རིན་ཆེན་གཏེར་མཛོད་ཆེན་མོ་སྤར་དུ་ཇི་ལྟར་བསྒྲུབས་པའི་ཚུལ་དཔག་བསམ་གསར་པའི་འཁྲི་ཤིང་། རྒྱལ་སྲས་འཇམ་དབྱངས་ཆོས་ཀྱི་ཉི་མ།
རིན་ཆེན་གཏེར་མཛོད་ཆེན་མོ་སྤར་དུ་ཇི་ལྟར་བསྒྲུབས་པའི་ཚུལ་དཔག་བསམ་གསར་པའི་འཁྲི་ཤིང་ཞེས་བྱ་བ་བཞུགས་སོ།
ན་མོ་གུ་རུ་དྷེ་བ་དྷཱ་ཀི་ནཱི་ཡེ། རྒྱལ་ཀུན་ཐུགས་རྗེའི་མཁའ་ལ་རབ་འབར་འགྲོ་བའི་མགོན་གཅིག་ཉི་མ་ནི། །རྩ་གསུམ་དཀོན་མཆོག་རྒྱ་མཚོའི་འོད་ཟེར་དཔག་ཡས་མཁའ་དང་མཉམ་པར་འཕྲོས། །ཐུབ་བསྟན་པད་ཚལ་རྒྱས་པར་བྱེད་ལ་སྟོན་པ་མཆོག་ཉིད་འདིར་ལྷགས་བཞིན། །དཔལ་ལྡན་བླ་མའི་ཞབས་ཀྱི་རྡུལ་ཕྲན་བྱང་ཆུབ་ཐོབ་ཀྱང་སྤྱི་བོར་མཆོད། །ལེགས་བྱས་མནྡཱ་རཿབས་བསྲུབས་པ་ལས། །ཀུན་ཕན་ཆོས་མཛོད་བསིལ་ཟེར་སྟོང་ཕྲག་གིས། །འཁོར་བའི་ཚ་གདུང་གཞིལ་བའི་སྨན་གཅིག་པུ། །ས་གསུམ་སྐྱེ་རྒུའི་དཔལ་དུ་ཤར་ལ་ལྟོས། །འདིར་དུས་གསུམ་གྱི་རྒྱལ་བ་མ་ལུས་པ་གཤེགས་ཤིང་རྗེས་སུ་གཤེགས་པའི་ལམ་པོ་ཆེ། རྩ་གསུམ་རྒྱལ་བ་རྒྱ་མཚོའི་གསང་ཆེན་ངེས་དོན་
མཐར་ཐུག་གི་དགོངས་པ་གཅིག་པུ་དཔའ་བོ་དང་མཁའ་འགྲོ་ཡོངས་ཀྱི་སྙིང་ཁྲག །རིག་འཛིན་གྲུབ་ཐོབ་རྒྱ་མཚོའི་སྙིང་ནོར། ཆོས་སྲུང་དམ་ཅན་ཡོངས་ཀྱི་སྲོག་སྙིང་། སྐལ་བཟང་གི་སྐྱེས་བུ་ཚེ་ལུས་གཅིག་གིས་འཇའ་ལུས་རྡོ་རྗེའི་སྐུར་སྨིན་པར་བྱེད་པ་འོད་གསལ་རྡོ་རྗེ་ཐེག་པའི་རྩེ་མོ་གསང་སྔགས་ནང་རྒྱུད་སྡེ་གསུམ་ལ། སྔ་འགྱུར་རང་ལུགས་ཀྱི་ཆོས་སྐད་དུ་རྒྱ་ཆེ་བ་བཀའ་མ། ཟབ་མོ་གཏེར་མ། སྙིང་པོ་དག་སྣང་གི་སྐོར་དང་གསུམ་དུ་བཞུགས་པ་ལས། སྐབས་འདིར་ཕྱི་མ་གཉིས་སྤར་དུ་ཇི་ལྟར་བསྒྲུབས་པའི་ཚུལ་མདོར་བསྡུས་བརྗོད་པ་ལ་གསུམ། བཀའ་བསྡུ་བའི་ཚུལ། སྡུད་པ་པོའི་ཆེ་བ། བསྡུས་ཟིན་སྤར་དུ་བསྒྲུབས་པའི་ཚུལ་ལོ། །དང་པོ་ནི། རྗེ་བཙུན་བླ་མ་ཉིད་
ཀྱིས་བརྒྱུད་ཡིག་དང་དཀར་ཆག་ལྷན་ཅིག་མཛད་པ་ལས་ཤེས་པར་བྱའོ། །གཉིས་པ་སྡུད་པ་པོའི་ཆེ་བ་ནི། ཚུལ་འདི་ནི་རྩ་གསུམ་དམ་ཅན་རྒྱ་མཚོའི་ཚོགས་དང་བཅས་བའི་གནང་བ་ཐོབ་ཅིང་། ནང་གི་གོ་འཕང་མཐོན་པོ་ལ་གནས་པ། བསྐལ་པ་རྒྱ་མཚོ་ནས་དེ་བཞིན་གཤེགས་པ་རྣམས་ཀྱི་དམ་པའི་ཆོས་མཛོད་ཆེན་པོ་བསྲུང་བའི་སྨོན་ལམ་གྱི་མཐའ་གྲུབ་པ་ཞིག་མ་གཏོགས་ཕལ་པ་རྣམས་ཀྱིས་བསམ་པར་ཡང་ནུས་དཀའ་ན་བསྡུ་བ་ལྟ་ཅི་སྨྲོས་ཏེ། ཐེག་པ་ཆེན་པོ་ཉན་རང་གི་ཡུལ་མ་ཡིན་པ་དང་། རྡོ་རྗེ་ཐེག་པ་ཉིད་རྒྱུ་མཚན་ཉིད་ཐེག་པའི་རང་ལམ་ལ་ཞུགས་པ་རྣམས་ཀྱི་ཡང་ཡུལ་མ་ཡིན་ན། ཐེག་པ་བླ་ན་མེད་པ་འདི་ལྟ་བུ་སོ་སྐྱེའི་ཡུལ་མིན་པར་ལུང་དང་རིགས་པས་གྲུབ་ཅིང་། གལ་ཏེ་འདི་ལྟ་བུ་ལ་འབད་པར་བྱའོ་བསམ་པ་ཙམ་ནུས་སུ་ཟིན་ཀྱང་། དབྱིངས་ན་གནས་པའི་དཔལ་བོ་དང་མཁའ་འགྲོ་རྣམས་ཀྱི་སྙིང་ཁྲག་གི་དྭངས་མ་ལྟ་བུ་ཡིན་པས་ཡེ་ཤེས་དང་འཇིག་རྟེན་པའི་ཆོས་སྲུང་རྒྱ་མཚོས་རྟག་ཏུ་དམ་པའི་ཆོས་མཛོད་ཆེན་པོ་འདི་བསྲུངས་པས་ལག་ཏུ་ལེན་པར་མི་ནུས་ཤིང་། བླངས་ཀྱང་བར་ཆད་དྲག་པོས་མྱུར་དུ་འཇོམས་པར་འགྱུར་ཏེ། སྔོན་གྱི་མཁས་གྲུབ་ཆོས་དང་ཡེ་ཤེས་ཀྱི་སྤྱན་དང་ལྡན་པ་མང་པོའང་གནང་བ་མ་ཐོབ་པར་རྡོ་རྗེ་ཐེག་པའི་སྔགས་རྒྱུད་དང་མན་ངག་བཀྲལ་བས་བར་ཆད་ཀྱི་དབང་དུ་སོང་བར་བཤད་ན་གཞན་ལ་ལྟ་ཅི་སྨྲོས་པའི་ཕྱིར་རོ། །དེ་ལྟ་བས་ན་སྔོན་དཔལ་ཆེན་པོ་ཧེ་རུ་ཀཿདང་། ཨོ་རྒྱན་ཆོས་ཀྱི་རྒྱལ་པོ་སོགས་དང་རྣམ་དབྱེར་མེད་
ཀྱང་ཚུར་མཐོང་ལ། ཇི་སྐད་དུ། འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པ་ང་། །ཞེས་སོགས་གསུངས་པ་ལྟར་གཙོ་འཁོར་གྱི་རྣམ་པར་སྣང་བས་ཟབ་གསང་རྡོ་རྗེ་ཐེག་པའི་ཆོས་སྒོ་རྒྱ་མཚོ་དབྱེ་བ་ན་སོ་སོའི་དུས་སུ་བཀའ་གཏད་ཅིང་སྨོན་ལམ་མཛད་པ་ཉིད། སྙིགས་མ་ལས་ཀྱང་སྙིགས་མའི་དུས་ཆོས་གཞན་གྱིས་དཀྲི་བར་མི་ནུས་པའི་སྐབས་འདིར་དུས་ལས་ཡོལ་བ་མེད་པའི་ཕྲིན་ལས་ཀྱི་ཚུལ་འདི་ལྟ་བུ་སྣང་བར་མཛད་པ་པོ་ནི་༧པདྨ་འོད་གསལ་མདོ་སྔགས་གླིང་པ་དང་། ༧འཆི་མེད་བསྟན་གཉིས་གཡུང་དྲུང་གླིང་པ་རྣམ་པ་གཉིས་ཏེ། དེ་ཡང་ཚུར་མཐོང་གི་བློ་ངོ་དང་སྦྱར་ནས་བོད་གངས་ཅན་ཙམ་ན་གྲགས་ཤིང་གྲུབ་པའི་ཟབ་གཏེར་གྱི་ཆོས་སྒོ་ཇི་སྙེད་པ་དེང་སང་རྒྱུན་བཞུགས་ངེས་རྣམས་རྟག་གུས་གྱིས་ཐུགས་བརྩོན་དྲག་པོས་གསན་བསམ་གྱིས་གཏན་ལ་ཕབ། དོན་ཉམས་བཞེས་ལ་སྦྱར་ཏེ་གྲུབ་པའི་གོ་འཕང་མཐོན་པོར་གཤེགས་པའི་ཚུལ་བསྟན། དོན་དམ་པར་རྩ་གསུམ་རབ་འབྱམས་རྒྱ་མཚོའི་སྣང་བ་དང་རྟག་ཏུ་འགྲོགས་ཤིང་བཀའ་བསྡུའི་གནང་བ་ཁྱད་པར་ཅན་བརྙེས། དཔལ་ཨོ་རྒྱན་ཆོས་ཀྱི་རྒྱལ་པོ་སོགས་རྩ་གསུམ་རྒྱ་མཚོས་ཕྲིན་ལས་དུས་སུ་བབས་པར་ལུང་བསྟན་པས། རྗེ་བླ་མ་རྣམ་གཉིས་བཀའ་བགྲོས་པའི་ཚུལ་གྱིས་ཟབ་གསང་གི་ཆོས་ཚུལ་རིན་པོ་ཆེ་ཇི་སྙེད་པ་ཆོས་མཛོད་གཅིག་ཏུ་བསྡུ་བར་མཛད་པ་ཡིན་ནོ། །ཚུལ་དེས་ན་ཉན་ཐོས་ཀྱི་ཐེག་པའི་སྐབས་སུ་
བཀའ་སྡུད་པ་པོ་འོད་སྲུངས་ལ་སོགས་པ་བཞིན་དུ་སྐབས་འདིའི་སྡུད་པ་པོ་ནི་རྗེ་བླ་མ་རྣམ་གཉིས་ཡིན་ལ། དེ་ལས་པདྨ་འོད་གསལ་མདོ་སྔགས་གླིང་པའམ་འཇམ་དབྱངས་མཁྱེན་བརྩེའི་དབང་པོའི་རྣམ་ཐར་ཕྱོགས་ཙམ་ནི་རྗེ་བླ་མས་མཛད་པའི་གཏེར་ཆེན་བརྒྱ་རྩའི་རྣམ་ཐར་ལས་ཤེས་པར་བྱ་ཞིང་། འདིར་འཆི་མེད་བསྟན་གཉིས་གཡུང་དྲུང་གླིང་པའམ་རྡོ་རྗེ་འཆང་ཀརྨ་ངག་དབང་ཡོན་ཏན་རྒྱ་མཚོའི་སྐུ་ཆེ་བའི་རྣམ་ཐར་ཅུང་ཟད་བརྗོད་པ་ལ་གཉིས། ཐུན་མོང་གི་རྣམ་ཐར་ཕྱོགས་རེ་བརྗོད་པ་དང་། ཐུན་མོང་མིན་པའི་རྣམ་ཐར་གྱི་ཕྱོགས་རེ་བརྗོད་པའོ། །དང་པོ་ནི། སྐྱེས་བུ་དམ་པ་རྣམས་ཀྱི་འཇུག་ཡུལ་ནི་སྡོམ་པ་གསུམ་གྱི་ཚུལ་ཁྲིམས་ཉམས་པ་མེད་པའི་སྟེང་དུ་ཐོས་བསམ་སྒོམ་གསུམ་གྱིས་རང་སྨིན་པར་བྱས་ནས་འཆད་རྩོད་རྩོམ་གསུམ་གྱིས་གཞན་སྨིན་པར་བྱེད་པ་ཙམ་ལ་ཐམས་ཅད་འདུས་སོ། །དེས་ན་རྗེ་བླ་མ་འདི་ནི་རྟེན་སུམ་ལྡན་རྡོ་རྗེ་འཛིན་པ་ཆེན་པོར་བཞུགས་ཤིང་། ཁྱད་པར་དུ་རྡོ་རྗེ་ཐེག་པའི་ལམ་གྱི་མངོན་རྟོགས་ཁྱད་པར་ཅན་སྐུ་ཆུང་ངུའི་དུས་ནས་བརྙེས་ཏེ་འཕགས་ཡུལ་གྱི་ནག་པོ་སྤྱོད་པ་ལ་སོགས་པ་དང་མཉམ་པའི་གསང་བ་གྲུབ་ཅིང་། དཔལ་ཧེ་རུ་ཀའི་ཆས་ཀྱིས་སྤྱོད་པ་ལ་རྒྱུ་བའི་དུས་སུ་སོན་པ་ཙམ་དུ་ངེས་ཀྱང་། དཔལ་ལྡན་ཇོ་བོ་རྗེ་ཇི་ལྟ་བ་བཞིན་དགག་དགོས་བརྩི་བའི་སྒོ་ནས་དགག་བྱ་ཡོད་ཅིང་དགོས་པ་མེད་ན་སོ་ཐར་གྱི་ཉེས་བྱས་ཕྲ་མོ་ཙམ་ལས་ཀྱང་འདའ་བར་མི་མཛད་ལ། བཀའ་རྟགས་
ཕྱག་རྒྱ་བཞིས་ཐུགས་ལེགས་པར་དུལ་བས་ཇི་ཙམ་མཐོན་པོའི་གནས་བརྙེས་ཀྱང་ང་རྒྱལ་གྱི་དྲེགས་པ་མེད་པས་ཀུན་ལ་འདུད་པར་མཛད་པ་དང་། བྱང་ཆུབ་ཀྱི་སེམས་གཉིས་འབྱོངས་པས་འགྲོ་བ་སྤྱི་དང་ཁྱད་པར་སྡུག་བསྔལ་གྱིས་ཉེན་པ་རྣམས་གཟིགས་པའམ་གསན་པ་ཙམ་གྱིས་ཞལ་མདོག་འགྱུར་བའི་ཐུགས་རྗེ་སྐྱེ་ཞིང་། དམན་པ་ཁྱི་སྤྲང་ལྟ་བུ་ལའང་གསོལ་ལྷག་ཚུན་ཆད་ཀྱི་བགོ་བཤའ་ཕྱག་ནས་གཏོང་བས་རྟག་ཏུ་ཕན་གདགས་པ་དང་། ཁྱད་པར་བློ་སྦྱོང་ཁོ་ན་ཐུགས་དམ་དུ་མཛད་པས་གནོད་ལན་དུ་ཕན་འདོགས་པ་དང་། འཁོར་གྱི་ལོག་སྒྲུབ་དང་སྐུར་འདེབས་སོགས་གནོད་པའི་ལས་ཇི་ལྟར་ཆེ་ཡང་བཟོད་པ་རི་ལྟར་མི་གཡོ་བ་ཡིན་ལ། སྣང་སྲིད་དག་པ་རབ་འབྱམས་ཀྱི་དཀྱིལ་འཁོར་ཆེན་པོར་ཤར་བས་རྡོ་རྗེ་ཐེག་པའི་དམ་ཚིག་ལས་འདའ་བའི་སྐབས་མེད་དེ། ཞལ་ནས་སྒོ་གསུམ་ཁྱེར་སོ་གསུམ་དང་མི་འབྲལ་ཙམ་བྱས་ཞེས་གསུངས་པ་ཡང་ཡང་ཐོས་པའི་ཕྱིར་རོ། །འོན་ཀྱང་ཚུར་མཐོང་གི་ངོར་ཡང་རྩ་ལྟུང་ལྟ་ཅི་སྦོམ་པོ་དང་ཉེས་བྱས་སོགས་ལས་ཀྱང་ཐུགས་རྟག་ཏུ་བསྲུངས་ཤིང་། གལ་ཏེ་ཕྲ་མོ་བྱུང་ཡང་རྡོ་རྗེ་ཐེག་པའི་འདུལ་བ་བཞིན་ཕྱིར་བཅོས་དང་བཤགས་པའི་སྒོ་ནས་སོར་ཆུད་པར་མཛད་པ་སྟེ། དོན་དུ་སྡོམ་པ་གསུམ་གྱི་གནང་བཀག་ཇི་ལྟ་བ་བཞིན་ལ་གནས་ཤིང་གཞན་ལའང་སྐུལ་མ་མཛད་པས་སུམ་ལྡན་རྡོ་རྗེ་འཛིན་པ་ཐམས་ཅད་ཀྱི་དཔེར་འོས་པ་འདི་ལྟར་ལགས་སོ། །ཐོས་པ་མཛད་པའི་སྐབས་སུ་དགེ་བའི་
བཤེས་གཉེན་བརྒྱ་ཕྲག་ཕྱེད་ལྷག་པ་བསྟེན་ནས། ཐུན་མོང་རིག་ལམ་བཟོ་གསོ་སྒྲ་ཚད་ནང་རིག་པ་སྟེ་རིག་པའི་གནས་ཆེ་བ་ལྔ་དང་། སྙན་ངག་སོགས་ཆུང་བ་ལྔ་སྟེ་རིག་པའི་གནས་བཅུ་ཀ་མཐར་ཕྱིན་པ་སྦྱངས་པར་མཛད་པ་ཡིན་ལ། དེ་དག་ཀྱང་གསན་པ་ཙམ་གྱིས་ཐུགས་སུ་ཆུད་ནུས་པའི་སྐྱེས་ཐོབ་ཀྱི་ཤེས་རབ་སྐུ་ཆུང་ངུའི་དུས་ནས་སད་པ་ཡིན་ཏེ། ཀ་ཁ་སོགས་ཞིབ་པར་མ་བསླབ་པའི་སྔོན་དུ་འཇམ་དབྱངས་དཀར་པོའི་སྒྲུབ་ཐབས་རང་སྟོབས་ཀྱིས་གསུངས་པ་དང་། བོད་ཀྱི་བརྡ་སྤྲོད་པ་སུམ་རྟགས་སོགས་མ་གསན་ན་ཡང་མཁྱེན་པ་ལྟར་གྱུར་མོད་ཀྱི། ཕྱི་རབས་ཀྱི་གང་ཟག་མཁས་པར་འདོད་ནས་དཀའ་ཚེགས་དང་ཡུན་རིང་གི་སྦྱང་རྩོལ་མི་ནུས་པ་རྣམས་དྲང་བའི་ཕྱིར་བརྡ་སྤྲོད་པ་ཙནྡྲ་པ་ཡན་ལག་དང་བཅས་པ་ཁོ་ནའང་ལོ་གསུམ་ལྷག་པར་སྦྱངས་པར་མཛད། དེ་བཞིན་དུ་རིག་པའི་གནས་གཞན་ལའང་རྟག་གུས་ཀྱི་བརྩོན་པ་མཛད་པས་གངས་ཅན་ཙམ་ན་འགྲན་ཟླ་དང་བྲལ་བའི་པིཎྜི་ཏ་ཆེན་པོར་གྱུར་ཅིང་། དེར་མ་ཟད་བཟོའི་ཕྱོགས་སུ་གཏོགས་པ་རང་ལུགས་དང་གཞན་ལུགས་ཀྱི་ཆོ་གའི་དབྱངས་གདངས། གར་ཐིག །རོལ་མོ་འབུད་དཀྲོལ་ལ་སོགས་པ་དགོན་སྡེ་རྣམས་ཀྱི་བྱང་འདྲེན་སོགས་ལ་མི་ཚེ་རིལ་པོར་སྦྱངས་པ་རྣམས་ལས་ཀྱང་བརྒྱ་སྟོང་གིས་ལྷག་པ་གསན་པའམ་གཟིགས་པ་ཙམ་གྱིས་ཐུགས་སུ་ཆུད་པ་དང་། ཐ་ན་རྒྱ་བོད་ཀྱི་ཡིག་རིགས་ཕྱག་བསྟར་མཛད་པ་ཙམ་ཡང་གངས་ཅན་མཐའ་དབུས་ན་གནས་
པའི་མཁས་པ་ཐམས་ཅད་ཀྱི་མིག་གི་བདུད་རྩིར་གྱུར་པ་སོགས་ནི་བརྗོད་དུ་མི་ལངས་ཏེ། མདོར་ན་རྗེ་ཐམས་ཅད་མཁྱེན་པ་འདི་ཉིད་ཀྱི་བཀའ་དྲིན་ཁོ་ན་ལས་དེང་དུས་རིག་གནས་སྨྲ་བ་ཅུང་ཟད་ཡོད་པ་འདི་བྱུང་བ་ཡིན་པར་ཤེས་པར་བྱའོ། །ནང་རིག་པ་ནི་བདེ་བར་གཤེགས་པའི་མདོ་སྔགས་ཀྱི་ཆོས་ཚུལ་དགོངས་འགྲེལ་དང་བཅས་པ་ཡིན་ལ། དེ་དག་ནི་རྒྱལ་བའི་བཀའ་འགྱུར་རིན་པོ་ཆེ་ཚར་གཉིས་དང་། རྙིང་མ་རྒྱུད་འབུམ་སོགས་བཀའི་ཕྱོགས་སུ་གཏོགས་པའི་བཀླག་ལུང་ཇི་སྙེད་ཡོད་པ་དང་། དགོངས་འགྲེལ་བསྟན་འགྱུར་རིན་པོ་ཆེའི་བཀླག་ལུང་གི་རྒྱུན་གང་བཞུགས། བོད་ཀྱི་བླ་མ་རྣམས་ཀྱི་བཀའ་འབུམ་ཕལ་མོ་ཆེ། གཞན་ཡང་སྨན་གཏོ་མདོས་ཆོག་སོགས་ཡན་ཆད་རྒྱུན་གང་བཞུགས་ཀྱི་ལུང་དང་ཕྱག་ལེན་མ་གསན་པ་མེད་པ་ལྟ་བུ་དང་། འཕགས་ཡུལ་ཤིང་རྟ་ཆེན་པོ་གཉིས་རྗེས་འབྲངས་དང་བཅས་པས་བཀྲལ་པའི་གཞུང་ལུགས་དབུ་ཕར་འདུལ་མཛོད་ཡན་ལག་དང་བཅས་པ་དང་། རྗེ་བཙུན་བྱམས་པ་མགོན་པོས་མཛད་པའི་བྱམས་ཆོས་སྡེ་ལྔ་སོགས་ཀྱི་གཞུང་བཤད། བོད་ཀྱི་བླ་མ་རྣམས་ཀྱི་བསྟན་བཅོས། བུ་དོལ་ཏཱ་ར་ནཱ་ཐ་རྗེ་ས་སྐྱ་པ་ཡབ་སྲས་རོང་ཀློང་སྨིན་གླིང་སྐུ་མཆེད་ལ་སོགས་པས་མཛད་པ་ཕལ་མོ་ཆེ་དང་། ཁྱད་པར་དུ་བཀའ་བརྒྱུད་རང་ལུགས་ཀྱི་རྗེ་རང་བྱུང་ཞབས་ཀྱིས་མཛད་པའི་བསྟན་བཅོས་ལ་སོགས་པ་རྒྱུན་གང་བཞུགས། རྡོ་རྗེ་ཐེག་པ་གསར་ཕྱོགས་སུ་བྱུང་བའི་
དུས་ཀྱི་འཁོར་ལོ། བདེ་གསང་འཇིགས་གསུམ་སོགས་དང་། ཀྱེ་རྡོ་རྗེ་རྔོག་ལུགས་དང་ས་ལུགས་ཀྱི་རྒྱུད་བཤད། སྔ་འགྱུར་གྱི་སྒྱུ་འཕྲུལ་གསང་བ་སྙིང་པོ་ལ་སོགས་པའི་རྒྱུད་བཤད། དེ་དག་གི་དགོངས་འགྲེལ་བསྟན་བཅོས་རྣམས་དང་བཅས་པའི་བཤད་པ་ཡོད་དོ་ཅོག་ཐམས་ཅད་གསན་ཅིང་སྦྱང་བརྩོན་གྱི་སྒོ་ནས་ཤིན་ཏུ་མཐར་ཕྱིན་པར་མཛད་པ་དང་། བསམ་པས་དེ་དག་གི་དགོངས་པ་དཔྱིས་ཕྱིན་པར་ལོན་པས་མཁས་པ་ལས་ཀྱང་མཁས་པར་གྱུར་པ་སྟེ། དོན་དུ་བོད་ཡུལ་བཤད་རྒྱུན་འདེགས་པའི་ཀ་ཆེན་བཅུ་ཞེས་གྲགས་པ་རྗེས་འབྲངས་དང་བཅས་པའི་ལེགས་བཤད་ཀྱི་ཆུ་ཀླུང་ཐམས་ཅད་འདུས་པའི་རྒྱ་མཚོ་ཆེན་པོར་གྱུར་པ་ཡིན་ནོ། །སྒྲུབ་བརྒྱུད་ཀྱི་ཤིང་རྟ་སྔ་འགྱུར་བཀའ་མ་དང་གཏེར་མ་ཡོད་དོ་ཅོག །ཇོ་བོ་རྗེ་དཔལ་ལྡན་ཨ་ཏི་ཤ་རྗེས་འབྲངས་དང་བཅས་པའི་རིང་ལུགས་བཀའ་གདམས་གཞུང་གདམས་མན་ངག་བཅས། འཇམ་མགོན་ས་སྐྱ་པ་ཆེན་པོའི་གདམས་ངག་ལམ་འབྲས་བུ་དང་བཅས་པ་ཡན་ལག་བཅས། མངའ་བདག་མར་པ་ལོ་ཙཱ་བའི་བཀའ་བརྒྱུད་ལས་རྗེ་དུས་གསུམ་མཁྱེན་པའི་བཀའ་བརྒྱུད་ལའང་ཕྱིས་སུ་ཀཾ་ཚང་ཟུར་མང་གནས་མདོ་གསུམ་དུ་གྱེས་པའི་གཞུང་གདམས་མན་ངག་བཅས་དང་། དཔལ་ལྡན་ཕག་མོ་གྲུ་པའི་བཀའ་བརྒྱུད་ཡ་བཞི་ཟུང་བརྒྱད་དུ་གྲགས་པ་དང་། གཞན་ཡང་རས་ཆུང་དང་ངན་རྫོང་བཀའ་བརྒྱུད་ལ་སོགས་པ། མཁས་གྲུབ་ཁྱུང་པོ་རྣལ་འབྱོར་གྱིས་འཕགས་ཡུལ་
གྱི་གྲུབ་ཐོབ་ཕལ་མོ་ཆེའི་དགོངས་བཅུད་དྲིལ་བ་དཔལ་ལྡན་ཤངས་པ་བཀའ་བརྒྱུད་དེ། བཀའ་བརྒྱུད་འདི་ནི་སྔར་གྲུབ་ཐོབ་བརྒྱུད་པ་ནས་བརྒྱུད་པར་སོང་ཞིང་མིང་གི་གཡེར་བག་རང་མི་ཆེ་ཡང་དོན་གྱི་ངེས་པར་གྲུབ་མཐའ་སྙོགས་པ་ཤ་སྟག་བྱུང་ཞིང་། གྲུབ་མཐའ་ཕལ་མོ་ཆེར་ཁྱབ་ཀྱང་ཕྱིས་སུ་དོན་བརྒྱུད་དང་ཚིག་བརྒྱུད་ཀྱང་ནམ་མཁའི་པདྨ་བཞིན་དུ་གྱུར་པར་ཉེ་བ་ན། སྨིན་གྲོལ་གདམས་ངག་དང་བཅས་པ་དཀའ་ཚེགས་ཆེན་པོས་གསན་ཅིང་ལྷག་པར་ཐུགས་ཉམས་སུ་བཞེས་ནས། ཡང་ཁྲོད་བདེ་ཆེན་འོད་གསལ་གླིང་དུ་སྒྲུབ་པ་བཅུ་ཕྲག་ལྷག་པ་ཇི་སྲིད་དུ་གནས་པའི་འཚོ་ཆས་འཇོག་པ་སོགས་ཁྱུང་པོ་རྣལ་འབྱོར་དངོས་སུ་སླར་བྱོན་པ་ལྟ་བུའི་ཕྲིན་ལས་མཛད་པ་འདི་ལྟར་ན། ཚར་ཚའི་གྲུབ་ཆེན་བློ་གྲོས་ནས། འབྱོར་རྒྱས་ཞེས་པ་སློབ་གཉེར་མེད་པ་ཞིག་དབོན་སྟོན་སྐྱེར་སྒང་པའི་རྣམ་འཕྲུལ་དུ་གཟིགས་ནས་ཤངས་ལུགས་ཀྱི་དབང་ལུང་ནན་ཏན་དུ་གནང་བས། བདག་གིས་ཉམས་ལེན་ནི་བླ་མའི་གདམས་ངག་ཆུད་མ་ཟོས་པར་བྱེད། དབང་ལུང་སོགས་ཉམས་ལེན་ལ་མཁོ་བ་ཙམ་ནི་ཐུགས་ལ་བཏགས། གཞན་ཡོངས་རྫོགས་འདི་བདག་ལ་སློབ་གཉེར་མེད་པས་དབང་ལུང་གི་རྒྱུན་ནི་སྤེལ་མི་ནུས་པས་རྗེ་བླ་མ་སྐུ་བསྙེལ་བའི་རྒྱུ་ཙམ་དུ་ཟད་ཅེས་ཞུས་པ་ན། ཁྱོད་ལ་རྨོག་ལྕོགས་པའི་སྤྲུལ་པ་ཞིག་གིས་དབང་སོགས་འདི་ལྟར་འཆད་དགོས་ཞེས་སློབ་པ་འབྱུང་། དེ་ལ་བསྟན་
པས་དེས་ཁྱུང་པོ་རྣལ་འབྱོར་གྱི་སྤྲུལ་པ་ཞིག་གིས་བསྟན་པ་འདིའི་མེ་རོ་སློང་བར་བྱེད་ཅེས་ལུང་བསྟན་ནོ་ཞེས་ཐོས་ཏེ། འབྱོར་རྒྱས་ཀྱི་མདུན་དུ་བླ་མ་ནོར་བུ་བྱོན་ནས་དབང་བསྐུར་གྱི་ཕྱག་ལེན་སོགས་ཡར་ཕུལ་ནས་ཞུས། དེས་རྗེ་བླ་མ་ལ་གནང་བས་དེ་ཁོ་ན་ལྟར་གྱུར་པར་བདག་གིས་སེམས་སོ། །འཕགས་ཡུལ་གྱི་གྲུབ་ཆེན་དམ་པ་སངས་རྒྱས་ཀྱི་རིང་ལུགས་དམ་ཆོས་སྡུག་བསྔལ་ཞི་བྱེད། དེ་དང་རྗེས་སུ་འབྲེལ་བའི་ཟབ་དོན་གཅོད་ཡུལ་གྱི་སྐོར། དཔལ་དུས་ཀྱི་འཁོར་ལོའི་དབང་དང་རྒྱུད་བཤད་བུ་དོལ་གཉིས་ཀའི་ལུགས། སྦྱོར་བ་ཡན་ལག་དྲུག་པ་ཡན་ལག་དང་བཅས་པ། བདེ་མཆོག་རབ་འབྱམས། གཤིན་རྗེ་རབ་འབྱམས། དཔལ་མཁའ་འགྲོ་རྒྱ་མཚོ། སྒྲོལ་མ་རྣལ་འབྱོར་མ་སོགས་ཇོ་ནང་པའི་རྒྱུད་སྡེ་རབ་འབྱམས། གྲུབ་ཆེན་ཨོ་རྒྱན་པས་ཨོ་རྒྱན་གྱི་ཡུལ་ནས་རྡོ་རྗེ་ཕག་མོ་ལས་དངོས་སུ་བླངས་པའི་རྡོ་རྗེ་གསུམ་གྱི་བསྙེན་སྒྲུབ་སྟེ། དེ་ལྟར་ན་སྒྲུབ་བརྒྱུད་ཀྱི་ཤིང་རྟ་ཆེན་པོ་དེ་དག་གི་གཞུང་གདམས་ངག་དང་བཅས་པ། དབང་གྲོལ་བྱེད་དང་བཅས་པ། དཀྱིལ་ཆོག་ཕྱག་ལེན་དང་བཅས་པ། མན་ངག་ཁ་འཐོར་དང་བཅས་པ་མཐའ་དག་གསན་ནས་ཐུགས་ཉམས་སུ་བཞེས་ཤིང་གཞན་ལ་སྤེལ་བ་དང་བསྟན་བཅོས་མཛད་པ་སོགས་མཐའ་ཡས་སོ། །དེས་ན་བོད་ཡུལ་གནས་པའི་གྲུབ་མཐའ་ཕལ་མོ་ཆེ་གསན་པ་ཡིན་པས་སྔར་གྱི་བླ་མ་གསན་རྒྱ་ཤིན་ཏུ་ཆེ་བར་གྲགས་པ་རྣམས་ཀྱིས་ཀྱང་ཕྱོགས་ལ་མི་ཉེ་བས་གསན་ཡིག་རྒྱས་
སྤྲོས་སུ་བྱས་ན་གླེགས་བམ་བཞི་ལྔ་ཙམ་འོངས་ངེས་སུ་སྣང་ངོ་། །དེ་ལྟར་གསན་པ་དེ་དག་ཀྱང་གསན་ཙམ་དུ་བཞག་པ་མ་ཡིན་པར་དོན་དཔྱིས་ཕྱིན་པར་མ་ངེས་ཀྱི་བར་དུ་བསམ་པས་གཏན་ལ་ཕབ་པ་ཡིན་ཏེ། རྒྱུད་དང་གཞུང་གི་སྐབས་སུ་རང་རང་གི་བསྟན་བྱའི་དོན། མན་ངག་ཉམས་ཁྲིད་ཀྱི་སྐབས་སུ་སྐབས་དེ་དག་ཏུ་བསྒོམ་པར་བྱ་བ། ཆོ་ག་ཕྱག་ལེན་གྱི་སྐབས་སུ་རྒྱུད་གཞུང་དང་མཐུན་མི་མཐུན་གྱི་གནད་དེ་དག་ངེས་པ་གཏིང་ཚུགས་མ་སྐྱེས་ཀྱི་བར་དུ་དཔེ་ཆ་གཟིགས་རྟོག་མཛད་པ་ཡིན་ཏེ། སྔར་སྐུ་གཞོན་པའི་དུས་སུ་དེ་ལྟར་མཛད་པ་སྨྲོས་ཅི་དགོས་ད་ལྟ་སྐུ་ན་ཤིན་ཏུ་སྨིན་པའི་གནས་སྐབས་སུ་ཡང་དལ་ཁོམ་ནམ་ཡོད་ལ་ཕྱག་དཔེ་གཟིགས་པ་ཕལ་ཆེར་དུ་མཐོང་བའི་ཕྱིར་རོ།། སྒོམ་པ་ཉམས་བཞེས་ནི་དོན་དམ་པར་འཕགས་ཆེན་གྱི་སར་བཞུགས་པས་ཟབ་མོའི་དོན་རྟོགས་སམ་མ་རྟོགས་ཀྱི་དཔྱད་པ་མི་འཇུག་ཀྱང་། ཚུར་མཐོང་དུ་དབང་རྣོན་ཅིག་ཅར་བའི་གང་ཟག་ཡིན་པས་སྐུ་ཆུང་ངུའི་དུས་ཟེ་ཆེན་དུ་བཞུགས་ཚེ་མགོན་བླ་བླ་མ་ཞིག་ལ་བསྟེན་ནས་གནས་ལུགས་ལྷན་ཅིག་སྐྱེས་པ་ཕྱག་རྒྱ་ཆེན་པོའི་རང་ངོ་འཕྲོད་ཀྱང་། ཕྱིས་སུ་ཁྱད་པར་བྱམས་མགོན་ཏཱའི་སི་ཏུ་པདྨ་ཉིན་བྱེད་དབང་པོ་ལ་བསྟེན་ནས་གནས་ལུགས་ལྷན་ཅིག་སྐྱེས་པའི་ཡེ་ཤེས་པྲ་ཕབ་པའི་སྣང་བརྙན་ལྟར་མངོན་དུ་གྱུར་ཏེ་ངེས་པ་དོན་གྱི་རྩ་བའི་བླ་མར་གྱུར་པ་དང་། དེས་ཀྱང་ཟུང་འཇུག་དོན་གྱི་བརྒྱུད་པའི་བསྟན་པ་གཏད་དེ་རྒྱལ་ཚབ་ཀྱི་ས་ལ་མངོན་པར་དབང་བསྐུར། དཔལ་
སྤུངས་སྒྲུབ་ཁང་ཆེན་མོར་ལོ་གསུམ་ཕྱོགས་གསུམ་གྱི་ནང་དུ་དགྱེས་རྡོར། ཕག་མོ། བདེ་མཆོག་ལ་སོགས་པ་སྒྲུབ་བརྒྱུད་ཀྱི་དཀྱིལ་འཁོར་རྣམས་ཀྱི་བསྐྱེད་རིམ་ལ་བརྟན་པ་ཐོབ་པའི་ངང་ནས་བསྙེན་པ་དང་རྫོགས་རིམ་དཔལ་ནཱ་རོ་པའི་ཆོས་དྲུག །ཁྱད་པར་དུ་རྗེ་བྲམ་ཟེ་ཆེན་པོའི་དོ་ཧ་རྣམས་ཀྱི་དགོངས་དོན་ཕྱག་རྒྱ་ཆེན་པོ་ཞེས་བྱ་བ་སེམས་གཉུག་མའི་གནས་ལུགས་ཀྱི་སྟེང་དུ་བཟོ་བཅོས་དང་བྲལ་བར་བཞག་པས་སྐད་ཅིག་གཅིག་གིས་བྱེ་བྲག་འབྱེད་པའི་ཟབ་ཆོས་འགྲན་ཟླ་དང་བྲལ་བ་རྣམས་ཀྱི་ཉམས་བཞེས་གནད་དུ་ཕྱིན་ངེས་པར་མཛད། དེ་རྗེས་སྐུ་ཆས་ཆེ་ཕྲ་གང་ཡོད་སྤོང་དག་མཛད་ནས་སྐུ་གསུང་ཐུགས་རྟེན་བཞེངས། ཡང་ཁྲོད་བདེ་ཆེན་འོད་གསལ་གླིང་དུ་ཕེབས་ཏེ་སྒྲུབ་གནས་སུ་མཛད་ནས་འཚོ་ཆས་ཐབས་མི་ཆག་ཙམ་ལ་བརྟེན་ཏེ་དགུང་གྲངས་སུམ་ཅུ་སྐོར་ནས་ལྔ་བཅུ་བརྒལ་བའི་བར་དུ་གཙོ་ཆེར་སྒྲུབ་པ་སྙིང་པོར་མཛད་དེ། དཔལ་ཨོ་རྒྱན་ཆོས་ཀྱི་རྒྱལ་པོའི་ཟབ་གཏེར་ཡང་ཟབ་དཀོན་མཆོག་སྤྱི་འདུས་ཀྱི་བསྙེན་སྒྲུབ་དྲོད་རྟགས་ཐོན་པར་མཛད་པའི་སྟེང་དུ། སྒྲུབ་བརྒྱུད་ཤིང་རྟ་བརྒྱད་ཀྱི་མན་ངག་ལས་བྱུང་བའི་དཀྱིལ་འཁོར་གྱི་ལྷ་སོ་སོའི་བསྙེན་སྒྲུབ་ལས་ཚོགས་དང་བཅས་པ་དང་། ཁྱད་པར་དཔལ་ལྡན་ཤངས་པ་བཀའ་བརྒྱུད་ཀྱི་ཐབས་ལམ་ནི་གུའི་ཆོས་དྲུག །གྲོལ་ལམ་ཕྱག་རྒྱ་ཆེན་པོ་སོགས་དྲོད་རྟགས་ཐོན་པར་མཛད་པ་ཡིན་ལ། སྤྱིར་སྒོམ་པ་ཉམས་ལེན་གྱི་གནད་དང་ནམ་ཡང་འབྲལ་མ་མྱོང་བ་ཡིན་པར་གྲུབ་སྟེ། གསུང་
མགུར་རྣམས་ལ་བརྟགས་པས་ཤེས་ཤིང་། འཆད་པའི་སྐབས་ལ་ཏཱའི་སི་ཏུ་པདྨ་ཀུན་བཟང་ཆོས་ཀྱི་རྒྱལ་པོ་གཙོས་པའི་འདུས་པ་བཟང་ལ་མང་བར་རྒྱལ་བའི་བཀའ་འགྱུར་རིན་པོ་ཆེའི་བཀླག་ལུང་། དུས་གསུམ་ན་འགྲན་ཟླ་དང་བྲལ་བ་འཇམ་མགོན་བླ་མ་མཁྱེན་བརྩེའི་དབང་པོ་གཙོས་མཆོག་གི་འདུས་པ་རྣམས་ལ་གསང་སྔགས་རྙིང་མའི་རྒྱུད་འབུམ་གྱི་བཀླག་ལུང་གསུངས་པ་གཉིས་ནི་གཙོ་བོ་ཡིན་ལ། རྒྱལ་དབང་བཅོ་ལྔ་པ་ཀུན་བཟང་མཁའ་ཁྱབ་རྡོ་རྗེ་ལ་སོགས་པ་བཀའ་བརྒྱུད་ཀྱི་རྒྱལ་བ་ཡབ་སྲས་གཙོས། ཕྱོགས་མེད་རིས་མེད་ཀྱི་སྐྱེས་ཆེན་དམ་པ་རྣམས་ལ་རིན་ཆེན་གཏེར་མཛོད་ཆེན་མོའི་དབང་ལུང་ཁྲིད་དང་བཅས་པ་ལན་ལྔ། གདམས་ངག་མཛོད་ཀྱི་དབང་ལུང་ཁྲིད་བཅས་ལན་གསུམ། བཀའ་བརྒྱུད་སྔགས་མཛོད་ཆེན་པོའི་དབང་ལུང་ཁྲིད་དང་བཅས་ལན་བདུན། གཞན་ཡང་དཔལ་དུས་ཀྱི་འཁོར་ལོ་ལ་སོགས་པ་གསར་རྙིང་གི་དཀྱིལ་འཁོར་གྱི་ལྷ་རྣམས་ཀྱི་དབང་ལུང་ཁྲིད་སོགས་ཐོར་བུ་གནང་བ་རྣམས་ནི་སྨྲོས་ཀྱིས་མི་ལངས་ལ། ཀུན་མཁྱེན་ཀློང་ཆེན་པའི་མཛོད་བདུན་ངལ་གསོ་སྐོར་གསུམ་དང་བཅས་པ་རྩ་འགྲེལ། ཇོ་ནང་རྗེ་བཙུན་ཆེན་པོ་ཏཱ་ར་ནཱ་ཐའི་བཀའ་འབུམ་སོགས་བླ་མ་རྣམས་ཀྱི་གསུང་རབ་བསྟན་བཅོས་ལ་དེང་སང་བཀའ་འབུམ་དུ་གྲགས་པ་དང་། མངའ་བདག་ཉང་རིན་པོ་ཆེའི་ཟབ་གཏེར་བཀའ་བརྒྱད་བདེ་གཤེགས་འདུས་པ་པོད་དགུ་གཙོས་གཏེར་སྟོན་རིམ་བྱོན་གྱི་གཏེར་གཞུང་རྒྱུན་གང་
བཞུགས་རྣམས་ཕལ་ཆེར་ཚར་ཁ་ཤས་དང་ཐ་ན་ཚར་རེ་མ་གནང་བ་མེད་ཅིང་། ཟབ་མོ་ནང་དོན་ལ་སོགས་པ་གཞུང་ལུགས་ཆེན་པོ་བཤད་རྒྱུན་ཡོད་ངེས་རྣམས་ཀྱི་བཤད་པ་ལན་གྲངས། བརྡ་སྤྲོད་པ་ཀ་ཙཱན་དབྱངས་གསུམ། བོད་ཀྱི་བརྡ་དག་སྟོན་པ་སུམ་རྟགས། སྙན་ངག །རྩིས་དཀར་ནག །སྨན་གཞུང་རྣམས་དང་། སྡེབ་སྦྱོར་སོགས་རིག་གནས་ཕྲ་མོ་འཆད་པ་རྣམས་ནི་མཐའ་ཡས་སོ། །རྩོད་པ་ནི། ཕྱོགས་འདིར་མཚན་ཉིད་ཀྱི་གྲྭ་ས་ཆེར་མེད་ཅིང་། དཔལ་ལྡན་ཕྱོགས་ཀྱི་གླང་པོ་ཡབ་སྲས་ཀྱི་གཞུང་ལུགས་དངོས་སྟོབས་ཀྱི་རིགས་པའི་ལམ་ནས་ཚུལ་བཞིན་མི་རྩོད་པར། ཚིག་འཁྲིའི་རྩོད་པ་ཙམ་ལ་མི་ཚེ་བསྐྱལ་བ་ནི་གཞུང་ལུགས་ཆེན་པོ་རྣམས་ཀྱི་རྣམ་གཞག་འཁྲུགས་པའི་རྒྱུ་ལས་སྙིང་པོ་ཆེར་མེད་པས་རྗེ་འདིས་དངོས་སུ་རྩོད་པ་མཛད་ཚུལ་ཆེར་མ་ཐོས་མོད་ཀྱི། དངོས་སྟོབས་ཀྱི་རིགས་པ་སྟོབས་སུ་ཞུགས་པས་མཁས་པ་ལས་ཀྱང་མཁས་པ་ཇི་ལྟ་བུ་ཞིག་སྐུ་མདུན་དུ་བྱུང་ཡང་རྗེ་འདི་ནི་རི་རྒྱལ་ལྟར་བློ་གྲོས་ཇེ་མཐོར་འགྲོ་ཞིང་། གཞན་དག་གི་སྤོབས་པ་ཇེ་རྟུལ་དུ་འགྲོ་བར་མཐོང་བས་རིགས་པའི་རྣམ་དཔྱོད་ལ་འགྲན་ཟླ་མེད་པར་ངེས་སོ། །རྩོམ་པ་ནི། གཙོ་བོ་གང་ཟག་གཞན་དང་ཐུན་མོང་མ་ཡིན་པ་རྗེ་ཉིད་ལ་བཀའ་བབས་སུ་གྱུར་པའི་མཛོད་ཆེན་ལྔ་རྗེས་འབྲངས་དང་བཅས་པ་སྟེ། དེའང་གཞི་ལམ་འབྲས་བུའི་བར་གྱི་ཤེས་བྱ་མཐའ་དག་ལ་ཁྱབ་ཅིང་གསལ་བར་སྟོན་པའི་གཞུང་སྐབས་
བཅུ་ལ་རྐང་པ་རེ་བཞི་ཡོད་པ་རྩ་བ་འགྲེལ་པ་དང་བཅས་པ་ཐུན་མོང་ཤེས་བྱའི་མཛོད། མངའ་བདག་མར་པ་ལོ་ཙཱ་ནས་བརྒྱུད་པའི་བདེ་དགྱེས་གསང་གསུམ་གཙོས་བླ་མེད་ཀྱི་རྒྱུད་སྡེ་ཟབ་ཅིང་གཉན་ལ་ཆེས་དཀོན་པ་རྣམས་ཀྱི་སྨིན་གྲོལ་དང་ལྷག་པའི་ལྷ་འགའ་ཞིག་གི་རྗེས་གནང་སྐོར་ཕྱོགས་གཅིག་བསྡུས་པ། ཕྱོགས་དེར་གཏོགས་པའི་ནང་བརྟགས་རྒྱུད་གསུམ་གྱི་འགྲེལ་བ་སོགས་བཀའ་བརྒྱུད་སྔགས་མཛོད་ཆེན་མོ། རྙིང་མ་བཀའ་མའི་གྲས་ཡང་དག་དང་ཕུར་པ་འཁོན་ལུགས། ཡང་དག་སོ་ལུགས་ཀྱི་སྒྲུབ་ཁོག་དང་བསྙེན་ཡིག །གཤིན་རྗེ་གདོང་དྲུག་སྒྲུབ་དཀྱིལ་དབང་ཆོག །རྣམ་འཇོམས་ཁྲོ་དཀར་ནག་སོགས་ཀྱང་བཀའ་མཛོད་འདིར་གཏོགས་པ་དང་། གཏེར་སྟོན་སངས་རྒྱས་བླ་མ། རྒྱ་ལོ་ཙཱ། རྡོར་འབུམ་ཆོས་ཀྱི་གྲགས་པ་ནས་བཟུང་། མཆོག་གི་སྤྲུལ་སྐུ་གསུམ། གླིང་པ་བཅུ་གཉིས་གཙོ་བོར་གྱུར་པའི་གཏེར་ཆེན་གཏེར་ཕྲན། དེང་སང་བྱོན་པའི་པདྨ་འོད་གསལ་མདོ་སྔགས་གླིང་པ་དང་། མཆོག་གྱུར་བདེ་ཆེན་གླིང་པའི་བར་གཏེར་སྟོན་ཉིས་བརྒྱར་ཉེ་བའི་སྨིན་གྲོལ་གདམས་ཕྲན་རིགས་ཕྱོགས་གཅིག་ཏུ་བསྡུས་པ་རིན་ཆེན་གཏེར་གྱི་མཛོད། སྔ་འགྱུར་རྙིང་མ། བཀའ་གདམས་གསར་རྙིང་། ལམ་འབྲས་བུ་དང་བཅས་པ། བཀའ་བརྒྱུད་ཆེ་བཞི་ཆུང་བརྒྱད། ཤངས་པ་བཀའ་བརྒྱུད། ཞི་བྱེད་དང་གཅོད་ཡུལ། རྡོ་རྗེ་རྣལ་འབྱོར་ཡན་ལག་དྲུག་པ། རྡོ་རྗེ་གསུམ་གྱི་བསྙེན་
སྒྲུབ་བཅས་སྒྲུབ་བརྒྱུད་ཤིང་རྟ་ཆེན་པོ་བརྒྱད། མི་ཏྲའི་གདམས་ཁྲིད་སོགས་ཁྲིད་ཕྲན་མང་པོའི་གཞུང་དང་དབང་གདམས་ངག་ཡོངས་སུ་རྫོགས་པ་ཕྱོགས་སུ་བསྡུས་པ་གདམས་ངག་རིན་པོ་ཆེའི་མཛོད། ཉིད་ཀྱི་ཟབ་གཏེར་རྣམ་གྲངས་མང་དུ་བཞུགས་པར་འདུག་ཀྱང་། དུས་ཚོད་སོགས་རྟེན་འབྲེལ་བབས་ཀྱིས་ཅུང་ཟད་རེ་ལས་གཏན་ལ་ཕབ་མ་ཐུབ། ད་ལྟ་མངོན་གྱུར་རྩ་གསུམ་དགོངས་འདུས་མཛོད་ལྔ་ཡོངས་རྫོགས་ཀྱི་ཆོས་སྡེ་ཆེན་པོ་ལས། ལུང་གཏེར་གྱི་མཛོད་ལ་དགོངས་འདུས་སྐོར་བཞི་བཞུགས་པའི་བླ་མ་དགོངས་འདུས་ཆོས་སྡེ་བཅོ་ལྔ་པ་ལས་རིག་འཛིན་མཆོག་སྒྲུབ་ཆོས་ཚན་ལྔ་ཙམ་དང་། གསང་ཐིག་ཡབ་བཀའ་ཡུམ་བཀའ། དག་སྣང་ཚིག་བདུན་སྒྲུབ་སྐོར་སོགས་ཐུན་མོང་མིན་པའི་མཛོད་བཅས་ལྔ་དང་། གསུང་ཐོར་བུའི་སྐོར་བསྟོད་ཚོགས་ནས་བསྔོ་སྨོན་ཤིས་བརྗོད་ཡན་ལ་ཀུན་གཟིགས་འཇམ་དབྱངས་མཁྱེན་བརྩེའི་དབང་པོས་དཀར་ཆག་མཛད་པ་ས་བཅད་ཟླ་བ་ཉའི་གྲངས་སུ་བཞུགས་པ་བཅས་གསུང་རབ་ཀྱི་གླེགས་བམ་བགྲང་ན་བརྒྱ་ཕྲག་ལས་བརྒལ་བར་སྣང་། སྒྲུབ་དཀྱིལ་དབང་ཁྲིད་སོགས་ཀྱི་ཡིག་ཆ་གསར་དུ་སྤེལ་བ་ཐམས་ཅད་ཀྱང་འཕགས་ཡུལ་གྱི་སློབ་དཔོན་ཆེན་པོ་ཨ་བྷ་ཡཱ་ཀ་རའི་རྗེས་སུ་འགྲོ་བའི་ལེགས་བཤད་རིན་ཐང་དང་བྲལ་བ་ཕྱིས་འབྱུང་རྡོ་རྗེ་འཛིན་པ་རྣམས་ཀྱི་མིག་གཅིག་པུར་གྱུར་པ་འབའ་ཞིག་སྟེ། དེ་དག་ཀྱང་གསང་སྔགས་འཆད་པའི་སྐབས་སུ་རྒྱུད་དང་འབྲེལ་བ། མཚན་ཉིད་ཐེག་པའི་དགོངས་འགྲེལ་གྱི་གཙོ་བོ་ཤིང་རྟ་གཉིས་ཀྱི་
གཞུང་དང་མཐུན་པ། མན་ངག་འཆད་པའི་སྐབས་སུ་རྟོག་གེའི་ཡུལ་ལས་འདས་པ་རྣལ་འབྱོར་བ་རྣམས་ཀྱི་སོ་སོ་རང་རིག་པའི་ཡེ་ཤེས་དང་མཐུན་པ་སྟེ། མདོར་ན་རྒྱལ་བའི་གསུང་རབ་གདུལ་བྱའི་བློ་ངོ་ལ་ལྟོས་ནས་སྐས་ཀྱི་གདང་བུ་ལྟར་གསུངས་པའི་སོ་སོའི་དགོངས་པ་མ་འཛིངས་པར་བསྟན་པའི་ལེགས་བཤད་ཟླ་མེད་པ་ཤ་སྟག་ཡིན་ལ། གཟུ་བོར་མི་གནས་ཤིང་གྲུབ་མཐའི་ཕྱོགས་ལྷུང་གི་གདོན་གྱིས་ཟིན་པ་རྣམས་ཀྱིས་སྐྱོན་བརྗོད་པ་ཡོད་སྲིད་ཀྱང་། དོན་དུ་ལུང་རིགས་དང་འབྲེལ་བས་དངོས་པོ་སྟོབས་ཞུགས་ཡིན་པའི་ཕྱིར་སུས་ཀྱང་བརྒལ་དུ་མེད་པ་ཁོ་ན་ཡིན་ལ། གྲུབ་མཐའ་སོ་སོའི་གནད་གསང་མ་འདྲེས་པར་མཁྱེན་ཅིང་། གྲུབ་མཐའ་ཕྱོགས་འཛིན་གྱི་ལྕགས་ཀྱུས་རང་དབང་མེད་པར་མ་དྲངས་པའི་སྐྱེས་བུ་དམ་པ་རྣམས་ཀྱི་ཐུགས་ལ་ནི་འཆི་མེད་ཀྱི་བདུད་རྩི་ལྟར་སིམ་པར་གྱུར་པ་ཡིན་ནོ། །དེས་ན་སྔ་རབས་ཀྱི་བླ་མ་རྣམས་ཀྱི་རྣམ་ཐར་དུ། སྒྲུབ་པ་ཉམས་བཞེས་ལ་བལྟས་ན་མི་ཚེར་སྒྲུབ་པ་མཛད་པ་ལྟ་བུ། བསྟན་བཅོས་ལ་བལྟས་ན་མི་ཚེར་རྩོམ་པ་མཛད་པ་ལྟ་བུ། བུ་སློབ་ལ་བལྟས་ན་མི་ཚེར་བཤད་པ་མཛད་པ་ལྟ་བུ་སོགས་འབྱུང་བ་རྗེ་འདི་ཉིད་ལ་དོན་ལ་གནས་སོ།། །།གཉིས་པ་ཐུན་མོང་མ་ཡིན་པའི་རྣམ་ཐར་གྱི་ཕྱོགས་རེ་བརྗོད་པ་ལ་རིགས་པས་ཅུང་ཟད་བསྒྲུབ་པ་དང་། ལུང་གིས་ཅུང་ཟད་བསྒྲུབ་པའོ། །དང་པོ་ནི། ཐུན་མོང་མ་ཡིན་པའི་རྣམ་པར་ཐར་པ་ནི་ཚུར་མཐོང་གཞན་ལ་ལྐོག་ཏུ་གྱུར་པ་ཡིན་པས་དངོས་སུ་བསམ་པར་མི་
ནུས་མོད་ཀྱི། གང་མེད་ན་མི་འབྱུང་བའི་འབྲེལ་བ་ཁྱད་པར་ཅན་ངེས་པའི་དངོས་སྟོབས་རྗེས་དཔག་གི་ཚད་མས་ཅུང་ཟད་སྒྲུབ་པར་ནུས་ཏེ་སྟོན་པ་ཚད་མར་སྒྲུབ་པ་བཞིན་ནོ། །དེས་ན་ད་ལྟ་མངོན་སུམ་དུ་མཐོང་བའི་རྣམ་ཐར་ཕྲིན་ལས་དང་བཅས་པའི་རྟགས་མངོན་སུམ་པ་ལ་བརྟེན་ནས་ནང་གི་མངོན་རྟོགས་དང་། ས་ལམ་མཐོན་པོར་གནས་པ་སོགས་ཀྱི་ཚུལ་རྗེས་སུ་དཔག་པར་ནུས་ཏེ། མེད་ན་མི་འབྱུང་བའི་འབྲེལ་པ་ལས་སོ། །རྒྱུ་མཚན་དེ་ལྟ་བས་ན་རྗེ་འཇམ་མགོན་བླ་མ་རྣམ་པ་གཉིས་པོ་འདི་ནི་སྙིགས་མ་ལས་ཀྱང་སྙིགས་མའི་དུས་འདིར་སངས་རྒྱས་འཇིག་རྟེན་དུ་བྱོན་པ་དང་ཁྱད་པར་མེད་པས་རྒྱལ་བ་དངོས་སམ། ས་བཅུའི་བྱང་ཆུབ་སེམས་དཔའ་ཞིག་དགེ་བའི་བཤེས་གཉེན་གྱི་རྣམ་པར་སྣང་བ་ལ་སོམ་ཉི་མེད་དེ། རྒྱལ་བའི་ཕྲིན་ལས་མཐའ་དག་མཛད་པ་ཡིན་པའི་ཕྱིར་རོ། །ཚུལ་དེས་ན་སྤངས་རྟོགས་ཀྱི་ཁྱད་པར་ཡང་དེ་ལྟར་བཞུགས་པར་ངེས་མོད། མིའི་ཆོས་བླ་མ་གསང་ཞིང་སྦེད་པ་ལྷུར་ལེན་པར་མཛད་ཀྱང་དམ་ལྡན་དང་མོས་གུས་ཅན་གྱི་ངོར་མཐོང་བ་དང་ཞལ་ནས་གསུངས་པའང་ཅི་རིགས་ཡོད་དེ། སྔ་འགྱུར་བཀའ་གཏེར་གྱི་སྒྲུབ་ཆེན་ཁོ་ན་བརྒྱ་ཕྲག་ལྷག་པའི་རྡོ་རྗེ་སློབ་དཔོན་མཛད་པས་ཐུན་མོང་ངོར་དངོས་གྲུབ་མ་ཐོབ་ཀྱང་བར་ཆད་ནི་གང་ཡང་མ་བྱུང་ཙམ་གསུངས་ཀྱང་། སྒྲུབ་ཆེན་རྣམས་ཚུགས་གྲོལ་གྱི་སྐབས་ཕལ་ཆེར་འཇའ་ཚོན་ཁྱད་པར་ཅན་ཤར་བ་དང་། སྨན་སྒྲུབ་མཛད་པའི་སྐབས་འགའ་རེར་སྨན་གྱི་དྲི་ངད་རྒྱང་རིང་པོ་ནས་ཚོར་བ་
དང་། ཚོགས་ཀྱི་འདུ་བའི་སྐབས་སུ་འཇའ་འོད་དང་བྱ་རྒོད་མང་པོས་ཚོགས་ལ་རོལ་པ་དང་། བདུད་རྩི་ཁོལ་ཞིང་རཀྟ་ཕྱུར་བ་སོགས་དེར་འདུས་པ་ཐམས་ཅད་ཀྱི་མཐུན་སྣང་དུ་གྲུབ་པ་དང་། རྫོང་གསར་དགོན་དུ་གཏེར་མཛོད་དབང་ལུང་ཐོག་མར་ཚུགས་པ་དང་། བཀྲ་ཤིས་ཕོ་བྲང་དུ་སྡེ་དགེ་ཆོས་རྒྱལ་ཡུམ་སྲས་ཀྱིས་སྦྱིན་བདག་མཛད་ནས་ཉིད་ཀྱི་གཏེར་བྱོན་རབ་བདུན་རིང་བསྲེལ་ལ་མཆོད་པ་མཛད་པའི་ཉིན། སྔར་མཐོང་མ་མྱོང་བའི་འཇའ་འོད་ཐིག་ལེས་ནམ་མཁའ་གང་བ་ཀུན་གྱི་སྤྱོད་ཡུལ་དུ་གྱུར་པ་དང་། ལུང་དོན་ལྟར་གནས་ཆེན་རྣམས་སུ་རྩ་གསུམ་དགོངས་འདུས་གཏེར་སྒྲུབ་དང་འབྲེལ་བར་ཚིག་བདུན་གསོལ་འདེབས་སྒྲུབ་པ་མཛད་པ་ཟླ་བ་གཉིས་རིང་ཉིན་མཚན་ཕལ་ཆེར་མཚན་ཐུན་དང་པོ་རྣམས་སུ། འཇའ་སྤྲིན་བཀྲ་ཤིས་པའི་རྟགས་ཀྱི་རྣམ་པ་ཅན་མང་པོ་ཤར་བས། དེ་དོན་མ་ཤེས་པའི་རྟོག་དཔྱོད་ཅན་རྣམས་ཀྱིས་ད་ལོའི་ལྟས་འདི་གང་ལ་བལྟ་ཞེས་ཐེ་ཚོམ་གླེང་བརྗོད་བྱུང་བ་དང་། ས་ལུག་ལོའི་ཟླ་བ་ལྔ་པར་ཙ་འདྲ་རིན་ཆེན་བྲག་ཏུ་གནས་འདུས་ཡོད་པའི་སྐོར་ལམ་གཏོད་པར་ཕེབས་སྐབས། སྔ་དྲོ་བསང་གསེར་སྐྱེམས་ཀྱི་སྐབས་ནས་ཤར་ཕྱོགས་ནམ་མཁའ་ཐམས་ཅད་ཁྱབ་པར་སྔོ་ལྗང་ཤས་ཆེ་བའི་འཇའ་འོད་ཐིག་ལེས་མཚན་པར་ཤར་བ་ཉིན་གུང་ཚོགས་འཁོར་མ་ཟིན་བར་སྡོད་པ་དང་། དེ་སྐོར་ཟླ་བ་གཅིག་ཙམ་དུ་ཉིན་རེ་བཞིན་གྱི་ཕྱི་དྲོ་ནས་མུན་རུབ་བར་དུ་འཇའ་དཀར་ཀུ་ཤའི་དབྱིབས་ཅན་ནུབ་ནས་ཇེ་རྒྱས་སུ་སོང་ནས་ནམ་མཁའི་ཕྱེད་ཁྱབ་པ་དང་།
སྐོར་བ་བྱེད་མཁན་གནས་རིའི་མཐའ་འཁོར་བའི་གྲངས་མང་རྒན་རྒོན་ཞྭ་ལོང་ཁུར་ཁྲིད་དགོས་པ་མང་དུ་འདུས་པ། བྲག་འཕྲང་སོགས་ཤིན་ཏུ་བགྲོད་དཀའ་བ་རྣམས་ལ་ཕན་ཚུན་འཐབ་འཛིང་དང་རྦབ་འདྲིལ་སོགས་ཉེར་འཚེ་ཕྲན་བུ་ཙམ་མ་བྱུང་བ་རྣམས་ཀྱང་ཐུགས་བསྐྱེད་བྱིན་རླབས་ཀྱི་ལྟས་སུ་ངེས་ཤིང་། ཨ་རབ་གནས་ནང་རྡོ་རྗེ་བདུད་རྩིའི་སྒྲུབ་པའི་སྔོན་འགྲོ། མ་དཱ་ནའི་སྒྲུབ་པ་ཐོག་མར་ཚུགས་སྐབས་ཅིས་ཀྱང་མི་མཚོན་པའི་བདུད་རྩིའི་དྲི་ངད་བཟང་པོས་ཁྱིམ་གྱི་ཕྱི་ནང་ཐམས་ཅད་དུ་ཁྱབ། མ་དཱ་ན་ལངས་ཚུལ་སོགས་པ་ལ་ཀུན་གྱིས་ངོ་མཚར་དུ་བྱེད་པ་སོགས་དང་། ཨ་ཁྲི་གནས་ནང་དུ་དྲི་མེད་རྒྱལ་བ་རྒྱ་མཚོའི་སྒྲུབ་ཆེན་སྐབས་སུ་ནམ་མཁའ་འཇའ་འོད་དམར་པོས་ཁྱབ། ནུབ་ཀྱི་རེས་ཕལ་ཆེར་ཕྱི་ནས་ནང་དང་ནང་ནས་ཕྱི་རུ་ཡོད་པ་འདྲ་བའི་ཡིག་དྲུག་སྒྲ་དིར་དིར་ཐོས་པ་སོགས་མཆོག་དམན་ཀུན་ལ་གསལ་བའི་རྟགས་མཚན་ངོ་མཚར་བ་བྱུང་བར་སྣང་། རྒྱལ་ཁབ་ཆེན་པོ་ལྷུན་གྲུབ་སྟེང་དུ་རྒྱལ་ཁམས་སྤྱི་རིམ་དུ་འགོང་པོ་ཨར་གཏད་དགོས་པའི་ལུང་བབས་མང་ཡང་སྔོན་གྱི་ནུས་ལྡན་རེ་རེ་ཙམ་ལས་ཕྱིས་སུ་ལག་ལེན་ཐེབས་མཁན་གཏན་ནས་མེད་པ་ལ། ཆོས་རྒྱལ་ཆེན་པོས་རྗེ་འདི་ལ་ཤིན་ཏུ་ནན་བསྐུལ་མཛད་པ་ལྟར་ཕྱག་བཞེས་གནང་བས་ཐོག་མར་འཚུབས་ལྷོང་ཆེན་པོ་དང་། མཐར་ཤིན་ཏུ་ལེགས་ལམ་གྱུར་ཅིང་དེ་ཕྱོགས་རྒྱལ་གདོན་འབྱུང་པོ་ཐམས་ཅད་གཞན་དུ་བྱོལ་བའི་མནལ་ལྟས་ཁྱད་པར་ཅན་ཕན་ཁང་དང་ཁང་སར་མཁན་རིན་པོ་ཆེ་རྣམ་གཉིས་ནས་ཀྱང་གཟིགས།
རྗེ་བླ་མ་འཇམ་དབྱངས་མཁྱེན་བརྩེ་རིན་པོ་ཆེས་ཀྱང་། སྔོན་ཆད་ཁྱེད་ལ་གྲུབ་ཐོབ་ཀྱི་མཚན་མི་འདུག །ད་རེས་གྲུབ་ཐོབ་ཀྱི་མཛད་པ་ཆེ་ཤོས་བྱུང་འདུག་ཅེས་གཟེངས་བསྟོད་གནང་བར་འདུག །དེ་མཚུངས་ཨ་ལོ་རྩེ་ཟུལ་མདོར་མི་མ་ཡིན་གདུག་པ་ཅན་མང་པོ་རྒྱུ་ཞིང་གནས་བཅས་པས་ལམ་འགྲུལ་རྣམས་ལ་ཤིན་ཏུ་འཚེ་བ་དང་། གཏེར་ལུང་རྣམས་སུ་སྟོབས་ཆེན་མཆོད་རྟེན་བཞེངས་དགོས་པར་གསུངས་པའང་སྒྲུབ་མཁན་མ་རྙེད་པས། ཆོས་རྒྱལ་ཉིད་ནས་རྗེ་འདི་ལ་སྔ་རྗེས་ལན་གྲངས་ཞུས་ལྟར་བཅའ་སྒྲུབ་ཚད་ལྡན་མཛད་སྐབས་ངོ་མཚར་གྱི་ལྟས་མཐུན་སྣང་དུ་གྲུབ་པ་དང་། ཕྱོགས་དེར་རྩྭ་ལོ་ཚུན་དེ་ལོ་ལས་ལེགས་པ་སྔོན་ཆད་མ་བྱུང་ཞིང་། སྲི་རིགས་ཀྱི་བླ་རྡོ་ཕྱོགས་དང་དབུས་ནས་ལེན་དགོས་པ་རྣམས་ཀྱང་ཕྱོགས་འདི་དང་འདིར་འདི་ལྟར་ཡོད་ཚུལ་གསུངས་པ་རྣམས་ཀྱང་ཇི་བཞིན་རྙེད་པ་སོགས་ཤེས་ལྡན་རྣམས་ཡིད་ཆེས་ཀྱི་དད་པ་གཏིང་ཚུགས་པ་བྱུང་། གནས་ཆེན་རྣམས་སུ་ལྷ་སྲིན་དམ་བསྒྲག་དང་གནས་ཆེན་བྱིན་འབེབ་མཛད་པའི་སྐབས་རྣམས་སུའང་ཁྱད་པར་གྱི་ལྟས་རེ་རྒྱུན་དུ་བྱུང་བར་སྣང་། གཞན་ཡང་སྒྱུ་ལུས་ཀྱི་རྣལ་འབྱོར་འབྱོངས་པས་ཁང་ཁྱིམ་ལ་ཟང་ཐལ་དུ་ཕེབས་པ། རྡོ་ལ་ཕྱག་ཞབས་རྗེས་བཞག་པ། སྣང་བ་ལ་བདེན་འཛིན་མེད་པས་འཁྲུལ་པ་ཞིག་པའི་ངང་ཚུལ་ཅན་དུ་བཞུགས་པ་དང་། ཁྱད་པར་སྐུ་ཚེ་ཐུང་ངུ་ཞིག་ལས་མེད་པར་ཟབ་གཏེར་གྱི་ལུང་བྱང་ལ་ཡོད་ཚོད་ཀྱང་། རྡོ་རྗེའི་རྣལ་འབྱོར་དང་རྩ་རླུང་གི་ནུས་པས་
སྐུ་ཚེ་མཐར་ཕྱིན་ནས་ད་ལྟ་དགུང་གྲངས་བརྒྱད་ཅུ་གྱ་གཉིས་ཀྱི་སྟེང་དུ་སོན་ཀྱང་སྐུ་གཞོན་ཤ་ཆགས་ཤིང་སྤྱན་སླར་གསལ་བ་སོགས་གྲུབ་རྟགས་ནང་གི་ཆེ་བ་དང་། གཏེར་ལུང་བཞིན་ཙ་འདྲ་རིན་ཆེན་བྲག་ཏུ་དཔལ་ཆེན་པོའི་ལྷ་ཁང་རྟེན་དང་བརྟེན་པ་སྒྲུབ་གྲྭ་བཅས་དང་། རྫོང་ཤོད་བདེ་གཤེགས་འདུས་པའི་རྟེན་བརྟེན་པ་སྒྲུབ་གྲྭ་བཅས་གསར་དུ་བཙུགས་པ་ལ་སོགས་པའི་ཕྱག་རྗེས་ཀྱི་ཕྲིན་ལས་རྣམས་ཀྱང་། རྗེ་ཉིད་ཀྱི་ཚོགས་བསགས་ཙམ་མ་ཡིན་པར་དཔལ་ཨོ་རྒྱན་ཆོས་ཀྱི་རྒྱལ་པོའི་གཏེར་ལུང་བཞིན་གངས་ཅན་ཐུབ་བསྟན་ཡོངས་རྫོགས་ཀྱི་དོན་དང་། བོད་ཁམས་བདེ་ཐབས་ཁོ་ན་ཡིན་པར་འདུག་པས་འདི་ལྟ་བུ་སངས་རྒྱས་བྱང་སེམས་ཀྱི་མཛད་པ་ཁོ་ནར་ངེས་ལ། དེར་མ་ཟད་ཕྱག་ལི་རྙིང་པ་ཁ་ཤས་བདག་གིས་ཀྱང་མཇལ་བའི་ནང་ཕྱག་བྲིས་མཛད་འདུག་པ་ཉིན་རེ་བཞིན་ཡང་དངོས་ཉམས་རྨི་ལམ་རྣམས་སུ། སངས་རྒྱས་བྱང་སེམས་འཕགས་བོད་ཀྱི་བླ་མ་མཁས་ཤིང་གྲུབ་པ་རྣམས་མཇལ་བའི་ཚུལ་དང་། ལྷག་པའི་ལྷ་རབ་འབྱམས་གཟིགས་པའི་ཚུལ་ནི་བསམ་གྱིས་མི་ཁྱབ་པར་སྣང་ངོ་། །ཚུལ་དེས་ན་ཐུན་མོང་མ་ཡིན་པའི་རྣམ་པར་ཐར་པ་ནི་རྒྱལ་བ་ཀུན་དང་རོ་མཉམ་པ་ཡིན་པར་ཤེས་པར་བྱ་སྟེ། དཔལ་ཨོ་རྒྱན་ཆོས་ཀྱི་རྒྱལ་པོའི་ཟབ་གཏེར་གྱི་ལུང་བྱང་རྣམས་ལས་ལོ་ཆེན་བཻ་རོའི་རྣམ་འཕྲུལ་དུ་ལུང་བསྟན་ལ། བཻ་རོ་ནི་ཨོ་རྒྱན་ཉིད་དང་དགོངས་པ་མཉམ་པར་ཡང་ནས་ཡང་དུ་གསུངས་ཤིང་། ཨོ་རྒྱན་ཆེན་པོ་ནི་སངས་རྒྱས་འོད་དཔག་མེད་དངོས་སུ་རྡོ་
རྗེ་སློབ་དཔོན་གྱི་ཚུལ་དུ་བྱོན་པ་ཡིན་པའི་ཕྱིར་རོ། །གཉིས་པ་ལུང་གིས་ཅུང་ཟད་བསྒྲུབ་པ་ནི། བདག་ཅག་གི་སྟོན་པས་ཏིང་ངེ་འཛིན་རྒྱལ་པོའི་མདོ་ལས། གང་གི་ལག་ན་ཏིང་འཛིན་མཆོག་ཡོད་པ། །རྒྱལ་བ་བྱམས་པ་གྲགས་པ་མཐའ་ཡས་བཞིན། །སེམས་ཅན་རྣམས་ཀྱི་དོན་མང་བྱེད་འགྱུར་ཞེས། །བློ་གྲོས་མཐའ་ཡས་དེ་ནི་ངས་ལུང་བསྟན། །ཞེས་དང་། འཕགས་པ་དེ་བཞིན་གཤེགས་པའི་ཡེ་ཤེས་ཕྱག་རྒྱའི་མདོ་ལས། འདི་དང་ལྡན་པ་འདྲེན་པར་འགྱུར་ཏེ་བློ་གྲོས་མཐའ་ཡས་བློ་གྲོས་མཆོག །ཕྱོགས་བཅུའི་སངས་རྒྱས་བྱེ་བ་ཕྲག་བརྒྱ་མང་པོ་དག་གིས་དགོངས་པར་འགྱུར། །མདོ་སྡེ་བརྒྱ་ཡི་ཚུལ་དག་ཤིན་ཏུ་རབ་འབྱེད་བསམ་ཡས་དཔག་མེད་དེ། །མདོ་སྡེ་འདི་ལ་རབ་ཏུ་སྦྱོར་བ་མི་ཟད་གཟུངས་ཐོབ་རྙེད་པར་འགྱུར། །ཞེས་དང་། ཁྱད་པར་ལང་ཀར་གཤེགས་པ་ལས། དེ་ཡི་འོག་ཏུ་བྱས་དུས་ལ། །འདྲེན་པ་བློ་གྲོས་ཞེས་བྱ་བ། །ཤེས་བྱ་ལྔ་རྣམས་སྟོན་པ་པོ། །དཔའ་བོ་ཆེན་པོ་འབྱུང་བར་འགྱུར། །ཞེས་གསུངས་པའི་ཤེས་བྱ་ལྔ་རིག་པའི་གནས་ལྔ་སོགས་ལ་བྱས་ན་རྒྱ་བོད་མཁས་པ་ཀུན་གྱི་སྤྱི་ནོར་ཡིན་པས་ལུང་བསྟན་ཡུལ་གྱི་ཁྱད་ཆོས་སུ་མི་འགྱུར་བས་མཛོད་ཆེན་ལྔ་པོ་སྔར་མ་བྱུང་བའི་ཁྱད་པར་ཅན་གྱི་ཕྱིར་ཤིན་ཏུ་འབྲེལ་བས། འདི་རྣམས་རྗེ་བླ་མ་ལུང་བསྟན་པ་ཡིན་པར་འཇམ་མགོན་མཁྱེན་བརྩེའི་དབང་པོ་སོགས་དམ་པ་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱིས་བཞེད་ལ། སྔ་འགྱུར་སྒྱུ་འཕྲུལ་ཀལྤ་དུམ་བུའི་རྒྱུད་ལས། འཇིག་རྟེན་
ཁ་བ་ཅན་ཞེས་སུ། །པདྨའི་སྙིང་པོ་ཀུན་དགའ་དང་། །བློ་གྲོས་མཐའ་ཡས་ལ་སོགས་པས། །འཛིན་པས་བསྟན་པ་རྒྱས་པར་འགྱུར། །ཞེས་དང་། གཏེར་ཆེན་པདྨ་གླིང་པའི་ལུང་བསྟན་ལས། ལྕགས་རྟ་ལོ་ལ་མཐའ་དམག་བོད་དུ་བརྡོལ༔ ང་ཡི་སྤྲུལ་པ་དགེ་སློང་བློ་གྲོས་མིང༔ ཁམས་ཕྱོགས་གསེར་ལྡན་འབབ་པའི་འགྲམ་ནས་འབྱུང༔ སྨོན་ལམ་དབང་གིས་དུས་ཀྱི་འཁྲུགས་པ་བཟློག༔ ལྕགས་ལུག་ལོ་ལ་སྐྱིད་པའི་ཉི་མ་ཤར༔ ཞེས་གསུངས་པ་ལྕགས་རྟ་ལོར་གཡུ་ལུང་གངས་ར་གཉིས་པ་བཀྲ་ཤིས་ཉི་ཟླ་དཔལ་ཕུག་ཏུ་བཀའ་བརྒྱད་བདེ་གཤེགས་འདུས་པའི་སྨན་སྒྲུབ་མཛད་པ་དང་དུས་འགྲིགས་ཤིང་། མཁས་ཤིང་གྲུབ་པ་ཡོངས་ཀྱི་སྤྱི་རྗེ་འཇམ་དབྱངས་མཁྱེན་བརྩེའི་དབང་པོ་དང་། གཏེར་ཆེན་མཆོག་གྱུར་གླིང་པ་ལ་སོགས་པ་ཕྱིས་བྱོན་ཚད་ཐུབ་ཀྱི་གཏེར་ལུང་རྣམས་སུ་བཻ་རོ་ཙ་ནའི་རྣམ་འཕྲུལ་དུ་ཡང་ནས་ཡང་དུ་ལུང་བསྟན་ཅིང་། རྗེ་ཉིད་ཀྱི་ཟབ་གཏེར་རྣམས་སུ་ཡང་བཻ་རོའི་རྣམ་འཕྲུལ་དུ་ལུང་བསྟན་པར་སྣང་ངོ་། །དེར་མ་ཟད་རྒྱལ་དབང་ཀརྨ་པ་དང་། སི་ཏུ་པདྨ་ཉིན་བྱེད། རྗེ་མཁྱེན་བརྩེའི་དབང་པོ་སོགས་ལྐོག་གྱུར་གཟིགས་པའི་ཡེ་ཤེས་ཅན་མང་པོས་ཇོ་ནང་ཏཱ་ར་ནཱ་ཐ་དང་། སྨིན་གླིང་གཏེར་ཆེན་ལ་སོགས་པར་སྐྱེས་པའི་རབས་སུ་ལུང་བསྟན། སྐུ་ཆུང་ངུའི་དུས་བོན་གྱི་བླ་མ་ཞིག་གིས་ཀྱང་འདི་བནྡེའི་བླ་མ་སྙན་གྲགས་ཅན་ཞིག་འབྱུང་ཞེས་བཤད་ཅིང་། ཟེ་ཆེན་དུ་སློབ་གཉེར་ལ་བཞུགས་ཚེ་གྲ་ཆུང་ཕལ་བ་ལྟར་ཡིན་སྐབས་གཞན་གྱི་ཅུང་བརྙས་པར་
གྱུར་པ་ན། པཎ་ཆེན་བླ་མ་མཐུ་སྟོབས་རྣམ་རྒྱལ་གྱི་ཞལ་ནས། འདི་ལ་བརྙས་པ་མ་བྱེད། ཕྱིས་ཁྱེད་ཟེ་ཆེན་དགོན་པས་ཁོང་རང་ལྟ་ཅི་གསང་ཆབ་ཀྱི་བུམ་པའང་མི་ཐོབ་པའི་དུས་འོང་ཞེས་གསུངས་ཚུལ་སོགས་ཐོས་ཏེ། མདོར་ན་སྐྱེས་ཆེན་ཕལ་མོ་ཆེས་དམ་པ་ཡིན་པར་ལུང་བསྟན་པ་ཡིན་ནོ། །དེ་དག་ལས་ཆེས་གསང་བ་ཟབ་མོ་གཏེར་གྱི་བཀའ་བབས་ཀྱང་བཞུགས་པ་སྟེ། དགུང་ལོ་ཆུང་ངུའི་དུས་ནས་ཨོ་རྒྱན་རིན་པོ་ཆེ་ལ་མི་ཕྱེད་པའི་དད་པ་ལྷན་སྐྱེས་སུ་མངའ་བས་ཚིག་བདུན་གསོལ་འདེབས་དང་བཛྲ་གུ་རུ་ཞལ་འདོན་མཛད། དགུང་གྲངས་བཅོ་ལྔ་པར་གུ་རུས་བྱིན་གྱིས་བརླབས་པའི་དག་སྣང་ཤར། དགོངས་གཏེར་མང་ཞིག་ཕབ་པར་འདུག་ཀྱང་དེ་སྐོར་ནས་རིག་གནས་གཞུང་ལུགས་རིགས་ལ་སྦྱང་བརྩོན་ལྷུར་བླངས། བཀའ་བརྒྱུད་ཀྱི་ཆོས་སྒོར་ཞུགས་ནས་རྙིང་མ་བཏང་སྙོམས་སུ་བསྐྱུར། ཉམས་བཞེས་དུས་ལས་ཡོལ་བ་སོགས་རྩ་བའི་རྟེན་འབྲེལ་འཆུགས་པ་ལ་བསྙུན་གཞི་ཤིན་ཏུ་ལྕི་བས་ཟིན། ལན་གཅིག་སྐྱེ་གནས་འཕོས་པ་ལྟར་གྱུར་པ་ལ་གུ་རུ་ཡབ་ཡུམ་གྱིས་བར་ཆད་བསལ་ནས་བྱིན་རླབས་ཐོབ། ཡང་ཁྲོད་དུ་སྒྲུབ་པ་རྩེ་གཅིག་མཛད་པས་སྐུ་ཁམས་དྭངས་ཤིང་རིམ་པར་གཏེར་རྙིང་རྣམས་ཀྱི་བཀའ་བབས་ཐོབ། ཕྱིས་འཇམ་དབྱངས་མཁྱེན་བརྩེ་རིན་པོ་ཆེ་དང་གཏེར་ཆེན་མཆོག་གྱུར་གླིང་པ་ལྷན་རྒྱས་ནས་ད་ལྟའི་སྐུ་ཚེ་བརྟན་པ་དང་། འབྱུང་འགྱུར་གྱི་ལས་འཕྲོ་གང་ཅིར་རྟེན་འབྲེལ་འཕྲོ་མཐུད་གལ་ཆེ་བའི་གསུང་བསྐུལ་དང་ཁ་བྱང་སོགས་བསླབ་སྟོན་མཛད་པ་ལྟར་གཏེར་ཁ་བཅུ་གཅིག་
ཙམ་ཕྱག་ཏུ་སོན་པ་ལས། གཙོ་བོར་རྩ་གསུམ་དགོངས་འདུས་ཀྱི་ཆོས་ཚན་དྲུག་ཙམ་དང་། གསང་ཐིག་བླ་སྒྲུབ་དང་མཁའ་འགྲོའི་སྐོར། ལམ་ཟབ་ལེའུ་བདུན་མ། དག་སྣང་ཚིག་བདུན་སྒྲུབ་ཐབས་སོགས་གཏེར་མཛོད་དུའང་བཞུགས་ཤིང་། གུ་རུའི་སྐུ་ཚབ། དམ་རྫས་རིགས་མང་པོས་འགྲོ་དོན་རྒྱ་ཆེར་སྤེལ་བ་དང་། ཆོས་སྐོར་ཕལ་ཆེར་གནས་དུས་འཛོལ་བ་སོགས་ཀྱིས་ཆ་ཚང་གཏན་ལ་འབེབ་ཐུབ་པར་མ་བྱུང་ཡང་། གོང་སྨྲོས་ལྟར་དེ་སྔ་སུས་ཀྱང་མ་མཛད་པའི་མཛད་པ་རླབས་ཆེན་གཏེར་རྙིང་འདི་ཙམ་ཞིག་གི་བཀའ་བསྡུ་དང་དབང་ལུང་གི་རྒྱུན་ཚར་གྲངས་སྤེལ་བ་ལ་བར་ཆད་ཕྲ་མོའང་མ་བྱུང་ཞིང་གླེགས་བམ་སྤར་དུ་འཁོད་པ་བཅས། གཏེར་གསར་ཡིན་རྒྱུའི་པུསྟི་བརྒྱ་ཕྲག་བྲི་བ་ལས་ཀྱང་དོན་ཆེ་ཞིང་ངོ་མཚར་བ་འདི་གཟུར་གནས་རྣམས་ཀྱིས་བརྟགས་ན་ཤེས་པར་སྣང་། དེ་ལྟར་རྗེ་བླ་མའི་རྣམ་པར་ཐར་པ་རང་གིས་ཅུང་ཟད་ངེས་པ་ཤིན་ཏུ་མདོར་བསྡུས་ནས་བརྗོད་པ་འདི་ལྟར་ཡིན་ངེས་ཀྱི་ཡིད་ཆེས་གཏིང་ནས་རྙེད་དེ་བཀོད་པ་ཡིན་གྱི། རང་གི་བླ་མ་ཡིན་པའི་ཞེན་པས་ཟོལ་སྦྱོར་གྱི་ཚིག་བཀོད་པ་སོགས་མེད་དེ་ཡེ་ཤེས་ཀྱི་སྤྱན་དང་ལྡན་པ་རྣམས་དཔང་པོར་འོས་པ་ཡོད་དོ།། །།གསུམ་པ་བསྡུས་ཟིན་སྤར་དུ་བསྒྲུབས་པའི་ཚུལ་ལ་གསུམ། ཆས་ཡོན་སྦྱོར་བ་པོའི་སྦྱིན་བདག །ཚུལ་ཇི་ལྟར་བསྒྲུབས་པ། ཞུས་དག་བྱས་ཚུལ་མདོ་ཙམ་བརྗོད་པའོ། །དང་པོ་ནི། ཆོས་མཛོད་ཆེན་པོ་འདི་འགྲུབ་བྱེད་ཀྱི་རྒྱུ་ཐུན་མོང་མ་ཡིན་པ་ནི། དཔལ་སྤུངས་དབོན་སྤྲུལ་གསུམ་པ་ཀརྨ་སྒྲུབ་བརྒྱུད་བསྟན་
འཛིན་ཕྲིན་ལས་དང་། ས་སྐྱོང་ཆོས་རྒྱལ་ཆེན་པོ་དཔལ་ལྡན་འཆི་མེད་རྟག་པའི་རྡོ་རྗེ། གཉེར་ཆེན་པདྨ་ལེགས་གྲུབ་གསུམ་ཡིན་ལ། གཞན་ཡང་བསྟན་པ་རིན་པོ་ཆེ་ཁོ་ན་གཅེས་པར་འཛིན་པའི་སྐྱེས་ཆེན་བླ་སྤྲུལ་གྱི་རིགས་དང་། བསྟན་པ་མཆོད་པའི་དད་འབྱོར་ལྡན་པ་སྦྱིན་བདག་ཆེན་པོ་ཁ་ཤས་བཅས་ནས་ཞལ་འདེབས་རྒྱ་ཆེན་པོ་སྦྱར་པ་ཡིན་ཏེ་འོག་ཏུ་འཆད་པར་འགྱུར་རོ། །དེ་ལས་དཔལ་སྤུངས་དབོན་སྤྲུལ་རིན་པོ་ཆེ་འདི་ནི་གཏེར་ཆེན་ཀློང་གསལ་སྙིང་པོའི་རྣམ་འཕྲུལ་ཡིན་ཏེ། གཏེར་ཆེན་ཉིད་ཨ་ལོ་དཔལ་འབྱོར་དགོན་དུ་ཕེབས་སྐབས་ཨ་ལོ་བླ་མ་ཀུན་མཁྱེན་གྱིས་ངེད་ཀྱི་ཚ་བོ་ཆོས་ཀྱི་འབྱུང་གནས་འདིས་དཔལ་སྤུངས་སུ་དགོན་པ་འདེབས་རྩིས་ཡིན་པས། རྗེ་གཏེར་ཆེན་ཉིད་དེར་བཞུགས་ནས་ངེད་ཀྱི་ཚ་བོའི་ཕྲིན་ལས་ཀྱི་གྲོགས་མཛད་ཐུབ་ཡང་ནན་ཞུས་པ་ན། གཏེར་ཆེན་གྱི་ཞལ་ནས། ང་ཚེ་འདིར་ཁྱེད་ཀྱི་དབོན་པོའི་ཕྲིན་ལས་ཀྱི་གྲོགས་བྱེད་པའི་སྐལ་པ་མེད། སྐྱེ་བ་ཕྱི་མ་ནས་མི་རབས་གསུམ་གྱི་བར་དུ་ཕྲིན་ལས་ཀྱི་གྲོགས་བགྱི་ཞེས་ཞལ་བཞེས་གནང་བ་རྗེ་གཏེར་ཆེན་འདས་ནས་དབོན་པོ་བསམ་འཕེལ་དུ་འཁྲུངས། དེ་རྗེས་དབང་གི་རྡོ་རྗེ། དེ་རྗེས་དབོན་སྤྲུལ་རིན་པོ་ཆེ་འདི་ཉིད་ཡིན་པའི་ཕྱིར་རོ། །དེ་དང་མཐུན་པར་གཏེར་ལུང་རྣམས་ནས་ཀྱང་ལང་གྲོ་ལོ་ཙཱའི་རྣམ་འཕྲུལ་དུ་ལུང་བསྟན་ཅིང་། སྐྱབས་མགོན་པདྨ་ཉིན་བྱེད་ཀྱི་སྐུ་ཚེ་སྨད་ནས་དཔལ་སྤུངས་པའི་བསྟན་པ་གཟིགས་སྐྱོང་མཛད་དེ། སྐྱབས་མགོན་སྐུ་གཤེགས་ནས་ཡང་སྲིད་བྱོན་པ་སྐུ་ན་མ་
ཚར་གྱི་བར་དུ་བསྟན་པ་སྔར་ལས་ཉམས་གུད་མེད་པར་བསྐྱངས་པས་བཀའ་དྲིན་ཟླ་མེད་ཅིང་། ལོ་བསྟར་བུམ་སྒྲུབ་ཆེན་མོའི་རྒྱུན་བཙུགས་པའི་ཚོགས་པར་གཏོང་ཐེབས། དཀྱིལ་འཁོར་གྱི་མཆོད་ཆས། འཆམ་གོས་སོགས་གང་དགོས་ཐམས་ཅད་རྒྱ་དངུལ་རྡིལ་ཚད་གྲངས་མང་གིས་གསར་བསྐྲུན་མཛད་པ་དང་། རྔོག་དཀྱིལ་རྣམས་ཀྱི་རྒྱུན་བཙུགས་ནས་གླེགས་བམ་སྤར་དུ་བཞེངས། ཕུར་སྒྲུབ་དང་དབྱར་གནས་ཀྱི་རྒྱུན་བཙུགས་པ་སོགས་མདོར་ན་རྗེ་སི་ཏུ་རིན་པོ་ཆེ་དང་མཛད་ཕྲིན་མཉམ་པ་ལས་ཀྱང་ལྷག་པའི་མཛད་པ་བསྐྱངས་ལ། དེ་ཉིད་རྗེ་བླ་མས་གཏེར་མཛོད་ཚར་ལྔ་གནང་བའི་གཉིས་པ་དུས་ཀྱི་སློབ་ཚོགས་འདུས་པའི་ནང་དུ་བཞུགས་པས། ཁོང་ནས་ཉམས་ལེན་དང་འཆད་སྤེལ་སོགས་ནི་འོང་དཀའ་བས་དཔེ་ཆ་ཚང་མ་སྤར་དུ་བསྒྲུབ་ཅེས་རྗེ་བླ་མར་ཞུས་ཀྱང་། དེ་རྗེས་ཡིད་སྲུབས་ཀྱི་རྩ་ལག་གིས་གྲྭ་པ་འགའ་ཞིག་གི་ཡིད་བརླམས་པས་དབོན་སྤྲུལ་རིན་པོ་ཆེར་བཟང་ལན་ངན་འཇལ་གྱི་འཁྲུགས་ཟིང་བྱུང་བའི་རྐྱེན་གྱིས་ལོ་ཤས་ལུས་མོད། དོན་དུ་སྤར་དུ་སྒྲུབ་པ་ལྟ་ཅི་བྲི་བ་ཙམ་ལའང་སྐྲག་པར་གྱུར་པའི་སྐབས་དེར། མཆོག་སྤྲུལ་རིན་པོ་ཆེ་འདི་ཉིད་ཀྱི་བཀའ་དྲིན་ལས་སྤར་དུ་སྒྲུབ་པའི་རྣམ་དཔྱོད་བྱུང་བ་ཡིན་པས་མདོ་སྡེ་རྣམས་ལས་སེང་གེའི་སྒྲ་སྒྲོག་པ་ཞེས་གསུངས་པ་ལྟ་བུ་ཡིན་ནོ། །ཆོས་རྒྱལ་ཆེན་པོ་དཔལ་ལྡན་འཆི་མེད་རྟག་པའི་རྡོ་རྗེ་ནི། བཀའ་བསྟན་གྱི་དཀར་ཆག་ལ་སོགས་པར་གསལ་བའི་འོད་གསལ་ལྷ་ཡི་རིགས་ལས། ཆོས་རྒྱལ་སེམས་དཔའ་ཆེན་
པོ་དམ་ཚིག་རྡོ་རྗེའི་སྲས་སུ་འཁྲུངས་ཤིང་། རྗེ་ས་སྐྱ་པ་བདག་ཆེན་བཀྲ་ཤིས་རིན་ཆེན་གྱིས་དཔལ་ལྡན་འཆི་མེད་རྟག་པའི་རྡོ་རྗེའི་མཚན་གསོལ། གཏེར་ཆེན་མཆོག་གྱུར་གླིང་པ་ལ་སོགས་ཚད་ཐུབ་ཀྱི་གཏེར་ལུང་དུ་མ་ནས་ལྷ་སྲས་མུ་ཏིག་བཙན་པོའི་རྣམ་འཕྲུལ་དུ་བསྔགས། སྐུ་ན་ཤིན་ཏུ་ཕྲ་བའི་སྐབས་སུ་ཉག་དགྲས་བརླག་པར་བརྩམས་ཀྱང་སྐུ་ལ་ཉེས་སྐྱོན་མ་སོང་བར་ལས་དབང་བསོད་ནམས་སྟོབས་ཀྱིས་ཕྱི་ནས་ཕྱོགས་ལས་རྣམ་པར་རྒྱལ་ཞིང་། ཆོས་རྒྱལ་གོང་མ་རྣམས་ཀྱི་ཕྱག་བཞེས་ལྟར་ཐུབ་བསྟན་རིས་མེད་པ་དང་། ཁྱད་པར་དུ་དཔལ་ལྡན་ས་ངོར་གྱི་གྲུབ་མཐའ་མཆོད་པ་དང་། ཆབ་འབངས་ཀྱི་ལོ་ཐང་གི་དཔྱ་ཁྲལ་ལ་སོགས་པའི་འདུ་སྒོ་ཐམས་ཅད་མངའ་འབངས་ཆར་གཏོགས་རིས་མེད་དགོན་སྡེ་རྣམས་ཀྱི་འཚོ་ཆས་སུ་སྦྱར་བ་སོགས་དང་། ཡུལ་དབུས་སུ་ཕེབས་ནས་ཇོ་ཤཱཀ་ལ་སོགས་པའི་རྟེན་ཁྱད་པར་ཅན་རྣམས་ལ་མཆོད་པ། གཞུང་ས་སྐྱབས་མགོན་རིན་པོ་ཆེ་རྩེ་ཤོད་དང་ས་ངོར་གཙོས་བླ་མ་རྣམས་ལ་འབུལ་ཆེན། སྨོན་ལམ་ཆེན་མོའི་ཚོགས་ཆེན་ལ་རྒྱ་དངུལ་སྲང་རེའི་ཕྱག་འགྱེད་སོགས་དགོན་སྡེ་རྣམས་ལ་འགྱེད་ཆེན་གཏོང་བར་མཛད་པ་དང་། དཔལ་ལྡན་ལྷུན་གྲུབ་སྟེང་གི་དབྱར་གནས་ལྷ་ཁང་ཉམས་གསོས་དང་། ལྷ་གསར་ཆེན་མོའི་གསེར་གཡབ་ཉམས་གསོས། ཨོ་རྒྱན་གཏེར་བདག་གླིང་པའི་ཟབ་གཏེར་ཐུགས་ཆེན་བདེ་གཤེགས་ཀུན་འདུས་ཀྱི་སྒྲུབ་ཆེན་ཨོ་རྒྱན་སྨིན་གྲོལ་གླིང་པའི་ཕྱག་བཞེས་ཇི་ལྟ་བར་རྒྱུན་འཛུག་གི་ཆོས་
འཁོར་འགྲན་བྲལ་དུ་བསྐྲུན་པ་དང་། ཚེ་དཔག་ལྷ་དགུའི་སྒྲུབ་མཆོད་དངོས་གཙང་གི་རྒྱུན་བཙུགས་པ་སོགས་ཆོས་ཀྱི་མཛད་པ་རྒྱ་ཆེ་ཞིང་། ལྷག་པར་གཏེར་མཛོད་འདི་ཉིད་ལ་འགོ་ལུང་མཛད་མཁན་ཞིག་མེད་ན་འགྲུབ་ཐབས་དཀའ་བས། རྗེ་བཙུན་བླ་མ་ཉིད་ཀྱིས་གཉེར་ཆེན་ཞིག་འདིའི་འགོ་འཛིན་བསྐོས་ཐུབ་ལན་གཉིས་ཙམ་ཞུས་ཀྱང་བཀའ་ལན་གནང་མ་ཐུབ། ཕྱིས་སུ་དངོས་མཇལ་སྐབས་བསྐྱར་ཞུས་ཀྱི་ཚེ་འགོ་འཛིན་གཉེར་ཆེན་བསྐོ་རྒྱུའི་ཞལ་བཞེས་གནང་བས། ཕྱིས་གཉེར་ཆེན་པདྨ་ལེགས་གྲུབ་ལ་བཀའ་ཕེབས་པ་ཡིན་འདྲ། གཞན་ཡང་སྤར་ཤིང་ཇི་སྙེད་པའི་མཐུན་རྐྱེན། ལས་ཚན་བསྡུ་བཀོད་ལེགས་སྤེལ་ཉེས་གསུབ་སོགས་བཀའ་བཀོད་དང་བཀའ་ཤོག་སོགས་རྣམ་པ་ཀུན་ཏུ་བཀའ་དྲིན་བསྐྱངས་པ་ཡིན་ལ། པདྨ་ལེགས་གྲུབ་ནས་ལོ་བཞི་སོང་མཚམས་རྒྱལ་བློན་གྱི་བར་དུ་ཕྲ་མ་ཞུགས་པས་གཉེར་ཆེན་གཞན་ཡུལ་དུ་བགྲོད་པ་ན། གཏེར་མཛོད་ལུས་ཤོམ་གྱི་སྐབས་ནས་བཟུང་སྟེ་ལོ་གྲངས་གསུམ་ཙམ་ལ་ལས་ཚན་ལ་ཕོགས་ཆས་འབུད་ཤིང་བཅས་རྒྱལ་ཁབ་གཞུང་ནས་གནང་། དེ་མཚམས་རྗེ་མཁྱེན་བརྩེ་རིན་པོ་ཆེའི་བཀའ་དྲིན་གྱིས་ཕྲ་མ་བསལ་ནས་རྒྱལ་བློན་ཐུགས་ཡིད་གཅིག་འདྲེས་སྔར་ལྟར་གྱུར་ཀྱང་། གེགས་ཆག་ལྟ་བུས་གཉེར་ཆེན་བསྙུན་ཁམས་ཀྱིས་གྲོངས་པས་དེ་ནས་གཏེར་མཛོད་ལོ་གསུམ་ལ་ལུས་ཤིང་། དེ་རྗེས་སླར་ལོ་ལྔ་སྟེ་སྔ་ཕྱི་ལོ་བརྒྱད་ཙམ་ལ་ལས་ཚན་བྲིས་རྐོས་ལྔ་བཅུ་མན་ཉི་ཤུ་ཡན་ཅི་རིགས་ལ་ཕོགས་ཆས་རྒྱལ་ཁབ་གཞུང་ནས་གནང་སྟེ། ཟླ་
བ་བཞི་ནས་དྲུག་གི་བར་ཅི་རིགས་ལ་བརྐོ་བའི་བདག་རྐྱེན་མཛད་པས་བསྟན་འགྲོ་ཡོངས་ལ་ཕན་པའི་ཕྲིན་ལས་བླ་ན་མེད་པ་ཡིན་ནོ། །གཉེར་ཆེན་པདྨ་ལེགས་གྲུབ་ནི། རྗེ་མཁྱེན་བརྩེ་རིན་པོ་ཆེས་སྡེ་དགེའི་རྒྱལ་ཁབ་ལ་ཆོས་རྒྱལ་དུ་མ་བྱོན་ཀྱང་ཆོས་བློན་པདྨ་ལེགས་གྲུབ་འདྲ་བ་སུ་ཡང་མ་བྱུང་། འདི་ངེས་པར་གཏེར་ལུང་ལ་ཡོད་དགོས་པ་དང་། འགོས་པདྨ་གུང་བཙན་གྱི་སྐྱེ་བ་ཡིན་དགོས་སོགས་ཡང་ཡང་གསུངས་པར་ཐོས་པ་དང་། ཐུགས་གཏད་ཕྱོགས་ལ་བླ་ཆེན་ཞིག་ལས་ཀྱང་ཐུགས་རྩིས་ཆེ་བར་འདུག་ཅིང་། གཞན་ཆོས་སྤྱན་ལྡན་པའི་བླ་མ་མང་པོས་ཀྱང་དེ་ལྟར་ཐུགས་གཏད་པར་འདུག་པས་སྐྱེས་བུ་དམ་པ་ཞིག་ཡིན་འདྲ་སྙམ་པ་ལས་ལུང་བསྟན་སོགས་མ་མཐོང་ཡང་། བློན་པོ་མགར་རྒྱ་ནག་ཏུ་ཕྱིན་པ་ལྟ་བུའི་བློ་འཕྲུལ་གྱིས་བདག་པོ་ཆོས་རྒྱལ་ཡུམ་སྲས་ཡིད་སྲུབས་ཀྱི་ལག་ནས་བླངས་པ་དང་། ཆོས་རྒྱལ་ཆེན་པོ་ཟླ་བ་སྒྲ་གཅན་གྱིས་ཟིན་པ་ལྟ་བུའི་ཚེ་ན་སྐྱབས་མེད་ཀྱི་མངའ་འབངས་རྣམས་ཀྱི་རེ་ལྟོས་ཡུལ་གཅིག་པུར་གྱུར་པ་སོགས་ཆོས་རྒྱལ་ཆེན་པོའི་ཞབས་འདེགས་ཕུལ་དུ་བྱུང་བ་ནི་ཡོངས་ལ་གྲགས་པ་འདི་ལྟར་ཟད་ལ། དེར་མ་ཟད་རིས་མེད་ཀྱི་དགོན་སྡེ་བྱམས་པས་སྐྱོང་བ། ཁྲོམ་རྡོ་ཁོར་དགོན་རྟེན་བརྟེན་པར་བཅས་པ་གསར་བཞེངས། རྗེ་མཁྱེན་བརྩེ་རིན་པོ་ཆེའི་དགོངས་བཞེད་གསེར་གདུང་མཐོང་གྲོལ་ཆེན་མོ་གསར་བཞེངས། ལྷ་འབྲང་དགོན་དུ་ཚེས་བཅུ་སོགས་འདི་རིགས་ཕལ་ཆེ་བའི་རྒྱུ་རྩ་རང་ཉིད་ནས་གཏོང་
བ་དང་། རྗེ་བླ་མའི་བསྟན་བཅོས་ཤེས་བྱ་ཀུན་ཁྱབ་ཀྱི་འགྲེལ་པ་པོད་གསུམ་སྤར་དུ་བསྒྲུབས་པ་སོགས་ཆོས་སྤྱོད་ཀྱི་མཛད་པ་རྒྱ་ཆེ་ཞིང་། གཏེར་མཛོད་ཀྱི་འགན་བཞེས་དང་པོ་མིན་རྩིས་ཀྱང་ཕྱིས་སུ་གཉེར་ཆེན་ཉིད་ཀྱིས་འགན་དང་ལེན་ཡིན་ནམ་བདག་པོའི་བཀའ་ཕེབས་པ་དམིགས་བསལ་གང་ཡིན་མ་ངེས་པར་འགན་བཞེས་མཛད་ནས་ལོ་བཞིའི་ཚེ་ལ་གླ་ཆས་ཡོངས་རྫོགས་གནང་བར་མཛད་པ་ཡིན་ནོ། །དེ་ཡང་སྐབས་དེར་སྤར་རྐོས་ཤིན་ཏུ་ཉུང་བས་ཉི་ཤུ་ཡར་བརྒལ་མེད་པའི་གནས་སྐབས་ཡིན་ཀྱང་། གཉེར་ཆེན་འདིས་ཤེས་བྱ་ཀུན་ཁྱབ་པོད་གསུམ་སྤར་དུ་བསྒྲུབས་པས་སྤར་རྐོས་ལོ་རེ་བཞིན་ཇེ་མང་ལ་སོང་ནས་དེང་སང་ཉིས་བརྒྱ་ཙམ་གྱི་གྲངས་འདྲེན་པ་འདི་ནི་རིན་ཆེན་གཏེར་མཛོད་དང་གཉེར་ཆེན་འདི་ཉིད་ཀྱི་བཀའ་དྲིན་ཡིན་ཏེ་འོག་ཏུའང་ཅུང་ཟད་ཤེས་པར་འགྱུར་རོ། །གཉིས་པ་ཚུལ་ཇི་ལྟར་བསྒྲུབས་པ་ལ་གཉིས། སྒྲུབ་ཚུལ་དང་། སྒྲུབ་བྱེད་ཀྱི་ཞལ་འདེབས་བྱུང་ཚུལ་སྨྲོས་པའོ། །དང་པོ་ནི། རབ་བྱུང་བཅོ་ལྔ་པའི་ནང་གསེས་འཛིན་བྱེད་ཅེས་པ་མེ་ཕོ་བྱི་བའི་ལོ། སྨེ་ཕྲེང་དང་པོའི་བདུན་དམར་དབུས་ཞུགས་ཀྱི་ནག་པ་ཟླ་བ་ཙམ་ལ་དབུ་བཙུགས་ཏེ། སྤར་བརྐོ་གཞི་སྤར་ཤིང་ཀུ་སེ་ཕོ་བྲང་ནས་བསྡུ་འདྲེན་རིམ་སྦྱོར་ཐོག །ལས་ཚན་བྲི་རྐོས་ཕེར་ངེས་དྲུག་ཅུ་ཡར་བརྒལ་ཙམ་དང་སྦྱང་རྩོལ་བྱེད་མཁན་ཉི་ཤུ་ཙམ་ལའང་ཕོགས་ཆས་ཙམ་གནང་ནས་ཟླ་བ་དགུ་ཟད་ཀྱི་བར་དུ་བརྐོས། དགུན་ཁྱིམ་དུ་བརྐོ་རྒྱུ་ཡང་སྤར་རྐོས་རེ་ལ་ལྡེབ་བཅུ་སྐོར་རེ་དང་། བྲི་རྒྱུ་དེ་མཚུངས་
བསྐུར། ཕྱི་མའི་གླང་ལོར་ཟླ་བ་གཉིས་པ་ནས་ལས་ཚན་བསྡུས་ཏེ་སྤར་བྲིས་ལས་ཕེར་ངེས་བདུན་ཅུ་དོན་ལྔ་དྲུག་ཙམ་དང་། སྦྱང་རྩོལ་མཁན་བཅས་བརྒྱད་ཅུ་ལྷག་ཙམ་གྱིས་ཟླ་བ་དགུ་པ་ཟད་ཀྱི་བར་བྲི་བརྐོ་བགྱིས་པ་ཁྱིམ་སྤར་བསྐུར་བ་སོགས་སྔར་བཞིན། སྟག་ལོ་ཟླ་བ་གཉིས་པ་ནས་བརྩམ་སྟེ་བྲིས་རྐོས་ཕེར་ངེས་བརྒྱད་ཅུ་ལྷག་ཙམ་དང་། སྦྱང་རྩོལ་མཁན་བཅས་བརྒྱར་ཉེ་བས་ཟླ་བ་དགུ་པ་ཟད་ཀྱི་བར་སྔར་བཞིན། ཡོས་ལོར་ཟླ་བ་གཉིས་པ་ནས་བྲིས་རྐོས་ཕེར་ངེས་བརྒྱ་ཙམ་དང་། སྦྱང་རྩོལ་མཁན་བཅས་ཐམས་ཅད་བསྡོམས་པས་བརྒྱ་ལྷག་ཙམ་གྱིས་དགུ་པ་ཟད་ཀྱི་བར་དུ་བརྐོས་པ་ཡིན་ལ། དེ་དག་གི་ཚེ་གླ་ཆས་ཇི་སོང་དང་སྦྱང་རྩོལ་མཁན་རྣམས་ལའང་གླ་ཆས་གནང་བས། དེ་ལྟར་ལོ་བཞིའི་ཚེ་ཕྱག་རྫས་ཇི་སོང་ཞིབ་རྩིས་ཆོག་པའི་ཡི་གེ་ད་ལན་འདིར་མེད་ཅིང་ཡི་གེ་མང་བས་ཀྱང་འཇིགས་པའི་ཕྱིར་མ་སྤྲོས་ལ། ཕྱོགས་མཚོན་ཙམ་ནི་དེ་སྐབས་སུ་ནས་མར་ལྷག་པར་དཀོན་པས་ཚོད་རྩིས་ལྟར་བྱས་ན་ཟླ་བ་རེའི་ཕོགས་ཚྭ་ཤིང་ཡན་ཆད་མི་རེ་ལ་བར་གྲ་བག་ལྔ་རེ་ཙམ་འགྲོ་ངེས་འདུག་པ་དང་། ཡོན་ཟླ་བ་དྲུག་རེའི་ཚེ་བྲིས་པ་བཟང་གྲས་ལ་འཁོར་དྲུག་བཅུ་གཉིས་བཅུ་གསུམ་རེ་ཙམ། འབྲིང་གྲས་ལ་འཁོར་དྲུག་བརྒྱད་དགུ་རེ། ཐ་མ་རྣམས་ལ་ལྔ་དྲུག་རེ་ཡན། སྤར་རྐོས་བཟང་གྲས་ལ་འཁོར་དྲུག་བརྒྱད་རེ་ཙམ། འབྲིང་གྲས་ལ་དྲུག་རེ། ཐ་མ་རྣམས་ལ་བཞི་རེའམ་ལྔ་རེ་ཙམ་བབས་འདུག་པས། དེ་ལྟར་དཔྱད་ན་ཕྱོགས་མཚོན་ཙམ་ཤེས་
ནུས་སོ། །འབྲུག་ལོ་ནས་བརྩམ་སྟེ་སྤར་བྲིས་བཞི་བཅུ་ཙམ་ལ་ལོ་གསུམ་གྱི་བར་དུ་བདག་པོ་གཞུང་ནས་ཕོགས་ཆས་གནང་སྟེ་ཟླ་བ་ལྔ་རེ་ཙམ་དང་དྲུག་རེ་བཞི་རེ་ཅི་རིགས་ཀྱི་བར་དུ་བརྐོས་ཏེ། དེ་རྗེས་ལྷ་འབྲུམ་སོགས་ཀྱི་སྟབས་ལོ་ཤས་ལུས་ཤིང་། ཡང་ཁྱི་ལོ་ནས་བརྩམ་ལོ་ལྔའི་བར་དུ་སླར་ཡང་བདག་པོ་གཞུང་ནས་ཕོགས་ཆས་སོགས་སྔ་མ་ལྟར་གནང་སྟེ་ལས་ཚན་ཉི་ཤུ་ཡན་ནས་ལྔ་བཅུ་མན་གྱིས་ཟླ་བ་བཞི་ནས་དྲུག་གི་བར་ཅི་རིགས་ལ་བྲི་བརྐོ་བྱས་པ་གོང་དུ་ཡང་ཅུང་ཟད་སྨྲོས་པ་ལྟར་དང་། ཁྱིམ་སྤར་ཡང་ཉུང་ཤས་བསྐུར་བ་ཡིན་ཅིང་། དེ་དག་གི་སྐབས་སུ་གཞུང་རིན་པོ་ཆེའི་ཕྱག་རྫས་ཇི་སོང་ནི་གོང་དུ་སྨྲོས་པས་ཤེས་ནུས་ལ། གྲངས་སུ་བཏབ་ན་ལོ་རེ་ལའང་རྒྱ་ཆེན་པོ་འགྲོ་བར་མཐོང་སྟེ། མི་ལྔ་བཅུ་ལ་ཟླ་བཞིའི་ཕོགས་ཙམ་ལའང་ནས་ཁོ་ན་ཁལ་ཉིས་བརྒྱ། རྒྱུག་ཁྲ་ཞོ་གསུམ་རེ་གནང་བས་ཕྱེད་ཉིས་བརྒྱ་སྟེ་ཁལ་སུམ་བརྒྱ་དང་ལྔ་བཅུ་འགྲོ་བ་ཡིན་པས་དེས་མཚོན་ཏེ་ཤེས་པར་བྱའོ། །གཉིས་པ་སྒྲུབ་བྱེད་ཀྱི་ཞལ་འདེབས་བྱུང་ཚུལ་ནི། གོང་སྨྲོས་ལྟར་དཔལ་སྤུངས་དབོན་སྤྲུལ་རིན་པོ་ཆེ་བླ་གྲ་ནང་གཡེང་མ་བྱུང་ན་སྤར་ཚང་མའི་སྒྲུབ་རྟེན་འབུལ་རྩིས་མཛད་མོད། འོན་ཀྱང་གཞན་དབང་དུ་གྱུར་རུང་། སྐུ་བཞུགས་སྐབས་སྟོང་ཇ་གཅིག་དང་འཁོར་དྲུག་སུམ་བརྒྱ་ནོན་ངེས། ཞིང་གཤེགས་རྗེས་སྐུ་ཆས་གྲས་ནས་སྟོང་ཇ་ཕྱེད་གཉིས་ལྷག་ཙམ་བཅས་གཉེར་པདྨ་ལེགས་གྲུབ་ཕྱག་ཏུ་ཕུལ་བས་མ་རྩ་བྱས་ནས། སྐྱབས་རྗེ་འཇམ་དབྱངས་མཁྱེན་བརྩེའི་དབང་པོའི་མདུན་ནས་དངུལ་
རྡེལ་ཚད་ལྔའི་བབ། དཔལ་ཡུལ་རྒྱ་སྤྲུལ་རིན་པོ་ཆེའི་མདུན་ནས་རྡེལ་ཚད་བཅུའི་བབ། ལྷ་འབྲང་སྤྲུལ་སྐུ་རྣམ་གཉིས་ནས་རྡེལ་ཚད་ལྔའི་བབ། རྫོགས་ཆེན་མཁན་པོ་དཀོན་མཆོག་འོད་ཟེར་ནས་དངུལ་སྲང་ཉེར་ལྔ། ལྕགས་ལ་མཁན་སྤྲུལ་ནས་བརྒྱད་པ་འཁོར་དྲུག་ལྔ་བཅུ་བཅས་པད་ལེགས་ཕྱག་ཏུ་ཕུལ། དེ་རྗེས་ཀཿཐོག་རྨོག་སྤྲུལ་རིན་པོ་ཆེས་རྡེལ་ཚད་གསུམ་གྱི་བབ། ཞེ་ཆེན་སྤྲུལ་སྐུ་རྣམ་གཉིས་ནས་རྡེལ་ཚད་གསུམ། གླིང་རྗེ་དྲུང་སྤྲུལ་སྐུའི་རྡེལ་ཚད་གསུམ། དཔལ་སྤུངས་པའི་ཆོས་རྗེ་བླ་མ་གསལ་བྱེད་ནས་དངུལ་སྲང་ཉེར་ལྔ། རྟ་གསུམ། བསྟན་པ་ཡོངས་རྫོགས་ཀྱི་སྦྱིན་བདག་ཨ་ཐུབ་ལ་དཀར་ཚང་ནས་ཇ་བརྒྱད་ལོག་འཁོར་དྲུག་བརྒྱ་ཐམ་པ། འབའ་སྤྲུལ་རིན་པོ་ཆེ་ཐུབ་བསྟན་ཆོས་དཔལ་རྒྱ་མཚོ་དང་རྡོར་སློབ་པདྨ་ནོར་བུ་བཅས་ཧོར་སྟོད་སྨད་ཞལ་འདེབས་འབུལ་སྡུད་མངགས་པའི་སོ་སོ་ནས་ཇ་འཁོར་དྲུག་བརྒྱ་རེ་ཙམ་དང་། གཞན་ཡང་དངོས་པོ་ཕྲ་མོ་ཅི་རིགས་བྱུང་བ་རྣམས་ལས་གོང་གསལ་ཕལ་ཆེར་དམར་ཟོང་འདྲེས་མ་རྟ་ཁལ་སོགས་ཅི་རིགས་འདུག་ཀྱང་། ཀཿཐོག་དང་ཞེ་ཆེན་པ་བླ་མ་གསལ་བྱེད་སྐོར་ནས་གཉེར་ཆེན་བཀྲ་ཤིས་དགེ་ལེགས་ཕྱག་ཏུ་ཕུལ་ནས་ལས་ཚན་ལ་སྤྲད། གླིང་རྗེ་དྲུང་དང་འབའ་སྤྲུལ་སྐོར་གྱི་རྗེ་བླ་མའི་ཕྱག་ཏུ་ཕུལ་ནས་གནང་བ་ལྟར་སོ་སོར་བཀའ་འཛིན་ལྟར་ར་སྤྲད་ནས་བྱིན། ལ་དཀར་ཚང་གི་ཇ་ལོག་འཁོར་དྲུག་བརྒྱ་ཐམ་པ་ཕག་ལོ་བྱི་ལོ་གཉིས་ཀྱི་ཡོན་ཐོབ་བརྩིས་ནས་བདག་གིས་སྤྲད་པ་སྟེ། དེ་ལྟར་དངོས་པོ་ཐམས་ཅད་དགེ་
རྩར་སྨིན་ངེས་སུ་ཕྱོགས་ཐམས་ཅད་ནས་སོང་བ་ཡིན་ནོ།། ༈ །།ལྕགས་སྟག་ལོར་ཞུ་ཆེན་ལྷག་བསམ་རྒྱལ་མཚན་བོད་དུ་རྒྱལ་དབང་ཀརྨ་པའི་ཞབས་འདེགས་སུ་བྱོན་དགོས་བྱུང་སོང་བའི་རྗེས་ཤིང་རྟའི་བར་གྱི་དབྱར་ངོ་གསུམ་ཙམ་ལ་སྤར་གྱི་འཕྲོས་རྣམས་སྔ་རྒྱུན་ལྟར་བརྐོས་སྐབས། རྫོགས་ཆེན་མཆོག་སྤྲུལ་རིན་པོ་ཆེའི་མདུན་ནས་དམར་ཟོང་རྡེལ་ཚད་ལྔ། ངེད་རང་གིས་ཇ་དངུལ་རྡེལ་ཚད་བཅུ། ཟོང་རྩ་རྡེལ་ཚད་བདུན་བཅས་སྔ་མ་རྣམས་ཀྱི་འགྲིགས་ལྟར། རྗེས་མ་རྣམས་ཞུ་དག་འཕྲོ་སྐྱོང་མཁས་དབང་བླ་མ་བཀྲ་འཕེལ་དང་ཀརྨ་ཚེ་དཔལ་གཉིས། སྤར་འདིའི་ཐོག་མཐའ་ཀུན་གྱི་དོ་དམ་པ་དགེ་བ་ལ་ཡིད་གཞུངས་པ་དབང་ཕྱུག་རྣམས་ཀྱི་ལག་བརྒྱུད་ལས་ཚན་སོ་སོ་ལ་སྤྲད་ནས་མཐར་དབྱུང་བ་ཡིན་ཅེས་གུ་ཎ་པས་སོ།། ༈ །།རྣམ་དཀར་སྒོ་ཆེན་ཐོག་མར་དབྱེ་བའི་དབུ་ཚུགས་སྐབས་གཉེར་ཆེན་པདྨ་ལེགས་གྲུབ་ཀྱིས་ཞུ་རྟེན་དང་བཅས་ས་སྐྱོང་ཆོས་ཀྱི་རྒྱལ་པོའི་མདུན་དུ་སྙན་སྒྲོན་ཕུལ་བ་བཞིན། བྲིས་རྐོས་ལས་ཚན་རྣམས་ལ་རང་གཞིས་སུ་རྐང་འགྲོའི་ཁྲལ་རིགས་ཆེ་ཕྲ་ཆག་ཡངས་ཀྱི་བདག་རྐྱེན་བྱུང་བར་རྒྱུ་འབྲས་ལ་རྨོངས་པའི་གཏི་མུག་ཅན་རྣམས་ཀྱིས་ཟུར་ཟ་ཆེ་ཡང་དགེ་རྩའི་རྒྱབ་སྐྱོར་ཐོག །རྟེན་བཞེངས་མཐར་ཕྱིན་གྱི་ཉེར་ལེན་དུ་སོང་བ་ཞར་བྱུང་གི་འཕྲོས་དོན་ནོ།། །།གསུམ་པ་ཞུ་དག་བྱས་ཚུལ་མདོ་ཙམ་བརྗོད་པ་ནི། འདི་ལྟ་བུའི་ཆོས་མཛོད་ཟབ་ཅིང་རྒྱ་ཆེ་བ་དཔྱད་པ་གསུམ་གྱིས་དག་པར་གཏན་ལ་འབེབ་ནུས་པ་ནི་རྗེ་བླ་མ་རྣམ་གཉིས་ཉིད་མ་གཏོགས་
གཞན་གཏན་ནས་མི་སྲིད་པ་ཡིན་པས། རྒྱུ་མཚན་དེས་ན་གཉེར་མཛོད་ཚེ་རིང་དོན་གྲུབ་དཔལ་སྤུངས་པའི་འཁྲུན་གཅོད་ལ་བྱོན་སྐབས་འདིའི་ཞུ་དག་གི་ཁུར་ལེན་བདག་ལ་དགོས་ཚུལ་བཀའ་ནན་ཕེབས་ཀྱང་། བདག་བསྟན་པ་རིན་པོ་ཆེར་མཐའ་གཅིག་ཏུ་གུས་ཤིང་བླ་མའི་ཞབས་འདེགས་སུ་འགྱུར་ན་རེ་བ་དེ་བས་ཆེ་བྱར་མེད་པར་ཤེས་ཀྱང་། བདག་ཉིད་བློ་གྲོས་ཀྱི་མིག་བུ་ཕྲ་ཞིང་། ཁྱད་པར་ཟབ་ཅིང་རྒྱས་ལ་བཀའ་ཆེས་གཉན་པ་འདི་ལྟ་བུ་བདག་གི་ཡུལ་མ་ཡིན་པས་དང་། ལས་སུ་བྱ་བ་རྒྱ་ཆེ་བས་མཐར་ཕྱིན་པར་དཀའ་བ་དང་། ལས་ཚན་ལ་སོགས་པ་སྐྱེ་བོ་མང་པོ་འདུས་པ་དུས་ཡུན་རིང་པོར་ཆེས་མཐུན་པར་དཀའ་བ་ལ་སོགས་པའི་རྒྱུ་ལ་བསམས་ནས་བཀའ་དང་དུ་ལེན་པར་མ་ནུས་ཤིང་། དེ་རྗེས་གཉེར་ཆེན་པདྨ་ལེགས་གྲུབ་པས་ཤེས་བྱ་ཀུན་ཁྱབ་པོད་གསུམ་སྤར་དུ་གྲུབ་སྐབས་བླ་མ་འཇམ་དབྱངས་ཡོན་ཏན་སོགས་མཁས་པ་མང་པོ་ལ་ཞུ་རྟེན་གྱི་མེ་ཏོག་རྒྱ་ཆེ་བ་བཅས་འདི་ཞུ་དག་རོགས་ཞུས་པ་ཡིན་ཀྱང་དོན་བཞིན་སྨིན་པ་མ་བྱུང་། ད་ཆ་ཁྱོད་ཀྱི་བླ་མའི་བསྟན་བཅོས་ཡིན་བཞིན་ཁྱོད་ནས་ཞུ་དག་སོགས་ཅི་ནས་གལ་ཆེ། དེ་ལྟ་མིན་ན་སྤར་གྲུབ་ཀྱང་གདབ་མི་ལོ་བས་ཤིང་བརྩེགས་ཀྱི་ཕུང་པོ་འདི་ལྟར་བསྐྱུར་བ་ལས་ད་ནི་ཞུ་དག་བྱེད་མཁན་མི་རྙེད་ངོ་མ་རེད་ཚུལ་སོགས་ཐུགས་ཡིད་མུག་པའི་ཚུལ་བཅས་བཀའ་ཕེབས་པ། པོད་གསུམ་ཁོ་ན་ཡིན་སྟབས་ཅུང་དྲགས་བསམས་ནས་དམ་པའི་བཀའ་གཅོག་པར་མ་ནུས་ཏེ་དགུན་ངོས་ལ་ཞུ་དག་བྱེད་མདོག་བྱས། དེ་
སྐབས་གཉེར་ཆེན་རང་གཏེར་མཛོད་ཀྱི་འགན་བཞེས་ཡིན་རྩིས་ཀྱི་དུས་ཡིན་ཀྱང་། ལྷུན་གྲུབ་སྟེང་ནས་ཕྲན་ཚུར་འོང་ཁར་གཉེར་ཆེན་པའི་གསུང་ལས། ངས་རིན་ཆེན་གཏེར་མཛོད་ལ་འབྲེལ་འཇོག་ཙམ་བྱུང་ན་པོད་གཉིས། མ་བྱུང་ཡང་པོད་གཅིག་ངེས་པར་བརྐོ་རྒྱུ་ཡིན་པས་དེ་ཙམ་གྱི་ཞུ་དག་ད་དུང་ཡང་མ་འཆུགས་དགོས་གསུངས་པ། ཞུ་དག་ཟེར་བ་འདི་སུས་ཀྱང་མི་ཐོན་ངོ་མ་ཡིན་ཚུལ་སོགས་རྒྱུ་མཚན་མང་དུ་ཞུས་ཀྱང་ཡང་ནན་མཐར་པོད་གཅིག་ཙམ་ཨི་ཐོན་ལྟ་ཚུལ་ཞུས། དེ་རྗེས་ཕྱི་ལོ་གཏེར་མཛོད་ཀྱི་འགན་ལེན་ལ་ཆེན་པོ་རྣམས་ཀྱིས་ཕར་འཕེན་ཚུར་འཕེན་ཅི་རིགས་བྱས་ཚོད་མཐར་གཉེར་ཆེན་རང་ནས་འགན་བཞེས་རྒྱུ་དང་ལས་གྲ་ཚོགས་རྒྱུ་རེད་འདུག་སྐབས། བཀྲ་ཤིས་གནས་ནང་དུ་དད་འབྱོར་ལྡན་པ་རྒ་རྗེ་གྲོ་རྡོག་ནས་ཡོན་བདག་བྱས་ཏེ་རྗེ་བླ་མ་དབུ་བཞུགས་ཀྱིས་བཀའ་བརྒྱད་སྨན་སྒྲུབ་བཙུགས་པའི་དབང་གི་སྐབས་སུ། གཉེར་ཆེན་ཡང་བྱོན་པ་མཆོད་ཡོན་དགོངས་མཐུན་གྱིས་ཞུ་དག་དགོས་ཚུལ་ཕྲན་ལ་བཀའ་ཕེབས་པ་ན་དགོངས་པ་ཚོམ་དོགས་ཀྱིས་ཞུ་བ་ཕུལ་མ་སྤོབས་པར་དང་ལེན་ཞུས། དེ་ལོ་ནས་བརྩམ་སྟེ་སྔ་ཕྱི་ལོ་བཅུ་གཅིག་གི་རིང་ལ་ཅི་ཤེས་གང་ཤེས་ཞུ་དག་བྱས་ཁུལ་དང་། སྔ་ཆར་མེ་བྱི་ལོར་རང་གི་སྤུན་ཟླ་ཀརྨ་ཚེ་དཔལ་ནས་ཞུ་དག་མགོ་བཟུང་དབྱར་ངོ་གཅིག་ཙམ་ཐོག་གཞན་རྐྱེན་གྱིས་བཤོལ། ལོ་རྗེས་མར་ཟླ་ངོ་གསུམ་ཙམ་གྱི་བར་སྐྱབས་ཆེ་བསོད་ཆོས་སྤྲུལ་སྐུ་ཡོད་ཀྱང་། ཕྱིས་སུ་འདོན་མཁན་གཅིག་མ་གཏོགས་གཞན་གྲོགས་དན་སུ་ཡང་མེད་པར་བདག་ཁོ་ནས་ཅི་
རིག་ཅི་ཤེས་བལྟས་པ་ཡིན་པས་མ་རིག་པ་དང་མ་ཤེས་པ་སོགས་རྒྱ་ཆེན་པོ་ཡོད་པ་གཞིར་བཅས། བཀའ་འགྱུར་དང་བསྟན་འགྱུར་རིན་པོ་ཆེ་རྣམས་ཞུ་ཆེ་ཆུང་དཔོན་གཡོག་ཉི་ཤུ་རེ་ཙམ་གྱིས་ཞུ་དག་བྱས་པ་ཡིན་འདུག་ཀྱང་ད་དུང་མ་དག་པ་ཡོད་པའི་ཕྱིར་རོ། །དེ་ལྟ་མོད་ཀྱི་བྱས་ལོ་ཙམ་དང་འདི་ཙམ་མ་དག་ཀྱང་སླ་སྙམ་པ་ལྟ་བུའི་ཆོག་བཟོད་མ་བྱས་པར་ཤེས་ནུས་ཀྱི་རྩལ་ཅི་ཙམ་ཡོད་པ་དེ་ཙམ་དུ་འབད་པ་བརྒྱ་ཕྲག་དུ་མས་བརྩོན་པར་བྱས་པ་ཡིན་ཅིང་། དེ་ཡང་མ་དཔེ་ཕལ་མོ་ཆེ་ལའང་དོན་གྱི་གནད་བཅོས་སུ་མི་སྤོབས་ཀྱང་ཚིག་མ་བཅོས་ཐབས་མེད་མང་པོ་སྣང་བ་རྣམས་ནི་བཅོས་པ་དང་། མ་དཔེའི་སྟེང་དུ་ཆད་ལྷག་ཀྱང་ཤིན་ཏུ་མང་བས་ལྷག་པ་ཅུང་ཤེས་སླ་ཡང་ཆད་པ་ཤིན་ཏུ་ངེས་དཀའ་ཞིང་དཔེ་གཞན་བསྡུར་གཞིའང་མ་རྙེད་པ་དང་། རྙེད་ཀྱང་དཔེ་རྙིང་ཕལ་ཆེར་འདྲ་མིན་མང་བས་རྣམ་དག་གང་ཡིན་དཔྱད་དཀའ་བ་དང་། སྔགས་ཡིག་ལ་སོགས་པའི་མན་ངག་གི་སྐོར་ཕལ་ཆེར་གབ་དཀྲུགས་དང་། ཕལ་ཆེར་གྲོང་སྔགས་པ་རྣམས་ཀྱི་ལག་ཁྱེར་དུ་སོང་བས་ཉམས་ཀྱང་གནད་ཇི་བཞིན་འབྱེད་དཀའ་བ་རྣམས་ནི་ཤིན་ཏུ་ངེས་པར་དཀའ་བས་རྗེ་བླ་མར་བཀའ་འདྲི་ཞུས་པ་སོགས་ཀྱི་སྒོ་ནས་ཤེས་པ་རྣམས་བཅོས། གཏན་ནས་མ་ཤེས་པ་རྣམས་རང་སར་གཞག་པ་ལས་བྱ་ཐབས་བྲལ་བ་དང་། ཕྱིས་ཀྱི་གཏེར་གསར་སྐོར་ལའང་གཏེར་ཆེན་རང་རང་གི་སྤྱན་ལམ་དུ་སོང་བ་རྣམས་ནི་དག་པ་ཡིན་འདྲ་རུང་། དཔེ་བཅད་ནས་བྲིས་པའི་སྐོར་ཕལ་ཆེ་བ་ནི་བུ་དཔེ་ཚར་རེ་བྲིས་པ་ལའང་སྐྱོན་
ཆེན་པོ་བྱུང་འདུག་པ་དེ་རིགས་ཤེས་ངེས་རྣམས་འཆོས། གཞན་སྔ་འགྱུར་རང་ལུགས་ཀྱི་བརྡ་ཆད་དང་སྔགས་སོགས་རྟོག་གེས་བཟོ་བཅོས་མི་རུང་བས་རང་སར་བཞག་སྟེ། སྤར་གཞི་བྲིས་ཟིན་པའི་ཚེ་དཔེ་བསྡུར་ཞིབ་ཆ་བྱས་ནས་འཆོས་རྟགས་ཕོག་རིགས་བྲིས་པ་ལ་བཅོས་རྒྱུ་གཏད་ནས་བཅོས་ཚར་ཚེ་བཅོས་ནོར་སོགས་བྱས་སམ་མ་བྱས་ཞིབ་ཏུ་བལྟས། བརྐོས་ཟིན་པ་ལ་དཔེ་བསྡུར་ཞིབ་ཆ་ཚར་རེ་དང་། དེ་རྗེས་འཆོས་ནོར་བྱས་པ་དང་སྔར་མ་མཐོང་བ་རྣམས་ལ་ཞིབ་དཔྱད་ཀྱིས་ཚར་གཉིས་རེ་སྟེ་ཚར་གསུམ་རེ་ཞུ་དག་བྱས་པ་ཡིན་ལ། གཞན་ཡང་སྤར་གཞི་སྐབས་འབྲུ་ཆེ་ཆུང་དང་བཟང་ངན། སྤར་རྐོས་རྣམས་ཀྱི་ལས་ཀ་གྲུལ་ཐུབ་མ་ཐུབ་དབྱེ་འབྱེད་བསྒོ་སྦྱང་སོགས་མདོར་ན་ཆུ་ཁའི་མཉན་པ་གྲུ་སྒྲོལ་བ་བཞིན་འབད་རྩོལ་དྲག་པོ་བྱས་པ་ཡིན་ནོ། །དེ་ལྟར་འབད་པས་སྒྲུབ་པའི་ཚེ་ཀུན་ཏུ་ལས་ཚན་ལ་འཆི་བ་སོགས་ཀྱི་མཚོན་ཏེ་གློ་བུར་དྲག་པོ་མ་བྱུང་ན་ཡང་། ཤེར་ཕྱིན་སྡུད་པར། རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བའང་མང་། །ཞེས་དང་། ཆོས་ཇི་ཙམ་ཟབ་པ་དེ་ཙམ་དུ་བདུད་ཀྱི་བར་ཆད་ཀྱང་འཇུག་པར་ལུང་རྣམས་ནས་གསུངས་པ་བཞིན། ལེགས་བྱས་ཀྱི་འཕྲོ་ལུས་པར་ཉེ་བ་ལན་གྲངས་བྱུང་ཡང་རྗེ་བཙུན་བླ་མ་མཁྱེན་བརྩེ་ནུས་པའི་བདག་ཉིད་ཅན་རྣམ་པ་གཉིས་ཀྱི་བཀའ་དྲིན་གྱིས་བར་ཆད་ཀྱིས་མ་ཚུགས་པར་ཕྱོགས་ཐམས་ཅད་ལས་རྣམ་པར་རྒྱལ་བ་ཡིན་ནོ། །སྐབས་འདིར་དེ་ལྟར་སྤར་དུ་བསྒྲུབས་པའི་ཕན་ཡོན་འཆད་པར་རིགས་མོད་ཀྱི། བཀའ་འགྱུར་དང་བསྟན་
འགྱུར་རྙིང་རྒྱུད་ལ་སོགས་པའི་དཀར་ཆག་རྣམས་སུ་གསལ་བས་འདིར་ཡི་གེ་མང་གིས་དོགས་ནས་མ་བྲིས་ལ། ཁྱད་པར་གསང་སྔགས་ནང་རྒྱུད་སྡེ་གསུམ་ནི་ཆོས་གཞན་ལས་ཕན་ཡོན་དང་བྱིན་རླབས་ཆེ་བར་ལུང་ལས་འབྱུང་ཞིང་རིགས་པས་གྲུབ་པ་སྟེ། ཐེག་པ་ཐམས་ཅད་ཀྱི་བླ་ན་མེད་པ་ཡིན་པའི་ཕྱིར་རོ། །གཞན་ཡང་ཟབ་མོའི་གཏེར་ཁ་སོ་སོའི་གཞུང་པོད་རྣམས་སུ་གླེགས་བམ་བཞུགས་པའི་ས་ཕྱོགས་དེར་ནད་མུག་དང་དུས་ཀྱི་འཁྲུག་རྩོད་ཞི་ཞིང་། ཆར་ཆུ་དུས་སུ་འབེབ། མི་ནད་དང་ཕྱུགས་ནད་རྒྱུན་ཆད། ལོ་ཕྱུགས་རྟག་ཏུ་ལེགས། རིག་འཛིན་བླ་མ་རྣམས་ཀྱིས་བྱིན་གྱིས་རློབ། ཡི་དམ་ལྷ་ཚོགས་ཀྱིས་དངོས་གྲུབ་སྟེར། དཔའ་བོ་མཁའ་འགྲོ་སྤྲིན་ལྟར་འདུ། ཆོས་སྐྱོང་སྲུང་མས་རྟག་ཏུ་སྲུང་ཞིང་སྐྱོབ་པ་སོགས་རྒྱ་ཆེར་འབྱུང་ཡང་འདིར་མཐའ་གཅིག་ཏུ་བསྡུ་མི་ནུས་པས་གཏེར་གཞུང་རྡོ་རྗེའི་གསུང་རྣམས་ལས་ངེས་པར་བྱ་བའོ།། །།དུང་དང་པད་རྩ་ཟླ་བའི་རྗེས་འགྲོ་ལེགས་བྱས་འོ་མའི་ཆུ་གཏེར་གཡོ་བ་གང་། །གཞི་སྣང་གདོད་མའི་མགོན་པོའི་དགོངས་ཀློང་རྒྱ་མཚོ་ཆེན་པོར་རོ་གཅིག་འདྲེས་པ་ལས། །འཁྲུལ་པ་གཞི་ལ་དག་པ་རང་རིག་འོད་གསལ་བདེ་ཆེན་རྡོ་རྗེའི་གར་མཆོག་གིས། །དུས་གསུམ་དག་གིས་སྐྱེ་ཞིང་སྡུད་པའི་འགྲོ་ཀུན་དུས་མེད་དབྱིངས་སུ་རྩེན་གྱུར་ཅིག །འདིར་འབད་དགེ་ཚོགས་མཐའ་དག་ཅི་མཆིས་པས། །རྗེ་བཙུན་རྣམ་གཉིས་ཞབས་པད་བསྐལ་བརྒྱར་བརྟན། །འོད་གསལ་རྡོ་རྗེ་ཐེག་པའི་ཆོས་འཁོར་བསྐོར། །བདག་སོགས་ཆོས་མཐུན་
བསམ་པ་ལྷུན་གྲུབ་ཤོག །ཅེས་པའི་ཚུལ་ཤིན་ཏུ་ཉུང་ངུར་བསྡུས་པ་འདི་ནི་བདག་ཅག་གི་མགོན་གཅིག་རྗེ་བླ་མ་༧ཀརྨ་ངག་དབང་ཡོན་ཏན་རྒྱ་མཚོས་མདོར་བསྡུས་འདི་ལྟ་བུ་ཞིག་བྲིས་ཞེས་བཀའ་བསྩལ་གྱི་ཅོད་པན་སྤྱི་བོར་གནང་བ་གུས་པས་མཆོད་དེ། མགོན་པོ་གང་གི་བཀའ་འབངས་པ་ལྷག་བསམ་བསྟན་པའི་རྒྱལ་མཚན་ནམ་ཀརྨ་སྨོན་ལམ་འོད་ཟེར་གྱིས་རྫོང་གསར་བཀྲ་ཤིས་ལྷ་རྩེར་སྦྱར་པ་དགེ་ལེགས་འཕེལ།། ༈ །།ན་མོ་གུ་རུ་པདྨ་པྲ་བྷ་སྭ་ར་སཱུ་ཏྲ་མནྟྲ་དྭཱི་པ་ཡ། ཁྱད་ཆོས་དྲུག་ལྡན་གདོད་མའི་མགོན་པོ་རྡོ་རྗེ་སེམས་དཔའ་བདེ་བ་ཆེ། །གཅིག་དང་དུ་མ་ལས་འདས་ངང་ནས་ཞི་ཁྲོ་རབ་འབྱམས་སྤྲིན་ཕུང་འཕྲོ། །དུས་གསུམ་དུས་མེད་མཉམ་བརྡལ་ཆེན་པོར་སྲིད་ཞི་མཉམ་པ་ཉིད་གཟིགས་པ། །འགྲོ་ཁམས་གློ་བུར་དྲི་མ་འཁྲུད་མཁས་ལྷག་པའི་ལྷ་དེས་དགེ་ལེགས་སྩོལ། ༡ །ཀུན་ཏུ་བཟང་པོའི་སོར་རྟོག་ཡེ་ཤེས་དཔག་མེད་བདེ་ལྡན་ཞིང་གི་མགོན། །ཐུགས་རྗེའི་རང་གཟུགས་ཧྲཱིཿཡིག་གང་ཆེན་མཚོ་སྤྲིན་ཆོས་དབྱིངས་མཐར་གཡོས་པ། །རང་བྱུང་མཚོ་ལས་སྐྱེས་པའི་རྡོ་རྗེར་རྣམ་པར་འཕྲུལ་པའི་གྲགས་སྙན་ཕུལ། །ཞིང་ཁམས་རྒྱ་མཚོའི་མུ་ཁྱུད་རྣམས་སུ་སྲས་བཅས་རྒྱལ་བས་ངོ་མཚར་གླེང་། ༢ །སྟོན་པ་ཉིད་ལས་མི་གཞན་ཆོ་འཕྲུལ་རྒྱལ་རྣམས་དགོངས་ཀློང་གཅིག་ཉིད་ལས། །ལོངས་སྤྱོད་ཡོངས་རྫོགས་བཞིན་གྱི་སྣོད་དུ་བརྡ་ཐབས་རྣམ་པ་ཐམས་ཅད་དངོས། །རིག་འཛིན་རྩལ་འཆང་སྙན་དུ་བརྒྱུད་བཅས་ཐེག་མཆོག་སེང་གེའི་ང་རོ་ཡིས། །འཇིག་རྟེན་ཇི་སྙེད་ཁོར་ཡུག་ཁྱབ་
པ་རྟག་པ་རྒྱུན་གྱི་རང་བཞིན་ཉིད། ༣ །སྟོན་པ་རྡོ་རྗེ་ཆོས་ཀྱི་ཚུལ་བཟུང་གསང་ཆེན་བཀའ་བསྡུའི་ཕྲིན་ལས་དབྱིག །འཇིག་རྟེན་གསུམ་དུ་འདྲེན་པའི་ཤིང་རྟ་ཟུང་འཇུག་གྲུབ་པ་རྣམ་མང་གིས། །མི་མཇེད་ཞིང་དུ་སྣང་བར་མཛད་མོད་དབུས་འགྱུར་འཆང་བ་བསིལ་ལྡན་ཁྲོད། །སྐལ་བཟང་གདུལ་བྱའི་གསོས་སུ་བབས་འདི་རྒྱལ་དབང་མཚོ་སྐྱེས་བླ་མའི་དྲིན། ༤ ཁྱད་པར་རྒྱལ་བ་ཡོངས་ཀྱི་ཐུགས་བཅུད་རྒྱུད་དང་སྒྲུབ་སྡེའི་མན་ངག་གིས། །སྐལ་ལྡན་རྗེ་འབངས་སྨིན་པར་མཛད་ནས་མ་འོངས་གདུལ་བྱའི་དོན་ཆེན་ཕྱིར། །ཟབ་གཏེར་སྒོ་འཕར་བྱེ་བ་ཕྲག་བརྒྱས་ནོར་འཛིན་ཁྱོན་ཀུན་གཏམས་ལ་སོགས། །བསམ་གྱིས་མི་ཁྱབ་རྫུ་འཕྲུལ་མཐུ་ཡིས་གདོད་མའི་གསེང་ལམ་ཅི་བདེར་བཏོད། ༥ །དུས་བབས་སྤྲུལ་པའི་གཏེར་འབྱིན་དུ་མས་རླབས་ཆེན་འགྲོ་དོན་སྤེལ་བ་ནས། །མཆོག་ཐུན་དོན་གཉེར་རྣལ་འབྱོར་བགྲང་ཡས་སློབ་དང་མི་སློབ་ཟུང་འཇུག་གི། །རྒྱལ་ཁབ་མཐོན་པོར་གཤེགས་པའི་ལམ་བཟང་སླར་ཡང་གཅིག་ཏུ་སྤུངས་པའི་མཛོད། །པདྨའི་ཞལ་སྐྱིན་ཟུང་གིས་བགྲོས་འདི་དུས་གསུམ་འབྱོན་སྲིད་མ་ལགས་གྲང་། ༦ །འཕོ་ཆེན་འཇའ་ལུས་རྡོ་རྗེའི་སྐུ་ཅན་པདྨ་འབྱུང་གནས་དྲི་མེད་བཤེས། །ཚངས་པ་ལྷ་ཡི་མེ་ཏོག་དངོས་བྱོན་སྙིགས་དུས་གདུལ་བྱའི་མགོན་གཅིག་པུ། །བཀའ་བབས་མཛོད་ཆེན་བདུན་གྱི་མངའ་བདག་པདྨ་འོད་གསལ་མདོ་སྔགས་གླིང་། །སྤྲུལ་པའི་གཏེར་སྟོན་གྲུབ་ཐོབ་རྒྱ་མཚོའི་འཁོར་ལོས་སྒྱུར་བ་ཉིད་དུ་གྲུབ། ༧ །སྟོན་པ་རྒྱལ་བ་ཉི་མའི་གཉེན་གྱི་ཚངས་
དབྱངས་ལུང་གིས་བསྔགས་པའི་ཡུལ། །མཚོ་སྐྱེས་ཀུན་ཏུ་འཆང་བ་ཆེན་པོས་དགོངས་སྤྱོད་མཉམ་པར་ཞལ་འཆེས་པ། །རྣམ་སྣང་ལོ་ཙཱ་བློ་གྲོས་མཐའ་ཡས་འཆི་མེད་བསྟན་གཉིས་གླིང་པ་རྗེ། །གསང་བའི་བདག་པོའི་གསང་བ་འཛིན་ལ་འགྲན་ཟླ་སྤངས་པའི་རྣམ་ཐར་འཆང་། ༨ །རིགས་གསུམ་སྤྲུལ་པའི་སེམས་དཔའ་གསུམ་གྱི་རྣམ་རོལ་མཆེད་པོར་ཡོངས་གྲུབ་པས། །སྐྱེས་རབས་ཕྲེང་བས་གཏེར་གྱི་སྒོ་འབྱེད་གཞན་ལས་མཆོག་ཏུ་གྱུར་པའི་གླིང་། །མཚན་སྙན་གྲགས་པ་དོན་དང་ལྡན་ཕྱིར་ཆོས་ཀྱི་རྒྱལ་པོ་རྣམ་གསུམ་གྱི། །ངང་ཚུལ་འདི་མཚུངས་སྔོན་ཆད་བྱོན་ནམ་དཔྱོད་ལྡན་དག་གིས་བསམ་པར་རིགས། ༩ །བསྐྱེད་རྫོགས་རྫོགས་ཆེན་གྲུབ་མཐའ་སྙོགས་རྣམས་རྡོ་རྗེའི་གསུང་གི་གསང་བ་ཆེ། །ཤིན་ཏུ་ཟབ་འདྲིལ་བཅུད་ཀྱི་ཡང་སྙིང་རིག་འཛིན་རྣམ་བཞིའི་ཉེ་ལམ་ཕུལ། །གཞན་དོན་ཕྲིན་ལས་རབ་འབྱམས་སྒོ་བརྒྱ་གསལ་བར་ཕྱེས་པའི་ཁྱད་པར་ཅན། །འདི་ལ་བརྟེན་ནས་མཆོག་ཐུན་དངོས་རྣམས་ལག་རྩེར་ལེན་པའི་སླད་དུ་སྤྱོན། ༡༠ །སྟོན་དང་བསྟན་པའི་ངོ་མཚར་ཕུང་པོ་རྡོ་རྗེའི་རི་དབང་བྱེ་བའི་ལྗིད། །བསིལ་ལྡན་ནོར་འཛིན་ཕང་པར་བཀོད་པས་བཟོད་པར་དཀའ་བའི་ཁུར་འཛིན་རྣམས། །མཐོང་ཐོས་དྲན་རེག་བཟང་ངན་བར་བཅས་འབྲེལ་ཚད་དོན་ལྡན་ཁོ་ནའི་ཕྱིར། །ཅི་ནས་ངལ་བའི་འཁུན་བུ་འདོན་རྣམས་བག་ཕེབས་མལ་དུ་ངལ་སོས་ཤིག ༡༡ །སྲིད་པའི་སྡུག་བསྔལ་བཟོད་དཀའི་ཚུལ་མཐོང་འཁོར་འགྲོའི་གནས་ལས་ཡིད་བྱུང་ཞིང་། །ཞི་བདེའི་མུན་པར་མགོ་བོ་འཐུམས་ལྡན་དེ་དེའི་སྐྱོན་རྣམས་ཤེས་ནས་
ཀྱང་། །གྲངས་མེད་བསྐལ་པའི་བསྒུགས་ཡུན་མི་འཁྱོངས་ཐབས་ཆེན་གསང་མཆོག་འཕུར་འགྲོའི་ལམ། །ཚེ་ལུས་གཅིག་གིས་མཐར་དབྱུང་འདོད་རྣམས་འདོད་འབྱུང་གཏེར་ལ་ད་སྤྱོད་ཅིག ༡༢ །རྒྱ་ཆེ་རབ་ཟབ་གཏེར་གྱི་ཆོས། །རྒྱལ་དབང་པདྨའི་ཐུགས་བཅུད་ཕུལ། །ཆོས་སྦྱིན་ཕྱི་མོའི་འཕྲུལ་ཆེན་དབྱིག །སྔ་ན་མེད་པའི་རྨད་ཅིག་འདི། ༡༣ །རབ་དཀར་སྟོན་ཟླའི་ལང་ཚོས་མི་བསྒྲུན་ཚངས་དང་བརྒྱ་བྱིན་དཔལ་གྱིས་མིན། ཁྱབ་འཇུག་གོམ་གསུམ་གནོན་གྱིས་མ་ཡིན་ཡོངས་འདུ་རྐང་འཐུང་དབང་པོས་མིན། །བུམ་པ་བཟང་པོའི་ནང་ནས་མི་འབྱུང་སྐལ་བཟང་ཡོངས་ཀྱི་སྤྱི་ནོར་འདི། །མིག་འཕྲུལ་ཚུལ་གྱིས་རྡོ་རྗེར་འགྲོ་བ་མཆོག་ཐུན་དགོས་འདོད་འཇོ་བའི་ཕུལ། ༡༤ །ཕུལ་བྱུང་ཐུགས་བསྐྱེད་བཟང་པོས་ཉེར་དྲངས་དངོས་རྫས་གྱ་ནོམ་སྦྱོར་མཛད་པ། །ཀར་རྙིང་བསྟན་པའི་གསལ་བྱེད་མཚུངས་བྲལ་དཔལ་སྤུངས་རྗེ་དབོན་མཆོག་སྤྲུལ་དང་། །མི་ཡི་བརྒྱ་བྱིན་ས་སྐྱོང་དབང་པོ་སྡེ་དགེ་ཆོས་ཀྱི་རྒྱལ་པོ་དང་། །བཀའ་ཡི་འཕྲུལ་བློན་གཉེར་ཆེན་དམ་པ་པདྨ་ལེགས་གྲུབ་བཅས་པ་སྟེ། ༡༥ །ཀཿདཔལ་ཞེ་རྫོགས་ལྷ་འབྲང་གཙོར་གྱུར་སློབ་ཚོགས་བླ་སྤྲུལ་ཆེ་རིམ་ནས། །རྣམ་དཀར་ཞལ་འདེབས་ཇི་སྙེད་བྱུང་རྗེས་སླར་ཡང་འཕྲོ་མཐུད་སྐབས་རྣམས་སུ། །འཇམ་མགོན་བླ་མས་རྒྱ་ཆེའི་ཡོན་གནང་རྒྱལ་ཁབ་མཛོད་ནས་ཕོགས་སྩོལ་ངོས། །ཡིད་བཞིན་ནོར་མཆོག་གྲམ་བུར་སྤུངས་པའི་རིན་ཆེན་གཏེར་མཛོད་སྤར་དུ་སྨིན། ༡༦ །འདི་ན་བསམ་དང་སྦྱོར་བའི་མཐུ་གྲུབ་ཡོན་གྱི་བདག་སོགས་སྒོ་
གསུམ་གྱི། །འབད་པས་རྟག་གུས་རབ་དཀར་དགེ་རྩ་མཆོག་དང་ཕུལ་དང་རྩེ་མོའི་ཕྱིར། །འཁོར་གསུམ་རྙོགས་བྲལ་ཡོངས་བསྔོའི་ཐུགས་དམ་ཀུན་མཁྱེན་མཆེད་ཀྱིས་གནང་ཟིན་མོད། །རྗེས་སུ་ཡི་རངས་མཐུན་འགྱུར་ཚུལ་ལ་ཉེས་པས་ནོངས་པ་མིན་ནོ་ལོ། ༡༧ །ཕྱོགས་དུས་རྒྱལ་བའི་དཀྱིལ་འཁོར་ཇི་སྙེད་ཡིད་ཀྱི་མེ་ལོང་གཙང་མའི་ངོགས། །རྣམ་པར་བཀོད་པའི་བློ་ཡི་ཟུངས་སུ་རྒྱལ་བ་ཀུན་དངོས་བླ་མ་ཡི། །རྣམ་ཐར་བསམ་ཡས་རྗེས་སུ་རྐང་འཇོག་སྨོན་ལམ་བཟང་པོའི་མཐུ་རླབས་ཀྱིས། །སྲིད་པའི་ཁྲི་མུན་མིང་ཡང་མི་གྲགས་འཁོར་འགྲོའི་སྲིད་མཚོ་སྐེམ་གྱུར་ཅིག ༡༨ །རྒྱལ་བའི་བསྟན་པ་སྤྱི་དང་བྱེ་བྲག་རྒྱལ་དབང་པདྨའི་རིང་ལུགས་ཆེ། །ཕྱོགས་དུས་གནས་སྐབས་ཀུན་ཏུ་དར་རྒྱས་ཕྱོགས་ལས་རྣམ་རྒྱལ་ཕྲིན་ལས་ཀྱིས། །སྙིགས་དུས་རྒུད་ཚོགས་ཇི་སྙེད་ཞི་དང་ཀླ་ཀློའི་འཚུབས་འགྱུར་མཐར་བསྐྲད་ནས། །གངས་ལྗོངས་བསྟན་འགྲོའི་བདེ་སྐྱིད་དཔལ་ཡོན་རྫོགས་ལྡན་དུས་ལྟར་འཕེལ་གྱུར་ཅིག ༡༩ །ཁྱད་པར་རྡོ་རྗེའི་བཀའ་བསྩལ་བསླུ་མེད་དྲི་མེད་བཤེས་གཉེན་ཐུགས་དབུས་ནས། །རྣམ་པར་འཕྲུལ་པའི་ལང་ཚོ་གསར་པ་བོད་དང་བོད་ཆེན་ཡུལ་ལྗོངས་སུ། །ལྔ་ཕྲག་མཚན་དཔེའི་མེ་ཏོག་བཞད་པས་རིས་བྲལ་བསྟན་འགྲོར་སྨན་སྩོལ་བའི། །དཔལ་མགོན་ཆེན་པོར་འཚོ་གཞེས་རྟག་བརླིང་ཕྲིན་ལས་ཕྱོགས་མཐར་རྒྱས་གྱུར་ཅིག ༢༠ །རྒྱ་ཆེར་རོལ་པའི་མཛད་ཕྲིན་རྨད་བྱུང་གསང་འཛིན་དབང་ཕྱུག་ཐམས་ཅད་མཁྱེན། །པདྨ་གར་དབང་འཆི་མེད་རིག་འཛིན་ཞིང་འདིར་བསྐལ་པ་རྒྱ་མཚོའི་བར། །འཚོ་
གཞེས་ཉི་མ་ནམ་ཡང་མི་འགྲིབ་ངེས་གསང་ཆོས་འཁོར་རྟག་བསྐོར་ནས། །འབྲེལ་བཅས་འགྲོ་རྣམས་མཁའ་སྤྱོད་གྲོང་དུ་བདེ་བའི་དབུགས་དབྱུང་སྩོལ་གྱུར་ཅིག ༢༡ །རྡོ་རྗེ་ཐེག་པའི་གསང་ལམ་མཐར་ཐུག་རིན་ཆེན་གཏེར་གྱི་མཛོད་ཆེན་པོ། །གཅིག་ལས་དུ་མར་འཕེལ་བའི་གཞི་འདི་སྲིད་པ་ཇི་སྲིད་གནས་ཀྱི་བར། །རྡོ་རྗེའི་སྲུང་མས་མེལ་ཚེ་དང་བཅས་ཉམས་མེད་བརླིང་པའི་ཕྲིན་ལས་སྒོ། །དཔག་མེད་འཕེལ་བས་སྲིད་གསུམ་ཁྱོན་རྣམས་རབ་དཀར་སྣང་བས་འགེངས་གྱུར་ཅིག ༢༢ །སྡེ་བཞི་དགེ་བཅུའི་ཕུན་ཚོགས་དབང་འབྱོར་ས་སྐྱོང་མི་ཡི་ཚངས་དབང་གི། །མཛད་ཕྲིན་གཞུང་ལམ་མ་ནོར་རབ་རྒྱས་དབུ་རྨོག་དགུང་དུ་བཙན་པ་ནས། །ཆབ་འོག་རིས་མེད་རྒྱལ་བསྟན་སྐྱོང་དང་སྐྱེ་འགྲོ་བདེ་སྐྱིད་དབྱར་མཚོ་བཞིན། །ཕྱོགས་ཀྱི་ནོར་འཛིན་དོག་པོར་བྱེད་པའི་དགེ་མཚན་ཉིན་བཞིན་འཕེལ་གྱུར་ཅིག ༢༣ །སྙིགས་དུས་འགྲོ་བའི་བསམ་སྤྱོད་ལོག་པའི་རྒྱུ་དང་རྐྱེན་གྱི་ཉེར་ལེན་ངོས། །སྡེ་བརྒྱད་འབྱུང་པོའི་རྩུབ་འགྱུར་གྱིས་མཚོན་མི་དང་མི་མིན་འབྱུང་པོའི་སྡེས། །བརྟན་གཡོའི་ཕུན་ཚོགས་འཇོམས་པར་བྱེད་རྣམས་རྩ་གསུམ་རྒྱལ་བ་སྲུང་མར་བཅས། །རྡོ་རྗེ་ཁྲོས་པའི་གཟི་བྱིན་འབར་བས་རྨེག་མེད་ཉིད་དུ་བཅོམ་གྱུར་ཅིག ༢༤ །འཇིག་རྟེན་སྐྱོང་བའི་མཐུ་ལྡན་ཚོགས་ཀྱིས་རྒྱལ་བསྟན་སྐྱོང་ལ་ཐུགས་བྲེལ་ཞིང་། །སྣོད་བཅུད་དཔལ་འབྱོར་བླ་ན་སྤེལ་བའི་མཐུ་སྟོབས་རྩལ་ཤུགས་ཕྱུང་བ་ཡིས། །ས་གསུམ་རྒྱུ་ཞིང་འཁོད་པའི་འབྱུང་པོས་སྐྱེ་རྒུ་རྣམས་ལ་བྱམས་དང་བཅས། །བསོད་ནམས་
བྱ་བའི་གནས་ལ་གུས་རྣམས་འདི་གཏན་ཀུན་ཏུ་བདེ་གྱུར་ཅིག ༢༥ །དཀོན་མཆོག་རྩ་གསུམ་ཆོས་སྲུང་རྒྱ་མཚོའི་མཐུ་སྟོབས་རྨད་དུ་བྱུང་བ་དང་། །དྲང་སྲོང་རིག་འཛིན་བདེན་ཚིག་གྲུབ་པ་ཇི་སྙེད་ཡོངས་ཀྱི་གཟི་བྱིན་དང་། །ཆོས་ཉིད་རང་བཞིན་རྣམ་པར་དག་ཅིང་ཆོས་ཅན་རྒྱུ་འབྲས་བསླུ་མེད་མཐུས། །ཇི་ལྟར་སྨོན་པའི་དོན་བཟང་འདི་རྣམས་གེགས་མེད་བདེ་བླག་འགྲུབ་གྱུར་ཅིག ༢༦ །བཀྲ་ཤིས་ཕུན་སུམ་ཚོགས་པའི་གཏེར་མཛོད་རིན་ཆེན་གསུམ་དང་རྩ་གསུམ་ལྷ། །བཀྲ་ཤིས་ཕུན་སུམ་ཚོགས་པའི་མེ་ཏོག་ཕྱོགས་དུས་ཀུན་ཏུ་ཆར་འབེབ་པས། །བཀྲ་ཤིས་ཕུན་སུམ་ཚོགས་པའི་དགེ་མཚན་རྟག་ཁྱབ་ལྷུན་གྱིས་གྲུབ་པ་ཉིད། །བཀྲ་ཤིས་ཕུན་སུམ་ཚོགས་པའི་དཔལ་ཡོན་ནམ་ཡང་ཉམས་པ་མེད་གྱུར་ཅིག ༢༧ །ཅེས་པའང་པདྨའི་རྒྱལ་ཚབ་འཇམ་མགོན་རྡོ་རྗེ་འཆང་པདྨ་གར་དབང་འཆི་མེད་བསྟན་གཉིས་གཡུང་དྲུང་གླིང་པའི་ཞལ་སྔ་ནས་ཀྱིས་གཏེར་མཛོད་ཞུ་དག་འཕྲོ་སྐྱོང་དགོས་པའི་བཀའ་ལུང་གསེར་སྒྲོམ་ལྟར་ལྕི་བ་སྤྱི་བོར་ཕེབས་པ་དང་། སྤར་བྱང་སྦྱར་དགོས་ཀྱི་རྗེས་སུ་གནང་བའང་བསྩལ་པ་བཞིན། ས་སྐྱོང་བླ་མ་རིག་འཛིན་འཇམ་དཔལ་རྡོ་རྗེས་རྒྱལ་སྲིད་ལ་གཟིགས་པ་ཐོག་མར་འཇུག་པའི་སྐབས་སུ་ཟིན་པ། རབ་བྱུང་བཅོ་ལྔ་པའི་རྒྱལ་བ་ཞེས་པ་ཤིང་ཕོ་རྟའི་ལོ། གྲོ་བཞིན་ཟླ་བའི་དཀར་ཕྱོགས་རྫོགས་པ་གཉིས་པའི་གྲལ་ཚེས་དགེ་བར། ས་སྐྱོང་ཆོས་ཀྱི་རྒྱལ་པོ་རིམ་བྱོན་གྱི་ལུགས་བརྒྱའི་འདུན་ས་རྒྱལ་ཁབ་ཕོ་བྲང་ཕྲིན་ལས་ཀུན་ཁྱབ་རྫོང་དང་འབྲེལ་བ་ལྷུན་
གྲུབ་སྟེང་གི་དགོན་ཆེན་དུ་རྒྱལ་སྲས་འཇམ་དབྱངས་ཆོས་ཀྱི་ཉི་མ་བློ་གྲོས་རྒྱས་པའི་སྡེས་ཤར་མར་བྲིས་པ་འདི་ཡིས། ཟབ་གསང་བླ་མེད་རྡོ་རྗེ་ཐེག་པ་རིན་ཆེན་གཏེར་གྱི་མཛོད་ཆེན་པོའི་མངའ་ཐང་དང་ཕྲིན་ལས་ཕྱོགས་དུས་གནས་སྐབས་ཀུན་ཏུ་རྟག་ཁྱབ་ལྷུན་གྱིས་གྲུབ་པའི་དགེ་ལེགས་བཀྲ་ཤིས་ཀྱི་སྣང་བས་འཇིག་རྟེན་མཐའ་དག་ཁྱབ་ཅིང་མཛེས་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །།