གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་ཀླུ་མི་མགོན་དཀར་པོའི་སྒྲུབ་ཐབས། མི་འགྱུར་རྡོ་རྗེ།
གུ་རུ་དྷེ་ཝ་དྷཱ་ཀི་ནཱི་ཧཱུྃ༔ མི་མགོན་དཀར་པོའི་བསྒྲུབ་པ་ནི༔ དཀྱིལ་འཁོར་མེད་དེ་གཏོར་མ་བཅའ༔ རང་ཉིད་རྡོ་རྗེ་གཏུམ་པོར་བསྐྱེད༔ མདུན་དུ་མི་མགོན་དཀར་པོ་ནི༔ སྐུ་མདོག་དཀར་པོ་ཞལ་གཅིག་པ༔ ཕྱག་གཉིས་བུམ་པ་སྦྲུལ་མགོ་བདུན༔ སྦྲུལ་མཇུག་འཁྱིལ་ཞིང་རིན་ཆེན་བརྒྱན༔ རང་རང་གནས་ནས་སྤྱན་དྲངས་བསྟིམ༔ ཨོཾ་ནཱ་ག་རཱ་ཙ་ཨ་ཏི་ཧཱུྃ༔ དེ་ཡིས་མི་མགོན་དཀར་པོ་འགྲུབ༔ ས་མ་ཡ༔ རྒྱ་རྒྱ་རྒྱ༔ དེ་ནས་དེ་ཡི་ལས་ཚོགས་ནི༔ དང་པོ་ཆར་པ་འབེབ་པ་སྟེ༔ སྔགས་འདི་མང་དུ་བཟླས་པས་ཆོག༔ ཨོཾ་ནཱ་ག་རཱ་ཙ་ཨ་ཏི་བྷ་རི་ཤ་ཡ་ཕོབ༔ ས་མ་ཡ༔ རྒྱ་རྒྱ་རྒྱ༔ དེ་ནས་སད་བཀག་རིམ་པ་ནི༔ སྔགས་འདི་མང་དུ་བཟླས་པས་ཆོག༔ ཨོཾ་ནཱ་ག་རཱ་ཙ་ཨ་ཏི་ཨུ་ལ་མི་ཏི་སྭཱ་ཧཱ༔ ས་མ་ཡ༔ རྒྱ་རྒྱ་རྒྱ༔ དེ་ནས་ནོར་བསྒྲུབ་རིམ་པ་ནི༔ སྔགས་འདི་མང་བཟླས་ཀླུ་ཡི་ནི༔ དངོས་གྲུབ་སྟེར་བར་བསམ་པས་ཆོག༔ ཨོཾ་ནཱ་ག་རཱ་ཙ་ཨ་ཏི་སརྦ་སིདྡྷི་ཧཱུྃ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ འདིའི་ཞལ་གདམས་ནི། ས་བོན་ཕུཿལ་སྔགས་ཀྱིས་བསྐོར་བའོ༔ ལས་ཚོགས་གང་བྱེད་ཀྱང་གཏོར་མ་དང་བཀའ་བསྒོ་བྱ༔ ཆར་འབོད་སད་བཀག་ལ་ཀླུ་སྨན་སྔགས་ལ་ཆུའམ་མཚོ་ལ་སྦ༔ སྒྲུབ་པའི་གྲངས་དང་སྔགས་གྲངས་མེད༔ རྟགས་ནི་ཀླུ་སྒྲུབ་སྤྱི་དང་འདྲ་འོ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔
གུ་ཧྱ༔ ཞེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་བྱ་ལོ་ས་ག་ཟླ་བའི་ཉེར་གཅིག་ལ་ཀླུ་རྒྱལ་མི་མགོན་དཀར་པོ་ཉིད་ཀྱིས་དངོས་སུ་ཕུལ་ཏེ༔ སྐུ་སྨད་འོ་མའི་མཚོ་ལ་གནས་པ་སྟེང་དུ་སྤྲིན་གྱི་བླ་རེ་ཅན་ཕྱག་ཐལ་སྦྱར་བར་ན་བུམ་པ་བསྣམས་པ་ཤིན་ཏུ་ཞི་ཞིང་འཛུམ་པ་གཅིག་འདུག་གསུངས་སོ༔ ༔