ཀློང་སྡེ་རྡོ་རྗེ་ཟམ་པའི་ཚུལ་ཤིང་ལ་བྲི་རྒྱུ།

---

^{[མ་དཔེ་གཟིགས་ན་འདིར་གནོན།]}

ཀློང་སྡེ་རྡོ་རྗེ་ཟམ་པའི་ཚུལ་ཤིང་ལ་བྲི་རྒྱུ། རྟེན་མེད་ཀྱི་རིག་པ་རང་གྲོལ་ལ། །ཐོགས་མེད་ཀྱི་ཤེས་རབ་རང་ཤར། །རྟག་ཆད་གཉིས་མེད་ཀྱི་ཤེས་རབ་ལ། །ཕྱོགས་རིས་མེད་ན་ལྟ་བ་ཡིན། །གཏད་མེད་ཀྱི་རིག་པ་རང་གྲོལ་ལ། །ཞེན་མེད་ཀྱི་ཉམས་མྱོང་རང་ཤར། །སྟོང་གསལ་བདེ་ཆེན་ཉམས་མྱོང་ལ། །བྱིང་རྒོད་མེད་ན་སྒོམ་པ་ཡིན། །འཛིན་མེད་ཀྱི་རིག་པ་རང་གྲོལ་ལ། །ཆགས་མེད་ཀྱི་སྤྱོད་པ་རང་ཤར། །ཐ་མལ་རང་སྤྱོད་ཀྱི་ལྷུག་པ་ལ། །བླང་དོར་མེད་ན་སྤྱོད་པ་ཡིན། །གཉིས་མེད་ཀྱི་རིག་པ་རང་གྲོལ་ལ། །བཙལ་མེད་ཀྱི་འབྲས་བུ་རང་ཤར། །འཁོར་འདས་གཉིས་མེད་ཀྱི་དགོངས་པ་ལ། །རེ་དོགས་མེད་ན་འབྲས་བུ་ཡིན། །ཀློང་སྡེ་རྡོ་རྗེ་ཟམ་པའི་གཞུང་པོད་ལས་ཕྱུང་བའོ།། །།

---

^{[མ་དཔེ་གཟིགས་ན་འདིར་གནོན།]}

ཤོག་སྟོང་།