སྡེ་གསུམ་སྨོན་ལམ་གྲུབ་གཉིས་རིན་ཆེན་གྲུ་ཆར།
སྡེ་གསུམ་སྨོན་ལམ་གྲུབ་གཉིས་རིན་ཆེན་གྲུ་ཆར་བཞུགས་སོ། །ན་མོ་གུ་རུ་མ་ཧཱ་ནི་དྷི་པ་དཱ་ཡ། མཛོད་གསུམ་ཆུ་བོ་བཞི་རྫོགས་བླ་མ་ལས། །ཐོག་མར་སྨིན་བྱེད་དབང་གིས་ས་བོན་ཐེབས། །དམ་ཚིག་སྡོམ་པ་ཉམས་མེད་རྒྱུད་ལ་བརྟན། །བྱིན་རླབས་དབང་གི་ནུས་པ་གོང་འཕེལ་ཤོག །གྲོལ་བྱེད་ཁྲིད་ཀྱིས་གཞི་ལམ་འབྲས་བུའི་དོན། ཁོང་དུ་ཆུད་ཅིང་དྲན་ཤེས་བག་ཡོད་ལྡན། །དྭངས་འདོད་ཡིད་ཆེས་མི་ལྡོག་དད་པས་བཟུང་། །ལུས་སེམས་ལས་རུང་ཤིན་སྦྱངས་མཐར་ཕྱིན་ཤོག །བསྐྱེད་པའི་རིམ་པ་རྣམ་པ་གསལ་བ་དང་། །རྣམ་དག་དྲན་ཅིང་གསལ་སྣང་ང་རྒྱལ་བརྟན། །ཆོ་ག་རང་འབྲས་ངོ་བོ་བྱེད་ལས་ཀྱི། ཁྱད་པར་བཞི་ལྡན་བསྐྱེད་རིམ་མཐར་ཕྱིན་ཤོག །རྫོགས་རིམ་མཚན་བཅས་མཚན་མེད་ཏིང་ངེ་འཛིན། །སྡེ་གསུམ་ཀུན་བཟང་ཡབ་ཡུམ་སྲས་གསུམ་གྱི། །ཉམས་ལེན་གཡོ་ཐོབ་གོམས་བརྟན་མཐར་ཕྱིན་ནས། །སྣང་བཞི་མཐར་ཕྱིན་འབྲས་བུ་མངོན་གྱུར་ཤོག །སྐུ་གསུམ་ཞིང་གི་བཀོད་པ་ཡོངས་སུ་རྫོགས། །ཆོ་འཕྲུལ་གསུམ་གྱི་ཆོས་འཁོར་རབ་བསྐོར་ནས། ཁམས་
གསུམ་འཁོར་བའི་སེམས་ཅན་འདྲེན་པ་ལ། །དུས་གསུམ་སངས་རྒྱས་ཕྲིན་ལས་ལྷུན་གྲུབ་ཤོག །མདོར་ན་སྐྱེ་དང་ཚེ་རབས་ཐམས་ཅད་དུ། །ཡོངས་འཛིན་དགེ་བའི་བཤེས་ཀྱིས་རྗེས་སུ་གཟུང་། །ས་བཅུ་ལམ་ལྔའི་ཡོན་ཏན་མཐར་ཕྱིན་པ། ཁྱབ་བདག་འབྲས་བུའི་ཧེ་རུ་ཀཿཐོབ་ཤོག །རྒྱལ་བ་ཡབ་སྲས་སྐུ་ཚེ་ཞབས་པད་བརྟན། །རྒྱལ་སྲས་འཕགས་ཚོགས་དགེ་འདུན་འདུས་པ་འཕེལ། །རྒྱལ་ཁམས་ཀུན་ཏུ་ནད་མུག་འཁྲུག་རྩོད་ཞི། །རྒྱལ་བསྟན་དར་ཞིང་རྒྱས་པའི་བཀྲ་ཤིས་ཤོག །ཅེས་པ་འདི་ལྟར་དགོས་ཞེས་རང་སློབ་ཉེ་གནས་རི་རྒྱས་རྒྱ་མཚོས་བསྐུལ་ངོར། གཏེར་སློབ་མཁན་པོ་ཀརྨ་རཏྣས་མཛེས་བྱེད་ཆུ་ཡོས་ཀྱི་ལོ་གྲོ་ཞུན་ཟླ་བའི་དགའ་བ་གསུམ་པའི་རྒྱལ་ཕུར་འགྲུབ་སྦྱོར་ལ་བྲིས་པ་དགེ་ལེགས་འཕེལ། ཤུ་བྷཾ། མངྒ་ལཾ། བི་ཛ་ཡནྟུ།། །།