སི་ཏུ་པདྨ་ཉིན་བྱེད་ཀྱི་བཀའ་འབུམ།

པོད། ཨོཾ༽

སི་ཏུ་པདྨ་ཉིན་བྱེད།

Nitartha international

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

ལམ་ཟབ་བླ་མའི་རྣལ་འབྱོར་སྤྱི་དང་བྱེ་བྲག་གི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཡེ་ཤེས་བདུད་རྩིའི་གཏེར་མཛོད།

[Full Size]

ལམ་ཟབ་བླ་མའི་རྣལ་འབྱོར་སྤྱི་དང་བྱེ་བྲག་གི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཡེ་ཤེས་བདུད་རྩིའི་གཏེར་མཛོད་ཅེས་བྱ་བ་བཞུགས་སོ། །

བླ་མའི་རྣལ་འབྱོར་ཚན་ཆུང་ཁ་ཤས་བཞུགས།

[Full Size]

བདག་ཉིད་ཐ་མལ་སྤྱི་གཙུག་ཏུ། །ཡེ་ཤེས་འོད་ལྔའི་ཐིག་ལེའི་དབུས། །རིན་ཆེན་སེང་གེས་བཏེགས་པའི་ཁྲིར། །ངོ་བོ་རྩ་བའི་བླ་མ་ལ། །རྣམ་པ་རྡོ་རྗེ་འཆང་ཆེན་པོ། །གསལ་འཚེར་ནམ་མཁའི་མདོག་ཅན་གྱི། །ཕྱག་གཉིས་རྡོར་དྲིལ་བསྣོལ་ཐབས་འཛིན། །ཞབས་གཉིས་རྡོ་རྗེ་སྐྱིལ་ཀྲུང་བཞུགས། །དབུ་རྒྱན་སྙན་རྒྱན་མགུལ་རྒྱན་དང། །ཕྱག་ཞབས་གདུ་བུ་སྐ་རགས་འཕྱངས། །ལོངས་སྤྱོད་རྫོགས་པའི་ཆ་ལུགས་ལྡན། །ཞལ་མདངས་འཛུམ་པའི་ཉམས་དང་བཅས། །མཚན་དཔེའི་སྐུ་མཆོག་ལྷམ་མེ་བ། །སྐྱབས་གནས་ཀུན་འདུས་དམ་པ་ལ། །ཕྱག་

[Full Size]

འཚལ་མཆོད་པ་རྒྱ་མཚོ་འབུལ། །ཉེས་བཤགས་དགེ་ལ་ཡི་རང་ངོ་། །ཞིང་འདིར་ཆོས་སྟོན་བཞུགས་གསོལ་འདེབས། །འགྲོ་ཀུན་བྱང་ལམ་ཐོབ་ཕྱིར་བསྔོ། །རང་བྱུང་ལྷན་སྐྱེས་དོན་དམ་པ། །ཇི་བཞིན་རྟོགས་པར་བྱིན་གྱིས་རློབས། །དུས་གསུམ་སངས་རྒྱས་འདུས་པའི་སྐུ། །དཀྱིལ་འཁོར་ཀུན་གྱི་བདག་པོ་ཆེ། །བཀའ་དྲིན་གསུམ་ལྡན་རིན་པོ་ཆེ། །དྲིན་ཅན་རྗེ་ལ་གསོལ་བ་འདེབས། །བདག་འཛིན་འཁྲུལ་པ་དག་པ་དང། །རང་སེམས་སྐྱེ་མེད་དོན་རྟོགས་ནས། །སྣང་སྲིད་ཆོས་ཀྱི་སྐུ་རུ་འཆར། །མཆོག་གི་གོ་འཕང་ཐོབ་བྱིན་རློབས། །ཕ་གཅིག་

[Full Size]

དམ་པ་རྗེ་བཙུན། །རྒྱལ་དབང་སྐུ་བཞིའི་དབང་ཕྱུག །ངན་སོང་འཇིགས་སྐྱོབ་མགོན་པོ། །དྲིན་ཅན་བླ་མ་མཁྱེན་ནོ། །ཕ་གཅིག་ཕྲིན་ལས་བཞི་ལྡན། །ཡེ་ཤེས་སྐད་ཅིག་འཕོ་བའི། །ཐུགས་རྗེའི་བྱིན་རླབས་གཏེར་འཛིན། །དྲིན་ཅན་བླ་མ་མཁྱེན་ནོ། །བདག་འདྲ་ལས་ངན་སེམས་ཅན། །ཉམ་ཐག་སྐྱབས་མེད་མགོན་མེད། །ཉོན་མོངས་གཡང་ལས་ཐར་བའི། །དྲིན་ཅན་ཐུགས་རྗེས་དྲོངས་ཤིག །ཅེས་མོས་གུས་ཀྱི་འདུན་པ་རྩེ་གཅིག་པས་རྒྱང་འབོད་ཀྱི་ཚུལ་དུ་ལན་ཅི་ནུས་བྱས་ལ། དེ་ནས་བྱིན་རླབས་ཀྱི་དབང་བཞི་ལེན་པ་ནི། བླ་མའི་སྐུ་དང་གསུང་དང་ཐུགས། །ཡེ་ཤེས་རྡོ་རྗེའི་བྱིན་རླབས་ཀྱི། །འོད་ཟེར་དཀར་དམར་མཐིང་ལྗང་འཕྲོས། །གནས་བཞིར་ཐིམ་པས་དབང་བཞི་རྫོགས། །སླར་ཡང་མོས་གུས་གསོལ་བཏབ་མཐུས། །དགྱེས་ཚུལ་དང་བཅས་འོད་དུ་ཞུ། །ཆུ་ལ་ཆུ་བཞག་ཇི་བཞིན་ཏུ། །སྤྲོས་མེད་ངང་ལ་མཉམ་པར་བཞག །ཅེས་ཅི་གནས་སུ་བཞག །བདག་ནི་སྐྱེ་བ་ཚེ་རབས་ཀུན་ཏུ་ཡང། །སྒྲུབ་བརྒྱུད་བསྟན་པའི་སྒོར་ཞུགས་བླ་མ་མཆོག །འབྲལ་མེད་བརྙེས་པ་གསུམ་གྱིས་གུས་མཆོད་ཅིང། །བློ་འདས་ཕྱག་རྒྱ་ཆེན་པོ་འགྲུབ་གྱུར་ཅིག །ཉོན་མོངས་ཆུ་བོར་སྤྱོད་པའི་འགྲོ་བ་རྣམས། །རབ་དཀར་དགེ་བའི་གྲུ་རྫིང་ལ་བརྟེན་ནས། །བྱང་ཆུབ་སེམས་གཉིས་སྐྱ་བས་རྒྱུད་བསྐུལ་ཏེ། །མྱང་འདས་ཆེན་པོའི་

[Full Size]

གོ་འཕང་མྱུར་ཐོབ་ཤོག །ཅེས་པ་འདིའང་འཕགས་ནོར་བདུན་གྱིས་ཕྱུག་པ་མཆོག་སྤྲུལ་བདེ་ཆེན་རབ་འཕེལ་ནས་བླ་མའི་རྣལ་འབྱོར་སྤྱི་ལ་འཇུག་པའི་ཁྱེར་བདེ་ཞིག་བསྐུལ་ངོར་སི་ཏུ་ཧོ་ཐོག་ཐུ་པདྨ་ཉིན་བྱེད་དབང་པོས་ཤིང་ཡོས་ཁྲུམས་ཟླའི་ཡར་ཚེས་ལ་བྲིས་པ་འགྲོ་རྣམས་ཟུང་འཇུག་རྡོ་རྗེ་འཆང་གི་གོ་འཕང་ལ་འགོད་པར་གྱུར་ཅིག །བཀྲ་ཤིས།། །།རང་ལྷར་གསལ་བའི་སྤྱི་བོར་པད་ཟླའི་སྟེང་། །ངོ་བོ་བླ་མ་རྣམ་པ་རྡོ་རྗེ་འཆང། །རྩ་བརྒྱུད་རྣམས་དང་ཡི་དམ་དཀྱིལ་འཁོར་ལྷ། །ཆོས་སྐྱོང་རྒྱ་མཚོས་བསྐོར་ནས་བཞུགས་པར་གསལ། །ཕྱག་འཚལ་མཆོད་ཅིང་བསྟོད་དང་ནོངས་པ་བཤགས། །ཡི་རངས་བསྐུལ་གསོལ་དགེ་བ་བྱང་ཆུབ་བསྔོ། །བདག་སོགས་འགྲོ་རྣམས་འདི་བཟུང་སྙིང་པོའི་བར། །སྐྱབས་གསོལ་ཐུགས་རྗེས་བདག་རྒྱུད་བྱིན་གྱིས་རློབས། ༀ་ཨཱཿབཛྲ་དྷཱ་ར་ཧཱུྃ། ཅི་ནུས་བཟླས་མཐར། མཐར་ནི་བླ་མ་འོད་ཞུ་རང་ལ་ཐིམ། །དབྱེར་མེད་གཅིག་འདྲེས་མ་བཅོས་ངང་དུ་བཞག །དགེ་དེས་སྐྱེ་དང་ཚེ་རབས་ཐམས་ཅད་དུ། །དམ་པས་རྗེས་བཟུང་སྐུ་བཞི་མངོན་གྱུར་ཤོག །ཅེས་སི་ཏུ་པས་རྣམ་གླིང་དགོན་པར་བླ་སྤྲུལ་བཞེད་ངོར་སྤེལ་བ་དགེ།། །།སྤྱི་བོར་པད་ཉི་ཟླ་གདན་སྟེང་། །རྡོ་རྗེ་འཆང་དབང་ཆོས་ཀྱི་རྗེ། །ནམ་མཁའི་མདོག་ཅན་རྡོར་དྲིལ་བསྣམས། །ཞབས་ཟུང་རྡོ་རྗེ་སྐྱིལ་ཀྲུང་བཞུགས། །ལྷ་རྫས་དར་གྱི་ན་བཟས་མཛེས། །རིན་ཆེན་རྒྱན་གྱིས་རྣམ་

[Full Size]

པར་བཀླུབས། །ཡེ་ཤེས་འོད་ལྡའི་ཀློང་དུ་གསལ། །སངས་རྒྱས་ཀུན་གྱི་སྤྱི་དཔལ་ཆེ། །རིགས་རྣམས་ཁྱབ་བདག་འཁོར་ལོའི་མགོན། །བཀའ་དྲིན་མཉམ་མེད་བླ་མ་མཁྱེན། །སྐྱེ་ཞིང་སྐྱེ་བར་རྗེས་འཛིན་ཏེ། །བླ་མེད་རྡོ་རྗེ་འཆང་འགྲུབ་ཤོག །སྤྱི་བོའི་བླ་མ་འོད་ཞུ་ནས། །དབྱེར་མེད་ཆུ་ལ་ཆུ་བཞག་ལྟར། །རང་སེམས་མ་བཅོས་ལྷུག་པར་བཞག །ཅེས་རྟོགས་ལྡན་དཔལ་ལྡན་ཕྲིན་ལས་ནས་བསྐུལ་ལྟར། སི་ཏུས་དཔལ་འཛོང་གནས་མཆོག་ནས་བྲིས་པ་མངྒ་ལྃ།། །།རང་ལུས་ཐ་མལ་སྤྱི་བོ་རུ། །བླ་མ་རྡོ་རྗེ་འཆང་ཆེན་པོ། །སྐུ་ུམདོག་སྔོན་པོ་ཕྱག་གཉིས་ཀྱིས། །རྡོར་དྲིལ་བསྣོལ་ཐབས་ལོངས་སྐུའི་ཆས། །ཡོངས་རྫོགས་འོད་ལྔའི་ཀློང་དུ་གསལ། །དཀོན་མཆོག་འདུས་པའི་ངོ་བོ་ཉིད། །གསོལ་བ་འདེབས་སོ་བྱིན་གྱིས་རློབས། །དབང་བཞི་རྫོགས་ཐོབ་སྒྲིབ་བཞི་དག །སྐུ་བཞིའི་གོ་འཕང་ཡོངས་ཐོབ་ནས། །བླ་མེད་བྱང་གྲོལ་མྱུར་ཐོབ་ཤོག །ཅེས་བསྟན་དབང་ནས་བསྐུལ་ངོར་སི་ཏུས་སྤེལ། བཀྲ་ཤིས་དཔལ་འབར་འཛམ་གླིང་རྒྱན་དྲུག་ཤོག །དགེའོ།། །།

བླ་མའི་རྣལ་འབྱོར་དཀོན་མཆོག་ཀུན་འདུས།

[Full Size]

བླ་མའི་རྣལ་འབྱོར་དཀོན་མཆོག་ཀུན་འདུས་བཞུགས། སྤྱི་བོར་པད་ཟླའི་གདན་གྱི་སྟེང། །བླ་མ་ཁྱབ་བདག་རྡོ་རྗེ་འཆང། །ལོངས་སྤྱོད་རྫོགས་པའི་ཆས་དང་ལྡན། །དེ་ལ་དཀོན་མཆོག་རྩ་

[Full Size]

གསུམ་གྱི། །ལྷ་ཚོགས་དཔག་མེད་བསྐོར་བར་གསལ། །བདག་སོགས་མཁའ་མཉམ་འགྲོ་ཀུན་གྱི། །ཕྱག་འཚལ་མཆོད་བཤགས་རྗེས་ཡི་རང། །བསྐུལ་ཞིང་གསོལ་འདེབས་བསྔོ་བར་བགྱི། །རང་བྱུང་ལྷན་སྐྱེས་ཕྱག་རྒྱ་ཆེ། །སྙིང་པོའི་དོན་རྟོགས་བྱིན་གྱིས་རློབས། །ༀ་ཨཱཿབཛྲ་དྷཱ་ར་ཧཱུྃ། ཞེས་བསྙེན་ཅིང། མཐར་ནི་སྐྱབས་ཡུལ་རང་ལ་ཐིམ། །དབྱེར་མེད་ཆུ་ལ་ཆུ་བཞག་ལྟར། །མ་བཅོས་སྤྲོས་མེད་ངང་དུ་བཞག །དགེ་དེས་རང་གཞན་སངས་རྒྱས་ཤོག །ཅེས་སྔགས་འཆང་ཀརྨ་རྣམ་རྒྱལ་ངོར་སྤེལ།། །།རང་ཉིད་ཐ་མལ་སྤྱི་བོ་རུ། །པདྨ་དཀར་པོ་འདབ་བརྒྱད་པ། །ཟླ་བའི་དཀྱིལ་འཁོར་ཉ་གང་སྟེང་། །རིགས་ཀུན་གཙོ་བོ་བླ་མ་མཆོག །རྣམ་པ་རྡོར་སེམས་སྐུ་མདོག་དཀར། །ཕྱག་གཉིས་རྡོ་རྗེ་དྲིལ་བུ་འཛིན། །དབུ་རྒྱན་སྙན་རྒྱན་མགུལ་རྒྱན་དང། །ཕྱག་ཞབས་གདུ་བུ་རིན་ཆེན་བརྒྱན། །དར་ལིའི་སྟོད་གཡོགས་སྨད་གཡོགས་གསོལ། །ཞབས་གཉིས་སེམས་དཔའི་སྐྱིལ་ཀྲུང་བཞུགས། །ཐུགས་ཀར་ཧཱུྃ་མཐར་ཡིག་བརྒྱས་བསྐོར། །སྐུ་ལས་བདུད་རྩི་འོ་མའི་རྒྱུན། །བསིལ་བ་བདེ་བའི་རང་བཞིན་ཅན། །བབས་པས་རང་ལུས་གང་བར་གྱུར། །ༀ་བཛྲ་ས་ཏྭ་སོགས་ཡི་གེ་བརྒྱ་པ་དང་དྲུག་པ་ཅི་ནུས་བཟླས་མཐར། ཀྱེ་མགོན་པོ། བདག་ནི་འཁྲུལ་པའི་དབང་གྱུར་ཏེ། །སྐུ་གསུང་ཐུགས་

[Full Size]

དང་གང་འགལ་བའི། །ཉེས་ལྟུང་ཐམས་ཅད་བྱང་ཞིང་དག །དག་ཚངས་དབུགས་དབྱུང་མཛད་དུ་གསོལ། །གསོལ་བཏབ་མཐུ་ལས་སྡིག་སྒྲིབ་རྣམས། །དུད་ཁུ་སོལ་ཁུའི་རྣམ་པར་ཐོན། །རང་ལུས་ཤེལ་སྒོང་ལྟ་བུར་གྱུར། །སྤྱི་བོའི་བླ་མ་འོད་ཞུ་ནས། །དབྱེར་མི་ཕྱེད་པ་རང་ལ་ཐིམ། །མ་བཅོས་གཉུག་མའི་ངང་ལ་བཞག །དགེ་འདིས་མཁའ་མཉམ་མ་རྒན་རྣམས། །སངས་རྒྱས་གོ་འཕང་ཐོབ་ཕྱིར་བསྔོ། །ཅེས་པའང་དབོན་སྤྲུལ་ཀརྨ་འབྱུང་གནས་ཀྱི་ཐུགས་བཞེད་བཞིན་སི་ཏུ་པདྨ་ཉིན་བྱེད་དབང་པོས་འཛི་སྒར་བཀྲ་ཤིས་ཆོས་གླིང་དུ་སྤེལ་བ་སརྦ་མདྒ་ལཾ།། །།སྤྱི་བོར་དྲི་མེད་ཟླ་རྒྱས་སྟེང། །ཧྲཱིཿཡིག་དམར་པོའི་འཕྲོ་འདུ་ལས། །ངོ་བོ་རྩ་བའི་བླ་མ་ལ། །རྣམ་པ་བཅོམ་ལྡན་སྣང་མཐའ་ཡས། །དམར་གསལ་ཞལ་གཅིག་ཕྱག་གཉིས་པ། །མཉམ་བཞག་ལྷུང་བཟེད་ཚེ་བུམ་འཛིན། །ན་བཟའ་ཆོས་གོས་ཞབས་རྡོར་སྐྱིལ། །མཚན་དང་དཔེ་བྱད་ཡོངས་རྫོགས་པ། །འོད་དང་འོད་ཟེར་ཀློང་དུ་གསལ། །གནས་གསུམ་ༀ་ཨཱཿཧཱུྃ་ཡིག་ལས། །འོད་འཕྲོས་བདེ་ཆེན་ཞིང་ཁམས་ནས། །བསྐྱེད་པ་དང་འདྲའི་ཡེ་ཤེས་པ། །དཔག་མེད་སྤྱན་དྲངས་རང་ཐིམ་གྱུར། །སླར་ཡང་ཐུགས་འོད་འཕྲོས་པ་ལས། །དབང་ལྷ་རིགས་ལྔས་དབང་བསྐུར་ཞིང་། །རིགས་བདག་རྣམ་སྣང་རྒྱས་གདབ་གྱུར། །ཐུགས་ཀར་ཟླ་སྟེང་ཧྲཱིཿཡིག་དམར། །

[Full Size]

དེ་མཐར་སྔགས་ཕྲེང་གཡས་སུ་འཁོར། །ཕྱོགས་དུས་རྒྱལ་བ་རྒྱ་མཚོའི་ཚོགས། །ཀུན་གྱི་ཐུགས་རྗེ་དངོས་གྲུབ་རྣམས། །སྣང་མཐའི་སྐུར་གྱུར་རང་ལ་ཐིམ། །ཕྱི་སྣོད་ནང་བཅུད་འགྲོ་བ་རྣམས། །ལྷ་ཡི་ངོ་བོར་བསྒྱུར་བ་དང་། །རིགས་དྲུག་སྒྲིབ་སྦྱང་བྱང་ཆུབ་ཀྱི། །ལམ་བཀོད་ཁྱེར་སོ་གསུམ་ལྡན་ངང་། །ༀ་ཨཱ་མི་དྷེ་ཝཱ་ཧྲཱིཿཅི་ནུས་བཟླས་མཐར། རྒྱལ་ཀུན་ཐུགས་རྗེའི་གཏེར་ཆེན། །པདྨ་གསུང་གི་དབང་ཕྱུག །སངས་རྒྱས་འོད་དཔག་མེད་མགོན། །དབྱེར་མེད་དཔལ་ལྡན་བླ་མར། །སྙིང་ནས་དད་པས་གསོལ་འདེབས། །བདག་དང་འབྲེལ་ཐོགས་སེམས་ཅན། །ནུབ་ཕྱོགས་བདེ་ལྡན་ཞིང་དུ། །གང་གི་ཞལ་མཐོང་ལུང་ཐོབ། །ཕྱིར་མི་ལྡོག་བར་བྱིན་རློབས། །ཅེས་བླ་མ་རྒྱང་འབོད་སྨོན་ལམ་དང། བཅོམ་ལྡན་འདས་ཀྱི་སྐུ་ལས་ཡེ་ཤེས་ལྔའི། །ངོ་བོ་ༀ་དཀར་ཨཱཿདམར་ཧཱུྃ་སྔོན་པོ། །སྭཱ་སེར་ཧཱ་ལྗང་འཕྲོས་པས་བདག་ལུས་ཀྱི། །གནས་ལྔར་ཐིམ་པས་ཕུང་ཁམས་སྡིག་སྒྲིབ་བསལ། །དབང་བཞི་ཐོབ་ཅིང་བླ་མ་འོད་ཞུ་ནས། །དབྱེར་མེད་གཅིག་འདྲེས་སྣང་སྲིད་ཆོས་ཐམས་ཅད། །གནས་ལུགས་ཕྱག་རྒྱ་ཆེན་པོའི་ངོ་བོར་བཞག །ཅེས་ཅི་གནས་ཉམས་བསྐྱང་ལ་། མཐར་དགེ་རྩ་བྱང་ཆེན་བསྔོ། དེ་ལྟར་གདན་ས་བར་པའི་སྒྲུབ་ཆེན་ཕྲིན་ལས་ཕུན་ཚོགས་ངོར་སི་ཏུ་པདྨ་ཉིན་བྱེད་དབང་པོས་སྤེལ་བ་སརྦ་མདྒ་ལམ། ཤུ་བྷམ།། །།

[Full Size]

ཧྲཱིཿསྣང་སྲིད་ཆོས་རྣམས་གཟོད་ནས་མཚན་བྲལ་ངང་། །སྙིང་རྗེ་ཆེན་པོའི་རོལ་རྩལ་འགག་མེད་མདངས། །གསལ་སྟོང་འོད་ཕུང་ཡི་དམ་ལྷར་གསལ་བའི། །སྤྱི་བོར་དྲིན་ཅན་རྩ་བའི་བླ་མ་ནི། །རྣམ་པ་གུ་རུ་པདྨ་འབྱུང་གནས་མཆོག །མཚན་དཔེའི་གཟི་འབར་ཆ་ལུགས་ཡོངས་སུ་རྫོགས། །སྐུ་དང་ཡེ་ཤེས་དབྱེར་མེད་ལྷུན་གྲུབ་ཀྱང་། །གཉིས་འཛིན་སྣང་ཡུལ་བག་ཆགས་དག་པའི་ཕྱིར། །ཐུགས་ལས་འོད་འཕྲོས་པདྨ་འོད་ཞིང་ནས། །ཡེ་ཤེས་སྤྱན་དྲངས་དམ་ཡེ་གཉིས་མེད་གྱུར། །ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་བརླབ་ཕྱིར་གཤེགས་སུ་གསོལ། །གུ་རུ་པདྨ་སིདྡྷི་ཧཱུྃཿཿཞེས་ཚར་བདུན་ནམ་གསུམ་དང་། གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ། ཞེས་ཐོད་ཕྲེང་རྩལ་སྔགས་གང་འགྲུབ་བཟླ། དེ་ལྟར་གསོལ་བ་བཏབ་པས་བླ་མ་ཡི། །རྡོ་རྗེ་བཞི་ཡི་བྱིན་རླབས་འོད་ཟེར་ཚུལ། །འཕྲོས་ནས་རང་གི་གནས་

[Full Size]

བཞིར་ཐིམ་པའི་མོད། །གནས་སྐབས་རྣམ་བཞིའི་སྒྲིབ་པ་དག་ནས་ཀྱང་། །སྐུ་བཞིའི་ས་བོན་རྒྱུད་ལ་བཞག་པར་གྱུར། །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ཏེ། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །བརྗོད། ཅེས་ཀརྨའི་དད་པའི་གསོས་སུ་སྤེལ།། །།

མར་མི་དྭགས་གསུམ་གྱི་བླ་མའི་རྣལ་འབྱོར།

[Full Size]

མར་མི་དྭགས་གསུམ་གྱི་བླ་མའི་རྣལ་འབྱོར་བཞུགས། ཀྱེ་མ། གཟུང་འཛིན་མ་རིག་འཆིང་བའི་དྲྭ་བ་ལ། །འཐུམ་པའི་རང་གཞན་སེམས་ཅན་སྙིང་རེ་རྗེ། །ད་ནི་ངེས་དོན་སྙིང་པོའི་གསང་ལམ་མཆོག །རང་བྱུང་ཡེ་ཤེས་གནས་ལ་འབད་པར་བྱ། །དངོས་ཀུན་ཆོས་རྣམས་སྟོང་ཉིད་ཆེན་པོའི་ངང་། །སྣང་བའི་རྩལ་ལས་མ་འགག་དཀྱིལ་འཁོར་ཤར། །མདུན་མཁར་ལྔ་ལྡན་འཇའ་འོད་འཐིབས་པའི་ཀློང་། །པད་ཉི་ཟླ་གདན་གསུམ་གསལ་དབུས་མ་ལ། །དགྱེས་མཛད་ཧེ་རུ་ཀ་དངོས་ལོ་ཙཱ་ཆེ། །ཆོས་ཀྱི་བློ་གྲོས་དགེ་བསྙེན་ཆ་ལུགས་ཅན། །རབ་བརྗིད་གཟི་འབར་ཟིལ་གནོན་ཕྱག་རྒྱ་མཛད། །གཡས་སུ་རྗེ་བཙུན་མི་ལ་ཐོས་པ་དགའ། །རས་དཀར་བླ་གོས་སེམས་ཉིད་ངལ་གསོའི་ཚུལ། །རྡོ་རྗེའི་མགུར་དབྱངས་ཏམ་བུ་ུར་བཞིན་སྒྲོག །གཡོན་དུ་ཟླ་འོད་གཞོན་ནུ་རབ་བྱུང་ཆས། །དབུ་ལ་སྒོམ་ཞུ་མཉམ་བཞག་ཕྱག་རྒྱ་ཅན། །མི་རྟོག་ཏིང་འཛིན་ཟབ་མོདོན་ལ་གནས། །

[Full Size]

གཞན་ཡང་སྟེང་འོག་བར་མཚམས་ཐམས་ཅད་དུ། །ཆོས་ལོངས་སྤྲུལ་དང་བཀའ་བརྒྱུད་བླ་མའི་ཚོགས། །ཡི་དམ་ཌཱ་ཀི་དཔའ་བོ་རྣལ་འབྱོར་མ། །དམ་ཅན་ཆོས་སྲུང་ལ་སོགས་སྐྱབས་གནས་རྣམས། །སྤྲིན་ལྟར་གཏིབ་བཞིན་རབ་ཏུ་གསལ་བར་གྱུར། །ཅེས་གསལ་བཏབ་ནས། ཀྱེ་ཧོ། དུས་གསུམ་རྒྱལ་ཀུན་གྱི་གོང་བུ། །གཅིག་བསྡུས་ཐུགས་རྗེ་ཡི་གཏེར་ཆེན། །བྱིན་རླབས་བུམ་བཟང་གི་བདག་ཉིད། །རྗེ་བཙུན་བླ་མ་རང་མཁྱེན་ནོ། །གཏན་མེད་འཁྲུལ་འབྱམས་ཀྱི་སེམས་ཅན། །ཆོས་མེད་དྲེད་པོ་ལ་གཟིགས་དང་། །ངན་སོང་འཁོར་བ་ཡི་འདམ་ལས། །ནུས་མཐུའི་ལྕགས་ཀྱུ་ཡིས་དྲོངས་ཤིག །བདག་སོགས་མཁའ་མཉམ་གྱི་འགྲོ་བ། །སྐྱབས་མེད་མགོན་བྲལ་ལ་དགོངས་མཛོད། བདེ་ཆེན་ཐར་མཆོག་གི་ཞིང་དུ། །མྱུར་དུ་འདྲེན་པར་རང་བྱིན་རློབས། །ཅེས་གསོལ་འདེབས་རྒྱང་འབོད་ཚུལ་དུ་ཚར་ཁ་ཤས་དང་། མཐར། སྣང་སྲིད་བླ་མའི་དཀྱིལ་འཁོར་དེ་ཐམས་ཅད། །འོད་ཞུ་གཙོར་ཐིམ་དེ་ཡང་རང་ལ་ཐིམ། །བླ་མ་རང་སེམས་དབྱེར་མེད་གཉུག་མའི་ངང་། །མ་བཅོས་སྤྲོས་པ་ཀུན་བྲལ་ཀློང་དུ་བཞག །མཐར་དགེ་བསྔོ་སོགས་བྱའོ། །ཅེས་པའང་སི་ཏུ་པས། དད་དམ་ལྡན་པ་དབུ་དར་རྒྱས་ངོར་སྤེལ་བ་དགེའོ།། །།

གྲུབ་ཆེན་ཀརྨ་པཀྴིའི་བླ་མའི་རྣལ་འབྱོར།

[Full Size]

གྲུབ་ཆེན་ཀརྨ་པཀྴིའི་བླ་མའི་རྣལ་འབྱོར་བཞུགས་སོ། །

[Full Size]

སྣང་སྲིད་འཁོར་འདས་ཆོས་ཐམས་ཅད། །འཛིན་མེད་བློ་འདས་ཕྱག་རྒྱ་ཆེའི། །རང་མདངས་མ་འགགས་གསལ་བའི་ངང་། །སྤྱི་བོར་པདྨ་ཉི་ཟླའི་སྟེང་། །ཨོ་རྒྱན་ཆེན་པོའི་ངོ་བོ་ཉིད། །རྣམ་པ་དཔལ་ཆེན་ཧེ་རུ་ཀ། གྲུབ་ཐོབ་རྒྱ་མཚོའི་དབང་ཕྱུག་མཆོག །ཀརྨ་པཀྴི་གཟི་འོད་འབར། །དམར་སྨུག་ཞལ་གཅིག་ཕྱག་གཉིས་ཀྱི། །ཟིལ་གནོན་ཕྱག་རྒྱ་ཞབས་རྡོར་སྐྱིལ། །ཆོས་གོས་རྣམ་གསུམ་ཟབ་བེར་གསོལ། །ཞྭ་ནག་ཁྱུང་གཤོག་དབུ་ལ་མཛེས། །སྤྱན་གསུམ་འོད་ཀྱི་དཀྱིལ་འཁོར་འཁྱིལ། །ཁྲོ་འཛུམ་ཨག་ཚོམ་ཟུར་གསུམ་ནག །ཡེ་ཤེས་ལྔ་ལྡན་ཐིག་ལེའི་དབུས། །སྣང་ལ་རང་བཞིན་མེད་པར་གསལ། །གནས་གསུམ་འབྲུ་གསུམ་ལས་འོད་འཕྲོས། །ཕྱོགས་བཅུའི་ཞིང་ཁམས་རབ་འབྱམས་ནས། །རྩ་གསུམ་ལྷ་ཡི་ཐུགས་རྗེ་བསྐུལ། །ཡེ་ཤེས་སེམས་དཔའ་སྤྱན་དྲངས་ཐིམ། །དབང་ལྷས་དབང་བསྐུར་མཆོད་ཅིང་བསྟོད། །རིགས་བདག་པད་འབྱུང་རྒྱས་གདབ་གྱུར། །ཐུགས་ཀར་ཧཱུྃ་མཐར་སྔགས་ཕྲེང་འཁོར། །སྤྲོ་བསྡུས་སྒྲིབ་སྦྱང་རྒྱལ་ཀུན་གྱི། །ཡེ་ཤེས་ཆེན་པོ་ཐོབ་པར་གྱུར། །ༀ་ཨཱཿཤྲི་མཱན་མ་ཧཱ་གུ་རུ་ཀརྨ་པཀྴི་སརྦ་སིདྡྷི་ཕ་ལ་ཧཱུྃ། དུས་གསུམ་མཉམ་མེད་ཤཱཀྱའི། །རྒྱལ་པོས་བྱིན་རླབས་ལུང་བསྟན། །སྒྲུབ་བརྒྱུད་ཀརྨ་ཀཾ་ཚང་། །ཞེས་གྲགས་སངས་རྒྱས་གཉིས་པ། །པད་འབྱུང་དབྱེར་མེད་ཉིད་དུ། །ལུང་

[Full Size]

ཟིན་བསྟན་འགྲོའི་མགོན་པོ། །དུས་གསུམ་མཁྱེན་པ་ནས་བཟུང་། །བཅུ་གསུམ་བདུད་འདུལ་རྡོ་རྗེའི། །བར་དུ་སྐྱེས་རབས་ཕྲེང་བ། །གཅིག་ཏུ་བསྡུས་པའི་ངོ་བོ། །ཆོས་ཀྱི་བླ་མ་མཁྱེན་ནོ། །གཉིས་འཛིན་འཁྲུལ་པས་བསླད་པའི། །འཁོར་བའི་འཁོར་ལོ་འདི་ལྟའི། །མ་དག་སེམས་ཀྱི་ཆོ་འཕྲུལ། །རིག་སྟོང་རྩ་བྲལ་ཆེན་པོ། །རང་གསལ་རང་གྲོལ་ངང་དུ། །ཀ་དག་དབྱིངས་སུ་ཟློག་ཅིག །ༀ་ཨཱཿཀརྨ་པཀྴི་ཧཱུྃ། གསོལ་བཏབ་མཐུ་ལས་དེང་ནས་བཟུང་། །མ་ནོར་ལམ་སྟོན་བླ་མ་དང་། །ཐེག་ཆེན་གསང་སྔགས་དམ་པའི་ཆོས། །སྤྱོད་པའི་སྐལ་བ་ལྡན་གྱུར་ཅིག །ལྟ་ལོག་ཆོས་ལྟར་བཅོས་པའི་བདུད། །དམ་ཉམས་འདྲེས་ཁྱེར་དྲེད་པོ་ཡིས། །ནམ་ཡང་བསླུ་བར་མ་གྱུར་ཅིག །གདོད་མའི་སངས་རྒྱས་ཀུན་ཏུ་བཟང་། །དགོངས་པ་མཉམ་ཉིད་རྟོགས་པར་ཤོག །བླ་མ་འོད་ཞུ་རང་ལ་ཐིམ། །ཆུ་ལ་ཆུ་བཞག་ཇི་བཞིན་པར། །དབྱེར་མེད་གཅིག་ཏུ་འདྲེས་པར་གྱུར། །སྣང་གྲག་རྟོག་བའི་དོན་ཐམས་ཅད། །བླ་མའི་དཀྱིལ་འཁོར་ཡོངས་སུ་ཤར། །འཁོར་འདས་དུས་གསུམ་དགེ་བའི་ཚོགས། །འབྲས་བུ་སྐུ་གསུམ་ཐོབ་ཕྱིར་བསྔོ། །རྩ་གསུམ་བདེ་ལེགས་རབ་དགའི་ཆར། །སྲིད་གསུམ་ཀུན་ཏུ་ཁྱབ་གྱུར་ཅིག །སྐྱབས་ཆེ་བླ་མ་བསོད་ནམས་ཆོས་འཕེལ་གྱི་དགོངས་བཞེད་ལྟར་གར་དབང་རིན་པོ་ཆེའི་བཀའ་ཕེབས་པར་སི་ཏུ་པདྨ་ཉིན་བྱེད་དབང་པོས་འོག་མིན་ཀརྨ་ནས་སྤེལ་བ་མདྒ་ལཾ། དགེའོ།། །།

ཐུན་བཞིའི་སྒོམ་རིམ་ཉུང་བསྡུས་གྲུབ་གཉིས་འབྲས་སྟེར།

[Full Size]

༈ ཐུན་བཞིའི་སྒོམ་རིམ་ཉུང་བསྡུས་གྲུབ་གཉིས་འབྲས་སྟེར་བཞུགས་སོ། །ན་མོ་གུ་རུ་ཀརྨ་ཡེ། མི་བསྐྱོད་རྒྱལ་བའི་ཞལ་གྱི་བདུད་རྩི་ལས། །བྱུང་བའི་ཉམས་ལེན་ཟབ་ལམ་རྨད་བྱུང་བ། །ཐུན་བཞིའི་དོན་བསྡུས་བླ་མའི་རྣལ་འབྱོར་ཞིག །སྤེལ་བགྱི་མཁའ་འགྲོས་བཀའ་ཡི་གནང་བ་སྩོལ། །སྤྱི་བོར་མཁའ་དབྱིངས་འཇའ་འོད་ཟེར་གྱི་ཀློང་། །ཡེ་ཤེས་མཁའ་འགྲོ་དམར་མོ་ཌཱ་བྷན་བསྣམས། །གཅེར་བུ་སྐྲ་གྲོལ་རྒྱན་སྤང་སྤྱན་གསུམ་ལྡན། །དཀར་འཛིན་ཆུ་འཛིན་རབ་རྒྱས་བདེ་བ་ཆེའི། །གར་གྱི་རོལ་པས་རྩེ་བཞིན་རྣམ་མང་པོས། །སྐུ་ཡི་བཀོད་པ་ཉི་ཟེར་རྡུལ་ལྟར་འཚུབས། །དེ་དབུས་རྩ་བའི་བླ་མ་ཀརྨ་པ། །ཆོས་གོས་རྣམ་གསུམ་ཞྭ་ནག་གསེར་གདངས་ཅན། །ཕྱག་གཉིས་རྡོར་དྲིལ་བསྣོལ་འཛིན་ཞབས་སྐྱིལ་ཀྲུང་། །ཆོས་དབྱིངས་དོན་དམ་སྐྱེ་མེད་ལྟ་སྟངས་ཅན། །གསོལ་བཏབ་ཙམ་གྱིས་མི་བཟོད་གདུང་བ་ཡི། །དད་དང་མོས་གུས་དག་སྣང་དུངས་སེ་དུང་། །བྱིན་རླབས་དངོས་གྲུབ་ཆར་བཞིན་ཐིབས་སེ་ཐིབ། །དཀོན་མཆོག་འདུས་པའི་ངོ་བོར་ལྷམ་མེར་གསལ། །ཀྱཻ། སྣང་སྟོང་སྐུ་ལ་གྲགས་སྟོང་གསུང་། །བདེ་སྟོང་ཐུགས་ལ་གསོལ་བ་འདེབས། །གསང་གསུམ་རྡོ་རྗེའི་བྱིན་ཕོབ་ལ། །དབང་བསྐུར་བདག་རྒྱུད་སྨིན་གྲོལ་མཛོད། །ཕྱོགས་དུས་རྒྱལ་བ་རྒྱ་མཚོ་རྣམས། །ཀུན་ཀྱང་བླ་མའི་སྐུ་ལ་ཐིམ། །རིགས་དཀྱིལ་ཁྱབ་བདག་ངེས་པར་ཤར། །ཡེ་ཤེས་མཁའ་འགྲོ་ལྗང་སེར་དམར། །དཀར་ནག་སྔོ་ཁྲ་ཌཱ་རུ་དང་། །བྷནྡྷ་བསྣམས་ཤིང་གར་སྟབས་

[Full Size]

འཁྱུག །ཉོན་མོངས་སྡིག་སྒྲིབ་རྩད་ནས་བསལ། །དམ་ཚིག་རྩ་བ་ཡན་ལག་གི། །ནོངས་པ་བཤགས་སོ་དག་ཚངས་སྩོལ། །གསོལ་བཏབ་མོད་ལ་མཁའ་འགྲོ་རྣམས། །རིམ་བཞིན་གཙོ་མོའི་སྐུ་ལ་ཐིམ། །དེ་ཉིད་རང་ཐིམ་མཁའ་འགྲོར་གོང་གི་ཕག་མོ་དམར་མོ། མཆན། གསལ། །རྩ་བའི་བླ་མ་སྐད་ཅིག་གིས། །འཁོར་ལོ་བདེ་མཆོག་དཔའ་གཅིག །མཆན། སྐུར་གྱུར་ནས། །རྒྱན་དང་ཆ་ལུགས་ཡོངས་སུ་རྫོགས། །ཆོས་འབྱུང་ཕྱག་རྒྱ་སྤྱི་བོར་མཛད། །བདེ་བའི་ཉམས་ལྡན་གར་སྟབས་གཡོ། །རང་ཉིད་མཁའ་འགྲོར་གསལ་པ་ཡི། །བདུད་རྩིའི་མཆོད་འབུལ་ཡེ་ཤེས་མེ། །འབར་ཞིང་འོད་ཀྱིས་སྤྱན་དྲངས་ནས། །སྙིང་གར་འདི་སྐབས་རླུང་བུམ་ཅན་ནམ་བར་རླུང་བཟུང་། མཆན། པད་ཉིར་བཞུགས་པར་མོས། །དེ་ཡི་དཔྲལ་མགྲིན་ཐུགས་ལྟེ་བར། །ༀ་དཀར་ཨཱཿདམར་ཧཱུྃ་སྔོན་པོ། །ཧོཿསེར་སྐུ་གསུང་ཐུགས་རྡོ་རྗེའི། །ངོ་བོར་རབ་ཏུ་གསལ་བར་གྱུར། །སངས་རྒྱས་ཐམས་ཅད་འདུས་པའི་སྤྱི་དཔལ། །རིགས་དྲུག་འཁོར་བའི་སྡུག་བསྔལ་སེལ་བྱེད། །ཡང་དག་ངེས་པའི་ལམ་མཆོག་སྟོན་པའི། །རྗེ་བཙུན་བདུད་འདུལ་རྡོ་རྗེ་མཁྱེན་ནོ། །ལན་གསུམ་མམ་བདུན་བཏོན་ལ། ཀརྨ་པ་མཁྱེན་ནོ། །ཅི་ནུས་བགྲང་། དཀོན་མཆོག་ཀུན་འདུས་མཁྱེན་ནོ། །དྭགས་པོ་བཀའ་བརྒྱུད་མཁྱེན་ནོ། །བདུད་འདུལ་རྡོ་རྗེ་མཁྱེན་ནོ། །སྐྱབས་གནས་གཅིག་ཆོག་མཁྱེན་ནོ། །ཀྱེ་མ་དྲིན་ཆེན་བླ་མ། །རིགས་ཀུན་ཁྱབ་བདག་ཆེན་པོ། །

[Full Size]

དཔལ་ལྡན་རྡོ་རྗེ་འཆང་དངོས། །དྲན་མཆོག་འཁོར་ལོའི་མགོན་པོ། །སྙིང་ནས་གསོལ་བ་འདེབས་སོ། །ཕྱག་རྒྱ་ཆེན་པོའི་ཡེ་ཤེས། །འགྱུར་མེད་ལྷན་སྐྱེས་ངོ་བོ། །མྱུར་དུ་རྟོགས་པར་བྱིན་རློབས། །དུས་གསུམ་དགེ་ཚོགས་ཐམས་ཅད། །འགྲོ་བའི་དོན་དུ་འབུལ་བཞེས། །རྗེ་བཙུན་ཁྱེད་རང་ལྟ་བུར། །སྙིང་ནས་བྱིན་གྱིས་རློབས་ཤིག །ཅེས་བརྗོད་ལ་སྙིང་གའི་བླ་མ་འོད་དུ་ཞུ་ནས་རང་དང་དབྱེར་མེད་དུ་མོས། རང་ལྷར་གསལ་བ་དེ་ཡང་མི་དམིགས་པའི་ངང་དུ་འཇའ་ཡལ་བ་ལྟར་རྫོགས་རིམ་ལྟ་བའི་ངང་ལ་རེ་ཞིག་མཉམ་པར་བཞག །རྡོ་རྗེ་ཅན་དངོས་བླ་མ་ལ་གསོལ་བ་འདེབས་སོ། །ཀར་བརྒྱུད་གྲུབ་ཐོབ་རྒྱ་མཚོ་ལ་གསོལ་བ་འདེབས་སོ། །ཐུགས་རྗེ་བྱིན་རླབས་གཏེར་ཆེན་ལ་གསོལ་བ་འདེབས་སོ། །རྗེ་བཙུན་བདུད་འདུལ་རྡོ་རྗེ་ལ་གསོལ་བ་འདེབས་སོ། །ཚེ་གཅིག་རྟེན་ཐོག་འདི་ཉིད་དུ། །ངེས་པའི་དོན་མཆོག་ཟབ་མོའི་ལམ། །སྦྱངས་པའི་ཡོན་ཏན་མཐར་ཕྱིན་ནས། །བླ་མེད་སྒྲུབ་པ་སྙིང་པོ་ཡི། །གེགས་མེད་ལྷུན་གྱིས་གྲུབ་གྱུར་ནས། །ཕྱག་རྒྱ་ཆེན་པོ་འགྲུབ་པར་ཤོག །ཅེས་དང་། གཞན་ཡང་བསྔོ་བ་སྨོན་ལམ་གྱིས་རྒྱས་གདབ་པར་བྱའོ། །དེ་ལྟར་ཐུན་བཞིའི་རྣལ་འབྱོར་མདོར་འསྡུས་འདི་བཞིན་དྲུང་འཚོ་བ་དགེ་སློང་ནོར་བུས་བསྐུལ་ངོར། སི་ཏུ་པདྨ་ཉིན་བྱེད་དབང་པོས་སྤེལ་བ་འགྲོ་རྣམས་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པར་གྱུར་ཅིག། །།

ཐུན་མིན་བླ་མའི་རྣལ་འབྱོར།

[Full Size]

ཐུན་མིན་བླ་མའི་རྣལ་འབྱོར་བཞུགས། མཆོག་གསུམ་ངོ་བོ་

[Full Size]

དཔལ་ལྡན་རྡོ་རྗེ་འཆང་ཀརྨ་པ་ལ་ཕྱག་འཚལ་ལོ། །འདིར་སྐལ་བ་དང་ལྡན་པ་དག་གི་སྤྱོད་ཡུལ་དུ་ཐུན་མོང་མ་ཡིན་པའི་བླ་མའི་རྣལ་འབྱོར་བསྒོམ་པར་སྤྲོ་ན། དང་པོ་སྐྱབས་སེམས་ནི། བདག་དང་མ་གྱུར་འགྲོ་བ་རྣམས། །དེང་ནས་བྱང་ཆུབ་སྙིང་པོའི་བར། དཀོན་མཆོག་ཀུན་འདུས་བླ་མ་ལ། །རྟག་པར་སྐྱབས་མཆི་གསོལ་བ་འདེབས། །དུས་གསུམ་མཁའ་མཉམ་སེམས་ཅན་རྣམས། །རྫོགས་སངས་གོ་འཕང་ལ་འགོད་ཕྱིར། །སྨོན་དང་འཇུག་བའི་སེམས་བསྐྱེད་ནས། །ཚད་མེད་འགྲོ་སྒྲོལ་དམ་བཅའོ། །ལན་བདུན་ནམ་ཉེར་གཅིག །གཉིས་པ་བསྐྱེད་རིམ་རྣལ་འབྱོར་ནི། ༀ་ཤཱུ་ནྱ་ཏས་སྦྱངས་ནས། གཟུང་འཛིན་སྣང་བ་འདི་ཀུན་རང་བཞིན་གྱི། །སྟོང་པའི་རང་མདངས་དེ་ལས་མ་གཡོས་ངང་། །རང་ཉིད་ཡི་དམ་ལྷར་གསལ་མདུན་གྱི་མཁར། །ཡེ་ཤེས་ལྔ་ལྡན་འོད་ཀློང་དཀྱིལ་འཁོར་དབུས། །གྱད་དང་སེང་ཆེན་གྱིས་བཏེགས་རིན་ཆེན་ཁྲིར། །མ་ཆགས་པདྨ་ཐབས་ཤེས་ཉི་ཟླའི་སྟེང། །དེ་དབུས་རྒྱལ་ཀུན་འདུས་པའི་ངོ་བོ་ཉིད། །རྩ་བའི་བླ་མ་བྱམས་ཆེན་མི་ཕམ་མགོན། །དངོས་སྣང་རྗེ་བཙུན་དྷརྨཱ་ཀ་ར་མཆོག །ཞྭ་དམར་གསེར་མདངས་ཅོད་པན་དབུ་ལ་གསོལ། །དཀར་གསལ་བགྲེས་ཉམས་ཕྱག་གཉིས་ཆོས་འཆད་རྒྱས། །ཨུཏྤལ་སྡོང་བུས་བཏེགས་པའི་རལ་པོད་བསྣམས། །ཆོས་གོས་རྣམ་གསུམ་ཞབས་གཉིས་རྡོར་སྐྱིལ་བཞུགས། །དེ་ཡི་དཔྲལ་བར་པད་ཉི་ཟླ་སྟེང་དུ། །མ་འོངས་བསྐལ་བཟང་དྲུག་པ་

[Full Size]

སེང་གེ་སྒྲའི། །རྣམ་འཕྲུལ་དཔལ་ལྡན་དུས་གསུམ་ཀུན་ཏུ་མཁྱེན། །བགྲེས་ཚུལ་ཞྭ་ནག་ཅོད་པན་ཕྱག་བྱང་ཆུབ། །མཆོག་གི་རྒྱ་ཅན་ངུར་སྨྲིག་རྣམ་གསུམ་བཀླུབས། །རྡོར་སྐྱིལ་གྱིས་བཞུགས་མགྲིན་པར་པདྨ་དང། །ཉི་ཟླའི་སྟེང་དུ་འདས་པའི་སངས་རྒྱས་ནི། །རཏྣ་ཨངྒ་སྤྲུལ་བསྒྱུར་གར་གྱི་དབང་། །དཀོན་མཆོག་ཡན་ལག་པད་རག་ཅོད་པན་མཛེས། །ཕྱག་གཉིས་བགྲང་ཕྲེང་ཆོས་གོས་གསུམ་ལྡན་གསོལ། །ཞབས་གཉིས་སྐྱིལ་མོ་ཀྲུང་བཞུགས་ཐུགས་ཀ་རུ། །པད་ཉི་ཟླ་སྟེང་སྙིང་པོ་དོན་བརྒྱུད་ཀྱི། །བྱིན་རླབས་ངེས་ཐོབ་པདྨ་ཉིན་བྱེད་དབང་། །དགེ་སློང་ཆ་ལུགས་དབང་ཞུ་མཐོང་གྲོལ་ཅན། །རྡོ་རྗེ་དྲིལ་འཛིན་སྐྱིལ་ཀྲུང་དང་བཅས་གསལ། །གཙོ་བོའི་སྤྱི་བོར་པདྨ་ཉི་ཟླའི་སྟེང་། །རིགས་བདག་རྡོར་འཆང་ཟླ་འོད་གཞོན་ནུའི་ཚུལ། །སྒོམ་ཞྭ་གསོལ་ཞིང་འདུལ་འཛིན་ཆ་བྱད་ཀྱི། །མཉམ་བཞག་ནོར་བུ་བསྣམ་ཞིང་ཞབས་རྡོར་སྐྱིལ། །དེ་ལྟར་སངས་རྒྱས་སྐུ་ལྔའི་བདག་ཉིད་གསལ། །ཕྱོགས་དང་ཕྱོགས་མཚམས་བཀའ་བརྒྱུད་བླ་མའི་ཚོགས། །དུས་གསུམ་རྒྱལ་དང་དམ་ཆོས་འཕགས་དགེ་འདུན། །རྒྱུད་བཞིར་འབྲེལ་བའི་ཡི་དམ་དཀྱིལ་འཁོར་ལྷ། །ཡེ་ཤེས་ཆོས་སྐྱོང་ལས་དང་འཇིག་རྟེན་གྱི། །དམ་ཅན་བཀའ་ཡི་སྲུང་མ་མཐུ་རྩལ་ཅན། །ཀུན་ཀྱང་བཀྲ་གསལ་ལམ་མེར་སྤྲིན་ལྟར་གཏིབས། །གསོལ་བཏབ་ཙམ་གྱིས་བཟོད་མེད་མོས་གུས་

[Full Size]

འབར། །ཐ་མལ་སྣང་བ་གང་ཤར་སྟོང་ཉིད་དང་། །སྙིང་རྗེ་ཟུང་འཇུག་བདེ་གསལ་མི་རྟོག་ངང་། །སྣང་སྲིད་བླ་མའི་དཀྱིལ་འཁོར་རོལ་པར་ཤར། །སོ་སོའི་གནས་གསུམ་ༀ་དཀར་ཨཱཿདམར་པོ། །ཧཱུྃ་མཐིང་མཚན་པ་དེ་ལས་འོད་ཟེར་འཕྲོས། །འོག་མིན་ཆོས་དབྱིངས་ཕོ་བྲང་བདེ་བ་ཆེ། །རང་རིག་ངོ་བོ་དག་པ་རབ་འབྱམས་ཀྱི། །ལྷ་ཚོགས་སྤྱན་དྲངས་བཛྲ་ས་མ་ཛཿགསུམ་པ་སྤྱན་འདྲེན་ནི། ༀ། སྐུ་ལྔའི་བདག་ཉིད་བཅོམ་ལྡན་འདས། །ཨཱཿརྣམ་གྲོལ་ལམ་མཆོག་སྟོན་པའི་བདག །ཧཱུྃ། ཟབ་ཞི་སྤྲོས་བྲལ་འདུས་མ་བྱས། །ཧོཿདབྱིངས་ནས་བརྩེར་དགོངས་འདིར་གཤེགས་གསོལ། །བདག་གཞན་འགྲོ་རྒྱུད་ཉོན་མོངས་ཀྱི། །དྲ་བ་རྩད་ནས་གཞོམ་པའི་ཕྱིར། །ཡེ་ཤེས་ཐུགས་རྗེའི་ཀློང་ཡངས་ནས། །མཆོག་ཐུན་གྲུབ་པའི་བདུད་རྩིའི་ཆར། །བྱིན་རླབས་དབང་བཞིས་སྨིན་པ་དང་། །རྒྱུད་བཞི་གྲོལ་བར་མཛད་དུ་གསོལ། །བཞི་པ་མཆོད་འབུལ་ནི། རང་གི་ཐུགས་ཀའི་འོད་ཟེར་ལས། །སྤྲུལ་པའི་རྡོ་རྗེ་ལྷ་མོ་ནི། །གཟུགས་སྒྲ་དྲི་རོ་རེག་ཆོས་སོགས། །ཕྱི་ཡི་མཆོད་པ་བཅུ་དྲུག་དང་། །དམ་རྫས་ཤ་ལྔ་བདུད་རྩི་ལྔ། །བླ་མེད་ནང་གི་མཆོད་པ་དང་། །གསང་བ་བདེ་སྟོང་དབྱེར་མེད་ངང་། །ཟུང་འཇུག་བདེ་ཆེན་མཆོད་པ་འབུལ། །དེ་ལྟར་མཆོད་བྱ་མཆོད་བྱེད་རྣམས། །གཉིས་མེད་རྟོགས་པས་བསྐང་ཞིང་བཤགས། །ཡི་གེ་བརྒྱ་པ་བརྗོད་ལ། །བདག་གཞན་

[Full Size]

རྒྱུད་ཀྱི་ཉེས་པ་གང་མཆིས་བཤགས་ཤིང་། བླ་མ་རྣམས་ཀྱི་སྐུ་ལས་བདུད་རྩི་འོ་རྒྱུན་ལྟ་བུ་སྤྲོས་ནས་རང་ལུས་ལྟེམས་ཀྱིས་གང་ནས། དེའི་འོད་ཟེར་གྱིས་འགྲོ་བའི་སྡིག་སྒྲིབ་ཉེས་ལྟུང་ཐམས་ཅད་དག་པར་མོས་ལ། སངས་རྒྱས་ཀུན་འདུས་ཀྱི་ངོ་བོར་རྩེ་གཅིག་མོས་པས། ཀརྨ་པ་མཁྱེན་ནོ། །ཅི་ནུས་བཟླ། དྲུག་པ་བླ་མ་རྒྱང་འབོད་གསོལ་འདེབས། དུས་གསུམ་གྱི་སངས་རྒྱས་འདུས་པའི་སྐུ། །ཆོས་བརྒྱད་ཁྲི་བཞི་སྟོང་འབྱུང་བའི་གནས། །འདྲེན་པ་ཚོགས་ཞིང་གི་མངའ་བདག་མཆོག །མ་རིགས་དྲུག་སེམས་ཅན་གཟིགས་སུ་གསོལ། །མཁའ་ཁྱབ་ཆོས་སྐུ་ཡི་རང་བཞིན་ལ། །བདེ་བ་ཆེ་ལོངས་སྤྱོད་ཡོངས་རྫོགས་པ། །གང་འདུལ་གྱི་སྤྲུལ་བསྒྱུར་སྟོན་པ་པོ། །བདག་འགྲོ་དྲུག་ཐུགས་རྗེས་སྐྱོང་དུ་གསོལ། །འཇིག་རྟེན་གྱི་ཞེན་འཛིན་མཐའ་མེད་འདི། །བློ་ཨ་འཐས་འཁྲུལ་སྣང་ཤེས་བཞིན་པར། །མི་རྟག་དང་ངེས་འབྱུང་མོས་གུས་ཀྱིས། །ལུས་རྟེན་འདིར་རྒྱུད་གྲོལ་བྱིན་གྱིས་རློབས། །སྣང་སྲིད་ཀུན་སྐྱེ་མེད་ཀློང་ཡངས་པར། །རང་བྱུང་གི་རིག་པ་རང་གྲོལ་ངང་། །ལྷན་སྐྱེས་ཀྱི་ཡེ་ཤེས་མངོན་གྱུར་ནས། །རྗེ་བཙུན་གྱི་རྣམ་ཐར་མཚུངས་བྱིན་རློབས། །དེ་ནས་བདུན་བ་དབང་བཞིའི་བྱིན་རླབས་བསྐུལ་བ། ཀྱེ་ཧོ། ཕ་གཅིག་དྲིན་ཆེན་བླ་མ། །དོན་བརྒྱུད་བྱིན་རླབས་གཏེར་ཆེན། །དེང་བདག་རྡོ་རྗེ་སེམས་དཔའ། །མྱུར་འགྲུབ་རྒྱུད་སྨིན་གྲོལ་མཛོད། །མཐོང་ཐོས་དྲན་རེག་འབྲེལ་ཚད། །ཐུགས་རྗེའི་རོལ་པས་སྐྱོང་བཞིན། །གང་འདིར་མངོན་བྱང་ཆུབ་པའི། །གོ་འཕང་བདེ་བླག་སྩོལ་

[Full Size]

ཅིག །བརྒྱད་བ་དབང་ལེན་པ་དངོས། དེ་ལྟར་གསོལ་བཏབ་ཐུགས་བརྒྱུད་བསྐུལ་བའི་མཐུས། །སྐྱབས་གནས་རྒྱ་མཚོ་འདུས་ཞལ་ངེས་པ་ཡི། །བླ་མའི་དཀྱིལ་འཁོར་ལྷ་ཚོགས་འོད་ཞུ་ནས། །རིགས་ཀུན་ཁྱབ་བདག་གཙོ་བོའི་སྐུ་ུལ་ཐིམ། །དེ་ཡི་གསང་གསུམ་ཡེ་ཤེས་རྡོ་རྗེ་བཞིའི། །བྱིན་རླབས་བུམ་གསང་ཤེར་ཡེ་བཞི་པའི་དོན། །རྣམ་པ་ༀ་དཀར་ཨཱཿདམར་ཧཱུྃ་མཐིང་ག །ཧོཿལྗང་འོད་ཟེར་དང་ནི་བདུད་རྩིའི་རྒྱུན། །རང་གི་གནས་བཞིར་ཐིམ་པས་དབང་བཞི་ཐོབ། །རྒྱུད་སྨིན་སྒྲིབ་དག་ལམ་བཞི་འབྱོངས་པ་དང་། །སྐུ་བཞིའི་གོ་འཕང་མངོན་གྱུར་བྱིན་གྱིས་རློབས། །བླ་མ་དགྱེས་ཞལ་མདངས་བཅས་འདི་སྐད་དུ། །གཞི་ནས་མ་བཅོས་ཡེ་ནས་ལྷུན་གྲུབ་ལ། །ཐ་མལ་རང་ལུགས་ཆེན་པོར་བཞག་པ་ན། །སྐྱེ་འཆི་མེད་པ་ནམ་མཁའི་ཀློང་ཡངས་སུ། །འཕོ་འགྱུར་མེད་པ་ཆོས་སྐུའི་ལུས་མཐོང་འགྱུར། །ཅེས་པའི་ཟབ་དོན་བཀའ་གསང་གནང་ཐོབ་ནས། །བྱམས་ཆེན་ཞི་བའི་དབྱིངས་ལས་རྗེས་དགོངས་ཏེ། །འོད་ཞུ་བདག་ཐིམ་དབྱེར་མེད་བདེ་ཆེན་ངང་། །མ་བཅོས་སྤྲོས་ཀུན་བྲལ་བའི་ཀློང་དུ་བཞག །ཅི་གནས་སུ་ཉམས་ལེན་བསྐྱངས་ལ་མཐར་བསྔོ་བ་དང་སྨོན་ལམ་གྱིས་རྒྱས་གདབ་པར་ཡང་བྱའོ། །ཅེས་པའི་རྣལ་འབྱོར་དོན་ཚན་བརྒྱད་པ་འདིའང་སི་ཏུ་པདྨའི་མིང་ཅན་གྱིས། བམ་སྟེང་གྲུབ་པའི་དབང་མཆོག་གི། །སྤྲུལ་གར་སྔོན་སྨོན་ལེགས་སྨིན་པ། །གུཎའི་མཚན་ཅན་བཞེད་སྐོང་ཆེད། །བཀོད་དགེས་འགྲོ་ཀུན་སངས་རྒྱས་ཤོག །མདྒ་ལཾ། ཛ་ཡནྟུ།། །།

[Full Size]

༈ བླ་མ་རྒྱང་འབོད་དང་གསོལ་འདེབས་དངོས་གྲུབ་ཡོངས་འདུ་ཞེས་པ་བཞུགས་སོ། །ཨ་ཧོཿརང་སེམས་འཁྲུལ་པ་རྒྱ་འབྱམས་ཀྱི་ངང་ནས། །སྐབས་ཤིག་སྣང་བ་ཡེ་ཆ་ལས་འཕྲོས་པའི། །རྩ་བའི་བླ་མ་དམ་པ་དེ་དྲན་བྱུང་། །རྡོ་རྗེ་འཆང་དངོས་སུ་ངེས་ཤེས་རྙེད་བྱུང་། །འཇུར་བུར་བཅིངས་པའི་རྗེས་ཤེས་ཀྱི་ངང་ནས། །རྣམ་རྟོག་ཐོལ་བྱུང་དུ་གཏད་མེད་འཕྲོས་པའི། །དྲན་མཆོག་རྩ་བའི་བླ་མ་གསལ་བྱུང་ངོ་། །རྡོ་རྗེ་འཆང༴ སེམས་དུས་གསུམ་གྱི་སྤྲོས་པ་རྒྱུན་བཅད་ནས། །ཤེས་ཐོག་ཏུ་རིག་པ་གནས་པའི་ཚེ་ན། །གཤིས་ཀུན་ཁྱབ་ངོ་བོ་བླ་མ་དྲན་བྱུང་ངོ་། །རྡོ་རྗེ༴ མགོན་ཁྱོད་ཀྱི་བཀའ་དྲིན་རྗེས་སུ་སྐྱོང་བའི། །ལམ་འབྲས་བུའི་ཉམས་ལེན་གནད་དུ་བསྣུན་པས། །སྐུ་བཞི་ཡི་དབང་ཕྱུག་བླ་མ་དྲན་བྱུང་ངོ་། །རྡོ་རྗེ༴ སྣང་སྲིད་ཀྱིས་བསྡུས་བའི་ཆོས་རྣམས་ཐམས་ཅད། །ཆོས་དབྱིངས་ཡེ་སྟོང་མཐའ་བྲལ་གྱི་ཡེ་ཤེས། །སྐྱེ་མེད་ངོ་བོ་བླ་མ་དྲན་བྱུང་ངོ་། །རྡོ་རྗེ་འཆང་དངོས་སུ་ངེས་ཤེས་རྙེད་བྱུང་། །སུ་ཁ་སིདྡྷི། ཨ་ཧོཿགསོལ་བ་སྙིང་གི་དཀྱིལ་ནས་འདེབས་སོ། །བྱིན་རླབས་ཐུགས་ཀྱི་ཀློང་ནས་སྩོལ་ཅིག །ཕ་གཅིག་སངས་རྒྱས་རྡོ་རྗེ་འཆང་མཁྱེན་ནོ། །ལྷན་ཅིག་སྐྱེས་པའི་ཡེ་ཤེས་སྨིན་གྲོལ་སྩོལ་ཅིག །ཅེས་རྒྱང་འབོད་དར་དྲག་ལ་ཡུན་རིང་བ་སེམས་མོས་གུས་ཀྱི་སྣང་བ་འགྱུར་ངེས་བྱས་ལ་མཆོག་གི་བླ་མའི་རྣལ་འབྱོར་རྣམས་ལ་རྟག་འགྲུས་སུ་འབད་པ་ཆེར་སྤྲོ་བར་རིགས་སོ། །དེ་ཡང་དམ་ཚིག་བཀོད་པའི་རྒྱུད་ལས། མཚན་དང་དཔེ་བྱད་ལྡན་བའི་ལྷ། །བསྐལ་བ་འབུམ་དུ་བསྒོམས་པ་ལས། །བླ་མ་དྲན་བ་འབུམ་ཆར་མིན། །བསྙེན་སྒྲུབ་བཟླས་པ་ས་ཡ་ལས། །བླ་མའི་གསོལ་འདེབས་ལན་གཅིག་ལྷག །ཅེས་སོགས་ཕན་ཡོན་མཐའ་ཡས་བར་གསུངས་པའི་ཕྱིར་རོ། །མདྒ་ལམ་ཀུརྦནྟུ། ཤུ་བྷམ།། །།

བླ་མའི་རྣལ་འབྱོར་སྣང་སྲིད་དག་པ་རབ་འབྱམས་ནམ་མཁའ་ཡེ་དྭངས།

[Full Size]

༈ བླ་མའི་རྣལ་འབྱོར་སྣང་སྲིད་དག་པ་རབ་འབྱམས་ནམ་མཁའ་ཡེ་དྭངས་ཞེས་བྱ་བ་བཞུགས་སོ། །ཤྲཱི་མ་ཧཱ་གུ་རུ་ཀརྨ་ཀྭ་ཡ་ན་མཿཚད་མེད་བྱམས་པའི་ཟླ་སྣང་གིས། །སྒྲིབ་གཉིས་རབ་རིབ་མུན་པ་སེལ། །རྣམ་གྲོལ་ལམ་མཆོག་གསལ་བའི་གཉེན། །འགྲོ་མགོན་དཔལ་ལྡན་བླ་མར་འདུད། །གང་ལ་བསྟེན་ན་འཁོར་མཚོ་ལས། །སྒྲོལ་བྱེད་བྱང་ཆུབ་གྲུ་གཟིངས་འདི། །ངེས་འབྱུང་བློ་ཡིས་བསྐུལ་བས་ན། །རིང་མིན་ཐར་བའི་གྲོང་འཇུག་ངེས། །དེ་ལ་འདིར་དུས་གསུམ་སངས་རྒྱས་འདུས་པའི་རང་གཟུགས་དཔལ་ལྡན་ཀརྨ་པ་ཆེན་པོའི་བླ་མའི་རྣལ་འབྱོར་བསྒོམ་རིམ་ཞིག་སྤེལ་བ་སྟེ། དེ་ཡང་བདག་ཅག་གི་སྟོན་པས་མདོ་རྒྱུད་དྲང་ངེས་ཀྱི་ཐེག་པ་རྣམས་ལས་བླ་མ་མཆོད་བ་མགྲིན་གཅིག་བསྔགས་པའི་གནས་སུ་གསུངས་ཤིང་། ཁྱད་པར་རྗེ་མཐོན་མཐིང་དང་པདྨ་རཱ་གའི་ཅོད་པན་འཆང་བ་གྲུ་འཛིན་བདག་པོའི་ཕྲེང་བ་འཛིན་བ་རྣམས་ནི་གསར་རྙིང་དུ་མ་ནས་ལུང་གིས་ཟིན་པའི་ཆོས་ཀྱི་རྒྱལ་པོ་ངེས་པ་ཉིད་དུ་མངོན་སུམ་ཚད་མར་གྲུབ་ཅིང་། དེས་ན་བཅོས་མིན་ཤུགས་འབྱུང་མོས་གུས་ཙམ་གྱིས་རང་སེམས་ཆོས་སྐུར་འཆར་བའི་ལམ་ཟབ་མོ་གཅིག་ཆོད་ཀྱི་གདམས་པ་བསྟན་ཏེ། གདོད་ནས་གྲུབ་པའི་གནས་སམ་རྒྱལ་བས་བྱིན་གྱིས་བརླབས་པའི་གནས་ལྟ་བུར་བླ་མའི་སྐུ་བརྙན་དང་ཕྱག་ཞབས་ཀྱི་རྗེས་བཀྲམ་ལ། ཚོགས་གཉིས་བསོད་ནམས་སྤེལ་བའི་རྟེན་འབྲེལ་དུ་ཕྱི་ནང་གསང་བའི་འདོད་ཡོན་མཆོད་རྫས་ཇི་སྙེད་པ་དང་། མཎྜལ་ནང་མཆོད་བདུད་རྩི་ཐབས་ཤེས་ཀྱི་རྫས་མཆོག་ཚོགས་ཀྱི་འཁོར་ལོའི་ཡོ་བྱད་རྣམས་འདུ་བགྱིད་ལ། རང་ཉིད་བདེ་དགྱེས་སོགས་ཡི་དམ་གང་རུང་བསྐྱེད་ལ་དང་པོ་ནང་མཆོད་བྱིན་གྱིས་བརླབ་པ་ནི། ༀ་ཨཱཿབིགྷྣན་གྱིས་བསངས་། ༀ་སྭབྷཱ་ཝས་སྦྱངས། དངོས་ཀུན་སྟོང་པར་གྱུར་པའི་ངང་། །རླུང་

[Full Size]

དཀྱིལ་སྔོན་པོ་གཞུ་དབྱིབས་ཅན། །ཡྃ་ཡིག་བ་དན་མཚན་པའི་སྟེང་། །མེ་དཀྱིལ་དམར་པོ་ཟུར་གསུམ་འབར། །རྃ་ཡིག་མཚན་པ་དེ་སྟེང་དུ། །ཀྃ་ལས་མི་མགོའི་ཐོད་སྒྱེད་གསུམ། །ཨ་ལས་མཚན་ལྡན་ཀ་པཱ་ལ། །ཡངས་ཤིང་རྒྱ་ཆེ་ཕྱི་དཀར་ལ། །ནང་དམར་ཐབས་ཤེས་མཚོན་པ་ཡི། །དབུས་སུ་མུ་ལས་དྲི་ཡི་ཆུ། །ཤར་དུ་བི་ལས་དྲི་ཆེན་དང་། །ལྷོ་རུ་ར་ལས་རཀྟ་བསྐྱིལ། །ནུབ་ཏུ་ཤུ་ལས་བྱང་སེམས་དཀར། །བྱང་དུ་མ་ལས་ཀླད་པ་སྟེ། །བདུད་རྩི་རྣམ་ལྔ་སླར་ཡང་ནི། །དབུས་སུ་ན་ལས་མི་ཡི་ཤ། །ཤར་ལྷོར་གོ་ལས་བ་གླང་དང། །ལྷོ་ནུབ་ཀུ་ལས་ཁྱི་ཡི་ཤ། ནུབ་བྱང་ད་ལས་གླང་ཆེན་དང། །བྱང་ཤར་ཧ་ལས་རྟ་ཡི་ཤ། བདུད་རྩི་དང་ནི་ཤ་ཆེན་ལྔ། །ཡི་གེ་སོ་སོས་རྒྱས་བཏབ་བོ། །རང་གི་སྣ་བུག་གཡོན་པ་ནས། །ཧཱུྃ་གི་དབྱིབས་ཅན་རླུང་སྤྲོས་པས། །རླུང་གཡོས་མེ་བསྐྱོད་ཐོད་རྫས་ཁོལ། །དམ་ཚིག་བདུད་རྩིའི་འོད་ཀློང་ལས། །ༀ་ཨཱཿཧཱུྃ་སྤྲོས་ཡེ་ཤེས་ཀྱི། །ཟག་མེད་བདུད་རྩི་སྤྱན་དྲངས་ནས། །བྱིན་རླབས་དམ་ཡེ་དབྱེར་མེད་པའི། །མཐའ་ཀླས་ཡེ་ཤེས་རྒྱ་མཚོར་གྱུར། །ༀ་ཨཱཿཧཱུྃ། ལན་གསུམ་བརྗོད་བས་བྱིན་བརླབས་ལ། དེ་ནས་སྔོན་འགྲོའི་གཏོར་མའང་གོང་བཞིན་བྱིན་གྱིས་བརླབས་ཏེ། ༀ་ཁ་ཁ་ཁཱ་ཧི་སོགས་ལན་བཞི་བརྗོད་ལ། ཧཱུྃ། དམ་ཚིག་ཆེན་པོའི་དབང་གིས་ནི། །ཞིང་སྐྱོང་མཐུ་ཆེན་བརྒྱད་རྣམས་དང། །མཁའ་འགྲོ་སུམ་ཅུ་སོ་གཉིས་སོགས། །དཀྱིལ་འཁོར་བསྒྲུབ་ལ་མངོན་ཕྱོགས་པའི། །མ་ལུས་འཁོར་དང་

[Full Size]

ཡང་འཁོར་རྣམས། །འདིར་གཤེགས་མཆོད་སྦྱིན་གཏོར་མ་བཟང། །ལྔ་ལྡན་དག་པའི་བདུད་རྩི་ཡིས། །སྦྱངས་སྤེལ་བསྒྱུར་བའི་འདོད་ཡོན་རྣམས། །བཞེས་ནས་རྣལ་འབྱོར་མཐུན་རྐྱེན་སྤེལ། །ནད་གདོན་ཞི་དང་དཔལ་འབྱོར་རྒྱས། །མོས་པ་རྣམ་བཞིས་དབང་སྡུས་ལ། །ལོག་འདྲེན་བར་ཆད་རྐྱེན་ངན་སོལ། མདོར་ན་ཡིད་ལ་གང་བསམ་པའི། །འདོད་དོན་ལྷུན་གྱིས་གྲུབ་པར་མཛོད། །གང་དག་ལྟ་བར་མི་དབང་བའི། །གདོན་བགེགས་འབྱུང་པོ་ཕྱིར་དེངས་ཤིག །བཀའ་ལས་འདས་ན་ཆོས་ཉིད་ཀྱི། །བདེན་པས་ཐལ་བར་བརླག་ཏ་རེ། །ༀ་སུམ་བྷ་ནི་དྲག་ཏུ་བརྗོད། སྟེང་འོག་ཕྱོགས་མཚམས་མ་ལུས་པར། །རང་གི་ཐུགས་ཀའི་འོད་ཟེར་ལས། །རྡོ་རྗེའི་རྭ་གུར་ཡེ་ཤེས་མེའི། །སྲུང་བའི་འཁོར་ལོས་གཏམས་པར་གྱུར། །བཛྲ་རཀྴ་རཀྴ་ཧཱུྃ་ཧཱུྃ་ཧཱུྃ། །ཅེས་སྲུང་འཁོར་བསྒོམས་ལ། མཆོད་པ་བྱིན་རླབས་ནི། ནང་མཆོད་ཀྱིས་བྲན་ལ། ༀ་ཨཱཿབིགྷྣཱན་སོགས་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་ཐོད་སྣོད་དུ། །ཧཱུྃ་ཡིག་དཔག་མེད་འོད་དུ་ཞུ་བ་ལས། །རྡོ་རྗེའི་མཆོད་ཡོན་ཞབས་བསིལ་མེ་ཏོག་སྤོས། །སྣང་གསལ་དྲི་ཆབ་ཞལ་ཟས་རོལ་མོ་རྣམས། །ལྷ་རྫས་རྨད་བྱུང་ཟག་མེད་བདེ་བ་ཆེ། །ཀུན་ཏུ་བཟང་པོའི་སྨོན་ལམ་ལས་གྲུབ་བཞིན། །མཆོད་པའི་སྤྲིན་གྱིས་རབ་འབྱམས་དབྱིངས་གང་བ། །རྒྱལ་རྣམས་དགྱེས་པ་སྐྱེད་པའི་རང་བཞིན་གྱུར། །ༀ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱདྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝདྱེ་

[Full Size]

ཤབྡ་ཨཱཿཧཱུྃ། གིས་བྱིན་གྱིས་བརླབས་ལ། སྐྱབས་སུ་འགྲོ་བ་ནི། བདག་གཞན་མར་གྱུར་མཁའ་ཁྱབ་རྣམས། །དེང་བཟུང་སྙིང་པོ་བྱང་ཆུབ་བར། །སྟོན་མཆོག་ཞི་བ་ཆགས་བྲལ་བ། །འཕགས་ཚོགས་དགེ་འདུན་བདག་ཉིད་ཅན། །དཔལ་ལྡན་བླ་མ་རྡོ་རྗེ་འཆང་། །བྱིན་རླབས་རྩ་བ་བརྒྱུད་པར་བཅས། །ཡི་དམ་དཀྱིལ་འཁོར་རབ་འབྱམས་ལྷ། །དངོས་གྲུབ་འབྱུང་གནས་དམ་པ་དང་། །སངས་རྒྱས་ཆོས་དང་ཚོགས་ཀྱི་མཆོག །ཐུགས་རྗེའི་གཏེར་མངའ་དཀོན་མཆོག་གསུམ། །དཔའ་བོ་མཁའ་འགྲོ་ཆོས་སྐྱོང་ལ། །སྐྱབས་སུ་མཆིའོ་བདག་བྱིན་རློབས། །ལན་བདུན་ནམ་ཉེར་གཅིག་བརྒྱ་ཙམ་བརྗོད། འགྲོ་རྣམས་འཁོར་བའི་དུཿཁ་ལས། །སྒྲོལ་ཕྱིར་བདག་ཉིད་ཟབ་མོའི་ལམ། །འཁོད་ནས་གཞན་ཕན་སེམས་བསྐྱེད་ཀྱིས། །ཀུན་ཀྱང་རྣམ་གྲོལ་ཐོབ་པར་བགྱི། །ལན་གསུམ་སེམས་བསྐྱེད་ལ། དཀོན་མཆོག་གསུམ་ལ་བདག་སྐྱབས་མཆི། །སོགས་ཡན་ལག་བདུན་པ་འབུལ། སེམས་ཅན་ཐམས་ཅད་བདེ་དང་ལྡན། །སྡུག་བསྔལ་རྒྱུ་དང་བྲལ་གྱུར་ཅིག །ཉེ་རིང་ཆགས་སྡང་སྤངས་པ་ཡི། །བཏང་སྙོམས་ཆེན་པོར་གནས་གྱུར་ཅིག །ཅེས་ལན་གསུམ་ཚད་མེད་བསྒོམས་ལ། དེ་ནས་བླ་མའི་དཀྱིལ་འཁོར་བསྐྱེད་བའི་རིམ་པ་ནི། ༀ་མ་ཧཱ་ཤཱུནྱ་ཏཱ་སོགས། ཞེས་དངོས་སྣང་འཛིན་པའི་བག་ཆགས་ཐམས་ཅད་དོན་དམ་སྟོང་ཉིད་ཡེ་ཤེས་ཆེན་པོའི་དབྱིངས་སུ་སྦྱངས་ལ། ཆོས་རྣམས་དམིགས་མེད་སྟོང་པའི་ངང་ཉིད་ལས། །བྷྲཱུྃ་ལས་གཞལ་ཡས་དཀྱིལ་འཁོར་

[Full Size]

གྲུ་ུབཞི་པ། །སྒོ་བཞི་རྟ་བབས་ཆོས་འཁོར་གདུགས་རི་དྭགས། །དྲྭ་ཕྱེད་མདའ་ཡབ་འདོད་སྣམ་རིན་པོ་ཆེ། །སྣ་ཚོགས་རྒྱན་དང་ཕྱོགས་མཚམས་ཀུན་ཏུ་ཡང་། །བ་དན་རྔ་ཡབ་གདུགས་དང་རྒྱལ་མཚན་སོགས། །གཞན་ཡང་མཆོད་པའི་བྱེ་བྲག་དཔག་མེད་འཕྲོ། །སྟེང་འོག་ཤར་སྔོ་ལྷོ་སེར་ནུབ་དམར་བ། །བྱང་ལྗང་དབུས་དཀར་ཕྱི་རིམ་རྡོ་རྗེ་ཡི། །རྭ་བ་དང་ནི་འོད་ཟེར་འབར་བ་ཅན། །དབུས་སུ་པད་སྡོང་ཡལ་ག་ལྔར་གྱེས་པའི། །དབུས་མར་པད་དཀར་འདབ་མ་བཅུ་གསུམ་པ། །ཟེའུ་འབྲུ་གེ་སར་རྒྱས་པའི་ལྟེ་བ་ལ། །མི་འཇིགས་བཞི་དང་ལྡན་པ་སེང་གེའི་ཁྲི། །ལྷ་ཀླུ་མི་ཡི་བསོད་ནམས་ལས་གྲུབ་པའི། །རིན་ཐང་བྲལ་བའི་རེག་བྱ་དུ་མས་བརྒྱན། །དྲི་མེད་དྭངས་གསལ་ཆུ་ཤེལ་ཆ་རྫོགས་སྟེང་། །སངས་རྒྱས་ཀུན་འདུས་ངོ་བོ་རིགས་དཀྱིལ་བདག །རྗེ་བཙུན་བདུད་ཚོགས་འདུལ་བའི་རྡོ་རྗེ་འཆང་། །དཀར་གསལ་ཞལ་གཅིག་བགྲེས་ཚུལ་དབུ་སྐྱེས་དཀར། །སྤྱན་གཉིས་དོན་དམ་སྐྱེ་མེད་ཀློང་དུ་གཟིགས། །མཐོང་གྲོལ་ཞྭ་ནག་གསེར་མདངས་ཁྱུང་གཤོག་ཅན། །ནོར་བུ་རིན་ཆེན་དུ་མས་རྒྱན་མཛེས་པ། །རིགས་བདག་མི་བསྐྱོད་བརྡ་མཚོན་དབུ་ལ་གསོལ། །ཕྱག་གཉིས་བདེ་སྟོང་དབྱེར་མེད་རྡོ་རྗེ་དྲིལ། །བསྣོལ་འཛིན་སྐུ་ལ་ཆོས་གོས་རྣམ་གསུམ་དང་། །ཟ་འོག་བེར་གསོལ་ཞབས་གཉིས་སྐྱིལ་མོ་ཀྲུང་། །གཡོ་མེད་དྲང་པོའི་ལུས་གནད་སངས་ཀྱིས་བཞུགས། །གཡས་གཡོན་རིིམ་བཞིན་སྐྱེས་རབས་གསེར་གྱི་

[Full Size]

ཕྲེང་། །མཐའ་སྐོར་པད་འདབ་བཅུ་གསུམ་སོ་སོའི་སྟེང་། །ཟླ་བའི་དཀྱིལ་འཁོར་ཉ་གང་དང་པོའི་དབུས། །དཔལ་ལྡན་དུས་གསུམ་མཁྱེན་པ་བགྲེས་ཉམས་ལྡན། །དབུ་སྐྱེས་རབ་དཀར་སྤྱན་གཉིས་བར་སྣང་གཟིགས། །ཕྱག་གཉིས་མཉམ་བཞག་དཔལ་བེའུ་ཞབས་རྡོར་སྐྱིལ། །གཉིས་པར་གྲུབ་ཆེན་ཀརྨ་པཀྴི་ནི། །སྨུག་ནག་ཨག་ཚོམ་ཟུར་གསུམ་སྤྱན་ལྟ་སྟངས། །ཟིལ་གནོན་ཕྱག་རྒྱ་ཞབས་གཉིས་རྡོར་སྐྱིལ་བཞུགས། །གསུམ་པར་སེམས་དཔའ་རང་བྱུང་རྡོ་རྗེ་ནི། །དཀར་གསལ་མིའུ་ཐུང་གཟུགས་ལ་སྤྱན་ཧྲིག་གེ། །ཆོས་འཁོར་ཕྱག་རྒྱ་ཞབས་གཉིས་སྐྱིལ་མོ་ཀྲུང་། །བཞི་པར་འཛམ་གླིང་རོལ་པའི་རྡོ་རྗེ་ནི། །ཞལ་དཀྱུས་རིང་ཞིང་མཆོག་སྦྱིན་མཉམ་བཞག་རྒྱས། །འཁོར་ལོ་འཛིན་ཞིང་ཞབས་གཉིས་ཕྱེད་སྐྱིལ་བཞུགས། །ལྔ་པར་དེ་བཞིན་གཤེགས་པ་མཚན་དཔེས་བརྒྱན། །སྐྱབས་སྦྱིན་ཕྱག་ན་རིན་ཆེན་ཕྲེང་བ་འཛིན། །ཞབས་གཉིས་བཟང་པོའི་སྟབས་བཞུགས་དྲུག་པར་ནི། །མཐོང་བ་དོན་ལྡན་སྒེག་ཉམས་སྨིན་མ་འཁྱུགས། །རྡོ་རྗེ་དྲིལ་འཛིན་པདྨའི་སྐྱིལ་མོ་ཀྲུང་། །བདུན་པར་ཆོས་གྲགས་རྒྱ་མཚོ་དཀར་སྨུག་བརྗིད། །ཆོས་འཆད་མེ་ཏོག་ནོར་བུ་འཛིན་ཞབས་གཉིས། །སེམས་སྐྱིལ་གྱིས་བཞུགས་བརྒྱད་པ་མི་བསྐྱོད་རྒྱལ། །སྐུ་བོང་རིང་ཞིང་ཕྱག་ཞབས་མཐིལ་བསྟན་ནས། །བྱིན་རླབས་སྟངས་སྟབས་ཀྱིས་བཞུགས་དགུ་པར་ནི། །དབང་ཕྱུག་རྡོ་རྗེ་དཀར་གསལ་ཕྱག་གཉིས་ཀྱིས། །ས་གནོན་

[Full Size]

མཉམ་བཞག་ཚེ་ཡི་བུམ་པ་བསྣམས། །རྡོར་སྐྱིལ་གྱིས་བཞུགས་བཅུ་པར་བཟོ་སྦྱོང་མཆོག །བཛྲ་དྷརྨཱ་དྷཱ་ཏུ་བགྲེས་ཉམས་ཅན། །མཆོག་སྦྱིན་མཉམ་བཞག་པད་དཀར་སྡོང་བུ་འཛིན། །སེམས་སྐྱིལ་གྱིས་བཞུགས་བཅུ་གཅིག་རྒྱལ་བའི་དབང་། །ཡེ་ཤེས་རྡོ་རྗེ་མཉམ་བཞག་མི་གཡོ་ཞབས། །རྡོར་སྐྱིལ་བཞུགས་ཤིང་བཅུ་གཉིས་མཉམ་མེད་འདྲེན། །བྱང་ཆུབ་རྡོ་རྗེ་གཞོན་ཚུལ་ཞི་མ་ཁྲོ། །སྐྱབས་སྦྱིན་མཉམ་བཞག་ཡིད་བཞིན་ནོར་བུ་འཛིན། །རྡོར་སྐྱིལ་གྱིས་བཞུགས་ཀུན་ཀྱང་དབུ་ུལ་ནི། །ཞྭ་ནག་གསེར་མདངས་གསོལ་ཞིང་ཆོས་གོས་གསུམ། །ཟབ་བེར་ལྷབ་ལྷུབ་སྐུར་གསོལ་དེ་དག་ཀྱང་། །ངོ་བོ་གཅིག་ལ་རྣམ་པ་དུ་མར་སྤྲུལ། །གང་འདུལ་ཐབས་ཀྱིས་འགྲོ་བའི་སྐྱབས་སུ་བཞུགས། །བཅུ་གསུམ་མདུན་དབུས་ཞྭ་དམར་ཅོད་པན་ཅན། །དཔལ་ལྡན་མི་ཕམ་ཆོས་གྲུབ་རྒྱ་མཚོ་ནི། །སྐུ་ཤ་རབ་རྒྱས་སྤྱན་གཉིས་དབྱིངས་སུ་གཟིགས། །ཕྱག་གཉིས་ཐབས་ཤེས་ངོ་བོ་རྡོར་དྲིལ་འཛིན། །ཞབས་གཉིས་སེམས་དཔའི་སྐྱིལ་མོ་ཀྲུང་གིས་བཞུགས། །ཆོས་གོས་རྣམ་གསུམ་བེར་ཆེན་ཟླུམ་གསོལ་ཞིང་། །ཐབས་མཁས་གང་འདུལ་དེར་སྣང་སྟོན་ཅིང་བཞུགས། །རྒྱབ་ཕྱོགས་སྟེང་གི་པདྨ་ཉི་མའི་སྟེང་། །ཁྱབ་བདག་རྡོར་འཆང་མཐོན་མཐིང་རྡོ་རྗེ་དྲིལ། །བསྣོལ་འཛིན་རང་འོད་ཡུམ་འཁྱུད་ལོངས་སྐུའི་ཆས། །ཡོངས་རྫོགས་རིན་ཆེན་རྒྱན་ལྡན་ཞབས་རྡོར་སྐྱིལ། །གཡས་ཕྱོགས་པདྨར་ཟླ་སྟེང་སྒྲོལ་མ་དཀར། །སྤྱན་བདུན་ཕྱག་གཡས་མཆོག་

[Full Size]

སྤྱིན་གཡོན་ཨུཏྤལ། །དར་དང་རིན་ཆེན་རྒྱན་ལྡན་རྡོར་སྐྱིལ་བཞུགས། །གཡོན་ཕྱོགས་པདྨ་ཉི་མ་ཟླ་བའི་སྟེང་། །ཨོ་རྒྱན་ཆེན་པོ་པད་ཞྭ་ཕོད་ཀ་དང་། །ཆོས་གོས་གསོལ་ཞིང་རྡོ་རྗེ་ཐོད་པ་བསྣམས། །ཁ་ཊྭཱྃ་དཀུར་བསྟེན་རྡོར་སྐྱིལ་ལྷམ་མེར་གསལ། །མདུན་ཕྱོགས་འོག་གི་པདྨར་ཉི་རོའི་སྟེང་། །བེར་ཅན་རང་བྱུང་རྒྱལ་མོ་འཁྲིལ་སྦྱོར་རོལ། །རྔམས་ཤིང་ཞལ་གདངས་ལྗགས་འདྲིལ་སྤྱན་གསུམ་འབར། །གཉིས་ཀའང་གྲི་ཐོད་འཛིན་ཅིང་བེར་ནག་གསོལ། །ཁྲོ་བོའི་ཆས་རྫོགས་ཞབས་གཉིས་འདོར་སྟབས་བཞུགས། །ལྷ་ཚོགས་རྣམས་ཀྱི་གནས་གསུམ་ༀ་ཨཱཿཧཱུྃ། །གདོད་ནས་ལྷུན་གྲུབ་འགྱུར་མེད་ངོ་བོས་མཚན། །དེ་ལྟར་དཀོན་མཆོག་ཀུན་འདུས་ཀརྨ་པ། །སྐུ་ཡི་བཀོད་པས་ཞིང་ཁམས་ཡོངས་ལ་ཁྱབ། །རབ་འབྱམས་ཞིང་རྣམས་མ་ལུས་སྐུ་ལ་རྫོགས། །གཙོ་བོའི་ཐུགས་ཀའི་ས་བོན་འོད་ཟེར་འཕྲོས། །མི་མངོན་ཆོས་དབྱིངས་གནས་ནས་རྩ་གསུམ་གྱི། །དཀྱིལ་འཁོར་འཁོར་ལོ་བསྐྱེད་པ་དང་འདྲ་བ། །བུ་ཡུག་འཚུབས་བཞིན་མདུན་མཁར་སྤྱན་དྲངས་གྱུར། །ཞེས་བརྗོད་ལ་བྱིན་འབེབས་པ་ནི། སྟེང་དག་པ་འོག་མིན་ཞིང་ཁམས་ནས། །རིགས་ཀུན་གྱི་གཙོ་བོ་རྡོ་རྗེ་འཆང་། །སངས་རྒྱས་དང་བྱང་སེམས་གཤེགས་སུ་གསོལ། །དབང་བསྐུར་ལ་བྱིན་ཆེན་དབབ་ཏུ་གསོལ། །གཡས་པོ་ཏ་ལ་ཡི་གནས་མཆོག་ནས། །དུས་གསུམ་གྱི་རྒྱལ་ཡུམ་སྒྲོལ་མ་དཀར། །ལྷ་

[Full Size]

ཡི་དམ་ཞི་ཁྲོ་གཤེགས་སུ་གསོལ། །དབང་བསྐུར་ལ་བྱིན་ཆེན་དབབ་ཏུ་གསོལ། །གཡོན་དཔལ་རི་པདྨ་འོད་ཞིང་ནས། །མཆོག་གྲུབ་པའི་སྤྱི་མེས་པདྨ་འབྱུང་། །འཁོར་རིག་འཛིན་ཌཱ་ཀི་གཤེགས་སུ་གསོལ། །དབང་བསྐུར་ལ་བྱིན་ཆེན་དབབ་ཏུ་གསོལ། །དབུས་རང་སེམས་སྣང་སྟོང་ཕོ་བྲང་ནས། །རྗེ་ཀརྨ་པ་ཡི་སྐྱེས་རབས་ཕྲེང་། །བཀའ་བརྒྱུད་པའི་བླ་མ་གཤེགས་སུ་གསོལ། །དབང་བསྐུར་ལ་བྱིན་ཆེན་དབབ་ཏུ་གསོལ། །འོག་དམ་ཚིག་གཉེན་པོའི་དུར་ཁྲོད་ནས། །དཔལ་མ་ཧཱ་ཀཱ་ལ་རེ་མ་ཏི། །བཀའ་ཆོས་སྐྱོང་རྒྱ་མཚོ་གཤེགས་སུ་གསོལ། །དབང་བསྐུར་ལ་བྱིན་ཆེན་དབབ་ཏུ་གསོལ། །རྡོ་རྗེ་བསྡུ་བའི་རྒྱས། ༀ་ཤྲཱི་མཱན་གུ་རུ་མཎྜལ་ས་པ་རི་ཝཱ་ར་བཛྲ་ས་མ་ཡ་ཛཿཅེས་སྤྱན་དྲངས་ལ། ཛཿཧཱུྃ་བྃ་ཧོཿབཛྲ་ས་མ་ཡ་ཏིཥྛ་ལྷན། དམ་ཡེ་གཉིས་མེད་དུ་བསྟིམས་ལ། སླར་ཡང་གཙོ་བོའི་ཐུགས་ཀའི་འོད་ཟེར་གྱིས། །རང་བཞིན་གནས་ནས་དབང་ལྷ་སྤྱན་དྲངས་ཏེ། །རིགས་ལྔ་ཡབ་ཡུམ་ལ་སོགས་དེ་བཞིན་གཤེགས། །དགོངས་པ་མཛད་དང་ཤིས་བརྗོད་མེ་ཏོག་འཐོར། །རིན་ཆེན་བུམ་བཟང་བདུད་རྩིའི་ཆར་རྒྱུན་གྱིས། །དབང་བསྐུར་ཆུ་ལྷག་ཡར་ལུད་རིགས་ལྔ་པོ། །སྤྲུལ་སྐུའི་རྣམ་པས་སོ་སོའི་དབུ་བརྒྱན་གྱུར། །ཅེས་དབང་བསྐུར་རྒྱས་གདབ་དང་། དེ་ནས་མཆོད་པའི་བྱེ་བྲག་རྣམས་རིམ་བཞིན་འབུལ་བ་ནི། མཐའ་ཡས་འགྲོ་ཁམས་རྒྱ་མཚོ་ན། །དྲི་མེད་མཆོད་ཡོན་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་

[Full Size]

སྨིན་གྲོལ་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་དྷརྨ་པཱ་ལ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། མཐའ་ཡས་འགྲོ་ཁམས་རྒྱ་མཚོ་ན། །རྒྱུན་འབབ་ཞབས་བསིལ་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །སྔགས་ཐོག་མཐའ་འདྲ་བར། པཱ་དྱཾ༴ མཐའ་ཡས་འགྲོ་ཁམས་རྒྱ་མཚོ་ན། །རབ་མཛེས་མེ་ཏོག་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །པུཥྤེ༴ མཐའ་ཡས་འགྲོ་ཁམས་རྒྱ་མཚོ་ན། །བདུག་སྤོས་བསུང་ཞིམ་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། དྷཱུ་པེ༴ མཐའ་ཡས་འགྲོ་ཁམས་རྒྱ་མཚོ་ན། །སྣང་གསལ་འོད་ཟེར་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །ཨཱ་ལོ་ཀེ༴ མཐའ་ཡས་འགྲོ་ཁམས་རྒྱ་མཚོ་ན། །བྱུང་བའི་དྲི་བཟང་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །གནྡྷེ༴ མཐའ་ཡས་འགྲོ་ཁམས་རྒྱ་མཚོ་ན། །ཞལ་ཟས་སྣ་ཚོགས་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །ནཻ་ཝི་དྱེ༴ མཐའ་ཡས་འགྲོ་ཁམས་རྒྱ་མཚོ་ན། །རྒྱུད་མངས་བྱེ་བྲག་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །

[Full Size]

ཤབྡ༴ མཆོད་རོལ་བྱ། འཇིག་རྟེན་རབ་འབྱམས་ཞིང་རྣམས་ན། །རྡོ་རྗེ་གཟུགས་སྒྲ་དྲི་རོ་རེག །རྨད་བྱུང་ཡིད་འོང་མཆོད་པ་རྣམས། །འབུལ་བཞེས་དངོས་གྲུབ་རྣམ་གཉིས་སྩོལ། །ༀ་བཛྲ་རུ་པ་ཤབྡ་གནྡྷེ་རཱ་ས་སྤཪྴེ་ཨཱཿཧཱུྃ་སྭཱ་ཧཱ། རིན་ཆེན་འཁོར་ལོ་དཔལ་བེའུ་པདྨ་དང་། །རྒྱལ་མཚན་གདུགས་བཟང་བུམ་པ་དུང་དཀར་པོ། །གསེར་ཉ་བཀྲ་ཤིས་རྨད་བྱུང་རྟགས་བརྒྱད་འདི། །བླ་མའི་དཀྱིལ་འཁོར་ལྷ་ལ་མཆོད་པ་འབུལ། །གསེར་གྱི་འཁོར་ལོས་མངའ་དབང་བསྒྱུར། །བསམ་འཕེལ་ནོར་བུ་དགོས་འདོད་འབྱུང་། །བཙུན་མོ་རིན་ཆེན་བདེ་སྟོང་སྟེར། །ཁྱིམ་བདག་ཟས་གཡང་དཔལ་འབྱོར་བརྗིད། །ཁྱུ་མཆོག་སྟོབས་བཅུའི་རྩལ་ཆེན་རྫོགས། །ཅང་ཤེས་རྫུ་འཕྲུལ་ཐར་ལམ་དྲོངས། །དམག་དཔོན་བདུད་བཞིའི་གཡུལ་ལས་རྒྱལ། །རྒྱལ་སྲིད་རིན་ཆེན་སྣ་བདུན་པོ། །རྒྱལ་བའི་དཀྱིལ་འཁོར་ལྷ་ལ་འབུལ། །རྒྱལ་ཀུན་ཐུགས་རྗེའི་བྱིན་རླབས་ཀྱིས། །རྒྱལ་བ་ཉིད་དང་དབྱེར་མེད་ཤོག །གང་ཞིག་འཇིག་རྟེན་འདིའམ་གཞན། །དཔལ་འབྱོར་སྲིད་ཞིའི་ལོངས་སྤྱོད་ཀྱི། །མཆོད་པའི་སྤྲིན་ཕུང་ཟད་མེད་པར། །རྒྱ་ཆེན་བསྐལ་པར་འཕྲོ་གྱུར་ཅིག །སྤྲོ་ན་ཡན་ལག་བདུན་པ་བཏོན་ལ། དེ་ནས་མཎྜལ་འབུལ་བ་ནི། ༀ་བཛྲ་ས་ཏྭ་སོགས་ཡིག་བརྒྱ་བརྗོད། ཞིང་ཁམས་ཡང་དག་གསེར་གྱི་ས་གཞི་བརྡལ། །རྡོ་རྗེའི་རི་ཡི་ཁོར་ཡུག་ར་བས་བསྐོར། །དབུས་སུ་རི་དབང་རྒྱལ་པོ་མཆོག་རབ་མཐོ། །གླིང་ཆེན་ལུས་འཕགས་འཛམ་གླིང་བ་

[Full Size]

ལང་སྤྱོད། །སྒྲ་མི་སྙན་དང་གླིང་གཡོག་རོལ་མཚོ་སོགས། །རིན་ཆེན་ས་འཛིན་ཡོངས་འདུ་ས་བརྟོལ་ལྗོན། །འདོད་འཇོའི་བ་མོ་མ་རྨོས་འབྲུ་སྣ་ཚོགས། །རྒྱལ་སྲིད་སྣ་བདུན་གཏེར་ཆེན་བུམ་པ་བཟང་། །མཆོད་པའི་ལྷ་མོས་ཡོངས་བསྐོར་ཉི་ཟླ་གསལ། །ཀུན་ཁྱབ་གདུགས་དཀར་མི་ནུབ་རྒྱལ་མཚན་བསྒྲེངས། །གཞན་ཡང་ཁམས་གསུམ་ཕྱི་སྣོད་ནང་བཅུད་ཀྱི། །ལོངས་སྤྱོད་ཕུན་ཚོགས་ཕྲ་རབ་རྡུལ་བྱེ་སྙེད། །གྲངས་མེད་མངོན་པར་བཀོད་ལེགས་མཎྜལ་འདི། །བླ་མ་ཡི་དམ་སངས་རྒྱས་བྱང་སེམས་དང་། །དཔའ་པོ་མཁའ་འགྲོ་ཆོས་སྐྱོང་ཚོགས་རྣམས་ལ། །གུས་པས་འབུལ་ལོ་བརྩེ་བས་བཞེས་སུ་གསོལ། །བཞེས་ནས་བདག་རྒྱུད་སྨིན་གྲོལ་བྱིན་གྱིས་རློབས། །ༀ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ས་གཞི་སྤོས་ཆུས་སོགས་དང་། དངོས་དང་ཡིད་སྤྲུལ་རྒྱ་མཚོས་དྲངས་པ་ཡི། །དགོས་འབྱུང་ནོར་བུའི་མཎྜལ་འདི་ཕུལ་བས། །བྱང་ཆུབ་ལམ་ལ་བར་ཆད་དང་བྲལ་ཞིང་། །སྲིད་ཞིར་མི་གནས་རྣམ་གྲོལ་མཆོག་ཐོབ་ཤོག །སྐུ་གསུམ་ཡོངས་རྫོགས་བླ་མའི་ཚོགས་རྣམས་ལ། །སོགས་ཀྱང་བརྗོད་ནས། ཕྱག་འཚལ་མཆོད་བཤགས་ཡི་རངས་བསྐུལ་གསོལ་འདེབས། །བདག་ལུས་ལོངས་སྤྱོད་དུས་གསུམ་དགེ་རྩ་འབུལ། །ཆོས་དབྱིངས་མྱང་འདས་ཆེན་པོར་བསྔོ་བར་བགྱི། །མ་རྣམས་རྫོགས་པའི་སངས་རྒྱས་མྱུར་ཐོབ་ཤོག །ཅེས་ཕྱི་ཡི་མཆོད་པ་ཕུལ་ནས།

[Full Size]

ནང་མཆོད་འབུལ་བ་ནི། བདུད་རྩི་མཐེབ་སྲིན་གྱིས་མཆོད་ལ། རྡོ་རྗེ་འཆང་ཆེན་ཡུམ་གྱུར་འཕགས་མ་དང་། །གུ་རུ་པདྨ་དཔལ་ལྡན་དུས་གསུམ་མཁྱེན། །གྲུབ་ཆེན་ཀརྨ་པ་དང་རང་བྱུང་ཞབས། །རོལ་པའི་རྡོ་རྗེ་ཐུབ་ཆེན་དེ་བཞིན་གཤེགས། མཐོང་བ་དོན་ལྡན་ཆོས་གྲགས་རྒྱ་མཚོ་དང་། །མི་བསྐྱོད་རྡོ་རྗེ་དབང་ཕྱུག་རྡོ་རྗེའི་ཞབས། །ཆོས་དབྱིངས་རྡོ་རྗེ་ཡེ་ཤེས་རྡོ་རྗེ་མཆོག །བྱང་ཆུབ་རྡོ་རྗེ་བདུད་ཚོགས་འདུལ་རྡོ་རྗེ། །མི་ཕམ་ཆོས་གྲུབ་རྒྱ་མཚོ་ལ་སོགས་པ། །རྩ་བར་བརྒྱུད་པའི་མཆོད་འོས་རབ་འབྱམས་དང་། །མ་ཧཱ་ཀཱ་ལ་བཀའ་སྡོད་དམ་ཅན་ཚོགས། །ཡེ་ཤེས་བདུད་རྩིའི་རྒྱུན་འབུལ་གྲུབ་གཉིས་སྩོལ། །ༀ་ཨཱཿཧཱུྃ་གིས་མཆོད་ལ། གསང་བའི་མཆོད་པ་ནི། རྡོ་རྗེ་ལྷ་མོ་བཅུ་དྲུག་པོ། །རྒྱན་ལྡན་མཚར་སྡུག་མདོག་སྣ་ཚོགས། །པི་ཝཾ་གླིང་བུ་རྔ་ཆེན་དང་། །རྫ་རྔ་ལ་སོགས་ཐོགས་པ་དང་། །བཞད་དང་སྒེག་པ་གླུ་གར་མཁན། །མེ་ཏོག་བདུག་སྤོས་སྣང་གསལ་དྲི། །གཟུགས་དང་རོ་བཅུད་རེག་བྱ་མ། །ཆོས་དབྱིངས་བདེ་སྟོང་ལྷ་མོའི་ཚོགས། །ཡིད་འོང་མཆོད་པ་སྤྲོ་བཞིན་དུ། །དགའ་བཞིའི་ཡེ་ཤེས་བསྐྱེད་པར་བགྱི། །ༀ་བཛྲ་བཱི་ནི་ཧཱུྃ་ཧཱུྃ་ཕཊཿདེ་བཞིན་ཐོག་མཐའ་འདྲ་བར། ཝཾ་ཤེ༴ མྲྀ་དཾ་གི༴ མུ་རཉྫེ༴ ཧཱ་སྱེ༴ ལཱ་སྱེ༴ གཱིརྟི༴ ནྲྀ་ཏྱ༴ པུཥྤེ༴ དྷཱུ་པེ༴ དཱི་པཾ༴ གནྡྷེ༴ ༀ་རཱུ་པ་བཛྲེ༴ རཱ་ས༴ སྤཪྴེ༴ དྷརྨཱ་དྷཱ་ཏུ་བཛྲེ་བར་བརྗོད། ཞེས་འབུལ། མཆོད་བྱ་མཆོད་བྱེད་ཐམས་ཅད་ཀྱང་། །རང་བྱུང་རིག་བའི་རྩལ་ལས་གསལ། །དངོས་

[Full Size]

སྣང་འཛིན་མེད་དེ་བཞིན་ཉིད། །བློ་འདས་ཆེན་པོའི་ངང་དུ་རོལ། །མ་ཧཱ་ཛྙཱ་ན་ཤུནྱ་ཏཱ་པཱུ་ཛ་ཧོཿཞེས་དེ་ཁོ་ན་ཉིད་ཀྱི་མཆོད་པ་ཆེན་པོའོ། །དེ་ནས་བསྟོད་པ་ཕྱག་འཚལ་བ་ནི། ཧྲཱིཿསྤྲོས་བྲལ་རང་བྱུང་བདེ་བ་ཆེ། །དོན་དམ་འགགས་མེད་ཐུགས་རྗེའི་མདངས། །སྒྱུ་འཕྲུལ་དྲྭ་བས་ཞིང་ཀུན་ཁྱབ། །རྡོ་རྗེ་འཆང་ལ་ཕྱག་འཚལ་བསྟོད། །སྨྲ་བསམ་བློ་འདས་ཕ་རོལ་ཕྱིན། །མཉམ་ཉིད་ངང་ནས་གང་འདུལ་སྟོན། །དུས་གསུམ་རྒྱལ་ཀུན་སྐྱེད་པའི་ཡུམ། །འཕགས་མ་སྒྲོལ་མར་ཕྱག་འཚལ་བསྟོད། །བདེ་གཤེགས་འདུས་པའི་སྤྱི་དཔལ་མཆོག །གདོད་མའི་སངས་རྒྱས་ཧེ་རུ་ཀ། འཆི་མེད་གྲུབ་པའི་གཏེར་ཆེན་པོ། །པདྨཱ་ཀ་རར་ཕྱག་འཚལ་བསྟོད། །བསྐལ་བཟང་ཞིང་འདིར་སངས་རྒྱས་སྟོང་། །མ་འོངས་རྣམ་འདྲེན་དྲུག་པ་ནི། །སེང་གེ་ཞེས་བྱར་འཚང་རྒྱ་བའི། །ཟབ་མོའི་ཐུགས་བསྐྱེད་ལྡན་ལ་འདུད། །གང་ཞིག་རྣམ་འཕྲུལ་དུ་ུམ་ཡི། །ཆུ་ཟླའི་གར་གྱིས་བརྩེ་བ་ཅན། །འགྲོ་ལ་མི་འཇིགས་སྦྱིན་པའི་གཉེན། །གང་འདུལ་དེར་སྣང་སྟོན་དེར་འདུད། །ཆོས་ནོར་དབང་བསྒྱུར་འཛམ་བུའི་གླིང་། །བྱང་ཕྱོགས་བསིལ་རིའི་ལྗོངས་འདི་རུ། །སྤྱན་རས་གཟིགས་དང་དབྱེར་མེད་པར། །གཅིག་གྱུར་འབྲེལ་ཚད་དོན་ལྡན་འདུད། །མཐོན་མཐིང་ཅོད་པན་ཕྲེང་བ་འཛིན། །དཔལ་ལྡན་དུས་གསུམ་མཁྱེན་པ་ནས། །བདུད་ལས་རྣམ་པར་རྒྱལ་བའི་བར། །སྐྱེས་རབས་བཅུ་གསུམ་དྲང་ངེས་ཀྱི། །མདོ་རྒྱུད་རྒྱ་མཚོར་གསལ་ལ་འདུད། །སངས་རྒྱས་དངོས་ལས་ལྷག་པ་ཡི། །བཀའ་

[Full Size]

དྲིན་གསུམ་ལྡན་རྡོ་རྗེ་འཛིན། །རིགས་དང་དཀྱིལ་འཁོར་ཡོངས་ཀྱི་བདག །རྗེ་བཙུན་བདུད་འདུལ་རྡོ་རྗེར་འདུད། །སྔོན་བསགས་ལེགས་བྱས་སྨིན་པའི་མཐུས། །ཀུན་རྫོབ་སྣང་ངོར་ཞལ་མཐོང་ཞིང་། །སྨིན་གྲོལ་ཆོས་ཀྱི་བདུད་རྩིས་ཚིམས། །ཐུགས་ཀྱིས་བྱིན་བརླབས་རྗེས་བཟུང་འདུད། །དེ་ལས་བྱུང་བའི་ལམ་ཟབ་མོ། །ཀུན་གཞི་བདེ་གཤེགས་སྙིང་པོ་ཞེས། །དོན་དམ་རང་རྩལ་སྣང་ཆ་ལས། །སྣང་སྲིད་བླ་མའི་དཀྱིལ་འཁོར་ཤར། །མཉམ་ཉིད་མཁའ་ཀློང་ཡེ་དག་པའི། །སྟོང་ཉིད་ཡེ་ཤེས་ཆེན་པོ་རུ། །གྲག་སྟོང་བརྗོད་མེད་བསྟོད་པས་བསྟོད། །གསལ་སྟོང་ངང་དུ་ཕྱག་འཚལ་བསྟོད། །སྙིང་རྗེའི་དབྱིངས་ལས་ཁྲོས་པའི་ཚུལ། །ཉོན་མོངས་བདུད་བཞི་ཚར་གཅོད་པའི། །ཡེ་ཤེས་མགོན་པོ་བེར་ཡབ་ཡུམ། །བཀའ་སྡོད་ཚོགས་ལ་ཕྱག་འཚལ་བསྟོད། །ཕྱོགས་བཅུའི་སངས་རྒྱས་བྱང་སེམས་ལྷ། །རབ་འབྱམས་རྡུལ་སྙེད་གྲངས་འདས་ཀྱང་། །ཀརྨ་ཀ་ཡི་ངོ་བོར་གསལ། །བླ་མ་མགོན་པོ་དབྱེར་མེད་པ། །ཡེ་ཤེས་ཆོས་སྐྱོང་བེར་ནག་ཅན། །དཀོན་མཆོག་ཀུན་འདུས་ཀརྨ་པ། །བཅུ་གསུམ་བདུད་འདུལ་རྡོ་རྗེ་འཆང་། །སྐྱེ་དང་ཚེ་རབས་འབྲལ་མེད་ཤོག །ཅེས་རང་དང་སེམས་ཅན་ཐམས་ཅད་ལུས་གངྒཱའི་ཀླུང་བྱེ་སྙེད་དུ་སྤྲུལ་ནས་ཕྱག་འཚལ་བར་དམིགས་ནས་ངེས་འབྱུང་སྐྱོ་ཤས་དྲག་པོའི་སྒོ་ནས་འབད་པར་བྱའོ། །དེ་ནས་བཤགས་པ་བྱ་བ་ནི། སྤྲོ་ན་དང་པོར་ཕུང་པོ་གསུམ་པའི་མདོ་བཏོན་ལ་ཐལ་མོ་སྦྱར་ཕྱག་འཚལ་ཞིང་། ཀྱཻ། ཕྱོགས་བཅུ་ུན་བཞུགས་པའི་བདེ་བར་གཤེགས་པ་སངས་རྒྱས་ཆོས་དང་དགེ་འདུན་ཐམས་ཅད་

[Full Size]

ཀྱི་མངའ་བདག་དཔལ་ལྡན་བླ་མ་རྡོ་རྗེ་འཆང་ཆེན་པོ་དེང་བདག་སོགས་མཐའ་ཡས་པའི་སེམས་ཅན་རྣམས་ལ་དགོངས་སུ་གསོལ་ལོ། །བདག་མིང་འདི་ཞེས་བགྱི་བས་ཐོག་མེད་དུས་རིང་ནས་ད་ལྟའི་བར་དུ་བསགས་པའི་ཉོན་མོངས་པ་ལྔའི་དབང་དུ་གྱུར་པའི་མི་དགེ་བ་བཅུ། མཚམས་མེད་པ་ལྔ། དེ་དང་ཉེ་བ་ལྔ་བགྱིས་པ་དང་། སོ་ཐར་བྱང་སེམས་གསང་སྔགས་ཀྱི་སྡོམ་པ་བསླབ་བྱ་དམ་ཚིག་དང་འགལ་བའི་ཉེས་པ་དང་ལྟུང་བའི་ཚོགས་ཅི་དང་ཅི་མཆིས་པ་ཐམས་ཅད་འདུན་པ་དྲག་པོའི་སྒོ་ནས་མཐོལ་ལོ་བཤགས་སོ། །མི་འཆབ་བོ། །མི་སྦེད་དོ། །ཕྱིན་ཆད་ངེས་པར་སྡོམ་ལགས་སོ། །ཅེས་ལན་གསུམ་བརྗོད། ༀ་ས་མ་ཡ། ཨཱཿས་མ་ཡ། ཧཱུྃ་ས་མ་ཡ། ༀ་ཤྲཱི་མཱ་ན་ཀརྨ་ཀ་ས་ཏྭ་ས་མ་ཡ་སོགས། ༀ་བཛྲ་ས་ཏྭ་ཧཱུྃ་ཅི་ནུས་བརྗོད་མཐར། བླ་མ་ཆེན་པོའི་དཀྱིལ་འཁོར་གྱི་འཁོར་ལོ་ཀུན་གྱི་ཞལ་ནས། ཀྱེ་ཧོཿསྐལ་ལྡན་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་གོ་ཞེས་གནང་བ་བྱིན་པར་གྱུར། དེ་ལྟར་དག་ཚངས་དབུགས་དབྱུང་དངོས་སུ་ཐོབ་བར་བསམ་མོ། །དེ་ནས་བླ་མ་རྒྱང་འབོད་ལ་འཇུག་སྟེ། མོས་གུས་ཚད་མ་རྒྱུད་ལ་སྐྱེ་བའི་རྣལ་འབྱོར་པ་དག་གིས་འདི་ལྟར་བསྒོམ་མོ། །བླ་མའི་སྐུ་ལས་བྱུང་བའི་བྱིན་རླབས་རིལ་བུ་ཁར་བཅུག་ལ། སྤྱི་བོར་སྒོམ་ཞྭ་བཅིངས། བླ་གོས་ཕྲག་པར་གཟར་ཆོས་གོས་ཀྱི་གྲྭ་ལག་གཡོན་གྱིས་དཀུར་བསྟེན། གཡས་ཐལ་མོ་ཕྱིར་བསྟན་གྱིས་དཀུ་གཡས་བསྟེན་ལ་ངག་ཏུ། བླ་མ་དམ་པ་དྲན་བྱུང་ངོ་། །རིགས་དྲུག་པ་རྡོ་རྗེ་འཆང་ཆེན་པོར་གསལ་བྱུང་ངོ་། །རྣམ་དག་གི་ཞིང་ཁམས་རྒྱ་མཚོར་

[Full Size]

འབྱམས་ཀླས་སོང་ངོ་། །འོད་ཟེར་བཟོད་མེད་དུ་འབར་སོང་ངོ་། །སྣོད་བཅུད་ཐམས་ཅད་ཞུ་སོང་ངོ་། །རྡོ་རྗེ་འཆང་བདག་ལ་དབབ་པར་མཛོད། །བདག་ལ་ངལ་གསོ་བར་མཛོད། །ཅེས་བརྗོད་ཅིང་འདོན་སྒོམ་དྲག་ཏུ་བྱས་པས་ཡེ་ཤེས་འདྲེན་པའི་མོས་གུས་བསྐྱེད་མི་ཐུབ་ན། ཌཱ་ཀིཎྜཧོཿབླ་མ་ནམ་དྲན་པ་ན་ལུས་རྣམ་སྣང་ཆོས་བདུན་ལག་པ་གཉིས་ས་གནོན་བྱས་ལ་སྟེང་འོག་གི་རླུང་ཁ་སྦྱར། ལུས་གྱི་ནང་སྟོང་སེང་དུ་བསྒོམས་ནས་སྐེད་སྐོར་བྱས་རིམ་ནས་རྣམ་ཤེས་འགགས། རང་བཞིན་འོད་གསལ་གྱི་སེམས་ཟླ་གདན་དུ་གྱུར་བ་ལ་བླ་མ་ཅི་འདྲ་ཁོ་ན་བཞུགས་སུ་གསོལ་བ་བསྒོམས་ནས་སྐེད་སྐོར་དྲག་ཏུ་བྱས་པས་བླ་མ་སྟོང་ཆེན་དུ་ཞུ་ནས་ཟླ་དཀྱིལ་གྱི་ཐིག་ལེ་དམར་བོ་ཡུངས་འབྲུ་ཙམ་ལ་ཤེས་བ་གཏད། འདི་ནི་འོད་གསལ་བསྐྱེད་པའི་མོས་གུས་འདྲེན་ཐབས་ཡིན་ནོ། །རྣམ་ཤེས་ཡེ་ཤེས་སུ་འཕོ་བར་བྱེད་བའི་ཕྱིར་ཡིན་ན། གཞན་གོང་དང་འདྲ་བ་ལ། སྤྱི་བོར་ཐལ་བྱུང་གི་ནམ་མཁར་བླ་མ་ཡེ་ཤེས་ཀྱི་མེ་འུར་འུར་འབར་བའི་ཞབས་གཡོན་པའི་མཐེ་བོང་གི་འོད་ཟེར་གྱིས་རང་སེམས་འོད་གསལ་སྙིང་ག་ནས་ཐིག་ལེ་དམར་པོ་སྲན་ཆུང་ཙམ་པ་དེ་རང་དབང་མེད་པར་བསྡུས་ནས་བསྒོམ་ཞིང་དྲག་སྦྱོར་བྱ་བ་དང་། ཡེ་ཤེས་ཕྱག་ཆེན་སྩོལ་མེད་དུ་མ་སྐྱེས་ན་ལེ་ལན་ཐམས་ཅད་ང་དབྱངས་ཅན་བཟང་པོ་ལ་བསྡོས་ཤིག །དེ་ལྟར་མི་བསྐྱོད་རྒྱལ་བས་གསུང་བཞིན་འདི་ནི་ཐུན་མོང་མིན་པའི་རྡོ་རྗེའི་བཀའ་ལ་ཚད་བཟུང་ལྷུར་ལེན་གྱིས་མོས་གུས་སྐྱེད་ཅིག །རྗེ་རྡོ་རྗེ་འཆང་ཆེན་མན་ཆད་ནས། །བདུད་འདུལ་བའི་རྡོ་རྗེ་ཡན་ཆད་ཀྱི། །བཀའ་བརྒྱུད་པའི་གྲུབ་ཐོབ་བླ་མའི་ཚོགས། །དེང་བདེ་ཆེན་འཁོར་ལོར་རྟག་བཞུགས་ལ། །ངེད་སྐལ་ལྡན་བུ་རྣམས་བསྐྱབ་ཏུ་གསོལ། །ལས་ཉོན་མོངས་འཁོར་བའི་འདམ་དུ་བྱིངས། །ཆོས་

[Full Size]

བླ་མའི་དཀོར་གྱིས་རང་རྒྱུད་བསྲེགས། །བདུད་བཞི་ཡི་ཆུ་བོས་ཁྱེར་ལ་ཉེ། །ངན་སོང་གི་གཡང་སར་ལྷུང་ངེས་བའི། །མ་རིག་པའི་མུན་པས་བསྒྲིབས་པ་ཡི། །བདག་མཁའ་ཁྱབ་སེམས་ཅན་སྙིང་རྗེས་དགོངས། །དུཿཁ་ལས་མྱུར་དུ་བསྐྱབ་ཏུ་གསོལ། །དུས་སྙིགས་མ་ལྔ་བདོར་སྐྱེས་པ་ཡི། །སྐལ་མེད་རྣམས་དགེ་བ་རིང་དུ་བསྲིངས། །མི་དགེ་བའི་ལས་ཀྱི་ཁུར་ཆེན་ནོན། །བདག་སེམས་ཅན་ལ་བརྩེ་བས་བཟུང་དུ་གསོལ། །ལས་འཕྲོ་དང་ལྡན་ནམ་སྙམ་པ་ཡི། །རྗེ་དངོས་ཀྱིས་བསླབ་སྡོམ་དམ་ཚིག་ནོད། །འཕྲལ་མོས་བློ་བསྒྱུར་ཡང་རྐྱེན་མ་ཆགས། །རང་བྱས་ལས་རང་སྨིན་ང་རེ་འགྱོད། །ཕྱི་དབྱིབས་ལེགས་ཞི་དུལ་ཙམ་ཡོད་རུང་། །ནང་དུག་ལྔའི་རྣམ་རྟོག་རྒྱས་པ་ཡིས། །ཉེས་ལྟུང་གི་ཆར་པ་རྒྱུན་མི་ཆད། །སྡིག་ཆེན་བདག་ཐུགས་རྗེས་ད་གཟིགས་ཤིག །བླ་མ་ལ་སངས་རྒྱས་འདུ་ཤེས་བྲལ། །གནས་གདན་སར་ཞིང་ཁམས་མི་མཐོང་བ། །མཆེད་གྲོགས་ལ་དག་སྣང་མི་འབྱོང་བ། །རྒྱུད་དྲེད་པོར་ཐུགས་རྗེས་ད་གཟིགས་ཤིག །དུས་ལྔ་བདོའི་ཡང་མཐར་འཁོར་བ་ཡི། །སྲིད་བཟུང་གི་འགྲོ་བ་མཆིས་སོ་ཅོག །སྐལ་བ་དང་རིགས་ཆད་ཀྱི་དབང་གིས་ནི། །རྗེ་ཁྱེད་དང་མ་མཇལ་སྙིང་རྗེའི་གནས། །ཀྱེ་མ་ཀྱེ་ཧུད་ཐུགས་རྗེས་འདོར་རམ་ཅི། །དད་མོས་གུས་དྲག་པོས་རྒྱུད་རླན་པའི། །ལས་སྐལ་བར་ལྡན་རྣམས་བྱིན་རླབས་ཀྱི། །ལམ་བཟང་པོར་དཀྲི་བར་མཛད་དུ་གསོལ། །ལར་སེམས་ཀྱི་ཆོ་འཕྲུལ་བག་ཆགས་ཀུན། །ཟད་མེད་ཀྱི་ཆུ་བོའི་

[Full Size]

རྒྱུན་འདི་བཞིན། །རང་བྱུང་ལ་རང་ཡལ་མཁའ་འདྲ་བ། །སྐྱེ་འགགས་དང་གནས་མེད་ཀྱི་ངང་ཉིད་དུ། །བརྗོད་མེད་པ་ཡེ་ཤེས་ཀྱི་ཕྱག་རྒྱ་ཆེ། །དཔལ་ཀུན་ཏུ་བཟང་པོའི་དགོངས་པའི་དོན། །བཀའ་བརྒྱུད་པ་གཤེགས་ཤུལ་ལམ་ཟབ་མོ། །དེ་མངོན་སུམ་རྟོགས་པར་བྱིན་གྱིས་རློབས། །ཅེས་སྣང་བ་འགྱུར་ངེས་བྱའོ། །བཀའ་བརྒྱུད་པ་འདི་མོས་གུས་བྱིན་རླབས་ཀྱི་བརྒྱུད་བ་ཡིན་པས་བཅོས་མིན་དག་སྣང་སྦྱང་བ་གལ་ཆེ་བར་གདའོ། །འདི་སྐབས་རྗེ་མི་བསྐྱོད་རྒྱལ་བས་མཛད་པའི་གསོལ་འདེབས་ཐུན་བཞིར་རྟག་པར་འདོན་ཞིང་། འདིར་སྤྲོ་ན་བདེ་སྟོང་མ། ཟུང་འཇུག་མ། རྡོ་རྗེ་འཆང་ཆེན་མ། དངོས་ཀུན་མ་སོགས་དང་། ཀརྨ་པ་ན་རིམ་དང་། ཞྭ་དམར་བཅུ་པའི་གསོལ་འདེབས་བཅས་བྱ་ཞིང་། བསྡུ་ན་ཡང་རྡོ་རྗེ་འཆང་ཆེན་མ། ཀརྨ་པ་བཅུ་གསུམ་དང་ཞྭ་དམར་བཅུ་པའི་གསོལ་འདེབས་བཅས་གཏོན་ལ། དེ་ནས་བསྙེན་པ་བྱ་བ་ནི། དེ་ལྟར་གསོལ་བ་བཏབ་པས་དཀྱིལ་འཁོར་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་འཕྲོས་ནས་རྩ་བའི་བླ་མར་ཐིམ་པས་དེ་ལས་བྱིན་རླབས་འོད་ཟེར་ལྔ་ལྡན་དུ་ཕྱོགས་བཅུར་འཕྲོས་ནས་བདག་གཞན་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་ཉེས་ལྟུང་ཐམས་ཅད་བྱང་ཞིང་དག །མཆོག་དང་ཐུན་མོང་གི་དངོས་གྲུབ་ཆར་བཞིན་དུ་བབས་ནས་དབྱེར་མེད་དུ་ཐིམ་པས་ཕྱག་རྒྱ་ཆེན་པོའི་གོ་འཕང་ཐོབ་པར་གྱུར་ཅིག །ཅེས་བསམ་ལ། ༀ་ཨཱཿམཱ་ར་ད་མ་ཀ་བཛྲ་ཧཱུྃ་སྭཱ་ཧཱ། སྐྱེས་རབས་ཐམས་ཅད་འདུས་པའི་ངོ་བོ་ཡིན་ལ་ཡིན་བཞིན་དུ་གཙོ་བོའི་བསྙེན་པ་གང་འགྲུབ་བྱའོ། །སྟེང་རྡོ་རྗེ་འཆང་ལ་དམིགས་ནས། ༀ་བཛྲ་དྷྲྀཀྲ་ཧཱུྃ་སྭཱ་ཧཱ།

[Full Size]

གཡས་སྒྲོལ་མར་དམིགས་ལ། ༀ་ཏཱ་རེ་སོགས། གཡོན་ཨོ་རྒྱན་རིན་པོ་ཆེར་དམིགས་ནས། བཛྲ་གུ་རུ་སོགས། འོག་མགོན་པོ་ལྕམ་དྲལ་ལ་དམིགས་ནས། ༀ་མ་ཧཱ་ཀཱ་ལ་མ་ཧཱ་ཀཱ་ལཱི་ཧཱུྃ་ཕཊ་སྭཱ་ཧཱ། ཅེས་སོ་སོར་གང་འགྲུབ་བཟླའོ། །དེ་ནས་ཚོགས་ཀྱི་འཁོར་ལོ་བསྐོར་བ་ནི། ཐོག་མར་ཚོགས་རྫས་རྣམས། ནང་མཆོད་ལྟར་བྱིན་གྱིས་བརླབས་ལ་བསངས་སྦྱངས་སྤེལ་བར་བྱའོ། །ན་མོ་ཐབས་ཤེས་བདེ་སྟོང་གཉིས་མེད་ཀྱི། །ཟབ་མོ་ཚོགས་ཀྱི་འཁོར་ལོའི་འདོད་ཡོན་བཟང་། །ཤ་ལྔ་བདུད་རྩི་ལྔ་ལྡན་ཟག་མེད་ཀྱི། །ཡེ་ཤེས་ཆེན་པོར་སྦྱངས་སྤེལ་བསྒྱུར་བྱས་འདི། །བྱིན་རླབས་རྩ་བ་བླ་མ་དངོས་གྲུབ་ཀྱི། །འབྱུང་གནས་ཡི་དམ་ཕྲིན་ལས་ཆོས་སྐྱོང་བ། །དམ་ཅན་རྒྱ་མཚོ་ལ་སོགས་མཆོད་འོས་ལ། །འབུལ་ཕྱིར་ཀུན་ཀྱང་དབྱིངས་ནས་སྐུ་བསྐྱོད་ཅིག །པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ཧཱུྃ། གནས་འོག་མིན་ངེས་པ་ལྔ་ལྡན་ཞིང་། །མཆོག་ཁ་སྦྱོར་ཡན་ལག་བདུན་ལྡན་པ། །རིགས་ཀུན་གྱི་བདག་པོ་རྡོ་རྗེ་འཆང་། །ཚོགས་འཁོར་ལོར་རོལ་ཕྱིར་གཤེགས་སུ་གསོལ། །གནས་པོ་ཏ་ལ་ཡི་ཞིང་ཁམས་ནས། །འགགས་མེད་ཀྱི་ཐུགས་རྗེའི་རང་བཞིན་ཅན། །རྒྱལ་ཀུན་གྱི་ཡུམ་གྱུར་སྒྲོལ་མ་དཀར། །ཚོགས་འཁོར་ལོར་རོལ་ཕྱིར་གཤེགས་སུ་གསོལ། །གནས་སྤྲུལ་ཞིང་དཔལ་རི་པདྨ་འོད། །སྒྱུ་འཕྲུལ་གྱི་རོལ་པའི་གར་རྩེད་མཁན། དཔལ་པདྨ་འབྱུང་གནས་ཧེ་རུ་ཀ། ཚོགས་འཁོར་ལོར་རོལ་ཕྱིར་གཤེགས་སུ་གསོལ། །གནས་འགྱུར་

[Full Size]

མེད་ཡོངས་གྲུབ་འདོད་མའི་གཤིས། །གཤིས་ཀུན་ཁྱབ་རང་སྣང་ཀློང་ཡངས་ནས། དུས་གསུམ་གྱི་སངས་རྒྱས་འདུས་པའི་སྐུ། །མཐོན་མཐིང་གི་ཅོད་པན་འཆང་བ་པོ། །སྐྱེས་རབས་ཀྱི་ཕྲེང་བ་བཅུ་གསུམ་དང་། །གནས་བདེ་ཆེན་པདྨ་བཀོད་པ་ནས། །ཚེ་འོད་སྣང་མཐའ་ཡས་རྣམ་པར་འཕྲུལ། །དཔལ་མི་ཕམ་ཆོས་གྲུབ་རྒྱ་མཚོ་སོགས། །རྩ་བ་དང་བརྒྱུད་པའི་བླ་མ་རྣམས། །བྱིན་རླབས་ཀྱི་སྤྲིན་ཕུང་ཐིབས་སེ་ཐིབ། །དངོས་གྲུབ་ཀྱི་ཆར་རྒྱུན་སི་ལི་ལི། །ཚོགས་འཁོར་ལོར་རོལ་ཕྱིར་གཤེགས་སུ་གསོལ། །གནས་དུར་ཁྲོད་འཇིགས་རུང་རྩུབ་འགྱུར་ཚལ། །བསྐལ་མེ་འབར་རླུང་ནག་འཚུབ་དཀྱིལ་ནས། །རྡོ་རྗེ་བེར་རང་བྱུང་རྒྱལ་མོ་སོགས། །ཚོགས་འཁོར་ལོར་རོལ་ཕྱིར་གཤེགས་སུ་གསོལ། །གནས་དཀྱིལ་འཁོར་གཞལ་ཡས་ཉམས་རེ་དགའ། །རྫས་མཆོད་པ་གཟི་ལྡན་དང་རེ་སྤྲོ། །རྣལ་འབྱོར་རྣམས་རྡོ་རྗེའི་དམ་རེ་གཙང་། །ཕྱི་སྣོད་དང་ནང་བཅུད་བྱིན་གྱིས་རློབས། །ཅེས་སྤྱན་དྲངས་ལ། དེ་ནས་ཚོགས་ཕུད་རིམ་བཞིན་སྤྲོས་ལ་གཏོར་མ་གསོས་ནས་ཡང་ནང་མཆོད་ལྟར་གྱི་བྱིན་རླབས་བྱས་ལ་གཏོར་བསྔོས་ནི། འབར་བའི་རྒྱས། ཕེཾ་ཕེཾ་ཕེེཾ་པད་སྐོར་དང་རྡོར་ཐལ་ཁ་ཕྱེེ་བཅས། ༀ་བཛྲ་ཨཱ་ར་ལི་ཧོཿཛཿཧཱུྃ་བྃ་ཧོཿབཛྲ་ཌཱཀྐཱི་ནི་ས་མ་ཡ་སྟྭཾ་དྲྀ་ཤྱ་ཧོཿལན་གསུམ། ན་མོ་རཏྣ་གུ་རུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། ཆོས་སྐུ་དྲུག་པ་རྡོ་རྗེ་འཆང་ཆེན་པོ། རྗེ་བཙུན་ཨཱཪྱ་ཏཱ་རེ། ཨོ་རྒྱན་པདྨ་བཛྲ། ཏེ་ལོ་པྲཛྙཱ་བྷ་དྲ། ནཱ་རོ་ཛྙཱ་ན་སིདྡྷི། མར་པ་དྷརྨ་མ་ཏི། མི་ལ་ཧཱ་སྱེ་

[Full Size]

བཛྲ། སྙི་སྒོམ་པུཎྱེ་རཏྣ། དཔལ་ལྡན་དུས་གསུམ་མཁྱེན་པ། འགྲོ་མགོན་དར་མ་གྲགས། སྤོམ་བྲག་པ་བསོད་ནམས་རྡོ་རྗེ། གྲུབ་ཆེན་ཀརྨ་པཀྴི། གཉན་རས་དགེ་འདུན་འབུམ། སེམས་དཔའ་རང་བྱུང་རྡོ་རྗེ། གཡུང་སྟོན་རྡོ་རྗེ་དཔལ། འཛམ་གླིང་རོལ་པའི་རྡོ་རྗེ། རྟོགས་ལྡན་མཁའ་སྤྱོད་དབང་པོ། ཆོས་རྗེ་དེ་བཞིན་གཤེགས་པ། རྗེ་བཙུན་རིན་ཆེན་བཟང་པོ། ཀུན་མཁྱེན་མཐོང་བ་དོན་ལྡན། བན་སྒར་འཇམ་དཔལ་བཟང་པོ། བྱང་སེམས་དཔལ་འབྱོར་དོན་གྲུབ། རྒྱལ་དབང་ཆོས་གྲགས་རྒྱ་མཚོ། གྲུབ་ཆེན་བཀྲ་ཤིས་དཔལ་འབྱོར། འཇིགས་མེད་དབྱངས་ཅན་བཟང་པོ། རྒྱལ་བ་དཀོན་མཆོག་ཡན་ལག །རྗེ་བཙུན་དབང་ཕྱུག་རྡོ་རྗེ། གར་དབང་དྷརྨེ་ཤྭ་ར། རྒྱལ་མཆོག་ཆོས་དབྱིངས་རྡོ་རྗེ། དཔལ་ལྡན་ཡེ་ཤེས་སྙིང་པོ། མཚུངས་མེད་ཡེ་ཤེས་རྡོ་རྗེ། དཔལ་ཆེན་ཆོས་ཀྱི་དོན་གྲུབ། རྒྱལ་དབང་བོདྷི་བཛྲ། འཇམ་མགོན་དྷརྨཱ་ཀ་ར། རྗེ་བཙུན་བདུད་འདུལ་རྡོ་རྗེ། མི་ཕམ་ཆོས་གྲུབ་རྒྱ་མཚོ་ལ་སོགས་པ་གྲུབ་པའི་ས་ལ་བཞུགས་པའི་བཀའ་བརྒྱུད་རིན་པོ་ཆེའི་སྙིང་པོ་དོན་གྱི་དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཅོམ་ལྡན་འདས་དཔལ་འཁོར་ལོ་བདེ་མཆོག །རྗེ་བཙུན་རྣལ་འབྱོར་མ། འཇིག་རྟེན་དབང་ཕྱུག་རྒྱལ་བ་རྒྱ་མཚོ་ལ་སོགས་པ་ཡི་དམ་རྒྱུད་སྡེ་བཞི་ཡི་དཀྱིལ་འཁོར་དཔའ་བོ་དང་མཁའ་འགྲོ་མ་རྣམས་ཀྱི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི།

[Full Size]

ཡེ་ཤེས་ཀྱི་མགོན་པོ་མ་ཧཱ་ཀཱ་ལ་རྡོ་རྗེ་བེར་ནག་པོ་ཅན། འདོད་པ་ཁམས་ཀྱི་དབང་ཕྱུག་ལྷ་མོ་རང་བྱུང་རྒྱལ་མོ་ལ་སོགས་པ་ཡེ་ཤེས་དང་ལས་དང་འཇིག་རྟེན་གྱི་དྲེགས་པ་ཆོས་སྐྱོང་ཕོ་རྒྱུད་མོ་རྒྱུད་རྣམས་དང་། དཔལ་ལྡན་ཞིང་སྐྱོང་དབང་པོ། ཡུམ་ཆེན་སི་ན་ར་མ། ལས་མཁན་བདུད་དམག་སྟོང་སྡེའི་ཚོགས་རྣམས་དང་། དམ་ཅན་སྐྱེས་བུ་ཆེན་པོ། མཆེད་ཟླ་སུམ་བརྒྱ་དྲུག་ཅུ། གཞན་ཡང་སངས་རྒྱས་ཀྱི་བསྟན་པ་སྲུང་བར་ཞལ་གྱིས་བཞེས་པའི་བཀའ་སྲུང་དམ་ཅན་རྒྱ་མཚོ་ཚོགས་ཀྱི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། དེ་ལྟར་དམ་རྫས་བདུད་རྩིའི་གཏོར་མ་རྒྱ་ཆེན་པོ་འདི་འབུལ་བའི་མཐུས་བྱིན་གྱིས་བརླབས་པ་དང་། མཆོག་དང་ཐུན་མོང་གི་དངོས་གྲུབ་སྩོལ་ཅིག །ཞི་རྒྱས་དབང་དྲག་གི་ཕྲིན་ལས་ཐོགས་པ་མེད་པའི་སྒོ་ནས་རྣལ་འབྱོར་སྐྱོང་ཞིང་ཁྱད་པར་བསྟན་པ་དང་བསྟན་འཛིན་རྣམས་སྲུང་སྐྱོབ་གཡེལ་བ་མེད་པར་ཇི་ལྟར་བཅོལ་པའི་ཕྲིན་ལས་མཛོད་ཅིག །ཅེས་འབུལ་ལོ། །དེ་ནས་ཕྱོགས་སྐྱོང་རྣམས་ལ། ༀ་ཁ་ཁ་ཁཱ་ཧི་ཁཱ་ཧི་དང་། ༀ་ཧྲིཾ་ཧྲིཾ་ཧ་ཧ་སོགས་ནས་ཕེཾ་བར་བརྗོད། ཧཱུྃ། དམ་ཚིག་སོགས་ནས། འགྲུབ་པར་མཛོད། བར་བརྗོད་ལ། དེ་ནས་སྒྲུབ་པ་པོ་རྣམ་ཚོགས་ལ་རོལ་ཞིང་ཐབས་ཤེས་ཀྱི་རྫས་འཛིན་བཞིན་དུ། ཀྱཻ། བདེ་སྟོང་རྟེན་འབྲེལ་ཟབ་མོའི་རང་བཞིན་ཅན། །ལོངས་སྤྱོད་ཚོགས་ཀྱི་འཁོར་ལོ་དགྱེས་པར་རོལ། །ཞེས་དྲངས་ལ། ལེན་པ་པོས། ཧོཿཐབས་ཤེས་ངོ་བོ་བྱིན་རླབས་ཀུན་འབྱུང་གནས། །གཉིས་འཛིན་ཡེ་དག་དྲི་མེད་ཨེ་མ་ཧོཿཞེས་བརྗོད་ནས་རོལ་བར་བྱའོ། །དེ་ནས་ཕུད་ལྷག་

[Full Size]

ལ་བདུད་རྩིས་བྲན་ལ། ཨ་ཀཱ་རོས་བྱིན་གྱིས་རླབས། གང་དག་དཀྱིལ་འཁོར་གཉེན་པོའི་མུ་ཁྱུད་ལ་གནས་པའི་འཁོར་གྱི་བཀའ་ཉན་བྲན་གཡོག་དམ་ཚིག་གཉེན་པོའི་གདུང་སེམས་ཅན་ལྷག་མའི་གཏོར་མ་དབང་བ་རྣམས་ལ་ཕུད་ལྷག་བཤལ་ཆུའི་མཆོད་པ་འབུལ་ལོ། །བསྟན་བ་རིན་པོ་ཆེ་བསྲུང་བ་དང་། རྣལ་འབྱོར་པའི་ཕྲིན་ལས་རྣམ་བཞི་མྱུར་དུ་འགྲུབ་པ་དང་། འགལ་རྐྱེན་བར་ཆད་མི་མཐུན་པའི་ཕྱོགས་ཐམས་ཅད་བཟློག་ཅིང་ཇི་ལྟར་བཅོལ་པའི་ལས་རྣམས་གཡེལ་མེད་དུ་སྒྲུབ་བར་བཛོད་ཅིག །སརྦ་ཨུཙྪིཤྚ་བ་ལིངྟ་བྷཀྵ་བྷཀྵ་སི་ཁ་ཁ་ཁཱ་ཧི་ཁཱ་ཧི། ཞེས་ལྷག་མ་ཕྱི་རོལ་དུ་ཕུལ། དེ་ནས་རྗེས་ཀྱི་ཆོ་ག་ནི། མཆོད་པ་གསོ་བྲན་ལེགས་པར་བྱས་ནས། རྒྱས་པར་ན་གོང་གི་མཆོད་པ་བྱིན་རླབས་དང་ཕྱི་མཆོད་ཚན་གཉིས་བཅས། བསྡུ—་ན་སྔགས་མཆོད་ཙམ་དང་བསྟོད་པ་ནི། དཔལ་ལྡན་ཁྱོད་ཀྱི་ཐུགས་རྗེའི་ཉི་མ་ཆེན་པོས་སྲིད་པའི་མཁའ་ལ་ཁྱབ། །གང་ཞིག་མ་རིག་ཉོན་མོངས་སྒྲིབ་གཉིས་མུན་སྟུག་དྲྭ་བ་གཞོམ་པ་ཡི། །མཐའ་ཡས་ཟབ་མོའི་སྟོབས་མངའ་གདུལ་བྱ་རྒྱ་མཚོའི་འདམ་སྐྱེས་པདྨོའི་གཉེན། །ཇི་ལྟར་འདུད་དོ་བྱམས་པའི་འོད་ཟེར་བདག་བློ་ཀུན་ཏུ་གསལ་བར་མཛོད། །ཞེས་བརྗོད། བཟོད་གསོལ་ནི། དེང་འདིར་དཀྱིལ་འཁོར་བསྒྲུབ་ལ་ནོངས་པ་ཡི། །ལྟ་སྒོམ་ཏིང་འཛིན་བཟླས་བརྗོད་གཡེལ་བ་དང་། །མཆོད་རྫས་འཁྲུལ་པའི་དབང་གྱུར་ཉམས་པ་སོགས། །ཉེས་པ་གྱུར་རྣམས་བཟོད་གསོལ་དག་ཚངས་སྩོལ། །རྟེན་འབྲེལ་སྙིང་པོ་དབྱངས་གསལ་བྱེད་སྦྲེལ་བར་ལན་གསུམ་བརྗོད་ལ། དེ་ནས་བྱིན་རླབས་དབང་བཞི་ལེན་པའི་མོས་

[Full Size]

གུས་དྲག་པོས་འདི་སྐད་དོ། །བླ་མ་རིན་པོ་ཆེ་ལ་གསོལ་བ་འདེབས། །བདག་འཛིན་བློ་ཡིས་སོགས་ཚར་ཁ་ཤས་བརྗོད་ལ་ཐལ་མོ་སྙིང་གར་སྦྱར་ལ། དཀྱིལ་འཁོར་ལྷ་ཚོགས་དགོངས་ཤིང་གསན་དུ་གསོལ། །མོས་འདུན་གདུང་བས་རྒྱལ་རྣམས་མཆོད་བསྐུལ་ན། །སྐལ་ལྡན་བདག་རྒྱུད་སྨིན་གྲོལ་བྱིན་རླབས་ཀྱི། །ཆར་ཆེན་དངོས་གྲུབ་དམ་པ་མྱུར་དུ་སྩོལ། །དེ་ཡི་ངང་ནས་ཕྱི་རིམ་དཀྱིལ་འཁོར་དང་། །སྐྱབས་ཡུལ་བླ་མའི་ལྷ་ཚོགས་མ་ལུས་ཀུན། །འོད་ཟེར་ངོ་བོ་རྩ་བའི་བླ་མར་ཐིམ། །དཀོན་མཆོག་ཀུན་འདུས་དཔལ་ལྡན་རིགས་ཀུན་བདག །དགྱེས་པའི་རྣམ་འགྱུར་དང་བཅས་མཛོད་སྤུ་ནས། །འོད་ཟེར་དཀར་པོ་རང་གི་དཔྲལ་བར་ཐིམ། །ལུས་ཀྱི་སྒྲིབ་དག་སྐུ་མཆོག་བུམ་དབང་ཐོབ། །བསྐྱེད་རིམ་བསྒོམ་པར་དབང་ཞིང་སྤྲུལ་སྐུ་འགྲུབ། །མགྲིན་པའི་གནས་ནས་འོད་དམར་ཟེར་འཕྲོས་ཏེ། །རང་གི་མགྲིན་ཐིམ་ངག་གི་སྒྲིབ་དག་ནས། །གསུང་མཆོག་གསང་བའི་དབང་ཐོབ་རྩ་རླུང་ལ། །བསྒོམ་པར་དབང་ཞིང་ལོངས་སྐུ་འགྲུབ་པར་འགྱུར། །ཐུགས་ཀའི་གནས་ནས་འོད་སྔོན་ཟེར་འཕྲོས་ཏེ། །རང་གི་སྙིང་གར་ཐིམ་པས་ཡིད་སྒྲིབ་དག །ཐུགས་མཆོག་ཤེར་དབང་ཐོབ་ཅིང་སྙོམས་འཇུག་ལ། །བསྒོམ་པར་དབང་ཞིང་ཆོས་སྐུ་འགྲུབ་པར་འགྱུར། །གནས་གསུམ་འོད་ཟེར་དཀར་དམར་མཐིང་ག་འཕྲོས། །རང་གི་སྒོ་གསུམ་ལ་ཐིམ་སྒྲིབ་ཚོགས་དག །བཞི་པའ་ིདབང་མཆོག་ཐོབ་སྟེ་ཕྱག་རྒྱ་ཆེ། །བསྒོམ་པར་དབང་ཞིང་ངོ་བོ་ཉིད་སྐུ་འགྲུབ། །དེ་ནས་ངེས་བ་དོན་གྱི་བྱིན་རླབས་

[Full Size]

པ། །བླ་མ་འོད་དུ་ཞུ་ནས་རང་ལ་ཐིམ། །དབྱེར་མེད་གཅིག་འདྲེས་མཚོ་ལ་ཆར་བབས་བཞིན། །མི་ཕྱེད་རྡོ་རྗེ་གསུམ་གྱི་ངོ་བོ་གྱུར། །ཅེས་ཅི་གནས་སུ་མཉམ་བཞག་བྱས་ལ་ངོ་བོ་བསྐྱང་བར་བྱའོ། །དེའི་ངང་ནས་ལུས་གསལ་སྟོང་། ངག་གྲག་སྟོང་། སེམས་བདེ་སྟོང་གི་ངང་ནས་སྤྱོད་ལམ་ལ་འཇུག་གོ། དེ་ནས་བསྔོ་སྨོན་ནི། གཅིག་ཆོད་ལམ་གྱི་མཐར་ཐུག་བསྒྲུབས་པ་ཡི། །དགེ་བས་བདག་གཞན་ཁམས་གསུམ་སེམས་ཅན་ཀུན། །རང་བྱུང་ཡེ་ཤེས་དེ་ཉིད་གནས་མཐོང་ནས། །སྐུ་ལྔའི་བདག་ཉིད་རྡོ་རྗེ་འཆང་འགྲུབ་ཤོག །དེ་ནས་ཤིས་པའི་མེ་ཏོག་ཆར་དུ་བསྙིལ་ལ། ༀ་ཤྲཱི་ཤྲཱི་ཤྲཱི་སྭ་སྟི། སྔོན་ཚེ་རྫོགས་ལྡན་བསྐལ་བཟང་བསྟན་པ་ལ། །སྐྱེ་རྒུའི་དཔལ་ཡོན་བདེ་ལེགས་དགུང་ལ་བསྙེགས། །ཀུན་ཀྱང་ཞི་བ་ཆོས་ཀྱི་བདུད་རྩི་ཡིས། །ཚད་མེད་སྒྲོལ་བཞིན་དེང་ཡང་བཀྲ་ཤིས་ཤོག །ཇི་ལྟར་སྲིད་འདིའི་ཤིས་པའི་ཡོན་ཏན་རྣམས། །རྣལ་འབྱོར་དཔོན་སློབ་ཡིད་ལ་འདོད་འཇོ་བའི། དཔག་བསམ་རྐང་འཐུང་ལྗོན་བཞིན་རྟག་བརྟན་ཞིང་། །ཚོགས་གཉིས་འབྲས་བུ་མངོན་པར་ཕྱུག་གྱུར་ཅིག །གང་ཞིག་འཁོར་བའི་འཆིང་པ་རིང་སྤངས་ནས། །རྒྱལ་བའི་ཞིང་ཁམས་བཀོད་པ་ལྷུན་གྲུབ་ཏུ། །རྣམ་དག་སྙིང་པོའི་དོན་རབ་སྟོན་པའི་ཕྱིར། །བཀའ་དྲིན་གསུམ་ལྡན་རྡོ་རྗེ་རྒྱལ་པོ་དང་། །གཉིས་མེད་ཟུང་དུ་འབྲེལ་བའི་མཆེད་ལྕམ་རྣམས། །རྟག་ཏུ་འབྲལ་མེད་ཕུན་སུམ་ཚོགས་པ་ཡི། །ཚོམ་བུ་གཅིག་གི་ངང་དུ་སངས་རྒྱས་ནས། །

[Full Size]

འགྲོ་ཁམས་ཡོངས་སྒྲོལ་ཆེན་པོའི་བཀྲ་ཤིས་ཤོག །གཞན་ཡང་བསྔོ་བ་སྨོན་ལམ་ཤིས་བརྗོད་སོགས་ཀྱང་སྤྲོ་ན་བྱའོ། །དེ་ལྟར་རྫོགས་པའི་སངས་རྒྱས་ཀརྨ་པ་བཅུ་གསུམ་བདུད་འདུལ་རྡོ་རྗེའི་བླ་མའི་རྣལ་འབྱོར་མཆོད་ཕྲེང་གིས་བརྒྱན་པ་ཞིག་དགོས་ཞེས་དད་བརྩོན་གྱིས་ཉེ་བར་ཕྱུག་པ་དགེ་སློང་བསོད་ནམས་དབང་རྒྱལ་གྱིས་ས་སྤྱོད་གསུང་གི་གནས་མཆོག་དཔལ་ཀརྨའི་དགོན་ནས་བསྐུལ་བའི་ངོར་མཐོན་མཐིང་ཅོད་པན་འཆང་བ་བཅུ་གསུམ་པ་དང་། རཱ་གའི་ཅོད་པན་འཆང་བ་བཅུ་པ་བཅས་རྩོད་དུས་ཀྱི་རྡོ་རྗེ་འཆང་ཉིད་དུ་ངེས་པའི་བློ་ཅན། རྒྱལ་བ་གཉིས་ཀྱིས་རྗེས་སུ་འཛིན་པ་སི་ཏུ་སྤྲུལ་སྐུ་པདྨ་ཉིན་བྱེད་དབང་པོས་དཔལ་སྤུངས་ཐུབ་བསྟན་ཆོས་འཁོར་གྱི་གཙུག་ལག་ཏུ་བཀོད་པ་འགྲོ་རྣམས་ཐར་པའི་རྒྱ་མཚོར་ཆོས་ཀྱི་བདུད་རྩིའི་དཔལ་ལ་སྤྱོད་ནས་དཔལ་ལྡན་བླ་མ་ཆེན་པོའི་གོ་འཕང་ཐོབ་པའི་རྒྱུར་གྱུར་ཅིག །སརྦ་མདྒ་ལཾ། སུ་ཛ་ཡནྟུ།། །།

བླ་མའི་མཆོད་ཆོག་ནམ་མཁའ་ཡེ་དྭངས་ཀྱི་སྨིན་དབང་དང་བསྐང་བཤགས་ལྷན་ཐབས་སུ་བསྡེབས་པ།

[Full Size]

བླ་མའི་མཆོད་ཆོག་ནམ་མཁའ་ཡེ་དྭངས་ཀྱི་སྨིན་དབང་དང་བསྐང་བཤགས་ལྷན་ཐབས་སུ་བསྡེབས་པ་བཞུགས་སོ། །གུ་རུ་དྷརྨ་ཀཱ་ཡ་ན་མཿའདིར་བླ་སྒྲུབ་མཆོད་པ་དང་འབྲེལ་བའི་སྤྲོས་མེད་དོན་གྱི་དབང་བཞི་ལེན་པ་ནི་གཞུང་དུ་གསལ་ནའང་། སྤྲོས་པ་ལ་དགའ་བའི་སྐལ་བ་དང་ལྡན་པ་རྣམས་ཀྱི་ངོར་གསང་སྔགས་བླ་མེད་ལུགས་ཀྱི་སྨིན་དབང་གིས་རྒྱུད་བརླན་པའི་གདམས་པ་སྤེལ་བ་བྱ་སྟེ། དེའང་དང་པོ་བཤམས་བཀོད་ལ། བུམ་སྟེགས་པདྨ་འདབ་བརྒྱད་ཀྱི་སྟེང་དུ་ལྔ་ཚན་ལྔའི་རྫས་དང་རྒྱུན་འབབ་ཆུས་སུམ་གཉིས་བཀང་པའི་བུམ་པ་མཚན་ཉིད་དང་ལྡན་པ་ལ་ཁ་རྒྱན་དང་། དུང་ཆོས། གཟུངས་རྡོར་སོགས་བཤམས། གཞན་ཡང་དབང་རྫས་ཀྱི་རིགས་དབུ་རྒྱན། རྡོ་རྗེ། དྲིལ་བུ། མིང་དབང་གི་རྡོར་དྲིལ། ཐོད་པ་བདུད་རྩི་དམ་

[Full Size]

རྫས་ཀྱིས་གཏམས་པ། གཟུངས་མའི་ཙཀླི། དམ་ཆུ། མཎྜལ་བཀྱེ་བསྡུའི་ཆས་སོགས་དང་ཉེ་བར་མཁོ་བ་རྣམས་ཀྱང་འདུ་བགྱིད་ཅིང་། ལས་བུམ་ཡང་གང་བདེར་བཞག །སླར་དགོས་རྒྱུའི་སྔོན་གཏོར་ཞིག་ཀྱང་བཤམས། སློབ་དཔོན་གྱི་མདུན་དུ་གཡོན་ནས་བརྩམས་ཏེ་ནང་མཆོད། ཅང་ཏེའུ། རྡོར་དྲིལ། ནས་བཟེད་རྣམས་བཀོད་ལ། གཉིས་པ་གཞུང་ལྟར་གྱི་གདོན་བྱ་རྣམས་མཐར་ཆགས་སུ་བཏོན་ཏེ་མདུན་བསྐྱེད་བསྙེན་པ་བཅས་ཟིན་ནས་བུམ་པ་བདུད་རྩིས་བསངས་ཞིང་། ༀ་མ་ཧཱ་ཤཱུ་ནྱ་ཏཱ་སོགས་དང་། ཆོས་རྣམས་མི་དམིགས་སྟོང་པ་ཉིད་དུ་གྱུར། །བྷྲཱུྃ་ལས་རིན་ཆེན་བུམ་པ་མཚན་རྫོགས་ཀྱི། །དབུས་སུ་པད་སྡོང་ཡལ་ག་ལྟར་གྱེས་པའི། །སོགས་མདུན་བསྐྱེད་ཇི་བཞིན་ལ། མི་མངོན་ཆོས་དབྱིངས་གནས་ནས་རྩ་གསུམ་གྱི། །དཀྱིལ་འཁོར་བསྐྱེད་པ་དང་འདྲའི་ཡེ་ཤེས་སེམས། །སྤྱན་དྲངས་བུམ་ལྷར་གཉིས་སུ་མེད་པར་ཐིམ། །རྡོ་རྗེ་བསྡུ་བའི་རྒྱས། ༀ་ཤྲཱི་མཱན་གུ་རུ་མཎྜལ་ས་པ་རི་ཝཱ་ར་བཛྲ་ས་མ་ཡ་ཛཿཞེས་སྤྱན་དྲངས་ཏེ། ཛཿཧཱུྃ་བྃ་ཧོཿདབྱེར་མེད་དུ་གྱུར་པར་མོས་ལ་དབང་བསྐུར་བ་ནི། སླར་ཡང་ཐུགས་ཀའི་འོད་ཟེར་གྱིས། །དབང་ལྷ་སྤྱན་དྲངས་ཁྲུས་གསོལ་ཞིང་། །ཆུ་ཞབས་གྱེན་བརྟེན་རིགས་ལྔ་ཡིས། །རྒྱས་གདབ་ལྷ་རྣམས་རང་ཐིམ་གྱུར། །གཞུང་ལྟར་མཆོད་པ་བྱིན་གྱིས་བརླབས་ལ། མཐའ་ཡས་ཞིང་ཁམས་རབ་འབྱམས་ཀྱི། །དག་ཅིང་དྲི་མེད་མཆོད་པའི་རྫས། །སྣ་ཚོགས་བློ་ཡིས་བླངས་ནས་སུ། །དཀྱིལ་འཁོར་ལྷ་ལ་འབུལ་བར་བགྱི། །ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ།

[Full Size]

དེ་བཞིན་དུ། པཱ་དྱཾ་ནས། ཤབྡའི་བར་གྱིས་མཆོད། གཙོ་འཁོར་རྣམས་ཀྱི་ཐུགས་ཀར་ཟླ་སྟེང་ཧཱུྃ། །དེ་མཐར་སྔགས་ཕྲེང་འོད་ཟེར་བདུད་རྩིའི་རྒྱུན། །བབས་པས་བུམ་པ་གང་ཞིང་སླར་འོད་འཕྲོས། །བདག་གཞན་འགྲོ་བའི་སྡིག་སྒྲིབ་ཀུན་དག་གྱུར། །པར་བསམས་ལ་སྔགས་ཚན་ལྔ་པོ་སོ་སོར་བཟླའོ། །མཐར་དུང་ཆོས་ཀྱི་ཆུ་བུམ་བར་ཕུལ་ལ། ༀ་ཤྲཱི་མཱན་གུ་རུ་མཎྜལ་ཨརྒྷཾ་པྲ་ཏིཙྪ་སྭཱ་ཧཱ། །ཞེས་མཆོད་ཡོན་འབུལ་ཞིང་། བུམ་ལྷ་འོད་ཞུ་དག་བྱེད་ལྷ་ཆུར་གྱུར། །པུཥྤེ་སོགས་ནས། ནཻ་ཝི་དྱེ་ཨཱཿཧཱུྃ་གིས་མཆོད། དེ་ནས་གཟུངས་རྡོར་ལས་བུམ་ཁར་སྤོ་ནས་ལས་ལྷ་བསྐྱེད་པ་ནི། བིགྷྣཱན་གྱིས་བསངས་། སྭ་བྷཱ་ཝས་སྦྱངས། ལས་བུམ་དབུས་སུ་པད་ཉིའི་སྟེང་། །བགེགས་མཐར་བྱེད་པ་སྐུ་མདོག་མཐིང་། །རྡོ་རྗེ་ཞགས་བསྣམས་ཁྲོ་ཆས་རྫོགས། །ཐུགས་ཀར་ཧཱུྃ་མཐར་སྔགས་ཕྲེང་གསལ། ༀ་ཨཱཿབིགྷྣཱན་སོགས་ཉེར་གཅིག་བརྗོད་ལ་མཐར་བུམ་ཆུའི་བསང་གཏོར་བཅས། བསྲུང་དང་བཟློག་པའི་ཕྲིན་ལས་མཛོད། །ཁྲོ་རྒྱལ་འོད་ཞུ་བུམ་ཆུར་གྱུར། །པར་མོས་ལ། གསུམ་པ་བདག་ཉིད་འཇུག་ཅིང་དབང་ལེན་པ་ནི། རང་ཡི་དམ་དུ་གསལ་བཞིན་པར། མདུན་བསྐྱེད་ལྷ་ཚོགས་རྣམས་ཀྱིས་དབང་གི་བྱ་བ་མཛད་པར་དམིགས་ལ། ལས་བུམ་གྱི་ཁྲུས། ཇི་ལྟར་བལྟམས་པ་སོགས་ནས། ས་མ་ཡ་ཤྲི་ཡེ་ཧཱུྃ་བར་དང་། གཞུང་གི་མཎྜལ། ཞིང་ཁམས་ཡང་དག་སོགས་ནས། ས་མ་ཡེ་ཨཱཿཧཱུྃ། བར་གྱིས་ཕུལ། དེ་ནས་གསོལ་བ་གདབ་བ་ནི། ཀྱཻ། དཔལ་ལྡན་བླ་མ་རྡོ་རྗེ་འཛིན། །དཀྱིལ་འཁོར་ཀུན་བདག་

[Full Size]

ཧེ་རུ་ཀ། བདག་ལ་སྨིན་བྱེད་ཟབ་མོའི་དབང་། །རྒྱུད་གྲོལ་ཐུགས་རྗེས་བཟུང་དུ་གསོལ། །འདི་རིགས་ལན་གསུམ་མམ་རེ་རེས་འཐུས་སོ། །སློབ་དཔོན་གྱིས། ཀྱེ་ཧོཿའདིར་ཚོགས་རིགས་ལྡན་གྱི། །རྡོ་རྗེ་སློབ་མ་ཁྱེད་རྣམས་ཉོན། །གསང་སྔགས་དབང་བཞིའི་ལམ་ཟབ་མོའི། །སྣོད་དང་ལྡན་པའི་ལས་ཅན་དག །ཞུགས་ཀྱི་དེ་བས་སྐལ་དམན་རྣམས། བལྟ་བར་མི་དབང་དེངས་པར་རིགས། །དེའི་ལན་དུ། ཨེ་མ། བདག་ཅག་ངེས་པར་འཁོར་བ་ལས། །ཐར་འདོད་བྱང་ཆུབ་སེམས་བསྐྱེད་ཅིང་། །གསང་བ་སྔགས་ཀྱི་དམ་ཚིག་རྣམས། །ནམ་ཡང་མི་སྤང་སྲོག་ལྟར་བསྲུང་། །ཞེས་ཞུའོ། །དེ་ནས་སློབ་དཔོན་གྱིས་རྡོ་རྗེ་སྤྱི་བོར་བཞག་ལ། ཧོཿགསང་བ་ཆེན་པོའི་དཀྱིལ་འཁོར་དུ། །དེང་ནས་འཇུག་གོ་དམ་མེད་ལ། །སྨྲ་བར་མི་རུང་དམ་བཅའ་བཟུང་། །དེ་ཕྱིར་ཐ་ཚིག་ངོ་བོར་འཚལ། །སློབ་མས། བཛྲ་ས་མ་ཡ་རཀྵཿབརྗོད་ལ་དམ་ཆུ་བླུད། དེ་ནས་གཞུང་ལྟར་གྱི་སྔོན་གཏོར་བྱིན་གྱིས་བརླབས་ལ་བསྔོ་ཞིང་འབུལ་ཏེ་སྲུང་འཁོར་བཅས་ཟིན་ནས། ཀུན་རྫོབ་དོན་དམ་བྱང་ཆུབ་སེམས་བསྐྱེད་ཕྱིར། །སྙིང་གར་ཟླ་སྟེང་རྡོ་རྗེ་རྩེ་ལྔ་བསྒོམ། །ༀ་སརྦ་ཡོ་ག་ཙིཏྟཾ་ཨུཏྤཱ་ད་ཡཱ་མི། །ལན་གསུམ་སྙིང་གར་རྡོ་རྗེས་རེག་ལ། སུ་ར་ཏེ་ས་མ་ཡ་སྟྭཾ་ཧོཿསིདྡྷི་བཛྲ་ཡ་ཐཱ་སུ་ཁཾ། ཡེ་ཤེས་དབབ་ཕྱིར་གསོལ་བ་གདབ་པ་ནི། བཀའ་བརྒྱུད་བླ་མ་དཔའ་བོ་རྣལ་འབྱོར་ཚོགས། །ཡེ་ཤེས་ཆོས་སྐྱོང་རྣམས་ཀྱིས་བདག་བྱིན་རློབས། །ལན་གསུམ། དེ་ནས་དབང་གི་གཞི་འགོད་པའི་དོན་

[Full Size]

དུ་དམིགས་པ་ནི། སྔར་བསྐྱེད་པ་ཇི་ལྟར་སླར་ཡང་སློབ་མའི་དོན་དུ་གསལ་གདབ་པ་ནི། མདུན་མཁར་གཞལ་ཡས་དཀྱིལ་འཁོར་གྲུ་བཞི་པ། །སྒོ་བཞི་རྟ་བབས་སོགས་མཐར་ཆགས་སུ་བཏོན་ལ། རབ་འབྱམས་ཞིང་རྣམས་མ་ལུས་སྐུ་ལ་རྫོགས། །བར་དང་། བདག་ཉིད་གཞན་ལ་དབང་བསྐུར་དུས་ཁྱེད་རང་བརྗོད་ལྷར་གསལ་ཐུགས་ཀའི་འོད་ཟེར་གྱིས། །སློབ་དཔོན་ཐུགས་རྒྱུད་བསྐུལ་ཞིང་སླར་འོད་འཕྲོས། །དཀྱིལ་འཁོར་ལྷ་ཚོགས་བདེ་ཆེན་རྡོ་རྗེའི་དབྱིངས། །ཟག་མེད་ཐུགས་དམ་རྒྱུད་བསྐུལ་འོག་མིན་དང་། །རང་བཞིན་གནས་ནས་ཡེ་ཤེས་སྤྱན་དྲངས་ཏེ། །མཚོ་ལ་ཆར་བབས་ལྟ་བུ་སློབ་མ་ལ། །སིབ་སིབ་ཐིམ་པས་དབྱེར་མེད་རོ་གཅིག་གྱུར། །གུ་གུལ་དང་སྤོས་བསྲེག་ཅིང་རོལ་མོའི་སྒྲ་དང་བཅས། སྟེང་དག་པ་འོག་མིན་སོགས་ཀྱིས་བྱིན་འབེབས་ཤིང་དབྱངས་དང་བཅས། དབང་བསྐུར་ལ་བྱིན་ཆེན་དབབ་དུ་གསོལ། །བར་དང་། ༀ་ཨཱཿགུ་རུ་བཛྲ་དྷྲྀཀྲ་དེ་ཝ་ཌཱཀྐཱི་ནཱི་དྷརྨ་པཱ་ལ་ས་པ་རི་ཝཱ་ར་ཛྙཱ་ན་བཛྲ་ཨཱ་ཝེ་ཤ་ཡ་ཨཱ་བེ་ཤ་ཡ་ཨ་ཨ་ཨཿལན་ཁ་ཤས་བརྗོད་ཅིང་སྣང་བ་འགྱུར་ངེས་སུ་བྱིན་ཕབ། དེ་ནས་ངོ་སྤྲད་རྡོ་རྗེའི་གླུ་བླང་བ། ལྟོས་ཤིག་རང་སེམས་སྣང་བའི་རྩལ། །མ་སྐྱེས་མི་འགགས་བརྗོད་བ་བྲལ། །བློ་འདས་བདེ་ཆེན་གཉུག་མའི་གཤིས། །གསལ་ལ་དེར་འཛིན་མེད་པར་སྐྱོངས། །ཡེ་ཤེས་བརྟན་ཕྱིར་རྡོ་རྗེ་སྤྱི་བོར་བཞག་ལ། ཏིཥྛ་བཛྲ་ཞེས་བརྗོད། དབང་དངོས་གཞིའི་དོན་དུ། ས་གཞི་སྤོས་ཆུས་སོགས་མཎྜལ་ཕུལ་ལ། གསོལ་གདབ་ནི། ཨེ་མ། དཔའ་བོ་རྣལ་འབྱོར་མ་

[Full Size]

དཔལ་ཚོགས། །བདག་ལ་དགོངས་མཛོད་དབང་བཞི་ཡི། །ཆུ་བོ་ཆེན་པོས་རྒྱུད་སྨིན་ཅིང་། །གྲོལ་བ་མངོན་གྱུར་བྱིན་རློབས་མཛོད། །ལན་གསུམ། དེ་ནས་དབང་རྫས་རྣམས་རིམ་བཞིན་ཐོགས་ལ། དཀྱིལ་འཁོར་ལྷ་ཚོགས་ཐུགས་ཀའི་འོད་ཟེར་གྱིས། །དྲངས་པའི་དབང་ལྷ་རིགས་ལྔས་དགོངས་པ་མཛད། །སེམས་དཔའ་སེམས་མ་རྣམས་ཀྱིས་བཀྲ་ཤིས་པའི། །མེ་ཏོག་འཐོར་ཞིང་མཆོད་པའི་ལྷ་མོས་མཆོད། །ཁྲོ་བོ་ཁྲོ་མོས་སྲུང་བའི་ལས་མཛད་ཅིང་། །རིགས་ཀྱི་ཡུམ་ལྔས་ཕྱག་ན་བུམ་པ་བཟང་། །ཡེ་ཤེས་བདུད་རྩིའི་བཅུད་བཀང་འཛིན་པ་དང་། །རིན་ཆེན་པྲོག་ཞུ་ཅོད་པན་དར་ཆུན་འཕྱངས། །རྩེ་མོ་དགུ་པའི་རྡོ་རྗེ་འོད་འབར་བ། །དྲིལ་བུ་གྲག་སྟོང་རང་སྒྲ་སྒྲོག་པ་དང་། །མིང་གི་དབང་མཆོག་རྡོ་རྗེ་དྲིལ་བུ་སོགས། །བསྣམས་ནས་དབང་མཆོག་དམ་པ་སྦྱིན་པར་བྱ། །དང་པོ་བུམ་པས་དབང་བསྐུར་བ་ནི་མགོར་བཞག་ལ། ཇི་ལྟར་བལྟམས་པ་སོགས་ནས། ས་མ་ཡ་ཤྲི་ཡེ་ཧཱུྃ་བར་དང་། བུམ་ཆུ་བཏུང་གཞུག་ལ། ༀ་བཛྲོ་ད་ཀ་ཨ་བྷི་ཥིཉྩ་ཧཱུྃ་སུ་ར་ཏེ་སྟྭཾ་ཨ་ཧཾ། བུམ་ཆུས་བསང་གཏོར་ཡང་བྱ་ཞིང་། དེ་ནས་པྲོག་ཞུ་ཐོགས་ལ། ལོངས་སྤྱོད་ཡོངས་རྫོགས་དབུ་རྒྱན་དབང་། །རིན་ཆེན་དཔལ་དང་ལྡན་དབང་བསྐུར། །ༀ་ཨཱཿམུ་ཀུ་ཊ་ཨ་བྷི་ཥིཉྩ་ཧཱུྃ། སྤྱི་བོར་བཅིངས་ལ། ༀ་བཛྲོ་ད་ཀ་སོགས་ཆུ་དབང་སྔར་ལྟར་དང་། རྡོ་རྗེའི་དབང་ནི། སངས་རྒྱས་ཀུན་གྱི་ཐུགས་རྡོ་རྗེ། །ཆོས་བདུན་ཡོན་ཏན་ལྡན་པར་ཤོག །ༀ་བཛྲ་ཨ་བྷི་ཥཉྩ་ཧཱུྃ། ལན་གསུམ་དུ་རྡོ་རྗེ་

[Full Size]

གསོར། ༀ་བཛྲོ་ད་ཀ་སོགས་དང་། དྲིལ་བུ་ཐོགས་ལ། ཐེག་ཆེན་ཆོས་ཀྱི་སྒྲ་དབྱངས་ཀྱིས། །འཁོར་བ་དོང་སྤྲུགས་དབང་ཐོབ་ཤོག །ༀ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། དྲིལ་བུ་བཀྲོལ། ༀ་བཛྲོ་ད་ཀ་སོགས་དང་། མིང་དབང་ནི། བདེར་གཤེགས་ཀུན་གྱིས་དབུགས་དབྱུང་ཞིང་། །ལུང་བསྟན་མིང་དབང་མཆོག་ཐོབ་ཤོག །ༀ་བཛྲ་ས་ཏྭ་སྟྭཾ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏ་ཤྲཱི་ཧེ་རུ་ཀ་ཞེས་བྱ་བའོ། །རྡོར་དྲིལ་སྤྱི་བོར་བཞག་ནས་བཀྲོལ། ༀ་བཛྲོ་ད་ཀ་སོགས་སྔར་ལྟར་ཆུ་དབང་ཡང་བསྐུར། དེ་ལྟར་ཆུ་དང་ཅོད་པན་རྡོ་རྗེ་དང་། །དྲིལ་བུ་མིང་དབང་བསྐུར་བས་ཉོན་མོངས་ལྔ། །རྣམ་པར་དག་ཅིང་ཕུང་ལྔ་གནས་འགྱུར་ནས། །ཡེ་ཤེས་ལྔ་ཐོབ་རིགས་ལྔས་རྒྱས་གདབ་གྱུར། །དེ་ལྟར་རིག་པའི་དབང་ལྔ་བསྐུར་བ་ཡིས། །ལུས་སྒྲིབ་དག་ནས་བསྐྱེད་རིམ་བསྒོམ་པར་དབང་། །འབྲས་བུ་སྤྲུལ་སྐུའི་ས་བོན་རྒྱུད་ལ་སྨིན། །དེ་ནས་མཆོག་དབང་གོང་མ་རྣམ་གསུམ་ཆེད་དུ། ས་གཞི་སྤོས་ཆུས་སོགས་མཎྜལ་ཕུལ་ལ་གསང་དབང་ནི། ཀ་པཱ་ལ་དམ་རྫས་ཀྱིས་བཀང་བ་སྤྱི་བོ་དང་མགྲིན་པར་བཞག་སྟེ། དཀྱིལ་འཁོར་ལྷ་ཚོགས་བདེ་སྟོང་རང་བཞིན་གྱི། །ཐབས་ཤེས་བྱང་སེམས་རྒྱུན་གྱིས་དབང་བསྐུར་རོ། །བདུད་རྩི་བཏུང་ལ། ཨ་ཧོཿམ་ཧཱ་སུ་ཁ་ཨ་བྷི་ཥིཉྩ་ཏུ་མཱཾ། དེ་ལྟར་གསང་དབང་ཐོབ་ནས་ངག་སྒྲིབ་བྱང་། །རྫོགས་རིམ་བསྒོམ་དབང་འབྲས་བུ་ལོངས་སྐུ་འགྲུབ། །དེ་ནས་ཤེར་དབང་ནི། རིག་མའི་ཙཀླི་གཏད་ལ། དཀྱིལ་འཁོར་པ་ལས་གཟུངས་མ་མཚན་ལྡན་སྤྲོས། །སློབ་མར་སྙོམས་ཞུགས་

[Full Size]

དགའ་བཞིའི་ཡེ་ཤེས་མྱོང་། །དེ་ལྟར་ཤེར་ཡེའི་དབང་ཐོབ་སྡིག་སྒྲིབ་དག །བདེ་སྟོང་བསྒོམ་དབང་འབྲས་བུ་ཆོས་སྐུ་འགྲུབ། །དེ་ནས་བཞི་པ་ཚིག་དབང་ནི། སློབ་མ་རྣམས་ལུས་གནད་བཅས་ལ། སློབ་དཔོན་གྱིས། སྣང་སྲིད་འཁོར་འདས་ཆོས་ཐམས་ཅད། །སེམས་ལས་གུད་དུ་མ་གྲུབ་ཅིང་། །སྤྲོས་བྲལ་ནམ་མཁའི་རྡོ་རྗེ་ཆེ། །ཡང་དག་ཡེ་ཤེས་ངོ་བོར་གསལ། །ཅེས་ངོ་སྤྲད། ཕྱག་ཆེན་ལ་བསྟེན་བཞི་པའི་དབང་བསྐུར་ཐོབ། །སྒོ་གསུམ་སྒྲིབ་དག་ངོ་བོ་ཉིད་སྐུ་འགྲུབ། །དེ་ནས་སློབ་དཔོན་དུ་བསྒྲུབ་པའི་དབང་གི་དོན་དུ། ས་གཞི་སྤོས་ཆུས་སོགས་མཎྜལ་ཕུལ། སློབ་མ་སླར་ཡང་བཛྲ་ས་ཏྭ་གསལ། །རང་འོད་ཡུམ་འཁྱུད་དབང་ལྷ་བུམ་པའི་ཆུས། །ཇི་ལྟར་བཅོམ་ལྡན་བལྟམས་ཚེ་ཁྲུས་གསོལ་བཞིན། །དྲི་མེད་ལྷ་ཆུས་དེང་འདིར་དབང་བསྐུར་རོ། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། །ཞེས་བུམ་དབང་བསྐུར་ཞིང་བཏུང་དུའང་བཅུག །རྡོར་དྲིལ་གཏད་ལ། ཧཱུྃ་དང་ཨཱཿལས་བྱུང་བའི་རྡོ་རྗེ་དྲིལ། །བསྣོལ་ཐབས་སུ་འཛིན་ལ། མ་ཧཱ་བཛྲ་ཧཱུྃ་བཛྲ་གྷཎྜེ་ཨཱཿདཀྲོལ་ལ། གསང་གསུམ་དམ་ཚིག་བརྟན་ཞིང་དེང་ཕྱིན་ཆད། །འགྲོ་བའི་སློབ་དཔོན་དམ་པར་དབུགས་དབྱུང་ངོ་། །ལུང་བསྟན་པ་ནི། སློབ་དཔོན་གྱིས་རྡོར་དྲིལ་དང་བཅས། གཡོན་པས་ཆོས་གོས་ཀྱི་གྲྭ་རི་དྭགས་ཀྱི་རྣ་བ་ལྟར་འཛིན། གཡས་མི་འཇིགས་པའི་ཕྱག་རྒྱ་དང་བཅས། ཀྱེ། དེང་ནས་སངས་རྒྱས་སྲས་སུ་གྱུར། །སེམས་ཅན་དོན་ཆེན་བླ་མེད་སྤྱོད། །མ་འོངས་བྱང་ཆུབ་བདུད་རྩི་བརྙེས། །ཆོས་འཁོར་

[Full Size]

སྒྱུར་རྒྱལ་མཆོག་ཏུ་འགྱུར། །དེ་ནས་དབང་གི་རྗེས་ནི། སློབ་མས། ཧོཿདུས་གསུམ་སངས་རྒྱས་ངོ་བོ་ཉིད། །གང་གི་དྲིན་ལས་ཟབ་ལམ་གྱི། །སྨིན་གྲོལ་དེང་ཐོབ་རྩ་བ་དང་། །ཡན་ལག་དམ་ཚིག་ཚུལ་བཞིན་བསྲུང་། །ལན་གསུམ་དང་། །གཏང་རག་གི་མཎྜལ། ཞིང་ཁམས་ཡང་དག་ནས། སངས་རྒྱས་མྱུར་ཐོབ་ཤོག །བར་ཚང་མ་བརྗོད་ལ་ཕུལ། སླར་ཡང་། དེང་བཟུང་སྙིང་པོ་བྱང་ཆུབ་བར། །རྡོ་རྗེ་ཅན་ཞབས་ཚེ་རབས་སུ། །མི་འབྲལ་བསྒྲུབས་པའི་མཆོད་པ་ཡིས། །བསྙེན་ཅིང་ཐུགས་རྗེས་སྐྱོང་གྱུར་ཅིག །ལན་གསུམ་སོགས་ཀྱིས་གསོལ་བ་སྙིང་ནས་གདབ་བར་བྱ་ཞིང་། བསོད་ནམས་འདི་ཡིས་ཐམས་ཅད་གཟིགས་པ་ཉིད། །སོགས་ཀྱང་བརྗོད་པར་བྱའོ། །དེ་ནས་ཚོགས་ཀྱི་འཁོར་ལོ་བསྐོར་བ་དང་རྗེས་ཀྱི་བྱ་བ་རྣམས་གཞུང་བཞིན་བྱའོ།། །།དེ་ནས་ཐུགས་དམ་བསྐང་མཆོད་སྤྲོ་ན། འཆད་འགྱུར་ཇི་བཞིན་བསྐང་རྫས་མཆོད་པའི་བྱེ་བྲག་རྣམས་གང་འབྱོར་འདུ་བྱས་ལ། མར་མེ་རྣམས་སྤར་ཞིང་སྤོས་བསྲེག །ནང་མཆོད་སྦྲེང་། གཞུང་གི་ཚོགས་ཕུད་འབུལ་བའི་འདོད་གསོལ་གྱིས། བཅོལ་པའི་ཕྲིན་ལས་མཛོད་ཅིག །ཅེས་པའི་མཐར་རོལ་མོའི་སྒྲ་སྣ་ཚོགས་ཀྱིས་གཟི་བྱིན་བསྐྱེད་ཅིང་། རྣལ་འབྱོར་པ་རྣམས་ལྟ་སྒོམ་དང་ལྡན་པས་དད་པའི་སེམས་ཀྱིས་དྲངས་ནས། གདུང་བའི་ང་རོས་བསྐུལ་བའི་དབྱངས་དང་བཅས་འདི་སྐད་དོ། །ཧཱུྃ་ཧྲཱིཿའགྱུར་མེད་སྤྲོས་བྲལ་བདེ་ཆེན་ཀློང་། །རང་བྱུང་ལྷུན་གྲུབ་འོད་གསལ་བ། །དངོས་ཀུན་སྣ་ཚོགས་མཉམ་ཉིད་ངང་། །འཁོར་འདས་ཀ་ནས་དག་པའི་དབྱིངས། །ཀུན་བཟང་བརྡལ་ཁྱབ་ཆེན་པོའི་མདངས། །དོན་དམ་ཡེ་ཤེས་དཀྱིལ་

[Full Size]

འཁོར་ལྷ། །གཤེགས་བཞུགས་མཚན་མ་མི་མངའ་ཡང་། །ཀུན་རྫོབ་སྒྱུ་མའི་སྣང་ཆ་ལས། །སྒྲུབ་པའི་རིག་འཛིན་རྣལ་འབྱོར་པས། །མོས་གུས་གདུང་བས་བསྐུལ་ལགས་ན། །ཆུ་ཟླའི་གར་གྱིས་བརྩེ་བ་ཡི། །ཐུགས་རྗེ་བྲི་གང་དང་བྲལ་བ། །རྩ་གསུམ་རྒྱལ་བ་རབ་འབྱམས་རྣམས། །འགྲོ་བའི་དོན་དུ་སྐུ་བསྐྱོད་ལ། །བླ་མེད་གསང་ཆེན་རོལ་པ་ཡི། །ཧེ་རུ་ཀ་གནས་དུར་ཁྲོད་ཀྱི། །གཞལ་ཡས་ཚོགས་ཁང་འབར་བ་འདིར། །གསང་བ་མཆོག་གི་མཆོད་པ་རྣམས། །གཞུང་བཞིན་ཇི་ལྟར་བཀྲམ་ནས་སུ། །ཚར་དུ་དངར་བའི་དམ་ཚིག་རྫས། །གདོད་ནས་རྣམ་དག་ར་ས་ཡ། །མ་ཧཱ་པཉྩ་ཨ་མྲྀ་ཏ། །ཚེ་གལ་བ་ལིཾ་རི་ལྟར་བརྗིད། །ཐབས་ཤེས་དབྱེར་མེད་རྒྱན་དང་ལྡན། །དམར་ཆེན་རཀྟའི་རྒྱ་མཚོ་བསྐྱིལ། །རྦ་རླབས་ཕྲེང་བ་ཆལ་ཆིལ་གཡོ། །ག་ཎ་ཙཀྲ་ཟག་མེད་ཀྱི། །ཡེ་ཤེས་བདུད་རྩིའི་རང་བཞིན་ཅན། །རྡོ་རྗེའི་མཆོད་ཡོན་ཞབས་བསིལ་བ། །ཆུ་དང་ཐང་སྐྱེས་སྤོས་ངད་ལྡང་། །སྣང་ཞིང་གསལ་བྱེད་དྲི་ཡི་ཆབ། །བཤོས་གཙང་རྒྱུད་མངས་རོལ་སྙན་སྒྲོགས། །གཟུགས་སྒྲ་དྲི་རོ་རེག་ཆོས་དང་། །རྡོ་རྗེ་ལྷ་མོ་བཅུ་དྲུག་སོགས། །མཉེན་ལྕུག་འཁྲིལ་ལྡེམ་གར་སྟབས་བསྒྱུར། །བདེ་སྟོང་མཆོད་པས་དགྱེས་བསྐྱེད་ཅིང་། །སྟོང་གསུམ་འཇིག་རྟེན་སྣང་སྲིད་ཞིང་། །རི་དབང་ལྷུན་པོ་གླིང་ཆེན་བཞི། །གླིང་ཕྲན་ཁོར་ཡུག་མུ་ཁྱུད་མཛེས། །ཉི་ཟླ་བཀྲ་ཤིས་རྫས་རྟགས་

[Full Size]

བརྒྱད། །རྒྱལ་སྲིད་ཉེ་བའི་རིན་ཆེན་བདུན། །རྩེ་མོར་ཆོས་བཟང་ལྷའི་ཕོ་བྲང་། །ལོངས་སྤྱོད་དཔལ་འབྱོར་ཕུན་ཚོགས་རྣམས། །བཀོད་ལེགས་ཕྱུར་བུར་སྤུངས་ནས་སུ། །ཕྱི་ནང་གསང་བའི་བསྐང་མཆོད་རྫས། །ཀུན་བཟང་རྣམ་ཐར་ལས་ལྷག་པ། །དངོས་འབྱོར་ཡིད་ཀྱིས་མངོན་སྤྲུལ་ནས། །དད་དང་མོས་བློ་རྣམ་དག་པའི། །དབྱངས་ཀྱི་ཡན་ལག་རྒྱ་མཚོ་ཡིས། །དྲངས་པའི་མི་ཤིགས་ནཱ་དའི་སྒྲ། །མཐའ་ཡས་ཞིང་ཁམས་རྒྱས་འགེངས་པས། །བསྐང་ངོ་བསྐལ་པར་ཐུགས་དམ་བསྐང་། །འོག་མིན་སྟོན་པ་ཆོས་ཀྱི་སྐུ། །གདོད་མའི་མགོན་པོ་ཡེ་སངས་རྒྱས། །བཛྲ་དྷ་རའི་ཐུགས་དམ་བསྐང་། །རྣམ་གྲོལ་ཐར་མཆོག་ལམ་སྟོན་གསོལ། །པོ་ཏ་ལ་ཡི་རི་བོ་ནས། །ཚེ་དབང་ཡིད་བཞིན་དཔལ་སྟེར་ཡུམ། །ཨཱཪྱ་ཏཱ་རེའི་ཐུགས༴ རྡོ་རྗེའི་ཆོས་བདུན་ལྡན་བྱིན་རློབས། །མཁའ་སྤྱོད་པདྨ་འོད་ཞིང་དུ། །འཆི་མེད་གྲུབ་བརྙེས་ཨོ་རྒྱན་རྗེ། །པྲ་ཝ་ཀ་རའི༴ མི་འགྱུར་རྟག་བརྟན་ཚེ་དངོས་སྩོལ། །ཡོངས་རྫོགས་ཐུབ་བསྟན་རྒྱལ་མཚན་འཛིན། །དུས་གསུམ་ཀུན་མཁྱེན་ཀརྨ་ཀ། དྷརྨ་ཀཱིརྟིའི༴ ཤེས་བྱ་ཐོགས་པ་མེད་བྱིན་རློབས། །སྣང་སྲིད་ཟིལ་གནོན་རྫུ་འཕྲུལ་ཅན། །གདུལ་དཀའ་མཐར་བྱེད་དཔའ་བོ་ཆེ། །ཆོས་ཀྱི་བླ་མའི༴ ཁམས་གསུམ་དབང་སྒྱུར་མཐུ་སྟོབས་སྩོལ། །མཁྱེན་རབ་ཀེ་ལཱ་ཤ་རིའི་ངོགས། །གཞན་སྟོང་སྨྲ་བའི་གདོང་ལྔ་པ། །རང་བྱུང་རྡོ་རྗེའི༴ མི་འཇིགས་སྤོབས་པ་ཐོབ་བྱིན་རློབས། །

[Full Size]

ལུང་རིགས་དཔུང་ཚོགས་ཡན་ལག་བཞིས། །ལོག་ལྟའི་རྒོལ་པ་སྤ་བཀོང་བའི། །འཛམ་གླིང་ཆོས་གྲགས༴ ཕྱོགས་ལས་རྣམ་རྒྱལ་བློ་གྲོས་སྩོལ། །མཚན་དཔེ་རང་བཞིན་ལྷུན་གྱིས་གྲུབ། །རྩོལ་མེད་འགྲོ་དོན་རྒྱུན་མི་ཆད། །དེ་བཞིན་གཤེགས་པའི༴ འབྲེལ་ཚད་རྫོགས་སངས་རྒྱས་བྱིན་རློབས། །ཐེག་གསུམ་མཐར་ཐུག་ཟབ་མོའི་དོན། །ལེགས་བཤད་ཆོས་ཀྱི་རྒྱལ་ཐབས་འཆང་། །མཐོང་བ་དོན་ལྡན༴ སྒྲིབ་བྲལ་ལྷན་སྐྱེས་ཡེ་ཤེས་སྩོལ། །ཐུགས་རྗེའི་འོད་དཀར་ཞི་བསིལ་གྱིས། །ཉོན་མོངས་གདུང་སེལ་སྨན་གཅིག་པུ། །རང་བྱུང་མཚོ་སྐྱེས༴ གནས་ལུགས་མངོན་གྱུར་བྱིིན་གྱིས་རློབས། །ཟབ་གསལ་ངོ་བོ་ཉིད་དབྱིངས་ལས། །ཇི་ལྟ་ཇི་སྙེད་ཐམས་ཅད་མཁྱེན། །དབྱངས་ཅན་དགའ་བའི༴ ཤེས་རབ་གསུམ་གྱི་སྣང་བ་སྩོལ། །ཨེ་ཝྃ་ཟུང་འཇུག་རོལ་བའི་ཀློང་། །བདེ་སྟོང་མི་ཕྱེད་རྡོ་རྗེ་ཅན། །མི་ཕམ་ཆོས་དབང༴ སྐྱེ་འགགས་གནས་བྲལ་བྱིན་གྱིས་རློབས། །ཀུན་ཁྱབ་འགྱུར་མེད་མཁའ་ཡངས་པོར། །བདེ་ཆེན་དྲྭ་བ་སྡོམ་པའི་གར། །ཆོས་དབྱིངས་རྡོ་རྗེའི༴ མི་རྟོག་ཏིང་འཛིན་རྒྱུད་སྨིན་སྩོལ། །སྲིད་མཚོ་སྒྲོལ་བའི་དེད་དཔོན་ཆེ། །ཡང་དག་ཡེ་ཤེས་ལྔའི་བདག་ཉིད། །ཛྙཱ་ན་བཛྲེ༴ ལས་ཉོན་འཁྲུལ་འཁོར་བཟློག་བྱིན་རློབས། །སྲིད་ཞིའི་དགོས་འབྱུང་དཔག་བསམ་དབང་། །དོན་གཉིས་ཕུན་ཚོགས་ཆར་འབེབས་པ། །བོ་དྷི་བཛྲེ༴ བྱང་ཆུབ་སྙིང་བོར་དབུགས་དབྱུང་སྩོལ། །རིགས་དཀྱིལ་

[Full Size]

ཁྱབ་བདག་འཁོར་ལོས་སྒྱུར། །ངེས་དོན་རྡོ་རྗེ་སློབ་དཔོན་མཆོག །བདུད་ལས་རྣམ་རྒྱལ༴ དབང་བཞི་ཡེ་ཤེས་ཐོབ་བྱིན་རློབས། །ལོངས་སྐུ་ངེས་པ་ལྔ་ལྡན་བདག །གར་དབང་རྡོར་འཆང་རྣམ་པར་འཕྲུལ། །ཆོས་གྲུབ་རྒྱ་མཚོའི༴ ཕྱག་རྒྱ་ཆེན་པོས་རྒྱུད་གྲོལ་སྩོལ། །སྒྲུབ་པའི་སྲོལ་གཏོད་བསྟན་པ་སྤེལ། །རྩོད་ལྡན་འགྲོ་བའི་དོན་སྤྱོད་པ། །རྩ་བརྒྱུད་བླ་མའི༴ དག་སྣང་ཕྱོགས་མེད་འབྱོང་བྱིན་རློབས། །གསང་མཆོག་དགྱེས་པའི་རོལ་པ་ན། །བྱ་སྦྱོད་རྣལ་འབྱོར་བླ་མེད་ཀྱི། །ཡི་དམ་ལྷ་ཚོགས༴ མཆོག་ཐུན་དངོས་གྲུབ་སྩལ་དུ་གསོལ། །སྣང་སྟོང་རྩ་རླུང་ཐིག་ལེ་དང་། །འདུ་འབྲལ་མེད་པར་གནས་ཞིང་སྐྱོང་། །དཔའ་བོ་འཁའ་འགྲོའི༴ བདེ་གསལ་ཉམས་རྟོགས་འཆར་བྱིན་རློབས། །དམ་ཚིག་གཉན་པོའི་ཕོ་བྲང་ནས། །ཆོས་སྐྱོང་མ་མགོན་ལྕམ་དྲལ་ཚོགས། །དམ་ཅན་སྲུང་མའི༴ ལས་བཞིའི་ཕྲིན་ལས་མྱུར་འགྲུབ་མཛོད། །དེ་ལྟར་ཡེ་ཤེས་དཀྱིལ་འཁོར་བའི། །རྩ་གསུམ་རབ་འབྱམས་རྒྱ་མཚོ་རྣམས། །བསྐང་ངོ་བསྐལ་པར་ཐུགས་དམ་བསྐང་། །འགལ་རྐྱེན་བར་ཆད་རྦོད་གཏོང་ཟློག །ཧོཿདགོངས་སུ་གསོལ་ལོ་རྩ་བ་གསུམ། །མི་མངོན་ཕྱོགས་བཅུའི་ཞིང་བཞུགས་པའི། །རྒྱལ་དང་རྒྱལ་བའི་གདུང་འཚོབ་རྣམས། །དེང་འདིར་གསན་ཅིང་དགོངས་བར་མཛོད། །བདག་སོགས་འཁྲུལ་བློ་གཟུང་འཛིན་དབང་། །བག་ཆགས་བརྟས་པས་ནོངས་གྱུར་པ། །སོ་ཐར་བྱང་སེམས་གསང་སྔགས་ཀྱི། །རྩ་བ་ཡན་ལག་དམ་ཉམས་པ། །

[Full Size]

ཁྱད་པར་རྡོ་རྗེ་རྒྱལ་པོ་ལ། །ལོག་ལྟ་ཕ་མར་མ་གུས་དང་། །སྣོད་མིན་རྣམས་ལ་གསང་སྒྲོག་སོགས། །ཉམས་ཆག་བསྐང་ངོ་དག་ཚངས་སྩོལ། །འཁོར་འདས་གཉིས་ཆོས་ཐམས་ཅད་ཀུན། །ཡེ་ནས་མ་བཅོས་སྤྲོས་མཚན་དབེན། །རྣམ་དག་བདེ་ཆེན་གཉུག་མའི་གཤིས། །རང་རིག་སྐྱེ་བ་མེད་པའི་ཀློང་། །བསྐང་དང་བཤགས་བྱ་མ་གྲུབ་ཀྱང་། །ཆོས་ཉིད་འོད་གསལ་རྫོགས་པ་ཆེ། །དབྱེར་མེད་མ་ཧཱ་མུ་དྲའི་མདངས། །ཆོས་ཅན་རྟེན་འབྲེལ་རང་བཞིན་ལས། །འདའ་དཀའ་རྡོ་རྗེའི་བཀའ་གསང་གཉན། །སྤྱོད་པའི་རྣལ་འབྱོར་མཆེད་རྣམས་ཀྱིས། །རྨད་བྱུང་དམ་རྫས་ཚོགས་འཁོར་ལོའི། །བསྐང་མཆོད་བླ་མེད་ཕུལ་བའི་མཐུས། །བདག་དང་མཐའ་ཡས་སེམས་ཅན་གྱི། །དམ་ཚིག་ཉམས་ཆག་བྱང་གྱུར་ཅིག །ལས་ངན་སྡིག་སྒྲིབ་དག་གྱུར་ཅིག །འཁོར་བ་དོང་ནས་སྤྲུགས་གྱུར་ཅིག །ཀུན་བཟང་མཁའ་ཀློང་དབྱིངས་སུ་བསྐང་། །ཆོས་ཉིད་ངང་དུ་སོར་ཆུད་ཤོག །ས་མ་ཡ་ཨ་ཨ་ཨཱཿདེ་ནས་ཞིང་སྐྱོང་བ་རྣམས་དང་མཁའ་འགྲོའི་གཏོར་འབུལ་གཏང་། ཚོགས་ལ་ལོངས་སྤྱོད་པ། ལྷག་མ་དང་རྗེས་ཆོག་བྱིན་རླབས་བསྡུ་བ་སོགས་ཀྱང་བྱའོ། །དེ་ལྟར་སྨིན་དབང་དང་སྐོང་བཤགས་ཀྱི་རིམ་པ་འདི་དག་ཟབ་ལམ་སྤྱོད་པའི་སྐལ་བ་ཅན་རྡོ་རྗེའི་སློབ་མ་མཚན་ལྡན་དགེ་སློང་ཀརྨ་བཀྲ་ཤིས་པའི་བཞེད་ངོར། རྒྱལ་དབང་པདྨའི་མཚན་གྱི་བྱིན་རླབས་ཐོབ་པའི་སི་ཏུ་པདྨ་ཉིན་བྱེད་དབང་པོས་བཀོད་པ་ཚུལ་འདིར་འབྲེལ་ཚད་སྣང་སྲིད་བླ་མའི་དཀྱིལ་འཁོར་དུ་རང་གྲོལ་ཕྱག་རྒྱ་ཆེན་པོ་མངོན་དུ་ཐོབ་པར་གྱུར་ཅིག །སརྦ་ཐཱ་མདྒ་ལཾ་བྷ་ཝ་ནྟུ།། །།

བླ་སྒྲུབ་ཡིད་བཞིན་ཀུན་སྩོལ།

[Full Size]

བླ་སྒྲུབ་ཡིད་བཞིན་ཀུན་སྩོལ་ཞེས་བྱ་བ་བཞུགས་སོ། །སྭ་སྟི། འདིར་དཔལ་ལྡན་ཀརྨ་པའི་བླ་མའི་རྣལ་འབྱོར་ལ་བརྩོན་པའི་སྒྲུབ་པ་པོས། དབེན་པའི་གནས་སུ། རྟེན་གསུམ་གྱི་དྲུང་དུ་མཆོད་པ་ཇི་སྙེད་ཚར་དུ་དངར་བ་བཤམས་པར་བྱའོ། །དེའང་དང་པོ་ཡོན་ཏན་ཟུར་ཙམ་བརྗོད་ན། རྡོ་རྗེ་གདན་བཞི་ལས། དུས་གསུམ་སངས་རྒྱས་མཆོད་པ་བས། །བླ་མའི་བ་སྤུ་ཉག་གཅིག་མཆོད། །དེ་ནི་བསོད་ནམས་ཁྱད་པར་འཕགས། །ཅེས་དང་། དྲིན་དང་ལྡན་པའི་བླ་མ་དེ། །སྤྱི་བོའི་གཙུག་གམ་སྙིང་གི་དཀྱིལ། །ཡན་ལག་མཐིལ་སོགས་གང་བསྒོམ་པ། །སངས་རྒྱས་སྟོང་གི་ཡོན་ཏན་ནི། །གང་ཟག་དེ་ཡིས་འཛིན་པར་འགྱུར། །ཅེས་སོགས་རྒྱུད་ལུང་དུ་མ་ནས་བསྔགས་པའི་ཡུལ་དུ་མཛད་པ་ལྟར་མོས་པས་ཡར་གཞལ་ཙམ་དུ་མ་ཡིན་པར། བཅོས་མིན་གྱི་དད་གུས་གདུང་ཤུགས་དང་བཅས་པས་ཀུན་ནས་བསླང་པས་ཚུལ་འདིར་འཇུག་པ་ལ་ཐོག་མར་སྐྱབས་ཡུལ་རྣམས་མདུན་མཁར་ལམ་གྱིས་གསལ་བཏབ་ལ། ན་མོ། །སྐྱབས་གནས་དཀོན་མཆོག་རྒྱ་མཚོའི་སྐུ་གསུང་ཐུགས། །ཡོན་ཏན་ཕྲིན་ལས་གཅིག་བསྡུས་རྡོ་རྗེ་འཛིན། །རྩ་བའི་བླ་མར་དེང་བཟུང་སྙིང་པོའི་བར། །བདག་སོགས་སྐྱབས་མཆི་ཐུགས་རྗེས་བཟུང་དུ་གསོལ། །མ་གྱུར་སེམས་ཅན་དོན་ཕྱིར་བླ་མ་བསྒྲུབ། །ཀུན་ཀྱང་བྱང་ཆུབ་ཐོབ་པར་སེམས་བསྐྱེད་དོ། །ཅེས་སྐྱབས་འགྲོ་སེམས་བསྐྱེད་ལན་གསུམ་དང་། དེ་ནས་བླ་མའི་རྣལ་འབྱོར་ལ་འཇུག་པ་ནི། སྣང་སྲིད་ཆོས་ཀུན་དམིགས་མེད་ངང་། །སྟོང་དང་སྙིང་རྗེའི་རྩལ་སྣང་ལས། །རང་ཉིད་རྡོ་རྗེ་རྣལ་འབྱོར་མར། །གསལ་བའི་སྤྱི་བོར་པད་དཀར་དང་། །ཉི་ཟླའི་སྟེང་དུ་རྒྱལ་ཀུན་གྱི། །ཡེ་ཤེས་གཅིག་བསྡུས་འཁོར་ལོའི་མགོན། །ངོ་བོ་དཔལ་ལྡན་ཀརྨ་པ། །རྗེ་བཙུན་བདུད་འདུལ་

[Full Size]

རྡོ་རྗེ་ལ། །རྣམ་པ་བཅོམ་ལྡན་རྡོ་རྗེ་འཆང་། །ནམ་མཁའི་མདོག་ཅན་ལོངས་སྐུའི་ཆས། །དར་དང་རིན་ཆེན་རྒྱན་གྱིས་མཛེས། །ཐབས་ཤེས་རྡོར་དྲིལ་བསྣོལ་སྟབས་འཛིན། །ཞབས་གཉིས་རྡོར་སྐྱིལ་འོད་ལྔའི་ཀློང་། །སྒྲུབ་བརྒྱུད་བླ་མའི་ཚོགས་ཀྱིས་བསྐོར། །ཀུན་ཀྱང་མཚན་དཔེ་ལྷམ་མེར་གསལ། །ཆོས་དབྱིངས་དགོངས་པ་སྐྱེ་མེད་ངང་། །དོན་དམ་གཟིགས་པའི་ལྟ་སྟངས་ཅན། །དྲན་ཙམ་ཉིད་ནས་མོས་གུས་འབར། །བཟོད་མེད་གདུང་ཤུགས་དྲག་པོ་ཡིས། །གསོལ་བཏབ་ཙམ་གྱི་བྱིན་རླབས་མྱུར། །མྱུར་བའི་སྟོབས་ཀྱིས་བདག་རྒྱུད་ལ། །ཡེ་ཤེས་མངོན་སུམ་སྟོན་བ་ཡི། །ཐུགས་རྗེའི་འོད་ཟེར་ཀུན་ཏུ་ཁྱབ། །སྙིང་ནས་གསོལ་འདེབས་དུས་ལ་བབ། །ཀྱེ། སྣང་སྟོང་སྐུ་ལ་གྲག་སྟོང་གསུང་། །བདེ་སྟོང་ཐུགས་ཀྱི་རང་བཞིན་ཅན། །རྡོ་རྗེའི་གསང་བ་གསུམ་ཕྱག་འཚལ། །སྐུ་གསུང་ཐུགས་ཀྱིས་བྱིན་གྱིས་རློབས། །ཀྱེ། རང་བྱུང་སྣང་སྟོང་ཕོ་བྲང་ནས། །རྩ་བའི་བླ་མ་སྤྱན་འདྲེན་ན། །གནམ་ས་བླ་འོག་མཆོག་གསུམ་དང་། །རྩ་གསུམ་ལྷ་ཚོགས་སྤྲིན་ལྟར་གཏིབས། །དངོས་གྲུབ་ཆར་འབེབས་འཇའ་འོད་འཚེར། །དད་དང་གདུང་བས་གསོལ་བཏབ་པས། །ཐུགས་དམ་དབང་གིས་འདིར་གཤེགས་གསོལ། །མོས་བའི་བུ་ལ་བྱིན་གྱིས་རློབས། །དེ་ལྟར་བྱིན་འབེབས་ནས་མཆོད་པ་འབུལ་བ་ཡན་ལག་བདུན་པ་ནི། ཕྱག་

[Full Size]

འཚལ་མཆོད་ཅིང་མི་དགེ་བཤགས། །ཡི་རངས་ཆོས་འཁོར་བསྐོར་གསོལ་འདེབས། །དགེ་བས་འགྲོ་དྲུག་སངས་རྒྱས་ཀྱི། །གོ་འཕང་ཐོབ་པའི་ཕྱིར་བསྔོའོ། །བདག་ལུས་ལོངས་སྤྱོད་སྣང་སྲིད་ཀྱི། །དངོས་པོ་ཀུན་གྱི་མཆོད་པའི་ཚོགས། །ཞིང་ཁམས་རབ་འབྱམས་རྒྱས་འགེངས་པ། །བླ་མ་དཀྱིལ་འཁོར་ལྷ་ལ་འབུལ། །ༀ་རཏྣ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཧཱུྃ། དེ་ནས་རྗེ་ཟླ་འོད་གཞོན་ནུའི་གསུང་ལས་བྱུང་བ་འདིའང་བྱིན་རླབས་ཀྱི་ཁྱད་དུ་བརྗོད་པར་བྱ་བ་ནི། བླ་མ་རིན་པོ་ཆེ་བདག་མིང་འདི་ཞེས་བྱ་བའི་ལས་དང་ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་དང་། བག་ཆགས་ཀྱི་སྒྲིབ་པ་ཐམས་ཅད་ད་ལྟ་ཉིད་དུ་དག་པར་བྱིན་གྱིས་བརླབ་ཏུ་གསོལ། །འདུག་ས་འདི་ཉིད་དུ་དག་པར་བྱིན༴ ཐུན་གཅིག་པོ་འདི་ཉིད་ངང་ལ་དག་པར་བྱིན༴ བླ་མ་རྗེ་བཙུན་རིན་པོ་ཆེ་བདག་མིང་འདི་ཞེས་བྱ་བའི་རྒྱུད་འདི་དག་པར་བྱིན༴ རྒྱུད་འདི་རྣམ་པར་གྲོལ་བར་བྱིན༴ ད་ལྟ་ཉིད་དུ་དག་པར་བྱིན༴ འདུག་ས་འདི་ཉིད་དུ་དག་པར་བྱིན༴ ཐུན་འདི་ཉིད་ལ་དག་པར་བྱིན༴ བླ་མ་རྗེ་བཙུན་རིན་པོ་ཆེ་བདག་མིང་འདི་ཞེས་བྱ་བའི་རྒྱུད་ལ་ཏིང་ངེ་འཛིན་ཕྱིན་ཅི་མ་ལོག་པ་མཆོག་ཏུ་གྱུར་པ་སྐྱེ་བར་མཛད་དུ་གསོལ། ད་ལྟ་ཉིད་དུ་སྐྱེ་བར་བྱིན༴ འདུག་ས་འདི་ཉིད་དུ་སྐྱེ་བར་བྱིན༴

[Full Size]

ཐུན་འདི་ཉིད་ཀྱི་རིང་ལ་སྐྱེ་བར་བྱིན༴ བླ་མ་རྗེ་བཙུན་རིན་པོ་ཆེ་བདག་མིང་འདི་ཞེས་བྱ་བའི་རྒྱུད་ལ་ཡེ་ཤེས་ཕྱིན་ཅི་མ་ལོག་པ་མཆོག་ཏུ་གྱུར་པ་བསྐྱེད་པར་མཛད་དུ་གསོལ། །ད་ལྟ་ཉིད་དུ་སྐྱེ་བར་བྱིན༴ འདུག་ས་འདི་ཉིད་དུ་སྐྱེ་བར་བྱིན༴ ཐུན་འདི་ཉིད་ལ་སྐྱེ་བར་བྱིན་གྱིས་བརླབ་ཏུ་གསོལ། ཅེས་པ་རྣམས་སོ་སོར་ལན་གསུམ་རེ་བརྗོད་ལ། ཀརྨ་པ་མཁྱེན་ནོ། །ཞེས་ཅི་ནུས་དང་། དེ་ནས་རྗེ་དུས་གསུམ་མཁྱེན་པས་མཛད་པར་གྲགས་པ། བླ་མ་རིན་པོ་ཆེ་ལ་གསོལ་བ་འདེབས། །བདག་འཛིན་བློ་ཡིས་ཐོང་བར་བྱིན་གྱིས་རློབས། །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །ཆོས་མིན་རྣམ་རྟོག་འགག་བར་བྱིན་གྱིས་རློབས། །རང་སེམས་སྐྱེ་མེད་རྟོགས་པར་བྱིན་གྱིས་རློབས། །འཁྲུལ་པ་རང་སར་ཞི་བར་བྱིན་གྱིས་རློབས། །སྣང་སྲིད་ཆོས་སྐུར་རྟོགས་པར་བྱིན་རློབས། །ཅེས་ཀྱང་བརྗོད་པར་བྱའོ། །སྤྲོ་ན་རྒྱང་འབོད་མདོར་བསྡུས་ནི། སྐྱབས་དཀོན་མཆོག་འདུས་པའི་ངོ་བོ་ཉིད། །མགོན་དྲིན་ཆེན་རྩ་བའི་བླ་མ་ལ། །དུས་འདི་ནས་མཐར་ཐུག་སངས་རྒྱས་བར། །བདག་མགོན་མེད་སེམས་ཅན་བསྐྱབ་ཏུ་གསོལ། །གནས་འགྲོ་བ་རིགས་དྲུག་གི་སྡུག་བསྔལ་མཚོར། །བྱིངས་པ་ཡི་སྐྱབས་མེད་རྣམས་བསྒྲལ་དུ་གསོལ། །གདོད་རང་ཆས་སུ་གྲུབ་པའི་གཉུག་མའི་སེམས། །དོན་མངོན་གྱུར་གྱི་རྟོགས་པའི་གདེང་ཐོབ་ཤོག །ཕ་བཀའ་བརྒྱུད་ཀྱི་བླ་མ་དགོངས་སུ་གསོལ། །ཆོས་ཐེག་ཆེན་གྱི་ལྟ་སྒོམ་རྣམ་དག་པར། །ཚུལ་ཇི་བཞིན་ཤེས་རབ་ཀྱི་མིག་ཐོབ་ནས། །གནད་མ་ནོར་སྦྱངས་གོམས་ཀྱི་མཐར་སོན་ཤོག །དེ་ནས་བརྒྱུད་པའི་གསོལ་འདེབས་བསྡུས་པར་ན། ཆོས་སྐུ་རྡོ་རྗེ་འཆང་ཆེན་མ་ཏིའི་ཞབས། །ས་ར་ཧ་དང་ཀླུ་སྒྲུབ་ཤ་བ་རི། །མཻ་ཏྲི་མར་མི་དྭགས་

[Full Size]

པོ་དུས་གསུམ་མཁྱེན། །རས་ཆེན་རྒྱལ་སྲས་པཀྵི་ཨོ་རྒྱན་རྗེ། །རང་བྱུང་གཡུང་སྟོན་རོལ་རྡོར་མཁའ་སྤྱོད་དབང་། །དེ་བཞིན་གཤེགས་བ་རིན་ཆེན་བཟང་དོན་ལྡན། །འཇམ་དཔལ་བཟང་པོ་གུ་ཤྲི་མཚོ་སྐྱེས་ཞབས། །སངས་རྒྱས་མཉན་པ་མི་བསྐྱོད་དཀོན་མཆོག་འབངས། །དབང་ཕྱུག་རྡོ་རྗེ་ཆོས་ཀྱི་དབང་ཕྱུག་དང་། །ཆོས་དབྱིངས་རྡོ་རྗེ་ཡེ་ཤེས་སྙིང་པོ་དང་། །ཡེ་ཤེས་རྡོ་རྗེ་ཆོས་ཀྱི་དོན་ཀུན་འགྲུབ། །བྱང་ཆུབ་རྡོ་རྗེ་ཆོས་ཀྱི་འབྱུང་གནས་མཆོག །བདུད་འདུལ་རྡོ་རྗེ་ཆོས་གྲུབ་རྒྱ་མཚོའི་སྡེ། །ཡི་དམ་དཀྱིལ་འཁོར་ལྷ་ཚོགས་བཀའ་སྲུང་ལ། །གསོལ་འདེབས་རང་བྱུང་རིག་པ་རང་གྲོལ་ངང་། །ལྷན་སྐྱེས་ཡེ་ཤེས་མངོན་གྱུར་བྱིན་གྱིས་རློབས། །དེ་ནས་བྱིན་རླབས་དབང་བཞི་བླང་བའི་རིམ་པ་ནི། དྲན་ཆོག་རྒྱལ་པོ་བླ་མ་རིན་པོ་ཆེ། །སྐལ་ལྡན་སྨིན་གྲོལ་དབང་བཞི་བསྐུར་གསོལ་འདེབས། །སྐྱབས་ཡུལ་ཐམས་ཅད་རྩ་བའི་བླ་མར་ཐིམ། །དགྱེས་པ་དང་བཅས་དབང་གི་དགོངས་པ་མཛད། །བླ་མའི་དཔྲལ་བའི་ༀ་ལས་འོད་དཀར་འཕྲོས། །རང་གི་དཔྲལ་ཐིམ་ལུས་ཀྱི་སྒྲིབ་པ་དག །བུམ་དབང་ཐོབ་ཅིང་བསྐྱེད་རིམ་སྣང་སྟོང་ལྷར། །བསྒོམ་པར་དབང་བའི་སྤྲུལ་སྐུ་འགྲུབ་པར་འགྱུར། །མགྲིན་པའི་ཨཱཿལས་འོད་ཟེར་དམར་པོ་འཕྲོས། །རང་གི་མགྲིན་ཐིམ་ངག་གི་སྒྲིབ་པ་དག །གསང་བའི་དབང་ཐོབ་རྫོགས་རིམ་རྩ་ཐིག་རླུང་། །སྒྱུ་ལུས་གསལ་སྟོང་བསྒོམ་དབང་ལོངས་སྐུ་འགྲུབ། །ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས། །རང་

[Full Size]

གི་སྙིང་ཁར་ཐིམ་པས་ཡིད་སྒྲིབ་དག །ཤེར་ཡེའི་དབང་ཐོབ་དགའ་བཞི་ཡེ་ཤེས་ཀྱི། །བདེ་སྟོང་བསྒོམ་དབང་ཆོས་ཀྱི་སྐུ་འགྲུབ་འགྱུར། །སླར་ཡང་འོད་ཟེར་དཀར་དམར་མཐིང་འཕྲོས་ནས། །སྒོ་གསུམ་ལ་ཐིམ་ཆ་མཉམ་སྒྲིབ་པ་དག །དབང་བཞི་ཐོབ་ཅིང་ཕྱག་རྒྱ་ཆེ་བསྒོམ་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །རྡོ་རྗེ་འཆང་དབང་དཔལ་ལྡན་ཀརྨ་པ། །བདག་ཉིད་པདྨའི་ཟེའུ་འབྲུར་རྟག་བཞུགས་ནས། །བྱང་ཆུབ་བར་དུ་འབྲལ་མེད་རྗེས་བཟུང་ལ། །གསང་གསུམ་རྡོ་རྗེའི་བྱིན་རླབས་དེང་འདིར་སྩོལ། །དེ་ལྟར་གསོལ་བཏབ་བླ་མ་འོད་ཞུ་ནས། །རང་ཐིམ་གཅིག་འདྲེས་ཕྲིན་ལས་རབ་འབྱམས་ཀུན། །བསྒྲུབ་པར་ནུས་པ་རྡོ་རྗེ་སློབ་དཔོན་དབང་། །ཐོབ་ཅིང་བདག་རྒྱུད་བླ་མའི་སྐུ་གསུང་ཐུགས། །དབྱེར་མེད་ངང་ལ་མ་བཅོས་རང་བབས་སུ། །སྤྲོས་ཀུན་བྲལ་བ་ཅི་གནས་མཉམ་པར་བཞག །ཅེས་པའི་ཚིག་དོན་ལྟར་རང་སེམས་ངོ་བོ་བསྐྱང་ལ། མཐར། བདག་གིས་དུས་གསུམ་བསགས་པའི་དགེ་གང་མཆིས། །འགྲོ་ཀུན་གདོད་མའི་བདེར་གཤེགས་རྡོ་རྗེ་འཆང་། །གོ་འཕང་ཐོབ་ཕྱིར་ཡོངས་སུ་བསྔོ་བར་བགྱི། །དེ་ལྟར་སྨོན་ལམ་རྣམ་དག་འགྲུབ་གྱུར་ཅིག །ཅེས་པའང་དད་གསུམ་གྱི་ལྷག་བློ་དང་ལྡན་པ་དགེ་སློང་འབྱོར་ལྡན་གྱིས་བསྐུལ་ལྟར་སི་ཏུ་པདྨ་ཉིན་བྱེད་དབང་པོས་ས་ཟླའི་དཀར་ཕྱོགས་བཟང་པོ་གཉིས་པར་བཀོད་པ་འབྲེལ་བཅས་སངས་རྒྱས་ཀརྨ་ཀའི་གོ་འཕང་ལ་རེག་པར་གྱུར་ཅིག །མངྒ་ལམ།། །།

བླ་མའི་རྣལ་འབྱོར་དངོས་གྲུབ་མཆོག་སྩོལ།

[Full Size]

བླ་མའི་རྣལ་འབྱོར་དངོས་གྲུབ་མཆོག་སྩོལ་བཞུགས་སོ། །རང་མདུན་ཡེ་ཤེས་ལྔ་ཡི་འོད་ཀྱི་ཀློང་། །རིན་ཆེན་སེང་གེས་བཏེགས་པའི་ཁྲི་སྟེང་དུ། །དུས་གསུམ་རྒྱལ་བའི་སྤྱི་གཟུགས་ཀརྨ་པ། །འཇིགས་བྲལ་རྒྱལ་དབང་བདུད་འདུལ་རྡོ་རྗེ་ནི། །སྐུ་མདོག་དཀར་གསལ་ཕྱག་གཉིས་མཉམ་པར་བཞག །ཞབས་གཉིས་རྡོ་རྗེ་སྐྱིལ་མོ་ཀྲུང་གིས་བཞུགས། །སྐུ་ལ་ཆོས་གོས་རྣམ་གསུམ་ལྷུག་པར་གསོལ། །མཚན་དཔེའི་གཟི་བྱིན་རབ་གསལ་ལྷང་ངེ་བ། །བདག་སོགས་མཁའ་མཉམ་འགྲོ་བའི་དཔལ་དུ་ཤར། །མཆོག་གསུམ་རྒྱལ་བ་རྒྱལ་སྲས་འཕགས་པའི་ཚོགས། །ཟུང་འཇུག་ཕྱག་རྒྱ་ཆེན་པོ་བཀའ་བརྒྱུད་ཀྱི། །གྲུབ་ཐོབ་རྒྱ་མཚོ་ཉིན་མོར་བྱེད་ལྟར་གསལ། །མཆོག་དང་ཐུན་མོང་གྲུབ་གཉིས་སྩོལ་མཛད་པ། །རྒྱུད་སྡེ་བཞི་ཡི་ཡི་དམ་རབ་འབྱམས་རྣམས། །དྲི་མེད་ཆ་ཤས་ཡོངས་རྫོགས་འོད་དཀར་བཞིན། །དངོས་གྲུབ་བདུད་རྩིའི་ཆར་རྒྱུན་སི་ལི་ལི། །ཆོས་དབྱིངས་ཡེ་ཤེས་ངང་ལས་གྲུབ་པའི་ལྷ། །མ་ཧཱ་ཀཱ་ལ་རྡོ་རྗེ་རེ་མ་ཏི། །དམ་ཅན་བཀའ་སྡོད་ཆོས་ཀྱི་སྲུང་མ་རྣམས། །ཆར་སྤྲིན་དང་མཚུངས་བཟོད་དཀའི་གཟི་བྱིན་ལྡན། །གཞན་ཡང་ཕྱི་ནང་བར་ཆད་ཀུན་སེལ་བ། །གནས་གསུམ་དག་པའི་ཞིང་ཁམས་རབ་འབྱམས་ཀྱི། །ཌཱ་ཀི་དཔའ་བོ་རྒྱུ་སྐར་ཕྲེང་བཞིན་གསལ། །སྣ་ཚོགས་ཕྲིན་ལས་ནམ་མཁའི་གློག་ལྟར་འཁྱུག །དེ་ལྟར་སྐྱབས་ཡུལ་ངོ་བོ་མཆོག་གསུམ་དང་། །རྩ་

[Full Size]

གསུམ་རྒྱལ་བའི་དཀྱིལ་འཁོར་གསལ་བའི་མདུན། །བདག་གིས་གཙོ་བྱས་རིགས་དྲུག་ཕ་མའི་ཚོགས། །གདུང་ཤུགས་དྲག་བོས་ཕྱག་འཚལ་མཆོད་པ་འབུལ། །ཉེས་བཤགས་རྗེས་སུ་ཡི་རང་ཆོས་སྟོན་འཚལ། །དགེ་བ་བྱང་ཆུབ་ཆེན་པོར་བསྔོ་བར་བགྱི། །མི་ཕྱེད་རྩེ་གཅིག་སྙིང་ནས་གསོལ་བ་འདེབས། །སངས་རྒྱས་ཀུན་འདུས་ཀརྨ་པ་མཁྱེན་ནོ། །ཀརྨ་པ་མཁྱེན་ནོ། །ཞེས་མོས་གུས་ཀྱི་འདུན་པ་དང་ལྡན་པས་མང་ཙམ་བརྗོད་ནས། །འཕགས་པ་སྙིང་རྗེའི་རང་གཟུགས་འགྲོ་བའི་མགོན། །སྤྱན་རས་གཟིགས་དངོས་རྒྱལ་མཆོག་ཀརྨ་པ། །འཇིགས་བྲལ་བདུད་ཚོགས་འདུལ་བའི་རྡོ་རྗེ་ལ། །རྣམ་ཀུན་གསོལ་བ་བཏབ་པའི་བྱིན་རླབས་ཀྱིས། །ཚེ་གཅིག་དམ་ཆོས་ཟབ་མོ་ཕྱག་རྒྱ་ཆེའི། །གནས་ལུགས་དོན་རྟོགས་སྒྱུ་ལུས་ཆོས་སྐུར་འཆར། །རྟེན་ཐོག་འདི་རུ་འཇའ་ལུས་སྐུ་འགྲུབ་ནས། །རྡོ་རྗེ་འཆང་གི་གོ་འཕང་ཡོངས་ཐོབ་ཤོག །མཐར་ནི་སྐྱབས་ཡུལ་བླ་མའི་སྐུ་ལ་ཐིམ། །རྩ་བའི་བླ་མ་རང་སེམས་གཉིས་མེད་འདྲེས། །དབང་བཞི་མཆོག་ཐོབ་སྒོ་གསུམ་སྡིག་སྒྲིབ་དག །སྣང་གྲག་རྟོག་གསུམ་བླ་མའི་དཀྱིལ་འཁོར་གྲུབ། །བདག་ཅག་སྐྱེ་དང་ཚེ་རབས་ཐམས་ཅད་དུ། །རིགས་ཀུན་ཁྱབ་བདག་བཛྲ་དྷཱ་ར་དང་། །དབྱེར་མེད་དཔལ་ལྡན་བླ་མས་རྗེས་བཟུང་སྟེ། །མ་ཧཱ་མུ་དྲའི་གོ་འཕང་ཐོབ་གྱུར་ཅིག །དེ་ལྟར་འཇིག་རྟེན་ཞིང་འདིའི་སྟོན་མཆོག་དཔལ་ཀརྨ་པའི་གསོལ་འདེབས་བླ་མའི་རྣལ་འབྱོར་འདི་ཡང་གཏེར་ཆེན་རོལ་པའི་རྡ་ོ

[Full Size]

རྗེའི་སྒྱུ་འཕྲུལ་པདྨ་བསྟན་འཕེལ་གྱི་དགོངས་བཞེད་ལྟར། སི་ཏུའི་མིང་ཅན་གྱིས་ཀུན་དགའ་ཞེས་པ་ཤིང་ཕོ་སྟག་གི་ལོ་ཆོ་འཕྲུལ་ཅན་གྱི་ཡར་ཚེས་ལ་དཔལ་གྱི་མཚུར་ཕུའི་གཙུག་ལག་ཏུ་བྲིས་པའོ།། །།

ཀརྨ་པ་བདུད་འདུལ་རྡོ་རྗེའི་བླ་སྒྲུབ།

[Full Size]

༈ རང་ཉིད་ཐ་མལ་སྤྱི་བོར་པདྨ་དཀར། །འདབ་རྒྱས་དེ་སྟེང་ཟླ་དཀྱིལ་དྲི་མེད་དབུས། །རྒྱལ་ཀུན་ཕྲིན་ལས་བདག་པོ་ཀརྨ་ཀ། རྗེ་བཙུན་བདུད་ཚོགས་འདུལ་བའི་རྡོ་རྗེ་མཆོག །སྐུ་མདོག་དཀར་གསལ་མཚན་དཔེའི་རྒྱན་རྣམས་རྫོགས། །ཞྭ་ནག་གསེར་མདངས་རིན་ཆེན་རྒྱན་སྤྲས་གསོལ། །སྤྱན་གཉིས་དོན་དམ་ཆོས་ཉིད་དབྱིངས་སུ་གཟིགས། །ཆོས་གོས་རྣམ་གསུམ་ན་བཟས་ཀུན་ཏུ་བཀླུབས། །ཕྱག་གཡས་མཆོག་སྦྱིན་གཡོན་པས་པད་དཀར་འཛིན། །ཞབས་གཉིས་རྡོ་རྗེ་སྐྱིལ་མོ་ཀྲུང་གིས་བཞུགས། །ཡེ་ཤེས་ལྔ་ལྡན་འཇའ་འོད་གཏིབས་པའི་ཀློང་། །གསལ་སྟོང་སྒྲིབ་མེད་སྐུ་རུ་གསལ་བར་གྱུར། །སྟེང་འོག་བར་མཚམས་འཇའ་འོད་ཐིག་ལེའི་ཀློང་། །བཀའ་བརྒྱུད་རིག་འཛིན་གྲུབ་ཐོབ་རྒྱ་མཚོ་དང་། །རྒྱུད་སྡེ་རབ་འབྱམས་ཡི་དམ་ཞི་ཁྲོའི་ཚོགས། །ཆོས་ཀྱི་སྲུང་མ་མ་མགོན་ལྕམ་དྲལ་དང་། །དམ་ཅན་གཏུམ་རྔམ་དྲག་ཤུལ་ལྡན་པའི་ཚོགས། །སྣ་ཚོགས་སྐུ་དང་ཆ་ལུགས་ཅིར་ཡང་སྒྱུར། །མེ་རླུང་འཚུབས་མའི་ནང་དུ་མངོན་སུམ་གསལ། །དེ་ལྟར་སྐྱབས་ཡུལ་དཀོན་མཆོག་རྩ་གསུམ་ལ། །བདག་སོགས་སེམས་ཅན་རྣམས་ཀྱི་ལུས་རྡུལ་སྙེད། །གྲངས་མེད་དུ་མར་སྤྲུལ་ཏེ་རྩེ་གཅིག་པའི། །སྒོ་གསུམ་དང་བའི་ཡིད་ཀྱིས་ཕྱག་འཚལ་ཞིང་། །ཀུན་ཏུ་བཟང་པོའི་མཆོད་པའི་སྤྲིན་གྱིས་

[Full Size]

མཆོད། །མི་དགེ་ནོངས་པའི་ལས་གྱུར་མཐོལ་ལོ་བཤགས། །གཞན་ཕན་བྱང་ཆུབ་སྤྱོད་ལ་རྗེས་ཡི་རངས། །ཆོས་འཁོར་རྒྱུན་ཆད་མེད་པར་བསྐོར་བར་བསྐུལ། །དད་དང་མོས་པའི་བློ་ཡིས་གསོལ་བ་འདེབས། །དུས་གསུམ་བསགས་དགེ་མྱང་འདས་རྒྱུ་རུ་བསྔོ། །ཞེན་ལོག་ངེས་འབྱུང་དྲག་པོས་རྒྱུད་བརླན་ཅིང་། །གདོད་ནས་དོན་དམ་ལྷན་སྐྱེས་ཡེ་ཤེས་ཀྱི། །འོད་ཟེར་སྣང་བས་མ་རིག་སྒྲིབ་པའི་ཚོགས། །མུན་པའི་དྲ་བ་རྩད་ནས་གཞིལ་བ་དང་། །སེམས་ཉིད་ཆོས་སྐུའི་ངོ་བོ་གནད་མཐོང་ཞིང་། །སྐུ་བཞིའི་ངོ་བོ་མངོན་དུ་གྱུར་ནུས་པའི། །སྐྱབས་ཡུལ་དམ་པས་མྱུར་བར་བྱིན་རློབས་ཤིག །ཀརྨ་པ་མཁྱེན་ནོ། །ཅི་ནུས་བརྗོད་མཐར། འཕགས་པ་སྙིང་རྗེའི་རང་གཟུགས། །རྒྱལ་མཆོག་ཕྱག་ན་པདྨོ། །སྤྱན་རས་གཟིགས་དངོས་དམ་པ། །གྲུ་འཛིན་ཕྲེང་བ་རིམ་བྱོན། །བཅུ་གསུམ་བདུད་འདུལ་རྡོ་རྗེ། །ཐུགས་བསྐྱེད་གཏིང་མཐའ་ཡས་པས། །བསྐལ་པར་མཆོག་གི་སྤྲུལ་སྐུ། །རྒྱུན་མི་ཆད་པར་སྟོན་པའི། །འགྲོ་དྲུག་སྐྱབས་གནས་གཅིག་པུ། །རྗེ་བཙུན་ཁྱེད་རང་མཁྱེན་ནོ། །བདག་དང་བདག་འདྲའི་སེམས་ཅན། །ཉོན་མོངས་འཁོར་བའི་འདམ་ལས། །མྱུར་དུ་སྒྲོལ་བར་བྱིན་རློབས། །སྟན་ཐོག་འདི་རུ་བྱིན་རློབས། །བརྩེ་བ་ཆེན་པོས་བྱིན་རློབས། །ཡེ་ཤེས་འཕོ་བར་བྱིན་རློབས། །མཐར་ནི་སྐྱབས་ཡུལ་ཐམས་ཅད་འོད་ཞུ་ནས། །རྩ་བའི་བླ་མའི་སྐུར་ཐིམ་དེ་ཉིད་ཀྱི། །སྐུ་ལས་འོད་ཟེར་དཀར་དམར་སྔོ་སེར་

[Full Size]

ལྗང་། །འཕྲོས་ཏེ་རང་ལུས་ལ་ཐིམ་སླར་ཡང་ནི། །དགྱེས་པ་དང་བཅས་འོད་དུ་ལྟེམ་གྱིས་ཞུ། །དབྱེར་མེད་གཅིག་འདྲེས་ཆུ་ལ་ཆུ་བཞག་ལྟར། །དུས་གསུམ་རྟོག་པ་མ་ལུས་རྒྱུན་བཅད་ནས། །མ་བཅོས་སོ་མའི་ངང་དུ་མཉམ་པར་བཞག །དགེ་འདི་བདག་གཞན་སེམས་ཅན་ཀུན། །སྤྱན་རས་གཟིགས་དབང་སྐུ་ཐོབ་ནས། །རིགས་དྲུག་འཁོར་བ་དོང་སྤྲུག་གི། །ཕྲིན་ལས་ཚད་མེད་འགྲུབ་གྱུར་ཅིག །ཅེས་པའང་དད་གསུམ་མངོན་མཐོ་རྗེ་སྟོད་མཛོད་པ་ཤཱཀྱ་དར་རྒྱས་ཀྱིས་བསྐུལ་བཞིན་ཀརྨའི་གདན་སར་ས་ཟླའི་དུས་ཆེན་ལ་སི་ཏུ་པདྨ་ཉིན་བྱེད་དབང་པོས་སྤེལ་བ་ཛ་ཡ།། །།

བླ་མའི་རྣལ་འབྱོར་སངས་རྒྱས་ལག་གཏད་ཡེ་ཤེས་རང་འབར།

[Full Size]

བླ་མའི་རྣལ་འབྱོར་སངས་རྒྱས་ལག་གཏད་ཡེ་ཤེས་རང་འབར་བཞུགས། ༀ་མ་ཧཱ་ཤཱུ་ཎྱ་ཏ་སོགས་ཀྱིས་སྟོང་པར་སྦྱངས། སྤྱི་བོར་པད་དཀར་འདབ་སྟོང་དྲི་མེད་སྟེང་། །ཆུ་ཤེལ་དབང་པོ་ཆ་ཤས་ཡོངས་རྫོགས་དབུས། །དུས་གསུམ་རྒྱལ་བའི་སྤྱི་དཔལ་འཁོར་ལོའི་མགོན། །འཕགས་པའི་སར་གནས་བྱང་ཆུབ་སེམས་དཔའ་མཆོག །རྗེ་བཙུན་བདུད་འདུལ་རྡོ་རྗེ་ཞལ་གཅིག་པ། །ཕྱག་གཉིས་ས་གནོན་མཉམ་བཞག་ཚེ་བུམ་བསྣམས། །ཆོས་གོས་རྣམ་གསུམ་ཟབ་བེར་ཟླུམ་གསོལ་ཞིང་། །དབུ་ལ་མཐོང་གྲོལ་ཞྭ་ནག་གསེར་མདངས་མཛེས། །སྤྱན་གཉིས་ཆོས་ཉིད་དོན་དམ་དབྱིངས་ལ་གཟིགས། །ཞབས་གཉིས་རྡོ་རྗེ་སྐྱིལ་ཀྲུང་གཡོ་མེད་ངང་། །འོད་དང་འོད་ཟེར་ཟེར་ཐག་ཀུན་ཏུ་འཕྲོ། །བཀའ་བརྒྱུད་གྲུབ་ཐོབ་རྒྱ་མཚོ་སྤྲིན་ལྟར་གཏིབས། །ཡི་དམ་དཔའ་བོ་ཌཱ་ཀི་ཆོས་སྲུང་མ། །ཆར་ལྟར་བབ་ཅིང་དངོས་གྲུབ་

[Full Size]

བྱིན་ཆེན་འབེབས། །མོས་གུས་གསོལ་བཏབ་ཙམ་གྱིས་སྣང་སྲིད་ཞིང་། །དག་པ་བླ་མའི་དཀྱིལ་འཁོར་བསྒྱུར་ནུས་པའི། །གདུང་ཤུགས་དྲག་པོའི་དབྱངས་ཀྱིས་བསྐུལ་ལགས་ན། །ཐུགས་རྗེ་ཅན་གྱི་བཀའ་བརྒྱུད་བླ་མ་རྣམས། །བདག་རྒྱུད་ཡེ་ཤེས་བདེ་ཆེན་རང་འབར་ནས། །གཟུང་འཛིན་འཆིང་བ་མ་ལུས་དབྱིངས་སུ་དག །སྟན་ཐོག་འདི་རུ་མཆོག་དངོས་ཐོབ་ནུས་པའི། །མི་འགྱུར་དོན་གྱི་བྱིན་རླབས་འཕོ་དབང་སྩོལ། །ཅེས་བསྐྱེད་དང་འབེབས་པའི་དམིགས་པ་དང་། དེ་ནས། བླ་མ་ལ་གསོལ་བ་འདེབས་སོ། །བཀའ་བརྒྱུད་ཀུན་འདུས་ངོ་བོ་ལ་གསོལ་བ་འདེབས་སོ། །རྒྱལ་དབང་ཀརྨ་པ་ལ་གསོལ་བ་འདེབས་སོ། །བཅུ་གསུམ་བདུད་འདུལ་རྡོ་རྗེ་ལ་གསོལ་བ་འདེབས་སོ། །རབ་འབྱམས་ཞིང་ཀུན་སྐུ་ཡིས་ཁྱབ་པ་ལ་གསོལ་བ་འདེབས་སོ། །སྐུ་དང་ཞིང་ཁམས་ཐ་མི་དད་པ་ལ་གསོལ་བ་འདེབས་སོ། །ཆོས་དབྱིངས་ཡེ་ཤེས་ངང་ནས་ཐུགས་རྗེས་གཟིགས་ཤིག །བདག་སོགས་སེམས་ཅན་ངན་སོང་གཡང་ལས་སྒྲོལ་ཅིག །མི་རྟག་སྐྱོ་ཤས་ངེས་འབྱུང་རྒྱུད་ལ་སྐྱེ་བར་གྱུར་ཅིག །སྐྱེས་ནས་དམ་པའི་ཆོས་ཀྱི་སྐལ་བ་དང་ལྡན་པར་གྱུར་ཅིག །ཉམས་ལེན་ཚེ་གཅིག་རྡོ་རྗེ་འཆང་ཆེན་འགྲུབ་པར་གྱུར་ཅིག །ཀརྨ་པ་མཁྱེན་ནོ། །ཅི་ནུས་བགྲང་མཐར། ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས། །སྤྲུལ་སྐུ་པད་འབྱུང་སྐུ་གསུམ་འདུས་པའི་དཔལ། །བྱམས་མགོན་སེང་གེ་ལ་སོགས་བསྐལ་བཟང་གི། །འདྲེན་པ་རྣམས་ཀྱི་

[Full Size]

ཐུགས་རྗེའི་ནུས་མཐུ་རྩལ། །ཀུན་འདུས་སངས་རྒྱས་ཕྲིན་ལས་རོལ་པ་འཆང་། །གང་དེར་སྙིང་ནས་གསོལ་འདེབས་བདག་རྒྱུད་ཀྱི། །མ་རིག་དབང་གྱུར་དུག་ལྔའི་སྡིག་སྒྲིབ་ཚོགས། །སྡོམ་གསུམ་འགལ་བའི་ལས་བགྱིས་མཐོལ་ལོ་བཤགས། །ཕྱིན་ཆད་ཀུན་རྟོག་རྐྱེན་གྱིས་མི་ལྡང་བར། །བྱིན་གྱིས་རློབས་ཤིག་བདེ་ཆེན་འཁོར་ལོའི་མགོན། །ངན་སོང་རིགས་དྲུག་སྐྱེ་སྒོ་བཅད་དུ་བསོལ། །རྣམ་དག་བདེ་བ་ཅན་དུ་ལམ་སྣ་དྲོངས། །གདོད་མའི་གནས་ལུགས་མངོན་གྱུར་བྱིན་གྱིས་རློབས། །དཔལ་ལྡན་བླ་མའི་གནས་བཞིར་རྡོ་རྗེ་བཞིའི། །ངོ་བོ་སྣ་ཚོགས་འོད་འཕྲོས་རང་གནས་བཞིར། །ཐིམ་པས་དབང་བཞི་ཐོབ་ཅིང་སྒྲིབ་བཞི་དག །སྐུ་བཞི་ཐོབ་ཅིང་དགྱེས་པའི་འཛུམ་ཞལ་གྱི། །བྱང་ཆུབ་བར་དུ་འདུ་འབྲལ་མེད་པ་ཡི། །དབུགས་དབྱུང་རྡོ་རྗེའི་གསུང་གི་གནང་བ་བཅས། །འོད་དཀར་ལྟེམས་ཀྱིས་ཞུ་ནས་རང་ལུས་ཐིམ། །བདེ་གསལ་མི་རྟོག་རང་བྱུང་རིག་པའི་མདངས། །བྱར་མེད་བློ་འདས་བདེ་བ་ཆེན་པོའི་ངང་། །ཞེས་མཉམ་བཞག་དང་བཅས་ཉམས་ལེན་ངང་ལ་དར་ཅིག་བཞག །མཐར། དགེ་འདིའི་འགྲོ་བ་མ་ལུས་རྡོ་རྗེ་སེམས། །སོགས་ཤླཽ་ཀ་གཅིག་གིས་བསྔོ་བ་དང་། ཟབ་ལམ་རྣལ་འབྱོར་སྒྲུབ་པའི་དགེ་ཚོགས་མཐུས། །སྟན་ཐོག་འདི་རུ་བདེ་ལྡན་ཞིང་བགྲོད་ཅིང་། །མཁའ་མཉམ་མ་གྱུར་ཀུན་ཀྱང་སྲིད་ཞི་ལ། །མི་གནས་བྱང་ཆེན་འདྲེན་པའི་དཔལ་གྱུར་ཅིག །ཅེས་པའི་སྨོན་ལམ་མདོར་བསྡུས་དང་། །གཞན་ཡང་སྨོན་ལམ་གང་ཤེས་བྱའོ། །དེ་ལྟར་ཁང་གསར་ཀརྨ་འཆི་མེད་རྒྱ་མཚོ་ནས་

[Full Size]

ཁོ་བོའི་རྣལ་འབྱོར་ཞིག་ནན་གྱིས་བསྐུལ་ཡང་། རང་གིས་གཞིགས་འབྲེལ་གྱིས་རྒྱལ་མཆོག་བཅུ་གསུམ་པ་ཞལ་མཐོང་གསུང་གི་བདུད་རྩི་ཐོབ་པའི་སངས་རྒྱས་དངོས་སྣང་རྒྱལ་བའི་ལུང་ཟིན་ཉིད་དུ་ཚད་མར་གྲུབ་པ་མཆོག་དེའི་རྣལ་འབྱོར་བྱིན་རླབས་ཀྱི་དགོས་ཁྱད་ཆེ་བའི་ཆེད་དུ་བྱས་ཏེ། དགེ་བས་བདག་གཞན་འགྲོ་རྣམས་མགོན་དེའི་ཐུགས་རྗེས་སྐྱོང་བར་གྱུར་ཅིག། །།ༀ་ཨཱཿཧཱུྃ། རང་སྣང་རྣམ་དག་གཞལ་ཡས་ཁང་གི་དབུས། །རང་སེམས་བདེ་གཤེགས་སྙིང་བོའི་སྣང་བའི་ཆ། །ཡི་དམ་གདན་གསུམ་ཚང་བའི་སྐུར་གསལ་བའི། །མདུན་མཁར་འཇའ་འོད་ཟེར་ཀློང་སེང་ཁྲི་དང་། །པད་དཀར་ཟླ་སྟེང་རྩ་བའི་བླ་མ་མཆོག །སྤྱན་རས་གཟིགས་དངོས་རྗེ་བཙུན་ཀརྨ་པ། །བདུད་འདུལ་རྡོ་རྗེ་ཞྭ་ནག་གསེར་མདངས་ཅན། །བགྲེས་ཚུལ་རབ་བྱུང་ཆ་ལུགས་ཕྱག་ས་གནོན། །མཉམ་བཞག་ཚེ་ཡི་བུམ་འཛིན་ཞབས་རྡོར་སྐྱིལ། །ཟླ་བའི་རྒྱབ་ཡོལ་དང་བཅས་ལྷམ་མེར་ཞུགས། །གཞན་ཡང་རྩ་བར་བརྒྱུད་པའི་བླ་མ་དང་། །ཡི་དམ་ཌཱ་ཀི་ཆོས་སྐྱོང་སྤྲིན་ལྟར་གཏིབས། །དྲན་ཙམ་བདེ་ཆེན་ཡེ་ཤེས་ཕྱག་རྒྱ་ཆེའི། །ཉམས་རྟོགས་ཡོན་ཏན་རྒྱུད་ལ་བསྐྱེད་ནུས་གསལ། །ཀྱེ་ཧོཿརབ་འབྱམས་རྒྱལ་བ་ཀུན་འདུས་རྡོ་རྗེ་འཆང་། །ལུང་རྟོགས་དམ་ཆོས་རྒྱ་མཚོའི་འབྱུང་གནས་ཆེ། །ཚོགས་མཆོག་དགེ་འདུན་ཀུན་གཙོ་རིགས་དཀྱིལ་བདག །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཞེས་དང་། ༀ་ཨཱཿམཱ་ར་ད་མ་ཀ་བཛྲ་ཧཱུྃ།

[Full Size]

ཅེས་པའི་སྔགས་ཀྱང་བཟླས་མཐར། དཔལ་ལྡན་བླ་མ་རྡོ་རྗེ་ཅན། །སྲིད་པའི་འཇིགས་ལས་སྒྲོལ་བ་པོས། །སྐུ་གསུང་ཐུགས་དང་ཡེ་ཤེས་ཀྱི། །དབང་བཞི་བསྐུར་བར་མཛད་དུ་གསོལ། །ཞེས་གསོལ་བཏབ་པས་བླ་མ་ཡི། །རྡོ་རྗེ་བཞིི་ཡི་ས་བོན་འོད། །གནས་བཞིར་ཐིམ་པས་དབང་བཞི་ཐོབ། །བླ་མ་འོད་ཞུ་རང་ལ་ཐིམ། །རང་སེམས་མ་བཅོས་སོ་མའི་ངང་། །ཡེངས་མེད་དེ་ཡི་ངོ་བོ་སྐྱོང་། །བླ་མ་ཆོས་སྐུའི་རང་ཞལ་མཇལ། །ལྷུན་གྲུབ་གདོད་མའི་གནས་ཐོབ་གྱུར། །དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་སོགས་བརྗོད། ཅེས་ཁྲ་འགུ་དགོན་བློ་གྲོས་ཉི་མའི་སྤྲུལ་སྐུའི་བཞེད་ངོར་དགེ། །།

བླ་མའི་རྣལ་འབྱོར་ཚན་ཆུང་ཁ་ཤས་བཞུགས།

[Full Size]

མདུན་མཁར་པད་དཀར་ཟླ་སྟེང་ཀརྨ་པ། །ཞལ་གཅིག་ཕྱག་གཉིས་ཞི་འཛུམ་མཚན་དཔེ་རྫོགས། །ཕྱག་གཉིས་ས་གནོན་མཉམ་བཞག་ཞབས་རྡོར་སྐྱིལ། །སྣང་བཞིན་གསལ་སྟོང་ལྷུན་གྲུབ་སྐུ་རུ་བསྐྱེད། །སྐྱབས་གནས་ཀུན་འདུས་བདུད་འདུལ་རྡོ་རྗེ་མཁྱེན། །གནས་གསུམ་འབྲུ་གསུམ་འོད་འཕྲོས་རང་ལ་ཐིམ། །དབང་བཞི་མཆོག་ཐོབ་སྐུ་བཞི་མངོན་གྲུབ་ཤོག །ཅེས་ཀརྨ་བཀྲ་ཤིས་ངོར་སྤེལ།། །།རང་ཉིད་ལྷར་གསལ་སྤྱི་བོར་པད་ཟླའི་སྟེང་། །བཀའ་བརྒྱུད་རྒྱ་མཚོ་ཡི་དམ་ལྷ་རབ་འབྱམས། །ཆོས་སྐྱོང་ཀུན་འདུས་ངོ་བོ་རྡོ་རྗེ་བེར། །དབྱེར་མེད་དྷརྨཱ་ཀ་ར་ཐམས་ཅད་མཁྱེན། །ཞལ་གཅིག་ཕྱག་གཉིས་ཆོས་འཆད་ཞབས་སྐྱིལ་ཀྲུང། །ཆོས་གོས་རྣམ་གསུམ་དབུ་ལ་མཐོང་

[Full Size]

གྲོལ་གསོལ། །རབ་གསལ་སྟོན་ཟླའི་སྟེང་དུ་ལྷམ་མེར་གསལ། །སྐྱབས་གསུམ་སྤྱི་མེས་ཉིད་དུ་ངེས་བྱས་ནས། །ཕྱག་འཚལ་མཆོད་བཤགས་ཡི་རངས་བསྐུལ་གསོལ་འདེབས། །དགེ་ཀུན་འགྲོ་རྣམས་བྱང་ཆུབ་ཐོབ་ཕྱིར་བསྔོ། །དེང་བཟུང་བླ་མེད་བྱང་ཆུབ་སྙིང་པོའི་བར། །བདེ་ཆེན་འཁོར་ལོར་འདུ་འབྲལ་མེད་པ་རུ། །བསྙེན་པའི་གསོལ་འདེབས་བདག་རྒྱུད་སྨིན་གྲོལ་གྱི། །ཡེ་ཤེས་མཆོག་གི་ལམ་ཟབ་དབང་མཆོག་སྩོལ། །ༀ་ཨཱཿདྷརྨཱ་ཀ་ར་ཧཱུྃ། ཅེས་པའང་ཅི་ནུས་བཟླས་མཐར་བྱིན་རླབས་བསྡུ་བ། བཟོད་པར་གསོལ་བ། དུག་གསུམ་སྒྲིབ་པས་འཐུམས་པ་ཡི། །བསླབ་པ་གསུམ་དང་འགལ་བ་རྣམས། །མི་འཆབ་མི་སྦེད་མཐོལ་ཞིང་བཤགས། །སླན་ཆད་མི་བགྱིད་དམ་བཅའ་བཟུང་། །དག་ཚངས་སྒྲིབ་པར་མི་འགྱུར་བའི། །མགོན་པོས་དབུགས་དབྱུང་སྩལ་དུ་གསོལ། །བླ་མ་དགྱེས་བཅས་འོད་ཞུ་ནས། །རང་ཐིམ་སྒོ་གསུམ་དྲི་མ་དག །སྐུ་གསུམ་འབྲས་བུ་མངོན་གྱུར་ཏེ། །དབྱེར་མེད་ངང་དུ་མཉམ་པར་བཞག །མཐར་བསྔོ་སྨོན་བྱ། ཞེས་པའང་གནས་མདོ་ཆོས་རྒྱལ་གྱིས་བསྐུལ་ངོར། སི་ཏུ་པས་སྤེལ་བ་བཀྲ་ཤིས་ཀྱི་སྣང་བས་ཁྱབ་པར་གྱུར་ཅིག། །།རང་གི་སྦྱི་བོར་ཟླ་བའི་སྟེང་། །སྐྱབས་གནས་ཀུན་འདུས་པདྨ་འབྱུང་། །ངོ་བོ་ཡེ་ནས་གྲུབ་པ་ལ། །རྣམ་པ་པདྨའི་མཚན་འཆང་བ། །བཀྲ་གསལ་ལམ་མེར་རབ་བྱུང་ཆས། །ཟག་མེད་བདེ་སྟོང་དབྱེར་མེད་པའི། །རྡོར་དྲིལ་བསྣོལ་འཛིན་འོད་ཀློང་དུ། །རྩ་གསུམ་

[Full Size]

དཀྱིལ་འཁོར་ཡོངས་འདུས་ཤར། །བཛྲ་གུ་རུ་བཟླ། རྗེ་བཙུན་པདྨའི་རྣམ་རོལ། །གང་ཤར་རང་བྱུང་ཉིད་གྲུབ། །གསོལ་འདེབས་བདག་རྒྱུད་བྱིན་རློབས། །གནས་སྐབས་མཐར་ཐུག་ཉེས་ཚོགས། །བར་ཆད་སེལ་ཞིང་སེམས་ཉིད། །ཀ་དག་གདོད་མའི་ངོ་བོ། །རང་ཞལ་མཐོང་བར་བྱིན་རློབས། །གང་ཁྱོད་བསྟན་འགྲོའི་དཔལ་དུ། །འཚོ་བརྟན་མི་འགྱུར་རྡོ་རྗེའི། །རང་བཞིན་གཞུགས་གསོལ་བྱིན་རློབས། །བླ་མའི་སྐུ་ལས་འོད་འཕྲོས་པས། །གནས་བཞིར་ཐིམ་པས་དབང་བཞི་ཐོབ། །རྒྱུད་བཞི་སྨིན་ཅིང་སྐུ་བཞི་འགྲུབ། །དབྱེར་མེད་རྡོ་རྗེ་འཆང་ཐོབ་ཤོག །ཅེས་པའང་བསླབ་གསུམ་ལྡན་བ་གྲུབ་དབང་བླ་མ་པདྨ་དབང་དྲག་གིས་བཞེད་ངོར་སི་ཏུ་པདྨའི་མིང་ཅན་གྱི་སྤེལ་བ་དགེའོ།། །།ༀ་ཨཱཿཧཱུྃ། རང་སྣང་རྣམ་དག་གཞལ་ཡས་ཁང་གི་དབུས། །རང་སེམས་བདེ་གཤེགས་སྙིང་པོའི་སྣང་བའི་ཆ། །ཡི་དམ་གདན་གསུམ་ཚང་བའི་སྐུར་གསལ་བའི། །སྤྱི་བོར་སེང་ཁྲི་པདྨ་ཉི་ཟླའི་སྟེང་། །རྩ་བའི་བླ་མ་དྲན་ཆོག་འཁོར་ལོའི་མགོན། །སྣང་སྲིད་ཟིལ་ནོན་པདྨ་རྒྱལ་པོའི་ཚུལ། །མཚན་དཔེའི་གཟི་འབར་རྒྱན་དང་ཆ་ལུགས་རྫོགས། །དྲན་ཙམ་བདེ་ཆེན་ཡེ་ཤེས་རྫོགས་པ་ཆེའི། །ཉམས་རྟོགས་ཡོན་ཏན་རྒྱུད་ལ་བསྐྱེད་ནུས་གསལ། །ཀྱེ་ཧོཿརབ་འབྱམས་རྒྱལ་བ་ཀུན་འདུས་རྡོ་རྗེ་འཆང་། །ལུང་རྟོགས་དམ་ཆོས་རྒྱ་མཚོའི་འབྱུང་གནས་ཆེ། །ཚོགས་མཆོག་དགེ་འདུན་ཀུན་གཙོ་རིགས་དཀྱིལ་བདག །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཅེས་དང།

[Full Size]

ༀ་ཨཱཿཔདྨ་དེ་ཝེནྡྲ་སརྦ་སིདྡྷི་ཕ་ལ་ཧཱུྃ། ཅེས་པའི་སྔགས་ཀྱང་བཟླས་མཐར། དཔལ་ལྡན་བླ་མ་རྡོ་རྗེ་ཅན། །སྲིད་པའི་འཇིགས་ལས་སྒྲོལ་པ་པོས། །སྐུ་གསུང་ཐུགས་དང་ཡེ་ཤེས་ཀྱི། །དབང་བཞི་བསྐུར་བར་མཛད་དུ་གསོལ། །ཞེས་གསོལ་བཏབ་པས་བླ་མ་ཡི། །རྡོ་རྗེ་བཞི་ཡི་ས་བོན་འོད། །གནས་བཞིར་ཐིམ་པས་དབང་བཞི་ཐོབ། །བླ་མ་འོད་ཞུ་རང་ལ་ཐིམ། །རང་སེམས་བླ་མའི་ངོ་བོར་ཤར། །བཅོས་མའི་མོས་གུས་མ་ཡིན་པར། །བླ་མ་ཆོས་སྐུའི་རང་ཞལ་མཇལ། །ལྷུན་གྲུབ་གདོད་མའི་གནས་ཐོབ་གྱུར། །དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་སོགས་བརྗོད། ཅེས་དད་གསུམ་མངོན་མཐོ་བླ་མ་སྐུ་དགའི་བཞེད་ངོར་སི་ཏུ་པདྨའི་མིང་ཅན་གྱིས་སྤེལ་བ་དགེ། །།རང་ལུས་སྣང་སྟོང་ལྷར་གསལ་སྤྱི་བོ་རུ། །རིགས་ཀྱི་བདག་པོ་ཐེག་མཆོག་རྡོ་རྗེ་དང་། །པདྨ་ཉིན་བྱེད་གཙུག་ལག་ཆོས་ཀྱི་རྒྱལ། །རྡོ་རྗེ་དྲག་པོའི་སྒྱུ་འཕྲུལ་རྣམ་པར་རོལ། །བླ་མེད་བླ་མ་རྡོ་རྗེ་ཅན་རྣམས་གསལ། །དེ་ལ་གསོལ་བཏབ་མོས་གུས་བྱས་པའི་མཐུས། །སྐུ་གསུང་ཐུགས་དང་ཡེ་ཤེས་རྡོ་རྗེ་ཡིས། །བྱིན་རླབས་དབང་བསྐུར་བདུད་རྩིས་རྒྱུད་སྨིན་ནས། །སྐུ་བཞི་མངོན་འགྱུར་མཆོག་ཐུན་དངོས་གྲུབ་སྩོལ། །བླ་མ་འོད་ཞུ་རང་ཐིམ་དབྱེར་མེད་གྱུར། །བློ་འདས་ཕྱག་རྒྱ་ཆེན་པོའི་ངང་དུ་བཞག །དགེ་བས་བདག་གཞན་བྱང་ཆུབ་ཆེ་ཐོབ་ཤོག །ཅེས་གླིང་ཐོག་ཀརྨ་དངོས་གྲུབ་ངོར་སྤེལ།། །།ཧྲཱིཿཿ

[Full Size]

རང་སྣང་རྣམ་དག་རྒྱལ་བའི་དཀྱིལ་འཁོར་དུ། །རང་ལུས་དག་པ་ལྷ་ཡི་སྐུར་གསལ་བའི། །སྤྱི་བོར་སེང་ཁྲི་པདྨ་ཉི་ཟླའི་སྟེང་། །རྒྱལ་ཀུན་འདུས་གཟུགས་པདྨ་འབྱུང་གནས་དང་། །དབྱེར་མེད་དྲིན་ཆེན་ཨདྒ་ཀཱ་རའི་ཞབས། །གསུམ་ལྡན་རྡོ་རྗེ་འཛིན་པའི་ཆ་ལུགས་སུ། །བག་བྲོ་བརྗིད་ཆགས་དྲན་པས་བདེ་ཆེན་གྱི། །ཡེ་ཤེས་རྩོལ་མེད་རྒྱུད་ལ་བསྐྱེད་ནུས་གྱུར། །བླ་མ་རིན་པོ་ཆེ་ལ་གསོལ་བ་འདེབས། །བདག་འཛིན་བློ་ཡིས་ཐོང་པར་བྱིན་གྱིས་རློབས། །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །འཁྲུལ་པ་རང་སར་དག་པར་བྱིན་གྱིས་རློབས། །སྣང་སྲིད་ཆོས་སྐུར་འཆར་བར་བྱིན་གྱིས་རློབས། །ཅེས་དང་། མ་ནམ་འཁའ་དང་མཉམ་པའི་སོགས་གྲངས་མང་བརྗོད་ཅིང་། གསོལ་འདེབས་སྙིང་པོ་བཛྲ་གུ་རུ་བཟླ། མཐར་ནི་བླ་མའི་སྐུ་ཡི་གནས་བཞི་ནས། །འོད་འཕྲོས་གནས་བཞིར་ཐིམ་པས་སྒྲིབ་བཞི་དག །དབང་བཞི་ཐོབ་ཅིང་སྐུ་བཞིའི་གོ་འཕང་འགྲུབ། །བླ་མ་འོད་ཞུ་རང་དང་དབྱེར་མེད་འདྲེས། །རང་སེམས་སྐྱེ་འགགས་གནས་དང་བྲལ་བའི་ངང་། བརྗོད་བྲལ་ལྷན་སྐྱེས་བདེ་སྟོང་ཟུང་འཇུག་པ། །བསམ་འདས་བླ་མ་ཆོས་སྐུའི་ཀློང་ཡངས་སུ། །བདག་དང་འབྲེལ་ཀུན་མངོན་པར་སངས་རྒྱས་ཤོག །ཅེས་ཀརྨ་བསོད་ནམས་ཀྱི་བཞེད་སྐོང་དུ་སི་ཏུས་སྤེལ།། །།བསྐལ་བཟང་འདྲེན་པ་སྟོང་རྩ་འབྱོན་པ་ལས། །བཞི་པ་བཅོམ་ལྡན་ཤཱཀྱ་ཐུབ་པ་ཡི། །རྒྱལ་བསྟན་བྱང་ཕྱོགས་ལྗོངས་འདིར་སྤེལ་བའི་ཕྱིར། །འགྲོ་མགོན་བླ་མ་རྡོ་རྗེ་རྒྱལ་པོ་ཞེས། །དོན་

[Full Size]

དམ་བདེ་ཆེན་འཁོར་ལོ་སྡོམ་པའི་དཔལ། །སྟོང་ཉིད་ཤེས་རབ་ཡུམ་དང་མཉམ་པར་སྦྱོར། །བདེ་དང་སྟོང་པའི་ཡེ་ཤེས་གཟི་འོད་འབར། །སྐད་ཅིག་དྲན་པས་ལྷན་སྐྱེས་ཕྱག་རྒྱ་ཆེ། །མངོན་སུམ་རྒྱུད་ལ་སྐྱེད་ནུས་རྡོ་རྗེའི་སྐུ། །སྙིང་དབུས་ལྔ་ལྡན་འོད་ཀློང་གསལ་བར་གྱུར། །དཔལ་ལྡན་ཕག་མོ་གྲུ་ཡི་ནགས་ཁྲོད་ན། །སྐལ་ལྡན་གདུལ་བྱ་མང་པ་ོསྨིན་མཛད་ཅིང་། བསམ་གྱིས་མི་ཁྱབ་ཆོ་འཕྲུལ་སྣ་ཚོགས་སྟོན། །འགྲོ་མགོན་རིན་པོ་ཆེ་ལ་གསོལ་བ་འདེབས། །བླ་མ་རིན་པོ་ཆེ་ལ་གསོལ་བ་འདེབས། །བདག་འཛིན་བློ་ཡིས་ཐོངས་པར་བྱིན་གྱིས་རློབས། །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །ཆོས་མིན་རྣམ་རྟོག་འགགས་པར་བྱིན་གྱིས་རློབས། །རང་སེམས་སྐྱེ་མེད་རྟོགས་པར་བྱིན་གྱིས་རློབས། །འཁྲུལ་པ་རང་སར་ཞི་བར་བྱིན་གྱིས་རློབས། །སྣང་སྲིད་ཆོས་སྐུར་རྟོགས་པར་བྱིན་གྱིས་རློབས། །ཚར་ཁ་ཤས་རྒྱང་འབོད་ཚུལ་དུ་བཏོན་ལ། བླ་མ་ཡབ་ཡུམ་རྗེས་སུ་ཆགས་པའི་མེས། །ལྟེམ་གྱིས་ཞུ་བ་རང་གི་རྩ་དང་རླུང་། །ཐིག་ལེ་དང་བཅས་རྣམ་པར་དག་པའི་ཁམས། །མི་ཕྱེད་རྡོ་རྗེ་གསུམ་དང་དབྱེར་མེད་གྱུར། །སྐྱེ་བ་འདི་ནས་རིགས་བདག་མི་འཆོལ་ཞིང་། །སོགས་བརྗོད། ཅེས་པའང་སྐལ་ལྡན་ཀརྨའི་མཚན་ཅན་བཞེད་སྐོང་ཆེད་དུ་སྤེལ་བ་དགེ། །།

བླ་མའི་རྣལ་འབྱོར་བདེ་ཆེན་ལམ་གྱི་སྣང་བྱེད་རབ་གསལ་སྐལ་ལྡན་བགྲོད་པའི་མྱུར་ལམ།

[Full Size]

༈ བླ་མའི་རྣལ་འབྱོར་བདེ་ཆེན་ལམ་གྱི་སྣང་བྱེད་རབ་གསལ་སྐལ་ལྡན་བགྲོད་པའི་མྱུར་ལམ་ཞེས་བྱ་བ་བཞུགས་སོ། །ན་མོ་གུ་རུ་པདྨཱ་ཀཱ་ར་ཡེ། །མཐའ་ཡས་ཡོན་ཏན་རིན་ཆེན་ཀུན་འབྱུང་གནས། །རྣམ་དག་རྒྱལ་བའི་དཀྱིལ་འཁོར་རྒྱ་མཚོ་ཆེར། །འཇུག་འདོད་དོན་གཉིས་སྙིང་པོའི་ནོར་བུ་མཆོག །སྐལ་ལྡན་བྱང་ཆུབ་གྲུ་རྫིང་འདིར་ཞུགས་ཀྱེ། །དེ་ཡང་དུས་གསུམ་སངས་རྒྱས་ཐམས་ཅད་ཀྱི་གསང་གསུམ་ཡེ་ཤེས་རོལ་པ་གཅིག་ཏུ་འདུས་པའི་དཔལ་ལྡན་བླ་མ་དམ་པ་རྣམས་ཀྱི་དྲང་དང་ངེས་པའི་ཆོས་ཚུལ་དུ་མས་འགྲོ་རྣམས་ཀུན་མཁྱེན་ཀྱི་གོ་འཕང་མངོན་དུ་སྟོན་པའི་དཀྱིལ་འཁོར་ཀུན་གྱི་གཙོ་མཆོག་དཔལ་ཧེ་རུ་ཀའི་སྐུར་བཞེངས་ནས་སྨིན་གྲོལ་གྱི་སར་བཀོད་པའི་གང་འདུལ་ཐབས་གྱིས་སྐྱོང་བའི། ཇི་ལྟར་ཆུ་ཀླུང་ཟླ་གཟུགས་བཞིན། །སྣ་ཚོགས་སྒྱུ་འཕྲུལ་གར་རྩེད་སྟོན། །ཅེས་པ་ལྟར་འདིར་ནི་བླ་མེད་ངེས་པའི་དོན་གྱི་ཡང་སྙིང་གཅིག་ཏུ་དྲིལ་བ་རྡོ་རྗེ་ཐེག་པའི་ཉེ་ལམ་ཟབ་མོ་མཆོག་གི་བླ་མའི་རྣལ་འབྱོར་ལ་འཇུག་པའི་མངོན་པར་རྟོགས་པ་ཐོ་ཙམ་བཀོད་པ་སྟེ། རབ་ཏུ་གོང་མ་དག་གི་བྱིན་གྱིས་བརླབས་པའི་སྒྲུབ་གནས་སམ། དབེན་ཞིང་ཉམས་དགའ་བྱིན་ཆགས་པའི་གནས་སུ་གཙང་སྦྲ་བྱི་དོར་ལེགས་པར་བྱས་ལ། དཀོན་མཆོག་གི་རྟེན་བཀྲམ་ལ་མཆོད་བའི་ཡོ་བྱད་སྣ་ཚོགས་པ་དང་། ཁྱད་པར་ཐབས་ཤེས་ཀྱི་རྫས་ནང་མཆོད་ལ་སོགས་པ་རྒྱ་ཆེར་བཤམས་ལ། གཞན་ཡང་བཀོད་པ་རབ་ཏུ་མཛེས་པས་བརྒྱན་པར་བྱ་བ་སོགས་མདོར་ན་ཚོགས་གཉིས་བསོད་ནམས་ཀྱི་ཞིང་དུ་མོས་པར་ཡོ་བྱད་ཀྱི་རྣམ་པ་དུ་ུམ་མདུན་དུ་བརྡལ་བར་བྱའོ། །དེ་ནས་ཐོག་མར་རང་ཉིད་ལྷ་ཡི་རྣལ་འབྱོར་དང་ལྡན་པས་བདུད་རྩི་བྱིན་གྱིས་བརླབ་བ་ནི། ༀ་ཨཱཿབིགྷྣཱན་སོགས་ཀྱིས་བསངས་། སྭ་བྷཱ་ཝས་སྦྱངས། སྟོང་པའི་ངང་ལས་ཡྃ་རྃ་ཀྃ་རྣམས་ལས་རླུང་མེ་ཐོད་སྒྱེད་ཀྱི་སྟེང་དུ་ཨཱཿལས་ཐོད་པ་དུམ་བུ་

[Full Size]

གཅིག་པ་རྒྱ་ཁྱོན་ཆོས་ཀྱི་དབྱིངས་དང་མཉམ་པ། དཔྲལ་བ་རང་ལ་བསྟན་པ་ཕྱི་དཀར་ལ་ནང་དམར་བ་དེའི་དབུས་སུ་མུ། ཤར་དུ་བི། ལྷོར་ར། ནུབ་ཏུ་ཤུ། བྱང་དུ་མ་སྟེ་བདུད་རྩི་ལྔ་དང་། སླར་ཡང་དབུས་སུ་ན། ཤར་ལྷོར་གོ། ལྷོ་ནུབ་ཏུ་ཀུ། ནུབ་བྱང་དུ་ད། བྱང་ཤར་དུ་ཧ་སྟེ་ཤ་ལྔ་པོ་སླར་ཡང་ཡིག་འབྲུ་དེ་དག་གིས་མཚན་པར་གྱུར་བ་དང་། རང་གི་སྣ་བུག་གཡོན་པ་ནས་ཧཱུྃ་གི་དབྱིབས་ཅན་གྱི་རླུང་གཡོས་པས་མེ་སྤར་ཐོད་པ་དྲོས། རྫས་རྣམས་ཁོལ། མ་དག་པའི་དྲི་མ་སྦྱངས། སྟེང་དུ་ༀ་དཀར་ཨཱཿདམར་ཧཱུྃ་སྔོན་ལས་འོད་ཟེར་འཕྲོས་པས་ཡེ་ཤེས་ཀྱི་བདུད་རྩི་སྤྱན་དྲངས་ནས་དམ་ཚིག་གི་བདུད་རྩི་དང་གཉིས་སུ་མེད་པར་འདྲེས། བདེ་བ་ཆེན་པོའི་རང་བཞི་ཅན་དུ་གྱུར། །ༀ་ཨཱཿཧཱུྃ། ལན་གསུམ་བརྗོད་པས་བདུད་རྩི་བྱིན་གྱིས་བརླབས། དེ་ནས་སྔོན་འགྲོ་གཏོར་མ་བྱིན་གྱིས་བརླབ་པ་ཡང་གོང་ལྟར་བྱ་ཞིང་། ༀ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཀྵ་ས་བྷཱུ་ཏ་པྲེ་ཏ་པི་ཤ་ཙ་ཨུནྨད་ཨ་པ་སྨ་ར་ཌཱ་ཀ་ཌཱ་ཀི་ནྱ་ད་ཡ། ཨི་དཾ་པ་ལིཾ་གྲྀ་ཧྣནྟུ་ས་མ་ཡ་རཀྵནྟུ་མ་མ་སརྦ་སིདྡྷིམྨེ་པྲ་ཡ་ཙྪནྟུ་ཡ་ཐཻ་བྃ་ཡ་ཐཻ་ཥྚཾ། བྷཱུཉྫ་ཐ་ཛི་གྷ་ཐ་པི་པ་ཐ་མ་ཏི་ཀྲ་མ་ཐ། མ་མ་སརྦ་ཀཱ་ར་ཏ་ཡ་སད་སུ་ཁཾ་བི་ཤུདྡྷ་ཡེ། སཱ་ཧཱ་ཡི་ཀཾ་བྷ་ཝནྟུ་ཧཱུྃ་ཧཱུྃ་ཕཊ་སྭཱ་ཧཱ། ལན་བཞིར་བརྗོད་ལ། ཧཱུྃ། གང་དག་བླ་མེད་དཀྱིལ་འཁོར་འདིར། །མངོན་པར་འདུད་པའི་ཞིང་སྐྱོང་བརྒྱད། །མཁའ་འགྲོ་སུམ་ཅུ་སོ་གཉིས་སོགས། །མ་ལུས་འཁོར་ཚོགས་ཇི་སྙེད་པ། །འདིར་བཤམས་མཆོད་རྫས་འདོད་ཡོན་རྣམས། །དགྱེས་

[Full Size]

དགུར་ཚིམ་པར་ལོངས་སྤྱོད་རོལ། །ཡང་དག་བྱང་ཆུབ་བསྒྲུབ་པ་ལ། །བར་ཆད་ནད་གདོན་ཞི་བར་མཛོད། །ཚེ་དཔལ་འབྱོར་པའི་དབང་དང་ལྡན། །བརྟན་གཡོའི་སྲིད་བཅུད་མ་ལུས་སྡུད། །མངོན་སྤྱོད་ལས་ཀྱི་དངོས་གྲུབ་སོགས། །ཕྲིན་ལས་ཐོགས་མེད་སྒྲུབ་པར་མཛོད། །ཅེས་དང་། དེང་འདིར་གནོད་ཅིང་འཚེ་བ་ཡི། །བསམ་སྦྱོར་ལོག་ལྟར་གྱུར་པ་རྣམས། །སྐད་ཅིག་ཉིད་ལ་ཕྱིར་དེངས་ཤིག །ཧཱུྃ་ཧཱུྃ། སུམ་བྷ་ནི་སོགས་ཀྱིས་བགེགས་བསྐྲད། སྟེང་འོག་ཕྱོགས་མཚམས་ཀུན་ཏུ་བར་མེད་རྡོ་རྗེའི་རྭ་བ་དྲྭ་བ་གུར་དང་བླ་རེ་ཕྱི་རོལ་ཡེ་ཤེས་ཀྱི་མེ་དཔུང་འབར་བས་སྲུང་བའི་འཁོར་ལོ་ཡངས་ཤིང་རྒྱ་ཆེ་བས་ཀུན་ནས་ཀུན་ཏུ་གཏམས་པར་གྱུར། ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ། ཅེས་སྲུང་འཁོར་བསྒོམས་ལ། དེ་ནས་གནས་དང་མཆོད་པའི་ཡོ་བྱད་བྱིན་གྱིས་བརླབ་པ་ནི་བདུད་རྩི་བྲན་ལ། ༀ་ཨཱཿབིགྷྣཱན་གྱིས་བསངས་། སྭ་བྷཱ་ཝས་སྦྱངས་ལ། སྟོང་པའི་ངང་ལས་ཨཱཿལས་ཐོད་པའི་སྣོད་ཡངས་པར་ཧཱུྃ་ཡིག་གི་ཚོགས་དཔག་ཏུ་མེད་པ་འོད་དུ་ཞུ་བ་ལས་བྱུང་བའི་རྡོ་རྗེའི་མཆོད་ཡོན། ཞབས་བསིལ། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ། གཞན་ཡང་མཆོད་པའི་བྱེ་བྲག་སྣ་ཚོགས་པ་བསམ་གྱིས་མི་ཁྱབ་པ་འཕགས་པ་ཀུན་ཏུ་བཟང་པོའི་རྣམ་པར་ཐར་བ་ལས་བྱུང་བའི་མཆོད་པའི་སྤྲིན་གྱི་ཕུང་པོ་རབ་འབྱམས་ཆོས་ཀྱི་དབྱིངས་རྒྱས་པར་འགེངས་པའི་མཐུ་དང་ལྡན་པར་གྱུར། ༀ་སརྦ་བིད་པཱུ་ར་པཱུ་ར་སུ་ར་སུ་ར་ཨ་ཝརྟ་ཡ་ཧོ། ལན་གསུམ་དང་། ༀ་བཛྲ་སྥ་ར་

[Full Size]

ཁཾ། ལན་གསུམ། ༀ་བཛྲ་ཨརྒྷ་ཾཨཱཿཧཱུྃ་སྭཱ་ཧཱ། དེ་བཞིན། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻཝི་དྱ། ཤབྡ་ཨཱཿཧཱུྃ་སྭཱ་ཧཱ། ཅེས་བྱིན་གྱིས་བརླབས་ལ། སྐྱབས་སུ་འགྲོ་བ་ནི། ན་མོ། དུས་གསུམ་སངས་རྒྱས་དམ་པའི་ཆོས། །ཚོགས་མཆོག་བླ་ན་མེད་པའི་མགོན། །བདག་ཉིད་ཆེན་པོ་རྡོ་རྗེ་ཅན། །དཔལ་ལྡན་བླ་མ་རིན་པོ་ཆེ། །རྩ་བ་བརྒྱུད་པར་བཅས་རྣམས་དང་། །ཡི་དམ་རྒྱལ་བའི་དཀྱིལ་འཁོར་ལྷ། །ཆོས་སྐྱོང་རྒྱ་མཚོ་ཚོགས་བཅས་ལ། །བདག་ནི་རྟག་པར་སྐྱབས་སུ་མཆི། །ལན་བདུན་ནམ་ཉེར་གཅིག་བརྗོད། སེམས་བསྐྱེད་ནི། གཞན་ཕན་སྙིང་རྗེས་ཀུན་བསླང་སྟེ། །བླ་མ་བདེ་གཤེགས་ཀུན་འདུས་ཀྱི། །གོ་འཕང་དམ་པ་བསྒྲུབ་ནས་ནི། །འགྲོ་སྒྲོལ་བྱང་ཆུབ་སེམས་བསྐྱེད་དོ། །ལན་གསུམ་དང་། སྐབས་འདིར་སྦྱང་བྱ་སྒྲིབ་གཉིས་ཀྱི་དྲི་མ་རྣམས་སྦྱོང་བྱེད་གཉེན་པོ་རྟེན་གྱི་སྟོབས་ཁྱད་པར་དུ་འཕགས་པ་བླ་མ་དང་རྡོ་རྗེ་སེམས་དཔའ་དབྱེར་མེད་དུ་སྒོམ་བཟླས་ཀྱི་རིམ་པ་བསྟན་པ་ནི། རང་གི་སྤྱི་གཙུག་ཚངས་པའི་གནས་སྟེང་དུ། །པད་དཀར་ཟླ་དཀྱིལ་སྟེང་དུ་ཧཱུྃ་དཀར་ལས། །བླ་མ་ཧེ་རུ་ཀ་དཔལ་དཔའ་པོ་ཆེ། །རྡོ་རྗེ་སེམས་དཔའ་རིགས་ཀུན་བདག་པོ་མཆོག །སྐུ་མདོག་དཀར་པོ་ཟླ་བའི་རྒྱབ་ཡོལ་ཅན། །ལོངས་སྐུ་མཚན་དཔེའི་ཆ་རྫོགས་ཞལ་གཅིག་པ། །ཕྱག་གཉིས་རྡོར་དྲིལ་འགྱིང་བག་ཚུལ་དུ་བསྣམས། །དར་དང་རིན་ཆེན་རྒྱན་སྤྲས་ཞབས་རྡོར་སྐྱིལ། །པང་དུ་རྡོ་རྗེ་སྙེམས་མ་མདོག་དཀར་གཡས། །གྲི་གུག་གཡོན་པས་ཐོད་ཆང་འཛིན་པ་

[Full Size]

འཁྲིལ། །གནས་གསུམ་སྐུ་གསུམ་ངོ་བོ་ཡིག་འབྲུས་མཚན། །འོད་འཕྲོས་རང་བཞིན་གནས་ནས་ཡེ་ཤེས་པ། །སྤྱན་དྲངས་དབྱེར་མེད་ཐུགས་ཀར་ཟླ་དཀྱིལ་དབུས། །ཧཱུྃ་དཀར་མཐའ་མར་སྔགས་ཕྲེང་བསྐོར་བར་གྱུར། །སྐུ་ཡི་ཆ་ལས་བདུད་རྩི་འོ་མའི་རྒྱུན། །དཀར་ཞིང་བསིལ་བ་རེག་ན་བདེ་བ་འབབ། །སྡིག་སྒྲིབ་མ་ལུས་བྱང་ཞིང་དག་གྱུར་ནས། །རང་ལུས་འོད་དུ་གསལ་བ་དེ་ཡི་ངང་། །ༀ་བཛྲ་ས་ཏྭ་ས་མ་ཡ་སོགས་ཡི་གེ་བརྒྱ་པ་དང་། ཡིག་དྲུག་བཟླས་པའི་མཐར། ཀྱེ་ཧོ། བདག་ནི་ཉོན་མོངས་མ་རིག་དབང་། །སྒྲིབ་བའི་དྲྭ་བར་འཐུམས་པ་ཡི། །དམ་ཚིག་ཉེས་བའི་ཚོགས་ཀུན་འཤགས། །དག་ཚངས་དབུགས་དབྱུང་མཛད་དུ་གསོལ། །ཅེས་གསོལ་བས། བླ་མ་རྡོ་རྗེ་སེམས་དཔའ་ཡིས། །བུ་ཁྱོད་ནོངས་པ་བྱང་ངོ་ཞེས། །གནང་བ་ཐོབ་པའི་མོད་ཉིད་དུ། །འོད་ཞུ་རང་ལ་ཐིམ་པར་གྱུར། །དར་གཅིག་ཉམས་ལེན་བསྐྱངས་ལ། འགྲོ་ཀུན་བདེ་དང་ལྡན་གྱུར་ཅིག །སྡུག་བསྔལ་རྒྱུ་དང་བྲལ་བར་ཤོག །བདེ་བས་རྟག་པར་ཉེར་འཚོ་ཞིང་། །ཆོས་རྣམས་མཉམ་ཉིད་རྟོགས་པར་ཤོག །ལན་གསུམ་གྱིས་ཚད་མེད་བཞི་བསྒོམ་ལ། དེ་ནས་མདུན་མཁར་བླ་མའི་དཀྱིལ་འཁོར་བསྐྱེད་པ་གསལ་བཏབ་པ་ནི། མདུན་བསྐྱེད་རྟེན་རྣམས་བསངས་སྦྱངས་ལ། ༀ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། གིས་ཆོས་ཐམས་ཅད་སྟོང་ཉིད་ཡེ་ཤེས་རྡོ་རྗེ་རང་བཞིན་མེད་པའི་བདག་ཉིད་དེ་ཁོ་ནའི་ངོ་བོར་སྦྱངས་ལ། སྟོང་པའི་ངང་ལས་མདུན་གྱི་མཁའ་དབྱིངས་སུ། །སྔོན་གྱི་སྨོན་ལམ་ཚོགས་གཉིས་རྫོགས་པའི་སྟོབས། །ཆོས་དབྱིངས་རང་

[Full Size]

བཞིན་བསམ་མི་ཁྱབ་པ་དང་། །སངས་རྒྱས་ཞིང་སྦྱང་དག་པའི་སྦྱོར་པའི་མཐུས། །བདག་སོགས་མོས་པའི་རྟེན་འབྱུང་ལྷག་བསམ་གྱིས། །གནས་འདིར་ཐར་པ་ཆེན་པོའི་ཕོ་བྲང་མཆོག །ཞིང་ཁམས་བཀོད་པ་ཡོན་ཏན་ལྷུན་གྲུབ་པར། །ཕུན་སུམ་ཚོགས་པའི་རང་བཞིན་ལྡན་གྱུར་ཅིག །དེ་དབུས་པད་སྡོང་ཡལ་ག་ལྔར་གྱེས་པའི། དབུས་སུ་དྲི་མེད་པད་དཀར་འདབ་མ་བརྒྱད། །གེ་སར་ཟེའུ་འབྲུ་དེ་སྟེང་སེང་གེའི་ཁྲིར། །མ་ཆགས་སྐྱོན་གྱིས་མ་གོས་པདྨའི་གདན། །རང་བཞིན་འོད་གསལ་ཆུ་ཤེལ་ཉ་གང་སྟེང་། །རྒྱལ་བ་ཀུན་གྱི་ཡེ་ཤེས་རྣམ་པར་རོལ། །གསང་གསུམ་མི་བཟད་རྒྱན་འཁོར་ལྔ་ཡི་བདག །འཕགས་མཆོག་འཇིག་རྟེན་དབང་ཕྱུག་དངོས་སྣང་བ། །རྗེ་བཙུན་བདུད་ཚོགས་འདུལ་བའི་རྡོ་རྗེ་ནི། །བགྲེས་ཉམས་ཞྭ་ནག་གསེར་མདངས་ཁྱུང་གཤོག་གསོལ། །དབུ་སྐྱེས་རབ་དཀར་ལྟ་སྟངས་དབྱིངས་སུ་གཟིགས། །ཞལ་གཅིག་ཕྱག་གཉིས་གཡས་པ་ས་གནོན་དང་། །གཡོན་པས་མཉམ་བཞག་འཆི་མེད་བུམ་པ་བསྣམས། །ཆོས་གོས་རྣམ་གསུམ་ཞབས་གཉིས་སྐྱིལ་མོ་ཀྲུང་། །ཏིང་འཛིན་བྱེ་བ་ཕྲག་བརྒྱའི་འོད་ཟེར་གྱིས། །ཁམས་གསུམ་འཁོར་བ་དོང་ནས་སྤྲུག་ཅིང་བཞུགས། །ཤར་གྱི་འདབ་སྟེང་གླང་ཆེན་བཏེགས་པའི་ཁྲིར། །པད་ཟླའི་སྟེང་དུ་འོད་སྣང་མཐའ་ཡས་མགོན། །རིགས་དྲུག་ཁྱབ་བདག་ཞྭ་དམར་ཅོད་པན་ཅན། །མི་ཕམ་ཆོས་གྲུབ་རྒྱ་མཚོ་སྐུ་ཤ་རྒྱས། །ཕྱག་གཉིས་ཐབས་ཤེས་རྡོ་རྗེ་

[Full Size]

དྲིལ་བུ་འཛིན། །ཆོས་གོས་རྣམ་གསུམ་ཟ་འོག་བེར་ཆེན་གསོལ། །ཞབས་གཉིས་རྡོར་སྐྱིལ་གཟི་བྱིན་རབ་ཏུ་འབར། །འབྲེལ་ཚད་དོན་དང་ལྡན་ཞིང་ལྷམ་མེར་བཞུགས། །ལྷོ་ཡི་འདབ་སྟེང་ཅང་ཤེས་བཏེགས་པའི་ཁྲིར། །པད་ཟླའི་སྟེང་དུ་ཐུགས་རྗེ་ཆེན་པོའི་འཕྲུལ། །བཀའ་དྲིན་མཉམ་མེད་དཔལ་ལྡན་འབྲུག་པ་མཆོག །བཀའ་བརྒྱུད་ཕྲིན་ལས་ཤིང་རྟ་སྐུ་མདོག་དཀར། །དབུ་ལ་སྒོམ་ཞྭ་རིན་ཆེན་སྤྲིན་དཔུང་མཛེས། །ཕྱག་གཡས་མཆོག་སྦྱིན་པད་དཀར་གཡོན་མཉམ་བཞག །ཆོས་གོས་རྣམ་གསུམ་རྡོ་རྗེ་སྐྱིལ་མོ་ཀྲུང་། །ཕན་བདེའི་ཆར་གྱིས་རྟག་ཏུ་སྐྱོང་བཞིན་བཞུགས། །ནུབ་ཀྱི་ཟླ་སྟེང་རྨ་བྱས་བཏེགས་པའི་ཁྲིར། །པད་ཟླའི་སྟེང་དུ་བྱམས་ཆེན་ཤེས་རབ་གཉེན། །ཀུན་མཁྱེན་ཆོས་ཀྱི་འབྱུང་གནས་བགྲེས་ཉམས་ལྡན། །དབང་རྟགས་ཅོད་པན་རྭ་གའི་མདངས་དང་ལྡན། །ཕྱག་གཉིས་ཆོས་འཆད་རལ་གྲི་པུསྟི་ཀཿ། ཆོས་གོས་རྣམ་གསུམ་ཞབས་གཉིས་སྐྱིལ་མོ་ཀྲུང་། །འགྲོ་རྣམས་མཁྱེན་བརྩེས་ཡང་དག་སར་བཀོད་ཕྱིར། །བཤད་སྒྲུབ་ཕྲིན་ལས་སྣང་བ་རྒྱས་པར་བཞུགས། །བྱང་གི་འདབ་སྟེང་ཁྱུང་ཆེན་བཏེགས་པའི་ཁྲིར། །པད་ཟླའི་སྟེང་དུ་མཚོ་སྐྱེས་རྣམ་པར་རོལ། །གྲུབ་པའི་དབང་ཕྱུག་དཔལ་ལྡན་དཔའ་བོ་མཆོག །རྡོ་རྗེ་གཙུག་ལག་དགའ་བའི་དབང་པོའི་སྡེ། །བགྲེས་ཚུལ་དབང་ཞུ་པདྨ་ཟུར་བརྒྱད་གསོལ། །ཕྱག་གཉིས་རྡོ་རྗེ་སྡིགས་མཛུབ་དྲིལ་དཀུར་

[Full Size]

བརྟེན། །མེ་ཁ་ལི་ལྗང་བླ་གོས་ངུར་སྨྲིག་བཀླུབས། །ཞབས་གཉིས་ཕྱེད་སྐྱིལ་བདེ་སྟོང་ཡེ་ཤེས་རྒྱས། །ཤར་ལྷོའི་འདབ་སྟེང་རྡོ་རྗེས་མཚན་པའི་ཁྲིར། །པད་ཟླའི་སྟེང་དུ་རྩ་བའི་བླ་མ་ནི། །རྡོ་རྗེ་དྲག་པོ་ཕྲིན་ལས་འདུས་པ་རྩལ། །དཀར་སྨུག་དབུ་ལ་པདྨ་མཐོང་གྲོལ་གསོལ། །ཕྱག་གཡས་རྡོ་རྗེ་རྩེ་དགུ་མཁའ་ལ་གདེངས། །གཡོན་པས་ཕུར་པ་འདྲིལ་ཞིང་ལྕགས་སྡིགས་འཕྲོ། །ཕོད་ཀ་ཆོས་གོས་ཞབས་གཉིས་རོལ་པའི་སྟབས། །ལོག་འདྲེན་བགེགས་ཚོགས་ཞི་བའི་རྔམས་ཟེར་འཕྲོ། །ལྷོ་ནུབ་འདབ་སྟེང་རིན་ཆེན་མཚན་པའི་ཁྲིར། །པད་ཟླའི་སྟེང་དུ་སྔགས་ཀྱི་རིག་པ་འཛིན། །ཚེ་དབང་མགོན་པོ་འཆི་མེད་དཔལ་དར་མཆོག །སྨུག་ནག་པདྨ་ཁ་འབུས་དབང་ཞུ་ཅན། །ཕྱག་གཉིས་རྡོ་རྗེ་ཐོད་ཆང་འགྱིངས་བཅས་བསྣམས། །རྡོ་རྗེའི་གསང་གོས་དང་ནི་བླ་གོས་བཀླུབས། །ཞབས་གཉིས་པདྨའི་སྐྱིལ་མོ་ཀྲུང་གིས་བཞུགས། །ཚེ་བསོད་ཡེ་ཤེས་རྒྱས་པའི་དངོས་གྲུབ་འདུ། །ནུབ་བྱང་འདབ་སྟེང་པདྨས་མཚན་པའི་ཁྲིར། །པད་ཟླའི་སྟེང་དུ་གར་དབང་རྡོ་རྗེ་འཛིན། །ཆོས་སྐྱོང་རྣམ་པར་རྒྱལ་བ་སྐུ་བོང་མཐོ། །དབུ་ལ་དྭགས་ཞུ་གསོལ་ཞིང་ཕྱག་གཉིས་ཀྱི། །ཆོས་འཆད་མཉམ་བཞག་ཕྱག་རྒྱས་གླེགས་བམ་འཛིན། །སྐུ་ལ་ཆོས་གོས་རྣམ་པ་གསུམ་དང་ལྡན། །ཞབས་གཉིས་སེམས་དཔའི་སྐྱིལ་མོ་ཀྲུང་གིས་བཞུགས། །སྲིད་ཞིའི་བརྟན་གཡོ་མ་ལུས་དབང་དང་ལྡན། །བྱང་

[Full Size]

ཤར་འདབ་སྟེང་རྒྱ་གྲམ་མཚན་པའི་ཁྲིར། །པད་ཟླའི་སྟེང་དུ་སྒྲུབ་བརྒྱུད་ཕྲིན་ལས་ཀྱི། །བྱེད་པོར་དབང་བསྐུར་ནོར་བུ་བསམ་འཕེལ་དབང་། །བགྲེས་པའི་ཉམས་ལྡན་བསྒོམ་ཞྭ་དབུ་ལ་གསོལ། །བསམ་གཏན་ངང་དུ་ཏིང་འཛིན་ཕྱག་རྒྱར་ལྡན། །ཆོས་གོས་རྣམ་གསུམ་རྡོ་རྗེ་སྐྱིལ་མོ་ཀྲུང་། །གཉིས་འཛིན་བར་ཆད་སྟོང་ཉིད་ངང་དུ་བསྟིམས། །དེ་ལྟར་དབུས་ཕྱོགས་བླ་མའི་དཀྱིལ་འཁོར་གསལ། །རྒྱབ་ཕྱོགས་སྟེང་གི་པདྨ་གེ་སར་སྟེང་། །ཉི་ཟླའི་གདན་ལ་དང་པོའི་སངས་རྒྱས་མཆོག །ཆོས་སྐུ་སྣང་བ་མཐའ་ཡས་སྐུ་མདོག་དམར། །ཞལ་གཅིག་ཕྱག་གཉིས་མཉམ་བཞག་ཞབས་རྡོར་སྐྱིལ། །གཡས་ཕྱོགས་པད་སྟེང་ཟླ་བའི་དཀྱིལ་འཁོར་དབུས། །འཕགས་པ་སྤྱན་རས་གཟིགས་དབང་གངས་རིའི་མདོག །ཞལ་གཅིག་ཕྱག་གཡས་མཆོག་སྦྱིན་གཡོན་པདྨ། །ལོངས་སྤྱོད་རྫོགས་སྐུའི་རྒྱན་ལྡན་ཞབས་རྡོར་སྐྱིལ། །གཡོན་ཕྱོགས་པདྨ་གེ་སར་ཉི་ཟླའི་སྟེང་། །འཆི་མེད་གུ་རུ་པདྨ་འབྱུང་གནས་ནི། །པད་ཞྭ་གསོལ་ཞིང་རྡོ་རྗེ་ཐོད་པ་བསྣམས། །ཁ་ཊྭཱྃ་ཕོད་ཀ་ཆོས་གོས་ཞབས་རྡོར་སྐྱིལ། །མདུན་ཕྱོགས་འོག་གི་པདྨ་ཉི་རོའི་སྟེང་། །ཡེ་ཤེས་མགོན་པོ་བེར་ནག་རང་བྱུང་རྒྱལ། །གཉིས་ཀའང་གྲི་ཐོད་འཛིན་ཅིང་འཁྱུད་སྟབས་ཀྱིས། །དར་ནག་བེར་གསོལ་རྫུ་འཕྲུལ་དྲེལ་རྟ་ཆིབས། །རྩ་གསུམ་ལྷ་ཚོགས་དེ་དག་ཐམས་ཅད་ཀྱི། །གནས་གསུམ་ༀ་དཀར་ཨཱཿདམར་ཧཱུྃ་མཐིང་མཚན། །དེ་ལས་འོད་ཟེར་ཕྱོགས་བཅུའི་ཞིང་དུ་འཕྲོས།

[Full Size]

རབ་འབྱམས་དུས་གསུམ་རྒྱལ་བའི་ཐུགས་རྗེ་བསྐུལ། །ཀུན་ཀྱང་བསྐྱེད་པ་དང་འདྲའི་ཡེ་ཤེས་སེམས། །མདུན་གྱི་ནམ་མཁར་སྐད་ཅིག་སྤྱན་དྲངས་ནས། །ཐུགས་རྗེའི་བྱིན་རླབས་དངོས་གྲུབ་གཏིབ་པར་གྱུར། །ༀ་སརྦ་ཏ་ཐཱ་ག་ཏ་གུ་རུ་བཛྲ་ས་མ་ཛཿཛཿཧཱུྃ་ཧཱུྃ་ཕེཾ་ཕེཾ། ཅེས་བརྗོད་ལ་སྤྱན་འདྲེན་པ་ནི། སྟེང་དག་པ་ཆོས་དབྱིངས་ཕོ་བྲང་ནས། །དཔལ་དང་པོའི་སངས་རྒྱས་སྣང་མཐའ་ཡས། །མཆོག་དངོས་གྲུབ་སྤྲིན་ཕུང་ཐིབས་སེ་ཐིབ། །གནས་འདིར་བྱོན་བྱིན་ཆེན་དབབ་ཏུ་གསོལ། གཡས་པོ་ཊ་ལ་ཡི་ཞིང་ཁམས་ནས། །དཔལ་ལོངས་སྐུ་ཐུགས་རྗེ་ཆེན་པོའི་མགོན། །མཆོག་དངོས་གྲུབ་སྤྲིན་ཕུང་ཐིབས་སེ་ཐིབ། །གནས་འདིར་བྱོན་བྱིན་ཆེན་དབབ་ཏུ་གསོལ། །གཡོན་དཔལ་རི་པདྨ་འོད་ཞིང་ནས། །རྗེ་སྤྲུལ་སྐུ་གུ་རུ་ཐོད་ཕྲེང་རྩལ། །མཆོག་དངོས་གྲུབ་སྤྲིན་ཕུང་ཐིབས་སེ་ཐིབ། །གནས་འདིར་བྱོན་བྱིན་ཆེན་དབབ་ཏུ་གསོལ། །དབུས་མི་འགྱུར་གདོད་མའི་གཤིས་ཀྱི་ངང་། །རང་བྱུང་གི་གསལ་ལ་སྟོང་པ་ཡི། །སེམས་སྣང་སྟོང་དབྱེར་མེད་བདེ་བ་ཆེ། །དོན་དབྱིངས་དང་ཡེ་ཤེས་ཕོ་བྲང་ནས། །དྲན་ཆོག་གི་འཁོར་ལོའི་དབང་ཕྱུག་གཙོ། །རིགས་ཀུན་གྱི་ཁྱབ་བདག་རྡོ་རྗེ་འཆང་། །རྩ་བ་དང་བརྒྱུད་པའི་བླ་མ་རྣམས། །ཐུགས་བརྩེ་བ་ཆེན་པོས་བཟུང་སླད་དུ། །མཆོག་དངོས་གྲུབ་སྤྲིན་ཕུང་ཐིབས་སེ་ཐིབ། །གནས་འདིར་བྱོན་བྱིན་ཆེན་དབབ་ཏུ་གསོལ། །འོག་དམ་ཚིག་གཉེན་པོའི་གཞལ་ཡས་ནས། །དཔལ་མ་ཧཱ་ཀཱ་ལ་ལྕམ་དྲལ་

[Full Size]

ཚོགས། །ཕྲིན་ལས་ཀྱི་གློག་འོད་ཁྱུགས་སེ་ཁྱུག །གནས་འདིར་བྱོན་ཕྱི་ནང་བར་ཆད་སོལ། །སྐྱབས་ཐུགས་རྗེ་ཅན་གྱི་བླ་མ་དང་། །མགོན་ཡི་དམ་དཀྱིལ་འཁོོར་མ་ལུས་དང་། །བསྟན་སྲུང་བའི་དམ་ཅན་རྒྱ་མཚོ་རྣམས། །དེང་མཆོད་པའི་གནས་འདིར་སྤྱན་འདྲེན་ན། །སྔོན་བྱང་ཆུབ་སྙིང་པོའི་སྨོན་ལམ་གྱིས། །མ་བརྒལ་དང་མ་གྲོལ་གདུལ་བྱ་རྣམས། །ཡང་དག་གི་ས་ལ་འགོད་པའི་ཕྱིར། །གནས་འདིར་བྱོན་བྱིན་རླབས་དངོས་གྲུབ་སྩོལ། །ༀ་ཤྲཱི་མཱན་གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་བཛྲ་ས་མ་ཡ་ཛཿཅེས་བརྗོད་ལ་དམ་ཚིག་དང་ཡེ་ཤེས་དབྱེར་མེད་དུ་གྱུར་པར་མོས་ལ། ཛཿཧཱུྃ་བྃ་ཧོཿདམ་ཚིག་ཡེ་ཤེས་དབྱེར་མེད་གཅིག་འདྲེས་གྱུར། །སླར་ཡང་ཐུགས་ཀའི་འོད་ཀྱིས་དབང་ལྷ་རྣམས། །རང་བཞིན་གནས་ནས་མ་ལུས་སྤྱན་དྲངས་ཏེ། །མཆོད་པའི་སྤྲིན་གྱི་རང་བཞིན་སྤྲོ་བར་གྱུར། །ༀ་བཛྲ་ཨརྒྷཾ། པཱདྱཾ། པུཥྤེ། དྷཱུཔྤེ། དི་པེ། གནྡྷེ། ནཻ་ཝི་དྱ། ཤབྟ་པྲ་ཏཱིཙྪ་ཡེ་སྭཱ་ཧཱ། བདེ་གཤེགས་རིགས་ལྔ་སེམས་དཔའ་སེམས་མ་དང་། །ཁྲོ་བོ་ཁྲོ་མོ་ལ་སོགས་དབང་གི་ལྷས། །དགོངས་པ་མཛད་དང་བཀྲ་ཤིས་མེ་ཏོག་འཐོར། །སྲུང་བའི་ལས་མཛད་ལྷ་མོ་རྣམས་ཀྱིས་ནི། །རིན་ཆེན་བུམ་བཟང་འཆི་མེད་བདུད་རྩི་ཡི། །རྒྱུན་གྱིས་མངོན་པར་དབང་བསྐུར་ཁྲུས་གསོལ་བགྱི། །ༀ་སརྦ་ཏ་ཐཱ་ག་ཏ་ཨ་བྷི་ཥ་ཀ་ཏ་ས་མ་ཡ་ཤྲཱི་ཡེ་ཧཱུྃ། ལྷ་རྫས་དབང་པོའི་གཞུ་ཅན་གོས་ཟུང་འབུལ། །ༀ་བཛྲ་ཝསྟྲ་ཨཱཿཧཱུྃ། །དབང་བསྐུར་ཆུ་ཞབས་གྱེན་དུ་འཁྱིལ་བས་ནི། །གཙོ་བོར་བཅོམ་

[Full Size]

ལྡན་མི་བསྐྱོད་རྒྱས་གདབ་ཅིང་། འཁོར་རྣམས་རིགས་བདག་སོ་སོས་དབུ་བརྒྱན་གྱུར། །རྒྱལ་བའི་སྐུ་ལ་སྒྲིབ་པ་མི་འཚལ་ཡང་། །བདག་སོགས་འགྲོ་བ་སེམས་ཅན་ཀུན་དོན་ཕྱིར། །ཉོན་མོངས་བག་ཆགས་དྲི་མ་དག་གྱུར་ཅིག །ཅེས་དབང་བསྐུར་རྒྱས་གདབ་ལ། རང་ལུས་ཞིང་གི་རྡུལ་སྙེད་ཀྱི་ཕྲ་རབ་ཏུ་སྤྲུལ་ནས་ཕྱག་འཚལ་བ་ནི། ཨེ་མ་ཧོ་ལྷ་རྣམས་ཀུན་གྱི་ལྷ། །ཨེ་མ་ཧོ་རྒྱལ་དང་རྒྱལ་བའི་མཆོག །ཨེ་མ་སངས་རྒྱས་ཀུན་འབྱུང་གནས། །བླ་མའི་ཞབས་ལ་ཕྱག་འཚལ་ལོ། །གང་ཞིག་དྲན་པ་ཙམ་གྱིས་ཀྱང་། །བླ་མེད་གོ་འཕང་སྦྱིན་པ་ཡི། །ཡིད་བཞིན་རིན་ཆེན་གཏེར་ཆེན་པོ། །བླ་མའི་ཞབས་ལ་ཕྱག་འཚལ་ལོ། །དཔལ་ལྡན་ཡོན་ཏན་བསམ་ཡས་ཀྱི། །འོད་ཟེར་འབུམ་ཕྲག་བརྡལ་བ་ཡི། །མ་རིག་མུན་པ་རབ་བསལ་བ། །བླ་མའི་ཞབས་ལ་ཕྱག་འཚལ་ལོ། །བྱམས་དང་སྙིང་རྗེའི་རང་གཟུགས་ཀྱིས། །འགྲོ་ལ་བདུད་རྩིའི་བསིལ་སྦྱིན་ནས། །ངེས་དོན་འོད་དཀར་སྤྲོ་བ་ཅན། །བླ་མའི་ཞབས་ལ་ཕྱག་འཚལ་ལོ། །གཏིང་མཐའ་བྲལ་བའི་བློ་གྲོས་ཀྱི། །དྲང་ངེས་ཆོས་ཚུལ་རྒྱ་མཚོའི་བདག །སྨིན་གྲོལ་ཆུ་བོ་ཀུན་འདུས་པའི། །བླ་མའི་ཞབས་ལ་ཕྱག་འཚལ་ལོ། །གསོལ་བ་འདེབས་སོ་ཡེ་ཤེས་ཀྱི། །སྤྱན་གྱིས་གཟིགས་ལ་བྱིན་གྱིས་རློབས། །བདག་སོགས་སེམས་ཅན་ཐམས་ཅད་ལ། །དངོས་གྲུབ་དོན་གཉིས་ཆར་ཆེན་སྩོལ། །ཅེས་ཕྱག་འཚལ་ནས། ཕྱི་ཡི་མཆོད་པ་འབུལ་པ་ནི། དངོས་དང་ཡིད་སྤྲུལ་མཆོད་པའི་རྫས། །བདག་ལུས་

[Full Size]

ལོངས་སྤྱོད་སྣང་སྲིད་རྣམས། །ཚོགས་གཉིས་བསོད་ནམས་སྤེལ་བའི་ཕྱིར། །རབ་འབྱམས་ཞིང་གང་སྤྲོ་བར་གྱུར། །ཅེས་བརྗོད་ལ། རྣམ་པར་དག་ཅིང་གཙང་བྱེད་ཀྱི། །ཡན་ལག་བརྒྱད་ལྡན་མཆོད་ཡོན་འདི། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །ༀ་ཤྲཱི་མཱན་ག་རུ་དེ་ཝ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། དྲི་མེད་ཚངས་རལ་ལས་འོངས་པའི། །ལམ་གསུམ་རྒྱུན་གྱི་ཞལ་བསིལ་འདི། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །སྔགས་ཐོག་མཐའ་འདྲ་བར། བཛྲ་པཱདྱཾ༴ ཆུ་དང་ཐང་ལས་སྐྱེས་པ་ཡི། །འདབ་སྟོང་གེ་སར་ལོ་འདབ་རྒྱས། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །བཛྲ་པུཥྤེ༴ ཙནྡན་ལ་སོགས་དྲི་བསུང་ལྗོན། །བདུག་སྤོས་རྣམ་པ་ཇི་སྙེད་རྣམས། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །བཛྲ་དྷཱུ་པེ༴ ཉི་ཟླ་རིན་ཆེན་འོད་ཟེར་སོགས། །སྣང་ཞིང་གསལ་བྱེད་སྒྲོན་མེ་འདི། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །བཛྲ་ཨཱ་ཱལོ་ཀེ༴ སྣ་ཚོགས་སྨན་གྱི་སྦྱོར་བ་ལས། །དྲི་ཆབ་ངད་ལྡན་བྱུགས་པའི་ཚོགས། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །བཛྲ་གནྡྷེ༴ རོ་བརྒྱ་ལྡན་པ་བཅུད་ཀྱི་མཆོག །ལྷ་ཡི་ཞལ་ཟས་དམ་པ་འདི། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་

[Full Size]

བརླབ་ཏུ་གསོལ། །བཛྲ་ནཻ་ཝིདྱེ༴ སྙན་ཅིང་དབྱངས་ལྡན་རྒྱུད་མངས་དང་། །རོལ་མོའི་བྱེ་བྲག་ཇི་སྙེད་པ། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །བཛྲ་ཤབྟ༴ སོ་སོའི་ཕྱག་རྒྱ་དང་བཅས་ཏེ་མཆོད་རོལ་སྣ་ཚོགས་པ་བྱའོ། །དེ་ནས་འདོད་ཡོན་རྣམ་ལྔ་འབུལ་བ་ནི། ཕྱོགས་བཅུའི་རབ་འབྱམས་ཞིང་རྣམས་ལ། །གཟུགས་དང་སྒྲ་སྙན་དྲི་ཡི་བྱུགས། །རོ་བཅུད་ལྷ་ཡི་ཞལ་ཟས་རྣམས། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་ཐུགས་རྗེས་བདག་བྱིན་རློབས། །ༀ་བཛྲ་རཱུ་པ་ཤབྡ་གནྡྷེ་ར་ས་སྤ-ཪྴེ་ཀ་མ་གུ་ཎ་བཛྲ་པཱུ་ཱུཛི་ཏེ་ཨཱཿཧཱུྃ། དེ་ནས་རྒྱལ་སྲིད་སྣ་བདུན་འབུལ་བ་ནི། གསེར་གྱི་འཁོར་ལོ་རྩིབས་སྟོང་ལྡན། །བསམ་འཕེལ་ནོར་བུ་དགོས་འདོད་འབྱུང་། །ཁྱིམ་བདག་འབྱོར་བའི་དཔལ་གྱིས་ཕྱུག །ཤེས་རབ་བདེ་སྟོང་ལང་ཚོ་ཅན། །ཅང་ཤེས་ཐར་པའི་ལམ་གྱི་སྟེགས། །ཁྱུ་མཆོག་སྟོབས་བཅུའི་རྩལ་རྫོགས་ཤིང་། །བདུད་བཞི་མཐར་བྱེད་དཔའ་པོ་སྟེ། །རྒྱལ་སྲིད་རིན་ཆེན་སྣ་བདུན་འབུལ། །ༀ་སཔྟ་རཏྣ་པྲ་ཏཱི་ཙྪ་ཡེ་ཨཱཿཧཱུྃ། དེ་ནས་བཀྲ་ཤིས་པའི་རྟགས་བརྒྱད་འབུལ་བ་ནི། རིན་ཆེན་གདུགས་བཟང་གསེར་ཉ་འཁྱུགས། །བུམ་པ་དཔལ་བེའུ་རྒྱལ་མཚན་བསྒྲེངས། །དུང་དཀར་པདྨ་འཁོོར་ལོ་སྟེ། །བཀྲ་ཤིས་རྟགས་ཀྱི་མཆོད་པ་འབུལ། །ༀ་ཨཥྚ་མདྒལ་ཧེ་ཏུ་པྲ་ཏཱི་ཙྪ་ཡེ་ཨཱཿཧཱུྃ། དེ་ནས་རྫས་བརྒྱད་འབུལ་བ་ནི། ཀུན་ཏུ་གསལ་དང་སྐྱེ་བ་ལྔ། །གིའུ་ཝྃ་ལི་ཁྲི་ཞོ་མཆོག་དང་། །ཡུངས་ཀར་དུཪྺ་བིལ་བ་སྟེ། །བཀྲ་ཤིས་རྫས་ཀྱི་མཆོད་པ་འབུལ། །ༀ་ཨཥྚ་མདྒལ་དྲ་བྱ་པྲ་ཏཱི་ཙྪ་ཡེ་ཨཱཿཧཱུྃ། དེ་ནས་མཎྜལ་འབུལ་བ་ནི། ༀ་བཛྲ་བྷཱ་མི་ཨཱཿཧཱུྃ། གསེར་གྱི་ས་གཞི་མཐའ་དབུས་བརྡལ་བའོ། །ༀ་

[Full Size]

བཛྲ་རེ་ཁེ་ཨཱཿཧཱུྃ། རྡོ་རྗེའི་རི་ཡིས་ཁོར་ཡུག་བསྐོར་བའི་དབུས། །རི་དབང་རྒྱལ་པོ་མཆོག་རབ་ལྷུན་པོའོ། །ཤར་ལྷོ་ནུབ་བྱང་རིམ་བཞིན་གླིང་ཆེན་བཞི། །ལུས་འཕགས་པོ་དང་ཛམ་བུ་ཆོས་ཀྱི་གླིང་། །བ་ལང་སྤྱོད་དང་བྱང་གི་སྒྲ་མི་སྙན། །གླིང་ཕྲན་བརྒྱད་དང་རིན་ཆེན་ས་འཛིན་དང་། །དཔག་བསམ་རྐང་འཐུང་འདོད་པ་འཇོ་བའི་བ། །མ་རྨོས་སྙེ་མ་རྒྱལ་སྲིད་སྣ་བདུན་དང་། །གཏེར་ཆེན་བུམ་པ་སྒེག་ཕྲེང་གླུ་ུགར་མ། །མེ་ཏོག་བདུག་སྤོས་སྣང་གསལ་དྲིའི་ལྷ་མོ། །ཉི་ཟླ་གདུགས་བཟང་རྒྱལ་མཚན་སྲིད་རྩེར་གཡོ། །གཞན་ཡང་གླིང་བཞི་བྱེ་བ་ཕྲག་བརྒྱ་ཡི། །ལྷ་མིའི་དཔལ་འབྱོར་ལོངས་སྤྱོད་སྣ་ཚོགས་པ། །རབ་འབྱམས་ཞིང་གི་རྡུལ་སྙེད་གྲངས་འདས་ཀུན། །རྡོ་རྗེའི་མཎྜལ་གཅིག་ཏུ་བསྡུས་ནས་ནི། །བླ་མ་ཡི་དམ་དཀྱིལ་འཁོར་ལྷ་ཚོགས་དང་། །སངས་རྒྱས་བྱང་སེམས་དཔའ་བོ་མཁའ་འགྲོའི་ཚོགས། །ཆོས་སྐྱོང་སྲུང་མར་བཅས་ལ་དབུལ་བར་བགྱི། །བཞེས་ནས་སྨིན་གྲོལ་བྱིན་གྱིས་བརླབ་ཏུ་གསོལ། །ༀ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་ཕྱིའི་མཆོད་པ་རྣམས་འབུལ་ཞིང་། ནང་མཆོད་འབུལ་བ་ནི། མཐེབ་སྲིན་གྱིས་བདུད་རྩི་འབུལ་བཞིན་པས། ཆོས་སྐུ་མཐའ་ཡས་ལོངས་སྐུ་སྤྱན་རས་གཟིགས། །སྤྲུལ་སྐུ་རྒྱལ་དབང་པདྨ་འབྱུང་གནས་ལ། །ཡེ་ཤེས་བདུད་རྩིའི་རྒྱུན་གྱི་མཆོད་པ་འབུལ། །རྗེ་བཙུན་བདུད་ཚོགས་འདུལ་བའི་རྡོ་རྗེ་འཆང་། །ཆོས་གྲུབ་རྒྱ་མཚོ་ཕྲིན་ལས་ཤིང་རྟ་དང་། །བསྟན་པའི་ཉིན་བྱེད་གཙུག་ལག་དགའ་བའི་

[Full Size]

དབང་། །ཐུགས་ཀྱི་རྡོ་རྗེ་འཆི་མེད་དཔལ་དར་རྗེ། །ཆོས་སྐྱོང་རྣམ་རྒྱལ་ནོར་བུ་བསམ་འཕེལ་ལ། །ཡེ་ཤེས་བདུད་རྩིའི་རྒྱུན་གྱི་མཆོད་པ་འབུལ། །མ་མགོན་ལྕམ་དྲལ་ཆོས་སྐྱོང་སྲུང་མ་ལ། །ཡེ་ཤེས་བདུད་རྩིའི་རྒྱུན་གྱི་མཆོད་པ་འབུལ། །ཟག་མེད་བདེ་བ་ཆེན་པོའི་ངང་དུ་རོལ། །སརྦ་པཉྩ་ཨ་མྲྀ་ཏ་ༀ་ཨཱཿཧཱུྃ། ཅེས་ཕུལ་ནས་གསང་བའི་མཆོད་པ་ནི། རྡོ་རྗེ་རོལ་པའི་ལྷ་མོ་བཅུ་དྲུག་པོ། །པི་ཝཾ་གླིང་བུ་རྔ་ཆེན་རྫ་རྔ་དང་། །བཞད་མ་སྒེག་མཛེས་གླུ་གར་མེ་ཏོག་སྤོས། །སྣང་གསལ་དྲི་ཆབ་གཟུགས་རོ་བཅུད་རེག་བྱ། །ཆོས་དབྱིངས་བདེ་སྟོང་ལྷ་མོ་ལ་སོགས་པས། །གསང་བ་མཆོག་གི་མཆོད་པ་ཆེན་པོ་འབུལ། །ༀ་བཛྲ་ཝི་ཎི་ཧཱུྃ་ཧཱུྃ་ཕཊ། ཐོག་མཐའ་འདྲ་བར། ཝཾ་ཤེ། མྲི་དཾ་གེ། མུ་རཉྫེ། ཧ་སྱ། ལ་སྱ། གིརྟི། ནིརྟི། དྷཱུ་པེ། པུཥྤེ། དཱེ་པེ། གནྡྷེ། ༀ་ཨཱཿརཱུ་པ་བཛྲེ་ཧཱུྃ་ཧཱུྃ་ཕཊ། ར་ས༴ སྤཪྴེ༴ དྷརྨ་དྷཱ་ཏུ་བཛྲ་ཧཱུྃ་ཧཱུྃ་ཕཊ། ཅེས་ཕུལ་ནས། མཆོད་བྱ་མཆོད་བྱེད་ཐམས་ཅད་ཀྱང་། །དྲན་རིག་གསལ་བའི་ངང་དུ་སྟོང་། །འདུས་མ་བྱས་པའི་མཆོད་པ་ཆེ། །ཀ་ནས་དག་པའི་ཀློང་དུ་བཞེས། །ༀ་མ་ཧཱ་ཤཱུ་ནྱ་ཏ་པཱུ་ཛ་ཧོཿཅེས་དེ་ཁོ་ན་ཉིད་ཀྱི་མཆོད་པ་ཆེན་པོ་སྟེ་ཕྱི་ནང་གསང་བའི་མཆོད་པ་རྣམས་གྲུབ་ནས་སྡོམ་པ་གསུམ་དང་འགལ་པའི་དམ་ཚིག་རྩ་ལྟུང་གི་ཉེས་པ་ཐམས་ཅད་བཤགས་པ་ནི། ཧོ་དགོངས་སུ་གསོལ་ལོ། །དཔལ་ལྡན་བླ་མ་ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་གསན་

[Full Size]

དུ་གསོལ། བདག་མིང་འདི་ཞེས་བགྱི་བ་ཚེ་རབས་འཁོར་བ་ཐོག་མེད་དུས་རིང་ནས་ཐ་མ་ད་ལྟའི་བར་དུ་འདོད་ཆགས་ཞེ་སྡང་གཏི་མུག་གིས་བསྐྱེད་པའི་སྡིག་པ་མི་དགེ་བ་བཅུ། མཚམས་མེད་པ་ལྔ། དེ་དང་ཉེ་བ་ལྔ་བགྱིད་པ་དང་། སོ་སོ་ཐར་པའི་སྡོམ་པ་དང་། བྱང་ཆུབ་སེམས་དཔའི་བསླབ་པ་དང་། གསང་བ་སྔགས་ཀྱི་དམ་ཚིག་སྟེ་སྡོམ་པ་གསུམ་དང་འགལ་བའི་རྩ་བ་ཡན་ལག་གི་ཉེས་པར་གྱུར་པའི་ལྟུང་པའི་ཚོགས་ཅི་མཆིས་པ་ཐམས་ཅད་རབ་ཏུ་གནོང་འགྱོད་དྲག་པོས་མཐོལ་ལོ་བཤགས་སོ། །དག་ཚངས་སྒྲིབ་པར་མི་འགྱུར་པའི་དབུགས་དབྱུང་དམ་པ་སྩལ་དུ་གསོལ། ཅེས་ལན་གསུམ་བརྗོད། དེ་ནས། ཀྱེ་མ་རྗེ་བཙུན་བླ་མ་དམ་པ། །སྐུ་བཞིའི་དབང་ཕྱུག་རྡོ་རྗེ་འཆང་ཆེན། །སྣ་ཚོགས་ཕྲིན་ལས་འོད་སྟོང་ཟེར་གྱིས། །བཅོམ་ལྡན་ཐུགས་མཆོག་རྣམ་ཐར་ཇི་བཞིན། །འགྲོ་ཀུན་ངན་སོང་མུན་པ་གཞོམ་ནས། །རྣམ་གྲོལ་ཡང་དག་ཐར་པའི་ལམ་མཆོག །གསལ་བར་སྟོན་པའི་བཀའ་དྲིན་གསུམ་ལྡན། །ཡོངས་སུ་འཛིན་པའི་སློབ་དཔོན་དྲན་བྱུང་། །མཁའ་ཁྱབ་ཡེ་ཤེས་རོལ་པ་འབྱམས་ཀླས། །ཞིང་ཁམས་ཡོངས་ཀྱི་མངའ་བདག་ཆེན་པོ། །རྨད་བྱུང་བྱིན་རླབས་རྒྱ་མཚོའི་འབྱུང་གནས། །སངས་རྒྱས་དངོས་སུ་སྣང་བ་དྲན་བྱུང་། །གཏན་གྱི་འདུན་མའི་སྐྱབས་གནས་གཅིག་ཆོག །སྐལ་ལྡན་རྒྱུད་ལ་ཡེ་ཤེས་འཕོ་བའི། །བྱིན་རླབས་དབང་བཞིའི་ཆུ་རྒྱུན་སྩོལ་བའི། །རྩ་བའི་བླ་མ་ཁྱེད་རང་དྲན་བྱུང་། །

[Full Size]

དཔལ་ལྡན་དྭགས་པོ་བཀའ་ཡི་བརྒྱུད་པའི། །ངེས་པ་དོན་གྱི་སྒྲུབ་བརྒྱུད་གཅིག་བསྡུས། །འགྲོ་བའི་མགོན་པོ་བླ་མ་དྲན་བྱུང་། །ཕྱག་རྒྱ་ཆེན་པོའི་དངོས་གྲུབ་སྩོལ་ཅིག །ཅེས་བླ་མ་རྒྱང་འབོད་ཀྱི་ཚུལ་དུ་སྣང་བ་འགྱུར་ངེས་སུ་མོས་གུས་ཀྱི་དག་པའི་སྣང་བ་དང་ལྡན་པས་བཏོན་ལ། དེ་ནས་བསྙེན་པ་ལ་འཇུག་པ་ནི། དེ་ལྟར་གསོལ་བ་བཏབ་པས་ཕྱོགས་བཅུ་དུས་གསུམ་གྱི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཡེ་ཤེས་ཆོས་སྐྱོང་སྲུང་མའི་བྱིན་རླབས་ཐུགས་རྗེ་ནུས་རྩལ་ཐམས་ཅད་འོད་ཟེར་གྱི་རྣམ་པར་མདུན་བསྐྱེད་བླ་མའི་དཀྱིལ་འཁོར་གྱི་ལྷ་ཚོགས་རྣམས་ལ་ཐིམ། གཉིས་མེད་དུ་འདྲེས། ཐུགས་རྒྱུད་བསྐུལ། སླར་འོད་ཟེར་སྟེང་འོག་ཕྱོགས་མཚམས་ཀུན་ཏུ་འཕྲོས་པས་བདག་གཞན་འབྲེལ་ཚད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་སྡིག་སྒྲིབ་ཉེས་ལྟུང་བྱང་ཞིང་དག་ནས། འཁོར་བ་དང་ངན་སོང་གི་སྐྱེ་སྒོ་ཆོད་ནས་ཀུན་ཀྱང་དག་པ་ཡེ་ཤེས་ཀྱི་སྐུ་ཐོབ་པའི་སྐལ་པ་དང་ལྡན་པར་གྱུར་པར་བསམ་ལ། དེ་ཡི་ངང་ནས། དང་པོ་ཆོས་སྐུ་སྣང་མཐའ་ཡས་ལ་དམིགས་ཏེ། ༀ་ཨ་མིདྷཱེ་ཝ་ཧྲཱིཿཅི་ནུས་བཟླས། དེ་ནས་ལོངས་སྐུ་སྤྱན་རས་གཟིགས་ལ་དམིགས་ཏེ། ༀ་མ་ཎི་པདྨེ་ཧཱུྃ། ཞེས་ཅི་ནུས་དང་། སྤྲུལ་སྐུ་པདྨ་འབྱུང་གནས་ལ་དམིགས་ཏེ། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཅི་ནུས་དང་དབུས་ཕྱོགས་བླ་མ་ཀུན་འདུས་ཀྱི་གཙོ་བོར་དམིགས་ལ། ༀ་ཨཱཿམཱ་ར་ད་མ་ཀ་བཛྲ་ཧཱུྃ། བཟླས་པ་འདི་ཉིད་བུངས་བསྐྱེད་ནས་མཚན་སྔགས་

[Full Size]

གཞན་རྣམས་མ་བཏོན་ཀྱང་རུང་། སྤྲོ་ན་བཏོན་པ་སོགས་གང་བདེར་བྱ་ཞིང་། འོག་ཕྱོགས་མ་མགོན་ལྕམ་དྲལ་ལ་དམིགས་ཏེ། ༀ་མ་ཧཱ་ཀཱ་ལ་མ་ཧཱ་ཀཱ་ལཱི་ཧཱུྃ་ཧཱུྃ་ཕཊ། ཅེས་པའང་བཟླས་ལ། དེ་ནས་ཐབས་ཤེས་ཀྱི་རྫས་ཚོགས་ཀྱི་མཆོད་པ་འབུལ་བ་ནི་ནང་མཆོད་ལྟར་བྱིན་གྱིས་བརླབས་ལ། ༀ་ཨཱཿཧཱུྃ་གི་བར་བརྗོད་ལ། ན་མོ། ཐབས་དང་ཤེས་རབ་གཉིས་སུ་མེད་པའི་ཚོགས་ཀྱི་འཁོར་ལོ་རྒྱ་ཆེན་པོ་འདི་བྱིན་རླབས་ཀྱི་རྩ་བ། དངོས་གྲུབ་ཀྱི་འབྱུང་གནས། ཕྲིན་ལས་ཀྱི་དབང་ཕྱུག །རྩ་གསུམ་རབ་འབྱམས་དཀྱིལ་འཁོར་ལྷ་ཚོགས་རྣམས་ཀྱི་ཞལ་དུ་ཁཱ་ཧི། པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ལན་གསུམ་བརྗོད། ཚོགས་ལ་སྤྱན་འདྲེན་ནི། ཧཱུྃ། ཟག་མེད་ཡེ་ནས་སྟོང་པའི་དབྱིངས། །ཀློང་ཡངས་མཐའ་བྲལ་ཞིང་ཁམས་ནས། །ཆོས་སྐུ་སྣང་བ་མཐའ་ཡས་ཀྱང་། །འདིར་གཤེགས་ཚོགས་ལ་གཤེགས་སུ་གསོལ། །རང་བྱུང་འགྱུར་མེད་ལྷུན་རྫོགས་པ། །རྣམ་དག་བདེ་ཆེན་ཞིང་ཁམས་ནས། །ལོངས་སྐུ་ཐུགས་རྗེ་ཆེན་པོ་ཡང་། །འདིར་གཤེགས༴ འགགས་མེད་ཐུགས་རྗེའི་རང་རྩལ་མདངས། །དཔལ་རི་པདྨ་འོད་ཞིང་ནས། །སྤྲུལ་སྐུ་རྡོ་རྗེ་ཐོད་ཕྲེང་རྩལ། །འདིར་གཤེགས༴ དུས་གསུམ་རྒྱལ་ཀུན་ཡེ་ཤེས་ཀྱི། །སྒྱུ་འཕྲུལ་དྲྭ་བའི་རང་བཞིན་ཅན། །ཐབས་མཁས་ཟབ་མོ་འགྲོ་བའི་གཉེན། །རྩ་བ་བརྒྱུད་པའི་བཀའ་བརྒྱུད་ཀྱི། །རིག་འཛིན་གྲུབ་ཐོབ་རྒྱ་མཚོ་རྣམས། །འདིར་གཤེགས༴ བྱ་སྤྱོད་རྣལ་འབྱོར་བླ་ན་མེད། །རྒྱུད་སྡེ་བཞི་འབྲེལ་རབ་འབྱམས་ཀྱི། །

[Full Size]

ཡི་དམ་ཞི་ཁྲོའི་ལྷ་ཚོགས་རྣམས། །འདིར་གཤེགས་ཚོགས་ལ་གཤེགས་སུ་གསོལ། །མཁའ་སྤྱོད་ས་སྤྱོད་དག་པའི་ཞིང་། །གནས་གསུམ་སྐྱོང་བའི་དཔའ་བོ་དང་། །མ་སྲིང་མཁའ་འགྲོ་དམ་ཚིགཅན། །འདིར་གཤེགས༴ བྱང་ཤང་ཆོས་དབྱིངས་ཕོ་བྲང་ནས། །མ་ཧཱ་ཀཱ་ལ་རྡོ་རྗེ་བེར། །རང་བྱུང་རྒྱལ་མོ་འཁོར་དང་བཅས། །འདིར་གཤེགས༴ དུར་ཁྲོད་བརྒྱད་དང་ཉེར་བཞིའི་གནས། །རང་རང་སོ་སོའི་གནས་མཆོག་ནས། །ཆོས་སྐྱོང་ཕོ་རྒྱུད་མོ་རྒྱུད་རྣམས། །འདིར་གཤེགས་ཚོགས་ལ་གཤེགས་སུ་གསོལ། །ཧཱུྃ། ཚོགས་ཁང་གཞལ་ཡས་ཉམས་རེ་དགའ། །སྒྲུབ་པའི་དཀྱིལ་འཁོར་བྱིན་རེ་ཆེ། །རྡོ་རྗེའི་རྣལ་འབྱོར་དམ་རེ་གཙང་། །ཚོགས་ཀྱི་འཁོར་ལོ་བཅུད་རེ་ཆེ། །དམ་རྫས་ཚོགས་ལ་སྤྱན་འདྲེན་གཤེགས། །རྨད་བྱུང་མཆོད་པ་བཞེས་སུ་གསོལ། །ཅེས་བརྗོད་ལ། ཚོགས་ཕུད་སྤྲོས་ནས་གཏོར་མར་བྲན་ལ་ནང་མཆོད་ཀྱི་བདུད་རྩི་བྱིན་རླབས་བསངས་སྦྱངས་སྔར་བཞིན་དུ་བྱས། ༀ་ཨཱཿཧཱུྃ་གི་བར་བརྗོད། འབར་བའི་རྒྱས། ཕེཾ་ཕེཾ་ཕེཾ། པད་ཀོར་དང་བཅས་རྡོར་ཐལ་ཁ་ཕྱེ་བས། ༀ་བཛྲ་ཨཱ་རལླྀ་ཧོཿཛཿཧཱུྃ་བྃ་ཧོཿབཛྲ་ཌཱ་ཀི་ནི་ས་མ་ཡ་སྟྭཾ་དྲི་ཤྱ་ཧོ། ལན་གསུམ། ན་མོ་རཏྣ་གུ་རུ་ཨི་དཾ་བ་ལིདྟ་ཁ་ཁ་ཁཱ་ཧི་ཁཱ་ཧི། ལན་གསུམ། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། བཀའ་གྲུབ་ཐོབ་བརྒྱུད་པའི་དཔལ་ལྡན་བླ་མ་དམ་པ་རྣམས་དང་། རིགས་བརྒྱའི་ཁྱབ་བདག་རྡོ་རྗེ་འཆང་བདུད་ཚོགས་འདུལ་བའི་རྡོ་རྗེ།

[Full Size]

འཁོར་ལོའི་མགོན་པོ་མི་ཕམ་ཆོས་གྲུབ་རྒྱ་མཚོ། བཀའ་དྲིན་མཉམ་མེད་ཕྲིན་ལས་ཤིང་རྟ། ཀུན་མཁྱེན་འཇམ་མགོན་ཆོས་ཀྱི་འབྱུང་གནས། གྲུབ་པའི་དབང་ཕྱུག་གཙུག་ལག་དགའ་བ། རྩ་བའི་བླ་མ་ཤྲཱི་ཙིཏྟ་བཛྲ། སྔགས་ཀྱི་རིག་འཛིན་ཤྲཱིའི་མཚན་ཅན། རྡོ་རྗེ་འཛིན་པ་ཆོས་སྐྱོང་རྣམ་རྒྱལ། གྲུབ་པའི་སར་གནས་ནོར་བུ་བསམ་འཕེལ་ལ་སོགས་པ་དྲིན་ཅན་རྩ་བ་དང་བརྒྱུད་པར་བཅས་པའི་བླ་མ་རྣམས་ཀྱི་ཞལ་དུ་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ཡི་དམ་བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་རྒྱུད། རྣལ་འབྱོར་ཆེན་པོ་བླ་ན་མེད་པའི་རྒྱུད། རྒྱུད་སྡེ་ཆེན་པོ་བཞི་དང་འབྲེལ་བའི་སངས་རྒྱས་དང་བྱང་ཆུབ་སེམས་དཔའ་དུས་གསུམ་གྱི་རྒྱལ་བ་སྲས་དང་བཅས་པ། དཔའ་བོ་དང་མཁའ་འགྲོ་མ་རྣམས་ཀྱི་ཞལ་དུ་ཨི་དཾ་བ་ལིདྟ་ཁ་ཁ་ཁཱ་ཧི་ཁཱ་ཧི། དཔལ་ཡེ་ཤེས་ཀྱི་མགོན་པོ། རྡོ་རྗེ་བེར་ནག་པོ་ཅན། ལས་ཀྱི་མགོན་པོ། འཇིག་རྟེན་གྱི་མགོན་པོ། རང་བྱུང་སྲིད་པའི་རྒྱལ་མོ། ཞིང་སྐྱོང་ཀུན་དགའ་གཞོན་ནུ། སྐྱེས་བུ་རྡོ་རྗེ་ལེགས་པ་ལ་སོགས་པ་ཆོས་སྐྱོང་བའི་སྲུང་མ་དམ་ཅན་རྒྱ་མཚོ་འཁོར་དང་བཅས་པ་རྣམས་ཀྱི་ཞལ་དུ་ཨི་དཾ་བ་ལིདྟ་ཁ་ཁ་ཁཱ་ཧི་ཁཱ་ཧི། དེ་ལྟར་སྐུ་གསུང་ཐུགས་ཟག་མེད་བདེ་བ་ཆེན་པོའི་མཆོད་པས་མཉེས་ནས་མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་སྩོལ་བ་དང་། གཞན་ཡང་རྐྱེན་ཕྱི་ནང་གི་བར་ཆད་ཐམས་ཅད་ཉེ་བར་ཞི་ནས་ཕྲིན་ལས་རྣམ་པ་བཞི་བསྒྲུབ་པའི་སྟོང་གྲོགས་མཛད་དུ་གསོལ། ཅེས་པས་འབུལ།

[Full Size]

དེ་ནས་ཕྱོགས་སྐྱོང་དང་ཞིང་སྐྱོང་རྣམས་ལ་གཏོར་མ་འབུལ་བ་ནི། ༀ་ཁ་ཁ་ཁཱ་ཧི་སོགས་ལན་བཞི་དང་། ༀ་ཧྲིཾ་ཧྲིཾ་ཧཾ་ཧཾ་ཧེ་ཧེ་ཧི་ཧི་ཕེཾ་ཕེཾ། ལན་གསུམ་གྱིས་ལས་ཀྱི་མཁའ་འགྲོ་རྣམས་ལ་འབུལ། ཧཱུྃ། གང་དག་བླ་མེད་དཀྱིལ་འཁོར་སོགས་ནས། ཕྲིན་ལས་ཐོགས་མེད་བསྒྲུབ་པར་མཛོད། །ཅེས་བརྗོད་དེ་དབུལ་བར་བྱའོ། །དེ་ནས་སྒྲུབ་པོ་རྣམས་ཚོགས་ལ་རོལ་པ་ནི། ལས་ཀྱི་རྡོ་རྗེས་ཐབས་ཀྱི་རྫས་གཡས་དང་། ཤེས་རབ་ཀྱི་རྫས་གཡོན་དུ་འཛིན་བཞིན་པས། ཀྱེ། ལོངས་སྤྱོད་འདོད་ཡོན་བསམ་མི་ཁྱབ། །བདེ་སྟོང་ཚོགས་ཀྱི་འཁོར་ལོར་རོལ། །ལེན་པ་པོས། ཧོཿབླ་ན་མེད་པའི་དམ་ཚིག་རྫས། །ཆོས་ཀུན་མཉམ་པ་ཉིད་དེར་འདུད། །ཨ་ཧོ་མ་ཧཱ་སུ་ཁ། ཞེས་བརྗོད་ནས་འདུ་ཤེས་གསུམ་དང་ལྡན་པའི་ངང་ནས་རོལ་པར་བྱའོ། །དེ་ནས་ཕུད་ལྷག་རྣམས་ཕྱོགས་གཅིག་པར་བསྡུས་ལ་བདུད་རྩི་བྲན། ཨ་ཀཱ་རོས་བྱིན་གྱིས་བརླབས་ལ། ཐོད་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཕུད་ལྷག་བཤལ་ཆུའི་གཏོར་མ་རྒྱ་ཆེར་འཕྲོ་ཞིང་ཟད་མེད་ཅིར་ཡང་འཆར་བར་གྱུར། སྔོན་ཚེ་དཔལ་ཆེན་པོའི་སྤྱན་སྔར་འདུད་ཅིང་ཕྲིན་ལས་བསྒྲུབ་པར་ཁས་བླངས་པའི་ལས་ཀྱི་མཁའ་འགྲོ། འཇིག་རྟེན་མཁའ་འགྲོ། ཤ་ཟ་མཁའ་འགྲོ། མཁའ་འགྲོ་ཕོ་ཉའི་ཚོགས་རྣམས་ལ་འབུལ་བར་བགྱིའོ། །ཚིམ་ཞིང་དགྱེས་པར་བཞེས་ལ་དམ་ཚིག་ཅན་གྱི་རྣལ་འབྱོར་པ་སྐྱོང་བ་དང་། ཉམས་པ་ཅན་རྣམས་ཚར་གཅོད་རྗེས་སུ་འཛིན་ཅིང་། སངས་རྒྱས་ཀྱི་བསྟན་པ་བསྲུང་ཞིང་ཅི་ལྟར་བཅོལ་བའི་ཕྲིན་ལས་མྱུར་དུ་བསྒྲུབ་པར་མཛོད་ཅིག །ཨུ་ཙྪིཥྚ་བ་ལིངྟ་བྷ་ཀྵ་བྷ་ཀྵ་སི་སྭཱ་ཧཱ། ཅེས་ཕྱི་རོལ་དུ་དོར་ལ། བཤལ་ཆུ་ཤིན་ཏུ་ལྷག་

[Full Size]

མ་ལ་དབང་བ་རྣམས་ལ་སྦྱིན་ནོ། །དེ་ནས་རྗེས་ཀྱི་བྱ་བ་ནི། མཆོད་པ་རྣམས་གསོ་བྲན་ལེགས་པར་བྱ་བ་ལ། གོང་ལྟར་མཆོད་པ་བྱིན་རླབས་རྣམས་བྱ་ཞིང་། ཉེར་སྤྱོད་རྣམས་དང་འདོད་ཡོན་ལྔའི་མཆོད་པའི་བར་ཕུལ་ནས་བསྟོད་པ་ནི། ཨེ་མ། དཔལ་ལྡན་དེ་བཞིན་གཤེགས་ཀུན་ཐུགས་རྗེའི་རང་བཞིན་མཐའ་མི་མངོན། །སྲིད་དང་ཞི་བའི་འཆིང་བ་གྲོལ་མཛད་བརྩེ་ཆེན་ཉི་མ་ཡིས། །མྱ་ངན་འདས་པའི་ལམ་རབ་སྟོན་ཕྱིར་འགྲོ་བློའི་དགའ་ཚལ་དུ། །བྱང་ཆུབ་མྱུ་གུ་སྐྱེད་བྱེད་འགྲོ་བའི་དེད་དཔོན་ཁྱོད་ཕྱག་འཚལ། །ཅེས་བསྟོད་ལ། དཀྱིལ་འཁོར་ལྷ་ཚོགས་བསྒྲུབ་པ་ལ། །དུག་གསུམ་དབང་གིས་ནོངས་པའི་ཚོགས། །ཉེས་བར་གྱུར་བ་མཐོལ་ཞིང་བཤགས། །མི་སྒྲིབ་ཚངས་པའི་དངོས་གྲུབ་སྩོལ། །ༀ་བཛྲ་ས་ཏྭ་ས་མ་ཡ་སོགས་ཡིག་བརྒྱ་བརྗོད་ལ། བཟོད་བར་གསོལ་ནས་ལྷག་ཆད་བསྐང་། དེ་ནས་བྱིན་རླབས་དབང་བཞི་ལེན་པ་ནི། ཕ་གཅིག་གྲུབ་ཐོབ་ཆེན་པོ། །སྐྱབས་གཅིག་ཧེ་རུ་ཀ་དཔལ། །སངས་རྒྱས་ལག་བཅང་གཏོད་པའི། །ཡེ་ཤེས་སྐྱེ་བར་བྱིན་རློབས། །ཅེས་མོས་གུས་རྩེ་གཅིག་པའི་ངང་ནས་ལན་གསུམ་བསྐྱར་ནས་བརྗོད་ལ། ཀརྨ་པ་མཁྱེན་ནོ། །ཞེས་ཅི་ནུས་སུ་བཟླས་ལ་དྲན་པ་ཡེངས་མེད་དུ་མདུན་བསྐྱེད་བླ་མའི་དཀྱིལ་འཁོར་ལ་སེམས་འཛིན་བཞག་ལ། གསལ་གདབ་པ་ནི། ༀ། ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔར་བདག་སྒྲུབས་ཤིག །དེ་ནས་མདུན་བསྐྱེད་ཡས་ནས་མར་དང་། མས་ནས་ཡར་འོད་དུ་ཞུ་སྟེ་དབུས་ཀྱི་བླ་མ་སངས་རྒྱས་ཀུན་འདུས་ཀརྨ་པའི་སྐུ་ལ་ཐིམ་པར་བསྒོམས་ལ་འོད་ཟེར་གྱི་དབང་བླང་བ་ནི། དཔལ་ལྡན་རྩ་བའི་བླ་མའི་རིན་པོ་ཆེ། །དཀོན་

[Full Size]

མཆོག་ཀུན་འདུས་ངོ་བོ་ཀརྨ་པའི། །དཔྲལ་བའི་ༀ་ལས་འོད་ཟེར་དཀར་པོ་འཕྲོས། །རང་གི་སྨིན་མཚམས་ཐིམ་པས་སྤྱི་བོ་གང་། །བུམ་དབང་ཐོབ་ཅིང་ལུས་ཀྱི་སྒྲིབ་པ་བྱང་། །སྣང་སྟོང་ལྷ་སྐུའི་བསྐྱེད་རིམ་བསྒོམ་པར་དབང་། །སྤྲུལ་སྐུ་འགྲུབ་པའི་སྐལ་བ་ལྡན་པར་བྱས། །མགྲིན་པའི་ཨཱཿལས་འོད་ཟེར་དམར་པོ་འཕྲོས། །རང་གི་ཞལ་དུ་ཐིམ་པས་མགྲིན་པ་གང་། །གསུང་གི་དབང་ཐོབ་ངག་གི་ཉེས་ལྟུང་བྱང་། །རྩ་རླུང་ཐིག་ལེའི་རྣལ་འབྱོར་བསྒོམ་པར་དབང་། །ལོངས་སྤྱོད་རྫོགས་སྐུ་འགྲུབ་པའི་སྐལ་ལྡན་གྱུར། །ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས། །རང་གི་ཡིད་ལ་ཐིམ་པས་སྙིང་ག་གང་། །ཐུགས་ཀྱི་དབང་ཐོབ་སེམས་ཀྱི་ཉོན་མོངས་བྱང་། །དགའ་བཞི་ཡེ་ཤེས་སྙོམས་འཇུག་བསྒོམ་པར་དབང་། །སེམས་ཉིད་ཆོས་སྐུར་འགྲུབ་པའི་སྐལ་ལྡན་གྱུར། །སླར་ཡང་གསང་གསུམ་འོད་ཟེར་དཀར་དམར་མཐིང་། །འཕྲོས་པས་ལུས་ངག་ཡིད་ལ་ཐིམ་པ་ཡིས། །སྒོ་གསུམ་སྒྲིབ་དག་བཞི་པའི་དབང་མཆོག་ཐོབ། །འོད་གསལ་ཕྱག་རྒྱ་ཆེན་པོ་བསྒོམ་པར་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །དེ་ནས་བླ་མ་དགྱེས་པའི་མདངས་དང་བཅས། །འོད་དུ་ལྟེམ་གྱིས་ཞུ་ནས་རང་ལ་ཐིམ། །དབྱེར་མེད་རྡོ་རྗེ་བཞི་ཡི་བྱིན་རླབས་ཞུགས། །སྣང་གྲག་རྟོག་པའི་ཆོས་རྣམས་ཐམས་ཅད་ཀྱང་། །དག་པ་ཡེ་ཤེས་བླ་མའི་དཀྱིལ་འཁོར་ཤར། །དར་གཅིག་ཕྱག་ཆེན་གྱི་ཉམས་ལེན་ངོ་བོ་བསྐྱང་ནས་མཉམ་པར་བཞག །དགེ་བ་བྱང་ཆུབ་ཏུ་བསྔོ་བ་དང་སྨོན་ལམ་གྱི་མཚམས་སྦྱར་བ་ནི། རྒྱལ་ཀུན་རྡོ་རྗེའི་

[Full Size]

གསུང་གི་རང་བཞིན་ཅན། །བདེན་པ་གྲུབ་པ་རྣམས་ལ་ཕྱག་འཚལ་ལོ། །གཅིག་ཆོད་ཟབ་ལམ་བླ་མ་བསྒྲུབ་པ་ཡི། །དགེ་རྩ་མི་ཟད་འདུས་པ་གངྒཱའི་རྒྱུན། །འགྲོ་ཀུན་ཐར་པའི་རྒྱ་མཚོར་འཇུག་པའི་ཕྱིར། །རྣམ་གྲོལ་བྱང་ཆུབ་ཆེན་པོར་བསྔོ་བར་བགྱི། །བདག་གཞན་དུས་གསུམ་སེམས་ཅན་ཐམས་ཅད་པ། །སྐུ་བཞིའི་གོ་འཕང་དམ་པ་ཐོབ་གྱུར་ཅིག །ཅེས་བརྗོད་པར་བྱའོ། །དེ་ནས་མེ་ཏོག་གི་ཆར་ཕྱོགས་ཀུན་ཏུ་འཐོར་ཞིང་ཤིས་པ་བརྗོད་པ་ནི། ཕུན་ཚོགས་དོན་གཉིས་འབྱུང་བའ་ིགནས། །སྐུ་གསུམ་བླ་མའི་བཀྲ་ཤིས་གང་། །དེང་འདིར་ཉི་ལྟར་གསལ་གྱུར་ཏེ། །འགྲོ་བའི་མ་རིག་མུན་སེལ་ཤོག །ཇི་སྙེད་གཟིགས་པའི་སྤྱན་མངའ་བ། །བཀའ་བརྒྱུད་བླ་མའི་བཀྲ་ཤིས་གང་། །དེང་འདིར་ཉ་རྒྱས་ཟླ་ལྟར་འཆར། །རང་བྱུང་ཡེ་ཤེས་གསལ་བྱེད་ཤོག །སྙིང་རྗེའི་དབྱིངས་ལས་མངོན་སྤྱོད་སྐུ། །ཆོས་སྐྱོང་སྲུང་མའི་བཀྲ་ཤིས་གང་། །དེང་འདིར་ཕྲིན་ལས་སྐར་ཚོགས་བཀྲ། །བར་ཆད་མེད་པའི་བཀྲ་ཤིས་ཤོག །སིདྡྷི་ཛ་ཡ་ཛ་ཡ། གཞན་ཡང་བཀྲ་ཤིས་ཅི་རིགས་པར་བྱའོ། །དེ་ལྟར་མཆོག་གི་དཔལ་ལྡན་བླ་མ་རྡོ་རྗེ་ཅན་རྣམས་དཀྱིལ་འཁོར་ཚུལ་དུ་བསྒྲུབས་པ་འདི་ནི། བཀའ་དྲིན་གསུམ་ལྡན་རྡོ་རྗེ་དྲག་པོ་དངོས་ཀྱི་རྒྱལ་ཚབ་ཏུ་མངའ་གསོལ་བ་རིམ་གཉིས་ཟབ་དོན་སྙིང་པོར་མངའ་དབང་བསྒྱུར་བ་བསྟན་པའི་གསལ་བྱེད་དཔལ་དགའ་སྤྲུལ་པའི་སྐུ་ཚེ་དབང་བསྟན་འཛིན་དཔལ་བཟང་པོའི་དགོངས་བཞེད་ཇི་ལྟ་བར་གུ་རུ་རིན་པོ་ཆེའི་མཚན་གྱི་བྱིན་རླབས་ཆ་ཙམ་ཐོབ་པ་སི་ཏུ་པདྨ་ཉིན་བྱེད་དབང་པོས་ས་ཟླའི་དཀར་ཕྱོགས་ཀྱི་དགའ་བ་གསུམ་བའི་ཚེས་ལ་བཀོད་བའི་དགེ་བས་འགྲོ་ཀུན་ཟུང་འཇུག་རྡོ་རྗེ་འཆང་གི་གོ་འཕང་ཐོབ་བའི་རྒྱུར་བསྔོའོ། །མདྒ་ལཾ་ཀུརྦནྟུ།། །།

བླ་མའི་རྣལ་འབྱོར་གྲུབ་གཉིས་མཆོག་སྩོལ།

[Full Size]

༈ བླ་མའི་རྣལ་འབྱོར་གྲུབ་གཉིས་མཆོག་སྩོལ་ཞེས་བྱ་བ་བཞུགས། ན་མོ་གུ་རུ་ཝེ། བྱིན་རླབས་དང་དངོས་གྲུབ་ཐམས་ཅད་ཀྱི་འབྱུང་གནས་བླ་མའི་རྣལ་འབྱོར་ཟབ་མོའི་ཉེ་ལམ་འདི་ལྟར་ཚིག་དོན་ཡ་མ་བྲལ་བར་ཉམས་སུ་ལེན་པར་བྱ་སྟེ། དེའང་དང་པོ་སྐྱབས་སེམས་ནི། ཕྱོགས་བཅུ་དུས་བཞིའི་མཆོག་གསུམ་རྩ་བ་གསུམ། །གཅིག་བསྡུས་བླ་མ་རྡོ་རྗེ་འཛིན་རྣམས་ལ། །སྐྱབས་སུ་མཆིའོ་མཁའ་མཉམ་འགྲོ་བ་ཀུན། །བླ་མ་སངས་རྒྱས་གོ་འཕང་མྱུར་ཐོབ་ཤོག །ལན་གསུམ་དང་། གཉིས་པ་བསྐྱེད་པའི་རིམ་པ། ཕྱི་སྣོད་ནང་བཅུད་རང་ལུས་གཟུང་འཛིན་གྱི། །ཨ་འཐས་སྤྲོས་པ་ཀུན་བྲལ་གཉུག་མའི་ངང་། །རང་སྣང་རྣམ་དག་འོག་མིན་ཆོས་ཀྱི་དབྱིངས། །ཐར་པ་ཆེན་པོའི་རྒྱན་བཀོད་ཚད་མེད་པའི། །མདུན་མཁར་དབུས་སུ་སངས་རྒྱས་ཀུན་འདུས་པ། །འཇིག་རྟེན་དབང་ཕྱུག་ཐེག་མཆོག་རྡོ་རྗེ་འཆང་། །ཕྱག་གཉིས་མཆོག་སྦྱིན་ཆོས་འཆད་པད་དཀར་འཛིན། །ཞྭ་ནག་མཐོང་གྲོལ་གསོལ་ཞིང་ལྷམ་མེར་བཞུགས། །གཡས་སུ་འབྲི་ཁུང་ཆོས་ཉིད་ནོར་བུའི་དཔལ། །སྒོམ་ཞྭ་གསོལ་ཞིང་རབ་བྱུང་ཆ་ལུགས་ཅན། །གཡོན་ཏུ་བྱམས་མགོན་རྣམ་འཕྲུལ་སི་ཏུ་ུཔ། །པདྨ་ཉིན་བྱེད་ཞྭ་དམར་གསེར་མདངས་གསོལ། །མདུན་དུ་དཔལ་ལྡན་དཔའ་བོ་སྔགས་འཆང་ཆས། །པད་ཞུ་གསོལ་ཞིང་རྡོ་རྗེ་ཐོད་ཆང་བསྣམས། །གཙོ་བོའི་ཕྱོགས་བཞིར་རིག་པ་འཛིན་དབང་པོ། །རྡོ་རྗེ་དྲག་པོའི་སྒྱུ་འཕྲུལ་ཆོས་ཉི་མ། །ཀརྨ་ཆགས་མེད་མཆོག་སྣང་བསྟན་ཕྲིན་ཞབས། །མ་ཧཱ་སུ་ཁའི་རྣམ་པར་རོལ་པ་དང་། །ཡེ་ཤེས་ཉི་མའི་སྡེ་སོགས་སྟོན་

[Full Size]

འཁོར་རྣམས། །རང་རྟགས་རིགས་ཀྱི་ཅོད་པན་གསོལ་བཞིན་པར། །མཚན་དཔེའི་ཆ་རྫོགས་ཆོས་གོས་རྣམ་གསུམ་བཀླུབས། །ཕྱག་གཉིས་མཉམ་བཞག་ཞབས་གཉིས་སྐྱིལ་མོ་ཀྲུང་། །སེང་ཁྲི་པདྨ་ཟླ་བའི་གདན་ལ་བཞུགས། །རྩ་གསུམ་ལྷ་ཚོགས་སྤྲིན་ལྟར་གཏིབ་དབུས་གསལ། །དྲན་ཙམ་ཉིད་ལ་ཟག་མེད་བདེ་ཆེན་བསྐྱེད། །གཤེགས་བཞུད་མི་མངའ་ཆུ་མཚོར་ཟླ་གཟུགས་བཞིན། །བླ་མའི་དཀྱིལ་འཁོར་མངོན་སུམ་གསལ་བར་གྱུར། །གསུམ་པ་ཡན་ལག་བདུན་འབུལ་པ་ནི། ན་མོ། བདག་ལུས་ཞིང་རྡུལ་གྲངས་མཉམ་ལུས་སྤྲུལ་ནས། །ཡོན་ཏན་བསྔགས་བརྗོད་སྒོ་གསུམ་གུས་ཕྱག་འཚལ། །ལུས་དང་ལོངས་སྤྱོད་དུས་གསུམ་དགེ་བ་སོགས། །ཕྱི་ནང་མཆོད་སྤྲིན་རྒྱ་མཚོ་བློས་སྤྲུལ་འབུལ། །ཐོག་མེད་དུས་ནས་ཉོན་མོངས་དབང་གྱུར་པས། །སྒོ་གསུམ་ནོངས་པའི་ལས་ཀུན་མཐོལ་ཞིང་བཤགས། །རྒྱལ་བ་སྲས་དང་བཅས་པའི་རྣམ་ཐར་དང་། །གཞན་ཡང་འགྲོ་ཀུན་དགེ་ལ་རྗེས་ཡི་རངས། །བསྟན་པ་རིས་མེད་སྐྱོང་བའི་གང་ཟག་རྣམས། །གདུལ་བྱའི་ཁམས་དབང་འཚམས་པའི་ཆོས་སྟོན་བསྐུལ། །བདག་སོགས་སྙིགས་མའི་བསྟན་འགྲོར་རྗེས་དགོངས་ལ། །འཕོ་མེད་རྟག་པར་འཚོ་ཞེས་བཞུགས་གསོལ་འདེབས། །རང་གཞན་ཟག་བཅས་ཟག་མེད་དགེ་ཚོགས་ཀུན། །བླ་མེད་བྱང་ཆུབ་གོ་འཕང་ཐོབ་ཕྱིར་བསྔོ། །བཞི་པ་མོས་གུས་གསོལ་འདེབས་ནི།

[Full Size]

རྒྱལ་བ་ཀུན་གྱི་ཐུགས་རྗེ་གཅིག་བསྡུས་པ། །ཐེག་མཆོག་རྡོ་རྗེའི་ཞབས་ལ་གསོལ་བ་འདེབས། །ནཱ་གཱ་ཱརྫུ་ུན་འཇིག་རྟེན་གསུམ་མགོན་པོའི། །བརྒྱུད་འཛིན་ཆོས་ཉིད་ནོར་བུར་གསོལ་བ་འདེབས། །དཔལ་ལྡན་སངས་རྒྱས་མཚོ་སྐྱེས་རྡོ་རྗེ་ཡི། །རྣམ་རོལ་ཉིན་བྱེད་དབང་པོར་གསོལ་བ་འདེབས། །ཨོ་རྒྱན་ལུང་ཟིན་གསང་སྔགས་སྟོན་པའི་བདག །གཙུག་ལག་ཆོས་ཀྱི་རྒྱལ་པོར་གསོལ་བ་འདེབས། །ལྔ་བདོའི་དུས་འདིར་ཐུགས་རྗེ་གཞན་ལས་མྱུར། །ཐུགས་ཀྱི་རྡོ་རྗེ་གཉིས་པར་གསོལ་བ་འདེབས། །བཀའ་གཏེར་ཟབ་ཆོས་ཡོངས་ཀྱི་མངའ་བདག་མཆོག །ཀརྨ་ཤཱ་ས་དྷ་རར་གསོལ་བ་འདེབས། །རང་རིག་ཡེ་ཤེས་མངོན་གྱུར་རྟོགས་པའི་བདག །བདེ་ཆེན་མཆོག་གི་སྤྲུལ་སྐུར་གསོལ་བ་འདེབས། །སྒྲུབ་བརྒྱུད་ངེས་གསང་བསྟན་པའི་ཕྲིན་ལས་པ། །ཛྙ་ན་སཱུཪྱ་གར་ལ་གསོལ་བ་འདེབས། །སྐྱབས་གནས་དཀོན་མཆོག་ཀུན་འདུས་ངོ་བོ་ཉིད། །དྲིན་ཆེན་རྩ་བ་བརྒྱུད་པའི་བླ་མའི་ཚོགས། །དུས་གསུམ་སངས་རྒྱས་སྲས་སློབ་བཅས་རྣམས་དང་། དབྱེར་མེད་ངེས་པས་གསོལ་བ་བཏབ་པའི་མཐུས། །སྐལ་ལྡན་མོས་པའི་བུ་ུལ་བྱིན་གྱིས་རློབས། །ཐུགས་རྗེས་སྨིན་གྲོལ་དངོས་གྲུས་བསྩལ་དུ་གསོལ། །ལྔ་པ་མཚན་སྔགས་བཟླ་བ། ཀརྨ་པ་མཁྱེན། བརྒྱ་རྩ་བརྒྱད་བཟླ། དེ་ནས། ༀ་ཨཱཿཡཱ་ན་པར་མ་བཛྲ་ཧཱུྃ། སྔགས་ཤམ། མ་ཧཱ་མུ་དྲ་སིདྡྷི་ཧཱུྃ། དྲུག་པ་འདོད་

[Full Size]

གསོལ། ཕན་བདེའི་འབྱུང་གནས་ཐུབ་བསྟན་དམ་པའི་ཆོས། །ཐོས་བསམ་སྒོམ་དང་སྒྲུབ་པའི་རྒྱལ་མཚན་འཛིན། །ཐར་པའི་དེད་དཔོན་བསྟན་འཛིན་དམ་པ་རྣམས། །ཞབས་པད་བརྟན་ཅིང་རྣམ་བཞིའི་ཕྲིན་ལས་རྒྱས། །རིས་མེད་དགེ་འདུན་འདུས་པའི་ཚོགས་རྣམས་ཀྱང་། །ཆོས་སྤྱོད་བཅུ་དང་འཁོར་ལོ་གཉིས་ལྡན་ཅིང་། །རྣལ་འབྱོར་བདག་ཅག་བྱང་ཆུབ་བསྒྲུབ་པ་ལ། །འགལ་རྐྱེན་ཞི་ཞིང་མཐུན་རྐྱེན་ཕུན་སུམ་ཚོགས། །སྤངས་དང་རྟོགས་པའི་ཡོན་ཏན་མཐའ་རུ་ཕྱིན། །གཞན་ཕན་ཚད་མེད་འགྲུབ་པར་བྱིན་གྱིས་རློབས། །དེ་མ་ཐོབ་ཀྱི་ཚེ་རབས་ཐམས་ཅད་དུ། །མ་ནོར་ལམ་སྟོན་བླ་མས་རྗེས་འཛིན་ཅིང་། །ཞབས་ཏོག་དགུ་ཕྲུགས་མཆོད་པས་མཉེས་བྱས་ཏེ། །ཚེ་རབས་ཀུན་ཏུ་འབྲལ་བ་མེད་གྱུར་ཅིག །མཁའ་ཁྱབ་མ་གྱུར་རིགས་དྲུག་སེམས་ཅན་རྣམས། །བྱང་ཆུབ་གོ་འཕང་མྱུར་དུ་ཐོབ་པར་ཤོག །ཅེས་དང་། བདུན་པ་བྱིན་རླབས་དབང་བཞི་ལེན་པ་ནི། རྒྱལ་ཀུན་འདུས་པ་བླ་མའི་དཀྱིལ་འཁོར་གྱི། །གསང་གསུམ་ཡེ་ཤེས་རྡོ་རྗེས་བྱིན་བརླབས་ནས། །དབང་བཞི་རྫོགས་པར་དེང་འདིར་བསྐུར་དུ་གསོལ། །ལྷན་སྐྱེས་བདེ་བས་ལུས་ལ་བྱིན་གྱིས་རློབས། །རྡོ་རྗེའི་བཟླས་པས་ངག་ལ་བྱིན་གྱིས་རློབས། །ཕྱག་རྒྱ་ཆེན་པོས་ཡིད་ལ་བྱིན་གྱིས་རློབས། །རྩེ་གཅིག་སྙིང་ནས་མོས་གུས་དྲག་པོ་ཡིས། །གསོལ་བ་བཏབ་པས་འཁོར་རྣམས་རིམ་པ་བཞིན། །འོད་དུ་ཞུ་ནས་གཙོ་བོའི་སྐུ་ལ་ཐིམ། །དེ་ཉིད་དཀོན་མཆོག་

[Full Size]

ཀུན་འདུས་ངོ་བོར་གསལ། །དཔལ་ལྡན་རིགས་ཀུན་ཁྱབ་བདག་ཀརྨ་པ། །གང་དེའི་སྤྱི་མགྲིན་ཐུགས་ཀ་ལྟེ་བ་ནས། །འོད་ཟེར་འཇའ་ཚོན་དཀར་དམར་མཐིང་སེར་རྣམས། །འཕྲོས་ནས་རང་གི་གནས་བཞི་ལ་ཐིམ་པས། །སྐུ་གསུང་ཐུགས་དང་ཡེ་ཤེས་རྡོ་རྗེ་ཡི། །དབང་བསྐུར་བྱིན་རླབས་རྒྱུད་བཞི་སྨིན་པར་གྱུར། །ཀཱ་ཡ་ཝཱ་ཀ་ཙིཏྟ་ཛྙ་ན་བཛྲ་སིདྡྷི་ཕ་ལ་ཧཱུྃ། ལན་གསུམ། ཆོས་ཀྱི་སྐུ་ལ་འགྱུར་བ་མི་མངའ་ཡང་། །གཟུགས་སྐུ་བདག་གི་ལས་ཉོན་སྒྲིབ་སྦྱང་ཕྱིར། །ཐུགས་རྗེ་ཆེན་པོས་དབྱིངས་ནས་དགོངས་སུ་གསོལ། །དགྱེས་པ་དང་བཅས་འོད་ཀྱི་རྣམ་པར་ཞུ། །ཆུ་ལ་ཆུ་བཞག་ཇི་བཞིན་རང་སེམས་དང་། །དབྱེར་མེད་མ་བཅོས་ངང་དུ་མཉམ་པར་བཞག །ཅེས་ཅི་གནས་སུ་སེམས་ཀྱི་ངོ་བོ་བསྐྱང་བ་བྱའོ། །བརྒྱད་པ་རྗེས་ཀྱི་བསྔོ་སྨོན་བྱ་བ་ནི། དགེ་བ་འདིས་མཚོན་དུས་གསུམ་བསགས་ཡོད་ཀྱི། །ཟག་བཅས་ཟག་མེད་དགེ་ཚོགས་ཇི་སྙེད་པ། །མཐའ་ཡས་འགྲོ་རྣམས་བླ་མེད་བྱང་ཆུབ་ཀྱི། །གོ་འཕང་དམ་པ་མྱུར་དུ་ཐོབ་ཕྱིར་བསྔོ། །ཅེས་སི་ཏུ་པདྨའི་མིང་ཅན་གྱིས། ལུགས་ཟུང་མངོན་པར་མཐོ་བ་རག་ཤུལ་བེ་ཧུ་དཔལ་ལྡན་ཚེ་བརྟན་གྱི་བཞེད་ངོར་ཆོ་འཕྲུལ་ཟླ་བའི་ཚེས་བཅོ་ལྔ་བཟང་པོར་བཀོད་པ་སརྦ་ཐཱ་མདྒ་ལམ།། །།

བླ་མའི་རྣལ་འབྱོར་བདེ་ཆེན་ལམ་གྱི་སྣང་བ་རབ་གསལ།

[Full Size]

༈ བླ་མའི་རྣལ་འབྱོར་བདེ་ཆེན་ལམ་གྱི་སྣང་བ་རབ་གསལ་བཞུགས་སོ། །མདུན་གྱི་ནམ་མཁར་པད་ཟླའི་གདན་གྱི་སྟེང་། །དུས་གསུམ་རྒྱལ་བའི་ཐུགས་རྗེའི་སྒྱུ་འཕྲུལ་ལས། །ཡོངས་གྲུབ་སྐྱེ་དགུའི་འདྲེན་པ་ཆེན་པོ་པ། །བྱང་ཆུབ་སེམས་དཔའ་ཆོས་གྲུབ་རྒྱ་མཚོ་མཆོག །དབང་གི་མདངས་ལྡན་ཅོད་པན་དབུ་ལ་གསོལ། །ཕྱག་གཉིས་མཉམ་བཞག་འཆི་མེད་ཚེ་བུམ་འཛིན། །སྐུ་ལ་ཆོས་གོས་རྣམ་པ་གསུམ་གྱིས་བཀླུབས། །ཞབས་གཉིས་སེམས་དཔའི་སྐྱིལ་མོ་ཀྲུང་གིས་བཞུགས། །བདེ་བར་གཤེགས་བའི་ཚོགས་ཀུན་སྤྲིན་ལྟར་གཏིབས། །བཀའ་བརྒྱུད་གྲུབ་ཐོབ་རྒྱ་མཚོ་ཆར་ལྟར་བབས། །ཞི་དང་ཁྲོ་བོའི་སྐུར་སྟོན་ཡི་དམ་དང་། །ཌཱ་ཀི་དམ་ཅན་སྲུང་མ་རླུང་ལྟར་འཚུབས། །དེ་མདུན་བདག་དང་བདག་གི་འབྲེལ་ཐོགས་པའི། །ཕ་མར་གྱུར་པའི་འགྲོ་བ་རིགས་དྲུག་ཀུན། །རྩེ་གཅིག་བླ་མ་དཀོན་མཆོག་རྣམ་གསུམ་ལ། །དད་གུས་དྲག་པོས་སྙིང་ནས་ཕྱག་འཚལ་ཞིང་། །མཆོད་པའི་སྤྲིན་ཚོགས་ནམ་མཁའ་གང་བར་འབུལ། །དམ་ཚིག་རྩ་ལྟུང་ཐམས་ཅད་མཐོལ་ཞིང་བཤགས། །གཞན་ཕན་སྤྱོད་པ་དག་ལ་རྗེས་ཡི་རང་། །སེམས་ཅན་དོན་དུ་བསྐལ་མང་བཞུགས་གསོལ་འདེབས། །བདག་སོགས་འགྲོ་ཀུན་ཐར་པའི་ལམ་མཁན་མཆོག །བཀའ་དྲིན་གསུམ་ལྡན་གྲུབ་དབང་བླ་མ་མཁྱེན། །འགྲོ་བའི་མགོན་པོ་མཚུངས་མེད་ཆོས་ཀྱི་རྗེ། །རྒྱལ་བ་མི་ཕམ་ཆོས་གྲུབ་རྒྱ་མཚོ་མཁྱེན། །

[Full Size]

རྗེ་དྲིན་ཅན་རྩ་བའི་བླ་མ་སངས་རྒྱས་ཀུན་འདུས་མཁྱེན་ནོ། །ཞེས་སྙིང་ཐག་པ་ནས་ཅི་ནུས་བརྗོད། ཐབས་མཁས་གང་འདུལ་ཕྲིན་ལས་ཟབ་མོའི་བདག །བརྩེ་ཆེན་ཁྱོད་ཀྱི་ཐུགས་རྗེའི་ཀློང་ཡངས་ནས། །བྱང་ཆུབ་སེམས་ཀྱི་འོད་དཀར་ཡོངས་སུ་འཆར། །གདུལ་བྱའི་མོས་བློའི་ཀུ་མུད་རྣམ་པར་བཀྲ། །གསང་ཆེན་ཐེག་པའི་དམ་ཆོས་སྤྱོད་པ་དང་། །ནམ་ཞིག་སྒྱུ་ལུས་འཕོ་བར་གྱུར་མ་ཐག །བདེ་བ་ཅན་ཞེས་བྱ་བའི་ཞིང་ཁམས་སུ། །པདྨའི་སྙིང་པོར་བརྫུས་ཏེ་སྐྱེ་བར་ཤོག །དེ་མ་ཐག་ཏུ་ཞིང་དེའི་སྟོན་པ་མཆོག །འོད་དཔག་མེད་མགོན་གར་དབང་སྤྲུལ་པའི་སྐུ། །མི་ཕམ་དཔལ་ལྡན་ཆོས་གྲུབ་རྒྱ་མཚོའི་སྡེ། །ཞལ་མཐོང་གསུང་གི་བདུད་རྩི་མྱོང་བར་ཤོག །འཁོར་རྣམས་འོད་ཞུ་གཙོར་ཐིམ་དེ་ཉིད་ཀྱང་། །དགྱེས་པའི་ཚུལ་གྱིས་རང་གི་ལུས་ལ་ཐིམ། །དབང་བཞི་ཐོབ་ནས་སྐུ་བཞི་མངོན་དུ་བྱས། །མཚོ་ལ་ཆར་བབས་ལྟ་བུར་གཉིས་མེད་གྱུར། །དར་གཅིག་ལྟ་བའི་ངང་ལ་མཉམ་པར་བཞག་ནས་ཉམས་ལེན་ལ་གནས། སྐྱེ་དང་ཚེ་རབས་བརྒྱུད་པ་ཐམས་ཅད་དུ། །རྩ་བའི་བླ་མ་མི་འབྲལ་མཆོད་པར་ཤོག །དགེ་འདིས་འགྲོ་ཀུན་མྱང་འདས་སར་བཀོད་ནས། །མགོན་པོ་ཁྱོད་ཀྱི་གོ་འཕང་ཐོབ་གྱུར་ཅིག །ཅེས་རྒྱལ་མཆོག་བཅུ་གསུམ་བའི་ལུང་གིས་རས་སྤྲུལ་ཤེས་རབ་རྒྱ་མཚོ་ཞེས་པ་གང་ནས་ལྷ་རྫས་དང་བཅས་བསྐུལ་བར་བརྟེན། ས་བརྒྱད་སེམས་དཔའ་སྲིད་པའི་ལྷ་ཆེན་གྱི་བསྟི་གནས་དང་མི་རིང་བ་གང་དེའི་འཁོར་དུ་གཏོགས་པ་གང་བ་བཟང་པོའི་རི་

[Full Size]

ཞོལ་གྱི་ངོགས་སུ་ཀརྨ་སི་ཏུས་བྲིས་པ་ཀུན་ཏུ་བཀྲ་ཤིས་ཀྱི་དཔལ་ལ་སྤྱོད་པར་གྱུར་ཅིག །མདྒ་ལམ།། །།

སྲུང་འཁོར།

[Full Size]

སྔོན་འགྲོ་གཏོར་མ་ནང་མཆོད་ལྟར་བྱིན་གྱིས་བརླབས་ལ། ༀ་ཁ་ཁ་ཁཱ་ཧི་ཞེས་སོགས་ལན་བཞི་བརྗོད། ཞིང་སྐྱོང་བརྒྱད་དང་མཁའ་འགྲོ་སོ་གཉིས་སོགས། །ཞེས་སོགས་འོག་ནས་འབྱུང་བ་བཞིན། ལས་བཞིའི་ཕྲིན་ལས་མཛོད་བར་དང་། གཞན་ཡང་དཀྱིལ་འཁོར་ལྟ་བར་མི་དབང་པའི། །བདུད་བགེགས་ལོག་འདྲེན་འབྱུང་པོ་ཕྱིར་དེངས་ཤིག་གང་དག་བཀའ་ལས་འདས་ན་ཡེ་ཤེས་ཀྱི། །རྡོ་རྗེས་བརླག་པར་འགྱུར་བར་གདོན་མི་ཟ། །སུམྦྷ་ནི། བརྗོད་ལ། རང་ཉིད་ལྷར་གསལ་ཐུགས་ལས་འོད་ཟེར་འཕྲོས། །རྡོ་རྗེ་འཁོར་ལོ་རིན་ཆེན་པདྨ་དང་། །རྒྱ་གྲམ་འབར་བས་སྟེང་འོག་བར་མེད་པར། །སྲུང་བའི་འཁོར་ལོ་ཡངས་ཤིང་རྒྱ་ཆེས་གཏམས། །ཛྙཱ་ན་པཉྩ་བཛྲ་རཀྵ་རཀྵ་ཧཱུྃ། ཞེས་སྲུང་འཁོར་བསྒོམས་ལ། མདུན་བསྐྱེད་ལ་འཇུག་པར་བྱ།། །།

བླ་མའི་རྣལ་འབྱོར་བྱིན་རླབས་ཆར་འབེབས་བི་ཛ་ཧ་ར།

[Full Size]

བླ་མའི་རྣལ་འབྱོར་བྱིན་རླབས་ཆར་འབེབས་བི་ཛ་ཧ་ར། ན་མོ་གུ་རུ་ཨ་མི་ཏ་བྷ་ཡ། འདིར་སངས་རྒྱས་ཐམས་ཅད་འདུས་བའི་བདག་ཉིད་ཆེན་པོ་དཔལ་ལྡན་བླ་མ་སྒྲུབ་པའི་ཆོ་ག་མཐར་ཆགས་སུ་བརྗོད་པར་བྱ་སྟེ། དེ་ཡང་། ཇི་སྐད་དུ། མཛོད་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས། །ཞེས་སོགས་ཀྱི་དཔེ་ཟླས་དབེན་བའི་ཡོན་ཏན་དུ་མས་མདོ་རྒྱུད་ཀུན་ནས་བསྔགས་བརྗོད་རྒྱ་ཆེར་གསུངས་ཤིས་ངེས་པ་དོན་གྱི་ཡོངས་བཅུད་དུ་ངེས་པའི། དེ་ལ་འདིར་རྟེན་སྐུ་བརྙན་འདྲ་འབག་དངོས་སམ། ཡང་ན་རྗེ་ཞྭ་དམར་པའི་སྐུ་འདྲ་གང་བྱུང་བཤམས་ལ། མདུན་ནུ་མཆོད་པ་

[Full Size]

རྣམ་ལྔ། ནང་མཆོད་དང་གཏོར་མ་ཚོགས་ཀྱི་ཡོ་བྱད་སྣ་ཚོགས་པ། མཎྜལ་སོགས་མཆོད་པ་ཇི་སྙེད་འདུས་པར་བྱས་ཏེ། རང་ཉིད་ཡི་དམ་ལྷ་གང་རུང་བསྐྱེད་ལ། དང་པོ་སྐྱབས་འགྲོ་སེམས་བསྐྱེད་ཡན་ལག་བདུན་པ་ནི། མདུན་གྱི་ནམ་མཁར་དུས་གསུམ་སྐྱབས་ཡུལ་དཀོན་མཆོག་རྒྱ་མཚོ་གསལ་བའི་སྤྱན་སྔར་བདག་སོགས་མ་གྱུར་མཁའ་ཁྱབ་ཀྱི་སེམས་ཅན་ཐམས་ཅད་ཀྱིས་སྒོ་གསུམ་དྭངས་པའི་བློས། སྐྱབས་མཆོག་སྐྱབས་ཀྱི་མགོན་པོ་ཐུགས་རྗེ་ཅན། །བླ་མ་ཡི་དམ་སངས་རྒྱས་ཆོས་དགེ་འདུན། །དཔའ་བོ་མཁའ་འགྲོ་ཆོས་སྐྱོང་ཚོགས་བཅས་ལ། །དེང་བཟུང་བྱང་ཆུབ་བར་དུ་སྐྱབས་སུ་མཆི། །ཅེས་སྐྱབས་སེམས་འདི་དག་ལན་གསུམ་དང་། ཀྱེ་མ། བདག་གིས་འགྲོ་ཕན་ལྷག་བསམ་དྲག་པོ་ཡི། །བྱམས་དང་སྙིང་རྗེའི་གོ་ཆ་ཆེར་བགོས་ནས། །རིགས་དྲུག་འཁོར་བ་དོང་ནས་སྤྲུག་པ་ཡི། །ཚད་མེད་ཐུགས་རྗེས་འགྲོ་དོན་སྐྱོང་བར་ཤོག །དུས་གསུམ་རྒྱལ་ཀུན་འདུས་པ་ཡི། །དཔལ་ལྡན་བླ་མར་སྐྱབས་སུ་མཆི། །བདག་ལུས་ལོངས་སྤྱོད་དངོས་སྣང་སྲིད། །དཔལ་འབྱོར་མ་ལུས་མཆོད་པར་འབུལ། །ལས་ཉོན་སྒྲིབ་པའི་སྨག་རུམ་གྱི། །འཐིབ་པོའི་དབང་གྱུར་ཉེས་ཀུན་བཤགས། །ཆུ་ཟླའི་གར་གྱི་རོལ་པ་བཞིན། །མོས་ངོར་དེར་སྣང་རྗེས་ཡི་རང་། །བླ་མེད་ཡང་དག་སྣང་བ་ཡི། །དམ་ཆོས་ཉིན་བྱེད་ཀུན་གསལ་སྟོན། །ཐེག་ཆེན་བྱང་སེམས་སྤྱོད་པ་ཅན། །མགོན་རྣམས་བསྐལ་བརྒྱར་བཞུགས་

[Full Size]

གསོལ་འདེབས། །རབ་དཀར་དགེ་ཚོགས་ཆུ་རྒྱུན་རྣམས། །ཐར་བའི་རྒྱ་མཚོར་འཇུག་གྱུར་ཅིག །ཅེས་ཡན་ལག་བདུན་པ་འབུལ་ནས་ཚད་མེད་བཞི་བསྒོམ་པ་ནི། འགྲོ་རྣམས་བདེ་ལྡན་སྡུག་བསྔལ་དང་བྲལ་ཞིང་། །དགའ་བདེའི་བཏང་སྙོམས་ཚད་མེད་གནས་གྱུར་ཅིག །ནང་མཆོད་བདུད་རྩི། ༀ་ཨཱཿབིགྷྣཱན་གྱིས་བསངས། སྭ་བྷཱ་ཝས་སྦྱངས་ལ། ཆོས་ཀུན་སྟོང་པའི་ངང་ཉིད་ལས། །ཡྃ་ལས་རླུང་དཀྱིལ་གཞུ་དབྱིབས་ཅན། རྃ་ལས་མེད་དཀྱིལ་ཟུར་གསུམ་པ། །དེ་སྟེང་ཧཱུྃ་གསུམ་སྤྲོས་པ་ལས། །བྷནྡྷ་སྐམ་པོ་བུམ་རིལ་གསུམ། །ལྟག་པ་ནང་བསྟན་དེ་སྟེངས་སུ། །ཨཱཿལས་ཐོད་སྣོད་ཡངས་པ་ནི། །ཕྱི་དཀར་ནང་དམར་དབུས་སུ་མུ། །ཤར་དུ་བི་དང་ལྷོ་རུ་ར། །ནུབ་ཏུ་ཤུ་དང་བྱང་དུ་མ། །བདུད་རྩི་ལྔ་པོ་ཡིག་འབྲུས་མཚན། །དབུས་སུ་ུན་དང་ཤར་ལྷོར་གོ། ལྷོ་ནུབ་ཀུ་དང་ནུབ་བྱང་ད། །བྱང་ཤར་ཧ་སྟེ་ཤ་ལྔའོ། །ཡི་གེ་སོ་སོས་མཚན་པར་གྱུར། །རང་གི་སྣ་བུག་གཡོན་པ་ནས། །ཧཱུྃ་གི་དབྱིབས་ཅན་རླུང་འཕྲོས་པས། །རླུང་གིས་མེ་བསྐྱོད་ཐོད་རྫས་ཁོལ། །མ་དག་དྲི་མ་དག་གཙང་སྦྱངས། །དེ་སྟེང་ༀ་ཨཱཿཧཱུྃ་ཡིག་ལས། །འོད་འཕྲོས་ཡེ་ཤེས་བདུད་རྩི་བཀུག །དམ་ཚིག་བདུད་རྩི་གཉིས་མེད་པར། །དག་པ་ཡེ་ཤེས་བདུད་རྩིར་གྱུར། །ཅེས་བདུད་རྩི་བྱིན་གྱིས་བརླབས་ལ། དེ་ནས་མདུན་གྱི་ནམ་མཁར་བླ་མའི་དཀྱིལ་འཁོར་བསྐྱེད་པ་ནི། སྣང་སྟོང་སྒྱུ་མ་ལྟ་བུའི་ངང་ནས་འདི་ལྟར་བསྒོམ་པར་བྱའོ། །ༀ་ཤུནྱཱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། གཟུང་འཛིན་གྱིས་བསྡུས་བའི་ཆོས་ཐམས་ཅད་དོན་དམ་ཡེ་ཤེས་རྡོ་རྗེའི་དབྱིངས་སུ་བསྒྱུར་ནས། ཕྱི་ནང་སྣང་སྲིད་གཉིས་བསྡུས་དངོས་པོ་རྣམས། །

[Full Size]

སྟོང་ཉིད་ཆེན་པོའི་དབྱིངས་སུ་སྦྱང་བྱས་ནས། །མདུན་གྱི་ནམ་མཁར་རིན་ཆེན་གཞལ་ཡས་ཁང་། །མཚན་ཉིད་ཡོངས་རྫོགས་རྒྱན་དང་བཀོད་པ་རྣམས། །ཞིང་ཁམས་རབ་འབྱམས་ལྷུན་གྲུབ་དེ་དབུས་སུ། །གྱད་དང་སེང་གེ་བརྒྱད་བཏེགས་རིན་ཆེན་ཁྲིར། །དབྱིབས་ལེགས་རྨད་བྱུང་དེ་སྟེང་པདྨ་དཀར། །དྲི་མེད་འདབ་སྟོང་རྒྱས་པ་དེ་སྟེངས་སུ། །རབ་དཀར་ལྷུན་སྡུག་ཟླ་བའི་དཀྱིལ་འཁོར་དབུས། །དུས་གསུམ་སངས་རྒྱས་ཀུན་གྱི་ཕྲིན་ལས་མཛོད། །མི་བཟད་རྒྱན་འཁོར་ལྔ་ཡི་བདག་པོ་སྟེ། །རྡོ་རྗེ་སློབ་དཔོན་ཆེན་པོའི་སྐུར་སྣང་བ། །དཔལ་ལྡན་མི་ཕམ་ཆོས་གྲུབ་རྒྱ་མཚོ་ནི། །ཞལ་གཅིག་ཕྱག་གཉིས་སྐུ་མདོག་དཀར་དམར་མདངས། །ཐབས་ཤེས་དབྱེར་མེད་རྡོ་རྗེ་དྲིལ་བུ་འཛིན། །སྤྱན་གཉིས་ཆོས་ཉིད་འགྱུར་མེད་དོན་ལ་གཟིགས། །དབུ་ལ་མཐོང་གྲོལ་པདྨ་རཱ་གའི་མདོག །ཁྱུང་གཤོག་གསེར་མདངས་རིན་ཆེན་ཕྲ་ཚོམ་ཅན། །རིགས་བདག་པདྨ་གར་དབང་ཚུལ་དུ་གསོལ། །ཆོས་གོས་རྣམ་གསུམ་ཟ་འོག་བེར་ཆེན་བཀླུབས། །ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས། །གནས་གསུམ་ༀ་དཀར་ཨཱཿདམར་ཧཱུྃ་སྔོན་མཚན། །གཞན་ཡང་སྟེང་འོག་ཕྱོགས་མཚམས་ཐམས་ཅད་དུ། །སངས་རྒྱས་བྱང་སེམས་རིག་འཛིན་གྲུབ་ཐོབ་ཚོགས། །ཡི་དམ་དཔའ་བོ་མཁའ་འགྲོ་ཆོས་སྐྱོང་དང་། །ཞིང་སྐྱོང་བསྟན་སྲུང་རྒྱ་མཚོ་མ་ལུས་པ། །དཔག་མེད་

[Full Size]

མཐའ་ཡས་བརྗོད་བྲལ་ཇི་སྙེད་ཚོགས། །བར་མཚམས་མེད་པར་བུ་ཡུག་འཚུབས་བཞིན་བཞུགས། །གཙོ་བོའི་ཐུགས་ཀའི་ཧཱུྃ་ལས་འོད་ཟེར་འཕྲོས། །རྣམ་དག་ཕྱོགས་བཅུའི་ཞིང་དང་འོག་མིན་གནས། །ཁྱད་པར་བདེ་ལྡན་པདྨ་བཀོད་ཞིང་ནས། །རྒྱལ་བ་འོད་སྣང་མཐའ་ཡས་ཐུགས་རྒྱུད་བསྐུལ། །མཆོག་གི་སྤྲུལ་སྐུ་གར་གྱི་དབང་པོ་ལ། །བཀའ་བརྒྱུད་བླ་མ་ཡི་དམ་ལྷ་ཚོགས་དང་། །དཔའ་བོ་ཌཱ་ཀི་ཆོས་སྐྱོང་འཁོར་ཚོགས་བཅས། །ཆར་སྤྲིན་གཏིབས་བཞིན་མདུན་བསྐྱེད་ལྷ་རྣམས་ལ། །གཉིས་མེད་དུ་མ་རོ་གཅིག་ངང་ཉིད་དུ། །དམ་ཚིག་དང་ནི་ཡེ་ཤེས་མཉམ་ཉིད་གྱུར། །གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ཨེ་ཧྱ་ཧི་བཛྲ་ས་མ་ཡ་ཛ་ཛཿཛཿཧཱུྃ་བྃ་ཧོཿསླར་ཡང་ཐུགས་ལས་འོད་ཟེར་དཀར་པོ་འཕྲོས། །རིགས་ལྔ་ཡུམ་ལྔ་ལ་སོགས་དབང་ལྷའི་ཚོགས། །རང་བཞིན་གནས་ནས་སྤྱན་དྲངས་མདུན་མཁར་བཞུགས། །དེ་བཞིན་གཤེགས་ཀུན་དབང་གི་དགོངས་པ་བཛད། །གཤེགས་མ་རྣམས་ཀྱིས་ཤིས་བརྗོད་མེ་ཏོག་འཐོར། །རིན་ཆེན་བུམ་པ་བདུད་རྩིས་ལེགས་གཏམས་པས། །དབང་བསྐུར་སྐུ་གང་ཆུ་ཞབས་ཡར་ལུད་ནས། །རིགས་བདག་པདྨ་གར་དབང་དབུ་བརྒྱན་གྱུར། །ཅེས་དབང་བསྐུར་རྒྱས་གདབ་དང་། དེ་ནས་མཆོད་བ་འབུལ་བའི་རིམ་པ་ནི། མཆོད་པ་རྣམས་ནང་མཆོད་བདུད་རྩིས་བསངས་ལ། ༀ་ཨཱཿབིགྷྣཱན་སོགས་དང་། སྭ་བྷཱ་ཝས་སྦྱངས། སྟོང་པའི་ངང་ལས་རིན་པོ་ཆེའི། །སྣོད་མཆོག་ཡིད་འོང་དུ་མའི་ནང་། །

[Full Size]

མཆོད་ཡོན་ཞབས་བསིལ་མེ་ཏོག་སྤོས། །སྣང་གསལ་དྲི་ཆབ་ཞལ་ཟས་དང་། །སྒྲ་སྙན་ལ་སོགས་གཞན་ཡང་ནི། །ཕྱི་ནང་མཆོད་རྫས་དཔག་མེད་ཚོགས། །ཟག་མེད་ཀུན་བཟང་མཆོད་པའི་སྤྲིན། །བདེ་ཆེན་ཡེ་ཤེས་སྐྱེད་བྱེད་གྱུར། །ༀ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱདྱཾ། པུཥྤེ། དྷཱུ་པེ། ཨཱ་ལོ་ཀེགནྡྷེ། ནི་ཝི་དྱ། ཤབྡ། སོགས་དང་། རཱུ་པ། ཤབྡ། གནྡྷེ། རཱ་ཱས། སྤཪྴེ། བི་ཤྭ་སྥ་ར་ཎ་ཨཱ་ཧཱུྃ་གིས་བྱིན་བརླབས་ནས། རབ་ཏུ་དག་གཙང་དྲི་མེད་གདུང་སེལ་བའི། །རྡོ་རྗེའི་མཆོད་ཡོན་འབུལ་གྱི་བདག་བྱིན་རློབས། །ༀ་ཤྲཱི་མཱན་གུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། དྭངས་ཤིང་སིམ་པའི་རྒྱུར་གྱུར་དལ་འབབས་ཀྱི། །ཞབས་བསིལ་ཡིད་འོང་འབུལ་གྱི་བདག་བྱིན་རློབས། །སྔགས་ཐོག་མཐའ་འདྲ་བ། པཱ་དྱཾ། སྐབས་གསུམ་མེ་ཏོག་མནྡཱ་ར་བ་སོགས། །ཆུ་སྐྱེས་ཐང་སྐྱེས་འབུལ་གྱི་བདག་བྱིན་རློབས། །པུཥྦེ། དྲི་བསུང་ཕུན་ཚོགས་སྤྲིན་ཆེན་ཕྱོགས་མཐར་དཀྲིགས། །བདུག་པའི་སྤོས་མཆོག་འབུལ་གྱི་བདག་བྱིན་རློབས། །དྷཱུ་པེ། ཉི་ཟླ་གཟའ་སྐར་འཕྲུལ་གྱི་གསལ་བྱེད་སོགས། །སྣང་བའི་རིགས་ཀུན་འབུལ་གྱི་བདག་བྱིན་རློབས། །ཨཱ་ལོ་ཀེ། ཇི་སྙེད་སྨན་སྤོས་སྦྱར་བ་ལས་བྱུང་བའི། །བྱུགས་པའི་དྲི་བཟང་འབུལ་གྱི་བདག་བྱིན་རློབས། །གནྡྷེ། ལྷ་ཡི་ཞལ་ཟས་རོ་བརྒྱ་དང་ལྡན་པ། །བཅུད་ཀྱིས་

[Full Size]

ཡོངས་གཏམས་འབུལ་གྱི་བདག་བྱིན་རློབས། །ནཻཝཱི་དྱ། གྲག་སྟོང་སྒྲ་ཡི་བྱེ་བྲག་སྣ་ཚོགས་དང་། །མི་ཤིགས་ནཱ་ད་འབུལ་གྱི་བདག་བྱིན་རློབས། །ཤབྡ། རོལ་མོ་ལྡིར། མཐའ་ཡས་རབ་འབྱམས་འཇིག་རྟེན་གྱི། །གཟུགས་བཟང་དབྱངས་སྙན་དྲི་ངད་ལྡན། །བཤོས་གཙང་རེག་འཇམ་དུ་ཀུ་ལ། །རྣམ་མང་མཆོད་འབུལ་བདག་བྱིན་རློབས། །ༀ་ཤྲཱི་མཱན་གུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་བཛྲ་རཱུ་པ། ཤབྡ། གྷནྡྷེ། རཱ་ས། སྤཪྴེ་པཱུ་ཛི་ཏེ་ཨཱཿཧཱུྃ། གཞན་ཡང་སྲིད་ཞིའི་ལོངས་སྤྱོད་ཀྱི། །དཔལ་འབྱོར་རྒྱ་ཆེན་མི་བཟད་པ། །བསྐལ་པར་རྒྱུན་མི་འཆད་པ་ཡི། །མཆོད་སྤྲིན་མཁའ་དབྱིངས་གང་གྱུར་ཅིག །དེ་ནས་མཎྜལ་ནི། ༀ་བཛྲ་ས་ཏྭ་སོགས་ཡི་གེ་བརྒྱ་པ་བརྗོད་ལ། རྡོ་རྗེའི་ས་གཞི་རྣམ་པར་དག་པའི་དཀྱིལ་འཁོར་ལ། །མུ་ཁྱུད་ར་བས་ཡོངས་བསྐོར་དབུས་སུ་རི་དབང་པོ། །ལྷུན་པོ་མཆོག་རབ་ཤིན་ཏུ་མངོན་མཐོ་ལྷམ་མེ་བ། །ལུས་འཕགས་འཛམ་གླིང་བ་ལང་སྤྱོད་དང་སྒྲ་མི་སྙན། །ཤར་ལྷོ་ནུབ་བྱང་གླིང་ཆེན་བཞི་སྟེ་གླིང་གཡོག་དང་། །རིན་ཆེན་རི་བོ་དཔག་བསམ་རྐང་འཐུང་འདོད་འཇོའི་བ། །མ་རྨོས་ལོ་ཏོག་འཁོར་ལོ་ནོར་བུ་བཙུན་མོ་དང་། །ཁྱིམ་བདག་ཅང་ཤེས་ཁྱུ་མཆོག་གཡུལ་རྒྱལ་དཔའ་བོ་ཆེ། །གཏེར་ཆེན་བུམ་བཟང་སྒེག་པ་ཕྲེང་འཛིན་གླུ་དབྱངས་མ། །གར་མཁན་མེ་ཏོག་བདུག་སྤོས་སྣང་གསལ་དྲི་ཆབ་ཐོགས། །འདོད་ཡོན་ལྷ་མོ་རབ་འབྱམས་ཞིང་བཀང་མཆོད་པ་སྤྲོ། །ཉི་ཟླ་རིན་ཆེན་གདུགས་

[Full Size]

བཟང་རྣམ་རྒྱལ་རྒྱལ་མཚན་བསྒྲེང་། །གཞན་ཡང་བར་མཚམས་ཀུན་ཏུ་ལྷ་མིའི་མཆོད་པའི་རྫས། །མཐའ་ཡས་མུ་མེད་ཕྲ་རབ་རྡུལ་གྱི་གྲངས་ལས་འདས། །བཀོད་ལེགས་རྨད་བྱུང་ཕུན་ཚོགས་ཡོན་ཏན་བརྗིད་པ་འདི། །དཔལ་ལྡན་བླ་མ་ཡི་དམ་སངས་རྒྱས་ཆོས་དགེ་འདུན། །དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ལ་འབུལ་བར་བགྱི། །བདག་གཞན་འགྲོ་ལ་བརྩེ་བར་དགོངས་མཛོད་དབྱིངས་ནས་རོལ། །བྱིན་རླབས་ཆར་གྱི་མཆོག་དང་ཐུན་མོང་དངོས་གྲུབ་སྩོལ། །ༀ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཕྱག་འཚལ་མཆོད་བཤགས་ཡི་རང་བསྐུལ་གསོལ་འདེབས། །དུས་གསུམ་དགེ་རྩ་ཆོས་དབྱིངས་ཆེན་པོར་བསྔོ། །ཅེས་མཎྜལ་ཕུལ་ནས། ནང་མཆོད་འབུལ་བ་ནི། སྐུ་གསུམ་ཡེ་ཤེས་ལྔ་བདག་རྡོ་རྗེ་ཅན། །བཀའ་བརྒྱུད་རིག་འཛིན་གྲུབ་ཐོབ་རྒྱ་མཚོ་སོགས། །ཞིང་ཁམས་རབ་འབྱམས་བཞུགས་པའི་མཆོད་འོས་ལ། །དག་པ་ཡེ་ཤེས་བདུད་རྩིའི་རྒྱུན་འབུལ་བཞེས། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ༀ་ཨཱཿཧཱུྃ། ཞེས་འབུལ། དེ་ནས་སྐབས་འདིར་བསྟོད་བཤགས་འབུལ་བ་ནི། ཆོས་དབྱིངས་ཀྱི་ནམ་མཁའ་མཐའ་དབུས་བརྡལ། །བདེ་ཆེན་རྩལ་མ་འགགས་སྤྲིན་ཚོགས་གཏིབས། །སྒྱུ་འཕྲུལ་གར་རྩེད་ཀྱི་ཆར་རྒྱུན་འབབས། །སྐུ་གསུམ་གྱི་བདག་ཉིད་ཁྱོད་ལ་བསྟོད། །སྐུ་མཚན་དཔེའི་ཉིན་བྱེད་འོད་སྟོང་ལྡན། །ལོག་རྟོག་གི་མུན་ཆེན་ཕ་མཐར་གཞོམ། །མཐོང་ཙམ་གྱིས་གྲོལ་བའི་ལམ་མཆོག་

[Full Size]

སྟོན། །མཆོག་རྡོ་རྗེའི་སྐུ་ལ་ཕྱག་འཚལ་བསྟོད། །གསུང་ཡན་ལག་དྲུག་ཅུའི་དབྱངས་དང་ལྡན། །བཀའ་བརྒྱད་ཁྲི་བཞི་སྟོང་ཆོས་འཁོར་བསྐོར། །ཐོས་ཙམ་གྱིས་ཡང་དག་བདེན་པ་རྟོགས། །མཆོག་རྡོ་རྗེའི་གསུང་ལ་ཕྱག་འཚལ་བསྟོད། །ཐུགས་མཐའ་བྲལ་ཟབ་ཞི་སྤྲོས་དང་བྲལ། །ཏིང་ངེ་འཛིན་བརྒྱ་ཕྲག་སྟོང་མངའ་བ། །དྲན་ཙམ་གྱིས་རྣམ་གྲོལ་ལམ་ལ་བཀོད། །མཆོག་རྡོ་རྗེའི་ཐུགས་ལ་ཕྱག་འཚལ་བསྟོད། །དུས་གསུམ་གྱི་རྒྱལ་བ་མ་ལུས་པ། །ཀུན་འདུས་པ་བླ་མ་རྡོ་རྗེ་འཆང་། །དཔལ་མི་ཕམ་ཆོས་གྲུབ་རྒྱ་མཚོའི་ཞབས། །བདག་མགོན་མེད་འདི་ནས་བྱང་ཆུབ་བར། །མི་འབྲལ་བར་གཅིག་ཏུ་སྨོན་ལགས་ན། །རྗེ་ཁྱེད་ཀྱི་ཐུགས་རྗེས་བདག་བྱིན་རློབས། །དངོས་སྣང་གི་འཛིན་པའི་ཞེན་ཆགས་དང་། །འཁྲུལ་སྣང་ལ་ཨ་འཐས་རེ་དོགས་སོགས། །ཆོས་བརྒྱད་ཀྱི་ཉོན་མོངས་དགྲ་བོ་འདི། །རང་སར་ཡལ་བདེན་མེད་རྟོགས་གྱུར་ཅིག །སྐྱེ་མེད་ཀྱི་ངང་དུ་འགགས་མེད་པ། །གནས་མེད་ཀྱི་རྟོགས་པའི་རྩལ་རྫོགས་ཤོག །དུས་སྙིགས་མ་ལྔ་ཡི་ཡང་མཐའ་འདིར། །སྐལ་མེད་བདག་སྐལ་བར་ལྡན་ནམ་སྙམ། །རྗེ་སངས་རྒྱས་བདུད་འདུལ་རྡོ་རྗེ་དང་། །མཆོག་དབང་གི་ཅོད་པན་འཛིན་པ་གཉིས། །མཐོང་ཐོས་པས་ཐུགས་རྗེའི་ཟླ་སྣང་གིས། །བདག་བློ་ཡི་དད་བའི་ཀུ་མུད་རྒྱས། །བཅོས་མིན་གྱི་མོས་གུས་དྲག་པོ་ཡིས། །ལུས་བྱེ་སྙེད་སྤྲུལ་ནས་ཕྱག་འཚལ་ཞིང་། །ངག་ལྷང་ལྷང་གསོལ་བ་འདེབས་འདེབས་སོ། །

[Full Size]

ཡིད་དུང་དུང་འདུན་པ་རྩེ་གཅིག་པས། །ཕ་མཁྱེན་ནོ་དུས་གསུམ་སངས་རྒྱས་མཁྱེན། །ཕ་མཁྱེན་ནོ་སངས་རྒྱས་ཀུན་འདུས་མཁྱེན། །བདག་ལས་ཉོན་ཁུར་གྱིས་ལྕི་བ་ཡིས། །དངོས་བཀའ་ཡི་གདམས་པ་གཡེལ་ལགས་ཀྱང་། །གདུང་ཤུགས་ཀྱི་མོས་གུས་འབར་བའི་མཐུས། །ཉམས་གསལ་སྣང་ངང་དུ་ཆོས་སྟོན་གསོལ། །མཆོག་ཁ་སྦྱོར་ཡན་ལག་བདུན་ལྡན་པ། གནད་མ་ཧཱ་མུ་དྲའི་བདག་ཉིད་ཅན། །ལམ་གཅིག་ཆོད་ཟབ་མོ་མྱུར་བརྒལ་ནས། །སྐུ་བཞི་ཡི་རྒྱལ་སར་དྲང་དུ་གསོལ། །ཅེས་དང་། དེ་ནས་སྙིང་པོ་བཟླས་པ་ནི། མདུན་བསྐྱེད་བླ་མའི་ཐུགས་ཀར་ཟླ་སྟེང་ཧྲཱིཿ། དམར་པོའི་མཐའ་མར་ཡིག་དྲུག་འཁོར་བ་ལས། །འོད་ཟེར་འཕྲོས་པས་བདག་གཞན་འགྲོ་ལ་ཐིམ། །སྡིག་སྒྲིབ་ཀུན་དག་སྣང་སྟོང་མངོན་དུ་གྱུར། །ༀ་ཨ་མི་དྷེ་ཝ་ཧྲཱིཿཅི་ནུས་དང་། ༀ་ཨཱཿདྷརྨ་སིདྡྷ་སཱ་ག་ར་ཧཱུྃ། མཚན་སྔགས་ཀྱང་བཟླའོ། །བླ་མ་ལ་གསོལ་བ་འདེབས་སོ། །བདག་འདྲའི་དམུ་རྒོད་སེམས་ཅན། །ལས་ངན་གཡང་ས་བརྒལ་ནས། །ཁྱོད་ཀྱི་ཞིང་ཁམས་བདེ་ལྡན་། །པདྨོ་བཀོད་པར་སྐྱེས་ནས། །རྒྱལ་བའི་ཞལ་མཐོང་ལུང་ཐོབ། །རྩེ་གཅིག་སྨོན་ལམ་འདེབས་སོ། །མི་ཕམ་ཆོས་གྲུབ་རྒྱ་མཚོ། །མཁྱེན་ནོ་ཐུགས་རྗེས་ཟུངས་ཤིག །ཅེས་རྒྱང་འབོད་ཚུལ་དུ་བྱའོ། །ཡང་། ཨ་ཧོཿརང་སེམས་འཁྲུལ་པ་ཞེས་དང་། མ་འོངས་དྲུག་པ་མཚན་གཉིས་ཀྱང་སྤྲོ་ན་བརྗོད། དེ་ནས་ཕྱི་ནང་དམ་ཚིག་ཉམས་ཆག་བཤགས་པ་ནི། ཀྱཻ། བླ་མ་རིན་པོ་

[Full Size]

ཆེ་དཀྱིལ་འཁོར་ཀུན་གྱི་ཁྱབ་བདག་དཔའ་བོ་ཆེན་པོ་དང་། གཞན་ཡང་མཁྱེན་ཅིང་གཟིགས་པ་མངའ་བ་ཐམས་ཅད་དགོངས་སུ་གསོལ། བདག་མིང་འདི་ཞེས་བགྱི་བའི་འཁོར་བ་ཐོག་མེད་ནས་ད་ལྟའི་བར་དུ་ཉོན་མོངས་པའི་དབང་ལས་གྱུར་པའི་མི་དགེ་བའི་ལས་ཀྱི་སོ་ཐར་དང་གསང་སྔགས་བྱང་སེམས་ཀྱི་དམ་ཚིག་དང་འགལ་བའི་སྡིག་སྒྲིབ་ཉེས་ལྟུང་ནོངས་པ་ཐམས་ཅད་དེང་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱི་དྲུང་དུ་མཐོལ་ལོ་བཤགས་སོ། །དེ་ལྟར་ཉེས་ཚོགས་བཤགས་པའི་བསོད་ནམས་ཀྱིས། །རྒྱལ་ཀུན་མགྲིན་དབྱངས་གཅིག་པས་དབུགས་དབྱུང་གྱུར། །ཕྱིན་ཆད་ནོངས་པར་བགྱིས་པའི་ལས་གང་དག །སྲོག་ལ་བབ་ཀྱང་མི་འདོར་དམ་བཅའ་བཟུང་། །ཞེས་བཤགས་སྦྱང་སྟོབས་བཞིའི་ཡ་གྱལ་རྟེན་བླ་མའི་སྟོབས་ཁྱད་འཕགས་གསུངས་ཕྱིར་འདི་ཡང་འབད་པས་ཟུངས་ཤིག །ཚོགས་གཉིས་རྒྱ་མཚོའི་རླབས་ཕྲེང་གཡོ་བའི་ཕྱིར། །ཚོགས་འཁོར་བྱིན་རླབས་མྱུར་འབེབས་བརྗོད་པར་བྱ། །ནང་མཆོད་ལྟར་ཚོགས་བྱིན་གྱིས་བརླབས་ནས། དག་པ་ཡེ་ཤེས་བདུད་རྩིར་གྱུར། །བར་དང་། ཧཱུྃ། ཐབས་དང་ཤེས་རབ་དབྱེར་མེད་པའི། །འདོད་ཡོན་ཞལ་ཟས་ཚོགས་འཁོར་ལོ། །ཤ་ལྔ་བདུད་རྩི་ལྔ་དང་ལྡན། །ཟག་མེད་ལོངས་སྤྱོད་ཆར་འབེབས་གྱུར། །པཉྩ་ཨ་མྲི་ཏ་ལ་ཁཱ་ཧི། ག་ན་ཙཀྲ་ལ་ཁཱ་ཧི། དེ་ནས་ཚོགས་རོལ་གྱི་མགྲོན་རྣམས་སྤྱན་དྲངས་པ་ནི། ཧཱུྃ་རང་སྣང་ཆོས་དབྱིངས་ཞིང་ཁམས་ནས། །བཀའ་བརྒྱུད་བླ་མ་སྐུ་བསྐྱོད་འཚལ། །རྣམ་འཕྲུལ་ཀློང་ཡངས་ཐིབས་སེ་ཐིབ། །འདིར་

[Full Size]

གཤེགས་ཚོགས་ཀྱི་མཆོད་པ་བཞེས། །ནུབ་ཕྱོགས་བདེ་ཆེན་ཞིང་ཁམས་ནས། །རྩ་བའི་བླ་མ་སྐུ་བསྐྱོད་འཚལ། །བྱིན་རླབས་སྤྲིན་ཕུང་ཀྱི་ལི་ལི། །འདིར་གཤེགས་ཚོགས་ཀྱི་མཆོད་པ་བཞེས། །ཕྱོགས་བཅུའི་ཞིང་ཁམས་རབ་འབྱམས་ནས། །སངས་རྒྱས་བྱང་སེམས་སྐུ་བསྐྱོད་འཚལ། །ཐུགས་རྗེའི་ཆར་རྒྱུན་སི་ལི་ལི། །འདིར་གཤེགས་ཚོགས་ཀྱི་མཆོད་པ་བཞེས། །དག་པ་མཁའ་སྤྱོད་ཞིང་ཁམས་ནས། །ཡི་དམ་ཌཱ་ཀི་སྐུ་བསྐྱོད་འཚལ། །དངོས་གྲུབ་དབྱར་རྔ་དི་རི་རི། །འདིར་གཤེགས་ཚོགས་ཀྱི་མཆོད་པ་བཞེས། །དུར་ཁྲོད་ཆེན་པོའི་གནས་བརྒྱད་ནས། །ཆོས་སྐྱོད་སྲུང་མ་སྐུ་བསྐྱོད་འཚལ། །ཕྲིན་ལས་གློག་འོད་ཁྱུགས་སེ་ཁྱུག །འདིར་གཤེགས་ཚོགས་ཀྱི་མཆོད་པ་བཞེས། །ཙཱ་རི་ཡེ་ཤེས་འཁོར་ལོ་ནས། །ཞིང་སྐྱོང་འཁོར་བཅས་སྐུ་བསྐྱོད་འཚལ། །མྱུར་མགྱོགས་རླུང་ལྟར་ཐོགས་མེད་འཕྱོ། །འདིར་གཤེགས་ཚོགས་ཀྱི་མཆོད་པ་བཞེས། །གནས་དང་འདོད་ཡོན་བྱིན་ཕོབ་ལ། །སྒྲུབ་མཆོག་བདག་ལ་དབང་ཆེན་བསྐུར། །རླུང་སེམས་སྣང་བ་དབང་སྡུད་ཅིང་། །མཆོག་དང་ཐུན་མོང་དངོས་གྲུབ་སྩོལ། །དེ་ནས་ཚོགས་ཕུད་རིམ་པར་སྤྲོས་ལ། གཏོར་མར་བྲན་ནས། བླ་མ་ཡི་དམ་ཆོས་སྐྱོང་སོགས་ལ་དམིགས་ནས། སྔར་བཞིན་བདུད་རྩི་བྱིན་རླབས་བྱས་ལ། ཕེཾ་ཕེཾ་ཕེཾ། ༀ་བཛྲ་ཨ་རལླི་ཧོཿཛཿཧཱུྃ་བྃ་ཧོཿབཛྲ་ཌ་ཀི་ནི་ས་མ་ཡ་སྟྭཾ་ཌི་ཤྱ་ཧོཿཆོས་སྐུ་གར་དབང་རྡོ་རྗེ་འཆང་ཆེན་དང་། །ལོངས་སྐུ་ཚེ་འོད་

[Full Size]

སྣང་བ་དཔག་ཏུ་མེད། །སྤྲུལ་སྐུ་འཆི་མེད་པདྨ་ཐོད་ཕྲེང་རྩལ། །མཐོན་མཐིང་པདྨ་རཱ་གའི་ཅོད་པན་ཅན། །རྒྱལ་བས་ལུང་ཟིན་རིམ་པར་བྱོན་རྣམས་དང་། །བཀའ་བརྒྱུད་གྲུབ་ཐོབ་རིག་འཛིན་རྒྱ་མཚོ་དང་། །སངས་རྒྱས་བྱང་སེམས་ཡི་དམ་དཀྱིལ་འཁོར་ལྷ། །མ་མགོན་མགར་གསུམ་ཞིང་སྐྱོང་ཆེན་པོ་སོགས། །ཆོས་སྐྱོང་སྲུང་མའི་ཞལ་དུ་མཆོད་པ་འབུལ། །དགྱེས་བཞེས་དངོས་གྲུབ་དམ་པ་མྱུར་དུ་སྩོལ། །དེ་ནས་འཇིག་རྟེན་སྐྱོང་བ་རྣམས་ལ། ༀ་ཁ་ཁ་ཁཱ་ཧི་ཁཱ་ཧི་སརྦ་ཡཀྴ་རཀྴ་སོགས་དང་། ༀ་ཧྲིཾ་ཧྲིཾ་ཧ་ཧ་སོགས་དང་ཕེཾ་བར་བརྗོད། ཞིང་སྐྱོང་བརྒྱད་དང་མཁའ་འགྲོ་སོ་གཉིས་སོགས། །འཁོར་བཅས་འདིར་བྱོན་མཆོད་སྦྱིན་འདོད་ཡོན་གྱི། །གཏོར་མ་འདི་བཞེས་རྣལ་འབྱོར་མཐུན་རྐྱེན་སྤེལ། །འགལ་རྐྱེན་ཕྱིར་བཟློག་ལས་བཞིའི་ཕྲིན་ལས་མཛོད། །ཅེས་ཕྲིན་ལས་བཅོལ། དེ་ནས་ཁྱད་པར་སྒོས་ཀྱི་བཀའ་སྲུང་ཞིང་སྐྱོང་ཆེན་པོའི་གཏོར་འབུལ་ནི། ཧཱུྃ་བྷྱོ། མཁའ་སྤྱོད་དཔལ་གྱི་ཙཱ་རི་ཏྲ། །རབ་འཇིགས་དུར་ཁྲོད་རོལ་པ་ནས། །འཁོར་ལོ་སྡོམ་པའི་ཐུགས་ལས་སྤྲུལ། །གྷ་ཡ་དྷ་ར་ཡབ་ཡུམ་དང་། །བདུད་དམག་སྟོང་སྡེའི་དཔུང་ཚོགས་བཅས། །དམ་ཚིག་འདུ་འབྲལ་མེད་བཞིན་དུ། །འཁོར་བཅས་གནས་འདིར་གཤེགས་སུ་གསོལ། །འདིར་བཤམས་ཡེ་ཤེས་ལྔ་ཡི་རྫས། །བ་ལིང་གཏོར་མ་རི་ལྟར་སྤུངས། །སྨན་རཀ་གཏན་འཁྱིལ་མཚོ་ལྟར་རྒྱས། །གཞན་ཡང་བསྐང་རྟེན་སྒྲུབ་པའི་རྫས། །ལོངས་སྤྱོད་མི་བཟད་སྤྲིན་ལྟར་གཏིབས། །བསྟན་སྲུང་

[Full Size]

འཁོར་དང་བཅས་ལ་འབུལ། །དཔལ་ལྡན་མཁའ་སྤྱོད་དབང་པོ་ཡི། །རྡོ་རྗེའི་བཀའ་བསྒོས་མ་བསྙེལ་བར། །སངས་རྒྱས་བསྟན་དང་བསྟན་འཛིན་སྲུང་། །རྣལ་འབྱོར་ཚེ་དཔལ་ཆོས་འཕེལ་ཞིང་། །ནད་མཚོན་དལ་ཀ་དགྲ་ལ་སྒྱུར། །ཕ་རོལ་བྱད་དང་རྦོད་གཏོང་ཟློག །བཅོལ་པའི་ཕྲིན་ལས་བསྒྲུབ་པར་མཛོད། །ཅེས་ཕུལ། དེ་ནས་དངོས་གྲུབ་ཀྱི་རྫས་ཚོགས་ལ་རོལ་པ་ནི། ཀྱེ་ཀུན་རྟོག་མཉམ་ཉིད་ངང་ནས་འདོད་ཡོན་རོལ། །ལེན་པ་པོས། ཧོཿགཟུང་འཛིན་མཚན་བྲལ་དེ་བཞིན་ཉིད་ལ་འདུད། །ཨ་ཧོ་མ་ཧཱ་སུ་ཁ་ཧོཿཞེས་བརྗོད་ལ་རོལ་པར་བྱའོ། ཕུད་ལྷག་ལ་བདུད་རྩིས་བྲན་ལ། ཨ་ཀཱ་རོས་བྱིན་གྱིས་བརླབས་ནས། ཕུད་ལྷག་བཤལ་ཆུའི་གཏོར་མ་ལ་དབང་བའི་མཁའ་འགྲོ་དང་ཡང་འཁོར་ཕོ་ཉའི་ཚོགས་རྣམས་ལ་བསྔོ་ཞིང་འབུལ་བར་བགྱིའོ། །བསྟན་པ་སྲུང་ལ་རྣལ་འབྱོར་སྐྱོང་བའི་ཕྲིན་ལས་མ་གཡེལ་ཅིག །ཨུཙྪི་ཊ་བ་ལིཾ་ཏ་ཁཱ་ཧི། ཅེས་ཕུལ། དེ་ནས་མཆོད་པ་གསོ་བྲན་བྱས་ལ། ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། དེ་བཞིན། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻཝི་དྱ། ཤབྡ་དང་། ༀ་བཛྲ་རཱུ་པ། ཤབྡ། གནྡྷེ། རཱ་ས། སྤཪྴེ་ཨཱཿཧཱུྃ་སྭཱ་ཧཱ། ཞེས་མཆོད། དྲན་པ་ཙམ་གྱིས་འཁོར་མཚོ་ལས། །ངེས་པར་སྒྲོལ་བའི་ཐུགས་རྗེ་ཅན། །དཀྱིལ་འཁོར་དབང་ཕྱུག་རྡོ་རྗེ་འཛིན། །རིགས་ཀུན་བདག་པོར་ཕྱག་འཚལ་བསྟོད། །ཅེས་དང་། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་བཞུགས་གསུངས་བཞིན། །ཇི་ལྟར་དཔལ་

[Full Size]

ལྡན་བླ་མ་མཆོག །བདག་ངོར་ངེས་པར་མངོན་སུམ་ཤར། །དེ་ཡི་ངང་ནས་རྩེ་གཅིག་མོས་གུས་དར་དྲག་བསྐྱེད་ལ། བླ་མའི་ཞལ་ནས་མངོན་སུམ་རྡོ་རྗེའི་བཀའ་ཡིས་གནང་བ་ཐོབ་པར་བསམ་ལ། ཀྱཻ་ཧོཿསེམས་ཉིད་དངོས་མེད་གདོད་ནས་རྣམ་དག་ལ། །རང་བཞིན་སྟོང་ཞིང་བཅོས་མེད་བསྒོམ་བྱ་དང་། །སྒོམ་བྱེད་བྲལ་བའི་ངང་ལ་ཤིགས་སེ་ཞོག །དེ་ཁོ་ན་ཉིད་སངས་རྒྱས་དགོངས་པའོ། །ཞེས་དེའི་ངང་ནས་བྱིན་རླབས་དབང་བཞི་བླང་བའི་མོས་གུས་ཀྱིས། སྐྱབས་ཡུལ་ཀུན་ཀྱང་མདུན་བསྐྱེད་བླ་མར་ཐིམ། །དེ་ཉིད་དགྱེས་པའི་འཛུམ་མདངས་གཡོ་བཞིན་དུ། །སྤྱི་བོ་མགྲིན་པ་ཐུགས་ཀ་ལྟེ་གསང་ནས། །ༀ་དཀར་ཨཱཿདམར་ཧཱུྃ་སྔོན་སྭཱ་སེར་ཧཱ། །ལྗང་འོད་ཟེར་འཕྲོས་རང་གི་གནས་ལྔར་ཐིམ། །སྐུ་གསུང་ཐུགས་ཡོན་ཕྲིན་ལས་བྱིན་རླབས་ཞུགས། །ཉོན་མོངས་ལྔ་དག་ཡེ་ཤེས་ལྔ་ཐོབ་གྱུར། །དེ་ཡི་ངང་ནས་བརྩེ་བ་ཆེན་པོར་བཅས། །འོད་དཀར་ལྟེམ་གྱིས་གྱུར་ནས་བདག་ལུས་དང་། །དབྱེར་མེད་གཅིག་འདྲེས་ཕྱག་རྒྱ་ཆེན་པོ་ཡི། །ཉམས་ལེན་ལྟ་བའི་ངང་དུ་དར་གཅིག་བཞག །དེ་ནས་བསྔོ་བ་སྨོན་ལམ་ནི། ན་མོ། བླ་མ་སྒྲུབ་པའི་དགེ་བ་གང་། །བདག་དང་སེམས་ཅན་ཐམས་ཅད་ཀུན། བླ་མེད་རྫོགས་པའི་བྱང་ཆུབ་བསྔོ། །ཕྱམ་གཅིག་སངས་རྒྱས་སར་འགོད་ཤོག །ཅེས་དང་། སྟོན་མཆོག་ཞི་བ་ཆགས་བྲལ་དང་། །རྩ་གསུམ་མཐུ་ུསྟོབས་འོད་སྟོང་ཅན། །དེང་འདིར་ཀུན་ནས་ཀུན་གསལ་བའི། །བཀྲ་ཤིས་རབ་གསལ་རབ་རྒྱས་ཤོགཅེས་ཤིས་པའི་མེ་ཏོག་འཐོར།

[Full Size]

མཆོད་སྦྱིན་གནས་སོགས་བརྗོད་པར་བྱའོ། །དེ་ལྟར་དབང་གི་ཅོད་པན་འཛིན་པ་བཅུ་པ་མི་ཕམ་ཆོས་གྲུབ་རྒྱ་མཚོའི་བླ་སྒྲུབ་འདི་བཞིན་འོག་མིན་ཀརྨའི་གྲྭ་ཚང་བསླབ་གསུམ་ལྡན་པ་དགེ་སློང་ཀརྨ་ཚེ་བརྟན་གྱིས་དངོས་པོའི་མཎྜལ་དང་བཅས་བསྐུལ་བའི་ངོར་རྗེ་དེ་ཉིད་ཀྱི་ཐུགས་རྗེས་རྗེས་འཛིན་སི་ཏུ་པདྨ་ཉིན་བྱེད་དབང་པོས་རྒྱལ་ཟླའི་དཀར་ཕྱོགས་ཀྱི་ཉ་ལ་སྤེལ་བ། བདག་འདྲ་སོ་སྐྱེའི་བརྗོད་པ་དཔེ་ཆུ་ཤིང་དང་མཚུངས་པར་གྱུར་ཀྱང་། དོན་བླ་མ་སྒྲུབ་པ་མཆོག་གི་ཉེ་ལམ་སྟེ་སྐལ་ལྡན་རྣམས་ཀྱི་ཐར་པའི་ཐེམ་སྐས་ཙམ་དུ་གྱུར་པའོ། །དགེ་འདིས་ཀུན་མཁྱེན་བྱང་གྲོལ་མྱུར་ཐོབ་ཤོག །འདི་ཉིད་རྒྱས་བསྡུས་གསུམ་དུ་དབྱེ་བས་རྒྱས་པ་ནི་འདིར་གསལ་གྱི་འབྲིང་པོར་སྐྱབས་སེམས་ཡན་ལག་བདུན་པ་དེ་ནས་མདུན་བསྐྱེད་དབང་བསྐུར་རྒྱས་གདབ་མཆོད་པ་བྱིན་རླབས་ནས་མཎྜལ་ཚར་རྗེས། བསྟོད་ཕྱག །བཟླས་པ། བཤགས་སྡོམ་མཐར། སྔགས་མཆོད་རྣམས་དང་། དེ་ནས་གཞུང་ལྟར་རོ། །རྒྱུན་ཁྱེར་ལྟ་བུར་བསྡུ་ན། སྐྱབས་སེམས་ཡན་ལག་བདུན་ཕུལ་ནས། མདུན་བསྐྱེད་དབང་བསྐུར་རྒྱས་གདབ་པར། །སྔགས་མཆོད་ཕུལ་ནས་བསྙེན་པར་འཇུག །རྒྱང་འབོད་བཤགས་སྡོམ་མཐར། གང་ཞིག་སངས་རྒྱས་མན། བཀྲ་ཤིས་བར་གྱིས་འགྲུབ། ཅེས་ཡང་དབེན་དུ་སྤེལ།། །།

བླ་མའི་རྣལ་འབྱོར་བྱིན་རླབས་ཆར་འབེབས་ཀྱི་དབང་བཞི་དངོས་གྲུབ་སྤྲིན་ཕུང་།

[Full Size]

བླ་མའི་རྣལ་འབྱོར་བྱིན་རླབས་ཆར་འབེབས་ཀྱི་དབང་བཞི་དངོས་གྲུབ་སྤྲིན་ཕུང་ཞེས་བྱ་བ་བཞུགས་སོ། །རྩ་བའི་བླ་མ་སྐྱེ་མེད་ཆོས་ཀྱི་སྐུ་ལ་ཕྱག་འཚལ་ལོ། །འདིར་བླ་སྒྲུབ་བྱིན་རླབས་ཆར་འབེབས་ལས་འཕྲོས་པའི་དབང་ཆོག་ཞིག་བཀོད་པ་སྟེ། བླ་མེད་ལུགས་ཀྱི་ཐུན་མོང་མིན་པའི་སྨིན་བྱེད་

[Full Size]

རིམ་པ་ལ། མདུན་བསྐྱེད་མཆོད་པའི་དབུས་སུ་མཉྫིའི་སྟེང་རྣམ་རྒྱལ་བུམ་པ་ལྔ་ཕྲག་ལྔ་ཡི་རྫས་ཀྱིས་གཏམས་པར་དྲི་བཟང་གི་ཆུས་སུམ་གཉིས་བཀང་བའི་ཁར་དུང་ཆོས་དང་གཟུངས་རྡོར་ཁ་རྒྱན་སོགས་ཀྱང་བཀོད། རིགས་ལྔའི་དབང་རྫས་བཀྲམ། དེ་ཡི་སྟེང་དུ་ཀ་པཱ་ལ་མཚན་ཉིད་ལྡན་པ་མྱོས་བྱེད་དང་བདུད་རྩི་རིལ་བུས་གང་བའི་ཁར་མེ་ལོང་སིནྡྷུ་རའི་དཀྱིལ་འཁོར་བཤམས། གཞན་ཡང་ཉེར་མཁོའི་ཡོ་བྱད་འདུ་བར་བྱས་ལ། ཐོག་མར་མདུན་བསྐྱེད་དཀྱུས་ལྟར་གྱི་བཤགས་པའི་བར་བཏོན་ལ། བུམ་པ་བསངས་སྦྱངས་པ་ནི། ༀ་ཨཱ་བིགྷྣཱན་སོགས་དང་། ༀ་སྭ་བྷཱ་ཝས་སྦྱངས་ལ། སྟོང་ལས་དལ་དབུས་མཚན་ཉིད་ཡོངས་རྫོགས་པའི། །རིན་ཆེན་བུམ་པ་མཆུ་འཕྱང་ལྟོ་བ་ལྡིར། །མགྲིན་རིང་ཁ་ཡངས་ཞབས་ཞུམ་རྒྱན་གྱིས་སྤྲས། །ལམ་གསུམ་འབབས་ཀྱི་རྒྱུན་བཟང་མཚོ་འཁྱིལ་དབུས། །དྲི་མེད་པདྨའི་སྡོང་པོ་འདབ་རྒྱས་ལྟེར། །བསིལ་ཟེར་བྱེད་པའི་ཆ་ཤས་ཡོངས་གང་སྟེང་། །གར་དབང་རིགས་ཀུན་བདག་པོ་རྡོ་རྗེ་འཆང་། །དམར་གསལ་ཞལ་གཅིག་ཕྱག་གཉིས་རྡོ་རྗེ་དྲིལ། །བསྣོལ་འཛིན་རང་འོད་ཡུམ་འཁྱུད་མཚན་དཔེ་འབར། །ལོངས་སྤྱོད་རྫོགས་པའི་རྒྱན་དང་ཆ་ལུགས་མཛེས། །རྡོར་སྐྱིལ་གྱིས་བཞུགས་བདེ་སྟོང་ཡེ་ཤེས་རྒྱས། །གནས་གསུམ་ཡིག་གསུམ་ས་བོན་མཚན་པར་གྱུར། །དེ་ལས་འོད་ཟེར་སྣ་ཚོགས་ཕྱོགས་བཅུར་འཕྲོས། །ཁྱད་པར་ནུབ་ཕྱོགས་བདེ་ཆེན་ཕོ་བྲང་ནས། །སྤྱན་དྲངས་དབྱེར་མེད་བུམ་ལྷར་སིབ་སིབ་ཐིམ། །གུ་རུ་བཛྲ་ས་མ་ཡ་ཛཿཛ་ཧཱུྃ་བཾ་ཧོཿགཉིས་སུ་མེད་པར་གྱུར། །དེ་ནས་ཨརྒྷཾ་

[Full Size]

སོགས་ཀྱིས་མཆོད་ནས། དྲན་པ་ཙམ་གྱིས་འཁོར་མཚོ་ལས། །ངེས་པར་སྒྲོལ་བའི་ཐུགས་རྗེ་ཅན། །དཀྱིལ་འཁོར་དབང་ཕྱུག་རྡོ་རྗེ་འཛིན། །རིགས་ཀུན་བདག་པོར་ཕྱག་འཚལ་བསྟོད། །ཅེས་པས་བསྟོད། ཕྱག་འཚལ་བ་དང་སོགས་ཡན་ལག་བདུན་པ་ཕུལ། བུམ་ལྷའི་ཐུགས་ཀའི་ཧཱུྃ་ལས་འོད་འཕྲོས་པས། །རྒྱལ་བ་རྒྱ་མཚོའི་ཐུགས་རྒྱུད་བསྐུལ་བར་བྱས། །དེ་ཉིད་ཚུར་འདུས་སྐུ་ཡི་ཆ་ཤས་ནས། །ཡེ་ཤེས་བདུད་རྩིའི་རྒྱུན་གྱི་ཆར་འབེབས་གྱུར། །ༀ་ཨཱཿཧཱུྃ་གུ་རུ་བཛྲ་དྷྲྀ་ཀྲ་ཧཱུྃ་སྭཱ་ཧཱ། ཅེས་སྙིང་པོ་གང་འགྲུབ་བཟླའོ། །བུམ་ལྷ་འོད་ཞུ་བདུད་རྩིའི་ངོ་བོར་གྱུར། །ཅེས་བརྗོད། དེ་ནས་སྔར་གྱི་མདུན་བསྐྱེད་བླ་མའི་དཀྱིལ་འཁོར་བཀྲ་ལམ་མེར་སླར་ཡང་མངོན་སུམ་གསལ་བཏབ་ནས། གཙོ་བོ་བུམ་བསྐྱེད་ལྟར་ལོངས་སྤྱོད་རྫོགས་སྐུ་གར་དབང་རྡོ་རྗེ་འཆང་རང་འོད་ཡུམ་ཅན་དུ་བསྐྱེད་ལ་དབང་བླང་བ་ནི། དང་པོ་གསལ་གདབ་ནི། ༀ་ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔར་བདག་སྒྲུབས་ཤིག །ཞེས་གསོལ་བ་བཏབ་ལ། ཇི་ལྟར་བལྟམས་པ་སོགས་ཀྱིས་ཁྲུས་དང་། སྔོན་འགྲོ་གཏོར་མ་བྱིན་རླབས་དང་བཅས་བགེགས་བསྐྲད་སྲུང་འཁོར་བར་བཏོན་ནས། མཎྜལ་ཕུལ་ལ། མི་ཕྱེད་པའི་བློས། ཐུགས་རྗེའི་བདག་ཉིད་བཀའ་དྲིན་གྱིས། །ཡང་དག་ཡེ་ཤེས་མཆོག་ཐོབ་སྟེ། །ཆོས་ཀྱི་བདུད་རྩི་འདི་འཐུང་ཕྱིར། །བླ་མ་ཆེ་ལ་གསོལ་བ་འདེབས། །ཅེས་ལན་གསུམ་བརྗོད། རྡོ་རྗེ་རྒྱལ་པོ་དགོངས་སུ་གསོལ། །ཐར་པ་

[Full Size]

ཆེན་པོའི་གྲོང་མཆོག་ཏུ། །ངེས་པར་བདག་ནི་འཇུག་པ་དང་། །རིགས་ལྔའི་དམ་ཚིག་སོ་སོར་བཟུང་། །ལན་གསུམ། ༀ་སརྦ་ཡོ་ག་ཙིཏྟ་ཨུཏྤ་ད་ཡཱ་མི། ལན་གསུམ། རྡོ་རྗེ་སྙིང་གར་བཞག་ལ། སུ་ར་ཏེ་ས་མ་ཡ་སྟྭཾ་ཧོ། སིདྡྷི་བཛྲ་ཡ་ཐཱ་སུ་ཁཾ། ཅེས་སེམས་བསྐྱེད་ལ། བླ་མ་ཧེ་རུ་ཀ་དཔལ་སྙིང་ལ་བཞུགས། །རྡོ་རྗེ་སྙིང་གར་རེག །ཡེ་ཤེས་དབབ་པའི་སླད་དུ་གསོལ་བ་གདབ་པ་ནི། དཔལ་ཧེ་རུ་ཀ་ཡི་དཀྱིལ་འཁོར་གྱི་འཁོར་ལོ་རྣམས་ཀྱིས་བདག་ལ་དེ་བཞིན་ཉིད་ཀྱི་ཡེ་ཤེས་ནམ་མཁའ་ལྟ་བུ་བདུད་རྩི་ལྟ་བུ། རིན་པོ་ཆེ་ལྟ་བུས་གང་བར་མཛད་དུ་གསོལ། སྨིན་པར་མཛད་དུ་གསོལ། ཤིན་ཏུ་ཡང་སྨིན་པར་མཛད་དུ་གསོལ། །ལན་གསུམ། ཞེས་གསོལ་བ་བཏབ་པས་མདུན་བསྐྱེད་ལྷ་ཚོགས་རྣམས་ཀྱི་གསང་གསུམ་ཡེ་ཤེས་རྡོ་རྗེའི་བྱིན་རླབས་དངོས་གྲུབ་ཐམས་ཅད་སྐུ་དང་ཡིག་འབྲུ་ཕྱག་མཚན་གྱི་རྣམ་པར་རང་གི་སྤྱི་བོ་ནས་ཞུགས། ལུས་སེམས་བདེ་བ་ཆེན་པོའི་འོད་ཀྱིས་གང་བར་གྱུར། ༀ་གུ་རུ་བཛྲ་ས་མ་ཡ་ཛ་ཛ། ཛྙཱ་ན་ཨཱ་བེ་ཤ་ཡ་ཨཱ་བེ་ཤ་ཡ་ཨ་ཨ། དྲག་ཏུ་བརྗོད་ཅིང་། སྤོས་དང་རོལ་མོ་བྱའོ། །ལྟོས་ཤིག་རང་གི་སེམས་ལ་ལྟོས། །བལྟས་པས་སེམས་ལ་གྲུབ་པ་མེད། །གྲུབ་པ་མེད་པའི་སེམས་ཉིད་འདི། །སྣ་ཚོགས་སྣང་བ་ངོ་མཚར་ཆེ། །རང་སེམས་སྐྱེ་མེད་ཆོས་ཀྱི་སྐུ། །ཆོས་ཀྱི་སྐུ་ལ་སྐྱེ་འཇིག་མེད། །སྐྱེ་མེད་བདེ་བ་ཆེན་པོའི་སྐུ། །རང་ལ་ཡོད་པ་ངོ་མཚར་ཆེ། །རང་སེམས་ཆོས་སྐུའི་མེ་ལོང་ལ། །གཉིས་མེད་ཡེ་ཤེས་འོད་དུ་ཤར། །ཤར་བ་

[Full Size]

ཉིད་ནས་གྲུབ་མེད་དེ། །བདེ་ཆེན་ལྷན་ཅིག་སྐྱེས་པ་ཡིན། །ཏིཥྛ་བཛྲ་གྱིས་བརྟན་པར་བྱས། སློབ་མ་དབང་རྫས་རིགས་ལྔ་ཡབ་ཡུམ་གསལ། །འོད་ཀྱིས་ལྷ་ཡི་དབང་རྫས་སོ་སོར་ཐོགས། །དགོངས་པ་མཛད་དང་མཆོད་ཅིང་ཤིས་པ་བརྗོད། །སྲུང་བའི་ལས་དང་བུམ་པ་བདུད་རྩི་ཡིས། །ཇི་ལྟར་བལྟམས་ཚེ་བཅོམ་ལྡན་ཁྲུས་གསོལ་ལྟར། །ལྷ་ཆུ་དག་པས་འདིར་ནི་དབང་བསྐུར་རོ། །ༀ་བཛྲ་ཨ་བྷི་ཥཉྩ་ཧཱུྃ། རཏྣ་མུ་ཀུ་ཊ་ཨ་བྷི་ཥེཉྩ་ཏྲྃ། བཛྲ་དྷཱ་ར་ནི་ཨ་བྷི་ཥིཉྩ་ཧྲཱིཿབཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཨཱཿབཛྲ་ན་མཿཨ་བྷི་ཥིཉྩ་ༀ། ཅེས་བརྗོད་ལ་བུམ་པ་དང་། དབུ་རྒྱན། པདྨ། དྲིལ་བུ། མིང་དབང་རྣམས་སོ་སོར་བསྐུར་ནས། ༀ་བཛྲོ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏ་སྟྭཾ་ཨཱ་ཧཾཿཞེས་ཆུ་དབང་བསྐུར། དེ་ལྟར་དབང་བསྐུར་དུག་ལྔའི་སྒྲིབ་པ་དག །ཕུང་ལྔ་གནས་གྱུར་ཡེ་ཤེས་ལྔ་ཐོབ་ནས། །ཆུ་ཞབས་ཡར་ལུད་རིགས་ལྔས་དབུ་རྒྱན་གྱུར། །དེ་ནས་སློབ་དཔོན་དབང་ནི། དཔའ་བོ་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །ལན་གསུམ་གསོལ་བ་བཏབ། རྡོ་རྗེ་དང་དྲིལ་བུ་བླངས་སྟེ། ཧཱུྃ་བྱུང་རྡོ་རྗེ་མ་ཧཱ་བཛྲ་ཧཱུྃ། ཨཱཿབྱུང་དྲིལ་བུ་བཛྲ་གནྜེ་ཨཱཿའཁྱུད་པའི་རྒྱ་དང་བཅས། སློབ་མ་རྡོ་རྗེ་སེམས་དཔའ་དང་། རྡོ་རྗེ་སྙེ་མ་ཟུང་འཇུག་གསལ། །རྡོ་རྗེ་དྲིལ་བུ་ཆེ་ཟུང་ཞིག །རྡོ་རྗེར་བྱིན་རློབས་སློབ་དཔོོན་གྱུར། །སློབ་མ་བསྡུ་བ་ཉིད་དུ་གྱིས། །དབང་བསྐུར་བ་ནི། རྡོ་རྗེ་ཆེན་པོས་དབང་བསྐུར་བ། །ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་

[Full Size]

གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །བུམ་པ་སྤྱི་བོར་བཞག་ཆུ་བཏུང་། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཆུ་ཞབས་གྱེན་འཁྱིལ་མི་བསྐྱོད་རྒྱས་གདབ་གྱུར། །ༀ་བཛྲ་པུཥྤེ་སོགས་ཉེར་སྤྱོད་ལྔས་མཆོད། འདོད་ཡོན་རོལ་ཞིང་ཁམས་གསུམ་དོན། །རྟེན་ཅིང་འབྲེལ་འབྱུང་ཉིད་དུ་སྤྱོད། །དེ་ལྟར་ལུས་ཀྱི་སྒྲིབ་དག་བུམ་དབང་ཐོབ། །བསྐྱེད་རིམ་བརྟན་ཐོབ་སྤྲུལ་སྐུ་འགྲུབ་པར་གྱུར། །དེ་ནས་གསང་དབང་ནི། མགོན་པོ་བདག་སོགས་འཁོར་བའི་འདམ། །བྱིང་བ་སྐྱབས་མེད་སྒྲོལ་མཛོད་ཅིག །ལན་གསུམ་གསོལ་བ་གདབ། གཙོ་བོ་ཡབ་ཡུམ་སྙོམས་འཇུག་གི། །བྱང་སེམས་རྒྱུན་གྱི་དབང་མཆོག་བསྐུར། ཀཱ་པ་ལ་མགྲིན་པར་བཞག་ལ། ཨ་ཧོ་མ་ཧཱ་སུ་ཁ། བདུད་རྩི་མྱོང་ལ། དེ་ལྟར་སངས་རྒྱས་རྣམས་ལས་བྱུང་བ་ཡི། །དམ་ཚིག་བཅུད་ཀྱི་བདེ་བ་ཆེན་པོ་མྱོང་། །ངག་གི་སྒྲིབ་དག་གསང་དབང་ཐོབ་ནས་ནི། །རྩ་རླུང་བརྟན་ཐོབ་ལོངས་སྐུ་འགྲུབ་པར་གྱུར། །དེ་ནས་ཤེས་རབ་ཡེ་ཤེས་དབང་ནི། ཧེ་རུ་ཀ་དཔལ་བདག་དྲོངས་ཤིག །གསང་བ་ཆེན་པོས་སྨིན་པར་མཛོད། །ལན་གསུམ་གསོལ་བ་བཏབ། སིནྡྷཱུ་རའི་དཀྱིལ་འཁོར་ཡུམ་དུ་གསལ་བས། རྡོ་རྗེ་སྙེ་མ་ལས་སྤྲོས་པའི། །བདེ་སྟེར་ལྷ་མོ་མཆོད་པར་གྱིས། །ཞེས་གཏད་ལ། མཁའ་གསང་བྱིན་བརླབས་སྦྱོར་བ་ཡིས། །དགའ་དང་མཆོག་དགའ་ཁྱད་པར་དགའ། །ལྷན་སྐྱེས་དགའ་བཞི་ཉམས་མྱོང་གྱུར། །སིནྡྷཱུ་རས་གནས་བཞིར་ཐིག་ལེ་བྱ། སེམས་ཀྱི་སྒྲིབ་དག་བདེ་སྟོང་བསྒོམ་པར་དབང་། །ཆོས་སྐུ་འགྲུབ་པའི་སྐལ་བ་ལྡན་པར་གྱུར། །བཞི་པ་ཚིག་དབང་ནི། རྡོ་རྗེ་ཅན་ཞབས་བཀའ་དྲིན་གྱིས། །རིན་ཆེན་བཞི་པའང་དེང་འདིར་སྩོལ། །ལན་

[Full Size]

གསུམ་གསོལ་བ་གདབ། བླ་མ་སྤྱི་བོར་བསྒོམ། ལུས་གནད་ངོ་བོ་སྐྱོང་ལ། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་རང་ཡང་ནི་དེ་ཡི་ཕ། །ཞེས་ཚིག་གི་བརྡ་སྤྲད་ལ། དོན་དམ་དེ་བཞིན་ཉིད་ཀྱི་དབང་བསྐུར་ཐོབ། །སྒོ་གསུམ་སྒྲིབ་དག་ཕྱག་ཆེན་བསྒོམ་པར་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །དེ་ནས་རྗེས་རིམ་ནི། གཙོ་བོས་ཇི་ལྟར་བཀའ་སྩལ་བདག་གིས་བགྱི། །ལན་གསུམ་དང་། གཏང་རག་གི་མཎྜལ་འབུལ་བར་བྱའོ། །དེང་ནས་བརྩམས་ཏེ་བདག་བྲན་སོགས་བརྗོད་ལ། དེ་ནས་དཔའ་བོའི་དགའ་སྟོན་ཚོགས་ཀྱི་འཁོར་ལོའི་དཀྱིལ་འཁོར་ལ་རོལ་པ་སོགས་རྣལ་འབྱོར་གྱི་ཉམས་བསྐྱང་བར་བྱའོ། །ཅེས་པའང་བསླབ་པའི་ཚུལ་ཁྲིམས་དང་དད་པའི་ནོར་ལྡན་སྒྲུབ་ཆེན་པ་བཀྲ་ཤིས་ཀྱི་བཞེད་ལྟར། སི་ཏུ་པདྨ་ཉིན་བྱེད་དབང་པོས་ཡང་དབེན་དུ་སྤེལ་བ་མངྒ་ལཾ།། །།

དབང་བཞི་དངོས་གྲུབ་སྤྲིན་ཕུང་གི་མཚམས་སྦྱོར་པད་དཀར་ཆུན་པོ།

[Full Size]

དབང་བཞི་དངོས་གྲུབ་སྤྲིན་ཕུང་གི་མཚམས་སྦྱོར་པད་དཀར་ཆུན་པོ་ཞེས་བྱ་བ་བཞུགས་སོ། །སློབ་མ་ཁྲུས་དང་། སྔོན་འགྲོ་གཏོར་མ་བཏང་། བགེགས་བསྐྲད་ལ། དང་པོ་དབང་གི་སྤྱི་བཤད་ནི། ནམ་མཁའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ལ་བཀོད་སྙམ་པའི་སེམས་བསྐྱེད་ནས་ལེགས་པར་གསན་འཚལ། གསན་པར་བྱ་བའི་ཆོས་དེ་ལ་ཡང་བདག་ཅག་གི་སྟོན་པས་རྒྱུ་ཕ་རོལ་དུ་ཕྱིན་པའི་ཐེག་པ་དང་། འབྲས་བུ་རྡོ་རྗེ་ཐེག་པ་གཉིས་སུ་གསུངས་པར་འདུས་ཤིང་། དེ་ཡང་རྒྱུད་སྡེ་བཞིར་དབྱེ་བ་ལས། ནང་

[Full Size]

གསེས་གཉིས་སུ་དབྱེ་བ། གསུམ་དང་བཞིར་དབྱེ་བ། ལྔ་དང་དྲུག་ཏུ་དབྱེ་བ་གྲངས་ངེས་མེད་དུ་དབྱེ་བ་མཆིས་ནའང་ཡོངས་སུ་གྲགས་པ་རྒྱུད་སྡེ་བཞིར་བསྟན་ཅིང་། སྐྱེ་གནས་རྣམ་པ་བཞི་ཡི་གདུལ་བྱའི་ཁམས་དང་དབང་པོའི་བྱེ་བྲག་གི་གང་ཟག་ལ་དགོངས་ནས་སོ་སོར་གསལ་ཞིང་སྟོན་པར་མཛད་ཅིང་། དེ་ཡང་དབང་རྣོན་གྱི་རྒྱུད་ལ་བྱིན་རླབས་མྱུར་དུ་སྨིན་པའི་ཕྱིར། ཀུན་རྫོབ་ཏུ་དམ་ཡེ་གཉིས་ཀ་གདོད་ནས་རང་ཆས་སུ་བཞུགས་པ་དེ་ཡི་ངོ་བོར་གནས་པ་ལ་གསལ་ཐེབས་པས་དངོས་གྲུབ་ཐམས་ཅད་ལྷུན་གྱིས་གྲུབ་པས་རྣལ་འབྱོར་ཆེན་པོ་བླ་ན་མེད་པའི་རྒྱུད་ཅེས་གྲགས་པ་འདི་ཉིད་ཡིན་གྱི། དོན་དམ་པར་ནི་སྤྲོས་བྲལ་སྟོང་པ་ཉིད་ཀྱི་ཡེ་ཤེས་དབྱེར་མེད་འོད་གསལ་ཆེན་པོའི་ཆོས་ཉིད་ཀྱི་རང་བཞིན་ཅིར་ཡང་ཤར་བ་སྟེ། རྟག་པ་ཕྱི་མ་ལས། རང་བཞིན་གདོད་ནས་མ་སྐྱེས་པ། །རྫུན་མིན་བདེ་མིན་དེ་བཞིན་དུ། །ཐམས་ཅད་ཆུ་ཡི་ཟླ་བ་ལྟར། །འདོད་པ་རྣལ་འབྱོར་པས་ཤེས་ཀྱི། །ཞེས་པ་ལྟར་བསྟན་ཅིང་། མཆོག་གི་རྨད་དུ་བྱུང་བའི་རྒྱུད་ལ་བསྟེན་ནས་ལམ་གཅིག་ཆོད་ཀྱི་ཟབ་མོ་བླ་མ་སྒྲུབ་པའི་རྣལ་འབྱོར་གྱི་སྒོ་ནས་རྗེས་སུ་འཛིན་པ་སྟེ། དེ་ཡང་བླ་མ་སངས་རྒྱས་ཆོས་ཀྱི་སྐུ་ནི་དཔེར་ན་མེ་ལོང་གི་དངོས་པོ། གདུལ་བྱ་ནི་དེ་ཡི་ངོགས་ནས་གཟུགས་འཆར་བ། འདུལ་བྱེད་གཟུགས་ཀྱི་སྐུ་ནི་མི་གཡོ་བར་གཟུགས་ཇི་ལྟ་བར་འཆར་བའི་གཉེན་པོ། ཤར་བཞིན་པ་མེ་ལོང་ཉིད་ལ་དེ་ཡི་ངེས་པས་གསལ་བར་མཚོན་ནོ། །ཀུན་སྤྱོད་ཀྱི་རྒྱུད་ནས་གསུངས་པའི་མཆོད་བརྗོད།

[Full Size]

གང་གི་དྲིན་གྱི་བདེ་ཆེན་ཉིད། །ཅེས་པའི་ཚིག་རྐང་བ་བཞི་པོའི་ལུང་དང་མཐུན་པར། བླ་མ་བསྟེན་པ་ལ་གུས་པ་རྣམས་སྨིན་ལམ་དབང་གི་དུས་མཚོན་བྱ་དོན་དམ་པའི་ཡེ་ཤེས་སྐྱེད་པར་བྱེད་དེ། དགྱེས་རྡོར་ལས། བླ་མའི་དུས་ཐབས་བསྟེན་པ་ལ། །རང་གི་བསོད་ནམས་ལས་ཤེས་བྱ། །ཞེས་གསུངས་ཤིང་། དེ་ལྟ་བུའི་བླ་མ་རིན་པོ་ཆེ་དབང་གི་རྒྱལ་པོ་ལྟ་བུ་སྟེ། གདུལ་བྱ་རྣམས་ཀྱི་བསམ་པ་ཇི་ལྟ་བར་རྫོགས་པར་བྱེད་ནུས་པས་སོ། །དེས་ན་དེ་ཉིད་རྡོ་རྗེ་སེམས་དཔའ་འམ། རྡོ་རྗེ་ཅན་ཏེ། ཇི་སྐད་དུ། བླ་མ་དང་ནི་རྡོ་རྗེ་འཛིན། །ཐ་དད་པར་ཡང་མི་རྟོག་གོ། ཞེས་དང་། དུས་གསུམ་སངས་རྒྱས་མཆོད་པ་བས། །བླ་མའི་བ་སྤུ་གཅིག་མཆོད་ལྷག །ཅེས་དང་། འཇམ་དཔལ་ལས། མཆོད་འོས་བསྟོད་འོས་ཕྱག་གི་གནས། །རྟག་ཏུ་རི་མོར་བྱ་བའི་འོས། །བཀུར་འོས་བརྗེད་པར་བྱ་བའི་མཆོག །ཕྱག་བྱར་འོས་པ་བླ་མའི་རབ། །ཅེས་སོགས། མདོ་རྒྱུད་གང་ནས་ཀྱང་ལུང་གི་འདྲེན་པ་ཆེས་མང་བར་གསལ་ཞིང་བསྔགས་པར་མཛད་ལ། དེ་ལྟར་མཚན་ཉིད་དང་ལྡན་པའི་བླ་མ་མཆོད་ཅིང་བྱིན་རླབས་རྒྱུད་ལ་སྨིན་པའི་ཕྱིར་རྣལ་འབྱོར་བསྒོམ་རིམ་ལ་བརྩོན་པར་བྱས་ན་མཆོག་དང་ཐུན་མོང་གི་དངོས་གྲུབ་ཐམས་ཅད་འབྱུང་བར་ངེས་པའི་ཚུལ་ལ་དྭངས་པ་བསྐྱེད་ཅིང་། དེ་དག་གི་ཕན་ཡོན་ཐེག་པ་ཆེ་ཆུང་སོ་སོ་ནས་གསུང་ཚུལ་དཔག་ཏུ་མེད་པ་སྤྲོས་ཀྱིས་མི་ལང་གི། འདིར་ནི་གཙོ་བོ་བྱིན་རླབས་བརྒྱུད་པའི་བཀའ་སྲོལ་མ་ཆད་པ་འབྲེལ་ཚད་དོན་དང་ལྡན་ཞིང་། ཁྱད་

[Full Size]

པར་སྐལ་ལྡན་གྱི་རྒྱུད་ལ་དངོས་སུ་ཕྱག་རྒྱ་ཆེན་པོའི་ཡེ་ཤེས་སྐྱེད་པར་མཛད་ཅིང་ཕྱིར་མི་ལྡོག་པའི་གོ་འཕང་ལ་བཀོད་ནུས་པའི་བླ་མ་དེ་ཉིད་རྡོ་རྗེ་འཆང་དངོས་སུ་སྣང་བར་བྱེད་པ་རིགས་ཏེ། དེ་ཡང་སངས་རྒྱས་དྲུག་པ་སེངྒེའི་རྣམ་འཕྲུལ་མཐོན་མཐིང་གི་ཅོད་པན་འཆང་བ་དཔལ་ཀརྨ་པ་སྐྱེས་རབས་ཀྱི་ཕྲེང་བ་བཅུ་གསུམ་དང་། དབང་རྟགས་པདྨ་རཱ་གའི་ཅོད་པར་འཆང་བ་ཞྭ་དམར་པ་སྐྱེས་རབས་བཅུ་པ་འཛིན་པའི་རྡོ་རྗེ་སློབ་དཔོན་ཆེན་པོའི་སྐུར་སྣང་བ་འདི་དག་ནི་རྒྱལ་བ་བུ་རམ་ཤིང་པ་དང་། ཨོ་རྒྱན་ཆེན་པོའི་ལུང་གིས་ཟིན་ཅིང་དབུགས་དབྱུང་བར་མཛད་པ་སོགས་ཆེས་གསལ་བར་བསྟན་པ་གསར་རྙིང་གི་ཆོས་སྒོ་དུ་མར་བཀྲལ་བར་སྣང་བ་དང་། འོག་མིན་ཆོས་ཀྱི་དབྱིངས་ངེས་པ་ལྔ་ལྡན་གྱི་ཞིང་ན་གར་དབང་རྡོ་རྗེ་འཆང་གི་རྣམ་པར་རོལ་པ་དང་། བདེ་བ་ཅན་པདྨོ་རྣམ་པར་བཀོད་པར་འོད་སྣང་མཐའ་ཡས་ཀྱི་སྐུར་གསལ་བ་དང་། སྔོན་འདས་པའི་དུས་སངས་རྒྱས་དཀོན་མཆོག་ཡན་ལག་ཏུ་མངོན་པར་བྱང་ཆུབ་ནས་བདུད་རྩི་བརྙེས་ཟིན་ཀྱང་། གངས་རིའི་ལྗོངས་འདིར་ཡང་སྙིང་རྗེ་དང་། བྱམས་པ་དང་། བརྩེ་བ་ཆེན་པོས་འགྲོ་རྣམས་ཡལ་བ་མ་དོར་བའི་ཕྱིར་སྐྱེ་བའི་རྣམ་པར་འཕྲུལ་པ་ཇི་སྲིད་དུ་སྟོན་པར་མཛད་ཅིང་། དེ་ཡང་རྡོ་རྗེ་གུར་ལས། གང་ཕྱིར་རྡོ་རྗེ་སེམས་དཔའ་ནི། །དེ་ཉིད་སློབ་དཔོན་གཟུགས་བཟུང་སྟེ། །སེམས་ཅན་ཕན་གདགས་དམིགས་ནས་ནི། །ཐ་མལ་པ་ཡི་གཟུགས་སུ་གནས། །ཅེས་གསུངས་པས་བསྟན་ཅིང་གདུལ་བྱ་རྣམས་ཐབས་དང་རྣམ་པ་སྣ་ཚོགས་པའི་སྒོ་ནས་འདུལ་བར་

[Full Size]

མཛད་ཅིང་། ཡང་དག་པའི་སར་ངེས་པར་དཀྲི་བའི་འཕགས་པ་མཆོག་གི་སྤྱོད་པ་དག་ཉེ་བར་སྤྱད་པའི་སྟོབས་ཀྱིས་དཀྱིལ་འཁོར་ཀུན་གྱི་གཙོ་བོ། རིགས་ཐམས་ཅད་ཀྱི་དབང་ཕྱུག །རྡོ་རྗེ་འཆང་དང་མི་གཉིས་པར་རྡོ་རྗེ་བཞི་ཡི་ངོ་བོར་མངོན་དུ་བསྙེན་པའི་སྒོ་ནས་སྨིན་དབང་འདི་དག་ཐོབ་པའི་དགོས་ཁྱད་ནི། དཀྱིལ་འཁོར་མཐོང་ཞིང་དབང་བསྐུར་ཐོབ། །ཕུང་པོ་བདག་ཉིད་སྨིན་པར་འགྱུར། །སྡིག་པ་ཐམས་ཅད་རྣམ་པར་སྤངས། །རྡོ་རྗེ་འཛིན་པའི་གནས་ཐོབ་བོ། །ཞེས་གསུངས་ཞིང་། དེ་ཡང་སྣོད་འདི་ལྟ་བུར་རུང་བའི་དལ་བ་བརྒྱད་དང་། འབྱོར་པ་བཅུ་དང་ལྡན་པའི་མི་ལུས་ཐོབ་པ་ཤིན་ཏུ་རྙེད་པར་དཀའ། དེ་ཡི་ནང་ནས་ཀྱང་རྡོ་རྗེ་ཐེག་པའི་སྙིང་པོ་གསང་བ་བླ་ན་མེད་པའི་ལམ་དུ་འཇུག་པ་ནི་དེ་བས་ཀྱང་ཁྱད་པར་དུ་འཕགས་ཤིང་རྨད་དུ་བྱུང་བ་སྟེ། དེ་ལ་ཡང་ཚེ་གཅིག་བྱང་ཆུབ་ཀྱི་འབྲས་བུ་སྨིན་པར་ནུས་པའི་མོས་གུས་བླ་མའི་རྣལ་འབྱོར་རྩ་བ་དང་གཞི་མ་ལྟར་ལམ་དང་ལམ་གྱི་སྟེགས་སུ་གྱུར་པས་དེ་དག་གི་སྒོ་ནས་སྨིན་གྲོལ་གྱི་དབང་བསྐུར་ཟབ་མོ་བགྱིད་པ་ལ་ཐོག་མར་བདག་སློབ་དཔོན་ཏུ་འོས་པའི་བྱ་བ། དཀྱིལ་འཁོར་མཆོད་ཅིང་བསྟོད་བསྐུལ་བསྙེན། །འཇུག་སོགས་རང་སྨིན་གཞན་གྲོལ་སྟོན། །ཞེས་གསུངས་པ་ལྟར་གྱི་སྦྱོར་དངོས་རྣམས་ཇི་ལྟར་བར་གྲུབ་ཅིང་། ཁྱེད་རང་སྐལ་ལྡན་སློབ་མ་རྣམས་ཀྱི་ངོ་སྐལ་དུ་གྱུར་པ་དབང་བསྐུར་ཡོངས་སུ་རྫོགས་པར་ཞུ་བའི་དོན་དུ་དངོས་དང་ཡིད་སྤྲུལ་གྱིས་དམིགས་ཏེ་མཎྜལ་གནང་བར་ཞུ། ཞེས་མཎྜལ་ཕུལ་ནས།

[Full Size]

སློབ་དཔོན་གྱིས། ཁྱེད་རྣམས་བླ་ན་མེད་པའི་བྱང་ཆུབ་འདོད་པ་ནི་ཤིན་ཏུ་ལེགས། དེ་ཡང་བླ་མའི་དཀྱིལ་འཁོར་ཆེན་པོས་ཁྱེད་རྣམས་ཀྱི་རྒྱུད་སྨིན་པར་བྱེད་པ་ལ་བདག་བླ་མར་འོས་པ་ལ་གསོལ་བ་འདེབས་པའི་འདུན་པས་འདིའི་རྗེས་ཟློས། ཐུགས་རྗེའི་བདག་ཉིད་བཀའ་དྲིན་གྱི་སོགས་བརྗོད་དུ་གཞུགཁྱེད་རྣམས་འཁོར་བ་སྡུག་བསྔལ་གྱི་རང་བཞིན་ཅན་ལས་ངེས་པར་འབྱུང་བའི་བློས། ཆོས་བརྒྱད་རྣམ་གཡེང་འཇིག་རྟེན་གྱི་འདུ་འཛི་སྤངས་ཏེ་ཐར་པ་དང་ཐམས་ཅད་མཁྱེན་པའི་གོ་འཕང་འདོད་པའི་ཕྱིར་མགོན་པོས་འདྲེན་པར་གསོལ་ཞེས་རིགས་ལྔ་སྤྱི་དང་བྱེ་བྲག་གི་སྡོམ་པ་རྣམས་འཛིན་སྙམ་པས་འདིའི་རྗེས་ཟློས། རྡོ་རྗེ་རྒྱལ་པོ་སོགས་བརྗོད། དེ་ནས་སེམས་བསྐྱེད་པའི་ཕྱིར་ཁྱེད་རང་རྣམས་ཀྱི་སྙིང་གར་ཀུན་རྫོབ་དང་དོན་དམ་གྱི་མཚོན་བྱེད་ཟླ་བའི་སྟེང་དུ་རྡོ་རྗེ་རྩེ་ལྔ་པ་བསྒོམ་ལ་འདིའི་རྗེས་ཟློས། ༀ་སརྦ་ཡོ་ག་ཙིཏྟ་སོགས། དེ་ནས་ཡེ་ཤེས་ཀྱི་དཀྱིལ་འཁོར་ཆེན་པོས་བྱིན་དབབ་པའི་ཕྱིར་གསོལ་བ་གདབ་པ་འདིའི་རྗེས་ཟློས་མཛོད། དཔལ་ཧེ་རུ་ཀ་ཡི་དཀྱིལ་འཁོར་གྱི་སོགས་བརྗོད་དུ་གཞུག་ནས་བྱིན་འབེབས་པར་བྱའོ། །དེ་ལྟར་ཕབས་པའི་ཡེ་ཤེས་དེ་ངོ་སྤྲད་པའི་ཕྱིར་རྡོ་རྗེ་གླུ་བླང་བ་ནི། ལྟོས་ཤིག་སོགས། དེ་ལྟར་ཡེ་ཤེས་དེ་ཉིད་བརྟན་པར་མོས་ཤིག །ཏིཥྛབཛྲ། དེ་ལྟར་ཡེ་ཤེས་དབབ་པ་དང་རྒྱས་བཏབ་ཟིན་གྱི། དེ་ནས་རིགས་པའི་དབང་ལྔ་བསྐུར་པ་ནི་སྡོམ་འབྱུང་ལས། ཆུ་དང་ཅོད་པན་རྡོ་རྗེ་དང་། །དྲིལ་བུ་མིང་གི་དབང་བསྐུར་ཏེ། །དབང་ལྔ་དེ་བཞིན་གཤེགས་བདག་ཉིད། །ཅེས་གསུངས་པས་དང་པོ་མི་བསྐྱོད་པ་ཆུ་ཡི་དབང།

[Full Size]

རིན་ཆེན་འབྱུང་ལྡན་ཅོད་པན་གྱི་དབང་། འོད་དཔག་མེད་རྡོ་རྗེའི་དབང་། དོན་ཡོད་གྲུབ་པ་དྲིལ་བུའི་དབང་། རྣམ་པར་སྣང་མཛད་མིང་གི་དབང་སྟེ་རིགས་པའི་དབང་ལྔའོ། །དེ་ཡང་གཞི་ཕུང་པོ་ལྔ་གདོད་མ་ནས་རྒྱལ་བ་རིགས་ལྔར་བཞུགས་པ་ལ། དེ་ལྟར་མ་རིག་པའི་གདུལ་བྱ་རྣམས་ལ་གནས་ལུགས་ཇི་ལྟ་བ་བཞིན་སྟོན་པ་སྟེ། དམིགས་པ་འདི་བཞིན་དུ་མཛོད། ཅེས་བརྗོད་ལ། སློབ་མ་དབང་རྫས་སོགས་བརྗོད། ཆུ་དབང་གི་རྗེས་སུ། དེ་དག་ནི་ཐུགས་རྡོ་རྗེའི་དབང་ངོ་། །དབུ་རྒྱན། དེ་དག་ནི་ཡོན་ཏན་གྱི་དབང་ངོ་། །རྡོ་རྗེ། དེ་དག་ནི་གསུང་རྡོ་རྗེའི་དབང་ངོ་། །དྲིལ་བུ། དེ་དག་ནི་ཕྲིན་ལས་ཀྱི་དབང་ངོ་། །མིང་དབང་། དེ་དག་ནི་སྐུ་རྡོ་རྗེའི་དབང་ངོ་། །དེ་ལྟར་དབང་བསྐུར་དུག་ལྔའི་སྒྲིབ་པ་དག་སོགས་བརྗོད། དེ་ནས་རྡོ་རྗེ་སློབ་དཔོན་གྱི་དབང་གི་དོན་དུ་འདིའི་རྗེས་ཟློས་མཛོད། དཔའ་བོ་ཆེན་པོ་སོགས། དེ་ནས་དེ་བཞིན་གཤེགས་པ་ཐམས་ཅད་ཀྱི་གསང་བ་སྦྱིན་པ་ནི། ཧཱུྃ་བྱུང་སོགས་ནས། ཉིད་དུ་གྱིས་བར་བརྗོད་ལ། དེ་ནས་དཀྱིལ་འཁོར་གྱི་ལྷ་ཚོགས་རྣམས་ཀྱི་ཡེ་ཤེས་རྒྱུན་གྱི་དབང་བསྐུར་བ་ནི། རྡོ་རྗེ་ཆེན་པོ་སོགས། དེ་ནས་གསང་དབང་གི་དོན་དུ་འདིའི་རྗེས་ཟློས། མགོན་པོ་སོགས། བླ་མ་ཧེ་རུ་ཀ་ཡབ་ཡུམ་བདེ་བ་ཆེན་པོས་བསྐུལ་བའི་སྒྲས་དེ་བཞིན་གཤེགས་པ་ཐམས་ཅད་སྤྱན་དྲངས། རྗེས་ཆགས་ཀྱི་བྱང་སེམས་ཞུ། རྩ་འཁོར་ལོ་བཞིར་ཁྱབ་པར་མོས་ཤིག །དེ་ལྟར་སངས་རྒྱས་རྣམས་སོགས། དེ་ནས་ཤེས་རབ་ཡེ་ཤེས་ཀྱི་དོན་དུ་འདིའི་རྗེས་ཟློས། ཧེ་རུ་ཀ་དཔལ་སོགས། མེ་

[Full Size]

ལོང་སིནྡྷུ་ར་ཆོས་ཀྱི་འབྱུང་གནས་རྡོ་རྗེ་བཙུན་མོའི་གསང་བ་ནས་འཕྲོས་པའི་ཤེས་རབ་མ་སྤྱིན་པ་ནི། རྡོ་རྗེ་སྙེ་མ་སོགས། སེམས་ཀྱི་སྒྲིབ་དག་སོགས། བཞི་པ་འཇིག་རྟེན་དང་འཇིག་རྟེན་ལས་འདས་པའི་དབང་གི་དོན་དུ་རྗེས་ཟློས་མཛོད། རྡོ་རྗེ་ཅན་སོགས། དེ་ཡང་དཔེ་ཡི་ལྷན་སྐྱེས་ལས་དོན་གྱི་ཡེ་ཤེས་མཚོན་པར་བྱ་སྟེ། ཁྱེད་རྣམས་ལུས་གནད་དང་ལྡན་པའི་སེམས་ཀྱི་རྡོ་རྗེ་གང་ཤར་དེ་ཡི་ངོ་བོ་ལ་མཉམ་པར་ཞོག་ཅིག །ཡེ་ཤེས་འདི་ནི་ཆེས་ཕྲ་ཞིང་སོགས་བརྗོད། དོན་དམ་དེ་བཞིན་ཉིད་ཀྱི་སོགས་བརྗོད། དེ་ལྟར་རྡོ་རྗེའི་གསང་བ་ཆེན་པོས་དབང་བསྐུར་རྫོགས་པར་གྲུབ་པ་ཡིན་གྱི། དེ་ཡང་དེ་ལྟ་བུ་ཐོབ་པའི་དགོས་ཁྱད་ནི། སློབ་དཔོན་ཨ་བྷཱ་ཡས། སྔར་མི་དབང་བ་ལ་དབང་བས་དབང་ཞེས་བྱ་སྟེ། དབུལ་པོའི་སྒྱེད་པུ་གསེར་དུ་ཡོད་པ་ངོ་ཤེས་པ་ལྟ་བུའོ་ཞེས་གསུངས་པ་ལྟར་དགའ་བ་དང་སྤྲོ་བ་རྒྱ་ཆེན་པོ་གྱིས་ལ་རྩ་བ་དང་ཡན་ལག་གི་དམ་ཚིག་རྣམས་ཚུལ་བཞིན་དུ་འཛིན་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས། གཏང་རག་གི་མནྜལ་དང་། ལུས་དང་ལོངས་སྤྱོད་ལྟོས་པ་མེད་པར་འབུལ་སྙམ་པས་འདིའི་རྗེས་ཟློས། དེང་ནས་བརྩམས་ཏེ་བདག་བྲན་དུ་སོགས་ཀྱང་བརྗོད་པར་བྱའོ། །དེ་ནས་མ་དན་དང་བ་ལ་ཚོགས་ཀྱི་ཡོ་བྱད་གཙོ་བོར་གྱུར་པའི་འདོད་ཡོན་རྣམས་ལ་དཔའ་བོའི་དགའ་སྟོན་གྱིས་རོལ་པར་བྱ་ཞིང་། རྣམ་པར་རྟོག་པ་མེད་པར་ནང་གི་སྦྱིན་སྲེག་གི་ངེས་པས་ལོངས་སྤྱད། དེའི་ཚེ་རྡོ་རྗེའི་གླུ་དང་གར་དང་། ཡེ་ཤེས་ཀྱི་ཀུན་ཏུ་རུའི་སྤྱོད་པ་སོགས་བྱའོ། །དེ་ལྟར་ཁྱབ་བདག་རྡོ་རྗེ་སེམས། །ཧེ་རུ་ཀ་དཔལ་བླ་མ་ཡི། །དཀྱིལ་འཁོར་ཆེན་པོར་སྨིན་བྱེད་ཀྱི། །དབང་བསྐུར་ཡེ་ཤེས་རྒྱུན་བཟང་འདི། །ཚུལ་འདིར་མོས་པའི་

[Full Size]

སྐལ་པ་ཅན། །སྒྲུབ་ཆེན་མངྒའི་མིང་ཅན་གྱི། །རྣམ་དཔྱོད་བློ་གྲོས་པད་ཚལ་བཞད། །གདུལ་བྱའི་ར་ཡིག་གཉིས་པ་རྣམས། །ཆོས་ཀྱི་ཟིལ་མངར་ཐོབ་པའི་ཕྱིར། །ཉིན་མོར་བྱེད་པའི་དབང་པོ་ཡིས། །ཀུན་དགའི་འོད་སྟོང་སྤྲོ་བར་བྱས། །དགེ་དེས་སྐྱེ་དགུ་རྒྱལ་གྱུར་ཅིག །ཤུ་བྷཾ།། །།

བླ་མའི་རྣལ་འབྱོར་བྱིན་རླབས་ཆར་འབེབས་ཀྱི་ཟིན་བྲིས་རབ་གསལ་མེ་ལོང་།

[Full Size]

བླ་མའི་རྣལ་འབྱོར་བྱིན་རླབས་ཆར་འབེབས་ཀྱི་ཟིན་བྲིས་རབ་གསལ་མེ་ལོང་བཞུགས། །དཔལ་ལྡན་མི་ཕམ་ཆོས་གྲུབ་རྒྱ་མཚོའི་ཞབས་ལ་ཕྱག་འཚལ་ལོ། །མགོན་པོ་དེ་ཉིད་ཀྱི་བླ་མའི་རྣལ་འབྱོར་མདོར་བསྡུས་ཞིག་སྐལ་བ་དང་ལྡན་པའི་ཆོས་སྐལ་དུ་སྦྱིན་པ་བྱིན་རླབས་ཆར་འབེབས་ཀྱི་ཟིན་ཐོ་ཞིག་དགོས་ཞེས་བྱ་བཏང་མངྒ་ལའི་མིང་ཅན་གྱིས་རྣམ་པར་དག་པའི་བློ་ཡིས་བསྐུལ་ཏེ། དེས་ན་ཐོ་ཙམ་བརྗོད་པར་བྱ་སྟེ། འདི་ཉིད་ཀྱི་སྒྲུབ་པ་དབང་དང་འབྲེལ་བའི་ཚེ་ལྟ་བུར་སྤྲོ་ན། ཐོག་མར་གདོད་ནས་རང་བྱུང་ལྷུན་གྱིས་གྲུབ་པའི་གནས་ས་སྤྱོད་དཔའ་བོ་མཁའ་འགྲོ་འདུ་བའི་གནས་སམ། རྒྱལ་བ་གོང་མས་བྱིན་གྱིས་བརླབས་ཤིང་ཞབས་ཀྱིས་བཅགས་པའི་གནས་སམ། དབེན་ཞིང་ཉམས་དགའ་ལ་བསམ་གཏན་གྱི་ཚེར་མ་མེད་པའི་སར་གནས་འཆའ་ཞིང་། ས་གཞི་བྱི་དོར་དང་། གཙང་སྦྲ་གང་ཆེའི་བཤམས་བཀོད་སོགས་བྱས་ལ། དམིགས་པའི་རྟེན་རྗེ་ཞྭ་དམར་པའི་སྐུ་བརྙན་འདྲ་ཞལ་ལམ། ན་རིམ་གང་ཡིན་གྱི་སྐུ་འམ་རས་བྲིས་བཤམས་ལ་སྟེགས་ཀྱི་ཁར་ལྷ་མཚན་མཎྜལ་དབུས་དང་ཕྱོགས་བཞིར་འབྲུ་དཀར་དྲི་བཟང་སྦགས་པའི་ཚོམ་བུ་བཀོད། དེ་སྟེང་མཉྫིའི་ཁར་བུམ་པ་མགུལ་ཆིངས་ཁ་རྒྱན་དུང་ཆོས་གཟུངས་རྡོར་ཡང་བཤམས། བུམ་པའི་སུམ་གཉིས་ཆུ་གཙང་གིས་

[Full Size]

བཀང་བ་དང་། བུམ་རྫས་ཉེར་ལྔ་དྲི་བཟང་སོགས་བཏབ། དེ་སྟེང་མཉྫིའི་རིམ་གཅིག་སྟེང་རབ་ཏུ་ཐོད་པ་མཚན་ལྡན། མིན་ཀྱང་སྐྱོན་མེད་ཀྱི་ཐོད་པར་ཆང་དང་། འཛོམས་ན་རྩ་བརྒྱད་སྟོང་སྦྱར་གྱི་ཆོས་སྨན་བཏབ། དེ་ཡི་ཁར་མེ་ལོང་སིནྡྷཱུ་ར་བྱུགས་པའི་དབུས་སུ་ཆོས་འབྱུང་བསྣོལ་མ་ཁུག་དྲུག་ལ་དགའ་འཁྱིལ་གཡོན་བསྐོར། ལྟེ་བར་ཧྲཱིཿདེ་མཐར་ཡིག་ངོས་ནང་བསྟན་གྱིས། ༀ་བཛྲ་དྷྲིཀྲ་ཛྙཱ་ན་ཌཱ་ཀི་ནི་ས་མ་ཡ་ཨཱ་བེ་ཤ་ཡ་ཨཱ་བེ་ཤ་ཡ་ཨ་ཨཿཞེས་བྲིས་ལ་དར་དམར་གྱིས་དགབ། ཕྱོགས་བཞིར་དབུ་རྒྱན། རྡོ་རྗེ། དྲིལ་བུ། མིང་དབང་རྣམས་དངོས་སམ་ཙཀླི་སོགས་གང་བདེ་བཤམས་ལ་མདུན་དུ་མཆོད་པ་ཕྲེང་ཚར་བཤམས། ནང་མཆོད་ཀ་པཱ་ལ་བདུད་རྩིས་གང་བ་ཐོད་རྫས་དང་བཅས་པ། བླ་མ་ཡི་དམ་ཆོས་སྐྱོང་མཁའ་འགྲོའི་གཏོར་མ་ལྔ་ཚོམ་ཚོགས་དང་། ཤ་ཆང་གཞན་ཡང་ཟས་སྣའི་རིགས་དང་། མཆོད་པའི་མཎྜལ་སོ་བདུན་མའི་བཀོད་པ་ཅན་དང་། སྔོན་འགྲོ་གཏོར་མ། ཌཱ་དྲིལ། སྤོས་སྣོད། ཡུངས་ཀར་གུ་གུལ་ལ་སོགས་པ་ཉེར་མཁོའི་ཡོ་བྱད་འདུ་བར་བགྱིད་ལ། སྟན་བདེ་བར་ལུས་གནད་གང་བདེས་འཁོད་ལ། རང་ཉིད་རྩ་བའི་ཡི་དམ་གང་ཡིན་དེ་གསལ་བཏབ། མདུན་གྱི་ནམ་མཁར་སྐྱབས་ཡུལ་རྣམས་འདོན་སྒོམ་སྦྲགས་ནས། སྐྱབས་སེམས། ཡན་ལག་བདུན་པ། ཚད་མེད་བཞི་སོགས་བསྒོམ། ནང་མཆོད་བདུད་རྩི་བསང་སྦྱངས་བྱིན་རླབས་དང་པོ་ཉིན་པར་བྱ། སྔོན་འགྲོ་ཡང་དེ་བཞིན། བྱིན་རླབས་ཉིན་བསྟར་ཆགས་དང་། སྲུང་

[Full Size]

འཁོར་བར། དེ་ནས་མདུན་མཁར་བླ་མའི་དཀྱིལ་འཁོར་བསྐྱེད་པ་སོགས་གཞུང་ཚིག་དང་དམིགས་པ་མཐུན་པར་ལྷ་སྐུ་ངོ་བོ་གསལ་བ། རྣམ་པ་སྟོང་པ། འཇའ་ཚོན་ལྟ་བུ། གཞན་ཡང་དུས་གསུམ་གྱི་སངས་རྒྱས་རྣམས་དང་། ཉེ་སྲས་བརྒྱད། ཉན་ཐོས་གནས་བརྟན་སོགས་བྱང་འཕགས་ཀྱི་སེམས་དཔའ་རྣམས་དང་། གུ་རུ་པདྨ་སོགས་རྒྱ་བོད་ཀྱི་རིག་འཛིན་གྲུབ་ཐོབ་བརྒྱུད་པའི་བླ་མ་ཐམས་ཅད་དང་། བདེ་དགྱེས་གསང་གསུམ་སོགས་རྒྱུད་སྡེ་བཞི་ཡི་ལྷ་རབ་འབྱམས། ཡེ་ཤེས་མགོན་པོ་བེར་དང་། ལྷ་མོ། དམ་ཅན། ཞིང་སྐྱོང་སོགས་ཆོས་སྐྱོང་རྒྱ་མཚོས་བསྐོར་བ་བར་མཚམས་མེད་པར་བཞུགས་པ། བཀྲ་ལམ་མེར་མེ་ལོང་གི་གཟུགས་བརྙན་བཞིན་གསལ་བར་བསྐྱེད་ནས་སྤྱན་འདྲེན་སོགས་གཞུང་ཚིག་ལྟར་དམིགས་པར་བྱའོ། །མདུན་བསྐྱེད་ཐུགས་ཀའི་འོད་ཀྱིས་བསྐུལ་བའི་དབང་ལྷ་སྤྱན་དྲངས་སོགས་དང་། ཕྱི་ནང་གི་མཆོད་པ། བསྟོད་ཕྱག་རྣམས་དཀྱུས་ལྟར་བྱའོ། །སྔགས་འཁོར་གསལ་ལྟར་ཧྲཱིཿཡི་མདུན་ནས་ཡིག་དྲུག་ངོ་ཕྱིར་བསྟན་གཡོན་དུ་བཀོད་གཡས་སུ་བསྐོར་བཟླས་པའི་སྔགས་དག་ཆ་དང་བཅས། དང་པོ་རིམ་བཞིན་གསལ་བཏབ། དེ་ནས་བར་མེད་ལྟ་བུར་འཁོར་བ་དང་། དེ་ནས་འོད་ཀྱི་རིགས་དྲུག་གི་ཞིང་དུ་ཕོག །སྡིག་སྒྲིབ་སྦྱངས། སྣང་གྲག་སྣོད་བཅུད་ལྷ་ཡི་ངོ་བོར་གསལ་བར་བསམ། མཚན་སྔགས་ཀྱང་སྐབས་སུ་བཟླའོ། །དེ་ལྟར་ཡིག་དྲུག་གཙོ་བོར་སྟོན་པ་ནི་གསུང་གི་དབང་ཕྱུག་སྣང་མཐའ་དང་ངོ་བོ་གཅིག་བཞིན་

[Full Size]

དེ་ཡི་དགོས་ཁྱད་བསྟན་པའོ། །དེ་ནས་རྒྱང་འབོད་བྱ་བ་ནི། མི་རྟག་སྐྱོ་ཤས་ཀྱིས་བློ་བསྐུལ་ནས་ཆོས་བརྒྱད་གཉིས་འཛིན་ལ་ཞེན་པ་ལྡོག །སེམས་ཅན་རྣམས་ལ་སྙིང་རྗེ་དུང་ངེ་བ་བསྐྱེད་ནས་གྲུབ་ཐོབ་གོང་མའི་རྣམ་ཐར་རྗེས་སུ་དྲན་བཞིན་དེ་ཡི་རྗེས་སུ་སློབ་པའི་མོས་འདུན་གཏིང་ནས་སྐྱེས་པར་བྱས་ལ་གདུང་བའི་དབྱངས་དང་ལྡན་པས་སྣང་བ་འགྱུར་ངེས་སུ་བྱའོ། །དེ་ནི་མོས་གུས་སྒོམ་གྱི་མགོ་བོ་དང་། ཞེན་ལོག་སྒོམ་གྱི་རྐང་པར་གསུངས་བཞིན་མོས་གུས་དང་དག་སྣང་སྙིང་རྗེ་དམ་ཚིག་སོགས་ལམ་ཆོད་བྱིན་རླབས་འཇུག་ཕུལ་ཆེ་བ་རྒྱལ་བ་དག་གི་གསུང་ལས་བྱུང་བས་ནན་ཏར་འབད་པས་ཟུང་ཞིགདེ་ནས་སྡོམ་གསུམ་བཤགས་སྡོམ་སོགས་ཀྱང་སྙིང་ཁུང་རུས་པའི་གཏིང་ནས་འགྱོད་པ་དྲན་བཞིན་དུ་རྩེ་གཅིག་པས་བྱའོ། །དེ་ནས་བདག་ཉིད་འཇུག་ཅིང་དབང་བླང་བ་ནི། དངོས་གྲུབ་སྤྲིན་ཕུང་དུ་གསལ་ལྟར་རྣམ་རྒྱལ་བུམ་པ་སྐྱེད་ཆོག་དང་ཐུགས་ཀར་ཟླ་སྟེང་ཧྲཱིཿདམར་མཐར་སྔགས་ཕྲེང་བཀོད་པ་མདུན་བསྐྱེད་ལྟར་སྔགས་ཀྱི་དབྱེ་བ་ལས་གཞན་དུ་མ་མཆིས། འདི་སྐབས་རྡོར་འཆང་གཙོ་བོར་སྟོན་པ་ནི་གར་དབང་རྡོ་རྗེ་འཆང་ཉིད་ངེས་པ་ཐུན་མོང་མ་ཡིན་པའི་སྒྲུབ་པའི་རྩ་བ་མཐར་ཐུག་པའོ། །དེ་ནས་བདག་འཇུག་དབང་བཞི་བླང་བ་སོགས་གཞུང་དུ་བཀོད་པ་ལྟར་དང་། དབང་གི་ལྷ་རྣམས་རང་ཉིད་ལ་རིམ་པ་བཞིན་བསྟིམ་པ་སོགས་འདོན་སྒོམ་དང་བསྟུན་པར་གསལ་བར་དམིགས་པའོ། །དེས་རང་རྒྱུད་སྨིན་པར་བྱས་ནས་གཞན་སྐལ་པ་དང་ལྡན་པ་སྙིང་པོའི་བསྟན་པ་ལ་འཇུག་པའི་སློབ་མ་བྱང་ཆུབ་ཀྱི་སེམས་དང་ལྡན་པ་ལ་རྒྱུད་བྱིན་གྱིས་བརླབས་ཕྱིར་སྨིན་བྱེད་བསྐུར་བར་རུང་གི། དེ་ཡང་བདག་འཇུག་

[Full Size]

ཟིན་ནས་ཚོགས་ཕུལ་བ་གཏོར་བསྔོས་མཚམས་སློབ་མ་རྗེས་འཛིན་བྱ་ལ། དེ་མིན་རྒྱུད་མ་དུལ་བའི་གཏི་མུག་ཅན་རྣམས་ལ་ནི་གསང་བ་གདམས་པ་མི་བྱའོ། །རྗེས་ཀྱི་བྱ་བ་ཚོགས་ཀྱི་འཁོར་ལོ་ནང་མཆོད་ལྟར་བྱིན་གྱིས་བརླབས། སྤྱན་འདྲེན་གཏོར་བསྔོས་ཚོགས་རོལ་ལྷག་མ་དང་། མཆོད་བསྟོད་རྣམས་དཀྱུས་ལྟར་འདོན་སྒོམ་དང་། བསྡུ་རིམ་གསོལ་གདབ་མི་བྱེད་པའི་འདུན་པ་དང་བཅས། བླ་མའི་ཞལ་ནས་དངོས་སུ་གདམས་པའི་དོན་ཚིགས་རྐང་བཞི་ལྷང་ལྷང་གསུངས་བར་མོས་ལ་མ་ཡེངས་པར་བྱས་ནས་དེ་ཡི་དོན་ཡིད་ལ་ཆུབ་པར་བྱས་ལ། མཐར་བྱིན་རླབས་བསྡུ་བའི་དབང་ནི། སྐྱབས་ཡུལ་ཐམས་ཅད་གཙོ་བོར་ཐིམ། དེ་ཡི་སྤྱི་བོ་ནས་ༀ་དཀར་པོ་འོད་ཟེར་དང་བཅས་པ་རང་གི་དཔྲལ་བར་ཐིམ། སྐུ་ཡི་དབང་ཐོབ། ཉོན་མོངས་པ་གཏི་མུག་དག །ཆོས་དབྱིངས་ཡེ་ཤེས་མངོན་དུ་གྱུར། དེ་ཡི་རིགས་འགྲེས་ཀྱི། ཨཱཿདམར་པོ། མགྲིན་པར་ཐིམ། གསུང་གི་དབང་ཐོབ། འདོད་ཆགས་དག །སོར་རྟོག་ཡེ་ཤེས་ཐོབ། ཧཱུྃ་སྔོན་པོ་སྙིང་གར་ཐིམ། ཐུགས་དབང་ཐོབ། ཞེ་སྡང་དག །མེ་ལོང་ཡེ་ཤེས་ཐོབ། སྭཱ་སེར་པོ་ལྟེ་བར་ཐིམ། ཡོན་ཏན་དབང་ཐོབ། ང་རྒྱལ་དགམཉམ་ཉིད་ཡེ་ཤེས་ཐོབ། ཧཱ་ལྗང་གུ་གསང་བར་ཐིམ། ཕྲིན་དབང་ཐོབ། ཕྲག་དོག་དག །བྱ་གྲུབ་ཡེ་ཤེས་ཐོབ་པར་མོས་ལ་མཐར་བླ་མ་འོད་དུ་ཞུ་རང་ཉིད་དང་དབྱེར་མེད་ཆུ་ལ་ཆུ་བཞག་པ་ལྟར་གྱུར་པར་མོས་ལ་སེམས་ཀྱི་གནས་ལུགས་སྐྱོང་། བསྔོ་བ་དང་སྨོན་ལམ་བཀྲ་ཤིས་སོགས་བྱའོ། །དེ་ནི་ཅུང་ཟད་རྒྱས་པ་སྤྲོ་བ་ཡིན་གྱི། དེ་ལས་ཁྱེར་བདེ་བའི་རྒྱས་འབྲིང་བསྡུས་གསུམ་གྱི་དབྱེ་བ་ནི་བྱིན་རླབས་ཆར་འབེབས་ཀྱི་མཐར་གསལ་ལོ། །དེ་ལྟར་འཇུག་པ་དེའི་ཟིན་བྲིས་ཐོ་ཙམ་ཞིག་བཀོད་པ་དུས་དང་གནས་སྐབས་ཐམས་ཅད་དུ་བཀྲ་ཤིས་པར་གྱུར་ཅིག། །།

བླ་མ་མཆོད་པ་མདོར་བསྡུས།

[Full Size]

༈ སྭསྟི། འདིར་བླ་མ་མཆོད་པ་མདོར་བསྡུས་ཞིག་སྤྲོ་ན། དང་པོ་སྐྱབས་སེམས། མཁའ་ཁྱབ་དངོས་ཀུན་བདག་ཉིད་ཅན། །བདེ་ཆེན་ཡེ་ཤེས་ཐུགས་རྗེའི་འཕྲུལ། །རབ་འབྱམས་དཀྱིལ་འཁོར་ལྷ་ཚོགས་ལ། །བདག་སོགས་འགྲོ་ཀུན་སྐྱབས་སུ་མཆི། །བྱང་ཆུབ་མཆོག་ཏུ་སེམས་བསྐྱེད་དོ། །དེ་ནས་མཆོད་རྫས་རྣམས་ཨ་མྲྀ་ཏས་བསངས་། སྭ་བྷཱ་ཝས་སྦྱངས། སྟོང་ལས་རླུང་མེ་ཐོད་སྒྱེད་སྟེང་། །ཐོད་པ་མཚན་ལྡན་ཀ་པཱ་ལར། །ཤ་ལྔ་བདུད་རྩི་རྣམ་ལྔ་པོ། །ས་བོན་དང་བཅས་གསལ་བ་ལས། །འོད་འཕྲོས་ཡེ་ཤེས་བདུད་རྩི་བཀུག །དམ་ཡེ་དབྱེར་མེད་མཆོད་སྤྲིན་སྤེལ། །ༀ་ཨཱ་ཧཱུྃ་ཧ་ཧོ་ཧྲཱིཿལན་གསུམ་གྱིས་བྱིན་བརླབས་ནས། གནས་འོག་མིན་ངེས་པ་ལྔ་ལྡན་ཞིང་། །འཁོར་དཔའ་བོ་མཁའ་འགྲོ་འབུམ་གྱི་དབུས། །རྒྱལ་བ་དང་རྒྱ་མཚོའི་གཙོ་བོ་མཆོག །དཔལ་ས་བཅུའི་དབང་ཕྱུག་འགྲོ་བའི་མགོན། །རྗེ་བློ་གྲོས་རིན་ཆེན་དམ་པ་དང་། །བཀའ་བབས་ཀྱི་ཆོས་བདག་གྲུབ་པའི་དབང་། །ངེས་དོན་གྱི་རིང་ལུགས་འཛིན་པའི་ཕྲེང་། །སྲས་སློབ་དང་གདན་རབས་བརྒྱུད་པར་བཅས། །ཐུགས་ཆོས་དབྱིངས་ཀློང་ནས་འདིར་དགོངས་ལ། །ཚོགས་མཆོད་པའི་གནས་འདིར་གཤེགས་སུ་གསོལ། །བྱིན་རླབས་ཀྱི་སྤྲིན་ཕུང་ཐིབས་སེ་ཐིབ། །དངོས་གྲུབ་ཀྱི་ཆར་རྒྱུན་ཤ་ར་ར། །བདག་མོས་པའི་བུ་ལ་བྱིན་གྱིས་རློབས། །མཆོག་ཐུན་མོང་གི་དངོས་གྲུབ་དེང་འདིར་སྩོལ། །འདིར་བཤམས་

[Full Size]

ཀྱི་དམ་ཚིག་གསང་བའི་རྫས། །ཤ་ལྔ་དང་བདུད་རྩི་རྣམ་ལྔ་ཡི། །འོད་ཟེར་ལས་ཀུན་བཟང་མཆོད་པའི་སྤྲིན། །རབ་འབྱམས་ཞིང་ཡོངས་བཀང་བློས་བླངས་ཏེ། །དད་མོས་པས་འབུལ་གྱི་བཞེས་སུ་གསོལ། །གཱ་ཱཎ་ཙཀྲ་པཉྩ་ཨ་མྲ་ྀཏ་སརྦ་པཱུ་ཛ་ཁཱ་ཱཧི། ཅེས་འབུལ་ལ། དེ་ལྟར་ཚོགས་ཀྱི་འཁོར་ལོ་ཡི། །མཆོད་པ་ཟབ་མོ་ཕུལ་བའི་མཐུས། །བདག་གཞན་ཚོགས་གསུམ་ཡོངས་རྫོགས་ནས། །གདོད་ནས་ལྷན་སྐྱེས་རང་བྱུང་གི། །མཐའ་བྲལ་བླ་མེད་སྙིང་པོའི་དོན། །མངོན་གྱུར་རྡོ་རྗེ་འཆང་ཐོབ་ཤོག །རྒྱལ་བའི་བསྟན་པ་དར་ཞིང་རྒྱས། །དེ་འཛིན་ཕྲིན་ལས་འགྲོ་དོན་འཕེལ། །སྔོན་བྱོན་རྒྱལ་བའི་ཐུགས་བསྐྱེད་འོད། །གང་འདིར་གསལ་བའི་བཀྲ་ཤིས་ཀྱིས། །རྣམ་ཀུན་དོན་གཉིས་ཡོངས་གྲུབ་ཤོག །ཅེས་པའང་ཀརྨ་སྦྱིན་པའི་ངོར་སྤེལ་བ་དགེ། །།

དྲུང་རྨ་སེ་བློ་གྲོས་རིན་ཆེན་བླ་སྒྲུབ་དང་རྗེས་འབྲེལ་ཚོགས་མཆོད་འབུལ་བ།

[Full Size]

དྲུང་རྨ་སེ་བློ་གྲོས་རིན་ཆེན་བླ་སྒྲུབ་དང་རྗེས་འབྲེལ་ཚོགས་མཆོད་འབུལ་བར་སྤྲོ་ན། མཆོད་པའི་ཡོ་བྱད་རྣམས། ༀ་ཁནྜ་རོ་ཧིས་བསངས། སྭ་བྷཱ་ཝས་སྦྱངས། ཧྲཱིཿབདེ་ཆེན་དབྱིངས་ཀྱི་ཀཱ་པ་ལར། །འབྲུ་གསུམ་འོད་ཞུའི་ཐབས་ཤེས་ཀྱི། །འཆི་མེད་ར་ས་ཡ་ན་སྟེ། །ཚོགས་ཀྱི་འཁོར་ལོར་བྱིན་བརླབས་གྱུར། །ༀ་ཨཱཿཧཱུྃ། ལན་གསུམ་བརྗོད། ཕེཾ་ཕེཾ་ཕེཾ། བདེ་གསལ་ཆོས་དབྱིངས་ཞིང་ཁམས་ནས། །བདེ་གཤེགས་ཀུན་འདུས་ཧེ་རུ་ཀ། བདེ་ཆེན་དྲྭ་བ་སྡོམ་པ་ཉིད། །བདེ་སྟོང་ཚོགས་ལ་སྤྱན་འདྲེན་གཤེགས། །ཆོས་དབྱིངས་

[Full Size]

ལྷུན་རྫོགས་ཀློང་ཡངས་ནས། །ལོངས་སྤྱོད་རྫོགས་པ་ཧེ་རུ་ཀ། གྲུབ་མཆོག་ཏཻ་ལོ་འགྲོ་བའི་མགོན། །རང་གསལ་ཚོགས་ལ་སྦྱན་འདྲེན་གཤེགས། །ཀུན་ཁྱབ་ཐུགས་རྗེའི་གནས་མཆོག་ནས། །དམིགས་མེད་སྙིང་རྗེའི་གར་རོལ་པ། །གྲུབ་བརྙེེས་མ་ཏི་རཏྣའི་མཚན། །ཤར་གྲོལ་ཚོགས་ལ་སྤྱན་འདྲེན་གཤེགས། །གཞན་ཡང་ཐབས་དང་ཤེས་རབ་ཀྱི། །སྣང་ཆ་ལས་ཤར་དཔའ་བོ་དང་། །མཁའ་འགྲོ་ཤུགས་འགྲོའི་ཚོགས་བཅས་ཀྱང་། །བདེ་ཆེན་ཚོགས་ལ་སྤྱན་འདྲེན་གཤེགས། །བག་དྲོ་བཀོད་ལེགས་ཚོགས་ཁང་འདིར། །དུར་ཁྲོད་གནས་སུ་བྱིན་གྱིས་རློབས། །འདིར་ཚོགས་མོས་པའི་བུ་སློབ་རྣམས། །དཔའ་བོ་ཌཱ་ཀིར་བྱིན་གྱིས་རློབས། །ཐབས་ཤེས་ཚོགས་ཀྱི་མཆོད་པ་འདི། །ཡེ་ཤེས་བདུད་རྩིར་བྱིན་གྱིས་རློབས། །མ་དག་ཕུང་ལྔ་ཁམས་ལྔ་རྣམས། །ཡེ་ཤེས་ལྔ་ཡི་ཀློང་དུ་བཞེས། །ཡེ་ནས་གནས་པའི་ཆོས་སྐུ་ལ། །རང་ངོ་ཤེས་བཞིན་སོ་མར་བཞག །རེ་དོགས་གཉིས་འཛིན་ལས་གྲོལ་བའི། །ཚོགས་མཆོད་དམ་པ་དང་རེ་སྤྲོ། །རྩ་གསུམ་རྒྱལ་བའི་ལྷ་ཚོགས་ཀྱི། །ཐུགས་དམ་དབྱིངས་སུ་བསྐང་བ་དང་། །ཀུན་རྫོབ་འཁྲུལ་པའི་ཉམས་ཆག་རྣམས། །ཡེ་དག་ཀུན་བཟང་དབྱིངས་སུ་བཤགས། །ཉག་གཅིག་ཆོས་སྐུའི་རང་ཞལ་ལ། །འཛིན་རྟོག་སྤྲོས་པས་སྒྲིབ་གྱུར་པ། །སྤྲོས་བྲལ་བདེ་ཆེན་ཀློང་ཡངས་སུ། །རང་གསལ་རང་གྲོལ་ངང་དུ་ཟློག །ཀུན་ཁྱབ་དབྱིངས་ཀྱི་མཁའ་

[Full Size]

ཀློང་དུ། །སྒྲིབ་བྱེད་དྲི་མ་གང་མཆིས་ཀུན། །སྐྱེ་འགགས་གནས་མེད་ཆེན་པོ་རུ། །ལྷག་མེད་ཆོས་སྐུ་མངོན་མཐོང་ནས། །འཁྲུལ་གྲོལ་མཚན་མ་རྣམ་དག་པའི། །ཆོས་དབྱིངས་མཆོག་གི་བཀྲ་ཤིས་ཤོག །ཅེས་དོན་དམ་ཚོགས་ཀྱི་མཆོད་པ་ཚིག་དོན་མཐུན་པའི་སྒོ་ནས་འབུལ་ཞིང་དེ་ནས་བྱིན་རླབས་དབང་བཞི་བླང་བར་བྱའོ། །ཞེས་སི་ཏུ་པས་དབོན་ཀརྨ་བསྟན་པའི་བཞེད་ངོར་སྤེལ་བ་ཛ་ཡནྟུ།། །།

བླ་མའི་རྣལ་འབྱོར་དངོས་གྲུབ་ཡོངས་འདུ།

[Full Size]

བླ་མའི་རྣལ་འབྱོར་དངོས་གྲུབ་ཡོངས་འདུ་བཞུགས་སོ། །སྭ་སྟི། འདིར་བླ་མའི་རྣལ་འབྱོར་དང་འབྲེལ་བའི་ཚོགས་མཆོད་ཀྱི་རིམ་པ་ཁྱེར་བདེར་བྱེད་པ་སྤྲོ་ན། ཡོ་བྱད་མཆོད་རྫས་རྣམས་འདུ་བགྱིས་ལ་རང་ལྷར་གསལ་བའི་ངང་ནས། ཨམྲྀ་ཏས་བསངས་། སྭ་བྷཱ་ཝས་སྦྱངས། སྟོང་ལས་ཨ་ཡིག་ཡོངས་གྱུར་ཐོད་པའི་སྣོད། །རྣམས་ཀྱི་ནང་དུ་ཧཱུྃ་ཡིག་ཚོགས་འོད་ཞུ། །དེ་ལས་མཆོད་པའི་བྱེ་བྲག་ཕྱི་ནང་རྫས། །འདོད་ཡོན་ཟག་མེད་མཆོད་སྤྲིན་རྒྱ་མཚོར་སྤེལ། །ཨ་ཀཱ་རོས་ལན་གསུམ་བྱིན་བརླབས། རང་མདུན་ནམ་མཁར་གྱད་དང་སེང་གེ་བཞིས། །བཏེགས་པའི་རིན་ཆེན་ཁྲི་སྟེང་པདྨ་དཀར། །འདབ་སྟོང་གེ་སར་རབ་རྒྱས་ཉི་ཟླའི་དབུས། །ཧྲཱིཿཡིག་འོད་ཀྱིས་དོན་གཉིས་བྱས་ཡོངས་གྱུར། །དཔལ་ལྡན་བླ་མ་ཆོས་སྐྱོང་འགྱུར་མེད་མཆོག །དཀར་གསལ་ཞི་འཛུམ་སྤྱན་གཉིས་ལྟ་སྟངས་གཟིགས། །ཞལ་གཅིག་ཕྱག་གཉིས་རྡོར་དྲིལ་འཁྱུད་སྟབས་འཛིན། །དབུ་ལ་སྒོམ་ཞུ་དང་ནི་ཞབས་སྐྱིལ་ཀྲུང་། །ཆོས་གོས་རྣམ་གསུམ་ན་བཟས་མཛེས་པར་བཀླུབས། །གནས་གསུམ་འབྲུ་

[Full Size]

གསུམ་ཡི་གེས་མཚན་པར་གྱུར། །འཇའ་ཟེར་འོད་སྐུད་འཁྲུགས་པའི་ཀློང་དུ་གསལ། །གསོལ་བཏབ་ཙམ་གྱིས་བཟོད་མེད་གདུང་ཤུགས་འབར། །འབར་ཙམ་ཉིད་ནས་བྱིན་རླབས་ཐུགས་རྗེ་མྱུར། །མྱུར་བའི་སྟོབས་ཀྱིས་མཆོག་དང་ཐུན་མོང་གི། །དངོས་གྲུབ་སྤྲིན་འཁྲིགས་ཆར་རྒྱུན་ཤ་ར་ར། །སྟེང་འོག་བར་མཚམས་བཀའ་བརྒྱུད་བླ་མ་དང་། །ཡི་དམ་དཔའ་བོ་མཁའ་འགྲོ་ཆོས་སྐྱོང་ཚོགས། །ཀུན་ཀྱང་སྐྱབས་གནས་རྒྱ་མཚོའི་ངོ་བོར་གསལ། །གཙོ་བོའི་ཐུགས་ཀའི་ཧཱུྃ་ལས་འོད་འཕྲོས་པས། །འོག་མིན་ཆོས་ཀྱི་དབྱིངས་ཀྱི་ཞིང་ཁམས་ནས། །རྩ་གསུམ་ལྷ་ཚོགས་སྤྱན་དྲངས་དམ་ཚིག་དང་། །ཡེ་ཤེས་དབྱེར་མེད་དབང་ལྷས་དབང་བསྐུར་ཞིང་། །རིགས་བདག་རྡོར་སེམས་རྒྱས་གདབ་མཆོད་པའི་ཚོགས། །ནམ་མཁའ་གང་བས་དགྱེས་བསྐྱེད་མཆོད་པར་གྱུར། །ༀ་བཛྲ་ཨརྒྷཾ། པཱདྱཾ་ནས། ཤབྟའི་བར་གྱིས་མཆོད། ཐུགས་ཀར་ཟླ་སྟེང་ཧྲཱིཿདཀར་པོའི། །མཐའ་མར་སྔགས་ཀྱིས་བསྐོར་བ་ལས། །འོད་འཕྲོས་རྒྱལ་མཆོད་འགྲོ་དོན་བྱས། །ཚུར་འདུས་འཕགས་པའི་ཐུགས་རྗེ་དང་། །བྱིན་རླབས་བདག་རྒྱུད་ལ་སྨིན་ནས། །སྒོ་གསུམ་རྡོ་རྗེ་གསུམ་བརྙེས་གྱུར། །ༀ་ཨཱཿདྷརྨ་པཱ་ལ་ཨཀྵ་ར་ཧཱུྃ། ཞེས་བཟླས་ལ། ཚོགས་འཁོར་བྱིན་གྱིས་བརླབ་པ་ནི། ཨ་མྲྀ་ཏས་བསངས་། སྭ་བྷཱ་ཝས་སྦྱངས། སྟོང་ལས་རླུང་མེ་ཐོད་སྒྱེད་སྟེང་། །ཨ་ལས་ཡེ་ཤེས་ཀ་པཱ་ལར། །ཤ་ལྔ་བདུད་རྩི་

[Full Size]

ལྔས་གང་བ། །སྦྱང་རྟོགས་སྦར་བའི་ནུས་པ་ཡི། །ཡེ་ཤེས་བདུད་རྩིའི་རང་བཞིན་ཅན། །ཐབས་ཤེས་གཉིས་མེད་མཆོད་པའི་སྤྲིན། །རབ་འབྱམས་མཐའ་ཡས་ཀུན་ཁྱབ་པའི། །འདོད་ཡོན་ཚོགས་ཀྱི་འཁོར་ལོར་གྱུར། །དེ་ནས་སྤྱན་དྲངས་པ་ནི། གནས་བདེ་ཆེན་འོག་མིན་གཞལ་ཡས་ནས། །ཕ་བཀའ་བརྒྱུད་བླ་མ་ཚོགས་ལ་བྱོན། །གནས་སྙིང་ག་ཆོས་ཀྱི་འཁོར་ལོ་ནས། །རྗེ་ཆོས་སྐྱོང་འགྱུར་མེད་ཚོགས་ལ་བྱོན། །གནས་དག་པ་མཁའ་སྤྱོད་ཞིང་ཁམས་ནས། །ལྷ་ཡི་དམ་ཌཱ་ཀི་ཚོགས་ལ་བྱོན། །གནས་བཀའ་གསང་དམ་ཚིག་དཀྱིལ་འཁོར་ནས། །ཆོས་སྐྱོང་བའི་སྲུང་མ་ཚོགས་ལ་བྱོན། །ཕྱི་ནང་གི་དངོས་པོའི་གཟུང་འཛིན་ཀུན། །ཡེ་ཤེས་ཀྱི་རོལ་པ་ཆེན་པོར་བསྒྱུར། །འདོད་ཡོན་ཚོགས་བདུད་རྩིའི་རང་བཞིན་སྤེལ། །རྣལ་འབྱོར་རྣམས་ཟག་མེད་བདེ་སྟོང་གི། །ཏིང་འཛིན་གྱི་རྩལ་སྐྱེད་མཆོག་ཐུན་མོང་། །དངོས་གྲུབ་ཀྱི་ཆར་ཆེན་དུས་འདིར་སྩོལ། །གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ཞེས་སྤྱན་དྲངས་ཤིང་ཚོགས་ཕུད་ཕུལ་ལ། རྣལ་འབྱོར་རྣམས་ཀྱང་རོལ་ནས། ལྷག་མ་ཨ་ཀ་རོས་བྱིན་བརླབས་ནས། ཕུད་ལྷག་བཤལ་ཆུར་དབང་བའི་མཁའ་འགྲོའི་ཚོགས། །ཀུན་ཀྱང་འདིར་སྤྱོན་གཏོར་མ་འདི་བཞེས་ལ། །བསྟན་པ་སྲུང་དང་རྣལ་འབྱོར་སྐྱོང་བ་སོགས། །གང་བཅོལ་ཕྲིན་ལས་རྣམ་བཞི་ཐོགས་མེད་སྒྲུབས། །ཞེས་པས་

[Full Size]

ཕུལ། དེ་ནས་རྗེས་རིམ་བྱིན་རླབས་བསྡུ་བ་ནི། བླ་མའི་གསང་གསུམ་ཡེ་ཤེས་རྡོ་རྗེ་བཞིའི། །བྱིན་རླབས་ངོ་བོ་འོད་ཟེར་སྣ་ཚོགས་འཕྲོས། །རང་གི་གནས་བཞིར་ཐིམ་པས་དབང་བཞི་ཐོབ། །སྒྲིབ་བཞི་དག་ནས་སྐུ་བཞི་མངོན་དུ་གྱུར། །སྐྱབས་ཡུལ་ཐམས་ཅད་དཀྱིལ་འཁོར་གཙོ་བོར་བསྡུས། །དེ་ཉིད་དགྱེས་པ་དང་བཅས་འོད་ཞུ་ནས། །རང་ཐིམ་དབྱེར་མེད་ཆོས་དབྱིངས་གཉུག་མའི་གཤིས། །དུས་གསུམ་སྤྲོས་པ་བྲལ་བའི་ངང་དུ་བཞག །ཅི་གནས་སུ་མཉམ་པར་བཞག་ལ། དགེ་བ་འདི་ཡིས་སོགས་དང་། བསྔོ་སྨོན་དང་བཅས་བརྗོད། ཅེས་དབོན་པོ་བླ་མ་ཀརྨ་བསྟན་པ་ཚེ་རིང་གི་དགྱེས་སྐོང་ཕྱིར། སི་ཏུ་པས་སྤེལ་བ་སརྦ་ཛ་ག་ཏཾ།། །།

རྗེ་ཆོས་སྐྱོང་འགྱུར་མེད་ཀྱི་བླ་སྒྲུབ་ཁག་གཉིས།

[Full Size]

གུ་རུ་སརྦ་ཡོ་ག་མ་ཧཱ་སུ་ཁ་ཛྙཱ་ན་བི་ཧ་ར་ཏིསྨ། ༀ་སྭ་བྷཱ་ཝ་སོགས་ཀྱིས་སྣང་སྲིད་ཀྱི་ཆོས་ཐམས་ཅད་སྟོང་པར་སྦྱངས་ནས། རང་གི་སྤྱི་བོར་བླ་མ་བསྒོམ་པ་ནི། བདག་ཉིད་ཐ་མལ་བདེ་ཆེན་འཁོར་ལོ་རུ། །པདྨ་ཉི་ཟླའི་སྟེང་དུ་རྒྱལ་ཀུན་གྱི། །གསང་གསུམ་ཡེ་ཤེས་གཅིག་བསྡུས་རྡོ་རྗེ་འཆང་། །དྲན་མཆོག་མགོན་པོ་ཆོས་སྐྱོང་འགྱུར་བ་མེད། །སྐུ་མདོག་དཀར་གསལ་ཞལ་གཅིག་ཕྱག་གཉིས་པ། །གཡས་པས་སྐྱབས་སྦྱིན་གཡོན་པས་ཚེ་བུམ་བསྣམས། །རྡོ་རྗེ་སྐྱིལ་ཀྲུང་ཆོས་གོས་རྣམ་གསུམ་བཀླུབས། །ཟབ་ཞི་སྤྲོ་བྲལ་ཏིང་འཛིན་ངང་ཉིད་ལས། །སྨིན་གྲོལ་དམ་ཆོས་བདུད་རྩིའི་སྒྲ་དབྱངས་སྒྲོག །མཆོག་ཐུན་ལས་བཞིའི་དངོས་གྲུབ་སྤྲིན་ཕུང་གཡོ། །དཀོན་མཆོག་འདུས་པའི་ངོ་བོར་ཁྱེད་ཤེས་ཀྱི། །མོས་བློས་ཡར་

[Full Size]

གཞལ་མ་ཡིན་བཅོས་མིན་གྱི། །དད་གསུམ་བློ་ཡིས་རབ་བཏུད་གུས་འདུད་ནས། །ཕྱག་འཚལ་མཆོད་བཤགས་ཡི་རང་བསྐུལ་གསོལ་འདེབས། །དགེ་ཚོགས་འགྲོ་ཀུན་བྱང་ཆུབ་ཆེན་པོར་བསྔོ། །སྐྱབས་ཀུན་འདུས་བདེ་ཆེན་འཁོར་ལོའི་མགོན། །རིགས་དཀྱིལ་འཁོར་ཁྱབ་བདག་རྡོ་རྗེ་འཛིན། །དྲིན་ཆེན་རྗེ་ཆོས་སྐྱོང་འགྱུར་མེད་མཁྱེན། །སྐལ་ལྡན་བདག་རྗེས་འཛིན་བྱིན་གྱིས་རློབས། །ཚར་ཁ་ཤས་མོས་གུས་དང་ལྡན་པས་སྣང་བ་འགྱུར་ངེས་སུ་བཏོན། མཐར། སྤྱི་བོའི་བླ་མ་འོད་ཞུ་རང་ལ་ཐིམ། །དབང་བཞི་ཐོབ་ཅིང་སྒོ་གསུམ་སྒྲིབ་དག་ནས། །བླ་མ་ཆོས་སྐུའི་རང་ཞལ་ལེགས་མཐོང་ཞིང་། །སྐུ་བཞིའི་བདག་ཉིད་ཆེན་པོར་དབང་བསྒྱུར་ཤོག །དགེ་དེས་བདག་སོགས་རྡོ་རྗེ་འཆང་འགྲུབ་ཤོག །ཅེས་སྒྲུབ་པ་ཐེག་འཕེལ་གྱིས་ཤེལ་དཀར་མཱ་ལ། བལ་ཏྲམ་བཅས་ཕུལ་ནས་བསྐུལ་ངོར་སི་ཏུ་པདྨ་ཉིན་བྱེད་དབང་པོས་སྤེལ།། །།རང་ལུས་ཐ་མལ་མདུན་མཁར་དབུས། །འོད་ཀྱི་ཐིག་ལེ་འཁྱིལ་པའི་དབུས། །རིན་ཆེན་སེང་ཁྲི་དར་ཟབ་སྟེང་། །གར་དབང་ཆོས་སྐྱོང་འགྱུར་བ་མེད། །ཞི་འཛུམ་ཆོས་གོས་རྣམ་གསུམ་ལྡན། །བཀྲ་གསལ་ལྷམ་མེ་དེའི་སྤྱི་བོར། །དྲི་མེད་པདྨ་དཀར་པོ་ནི། །འདབ་སྟོང་རྒྱས་སྟེང་རིག་པ་འཛིན། །རྡོ་རྗེ་དྲག་པོ་ཞི་མ་ཁྲོ། །པད་ཞྭ་ཕོད་ཁ་རིན་ཆེན་བརྒྱན། །ཕྱག་གཉིས་རྡོ་རྗེ་ཕུར་སྡིག་འཛིན། །རོལ་སྟབས་ཀྱིས་བཞུགས་ལྷམ་མེ་བ། །དུས་གསུམ་རྒྱལ་བ་ཀུན་སྤྱི་དཔལ། །པདྨ་འབྱུང་གནས་དབྱེར་མེད་པའི། །དྲིན་ཆེན་བླ་མའི་

[Full Size]

ཞབས་ལ་འདུད། །བདེ་ཆེན་ཡེ་ཤེས་དོན་རྟོགས་ཤོག །དྲག་རྩལ་འོད་ཞུ་བླ་མར་ཐིམ། །དེ་ཉིད་རང་ལུས་ལ་ཐིམ་པས། །དབང་བཞི་ཡོངས་རྫོགས་སྒྲིབ་བཞི་དག །སྐུ་བཞི་མངོན་དུ་གྱུར་པར་བསམ། །དར་གཅིག་ཅི་གནས་མཉམ་པར་བཞག །ཅེས་རྗེས་བསྔོ་བ་བྱའོ། །དེ་ལྟར་དབོན་པོ་ཀརྨ་བསྟན་པའི་ངོར་སི་ཏུས་དཔལ་སྤུངས་ཡང་དབེན་དུ་བྲིས་པ་མངྒ་ལམ།། །།

བླ་མའི་རྣལ་འབྱོར་དོན་གཉིས་ཡོངས་འདུ་དངོས་གྲུབ་མཆོག་སྩོལ།

[Full Size]

བླ་མའི་རྣལ་འབྱོར་དོན་གཉིས་ཡོངས་འདུ་དངོས་གྲུབ་མཆོག་སྩོལ་བཞུགས། ན་མོ་གུ་རུ་བཛྲ་དྷ་ར་ཡ། འདིར་བླ་མའི་རྣལ་འབྱོར་ཁྱེར་བདེར་བཀོད་པ་ལ། དེ་ཡང་ཚོགས་དང་མཆོད་པ་འབྲེལ་པ་ཕན་ཡོན་བྱིན་རླབས་ཀྱི་ཚན་ཁ་ལྷག་པར་ཐོབ་པ་སྟེ། རིམ་ལྔ་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །ཅེས་གསུངས་པ་ལྟར། རྟེན་གྱི་དྲུང་དུ། མཆོད་པའི་བྱེ་བྲག་ཐམས་ཅད་འདུ་བགྱིས་ལ། བདེ་བའི་སྟན་ལ་འཁོད་ནས། དང་པོ་སྐྱབས་སེམས་ནི། ན་མོ། དུས་གསུམ་སྟོན་མཆོག་ཆགས་བྲལ་དམ་པའི་ཆོས། །རིག་གྲོལ་ཚོགས་དང་རྩ་གསུམ་རབ་འབྱམས་ལྷ། །ཀུན་འདུས་དབྱེར་མེད་བླ་མར་སྐྱབས་སུ་མཆི། །འགྲོ་རྣམས་བྱང་ཆུབ་ཐོབ་པར་སེམས་བསྐྱེད་དོ། །ལན་གསུམ་དང་། གཉིས་པ་མཆོད་རྫས་བྱིན་བརླབ་ནི། ཨ་མྲྀ་ཏས་བསངས། སྭ་བྷཱ་ཝས་སྦྱངས་། ༀ་ལས་རིན་ཆེན་སྣོད་རྣམས་སུ། །ཧཱུྃ་ཡིག་འོད་ཞུ་ལྷ་ཡི་རྫས། །རྡོ་རྗེའི་མཆོད་པའི་སྤྲིན་རྒྱ་མཚོ། །ཀུན་བཟང་སྨོན་ལམ་ཇི་བཞིན་གྱུར། །ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། །དེ་བཞིན། པཱ་དྱཾ་ནས། ཤབྡའི་བར་

[Full Size]

དང་། གསུམ་པ་རང་ལྷར་གསལ་བའི་མདུན་མཁར་བསྐྱེད་པའི་རིམ་པ་བསྟན་པ་ནི། ༀ་སྭ་བྷཱ་ཝས་སྦྱངས། སྟོང་པའི་ངང་ལས་མདུན་མཁར་འོད་ལྔའི་ཀློང་། །བྷྲཱུྃ་ལས་རིན་ཆེན་གཞལ་མེད་ཁང་ཆེན་པོ། །གྲུ་བཞི་སྒོ་བཞི་མཚན་ཉིད་ཡོངས་སུ་རྫོགས། །དེ་དབུས་གྱད་དང་སེང་ཆེན་བཞིས་བཏེགས་ཁྲིར། །ལྷ་མིའི་དཔལ་འབྱོར་བཀོད་ལེགས་ཕུན་ཚོགས་སྟེང་། །པྃ་ལས་པད་དཀར་འདབ་སྟོང་གེ་སར་རྒྱས། །ཨ་ལས་ཉ་གང་ཆུ་ཤེལ་དབང་པོས་མཚན། །དེ་སྟེང་རྒྱལ་ཀུན་གསུང་གི་ངོ་བོ་ཧྲཱིཿ། འོད་འཕྲོས་འཕགས་མཆོད་འགྲོ་བའི་སྒྲིབ་གཉིས་སྦྱང་། །ཚུར་འདུས་ཡོངས་གྱུར་འཇིག་རྟེན་དབང་ཕྱུག་མགོན། །ས་ར་ཧ་ཡི་རྣམ་རོལ་སྤྲུལ་པའི་སྐུ། །དཔལ་ལྡན་གྲུབ་མཆོག་དགེ་ལེགས་རབ་རྒྱས་ནི། །བདེ་ཆེན་གཟི་བྱིན་རབ་འབར་བརྗིད་བག་ཅན། །ཞལ་གཅིག་ཞལ་འཛུམ་དབུ་ལ་སྒོམ་ཞུ་གསོལ། །སྤྱན་ཟུང་ལྟ་སྟངས་ཆོས་ཉིད་དབྱིངས་ལ་གཟིགས། །ཕྱག་གཉིས་ཌཱ་དྲིལ་གྲག་སྟོང་སྒྲ་སྒྲོག་ཅིང་། །ལེ་བརྒན་དར་གྱི་ཆོས་གོས་རྣམ་གསུམ་དང་། །ཟ་འོག་བེར་ཆེན་ཟླུམ་འཁྱིལ་ལྷབ་མ་ལྷུབ། །ཞབས་གཉིས་སེམས་དཔའི་སྐྱིལ་ཀྲུང་དང་བཅས་བཞུགས། །ཡེ་ཤེས་རང་འོད་འཕྲོ་བའི་ཀློང་དུ་གསལ། །དཔྲལ་མགྲིན་ཐུགས་ཀར་འབྲུ་གསུམ་མཚན་པར་གྱུར། །གཞན་ཡང་སྟེང་འོག་ཕྱོགས་མཚམས་བར་མེད་དུ། །བཀའ་བརྒྱུད་བླ་མ་ཡི་དམ་དཔའ་བོ་དང་། །མཁའ་འགྲོ་ཆོས་སྐྱོང་ལ་སོགས་སྐྱབས་ཡུལ་རྣམས། །སྤྲིན་

[Full Size]

ཕུང་གཏིབས་བཞིན་གསལ་སྟོང་འཛིན་མེད་པ། །རྣམ་དག་དཀྱིལ་འཁོར་རང་བཞིན་ལྷུན་གྱིས་རྫོགས། །ཐུགས་ཀའི་ཧཱུྃ་ལས་འོད་འཕྲོས་པོ་ཊ་ལ། །བདེ་ལྡན་ཞིང་དང་དཔལ་གྱི་རི་བོ་ནས། །འགྲོ་བའི་དོན་དུ་སྙིང་རྗེས་བརྩེར་དགོངས་ལ། །འཁོར་བཅས་སྤྱན་འདྲེན་གནས་འདིར་གཤེགས་སུ་གསོལ། །ༀ་ཤྲཱི་མཱན་གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་བཛྲ་ས་མ་ཡ་ཛཿཛཿབཞི་པ་བྱིན་འབེབས་ཅིང་སྤྱན་འདྲེན་པ་ནི། ཧཱུྃ། སྐྱེ་མེད་སྤྲོས་བྲལ་ཀློང་ཡངས་ནས། །རྒྱལ་བ་རབ་འབྱམས་རྒྱ་མཚོའི་དབུས། །སྤྱན་རས་གཟིགས་དབང་སྐུ་བསྐྱོད་འཚལ། །དབང་བཞི་བསྐུར་ལ་བྱིན་ཆེན་ཕོབ། །རང་བྱུང་ཐུགས་རྗེའི་རོལ་པ་ལས། །བརྟུལ་ཞུགས་སྤྱོད་པ་འཆང་རྣམས་དང་། །བྲམ་ཟེ་ཆེན་པོ་འདིར་གཤེགས་ལ། །སྨིན་ཅིང་གྲོལ་བའི་བྱིན་ཆེན་ཕོབ། །འགྲོ་བའི་དོན་དུ་གཟུགས་སྐུར་བསྟན། །རིག་འཛིན་རྣལ་འབྱོར་འཁོར་ཚོགས་བཅས། །གྲུབ་མཆོག་བླ་མ་གནས་འདིར་བྱོན། །དབང་བསྐུར་བྱིན་རླབས་དངོས་གྲུབ་སྩོལ། །ཛྙཱ་ན་བཛྲ་ཨཱ་ཝེ་ཤ་ཡ་ཨཱ་ཝེ་ཤ་ཡ་ཨ་ཨཿཛཿཧཱུྃ་བྃ་ཧོཿཞེས་དམ་ཡེ་དབྱེར་མེད་དུ་མོས་ལ། ལྔ་པ་དབང་བསྐུར་རྒྱས་གདབ་ནི། སླར་ཡང་ཐུགས་ལས་འོད་འཕྲོས་ཏེ། །རང་བཞིན་གནས་ནས་དབང་གི་ལྷ། །སྤྱན་དྲངས་དབང་བསྐུར་ཁྲུས་གསོལ་ནས། །རིགས་བདག་སྣང་མཐས་དབུ་བརྒྱན་གྱུར། །དྲུག་པ་མཆོད་པ་འབུལ་བ་ནི། དྲི་མེད་རྣམ་དག་རབ་དཀར་མོས་པའི་

[Full Size]

བློས། །དྲངས་པའི་ལེགས་བྱས་རང་གཟུགས་ལྷ་ལམ་ཁྱོན། །དོག་པོར་གྱུར་པའི་རྡོ་རྗེའི་མཆོད་པའི་སྤྲིན། །ཐུགས་རྗེས་འགྲོ་བའི་དོན་ཕྱིར་བཞེས་སུ་གསོལ། །ༀ་བཛྲ་ཨརྒྷཾ་པྲ་ཏཱི་ཙྪ་ཨཱཿཧཱུྃ། ནས། ཤབྡའི་བར་དང་། གཞན་ཡང་ལྷ་མིའི་བདོག་པ་མཆིས་སོ་ཅོག །ཡིད་སྤྲུལ་དངོས་འབྱོར་ལོངས་སྤྱོད་དཔག་མེད་རྣམས། །མཎྜལ་གཅིག་ཏུ་བསྡུས་ནས་འབུལ་ལགས་ན། །བཞེས་ནས་བླ་མེད་གྲུབ་གཉིས་སྩལ་དུ་གསོལ། །གུ་རུ་ཨི་དཾ་མཎྜལ་ཀཾ་ནིཪྻ་ཏ་ཡ་མི། བདུན་པ་བཟླས་པ་བྱ་བ་ནི། མདུན་བསྐྱེད་ཐུགས་ཀར་ཟླ་སྟེང་ཧྲཱིཿམཐར་སྔགས། །འཁོར་བའི་འོད་ཀྱིས་རྒྱལ་མཆོད་དངོས་གྲུབ་ཐོབ། །འགྲོ་དྲུག་སྒྲིབ་སྦྱང་ཀུན་ཀྱང་ཡེ་ཤེས་ཀྱི། །རོལ་པ་ཆེན་པོའི་རང་བཞིན་ཉིད་དུ་གྱུར། །ༀ་ཨཱཿསིདྡྷ་པ་ར་མ་སྭ་སྟི་ཧཱུྃ། ཅེས་མཚན་སྔགས་ཅི་འགྲུབ་བཟླས་ལ། བརྒྱད་པ་ཚོགས་གཉིས་སྤེལ་ཕྱིར་དཔའ་བོའི་དགའ་སྟོན་ནི། ཨམྲྀ་ཏས་བསངས་། སྭ་བྷཱ་ཝས་སྦྱངས་། སྟོང་པའི་ངང་ལས་རླུང་མེ་ཐོད་སྒྱེད་སྟེང་། །ཨ་ལས་མཚན་ལྡན་བདེ་སྐྱོང་ཀ་པཱ་ལ། །ཡངས་ཤིང་རྒྱ་ཆེའི་ནང་དུ་ཤ་ལྔ་དང་། བདུད་རྩི་ལྔ་པོ་ས་བོན་མཚན་པ་ལས། །འོད་འཕྲོས་དམ་ཡེ་གཉིས་མེད་རྒྱ་མཚོར་གྱུར། །ༀ་ཨཱ་ཧཱུྃ་ཧ་ཧོ་ཧྲཱིཿལན་གསུམ་བྱིན་བརླབས་ལ། གནས་གྲུ་འཛིན་པོ་ཊ་ལ་ཞིང་དང་། །བདེ་བ་ཅན་དཔལ་རི་པད་འོད་སོགས། །རང་བཞིན་གྱི་དག་པའི་དཀྱིལ་འཁོར་ནས། །ལྷ་ནོར་བུ་པདྨ་ཅན་ཉིད་དང་། །དབྱེར་མེད་པའི་མདའ་བསྣུན་

[Full Size]

ཆེན་པོ་མཆོག །སྐུ་རྣམ་འཕྲུལ་གསུམ་ལྡན་རྡོ་རྗེ་འཛིན། །གང་མི་མངོན་ཡེ་ཤེས་ཀློང་ཡངས་ནས། །ཐུགས་བདེ་སྟོང་དབྱིངས་ནས་དགོངས་མཛོད་ལ། །དེང་སྐལ་ལྡན་རྡོ་རྗེའི་དམ་ཚིག་ཅན། །དད་མོས་ཀྱིས་མཆོད་པའི་ཞིང་འདི་རུ། །རྒྱལ་བ་དང་རྒྱལ་སྲས་ཐུ་བོ་རྣམས། །རྩ་གསུམ་ལྷ་སྤྲིན་ལྟར་འདུས་པའི་དབུས། །གནས་འདིར་སྤྱོན་ཚོགས་ལ་གཤེགས་སུ་གསོལ། །བླ་མེད་ཀྱི་མཆོད་པའི་ཁྱད་པར་མཆོག །ཐབས་ཤེས་རབ་གཉིས་མེད་ཚོགས་འཁོར་ལོ། །བདག་གུས་པས་འབུལ་ལོ་བརྩེ་བས་བཞེས། །མཆོག་ཐུན་མོང་དངོས་གྲུབ་སྩལ་དུ་གསོལ། །གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ཅེས་ཚོགས་ཕུད་ཕུལ་ནས་སྒྲུབ་པོ་རྣམས་ཀྱང་དངོས་གྲུབ་ལ་རོལ་ནས། དགུ་པ་ལྷག་མ་ནི། རྡོ་རྗེ་འཆང་གི་བཀའ་གཏེར་སྲུང་མ་གཉན། །མཁའ་འགྲོ་ཤུགས་འགྲོ་ལ་སོགས་སྤྲུལ་འཁོར་རྣམས། །ཕུད་དང་ལྷག་མའི་དམ་རྫས་འདི་བཞེས་ལ། །བསྟན་སྐྱོང་རྣལ་འབྱོར་བསྲུང་བའི་ཕྲིན་ལས་མཛོད། །ཨུཥྩིཊ་བ་ལིངྟ་ཁཱ་ཧི། དེ་ནས་བཅུ་པ་ནོངས་བཤགས་ནི། ཀྱཻ། སངས་རྒྱས་ཀུན་འདུས་བླ་མ་མཆོག །དཀྱིལ་འཁོར་ཁྱབ་བདག་ཧེ་རུ་ཀ། འཁོར་བཅས་དེང་འདིར་དགོངས་སུ་གསོལ། །མི་ཤེས་རྨོངས་པར་གྱུར་པ་ཡིས། །སྡོམ་གསུམ་འགལ་ཉམས་ཅི་མཆིས་རྣམས། །མཐོལ་བཤགས་མི་སྒྲིབ་ཚངས་པར་སྩོལ། །ཡི་གེ་བརྒྱ་པ་བརྗོད། བཅུ་གཅིག་པ་བྱིན་རླབས་བསྡུ་བ་ནི། སྐྱབས་ཡུལ་ཀུན་ཀྱང་

[Full Size]

རིམ་བཞིན་འོད་ཟེར་གྱི། །རྣམ་པར་གཙོ་མཆོག་དཔལ་ལྡན་བླ་མར་ཐིམ། །དེ་ཡང་དགྱེས་པའི་འཛུམ་མདངས་དང་བཅས་ཏེ། །བྱིན་རླབས་དབང་གི་དགོངས་གཏད་མོད་ཉིད་ལས། །རྡོ་རྗེའི་སྐུ་གསུང་ཐུགས་དང་ཡེ་ཤེས་བཞིའི། །ངོ་བོ་འོད་ཟེར་དཀར་དམར་མཐིང་ལྗང་འཕྲོས། །རང་གི་གནས་བཞིར་ཐིམ་པས་སྒྲིབ་བཞི་དག །དབང་བཞི་མཆོག་ཐོབ་སྐུ་བཞི་མངོན་དུ་གྱུར། །བླ་མ་འོད་ཞུ་རང་དང་དབྱེར་མེད་ངང་། །གསལ་སྟོང་འཛིན་བྲལ་མ་བཅོས་མཉམ་པར་བཞག །དར་གཅིག་མི་རྟོག་པའི་ངང་དུ་བཞག་ལ། སླར་ཡང་རིག་རྩལ་ལྷ་ཡི་རོལ་པར་གསལ། །བཅུ་གཉིས་པ་དགེ་བ་བསྔོ་བ་ནི། རྡོ་རྗེའི་རྣལ་འབྱོར་འདིར་འབད་དགེ་བ་དང་། །དུས་གསུམ་ཟག་བཅས་ཟག་མེད་ལེགས་བྱས་བཅས། །རྨད་བྱུང་སྨོན་ལམ་ཟབ་མོས་མཚམས་སྦྱར་མཐུས། །བདག་གཞན་ཚེ་གཅིག་རྡོ་རྗེ་འཆང་འགྲུབ་ཤོག །བཅུ་གསུམ་པ་བཀྲ་ཤིས་བརྗོད་པ་ནི། རྒྱལ་ཀུན་ཡོངས་འདུ་བཀྲ་ཤིས་རྒྱ་མཚོའི་ཀློང་། །དོན་གཉིས་འབྲས་སྟེར་དགོས་འབྱུང་ཡིད་བཞིན་དབང་། །སྲིད་ཞིའི་གདུང་སེལ་འབད་མེད་འདོད་དགུའི་ཆར། །ཕན་བདེའི་དཔྱིད་དུ་འབབ་པའི་བཀྲ་ཤིས་ཤོག །དེ་ལྟར་དོན་ཚན་བཅུ་གསུམ་རྡོ་རྗེ་འཛིན་པའི་ས་ཡི་གྲངས་ལྡན་ཟབ་མོའི་རྣལ་འབྱོར་འདི་དག་ཟུར་མང་བླ་མ་བསྟན་འཛིན་པ་དེ་ཉིད་ཟག་མེད་ཐུགས་ཀྱི་དགོངས་པ་བདེ་ཆེན་ཆོས་དབྱིངས་ཀློང་དུ་བསྐང་བའི་ཕྱིར། སི་ཏུ་པདྨ་ཉིན་བྱེད་དབང་པོས་སྤེལ་བ་འགྲོ་རྣམས་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པའི་རྒྱུར་གྱུར་ཅིག །དགེའོ། །མངྒ་ལམ།། །།

བླ་མའི་རྣལ་འབྱོར་ཡེ་ཤེས་གཟི་འབར་བྱིན་རླབས་མཆོག་སྩོལ།

[Full Size]

བླ་མའི་རྣལ་འབྱོར་ཡེ་ཤེས་གཟི་འབར་བྱིན་རླབས་མཆོག་སྩོལ་བཞུགས། སྭསྟི། གཅོད་ཡུལ་གྲུབ་བརྙེས་བླ་མའི་རྣལ་འབྱོར་དང་འབྲེལ་བའི་ཚོགས་མཆོད་ཀྱི་རིམ་པ་སྤྲ་ོན། མཆོད་རྫས་རྣམས་འདུ་བགྱིད་ལ། རང་ལྷར་གསལ་བའི་ངང་ནས། སྭ་བྷཱ་ཝས་དངོས་འཛིན་གྱི་ཆོས་ཐམས་ཅད་སྟོང་པར་སྦྱངས་ལ། སྟོང་ལས་མདུན་མཁར་འོད་ལྔའི་ཐིག་ལེའི་ཀློང་། །པད་དཀར་ཟླ་སྟེང་ཧྲཱིཿཡིག་ཡོངས་གྱུར་ལས། །རྒྱལ་དབང་ཀརྨའི་ཕྲིན་ལས་རང་གཟུགས་རྩལ། །ཡོངས་གྲུབ་གུ་རུ་ཛྙཱ་ན་བགྲེས་ཉམས་ཅན། །དབུ་ལ་སྒོམ་ཞུ་ཕྱག་གཉིས་ཆོས་འཆད་རྒྱ། །ཆོས་གོས་རྣམ་གསུམ་ཞབས་གཉིས་རྡོར་སྐྱིལ་བཞུགས། །ཆོས་དབྱིངས་སྐྱེ་མེད་ངང་ལ་ལྟ་སྟངས་ཅན། །གསོལ་བཏབ་ཙམ་གྱིས་བྱིན་རླབས་ཆར་རྒྱུན་འབེབས། །འབེབས་ཙམ་ཉིད་ནས་མོས་གུས་མྱུ་གུ་སྐྱེ། །སྐྱེས་པའི་མོད་ལ་བརྗོད་མེད་ཡེ་ཤེས་འཆར། །གནས་གསུམ་འབྲུ་གསུམ་འོད་ཀྱིས་འོག་མིན་ཞིང་། །དག་པ་མཁའ་སྤྱོད་གནས་ནས་ཨོ་རྒྱན་རྗེ། །བཀའ་བརྒྱུད་གྲུབ་ཐོབ་རྒྱ་མཚོའི་འཁོར་ཚོགས་བཅས། །སྤྱན་དྲངས་དམ་ཡེ་དབྱེར་མེད་ཉིད་དུ་གསལ། །ཐུགས་ལས་འོད་འཕྲོས་དབང་ལྷས་དབང་བསྐུར་ནས། །འདོད་ཡོན་ལྷ་མོས་ཕྱི་ནང་གསང་མཆོད་འབུལ། །ཐུགས་ཀར་ཟླ་སྟེང་ཧྲཱིཿམཐར་སྔགས་ཀྱིས་བསྐོར། །འོད་འཕྲོས་འཕགས་མཆོད་འགྲོ་བའི་སྒྲིབ་སྦྱངས་གྱུར། །ༀ་ཨཱཿགུ་རུ་ཛྙཱ་ན་སརྦ་སིདྡྷི་ཧཱུྃ། ཞེས་གང་འགྲུབ་བཟླས་ལ། བསྡུས་བ་ནི་དབང་བཞི་ལེན་པར་འཇུག །སྤྲོ་ན་ཚོགས་

[Full Size]

ཀྱི་མཆོད་པ་དཔའ་བོའི་དགའ་སྟོན་ནི། རྃ་ཡྃ་ཁྃ་འཕྲོས་ཚོགས་རྫས་ཀྱི། །གཟུང་འཛིན་ཀུན་རྟོག་བག་ཆགས་སྦྱངས། །དག་པ་ཡེ་ཤེས་བདུད་རྩིར་སྤེལ། །རྒྱ་ཆེན་རྒྱུན་མི་ཆད་པར་གྱུར། ༀ་ཨཱཿཧཱུྃ་ཧ་ཧོ་ཧྲཱིཿལན་གསུམ་གྱིས་བྱིན་བརླབས་ལ། གནས་མཁའ་སྤྱོད་པདྨ་འོད་ཀྱི་ཞིང་། །ལྷ་ཞི་ཁྲོ་རབ་འབྱམས་འདུས་པའི་དབུས། །རྒྱལ་ཡོངས་ཀྱི་སྤྱི་གཟུགས་པདྨ་འབྱུང་། །དབྱེར་མེད་ཀྱི་རྗེ་བཙུན་ཀརྨ་ཀ། གནས་འདིར་གཤེགས་ཚོགས་ཀྱི་མཆོད་པ་བཞེས། །རྒྱུད་སྨིན་གྲོལ་མཆོག་ཐུན་དངོས་གྲུབ་སྩོལ། །གནས་རང་བཞིན་རྣམ་པར་དག་པའི་ཞིང་། །དངོས་སྣང་སྲིད་ལྷ་ཡི་དཀྱིལ་འཁོར་དབུས། །བཀའ་བརྒྱུད་པའི་གྲུབ་ཐོབ་རྒྱ་མཚོ་དང་། །གཅོད་ཡུལ་གྱི་གུ་རུ་ཛྙཱ་ན་མཆོག །གནས་འདིར་གཤེགས་ཚོགས་ཀྱི་མཆོད་པ་བཞེས། །རྒྱུད་སྨིན་གྲོལ་མཆོག་ཐུན་དངོས་གྲུབ་སྩོལ། །གནས་ཐབས་ཤེས་བདེ་སྟོང་དབྱེར་མེད་ཞིང་། །རྒྱུད་སྡེ་བཞིར་འབྲེལ་བའི་ཡི་དམ་དང་། །མ་གནས་གསུམ་དཔའ་བོ་ཌཱ་ཀིའི་ཚོགས། །ལེགས་ཉེས་ཀྱི་སྟངས་འཛིན་གཡར་དམ་ཅན། །གནས་འདིར་གཤེགས་ཚོགས་ཀྱི་མཆོད་པ་བཞེས། །རྒྱུད་སྨིན་གྲོལ་མཆོག་ཐུན་དངོས་གྲུབ་སྩོལ། །བཀའ་གསང་དང་དམ་ཚིག་གཉན་པོའི་ཞིང་། །ཆོས་སྐྱོང་བའི་མ་ཧཱ་ཀཱ་ལ་དང་། །དཔལ་ལྷ་མོ་ཡེ་ཤེས་ལས་འཇིག་རྟེན། །དྲེགས་ཅན་གྱི་སྲུང་མ་དམ་ཅན་རྣམས། །གནས་འདིར་གཤེགས་ཚོགས་ཀྱི་མཆོད་པ་

[Full Size]

བཞེས། །ཕྲིན་ལས་ཀྱི་སྡོང་གྲོགས་མ་གཡེལ་མཛོད། །ཕྱི་སྣོད་ཀྱི་གཞལ་ཡས་ཁང་བྱིན་རློབས། །ནང་བཅུད་ཀྱི་མཆོད་རྫས་བདུད་རྩིར་བསྒྱུར། །བདག་རྒྱུད་ལ་ཟག་མེད་ཡེ་ཤེས་ཀྱི། །བདེ་སྟོང་གི་ཏིང་འཛིན་བསྐྱེད་དུ་གསོལ། །ག་ཎ་ཙཀྲ་པཉྩ་ཨམྲྀ་ཏ་ཁཱ་ཧི། ཅེས་པས་ཕུལ། ཧོ། ཐོག་མེད་ནས་ད་ལྟའི་ལུས་འདི་བར། །རྩ་བ་དང་ཡན་ལག་དམ་ཉམས་པ། །འདོད་ཡོན་ཚོགས་མཆོད་པས་བསྐང་ཞིང་བཤགས། །བཤགས་བྱ་དང་བཤགས་བྱེད་གཉིས་མེད་པར། །རང་རིག་པ་རང་བྱུང་ཀ་དག་ཀློང་། །བློ་འདས་ཀྱི་མཉམ་ཉིད་ཆེན་པོར་བཤགས། །ༀ་བཛྲ་ས་ཏྭ་ས་མ་ཡ་སོགས་ཡིག་བརྒྱ་བརྗོད། ཚོགས་ལ་རོལ། ལྷག་མ་བསྔོ་བ་ནི། ཧཱུྃ། བཀའ་ཡི་ལྷག་གཏོར་དབང་བ་ཡི། །མ་མོ་མཁའ་འགྲོ་ཤུགས་འགྲོའི་ཚོགས། །འདིར་གཤེགས་ཕུད་ལྷག་བཤལ་ཆུ་བཞེས། །བསྟན་པ་སྲུང་དང་རྣལ་འབྱོར་སྐྱོང་། །དམ་ཚིག་རྗེས་གཅོད་མེལ་ཚེ་དང་། །ནད་ཡམས་དལ་ཁ་བསྒྱུར་དུ་གསོལ། །ཨུཥྩྀ་ཊ་བ་ལིདྟ་ཁཱ་ཧི། རྗེས་རིམ་བྱིན་རླབས་བསྡུ་བ་ནི། མདུན་བསྐྱེད་བླ་མའི་སྐུ་ཡི་གནས་བཞི་ནས། །འོད་ཟེར་དཀར་དམར་མཐིང་ལྗང་འཕྲོས་པ་ལས། །རང་གི་གནས་བཞིར་ཐིམ་པས་དབང་བཞི་ཐོབ། །སྒྲིབ་བཞི་དག་ནས་སྐུ་བཞི་མངོན་དུ་གྱུར། །དེ་ཉིད་དགྱེས་པ་དང་བཅས་འོད་ཞུ་ནས། །རང་ཐིམ་དབྱེར་མེད་བདེ་ཆེན་ངང་དུ་བཞག །ཅེས་མ་བཅོས་སོ་མའི་ངང་དུ་ཅི་གནས་སུ་ངོ་བོ་བསྐྱངས་ལ། དགེ་དེས་བདག་

[Full Size]

གཞན་འགྲོ་བ་མ་ལུས་པ། །ཀུན་བཟང་རྡོར་འཆང་གོ་འཕང་མྱུར་ཐོབ་ཤོག །ཅེས་པའང་དད་དམ་ཚུལ་ལྡན་དབུ་མཛད་ཀརྨ་དར་རྒྱས་ཀྱིས་བསྐུལ་ངོར། སི་ཏུ་པདྨ་ཉིན་བྱེད་དབང་པོས་སྤེལ་བ་དགེ། སརྦ་མངྒ་ལམ།། །།

གསོལ་འདེབས།

[Full Size]

དུས་གསུམ་རྒྱལ་བའི་ཡུམ་གྱུར་ཤེར་ཕྱིན་མ། །སྟན་པའི་མངའ་བདག་བཅོམ་ལྡན་ཤཱཀྱ་ཐུབ། །སྨྲ་བའི་སེང་གེ་འཕགས་མ་སྒྲོལ་དཀར་ཡུམ། །གསོལ་འདེབས་དངོས་གྲུབ་གཉིས་རྩོལ་བདག་བྱིན་རློབས། །སུ་ཁ་སིདྡྷི་ཨཱཪྱ་དེ་ཝ་དང་། །ཕ་ཅིག་དམ་པ་མ་ཅིག་ལབ་ཀྱི་སྒྲོན། །ཁམ་བུ་ཡ་ལེ་ཛྙཱ་ན་ཛྭ་ལ་རྗེ། །གསོལ་འདེབས༴ གནམ་མཚོ་དོལ་བ་རང་བྱུང་རྒྱལ་བའི་ཞབས། །སེང་གེ་དཔལ་བ་དབང་རྡོར་རིན་ཆེན་ཤྲཱི། །བྱམས་པ་དཔལ་དང་འོད་ཟེར་བླ་མ་ལ། །གསོལ་འདེབས༴ སངས་རྒྱས་རིན་ཆེན་ཀུན་དགའ་རྣམ་པར་རྒྱལ། །ཀརྨ་བསྟན་སྐྱོང་འགྱུར་མེད་སྙིང་པོའི་སྡེ། །དཀོན་མཆོག་བསྟན་འཛིན་བསྟན་པ་རྣམ་རྒྱལ་ལ། །གསོལ་འདེབས༴ ཀརྨ་རིག་འཛིན་གསུང་རབ་རྒྱ་མཚོ་དང་། །དྲན་མཆོག་དྭངས་མའི་མགོན་པོ་ཐམས་ཅད་མཁྱེན། །བསྟན་པའི་ཉིན་བྱེད་རྩ་བའི་བླ་མ་ལ། །གསོལ་འདེབས༴ སྣང་སྲིད་ཆོས་ཀུན་སྒྱུ་མའི་རང་བཞིན་ལ། །བློ་འདས་མི་རྟོག་ཡེ་ཤེས་འོད་གསལ་ཆེའི། །གནས་ལུགས་ཇི་བཞིན་འཁྲུལ་མེད་གདེང་ཐོབ་ནས། །ཀུན་བཟང་ཁྱབ་བརྡལ་དབྱིངས་སུ་གྲོལ་གྱུར་ཅིག །ཅེས་ཀརྨ་དར་རྒྱས་ངོར་སྤེལ།། །།

རིག་འཛིན་ཚེ་དབང་ནོར་བུའི་བླ་སྒྲུབ།

[Full Size]

༈ རིག་འཛིན་ཚེ་དབང་ནོར་བུའི་བླ་སྒྲུབ་བཞུགས། རང་ཉིད་ལྷར་གསལ་སྤྱི་བོར་འོད་ལྔའི་ཀློང་། །པདྨ་ཉི་ཟླའི་སྟེང་དུ་ཧྲཱིཿཡིག་ལས། །འོད་འཕྲོས་དོན་གཉིས་བྱས་ནས་ཧེ་རུ་ཀ། རྡོ་རྗེ་ཚེ་དབང་ནོར་བུ་ཞི་མ་ཁྲོ། །སྤྱན་གསུམ་ལྟ་སྟངས་དབུ་ལ་པད་ཞུ་གསོལ། །ཕྱག་གཡས་རྡོ་རྗེ་གཡོན་པས་ཀ་པཱ་ལ། །བདུད་རྩིས་བཀང་དབུས་ཚེ་བུམ་ཤིང་ལོས་བརྒྱན། །མེ་ག་ལི་ལྗང་བླ་གོས་ངུར་སྨྲིག་བཀླུབས། །ཞབས་གཉིས་རོལ་སྟབས་བདེ་ཆེན་ཡེ་ཤེས་ཀྱི། །རང་འོད་རབ་འབར་གཟི་བྱིན་ལྡན་པར་གསལ། །གནས་གསུམ་འབྲུ་གསུམ་ཐུགས་ཀར་ཧྲཱིཿམཐར་སྔགས། །དེ་ལས་འོད་འཕྲོས་འཕགས་མཆོད་བྱིན་རླབས་བསྡུས། །རང་གཞན་སྒྲིབ་སྦྱོང་སྣོད་བཅུད་སྣང་སྲིད་ཀུན། །བླ་མའི་དཀྱིལ་འཁོར་ངོ་བོར་ལྷུན་གྱིས་གྲུབ། །ༀ་ཨཱཿཨཱ་ཡུཿཨིནྡྲ་མ་ཎི་ཧཱུྃ། ཅི་ནུས་བཟླས་ལ། སྐྱབས་ཡུལ་སྐུ་ལས་འོད་འཕྲོས་དབང་བཞི་ཐོབ། །སྒྲིབ་བཞི་དག་ནས་སྐུ་བཞི་མངོན་དུ་གྱུར། །བླ་མ་རང་ཐིམ་དབྱེར་མེད་མ་བཅོས་ངང་། །སྤྲོས་བྲལ་བདེ་བ་ཆེན་པོའི་ཀློང་དུ་བཞག །ཅེས་པའང་རྗེ་དྲུང་མཆོག་སྤྲུལ་རིན་པོ་ཀརྨ་ཆོས་རྒྱལ་ཕུན་ཚོགས་ཀྱི་བཞེད་ལྟར་སི་ཏུ་པདྨ་ཉིན་བྱེད་དབང་པོས་སྤེལ་བ་སརྦ་ཛ་ག་ཏཾ།། །།

བླ་མའི་རྣལ་འབྱོར་ཟབ་ལམ་མཐར་ཐུག་མཆོག་དངོས་བདུད་རྩིའི་བུམ་བཟང་།

[Full Size]

བླ་མའི་རྣལ་འབྱོར་ཟབ་ལམ་མཐར་ཐུག་མཆོག་དངོས་བདུད་རྩིའི་བུམ་བཟང་བཞུགས། ན་མོ་གུ་རུ་པྲ་ཝཱ་ཀ་ར་ཡེ། འདིར་ལུང་ཟིན་སྐྱེས་མཆོག་རིག་འཛིན་བླ་མའི་རྣལ་འབྱོར་དང་འབྲེལ་བའི་ཚོགས་སྐོང་སྤྲོ་བ་དག་གིས་ཚོགས་གཉིས་སྤེལ་ཕྱིར་མཆོད་པ་རྣམས་གང་འབྱོར་འདུ་བར་བྱས་ལ། རང་ལྷའི་རྣལ་འབྱོར་དང་ལྡན་པས། རྙིང་ལུགས་ལྟར་གྱི་སྐྱབས་

[Full Size]

སེམས་སྤྱི་མཐུན་སྔོན་དུ་འགྲོ་བས། ཤཱུནྱ་ཏའི་སྔགས་ཀྱིས་གཟུང་འཛིན་ཆོས་རྣམས་སྟོང་པར་སྦྱངས་ནས། སྟོང་ལས་མདུན་མཁར་འཇའ་ཚོན་ལྔ་ལྡན་གྱི། །ཐིག་ལེ་ཐིག་ཕྲན་འོད་དང་འོད་ཟེར་འཕྲོ། །དེ་དབུས་སྣ་ཚོགས་པདྨ་ཉི་ཟླའི་སྟེང་། །བུདྡྷ་ཐོད་ཕྲེང་ངོ་བོར་ཡོངས་གྲུབ་པ། །རྣམ་པ་ཐུགས་ཀྱི་རིག་འཛིན་འཁོར་ལོས་སྒྱུར། །ཧེ་རུ་ཀ་དཔལ་བརྟུལ་ཞུགས་སྤྱོད་པ་འཆང་། །ཀརྨ་རྣམ་རྒྱལ་རྡོ་རྗེ་རབ་བརྟན་རྩལ། །ཞལ་གཅིག་གཡུ་རལ་ལྕང་ལོ་སྤྲིན་ལྟར་གཏིབས། །སྤྱན་གཉིས་ལྟ་སྟངས་དོན་དམ་ཆོས་ཉིད་གཟིགས། །དབང་ཞུ་པདྨ་མཐོང་གྲོལ་ཅོད་པན་གསོལ། །ཕྱག་གཡས་ཅང་ཏེའུ་གཡོན་པས་ཐོད་ཆང་འཛིན། །ཤེས་རབ་སྙེམས་ཚུལ་ཁ་ཊཱཾ་གྲུ་མོར་བཅུག །རབ་བརྗིད་སྐུ་ནི་རི་རྒྱལ་ལྷུན་པོ་བཞིན། །མདོ་སྔགས་གཉིས་ལྡན་ཆ་ལུགས་ཡོངས་རྫོགས་པའི། །ཕོད་ཀ་སྟག་ཤམ་ཆོས་གོས་ཟབ་བེར་བཀླུབས། །ཞབས་གཉིས་རྒྱལ་པོ་རོལ་པའི་སྟངས་སྟབས་ཀྱིས། །སྣང་སྲིད་ཟིལ་གནོན་གར་ཉམས་དགུ་དང་ལྡན། །གནས་གསུམ་ༀ་དཀར་ཨཱཿདམར་ཧཱུྃ་མཐིང་མཚན། །རྡོ་རྗེ་གསུམ་གྱི་ངོ་བོར་ཡེ་ནས་གྲུབ། །གནམ་ས་བར་སྣང་ཆུ་འཛིན་ཕྲེང་བྲེས་དབུས། །བཀའ་བརྒྱུད་བླ་མ་ཡི་དམ་དཔའ་བོ་དང་། །རྣལ་འབྱོར་མ་ཚོགས་ཌཱ་ཀི་ཆོས་སྲུང་རྣམས། །བུ་ཡུག་འཚུབས་བཞིན་བྱིན་རླབས་ཆར་རྒྱུན་འབེབས། །ཀུན་ཀྱང་གསལ་སྟོང་འཛིན་མེད་ལྷམ་མེར་གསལ། །ཨེ་མ་ཧོ། ཀུན་ཁྱབ་སྤྲོས་བྲལ་ཡེ་ཤེས་ལྔ་ཀློང་དུ། །ལོངས་

[Full Size]

སྤྱོད་ཡོངས་རྫོགས་གང་འདུལ་སྤྲུལ་པར་ཤར། །སྐལ་ལྡན་རྗེས་འཛིན་སྐལ་མེད་ཚར་གཅོད་འདྲེན། །ཕྲིན་ལས་བཞི་རྫོགས་མཐུ་སྟོབས་དབང་ཕྱུག་མཁྱེན། །ཆོས་དང་མཐུན་པའི་བསམ་དོན་ཡིད་བཞིན་འགྲུབ། །ཕྱི་ནང་གསང་བའི་བར་ཆད་སེལ་བྱིན་རློབས། །དེ་ལྟར་ལན་གསུམ་མམ་ལྔ་བདུན་བརྗོད་ལ། ཐུགས་ཀའི་ས་བོན་མཐར་སྔགས་ཕྲེང་། །སྤྲོ་སྡུས་པདྨ་འོད་ཞིང་ནས། །ཨོ་རྒྱན་རྗེ་འབངས་འཁོར་ཚོགས་བཅས། །བདག་མདུན་ལ་ཐིམ་དབྱེར་མེད་ངང་། །ཡེ་ཤེས་རྡོ་རྗེའི་གོ་འཕང་མཆོག །དངོས་གྲུབ་རྒྱུན་སྨིན་གྲོལ་ཐོབ་གྱུར། །ༀ་ཨཱཿབི་ཛ་ཡ་བཛྲ་ཧཱུྃ། གང་འགྲུབ་བཟླས་ལ་མཆོད་ཚོགས་བྱིན་རླབས་ནི། རྃ་ཡྃ་ཁྃ། ༀ་ཨཱཿཧཱུྃ། མཆོད་ཚོགས་རྣམ་དག་བདེ་ཆེན་གྱུར། །གདོད་ནས་ལྷུན་རྫོགས་གྲུབ་པའི་གནས། །ཨོ་རྒྱན་རང་བྱུང་དུར་ཁྲོད་ཆེ། །ཚོགས་ཁང་གཞལ་ཡས་བྱིན་རེ་ཆགས། །བླ་མེད་ཕྱི་ནང་གསང་མཆོད་རྫས། །ཚོགས་ཀྱི་འཁོར་ལོ་རྒྱ་ཆེན་པོ། །ཡེ་ཤེས་བདུད་རྩིའི་ཟེར་མ་ལས། །འདོད་ཡོན་ལྷ་མོས་གར་བསྒྱུར་ཞིང་། །ཟག་མེད་འདོད་དགུའི་ལོངས་སྤྱོད་སྤེལ། །ནམ་མཁའ་མཛོད་བཞིན་དང་རེ་སྤྲོ། །གྲུབ་པའི་རྣལ་འབྱོར་མཆེད་རྣམས་ཀྱང་། །ལྟ་སྤྱོད་ཚུལ་ལྡན་དམ་རེ་གཙང་། །དངོས་སུ་འབྱོར་དང་ཡིད་སྤྲུལ་པ། །ཀུན་བཟང་རྣམ་ཐར་འབྱམས་ཀླས་བཞིན། །སྣང་སྲིད་འཁོར་འདས་ཡོངས་བཀང་ནས། །ཕྱི་ནང་གསང་བ་ཡང་གསང་གི། །མཆོད་སྤྲིན་རབ་འབྱམས་རྒྱ་མཚོ་འདིས། །རྩ་གསུམ་འདུས་

[Full Size]

པའི་ངོ་བོ་ཉིད། །ལུང་ཟིན་སྐྱེས་མཆོག་རྡོ་རྗེ་འཛིན། །སྒྲུབ་པའི་སྲོལ་གཏོད་བསྟན་པ་སྐྱོང་། །ཟབ་གཏེར་མངའ་བདག་རིག་སྔགས་འཆང་། །ཐེག་མཆོག་འོད་གསལ་ཨ་ཏིའི་ཆོས། །འགྲོ་རྒྱུད་མུན་སེལ་ལམ་བཟང་སྟོན། །རྣམ་རྒྱལ་རྡོ་རྗེའི་ཐུགས་དམ་བསྐང་། །གཞན་ཡང་བཀའ་བབས་ཆོས་ཀྱི་བདག །རྩ་བ་བརྒྱུད་པའི་བླ་མ་དང་། །ཡི་དམ་དཀྱིལ་འཁོར་ལྷ་ཡི་ཚོགས། །གནས་གསུམ་དཔའ་བོ་མཁའ་འགྲོ་དང་། །བཀའ་ཉན་གཏེར་བདག་ཆོས་སྲུང་རྣམས། །བསྐང་ངོ་བསྐལ་པ་ཐུགས་དམ་བསྐང་། །གཡར་དམ་གཉན་པོ་བསྐང་གྱུར་ནས། །དབང་དང་དངོས་གྲུབ་སྩོལ་བྱིན་རློབས། །བདག་ནི་ཉོན་མོངས་དུག་ལྔ་ཡི། །སྒྲིབ་པས་མ་རིག་དབང་གིས་ནི། །དམ་ཚིག་ཉམས་ཆག་འགལ་འཁྲུལ་སོགས། །ནོངས་གྱུར་ཐམས་ཅད་གནོང་འགྱོད་བཤགས། །ཆོས་ཀུན་ཡེ་ནས་མཉམ་ཉིད་ངང་། །བསྐང་དང་བཤགས་བྱ་བརྗོད་ལས་འདས། །མ་བཅོས་རང་བྱུང་ལྷུན་གྲུབ་རྩལ། །དོན་དམ་ཀ་དག་དབྱིངས་སུ་བསྐང་། །འཁོར་གསུམ་དམིགས་མེད་མཐའ་བྲལ་ཀློང་། །ཀུན་བཟང་རོལ་པར་སོར་ཆུད་ཤོག །ཅེས་ཚོགས་ཀྱི་མཆོད་པས་བསྐངས་ནས། དངོས་གྲུབ་ཀྱི་རྫས་ལ་རོལ་ཞིང་། ལྷག་མ་བཏང་བ། སྔགས་ཀྱི་བཀའ་སྲུང་དམ་ཚིག་ཅན། །མ་མོ་མཁའ་འགྲོ་ཤུགས་འགྲོ་སོགས། །ལྷག་གཏོར་བཞེས་ལ་བཅོལ་པའི་ལས། །མ་གཡེལ་མ་འདའ་ཕྲིན་ལས་མཛོད། །ཅེས་འབུལ། དེ་ནས་རྗེས་རིམ་བྱིན་རླབས་བསྡུ་བ་ནི། ན་མོ་གུ་རུ། སྤྲོས་བྲལ་ཆོས་དབྱིངས་ནམ་མཁའ་ཡངས་པ་

[Full Size]

ལས། །བདེ་བ་ཆེན་པོ་མི་ཕྱེད་རྡོ་རྗེའི་བདག །ཨེ་ཝཾ་ཟུང་འཇུག་མཚོར་འཁྲུངས་པདྨ་སྐྱེས། །རིགས་ཀུན་ཁྱབ་བདག་མགོན་དེར་གསོལ་བ་འདེབས། །ལྔ་བརྒྱ་ཐ་མར་སྙིགས་དུས་སེམས་ཅན་རྣམས། །ཉོན་མོངས་རགས་པའི་མི་བསྲུན་འཆོལ་སྤྱོད་ངོར། །རྒྱལ་རྣམས་ཕྲིན་ལས་འཇུག་སྒོའི་གནས་དབེན་ཀྱང་། །ཨོ་རྒྱན་ཐུགས་བསྐྱེད་ལྷག་པར་རྗེས་སྐྱོང་བའི། སྤྲུལ་དང་ཡང་སྤྲུལ་གར་བསྒྱུར་རྣམ་རོལ་ནི། །སྣ་ཚོགས་བཀོད་པ་ཅིར་ཡང་འཆར་བ་ལས། །གང་འདིར་སྔགས་རིག་གྲུབ་པའི་སྤྱོད་འཆང་ཚུལ། །བླ་མེད་གསང་མཆོག་སྟོན་དེར་གསོལ་བ་འདེབས། །མི་ཕྱེད་འདུན་དང་དམ་ཚིག་རྣམ་དག་གི། གཞི་བརྟན་མོས་གུས་ལྟེམ་རྐྱང་བྲལ་བའི་ངང་། །བཅོས་མིན་གསོལ་འདེབས་བདག་ལ་བརྩེར་དགོངས་ཀྱཻ། །དབང་བཞི་བསྐུར་ཞིང་རྒྱུད་བཞི་སྨིན་པར་མཛོད། །ལམ་བཞི་འབྱོངས་ནས་སྐུ་བཞི་ཐོབ་བྱིན་རློབས། །དེ་ནས་སྐྱེད་པའི་དཀྱིལ་འཁོར་རང་ལ་ཐིམ། །བློ་འདས་བྱར་མེད་ཀུན་བཟང་གཉུག་མའི་གཤིས། །ཁྱབ་གདལ་ཀློང་ཡངས་སྐྱེ་མེད་ས་མ་དྷི། །ཨ་ཨ་ཨཱཿདེའི་ངང་དུ་གནས་ལུགས་ཀྱི་ངོ་བོ་སྐྱོང་། མཐར་བསྔོ་བ་སྨོན་ལམ་བཀྲ་ཤིས་སོགས་དཀྱུས་མཐུན་གྱིས་མཐའ་བརྒྱན་པར་བྱའོ། །དེ་ལྟར་ཀ་ཉིན་ལུང་ཆོས་གྲྭའི་སྒྲུབ་སྡེའི་སྤོང་བ་པ་སྦས་པའི་རྣལ་འབྱོར་སྙིང་པོའི་དོན་ལ་གཞོལ་བ་བླ་མ་ཀརྨ་འཕགས་མཆོག་དང་འཕེལ་རྒྱས་མཆེད་ཀྱི་བཞེད་ལྟར། སི་ཏུ་པདྨ་ཉིན་བྱེད་དབང་པོས་བཀོད་པ་འགྲོ་རྣམས་ཀུན་བཟང་རྡོ་རྗེ་འཆང་ཆེན་པད་འབྱུང་གི་གོ་འཕང་ལ་འགོད་པར་གྱུར་ཅིག །དགེའོ། །བཀྲ་ཤིས།། །།

བླ་མའི་རྣལ་འབྱོར་བདེ་ཆེན་མཆོག་སྩོལ།

[Full Size]

༈ བླ་མའི་རྣལ་འབྱོར་བདེ་ཆེན་མཆོག་སྩོལ་བཞུགས། མཆོག་གསུམ་ངོ་བོ་བླ་མ་ལ། །བདག་སོགས་འདི་ནས་བྱང་ཆུབ་བར། །སྐྱབས་གསོལ་འགྲོ་ཀུན་བདེ་གྱུར་ལྡན། །སྡུག་བསྔལ་དང་བྲལ་སངས་རྒྱས་ཤོག །སྭ་བྷཱ་ཝས་སྦྱངས། སྟོང་ལས་ཕྱི་ནང་མཆོད་པའི་རྫས། །རྒྱ་ཆེན་རྒྱུན་མི་ཆད་པ་ཡི། །ཀུན་ཏུ་བཟང་པོའི་མཆོད་སྤྲིན་གྱི། །ཟག་མེད་བདེ་ཆེན་དགྱེས་སྐྱེད་གྱུར། །ཨ་ཀཱ་རོས་བྱིན་བརླབས་ནས། བདག་ཉིད་ལྷར་གསལ་མདུན་གྱི་མཁའ་དབྱིངས་སུ། །རིན་ཆེན་གཞལ་ཡས་གྲུ་ུབཞི་མུ་ཁྱུད་རྫོགས། །དབུས་སུ་པདྨ་ཕྱོགས་མདོག་འདབ་བཞིར་ལྡན། །གེ་སར་དབུས་སུ་ཆོས་དབྱིངས་ཡེ་ཤེས་ཀྱི། །ངོ་བོ་ཧེ་རུ་ཀ་དཔལ་དཔའ་བོ་ཆེ། །རྡོ་རྗེ་གཙུག་ལག་དགའ་བའི་རྡོ་རྗེ་འཆང་། །ཞལ་གཅིག་ཕྱག་གཉིས་ཌཱ་དྲིལ་ཞབས་རོལ་སྟབས། །ཕོད་ཀ་ཆོས་གོས་པད་ཞྭ་རུས་རྒྱན་སྤྲས། །ཤར་གྱི་འདབ་མར་མེ་ལོང་ཡེ་ཤེས་ཀྱི། །ངོ་བོ་རིག་འཛིན་གྲུབ་པའི་དབང་ཕྱུག་མཆོག །ཧྱ་གྷྲྀཝ་ན་ཐཱ་ལམ་མེར་གསལ། །ལྷོ་ཡི་འདབ་མར་མཉམ་ཉིད་ཡེ་ཤེས་ཀྱི། །ངོ་བོ་ཁྲག་འཐུང་དཔལ་ཆེན་རྡོ་རྗེ་འཛིན། །ཤྲཱི་ཙིཏྟ་བཛྲ་ལམ་མེར་གསལ། །ནུབ་ཀྱི་འདབ་མར་སོར་རྟོག་ཡེ་ཤེས་ཀྱི། །ངོ་བོ་གསང་སྔགས་གྲུབ་པའི་སྐྱེས་བུ་མཆོག །རྗེ་བཙུན་པདྨ་ཀུན་ནས་རབ་ཏུ་གསལ། །བྱང་གི་འདབ་མར་བྱ་གྲུབ་ཡེ་ཤེས་ཀྱི། །ངོ་བོ་མངོན་སྤྱོད་ཕྲིན་ལས་སྣ་ཚོགས་ལ། །དབང་བསྒྱུར་ཚེ་དབང་འཆི་མེད་དཔལ་དར་གསལ། །རྒྱན་དང་

[Full Size]

ཆ་ལུགས་ཕྱག་མཚན་གཙོ་བོ་ལྟར། །འོད་དང་འོད་ཟེར་འབར་བའི་ཀློང་དུ་གསལ། །དེ་ལྟར་སོ་སོའི་ཐུགས་ལས་འོད་འཕྲོས་པས། །འོག་མིན་དག་པ་མཁའ་སྤྱོད་ཞིང་ཁམས་ནས། །བསྒོམ་པ་དང་འདྲའི་ཡེ་ཤེས་སྤྱན་དྲངས་ཏེ། །མཚོ་ལ་ཆར་བཞིན་དབྱེར་མེད་རོ་གཅིག་གྱུར། །ཞེས་སྤྱན་དྲངས་ཏེ་མཆོད་པ་འབུལ་བ་ནི། ཧོ་ཕྱི་ནང་གསང་བའི་འདོད་ཡོན་རྫས། །ཚོགས་ཀྱི་འཁོར་ལོ་རྒྱ་ཆེན་པོ། །ཤ་ལྔ་བདུད་རྩི་ལྔ་ལྡན་གྱི། །ལོངས་སྤྱོད་ཟད་མེད་འདི་དག་ཀུན། །མཆོད་ཡུལ་དམ་པའི་ལྷ་ཚོགས་མཆོད། །བཞེས་ཤིག་རོལ་ཅིག་པཱུ་ཛ་ཧོ། །བདག་དང་མཐའ་ཡས་སེམས་ཅན་ཀུན། །དུག་གསུམ་དུག་ལྔའི་དབང་གྱུར་པའི། །རྩ་བ་ཡན་ལག་ཉམས་པ་བཤགས། །རང་རིག་ཀ་དག་དོན་རྟོགས་ནས། །ཡེ་ཤེས་སྐུ་ལྔ་མཆོག་ཐོབ་ཅིང་། །གཉིས་འཛིན་ལོག་རྟོག་གཡུལ་རྒྱལ་ཏེ། །དམ་པའི་གོ་འཕང་རེག་གྱུར་ཅིག །བཀྲ་ཤིས་དགེ་ལེགས་ཡོངས་འདུའི་ལྗོན། །འབད་མེད་ལྷུན་གྲུབ་དཔལ་ཐོབ་ནས། །བཀའ་བརྒྱུད་བསྟན་པའི་རྒྱལ་མཚན་མཆོག །སྲིད་པའི་རྩེ་མོར་མཐོ་གྱུར་ཅིག །ཅེས་པའང་བླ་མ་ཕྲིན་ལས་རབ་རྒྱས་ཀྱི་བཞེད་ལྟར། སི་ཏུས་སྤེལ་བ་མངྒ་ལམ།། །།སྣང་སྲིད་ཡེ་དག་བདེ་ཆེན་པད་འོད་ཞིང་། །རང་ལྷར་གསལ་བའི་སྤྱི་བོར་འཁོར་ལོའི་མགོན། །ངོ་བོ་པད་འབྱུང་རྣམ་པ་དཔལ་འབྲུག་པ། །བསྟན་པའི་རྒྱལ་མཚན་མཚན་དཔེ་མཐོང་གྲོལ་སྐུ། །ཐོས་དང་དྲན་རེག་ཡེ་ཤེས་མངོན་གྱུར་པའི། །སངས་རྒྱས་ཆོས་

[Full Size]

དང་ཚོགས་མཆོག་ཀུན་འདུས་པ། །དྲན་མཆོག་དྭངས་མའི་མགོན་གྱུར་སྐྱབས་གནས་རྗེ། །དུས་འདིར་དྲན་ནོ་ཅི་མཛད་ཁྱེད་ཤེས་ཀྱི། །བཅོས་མིན་མོས་གུས་ངང་ནས་གསོལ་བ་འདེབས། །རྗེ་བཙུན་ཁྱེད་བཞིན་བདག་རྒྱུད་བྱིན་གྱིས་རློབས། །དེ་ནས་གསོལ་འདེབས་དང་། མཆོད་པ། བཀྲ་ཤིས་སོགས་ཞལ་བསྒྱུར་འདིའང་འདོན། བདེ་ཆེན་འགྱུར་མེད་འོད་གསལ་ཀུན་ཁྱབ་ཀློང་། །རང་བྱུང་ཡེ་ཤེས་ལྔ་ལྡན་ལོངས་སྤྱོད་རྫོགས། །རིགས་དཀྱིལ་འཁོར་ལོའི་མགོན་པོ་རྡོ་རྗེ་འཆང་། །དཔལ་ལྡན་འབྲུག་པའི་ཞབས་ལ་གསོལ་བ་འདེབས། །ལན་གསུམ་མམ་བདུན། མཚན་སྔགས་ནི། ༀ་ཨཱཿཤཱ་ས་ན་དྷྭ་ཛ་ཧཱུྃ། ཅི་ནུས་བཟླ་ཞིང་། དཔལ་ལྡན་འབྲུག་པ་མཁྱེན། དད་པའི་བློ་ཡིས་གང་གྲུབ་དང་། མཐར་ནི། བྱིན་རླབས་དབང་བཞིས་སྨིན་ཅིང་གྲོལ་བ་ཡི། །མི་འགྱུར་ཟག་མེད་བདེ་སྟོང་ཕྱག་རྒྱ་ཆེ། །རང་གཞན་དོནགཉིས་མཐར་ཕྱིན་ཆོས་ཀྱི་སྐུ། །མངོན་བྱང་ཆུབ་པའི་གོ་འཕང་མྱུར་ཐོབ་ཤོག །ཅེས་པའང་སི་ཏུ་པདྨའི་མིང་ཅན་གྱིས་དད་ལྡན་སེ་བོ་འཚོ་བྱེད་ཀརྨ་བཀྲ་ཤིས་ངོར་བཀོད་པའོ། །ཛ་ཡནྟུ།། །།

བླ་མའི་རྣལ་འབྱོར་ཡིད་བཞིན་རེ་སྐོང་ཐར་འདོད་གྲུ་རྫིང་།

[Full Size]

བླ་མའི་རྣལ་འབྱོར་ཡིད་བཞིན་རེ་སྐོང་ཐར་འདོད་གྲུ་རྫིང་ཞེས་བྱ་བ་བཞུགས། ན་མོ་གུ་ར་ཝེ། འདིར་བླ་མའི་རྣལ་འབྱོར་དང་འབྲེལ་བའི་ཚོགས་བསྐང་བཤགས་པའི་རིམ་པ་སྤྲོ་ན་འདི་ལྟ་སྟེ། དང་པོ་སྐྱབས་སེམས་ནི། རྒྱལ་བ་རབ་འབྱམས་ཀུན་འདུས་པའི། །བླ་མེད་སྟོན་པ་རྡོ་རྗེ་འཛིན། །དཀྱིལ་འཁོར་གཙོ་མཆོག་དམ་པ་ལ། །སྒོ་གསུམ་གུས་པས་སྐྱབས་སུ་མཆི། །ནམ་མཁའི་མཐའ་མཉམ་སེམས་ཅན་རྣམས། །རྣམ་གྲོལ་

[Full Size]

ཐར་མཆོག་ལ་འགོད་ཕྱིར། །དེང་ནས་སངས་རྒྱས་ཐོབ་ཀྱི་བར། །བདག་གིས་བླ་མ་བསྒྲུབ་པར་བགྱི། །དེ་ནས་མཆོད་རྫས་བྱིན་གྱིས་བརླབ་པ་ནི། སྭ་བྷཱ་ཝས་སྦྱངས། སྟོང་ལས་མཆོད་རྫས་ཕྱི་ནང་གསང་བ་ཡི། །སྨན་གཏོར་རཀྟའི་ཚོགས་རྣམས་ཟག་མེད་ཀྱི། །ཡེ་ཤེས་བདུད་རྩི་འོད་རླབས་རབ་འཕྲོ་བ། །ཀུན་བཟང་སྨོན་ལམ་ལས་གྲུབ་དགྱེས་སྐྱེད་གྱུར། །ༀ་ཨཱཿཧཱུྃ་ཧ་ཧོ་ཧྲཱིཿས་བྱིན་བརླབས་ཏེ། བསྐྱེད་རིམ་བསྒོམ་པ་ནི། ཕྱི་ནང་སྣོད་བཅུད་མི་དམིགས་སྟོང་ཉིད་གྱུར། །རང་ཉིད་ལྷར་གསལ་མདུན་གྱི་མཁའ་དབྱིངས་སུ། །ཡེ་ཤེས་ལྔ་ཡི་འཇའ་འོད་འཐིབས་པའི་ཀློང་། །རིན་ཆེན་དར་དང་སེང་གེས་བཏེགས་པའི་ཁྲི། །དེ་སྟེང་པདྨ་དཀར་པོ་འདབ་སྟོང་རྒྱས། །ཉི་ཟླའི་དཀྱིལ་འཁོར་གསལ་ལ་འཚེར་བའི་དབུས། །སངས་རྒྱས་པདྨ་འབྱུང་གནས་ངོ་བོ་ཉིད། །དཔལ་ལྡན་རིགས་ཀུན་དབང་ཕྱུག་ཧེ་རུ་ཀ། མཐའ་ཀླས་ཞིང་གི་བདག་པོ་དཔའ་བོ་ཆེ། །རྡོ་རྗེ་དྲག་པོ་ཕྲིན་ལས་འདུས་པ་རྩལ། །སྐུ་མདོག་དཀར་སྨུག་ཞི་མ་ཁྲོ་ཡི་ཚུལ། །དབུ་ལ་པདྨ་མཐོང་གྲོལ་རབ་མཛེས་གསོལ། །ཕྱག་གཡས་གསེར་གྱི་རྡོ་རྗེ་རྩེ་དགུ་དང་། །གཡོན་པས་སྡིགས་མཛུབ་གནམ་ལྕགས་ཕུར་བུ་བསྣམས། །སྐུ་ལ་ཕོད་ཀ་ཆོས་གོས་རྣམ་གསུམ་བཀླུབས། །ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས། །གནས་གསུམ་ༀ་དཀར་ཨཱཿདམར་ཧཱུྃ་མཐིང་གསལ། །ཧཱུྃ་ལས་འོད་འཕྲོས་འོག་མིན་ཞིང་རབ་འབྱམས། །ཁྱད་པར་ཨོ་རྒྱན་དཔལ་གྱི་མཁའ་སྤྱོད་ནས། །རྡོ་རྗེ་

[Full Size]

སློབ་དཔོན་རྟ་མགྲིན་དབང་གི་རྒྱལ། །མ་ཚོགས་མཁའ་འགྲོ་རིག་འཛིན་བྱེ་བ་འབུམ། །ཆོས་ཀྱི་སྲུང་མ་རྒྱ་མཚོ་འཁོར་བཅས་རྣམས། །དེང་འདིར་དད་དང་དམ་ཚིག་མོས་བློ་ཡིས། །སྒྲུབ་པའི་གནས་འདིར་སྤྱན་འདྲེན་གཤེགས་སུ་གསོལ། །བཛྲ་ས་མ་ཡ་ཛཿཞེས་སྤྱན་དྲངས་ཏེ་གདན་འབུལ། པདྨ་ཀ་མ་ལཱ་ཡ་སྟྭྃ། ཧྲཱིཿསངས་རྒྱས་ཀུན་འདུས་སྐུ་མཆོག་མཚན་དཔེས་བརྒྱན། །དམ་པའི་གསུང་མཆོག་ཚངས་དབྱངས་དྲུག་ཅུ་ལྡན། །ཐུགས་མཆོག་རྡོ་རྗེ་ཏིང་འཛིན་བརྒྱ་ཕྲག་མངའ། །རིག་འཛིན་བླ་མའི་ཚོགས་ལ་ཕྱག་འཚལ་ལོ། །དེ་ནས་མཆོད་པ་འབུལ་བ་ནི། ཡན་ལག་བརྒྱད་ལྡན་མཆོད་ཡོན་ཞབས་བསིལ་དང་། །པུཎྜ་རི་ཀ་ལ་སོགས་མེ་ཏོག་ཚལ། །ཚུལ་ཁྲིམས་དྲི་བསུང་བདུག་སྤོས་སྤྲིན་བཞིན་གཏིབས། །རབ་གསལ་སྣང་བའི་སྒྲོན་མེ་ཉི་ལྟར་འཚེར། །ཚངས་རལ་ལས་འོངས་དག་བྱེད་དྲི་ཆབ་དང་། །ལྷ་ཡི་ཞལ་ཟས་སྣ་ཚོགས་རོ་བརྒྱར་ལྡན། །པི་ཝཾ་གླུ་དབྱངས་གྲག་སྟོང་སྒྲ་ཡིས་མཆོད། །དབང་ལྔའི་ཆུ་སྐྱེས་གསུར་ཆེན་སྤོས་ཞུན་མེ། །དྲི་ཆབ་ཞལ་ཟས་ཐོད་རྔ་རྐང་གླིང་སྒྲ། །བདུད་རྩི་སྨན་དང་རཀྟ་བ་ལིཾ་ཏ། །སྦྱོར་སྒྲོལ་ཏིང་འཛིན་བླ་ན་མེད་པའི་རྫས། །ཕྱི་ནང་གསང་མཆོད་སྣ་ཚོགས་བཞེས་སུ་གསོལ། །བསྟོད་པ་བྱ་བ་ནི། ཧྲཱིིཿགདོད་ནས་རྣམ་དག་ཆོས་ཀྱི་སྐུ་བརྙེས་ཀྱང་། །བྱམས་པས་འགྲོ་ལ་རྗེས་སུ་བརྩེ་བ་ཡི། །གང་འདུལ་དེར་སྟོན་སྒྱུ་འཕྲུལ་གར་རོལ་པ། །ཤྲཱི་ཐུགས་ཀྱི་རྡོ་རྗེར་ཕྱག་འཚལ་བསྟོད། །གྲུབ་གཉིས་སྩོལ་ཞིང་ས་

[Full Size]

ལམ་བར་ཆད་སེལ། །རིག་འཛིན་རྒྱ་མཚོ་བྱེ་བ་འབུམ་སྡེ་དང་། །ཛྙཱ་ན་ཌཱ་ཀི་དཔའ་བོ་དཔའ་མོའི་ཚོགས། །ཆོས་ཀྱི་སྲུང་མ་རྣམས་ལ་བསྟོད་པར་བགྱི། །བཤགས་པ་ནི། བདག་དང་མཐའ་ཡས་སེམས་ཅན་ཐམས་ཅད་ཀྱི། །བསྐལ་དུས་སྔོན་ནས་ད་ལྟའི་བར་འདི་རུ། །མ་རྟོགས་དབང་གིས་ནོངས་པར་གྱུར་པ་རྣམས། །སྙིང་ནས་བཤགས་སོ་དག་ཚངས་དངོས་གྲུབ་སྩོལ། །ཡི་གེ་བརྒྱ་བ་བརྗོད། དེ་ནས་བཟླས་བའི་རིམ་པ་ནི། མདུན་བསྐྱེད་བླ་མའི་ཐུགས་ཀར་ཟླ་སྟེང་ཧཱུྃ། །མཐིང་གསལ་འབར་བ་དེ་མཐར་སྔགས་ཕྲེང་འཁོར། །འོད་འཕྲོས་འཕགས་མཆོད་འགྲོ་བའི་སྒྲིབ་གཉིས་སྦྱངས། །ཚུར་འདུས་ཡེ་ཤེས་བདག་རྒྱུད་ལ་སྨིན་གྱུར། །ༀ་ཨཱཿཤྲཱི་ཙིཏྟ་བཛྲ་ཧཱུྃ། ཞེས་ཅི་ཅུས་བཟླས། དེ་ནས་ཚོགས་མཆོད་འབུལ་བ་ནི། རྃ་ཡྃ་ཁྃ། ༀ་ཨཱཿཧཱུྃ། འདིར་བཤམས་ཞལ་ཟས་ཚོགས་གཏོར་གྱི། །མ་དག་གཉིས་འཛིན་བསྲེག་སྦྱང་བཀྲུས། །ཡེ་ཤེས་བདུད་རྩིར་བྱིན་བརླབ་ནས། །ཟག་མེད་མཆོད་སྤྲིན་རྒྱ་མཚོར་གྱུར། །གནས་འོག་མིན་ཆོས་དབྱིངས་ཞིང་རབ་འབྱམས། །དཔལ་ཨོ་རྒྱན་མཁའ་སྤྱོད་གཞལ་ཡས་ནས། །མགོན་མཚུངས་མེད་ཐུགས་ཀྱི་རྡོ་རྗེ་མཆོག །ཡིད་གདུང་བས་ཚོགས་ལ་སྤྱན་འདྲེན་གཤེགས། །འཁོར་རིག་འཛིན་གྲུབ་བའི་དབང་ཕྱུག་ཆེ། །མ་གནས་གསུམ་དཔའ་བོ་མཁའ་འགྲོ་དང་། །ཆོས་སྐྱོང་བའི་མགོན་པོ་ལྕམ་དྲལ་རྣམས། །ཚོགས་མཆོད་པ་བཞེས་ཕྱིར་གཤེགས་སུ་གསོལ། །ཧོ་ཚོགས་རྫས་འདོད་ཡོན་སྣ་ཚོགས་པ། །རོ་བཅུད་ལྡན་ལོངས་སྤྱོད་

[Full Size]

བསམ་ཡས་འདི། །དཔལ་རྡོ་རྗེ་ཅན་དངོས་ཞལ་དུ་འབུལ། །འཁོར་དང་བཅས་དགྱེས་པར་ད་རོལ་ཅིག །གྷ་ན་ཙཀྲ་པཱུ་ཛ་ཧོཿཞེས་ཚོགས་ཕུད་ཕུལ་ནས་བསྐང་བ་བྱ་བ་ནི། ཧཱུྃ་ཧྲཱིཿའཆི་མེད་གྲུབ་པའི་འཁོར་ལོས་སྒྱུར། །པད་འབྱུང་སྒྱུ་འཕྲུལ་གར་རོལ་པ། །ཚངས་པ་ལྷ་ཡི་མེ་ཏོག་དང་། །དབྱེར་མེད་རྡོ་རྗེ་དྲག་བོ་རྩལ། །བསྐང་ངོ་མཆོད་དོ་ཐུགས་དམ་བསྐང་། །རིག་འཛིན་བྱེ་བ་འབུམ་གྱི་སྡེ། །མ་ཚོགས་ཌཱ་ཀི་དཔའ་བོ་དང་། །དམ་ཅན་ཆོས་སྲུང་ཐུགས་དམ་བསྐང་། །གཡར་དམ་གཉན་པོ་བསྐང་བའི་རྫས། །མཁའ་དབྱིངས་ཀུན་ཁྱབ་མཆོད་པའི་སྤྲིན། །ཉེར་སྤྱོད་ལྔ་དང་འདོད་ཡོན་དྲུག །རྡོ་རྗེ་ལྷ་མོ་བཅུ་དྲུག་པོ། །རྒྱལ་སྲིད་བདུན་དང་བཀྲ་ཤིས་བརྒྱད། །མཆོད་པའི་བྱེ་བྲག་མཐའ་ཀླས་པས། །ཐུགས་དམ་བསྐང་ངོ་བྱིན་གྱིས་རློབས། །དོན་གཉིས་མཐར་ཕྱིན་དངོས་གྲུབ་སྩོལ། །དེ་ནས་བཤགས་པ་ནི། ཧོ་རྡོ་རྗེ་རྒྱལ་པོ་སངས་རྒྱས་འདུས་པའི་སྐུ། །དཀྱིལ་འཁོར་མངའ་བདག་སློབ་དཔོན་དགོངས་སུ་གསོལ། །བདག་ཅག་མ་རིག་འཁྲུལ་བའི་ལས་དབང་གིས། །སོ་ཐར་བྱང་སེམས་གསང་སྔགས་དམ་འགལ་བ། །བཤགས་སོ་བཤགས་སོ་གནོང་འགྱོད་དྲག་པོས་བཤགས། །བཟོད་པར་བཞེས་ལ་དག་ཚངས་དབུགས་དབྱུང་གསོལ། །གཉིས་འཛིན་ལོག་རྟོག་གཡུལ་ངོ་ལས་རྒྱལ་ནས། །སྐུ་བཞི་མངོན་གྱུར་བླ་མེད་སངས་རྒྱས་ཤོག །བསྒྲལ་བ་ནི། ན་མོ་རྩ་གསུམ་ལྷ་ཡི་བདེན་པའི་མཐུས། །བསྟན་

[Full Size]

དགྲ་དམ་ཉམས་མ་ལུས་འདིར་ཁུག་ཅིག །ཡེ་ཤེས་ཕུར་བུས་རབ་བསྒྲལ་དབྱིངས་སུ་བསྟིམ། །ཞལ་དུ་བསྟབ་བོ་བཞེས་ཤིག་དགྱེས་པར་རོལ། །དེ་ནས་ལྷག་མ་ཕུལ་བ་ནི། ཧཱུྃ་གསང་སྔགས་དཀྱིལ་འཁོར་སྐྱོང་བའི་ལྷག་སྡུད་རྣམས། །ཐམས་ཅད་འདིར་སྤྱོན་ཚོགས་ལྷག་གཏོར་མ་བཞེས། །གང་བཅོལ་ལས་ཀུན་ཐོགས་མེད་བསྒྲུབ་པ་དང་། །མི་མཐུན་རྐྱེན་རྣམས་བཟློག་པའི་ཕྲིན་ལས་མཛོད། །ཆད་ཐོ་དང་བརྟན་སྐྱོང་ནི། སྔོན་ཚེ་བར་དང་ཐ་དུས་བསྐལ་པ་ལ། །རིག་འཛིན་པདྨ་ཐོད་ཕྲེང་རྒྱལ་པོ་དང་། །དབྱེར་མེད་དཔལ་ཆེན་ཐུགས་ཀྱི་རྡོ་རྗེའི་དྲུང་། །ཡེ་ཤེས་ལས་ཀྱི་དཔའ་བོ་མཁའ་འགྲོ་སོགས། །འཇིག་རྟེན་དྲེགས་བྱེད་དམ་ཅན་སྲུང་མ་ཡིས། །སོ་སོའི་ཁས་བླངས་དམ་ཚིག་དྲན་མཛོད་ལ། །གསང་སྔགས་དཀྱིལ་འཁོར་གཉེན་པོ་སྐྱོང་བ་དང་། མཆོད་གཏོར་བཞེས་ལ་གང་བཅོལ་ཕྲིན་ལས་སྒྲུབས། །བོད་ཁམས་སྐྱོང་བའི་མ་སྲིང་བརྟན་མའི་ཚོགས། །ཐ་ཚིག་མ་འདའ་བཀའ་ཡི་གཏོར་མ་བཞེས། །བསྟན་པ་སྲུང་དང་འགྲོ་ལ་ཕན་བདེ་སྤེལ། །རྣལ་འབྱོར་འཁོར་སྲུང་བར་ཆད་བཟློག་ཏུ་གསོལ། །དེ་ནས་རྗེས་ཀྱི་བྱ་བ་ནི། རིག་འཛིན་ལྷ་ཚོགས་མཆོད་ཅིང་བསྒྲུབ་ལགས་ན། །ཐུགས་རྗེས་དགོངས་ཏེ་བདག་གཞན་སྨིན་གྲོལ་གྱི། །ལམ་ལ་འགོད་ཕྱིར་དབང་དང་དངོས་གྲུབ་སྩོལ། །སྐུ་བཞི་མངོན་དུ་འགྱུར་བར་བྱིན་གྱིས་རློབས། །དེ་ལྟར་སྐུ་གསུང་ཐུགས་ཡོན་ཕྲིན་ལས་ཀྱི། །འོད་ཟེར་དཀར་དམར་སྔོ་ལྗང་སེར་འཕྲོས་ནས། །

[Full Size]

བདག་གི་གནས་བཞིར་ཐིམ་པས་དབང་བཞི་རྫོགས། །བླ་མ་འོད་ཞུ་དབྱེར་མེད་གཅིག་འདྲེས་གྱུར། །དེའི་ངང་ལ་དར་ཅིག་ཅི་གནས་སུ་མཉམ་པར་བཞག །དགེ་བ་འདིས་མཚོན་དུས་གསུམ་བསགས་ཡོད་ཀྱི། །དགེ་ཚོགས་ཐམས་ཅད་གཅིག་ཏུ་བཟླུམས་བྱས་ནས། །དགེ་ཀུན་སེམས་ཅན་སངས་རྒྱས་ཐོབ་ཕྱིར་བསྔོ། །དགེ་དེས་ཚོགས་གཉིས་ཡོངས་སུ་རྫོགས་ཐོབ་ཤོག །ཅེས་བསླབ་གསུམ་རྒྱན་ལྡན་བླ་མ་ནོར་བུ་ནས་རྟེན་དང་བཅས་འདི་ལྟར་དགོས་ཞེས་བསྐུལ་བ་ལྟར་སི་ཏུས་སྤེལ་བ་མངྒ་ལམ།། །།

བླ་མའི་རྣལ་འབྱོར་ཚོགས་མཆོད་དང་འབྲེལ་བ།

[Full Size]

བླ་མའི་རྣལ་འབྱོར་ཚོགས་མཆོད་དང་འབྲེལ་བར་སྤྲོ་ན། སྐྱབས་སེམས་ནི། མཆོག་གསུམ་རྩ་གསུམ་ངོ་བོ་ཉིད། །རྡོ་རྗེ་འཛིན་དབང་བླ་མ་ལ། །སྐྱབས་སུ་མཆི་ཞིང་འགྲོ་བ་རྣམས། །འཁོར་མཚོ་ལས་གྲོལ་སེམས་བསྐྱེད་དོ། །ལན་གསུམ། མདུན་རྟེན་བསྐྱེད་པ་ནི། ༀ་ཤཱུ་ནྱ་ཏས་སྟོང་བར་སྦྱངས། ཆོས་རྣམས་མ་སྐྱེས་མི་འགགས་པ། །གསལ་སྟོང་རིག་པའི་སྣང་ཆ་ལས། །རང་ལྷར་གསལ་བའི་མདུན་གྱི་མཁར། །ཡེ་ཤེས་ལྔ་ལྡན་འཇའ་འོད་ཀློང་། །སྣ་ཚོགས་པདྨ་ཉི་ཟླའི་སྟེང་། །དྲིན་ཆེན་རྩ་བའི་བླ་མ་མཆོག །རྡོ་རྗེ་འཆང་གི་རྣམ་པ་ཅན། །ལོངས་སྤྱོད་རྫོགས་པའི་རྒྱན་ལྡན་པ། །རྒྱལ་ཀུན་འདུས་པའི་ངོ་བོར་གསལ། །འོད་དང་འོད་ཟེར་ཕྱོགས་བཅུར་འཕྲོ། །གནས་གསུམ་འབྲུ་གསུམ་ལས་འོད་འཕྲོས། །ཕྱོགས་བཅུའི་རྒྱལ་བ་སྲས་འཁོར་བཅས། །བླ་མའི་ཡེ་ཤེས་རོལ་པ་རུ། །སྤྱན་དྲངས་དམ་ཡེ་དབྱེར་

[Full Size]

མེད་གྱུར། །ཤྲཱི་མཱན་གུ་རུ་དེ་ཝ་བཛྲ་ས་མཱ་ཛཿཔདྨ་ཀ་མ་ལ་ཡ་སྟྭྃ། སྤྱན་དྲངས་བཞུགས་གསོལ་དང་། བླ་མའི་དཀྱིལ་འཁོར་ལྷ་ཚོགས་ལ། །ཕྱི་ཡི་མཆོད་པ་སྣ་ཚོགས་དང་། །རང་བྱུང་འདོད་ཡོན་ནང་མཆོད་འབུལ། །གསང་མཆོད་བདེ་ཆེན་ལྷ་མོའི་ཚོགས། །འཁོར་འདས་རོ་མཉམ་དེ་བཞིན་ཉིད། །དུས་གསུམ་མཉམ་ཉིད་རྟོགས་པས་མཆོད། །ༀ་བཛྲ་ཨརྒྷཾ་ནས། པཱ་དྱཾ། ཤབྡའི་བར་དང་། མ་ཧཱ་པཉྩ་རཀྟ། བ་ལིང་ཏ། མ་ཧཱ་སུ་ཁ་པཱུ་ཛ་ཧོ། ཞེས་མཆོད། དུས་གསུམ་རྒྱལ་ཀུན་འདུས་པའི་དཔྱིད། །སྙིགས་དུས་འགྲོ་ལ་རྗེས་བརྩེ་བའི། །ཐུགས་རྗེ་རྨད་བྱུང་རིགས་ཀུན་བདག །རྡོ་རྗེ་ཅན་ལ་ཕྱག་འཚལ་བསྟོད། །ཅེས་བསྟོད། ཐུགས་ཀར་ཟླ་སྟེང་ཧྲཱིཿཡིག་མཐར། །སྔགས་ཕྲེང་གཡས་སུ་འཁོར་བ་ལས། །འོད་འཕྲོས་འཕགས་མཆོད་འགྲོ་སྒྲིབ་སྦྱང་། །མཆོག་ཐུན་དངོས་གྲུབ་ཐོབ་པར་གྱུར། །ༀ་ཨཱཿདྷརྨ་སུཪྱཱ་མ་ཧཱ་མུ་དྲ་སིདྡྷི་ཧཱུྃ། ཅེས་སྔགས་བཟླའོ། །དེ་ནས་ཚོགས་རྫས་རྣམས། ཨམྲྀ་ཏས་བསངས། ༀ་སྣང་བ་སྣོད་ཀྱི་གཏོར་གཞོང་དུ། ཨཱཿསྟོང་པ་བཅུད་ཀྱི་བདུད་རྩིས་གཏམས། །ཧཱུྃ་འདོད་ཡོན་སྣ་ཚོགས་སྤྲིན་སྤྲོར་གྱུར། །ཧྲཱིཿབདེ་ཆེན་མཉམ་ཉིད་ཚོགས་མཆོད་བཞེས། །ཞེས་ཚོགས་སྤྲོ། བདག་ཅག་འཁྲུལ་པའི་དབང་གྱུར་པས། །བསྐྱེད་རྫོགས་མི་གསལ་མོས་གུས་ལ། །ལྟེམས་རྐྱང་ཚོད་ཡོད་གྱུར་པ་སོགས། །སྡོམ་གསུམ་འགལ་ཉམས་སྡིག་སྒྲིབ་བཤགས། །གཉིས་འཛིན་མ་རིག་དགྲ་

[Full Size]

དང་བགེགས། །བདག་མེད་ཕུར་པས་བསྒྲལ་ནས་ཀྱང་། །དུག་གསུམ་སྐུ་གསུམ་བདུད་རྩིར་གྱུར། །དཀྱིལ་འཁོར་ལྷ་ཚོགས་ཞལ་དུ་བསྟབ། །ག་ན་ཙཀྲ་པཱུ་ཛ་ཁཱ་ཧི། ཞེས་ཕུལ། ཨ་ཧོཿམ་ཧཱ་སུ་ཁཿ། དངོས་གྲུབ་རོལ། ལྷག་མ་ནི། ཧཱུྃ། དབྱིངས་དང་ཡེ་ཤེས་དབྱེར་མེད་ངང་། །རོལ་རྩལ་ལས་ཤར་སྲུང་མ་བྲན། །དྲེགས་བྱེད་མ་མོ་མཁའ་འགྲོའི་ཚོགས། །ལྷག་གཏོར་བཞེས་ལ་ཕྲིན་ལས་མཛོད། །དེ་ནས་བྱིན་རླབས་དབང་ལེན་ནི། ཧྲཱིཿམདུན་བསྐྱེད་བླ་མའི་གནས་བཞི་ལས། །རྡོ་རྗེ་བཞི་ཡི་ངོ་བོ་རུ། །ༀ་ཨཱཿཧཱུྃ་ཧོཿདཀར་དམར་མཐིང་། །ལྗང་འཕྲོས་རང་གི་གནས་བཞིར་ཐིམ། །དབང་བཞི་ཡེ་ཤེས་མཆོག་ཐོབ་ནས། སྐུ་བཞིའི་གོ་འཕང་རྒྱུད་སྨིན་གྱུར། །གུ་རུ་སརྦ་སིདྡྷི་ཕ་ལ་ཧཱུྃ། བླ་མ་འོད་ཞུ་རང་ལ་ཐིམ། །དབྱེར་མེད་ཆུ་ལ་ཆུ་ུབཞག་ལྟར། །དུས་གསུམ་རྟོག་པའི་རྒྱུན་བཅད་ནས། །མ་བཅོས་གང་ཤར་ངོ་བོ་བསྐྱང་། །ཞེས་ཅི་གནས་སུ་མཉམ་པར་བཞགདགེ་འདིས་འགྲོ་དྲུག་སེམས་ཅན་རྣམས། །བླ་མེད་གོ་འཕང་ཐོབ་པར་ཤོག །ཅེས་སི་ཏུ་པདྨའི་མིང་གིས་དད་གསུམ་ལྡན་པ་དགེ་ལེགས་ཆོས་འཕེལ་ངོར་རྡོ་རྗེ་དྲག་པོའི་མཆོག་སྤྲུལ་དེ་ཉིད་ཀྱི་བླ་སྒྲུབ་སྟེ། བླ་མའི་རྣལ་འབྱོར་གཞན་ལའང་སྦྱར་རུང་དུ་སྤེལ་བ་དགེ། མངྒ་ལམ།། །།

དཔལ་དགའ་སྤྲུལ་སྐུའི་བླ་མའི་རྣལ་འབྱོར།

[Full Size]

སྭསྟི། འདིར་དཔལ་དགའ་སྤྲུལ་སྐུའི་བླ་མའི་རྣལ་འབྱོར་ལ་མོས་པ་དག་གིས། ངོ་བོ་བླ་མ་ལ་རྣམ་པ་ཨོ་རྒྱན་ཆེན་པོ་བསྐྱེད་བཟླས་སྤྲུལ་གཞི་ཉིད་དུ་ངེས་པས་རྟེན་དང་མཆོད་པ་ཚར་དུ་

[Full Size]

དངར་བ་འདུ་བྱས་ལ། ༀ་ཨཱཿཧཱུྃ། དུས་འདི་ནས་བཟུང་བྱང་ཆུབ་སྙིང་པོའི་བར། །བླ་མ་དཀོན་མཆོག་གསུམ་ལ་སྐྱབས་སུ་མཆི། །བདག་དང་འགྲོ་ཀུན་མ་གྱུར་སེམས་ཅན་རྣམས། །སངས་རྒྱས་གོ་འཕང་ཐོབ་པར་སེམས་བསྐྱེད་དོ། །ལན་གསུམ། ༀ་ཤཱུནྱ་ཏ་སོགས། གཉིས་སུ་འཛིན་པའི་དྲི་མ་ཀུན་བྲལ་ངང་། །མདུན་མཁར་པད་སྡོང་ཉི་ཟླ་བརྩེགས་པའི་སྟེང་། །སྟོང་དང་སྙིང་རྗེ་ཟུང་འཇུག་རིག་རྩལ་ལས། །ཧྲཱིཿཡིག་ཡོངས་གྱུར་རྒྱལ་ཀུན་འདུས་པའི་དཔྱིད། །གུ་རུ་པདྨ་འབྱུང་གནས་ལམ་མེར་གསལ། །གནས་གསུམ་འབྲུ་གསུམ་ཐུགས་ཀའི་ས་བོན་ལས། །འོད་འཕྲོས་བདེ་ཆེན་པདྨ་འོད་ཞིང་ནས། །རྒྱལ་བ་སྲས་འཁོར་རྩ་གསུམ་ལྷ་ཡི་ཚོགས། །སྤྲིན་ཕུང་གཏིབ་བཞིན་སྤྱན་དྲངས་ས་མཱ་ཛཿཧཱུྃ། ཨོ་རྒྱན་ཡུལ་གྱི་སོགས་ཚིག་བདུན་གསོལ་འདེབས་སྔགས་དང་བཅས་ལན་གསུམ་གྱིས་བྱིན་ཕབས། ཧོཿརིགས་ཀུན་ཁྱབ་བདག་བླ་མ་རྡོ་རྗེ་འཆང་། །གཤེགས་དང་བཞུགས་པའི་མཚན་མ་མི་དམིགས་ཀྱང་། །གཉིས་སུ་འཛིན་པའི་རྟོག་པ་ཞི་བའི་ཕྱིར། །གཉིས་མེད་བདེ་བ་ཆེན་པོར་བཞུགས་སུ་གསོལ། །ཡེ་ནས་གནས་པ་ཆོས་སྐུའི་རོལ་པ་ལ། །དེ་བཞིན་ཉིད་དུ་རྟོགས་པས་གུས་ཕྱག་འཚལ། །ཕྱི་མཆོད་ཚོགས་དྲུག་ཡུལ་སྣང་མཆོད་ལྷར་སྤྲུལ། །ནང་མཆོད་སྐུ་གསུམ་བདུད་རྩི་ར་ས་ཡན། །གསང་བ་བདེ་བ་ཆེན་པོ་རྡོ་རྗེའི་དངོས། །འཁོར་གསུམ་དམིགས་བྲལ་དེ་བཞིན་ཉིད་དང་བཅས། །ལྷ་ལ་

[Full Size]

ལྷ་ཐིམ་དགྱེས་པའི་ཚུལ་གྱིས་རོལ། །གང་གི་གསང་གསུམ་རྒྱལ་བ་ཀུན་ཡེ་ཤེས། །དབྱེར་མེད་གཅིག་ཏུ་ངེས་པར་བསྔགས་འོས་སྟོབས། །སྲིད་འདིར་མ་མཆིས་འོན་ཀྱང་རང་རིག་པ། །གདོད་མའི་མགོན་པོར་རོ་གཅིག་མོས་པས་བསྟོད། །བཤགས་དང་བཤགས་བྱ་བཤགས་མཁན་མི་དམིགས་པ། །སྒྱུ་མ་ལྟ་བུར་ནོངས་གྱུར་མ་ལུས་འཆགས། །དངོས་གྲུབ་སྩོལ་དང་སྩོལ་བ་མི་དམིགས་ཀྱང་། །ཐུན་མོང་སྤྱི་དང་རང་རིག་ཡེ་ཤེས་ཆེ། །མངོན་མཐོང་ཕྱག་རྒྱ་ཆེན་པོའི་དངོས་གྲུབ་དང་། །ཚིག་དང་ཡི་གེར་མི་ལྟོས་རྡོ་རྗེ་བཞིས། །བྱིན་རླབས་འཕོ་དབང་བདག་རྒྱུད་བྱིན་གྱིས་རློབས། །ཞེས་དང་། གསོལ་འདེབས་སྙིང་པོ་བཛྲ་གུ་རུ་བཟླས། རྒྱུན་ཁྱེར་བསྡུས་པའི་སྐབས་འདི་ནས་བྱིན་རླབས་བསྡུ་བ་ཕྱིན་བཏོན། རྒྱས་པར་སྤྲོ་ན་དེ་ནས་ཚོགས་རྫས་བཤམས་ལ་བྱིན་རླབས་ནི། ༀ་སྣང་བ་སྣོད་ཀྱི་གཏོར་གཞོང་དུ། །ཨཱཿསྟོང་པའི་རང་མདངས་ཚོགས་ཀྱི་རྫས། །ཧཱུྃ་ཀུན་བཟང་རོལ་པ་ཆེན་པོར་གྱུར། །ཧྲཱིཿཟག་མེད་བདེ་སྐྱེད་ཡེ་ཤེས་ཀྱི། །བཅུད་ཆེན་འདི་དཔལ་མཆོག་ཧེ་རུ་ཀ། དོན་སྟོང་ཉིད་རོལ་པའི་ཡུམ་དང་འཁོར། །དཔལ་རྩ་གསུམ་ལྷ་ཡི་སྤྲོ་བསྡུ་བཅས། །སྐྱབས་དམ་པར་གྱུར་ཀུན་དགྱེས་པར་བཞེས། །གཤིས་ཀུན་ཁྱབ་འགྱུར་བ་མེད་པའི་དངོས། །དོན་མཉམ་ཉིད་དབྱིངས་སུ་བསྒྲལ་བར་མཛོད། །དགྲ་གཉིས་འཛིན་འཁྲུལ་རྟོག་ལས་ཉོན་བདུད། །འཕྲལ་གློ་བུར་དྲི་མས་བསྒྲིབས་པ་རྣམས། །ཐབས་རང་རིག་

[Full Size]

གཅེར་མཐོང་ངང་དུ་བཤགས། །ༀ་བཛྲ་ས་ཏྭ་ས་མ་ཡ་སོགས་ཡིག་བརྒྱ་བརྗོད། དཔལ་བདེ་བ་ཆེན་པོ་རྡོ་རྗེའི་གར། །དབྱིངས་གསུམ་གྱི་མཁའ་རུ་བསྒྱུར་བ་དང་། །ལྷ་སྔགས་དང་ཡེ་ཤེས་ཆེན་པོ་རུ། །འདུ་ཤེས་པའི་བདུད་རྩི་ཨེ་མ་ཧོ། །ཞེས་ཚོགས་ལ་རོལ་ཞིང་ལྷག་མ་བསྔོ་བ། ཧོཿདོན་བདེ་ཆེན་ཐིག་ལེ་ཉག་གཅིག་ལས། །ཐབས་སྣང་ཚུལ་གསང་བའི་དཀྱིལ་འཁོར་གྱི། །ཕྱི་མུ་རན་སྐྱོང་བའི་ལྷག་སྡུད་རྣམས། །བཅུད་རོ་ལྡན་ལྷག་མའི་གཏོར་མ་ལོངས། །འཕྲལ་བྱང་ཆུབ་སྒྲུབ་པའི་བར་ཆད་དང་། །གཏན་རྣལ་འབྱོར་བཞི་ཡི་གོལ་ཤོར་གྱི། །ས་ལམ་ལ་བར་གཅོད་འབྲས་འབྱིན་པའི། །འཁྲུལ་རྟོག་གི་བདུད་བཞིའི་དགྲ་དཔུང་ཟློག །ཨུཥྩི་ཊ་བ་ལིདྟ་ཁཱ་ཧི། བྱིན་རླབས་བསྡུ་བ་ནི། བླ་མའི་སྐུ་ཡི་གནས་བཞིར་རྡོ་རྗེ་བཞིའི། །ཡི་གེ་གསལ་ལས་འོད་འཕྲོས་གནས་བཞིར་ཐིམ། །དབང་དང་བྱིན་རླབས་ཀུན་ཐོབ་འོད་དུ་ཞུ། །རང་རིག་གདོད་མའི་དབྱིངས་སུ་རོ་གཅིག་འདྲེས། །དགེ་འདིས་འགྲོ་བ༴ རྟག་བདེའི༴ ནང་གིས་ལམ༴ སངས་རྒྱས་ཉིད་ཀྱི༴ ཞེས་སི་ཏུ་པདྨའི་མིང་ཅན་གྱིས་ཟུར་མང་བསྟན་འཛིན་མཆོག་སྤྲུལ་བཞེད་ངོར། འཛི་སྒར་ཆོས་སྐྱོང་སྤྲུལ་སྐུ་དཔལ་དགའི་བླ་མའི་རྣལ་འབྱོར་དུ་སྤེལ་བ་དགེ། གཞན་སྤྱི་ཁྱབ་ཏུ་གུ་རུ་རིན་པོ་ཆེ་ཁོ་ནའི་བླ་སྒྲུབ་ཏུ་དམིགས་ནས་ཉམས་ལེན་བགྱིས་ན་ཆོག་འདུག་སྟེ་ལེགས་བར་སེམས་སོ།། །།ༀ་ཨཱཿཧཱུྃ་ཧྲཱིཿརང་སྣང་གདོད་ནས་རྣམ་དག་སྟོང་ཉིད་ལས། །ཐབས་མཆོག་སྙིང་རྗེའི་རོལ་གར་ཡི་དམ་ལྷ། །

[Full Size]

གདན་གསུམ་ཚང་བའི་སྐུར་གསལ་སྤྱི་གཙུག་ཏུ། །རྒྱལ་ཀུན་ཡེ་ཤེས་དབྱིངས་སུ་རོ་གཅིག་ཀྱང་། །གང་འདུལ་སྐུ་གསུམ་ཆུ་ཟླའི་རོལ་རྩེད་ཚུལ། །ཆོས་ཀྱི་སྣང་བ་མཐའ་ཡས་ཆོས་སྐུའི་ཀློང་། །འགྲོ་འདུལ་ལོངས་སྤྱོད་ཡོངས་རྫོགས་ཉིན་མོར་བྱེད། །ཆགས་མེད་གང་འདུལ་སྐུར་སྟོན་སྤྲུལ་པའི་སྐུ། །སྐུ་དང་ཡེ་ཤེས་ཐ་དད་བྲལ་བ་ཡི། །དབྱིངས་རིག་འདུ་འབྲལ་མེད་པའི་འོད་ཀློང་གསལ། །ༀ། ཆོས་དབྱིངས་མཐའ་བྲལ་ཀུན་ཏུ་ཁྱབ་པའི་དངོས། །དུས་གསུམ་སྐྱེ་འགགས་སྤྲོས་པའི་མཚན་མ་ལས། །ཡོངས་གྲོལ་བདེ་གཤེགས་སྙིང་པོ་དམ་པའི་བདག །བླ་མ་ཆོས་ཀྱི་སྐུ་ལ་གསོལ་བ་འདེབས། །ཨཿལྷུན་འགྲུབ་ཡེ་ཤེས་ལྔ་ལྡན་འཕོ་བྲལ་ཁམས། །རིགས་རྣམས་ཀུན་གྱི་ཟློས་གར་མི་འགོག་པར། །རང་རྩལ་སྐུ་དང་ཞིང་ཁམས་འདུ་འབྲལ་མེད། །བླ་མ་ལོངས་སྤྱོད་རྫོགས་སྐུར་གསོལ་བ་འདེབས། །ཧཱུྃ། སྐྱེ་མེད་རྩལ་ལས་གང་འདུལ་འགགས་མེད་ཀྱི། །སྒྱུ་འཕྲུལ་བསམ་གྱིས་མི་ཁྱབ་རོལ་བ་ཡིས། །འཁོར་བ་སྲིད་དུ་འཁོར་བའི་དོན་མཛད་པ། །བླ་མ་སྤྲུལ་པའི་སྐུ་ལ་གསོལ་བ་འདེབས། །ཧྲཱིཿརང་སེམས་བདེ་སྟོང་དབྱེར་མེད་ཕྱག་རྒྱ་ཆེའི། །ངོ་བོར་བཅོས་མིན་རྩེ་གཅིག་མཉམ་བཞག་པས། །བསྒོམ་བྱ་སྒོམ་བྱེད་བྲལ་བའི་ཡེ་ཤེས་ཏེ། །བླ་མ་ངོ་བོ་ཉིད་སྐུ་མངོན་དུ་གྱུར། །སྐྱེ་བ་ཀུན་ཏུ་ཡང་དག་བླ་མ་དང་། །སོགས་བརྗོད། ཅེས་སྐྱབས་རྗེ་འབྲུག་བ་རིན་པོ་ཆེའི་ཞལ་སློབ་བསྟན་འཛིན་ཆོས་དབང་གི་ངོར་སི་ཏུས་སྤེལ།། །།

གུ་རུ་དྷརྨཱ་ཛའི་རྣལ་འབྱོར་གྱི་ཉམས་དབྱངས་མཆོད་སྤྲིན་རམ་འབྱམས་ཀྱི་གླུ།

[Full Size]

གུ་རུ་དྷརྨཱ་ཛའི་རྣལ་འབྱོར་གྱི་ཉམས་དབྱངས་མཆོད་སྤྲིན་རམ་འབྱམས་ཀྱི་གླུ་ཞེས་བ་བཞུགས་སོ། ཆོས་དབྱངས་ཀྱི་ནམ་མཁལ་མཐའ་དབུས་བརྡལ། བླ་མ་ལ་གསོལ་བ་འདེབས་སོ། བདག་འདྲ་ཡི་དམུ་རྒོད་སེམས་ཅན། ལས་ངན་གྱི་གཡངས་བརྒལ་ནས། ཅེས་ཚིག་གཉིས་ནང་འབྲུ་རེ་དབྱནགས་ཀྱི་སྐབས་མ་སྣན་པའོ། ཁྱོད་ཀྱི་ཞིང་ཁམས་བདེ་ལྡན་པད་མོ་བཀོད་པར་སྐྱེས་ནས། བླ་མ་རྒྱངས་འབོད་བྱིན་རླབས་འོད་ཀྱི་སྒྲ་དབྱངས་ཞེས་ཞེས་བྱ་བ་སུམ་འདབས་དང་། དེའི་གདངས་ཁྱོད་ཀྱི་ཞིམགས་ཁམས་མན་ལྷུ་ཐུང་དུ་བཏང་ངོ་།

[Full Size]

ཨོཾ་ནམ་མཁའ་ལས་སུ་མཚན་ལྡན་ཕྱིར་ཐོག་མ་ཐ་མ་མེད་པའི་ཕྱིར། །དབང་གི་གསོལ་བ་གདབ་པ་ཐུགས་རྗེ་བསྐུལ་པའི་དབྱང་ཏ་མྱུ་རའི་སྒྲ་ལྡན། ཀྭ་ཡེ། དཔལ་ཧེ་རུ་ཀ་དངོས་བླ་མ་ཡི། དཀྱིལ་འཁོར་མཆོག་དགྱེས་པ་བསྐྱེད་པའི་ཕྱིར། །རྡོ་རྗེ་ཡི་གླུ་དབྱངས་ན་དྭའི་སྒྲ། །རྟོགས་ལྡན་པ་མངྒའི་མིང་ཅན་དེའི། །མོས་གུས་ཀྱི་རྟོགས་པའི་ཡེ་ཤེས་ཁམས། །འབར་ཕྱིར་དུ་ཐོལ་བྱུང་སྨྲ་བ་པོ། །པདྨ་ཡི་ཉིན་མོར་བྱེད་ཅེས་བགྱིས། །དབྱངས་མཆོད་པར་འབུལ་ལོ་དཀོན་མཆོག་གསུམ། །ཆོས་ཕྱག་རྒྱ་ཆེན་པོའི་དངོས་གྲུབ་སྩོལ། །

[Full Size]

བླ་མ་འབོད་དབྱངས་བདེ་ཆེན་རབ་འབར་དཔའ་བོའི་རྒྱངས་གླུ་བྱའོ། །ཨ་ཧོཿརང་སེམས་འཁྲུལ་བ་རྒྱ་འབྱམས་ཀྱི་ངང་ནས། སྐབས་ཤིག་སྣང་བའི་ཆ་ལས་འབྲོས་བའི། གསོལ་བ་སྙིང་གི་དཀྱིལ་ནས་འདེབས་སོ་བྱིན་རླབས་ཐུགས་ཀྱི་ཀློང་ནས་དྲོངས་ཤིགརྣལ་འབྱོར་རྡོ་རྗེའི་ཉམས་སྐྱོང་བའི་ཕྱིར་དུ། །གང་ཤར་བརྗོད་བྲལ་གྱི་དབྱངས་ཆུང་འདི། །རྟོགས་ལྡན་དབང་འཛིན་ཡེ་ཤེས་བསྐྱེད་པའི་ཕྱིར་དུའོ། །སརྦ་མངྒ་ལམ། །

བདེ་ཆེན་ཞིང་གི་སྒྲུབ་པ་ལྷ་དང་བླ་མ་དབྱེར་མེད་ཀྱི་རྣལ་འབྱོར་རྟ་མཆོག་བཱ་ལ་ཧ།

[Full Size]

བདེ་ཆེན་ཞིང་གི་སྒྲུབ་པ་ལྷ་དང་བླ་མ་དབྱེར་མེད་ཀྱི་རྣལ་འབྱོར་རྟ་མཆོག་བཱ་ལ་ཧ་ཞེས་བྱ་བ་བཞུགས་སོ། །

[Full Size]

ན་མོ་གུ་རུ་བེ། འདིར་བདེ་ལྡན་ཞིང་གི་མགོན་པོ་འོད་དཔག་མེད་དང་རྣམ་དབྱེར་མེད་པའི་དབང་གི་ཅོད་པན་འཆང་བ་དྲིལ་སྒྲུབ་ཀྱི་བླ་མའི་རྣལ་འབྱོར་གྱི་སྒོམ་རིམ་ཉུང་བསྡུས་ཞིག་བརྗོད་པར་བྱ་སྟེ། མཎྜལ་པདྨ་འདབ་བརྒྱད་ཀྱི་ཚོམ་བུའི་སྟེང་དུ་འོད་དཔག་མེད་ཀྱི་སྐུ་བརྙན་ནམ་བླ་མའི་སྐུ་གང་འབྱོར་བཤམས། མདུན་དུ་མཆོད་པ་ཉེར་སྤྱོད་རྣམས་དང་། གཏོར་ཟླུམ་དང་མཐེབ་ཀྱུ། བསང་ཆུ་སོགས་ཉེ་བར་བསགས་ལ། དང་པོ་སྐྱབས་སུ་འགྲོ་བ་དང་། སེམས་བསྐྱེད་པ་དང་། ཚད་མེད་བསྒོམ་པ་ནི། ན་མོ། མཆོག་གསུམ་སྤྱི་དཔལ་རྡོ་རྗེ་ཅན། །རྩ་གསུམ་ཀུན་འདུས་རང་བཞིན་མཆོག །རྟག་པར་སྐྱབས་མཆི་སེམས་ཅན་རྣམས། །འཁོར་བའི་མཚོ་ལས་བསྒྲལ་བའི་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །ལན་གསུམ་མམ་བདུན།

[Full Size]

འགྲོ་ཀུན་བདེ་ལྡན་སྡུག་བསྔལ་བྲལ། །དགའ་དང་བཏང་སྙོམས་ཆེར་གནས་ཤོག །ལན་གསུམ། མཆོད་རྫས་རྣམས། ༀ་བཛྲ་ཨ་མྲྀ་ཏས་བསངས། སྭ་བྷཱ་ཝས་སྦྱངས་ལ། ༀ་ལས་རིན་ཆེན་པདྨའི་སྣོད། །རབ་འབྱམས་རྒྱ་ཁྱོན་བྲལ་བའི་ནང་། །ཧཱུྃ་ཡིག་ཞུ་བ་ལས་བྱུང་བའི། །མཆོད་སྤྲིན་སྣ་ཚོགས་མཐའ་ཡས་པ། །ཀུན་བཟང་རྣམ་ཐར་ཇི་བཞིན་དུ། །རྒྱུན་མི་ཆད་པའི་རང་བཞིན་གྱུར། །ༀ་བཛྲ་སྥ་ར་ཎ་ཁཾ། ལན་གསུམ་དང་། ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། དེ་བཞིན་དུ། པཱ་དྱཾ། པུཥྤེ། དྷུ་པེ། ཨཱ་ལོ་ཀེ། གནྡྷེ། ནི་ཝི་དྱ། ཤབྡ་ཨཱཿཧཱུྃ་སྭཱ་ཧཱ། ཅེས་གནས་དང་། ཡོ་བྱད་བྱིན་གྱིས་བརླབས། དེ་ནས་བསྐྱེད་པའི་རིམ་པ་བསྒོམ་པ་ནི། ༀ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷ་

[Full Size]

ཝ་ཨཏྨ་ཀོ྅་ཧཾ། གཟུང་འཛིན་ཆོས་རྣམས་སྟོང་པ་ཆེན་པོའི་དབྱིངས། །ཡེ་ཤེས་རྡོ་རྗེའི་ངོ་བོར་སྦྱངས་བྱས་ནས། །སྣོད་བཅུད་ལྷ་ཡི་འཁོར་ལོའི་རང་བཞིན་བསྒྱུར། །རྣམ་པར་དག་པའི་ཞིང་མཆོག་བདེ་བ་ཅན། །ས་གཞི་ལག་མཐིལ་ལྟར་མཉམ་མིག་མང་རིས། །མནན་ན་ནེམ་དང་བཏེགས་ན་སྤར་བྱེད་པ། །དཔག་བསམ་ལྗོན་པ་བདུད་རྩིའི་རྒྱ་མཚོས་བསྐོར། །དབུས་སུ་བྱང་ཆུབ་ཤིང་མཆོག་རྣམ་པར་སྣང་། །དེ་མདུན་རྨ་བྱས་བཏེགས་པའི་རིན་ཆེན་ཁྲིར། །པདྨ་སྟོང་ལྡན་ཆུ་ཤེལ་འོད་དཀར་སྟེང་། །ཧྲིཿདམར་འོད་ཀྱི་འཕྲོ་འདུས་འཕགས་པ་མཆོད། །འགྲོ་བའི་དོན་བྱས་ཚུར་འདུས་ཡོངས་གྱུར་ལས། །མཐའ་ཡས་འོད་མངའ་སྟོབས་བཅུའི་དབང་ཕྱུག་མཆོག །བཅོམ་ལྡན་སངས་རྒྱས་པདྨ་གསུང་གི་དབང་། །དཔལ་ལྡན་མི་ཕམ་ཆོས་གྲུབ་རྒྱ་མཚོ་ནི། །ཚེ་དང་ཡེ་ཤེས་དཔག་མེད་སྟོན་པར་གསལ། །པདྨ་རཱ་གའི་མདོག་ཅན་འོད་ཟེར་འཕྲོ། །སྤྲུལ་སྐུའི་ཆ་ལུགས་ཆོས་གོས་རྣམ་གསུམ་གསོལ། །ཕྱག་གཉིས་མཉམ་བཞག་ལྷུང་བཟེད་བཅུད་བཀང་ནས། །ཚེ་བུམ་ཤིང་ལོའི་ཁ་རྒྱན་འདོད་དགུ་སྟེར། །དབུ་ལ་གཙུག་ཏོར་ཞབས་ལ་འཁོར་ལོ་སོགས། །མཚན་བཟང་སོ་གཉིས་དཔེ་བྱད་བརྒྱད་ཅུས་སྤྲས། །ཞབས་གཉིས་རྡོ་རྗེའི་སྐྱིལ་མོ་ཀྲུང་བཅས་བཞུགས། །གཡས་གཡོན་པད་དཀར་དྲི་མེད་ཟླ་དཀྱིལ་དབུས། །རྒྱལ་སྲས་ཐུ་བོ་འཕགས་པ་བྱང་ཆུབ་སེམས། །

[Full Size]

སྙིང་རྗེ་ཚད་མེད་ཐུགས་རྗེའི་རྣམ་པར་རོལ། །འཁོར་བ་དོང་སྤྲུག་འདྲེན་པའི་བདག་ཉིད་ཅན། །རྗེ་བཙུན་བདུད་ཚོགས་འདུལ་བའི་རྡོ་རྗེ་ནི། །སྤྱན་རས་གཟིགས་ཀྱི་དབང་ཕྱུག་མངོན་སུམ་ཤར། །དཀར་གསལ་བཅོ་ལྔའི་ཟླ་བ་ཉ་འདྲའི་མདོག །ལོངས་སྐུའི་ཆས་རྫོགས་ཀྲྀ་ཎས་ནུ་གཡོན་བཀབ། །དར་དང་རིན་ཆེན་རྒྱན་ལྡན་ཕྱག་གཉིས་གཡས། །མཆོག་སྦྱིན་གཡོན་པས་ཨུཏྤལ་འདབ་རྒྱས་འཛིན། །ཞབས་གཉིས་མཉམ་པའི་སྟབས་ཀྱིས་བཞེངས་པར་གསལ། །གཡོན་དུ་བྱམས་པ་ཆེན་པོའི་སྟོབས་འཆང་བ། །ཤེས་རབ་ཉི་མས་འགྲོ་བློའི་མུན་སེལ་གཉེན། །ཀུན་མཁྱེན་ཆོས་ཀྱི་འབྱུང་གནས་སྨྲ་བའི་དབང་། །འཕགས་པ་མ་ཕམ་མགོན་པོར་སྣང་བ་ནི། །དམར་སེར་གུར་གུམ་གེ་སར་མདོག་ལྟར་འཚེར། །ལོངས་སྐུའི་ཆས་རྫོགས་དར་དང་རིན་ཆེན་བརྒྱན། །ཕྱག་གཉིས་ཆོས་འཆད་ཨུཏྤལ་གཡས་གཡོན་སྟེང་། །ཀླུ་ཤིང་རིལ་པ་ཞབས་གཉིས་བཞེངས་སྟབས་གསལ། །གཞན་ཡང་གཡས་གཡོན་ཉེ་བའི་སྲས་ཆེན་པོ། །འཇམ་དཔལ་དཔའ་བོ་མཐུ་ཆེན་རྡོ་རྗེ་འཛིན། །ས་ཡི་སྙིང་པོ་སྒྲིབ་པ་རྣམ་པར་སེལ། །ནམ་མཁའི་སྙིང་པོ་ཀུན་ཏུ་བཟང་པོ་རྣམས། །སྣ་ཚོགས་མདོག་དང་སྣ་ཚོགས་རྒྱན་གྱིས་མཛེས། །སྣ་ཚོགས་ཕྱག་མཚན་སྣ་ཚོགས་ཕྲིན་ལས་ཀྱིས། །འགྲོ་ཁམས་རྒྱ་མཚོར་ཆུ་ཟླའི་གར་རྩེད་དུ། །སྤྲུལ་པ་དུ་མས་ཡང་དག་ལམ་མཆོག་སྟོན། །འོད་དང་འོད་ཟེར་མ་

[Full Size]

ལུས་ཀུན་ཏུ་འཕྲོ། །བྱང་ཆུབ་སེམས་དང་ཉན་ཐོས་དགེ་འདུན་སྡེ། །བར་མཚམས་ཐམས་ཅད་ལྷ་དང་ལྷ་མོའི་ཚོགས། །མངོན་པར་རྒྱལ་བའི་ཞབས་ཀྱི་པདྨོ་ལ། །དྭངས་ཤིང་འདུད་པའི་དགའ་བདེའི་སིམ་པ་བསྐྱེད། །གཙོ་འཁོར་ཀུན་གྱི་གནས་གསུམ་ༀ་ཨཱཿཧཱུྃ། །དེ་ལས་འོད་འཕྲོས་ནུབ་ཕྱོགས་བདེ་བ་ཅན། །པདྨ་རྣམ་པར་བཀོད་པའི་ཞིང་ཁམས་ནས། །བླ་མ་འོད་དཔག་མེད་ཀྱི་ཐུགས་རྒྱུད་བསྐུལ། །བརྩེ་བ་ཆེན་པོས་དབྱིངས་ནས་རྗེས་དགོངས་ལ། །ལྷ་ཚོགས་མ་ལུས་འཁོར་དང་བཅས་པ་རྣམས། །ཆར་ལྟར་འབབ་བཞིན་གནས་འདིར་སྤྱན་དྲངས་གྱུར། །ༀ་སརྦ་ཏ་ཐྭ་ག་ཏ་བཛྲ་ས་མ་ཡ་ཛཿཅེས་བརྗོད་ལ་སྤྱན་དྲངས་ནས། ཛཿཧཱུྃ་བྃ་ཧོཿགཉིས་མེད་གྱུར། །པདྨ་ཀ་མ་ལ་ཡ་སྟྭཾ། ཞེས་གདན་འབུལ་དང་། སླར་ཡང་ཐུགས་ཀའི་ཧཱུྃ་ཡིག་ལས། །འོད་ཟེར་རབ་འཕྲོས་དབང་ལྷའི་ཚོགས། །སྤྱན་དྲངས་དབང་བསྐུར་སྐུ་ཁྲུས་གསོལ། །སངས་རྒྱས་རིགས་ལྔས་རྒྱས་གདབ་པོ། །ཞེས་དང་། དེ་ནས་མཆོད་པ་འབུལ་བ་ནི། འཇིག་རྟེན་འདི་འམ་གཞན་དག་ན། །དག་གཙང་མཆོད་ཡོན་རྒྱ་མཚོ་འདི། །རྒྱལ་བ་སྲས་དང་བཅས་ལ་འབུལ། །རང་བྱུང་ཡེ་ཤེས་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། འཇིག་རྟེན་འདི་འམ་གཞན་དག་ན། །དལ་འབབ་རྒྱུན་བཟང་ཞབས་བསིལ་འདི། །རྒྱལ་བ་སྲས་དང་བཅས་ལ་འབུལ། །རང་བྱུང་ཡེ་

[Full Size]

ཤེས་དངོས་གྲུབ་སྩོལ། །སྔགས་ཐོག་མཐའ་འདྲ་བར། པཱདྱཾ། འཇིག་རྟེན་འདི་འམ་གཞན་དག་ན། །ཡིད་འོང་མེ་ཏོག་དགའ་ཚལ་རྒྱས། །རྒྱལ་བ་སྲས་དང་བཅས་ལ་འབུལ། །རང་བྱུང་ཡེ་ཤེས་དངོས་གྲུབ་སྩོལ། །པུཥྤེ། འཇིག་རྟེན་འདི་འམ་གཞན་དག་ན། །དྲི་བཟང་སྨན་སྤོས་དུད་པའི་སྤྲིན། །རྒྱལ་བ་སྲས་དང་བཅས་ལ་འབུལ། །རང་བྱུང་ཡེ་ཤེས་དངོས་གྲུབ་སྩོལ། །དྷཱུ་པེ། འཇིག་རྟེན་འདི་འམ་གཞན་དག་ན། །རབ་ཏུ་གསལ་བྱེད་འོད་ཟེར་འབར། །རྒྱལ་བ་སྲས་དང་བཅས་འབུལ། །རང་བྱུང་ཡེ་ཤེས་དངོས་གྲུབ་སྩོལ། །ཨཱ་ལོ་ཀེ། འཇིག་རྟེན་འདི་འམ་གཞན་དག་ན། །སྦྱར་དང་བྱུགས་པའི་དྲི་བཟང་པོ། །རྒྱལ་བ་སྲས་དང་བཅས་ལ་འབུལ། །རང་བྱུང་ཡེ་ཤེས་དངོས་གྲུབ་སྩོལ། །གནྡྷེ། འཇིག་རྟེན་འདི་འམ་གཞན་དག་ན། །ལྷ་ཡི་ཞལ་ཟས་སྣ་ཚོགས་པ། །རྒྱལ་བ་སྲས་དང་བཅས་ལ་འབུལ། །རང་བྱུང་ཡེ་ཤེས་དངོས་གྲུབ་སྩོལ། །ནིཝིདྱ། འཇིག་རྟེན་འདི་འམ་གཞན་དག་ན། །གྲག་སྟོང་སྙན་པའི་རོལ་མོ་ལྡིར། །རྒྱལ་བ་སྲས་དང་བཅས་ལ་འབུལ། །རང་བྱུང་ཡེ་ཤེས་དངོས་གྲུབ་སྩོལ། །ཤབྡ། ཅེས་སོགས་རོལ་མོ་སྣ་ཚོགས་འབུལ་ནས། འདོད་ཡོན་ལྔ་དང་རྒྱལ་སྲིད་བདུན། །བཀྲ་ཤིས་རྫས་རྟགས་བརྒྱད་ལ་སོགས། །རྒྱལ་བ་སྲས་དང་བཅས་ལ་འབུལ། །རང་བྱུང་ཡེ་ཤེས་དངོས་གྲུབ་སྩོལ། །སྲིད་ཞིའི་ལོངས་སྤྱོད་ཆར་གྱི་རྒྱུན། །མཎྜལ་དཔལ་

[Full Size]

འབྱོར་རྒྱ་མཚོས་གང་། །གླིང་བཞི་གླིང་ཕྲན་མེ་ཏོག་བཀྲ། །འབུལ་བཞེས་བྱིན་གྱིས་བརླབ་ཏུ་གསོལ། །ཞེས་ཕྱི་ཡི་མཆོད་པ་དང་། མཚར་སྡུག་སྒེག་མཛེས་ལང་ཚོ་ཅན། །རྡོ་རྗེ་ལྷ་མོ་བཅུ་དྲུག་པོ། །རང་སྣང་ཕྱག་རྒྱ་གར་གྱིས་རོལ། །གསང་བ་ནང་གི་མཆོད་པ་འབུལ། །ཅེས་ནང་དང་གསང་བའི་མཆོད་པ་དང་། མཆོད་བྱ་མཆོད་བྱེད་བྲལ་བ་ཡི། །འཁོར་གསུམ་དག་པའི་མཆོད་པ་འབུལ། །དེ་བཞིན་ཉིད་མཆོད་དང་། ༀ། མཁའ་ཁྱབ་རང་བཞིན་ལྷུན་གྱིས་གྲུབ། །རྡོ་རྗེའི་སྐུ་ལ་ཕྱག་འཚལ་བསྟོད། །ཨཱཿསྣ་ཚོགས་དབྱིངས་ཀྱིས་ཆོས་སྒྲ་སྒྲོག །རྡོ་རྗེའི་གསུང་ལ་ཕྱག་འཚལ་བསྟོད། །ཧཱུྃ། མཐའ་བྲལ་མི་རྟོག་ཏིང་འཛིན་ལྡན། །རྡོ་རྗེའི་ཐུགས་ལ་ཕྱག་འཚལ་བསྟོད། །ཅེས་ཕྱག་འཚལ་ནས། ཀྱཻ་ཧོ། དགོངས་སུ་གསོལ་ལོ་མགོན་པོ་ཐུགས་རྗེ་ཅན། །བདག་ནི་ཐོག་མེད་དུས་ནས་ད་ལྟའི་བར། །ཀུན་རྟོག་འཁྲུལ་པའི་མི་དགེ་སྡིག་པའི་ལས། །སྙིང་ནས་གནོང་འགྱོད་དྲག་པོས་མཐོལ་ཞིང་བཤགས། །དག་ཚངས་སྒྲིབ་པར་མི་འགྱུར་དངོས་གྲུབ་སྩོལ། །ཅེས་ནོངས་པ་བཤགས་ནས་བསྙེན་པར་འཇུག་པ་ནི། མདུན་བསྐྱེད་ཐུགས་ཀར་ཟླ་སྟེང་ཧྲཱིཿདམར་མཐར། །སྔགས་ཕྲེང་གཡས་སུ་འཁོར་ལས་འོད་ཟེར་འཕྲོས། །འཕགས་མཆོད་འགྲོ་བའི་དོན་བྱས་བདག་རྒྱུད་ལ། །བྱིན་གྱིས་བརླབ་ཅིང་དངོས་གྲུབ་མྱུར་ཐོབ་གྱུར། །ༀ་ཨ་མི་དྷེ་ཝ་ཧྲཱིཿཅི་ནུས་བཟླས་ལ། ཐུན་མཚམས་སུ་གཏོར་མ་འབུལ་བར་སྤྲོ་ན། ཨ་མྲྀ་ཏས་བསངས་།

[Full Size]

སྭ་བྷཱ་ཝས་སྦྱངས། རིན་ཆེན་སྣོད་དུ་འདོད་ཡོན་ལྔ་ལྡན་གྱི། །གཏོར་མ་དྭངས་ཤིང་ཟག་མེད་རྒྱ་ཆེན་སྤེལ། །ༀ་ཨཱཿཧཱུྃ་ལན་གསུམ་བྱིན་གྱིས་བརླབས་ལ། ལྷ་རྣམས་ལྗགས་ཧཱུྃ་རྡོ་རྗེ་འོད་སྦུ་གུས། །གཏོར་མ་གསོལ་བས་གསང་གསུམ་དགྱེས་བསྐྱེད་གྱུར། །ཨ་ཀཱ་རོ་ལན་གསུམ་བརྗོད་ནས་ཕུལ། བདག་གཞན་འགྲོ་བ་མ་ལུས་པ། །ཕྱིར་མི་ལྡོག་པའི་ཞིང་ཁམས་མཆོག །སྐྱེས་ནས་རྒྱལ་བའི་ལུང་བསྟན་ཐོབ། །ཀུན་ཀྱང་འདྲེན་པའི་དཔལ་གྱུར་ཅིག །ཅེས་འདོད་དོན་གསོལ། རྗེས་ནི། མདུན་བསྐྱེད་ཕྱི་ནང་སྣོད་བཅུད་ལྷ་ཚོགས་རྣམས། །གཙོ་བོར་ཐིམ་པ་དེ་ཉིད་འོད་ཞུ་ནས། །རང་ཉིད་ལ་ཐིམ་ལུས་གང་སྒྲིབ་བཞི་དག །དབང་བཞི་ཐོབ་ཅིང་སྐུ་བཞི་མངོན་དུ་བྱས། །རྡོ་རྗེ་བཞི་ཡི་ངོ་བོར་ལྷུན་གྲུབ་ནས། །སྣང་སྲིད་དག་པ་རབ་འབྱམས་ངོ་བོར་ཤར། །ཅེས་དར་གཅིག་ཕྱག་ཆེན་གྱི་ཉམས་ལེན་ལྟ་བའི་ངང་ལ་བཞག་ནས། དེ་ནས་བསྔོ་བ་དང་སྨོན་ལམ་ནི། ན་མོ། བདེར་གཤེགས་གསུང་གི་རྡོ་རྗེའི་བདག་ཉིད་ཅན། །བདེན་པ་གྲུབ་པ་རྣམས་ལ་ཕྱག་འཚལ་ལོ། །བདག་གི་ལེགས་པར་བྱས་པའི་བསོད་ནམས་ལས། །བྱུང་བའི་དགེ་ཚོགས་ཆུ་རྒྱུན་མི་ཟད་པ། །འགྲོ་རྣམས་ཕྱིར་མི་ལྡོག་པའི་གོ་འཕང་ལ། །མྱུར་དུ་ཐོབ་ཕྱིར་བྱང་ཆུབ་ཆེན་པོར་བསྔོ། །བདག་དང་བདག་ལ་འབྲེལ་བའི་སེམས་ཅན་དང་། །ནམ་མཁའི་མཐའ་ཁྱབ་འགྲོ་བ་རིགས་དྲུག་རྣམས། །སྡུག་བསྔལ་འཁོར་བའི་དུཿཁ་ལས་གྲོལ་སྟེ། །འདུས་བྱས་

[Full Size]

ཀུན་རྫོབ་སྒྱུ་མའི་འཁྲུལ་འཁོར་གཟུགས། །ཆུ་བུར་ལྟ་བུ་ནམ་ཞིག་ཡལ་བའི་ཚེ། །དོན་དམ་རང་བཞིན་གཞི་ལམ་འོད་གསལ་གྱི། །ཕྱག་རྒྱ་ཆེན་པོའི་ཡེ་ཤེས་མངོན་གྱུར་ནས། །སྔོན་གྱི་ཐུགས་བསྐྱེད་ཟབ་མོའི་སྨོན་ལམ་གྱིས། །སྟོན་མཆོག་བཅོམ་ལྡན་བླ་མ་འོད་དཔག་མེད། །རྒྱལ་སྲས་ཐུ་བོ་གཉིས་བཅས་དངོས་བྱོན་ནས། །བདེ་བ་ཅན་གྱི་ཞིང་དུ་ལམ་སྣ་དྲོངས། །པདྨའི་སྦུབས་སུ་བརྫུས་ཏེ་སྐྱེས་ནས་སུ། །སངས་རྒྱས་ཞལ་མཐོང་བླ་མེད་དབུགས་དབྱུང་ཞིང་། །འགྲོ་ཁམས་རྒྱ་མཚོའི་འཇུག་པ་ཇི་སྲིད་པར། །དེ་སྲིད་བར་དུ་རླབས་ཆེན་འགྲོ་དོན་སྤྱོད། །ཐེག་ཆེན་སྨོན་ལམ་དེང་འདིར་ཡོངས་གྲུབ་ཤོག །ཏདྱ་ཐཱ་པཉྩ་བྲི་ཡ་ཨ་བ་བྷོ་དྷ་ན་ཡ་སྭཱ་ཧཱ། ཅེས་སོ། །དེ་ནས་ཤིས་པ་བརྗོད་པ་སོགས་སྤྱི་དང་མཚུངས་པར་བྱའོ། །ཅེས་པ་གཡུ་ཐོག་ཆོས་སྡེའི་སྒྲུབ་ཆེན་བླ་མ་ཀརྨ་བསྟན་པ་དར་རྒྱས་ཀྱིས་བསྐུལ་བའི་ངོར། སི་ཏུ་པདྨ་ཉིན་བྱེད་དབང་པོས་སྣྲོན་ཟླའི་ཉ་གང་བའི་ཚེས་བཟང་པོར་བཀོད་པ་འགྲོ་རྣམས་འོད་དཔག་མེད་ཀྱི་གོ་འཕང་ཐོབ་པའི་རྒྱུར་གྱུར་ཅིག །ཤུ་བྷཾ།། །།

བླ་མ་ཡི་དམ་དབྱེར་མེད་ཀྱི་གསོལ་འདེབས་བདེ་སྨོན་ཡོངས་འདུའི་ལྗོན་པ།

[Full Size]

བླ་མ་ཡི་དམ་དབྱེར་མེད་ཀྱི་གསོལ་འདེབས་བདེ་སྨོན་ཡོངས་འདུའི་ལྗོན་པ་བྱ་བ་བཞུགས་སོ། །ན་མོ་བུདྡྷ་བོ་དྷི་ས་ཏྭ་བྷྱ། མཐའ་ཡས་བླ་ན་མེད་པའི་སྙིང་སྟོབས་ཀྱི། །དམ་བཅས་ས་གསུམ་གཡོ་བའི་ཐུགས་རྗེ་ཅན། །མཆོག་གི་དང་པོའི་སངས་རྒྱས་འོད་མི་འགྱུར། །ཚེ་འོད་དཔག་ཏུ་མེད་པའི་སྐུར་སྣང་བ། །རྣམ་དག་ཞིང་གི་ཡོན་ཏན་ལྷུན་རྫོགས་པའི། །བདེ་ལྡན་པདྨོ་བཀོད་པའི་ཕོ་བྲང་དབུས། །

[Full Size]

མཚན་དཔེའི་གཟི་བྱིན་བལྟར་མི་མངོན་པར་བཞུགས། །ཕྱོགས་བཅུའི་རྒྱལ་བ་ཀུན་གྱི་མགྲིན་དབྱངས་གཅིག །རབ་བསྟོད་དབུགས་དབྱུང་དུ་མས་གཟེངས་བསྟོད་ཅིང་། །ལྷར་བཅས་ཡོངས་ཀྱི་སྐྱབས་ཡུལ་གཉེན་གཅིག་པུ། །སྤྱི་བོས་འདུད་པའི་སྐལ་བཟང་ཅིར་ཡང་ཐོབ། །གང་ཞིག་འགྲོ་ལ་བརྩེ་ཆེན་རྟ་བདུན་གྱིས། །དྲངས་བའི་སྒྱུ་འཕྲུལ་རྡོ་རྗེའི་འོད་སྟོང་གི། །གོང་བུ་གཅིག་ཏུ་སྨིན་པའི་དཔལ་ཡོན་ཅན། །འཆར་ཀའི་ཉིན་བྱེད་ལྟར་དམར་ཅོད་པན་འཛིན། །གར་དབང་རྡོ་རྗེ་འཆང་ཆེན་སྤྲུལ་པའི་སྐུ། །དཔལ་ལྡན་མི་ཕམ་ཆོས་གྲུབ་རྒྱ་མཚོ་མཆོག །ལུས་ཅན་སྐལ་ལྡན་མཐོང་དང་ཐོས་པ་ཡི། །འབྲེལ་ཚད་ཕྱམ་གཅིག་བདེ་ཆེན་སར་བཀོད་པ། །སྣང་མཐའ་ཡས་དང་དབྱིངས་དང་ཡེ་ཤེས་ཀྱི། །ངོ་བོ་གཅིག་ལ་རྣམ་པ་གང་འདུལ་སྟོན། །ཐབས་མཁས་གདུལ་བྱའི་མོས་པ་སྣ་ཚོགས་པས། །འདྲེན་པའི་དེད་དཔོན་ཁྱོད་ལ་གསོལ་བ་འདེབས། །བདག་སོགས་བདེ་ཆེན་ཞིང་དུ་བགྲོད་གྱུར་ཅིག །གཡས་སུ་འཇིག་རྟེན་དབང་ཕྱུག་སྤྱན་རས་གཟིགས། །གཡོན་དུ་ཕྱག་ན་རྡོར་འཛིན་མཐུ་ཆེན་ཐོབ། །བྱམས་པ་འཇམ་དཔལ་ཀུན་ཏུ་བཟང་པོ་དང་། །ནམ་མཁའི་སྙིང་པོ་སྒྲིབ་པ་རྣམ་པར་སེལ། །ས་ཡི་སྙིང་པོ་བྱང་སེམས་ཉེ་སྲས་བརྒྱད། །ལྷག་པའི་མཁྱེན་བརྩེ་ལྷག་པའི་སེམས་བསྐྱེད་ཀྱི། །ཟླ་མེད་ཐུགས་རྗེ་ཆེན་

[Full Size]

པོའི་སྣང་བ་ལས། །མཁའ་མདངས་མི་བསྐྱོད་ཅོད་པན་འཆང་ནས་སུ། །འགྲོ་སྒྲོལ་ཕྲིན་ལས་བདུད་རྩིའི་ཆ་ཤས་གང་། །རྗེ་བཙུན་བདུད་ཚོགས་འདུལ་བའི་རྡོ་རྗེ་འཆང་། །བྱིན་རླབས་འོད་དཀར་སྲིད་ཞིའི་མུན་སེལ་མགོན། །གསོལ་བ་འདེབས་སོ་ཁྱོད་ཞབས་བསྙེན་པར་སྨོན། །རབ་ཏུ་འཕགས་པའི་སར་གནས་འཕགས་པ་ཡི། །ཐུགས་བསྐྱེད་གོ་ཆ་བཙན་པོའི་སྙིང་སྟོབས་ཀྱིས། །ལོག་ལྟ་བདུད་རིས་ཁྲི་མུན་ཞུམ་པའི་ཕྱིར། །གཟུགས་སྐུ་ཁྱུང་སྔོན་སྐྱེས་ལྟར་ལུང་རིགས་ཀྱིས། །རྒྱལ་བསྟན་ཡོངས་རྫོགས་འཛིན་པ་སྨྲ་བའི་དབང་། །བྱམས་མགོན་དངོས་སྣང་དྷརྨཱ་ཀཱ་རའི་ཞབས། །གསོལ་བ་འདེབས་སོ་བདག་བྱིན་བརླབས་པ་དང་། །སྒྲིབ་གཉིས་བག་ཆགས་མ་ལུས་སྦྱང་དུ་གསོལ། །དེ་ལྟར་རྣམ་པར་དག་པའི་ཞིང་རྣམས་ཀུན། །སྐུ་ལ་རྫོགས་ཤིང་སྐུ་ཡི་བཀོད་པ་ནི། །ཞིང་ཁམས་མ་ལུས་གང་བར་སྣང་བ་ཡི། །སྟོན་འཁོར་ཐ་མི་དད་པའི་ཕྲིན་ལས་ཀྱིས། །བསྐལ་མང་སྔོན་ནས་བྱང་ཆུབ་སྤྱད་མཆོག་དོན། །འགྲོ་ལ་རྗེས་སུ་ཆགས་པའི་སྙིང་སྟོབས་འཕྲུལ། །གཡོ་བ་མེད་བཞིན་གུས་པས་གསོལ་འདེབས་ན། །མྱུར་བར་ཐུགས་རྗེའི་ལྕགས་ཀྱུས་དྲོང་དུ་གསོལ། །འབྱུང་ལྔའི་ཕུང་ཁམས་སྒྱུ་ལུས་ཡལ་བའི་ཚེ། །རྩེ་གཅིག་སྐྱབས་གནས་ཡིད་ཀྱིས་འཆང་ལགས་ན། །མྱུར་བར་ཐར་པའི་ལམ་སྣ་དྲངས་ནས་སུ། །

[Full Size]

ཞིང་མཆོག་དམ་པར་བརྫུས་ཏེ་སྐྱེ་བར་ཤོག །དེ་མ་ཐག་ཏུ་ཞལ་མཐོང་ལུང་བསྟན་ཐོབ། །སྤྲུལ་པས་ཕྱོགས་བཅུར་འགྲོ་བའི་དོན་ལ་སྤྱོད། །ཕྱིར་མི་ལྡོག་པར་བདེ་བ་ཅན་ཞིང་དུ། །རྫོགས་སངས་རྒྱས་ཀྱི་གོ་འཕང་ཐོབ་གྱུར་ཅིག །ཅེས་རྡོ་སྟོད་གཡུ་ཐོག་པའི་སྒྲུབ་ཆེན་ཀརྨ་ནས་རྒྱལ་བ་ཡབ་སྲས་གསུམ་གྱི་གསོལ་འདེབས་དང་བདེ་སྨོན་ཟུང་དུ་འཇུག་པ་འདི་བཞིན་བསྐུལ་བར་བརྟེན། སི་ཏུ་པདྨ་ཉིན་བྱེད་དབང་པོས་སྤེལ་པ་སརྦ་ཛ་ག་ཏཾ། །ཤུ་བྷཾ།། །།

ཨོ་རྒྱན་རིན་པོ་ཆེ་བདེ་གཤེགས་སྤྱི་དྲིལ་དུ་བསྒྲུབས་པའི་རྣལ་འབྱོར་གྲུབ་གཉིས་ནོར་བུའི་ཆར་འབེབས།

[Full Size]

ཨོ་རྒྱན་རིན་པོ་ཆེ་བདེ་གཤེགས་སྤྱི་དྲིལ་དུ་བསྒྲུབས་པའི་རྣལ་འབྱོར་གྲུབ་གཉིས་ནོར་བུའི་ཆར་འབེབས་ཞེས་བྱ་བ་བཞུགས་སོ། །

[Full Size]

ན་མོ་པདྨཱ་ཀཱ་ར་ཡ། གང་ལ་བསྟེན་ན་ལས་ཉོན་གྱི། །བག་ཆགས་མུན་པ་དྲུངས་ཕྱུང་བའི། །ཐུགས་རྗེའི་ཉིན་བྱེད་ལྷམ་མེ་བ། །རྩ་གསུམ་རྒྱལ་ལ་གུས་པས་བཏུད། །དེ་ལ་འདིར་ལྷ་གཅིག་བསྒྲུབས་པས་ལྷ་ཀུན་འགྲུབ་པའི་ཉེ་ལམ་ཟབ་མོ། དེ་ཡང་དེང་དུས་སངས་རྒྱས་གཞན་ལས་བྱིན་རླབས་མྱུར་བ་ལྷག་པའི་ཨོ་རྒྱན་ཆེན་པོའི་བྱིན་རླབས་མངོན་དུ་འབེབས་བའི་བསྐྱེད་རྫོགས་ཐོ་ཙམ་བཀོད་པ་སྟེ། གང་དེའི་སྐུ་རྟེན་གྱི་མདུན་དུ་ཕྱི་ནང་གི་མཆོད་རྫས་གང་འཛོམས་དང་། ཚོགས་ཀྱི་ཡོ་བྱད་སོགས་རྒྱས་པར་བཤམས་ལ། དང་པོ་སྔོན་དུ་འགྲོ་བ་གནས་བདག་དང་བགེགས་ལ་གཏོར་མ་སྦྱིན་པ་ནི། བྷྲཱུྃ་ལས་བྱུང་བའི་རིན་ཆེན་སྣོད་ཡངས་པར། །ཁམ་ཡིག་འོད་ཞུ་གཏོར་མ་འདོད་དགུ་ཡི། །ལོངས་སྤྱོད་རྒྱ་ཆེན་ཟད་མེད་ནམ་མཁའ་མཛོད། །སོ་སོའི་ཡིད་མཐུན་དུ་མས་གང་བར་གྱུར། །ཨ་ཀཱ་རོས་བྱིན་བརླབས།

[Full Size]

མཆོད་སྦྱིན་གཏོར་མ་དཀར་གསུམ་མངར་གསུམ་དང་། །རིན་ཆེན་གསེར་གཡུའི་སྐྱེམས་སོགས་ཡིད་འོང་ལྡན། །གང་འདོད་བློ་ཡིས་དངོས་སྤྲུལ་འདི་དག་ནི། །ཕྱོགས་སྐྱོང་སྡེ་བརྒྱད་ལ་སོགས་ཡུལ་གནས་བདག །ཀུན་ལ་འབུལ་གྱི་རྣལ་འབྱོར་བསམ་པའི་དོན། །ཐོགས་མེད་འགྲུབ་པའི་སྟོང་གྲོགས་མཛད་དུ་གསོལ། །སརྦ་བྷཱུ་ཏ་ས་པ་རི་ཝཱ་ར་ཨི་དཾ་བ་ལིང་ཏ་ཁཱ་ཧི། ཞེས་དཀར་གཏོར་གསེར་སྐྱེམས་འབུལ། ཧཱུྃ། ང་ནི་ཡེ་ནས་ཆོས་དབྱིངས་ངང་། །རང་བྱུང་པདྨ་ཧེ་རུ་ཀ། འཇིགས་པའི་ཁྲོ་རྒྱལ་རྡོ་རྗེའི་སྐུ། །ཡེ་ཤེས་རོལ་པའི་མེ་དཔུང་འབར། །ཧཱུྃ་ཧཱུྃ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུྃ། ལན་གསུམ་གྱིས་གླུད་གཏོར་བྱིན་གྱིས་བརླབས་ནས། སྣང་སྲིད་ལོག་འདྲེན་གདོན་བགེགས་དང་། །

[Full Size]

ལན་ཆགས་འབྱུང་པོ་གནོད་བྱེད་ཚོགས། །ཀུན་ཀྱང་འདིར་འདུས་གླུད་གཏོར་ལོངས། །ཚིམས་པར་སྤྱོད་ལ་མཐའ་མེད་པ། །གནས་མེད་ཡུལ་དུ་འགྲོ་བར་གྱིས། །གལ་ཏེ་བསྒོ་བ་ལས་འདས་ན། །དབང་ཆེན་ཁྲོས་པའི་རྔམས་ཟེར་གྱིས། །འཆོལ་བའི་ཁྲོ་བོ་ཁྲོ་ཆུང་དང་། །ལྕགས་སྡིགས་མེ་ཆར་དྲག་པོ་སྤྲོས། །རྡུལ་དམྱལ་ཚལ་བར་འཐོར་བར་འགྱུར། །ཧཱུྃ་ཧཱུྃ་ཧཱུྃ། གནོད་བྱེད་འབྱུང་པོ་ཨུ་ཙ་ཏ་ཡ་ཕཊ། ཞེས་བགེགས་བསྐྲད་ལ། རང་གི་ཐུགས་ལས་འོད་ཟེར་དང་། །རྡོ་རྗེ་མེ་རི་ཕྱོགས་བཅུར་སྤྲོས། །བར་མཚམས་མེད་པར་གང་བར་གྱུར། །སྲ་བརྟན་སྲུང་འཁོར་གཞོམ་དུ་མེད། །བཛྲ་ཀྲོ་དྷ་རཀྵ་རཀྵ་ཧཱུྃ། གིས་བསྲུང་འཁོར་བསྒོམ་ལ། དེ་ནས་སྐྱབས་འགྲོ་སེམས་བསྐྱེད་ལ་འཇུག་པ་ནི། ན་མོ། ཕྱོགས་བཅུ་དུས་གསུམ་བདེ་བར་གཤེགས། །མཆོག་གསུམ་རྩ་བ་གསུམ་རབ་འབྱམས། །ཀུན་འདུས་པདྨ་ཐོད་ཕྲེང་ལ། །བདག་སོགས་སེམས་ཅན་སྐྱབས་སུ་གསོལ། །འཁོར་བ་དུཿཁའི་རྒྱ་མཚོ་ལས། །བསྒྲལ་ནས་མྱང་འདས་མཆོག་གི་ལམ། །བཀོད་ཕྱིར་ཚད་མེད་གཞན་ཕན་བློས། །བྱང་ཆུབ་ཆེན་པོས་སེམས་བསྐྱེད་དོ། །དེ་ནས་མཆོད་པ་བྱིན་རླབས་ནི། ༀ་བཛྲ་ཨ་མྲྀ་ཏས་བསངས་། སྭ་བྷཱ་ཝས་སྦྱངས། སྟོང་ལས་ཁམས་གསུམ་ཕྱི་སྣོད་གཏོར་གཞོང་དུ། །ནང་བཅུད་གནས་ཡུལ་བཀོད་པ་རྫས་སུ་བཤམས། །ཀུན་ཀྱང་རང་བྱུང་གདོད་ནས་དག་པ་ཡི། །ཟག་མེད་ནམ་མཁའ་མཛོད་བཞིན་

[Full Size]

སྤྲིན་སྤྲོ་གྱུར། །ༀ་བཛྲ་ཨརྒྷཾ། པཱ་དྱཾ། པུཥྦེ། དྷུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤབྡ་ཨཱཿཧཱུྃ། ཛྙཱ་ན་པཉྩ་ཨ་མྲྀ་ཏ། མ་ཧཱ་རཀྟ། བ་ལིཾ་ཏ་ག་ཎ་གུ་ཧྱེ་ས་མ་ཡེ་སྭཱ་ཧཱ། ཅེས་བྱིན་གྱིས་བརླབས། དེ་ནས་བདག་མདུན་གཅིག་ཆར་བསྐྱེད་པ་ནི། ༀ་སྭ་བྷཱ་ཝས་དངོས་སྣང་གཉིས་འཛིན་སྦྱངས་ནས། སྟོང་བའི་ངང་ལས་དྲི་མེད་དྭངས་གསལ་གཡོ་བ་མེད། །རིན་ཆེན་འབྱུང་གནས་རྒྱ་ཆེ་གཏིང་ཟབ་མཐའ་མི་མངོན། །དེ་དབུས་པདྨ་དཀར་པོ་འདབ་སྟོང་གེ་སར་རྒྱས། །ཉི་ཟླའི་དཀྱིལ་འཁོར་ཐབས་ཤེས་གཟི་འོད་འབར་བའི་སྟེང་། །ཧྲཱིཿདམར་འོད་འཕྲོས་འཕགས་མཆོད་འགྲོ་བའི་དོན་བྱས་ནས། །རྒྱལ་བའི་རྣམ་རོལ་མ་ཧཱ་གུ་རུ་པདྨཱ་ཀཱ་ར་ནི། །ཞལ་གཅིག་ཕྱག་གཉིས་སྐུ་མདོག་གངས་ལ་ཉི་ཤར་བཞིན། །དཀར་དམར་མདངས་མཛེས་ཞི་འཛུམ་གཞོན་ནུ་ལོ་བརྒྱད་ཚུལ། །སྤྱན་གསུམ་ལྟ་སྟངས་ཆོས་ཉིད་སྐྱེ་མེད་དབྱིངས་སུ་གཟིགས། །ཛམྦུའི་གསེར་གྱི་སྙན་ཆ་མགུལ་རྒྱན་ཕྱག་ཞབས་གདུབ། །ཕྱག་གཡས་གསེར་གྱི་རྡོ་རྗེ་ཐུགས་ཀར་གཏོད་དེ་འཛིན། །གཡོན་པས་ཐོད་པ་ཚེ་བུམ་ནོར་བུས་བཀང་བ་བསྣམས། །ཤེས་རབ་མཚོན་བྱེད་གྲུ་མོར་ཁ་ཊཱྃ་དཀུ་ལ་བརྟེན། །པད་ཞྭ་སྒྲོ་དར་རཏྣས་བརྒྱན་པ་དབུ་ལ་གསོལ། །ཟ་འོག་མཐིང་ཀའི་ཕོད་ཀ་ཆོས་གོས་རྣམ་གསུམ་དང་། །ཐུན་མཚམས་འཆར་ཀའི་མདངས་ལྡན་བེར་ཆེན་ལྷུབས་པར་གསོལ། །ཞབས་གཉིས་རྡོ་རྗེའི་

[Full Size]

སྐྱིལ་མོ་ཀྲུང་གིས་བཞུགས་པར་གསལ། །མཚན་དང་དཔེ་བྱད་ཉི་མ་སྟོང་གི་གཟི་འོད་འབར། །བདེ་ཆེན་ཡེ་ཤེས་ཆོས་སྐུའི་ཞིང་ཁམས་ཡོངས་ལ་ཁྱབ། །རབ་འབྱམས་ཞིང་ཀུན་མ་ལུས་སྐུ་ཡི་བཀོད་པར་རྫོགས། །གནས་གསུམ་ༀ་དཀར་ཨཱཿདམར་ཧཱུྃ་སྔོན་གསལ་བར་གྱུར། །སྟེང་འོག་ཕྱོགས་མཚམས་བར་སྣང་འོད་ལྔའི་དཀྱིལ་འཁོར་ཀློང་། །ཕྱོགས་བཅུའི་སངས་རྒྱས་འཕགས་པ་ཉན་རང་བྱང་སེམས་དང་། །རིག་འཛིན་གྲུབ་ཐོབ་གསར་རྙིང་བཀའ་བརྒྱུད་བླ་མ་སོགས། །རྒྱུད་སྡེ་བཞི་ཡི་ཡི་དམ་ཞི་ཁྲོ་ཌཱ་ཀི་མ། །དཔའ་བོ་དམ་ཅན་ཆོས་སྲུང་ནོར་ལྷ་གཏེར་བདག་པོ། །ཐམས་ཅད་རྒྱན་དང་ཆ་ལུགས་ཡོངས་རྫོགས་བཀྲ་ལམ་མེ། །སྐྱབས་ཡུལ་ཞིང་དུ་མངོན་པར་ཉིད་དུ་སྣང་བ་ཡི། །རིགས་འདུས་རྒྱལ་བའི་དཀྱིལ་འཁོར་གཙོ་མཆོག་གནས་གསུམ་ནས། །ལྔ་ལྡན་འོད་ཟེར་ཟེར་ཐག་དབང་པོའི་གཞུ་ལྟ་བུ། །འོག་མིན་ངེས་པ་ལྔ་ལྡན་རང་སྣང་སྤྲུལ་པའི་ཞིང་། །ཕྱོགས་བཅུའི་མཐའ་ཀླས་རང་བཞིན་རྣམ་པར་དག་ཞིང་ནས། །བདེར་གཤེགས་རྒྱལ་བ་རྒྱ་མཚོའི་ལྷ་ཚོགས་འཁོར་བཅས་རྣམས། །མཁའ་དབྱིངས་གང་བར་སྤྱན་དྲངས་བདག་མདུན་ལྷ་ཚོགས་དང་། །དམ་ཚིག་ཡེ་ཤེས་དབྱེར་མེད་ཆུ་ལ་ཆུ་བཞག་ལྟར། །མཉམ་ཉིད་བདེ་ཆེན་འདུ་འབྲལ་མེད་པའི་ངང་དུ་བཞུགས། །ༀ་མ་ཧཱ་གུ་རུ་པདྨཱ་ཀཱ་ར་སརྦ་ཏ་ཐཱ་ག་ཏ་དེ་ཝ་ཌཱཀྐི་ནི་མ་ཧཱ་ཀཱ་ལ་ཀཱ་ལི་ས་པ་རི་ཝཱ་ར་ཨེ་ཧྱ་ཧི་བཛྲ་ས་མ་ཡ་ཛ་ཛཿཞེས་སྤྱན་དྲངས་ལ། བདག་མདུན་ཐུགས་ལས་འོད་འཕྲོས་

[Full Size]

དབང་གི་ལྷ། །སྤྱན་དྲངས་དྲི་མེད་སིམ་བྱེད་རྒྱུན་འབབ་ཀྱི། །ཁྲུས་གསོལ་གསང་གསུམ་བདེ་ཆེན་དགྱེས་པ་བསྐྱེད། །རིགས་བདག་མཐའ་ཡས་སྤྲུལ་སྐུས་དབུ་བརྒྱན་གྱུར། །དེ་ནས་ཕྱི་མཆོད་འབུལ་བ་ནི། སྲིད་གསུམ་རབ་འབྱམས་ཞིང་རྣམས་ལ། །གངྒཱའི་ཀླུང་ཆེན་མཆོད་ཡོན་བརྡལ། །དད་པས་རྒྱལ་ལ་འབུལ་ལགས་ན། །རང་བྱུང་ལྷན་སྐྱེས་དངོས་གྲུབ་སྩོལ། །ༀ་བཛྲ་ཨརྒྷཾ་པྲ་ཏཱི་ཙྪ་སྭཱ་ཧཱ། །སྲིད་གསུམ༴ དག་བྱེད་ཁྲུས་ཆབ་ཞབས་བསིལ་འཐོར། །དད་པས༴ རང་བྱུང༴ སྔགས་ཐོག་མཐའ་འདྲ་བར། པཱ་དྱཾ། སྲིད་གསུམ༴ པདྨ་ཀུ་མུཏ་དགའ་ཚལ་རྒྱས། །དད་པས༴ རང་བྱུང༴ པུཥྤེ༴ སྲིད་གསུམ༴ ཧ་རི་ཙནྡ་ཡལ་འདབ་བསྐྱོད། །དད་པས༴ རང་བྱུང༴ དྷཱུ་པེ༴ སྲིད་གསུམ༴ སུཪྱ་ཙནྡྲའི་སྣང་གསལ་འབར། །དད་པས༴ རང་བྱུང༴ ཨཱ་ལོ་ཀེ༴ སྲིད་གསུམ༴ རྨད་བྱུང་སྨན་སྤོས་བྱུགས་པ་བཟང། །དད་པས༴ རང་བྱུང་༴ གནྡྷེ༴ སྲིད་གསུམ༴ ཡིད་འཕྲོག་རོ་ལྡན་ཞལ་ཟས་བཤམས། །དད་པས༴ རང་བྱུང་༴ ནཻ་ཝི་དྱ༴ སྲིད་གསུམ༴ སྣ་ཚོགས་གྲག་སྟོང་སྒྲ་དབྱངས་ལྡིར། །དད་པས་རྒྱལ་ལ་འབུལ་ལགས་ན། །རང་བྱུང་ལྷན་སྐྱེས་དངོས་གྲུབ་སྩོལ། །ༀ་བཛྲ་ཤབྡ་པྲ་ཏཱིཙྪ་སྭཱ་ཧཱ། དེ་ནས་འདོད་ཡོན་མཆོད་པ་ནི། རྡོ་རྗེའི་གཟུགས་སྒྲ་དྲི་རོ་རེག །བདེ་སྟོང་ལྷ་མོས་གར་བསྒྱུར་ཞིང་། །འཛིན་མེད་ངང་དུ་འབུལ་ལགས་ན། །མཉམ་ཉིད་དབྱིངས་

[Full Size]

སུ་བཞེས་སུ་གསོལ། །བཛྲ་རཱུ་པ། ཤབྡ། གནྡྷེ། ར་ས། སྤཪྴེ་མ་ཧཱ་སུ་ཁ་པཱུ་ཛ་ཧོ། དེ་ནས་ནང་མཆོད་འབུལ་བ་ནི། མཆོག་ཆེན་བྷནྡྷ་མཚན་དང་ལྡན། །རྩ་བརྒྱད་ཡན་ལག་སྟོང་སྦྱར་བའི། །ཡེ་ཤེས་བདུད་རྩིའི་རྦ་རླབས་འཕྱོ། །ཐུགས་རྗེས་བརྩེར་དགོངས་བཞེས་སུ་གསོལ། །སརྦ་པཉྩ་ཨ་མྲི་ཏ་ལ་ཁཱ་ཧི། །ལྕང་ལོར་བཅས་པའི་ཀ་པཱ་ལར། །རྒྱུ་དྲུག་སྙིང་རྗེས་བསྒྲལ་བ་ཡི། །རཀྟའི་རྒྱུན་གྱི་ཟེགས་མ་འཐོར། །བྱམས་པའི་ཚུལ་གྱིས་དགྱེས་པར་རོལ། །མ་ཧཱ་རཀྟ་ལ་ཁཱ་ཧི། རིན་ཆེན་པད་སྣོད་ཡངས་པའི་ནང་། །བཅུད་ལྡན་འདོད་ཡོན་བ་ལིང་ཏ། །རི་ལྟར་བརྗིད་ཆེ་མཚོ་ལྟར་བསྐྱིལ། །ཀུན་ཀྱང་ཀློང་ཡངས་ཆེན་པོར་བཞེས། །མ་ཧཱ་བ་ལིང་ཏ་ལ་ཁཱ་ཧི། དངོས་ཀུན་རང་སེམས་སྣང་བའི་རྩལ། །ཀ་དག་ཡེ་ནས་རྫོགས་པ་ཆེ། །གསལ་སྟོང་ལྷུན་གྲུབ་འདུས་མ་བྱས། །དོན་དམ་བརྗོད་མེད་ངང་དུ་མཆོད། །བཛྲ་ཛྙཱན་དྷརྨ་དྷཱ་ཏུ་པཱུ་ཛ་ཧོ། དེ་ནས་ལྷ་ཚོགས་མ་ལུས་པ་ཐམས་ཅད་ཨོ་རྒྱན་རིན་པོ་ཆེ་དང་དབྱེར་མེད་ངང་དུ་བསྟོད་པ་བྱ་བ་ནི། ༀ། ཆོས་སྐུའི་ཞིང་ཁམས་ཀུན་ཏུ་ཁྱབ། །ཨཱཿལོངས་སྐུ་འགགས་མེད་སྤྲིན་ཚོགས་གཏིབས། །ཧཱུྃ། སྤྲུལ་བསྒྱུར་ཆུ་ཟླའི་རོལ་པ་ཅན། །སྐུ་གསུམ་པདྨ་འབྱུང་ལ་བསྟོད། །རང་བྱུང་མཚོ་དབུས་གེ་སར་ལས། །བདེ་སྟོང་བརྫུས་འཁྲུངས་རྒྱལ་བའི་སྲས། །གསང་སྔགས་སྟོན་པ་རྡོ་རྗེ་འཆང་། །བླ་མེད་བླ་མར་ཕྱག་འཚལ་བསྟོད། །ཕྱོགས་བཅུ་དུས་གསུམ་

[Full Size]

བདེ་བར་གཤེགས། །ཀུན་གྱི་སྤྱི་མེས་དཀྱིལ་འཁོར་གཙོ། །སྣང་སྲིད་ཟིལ་གནོན་ཐོད་ཕྲེང་རྩལ། །ཆེ་མཆོག་དཔལ་ཆེན་ཕྱག་འཚལ་བསྟོད། །བསྟོད་བྱ་བསྟོད་བྱེད་བློ་ལས་འདས། །རྗོད་བྱེད་སྨྲ་བསམ་ཡུལ་དང་བྲལ། །ཆོས་རྣམས་ཡེ་ནས་རིག་པའི་རྩལ། །ཀུན་བཟང་ཀློང་ཡངས་ཆེན་པོར་བསྟོད། །ཅེས་བསྟོད་ནས། ཀྱཻ། སངས་རྒྱས་ཀུན་གྱི་བདག་ཉིད་མཆོག །མི་མངོན་དབྱིངས་ནས་རྗེས་དགོངས་ལ། །བདག་སོགས་འཁོར་བའི་སེམས་ཅན་རྣམས། གདོད་ནས་བག་ཆགས་སྒྲིབ་པ་ཡིས། །གསང་སྔགས་བྱང་སེམས་སོ་ཐར་གྱི། །དམ་ཚིག་བསླབ་སྡོམ་ཉེས་ལྟུང་སོགས། །མི་ཤེས་མུན་པའི་དབང་གྱུར་རྣམས། །གནོང་འགྱོད་དྲག་པོས་བཟོད་པར་བཞེས། །མི་སྒྲིབ་ཉི་མ་འབུམ་བརྡལ་པའི། །དག་ཚངས་དབུགས་དབྱུང་བསྩལ་དུ་གསོལ། །ༀ་ས་མ་ཡ། ཨཱཿས་མ་ཡ། ཧཱུྃ་ས་མ་ཡ། ༀ་ཨཱཿཧཱུྃ་མ་ཧཱ་གུ་རུ་བཛྲ་ཛྙཱ་ན་སཏྭ་ཧཱུྃ། ལན་གསུམ་བརྗོད། དེ་ནས་བཟླས་པ་ནི། བདག་མདུན་ཐུགས་ཀར་ཟླ་བའི་དཀྱིལ་འཁོར་སྟེང་། །གསེར་གྱི་རྡོ་རྗེ་རྩེ་ལྔའི་ལྟེ་བ་རུ། །ཧྲཱིཿདམར་མཐའ་སྐོར་སྔགས་ཀྱི་ཕྲེང་བ་གསལ། །འོད་ཀྱིས་འཕགས་མཆོད་འགྲོ་བའི་སྡིག་སྒྲིབ་སྦྱངས། །རང་ལུས་སྣང་སྟོང་བདེ་གསལ་མི་རྟོག་ངང་། །མཆོག་གསུམ་རྩ་གསུམ་ཡེ་ཤེས་སེམས་དཔའི་ཚོགས། །རྡུལ་སྙེད་གྲངས་འདས་བདག་རྒྱུད་བྱིན་རློབ་གྱུར། །ༀ་ཨཱཿཧཱུྃ་བཛྲ་གུ་རུ་

[Full Size]

པདྨ་སིདྡྷི་ཧཱུྃ། ཅི་ནུས་དང་། ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ། ཞེས་བཟླའོ། །དེ་ནས་སྤྲོ་ན་ཚོགས་མཆོད་འབུལ་བ་ནི། ཧཱུྃ། རང་ཉིད་ལྷར་གསལ་ཐུགས་ཀ་ནས། །རྃ་ཡྃ་ཁྃ་འཕྲོས་འདོད་ཡོན་ལ། །ཐིམ་པས་ཀུན་རྟོག་བག་ཆགས་སྦྱངས། །ༀ་དཀར་ཨཱཿདམར་ཧཱུྃ་མཐིང་འཕྲོས། །ཐབས་ཤེས་ཚོགས་རྫས་ལོངས་སྤྱོད་ཀྱི། །སྣང་སྲིད་མཐའ་བྲལ་ཞིང་རྣམས་བཀང་། །ཟག་མེད་ཡེ་ཤེས་བཅུད་མཆོག་ལྡན། །མཆོད་འོས་སྐྱབས་གནས་རྒྱ་མཚོ་རྣམས། །རང་བཞིན་གནས་ནས་སྐུ་བསྐྱོད་འཚལ། །མཁའ་སྤྱོད་པདྨ་འོད་ཞིང་ནས། །གུ་རུ་པདྨ་ཐོད་ཕྲེང་རྩལ། །རིག་འཛིན་གྲུབ་ཐོབ་བྱེ་བ་འབུམ། །ཡི་དམ་ཞི་ཁྲོ་དཔའ་བོདང་། །མ་ཚོགས་མཁའ་འགྲོ་གྲངས་ལས་འདས། །ཡེ་ཤེས་ལས་དང་འཇིག་རྟེན་གྱི། །ཆོས་སྐྱོང་མ་མགོན་ལྕམ་དྲལ་དང་། །དཀའ་སྲུང་དམ་ཅན་དྲེགས་བྱེད་རྣམས། །ཚོགས་ཀྱི་དཀྱིལ་འཁོར་ཆེན་པོ་འདིར། །ཐུགས་རྗེའི་ཐུགས་དམ་བསྐང་བ་དང་། །རྣལ་འབྱོར་བྱིན་གྱིས་བརླབས་པའི་ཕྱིར། །མཁའ་དབྱིངས་གང་བར་གཤེགས་སུ་གསོལ། །ཕྱི་སྣོད་ནང་བཅུད་མ་ལུས་པ། །དག་པ་ལྷ་ཡི་ངོ་བོར་བསྒྱུར། །གཞལ་ཡས་ཚོགས་ཁང་ཉམས་རེ་དགའ། །རྨད་བྱུང་ཚོགས་གཏོར་དྭངས་རེ་སྤྲོ། །སྐྱབས་གནས་དཀོན་མཆོག་བྱིན་རེ་ཆེ། །སྒྲུབ་པའི་རྣལ་འབྱོར་དམ་རེ་གཙང་། །འདིར་གཤེགས་ཟག་མེད་ཏིང་འཛིན་གྱི། །

[Full Size]

མཆོད་པ་ཆེན་པོ་བཞེས་སུ་གསོལ། །དུག་ལྔའི་དབང་གྱུར་བཟོད་པར་དགོངས། །ཉོན་མོངས་བདུད་བཞིའི་དངོས་སྣང་ལས། །འཁྲུལ་འབྱམས་རྣམ་རྟོག་དགྲ་དཔུང་འདི། །ཡེ་ཤེས་ལྔ་ཡི་ངང་ཉིད་དུ། །དགྱེས་པ་ཆེན་པོས་ད་རོལ་ཅིག །གུ་རུ་དེ་ཝ་ཌཱཀྐི་ནི་དྷརྨ་པཱ་ལ་ས་པ་རི་ཝཱ་ར་ག་ཎ་ཙཀྲ་ཁཱ་ཧི། དེ་ནས་བསྐང་བ་བྱ་བ་ནི། ཧཱུྃ་ཧྲཱིཿཆོས་དབྱིངས་རྣམ་དག་རང་བཞིན་ཞིང་ཁམས་ནས། །ཀུན་བཟང་རྡོར་འཆང་པད་འབྱུང་ཐུགས་དམ་བསྐང་། །འོག་མིན་གནས་དང་ཕྱོགས་བཅུའི་ཞིང་ཁམས་ནས། །སངས་རྒྱས་བྱང་སེམས་མ་ལུས་ཐུགས་དམ༴ སྐྱེ་མེད་སྤྲོས་དང་བྲལ་བའི་ཕོ་བྲང་ནས། །བཀའ་བརྒྱུད་བླ་མ་རྣམས་ཀྱི༴ མཁའ་སྤྱོད་དག་པ་རབ་འབྱམས་དཀྱིལ་འཁོར་ནས། །ཡི་དམ་ཞི་ཁྲོའི་ལྷ་ཚོགས༴ རྩ་རླུང་སྣང་སྟོང་བདེ་ཆེན་གཞལ་ཡས་ནས། །རིག་འཛིན་དཔའ་བོ་མཁའ་འགྲོའི༴ དཔལ་རི་པདྨ་འོད་ཕུང་འཁྱིལ་བ་ནས། །ཨོ་རྒྱན་རྗེ་འབངས་ཉེར་ལྔའི༴ གང་འདུལ་སྤྲུལ་སྐུའི་གར་རྩེད་གནས་མཆོག་ནས། །གཏེར་ཆེན་གཏེར་ཕྲན་མངའ་བདག༴ དག་སྣང་ཕྱོགས་མེད་སྙིང་རྗེའི་འོད་ཀློང་ནས། །དྲན་མཆོག་རྩ་བའི་བླ་མའི༴ འོག་མིན་དུར་ཁྲོད་རོལ་པ་ཆེན་པོ་ནས། །ཡེ་ཤེས་མགོན་པོ་ཡོངས་ཀྱི༴ རྩུབ་འགྱུར་རབ་འཇིགས་མེ་རི་འབར་བ་ནས། །ལས་དང་འཇིག་རྟེན་མགོན་པོའི༴ མི་བཟད་རླུང་ནག་དགུ་

[Full Size]

ཀློང་འཁྱིལ་བ་ནས། །དཔལ་ལྡན་མ་མོ་ཡོངས་ཀྱི༴ དྲག་རྩལ་བསྐལ་མེ་འཁྲུགས་པའི་ཀློང་དཀྱིལ་ནས། །བཀའ་སྲུང་བསྟན་སྲུང་རྒྱ་མཚོའི༴ མི་ཟད་ནམ་མཁའ་མཛོད་ཀྱི་འཁོར་ལོས་སྒྱུར། །ནོར་ལྷ་གཏེར་བདག་རྣམས་ཀྱི༴ གནས་དང་ཟབ་ཆོས་བཀའ་ཡི་བྱ་ར་བ། །དཀར་ཕྱོགས་སྐྱོང་བའི་སྡེ་དཔུང་ཐུགས་དམ་བསྐང་། །ཐུགས་དམ་བསྐང་ཕྱིར་རྨད་བྱུང་མཆོད་པའི་རྫས། །རྩ་བརྒྱད་བདུད་རྩི་མ་ཧཱ་རཀྟ་དང་། །དམ་རྫས་སྟོབས་ལྡན་མ་ཧཱ་བ་ལིང་ཏ། །ཟག་མེད་བདེ་ཆེན་ཚོགས་ཀྱི་འཁོར་ལོ་ལྡན། །མཆོད་འོས་ཐུགས་དམ་གཉེན་པོ་བསྐང་གྱུར་ཅིག །བསྐང་མེད་ཆོས་དབྱིངས་ཆེན་པོའི་ངང་དུ་བསྐང་། །སྣང་སྟོང་བདེ་བ་ཆེན་པོའི་ངང་དུ་བསྐང་། །གཟུང་འཛིན་དངོས་མེད་སྟོང་ཉིད་ཆེན་པོ་བསྐང་། །ༀ་བཛྲ་ས་ཏྭ་ས་མ་ཡ་སོགས། ཀྱཻ། ཚེ་རབས་འཁོར་བ་ཐོག་མེད་ནས། །ལས་ངན་སྡིག་སྒྲིབ་ཉེས་ལྟུང་རྣམས། །ཀུན་བཟང་ཡངས་པའི་ཀློང་དུ་བསྟིམ། །དམིགས་མེད་ཆོས་ཀྱི་དབྱིངས་སུ་དག །ཨ་ཨ་ཨ། ཞེས་ཕུལ་ལོ། །དེ་ནས་རྣལ་འབྱོར་པ་རྣམས་ཚོགས་ལ་རོལ་པ་ནི། ཧོ། དུག་ལྔ་གནས་དག་ཡེ་ཤེས་ལྔའི་རང་བཞིན། །དངོས་གྲུབ་རྫས་མཆོག་ཚོགས་ལ་ལོངས་སྤྱོད་མཛོད། །ལན་དུ། ཨེ་མ་གདོད་ནས་བློ་འདས་ཟག་པ་མེད། །མཚན་བྲལ་དེ་བཞིན་ཉིད་དབྱིངས་ཀློང་དུ་རོལ། །ཨ་ལ་ལ་ཧོཿདེ་ནས་ཕུད་ལྷག་རྣམས་བདུད་རྩིས་བསངས་ལ། ༀ་ཨ་མྲྀ་ཏེ་ཧཱུྃ་ཕཊ། དཀྱིལ་འཁོར་

[Full Size]

མུ་རན་སྐྱོང་བ་ཡི། །བཀའ་ཉན་བྲན་གཡོག་ཕོ་ཉའི་ཚོགས། །མཁའ་འགྲོ་གིང་དང་ལངྐ་བཅས། །དབང་ཕྱུག་མ་མོ་ཉི་ཤུ་བརྒྱད། །ཕྲ་མན་ཤུགས་འགྲོ་གཏོར་ལེན་གྱི། །ཕུད་ལྷག་བཤལ་ཆུ་དབང་བ་རྣམས། །དམ་ཚིག་ཆེན་པོས་དགྱེས་པར་རོལ། །བསྟན་སྲུང་བསྒྲུབ་པའི་བར་ཆད་ཟློག །ཕྲིན་ལས་རྣམ་བཞི་བསྒྲུབ་ཏུ་གསོལ། །ཨུཙྪི་ཊ་བྷཀྵ་བྷཀྵ་སི་སྭཱ་ཧཱ། ཞེས་ཕྱི་རོལ་དུ་དོར། བཀའ་ཡི་ཐ་ཚིག་བསྒྲག་པ་ཆད་མདོ་ནི། ཧཱུྃ། སྔོན་དུས་བསྐལ་པ་དང་པོ་ལ། །ཆོས་དབྱིངས་རོལ་པའི་ཕོ་བྲང་དུ། །དབང་ཆེན་པདྨ་ཧེ་རུ་ཀའི། །རྡོ་རྗེའི་བཀའ་བསྒོས་དབང་ཡང་བསྐུར། །དེ་འོག་རྒྱ་བོད་གནས་རྣམས་སུ། །སློབ་དཔོན་པདྨ་འབྱུང་གནས་ཀྱིས། །དྲེགས་ཅན་མ་ལུས་དབང་སྡུད་ནས། །ཕྲིན་ལས་བསྒྲུབ་པར་མ་ཆད་དམ། །དེ་འོག་རྩོད་ལྡན་སྙིགས་མའི་དུས། །རིག་འཛིན་གྲུབ་པ་མཆོག་རྣམས་ཀྱི། །སྤྱན་སྔར་ཁས་བླངས་དམ་བཅས་བཞིན། །བཀའ་དང་ཐ་ཚིག་མ་གཡེལ་ཅིག །ད་ལྟ་བསྒྲུབ་པའི་རྣལ་འབྱོར་གྱིས། །དཀྱིལ་འཁོར་གཉེན་པོ་ཞལ་ཕྱེས་ནས། །དམ་ཚིག་ཅན་རྣམས་མཆོད་བསྐུལ་ན། །སྔོན་གྱི་ཐུགས་དམ་མ་གཡེལ་བར། །བརྒྱན་པའི་གཏོར་མ་འདི་བཞེས་ལ། །སྐལ་ལྡན་བསྲུང་ཞིང་སྐྱོབ་པ་དང་། །བསྟན་དང་བསྟན་འཛིན་བར་ཆད་སོལ། །གནད་ནས་བསྐུལ་ལོ་ཕྲིན་ལས་མཛོད། །ཅེས་ཕུལ་ནས། བརྟན་མ་སྐྱོང་བ་ནི། བྷྱོ། བདག་ཉིད་ཆེན་པོ་པད་འབྱུང་གི། ཕྲིན་ལས་

[Full Size]

བསྒྲུབ་པར་དམ་བཅས་པའི། །འཛམ་གླིང་སྐྱོང་བའི་བརྟན་མ་རྣམས། །འདིར་གཤེགས་གཏོར་མ་བཤལ་ཆུ་བཞེས། །སྔོན་ཚེ་ཁས་བླངས་མནའ་བོར་བཞིན། །ལྔ་བརྒྱ་དུས་ཀྱི་སྙིགས་མ་འདིར། །པདྨའི་ལུང་ཟིན་མཆོག་རྣམས་དང་། །ངེས་དོན་གསང་སྔགས་རིང་ལུགས་སྐྱོང་། །རྣལ་འབྱོར་བར་ཆད་རྐྱེན་ངན་ཟློག །ནད་ཡམས་དལ་ཁ་དགྲ་ལ་སྒྱུར། །དུག་མཚོན་བྱད་ཁ་ཕུར་ཁ་ཡི། །རྦོད་གཏོང་རང་གཤེད་རང་ལ་ཟློག །བཅོལ་བའི་ཕྲིན་ལས་དུས་ལ་བབས། །མ་གཡེལ་མ་འདའ་ས་མ་ཡ། མ་མ་ཧྲིང་ཧྲིང་བ་ལིང་ཏ་ཁཱ་ཧི། ཞེས་ཕུལ་ནས་གཏོར་སྣོད་སྦུབ་ལ། དགྲ་བགེགས་ཤ་ཏྲཱུཾ་སྟྭཾ་བྷ་ཡ་ནན། དེ་ནས་རྗེས་ཀྱི་ཆོ་ག་ནི། དཔལ་མགོན་དམ་པ་རྒྱལ་བའི་སྤྱི་གཟུགས་མཆོག །དཔལ་ལྡན་མཚོར་འཁྲུངས་བླ་མའི་ལྷ་ཚོགས་ལ། །དཔལ་འབྱོར་ཕྱི་ནང་གསང་གསུམ་མཆོད་པ་འབུལ། །དཔལ་ཀུན་རབ་རྒྱས་འཕེལ་བར་བྱིན་གྱིས་རློབས། །ༀ་བཛྲ་ཨརྒྷཾ། པཱདྱཾ། པུཥྤེ། དྷཱུཔྤེ། ཨཱ་ལོ་ཀེ། གནྡྷེ། ནཻ་ཝཱི་དྱ། ཤབྡ། མ་ཧཱ་པཉྩ་རཀྟ་བ་ལིང་ཏ་སརྦ་པཱུ་ཛ་ཁཱ་ཧི། ཧྲཱིཿསྐྱེ་འཆི་སྤངས་པའི་སྣང་སྟོང་བདེ་བ་ཆེ། །འདུས་མ་བྱས་པ་རང་གསལ་ལྷུན་གྱིས་གྲུབ། །འོད་གསལ་ཡེ་ཤེས་རྩལ་རྫོགས་ཡེ་སངས་རྒྱས། །ཀུན་ཁྱབ་གདོད་མའི་མགོན་པོར་ཕྱག་འཚལ་ལོ། །ཞེས་བསྟོད་ནས་བཟོད་གསོལ་ནི། ལྟ་སྒོམ་སྤྱོད་པ་བག་ཉལ་གྱིས། །གོས་པར་གྱུར་པའི་ལས་བསགས་པ། །ཐར་

[Full Size]

པའི་སྒྲིབ་ཚོགས་མ་ལུས་བཤགས། །ཚངས་པར་བྱང་ཞིང་དག་པར་གསོལ། །དེ་ནས་བྱིན་རླབས་དབང་བཞིའི་དངོས་གྲུབ་བླང་བ་ནི། མདུན་བསྐྱེད་རྒྱལ་བའི་དཀྱིལ་འཁོར་ལ་དམིགས་ནས། ཧྲཱིཿགུ་རུ་པདྨ་ཀཱ་ར་ཡེ། །བྱིན་རླབས་འོད་ཟེར་ལྔ་ལྡན་གྱི། །སྣང་བ་སྤྲིན་ལྟར་ཐིབས་སེ་ཐིབ། །དངོས་གྲུབ་མེ་ཏོག་ཆར་གྱི་རྒྱུན། །བར་མཚམས་མེད་པར་སྤུངས་སེ་སྤུང་། །ཁྱད་པར་གུ་རུའི་གནས་གསུམ་ནས། །འབྲུ་གསུམ་འཕྲོས་ནས་རང་ལ་ཐིམ། །ལུས་ངག་ཡིད་གསུམ་བྱིན་རློབས་ལ། །དབང་བཞི་བསྐུར་ཞིང་རྒྱུད་བཞི་སྨིན། །སྐུ་བཞི་མངོན་གྱུར་དངོས་གྲུབ་སྩོལ། །ༀ་ཨཱཿཧཱུྃ་བཛྲ་གུ་རུ་པདྨ་དྷེ་ཝཱ་ཌཱ་ཀི་ནི་ཀཱ་ཡ་ཨ་བྷི་ཥི་ཉྩ་ༀ། ཝཀྐཱ་ཨབྷི་ཥིཉྩ་ཨཱཿཙིཏྟ་ཨ་བྷི་ཥིཉྩ་ཧཱུཾ། སརྦ་ཨབྷི་ཥིཉྩ་ཧྲཱིཿམོས་གུས་དག་སྣང་གི་འདུན་པ་དང་བཅས་ཏེ་དབང་བཞི་ཐོབ་པར་བསྒོམ་མོ། །དེ་ནས་བསྔོ་བ་ནི། ན་མོ། དུས་གསུམ་དགེ་བའི་རྩ་བ་དང་། །བསྐྱེད་རྫོགས་ཏིང་འཛིན་མཆོད་བཟླས་བསྐུལ། །ཟག་བཅས་ཟག་མེད་དགེ་བ་རྣམས། །ཆོས་དབྱིངས་བྱང་ཆུབ་ཆེན་པོར་བསྔོ། །མདུན་བསྐྱེད་ཡེ་ཤེས་རྟེན་ཡོད་ན། ༀ་སུ་པྲ་ཏིཥྛས་བསྟིམ། མེད་ན། བཛྲ་མུཿས་གཤེགས་གསོལ་བྱ། རང་ཉིད་བསྐྱེད་པའི་དཀྱིལ་འཁོར་བ། །མཐའ་ནས་དབུས་ཡལ་ཧྲཱིཿལ་ཐིམ། །ཐིག་ལེ་ནཱ་ད་མི་དམིགས་པ། །དབྱིངས་རིག་དབྱེར་མེད་འོད་གསལ་ངང་། །ཅི་གནས་སུ་

[Full Size]

མཉམ་པར་བཞག་པར་བྱའོ། །དེ་ནས་ཤིས་པའི་མེ་ཏོག་འཐོར་བ་ནི། བཀྲ་ཤིས་གང་ཞིག་ལྷ་ལམ་ཀློང་ཡངས་སུ། །གུ་རུ་པདྨ་ཉིན་བྱེད་འབུམ་འོད་བརྡལ། །དེང་འདིར་རབ་དཀར་མེ་ཏོག་ཆོས་སྤྱོད་བཅུའི། །སྒྲུབ་པ་མཐར་ཕྱིན་སྲིད་ཞི་བདེ་ལེགས་ཤོག །བཀྲ་ཤིས་རྒྱལ་བ་སྲས་བཅས་ཐུགས་རྗེ་ཅན། །ཆུ་ཤེལ་བྱམས་པའི་བདུད་རྩིའི་བསིལ་རྒྱུན་འབེབས། །དེང་འདིར་ཉོན་མོངས་མུན་པ་ཕ་མཐར་གཞིལ། །ཡང་དག་དོན་གསལ་བདེ་ལེགས་ཀུན་འབྱུང་ཤོག །བཀྲ་ཤིས་ཡི་དམ་དཔའ་བོ་ཌཱ་ཀི་མ། །ཆོས་སྐྱོང་ནོར་ལྷ་སྐར་ཚོགས་འབུམ་བཀྲ་ཞིང་། །དེང་འདིར་ཕྱི་ནང་སྣོད་བཅུད་དཔལ་ཕུན་ཚོགས། །རབ་བརྟན་ལྷུན་གྱིས་གྲུབ་པའི་ཤིས་པ་རྩོལ། །བཀྲ་ཤིས་སྐལ་ལྡན་རྒྱ་མཚོ་མཐའ་ཀླས་དབུས། །ནོར་བུ་ཡིད་བཞིན་དབང་རྒྱལ་སངས་རྒྱས་བསྟན། །དེ་འཛིན་གདེངས་ཅན་བདག་པོ་མ་ལུས་རྣམས། །གཡོ་མེད་ཉིན་མཚན་བཀྲ་ཤིས་འབྱུང་གྱུར་ཅིག །དགེ་ཚོགས་རི་དབང་ལྷུན་པོའི་དཔངས་ལྟར་མཐོ། །ལེགས་བྱས་གསེར་གྱི་མཎྜལ་འདི་ཕུལ་མཐུས། །འོག་མིན་མཁའ་སྤྱོད་པདྨ་འོད་ཞིང་དུ། །རྡོ་རྗེ་འཆང་དབང་ཉིད་དང་དབྱེར་མེད་ཤོག །མངྒ་ལམ་སྭ་སྟི་ཛ་ཡ་སུ་ཛ་ཡ། ཅེས་བརྗོད་པར་བྱའོ། །དེ་ལྟར་གུ་རུ་པདྨ་བསྒྲུབ་པའི་མཆོད་ཕྲེང་འདི་ཉིད་ཀྱང་བསླབ་གསུམ་མངོན་མཐོ་དད་ནོར་གྱིས་ཕྱུག་པ། དགེ་སློང་ཀརྨ་ལེགས་སྦྱིན་ནས། སྟོན་

[Full Size]

པའི་གསེར་སྐུ་འཕགས་ཡུལ་གྱི་བཟོ་ཁྱད་ཅན་དང་། ཉེས་སྲས་རྒྱ་ནག་གི་རི་མོའི་འདུ་བྱེད་ཅན་བཟང་གོས་ཀྱི་གོང་གཤམ་ལྡན་པ། ཆུ་དར་དྲི་མེད་བཅས་དངོས་འབྱོར་མཎྜལ་རྟེན་འབྲེལ་དགེ་མཚན་དང་བཅས་བསྐུལ་བའི་ངོར། སི་ཏུའི་སྐྱེས་རབས་ཀྱི་ཕྲེང་བ་འཛིན་པ་ཨོ་རྒྱན་ཆེན་པོས་བྱིན་གྱིས་བརླབས་པར་མོས་པ་པདྨ་ཉིན་བྱེད་དབང་པོས་དཔལ་སྤུངས་ཡང་དབེན་དུ་རྒྱལ་ཟླའི་དམར་ཕྱོགས་ཀྱི་རྒྱལ་བ་དང་པོ་ལ་སྤེལ་བ་འགྲོ་རྣམས་ཀུན་བཟང་པདྨ་འབྱུང་གནས་ཀྱི་གོ་འཕང་མངོན་དུ་ཐོབ་པར་གྱུར་ཅིག །སརྦ་མངྒ་ལམ། སིདྡྷི་བྷ་ཝནྟུ། དགེའོ།། ༈ །།ཆོས་རྣམས་དམིགས་མེད་སྟོང་པ་ཆེན་པོའི་ངང་། །སྟོང་པའི་ངང་ལས་མདུན་མཁར་སེང་གེའི་ཁྲིར། །དར་དང་རིན་པོ་ཆེས་བརྒྱན་དེ་སྟེང་དུ། །རྩ་བའི་བླ་མ་ཨོ་རྒྱན་རྡོ་རྗེ་འཆང་། །དཀར་གསལ་ཞལ་གཅིག་ཕྱག་གཉིས་རྡོ་རྗེ་དང་། །ཐོད་པ་ཚེ་བུམ་གྲུ་མོར་ཁ་ཊྭཱྃ་ག །སྐུ་ལ་ཕོད་ཀ་ཆོས་གོས་ཟབ་བེར་གསོལ། །ཞབས་གཉིས་རྡོར་སྐྱིལ་དབུ་ལ་པད་ཞྭ་དང་། །སྙན་རྒྱན་མགུལ་རྒྱན་ཕྱག་ཞབས་གདུ་བུས་བརྒྱན། །འཇའ་འོད་ཀློང་དུ་གསལ་འཚེར་འོད་འབར་བསྐྱེད། །གཞན་ཡང་བླ་མ་ཡི་དམ་ཌཱ་ཀི་དང་། །ཡེ་ཤེས་ཆོས་སྐྱོང་ལ་སོགས་སྤྲིན་ལྟར་འཁྲིགས། །སྐྱབས་གནས་མཆོག་གསུམ་རྩ་གསུམ་ངོ་བོ་ཉིད། །ཀུན་འདུས་གུ་རུ་པདྨ་འབྱུང་གནས་ལ། །ཕྱག་འཚལ་གསོལ་འདེབས་བདག་རྒྱུད་སྨིན་གྲོལ་མཛོད། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།

[Full Size]

ཅི་ནུས་བཟླས་ཤིང་། སྐྱབས་ཡུལ་འོད་ཞུ་རང་གི་སྤྱི་བོར་ཐིམ། །དབང་བཞི་མཆོག་ཐོབ་སྒྲིབ་བཞི་རྣམ་པར་དག །སྐུ་བཞིའི་གོ་འཕང་ཐོབ་པའི་སྐལ་ལྡན་ཞིང་། །འདས་དང་མ་འོངས་རྟོག་པའི་རྗེས་མི་འབྲང་། །ད་ལྟའི་ཤེས་པ་གང་ཤར་བཟོ་མེད་ངང་། །གསལ་སྟོང་འཛིན་མེད་མ་བཅོས་ལྷུག་བར་བཞག །བསྔོ་སྨོན་བྱའོ། །དེ་ལྟར་དད་སྟོབས་འབྱོར་པ་མངོན་མཐོ་ཧོར་ཀརྨ་མགོན་པོའི་བཞེད་ལྟར་སྤེལ།། །།ན་མོ་གུ་རུ། སངས་རྒྱས་ཀུན་འདུས་ངོ་བོ་མཚོ་སྐྱེས་རྒྱལ་བའི་རྣལ་འབྱོར་གྱི་རིམ་པ་སྤྲོ་ན། ༀ་ཤཱུ་ནྱ་ཏའི་སྔགས་ཀྱིས་སྟོང་པར་སྦྱངས་ལ། རང་ལུས་འཛིན་མེད་སྤྱི་བོར་པདྨ་དང་། །ཉི་ཟླའི་སྟེང་དུ་ཨོ་རྒྱན་རྡོ་རྗེ་འཆང་། །མཚན་དཔེའི་ཆ་རྫོགས་གཟི་བྱིན་ལྷམ་མེ་བ། །རྩ་བརྒྱུད་བླ་མ་ཡི་དམ་སྤྲིན་ལྟར་གཏིབས། །དཔའ་བོ་ཌཱ་ཀི་ཆོས་སྐྱོང་ཚོགས་བཅས་གསལ། །རང་སྣང་རྩལ་ལས་ཕྱི་ནང་གསང་མཆོད་འབུལ། །ཕྱོགས་བཅུ་དུས་གསུམ་བདེར་གཤེགས་མ་ལུས་པའི། །སྤྱི་གཟུགས་རིགས་འདུས་ཁྱབ་བདག་ཧེ་རུ་ཀ། བདག་སོགས་སྙིགས་འགྲོའི་སེམས་ཅན་བརྩེར་དགོངས་ལ། །ཐུགས་རྗེས་རྒྱུད་བརླན་སྨིན་ཅིང་གྲོལ་ནས་སུ། །སྒྲུབ་པ་མཐར་ཕྱིན་ཕྱི་ནང་བར་ཆད་ཞི། །ལྷན་སྐྱེས་ཡེ་ཤེས་སྒྲིབ་བྲལ་རྟོགས་བྱིན་རློབས། །ཅེས་གསོལ་བ་བཏབ་ནས། བཛྲ་གུ་རུ་ཅི་ནུས་བགྲང་ལ་མཐར་བྱིན་རླབས་དབང་བཞི་ཞུ་བ་ནི། གུ་རུའི་གསང་གསུམ་ཡེ་ཤེས་རྡོ་རྗེ་བཞིའི། །ངོ་བོ་འོད་ཟེར་དཀར་དམར་

[Full Size]

མཐིང་ལྗང་འཕྲོས། །བདག་གི་གནས་བཞིར་ཐིམ་པས་དབང་བཞི་ཐོབ། །སྒྲིབ་བཞི་དག་ཅིང་ལམ་བཞི་འབྱོང་བ་དང་། །སྐུ་བཞིའི་ས་བོན་རྒྱུད་ལ་ཡོངས་སྨིན་ནས། །བླ་མ་འོད་ཞུ་དབྱེར་མེད་མ་བཅོས་ངང་། །ཀ་ནས་དག་པ་རང་བཞིན་གཉུག་མའི་གནས། །ཀུན་བཟང་བདེ་བ་ཆེན་པོའི་ཀློང་དུ་བཞག །ཅི་གནས་སུ་ངོ་བོ་བསྐྱངས་ལ་མཐར། དགེ་དེས་མཁའ་མཉམ་སེམས་ཅན་མ་ལུས་པ། །བླ་མེད་ཐར་པའི་གྲོང་དུ་འཇུག་ནས་སུ། །ཡང་དག་རྫོགས་པའི་བྱང་ཆུབ་མངོན་གྱུར་པའི། །རང་བྱུང་པདྨའི་གོ་འཕང་མཆོག་ཐོབ་ཤོག །ཅེས་པའང་སི་ཏུ་པས་རྗེ་དབོན་གང་དེའི་བཞེད་ངོར་སྤེལ་བ་དགེ། །།སྭསྟི། འདིར་གུ་རུ་རིན་པོ་ཆེའི་རྣལ་འབྱོར་སྒོམ་རིམ་དང་འབྲེལ་བའི་ཚོགས་མཆོད་སྐོང་བཤགས་ཀྱི་རིམ་པ་ཁྱེར་བདེར་སྤྲ་ོན། རྟེན་དང་གཏོར་མ་མཆོད་རྫས་རྣམས་གང་འབྱོར་དང་། ཚོགས་ཀྱི་ཡོ་བྱད་སོགས་བཤམས་ལ། དང་པོ་སྐྱབས་སུ་འགྲོ་བ་དང་སེམས་བསྐྱེད་པ་ནི། ན་མོ། སྐྱབས་ཡུལ་དམ་པ་རྩ་བ་གསུམ་གྱི་ལྷར། །བདག་སོགས་སེམས་ཅན་རྟག་པར་སྐྱབས་མཆི་ཞིང་། །འགྲོ་རྣམས་སྲིད་པའི་གཟེབ་ལས་ངེས་སྒྲོལ་ཕྱིར། །ཡང་དག་བྱང་ཆུབ་སེམས་ནི་བསྐྱེད་པར་བགྱི། །ལན་གསུམ། དེ་ནས་བསྐྱེད་རིམ་ནི། ཤཱུ་ནྱ་ཏའི་སྔགས་ཀྱིས་སྦྱ’ངས་ལ། སྣང་སྲིད་གཉིས་བསྡུས་ཆོས་རྣམས་སྟོང་ཉིད་གྱུར། །དེ་ཡི་ངང་ལས་མདུན་མཁར་འཇའ་འོད་ཀློང་། །པདྨ་དཀར་པོ་འདབ་སྟོང་གེ་སར་རྒྱས། །དེ་དབུས་ཉི་ཟླར་ཧྲཱིཿ

[Full Size]

ཡིག་འོད་འཕྲོས་པས། །དོན་གཉིས་བྱས་ཏེ་ཡོངས་གྱུར་ཨོ་རྒྱན་རྗེ། །པདྨ་འབྱུང་གནས་སྐུ་མདོག་དཀར་ལ་དམར། །ཞི་མ་ཁྲོ་འཛུམ་སྒེག་པའི་ཉམས་དཔལ་ལྡན། །པད་ཞྭ་ཕོད་ཀ་ཆོས་གོས་རྣམ་གསུམ་དང་། །ཟ་འོག་བེར་ཆེན་བཀླུབས་གསོལ་ཕྱག་གཉིས་ཀྱིས། །རྡོ་རྗེ་ཐོད་ཆང་ཚེ་ཡི་བུམ་བཟང་འཛིན། །ཁ་ཊྭཱཾ་དཀུར་བརྟེན་འགྱིངས་བག་ཚུལ་ཞབས་གཉིས། །རྒྱལ་པོ་རོལ་པའི་སྟབས་ཀྱིས་ལྷུན་ཆགས་བཞུགས། །ཕྱོགས་བཅུའི་ཞིང་ཁམས་རབ་འབྱམས་འཁོར་ལོས་སྒྱུར། །གང་སྐུར་གདོད་ནས་ཞིང་གི་ཡོན་ཏན་རྫོགས། །གནམ་ས་བླ་འོག་ཕྱོགས་མཚམས་ཐམས་ཅད་པར། །བྱིན་རླབས་རྩ་བ་རྒྱལ་དང་རྒྱལ་བའི་སྲས། །དགུ་ལྡན་བརྒྱུད་པའི་གྲུབ་ཐོབ་རིག་པ་འཛིན། །དངོས་གྲུབ་རྩ་བ་ཡི་དམ་ཞི་དང་ཁྲོ། །ཕྲིན་ལས་རྩ་བ་བཀའ་སྡོད་ཆོས་སྲུང་རྣམས། །བཀྲ་གསལ་ལམ་མེར་མངོན་སུམ་སྣང་བར་གྱུར། །གཙོ་འཁོར་ཀུན་གྱི་གནས་གསུམ་འབྲུ་གསུམ་མཚན། །ཁྱད་པར་ཐུགས་ཀའི་འོད་ཟེར་གྱིས་བསྐུལ་བའི། །བདེ་ཆེན་པདྨ་འོད་ཕུང་འཁྱིལ་བ་ནས། །ཡེ་ཤེས་གཙོ་འཁོར་སྤྲུལ་དང་ཡང་སྤྲུལ་རྣམས། །ཉི་དང་འོད་ཟེར་ཇི་བཞིན་མདུན་བསྐྱེད་ཀྱི། །དཀྱིལ་འཁོར་སྒྲུབ་རྫས་ལ་ཐིམ་གཉིས་མེད་གྱུར། །རོལ་མོ་དང་བཅས། ༀ་ཨཱཿཧཱུྃ་བཛྲ་གུ་རུ་པདྨ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་བཛྲ་ས་མ་ཡ་ཛཿཛཿཞེས་སྤྱན་དྲངས་ལ། ཛཿཧཱུྃ་བྃ་ཧོཿགཉིས་སུ་མེད་པར་གྱུར།

[Full Size]

དེ་ནས་ཕྱག་འཚལ་བ་ནི། ན་མོ། ཆོས་དབྱིངས་ཀུན་ཁྱབ་འགགས་མེད་རང་རྩལ་ལས། །ཡེ་ནས་གྲུབ་པ་སྐུ་གསུམ་དབྱེར་མེད་ཀློང་། །དོན་དམ་སེམས་ཀྱི་རྡོ་རྗེ་གཉུག་མའི་གཤིས། །མངོན་དུ་རྟོགས་པ་དེ་བཞིན་ཉིད་ཕྱག་འཚལ། །དེ་ནས་མཆོད་པ་འབུལ་བ་ནི། ཧཱུྃ། ཕྱི་དང་ནང་མཆོད་གསང་བ་དེ་ཁོ་ནའི། །དངོས་སུ་འབྱོར་དང་ཡིད་ཀྱིས་སྤྲུལ་པ་ལས། །མཁའ་དབྱིངས་རྒྱས་པར་འགེངས་པའི་མཆོད་སྤྲིན་ཚོགས། །འབུལ་བཞེས་ཐུགས་རྗེས་བདག་ལ་དགོངས་པར་མཛོད། །ༀ་བཛྲ་ཨརྒྷཾ། པཱ་དྱཾ་ནས། ཤབྡ་པྲ་ཏཱིཙྪ་སྭཱ་ཧཱ། བར་དང་། མ་ཧཱ་པཉྩ། རཀྟ། བ་ལིཾ་ཏ། གུ་ཧྱ་སརྦ་པཱུ་ཛ་ཧོཿདེ་ནས་ཛབ་བཟླས་དམིགས་པ། མདུན་བསྐྱེད་ཐུགས་ཀར་པད་སྟེང་རྡོ་རྗེའི་ལྟེར། །ཟླ་དཀྱིལ་ཧྲཱིཿཡིག་མཐའ་མར་སྔགས་ཕྲེང་བསྐོར། །དེ་ལས་འོད་འཕྲོས་འཕགས་མཆོད་སེམས་ཅན་གྱི། །སྒྲིབ་སྦྱང་སྣོད་བཅུད་དག་པ་གསུམ་ལྡན་གྱུར། །བཛྲ་གུ་རུ་ཅི་ནུས་བཟླ་ཞིང་། ཐོད་ཕྲེང་རྩལ་ཡང་བཟླའོ། །དེ་ནས་ཚོགས་ཀྱི་མཆོད་པ་བསངས་སྦྱངས་པ་ནི། ཧྲཱིཿསྟོང་གསལ་འཛིན་བྲལ་དེ་བཞིན་ཉིད། །བདེ་ཆེན་བདེ་བའི་ལོངས་སྤྱོད་རྫས། །སྐྱེ་འགག་གཉིས་མེད་སྣང་ཆ་ལས། །རྃ་ཡྃ་ཁྃ་འཕྲོས་བསྲེག་གཏོར་སྦྱང་། །ཧྲཱིཿསྐུ་གསུམ་ངོ་བོ་ༀ་ཨཱཿཧཱུྃ། །འོད་ཞུ་ཟག་མེད་བདུད་རྩི་མཆོག །ར་ས་ཡ་ནའི་མཆོད་པ་ཆེ། །འདོད་ཡོན་ཡེ་ཤེས་ལྔ་དང་ལྡན། །ཐབས་ཤེས་ཟུང་

[Full Size]

འཇུག་ཚོགས་འཁོར་ལོ། །མཆོད་ཡུལ་དགྱེས་པ་སྐྱེད་བྱེད་གྱུར། །ཚོགས་ལ་སྤྱན་དྲངས་པ་ནི། ཧཱུྃ། འོག་མིན་མཁའ་སྤྱོད་བདེ་ཆེན་ཕོ་བྲང་ནས། །མཚོ་སྐྱེས་རང་བྱུང་རྒྱལ་བ་རྡོ་རྗེ་འཆང་། །འཁོར་དུ་གྲུབ་པའི་རིག་འཛིན་བྱེ་བ་འབུམ། །འདིར་གཤེགས་ག་ཎ་ཙཀྲའི་མཆོད་པ་བཞེས། །གསང་བའི་དགྱེས་སྡེ་ཡེ་ཤེས་ཌཱ་ཀིའི་གཙོ། །མནྡ་ར་བ་ཡི་དམ་དཀྱིལ་འཁོར་ལྷ། །གནས་གསུམ་དཔའ་བོ་རྣལ་འབྱོར་མ་རྣམས་ཀྱང་། །འདིར་གཤེགས་དམ་རྫས་ཚོགས་ཀྱི་མཆོད་པ་བཞེས། །མ་མགོན་ལྕམ་དྲལ་དཔལ་ལྡན་ཞིང་སྐྱོང་དབང་། །སྐྱེས་བུ་རྡོར་ལེགས་བཀའ་སྲུང་ཆོས་སྐྱོང་བ། །དྲེགས་པ་ཕོ་རྒྱུད་མོ་རྒྱུད་འཁོར་བཅས་རྣམས། གནས་འདིར་སྐུ་བསྐྱོད་ཚོགས་གཏོར་འབུལ་གྱི་བཞེས། །ཨོ་ཤྲཱི་མཱན་གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་ག་ཎ་ཙཀྲ་ལ་ཁཱ་ཧི། པཉྩ་ཨ་མྲི་ཏ་ལ་ཁཱ་ཧི། །དེ་ནས་ཚོགས་ཕུད་ཕུལ་ལ། བར་པ་དང་། ཐ་མ་རྣམས་ཀྱང་རིམ་པར་སྤྲོས་ཤིང་འབུལ། སྐོང་བཤགས་ནི། ཧཱུྃ། རང་བཞིན་རྣམ་དག་སྐྱེ་མེད་དག་པའི་ཀློང་། །ལྷུན་གྲུབ་སྣང་བའི་རོལ་པ་ཧེ་རུ་ཀའི། །གནས་ཡུལ་དུར་ཁྲོད་རབ་འཇིགས་གཞལ་ཡས་འདིར། །ཚོགས་རྗེ་ཚོགས་བདག་པདྨ་ཐོད་ཕྲེང་རྩལ། །བཀའ་གཏེར་བརྒྱུད་པའི་སྐྱེས་མཆོག་བླ་རབས་ཕྲེང་། །གྲུབ་བའི་སར་གནས་རྗེ་འབངས་ཉི་ཤུ་ལྔ། །ཐེག་པ་རིམ་དགུར་འདུས་པའི་ཞི་དང་ཁྲོ། །རྨད་བྱུང་དམ་ཚིག་རྫས་ཀྱིས་ཐུགས་

[Full Size]

དམ་བསྐང་། །རྡོ་རྗེ་བེར་ཅན་རང་བྱུང་སྲིད་པའི་རྒྱལ། །ཀུན་དགའ་གཞོན་ནུ་བཛྲ་སཱ་དྷུ་སོགས། །མཐུ་སྟོབས་རྩལ་ལྡན་དམ་ཅན་སྲུང་མ་རྣམས། །གཏོར་ཚོགས་བརྟེན་པའི་རྫས་ཀྱིས་ཐུགས་དམ་བསྐང་། །ཧོཿགདོད་ནས་དྲི་བྲལ་དུས་གསུམ་ཀུན་མཁྱེན་ཞིང་། །ཆོས་ཀྱི་དབྱིངས་ཉིད་སྤྲོས་མཚན་ལས་འདས་ཀྱང་། །བདག་སོགས་ཉོན་མོངས་མ་རིག་འཁྲུལ་དབང་གིས། །ནོངས་པར་གྱུར་རྣམས་བཟོད་བཞེས་ཚངས་པར་སྩོལ། །བསྐང་དང་བཤགས་བྱ་རང་བཞིན་དམིགས་མེད་ངང་། །དོན་དམ་སྤྲོས་བྲལ་ཆོས་ཉིད་ཀློང་དུ་བསྐང་། །ༀ་བཛྲ་ས་ཏྭ་ས་མ་ཡ་སོགས་ཡི་གེ་བརྒྱ་པ་བརྗོད། བསྒྲལ་མཆོད་ནི། ཧཱུྃ། ཀུན་རྟོག་དུག་ལྔས་བསླད་པའི་ངར་འཛིན་འཕྲུལ། །བར་ཆད་བདུད་བཞི་ལོག་འདྲེན་དགྲ་བགེགས་རྣམས། །སྟོང་ཉིད་སྙིང་རྗེའི་མཚོན་གྱིས་བསྒྲལ་བྱས་ཏེ། །ཕུང་ཁམས་སྐྱེ་མཆེད་ཆོས་དབྱིངས་ངང་དུ་རོལ། །ཅེས་ཕུལ་ལོ། །དེ་ནས་ཚོགས་ཀྱི་དངོས་གྲུབ་ལ་སྤྱོད་ཅིང་། ལྷག་གཏོར་ནི། ཧཱུྃ། དཀྱིལ་འཁོར་གཉེན་པོའི་མུ་རན་སྐྱོང་བ་ཡི། །བསྟན་སྲུང་མཁའ་འགྲོ་ཚོགས་ཀྱིས་ལྷག་རོལ་རྣམས། །གཏོར་མར་བཞེས་ལ་རྣལ་འབྱོར་སྲུང་ཞིང་སྐྱོབ། །ཕྲིན་ལས་ཐོགས་མེད་འགྲུབ་པའི་སྟོངས་གྲོགས་མཛོད། །ཨུཥྩི་ཊ་བ་ལིཾ་ཏ་ཁཱ་ཧི་ཁཱ་ཧི། ཞེས་ཕུལ། བཀའི་ཆད་ཐོ་དང་བརྟན་མ་སྐྱོང་བ་ནི། ཧཱུྃ། སྔོན་འདས་བར་དང་ཐ་མའི་

[Full Size]

དུས་ཚིགས་ལ། །ཆེ་མཆོག་དྲག་པོས་བཀའ་བསྒོས་ཐ་ཚིག་ཅན། །ཡེ་ཤེས་ལས་དང་འཇིག་རྟེན་དྲེགས་བྱེད་རྣམས། །དམ་རྫས་བདུད་རྩི་འབར་བ་འདི་བཞེས་ལ། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །བོད་སྐྱོང་མ་ཡམས་བརྟན་མ་བཅུ་གཉིས་ཀྱང་། །སྔོན་ཚེ་ཞལ་བཞེས་རྗེས་དགོངས་གཏོར་མ་དང་། །བཤལ་ཆུ་བཞེས་ལ་རྐྱེན་ངན་བར་ཆད་ཟློག །ཅེས་ཕུལ། དེ་ནས་རྗེས་རིམ་བྱིན་རླབས་བསྡུ་པ་ནི། ཧྲཱིཿགཙོ་མཆོག་རྡོ་རྗེ་འཛིན་རྒྱལ་དགོངས་སུ་གསོལ། །བདག་རྒྱུད་བྱིན་རློབས་དབང་དང་དངོས་གྲུབ་སྩོལ། །གསོལ་བཏབ་མོད་ལ་འཁོར་རྣམས་བླ་མར་ཐིམ། །སྐུ་ལས་འོད་ཟེར་དཀར་དམར་མཐིང་ལྗང་འཕྲོས། །རང་གི་གནས་བཞིར་ཐིམ་པས་དབང་བཞི་ཐོབ། །རྒྱུད་བཞི་སྨིན་ཅིང་སྐུ་བཞི་མངོན་དུ་གྱུར། །སླར་ཡང་དགྱེས་པ་དང་བཅས་འོད་ཞུ་ནས། །དབྱེར་མེད་ངང་དུ་མ་བཅོས་ལྷུག་པར་བཞག །གནས་ལུགས་ཀྱི་ངོ་བོ་བསྐྱངས་ལ། མཐར་བསྔོ་སྨོན་ནི། དགེ་དེས་རྒྱུ་དྲུག་འཁོར་བའི་སེམས་ཅན་རྣམས། །རྣམ་གྲོལ་བྱང་ཆུབ་ལམ་བཟང་ཐོབ་ཕྱིར་བསྔོ། །བཀྲ་ཤིས་མཆོག་ཐུན་དངོས་གྲུབ་ཡོངས་འདུའི་ལྗོན། །འབད་མེད་བསམ་དོན་འབྲས་སྨིན་བདེ་ལེགས་ཤོག །ཅེས་པའང་སི་ཏུ་པདྨ་ཉིན་བྱེད་དབང་པོས་རྗེའི་དབོན་མོ་ཆོས་མཛད་མ་ཀརྨ་དྷརྨ་ཏཱ་རེས་བསྐུལ་ངོར་བཀོད་པ་དགེའོ། །མངྒ་ལཾ།། །།

[Full Size]

༈ ཆོས་ཀུན་གདོད་ནས་སྐྱེ་འགག་གནས་བྲལ་ངང་། །རང་ཉིད་ལྷར་གསལ་སྤྱི་གཙུག་པདྨ་དཀར། །གེ་སར་རབ་རྒྱས་འདབ་སྟོང་ལྡན་པའི་སྟེང་། །ཉི་ཟླའི་དཀྱིལ་འཁོར་བཀྲ་གསལ་འོད་འཚེར་དབུས། །ཧྲཱིཿདམར་འཕྲོ་འདུས་རྒྱལ་ཀུན་འདུས་པའི་མགོན། །སངས་རྒྱས་པདྨ་འབྱུང་གནས་དཀར་དམར་མདངས། །ཞལ་གཅིག་ཕྱག་གཉིས་རྡོ་རྗེ་ཐོད་བུམ་བསྣམས། །ཁ་ཊྭཾ་དཀུར་བརྟེན་ཟ་འོག་ཕོད་ཀ་དང་། །ཆོས་གོས་རྣམ་གསུམ་པད་ཞྭ་སྒྲོ་དར་མཛེས། །རིན་ཆེན་རྒྱན་སྤྲས་ཞབས་གཉིས་རྡོར་སྐྱིལ་བཞུགས། །ཡེ་ཤེས་ལྔ་ལྡན་ཐིག་ལེ་ཐིག་ཕྲན་དབུས། །སྣང་ལ་རང་བཞིན་མེད་པ་འཇའ་ཚོན་ལྟར། །གསལ་བའི་གནས་གསུམ་འབྲུ་གསུམ་ཡི་གེས་མཚན། །དེ་ལས་འོད་འཕྲོས་པདྨ་འོད་ཞིང་ནས། །བསྒོམ་པ་དང་འདྲའི་ལྷ་ཚོགས་སྤྱན་དྲངས་ཏེ། །དམ་ཚིག་ཡེ་ཤེས་གཉིས་མེད་གཅིག་འདྲེས་གྱུར། །སྤྲུལ་པའི་ལྷ་མོས་ཕྱི་ནང་གསང་བ་དང་། །ཡང་གསང་དེ་ཁོ་ན་ཡི་མཆོད་པས་མཆོད། །ཉམས་གྱུར་ཉེས་བཤགས་དམ་བསྐང་དངོས་གྲུབ་སྩོལ། །ཐུགས་ཀར་ཟླ་སྟེང་རྡོ་རྗེ་རྩེ་ལྔ་པའི། །ལྟེ་བར་ཧྲཱིཿམཐར་སྔགས་ཕྲེང་གཡས་སུ་འཁོར། །དུས་གསུམ་སངས་རྒྱས་རྒྱུད་སྡེ་རབ་འབྱམས་དང་། །ཡེ་ཤེས་ཆོས་སྐྱོང་རིག་འཛིན་ཌཱ་ཀིའི་ཚོགས། །ཀུན་གྱི་

[Full Size]

ཐུགས་རྗེ་འོད་ཟེར་ལྔ་ལྡན་ཚུལ། །བསྡུས་ནས་སྔགས་ཀྱི་འཁོར་ལོ་ལ་ཐིམ་གྱུར། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཇི་སྲིད་མི་སྐྱོའི་བར་དུ་བཟླ། སླར་ཡང་ལྷ་སྐུ་སྟོང་གསལ་དེ་ཡི་ངང་། །ཨོ་རྒྱན་ཆེན་པོའི་གསང་གསུམ་ཡེ་ཤེས་ཀྱི། །རྡོ་རྗེ་གསུམ་གྱི་ངོ་བོ་འབྲུ་གསུམ་ལས། །འོད་ཟེར་དཀར་དམར་མཐིང་འཕྲོས་འོད་དུ་ཞུ། །སྒོ་གསུམ་ལ་ཐིམ་དུག་གསུམ་རྣམ་རྟོག་ཞི། །སྐུ་གསུམ་མངོན་གྱུར་རང་རིག་ཡེ་ཤེས་ཆེའི། །རྒྱས་གདབ་དུས་གསུམ་སྤྲོས་པའི་ཆོས་ཐམས་ཅད། །ཆུ་ལ་ཆུ་བཞག་ཇི་བཞིན་སེམས་ངོ་བོ། །གང་ཤར་མ་བཅོས་སོ་མའི་གནས་ལུགས་སྐྱོང་། །ཅི་གནས་སུ་ཉམས་ལེན་ངོ་བོ་བསྐྱང་། དགེ་བ་འདིས་མཚོན་དུས་གསུམ་བསགས་ཡོད་ཀུན། །འགྲོ་རྣམས་འཆི་མེད་པདྨ་འབྱུང་གནས་ཀྱི། །ཐུགས་རྗེས་ཡང་དག་ལམ་འགོད་སྨིན་གྲོལ་གྱིས། །ལྟ་བ་འཁྲུལ་མེད་ཉིད་དུ་རྟོགས་པ་དང་། །མཐར་ཐུག་བླ་མེད་གོ་འཕང་ཐོབ་ཕྱིར་བསྔོ། །ཅེས་པའང་དགེ་སློང་རྟོགས་ལྡན་རབ་འབྱོར་ནས་བསྐུལ་བཞིན་སྤེལ། པདྨ་འབྱུང་གནས་ཐུགས་རྗེའི་འོད། །སྣང་བས་དེང་འདིར་བཀྲ་ཤིས་པའི། །བདེ་ལེགས་དཔལ་དང་འབྱོར་བ་ཡིས། །ཀུན་ནས་ཀུན་ཏུ་དགེ་གྱུར་ཅིག །ཅེས་པའང་སི་ཏུ་པ་པདྨ་ཉིན་བྱེད་དབང་པོས་སྤེལ་བ་དགེ། །།

དམ་ལྡན་རྡོ་རྗེའི་སློབ་མ་རྣམས་ལ་དོན་གྱི་བྱིན་རླབས་བཀའ་བསྒོ་ནི།

[Full Size]

དམ་ལྡན་རྡོ་རྗེའི་སློབ་མ་རྣམས་ལ་དོན་གྱི་བྱིན་རླབས་བཀའ་བསྒོ་ནི། སྔོན་ཚེ་རྡོ་རྗེ་ཕག་མོས་གུ་རུ་རིན་པོ་ཆེའི་ཐུགས་རྒྱུད་བསྐུལ་བའི་གསོལ་འདེབས་ཚིག་བདུན་མར་གྲགས་པ་དེར་འབྲེལ་གཏེར་གཞུང་རྡོ་རྗེའི་གསུང་གསང་བླ་ན་མེད་པའི་བྱིན་འབེབས་ཏིང་འཛིན་གྱི་དབང་བཞི་བསྐུར་བ་བཅས་ཤིན་ཏུ་འཐུས་ཁྱབ་ཆེ་བས་ཐུགས་རྗེ་མཆོག་ཏུ་གྱུར་ཅིང་། གཞན་དང་ཕལ་མོ་ཆེར་ཉེར་འཚེ་ལས་སྲུང་ཕྱིར་བཀའ་བསྒོའི་རིམ་པ་སྤྲོ་ན། ན་མོ། ཆེ་བའི་ཆེ་མཆོག་པདྨ་ཐོད་ཕྲེང་རྩལ། །དུས་གསུམ་ཁྲོ་རྒྱལ་སྟོབས་འདུས་ཧེ་རུ་ཀའི། །བདེན་པའི་བྱིན་རླབས་མཐུ་ཡིས་བསྲུང་བྱ་ལ། །གཉིས་འཛིན་སྣང་བའི་ལོག་འདྲེན་གདོན་བགེགས་རྣམས། །དམ་ཚིག་གཉེན་ལས་མ་འདའ་ཕྱིར་དེངས་ཤིག །དེ་བས་རྡོ་རྗེའི་ཆར་གྱིས་བརླག་ཏ་རེ། །སུམྦྷ་ནི་སོགས་ཧཱུྃ་བཞིའི་སྔགས་ཀྱིས་བགེགས་བསྐྲད་ཡུངས་ཀར་བྲབ་ལ། བྱིན་གྱིས་བརླབ་པ་ནི། སྤྲོ་ན་གསང་གསུམ་གྱི་རྟེན་སྤྱི་བོར་བཞག་པ་བཅས། ༀ་ཨཱཿཧཱུྃ། སྐུ་གསུམ་ཡེ་ཤེས་ལྔ་བདག་པདྨ་འབྱུང་། །ཐུགས་རྗེའི་མཐུ་སྟོབས་སྐལ་ལྡན་རྒྱུད་སྨིན་ནས། །སྒོ་གསུམ་རྡོ་རྗེ་གསུམ་དང་དབྱེར་མེད་པར། །རྒྱས་གདབ་མི་འགྱུར་གཞོམ་ཞིག་བྲལ་བའི་ངང་། །གདོད་ནས་རྟག་པ་དམ་པའི་གོ་འཕང་ཆེ། །ཆོས་དབྱིངས་སྐྱེ་མེད་ཀློང་དུ་ས་མ་དྷི། ཅུང་ཟད་མཉམ་པར་བཞག །མཐར། ཛྙཱ་ན་བཛྲ་རཀྵ་རཀྵ་ཧཱུྃ། གིས་སླར་ཡང་བསྲུང་བའི་གོ་བགོ་ཞིང་བརྟན་པར་བྱས་སོ། །ཞེས་པའང་རྒྱལ་དབང་རིན་པོ་ཆེའི་བཀའ་སྩལ་ལྟར་སི་ཏུ་པདྨ་ཉིན་བྱེད་དབང་པོས་ཕུལ་བ་མངྒ་ལམ།། །།

ཨོ་རྒྱན་རིན་པོ་ཆེ་རྗེ་འབངས་ཉེར་ལྔའི་ལས་བྱང་དངོས་གྲུབ་སྤྲིན་ཕྲེང་བྱིན་རླབས་ཆར་འབེབས།

[Full Size]

ཨོ་རྒྱན་རིན་པོ་ཆེ་རྗེ་འབངས་ཉེར་ལྔའི་ལས་བྱང་དངོས་གྲུབ་སྤྲིན་ཕྲེང་བྱིན་རླབས་ཆར་འབེབས་བཞུགས།

[Full Size]

ན་མོ་པྲ་ཝཱ་ཀ་ར་ཡ། འདིར་གུ་རུ་རིན་པོ་ཆེ་རྗེ་འབངས་ཉེར་ལྔ་བསྙེན་ཅིང་བསྒྲུབ་པར་མོས་པའི་གང་ཟག་སྐལ་ལྡན་དམ་ཚིག་ཅན་གྱི་རྣལ་འབྱོར་པས། དབེན་པའི་གནས་སུ་རྟེན་བཤམས་པའི་དྲུང་དུ་ཕྱི་ནང་གི་མཆོད་པ་རྣམས་དང་། ག་ཎ་ཙཀྲའི་ཡོ་བྱད་ལོངས་སྤྱོད་ལ་སོགས་པ་ཚར་དུ་དངར་བ་གཙང་ཞིང་བཟང་བར་བཤམས་ལ། དེ་ཡང་ལས་རིམ་དོན་ཚན་ཉེར་ལྔ་བསྟན་པ་ལས། དང་པོ་སྐྱབས་སུ་འགྲོ་བ་ནི། སྐྱབས་ཡུལ་རྣམས་གསལ་གདབ་ལ། ན་མོ། བདེ་གཤེགས་འདུས་པ་དཀྱིལ་འཁོར་གཙོ། །ཁྱབ་བདག་རྒྱལ་བ་ཡེ་སངས་རྒྱས། །ཀུན་བཟང་པདྨ་ཐོད་ཕྲེང་ལ། །བདག་སོགས་འགྲོ་རྣམས་སྐྱབས་སུ་མཆི། །གཉིས་པ་སེམས་བསྐྱེད་པ། དེང་ནས་བླ་མེད་བྱང་ཆུབ་བར། །མཐའ་ཀླས་སེམས་ཅན་ཀུན་དོན་དུ། །གཞན་ཕན་ཕྲིན་ལས་རླབས་ཆེན་གྱིས། །འཁོར་བ་དོང་སྤྲུག་

[Full Size]

སེམས་བསྐྱེད་དོ། །གསུམ་པ་སྔོན་འགྲོ་གཏོར་མ་བྲན་ལ། ཨ་མྲྀ་ཏས་བསངས་། སྭ་བྷཱ་ཝས་སྦྱངས། བྷྲཱུཾ་ལས་རིན་ཆེན་གཏོར་སྣོད་དུ། །འབྲུ་གསུམ་འོད་ཞུ་འདོད་ཡོན་རྣམས། །ཟག་མེད་བདེ་བ་བསྐྱེད་པར་གྱུར། །སྣང་ཞིང་སྲིད་པའི་འབྱུང་པོ་དང་། །བགེགས་རིགས་ལན་ཆགས་རྣམས་ལ་བསྔོ། །ཚིམ་ཞིང་དགྱེས་ནས་གནོད་སེམས་སྤོང་། །བལྟ་བར་མི་དབང་ལོག་འདྲེན་རྣམས། །དེངས་ཤིག་གལ་ཏེ་བཀའ་འདས་ན། །དབང་ཆེན་འབར་བའི་བདེན་སྟོབས་ཀྱིས། །རྡུལ་ཕྲན་བཞིན་དུ་བརླག་ཏ་རེ། །ༀ་སུམ་བྷ་ནི་སོགས་ཧཱུྃ་བཞིའི་སྔགས་བརྗོད། གུ་གུལ་བདུག །ཡུངས་ཀར་བྲབ་ལ་བགེགས་བསྐྲད། བཞི་པ་མཚམས་གཅོད་སྲུང་འཁོར་ནི། ཧྲཱིཿདངོས་ཀུན་ཀ་དག་ཡེ་རྫོགས་ཀློང་། །རང་གསལ་འཛིན་མེད་མཚམས་

[Full Size]

བཅད་དོ། །སྟེང་འོག་བར་མཚམས་ཡེ་ཤེས་ཀྱི། །མེ་རི་ལྔ་ལྡན་སྲུང་འཁོར་གྱུར། །དྷརྨ་དྷཱ་ཏུ་ཛྙཱ་ན་པཉྩ་བཛྲ་ཙཀྲ་རཀྵ་རཀྵ་ཧཱུྃ་ཧཱུྃ། ལྔ་པ་མཆོད་རྫས་བྱིན་གྱིས་བརླབ་པ་ནི། འདིར་བཤམས་ཕྱི་ནང་གསང་བའི་རྫས། །སྨན་གཏོར་རཀྟ་ལ་སོགས་པ། །བླ་མེད་མཆོག་གི་མཆོད་པ་རྣམས། །ཡེ་ཤེས་བདུད་རྩིའི་རྒྱ་མཚོར་གྱུར། །ༀ་ཨཱཿཧཱུྃ་ཛྙཱ་ན་པཉྩ་ཨ་མྲྀ་ཏ། མ་ཧཱ་བ་ལིང་ཏ། མ་ཧཱ་རཀྟ་ཧཱུྃ་ཧྲཱིཿཋཿསྔགས་ལན་གསུམ་བརྗོད་ཅིང་མཆོད་རྫས་རྣམས་ལ་བདུད་རྩི་འཐོར། ༀ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱ་དྱཾ་སོགས་ནས། ཤབྡའི་བར་བརྗོད། དེ་ནས་དྲུག་པ་དངོས་གཞི་བདག་མདུན་དབྱེར་མེད་གཅིག་ཆར་དུ་བསྐྱེད་པའི་རིམ་པ་ནི། ༀ་ཨཱཿཧཱུྃ། བློ་འདས་བརྗོད་མེད་དེ་བཞིན་ཉིད་ཀྱི་ངང་། །སྟོང་དང་སྙིང་རྗེ་ཟུང་འཇུག་རྩལ་མདངས་ལས། །རིག་པའི་ངོ་བོ་ཧཱུྃ་ཡིག་མཐིང་ཀ་ཤར། །ཡོངས་གྱུར་བདག་ཉིད་ཆེན་པོ་པདྨ་འབྱུང་། །རྒྱལ་ཀུན་འདུས་པ་མཚོ་སྐྱེས་རྡོ་རྗེ་འཆང་། །མཚན་དང་དཔེ་བྱད་ཡོངས་སུ་རྫོགས་པའི་སྐུ། །དཀར་གསལ་ཟླ་མདོག་ཞི་འཛུམ་སྤྱན་གསུམ་ཅན། །པད་ཞྭ་རྒོད་ལྡེམ་རིན་ཆེན་ཉི་ཟླས་བརྒྱན། །ཕྱག་གཡས་རྡོ་རྗེ་གཡོན་པས་ཀ་པཱ་ལ། །བདུད་རྩིས་བཀང་དབུས་འཆི་མེད་ཚེ་བུམ་འཛིན། །གྲུ་མོར་ཁ་ཊྭཱཾ་ཌཱ་རུ་དྲིལ་ཆུང་བརྒྱན། །ཡིད་བཞིན་ནོར་དང་ཛམ་བུ་ཆུ་གསེར་གྱི། །སྙན་ཆ་མགུལ་རྒྱན་ལ་སོགས་དུ་མས་སྤྲས། །ཟབ་ཆེན་དབང་སྔོན་ཕོད་ཀ་ཐུན་མཚམས་ཀྱི། །འཆར་ཀའི་མདོག་མཚུངས་ཆོས་གོས་རྣམ་གསུམ་ལྡན། །ལྷ་རྫས་རིན་

[Full Size]

ཐང་བྲལ་བའི་བེར་གྱིས་བཀླུབས། །ཞབས་གཉིས་རྡོར་སྐྱིལ་ཟླ་ཉི་པདྨའི་སྟེང་། །ཡེ་ཤེས་ལྔ་ལྡན་འོད་ཀྱི་གུར་ཁང་དབུས། །སྣང་ཞིང་སྟོང་ལ་སྟོང་བཞིན་སྣང་བ་ཡི། །གནས་གསུམ་ༀ་ཨཱཿཧཱུྃ་གིས་མཚན་པར་གྱུར། །བདེར་གཤེགས་ཞིང་ཁམས་ཡོན་ཏན་སྐུར་རྫོགས་ཤིང་། །སྐུ་ཡི་བཀོད་པས་རབ་འབྱམས་དཀྱིལ་འཁོར་ཁྱབ། །སྒྱུ་འཕྲུལ་རྡོ་རྗེའི་གར་གྱི་རོལ་རྩེད་ལས། །ངོ་མཚར་སྤྲུལ་པ་སྣ་ཚོགས་ཅིར་ཡང་སྟོན། །འཇམ་དཔལ་སྐུ་ཡི་བཀའ་བབས་རིག་འཛིན་ཆེ། །སངས་རྒྱས་ཡེ་ཤེས་ཉི་ཟླ་གདན་དུ་བཏིང་། །དབང་ཆེན་གསུང་གི་བཀའ་བབས་གྲུབ་པའི་དབང་། །རྒྱལ་བ་མཆོག་དབྱངས་སྤྱི་བོར་རྟ་སྐད་འཚེར། །ཡང་དག་ཐུགས་ཀྱི་བཀའ་བབས་དགེ་སློང་མཆོག །ནམ་མཁའི་སྙིང་པོ་ཉི་མའི་ཟེར་ལ་ཆིབས། །ཡོན་ཏན་བདུད་རྩིའི་བཀའ་བབས་རྡོ་རྗེ་འཛིན། །ཛྙཱ་ན་ཀུ་མ་བྲག་ལས་བདུད་རྩི་འབྱིན། །ཕྲིན་ལས་རྡོ་རྗེ་ཕུར་པའི་བཀའ་བབས་གཙོ། །ཡེ་ཤེས་མཚོ་རྒྱལ་བྲག་ལ་ཕུར་པ་འདེབས། །བླ་མེད་གསང་བའི་བཀའ་བབས་ཧེ་རུ་ཀ། དཔལ་གྱི་ཡེ་ཤེས་མ་སྲིན་ལས་ལ་བཀོལ། །དྲེགས་པ་ཀུན་འདུལ་བཀའ་བབས་རྣལ་འབྱོར་ཆེ། །དཔལ་གྱི་སིངྒེ་དྲེགས་པ་ཕོ་ཉར་འགྱེད། །སྟོབས་ལྡན་དྲག་སྔགས་བཀའ་བབས་འཇིག་རྟེན་མིག །བཻ་རོ་ཙ་ན་སྡེ་བརྒྱད་བྲན་དུ་ཁོལ། །བདེ་གཤེགས་འདུས་པའི་འཀའ་བབས་ཆོས་ཀྱི་རྒྱལ། །ཁྲི་སྲོང་ལྡེའུ་བཙན་གཞན་སྣང་ཟིལ་གྱིས་གནོན། །བཀའ་བབས་ཐུགས་ཀྱི་

[Full Size]

སྲས་དགུ་ལྷམ་མེར་གསལ། །གྲུབ་པའི་སར་གནས་གྲུབ་པ་ཡོངས་ཀྱི་གཙོ། །རྣལ་འབྱོར་དབང་ཕྱུག་རིག་སྔགས་འཆང་རྣམས་ནི། །རྡོ་རྗེ་བདུད་འཇོམས་མཁའ་ལ་ཐོགས་མེད་ལྡིང་། །ཡེ་ཤེས་དབྱངས་ཅན་མཁའ་སྤྱོད་གནས་རྣམས་བསྒྲོད། །སོག་པོ་ལྷ་དཔལ་ལྕེ་སྤྱང་ཕྱག་གིས་འཛིན། །སྣ་ནམ་ཡེ་ཤེས་མཁའ་ལ་བྱ་ལྟར་འཕུར། །གཡུ་སྒྲ་སྙིང་པོ་གསེར་གྱི་རྡོ་རྗེར་སྤྲུལ། །དཔལ་གྱི་དབང་ཕྱུག་ཕུར་པ་གདེངས་ཚད་སྒྲོལ། །ཤུད་བུ་དཔལ་སེང་ཆུ་བོ་གྱེན་དུ་བཟློག །ལྡན་མ་རྩེ་མང་མི་བརྗེད་གཟུངས་རྣམས་ཐོབ། །ཀ་བ་དཔལ་བརྩེགས་གཞན་རྒྱུད་ས་ལེར་མཁྱེན། །རྒྱལ་བ་བློ་གྲོས་རོ་ལངས་གསེར་དུ་བསྒྱུར། །ཁྱེའུ་ཆུང་ལོ་ཙཱ་ནམ་མཁའི་བྱ་རྣམས་འཛིན། །དྲན་པ་ནམ་མཁའ་བྱང་ནས་གཡག་རྒོད་འགུགས། །འོ་བྲན་དབང་ཕྱུག་ཆུ་ལ་ཉ་ལྟར་འཕྱོ། །རྨ་ཐོག་རིན་ཆེན་ཕ་ཝང་ཟན་ལྟར་གསོལ། །དཔལ་གྱི་རྡོ་རྗེ་རི་བྲག་ཐོགས་མེད་རྒྱུ། །ལང་གྲོ་དཀོན་མཆོག་ཐོག་ཆེན་མདའ་ལྟར་འཕེན། །རྒྱལ་བ་བྱང་ཆུབ་མཁའ་ལ་སྐྱིལ་ཀྲུང་བཞུགས། །གཞན་ཡང་རིག་འཛིན་དཔའ་བོ་ཌཱ་ཀི་དང་། །གཏེར་ཆེན་བརྒྱ་རྩ་གཏེར་ཕྲན་སྟོང་རྩ་གཉིས། །ལུང་ཟིན་སྐྱེས་མཆོག་རྒྱ་བོད་གྲུབ་ཆེན་ཚོགས། །ཡི་དམ་རྒྱལ་བའི་དཀྱིལ་འཁོར་ལྷ་རབ་འབྱམས། །ཆོས་ཀྱི་སྲུང་མ་དམ་ཅན་རྒྱ་མཚོ་རྣམས། །འཇའ་ཟེར་འོད་ཀློང་བཀྲ་གསལ་སྣང་བར་གྱུར། །གཙོ་འཁོར་ཀུན་གྱི་གནས་གསུམ་འབྲུ་གསུམ་ལས། །འོད་འཕྲོས་འོག་མིན་མཁའ་སྤྱོད་བདེ་

[Full Size]

ཆེན་ཞིང་། །དཔལ་རི་པདྨ་འོད་ཀྱི་ཕོ་བྲང་ནས། །ཨོ་རྒྱན་རྗེ་འབངས་སངས་རྒྱས་བྱང་སེམས་ཚོགས། །སྤྲུལ་དང་ཡང་སྤྲུལ་དཔག་མེད་འཁོར་བཅས་རྣམས། །མདུན་གྱི་ནམ་མཁར་སྤྱན་དྲངས་གཤེགས་སུ་གསོལ། །དེ་ནས་བདུན་པ་སྤྱན་དྲངས་པ། གཏེར་གཞུང་རྡོ་རྗེའི་གསུང་ལས་བྱུང་བའི་ཚིག་བདུན་གསོལ་འདེབས་ནི། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་བསྒྲུབ་ཀྱི། །བྱིན་གྱིས་བརླབ་ཕྱིར་གཤེགས་སུ་གསོལ། །ལན་གསུམ་དང་། གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿཛཿསརྦ་སིདྡྷི་ཕ་ལ་ཧཱུྃ་ཨཱཿཧྲཱི་མ་ཧ་རི་ནི་ས་རཱ་ཙ་ཧྲི་ཡ་ཙིཏྟ་ཧྲིཾ་ཧྲིཾ་ཛཿཛཿཞེས་ཛབ་ལན་བདུན་ནམ་གསུམ་བརྗོད་པས་བྱིན་ཕབ། དམ་ཚིག་ཡེ་ཤེས་གཉིས་མེད་དུ་གྱུར་པར་མོས་ལ། བརྒྱད་པ་བཞུགས་སུ་གསོལ་བ་ནི། ཧཱུྃ། རྒྱལ་བ་རབ་འབྱམས་ཐུགས་རྗེ་ཅན། །བདག་སོགས་སེམས་ཅན་ཀུན་དོན་དུ། །བརྩེ་བ་ཆེན་པོས་རྗེས་དགོངས་ལ། །གནས་འདི་ཉིད་དུ་བརྟན་པར་བཞུགས། །པདྨ་ཀ་མ་ལཱ་ཡ་སྟྭཾ། དགུ་པ་ཕྱག་འཚལ་བ་ནི། ཧཱུྃ། སྐུ་གསུམ་ཡོན་ཏན་ཡོངས་

[Full Size]

རྫོགས་པ། །མཚོ་སྐྱེས་རྡོ་རྗེ་འཆང་ཆེན་པོ། །རྗེ་འབངས་སྤྲུལ་པར་བཅས་པ་ལ། །དད་མོས་གདུང་བས་གུས་ཕྱག་འཚལ། །ན་མོ་པུ་རུ་ཥྱ་ཧོཿབཅུ་པ་ཕྱི་མཆོད་འབུལ་བ། ༀ། རང་སྣང་རྩལ་ལས་མཆོད་པའི་ལྷ་མོ་ནི། །མཆོད་ཡོན་ཞབས་བསིལ་མེ་ཏོག་བདུག་སྤོས་མ། །སྣང་གསལ་དྲི་ཞལ་རོལ་མོ་གཟུགས་སྒྲ་དྲི། །རོ་དང་རེག་ཆོས་རྣམ་དག་ཕྱིའི་མཆོད་པ། །ཐུགས་རྗེའི་དབྱིངས་ནས་བརྩེར་དགོངས་བཞེས་སུ་གསོལ། །མཆོག་ཐུན་དངོས་གྲུབ་མྱུར་སྩོལ་བྱིན་གྱིས་རློབས། །ༀ་བཛྲ་ཨརྒྷཾ་ཨཱཿཧཱུྃ། དེ་བཞིན། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤབྡ་ཨཱཿཧཱུྃ། བར་དང་། རུ་པ། ཤབྡ། གནྡྷེ། ར་ས། སྤཪྴེ། དྷཱརྨ་དྷཱ་ཏུ་སརྦ་པཱུ་ཛ་ཨཱཿཧཱུྃ། བཅུ་གཅིག་པ་ནང་མཆོད་འབུལ་བ། ཨཱཿརྩ་བརྒྱད་ཡན་ལག་སྟོང་སྦྱར་འཆི་མེད་བཅུད། །རང་བྱུང་བདུད་རྩི་ར་ས་ཡ་ན་དང་། །ཚེ་དང་གལ་གྱི་རྨད་བྱུང་བརྗིད་ལྡན་པའི། །དམ་ཚིག་རྫས་མཆོག་མ་ཧཱ་བ་ལིཾ་ཏ། །རྒྱུ་དྲུག་འཁོར་བའི་དུག་ལྔ་ཡེ་ཤེས་ལྔར། །བསྒྲལ་བའི་དམར་ཆེན་རཀྟ་མཆོད་པར་འབུལ། །མ་ཧཱ་པཉྩ་ཨ་མྲྀ་ཏ། མ་ཧཱ་བ་ལིངྟ། མ་ཧཱ་རཀྟ་པཱུ་ཛ་ཁཱ་ཧི། བཅུ་གཉིས་པ་གསང་བའི་མཆོད་པ། ཧཱུྃ། སྣང་བ་ཐབས་ཀྱི་ཧེ་རུ་ཀ། སྟོང་པ་ཤེས་རབ་ཡུམ་དང་སྦྱོར། །གསང་བ་བླ་མེད་མཆོད་པ་འདི། །བདེ་ཆེན་བདེ་བའི་ངང་དུ་རོལ། །མ་ཧཱ་སུ་ཁ་པཱུ་ཛ་ཧོ། བཅུ་གསུམ་པ་དེ་བཞིན་ཉིད་མཆོད་ནི། ཧོ། མཆོད་བྱ་མཆོད་བྱེད་ཐམས་ཅད་ཀྱང་། །

[Full Size]

འཛིན་མེད་མ་བཅོས་ཁྱབ་གདལ་ཀློང་། །རང་བྱུང་རང་གྲོལ་ཆེན་པོའི་དབྱིངས། །འཁོར་གསུམ་དག་པའི་མཆོད་པ་འབུལ། །དྷརྨ་དྷཱ་ཏུ་ཛྙཱ་ན་གརྦྷ་ཨ། བཅུ་བཞི་པ་བསྟོད་པ་ནི། ཧྲཱིཿགདོད་ནས་རྣམ་དག་མཐའ་བྲལ་ཆོས་ཀྱི་སྐུ། །ལྷུན་གྲུབ་འདུས་མ་བྱས་པ་ལོངས་སྤྱོད་རྫོགས། །འགགས་མེད་ཐུགས་རྗེའི་རྣམ་རོལ་སྤྲུལ་སྐུར་སྟོན། །སྐུ་གསུམ་པདྨ་འབྱུང་ལ་ཕྱག་འཚལ་བསྟོད། །རང་བཞིན་དབྱིངས་ལས་མ་གཡོས་རྣམ་པར་འཕྲུལ། །སྲིད་པའི་དུཿཁ་མཐར་བྱེད་དཔའ་བོ་ཆེ། །རྗེ་འབངས་ཚུལ་གྱི་རྣལ་འབྱོར་སྤྱོད་པ་འཆང་། །གྲུབ་པའི་འཁོར་ལོས་སྒྱུར་རྣམས་བསྟོད་པར་བགྱི། །བཅོ་ལྔ་པ་འཛབ་བཟླས་དམིགས་རིམ་ནི། བདག་མདུན་ཐུགས་ཀར་པདྨ་འདབ་བརྒྱད་སྟེང་། །རྡོ་རྗེ་རྩེ་ལྔའི་ལྟེ་བར་ཟླ་དཀྱིལ་ཧཱུྃ། །མཐའ་མར་སྔགས་ཕྲེང་གཡས་བསྐོར་འོད་ཟེར་འཕྲོས། །འཕགས་མཆོད་བྱིན་རླབས་རང་ཐིམ་སླར་ཡང་ནི། །འོད་འཕྲོས་འགྲོ་དྲུག་སེམས་ཅན་སྡིག་སྒྲིབ་སྦྱང་། །དྲེགས་ཅན་ཟིལ་གནོན་བཀའ་དང་དམ་ལ་གནས། །ཕྱི་སྣོད་གཞལ་ཡས་ནང་བཅུད་ལྷ་སྐུར་སྒྱུར། །གྲག་སྟོང་སྔགས་ཀྱི་རང་སྒྲ་སྒྲོག་པར་གྱུར། །ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། དེ་ལྟར་ཡང་སྙིང་ཅི་འགྲུབ་བཟླ་ཞིང་། ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿཛཿསརྦ་སིདྡྷི་ཕ་ལ་ཧཱུྃ་ཨཱཿཧྲཱིཿམ་ཧ་རི་ནི་སཿར་ཙ་ཧྲཱི་ཡཿཙིཏྟ་ཧྲཱིཾ་ཧྲཱིཾ་ཛཿཛཿསྤྱི་དྲིལ་ཡང་ལྷག་པར་བཟླའོ། །དེ་ནས་བཅུ་དྲུག་པ་ཚོགས་ཀྱི་མཆོད་པ་ནི། ཧྲཱིཿརང་

[Full Size]

ཉིད་ལྷར་གསལ་ཐུགས་ཀ་ནས། །རྃ་ཡྃ་ཁྃ་འཕྲོས་མཆོད་རྫས་ཀྱི། །འཛིན་རྟོག་བག་ཆགས་ཉེས་སྐྱོན་སྦྱངས། །ༀ་ཨཱཿཧཱུྃ་གི་འཕྲོ་འདུ་ལས། །ཟག་མེད་བདེ་ཆེན་ཚོགས་འཁོར་ལོ། །རང་བྱུང་ཡེ་ཤེས་བདུད་རྩིར་སྤེལ། ༀ་ཨཱཿཧཱུྃ་ཧ་ཧོ་ཧྲཱིཿཧཱུྃ། འཆི་མེད་རིག་འཛིན་གྲུབ་པའི་གཙོ། །རྒྱལ་བ་རྒྱལ་བའི་མྱུ་གུ་རྣམས། །འདིར་གཤེགས་ཚོགས་ཀྱི་མཆོད་པ་བཞེས། །ཐུགས་དམ་གཉེན་པོ་བསྐང་གྱུར་ཅིག །ཉམས་དགའ་དམ་གཙང་སྤྲོ་དགའི་གནས། །དེང་འདིར་བྱིན་རླབས་བཅུད་ཕོབ་ལ། །མི་རྟོག་ཡེ་ཤེས་བསྐྱེད་དུ་གསོལ། །མ་རིག་དབང་གིས་སྡོམ་གསུམ་དང་། །འགལ་ཉམས་ནོངས་པ་མཐོལ་ཞིང་བཤགས། །ཉོན་མོངས་དུག་ལྔའི་ངར་འཛིན་འདི། །སྐྱེ་མེད་ངང་དུ་བསྒྲལ་ནས་ཀྱང་། །ཀུན་བཟང་ཀློང་དུ་བསྟིམ་པར་མཛོད། །གུ་རུ་དེ་ཝ་ཌཱ་ཀི་ནི་ས་པ་རི་ཝཱ་ར་ག་ཎ་ཙཀྲ་ལ་ཁཱ་ཧི། པཉྩ་ཨ་མྲི་ཏ་ལ་ཁཱ་ཧི། ཞེས་ཚོགས་ཕུད་ཕུལ། དེ་ནས་རྣལ་འབྱོར་པ་རྣམས་ཚོགས་ཀྱི་དངོས་གྲུབ་ལ་གསལ་བ་གསུམ་ལྡན་གྱིས་རོལ་ནས། བཅུ་བདུན་པ་ལྷག་གཏོར་བསྔོ་བ་ནི། ཧཱུྃ། བཀའ་ཡི་འཁོར་དུ་དམ་བཅས་པའི། །བཀའ་སྲུང་རྡོ་རྗེའི་དམ་ཚིག་ཅན། །བཀའ་ཡི་ལྷག་གཏོར་དམ་པ་བཞེས། །བཀའ་ལས་མ་འདའ་དམ་མ་གཡེལ། །ཨུ་ཙྪིཥྚ་བ་ལིཾ་ཏ་ཁཱ་ཧི། བཅོ་བརྒྱད་པ་བཀའི་ཆད་ཐོ་བསྒྲག་པ་ནི། ཧཱུྃ། སྔོན་འདས་དུས་དང་བར་གྱི་བསྐལ་པ་དང་། །ད་ལྟ་དུས་གསུམ་ཀུན་བཟང་པད་འབྱུང་གིས། །དགོངས་གཏད་སྨོན་ལམ་དབང་བསྐུར་

[Full Size]

ཇི་ལྟ་བར། །ཆོས་ཀྱི་སྲུང་མ་ཁྱེད་རྣམས་རྗེས་དགོངས་ལ། །ཐ་ཚིག་གཉེར་གཏད་མ་བསྙེལ་གཏོར་མ་བཞེས། །རྣལ་འབྱོར་ཕྲིན་ལས་གང་བཅོལ་ཐོགས་མེད་སྒྲུབས། །བཅུ་དགུ་པ་བརྟན་སྐྱོང་ནི། གངས་ཅན་བསྟན་འགྲོ་བདེར་སྐྱོང་བརྟན་མ་རྣམས། །སྔོན་གྱི་གཡར་དམ་མ་གཡེལ་བཤལ་ཆུ་བཞེས། །དལ་ཡམས་མཚོན་འཁྲུགས་སྡང་བའི་དགྲ་ལ་བསྒྱུར། །ཆོས་དང་ལོངས་སྤྱོད་རྒྱས་པའི་སྡོང་གྲོགས་མཛོད། །ཉི་ཤུ་པ་བཟོད་གསོལ་ནི། ཧོ། ཟབ་དོན་ཐུགས་ཀྱི་སྒྲུབ་པའི་དཀྱིལ་འཁོར་འདིར། །མ་རིག་དབང་གིས་ཉམས་ཆག་འགལ་འཁྲུལ་རྣམས། །ཐོག་མེད་སྡིག་བཅས་གནོང་འགྱོད་དྲག་པོས་བཤགས། །བྱང་དག་ཚངས་པའི་དངོས་གྲུབ་སྩལ་དུ་གསོལ། །ཡིག་བརྒྱ་བརྗོད། ཉེར་གཅིག་པ་བྱིན་རླབས་དབང་བཞི་ལེན་པ་རྡོ་རྗེའི་ཚིག་རྐང་ལྟར་བྱ་བ་ནི། གུ་རུ་མཁའ་འགྲོའི་ཚོགས་བཅས་ཀྱིས། །བདག་ཅག་མོས་པའི་བུ་རྣམས་ལ། །ལུས་ལ་སྐུ་ཡིས་བྱིན་གྱིས་རློབས། །ངག་ལ་གསུང་གིས༴ ཡིད་ལ་ཐུགས་ཀྱིས༴ དབང་བཞི་བསྐུར་བར༴ རྒྱུད་བཞི་དག་པར༴ ལམ་བཞི་འབྱོངས་པར༴ སྐུ་བཞི་ཐོབ་པར་བྱིན་གྱིས་རློབས། །ༀ་ཨཱཿཧཱུྃ་བཛྲ་གུ་རུ་པདྨ་དེ་ཝ་དྷཱ་ཀི་ནི་ཀཱ་ཡ་ཨ་བྷི་ཥིཉྩ་ༀ། ཝཱཀྐ་ཨ་བྷི་ཥིཉྩ་ཨཱཿཙིཏྟ་ཨ་བྷི་ཥིཉྩ་ཧཱུྃ། སརྦ་ཨ་བྷི་ཥིཉྩ་ཧྲཱིཿསྔགས་རྣམས་ལན་གསུམ་བརྗོད་ནས། མདུན་བསྐྱེད་འཁོར་རྣམས་གཙོ་བོར་ཐིམ། །དེ་ཉིད་རང་ཐིམ་དབྱེར་མེད་པར། །མ་བཅོས་གཉུག་མ་སྤྲོས་བྲལ་ཀློང་། །གང་ཤར་བཟོ་མེད་ངང་དུ་བཞག །

[Full Size]

ཉེར་གཉིས་པ་བདག་བསྐྱེད་བསྡུ་རིམ་ནི། བསྐྱེད་པའི་ལྷ་ཚོགས་རིམ་བཞིན་རང་ལ་ཐིམ། །དེ་ཡང་སྔགས་ཕྲེང་རྡོ་རྗེ་ཧཱུྃ་ལ་བསྡུ། །དམིགས་མེད་བློ་འདས་རྫོགས་པ་ཆེན་པོའི་ངང་། །བྱ་རྩོལ་བྲལ་བའི་ཀློང་དུ་མཉམ་པར་བཞག །སླར་ཡང་པད་འབྱུང་སྐུ་རུ་ལམ་གྱིས་གསལ། །སྣང་གྲག་རྟོག་ཚོགས་ཡེ་ཤེས་རོལ་པར་ཤར། །ཉེར་གསུམ་པ་བསྔོ་བ་ནི། ཨེ་མ་ཧོ་བླ་མེད་ཡང་གསང་དཀྱིལ་འཁོར་བསྒྲུབས་ལ་སོགས། །དུས་གསུམ་བསགས་པའི་དགེ་བ་ཅི་མཆིས་པ། །སྨོན་འབྲེལ་ཟབ་མོའི་མཚམས་སྦྱར་འདིར་བརྟེན་ནས། །བདག་གཞན་ཚེ་གཅིག་སངས་རྒྱས་ཐོབ་ཕྱིར་བསྔོ། །ཉེར་བཞི་པ་སྨོན་ལམ་ནི། གདོད་མའི་བདེར་གཤེགས་ཀུན་ཏུ་བཟང་པོ་ཡི། །དགོངས་དོན་མཐའ་བྲལ་ལྟ་བའི་ཡང་རྩེ་མཆོག །རྣམ་དག་ཨ་ཏིའི་ངེས་ལམ་མཐར་ཕྱིན་ནས། །རྟེན་འདིར་འཇའ་ལུས་ཆོས་སྐུ་མངོན་གྱུར་ཤོག །ཉེར་ལྔ་བ་བཀྲ་ཤིས་ནི་མེ་ཏོག་གི་ཆར་བསྙིལ་བཞིན་པས། བཀྲ་ཤིས་གང་ཞིག་སྐུ་གསུམ་རོལ་པའི་ཀློང་། །ཐུགས་རྗེ་ཀུན་གསལ་པད་འབྱུང་ཉིན་མོར་བྱེད། །འགྲོ་དྲུག་མུན་སེལ་དེང་འདིར་བདེ་ལེགས་ཀྱི། །སྣང་བ་དམ་པས་རྟག་པར་བཀྲ་ཤིས་ཤོག །བཀྲ་ཤིས་གང་ཞིག་ཆུ་ཟླའི་གར་རྩེད་ལས། །རྩ་གསུམ་ལྷ་ཚོགས་བྱིན་རླབས་འོད་དཀར་ཅན། །སྲིད་པའི་གདུང་སེལ་དེང་འདིར་བདེ་ལེགས་ཀྱི། །དཔལ་ཀུན་ཡོངས་འདུ་རྣམ་ཀུན་བཀྲ་ཤིས་ཤོག །ཅེས་པའང་བསླབ་གསུམ་མངོན་མཐོ་རྟོགས་ལྡན་བླ་མ་མ་ཎིའི་ཐུགས་བཞེད་བསྐང་ཕྱིར། སི་ཏུ་

[Full Size]

པདྨ་ཉིན་བྱེད་དབང་པོས་བཀོད་པ་ནོངས་པར་གྱུར་རྣམས་ཀུན་བཟང་ཀློང་དུ་བཤགས་ཤིང་དགེ་བས་འགྲོ་རྣམས་རྡོ་རྗེ་འཛིན་པའི་གོ་འཕང་ཐོབ་པར་གྱུར་ཅིག །སརྦ་མངྒ་ལམ།། །།

གུ་རུ་རྗེ་འབངས་ཉེར་ལྔའི་ལས་བྱང་ལ་ཅུང་ཟད་རྒྱས་པར་སྤྲོ་བའི་སྐབས་ཟུར་རྒྱན།

[Full Size]

སྭསྟི། འདིར་གུ་རུ་རྗེ་འབངས་ཉེར་ལྔའི་ལས་བྱང་ལ་ཅུང་ཟད་རྒྱས་པར་སྤྲོ་བའི་སྐབས་ཟུར་རྒྱན་འདི་ལྟར་དང་པོ་ལྷ་བསྐྱེད་ལ། ཞབས་གཉིས་རྡོར་སྐྱིལ་ཟླ་ཉི་པད་སྟེང་བཞུགས། །དེ་ཕྱིར་བུདྡྷ་བཛྲ་རཏྣ་དང་། །པདྨ་ཀརྨ་ཐོད་ཕྲེང་རྩལ་ལྔ་གསལ། །པདྨ་འབྱུང་གནས་པདྨ་སམྦྷ་ཝ། །བློ་ལྡན་མཆོག་སྲེད་པདྨ་རཱ་ཛ་དང་། །སཱུཪྱ་འོད་ཟེར་ཤཱཀ་སེང་གྲོ་བོ་ལོད། །སེང་ཧ་སྒྲ་སྒྲོགས་ལ་སོགས་རང་རང་གི། །ཆ་ལུགས་མ་ངེས་སྣ་ཚོགས་ཅིར་ཡང་བསྒྱུར། །ཡེ་ཤེས་ལྔ་ལྡན་སོགས་གཞུང་ལྟར་དང་། གཉིས་པ་སྤྱན་འདྲེན་སྐབས། དཔལ་རི་པདྨ་འོད་ཀྱི་ཕོ་བྲང་ནས། །ཨོ་རྒྱན་ཆེན་པོ་སྐུ་ལྔ་མཚན་བརྒྱད་དང་། །རྗེ་འབངས་ཉེར་ལྔ་སངས་རྒྱས་བྱང་སེམས་ཚོགས། །སྤྲུལ་དང་ཡང་སྤྲུལ་སོགས་གཞུང་ལྟར་དང་། གསུམ་པ་ཕྱག་འཚལ་ལ། མཚོ་སྐྱེས་རྡོ་རྗེ་འཆང་ཆེན་པོ། །སྐུ་ལྔ་མཚན་བརྒྱད་རྗེ་འབངས་བཅས། །དད་མོས་གདུང་བས་གུས་ཕྱག་འཚལ། །བཞི་པ་བསྟོད་པའི་སྐབས། སྲིད་པའི་དུ་ཁཿམཐར་བྱེད་དཔའ་བོ་ཆེ། །གང་འདུལ་ཚུལ་གྱི་རྣལ་འབྱོར་སྤྱོད་པ་འཆང་། །ཅེས་དང་། ལྔ་པ་ཚོགས་འབུལ་དང་བསྐང་བཤགས་བསྒྲལ་བསྟབ་ཀྱི་རིམ་པ་ལ། གཞུང་གི་ཚོགས་བྱིན་རླབས་དང་སྔགས་ཀྱི་མཐར། ཧཱུྃ། ཆོས་དབྱིངས་མཐའ་བྲལ་ཀློང་ཡངས་ནས། །སྣང་སྟོང་ཟུང་འཇུག་བདེ་བ་ཆེ། །རིག་རྩལ་མ་འགགས་

[Full Size]

ཅིར་ཡང་ཤར། །རྒྱལ་དང་རྒྱལ་སྲས་རྒྱ་མཚོ་རྣམས། །འདིར་གཤེགས་ཚོགས་ཀྱི་མཆོད་པ་བཞེས། །མཆོག་དང་ཐུན་མོང་དངོས་གྲུབ་སྩོལ། །ག་ན་ཙཀྲ་པཱུ་ཛ་ཁཱ་ཧི། ཅེས་ཚོགས་ཀྱི་མཆོད་པ་ཕུལ་ལ། དེ་ནས་བསྐང་བ་བྱ་བ་ནི། ཧཱུྃ་ཧྲཱིཿསྐུ་གསུམ་ཡེ་རྫོགས་པད་འབྱུང་ཐོད་ཕྲེང་རྩལ། །སྐུ་ལྔ་རྒྱལ་བ་དགོངས་བརྒྱུད་ཐུགས་དམ་བསྐང་། །གུ་རུ་སྤྲུལ་པའི་མཚན་བརྒྱད་ལ་སོགས་པ། །རིག་འཛིན་བརྡའ་ཡི་བརྒྱུད་པའི་ཐུགས་དམ་བསྐང་། །མངའ་བདག་མཚོ་རྒྱལ་རྗེ་འབངས་ཉི་ཤུ་ལྔ་། །གང་ཟག་སྙན་བརྒྱུད་བླ་མའི༴ མཐིང་དམར་ཅོད་པན་འཆང་བ་བཀའ་བརྒྱུད་ཀྱི། །བྱིན་རླབས་དོན་གྱི་བརྒྱུད་པའི༴ རཏྣ་གླིང་སོགས་གཏེར་ཆེན་གཏེར་ཕྲན་བདག །མཁའ་འགྲོ་གཏད་བརྒྱུད་བླ་མའི༴ ཀརྨ་ཆགས་མེད་བཀའ་གཏེར་ཡོངས་ཀྱི་བདག །ཤོག་སེར་ཆོས་སྤེལ་བརྒྱུད་པའི༴ ཐུགས་ཀྱི་རྡོ་རྗེའི་དགོངས་གཏད་ལས་ཅན་རྣམས། །སྨིན་གྲོལ་ལམ་ཟབ་བརྒྱུད་རིམ༴ འབྲེལ་ཚད་ཐར་པའི་གོ་འཕང་འགོད་ནུས་པའི། །སྐྱེ་བདུན་མྱོང་གྲོལ་བརྒྱུད་པའི༴ མཐོང་ཐོས་དྲན་པས་འགྲོ་བ་སྒྲོལ་བའི་མགོན། །དྲིན་ཆེན་རྩ་བརྒྱུད་བླ་མའི༴ མཆོག་དང་ཐུན་མོང་དངོས་གྲུབ་ཆར་ལྟར་འབེབས། །ཡི་དམ་རྒྱུད་སྡེའི་ལྷ་ཚོགས་ཐུགས་དམ་བསྐང་། །ས་ལམ་བར་ཆད་སེལ་ཞིང་ཕྲིན་ལས་སྒྲུབ། །ཆོས་སྐྱོང་སྲུང་མ་རྣམས་ཀྱི་ཐུགས་དམ་བསྐང་། །ཧཱུྃ་ཧྲཱིཿརང་བྱུང་གདོད་ནས་ཧེ་རུ་ཀ་ཡི་གནས། །གཞལ་ཡས་ཚོགས་ཁང་འབར་

[Full Size]

བ་ཉམས་རེ་དགའ། །བཀྲ་གསལ་ཡེ་ཤེས་དཀྱིལ་འཁོར་ལྷ་ཡི་ཚོགས། །ལྷུན་རེ་ཆགས་ཞིང་གཟི་བྱིན་འོད་དང་ལྡན། །ཕྱི་ནང་གསང་བ་ཡང་གསང་དེ་ཁོ་ནའི། །དམ་རྫས་མཆོད་པ་རྨད་བྱུང་དྭངས་རེ་སྤྲོ། །ལྟ་སྒོམ་རྣམ་དག་སྤྱོད་པའི་ངང་ཚུལ་གྱི། །སྒྲུབ་པའི་རྣལ་འབྱོར་མཆེད་ལྕམ་དམ་རེ་གཙང་། །ཧཱུྃ་ཧྲཱིཿཐུགས་དམ་གཉན་བསྐང་མཆོད་པའི་བྱེ་བྲག་ནི། །མཆོད་ཡོན་མེ་ཏོག་བདུག་སྤོས་སྣང་གསལ་དྲི། །ཞལ་ཟས་སྒྲ་སྙན་འདོད་ཡོན་ལྔ་ལ་སོགས། །ཕྱི་ཡི་མཆོད་པས་ཐུགས་དམ་བསྐང་གྱུར་ཅིག །རྨད་བྱུང་བརྗིད་ལྡན་མ་ཧཱ་བ་ལིང་ཏ། །འཆི་མེད་རྫས་མཆོག་པཉྩ་ཨ་མྲྀ་ཏ། །ཆགས་མེད་ཆགས་བྲལ་ཨརྒྷཾ་རཀྟ་དམར། །པདྨ་དུང་ཅན་ལ་སོགས་མཚན་ལྡན་གྱི། །བླ་མེད་ནང་གི་མཆོད་པས་ཐུགས་དམ་བསྐང་། །གཟུང་འཛིན་སྣང་བ་རང་གྲོལ་གཉིས་མེད་ངང་། །མཆོད་བྱ་མཆོད་བྱེད་ཆོས་ཉིད་དག་པའི་ཀློང་། །ཀུན་བཟང་བདེ་ཆེན་དབྱིངས་སུ་བསྐང་གྱུར་ཅིག །ཅེས་བསྐང་ངོ་། །དེ་ནས་བཤགས་པ་བྱ་བ་ནི། ཧཱུྃ་ཧྲཱིཿབླ་མ་དཀྱིལ་འཁོར་ལྷ་ཚོགས་དགོངས། །བདག་ནི་སྐྱེ་བ་ཐོག་མེད་ནས། །ད་ལྟའི་ལུས་འདི་ཡན་ཆད་དུ། །མ་རིག་རྨོངས་པའི་དབང་གྱུར་པས། །རྩ་བ་ཡན་ལག་ཉེས་ལྟུང་རྣམས། །ཚོགས་ཀྱི་མཆོད་པས་བསྐང་ཞིང་བཤགས། །ༀ་བཛྲ་ས་ཏྭ་ས་མ་ཡ་སོགས་ཡིག་བརྒྱ་བརྗོད། དེ་ནས་བསྒྲལ་ལས་ནི། ཧཱུྃ། ང་ནི་ཡེ་ནས་ཆེ་བའི་མཆོག །དབང་

[Full Size]

དྲག་འབར་བ་དྲག་པོ་རྩལ། །སྣང་སྲིད་དྲེགས་པ་སྡེ་བརྒྱད་རྣམས། །ཀུན་ཀྱང་བཀའ་ཉན་བྲན་ཁོལ་གྱུར། །ཧཱུྃ་ཧཱུྃ་ཧཱུྃ། འགུགས་པ་ནི། ཧཱུྃ། བདག་ཉིད་དཔལ་གྱི་ཐུགས་ཀ་ནས། །སྤྲུལ་པའི་ཁྲོ་ཆུང་སྐར་ལྟར་འཁྲུགས། །བསྟན་དགྲ་སྒོས་དགྲ་ལོག་འདྲེན་རྣམས། །ཁུག་ཅིག་ཛཿཧཱུྃ་བྃ་ཧོཿཕཊ། བསྒྲལ་ཞིང་བསྟབ་པ་ནི། ཧཱུྃ། ཆོས་ཉིད་ཞི་བའི་ངང་ལས་ཁྲོ་བོའི་སྐུ། །ཞིང་བཅུ་ཚང་བའི་བསྟན་དགྲ་བསྒྲལ་ཕྱིར་དུ། །ཡེ་ཤེས་མཚོན་གྱིས་དུག་ལྔའི་ཕུང་པོ་བཅོམ། །དག་པ་རྣམ་དག་བདུད་རྩིར་བསྒྱུར་བྱས་ནས། །དཀྱིལ་འཁོར་ལྷ་ཚོགས་དགྱེས་པ་བསྐང་གྱུར་ཅིག །དེ་ནས་ཚོགས་ལ་ལོངས་སྤྱོད་པ་སོགས་གཞུང་ལྟར་བྱའོ། །ཅེས་པའང་ཀརྨ་ཆགས་མེད་དངོས་སྤྲུལ་པདྨ་འཆི་མེད་གྲུབ་དབང་གིས་བཞེད་ལྟར་སི་ཏུ་པདྨ་ཉིན་བྱེད་དབང་པོས་སྤེལ་བ་མངྒ་ལམ།། །།

རྒྱུན་ཁྱེར་གྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་དངོས་གྲུབ་བདུད་རྩིའི་གཏེར་མཛོད།

[Full Size]

རྒྱུན་ཁྱེར་གྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་དངོས་གྲུབ་བདུད་རྩིའི་གཏེར་མཛོད་ཅེས་བྱ་བ་བཞུགས་སོ། །

[Full Size]

རང་ཉིད་ཐ་མལ་སྤྱི་བོ་རུ། །ཧཱུྃ་དཀར་ལས་བྱུང་པད་ཟླའི་སྟེང་། །རྡོར་སེམས་དཀར་པོ་ཕྱག་གཉིས་ཀྱི། །གཡས་པས་རྡོ་རྗེ་གཡོན་དྲིལ་བསྣམས། །སྐྱིལ་ཀྲུང་ལོངས་སྤྱོད་རྫོགས་སྐུའི་ཆས། །སྣང་ལ་རང་བཞིན་མེད་པར་གྱུར། །སྤྱི་མགྲིན་སྙིང་གར་ༀ་ཨཱཿཧཱུྃ། །ཧཱུྃ་ལས་འོད་འཕྲོས་ཡེ་ཤེས་སེམས། །སྤྱན་དྲངས་དབྱེར་མེད་གཅིག་འདྲེས་གྱུར། །ཐུགས་ཀར་ཟླ་སྟེང་ཧཱུྃ་དཀར་མཐར། །ཡི་གེ་བརྒྱ་པ་གཡས་བསྐོར་གསལ། །ༀ་བཛྲ་སཏྭ་སོགས་བརྗོད། ཕྱི་ནང་སྐུ་གསུང་ཐུགས་ལ་སོགས། །རྩ་བ་ཡན་ལག་དམ་འགལ་རྣམས། །གནོང་འགྱོད་དྲག་པོས་བཟོད་པར་གསོལ། །སྐུ་ཡི་ཆ་ལས་བདུད་རྩི་བབས། །སྒྲིབ་གཉིས་བག་ཆགས་དུད་ཁུ་ལྟར། །

[Full Size]

ནག་ཉིལ་ཕྱིར་ཐོན་ལྷ་འོད་ཞུ། །རང་དང་དབྱེར་མེད་ཆུ་བཞག་ལྟར། །བདེ་གསལ་མི་རྟོག་ངང་ལ་བཞག །དགེ་བ་འདི་ཡིས་སོགས། ཀརྨ་མངོན་དགའི་ངོར་སྤེལ།། །།ཧྲཱིཿགཟུང་འཛིན་ཆོས་རྣམས་སྟོང་པའི་ངང་ཉིད་ལས། །རང་ཉིད་ཐ་མལ་སྤྱི་བོར་པད་ཟླའི་སྟེང་། །ཧྲཱིཿདཀར་འོད་ཀྱི་འཕྲོ་འདུས་དོན་གཉིས་བྱས། །ཡོངས་གྱུར་རིགས་འདུས་ཁྱབ་བདག་ཧེ་རུ་ཀ། བཛྲ་ས་ཏྭ་དུང་དང་ཀུནྡའི་མདོག །གསལ་ཞིང་འཚེར་ལ་འོད་དང་འོད་ཟེར་འབར། །དབུ་ལ་རིགས་ལྔའི་པྲོག་ཞུ་དར་དཔྱངས་བརྒྱན། །འགྱིང་བག་ཚུལ་གྱིས་རྡ་ོརྗེ་དྲིལ་བུ་འཛིན། །ལྷ་རྫས་དར་གྱི་སྟོད་གཡོགས་སྨད་གཡོགས་བཀླུབས། །རིན་ཆེན་སྙན་ཆ་མགུལ་རྒྱན་ལ་སོགས་པ། །

[Full Size]

ལོངས་སྐུའི་ཆས་རྫོགས་ཞབས་གཉིས་སེམས་སྐྱིལ་བཞུགས། །གཞན་ཡང་རྩ་གསུམ་ལྷ་ཚོགས་སྤྲིན་ལྟར་གཏིབས། །གནས་གསུམ་འབྲུ་གསུམ་ཐུགས་ཀྱི་ཧཱུྃ་འོད་ཀྱིས། །བསྐུལ་བས་སངས་རྒྱས་བྱང་སེམས་སྤྱན་དྲངས་ཐིམ། །རྒྱལ་བ་རབ་འབྱམས་དཀྱིལ་འཁོར་ཀུན་འདུས་པའི། །བདག་ཉིད་ཆེན་པོར་མངོན་སུམ་ལྷམ་མེར་གསལ། །བདེར་གཤེགས་འདུས་པ་བླ་མ་ཧེ་རུ་ཀ། ཆོས་ཀུན་འབྱུང་གནས་གསང་སྔགས་སྟོན་པ་ཆེ། །ཚོགས་མཆོག་རང་བཞིན་དཔལ་ལྡན་རྡོ་རྗེ་འཛིན། །གསོལ་འདེབས་སྐལ་ལྡན་རྒྱུད་བྱིན་བརླབ་དུ་གསོལ། །ཅེས་པའི་གསོལ་འདེབས་ལན་ཁ་ཤས་དང་། བླ་མའི་ཐུགས་ཀར་ཟླ་སྟེང་ཧཱུྃ་མཐར་སྔགས། །ཡིག་བརྒྱས་བསྐོར་བ་དེ་ལས་འོད་འཕྲོས་པས། །འཕགས་མཆོད་འགྲོ་བའི་སྒྲིབ་སྦྱོང་ཁྱད་པར་དུ། །སྐུ་ལས་བདུད་རྩིའི་རྒྱུན་བབས་བདག་ལུས་གང་། །ཐོག་མེད་ནས་བསགས་སྡིག་སྒྲིབ་བྱང་ཞིང་དག །རྣམ་སྨིན་ལུས་སྦྱོང་དྲི་མེད་ཤེལ་ལྟར་གྱུར། །དེ་ནས་ཡིག་བརྒྱ་ཅི་ནུས་བཟླས་ཤིང་། ཡིག་དྲུག་ཀྱང་བཟླའོ། །དེ་ནས་སྤྲོ་ན་བརྗོད་མེད་དོན་བཤགས་བཏོན་ལ་རྒྱལ་གསུང་ཚད་མ་ཉིད་དེ་ལྷག་པར་ཕན་ཡོན་ཆེ་ཞིང་། བསྡུས་པར་ན། ཀྱཻ་ཧོ་རྒྱལ་ཀུན་འདུས་པ་དགོངས། །བདག་ཅག་མ་རིག་ནོངས་པ་ཡིས། །སོ་ཐར་བྱང་སེམས་གསང་སྔགས་ཀྱི། །དམ་ཚིག་ཉེས་ལྟུང་འགལ་འཁྲུལ་རྣམས། །མི་འཆབ་མི་སྦེད་མཐོལ་ཞིང་བཤགས། །ཕྱིན་ཆད་སྡོམ་ལ་

[Full Size]

གནས་པར་བགྱི། །མགོན་པོའི་གསུང་ལས་བུ་ཁྱོད་ཀྱི། །སྡིག་སྒྲིབ་དག་ཅེས་དབུགས་དབྱུང་གྱུར། །རྗེས་རིམ་ནི། ལྷ་སྐུ་འོད་ཞུ་རང་ཐིམ་གཉིས་མེད་ངང་། །སྤྲོས་བྲལ་བདེ་བ་ཆེན་པོའི་ཀློང་དུ་བཞག །མཐར་དགེ་རྩ་བྱང་ཆུབ་ཏུ་བསྔོ་བ་སྤྱི་ལྟར་བྱའོ། །ཅེས་པའང་ཀརྨ་ཆགས་མེད་དངོས་སྤྲུལ་ཀརྨ་བསྟན་འཛིན་ཕྲིན་ལས་བཀའི་བསྐུལ་ལྟར་སི་ཏུས་སྤེལ།། །།

འཇམ་དཔལ་དམར་སེར་ཤེས་རབ་བློ་འཕེལ།

[Full Size]

འཇམ་དཔལ་དམར་སེར་ཤེས་རབ་བློ་འཕེལ་བཞུགས། ན་མཿསརྦ་ཛྙ་དྷརྨཱ་ཀཱ་ར་ཡ། འདིར་བཅོམ་ལྡན་འདས་འཇམ་དཔལ་དཔའ་བོ་དམར་སེར་གྱི་སྒོ་ནས་ཤེས་རབ་བློ་འཕེལ་སྒྲུབ་པར་འདོད་པའི་གང་ཟག་རྣམས་ལ་ཕན་བདེའི་དཔྱིིད་དུ་འདི་ལྟར་སྤེལ་བར་བྱ་སྟེ། བསླུ་མེད་སྐྱབས་གནས་མཆོག་གསུམ་ལ། །བྱང་ཆུབ་བར་དུ་སྐྱབས་སུ་ུམཆི། །བདག་གིས་ཤེས་རབ་བསླབ་པ་ཡིས། །ཀུན་ཀྱང་ཐམས་ཅད་མཁྱེན་ཐོབ་ཤོག །ༀ་སྭ་བྷཱ་ཝ་སོགས་ཀྱིས་སྟོང་པར་སྦྱངས། ཆོས་རྣམས་དམིགས་མེད་སྟོང་ཆེན་ངང་། །སྣ་ཚོགས་པདྨ་འདབ་རྒྱས་དབུས། །ཨ་ལས་བསིལ་ཟེར་བྱེད་པ་ཡི། །དཀྱིལ་འཁོར་དྲི་མེད་ཉ་གང་སྟེང་། །རང་རིག་ངོ་བོ་དྷཱིཿདམར་སེར། །འོད་འཕྲོས་རྒྱལ་ཀུན་མཆོད་པས་མཉེས། །འགྲོ་བའི་སྒྲིབ་ཚོགས་མུན་པ་བསལ། །སླར་ཡང་འོད་ཟེར་འདུས་པ་ལས། །རང་ཉིད་རྗེ་བཙུན་འཇམ་དཔལ་དབྱངས། །ཉིན་བྱེད་འཆར་ཀའི་མདངས་ཟེར་ལས། །ཆེས་ཆེར་ལྷག་པའི་ཁ་དོག་

[Full Size]

འཆང་། །རལ་བའི་ཅོད་པན་སྤྱི་གཙུག་ཏུ། །བཅིང་ཞིང་ཟུར་ཕུད་གཡོན་ངོས་འཕྱངས། །ཞལ་གཅིག་ཕྱག་གཉིས་ཞི་འཛུམ་བརྗིད། །ཕྱག་གཡས་ཤེས་རབ་རལ་གྲི་མཆོག །མི་ཤེས་དྲྭ་བ་གཅོད་པར་བྱེད། །གཡོན་པས་ཨུཏྤལ་སྔོན་པོ་ནི། །འདབ་རྒྱས་སྟེང་དུ་པུསྟི་ཀཿ། རབ་ཏུ་སྒེག་བའི་ཉམས་དང་ལྡན། །ཞབས་གཉིས་རྡ་ོརྗེ་སྐྱིལ་མོ་ཀྲུང་། །རིན་ཆེན་སྣ་ཚོགས་ལྷ་རྫས་ཀྱི། །རྒྱན་དང་ན་བཟའ་མཛེས་པར་བཀླུབས། །བརྒྱད་གཉིས་ལང་ཚོའི་ཆ་གང་ཞིང་། །རི་བོང་འཛིན་པའི་རྒྱབ་ཡོལ་ཅན། །དབང་གཞུ་ལྟ་བུའི་འོད་འོད་ཟེར། །རབ་ཏུ་འཕྲོ་བའི་དབུས་ཉིད་དུ། །སྣང་ལ་རང་བཞིན་མེད་པ་ཡི། །གསལ་སྟོང་ལྷུན་གྱིས་གྲུབ་པར་གསལ། །གནས་གསུམ་འབྲུ་གསུམ་ས་བོན་མཚན། །དེ་ལས་འོད་འཕྲོས་རང་བཞིན་གྱི། །གནས་ནས་བསྒོམ་པ་དང་འདྲ་བའི། །ཡེ་ཤེས་སེམས་དཔའ་སྤྱན་དྲངས་ནས། །ཛཿཧཱུྃྃ་བྃ་ཧོཿགཉིས་མེད་བསྟིམ། །སླར་ཡང་ཐུགས་ལས་འོད་འཕྲོས་པས། །རིགས་ལྔ་ཡབ་ཡུམ་སྤྱན་དྲངས་ནས། །མཆོད་ཅིང་ཕྱག་འཚལ་དབང་བསྐུར་གསོལ། །བདུད་རྩིས་ལུས་གང་ཆུ་ལྷག་མ། །ཡར་བརྟེན་མི་བསྐྱོད་རྒྱས་གདབ་གྱུར། །རང་ཉིད་ལྷར་གསལ་སྙིང་གར་ནི། །པད་ཟླའི་སྟེང་དུ་ཡི་གེ་དྷཱིཿ། དེ་མཐར་ཡིག་བདུན་གཡས་སུ་བསྐོར། །དེ་ལས་འོད་འཕྲོས་རང་གཞན་གྱི། །རྨོངས་པའི་གཏི་མུག་བག་ཉལ་བཅོམ། །ཤེས་རབ་བློ་གྲོས་སྣང་བྱེད་ཀྱི། །ཡོན་ཏན་འོད་

[Full Size]

སྟོང་ཕུན་སུམ་ཚོགས། །འཇིག་རྟེན་མ་ལུས་གསལ་བར་གྱུར། །ༀ་ཨ་ར་པ་ཙ་ན་དྷཱིཿཅི་ནུས་སུ་བཟླས་ལ་མཐར། ༀ་ཨཱཪྱ་མཉྫུ་ཤྲཱི་ཨརྒྷཾ་ནས། ཤབྡ་བར་བརྗོད་ཅིང་མཆོད་ལ། རྒྱལ་བའི་ཐུགས་རྗེ་མི་མངོན་ཀློང་ཡངས་ནས། །རྒྱལ་ཀུན་མཁྱེན་བརྩེའི་ཉི་མ་འབུམ་བརྡལ་ཞིང་། །རྒྱལ་ལ་མོས་ལྡན་ཡིད་ཀྱི་དགའ་ཚལ་དུ། །རྒྱལ་བའི་གོ་འཕང་སྣང་བྱེད་བསྟན་དུ་གསོལ། །རྒྱལ་མཆོག་ཇི་བཞིན་བློ་གྲོས་ཐོགས་མེད་ཀྱིས། །རྒྱལ་བ་མ་ལུས་མཆོད་པའི་འདབ་སྟོང་རྒྱས། །རྒྱལ་བསྟན་འགྲོ་བའི་ཕུན་ཚོགས་རྒྱན་གྱུར་ནས། །རྒྱལ་བས་རྗེས་སུ་འཛིན་པར་བྱིན་གྱིས་རློབས། །བཅོམ་ལྡན་མགོན་པོ་ཤེས་རབ་གཉེན། །འཇམ་དཔལ་དཔའ་བོ་སྒྲུབ་པའི་མཐུས། །བདག་བློའི་མུན་པ་ཀུན་བསལ་ནས་། །ཐམས་ཅད་མཁྱེན་ཉིད་ཐོབ་པར་ཤོག །དགེ་བ་འདི་ཡིས་སོགས་དང་། བསྔོ་སྨོན་དཀྱུས་ལྟར་བྱའོ། །དེ་ལྟར་འཚོ་བྱེད་པ་གུ་རུ་ཚེ་དབང་གིས་བསྩལ་བའི་ངོར། སི་ཏུ་པདྨ་ཉིན་མོར་བྱེད་པས་རྒྱལ་ཟླའི་དགའ་བ་དང་པོ་ལ་སྤེལ་བ་སརྦ་མངྒ་ལཾ།། །།ཆོས་ཀུན་སྟོང་པའི་ངང་ཉིད་ལས། །པད་དཀར་ཟླ་བའི་སྟེང་དུ་ཧྲཱིཿ། །ཡོངས་གྱུར་རང་ཉིད་སྤྱན་རས་གཟིགས། །དཀར་གསལ་ཞལ་གཅིག་ཕྱག་བཞི་པ། །དང་པོ་ཐལ་སྦྱར་གཡས་འོག་གི། །ཤེལ་ཕྲེང་གཡོན་འོག་པདྨ་དཀར། །དར་དང་རིན་ཆེན་རྒྱན་གྱིས་སྤྲས། །ལོངས་སྤྱོད་རྫོགས་སྐུ་ཞབས་རྡོར་སྐྱིལ། །གནས་གསུམ་

[Full Size]

འབྲུ་གསུམ་ཡི་གེས་མཚན། །འོད་འཕྲོས་ཡེ་ཤེས་སྤྱན་དྲངས་ནས། །དམ་ཚིག་པ་ལ་གཉིས་མེད་ཐིམ། །དབང་ལྷས་དབང་བསྐུར་ཆུ་ལྷག་མ། །ཡར་ལུད་སྣང་མཐས་རྒྱས་བཏབ་གྱུར། །ཐུགས་ཀར་ཧྲཱིཿམཐར་སྔགས་ཕྲེང་ལས། །འོད་འཕྲོས་འཕགས་མཆོད་རིགས་དྲུག་གི། །སྡུག་བསྔལ་རྒྱུ་བཅས་དག་པར་བསྒོམ། །ༀ་མ་ཎི་པདྨེ་ཧཱུྃ། ཅི་ནུས་བཟླས་མཐར། ཨརྒྷཾ་སོགས་ཀྱིས་མཆོད། སྐྱོན་གྱིས་མ་གོས་སོགས་ཀྱིས་བསྟོད། སྣོད་བཅུད་ལྷ་ཡི་དཀྱིལ་འཁོར་པ། །འོད་ཞུ་རང་ལ་ཐིམ་པར་གྱུར། །དར་ཅིག་མཉམ་པར་བཞག །སླར་ཡང་རང་ཉིད་སྤྱན་རས་གཟིགས། །ཡོངས་གྱུར་སྣང་གྲག་རྟོག་པའི་ཆོས། །ཀུན་ཀྱང་རྒྱལ་བའི་ཞིང་དུ་མོས། །དགེ་རྩ་རྫོགས་བྱང་དུ་བསྔོ་བར་བྱ། ཅེས་དབུ་མཛད་ཚུལ་ལྡན་ངོར་སྤེལ།། །།དཀོན་མཆོག་གསུམ་ལ་སྐྱབས་མཆི་ཞིང་། །འགྲོ་བའི་དོན་དུ་སེམས་བསྐྱེད་དོ། །སྭ་བྷཱ་ཝས་སྦྱངས། སྟོང་ལས་པད་དཀར་ཟླ་བའི་སྟེང་། །རང་སེམས་ཧྲཱིཿཡིག་ཡོངས་གྱུར་ལས། །སྤྱན་རས་གཟིགས་དབང་སྐུ་མདོག་དཀར། །ཞལ་གཅིག་ཕྱག་བཞི་དང་པོ་གཉིས། །ཐལ་སྦྱར་གཡས་འོག་ཤེལ་ཕྲེང་དང་། །གཡོན་འོག་པདྨ་རིན་ཆེན་གྱི། །དབུ་རྒྱན་སྙན་ཆ་མགུལ་རྒྱན་དང་། །ཕྱག་གདུབ་ཞབས་གདུབ་སེ་མོ་དོ། །རི་དྭགས་པགས་པས་ནུ་གཡོན་བཀབ། །ལྷ་རྫས་དར་གྱི་སྟོད་

[Full Size]

གཡོགས་དང་། །སྨད་གཡོགས་ལོངས་སྤྱོད་རྫོགས་པའི་ཆས། །ཞབས་གཉིས་རྡོ་རྗེ་སྐྱིལ་ཀྲུང་བཞུགས། །གནས་གསུམ་འབྲུ་གསུམ་འོད་འཕྲོས་པས། །ཡེ་ཤེས་སྤྱན་དྲངས་དབང་བསྐུར་ཞིང་། །འོད་དཔག་མེད་ཀྱིས་རྒྱས་གདབ་གྱུར། །ཨརྒྷཾ་སོགས་ཀྱིས་མཆོད། སྐྱོན་གྱིས་མ་གོས་སོགས་ཀྱིས་བསྟོད། རང་གི་སྙིང་གར་ཟླ་སྟེང་ཧྲཱིཿ། མཐའ་མར་ཡིག་དྲུག་གཡས་སུ་འཁོར། །འོད་འཕྲོས་རྒྱལ་བའི་བྱིན་རླབས་བསྡུས། །འགྲོ་བའི་སྡིག་སྒྲིབ་ཀུན་སྦྱང་གྱུར། །ཡིག་དྲུག་ཅི་ནུས་བཟླས་ལ། ཐུན་མཚམས་སུ་གཏོར་འབུལ་སྤྲོ་ན། ཨ་མྲྀཏས་བསངས། སྭ་བྷཱ་ཝས་སྦྱངས། བྷཱུྃ་ལས་རིན་ཆེན་སྣོད་དུ་ༀ་འོད་ཞུ། །གཏོར་མ་བདུད་རྩིའི་རང་བཞིན་ཟག་མེད་གྱུར། །རང་གི་སྙིང་གའི་འོད་ཀྱིས་འཇིག་རྟེན་མགོན། །སྤྱན་དྲངས་མཆོད་འབུལ་བདག་རྒྱུད་སྨིན་གྲོལ་མཛོད། །ཨ་ཀཱ་རོ་ཚར་གསུམ་གྱིས་གཏོར་མ་འབུལ། རང་ཉིད་ལྷར་གསལ་འོད་ཞུ་ནས། །ཐུགས་ཀའི་ཧྲཱིཿཡིག་ལ་ཐིམ་གྱུར། །དེ་ཡི་ངང་ལ་མཉམ་པར་བཞག །སླར་ཡང་སྐད་ཅིག་དྲན་རྫོགས་སུ། །སྤྱན་རས་གཟིགས་དབང་གསལ་བའི་ངང་། །ཁྱེར་སོ་གསུམ་ལྡན་སྤྱོད་པ་བསྐྱང་། །མཐར་བསྔོ་སྨོན་གྱིས་རྒྱས་གདབ་བྱའོ། །ཡོ་ཆུང་མའི་ངོར་སྤེལ།། །།

བཅོམ་ལྡན་འདས་འོད་དཔག་མེད་ཀྱི་སྒོམ་བཟླས་ཉུང་འདུས་སུ་བཀོད་པ།

[Full Size]

བཅོམ་ལྡན་འདས་འོད་དཔག་མེད་ཀྱི་སྒོམ་བཟླས་ཉུང་འདུས་སུ་བཀོད་པ་བཞུགས་སོ། །སྭསྟི། འདིར་བཅོམ་ལྡན་འདས་འོད་དཔག་མེད་

[Full Size]

ལ་བརྟེན་ནས་རང་གཞན་གྱི་དོན་བྱ་བར་འདོད་ན། སངས་རྒྱས་ཆོས་ཚོགས་དང་ཚད་མེད་བཞི་བཅས་སྔོན་དུ་བཏང་ནས། སྭ་བྷཱ་ཝ་སོགས། སྣང་ཞིང་སྲིད་པའི་ཆོས་རྣམས་ཀུན། །གཟུང་འཛིན་བྲལ་བའི་སྟོང་བར་གྱུར། །དེ་ཡི་ངང་ལས་རང་རྩལ་མདངས། །རྨ་བྱས་བཏེགས་པའི་རིན་ཆེན་ཁྲིར། །སྣ་ཚོགས་པདྨ་ཟླ་བའི་སྟེང་། །རང་སེམས་ཧྲཱིཿཡིག་འོད་འཕྲོ་འདུས། །དོན་གཉིས་བྱས་ཏེ་ཡོངས་གྱུར་ལས། །བཅོམ་ལྡན་འོད་མི་འགྱུར་བའི་སྐུ། །པདྨ་རཱ་གའི་རི་བོ་ལྟར། །དམར་གསལ་ཞལ་གཅིག་ཕྱག་མཉམ་བཞག །ལྷུང་བཟེད་བདུད་རྩིས་བཀང་བ་འཛིན། །ཆོས་གོས་རྣམ་གསུམ་ཞབས་རྡོར་སྐྱིལ། །མཚན་དཔེའི་འོད་ཀྱི་དཀྱིལ་འཁོར་གསལ། །གཡས་གཡོན་པདྨ་ཟླ་བའི་སྟེང་། །ཕྱག་ན་པདྨ་རྡོ་རྗེ་འཛིན། །རྒྱལ་སྲས་ཐུ་བོ་མཆོག་བརྒྱད་དང་། །གཞན་ཡང་སངས་རྒྱས་བྱང་ཆུབ་སེམས། །ཉན་ཐོས་རང་རྒྱལ་ཚོགས་ཀྱིས་བསྐོར། །གཙོ་བོའི་གནས་གསུམ་ༀ་ཨཱ་ཧཱུྃ། །ཐུགས་ཀར་པད་ཟླར་ཧྲཱིཿཡིག་ལས། །འོད་འཕྲོས་བདེ་ཆེན་ཞིང་ཁམས་ནས། །བསྒོམ་པ་དང་འདྲའི་ཡེ་ཤེས་པ། །སྤྱན་དྲངས་དམ་ཡེ་གཉིས་མེད་གྱུར། །སླར་ཡང་འོད་འཕྲོས་དབང་ལྷ་བསྐུལ། །དབང་བསྐུར་སྐུ་གང་དྲི་མ་དག །ཚེ་དཔག་མེད་ཀྱིས་རྒྱས་གདབ་ཅིང་། །ཐུགས་ལས་སྤྲོས་པའི་ལྷ་མོས་མཆོད། །ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱ་དྱཾ། ནས། ཤ་བྡའི་བར་གྱིས་

[Full Size]

མཆོད། ཐུགས་ཀའི་ཧྲཱི་མཐར་སྔགས་ཀྱི་ཕྲེང་། །གཡས་བསྐོར་འོད་ཀྱིས་རྒྱལ་རྣམས་མཆོད། །ཀུན་ཀྱང་སྣང་མཐའི་སྐུར་གྱུར་ནས། །རང་ཐིམ་སླར་ཡང་འོད་ཟེར་འཕྲོས། །རིགས་དྲུག་སེམས་ཅན་སྡིག་སྒྲིབ་སྦྱོང་། །སྣོད་བཅུད་ལྷ་ཡི་རང་བཞིན་གསལ། །སྒྲ་གྲགས་སྔགས་ལ་དྲན་རྟོག་ཐུགས། །དག་པ་རྣམ་པ་གསུམ་ལྡན་གྱུར། །ༀ་ཨ་མི་དྷེ་ཝ་ཧྲཱིཿཅི་ནུས་བཟླ་ཞིང་། དམིགས་བསལ་ཚེ་སྒྲུབ་སྐབས། སླར་ཡང་ལྔ་ལྡན་འོད་ཀློང་ནས། །སྤྲུལ་པའི་ལྷ་མོ་མགྱོགས་མའི་ཚོགས། །འཕྲོས་པས་ཚེ་ལྷ་རིག་པ་འཛིན། །དྲང་སྲོང་ལྷ་ཀླུ་མི་སོགས་ཀྱི། །ཚེ་བསོད་དཔལ་གྲགས་འབྱུང་བ་ལྔའི། །དྭངས་བཅུད་འོད་ཟེར་རྣམ་པར་བསྡུས། །རང་ཐིམ་རྟག་པའི་རྡོ་རྗེ་ཅན། །གཞོམ་བྲལ་མི་འགྱུར་ལྷུན་གྱིས་གྲུབ། །ༀ་ཨ་མི་དྷེ་ཝ་ཨཱ་ཡུཿསིདྡྷི་ཧཱུྃ། ཅི་ནུས་བཟླས་པའི་མཐར། སྦྱིན་པའི་སྟོབས་ཀྱིས་སོགས་ཕར་ཕྱིན་དྲུག་གི་བདེན་ཚིག་དང་། ཡང་སྒྲིབ་སྦྱོང་སོགས་ལ། བདེ་སྨོན་ཤེས་བྱ་མའམ། ངོ་མཚར་སངས་རྒྱས་གང་འོས་བྱ་ཞིང་། སྣོད་བཅུད་ལྷར་བསྡུ་དེ་ཉིད་ཀྱང་། །འོད་ཞུ་ཧྲཱིཿར་ཐིམ་མི་དམིགས་པ། །མ་བཅོས་སྤྲོས་བྲལ་ངང་དུ་བཞག །སླར་ཡང་ལྷ་སྐུར་ལམ་གྱིས་གསལ། །དགེ་བ་འདི་ཡིས་མྱུར་དུ་བདག །སོགས་དང་། དགེ་བ་འདི་ཡིས་སྐྱེ་བོ་ཀུན། །སོགས་དང་བཀྲ་ཤིས་རིམ་པ་ཅི་རིགས་བརྗོད་པར་བྱའོ། །ཞེས་པ་འདི་སི་ཏུ་པདྨ་ཉིན་བྱེད་དབང་པོས་ཆོས་

[Full Size]

ཁྲིམས་པ་ཀརྨ་ལྷས་སྐྱབས་ཀྱི་བཞེད་ལྟར་འདུས་སྡེའི་ཞལ་འདོན་རྒྱུར་སྤེལ་བ་དགེ་བར་གྱུར་ཅིག །སརྦ་མངྒ་ལཾ།། །།དཀོན་མཆོག་གསུམ་ལ་བྱང་ཆུབ་བར། །སྐྱབས་སུ་མཆི་ཞིང་འགྲོ་བ་རྣམས། །བདེ་ལྡན་སྡུག་བསྔལ་དང་བྲལ་ཞིང་། །བླ་མེད་གོ་འཕང་ཐོབ་གྱུར་ཅིག །དངོས་ཀུན་ཆོས་རྣམས་སྟོང་པའི་ངང་། །དེ་ལས་རང་ཉིད་པད་ཟླའི་སྟེང་། །ཧྲཱིཿདམར་འོད་ཀྱིས་འཕགས་པ་མཆོད། །སེམས་ཅན་དོན་བྱས་ཡོངས་གྱུར་ལས། །བཅོམ་ལྡན་སྣང་མཐའ་ཚེ་དཔག་མེད། །དམར་གསལ་པདྨ་རཱ་གའི་མདོག །ཞལ་གཅིག་ཕྱག་གཉིས་མཉམ་བཞག་གི། ཕྱག་རྒྱས་ལྷུང་བཟེད་བཅུད་བཀང་ནང་། །ཚེ་བུམ་རིན་ཆེན་ཤིང་ལོས་བརྒྱན། །བསྣམས་ཤིང་ཆོས་གོས་རྣམ་གསུམ་བཀླུབས། །ཞབས་གཉིས་རྡོར་དཀྱིལ་མཚན་དཔེ་འབར། །ཟླ་བའི་རྒྱབ་ཡོལ་འོད་ལྔ་ཡི། །ཟེར་དང་ཟེར་ཐག་ཀུན་ཏུ་འཕྲོ། །གནས་གསུམ་ༀ་ཨཱཿཧཱུྃ་གིས་མཚན། །ཐུགས་ཀའི་དབུས་སུ་པད་ཟླར་ཧྲཱིཿ། དེ་ལས་འོད་འཕྲོས་རང་བཞིན་གྱི། །ཆོས་དབྱིངས་རྣམ་པར་དག་པའི་ཞིང་། །བདེ་ལྡན་པདྨོ་བཀོད་པ་ནས། །འོད་སྣང་མཐའ་ཡས་ཚེ་དཔག་མེད། །བསྒོམ་པ་དང་འདྲའི་ཡེ་ཤེས་པ། །ཕྱོགས་བཅུའི་རྒྱལ་དང་རྒྱལ་སྲས་ཚོགས། །བཙུན་མོ་བྱང་སེམས་ཉན་རང་གི། །འཁོར་ཚོགས་སྤྱན་དྲངས་མདུན་མཁར་བཞུགས། །རང་གི་ཐུགས་ཀའི་འོད་ཟེར་གྱིས། །བསྐུལ་བའི་མཆོད་ལྷས་མཉེས་

[Full Size]

པར་བྱས། །ཛཿཧཱུྃ་བྃ་ཧོཿདམ་ཚིག་དང་། །ཡེ་ཤེས་གཉིས་མེད་སླར་ཡང་ནི། །ཐུགས་ཀའི་ས་བོན་ལས་འོད་འཕྲོས། །དབང་ལྷ་རིགས་ལྔ་ཡབ་ཡུམ་རྣམས། །སྤྱན་དྲངས་མཆོད་པས་དགྱེས་པ་བསྐྱེད། །དབང་བསྐུར་གསོལ་གདབ་མོད་ཉིད་ལ། །དགོངས་པ་མཛད་ཅིང་ལྷ་ཡི་ཆུ། །དྲི་མེད་དག་པས་ཁྲུས་གསོལ་ཞིང་། །སྐུ་གང་ཆུ་ཞབས་སྤྱི་བོར་བརྟན། །ཚེ་དཔག་མེད་པས་དབུ་རྒྱན་གྱུར། །རང་འོད་ལས་སྤྲུལ་མཆོད་ལྷ་མོ། །དུ་མ་སྤྲོས་པས་ཀུན་བཟང་གི། །སྨོན་ལམ་ཇི་བཞིན་མཆོད་པའི་སྤྲིན། །མཁའ་དབྱིངས་བཀང་བས་མཆོད་པར་གྱུར། །ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱདྱཾ། པུཥྤེ་ཨཱཿཧཱུྃ། ནས། ཤབྡ་བར་གྱིས་མཆོད་ལ། བདེ་ཆེན་བདེ་བའི་རང་བཞིན་གྱི། །ལྷུན་གྲུབ་ཞིང་གི་སྟོན་པ་མཆོག །རྒྱལ་བ་རྒྱལ་བའི་འབྱུང་གནས་གཏེར། །འོད་སྣང་དཔག་མེད་ཕྱག་འཚལ་བསྟོད། །ཐུགས་ཀའི་པད་ཟླར་ཧྲཱིཿདམར་པོ། །དེ་མཐར་སྔགས་ཕྲེང་གཡས་སུ་བསྐོར། །འོད་འཕྲོས་ཕྱོགས་བཅུའི་བདེ་གཤེགས་མཆོད། །ཚུར་འདུས་བྱིན་རླབས་ཐུགས་རྗེའི་སྟོབས། །ལྷ་སྐུའི་རྣམ་པར་སྤྱན་དྲངས་ནས། །མཚོ་ལ་ཆར་བབས་བཞིན་དུ་ཐིམ། །མཆོག་ཐུན་དངོས་གྲུབ་ཐོབ་པར་བསམ། །སླར་ཡང་འོད་འཕྲོས་མ་གྱུར་འགྲོ། །རིགས་དྲུག་འཁོར་བའི་སྐྱེ་སྒོ་བཅད། །ཀུན་ཀྱང་ལྷ་ཡི་དཀྱིལ་འཁོར་དམིགས། །ཁྱེར་སོ་གསུམ་ལྡན་

[Full Size]

ཏིང་འཛིན་དང་། །ༀ་ཨ་མི་དྷེ་ཝ་ཧྲཱིཿསྙིང་པོ་ཅི་ནུས་སུ་བཟླས་ལ། ཉེ་སྙིང་། ཧྲཱིཿཅེས་པའང་བཟླས་ལ། མཐར། ཕྱི་སྣོད་ལྷ་ཡི་དཀྱིལ་འཁོར་པ། །རང་ལ་ཐིམ་ཞིང་རང་ཉིད་ཀྱང་། །ཐུགས་ཀའི་ས་བོན་ལ་ཐིམ་ནས། །དེའང་མི་དམིགས་འོད་གསལ་བ། །མ་བཅོས་སྤྲོས་བྲལ་ངང་ལ་བཞག །ཅེས་ཅི་གནས་རང་བབས་སུ་མཉམ་བཞག་གི་ངོ་བོ་བསྐྱངས་ལ། སླར་ཡང་ལྷ་སྐུར་གསལ་བ་ཡི། །གནས་གསུམ་འབྲུ་གསུམ་མཚན་པར་གྱུར། །སྣོད་བཅུད་ལྷ་ཡི་རང་བཞིན་སྐུ། །སྒྲ་གྲགས་སྔགས་ལ་དྲན་རྟོག་ཐུགས། །ཀུན་བཟང་ཀློང་ཡངས་ཆེན་པོར་གསལ། །དགེ་བ་འདི་ཡིས་སོགས་བརྗོད། སྐབས་སུ་གཏོར་མ་འབུལ་བར་སྤྲོ་ན། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་ལས་རིན་ཆེན་སྣོད་མཆོག་ཏུ། །ལྷ་ཡི་ཞལ་ཟས་གཙང་ཞིང་བཟང་། །འདོད་ཡོན་ལྔ་ལྡན་མཆོད་པའི་ཚོགས། །རྒྱ་ཆེན་རྒྱུན་མི་ཆད་པར་མོས། །རང་གི་སྙིང་གའི་འོད་ཟེར་གྱིས། །བསྐུལ་ལས་ཡེ་ཤེས་སྤྱན་དྲངས་གྱུར། །ༀ་ཨ་ཀཱ་རོས་ལན་གསུམ་བྱིན་བརླབས་ལ་འབུལ། ༀ་བཛྲ་ཨརྒྷཾ་སོགས་ཀྱིས་མཆོད། གོང་བཞིན་བསྟོད་པ་དང་། འདོད་དོན་གསོལ་བ་ནི། མཆོད་སྦྱིན་གཏོར་མ་འདི་བཞེས་ལ། །སོགས་ནས། ཀུན་འགྲུབ་མཛོད་བར་བརྗོད། མ་འབྱོར་པ་སོགས་ཀྱིས་བཟོད་གསོལ་དང་། བཛྲ་མཱུས་ཡེ་ཤེས་གཤེགས་པའམ། སུ་པྲ་ཏིཥྛས་བརྟན་བཞུགས་བྱ་བའང་ལེགས། ཅེས་པའང་འཇང་ཡུལ་གྱི་སྒྲུབ་པ་ཀརྨ་ཐུགས་རྗེས་བསྐུལ་ལྟར་སི་ཏུ་པས་སྤེལ་བ་མངྒ་ལཾ།། །།

ཞིང་སྒྲུབ་དང་ཚེ་སྒྲུབ་ཉུང་བསྡུས་དངོས་གྲུབ་ཆུ་འཛིན་བི་ཧ་ར།

[Full Size]

ཞིང་སྒྲུབ་དང་ཚེ་སྒྲུབ་ཉུང་བསྡུས་དངོས་གྲུབ་ཆུ་འཛིན་བི་ཧ་ར་ཏིསྨ། མཆོག་གསུམ་རྒྱལ་ལ་སྐྱབས་མཆི་ཞིང་། །འགྲོ་དོན་བྱང་ཆུབ་སེམས་བསྐྱེད་དོ། །རང་སེམས་ཧྲཱིཿཡིག་ཡོངས་གྱུར་ལས། །སྤྱན་རས་གཟིགས་དབང་སྐུ་མདོག་དཀར། །ཞལ་གཅིག་ཕྱག་གཉིས་གཡས་མཆོག་སྦྱིན། །གཡོན་པས་པད་དཀར་ཞབས་སྐྱིལ་ཀྲུང་། །ལོངས་སྤྱོད་རྫོགས་པའི་ཆ་ལུགས་ཅན། །གནས་གསུམ་འབྲུ་གསུམ་མཚན་པར་གྱུར། །མདུན་མཁར་པད་ཟླའི་སྟེང་དུ་ཧྲཱིཿ། ཡོངས་གྱུར་བདེ་ཆེན་པདྨོ་བཀོད། །ཞིང་མགོན་སངས་རྒྱས་འོད་དཔག་མེད། །དམར་གསལ་ཞལ་གཅིག་ཕྱག་གཉིས་ཀྱིས། །མཉམ་བཞག་ལྷུང་བཟེད་སྤྲུལ་པའི་སྐུ། །མཚན་དཔེ་གཟི་འབར་ཆས་རྫོགས་གསལ། །སྐུ་གསུམ་ངོ་བོ་འབྲུ་གསུམ་མཚན། །སླར་ཡང་འོད་འཕྲོས་རྣམ་དག་ཞིང་། །རྒྱ་མཚོར་མངའ་བའི་བཅོམ་ལྡན་འདས། །ལྷ་ཚོགས་འཁོར་བཅས་ཐུགས་རྒྱུད་བསྐུལ། །སྤྱན་དྲངས་བདག་མདུན་ལ་ཐིམ་གྱུར། །ༀ་ཨ་མི་དྷེ་ཝ་ཛྙཱ་ན་སརྦ་ཨཱ་བེ་ཤ་ཡ་ཧཱུྃ། ཛཿཧཱུྃ་བྃ་ཧོཿ་གཉིས་མེད་གྱུར། །བདག་མདུན་ཐུགས་ཀའི་ཧཱུྃ་ཡིག་ལས། །མཆོད་པའི་ཚོགས་སྤྲོས་དགྱེས་བསྐྱེད་གྱུར། །དབང་ལྷས་དབང་བསྐུར་སྐུ་ཁྲུས་གསོལ། །ཆུ་ལྷག་ཡར་

[Full Size]

བརྟེན་རིགས་ལྔ་ཡིས། །རྒྱས་གདབ་ཐུགས་ཀར་ཟླ་སྟེང་ཧྲཱིཿ། དེ་མཐར་སྔགས་བསྐོར་ཕྲེང་བ་ལས། །འོད་འཕྲོས་འཕགས་མཆོད་འགྲོ་སྒྲིབ་སྦྱངས། །བདག་རྒྱུད་ཡེ་ཤེས་སྨིན་གྲོལ་གྱུར། །དེ་ནས་ལྷ་ཡི་རིགས་སྔགས་བཟླས་ལ། སླར་ཡང་མདུན་བསྐྱེད་ཐུགས་ལས་འོད། །ལྔ་ལྡན་ཕྱོགས་བཅུར་འཕྲོས་པ་ལས། །ཚེ་ཉམས་ཡལ་བ་ཆད་པ་སོགས། །ཐམས་ཅད་ཐིག་ལེ་འོད་ཟེར་དང་། ནྲྀ་ཡིག་རྣམ་པར་བསྡུས་ནས་སུ། །རང་ཐིམ་ཚེ་དབང་དཔལ་འབྱོར་པ། །རབ་རྒྱས་འཆི་མེད་མཆོག་ཐོབ་གྱུར། །སྐབས་འདིར། ༀ་ཨཱཿཧཱུྃ་ཨ་མི་དྷེ་ཝ་ཨཱ་ཡུཿསིདྡྷི་ཧཱུྃ་ཧྲཱིཿཅི་ནུས་བཟླས་མཐར། མདུན་བསྐྱེད་འོད་ཞུ་དགྱེས་མདངས་བཅས། །རང་གི་སྤྱི་བོར་ཐིམ་ནས་སུ། །དབྱེར་མེད་གཅིག་འདྲེས་མ་བཅོས་པ། །རང་རིག་རང་གསལ་ཆོས་དབྱིངས་ཀྱི། །རྩལ་གདངས་ཀློང་ཡངས་ཆེན་པོའི་ངང་། །འཁོར་འདས་དཀྱིལ་འཁོ༷ར་གཅིག་ཏུ་ཤར། །དར་ཅིག་ལྟ་བའི་ངང་ལ་མཉམ་པར་བཞག །མཐར་དགེ་བསྔོ་སོགས་སྤྱི་འགྲོ་ལྟར་བྱའོ། །ཞེས་པའང་ཞེ་འཛོང་བླ་སྤྲུལ་ཀརྨ་ཨ་མཱ་རའི་བཞེད་ངོར་སྤེལ་བ་ཛ་ག་ཏཾ། བཀྲ་ཤིས་དཔལ་འབར་འཛམ་གླིང་རྒྱན་དྲུག་ཤོག །དགེའོ། །དགེའོ། །དགེའོ།། །།

རྒྱལ་བ་རྒྱ་མཚོའི་ལྷ་དགུའི་བདག་བསྐྱེད་རྒྱུན་ཁྱེར་ངེས་ལམ་སྙིང་པོའི་དོན་སྟོན།

[Full Size]

༈ རྒྱལ་བ་རྒྱ་མཚོའི་ལྷ་དགུའི་བདག་བསྐྱེད་རྒྱུན་ཁྱེར་ངེས་ལམ་སྙིང་པོའི་དོན་སྟོན་བཞུགས་སོ། །ན་མོ་ལོ་ཀི་ཤྭ་ར་ཡེ། འདིར་དཔལ་འཇིག་རྟེན་དབང་ཕྱུག་གི་བདག་བསྐྱེད་རྒྱུན་ཁྱེར་འདོད་པས་མཆོད་པ་དངོས་བཤམས་སམ། ཡིད་སྤྲུལ་དམིགས་པས་ཁྱབ་པར་བྱས་ལ། དང་པོ་སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་ནི། བདག་དང་མ་གྱུར་མཁའ་ཁྱབ་འགྲོ་བ་རྣམས། །ཕྱོགས་བཅུ་དུས་གསུམ་སངས་རྒྱས་ངོ་བོ་ཉིད། །དཀོན་མཆོག་གསུམ་དང་རྩ་གསུམ་འདུས་པའི་དཔལ། །རྒྱལ་བ་རྒྱ་མཚོའི་ལྷ་ལ་སྐྱབས་སུ་མཆི། །འཁོར་བ་དུཿཁའི་མུན་པར་བྱིངས་པ་རྣམས། །དེང་འདིར་བདག་གི་སེམས་བསྐྱེད་འོད་སྣང་གིས། །མྱ་ངན་འདས་པའི་ལམ་ལ་འཇུག་པ་ཡི། །ཡང་དག་ཡེ་ཤེས་ཕྱིར་མི་ལྡོག་ཕྱིར་བསྔོ། །སེམས་ཅན་ཐམས་ཅད་བདེ་ལྡན་སྡུག་བསྔལ་བྲལ། །བདེ་དང་མི་འབྲལ་མཉམ་ཉིད་ངང་གནས་ཤོག །དེ་ནས་རྟེན་དང་བརྟེན་པའི་དཀྱིལ་འཁོར་བསྒོམ་པ་ནི། ༀ་སྭ་བྷཱ་ཝས་སྟོང་པར་སྦྱངས། ཆོས་རྣམས་ཐམས་ཅད་སྟོང་པ་ཉིད་དུ་གྱུར། །དེ་ཡི་ངང་ལས་རང་སེམས་ཡི་གེ་ཧྲཱིཿ། །དམར་གསལ་ཡེ་ཤེས་ལྔ་ལྡན་འོད་ལྔའི་ཟེར། །འོག་གི་ཕྱོགས་འཕྲོས་འོད་ཟེར་ལས་གྲུབ་པའི། །ཞིང་ཁམས་རྒྱ་ཁྱོན་ཆོས་དབྱིངས་ཚད་མཉམ་དབུས། །སྣ་ཚོགས་རྡོ་རྗེའི་ལྟེ་བར་བྱང་ཆུབ་ཤིང་། །ལོ་འབྲས་ནོར་བུ་རིན་ཆེན་བཀྲ་ཤིས་བརྒྱན། །དེ་སྟེང་པྃ་ལས་པདྨ་འདབ་མ་འབུམ།

[Full Size]

ལྟེ་བར་བྷྲུྃ་ལས་གཞལ་ཡས་ཁང་གྲུ་བཞི། །སྒོ་བཞི་རྟ་བབས་བཞི་ལྡན་ཀ་བརྒྱད་སོགས། །མཚན་ཉིད་ཡོངས་རྫོགས་དཀྱིལ་འཁོར་ཆེན་པོར་གསལ། །ཕྱི་རོལ་དུར་ཁྲོད་བརྒྱད་དང་མཐའ་སྐོར་དུ། །རྡོ་རྗེ་ར་གུར་མེ་རི་འབར་པའོ། །དཀྱིལ་འཁོར་དབུས་སུ་སྣ་ཚོགས་པད་འདབ་བརྒྱད། །ལྟེ་བར་ཉི་དཀྱིལ་སྟེང་དུ་ཧྲཱིཿཡིག་འོད། །འཕྲོས་པས་རྒྱལ་མཆོད་འགྲོ་བའི་སྡིག་སྒྲིབ་སྦྱངས། །ཀུན་ཀྱང་ཐུགས་རྗེ་ཆེན་པོར་སྣང་བར་བྱས། །འོད་ཟེར་ཚུར་འདུས་རང་ཐིམ་ཡོངས་གྱུར་ལས། །བཅོམ་ལྡན་སྤྱན་རས་གཟིགས་དབང་སྐུ་མདོག་དམར། །ཞལ་གཅིག་ཕྱག་བཞི་རྩ་ཕྱག་ཐལ་སྦྱར་གྱིས། །ཡུམ་འཁྱུད་གཡས་འོག་རྡོ་རྗེ་རྩེ་ལྔ་དང་། །གཡོན་འོག་པདྨ་དམར་པོ་འདབ་བརྒྱད་འཛིན། །དབུ་སྐྲ་ཐོར་ཚུགས་དར་གྱི་ཅོད་པན་དང་། །རིན་ཆེན་རྩེ་བྲན་ལྔས་བརྒྱན་ཞབས་རྡོར་སྐྱིལ། །པང་དུ་ཡུམ་མཆོག་རྡོ་རྗེ་ཕག་མོ་དམར། །ཞལ་གཉིས་སྤྱི་གཙུག་ཕག་ཞལ་ཕེཾ་སྒྲ་ངུར། །རྩ་ཞལ་ཁྲོ་གཉེར་སྤྱན་གསུམ་མཆེ་བ་གཙིགས་། །ཕྱག་གཉིས་གཡས་པ་རྡོ་རྗེ་གྲི་གུག་འཕྱར། །གཡོན་ཐོད་ཁྲག་བཀང་ཡབ་ལ་སྟོབ་བཞིན་འཁྱུད། །སྐྲ་གྲོལ་ཐོད་སྐམ་ལྔས་བརྒྱན་ཐོད་རློན་གྱི། །དོ་ཤལ་རུས་པའི་ཕྱག་རྒྱ་ལྔས་བརྒྱན་ཞིང་། །ཞབས་གཉིས་ཐབས་ཀྱི་སྐུ་ུལ་འཁྲིལ་ཚུལ་གྱིས། །སྐྱིལ་མོ་ཀྲུང་བཅས་བཞུགས་པ་གསལ་བར་གྱུར། །ཕྱོགས་བཞིར་པད་ཉིའི་སྟེང་དུ་ཧྲཱིཿཡིག་བཞི། །འོད་འཕྲོས་དོན་གཉིས་བྱས་ནས་ཧྲཱིཿལ་ཐིམ། །

[Full Size]

ཡོངས་གྱུར་ཤར་དུ་མི་བསྐྱོད་སྤྱན་རས་གཟིགས། །དམར་གསལ་སྤྱན་མ་སྔོན་མོ་གཉིས་མེད་སྦྱོར། །ལྷོ་རུ་རིན་ཆེན་སྤྱན་རས་གཟིགས་དམར་པོ། །མཱ་ཀི་སེར་མོ་མཉམ་སྤྱོར་ནུབ་ཏུ་ནི། །སྣང་མཐའ་སྤྱན་རས་གཟིགས་དམར་གོས་དཀར་མོ། །དཀར་དམར་མདངས་ཅན་མཉམ་སྦྱོར་བྱང་དོན་གྲུབ། །སྤྱན་རས་གཟིགས་དམར་དམ་ཚིག་སྒྲོལ་ལྗང་སྦྱོར། །ཀུན་ཀྱང་ཞལ་གཅིག་ཕྱག་བཞི་ཡབ་རྣམས་ཀྱི། །རྩ་ཕྱག་ཡུམ་འཁྱུད་ཐལ་སྦྱར་གཡས་འོག་མས། །མུ་ཏིག་ཕྲེང་འཛིན་གཡོན་འོག་པདྨ་བསྣམས། །ཞབས་གཉིས་སྐྱིལ་ཀྲུང་ཡུམ་རྣམས་ཕྱག་དང་པོ། །ཐལ་སྦྱར་ཡབ་འཁྱུད་གཡས་འོག་རིམ་བཞིན་དུ། །འཁོར་ལོ་རིན་ཆེན་པདྨ་ཨུཏྤལ་འཛིན། །གཡོན་འོག་རྣམས་ཀྱིས་པདྨ་དམར་པོ་བསྣམས། །ཞབས་གཉིས་བདག་པོར་འཁྲིལ་ཚུལ་སྐྱིལ་ཀྲུང་བཞུགས། །དབུ་སྐྲ་ཐོར་ཚུགས་ཅོད་པན་རྩེ་བྲན་སོགས། །རིན་ཆེན་དར་དང་རུས་པའི་རྒྱན་རྣམས་རྫོགས། །མཚམས་བཞིར་ཧ་རི་ནི་ས་ཡོངས་གྱུར་ལས། །རྡོ་རྗེ་རིན་ཆེན་པདྨ་ལས་ཀྱི་རིགས། །ཌཱ་ཀི་སྔོ་སེར་དམར་ལྗང་སྐུ་མདོག་ཅན། །ཕྱག་གཡས་རྡོ་རྗེ་ནོར་བུ་བུམ་པ་དང་། །རལ་གྲི་འཕྱར་ཞིང་གཡོན་རྣམས་པདྨ་འཛིན། །རུས་རྒྱན་རིན་ཆེན་དར་གྱིས་མཛེས་པའོ། །ཕྱི་རོལ་འདོད་སྣམ་ལྷ་མོ་གཟུགས་སྒྲ་དྲི། །རོ་དང་རེག་བྱ་སོ་སོའི་བརྡ་ཆོས་འབུལ། །ལྷ་ཚོགས་ཀུན་གྱི་སྤྱི་བོར་ཟླ་ལ་ༀ། །མགྲིན་པར་ཉི་སྟེང་ཨཱཿདམར་

[Full Size]

ཐུགས་ཀ་རུ། །པདྨར་ཧཱུྃ་སྔོན་དང་ནི་ཧྲཱིཿདམར་གསལ། །ཡབ་ཡུམ་ཐུགས་སྲོག་ཧྲཱིཿལ་སྔགས་ཕྲེང་བ། །གཡས་དང་གཡོན་བསྐོར་མཁའ་འགྲོ་བཞིའི་ཐུགས་ཀར། །རང་མདོག་ཧ་རི་ནི་ས་གསལ་བར་གྱུར། །རང་གི་ཐུགས་ཀའི་ཧྲཱིཿལས་འོད་ཟེར་འཕྲོས། །བསྐྱེད་པ་དང་འདྲའི་ཡེ་ཤེས་དཀྱིལ་འཁོར་གྱི། །རྟེན་དང་བརྟེན་པར་བཅས་པ་སངས་རྒྱས་དང་། །བྱང་སེམས་སྲས་དང་བཙུན་མོའི་ཚོགས་བསྐོར་བ། །མདུན་མཁར་སྤྱན་དྲངས་བཛྲ་མཱ་ཛཿཞེས་རྡོ་རྗེ་བསྡུ་བའི་རྒྱས་སྤྱན་དྲངས་ལ་མཆོད་པ་ནི། ༀ། ཉེར་སྤྱོད་བདུན་དང་ཤ་ལྔ་བདུད་རྩི་ལྔ། །ཟག་མེད་བདེ་ཆེན་མཆོད་འབུལ་བྱིན་གྱིས་རློབས། །ༀ་བཛྲ་ཨརྒྷཾ། དྷཱུ་པེ། པུཥྤེ་སོགས་ཀྱིས་མཆོད། ཛཿཧཱུྃ་བྃ་ཧོཿགཉིས་སུ་མེད་པར་གྱུར། མདུན་མཁར་ཡེ་ཤེས་དཀྱིལ་འཁོར་ལྷ་ཚོགས་རྣམས། །རྒྱུད་བསྐུལ་ཐུགས་ལས་མཁའ་འགྲོ་མ་ཚོགས་སྤྲོས། །མཚམས་བསྲུང་ཤིས་བརྗོད་བུམ་པས་དབང་བསྐུར་གྱུར། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཆུ་ཞབས་ཡར་ལུད་གཙོ་བོར་སྣང་མཐའ་ཡས། །ཡུམ་ལ་རྣམ་སྣང་འཁོར་རྣམས་མི་བསྐྱོད་པ། །རིན་འབྱུང་འོད་དཔག་དོན་གྲུབ་རྒྱས་གདབ་གྱུར། །བདག་ཉིད་ཐུགས་ཀར་པདྨ་ལ་གནས་བའི། །ཧྲཱིཿདང་ཡུམ་གྱི་ཐུགས་ཀར་ཆོས་འབྱུང་དབུས། །ཧྲཱིཿལས་འོད་ཟེར་དཀར་སེར་དམར་ལྗང་འཕྲོས། །འཕགས་མཆོད་ཀུན་ཀྱང་ཐུགས་རྗེ་ཆེན་

[Full Size]

པོའི་སྐུ། །ཆར་བབས་རང་ཐིམ་སླར་ཡང་ཧྲཱིཿཡིག་འོད། །ཞལ་ནས་ཐོན་ཅིང་རིགས་བཞི་ཡབ་ཡུམ་དང་། །མཁའ་འགྲོ་བཞི་ཡི་ཐུགས་ཀར་ཐིམ་སོ་སོའི། །ཐུགས་ལས་འོད་འཕྲོས་ཞལ་བརྒྱུད་བདག་ཡབ་ཡུམ། །ཐུགས་ཀའི་ཧྲཱིཿར་ཐིམ་ལས་བཞི་འགྲུབ་པར་གྱུར། །ༀ་ཨཱཿཧཱུྃ་ཧྲཱིཿༀ་མ་ཎི་པདྨེ་ཧཱུྃ། ཞེས་ཡི་གེ་བཅུ་པ་ཅི་ནུས་བཟླས། དྷུ་མ་གྷ་ཡེ་ན་མ་སྭཱ་ཧཱ། ཧ་རི་ནི་ས་ར་ཙ་ཧྲི་ཡ་ཧཱུྃ་ཛཿཞེས་དཔའ་བོ་མཁའ་འགྲོ་ཡོངས་ཀྱི་སྙིང་པོ་ཅི་རིགས་སུ་བཟླའོ། །དེ་ནས་ཐུན་མཐར་རྫོགས་རིམ་ནི། སླར་ཡང་རང་གི་ཐུགས་ལས་འོད་ཟེར་འཕྲོས། །འཁོར་འདས་ལྷར་གསལ་ལ་ཐིམ་དེ་དག་ཀྱང་། །འོད་ཞུ་སྲུང་བའི་གུར་ཐིམ་རང་ལ་བསྡུ། །རང་ཡང་ཐུགས་ཀའི་ཧྲཱིཿཡིག་ལ་ཐིམ་པས། །ཧྲཱིཿཡང་འོད་ཞུ་གོང་བུ་ནཱ་ཱད་ལས། །མི་དམིགས་འོད་གསལ་སྤྲོས་བྲལ་ངང་དུ་བཞག །ཅེས་ཅི་གནས་སུ་བཞག །སླར་ཡང་རང་ཉིད་ཞལ་གཅིག་ཕྱག་གཉིས་པ། །སྤྱན་རས་གཟིགས་གསལ་ཕྱི་སྣོད་གཞལ་ཡས་ཁང་། །ནང་བཅུད་ལྷ་དང་སྒྲ་གྲགས་སྔགས་ཀྱི་གདངས། །དྲན་རྟོག་ཏིང་འཛིན་ངང་ལ་ངོ་བོ་སྐྱོང་། །སྤྱན་རས་གཟིགས་དབང་འཇིག་རྟེན་མགོན། །ཚད་མེད་ཐུགས་རྗེའི་རབ་བགྲོད་ཀྱིས། །དེང་འདིར་འགྲོ་དྲུག་སེམས་ཅན་རྣམས། །ཀུན་ཀྱང་མངོན་སངས་རྒྱས་གྱུར་ཅིག །ཅེས་དང་། བསྔོ་བ་སྨོན་ལམ་ཅི་བདེར་བྱའོ། །ཞེས་པའང་རྒྱལ་རོང་ཁྲོ་ཆུ་ཤུ་བྷཾ་ཆོས་གྲྭའི་སྒྲུབ་ཆེན་བླ་མ་བཛྲ་ལཀྵའི་གཡར་ངོར། སི་ཏུ་པདྨ་ཉིན་བྱེད་དབང་པོས་བཀོད་པ་དགེ་བར་གྱུར་ཅིག །སརྦ་མངྒ་ལཾ།། །།

རྡོ་རྗེ་རྣམ་འབྱོར་མའི་བདག་བསྐྱེད་རྒྱུན་ཁྱེར་མཁའ་སྤྱོད་འཛུམ་ཞལ།

[Full Size]

༈ རྡོ་རྗེ་རྣམ་འབྱོར་མའི་བདག་བསྐྱེད་རྒྱུན་ཁྱེར་མཁའ་སྤྱོད་འཛུམ་ཞལ་བཞུགས། སྭ་བྷཱ་ཝས་སྦྱངས། སྟོང་ལས་ཁམས་གསུམ་ཆོས་འབྱུང་གཞལ་ཡས་དབུས། །པདྨ་རོ་ཉིའི་སྟེང་དུ་རང་སེམས་ཧྲཱིཿ། དམར་པོའི་འོད་ཀྱིས་དོན་གཉིས་བྱས་ཡོངས་གྱུར། །བདག་ཉིད་རྡོ་རྗེ་རྣལ་འབྱོར་མ་དམར་མོ། །ཞལ་གཅིག་ཁྲོ་གཉེར་སྤྱན་གསུམ་དམར་ལ་ཟླུམ། །དབུ་སྐྲ་ཁམ་ནག་འབར་འཕྱང་ཐོད་སྐམ་བརྒྱན། །མཆེ་གཙིགས་ཚེམས་ཀྱིས་མ་མཆུ་མནན་ཕྱག་གཉིས། །གྲི་གུག་ཐོད་ཁྲག་གྲུ་མོར་ཁ་ཊྭཱྃ་བརྟེན། །ཐོད་རློན་དོ་ཤལ་མེ་ཏོག་དྲིལ་གཡེར་དང་། །ཕྱག་རྒྱ་ལྔས་བརྒྱན་གཡོན་བརྐྱང་གར་གྱིས་རོལ། །སྟོང་གསུམ་ཁྱབ་ཅིང་གཟི་འབར་གནས་གསུམ་དུ། །འབྲུ་གསུམ་མཚན་ལས་འོད་འཕྲོས་ཨོ་རྒྱན་ནས། །ཡེ་ཤེས་སྤྱན་དྲངས་དབང་བསྐུར་རྒྱས་གདབ་གྱུར། །གསང་བར་ཆོས་འབྱུང་པད་འདབ་བཞིར་ཧ་རི། །ནི་ས་དབུས་སུ་ཧྲཱིཿམཐར་སྔགས་ཕྲེང་གཡོན། །འཁོར་བས་མཆོག་ཐུན་དངོས་གྲུབ་ཐོབ་པར་གྱུར། །ༀ་བཛྲ་བཻ་རོ་ཙ་ནི་ཡེ་ཧ་རི་ནི་ས་ཧཱུྃ་ཧཱུྃ་ཕཊ་སྭཱཧཱ། ཅི་ནུས་མཐར། སྣོད་བཅུད་འོད་ཞུ་བདག་ཐིམ་དེ་ཡང་ཧྲཱིཿ། ཐིག་ལེ་ནཱ་ད་མི་དམིགས་འོད་གསལ་ངང་། །སླར་ཡང་བཅོམ་ལྡན་འདས་མའི་སྐུ་རུ་གསལ། །སྣང་གྲགས་ལྷ་ཡི་དཀྱིལ་འཁོར་ཉིད་དུ་ཤར། །དགེ་བ་འདི་ཡིས་མྱུར་དུ་བདག །རྡོ་རྗེ་ཕག་མོ་སོགས་ནས་དགེ་བསྔོ་བྱ། དེ་ལྟར་བུ་རྒྱལ་

[Full Size]

གྱིས་བསྐུལ་ལྟར་སྤེལ་བ་དགེ། །།རང་ཉིད་ལྷར་གསལ་ཐུགས་ལས་རྃ་ཡྃ་ཁྃ། །ཚོགས་རྫས་ལ་ཐིམ་གཉིས་འཛིན་དྲི་མ་སྦྱངས། །ༀ་ཨཱཿཧཱུྃ་གིས་ཡེ་ཤེས་བདུད་རྩིར་སྤེལ། །འདོད་ཡོན་ཟག་མེད་བདེ་ཆེན་མཆོད་སྤྲིན་གྱུར། །ཅེས་པས་བྱིན་བརླབས་ལ། ཧཱུྃ། དཀོན་མཆོག་ཀུན་འདུས་པདྨ་འབྱུང་གནས་མཆོག །རྩ་གསུམ་རྒྱལ་བའི་དཀྱིལ་འཁོར་གནས་འདིར་གཤེགས། །དམ་ཚིག་རྫས་མཆོག་པཉྩ་ཨ་མྲྀ་ཏ། །ག་ཎ་ཙཀྲའི་མཆོད་པ་ཆེན་པོ་འབུལ། །ཐུགས་དམ་བསྐང་ངོ་ནོངས་བཤགས་བར་ཆད་བགེགས། །དབྱིངས་སུ་དག་ཅིང་མཆོག་ཐུན་དངོས་གྲུབ་སྩོལ། །ཅེས་ཚོགས་ཀྱི་མཆོད་པ་འབུལ་ནས་ལྷག་གཏོར་བསྔོ་བ་ནི། བཀའ་ཡི་ལྷག་གཏོར་དབང་རྣམས་འདིར་བྱོན་ལ། །ཚོགས་ལྷག་བཤལ་ཆུའི་དམ་བསྐང་ཕྲིན་ལས་མཛོད། །ཅེས་པའང་ཚོགས་མཆོད་ཁྱེར་བདེར་ཨཱནནྡ་ཤཱ་ས་ནའི་བཞེད་ལྟར། སི་ཏུ་པདྨ་དེ་ཝེནྡྲའི་ལི་ཁི་ཏཾ། སརྦ་ཐཱ་མངྒ་ཀུརྦནྟུ།། །།

རྒྱལ་ཡུམ་འཆི་མེད་མཆོག་སྟེར་འཕགས་མ་ཡིད་བཞིན་འཁོར་ལོའི་སྒོམ་བཟླས་ནི།

[Full Size]

རྒྱལ་ཡུམ་འཆི་མེད་མཆོག་སྟེར་འཕགས་མ་ཡིད་བཞིན་འཁོར་ལོའི་སྒོམ་བཟླས་ནི། སྐྱབས་ཡུལ་དཀོན་མཆོག་རྣམས་ལ་ཕྱག་འཚལ་ཞིང་། །འགྲོ་བའི་དུཿཁ་སྒྲོལ་ཕྱིར་སེམས་བསྐྱེད་དོ། །ༀ་སྭ་བྷཱ་ཝ་སོགས་ཀྱིས་སྦྱངས་ལ། སྟོང་པའི་རང་མདངས་མ་འགགས་སྣང་བའི་རྩལ། །རང་བྱུང་རིག་པའི་ངོ་བོ་ཏཱྃ་ཡིག་དཀར། །དེ་ལས་འོད་འཕྲོས་འཕགས་མཆོད་འགྲོ་དོན་བྱས། །ཚུར་འདུས་

[Full Size]

ཡོངས་གྱུར་འཆི་མེད་མཆོག་སྦྱིན་ཡུམ། །སྟོན་མཚན་དབང་པོ་ཉ་རྒྱས་ལྟ་བུའི་མདོག །བརྒྱད་གཉིས་ལང་ཚོས་སྒེག་པ་ཞི་འཛུམ་ལྡན། །ཞལ་གཅིག་ཕྱག་གཉིས་དབུ་དང་ཕྱག་ཞབས་མཐིལ། །ཡེ་ཤེས་སྤྱན་བདུན་བཀྲ་ཞིང་དཀར་འཛིན་ཟུང་། །རབ་རྒྱས་མཐོན་མཐིང་ལྕང་ལོ་ལྟག་པར་འཕྱང་། །ཕྱག་གཡས་མཆོག་སྦྱིན་གཡོན་པས་ཨུཏྤ་ལ། །ལོ་འདབ་གེ་སར་བཞད་པ་ཐུགས་ཀར་བསྣམས། །མུ་ཏིག་གཙོར་གྱུར་རིན་ཆེན་སྣ་ཚོགས་ཀྱི། །དབུ་རྒྱན་དར་དཔྱངས་སྙན་ཆ་མགུལ་ཆུ་དང་། །དོ་ཤལ་སེ་མོ་དོ་དང་ཕྱག་ཞབས་གདུབ། །སྐ་རགས་གཡེར་ཁའི་ཕྲེང་བས་མངོན་པར་མཛེས། །ལྷ་རྫས་དཀར་པོས་སྟོད་གཡོགས་སྣ་ཚོགས་དར། །སྨད་དཀྲིས་དང་བཅས་ཞབས་གཉིས་སྐྱིལ་མོ་ཀྲུང་། །པད་ཟླའི་གདན་བཞུགས་ཙནྡྲའི་རྒྱབ་ཡོལ་གསལ། །གནས་གསུམ་འབྲུ་གསུམ་ཐུགས་ཀར་ཏཱྃ་ཡིག་མཚན། །དེ་ལས་འོད་འཕྲོས་པོ་ཊ་ལ་ཞིང་ནས། །ཡེ་ཤེས་སེམས་དཔའ་སྤྱན་དྲངས་དབྱེར་མེད་ཐིམ། །དབང་ལྷས་དབང་བསྐུར་སྣང་མཐས་རྒྱས་གདབ་གྱུར། །ༀ་ཨཱཪྱ་ཏཱ་རེ་བཛྲ་ཨརྒྷཾ་ཨཱཿཧཱུྃ། སོགས་ནས། ཤབྡའི་བར་གྱིས་མཆོད། སྙིང་གར་པད་ཟླའི་སྟེང་དུ་འཁོར་ལོ་དཀར། །རྩིབས་བརྒྱད་མུ་ཁྱུད་དང་བཅས་ལྟེ་བར་ཏཱྃ། །གཡས་སུ་ༀ་དང་སྤེལ་ཚིག་སྔགས་མཐར་ཧཱ། །རྩིབས་རྣམས་སོ་སོར་ཡིག་འབྲུ་བརྒྱད་དེ་ལས། །འོད་འཕྲོས་རྒྱལ་བའི་བྱིན་རླབས་བརྟན་གཡོའི་བཅུད། །

[Full Size]

བསྡུས་ནས་འཁོར་ལོ་ཡིག་འབྲུར་ཐིམ་པར་གྱུར། །ཡི་གེ་བཅུ་པ་ཅི་ནུས་བཟླ་ཞིང་། སྔགས་སྤེལ་ཚིག་ཅན་ཡང་བཟླའོ། །ཐུན་མཐར། སྣང་སྲིད་ཡེ་ཤེས་ལྷ་ཡི་དཀྱིལ་འཁོར་པ། །བདག་ཉིད་ལ་ཐིམ་རང་ལྷར་གསལ་བ་ཡང་། །ཡས་མར་འདུས་ནས་ཐུགས་ཀའི་ཏཱྃ་ལ་ཐིམ། །དེ་ཡང་འོད་ཞུ་ཐིག་ལེ་ནཱ་དར་བསྡུ། །སེམས་ཉིད་མ་བཅོས་སྤྲོས་དང་བྲལ་བའི་དབྱིངས། །དམིགས་མེད་བདེ་གསལ་མི་རྟོག་ངང་དུ་བཞག །ཅེས་མཉམ་པར་བཞག་ལ་རྗེས་ཐོབ་ནི། སླར་ཡང་སྣང་སྟོང་ཟུང་འཇུག་ལྷ་སྐུར་ལྡང་། །འཇིག་རྟེན་དབང་སྲས་འཕགས་མའི་གོ་འཕང་ལ། །མཁའ་དང་མཉམ་པའི་སྲིད་འགྲོ་ཇི་སྙེད་པ། །འགོད་ཕྱིར་འཁོར་གསུམ་དམིགས་མཐའ་བྲལ་བར་བསྔོ། །ཅེས་པའང་སི་ཏུ་པས་རྒྱལ་བའི་ཕྲིན་ལས་དབོན་གང་དེའི་བཞེད་ལྟར་བཀོད་པ་ཤུ་བྷ་པུཥྚིཾ།། །།སྣང་སྲིད་གཉིས་བསྡུས་ཆོས་རྣམས་ཀུན། །སྟོང་པར་གྱུར་པ་དེའི་ངང་ལས། །བྃ་ལས་ཡན་ལག་བརྒྱད་ལྡན་མཚོར། །པྃ་ལས་པད་དཀར་འདབ་སྟོང་ལྡན། །ཨ་ལས་ཟླ་དཀྱིལ་སྟེང་དུ་ནི། །རང་སེམས་ཏཱྃ་ལས་འོད་འཕྲོས་པས། །དོན་གཉིས་བྱས་ཏེ་འཕགས་མའི་སྐུ། །ཆུ་ཤེལ་སྟོན་ཟླའི་ཁ་དོག་ཅན། །ཞལ་གཅིག་ཕྱག་གཉིས་གཡས་མཆོག་སྦྱིན། །གཡོན་པའི་མཐེབ་སྲིན་ཨུཏྤལ་བསྣམས། །སྤྱན་བདུན་བཀྲ་ཞིང་ལྷ་རྫས་ཀྱི། །དར་དཀར་སྟོད་གཡོགས་སྣ་ཚོགས་དར། །སྨད་གཡོགས་དབུ་རྒྱན་སྙན་རྒྱན་དང་། །མགུལ་རྒྱན་

[Full Size]

ཕྱག་ཞབས་གདུ་བུ་སོགས། །རིན་ཆེན་རྒྱན་ཀུན་རབ་མཛེས་པ། །ཞབས་གཉིས་རྡོར་སྐྱིལ་ཟླ་བ་ཡི། །རྒྱབ་ཡོལ་འོད་དང་འོད་ཟེར་འཕྲོ། །གནས་གསུམ་ༀ་ཨཱཿཧཱུྃ་ཡིག་དང་། །ཐུགས་ཀའི་ཆ་སྨད་ཏཱྃ་ཡིག་མཚན། །འོད་འཕྲོས་པ་ོཊ་ལ་ཞིང་ནས། །རང་འདྲའི་ལྷ་མོ་དཔག་མེད་པ། །སྤྱན་དྲངས་དམ་ཡེ་གཉིས་མེད་བསྟིམ། །རང་གི་ཐུགས་ལས་འོད་འཕྲོས་པས། །དབང་ལྷས་དབང་བསྐུར་མཆོད་པས་མཆོད། །རིགས་བདག་འོད་དཔག་དབུ་རྒྱན་གྱུར། །ཐུགས་ཀར་ཟླ་སྟེང་འཁོར་ལོ་དཀར། །རྩིབས་བརྒྱད་མུ་ཁྱུད་དང་བཅས་པ། །དབུས་སུ་ཏཱྃ་མཐར་སྔགས་ཕྲེང་དང་། །རྩིབས་བརྒྱད་ཡིག་བརྒྱད་འགྲེང་ཐབས་འཁོད། །འོད་ཀྱིས་རྒྱལ་མཆོད་སེམས་ཅན་ཀུན། །སྒྲིབ་སྦྱང་བརྟན་གཡོ་སྣོད་བཅུད་ཀྱི། །དཔལ་འབྱོར་བསྡུས་ནས་ཡིག་འབྲུར་ཐིམ། །ཚེ་དབང་ཡེ་ཤེས་དབང་ཐོབ་གྱུར། །ཡི་གེ་བཅུ་པ་ཅི་ནུས་བཟླས་ལ། ཕྱི་ནང་སྣོད་བཅུད་དངོས་པོ་རྣམས། །འཕགས་མའི་དཀྱིལ་འཁོར་ཡོངས་ཤར་བ། །ཀུན་ཀྱང་རང་ཐིམ་འོད་ཞུ་ནས། །ཏཱྃ་ཡིག་ནཱ་ད་འོད་གསལ་བ། །དམིགས་མེད་སྤྲོས་བྲལ་བདེ་བ་ཆེ། །གང་ཤར་ཆོས་སྐུའི་ངང་དུ་བཞག །སླར་ཡང་རྗེ་བཙུན་འཕགས་མའི་སྐུ། །ཡོངས་གྱུར་གནས་གསུམ་ཡིག་གསུམ་མཚན། །གཟུང་འཛིན་དངོས་ཀུན་ཆོས་རྣམས་ཀུན། །ལྷ་སྔགས་ཡེ་ཤེས་རོལ་པར་ཤར། །དགེ་བ་འདི་ཡིས་སོགས། ཅེས་གནས་

[Full Size]

མདོ་ཀྱུ་ར་དགེ་སློང་ཀརྨ་ཡེ་ཤེས་ངོར་སྤེལ།། །།སྟོང་པའི་ངང་ལས་པད་ཉི་ལ་ཧྲཱིཿལས་སྒྲོལ་མ་དམར་མོ། ཕྱག་གཡས་སྐྱབས་སྦྱིན་དང་། གཡོན་ལྕགས་ཀྱུས་མཚན་པའི་ཨུཏྤལ་འཛིན་པ། ལྷ་དང་མི་ལས་འདས་པའི་རྒྱན་དུ་མས་སྤྲས་པ། ཞབས་རོལ་པའི་སྟབས་ཀྱིས་མི་ཡི་དབང་པོ་མནན་པར་བསམ་ལ། ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་ཅི་ནུས་བཟླས་མཐར། སྨོན་ལམ་ནི། བཅོམ་ལྡན་སྒྲོལ་མ་དབང་མཛད་དཔལ་མོ་ལ། །དེང་བཟུང་སྙིང་པོའི་བར་དུ་སྐྱབས་གསོལ་འདེབས། །རྒྱལ་པོས་འཇིགས་སོགས་བར་ཆད་ནད་གདོན་ཞི། །ཚེ་བསོད་འབྱོར་རྒྱས་བྱང་ཆུབ་ཆེ་ཐོབ་ཤོག །ཅེས་སི་ཏུ་པདྨའི་མིང་གིས་དད་གསུམ་ལྡན་པ་རྨད་དགའ་ལ་སྤེལ་བ། མ་གཞི་ཨ་རཱ་གའི་གསུངས་པ་གཞིར་བཞག །སྨོན་གསོལ་སྤེལ་བ་དགེའོ།། །།སྭསྟི། མཆོག་གསུམ་རྒྱལ་ལ་གུས་འདུད་འགྲོ་བ་རྣམས། །འབྱུང་བ་ཞུགས་ལྕེའི་འཇིགས་ལས་སྐྱོབ་པའི་ཕྱིར། །ཏཱ་ར་ཀྲོ་དྷིའི་བསྐྱེད་བཟླས་ཟབ་གནད་དོན། །འཇུག་བདེ་འདིར་བཀོད་བཀའ་ཡི་གནང་བ་སྩོལ། །སྭ་བྷ་ཝས་སྦྱངས། ཆོས་རྣམས་དམིགས་མེད་སྟོང་པའི་རང་མདངས་ལས། །སྣ་ཚོགས་པདྨ་ཟླ་བའི་དཀྱིལ་འཁོར་སྟེང་། །རང་ཉིད་སྐད་ཅིག་འཕགས་མ་སྒྲོལ་མ་

[Full Size]

མཆོག །རབ་ཁྲོས་པདྨ་རཱ་གའི་རི་བོ་ལྟར། །དྭངས་ཤིང་གསལ་ལ་འོད་འཚེར་ཞལ་བདུན་ལྡན། །མཆེ་གཙིགས་ལྗགས་བསྐྱོད་རལ་གཡེངས་སྨིན་མ་འབར། །ཕྱག་གཉིས་ནོར་བུ་ཆུ་ཤེལ་བདུད་རྩི་ཅན། །འོད་དཀར་བསིལ་བའི་རང་བཞིན་དཀྱིལ་འཁོར་བསྣམས། །དར་དང་རིན་ཆེན་རུས་པའི་རྒྱན་དང་ནི། །སྟག་གི་ཤམ་གསོལ་ཞབས་གཉིས་རོལ་སྟབས་ཀྱི། །འོད་དང་འོད་ཟེར་སྣ་ཚོགས་ཀློང་དུ་གསལ། །གནས་གསུམ་འབྲུ་གསུམ་ཐུགས་ཀའི་ཧཱུྃ་འོད་ཀྱིས། །བསྐུལ་བས་ཡེ་ཤེས་སྤྱན་དྲངས་དབྱེར་མེད་གྱུར། །ཐུགས་ཀར་ཟླ་སྟེང་ཡིག་བཅུའི་སྔགས་ཕྲེང་ལས། །འོད་འཕྲོས་རང་གཞན་བསྐལ་པ་ནས་བསགས་པའི། །སྡིག་སྒྲིབ་ཉེས་ཚོགས་འཕྲལ་གྱི་མི་མཐུན་ཕྱོགས། །འཇིགས་བརྒྱད་བཅུ་དྲུག་ཞི་ཞིང་ཨགྣེ་ཡེ། །བར་ཆད་ལས་རྒྱལ་སྣོད་བཅུད་དག་པའི་ཞིང་། །པོ་ཊ་ལ་ཡི་གནས་མཆོག་མངོན་གྱུར་ནས། །སྣང་གྲག་རྟོག་ཚོགས་ལྷ་ཡི་དཀྱིལ་འཁོར་ཤར། །གཟུངས་སྔགས་རང་སྒྲས་སྣང་སྲིད་ཞི་བ་དང་། །བྱམས་པའི་ངང་ལས་དགེ་ལེགས་སྐྱེད་པར་གྱུར། །ༀ་ཤྲི་ཁཱི་བ་ད་ནེ་མ་ཧཱ་ཨུལྐ་མུ་ཁི་ཛྭ་ལ་མ་ལི་ནཱ་སཔྟ་ཛི་ཧྭཱི། སཔྟ་མུ་ཁཱི་བི་ཤྭ་ན་རི་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཅི་ནུས་བཟླ་ཞིང་ལྷ་ཡི་ང་རྒྱལ་བརྟན་པོས་དམིགས་

[Full Size]

པའི་གསལ་འདེབས་གང་འོས་བྱའོ། །མཐར་ནི་ལྷ་སྐུ་མི་དམིགས་སྟོང་པའི་ངང་། །མ་བཅོས་སྤྲོས་པ་བྲལ་བའི་ཀློང་དུ་བཞག །དགེ་བས་བདག་གཞན་སྔོན་བསགས་འཕྲལ་ལས་དབང་། །རྐྱེན་ངན་གྲོལ་ཞིང་བསམ་དོན་ཆོས་བཞིན་འགྲུབ། །མཁའ་མཉམ་འགྲོ་བ་རྣམ་པར་གྲོལ་བའི་ལམ། །བཀོད་པའི་ཕྲིན་ལས་གེགས་མེད་ཉིད་འགྲུབ་ཤོག །ཅེས་པའང་རིག་འཛིན་བླ་མའི་ཐུགས་ཀྱི་སྲས་མཆོག་ཚེ་དབང་དཔལ་དར་མཆོག་སྤྲུལ་གྱི་བཀའི་བཞེད་ལྟར། སི་ཏུ་པདྨ་ཉིན་བྱེད་དབང་པོས་བཀོད་དེ་ཕུལ་པ་མངྒ་ལཾ། །

དབེན་པར་གནས་པའི་དགེ་སློང་གཅིག་པུའི་གསོ་སྦྱོང་།

[Full Size]

དབེན་པར་གནས་པའི་དགེ་སློང་གཅིག་པུའི་གསོ་སྦྱོང་བཞུགས། སྭ་སྟི། དགེ་སློང་གཅིག་པུ་དབེན་པར་གནས་པ་དག་གིས་ཟླ་བ་ཕྱེད་ཕྱེད་ཀྱི་གསོ་སྦྱོང་བྱིན་རླབས་བྱ་ཚུལ་ནི། དང་པོ་ཐུབ་དབང་གི་སྐུ་དང་མཎྜལ་སོགས་མཆོད་པ་གང་འབྱོར་བཤམས་ལ། སངས་རྒྱས་ཆོས་སོགས་ལན་གསུམ། སེམས་ཅན་ཐམས་ཅད་སོགས་ལན་གསུམ། ཐམས་ཅད་དུ་ནི་ས་གཞི་དག་སོགས། མ་ལུས་སེམས་ཅན་སོགས། བཅོམ་ལྡན་འདིར་ནི་སོགས། ཇི་ལྟར་བལྟམས་པ་སོགས། སྲབ་འཇམ་ཡངས་པ་སོགས། དེ་ལས་གཞན་ཡང་སོགས། དེ་ནས་ཕྱག་འཚལ་བའམ་ཐལ་མོ་སྦྱར་ལ། ཇི་སྙེད་སུ་དག་སོགས། བསྡུ་ན། ཕྱག་འཚལ་བ་སོགས་བརྗོད། ཡིག་བརྒྱ་དང་མཎྜལ་སོ་བདུན་མ་རྒྱས་པའམ་འབྲིང་པོ། བསྡུ་ན། ས་གཞི་སྤོས་སོགས། རྒྱས་བསྡུས་ཇི་ལྟར་ཡང་ཐལ་མོ་སྦྱར་བཞིན། ཐུབ་བསྟོད་གང་རུང་ཞིག་དང། ཐམས་ཅད་མཁྱེན་པ་སོགས་དཀོན་མཆོག་རྗེས་དྲན་མདོ་བཏོན། སྐར་མ་རབ་རིབ་སོགས། ཆོས་རྣམས་ཐམས་ཅད་སོགས། བསྟན་པ་ཡིན་བར་དང་། ལུས་ཀྱི་སྡོམ་པ་སོགས། བསོད་ནམས་འདི་ཡིས་སོགས། ཕྱག་གསུམ་འཚལ་ནས་ཐང་ཤད་བཅས་ཙོག་པུར་ཐལ་མོ་སྦྱར་ལ། ལྷ་རྣམས་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅུ་བཞི་པའམ། བཅོ་ལྔ་པ་

[Full Size]

ལགས་ཏེ། བདག་ཤཱཀྱིའི་དགེ་སློང་མིང་འདི་ཞེས་བགྱི་བའི་ཡང་གསོ་སྦྱོང་བཅུ་བཞི་པའམ། བཅོ་ལྔ་པ་ལགས་ལ། བདག་ཤཱཀྱའི་དགེ་སློང་མིང་འདི་ཞེས་བགྱི་བ་བར་ཆད་ཀྱི་ཆོས་རྣམས་ཀྱིས་ཡོངས་སུ་དག་གོ་ཞེས་བདག་སྨྲ་ན། བདག་ཡོངས་སུ་དག་པར་ལྷ་རྣམས་ཀྱིས་གཟུང་དུ་གསོལ། བདག་ཤཱཀྱའི་དགེ་སློང་མིང་འདི་ཞེས་བྱ་བས་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱ་བའི་ཕྱིར། དེང་གསོ་སྦྱོང་བྱིན་གྱིས་བརླབ་བོ། །གང་གི་ཚེ་དགེ་འདུན་གྱི་ཚོགས་པ་རྙེད་པ་དེའི་ཚེ་དགེ་འདུན་དང་ལྷན་ཅིག་དུ་གསོ་སྦྱོང་རྒྱ་ཆེར་ཉམས་སུ་མྱོང་བར་བྱ་ཞིང་། སོ་སོ་ཐར་པའི་མདོ་གདོན་པར་བགྱིའོ། །ཞེས་ལན་གསུམ་བརྗོད། ལྷ་རྣམས་ཀྱིས། ཐབས་ཡིན་ནོ། །གསུང་བར་མོས་ལ། ལན་དུ། ལེགས་སོ་བརྗོད་ལ་ཕྱག་གསུམ་དང་ཐང་ཤད་བཅས་འཁོད་ནས། ཁྲིམས་ཀྱི་ཚུལ་ཁྲིམས་སོགས། རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་སོགས་ནས། སྤྱོད་པར་ཤོག་བར། འདི་ལྟར་བགྱིས་པའི་སོགས། རྒྱལ་བ་བྱམས་པ་སོགས། དགེ་བ་འདི་ཡིས་ཚེ་རབས་སོགས། ཇི་ལྟར་སྔོན་གྱི་སོགས་བརྗོད། དེ་ལྟར་བྱས་པས་ལྟུང་བ་མི་འཕེལ་བར་བྱིན་གྱིས་བརླབ་པར་འགྱུར་ཞེས། རྗེ་ཆོས་ཀྱི་དབང་ཕྱུང་གི་གསུང་རྒྱུན་ལས་བྱུང་ཞིང་། རང་རེ་བསྟན་སྒོར་འཇུག་པ་རྣམས་ཀྱི་དོན་ཆེད་དུ་༧སི་ཏུ་པདྨའི་མིང་གིས་ཟིན་ཐོར་སྤེལ་ཞིང་། འདི་ཧོར་ཟླ་གཉིས་པ། བཞི་པ། དྲུག་པ། བརྒྱད་པ། བཅུ་པ། བཅུ་གཉིས་པ་རྣམས་ཀྱི་

[Full Size]

ཉེར་དགུ་ཆད་པའི་གནམ་སྟོང་ལ་གསོ་སྦྱོང་བཅུ་བཞི་པ་དང་། དེ་འཕྲོའི་གནམ་སྟོང་རྣམས་དང་། བཅོ་ལྔ་ཀུན་ལ་གསོ་སྦྱོང་བཅོ་ལྔ་པ་སྟེ། ཟླ་བཤོལ་སྐབས་ཟླ་བ་དེའི་སྔོན་རྗེས་གཉིས་ཀར་དུས་ཚིགས་འདྲ་བར་བརྗོད་དགོས་སོ། །མངྒ་ལམ།། །།

བཅོམ་ལྡན་མ་ཧཱ་མཱ་ཡཱའི་ཚོགས་མཆོད་འདོད་དགུ་མྱུར་སྟེར།

[Full Size]

བཅོམ་ལྡན་མ་ཧཱ་མཱ་ཡཱའི་ཚོགས་མཆོད་འདོད་དགུ་མྱུར་སྟེར་ཞེས་པ་བཞུགས་སོ། །

[Full Size]

བཅོམ་ལྡན་འདས་མ་ཧཱ་མཱ་ཡཱའི་སྒྲུབ་མཆོད་དམ། དབང་བསྐུར་ལ་སོགས་པའི་དུས་རྣལ་འབྱོར་ཕོ་མོ་ཟུང་དུ་གྱུར་པའི་དཔའ་བོའི་སྟོན་མོ་བྱ་བར་ཡང་གསུངས་ཏེ། ཚོགས་ཀྱི་འཁོར་ལོའི་གནས་ཉིད་དང་། །དཔའ་བོ་དང་ནི་དཔའ་མོ་ཡི། །སྟོན་མོར་གྱུར་པ་ཉིད་དང་ཡང་། །སྣ་ཚོགས་སྟོན་མོའི་རིམ་ཤེས་པས། །ཐབས་དང་ཤེས་རབ་གསང་བ་ཡིས། །མཆོག་ཏུ་གྱུར་པ་འདིར་བརྗོད་ཡིན། །ཞེས་གསུངས་པ་ལྟར་བྱ་བར་འདོད་པའི་རྣལ་འབྱོར་པས། ཐབས་ཤེས་ཀྱི་རྫས་རྣམས་སྟག་གི་པགས་པའི་སྟེང་དུ་བཤམས་ལ་བདུད་རྩི་བྲན་ཞིང་། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཡྃ་ལས་རླུང་གི་དཀྱིལ་འཁོར་ཟླ་གམ། ཞེས་པ་ནས། རོ་གཅིག་ཏུ་གྱུར། ༀ་ཨཱཿཧཱུྃ། ལན་གསུམ། ནང་མཆོད་

[Full Size]

ལྟར་བྱིན་གྱིས་བརླབས། ན་མོ། ཐབས་དང་ཤེས་རབ་གཉིས་སུ་མེད་པའི་ཚོགས་ཀྱི་འཁོར་ལོ་རྒྱ་ཆེན་པོ། རང་བཞིན་གྱི་རྣམ་པར་དག་པ་སྐྱེ་བ་མེད་པ། ངོ་བོ་རྣམ་པར་དག་པ་ཨཱ་ལི་ཀཱ་ལི། མཚན་ཉིད་རྣམ་པར་དག་པ་ཤ་ལྔ་བདུད་རྩི་ལྔར་རྒྱས་བཏབ་པ་འདི། འབུལ་བའི་གནས་ནི་བྱིན་རླབས་ཀྱི་རྩ་བ་བཀའ་བརྒྱུད་བླ་མ། དངོས་གྲུབ་ཀྱི་རྩ་བ་ཡི་དམ་ལྷ་ཚོགས། ཕྲིན་ལས་ཀྱི་རྩ་བ་ཆོས་སྐྱོང་སྲུང་མ་རྣམས་ཀྱི་ཞལ་དུ་ཁཱ་ཧི། ཞེས་ལན་གསུམ་བརྗོད། ཧཱུྃ། རང་སྣང་ཆོས་སྐུའི་ཀློང་ཡངས་ནས། །བཀའ་བརྒྱུད་བླ་མ་སྤྲིན་ལྟར་གཏིབས། །འདིར་གཤེགས་འདོད་ཡོན་ཚོགས་མཆོད་བཞེས། །མཆོག་ཐུན་དངོས་གྲུབ་

[Full Size]

ཆར་ཆེན་སྩོལ། །འོག་མིན་མཁའ་སྤྱོད་ཞིང་ཁམས་ནས། །ཧེ་རུ་ཀ་དཔལ་དཔའ་བོ་ཆེ། །འདིར་གཤེགས་འདོད་ཡོན་ཚོགས་མཆོད་བཞེས། །མཆོག་ཐུན་དངོས་གྲུབ་ཆར་ཆེན་སྩོལ། །མཁའ་ཁམས་རྣམ་པར་དག་པ་ཡི། །སངས་རྒྱས་མཁའ་འགྲོ་བདེ་ཆེན་ཡུམ། །འདིར་གཤེགས་འདོད་ཡོན་ཚོགས་མཆོད་བཞེས། །མཆོག་ཐུན་དངོས་གྲུབ་ཆར་ཆེན་སྩོལ། །ས་ཁམས་རྣམ་པར་དག་པ་ཡི། །མི་འགྱུར་རྡོ་རྗེ་ཌཱ་ཀི་མ། །འདིར་གཤེགས་འདོད་ཡོན་ཚོགས་མཆོད་བཞེས། །མཆོག་ཐུན་དངོས་གྲུབ་ཆར་ཆེན་སྩོལ། །ཆུ་ཁམས་རྣམ་པར་དག་པ་ཡི། །ཡོན་ཏན་རིན་ཆེན་ཌཱ་ཀི་མ། །འདིར་གཤེགས་འདོད་ཡོན་ཚོགས་མཆོད་བཞེས། །མཆོག་ཐུན་དངོས་གྲུབ་ཆར་ཆེན་སྩོལ། །མེ་ཁམས་རྣམ་པར་དག་པ་ཡི། །གསུང་མཆོག་པདྨ་ཌཱ་ཀི་མ། །འདིར་གཤེགས་འདོད་ཡོན་ཚོགས་མཆོད་བཞེས། །མཆོག་ཐུན་དངོས་གྲུབ་ཆར་ཆེན་སྩོལ། །རླུང་ཁམས་རྣམ་པར་དག་པ་ཡི། །སྣ་ཚོགས་ཕྲིན་ལས་ཌཱ་ཀི་མ། །འདིར་གཤེགས་འདོད་ཡོན་ཚོགས་མཆོད་བཞེས། །མཆོག་ཐུན་དངོས་གྲུབ་ཆར་ཆེན་སྩོལ། །དམ་ཚིག་གཉེན་པོའི་བཀའ་སྡོད་པའི། །ཆོས་སྐྱོང་ཞིང་སྐྱོང་མ་ལུས་པ། །འདིར་གཤེགས་འདོད་ཡོན་ཚོགས་མཆོད་བཞེས། །མངོན་སྤྱོད་ལས་རྣམས་ཐོགས་མེད་སྒྲུབས། །དེ་ནས་ཚོགས་ཕུད་

[Full Size]

དཀྱིལ་འཁོར་དྲུང་དུ་འབུལ་ནས་བདུད་རྩི་བྲན་ལ། ནང་མཆོད་ལྟར་བྱིན་གྱིས་བརླབས་ཏེ། ༀ་ཨཱཿཧཱུྃ། གསུམ་གྱི་བར། བཅོམ་ལྡན་ཡབ་ཡུམ་ལྷ་མོ་བཞི་དུར་ཁྲོད་པ་རྣམས་དང་བཅས་པའི་ལྗགས་ཧཱུྃ་ལས་སོགས། ༀ་ཤྲཱི་ཧེ་རུ་ཀ་མ་ཧཱ་བཛྲ་སོགས་ནས། ཧ་ཧ་ཧོ་ཕཊ་བར་ལན་གསུམ་མམ་བདུན་གྱིས་ཕུལ་ནས། མི་བསྐྱོད་རྡོ་རྗེ་སོགས་དེ་ཉིད་ལྔ་པས་བསྟོད། ཆོས་རྣམས་གཟུགས་བརྙན་སོགས་ཀྱིས་འཇིག་རྟེན་པ་རྣམས་ལ་ཆོས་བསྟན་ལ། ༀ་ཨཱཿཧཱུྃ་ཀྵེ་ཏྲ་པཱ་ལ་ནས། སྭཱ་ཧཱའི་བར་ལན་གསུམ་གྱིས་ཕུལ། ཧེ་རུ་ཀ་དཔལ་སོགས་ནས། ཀུན་འགྲུབ་མཛོད། །ཅེས་སོགས་ཀྱིས་ཕྲིན་ལས་བཅོལ། དེ་ནས་ལས་རྡོར་གྱིས། སློབ་དཔོན་ནས་བརྩམས་ཏེ་འདུས་པ་ཐམས་ཅད་ལ་ཐབས་ཤེས་ཀྱི་རྫས་སྣོད་སོ་སོར་གནས་པ་དག །ལག་པ་གཉིས་གཡས་གཡོན་བརྩེགས་ཐབས་སུ་བསྣོལ་བཞིན་པས་བཟུང་ནས། འདིར་ནི་ཆོས་རྣམས་བཟང་པོར་ལྟོས། །འདུས་པ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་པ་རྣམས། །རང་བཞིན་གཅིག་ཏུ་དགོངས་ཏེ་རོལ། །ཅེས་བརྗོད་ལ་དྲང་ངོ་། །ལེན་པ་པོས་པད་ཀོར་དང་བཅས་ཏེ། བདེ་གཤེགས་ཆོས་ནི་རིན་ཐང་མེད། །འདོད་ཆགས་ལ་སོགས་དྲི་མ་བྲལ། །གཟུང་དང་འཛིན་པ་རྣམ་པར་སྤངས། །དེ་བཞིན་ཉིད་ལ་བདག་ཕྱག་འཚལ། །ཅེས་བརྗོད་ཅིང་བླངས་ཏེ། བཟའ་བཏུང་ལ་ཉེ་བར་སྤྱད་པའི་ཚེ། ལྟེ་བའི་གཏུམ་མོ་འབར་བའི་དབུས་ཀྱི་ལྷ་ཚོགས་མཆོད་པའི་ཚུལ་ལམ། ལྷའི་ང་རྒྱལ་

[Full Size]

གྱིས་རོལ་པར་བྱས་པའི་རྗེས་སུ། རྡོ་རྗེའི་གླུ་ཡང་བྱ་སྟེ། འགྲོ་བ་ཀུན་ནི་མཆོག་ཏུ་དགའ་བའི་རང་བཞིན་ཏེ། །རྣལ་འབྱོར་མ་ནི་འཁོར་ལོའི་རང་བཞིན་དུ་གནས་ཀྱི། །ས་གསུམ་མ་ལུས་འགྲོ་བ་སངས་རྒྱས་ཀྱི་རང་བཞིན། །སྙིང་རྗེས་གཞོན་ནུ་མ་དང་ལྷན་ཅིག་རོལ་པར་བྱོས། །གང་གིས་དོན་དམ་ལ་ནི་མ་བསྒོམས་པར། །དེ་ཡིས་སངས་རྒྱས་ཉིད་ནི་ཐོབ་པ་མ་ཡིན་ནོ། །ནང་དང་ཕྱི་ནི་དབྱེ་བ་མེད་པར་ཤེས་པར་གྱིས། །འཇིག་རྟེན་ཐམས་ཅད་བསྒྲལ་བར་ནུས་པའོ། །ཞེས་པའི་ཤླཽ་ཀ་གཉིས་པོ་སོ་སོའི་མཐར། ཨ་རེ་རེ་གཏི་མུག་ཕྱུགས་ཀྱིས་མི་ཤེས་སོ། །ལྷན་སྐྱེས་མཛེས་མ་བླངས་ནས་བདེ་བ་ཆེ་ལ་མནོས། །ཞེས་དྲུག་འགྱུར་དུ་བླང་བའི་མཐར། ལྷག་མ་རྣམས་ཕྱོགས་གཅིག་ཏུ་བསྡུས་ལ། ༀ་ཨ་ཀཱ་རོ་མུ་ཁཾ་སོགས་གསུམ་བརྗོད། ལྷག་མའི་རྫས་རྣམས་འབྱུང་པོའི་ཚོགས་ཀྱིས་ཉེར་སྤྱད་དུ་འོས་པ་བསམ་གྱིས་མི་ཁྱབ་པར་གྱུར། ཞེས་དམིགས། ཕྱི་རོལ་སྒོ་དྲུང་ན་གནས་པའི་འབྱུང་པོ་འཆོལ་བའི་ཚོགས་དམ་ཚིག་གི་ཆོ་ག་བལྟ་བར་མི་དབང་བ་རྣམས་ལ་སྦྱིན་ནོ། །རྡོ་རྗེ་ཐེག་པ་ལ་གསང་བ་མཆོག་གི་རྣལ་འབྱོར་སྤྱོད་པའི་སྐལ་བ་དང་ལྡན་པར་གྱུར་ཅིག །ༀ་ཨུ་ཙྪིཥྚ་བ་ལིདྟ་བྷཀྵ་བྷཀྵ་སི་སྭཱ་ཧཱ། ལྷག་མ་རྒྱང་རིང་དུ་དོར། བཤལ་ཆུ་ཤིན་ཏུ་ལྷག་མ་ལ་དབང་བ་རྣམས་ལ་སྦྱིན་ནོ། །དེ་ནས་མཆོད་བསྟོད་

[Full Size]

བཟོད་གསོལ་སོགས་དཀྱུས་ལྟར་བྱའོ། །དེ་ལྟར་བཅོམ་ལྡན་འདས་སྒྱུ་འཕྲུལ་ཆེན་པོའི་མངོན་དཀྱིལ་འོད་མཚན་འཆང་བ་བཞི་པས་བཀྲལ་བར་གནང་བ་ལ། ཚོགས་མཆོད་གུད་དུ་སྦྱར་བ་འདི་ཉིད་འཇང་འོག་མིན་གླིང་གི་བླ་མ་དབང་རྒྱལ་གྱིས་ཉེ་བར་བསྐུལ་བ་ལྟར་ས་ཟླའི་ཡར་ཚེས་ལ་དཔལ་སྤུངས་ཐུབ་བསྟན་གླིང་གི་ཡང་དབེན་སྒྲུབ་བརྒྱུད་དར་རྒྱས་གླིང་དུ་སི་ཏུ་སྤྲུལ་སྐུ་པདྨ་ཉིན་བྱེད་དབང་པོས་སྤེལ་བ་འགྲོ་ཀུན་སྐུ་བཞིའི་བདག་ཉིད་ཆེན་པོའི་གོ་འཕང་ལ་རེག་པར་གྱུར་ཅིགཤུ་བྷཾ།། །།

གསོལ་འདེབས་ཀྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་བྱིན་རླབས་བདུད་རྩིའི་གཏེར་མཛོད།

[Full Size]

གསོལ་འདེབས་ཀྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་བྱིན་རླབས་བདུད་རྩིའི་གཏེར་མཛོད་ཅེས་བྱ་བ་བཞུགས་སོ། །

[Full Size]

གྲུབ་ཆེན་རིན་པོ་ཆེའི་གསོལ་འདེབས་ཐར་འདོད་དད་པའི་པི་ཝང་ཞེས་པ་བཞུགས། ན་མོ་གུ་རུ་ཀརྨ་ཀ་ཡེ། ཆོས་དབྱིངས་ཀུན་ཏུ་ཁྱབ་པའི་ཀློང་། །བདེ་ཆེན་མ་འགགས་ལོངས་སྤྱོད་རྫོགས། །སྣ་ཚོགས་སྤྲུལ་བསྒྱུར་རྡོ་རྗེའི་གར། །དུས་གསུམ་རྣམ་པར་རོལ་པ་ཡིས། །ནམ་མཁའ་ཇི་སྲིད་གནས་ཀྱི་བར། །གདུལ་བྱའི་ཁམས་དབང་མོས་པའི་ངོར། །ཞིང་ཁམས་རྒྱ་མཚོར་འབྱམས་ཀླས་པར། །རྫོགས་སངས་རྒྱས་དང་བྱང་ཆུབ་སེམས། །ཉན་རང་དྲང་སྲོང་ས་ཡི་བདག །གང་འདུལ་དུ་མར་སྤྲུལ་ལ་འདུད། །སྔོན་ཚེ་ཤཱཀྱ་སེང་གེ་ཡིས། །བྱང་ཕྱོགས་རྒྱུད་དུ་ཀརྨ་ཀ། དབུགས་དབྱུང་ལུང་གིས་གསལ་བར་བསྟན། །ཐུགས་རྗེའི་དཔལ་གྱུར་འཇིག་རྟེན་མགོན། །

[Full Size]

དབྱིངས་དང་ཡེ་ཤེས་དབྱེར་མེད་པའི། །འོད་ཟེར་སྣང་བས་སྐྱོང་བའི་ཡུལ། །ཀཻ་ལ་ཤ་ཡི་ལྗོངས་འདིར་ཡང་། །དཔལ་ལྡན་དྷརྨ་ཀཱིརྟིར་གྱུར། །མཐོང་ཐོས་དྲན་རེག་སྐྱེ་བོ་ཀུན། །འབྲེལ་ཚད་དོན་ལྡན་བཀོད་ལ་འདུད། །དྲེགས་ལྡན་ཁེངས་པ་གཞོམ་པ་དང་། །རྒྱལ་བསྟན་ཉི་མ་གསལ་བའི་ཕྱིར། །གྲུབ་ཆེན་ཆོས་ཀྱི་བླ་མའམ། །ཀརྨ་པཀྴི་ཞེས་གྲགས་པ། །རྫུའཕྲུལ་སྣང་སྲིད་ཟིལ་གྱིས་གནོན། །རླུང་སེམས་སྣང་བ་དབང་སྡུད་ཅིང་། །ཕྲིན་ལས་འཛམ་གླིང་ཐ་གྲུར་ཁྱབ། །འཆི་མེད་སངས་རྒྱས་པདྨ་སྐྱེས། །ཐ་མི་དད་པས་སྐུའི་བཀོད་པས། །འགྲོ་མང་སྨིན་གྲོལ་སྟོན་ལ་འདུད། །ཁམས་གསུམ་ཡོངས་སྒྲོལ་ཆེན་པོ་ཡིས། །ཁྱབ་དང་རྟག་

[Full Size]

པའི་བདག་ཉིད་ཅན། །དཀྱིལ་འཁོར་རྒྱ་མཚོའི་གཙོ་མཆོག་སྟོན། །རང་བྱུང་སེམས་དཔའ་ནས་བཟུང་སྟེ། །མཐོན་མཐིང་མི་བསྐྱོད་ཅོད་པན་ཅན། །བསམ་བཞིན་སྐྱེ་བའི་ཕྲེང་བ་འཛིན། །བཅུ་གསུམ་བདུད་ལས་རྣམ་པར་རྒྱལ། །རྡོ་རྗེའི་ཏིང་འཛིན་བྱེ་བ་བརྒྱས། །གནས་དང་གནས་མིན་དྲི་བཅོམ་ཞིང་། །སྒྲིབ་བྲལ་ཡེ་ཤེས་སྟོན་ལ་འདུད། །མ་འོངས་བསྐལ་བཟང་རྣམ་པར་འདྲེན། །དྲུག་པ་སེང་གེ་ཞེས་བྱར་འགྱུར། །མངོན་པར་རྫོགས་སངས་རྒྱས་ཚུལ་བསྟན། །དུས་གསུམ་ཐོག་མེད་རབ་འབྱམས་ཀྱི། །མཐུ་སྟོབས་བཀོད་པ་བསམ་མི་ཁྱབ། །བདེར་གཤེགས་མཛད་པ་རྨད་བྱུང་བ། །སྐྱེ་བ་འདི་ནས་སྙིང་པོའི་བར། །གུས་པས་རབ་ཏུ་འདུད་བྱེད་ཅིང་། །ཆོས་ཀྱི་བདུད་རྩིའི་སྨིན་བྱེད་ལམ། །ཡང་དག་ཉིད་དུ་ཐོབ་གྱུར་ཅིག །མཚུངས་མེད་བླ་མ་ཀརྨ་པ། །གྲུབ་ཐོབ་ཆེན་པོ་པཀྴི་མཆོག །རྡོ་རྗེའི་གསང་གསུམ་འོད་ཟེར་གྱི། །བྱིན་རླབས་ཐུགས་རྗེས་བདག་རྒྱུད་ལ། །དབང་བཞི་ཆུ་བོའི་རྒྱུན་བཟང་པོས། །བྱང་ཆུབ་འབྲས་བུ་གཡུར་ཟ་བའི། །ཕྱིར་མི་ལྡོག་པའི་གོ་འཕང་ལ། །མངོན་དུ་འགྱུར་བར་བྱིན་གྱིས་རློབས། །གནས་སྐབས་འཁྲུལ་པ་རང་སར་དག །སྣང་སེམས་དབྱེར་མེད་རྟོགས་གྱུར་ཅིག །དེ་ལྟར་གསོལ་བཏབ་སྨོན་ལམ་རྣམས། །ཇི་བཞིན་ཡོངས་སུ་འགྲུབ་པའི་ཕྱིར། །ཕྱོགས་དུས་རྒྱལ་ཀུན་གསུང་རྡོ་རྗེའི། །བདག་ཉིད་བདེན་པ་གྲུབ་

[Full Size]

རྣམས་ཀྱིས། །མཐུན་འགྱུར་ཟབ་མོའི་སྟོབས་དེང་འདིར། །ཡིད་བཞིན་ལྷུན་གྱིས་གྲུབ་གྱུར་ཅིག །དགེ་དེས་འཇིག་རྟེན་ཁམས་རྣམས་སུ། །ཆོས་འཕེལ་བདེ་བ་དང་ལྡན་ཞིང་། །སྡུག་བསྔལ་རྒྱུ་བཅས་ཡོངས་སུ་བྲལ། །ཀུན་ཀྱང་བླ་མེད་ཉིད་ཐོབ་ཤོག །ཅེས་པའང་སྤྲེང་ཡུལ་རྒྱལ་པོའི་ཁབ་ཀྱི་ཆོས་སྡེ་ཆེན་པོའི་དགེ་སློང་སྒྲུབ་ཆེན་པ་ཀརྨ་བསྟན་རྒྱས་ཀྱིས་བསྐུལ་ལྟར། སི་ཏུ་པདྨ་ཉིན་བྱེད་དབང་པོས་ཐུབ་བསྟན་དཔལ་སྤུངས་ཀྱི་ཡང་དབེན་དུ་བཀོད་པའོ། །སརྦ་མངྒལཾ།། །།

རྒྱལ་བ་ཡབ་སྲས་ལྔ་ཡི་སྐྱེས་རབས་གསོལ་འདེབས་མདོར་བསྡུས།

[Full Size]

རྒྱལ་བ་ཡབ་སྲས་ལྔ་ཡི་སྐྱེས་རབས་གསོལ་འདེབས་མདོར་བསྡུས་བཞུགས་སོ། །བདེ་བར་གཤེགས་ཀུན་གསང་གསུམ་མི་བཟད་པ། །རྒྱན་འཁོར་ལྔ་ཡི་བདག་ཉིད་དབང་བསྒྱུར་པ། །ཐབས་མཁས་འགྲོ་བ་སྒྲོལ་བའི་ཕྲིན་ལས་ཅན། །བཀའ་བརྒྱུད་བླ་མ་རྣམས་ལ་ཕྱག་འཚལ་ལོ། །སྔོན་ཚེ་རྒྱལ་སྲས་མཆོག་གི་བློ་གྲོས་དང་། །སྤྱན་རས་གཟིགས་དབང་པདྨ་རྣམ་པར་རོལ། །བློ་གྲོས་རིན་ཆེན་དྲང་སྲོང་ལེགས་པར་སྐྱེས། །འཆི་མེད་པད་འབྱུང་སྐུར་བཞེངས་ལ་ཕྱག་འཚལ། །སྒྲ་གཅན་ཟིན་དང་ནཱ་ག་བོ་དྡྷིའི་ཞབས། །རིན་ཆེན་གསལ་སོགས་དུ་མར་སྟོན་ཅིང་སྤྲུལ། །མ་འོངས་སྐལ་བཟང་དྲུག་པར་འཚང་རྒྱ་བའི། །ཀརྨ་པར་གྲགས་ཞབས་ལ་གུས་ཕྱག་འཚལ། །དཀྱིལ་འཁོར་ཁྱབ་བདག་གར་དབང་རྡོ་རྗེ་འཆང་། །བདེ་ཆེན་ཞིང་དུ་མཐའ་ཡས་འདྲེན་པ་དང་། །

[Full Size]

བསྐལ་མང་སྔོན་ནས་བྱང་ཆུབ་བདུད་རྩི་བརྙེས། །སངས་རྒྱས་དཀོན་མཆོག་ཡན་ལག་ལ་ཕྱག་འཚལ། །འཕགས་པའི་ཡུལ་དུ་སྔགས་ཀྱི་སྤྱོད་འཆང་གཙོ། །ཁོལ་པོ་དགའ་དང་བྲམ་ཟེ་ཀུན་རིག་མཆོག །འགྲོ་མང་མཆོད་པའི་རྟེན་གྱུར་དེང་འདིར་ཡང་། །ཞྭ་དམར་ཅོད་པན་ཅན་ཞབས་གུས་ཕྱག་འཚལ། །རྣམ་འདྲེན་ལྔ་པ་མི་ཕམ་བྱམས་པ་མགོན། །གྲུབ་པའི་སྤྱི་མེས་ཌོམྦི་ཧེ་རུ་ཀ། དཱ་རི་ཀ་པ་འཇམ་དཔལ་གསང་བ་དང་། །མངའ་བདག་ལོ་ཙཱར་གྱུར་ལ་གུས་ཕྱག་འཚལ། །སྒྲུབ་བརྒྱུད་སྲོག་ཤིང་སངས་རྒྱས་རས་ཆེན་ཞབས། །བསིལ་བ་ཚལ་དུ་རྡོ་རྗེ་བེར་ནག་ཅན། །བླ་མ་མགོན་པོ་དབྱེར་མེད་སྐུར་སྣང་བ། །ཏཱ་ཡི་སི་ཏུའི་ཞབས་ལ་གུས་ཕྱག་འཚལ། །རྒྱལ་སྲས་འཇམ་དཔལ་གཞོན་ནུ་གསུང་དབང་ཕྱུག །པཎྜི་ཏ་པ་ཤེས་རབ་འབྱུང་གནས་སྤྲུལ། །དེ་ཉིད་ཕྱི་མར་རྣལ་འབྱོར་བདེ་སྐྱོང་བཟང་། །གྲུབ་བརྙེས་རོལ་པ་ཡེ་ཤེས་ལ་ཕྱག་འཚལ། །ཤེས་བྱ་ཐོགས་མེད་རོང་སྟོན་ཆེན་པོ་དང་། །རིག་འཛིན་རཏྣ་གླིང་དང་ཀློང་ཡངས་བདེ། །རྒྱལ་མཚན་དཔལ་བཟང་ཆོས་དབང་ལྷུན་གྲུབ་སོགས། །དཔལ་ལྡན་དཔའ་བོའི་ཞབས་ལ་གུས་ཕྱག་འཚལ། །ཚེ་འོད་དཔག་མེད་མཐའ་ཡས་སྣང་བ་ཡི། །ཨིནྡྲ་བྷུ་ཏི་ཀླུ་སྒྲུབ་ཤེས་རབ་བཟང་། །པཎ་ཆེན་ཕྱོགས་གླང་ཏེ་ཕུ་པ་ལ་སོགས། །མཆོག་གི་སར་གནས་སྐུར་སྣང་ལ་ཕྱག་འཚལ། །སྐྱོབ་པ་འཇིག་རྟེན་གསུམ་

[Full Size]

མགོན་སྤོམ་བྲག་པ། །རིན་ཆེན་དཔལ་དང་མཚུར་ཕུ་འཇམ་དབྱངས་མཚན། །ཀརྨ་གུ་རུ་འཕྲུལ་ཆེན་རྩལ་ལ་སོགས། །ཧྲེ་ཧོ་རིམ་པར་བྱོན་ལ་གུས་ཕྱག་འཚལ། །དེ་ལྟར་གསོལ་བཏབ་དགེ་གང་སྨིན་པའི་མཐུས། །ལེགས་བྱས་ལྷག་བསམ་ཐ་གྲུ་ུཁྱོན་ཡངས་པོར། །རྣམ་དག་བྱང་ཆུབ་སེམས་ཀྱི་རྩ་བ་བརྟན། །ཐེག་ཆེན་དམ་པའི་རྐང་འཐུང་རྒྱས་པར་ཤོག །སྒྲིབ་གཉིས་བག་ཆགས་དྲི་བཞོན་རབ་བསལ་ཞིང་། །མཆོག་ཐུན་དངོས་གྲུབ་ཆར་གྱིས་རང་རྒྱུད་བརླན། །སེམས་ཉིད་རང་བྱུང་འབྲས་བུ་གཡུར་ཟ་བའི། །བདེ་གཤེགས་སྙིང་པོའི་ལོ་འདབ་རྒྱས་པར་ཤོག །རྣམ་མང་རྒྱལ་དང་རྒྱལ་སྲས་བདེན་པ་དང་། །རྣམ་དག་ཆོས་དབྱིངས་བསམ་མི་ཁྱབ་པའི་མཐུས། །རྣམ་མང་བདག་གཞན་དུས་གསུམ་སེམས་ཅན་ཀུན། །རྣམ་མཁྱེན་ཕྱིར་མི་ལྡོག་པར་སངས་རྒྱས་ཤོག །ཅེས་པའང་རིགས་དང་རུས་ཀྱི་རྣམ་དཔྱོད་ལྡན་པ་འཕེལ་ཚ་ནང་སོ་སྒྲུབ་ཆེན་བླ་མ་བསྟན་འཛིན་རྒྱ་མཚོས་བསྐུལ་བའི་ངོར་སི་ཏུ་པདྨ་ཉིན་བྱེད་དབང་པོས་དགེ་བར་སྤེལ། མངྒལཾ། སུ་ཛ་ཡནྟུ།། །།

རྒྱལ་བ་ཡབ་སྲས་གསོལ་འདེབས།

[Full Size]

རྒྱལ་བ་ཡབ་སྲས་གསོལ་འདེབས་བཞུགས། མཆོག་ཏུ་མི་འགྱུར་ཆོས་དབྱིངས་མཐའ་བྲལ་ཁམས། །རང་མདངས་ལྷུན་གྲུབ་བདེ་བ་ཆེན་པོའི་རྩལ། །འགགས་མེད་སྒྱུ་འཕྲུལ་དྲྭ་བའི་རང་བཞིན་ཅན། །སྐུ་གསུམ་བདག་ཉིད་བླ་མའི་ཞབས་ལ་འདུད། །འབྱམས་ཀླས་བསྐལ་པའི་གོང་ནས་

[Full Size]

བྱང་ཆུབ་ཀྱི། །སྤྱད་པ་སྤྱོད་ཅིང་བདུད་རྩི་བརྙེས་ཟིན་ཀྱང་། །འགྲོ་སྒྲོལ་དམ་བཅས་སྙིང་རྗེའི་སྐུར་བཞེངས་པ། །རྗེ་བཙུན་བདུད་འདུལ་རྡོ་རྗེའི་ཞབས་ལ་འདུད། །རླབས་ཆེན་ཐུགས་བསྐྱེད་ཟབ་མོའི་འཇུག་ངོགས་ནས། །གདུལ་བྱ་རྗེས་འཛིན་ཕྲིན་ལས་ཡིད་བཞིན་དབང་། །ལྷན་སྐྱེས་ཡེ་ཤེས་དངོས་གྲུབ་ཆར་འབེབས་པ། །མི་ཕམ་ཆོས་གྲུབ་རྒྱ་མཚོའི་ཞབས་ལ་འདུད། །རྒྱལ་ཀུན་མཁྱེན་པའི་བདུད་རྩིའི་འོད་དཀར་པོ། །བློ་གྲོས་ཆུ་གཏེར་གཅིག་ཏུ་སྨིན་པ་ཡི། །མདོ་རྒྱུད་གངྒཱའི་རྒྱུན་བཟང་གཏེར་དམ་པ། །འཇམ་མགོན་ཆོས་ཀྱི་འབྱུང་གནས་ཞབས་ལ་འདུད། །དོན་དམ་མི་ཤིགས་སྙིང་པོའི་རྩ་བ་བརྟན། །རང་བྱུང་ཟག་མེད་བདེ་སྟོང་ཡལ་འདབ་རྒྱས། །འབྲས་བུ་སྐུ་བཞིའི་གོ་འཕང་སྦྱིན་པའི་དཔལ། །རྡོ་རྗེ་གཙུག་ལག་དགའ་བའི་ཞབས་ལ་འདུད། །དཔེ་མེད་ཚོགས་གཉིས་རྒྱ་ཆེན་ས་གཞི་བརྡལ། །ཇི་ལྟ་ཇི་སྙེད་གཟིགས་པའི་པད་ཚལ་བཞད། །སྐྱེ་དགུའི་གཙུག་གི་རྒྱན་དུ་རོལ་པ་ཡི། །རིག་འཛིན་རྡོ་རྗེ་དྲག་པོའི་ཞབས་ལ་འདུད། །བརྗོད་བྲལ་གནས་ལུགས་གཉུག་མའི་ཁྱོན་ཡངས་པོར། །ཟབ་མོ་ལྟ་བའི་ཡང་རྩེ་ཤིང་རྟ་ཡིས། །ལུས་ཅན་སྲིད་འགྲོའི་ངལ་བ་སེལ་བའི་གཉེན། །དྲིན་ཅན་དབང་གི་རྡོརྗེའི་ཞབས་ལ་འདུད། །དེ་ལྟར་ཕྱག་འཚལ་མཆོད་ཅིང་མི་དགེ་བཤགས། །ཡི་རང་བསྐུལ་ཞིང་གསོལ་འདེབས་བསྔོ་བར་བགྱི། །དུས་གསུམ་མཁའ་ཁྱབ་རིགས་དྲུག་དུཿཁ་ལས། །སྒྲོལ་བའི་

[Full Size]

མྱང་འདས་གོ་འཕང་ཐོབ་གྱུར་ཅིག །ཀྱེ་མ། གྲངས་མེད་བསྐལ་པར་འཁྲུལ་འབྱམས་དྲྭ་བས་འབྲེལ། །སྣང་ཞེན་མ་རིག་མུན་པ་སྟུག་པོས་བསྒྲིབས། །དྲན་རྟོག་རྗེས་ཤེས་ལས་ཀྱི་སེར་བུས་བསྐྱོད། །རྣམ་སྨིན་གཡང་ལས་སྐྱོབས་ཤིག་བཀའ་བརྒྱུད་རྣམས། །ཐར་མེད་ལས་ཀྱི་དབང་བཙན་དུག་ལྔ་ཡིས། །ཞི་བདེའི་གོ་སྐབས་འགོག་པའི་གཉིས་འཛིན་བདུད། །རང་གསལ་ཤར་གྲོལ་ཀློང་དུ་སྦྱང་བྱས་ནས། །ཉོན་མོངས་གཡུལ་ལས་སྐྱོབས་ཤིག་བཀའ་བརྒྱུད་རྣམས། །སྐྱེ་ཞིང་སྐྱེ་བ་ཚེ་རབས་ཐམས་ཅད་དུ། །མ་ནོར་ལམ་སྟོན་བླ་མས་རྗེས་འཛིན་ཅིང་། །ཆོས་ཀྱི་དཔལ་ལ་རྟག་པར་ལོངས་སྤྱོད་ནས། མངོན་པར་རྫོགས་སངས་རྒྱས་པ་ཐོབ་གྱུར་ཅིག །ཅེས་པའང་མགོ་ལོག་ཕྱོགས་ཀྱི་སྒྲུབ་ཆེན་པ་བླ་མ་དགེ་ལེགས་རྒྱ་མཚོས་བསྐུལ་བའི་ངོར། སི་ཏུ་པདྨ་ཉིན་བྱེད་དབང་པོས་སྤེལ་པ་ཛ་ག་ཏཾ།། །།

གསོལ་འདེབས་ཡོངས་འདུའི་ལྗོན་བཟང་བྱིན་རླབས་དགའ་ཆར།

[Full Size]

གསོལ་འདེབས་ཡོངས་འདུའི་ལྗོན་བཟང་བྱིན་རླབས་དགའ་ཆར་ཞེས་པ་བཞུགས་སོ། །འགྱུར་མེད་ཀུན་ཁྱབ་མཐའ་བྲལ་ཆོས་ཀྱི་སྐུ། །བདེ་བ་ཆེན་པོའི་རང་མདངས་ལོངས་སྤྱོད་རྫོགས། །རང་བྱུང་ལྷུན་གྲུབ་སྤྲུལ་པའི་སྐུར་སྣང་བ། །ཨོ་རྒྱན་ཆེན་པོ་པདྨཱ་ཀཱ་རར་འདུད། །དྲི་མེད་ཀོ་ཤའི་མཚོར་འཁྲུངས་དུས་གསུམ་གྱི། །མཐུ་སྟོབས་གཅིག་བསྡུས་བུདྡྷཱ་ཐོད་ཕྲེང་རྩལ། །གསང་སྔགས་བླ་མེད་ཐེག་མཆོག་སྟོན་པའི་གཉེན། །རིགས་རྣམས་ཀུན་བདག་

[Full Size]

ཧེ་རུ་ཀ་དཔལ་འདུད། །གང་ཞིག་མཐའ་གཉིས་རྣམ་པར་བྲལ་བ་ཡི། །འདུས་མ་བྱས་པའི་རང་གཟུགས་ངེས་པའི་དོན། །ཡང་དག་གྲོལ་བའི་རྨད་བྱུང་ཕྲིན་ལས་ཅན། །དཔལ་ལྡན་རྡོ་རྗེ་འཛིན་ཞབས་པད་ལ་འདུད། །ཉོན་མོངས་གཉིས་འཛིན་བདུ༵ད་བཞིའི་གཡུལ་ངོ་རྣམས། །ཕ་མཐར་གཞོམ་ཞིང་འདུ༵ལ་བའི་མངོན་སྤྱོད་ཀྱི། །རྡོ༵་རྗེ༵་གདེངས་པས་སྣང་སྲིད་ཟིལ་གནོན་པ། །ལུས་མེད་མཐར་བྱེད་ཕྲིན་ལས་ལྡན་དེར་འདུད། །ཆོས་ཀུན་མཁྱེན་པའི་ཀློ༵ང་ཡངས་དཀྱིལ་འཁོར་ནས། །ངེས་གསང་རིང་ལུགས་གས༵ལ་བའི་ཉིན་མོར་བྱེད། །སྙི༵ང་པོ༵་བྱང་ཆུབ་སྐྱེད་ཚལ་རྒྱས་པའི་དཔྱིད། །ཐུགས་བསྐྱེད་འོད་སྟོང་མ་རིག་མུན་སེལ་འདུད། །མཁའ་སྤྱོད་པ༵དྨ༵་འོད་ཀྱི་ཞིང་བཞུགས་ནས། །འགྲོ་རྣམས་བདེ༵་ཆེ༵ན་ལམ་ལ་འགོད་པའི་ཕྱིར། །སྤྲུལ་བསྒྱུར་དུ་མ་འཛམ་གླི༵ང་ཁྱབ་པར་སྤེལ། །ཐབས་མཁས་ཟབ་མོའི་རོལ་པ༵་སྟོན་ལ་འདུད། །འཆི་མེད་རིག་འཛིན་རྟག་ལྡན་གཞོམ་བྲལ་སྐུ། །སྟོབས་བཅུའི་རྩལ་རྫོགས་ཚེ༵་དབ༵ང་དངོས་གྲུབ་བརྙེས། །དགོས་འབྱུ༵ང་ནོ༵ར་བུ༵་བསམ་འཕེལ་དབང་གི་རྒྱལ། །ལྷར་བཅས་གཙུག་གི་རྒྱན་གྱུར་ཁྱོད་ལ་འདུད། །འཇམ་དཔལ་དཔའ་བོ་ཇི་བཞིན་ཤེས་བྱའི་གནས། །གཙུ༵ག་ལ༵ག་སྒོ་བརྒྱའི་རྣམ་དཔྱོད་འོད་སྟོང་གིས། །དབྱངས་ཅན་དག༵འ་བ༵འི་འཛུམ་ཕྲེང་བཞད་པ་ཡི། །ངག་གི་དབ༵ང་པོ༵་སྨྲ་བའི་སེང་གེར་འདུད། །དོན་དམ་རྡོ་རྗེའི་དབྱིངས་ལས་མ་གཡོས་ཀྱང་། །གང་འདུལ་

[Full Size]

དྲ༵ག་པོ༵་ཐོགས་མེད་རྫུ་འཕྲུལ་གྱི། །རྣམ་བཞིའི་ཕྲི༵ན་ལ༵ས་འདུ༵ས་པ༵འི་རང་རྩ༵ལ་ལས། །འཁོར་འདས་དངོས་ཀུན་དབང་སྒྱུར་བྱེད་པོར་འདུད། །གང་སྐུའི་བཀོད་པས་རབ་འབྱམས་ཞིང་རྣམས་བདག །རྣམ་དག་ཞིང་ཀུན་མ་ལུས་སྐུ་ལ་རྫོགས། །ཀུན་བཟང་མཁའ་ཁྱབ་རྒྱལ་བ་རྡོརྗེ་འཆང་། །ཨོ་རྒྱན་ཆེན་པོར་སྒོ་གསུམ་གུས་པས་འདུད། །ལྔ་བརྒྱའི་མཐར་ཐུག་དུས་ཀྱི་ཡང་མཐའ་འདིར། །སངས་རྒྱས་གཞན་ལས་མགོན་ཁྱོད་ཐུགས་རྗེའི་སྟོབས། །ཁྱད་པར་འཕགས་པའི་ཞལ་བཞེས་རྗེས་དགོངས་ལ། །གདུང་ཤུགས་དྲག་པོས་རྩེ་གཅིག་གསོལ་བ་འདེབས། །བདག་རྒྱུད་ཡེ་ཤེས་མངོན་སུམ་ཐོགས་མེད་དུ། །མྱུར་དུ་སྩོལ་ཅིག་གུ་རུ་རིན་པོ་ཆེ། །ཇི་ལྟར་བསམ་པ་ལྷུན་གྱིས་འགྲུབ་པ་ཡི། །རེ་བའི་ཤིང་རྟ་འགེངས་པར་མཛད་དུ་གསོལ། །བྱང་ཆུབ་བར་ཆད་ལོག་པར་འདྲེན་པ་ཡི། །མི་དང་མི་མིན་གཉིས་སྣང་འཁྲུལ་པའི་ཆ། །འཛིན་མེད་ཡེ་སྟོང་ངང་དུ་རང་སར་ཞི། །ཆོས་ཀུན་སྒྱུ་མར་འཆར་བར་བྱིན་གྱིས་རློབས། །ཀ་ནས་དག་པའི་སེམས་ཉིད་གཉུག་མའི་གཤིས། །གང་ཤར་གནས་ལུགས་ངོ་བོ་ལྷུན་གྱིས་གྲུབ། །ཡེ་ཤེས་རྡོ་རྗེའི་དབྱིངས་སུ་རང་གྲོལ་ནས། །ཀུན་བཟང་རྡོར་འཆང་གོ་འཕང་ཐོབ་གྱུར་ཅིག །དཀར་པོའི་ཆ་གང་རི་བོང་འཛིན་པའི་དཀྱིལ་འཁོར་ཀུ་མུད་གཉེན། །དཀར་གསལ་དྲི་མེད་བདུད་རྩིའི་འོད་ཀྱིས་མཛེས་པར་གཏམས་འདི་རྨད། །ཇི་བཞིན་ཀརྨ་

[Full Size]

བཀའ་བརྒྱུད་བསྟན་པའི་རྒྱལ་མཚན་མཆོག་རྣམས་ཀྱི། །ཞབས་རྟན་ཕྲིན་ལས་སྣང་བ་རབ་གསལ་རྟག་ཏུ་བདེ་ལེགས་ཤོག །རྒྱ་ཆེན་གཙུ༵ག་ལ༵ག་གོམས་སྟོབས་ལ། །ཆོ༵ས་ཀྱི༵་རྒྱ༵ལ་པོ༵་བླ་ན་མེད། །གྲུབ་པ་མཆོག་གི་གསུང་གཡར་ངོར། །པ༵དྨ༵་ཉི༵ན་མོ༵ར་བྱེད་པ༵ས་སྤེལ། །ཤུ་བྷཾ་སརྦ་ཛ་ག་ཏཾ།། །།

རྒྱལ་མཆོག་ཕྱག་ན་པདྨོ་བདུད་ཚོགས་འདུལ་བའི་རྡོ་རྗེ་འཆང་ཆེན་པོར་གསོལ་འདེབས།

[Full Size]

རྒྱལ་མཆོག་ཕྱག་ན་པདྨོ་བདུད་ཚོགས་འདུལ་བའི་རྡོ་རྗེ་འཆང་ཆེན་པོར་གསོལ་འདེབས་བཞུགས་སོ། །རྒྱལ་ཀུན་ཐུགས་རྗེའི་རང་གཟུགས་སྤྱན་རས་གཟིགས། །བསམ་མི་ཁྱབ་པའི་སྒྱུ་འཕྲུལ་གར་རོལ་པ། །རྡོ་རྗེ་ཅན་དངོས་སྐུར་བསྟན་སེམས་དཔའ་ཆེ། །བདུ༵ད་འདུ༵ལ་རྡོ༵་རྗེ༵འི་ཞབས་ལ་གསོལ་བ་འདེབས། །དཔ༵ལ་ལྡ༵ན་བསྟ༵ན་པ༵འི་སྙིང་པོ་སྒྲུབ་བརྒྱུད་ཀྱི། །ཉི༵ན་བྱེ༵ད་འགྲོ་ལ་འཆི༵་མེ༵ད་དཔལ་སྟེར་བ། །མཁས་དང་གྲུ༵བ་པ༵འི་ཁྱུ༵་མཆོ༵ག་ཡོངས་ཀྱི་གཉེན། །རྣམ་བཞིའི་ཕྲི༵ན་ལ༵ས་རྒྱ༵ས་པ༵འི་སྡེ་ལ་འདུད། །ཟླ་བྲལ་མཉམ་མེད་ཐུབ་པའི་དབང་པོ་ཡི། །རིང་ལུགས་རྒྱལ་མཚན་འཛིན་པའི་མངའ་བདག་མཆོག །འཁོར་བ་ཇི་སྲིད་གནས་དང་དེ་སྲིད་བར། །རྣམ་འཕྲུལ་རྒྱུན་མི་འཆད་པར་སྟོན་ལ་འདུད། །རིགས་གསུམ་གདུལ་བྱའི་དོན་སླད་སྤྲུལ་སྐུའི་ཚུལ། །གཟིགས་པ་རྣམ་ལྔས་སྙལ་དྭགས་ལ་དགོངས་ཏེ། །པད་འབྱུང་རྡོ་རྗེའི་བཀའ་ཡི་ལུང་ཇི་བཞིན། །ཛྙཱ་ན་ཊཱ་ཀིའི་བརྡ་ཡིས་བསྐུལ་ལ་འདུད། །འཐུང་གཅོད་རྗེས་མཐུན་བསིལ་རི་ན་བུན་ཅན། །ཆུ་ཀླུང་མེ་ཡི་ཕྱོགས་རྒྱུ་རིགས་དང་རུས། །རྣམ་པར་དག་པའི་གནས་དེར་ཀརྨ་པ། །གསལ་

[Full Size]

བར་ལུང་བསྟན་རྗེས་སུ་གནང་ལ་འདུད། །གླང་ལོ་ཁྲུམས་ཀྱི་ཟླ་བའི་ཡར་ཚེས་ལ། །ཕུན་ཚོགས་ལྟས་བཟང་དང་བཅས་སྐུ་འཁྲུངས་ནས། །ལུས་ཅན་སྐྱེ་དགུའི་མགོན་དུ་ཕྱོགས་བཅུ་ཡི། །སངས་རྒྱས་བྱང་སེམས་དབུགས་དབྱུང་སྩོལ་ལ་འདུད། །སྐབས་དེར་བྱིས་པ་དར་དཀར་རལ་ག་ཅན། །ཤེལ་སྣོད་ཀ་མ་ལ་ཐོགས་འཇའ་འོད་ཀློང་། །གླུ་གར་རོལ་རྩེད་སྣ་ཚོགས་ཅིར་ཡང་བསྒྱུར། །རྡོ་རྗེ་བེར་ཅན་མེ་ཏོག་འཐོར་ལ་འདུད། །ཡེ་ཤེས་དབྱིངས་ལས་སྐུར་བཞེངས་ལས་བཞིར་སྟོན། །དོན་དམ་ཉིད་ལས་གཞན་སྣང་གུད་དུ་མེད། །དེ་སྐད་སྨྲ་ཞིང་ཧ་ཧའི་གད་རྒྱང་སྒྲོག །བླ་མ་མགོན་པོ་དབྱེར་མེད་ཞབས་ལ་འདུད། །གང་སྐུ་མཚན་དང་དཔེ་བྱད་ཡོངས་སུ་རྫོགས། །ངོ་མཚར་དུ་མས་སྤྲས་པའི་རྒྱལ་སྲས་ཀྱི། །སྤྱོད་པས་གྲགས་སྙན་ས་གསུམ་ཀུན་ཁྱབ་ནས། །གྲུབ་པའི་གནས་མཆོག་མཚུར་ཕུར་བྱོན་ལ་འདུད། །རྒྱལ་བ་དང་པོར་མི་འཇིགས་སེང་གེའི་ཁྲིར། །མངའ་གསོལ་མགོན་ཁྱོད་ཉིན་བྱེད་འོད་སྟོང་བཞིན། །མུན་པར་འཐོམས་པའི་སྐྱེ་བོ་ཇི་སྙེད་པ། །ཡང་དག་ལམ་སྟོན་རྣམ་འདྲེན་ཁྱོད་ལ་འདུད། །སྡེ་སྣོད་གསུམ་དང་ཤེས་བྱའི་གནས་རྣམས་ཀུན། །མ་ལུས་ཐུགས་སུ་ཆུད་ནས་རྒྱལ་བའི་བསྟན། །ཡོངས་རྫོགས་འཛིན་པའི་ཞབས་སེན་ནོར་བུའི་འོད། །ཚངས་དབང་གཙུག་གིས་མངོན་པར་བཏུད་ལ་འདུད། །གནམ་ལྷ་ཤེལ་

[Full Size]

གིང་དཀར་སོགས་མཐུ་ཆེན་གྱི། །རྩལ་ལྡན་ཚོགས་ཀྱང་གུས་པས་རབ་བསྙེན་ཅིང་། །མཐའ་བཞིའི་དྲེགས་ལྡན་ཁེངས་པ་ཡོངས་བསྐྱུངས་ནས། །ཐུགས་རྗེའི་ཆར་གྱིས་སྨིན་གྲོལ་བཀོད་ལ་འདུད། །གཞན་ཡང་རིགས་དྲུག་བག་ཉལ་རྣམས་ཀྱི་རྒྱུད། །བྱིན་རླབས་འོད་ཀྱིས་རང་སྐད་ཆོས་སྒྲ་སྟོན། །བདེན་པ་མཐོང་བའི་ལས་ཅན་བསམ་ལས་འདས། །སངས་རྒྱས་གཉིས་པ་དངོས་སུ་བྱོན་ལ་འདུད། །དུས་གསུམ་རྒྱལ་དང་ཉན་ཐོས་གནས་བརྟན་སོགས། །འཕགས་ཡུལ་གྲུབ་བརྙེས་ཡི་དམ་ལྷ་ཆོས་སྐྱོང་། །ཞལ་བསྟན་ཟབ་དོན་སྙིང་པོའི་བཅུད་མཐའ་དག །གང་སྐུའི་བུམ་པ་བཟང་དེར་གཏམས་ལ་འདུད། །ཡིད་བཞིན་བསམ་འཕེལ་ཇོ་ཤཱཀ་མཆོག་གཉིས་དྲུང་། །གདེངས་ཅན་སུན་ཟློག་སྨོན་ལམ་བདེན་སྟོབས་དང་། །འཕགས་པ་ཝ་ཏིར་མཆོད་པའི་སྤྲིན་སྤྲོ་པས། །ངོ་མཚར་མངོན་སུམ་སྙན་ཤལ་འཛིན་དེར་འདུད། །འཛམ་གླིང་སྤྱི་དང་བྱེ་བྲག་གངས་ལྗོངས་འདིར། །འགྲོ་བའི་དཔལ་མགོན་ཁྱོད་ཉིད་ལས་གཞན་སུ། །ས་ཟླའི་རི་དབང་ཇི་བཞིན་ལྷམ་མེར་གསལ། །ཁམས་གསུམ་ཆོས་ཀྱི་རྒྱལ་པོ་ཁྱོད་ལ་འདུད། །ལྔ་བདོའི་ལང་ཚོ་ཆེས་ཆེར་ངོམས་པའི་དུས། །དམུ་རྒོད་རང་རྒྱུད་ཞུགས་ལྕེས་གཞོམ་རྣམས་ལ། །ཚད་མེད་སྙིང་རྗེའི་ཆུ་ཡིས་བརླན་པར་མཛད། །སར་གནས་བྱང་ཆུབ་སེམས་དཔའ་ཆེན་པོར་འདུད། །མེ་སྦྲུལ་ཆོ་འཕྲུལ་

[Full Size]

ཅན་གྱི་ཉེར་བཞི་ལ། །དགོངས་པ་ཆོས་དབྱིངས་ཐིམ་པའི་སྣང་བ་བསྟན། །མེ་ཏོག་ཆར་བབས་ལྷ་ཡིས་རོལ་མོ་ལྡིར། །སྐལ་ལྡན་རྒྱུད་སྨིན་བྱིན་རླབས་སྩོལ་ལ་འདུད། །རྒྱལ་བའི་རྣམ་ཐར་རྒྱ་མཚོའི་ཕ་རོལ་སོན། །གཞལ་བར་དཀའ་ཡང་ཟེགས་མ་འཐོར་བའི་དགེས། །མ་འོངས་བསྐལ་བཟང་དྲུག་པ་སེང་གེ་ཡིས། །རྗེས་བཟུང་བླ་མེད་བྱང་ཆུབ་སྤྱོད་པར་ཤོག །རྣམ་དག་ངེས་གསང་བཀའ་བརྒྱུད་རིན་ཆེན་བསྟན། །མཐའ་ཀླས་སྲིད་མཐར་ཁྱབ་པའི་ལེགས་བྱས་ཀྱིས། །ཐོས་བསམ་སྒྲུབ་པ་སྙིང་པོར་སྤེལ་བྱེད་པའི། །རྒྱལ་བ་མཆོག་དེའི་དགོངས་པ་རྫོགས་བྱེད་ཤོག །ཅེས་པའང་རྒྱལ་བའི་ཕྲིན་ལས་པ་དགེ་སློང་ནོར་བུ་གང་ནས་བཀའ་གནང་བཞིན་སི་ཏུ་སྤྲུལ་སྐུ་པདྨ་ཉིན་བྱེད་དབང་པོས་གསོལ་བ་བཏབ་པའོ།། །།མེ་ལོང་ཡེ་ཤེས་རྣམ་པར་དག །མི་བསྐྱོད་རྒྱལ་པོ་བཅོམ་ལྡན་འདས། །རྡོ་རྗེའིབདུད་འདུལ་ཕྱག་རྒྱ་ཅན། །མི་འཁྲུགས་མགོན་པོ་ལ་ཕྱག་འཚལ། །ཆོས་དབྱིངས་ཡེ་ཤེས་རྣམ་པར་དག །སྣང་མཛད་རྒྱལ་པོ་བཅོམ་ལྡན་འདས། །བྱང་ཆུབ་མཆོག་གི་ཕྱག་རྒྱ་ཅན། །རྣམ་པར་སྣང་བ་ལ་ཕྱག་འཚལ། །མཉམ་ཉིད་ཡེ་ཤེས་རྣམ་པར་དག །ཡོན་ཏན་རྒྱལ་པོ་བཅོམ་ལྡན་འདས། །མཆོག་རྣམས་སྦྱིན་པའི་ཕྱག་རྒྱ་ཅན། །རིན་ཆེན་འབྱུང་གནས་ལ་ཕྱག་འཚལ། །སོར་རྟོག་ཡེ་ཤེས་རྣམ་པར་དག །རྔ་སྒྲའི་རྒྱལ་པོ་

[Full Size]

བཅོམ་ལྡན་འདས། །མཉམ་བཞག་ཏིང་འཛིན་ཕྱག་རྒྱ་ཅན། །འོད་སྣང་མཐའ་ཡས་ལ་ཕྱག་འཚལ། །བྱ་གྲུབ་ཡེ་ཤེས་རྣམ་པར་དག །ལས་རབ་རྒྱལ་པོ་བཅོམ་ལྡན་འདས། །མི་འཇིགས་སྐྱབས་སྦྱིན་ཕྱག་རྒྱ་ཅན། །དོན་རྣམས་གྲུབ་པ་ལ་ཕྱག་འཚལ། །དཔལ་འབར་བཀྲ་ཤིས་ལྷ་མོ་བརྒྱད། །ཤར་ནས་རིམ་བཞིན་པད་ཅན་མ། །འཇིགས་བྱེད་དང་ནི་འོད་ཟེར་ཅན། །རྣམ་པར་རྒྱལ་དང་མདངས་ལྡན་མ། །དཀར་ཤམས་དྲི་མེད་ཡིད་གཞུངས་སོགས། །བདེ་ལེགས་སྩོལ་བའི་མཆོད་རྫས་ཐོགས། །རྒྱལ་བ་དགྱེས་པར་སྐྱེད་བྱེད་པའི། །སེམས་མ་རྣམས་ལ་ཕྱག་འཚལ་ལོ། །བདག་གཞན་སེམས་ཅན་ལས་ཉོན་གྱི། །སྒྲིབ་གཉིས་བག་ཆགས་སྦྱོང་དུ་གསོལ། །མི་བཟད་འཁོར་བའི་འཇིགས་པ་ལས། །ཡོངས་སུ་སྒྲོལ་བར་མཛད་དུ་གསོལ། །ཅེས་བླ་མ་ཀར་ལུས་བསྐུལ་ལྟར་སི་ཏུས་སྤེལ་བ་དགེ། །།ཆོས་དབྱིངས་གཞི་ལས་ལོངས་སྐུ་ཐུགས་རྗེའི་འཕྲུལ། །པད་འབྱུང་ཧེ་རུ་ཀ་དཔལ་སྐུར་སྣང་བ། །རྡོ་རྗེ་གྲོ་ལོད་དཀྱིལ་འཁོར་ལྷ་ཚོགས་དང་། །བཀའ་བབས་བརྒྱུད་པར་བཅས་ལ་གསོལ་བ་འདེབས། །བསྙེན་སྒྲུབ་མཐར་ཕྱིན་ཕྱི་ནང་བར་ཆད་ཞི། །མཆོག་ཐུན་དངོས་གྲུབ་བརྙེས་པར་བྱིན་གྱིས་རློབས། །ཅེས་བླ་མ་བསྟན་པས་བཞེད་ལྟར་སྤེལ་བ་དགེ་ལེགས་འཕེལ། མངྒ་ལཾ།། །།

[Full Size]

མ་འོངས་དྲུག་པ་སེང་གེའི་རྣམ་པར་འཕྲུལ། །དུས་གསུམ་ཀུན་མཁྱེན་ཆོས་རྗེ་ཀརྨ་པ། །བདུད་འདུལ་རྡོ་རྗེའི་ཞབས་ལ་གསོལ་བ་འདེབས། །བྱིན་གྱིས་རློབས་ཤིག་འགྲོ་མགོན་རིན་པོ་ཆེ། །མ་ཧཱ་མུ་དྲ་སརྦ་སིདྡྷི་ཧཱུྃ། །འདས་པའི་སངས་རྒྱས་དཀོན་མཆོག་ཡན་ལག་ཏུ། །འཚང་རྒྱ་ཟིན་ཀྱང་སྤྲུལ་པའི་སྐུར་བཞེངས་པ། །ཆོས་གྲུབ་རྒྱ་མཚོའི་ཞབས་ལ་གསོལ་བ་འདེབས། །བྱིན་གྱིས་རློབས་ཤིག་འགྲོ་མགོན་རིན་པོ་ཆེ། །མ་ཧཱ་མུ་དྲ་སརྦ་སིདྡྷི་ཧཱུྃ། །བསྐལ་བཟང་རྣམ་འདྲེན་ལྔ་པ་མ་ཕམ་པའི། །སྒྱུ་འཕྲུལ་རྡོ་རྗེའི་སྣང་བ་རྟག་འཆར་བ། །བསྟན་པའི་ཉིན་བྱེད་ཞབས་ལ་གསོལ་བ་འདེབས། །བྱིན་གྱིས་རློབས་ཤིག་འགྲོ་མགོན་རིན་པོ་ཆེ། །མ་ཧཱ་མུ་དྲ་སརྦ་སིདྡྷི་ཧཱུྃ། །དེ་ལྟར་གསོལ་བ་བཏབ་པའི་ཐུགས་རྗེའི་འོད། །བདག་གཞན་གནས་ངན་ལེན་གྱི་མུན་པ་བསལ། །ཐེག་པ་མཆོག་གི་ས་ལ་རབ་གནས་ནས། །སངས་རྒྱས་རྡོ་རྗེ་འཆང་དབང་འགྲུབ་གྱུར་ཅིག །ཅེས་པའང་ལ་ཤྲཱི་ངེས་དོན་གླིང་གི་དགེ་སློང་སྒྲུབ་ཆེན་པ་ཚེ་དབང་དཔལ་འབར་གྱིས་བསྐུལ་བའི་ངོར། སི་ཏུ་པདྨ་ཉིན་བྱེད་དབང་པོས་གསལ་བར་བཀོད་པ་འགྲོ་རྣམས་ཕྱིར་མི་ལྡོག་པའི་གོ་འཕང་ལ་མངོན་དུ་རེག་པར་གྱུར་ཅིག །ཤུབྷཾ།། །།

གསོལ་འདེབས་དངོས་གྲུབ་ཡོངས་འདུ།

[Full Size]

གསོལ་འདེབས་དངོས་གྲུབ་ཡོངས་འདུ་བཞུགས། ན་མ་ཤྲཱི་གུ་རུ་ཝེ། སྤྲོས་བྲལ་དང་པོའི་སངས་རྒྱས་ཀུན་ཏུ་བཟང་། །ངེས་པ་ལྔ་ལྡན་བདེ་ཆེན་ལོངས་སྤྱོད་རྫོགས། །ཐུགས་

[Full Size]

རྗེའི་གར་གྱིས་རོལ་པ་སྤྲུལ་བའི་སྐུ། །རྒྱལ་ཀུན་ཕྲིན་ལས་མི་བཟད་གཏེར་ཆེན་པོ། །ཨོ་རྒྱན་སློབ་དཔོན་རིག་འཛིན་པདྨ་འབྱུང་། །དུས་གསུམ་ཀུན་མཁྱེན་སྟོབས་བཅུ་མངའ་བའི་དཔལ། །གང་འདུལ་སྤྲུལ་པའི་རོལ་རྩེད་ཅིར་ཡང་སྒྱུར། །ཐབས་མཁས་ཐུགས་རྗེ་ཅན་ལ་གསོལ་བ་འདེབས། །སྙིགས་མར་སྤྱོད་པའི་དུས་ཀྱི་ཡང་མཐའ་འདིར། །སངས་རྒྱས་གཞན་ལས་ཕུལ་གྱུར་བརྩེ་བ་ཅན། །ཕྲིན་ལས་ཉིན་བྱེད་འོད་སྣང་རབ་གསལ་བས། །འགྲོ་རྒྱུད་མ་རིག་མུན་པའི་དྲྭ་བ་བཅོམ། །ཡང་དག་རང་བྱུང་ཡེ་ཤེས་པད་ཚལ་བཞད། །སྤངས་རྟོགས་ཡོན་ཏན་དུ་མའི་ལོ་འདབ་རྒྱས། །མཐར་ཐུག་སྐུ་ལྔའི་འབྲས་བུ་མངོན་བྱེད་པའི། །མཚོ་སྐྱེས་རྡོ་རྗེ་འཆང་ལ་གསོལ་བ་འདེབས། །སྐྱེ་ཀུན་གསང་སྔགས་བསྟན་པའི་སྒོར་ཞུགས་ཤིང་། །ཨོ་རྒྱན་མཁའ་སྤྱོད་བདེ་ཆེན་ཞིང་ཁམས་སུ། །ཁྱབ་བདག་སྟོན་པ་མཆོག་གིས་རྗེས་བཟུང་ཞིང་། །བླ་མེད་བྱང་ཆུབ་ཆེན་པོ་མངོན་གྱུར་ཤོག །ཅེས་རྡོ་སྟོད་དཔོན་མོ་དཔལ་སྐྱིད་ཀྱིས་བསྐུལ་བའི་ངོར་སྤེལ་བ་དགེ། །།གདུལ་བྱའི་ཁམས་དབང་མོས་པ་དུ་མའི་ངོར། །དེ་སྙེད་ཐུགས་རྗེའི་རོལ་གར་ཅིར་ཡང་བསྒྱུར། །དཔལ་ལྡན་མི་ཕམ་ཆོས་གྲུབ་རྒྱ་མཚོ་ལ། །གསོལ་བ་འདེབས་སོ་ལྷན་སྐྱེ་ཡེ་ཤེས་སྩོལ། །དབོན་པོ་དགེ་ལེགས་ངོར་སྤེལ།། །།སྟོན་མཆོག་དྲུག་པ་སེང་གེ་ཀརྨ་པའི། །རིང་ལུགས་རྒྱ་མཚོའི་གོས་ཅན་སྤེལ་བྱེད་པའི། །མཁྱེན་དང་བརྩེ་བའི་དབང་ཕྱུག་

[Full Size]

ཆོས་ཀྱི་རྗེ། །ཕྲིན་ལས་འཆི་མེད་མགོན་དེར་གསོལ་བ་འདེབས། །ལུས་ཅན་འགྲོ་བའི་ཉོན་མོངས་ཚ་གདུང་རྣམས། །ཐུགས་རྗེ་བྱམས་པའི་བསིལ་རྒྱུན་རྨད་བྱུང་བས། །ཡང་དག་སྣང་བའི་པད་ཚལ་རྒྱས་མཛད་པ། །ཕྲིན་ལས་འཆི་མེད་མགོན་དེར་གསོལ་བ་འདེབས། །གསོལ་བཏབ་མཐུ་ལས་སྒྲུབ་བརྒྱུད་རིན་པོ་ཆེའི། །བསྟན་པ་མི་ནུབ་རྒྱལ་མཚན་བསྒྲེངས་ནུས་པའི། །སྤངས་དང་རྟོགས་པའི་ཡོན་ཏན་རབ་རྫོགས་ནས། །ཐོས་བསམ་སྒོམ་པ་མཐར་ཕྱིན་སངས་རྒྱས་ཤོག །ཅེས་པའང་རྗེ་དྲུང་ཞིང་གཤེགས་དེར་གསོལ་བ་འདེབས་དགོས་ཞེས་མཛོད་པ་རྣམས་ཀྱིས་བསྐུལ་ལྟར་སྤེལ།། །།དཔལ་ལྡན་སྒྲུབ་བརྒྱུད་བསྟན་འཛིན། །འཆི་མེད་དངོས་ཀུན་འབྱུང་གནས། །གྲུབ་མཆོག་རྒྱ་མཚོའི་སྤྱི་མེས། །ཡེ་ཤེས་དབྱིངས་ཀྱི་ངང་ནས། །ཉི་མ་ལྟ་བུའི་ཐུགས་རྗེ། །ཕྲིན་ལས་རྣམ་བཞི་རབ་གསལ། །རྣམ་པར་གྲོལ་བའི་ལམ་བཟང་། །རྒྱལ་བའི་བྱིན་རླབས་སྣང་བས། །སྡེ་བཞིའི་རིང་ལུགས་རྒྱས་ཤིང་། །འགྲོ་རྣམས་བྱང་ཆུབ་ཐོབ་ཤོག །དཔལ་ལྡན་འབྲུག་པའི་མཚན་གྱི། །གསོལ་འདེབས་འདི་དག་སྐལ་ལྡན། །རང་གཞན་ཀུན་གྱིས་མོས་པའི། །རྒྱན་དུ་རོལ་པར་གྱིས་ཤིག། །།གྲུབ་ཐོབ་རྒྱ་མཚོའི་འབྱུང་གནས་དཔལ་ཡོན་ཅན་དེ། །བླ་མེད་སྙིང་པོ་ངེས་གསང་བཀའ་བརྒྱུད་རིན་ཆེན། །དབྱར་རྔའི་རིང་ལུགས་

[Full Size]

འཆང་བ་མུ་ཏིག་ཕྲེང་མཛེས། །མཚུངས་མེད་བསོད་ནམས་རྒྱ་མཚོའི་སྐྱེ་བའི་རབས་འཁྲུངས། །རྒྱལ་བའི་སྲས་གྱུར་བརྩེ་ཆེན་འཇམ་དཔལ་དཔའ་བོ། །དངོས་སྤྲུལ་གངས་ཅན་མི་བདག་ཁྲི་སྲོང་ལྡེའུ་བཙན། །རྣམ་པར་རོལ་པའི་ངོ་མཚར་ཟློས་གར་ཡོངས་ཤར། །སྙིགས་དུས་མུན་ཆེན་འཐིབས་པོའི་གནས་ཀུན་གསལ་བར་བྱེད་པའི། །རིག་འཛིན་ཡོངས་གཙོ་ཉིན་མོར་བྱེད་བཞིན་ཕྲིན་ལས་འོད་སྟོང་། །བདག་ཉིད་ཆེན་པོ་རྡོ་རྗེ་དྲག་པོ་ཕྲིན་ལས་འདུས་པ། །དུས་གསུམ་རྒྱལ་བའི་ཐུགས་རྗེ་ཡོངས་རྫོགས་བྱིན་རླབས་གཏེར་ཆེན། །མཆོག་གི་བླ་མ་རྡོ་རྗེ་འཛིན་པ་བདེ་ཆེན་འཁོར་ལོའི་མགོན་པོར། །སྙིང་ནས་དད་གསུམ་རྒྱ་མཚོས་དྲང་བའི་ཕྱག་འཚལ། །ཡན་ལག་བདུན་འབུལ་དེང་བཟུང་བྱང་ཆུབ་བར་དུ། །མ་ནོར་ལམ་སྟོན་རྩ་བའི་བླ་མས་རྗེས་བཟུང་སྨིན་གྲོལ། །འགྱུར་མེད་རྟག་པར་ལྷུན་གྲུབ་དབྱིངས་ཀྱི་ངོ་བོ། །གོ་འཕང་མངོན་གྱུར་སྐུ་བཞི་ཡེ་ཤེས་ཐོབ་པར་བྱིན་རློབས། །རྗེ་བཙུན་བླ་མ་ཁྱེད་རང་མཁྱེན་ནོ་བདག་རྒྱུད་སྨིན་པར་མཛོད་ཅིག །དད་གསུམ་ལྡན་པ་སྒྲུབ་པ་བཀའ་བརྒྱུད་ཆོས་འཕེལ་ངོར་སྤེལ།། །།ན་མཿཨཱཪྱ་ཏཱ་ར་ཡེ། །དཔལ་མཆོག་ལྷན་སྐྱེས་ཡེ་ཤེས་བདེ་བ་ཆེ། །མ་འགགས་རང་གསལ་སྤྲུལ་བསྒྱུར་གར་སྟོན་པའི། །འགྲོ་འདུལ་འཇིག་རྟེན་དབང་ཕྱུག་སྲས་མོ་སྟེ། །འཕགས་མ་སྒྲོལ་མ་དཔལ་མོར་གསོལ་བ་འདེབས། །གང་དེས་བྱིན་རླབས་གྲུབ་པའི་འཁོར་ལོས་སྒྱུར། །ཧེ་རུ་ཀ་དཔལ་

[Full Size]

ཚེ་དབང་ནོར་བུ་དང་། །རྒྱལ་བསྟན་ཡོངས་རྫོགས་མཁྱེན་པའི་དཀྱིལ་འཁོར་རྒྱས། །ཆོས་ཀྱི་འབྱུང་གནས་ཞབས་ལ་གསོལ་བ་འདེབས། །མངའ་བདག་ཚངས་ཆེན་རྣམ་རོལ་སྤྲུལ་པའི་སྐུ། །རྡོ་རྗེ་དྲག་པོ་ལས་རབ་བདེ་བ་རྩལ། །མི་ཤིགས་སྙིང་གི་ཐིག་ལེར་རྟག་འཆར་བའི། །དྲིན་ཆེན་རྩ་བརྒྱུད་བླ་མར་གསོལ་བ་འདེབས། །དེ་ལྟར་གསོལ་བ་བཏབ་པའི་ཐུགས་རྗེའི་མཐུས། །ཚོགས་གཉིས་རབ་རྫོགས་འགྲོ་ཀུན་ཡུམ་གྱུར་མའི། །གོ་འཕང་དམ་པ་མྱུར་དུ་ཐོབ་པ་དང་། །དོན་གཉིས་ལྷུན་གྲུབ་བཀྲ་ཤིས་ཀུན་འབྱུང་ཤོག །ཅེས་སྒྲོལ་མ་མཎྜལ་བཞི་པའི་ཉེ་བརྒྱུད་ཀྱི་གསོལ་འདེབས་འདི་ཡང་ཨོ་རྒྱན་ཆོས་འཕེལ་ངོར་སྤེལ།། །།མ་འོངས་རྣམ་འདྲེན་བསྐལ་བཟང་རྫོགས་སངས་རྒྱས། །མི་ཕམ་མགོན་པོ་བྱམས་ཆེན་སྒྱུ་འཕྲུལ་གར། །གངས་ཅན་ལྗོངས་འདིར་ཏཱ་ཡི་སི་ཏུ་ཞེས། །སྐྱེས་རབས་རིམ་པར་བྱོན་ལ་གསོལ་བ་འདེབས། །ཨོ་རྒྱན་རྗེ་དང་ཌོམ་བྷི་མར་ལོ་ཙཱ། །རས་ཆེན་མགོན་པོ་བེར་ནག་དབྱེར་མེད་པར། །རྒྱལ་ཀུན་ཐུགས་རྗེ་འདུས་པའི་རང་གཟུགས་མཆོག །དཀྱིལ་འཁོར་ཡོངས་ཀྱི་བདག་པོར་གསོལ་བ་འདེབས། །སྙིགས་མ་ལས་ཀྱང་ཆེས་སྙིགས་དུས་འདིར་ཡང་། །ཐུགས་བསྐྱེད་གོ་ཆ་བཙན་པོའི་ཕྲིན་ལས་ཀྱིས། །བསྟན་པ་ཡོངས་རྫོགས་གསལ་བྱེད་འཇམ་པའི་མགོན། །ཆོས་ཀྱི་འབྱུང་གནས་ཞབས་ལ་གསོལ་བ་འདེབས། །གང་དེའི་མཚན་གྱིས་

[Full Size]

བརྗིད་པའི་སྙེམས་པ་ཅན། །བསྟན་འགྲོར་ཕན་བདེ་རློམ་པའི་ངང་ཚུལ་གྱི། །ལྟར་སྣང་བསླུ་བྲིད་ཆོས་བརྒྱད་མངའ་དབང་ཕྱུག །པདྨ་ཉིན་བྱེད་དབང་པོར་དང་བ་ཡི། །བདག་སོགས་མོས་པའི་དད་པས་གསོལ་འདེབས་ན། །སངས་རྒྱས་ཡིད་བྱེད་གསུངས་པའི་དོན་དེ་བཞིན། །གསོལ་བཏབ་མཐུ་ལས་ཅུང་ཟད་ཐུགས་རྗེའི་ཆར། །བདག་རྒྱུད་སྨིན་པར་བྱིན་གྱིས་བརླབ་ཏུ་གསོལ། །ཅེས་པའང་དགེ་སློང་དཔལ་འབྱོར་ནས་བསྐུལ་ལྟར་སྤེལ།། །།དུས་གསུམ་རྒྱལ་བའི་ཡུམ་གྱུར་ཤེར་ཕྱིན་མ། །བསྟན་པའི་མངའ་བདག་བཅོམ་ལྡན་ཤཱཀྱ་ཐུབ། །སྨྲ་བའི་སེངྒེ་འཕགས་མ་སྒྲོལ་དཀར་ཡུམ། །གསོལ་འདེབས་དངོས་གྲུབ་གཉིས་སྩོལ་བདག་བྱིན་རློབས། །སུ་ཁ་སིདྡྷི་ཨཱཪྱ་དེ་ཝ་དང་། །ཕ་ཅིག་དམ་པ་མ་ཅིག་ལབ་ཀྱི་སྒྲོན། །ཁམ་བུ་ཡ་ལེ་ཛྙཱ་ན་ཛྭ་ལ་རྗེ། །གསོལ་འདེབས་དངོས་གྲུབ་གཉིས་སྩོལ་བདག་བྱིན་རློབས། །གནམ་མཚོ་དོ་པ་རང་བྱུང་རྒྱལ་བའི་ཞབས། །སེངྒེ་དཔལ་བ་དབང་རྡོར་རིནཆེན་ཤྲཱི། །བྱམས་པ་དཔལ་དང་འོད་ཟེར་བླ་མ་ལ། །གསོལ་འདེབས་དངོས་གྲུབ་གཉིས་སྩོལ་བདག་བྱིན་རློབས། །སངས་རྒྱས་རིན་ཆེན་ཀུན་དགའ་རྣམ་པར་རྒྱལ། །ཀརྨ་བསྟན་སྐྱོང་འགྱུར་མེད་སྙིང་པོའི་སྡེ། །དཀོན་མཆོག་བསྟན་འཛིན་བསྟན་པ་རྣམ་རྒྱལ་ལ། །གསོལ་འདེབས་དངོས་གྲུབ་གཉིས་སྩོལ་བདག་བྱིན་རློབས། །ཀརྨ་རིག་འཛིན་གསུང་རབ་རྒྱ་མཚོ་དང་། །དྲན་མཆོག་དྭངས་མའི་མགོན་

[Full Size]

པོ་ཐམས་ཅད་མཁྱེན། །བསྟན་པའི་ཉིན་བྱེད་རྩ་བའི་བླ་མ་ལ། །གསོལ་འདེབས་དངོས་གྲུབ་གཉིས་སྩོལ་བདག་བྱིན་རློབས། །སྣང་སྲིད་ཆོས་ཀུན་སྒྱུ་མའི་རང་བཞིན་ལ། །བློ་འདས་མི་རྟོག་ཡེ་ཤེས་འོད་གསལ་ཆེའི། །གནས་ལུགས་ཇི་བཞིན་འཁྲུལ་མེད་གདེང་ཐོབ་ནས། །ཀུན་བཟང་ཁྱབ་བརྡལ་དབྱིངས་སུ་གྲོལ་གྱུར་ཅིག །ཅེས་པ་ཀརྨ་དར་རྒྱས་ངོར་སྤེལ།། །།གཅོད་ཚོགས་ཡོན་ཏན་ཀུན་འབྱུང་ཁ་བསྐང་གི་ཐོག་མར་རིང་བརྒྱུད་གསོལ་འདེབས་སུ། གནས་དབྱིངས་དང་ཡེ་ཤེས་དཀྱིལ་འཁོར་ན། །རྗེ་བདུད་འདུལ་རྡོ་རྗེ་ལ་གསོལ་བ་འདེབས། ༴ གནས་རང་བྱུང་གདོད་མའི་གཞལ་ཡས་ན། །མི་ཕམ་ཆོས་གྲུབ་རྒྱ་མཚོ་ལ་གསོལ་བ་འདེབས། ༴ བདེ་ཆེན་འགྱུར་མེད་གཞལ་ཡས་ན། །ཆོས་ཀྱི་འབྱུང་གནས་བྱིན་རླབས་ཅན། ༴ གསལ་སྟོང་ལྷུན་གྲུབ་འོད་ཀློང་ན། །རྗེ་བདུད་འདུལ་རྡོ་རྗེ་བྱིན་རླབས་ཅན། ༴ ཆོས་དབྱིངས་སྐྱེ་མེད་ཕོ་བྲང་ན། །མི་ཕམ་ཆོས་གྲུབ་རྒྱ་མཚོ་བྱིན་རླབས་ཅན། ༴ རྗེ་བཙུན་བདུད་ཚོགས་འདུལ་བའི་རྡོ་རྗེ་དང་། །དཔལ་ལྡན་མི་ཕམ་ཆོས་གྲུབ་རྒྱ་མཚོ་ལ། །གསོལ་བ་འདེབས་སོ༴ ཚོགས་ལས་གོང་གི་རིང་བརྒྱུད་གསོལ་འདེབས་ཁ་བསྒྱུར་གྱིས་འཐུས། སྒྲུབ་བླ་མ་ནོར་བུའི་ངོར་སྤེལ།། །།རབ་འབྱམས་རྒྱལ་བ་ཡོངས་ཀྱི་སྤྱི་གཟུགས་མཆོག །ཀོ་ཤའི་མཚོར་འཁྲུངས་བླ་མ་ཧེ་རུ་ཀ། འཆི་མེད་གྲུབ་པ་རྡོ་རྗེ་ཐོད་

[Full Size]

ཕྲེང་རྩལ། །གང་འདིར་ཐུགས་རྗེའི་བདག་ཉིད་ཡོངས་ཤར་བ། །པདྨ་དབང་ཆེན་རྒྱལ་པོ་རོལ་པ་རྩལ། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྣང་སྲིད་དངོས་ཀུན་རང་གྲོལ་བདེ་བ་ཆེ་། །ཀུན་བཟང་དགོངས་པ་མཉམ་ཉིད་བྱིན་གྱིས་རློབས། །ཅེས་དབོན་བླ་མ་བརྟན་པའི་བཞེད་ངོར་སྤེལ།། ༈ །།དུས་གསུམ་མཁྱེན་པའི་རང་གཟུགས་པ༵དྨ༵་རྒྱལ། །ཡེ་ཤེས་རྣམ་པར་རོལ་པའི་ཉི༵ན་བྱེ༵ད་དབང་། །རྩ་བརྒྱུད་བླ་མ་དཔལ་ལྡན་རྡོ་རྗེ་འཆང་། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཞེས་སམ། གནས་སྐབས་བདུད་བཞིའི་བར་ཆད་གཡུལ་ལས་རྒྱལ། །རྣམ་པར་དག་པའི་ངེས་དོན་གསང་བ་མཆོག །སྙིང་པོའི་བརྟན་ཐོབ་རང་གཞན་སྨིན་ཅིང་གྲོལ། །སྐུ་བཞིའི་གོ་འཕང་མྱུར་དུ་ཐོབ་པར་ཤོག །ཅེས་དབོན་བསམ་གཏན་སྐུ་སྐྱེའི་ཐུགས་བཞེད་བསྐང་ཕྱིར་སྤེལ། མངྒ་ལཾ། ཛ་ཡནྟུ།། །།འཇིག་རྟེན་མགོན་པོའི་བྱིན་རླབས་མཁའ་དབྱིངས་ལས། །ས་ར་ཧ་ཞེས་ཉིན་བྱེད་རྣམ་པར་གསལ། །ཀརྨ་པར་གྲགས་ས་གསུམ་སྣང་བའི་གཉེན། །བསམ་མི་ཁྱབ་པའི་ཕྲིན་ལས་ལྡན་དེར་འདུད། །གང་གི་ཐུགས་རྗེའི་འོད་ཟེར་འབུམ་བརྡལ་བས། །ལུས་ཅན་ཐར་ལམ་པདྨོ་རྒྱས་པའི་དཔལ། །བསྟན་འཛིན་མཚན་ཅན་དོན་དང་ལྡན་པ་ཡི། །སྤྲུལ་པའི་སྐྱེས་རབས་ཚར་དུ་དངར་བ་ལས། །གྲུབ་མཆོག་དགེ་ལེགས་རབ་རྒྱས་གང་དེར་འདུད། །གསོལ་བཏབ་མཐུ་

[Full Size]

ལས་བསླབ་གསུམ་གཞི་བརྟན་ཅིང་། །གཞན་ཕན་བྱང་ཆུབ་སྤྱོད་ལ་དབང་འབྱོར་ནས། །རང་རིག་ཡེ་ཤེས་མངོན་གྱུར་བྱིན་གྱིས་རློབས། །ཅེས་ཟུར་མང་བསྟན་འཛིན་མཆོག་གི་གསོལ་འདེབས་སུ་སྒྲུབ་ཀརྨ་ཚེ་དབང་གི་གཡར་ངོར་སྤེལ།། །།དུས་གསུམ་སྟོན་མཆོག་ཐུགས་རྗེའི་ཀློང་ཡངས་ནས། །ཟླ་མེད་ཕྲིན་ལས་ནམ་མཁའི་ནོར་བུའི་འོད། །ས་གསུམ་སྣང་བྱེད་བྱེ་བའི་བདག་ཉིད་ཆེ། །ཕྱག་ན་པད་འཆང་རྣམ་རོལ་སྒྱུ་འཕྲུལ་གར། །ངེས་དོན་རིང་ལུགས་སྐྱེད་ཚལ་རྒྱས་བྱེད་པ། །ཡོངས་ཀྱི་དགེ་བའི་བཤེས་གཉེན་དམ་པའི་མགོན། །དབང་རྒྱལ་རྡོ་རྗེའི་ཞབས་ལ་གསོལ་བ་འདེབས། །བསྟན་པ་འཛིན་ལ་མངའ་བརྙེས་བྱིན་གྱིས་རློབས། །རྒྱལ་སྲས་ཐུ་བོར་གྱུར་པ་སྙིང་པོའི་དོན། །མངོན་སུམ་རྟོགས་པའི་གདེང་ཐོབ་ཡན་ལག་འབྱུང་། །གསོལ་འདེབས་ལྷན་སྐྱེས་ཡེ་ཤེས་མཆོག་དངོས་སྩོལ། །བདག་གཞན་སྨིན་གྲོལ་བྱང་ཆུབ་མངོན་གྱུར་ཤོག །ཅེས་སྤོང་བ་པ་བླ་མ་སྒྲུབ་ཆེན་མགོན་དབང་ནས་བསྐུལ་བའི་ངོར་སྤེལ།། །།སྐུ་གསུམ་ཡེ་ཤེས་ལྔ་ཡི་བདག་ཉིད་མཆོག །རྒྱལ་བ་ཀུན་དངོས་གུ་རུ་པདྨ་འབྱུང་། །དབྱེར་མེད་དཔལ་ལྡན་འབྲུག་པའི་ཞབས་ལ་འདུད། །གྲུབ་གཉིས་དངོས་སྩོལ་བདག་རྒྱུད་བྱིན་གྱིས་རློབས། །འཇིག་རྟེན་སོ་ནམ་སྡུག་བསྔལ་བདེར་ཤར་བའི། །རང་གཞན་དུག་ལྔས་བསླད་པའི་འཁྲུལ་འཁོར་གྱི། །དྲྭ་བར་ཆུད་འདི་དོན་དམ་

[Full Size]

རྡོ་རྗེའི་མཚོན། །འབར་བས་གཅོད་ཅིང་རང་སར་ཞི་གྱུར་ཅིག །སྔོན་ལས་འཕྲལ་རྐྱེན་ནད་གདོན་བགེགས་བར་ཆད། །ཉེར་འཚེའི་ཕྱོགས་རྣམས་ཀུན་ལས་རྣམ་རྒྱལ་ཞིང་། །རང་རིག་སྐྱེ་མེད་མཐའ་བྲལ་ཆོས་ཀྱི་སྐུ། །གཞི་ལམ་འབྲས་གསུམ་མཐར་ཕྱིན་བྱང་ཆུབ་ཤོག །དད་གསུམ་ལྡན་པ་འབྲོང་པ་བསྟན་ཕྲིན་དང་། དཀོན་རྒྱལ་བཅས་ཀྱི་ཆེད་དུ་སྤེལ་བ་དགེ།། །།ཆོས་དབྱིངས་གདོད་མའི་རང་གཟུགས་ཐུགས་རྗེའི་འཕྲུལ། །མ་འགགས་ཅིར་ཡང་སྣང་བ་གདུལ་བྱའི་ངོར། །གང་འདུལ་ཐབས་ཀྱི་ཕྲིན་ལས་གཏེར་ཆེན་པོ། །བཀའ་བརྒྱུད་བླ་མ་རྣམས་ལ་གསོལ་བ་འདེབས། །སྐྱེ་དང་ཚེ་རབས་ཡང་དག་སྟོན་པ་དང་། །མི་འབྲལ་བསྙེན་ཅིང་གསང་སྔགས་སྣོད་དང་ལྡན། །ལྟ་སྒོམ་སྤྱོད་པའི་གདེང་ཐོབ་རྒྱུད་སྨིན་གྲོལ། །ས་ལམ་ཡོན་ཏན་རྫོགས་པར་བྱིན་གྱིས་རློབས། །གནས་སྐབས་ཚེ་ནོར་ལོངས་སྤྱོད་དཔལ་ཐོབ་ཅིང་། །རྟག་ཏུ་ཆོས་ལ་མོས་ཐོབ་ཤེས་རབ་མིག །རྡུལ་བྲལ་དུག་གསུམ་ཉོན་མོངས་ཀུན་བཅོམ་ནས། །བདེ་གཤེགས་རྒྱལ་བའི་གོ་འཕང་རེག་གྱུར་ཅིག །ཅེས་སྐྱབས་ཆེ་བླ་ཆུང་ཚེ་དབང་བཞེད་ལྟར་སི་ཏུས་སྤེལ།། །།དུས་གསུམ་གྱི་སངས་རྒྱས་འདུས་པའི་དཔལ། །དཔལ་དྲན་མཆོག་རྡོ་རྗེ་སློབ་དཔོན་སྐུ། །དུས་འདིར་སྣང་སྙིགས་དུས་འགྲོ་བའི་མགོན། །མགོན་བསླུ་མེད་བསྟན་འཛིན་དགེ་བའི་བཤེས། །གྲུབ་པ་མཆོག་དགེ་ལེགས་རབ་རྒྱས་ཞབས། །སེམས་གཉུག་མ་ལྷན་སྐྱེས་ངོ་བོ་

[Full Size]

ཉིད། །དབྱེར་མེད་ཀྱི་ངང་ནས་གསོལ་བ་འདེབས། །སྣང་སྲིད་ཀུན་སྒྱུ་མར་འཆར་བ་དང་། །ཅི་སྣང་དང་ཅི་ཤར་ཆོས་སྐུ་ཡི། །རོལ་པ་འབྱམས་ཀླས་ཀྱི་ངང་ཉིད་ནས། །བདེ་ཆེན་གྱི་ཡེ་ཤེས་འབར་བའི་གཟིས། །གཉིས་སྣང་གི་འཁྲུལ་ཞེན་ཀུན་བསལ་ནས། །རྡོ་རྗེ་འཆང་གོ་འཕང་ཚེ་གཅིག་ཏུ། །གེགས་མེད་དུ་ཐོབ་པར་བྱིན་གྱིས་རློབས། །ཅེས་པའང་ཐེག་འཕེལ་ངོར་སྤེལ།། །།རྒྱལ་ཀུན་ཐུགས་རྗེའི་རང་རྩལ། །དབྱེར་མེད་ཀུན་འདུས་ངོ་བོ། །མཆོག་གི་རྡོ་རྗེ་ཅན་དངོས། །ཆོས་སྐྱོང་འགྱུར་མེད་དམ་པར། །རང་སེམས་རིག་པའི་ངོ་བོ། །ཀ་དག་ཆོས་སྐུར་གསལ་བཞིན། །བཅོས་མིན་དད་པའི་ཤུགས་ཀྱིས། །གསོལ་བ་འདེབས་སོ་བདག་རྒྱུད། །སྒྲིབ་གཉིས་བྱང་ནས་སྐུ་གཉིས། །གོ་འཕང་མངོན་དུ་གྱུར་པའི། །བྱིན་རླབས་ཀློང་ནས་སྩོལ་ཅིག །ཅེས་ལྷག་བསམ་ངོར་སྤེལ།། །།བླ་མ་ལ་གསོལ་བ་འདེབས་སོ། །རྒྱལ་ཀུན་གཅིག་བསྡུས་ཀྱི་ངོ་བོ། །འཕགས་པ་མཆོག་སྤྱན་རས་གཟིགས་དངོས། །རྗེ་བཙུན་བདུད་འདུལ་བའི་རྡོ་རྗེ། །སྐལ་ལྡན་ལ་དགོངས་ཤིག་སྣང་སྲིད། །ཆོས་ཀྱི་སྐུར་འཆར་བར་བྱིན་རློབས། །ཡི་དམ་ལ་གསོལ་བ་འདེབས་སོ། །བྱ་སྤྱོད་རྣལ་འབྱོར་དང་བླ་མེད། །རྒྱུད་བཞི་ཡི་ལྷ་ཚོགས་སྐྱེད་གཞི། །ཡུམ་རྣལ་འབྱོར་རྡོ་རྗེ་ཕག་མོ། །སྐལ་ལྡན་ལ་དགོངས་ཤིག་སྣང་སྲིད། །དག་པ་ཡེ་ཤེས་སུ་བྱིན་རློབས། །ཆོས་སྐྱོང་ལ་གསོལ་བ་འདེབས་སོ། །

[Full Size]

ཡེ་ཤེས་དང་ལས་འཇིག་རྟེན་མགོན། །མཐུ་སྟོབས་ཀྱི་སྤྱི་དཔལ་བེར་ཅན། །ལྕམ་དྲལ་སྲུང་མ་ཡི་བཀའ་འཁོར། །སྐལ་ལྡན་ལ་དགོངས་ཤིག་སྣང་སྲིད། །ལྷ་ཡི་དཀྱིལ་འཁོར་དུ་བྱིན་རློབས། །གཉིས་སྣང་གི་འཛིན་པའི་སྒྲིབ་པ། །ཡེ་ནས་སུ་དག་པའི་ངང་དུ། །ལྷན་ཅིག་སྐྱེས་གཉུག་མའི་དེ་ཉིད། །མངོན་སུམ་དུ་རྟོགས་པར་བྱིན་རློབས། །གནས་སྐབས་སུ་འགལ་རྐྱེན་ཞི་ཞིང་། །མཐུན་རྐྱེན་ཆོས་ཡིད་བཞིན་འགྲུབ་ནས། །བྱ་སྤྱོད་ཀུན་དགེ་ལ་སྦྱོར་པའི། །བསམ་པའི་དོན་འགྲུབ་པར་བྱིན་རློབས། །ཅེས་རྩ་གསུམ་ལྷ་ལ་གསོལ་འདེབས་བྱིན་དབབ་ཐར་མཆོག་ངོར་སྤེལ།། །།ཀུན་ཏུ་བཟང་པོ་དགའ་རབ་ཤྲཱི་སེང་། །མཚོ་སྐྱེས་རྡོ་རྗེའི་རྣམ་རོལ་སྒམ་པོ་པ། །གང་འདུལ་ཕྲིན་ལས་རོལ་རྩེད་འབྱམས་ཀླས་ཀྱི། །ཞིང་ཁམས་སྤྲུལ་པས་ཁྱབ་དེར་གསོལ་བ་འདེབས། །སྙིགས་ལྔའི་གདུལ་བྱར་རྗེས་དགོངས་མཁའ་དབྱིངས་ལས། །མདོ་སྔགས་བསྟན་པའི་སྣང་བྱེད་ཉིན་མོའི་མགོན། །དཔལ་གྱི་སེངྒེ་དབྱེར་མེད་གནམ་གཏེར་ཆོས། །ཟབ་མོས་འགྲོ་བ་འདུལ་ལ་གསོལ་བ་འདེབས། །གང་གི་སྒྱུ་འཕྲུལ་ཟླ་དང་འོད་དཀར་བཞིན། །སྣང་སེམས་གཉིས་མེད་རྟོགས་པའི་རྣལ་འབྱོར་པ། །གྲུབ་པའི་དབང་ཕྱུག་ས་མནྟ་བྷ་དྲ། །བསམ་བཞིན་སྤྲུལ་པར་སྟོན་ལ་གསོལ་བ་འདེབས། །དེ་ལྟར་དད་གསུམ་མོས་བློའི་ལྷག་བསམ་ལས། །གསོལ་བཏབ་མཐུ་ལས་བླ་མའི་སྐུ་ཚེ་བརྟན། །མཛད་ཕྲིན་རབ་རྒྱས་དགེ་

[Full Size]

འདུན་འདུས་པ་འཕེལ། །འཇིག་རྟེན་བདེ་ཞིང་བཀྲ་ཤིས་ཀུན་ཁྱབ་ཤོག །ཅེས་པའང་སི་ཏུ་པདྨའི་མིང་ཅན་གྱིས་ལྷོ་རིན་པོ་ཆེའི་ཉེ་གནས་བསླབ་གསུམ་ལྡན་པ་དཀོན་མཆོག་དབང་ལྡན་བཞེད་ངོར་སྤེལ།། །།རྒྱལ་ཀུན་རྣམ་རོལ་ཐུགས་རྗེའི་བདག་ཉིད་མཆོག །རང་བྱུང་བླ་མ་མཚོ་སྐྱེས་རྡ་ོརྗེ་འཆང་། །དཀྱིལ་འཁོར་གཙོ་བོར་རིགས་འདུས་ཧེ་རུ་ཀ། གང་གི་སྒྱུ་འཕྲུལ་རང་བཞིན་སྣ་ཚོགས་གཟུགས། །འགྲོ་བློའི་སྣང་ངོར་ཅིར་ཡང་སྟོན་པ་ལས། །ངེས་གསང་རིང་ལུགས་པ༵དྨ༵་བཞད་པའི་གཉེན། །ཉི༵ན་བྱེ༵ད་ཕྲིན་ལས་རྣམ་བཞིའི་སྣང་བ་ཡིས། །དཔལ་ཡོན་མངོན་པར་རྫོགས་ལ་གསོལ་བ་འདེབས། །རྣམ་ཀུན་མཆོག་ཏུ་མི་འགྱུར་བདེ་བ་ཆེའི། །གོ་འཕང་དམ་པ་བདེ་བླག་ཐོབ་གྱུར་ཅིག །ཅེས་པ་སྐྱབས་ཆེ་བླ་གྲྭ་རྣམས་ཀྱི་ངོར་སི་ཏུས་སྤེལ་བ་སརྦ་མངྒ་ལཾ།། །།ན་མོ་མཉྫུ་ཤྲཱི་ཡེ་སྭཱ་ཧཱ། ན་མོ་སུ་ཤྲཱི་ཡེ་སྭཱ་ཧཱ། ན་མོ་ཨུཏྟ་མ་ཤྲཱི་ཡེ་སྭཱ་ཧཱ། དཀོན་མཆོག་གསུམ་གྱི་ངོ་བོ་ཉིད། །ཐུབ་པ་མཆོག་ལ་ཕྱག་འཚལ་ལོ། །རྩ་གསུམ་མ་ལུས་འདུས་པའི་སྐུ། །པདྨ་འབྱུང་ལ་ཕྱག་འཚལ་ལོ། །ཕྱོགས་བཅུར་བཞུགས་པའི་རྒྱལ་བ་དང་། །མཁའ་སྤྱོད་ས་སྤྱོད་སྐྱོང་བ་ཡི། །ཡི་དམ་དཔའ་བོ་མཁའ་འགྲོའི་ཚོགས། །ཆོས་སྐྱོང་རྣམས་ལ་ཕྱག་འཚལ་ལོ། །བདག་དང་ཕ་མ་སེམས་ཅན་རྣམས། །ཚེ་རབས་འཁོར་བ་ཐོག་མེད་ནས། །ད་ལྟའི་བར་གྱི་ཉོན་མོངས་པའི། །ཉེས་ལྟུང་ཅི་མཆིས་སྙིང་ནས་བཤགས། །ཆོས་

[Full Size]

བཞིན་བསམ་པ་ལྷུན་འགྲུབ་ནས། །མཐར་ཐུག་སངས་རྒྱས་སར་འགོད་ཤོག །ཅེས་དད་པའི་དཔལ་ལྡན་ཁྲ་འགུ་མའི་ངོར་སྤེལ།། །།དུས་གསུམ་གྱི་རྒྱལ་ཀུན་འདུས་པའི་སྐུ། །སྐྱབས་གཅིག་ཆོག་ཨོ་རྒྱན་རྡོ་རྗེ་འཆང་། །ཐུགས་ཡེ་ཤེས་རྡོ་རྗེའི་རྣམ་པར་རོལ། །དཔལ་ཌོམ་བྷི་ཧེ་རུ་ཀ་ལ་འདུད། །མཆོག་སྐྱེ་བའི་ཕྲེང་བ་རིམ་བྱོན་རྣམས། །ནམ་བཞག་གཏན་འདུན་གྱི་སྐྱབས་གནས་སུ། །དེང་བདེ་ཆེན་འཁོར་ལོ་བསྟེན་པའི་མཐུས། །བྱིན་རླབས་དབང་བཞི་ཡིས་རྒྱུད་སྨིན་ཤོག །སེམས་སྤྲོས་བྲལ་རིག་པའི་རང་རྩལ་འདི། །གཉུག་མ་ཆོས་སྐུ་ཡི་རོལ་པ་རུ། །ལྷན་སྐྱེས་ཀྱི་ཡེ་ཤེས་གཞི་ཐོག་ཏུ། །བདེ་བླག་ཉིད་ཐོབ་ཕྱིར་བྱིན་གྱིས་རློབས། །ཅེས་པའང་སི་ཏུ་པདྨའི་མིང་ཅན་གྱིས། ཟླ་རྒྱས་ཞེས་པའི་རྟོགས་ལྡན་ངོར་སྤེལ་བ་དགེ། །།ན་མཿགུ་ར་ཝེ། དཔལ་རིགས་ཀུན་ཁྱབ་བདག་འཁོར་ལོའི་མགོན། །ཧེ་རུ་ཀ་དགྱེས་མཛད་རྡོ་རྗེ་འཆང་། །སྐྱེས་རབས་ཀྱི་ཕྲེང་བ་ཚར་དངར་ལ། །བདག་མོས་གུས་གསོལ་བ་ཡང་ཡང་འདེབས། །སེམས་གཞི་མེད་རྩ་བྲལ་ཕྱག་རྒྱ་ཆེ། །དོན་རྣམ་ཀུན་མཆོག་ལྡན་ངེས་པའི་ལམ། །ཟུང་འཇུག་གི་སྐུ་བཞིའི་གོ་འཕང་མཆོག །དེང་བདག་རྒྱུད་སྨིན་ཅིང་གྲོལ་བ་ཡིས། །གཞན་ཕན་ཀྱི་ཕྲིན་ལས་སྟོན་ནུས་པའི། །རྗེ་རྒྱལ་བ་རྣམས་དང་མཉམ་པ་ཡི། །སྐུ་ཞིང་ཁམས་བཀོད་པ་ཡོངས་རྫོགས་ནས། །འགྲོ་དྲུག་རྣམས་འདྲེན་པའི་དཔལ་དུ་ཤོག །ཅེས་པ་སི་ཏུ་པདྨའི་མིང་ཅན་གྱིས།

[Full Size]

སྣོད་ལྡན་སློབ་མ་གྲུབ་པའི་དབང་པོའི་ངོར་སྤེལ་བ་སརྦ་ཛ་ག་ཏཾ།། །།ན་མཿཤྲཱི་གུ་ར་ཝེ། སྐྱབས་ཀུན་འདུས་བདེ་ཆེན་འཁོར་ལོའི་མགོན། །དཔལ་དགྱེས་པ་རྡོ་རྗེ་བླ་མའི་སྐུར། །དངོས་སྣང་བ་མངའ་བདག་ཆེན་པོ་ཡི། །སྒྱུ་འཕྲུལ་གྱི་རྡོ་རྗེའི་གར་རོལ་བ། །གང་འདུལ་ངོར་སྤྲུལ་པའི་སྣང་བརྙན་གཟུགས། །ཆུ་ཟླ་བཞིན་འཆར་པའི་ཕྲིན་ལས་ཅན། །སྐྱེས་རབས་ཀྱི་ཕྲེང་བ་རིམ་བྱོན་ལ། །ཡིད་རྩེ་གཅིག་དད་པས་གསོལ་བ་འདེབས། །སྣང་གྲགས་རྟོག་གསུམ་གྱི་ངོ་བོ་ནི། །སྐྱེ་མེད་ཆོས་སྐུ་ཡི་རོལ་པ་རུ། །དོན་མངོན་སུམ་རྗེན་པར་འཆར་ནས་སུ། །དཔལ་རྡོར་འཆང་གི་གོ་འཕང་མྱུར་ཐོབ་ཤོག །ཅེས་སི་ཏུ་པདྨའི་མིང་ཅན་གྱིས། སྒྲུབ་པ་བླ་མ་ཚུལ་ཁྲིམས་བཞེད་ངོར་སྤེལ་བ་ཤུ་བྷཾ་ཛ་ཡནྟུ།། །།སྐྱེ་མེད་ཆོས་སྐུ་ཀུན་བཟང་སྣང་མཐའ་ཡས། །འགགས་མེད་ལོངས་སྤྱོད་ཡོངས་རྫོགས་སྤྱན་རས་གཟིགས། །སྤྲུལ་པའི་རོལ་གར་འཆི་མེད་པདྨ་འབྱུང་། །སྐུ་གསུམ་འདུས་པ་དཔལ་ལྡན་ཀརྨ་ཀ། རྒྱལ་དབང་འབྲུག་པ་རིག་འཛིན་ཆོས་རྗེ་གླིང་། །མི་འགྱུར་རྡོ་རྗེ་ཚེ་དབང་ནོར་བུ་དཔལ། །གཙུག་ལག་དགའ་བ་ཀརྨ་ཆགས་མེད་ཞབས། །ཏཱ་ཡི་སི་ཏུ་རྡོ་རྗེ་དྲག་པོ་རྩལ། །རྩ་བ་བརྒྱུད་པའི་བླ་མར་གསོལ་བ་འདེབས། །རང་རིག་ལྷན་སྐྱེས་ཡེ་ཤེས་བདེ་བ་ཆེ། །དོན་དམ་གནས་ལུགས་མངོན་གྱུར་ཚེ་རབས་ཀུན། །མ་ནོར་ལམ་སྟོན་བླ་

[Full Size]

མས་རྗེས་སུ་བཟུང་། །ངེས་དོན་སྙིང་པོའི་ཉམས་ལེན་མཐར་ཕྱིན་ནས། །ལོག་ཆོས་བཤེས་དང་ནམ་ཡང་མི་འཕྲད་ཤོག །གནས་སྐབས་རྐྱེན་ཞི་ཚེ་བསོད་དཔལ་འབྱོར་རྒྱས། །ཆོས་བཞིན་སྤྱོད་གྲོགས་མི་འབྲལ་རྟག་པ་རུ། །དཀར་པོ་དགེ་བཅུའི་ཆོས་ལ་ལོངས་སྤྱོད་ཅིང་། །བླ་མེད་སྐུ་བཞིའི་གོ་འཕང་མྱུར་ཐོབ་ཤོག །ཅེས་སི་ཏུ་པདྨའི་མིང་ཅན་གྱིས་དགེ་རྒྱལ་བེ་ཧུ་ཕུན་ཚོགས་རྣམ་རྒྱལ་བཞེད་ངོར་སྤེལ་བ་དགེ། །།བཅོམ་ལྡན་བདེ་བ་མཆོག་དངོས་ཏཻ་ལོ་པ། །ནཱ་རོ་མཻ་ཏྲི་མར་པ་མི་ལ་རྗེ། །འཛམ་གླིང་གྲགས་པ་དར་མ་དབང་ཕྱུག་སོགས། །བཀའ་བརྒྱུད་གྲུབ་བརྙེས་རྣམས་དང་ཡི་དམ་ལྷ། །རྡོ་རྗེ་ནག་པོ་ཆེན་པོ་ཕྱག་བཞི་པ། །རྩ་གསུམ་རྒྱ་མཚོའི་ཐུགས་རྗེའི་མཁའ་དབྱིངས་ལས། །བྱིན་རླབས་ཉིན་བྱེད་འོད་ཀྱི་ཕྲེང་སྤྲོ་བས། །བར་ཆད་བདུད་རིགས་འཚེ་བའི་མུན་བཅོམ་ནས། །བདེ་ལེགས་ཆོས་དང་མཐུན་པའི་འདོད་དོན་གྱི། །འདབ་བརྒྱ་ཡོངས་གྲོལ་སྡོམ་གསུམ་འབྲས་བཟང་སྨིན། །ཕྱོགས་དུས་ཀུན་ཏུ་བཀྲ་ཤིས་བདེ་ལེགས་འཕེལ། །སྒྲུབ་བརྒྱུད་བསྟན་པ་རྒྱས་པར་བྱིན་གྱིས་རློབས། །ཅེས་སྐྱོ་བྲག་ཆོས་གྲྭར་ཕྱི་ནང་གི་འཚུབ་ལྷོང་ཞི་བའི་གསོལ་འདེབས་སུ་གང་དེས་བསྐུལ་བཞིན་སྤེལ།། །།རྩ་གསུམ་ཀུན་འདུས་གུ་རུ་པདྨ་འབྱུང་། །དབྱེར་མེད་གྲུབ་ཆེན་ཀརྨ་པཀྴི་སོགས། །གང་གི་ཕྲིན་ལས་རང་གཟུགས་རྡོ་རྗེ་བེར། །

[Full Size]

བསླུ་མེད་སྐྱབས་གནས་རྣམས་ལ་གསོལ་བཏབ་མཐུས། །བྱད་ཕུར་རྦོད་གཏོང་འཇིགས་པ་བརྒྱད་ལ་སོགས། །བར་ཆད་བདུད་ཀྱི་གཡུལ་ངོ་བཟློག་ཏུ་གསོལ། །ཆོས་དང་མཐུན་པའི་བསམ་དོན་ཡོངས་འགྲུབ་ནས། །ཚེ་མཐར་ཕྱིན་ཅིང་དོན་གཉིས་འབྲས་སྨིན་ཤོག །དབོན་གྱི་ངོར་སྤེལ།། །།ཆོས་དབྱིངས་གདོད་མའི་མགོན་པོ་ཀུན་ཏུ་བཟང་། །ལོངས་སྤྱོད་ཡོངས་རྫོགས་རབ་འབྱམས་རྒྱལ་པའི་ཚོགས། །ཀུན་འདུས་རིགས་བརྒྱའི་ཁྱབ་བདག་རྡོ་རྗེ་འཆང་། །གསོལ་འདེབས་བྱིན་རླབས་དངོས་གྲུབ་བསྩལ་དུ་གསོལ།། ༈ །།བདེ་ཆེན་སྣང་བ་མཐའ་ཡས་ཀྱི། །བརྩེ་བའི་སྣང་ཆ་འཇིག་རྟེན་མགོན། །གང་དང་དབྱེར་མེད་སི་ཏུ་པར། །གསོལ་འདེབས་བྱིན་རླབས་མཆོག་དངོས་སྩོལ།། ༈ །།སྐུ་གསུམ་སྟོན་པ་མཚོ་སྐྱེས་པདྨ་འབྱུང་། །རྡོ་རྗེ་སློབ་དཔོན་ཚུལ་དུ་རྣམ་པར་འཕྲུལ། །པདྨ་དབང་ཆེན་རྒྱལ་པོར་གསོལ་བ་འདེབས། །རང་སེམས་ཆོས་སྐུ་རྟོགས་པར་བྱིན་གྱིས་རློབས།། ༈ །།སངས་རྒྱས་དྲུག་པ་སེང་གེའི་རྣམ་པར་འཕྲུལ། །རྗེ་བཙུན་བདུད་འདུལ་རྡོ་རྗེའི་གསང་བ་གསུམ། །ཡེ་ཤེས་རྡོ་རྗེས་བྱིན་བརླབས་རྒྱུད་སྨིན་པ། །ཀརྨ་ཨངྐ་ར་ལ་གསོལ་བ་འདེབས། །རང་བྱུང་གདོད་གནས་སེམས་ཉིད་ཆོས་སྐུ་ཡི། །ངོ་བོ་མཐོང་ཞིང་མཁའ་མཉམ་འགྲོ་བའི་དོན། །རླབས་ཆེན་བྱང་ཆུབ་

[Full Size]

སྤྱོད་པ་མཐར་ཕྱིན་ནས། །བླ་མེད་རྫོགས་སངས་གོ་འཕང་ཐོབ་གྱུར་ཅིག །ཅེས་དད་ལྡན་ངོར་སྤེལ་བ་དགེ། །།༈ འཕགས་པའི་སར་གནས་གྲུབ་པའི་དབང་ཕྱུག་མཆོག །ས་ར་ཧ་ཡི་བྱིན་རླབས་རྣམ་པར་འཕྲུལ། །བསྟན་འཛིན་མཚན་ཅན་རིམ་པར་བྱོན་རྣམས་དང་། །བདག་ངོར་མངོན་ཤར་མཆོག་ལ་གསོལ་བ་འདེབས། །བླ་མར་དད་དང་མོས་གུས་གཞི་བརྟན་ཅིང་། །མ་གྱུར་འགྲ་ོལ་བྱམས་དང་སྙིང་རྗེ་འབྱོངས། །སྒོམ་པ་ལ་གནས་ཕར་ཕྱིན་དྲུག་དང་ལྡན། །མཐར་ཐུག་བྱང་ཆུབ་ས་ལ་རབ་གནས་ཤོག །ཅེས་རྟོགས་ལྡན་ཀརྨའི་ངོར་སྤེལ་པ་དགེ། །།༈ དུས་གསུམ་རྒྱལ་ཀུན་ངོ་བོ། །འཕགས་མཆོག་ཐུགས་རྗེའི་གཏེར་ཆེན། །རྗེ་བཙུན་བདུད་འདུལ་རྡོ་རྗེ། །མཁྱེན་ནོ་ཐུགས་རྗེས་ཟུངས་ཤིག །གང་དེས་བྱིན་རླབས་རྒྱུད་སྨིན། །པདྨས་ལུང་ཟིན་པདྨ། །ཉིན་བྱེད་དབང་པོ་མཁྱེན་ནོ། །བདག་རྒྱུད་སྨིན་གྲོལ་བྱིན་རློབས། །བསམ་དོན་ཆོས་བཞིན་འགྲུབ་ནས། །བདེ་ཆེན་ཞིང་བགྲོད་གྱུར་ཅིག །དད་ལྡན་ཀརྨ་དབང་ལྡན་ངོར་སྤེལ། མངྒ་ལཾ། ཛ་ཡནྟུ།། ༈ །།མཚོ་སྐྱེས་པདྨ་འབྱུང་གནས་རྡོ་རྗེའི་བཀའ། །ལུང་ཟིན་པདྨ་ཉིན་བྱེད་དབང་པོ་ལ། །གསོལ་འདེབས་ཆོས་མཐུན་བསམ་པ་ལྷུན་གྲུབ་ཤོག །གདོད་ནས་ལྷན་ཅིག་སྐྱེས་པ་ཕྱག་རྒྱ་ཆེ། །མ་བཅོས་སྤྲོས་བྲལ་གཉུག་མའི་དོན་རྟོགས་ནས། །བླ་མེད་སྐུ་བཞིའི་གོ་འཕང་ཐོབ་བྱིན་རློབས། །ཨོ་རྒྱན་རིན་པོ་ཆེའི་དགོངས་འདུས་ལུང་བསྟན་ལས་གསལ་

[Full Size]

བཞིན། ཚབ་ཚ་མཆོག་སྤྲུལ་བཞེད་ངོར་སྤེལ།། ༈ །།གངས་ཅན་མགོན་པོ་ཕྱག་ན་པད་དཀར་ཅན། །དབྱེར་མེད་རྗེ་བཙུན་བདུད་འདུལ་རྡོ་རྗེ་འཆང་། །མཆོག་གི་དོན་བརྒྱུད་སྙིང་པོའི་བསྟན་པའི་བདག །པདྨ་ཉིན་བྱེད་དབང་ལ་གསོལ་བ་འདེབས། །གང་དེས་རྗེས་བཟུང་དོན་དམ་ཡེ་ཤེས་ཀྱི། །བྱིན་རླབས་སྟོབས་འཆང་བཀའ་གཏེར་བསྟན་སྲོལ་འཛིན། །རྣལ་འབྱོར་པུཎྜ་རི་ཀའི་ནིརྨ་ཀཱར། །གསོལ་འདེབས་ཐུགས་རྗེས་བདག་རྒྱུད་གྲོལ་བྱིན་རློབས། །རང་བྱུང་ལྷན་སྐྱེས་གནས་ལུགས་མངོན་གྱུར་ནས། །གཞན་དོན་ཕྱོགས་མེད་ལྷུན་གྱིས་འགྲུབ་པར་ཤོག །གཏེར་སྤྲུལ་མཆོག་གི་བཞེད་ངོར་བཀོད་པ་དགེའོ། །མངྒ་ལཾ།། ༈ །།ཨོ་ཌི་ཡ་ནའི་མ་ཧཱ་ཨཱ་ཙཪྱ། །མཆོག་གི་ལུང་ཟིན་དྷརྨཱ་ཀཱ་ར་ཡི། །སྒྱུ་འཕྲུལ་རོལ་པ་པདྨ་དེ་ཝེནྡྲ། །གསོལ་འདེབས་བྱིན་རླབས་གྲུབ་གཉིས་དངོས་གྲུབ་སྩོལ། །གང་དེའི་ཐུགས་རྗེའི་རྣམ་པར་རོལ་པ་ཡི། །བསླབ་གསུམ་རྣམ་དག་ངུར་སྨྲིག་རྒྱལ་མཚན་འཛིན། །ཐུབ་དབང་ཨོ་རྒྱན་དགོངས་བཅུད་མདོ་སྔགས་བསྟན། །སྤེལ་བའི་ཕྲིན་ལས་སུ་ཙནྡྲ་ལ་འདུད། །སྐལ་ལྡན་མོས་ངོར་ཆོས་སྒོ་ཇི་སྙེད་ཀྱི། །ལམ་ཟབ་སྟོན་ཕྱིར་རྟག་བརྟན་འཚོ་གཞེས་གསོལ། །རྒྱལ་རོང་སྒྲུབ་ཀརྨ་ཕྲིན་ལས་ངོར་སྤེལ་བ་དགེ། །།༈ སྐུ་གསུམ་ཡེ་ཤེས་ལྔ་ཡི་བདག་ཉིད་ཅན། །ཚེ་དང་ཡེ་ཤེས་འོད་སྣང་མཐའ་ཡས་པ། །བདེ་ཆེན་ཞིང་གི་སྟོན་མཆོག་གཙོ་འཁོར་ལ། །གསོལ་

[Full Size]

འདེབས་རྒྱུད་སྨིན་ཐུགས་རྗེས་སྐྱོང་གྱུར་ཅིག །བདག་དང་བདག་ལ་འབྲེལ་ཐོགས་སེམས་ཅན་རྣམས། །རྩེ་གཅིག་མོས་བློས་དད་པས་མཚམས་སྦྱར་མཐུས། །འདི་ནས་སྐྱེ་གཞན་བར་མ་ཆད་པ་རུ། །རྣམ་དག་བདེ་ཆེན་ཞིང་དེར་སྐྱེ་བར་ཤོག །སངས་རྒྱས་ཞལ་མཐོང་བླ་མེད་ལུང་བསྟན་ཐོབ། །བྱང་ཆུབ་གོ་འཕང་མཆོག་ལ་འགོད་གྱུར་ཅིག །མགོན་པོ་སྤྲུལ་སྐུའི་བཞེད་ངོར་སྤེལ་བ་དགེ། །།༈ ཀུན་བཟང་པད་འབྱུང་ཐུགས་རྗེའི་རོལ་པ་ལས། །ཡོངས་ཤར་པདྨ་ཉིན་མོར་བྱེད་པ་ལ། །གསོལ་འདེབས་གནས་སྐབས་ཚེ་རིང་ཆོས་ལྡན་ཅིང་། །བདེ་ཆེན་ཞིང་དུ་སྐྱེ་བར་བྱིན་གྱིས་རློབས། །ཀརྨ་བསོད་ནམས་ངོར་སྤེལ།། ༈ །།ཕྱོགས་བཅུ་དུས་གསུམ་རྒྱལ་བ་རབ་འབྱམས་ཀྱི། །ཐུགས་རྗེ་གཅིག་བསྡུས་མཚོ་སྐྱེས་རྡོ་རྗེ་འཆང་། །སྐུ་ལྔ་མཚན་བརྒྱད་རྗེ་འབངས་ཉེར་ལྔ་ལ། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །ལྔ་བརྒྱ་ཐ་མའི་བདག་སོགས་སེམས་ཅན་རྣམས། །ལས་དང་ཉོན་མོངས་དབང་གིས་མི་དགེའི་རིགས། །མི་མཐུན་འཇིགས་པ་བརྒྱད་ལས་སྐྱོབ་པ་དང་། །ཚེ་ནོར་ཆོས་འཕེལ་བདེ་སྐྱིད་ཕུན་སུམ་ཚོགས། །རྟག་པར་རང་བྱུང་ལྷན་སྐྱེས་སྙིང་པོའི་དོན། །མཐར་ཕྱིན་རྫོགས་སངས་གོ་འཕང་འགོད་གྱུར་ཅིག །ཅེས་འགྲོ་བ་ཡོངས་ལ་སྨན་པའི་ཆེད་ཀརྨ་བསོད་ནམས་གྱི་ངོར་སྤེལ་བ་དགེ། །།༈ རྒྱལ་ཀུན་ངོ་བོ་གངས་ཅན་ལྷ་གཅིག་པུ། །ཁམས་གསུམ་འགྲོ་བའི་འདྲེན་པ་འཇིག་

[Full Size]

རྟེན་དབང་། །ནོར་བུ་པདྨ་ཅན་གྱི་རྣམ་པར་འཕྲུལ། །ཐེག་མཆོག་རྡོ་རྗེའི་ཞབས་ལ་གསོལ་བ་འདེབས། །ཚད་མེད་ཐུགས་རྗེ་ཆེན་པོའི་མཁའ་དབྱིངས་ལས། །གཞན་ཕན་སྣང་བའི་ཉིན་བྱེད་འོད་ཟེར་གྱིས། །མོས་ལྡན་པདྨའི་དགའ་ཚལ་ཐར་པའི་ལམ། །རབ་གསལ་ཞིང་ཁམས་མཆོག་ལ་དབང་བསྐུར་ཤོག །སྔགས་འཆང་ཨོ་རྒྱན་ཚེ་རིང་ངོར་སྤེལ་བ་མངྒ་ལཾ།། ༈ །།རྒྱལ་ཚབ་ཏུ་དབང་བསྐུར་བྱེད་པོ་སྟེ་རིགས་བདག་སྤྲུལ་གཞིའི་མཚན། པདྨ་ཀཱ་རས་རྒྱལ་ཚབ་དབང་བསྐུར་ནས། །སྔོན་གྱི་བྱ་བ་ནི་དགེ་བའི་སྨོན་ལམ་རྣམ་པ་མང་པོའི་མཐུ་ུཡིས་དེ་ཡི་བྱེད་ལས་ནི་མ་ལུས་ཕན་བདེའི་འབྱུང་གནས་གཅིག་པུ་པ་སངས་རྒྱས་ཀྱི་བསྟན་པ་སྟེ། བསྟན་པ་དེ་རང་གི་སྲོག་ལྟར་འཛིན་པས་ན་བསྟན་སྲོག་འཛིན། །ངོ་བོ་ནི་ཚེ་རབས་རྟག་ཏུ་ཕྲིན་ལས་ཀྱི་ཤུགས་ལས་འགྲོ་འདུལ་གྱི་བྱ་བ་ལ་རབ་ཏུ་འབད་པ་སྟེ། རྣམ་གྲངས་ནི་སྐྱེ་བ་སྤྲུལ་སྐུའི་ནང་ཚན་སྤྲུལ་པའི། དེ་ཡང་སུ་ཞིག །རྡོ་རྗེ་འཆང་གི་ངོ་བོ་པདྨ་ཀཱ་རས། སུས། རང་ཉིད་ཀྱི་རྒྱལ་ཚབ་ཏུ། སུ་ལ། སྤྲང་བན་ཚེ་དབང་ནོར་བུ་ལ་དབང་བསྐུར། དགོས་པ་གང་། རང་གཞན་ཕན་བདེ་བླ་ན་མེད་པ་ཐོབ་ཕྱིར་རོ། །སྤྱོད་ལམ་ནི་སྔགས་ཀྱི་རིག་པ་འཛིན་པས་རིག་པ་འཛིན། །ཚེ་དབང་ནོར་བུ་དཔལ་ལ་གསོལ་བ་འདེབས། །མངྒ་ལཾ། འདིའི་རྩོམ་གཞི་པདྨ་བདེ་ཆེན་གླིང་པའི་གསུང་ཡིན་པས་བྱིན་རླབས་ཆེའོ། །ཨཱ་ཡུ་རཱིནྡྲ་མ་ཎི་ཤྲཱི། ཞེས་པ་བཀླག་ཐབས་སུ་བསྣན་པ་སྟེ། དགོས་པ་ནི་ཆེ་བ་ཞིག་གོ། །།

[Full Size]

༈ མཆོག་གསུམ་དཀྱིལ་འཁོར་རྒྱ་མཚོའི་སྤྱི་མེས་མཆོག །ཀོ་ཤའི་མཚོར་འཁྲུངས་པདྨ་ཀཱ་ར་ཡི། །བྱིན་རླབས་ཀློང་ནས་དེང་འདིར་ཉེར་དགོངས་ལ། །གསང་གསུམ་ཐུགས་རྗེའི་ཆུ་འཛིན་དྲྭ་བ་གཡོ། །མཆོག་དངོས་གྲུབ་པའི་ཆར་ཆེན་རྟག་འབེབས་ཤིང་། །ཟབ་དོན་ཆོས་ཀྱི་དབྱར་རྔའི་སྒྲ་དབྱངས་སྒྲོགས། །སྐལ་ལྡན་དད་པའི་བློ་ཡི་སྐྱེད་ཚལ་དུ། །རྨད་བྱུང་ཡང་དག་ལྟ་བའི་པདྨ་དཀར། །དོན་དམ་སེམས་ཀྱི་དེ་ཉིད་ལོ་འདབ་རྒྱས། །ཁམས་དབང་མོས་པའི་གདུལ་བྱའི་བུང་བ་འདུ། །ཀུན་ཀྱང་ཕན་བདེའི་བཅུད་ཀྱིས་འཚོ་གྱུར་ཞིང་། །བླ་མེད་བྱང་ཆུབ་འབྲས་བུ་མངོན་གྱུར་ཤོག །ཅེས་སྒྲུབ་པ་བསམ་ཕེལ་ངོར་སི་ཏུ་པདྨ་ཉིན་བྱེད་དབང་པོས་སྤེལ་བ་ཛ་ཡ།། ༈ །།གདོད་ནས་སྤྲོས་བྲལ་འགྱུར་མེད་ཆོས་ཀྱི་དབྱིངས། །འོད་གསལ་ལྷུན་རྫོགས་བདེ་བ་ཆེན་པོའི་ངང་། །སྒྱུ་འཕྲུལ་རྡོ་རྗེའི་གར་གྱི་རྣམ་པར་རོལ། །སྐུ་གསུམ་བདག་ཉིད་གང་དེར་གསོལ་བ་འདེབས། །ཐུགས་རྗེ་ཚད་མེད་འགྲོ་བའི་མགོན་གྱུར་པ། །བྱམས་པའི་རང་གཟུགས་འཕགས་པ་མཆོག་སྣང་བ། །སྲིད་པའི་གདུང་སེལ་ཕྱག་ན་པདྨ་འཆང་། །འཇིག་རྟེན་དབང་ཕྱུག་རྒྱལ་ལ་གསོལ་བ་འདེབས། །སངས་རྒྱས་ཀུན་ཀྱི་ཕྲིན་ལས་མངའ་བདག་ཉིད། །རྡོ་རྗེ་འཛིན་པ་དཀྱིལ་འཁོར་རྒྱ་མཚོའི་གཙོ། །རིགས་ཀུན་ཁྱབ་བདག་དཔལ་ལྡན་ཀརྨ་ཀ། བདུད་འདུལ་རྡོ་རྗེའི་ཞབས་ལ་གསོལ་བ་འདེབས། །རང་བྱུང་ཡེ་ཤེས་

[Full Size]

གཉུག་མའི་དེ་བཞིན་ཉིད། །གནས་ལུགས་ཇི་བཞིན་མངོན་དུ་གྱུར་ནས་ཀྱང་། །བྱང་ཆུབ་གོ་འཕང་དམ་པ་ཡོངས་ཐོབ་ནས། །འགྲོ་རྣམས་ཐར་པ་མཆོག་ལ་འགོད་གྱུར་ཅིག །ཅེས་པའང་བླ་མ་པདྨ་དབང་དྲག་གང་དེས་བཞེད་ལྟར་སི་ཏུས་སྤེལ།། ༈ །།དུས་གསུམ་གྱི་གནས་སྣང་ས་ལེར་མཁྱེན། །སྣང་སྲིད་ཀུན་ཟིལ་གནོན་རྫུ་འཕྲུལ་ཅན། །གདུལ་དཀའ་བ་འདུལ་མཛད་ཐུགས་རྗེའི་བདག །རྗེ་གྲུབ་ཆེན་པཀྴི་ལ་གསོལ་བ་འདེབས། །གཞི་གདོད་མའི་སེམས་ཉིད་གསལ་བ་ལ། །ལམ་ཕྱག་རྒྱ་ཆེན་པོའི་དོན་རྟོགས་ཤིང་། །འབྲས་རྒྱུད་ཀྱི་རྡོ་རྗེ་འཆང་ཐོབ་ནས། །སྐུ་ལྔ་ཡི་གོ་འཕང་མྱུར་ཐོབ་ཤོག། །།༈ དཔལ་མི་ཕམ་སངས་རྒྱས་འགྲོ་བའི་མགོན། །བསྐལ་བཟང་གི་རྣམ་པར་འདྲེན་པ་ལྔ། །མཆོག་གང་གི་རྣམ་འཕྲུལ་གར་རོལ་པ། །ཧེ་རུ་ཀ་ཌོམྦྷི་པ་ཞེས་དང་། །དགྱེས་མཛད་དངོས་སྣང་བའི་ལོ་ཙཱ་བ། །མ་འགྲོ་དྲུག་ལ་བྱམས་ཆེན་ཐུགས་རྗེ་ཡི། །འཇུག་པ་ཟབ་དོན་གྱི་ཕྲིན་ལས་བདག །སི་ཏུ་པ་སྐྱེས་རབས་ཕྲེང་བར་འདུད། །ཚེ་རབས་ཀུན་འབྲལ་མེད་རྒྱུད་བྱིན་རློབས། །ཡེ་ཤེས་ལྔས་བདག་རྒྱུད་སྨིན་གྲོལ་མཛོད།། ༈ །།བཅོམ་ལྡན་བདེར་གཤེགས་སྟོབས་བཅུ་མངའ་བའི་ལྷ། །མངོན་ཤེས་དྲུག་ལྡན་བཻ་ཌཱུར་འོད་ཀྱི་རྒྱལ། །གསོལ་བ་འདེབས་སོ་བདག་གཞན་འགྲོ་བ་རྣམས། །ནད་རིགས་བཞི་བརྒྱ་རྩ་བཞི་ཞི་བའི་ཕྱིར། །གསོ་རིག་རྒྱུད་གཞུང་མན་ངག་མཐར་

[Full Size]

ཕྱིན་ནས། །གཉེན་པོའི་སྨན་གྱིས་ནད་རིགས་མཐར་བྱེད་པའི། །དྲང་སྲོང་དམ་པར་དབྱེར་མེད་བྱང་ཆུབ་བར། །མི་འབྲལ་སྟོན་མཆོག་ཅི་འདྲར་བདག་གྱུར་ཅིག། །།༈ ཚེ་དང་ཡེ་ཤེས་སྣང་བ་ཡི། །དཔལ་སྟེར་དུས་གསུམ་རྒྱལ་རྣམས་ཀྱི། །སྐྱེད་པའི་ཡུམ་གྱུར་ཏཱ་རེ་མས། །རྗེས་བཟུང་རྟག་བདེའི་གོ་འཕང་ཤོག །རྒུད་མེད་ལང་ཚོ་ཡར་ཟླ་ལྟར། །འཆི་མེད་གཉུག་མ་མངོན་གྱུར་ཤོག། །།༈ གྲུབ་པའི་སྤྱི་དཔལ་བཅོམ་ལྡན་རྩ་ཤད་ཞབས། །རྗེས་བཟུང་མར་སྟོན་ཆོས་ཀྱི་བློ་གྲོས་ཞེས། །དགྱེས་མཛད་དངོས་སྣང་སྐྱེས་རབས་རིན་ཆེན་ཕྲེང་། །བརྒྱུད་པར་བཅས་ལ་གསོལ་བཏབ་དགེ་བའི་འབྲས། །དོན་གཉིས་མཐར་ཕྱིན་རང་སེམས་ཆོས་ཀྱི་སྐུ། །མངོན་གྱུར་སྲིད་མཚོ་ལས་བརྒལ་སངས་རྒྱས་ཤོག །སྒྲུབ་མཐར་ཕྱིན་ལའོ།། ༈ །།སྐུ་གསུམ་ཡེ་ཤེས་ལྔ་ཡི་བདག་ཉིད་ཅན། །ཡང་དག་རྫོགས་པའི་སངས་རྒྱས་ཤཱཀྱའི་རྒྱལ། །དབྱེར་མེད་རྒྱལ་དབང་པདྨ་སྐྱེས་གང་དེར། །གསོལ་བཏབ་དགེ་བས་རྣམ་པ་ཐམས་ཅད་དུ། །བསམ་དོན་ཆོས་བཞིན་ལྷུན་གྱིས་གྲུབ་པ་དང་། །རང་རིག་མ་བཅོས་བཟོ་མེད་སྣང་བ་འདི། །དགག་སྒྲུབ་སྤང་བླང་དང་བྲལ་གསལ་ལ་སྟོང་། །འཛིན་མེད་རང་ཤར་རང་གྲོལ་ངང་ཉིད་དུ། །ཀུན་བཟང་དགོངས་པ་མངོན་དུ་གྱུར་བར་ཤོག །ལྷ་བྲིས་དབང་རྒྱལ་ལ་སྤེལ།། ༈ །།མཆོག་རྒྱལ་ཀུན་འདུས་པའི་སྤྱི་གཟུགས་ཆེ། །སྐྱབས་པདྨཱ་ཀ་རར་གསོལ་བཏབ་

[Full Size]

མཐུས། །དུས་འདི་བཟུང་བླ་མེད་སྙིང་པོའི་བར། །མ་ནོར་གྱི་ལམ་སྟོན་བླ་མ་དང་། །ཆོས་མཐར་ཐུག་ཕྱག་རྫོགས་དབྱེར་མེད་ཀྱི། །དོན་འཁྲུལ་མེད་རྟོགས་པའི་གདེང་ཐོབ་ནས། །བསྐྱེད་རྫོགས་ལ་རང་བྱན་ཆུབ་པ་དང་། །རང་རིག་པའི་ཡེ་ཤེས་མངོན་གྱུར་ཤོག །སྒྲུབ་བཟོད་པ་ལ་དགེ། །།༈ སྐྱེ་མེད་མཐའ་བྲལ་ཆོས་དབྱིངས་ཀུན་བཟང་ཀློང་། །བདེ་ཆེན་ལོངས་སྤྱོད་ཡོངས་རྫོགས་ཐུགས་རྗེ་ཅན། །སྣ་ཚོགས་ཕྲིན་ལས་འགྲོ་འདུལ་པདྨ་འབྱུང་། །སྐུ་གསུམ་སྟོན་པ་མཆོག་ལ་གསོལ་བ་འདེབས། །གང་སྔོན་བསོད་ནམས་ཡེ་ཤེས་རྒྱ་མཚོ་ལས། །བསྐྱེད་པའི་ཞིང་ཁམས་འོད་ཟེར་མཐའ་ཡས་སུ། །གསེར་འཁོར་བསྒྱུར་བ་ལག་ན་བེ་ཅོན་གྲགས། །དགེ་སློང་ཙུནྡ་བྲམ་ཟེ་པཎྜི་ཏ། །ཐོ་རི་སྙན་ཤལ་སྲོང་བཙན་བློན་པོ་མགར། །སད་ན་ལེགས་པ་ཀླུ་ཡི་རྒྱལ་མཚན་དང་། །གཡུ་སྒྲ་སྙིང་པོ་རས་པ་ཞི་བ་འོད། །ཤོ་སྒོམ་རབ་དགའ་གཡུང་ཆུང་རྫོགས་ཆེན་པ། །བྲམ་ཟེ་བདུན་དང་ཟླ་གྲགས་སྤང་ནུ་བ། །མཚུར་འཇམ་དྷརྨ་དྷཱ་ཏུ་དབྱིངས་ཡེ་ཤེས། །ཐ་མི་དད་པ་ཀརྨ་ཆགས་མེད་ཞབས། །དབང་འབྱུང་ཕྲིན་ལས་བསྟན་འཛིན་གསོལ་བ་འདེབས། །དེང་འདིར་སྒྲུབ་རྒྱུད་བསྟན་འཛིན་རྣམ་རྒྱལ་སྡེ། །བསྐལ་པར་ཆོས་སྟོན་རྟག་བརྟན་བཞུགས་གསོལ་འདེབས། །གང་ཁྱོད་ཞིང་ཁམས་རབ་འབྱམས་མངའ་བའི་བདག །བདེ་བ་ཅན་དུ་པདྨ་ཆུ་སྐྱེས་དང་། །ལྟ་ན་སྡུག་པར་

[Full Size]

སངས་རྒྱས་འགྲོ་ལ་གཟིགས། །དཔལ་རིར་རྨ་བྱ་མགྲིན་པའི་རྒྱལ་མཚན་ཞེས། །དེ་ལྟར་སྐྱེས་རབས་བསམ་ཡས་བརྗོད་བྲལ་བར། །ཆ་ཤས་ཙམ་ཞིག་གསོལ་བཏབ་དགེ་བའི་འབྲས། །ཚེ་རབས་རྗེས་བཟུང་བླ་མེད་བྱང་ཆུབ་སྤྱོད། །མཐར་ཕྱིན་སྐུ་བཞིའི་གོ་འཕང་ཐོབ་གྱུར་ཅིག །ཅེས་པའང་དྲིན་ཆེན་ཀརྨ་ཆགས་མེད་ཀྱི་དངོས་སྤྲུལ་དམ་པ་གང་གི་ཞབས་འདེགས་པ་བླ་མཆན་ཀརྨ་ཨ་བྷྱ་ཞེས་པས་བསྐུལ་ངོར་སི་ཏུས་སྤེལ།། ༈ །།དུས་གསུམ་སངས་རྒྱས་འདུས་ཞལ་པདྨ་འབྱུང་། །གང་དེར་རྣམ་ཀུན་གསོལ་བ་བཏབ་པའི་མཐུས། །རང་བྱུང་ཡེ་ཤེས་དོན་དམ་གདོད་གནས་ཀྱི། །ཀ་དག་ཆོས་སྐུའི་རང་ཞལ་མངོན་མཐོང་ནས། །ཀུན་བཟང་དགོངས་པ་མཉམ་ཉིད་ཆེན་པོའི་ཀློང་། །དབྱེར་མེད་སངས་རྒྱས་གོ་འཕང་མཆོག་ཐོབ་ཤོག། །།༈ ༵སྐུ་ལྔའི་བདག་ཉིད་གུ་རུ་པདྨ་འབྱུང་། །དབྱེར་མེད་བཀའ་བརྒྱུད་བླ་མ་རིན་ཆེན་ཕྲེང་། །རིམ་པར་བྱོན་ལ་ཕྱག་འཚལ་གསོལ་བ་འདེབས། །སྐྱེ་དང་ཚེ་རབས་རྗེས་སུ་འཛིན་གྱུར་ཅིག །བློ་འདས་བརྗོད་བྲལ་གདོད་མའི་ཀུན་ཏུ་བཟང་། །འཁྲུལ་པའི་དྲི་མ་རྒྱང་བསྲིང་གཉིས་འཛིན་གྱི། །བག་ཆགས་ངང་བྲལ་རང་རིག་ཡེ་ཤེས་རྩལ། །མངོན་གྱུར་བླ་མེད་རྫོགས་སངས་རྒྱས་ཐོབ་ཤོག། །།༈ ཡོན་ཏན་རབ་རྫོགས་ཞིང་ཁམས་བདེ་བ་ཅན། །སྟོན་མཆོག་དམ་པ་འོད་མི་འགྱུར་བའི་སྐུ། །གང་འདིར་གསོལ་བཏབ་དག་པའི་ཞིང་མཆོག་དེར། །

[Full Size]

སྐྱེས་ནས་བྱང་ཆུབ་ཆེན་པོར་མངོན་གྱུར་ཤོག །བཀའ་བརྒྱུད་ཆོས་འཕེལ་ངོར་སྤེལ།། ༈ །།རྒྱལ་ཀུན་གསང་གསུམ་ཐུགས་རྗེའི་རྣམ་པར་རོལ། །གཅིག་བསྡུས་རྡོ་རྗེ་ཅན་ཞབས་སྐྱེས་རབས་ཕྲེང་། །གང་དེར་གསོལ་བཏབ་དེང་བཟུང་བླ་མེད་པར། །མི་འབྲལ་རྫོགས་སངས་གོ་འཕང་རེག་གྱུར་ཅིག །ཆོས་ཁྲིམས་བསྟན་འཛིན་ངོར་སྤེལ།། ༈ །།གསོལ་འདེབས་དངོས་གྲུབ་དགའ་ཚལ་བཞུགས་སོ། །ན་མཿཤྲཱི་གུ་ར་ཝེ། ཐུགས་རྗེ་ཆེན་པོས་འཁོར་བ་དོང་སྤྲུགས་ཀྱི། །ཕྲིན་ལས་འདོད་དགུར་བསྒྱུར་བའི་མངའ་དབང་ཕྱུག །གྲུ་འཛིན་རིར་བཞུགས་འཕགས་པ་སྤྱན་རས་གཟིགས། །དབྱེར་མེད་བདུད་འདུལ་རྡོ་རྗེར་གསོལ་བ་འདེབས། །བྱིན་གྱིས་རློབས་ཤིག་མཆོག་གི་དངོས་གྲུབ་སྩོལ། །ཡོན་ཏན་མཐའ་ཡས་བརྗོད་བྲལ་བཅོམ་ལྡན་འདས། །ཤེས་བྱ་ཀུན་མཁྱེན་གཟིགས་པའི་བདག་ཉིད་ཅན། །བདེ་ཆེན་ཞིང་བཞུགས་འོད་སྣང་དཔག་ཏུ་མེད། །དབྱེར་མེད་ཆོས་གྲུབ་རྒྱ་མཚོར་གསོལ་བ་འདེབས། །བྱིན་གྱིས་རློབས་ཤིག་མཆོག་གི་དངོས་གྲུབ་སྩོལ། །རྣམ་པར་དག་པའི་ཐུགས་སྐྱེད་ཟབ་མོའི་འཕྲུལ། །རླབས་ཆེན་འགྲོ་སྒྲོལ་མཁྱེན་པའི་ཉི་འོད་རྒྱས། །དགའ་ལྡན་གནས་ཀྱི་སྟོན་མཆོག་མ་ཕམ་མགོན། །དབྱེར་མེད་ཆོས་ཀྱི་འབྱུང་གནས་གསོལ་བ་འདེབས། །བྱིན་གྱིས་རློབས་ཤིག་མཆོག་གི་དངོས་གྲུབ་སྩོལ། །དེ་ལྟར་རྩེ་གཅིག་གསོལ་བ་བཏབ་བ་ཡི། །བསོད་ནམས་དགེ་

[Full Size]

བ་རྒྱ་ཆེན་བསགས་པའི་མཐུས། །སྒྲིབ་གཉིས་བྱང་ཞིང་མ་ནོར་ལམ་བཟང་པོར། །བདག་གཞན་ཕྱམ་གཅིག་སངས་རྒྱས་སར་འགོད་ཤོག །ཅེས་རྒྱལ་བ་ཡབ་སྲས་སྤྲུལ་གཞི་དང་བཅས་པའི་གསོལ་འདེབས་འདི་བཞིན་སྒྲུབ་ཆེན་པ་ཀརྨ་ངེས་ལེགས་དཔལ་བཟང་གིས་བསྐུལ་བའི་ངོར་སི་ཏུ་པདྨ་ཉིན་བྱེད་དབང་པོས་སྤེལ་བ་ཤུ་བྷཾ།། ༈ །།པདྨ་བཛྲ་གསོལ་འདེབས་སྐུ་བཞིའི་བྱིན་རླབས་སྤྲིན་ཕུང་བཞུགས། ཆོས་སྐུ་སྤྲོས་བྲལ་ཟག་མེད་མཁའ་ལྟར་ཁྱབ། །ལོངས་སྐུ་འགགས་མེད་བདེ་བ་ཆེན་པོ་དངོས། །སྤྲུལ་སྐུ་སྣ་ཚོགས་གར་གྱི་སྒྱུ་འཕྲུལ་ཅན། །སྐུ་གསུམ་ངོ་བོ་ཨོ་རྒྱན་རྗེ་ལ་འདུད། །ཁྱོད་ནི་དུས་གསུམ་རྒྱལ་བ་ཐམས་ཅད་ཀྱི། །སྤྱི་མེས་དམ་པ་གདོད་མའི་ཀུན་ཏུ་བཟང་། །དབྱིངས་རིག་ཡེ་ཤེས་ཕར་ཕྱིན་ལྷུན་གྱིས་གྲུབ། །རིགས་ཀུན་ཁྱབ་བདག་པདྨ་བཛྲ་རྩལ། །མཁའ་མདངས་ཨིནྡྲ་སྙིལ་དང་མཐོན་ཀ་མཆོག །བཻ་ཌཱུར་མཐིང་གའི་ཁ་དོག་འཆང་པའི་སྐུ། །ཞལ་གཅིག་ཕྱག་གཉིས་ཐབས་ཤེས་རྡོར་དྲིལ་འཛིན། །སྤྱན་གསུམ་དུས་གསུམ་ས་ལེར་འགྲོ་ལ་གཟིགས། །རིན་ཆེན་སྣ་ཚོགས་དུ་མའི་དབུ་རྒྱན་དང་། །སྙན་ཆ་མགུལ་རྒྱན་ཕྱག་ཞབས་གདུ་བུ་དང་། །ཕྲེང་བ་དོ་ཤལ་དྲིལ་གཡེར་མཛེས་པར་བརྒྱན། །ལྷ་རྫས་སྣ་ཚོགས་དར་གྱི་སྟོད་གཡོགས་དང་། །སྨད་གཡོགས་རུས་རྒྱན་ཕྱག་རྒྱ་དྲུག་གིས་སྤྲས། །ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས། །པང་དུ་རྡོ་རྗེ་སྙེམས་མ་ལྷ་ཡི་ལྕམ། །མནྡ་ར་བ་དབང་སྔོན་མདོག་

[Full Size]

ལྟར་དྭངས། །ཕྱག་གཉིས་གྲི་ཐོད་འཛིན་ཅིང་ལང་ཚོ་རྒྱས། །མྱོས་བུམ་རབ་མཐོ་བདེ་བའི་ཆ་གང་ཞིང་། །ཐབས་ཀྱི་སྐུ་ལ་གཉིས་མེད་དགྱེས་པར་འཁྲིལ། །ཟུང་འཇུག་བདེ་སྟོང་མཉམ་ཉིད་ཆེན་པོར་རོལ། །གཡས་སུ་ཡེ་ཤེས་མཚོ་རྒྱལ་གཡོན་དུ་ནི། །བདེ་ཆེན་དབང་གི་རྒྱལ་མོ་ཌཱ་ཀི་མ། །བཞིན་མཛེས་བརྒྱད་གཉིས་ལང་ཚོའི་དཔལ་གྱིས་དྲེགས། །ལྟ་བས་མི་ངོམས་རིན་ཐང་བྲལ་བ་ཡི། །སྣ་ཚོགས་རཏྣ་ཟ་འོག་དུ་མ་ཡི། །རྒྱན་རྣམས་ཀུན་གྱིས་བཀླུབས་ཅིང་སྐུ་ཡི་མདོག །པྲི་ཡང་ཀུ་ལྟར་སྔོ་ཞིང་གསལ་ལ་འཚེར། །ཕྱག་གཉིས་ཐོད་ཆང་མཐེབ་སྲིན་བསྒྲེང་བཞིན་དུ། །ཟག་མེད་བཅུད་ཀྱི་བདུད་རྩིའི་ཟེགས་མ་ནི། །ཐབས་ཀྱི་སྐུ་ཡི་ཞལ་ལ་དགྱེས་པར་སྟོབ། །གཞན་ཡང་ཐོད་ཕྲེང་རྩལ་ལྔ་གྲུབ་ཆེན་བརྒྱད། །གུ་རུ་སྤྲུལ་པའི་མཚན་བརྒྱད་ཞི་རྒྱས་དང་། །དབང་དང་མངོན་སྤྱོད་ལས་གྲུབ་རིག་པ་འཛིན། །རྣལ་འབྱོར་དབང་ཕྱུག་བརྒྱད་ཅུ་སྒོ་སྲུང་བ། མཁའ་འགྲོ་སྡེ་བཞི་ཁྲོ་བོ་ཡབ་ཡུམ་སོགས། །སྣང་སྲིད་འཁོར་འདས་སྟོང་ཆེན་གདོད་མའི་ཀློང་། །རིག་རྩལ་སྒྱུ་འཕྲུལ་འཆར་སྒོའི་སྣང་ཆ་ལས། །ཞི་དང་ཁྲོ་ཚོགས་དཀྱིལ་འཁོར་མངོན་སུམ་ཤར། །རང་ཤར་རང་བྱུང་ལྷན་སྐྱེས་ཡེ་ཤེས་ཀྱི། །སེམས་ཀྱི་རྡོ་རྗེ་ཀུན་བྱེད་རྒྱལ་པོ་མཆོག །འཁྲུལ་དྲིས་མ་བསླད་རང་གསལ་རྗེན་པ་དངོས། །རིག་པའི་ཡེ་ཤེས་རང་ཆས་ལྷུན་རྫོགས་པ། །མཐའ་

[Full Size]

བྲལ་བརྗོད་མེད་སྣང་སྟོང་ལྷ་ཚོགས་ལ། །རང་གསལ་རང་གྲོལ་ངང་དུ་མཆོད་པ་འབུལ། །རྣམ་རྟོག་མཚན་མའི་རྦ་རླབས་འཁྲུགས་པ་ཡི། །ཉོན་མོངས་གཉིས་སྣང་བདུད་བཞིའི་གཡུལ་ངོ་བཟློག །ཀ་ནས་དག་པའི་དབྱིངས་སུ་སྒྲོལ་བར་མཛོད། །དུག་གསུམ་འཁོར་བ་འདུ་འཛིའི་གཡང་ས་ལས། །བླ་མེད་མཆོག་གི་འོད་ལམ་དྲང་དུ་གསོལ། །རང་རིག་ཆོས་དབྱིངས་ཡེ་ཤེས་མངོན་གྱུར་ཤོག །ཀྱེ་མ། བདག་སོགས་ཐོག་མེད་མ་རིག་བག་ཆགས་ཀྱི། །མུན་པའི་དྲྭ་བར་བྱིངས་ནས་ཡང་སྲིད་ཀྱི། །གནས་ལ་ཁོར་ཡུག་ལས་ཀྱི་རླུང་དྲག་པོས། །བསྐྱོད་ནས་རང་ངོ་མ་ཤེས་འཕྱང་མོ་ཉུག །གྲངས་མེད་སྐྱེ་རྒ་ན་འཆིའི་འདམ་རྫབ་ལས། །སྔོན་འབྲེལ་སྨོན་ལམ་དལ་འབྱོར་ལུས་རྟེན་ཐོབ། །བསྟན་པའི་སྒོར་ཞུགས་ལྷག་བསམ་སྣོད་ལྡན་ཞིང་། །དམ་པའི་ཆོས་ཀྱི་བདུད་རྩིས་རང་རྒྱུད་བརླན། །མོས་གུས་དད་དང་དག་སྣང་དམ་ཚིག་དང་། །ཉམས་ལེན་སྟོང་ཉིད་སྙིང་རྗེའི་བྱང་སེམས་ཀྱི། །རྩ་བ་བརྟན་ཅིང་བརྗོད་བྲལ་གནས་ལུགས་མཆོག །རྟོགས་པའི་རྩལ་རྫོགས་ས་ལམ་གཅིག་ཆར་དུ། །བགྲོད་ནས་བླ་མེད་སྐུ་བཞིའི་གོ་འཕང་མཆོག །རིང་མིན་ཉིད་དུ་ངེས་པར་ཐོབ་གྱུར་ཅིག །སེམས་ཀྱི་དངོས་པོ་མེད་ལ་ངོ་བོ་སྟོང་། །གསལ་ཞིང་སྣང་བ་འདས་དང་མ་འོངས་ཀྱི། །རྟོག་པ་རྒྱུན་བཅད་ཐ་མལ་ཤེས་པ་ནི། །སོ་མའི་ངང་དུ་བཅས་བཅོས་

[Full Size]

མེད་པར་བཞག །དགག་སྒྲུབ་སྤང་བླང་རེ་དོགས་མི་བྱ་བར། །གཉུག་མ་གང་ཤར་དེ་ཡི་ངོ་བོ་སྐྱོང་། །དེ་སྐད་དུས་གསུམ་རྒྱལ་བའི་གདམས་པའི་བཅུད། །ཡང་སྙིང་གཅིག་དྲིལ་བཀོད་པ་འདི་ཉིད་ཀྱང་། །ཐར་པའི་ལམ་གྱི་སྟེགས་སུ་འོས་པའི་ཕྱིར། སྒྲུབ་ཆེན་ཚེ་དབང་མགོན་པོས་བསྐུལ་བའི་ངོར། །ཨོ་རྒྱན་པདྨ་བཛྲ་གསོལ་འདེབས་དང་། །སེམས་ཀྱི་བཞག་ཐབས་མདོ་ཙམ་བསྡུས་པ་འདི། །རྒྱལ་དབང་པདྨས་བྱིན་རླབས་ཆ་ཤས་ཀྱི། །སྐལ་བཟང་ཐོབ་པ་པདྨ་ཉིན་བྱེད་ཀྱིས། །བཀོད་པའི་དགེ་བས་རིགས་དྲུག་སངས་རྒྱས་ཤོག །སརྦ་མངྒ་ལཾ།། ༈ །།མཁའ་ཁྱབ་ཡེ་ཤེས་ཆེན་པོའི་རང་གདངས་ལས། །སྒྱུ་འཕྲུལ་ལོངས་སྤྱོད་ཡོངས་སུ་རྫོགས་པ་ཅན། །གང་འདུལ་རྣམ་རོལ་བཀོད་པ་ཅིར་ཡང་བསྒྱུར། །སྐུ་གསུམ་བདག་ཉིད་རྗེ་བཙུན་མཆོག་དེར་འདུད། །གདུལ་བྱའི་མོས་ངོར་ཆུ་རྫིང་མཐའ་ཡས་པར། །དེ་སྙེད་ཟླ་གཟུགས་སྟོན་པའི་ཕྲིན་ལས་ཀྱིས། །ཐར་པའི་ལམ་བཟང་གསལ་བྱེད་འབའ་རམ་པ། །དར་མ་དབང་ཕྱུག་གང་དེར་གསོལ་བ་འདེབས། །དེ་ལྟར་གསོལ་བཏབ་བདེན་པའི་བྱིན་རླབས་ཀྱིས། །སྒྲུབ་བརྒྱུད་བསྟན་དང་བསྟན་འཛིན་དར་ཞིང་རྒྱས། །གཉུག་མ་ཆོས་སྐུའི་གནས་ལུགས་དེ་བཞིན་ཉིད། །མངོན་གྱུར་སྐུ་བཞིའི་གོ་འཕང་ཡོངས་ཐོབ་ཤོག །ཅེས་པའང་གར་དབང་མཆོག་གི་བཞེད་ལྟར་སི་ཏུ་པས་སྤེལ་བ་དགེ། །།

[Full Size]

༈ དཔལ་རྡོ་རྗེ་འཆང་དབང་ཡོངས་ཤར་བ། །ཤྲཱི་ཛྙཱ་ན་སིདྡྷིའི་རྣམ་པར་འཕྲུལ། །མགོན་རིགས་ཀྱི་བདག་པོ་ཐམས་ཅད་མཁྱེན། །མགོན་མེད་ཀྱི་བདག་སོགས་འགྲོ་རྣམས་ལ། །སྐྱབས་བསླུ་མེད་ཐུགས་རྗེས་བསྐྱང་དུ་གསོལ། །སྐྱབས་དཔུང་གཉེན་ཁྱེད་ཤེས་གསོལ་བ་འདེབས། །བདག་འཁོར་བའི་མཚོ་ཆེན་ལས་སྒྲོལ་ཏེ། །གནས་བྱང་ཆུབ་ཐར་ལམ་བཀོད་གྱུར་ཅིག །གཞི་གདོད་མའི་སེམས་ཉིད་རང་བྱུང་གཤིས། །གཞི་རྩ་བྲལ་མ་བཅོས་སོ་མའི་ངང་། །འགྱུར་མེད་ཀྱི་དབྱིངས་དང་ཡེ་ཤེས་གཉིས། །འགྱུར་མེད་དུ་རང་གྲོལ་བྱིན་གྱིས་རློབས། །ཞེས་པའང་འབྲུག་ལྡེ་འཆང་བའི་ངོར་སྤེལ་བ་དགེ། །།༈ གསོལ་འདེབས་ཀྱི་རིམ་པ་ཐར་པའི་ལམ་མཆོག་ཅེས་པ་བཞུགས། ན་མོ་གུ་རུ་པདྨ་བཛྲ་ཡེ། མཁའ་ཁྱབ་དབྱིངས་ཀྱི་ཡེ་ཤེས་རོལ་པ་ལས། །གདོད་མའི་སངས་རྒྱས་རྡོ་རྗེ་འཆང་ཆེན་པོ། །རིགས་དྲུག་འཁོར་བ་དོང་སྤྲུགས་ཕྲིན་ལས་ཀྱིས། །ཚད་མེད་འགྲོ་དོན་མཐར་ཕྱིན་བྱིན་གྱིས་རློབས། །བདེ་སྟོང་དབྱེར་མེད་ལྷ་ལྕམ་མནྡཱ་ར། །ཡེ་ཤེས་མཚོ་རྒྱལ་བདེ་ཆེན་དབང་རྒྱལ་མོ། །རིགས་དྲུག་འཁོར་བ་དོང་སྤྲུགས་ཕྲིན་ལས་ཀྱིས། །ཚད་མེད་འགྲོ་དོན་མཐར་ཕྱིན་བྱིན་གྱིས་རློབས། །སྤྲུལ་པའི་གར་བསྒྱུར་ཐོད་ཕྲེང་རྩལ་ལྔ་དང་། །མཆོག་བརྙེས་རྣལ་འབྱོར་གྲུབ་པ་ཆེན་པོ་བརྒྱད། །རིགས་དྲུག་འཁོར་བ་དོང་སྤྲུགས་ཕྲིན་ལས་ཀྱིས། །ཚད་མེད་འགྲོ་དོན་མཐར་ཕྱིན་བྱིན་གྱིས་རློབས། །གུ་རུ་མཚན་

[Full Size]

བརྒྱད་རིག་འཛིན་བརྒྱད་ཅུ་དང་། །སྒོ་བ་སྡེ་བཞི་མཁའ་འགྲོ་སྡེ་བཞི་པོ། །རིགས་དྲུག་འཁོར་བ་དོང་སྤྲུགས་ཕྲིན་ལས་ཀྱིས། །ཚད་མེད་འགྲོ་དོན་མཐར་ཕྱིན་བྱིན་གྱིས་རློབས། །རབ་འབྱམས་རྒྱལ་བའི་ལྷ་ཚོགས་ཐུགས་རྗེ་ཅན། །གང་ལ་གང་འདུལ་དེར་སྣང་སྐུར་སྟོན་པའི། །ཆུ་ཟླའི་རོལ་རྩེད་སྣ་ཚོགས་ཅིར་ཡང་བསྒྱུར། །མི་འགྱུར་རྡོ་རྗེ་གདེངས་པའི་མཐུ་སྟོབས་འཆང་། །ཧེ་རུ་ཀ་དཔལ་དྲག་པོ་ནུས་ལྡན་རྩལ། །བཀའ་བབས་ཆོས་བདག་བརྒྱུད་པའི་བླ་མའི་ཚོགས། །རིགས་དྲུག་འཁོར་བ་དོང་སྤྲུགས་ཕྲིན་ལས་ཀྱིས། །ཚད་མེད་འགྲོ་དོན་མཐར་ཕྱིན་བྱིན་གྱིས་རློབས། །ཨོ་རྒྱན་མཁའ་སྤྱོད་ཌཱ་ཀིའི་གཙོ་མཆོག་མ། །རྡོ་རྗེ་སེང་གདོང་རིགས་ལྔ་མཁའ་འགྲོའི་ཚོགས། །ཡེ་ཤེས་ལས་དང་འཇིག་རྟེན་དྲེགས་པ་ཅན། །ཆོས་སྐྱོང་རྒྱ་མཚོ་བཀའ་སྲུང་དམ་ཚིག་གཉེན། །སྲིད་པ་མོ་རྒྱུད་ཀུན་འདུས་བསྟན་སྲུང་དང་། །གནས་དང་གཏེར་བདག་དགེ་བསྙེན་འཁོར་ཚོགས་བཅས། །རིགས་དྲུག་འཁོར་བ་དོང་སྤྲུགས་ཕྲིན་ལས་ཀྱིས། །ཚད་མེད་འགྲོ་དོན་མཐར་ཕྱིན་བར་ཆད་སོལ། །དེ་ལྟར་རྣམ་དག་མོས་བློའི་ལྷག་བསམ་གྱིས། །སྐྱབས་གསུམ་ཐུགས་རྗེ་དབྱིངས་ནས་བསྐུལ་བའི་མཐུས། །བདག་སོགས་དུས་གསུམ་སེམས་ཅན་ཇི་སྙེད་པ། །དེ་སྙེད་བླ་མེད་གསང་བ་མཆོག་གི་ལམ། །ངེས་པར་འཇུག་པའི་ཐེག་ཆེན་བྱང་སེམས་ཀྱི། །སྨོན་ལམ་ཇི་ལྟར་དེང་འདིར་ཡོངས་འགྲུབ་ནས། །འཁོར་བ་

[Full Size]

དོང་སྤྲུགས་འགྲོ་དོན་མཐའ་རུ་ཕྱིན། །པདྨ་བཛྲ་གོ་འཕང་ཐོབ་གྱུར་ཅིག །ཅེས་པའང་དེང་དུས་སྙིགས་ལྔའི་རང་མདངས་ཀྱི་བགོ་སྐལ་ལས་དངོས་སུ་བྱོན་པའི་བཤེས་གཉེན་ཕལ་ཆེར་ཆོས་བརྒྱད་ཟང་ཟིང་དོན་གཉེར་གྱི་བཞེད་པས་བསྟན་འགྲོ་བདེ་འབྱུང་གི་ཕྲིན་ལས་ཐབས་སྣ་ཚོགས་པའི་ཚུལ་འཆོས་དུ་མ་དང་། དམ་རྫས་ལ་སོགས་པས་ས་སྟེང་ཉི་ལྟར་ཁྱབ་པའི་དུས་སྐལ་བཟང་པོ་འདིར། མེ་ཁྱེར་ལྟ་བུའི་འགྲོ་དོན་ལ་རློམས་པའི་ཁོ་བོས་འདི་ལྟའི་ངལ་བ་སྒྲུབ་པ་ལྟར་སྣང་ཙམ་ལས་དོན་མེད་དུ་གོ་བ་གཞིར་བཅས་ཀྱང་། སེམས་བསྐྱེད་དག་པ་ཙམ་ཁོ་ནས་རྒྱན་དུ་བྱས་ཏེ་སྐྱེ་བདུན་མྱོང་གྲོལ་ཁུངས་བཙུན་སེལ་མེད་ཀྱི་བྱིན་རྟེན་འདུས་པའི་རིལ་བུ་པདྨ་བཛྲའི་སྒོ་ནས་བུམ་སྒྲུབ་འཛུགས་སྐབས། པདྨཱ་ཀ་རར་འདུན་པའི་བློ་ཅན་སི་ཏུ་པདྨ་ཉིན་བྱེད་དབང་པོས་ཤིང་གླང་དབོ་ཟླའི་ཆ་ཤས་གང་བའི་ཚེས་ལ་དཔལ་སྤུངས་ཆོས་གྲྭར་སྤེལ་བ་མངྒ་ལཾ།། ༈ །།ཆོས་དབྱིངས་རང་བྱུང་སྤྲོས་དང་བྲལ་བའི་དབྱིངས། །སངས་རྒྱས་ཆོས་ཀྱི་སྐུ་ལ་གསོལ་བ་འདེབས། །བདེ་ཆེན་འགྱུར་བ་མེད་པ་ལྷུན་གྱིས་གྲུབ། །སངས་རྒྱས་ལོངས་སྤྱོད་རྫོགས་སྐུར་གསོལ་བ་འདེབས། །སྒྱུ་འཕྲུལ་རྡོ་རྗེའི་རང་བཞིན་རྟག་འཆར་བ། །སངས་རྒྱས་སྤྲུལ་པའི་སྐུ་ལ་གསོལ་བ་འདེབས། །ཕྱོགས་བཅུ་དུས་གསུམ་རྒྱལ་བ་རབ་འབྱམས་ཀྱི། །སྐུ་དང་ཞིང་ཁམས་ཡོན་ཏན་ཡོངས་རྫོགས་པ། །སངས་རྒྱས་ཀུན་འདུས་རྒྱལ་བ་རྡོ་རྗེ་འཆང་། །རིག་འཛིན་ཆེན་པོ་པདྨ་བཛྲ་རྩལ། །གསང་བའི་ཡུམ་མཆོག་མཁའ་འགྲོ་མནྡ་ར། །ཡེ་ཤེས་མཚོ་རྒྱལ་བདེ་ཆེན་དབང་རྒྱལ་མོ། །ཐོད་ཕྲེང་རྩལ་ལྔ་

[Full Size]

གྲུབ་ཆེན་བརྒྱད་པོ་དང་། །གུ་རུ་མཚན་བརྒྱད་རྣལ་འབྱོར་བརྒྱད་བཅུ་དང་། །སྒོ་སྲུང་སྡེ་བཞི་ཡེ་ཤེས་ལས་འཇིག་རྟེན། །མཁའ་འགྲོ་ཆོས་སྐྱོང་ཡབ་ཡུམ་སྤྲུལ་འཁོར་སོགས། །དཀྱིལ་འཁོར་གཉེན་པོའི་ལྷ་ཚོགས་མ་ལུས་རྣམས། །མི་མངོན་དབྱིངས་ནས་དེང་འདིར་དགོངས་སུ་གསོལ། །རིགས་དྲུག་ལམ་རྒྱུད་ལྔ་དང་སྐྱེ་གནས་བཞིའི། །སེམས་ཅན་རྣམས་དང་ཁྱད་པར་དམིགས་ཡུལ་གྱི། །ལས་དང་ཉོན་མོངས་སྡིག་སྒྲིབ་སྦྱང་དུ་གསོལ། །བག་ཆགས་གློ་བུར་དྲི་མ་བསལ་དུ་གསོལ། །ངན་སོང་འཁོར་བའི་དུཿཁ་བསྒྲལ་དུ་གསོལ། །ཡང་དག་ཐར་པའི་ལམ་མཆོག་བསྟན་དུ་གསོལ། །བླ་མེད་གསང་སྔགས་དཀྱིལ་འཁོར་འཇུག་ཏུ་གསོལ། །རིག་འཛིན་རྒྱལ་བའི་སྲས་སུ་དབང་བསྐུར་གསོལ། །སྐུ་ལྔའི་བདག་ཉིད་སངས་རྒྱས་ཐོད་པ་རྩལ། །གྲུབ་ཐོབ་རྒྱ་མཚོའི་ལྷ་ཚོགས་ཐམས་ཅད་ལ། །སྐྱབས་གསོལ་ཐུགས་རྗེའི་ལྕགས་ཀྱུས་བཟུང་ནས་ཀྱང་། །དམིགས་ཡུལ་ས་ལམ་བར་ཆད་རང་སར་ཞི། །དག་པ་མཁའ་སྤྱོད་གནས་སུ་དྲོང་དུ་གསོལ། །ཡེ་ཤེས་ཀློང་ནས་མ་གཡེལ་རྒྱལ་བའི་ལྷ། །ཞེས་པདྨ་བཛྲ་གྲུབ་ཐོབ་རྒྱ་མཚོའི་སྒོ་ནས་གཤིན་པོ་རྗེས་འཛིན་གྱི་སྨོན་ལམ་འདོད་གསོལ་དུ། སི་ཏུ་པདྨ་ཉིན་བྱེད་དབང་པོས་མཛོད་ཕུན་ཚོགས་རབ་བརྟན་དགོན་པར་སྤེལ་བ་རིགས་དྲུག་འཁོར་བ་དོང་སྤྲུག་གི་གོ་འཕང་ཐོབ་པར་གྱུར་ཅིག། །།༈ དུས་གསུམ་རྒྱལ་བ་མ་ལུས་ཐམས་ཅད་ཀྱི། །གསང་གསུམ་འདུས་པའི་བདག་ཉིད་ཆེན་པོ་

[Full Size]

མཆོག །དྲི་མེད་ཀོ་ཤའི་མཚོར་འཁྲུངས་པདྨ་འབྱུང་། །དབྱེར་མེད་ཀརྨ་པ་ལ་གསོལ་བ་འདེབས། །དུས་གསུམ་མཉམ་ཉིད་སྤྲོས་བྲལ་ཆོས་ཀྱི་སྐུ། །རང་མདངས་འགག་མེད་བདེ་ཆེན་ལོངས་སྤྱོད་རྫོགས། །ཞིང་ཁམས་གང་ལ་དེར་སྣང་སྤྲུལ་པའི་སྐུ། །ཨོ་རྒྱན་ཀརྨ་པ་ལ་གསོལ་བ་འདེབས། །དུས་གསུམ་མཐའ་ཀླས་ཕྲིན་ལས་ཟབ་མོའི་མཐུས། །ནམ་ཞིག་སྒྱུ་ལུས་འཇིག་ལ་ཐུག་པའི་ཚེ། །ཡོན་ཏན་བརྗོད་བྲལ་པདྨ་འོད་ཞིང་དུ། །སྐྱེས་ཏེ་རྒྱལ་བའི་སྲས་སུ་དབང་བསྐུར་ཤོག །དུས་གསུམ་དུས་མེད་མཁའ་མཉམ་མ་རྒན་ཀུན། །བདག་གི་ལྷག་བསམ་གྲུ་རྫིངས་ལ་བརྟེན་ནས། །འཁོར་བ་སྡུག་བསྔལ་མཚོ་ལས་བསྒྲལ་ནས་སུ། །བྱང་ཆུབ་ཆེན་པོའི་གོ་འཕང་མངོན་གྱུར་ཤོག །ཅེས་པའང་སྔོན་བྱོན་བཀའ་བརྒྱུད་གོང་མའི་རྣམ་ཐར་རྗེས་སུ་སློབ་པའི་སྤོང་བ་པ་རས་སྤྲུལ་ཤེས་རབ་རྒྱ་མཚོས་བཞེད་ལྟར་སྤེལ།། ༈ །།རི་བོ་པོ་ཊར་འཕགས་མཆོག་འཇིག་རྟེན་མགོན། །པདྨ་འོད་ཀྱི་ཞིང་ཁམས་དམ་པ་རུ། །རྒྱལ་དབང་ཨོ་ཌི་ཡ་ནའི་སློབ་དཔོན་མཆོག །བསིལ་ལྗོངས་གངས་རིས་བསྐོར་བའི་ས་ཆེན་འདིར། །ཉི་ཟླ་ལྟར་གྲགས་དཔལ་ལྡན་ཀརྨ་པ། །རྗེ་བཙུན་བདུད་འདུལ་རྡོ་རྗེར་གསོལ་བ་འདེབས། །དད་མོས་གདུང་ཤུགས་བཅོས་མིན་དྲག་པོ་ཡིས། །ཁ་ཙམ་མ་ཡིན་སྙིང་ནས་གསོལ་བཏབ་མཐུས། །བཀའ་བརྒྱུད་རིན་ཆེན་བསྟན་པའི་ཞབས་ཏོག་དང་། །སྐྱེ་འགྲོའི་རྒུད་པའི་མཚན་མ་གཏན་ཞི་ཞིང་། །རྟག་པར་དཔལ་འབྱོར་གྲགས་སྙན་

[Full Size]

ཕྱོགས་མཐར་ཁྱབ། །འབྲེལ་ཐོགས་ཇི་སྙེད་བདེ་ཆེན་དག་ཞིང་དུ། །མྱུར་བ་ཉིད་དུ་བགྲོད་པའི་རྒྱུར་གྱུར་ཅིག །ཅེས་གསོལ་འདེབས་དང་། དཔལ་ལྡན་ཀཾ་ཚང་བསྟན་པའི་མངའ་བདག་ཆེ། །བཀའ་བརྒྱུད་གྲུབ་ཐོབ་རྒྱ་མཚོའི་བྱིན་རླབས་དང་། །མཆོག་གཉིས་དངོས་སྩོལ་ཡི་དམ་ལྷ་ཚོགས་དང་། །དམ་ཅན་ཡེ་ཤེས་ཆོས་ཀྱིས་སྲུང་མ་སོགས། །རྩ་གསུམ་རབ་འབྱམས་ཞིང་ཀུན་ཡོངས་གང་བའི། །འཆི་མེད་བདག་པོ་རྣམས་ཀྱི་དགེ་ལེགས་སྩོལ། །གང་ཞིག་སྒྲུབ་བརྒྱུད་རིང་ལུགས་ཤིང་རྟ་པ། །ཀརྨ་ཡེ་ཤེས་ཚེ་འཕེལ་ཞེས་བྱ་གང་། །སྐུ་འཚོ་རི་དབང་ལྷུན་པོ་བཞིན་དུ་བརྟན། །གསུང་གསང་ཆོས་ཀྱི་རྔ་ཆེན་ཆད་མེད་སྒྲོགས། །ཐུགས་ཉིད་ཏིང་འཛིན་ཟབ་མོའི་དོན་གནས་ཤིང་། །མཛད་ཕྲིན་དབྱར་གྱི་ཆུ་བོ་ལྟར་རྒྱས་ཤིང་། །བསྐལ་བརྒྱར་རྟག་བརྟན་ངོ་བོ་ཉིད་འགྲུབ་ཤོག །མཆོག་གསུམ་ལྷ་ཡི་བླ་མེད་བདེན་པ་དང་། །བདེན་པ་དམ་པས་དེང་འདིར་སྨོན་པའི་འབྲས། །ཇི་བཞིན་ཡོངས་སུ་སྨིན་པའི་དཔལ་གྱུར་ཅིག །ཅེས་གཅོད་ཡུལ་ཛྙཱ་ནའི་མཚན་ཅན་ནས་རྒྱལ་བའི་གསོལ་འདེབས་དགོས་གསུངས་ལྟར་གྱི་ཐུགས་བཞེད་དང་། ཁོང་པར་ཡང་སྨོན་ལམ་བདེན་ཚིག་འདི་བཞིན་སི་ཏུ་པདྨ་ཉིན་བྱེད་ཀྱིས་ཕུལ་བ་སྟེ་དེ་ལྟར་ལྷུན་གྲུབ་ཏུ་གྱུར་ཅིག། །།༈ རིགས་ཀུན་ཁྱབ་བདག་གདོད་མའི་མགོན་པོ་མཆོག །རྡོ་རྗེ་འཆང་དབང་རྣམ་རོལ་སྤྲུལ་པའི་སྐུ། །དབང་རྟགས་ཞྭ་དམར་ཅོད་པན་འཛིན་པའི་ཕྲེང་། །རིམ་པར་བྱོན་རྣམས་བྱང་ཆུབ་བར་

[Full Size]

དུ་མཆོད། །མཚན་ཙམ་ཐོས་པས་ངན་འགྲོའི་ལམ་ཁོག་ཅིང་། །བདེ་ཆེན་དག་པའི་ཞིང་དུ་སྐྱེལ་ནུས་པའི། །མཁའ་སྤྱོད་དབང་པོ་དྲི་མེད་དཔལ་ཡེ་ཤེས། །དེང་བཟུང་བྱང་ཆུབ་བར་དུ་སྤྱི་བོས་མཆོད། །མི་འབྲལ་སྙིང་གི་ཐིག་ལེའི་ཏི་ལ་ཀར། །རྟག་པར་བཞུགས་ཤིང་མཆོག་ཐུན་དངོས་གྲུབ་དང་། །ཕྱག་རྒྱ་ཆེན་པོའི་ཡེ་ཤེས་བདག་རྒྱུད་ལ། །མྱུར་དུ་སྨིན་པར་བྱིན་གྱིས་བརླབ་ཏུ་གསོལ། །ཅེས་གྲུབ་པའི་དབང་ཕྱུག་གར་དབང་ཆོས་སྐྱོང་འགྱུར་མེད་ཀྱིས་བཞེད་ལྟར་སི་ཏུས་གསོལ་བ་ཛ་ག་ཏཾ།། ༈ །།སྐུ་གསུམ་འདུས་པའི་བདག་ཉིད་པདྨ་འབྱུང་། །མཆོག་གི་ཡེ་ཤེས་སྣང་ཆ་ལས་འཆར་བའི། །ཞི་དང་ཁྲོ་བོའི་སྐུར་སྟོན་ལྷ་ཡི་ཚོགས། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །མཚོ་སྐྱེས་རྒྱལ་བའི་གདུང་འཚོབ་རིག་པ་འཛིན། །རྡོ་རྗེ་དྲག་པོ་ཕྲིན་ལས་འདུས་པ་རྩལ། །བཀའ་བབས་ལུང་ཟིན་ཆོས་བདག་བརྒྱུད་བར་བཅས། །གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ། །གསང་སྔགས་བསྟན་པ་སྐྱོང་བའི་མཐུ་རྩལ་ཅན། །མ་མགོན་ལྕམ་དྲལ་བཀའ་སྡོད་ཕོ་ཉའི་ཚོགས། །སྲུང་མ་དམ་ཅན་འཁོར་ཚོགས་ཐམས་ཅད་ལ། །གསོལ་བ་འདེབས་སོ་འགལ་རྐྱེན་བར་ཆད་སོལ། །དེ་ལྟར་རྩ་གསུམ་དཀྱིལ་འཁོར་ལྷ་ཚོགས་ལ། །དད་གསུམ་མོས་པས་གསོལ་བ་བཏབ་པའི་མཐུས། །དུག་གསུམ་ཉོན་མོངས་རང་སར་དག་གྱུར་ནས། །

[Full Size]

སྐུ་གསུམ་འབྲས་བུ་ཐོབ་པར་བྱིན་གྱིས་རློབས། །ཅེས་པའང་རོང་མོ་སྤྲུལ་སྐུའི་བཞེད་ལྟར་དགོངས་གཏེར་སྤྱི་ཡི་གསོལ་འདེབས་སུ་སི་ཏུས་སྤེལ།། ༈ །།དཔལ་ལྡན་རྒྱལ་དབང་གཉིས་པ་ཀརྨ་ཀའི། །ཕྲིན་ལས་དབང་སྒྱུར་ཏཱ་ཡི་སི་ཏུ་ཞེས། །རིམ་པར་བྱོན་པ་རྣམས་ལ་གསོལ་བ་འདེབས། །མི་ཕམ་མགོན་པོ་ཌོམྦྷི་འབངས་སྟོབས་ཆེན། །དཱ་རི་ཀ་པ་གྱིམ་ཤང་མར་པའི་ཞབས། །དབོན་སྒོམ་ཆེན་པོ་འགྲོ་མགོན་ཡེ་ཤེས་དབང་། །རི་མགོ་བ་དང་ཏཱ་ཞིང་ཆོས་ཀྱི་རྒྱལ། །བཀྲ་ཤིས་རྣམ་རྒྱལ་མངྒའི་མཚན་ཅན་དང་། །མི་འཁྲུགས་ཆོས་ཀྱི་གོ་ཆ་ཆོས་རྒྱལ་མཚན། །ཕྲིན་ལས་རབ་བརྟན་ལེགས་བཤད་སྨྲ་བའི་ཞབས། །ཆོས་ཀྱི་འབྱུང་གནས་པདྨ་ཉིན་བྱེད་དབང་། །སྤྲུལ་པའི་སྐུ་མཆོག་རྣམས་ལ་གསོལ་བཏབ་མཐུས། །བདག་སོགས་འགྲོ་རྣམས་ཐར་པའི་ལམ་མཆོག་གི། །གོ་འཕང་རིང་པོར་མི་ཐོགས་བགྲོད་གྱུར་ཏེ། །རྣམ་པར་འདྲེན་པའི་མཐུ་དབང་ཐོབ་ནས་སུ། །རབ་འབྱམས་ཞིང་གི་བདག་པོ་ཉིད་གྱུར་ཅིག །ཅེས་པའང་འཛི་སྒར་གསོལ་དཔོན་ཆོས་འཕེལ་ནས་བསྐུལ་བ་བཞིན། སི་ཏུ་པས་སྨྲས་པ་ཛ་ཡ།། ༈ །།དུས་གསུམ་རྒྱལ་ཀུན་འདུས་པ་པདྨ་འབྱུང་། །སྙིགས་མའི་འགྲ་ོལ་ལྷག་པའི་ཐུགས་རྗེ་ཅན། །མཆོག་གི་རྣམ་རོལ་སངས་རྒྱས་གླིང་པ་ཆེའི། །གཏེར་ལུང་རྡོ་རྗེའི་བཀའ་གསང་དྲི་མེད་ལས། །གསལ་བར་ཆོས་སྤྱན་པདྨའི་ལྗགས་

[Full Size]

ལྡན་ཞེས། །གང་འདིར་མངོན་ཤར་པདྨ་ཉིན་བྱེད་དབང་། །སྐྱབས་གནས་རྒྱ་མཚོའི་ངོ་བོར་དམིགས་བྱས་ནས། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །གནས་སྐབས་ཚེ་དཔལ་རབ་རྒྱས་བསམ་པའི་དོན། །ལྷུན་གྲུབ་སྒོ་གསུམ་བྱ་བཞག་མཆིས་སོ་ཅོག །ཆོས་མཐུན་མཐར་ཐུག་བླ་མེད་རྫོགས་བྱང་གི། །གོ་འཕང་དམ་པར་འབྲེལ་བཅས་སངས་རྒྱས་ཤོག །ཅེས་དད་གསུམ་མི་ཕྱེད་པའི་འདུན་པ་ཅན་ནཱ་ཐ་སིདྡྷཱིརྠའི་བཞེད་ངོར། པདྨ་དེ་ཝེནྡྲས་སྤེལ་བ་དགེ། །།༈ ཕྱོགས་བཅུ་དུས་གསུམ་རྒྱལ་བའི་ཐུགས་རྗེའི་སྟོབས། །ལྷུན་གྲུབ་གདོད་མའི་སངས་རྒྱས་རྡོ་རྗེ་འཆང་། །རིགས་དང་དཀྱིལ་འཁོར་ཀུན་གྱི་དབང་ཕྱུག་མཆོག །མི་ཕམ་ཆོས་གྲུབ་རྒྱ་མཚོར་གསོལ་བ་འདེབས། །གང་གི་སྐུ་དང་ཞིང་ཁམས་བསམ་ཡས་པའི། །རང་གཟུགས་ཐུགས་རྗེའི་གཏེན་ཆེན་ཚེ་དཔག་མེད། །འོད་སྣང་མཐའ་ཡས་མགོན་དང་དབྱེར་མེད་པར། །སྒྱུ་འཕྲུལ་རྣམ་པར་རོལ་ལ་གསོལ་བ་འདེབས། །སྙིགས་དུས་གདུལ་དཀའ་རྗེས་སུ་འཛིན་སླད་དུ། །སྣ་ཚོགས་ཕྲིན་ལས་ཆུ་ཟླའི་གར་བསྒྱུར་ནས། །འབྲེལ་ཚད་ཡང་དག་ལམ་ལ་དཀྲི་བ་ཡི། །འགྲོ་བའི་དེད་དཔོན་དམ་པར་གསོལ་བ་འདེབས། །དངོས་ཀུན་རང་རིག་རྩལ་གདངས་མ་འགགས་པར། །སྣང་སྲིད་བླ་མའི་དཀྱིལ་འཁོར་གསལ་བའི་ངང་། །གསོལ་བཏབ་བདག་དང་འབྲེལ་བཅས་འགྲོ་བ་རྣམས། །དེང་ནས་སྐྱབས་གསོལ་མཆོག་ཐུན་དངོས་གྲུབ་སྩོལ། །

[Full Size]

བདེ་བ་ཅན་ཞིང་ཡོན་ཏན་བདག་རྒྱུད་ལ། །ཡོངས་རྫོགས་རྒྱལ་སྲས་དབང་བསྐུར་ལུང་བསྟན་ཐོབ། །འགྲོ་སྒྲོལ་ཕྱིར་མི་ལྡོག་པའི་གོ་འཕང་ལ། །འགོད་པའི་བྱིན་རླབས་བདུད་རྩིས་སྨིན་གྱུར་ཅིག །ཅེས་པའང་དད་གསུམ་ལྡན་པ་དགེ་སློང་ཀརྨ་བསྟན་འཛིན་ནས་མཎྜལ་རྟེན་དང་བཅས་བསྐུལ་བའི་ངོར། སི་ཏུ་པདྨ་ཉིན་བྱེད་དབང་པོས་གཉན་ཆེན་ཐང་ལྷས་སྐྱོང་བའི་གངས་རིའི་ཕྲེང་བས་བསྐོར་བའི་བཀྲ་ཤིས་ཐང་གི་ཆོས་སྒར་ནས་སྤེལ་བ་ཛ་ཡནྟུ།། ༈ །།སྐྱབས་གནས་གཞར་ཡང་བསླུ་མེད་དཀོན་མཆོག་གསུམ། །མི་ཕྱེད་དད་པའི་དངོས་པོས་ཀུན་བཏུད་ནས། །གསོལ་བ་འདེབས་སོ་བདག་རྒྱུད་བྱིས་བློ་ཡི། །འཁྲུལ་ནོངས་ཁ་ན་མ་ཐོ་གང་མཆིས་བཤགས། །སྐད་ཅིག་བསྒོམ་པས་བསྐལ་སྟོང་སྡིག་སྒྲིབ་རྣམས། །དྲུང་ནས་ཕྱུང་བྱེད་ཀུན་བཟང་དགོངས་པའི་དོན། །མ་ནོར་རྣམ་དག་ངེས་པའི་ལམ་བཟང་པོར། །འཇུག་པའི་སྐལ་པ་མཆོག་དང་ལྡན་གྱུར་ཅིག །ལྟར་སྣང་འབྲིད་པའི་གཉིས་འཛིན་སྣང་ཤས་ཀྱི། །རྩ་བ་བདུད་བཞིའི་བར་ཆད་རིང་སྤང་ནས། །མི་རྟག་རྒྱུད་བསྐུལ་སྒོ་གསུམ་དགེ་བཀོལ་ཞིང་། །བདེ་ཆེན་ཞིང་ཁམས་བགྲོད་པར་བྱིན་གྱིས་རློབས། །ཅེས་པའང་ཀརྨ་ཚེ་དཔལ་ངོར་སྤེལ།། ༈ །།དུས་གསུམ་རྒྱལ་ཀུན་འདུས་གཟུགས་པ༵དྨ༵་འབྱུང་། །ཡེ་ཤེས་རྣམ་པར་རོལ་པ་ཉི༵ན་བྱེ༵ད་དབང་། །རྩ་བའི་བླ་མ་དཔལ་ལྡན་རྡོ་རྗེ་འཆང་། །གསོལ་བ་འདེབས་སོ་བྱིན་རླབས་མཆོག་དངོས་སྩོལ། །ཅེས་པའང་སི་ཏུ་པདྨའི་མིང་ཅན་གྱིས་དབོན་བསམ་གཏན་སྐུ་སྐྱེའི་ཐུགས་བཞེད་བསྐང་ཕྱིར་སྤེལ།། ༈ །།གནས་

[Full Size]

ནུབ་ཕྱོགས་བདེ་ཆེན་ཞིང་ཁམས་ན། །ཚེ་འོད་སྣང་མཐའ་ཡས་ལ་གསོལ་བ་འདེབས། །གནས་རྡོ་རྗེ་གདན་བྱང་ཆུབ་ཤིང་དབང་དྲུང་། །སྟོན་མཆོག་ཤཱཀྱའི་རྒྱལ་པོ་ལ་གསོལ་བ་འདེབས། །གནས་རི་བོ་ཏ་ལའི་ཕོ་བྲང་ན། །འཕགས་པ་སྤྱན་རས་གཟིགས་དབང་ལ་གསོལ་བ་འདེབས། །གནས་གྲུ་འཛིན་ཨུཏྤལ་ལྡིང་ཁང་ན། །ཡུམ་ཡིད་བཞིན་འཁོར་ལོ་ལ་གསོལ་བ་འདེབས། །གནས་རྒྱ་གར་ཝཱ་ར་ཎཱ་སི་ན། །གྲུབ་ཆེན་མི་ཏྲ་ཛོ་ཀི་ལ་གསོལ་བ་འདེབས། །གནས་གཡུ་རུ་སྤྲུལ་པའི་ཁྲ་འབྲུག་ན། །ཆོས་རྒྱལ་སྲོང་བཙན་སྒམ་པོ་ལ་གསོལ་བ་འདེབས། །གནས་མཁའ་སྤྱོད་པདྨ་འོད་ཞིང་ན། །སློབ་དཔོན་པདྨ་འབྱུང་གནས་ལ་གསོལ་བ་འདེབས། །ཟག་མེད་ཀྱི་བདེ་སྟེར་མནྡཱ་ར། །མ་ཡེ་ཤེས་མཚོ་རྒྱལ་ལ་གསོལ་བ་འདེབས། །གནས་ལྷུན་གྲུབ་གཏེར་གྱི་དུར་ཁྲོད་ན། །པཎ་ཆེན་བི་མ་མི་ཏྲ་ལ་གསོལ་བ་འདེབས། །གནས་གངས་ཅན་སྒྲུབ་པའི་དབེན་གནས་སུ། །རྗེ་འབངས་ཉི་ཤུ་རྩ་ལྔ་ལ་གསོལ་བ་འདེབས། །གནས་ངོ་མཚར་ལྷུན་རྫོགས་ཡུལ་ལྗོངས་སུ། །གཏེར་ཆེན་བརྒྱ་དང་རྩ་བརྒྱད་ལ་གསོལ་བ་འདེབས། །གནས་དོན་གཉིས་འགྲུབ་པའི་ཕོ་བྲང་ན། གཏེར་ཕྲན་སྟོང་དང་རྩ་གཉིས་ལ་གསོལ་བ་འདེབས། །གནས་ལྟ་ན་སྡུག་གི་ཞིང་ཁམས་ན། །རྗེ་ཡོན་ཏན་མགོན་པོ་ལ་གསོལ་བ་འདེབས། །གནས་འོག་མིན་ཀརྨའི་གནྡྷོ་ལར། །གྲུབ་ཆེན་ཀརྨ་པཀྴི་ལ་གསོལ་བ་འདེབས། །གནས་ཕྱོགས་

[Full Size]

མེད་རྒྱལ་ཁམས་དབེན་ས་ན། །འཆི་མེད་ཐང་སྟོང་རྒྱལ་པོ་ལ་གསོལ་བ་འདེབས། །གནས་སྐྱིད་ཕུག་བདེ་ལྡན་རི་ཁྲོད་ན། །རྗེ་ཏཱ་ར་ནཱ་ལ་གསོལ་བ་འདེབས། །གནས་པང་རི་བཀྲ་ཤིས་འོད་འབར་ན། །རིག་འཛིན་ཧཱུྃ་ནག་མེ་འབར་ལ་གསོལ་བ་འདེབས། །གནས་དཔལ་རི་རྩེ་ཡི་དབེན་གནས་ན། །རྗེ་ཀརྨ་ཆགས་མེད་ལ་གསོལ་བ་འདེབས། །གནས་བྱང་གླིང་དབང་དྲག་དགའ་ཚལ་ན། །འཛམ་གླིང་བདེ་བའི་རྡོ་རྗེ་ལ་གསོལ་བ་འདེབས། །སེང་གནམ་འཕྱོང་ཉི་ཟླའི་ཀེའུ་ཚང་ན། །གཏེར་ཆེན་མི་འགྱུར་རྡོ་རྗེ་ལ་གསོལ་བ་འདེབས། །གནས་བྲག་དམར་བྱ་ཁྱུང་སྒྲུབ་གནས་སུ། །རིག་འཛིན་རོལ་པའི་རྡོ་རྗེ་ལ་གསོལ་བ་འདེབས། །གནས་མང་ཡུལ་རི་བོ་དཔལ་འབར་ན། །རྡོ་རྗེ་ཚེ་དབང་ནོར་བུ་ལ་གསོལ་བ་འདེབས། །གནས་དགའ་ལྡན་སྤྲུལ་པའི་ཞིང་ཁམས་ན། །རྗེ་དྷརྨཱ་ཀཱ་ར་ལ་གསོལ་བ་འདེབས། །གནས་སྤྱི་གཙུག་བདེ་ཆེན་ཕོ་བྲང་ན། །རྗེ་བཙུན་བདུད་འདུལ་རྡོ་རྗེ་ལ་གསོལ་བ་འདེབས། །གནས་སྙིང་ཁ་ཆོས་ཀྱི་འཁོར་ལོ་ན། །མི་ཕམ་ཆོས་གྲུབ་རྒྱ་མཚོ་ལ་གསོལ་བ་འདེབས། །ཀོང་ཟག་མེད་འཇའ་ཚོན་ཕུག་པ་ན། །རྡོ་རྗེ་གཙུག་ལག་དགའ་བ་ལ་གསོལ་བ་འདེབས། །གནས་སྦས་ཡུལ་རྡོ་རྗེ་ཅོང་ཕུག་ན། །ཀརྨ་བདུད་འདུལ་རྒྱལ་པོ་ལ་གསོལ་བ་འདེབས། །གནས་པདྨ་འོད་ཕུང་འཁྱིལ་བ་ན། །དཔལ་ཐུགས་ཀྱི་རྡོ་རྗེ་ལ་གསོལ་བ་བདེབས། །གནས་འགྲོ་སྡིང་མཁའ་འགྲོའི་

[Full Size]

ཚོགས་ཁང་ན། །ཚེ་དབང་འཆི་མེད་དཔལ་དར་ལ་གསོལ་བ་འདེབས། །གནས་གཅིག་ཆར་དཔལ་གྱི་གཙུག་ལག་ན། །མི་ཕམ་ཆོས་ཀྱི་སྣང་བ་ལ་གསོལ་བ་འདེབས། །གནས་ཡིད་དགའ་ཆོས་འཛིན་ཕོ་བྲང་ན། །པདྨ་ཉིན་བྱེད་དབང་པོ་ལ་གསོལ་བ་འདེབས། །གནས་སྣང་སྲིད་དག་པ་རབ་འབྱམས་ཞིང་། །མགོན་རྩ་བརྒྱུད་བླ་མ་ལ་གསོལ་བ་འདེབས། །མཆོག་ཐུན་གྱི་དངོས་གྲུབ་ཆར་ལྟར་འབེབས། །ལྷ་ཡི་དམ་ཌཱ་ཀི་ལ་གསོལ་བ་འདེབས། །ས་ལམ་གྱི་བར་ཆད་ཀུན་སེལ་བའི། །ཆོས་སྐྱོང་བའི་སྲུང་མ་ལ་གསོལ་བ་འདེབས། བདག་དེ་ལྟར་རྩེ་གཅིག་གསོལ་བ་འདེབས། །གཉིས་འཛིན་གྱི་འཁྲུལ་སྣང་རྣམ་པར་རྟོག །གཞི་མེད་དང་རྩ་བྲལ་གདེང་ཐོབ་ནས། །ཤར་གྲོལ་ལ་དུས་མཉམ་བྱིན་གྱིས་རློབས། །གནས་སྐབས་སུ་ཆོས་བཞིན་བསམ་པའི་དོན། །འབད་མེད་དུ་ལྷུན་གྲུབ་དུས་ནམ་ཞིག །འདུས་བྱས་ཀྱི་སྣང་བ་ཞིག་པའི་ཚེ། །གནད་གཅོད་ཀྱི་དུཿཁ་མི་འབྱུང་ཞིང་། །བློ་འདུན་པ་བདེ་ཆེན་ཞིང་ཁམས་སུ། །དོན་ཡེ་ཤེས་འཕོ་འགྱུར་བྲལ་བའི་ཀློང་། །མགོན་རྩ་བའི་བླ་མ་དབྱེར་མེད་ངང་། །ཕྱིར་མི་ལྡོག་རྫོགས་སངས་རྒྱས་གྱུར་ཅིག །ཅེས་ཨོ་རྒྱན་གུ་རུ་པདྨའི་བྱིན་རླབས་ཙམ་ཐོབ་པར་ལུང་ཟིན་སི་ཏུ་པདྨའི་མིང་ཅན་གྱིས། བསྟན་པའི་ཕྲིན་ལས་པ་དབོན་བསམ་གཏན་སྤྲུལ་སྐུས་བཞེད་ངོར་སྤེལ་བ་དགེ། །།༈ གང་ཞིག་དུས་གསུམ་རྒྱལ་ཀུན་ཡེ་ཤེས་འཕྲུལ། །གཅིག་

[Full Size]

གྱུར་ཐུགས་རྗེ་ཆེན་པོའི་རང་གཟུགས་ལས། །སངས་རྒྱས་པད་སྐྱེས་སྒྱུ་དྲྭའི་རྣམ་པར་རོལ། །པཎ་ཆེན་ནཱ་རོ་ཏ་པའི་ཞབས་ལ་འདུད། །སྲིད་འགྲོ་ཉོན་མོངས་འཁོར་མཚོར་བྱིང་བ་རྣམས། །འདྲེན་པའི་དེད་དཔོན་གང་འདུལ་དེར་སྣང་ངོར། །ཅིར་ཡང་སྟོན་པའི་སྐྱེས་རབས་ཕྲེང་འཛིན་པ། །བཀའ་བརྒྱུད་བསྟན་པའི་རྒྱལ་མཚན་ཞབས་ལ་འདུད། །གསོལ་བཏབ་ཙམ་གྱིས་གྲུབ་གཉིས་མཆོག་སྩོལ་བ། །དཀོན་མཆོག་འདུས་ཞལ་ཉིད་དུ་ུངེས་པ་ཡི། །མི་ཤིགས་སྙིང་གི་ཏི་ལ་ཀར་བཞུགས་ནས། །བྱང་ཆུབ་བར་དུ་རྗེས་བཟུང་བྱིན་གྱིས་རློབས། །སྣང་སྲིད་དངོས་ཀུན་ཆོས་རྣམས་སྟོང་ཉིད་རྩལ། །སྙིང་རྗེའི་རང་མདངས་འགགས་མེད་ཤར་གྲོལ་ཀློང་། །བདེ་གཤེགས་སྙིང་པོའི་རང་བཞིན་མངོན་རྟོགས་པའི། །ཟབ་ལམ་མཆོག་གིས་རྒྱུད་གྲོལ་བྱིན་གྱིས་རློབས། །ཆོས་བརྒྱད་ཞེན་འཛིན་བདུད་བཞི་ལས་རྒྱལ་ནས། །རིམ་གཉིས་རྣལ་འབྱོར་མཐར་སོན་བདག་གཞན་དོན། །ཡོངས་གྲུབ་རྟེན་འདིར་རྡོ་རྗེ་འཆང་དབང་གི། །གོ་འཕང་བདེ་བླག་བརྙེས་པར་བྱིན་གྱིས་རློབས། །ཞེས་པའང་ངེས་གསང་གནས་ལ་འདུན་པ་དབོན་བསམ་སྤྲུལ་པའི་སྐུའི་ཐུགས་བཞེད་ལྟར། དཔལ་ལྡན་འབྲུག་པའི་བྱིན་རླབས་རྒྱུད་སྨིན་གྱི་མོས་པ་ལམ་བྱེད་སི་ཏུ་པདྨ་ཉིན་བྱེད་དབང་པོས་གསོལ་བ་བཏབ་པའོ།། ༈ །།དུས་གསུམ་རྒྱལ་ཀུན་འདུས་པའི་སྤྱི་གཟུགས་མཆོག །ཐུགས་རྗེའི་གཏེར་ཆེན་

[Full Size]

ཕྱག་ན་པདྨ་ཅན། །གངས་ལྗོངས་གདུལ་བྱའི་མགོན་དུ་ཉིན་བྱེད་བཞིན། །འཇིག་རྟེན་མུན་སེལ་ཀརྨ་ཀ་དེར་འདུད། །གང་གི་རང་བཞིན་ཀུན་ཁྱབ་འོད་སྣང་ལས། །འགྲོ་རྒྱུད་མ་རིག་དྲྭ་བ་གཞོམ་སླད་དུ། །སྨིན་གྲོལ་ཆོས་ཀྱི་གདམས་ཟབ་སྤེལ་བའི་ཕྱིར། །ཤིང་རྟ་འདྲེན་པའི་གཞན་ཕན་ཕྲིན་ལས་ཀྱིས། །དྭགས་བརྒྱུད་བསྟན་པའི་དགའ་ཚལ་རྒྱས་པའི་གཉེན། །འབྲེལ་ཚད་བྱང་ཆུབ་སྙིང་པོར་གཞོལ་བ་ཡི། །ངེས་དོན་གྲུབ་པའི་སར་གནས་སྦས་ཚུལ་འཆང་། །རྣལ་འབྱོར་དབང་ཕྱུག་ཡན་ལག་འབྱུང་ལ་འདུད། །མཆོག་ཏུ་འགྱུར་མེད་ལྷན་སྐྱེས་ཡེ་ཤེས་ཁམས། །སྤྲོས་པ་ཀུན་བྲལ་རང་བྱུང་བདེ་བ་ཆེ། །ཀ་དག་གདོད་མའི་སངས་རྒྱས་ངོ་བོ་ཉིད། །རྟོགས་པའི་མངའ་བདག་གྱུར་ལ་གསོལ་བ་འདེབས། །མོས་བློས་གསོལ་བཏབ་དགེ་མཐུས་ཐོས་བསམ་སྒོམ། །རིམ་གཉིས་དབང་ཐོབ་བསྟན་འགྲོའི་དོན་མཐར་ཕྱིན། །སྐུ་བཞིའི་བདག་ཉིད་རྡོ་རྗེ་འཆང་ཆེན་གྱི། །གོ་འཕང་དམ་པ་བདེ་བླག་ཐོབ་གྱུར་ཅིག །ཅེས་པའང་ཀརྨ་འཇིགས་མེད་ངོར་སྤེལ།། ༈ །།བསྐལ་མང་ལེགས་གོམས་བསགས་སྦྱངས་མཐར་ཕྱིན་པ། །རྒྱལ་བའི་སྲས་ཀྱི་ཐུ་བོར་གྱུར་ནས་སུ། །ཤེས་རབ་གསུམ་གྱི་སྣང་བྱེད་ཟེར་ཕྲེང་གིས། །རྒྱ་མཚོའི་གོས་ཅན་ཁྱབ་དེར་གསོལ་བ་འདེབས། །བདེ་གསལ་མི་རྟོག་ཏིང་འཛིན་འོད་འབུམ་བརྡལ། །ཉོན་མོངས་ཁྲི་མུན་དྲྭ་བ་མཐར་བྱེད་པའི། །ཡེ་ཤེས་རྡོ་རྗེ་རྣོན་

[Full Size]

པོའི་གཟི་བྱིན་གྱིས། །འཁོར་བའི་དུ་ཁཿགཞོམ་དེར་གསོལ་བ་འདེབས། །དཔལ་ལྡན་ཐུབ་མཆོག་ཀརྨ་བཀའ་བརྒྱུད་ཀྱི། །ངེས་དོན་བསྟན་པ་གོང་ནས་འཕེལ་བའི་ཕྱིར། །ཆོས་སྤྱོད་བཅུ་དང་འཁོར་ལོ་རྣམ་གཉིས་སོགས། །ཕྲིན་ལས་ཁྱབ་པར་བརྡལ་ལ་གསོལ་བ་འདེབས། །སྲིད་འདིར་གང་ཁྱོད་མི་ཤིགས་དྭངས་མའི་སྐུར། །རྡོ་རྗེ་ཆོས་བདུན་ངོ་བོར་རྟག་བརྟན་ནས། །སྨིན་གྲོལ་ཆོས་ཀྱི་བདུད་རྩིའི་ཆར་རྒྱུན་གྱིས། །གདུལ་བྱ་བྱང་ཆུབ་འབྲས་སྨིན་བྱིན་གྱིས་རློབས། །ཅེས་རིག་འཛིན་རྣམ་རྒྱལ་ངོར་སྤེལ་བ་དགེ། །།༈ ཕྱོགས་བཅུ་དུས་གསུམ་རྒྱལ་བ་རྒྱ་མཚོ་ཡི། །སྤྱི་དཔལ་རིགས་དང་དཀྱིལ་འཁོར་ཀུན་བདག་མཆོག །རྗེ་བཙུན་བདུད་འདུལ་རྡོ་རྗེ་འཆང་ཆེན་པོ། །ཚེ་རབས་ཀུན་ཏུ་འབྲལ་མེད་བྱིན་གྱིས་རློབས། །སྒོ་གསུམ་བག་མེད་འཁྲུལ་དབང་ཉོན་མོངས་ཀྱི། །དྲྭ་བར་འཐུམ་པའི་ནོངས་པ་ཉེས་ལྟུང་ཚོགས། །ཅི་མཆིས་མཐོལ་བཤགས་སླན་ཆད་སྡོམ་པར་བགྱི། །འདི་ནས་སྣང་བ་ནུབ་པར་གྱུར་མ་ཐག །སྐྱེ་གཞན་བར་མ་ཆོད་པ་བདེ་ཆེན་ཞིང་། །སྟོན་མཆོག་གཟི་བརྗིད་རྒྱལ་པོ་འོད་དཔག་མེད། །གཙོ་འཁོར་རྣམས་ཀྱི་ཞལ་མཐོང་ཆོས་ཐོས་ཤིང་། །ལུང་བསྟན་ཐོབ་ཅིང་སྤྲུལ་པས་འགྲོ་བའི་དོན། །ཕྱོགས་མེད་རྒྱུ་བའི་རྫུ་འཕྲུལ་མངའ་བརྙེས་ཤིང་། །རིགས་དྲུག་རྫོགས་སངས་རྒྱས་ཀྱི་སར་བཀོད་པའི། །མཐུ་སྟོབས་ཐུགས་རྗེ་དང་ལྡན་བླ་མེད་ཀྱི། །བྱང་ཆུབ་ཆེན་པོའི་གོ་

[Full Size]

འཕང་མྱུར་ཐོབ་ཤོག །བླའོ་དགོན་བླ་མཆན་སྨོན་ལམ་རྒྱ་མཚོའི་ངོར་སྤེལ་བ་དགེ། །།༈ གངས་ཅན་ལྷ་གཅིག་ཕྱག་ན་པདྨོ་མཆོག །དབྱེར་མེད་དཔལ་ལྡན་བླ་མ་རྡོ་རྗེ་ཅན། །མི་མཆོག་དུས་གསུམ་མཁྱེན་ནས་སྐྱེས་རབས་ཕྲེང་། །བཅུ་གསུམ་བདུད་ལས་རྣམ་པར་རྒྱལ་བའི་ཞབས། །དེང་བཟུང་བྱང་ཆུབ་བར་དུ་སྐྱབས་གསོལ་འདེབས། །བླ་མ་རང་སེམས་དབྱེར་མེད་ཆོས་ཀྱི་སྐུ། །གདོད་ནས་བཞུགས་པར་མ་རིག་སྒྲིབ་དབང་གིས། །འཐུམས་པར་གྱུར་ཀྱང་མོས་གུས་རྩེ་གཅིག་གིས། །རྒྱུད་བསྐུལ་ལགས་ན་བརྩེ་བས་དགོངས་སུ་གསོལ། །ཐོག་མེད་ནས་བསགས་ཉེས་ལྟུང་མཐོལ་ཞིང་བཤགས། །ལྷན་སྐྱེས་ཡེ་ཤེས་སྒྲིབ་གཡོགས་དང་བྲལ་བ། །མངོན་སུམ་རང་རྒྱུད་སྨིན་ཅིང་གྲོལ་བྱིན་རློབས། །བདེ་ཆེན་པདྨོ་བཀོད་ཀྱི་ཞིང་ཁམས་སུ། །སྟོན་མཆོག་ཞལ་མཐོང་རྫོགས་སངས་རྒྱས་ཐོབ་ཤོག །བླའོ་རྟོགས་ལྡན་དམ་ཆོས་ངོར་སྤེལ།། ༈ །།སྐུ་གསུམ་རྩ་རྒྱུད་བླ་མའི་བྱིན་མཐུ་ཡིས། །དེང་འདིར་རང་བྱུང་རིག་པའི་ངོ་བོ་ཉིད། །བློ་འདས་ཕྱག་རྒྱ་ཆེན་པོའི་དོན་རྟོགས་ནས། །བདག་གཞན་རྒྱུད་གྲོལ་རྫོགས་སངས་རྒྱས་ཐོབ་ཤོག །ཟུར་མང་དབུ་མཛད་རིགས་བཟང་ངོར་སྤེལ།། ༈ །།སྣང་སྲིད་འཁོར་འདས་དབང་བསྒྱུར་ཐོད་ཕྲེང་རྩལ། །དབྱེར་མེད་རྒྱལ་དབང་ཀརྨ་ཀ་རིམ་བྱོན། །ཌོམྦིའི་རྣམ་འཕྲུལ་ཀརྨ་སི་ཏུ་སོགས། །བཀའ་རྒྱུད་བླ་མར་གསོལ་འདེབས་བྱིན་གྱིས་རློབས། །ཚེ་དཔག་

[Full Size]

མེད་མགོན་སྒྲོལ་དཀར་ལྗང་དམར་སེར། །རྒྱལ་བ་རྒྱ་མཚོ་གསང་ཡེ་རྣལ་འབྱོར་མ། །འོད་ཟེར་ཅན་དང་གྲྭ་ལྔའི་ལྷ་མོ་སོགས། །ཡི་དམ་རྒྱུད་བཞིར་གསོལ་འདེབས་གྲུབ་གཉིས་སྩོལ། །རྡོ་རྗེ་བེར་ཅན་ཕྱག་བཞི་མ་ནིང་ནག །དཔལ་ལྡན་ལྷ་མོ་རྣམ་སྲས་རྡོ་རྗེ་ལེགས། །ཞིང་སྐྱོང་ཏྲཀྴད་ཡེ་ཤེས་ལས་འཇིག་རྟེན། །ཆོས་སྐྱོང་རྣམས་ལ་གསོལ་འདེབས་བར་ཆད་སོལ། །གསོལ་བཏབ་བྱིན་གྱིས་གནས་སྐབས་ཆོས་དང་ལྡན། །བསམ་པ་ལྷུན་གྲུབ་ཚེ་དཔལ་འབྱོར་པ་རྒྱས། །འཇིགས་པ་བརྒྱད་དང་བཅུ་དྲུག་ལས་གྲོལ་ཞིང་། །དམ་པའི་མགོན་གྱིས་རྗེས་བཟུང་མཉེས་པ་སྒྲུབ། །བསླབ་སྡོམ་དྲི་མེད་དམ་ཚིག་དག་གཙང་སྤྱོད། །གདོད་གནས་རང་བྱུང་སེམས་ཉིད་མ་བཅོས་ངང་། །རང་ཤར་རང་གྲོལ་ཕྱག་རྫོགས་དབྱེར་མེད་ཀྱི། །གནས་ལུགས་ཆོས་སྐུའི་རྒྱལ་ས་ཟིན་གྱུར་ཅིག །ཅེས་མཚུར་རྗེ་དྲུང་བླ་མ་གང་དང་སྐྱེད་ཡུམ་ལྷ་ལྕམ་སྒྲོལ་ཚེའི་བཞེད་ངོར་སྤེལ་བ་མངྒ་ལམ།། ༈ །།ཨོ་རྒྱན་ལུང་ཟིན་བཀའ་གཏེར་བསྟན་རྒྱུན་སྤེལ། །གསང་སྔགས་སྟོན་མཆོག་གཙུག་ལག་ཆོས་རྒྱལ་ཞབས། །གསོལ་འདེབས་ཆོས་མཐུན་བསམ་འགྲུབ་ཕྱི་ནང་གི། །བར་ཆད་ཞི་ཞིང་དོན་གཉིས་མཐར་ཕྱིན་ཤོག །གཉེར་མགོན་དོན་བཞེད་ལྟར་སྤེལ།། ༈ །།ཐུགས་རྗེའི་རང་གཟུགས་སྤྱན་རས་གཟིགས་རྣམ་འཕྲུལ། །དཔལ་ལྡན་ཀརྨ་པ་དང་བྱམས་མགོན་གྱི། །སྤྲུལ་གར་ཏཱ་ཡི་སི་ཏུའི་སྐྱེས་རབས་ཕྲེང་། །ཨོ་རྒྱན་ཟབ་

[Full Size]

གཏེར་ལུང་ཟིན་དཔའ་བོ་རྗེ། །སྤྱི་གཙུག་རྒྱན་དུ་བཞུགས་ལ་གསོལ་བ་འདེབས། །ཆོས་སྐུའི་རང་ཞལ་མངོན་གྱུར་བྱིན་གྱིས་རློབས། །ཅེས་དྲུང་རམ་གྲྭ་པ་ཞིག་ངོར་སྤེལ།། ༈ །།སངས་རྒྱས་ཀུན་གྱི་ཐུགས་རྗེའི་གཏེར་ཆེན་པོ། །འོད་སྣང་མཐའ་ཡས་རྣམ་རོལ་པདྨ་འབྱུང་། །སྒྱུ་འཕྲུལ་གར་སྟོན་དཔལ་ལྡན་ཀརྨ་ཀ། བདུད་འདུལ་རྡོ་རྗེ་འཆང་ལ་གསོལ་བ་འདེབས། །ཚེ་འདིར་ཆོས་མཐུན་བསམ་པ་ཡིད་བཞིན་འགྲུབ། །ནད་གདོན་བར་ཆད་ཕྱོགས་ལས་རྣམ་རྒྱལ་ཞིང་། །རང་སེམས་གདོད་ནས་ཆོས་སྐུའི་རང་བཞིན་ལ། །ཡིན་པར་ཤེས་ངང་གནས་ལུགས་དོན་རྟོགས་ནས། །བདེ་ཆེན་པདྨོ་བཀོད་པའི་ཞིང་ཁམས་སུ། །སྐྱེས་ནས་སྤྲུལ་པས་འགྲོ་དོན་བྱེད་པར་ཤོག །ཅེས་སི་ཏུ་པདྨའི་མིང་ཅན་གྱིས་དད་ལྡན་དགེ་རྒྱལ་འཁོར་རུ་སྤུན་གྱི་ངོར་སྤེལ།། ༈ །།གུ་རུ་པདྨ་སིདྡྷི་ཧཱུྃ། སྣང་སྲིད་ཟིལ་གནོན་པདྨ་ཐོད་ཕྲེང་རྩལ། །དབྱེར་མེད་གྲུབ་ཆེན་ཀརྨ་པཀྴི་དང་། །རྡོ་རྗེ་གྲོ་ལོད་བེར་ཅན་ལྕམ་དྲལ་ལ། །གསོལ་འདེབས་བདག་རྒྱུད་བྱིན་གྱིས་བརླབ་ཏུ་གསོལ། །རྟག་པར་རང་རྒྱུད་ཆོས་མཐུན་དམ་ཚིག་ལ། །གནས་ཤིང་ཐོས་སྒོམ་སྒྲུབ་པ་མཐར་ཕྱིན་ནས། །ཚེ་དཔལ་ཡེ་ཤེས་སྣང་བ་ཡར་ཟླ་ལྟར། །རྒྱས་ཤིང་འཕེལ་པར་བྱིན་གྱིས་བརླབ་ཏུ་གསོལ། །དུས་མིན་འཆི་དང་འཇིགས་བརྒྱད་བཅུ་དྲུག་སོགས། །བར་ཆད་ཉེར་འཚེ་ལོ་ཟླ་ཞག་དུས་ཀག །གློ་བུར་རྐྱེན་ངན་ཉི་ཁྲི་ཆིག་སྟོང་རྣམས། །ཞི་ཞིང་བཟློག་ཅིང་བསྒྱུར་བར་མཛད་དུ་གསོལ། །

[Full Size]

རྗེ་དབོན་བསྟན་པ་རབ་རྒྱས་བཞེད་ངོར་སྤེལ་བ་དགེའོ།། ༈ །།རྣམ་དག་སྤྲོས་བྲལ་ཆོས་སྐུ་ཀུན་ཏུ་བཟང་། །བདེ་ཆེན་འོད་སྣང་མཐའ་ཡས་རྣམ་པར་རོལ། །སྣ་ཚོགས་གར་སྟོན་སྤྲུལ་སྐུ་པདྨ་འབྱུང་། །གསོལ་བ་འདེབས་སོ་ཕྱི་ནང་བར་ཆད་སོལ། །བསམ་དོན་ཡིད་བཞིན་འགྲུབ་པར་བྱིན་གྱིས་རློབས། །མཆོག་ཐུན་དངོས་གྲུབ་དེང་འདིར་བསྩལ་དུ་གསོལ། །དུས་གསུམ་རྒྱལ་ཀུན་ཐུགས་རྗེའི་གཏེར་ཆེན་པོ། །སྙིགས་འགྲོའི་དཔུང་གཉེན་དམ་པར་ཞལ་འཆེས་བཞིན། །ཐུགས་དམ་དབྱིངས་ནས་བསྐུལ་ཕྱིར་གསོལ་བ་འདེབས། །ལས་ཉོན་བག་ཆགས་ཕྱི་ནང་བར་ཆད་སོལ། །ཆོས་མཐུན་བསམ་པ་ལྷུན་གྱིས་འགྲུབ་བྱིན་རློབས། །དོན་གཉིས་མཐར་ཕྱིན་དངོས་གྲུབ་མྱུར་ཐོབ་ཤོག །ཅེས་སྐལ་ལྡན་སློབ་མའི་ངོར་སྤེལ།། ༈ །།སྟོན་པའི་ཞལ་ཚབ་རྟེན་འབྲེལ་མཐར་ཕྱིན་པའི། །རྒྱལ་བ་འབྲི་གུང་པ་ཞེས་ཡོངས་གྲགས་པ། །མཉམ་མེད་འཇིག་རྟེན་གསུམ་གྱི་མགོན་པོ་ལ། །སྙིང་ནས་གསོལ་འདེབས་ཆོས་སྐུའི་དོན་རྟོགས་ཤོག །གང་གི་བསྟན་པ་རྣམ་དག་སྒོར་ཞུགས་ཏེ། །བསླབ་གསུམ་མོས་གུས་རྒྱལ་མཚན་རྩེ་མོ་རུ། །གནས་ལུགས་ཕྱག་རྒྱ་ཆེན་པོའི་ཏོག་གིས་སྤྲས། །རྩེ་གཅིག་གསོལ་བཏབ་ཐུགས་ཡིད་གཅིག་འདྲེས་ཏེ། །མཆོག་གི་དངོས་གྲུབ་ཚེ་འདིར་མྱུར་ཐོབ་ཤོག །ཅེས་དད་ལྡན་མའི་ངོར་སྤེལ།། ༈ །།རྡོ་རྗེ་འཆང་ནས་རྩ་བའི་བླ་མའི་བར། བརྒྱུད་པ་

[Full Size]

གསེར་གྱི་ཕྲེང་བ་རིམ་བྱོན་དང་། །ཡི་དམ་ཆོས་སྐྱོང་བཅས་ལ་གསོལ་བཏབ་མཐུས། །འཕྲལ་ཡུན་ཀུན་ཏུ་ལེགས་པའི་ཡོན་ཏན་ཚོགས། །འབད་མེད་ལྷུན་གྲུབ་མཐར་ཕྱིན་གོ་འཕང་མཆོག །རིང་མིན་ཉིད་དུ་ཐོབ་པར་བྱིན་གྱིས་རློབས། །ཀར་ལྷུན་ངོར་སྤེལ།། ༈ །།སངས་རྒྱས་ཀུན་གྱི་ཕྲིན་ལས་ཡོངས་རྫོགས་པ། །ཀརྨ་ཀ་ཞེས་ས་གསུམ་འགྲན་ཟླ་བྲལ། །དྲན་པ་ཙམ་གྱིས་ཐར་པའི་ལམ་སྣ་ཟིན། །དཔལ་ལྡན་དུས་གསུམ་མཁྱེན་པར་གསོལ་བ་འདེབས། །ཞེན་ལོག་ངེས་འབྱུང་མོས་གུས་ལམ་བྱས་ཏེ། །གང་གི་བསྟན་སྒོར་བླ་མེད་བྱང་ཆུབ་བར། །འཇུག་ནས་མ་ཧཱ་མུ་དྲའི་དོན་རྟོགས་ཤོག །བཟོ་དགོན་དགེ་ལེགས་ངོར་སྤེལ།། ༈ །།དཀོན་མཆོག་འདུས་ཞལ་ཨོ་རྒྱན་རྡོ་རྗེ་འཆང་། །རྣམ་རོལ་བཀའ་གཏེར་བསྟན་འཛིན་ཆགས་མེད་ཅེས། །ཟབ་གཏེར་མངའ་བདག་མི་འགྱུར་རྡོ་རྗེ་ཅན། །གསོལ་འདེབས་བདག་རྒྱུད་སྨིན་གྲོལ་བྱིན་གྱིས་རློབས། །ཞེས་པའང་དད་ཅན་སློབ་མའི་ངོར་སྤེལ།། ༈ །།རྡོ་རྗེ་འཆང་ཆེན་ཏཻ་ལོ་ནཱ་རོ་པ། །མར་པ་མི་ལ་དྭགས་པོ་དུས་མཁྱེན་ནས། །རྗེ་བཙུན་བདུད་འདུལ་རྡོ་རྗེའི་བར་བྱོན་པའི། །བཀའ་རྒྱུད་བླ་མ་རྣམས་ལ་གསོལ་བ་འདེབས། །རང་སེམས་གདོད་ནས་ཆོས་སྐུའི་རང་བཞིན་ཡང་། །མ་རྟོགས་གཉིས་འཛིན་སྒྲིབ་པ་དང་བྲལ་ནས། །རང་ངོ་རང་གིས་མཐོང་ལ་ཆེར་གོམས་པས། །སྤྲོས་བྲལ་ཕྱག་ཆེན་རང་ཞལ་མྱུར་

[Full Size]

མཐོང་ཤོག །ཅེས་སི་ཏུ་པདྨའི་མིང་ཅན་གྱིས་གནས་མདོ་བླ་རྒན་སྤྲུལ་སྐུ་བསྟན་པ་རབ་རྒྱས་བཞེད་ངོར་སྤེལ།། ༈ །།སྣང་སྲིད་དབང་བསྒྱུར་པདྨ་འབྱུང་གནས་དང་། །དབྱེར་མེ་གྲུབ་ཐོབ་ཀརྨ་པཀྴི་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བྱང་ཆུབ་སྒྲུབ་པའི་འགལ་རྐྱེན་ཞི་བ་དང་། །རང་སེམས་ཀ་ནས་དག་པའི་ངོ་བོའི་ཀློང་། །གཉིས་འཛིན་འཁྲུལ་པའི་རྟོག་ཚོགས་རང་སར་ཡལ། །གདོད་ནས་དྲི་བྲལ་བདེ་གཤེགས་སྙིང་པོ་ཡི། །རང་ཞལ་མངོན་དུ་མཐོང་བར་བྱིན་གྱིས་རློབས། །ཅེས་སི་ཏུ་པདྨའི་མིང་ཅན་གྱིས་གནས་མདོ་འབྲོག་སྒར་སྤྲུལ་སྐུའི་ངོར་སྤེལ།། ༈ །།རིགས་ཀུན་ཁྱབ་བདག་རྡོ་རྗེ་འཆང་ཆེན་ནས། །བདུད་འདུལ་རྡོ་རྗེའི་བར་དུ་བཀའ་རྒྱུད་ཀྱི། །སྙིང་པོ་དོན་གྱི་སྨིན་གྲོལ་གདམས་པའི་བདག །པདྨས་ལུང་ཟིན་པདྨ་ཉིན་བྱེད་དབང་། །མཆོག་གསུམ་རྩ་གསུམ་ངོ་བོར་དམིགས་གསོལ་འདེབས། །གནས་སྐབས་ཆོས་ལྡན་བར་ཆད་ནད་གདོན་ཞི། །ཚེ་དཔལ་ཡེ་ཤེས་སྣང་བ་གོང་འཕེལ་ནས། །མཐར་ཐུག་གདོད་མའི་བདེར་གཤེགས་མཆོག་ཐོབ་ཤོག །དད་གསུམ་ལྡན་པ་རྒྱལ་བ་ཚེ་རྣམ་ངོར་སྤེལ།། ༈ །།སྐྱབས་གཏན་གྱི་རིགས་བདག་ཀརྨ་ཀ། མགོན་མཚུངས་མེད་ཞྭ་དམར་ཅོད་པན་ཅན། །བདེ་ཆེན་གྱི་འཁོར་ལོ་རྟག་རོལ་བ། །རྗེ་འབྲུག་ཆེན་ཏཱ་ཡི་སི་ཏུ་དང་། །སྙིགས་དུས་ཀྱི་བསྟན་འགྲོའི་དཔུང་གཉེན་མགོན། །

[Full Size]

དཔའ་བོ་དང་ཏྲེ་ཧོ་སྤྲུལ་པའི་སྐུ། །བཀའ་གཏེར་གྱི་བསྟན་པའི་རྒྱལ་མཚན་འཛིན། །མཁས་གྲུབ་མཆོག་ཀརྨ་ཆགས་མེད་ཞབས། །བདག་འདི་བཟུང་སྙིང་པོ་བྱང་ཆུབ་བར། །འབྲལ་མེད་དུ་ཞབས་པད་བསྙེན་ལགས་ན། །གནས་སྐབས་ཀྱི་བསམ་སྤྱོད་བསྟན་འགྲོའི་དོན། །ཆོས་བཞིན་དུ་གེགས་མེད་ལྷུན་གྲུབ་ཅིང་། །མཐར་ཐུག་ཏུ་ུསྐུ་བཞིའི་གོ་འཕང་ཉིད། །བདེ་བླག་ཏུ་ཐོབ་པར་བྱིན་གྱིས་རློབས། །རཏྣ་ཁ་བ་སྤྲུལ་སྐུའི་ངོར་སྤེལ།། ༈ །།སངས་རྒྱས་ཀུན་འདུས་གསང་བ་ཡེ་ཤེས་སྐུ། །དངོས་གྲུབ་གཉིས་སྩོལ་ཁྲོ་རྒྱལ་གྲོ་བོ་ལོད། །བར་ཆད་སེལ་མཛད་དྷཱ་ཀི་མཚོ་རྒྱལ་མ། །ཕྲིན་ལས་ཀུན་སྒྲུབ་བདུད་རྒྱལ་ཏྲཀྴད་མགོན། །གསོལ་འདེབས་མཆོག་ཐུན་ལས་བཞིའི་དངོས་གྲུབ་སྩོལ། །དེ་ཡང་རང་རིག་ཀ་དག་ཆོས་ཀྱི་དབྱིངས། །མངོན་གྱུར་རྩ་བའི་བླ་མའི་གསང་གསུམ་དང་། །ཡེ་ཤེས་རྡོ་རྗེའི་རོལ་གར་ཁོ་ན་ལས། །གུད་དུ་མེད་ཕྱིར་དད་གསུམ་གསོལ་བཏབ་པས། །འབྱུང་བཞིའི་གནོད་པ་རྒྱ་འདྲེའི་བར་ཆད་སོགས། །མཁའ་ལ་སྤྲིན་ལྟར་གཞི་བྲལ་དབྱིངས་སུ་ཐིམ། །སངས་རྒྱས་གཞན་དུ་མི་བཙལ་རང་གི་སེམས། །གཞི་རྩ་ཆོད་པའི་ཆོས་སྐུ་མངོན་གྱུར་ཤོག །ཅེས་སི་ཏུ་པས་ལྷ་ཐོག་མགོན་བླ་ཀརྨ་ཚེ་བརྟན་གྱི་ངོར་སྤེལ།། ༈ །།སྐུ་བཞི་ཡེ་ཤེས་ལྔ་བདག་རྡོ་རྗེ་འཆང་། །དབྱེར་མེད་ཕྱག་ན་པད་འཆང་ཀརྨ་ཀ། འགྲོ་མགོན་དཔལ་ལྡན་འབྲུག་པ་ཡབ་སྲས་དང་། །ཏཱ་ཡི་སི་ཏུ་གྲུབ་

[Full Size]

བརྙེས་དཔའ་བོ་རྗེ། །བཀའ་དྲིན་ཟླ་མེད་འཁོར་ལོའི་མགོན་མཆོག་རྣམས། །ཤཱཀྱའི་རིང་ལུགས་འཛིན་སྐྱོང་སྤེལ་བ་དང་། །སྐྱེ་དགུའི་སྐྱབས་དང་དཔུང་གཉེན་བླ་མེད་པར། །ཞབས་པད་རྡོ་རྗེ་ཆོས་བདུན་ངོ་བོ་རུ། །མི་ཤིགས་རྟག་པའི་རང་བཞིན་འཚོ་གཞེས་གསོལ། །སྙིགས་དུས་ལོག་ཕྱོགས་བདུད་རིས་རློམས་པ་ཡིས། །ཆོས་མིན་སྤྱོད་རྣམས་ལྡང་བ་མེད་པ་དང་། །རྣམ་དག་བཀའ་གསང་ཚད་མའི་གཞུང་བཟང་གི། །བསྟན་པ་རིན་ཆེན་ཕྱོགས་མཐར་ཁྱབ་ཡུན་གནས། །དེ་འཛིན་ཞབས་བརྟན་བཞེད་དོན་ལྷུན་གྱིས་གྲུབ། །བདག་སོགས་རིམ་གཉིས་བརྟན་ཐོབ་ས་ལམ་གྱི། །ཉམས་རྟོགས་ཡོན་ཏན་ཡར་ཟླ་ལྟར་རྒྱས་ཤོག །ཅེས་ཞབས་བརྟན་དང་། མི་ཕམ་བྱམས་མགོན་རྣལ་འབྱོར་གཡུང་མོ་ཅན། །དགྱེས་པ་རྡོ་རྗེ་བླ་མའི་སྐུར་སྣང་བ། །མངའ་བདག་མར་པ་སངས་རྒྱས་རས་ཆེན་ཞབས། །དྷརྨཱ་ཀཱ་ར་པདྨ་ཉིན་བྱེད་དབང་། །རྒྱལ་བསྟན་འདེགས་པའི་སྲི་ཞུ་དམ་བཅས་པའི། །རྩ་གསུམ་དབྱེར་མེད་ངོ་བོ་འདུས་པའི་སྐུར། །མཆོག་རྣམས་ཞལ་འཆེས་ཇི་ལྟར་བཅོས་མིན་གྱི། །ངེས་ཤེས་བརྟན་པོས་གསོལ་འདེབས་བདག་བྱིན་རློབས། །སྣང་སྲིད་ཆོས་སྐུར་རྟོགས་པའི་གདེང་ལྡན་ཞིང་། །གཞི་འབྲས་གཉིས་མེད་ཕྱག་རྒྱ་ཆེ་འགྲུབ་ཤོག །ཅེས་པའང་སྐྱབས་མགོན་འབྲུག་ཆེན་རྡོ་རྗེ་འཆང་གི་གཅུང་དབོན་སྔགས་སྤྲུལ་མཆོག་གི་བཞེད་ངོར། སི་ཏུ་པདྨའི་མིང་ཅན་གྱིས་སྤེལ་བ་དགེ། །།

[Full Size]

༈ དུས་གསུམ་རྒྱལ་བའི་ཐུགས་རྗེའི་རྣམ་པར་རོལ། །འཇིག་རྟེན་མགོན་པོ་དཔལ་ལྡན་ཀརྨ་པ། །རྒྱལ་དབང་འབྲུག་པ་ཡབ་སྲས་ཕྲེང་བ་དང་། །ཏཱ་ཡི་སི་ཏུ་རྗེ་བཙུན་དཔའ་བོའི་ཞབས། །དྲན་མཆོག་བདེ་ཆེན་འཁོར་ལོར་རྟག་རོལ་ནས། །བཤད་སྒྲུབ་བསྟན་པ་འཛིན་དང་ཕྲིན་ལས་སྤེལ། །འགྲོ་བའི་བསོད་ནམས་མཆོད་ཞིང་རྒྱས་པའི་ཕྱིར། །གསང་གསུམ་དྭངས་མ་རྡོ་རྗེའི་སྐུ་བརྙེས་ནས། །གཞོམ་བྲལ་རྟག་བརྟན་ངོ་བོར་ལྷུན་གྲུབ་གསོལ། །ངེས་དོན་སྙིང་པོ་སྒྲུབ་བརྒྱུད་རིང་ལུགས་གང་། །ནུབ་མེད་ཕྱོགས་དང་ཐ་གྲུར་འཕེལ་ཞིང་རྒྱས། །བསྟན་འཛིན་འཚོ་གཞེས་ཕྲིན་ལས་གེགས་མེད་འགྲུབ། །ལྔ་བདོའི་སེམས་ཅན་ལོག་སྨོན་འབྲས་སྨིན་པ། །གང་དག་རྩད་ནས་གཞོམ་ཞིང་རྨེག་མེད་ཤོག །བདག་ཀྱང་དོན་གཉིས་མཐར་ཕྱིན་ཡང་དག་གི། །ཡེ་ཤེས་སྣང་བ་གསལ་ཞིང་སངས་རྒྱས་ཤོག །ཅེས་ཞབས་བརྟན་འདོད་གསོལ་དང་། ཀྱཻ། ཡེ་ཤེས་ལས་དང་འཇིག་རྟེན་ཆོས་སྲུང་བ། །བཀའ་སྡོད་དམ་ཅན་རྒྱ་མཚོའི་ཚོགས་རྣམས་དང་། །དཀར་ཕྱོགས་སྐྱོང་བའི་ཡུལ་གཞི་གནས་ཀྱི་བདག །དགེ་བསྙེན་ལ་སོགས་སྡེ་བརྒྱད་དྲེགས་ཅན་རྣམས། །སྔོན་ཚེ་ཐ་ཚིག་ཡལ་གམ་མ་བསྙེལ་བར། །དེང་འདིར་རྣལ་འབྱོར་བསྟན་དང་འགྲོ་དོན་ལ། །འཕྲིན་ལས་བཞི་ཡི་སྡོང་གྲོགས་གཡེལ་མེད་ཀྱི། །ཕ་རོལ་བྱད་ཕུར་རྦོད་གཏོང་ཞི་བར་མཛད། །མདོར་ན་ཆོས་མཐུན་བཅོལ་པའི་

[Full Size]

ལས་གང་དག །འབད་མེད་ཡིད་བཞིན་འགྲུབ་པར་མཛད་དུ་གསོལ། །ཅེས་ཕྲིན་བཅོལ་དང་བཅས་འབྲུག་པད་དཀར་སྤྲུལ་སྐུའི་བཞེད་ངོར་སྤེལ།། ༈ །།དུས་གསུམ་རྒྱལ་བའི་ཐུགས་རྗེའི་རང་གཟུགས། །དཔལ་ལྡན་སངས་རྒྱས་པདྨ་སྐྱེས་མཆོག །མཚོ་འཁྲུངས་གུ་རུ་རྡོ་རྗེ་འཆང་ཆེན། །གསོལ་འདེབས་བདག་རྒྱུད་བྱིན་གྱིས་རློབས་ཤིག །རྒྱལ་ཀུན་བསྐྱེད་གཞི་ཤེས་རབ་ཕར་ཕྱིན། །དབྱེར་མེད་རྗེ་བཙུན་ཨཱཪྱ་ཏཱ་རེར། །གསོལ་འདེབས་ཚེ་དབང་གྲུབ་གཉིས་མྱུར་སྩོལ། །གནས་སྐབས་མཐར་ཐུག་རྒྱུད་སྨིན་གྲོལ་ནས། །ལྷན་སྐྱེས་ཡེ་ཤེས་ངོ་བོ་མངོན་གྱུར། །སྐུ་བཞིའི་གོ་འཕང་ཐོབ་པར་བྱིན་རློབས། །ཅེས་པའང་འབྲུག་ཆོས་རྫོང་སྤྲུལ་པའི་སྐུའི་བཞེད་ལྟར་དགེ། །།༈ ཆོས་དབྱིངས་སྤྲོས་བྲལ་བདེ་བ་ཆེན་པོའི་གཤིས། །རང་རྩལ་འགགས་མེད་སྒྱུ་འཕྲུལ་རོལ་པ་ཅན། །སྐུ་གསུམ་བདག་ཉིད་མཚོ་སྐྱེས་རྡོ་རྗེ་འཆང་། །གསོལ་བ་འདེབས་སོ་མཆོག་ཐུན་གྲུབ་གཉིས་སྩོལ། །ལྷན་སྐྱེས་གདོད་ནས་སེམས་ཉིད་གཉུག་མའི་མདངས། །མ་བཅོས་རང་གསལ་དེ་བཞིན་ཉིད་ཀྱི་ངང་། །ཀ་དག་ཀུན་ཁྱབ་ཡེ་ཤེས་ཆེན་པོའི་དབྱིངས། །རྩལ་རྫོགས་རིག་པ་རང་གྲོལ་བྱིན་གྱིས་རློབས། །མདོ་སྔགས་བསྟན་པའི་སྟོན་མཆོག་བསྟན་འཛིན་གྱི། །སྐྱེས་མཆོག་དམ་པ་ཞིང་འདིར་གང་བཞུགས་རྣམས། །གསང་གསུམ་མི་ཕྱེད་རྡོ་རྗེ་བཞིའི་རང་བཞིན། །ངོ་བོར་ཡོངས་གྲུབ་

[Full Size]

འཚོ་གཞེས་བརྟན་གྱུརཅིག །འཕྲིན་ལས་རབ་འབྱམས་ཕྱོགས་མཐར་སྤེལ་བ་ཡིས། །བསྟན་འགྲོའི་མགོན་དུ་སྔོན་སྨོན་ཐུགས་སྐྱེད་ཀྱི། །འཇུག་པ་ཟབ་མོའི་རླབས་ཆེན་བཞེད་པའི་དོན། །མཐར་ཕྱིན་གེགས་བྲལ་ལྷུན་གྲུབ་བཀྲ་ཤིས་ཤོག །སི་ཏུ་པདྨའི་མིང་ཅན་གྱིས་དད་མོས་ལྡན་པ་རྣམས་ཀྱི་བཞེད་ངོར་སྤེལ་བ་དགེ། །།༈ དང་པོའི་སངས་རྒྱས་ཆོས་སྐུ་འོད་མི་གྱུར། །བདེ་ཆེན་ལོངས་སྤྱོད་ནོར་བུ་པདྨ་ཅན། །མཚོ་སྐྱེས་སྤྲུལ་སྐུ་པྲ་ཝཱ་ཀ་ར་ཡིས། །དགོངས་འདུས་གསེར་ཆོས་ལུང་བྱང་བཀའ་རྒྱ་ལས། །འདན་མ་རྩེ་མང་རྣམ་རོལ་སྔོན་བྱོན་པའི། །ཆོས་ཀྱི་སྤྱན་ཅན་དྲུག་དང་དེའི་ཕྱི་མར། །པདྨའི་ལྗགས་ལྡན་ལྔ་ལས་དེང་འདི་རུ། །པདྨ་དབང་ཆེན་གྲགས་ལ་གསོལ་བ་འདེབས། །དེ་ལྟར་མི་ཕྱེད་དད་པས་གསོལ་བཏབ་མཐུས། །གང་གི་ཐུགས་རྗེའི་ཕྲིན་ལས་འོད་སྣང་གིས། །སྒྲིབ་གཉིས་བག་ཆགས་ཁྲི་མུན་རབ་བསལ་ནས། །བླ་མེད་སྐུ་བཞིའི་རྒྱལ་སར་དབང་འབྱོར་ཤོག །ཅེས་སི་ཏུ་པདྨའི་མིང་ཅན་གྱིས། དགེ་བཅུའི་དཔལ་མངའ་རག་ཤུལ་བེ་ཧུ་འཇིགས་མེད་དཀོན་མཆོག་ཚེ་ཐར་བཞེད་ངོར་སྤེལ་བ་དགེ།། ༈ །།ཕྱག་འཚལ་སྨོན་ལམ་བཤགས་སྡོམ་ཐར་པའི་སྒོ་འབྱེད་ཅེས་པ་བཞུགས། ན་མོ་གུ་རུ་བུདྡྷ་བོདྡྷི་མ་ཧཱ་ས་ཏྭཱ་ཡ། གང་ལ་བརྟེན་ན་སྲིད་པའི་འཆིང་བ་ལས། །ངེས་པར་སྒྲོལ་བའི་ཐབས་མཁས་ཀུན་མཁྱེན་ཅིང་། །སྟོབས་བཅུའི་མངའ་བདག་སངས་རྒྱས་བཅོམ་ལྡན་འདས། །བདེ་བར་གཤེགས་པ་རྣམས་ལ་ཕྱག་

[Full Size]

འཚལ་ལོ། །མཐའ་ཡས་བླ་ན་མེད་པའི་ཡོན་ཏན་གྱི། །འབྱུང་གནས་རིན་ཆེན་ཞི་བ་ཆགས་བྲལ་བ། །ཡང་དག་དོན་སྟོན་གསུང་རབ་རྒྱ་མཚོའི་གཏེར། །དམ་པའི་ཆོས་ཀྱི་འཁོར་ལོར་ཕྱག་འཚལ་ལོ། །རྣམ་པར་གྲོལ་བའི་ལམ་གྱི་བདག་ཉིད་ཅན། །སྣ་ཚོགས་ཟབ་མོའི་ཤེས་རབ་མཛོད་འཆང་བ། །རྣམ་དག་ཚུལ་ཁྲིམས་གསེར་གྱི་ཁ་དོག་འཆང་། །ཚོགས་མཆོག་དགེ་འདུན་རྣམས་ལ་ཕྱག་འཚལ་ལོ། །མཆོག་གསུམ་ཀུན་འདུས་དཀྱིལ་འཁོར་ཡོངས་ཀྱི་གཙོ། །རིགས་ཀུན་ཁྱབ་བདག་སྟོན་པ་རྡོ་རྗེ་འཆང་། །དངོས་སྣང་དྲན་མཆོག་མཉམ་མེད་བཀའ་དྲིན་ཅན། །དཔལ་ལྡན་བླ་མ་རྣམས་ལ་ཕྱག་འཚལ་ལོ། །བྱ་སྤྱོད་རྣལ་འབྱོར་བླ་ན་མེད་པ་ཡི། །རྒྱུད་སྡེ་བཞིར་འབྲེལ་ཡི་དམ་ལྷ་རབ་འབྱམས། །ཞི་དང་ཁྲོ་བོའི་སྐུར་སྟོན་ལྷ་ཡི་ཚོགས། །ཞིང་གི་རྡུལ་སྙེད་རྣམས་ལ་ཕྱག་འཚལ་ལོ། །ཆོས་དབྱིངས་སྙིང་རྗེའི་ངང་ལས་རང་ཤར་བའི། །དམ་ཚིག་རྗེས་གཅོད་རྣལ་འབྱོར་བུ་བཞིན་སྐྱོང་། །སངས་རྒྱས་བསྟན་པ་སྲུང་བར་ཞལ་བཞེས་པའི། །ཆོས་སྐྱོང་རྒྱ་མཚོ་རྣམས་ལ་ཕྱག་འཚལ་ལོ། །བྱང་ཆུབ་ལམ་གྱི་འདྲེན་པ་ཁྱེད་རྣམས་ལ། །བདག་ལུས་བྱེ་བར་སྤྲུལ་ནས་ཕྱག་འཚལ་ཞིང་། །མཆོད་ཅིང་ཉེས་བཤགས་རྗེས་སུ་ཡི་རང་ངོ་། །བསྐུལ་ཞིང་གསོལ་འདེབས་དགེ་བ་རྫོགས་བྱང་བསྔོ། །ཀྱེ་མ། མ་རིག་དབང་གི་ཐོག་མེད་བསྐལ་པ་ནས། །སྲིད་པར་འཁྱམས་པའི་འཁོར་བའི་འཁྲུལ་འཁོར་གྱི། །ལས་དབང་དྲག་

[Full Size]

པོས་ཐར་མེད་རྣམ་སྨིན་བསགས། །གྲངས་མེད་ལུས་བླངས་འཇིག་རྟེན་ལྟོས་མཉམ་ཡང་། །དོན་ལྡན་དལ་འབྱོར་ཐོབ་པ་ལན་གཅིག་ཙམ། །སོ་ཐར་བྱང་སེམས་རིག་འཛིན་སྔགས་ཀྱི་སྡོམ། །སྐལ་པ་ལྡན་པའི་དཔྱིད་དུ་འགྱུར་བ་ནི། །བརྒྱ་ལམ་རེས་འགའ་ཉིན་མོའི་སྐར་མ་ཙམ། །འདི་ནི་སྔོན་བསགས་ལེགས་བྱས་ཆུ་ཡི་རྒྱུན། །གཅིག་ཏུ་སྨིན་པ་མ་དྲོས་ཀླུང་ཆེན་པོ། །ཚེ་འདིར་བགོ་སྐལ་རྙེད་འདི་ཡིད་བཞིན་གྱི། །ནོར་བུར་མཚུངས་འདི་ལྷག་པའི་བརྩོན་འགྲུས་ཀྱིས། །རྟག་ཏུ་བྱི་དོར་གཅེས་སྤྲས་བསྙེན་པར་བྱ། །ལུས་དང་ངག་ཡིད་བསྡོམས་ནས་སྔོན་བྱོན་གྱི། །རྒྱལ་བ་རྣམས་ཀྱི་རྣམ་ཐར་རྗེས་སུ་ནི། །བདག་གིས་བསྒྲུབ་པར་བགྱིད་དོ་སློབ་བགྱིའོ། །བཅོམ་ལྡན་ཐུབ་མཆོག་ཤཱཀྱའི་རྒྱལ་པོ་ཡི། །ཉན་ཐོས་འདུལ་ཁྲིམས་བསླབ་གཞི་ཉིས་བརྒྱ་དང་། །ལྔ་བཅུ་རྩ་གསུམ་ཁྲིམས་ཀྱི་གཞིར་གསུངས་པའི། །སྲོག་གཅོད་མ་བྱིན་ལེན་དང་འདོད་པ་སྤྱོད། །རྫུན་སྨྲ་དབྱེན་སྦྱོར་རྩ་བཞི་ཆང་དང་ལྔ། །ཉོན་མོངས་དབང་གིས་བག་མེད་གྱུར་པ་ཡི། །ཕམ་ལྷག་སྦོམ་པོ་ལྕི་ཡང་གཉིས་དང་ནི། །ལྟུང་བྱེད་སྡེ་དང་སོར་བཤགས་ཉེས་བྱས་ཀྱི། །ལྷག་མ་བཅུ་གསུམ་སྤང་ལྟུང་སུམ་ཅུ་སོགས། །སོ་ཐར་བསླབ་གཞིར་ནོངས་པ་ཅི་མཆིས་པ། །སྙིང་ནས་འགྱོད་པས་བཤགས་སོ་ཕྱིན་ཆད་བསྡོམས། །བྱང་ཆུབ་སེམས་ཀྱི་རང་བཞིན་བསླབ་པའི་གཞི། །དཀོན་མཆོག་གསུམ་དང་ཕ་མར་མ་གུས་དང་། །སེམས་ཅན་རྣམས་ལ་ཉེ་རིང་ཆགས་དང་སྡང་། །

[Full Size]

བརྣབ་སེམས་གནོད་སོགས་ལོག་པའི་སྦྱོར་བ་སོགས། །སྙིང་རྗེ་སེམས་བསྐྱེད་བྲལ་བའི་ལས་བསགས་རྣམས། །རབ་ཏུ་འགྱོད་པས་བཤགས་སོ་སྙིང་ནས་བསྡོམས། །གསང་བ་སྔགས་ཀྱི་དམ་ཚིག་ཉི་ཤུ་ལྔ། །རྒྱས་པར་ས་ཡ་འབུམ་སྡེ་ལ་སོགས་པ། །ཉམས་ཆག་རལ་དང་ལྟུང་བ་ཅི་མཆིས་པ། །གནོང་འགྱོད་དྲག་པོས་བཤགས་སོ་སྙིང་ནས་བསྡོམས། །དེ་ལྟར་སྒོ་གསུམ་ཉོན་མོངས་འདམ་དུ་བྱིངས། །རིག་དང་མ་རིག་འཁྲུལ་པས་བསླད་པ་ཡི། །ཁ་ན་མ་ཐོའི་སྡིག་དང་ཉེས་ལྟུང་གི། །རྣམ་པར་སྨིན་པའི་ལས་ངན་བསགས་པ་ཀུན། །མཁའ་ལྟར་དག་པའི་ཀློང་དུ་བཟོད་པར་གསོལ། །ཕྱིན་ཆད་མི་བགྱིད་དམ་བཅའ་བརྟན་པོར་བཟུང་། །སྒྲིབ་པར་མི་འགྱུར་དག་གཙང་དབུགས་དབྱུང་བའི། །བྱང་ཆུབ་འབྲས་བུ་སྨིན་པའི་དངོས་གྲུབ་སྩོལ། །ཚེ་འདིར་མི་མཐུན་རྒུད་པའི་ཚོགས་མཐའ་དག །ཉེ་བར་ཞི་ཞིང་ཆོས་མཐུན་བསམ་པ་འགྲུབ། །འཁོར་ལོ་གཉིས་ཀྱི་སྒྲུབ་ལ་དབང་འབྱོར་ནས། །ས་ལམ་དྲོད་རྟགས་མ་ལུས་མཐར་ཕྱིན་ཅིང་། །མཐོང་ཐོས་དྲན་ཀུན་གྲོལ་བའི་ནུས་ཐོབ་ཤོག །སྐྱེ་བ་ཀུན་ཏུ་མ་ནོར་ལམ་སྟོན་པའི། །ཐེག་ཆེན་དགེ་བའི་བཤེས་དང་མི་འབྲལ་ཞིང་། །ཐོས་བསམ་སྒྲུབ་པའི་རྒྱལ་མཚན་འཛིན་པ་དང་། །སྙིང་པོའི་བསྟན་ལ་བྱ་བ་བྱེད་ནུས་པའི། །དལ་ཐོབ་རིགས་བཟང་བློ་དང་ལྡན་པར་ཤོག །མདོར་ན་སེམས་ཅན་

[Full Size]

རྣམས་ནི་ཐམས་ཅད་པ། །ཀུན་གྱི་དཔལ་མགོན་རང་ཉིད་གྱུར་ནས་སུ། །བླ་མེད་ཡང་དག་མཆོག་གི་སར་བཀོད་པའི། །འགྲོ་དོན་འཕྲིན་ལས་ཐོགས་མེད་ལྷུན་གྲུབ་ཏུ། །སྤྱན་རས་གཟིགས་དང་མཚུངས་པར་བྱིན་གྱིས་རློབས། །རང་སྣང་དབང་འདུས་གཞན་སྣང་ཟིལ་གནོན་ཅིང་། །འགྲོ་སྒྲོལ་སྙིགས་མའི་གདུག་པ་ཀུན་འདུལ་ནས། །ཕྱམ་གཅིག་བདེ་བ་ཆེན་པོའི་སར་བཀོད་པའི། །པདྨ་འབྱུང་གནས་ལྟ་བུར་བྱིན་གྱིས་རློབས། །སངས་རྒྱས་བསྟན་ལ་གནོད་པའི་དུཥྚཾ་རྣམས། །ཚར་གཅོད་རྗེས་འཛིན་འཕྲིན་ལས་རྣམ་བཞི་ཡིས། །བསྟན་དང་བླ་མའི་ཞབས་ཏོག་བསྒྲུབ་ནུས་པ། །མ་ཧཱ་ཀཱ་ལ་ཇི་བཞིན་བྱིན་གྱིས་རློབས། །རང་རིག་གཉུག་མ་སྤྲོས་བྲལ་ངོ་བོ་ཉིད། །ཆོས་སྐུའི་གནས་ལུགས་ཇི་བཞིན་རྗེན་པར་མཐོང་། །འོད་གསལ་ཕྱག་རྒྱ་ཆེན་པོ་མངོན་གྱུར་ནས། །འཁོར་འདས་དབྱེར་མེད་རྟོགས་པར་བྱིན་གྱིས་རློབས། །དུས་གསུམ་སངས་རྒྱས་ཕྱོགས་བཅུའི་བྱང་སེམས་དང་། །བླ་མ་རིག་འཛིན་དཔའ་བོ་མཁའ་འགྲོའི་ཚོགས། །ཡེ་ཤེས་ཆོས་ཀྱི་སྲུང་མ་འཁོར་དང་བཅས། །རྡོ་རྗེའི་བཀའ་ཡི་བདེན་གྲུབ་ཐམས་ཅད་ཀྱིས། །དེང་འདིར་དཔང་གྱུར་ངེས་པར་ཉིད་འགྲུབ་མཛོད། །ཅེས་པ་ས་ཐམ་འོག་མིན་གླིང་གི་རྟོགས་ལྡན་ཀུན་སྤངས་པ་ཀརྨ་དབང་འཛིན་གྱིས་བསྐུལ་བ་ལྟར། སི་ཏུ་པདྨ་ཉིན་བྱེད་དབང་པོས་ཆུ་སྟོད་ཅན་གྱི་གྲལ་ཚེས་བཟང་པོར་སྤེལ། ཤུབྷཾ།། ༈ །།དཀོན་མཆོག་ཀུན་འདུས་དཔལ་ལྡན་ཀརྨ་པ། །

[Full Size]

རྒྱལ་བའི་དཀྱིལ་འཁོར་ཡོངས་སུ་རྫོགས་པའི་སྐུ། །གང་གི་ཚད་མེད་ཐུགས་རྗེའི་ཀློང་ཡངས་ནས། །བྱིན་རླབས་ཆུ་ཤེལ་དབང་པོ་ལས་བྱུང་བའི། །ཉོན་མོངས་གདུང་སེལ་འོད་དཀར་བདུད་རྩིའི་རྒྱུན། །ལོག་རྟོག་ཞུགས་ལྕེས་གཙེས་པའི་འགྲོ་རྣམས་ལ། །བདེ་ཆེན་སྣང་བའི་མྱུ་གུ་བསྐྱེད་པའི་ཕྱིར། །གསོལ་བ་འདེབས་སོ་དངོས་གྲུབ་ཆར་རྒྱུན་སྩོལ། །སྐྱེ་བ་འདི་ནས་བྱང་ཆུབ་སྙིང་པོའི་བར། །དལ་བརྒྱད་འབྱོར་བཅུ་ལྡན་པའི་ལུས་ཐོབ་ཅིང་། །སྙིང་པོའི་བསྟན་ལ་བྱ་བ་བྱེད་པ་དང་། །དཔལ་ལྡན་བླ་མའི་གོ་འཕང་མྱུར་ཐོབ་ཤོག །མི་རྟག་ངེས་འབྱུང་སྐྱོ་ཤས་དྲག་པོ་ཡིས། །བསྐུལ་བའི་སྒྲུབ་པ་སྙིང་པོར་དང་ལེན་ནས། །མཐར་ཕྱིན་གེགས་མེད་ཉིད་དུ་འགྲུབ་བགྱུར་ཏེ། །རང་བྱུང་རིག་པའི་ངོ་བོ་མཐོང་གྱུར་ཅིག །ཅེས་ཚ་ཀོ་བ་བསླབ་གསུམ་རྒྱན་ལྡན་དགེ་སློང་ཀརྨ་མཚན་བཟང་གིས་བསྐུལ་ངོར་སི་ཏུ་སྤྲུལ་སྐུས་སྤེལ་བ་ཛ་ཡནྟུ།། ༈ །།ཆོས་དབྱིངས་ལྷུན་གྲུབ་བདེ་ཆེན་ཞིང་ཁམས་སུ། །སྐུ་གསུམ་བླ་མ་དང་པོའི་སངས་རྒྱས་མཆོག །ཀུན་བཟང་པདྨ་འབྱུང་གནས་རིན་པོ་ཆེ། །མགོན་དེའི་ཐུགས་རྗེའི་ཆར་གྱིས་བྱིན་ཕོབ་ཅིག །རྒྱལ་དང་རྒྱལ་སྲས་གྱུར་རྣམས་གཤེགས་པའི་ཤུལ། །ཡེ་ཤེས་གཅིག་ཆར་སྨིན་པའི་དཔལ་མངའ་བ། །དམ་ཆོས་རྫོགས་པ་ཆེན་པོའི་གསང་ཆེན་ལམ། །བླ་མེད་ཐེག་པའི་གོ་འཕང་མྱུར་ཐོབ་པའི། །ཀུན་ཁྱབ་ཐོག་མའི་མགོན་དེས་ཚེ་རབས་སུ། །རྗེས་བཟུང་འོད་གསལ་རྡོ་རྗེ་སྙིང་པོ་ཡི། །

[Full Size]

རང་གཞན་རྒྱུད་བརླན་ཚེ་གཅིག་སྟན་ཐོག་འདིར། །འཇའ་ལུས་ཆོས་སྐུ་འགྲུབ་པར་བྱིན་གྱིས་རློབས། །ཅེས་བླ་མ་དམ་པ་པད་དཀར་ནས་མཎྜལ་དང་བཅས་བསྐུལ་བར་བརྟེན་སི་ཏུ་པས་སྤེལ།། ༈ །།བླ་མེད་མཆོག་གསུམ་ཐུགས་རྗེའི་འོད་སྟོང་གིས། །འགྲོ་བའི་ལས་ཉོན་མུན་པའི་དྲྭ་བ་རྣམས། །ཡེ་ཤེས་ཆེན་པོའི་གཟི་ཡིས་རྨེག་མེད་འཇོམས། །ཡང་དག་ལམ་གྱི་སྣང་བ་བསྟན་དུ་གསོལ། །ལྷ་བྲིས་པ་སྦྱིན་པར་སྤེལ།། ༈ །།རྗེ་བཀའ་དྲིན་གསུམ་ལྡན་རྡོ་རྗེ་འཆང་། །སྐྱབས་མཚུངས་མེད་བདེ་ཆེན་འཁོར་ལོའི་མགོན། །དཔལ་རིགས་ཀྱི་བདག་པོ་ཀརྨ་པ། །སྐྱེས་རབས་ཀྱི་ཕྲེང་བ་མུ་ཏིག་ཕྲེང་། །བྱོན་པ་དང་འབྱོན་འགྱུར་ཐམས་ཅད་ཀྱི། །གསང་བ་གསུམ་རྡོ་རྗེའི་མཁའ་ཀློང་ནས། །མཆོག་ཐུན་གྱི་དངོས་གྲུབ་ཆར་ལྟར་འབེབས། །དེང་གདུལ་བྱ་མོས་ལྡན་དད་པའི་ཞིང་། །བྱང་ཆུབ་ཀྱི་མྱུ་གུ་བསྐྱེད་པའི་ཕྱིར། །མོས་གུས་ཀྱི་ང་རོས་གསོལ་འདེབས་ན། །མགོན་ཐུགས་རྗེའི་ཆར་རྒྱུན་མྱུར་དུ་སྩོལ། །སྐུ་བཞི་ཡི་དབང་ཕྱུག་རྡོ་རྗེ་འཆང་། །ཟུང་འཇུག་གི་འབྲས་བུ་ཐོབ་བྱིན་རློབས། །ཅེས་དབུ་མཛད་ཕུན་ཚོགས་བཟང་གི་ངོར་སྤེལ་བའོ།། ༈ །།རྒྱལ་ཀུན་ཕྲིན་ལས་འདུས་པའི་སྐུ། །རིག་འཛིན་མི་གྱུར་རྡོ་རྗེ་ཅན། །དྲག་པོ་ནུས་ལྡན་རྩལ་མཆོག་ལ། །སྒོ་གསུམ་གསོལ་བ་འདེབས་བྱིན་རློབས། །ཕྱི་ནང་འགལ་རྐྱེན་བར་ཆད་ཞི། །མཐུན་རྐྱེན་གང་བསམ་འགྲུབ་པ་དང་། །བདག་དང་འགྲོ་དྲུག་སྲིད་མཚོ་ལས། །སྒྲོལ་ཏེ་རྣམ་མཁྱེན་ཡོངས་

[Full Size]

ཐོབ་ཤོག །ཨ་ཚོགས་ལ་སྤེལ།། ༈ །།མཆོག་གསུམ་ངོ་བོ་འདུས་པའི་དཔལ། །རྡོ་རྗེ་འཆང་དབང་ཐུགས་རྗེའི་འཕྲུལ། །བཀའ་དྲིན་མཉམ་མེད་འབྲུག་པའི་ཞབས། །གསོལ་འདེབས་བདག་རྒྱུད་སྨིན་གྲོལ་ཤོག །རྡོ་རྗེ་ལའོ།། ༈ །།བསྟན་སྲུང་ནག་པོ་ཡོངས་ཀྱི་དཔལ། །དྲག་ཤུལ་མི་བཟད་ཁྲོ་བོའི་སྐུ། །རྡོ་རྗེ་བེར་ཅན་ཟངས་གྲི་ཅན། །གང་དེས་སྐྱེ་ནས་སྐྱེ་བར་སྐྱོངས། །བསྟན་སྲུང་ངོར་སྤེལ།། ༈ །།དུས་གསུམ་ཀུན་མཁྱེན་ཨོ་རྒྱན་རྗེ། །མཆོག་དེར་གསོལ་འདེབས་ཚེ་རབས་སུ། །དཔལ་འབྱོར་དང་ལྡན་སྐུ་ལྔ་ཡི། །གོ་འཕང་མཆོག་ལ་རེག་གྱུར་ཅིག །དབོན་པདྨ་མགོན་ལ་སྤེལ།། ༈ །།རྒྱལ་བའི་ཐུགས་བསྐྱེད་རྨད་བྱུང་ལས། །འཁྲུངས་པའི་བཀའ་བརྒྱུད་རིན་ཆེན་ཕྲེང་། །རིམ་པར་བྱོན་ལ་གསོལ་བཏབ་མཐུས། །གང་འདིར་རྟག་པར་བྱང་ཆུབ་ཀྱི། །སེམས་མཆོག་ཡར་ཟླའི་ཆ་བཞིན་དུ། །གོང་འཕེལ་བྱིན་རློབས་གསང་སྔགས་ཀྱི། །དམ་ཚིག་རྣམ་པར་དག་པ་དང། །སོ་སོར་ཐར་པའི་འདུལ་ཁྲིམས་གཞི། །ཉམས་མེད་ཉེ་བ་འཁོར་ཇི་བཞིན། །སྡོམ་པ་གསུམ་གྱི་བསླབ་པ་རྣམས། །ནོངས་མེད་གོང་འཕེལ་བྱིན་རློབས་ཤིག །སྐྱེ་བ་ཀུན་ཏུ་ཀརྨ་པ། །རྣམ་ཀུན་འབྲལ་མེད་བསྙེན་གྱུར་ཅིག །དགེ་སློང་ཀརྨ་བློ་གྲོས་ངོར་སྤེལ།། ༈ །།བྱམས་མགོན་འཕགས་མཆོག་ལོ་ཀི་ཤྭ་ར་དང་། །མི་ཕྱེད་གངས་ཅན་མགོན་པོ་

[Full Size]

ཀརྨ་པ། །རྗེ་བཙུན་བདུད་འདུལ་རྡོ་རྗེར་གསོལ་བཏབ་མཐུས། །དེང་བཟུང་སྐྱེ་དང་སྐྱེ་བ་ཐམས་ཅད་དུ། །སྒྲུབ་བརྒྱུད་སྙིང་པོ་ཀཾ་ཚང་རིན་པོ་ཆེའི། །བསྟན་པའི་སྒོར་ཞུགས་སྒོ་གསུམ་ཆོས་སྤྱོད་ཅིང་། །དགེ་བའི་སེམས་ལྡན་ལྟ་སྤྱོད་ཡང་དག་ལྡན། །མཁའ་ཁྱབ་འགྲོ་འདྲེན་དེད་དཔོན་འགྱུར་བར་ཤོག །ནོར་རྒྱས་ངོར་སྤེལ།། ༈ །།མ་ཧཱ་བཛྲ་ཨཱ་ཙཱཪྱ། །པདྨ་ཀཱ་རའི་རྒྱལ་ཚབ་མཆོག །ཤྲཱི་ཙིཏྟ་བཛྲ་ལ། །མི་ཕྱེད་སྙིང་ནས་གསོལ་བཏབ་མཐུས། །འདི་ནས་བཟུང་སྟེ་བྱང་ཆེན་བར། །གང་དེའི་ཐུགས་རྗེའི་འོད་དཀར་གྱིས། །མ་རིག་ཉེས་ཚོགས་ཀུན་བསལ་ཞིང་། །མཐུན་རྐྱེན་ཀུནྡ་ལྟར་རྒྱས་ཤོག །སངས་རྒྱས་ངོར་སྤེལ།། ༈ །།འཕགས་མཆོག་འཇིག་རྟེན་དབང་ཕྱུག་སྤྱན་རས་གཟིགས། །རྒྱལ་ཀུན་ངོ་བོ་འཆི་མེད་པདྨ་འབྱུང་། །མཆོག་དངོས་གྲུབ་པ་ནག་པོ་སྤྱོད་པ་སོགས། །ཀུན་འདུས་རིགས་དཀྱིལ་བདག་པོར་གསོལ་བ་འདེབས། །ཆོས་ཀྱི་སྣང་བའི་འོད་ཟེར་འབུམ་ཕྲག་གིས། །ལུས་ཅན་སྲིད་པའི་སྒྲིབ་མུན་ཚོགས་བཅོམ་པ། །ཐར་པ་དོན་ལྡན་གེ་སར་རྒྱས་མཛད་ནས། །ཇི་སྙེད་སྐྱེ་འགྲོ་བྷྲ་མ་ར་ཡི་ཚོགས། །བྱང་ཆུབ་ཆེན་པོར་ལྷུན་གྱིས་གྲུབ་པ་ཡི། །མཧཱ་མུ་དྲའི་དོན་དམ་རྟོགས་གྱུར་ཏེ། །འཁོར་འདས་སྣང་སྲིད་ཆོས་ཀྱི་སྐུའི་རང་བཞིན། །དབྱེར་མེད་རང་བྱུང་རང་རིག་རང་གྲོལ་ཤོག །རྟ་མགྲིན་ནས་བསྐུལ་བཞིན་སྤེལ།། །།

[Full Size]

༈ ཞིང་འདིའི་སྟོན་མཆོག་རྣམ་འདྲེན་ཤཱཀྱའི་རྒྱལ། །ཆོས་ཀྱི་རྒྱལ་ཚབ་དམ་པ་མི་ཕམ་པ། །མ་འོངས་སངས་རྒྱས་སེང་གེ་ཀརྨ་པ། །དཔལ་ལྡན་འཇིགས་བྲལ་བདུད་འདུལ་རྡོ་རྗེར་འདུད། །འགྱུར་མེད་ཀཾ་ཚང་བསྟན་པའི་གསལ་བྱེད་ཆེ། །འཛིན་སྐྱོང་གཞན་ཕན་འོད་ཀྱིས་ཕྱོགས་བཅུར་ཁྱབ། །སེམས་དཔའ་རྣམས་ལས་ཐུགས་རྗེ་རྨད་བྱུང་བ། །རྣམ་གྲོལ་ཐར་པའི་དེད་དཔོན་ཁྱོད་ལ་འདུད། །འཆི་མེད་འགྲོ་མགོན་པདྨ་ཀཱ་ར་ཡིས། །མདོ་སྔགས་ཆོས་ཚུལ་ཉིན་མོར་བྱེད་ཇི་བཞིན། །ཕྲིན་ལས་སྣང་བས་སྲིད་པའི་མུན་སེལ་བ། །ཚངས་དང་དབང་པོའི་སྡེ་བཅས་ཕྱག་གི་གནས། །དེ་ལྟར་འགྲོ་བའི་སྐྱབས་གཅིག་འཕགས་པ་མཆོག །པད་དཀར་འཆང་བ་འཇིག་རྟེན་དབང་ཁྱོད་ལ། །བདག་སོགས་མཁའ་མཉམ་སེམས་ཅན་ཐམས་ཅད་ཀྱིས། །མི་ཕྱེད་སྙིང་ནས་རྩེ་གཅིག་གསོལ་བཏབ་མཐུས། །དེང་ནས་བཟུང་སྟེ་བྱང་ཆུབ་སྙིང་པོའི་བར། །མགོན་པོ་ཁྱོད་ཀྱིས་རྟག་པར་རྗེས་བཟུང་ནས། །མཆོག་གི་དངོས་གྲུབ་མ་ཧཱ་མུ་དྲ་ཡི། །ཚེ་གཅིག་རྡོ་རྗེ་འཆང་དབང་འགྲུབ་གྱུར་ཅིག །ཅེས་ནང་ཆེན་རྒྱལ་པོའི་བཀའ་ཡི་བློན་པོ་གུ་རུ་བསྟན་སྐྱོང་གི་དགོངས་བཞེད་སྐོང་བའི་ཕྱིར། པདྨ་ཉིན་བྱེད་དབང་པོས་འོག་མིན་གཉིས་པ་མཚུར་ཕུ་ནས་བྲིས་པའོ། །སརྦ་མངྒ་ལཾ།། ༈ །།ཆོས་དབྱིངས་སྤྲོས་བྲལ་བདེ་བ་ཆེན་པོའི་ཀློང་། །རང་བཞིན་ལྷུན་གྲུབ་ཡེ་ཤེས་ལྔ་དང་ལྡན། །སྣ་ཚོགས་དེར་སྣང་སྒྱུ་འཕྲུལ་རོལ་པའི་གར། །

[Full Size]

སྐུ་གསུམ་བདག་ཉིད་པད་འབྱུང་ཞབས་ལ་འདུད། །དེང་བཟུང་བྱང་ཆུབ་སྙིང་པོར་མཆིས་ཀྱི་བར། །མ་ནོར་བླ་མས་རྗེས་བཟུང་ཆོས་སྤྱོད་བཅུ། །འཁོར་ལོ་གཉིས་དང་ཚུལ་གནས་ཐོས་བསམ་སྒོམ། །བསྡུ་བཞིའི་དོན་གཉིས་མཐར་ཕྱིན་བྱིན་གྱིས་རློབས། །སྒོ་གསུམ་གཞོམ་བྲལ་འཆི་མེད་རྡོ་རྗེའི་ཚེ། །མི་འགྱུར་གཡུང་དྲུང་ངོ་བོར་ཡོངས་གྲུབ་ཅིང་། །གཉིས་འཛིན་འཁྲུལ་པས་བསླད་པའི་བདུད་བཞིའི་དཔུང་། །ལོག་ཕྱོགས་གཡུལ་ལས་རྣམ་རྒྱལ་བྱིན་གྱིས་རློབས། །ཐེག་གསུམ་མཐར་ཐུག་ངེས་དོན་སྙིང་པོའི་བསྟན། །མཐའ་ཀླས་སྤེལ་མའི་ཕྲིན་ལས་ཀུན་ཁྱབ་ཅིང་། །ལྷན་སྐྱེས་ཡེ་ཤེས་སྒྲིབ་བྲལ་མངོན་གྱུར་ནས། །རྡོ་རྗེ་འཆང་དབང་གོ་འཕང་ཐོབ་གྱུར་ཅིག །ཅེས་ལྡིང་པོ་ཆེའི་ཞབས་དྲུང་མཆོག་གིས་བཞེད་ལྟར་ཕུལ་བའོ།། ༈ །།ཀུན་ཏུ་བཟང་པོ་རྡོ་རྗེ་སེམས་དཔའ་དང་། །ཕྱག་ན་རྡོ་རྗེ་ཁྱུང་ཆེན་མེ་ཕྲེང་རྩལ། །པདྨ་འབྱུང་གནས་ཡེ་ཤེས་མཚོ་རྒྱལ་ལ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །ཁྲི་སྲོང་ལྡེའུ་བཙན་རྡོ་རྗེ་དྲག་པོ་རྩལ། །བཀའ་བབས་ཆོས་བདག་བརྒྱུད་པའི་རིག་འཛིན་ཚོགས། །བཀའ་དྲིན་མཚུངས་མེད་རྩ་བའི་བླ་མ་ལ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །སྣོད་བཅུད་ཐ་མལ་འཛིན་པ་དབྱིངས་སུ་དག །ཅིར་སྣང་ཅི་ཤར་ཆོས་སྐུའི་རང་བཞིན་རྟོགས། །ཁྱུང་ཆེན་མེ་ཕྲེང་གོ་འཕང་

[Full Size]

མྱུར་ཐོབ་ཤོག །ཅེས་པ་འདི་དགོངས་གཏེར་ཁྱུང་ནག་གི་བརྒྱུད་པའི་གསོལ་འདེབས་སུ་ཀརྨ་བཀའ་བརྒྱུད་ཕྲིན་ལས་རྣམ་རྒྱལ་རྒྱས་པའི་སྡེས་བཀའ་ཡི་གནང་བ་ལྟར་སི་ཏུ་པས་སྤེལ་བ་དགེ།། ༈ །།སྙིང་རྗེའི་རང་གཟུགས་སྤྱན་རས་གཟིགས། །གང་འདིར་སྙིགས་མའི་འགྲོ་ཚོགས་རྣམས། །བྱམས་པའི་ལྕགས་ཀྱུས་ཡོངས་བཟུང་ནས། །ཐར་ལམ་ཞིང་དེར་འདོང་བར་མཛོད།། ༈ །།ཟུང་འཇུག་བདེ་ཆེན་མཆོག་གི་ཕོ་བྲང་ནས། །བདེ་བར་གཤེགས་པ་ཀུན་གྱི་སྤྱི་གཟུགས་དཔལ། །སྲིད་དང་ཞི་བ་ཡོངས་ཀྱི་གཉེན་གཅིག་པུ། །རིག་འཛིན་ཤྲཱི་ཙིཏྟ་བཛྲ་ཞབས། །རྡོ་རྗེ་སློབ་དཔོན་ཆེན་པོར་གསོལ་བཏབ་མཐུས། །སྐྱེ་ཀུན་དྲི་མེད་བསྟན་པའི་སྙིང་པོར་ཞུགས། །ས་དང་ལམ་གྱི་ཡོན་ཏན་ཡོངས་རྫོགས་ནས། །ཀུན་ཏུ་བཟང་པོའི་གོ་འཕང་མྱུར་ཐོབ་ཤོག །ཅེས་པའང་སྐྱབས་མགོན་དམ་པའི་གསོལ་འདེབས་རྒྱུར་ཀུན་དགའ་ཕྲིན་ལས་ངོར་སྤེལ།། ༈ །།མཆོག་གསུམ་བླ་མེད་ཀུན་འདུས་པ། །བཅོམ་ལྡན་འོད་སྣང་མཐའ་ཡས་ལ། །ཕྱག་འཚལ་གསོལ་འདེབས་སྒྲིབ་གཉིས་ཀྱི། །མུན་པའི་དྲྭ་བ་གཅོད་པ་དང་། །ཡེ་ཤེས་སྣང་བ་གསལ་བ་ཡི། །ཐུགས་རྗེའི་ཉི་འོད་བརྡལ་བར་མཛད། །བདག་ནི་ལུས་རྟེན་བོར་མ་ཐག །བདེ་ཆེན་ཞིང་བགྲོད་སངས་རྒྱས་ཤོག །གུར་དྲག་ངོར་སྤེལ།། ༈ །།སྐྱབས་མཚུངས་མེད་བཀའ་བརྒྱུད་རིན་པོ་ཆེ། །ཕྲེང་རིམ་བྱོན་གྲུ་འཛིན་བདག་པོ་མཆོག །བཅུ་གསུམ་པ་བདུད་འདུལ་རྡོ་རྗེ་དང་། །

[Full Size]

ཚེ་འོད་སྣང་མཐའ་ཡས་སྒྱུ་འཕྲུལ་ལས། །སྐྱེས་རབས་ཀྱི་ཕྲེང་བ་བཅུ་པ་མཆོག །དཔལ་མི་ཕམ་ཆོས་གྲུབ་རྒྱ་མཚོ་ལ། །བདག་གསོལ་བ་སྙིང་གི་དཀྱིལ་ནས་འདེབས། །མགོན་བྱིན་རླབས་ཐུགས་ཀྱི་ཀློང་ནས་སྩོལ། །དུས་འདི་ནས་བཟུང་སྟེ་བྱང་ཆུབ་བར། །རྗེ་འཁོར་ལོའི་མགོན་པོས་རྗེས་བཟུང་ནས། །བླ་མེད་ཀྱི་གོ་འཕང་མྱུར་ཐོབ་པའི། །སྐྱབས་བསླུ་བ་མེད་པས་བྱིན་རློབས་ཤིག །མགོན་ཐུགས་རྗེ་ཆེན་པོས་བྱིན་རློབས་ཤིག །ཁམས་སྨྱོན་དབོན་པོ་དགེ་ལེགས་ནས་བསྐུལ་ལྟར་སི་ཏུས་སྤེལ།། ༈ །།འཇམ་དཔལ་དབྱངས་ཀྱི་སྒྱུ་འཕྲུལ་ཆོས་ཀྱི་རྒྱལ། །མངའ་བདག་ཚངས་པ་ལྷ་ཡི་མེ་ཏོག་དང་། །གཉིས་སུ་མེད་པའི་ཡོན་ཏན་རབ་བརྗིད་པ། །ངེས་གསང་དྲི་མེད་སྙིང་པོའི་སྟོན་པ་སྟེ། །འཁོར་ལོའི་མགོན་པོ་ཐུགས་ཀྱི་རྡོ་རྗེའི་ཞབས། །གང་གི་ཐུགས་རྗེའི་འོད་སྟོང་ལ་བརྟེན་ནས། །སྲིད་པའི་མུན་སྟུག་དྲྭ་བ་འགོག་བྱེད་པ། །པདྨ་ཉིན་མོར་བྱེད་པའི་དབང་པོ་སོགས། །བཀའ་བརྒྱུད་ནོར་བུའི་ཕྲེང་བ་ཐམས་ཅད་ལ། །གསོལ་འདེབས་བདག་རྒྱུད་སྨིན་པར་བྱིན་གྱིས་རློབས། །རང་བྱུང་ཡེ་ཤེས་ཆེན་པོའི་དོན་རྟོགས་ནས། །སྐུ་བཞིའི་གོ་འཕང་མྱུར་བ་ཉིད་ཐོབ་ཤོག །ཅེས་དབོན་མི་ཕམ་ལྷ་ཡི་དགོངས་བཞེད་ལྟར། སི་ཏུ་སྤྲུལ་སྐུས་སྤེལ།། ༈ །།ཕྱོགས་བཅུའི་ཞིང་བཞུགས་འཕགས་རྣམས་ཀྱི། །ཐུགས་རྗེའི་གོང་བུ་གཅིག་བསྡུས་པ། །དཀྱིལ་འཁོར་ཀུན་བདག་སྟོན་མཆོག་ལ། །གསོལ་འདེབས་བྱིན་གྱིས་

[Full Size]

བརླབ་ཏུ་གསོལ། །ཅེས་ཀརྨ་བདེ་ཆེན་ངོར་སྤེལ།། ༈ །།རིག་འཛིན་པདྨ་ཀཱ་རའི་ཐུགས་རྗེའི་འཕྲུལ། །སྒྲུབ་བརྒྱུད་བསྟན་པའི་རྒྱལ་མཚན་ཡོངས་ཀྱི་རྒྱལ། །འགྲོ་བ་ཐར་ལམ་སྟོན་པའི་མངའ་བདག་མཆོག །རྡོ་རྗེ་དྲག་པོའི་ཞབས་ལ་ཕྱག་འཚལ་ལོ། །དེང་བཟུང་བྱང་ཆུབ་ཐོབ་པར་མ་གྱུར་བར། །འབྲལ་མེད་གུས་པས་རབ་མཆོད་རིམ་གཉིས་ཀྱི། །འབྲས་སྨིན་བསམ་དོན་གེགས་མེད་ལྷུན་གྲུབ་ཅིང་། །སྐུ་བཞིའི་གོ་འཕང་ཐོབ་པར་བྱིན་གྱིས་རློབས། །ཅེས་ཀར་བརྒྱུད་ཆོས་འཕེལ་ངོར་སྤེལ།། ༈ །།དུས་གསུམ་རྒྱལ་བའི་ཐུགས་རྗེའི་ཀློང་ཡངས་ནས། །སྤྲུལ་པའི་སྒྱུ་འཕྲུལ་འོད་སྟོང་ཕྲིན་ལས་ཅན། །གྲུབ་པའི་རྒྱན་གཅིག་སྨྲྀ་ཏི་ཛྙཱ་ན་ལ། །གསོལ་བ་འདེབས་སོ་དོན་གཉིས་ལྷུན་གྲུབ་ཤོག །ལེགས་པའི་ངོར་སྨྲས།། ༈ །།རྒྱལ་མཆོག་པདྨ་འབྱུང་དང་དབྱེར་མེད་པ། །རིགས་དང་དཀྱིལ་འཁོར་ཁྱབ་བདག་དམ་པའི་མགོན། །ཀརྨ་བཀའ་བརྒྱུད་ཕྲིན་ལས་རྣམ་རྒྱལ་གྱིས། །སྐྱེ་ཀུན་རྗེས་སུ་འཛིན་པར་མཛད་དུ་གསོལ། །ཅེས་ཀརྨ་ཤེས་རབ་ངོར་སྤེལ།། ༈ །།རྒྱལ་མཆོག་པད་དཀར་འཆང་བ་པོ། །རྒྱལ་དབང་བདུད་འདུལ་རྡོ་རྗེའི་ཞབས། །རྒྱལ་ཡུམ་རྡོ་རྗེ་རྣལ་འབྱོར་མ། །རྒྱལ་བསྟན་སྐྱོང་བའི་ནག་པོ་ཆེ། །བླ་མེད་དཀོན་མཆོག་རྩ་གསུམ་ལ། །བླ་མེད་གདུང་བས་གསོལ་བ་འདེབས། །བླ་མེད་གོ་འཕང་མྱུར་ཐོབ་ཀྱི། །བླ་མེད་ཐུགས་རྗེས་རྟག་ཏུ་སྐྱོངས། །ཞེས་པ་ཆོས་བཟང་ངོར་སྤེལ།། །།

[Full Size]

༈ རྩ་གསུམ་འདུས་པ་འཆི་མེད་པདྨ་འབྱུང་། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །ཚེ་དཔལ་ལྷུན་གྱིས་གྲུབ་པའི་དགེ་ལེགས་དང་། །རིམ་གཉིས་བརྟན་པ་ཐོབ་པར་བྱིན་གྱིན་རློབས། །ནམ་ཞིག་སྒྱུ་ལུས་འཇིག་ལ་ཐུག་པའི་ཚེ། །ཨོ་རྒྱན་སྣང་མཐའ་ཡས་པའི་སྨོན་ལམ་མཐུས། །དག་པ་མཁའ་སྤྱོད་པདྨ་འོད་ཞིང་དུ། །རིག་འཛིན་རྒྱལ་བའི་སྲས་སུ་དབང་ཐོབ་ནས། །སྐུ་དང་ཞིང་ཁམས་ཡོན་ཏན་ཇི་སྙེད་པ། །དབང་འབྱོར་གདོད་མའི་སངས་རྒྱས་མངོན་གྱུར་ཤོག །ཅེས་རྡོ་བྲག་སྔགས་ཆུང་ངོར་སྤེལ།། ༈ །།དཔལ་ལྡན་འཁོར་ལོ་སྡོམ་པའི་གསུང་གི་གནས། །ས་སྤྱོད་ཀརྨའི་ཞིང་མཆོག་དམ་པ་ནས། །དུས་མཁྱེན་འགྲོ་མགོན་བཀའ་བརྒྱུད་བླ་མའི་ཚོགས། །ཡི་དམ་ལྷ་དང་དཔའ་བོ་ཌཱ་ཀི་དང་། །ཆོས་སྐྱོང་རྒྱ་མཚོ་སྤྲིན་ལྟར་འདུ་བའི་ཞིང་། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །འདི་དང་ཕྱི་མའི་དུས་དང་གནས་སྐབས་སུ། །ཆོས་ལྡན་བསམ་པ་ལྷུན་གྱིས་འགྲུབ་པར་ཤོག །ཀརྨའི་མགོན་ཁང་བའི་ངོར་སྤེལ།། ༈ །།དུས་གསུམ་རྒྱལ་ཀུན་འདུས་པའི་སྐུ། །ཨོ་རྒྱན་ཆེན་པོར་གསོལ་བ་འདེབས། །ཚེ་དཔལ་བསམ་པ་ལྷུན་འགྲུབ་ཅིང་། །མཐར་ཐུག་སྐུ་བཞི་མཆོག་ཐོབ་ཤོག །༈ ། །རིགས་ཀུན་གཙོ་བོ་དྲུག་པ་རྡོ་རྗེ་འཆང་། །ཏཻ་ལོ་ནཱ་རོ་མར་མི་དྭགས་པོའི་ཞབས། །དུས་གསུམ་མཁྱེན་སོགས་བཀའ་བརྒྱུད་རིན་པོ་ཆེ། །མཉམ་མེད་སྐྱེས་མཆོག་སྤྲུལ་

[Full Size]

པའི་བརྒྱུད་འཛིན་ཅིང་། །གསང་སྔགས་སྟོན་པ་རྩ་བའི་བླ་མའི་བར། །ཡེ་ཤེས་མངོན་གྱུར་སྨིན་གྲོལ་གདམས་པའི་གཏེར། །སྐྱབས་མེད་སྐྱབས་གྱུར་རྡོ་རྗེ་སློབ་དཔོན་མཆོག །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ལྷན་སྐྱེས་བརྗོད་པ་བྲལ་བའི་ཕྱག་རྒྱ་ཆེ། །དོན་དམ་འགྱུར་མེད་གདོད་ནས་ཡོངས་གྲུབ་པའི། །གནས་ལུགས་གཤིས་ཀྱི་དེ་བཞིན་ཉིད་ངོ་བོ། །རང་རིག་ཆོས་སྐུ་མངོན་གྱུར་བྱིན་གྱིས་རློབས། །གནས་སྐབས་འགལ་རྐྱེན་ཕྱི་ནང་ཉེར་འཚེ་ཞི། །ཆོས་མཐུན་བསམ་པ་ལྷུན་གྱིས་གྲུབ་པ་དང་། །བསྐྱེད་རྫོགས་ཟུང་འཇུག་མཐར་ཕྱིན་བླ་མེད་ཀྱི། །བྱང་ཆུབ་ཆེན་པོར་རྫོགས་སངས་རྒྱས་ཐོབ་ཤོག །ཅེས་འབོ་བདེ་ལེགས་ངོར་སྤེལ།། ༈ །།དཔ༵ལ་ལྡ༵ན་མཉམ་མེད་དྭགས་པོ་བཀའ་བརྒྱུད་ཀྱི། །འགྱུ༵ར་མེ༵ད་བསྟ༵ན་པ་འཛི༵ན་ལ་མངའ་བརྙེས་པའི། །ཕྱོ༵གས་རྣམས་ཀུན་ལ༵ས་རྣ༵མ་པར་གྲོ༵ལ་བ་ཡི། །པ༵དྨ༵་ཉི༵ན་མོར་བྱེ༵ད་བཞིན་ཕན་བདེའི་གཞི། །ཚངས་དང་དབ༵ང་པོ༵འི་སྡེ༵་ཀུན་གུས་བཏུད་པའི། །བདུད་འདུལ་རྡོ་རྗེའི་ཞབས་ལ་གསོལ་བ་འདེབས། །བསམ་དོན་འགྲུབ་ཅིང་ཚེ་དང་ཡེ་ཤེས་རྒྱས། །དོན་གཉིས་མཐར་ཕྱིན་བླ་མེད་སངས་རྒྱས་ཤོག །དྲུང་རམ་པའི་སྤྲུལ་སྐུ་གང་དེའི་བཞེད་ལྟར་སྤེལ།། ༈ །།དཔག་ཡས་ཚེ་ལ་དབང་བསྒྱུར་བཅོམ་ལྡན་འདས། །དཔག་མེད་ཚེ་ཡི་མཆོག་སྩོལ་རྣམ་པར་རྒྱལ། །དཔག་བསམ་ཚེ་ཡི་ནོར་སྦྱིན་སྒྲོལ་མ་ཡུམ། །

[Full Size]

གསོལ་འདེབས་ཚེ་དབང་ཡེ་ཤེས་དངོས་ཀུན་སྩོལ། །ཨ་འཕགས་ངོར་སྤེལ།། ༈ །།རྒྱལ་བ་ཀུན་གྱི་སྤྱི་གཟུགས་རིགས་འདུས་དཔལ། །ཨོ་རྒྱན་ཆེན་པོ་པདྨ་འབྱུང་གནས་མཆོག །ཆོས་དབྱིངས་ཡེ་ཤེས་ངང་ནས་བརྩེར་དགོངས་ལ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །བདག་རྒྱུད་ཉོན་མོངས་སྒྲིབ་པའི་བག་ཆགས་རྣམས། །གང་ཤར་ཐམས་ཅད་གཞི་མེད་རྩ་བྲལ་དུ། །རང་བྱུང་གདོད་མའི་གནས་ལུགས་གཤིས་ཀྱི་ངང་། །ལྷུན་གྲུབ་སྣང་བའི་རང་བཞིན་མངོན་གྱུར་ཤོག །ཅེས་པ་སྔགས་འཆང་བུ་ལུག་ལའོ།། ༈ །།རིགས་རྣམས་ཁྱབ་བདག་དྲུག་པ་རྡོ་རྗེ་འཆང་། །བློ་གྲོས་རིན་ཆེན་བྲམ་ཟེ་ཆེན་པོ་དང་། །ནཱ་ག་རྫུ་ན་ཤ་ཝ་རི་པའི་ཞབས། །མཻ་ཏྲི་ལྷོ་བྲག་མི་ལ་སྒམ་པོ་པ། །དུས་མཁྱེན་འགྲོ་མགོན་ལ་སོགས་བཀའ་བརྒྱུད་ཀྱི། །ཟུང་འཇུག་ཕྱག་རྒྱ་ཆེ་བརྙེས་གསེར་གྱི་ཕྲེང་། །རིམ་པར་བྱོན་པ་རྣམས་ལ་གསོལ་བ་འདེབས། །མཆོག་གི་དངོས་གྲུབ་འགྱུར་མེད་ཡེ་ཤེས་ཀྱི། །ལྷན་ཅིག་སྐྱེས་པ་བདེ་བ་ཆེན་པོའི་ཁམས། །རང་བྱུང་རང་གསལ་ལྷུན་གྲུབ་ཆོས་ཀྱི་སྐུ། །དོན་དམ་ནམ་མཁའི་རྡོ་རྗེའི་ངོ་བོ་ཉིད། །བདག་རྒྱུད་སྟན་ཐོག་འདི་རུ་ཐོབ་བྱིན་རློབས། །སྐྱེ་བ་ཀུན་ཏུ་ཡང་དག་སོགས་ཀྱང་བརྗོད། ཅེས་པའང་དྲུང་རམ་གྲྭ་ལྔའི་ངོར་སྤེལ།། ༈ །།གྲངས་མེད་ཐུགས་བསྐྱེད་རྒྱ་མཚོའི་འཇུག་ངོགས་ལས། །

[Full Size]

ཕ་མཐར་བརྒལ་བའི་སྙིང་རྗེའི་རང་གཟུགས་མགོན། །འཕགས་ཆེན་ཕྱག་ན་པདྨོའི་རྣམ་པར་རོལ། །རྒྱལ་དབང་བདུད་འདུལ་རྡོ་རྗེར་གསོལ་བ་འདེབས། །གང་སྐུ་མཐོང་བའི་སྐལ་བ་དམན་ལགས་ཀྱང་། །མོས་གུས་ཤུགས་འབྱུང་སྒོ་གསུམ་དད་པ་ཡིས། །བསྐུལ་དང་ལྷན་ཅིག་རང་སེམས་གདོད་མའི་མགོན། །དབྱེར་མེད་རྩ་བའི་བླ་མར་གསོལ་བ་འདེབས། །མཆོག་གི་སྐུ་གསུམ་ཡེ་ཤེས་རྡོ་རྗེ་ཡི། །བྱིན་རླབས་འཕོ་བའི་ཡེ་ཤེས་དབང་བསྐུར་སྩོལ། །བདག་རྒྱུད་སྒྲིབ་གཉིས་དུག་ལྔ་རང་སར་ཞི། །རྣམ་དག་སྡོམ་གསུམ་དྲི་མེད་ཉིད་གྱུར་ཅིག །སྐྱེ་དང་སྐྱེ་བར་ལོག་འཚོའི་ལམ་འགོག་ཅིང་། །རྒྱལ་བསྟན་སྒོར་ཞུགས་མ་ནོར་དམ་པ་ཡིས། །རྗེས་འཛིན་བླ་མེད་ངེས་བའི་ཡང་བཅུད་ཀྱི། །སྙིང་པོ་ལྷན་སྐྱེས་བདེ་ཆེན་མངོན་གྱུར་ཤོག །ཅེས་པ་ཀརྨ་ཆོས་འགྲུབ་ངོར་སྤེལ།། ༈ །།རྒྱལ་རྣམས་ཐུགས་བསྐྱེད་གོང་བུ་གཅིག་བསྡུས་པ། །གངས་ཅན་མགོན་དངོས་བདུད་འདུལ་རྡོ་རྗེ་འཆང་། །འཆི་མེད་པདྨའི་སྒྱུ་འཕྲུལ་རོལ་པའི་གར། །དཔལ་ལྡན་ཐུགས་ཀྱི་རྡོ་རྗེ་ལ་ཕྱག་འཚལ། །སི་ཏུའི་མཚན་གྱིས་བརྗིད་པའི་ཚུལ་ཆོས་དང་། །ཐབས་རྣམས་དུ་མས་གདུལ་བྱའི་མཆོད་འོས་གནས། །པདྨ་ཉིན་བྱེད་དབང་ལའང་ཅུང་ཟད་བསྔགས། །གང་འདུལ་དེར་སྣང་བཀོད་པས་འབྲེལ་ཚད་རྣམས། །བདེ་ཆེན་གོ་འཕང་སྦྱིན་པའི་རྗེ་བཙུན་མཆོག །ཆོས་སྐྱོང་འགྱུར་མེད་ཞབས་ལ་གུས་

[Full Size]

གསོལ་འདེབས། །དེ་ལྟར་རྩ་བརྒྱུད་བླ་མར་གསོལ་བཏབ་མཐུས། །ལྷན་སྐྱེས་ཡེ་ཤེས་ཆོས་སྐུའི་རང་རིག་པ། །ཇི་བཞིན་མ་ནོར་མངོན་དུ་རྟོགས་གྱུར་ནས། །སྐུ་བཞིའི་རྒྱལ་ས་ཆེན་པོར་དབང་འབྱོར་ཤོག །ཅེས་ཁྲོ་རུ་སྤྲུལ་སྐུའི་ངོར་སྤེལ།། ༈ །།བདེ་ཆེན་ཞིང་མཆོག་སྟོན་པ་ཚེ་མཐའ་ཡས། །འོད་ཀྱི་སྣང་བ་དཔག་མེད་རྒྱལ་པོ་དང་། །གསང་ཡེ་ཡུམ་མཆོག་དཀྱིལ་འཁོར་ལྷ་ཚོགས་ལ། །གསོལ་འདེབས་རྡོ་རྗེའ་ིཚེ་དང་ཡེ་ཤེས་སྩོལ། །དཔལ་རི་པདྨ་འོད་ཀྱི་གཞལ་ཡས་ན། །འཆི་མེད་རིག་འཛིན་ཨོ་རྒྱན་ཆེན་པོ་དང་། །མནྡཱ་ར་བ་ཡེ་ཤེས་མཚོ་རྒྱལ་ལ། །གསོལ་འདེབས་རྡོ་རྗེའི་ཚེ་དང་ཡེ་ཤེས་སྩོལ། །མངའ་བདག་རྒྱལ་སྲས་མུ་ཁྲི་བཙན་པོ་དང་། །ཟབ་གཏེར་མངའ་བདག་མི་འགྱུར་རྡོ་རྗེ་ཅན། །དྲག་པོ་ནུས་ལྡན་ཀརྨ་ཀུན་མཁྱེན་ལ། །གསོལ་འདེབས་རྡོ་རྗེའི་ཚེ་དང་ཡེ་ཤེས་སྩོལ། །རིགས་ཀུན་ཁྱབ་བདག་ཆོས་ཀྱི་འབྱུང་གནས་ཞབས། །ཀརྨ་དམ་ཚིག་བཀའ་བབས་ཆོས་ཀྱི་བདག །དྲིན་ཆེན་རྩ་བའི་བླ་མ་བརྒྱུད་བཅས་ལ། །གསོལ་འདེབས་རྡོ་རྗེའི་ཚེ་དང་ཡེ་ཤེས་སྩོལ། །གནས་གསུམ་དཔའ་བོ་མཁའ་འགྲོ་རྒྱ་མཚོ་དང་། །ཡེ་ཤེས་འཇིག་རྟེན་ལས་གྲུབ་ཆོས་སྲུང་མར། གསོལ་བ་འདེབས་སོ་ལས་བཞིའི་ཕྲིན་ལས་སྒྲུབས། །ཚེ་ཡི་བར་ཆད་ཞི་བར་མཛད་དུ་གསོལ། །མདོར་ན་ཕྱོགས་དུས་རྒྱལ་བའི་དཀྱིལ་འཁོར་ཡང་། །དབྱེར་མེད་འདུས་པ་ཀུན་ཏུ་ཁྱབ་པའི་ཀློང་། །

[Full Size]

གདོད་ནས་ཡེ་གྲུབ་རང་བྱུང་བདེ་བ་ཆེར། །གསོལ་བ་འདེབས་སོ་སྨིན་གྲོལ་བྱིན་ཆེན་ཕོབ། །དེ་ལྟར་གསོལ་བ་བཏབ་པའི་ཐུགས་རྗེ་ཡིས། །བསམ་པ་ལྷུན་གྲུབ་ཆོས་འཕེལ་ཚེ་དཔལ་རྒྱས། །མཆོག་དངོས་གོ་འཕང་བདེ་བླག་ཉིད་འགྲུབ་ནས། །མི་ཤིགས་རྡོ་རྗེའི་ཚེ་ལ་དབང་ཐོབ་ཤོག །ཅེས་པའང་གནས་མདོ་བླ་མ་ཟབ་ཡངས་ཀྱིས་བསྐུལ་ངོར་སྤེལ།། ༈ །།སྐྱེ་མེད་བརྗོད་བྲལ་ཆོས་དབྱིངས་ཡེ་ཤེས་ཀྱི། །གནས་ལུགས་མངོན་གྱུར་རང་བྱུང་བདེ་བ་ཆེའི། །གར་རོལ་ཆུ་ཟླའི་གཟུགས་སྐུར་སྟོན་པ་ཡི། །བཀའ་བརྒྱུད་བླ་མ་རྣམས་ལ་གསོལ་བ་འདེབས། །དེང་བཟུང་སྙིང་པོ་བླ་མེད་བྱང་ཆུབ་བར། །སྐྱབས་གནས་མཐར་ཐུག་དཀོན་མཆོག་རྣམ་གསུམ་གྱིས། །རྗེས་འཛིན་མི་ཕྱེད་དད་གསུམ་རྣམ་དག་གིས། །རྒྱུད་བསྐུལ་སྡོམ་གསུམ་རྩ་བ་རབ་བརྟན་ཤོག །དུས་གསུམ་རྒྱལ་ཀུན་དགོངས་དྲིལ་ངེས་པའི་དོན། །ཟབ་ལམ་ཕྱག་རྒྱ་ཆེན་པོའི་གདམས་པའི་བཅུད། །ངེས་འབྱུང་སྐྱོ་ཤས་དྲག་པོས་བསྐུལ་ནས་སུ། །བདག་རྒྱུད་སྨིན་པར་བྱེད་པའི་དཔལ་ཐོབ་ཤོག །གསང་བ་ཆེན་པོ་རྡོ་རྗེ་ཐེག་མཆོག་གི། །ཡང་སྙིང་དོན་དམ་བླ་ན་མེད་གྱུར་པ། །བསྐྱེད་རྫོགས་རིམ་གཉིས་མཐའ་རུ་ཕྱིན་གྱུར་ནས། །སྐུ་ལྔའི་བདག་ཉིད་ཆེན་པོར་མངོན་འགྱུར་ཤོག །དེ་ལྟར་སྨོན་ལམ་བདེན་ཚིག་བདེན་པའི་དབང་། །སྐྱབས་ཀུན་འདུས་པ་དྲིན་ཅན་རྡོ་རྗེ་ཅན། །རྗེ་བཙུན་བདུད་འདུལ་རྡོ་རྗེ་སྙིང་པདྨོར། །

[Full Size]

རྟག་བཞུགས་བདེན་གྲུབ་སྒོ་གསུམ་བྱིན་གྱིས་རློབས། །ཅེས་པའང་སྒྲུབ་པ་མགོན་སྲུང་ངོར་སྤེལ།། ༈ །།རྒྱལ་ཀུན་ཐུགས་རྗེའི་རྣམ་རོལ་པ། །སྤྱན་རས་གཟིགས་དབང་ཀརྨ་པ། །བདུད་ཚོགས་འདུལ་པའི་རྡོ་རྗེ་དང་། །རིགས་བདག་པདྨ་གསུང་དབང་ཕྱུག །ཆོས་གྲུབ་རྒྱ་མཚོར་གསོལ་བ་འདེབས། །མ་བྱོན་སངས་རྒྱས་ལྔ་པ་ཡི། །སྒྱུ་འཕྲུལ་ཆོས་ཀྱི་འབྱུང་གནས་ཞབས། །མཆོག་རྣམས་འཁོར་བ་ཇི་སྲིད་དུ། །སྤྲུལ་པས་འཁོར་བ་དོང་ནས་སྤྲུགས། །སྐལ་ལྡན་མོས་པའི་བུ་རྣམས་ལ། །བྱིན་རླབས་ཡེ་ཤེས་ཆར་རྒྱུན་སྩོལ། །སྐྱེ་དང་སྐྱེ་བར་ཆོས་ལྡན་ཞིང་། །རྡོ་རྗེ་སྙིང་པོའི་དོན་རྟོགས་ནས། །བླ་མེད་གསང་སྔགས་དམ་ཚིག་གཉན། །དྲི་མེད་འཁྲུལ་པས་མ་བསླད་པར། །ཀུན་བཟང་དགོངས་པ་བདེ་ཆེན་ཀློང་། །རང་བྱུང་ཁྱབ་བརྡལ་དབྱིངས་གྲོལ་ཏེ། །གདོད་མའི་སངས་རྒྱས་མྱུར་ཐོབ་ཤོག །ཅེས་པའང་གཏེར་ཡུམ་དགྱེས་མཚོས་བསྐུལ་ངོར་སྤེལ།། ༈ །།ཐུགས་རྗེ་ཆེན་པོ་འགྲོ་བའི་མགོན་གྱུར་པ། །འཇིག་རྟེན་དབང་ཕྱུག་རྣམ་པར་རོལ་པ་མཆོག །རྗེ་བཙུན་བདུད་འདུལ་རྡོ་རྗེའི་འཆང་ཆེན་པོར། །གསོལ་འདེབས་ཡེ་ཤེས་སྤྱན་གཟིགས་བྱིན་གྱིས་རློབས། །གཏིང་མཐའ་བྲལ་བའི་ཀུན་ཁྱབ་ཕྲིན་ལས་ཀྱི། །ཡེ་ཤེས་སྣང་བས་སྲིད་པའི་མུན་སེལ་བ། །བསྟན་པའི་རྒྱལ་མཚན་དམ་ཆོས་ཉི་མའི་ཞབས། །གསོལ་འདེབས་ཡེ་ཤེས་སྤྱན་གཟིགས་བྱིན་གྱིས་རློབས། །རྣམ་འདྲེན་ལྔ་པ་མི་ཕམ་བྱམས་པ་མགོན་། །

[Full Size]

དབྱེར་མེད་ཐུབ་བསྟན་ཡོངས་སུ་རྫོགས་པའི་དཔལ། །འཇམ་མགོན་ཆོས་ཀྱི་འབྱུང་གནས་གང་དེ་ལ། །གསོལ་འདེབས་ཡེ་ཤེས་སྤྱན་གཟིགས་བྱིན་གྱིས་རློབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །རང་རིག་ངོ་བོ་གཅེར་མཐོང་ཆོས་སྐུ་ཡི། །གནས་ལུགས་མངོན་གྱུར་སྐུ་བཞིའི་དབང་ཕྱུག་མཆོག །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་ཚེ་དཔག་ངོར་སྤེལ།། ༈ །།མཆོག་གསུམ་འདུས་ཞལ་པདྨ་འབྱུང་། །གང་གི་བྱིན་རླབས་ཉི་འོད་ཀྱིས། །དེང་འདིར་བསམ་ཀུན་འབད་མེད་འགྲུབ། །ཉོན་མོངས་བདུད་ཀྱི་གཡུལ་རྒྱལ་ནས། །རང་བྱུང་རིག་སྟོང་ཕྱག་རྒྱ་ཆེ། །མངོན་དུ་རྟོགས་པར་བྱིན་གྱིས་རློབས། ཞེས་པའང་ས་བཅུའི་ངོར་སྤེལ།། ༈ །།པྲ་ཎི་དྷཱ་ན་སིདྡྷནྟུ། ཕྱོགས་བཅུའི་བླ་མ་ཡི་དམ་ཆོས་སྐྱོང་བ། །བསླུ་མེད་སྐྱབས་གནས་ཀུན་འདུས་ངོ་བོ་ཉིད། །ལྔ་བདོའི་འདྲེན་པ་ཨོ་རྒྱན་སྤྲུལ་པའི་སྐུ། །རིག་འཛིན་ཆེན་པོ་སློབ་དཔོན་པདྨ་འབྱུང་། །མཁའ་འགྲོའི་འཁོར་ཚོགས་དཔག་མེད་རབ་འབྱམས་ཞིང་། །མཐའ་ཡས་དབང་སྒྱུར་སྟོན་མཆོག་གང་དེ་ལ། །རྣམ་ཀུན་གསོལ་བ་འདེབས་སོ་བདག་བཞན་གྱི། །ཆོས་མཐུན་བསམ་པ་ལྷུན་འགྲུབ་བྱིན་གྱིས་རློབས། །བསྟན་པའི་སྙིང་པོ་འོད་གསལ་ཕྱག་རྫོགས་ཀྱི། །ལྟ་གྲུབ་འཁྲུལ་མེད་ཚེ་གཅིག་སངས་རྒྱས་ལམ། །ངེས་པར་རྙེད་པའི་དམ་ཆོས་ཟབ་མོ་ཡི། །རིང་ལུགས་དྲི་མེད་ཕྱོགས་མཐར་

[Full Size]

ཀུན་ཁྱབ་ཤོག །བསྟན་པའི་གཞི་མ་གུ་རུའི་ལུང་ཟིན་པའི། །སྐྱེས་མཆོག་རྣམས་དང་སྦྱང་སྟོབས་མཐར་སོན་པའི། །རྟོགས་པའི་གདེང་ལྡན་འགྲོ་ཕན་བྱང་སེམས་ཀྱི། །བསྟན་འཛིན་མངའ་བརྙེས་མཆོག་རྣམས་འཚོ་བརྟན་ཤོག །བསྟན་རྩ་དགེ་འདུན་འདུས་པ་རབ་རྒྱས་ཤིང་། །སྡོམ་པ་གསུམ་གྱི་གཞི་བརྟན་གཞན་ཕན་གྱི། །ལྷག་བསམ་ཚུལ་ལྡན་དད་ཅན་ཡོན་སྦྱོང་བའི། །ཆོས་སྤྱོད་བཅུ་དང་འཁོར་ལོ་གཉིས་ལྡན་ཤོག །དེ་དག་ཀུན་གྱི་ཕན་བདེའི་གཙོ་བོ་མཆོག །བསྐལ་བཟང་རྣམ་འདྲེན་བཞི་པ་དོན་ཀུན་གྲུབ། །གང་གི་བྱིན་རླབས་མཚན་དཔེ་འོད་འབར་བ། །སྙིགས་དུས་འགྲོ་བའི་མགོན་དུ་ལྷམ་མེ་བར། །མངོན་སྣང་ཤཱཀྱ་མུ་ནེ་རིན་པོ་ཆེ། །ཞིང་འདིར་ཐུགས་རྗེ་ཆེན་པོས་རྗེས་དགོངས་ལ། །མ་འོངས་རྣམ་འདྲེན་ལྔ་པ་སངས་རྒྱས་བར། །བརྟན་པར་བཞུགས་པར་བྱིན་གྱིས་བརླབ་ཏུ་གསོལ། །དེ་མཐུས་ཁམས་གསུམ་སེམས་ཅན་རིགས་དྲུག་གི། །ལས་ཉོན་དབང་གྱུར་འཁོར་བར་འཐོམ་པ་ཀུན། །མི་ཤེས་གཏི་མུན་མུན་པ་ཀུན་བསལ་ནས། །ཡང་དག་ཡེ་ཤེས་སྣང་བ་གསལ་བར་ཤོག །བདག་སོགས་ཚེ་རིང་ནད་མེད་དཔལ་འབྱོར་ལྡན། །ཆོས་བཞིན་སྤྱོད་ལ་སྐྱོ་ངལ་མ་མཆིས་པར། །ཕར་ཕྱིན་དྲུག་དང་བསྡུ་བཞི་འཕགས་ནོར་བདུན། །ཡོན་ཏན་དང་ལྡན་རྒྱལ་སྲས་རྗེས་སློབ་པའི། །རྣམ་དག་ཆོས་ཚུལ་རྒྱ་མཚོར་མངའ་བརྙེས་ནས། །གང་དུ་གནས་པའི་རྒྱལ་ཁམས་བཀྲ་ཤིས་

[Full Size]

ཤིང་། །བསྟན་པ་དར་ཞིང་རྒྱས་པར་བྱིན་གྱིས་རློབས། །ཆོས་མིན་སྤྱོད་རྣམས་ཞི་བར་བྱིན་གྱིས་རློབས། །དེ་ལྟར་མོས་བློས་རྩེ་གཅིག་གསོལ་བཏབ་པའི། །མཐུ་ལས་དཀོན་མཆོག་རྩ་གསུམ་རྒྱ་མཚོ་ཡིས། །བྱིན་རླབས་སྟོབས་ཀྱི་བདེན་པས་ཡིད་བཞིན་དུ། །སྨོན་ལམ་ཇི་བཞིན་དོན་ཀུན་གྲུབ་གྱུར་ཅིག །ཅེས་པའང་འཇིག་རྟེན་ལས་ཐར་པའི་ལམ་བསྙེགས་པའི་ཀུན་སྤངས་པ་སྙིང་པོའི་རྟོགས་པ་མཐར་ཕྱིན་ཀརྨ་རབ་འབྱོར་གྱི་བཞེད་ངོར་སྤེལ།། ༈ །།བཅོམ་ལྡན་ཚེ་འོད་སྣང་མཐའ་ཡས། །ཡིད་བཞིན་འཁོར་ལོ་ཏཱ་རེ་མ། །གཙུག་ཏོར་རྣམ་པར་རྒྱལ་མ་ཡུམ། །འཆི་མེད་ལྷ་ལ་གསོལ་བ་འདེབས། །འཆི་མེད་མཆོག་དངོས་དཔལ་ཡོན་གང་། །དེང་འདིར་གསོལ་འདེབས་བུ་ལ་སྩོལ། །རྒུད་མེད་ལང་ཚོ་རབ་རྒྱས་ཤིང་། །ཚེ་བརྟན་འགྱུར་མེད་སྐུ་ཐོབ་ཤོག །ཆོས་བཟང་ངོར་སྤེལ།། ༈ །།ཚེ་དང་ཡེ་ཤེས་དཔག་མེད་མགོན། །ཚེ་དབང་མཆོག་སྩོལ་སྒྲོལ་མ་དཀར། །ཚེ་མཆོག་སྦྱིན་མཛད་རྣམ་པར་རྒྱལ། །ཚེ་རིང་ནད་མེད་དཔལ་དངོས་གྲུབ། །གསོལ་བ་འདེབས་སོ་དེང་འདིར་སྩོལ། །མི་ཤིགས་རྡོ་རྗེའི་སྲོག་རྩ་བརྟན། །མི་འགྱུར་ཚེ་དཔལ་མྱུར་ཐོབ་ནས། །བར་ཆད་བདུད་ལས་རྒྱལ་བྱིན་རློབས། །ཨད་རྒྱལ་ལ་གསོལ་འདེབས་སུ་སྤེལ།། ༈ །།རིགས་ཀུན་གཙོ་བོ་དྲུག་པ་རྡོ་རྗེ་འཆང་། །རྒྱ་གར་གྲུབ་ཆེན་རིམ་པར་བྱོན་རྣམས་དང་། །གངས་ཅན་བསྟན་པའི་སྤྱི་མེས་ལྷོ་བྲག་པ། །བཀའ་

[Full Size]

ཕྱག་ཆུ་བོ་ཀུན་འདུས་རྒྱ་མཚོ་ཆེའི། །མངའ་བདག་ཟླ་འོད་གཞོན་ནུའི་བྱིན་རླབས་བརྒྱུད། །འབྲི་གུང་སྟག་ལུང་ཚལ་དང་འབྲུག་པ་ཞེས། །ཡ་བཞི་ཟུང་བརྒྱད་སྐྱེས་མཆོག་མུ་ཏིག་ཕྲེང་། །མཁས་གྲུབ་རིམ་པར་བྱོན་ལ་གསོལ་བ་འདེབས། །ཐུགས་རྗེའི་སྤྱན་གཟིགས་བདག་རྒྱུད་ངེས་འབྱུང་གིས། །བསྐུལ་བའི་ཆོས་བརྒྱད་མ་འདྲེས་ལས་འབྲས་ཀྱི། །བླང་དོར་ཇི་བཞིན་རྟོགས་པའི་གདེང་ཐོབ་ནས། །ཡེ་ཤེས་ཆེན་པོའི་གྲོལ་ལམ་ཐོབ་བྱིན་རློབས། །རང་བྱུང་གདོད་མའི་ངོ་བོའི་གནས་དམ་པ། །གོལ་འཆུགས་མེད་པ་དྲི་བྲལ་དེ་ཉིད་ཀྱི། །རིག་པ་རང་གྲོལ་རིང་མིན་རྫོགས་སངས་ཀྱི། །གོ་འཕང་ཐོབ་པར་བྱིན་གྱིས་བརླབ་ཏུ་གསོལ། །སྒྲུབ་པ་ཐེག་འཕེལ་ངོར་སྤེལ།། ༈ །།དཔལ་ལྡན་འཇིག་རྟེན་མགོན་དང་གསུང་དབང་ཕྱུག །མ་ཕམ་ལ་སོགས་སྒྱུ་འཕྲུལ་རྡོ་རྗེའི་གར། །ཅིར་ཡང་སྟོན་པའི་གཟུགས་སྐུའི་རྣམ་པར་རོལ། །མཆོག་གི་སྤྲུལ་སྐུར་བཞེངས་ལ་གསོལ་བ་འདེབས། །ཕྲིན་ལས་རྒྱ་མཚོའི་གོས་ཅན་ཡོངས་ཁྱབ་པའི། །འགྲོ་ཀུན་ཡང་དག་ལམ་བཀོད་བདག་ཉིད་ཅན། །སྟོན་པ་བདེར་གཤེགས་རྒྱལ་བའི་རིང་ལུགས་གཉེན། །རྒྱལ་ཚབ་དམ་པར་གསོལ་བཏབ་བྱིན་མཐུ་ཡིས། །བསམ་དོན་ཆོས་བཞིན་ཡོངས་འགྲུབ་སྒོ་གསུམ་གྱི། །བྱ་བ་ཐམས་ཅད་ཉེས་པའི་དྲི་སྤངས་ནས། །ནོངས་པ་མེད་པར་

[Full Size]

བསླབ་པའི་གཞི་བརྟན་ལ། གེགས་མེད་ཉིད་དུ་མཐར་ཕྱིན་བྱིན་གྱིས་རློབས། །ཞེས་ཀརྨ་ལྷག་བསམ་ནས་བསྐུལ་ངོར་སྤེལ།། ༈ །།བདེ་བར་གཤེགས་པ་ཤཱཀྱའི་རྒྱལ་པོ་ལ། །རྣམ་ཀུན་མི་ཕྱེད་དད་པས་གསོལ་བཏབ་མཐུས། །བདག་ཅག་སྐྱེ་བ་འདི་དང་ཚེ་རབས་ཀུན། །རྒྱལ་བའི་སྤྱི་གཟུགས་ཁྱབ་བདག་ཀརྨ་པ། །དངོས་གྲུབ་མཆོག་སྩོལ་བཛྲ་ཝཱ་ར་ཧི། །བར་ཆད་འདུད་འཇོམས་རྡོ་རྗེ་བེར་ནག་ཅན། །རྩ་བ་གསུམ་གྱི་ལྷག་པའི་ལྷ་མཆོག་དང་། །མི་འབྲལ་ཡེ་ཤེས་ཐུགས་རྗེས་རྟག་པར་སྐྱོངས། །ནམ་ཞིག་སྒྱུ་ལུས་འཕོ་བའི་དུས་བྱུང་ཚེ། །དག་པ་རབ་འབྱམས་རྒྱལ་བའི་ཞིང་ཁམས་སུ། །བླ་མེད་འཕགས་པའི་ཚོགས་ཀྱི་ཞལ་མཐོང་ནས། །བྱང་ཆུབ་ཆེན་པོར་མངོན་པར་སངས་རྒྱས་ཤོག །ཅེས་ཁང་གསར་དགེ་སློང་རྣམ་རྒྱལ་ངོར། སི་ཏུས་སྤེལ་བ་ཛ་ཡནྟུ།། ༈ །།སྟོན་མཆོག་ཤཱཀྱའི་རྒྱལ་པོ་ལ། །མི་ཕྱེད་རྩེ་གཅིག་གསོལ་བཏབ་མཐུས། །སྡོམ་གསུམ་ཚུལ་བཞིན་ལེགས་སྨིན་པ། །ཀརྨ་མཁས་གྲུབ་གཏན་དགེ་ཞིང་། །བསླབ་གསུམ་རྒྱན་གྱིས་རབ་མཛེས་ཤིང་། །བསྡུ་དངོས་བཞི་ཡི་དཔལ་འབྱོར་ལྡན། །འགྲོ་ཀུན་སྲིད་པའི་འཇིགས་སྒྲོལ་ཅིང་། །བླ་མེད་བྱང་ཆུབ་ཆེ་ཐོབ་ཤོག །ཅེས་ཤོ་ཕུ་བླ་མ་མཁས་གྲུབ་ཀྱི་དགོངས་དོན་བཞིན་སི་ཏུས་སྤེལ།། ༈ །།སྐྱབས་ཡུལ་མཆོག་གསུམ་ཀུན་འདུས་པ། །ཀརྨ་པ་ལ་གསོལ་བ་འདེབས། །ཆོས་ཀྱི་སྙིང་པོ་ཕྱག་

[Full Size]

རྒྱ་ཆེ། །བསྟན་པའི་སྙིང་པོ་ཀཾ་ཚང་གི། །རང་ལུགས་གཅེས་སྤྲས་འཛིན་ནུས་པའི། །ཐོས་བསམ་སྒོམ་པ་མཐའ་རུ་ཕྱིན། །དོན་གཉིས་ལྷུན་གྲུབ་འབྲས་ཐོབ་ནས། །འགྲོ་བ་འདྲེན་པའི་དཔལ་དུ་ཤོག །སྐྱབས་ཆེ་དབུ་མཛད་མཁྱེན་རབ་ངོར་སྤེལ་བ་ཛ་ཡ།། ༈ །།དཔལ་ལྡན་རིགས་ཀུན་ཁྱབ་བདག་འཁོར་ལོའི་མགོན། །རྡོ་རྗེ་འཆང་དབང་དཔལ་ལྡན་ཀརྨ་པ། །དུས་འདི་ནས་བཟུང་མྱང་འདས་ཆེན་པོའི་བར། །སྐྱབས་སུ་གསོལ་ལོ་མཆོག་དངོས་གྲུབ་གཉིས་སྩོལ། །སྐྱེ་དང་ཚེ་རབས་བརྒྱུད་པ་ཐམས་ཅད་དུ། །དལ་བརྒྱད་འབྱོར་བཅུ་དམ་པའི་རྗེས་སློབ་སྟེ། །ཇི་ལྟར་དགེ་ཚོགས་གེགས་མེད་མྱུར་འགྲུབ་ཅིང་། །རྟག་ཏུ་བདེ་དགེའི་དཔལ་ལ་སྤྱོད་པར་ཤོག །མཛོད་ཕུན་གླིང་གི་ཆོས་ཁྲིམས་པ་བསྟན་དར་ངོར་སྤེལ།། ༈ །།བསྐལ་བཟང་རྒྱལ་བ་སྟོང་གི་ཡབ་གྱུར་པ། །གདོད་མའི་མགོན་པོ་འཆི་མེད་སྣང་མཐའ་ཡས། །རྒྱལ་ཚབ་ཕྱག་ན་པདྨ་རྡོ་རྗེ་འཛིན། །རང་རིག་གཉུག་མའི་ངོ་བོར་མི་ཕྱེད་པར། །རྣམ་ཀུན་དད་པས་གསོལ་བ་བཏབ་པའི་མཐུས། །རང་གཞན་དོན་གཉིས་ལྷུན་གྱིས་གྲུབ་པར་ཤོག །ཁྲ་ཕུག་དགེ་སློང་ཀརྨ་མདོ་སྡེའི་ངོར་སི་ཏུ་པདྨའི་མིང་ཅན་གྱིས་སྤེལ་བ་དགེ་ལེགས་སུ་གྱུར་ཅིག། །།༈ འཕགས་མཆོག་སྤྱན་རས་གཟིགས་དབང་ཐུགས་རྗེའི་བདག །གང་འདུལ་ཐབས་མཁས་གར་གྱི་རོལ་རྩེད་ལས། །ཡེ་ཤེས་ཁྲོ་རྒྱལ་རྡོ་རྗེ་བེར་ནག་ཅན། །ག་ཎ་པ་ཏིའི་ལྷ་ཚོགས་དགོངས་སུ་གསོལ། །

[Full Size]

དེང་འདིར་སྲུང་བར་འོས་པའི་དམ་ལྡན་འདི། །གང་ཞིག་གཡུལ་ངོར་ཞུགས་པའི་ཚུལ་མཆིས་ཀྱང་། །སྐྱབས་གྱུར་རེ་གནས་དམ་པ་ཁྱོད་རྣམས་ཀྱིས། །མི་མཐུན་ཉེར་འཚེ་མཐའ་དག་དྲུངས་ཕྱུང་སྟེ། །ཕུན་ཚོགས་དཔལ་གྱིས་མངོན་མཐོ་རི་དབང་ལྟར། །ཚེ་བསོད་དཔལ་འབྱོར་ཉི་མ་འབུམ་གྱི་གཟི། །བཀྲ་ཤིས་ཕྱོགས་ལས་རྣམ་རྒྱལ་དོན་གྲུབ་པའི། །མ་གཡེལ་བརྩེ་བ་ཆེན་པོས་རྗེས་འཛིན་མཛོད། །ཨུ་རྒྱན་ཚེ་རིང་ཅེས་པ་གཡུལ་ངོར་ཆས་སྐབས་སྨོན་ལམ་ཕྲིན་བཅོལ་གྱི་ཚུལ་དུ་སྨྲས་པའོ།། ༈ །།རྒྱལ་ཀུན་སྤྱི་མེས་པ༵དྨ༵འི་བྱིན་རླབས་ཀྱི། །ཉི༵ན་བྱེ༵ད་ལྷ་དབང་རྡོ་རྗེ་རྩེ་བརྒྱ་པས། །གཉིས་སྣང་ལྷ་མིན་མུན་པའི་དཔུང་གཞོམ་ཞིང་། །སྒྲུབ་བརྒྱུད་བསྟན་པའི་ཕྲིན་ལས་ཤིང་རྟ་པར། །མོས་པས་གསོལ་འདེབས་དེང་བཟུང་མྱང་འདས་བར། །ཆོས་སྤྱོད་ལྷག་བསམ་གྲུ་རྫིངས་ལ་བརྟེན་ནས། །དད་དང་བརྩོན་འགྲུས་སྐྱ་བས་བསྐུལ་བྱས་ཏེ། །སྲིད་མཚོ་སྒྲོལ་བའི་དེད་དཔོན་ཉིད་གྱུར་ཅིག །ཅེས་འཇང་ཡུལ་ཨ་ཚེའི་ངོར་སྤེལ་བ་དགེ།། ༈ །།ཚོགས་གཉིས་ཆུ་གཏེར་ཡོན་ཏན་ནོར་བུས་གང་། །བྱམས་ཆེན་ཚད་མེད་ཐུགས་རྗེ་གཏིང་མཐའ་ཡས། །ཕྲིན་ལས་བཟང་པོའི་རླབས་ཕྲེང་ཕྱོགས་མཐར་ཁྱབ། །མཁྱེན་རབ་རྒྱ་མཚོ་དམ་པ་རྣམས་ལ་འདུད། །གང་ཞིག་སྐལ་ལྡན་ཐར་འདོད་ཡིད་ཅན་ཀུན། །ཡང་དག་ལམ་སྟོན་ཆོས་མཆོག་པདྨ་དཀར། །ལྷར་བཅས་མཆོད་པའི་གནས་གྱུར་

[Full Size]

ཚོགས་ཀྱི་མཆོག །དགེ་འདུན་བྱེ་སྙེད་གྲངས་འདས་རྣམས་ལ་འདུད། །བདག་མིང་ཀརྨ་དགེ་བ་ཞེས་བྱ་བས། །དུས་གསུམ་དགེ་ཚོགས་ཕུང་པོ་ཇི་སྙེད་པ། །མཆོད་སྤྲིན་ཀུན་བཟང་རྣམ་ཐར་ལས་ལྷག་པ། །བློ་ཡིས་བླངས་ཏེ་འབུལ་གྱི་བཞེས་སུ་གསོལ། །བདག་གི་གཙོ་བྱས་མཁའ་མཉམ་འགྲོ་བའི་ཚོགས། །གནས་སྐབས་མཐར་ཐུག་བདེ་ལེགས་དམ་པའི་དཔལ། །ཆོས་ཀྱི་སྤྱན་ལྡན་དགེ་བཤེས་ཚད་མ་དང་། །ནམ་ཡང་འབྲལ་མེད་རྗེས་འཛིན་མྱང་འདས་ཀྱི། །གོ་འཕང་མྱུར་བར་གེགས་མེད་ཉིད་ཐོབ་པའི། །ཐུགས་རྗེའི་རང་བཞིན་མངའ་བ་མཆོག་གསུམ་གྱིས། །ཡོངས་སུ་སྨིན་པའི་དམ་བཅའ་བརྩེར་དགོངས་ལ། །ཇི་བཞིན་ལྷུན་གྲུབ་འབྱུང་བར་བྱིན་གྱིས་རློབས། །ཅེས་སྐྱབས་ཆེ་བླ་མ་ཀརྨ་དགེ་བའི་ངོར་སྤེལ་བ་ཤུ་ུབྷཾ།། ༈ །།སྟོན་པ་བདེར་གཤེགས་ཤཀྱཱ་ཐུབ། །སངས་རྒྱས་གཉིས་པ་པདྨ་འབྱུང་། །འགྲོ་རྣམས་སྒྲོལ་སླད་སྒྱུ་འཕྲུལ་གྱི། །གར་རོལ་རིག་པ་འཛིན་པའི་དབང་། །མི་མངོན་ཆོས་ཀྱི་དབྱིངས་ཉིད་ལས། །དེང་འདིར་བདག་ལ་བརྩེར་དགོངས་ཤིག །འདི་ནས་བྱང་ཆུབ་སྙིང་པོའི་བར། །ཆོས་ལྡན་རང་བྱུང་ཡེ་ཤེས་ཀྱི། །སེམས་ཀྱི་དེ་ཉིད་མངོན་རྟོགས་ནས། །སྐུ་བཞིའི་རྒྱལ་ས་ཟིན་པར་ཤོག །ཅེས་པའང་སྤྲེའུ་བླ་མས་བཞེད་ལྟར་རྡོ་རྗེ་དྲག་པོའི་གསོལ་འདེབས་སུ་སྤེལ་བ་མངྒ་ལཾ།། ༈ །།སྟོབས་བཅུ་མངའ་བ་སངས་རྒྱས་བཅོམ་ལྡན་འདས། །

[Full Size]

ལུང་རྟོགས་དམ་ཆོས་རིག་གྲོལ་དགེ་འདུན་ཚོགས། །ཀུན་འདུས་རྗེ་བཙུན་བདུད་ལས་རྣམ་རྒྱལ་ཞབས། །ཆོས་གྲུབ་རྒྱ་མཚོ་དམ་ཆོས་ཉི་མའི་སྡེ། །རྡོ་རྗེ་དྲག་པོ་ཚེ་དབང་དཔལ་དར་རྗེ། །མ་ནོར་ལམ་སྟོན་རྩ་བརྒྱུད་བླ་མ་ལ། །གསོལ་བ་འདེབས་སོ་བདག་རྒྱུད་སྨིན་ཅིང་གྲོལ། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །སི་ཏུ་པས་སྤེལ་བ་དགེ། །།༈ དུས་གསུམ་རྒྱལ་ཀུན་ངོ་བོ། །མཚོར་འཁྲུངས་པདྨ་འབྱུང་གནས། །བདག་ཡིད་དྲན་པ་ཙམ་གྱིས། །བྱིན་རླབས་ཆར་ཆེན་མྱུར་སྩོལ། །ཀྱེ་མ་སྙིགས་ལྔའི་དུས་འདིར། །སྐྱེས་པའི་སྐལ་མེད་བདག་ལྟར། །མགོན་ཁྱོད་ཐུགས་རྗེའི་རྩལ་གྱིས། །རྒྱུད་བཞི་སྨིན་པར་མཛོད་ཅིག །སྣང་སྲིད་ཆོས་སྐུ་འབྱམས་ཀླས། །བདེ་སྟོང་རིག་པའི་ངོ་བོ། །གདོད་མའི་སངས་རྒྱས་གོ་འཕང་། །རང་བྱུང་རང་གྲོལ་ཉིད་ཤོག །ཅེས་པའང་ས་ཐམ་སྲས་པོ་ཀརྨ་མི་ཕམ་བསྟན་རྒྱས་ཀྱི་ངོར་སྤེལ།། ༈ །།རབ་འབྱམས་བདེ་བར་གཤེགས་ཀུན་གྱི། །སྤྱི་དཔལ་ཨོ་རྒྱན་པདྨ་ལ། །དུས་དྲུག་མོས་པས་གསོལ་བ་འདེབས། །རིགས་དྲུག་གནས་ལས་བསྒྲལ་དུ་གསོལ། །ཚེ་འདིར་བསམ་དོན་ལྷུན་གྲུབ་ཅིང་། །དཔལ་དང་འབྱོར་རྒྱས་ཡུན་དུ་འཚོ། །ནམ་ཞིག་དག་པའི་ཞིང་མཆོག་དེར། །བདག་དང་བདག་ལ་འབྲེལ་ཐོགས་ཀུན། །ཕྱམ་གཅིག་རྫོགས་སངས་རྒྱས་ཐོབ་ནས། །སྤྲུལ་པས་

[Full Size]

ཕྱོགས་བཅུའི་སེམས་ཅན་དོན། །ནུས་པའི་སྐལ་ལྡན་དབང་ཐོབ་ཅིང་། །བྱང་ཆུབ་སྙིང་པོ་མངོན་གྱུར་ཤོག །རྗེས་ཆགས་འབྱོར་པ་ལ་གསོལ་འདེབས་སྨོན་ལམ་དུ་སྤེལ།། ༈ །།རྣམ་དག་བདེར་གཤེགས་རྒྱས་སྲས་སློབ་ཚོགས་ཀྱི། །རྣམ་མར་ཐུགས་རྗེའི་སྟོབས་འདུས་པདྨ་འབྱུང་། །རྣམ་རྒྱལ་འཆི་མེད་ངེས་སྟེར་གང་འདི་ནས། །རྣམ་ཀུན་སྙིང་པོའི་བར་དུ་སྐྱབས་སུ་མཆི། །དག་པ་ཡེ་ཤེས་ལྷ་སྐུའི་དཀྱིལ་འཁོར་དུ། །མ་དག་གཟུང་འཛིན་སྦྱོང་བའི་མཐུ་སྟོབས་ཀྱིས། །འཁྲུལ་པ་གཏན་ཟད་ཡང་དག་ལྟ་བའི་གནད། །མ་ནོར་སྤྱོད་པའི་སྐལ་བར་ལྡན་བྱིན་རློབས། །ཀརྨ་དམ་པའི་ངོར་སྤེལ།། ༈ །།རྒྱལ་ཀུན་སྤྱི་མེས་གུ་རུ་པདྨ་འབྱུང་། །སྙིགས་དུས་འགྲོ་ལ་རྗེས་བརྩེའི་ཐུགས་རྗེ་ཅན། །གང་འདིར་དབྱིངས་ནས་བྱིན་རླབས་བདུད་རྩིའི་ཆར། །སྐལ་ལྡན་དད་པའི་ཞིང་སར་དབབ་ཏུ་གསོལ། །རྣམ་དག་ཡེ་ཤེས་རང་བྱུང་གདོད་གནས་ཀྱི། །དྲི་བྲལ་བདེ་གཤེགས་སྙིང་པོའི་ངོ་བོ་ཉིད། །སེམས་ཉིད་ཆོས་སྐུའི་རྒྱལ་ས་ཟིན་ནུས་པའི། །བྱིན་རླབས་འཕོ་བའི་དབང་མཆོག་དམ་པ་སྩོལ། །སྐྱེ་ཀུན་ངན་འགྲོའི་སྒོ་ཁེགས་ཡང་དག་ལམ། །མ་ནོར་ཇི་བཞིན་སྟོན་པའི་བླ་མ་དང་། །གནས་དུས་ཕུན་ཚོགས་དམ་ཆོས་དཔལ་སྤྱོད་ཅིང་། །སྒོ་གསུམ་ཉེས་པའི་དྲི་མ་རིང་སྤང་ཤོག །གནས་སྐབས་ཚེ་རིང་ནད་མེད་བདེ་དགའ་རྒྱས། །འགྲོ་རྣམས་ཐར་མཆོག་གོ་འཕང་དཀྲི་ནུས་པའི། །

[Full Size]

སེམས་བསྐྱེད་དམ་བཅའི་རྩ་བརྟན་སྨོན་འདུན་གྱི། །བདེན་པ་ཇི་བཞིན་འགྲུབ་པར་བྱིན་གྱིས་རློབས། །ཅེས་གནས་མདོ་ཀརྨ་ཆོས་རྒྱལ་ངོར་སྤེལ།། ༈ །།མཆོག་གསུམ་རྒྱལ་བ་སྲས་དང་བཅས། །ཡོངས་ཀྱི་སྤྱི་གཟུགས་པདྨ་འབྱུང་། །ཁྱེད་ལ་ཕྱག་འཚལ་གསོལ་འདེབས་ཤིང་། །གནས་སྐབས་མཐར་ཐུག་བར་ཆད་སོལ། །སྒྲུབ་པའི་རྒྱལ་ས་འཛིན་པ་ལ། །ཉོན་མོངས་བདུད་བཞིའི་གཡུལ་ངོ་ཟློག །དོན་གཉིས་ལྷུན་གྱིས་གྲུབ་པ་དང་། །མི་རྟོག་ཡེ་ཤེས་མངོན་གྱུར་མཛོད། །ཆོས་སྲུང་དཔའ་བོ་ཌཱ་ཀི་མ། །ཡེ་ཤེས་ལས་དང་འཇིག་རྟེན་གྱི། །དཀར་ཕྱོགས་སྐྱོང་པའི་དམ་ཚིག་ཅན། །ཁྱོད་རྣམས་ཐུགས་དམ་མ་བསྙེལ་བར། །ད་ལྟ་སྙིགས་དུས་བསྐལ་པ་འདིར། །པད་འབྱུང་བརྒྱུད་འཛིན་རྣལ་འབྱོར་བདག །བླ་མེད་བྱང་ཆུབ་བསྒྲུབ་པ་ལ། །བར་ཆད་དམ་སྲིའི་འཚེ་བ་ཟློག །ལས་བཞིའི་ཕྲིན་ལས་མྱུར་འགྲུབ་ཅིང་། །དྲི་མེད་སྙིང་པོ་རྒྱལ་བའི་བསྟན། །དཔལ་ལྡན་ཀརྨ་བཀའ་རྒྱུད་ཀྱི། །རིང་ལུགས་ཉིན་བྱེད་འོད་སྟོང་བཞིན། །རྒྱ་མཚོའི་གོས་ཅན་ཁྱབ་ཡུན་གནས། །བསྟན་འཛིན་ཞབས་བརྟན་དགེ་འདུན་རྒྱས། །འགྲོ་ལ་བདེ་སྐྱིད་འཕེལ་བ་དང་། །བཅོལ་པའི་ཕྲིན་ལས་འགྲུབ་པར་མཛོད། །ཅེས་པ་འདི་བླ་མ་རབ་འབྱོར་ནས་བསྐུལ་ངོར་སྤེལ། དགེའོ།། །།

ཐུན་མིན་ཞལ་གདམས་ཀྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ངེས་དོན་བདུད་རྩིའི་གཏེར་མཛོད།

[Full Size]

ཐུན་མིན་ཞལ་གདམས་ཀྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ངེས་དོན་བདུད་རྩིའི་གཏེར་མཛོད་ཅེས་བྱ་བ་བཞུགས་སོ། །

[Full Size]

ལགས། དམ་པ་མཆོག་ཉིད་སྔོན་སྦྱངས་སྐྱེས་ཐོབ་ཟླ་བྲལ་ཉམས་བཞེས་ཚུལ་ཅི་ནས་ལེགས་པའི་རང་བཞིན། ལར་འཁོར་འདས་ཐམས་ཅད་འཁྲུལ་དང་མ་འཁྲུལ་དེས་དབྱེ་བ་ལ་རྟོགས་ན་སངས་རྒྱས། མ་རྟོགས་ན་སེམས་ཅན་ཟེར་བའང་། འཁྲུལ་གྲོལ་གྱི་མཚན་མ་དོན་དམ་པར་མ་གྲུབ་པས། ད་ལྟའི་གཉུག་མ་ངོ་ཤེས་འདི་ལས་གཞན་ཅི་ཞིག་བསྒོམ་དུ་ཡོད་ཀྱང་། གོ་ཉམས་རྟོགས་གསུམ་གྱིས་གཏན་ལ་འབེབས་པ་ནི། རྣལ་འབྱོར་རང་གིས་ས་ལམ་བརྟག་པས་ཤེས་པར། ནང་གི་ཉམས་རྟོགས་དང་ཕྱི་རོལ་རྐྱེན་གཉིས་འཕྲད་སྐབས་རོ་སྙོམས་ཐུབ་མིན་གྱིས་ཚོད་འཛིན་དགོས་པར་གསུངས་ན། སྣང་རྐྱེན་དེ་ལ་མེད་ལུགས་ཀྱི་རྟོག་པས་བཏགས་ཏེ་རང་གར་བསྐྱུར་བ་ལྟ་བུའི་སྐབས་རེ་ཞིག་སྟོང་ཡང་། སླར་རྐྱེན་དང་འཕྲད་ཚེ་སྒོམ་གྱི་ཚོ་གཏན་ནས་མི་

[Full Size]

ཟིན་པར་བྱུང་ཚེ་གོ་རྐྱང་ཡིན། དེ་ལྟ་བུའི་ཉམས་ལེན་ལ་རྡོ་རུས་གཏུགས་སྐབས་འཛིན་མེད་ཀྱི་ངང་ལ་འདི་སྣང་གི་རྟོག་ཚོགས་སྒྱུ་མ་ལྟར་མཐོང་སྟེ་སྤང་བླང་མེད་པར་དེའི་ངང་ལ་འབྱམས་འགྲོ་བ་ལྟ་བུ་ཤས་ཆེར་འབྱུང་ཞིང་། སྐབས་འགར་ཚོ་མི་ཟིན་པར་འཁྲུལ་དབང་ཤོར་ན་ཉམས་ཀྱི་རྟགས་ཡིན། གཉུག་མ་དེ་ཀ་མཐོང་ནས་རྐྱེན་གང་བྱུང་ཡང་འཛིན་པའི་ཤན་མ་ཞུགས་པ་ལྟར་རྐྱེན་བཟང་ངན་གང་ལའང་སྤང་བླང་མེད་པར་རྟོགས་ནས་ཚོ་ཟིན་ཏེ་རང་དབང་འབྱོར་ན་རྟོགས་པ་དངོས་ཡིན་པར་གསུངས་པས། གོ་རྟོགས་ཉམས་གསུམ་གྱི་ཤན་འབྱེད་གནང་འཐུས་དགོངས་དབྱིངས་བཞུགས་པ་ཞུ། མངྒ་ལམ། འཛི་སྒར་མཆོག་སྤྲུལ་རིན་པོ་ཆེ་ལ་གདམས་པའོ།། ༈ །།སྭསྟི། སྔོན་སྨོན་སྐྱེས་སྦྱངས་ཡོན་ཏན་ཕུན་སུམ་ཚོགས། །མཆོག་གི་བཞེད་སྐོང་གདམས་པ་བཀའ་

[Full Size]

བབས་ཀྱི། །དོན་བརྒྱུད་སྙིང་པོའི་ཟབ་དོན་མདོར་དྲིལ་བ། །རང་རིག་ཡེ་ཤེས་སྤྲོས་པའི་མཐའ་བྲལ་དེ། །མངོན་སུམ་སྟོན་པའི་རྩ་བ་ཡི་བླ་མ། །སངས་རྒྱས་དངོས་སྣང་འདུ་ཤེས་བཅོས་མིན་གྱི། །མོས་གུས་དག་སྣང་གསོལ་འདེབས་འབད་བརྩོན་ན། །སེམས་ཉིད་ཆོས་སྐུའི་རང་ཞལ་མངོན་མཐོང་འགྱུར། །དེ་ཡང་ཐོག་མར་སྔོན་འགྲོ་རྣམ་བཞི་ཡིས། །རང་རྒྱུད་ལེགས་པར་འདུལ་སྦྱོང་མཉེན་བཙལ་ནས། །དངོས་གཞི་ཞི་ལྷག་ཟུང་འཇུག་བསྒོམ་དགོས་ཏེ། །ལུས་གནད་སེམས་འཛིན་རིགས་རྣམས་ཉམས་དང་བསྟུན། སེམས་གནད་དུས་གསུམ་སྤྲོས་བཅད་སྟོང་གསལ་གྱི། །རིག་པ་ངོ་ཤེས་མ་བཅོས་ལྷོད་བཞག་དང་། །རྟོགས་ན་མ་འཕྲོ་ངོས་བཟུང་རང་གར་བཞག །དེ་ལྟའི་ཚུལ་ལ་རྒྱུན་གོམས་གནས་པ་གསུམ། །རིམ་སྐྱེས་ཚེ་ན་ཉམས་ཀྱི་སོ་མཚམས་ལས། །ལྷན་སྐྱེས་གཉུག་མ་སྨྲ་བསམ་བརྗོད་འདས་ཀྱི། །ཡེ་ཤེས་མ་སྒྲིབ་རང་གསལ་ངང་ཉིད་དུ། །ལྷག་པར་མཐོང་བའི་རིག་གདངས་ཐོག་ལྟ་བུས། །ཕྱི་ནང་གཞན་གསུམ་འཛིན་སྒྲིབ་མ་ལུས་བཅོམ། །དེ་ཡང་གོ་ཉམས་རྟོགས་གསུམ་རབ་དབྱེ་དང་། །གཞི་ལམ་འབྲས་བུའི་རྣམ་བཞག་སྤྲོ་བསྡུ་སོགས། །ཉམས་མྱོང་ཀློང་ནས་རྣལ་འབྱོར་བཞི་རིམ་གྱི། །ས་ལམ་དང་བསྟུན་གྲུབ་མཐས་མ་བསྒྱུར་ཞིང་། །འགལ་འདུ་ཅན་མིན་ཀུན་མཐུན་ཀུན་ལྷག་པའི། །ལྟ་བ་རྣམ་དག་འགྱུར་མེད་བློ་འདས་ཀྱི། །ཆོས་སྐུའི་ཀློང་དུ་རང་རིག་ལ་བཟླའོ། །དེ་སྐད་མཁྱེན་གཉིས་པདྨ་འདབ་སྟོང་ཚལ། །རྣམ་ཀུན་མཆོག་ལྡན་ཟབ་ལམ་

[Full Size]

བདུད་རྩིའི་ཆར། །ལེགས་བྲན་ཉིན་མོར་བྱེད་པའི་འོད་སྣང་གིས། །རྣམ་པར་བཞད་པའི་གཉེན་དུ་འགྱུར་པར་སྨོན། །སརྦ་ཛ་ག་ཏཾ། ཐར་པ་རྩེའི་ཞབས་དྲུང་མཆོག་སྤྲུལ་རིན་པོ་ཆེ་འཇམ་དབྱངས་མཁྱེན་བརྩེའི་བཞེད་ངོར་སྤེལ།། ༈ །།རྡོ་རྗེ་འཆང་ནས་བཀའ་བརྒྱུད་ནོར་བུའི་ཕྲེང་། །བདུད་ལས་རྣམ་རྒྱལ་བར་བྱོན་རྩ་བརྒྱུད་ཀྱི། །བླ་མ་རྣམས་ལ་ཕྱག་འཚལ་རང་རྒྱུད་ལ། །ཆོས་སྐུ་མངོན་དུ་འགྱུར་བར་བྱིན་གྱིས་རློབས། །དེ་ཡང་སྔོན་སྨོན་བསགས་སྦྱངས་འབྲས་སྨིན་པས། །དལ་བརྒྱད་འབྱོར་བཅུའི་རྟེན་བཟང་མཆོག་ཐོབ་ཅིང་། །དམ་པའི་མགོན་གྱིས་རྗེས་བཟུང་བཅོམ་ལྡན་འདས། །ཤཱཀྱའི་རྗེས་སློབ་སྨོན་འཇུག་སྐལ་པར་ལྡན། །བསླབ་པའི་གཞི་རྣམས་གཅེས་སྤྲས་འབད་ནས་སུ། །རང་གཞན་དགེ་བའི་གཞིར་གྱུར་ལེགས་ཚོགས་རྨད། །ཁྱད་པར་གནས་ལུགས་གཉུག་མའི་ངེས་པའི་དོན། །རྟོགས་པར་དགོངས་ན་དབེན་གསུམ་བརྟེན་པ་ཡིན། །སྒོ་གསུམ་དགེ་ལ་བཀོལ་བའི་གཞི་བཟུང་ནས། །བཀའ་བརྒྱུད་བྱིན་རླབས་མོས་གུས་བཀའ་བབས་ཞེས། །གསུངས་པར་རྒྱུན་དུ་སངས་རྒྱས་ཐམས་ཅད་ཀྱི། །ངོ་བོ་བླ་མ་མཆོག་ལ་གསོལ་བ་འདེབས། །ལས་དང་རྒྱུ་འབྲས་ཕྲ་ཞིང་ཕྲ་བའང་འཛེམ། །འགྲོ་དྲུག་ཡོངས་ལ་བྱམས་དང་སྙིང་རྗེ་བསྒོམ། །རྣམ་ཀུན་དགེ་སྒྲུབ་སྡིག་སྤོང་ཡིད་དམ་འཆའ། །སྔོན་ཆད་རང་སེམས་རང་ངོ་མ་ཤེས་པས། །འཁོར་བའི་འཁོར་ལོར་འཁོར་བའི་ནོངས་པ་ལ། །བསམ་གཞིག་བཏང་ནས་སྔོན་འགྲོའི་ཆོས་རྣམས་འབད། །

[Full Size]

སྐྱབས་ཡུལ་འོད་ཞུ་རང་ལ་བསྟིམ་པའི་སྐབས། །སྔར་འདས་རྗེས་བཅད་མ་འོངས་མདུན་མི་བསུ། །ཤེས་པ་སོ་མ་མ་བཅོས་དེ་ངང་ལ། །མཉམ་པར་བཞག་ཅིང་རྗེས་ཐོབ་འཁོར་འདས་ཀྱི། །ཆོས་རྣམས་སྒྱུ་མ་རྨི་ལམ་ལྟ་བུར་བསམ། །དེ་ཡི་ངང་ནས་རང་གཞན་དགེ་ལ་བསྐུལ། །ཆོས་རྣམས་ཀུན་གྱི་སྙིང་པོ་ཕྱག་རྫོགས་ཞེས། །དབྱེར་མེད་གཅིག་འདུས་དེ་ཡང་རང་རིག་གི། །ཡེ་ཤེས་སྐྱོང་ལ་འདུས་ཤིང་གདམས་པའི་ཚུལ། །སི་ཏུ་པདྨའི་མིང་གིས་བྱ་བཏང་བའི། །མཆོག་སྤྲུལ་བཞེད་ངོར་སྤེལ་དེས་འགྲོ་བ་རྣམས། །བླ་མེད་སྐུ་བཞིའི་གོ་འཕང་ཐོབ་གྱུར་ཅིག །མངྒ་ལམ།། ༈ །།རྡོ་རྗེ་འཆང་དངོས་བདུད་འདུལ་རྡོ་རྗེ་ཡིས། །བྱང་ཆུབ་བར་དུ་འབྲལ་མེད་སྐྱོང་གྱུར་ཅིག །རང་སེམས་འདས་དང་མ་འོངས་རྣམ་རྟོག་གིས། །མ་བསླད་མཉམ་པར་བཞག་ཅིང་གང་ཤར་དེའི། །ཤེས་པ་སོ་མ་དེ་ངང་རང་བབ་སྐྱོང་། །དེ་ཡང་སྤྱོད་ལམ་རྣམ་པ་ཐམས་ཅད་དུ། །ཡེངས་མེད་དྲན་པའི་རྩི་ཡིས་ཟིན་བཞིན་པར། །ཆུ་བོ་རྒྱུན་གྱི་རྣལ་འབྱོར་རྟག་པར་འབད། །ལས་འབྲས་སྤང་བླང་མོས་གུས་དག་སྣང་སྦྱོང་། །མར་གྱུར་འགྲོ་བའི་དོན་དུ་སེམས་བསྐྱེད་གནད། །དེ་སྐད་སི་ཏུ་པདྨའི་མིང་ཅན་གྱིས། །སྒྲུབ་པ་གསང་སྔགས་གཡར་ངོར་སྤེལ་བ་དགེ། མངྒ་ལམ།། ༈ །།རིགས་བརྒྱའི་ཁྱབ་བདག་རྡོ་རྗེ་འཆང་དངོས་མཆོག །རྗེ་བཙུན་བདུད་ལས་རྣམ་རྒྱལ་དཔལ་འབྲུག་པའི། །ཞབས་ལ་ཕྱག་འཚལ་སྐལ་ལྡན་རྒྱུད་སྨིན་གྲོལ། །བྱིན་རླབས་ཆར་ཆེན་དེང་འདིར་དབབ་

[Full Size]

ཏུ་གསོལ། །རང་རིག་གདོད་ནས་ལྷན་སྐྱེས་གཉུག་མའི་སེམས། །གསོལ་འདེབས་མོས་གུས་འཁོར་ཆོས་མཐའ་མེད་པར། །ཞེན་ལོག་ངེས་འབྱུང་རྣམ་དག་གཞིར་བྱས་ནས། །འགྲོ་ལ་སྙིང་བརྩེའི་བྱང་ཆུབ་སེམས་བསྐྱེད་ཅིང་། །ཡེངས་མེད་སྒོམ་མེད་མ་བཅོས་སོ་མའི་ངང་། །མཉམ་པར་བཞག་ཅིང་དུས་གསུམ་དགེ་ཚོགས་རྣམས། །བདག་གིས་གཙོར་བྱ་མ་གྱུར་འགྲོ་བའི་དོན། །བྱང་ཆུབ་གོ་འཕང་ཐོབ་ཕྱིར་བསྔོ་སྨོན་གྱི། །རྒྱས་གདབ་དད་དང་དམ་ཚིག་གཅེས་སྤྲས་སུ། །སྲུང་སྡོམ་གཡེལ་མེད་རྟག་པར་ཐེག་ཆེན་གྱི། །སེམས་བསྐྱེད་རྒྱ་ཆེན་རྒྱུན་དུ་སྐྱོང་བར་འཚལ། །དེ་སྐད་སི་ཏུ་པདྨའི་མིང་ཅན་གྱིས། །དཔལ་དགའ་སྤྲུལ་སྐུར་གདམས་པའི་ཆོས་སུ་སྤེལ། །ཤུ་བྷམ།། ༈ །།དུས་གསུམ་རྒྱལ་བ་ཀུན་འདུས་པདྨ་འབྱུང་། །དབྱེར་མེད་ཀརྨ་ཀ་དང་འབྲུག་པའི་ཞབས། །འདི་ནས་བྱང་ཆུབ་བར་དུ་རིགས་ཀྱི་བདག །འདུ་འབྲལ་མེད་པར་བྱིན་ཆེན་དབབ་ཏུ་གསོལ། །སྐལ་ལྡན་རྒྱུད་གྲོལ་དབང་བཞིའི་ཡེ་ཤེས་ཀྱི། །གོ་འཕང་དམ་པ་བདེ་བླག་ཉིད་ཐོབ་ནས། །བདག་གཞན་འགྲོ་བའི་དོན་དུ་རླབས་ཆེན་གྱི། །ཕྲིན་ལས་ཐོགས་པ་མེད་པར་བྱིན་གྱིས་རློབས། །རང་སེམས་ངོ་བོ་སྟོང་ཞིང་གསལ་བ་ལ། །མ་འགགས་སྣ་ཚོགས་རྣམ་པར་རྟོག་པའི་ཕྲེང་། །སྔོན་བསུ་རྗེས་དཔྱོད་མེད་པར་ད་ལྟར་གྱི། །ཤེས་པ་སོ་མ་མ་བཅོས་དེ་ངང་ལ། །ངོ་བོ་སྐྱོང་ཞིང་མཉམ་པར་བཞག་པར་གནད། །དུས་ཀུན་རྩ་བའི་བླ་མར་བཅོས་མིན་གྱི། །མོས་གུས་ལྟེམ་རྐྱང་མེད་དང་མཁའ་ཁྱབ་འགྲོར། །

[Full Size]

བྱམས་དང་སྙིང་རྗེ་ཕྱོགས་མེད་འབྱོངས་པ་དང་། །སྡོམ་གསུམ་སྐྱོན་བྲལ་གསང་སྔགས་དམ་ཚིག་ལ། །སེལ་མེད་སྒོ་ནས་རང་དང་གཞན་དོན་སྐྱོངས། །ཞེས་པ་པདྨའི་མིང་ཅན་སི་ཏུ་པས། །འཛི་སྒར་བྱང་འདྲེན་ལེགས་བཤད་ངོར་སྤེལ་དགེ། །།༈ དུས་གསུམ་རྣམ་པར་རྟོག་པའི་ཆོས་ཐམས་ཅད། །ལྷན་སྐྱེས་ཡེ་ཤེས་གཉུག་མའི་རང་བཞིན་གྱི། །ཀ་དག་སྤྲོས་དང་བྲལ་བའི་ཀློང་ཡངས་སུ། །ཀུན་ཏུ་བཟང་པོའི་དགོངས་དོན་མྱུར་རྟོགས་ཤོག །དད་ཅན་དགེ་སློང་ཐབས་མཁས་ངོར་སྤེལ།། ༈ །།གདམས་པ་དོན་དུ་གཉེར་བའི་མོས་ལྡན་དག །གསོན་དང་རང་རེ་ཆོས་གཟུགས་འཛིན་པ་རྣམས། །དང་པོ་སྐྱབས་འགྲོའི་སྡོམ་དང་དགེ་བསྙེན་དང་། །རབ་བྱུང་བསྙེན་པར་རྫོགས་སོགས་སྔོན་བྱོན་གྱི། །ལུགས་སྲོལ་ཇི་བཞིན་དེ་ཡི་རྗེས་ཞུགས་སློབ། །དེང་དུས་རྩོད་ལྡན་སྙིགས་ལྔའི་སྐབས་འདིར་ཡང་། །དགེ་བའི་ཕྱོགས་ལ་འདུན་པའང་སྐལ་བཟང་རྨད། །དེས་ན་སོ་ཐར་སྲུང་སྡོམ་རྩ་བཞི་ཆང་། །ཕྲ་རགས་གང་ནུས་བསྲུང་ཞིང་རྣམ་པ་ཀུན། །སྡིག་སྤོང་དགེ་སྒྲུབ་རང་གཞན་སྨན་པའི་བློས། །ཆོས་ཚུགས་བླང་དོར་རང་ཡིད་ཆེས་པ་ཡི། །སྡོམ་པ་དམ་ཚིག་ངོ་ལྐོག་ཐུབ་པ་གནད། །ཡེ་ཤེས་སྤྱན་ལྡན་མི་ཁྲེལ་བྱ་བ་གཅེས། །ཆོས་ཀྱི་སྙིང་པོ་གནས་ལུགས་ཕྱག་རྒྱ་ཆེ། །རིག་པ་རང་གྲོལ་སངས་རྒྱས་རང་བྱུང་གཞི། །བླ་མར་མོས་གུས་འཁོར་བར་ཞེན་ལོག་དང་། །ལས་འབྲས་ཞིབ་དཔྱོད་བྱམས་དང་སྙིང་རྗེ་སྦྱོང་། །གང་ཤར་གཉུག་མ་ཆོས་སྐུའི་ཉམས་

[Full Size]

ལེན་ལ། །ཁོར་ཡུག་སྐྱོང་བའི་བསམ་གཏན་མཉམ་བཞག་དང་། །རྗེས་ཐོབ་སྒྱུ་མ་ལྟ་བུའི་ངང་ཉིད་ལས། །ལྷན་སྐྱེས་ཡེ་ཤེས་རང་ངོ་འཕྲོད་པ་ཡི། །ཆོས་སྐུའི་གོ་འཕང་བདེ་བླག་བསྒྲུབ་པར་རིགས། །དེ་སྐད་བསླབ་བྱ་མདོར་བསྡུས་གདམས་པའི་ཚུལ། །བཀོད་འདི་སི་ཏུ་པདྨའི་མིང་ཅན་གྱིས། །སྐལ་ལྡན་ཡིད་ཀྱི་ཤིང་རྟ་འགེངས་ཕྱིར་སྤེལ། །དགེ་དེས་འགྲོ་ཀུན་རྡོ་རྗེ་འཆང་འགྲུབ་ཤོག །སརྦ་མངྒ་ལམ། བྷ་ཝནྟུ།། ༈ །།ཆོས་རྣམས་ཀུན་གྱི་གཞི་རྟེན་མཆོག་གྱུར་པ། །སངས་རྒྱས་གཞན་ནས་མི་བཙལ་རང་གི་སེམས། །དུས་གསུམ་སྤྲོས་མཚན་དྲི་མས་མ་བསླད་པར། །གདོད་ནས་སྟོང་གསལ་སྣང་བ་འགགས་མེད་རྩལ། །མ་བཅོས་གང་ཤར་སོ་མའི་ངང་དུ་ཞོག །བསམ་བརྗོད་བློ་ལས་འདས་པ་ཕྱག་རྒྱ་ཆེ། །གནས་ལུགས་ཆོས་སྐུའི་རང་ཞལ་གསལ་སྟོན་པའི། །རྩ་བརྒྱུད་བླ་མའི་གོ་འཕང་མྱུར་ཐོབ་ཤོག །མོས་ལྡན་གང་དེའི་ངོར་སྤེལ་བ་དགེ།། ༈ །།ༀ་སྭསྟི། རང་སེམས་སྐྱེ་མེད་ཆོས་ཀྱི་སྐུ། །པདྨ་འབྱུང་གནས་ཡོངས་ཤར་བས། །དེང་འདིར་གནས་ལུགས་མངོན་གྱུར་གྱི། །རྟོགས་པའི་ཡོན་ཏན་མཐར་ཕྱིན་ཤོག །བླ་མར་མོས་གུས་འབྲལ་མེད་བརྟེན། །འཁོར་བར་ཞེན་ལོག་ངེས་འབྱུང་གི། །རྟེན་འབྲེལ་དགེ་ཚོགས་བར་མེད་སྒྲུབས། །ཀུན་གཞི་བདེར་གཤེགས་སྙིང་པོའི་དོན། །མི་རྟོག་གནས་པར་མི་ཞེན་ཅིང་། །འཁྲུལ་པའི་དྲྭ་བར་མི་འཐུམས་པར། །རང་བབ་རང་བཞིན་

[Full Size]

རིག་པའི་རྒྱུན། །སེམས་ཉིད་གསལ་སྟོང་སྤྲོས་བྲལ་གྱི། །ལྟ་བ་མཐར་ཐུག་མ་བཅོས་ངང་། །རང་གསལ་སྐྱོང་བ་བསྒོམ་པ་སྟེ། །འཕྲོ་འདུར་སྣང་ཡང་གཉུག་མའི་གཤིས། །ཡེངས་མེད་ངོ་བོ་སྐྱོང་ཕྱིན་ཆད། །སྤྱོད་ལམ་ཐ་མལ་མི་འགྱུར་ཞིང་། །དེ་ཕྱིར་བསྐྱེད་བཟླས་རང་རིག་ཀློང་། །སྣང་སྟོང་ཟུང་འཇུག་རོལ་རྩལ་ལས། །གང་ཤར་སྤང་བླང་བྲལ་བར་སྤྱོད། །ཆོས་ཀུན་སྙིང་པོ་ཟབ་ལམ་གྱི། །རྩ་བ་རང་རིག་སྐྱོང་ལ་འདུ། །དེ་ལྟར་གྲུབ་ཐོབ་གཅོད་ཡུལ་གྱི། །བརྒྱུད་འཛིན་སྦས་ཚུལ་རྣལ་འབྱོར་པ། །བླ་མ་བསོད་ནམས་ཆོས་འཕེལ་གྱི། །བཞེད་ངོར་ཐུགས་དམ་གསོས་འགྱུར་ཕྱིར། །པདྨ་ཉིན་བྱེད་དབང་པོས་སྤེལ། །ཚེ་གཅིག་རྡོ་རྗེ་འཆང་འགྲུབ་ཤོག། །།༈ རང་སེམས་མ་བཅོས་གཉུག་མའི་གཤིས། །ཀ་དག་ངོ་བོ་ཀུན་ཏུ་བཟང་། །དུས་གསུམ་སངས་རྒྱས་འདུས་པའི་དཔལ། །གུ་རུ་པདྨ་འབྱུང་གནས་དྲན། །དྲན་ཙམ་ཉིད་ནས་སྣང་སྲིད་ཀྱི། །ཆོས་རྣམས་ཡེ་དག་སེམས་སུ་འདུ། །དེ་ཡང་དབྱིངས་རིག་དབྱེར་མེད་པ། །གང་ཤར་ཤར་གྲོལ་ཀློང་ཐིམ་ཤོག །ཅེས་པའང་བདེ་དགའི་ངོར་སྤེལ།། ༈ །།དུས་གསུམ་རྣམ་པར་རྟོག་པའི་ཆོས་ཐམས་ཅད། །འཛིན་མེད་བྱར་མེད་རང་བབ་མ་བཅོས་པར། །ཡེངས་མེད་ཆུ་ུབོ་རྒྱུན་གྱི་རྣལ་འབྱོར་ངང་། སྤྱོད་ལམ་ཀུན་ཏུ་དྲན་རྫི་མ་བྲལ་བར། །སེམས་ཉིད་ཆོས་སྐུའི་རང་ཞལ་གཅེར་མཐོང་གི། །རང་རྒྱུད་རིག་རྩལ་ཀུན་བཟང་མྱུར་ཐོབ་ཤོག །ཅེས་པའང་བླ་མ་དགེ་ལེགས་རྒྱ་

[Full Size]

མཚོའི་ངོར་སྤེལ་བ་དགེ།། ༈ །།དལ་འབྱོར་རྙེད་དཀའ་མི་རྟག་རྒྱུད་བསྐུལ་ནས། །ལས་འབྲས་བླང་དོར་འཁོར་བའི་ཉེས་དམིགས་བསམ། །སྐྱབས་འགྲོ་སེམས་བསྐྱེད་རྡོར་སེམས་མཎྜལ་དང་། །བླ་མའི་རྣལ་འབྱོར་ཡི་དམ་བསྐྱེད་རྫོགས་སོགས། །སྔོན་འགྲོའི་ཆོས་རྣམས་འབད་ཅིང་དངོས་གཞི་ནི། །ཕྱག་རྒྱ་ཆེ་དང་རྫོགས་པ་ཆེ་ཞེས་པ། །དགོངས་པ་མདོར་དྲིལ་ཉམས་ལེན་རྩ་བ་ལ། །བླ་མར་མོས་གུས་འཁོར་བར་ཞེན་ལོག་རྣམས། །གཞིར་བྱས་ཡེངས་མེད་སྒོམ་གྱི་རྩ་བ་སྟེ། །དེ་ཡང་རྒྱུན་དུ་དྲན་རྫི་མ་བྲལ་ཙམ། །གནས་པ་ཆེད་དུ་མི་བསྒྲུབ་རྣམ་རྟོག་གི། །རྗེས་སུ་མི་འབྲང་མ་བཅོས་རང་བབས་ཀྱི། །ཤེས་པ་སོ་མ་དེ་ངང་ལྷོད་དེར་བཞག །གསལ་སྟོང་འཛིན་མེད་དབྱིངས་རིག་དབྱེར་མེད་པར། །གང་ཤར་ཆོས་སྐུའི་རོལ་པར་སྐྱོང་བ་གནད། །དེ་ལྟར་རིག་པ་གཞི་ཐོག་ཡེངས་མེད་ངང། །སྤྱོད་ལམ་རྣམ་བཞིར་འབད་པས་རིང་མིན་དུ། །རང་བྱུང་ལྷན་སྐྱེས་གདོད་ནས་རྡོ་རྗེ་འཆང་། །མངོན་གྱུར་འཇའ་ལུས་འོད་སྐུར་སངས་རྒྱས་ཤོག །ཅེས་པའང་སི་ཏུ་པདྨ་ཉིན་བྱེད་དབང་པོས་དད་གསུམ་རྣམ་དག་དྲུང་རམ་བླ་མཆན་ནོར་བུའི་བཞེད་ངོར་སྤེལ་བ་དགེ།། ༈ །།རྣམ་ཀུན་ཆོས་ཅན་དགེ་སྤྱོད་ཀུན། །ཅི་ནུས་བསྒྲུབ་ཅིང་མོས་གུས་དང་། །དག་སྣང་ཕྱོགས་མེད་སྦྱོང་བ་ཡི། །དངོས་ཀུན་ཆོས་ཉིད་སྣང་བ་ཡི། །རྟོག་ཚོགས་སེམས་ཀྱི་ཆོ་འཕྲུལ་རྣམས། །གང་ཤར་མ་བཅོས་གཉུག་མའི་ངང་། །རང་བྱུང་རིག་པའི་ངོ་བོ་སྐྱོངས། །ཅེས་པའང་བླ་མ་ཕྲིན་ལས་རབ་རྒྱས་བཞེད་ལྟར་སྤེལ་བ་བཀྲ་ཤིས།། །།

[Full Size]

༈ དལ་འབྱོར་རིན་ཆེན་ལུས་བཟང་རྟེན་མཆོག་ཐོབ། །མ་ནོར་ལམ་སྟོན་དཔལ་ལྡན་རྡོ་རྗེ་ཅན། །དམ་པ་རྣམས་ཀྱིས་རིམ་པས་རྗེས་བཟུང་ནས། །བསླབ་པ་རྣམ་དག་སྨིན་དབང་གྲོལ་ཁྲིད་ཀྱི། །གདམས་པས་རྒྱུད་བརླན་སྐལ་བར་ལྡན་པར་ངེས། །བྱམས་དང་སྙིང་རྗེས་ཀུན་བསླང་རིས་མེད་འགྲོར། །ཁྱབ་པའི་བསམ་པ་བརྟན་ཅིང་དགེ་བའི་ལས། །ཆེ་ཕྲ་ཀུན་ཀྱང་རང་གཞན་བླ་མེད་ཀྱི། །དོན་དུ་བསྔོ་ཞིང་ཁྱད་པར་སྟོང་ཉིད་ཀྱི། །ལྟ་བའི་ངང་ནས་མཉམ་བཞག་སྐྱོང་བ་སྟེ། །དེ་ཡང་འདས་རྗེས་མ་འོངས་རྣམ་རྟོག་བསལ། །ཤེས་རིག་སོ་མ་གང་ཤར་བཟོ་མེད་བསྐྱང་། །དེ་ལ་རིམ་གྱིས་གོམས་འདྲིས་མཐར་ཕྱིན་གནད། །ཀུན་གྱི་རྩ་བ་མོས་གུས་གདུང་ཤུགས་དང་། །འཁོར་བར་ཞེན་ལོག་ཆོས་ལ་ངེས་འབྱུང་བསྐྱེད། །ལས་འབྲས་བླང་དོར་ཕྲ་ཞིབ་འཛེམ་པ་དང་། །སྡོམ་པ་དམ་ཚིག་ངོས་ལྐོག་མེད་པ་རུ། །ཇི་ནུས་བསྲུང་ཞིང་ལུས་ངག་དགེ་ལ་འབད། །དུག་ལྔའི་དབང་དུ་མ་གྱུར་གཉེན་པོ་ཡི། །སྟོབས་ཀྱིས་སླེབས་པའི་དྲན་པའི་རྩིས་ཟིན་ངང་། །གང་ཤར་མ་བཅོས་གནས་ལུགས་བསྐྱང་བ་ན། །སྐབས་ཤིག་དོན་གྱི་ཡེ་ཤེས་ངོ་བོ་ཉིད། །ཕྱག་རྒྱ་ཆེ་དང་རྫོགས་པ་ཆེ་ཞེས་པ། །དབྱེར་མེད་རྒྱལ་བ་གོང་མ་གཤེགས་པའི་ཤུལ། །ལམ་བཟང་བླ་མེད་ཀུན་འདུས་རིག་པའི་རྩལ། །ཆོས་སྐུ་སྒྲིབ་བྲལ་མངོན་གྱུར་མཐོང་ཞེས་པར། །གོང་མ་རྣམས་ཀྱིས་མགྲིན་གཅིག་གསུངས་པ་བཞིན། །ཤེས་རབ་ལྡན་པས་བསམ་གཏན་གཡོ་མེད་པར། །

[Full Size]

བརྩོན་འགྲུས་དང་བཅས་འབད་པས་འགྲུབ་པར་འགྱུར། །དེས་ན་དྲན་རྫི་མ་བྲལ་ངང་དེ་ནས། །ཆོས་ཀུན་སེམས་སུ་ཐག་བཅད་གདེང་ལྡན་པས། །ཆུ་བོའི་རྒྱུན་བཞིན་རྣལ་འབྱོར་བསྒྲུབ་པར་འཚལ། །དེ་སྐད་སྐལ་ལྡན་ལས་འཕྲོ་བསོད་ནམས་ཅན། །ལྷ་ཡི་བཟོ་འཕྲུལ་རྨད་བྱུང་ཐར་མཆོག་ཅེས། །གང་དེའི་བསྐུལ་བ་དོན་ལྡན་བྱ་ཕྱིར་དུ། །སི་ཏུ་པདྨ་ཉིན་བྱེད་དབང་པོས་སྤེལ། །དགེ་དེས་གནས་ལུགས་ཕྱག་རྒྱ་ཆེན་པོ་ཡི། །ཡེ་ཤེས་མངོན་སུམ་རང་གཞན་རྒྱུད་སྨིན་ནས། །སྐུ་བཞིའི་གོ་འཕང་ཚེ་འདིར་ཐོབ་ནས་སུ། །ཐར་པ་མཆོག་གི་ས་ལ་འགོད་པར་ཤོག །སརྦ་མངྒ་ལཾ་སུ་ཛ་ཡནྟུ།། ༈ །།ན་མོ་གུ་རུ། སྐྱབས་ཀུན་འདུས་པ་རྒྱལ་མཆོག་ཀརྨ་ཀ། བདུད་འདུལ་རྡོ་རྗེ་སྐྱེ་དང་ཚེ་རབས་ཕྲེང་། བྱང་ཆུབ་སྙིང་པོའི་བར་དུ་འབྲལ་མེད་པར། སྙིང་གི་ཐིག་ལེར་རྟག་བཞུགས་བྱིན་གྱིས་རློབས། འཕགས་པའི་སར་གནས་མཆོག་རྣམས་གཤེགས་པའི་ཤུལ། །སྐལ་ལྡན་ལས་ཅན་གྲོལ་དང་སྨིན་བྱེད་ལམ། །ཕྱག་རྒྱ་ཆེ་ཞེས་ཟབ་དོན་རྨད་བྱུང་བ། །མཐར་ཐུག་དོན་གྱི་ཡང་བཅུད་མན་ངག་རྣམས། །རྒྱ་བོད་མཁས་གྲུབ་ཀུན་གྱི་གསུང་དྲི་མེད། །མུ་ཏིག་ཕྲེང་འདྲ་ལྟ་བུའི་གསུང་གསང་མཛོད། །ཀུན་ཏུ་གསལ་བཞིན་དེ་ཉིད་གཞིར་བཞག་པའི། །སྔོན་འགྲོ་དང་ནི་དངོས་གཞིའི་རིམ་པ་ལས། །དང་པོ་བསགས་སྦྱང་ཚོགས་གཉིས་རླབས་ཆེན་པོ། །སེམས་ཀྱི་དྲི་མ་སྤངས་པའི་ཐེག་ཆེན་གྱི། །བསམ་སྦྱོར་དང་བཅས་དེ་ཡང་རང་རྒྱུད་དུལ། །

[Full Size]

ངེས་འབྱུང་སྐྱོ་ཤས་མོས་གུས་གཞི་བརྟན་ཅིང་། །དད་དང་ཚུལ་ཁྲིམས་བག་ཡོད་དམ་ཚིག་གཙང་། །འགྲོ་ལ་ཉེ་རིང་བྲལ་བའི་བྱམས་པ་དང་། །སྟོང་ཉིད་སྙིང་རྗེ་ལྟ་བའི་གདེང་ལྡན་པས། །དགེ་ཀུན་མ་གྱུར་འགྲོ་ལ་བསྔོ་བར་འབད། །དངོས་གཞི་ཕྱག་རྫོགས་དབྱེར་མེད་ཟུང་འཇུག་པ། །ཤེས་པ་སོ་མ་དེ་ངང་མ་བཅོས་པར། །བྱར་མེད་ལྷུག་པར་བཞག་ནས་ཡེངས་མེད་ངང་། །རྩོལ་སྒྲུབ་རེ་དོགས་སྤང་བླང་མེད་པར་བསྐྱང་། །དེ་ཉིད་རྒྱུན་དུ་གོམས་འདྲིས་མཐར་ཕྱིན་གནད། །ཁྱད་པར་བརྒྱུད་པ་བྱིན་རླབས་ཚན་ཁ་ཆེ། །བསླུ་མེད་བླ་མར་གསོལ་འདེབས་ཁོ་ནར་འབུངས། །སྐབས་ཞིག་དོན་གྱི་ཡེ་ཤེས་འཆར་ཞེས་གསུངས། །དེས་ན་རང་སེམས་ཆོས་ཀུན་འདུས་པ་ལ། །ཆོས་སྐུར་རྟོགས་པའི་མཉམ་བཞག་རྒྱུན་བསྐྱང་བྱ། །གཞན་ཡང་རྣམ་དཀརདགེ་བ་གང་འགྲུབ་དང་། །ལས་འབྲས་བླང་དོར་ཚུལ་བཞིན་བསྒྲུབས་ནས་སུ། །སྙིང་པོའི་བསྟན་ལ་བྱ་བ་བྱེད་པ་ཡི། །ཐོས་བསམ་སྒྲུབ་པའི་རྒྱལ་ས་འཛིན་པ་དང་། །འགྲ་ོལ་ཕན་བདེའི་གོ་འཕང་སྦྱིན་ནུས་པའི། །འབྲེལ་ཚད་ཐར་པའི་ལམ་བཀོད་ཕྲིན་ལས་ཀྱི། །སྙིང་སྟོབས་གོ་ཆ་འཆང་ལ་དཔའ་བ་ཡི། །འཕགས་ཆེན་སྤྱན་རས་གཟིགས་བཞིན་འགྲུབ་གྱུར་ཅིག །དེ་སྐད་བླ་མ་སྙན་གྲགས་དཔལ་བཟང་པོའི། །བཞེད་ངོར་སི་ཏུ་པདྨ་ཉིན་བྱེད་ཀྱིས། །སྤེལ་དགེས་འགྲོ་ཀུན་རྡོ་རྗེ་འཆང་ཐོབ་ཤོག །དགེའོ།། ༈ །།དད་ལྡན་ཀརྨ་སྨོན་ལམ་ཞེས་པ་ནས། །རང་ཚུལ་མོལ་མཆིད་དེར་གསལ་ལྟར་འབྱོར་བ། །རྒྱལ་དབང་བཅུ་

[Full Size]

གསུམ་རྡོ་རྗེ་འཆང་ཆེན་པོ། །དངོས་སུ་ཞལ་མཇལ་བྱིན་རླབས་འཕོ་དབང་ཐོབ། །སྐལ་བཟང་སྐལ་བར་ལྡན་པའི་སྐྱེ་སྔོན་གྱི། །ལས་འཕྲོའི་བསོད་ནམས་ལྡན་ལས་གཞན་དུ་ཅི། །འོན་ཀྱང་འདིར་སྣང་ཞེན་འཛིན་ཆོས་བརྒྱད་ཀྱི། །བདུད་བཞིའི་རླུང་ལ་མི་གཡེང་དལ་རྟེན་འདི། །སྙིང་པོར་བྱ་ཕྱིར་རང་ལ་རགས་ལས་ཕྱིར། །དེས་ན་མོས་གུས་ལྟེམ་རྐྱང་མ་སོང་བར། །རང་སེམས་ངོ་བོ་བླ་མའི་དཀྱིལ་འཁོར་དུ། །འཆར་བའི་མ་བཅོས་དེ་ངང་སྣང་རིག་ཀུན། །དུས་གསུམ་རྟོག་པའི་དྲྭ་བས་མ་བཅིངས་པའི། །གང་ཤར་འཛིན་མེད་སྐྱོང་བའི་ཉམས་ལེན་གྱི། །མཉམ་པར་བཞག་དང་རྗེས་ཐོབ་གཉིས་འཛིན་ཆོས། །ཐམས་ཅད་སྒྱུ་མའི་སྣང་བར་འཆར་བ་ཡི། །ཡོད་མིན་མེད་མིན་ཟུང་འཇུག་ལྟ་བའི་གདེང་། །ཡེངས་མེད་ཆུ་རྒྱུན་ལྟ་བུའི་རྣལ་འབྱོར་འཚལ། །རང་གཞན་སྒོ་གསུམ་དགེ་ལ་བཀོལ་བ་ཡི། །བསགས་སྦྱང་ཅི་ནུས་འབད་པས་དང་ལེན་ནས། །སྡིག་ལས་ཆེ་ཕྲ་སྤང་པའི་ཡིད་དམ་བཟུང་། །ནམ་ཞིག་ཀུན་གཞི་བདེ་གཤེགས་སྙིང་པོ་ཞེས། །ཆོས་སྐུ་དྲི་མེད་རིག་པའི་རང་རྩལ་གྱི། །ངོ་བོ་གཅེར་མཐོང་བརྒྱུད་པའི་བྱིན་རླབས་འཇུག །དེ་ཕྱིར་ཚེ་གཅིག་སངས་རྒྱས་ཐོབ་པའི་ཆོས། །གཞན་དུ་མ་མཆིས་དེ་ལྟར་ཕྱག་རྫོགས་སོགས། །ཉམས་ལེན་ངང་ནས་རང་སེམས་སྐྱོང་བ་གནད། །བསྟན་འགྲོའི་བདེ་ཐབས་སྤེལ་ཕྱིར་སྨོན་བདེན་ཚིག །དགོས་ཞེས་དེ་ལྟར་བསམ་པ་ལྷུན་གྲུབ་དང་། །རིགས་གསུམ་སྙིང་པོ་གནས་མཆོད་སོགས་ལ་འབད། །དེ་ལས་ཁོ་བོའི་ཚིག་རིས་འབྲས་བུ་

[Full Size]

དབེན། །ངལ་བའི་རྒྱུར་སྣང་དེ་ལྟར་ཡིད་ངེས་འཚལ། །ཉམས་སུ་ལེན་པའི་སྣོད་དང་ལྡན་གྱུར་ན། །གསར་རྙིང་ཆོས་རྣམས་དགོས་འབྱུང་ནོར་བུ་བཞིན། །དེ་ཕྱིར་གཞན་དུ་གསར་རྩོམ་དང་གཏེར་ཆོས། །སྣ་ཚོགས་འདི་དག་ཉིང་འཁྲུལ་ཆུ་ཤིང་དཔེར། །ཇི་བཞིན་ངེས་པས་ཅལ་སྒྲོག་རྗེས་འཇུག་སྤོངས། །རང་སེམས་དཔང་བཙུགས་དད་དང་དམ་ཚིག་ལ། །གཅེས་སྤྲས་དགེ་སྒྲུབ་སྡིག་སྤང་རྣམ་ཀུན་ཏུ། །ཡིག་དྲུག་དུང་ཕྱུར་བཟླས་ལ་བརྩོན་པར་ཞུ། །སླད་ནས་དགེ་ཚོགས་ཡར་ཟླ་ལྟར་འཕེལ་སྨོན། །ལྷ་རྫས་སྔགས་མདུད་དམ་རྫས་དང་བཅས་ཏེ། །དཔལ་སྤུངས་ཆོས་གྲྭའི་ཡང་དབེན་ཁང་ནས་སྤེལ། །མངྒ་ལམ།། ༈ །།སྔོན་སྨོན་རྣམ་དཀར་དགེ་འབྲས་དུས་སྨིན་པས། །དལ་འབྱོར་རྟེན་བཟང་བསླབ་གསུམ་རྒྱན་ལྡན་པའི། །མཚུངས་བྲལ་དད་དམ་ལྡན་པ་གང་ཉིད་ཀྱི། །ཐུགས་དམ་ཟབ་མོའི་ཉམས་བཞེས་རིམ་པ་ཡང་། །འཁྲུལ་མེད་དམ་པའི་གསུང་དང་རྗེས་མཐུན་པར། །དུས་གསུམ་རྣམ་པར་རྟོག་པ་ཇི་སྙེད་པ། །རྟོག་མེད་རིག་པའི་རང་རྩལ་ཁོ་ན་རུ། །ཤར་བས་དུག་ལྔ་ལ་སོགས་ཉོན་མོངས་ཚོགས། །ཤར་གྲོལ་དུས་མཉམ་རིག་པ་རང་གྲོལ་ཕྱིར། །སྤྲོས་བྲལ་གནས་ལུགས་རྟོགས་པར་སོམ་ཉི་ཅི། །མི་སློབ་རབ་ཏུ་དགའ་བའི་ས་ཡང་ནོན། །དེ་ཕྱིར་ད་དུང་དེ་ལྟར་རྒྱུན་སྐྱོང་དང་། །རང་གཞན་དོན་གཉིས་ལྷུན་གྱིས་འགྲུབ་པར་ངེས། །ཞེས་པའང་འབྲུག་པ་བླ་མའི་བཞེད་ངོར་སི་ཏུས་སྤེལ།། ༈ །།སྭསྟི། སྔོན་སྨོན་

[Full Size]

བཟང་པོས་ཚོགས་ཟུང་འབྲས་སྨིན་པས། །དལ་རྟེན་མཆོག་ཐོབ་སྙིང་པོའི་བསྟན་ལ་ཞུགས། །མཚན་ལྡན་རྡོ་རྗེ་སློབ་དཔོན་རྣམས་དང་མཇལ། །ཆོས་ཀྱི་སྣོད་རུང་རྗེས་སུ་བཟུང་ནས་སུ། །གདམས་ངག་ཟབ་ཆོས་སྨིན་གྲོལ་ལམ་བཟང་བཀོད། །གསང་སྔགས་རྡོ་རྗེ་ཐེག་པའི་སྒོར་ཞུགས་ནས། །ཟབ་ལམ་ནཱ་རོ་ཆོས་དྲུག་ཉམས་ལེན་དང་། །རྣམ་ཀུན་མཆོག་ལྡན་ཕྱག་རྒྱ་ཆེན་པོ་ཡི། །སྔོན་འགྲོ་དངོས་གཞི་ཇི་བཞིན་བསྒྲུབ་ནས་སུ། །མོས་གུས་དང་ནི་ཞེན་ལོག་ངེས་འབྱུང་གིས། །རྒྱུད་བསྐུལ་བརྩོན་འགྲུས་མཐའ་རུ་ཕྱིན་པའི་མཐུས། །གོལ་ཤོར་འཕྲང་ལས་གྲོལ་ཏེེ་གདོད་མའི་གཤིས། །གནས་ལུགས་ཆོས་སྐུའི་རང་ཞལ་དྲི་མེད་པར། །མཐོང་ལ་ཡི་རང་སིམ་པ་ཅི་ཡང་བསྐྱེད། །སླད་དུའང་ལས་འབྲས་བླང་དོར་ཞིབ་སྤྱོད་ཅིང་། །བྱང་ཆུབ་སེམས་བསྐྱེད་གཞན་ཕན་རྩ་བ་བརྟན། །དད་གསུམ་རྣམ་དག་དམ་ཚིག་གཅེས་སྤྲས་དང་། །བསྐྱེད་དང་རྫོགས་པའི་རིམ་པ་ལྷུར་ལེན་ནས། །སྣང་སྲིད་ཆོས་སྐུའི་རོལ་པ་འཆར་བཞིན་དུ། །ཡེངས་མེད་བསྒོམ་པར་དེ་ཉིད་ཆོས་ཀུན་འདུས། །རྡོ་རྗེ་འཆང་ཆེན་ཏིལླི་ནཱ་རོ་པ། །མར་པ་མི་ལ་དྭགས་པོ་དུས་མཁྱེན་སོགས། །བཀའ་བརྒྱུད་བླ་མ་རྣམས་དང་ཡི་དམ་ལྷ། །ཡེ་ཤེས་ཆོས་སྐྱོང་ཚོགས་ཀྱི་ཐུགས་རྗེའི་མཐུས། །ཆོས་ལྟར་བཅོས་པའི་འཁྲུལ་པ་རྒྱང་བསྲིང་ཞིང་། །མ་ནོར་ངེས་དོན་སྙིང་པོའི་གནས་གཞོལ་ནས། །སྟོན་པའི་བསྟན་ལ་བྱ་བ་བྱེད་པ་དང་། །འབྲེལ་བཅས་ཐར་པའི་ལམ་དུ་བཀོད་

[Full Size]

བཞིན་པར། །རང་རིག་ཡེ་ཤེས་མངོན་དུ་གྱུར་ནས་སུ། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །དེ་སྐད་ཤར་ཕྱོགས་གདུལ་བྱར་གྱུར་པའི་འགྲོ། །ཡང་དག་ལམ་སྟོན་འདུལ་འཛིན་དགེ་བའི་བཤེས། །ངུར་སྨྲིག་འཆང་བ་བླ་མ་ནཱ་ཐ་ཞེས། །གང་དེའི་བཞེད་ངོར་ཨོ་རྒྱན་ལུང་ཟིན་ཙམ། །སི་ཏུ་པདྨ་ཉིན་བྱེད་དབང་པོས་སྤེལ། །དགེ་དེས་འགྲོ་ཀུན་བླ་མེད་སངས་རྒྱས་ཤོག །ཅེས་དཔལ་སྤུངས་ཐུབ་བསྟན་ཆོས་འཁོར་གླིང་གི་ཡང་དབེན་སྒྲུབ་ཁང་ནས་དགེ། །།༈ རྡོ་རྗེ་འཆང་ནས་རྩ་བའི་བླ་མའི་བར། །སྙིང་པོ་དོན་བརྒྱུད་རྣམས་དང་རང་སེམས་དང་། །དབྱེར་མེད་འདུ་འབྲལ་མེད་ངང་རྣམ་ཀུན་དུ། །ཆོས་མཐུན་གསོལ་གདབ་བསགས་སྦྱང་སྔོན་འགྲོའི་རིགས། །འབད་ཅིང་སེམས་ཅན་ཕ་མའི་རང་བཞིན་ལ། །བྱང་ཆུབ་སེམས་ཀྱི་རྩི་ཡིས་ཟིན་པ་ནས། །ཚད་མེད་བཞི་ལྡན་སྒོ་ནས་འགྲོ་ཕན་དུ། །ཕྱོགས་རིས་མེད་པར་སྨན་སྦྱིན་བཏང་བ་ལས། །སེམས་ཀྱི་དྲི་མ་ནམ་ཡང་རིང་དུ་སྤོངས། །བསྟན་སྒོར་འཇུག་པའི་སྐལ་བཟང་བསླབ་སྡོམ་ལ། །གསོ་སྦྱང་དང་ནི་ཤ་ཆང་བག་ཡོད་གནད། །བསྟན་དང་བླ་མ་དགེ་འདུན་སྤྱི་ཡི་དོན། །ལྷག་བསམ་དག་པས་ལྷུར་ལེན་གང་འགྲུབ་དང་། །རྣམ་ཀུན་དགེ་སྒྲུབ་སྡིག་སྤང་ཚད་ལྡན་བྱ། །དྲན་རིག་ཡེངས་མེད་ངོ་བོ་སྐྱོང་བཞིན་དུ། །ཉིན་སྣང་སྒྱུ་མ་རྨི་ལམ་རྟོགས་བྱས་ནས། །མཚན་སྣང་དེ་ཡི་ལ་ཟླར་གོམས་འདྲིས་ཀྱི། །མ་ཡེངས་དེ་ངང་སྤྱོད་ལམ་བརྟན་བྱས་ན། །ཆོས་སྐུའི་རང་རྩལ་སེམས་ཀྱི་ངོ་མཐོང་ཞེས། །རྡོ་རྗེའི་གསུང་གསང་

[Full Size]

དག་ལས་བྱུང་བ་བཞིན། །བྱིན་རླབས་འཕོ་དབང་ངེས་ཐོབ་སྐལ་ལྡན་གྱི། །ཉམས་ལེན་མོས་ཐོབ་འཚོ་བྱེད་སྨན་བླ་ཡིས། །བསྐུལ་ཕྱིར་སི་ཏུ་པདྨས་བཀོད་པའི་དགེས། །རང་གཞན་དོན་གཉིས་ཡོངས་གྲུབ་བྱིན་གྱིས་རློབས།། ༈ །།བཀའ་བརྒྱུད་པའི་བླ་མར་གསོལ་བ་འདེབས། །སེམས་གང་ཤར་རིག་པ་ཧྲིག་གེ་བ། །ཕྱི་སྣང་བའི་ཡུལ་ཕྱིར་མི་འབྲང་ཞིང་། །ནང་འཛིན་པས་མ་བསླད་རྗེན་ལྷང་ངེ། །དེ་མཉམ་རྗེས་རེས་འཇོག་མ་ཡིན་ཅིང་། །རྐྱེན་བཟང་ཞན་གང་ཤར་དེ་ངང་སྐྱོང་། །མོས་གུས་ཅན་སྒོམ་གྱི་མགོ་བོ་དང་། །ཞེན་ལོག་ཅན་སྒོམ་གྱི་རྐང་པ་ཞེས། །སྔོན་གྲུབ་བརྙེས་རྣམ་ཐར་ཚུལ་བཞིན་དུ། །རྗེས་སློབ་པའི་དགེ་བས་ནམ་ཞིག་ཏུ། །སེམས་ཆོས་སྐུའི་རང་ཞལ་མཐོང་ངོ་ཞེས། །ལྷ་བྲིས་པ་བསྟན་འཛིན་གཡར་ངོ་རུ། །སི་ཏུ་པ་པདྨའི་མིང་དེས་སྤེལ།། ༈ །།གང་ཁྱོད་སྔོན་ཚེ་ཚོགས་ཟུང་གི། །བསགས་སྦྱངས་ལེགས་སྨོན་དགེ་དེ་ཡིས། །དལ་རྟེན་མཆོག་ཐོབ་སྙིང་པོའི་བསྟན། །སྒོར་ཞུགས་ཆོས་ཟབ་ལམ་མ་ནོར། །ཕྱག་རྫོགས་ཉམས་ལེན་སྐལ་བཟང་ཐོབ། །ཆོས་ཀུན་རྩ་བ་སེམས་ཉིད་དེ། །རིག་པ་ཧྲིག་གེར་རང་སར་ཞོག །ལེགས་ཉེས་རྩིས་གདབ་མི་བྱ་བར། །དུས་གསུམ་རྣམ་རྟོག་རྗེས་མི་འབྲང་། །དེ་ལྟར་ཡང་ཡང་གོམས་པ་ན། །སེམས་ཉིད་གཞི་མེད་རྩ་བྲལ་གྱི། །ཆོས་སྐུའི་ངོ་བོ་རང་ཞལ་མཐོང་། །དེའང་མོས་གུས་ཞེན་ལོག་དང་། །དམ་ཚིག་དགེ་སྡིག་བླང་དོར་

[Full Size]

གནད། །བཀའ་བརྒྱུད་གོང་མའི་བྱིན་རླབས་ཀྱི། །ཡེ་ཤེས་རྒྱུད་སྨིན་གྲོལ་གྱུར་ཅིག །སི་ཏུ་པས་གཅོད་བླ་ཚེ་དབང་བཞེད་ལྟར་སྤེལ།། ༈ །།ཀ་དག་གདོད་མའི་མགོན་ལ་ཕྱག་འཚལ་འདུད། །སེམས་ཉིད་ལྷན་སྐྱེས་རང་བྱུང་རིག་པའི་དོན། །གཏན་ལ་འབེབས་པའི་ཡེ་ཤེས་ངོ་སྤྲད་ཕྱིར། །ཐ་མལ་འཁྲུལ་པ་རྒྱ་འབྱམས་རྣམ་རྟོག་གི། རྗེས་སུ་མི་འབྲང་མ་འོངས་མདུན་མི་བསུ། །ད་ལྟའི་ཤེས་པ་སོ་མའི་ངང་དུ་བཞག །དེ་ལ་བཅས་བཅོས་གནས་དགའ་འགྱུ་སྡུག་སྤངས། །གང་ཤར་དེ་ཡི་གནས་ལུགས་རྒྱུན་དུ་སྐྱོངས། །མ་གྱུར་སེམས་ཅན་འགྲོ་ལ་ཕན་སེམས་ཀྱི། །བྱང་སེམས་སྙིང་རྗེ་བསྐྱེད་ཅིང་རྣམ་ཀུན་དུ། །དཀོན་མཆོག་ཀུན་འདུས་རྩ་བའི་བླ་མ་ལ། །མོས་གུས་དད་དང་དམ་ཚིག་མོས་བློ་ཡི། །རྩ་བ་བརྟན་ཅིང་འཁོར་བར་ཞེན་ལོག་གི། །བསམ་པ་འགྱུར་བ་མེད་ཅིང་དུས་ཐམས་ཅད། །སྒོ་གསུམ་དགེ་བའི་ལས་ལ་བཀོལ་བར་བྱ། །ཅི་བྱེད་ཆོས་ཀྱི་ཕྱོགས་ལ་འབད་པས་ན། །ནམ་ཞིག་ཆོས་སྐུ་བདེ་བ་ཆེན་པོ་ཡི། །གོ་འཕང་རང་རྒྱུད་བདེ་བླག་ཐོབ་པར་འགྱུར། །ཅེས་པའང་ལྷ་སྲས་རིན་པོ་ཆེའི་བཞེད་དགོངས་ལྟར་སི་ཏུ་པདྨའི་མིང་གིས་བཀོད་པའོ།། ༈ །།དུས་གསུམ་སངས་རྒྱས་ཀྱི་སྐུ་གསུང་ཐུགས། །ཡེ་ཤེས་རྡོ་རྗེ་ཡི་ངོ་བོ་ཉིད། །གདོད་ནས་ཡོངས་གྲུབ་ཀྱི་རྡོ་རྗེ་འཆང་། །ཟླ་འོད་གཞོན་ནུ་ལ་གསོལ་བ་འདེབས། །རང་བྱུང་རིག་པ་དང་དབྱེར་མེད་ངང་། །ཀུན་ཁྱབ་ལྷན་སྐྱེས་ཀྱི་རང་མདངས་རྩལ། །ཀུན་བཟང་བདེ་ཆེན་གྱི་རོལ་པ་རུ། །སྣང་བཞིན་དུ་བདེ་གསལ་མི་རྟོག་པའི། །གཞི་མ་

[Full Size]

བཅོས་གཉུག་མ་སྤྲོས་དང་བྲལ། །ལམ་འོད་གསལ་ཕྱག་རྒྱ་ཆེན་པོའི་གཤིས། །ཡིན་ལ་ཡིན་བཞིན་པའི་ཐུགས་རྗེའི་འོད། །བྱིན་རླབས་ཀྱི་ཟེར་ཐག་འགོག་མེད་པར། །བདུན་བརྒྱུད་དུ་ངེས་པར་ཟབ་མོའི་དོན། །ཡེ་ཤེས་གཏད་ཙམ་གྱིས་སྨིན་གྲོལ་ལམ། །བཀོད་པ་ཡི་ཞལ་བཞེས་རྗེས་དགོངས་ལ། །རྗེ་ནཱ་རོ་དངོས་སྤྲུལ་དཔལ་འབྲུག་པའི། །ཆོས་བདུད་རྩིའི་ཉིང་ཁུ་ཡང་བཅུད་འདི། །ཞལ་བརྒྱུད་ནས་མངའ་བདག་ལོ་ཙཱ་ཆེ། །དགྱེས་མཛད་ཀྱི་སྒྱུ་འཕྲུལ་གར་རོལ་པ། །གྲུབ་རྣམས་ཀྱིས་དབུགས་དབྱུང་མིང་དབང་གིས། །གསལ་བ་རུ་མངོན་པར་གཟེངས་བསྟོད་པའི། །རྗེ་སངས་རྒྱས་རས་ཆེན་སྐྱེས་རབས་ཕྲེང་། །འཛིན་པ་པོ་པདྨའི་མིང་ཅན་ལ། །རྒྱུད་བྱིན་རླབས་རྡོ་རྗེ་བཞི་དབང་གིས། །དེང་རྟོགས་གྲོལ་ཡོན་ཏན་སིམ་པ་སྟེ། །སྙིགས་དུས་འདིར་ལས་ཅན་དམ་ཚིག་ཅན། །ཀུན་གྱི་སྤྱི་ནོར་དུ་གཞན་ཕན་བློས། །མོས་པས་སྤེལ་བགྱི་ན་སྣོད་ལྡན་གྱི། །སྐལ་ལྡན་རྣམས་དྭངས་པ་ཆེར་བསྐྱེད་ལ། །གཞི་མོས་གུས་འདུན་པ་བརྟན་པོ་ཡིས། །ལམ་བཟང་འདིར་འཇུག་པ་ཡོད་སྲིད་ན། །གནད་བྱིན་རླབས་ཐུགས་རྗེའི་རྟེན་འབྲེལ་དབང་། །ལས་སྨོན་ལམ་བཟང་པོས་མཚམས་སྦྱར་མཐུས། །རྟེན་ཐོག་འདིར་མཆོག་གཉིས་གྲུབ་པ་ཡི། །དངོས་གྲུབ་བདེ་བླག་ཏུ་ཐོབ་པར་ངེས། །རང་དང་གཞན་སེམས་ཅན་རིས་མེད་འགྲོ། །ཐར་པའི་གོ་འཕང་དུ་བཀོད་པ་ལ། །སྒྲོལ་བའི་དེད་དཔོན་མཆོག་ཐོབ་པར་ཤོག །ཅེས་རིག་འཛིན་འཇའ་ཚོན་པའི་གཏེར་བྱོན་གསང་ལམ་བླ་སྒྲུབ་

[Full Size]

བརྒྱུད་པ་བདུན་བར་དུ། སློབ་མ་སྣོད་ལྡན་གྱུར་ན། གྲོལ་བ་མངོན་གྱུར་ཞལ་བཞེས་སྣང་བར། ཁོ་བོ་བདུན་པར་ངེས་ཤེས་བརྟན་ཐོབ་ཟླ་སྤྲུལ་པས་ཉམས་ལེན་དང་། རྟེན་ཞལ་ཐང་བཞེས་པར་སྨོན་ལམ་བསྐུལ་ངོར། སི་ཏུ་པདྨ་ཉིན་མོར་བྱེད་པས་སྤེལ་བྲིས་ཆོས་འདི་འབྲེལ་ཚད་སྨིན་གྲོལ་དོན་དང་ལྡན་པར་གྱུར་ཅིག །སརྦ་མངྒ་ལམ།། ༈ །།སྔོན་ཚེ་དགེ་ཚོགས་བཟང་པོའི་འབྲས་སྨིན་མཐུས། །དལ་རྟེན་མཆོག་ཐོབ་ངེས་དོན་བསྟན་སྒོར་ཞུགས། །མ་ནོར་ལམ་སྟོན་ཡོངས་འཛིན་རྣམས་དང་མཇལ། །ཤཱཀྱའི་རྗེས་འཇུག་སློབ་པའི་སྐལ་བཟང་དང་། །བླ་མེད་རྡོ་རྗེ་ཐེག་པའི་ལམ་ཟབ་མོར། །སྨིན་ཅིང་གྲོལ་ནས་རྒྱུད་བྱིན་བརླབ་པ་དང་། །བྱང་ཆུབ་སེམས་བསྐྱེད་རྩིས་ཟིན་སྡོམ་གསུམ་གྱི། །དམ་ཚིག་གཅེས་སྤྲས་རྣམ་ཀུན་འབད་པར་གནད། །དེང་འདིར་དམ་ཆོས་ཕྱག་རྒྱ་ཆེན་པོ་གང་། །བགོ་སྐལ་ཐོབ་འདི་བརྒྱ་ལམ་རེས་འགའ་ཙམ། །དོན་བརྒྱུད་བཀའ་གསང་བདུད་རྩིའི་རྒྱུན་དྲི་མེད། །ཡིད་ལ་སིམ་པ་ཨེ་མ་ངོ་མཚར་རྨད། །ཐུན་མོང་སྔོན་འགྲོ་ཆོས་བཞིས་བློ་སྦྱངས་ནས། །ཐུན་མིན་སྐྱབས་འགྲོ་སེམས་བསྐྱེད་སྒྲིབ་སྦྱོང་དང་། །ཚོགས་བསགས་བླ་མའི་རྣལ་འབྱོར་ཡི་དམ་གྱི། །བསྐྱེད་བཟླས་དངོས་གཞི་ཉམས་ལེན་རྩ་བ་སྟེ། །རྣམ་ཀུན་འཁོར་བའི་ལས་ལ་ཞེན་ལོག་གི། །རྒྱུ་འབྲས་ཕྲ་ཞིབ་སྤང་བླང་འཆོལ་མེད་ཅིང་། །བླ་མར་མོས་གུས་ལྟེམ་རྐྱང་མ་ཤོར་བར། །སྙིང་ནས་ཐེ་ཚོམ་བྲལ་བའི་གསོལ་འདེབས་འབུངས། །མཉམ་མེད་ཟླ་འོད་གཞོན་ནུའི་ཞལ་སྔ་ནས། །སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །སྣང་བ་ལྷན་ཅིག་སྐྱེས་

[Full Size]

པ་ཆོས་སྐུའི་འོད། །སྣང་སེམས་དབྱེར་མེད་བདེ་སྟོང་ལྷན་ཅིག་སྐྱེས། །ལྷན་སྐྱེས་རང་ངོ་ཤེས་པར་བྱིན་གྱིས་རློབས། །ཅེས་གསུངས་ཐ་མལ་སེམས་འདི་གདོད་མ་ནས། །ཆོས་སྐུར་གནས་ཀྱང་གློ་བུར་ཨ་འཐས་ཀྱི། །དྲི་མས་སྒྲིབ་བཞིན་དེ་དག་བསལ་བའི་ཕྱིར། །ཚོགས་དྲུག་སྣང་བ་གང་ཤར་བདེན་མེད་དུ། །སྒྱུ་མའི་རང་མདངས་རྨི་ལམ་ཅི་བཞིན་པར། །རྟོགས་ནས་སྣང་སེམས་རོ་གཅིག་འདུ་ཤེས་ངང་། །མ་བཅོས་རང་བབས་ཡེངས་མེད་ཉམས་ལེན་སྐྱོངས་། །རྣམ་ཀུན་དྲན་རྫི་བརྟན་ཅིང་དུས་གསུམ་གྱི། །རྣམ་རྟོག་མི་འཕྲེང་ཆེད་དུའང་མི་བཀག་པར། །མ་ཡེངས་ཙམ་དུ་མཉམ་པར་བཞག་པ་དང་། །སྤྱོད་ལམ་ཀུན་དུ་གཡེལ་མེད་རྟག་པར་འབད། །ཞི་གནས་སྐྱོན་བྲལ་རབ་ཏུ་བརྟན་པ་ན། །རང་རིག་ལྷག་གེར་མཐོང་བའི་ངེས་ཤེས་ཐོབ། །འོན་ཀྱང་བདེ་གསལ་མི་རྟོག་ཉམས་བཟང་ལའང་། །ཞེན་འཛིན་སྤངས་ནས་མ་བཅོས་རང་ངོ་སྐྱོངས། །རིམ་བཞིན་རྩེ་གཅིག་སྤྲོས་བྲལ་སྒོམ་མེད་སོགས། །རྟོགས་པ་མངོན་གྱུར་ཐ་མལ་སྣང་ཞེན་བྲལ། །རང་རིག་ཆོས་སྐུའི་རྒྱལ་ས་ཟིན་གྱུར་ན། །གཞན་དོན་ཕྲིན་ལས་རླབས་ཆེན་སྤྱོད་པ་དང་། །སྐུ་བཞིའི་དབང་ཕྱུག་རྒྱལ་ས་ཐོབ་པར་ངེས། །གནས་སྐབས་ཆོས་ལྡན་བཤེས་དང་མི་འབྲལ་ཞིང་། །སྒྲུབ་པ་མཐར་ཕྱིན་ཚེ་རིང་ནད་མེད་ཅིང་། །གེགས་དང་གོལ་ས་མི་མཐུན་གནོད་པ་ཞི། །དོན་གཉིས་བསམ་དོན་ལྷུན་གྲུབ་འབྱུང་བར་སྨོན། །དེ་སྐད་ཚུལ་འདིར་འདུན་པའི་མོས་

[Full Size]

པ་ཅན། །དད་གསུམ་ལྡན་པ་ཀརྨ་བཀྲ་ཆོས་པས། །རིང་ནས་བསྐུལ་བར་དོན་ཡོད་བྱ་བའི་ཕྱིར། །སི་ཏུ་པདྨའི་མིང་གིས་བཀོད་པ་སྟེ། །དགེ་བས་རང་གཞན་འགྲོ་བ་མ་ལུས་པ། །རྡོ་རྗེ་འཆང་དབང་དབྱེར་མེད་འགྲུབ་གྱུར་ཅིག །ཤུ་བྷཾ།། ༈ །།རྒྱལ་བ་གོང་མ་དག་གི་བགྲོད་གཅིག་ལམ། །ཟབ་མོ་ཕྱག་ཆེན་གནད་ལ་བརྩོན་བྱས་ན། །བརྒྱད་ཁྲི་བཞི་སྟོང་ལམ་གྱི་ཉམས་ལེན་ཀུན། །གཅིག་ཆར་རྒྱུད་ལ་རྫོགས་པར་རྩོད་པ་བྲལ། །དེས་ན་བླ་མའི་མོས་གུས་གཞིར་བཟུང་སྟེ། །མ་ཡེངས་མི་བསྒོམ་ངང་ལ་དྲན་རིག་གིས། །ཟིན་ཙམ་དེ་ལས་སྤྲོས་པ་ཀུན་སྤང་བའི། །ལམ་འདིར་མོས་པས་ཀུན་ནས་འཇུག་པར་མཛོད། །སྐྱབས་ཀུན་འདུས་ཀྱི་སངས་རྒྱས་ཀརྨ་པ། །ཡིད་མོས་གུས་ཀྱི་གདུང་ཤུགས་དྲག་པོ་ཡིས། །འབྲལ་མེད་དུ་སྙིང་དབུས་འཆང་ལགས་ན། །བརྗོད་བྲལ་གྱི་ལྷན་སྐྱེས་ཡེ་ཤེས་དངོས། །ཚེགས་མེད་དུ་རྟོགས་པར་བྱིན་གྱིས་རློབས། །དབོན་ཀརྨ་བསྟན་པའི་ངོར་སྤེལ།། ༈ །།ན་མོ་ཤྲཱི་ཡ་ན་ཨུཏྟ་ར་བཛྲ་ཡེ། སྔོན་བསགས་ལེགས་བྱས་ཀྱི་རང་གཟུགས་བདོ་བའི། །དབང་ཤུགས་ཀྱི་དལ་བརྒྱད་འབྱོར་བཅུ་ཐོབ་ཅིང་། །དེ་ལས་ཀྱང་རྒྱལ་བས་རྗེས་སུ་འཛིན་ཕྱིར། །མི་མངོན་གྱི་དབྱིངས་ནས་གཟིགས་པ་བཞིས་དགོངས། །མཆོག་གི་སྣང་བརྙན་སྐྱེད་བྱེད་ཀྱི་ཡུམ་གྱུར། །དམ་པའི་རྣམ་ཐར་ལ་མི་ཕྱེད་འདུན་པ། །ཕྱོགས་མེད་ཀྱི་དག་སྣང་འབྱོངས་ཤིང་རྣམ་ཀུན། །བྱམས་པ་དང་སྙིང་རྗེས་ཡོངས་ལ་ཕན་བདེའི། །ལྷག་བསམ་གྱི་ཟླ་ཟེར་དཀར་པོས་ཁྱབ་

[Full Size]

པའི། །ངེས་དོན་ལ་ཕྱོགས་པའི་ཉམས་ལེན་གནད་གསང་། །སྙིང་པོར་བསྒྲིལ་བའི་རྣལ་འབྱོར་ལ་གཞོལ་པ། །ཁ་ཙམ་དུ་མ་ཡིན་གཏིང་ནས་གུས་པ། །མཚན་ལྡན་སློབ་མ་སྐལ་བ་ཅན་འཕགས་མའི། །རྣམ་པར་འཕྲུལ་ཤེས་རབ་མ་ཡི་ཟོལ་འཛིན། །གདོད་ནས་དག་པའི་ཡེ་ཤེས་རང་བརྙེས་མོད། །ཚུར་མཐོང་ངོར་ཐེག་པ་ལ་རིམ་འཇུག་གིས། །སྨོན་པའི་ཆོས་ཀུན་གྱི་ཡང་རྩེའི་ཏོག་གྱུར། །བླ་མར་གསོལ་བཏབ་ཟབ་ལམ་གྱི་གདུང་དབྱངས། །རིང་ནས་བསྐུལ་པ་དོན་ཡོད་ཀྱི་ཆེད་དུ། །གང་ཤར་ངང་ནས་འདི་སྐད་དུ་གསོལ་ལོ། །ཀྱེ་ཧོ། ཐོག་མེད་ཀྱི་དུས་རིང་ནས་ང་བདག་ཏུ་འཛིན་པའི། །འཁྲུལ་པ་ཡང་འཁྲུལ་རྒྱ་འབྱམས་ཀྱི་དྲྭ་བར་འཐུམས་ནས། །འཁོར་བའི་ལས་ལ་ཟད་མེད་ཆུ་བོའི་རྒྱུན་ལྟ་བུ། །བཟློག་ཏུ་མེད་པའི་སེམས་ཅན་ལ་བརྩེ་བས་དགོངས་ཤིག །རྩོད་ལྡན་དུས་འདིར་རྒྱལ་བ་དང་རྒྱལ་སྲས་སློབ་ཚོགས། །ལྷག་པར་ཐུགས་བསྐྱེད་དམ་བཅའ་རྩལ་སྤྲུགས་ཀྱི་ངང་ནས། །གཟུགས་སྐུར་བཞེངས་པ་ཀུན་རྫོབ་ངོར་ཐ་དད་སྟོན་ཀྱང་། །དོན་དམ་སྐྱེ་འགགས་གནས་མེད་ཀྱི་དབྱིངས་སུ་གཅིག་པས། །རང་སེམས་ལྷན་སྐྱེས་ཆོས་སྐུ་ཡི་ཀློང་ཡངས་སུ་དྲན་ཆོག །དྭངས་མའི་མགོན་པོ་སྙིང་གི་ཏི་ལ་ཀར་གདོད་གནས། །ཀུན་བཟང་འོད་མི་འགྱུར་བ་ཀརྨ་ཀ་མཁྱེན་ནོ། །སྣང་སྲིད་བླ་མའི་རོལ་པ་རུ་ཤར་བར་བྱིན་རློབས། །ཞེས་སོ། །དེ་སྐད་རྒྱལ་ཡུམ་དགོངས་བསྐང་ཕྱིར། །སྤྱི་བརྟོལ་བསྐྱེད་པའི་ཚིག་གི་ཕྲེང་། །པདྨ་ཉིན་བྱེད་དབང་གིས་

[Full Size]

སྨྲས། །དགེ་དེས་ཆོས་སྐུ་ཐོབ་གྱུར་ཅིག །ཤུ་བྷམ།། ༈ །།ཨེ་མ། རིང་ནས་བསོད་ནམས་ཡེ་ཤེས་འདུ་བྱས་པའི། །དལ་རྟེན་ལུས་ཐོབ་དེ་ལས་ཁྱད་པར་དུ། །རྒྱལ་བའི་མཆེད་ལྕམ་ཚུལ་དུ་གནས་པ་ཡི། །བག་ཆགས་བཟང་པོས་བསྐུལ་བས་ཆོས་ཀྱི་སྒོར། །འཇུག་ཅིང་ལྷག་པའི་བློ་དང་རབ་ལྡན་པའི། །དོན་དམ་གནས་ལུགས་ཕྱོགས་ལ་འདུན་པ་ཅན། །དེ་ཚུལ་གླེང་བའི་གདམས་པ་དོན་གཉེར་བ། །སྐལ་བཟང་སྐལ་བར་ལྡན་པའི་རང་བཞིན་ངེས། །དེའང་དང་པོར་མི་རྟག་རྒྱུད་བསྐུལ་ཞིང་། །འཁོར་བའི་ཆོས་ལ་བློ་ལོག་བྱང་ཆུབ་སེམས། །ཕྱོགས་མེད་འབྱོང་ཞིང་མཆོག་གསུམ་རྩ་བ་གསུམ། །ཀུན་འདུས་ངོ་བོ་དྲན་མཆོག་བླ་མ་ལ། །རྣམ་ཀུན་མོས་གུས་ལྟེམ་རྐྱང་མེད་པ་ཡི། །གསོལ་འདེབས་ངང་ནས་དུས་གསུམ་རྣམ་རྟོག་ཀུན། །རྒྱུན་བཅད་གང་ཤར་སོ་མའི་ངོ་བོ་སྐྱོངས། །མ་བཅོས་རང་བབས་དྲན་པའི་རྒྱང་སོ་ནི། །མ་བྲལ་ངང་ལ་ལྷན་ནེར་འཇོག་པ་གནད། །དེ་ཡང་སྤྱོད་ལམ་རྣམ་པ་ཐམས་ཅད་དུ། །ཉམས་ལེན་རྩི་ཡིས་ཟིན་བཞིན་ཡེངས་མེད་ཀྱིས། །དེ་ལ་གོམས་འདྲིས་བརྟན་པ་ཆེར་ཐོབ་ན། །ཞི་གནས་ལྷག་མཐོང་ལ་སོགས་རིམ་བཞིན་པར། །རྟོགས་པ་ན་འཕར་རང་སེམས་ཆོས་ཀྱི་སྐུ། །གནས་ལུགས་དེ་ཁོ་ན་ཉིད་མངོན་གྱུར་ནས། །བླ་མེད་སྐུ་བཞིའི་རྒྱལ་ས་མཆོག་ཐོབ་འགྱུར། །ཅེས་པའང་རྗེ་བཙུན་མའི་དགོངས་བཞེད་ལྟར་གདམས་པའི་ཚུལ་དུ་སི་ཏུ་པདྨ་ཉིན་བྱེད་དབང་པོས་བཀོད་པའོ།། ༈ །།ཨ་ཧོ། རིགས་ཀུན་གྱི་ཁྱབ་

[Full Size]

བདག་བཀའ་དྲིན་ཅན། །དཔལ་པདྨ་འབྱུང་གནས་ཀརྨ་ཀ། དབྱེར་མེད་པ་སྤྱི་བོའི་རྒྱན་མཆོད་ནས། །དེང་མོས་པའི་བུ་ལ་བྱིན་གྱིས་རློབས། །ཕྱི་ཀུན་རྫོབ་སྒྱུ་མའི་འཁྲུལ་འཁོར་ལ། །བདེན་ཞེན་འཛིན་ཨ་འཐས་ཐེར་ཟུག་གི། །བློ་རྣམ་རྟོག་ཕྲེང་བ་ལུག་རྒྱུད་བཞིན། །གང་ཤར་བའི་འགྱུ་ུབ་དེ་ངང་ལྷོད། །ཡིད་མ་བཅོས་འཛིན་བྲལ་སྣང་ཞིང་སྟོང་། །དོན་གསལ་ལ་འགགས་མེད་རང་ཞལ་ལྟོས། །བློས་བྱས་ཀྱི་རྩོལ་བས་མ་བསླད་པར། །གནས་དགའ་དང་འཕྲོ་བའི་རེ་དོགས་སྤང་། །ཡེངས་མེད་ཀྱི་དྲན་རྫིའི་རྒྱང་སོ་བཙུགས། །སྤྱོད་ལམ་ཀུན་གཉུག་མའི་ངོ་བོ་སྐྱོངས། །མཚན་སྣང་གི་ཉིང་འཁྲུལ་ལྡོག་མེད་པར། །ལམ་ཁྱེར་ཕྱིར་སེམས་ཀྱི་འཕེན་པར་བཏང་། །ཉམས་ལེན་གྱི་རྩི་དང་མ་བྲལ་ན། །གཉིད་འོད་གསལ་ཕྱག་རྒྱ་ཆེན་པོར་རྟོགས། །སངས་རྒྱས་ཞེས་བྱ་བའི་བཅོམ་ལྡན་འདས། །དུག་ལྔ་བཅོམ་ཡེ་ཤེས་ལྔ་དང་ལྡན། །འཁོར་བ་ལས་འདས་པས་དེ་ཉིད་དང་། །སེམས་ཅན་དུ་བཏགས་པའི་འཁྲུལ་འབྱམས་མཁན། །ཉོན་མོངས་པའི་ཕུང་པོ་འདི་དག་ཀྱང་། །དོན་སེམས་ཉིད་རྟོགས་དང་མ་རྟོགས་ཁྱད། །གཞི་གཅིག་ལས་ལམ་གཉིས་གསུངས་པའི་ཕྱིར། །རང་རེ་རྣམས་དལ་འབྱོར་ཐོབ་དུས་འདིར། །ཆོས་ཕྱིར་དུ་དཀའ་བ་སྤྱད་ནས་སུ། །ཆོས་མ་ནོར་ཕྱག་རྫོགས་ཉམས་ལེན་སྒོམས། །ཆོས་གེགས་འདུ་འཛི་ཡི་རྣམ་གཡེང་སྤོངས། །ཆོས་མིན་འདྲེས་ཁྱེར་རིགས་རྒྱང་བསྐྱུར་ལ། །ཆོས་བླང་དོར་

[Full Size]

ཇི་བཞིན་དབྱེ་བསལ་གནད། །ཆོས་དམ་ཚིག་དད་པ་འགྱུར་མེད་བརྟན། །ཆོས་སྒྲུབ་པའི་རྣལ་འབྱོར་ལ་མོས་པས། །ཆོས་རང་བྱུང་ལྷན་སྐྱེས་ཡེ་ཤེས་ཀྱི། །ཆོས་རང་རྡོལ་སེམས་ཀྱི་རྡོ་རྗེ་ཆེ། །ཆོས་སྨྲ་བསམ་ལས་འདས་ཀུན་བཟང་གི། །དགོངས་དོན་མཆོག་རྟོགས་པའི་སྐལ་ལྡན་ནས། །རང་གཞན་ཀུན་ཕྱམ་གཅིག་བྱང་ཆུབ་ཀྱི། །གོ་འཕང་ལ་དཀྲི་བའི་ནུས་ཐོབ་དེས། །འཁོར་བ་རྣམས་དོང་སྤྲུགས་སངས་རྒྱས་ཤོག །དེ་སྐད་ཅེས་གསང་སྔགས་རྙིང་མ་ཡི། །ཆོས་བརྒྱུད་འཛིན་གྲུབ་དབང་རིམ་བྱོན་གྱི། །གནས་གདན་ས་སྐྱོང་བའི་ལས་སྨོན་ཅན། །དབོན་བླ་མ་གསང་སྔགས་བསྟན་འཛིན་ཞེས། །མིང་དོན་མཚུངས་གང་དེའི་དད་པའི་གསོས། །རྒྱས་ཕྱིར་དུ་བཞེད་པ་བསྐང་བའི་བློས། །སི་ཏུ་པ་པདྨ་ཉིན་བྱེད་ཀྱིས། །གསལ་གདབ་ཀྱི་ཚུལ་དུ་བཀོད་པ་དགེ། །མངྒ་ལམ།། ༈ །།སྐུ་གསུམ་ངོ་བོ་རྩ་བའི་བླ་མ་ཞེས། །རྒྱལ་བས་ལུང་ཟིན་ངེས་པའི་སྐྱེས་མཆོག་ལ། །དད་གུས་མོས་བློ་འགྱུར་ལྡོག་བྲལ་བ་ཡིས། །དུས་གསུམ་སངས་རྒྱས་ཀུན་འདུས་ངོ་བོ་རུ། །རྩ་བརྒྱུད་བླ་མ་ཡེ་ཤེས་ཀློང་གཅིག་པར། །རང་རིག་ལྷན་སྐྱེས་ཆོས་སྐུ་དབྱེར་མེད་ངང་། །སྐྱེ་འགགས་གནས་བྲལ་གང་ཤར་འཛིན་མེད་ཀྱི། །མི་བསྒོམ་མ་ཡེངས་རིག་པའི་རྒྱུན་བསྐྱང་ནས། །མ་ཡེངས་དྲན་པའི་རྩི་དང་མ་བྲལ་གནད། །ཐ་མལ་སྣང་བ་རྒྱ་འབྱམས་མ་ཡིན་པར། །སྣང་སྲིད་ཆོས་རྣམས་རང་རིག་རང་རྩལ་ལས། །

[Full Size]

གཞན་དུ་མ་གྲུབ་དེ་ཕྱིར་ཉམས་ལེན་གྱི། །གནད་གསང་སེམས་ཉིད་སྤྲོས་བྲལ་ཉིད་ལ་འདུས། །རང་སེམས་ཆོས་སྐུར་རྟོགས་པའི་ཐབས་ཟབ་མོ། །ཚེ་གཅིག་རྡོར་འཆང་གོ་འཕང་ཐོབ་པར་ངེས། །ཅེས་པའང་སི་ཏུ་པདྨའི་མིང་ཅན་གྱིས། །གནས་མདོ་ཆོས་གྲྭའི་དགེ་བཤེས་དད་དམ་ཅན། །ལས་སྐལ་ལྡན་པ་རྣམས་ཀྱི་བགོ་སྐལ་ཆོས། །གདམས་པའི་དགེ་དེས་ཆོས་སྐུ་མངོན་གྱུར་ཤོག། །།༈ བཀའ་བརྒྱུད་གོང་མ་རྣམ་གསུམ་ལ་ཕྱག་འཚལ། །གང་ཉིད་སྔོན་བསགས་ལས་སྨོན་དུས་སྨིན་ཅིང་། །བརྒྱུད་པའི་བྱིན་རླབས་ཚན་ཁ་མ་ཉམས་བཞིན། །སྔོན་འགྲོའི་ཡོན་ཏན་ཚུལ་བཞིན་སྐྱེས་པ་ལེགས། །དངོས་གཞི་ཉམས་ཀྱི་སྐབས་ཏེ་ཅི་ལྟར་ཡང་། །རྡོ་རྗེ་འཆང་སོགས་དོན་བརྒྱུད་བླ་མ་ལ། །གསོལ་འདེབས་བླ་མའི་རྣལ་འབྱོར་གཞིར་བཟུང་ནས། །བདེ་གསལ་མི་རྟོག་འཕྲོ་རྒོད་བྱིང་རྨུགས་སོགས། །བདེ་དང་མི་བདེའི་འཛིན་རྟོག་གང་འཆར་བའི། །ངོ་བོར་བལྟས་ཚེ་རང་གྲོལ་ཆུ་རླབས་བཞིན། །སྤྲོས་བྲལ་རིག་སྟོང་རང་ངོ་འཕྲོད་པར་ངེས། །མ་བཅོས་སོ་མ་ལྷུག་པར་ཞོག་ཅིག་ཅེས། །བཀའ་བརྒྱུད་ཁྲིད་དང་ཞལ་གདམས་ཐམས་ཅད་ལས། །བཤད་ཀྱང་བཞག་ཐབས་གནད་ཁེལ་དཀའ་བར་སྣང་། །འོན་ཀྱང་སྤང་བླང་བཅོས་སྒྱུར་རེ་དོགས་ཀྱི། །འཆིང་བ་ཀུན་བྲལ་མ་ཡེངས་ཙམ་དུ་ནི། །ངོ་བོ་ཁོ་ན་བསྐྱང་ལས་ཕྱག་ཆེན་གྱི། །ཉམས་ལེན་འདི་ཞེས་སྨྲ་བརྗོད་ཡུལ་ལས་འདས། །དེས་ན་སྟོང་པ་ཕྱང་ཆད་ལ་སོགས་པ། །གོལ་ཤོར་བཞི་པོའི་ལམ་ལོག་རྒྱང་

[Full Size]

བསྲིངས་ཏེ། །སྟོང་ཉིད་སྙིང་རྗེ་ཟུང་འཇུག་ཐེག་མཆོག་ལམ། །འཁྲུལ་མེད་ཉམས་ལེན་མཐར་ཕྱིན་འབད་འཚལ་ཞུ། །དེ་སྐད་སི་ཏུ་པདྨའི་མིང་ཅན་གྱིས། །དགེ་རྒྱལ་རྗེ་དྲུང་སྤྲུལ་སྐུར་གདམས་པ་དགེ། །།༈ རྒྱལ་བ་གོང་མའི་ཕྱག་ཆེན་ཁྲིད་རིམ་ལས། །ཚིག་དང་ཡི་གེས་ནམ་ཡང་བསྟན་དུ་ུམེད། །བླ་མར་སངས་རྒྱས་ཤེས་པས་གསོལ་འདེབས་དང་། །བྱིན་རླབས་མཐུ་ཡིས་ནང་ནས་སྒྲོག་ཁྲོལ་དགོས། །དང་པོའི་ལས་ཅན་སེམས་འཛིན་ཞི་གནས་སྒྲུབ། །གོམས་ནས་ལྷག་མཐོང་རང་ངོ་ཤེས་པ་ནས། །རྣལ་འབྱོར་བཞི་རིམ་གོ་རྟོགས་མྱོང་བ་སྐྱེ། །དེའང་མི་ཉམས་གོང་དུ་སྤེལ་བའི་ཕྱིར། །ཞེན་ལོག་ངེས་འབྱུང་ལས་འབྲས་བག་ཡོད་སོགས། །སྒོམ་གྱི་བདག་པོ་ཡིན་པས་ཚུལ་བཞིན་བསྟེན། །ཆོས་མཁས་སྒོམ་བཟང་ང་རྒྱལ་གཏིང་ནས་སྤོངས། །བདེ་ཆེན་ཞིང་དུ་སྨོན་ལམ་ཡང་ཡང་ཐོབ། །ཚུལ་དེས་གཏན་བདེའི་གོ་འཕང་ཐོབ་པར་ངེས། །དེ་སྐད་དད་གསུམ་ལྡན་པ་ཚེ་བརྟན་ངོར། །སི་ཏུས་སྤེལ་དགེས་དོན་གཉིས་ཡོངས་འགྲུབ་ཤོག། །།༈ འཁོར་འདས་གཉིས་ཆོས་ཀུན་སེམས་ཀྱི་རང་མདངས། །སྣང་བ་འཁྲུལ་པའི་རྗེས་འབྲང་འདི་འཁོར་བའི་གཞི་མ། །དེ་རྗེས་མི་འབྲང་བར་རང་ངོ་ཤེས་བཞིན། །རིག་རྩལ་ཐོག་བབ་ཏུ་འཇོག་པ་ཉམས་ལེན་གྱི་མཐིལ་སོ། །མི་གཡེལ་ལྷོ་ཆགས་དབོན་མཛོད་མཁས་གྲུབ་ངོར་སྤེལ།། ༈ །།རང་ཉིད་ཐ་མལ་གནས་པའི་སྤྱི་བོ་རུ། །དཀོན་མཆོག་ཀུན་འདུས་ངོ་བོ་པདྨའི་མཚན། །རབ་བྱུང་ཆ་ལུགས་གསལ་བར་བསྐྱེད་ནས་སུ། །

[Full Size]

འདི་བཟུང་བྱང་ཆུབ་སྙིང་པོ་མཆིས་ཀྱི་བར། །དད་གསུམ་མོས་པས་གསོལ་བ་བཏབ་པའི་མཐུས། །ཚེ་འདིར་ཕྱག་རྒྱ་ཆེན་པོའི་ཡེ་ཤེས་མཆོག །བདེ་བླག་ཉིད་དུ་ཐོབ་པར་བྱིན་གྱིས་རློབས། །འགྲོ་ཀུན་འདྲེན་པའི་དཔལ་དུ་བདག་གྱུར་ཅིག །ཅེས་དང་། སེམས་ཀྱི་བཞག་ཐབས་ནི། རང་སེམས་གདོད་ནས་ཆོས་སྐུར་གནས་པ་ལ། །བསག་སྦྱང་མོས་གུས་བླ་མའི་བྱིན་རླབས་ཀྱིས། །རང་ངོ་ཤེས་བཞིན་འཁྲུལ་རྗེས་མི་འབྲང་བར། །སྟོང་གསལ་འཛིན་མེད་མ་བཅོས་ངང་ལ་བཞག །འགྲོ་ཀུན་སངས་རྒྱས་ཐོབ་པའི་བསྔོ་སྨོན་བྱ། །སྡིག་སྤང་དགེ་སྒྲུབ་རྣམ་ཀུན་འབད་པར་བྱོས། །བཟོ་རིག་ཚངས་དབྱངས་དང་། ལྷ་འོད་ངོར་སྤེལ།། ༈ །།བཀའ་བརྒྱུད་གོང་མ་གཤེགས་ཤུལ་ཕྱག་རྒྱ་ཆེའི། །ཉམས་ལེན་གནད་ལ་རྩ་བའི་བླ་མ་ཉིད། །སངས་རྒྱས་ཀུན་འདུས་ངོ་བོར་གསོལ་འདེབས་པ། །མོས་གུས་སྒོམ་གྱི་མགོ་བོར་གསུངས་པ་ཡིན། །བར་དུ་རང་སེམས་རིག་རིག་ཏུར་ཏུར་པོ། །བདེ་གསལ་མི་རྟོག་ཉམས་ཀྱི་སྣང་ཆ་ལ། །ཞེན་མེད་རང་ངོ་རྟག་ཏུ་སྐྱོང་བ་ནི། །ཡེངས་མེད་སྒོམ་གྱི་དངོས་གཞི་ཞེས་སུ་གྲགས། །ཚེ་འདིའི་འདོད་ཡོན་རིགས་རུས་ཆོས་བརྒྱད་ལ། །ཞེན་མེད་དགེ་རྩ་ཆེ་ཕྲ་གང་འགྲུབ་པ། །ཕྱི་བཤོལ་མེད་པར་ལག་ལེན་འདེབས་པ་ནི། །ཞེན་ལོག་སྒོམ་གྱི་རྐང་པ་ཞེས་བྱར་གསུངས། །གེགས་སེལ་བོགས་འདོན་ངོ་སྤྲོད་ལ་སོགས་པའི། །གནད་འགག་ཐམས་ཅད་ངེས་པར་འདིར་ཚང་བས། །ཉམས་སུ་བླངས་པས་ཚེ་གཅིག་སངས་རྒྱས་ཀྱི། །

[Full Size]

གོ་འཕང་ཚེགས་མེད་ཉིད་དུ་འགྲུབ་གྱུར་ཅིག །དེ་སྐད་སི་ཏུ་པདྨའི་མིང་ཅན་གྱིས། །དགེ་མ་ཚངས་སྤྱོད་དཔལ་མོའི་བཞེད་ངོར་སྤེལ།། ༈ །།མ་ཧཱ་མུ་ུདྲ་སིདྡྷི་ཧཱུྃ། སྔོན་བསགས་དཀར་པོའི་འབྲས་སྨིན་དལ་རྟེན་ཐོབ། །མཚན་ལྡན་བླ་མ་མཇལ་ཞིང་ཆོས་དང་འཕྲད། །དུས་འདིར་སྡིག་སྤོང་དགེ་སྒྲུབ་སེམས་དོན་གྱི། །ཚུལ་ལ་མོས་པ་དེ་བཞིན་སྤྲོ་བ་རྨད། །བཀའ་བརྒྱུད་བྱིན་རླབས་རྩ་བ་མོས་གུས་དང་། །སྙིང་རྗེ་དག་སྣང་སྦྱང་པ་གལ་ཆེ་གསུངས། །དེ་ཕྱིར་སྔོན་འགྲོ་བསག་སྦྱང་ཆོས་རྣམས་ལ། །འབད་ཅིང་བླ་མ་རྡོར་འཆང་ངོ་བོ་རུ། །སྤྱི་བོར་བསྒོམ་ཞིང་དབང་བཞི་ལེན་པ་དང་། །འོད་ཞུ་རང་ཐིམ་སེམས་ཉིད་མ་བཅོས་ངང་། །མཉམ་པར་བཞག་ཅིང་ངོ་བོ་སྐྱོང་བ་གནད། །དྲན་རྫི་འབྲལ་མེད་སྤྱོད་ལམ་རྣམ་ཀུན་དུ། །ཉིན་སྣང་ཐམས་ཅད་སྒྱུ་མ་རྨི་ལམ་བཞིན། །བདེན་མེད་མཚན་སྣང་དེ་བཞིན་བསྐྱངས་ནས་སུ། །རྣམ་རྟོག་འཁྲུལ་བའི་དབང་དུ་མ་སོང་བར། །རང་བབ་རང་བཞིན་རིག་པའི་རྒྱུན་སྐྱོང་གནད། །ནམ་ཞིག་རང་སེམས་རང་ངོ་འཕྲོད་པ་ཡི། །བླ་མེད་སྐུ་བཞིའི་རྒྱལ་ས་ཟིན་པར་སྨོན། །དེ་སྐད་མོས་ལྡན་དད་ཅན་རྣམས་ཀྱི་ངོར། །སི་ཏུ་པདྨའི་མིང་གིས་སྨྲས་པ་དགེ། །སརྦ་ཛ་ཡ།། ༈ །།རྣམ་ཀུན་མཆོག་ལྡན་སྟོང་ཉིད་གཟོད་མའི་གཤིས། །མི་ཤིགས་མི་འགྱུར་བཟོ་མེད་བདེ་བ་ཆེའི། །གནས་ལུགས་མངོན་གྱུར་བཀའ་བརྒྱུད་རྒྱ་མཚོ་ཡིས། །ལྷན་སྐྱེས་ཡེ་ཤེས་སྣང་བ་རྒྱས་བྱིན་རློབས། །གང་ཁྱོད་

[Full Size]

སྔོན་བསགས་ལས་སྨོན་འབྲས་སྨིན་མཐུས། །དལ་འབྱོར་དོན་ལྡན་སྒྲུབ་ལ་འབད་བརྩོན་དེའི། །ཉམས་མྱོང་རྟོགས་པ་ན་འཕར་འཆར་སྒོའི་ཚུལ། །ཇི་བཞིན་སྐྱེས་ལ་ངོ་མཚར་ཡི་རང་གནས། །ད་དུང་ཉམས་ལ་ཞེན་དང་ཚེ་འདིའི་འཁྲིས། །ཆོས་བརྒྱད་སྣང་ཤས་དབང་དུ་མ་ཤོར་བར། །ལས་འབྲས་དམ་སྡོམ་ཕྲ་ཞིབ་བླང་དོར་གནད། །སྐབས་སུ་རོ་སྙོམས་བྱང་སེམས་བློ་སྦྱོང་འབད། །རིམ་བཞིན་སྒོ་གསུམ་རྒྱུད་སྨིན་གྲོལ་གྱུར་ནས། །སེམས་ཉིད་ཆོས་སྐུའི་རང་ཞལ་མཐོང་བར་སྨོན། །དེ་སྐད་སི་ཏུ་པདྨའི་མིང་ཅན་གྱིས། །འབྲོང་རིགས་སྒྲུབ་པ་ཀརྨ་དར་རྒྱས་ངོར། །ཉམས་ལེན་གསལ་འདེབས་ཆེད་དུ་བཀོད་དགེ་དེའི། །འགྲོ་ཀུན་བྱང་ཆུབ་གོ་འཕང་ཐོབ་ཕྱིར་བསྔོ། །མངྒ་ལམ།། ༈ །།བྱིན་རླབས་དོན་བརྒྱུད་མར་མི་དྭགས་གསུམ་ལ། །གསོལ་འདེབས་རང་སེམས་ལྷན་སྐྱེས་ཆོས་ཀྱི་སྐུ། །གདོད་མའི་གནས་ལུགས་མངོན་སུམ་རྟོགས་གྱུར་ནས། །སྐུ་བཞིའི་གོ་འཕང་མྱུར་ཐོབ་བྱིན་གྱིས་རློབས། །སྐྱེ་འགགས་གནས་བྲལ་མ་བཅོས་སོ་མའི་ངང་། །གང་ཤར་དེ་ཡི་ངོ་བོ་སྐྱོང་བཞིན་དུ། །སྡོམ་པ་དམ་ཚིག་སེལ་མེད་ལས་འབྲས་ཀྱི། །བླང་དོར་གཅེས་སྤྲས་རྒྱུན་སྤྱོད་འབད་པར་འཚལ། །ཟླ་བོ་དབུ་མཛད་ཀརྨའི་ངོར་སྤེལ་བ་དགེ།། ༈ །།སེམས་ཉིད་མ་བཅོས་གཉུག་མའི་གཤིས། །ཡེངས་མེད་རྒྱུན་སྐྱོང་ནམ་ཞིག་ཚེ། །བསྒོམ་བྱ་སྒོམ་བྱེད་དང་བྲལ་ནས། །སྤྲོས་བྲལ་ཆོས་སྐུ་མངོན་གྱུར་ཤོག །གནས་སྐབས་ཚེ་ནོར་ཆོས་གསུམ་གྱི། །མངའ་དབང་

[Full Size]

འབྱོར་པའི་དཔལ་གྱུར་ཅིག །རྟོགས་ལྡན་ཕྲིན་ལས་ཆོས་དབང་བསྐུལ་ངོར་སྤེལ་བ་དགེ། །།༈ རིགས་ཀུན་ཁྱབ་བདག་བདུད་འདུལ་རྡོ་རྗེ་འཆང་། །འབྲལ་མེད་བདེ་ཆེན་འཁོར་ལོར་རྟག་བཞུགས་བཞིན། །དམ་པ་གང་གིས་བཀའ་མཆིད་བསྩལ་བའི་ལེན། །མདོར་བསྡུས་གསོལ་གྱིས་ཐུགས་ལ་འཆང་བར་རིགས། །སྡོམ་གསུམ་དྲི་མེད་ཚུལ་བཞིན་བསྲུང་བ་དང་། །ཚོགས་གཉིས་ཆུ་གཏེར་གོང་དུ་སྤེལ་བ་དང་། །ཐུན་མོང་སྔོན་འགྲོས་རྟག་ཏུ་རྒྱུད་སྦྱོང་བ། །འདི་གསུམ་རང་དོན་སྒྲུབ་ལ་མེད་ཐབས་མེད། །ཚད་མེད་སྙིང་རྗེ་ཕྱོགས་རིས་བྲལ་བ་དང་། །བསྡུ་བའི་དངོས་པོ་རང་འདོད་མ་གོས་དང་། །དག་སྣང་རབ་འབྱམས་ངོ་སྲུང་མེད་པ་སྟེ། །འདི་གསུམ་གཞན་དོན་སྒྲུབ་ལ་མེད་ཐབས་མེད། །ཕྱོགས་མེད་ཐོས་པའི་ནོར་གྱིས་ཕྱུག་པ་དང་། །ཐོས་དོན་སྒོམ་པས་རང་རྒྱུད་དུལ་བ་དང་། །དེ་ཡི་གྲོགས་སུ་བརྩོན་འགྲུས་རྩོམ་པ་གསུམ། །སངས་རྒྱས་བསྟན་པ་འཛིན་ལ་མེད་ཐབས་མེད། །གཙོ་བོར་མོས་གུས་རྣལ་འབྱོར་སྐྱོང་བ་དང་། །ཆོས་བརྒྱད་སྣང་ཤས་རྒྱང་དུ་དོར་བ་དང་། །གཉུག་མའི་དྲན་ཤེས་ཁོར་ཡུག་བསྟེན་པ་གསུམ། །སྒྲུབ་བརྒྱུད་རྣམ་ཐར་སྐྱོང་ལ་མེད་ཐབས་མེད། །དེ་ཕྱིར་བཀའ་བརྒྱུད་རྣམ་ཐར་དྲི་མེད་ལ། །རྟག་པར་རྗེས་སུ་སློབ་ཅིང་འབད་པར་ཞུ། །མཆོག་གསུམ་རྩ་གསུམ་བདེན་པའི་བྱིན་རླབས་དང་། །བདག་གཞན་དུས་གསུམ་བསགས་ཡོད་དགེ་བའི་མཐུས། །དཔལ་ལྡན་ཀརྨ་པ་ཡི་ཕྲིན་ལས་མཆོག །ཕྱོགས་མཐར་འདྲེན་པའི་ཤིང་རྟ་དམ་པ་མཆོག །རྟག་པར་འཚོ་གཞེས་ཕྲིན་

[Full Size]

ལས་རབ་རྒྱས་ཤིང་། །དུས་གསུམ་གཤེགས་པའི་བཀའ་བརྒྱུད་རིན་ཆེན་གྱི། །དགོངས་པ་མཐའ་དག་རྫོགས་པར་སྐོང་བྱེད་ཤོག །ཅེས་གོ་ཤྲི་སྤྲུལ་སྐུའི་དགོངས་བཞེད་བཞིན་བཀོད་པ་ཕུལ་བ་དགེ། ཤུ་ུབྷམ།། ༈ །།ངེས་པ་དོན་མཆོག་བཀའ་བརྒྱུད་ནོར་བུའི་ཕྲེང་། །ཀུན་འདུས་རྗེ་བཙུན་བདུད་འདུལ་རྡོ་རྗེ་འཆང་། །རང་སེམས་དབྱེར་མེད་ཉིད་དུ་ངེས་བཞིན་པར། །འདི་བཟུང་བྱང་ཆུབ་བར་དུ་ཐུགས་རྗེས་སྐྱོངས། །སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །གདོད་གནས་རང་བྱུང་ཡེ་ཤེས་ངོ་བོ་ཉིད། །མ་རིག་འཁྲུལ་པའི་བག་ཆགས་དབང་གྱུར་ཀྱང་། །བཅོམ་ལྡན་རྩ་འདོར་ཞབས་ཀྱི་གདམས་བའི་བཅུད། །གཉུག་མའི་ཤེས་པ་གསལ་དྭངས་རྙོག་པ་མེད། །ངོས་བཟུང་མེད་ཅིང་འཕྲོ་གནས་འགྲོ་འོང་མེད། །བཅས་བཅོས་བྱར་མེད་རང་གར་གློད་ལ་བཞག །གློད་པའི་སེམས་ཉིད་ནམ་མཁའ་ལྟ་བུའོ། །ཅེས་གསུངས་བྱིན་རླབས་མཆོག་གྱུར་ངེས་བ་འདི། །དེ་བཞིན་རྣམ་ཀུན་ཉམས་ལེན་སྐྱོང་གྱུར་ན། །སེམས་ཉིད་ཆོས་སྐུའི་རྒྱལ་ས་ཟིན་པར་སྨོན། །པདྨའི་མིང་གིས་མགོན་སྤྲུལ་བཞེད་ངོར་སྤེལ། །སརྦ་ཐཱ་ཤྲེ་ཡསྟུ།། ༈ །།གཏན་སྐྱབས་བླ་མ་ཡིད་བཞིན་དུས་ཀུན་ཏུ། །གསོལ་འདེབས་མོས་གུས་འཁོར་བར་ཞེན་ལོག་གི། །རང་སེམས་དུག་གསུམ་རྟོག་པས་མ་བསླད་པར། །རང་བཞིན་བཟོ་བཅོས་བྲལ་ངང་མཉམ་པར་བཞག །དང་པོར་དུག་གསུམ་རྣམ་རྟོག་མང་འགྱུ་ཡང་། །གང་ཤར་རང་ངོ་ཤེས་པའི་ཐོག་ཏུ་གློད། །མདོར་ན་སྐྱིད་སྡུག་ལེགས་

[Full Size]

ཉེས་ཐམས་ཅད་ཀུན། །གང་ཤར་ལམ་དུ་ཁྱེར་ཞིང་བླ་མ་ལ། །བློ་གཏད་ལིང་སྐྱུར་སྡིག་སྤང་དགེ་སྒྲུབ་འབད། །ལས་འབྲས་བླང་དོར་དེ་ཡིས་བསམ་དོན་འགྲུབ། །དད་གསུམ་ལྡན་པ་སོག་རུ་ཇོ་འབུམ་ངོར་སྤེལ་བ་དགེ། །།༈ དུས་གསུམ་རྒྱལ་བ་ཀུན་འདུས་ངོ་བོ་ཉིད། །དྲུག་པ་སེང་གེ་དཔལ་ལྡན་ཀརྨ་ཀ། བདུད་འདུལ་རྡོ་རྗེ་སྤྱི་བོའི་རྒྱན་དུ་མཆོད། །རྣམ་ཀུན་མཆོག་ལྡན་ཕྱག་རྒྱ་ཆེ་རྟོགས་ཤོག །བསག་སྦྱང་སྔོན་དུ་སོང་བའི་ལས་སྐལ་ཅན། །གང་ཉིད་སྐུ་འཚོ་གཞོམ་བྲལ་རྟག་བརྟན་ཅིང་། །བསླབ་གསུམ་རྣམ་དག་ཚུལ་གནས་ཐོས་སྒོམ་ལ། །རྣམ་ཀུན་གཅེས་སྤྲས་བག་ཡོད་ནོངས་མེད་ཞུ། །སྙིགས་དུས་རྒྱལ་བའི་བསྟན་ལ་མི་གུས་པའི། །དམུ་རྒོད་འགྲོ་རྣམས་མི་བསྲུན་བརླང་སྤྱོད་ལ། །སྐྱོ་བ་རྒྱང་བསྲིང་ཕ་རོལ་ཕྱིན་དྲུག་དང་། །བསྡུ་དངོས་བཞི་ཡིས་བསྟན་དང་འགྲོ་དོན་སྐྱོངས། །རྡོ་རྗེ་ཐེག་པའི་ལམ་ཟབ་བསྐྱེད་རིམ་གྱི། །རྩལ་སྦྱང་ཐ་མལ་སྣང་ཞེན་ལྷ་སྐུར་ལྡང་། །བཟླས་པ་སྔགས་ཀྱི་འཁོར་ལོ་རྟག་པར་འབད། །འཕྲོ་འདུས་དོན་གཉིས་ལྷུན་གྱིས་འགྲུབ་པར་བྱ། །ཐུན་མོང་སྔོན་འགྲོ་བཞི་ཡིས་རྒྱུད་བསྐུལ་ཞིང་། །ནང་པ་སངས་རྒྱས་བསྟན་ལ་སྐྱབས་འགྲོས་ཚུད། །ཐེག་ཆེན་ལམ་ཀྱི་གཞི་མ་སེམས་བསྐྱེད་འབད། །རིགས་འདུས་རྡོར་སེམས་སྒོམ་བཟླས་སྒྲིབ་གཉིས་སྦྱོངས། །ཚོགས་ཟུང་མྱུར་རྫོགས་ཕྱི་ནང་མཎྜལ་དང་། །བྱིན་རླབས་རྒྱུད་སྨིན་བླ་མའི་རྣལ་འབྱོར་སྒྲུབས། །དབང་བཞིའི་ཡེ་ཤེས་རྟོགས་གྲོལ་ཐུགས་ཡིད་བསྲེ། །རང་སེམས་བླ་མའི་ངོ་བོར་ཤེས་པར་བྱ། །དང་པོ་

[Full Size]

སེམས་ཉིད་གཏན་ལ་འབེབས་པ་ལ། །སྣང་ཕྱོགས་སྟོང་ཕྱོགས་དབྱེར་མེད་གསུམ་གོ་དགོས། །སྣང་བ་སེམས་ཀྱི་འགྱུ་བ་ཕྱི་རུ་ཕྱོགས། །སྟོང་པ་རྣམ་རྟོག་རྒྱུན་འགགས་ཕྱམ་མེར་གནས། །དེ་གཉིས་རིག་པས་དབྱེར་མེད་གཅིག་ཏུ་བསྡུས། །སྟོང་གསལ་མ་འགགས་རིག་པའི་སྙིང་པོ་ཅན། །འཁོར་འདས་གྱེས་སོ་གཉུག་མའི་རང་ཞལ་ཏེ། །བསྐྱང་བྱའི་སྙིང་པོ་ཡིན་པ་དགོངས་པར་མཛོད། །སྣང་བ་ལྷན་ཅིག་སྐྱེས་པ་ཆོས་ཀྱི་སྐུ། །རྣམ་རྟོག་ལྷན་སྐྱེས་ཆོས་སྐུའི་རྩལ་ཤེས་པས། །མ་བཅོས་སོ་མར་བཞག་པས་རྟོགས་པ་འཆར། །ཆུ་བོའི་རྒྱུན་བཞིན་སྐྱོང་ན་ཡང་བསྐྱར་འཆར། །དེ་ལ་གེགས་དང་གོལ་ས་ལ་སོགས་པ། །རྣམ་རྟོག་སྦུན་པོའི་རྗེས་འབྲང་མི་བྱ་བར། །གང་ཤར་རིག་པ་དེ་ཀའི་སྣང་ཐོག་ཏུ། །རྩེ་གཅིག་རྦད་གཅོད་བྱེད་པ་གནད་དུ་ཟབ། །ཐ་མལ་སྣང་ཞེན་ལྷ་སྐུར་གསལ་བ་དང་། །བླ་མར་མོས་གུས་ལྟེམ་རྐྱང་མེད་པ་རུ། །འགྲོ་བའི་དོན་དུ་སྟོང་ཉིད་སྙིང་རྗེ་སྒོམས། །འཁོར་འདས་དབྱེར་མེད་བསྔོ་བས་རྒྱས་འདེབས་འཚལ། །མདོར་ན་རྒྱལ་བའི་བཀའ་དང་གྲུབ་པའི་ལུང་། །བཀའ་བརྒྱུད་གོང་མའི་རྣམ་ཐར་རྒྱ་མཚོ་རྣམས། །ཉམས་སུ་ལེན་བྱའི་གདམས་པ་ཡིན་པའི་ཕྱིར། །དེ་ཀུན་ལས་ལྷག་སྨོས་སུ་ཅི་ཞིག་ཡོད། །དེ་སྐད་ཟུར་མང་བསྟན་འཛིན་མཆོག་སྤྲུལ་གྱི། །བཞེད་སྐོང་ཆེད་དུ་དཔལ་སྤུངས་ཡང་དབེན་ནས། །སི་ཏུ་པདྨའི་མིང་གིས་སྤེལ་བའི་དགེས། །སྒྲུབ་བརྒྱུད་བསྟན་བའི་རྒྱལ་མཚན་འཛིན་གྱུར་ཅིག །སུ་ཛ་ཡ། །༈ ། །དོན་དམ་

[Full Size]

རང་གསལ་ངོ་བོ་ཀུན་ཏུ་བཟང་། །མ་འགགས་སྣ་ཚོགས་རྟོག་པའི་རོལ་རྩེད་ཅན། །མཁའ་ལ་སྤྲིན་ལྟར་འགྲོ་འོང་དང་བྲལ་བ། །ཀ་དག་ལྷན་སྐྱེས་རྫོགས་པ་ཆེ་འགྲུབ་ཤོག །རིག་འཛིན་རྣམ་རྒྱལ་ངོར་སྤེལ།། ༈ །།དཔལ་རིགས་ཀུན་ཁྱབ་བདག་དཀྱིལ་འཁོར་གཙོ། །མགོན་སྐྱབས་གནས་མཚུངས་མེད་ཀརྨ་པ། །དུས་འདི་བཟུང་བླ་མེད་སྙིང་པོའི་བར། །འབྲལ་མེད་པ་སྤྱི་བོར་རྟག་བཞུགས་གསོལ། །སེམས་གདོད་ནས་དག་པའི་རང་བཞིན་ལ། །གློ་བུར་གྱི་མ་རིག་འཁྲུལ་པའི་དྲི། །རང་ཤར་དང་རང་གྲོལ་ངང་ཉིད་དུ། །བློ་འདས་ཀྱི་བརྗོད་མེད་དོན་རྟོགས་ཤོག །ཅེས་པའང་ཆོས་དགྱེས་ལ་སྤེལ།། ༈ །།ན་མོ་གུ་རུ། གཞི་གདོད་ནས་རྣམ་དག་གཉུག་མའི་གཤིས། །ལྷན་སྐྱེས་ཀྱི་རང་བྱུང་ཡེ་ཤེས་ངང་། །གང་སྣང་བ་སྣ་ཚོགས་རྟེན་འབྲེལ་བའི། །ཆོས་ཉིད་ཀུན་ཟད་སར་འཁྱོལ་གྱུར་ཅིག །ཀརྨ་བཀྲ་ཤིས་ལ་སྤེལ།། ༈ །།རང་བྱུང་མཐའ་བྲལ་ཀུན་ཏུ་བཟང་པོའི་ཀློང་། །ཡེ་ནས་མ་བཅོས་གཉུག་མའི་རང་རྩལ་གདངས། །གཟུང་འཛིན་དང་བྲལ་གསལ་སྟོང་བདེ་བ་ཆེ། །བྱར་མེད་ངང་ལ་གྲོལ་འགྱུར་ཨེ་མ་ཧོ། །སྒྲུབ་པ་རྒྱལ་བྱེད་ལའོ།། ༈ །།དུས་གསུམ་རྣམ་པར་རྟོག་པའི་ཆོས་ཐམས་ཅད། །མཁའ་ལས་སྤྲིན་ལྡང་སླར་ཡང་མཁར་ཐིམ་བཞིན། །གང་ཤར་བཟོ་མེད་རིག་རྩལ་འགགས་མེད་ངང་། །འཆི་མེད་ཆོས་སྐུའི་རང་ཞལ་གནས་མཐོང་ཤོག །སྒྲུབ་ཐེག་འཕེལ་ལའོ།། ༈ །།ན་མོ་རཏྣ་གུ་རུ། དཀོན་མཆོག་གསུམ་ལ་ཕྱག་འཚལ་ལོ། །བྱིན་

[Full Size]

རླབས་ཆེན་པོའི་འོད་སྟོང་ལྡན། །ཐུགས་རྗེས་མ་རིག་མུན་པ་སེལ། །ནུས་མཐུས་འགྲོ་བློའི་སྐྱེད་ཚལ་དུ། །རྣམ་དག་དགེ་བའི་རྫིང་བུ་བསྐྱིལ། །དྲི་མེད་ཡོན་ཏན་པད་དཀར་བཀྲ། །བསྡུ་དངོས་བཞི་ཡི་ཡལ་གས་བཏེགས། །ཡང་དག་དམ་པའི་བཅུད་སྟེར་བ། །སྐྱབས་དང་མགོན་པོ་བླ་ན་མེད། །ལོ་ཀི་ཤྭ་ར་ཀརྨ་ཀ། རྗེ་བཙུན་བདུད་འདུལ་རྡོ་རྗེ་ཡི། །ཞབས་ཀྱི་པདྨ་ཚེ་རབས་སུ། །འབྲལ་མེད་ཉིན་བྱེད་དབང་པོ་བཞིན། །མོས་པའི་ཡིད་མཁར་རྟག་ཏུ་འཆར། །སྒྲིབ་གཉིས་སྨག་རུམ་དྲུངས་ནས་འབྱིན། །ཚོགས་གཉིས་ལྗོན་པའི་རྩ་བ་བརྟན། །གཞན་ཕན་ལོ་འདབ་ཕྱོགས་བཅུར་གཡོ། །རང་བྱུང་གཉུག་མའི་འབྲས་བུ་སྨིན། །མ་རྒན་མཁའ་ཁྱབ་འཚོ་བའི་གཞི། །སྨན་མཆོག་དམ་པར་བདག་གྱུར་ཅིག །ཀྱེ་མ། ཡེ་ནས་འཁྲུལ་པའི་སྣང་བ་ཆེར་འཕེལ་ནས། །བདག་འཛིན་ཉོན་མོངས་ཞགས་པས་དམ་དུ་བཅིངས། །ཐར་མེད་འཁོར་བའི་སྡུག་བསྔལ་མེ་འོབས་ཀྱི། །བཙོན་དོང་འདི་རུ་རང་ཉིད་རང་གིས་ཁྲིད། །དེ་ལས་ཐར་བར་འདོད་བའི་བློ་སྐྱེས་ན། །དཀར་པོ་དགེ་བ་བཅུ་ཡི་ཐེམ་སྐས་འཛེགས། །ཆོས་ཀྱི་མཆོག་གྱུར་ཕྱག་ཆེན་ཉམས་ལེན་བསྐྱང་། །རྟག་ཏུ་བྱང་ཆུབ་སེམས་ནི་བརྗེད་མི་བྱ། །མོས་གུས་དད་པའི་འདུན་མ་མ་ཞན་པར། །འཆི་ཆོས་རྣམ་པར་དག་པའི་བློ་ཆོད་ན། །བཀའ་བརྒྱུད་བྱིན་རླབས་མི་འཇུག་མི་སྲིད་མོད། །འོན་ཀྱང་རང་རང་ཉོན་མོངས་སྟོབས་ཆེ་བས། །འབད་དང་རྩོལ་བ་མི་ནུས་ཉིན་རེ་བཞིན། །ངག་གི་བཟླས་བརྗོད་ཡིད་ཀྱིས་བསྐྱེད་མི་ནུས། །འདི་དག་ཆུ་ལ་རི་

[Full Size]

མོ་བྲིས་པའི་དཔེ། །འབྲས་མེད་ལགས་སོ་དེས་ན་ཁྱོད་ཉིད་ཀྱིས། །ཐུགས་ཀྱི་གཏིང་ནས་ཕྱི་མའི་དོན་གཉེར་ན། །དད་གུས་དམ་ཚིག་མི་ལྡན་རང་དབང་མེད། །དཔེར་ན་སྐོམ་པ་ཆུ་ལ་བསྙེགས་པ་བཞིན། །གཞན་ནས་རྩོལ་སྒྲུབ་དགོས་པར་མི་སྣང་ངོ་། །དེ་སྐད་སྔོན་བྱོན་གྲུབ་པའི་དབང་པོ་མཆོག །རྒྱལ་སྲས་བླ་མ་རྣམས་ཀྱི་ཚད་མའི་གསུང་། །གསུང་རབ་རྣམས་ལས་དད་པ་སྐྱེ་དགོས་པའི། །ཞལ་གདམས་སྙིང་པོར་འདུག་པས་དེ་བཞིན་མཛོད། །ཅེས་པའང་བསམ་གཏན་ཆོས་མཆོག་གླིང་གི་ཀུན་སྤངས་པ་རྟོགས་ལྡན་ཀརྨ་ཀུན་དགའི་ངོར་སི་ཏུས་བྲིས། མངྒ་ལམ་།། ༈ །།བསོད་ནམས་ཚོགས་ཆེན་འབྲས་སྨིན་པས། །དལ་བརྒྱད་འབྱོར་བ་བཅུ་ལྡན་པའི། །མི་ཡི་རྟེན་མཆོག་དེང་འདིར་ཐོབ། །ཡོངས་ཀྱི་བཤེས་གཉེན་དམ་པ་མཇལ། །ཟབ་དང་རྒྱ་ཆེའི་ཆོས་ཚུལ་གྱིས། །རང་རྒྱུད་སིམ་པའི་སྐལ་བཟང་དང་། །གཞན་ཕན་རླབས་ཆེན་བྱང་ཆུབ་ཀྱི། །སེམས་གཉིས་དག་གིས་ཡོངས་བསྐུལ་ཏེ། །སྔོན་བྱོན་གྲུབ་པའི་རྣམ་ཐར་བསྐྱང་། །ཆོས་བརྒྱད་འཁྲི་བ་རྒྱབ་ཏུ་བོར། །མི་རྟོག་ཡེ་ཤེས་ཕྱག་རྒྱ་ཆེའི། །གནས་ལུགས་ཇི་བཞིན་མངོན་གྱུར་ཤོག །ཅེས་ཝ་རའི་སྒྲུབ་ཆེན་ནས་བསྐུལ་བཞིན་སྤེལ་བ་མངྒ་ལམ།། ༈ །།ཚོགས་གཉིས་མཐར་ཕྱིན་སྔོན་གོམས་བྱང་ཆུབ་ཀྱི། །སྤྱད་པ་སྤྱོད་ཟིན་ནའང་ཐུགས་རྗེའི་འཕྲུལ། །དེང་འདིར་རྒྱལ་ཀུན་ཕྲིན་ལས་འགྲོ་བའི་མགོན། །མངོན་པར་གསལ་གང་ཀུན་ཏུ་རྒྱལ་གྱུར་ཅིག །མགོན་ཁྱོད་ཚེ་འོད་དཔག་མེད་རྣམ་པར་རོལ། །སྐྱེས་རབས་ཚར་དངར་ས་སྐྱོང་ཨིནྡྲའི་མཚན། །ནཱ་ག་རྫུ་ུན་ལ་སོགས་མཁས་

[Full Size]

གྲུབ་བརྙེས། །རིམ་བྱོན་ཟླ་བྲལ་ཐུབ་མཆོག་བསྟན་གསལ་བྱེད། །ཁྱད་པར་སྒྲུབ་བརྒྱུད་རིང་ལུགས་སྤེལ་བའི་གཉེན། །གང་འདིར་གཞན་ཕན་གཟུགས་སྐུར་སྟོན་པ་ཉིད། །བདག་བློའི་ཡིད་ཀྱི་པདྨོའི་དགའ་ཚལ་དུ། །རྫོགས་ལྡན་བསྐལ་བཟང་ནམ་མཁའི་ནོར་བུ་བཞིན། །ཚེ་རབས་འབྲེལ་བའི་དམ་ཚིག་བཙན་པོ་ཡིས། །ཟབ་གསང་རྡོ་རྗེའི་ཆོས་སྒོ་སྟོན་པ་ལ། །རེས་འགའ་སློབ་དཔོན་རེས་འགའ་སློབ་མའི་ཚུལ། །ཅིར་ཡང་བསྒྱུར་བ་ཕྲིན་ལས་དཔག་དཀའ་ཞིང་། །རྒྱལ་མཆོག་ཀརྨའི་ངེས་དོན་སྲོལ་འཛིན་པ། །ཡིན་ལ་ཡིན་པར་ངེས་པའི་གནའ་བོའི་ལུགས། །བཀུར་སྟི་རྗེ་ས་ཕུལ་འདི་དོན་མེད་མིན། །འོན་ཀྱང་བཀའ་བརྒྱུད་གོང་མའི་རྣམ་པར་ཐར། །ཇི་བཞིན་བླ་མ་བསྟེན་པའི་ཐབས་ཚུལ་ཡང་། །ནཱ་རོས་ཏིལླི་བསྙེན་པའི་དཔེ་བཞིན་པར། །ཕྱོགས་མཚུངས་དགོངས་དོན་ངེས་པ་ཅན་འབབ་པའི། །བཀའ་ནན་ཆེ་ཐང་བསྩལ་ལ་ཡི་རང་ཞིང་། །ཕྱིས་འབྱོན་མཐོན་པོའི་གོ་སར་བཞུགས་པ་རྣམས། །ཆོས་ཕྱིར་ཇི་མི་སྙམ་གྱི་ཀུན་རྟོག་ནི། །ཆེས་ཆེར་བདོ་བས་རྒྱལ་བཀའ་རས་བོར་བའི། །སྤྱོད་ཚུལ་གོ་ལྡོག་ཁོ་ནར་སྐྱོང་རྣམས་ཀྱང། །སྟོན་པར་ཞལ་འཆེས་ཚུལ་འཆོས་སྤེལ་བཞིན་དུ། །ཆེ་དང་སྙན་པའི་གྲགས་པས་གདུལ་བྱ་རྣམས། །འདུལ་བའི་སྤང་བླང་ལས་འབྲས་འདིར་གཞིག་ཚེ། །བཅོམ་ལྡན་ཞལ་ནས་གསུངས་པ་དབང་བཞག་ན། །ལས་དེའི་འབྲས་བུ་ཅི་ཞིག་མྱོང་གྱུར་ཀྱེ། །དཔལ་ལྡན་ཀརྨའི་ཐུགས་རྗེས་བཟུང་དུ་གསོལ། །ཞེས་ཏྲེ་ཧོ་ཞབས་དྲུང་རིན་པོ་ཆེར་སྔར་ཐོབ་ཀྱི་ཕྱག་

[Full Size]

ལེན་དང་། ཁྲི་གདན་སོགས་བཀུར་བཟོས་ཞུས་པར། ཁོ་བ་ོལ་སྨིན་གྲོལ་གསན་བཞེས་རིགས་བདག་བསྟེན་པའི་དེས་ན་སྔོན་བྱོན་གྲུབ་པའི་རྣམ་ཐར་སྐྱོང་བ་ཐུགས་བཞེད་སྤྲོ་ཚུལ་ཕེབས་པའི་བཀའ་ལེན་དུ་ཕུལ་བའོ།། ༈ །།རང་བྱུང་བློ་འདས་ཆོས་སྐུའི་རོལ་པ་ལས། །བདེ་ཆེན་ལོངས་སྤྱོད་ཡོངས་སུ་རྫོགས་པའི་སྐུ། །མ་འགགས་ཐུགས་རྗེའི་རོལ་རྩེད་སྤྲུལ་པའི་གར། །སྐུ་གསུམ་ངོ་བོ་བླ་མར་གསོལ་བ་འདེབས། །ལྷན་ཅིག་སྐྱེས་པའི་ཡེ་ཤེས་སྒྲིབ་བྲལ་བ། །གནས་ལུགས་ཇི་བཞིན་མངོན་དུ་རྟོགས་པར་ཤོག །གཞི་དད་དང་དམ་ཚིག་བརྟན་པོ་ལ། །ལམ་རྒྱུ་དང་འབྲས་བུའི་དགེ་སྡིག་གི། །སྤང་བླང་ཀུན་གཅེས་སྤྲས་རྣམ་ཀུན་དུ། །ཡེངས་མེད་དང་སྒོམ་མེད་གཉུག་མའི་གཤིས། །སེམས་ཆོས་སྐུའི་རང་ཞལ་མ་བཅོས་ངང་། །དྲན་རྫིའི་བྱ་ར་དང་དབྱེར་མེད་པར། །ཆུ་བོའི་རྒྱུན་རྣལ་འབྱོར་དབྱེར་མེད་ཀྱིས། །ཉིན་མཚན་ཀུན་འབྲལ་མེད་ཉམས་ལེན་འཚལ། །དུས་ནམ་ཞིག་རང་བྱུང་ཡེ་ཤེས་དོན། །ལྷན་སྐྱེས་ཀྱི་རང་ངོ་མངོན་གྱུར་ངེས། །དེ་སྐད་པདྨའི་མིང་ཅན་གྱིས། །དད་དམ་ལྡན་བཞེད་ངོར་སྤེལ་དགེའོ། །སྤྲེའུ་སྤྲུལ་སྐུས་བསྐུལ་ལྟར་བྲིས་པ་བཀྲ་ཤིས།། ༈ །།སྭསྟི། རང་རིག་ཡེ་ཤེས་མངོན་སུམ་སྟོན་མཛད་པ། །རྩ་བརྒྱུད་བླ་མ་རྣམས་ཀྱིས་བྱིན་རླབས་སྩོལ། །ཕྱག་རྫོགས་དབུ་གསུམ་བཞེད་གཞུང་མང་མོད་ཀྱང་། །བླ་སློབ་སོ་སོའི་རྒྱུད་ཚོད་དང་བསྟུན་པའི། །འཆད་ཚུལ་མང་ཡང་འགགས་དོན་གཅིག་ལས་ཅི། །འོན་ཀྱང་དད་བརྩོན་གོམས་པས་མ་འཆུན་ན། །སླ་ཆོས་གོ་བ་ཙམ་གྱིས་གནད་ཁེལ་དབེན། །

[Full Size]

སྟོང་གསལ་རིག་པའི་སྙིང་པོ་ཅན་རྟོགས་ན། །ཐོག་མཐའ་བར་གསུམ་གེགས་གོལ་མི་འབྱུང་ཞེས། །རྒྱལ་བ་རྒོད་ཚང་ཆེན་པོས་བཞེད་ལྟར་ལ། །སྟོང་ཞེས་ཕྱང་ཆད་ཚོགས་དྲུག་བསྒག་པ་དང་། །སྟོང་པར་ཞེན་པའི་ལས་འབྲས་བླང་དོར་བྲལ། །སྙིང་རྗེ་བྱང་སེམས་སྤང་སོགས་བདུད་ལས་ཀྱི། །གེགས་ལ་རྣམ་ཀུན་དོགས་འཛེམ་ཤིན་ཏུ་གཅེས། །གསལ་བ་ལའང་དཔྱད་པ་མང་གྱུར་ཀྱང་། །བལྟ་བར་སེམས་པའི་ངོ་དེ་མཐོང་མ་ཐག །སྟོང་པ་གཤིས་ཡིན་རང་གདངས་གསལ་ཧྲིག་གེ། །ཉམས་ལ་འབྱུང་བ་དེ་ཉིད་ཁོ་ན་ལས། །གསལ་ཞེས་སྒྲ་ལ་དངོས་པོར་འཛིན་བྱས་ནས། །བློ་ཡིས་བཅོས་བསྒྱུར་མང་པོ་བྱེད་པ་ནི། །རྟོག་གེའི་ཡུལ་ལས་ཉམས་སུ་ལེན་པའི་གེགས། །རིག་པ་རྗེན་པ་མངོན་སུམ་མཐོང་བ་ནི། །རྟོགས་པ་ཐོབ་པའི་དུས་ལས་མི་འབྱུང་ཡང་། །ཕྱོགས་མཚུངས་གསལ་ཉམས་དེ་ཀ་སེམས་ཉིད་ལས། །གཞན་དུ་མེད་པའི་ངོ་བོ་ཤེས་ཐོག་གློད། །སྐད་ཅིག་མ་ཡི་ཉམས་དེ་མ་ཤོར་ན། །མཉམ་གཞག་མིང་དུ་བཏགས་ཤིང་ཉམས་ལེན་མཐིལ། །སླར་ཡང་ཤེས་པ་ཡུལ་དུ་འཕྲོ་ཙམ་ལ། །སྐད་ཅིག་གསུམ་ལས་མི་འགྱང་ངོ་ཤེས་བྱ། །དེ་ལྟར་སྨོས་པ་མདོ་དོན་ཙམ་དུ་སྟེ། །ཞིབ་པར་ཉམས་ཁྲིད་སྔོན་བྱོན་བཀའ་བརྒྱུད་ཀྱི། །རྡོ་རྗེའི་གསུང་ལ་གོམས་འདྲིས་དཔང་པོར་འཚལ། །གང་ཉིད་སྐྱེས་སྦྱངས་ལྡན་ཞིང་དད་དམ་གཙང་། །རིག་འཛིན་མཆོག་གི་བརྒྱུད་པར་ལྡན་གྱུར་པས། །རང་གཞན་དོན་གཉིས་

[Full Size]

ལྷུན་གྲུབ་མཐར་ཕྱིན་ནས། །རྣམ་ཀུན་བཀྲ་ཤིས་དགེ་བའི་དཔལ་ལྡན་ཤོག །ཛ་ཡནྟུ།། ༈ །།དུས་གསུམ་ཀུན་མཁྱེན་ཀརྨ་པར། །གསོལ་འདེབས་བདག་རྒྱུད་སྨིན་གྲོལ་གྱི། །ལམ་ལ་འགོད་པར་བྱིན་གྱིས་རློབས། །སྐུ་བཞི་མངོན་གྱུར་བྱིན་གྱིས་རློབས། །རང་སེམས་སྟོང་པར་གནས་པ་འདི། །གང་ཤར་རྣམ་རྟོག་རྗེས་མི་འབྲངས། །ད་ལྟའི་ཤེས་པ་སོ་མ་ཡི། །ངང་ལ་བཅས་བཅོས་མེད་པར་བཞག །ས་ལེ་སེང་ངེ་ཡེ་རེར་བཞག །དེ་ཡང་དྲན་རྫིའི་སོ་པས་བསྐུལ། །ཡང་ཡང་བསྟར་ཆགས་འབད་པ་དང་། །འགྲོ་ལ་སྙིང་རྗེ་སྐྱབས་གསུམ་ལ། །མོས་གུས་དམ་ཚིག་དག་གཙང་གི། མཐུ་ཡིས་ཕྱག་ཆེན་ཡེ་ཤེས་ཀྱི། །ཉམས་མྱོང་རྒྱུད་ལ་སྐྱེ་བར་འགྱུར། །ཅེས་པའང་རིག་འཛིན་ངོར་སྤེལ།། ༈ །།གྲུབ་ཐོབ་རྒྱ་མཚོའི་གཙོ་མཆོག་ཐོས་པ་དགའ། །གང་དེར་གསོལ་འདེབས་བྱང་ཆུབ་བར་དུ་སྐྱོངས། །ཕྱག་རྒྱ་ཆེན་པོའི་ཡེ་ཤེས་རྒྱུད་ཐོག་འདིར། །འཕྲལ་རྐྱེན་སྒྲིབ་པས་མ་གོས་ཆོས་སྐུ་ཡི། །ངོ་བོ་གནད་དུ་སྨིན་པར་བྱིན་གྱིས་རློབས། །སྣང་སྲིད་དག་པ་ཆེན་པོའི་ངང་ཉིད་ལ། །འདས་པའི་རྗེས་བཅད་སྤངས་ཤིང་མ་འོངས་པའི། །རྣམ་རྟོག་ཡིད་ལ་མི་འཕྲེང་ད་ལྟ་ཡི། །ཤེས་པ་མ་བཅོས་སོ་མའི་ངང་དེར་སྐྱོངས། །དེ་ཡང་དྲན་རྫི་བརྟན་པོའི་རྩི་ཡིས་འདེབས། །མོས་གུས་དག་སྣང་སྦྱངས་དང་སྙིང་རྗེ་འབྱོངས། །བར་མ་ཆད་པར་སྙིང་རུས་བརྩོན་པ་ན། །ནམ་ཞིག་དོན་དམ་ཡེ་ཤེས་མངོན་དུ་འཆར། །བྱང་ཆུབ་སྙིང་པོའི་གོ་འཕང་མཆོག་ཐོབ་

[Full Size]

གྱུར། །ཅེས་པའང་ཀརྨ་ཕུན་ཚོགས་ངོར་སྤེལ།། ༈ །།སྣང་སྲིད་ཆོས་སྐུའི་རང་བཞིན་ལ། །རྒྱས་བཏབ་རྣལ་འབྱོར་ཐོས་པ་དགའ། །རས་པ་མཆོག་དེས་བྱང་ཆུབ་བར། །མི་འབྲལ་རྟག་ཏུ་སྐྱོང་གྱུར་ཅིག །བདེ་གཤེགས་སྙིང་པོ་ཞེས་བྱ་བ། །སེམས་ཀྱི་དོན་དམ་དེ་ཁོ་ནའི། །གནས་ལུགས་གཞི་དང་ལམ་འབྲས་བུ། །མཐར་ཕྱིན་ཕྱག་རྒྱ་ཆེ་རྟོགས་ཤོགསྔོན་སོང་རྣམ་རྟོག་གི་རྗེས་མི་འབྲང་། རྗེས་ནས་བསམ་བློ་འཕྲོ་མི་འཇུགད་ལྟར་གྱི་ཤེས་པ་ཧྲིག་གེ་བའི་ངང་ལ་ཡག་ཏུ་རེ་བ་དང་། ཉེས་ཀྱིས་དོགས་པ་སྤངས་ཏེ། དྲན་རྫིའི་རྒྱང་སོ་བཙུགས་ལ་རྒྱུན་པར་ཉམས་ལེན་ངོ་བོ་སྐྱོང་བའི་མཉམ་བཞག་རྒྱ་མཚོ་ལྟ་བུ། རྗེས་ཐོབ་སྒྱུ་མ་ལྟ་བུའི་སྤྱོད་ལམ་གྱིས། མཐར་ཐུག་བླ་མེད་ཐོབ་པར་འགྱུར་རོ། །སྒོམ་ཆེན་འཕགས་མཆོག་ངོར་སྤེལ།། ༈ །།དོན་དམ་བློ་འདས་སེམས་ཉིད་ཆོས་ཀྱི་སྐུ། །གདོད་ནས་རྣམ་དག་མ་སྐྱེས་འདུས་མ་བྱས། །རང་བཞིན་འོད་གསལ་ལྷུན་གྲུབ་དེ་བཞིན་ཉིད། །གློ་བུར་འཁྲུལ་བའི་དྲི་མས་མ་བསླད་ཅིང་། །མི་རྟོག་ཟག་མེད་བདེ་ཆེན་ཞི་བའི་ངང་། །བསྒོམ་བྱ་སྒོམ་བྱེད་རྩོལ་བ་རྣམས་སྤངས་ནས། །འབད་མེད་ཉིད་དུ་མ་བཅོས་རང་སར་བཞག །བརྗོད་བྲལ་བློ་འདས་རང་བྱུང་ཡེ་ཤེས་ནི། །སྐུ་གསུམ་དབྱེར་མེད་མཆོག་གི་ངོ་བོ་སྟེ། །བདུད་བཞི་ཉོན་མོངས་གཉིས་འཛིན་གཡུལ་ངོ་རྣམས། །མཐར་བྱེད་ཡོན་ཏན་རྒྱ་མཚོའི་དཔའ་བོ་ཡིན། །བླ་མེད་ཐེག་པའི་ཡང་སྙིང་གདམས་

[Full Size]

པའི་གནད། །སྐལ་བཟང་སྙིང་གི་པདྨོར་རོལ་པར་འོས། །དེ་སྐད་ཛམ་ཐང་ཆོས་གྲྭ་ཡི། །བསླབ་གསུམ་རིམ་གཉིས་སྐལ་ལྡན་པ། །པདྨ་མངྒའི་འགྲོ་ཆོས་སུ། །བསྐུལ་ཕྱིར་ཏཱ་ཡི་སི་ཏུ་པ། །པདྨ་ཉིན་མོར་བྱེད་པས་སྨྲས། །ཤུ་བྷམ།། ༈ །།ཀུན་བཟང་པདྨ་འབྱུང་ལ་ཕྱག་འཚལ་ལོ། །དང་པོར་སེམས་ཅན་རིགས་དྲུག་མཁའ་ཁྱབ་ལ། །བྱམས་དང་སྙིང་རྗེ་ཚད་མེད་བསྒོམ་པ་དང་། །བར་དུ་བླ་མར་མོས་གུས་དག་སྣང་སྦྱངས། །ཐ་མར་རང་སེམས་མ་བཅོས་སོ་མའི་ངང་། །སྔོན་སོང་རྗེས་གཅོད་མ་འོངས་དྲན་མེད་ངང་། །ད་ལྟའི་ཤེས་པ་དེ་ཡི་ངོ་བོ་བལྟ། །སྐབས་སུ་དྲན་པའི་རྒྱང་སོ་ཡེངས་མེད་ཀྱིས། །ཡིག་དྲུག་བཟླ་ཞིང་དུས་གསུམ་དགེ་ཚོགས་ཀུན། །རང་དང་འགྲོ་ཀུན་སངས་རྒྱས་ཐོབ་པའི་ཕྱིར། །བསྔོ་བ་སྨོན་ལམ་རྣམ་པར་དག་པ་དང་། །ཆུང་ངུའི་དགེ་སྡིག་བླང་དོར་བག་ཡོད་བྱ། །དེ་ལྟར་སྐལ་བཟང་གཡར་ངོར་སི་ཏུས་སྤེལ།། ༈ །།ཐོབ་དཀའི་དལ་འབྱོར་ལྡན་དུས་འདིར། །སྔོན་བསགས་བསོད་ནམས་སྨིན་པའི་མཐུས། །སྙིང་པོའི་བསྟན་པའི་སྒོར་ཞུགས་ནས། །མ་ནོར་བླ་མས་རྗེས་བཟུང་ཞིང་། །སྐལ་ལྡན་དད་དང་དམ་ཚིག་གི། །རྩ་བ་བརྟན་ཅིང་ལས་འབྲས་ཀྱི། །བླང་དོར་ཇི་བཞིན་འདོར་མེད་དང་། །སློབ་དཔོན་ཕ་མར་བཀུར་སྟི་སོགས། །ཆོས་དང་འཇིག་རྟེན་མཐུན་འཇུག་གིས། །བྱང་ཆུབ་སེམས་ལ་རྟག་གཞོལ་ཞིང་། །སྒོ་གསུམ་ཁྱེར་སོ་གསུམ་ལྡན་གྱི། །ཉམས་ལེན་རྒྱས་གདབ་མི་འབྲལ་འཚལ། །

[Full Size]

ཞེས་ཀརྨ་རྒྱལ་བའི་ངོར་སྤེལ།། ༈ །།འཁོར་བ་བློས་བཏང་ཐར་པ་དོན་གཉེར་བའི། །ཀུན་སྤངས་པདྨ་མཐར་ཕྱིན་དེང་ནས་བཟུང་། །སྣང་སེམས་རེ་དོགས་སྤྲོས་པ་རྒྱང་བསྐྱུར་ལ། །ནམ་འཆི་ངེས་མེད་ཚེ་འདི་རླུང་ནང་གི། །མར་མེ་ཇི་བཞིན་དེས་ན་ཡང་དག་གི། ལམ་བཟང་ངེས་པའི་དོན་ལ་གཉེར་བར་བྱོས། །དད་དང་དམ་ཚིག་མོས་གུས་སོ་ནམ་གྱིས། །བྱང་ཆུབ་ཆེན་པོའི་ལོ་འདབ་བསྐྱེད་བྱས་ནས། །རིང་མིན་བླ་མེད་འབྲས་བུ་སྤྱོད་ལ་ཉེ། །དེས་ན་བགྲང་བྱའི་གྲངས་འཛིན་འདི་བྱ་དང་། །འདི་བྱེད་གཏན་འདུན་ཆོས་བརྒྱད་རིང་སྤངས་ལ། །ཚེ་གཅིག་སངས་རྒྱས་བསྒྲུབ་ལ་དོན་གཉིས་པོ། །མཐར་ཕྱིན་མཛོད་ཅིག་པདྨ་མཐར་ཕྱིན་པ། །ཅེས་པའང་སི་ཏུས་སྨྲས་པའོ།། ༈ །།སྔར་འདས་རྟོག་པའི་རྗེས་མི་བཅད། །མ་འོངས་རྣམ་རྟོག་མདུན་མི་བསུ། །ད་ལྟའི་ཤེས་པ་ངོ་བོ་དང་། །ངོས་བཟུང་བྲལ་བ་དེའི་ངང་ཞོག །རྣམ་ཀུན་དྲན་རྫི་མ་བྲལ་བར། །མོས་གུས་སྙིང་རྗེས་རྒྱུད་བསྐུལ་ནས། །བརྩོན་པས་ཉམས་བླངས་རང་རིག་གི། །ཡེ་ཤེས་མངོན་དུ་རྟོགས་པར་འགྱུར། །ཅེས་པའང་སྨྲས་སོ།། ༈ །།གདོད་མའི་མགོན་པོ་ཀུན་ཁྱབ་ཀུན་ཏུ་བཟང་། །དབྱེར་མེད་རྗེ་བཙུན་བདུད་འདུལ་རྡོ་རྗེས་སྐྱོངས། །རང་སེམས་ལྷན་སྐྱེས་དྲི་བྲལ་ཆོས་ཀྱི་སྐུ། །བདེ་ཆེན་འགྱུར་མེད་རྡོ་རྗེའི་དོན་རྟོགས་ཤོག །དེ་ཡང་ཐ་མལ་ཤེས་པའི་རྣམ་རྟོག་འདི། །འདས་པའི་རྗེས་མི་བཅད་ཅིང་མ་འོངས་པའི། །འདི་བྱ་འདི་བྱེད་དྲན་རིག་མདུན་མི་བསུ། །གང་ཤར་སོ་མ་དེ་ངང་

[Full Size]

མཉམ་པར་བཞག །དུས་ཀུན་དྲན་རྫིའི་རྩི་དང་མ་བྲལ་བར། །མོས་གུས་དག་སྣང་སྙིང་རྗེ་ཚུལ་ཁྲིམས་བསྲུང་། །ཆོས་ཀྱི་རྩ་བ་རབ་ཏུ་བརྟན་གྱུར་ན། །བླ་མེད་བྱང་ཆུབ་རིང་མིན་ཉིད་ཐོབ་ངེས། །ཅེས་གནས་མདོ་ཀརྨ་རང་གྲོལ་ལ་སྤེལ།། ༈ །།བཀའ་བརྒྱུད་གྲུབ་པའི་འཁོར་ལོར་ཕྱག་འཚལ་ལོ། །མི་འགྱུར་ལྷན་ཅིག་སྐྱེས་པ་རང་བྱུང་གི། །རིག་པའི་ཡེ་ཤེས་བདེར་གཤེགས་སྙིང་པོ་ཆེ། །བློ་འདས་ཕྱག་རྒྱ་ཆེན་པོའི་དོན་རྟོགས་ཤོག །དུས་གསུམ་རྟོག་པའི་དྲི་མ་ཀུན་བསལ་ནས། །མ་བཅོས་སོ་མའི་ངང་དུ་བྱར་མེད་པ། །རྗེན་ནེ་ལྷོད་དེ་འབོལ་ལེ་ཤིགས་སེ་བཞག །མ་ཡེངས་སྐྱོང་བ་ཆོས་ཀུན་འདུས་པའི་མཆོག །གཞན་ཡང་འདུས་བྱས་དགེ་རྩ་གང་འགྲུབ་དང་། །ཁྱད་པར་འདུས་མ་བྱས་པའི་སེམས་ངོ་བོ། །སྐྱོང་བ་སངས་རྒྱས་ཀུན་གྱི་བགྲོད་པའི་ལམ། །མཐར་ཐུག་ཕྱིར་ན་སྒོ་གསུམ་ཆིག་དྲིལ་འཚལ། །དེ་སྐད་ཀརྨ་དར་རྒྱས་སྐྱབས་ཆེ་དབུ་མཛད་པ། མཆན། གང་དེ་ཡི། །གཡར་ངོར་སི་ཏུས་སྤེལ་བ་མངྒ་ལམ།། ༈ །།སྐྱབས་གནས་ཀུན་འདུས་བླ་མར་གསོལ་བཏབ་ནས། །རང་སེམས་མ་བཅོས་རང་བབས་གཉུག་མའི་ངང་། །མཉམ་རྗེས་ཀུན་ཏུ་་བསྐྱང་བས་གནས་ལུགས་ཀྱི། །རང་ཞལ་མངོན་མཐོང་ཚེ་གཅིག་སངས་རྒྱས་འགྱུར། །ཟུར་མང་བློ་གྲོས་ངོར་སི་ཏུས་སྤེལ།། ༈ །།བླ་མའི་རྣལ་འབྱོར་ཡིད་དང་འདྲེས་ངེས་མཐར། །བླ་མ་རང་སེམས་དབྱེར་མེད་ཕྱག་རྒྱ་ཆེ། །བྱ་རྩོལ་ལས་འདས་རང་བབས་ཆུ་རྒྱུན་ལྟར། །

[Full Size]

རྟག་པར་ཆད་མེད་སྦྱོང་བའི་ཉམས་ལེན་འཚལ། །གོ་ཆེན་ཀརྨ་བློ་གྲོས་ངོར་སྤེལ།། ༈ །།ཀརྨ་བྱང་ཆུབ་རྟག་པར་དཀོན་མཆོག་ལ། །སྐྱབས་སོང་སྨོན་འཇུག་བྱང་སེམས་བསླབ་པ་སྲུངས། །བསྐྱེད་རྫོགས་མོས་གུས་ཕྱག་རྒྱ་ཆེར་འདྲིལ་བས། །ཚེ་གཅིག་གདོད་མའི་རྒྱལ་ས་ཟིན་པར་ཤོག །ཅེས་པའང་དད་ལྡན་ངོར་སྤེལ།། ༈ །།སྤྱི་བོར་བཞི་རྫོགས་གདན་སྟེང་དྲིན་ཆེན་རྗེ། །རྡོ་རྗེ་འཆང་དབང་དཀོན་མཆོག་ཀུན་འདུས་གསལ། །སྙིང་ནས་གསོལ་བཏབ་རང་ལ་ཐིམ་པའི་མཐར། །བླ་མ་རང་སེམས་དབྱེར་མེད་མཉམ་པར་བཞག །ཀརྨ་རང་གྲོལ་ངོར་སྤེལ།། ༈ །།དཀོན་མཆོག་དྭགས་རྒྱུད་གྲལ་ན་སངས་རྒྱས་ཀྱི། །རང་ཞལ་མངོན་གསལ་ཞྭ་ནག་ཅོད་པན་ཅན། །ཀརྨ་པ་ཞེས་སྐྱོབ་པ་མཚུངས་བྲལ་དེས། །ཚེ་རབས་ཀུན་ཏུ་རྗེས་སུ་འཛིན་གྱུར་ཅིག །དེ་ལྟར་གསོལ་ཐོབ་སྦྱིན་སོགས་དགེ་བའི་ཆོས། །རྟག་ཏུ་ལྷག་པའི་བསམ་པས་བསྒྲུབ་པར་མཛོད། །སྒྲོལ་མ་ལྷ་མཚོའི་ངོར་སྤེལ།། ༈ །།ཀརྨ་ཆོས་འཛིན་ཆོས་ལ་དབང་ཐོབ་པའི། །གནས་ཚུལ་ཡི་གེར་བསྲིངས་དེར་བརྟག་པས་ན། །གནས་འགྱུའི་བར་ལག་འགྱེལ་བའི་སྒོམ་པ་ཞེས། །བཀའ་བརྒྱུད་གསུང་མཚུངས་དེ་ལྟར་རྒྱུན་སྐྱོང་འཚལ། །ཞེས་པའང་དད་པའི་ངོར་སྤེལ།། ༈ །།སྭསྟི། སྔོན་སྦྱངས་ལས་འཕྲོས་འབྲས་བཟང་དུས་སྨིན་པས། །གྲུབ་རིགས་བསྟན་འཛིན་མཆོག་ཏུ་ལྷུན་གྲུབ་ཅིང་། །ངེས་དོན་གནས་ལ་ཉམས་བཞེས་མཐར་ཕྱིན་པའི། །བཀའ་བརྒྱུད་

[Full Size]

རྣམ་ཐར་སྐྱོང་ཁྱོད་འཚོ་གྱུར་ཅིག །གང་གི་ཟབ་དོན་ཐུགས་དམ་སྐྱོང་ཚུལ་གྱི། །རྟོགས་པའི་འཆར་སྒོ་དེ་ཚུལ་འཁྲུལ་མེད་དུ། །སྣང་བས་གསལ་གདབ་དགོས་པ་དབེན་མོད་ཀྱང། །གནས་འགྱུ་བར་ལག་འགྱེལ་བ་ཉམས་མྱོང་མཐིལ། །རྟོགས་གྲོལ་དུས་མཉམ་རྟོགས་པ་མཐར་ཐུག་བཞེད། །བཀའ་ལས་འབྱུང་བཞིན་མཉམ་བཞག་ནམ་མཁའ་ལྟར། །སྐྱོང་སྐབས་ཡིད་དཔྱོད་མཐའ་དག་རྒྱང་བསྲིང་གནད། །རྗེས་ཐོབ་སྒྱུ་མ་ལྟ་བུའི་བྱང་སེམས་སྦྱོངས། །དེ་ཡང་རིག་རྩལ་ངང་དུ་རོ་གཅིག་པར། །ལྟ་བ་འཁོར་འདས་མཉམ་ཉིད་ཀློང་ཟླའོ། །གྲུབ་ཐོབ་གོང་མའི་དོ་ཧ་ལས། །ཕྱག་རྒྱ་ཆེན་པོ་ཞེས་བྱ་བ། །ཆོས་རྣམས་ཐམས་ཅད་རང་གི་སེམས། །ཕྱི་རོལ་དོན་མཐོང་འཁྲུལ་པའི་བློ། །རྨི་ལམ་བཞིན་ཏེ་ངོ་བོས་སྟོང་། །ཆུ་བོ་རྒྱུན་འབབས་ལྟ་བུར་སྒོམ། །དེ་སྐད་སི་ཏུ་པར་གྲགས་པ། །སྙོམ་ལས་པདྨའི་མིང་ཅན་གྱིས། །སློབ་མའི་ཐུ་བོར་བསྔགས་པ་ཡི། །མཚོ་སྤྲུལ་བཞེད་ངོར་སྤེལ་དགེའོ།། ༈ །།སྭ་སྟི། དུས་གསུམ་གྱི་སངས་རྒྱས་ཀུན་འདུས་པ། །དུས་སྙིགས་མར་ལྷག་པའི་ཐུགས་རྗེ་ཅན། །དུས་རྣམ་ཀུན་མཁྱེན་པ་ཨོ་རྒྱན་རྗེ། །དུས་འདིར་དགོངས་བདག་རྒྱུད་བྱིན་གྱིས་རློབས། །རང་རིག་པའི་ངོ་བོ་ལྷན་སྐྱེས་ཀྱི། །གཞི་གདོད་ནས་གྲུབ་པའི་སེམས་ཉིད་འདི། །འཕྲལ་མ་དག་འཁྲུལ་པ་ཀུན་སངས་ནས། །དོན་བདེ་ཆེན་ཡེ་ཤེས་འཆར་གྱུར་ཅིག །སོ་

[Full Size]

ཐར་དང་བྱང་སེམས་གསང་བ་སྔགས། །དམ་ཚིག་གི་ཉེས་ལྟུང་ཕྲ་རགས་པ། །སྤང་བླང་རྣམས་ཇི་བཞིན་མ་རྟོགས་པའི། །ཉེས་བྱས་ཀུན་བཤགས་སོ་དག་ཚངས་སྩོལ། །ཚེ་མི་རྟག་སྒྱུ་མའི་དཔེ་བསྟན་བཞིན། །ཐེར་ཟུག་གི་ཨ་འཐས་སྙིང་པོས་དབེན། །དུས་ཕྱི་མར་བསམ་པའི་བློ་ལོང་མེད། །རྒྱུད་བསྐུལ་གྱི་ཆོས་ལ་འཇུག་པར་ཤོག །འཁོར་འདས་ཀུན་རང་སེམས་ལས་བྱུང་བ། །འཁོར་བ་ཡི་རྩ་བ་མ་རིག་པ། །བདག་འཛིན་གྱི་ཞེན་པ་རྒྱང་བསྲིང་ནས། །བདག་མེད་ཀྱི་གནད་གསང་མཐོང་གྱུར་ཅིག །སེམས་དུས་གསུམ་རྟོག་པའི་འཕྲོ་བཅད་ལ། །གང་ཤར་གྱི་ངོ་བོར་གཅེར་གྱིས་བལྟ། །གསལ་སྟོང་དང་བདེ་སྟོང་དབྱེར་མེད་པར། །བྱར་མེད་ཀྱི་ངང་དུ་མཉམ་པར་བཞག །དེ་བརྗེད་མེད་སྤྱོད་ལམ་རྣམ་པ་བཞིར། །མ་ཡེངས་ཙམ་དྲན་པའི་རྩིས་ཟིན་བཞིན། །སྒོ་གསུམ་གྱི་དགེ་ལས་མཐའ་དག་འབད། །དུས་ནམ་ཞིག་རང་སེམས་རྗེན་པར་མཐོང་། །གཞི་བདེ་གཤེགས་སྙིང་པོ་ཆོས་ཀྱི་སྐུ། །དོན་འབད་རྩོལ་བྲལ་བ་ཕྱག་རྫོགས་ཀྱི། །བཀའ་ཆིག་དྲིལ་དོན་གྱི་རྩ་བ་སྟེ། །དེ་ཀུན་གྱི་གཞི་རྟེན་བླ་མ་ལ། །མོས་གུས་དང་དག་སྣང་སྦྱོང་བ་གནད། །འཁོར་ཆོས་ལ་ཞེན་ལོག་གཟུང་འཛིན་གྱི། །རྣམ་རྟོག་གི་དྲྭ་བར་མ་འཐུམས་པར། །རྗེ་བཀའ་བརྒྱུད་ཀྱི་རྣམ་ཐར་སྐྱོང་བར་སྨོན། །དེ་སྐད་སྐྱབས་སྒར་བྱང་འདྲེན་པ། །དར་རྒྱས་གང་ནས་ཁོ་བོ་ལ། །བོང་

[Full Size]

བར་གསེར་མཐོང་འདུན་པ་ཡིས། །བསྐུལ་ངོར་གདམས་པའི་ཚུལ་དུ་སྨྲས། །དགེའོ།། ༈ །།གཞི་རྣམ་བར་དག་པའི་ཞིང་ས་ལ། །ལམ་དབང་བཞིའི་ཆུ་རྒྱུན་རྟག་འབེབས་པས། །འབྲས་སྐུ་བཞི་འགྲུབ་པར་བྱིན་གྱིས་རློབས། །ལུས་གཟུང་འཛིན་ཕྲ་རགས་རྩ་ཡི་མདུད། །སྐུ་བདེ་ཆེན་དབུ་མའི་ངོ་བོར་ཁྲོལ། །ངག་སྨྲ་བརྗོད་རྩོལ་བཅས་མིང་དང་ཚིག །གསུང་བརྗོད་མེད་ནཱ་དའི་རང་སྒྲར་བསྒྱུར། །ཡིད་འགྱུ་བ་ཆགས་སྡང་རྟོག་པའི་ཚོགས། །ཐུགས་མི་རྟོག་ཡེ་ཤེས་དབྱིངས་སུ་བསྟིམ། །ཐུགས་རྗེ་ལ་འགགས་པ་མ་མཆིས་ཤིང་། །གདུལ་བྱ་ལ་ཉེ་རིང་མི་མངའ་བས། །རྗེ་ཁྱེད་ཀྱི་གསང་གསུམ་ཡེ་ཤེས་དང་། །མི་བདག་གི་ལུས་ངག་ཡིད་དང་གསུམ། །དབྱེར་མེད་པ་ལྕགས་ལ་གསེར་འགྱུར་བཞིན། །དུས་ད་ལྟ་ཉིད་དུ་བྱིན་གྱིས་རློབས། །དུས་ནམ་ཞིག་འདུས་བྱས་དོར་བའི་ཚེ། །ཤམ་བྷ་ལ་རིགས་ལྡན་ཞིང་མཆོག་དེར། །དུས་སྐད་ཅིག་འཕོ་བར་བྱིན་གྱིས་རློབས། །ཅེས་སི་ཏུ་པདྨའི་མིང་ཅན་གྱིས། རག་ཤུལ་བེ་ཧུའི་དྲུང་ཡིག་དགེ་སློང་སྐལ་བཟང་ནོར་བུའི་ངོར་སྤེལ་བ་དགེ། །།༈ གངས་ཅན་གྲུབ་བའི་གཙུག་རྒྱན་ཐོས་པ་དགའ། །འབྲལ་མེད་སྤྱི་བོའི་གཙུག་དང་སྙིང་གི་དཀྱིལ། །བཞུགས་ནས་ལྷན་སྐྱེས་ཕྱག་རྒྱ་ཆེན་པོ་ཡི། །གཞི་ལམ་འབྲས་གསུམ་རྟོགས་པར་བྱིན་གྱིས་རློབས། །གང་ཁྱོད་སྔོན་སྨོན་བཟང་པོའི་འབྲེལ་བ་ཡིས། །དལ་རྟེན་མཆོག་ཐོབ་རྟོགས་ལྡན་

[Full Size]

བླ་མ་མཇལ། །རྗེས་བཟུང་སྨིན་ཅིང་གྲོལ་བའི་ལམ་ཞུགས་ནས། །སེམས་དོན་ཉམས་ལེན་དེ་ཚུལ་སྐྱོང་བཞིན་པར། །རེ་དོགས་བླང་དོར་བྲལ་ངང་བརྩོན་འགྲུས་དང་། །དད་དམ་སྙིང་རྗེ་སེམས་བསྐྱེད་རྣམ་དག་གིས། །གཞིར་བཟུང་ཆུ་བོ་རྒྱུན་གྱི་རྣལ་འབྱོར་ལ། །འབད་པས་དོན་གཉིས་ལྷུན་གྱིས་འགྲུབ་པར་ངེས། །དད་གསུམ་ལྡན་པ་རྟོགས་ལྡན་རྣམ་དག་བཞེད་ངོར་དགེ། །།༈ གསོལ་འདེབས་ཉམས་དབྱངས་སུ་དྲངས་པའི་སྐོར་བཞུགས། འདིར་སྣང་ཀུན་རྫོབ་སྒྱུ་མའི་འཁྲུལ་འཁོར་ལ། །གནས་ཡུལ་བདག་ཏུ་འཛིན་ནས་ཡང་འཁྲུལ་བའི། །དུག་གསུམ་ཉོན་མོངས་རྩ་བ་རབ་བརྟན་ཅིང་། །མི་དགེའི་རྣམ་རྟོག་འགྱུ་པའི་རྐང་འཐུང་རྒྱས། །བག་མེད་དབང་གྱུར་སྤྱོད་པའི་ལོ་འདབ་ལྡན། །སྒྲིབ་གཉིས་ཡོངས་འདུའི་ལྗོན་པ་བདག་ལྟ་ནི། །སྔོན་ཚེ་བསོད་ནམས་བྱང་ཆུབ་འབྲས་སྨིན་པས། །སངས་རྒྱས་དངོས་སྣང་སངས་རྒྱས་ལུང་ཟིན་པ། །རྒྱལ་དབང་ཀརྨ་པ་དང་ཞྭ་དམར་པ། །ཐུགས་ཀྱི་རྡོ་རྗེ་ཉི་མའི་མཚན་ཅན་དང་། །འཆི་མེད་དཔལ་དར་ལ་སོགས་ཞབས་བསྙེན་པའི། །ཀུན་རྫོབ་མཚན་མ་རྫས་ཀྱི་རྟེན་འབྲེལ་དང་། །དོན་དམ་འགྱུར་མེད་དཀྱིལ་འཁོར་ཆེན་པོ་ཡི། །སྨིན་གྲོལ་ཡེ་ཤེས་བྱིན་རླབས་འཕོ་དབང་ཐོབ། །རྒྱལ་རྣམས་ཐུགས་རྗེའི་འཇུག་པ་རིང་མིན་ཡང་། །རང་རྒྱུད་ལས་ཉོན་ཆུ་ཀླུང་བཟློག་དཀའ་བས། །དེ་སླད་གྲོལ་ལམ་ཚད་དུ་ཕྱིན་མ་ནུས། །

[Full Size]

ལོག་རྟོག་ཁོར་མོ་ཡུག་ཏུ་བསྐྱེད་བསྲིང་ངང་། །མགོན་རྣམས་བདག་སོགས་འགྲོ་རྒྱུད་ལེ་ལོ་ཅན། །བསྐུལ་ཕྱིར་མི་མངོན་དག་པའི་ཞིང་ཁམས་སུ། །སྐུ་གསུམ་ལྷུན་གྲུབ་བདེ་ཆེན་དབྱིངས་ཀྱི་ངང་། །ཐིམ་པའི་སྣང་བ་བསྟན་འདི་ཀྱེ་མ་ཧུད། །འོན་ཀྱང་རང་བྱུང་གདོད་མའི་སེམས་ཉིད་དང་། །དབྱེར་མེད་བླ་མ་གཅིག་འདྲེས་ངེས་ཤེས་ཀྱི། །སྙིང་གི་ཏི་ལར་རྟག་ཏུ་མཆོད་བྱེད་ན། །བདག་སོགས་འཁོར་བའི་དུཿཁ་བསྒྲལ་དུ་གསོལ། །སེམས་ཉིད་ཆོས་སྐུའི་རང་ཞལ་བསྟན་དུ་གསོལ། །གསང་གསུམ་བྱིན་རླབས་འཕོ་བའི་དབང་མཆོག་སྩོལ། །མཆོག་ཐུན་དངོས་གྲུབ་མ་ལུས་སྩལ་དུ་གསོལ། །ཡང་ཡེ་ད་ལྟར་འཚོ་ཞིང་གཞེས་པ་ཡི། །ཚད་ཐུབ་རྒྱལ་བའི་ལུང་གིས་བསྔགས་འོས་པ། །གངས་ཅན་འདིར་ཡང་ཉི་མོའི་སྐར་མ་ཙམ། །ཆོས་བརྒྱད་བསླུ་བྲིད་འདོད་ཡོན་སྲེད་པ་དང་། །སྙན་པ་ལ་སོགས་སྒྲུབ་འདོད་ཚུལ་འཆོས་ཀྱི། །གང་ཟག་ཆེ་དགུ་སྟོབས་འབྱོར་དཔལ་གྲགས་ཅན། །ཡིད་སྲུབས་རྣམས་ཀྱིས་ཕྲིན་ལས་ཕྱོགས་མཐར་སྤེལ། །འབྲེལ་ཚད་ག ོལ་བའི་ལམ་སྟོན་ཆེན་པོ་ཡི། །གོ་ས་འཛིན་པའི་བཤེས་གཉེན་ས་སྟེང་ཁྱབ། །དེ་འདྲའི་བསྐལ་དུས་འཆར་བའི་དུས་འདིར་ནི། །བདག་བློའི་མོས་པས་ཡར་གཞལ་མ་ཡིན་པ། །གྲུབ་པའི་སར་གནས་གྲུབ་པ་རྣམས་ཀྱིས་ནི། །ཨེ་མ་ངོ་མཚར་ཡོན་ཏན་རབ་བརྗོད་ཅིང་། །ངེས་དོན་སྙིང་པོའི་རིང་ལུགས་རྒྱལ་མཚན་གང་། །བསྒྲེང་བར་མངའ་

[Full Size]

གསོལ་རྡོ་རྗེ་ཅན་མཆོག་དེ། །རྡོ་རྗེ་སློབ་དཔོན་དཔལ་ལྡན་འབྲུག་པའི་ཞབས། །འདྲེན་པ་བསེ་རུ་ལྟ་བུ་གང་ལས་སུ། །མིག་སྟོང་ལྡན་པས་དཔྱད་ཀྱང་རྙེད་བྱར་མིན། །དེས་ན་གང་ཁྱོད་བདག་སོགས་བསོད་ནམས་ཀྱི། །ཞིང་མཆོག་འདི་རུ་བསྐལ་པ་བསྐལ་པའི་བར། །གཡོ་མེད་རྟག་པར་བཞུགས་གསོལ་རྡོ་རྗེ་གསུམ། །འཕོ་འགྱུར་བྲི་གང་གདོད་ནས་གཏན་བྲལ་ཡང་། །གཉིས་སྣང་ངོ་འདིར་མི་ཤིགས་དྭངས་མའི་སྐུ། །ཚེ་འོད་མགོན་བཞིན་བཞུགས་པར་གསོལ་འདེབས་ན། །འཇིག་རྟེན་འདིར་སྣང་ཞེན་པ་རྒྱང་བསྲིང་ནས། །བླ་མེད་དེ་ཁོ་ན་ཡི་གནས་ལུགས་དོན། །གཉུག་མའི་ཡེ་ཤེས་རང་བྱུང་རིག་པའི་མདངས། །བྱར་མེད་བློ་འདས་ཆོས་ཀུན་ཡེ་དག་པའི། །ཀུན་ཁྱབ་ཀུན་བྱེད་རྒྱལ་པོ་ཀུན་ཏུ་བཟང་། །མཆོག་གི་གོ་འཕང་དེང་འདིར་ལྷུན་གྲུབ་ཤོག །ཅེས་པའང་མཆོག་རྣམས་ཐུགས་རྗེ་རྗེས་དྲན་གྱི་གསོལ་བ་བཏབ་པའོ།། ༈ །།བཀའ་བརྒྱུད་གྲུབ་ཐོབ་རྒྱ་མཚོའི་ཐུགས་རྗེ་བསྐུལ་དབྱངས་བྱིན་རླབས་སྤྲིན་ཕུང་ཞེས་པ་བཞུགས། ན་མོ་གུ་རུ་པདྨཱ་ཀཱ་ར་ཡ། དཔལ་རིགས་ཀུན་བདག་པོ་བཅོམ་ལྡན་འདས། །མཆོག་ཁ་སྦྱོར་ཡན་ལག་བདུན་ལྡན་སྐུ། །རྡོ་རྗེ་འཆང་དངོས་སུ་སྣང་བ་ཅན། །རྗེ་བདུད་འདུལ་རྡོ་རྗེའི་ཞབས་ལ་འདུད། །རྩོད་ལྡན་གྱི་སྙིགས་མ་ལྔ་བདོ་བའི། །དུས་བསྐལ་པའི་རང་མདངས་ངོམ་པའི་མཐུས། །བསླུ་ཆོས་དང་སྨོན་ལམ་གོལ་བ་ཡི། །ཕྱི་

[Full Size]

ལྟར་སྣང་བཟང་པོའི་ངང་ཚུལ་ཅན། །རྒྱལ་ཁམས་ཀུན་འགེངས་ཤིང་བསྟན་པ་སྤེལ། །ཆོས་གྲུབ་མཐར་ཐ་སྙད་ང་རྒྱལ་རློམ། །རིས་མཐུན་གྱི་ཆེ་དགུས་སྐྱབས་སུ་བསྟེན། །འཕྲལ་བློ་སྣ་ཆོས་ལ་བསྒྱུར་རོ་སྐད། །ཕུག་སྨོན་འབྲེལ་གྱི་ཐར་པའི་ལམ་དོགས་ནས། །ཡང་སྲིད་ཀྱི་གནས་ངན་ཁོར་མོ་ཡུག །ཚུལ་དེ་འདྲའི་གཡང་སར་མ་ལྷུང་བའི། །སྐལ་ལྡན་རྣམས་ལས་ཀྱི་འཕྲོ་ལྡན་སྙམ། །སྔོན་སངས་རྒྱས་གྱི་དྲང་ངེས་ཟབ་མོའི་དོན། །ཚུལ་ཇི་བཞིན་རྟོགས་པའི་གདེང་ཐོབ་པའི། །རྫུ་འཕྲུལ་གྱི་བཀོད་པ་བསམ་ལས་འདས། །བཀའ་བརྒྱུད་པ་ཆེ་བཞི་ཆུང་བརྒྱད་དང་། །ཁྱད་པར་དུ་འཕགས་པ་སྒྲུབ་པའི་བརྒྱུད། །དོན་ངེས་པ་ཀརྨ་ཀཾ་ཚང་གི། ཆོས་བརྒྱུད་པའི་རིང་ལུགས་གྲལ་ཆུད་འདི། །སྔོན་དཀར་པོ་དགེ་བའི་ས་བོན་སྨིན། །ཐོབ་དཀའ་བའི་དལ་འབྱོར་ཕུན་ཚོགས་ལྡན། །མཇལ་དཀའ་བའི་མཚན་ལྡན་རིན་པོ་ཆེ། །མཐིང་དབང་གི་ཅོད་པན་འཆང་ཞབས་བསྙེན། །དཔལ་འཇིག་རྟེན་དབང་དང་འོད་དཔག་མེད། །མཆོག་གཉིས་སུ་མེད་པའི་རང་བཞིན་ནི། །རྒྱལ་ཤཱཀ་ཐུབ་པདྨ་འབྱུང་སོགས་ཀྱིས། །མདོ་སྔགས་རྒྱུད་ཀུན་ཏུ་གསལ་བར་བསྟན། །རྗེ་སངས་རྒྱས་དངོས་སྣང་རང་གཟུགས་ཀྱི། །སྐུ་དཀྱིལ་འཁོར་མཇལ་ཞིང་གསུང་བདུད་རྩི། །ཐུགས་ཡེ་ཤེས་རྡོ་རྗེའི་བྱིན་རླབས་ཐོབ། །སྐལ་ཅན་ལས་སྐལ་བ་ལྡན་པར་བྱས། །གསང་སྔགས་ཀྱི་ཐེག་པའི་ཡང་རྩེ་མཆོག །དཔལ་ནཱ་རོ་མཻ་ཏྲིའི་བཞེད་པའི་གཞུང་། །ཆོས་ཟབ་མོ་

[Full Size]

གངྒཱའི་རྒྱུན་བཟང་པོ། །རྗེ་མངའ་བདག་ལོ་ཙཱ་ཆེན་པོ་དེས། །བློ་གྲོས་ཀྱི་བུམ་པར་གཏམས་པ་ཡི། །ལམ་མཐར་ཐུག་དོན་གྱི་བརྒྱུད་པ་མཆོག །རྗེ་རས་པ་ཆེན་པོ་ནས་བཟུང་སྟེ། །བདུད་འདུལ་བའི་རྡོ་རྗེའི་བར་བྱོན་པའི། །གྲུབ་བརྙེས་ཀྱི་བརྒྱུད་པ་བར་མ་ཆད། །ཆོས་བརྒྱུད་པ་ཉེ་རིང་བསྒྲང་མ་དགོས། །སྐལ་ལྡན་ཀུན་དད་བརྩོན་ཤེས་རབ་ཀྱི། །སེམས་མོས་གུས་ཞེན་ལོག་ངེས་འབྱུང་བློས། །བྱམས་སྙིང་རྗེ་ཚད་མེད་མཁའ་ཁྱབ་ཀྱི། །འགྲོ་བ་ཀུན་རྣམ་གྲོལ་སར་བཀོད་པའི། །དམིགས་མེད་ཀྱི་ངང་དུ་ཉམས་ལེན་སྐྱོངས། །རང་དབང་ལ་རང་གི་ཡོད་དུས་འདིར། །ཆོས་བརྒྱད་ལས་བློ་བསྒྱུར་དབེན་ས་བཟུང་། །དམ་ཚིག་ལ་གཅེས་སྤྲས་འདུ་འཛི་སྤངས། །ཉམས་ལེན་གྱིས་ས་བོན་ཐེབས་གྱུར་ན། །དུས་ནམ་ཞིག་འདུས་བྱས་ཡལ་བའི་ཚེ། །ཆོས་དབྱིངས་ཀྱི་མཁའ་ཁྱབ་ཡངས་པ་རུ། །བདེ་ཆེན་གྱི་ལོངས་སྤྱོད་རྫོགས་སྐུ་ཐོབ། །འགགས་མེད་ཀྱི་སྤྲུལ་བསྒྱུར་སྟོན་ནུས་པ། །བཀའ་ཟབ་མོའི་བྱིན་བརླབས་དྲིན་རེ་ཆེ། །ལས་ཉོན་མོངས་དྲག་པོའི་རླུང་ཤུགས་ཀྱིས། །ཟད་མེད་ཀྱི་རྣམ་གཡེང་ཆུ་རིས་ལྟར། །འཁོར་བ་རུ་ཡང་འཁོར་བདག་འཛིན་དབང་། །ཡིད་བྱེད་ཀྱི་ཆོ་འཕྲུལ་དྭངས་དུས་མེད། །རྗེ་རྒྱལ་བའི་ཐུགས་རྗེ་ཡོལ་མིན་ཀྱང་། །རྟག་འཛིན་གྱི་རྙེད་བཀུར་བདུད་བཞི་ཡི། །ཁྲི་མུན་གྱི་དཔུང་གིས་ནོན་ལགས་ན། །མཆོག་བྱིན་རླབས་འོད་

[Full Size]

སྣང་བསྟན་དུ་གསོལ། །ལུས་ངག་ཡིད་ཉོན་མོངས་དབང་གྱུར་ན། །གཉེན་པོ་རྒྱུད་ཐོག་ཏུ་ཁེལ་བར་བྱིན་གྱིས་རློབས། །རྟེན་འབྲེལ་ཀུན་ལུས་ལ་འགྲིག་པར་བྱིན་གྱིས་རློབས། །ཉམས་རྟོགས་པ་སེམས་ལ་འཆར་བར་བྱིན་གྱིས་རློབས། །འགྲོ་དོན་ཕྱོགས་མེད་དུ་འགྲུབ་པར་བྱིན་གྱིས་རློབས། །ས་ལམ་གྱི་ཡོན་ཏན་འཕེལ་བར་བྱིན་གྱིས་རློབས། །ཚེ་གཅིག་ལ་སངས་རྒྱས་ཐོབ་པར་བྱིན་གྱིས་རློབས། །སྐུ་བཞི་ཡི་རྒྱལ་ས་ཟིན་པར་བྱིན་གྱིས་རློབས། །བསམ་དོན་ཀུན་ལྷུན་གྱིས་འགྲུབ་པར་བྱིན་གྱིས་རློབས། །ཅེས་པའང་སྒྲུབ་སྡེའི་བླ་མ་ཀུན་སྤངས་པ་ཨཱ་ནནྟ་བྷ་དྲས་གསེར་གྱི་མཎྜལ་བཅས་འདི་ལྟར་བསྐུལ་ངོར། སི་ཏུ་པདྨ་ཉིན་བྱེད་དབང་པོས་ས་ཟླའི་དཀར་ཕྱོགས་གང་བའི་དུས་དགེ་བར་སྤེལ། མངྒ་ལཾ། དགེའོ།། ༈ །།གསོལ་འདེབས་ངག་གི་གླིང་བུ་མཆོག་ཐུན་སིདྡྷིའི་གྲུ་ཆར་བཞུགས་སོ། །དུས་གསུམ་རྒྱལ་བ་ཀུན་དངོས། །དྲིན་ཆེན་རྡོ་རྗེ་འཆང་དབང་། །རྗེ་བཙུན་བདུ༵ད་འདུ༵ལ་རྡོ༵་རྗེ༵། །སྙིང་གི་ཐིག་ལེར་རྟག་བཞུགས། །ཀྱེ་མ་སྙིགས་དུས་མུན་པ། །དྲྭ་བས་འབྲེལ་བའི་དུས་འདིར། །ལོག་རྟོག་ཧུ་ལུའི་འགྲོ་རྣམས། །ཉོན་མོངས་ལས་ཀྱི་སེར་བུས། །ཐར་མེད་གཡང་སར་ལྟུང་དུས། །པད་འབྱུང་ཐུགས་རྗེའི་མཁའ་དབྱིངས། །བརྩེ་ཆེན་ཁྱུང་སྔོན་སྐྱེས་ཀྱིས། །དྲངས་པའི་འཇིག་རྟེན་མིག་གཅིག །སྐྱེ་དགུའི་འདྲེན་པ་ཟླ་མེད། །ཐུབ་

[Full Size]

བསྟན་རིན་ཆེན་གསལ་བྱེད། །བདུ༵ད་ཚོགས་འདུ༵ལ་བའི་རྡོ༵་རྗེ༵། །ཉིན་བྱེད་འོད་སྟོང་གསལ་ཞིང་། །དམུ་རྒོད་གདུལ་དཀའི་ས་གཞིར། །རྗེས་འཛིན་ཆུ་ཁུར་ཕྲེང་བ། །ཆོ༵ས་རྒྱལ་གྲུ༵བ་པ་རྒྱ༵་མཚོ༵འི། །སྒྱུ་མའི་གར་གྱི་བརྡ་བསྟན། །ཕྲིན་ལས་བཟང་པོས་མཁའ་ཁྱབ། །ཐར་ལམ་མྱུ་གུ་བསྐྱེད་པའི། །ཆོ༵ས་ཀྱི༵་ཆར་གྱི་སྣ༵ང་བས། །དམ་པའི་བདུད་རྩིས་བསིལ་བྱིན། །ཟབ་ལམ་པདྨོའི་དགའ་ཚལ། །མཆོག་གི་འབྱུང་གནས་དམ་པ། །ཤྲཱི༵་ཙི༵ཏྟ༵་བ༵ཛྲ༵། །རྡོ་རྗེ་ཐེག་པའི་ལོ་འདབ། །ཕྱོགས་བཅུར་སྤྲོ་བའི་དཔ༵ལ་ལྡན། །སྒྲུབ་བརྒྱུད་བསྟན་པ་ད༵ར་རྒྱས། །མཐའ་ཡས་ཡོན་ཏན་རྒྱ་མཚོའི། །དབ༵ང་ཕྱུག་མཆོག་གི༵་རྡོ༵་རྗེ༵། །བསྟ༵ན་འཛི༵ན་རིན་ཆེན་གླིང་དུ། །དགོས་འབྱུང་ཆོ༵ས་ཀྱི༵་ནོར་བུ། །ཉི༵་མ༵འི་འོད་ཟེར་ཇི་བཞིན། །འགྲོ་ཀུན་ཉེར་འཚོའི་གཞིར་གྱུར། །བདག་སོགས་སྲིད་པའི་སེམས་ཅན། །མུ་མེད་རྡུལ་གྱི་གྲངས་འདས། །བྱང་ཆུབ་ལམ་ལ་དཀྲི་བའི། །མགོན་རྣམས་ཐུགས་རྗེ་མ་གཡེལ། །བཅོས་མིན་གདུང་ཤུགས་དྲག་པོས། །སྒོ་གསུམ་རྩེ་གཅིག་ཕྱག་འཚལ། །རབ་འབྱམས་དཔག་པར་དཀའ་བའི། །མཆོད་སྤྲིན་རྒྱ་ཆེན་འབུལ་ལོ། །དུག་ལྔར་གྱུར་པའི་འཁྲུལ་ནོངས། །སྤང་བླང་འགལ་བ་བཤགས་སོ། །བདེར་གཤེགས་མཛད་པ་མཐར་ཕྱིན། །གཞན་ཕན་སྤྱོད་ལ་ཡི་རངས། །ཞིང་གི་འདྲེན་པ་མཆོག་རྣམས། །

[Full Size]

དམ་ཆོས་སྟོན་པར་གསོལ་ལོ། །མྱ་ངན་འདའ་བར་བཞེད་ཀུན། །གྲངས་མེད་བསྐལ་པར་བཞུགས་འཚལ། །བདག་གིས་དུས་གསུམ་བསགས་པའི། །རབ་དཀར་དགེ་ཚོགས་ཇི་སྙེད། །ཐམས་ཅད་བྱང་གྲོལ་ཆེན་པོའི། །རྒྱུ་རུ་བསྔོ་བར་བགྱིའོ། །འཛམ་གླིང་ལྷ་ཡི་ལྷར་གྱུར། །འཕགས་མཆོག་ལོ༵་ཀ༵་ནཱ༵་ཐ༵། །གཉིས་མེད་ཀརྨ་པ་ཡི། །ཕྲིན་ལས་ཆུ་ཤེལ་དབང་པོ། །དྲི་མེད་འོད་དཀར་སྣང་བས། །སྐལ་ལྡན་གདུལ་བྱའི་ཀུ་མུཏ། །ཆེས་ཆེར་སྤྲོ་བར་མཛོད་ཅིག །འོག་མིན་ཞིང་གི་བདག་པོའི། །ཞབས་དྲུང་མྱུར་བར་འཁོད་པའི། །སྟོན་ཀའི་ཟླ་འདྲའི་དཔལ་མངའ། །ཐུགས་རྗེ་བསིལ་བའི་ལྕགས་ཀྱུས། །རྟེན་ཐོག་འདི་རུ་དྲོངས་ཤིག །བདག་དང་འབྲེལ་ཐོགས་སེམས་ཅན། །ཀཾ་ཚང་ངེས་དོན་སྙིང་པོའི། །དམ་པའི་ལམ་སྲོལ་བཟང་པོ། །ཕྱག་རྒྱ་ཆེན་པོ་མཆོག་གི། །གནས་ལུགས་ངོ་བོའི་དོན་རྟོགས། །སྐུ་བཞི་མངོན་དུ་གྱུར་ནས། །རིགས་དྲུག་དོང་ནས་སྤྲུགས་པའི། །འདྲེན་པའི་དཔལ་དུ་གྱུར་ཅིག །ཀྱེ་མ་ལས་ངན་བདག་སོགས། །གཉིས་འཛིན་རེ་དོགས་དབང་གིས། །འདུས་བྱས་ཆུ་ཡི་ལྦུ་བ། །མི་རྟག་ཕ་རོལ་གྱུར་ཚེ། །གཞི་ལམ་འོད་གསལ་འདྲེས་ནས། །ཆོས་སྐུ་མཐའ་བྲལ་སངས་རྒྱས། །བར་དོར་སྒྲ་དང་འོད་ཟེར། །ཞི་དང་ཁྲོ་བོའི་ལྷ་ཚོགས། །འཆར་ཚེ་རང་ངོ་ཟིན་ཅིང་། །གཉིས་མེད་ལོངས་སྐུར་གྱུར་ཅིག །

[Full Size]

སྲིད་པ་བར་དོའི་འདུ་འཕྲོད། །ཆགས་སྡང་རྣམ་པར་ཤར་དུས། །དག་སྣང་ཕྱོགས་མེད་འབྱོངས་ནས། །སྐྱེ་བ་སྤྲུལ་པའི་སྐུ་ཡིས། །འགྲོ་བའི་དོན་ཆེན་སྤྱོད་པའི། །མགོན་ཁྱོད་ཐུགས་རྗེ་མ་གཡེལ། །མཐར་ཐུག་བྱང་ཆུབ་སྙིང་པོ། །དེ་མ་ཐོབ་ཀྱི་བར་དུ། །བདག་ནི་སྐྱེ་ཞིང་སྐྱེ་བར། །དཔ༵ལ་ལྡ༵ན་སྒྲུབ་བརྒྱུད་སྙིང་པོའི། །འགྱུ༵ར་མེ༵ད་བསྟ༵ན་པའི་སྒོར་ཞུགས། །འཛི༵ན་སྐྱོང་ཕྱོ༵གས་ལ༵ས་རྣ༵མ་གྲོ༵ལ། །པ༵དྨ༵་ཉི༵ན་མོར་བྱེ༵ད་བཞིན། ཁམས་དང་དབ༵ང་པོ༵འི་རིམ་པར། །སྡེ་བཞིའི་དགེ་ཚོགས་སྤེལ་ཞིང་། །རྡོ་རྗེ་འཆང་དབང་བླ་མའི། །ཕྲིན་ལས་ཤིང་རྟར་གྱུར་ནས། །ཐུབ་མཆོག་སྟོན་པ་གཉིས་པའི། །རིང་ལུགས་འཛིན་མའི་ཁྱོན་འདིར། །རྣམ་པར་རྒྱལ་བའི་རྒྱལ་མཚན། །མི་ནུབ་སྲིད་རྩེར་བསྒྲེང་བའི། །རབ་རྒྱས་ཕུན་ཚོགས་གྱུར་ཅིག །ཚུལ་འདིར་སྡང་པའི་བློ་ཅན། །ལོག་པར་ཞུགས་པའི་ཉམས་པ། །ཞིང་བཅུ་ཚང་བའི་དུཥྚན། །སྙིང་རྗེའི་སྟོབས་ཀྱིས་བསྒྲལ་ཕྱིར། །བདག་གིས་ཐལ་བར་བརླག་པའི། །དྲག་པོ་ཆེན་པོའི་མཐུ་རྩལ། །རྫུ་འཕྲུལ་ནུས་པའི་གཟི་ཡིས། །རྒྱལ་བསྟན་སྐྱོང་བར་གྱུར་ཅིག །གཞན་ཡང་དྭགས་བརྒྱུད་བསྟན་པར། །བསྙེན་དང་བཀུར་སྟི་སྲི་ཞུར། །བརྩོན་པས་དང་ལེན་ནུས་པའི། །འཁོར་ལོས་སྒྱུར་དང་རྒྱལ་ཕྲན། །མ་ངེས་སོ་སོར་སྟོན་ཅིང་། །མངའ་རིས་དགེ་བཅུའི་ཁྲིམས་ཀྱི། །བདེ་ལེགས་

[Full Size]

དཔལ་འབྱོར་ལྡན་པས། །རྫོགས་ལྡན་ལྟ་བུར་སྤྱོད་ཅིག །མདོར་ན་ཡིད་ལུས་རྟེན་འདི། །ཉམ་ཐག་མགོན་མེད་རྣམས་ཀྱི། །གདུང་སེལ་འདོད་པ་འཇོ་བའི། །ཡིད་བཞིན་རེ་སྐོང་ཤོག་ཅིག །དེ་ལྟར་སྨོན་ལམ་རྒྱ་མཚོ། །བསོད་ནམས་མཐའ་ཡས་ཟབ་མོའི། །དགེ་ལས་བྱུང་བའི་རིན་ཆེན། །དོན་གཉིས་གླིང་དུ་བགྲོད་ཀུན། །དལ་འབྱོར་གྲུ་ུལ་བརྟེན་ནས། །སེམས་བསྐྱེད་སྐྱ་བས་བསྐུལ་ཞིང་། །ཡིད་སྲུབས་ལས་རླུང་ལ་སོགས། །མི་མཐུན་རིགས་ལས་གྲོལ་ཏེ། །ཐེག་མཆོག་མ༵་ཎི་ར༵ཏྣ། །དངོས་གྲུབ་གསེར་གྱི་བུམ་བཟང་། །དཔྱོད་ལྡན་མོས་པའི་དོན་བཞིན། །ཡོངས་སུ་ཐོབ་པར་གྱུར་ཅིག །འདི་ཀོ་སྐལ་བཟང་བུང་བའི། །གདུང་ཤུགས་དྲག་པོའི་གླུ་དབྱངས། །གསོལ་བའི་སྙིང་པོའི་གནས་ན། །ངོ་མཚར་སྤྲུལ་པའི་སྐྱེད་ཚལ། །སྐྱབས་གསུམ་པདྨ་དཀར་པོ། །རྨད་བྱུང་འདབ་སྟོང་རྒྱས་འདྲའི། །ཕུལ་བྱུང་རྩི་བཅུད་རོལ་ཕྱིར། །མཆོག་གསུམ་དམ་པའི་ངོ་བོ། །དྷི༵་པཱཾ༵་མ༵་ཧཱ༵་ས༵་ཏྭ༵། །གུ༵་རུ༵་དྷ༵རྨ༵་ར༵་ཛ༵། །འོག་མིན་ཞིང་གི་བདག་པོ། །ཤྲཱི༵་བ༵ཛྲ༵་དྷ༵་ར༵། །བྱ་སྤྱོད་རྣལ་འབྱོར་བླ་མེད། །རབ་འབྱམས་དཔའ་བོའི་དབང་པོ། །བདེ་བ་མཆོག་གི་འཁོར་ལོ། །ཡུམ་གྱུར་རྡོ་རྗེ་བཙུན་མོ། །ཆོས་དབྱིངས་རྩལ་ལས་གྲུབ་པའི། །ཧེ་རུ་ཀ་དཔལ་ཁྲོ་ཆེན། །གཅིག་བསྡུས་མ་ཧཱ་ཀཱ་ལ། །བེར་ནག་ལྕམ་དྲལ་ལ་སོགས། །ཁྱོད་རྣམས་འདས་དང་ད་ལྟ། །མ་འོངས་དུས་གསུམ་

[Full Size]

གཟིགས་ཤིང་། །གྲག་སྟོང་གསུང་གི་བདེན་ཚིག །རྫུ་འཕྲུལ་ནུས་པའི་མཐུ་ལྡན། །གང་ཞིག་ཇི་ལྟར་གསོལ་བའི། །སྨོན་ལམ་བྱམས་པའི་སྤྲིན་ཕུང་། །ཐུགས་བསྐྱེད་ལྷ་ལམ་ངོགས་ནས། །མཐུན་འགྱུར་དབྱར་གྱིི་རྔ་ཆེན། །མོས་ལྡན་གཙུག་ཕུད་ཅན་གྱི། །དད་པའི་ཟློས་གར་བསྒྱུར་རོ། །ཞེན་ལོག་འཁོར་བའི་འདམ་ནས། །བརྒལ་ཏེ་བདེ་ཆེན་འགྲོད་དོ། །འདི་ལས་བྱུང་བའི་དགེ་ཚོགས། །ས་མུ་དྲ་ཡི་རང་བཞིན། །རྣམ་དག་ཆུ་བོའི་རྒྱུན་བཟང་། །ལུས་ཅན་པད་ཚལ་བསྐྱེད་བསྲིང་། །དྭགས་བརྒྱུད་ནམ་མཁའི་ནོར་བུ། །ངེས་གསང་སྙིང་པོའི་འོད་སྟོང་། །མཐའ་ཀླས་ཞིང་ཁམས་རྒྱ་མཚོར། །ཡོངས་སུ་ཁྱབ་པར་གྱུར་ཅིག །སྭསྟི། རྒྱལ་བསྟན་བསྟན་འཛིན་འཛིན་པའི་ནོར་བུ། །དཔལ་མགོན་མགོན་སྐྱབས་སྐྱབས་གྱུར་དམ་པ། །བཅོམ་ལྡན་ཞི་བ་ཆགས་བྲལ་ཚོགས་མཆོག །མཆོག་གསུམ་ཕྱག་འཚལ་བདེ་ལེགས་ཤོག་ཅིག །ཐུགས་རྗེའི་གཏེར་ཆེན་རིགས་ཀུན་ཁྱབ་བདག་ཀརྨ་ཀ། ཐུགས་རྗེའི་རང་གཟུགས་རྡོ་རྗེ་ཕག་མོ་བདེ་གཤེགས་ཡུམ། །བསྟན་སྲུང་ཐུགས་རྗེའི་མཐུ་ལྡན་བེར་ནག་ལྕམ་དྲལ་ཚོགས། །རྩ་གསུམ་ཐུགས་རྗེ་ཅན་ལ་ཕྱག་འཚལ་བདེ་ལེགས་ཤོག །ཅེས་གཏན་གྱི་འདུན་མའི་རེ་ལྟོས་བསླུ་བ་མེད་པ་གཅིག་ཆོག་ཏུ་ངེས་ཤིང་། དེ་ཡང་ཕྱག་རྒྱ་ཆེན་པོ་མཆོག་གི་གྲུབ་བརྙེས་ཚད་མའི་བརྒྱུད་པ་དང་ལྡན་པའི་བྱིན་རླབས་ཀྱི་ཚན་ཁ་གཞན་ལས་ཁྱད་པར་དུ་འཕགས་པ་སྒྲུབ་བརྒྱུད་ཀརྨ་ཀཾ་ཚང་ཞེས་ཉི་ཟླ་ལྟར་ཡོངས་སུ་གྲགས་པ་ངེས་

[Full Size]

དོན་སྙིང་པོ་དོན་གྱི་བསྟན་པ་རིན་པོ་ཆེ་འཛིན་སྐྱོང་སྤེལ་བའི་དཔལ་མགོན་སེམས་དཔའ་ཆེན་པོ་མཚན་བརྗོད་པར་དཀའ་བ་དཔལ་ཀརྨ་པ་དང་གར་དབང་མི་ཡི་ཟོལ་ཅན་ན་རིམ་འདི་དག །བདག་ཅག་གི་སྟོན་པ་མཉམ་མེད་ཤཱཀྱའི་ཏོག་དང་རྒྱལ་དབང་པདྨ་ཀཱ་ཱར་སོགས་ཀྱི་ལུང་གིས་ཟིན་པའི་རྒྱལ་ཚབ་དམ་པར་བསྔགས་པ་འཇིག་རྟེན་གསུམ་གྱི་འདྲེན་པ་ཆེན་པོ་རྗེ་བཙུན་ཀརྨ་པ་བདུད་འདུལ་རྡོ་རྗེ་གཙོ་བོར་གྱུར་བའི་ཞལ་མཇལ་ཆོས་ཀྱི་བདུད་རྩི་ཐོབ་པ་རྣམས་ཀྱི་དྲུང་དུ་ཡན་ལག་བདུན་པ་སྔོན་དུ་འགྲོ་བའི་སྒོ་གསུམ་མི་ཕྱེད་གདུང་ཤུགས་དྲག་པོས་རྒྱུད་བསྐུལ་ཏེ་རང་བློར་ཇི་ཙམ་དཔག་པའི་སྨོན་ལམ་གྱི་ཚུལ་དུ་སྨྲས་པ་འདིས་མཚོན་དུས་གསུམ་བསགས་པའི་དགེ་བའི་ཕུང་པོ་ཇི་སྙེད་ཀྱ ི་མཐུ་ལ་བརྟེན་ནས། རྒྱལ་བསྟན་རིན་པོ་ཆེ་དར་རྒྱས་དང་། མཁའ་ཁྱབ་ཀྱི་སེམས་ཅན་ཡོངས་ལ་བསྔོ་ཞིང་། ཀུན་ཀྱང་བྱང་ཆེན་མྱུར་ཐོབ་ཀྱི་རྒྱུར་གྱུར་ཅིག །ཅེས་ཕྱོགས་བཅུའི་ཞིང་ཁམས་མུ་མེད་མཐའ་ཡས་པར་བཞུགས་པའི་སངས་རྒྱས་སྲས་དང་བཅས་པ་ཡེ་ཤེས་ཀྱི་སྤྱན་དང་ལྡན་པ། བརྩེ་བའི་ཐུགས་རྗེ། མཛད་བའི་ཕྲིན་ལས། སྐྱོབ་པའི་ནུས་མཐུ་དང་ལྡན་པ་རྣམས་ཀྱིས་ཇི་བཞིན་སྨོན་པ་ཐམས་ཅད་དེ་བཞིན་ཡོངས་སུ་འགྲུབ་པར་བྱིན་གྱིས་བརླབ་ཏུ་གསོལ། དེ་ལྟར་དད་པའི་མོས་བློས་ཀུན་ནས་བསླངས་ཏེ་རང་བཞིན་ཐོ་ལེར་བརྗོད་པའི་སྨོན་ལམ་འདི། མེ་འབྲུག་གནམ་ལོ་རྒྱལ་པོར་སྤྱོད་ཅིང་། དམ་པ་དང་པོའི་རྒྱུད་རྒྱལ་གྱི་དགོངས་པར་དཔྱིད་ཟླ་འབྲིང་པོ་སྒྲོལ་བྱེད་ཕཱལྐུ་ནཿཉ་པའི་ཚེས་བརྒྱད་གཟའ་ཡི་དབང་ཕྱུག་རཽ་ཧི་ཎི་ཡཿམདུན་དུ་བཙུན་མོ་མྲྀ་ག་ཤཱིཪྵཾ་དགའ་བཞེད་རྩེད་འཇོས་བྲེལ་བའི་དཀར་ཕྱོགས་བཟང་པོར་མདོ་ཁམས་འབྲི་ཀླུང་གསེར་ལྡན་ཀྱི་ཆར་གཏོགས་པའི་

[Full Size]

བྱང་ཨ་ཏ་རོང་དང་རྗེས་སུ་འབྲེལ་བའི་ས་སྤྱོད་དཔལ་སྤུངས་དཔལ་གྱི་གནས་མཆོག་གི་གཙུག་ལག་ཁང་ཐུབ་བསྟན་ཆོས་འཁོར་གླིང་ཞེས་པའི་བསླབ་ལྡན་ངུར་སྨྲིག་འཛིན་པའི་འདུས་པ་རྒྱ་མཚོའི་དབུས་ནས་སྐལ་ལྡན་དད་པའི་བློ་ཅན་པདྨ་ཉིན་བྱེད་དབང་པོས་གསོལ་བ་བཏབ་པ་འབྲས་སྨིན་ལྷུན་གྲུབ་ཏུ་གྱུར་ཅིག །ཨསྨརྟུ་ཛ་ཏི་སརྦཱ་ཤུདྡྷཾ་བཱ་ཙཱ་པ་རཾ་པ་རཱ་བཻ་ས་མྱ། ཀརྨཱ་ཀ་ཤཻཥྚ་བཻ་ག་ཧྱ་ཛ་ཊ་ཏུ་མཎྜི་ཧི་བྷ་ཝནྟུ་ཤྲཱི་མན། ཤྲཱི་ཛྭ་ལ་ཛམྦུ་དཱི་བ་མངྒ་ལ་བྷ་ཝནྟུ། སརྦ་མངྒ་ལཾ།། ༈ །།དཔལ་དུས་གསུམ་རྒྱལ་བ་ཀུན་འདུས་པ། །མགོན་སྙིགས་མའི་སྐྱབས་མགོན་ཆོས་ཀྱི་རྗེ། །བདུད་འདུལ་བའི་རྡོ་རྗེ་འཆང་བ་པོ། །ཁྱེད་མི་མངོན་དག་པའི་དབྱིངས་ནས་དགོངས། །བདག་མོས་པའི་བུ་ལ་རྗེས་བརྩེ་བའི། །ཐུགས་ཆོས་དབྱིངས་མི་ཟད་རོལ་པ་ལས། །དེང་མཆོག་དང་ཐུན་མོང་དངོས་གྲུབ་ཆར། །རྒྱུད་བྱིན་གྱིས་བརླབ་པར་མཛད་དུ་གསོལ། །བསྡུ་ན་དེ་ཙམ་དང་སྤྲོ་ན། སྙིགས་མ་ལས་སྙིགས་མའི་བསྐལ་པ་འདིར། །བདག་དྲེད་པོ་ཆོས་མེད་རྒྱུད་མི་འཆོས། །བཟང་བརྫུས་ཀྱི་མགོ་བསྐོར་རྣམ་གཡེང་ཅན། །ཐུགས་རྗེ་ཡིས་གཟིགས་པའི་མཐུ་མ་ཆུང་། །དཔལ་བཀའ་བརྒྱུད་གོང་མའི་གཤེགས་པའི་ཤུལ། །གནས་གཙུག་ལག་དང་དགེ་འདུན་སྡེ་ཚོགས་ཀྱི། །བསྟི་གནས་མཆོག་ས་སྤྱོད་ཀརྨ་ཡི། །སྙིང་པོ་ཡི་བསྟན་དང་བསྟན་འཛིན་ཀུན། །ཞབས་བརྟན་ཅིང་ཕྲིན་ལས་རྒྱས་པ་དང་། །བདག་དང་ནི་བདག་འདྲའི་གདུལ་བྱ་ཀུན། །ཚེ་འདིར་སྣང་

[Full Size]

བསོད་ནམས་དཔལ་རྒྱས་ཤིང་། །ཆོས་སྒྲུབ་ལ་ཕྱོགས་པའི་འདུན་པ་རྣམས། །གེགས་མེད་པར་འགྲུབ་པར་བྱིན་གྱིས་རློབས། །སྐྱེ་མེད་ཀྱི་ཆོས་སྐུའི་རང་རྩལ་ལས། །འགག་མེད་ཀྱི་ལོངས་སྐུའི་སྒྱུ་འཕྲུལ་ཤར། །གནས་མེད་ཀྱི་སྤྲུལ་སྐུ་མཆོག་ཐོབ་ནས། །སྐུ་གསུམ་གྱི་གོ་འཕང་ཡོངས་ཐོབ་ཤོག །མགོན་ཐུགས་རྗེ་ཆེན་པོའི་སྟོབས་ཟབ་མོ། །རྒྱལ་གཞན་ལས་ལྷག་པའི་སེམས་དཔའ་ཡི། །སྙིང་རྗེ་དང་བརྩེ་བའི་བདག་ཉིད་ཅན། །འགྲོ་དྲུག་ལ་བུ་གཅིག་མ་ཡི་ཚུལ། །སྐྱབས་སྐྱོབ་པ་མ་གཡེལ་ལྷ་ཡི་ལྷ། །རྗེ་མ་འོངས་བསྐལ་བཟང་དྲུག་པ་མཆོག །སེང་གེ་སྒྲ་ཞེས་བྱར་འཚང་རྒྱ་བའི། །དེང་གཏན་དུ་འབྲལ་མེད་ཚེ་རབས་ཀུན། །མགོན་ཐུགས་རྗེས་གཟིགས་ཤིག་ཀརྨ་ཀ། བདུད་འདུལ་བའི་རྡོ་རྗེ་དུས་འདིར་དྲན། །ཅེས་པ་འདི་ཀརྨ་དགོན་གྱི་བླ་མ་སྤྲུལ་སྐུ་བའི་བཞེད་ངོར་སྤེལ། སརྦ་མངྒ་ལཾ།། །།

སྨིན་དབང་ཟབ་མོའི་མཚམས་སྦྱོར་རིགས་རྣམས་ཕྱོགས་གཅིག་ཏུ་བསྡེབས་པ་ངོ་མཚར་བདུད་རྩིའི་གཏེར་མཛོད།

རཏྣ་གླིང་པའི་གཏེར་བྱོན་ཐུགས་རྗེ་ཆེན་པོ་གསང་འདུས་དབང་གི་བཤད་པ་སྐལ་ལྡན་ཡིད་ཀྱི་གདུང་སེལ་རྣ་བའི་བདུད་རྩི།

[Full Size]

སྨིན་དབང་ཟབ་མོའི་མཚམས་སྦྱོར་རིགས་རྣམས་ཕྱོགས་གཅིག་ཏུ་བསྡེབས་པ་ངོ་མཚར་བདུད་རྩིའི་གཏེར་མཛོད་ཅེས་བྱ་བ་བཞུགས་སོ། །

[Full Size]

རཏྣ་གླིང་པའི་གཏེར་བྱོན་ཐུགས་རྗེ་ཆེན་པོ་གསང་འདུས་དབང་གི་བཤད་པ་སྐལ་ལྡན་ཡིད་ཀྱི་གདུང་སེལ་རྣ་བའི་བདུད་རྩི་བཞུགས་སོ། །འདིའི་གཤམ་དུ་ཕན་ཡོན་བརྗོད་པ་ཡང་ཡོད། ནམ་མཁའ་དང་མཉམ་པའི་མ་གྱུར་འགྲོ་བ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་བདེ་བླག་ཏུ་ཐོབ་པར་བྱ་སྙམ་པའི་བྱང་ཆུབ་མཆོག་ཏུ་ཐུགས་བསྐྱེད་ལེགས་པར་གསལ་བཏབ་ནས་གསན་པར་མཛད་འཚལ། དེ་ལ་འདིར་བཅོམ་ལྡན་འདས་འགྲོ་འདུལ་ཐུགས་རྗེ་ཆེན་པོ་གསང་བ་འདུས་པའི་སྒོ་ནས་གདུལ་བྱ་སྐལ་བ་དང་ལྡན་པ་རྣམས་ཡང་དག་པའི་ལམ་ལ་དཀྲི་བའི་ཐབས་ཚུལ་དུ་མ་ལས་སྐབས་སུ་བབ་པ་སྒྲུབ་ཆེན་དང་འབྲེལ་བའི་སྐྱེ་བདུན་མྱོང་གྲོལ་རིལ་བུ་སྒྲུབ་པ་ལ་བརྟེན་ནས་སྨིན་བྱེད་ཀྱི་དབང་བསྐུར་ཟབ་མོ་བགྱིད་པ་ཡིན་ཅིང་། ཐོག་མར་ཡིད་ཆེས་དང་བ་འདྲེན་པའི་ཕྱིར་དུ་ལོ་རྒྱུས་ཟུར་ཙམ་སྨོས་ན།

[Full Size]

དེ་ཡང་འཕགས་པ་སྤྱན་རས་གཟིགས་འཇིག་རྟེན་དབང་ཕྱུག་ནི་དུས་གསུམ་གྱི་རྒྱལ་བ་མ་ལུས་པ་ཐམས་ཅད་ཀྱི་ཐུགས་རྗེ་གཅིག་ཏུ་འདུས་པའི་རང་གཟུགས་རྒྱ་མཚོ་ཆེན་པོ་ལྟ་བུ་སྟེ། ཆོས་ཀྱི་སྐུ་འཁོར་འདས་ཐམས་ཅད་ལ་ཡེ་གདོད་མ་ནས་ཁྱབ་པའི་རང་བཞིན་དུ་ངེས་ཤིང་། དེས་ན་ཀུན་ཁྱབ་དང་པོའི་སངས་རྒྱས་འོད་མི་འགྱུར་བ་ཞེས་བྱ་བ་བདེ་བར་གཤེགས་པ་རྣམས་ཀྱི་དབྱིངས་དང་ཡེ་ཤེས་རོ་གཅིག་པའི་ངང་དུ་ལྷུན་གྱིས་གྲུབ་པར་གནས་སོ། །རྒྱུད་ཆེན་ལས། ཕྱོགས་བཅུ་དུས་གསུམ་སངས་རྒྱས་རྣམས། །ཐུགས་རྗེ་ཆེན་པོར་མ་གྱུར་མེད། །དེ་ཉིད་སྐུ་གསུང་ཐུགས་བཅས་པ། །གསང་འདུས་རྒྱུད་འདིར་མ་འདུས་མེད། །ཅེས་གསུངས་པ་དང་། མདོ་སྡེ་ཟ་མ་ཏོག་ལས། ནམ་མཁའ་ནི་ཀུན་ཏུ་ཁྱབ་པ་

[Full Size]

ཐུགས་རྗེ་ཆེན་པོའི་ཞལ་དང་། རླུང་གི་འགྲོ་འོང་ནི་གྲག་སྟོང་གསུང་གི་རང་བཞིན། ཉི་མ་དང་ཟླ་བ་རབ་ཏུ་གསལ་བ་ཡེ་ཤེས་སྤྱན་གྱི་རྣམ་པ་སྟེ་ཞེས་གསུངས་པ་དེ་ལ་སོགས་པ་བརྡ་དང་བརྡའི་སྒོ་ནས་གཅིག་དང་དུ་མའི་རྣམ་པར་རོལ་པ་འགྲོ་བའི་དོན་དུ་བསྟན་པ་དང་། རྒྱལ་བ་རྣམས་ཀྱི་གསང་གསུམ་མི་ཟད་རྒྱན་གྱི་འཁོར་ལོར་སྒྱུར་བའི་ལོངས་སྤྱོད་ཡོངས་སུ་རྫོགས་པའི་སྐུའི་བཀོད་པའི་དབང་དུ་བྱས་ན། དེ་ཡང་འོག་མིན་སྟུག་པོ་བཀོད་པ་ཞེས་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ཁམས་རྒྱ་ཁྱོན་ཚད་ལས་འདས་པ་བཀོད་པ་དང་ཡོན་ཏན་ཕུན་སུམ་ཚོགས་པའི་ཞིང་དེའི་སྟོན་པ་རྣམ་པར་སྣང་མཛད་སྤྱན་རས་གཟིགས་གངས་ཅན་མཚོ་ཞེས་བྱ་བ། གནས་ངེས་པ་འོག་མིན་གྱི་ཞིང་དེར། འཁོར་ངེས་པ་ས་བཅུའི་བྱང་ཆུབ་སེམས་དཔས་བསྐོར་ཞིང་། དུས་ངེས་པ་འཁོར་བ་ཇི་སྲིད་ཀྱི་བར་དུ། ཆོས་ངེས་པ་ཐེག་ཆེན་གསང་སྔགས་འབའ་ཞིག་འཆད་པ། གཙོ་མཆོག་ངེས་པ་ལོངས་སྤྱོད་རྫོགས་པའི་སྐུ་སྟེ། དེའི་བ་སྤུའི་ཁུང་བུ་རེ་རེར་ཡང་འཇིག་རྟེན་གྱི་ཁམས་དཔག་ཏུ་མེད་པ་སྤྲུལ་པའི་ཐུགས་རྗེ་ཆེན་པོའི་རང་གཟུགས་ཀྱིས་འགྲོ་བའི་དོན་མཐའ་ཡས་པར་མཛད་པ་དང་། ཕྱག་གི་ལྷུང་བཟེད་ཀྱི་ནང་སྤོས་ཆུའི་རྒྱ་མཚོ་ཆེན་པོའི་དབུས་སུ་མེ་ཏོག་པདྨ་ཉི་ཤུ་རྩ་ལྔ་བརྩེགས་མར་སྐྱེས་པའི་ཟེའུ་འབྲུ་རེ་རེའི་ནང་ནའང་། འཇིག་རྟེན་གྱི་ཁམས་དཔག་ཏུ་མེད་

[Full Size]

པར་སྤྲུལ་པའི། མེ་ཏོག་བཅུ་གསུམ་པའི་ཟེའུ་འབྲུ་དབུས་མ་གཅིག་གི་ནང་དུ་སྟོང་གསུམ་མི་མཇེད་འཇིག་རྟེན་གྱི་ཁམས་འདི་ཆགས་ཤིང་། དེ་ཡང་ཐུགས་ཀའི་ཐད་དུ་གནས་པའི་རྟེན་འབྲེལ་གྱིས་འཇིག་རྟེན་གྱི་ཁམས་འདིར་དགེ་སྡིག་གང་བྱས་སྟོབས་དང་འགྱུར་གཞན་ལས་ཆེ་བར་གསུངས་པའི་བསོད་ནམས་མཆོག་གི་འདུ་བྱས་པ་ཐར་པའི་ལམ་སྟེགས་ཀྱི་གཞི་ཁོ་ནར་གྲུབ་པ་དང་། ངེས་པའི་དོན་དུ་ཐོག་མའི་མགོན་པོ་ཀུན་བཟང་དང་པོའི་སངས་རྒྱས་ཀྱི་རང་བཞིན་དང་། དྲང་བའི་དོན་དུ་འགྲོ་བའི་དོན་ལ་སླར་ཡང་བྱང་ཆུབ་ཏུ་སེམས་བསྐྱེད་པའི་ཚུལ་དང་། ལམ་ལ་སློབ་པ་སོགས་སྣང་ཚུལ་དུ་མར་བསྟན་པ་དང་། མ་འོངས་པར་སངས་རྒྱས་འོད་ཟེར་དཔལ་བརྩེགས་ཀྱི་རྒྱལ་པོར་མངོན་པར་འཚང་རྒྱ་བ་སོགས་དུས་གསུམ་དང་དུས་མེད་ཀྱི་སེམས་ཅན་རྣམས་འདུལ་བའི་ཆེད་དུ། དེ་ལྟ་བུའི་མཐུ་སྟོབས་དང་རྫུ་འཕྲུལ་སྣ་ཚོགས་པར་དབང་བསྒྱུར་བའི་འཕགས་ཆེན་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་སྤྱད་ཅིང་། སྟོང་ཉིད་ཤེས་རབ་བདེ་བ་ཆེན་པོའི་རང་བཞིན་ཆོས་ཐམས་ཅད་ཀྱི་ཕ་རོལ་ཏུ་ཕྱིན་མ། དུས་གསུམ་གྱི་རྒྱལ་བ་རྣམས་བསྐྱེད་པའི་གཞི་གསང་བ་ཡེ་ཤེས་དང་དབྱེར་མེད་ཟུང་དུ་འཇུག་པའི་རང་རྩལ་སྣང་བའི་རྣམ་པར་རོལ་པ་སྲས་ནོར་བུ་འཛིན་པ་དང་སྲས་མོ་གསང་སྔགས་འཛིན་མ། དེ་ལས་མ་གཡོས་པར་རྒྱལ་བ་རིགས་ཀྱི་ཡབ་ལྔ་དང་། ཡུམ་ལྔ། སེམས་དཔའ་

[Full Size]

ཡབ་ཡུམ་བཅུ་དྲུག །བསྐལ་བཟང་ཞིང་གི་འདྲེན་པ་སངས་རྒྱས་སྟོང་དང་རྩ་གཉིས། འགྲོ་འདུལ་སྤྲུལ་སྐུ་ཐུབ་དྲུག །སྒོ་སྐྱོང་ཁྲོ་རྒྱལ་ཡབ་ཡུམ་སོགས་མདོར་ན་ཞི་བ་དང་ཁྲོ་བོའི་དཀྱིལ་འཁོར་གྱི་འཁོར་ལོ་རབ་འབྱམས་མཐའ་ཡས་པ་བསམ་མི་ཁྱབ་པའི་རང་བཞིན་ཅན་རྣམས་ཀྱང་འདི་ཉིད་ཀྱི་རོལ་གར་ལས་མ་འདས་ཤིང་། འོ་སྐོལ་གྱི་སྟོན་པ་མཉམ་མེད་ཤཱཀྱའི་རྒྱལ་པོས་བསྟན་པའི་དམ་ཆོས་པདྨ་དཀར་པོ་དང་། སྣང་བ་རོལ་པ། ཟ་མ་ཏོག་ཆེ་ཆུང་ལ་སོགས་མདོ་སྡེ་མང་པོ་དང་། བྱ་རྒྱུད་པདྨ་དྲྭ་བ་དང་དོན་ཡོད་ཞགས་པ་སོགས་དང་། སྤྱོད་རྒྱུད་ལ་སྙིང་རྗེ་ཆེན་པོ་རང་བཞིན་རྒྱུད་སོགས་དང་། རྣལ་འབྱོར་རྒྱུད་ལ་པདྨ་ཅོད་པན་གྱི་སྐོར་རྣམས་དང་། བླ་མེད་ལ་པདྨ་རྒྱལ་པོའི་རྒྱུད་ལ་སོགས་པ་སྤྱན་རས་གཟིགས་ཀྱི་སྒོས་རྒྱུད་དཔག་ཏུ་མེད་པ་རྣམས་རྒྱ་གར་གྱི་ཡུལ་ལྗོངས་ཐ་གྲུར་སྤེལ་ཞིང་ཐུགས་རྗེ་ཆེན་པོའི་འོད་ཟེར་གྱིས་ཁྱབ་པར་མཛད་ཅིང་། བོད་ཡུལ་འདིར་ཇི་ལྟར་དར་བའི་ཚུལ་ནི་བཅོམ་ལྡན་འདས་ཀྱིས་མཛད་པ་ཐ་མའི་ཚུལ་བསྟན་པའི་ཚེ། སྤྱན་རས་གཟིགས་ཀྱིས་བོད་ཁ་བ་ཅན་དུ་ཆོས་ཀྱི་འཁོར་ལོ་བསྐོར་བར་གསོལ་བ་ན། འཕགས་པ་ཁྱོད་ཀྱི་གདུལ་བའི་ཞིང་ཁོ་ནར་ངེས་པས་དེ་ལྟར་ཡིད་དམ་འཆའ་བར་གྱིས་ཤིག་ཅེས་གསུངས་པས། འཕགས་པ་ཉིད་ཀྱི་པོ་ཊ་ལའི་རི་བོ་ནས་བྱང་ཕྱོགས་ཁ་བ་ཅན་གྱི་ལྗོངས་སུ་དགོངས་པ་གཏད་ཙམ་ན། ས་འོག་ཏུ་གྲང་

[Full Size]

དམྱལ་མི་བཟད་པའི་སྡུག་བསྔལ་གྱི་ཚོར་བས་ཉེན་པ་དཔག་ཏུ་མེད་པ་རྣམས་སྙིང་རྗེའི་ལྕགས་ཀྱུས་ཉེ་བར་དྲངས་ནས་ཐར་པའི་ལམ་ལ་བཀོད། དེ་ནས་འཕགས་པ་མཆོག་དང་། རྗེ་བཙུན་སྒྲོལ་མས་སྤྲུལ་སྒྱུར་གྱི་སྒོ་ནས་ཆོས་ཀྱི་སྣོད་དང་རྟེན་དུ་རུང་བའི་ཕྱིར་ཐབས་མཁས་ཐུགས་རྗེའི་འཕྲུལ་ཀྱིས་བྷོ་ཊ་ཞེས་པའི་རྐང་གཉིས་པ་རྣམས་སྤེལ་ཞིང་། བྱང་ཆུབ་སེམས་དཔའ་ནམ་མཁའི་སྙིང་པོའི་རྣམ་འཕྲུལ་རྒྱལ་པོའི་ཐོག་མ་གཉའ་ཁྲི་བཙན་པོ་འཁྲུངས་པ་དེས་རྒྱལ་ཁྲིམས་ལ་བརྟེན་ནས་མི་ཆོས་ཀྱི་སྲོལ་ཚུགས། དེ་ནས་བྱང་སེམས་ཀུན་ཏུ་བཟང་པོའི་སྤྲུལ་པ་ཐོ་ཐོ་རི་སྙན་ཤལ་གྱི་སྐབས། ཕོ་བྲང་གི་ཡང་རྩེར་མདོ་ཟ་མ་ཏོག །དཔང་ཀོང་ཕྱག་རྒྱ་པ། ཤེལ་གྱི་མཆོད་རྟེན་རྣམས་ནམ་མཁའ་ནས་བབས་ཏེ་དམ་པ་ཆོས་ཀྱི་དབུ་བརྙེས། དེ་ནས་སྤྱན་རས་གཟིགས་དངོས་སྲོང་བཙན་སྒམ་པོ་ཞེས་གྲགས་པ་དབུ་གཙུག་ཏུ་རིགས་བདག་སྣང་མཐའ་འདུ་འབྲལ་མེད་པར་བཞུགས་པ་དེས་ཆོས་འཁོར་ལྷ་སའི་གཙུག་ལག་ཁང་སོགས་བཞེངས་པ་དང་ཇོ་ཤཱཀ་རྣམ་གཉིས་སྤྱན་དྲངས། གཞན་ཡང་སེམས་ཅན་རྣམས་གསུང་ཡི་གེ་དྲུག་པའི་སྒོ་ནས་འགྲོ་དོན་ཕྲིན་ལས་རྒྱ་ཆེར་སྤེལ་བ་སོགས་ལྷ་ཆོས་ཀྱི་སྲོལ་གཏོད། དེ་ནས་འཇམ་དཔལ་སྤྲུལ་པ་ཆོས་རྒྱལ་ཁྲི་སྲོང་ལྡེའུ་བཙན་གྱིས་ཐུགས་བསྐྱེད་རྨད་དུ་བྱུང་བའི་སྒོ་ནས། སངས་རྒྱས་གཉིས་པ་ཨོ་རྒྱན་རིན་པོ་ཆེ་པདྨ་འབྱུང་གནས། ཟ་ཧོར་གྱི་མཁན་

[Full Size]

པོ་བོ་དྷི་སཏྭ། བི་མ་ལ་མི་ཏྲ། གཞན་ཡང་རྒྱ་གར་གྱི་པཎ་གྲུབ་མང་པོ་སྤྱན་དྲངས། བོད་ཡུལ་གྱི་ལྷ་སྲིན་མི་བསྲུན་པ་རྣམས་བཏུལ་ཞིང་དམ་ལ་བཞག་ནས་བཀའི་སྲུང་མར་བསྐོས་པ་དང། ཟན་ཡང་དཔལ་གྱི་བསམ་ཡས་གཙོས་གཙུག་ལག་ཁང་ཆེན་པོ་བརྒྱ་དང་རྩ་བརྒྱད། ཕྲན་བུ་སྟོང་དང་རྩ་གཉིས་བཞེངས་པར་མཛད། ལོ་ཙཱ་བ་བཻ་རོ་ཙ་ན། ཀ་ཅོག་རྣམ་གཉིས། ལྡན་མ་རྩེ་མང་སོགས་སྐད་གཉིས་སྨྲ་བ་རྣམས་ཀྱིས་མདོ་སྔགས་ཀྱི་ཆོས་ཚུལ་དུ་མ་བསྒྱུར་ཞིང་གཏན་ལ་ཕབ། ཁྱད་པར་གསང་བ་འདུས་པའི་རྒྱུད་མཁའ་འགྲོའི་བརྡའ་ཡིག་ལས་ཨོ་རྒྱན་ཆེན་པོས་སྒྲ་རང་འགྱུར་གནང་། བཀའི་བསྡུ་བ་པོ་ཡེ་ཤེས་མཚོ་རྒྱལ་དང་། རྒྱལ་བ་མཆོག་དབྱངས། ལང་གྲོ་ལོ་ཙཱ་བ་གསུམ་གྱིས་ཤོག་སེར་ལ་དག་པར་བཀོད། ཨཪྱ་པཱ་ལོའི་གླིང་དང་། ལྷོ་བྲག་གནམ་སྐས་ཅན་རྣམས་སུ་གསང་བ་འདུས་པའི་དཀྱིལ་འཁོར་ཆེན་པོ་ཞལ་ཕྱེས་ནས་ལས་ཅན་རྣམས་རྒྱུད་སྨིན་པར་བཛད་དེ། སྨོན་ལམ་ཟབ་མོས་མཚམས་སྦྱར་ཏེ། བཀའི་སྲུང་མ་རྣམས་ལ་གཉེར་དུ་གཏད་ཅིང་བསེ་ཡི་སྒྲོམ་བུར་བཅུག་ནས་ཟབ་གཏེར་དུ་སྦས་པ་སྟེ། ཐེམ་བྱང་ལས། ཐུགས་རྗེ་ཆེན་པོ་གསང་འདུས་ཞི་ཁྲོའི་སྐོར༔ མོན་མཁར་སྟེང་དུ་མཁའ་རིས་གདན་དྲངས་ཚེ༔ མཚོ་རྒྱལ་བདག་དང་བཙུན་པ་མཆོག་དབྱངས་དང་༔ ཤེལ་དཀར་བཟའ་དང་ལང་གྲོ་ལོ་ཙཱ་ཱདང་༔ ཨ་ཙར་ཡེ་ཤེས་རྣམས་ཀྱིས་ཡི་གེར་

[Full Size]

བྲིས༔ གནམ་སྐས་བྲག་ལ་གཏེར་ཁ་གསུམ་སྦས་ཏེ༔ ཞེས་དང་། ཁྱད་པར་སྔོན་འཕགས་མཆོག་སྤྱན་རས་གཟིགས་ཀྱིས་འགྲོ་བའི་དོན་དུ་ཐབས་ལ་མ་རྨོངས་པའི་ཚུལ་དུ་མའི་སྤྲུལ་སྒྱུར་གྱིས་བྲམ་ཟེའི་རིགས་དང་། གཞན་ཡང་གང་ཟག་མཆོག་གི་སྐྱེ་བ་བདུན་བརྩེགས་ཅན་ཁོ་ནར་བཞེས་པའི་སྐུ་ཤ་རྣམས་དང་། རྩ་བརྒྱད་སྟོང་སྦྱར་གྱི་བདུད་རྩི་ཆོས་སྨན་དམ་རྫས་ལ་སོགས་པ་གཏེར་གནས་གཞན་རྣམས་ལའང་རིམ་པར་སྦས་ཤིང་། གཏེར་ཁ་འདིར་ཡང་ཤོག་སེར་དང་སྐྱེ་བདུན་དམ་རྫས་སོགས་རྒྱ་རིམ་པ་བདུན་གྱིས་བཏབ་ནས། དགེ་བསྙེན་སྐུ་ལྷ་མཁའ་རི་དང་༔ ཀླུ་བདུད་ནག་པོ་མགོ་དགུ་དང་༔ མ་མོ་སྔགས་ཀྱི་སྲུང་མ་དང་༔ དམ་ཅན་རྡོ་རྗེ་ལེགས་པ་ལ༔ བཀའ་འདི་གཏད་དོ་ས་མ་ཡཿམ་འོངས་དུས་ཀྱི་ཐ་མ་ལ༔ ལས་ཅན་ཐུགས་རྗེ་ཆེན་པོ་ཡི༔ སྐལ་ལྡན་གཅིག་དང་འཕྲད་པར་ཤོག༔ ཅེས་སྨོན་ལམ་མཛད་པ་བཞིན་ཕྱིས་དུས་ལ་བབ་པ་ན་ལང་གྲོ་ལོ་ཙཱའི་སྐྱེ་བ་འགྲོ་འདུལ་གླིང་པའམ། ཞིག་པོ་གླིང་པའམ། རཏྣ་གླིང་པ་ཞེས་ཡོངས་སུ་གྲགས་པ་དེ་ལྟར་གླིང་པ་གསུམ་གྱི་མཚན་དང་ལྡན་པ། གཏེར་ཆེན་ཆོས་ཀྱི་རྒྱལ་པོ་རིག་འཛིན་གྲུབ་པའི་དབང་ཕྱུག་དེ་ཉིད་ཀྱིས་ཟབ་གཏེར་ཞལ་ཕྱེ་བའི་སྐབས། གཏེར་སྲུང་དགེ་བསྙེན་མཁའ་རི་ལྕམ་དྲལ་ཡང་ཁྲོམ་ཚོགས་རྣམས་ཀྱིས་དངོས་སུ་མཐོང་བར་གཏེར་སྒོ་བསྟན་པ་དང་།

[Full Size]

མེ་ཏོག་གི་ཆར་འབབས་ཤིང་། དྲི་བཟང་གི་ངད་ལྡང་བ། དབང་པོའི་གཞུ་ལྟ་བུ་ཁ་དོག་ལྔ་ལྡན་གྱི་འཇའི་གུར་ཁང་དང་། དར་ཡུགས་བརྐྱང་པ་ལྟ་བུ་སོགས་ཡ་མཚན་རྨད་དུ་བྱུང་བའི་ལྟས་དུ་མ་བཅས་ཤོག་སེར་དང་དམ་རྫས་སོགས་སྤྱན་དྲངས་ཤིང་། སྤྱིར་ཨོ་རྒྱན་ཆེན་པོས་གཏེར་ཁ་གཞན་རྣམས་ཀྱི་ཆོས་བདག་གི་གཙོ་བོ་ཡང་རྒྱལ་དབང་ཀརྨ་པ་ན་རིམ་ལུང་གིས་ཟིན་བཞིན་དང་། སྒོས་སུ་ཆོས་འདིའི་བཀའ་བབས་ཀྱི་མངའ་བདག་རྗེ་བདུན་པ་ཆོས་གྲགས་རྒྱ་མཚོ་ལ་གཏེར་བྱོན་གྱི་ཟབ་ཆོས་ཚང་མ་དང་། དམ་རྫས་ཨ་མ་སོགས་འབུལ་ཞིང་། གཞན་ཡང་རྗེ་འབྲུག་པ་རྒྱལ་དབང་ཆོས་རྗེ་སོགས་བཀའ་བབས་ཆོས་ཀྱི་བདག་པོ་ལྔ། ཉེ་བའི་ཐུགས་སྲས་རྣམ་བཞི། རིགས་ལྡན་ལྔ་དང་དཀྱིལ་འཁོར་འཛིན་པ་བརྒྱད། ལས་ཅན་ཆོས་བདག་ཉེར་ལྔ་ལ་སོགས་པ་བྱོན་དང་འབྱོན་འགྱུར་གྱི་བུ་སློབ་ནམ་མཁའི་སྐར་ཚོགས་ཙམ་གྱིས་གཞན་དོན་ཕྲིན་ལས་ཀྱི་སྒོ་དུ་མས་ས་ཆེན་པོའི་རྡུལ་དང་མཉམ་པའི་འགྲོ་བ་རྣམས་ཡང་དག་པའི་ལམ་ལ་བཀོད་པ་སོགས་ཕན་པའི་ཡོན་ཏན་རང་རེ་སོ་སྐྱེའི་བློ་ལས་འདས་ཤིང་བརྗོད་པར་དཀའ་ནའང་ཆ་ཤས་ཙམ་ཞིག་སྨོས་ན། དོན་ཏིག་འགྲོ་བ་ཀུན་གྲོལ་གྱི་རྒྱུད་ལས། ཐུགས་རྗེའི་ཕྲིན་ལས་ཤུགས་འབྱུང་བ༔ འདི་ཉིད་མྱོང་བ་ཙམ་གྱིས་ནི༔ བློ་དང་བྲལ་བའི་དོན་རྟོགས་ནས༔ བསྒོམ་མི་དགོས་པ་མྱོང་གྲོལ་ལོ༔ ཞེས་དང་།

[Full Size]

དཔལ་གསང་བ་འདུས་པའི་རྒྱུད་ལས། མ་སྒྲུབ་སངས་རྒྱས་ཐོབ་ཐབས་ལྔ༔ སྔོན་སྦྱང་ལས་དང་ཐོས་གྲོལ་དང་༔ རང་བྱུང་རྒྱུད་མཆོག་བཏགས་གྲོལ་དང་༔ མཚན་ལྡན་པད་ཅན་རྩ་ཡི་གནད༔ གསང་ལམ་ཟབ་མོའི་འཕོ་བ་དང་༔ ངོ་མཚར་མཆོག་རྫས་སྐྱེ་བདུན་ནོ༔ ཞེས་པ་ལྟར་གཏེར་ཆེན་ཉིད་ནས་ཀྱང་འཕན་ཡུལ་དུ་ཆོས་རྗེ་སྨོན་ལམ་རྒྱལ་པོས་བསྐུལ་བའི་བུམ་སྒྲུབ་དང་། གཞན་ཡང་སྒྲུབ་ཆེན་སུམ་ཅུ་ལྷག་ཙམ་མཛད་པས། གཞུང་དུ་གསལ་བའི་ཕྱི་ནང་གི་རྟགས་མཚན་ཁྱད་པར་ཅན་རྣམས་དང་། ཐུན་པ་རྣམས་ཀྱིས་ཀྱང་ཐུགས་རྗེ་ཆེན་པོ་ཞལ་མཇལ་བ་སོགས་ངོ་མཚར་བའི་གནས་དུ་མ་བྱུང་ཞིང་། ཕྱོགས་དང་རིས་སུ་མ་ཆད་པའི་སྐྱེ་འགྲོ་གྲངས་མེད་པ་རྣམས་འཁོར་བ་མཐའ་ཅན་ཆོས་ཉིད་མངོན་གྱུར་གྱི་གནས་ལ་བཀོད་པའི་ཕྲིན་ལས་རྒྱ་ཆེན་རྒྱུན་མི་ཆད་པར་སྤེལ་ཞིང་། རྒྱལ་སྲས་ཚེ་དབང་གྲགས་པ་ཞེས་དབང་ཆེན་རྟ་མགྲིན་དངོས་སུ་སྤྲུལ་པའི་གྲུབ་པ་ཡོངས་ཀྱི་འཁོར་ལོས་སྒྱུར་བ་དེ་ཉིད་དགུང་ལོ་བརྒྱ་དང་བཅུར་བཞུགས་ཤིང་། ཟབ་ཆོས་ཀྱི་རྒྱལ་ཐབས་ཆེན་པོར་གྱུར་པ་དེ་ལས་རིམ་པར་བརྒྱུད་བའི་རྔོད་ཤཱཀྱ་བཀྲ་ཤིས། མཁོར་དྲུང་པ་བསོད་ནམས་བཀྲ་ཤིས། ཚེ་ཆོག་པ་པདྨ་དབང་ཕྱུགརྡོ་རྗེ་འཛིན་པ་བཀྲ་ཤིས་དབང་ཕྱུག །ཡོངས་

[Full Size]

འཛིན་ཀརྨ་དོན་ཡོད། དྲིན་ཆེན་ཀརྨ་ཆགས་མེད། ཆེ་ཚང་པ་གསུང་རབ་རྒྱ་མཚོ། འཇམ་མགོན་བསྟན་པའི་ཉིན་བྱེད། རིག་འཛིན་ཐུགས་ཀྱི་རྡོ་རྗེ་སོགས་མཁས་པ་དང་གྲུབ་པའི་དབང་ཕྱུག་དམ་པ་རྣམས་ཀྱི་བཀའ་དྲིན་ལས་ཐོབ་པའི་སྨིན་བྱེད་དབང་བསྐུར་ཟབ་མོ་བགྱིད་པ་ལ། དེ་ཡང་ཐུགས་རྗེ་ཀུན་ལ་ཁྱབ་པ་སྙིང་རྗེའི་སྤྱན་རས་ཀྱིས་འགྲོ་ལ་དུས་དྲུག་གཟིགས་པའི་མཁའ་དབྱིངས་ཡངས་པོར་རྩ་བ་དང་བརྒྱུད་པའི་བླ་མ་རིག་འཛིན་གྲུབ་ཐོབ་རྣམས་ཀྱི་བྱིན་རླབས་ཀྱི་སྤྲིན་ཕུང་གཏིབས་ཤིང་། ཡི་དམ་དཔའ་བོ་མཁའ་འགྲོས་དངོས་གྲུབ་རྣམ་པ་གཉིས་ཀྱི་ཆར་རྒྱུན་ནི་འབེབས། རྟེན་དང་བརྟེན་པའི་དཀྱིལ་འཁོར་སྒྲུབ་རྫས་ཀྱི་མདངས་འཇའ་ཚོན་ལྟར་བཀྲ་ཞིང་གསལ། དམ་ཅན་སྲུང་མ་དགྱེས་པའི་གད་རྒྱངས་ཆེན་པོའི་དབྱར་རྔ་ནི་ལྡིར། སྒྲུབ་པའི་རྣལ་འབྱོར་དཔོན་སློབ་རྣམས་ཀྱང་དམ་ཚིག་དང་ལྡན་པའི་སྒོ་ནས་བསྐྱེད་རྫོགས་ཟུང་དུ་འཇུག་པའི་ས་མ་དྷི་དང་མ་བྲལ་བར་སྒྲུབ་པ་ཆེན་པོའི་སྦྱོར་དངོས་རྗེས་གསུམ་གཞུང་དང་མཐུན་པར་གྲུབ་ཅིང་། དེས་ན་ལུང་བསྟན་བཀའ་རྒྱ་མ་ལས། མདོར་ན་ཨོ་རྒྱན་ངས་བསྟན་ཆོས་རྣམས་ལ༔ གཞུང་བཞིན་སུ་དང་སུ་ཡིས་སྤྱད་པ་ཀུན༔ ཐམས་ཅད་ང་སྤྲུལ་ཡིན་པར་ཤེས་པར་བྱ༔ ཕྱི་རབས་ཀུན་གྱིས་ཡིད་གཉིས་ཐེ་ཚོམ་སྤང༔ གུས་པས་བཀུར་སྟི་ཕུ་

[Full Size]

དུད་འབྲེལ་བ་ཐོབ༔ ཅེས་གསུངས་པ་དང་། དབང་བསྐུར་འདི་ཉིད་ཐོབ་པའི་ཕན་ཡོན་ནི། གསང་འདུས་རྒྱུད་ཀྱི་དབང་གི་ལེའུ་ལས། དུས་གསུམ་བདེར་གཤེགས་སྐུ་གསུང་ཐུགས༔ ཡོན་ཏན་ཕྲིན་ལས་མ་ལུས་པ༔ ཡིག་བདུན་དག་ལ་ཡང་དག་རྫོགས༔ དབང་ཐོབ་ཡོན་ཏན་མཐའ་ཡས་ཏེ༔ ཞེས་སོགས་དང་། ཡིག་བདུན་དབང་དང་ལུང་ཐོབ་མིའི༔ ལས་དང་ལས་ཀྱི་རྣམ་སྨིན་རུང༔ མི་དགེ་བཅུ་དང་མཚམས་མེད་ལྔ༔ དུས་འདི་ཉིད་ལ་བྱང་བར་འགྱུར༔ ཞེས་སོ། །དེ་དག་ལ་སོགས་པ་བཀའ་གཏེར་གྱི་གཞུང་རྣམས་སུ་དུ་མར་གསུངས་ཤིང་། སྔགས་རྙིང་མའི་ལུགས་འདིར་རིང་བརྒྱུད་བཀའ་མ་དང་། ཉེ་བརྒྱུད་གཏེར་མ། ཟབ་མོ་དག་སྣང་བརྒྱུད་པ་སྟེ་བཀའ་སྲོལ་དེ་གསུམ་གཅིག་ཏུ་འདུས་པའི་སྨིན་ཅིང་གྲོལ་བའི་དབང་བསྐུར་ཟབ་མོ་ཞུ་བའི་ཕྱིར་ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པའི་མཎྜལ་ཞིག་གནང་འཚལ། ཞེས་པའང་རྒྱལ་དབང་མཆོག་གི་སྤྱན་རས་ཨུཏྤལ་གྱི་འབབས་སྟེགས་སུ། སི་ཏུ་པདྨ་ཉིན་བྱེད་དབང་པོས་བཀོད་པ་མངྒ་ལཾ།། །།

ཐུགས་རྗེ་ཆེན་པོ་གསང་བ་འདུས་པའི་སྒྲུབ་ཆེན་དབང་དང་འབྲེལ་བའི་ཕན་ཡོང་བརྗོད་པ།

[Full Size]

༈ ཐུགས་རྗེ་ཆེན་པོ་གསང་བ་འདུས་པའི་སྒྲུབ་ཆེན་དབང་དང་འབྲེལ་བའི་ཕན་ཡོང་བརྗོད་པ་བཞུགས་སོ། །ན་མོ་ལོ་ཀཱི་ཤྭ་ར་ཡ། འོ་ན་ད་ལམ་སྐབས་སུ་བབས་པ་སྐྱེ་བདུན་དམ་རྫས་ཀྱི་བུམ་སྒྲུབ་ཆེན་མོའི་ལོ་རྒྱུས་མདོར་བསྡུས་པ་ཙམ་ཞུ་ན། དེ་ལ་སྤྱིར་རྒྱུད་སྡ-ེ་བཞི་ཀ་ནས་རིལ་བུ་ལ་བརྟེན་ནས་མཆོག་དང་ཐུན་མོང་གི་དངོས་གྲུབ་བསྒྲུབ་པའི་ཐབས་དཔག་ཏུ་མེད་པ་གསུངས་ཏེ། འཇམ་དཔལ་དམར་པོའི་སྒོ་ནས་ཤེས་རབ་རིལ་བུ་དང་། དབྱངས་ཅན་མའི་ཤེས་རབ་རིལ་བུ་སོགས་བསྒྲུབ་པ་ལ་བརྟེན་ནས་ཤེས་རབ་དང་བློ་གྲོས་སྐྱེད་ཐབས་གསུངས་པ་དང་། གསར་མའི་བདེ་དགྱེས་གསང་གསུམ། དམར་ནག་འཇིགས་གསུམ་སོགས་བླ་མེད་ཀྱི་རྒྱུད་སྡེ་ཐམས་ཅད་དང་། རྙིང་མའི་བཀའ་དགོངས་ཕུར་གསུམ་སོགས་རྒྱུད་སྡེ་ཐམས་ཅད་ནས་ཀྱང་། བཟའ་བའི་དམ་ཚིག་གི་སྐབས་བདུད་རྩི་རིལ་བུ་བྱ་ཐབས། དེའི་ཕན་ཡོན་མྱོང་བ་ཙམ་གྱིས་མཆོག་གི་དངོས་གྲུབ་ཐོབ་ཚུལ་མཐའ་ཡས་པར་གསུངས་ཤིང་། མ་ཎི་རིལ་བུ་འདི་ལའང་གཏེར་ཁ་དུ་མ་ནས་བྱོན་པའི་བདུད་རྩི་རིལ་བུ་དང་། གཏེར་སྟོན་དུ་མས་བསྒྲུབས་པའི་བདུད་རྩི་རིལ་བུ་དང་། མཉམ་མེད་དྭགས་པོ་བཀའ་བརྒྱུད་རིམ་བྱོན་དང་། དཔལ་ལྡན་ས་སྐྱ་ན་རིམ་གྱིས་བསྒྲུབས་པའི་བདུད་རྩི་རིལ་བུ། འབྲི་གུང་བའི་བདུད་རྩི་རིལ་བུ་སོགས་ཀྱང་འདྲེས་ཤིང་དོན་ལ་མཆོག་གི་དམ་རྫས་རིལ་བུ་ཡིན་པའི་

[Full Size]

ཕྱིར་དང་། བདུད་རྩི་རིལ་བུ་ཡང་ཤ་ལྔ་བདུད་རྩི་ལྔ་ཡིན་ལ། འདི་མཆོག་གི་སྐྱེ་བདུན་གཙོ་བོར་བྱས་པའི་རིལ་བུ་ཡིན་པས། རྒྱུད་སྡེ་རྣམས་ནས་བདུད་རྩི་རིལ་བུའི་ཕན་ཡོན་ཇི་སྐད་བཤད་པ་ཐམས་ཅད་མ་ཎི་རིལ་བུ་འདི་ལ་འབྱུང་ངོ་། །ཁྱད་པར་གསར་མའི་བདེ་མཆོག་རྩ་བ་དང་བཤད་པའི་རྒྱུད་ཆེན་པོ་རྣམས་ནས་ཀྱང་སྐྱེ་བ་བདུན་པ་ཡིན་མིན་བརྟག་པའི་ཐབས་དང་། སྐྱེ་བདུན་དེ་ཡི་ཤ་ལ་བརྟེན་ནས་མཁའ་སྤྱོད་སྒྲུབ་པའི་ཐབས་རྒྱ་ཆེན་པོ་གསུངས་ཤིང་། རྙིང་མའི་ཐུགས་རྗེ་ཁྲོས་མའི་ཆོས་སྐོར་ལ་ཡང་གསུངས་སོ། །ཁྱད་པར་དུ་གསང་སྔགས་རྙིང་མ་བཀའ་རྫོགས་པ་ཆེན་པོའི་རྒྱུད་སྡེ་རྣམས་ནས་གཞན་ལས་ཁྱད་པར་དུ་འཕགས་པའི་གདམས་ངག་མ་བསྒོམ་པར་སངས་རྒྱས་པའི་ཐབས་བཞི་གསུངས་ཏེ། བཏགས་པས་གྲོལ་བ་བཏགས་གྲོལ་འཁོར་ལོ། ཐོས་པས་གྲོལ་བ་ཐོས་གྲོལ་དང་འཕོ་བ། རིིག་པས་གྲོལ་པ་ཌཱ་ཀི་མཚན་ལྡན་པདྨ་ཅན། ཟོས་པས་གྲོལ་བ་སྐྱེ་བདུན་རིལ་བུ་དང་བཞིའོ། །དེ་ལ་ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་ལས། དེ་ནས་སྐྱེ་བདུན་ཤ་བསྒྲུབ་པ༔ དེ་ཉིད་བརྟགས་བསྒྲུབ་འགྲོ་དོན་བྱ༔ བརྟག་པ་སྐྱེ་བདུན་གང་ཡིན་དེས༔ མི་ཡི་སྐྱེ་བ་བདུན་སོགས་དྲན༔ དེ་ཡང་ཆོས་ལྡན་སྐྱེ་བདུན་པའི༔ རོ་བླངས་ཤ་རྣམས་ལེགས་བསྐམས་ཏེེ༔ ཞེས་དང་། ཐུགས་རྗེ་ཆེན་པོ་གསང་བ་འདུས་

[Full Size]

པའི་རྒྱུད་ལས། དལ་འབྱོར་ཆོས་ལྡན་མི་ལུས་ནི༔ བདུན་ནི་བརྩེགས་མར་བླངས་པ་ཡི༔ ངེས་པར་ཡིད་ཆེས་ལྡན་པ་དེའི༔ རོ་བླངས་ཤ་རྣམས་ལེགས་པར་བསྐམ༔ ཞེས་གསུངས་པ་ལྟར། སྤྲུལ་པའི་གཏེར་ཆེན་དྲི་མེད་ལྷུན་པོ་དང་། གཞན་ཡང་གཏེར་ཁ་བཅུ་གསུམ་ནས་བྱོན་པའི་བྲམ་ཟེ་སྐྱེ་བདུན་གྱི་ཤ་དང་། བྲམ་ཟེ་དུང་རྣ་ཅན་གྱི་སྐུ་ཤ་པདྨ་གླིང་པའི་གཏེར་མ་དང་། རཏྣ་གླིང་པས་པཉྩ་ལྷ་ཁང་ནས་བཏོན་པའི་བྲམ་ཟེ་ལོ་ལི་ཇོ་སའི་སྐུ་ཤ་དང་། གནམ་སྐས་ཅན་ནས་བཏོན་པའི་བྲམ་ཟེ་ཛྭེ་ཏ་རི་པའི་སྐུ་ཤ་དང་། བྲམ་ཟེ་དྲི་མེད་སྙིང་པོས་གཙོས་བྲམ་ཟེ་ཉི་ཤུ་རྩ་ལྔའི་སྐུ་ཤ་རྣམས་གཙོ་བོ་བྱས་ནས་གསར་རྙིང་རིས་མེད་ཀྱི་དམ་རྫས་ཟབ་མོ་མཐའ་དག་ཀུན་འདུས་ཀྱི་རིལ་བུ་སྟེ། དེ་ལྟར་ཡིད་ཆེས་ཁུངས་བཙུན་དང་བ་འདྲེན་པའི་གནས་ཀྱི་རང་བཞིན་ལ། དེའང་། སྐྱེ་བདུན་བསྒྲུབ་པའི་ཕན་ཡོན་དང་། རིལ་བུ་ཟོས་པའི་ཕན་ཡོན། དབང་ཐོབ་པའི་ཕན་ཡོན་དང་གསུམ་མོ། །དང་པོ་བསྒྲུབ་པའི་ཕན་ཡོན་ནི། གསང་བ་འདུས་པའི་རྒྱུད་ལས། རྒྱལ་བ་མཉེས་མཆོད་རྒྱུན་མི་ཆད༔ སེམས་ཅན་སྒྲིབ་སྦྱོང་རྒྱུན་མི་ཆད༔ བདག་ལ་དངོས་གྲུབ་རྒྱུན་མི་ཆད༔ རྒྱུན་ཆད་མེད་པ་གསུམ་ལྡན་གྱི༔ ཏིང་འཛིན་འདི་ཟབ་འཇིག་རྟེན་འདིར༔ མ་བྱུང་མི་འབྱུང་འབྱུང་མི་འགྱུར༔ དངོས་གྲུབ་མ་ལུས་ཀུན་འབྱུང་ཞིང་༔ མྱུར་དུ་འགྲུབ་པར་ཐེ་ཚོམ་མེད༔ སྒྲུབ་ཐབས་གསུམ་པོ་བསྒྲུབ་ལམ་སྦྱངས༔ དོན་གཉིས་མཐར་

[Full Size]

ཕྱིན་སངས་རྒྱས་སོ༔ ཞེས་དང་། གསང་སྒྲུབ་ལས། སྤྱན་རས་གཟིགས་དང་གཉིས་མེད་དེ༔ བར་དོའི་འཇིགས་པ་ཀུན་བྲལ་ཏེ༔ གསང་བ་འདུས་དང་གཉིས་མེད་འགྱུར༔ ཞེས་དང་། སྒྲུབ་པ་བྱེད་པའི་རྣལ་འབྱོར་རྣམས༔ ཚེ་འདིར་རིག་འཛིན་ཐོབ་པར་འགྱུར༔ དང་དུ་ལོངས་ཤིག་སྐལ་ལྡན་རྣམས། །ཞེས་དང་། སྒྲུབ་ཆེན་ལས། སྙིགས་མའི་དུས་སུ་ཐུགས་རྗེ་ཆེན་པོའི་བསྟན་པ་དར་བར་འབྱུང་སྟེ༔ ཀུན་ཀྱང་མ་ཎི་དུང་ཕྱུར་ལ་སོགས་དར་བའི་ཚེ༔ རང་བཞིན་དུ་བཟླས་པས་སྒྲུབ་ཆེན་འདི་ཉིད་བརྒྱ་འགྱུར་གྱི་ཡོན་ཏན་ཆེའོ༔ ཞེས་ཨོ་རྒྱན་ང་ཡི་བཀའོ༔ ཞེས་པས་སྒྲུབ་ཆེན་འདི་ལ་བྱེ་ཆུང་གཅིག་ཐོན་ན་དུང་ཕྱུར་གཅིག་འོང་ངེས་སོ། སྤྱིར་ཡིག་དྲུག་གི་ཕན་ཡོན་མཐའ་ཡས་པ་མདོ་རྒྱུད་དུ་མ་ནས་གསུངས་ཤིང་། དེ་ཡང་ཕྱི་ཡིག་དྲུག །ནང་ཡིག་བཅུ། གསང་བ་ཡིག་བདུན་ཡིན་པར་གསུངས་པས། ཡི་གེ་བདུན་པ་འདི་ཡི་ཕན་ཡོན་ནི། ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་ལས། འཇིག་རྟེན་སེམས་ཅན་སྲོག་གཏོན་པའི༔ བསོད་ནམས་འཕགས་པས་བགྲང་བར་ནུས༔ ཡིག་བདུན་ལན་གཅིག་བརྗོད་པ་ཡི༔ ཡོན་ཏན་བརྗོད་པར་ག་ལ་ནུས༔ ཁམས་གསུམ་སེམས་ཅན་མ་ལུས་ཀུན༔ སངས་རྒྱས་སར་བཀོད་ཡོན་ཏན་རྣམས༔ བགྲང་བར་

[Full Size]

ནུས་ཀྱི་ཡིག་བདུན་པ༔ གཅིག་བརྗོད་ཡོན་ཏན་བརྗོད་མི་ནུས༔ རྒྱལ་བ་ནམ་མཁའ་གང་བ་ལཿམཆོད་པ་ཕུལ་བའི་བསོད་ནམས་ཚོགས༔ བགྲང་བར་ནུས་ཀྱི་ཡིག་བདུན་པ༔ གཅིག་བརྗོད་ཡོན་ཏན་བརྗོད་མི་ནུས༔ ཡང་སྙིང་ཡིད་ལ་སུས་བྱེད་ཚད༔ ཐུགས་རྗེ་ཆེན་པོ་ཉིད་ཡིན་ཕྱིར༔ བར་ཆད་བགེགས་ཞི་འགྲོ་བ་འདུལ༔ སྣང་སྲིད་འཁོར་འདས་དབང་དུ་འགྱུར༔ ཡང་སྙིང་ཐོས་ཚད་དྲན་རེག་རུང༔ སྒོམ་བཟླས་འདྲི་འཆང་བཏོན་པ་རྣམས༔ ཡོན་ཏན་ལྡན་ཞིང་གར་སྐྱེས་ཀྱང༔ སྤྱན་རས་གཟིགས་དང་བྲལ་མི་སྲིད༔ ཅེས་སོགས་གསུངས་པ་དང་། གཉིས་པ་རིལ་བུ་ཟོས་པའི་ཕན་ཡོན་ནི། ཐུགས་རྗེ་ཆེན་པོ་གསང་བ་འདུས་པའི་རྒྱུད་ལས། དེ་ནས་བཅོམ་ལྡན་རིགས་བདག་ལ༔ འདུས་པའི་འཁོར་གྱིས་ཡོངས་ཞུས་པ༔ རྩོལ་མེད་ངོ་མཚར་མཆོག་གི་རྫས༔ ཟོས་པས་སངས་རྒྱས་ཐོབ་པའི་ཐབས༔ བདག་ཅག་འཁོར་ལ་བཀའ་སྩོལ་ཅིག༔ བཅོམ་ལྡན་འདས་ཀྱིས་བཀའ་སྩལ་བ༔ ངོ་མཚར་དེ་ཉིད་བསྒྲུབ་པ་ན༔ བྱང་ཆུབ་སེམས་ལྡན་རྣལ་འབྱོར་གྱིས༔ འགྲོ་དོན་འཁོར་བ་དོང་སྤྲུགས་ཐབས༔ ཞེས་པ་ནས། རིལ་བུ་སུ་ཡི་ལྟོར་སོང་བ༔ ཚེ་རབས་གང་དང་གར་སྐྱེས་ཀྱང༔ སྤྱན་རས་གཟིགས་དང་འབྲལ་མི་སྲིད༔ བདག་པས་གཞན་གཅེས་འགྲོ་དོན་

[Full Size]

སྤྱོད༔ ཡིག་བདུན་བཟླས་ཤིང་དམ་ཚིག་བསྲུངས༔ ཐམས་ཅད་འཁོར་བ་དོང་ནས་སྤྲུགས༔ ཅེས་པའི་བར་གསུངས་པ་དང་། འདི་དག་གི་སྒྲུབ་པའི་ཕན་ཡོན་རིག་འཛིན་རཏྣ་གླིང་པའི་གཏེར་ལུང་ལས། གསང་འདུས་རྒྱུད་དོན་སྐྱེ་བདུན་སྒྲུབ་པའི་ཐབས༔ མ་འོངས་དོན་དུ་ཨོ་རྒྱན་པདྨ་ངས༔ ཆོས་དང་དམ་རྫས་གནམ་སྐས་བྲག་ལ་སྦས༔ མ་འོངས་སྲིན་མོ་ཁྲོས་འདྲའི་བྲག་དེ་ནས༔ གཏེར་སྟོན་འགྲོ་འདུལ་རྡོ་རྗེས་བཏོན་པ་ལས༔ ཕན་ཡོན་གནས་སྐབས་མཐར་ཐུག་གཉིས་སུ་བཤད༔ གནས་སྐབས་འཇིགས་པ་བརྒྱད་གྲོལ་མཐར་ཐུག་ནི༔ འགྲོ་བའི་དོན་དུ་སྤྲུལ་བ་འབྱོན་པའོ༔ སྒྲུབ་གནས་སྤ་གྲོ་སྟག་ཚང་སྦས་པ་ཡི༔ འཛད་མེད་རིག་འཛིན་དངོས་གྲུབ་རྒྱ་མཚོའི་གཏེར༔ རིལ་བུ་ཨཱཿཡིག་རང་བྱོན་ཁ་དོག་གསུམ་དུ་ཡོད༔ མ་འོངས་སྙིགས་མ་ལྔ་བཅུ་ཁ་རལ་དུསཿཔདྨ་རྡོ་རྗེའི་མིང་ཅན་དེ་ལ་སྤྲོད༔ གཟའ་དང་རྡོར་ལེགས་དམ་ཚིག་གཉེར་དུ་བསྐོས༔ ཅེས་དང་། པདྨ་བཀའ་ཡི་ཐང་ཡིག་ལས། རྒྱལ་སྲས་ལྷ་རྗེའི་སྐུ་ཤ་གཏེར་དུ་སྦས་སྐབས་སུ། དབང་པོ་ལྔ་དང་ཟག་ཆུ་ཤ་དང་རུས༔ ཤིག་གི་སྙིང་ཙམ་སུ་ཡི་ལྟོར་སོང་བ༔ རྨོངས་པའི་ལྟོར་སོང་མི་ཡི་དངོས་གྲུབ་འབྱུང༔ དབུལ་པོའི་ལྟོར་སོང་ནོར་གྱི་དངོས་གྲུབ་ཐོབ༔ འཆི་འཕོའི་ལྟོར་སོང་ཚེ་ཡི་དངོས་གྲུབ་ཐོབ༔ དད་ཅན་ལྟོར་སོང་ཆོས་ཀྱི་

[Full Size]

དངོས་གྲུབ་ཐོབ༔ དེ་ལ་སོགས་ཀྱི་ཡོན་ཏན་མང་ཡོད་ཀྱང༔ ལོག་ལྟ་ཅན་གྱིས་ཡོན་ཏན་སྐྱོན་དུ་མཐོང་༔ དེ་ཡང་འབྲེལ་བ་སྣ་གཅིག་ཐོབ་པ་ཡིན༔ སྒྲིབ་པ་དག་སྟེ་ཆོས་ཉིད་ལས་སད་འགྱུར༔ ཅེས་གསུངས་པ་དང་། སྐྱེ་བདུན་རིལ་བུས་འདུལ་བའི་དུས་ཚོད་ནི་དེང་གི་སྐབས་ཉིད་དུ་ངེས་པ་སྟེ། དོན་ཏིག་འགྲོ་བ་ཀུན་སྒྲོལ་གྱི་རྒྱུད་ལས། སྙིགས་མའི་དུས་སུ་ཚེ་ཐུང་ནད་མང་ཞིང་། །ལོངས་སྤྱོད་དབུལ་ཕོངས་ཉོན་མོངས་རང་སར་གྲོལ། །ཆོས་ལ་ཉན་བསམ་སྒོམ་གསུམ་གུས་མཁན་མེད། །དེ་དུས་ཚེགས་ཆུང་དོན་ཆེའི་དམ་རྫས་འདི། །འགྲོ་དོན་ཕྱོགས་བཅུར་སྐྱོ་ངལ་མེད་པར་སྤེལ། །ཞེས་པ་ལ་སོགས་པའི་ཕན་ཡོན་བརྗོད་ལས་འདས་པར་མཆིས་སོ། །རིལ་བུ་འདི་ཉིད་རི་བོ་ཆེན་པོའི་རྩེར་སྦས་ན། རི་དེ་ལ་རླུང་ཕོག་ཚད་ཀྱི་སྐྱེ་འགྲོ་ཕོ་མོ་དང་། སྣང་སྲིད་ཀྱི་མི་མ་ཡིན་པ་ཐམས་ཅད་ཐར་པའི་ལམ་ལ་འགོད་པར་འགྱུར་རོ། །ལྷ་སྲིན་སྡེ་བརྒྱད་ཀྱི་གནོད་འཚེ་ཐམས་ཅད་ཞི་བར་འགྱུར་རོ། །ཚོང་འདུས་དང་ས་མདོ་རྣམས་སུ་སྦས་ན་དེར་ཕྱིན་ཚད་ཐམས་ཅད་ཀྱི་ལས་སྒྲིབ་དག་ནས་ཐར་པའི་ལམ་སྣ་ཟིན་པར་འགྱུར་རོ། །དཀོར་མཛོད་དུ་སྦས་ན་ལོངས་སྤྱོད་འཕེལ་བར་འགྱུར་རོ། །ནོར་ལྷས་སུ་སྦས་ན་གོད་ཡམས་མི་འབྱུང་ཞིང་རྟ་ནོར་འཕེལ་བར་འགྱུར་རོ། །ཞིང་ལ་སྦས་ན་ལོ་ཏོག་ལེགས་པར་འགྱུར་རོ། །མཚོའམ་ཆུ་མིག་གི་འགོར་སྦས་ན་ཆར་ཆེན་པོ་

[Full Size]

འབབ་པ་འགྱུར་རོ། །མེ་ལ་བསྲེག་ན་དུད་པ་ཕོག་ཚད་ཀྱི་སྐྱེ་འགྲོ་ཐམས་ཅད་སངས་རྒྱས་པ་དང་། སྡེ་བརྒྱད་ཀྱི་གདུག་རྩུབ་ཐམས་ཅད་ཞི་བ་དང་། འགོ་བའི་ནད་རིམས་རྒྱུན་ཆད་པར་འགྱུར་རོ། །ལུས་ལ་འཆང་ན་འགོ་ནད་དང་མཚོན་ཆའི་རིགས་ཐམས་ཅད་ཐུབ་པར་འགྱུར་རོ། །རིལ་བུ་ཆུར་སྦྱངས་ནས་ཞིང་ལ་འཐོར་ན་འབུ་སྲིན་དང་བཙའ་སད་སོགས་གནོད་པ་ཐམས་ཅད་ཐུབ་པར་འགྱུར་རོ། །སྐུ་གསུང་ཐུགས་རྟེན་གྱི་ནང་དུ་འཇུག་ན་ཕྱག་སྐོར་འབྲེལ་ཚད་རྫོགས་པའི་སངས་རྒྱས་ཀྱི་ས་ལ་ཕྱིན་པར་འགྱུར་རོ། །ཁྱད་པར་དུ་ུས་གནད་གསོ་བའི་ནང་གཞུག་བྱས་ན་མཐའ་ཡི་དམག་ཚོགས་བཟློག་པར་འགྱུར་རོ། །གང་དུ་བསྒྲུབ་པའི་ཡུལ་དེར་བཀྲ་ཤིས་ཤིང་བྱིན་ཆགས་པ་དང་། འཇའ་འོད་དང་སྤྲིན་རྒྱུན་ལྡན་དུ་འབྱུང་བ་དང་ཆར་ཆུ་དུས་སུ་འབེབས་པར་འགྱུར་རོ། །ཐན་པ་དང་ལོ་ནད་བཙའ་སད་ཐམས་ཅད་མི་འབྱུང་ཞིང་ལོ་ཕྱུགས་རྟག་ཏུ་ལེགས་པ་དང་མུ་གེའི་བསྐལ་པ་ཐམས་ཅད་ཞི་བར་འགྱུར་རོ། །མི་ནད་དང་ཕྱུགས་ནད་ཐམས་ཅད་རྒྱུན་ཆད་པར་འགྱུར་རོ། །ཕྱི་ནང་གི་དུས་འཁྲུགས་ཐམས་ཅད་ཞི་བ་དང་མཐའ་ཡི་དམག་དཔུང་ཐམས་ཅད་བཟློག་པར་འགྱུར་རོ། །དབང་ཐོབ་པའི་ཕན་ཡོན་ནི།

[Full Size]

དཀྱིལ་འཁོར་མཐོང་ཞིང་དབང་བསྐུར་ཐོབ། །ཕུང་པོ་བདག་ཉིད་སྨིན་པར་འགྱུར། །སྡིག་པ་ཐམས་ཅད་རྣམ་པར་སྤང་། །རྡོ་རྗེ་འཛིན་པའི་གནས་ཐོབ་བོ། །ཞེས་སོགས་གསུངས་པ་དང་། རིག་འཛིན་པདྨ་འབྱུང་གནས་ཀྱིས། གཏེར་སྟོན་རཏྣ་གླིང་པ་ཉིད་ལུང་བསྟན་ཞལ་གདམས་དང་བཅས་པའི་མཇུག་ནས། སྐལ་ལྡན་དེ་ཡི་གདུལ་བྱ་རྗེས་འཇུག་རྣམས༔ ། སློབ་མ་བས་ཀྱང་ཡང་སློབ་རྗེས་སློབ་དུས༔ རིམ་པ་བཞིན་དུ་བསྟན་པ་མཐའ་རྒྱས་འགྱུར༔ མཐའ་དབུས་ཕྱོགས་མཚམས་ཀུན་ཏུ་ཆོས་འདི་དར༔ སྙིགས་མའི་འགྲོ་བ་ཕྱམ་གཅིག་ཐར་ལམ་བགྲོད༔ འཕྲད་ཆོག་མཐོང་གྲོལ་འགྱུར་ཏེ་ངོ་མཚར་ཆེ༔ བོད་ཡུལ་ས་འོག་ཀུན་གྱི་གཏེར་གཅིག་མ༔ ལས་ཅན་སྐྱེས་བུ་རྣམས་ཀྱིས་འདི་སྤྱོད་ཅིག༔ ཅེས་དང་། ལང་གྲོས་ཞུས་པའི་ལན་ལས་ཀྱང་། བུ་བས་ཀྱང་ཡང་སློབ་ཀྱི་དུས་ན་བསྟན་པ་མཐའ་རྒྱས་སུ་འགྲོ་བར་འགྱུར་རོ༔ ཞེས་ལུང་བསྟན་པ་དང་། རཏྣའི་གཏེར་ཆོས་ཀྱི་ནང་ནས་ཀྱང་ཐུགས་རྗེ་ཆེན་པོ་གསང་བ་འདུས་པ་འདི་བོད་ཡུལ་དུ་ཡུན་རིང་དར་ཏེ་ཐུགས་རྗེ་ཆེན་པོའི་སྤྲུལ་པ་དང་སྲས་བྱང་ཆུབ་སེམས་དཔའི་རིགས་དེ་དག་གི་སློབ་བརྒྱུད་ལ་སོགས་རིམ་པ་བཞིན་དུ་རྒྱུན་མ་ཆད་པར་

[Full Size]

བྱོན་ནས་ཡིག་བདུན་གྱི་བསྟན་པ་འཛིན་པ་དང་། ལ་ལས་སྐྱོང་བ་དང་། ལ་ལས་སྲུང་བར་བྱེད། རང་གཞན་ཀྱི་དོན་རྒྱ་ཆེན་པོར་བྱེད་པ་ལུང་བསྟན་པ་ནི། ཐུགས་རྗེ་ཆེན་པོ་གསང་བ་འདུས་པའི་རྒྱུད་ཆེན་པོ་ཉིད་ལས། མ་འོངས་བསྟན་པའི་སྒྲོན་མེ་འདི༔ ཤཱཀ་ཐུབ་མྱ་ངན་འདས་ནས་ཀྱང༔ ལོ་ནི་སུམ་སྟོང་ཉེ་བ་ན༔ རྡོ་རྗེ་གདན་གྱི་བྱང་ཕྱོགས་ངོས༔ རི་བོ་ནག་པོ་བཅུ་གསུམ་འདས༔ ཁ་བ་ཅན་གྱི་རྒྱལ་ཁམས་སུ༔ འགྲོ་ཀུན་ཐུགས་རྗེ་ཆེན་པོའི་ཞིང་༔ ཐུགས་རྗེའི་སྤྲུལ་སྲས་བརྒྱུད་འཛིན་གྱིས༔ ཡིག་བདུན་བསྟན་པ་འཛིན་སྐྱོང་སྲུངས༔ རིམ་པ་བཞིན་དུ་དོན་གཉིས་སྤྱོད༔ རྒྱུད་མཆོག་འདི་ཡང་དེར་སྣང་འགྱུར༔ ཞེས་བཀའ་སྩལ་ཏོ། །དེ་ལྟར་སྐལ་ལྡན་གྱི་སློབ་མ་ཁྱེད་རྣམས་ཀྱིས་དད་གསུམ་རྣམ་པར་དག་པའི་མོས་པ་བརྟན་པོའི་སྒོ་ནས་ཐུགས་ཀྱི་དཔལ་བེའུར་སིམ་པ་ཞུ། ཞེས་ཆགས་མེད་རིན་པོ་ཆེའི་གསུང་ལས་མདོར་བསྡུས་ཏེ་སི་ཏུ་པདྨ་ཉིན་བྱེད་དབང་པོས་བཀོད་པ་དགེ་ལེགས་འཕེལ། སརྦ་དཱ་ཀ་ལྱྭ་ཎཾ་བྷ་ཝ་ཏུ།། །།

ཚེ་སྒྲུབ་ཐབས་ཤེས་ཁ་སྦྱོར་དབང་གི་མཚམས་སྦྱོར་སྐལ་བཟང་རྣ་བའི་བདུད་རྩི།

[Full Size]

ཚེ་སྒྲུབ་ཐབས་ཤེས་ཁ་སྦྱོར་དབང་གི་མཚམས་སྦྱོར་སྐལ་བཟང་རྣ་བའི་བདུད་རྩི་ཞེས་བྱ་བ་བཞུགས་སོ། །ན་མོ་ཨཱ་ཡུཿཨ་མི་ཏ་བྷ་པདྨཱ་ཀཱ་ར་ཡེ། འདིར་གཏེར་ཆེན་མི་འགྱུར་རྡོ་རྗེའི་གཏེར་བྱོན་ཚེ་སྒྲུབ་ཐབས་ཤེས་ཁ་སྦྱོར་གྱི་སྨིན་དབང་ཟབ་མོའི་མཚམས་སྦྱོར་དང་དབང་བཤད་དད་ལྡན་དང་བ་འདྲེན་པའི་ཕྱིར་དུ་སྤྲོ་ན། ཐོག་མར་དཀྱིལ་འཁོར་གཞུང་བཞིན་བསྲང་ནས་བཀའ་སྲུང་རྣམས་ཀྱི་གཏོར་འབུལ་གྲུབ་མཚམས་སྒོ་དབྱེ་འདོན། བླ་མ་རིག་འཛིན་གྱིས་དབང་ལེན། རཀྵཿབར། དེ་ནས་སློབ་མ་སྒོ་དྲུང་དུ་འདུག་བཅུག་ནས་བདུད་བཞི་རྣམས་ཀྱང་བཏོན་ལ་རིམ་བཞིན་ཕྱི་རོལ་རྒྱང་རིང་པོར་སྐྱེལ། སྲུང་འཁོར་བསྒོམ། བཀའ་སྲུང་གཏོར་འབུལ་རྣམས་ཕུལ་གྲུབ་ནས། ཧཱུྃ། ཡེ་ཤེས་ལྔ་ཡི་སོགས་ཀྱིས་ཁྲུས་བྱས་ནས་ནང་དུ་འོང་ལ་བགེགས་བསྐྲད། དེ་ནས་དཀྱིལ་འཁོར་ཡོལ་བའི་ཕྱི་རོལ་དུ་གནས་པ་ལ་སློབ་དཔོན་གྱིས་དྲི་བ། ཀྱཻ་ཧོཿརིགས་ཀྱི་བུ་སོགས་ནས། དྲང་པོར་སྨོས༔ བར་དང་། དེ་ནས་སློབ་མ་རྣམས་ཀྱིས་སམ་ཡང་ན་རྗེས་ཟློས་ཀྱིས། ཀྱཻ་ཧོཿརྡོ་རྗེ་འཛིན་པ་སོགས་དང་། སློབ་དཔོན་གྱིས། ཀྱཻ་ལེགས་སོ་སོགས་དང་། ཡང་རྗེས་ཟློས་སམ་སློབ་མས། ལྷ་ཚེ་ལྷ་རིག་འཛིན་སོགས་ཞུ། ཡང་སློབ་དཔོན་གྱིས། ལེགས་སོ་སྐྱེས་བུ་སོགས་དང་རྗེས་ཟློས་སམ། སློབ་མས། ལེགས་སོ་ལེགས་སོགས་ཞུ་ནས་ཕྱག་འཚལ། ཡོལ་བ་བསལ་ནས་དྲུང་དུ་འཁོད། སློབ་དཔོན་གྱིས། སྔོན་ཆད་དཀྱིལ་འཁོར་གཉན་པོ་མ་མཐོང་པའི་བརྡར་གདོང་གཡོགས་འཆིང་བའི་མོས་

[Full Size]

པ་མཛོད། མིག་དར་བཅིངས་ལ། བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པའི་དཀྱིལ་འཁོར་གྱི་དབང་བསྐུར་ཟབ་མོ་ཞུ་བའི་དོན་ཏུ་མཎྜལ་འབུལ་བར་ཞུ། མཎྜལ་ནི། ཧོཿབདག་ལུས་ཕུང་ཁམས་སོགས་ཀྱིས་མཎྜལ་ཕུལ་ལ། སློབ་དཔོན་གྱིས་འདི་སྐད་དུ། ནམ་མཁའ་དང་མཉམ་པའི་སེམས་ཅན་ཐམས་ཅད་ཡང་དག་པར་རྫོགས་པའི་སངས་རྒྱས་ཚེ་དང་ཡེ་ཤེས་དཔག་ཏུ་མེད་པ་འོད་སྣང་མཐའ་ཡས་ཀྱི་གོ་འཕང་རིན་པོ་ཆེ་ཐོབ་པར་བྱ་སྙམ་པས་ཐུགས་བསྐྱེད་རྣམ་པར་དག་པའི་སྒོ་ནས་ལེགས་པར་གསན་འཚལ། དེ་ཡང་དུས་གསུམ་གྱི་རྒྱལ་བ་ཀུན་གྱི་བདག་ཉིད་ཤཱཀྱའི་དབང་པོའི་རྒྱལ་ཚབ་དམ་པར་བསྔགས་པའི་སངས་རྒྱས་གཉིས་པ་ཨོ་རྒྱན་གྱི་སློབ་དཔོན་མཚོ་སྐྱེས་རྡོ་རྗེ་འཆང་ཆེན་པོ་གུ་རུ་པདྨ་འབྱུང་གནས་དེ་ཉིད་ཀྱིས་གདུལ་བྱ་མཐའ་དག་སྨིན་གྲོལ་ཐར་ལམ་ལ་བཀོད་པའི་ཕྱིར་དུ་ཟབ་མོའི་གདམས་པ་ཆེས་ཆེར་དུ་མར་སྩལ་བའི་ནང་ཚན་ལས། འཆི་བ་མེད་པའི་རྡོ་རྗེའི་ཚེ་དང་ཡེ་ཤེས་ཀྱི་དངོས་གྲུབ་སྒྲུབ་པའི་ཉེ་ལམ་ཟབ་མོའི་གཏེར་ཁ་མ་འོངས་ཕྱི་མའི་སེམས་ཅན་རྣམས་ལ་ཐུགས་བརྩེ་བའི་སླད་དུ་གངས་ཅན་བོད་ཀྱི་ཡུལ་འདིར་ཚེ་རིལ་དང་། ཚེ་ཆུ་ལྷག་པར་ཟབ་མོའི་གདམས་པ་འགའ་ཞིག་སྦས་ཤིང་། གནས་ཁྱད་པར་ཅན་བསམ་ཡས་མཆིམས་ཕུ། གཡའ་མ་ལུང་། འབྲས་མོ་ལྗོངས། པདྨ་བཀོད། ཟམ་བུ་ལུང་ལ་

[Full Size]

སོགས་པ་རྣམས་ཚེ་ཡི་སྒྲུབ་གནས་རྣམས་སུ་བྱིན་གྱིས་བརླབས། ཚེ་མི་འགྱུར་བའི་རྒྱ་ཡིས་མཚན་པའི་བྲག་ཕུག་མཱ་ར་ཏི་ཀ། ཡར་ལུང་ཤེལ་བྲག །སྒྲགས་ཀྱི་ཡང་རྫོང་། ལྷོ་བྲག་མཁར་ཆུ། ཁམས་ཀྱི་སེང་གེ་གནམ་མཆོངས། སྐྱིད་འབྱམས་ཀྱི་ཉི་ཟླ་ཕུག་དང་ཐབས་ཤེས་ཕུག་ལ་སོགས་པ་ཡང་ཚེ་བསྒྲུབ་པའི་རང་བྱུང་གི་སྒྲུབ་ཕུག་མང་པོར་བྱིན་གྱིས་བརླབས། རི་བོ་ལྷུན་ཆགས་པ་དཔལ་གྱི་ཙཱ་རི་ཏྲ། གཙང་གི་ཇོ་མོ་ཁ་རག །ཡར་ལྷ་ཤམ་པོ་སོགས་དང་། ཁྱད་པར་ཏི་སེ་གངས་ཀྱི་རི་དང་། ཀམ་པོ་གངས་ཀྱི་ར་བ། རོང་བཙན་ཁ་བ་དཀར་པོ་སོགས་བོད་ཀྱི་འབྲོག་ཆེན་དང་། གངས་རི་ཐམས་ཅད་ཀྱང་རྡོ་རྗེ་ཚེ་ཡི་སྒྲུབ་པའི་གནས་མཆོག་ཏུ་བྱིན་གྱིས་བརླབས། མ་ཕམ་གཡུ་མཚོ། གནམ་མཚོ་ཕྱུག་མོ། ཙཱ་རི་གཡུ་མཚོ། རྨ་ཀུང་ལུང་སོགས་གཏན་འཁྱིལ་གྱི་མཚོ་རྣམས་དང་། ཆུ་མིག་མང་པོ་ཚེ་ཆུ་གཏེར་གནས་སུ་བྱིན་གྱིས་བརླབས་པ་སོགས་རྫུ་འཕྲུལ་གྱི་བཀོད་པས་གཏེར་དུ་སྦས་པ་ལས། ད་ལམ་སྐབས་སུ་བབས་པའི་ཚེའི་སྒྲུབ་པའི་སྒོ་ནས་སྨིན་གྲོལ་གྱི་གདམས་པ་ཟབ་མོ་འདི་ནི་སྔོན་གུ་རུ་པདྨ་འབྱུང་གནས་དང་། ཌཱ་ཀི་ལྷ་ལྕམ་མནྡ་ར་བ་རྣམ་གཉིས་བྲག་ཕུག་མཱ་ཱར་ཏི་ཀར་ཚེ་ཡི་རིག་འཛིན་སྒྲུབ་པའི་ཚེ་མགོན་པོ་ཚེ་དཔག་མེད་དངོས་སུ་བྱོན་ཏེ་བྱིན་གྱིས་བརླབས་ནས་ཚེ་སྒྲུབ་ཀྱི་སྐོར་དུ་མ་གསུངས་ཤིང་། ཨོ་རྒྱན་ཡབ་ཡུམ་དང་གཉིས་མེད་གཅིག་ཏུ་

[Full Size]

འདྲེས། སྐྱེ་འཆི་མེད་པ་རྡོ་རྗེའི་སྐུ་ཐོབ་ནས་སླར་གུ་རུ་ཉིད་གདོང་དམར་བོད་ཀྱི་ཡུལ་དུ་འབྱོན་པའི་སྐབས་མངའ་བདག་འཇམ་དབྱངས་ཀྱི་སྤྲུལ་པ་ཁྲི་སྲོང་ལྡེའུ་བཙན་གྱི་དུས་སུ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་དབུ་རྩེར་གཏན་ལ་ཕབ་ནས་བཀོད་ཅིང་། ཕྱིས་ལྷ་སྲས་མུ་ཁྲི་བཙན་པོར་སྔོན་འཕྲལ་སྨོན་ལམ་བཟང་པོས་མཚམས་སྦྱར་ནས་གཏེར་དུ་སྦས་ཤིང་། དེ་ཉིད་ཀྱི་སྐྱེ་བའི་རྣམ་འཕྲུལ་པ་རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་ཞེས་གྲགས་པ་སྤྲུལ་པའི་གཏེར་ཆེན་གང་དེར་སྔོན་སྦྱངས་སྐྱེས་སྟོབས་ཀྱི་ཡོན་ཏན་སྨིན་པའི་མཐུ་ལས་རྫུ་འཕྲུལ་སྣ་ཚོགས་ལ་དབང་བསྒྱུར་བ་དེ་ཉིད་ཀྱིས་ཨོ་རྒྱན་རིན་པོ་ཆེའི་བྱིན་གྱིས་བརླབས་པའི་སྒྲུབ་གནས་ཆེན་པོ་ཁམས་ཀྱི་སེང་གེ་གནམ་མཆོངས་བྲག་དང་འབྲེལ་བའི་སྙིང་ཐང་སྐྱིད་འབྱམས་ཉི་ཟླ་ཕུག་གི་གཡོན་ཟུར། སྲ་བརྟན་རང་བྱུང་རྡོ་རྗེའི་བྲག་གི་དབུས་ནས་དངོས་སུ་སྐལ་ལྡན་ཀུན་གྱིས་མཐོང་བར་གཏེར་སྒྲོམ་སྤྱན་དྲངས་ནས་མཁའ་འགྲོའི་བརྡའི་ཡི་གེ་བཀྲོལ་ནས་ཇི་ལྟ་བར་གཏན་ལ་ཕབ་ནས་ཟབ་ཆོས་རིན་པོ་ཆེ་གཞན་ལས་ཁྱད་པར་དུ་འཕགས་པ་དཔེར་ན་རྒྱུ་སྐར་སྟོང་གི་དབུས་སུ་ཟླ་བའི་དཀྱིལ་འཁོར་གསལ་ལ་དྭངས་བ་བཞིན་ཚེ་སྒྲུབ་ཐབས་ཤེས་ཁ་སྦྱོར་དུ་གྲགས་པ་འདི་ཉིད་བྱིན་རླབས་ཀྱི་ཚན་ཁ་རྨད་དུ་བྱུང་བ་སྟེ། དེ་དག་གི་དཀྱིལ་འཁོར་གཉེན་པོའི་སྒོ་ནས་སྨིན་བྱེད་ཀྱི་དབང་བསྐུར་

[Full Size]

བསྒྲུབ་པ་ལ་ཞིང་ཁམས་ཀྱི་ལོ་རྒྱུས་གཏེར་གཞུང་རྡོ་རྗེའི་ཚིག་ནས་གསུངས་པ་ལྟར་བརྗོད་པར་བྱ་སྟེ། དེ་ཡང་ཐ་ཚིག་ལོ་རྒྱུས་མདོར་ཙམ་བསྟན་པ་ནི༔ སོགས་ནས། ཞལ་གདམས་མ་ནོར་བ་ཉིད་མཐར་ཕྱིན་པའོཿཅེས་པའི་བར་བརྗོད་ལ། དེ་ལྟར་སྐལ་ལྡན་ཁྱེད་རྣམས་ཀྱིས་དད་པ་མོས་གུས་དག་པའི་སྣང་བས་སྤྲོ་བ་བསྐྱེད་པར་མཛོད་ལ། གསང་བ་སྔགས་ཀྱི་རྣལ་འབྱོར་དཀྱིལ་འཁོར་གཉེན་པོ་འཇུག་པའི་བློས་ཐོག་མར་བླ་མ་དང་དཀྱིལ་འཁོར་གྱི་གཙོ་བོ་དབྱེར་མེད་པའི་དྲུང་དུ་སྐྱབས་སུ་འགྲོ་བ་དང་སེམས་བསྐྱེད་པའི་རྗེས་ཟློས་མཛོད། དཀོན་མཆོག་གསུམ་དང་སོགས། ལན་གསུམ། མ་གྱུར་དུས་གསུམ་སོགས། དེ་ནས་ཁྱེད་རང་རྣམས་ཀྱི་ཚེ་རབས་འཁོར་བ་ཐོག་མེད་ནས་བསགས་པའི་རྒྱུ་དང་འབྲས་བུའི་སྡིག་པ་དང་སྒྲིབ་པ་ཐམས་ཅད་དཀྱིལ་འཁོར་ལྷ་ཚོགས་རྣམས་ཀྱི་སྤྱན་སྔར་གནོང་འགྱོད་དྲག་པོས་བཤགས་པའི་སྒོ་ནས་འདིའི་རྗེས་ཟློས། ན་མོ་ཡེ་ནས་ལས་དབང་སོགས། དེ་ལྟར་ནོངས་བཤགས་ཚངས་པར་བསྩལ་ནས་ལས་དང་ཉོན་མོངས་ཀྱི་སྒྲིབ་པའི་མུན་པ་རྣམས་བསལ། ཤེས་རབ་ཡེ་ཤེས་གསལ་བའི་སྤྱན་དང་ལྡན་པར་མོས་ཤིག །གསེར་གྱི་ཐུར་མ་ཐོགས་ལ། ཧོཿསྐྱེས་བུ་ཁྱེད་རྣམས་སོགས་ཀྱིས་མིག་དར་བསལ་ལ་ལྷ་ངོ་བསྟན་པ་ནི། ཧོ་གསན་དུ་གསོལ་ལོ་སོགས། རྡོ་རྗེའི་དཀྱིལ་འཁོར་ལ་རེག་པའི་མོས་

[Full Size]

པས། འོ་རིགས་ཀྱི་བུ་རྣམས་སོགས་ནས། བསོད་ནམས་ཕུན་སུམ་ཚོགས་པའོ། །བར་བརྗོད་ལ། དེ་ནས་མདུན་བསྐྱེད་ཡེ་ཤེས་ཀྱི་དཀྱིལ་འཁོར་བ་རྣམས་དང་། སློབ་དཔོན་ཚེ་དཔག་མེད་ཀྱི་དཀྱིལ་འཁོར་གསལ་བའི་ཐུགས་ཀ་ནས་འོད་ཟེར་འཕྲོས་པས་ཕྱོགས་དུས་རྒྱལ་བ་སྲས་དང་བཅས་པའི་ཐུགས་རྒྱུད་བསྐུལ་ནས་ཁྱད་པར་དུ་ཚེ་འོད་སྣང་བ་དཔག་ཏུ་མེད་པ་ཡེ་ཤེས་སེམས་དཔའི་ལྷ་ཚོགས་རྣམས་སྐུ་ཆེ་ཆུང་སྣ་ཚོགས་པ་མདུན་གྱི་ནམ་མཁར་བྱོན་ནས་དེ་དག་རྣམས་ཀྱི་ཡེ་ཤེས་ཆེན་པོའི་གསང་བ་བསམ་གྱིས་མི་ཁྱབ་པའི་ཕྲིན་ལས་ཀྱིས་བྱིན་གྱིས་བརླབ་པའི་མོས་པ་མཛོད་ཅིག །དེ་ནས་རོལ་ཆས་རྣམས་ལྡིར་ལ་མདའ་དར་གཡབ། སྤོས་འགྲིམ་ལ། ཧཱུྃ། ཞིང་ཁམས་རྣམ་དག་སོགས་ཀྱིས་སློབ་མ་ལ་བྱིན་འབེབས་དང་། རང་ཉིད་ཀྱང་ཐབས་ཤེས་ཀྱི་དཀྱིལ་འཁོར་གསལ་བཏབ། ཧཱུྃ། ཡེ་ཤེས་ལྔ་ལྡན་སོགས་ཀྱིས་སྤྱན་འདྲེན། ས་མ་ཡ་ཛཿཛ་ཧཱུྃ་བྃ་ཧོཿབར་བརྗོད་ལ། སྤྲོས་མེད་ཀྱི་མཆོད་བསྟོད་དམིགས་པ་བྱ། དེ་ནས་དབང་གི་གཞི་འགོད་པའི་སླད་དུ་ཁྱེད་རང་རྣམས་དམིགས་པ་འདི་བཞིན་མཛོད། ཧྲཱིཿའདིར་ཚོགས་སྐལ་ལྡན་སོགས་ནས། ཏིཥྛ་བཛྲཿཞེས་རྡོ་རྗེ་སྤྱི་བོར་བཞག་ལ་ཡེ་ཤེས་པ་རྣམས་དབྱེར་མེད་དུ་བསྟིམ་པར་བྱའོ། །དེ་ལྟར་རྡོ་རྗེ་སྤྱི་བོར་བཞག་པས་ཡེ་ཤེས་པ་དེ་ཉིད་བྱང་ཆུབ་མ་ཐོབ་བར་དུ་འདུ་འབྲལ་མེད་པའི་མོས་པ་མཛོད། དེ་ནས་མདུན་བསྐྱེད་ཀྱི་དཀྱིལ་འཁོར་ལྷ་

[Full Size]

ཚོགས་རྣམས་དང་། སློབ་དཔོན་ལྷར་གསལ་བའི་བུམ་པའི་དཀྱིལ་འཁོར་དང་། ནམ་མཁར་གནས་པའི་ལྷ་ཚོགས་རྣམས་ཏེ་ཐབས་ཤེས་ཁ་སྦྱོར་གྱི་དཀྱིལ་འཁོར་བ་རྣམས་ཀྱི་སྐུ་ཡི་ཆ་ལས་ཡེ་ཤེས་བདུད་རྩིའི་རྒྱུན་བབས། བུམ་ནང་ནས་ཁོལ་ཞིང་ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་སེམས་བདེ་བ་ཆེན་པོས་ཁྱབ་པར་སྒོམས་ཤིག །ཧཱུྃ། པདྨ་རཱ་གའི་བུམ་དཀྱིལ་དབུས༔ ཞེས་སོགས་དབང་བསྐུར་ཡོངས་རྫོགས་བཏོན་ནས། དེ་དག་རྣམས་ཀྱིས་རྒྱལ་བ་སྲས་དང་བཙུན་མོ་ཡབ་ཡུམ་ཉན་རང་བྱང་སེམས་རིགས་ལྔ་དང་ཡུམ་ལྔ། སེམས་དཔའ་དང་སེམས་མ་ཐུབ་པ་རིགས་དྲུག །ལྷ་མོ་བཅུ་དྲུག །སྒོ་སྲུང་ཁྲོ་བོ་ཡབ་ཡུམ་རྣམས་ཀྱི་སྨིན་བྱེད་བདུད་རྩིའི་རྒྱུན་གྱི་དབང་མཆོག་དམ་པ་ཐོབ་པ་ཡིན་ནོ། །དེ་ནས་ལྷ་དབང་ལུས་ལ་བསྐུར་བའི་དོན་དུ་འདིའི་རྗེས་ཟློས། ཀྱེ། རྡོ་རྗེ་འཛིན་པ་སོགས། སློབ་དཔོན་གྱིས། ཀྱཻ། ཡི་དམ་ལྷ་ཡི་བསྐྱེད་རིམ་ལ༔ སོགས་ནས། རིགས་ཀྱི་བུ༔ བར་བརྗོད། དེ་ནས་མདུན་བསྐྱེད་དཀྱིལ་འཁོར་ལྷ་ཚོགས་རྣམས་ཀྱི་སྐུ་ལས་མར་མེ་གཅིག་ལ་གཉིས་མཆེད་ཀྱི་ཚུལ་དུ་བྱོན་ནས་ཁྱེད་རང་རྣམས་ལ་ཐིམ་པས་རྣམ་དག་རྒྱལ་བའི་དཀྱིལ་འཁོར་མ་ལུས་པ་གཅིག་ཆར་དུ་དབྱེར་མེད་པར་རྟོགས་པའི་འདུན་པ་མཛོད་ཅིག །ཧཱུྃ། རྒྱལ་བ་རབ་འབྱམས་གཅིག་བསྡུས་པའི༔ སོགས་སྐུ་གཟུགས་དབང་རྣམས་ཡོངས་རྫོགས་བསྐུར་

[Full Size]

ནས། དེ་ལྟར་བཅོམ་ལྡན་འདས་རྡོ་རྗེ་ཚེ་དང་ཡེ་ཤེས་ཀྱི་འོད་དཔག་ཏུ་མེད་པ་ཡབ་ཡུམ་སྲས་དང་བཙུན་མོ་ཉན་རང་རྣམས་དང་། རྒྱལ་བ་རིགས་ལྔ་ཡབ་ཡུམ་སོགས་ཀྱི་དབང་བསྐུར་བས་ཕུང་པོ་ལྔ་དང་ཁམས་ལྔ་རྣམ་པར་དག་སྟེ་སྐུ་ལྔ་ཡེ་ཤེས་ལྔ་མངོན་དུ་གྱུར་པའི་གོ་འཕང་ཐོབ། ཉེ་སྲས་སེམས་དཔའ་རྣམས་ཀྱི་དབང་བསྐུར་བས་ཚོགས་བརྒྱད་ཀྱི་འཆིང་བ་རང་སར་གྲོལ། སྤྲུལ་སྐུ་ཐུབ་པ་དྲུག་གི་དབང་བསྐུར་བས་རིགས་དྲུག་གི་རྣམ་སྨིན་དག་ནས་སྐྱེ་བའི་སྒོ་ཆོད། ལྷ་མོ་བཅུ་དྲུག་གི་དབང་བསྐུར་བས་ཡུལ་དང་ཡུལ་ཅན་གྱི་སྣང་བ་ཐམས་ཅད་རྣམ་པར་དག་སྟེ་གཉིས་འཛིན་འཁྲུལ་པའི་སྒྲིབ་པ་རང་སར་དག །སྒོ་སྲུང་ཁྲོ་བོ་ཁྲོ་མོའི་དབང་བསྐུར་བས་བདུད་བཞིའི་བར་ཆད་རྩད་ནས་གཅོད་ཅིང་ལས་བཞི་གྲུབ་པ་ཆེན་པོ་བརྒྱད་ཀྱི་དངོས་གྲུབ་དང་། ཁྱད་པར་དུ་འཆི་མེད་ཚེའི་གོ་འཕང་བདེ་བླག་ཏུ་ཐོབ་པའི་སྐལ་བ་དང་ལྡན་པར་བྱས་སོ། །དེ་ནས་ལྷུང་བཟེད་དང་། །འཁར་གསིལ་ཆོས་གོས་གཏད་ལ། ཧཱུྃ། རྡོ་རྗེ་ཚེ་ཡི་ལྷ་ཚོགས་ཀྱིས༔ སོགས་དང་། དེ་ལྟར་ཀུན་རྫོབ་མཚན་མ་རྫས་ཀྱི་དབང་བསྐུར་བའི་རྟེན་འབྲེལ་ལས་དོན་དམ་པར་སྤྲུལ་པའི་སྐུའི་རོལ་པས་འགྲོ་བ་རྣམས་ཡང་དག་པའི་ལམ་ལ་བཀོད་པའི་སྨོན་ལམ་འབྲ ེལ་པ་འདི་དགོས་པ་ཁྱད་པར་དུ་འཕགས་པའོ། །ཁྲོ་ཆས་རྣམས་ཐོགས་ལ། ཧཱུྃ། དཔལ་གྱི་དུར་ཁྲོད་

[Full Size]

ཆས་སོགས། དེ་ལྟར་དུར་ཁྲོད་དཔའ་ཆས་བརྒྱད་ཀྱིས་བརྒྱན་པའི་དབང་བསྐུར་བའི་མཐུས་བདུད་བཞི་དང་ཉོན་མོངས་མ་ལུས་རྩད་ནས་འཇོམས་ཤིང་ཚེ་འདི་ཉིད་ལ་དཔལ་ཧེ་རུ་ཀའི་གོ་འཕང་ཐོབ་པའི་རྟེན་འབྲེལ་ཕུན་སུམ་ཚོགས་པའོ། །འདོད་ཡོན་ལྔ་ཐོགས་ལ། ཧཱུྃ། མཛེས་ཤིང་ཡིད་འོང་སོགས། དེ་ལྟར་ཚེ་རབས་ཐམས་ཅད་དུ་འདོད་པའི་ཡོན་ཏན་རྣམས་ལ་རྟག་པར་ལོངས་སྤྱོད་ཅིང་མི་ཟད་པའི་ནམ་མཁའ་མཛོད་ལ་དབང་འབྱོར་བའི་སྦྱིན་པའི་ཕ་རོལ་ཏུ་ཕྱིན་པ་མཆོག་ཏུ་གྱུར་པའི་སྐལ་བ་དང་ལྡན་པའི་དགོས་པའོ། །དེ་ནས་སྤྱི་འགྲེ་ལྟར་ན་ཚེ་འགུགས་ལ་འཇུག །དེ་མིན་སྐབས་འདིར་སྦྱིན་སྲེག་ལས་མཐའ་དང་། པུསྟིའི་ལུང་སྦྱིན་གཉིས་དང་འོག་ནས་འབྱུང་བའི་ཆོས་སྐྱོང་བཀའ་གཏད་བཅས་ཆོས་བརྒྱུད་སྤེལ་ངེས་ཀྱི་སློབ་མ་མ་གཏོགས་གར་ཐོད་ཐོད་དུ་མི་བྱ། སྤྲོ་ན། ལིང་ག་ལ་ཚེ་བདུད་འགུགས་པ་ནི། ཧཱུྃ། དཀོན་མཆོག་གསུམ་དང་སོགས་བདེན་སྟོབས་ཀྱིས་བཀུག །ཧཱུྃ། རྡོ་རྗེ་ཚེ་དཔག་སོགས་ཀྱིས་ཕུར་པས་བསྒྲལ། ལིངྒ་མེར་བསྲེག་ཞལ་བསྟབ་འདོན། ལས་མཐའ་སློབ་མར་སྦྱིན། དེ་ནས་ཕྱི་ལྟར་ན་གསུང་རབ་ཀྱི་གླེགས་བམ་ཨ་ཡིག་དཀར་པོས་མཚན་པ། ནང་ལྟར་ན་རྒྱལ་བ་རབ་འབྱམས་རྣམས་ཀྱི་གསང་སྔགས་དམ་པའི་ཆོས་ཀྱི་རང་སྒྲ་སྒྲོགས་པ་འདིའི་དབང་བསྐུར་བས་ཁྱེད་རང་རྣམས་ཀྱི་རྒྱུད་ལ་གསུང་དབྱངས་ཡན་ལག་དྲུག་ཅུའི་

[Full Size]

ནུས་པ་མཐར་ཕྱིན་ནས་འགྲོ་བའི་དོན་རླབས་པོ་ཆེ་མྱུར་བ་ཉིད་དུ་སྤྱོད་ནུས་པ་ལ་དབང་ཐོབ་པའི་མོས་པ་མཛོད། ཧཱུྃ། རབ་འབྱམས་རྒྱལ་བའི་གསུངས་སོགས་དང་། དེ་ནས་དཀྱིལ་འཁོར་གྱི་ལྷ་ཚོགས་རྣམས་ལ་གསོལ་བ་བཏབ་པས་གཙོ་འཁོར་རྣམས་དང་ཁྱད་པར་ཚེ་བདག་རྒྱལ་བ་རིགས་ལྔ་ཡབ་ཡུམ་རྣམས་ཀྱིས་རང་འདྲའི་སྤྲུལ་པ་དཔག་ཏུ་མེད་པ་ཕྱོགས་བཅུར་སྤྲོས་ནས་ཁྱེད་རང་རྣམས་ཀྱི་ཚེ་ཡར་བ་དང་ཆད་པ་དང་འཐོར་བ་རྣམས་དང་། འབྱུང་བ་བཞི། ཁམས་གསུམ་སྲིད་བཅུད་དཔལ་འབྱོར་གྱི་དྭངས་མ། ཕྱོགས་བཅུའི་རྒྱལ་བ་རྣམས་ཀྱི་གསང་གསུམ་མི་བཟད་པ་རྒྱན་གྱི་འཁོར་ལོའི་དངོས་གྲུབ་ཐམས་ཅད་ཚེ་བདག་ཚེ་འགུགས་ཆེན་པོ་ཡབ་ཡུམ་བཅུའི་ཕྱག་གི་བུམ་པར་བསྡུས་ནས་ཁྱེད་རང་རྣམས་ཀྱི་རྒྱུད་ལ་དབྱེར་མེད་དུ་བསྟིམ་ནས་ཚེ་མི་ནུབ་པ་རྒྱལ་མཚན་ལྟ་བུ། མི་འགྱུར་བ་གཡུང་དྲུང་ལྟ་བུ། མི་ཤིགས་པ་རྡོ་རྗེ་ལྟ་བུར་རྟག་བརྟན་གཞོམ་བྲལ་ཆེན་པོར་རྒྱས་གདབ་པའི་མོས་པ་མཛོད། ཀྱཻ། ཉི་མ་ཤར་ཕྱོགས་རྡོ་རྗེའི་རིགས༔ སོགས། དབྱངས་སྙན་པོས་བརྗོད་ཅིང་མདའ་དར་གཡབ་ནས་མགོར་བཞག །རྡོ་རྗེ་འཆང་དབང་མྱུར་འགྲུབ་ཤོག༔ བར་བརྗོད་ནས། དེ་ལྟར་ཡེ་ཤེས་ལྔ་ཡི་ངོ་བོས་དུག་ལྔའི་ཟེར་བཅོམ་སྟེ་འགུགས་པ་དང་། ལྷ་མོ་ལྔ་ཡི་ངོ་

[Full Size]

བོས་ཁམས་ལྔའི་བཅུད་བསྡུས་ཏེ་ཚེ་འགུགས་པ་དང་། དབྱིངས་རིག་རྡོ་རྗེ་དབྱིངས་ཕྱུག་མ་དང་རྡོ་རྗེ་འཆང་གཉིས་ངོ་བོར་འདྲེས་ཏེ་ཁྱེད་རང་རྣམས་ཀྱི་སེམས་ཀུན་ཏུ་བཟང་པོ་སྐྱེ་འཆི་དང་བྲལ་བའི་ཀློང་དུ་སྐྱེ་མེད་དུ་ཐག་བཅད། འཆི་མེད་དུ་གདེང་བཅའ། རེ་དོགས་ལ་བདེན་མེད། སྣང་བའི་ཡུལ་དང་བྱེད་ལས་ཀུན་རྫོབ་སྒྱུ་མ་སྨིག་རྒྱུ་ལྟ་བུར་མདོར་ན་དངོས་སྣང་གིས་བསྡུས་པའི་ཆོས་ཐམས་ཅད་དག་པ་ཡེ་ཤེས་ཀྱི་ངང་དུ་རོལ་པ་མཛོད་ཅིག །དེ་ནས་དཔལ་གྱི་གཏོར་མ་འདི་ཉིད་རྡོ་རྗེ་ཚེ་ཡི་ལྷ་ཚོགས་རྣམས་ཀྱི་དཀྱིལ་འཁོར་ཆེན་པོའི་གནས་ཏེ། ཁྱེད་རང་རྣམས་ཀྱི་སྤྱི་བོར་བཞག་པས་དབང་བཞི་ཐོབ། རྒྱུད་བཞི་སྨིན། སྐུ་བཞི་འགྲུབ། ལམ་བཞི་འབྱོང་། འཆི་བ་མེད་པའི་ཚེ་ཐོབ། རྒུད་པ་མེད་པའི་ལང་ཚོ་རྒྱས། རྟག་བརྟན་གཞོམ་གཞིག་དང་བྲལ་བའི་མགོན་པོ་ཚེ་དཔག་མེད་དང་དབྱེར་མེད་པ་གཏོར་མ་ལྷར་གསལ་བ་མཚོ་ལ་ཆར་བབ་པ་ལྟར་ཁྱེད་རང་རྣམས་ལ་ཐིམ་པའི་མོས་པ་མཛོད་ཅིག །ཧཱུྃ། དཔལ་གྱི་གཏོར་མ་རི་རབ་འབར༔ སོགས་བརྗོད་ནས། གཏོར་མ་སྤྱི་བོར་བཞག །འདིར་གཞུང་ལས་མ་གསལ་ཀྱང་ཚེ་རིལ་ཆང་སྦྱིན་པ་ནི། བཀྲ་ཤིས་ཚེ་ཡི་རང་བཞིན་ཅན། །རྩི་བཅུད་སྙིང་པོའི་རིལ་བུ་འདི། །ཚེ་དཔལ་འགྱུར་བ་མེད་པའི་རྫས། །དངོས་གྲུབ་དམ་

[Full Size]

པ་འདིར་རོལ་ཅིག །བཀྲ་ཤིས་ཚེ་མཆོག་རྒྱ་མཚོ་ཆེ། །འཆི་མེད་ལྷ་ཡི་བདུད་རྩི་དངོས། །ཚེ་རིང་དཔལ་གྱི་གཏེར་ཆེན་པོའི། །དངོས་གྲུབ་དམ་པ་རྟག་རོལ་ཅིག །ཅེས་བརྗོད་ལ་བར་སྐབས་ཚེ་གཟུངས་རྣམས་བཟླས་སོ། །སྐབས་འདིར་སྤྲོ་ན་ཆོས་སྐྱོང་བཀའ་གཏད་གཞུང་ལྟར་བྱ། དེ་ནས་དབང་གི་མཐའ་རྟེན་ནི། དེང་ཕྱིན་ཆད་ཁྱེད་རྣམས་ཀྱིས་ཐེག་ཆེན་བྱང་ཆུབ་སྤྱོད་པའི་སེམས་དང་མ་བྲལ་བར་གྱིས་ལ་རིགས་ཀུན་གྱི་ཁྱབ་བདག་དཀྱིལ་འཁོར་ཡོངས་ཀྱི་གཙོ་བོ་རྡོ་རྗེ་འཆང་སྤྱི་བོར་བསྒོམ་ནས་ཚད་མེད་སྙིང་རྗེ་ཆེན་པོའི་གོ་ཆ་བགོས་ཏེ་སེམས་ཅན་ཐམས་ཅད་བྱང་ཆུབ་ཀྱི་ས་ལ་འགོད་ནུས་པའི་དབང་ཐོབ་པའི་མོས་པ་མཛོད། ཧཱུྃ། རང་ལས་གཞན་གཅེས་བསམ་པ་ཡིས༔ སོགས་སྐུ་སྤྱི་བོར་བཞག །དེ་ནས་བྱང་ཆུབ་སྙིང་པོའི་བར་དུ་བླ་མ་བཅོམ་ལྡན་འདས་ཚེ་དཔག་མེད་དབྱེར་མེད་པར་སྤྱི་བོར་བསྒོམ་ལ་ལྷག་པའི་ལྷར་འཛིན་ནས་དམ་ཚིག་སྲུང་སྡོམ་རྣམས་ཚུལ་བཞིན་དུ་འཛིན་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་དང་། ཧཱུྃ། བདག་ལུས་ཕུང་ཁམས་སོགས་ཀྱིས་མཎྜལ་འབུལ། ལུས་ལོངས་སྤྱོད་གཏང་རག་གིས་ཡོན་དུ་འབུལ་བའི་བློས་འདིའི་རྗེས་ཟློས། དེང་ནས་བརྩམས་ཏེ་སོགས། དེ་ལྟར་སྤྲུལ་པའི་གཏེར་ཆེན་རིག་པ་འཛིན་པ་

[Full Size]

ཡོངས་ཀྱི་གཙོ་མཆོག་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱི་གཏེར་བྱོན་ཟབ་ཆོས་ཚེ་སྒྲུབ་ཁྱད་པར་དུ་འཕགས་པ་ཐབས་ཤེས་ཁ་སྦྱོར་ཞེས་བྱ་བ་ཟབ་གནད་བཀའ་རྒྱ་ཅན་གྱི་དཀྱིལ་འཁོར་གཉན་པོའི་དབང་བསྐུར་ཟབ་མོ་ལེགས་པར་གྲུབ་པས་དེ་ལ་བརྟེན་ནས་རང་དང་གཞན་ཕན་རྣམ་པར་དཀར་བའི་ལས་ལ་སྦྱོར་བའི་དོན་ལ་ཡང་དག་པར་སྤྱོད་པར་མཛོད་ཅིག །སློབ་མ་རྣམས་གྲོལ། སྐུ་གསུམ་བླ་མ་དང་། རྟེན་དང་གཏོར་མའི་སོགས། བཀྲ་ཤིས་དང་སྨོན་ལམ་གྱིས་མཐའ་བརྒྱན་པར་བྱའོ། །ཅེས་པ་པུནྱ་མ་ཎི་ཞེས་པས་འདི་ལྟར་ཡོངས་ལ་ཕན་པའི་ཕྱིར་དུ་ལྷག་བསམ་བཟང་པོས་བསྐུལ་བའི་ངོར། སི་ཏུ་པདྨ་ཉིན་བྱེད་དབང་པོས་ཕུན་སུམ་ཚོགས་པའི་རྟེན་འབྱུང་གི་དུས་དང་སྦྱོར་བར་དགེ་བ་སྤེལ་བ་མངྒ་ལཾ། ཛ་ཡནྟུ། དགེའོ།། །།

ནམ་སྙིང་ཚེ་སྒྲུབ་དབང་གི་མཚམས་སྦྱོར།

[Full Size]

ནམ་སྙིང་ཚེ་སྒྲུབ་དབང་གི་མཚམས་སྦྱོར་བཞུགས། ན་མོ་བཛྲ་ཨ་མི་ཏཱ་ཡུ་ུཥེ། འཆི་མེད་རིག་འཛིན་ཐུགས་ཀྱི་བཅུད། །ཡང་ཟབ་ཚེ་སྒྲུབ་ཨ་ཏིའི་ལུགས། །བྱིན་རླབས་བཅུད་དྲིལ་སྨིན་དབང་གི། མཚམས་སྦྱོར་བདུད་རྩིའི་གྲུ་ཆར་སྤྲོ། །དེ་ཡང་དང་པོ་རྩ་གསུམ་གྱི་ཞལ་ཐང་བཤམས་ཤིང་མདུན་དུ་སྟེགས་ཀྱི་ཁར་མཎྜལ་ལ་རྡུལ་ཚོན་གཞུང་མཐུན་ནམ། ཚོམ་བུ་གང་རུང་གི་སྟེང་དུ་མཉྫིའི་ཁར་དཔལ་གཏོར་རྒྱན་ལྡན་གྱི་རྩེར། སྐུ་རྟེན་ཙཀླི་ཡོད་ན་བཙུགས། མདུན་དུ་སྨན་རཀ་གཏོར་གསུམ། མཆོད་པ་ཕྲེང་ཚར། ལས་བུམ་གང་བདེར། ཚེ་རིལ་ཆང་ཡང་བཀོད། སྔོན་འགྲོ་དཀར་བགེགས། སྤོས་ཐུན་ཌཱ་དྲིལ་སོགས་འདུ་བྱས་ལ། ལས་བྱང་བསྙེན་པ་ཡན་གྲངས་གསོག་དགོས་མིན་དབང་བསྐུར་གྲངས་སམ། ལོང་སྐབས་དང་བསྟུན་ལ་བདག་འཇུག་དབང་ལེན། ཧྲཱིཿརང་གི་རང་རིག་སོགས་ཀྱིས་གཏོར་མ་སྤྱི་བོར་བཞག །ཚེ་རིལ་ཆང་དངོས་གྲུབ་ཏུ་རོལ། ལས་བུམ་རྟ་མགྲིན་བསྐྱེད་བཟླས་ཀྱང་བྱ། དེ་ནས་སློབ་མ་རྣམས་འཚོགས་ལ། ཇི་ལྟར་བལྟམས་པ་སོགས་ཀྱིས་ཁྲུས་དང་སྔོན་གཏོར་བྲན། དཀར་བགེགས་པདྨ་བཛྲ་ལྟར་བཏང་། གུ་གུལ་བདུག །ཡུངས་ཀར་བྲབ། སྲུང་འཁོར། ཧྲཱིཿསྣང་སྲིད་ལྷ་ཡི་སོགས་དང་། མཎྜལ་བཀྱེ་བསྡུ་བྱ། འོ་ན་ནམ་མཁའ་དང་མཉམ་པའི་སེམས་ཅན་ཐམས་ཅད་མགོན་པོ་ཚེ་དང་ཡེ་ཤེས་དཔག་ཏུ་མེད་པའི་གོ་འཕང་ལ་འགོད་པར་བྱ། དེའི་ཆེད་དུ་ཚེ་དབང་ཟབ་མོ་ཞུ་སྙམ་པ་བྱང་ཆུབ་ཀྱི་ཐུགས་བསྐྱེད་གསལ་བཏབ་ནས་གསན་འཚལ། དེ་ཡང་བསོད་ནམས་ཀྱི་

[Full Size]

ཚོགས་རྒྱ་ཆེན་པོ་ལས་གྲུབ་པའི་མི་ལུས་རིན་པོ་ཆེ་ཁམས་དྲུག་ལྡན་པ་འདིའང་། སྲོག་གཅོད་པའི་དབང་གིས་ཚེ་ཐུང་བ་དང་། རྡེག་བརྡུང་བརྔན་ཆེན་བྱས་པས་ནད་མང་ཞིང་། ཁྱད་པར་སུམ་ཅུ་ཁ་རལ་གྱི་དུས་སུ་གློ་བུར་གྱི་འཆི་རྐྱེན་བསམ་གྱིས་མི་ཁྱབ་པ་དེ་དག་ཀྱང་ལས་སྔོན་སོང་གི་འབྲས་བུ་བསླུ་མེད་སྨིན་པར་ངེས་པས། མོ་བོན་རྩིས་སོགས་ཀུན་རྫོབ་ཀྱི་སྲུང་སྐྱོབ་སྤྱི་དང་། ཁྱད་པར་སྲོག་གཅོད་ཀྱི་མཆོད་སྦྱིན་སོགས་སྡིག་དང་འདྲེས་པའི་དགེ་བས་འཕྲལ་ཕུག་གཉིས་ཀར་རྣམ་སྨིན་ལོག་པར་འགྱུར་བས། རྒྱུ་སྲོག་གཅོད་སྤངས་ཤིང་མི་འཇིག་པ་སྲོག་གི་སྦྱིན་པ་སོགས་ཆོས་དང་ཟང་ཟིང་གི་གཏོང་བ་ལ་གོམས་པས་ཚེ་བསྲིང་བ་མདོ་སྔགས་ཐུན་མོང་གི་ལུགས་དང་། རྐྱེན་རྩ་གསུམ་ལྷ་ཡི་བྱིན་རླབས་ལ་བརྟེན་ཏེ་ཚེ་བསྲིང་བ་ནི་སྔགས་ལུགས་ཁྱད་པར་བ་སྟེ་ཐབས་ཟབ་ཅིང་རྒྱ་ཆེ་ལ་འཕྲལ་ཕུག་གཉིས་ཀར་རྟག་བརྟན་བདེ་བའི་དཔལ་ཡོན་གོང་འཕེལ་དུ་འགྱུར་བས། དེ་ལྟ་བུའི་རྒྱུད་དང་མན་ངག་སྒྲུབ་ཐབས་ཀྱི་རིམ་པ་གསར་རྙིང་བཀའ་གཏེར་གདམས་ངག་མཐའ་ཡས་པ་ཞིག་བཞུགས་པ་ལས། ད་ལམ་གྱི་སྐབས་འདིར་གསང་སྔགས་རྙིང་མ་བ་གཏེར་གྱི་ཕྱོགས་སུ་གཏོགས་པ་མགོན་པོ་ཚེ་དཔག་མེད་རྡོ་རྗེ་སློབ་དཔོན་གྱི་རྣམ་པར་རོལ་པ་ནམ་མཁའ་ཇི་སྲིད་སྐྱེ་འཆི་འདས་གྲོངས་མི་མངའ་བར་འཇའ་ལུས་འཕོ་བ་ཆེན་པོས་འཁོར་བ་དོང་སྤྲུགས་མཛད་པ་དུས་གསུམ་

[Full Size]

ཀུན་མཁྱེན་པདྨ་སཾ་བྷ་བ་དེ་ཉིད་ཀྱིས་རྒྱལ་པོ་ཁྲི་སྲོང་ལྡེའུ་བཙན་གྱི་ཐུགས་བཞེད་བསྐང་ཕྱིར་བོད་ཡུལ་དུ་བསྟན་པའི་སྒྲོན་མེ་སྤར་བ་མཛད་པའི་སྐབས། ཚེ་གཅིག་གིས་གྲུབ་པ་རྣམ་གཉིས་མངོན་དུ་བརྙེས་པའི་ལོ་ཙཱ་བ་བརྒྱ་རྩ་བརྒྱད་ཀྱི་ནང་ནས། ལས་ཅན་དག་པའི་འཁོར་དགུའི་ཡ་གྱལ། ཡང་དག་ཐུགས་ཀྱི་རིག་འཛིན་གནུབ་བན་ནམ་མཁའི་སྙིང་པོས་ཕྱི་རབས་ཀྱི་དོན་དུ་གཡུ་ཡི་མཎྜལ་ཕུལ་ནས་གསོལ་བ་བཏབ་པས་ཨོ་རྒྱན་རིན་པོ་ཆེ་ར་ས་འཕྲུལ་སྣང་དུ་རབ་གནས་ལ་ཕེབས་པའི་ཤུལ་དུ། ཡེ་ཤེས་སེམས་དཔའ་སྐུ་ཚབ་གཟུགས་བརྙན་གྱི་རྣམ་པར་བྱིན་གྱིས་བརླབས་པ་དེའི་ཞལ་ནས་ཇི་ལྟར་གསུངས་པའི་ཚེ་སྒྲུབ་རྡོ་རྗེའི་ཚིག་རྐང་རྣམས་གནུབས་བན་ཆེན་པོས་ཐུགས་ཉམས་སུ་བསྟར་བས་དགུང་ལོ་ཉིས་བརྒྱ་ལྷག་ཙམ་བཞུགས་ཤིང་། ཕྱིས་སྡིག་སྤྱོད་རྒྱལ་པོ་གླང་དར་གྱིས་བསྟན་པ་ལ་འཚེ་བ་བརྩམས་པའི་སྐབས་སུ། དྲི་ཆུ་བྷནྡྷ་གང་ལ་བརྟེན་ཏེ་བསྐྱེད་བཟླས་མཛད་པ་ཙམ་གྱིས་ཚེ་ལྷའི་དཀྱིལ་འཁོར་མདུན་དུ་ལྷགས། འོད་ཟེར་དྲི་ཆུ་ལ་ཕོག་པས་ཁྲོ་ཆུ་ཁོལ་མ་དང་ཐོག་སེར་དུ་གྱུར་ནས་རྒྱལ་པོ་འཇིགས་ཤིང་སྤ་བཀོང་། སྡིག་བློན་རྣམས་ཀྱང་བརྒྱལ། ཧཱུྃ་སྒྲ་བསྒྲགས་པས་ཕ་རོལ་གཞན་སེམས་ཕམ་པ་སོགས་དངོས་གྲུབ་ནུས་མཐུ་གཅིག་ཅར་དུ་ཐོབ་པའི་ཟབ་ཆོས་དེ་ལྟ་བུ་མ་འོངས་ད་ལྟའི་སྐལ་ལྡན་ལས་ཅན་རྣམས་ཀྱི་དོན་དུ། ཁམས་ཀྱི་

[Full Size]

གནས་ཆེན་ཉེར་ལྔའི་ནང་ཚན་སྐྱིད་འབྱམས་སྒྲུབ་གནས་སེང་གེ་གནམ་མཆོངས་ཀྱི་ཉེ་ཆར་ཉི་ཟླ་ཕུག་གི་མདུན་ཟུར་འགྱུར་མེད་རྡོ་རྗེའི་བྲག་ལ་རྒྱས་བཏབ་པ། ཆོས་རྒྱལ་མུ་ཁྲི་བཙན་པོའི་སྐྱེ་མཐའ་སྤྲུལ་པའི་རིག་འཛིན་ཆེན་པོ་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱིས་ལས་ཅན་དུ་མ་འཚོགས་པའི་དབུས་སུ་ཟླ་བ་བདུན་དུ་འབད་རྩོལ་ཆེན་པོས་རྡོ་རྗེའི་རྒྱ་བཀྲོལ་བའི་ཚུལ་མཛད་པས་མཚོན་ཡིད་ཆེས་ངོ་མཚར་རྨད་དུ་བྱུང་ཞིང་བྱིན་རླབས་ཀྱི་ཚན་ཁ་ལྷག་པར་ཆེ་བར་རྡོ་རྗེའི་གསུང་ལས། ཆོས་རྣམས་ཀུན་གྱི་དོན་བསྡུས༔ སློབ་དཔོན་པདྨའི་ཐུགས་བཅུད༔ མ་མོ་མཁའ་འགྲོའི་སྙིང་ཁྲག༔ ནམ་མཁའི་སྙིང་པོའི་ཆོས་སྐལ༔ ཚེ་སྒྲུབ་འཆི་མེད་བཙན་རྫོང༔ གསང་སྒྲུབ་རྡོ་རྗེ་ཕ་ལམ༔ ཞེས་བྱ་བའི་དབང་བསྐུར་གྱི་རིམ་པ་སྒྲུབ་པར་བྱེད་པ་ལ། སློབ་དཔོན་གྱིས་བགྱི་བར་འོས་པ་རྣམས་སྔོན་དུ་སོང་ནས། ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པའི་མཎྜལ་འབུལ་བར་ཞུ། དེ་ནས་མཎྜལ་ཕུལ་དུ་གཞུག །དེ་ནས་ཁྱེད་རང་རྣམས་རྒྱུད་དག་པར་བྱ་བའི་ཕྱིར་བླ་མ་དང་རྩ་གསུམ་ཚེ་ལྷའི་དཀྱིལ་འཁོར་དབྱེར་མེད་པའི་སྤྱན་སྔར། མཁའ་ཁྱབ་ཀྱི་སེམས་ཅན་ཐམས་ཅད་གཏན་བདེའི་གོ་འཕང་ལ་འགོད་པར་བྱ་བའི་ཕྱིར་སྐྱབས་སུ་འགྲོ་བ་དང་སེམས་བསྐྱེད་སྙམ་པས་འདིའི་རྗེས་ཟློས་མཛོད། ཧྲཱིཿདུས་གསུམ་རྒྱལ་བའི་སོགས་ལན་གསུམ།

[Full Size]

དེས་དབང་དོན་གྱི་ཡེ་ཤེས་སྐྱེ་བའི་སྣོད་རུང་དུ་བསྒྲུབས་ནས། ད་བྱིན་འབེབས་ཅིང་ཏིང་ངེ་འཛིན་བསྒོམ་པ་ནི། ཧྲཱིཿསྣང་སྲིད་ལྷ་ཡི་དཀྱིལ་འཁོར་སོགས། དེ་ནས་བྱིན་རླབས་ཀྱི་གཞི་འགོད་པ་ལ། ཡུལ་སྣང་སེམས་གསུམ་གདོད་ནས་གདན་གསུམ་ཚང་བའི་ལྷའི་འཁོར་ལོར་རྫོགས་པ་དེ་ཉིད་བརྡ་སྤྲད་པའི་ཚིག་བརྗོད་པ་ན། ཡིན་པ་ལ་ཡིན་པར་གསལ་ཐོབ་མཛོད། ལས་བུམ་ཆུས་བྲན་ནས། ཧྲཱིཿཧེ་རུ་ཀ་ཡི་ཆོ་འཕྲུལ་ལསཿསོགས་ནས་སྔགས་དང་བཅས་ཌཱ་དྲིལ་སྤོས་རོལ་བྱ། དེ་ནས་ཚེ་ལྷ་ཡེ་ཤེས་ཀྱི་དཀྱིལ་འཁོར་སྤྱན་འདྲེན་པ་ནི། ཧྲཱིཿབདེ་བ་ཅན་དང་སོགས་མཐར་ཧཱུྃ་ངར་དང་ལྡན་པའི་སྒྲས་འབོད་ཅིང་སྤོས་རོལ་བྱ། དེ་ལྟར་ཕབ་པའི་ཡེ་ཤེས་སེམས་དཔའ་བརྟན་པར་གྱུར་བར་མོས་མཛོད། ཧྲཱིཿའདིར་བྱོན་ཚེ་ཡི་ལྷ་ཚོགས་རྣམསཿསོགས་དང་། དེ་ནས་དབང་གི་དངོས་གཞིའི་དོན་དུ་མཎྜལ་འབུལ། བདེ་གཤེགས་ཚེ་ཡི་ཕོ་བྲང་གཏོར་མ་རིན་ཆེན་འབར་བ་སྐུ་རྟེན་དང་བཅས་པ་འདི་ཉིད། ཐར་པ་ཆེན་པོའི་གཞལ་མེད་ཁང་། འཇའ་ཟེར་ཐིག་ལེ་ལུ་གུ་རྒྱུད་མུ་མཐའ་བྲལ་བའི་ཀློང་ན། ཀ་དག་རང་རིག་རང་གསལ་གྱི་རང་མདངས་འོད་མི་འགྱུར་བ་ཚེ་དཔག་མེད་དམ་ཡེ་དབྱེར་མེད་ཐབས་ཤེས་ཁ་སྦྱོར་གྱི་ཚོམ་བུ། མཁའ་འགྲོ་ཆོས་སྐྱོང་དང་བཅས་པའི་སྐུ་གསུང་ཐུགས་

[Full Size]

ཡེ་ཤེས་རྡོ་རྗེའི་འོད་ཟེར་དཔག་ཏུ་མེད་པ་ཁྱེད་རང་རྣམས་ཀྱི་གནས་གསུམ་དུ་ཐིམ་པས་ཕུང་ཁམས་སྐྱེ་མཆེད་དུག་ལྔ་བདག་འཛིན་དང་བཅས་པ་རང་སར་དག །གཞི་རྫོགས་ཀློང་ཡངས་ཆེན་པོར་འཆི་མེད་རྡོ་རྗེ་དྭངས་མའི་སྲོག་ཏུ་སྨིན་ཅིང་གྲོལ། གནས་སྐབས་སུ་ཚེ་བསོད་ཡེ་ཤེས་འབྱོར་པ་དབང་ཐང་རླུང་རྟ་ཉམས་ཤིང་གུད་པ་སོར་ཆུད། བརྟན་གཡོའི་དྭངས་བཅུད་མ་ལུས་པ་བླ་སྲོག་གི་གཏེར་བསྡུས། འཆི་མེད་མགོན་པོའི་རྡོ་རྗེ་བཞི་དང་དབྱེར་མེད་དུ་གྱུར་སྙམ་པའི་མོས་པ་མཛོད། ཚེ་ཡི་དཔལ་གཏོར་གྱིས་དབང་བསྐུར་ཏེ། ཧྲཱིཿརང་གི་རང་རིག་གསལ་བ་ཡིཿསོགས་སྔགས་དང་བཅས་བརྗོད་ཅིང་ཚེ་རིལ་ཆང་ཡང་སྦྱིན། གྲངས་གསོག་སྐབས། ཡང་གཏོར་མ་འཆི་མེད་རྡོ་རྗེ་ཚེའི་ལྷ་ཚོགས་སུ་གསལ་བའི་སྐུ་གསུང་ཐུགས་ཡེ་ཤེས་རྡོ་རྗེའི་འོད་ཟེར་ཁ་དོག་སྣ་ཚོགས་ཁྱེད་རང་རྣམས་ཀྱི་གནས་བཞིར་ཐིམ་པས་དབྱེར་མེད་དུ་གྱུར་སྙམ་པའི་མོས་པ་མཛོད། ཧྲཱིཿརང་གི་རང་རིག་གསལ་བ་སོགས་སྔར་ལྟར་གྱི་གྲངས་འཛིན་ནས། མཐར། དེ་ལྟར་ཡང་ཟབ་ཨ་ཏི་ཡོ་གའི་ལུགས་ཀྱི་ཚེ་དབང་ཟབ་མོ་ལེགས་པར་གྲུབ་པས། གནས་སྐབས་སུ་འཇིགས་པ་བརྒྱད་དང་བཅུ་དྲུག །ཁྱད་པར་དུ་དུས་མ་ཡིན་པའི་འཆི་བ་བཟློག་ཅིང་། མཐར་ཐུག་བཅོམ་ལྡན་འདས་མགོན་པོ་ཚེ་

[Full Size]

དཔག་མེད་དབྱིངས་དང་ཡེ་ཤེས་སུ་དབྱེར་མེད་དུ་འགྱུར་ལ། སྐབས་སུ་བབས་པའི་དམ་ཚིག་སྲོག་གཅོད་པ་དང་། འདོད་པས་ལོག་སྤྱོད་གདུག་ཅན་ཨར་ལ་གཏད་པ་སོགས་སྤང་བྱ། སྲོག་བསླུ་ཉེ་འདོན་སཱཙྪ་བཏབ་པ་སོགས་བླང་བྱ། ཁྱད་པར་རང་གི་སྒོ་གསུམ་ཡེ་ནས་ཚེ་ལྷའི་རང་བཞིན་དེ་ཡི་ཏིང་ངེ་འཛིན་དང་མ་བྲལ་བར་སློབ་སྙམ་པས་འདིའི་རྗེས་ཟློས་མཛོད། གཙོ་བོའི་ཇི་ལྟར་སོགས། གཏང་རག་གི་དོན་དུ་མཎྜལ། ལུས་ལོངས་སྤྱོད་འབུལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་སོགས། དེ་ལྟར་ཚེ་སྒྲུབ་ཡོངས་ཀྱི་ཟབ་པའི་མཐར་ཐུག་གུ་རུ་རིན་པོ་ཆེའི་ཐུགས་བཅུད་འཆི་མེད་ཚེ་ཡི་དབང་བསྐུར་ལེགས་པར་གྲུབ་པས་རང་གཞན་གྱི་དོན་རྒྱ་ཆེན་པོ་མཛོད། སྦྱིན་པ་གཏོང་ཞིང་ཚུལ་ཁྲིམས་སོགས་བརྗོད། མཐར་འཁོར་གསུམ་སྤྲོས་བྲལ་ཀ་དག་རྫོགས་པ་ཆེན་པོའི་ཀློང་དུ་མཉམ་པར་བཞག་ཅིང་། བཀྲ་ཤིས་དང་བསྔོ་སྨོན་གྱིས་རྒྱས་གདབ་པར་བྱའོ། །དེ་ལྟར་རིག་འཛིན་མི་འགྱུར་རྡོ་རྗེའི་སྐྱེས་རབས་ཀྱི་ཕྲེང་བ་བཞི་པ་མཆོག་སྤྲུལ་གང་དེའི་འགྲོོ་དོན་ཆེད་དུ་དབོན་ཀརྨ་བདེ་གསལ་གྱི་བཞེད་ངོར་སི་ཏུ་པདྨའི་མིང་ཅན་གྱིས་བཀོད་པ་བསྟན་འགྲོ་ཡོངས་ལ་ཕན་དང་བདེ་བའི་རྒྱུར་གྱུར་ཅིག །ཤུབྷཾ། མངྒ་ལཾ། འདིར་རིག་འཛིན་རྟ་མགྲིན་མགོན་

[Full Size]

པོའི་ཕྱག་བཞེས་སུ་ཁྲུས་དང་མཎྜལ། པདྨ་བཛྲ་ལྟར་གྱི་དཀར་བགེགས་བཏང་། རང་གཞུང་བགེགས་བསྐྲད། སྐྱབས་སེམས། སློབ་མ་ལྷར་བསྐྱེད་སྤྱན་འདྲེན་བཞུགས་གསོལ་ཡན་གྲུབ་ནས་དབང་ཚིག་ལན་གསུམ་བརྗོད་པའི་དང་པོས་བུམ་པ། གཉིས་པས་ཚེ་གཏོར། གསུམ་པས་སྒྲུབ་དཔེ་རྣམས་གནས་གསུམ་བཞག་ལ་དབང་བསྐུར། མཐར་སྙིང་པོ་བརྗོད་ལ་ཚེ་རིལ་ཆང་སྦྱིན། ཤིས་བརྗོད་རྗེས་ཀྱི་བྱ་བ་སྤྱི་ལྟར་མཛད་པའི་ཕྱག་སྲོལ་སྣང་སྟེ་ཟུར་མང་ཕྱོགས་སུ་བརྒྱུད་པ་སོགས་ཀྱིས་འདི་ཁོ་ན་ལྟར་མཛད་ཀྱིན་སྣང་ངོ་། །འོན་ཀྱང་དཀར་བགེགས་ནི་དཀྱུས་ཙམ་ལ་སྤྱི་འགྲོ་བཏང་བས་འཐུས་སོ།། །།

པདྨ་བཛྲ་སྙིང་ཐིག་དབང་མོ་ཆེའི་མཚམས་སྦྱོར་གསལ་བཀོད་རིན་ཆེན་ཕྲེང་བ།

[Full Size]

པདྨ་བཛྲ་སྙིང་ཐིག་དབང་མོ་ཆེའི་མཚམས་སྦྱོར་གསལ་བཀོད་རིན་ཆེན་ཕྲེང་བ་བཞུགས་སོ། །ན་མོ་གུ་རུ་པདྨ་བཛྲ་ཡེ། འདིར་པདྨ་བཛྲ་གྲུབ་ཐོབ་བརྒྱ་རྩའི་དཀྱིལ་འཁོར་དུ་སྐལ་ལྡན་གྱི་སློབ་མ་གཞུག་པར་འདོད་ན་འདིའི་དབང་ཐོབ་ཅིང་དམ་ཚིག་ལ་གནས་པའི་སློབ་དཔོན་གྱིས་དང་པོ་དཀྱིལ་འཁོར་བཤམས་བཀོད། ལས་བྱང་སོགས་མཐོང་བརྒྱུད་བཞིན་ཚུལ་ལྡན་ལྷག་མ་བཅས་གྲུབ་ནས། ཡེ་གསང་གི། བླ་མ་རིག་འཛིན་གྱིས་བདག་དབང་བླངས་ཏེ། སྨིན་བྱེད་དབང་གི་སྐབས་སུ་བབས་ན་སློབ་མ་རྣམས་ཕྱག་དང་བཅས་མདུན་དུ་འཁོད། སྔོན་འགྲོ་གླུད་གཏོར་དང་དཀར་གཏོར་མཚམས་སུ་རོལ་མོ་ལྡིར་ལ་ཕུལ། གུ་གུལ་བདུག །ཡུངས་ཐུན་བྲབ། མཚམས་རྔམས་དང་བཅས། ཧཱུྃ། སྟོང་གསུམ་ཀུན་ཁྱབ་སོགས་ཀྱི་སྲུང་འཁོར་དང་མཚམས་བཅད་མཐར་རོལ་མོ་བཞག །འདིའི་བར་ཚོགས་པས་མཉམ་འདོན། དེ་ནས་སློབ་དཔོན་གྱིས་མདའ་དར་མེ་ལོང་བཏགས་པ་རིམ་བཞིན་ཐོགས་ལ་གཡབ་ནས་དྲིལ་གསིལ་དང་བཅས། ཧཱུྃ། ང་ནི་ཐབས་ཀྱི་ཧེ་རུ་ཀ༔ སོགས་ནས། སྨིན་གྲོལ་དངོས་གྲུབ་སྩོལཿབར་གྱི་སྒོ་དབྱེ་གྲུབ་ནས། འོ་ན་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་རིགས་ཀུན་ཁྱབ་བདག་གདོད་མའི་སངས་རྒྱས་པདྨ་བཛྲ་རྩལ་གྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་ཐུགས་གཏེར་སྙིང་ཐིག་དབང་མོ་ཆེ་གསན་དགོངས་པའི་ཐུགས་བསྐྱེད་གསལ་བཏབ་ནས་གསན་པར་ཞུ། དེའང་གཞི་འབྱུང་ཚུལ་གྱི་ལོ་རྒྱུས་ཅུང་ཞིག་བརྗོད་ན༔

[Full Size]

སོགས། རྡོ་རྗེའི་ཚིག་རྐང་ཉིད་གསལ་དག་སྙན་པས་བཏོན་ལ། དེ་དག་ནི་པདྨ་བཛྲ་གྱི་ཡོན་ཏན་ཅུང་ཟད་བརྗོད་པའོཿབར་དང་། དེ་ལྟར་བྱུང་ཁུངས་ལོ་རྒྱུས་རྡོ་རྗེའི་གསུང་གིས་རྒྱས་པར་བསྟན་པའི་སྒྲུབ་ཐབས་ཟབ་མོ་འདི་ཡང་ཨུ་རྒྱན་སངས་རྒྱས་གཉིས་པ་ཡབ་ཡུམ་གྱིས་སྙིགས་དུས་ཀྱི་གདུལ་བྱ་རྣམས་ལ་དགོངས་ཏེ་ལྷོ་སྨར་ཁམས་ཕྱོགས་ཀྱི་སྦས་གནས་གྲུ་གུ་ལྷ་བྲག་ཏུ་གཏེར་དུ་སྦས། མི་འགྱུར་བའི་རྒྱ་བདུན་གྱིས་རྒྱས་བཏབ་གཏེར་བདག་ཏྲཀྵད་ནག་པོ་ལ་གཏད། གཏེར་སྲུང་ལྷ་བྲག་རྡོ་རྗེ་འབར་བ་རྩལ་ལ་བཅོལ། བདེན་ཚིག་སྨོན་ལམ་ཟབ་མོས་མཚམས་སྦྱར། ནམ་ཞིག་གདུལ་བྱ་འདུལ་བའི་དུས་ལ་བབ་པའི་ཚེ། ཇི་སྐད་དུ། གསང་བའི་བདག་པོའི་རོལ་གར་ལས༔ ཞི་རྒྱས་དབང་དྲག་མངོན་སྤྱོད་ཚུལ༔ མ་ངེས་སྣ་ཚོགས་ཅིར་ཡང་འཆར༔ ད་ལྟའི་ལྷ་སྲས་འདི་ཉིད་ཀྱང༔ སྐྱེ་བའི་ཐ་མ་རྒྱུན་ཆད་ཚེ༔ སེམས་ཅན་རྣམས་ལ་སྟོན་པར་འགྱུར༔ གང་ཞིག་ཟབ་ཆོས་ཐོད་པ་རྩལ༔ མཐོང་ཐོས་དྲན་རེག་སེམས་ཅན་རྣམས༔ སངས་རྒྱས་ཐོབ་པ་ཐེ་ཚོམ་མེད༔ ཅེས་གསུངས་པ་ལྟར་རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱིས་རྫུ་འཕྲུལ་གྱི་ཆོ་འཕྲུལ་ངོ་མཚར་མིག་གི་བདུད་རྩི་སྐལ་ལྡན་ཀུན་གྱི་སྤྱོད་ཡུལ་དུ་མངོན་སུམ་དུ་སྣང་བ་དང་བཅས་སྤྱན་དྲངས་པ་སྟེ། རྡོ་རྗེའི་གསུང་ལས། འདི་ཉིད་ཀྱི་དཀྱིལ་

[Full Size]

འཁོར་དུ་ཞུགས་པའི་སེམས་ཅན་ཤི་གསོན་གང་ཡང་རུང་སྟེ་སྐད་ཅིག་ཉིད་ལ་འཚང་རྒྱ་བ་ཐེ་ཚོམ་མེད་དོ༔ ཞེས་དང་། ཐོས་པས་སེམས་ཅན་གྲོལ་བར་འགྱུར༔ བསྒོམ་པས་འཇའ་ལུས་མཁའ་སྤྱོད་འགྲུབ༔ བཟླས་པས་དངོས་གྲུབ་རྣམ་གཉིས་བརྙེས༔ དད་བརྩོན་སྙིང་རྗེའི་ངང་དུ་བསྒྲུབ༔ མ་འོངས་སེམས་ཅན་ཐམས་ཅད་ཀུན༔ ཐར་ལམ་བགྲོད་པའི་གོ་ཆ་ཡིན༔ འདི་ལས་ལྷག་པ་ཡོད་རེ་ཀན༔ དེ་ཕྱིར་འདི་ལ་བརྩོན་པར་གྱིས༔ ཞེས་གསུངས་པ་ལྟར། ཐོས་གྲོལ་གྱི་དཀྱིལ་འཁོར་ཆེན་པོ་གཏེར་སྟོན་རིག་འཛིན་གྲུབ་དབང་ཆེན་པོ་ནས་བདག་ཅག་གི་དཔལ་ལྡན་བླ་མ་དམ་པའི་བར་དུ་རིམ་པར་བརྒྱུད་པ་ལ་དམ་ཚིག་གི་སེལ་མ་ཞུགས། བྱིན་རླབས་ཀྱི་སོ་མ་ཉམས། གདམས་ངག་གི་དྲོད་མ་ཡལ་བའི་དབང་བསྐུར་ཟབ་མོ་བསྒྲུབ་པ་ལ་སློབ་དཔོན་གྱི་བགྱི་བར་འོས་པ་རྣམས་སྔོན་ཏུ་སོང་ནས། ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པ་དབང་བསྐུར་ཞུ་བའི་ཡོན་དུ་མཎྜལ་འབུལ། ཞེས་མཎྜལ་འབུལ། དེ་ནས་དཀྱིལ་འཁོར་གྱི་གཙོ་བོ་དང་སློབ་དཔོན་དབྱེར་མེད་པ་ལ། ཐོག་མར་གསོལ་བ་གདབ་པ་འདིའི་རྗེས་ཟློས་མཛོད། རིགས་ཀུན་ཁྱབ་བདག་སོགས་རྗེས་ཟློས་ལན་གསུམ་དང་། སློབ་དཔོན་གྱིས། ལེགས་སོ་སྐལ་ལྡན་སོགས་ནས། སྐྱབས་སུ་འགྲོ་བར་གྱིས༔ བར། ཞེས་པའི་ལན་དུ་འདིའི་རྗེས་ཟློས།

[Full Size]

ལེགས་སོ༔ ཞེས་དང་། དེ་ནས་ཕྱི་ནང་གསང་གསུམ་གྱི་སྐྱབས་སུ་འགྲོ་བ་འདིའི་རྗེས་ཟློས་མཛོད། ཞེས་མཚམས་སྦྱར་ལ་གུར་དྲག་རྡོ་རྗེ་ཕ་ལམ་ལྟར། ན་མོ༔ དཀོན་མཆོག་གསུམ་དང་བྱང་སེམས་ཉན་རང་ལྷ༔ བདག་དང་མཐའ་ཡས་དུས་གསུམ་སངས་རྒྱས་རྣམས༔ སྐྱེ་བ་འདི་ནས་སངས་རྒྱས་ཐོབ་ཀྱི་བར༔ ལུས་ངག་ཡིད་གསུམ་གུས་པས་སྐྱབས་སུ་མཆི༔ ནང་ལྟར་སྐྱབས་སུ་འགྲོ་བ་ནི། ན་མོ༔ བླ་མ་ཡི་དམ་དཔའ་བོ་མཁའ་འགྲོ་ལ༔ བདག་གཞན་དུས་གསུམ་དུས་མེད་སྐྱེ་འགྲོ་རྣམས༔ ཚེ་གཅིག་འཇའ་ལུས་ཆོས་སྐུའི་འབྲས་ཐོབ་ཕྱིར༔ དབྱེར་མེང་ངང་དུ་སྙིང་ནས་སྐྱབས་སུ་མཆི༔ གསང་བ་ལྟར་སྐྱབས་སུ་འགྲོ་བ་ནི། ན་མོ༔ རང་ལུས་རྣམ་དག་ལྷ་ཡི་ཕོ་བྲང་འདིར༔ གདོད་མའི་ཀུན་བཟང་ཡེ་ནས་སངས་རྒྱས་བཞུགས༔ ཕུང་པོ་ལྔ་དག་རིགས་ལྔའི་རྒྱལ་བ་གསལ༔ ཁམས་ལྔ་དག་པ་ཡུམ་ལྔ་བདེ་སྟོང་རྒྱས༔ རྩ་རླུང་རྣམ་དག་དཔའ་བོ་མཁའ་འགྲོ་དང༔ དུག་ལྔ་རྣམ་དག་ཡེ་ཤེས་ཐིག་ལེ་འཁྱིལ༔ བརྗོད་མེད་རང་གསལ་རང་སེམས་ཀུན་ཏུ་བཟང༔ རེ་དོགས་བླང་དོར་གཉིས་འཛིན་མེད་བཞིན་དུ༔ གང་ཤར་བདེ་སྡུག་ཆོས་སྐུའི་རོལ་བ་འཕྱོ༔ མ་བསྒྲུབ་སངས་རྒྱས་སེམས་ལ་སྐྱབས་སུ་མཆི༔ སོ་སོར་ལན་གསུམ་རེ། དེ་ནས་དབང་གཞུང་བཞིན། རིགས་ཀྱི་བུ་རྣམས་ནས། སེམས་བསྐྱེད་མཛོད༔ བར། དེ་ནས་ཕྱི་

[Full Size]

ནང་གསང་བའི་སེམས་བསྐྱེད་པ་འདིའི་རྗེས་ཟློས་མཛོད། ཧཱུྃ་ཧྲཱིཿབདག་གཞན་དུས་གསུམ་དུས་མེད་སྐྱེ་འགྲོ་རྣམས༔ མི་དགེ་བཅུ་ཡི་ལས་སྒྲིབ་དག་གྱུར་ཅིང༔ མ་རིག་འཁོར་ལོ་ཀུན་རྟོག་རྣམ་དག་སྟེ༔ ཡང་དག་སངས་རྒྱས་ས་ལ་རབ་བཀོད་ཕྱིར༔ གསང་སྔགས་དྲག་པོའི་དཀྱིལ་འཁོར་བསྒྲུབ་པར་བྱ༔ འཁོར་བ་དོང་ནས་སྤྲུག་པར་སེམས་བསྐྱེད་དོ༔ ངན་སོང་གནས་གསུམ་མི་ཁོམ་གནས་བརྒྱད་པོ༔ མིང་ཡང་མེད་པར་ཟད་ཅིང་ཡུལ་འབྱིན་ཏེ༔ རྣམ་མཁྱེན་སངས་རྒྱས་མྱུར་དུ་ཐོབ་པར་ཤོག༔ དག་པ་རྣམ་དག་མྱུར་དུ་སངས་རྒྱས་ཤོག༔ ནང་ལྟར་བྱང་ཆུབ་སེམས་བསྐྱེད་པ་ནི། ཧཱུྃ་ཧྲཱི༔ བདག་དང་མཐའ་ཡས་དུས་གསུམ་སེམས་ཅན་རྣམས༔ ཡེ་གདོད་ཉིད་ནས་རང་སེམས་ཀུན་ཏུ་བཟང༔ ཕུང་པོ་ལྔ་ནི་དེ་བཞིན་གཤེགས་པ་ལྔ༔ འབྱུང་བའི་ཁམས་ལྔ་ཡེ་ཤེས་ལྷ་མོ་ལྔཿརྒྱུ་རྐྱེན་ཡེ་ནས་རང་བྱུང་ལྷ་ཡི་སྐུ༔ རང་གསལ་རང་ཆས་ལྷུན་གྲུབ་གཉུག་མའི་སེམས༔ སྟོང་པའི་ཡེ་ཤེས་འཁོར་འདས་མཉམ་པ་ཉིད༔ སྒྲིབ་གཡོགས་ཀུན་བྲལ་ངང་དུ་སེམས་བསྐྱེད་དོ༔ གསང་བ་དོན་གྱི་སེམས་བསྐྱེད་པ་ནི། ཧཱུྃ་ཧྲཱིཿབདག་གཞན་འདས་དང་ད་ལྟ་མ་འོངས་ཀྱི༔ སངས་རྒྱས་སེམས་ཅན་མིང་དུ་བཏགས་པ་ཙམ༔ སྐུ་ནི་བདེན་མེད་འཇའ་ལུས་སྣང་སྟོང་གཟུགས༔ གསུང་ནི་གྲག་སྟོང་བདེན་

[Full Size]

མེད་བྲག་ཆ་ལྟར༔ ཐུགས་ནི་དུས་གསུམ་སྤྲོས་བྲལ་ལྷན་སྐྱེས་ཐུགས༔ སྐྱེ་འགགས་གནས་གསུམ་བྲལ་བའི་ཡེ་ཤེས་ལ༔ སངས་རྒྱས་མ་བསྒྲུབ་རང་ཆས་རང་གསལ་ཀློང༔ ངན་སོང་གནས་མེད་རིག་བྱེད་འཁྲུལ་ཆ་ཙམ༔ ཀུན་བྱེད་རྒྱལ་པོ་ཡེ་ནས་སངས་རྒྱས་ཉིད༔ གང་ལའང་རེ་དོགས་ཀུན་བྲལ་སེམས་བསྐྱེད་དོ༔ ཞེས་དང་། དེ་ནས་ཁྱེད་རང་རྣམས་ཀྱིས་འཁོར་བ་ཐོག་མེད་ནས་བསགས་པའི་སྡིག་སྒྲིབ་ཉེས་ལྟུང་བག་ཆགས་དང་བཅས་པ་སྦྱངས་ཤིང་། སྨིན་བྱེད་ཟབ་མོའི་སྣོད་དུ་རུང་བར་བྱ་བའི་ཕྱིར་བཅོམ་ལྡན་འདས་དཔལ་རྡོ་རྗེ་སེམས་དཔའི་སྐུར་ལམ་གྱིས་འདི་ལྟར་དུ་གསལ་ཐོབ་མཛོད། ཧཱུྃ་བྷྱོ༔ མི་རྟག་ཆུ་བུར་ནས། ཡིག་བརྒྱས་བསྐོར། བར། དེ་ནས་ཧེ་རུ་ཀའི་ཡིག་བརྒྱ་དཔོན་སློབ་མཉམ་དུ་གསུངས་པའི་ཚེ་ཁྲུས་ཆབ་བཏང་། དེ་ནས་དབང་གི་སྔོན་འགྲོ་འཇུག་པའི་ཆོས་རྣམས་གྲུབ་ནས། དངོས་གཞི་དབང་གི་གཞི་འགོད་པའི་ཕྱིར་ཡེ་ཤེས་པ་དབབ་པའི་སླད་དུ་ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཡེ་ཤེས་ཀྱི་དཀྱིལ་འཁོར་ཆེན་པོར་འདི་ལྟར་དུ་ུགསལ་ཐོབ་མཛོད། ༀ་ཤུ་ནྱ་ཏ་ཛྙཱ་ན་སོགས། ཧཱུྃ་ཧྲཱིཿསྣོད་བཅུད་སྣང་སྲིད་མི་དམིགས་སོགས་བརྗོད་ཅིང་བསྐྱེད་རིམ་ཕོག་ནས། སྤྱན་འདྲེན་རོལ་ཆས་ལྡིར་ལ། སྔོན་བསྐལ་མ་སོགས། ཚོགས་པ་མཉམ་གསུང་གིས། དཀྱིལ་འཁོར་

[Full Size]

གྱིས་ཁེངས་པར་གྱུར༔ བར་དབྱངས་རོལ་དང་སྤོས་འགྲིམ་བཅས་ཀྱིས་བྱིན་དབབ། སྐབས་འདིར་གཞུང་ལས་སློབ་དཔོན་གྱིས་བདག་བསྐྱེད་གསལ་བཏབ་གསུངས་ཀྱང་། བརྒྱུད་པའི་ཕྱག་བཞེས་ལ་སློབ་དཔོན་དང་། སློབ་མས་ཡིད་ཀྱི་དམིགས་པས་གདོད་ནས་ཡེ་གྲུབ་ཀྱི་རང་བཞིན་དེས་ཁྱབ་པར་གསུངས། དེ་ནས་སློབ་དཔོན་གདོད་ནས་ཡེ་ཤེས་ཀྱི་དཀྱིལ་འཁོར་ཆེན་པོར་གསལ་བཞིན་པ་དང་། མདུན་བསྐྱེད་རིག་འཛིན་རྒྱ་མཚོའི་ལྷ་ཚོགས་རྣམས་ཀྱི་ཐུགས་ཀའི་འོད་ཟེར་གྱིས་བསྐུལ་བའི་གདན་གསུམ་ཚང་བའི་དབང་གི་ལྷ་རྣམས་དང་། སློབ་དཔོན་པདྨ་བཛྲར་གསལ་བའི་ཕྱག་གི་བུམ་པར་གསང་སྔགས་ཀྱི་ལྷ་ཚོགས་རྣམས་བཞུགས་པའི་དབང་ཁྱེད་རང་རྣམས་ཀྱི་ལུས་ལ་བསྐུར་བས་ལུས་ཀྱི་སྒྲིབ་པ་དག་ནས་སྐུ་རྡོ་རྗེ་མངོན་དུ་གྱུར་བའི་མོས་པ་མཛོད། ཧཱུྃ། ང་ནི་པདྨ་བཛྲ་སོགས་ནས་བུམ་པ་སྤྱི་བོར་བཞག་ལ། བུམ་ཆུ་བཏུང་། སྨོན་ལམ་དང་རབ་གནས་མེ་ཏོག་འཐོར། ཀཱ་ཡ་སུ་པྲ་ཏིཥྛ་སོགས་བརྗོད། ཤོག་སེར་པུསྟིའི་དབང་ནི། དེ་ནས་རིགས་འདུས་མ་ཧཱ་གུ་རུའི་གསུང་ཡི་གེའི་འཕྲུལ་ལས་ཤར་བའི་སྙིང་ཐིག་གླེགས་བམ་ལས་གསང་སྔགས་ཡིག་འབྲུའི་ཚོགས་ཆར་ལྟར་བབས་ནས་གསུང་དབང་ངག་ལ་བསྐུར་བས་ངག་གི་སྒྲིབ་དག་ནས་གསུང་རྡོ་རྗེ་མངོན་དུ་བྱས་པའི་མོས་པ་མཛོད། ཧཱུྃ། ང་ནི་པདྨ་བཛྲ་ཡབ་ཡུམ་སོགས་ཀྱིས་མགྲིན་པར་བཞག་ལ་མཐར་སྨོན་ལམ་རབ་གནས་བར། ཡང་དཀྱིལ་འཁོར་

[Full Size]

རྣམས་ལས་རང་བྱུང་ཡེ་ཤེས་ཀྱི་སྐུ་མར་མེ་གཅིག་ལ་གཉིས་མཆེད་ཀྱི་ཚུལ་དུ་འཕྲོས་ནས་ཁྱེད་རང་རྣམས་ཀྱི་སྙིང་གར་ཐིམ། ལྷ་དབང་སེམས་ལ་བསྐུར་བས་ཡིད་ཀྱི་སྒྲིབ་པ་དག་ནས་ཐུགས་རྡོ་རྗེ་མངོན་དུ་གྱུར་པའི་མོས་པ་མཛོད། དེ་ནས་ཙཀླི་རྣམས་རིམ་པར་ཐོགས་ལ་སྙིང་གར་བཞག །ཧཱུྃ། ང་ནི་པདྨ་བཛྲ་ཡབ་ཡུམ་སོགས། ལྷ་དབང་ཡོངས་རྫོགས་བསྐུར་མཐར་སྨོན་ལམ་རབ་གནས་དང་བཅས། དེ་ནས་རིགས་ལྔ་ཡེ་ཤེས་ལྔ་དང་ཕ་རོལ་ཕྱིན་དྲུག་གི་ངོ་བོར་རྟགས་ཀྱི་ཕྱག་རྒྱས་དབང་བསྐུར་བས་སངས་རྒྱས་ཐོད་པ་རྩལ་དང་དབྱེར་མེད་པའི་ཆོས་ཀྱི་རྒྱལ་སྲིད་ལ་མངའ་བརྙེས་ནས་ཕྲིན་ལས་རབ་འབྱམས་དབང་དུ་གྱུར་པའི་མོས་པ་མཛོད། ཧཱུྃ། རིག་འཛིན་སྐྱེས་བུ་སོགས་ནས། ཞི་ཆས་ཚང་མའི་དབང་དང་། སློབ་མ་ལ་མངའ་གསོལ་གཞུང་གསལ་ལྟར། རྔ་དུང་རོལ་མོ་ལྡིར། དབྱངས་དང་བཅས། དྲག་ཆས་རྣམས་གསོལ་ལ། ཧཱུྃ། ང་ནི་ཁྱབ་བདག་རྡོ་རྗེ་འཆང༔ སོགས་ནས། དབང་དང་ལྡན་པར་གྱུར་ཅིག༔ བར། དེ་ནས་ཕྲིན་ལས་གཏོར་མའི་དབང་གི་དོན་དུ། ཡེ་ཤེས་ལས་དང་འཇིག་རྟེན་གྱི་ཆོས་སྐྱོང་བ་རྣམས་ཀྱི་བཀའ་གཏད་པ་ནི། ཧཱུྃ༔ མ་ཧཱ་ཀཱ་ལ་སོགས་ཀྱིས་གཏོར་མ་རྣམས་མགོར་བཞགདེ་ལྟར་གནས་སྐབས་སུ་ལས་བཞིའི་ཕྲིན་ལས་སྒྲུབ་པ་དང་། མཐར་ཐུག་བྱང་ཆུབ་སྒྲུབ་པའི་བར་ཆད་སེལ་བའི་སྡོང་གྲོགས་

[Full Size]

མཛད་པར་མོས་ལ། དེ་ནས་ཡང་གསང་དབང་བཞི་ཡོངས་རྫོགས་བསྐུར་བ་ནི། ཧཱུྃ། ང་ནི་པདྨ་བཛྲ་སོགས་རྡོ་རྗེ་འཆང་གི་སྐུ་སྤྱི་བོར་བཞག་ལ། དེ་ལྟར་དབང་བཞི་བསྐུར་བས་སྒྲིབ་བཞི་དག །རྒྱུད་བཞི་སྨིན། ལམ་བཞི་འབྱོང་། སྐུ་བཞིའི་གོ་འཕང་མངོན་དུ་གྱུར་པའི་མོས་པ་མཛོད། དེ་ལྟར་བཟླས་ལུང་སྦྱིན་པ་ནི། ཧཱུྃ། རིག་འཛིན་པདྨ་སོགས་ཀྱིས་གླེགས་བམ་མགོར་བཞག་ལ། སློབ་དཔོན་ལྷར་གསལ་བའི་ཐུགས་ཀ་ནས་སྔགས་ཕྲེང་འཕྲོས། ཁྱེད་རང་རྣམས་ལྷར་གསལ་བའི་ཐུགས་ཀར་ཧཱུྃ་གི་མཐར་སྔགས་ཀྱི་ཕྲེང་བ་འཁོར་བར་མོས་ལ་སྔགས་འདིའི་རྗེས་ཟློས། གཙོ་འཁོར་སྤྱི་དྲིལ་གྱི་སྔགས་ཚན་གསུམ་ལན་གསུམ་བཟླའོ། །དེ་ལྟར་གསུང་རིགས་སྔགས་ཀྱི་བྱིན་རླབས་ནུས་རྩལ་མཐུ་སྟོབས་ཁྱེད་རྣམས་ཀྱི་རྒྱུད་ལ་འཇུག་ཅིང་བརྟན་པར་གྱུར་ཅིག །དེ་ནས་དབང་གི་མཐའ་རྟེན་རྒྱལ་སྲིད་རིན་པོ་ཆེ་སྣ་བདུན་བྱིན་པས་རིག་པ་འཛིན་པའི་འཁོར་ལོས་སྒྱུར་བའི་རྒྱལ་ཐབས་ལ་འཁོད་ནས་ནམ་མཁའ་ཇི་སྲིད་བར་དུ་གཞན་དོན་འབད་མེད་ལྷུན་གྱིས་གྲུབ་པའི་དབང་ཐོབ་པའི་མོས་པ་མཛོད། ཧཱུྃ། གསེར་གྱི་འཁོར་ལོ་སོགས་རྒྱལ་སྲིད་ཀྱི་དབང་ལག་ཏུ་བཞག །དམ་ཚིག་གི་བསླབ་བྱ་སྦྱིན་པ་ནི། དེ་ལྟར་སྐལ་ལྡན་ཁྱེད་རྣམས་ལ་སོགས་བརྗོད། ཧོཿདགོངས་སུ་གསོལ་ལོ༔

[Full Size]

སོགས་བཀྲ་ཤིས་མཉམ་གསུང་མཐར་རོལ་མོ་ལྡིར་ཞིང་མེ་ཏོག་གི་ཆར་བསྙིལ། དེ་ལྟར་བཅོམ་ལྡན་ཧེ་རུ་ཀ་པདྨ་བཛྲ་སངས་རྒྱས་ཐོད་པ་རྩལ་གྱི་སྙིང་ཐིག་དབང་མོ་ཆེ་ལེགས་པར་གྲུབ་བ་ཡིན་པས་དེ་དག་གི་སྐབས་སུ་བབས་པའི་གསང་སྔགས་ཀྱི་དམ་ཚིག་དང་སྡོམ་པ་སྔོན་དུ་བརྗོད་བཞིན་པ་རྣམས་ཅི་ནུས་སུ་བསྲུང་སྙམ་པའི་སྒོ་ནས་འདིའི་རྗེས་ཟློས། གཙོ་བོས་ཇི་ལྟར་སོགས། དབང་བསྐུར་རྫོགས་པར་ཐོབ་པའི་གཏང་རག་གི་ཡོན་དུ་མཎྜལ། ཞེས་མཎྜལ་འབུལ། སླར་ཡང་ལུས་ལོངས་སྤྱོད་དགེ་རྩ་དང་བཅས་དྲུག་ཆ་གཅིག་ལྷ་དང་བླ་མར་འབུལ་སྙམ་པས་འདིའི་རྗེས་ཟློས། དེང་ནས་བརྩམས་ཏེ་སོགས། དེ་ལྟར་སྨིན་བྱེད་ཀྱི་དབང་བསྐུར་ཐོབ་པའི་དགེ་རྩ་ཐམས་ཅད་མཁའ་ཁྱབ་སེམས་ཅན་མ་གྱུར་རྣམས་ཀྱི་དོན་དུ་བསྔོ་བས་རྒྱས་གདབ་པར་མཛོད། བསོད་ནམས་འདི་ཡིས་སོགས་བརྗོད་ལ་སློབ་མ་གྲོལ། རྟེན་དང་གཏོར་མའི་སོགས་བསྡུ་རིམ་ཡང་བྱས་ལ་བསྔོ་སྨོན་མཐའ་རྒྱས་བྱའོ། །ཞེས་གཏེར་གཞུང་གི་དགོངས་དོན་ཇི་བཞིན་གཞིར་བཞག་པའི་ཅུང་ཞིག་གོ་བདེའི་ཆེད་དུ་མཚམས་སྦྱོར་འདིའང་སི་ཏུ་པདྨའི་མིང་ཅན་གྱིས་བསླབ་གསུམ་རྣམ་དག་རག་ཤུལ་དགའ་ལྡན་ཆོས་གླིང་གི་བླ་མ་འཇམ་དབྱངས་བསྟན་འཕེལ་གྱི་བཞེད་ངོར་བཀོད་པ་ནོངས་པ་གང་མཆིས་ཀུན་བཟང་ཀློང་དུ་བཟོད་པར་གསོལ་ཞིང་། དགེ་བས་འགྲོ་དོན་འཁོར་བ་དོང་ནས་སྤྲུག་པར་གྱུར་ཅིག །ཛ་ཡནྟུ།། །།

དག་སྣང་པཀྴིའི་དབང་བཞི་བྱིན་རླབས་མྱུར་འབེབས་ཀྱི་དབང་བཤད་དང་མཚམས་སྦྱོར།

[Full Size]

དག་སྣང་པཀྴིའི་དབང་བཞི་བྱིན་རླབས་མྱུར་འབེབས་ཀྱི་དབང་བཤད་དང་མཚམས་སྦྱོར་བཞུགས། ནམ་མཁའ་དང་མཉམ་པའི་སེམས་ཅན་ཐམས་ཅད་ཟུང་འཇུག་སྐུ་བཞི་དང་ཡེ་ཤེས་ལྔ་ཡི་བདག་ཉིད་ཀྱི་གོ་འཕང་ཐོབ་པར་བྱ་སྙམ་པའི་འདུན་པ་དྲག་པོ་རྩེ་གཅིག་པའི་ངང་ནས་གསན་པར་མཛད་འཚལ། དེ་ཡང་ད་ལམ་སྐབས་སུ་བབས་པའི་དབང་བསྐུར་ཟབ་མོ་ལས་ཀྱང་ཆེས་ཟབ་པ་འདི་ཉིད། ཨོ་རྒྱན་གྱི་སློབ་དཔོན་ཆེན་པོ་སངས་རྒྱས་གཉིས་པ་དེ་ཉིད་གདུལ་བྱ་སྤྱི་དང་བྱེ་བྲག་གི་སྣང་ཚུལ་དུ་ཟ་ཧོར་གྱི་རྒྱལ་པོ་ཨིནྡྲ་བྷུ་ཏི་འཁོར་ཚོམ་བུ་འབུམ་དང་བཅས་པ་ཐུགས་རྗེ་ཐབས་མཁས་ཀྱིས་འདུལ་བར་དགོངས་ཏེ་དྷ་ན་ཀོ་ཤའི་མཚོ་གླིང་དུ་རང་བྱུང་སྐྱོན་གྱིས་མ་གོས་པདྨའི་སྡོང་པོ་ལ། དུས་གསུམ་རྒྱལ་བ་ཐམས་ཅད་ཀྱི་ཐུགས་རྗེ་གཅིག་ཏུ་བསྡུས་པའི་གོང་བུ་རང་བྱུང་ངོ་མཚར་སྤྲུལ་སྐུ་ཆེན་པོའི་བཀོད་པར་བརྫུས་ཏེ་འཁྲུངས་ནས་གསང་སྔགས་བླ་མེད་རྡོ་རྗེ་ཐེག་པ་མཆོག་གི་ཆོས་བསྟན་པར་མཛད་ཅིང་འགྲོ་བ་ལོག་པའི་ལམ་ལ་གོལ་པའི་ལྟ་ངན་ཝ་སྐྱེས་ལྟ་བུའི་ཚོགས་ཀྱིས་གཞན་ཡིད་བསླུ་ཞིང་བྲིད་པའི་ཚུལ་འཆོས་གཡོ་སྒྱུ་ཅན་རྣམས་མི་འཇིགས་སྤོབས་པ་གདོང་ལྔའི་ང་རོས་འགེམས་པར་དགོངས་ཏེ། ཁ་བ་ཅན་གྱི་དབུས་ལྗོངས་སུ་ཡང་ཆོས་རྒྱལ་མེས་དཔོན་རྣམ་པ་གསུམ་སོགས་ཀྱང་གུ་རུ་ཉིད་དང་ཐ་མི་དད་པར་སྐུ་ཡི་བཀོད་པ་ཙམ་ལས་རྒྱལ་བ་རིགས་གསུམ་གྱི་ངོ་བོའི་

[Full Size]

རྣམ་པར་རོལ་པ་ཐོ་རི་སྙན་ཤལ་དང་། སྲོང་བཙན་སྒམ་པོའི་དུས་སུ་བོད་ཡུལ་གངས་རིའི་ཕྲེང་བ་འདི་ཉིད་དུ་དམ་ཆོས་ཀྱི་སྒྲོན་མེ་སྦར་བའི་དབུ་བརྙེས་པར་མཛད། མངའ་བདག་ཁྲི་སྲོང་ལྡེའུ་བཙན་གྱིས་དམ་པའི་ཆོས་ཀྱི་སྲོལ་བཏོད་པའི་ཕྱིར་རྒྱ་གར་ནས་ལོ་པཎ་སྐྱེས་མཆོག་ཇི་སྙེད་པ་དང་། ཁྱད་པར་མཁན་པོ་བྷོ་དྷི་སཏྭ། དེ་ལས་ཀྱང་ཁྱད་པར་གྱི་ཡོན་ཏན་དཔག་པར་དཀའ་བའི་མཐར་སོན་པ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་སྤྱན་དྲངས་ཏེ། དེ་ཉིད་ཀྱི་མཚན་དཔེའི་ཉི་འོད་འབུམ་ཕྲག་ཏུ་བརྡལ་ཞིང་བོད་ཡུལ་གྱི་ལོག་བཤེས་རྣམས་ཀྱི་གཡང་ས་མུན་པ་སྟུག་པོར་གྱུར་བའི་དྲྭ་བ་ཡང་རྩད་ནས་འབྱིན་པར་མཛད། དཔལ་མི་འགྱུར་ལྷུན་གྱིས་གྲུབ་པའི་བསམ་ཡས་ལ་སོགས་གཙུག་ལག་ཁང་དང་། སད་མི་མི་བདུན་སོགས་དགེ་འདུན་གྱི་སྡེ་བཙུགས། བཀའ་མདོ་རྒྱུད་མཐའ་དག་བོད་སྐད་དུ་གཏན་ལ་ཕབ་ཅིང་རྒྱལ་བའི་བསྟན་པ་གསལ་བ་ལས་ཀྱང་གསལ་བའི་ཕུལ་དུ་མཛད། ལྷ་སྲིན་མ་རུངས་པ་རྣམས་ཀྱང་རྡོ་རྗེའི་ཐ་ཚིག་གཉེན་པོས་དམ་ལ་བཞག་སྟེ་རྒྱལ་བསྟན་ཡུན་གནས་ཀྱི་བཙས་སུ་ཡང་ཤར་ལྷོ་ནུབ་བྱང་དབུས་ཏེ་ས་འོག་ས་སྟེང་ཐམས་ཅད་ཆོས་དང་ནོར་གཏེར་གྱིས་བསྐངས་ནས་མ་འོངས་ལུང་ཟིན་གྱི་གང་ཟག་སོ་སོའི་ལས་སྐལ་དུ་མི་སྣང་བའི་རྒྱ་ཡིས་བཏབ་སྟེ་སྙིགས་མ་ལྔ་བདོའི་དུས་སུ་མདོ་སྔགས་བསྟན་པའི་རྒྱལ་མཚན་བསྒྲེང་བའི་དཔལ་དུ་བྱིན་གྱིས་བརླབས་ཏེ། དེ་ལྟར་གནས་དང་གང་ཟག་གི་

[Full Size]

སྲུང་མ་དྲེགས་བྱེད་རྣམས་ལ་གཉེར་དུ་གདམས་པར་མཛད་ཅིང་། བོད་ཡུལ་གྱི་གདུལ་བྱ་ཕྱི་རབས་ཐུགས་རྗེས་ཉེ་བར་སྐྱོང་བའི་སླད་དུ་ལྷོ་ནུབ་རཀྴ་སྲིན་པོའི་ཁ་གནོན་དུ་འབྱོན་པར་ཉེ་བ་ན། ལྷ་སྲས་མུ་ཁྲི་བཙན་པོའི་སྔོན་འཕྲལ་སྨོན་ལམ་བཙན་པའི་དམ་བཅའ་ཟབ་མོ་རྨད་དུ་བྱུང་བའི་མཐུས་སློབ་དཔོན་ཆེན་པོས་རྗེས་སུ་འཛིན་པར་གནང་སྟེ། ཕྱི་རབས་མ་འོངས་རྗེས་འཇུག་གདུལ་བྱ་སྐལ་པ་ལས་དང་ལྡན་པ་རྣམས་ཀྱི་དཔུང་གཉེན་དང་། འོད་གསལ་སྙིང་པོ་དྲི་མ་མེད་པའི་རིང་ལུགས་ཉམས་པ་མེད་པའི་ཕྱིར་སྨོན་ལམ་དག་པས་མཚམས་སྦྱར་ཏེ་སུམ་ཅུ་ཁ་རལ་གྱི་དུས་འདིར་ལྷ་སྲས་མུ་ཁྲིའི་སྐྱེས་རབས་སྤྲུལ་པའི་གཏེར་ཆེན་རིག་འཛིན་མི་འགྱུར་རྡོ་རྗེ་ཅན་ཞེས་གྲགས་པ་དེ་ཉིད་ཀྱི་ལས་སྐལ་དུ་ས་གཏེར་ལ་སོགས་གཏེར་ཁ་དུ་མར་དབང་བའི་མངའ་བདག་ཏུ་གྱུར་པ་དང་། སྐབས་སུ་བབ་པ་འདི་ཉིད་དག་སྣང་ཞལ་གཟིགས་སུ་མངོན་པར་འཆར་པ་དེ་ཡང་། རིག་འཛིན་ནུས་ལྡན་རྡོ་རྗེའི་སོགས་ནས། ཅེས་གསུངས་པ་ལྟར་གྱི་རྗེ་ཀརྨ་པཀྴི་ཞལ་གཟིགས་མར་གྲགས་པ། དེ་ལྟར་གུ་རུ་པདྨ་དང་ཀརྨ་པ་དབྱེར་མེད་གཉིས་སུ་མེད་པའི་ཚུལ་སྔགས་རྒྱུད་ཚད་མ་རྣམས་སུ་ཡང་སྤྱིར་ངེས་པ་དང་། བྱེ་བྲག་གྲུབ་ཆེན་པཀྴིས་སློབ་དཔོན་པདྨ་དང་ཀརྨ་པའི་བར་བརྒྱུད་པ་ཡོད་ཀྱང་ཆོག་མེད་ཀྱང་ཆོག་གསུངས་པ་ལྟར་སྐུ་དང་ཞིང་ཁམས་ཐ་མི་དད་པ་ཆོས་ཀྱི་དབྱིངས་སུ་གཅིག་པའི་ཞལ་

[Full Size]

བཞེས་ཐུན་མོང་མ་ཡིན་པ་དེ་ལྟར་ལ། དེ་དག་གི་སྒོ་ནས་ལུས་ངག་ཡིད་གསུམ་མི་ཕྱེད་པའི་དད་པ་ཆེན་པོའི་བློས་དཀྱིལ་འཁོར་གཙོ་བོ་དང་སློབ་དཔོན་དབྱེར་མེད་པ་ལ་གསང་སྔགས་ཟབ་མོའི་དབང་བསྐུར་ཡོངས་སུ་རྫོགས་པར་ཞུ་བའི་དོན་དུ་དངོས་དང་ཡིད་སྤྲུལ་རྒྱ་མཚོས་དྲངས་པའི་མཎྜལ་གནང་འཚལ། དེ་ནས་ཐོག་མར་དབང་བསྐུར་ཟབ་མོ་ཞུ་བའི་དོན་དུ་སྐྱབས་སུ་འགྲོ་བ་དང་སེམས་བསྐྱེད་པ་ལ་སློབ་དཔོན་དང་ཡི་དམ་དཀྱིལ་འཁོར་གྱི་ལྷ་ཚོགས་ཐ་མི་དད་པའི་དྲུང་དུ་གསོལ་བ་བཏབ་པ་འདིའི་རྗེས་ཟློས་མཛོད། དེ་ནས་ཕྱི་ནང་སྣོད་བཅུད་སྣང་སྲིད་ཀྱི་དངོས་པོ་གཟུང་འཛིན་གྱིས་བསྡུས་པའི་ཆོས་ཐམས་ཅད་དག་པ་རྒྱལ་བའི་དཀྱིལ་འཁོར་དུ་བསྐྱེད་པའི་རིམ་པ་བསྒོམས་པ་སྟེ་སྣང་སྟོང་གསལ་ལ་སྒྲིབ་མེད་ཀྱི་ངང་དུ་དམིགས་པ་འདི་བཞིན་མཛོད། ༈ དེ་ལྟར་ཡེ་ཤེས་པ་དེ་ཉིད་མི་འགྱུར་བ་རྒྱས་གདབ་པའི་མོས་པ་བརྟན་པོ་མཛོད་ཅིག །དེ་ནས་སྐུ་གསུང་ཐུགས་ཡོན་ཏན་ཕྲིན་ལས་ལྔའི་སྒོ་ནས་དབང་མཆོག་དམ་པའི་སྨིན་པར་བྱེད་པ་ལ། ཐོག་མར་སྐུ་མི་འགྱུར་བ་རྡོ་རྗེ་གསུམ་དང་རོ་གཅིག་པའི་ཕྱིར་བུམ་དབང་བསྐུར་བའི་མོས་པ་མཛོད། ༈ དེ་ནས་གསུང་མི་འགག་པ་ཚངས་དབྱངས་ཡན་ལག་དྲུག་ཅུ་མི་བཟད་པ་རྒྱན་གྱི་འཁོར་ལོར་དབང་ཐོབ་པའི་མོས་པ་བརྟན་པོ་མཛོད་ཅིག །༈ དེ་ནས་ཐུགས་ཇི་ལྟ་བ་དང་ཇི་སྙེད་

[Full Size]

པ་མཁྱེན་པའི་ཡེ་ཤེས་ཀྱི་ཉི་འོད་འབུམ་དུ་བརྡལ་བའི་དབང་མཆོག་དམ་པ་ཐོབ་པའི་མོས་པ་མཛོད། ༈ དེ་ནས་རང་གཞན་གྱི་དཔལ་དང་ཡེ་ཤེས་ཐམས་ཅད་དགོས་འབྱུང་དཔག་བསམ་ལྗོན་པ་བཞིན་ཡོན་ཏན་ལྷུན་གྲུབ་ཏུ་འབྱུང་བའི་མོས་པ་མཛོད། ༈ དེ་ནས་ལས་དང་ཉོན་མོངས་ཀྱིས་བསླད་པའི་སྡིག་སྒྲིབ་བར་ཆད་ཐམས་ཅད་ལས་རྒྱལ་ཏེ་ཕྲིན་ལས་རྣམ་བཞིར་དབང་འབྱོར་བའི་མོས་པ་མཛོད། ༈ དེ་ནས་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སྣང་སྲིད་ཟུང་འཇུག་སྤྲོས་པའི་མཐའ་དང་བྲལ་བ་ཕྱག་རྒྱ་ཆེན་པོའི་ངང་དུ་མཉམ་པར་ཞོག་ཅིག །དེ་ནས་གང་ཤར་སྣང་བའི་ཆ་ཐམས་ཅད་ཡབ་དང་སྟོང་པའི་ངོ་བོ་ཡུམ་གྱི་རང་བཞིན་གཉིས་མེད་བདེ་ཆེན་གྱི་ངང་དུ་རོལ་པར་གྱིས་ཤིག །༈ དེ་ནས་སྣང་བ་ཐམས་ཅད་བརྡ་ཆོས་སུ་སྟོན་པའི་དབང་ནི་གློ་བུར་ཡིད་བྱེད་ཀྱི་དྲན་རྟོག་ཐམས་ཅད་ཆོས་སྐུའི་རྒྱན་དུ་ངོ་ཤེས་པར་སྒོམས་ཤིག །༈ དེ་ནས་རིག་པའི་ངོ་བོ་སྟོང་པའི་རང་རྩལ་གྱི་ཡེ་ཤེས་དེ་ཡི་ངང་ནས་ཉོན་མོངས་རྟོག་ཚོགས་ཐམས་ཅད་རང་གྲོལ་ཆེན་པོའི་དབང་ཐོབ་པར་སྒོམས་ཤིག །༈ དེ་ནས་གཏོར་ཆེན་ཡེ་ཤེས་འབར་བའི་དབང་བསྐུར་བ་ནི་ཁྱོད་རང་རྣམས་ལྷར་གསལ་ཐོབ་ལ་མདུན་བསྐྱེད་ལྷ་ཚོགས་རྣམས་འོད་དུ་ལྟེམ་གྱིས་ཞུ་ནས་མཚོ་ལ་ཆར་བབ་པ་བཞིན་ཐིམ་ནས་དབང་བཞི་ཐོབ། སྒྲིབ་བཞི་དག །སྐུ་བཞི་མངོན་དུ་གྱུར་པའི་མོས་པ་

[Full Size]

མཛོད། ཆོས་སྐུ་ཀུན་ཏུ་བཟང་པོ། ལོངས་སྐུ་རྒྱལ་བ་རིགས་ལྔ། སྤྲུལ་སྐུ་པདྨ་འབྱུང་གནས། དཔལ་ཆེན་གྲུབ་པའི་དབང་ཕྱུག་ཀརྨ་པཀྴི། རས་ཆུང་རྡོ་རྗེ་གྲགས་པ། དབང་ཆེན་དཔའ་བོ་རྟ་མགྲིན། ཡུམ་ཆེན་དཔའ་མོ་རྡོ་རྗེ་ཕག་ཞལ་ཅན། རིག་འཛིན་མི་འགྱུར་རྡོ་རྗེ་ནུས་ལྡན་དྲག་པོ་རྩལ། འཁོར་ལོའི་མགོན་པོ་ཤྲཱི་ཙིཏྟ་བཛྲ་བཀའ་བབས་ཆོས་བདག་བརྒྱུད་པ་རྣམས་དང། དཔལ་ཡེ་ཤེས་ཀྱི་མགོན་པོ་རྡོརྗེ་བེར་ནག་པོ་ཅན། འདོད་ཁམས་དབང་ཕྱུག་རང་བྱུང་གི་རྒྱལ་མོ། དམ་ཅན་སྐྱེས་བུ་རྡོ་རྗེ་ལེགས་པ་ལ་སོགས་པ་རྩ་གསུམ་རྒྱལ་བའི་ལྷ་ཚོགས་རྣམས་ཀྱིས་རྡོ་རྗེའི་སློབ་མ་འདི་རྣམས་ལ་མཆོག་དང་ཐུན་མོང་གི་དངོས་གྲུབ་དམ་པ་མྱུར་དུ་སྩོལ་བར་མཛད་དུ་གསོལ། བར་ཆད་བདུད་བཞི་ལོག་འདྲེན་སྔོན་ལས་འཕྲལ་རྐྱེན་ཆོས་མིན་གྱི་སྣང་བ་ཐམས་ཅད་རང་སར་དག་པར་བྱིན་གྱིས་རློབས་ཤིག །དེ་ནས་དབང་གི་མཐའ་རྟེན་རྒྱས་གདབ་བརྟན་བར་གཞོམ་གཞིག་དང་བྲལ་བའི་ཕྱིར་རྡོརྗེ་རྒྱ་གྲམ་གྱི་དབང་བསྐུར་བ་ནི། ༈ དེ་ལྟར་རྩ་གསུམ་ཐུན་མོང་མ་ཡིན་པའི་དབང་བཞི་ཟབ་མོ་བཀའ་རྒྱ་ཅན་འཁྲུལ་མེད་ཉིད་དུ་ཐོབ་པ་ཡིན་པས་ཕྱི་ནང་གསང་བའི་དམ་ཚིག་མཐའ་དག་རྗེས་སུ་སློབ་པ་དང་བླ་མེད་བྱང་ཆུབ་ཀྱི་བར་འདུ་འབྲལ་མེད་པར་ཡི་དམ་དུ་ཁ་ཙམ་མ་ཡིན་པར་འཛིན་སྙམ་པའི་སྒོ་ནས་རྗེས་ཟློས། མཎྜལ། ཅེས་དག་སྣང་ཞལ་གཟིགས་མའི་དབང་གི་མཚམས་སྦྱོར་འདི་ཡང་སི་ཏུ་པདྨ་ཉིན་བྱེད་དབང་པོས་དཔལ་སྤུངས་སྒྲུབ་སྡེར་སྤེལ་བ། ཛ་ཡནྟུ།། །།

དགོངས་གཏེར་གུ་རུ་དྲག་པོའི་དབང་གི་མཚམས་སྦྱོར་དངོས་གྲུབ་དགའ་ཆར་བི་ཧ་ར།

[Full Size]

དགོངས་གཏེར་གུ་རུ་དྲག་པོའི་དབང་གི་མཚམས་སྦྱོར་དངོས་གྲུབ་དགའ་ཆར་བི་ཧ་ར། རྡོ་རྗེ་ཁྲོ་བོ་མ་ལུས་པ། །དྲག་པོ་ཕྲིན་ལས་སྣ་ཚོགས་གཟུགས། །འདུས་པ་ལས་རབ་ཀུན་གྱི་གཙོ། །བདེ་བ་རྩལ་གྱིས་རྣམ་ཀུན་སྐྱོངས། །འདིར་དགོངས་གཏེར་གུ་རུ་དྲག་པོའི་སྨིན་དབང་གི་སྒོ་ནས་སྐལ་ལྡན་རྗེས་སུ་འཛིན་པ་ལ། དང་པོ་ཡོ་བྱད་ཉེར་མཁོའི་བཤམས་ནི། སྟེགས་བུའི་ཁར་དཀྱིལ་འཁོར་བསྒོམ་དོན་ལྟར་གྱི་རྡུལ་ཚོན་ནམ་རས་བྲིས་བཀོད། བསྡུ་ན་མཎྜལ་ལྟེ་བར་ལྷ་གྲངས་དང་མཉམ་པའི་འབྲུ་ཡི་ཚོམ་བུ་འགོད། དེ་སྟེང་མཉྫིའི་ཁར་བུམ་པ་ཆས་ལྡན་རྫས་ཀྱིས་བཀང་བ། དེའི་ཁར་ཀ་པཱ་ལ་བདུད་རྩིས་གཏམས་པ་བཅས་དང་། གཡས་སུ་དཔལ་གཏོར་རྒྱན་ལྡན་སྐུ་ཙཀླི་དར་གདུགས་དམར་པོ་ཅན། གཡོན་དུ་རྡོར་དྲིལ། མདུན་དུ་སྐུ་ཙཀླི་རྣམས་དང་། དུད་ཁྲོད་དཔལ་ཆས། ཕྲེང་བ་དང་། ཤེལ་ལམ་མེ་ལོང་། དེའི་གཡས་གཡོན། རྡོ་རྗེ་དང་། སྡིགས་པའི་གཟུགས་བཅས་དང་། སྨན་གཏོར་རཀྟ། གཞན་ཡང་མཆོད་པ་ཕྲེང་ཚར་བཤམས། ཚོགས་ཀྱི་ཡོ་བྱད་དང་། ཆད་ཐོ། བརྟན་སྐྱོང་། བཀའ་སྲུང་གཏོར་མ་སོགས་དང་། མཎྜལ། ཁྲུས་ཆབ། སྔོན་འགྲོ་གཏོར་མ་བཅས་མཐོང་བརྒྱུད་བཞིན་དུ་འདུ་བགྱིས་ལ། གཉིས་པ་སྒྲུབ་པ་དངོས་གཞི་ལས་བྱང་ལྟར་བདག་མདུན་བུམ་གསུམ་དབྱེར་མེད་བསྐྱེད། བཟླས་པ་དང་ཚོགས་མཆོད་ཕུལ་གྲུབ་མཚམས། བདག་མདུན་འོད་ཟེར་སྤྲོ་བསྡུའི་ཏིང་ངེ་འཛིན་གྱི་དབང་བཞི་ཡང་ལེན་པར་བྱའོ། །གསུམ་པ་དབང་བསྐུར་བ་དངོས་ནི། སློབ་མ་རྣམས་ཁྲུས་བྱས།

[Full Size]

བགེགས་གཏོར་བཏང་ནས་མཚམས་བཅད། སྲུང་འཁོར་བསྒོམ་ལ་དབང་བཤད་སྤྱི་འགྲོ་ལྟར་གྱི་མཚམས། སྐབས་སུ་བབས་པ་དཔལ་ཆེ་མཆོག་གུ་རུ་དྲག་པོ་ཀཱི་ལ་ཡའི་སྒོ་ནས་སྨིན་བྱེད་ཀྱི་དབང་བསྐུར་ཟབ་མོ་བགྱིད་པ་ཡིན་ཏེ། དེ་ཡང་ཨོ་རྒྱན་ཆེན་པོ་ཉིད་གདུལ་བྱ་ཞི་བས་མི་ཐུལ་བ་རྣམས་དྲག་པོའི་ཕྲིན་ལས་ཀྱིས་འདུལ་བར་དགོངས་ཏེ་པདྨ་དྲག་པོའི་སྐུར་བཞེངས་ནས་མངོན་སྤྱོད་སྙིང་རྗེའི་དབང་གིས་འགྲོ་བ་ལོག་པར་བལྟ་བ་རྣམས་བསྒྲལ་ཞིང་། བླ་མེད་བྱང་ཆུབ་ཆེན་པོའི་གནས་སུ་འདྲེན་པར་མཛད་ཅིང་། དེ་ཉིད་ཀྱི་རྒྱུད་དང་སྒྲུབ་ཐབས་ཁྱད་པར་དུ་འཕགས་པ་སྙིགས་དུས་ཀྱི་བསྟན་པའི་བཙས་སུ་གདམས་པ་འགའ་ཞིག་གཏེར་དུ་སྦས་པ། སྔ་འགྱུར་བཀའ་གཏེར་རིང་ལུགས་འཆང་བ་སྤྲུལ་པའི་གཏེར་ཆེན་ཡོངས་ཀྱི་མངའ་བདག་ཉང་རལ་ཉི་མ་འོད་ཟེར་དང་ཐུགས་རྒྱུད་ཡེ་ཤེས་རིག་པའི་ངོ་བོ་ཆོས་ཀྱི་དབྱིངས་སུ་འདྲེས་པ་དགོངས་གཏེར་རྒྱ་མཚོའི་འབྱུང་གནས་དམ་པ་རིག་འཛིན་རྡོ་རྗེ་དྲག་པོའི་ཐུགས་ཀྱི་ཀློང་ལས་འཆར་བའི་ཟབ་ཆོས་འདི་ཉིད་ཉང་དང་། རཏྣའི་གཏེར་ཁ་ལས་བྱུང་བའི་བླ་མ་དྲག་པོའི་བྱིན་རླབས་ཀྱི་བརྒྱུད་པའི་དབང་བཞིའི་ཆུ་བོ་གཅིག་ཏུ་འདྲེས་པའི་མཐུ་སྟོབས་དུ་མ་དང་ལྡན་པ་འདི་དག་གི་སྒོ་ནས་དབང་བསྐུར་བ་ལ་སློབ་དཔོན་གྱིས་བགྱི་བར་འོས་པ་རྣམས་ལེགས་པར་གྲུབ་ནས། སློབ་མའི་བྱ་བ་དབང་བཞི་ལེགས་པར་ཞུ་བའི་དོན་དུ་མཎྜལ་ཕུལ། ཅེས་མཎྜལ་ཕུལ་ལ། དེ་ནས་བླ་མ་དང་ཆེ་

[Full Size]

མཆོག་པདྨ་དྲག་པོ་ཐ་མི་དད་པའི་དྲུང་དུ་དབང་བཞི་རྫོགས་པར་ཞུ་བའི་དོན་དུ་གསོལ་བ་བཏབ་པ་འདིའི་རྗེས་ཟློས་མཛོད། བླ་མ་བདུད་འདུལ་སོགས་ལན་གསུམ། དེ་ནས་མདུན་གྱི་ནམ་མཁར་སྟེང་གི་ཆ་ལ་རྩ་བརྒྱུད་ཀྱི་བླ་མ། བར་གྱི་ཆ་ལ་སངས་རྒྱས་བྱང་སེམས། པདྨ་དྲག་པོའི་ལྷ་ཚོགས། ཡི་དམ་ཞི་ཁྲོ་རབ་འབྱམས། འོག་གི་ཆ་ལ་ཡེ་ཤེས་ཆོས་སྐྱོང་སྲུང་མ་རྣམས་གསལ་བའི་དྲུང་དུ་སྐྱབས་སུ་འགྲོ་བ་དང་སེམས་བསྐྱེད་པ་འདིའི་རྗེས་ཟློས་མཛོད། ན་མོ། བླ་མ་བདེ་གཤེགས་སོགས་ལན་གསུམ། སེམས་བསྐྱེད་འགྲོ་བ་སོགས་ལན་གསུམ། དེ་ནས་བདུན་རྣམ་པར་དག་པ་འདིའི་རྗེས་ཟློས་མཛོད། རྡོ་རྗེ་རྒྱལ་པོ་སངས་རྒྱས་འདུས་པའི་སོགས་ལན་གསུམ། དེ་ནས་དབང་གི་གཞི་འགོད་པའི་སླད་དུ་དམིགས་པ་འདི་བཞིན་དུ་མཛོད་ཅིག །སློབ་མ་ལྷར་བསྐྱེད་པ་ནི། ཆོས་ཀུན་སྟོང་ཉིད་སྤྲོས་དང་སོགས་ལས་བྱང་ལྟར། སྤྱན་འདྲེན་སྐབས་སྤོས་དང་རོལ་མོ་དབྱངས་དང་བཅས་ཏེ། ཧྲཱིཿཡུལ་གྱི་མིང་ནི་རྔ་ཡབ་གླིང༔ སོགས་ནས་ཛབ་ལན་གསུམ་མམ་བདུན་གྱིས་བྱིན་དབབ་པའི་བར་བྱའོ། །དེ་ལྟར་ཡེ་ཤེས་པ་དེ་ཉིད་བྱང་ཆུབ་སྙིང་པོའི་བར་རབ་ཏུ་གནས་ཤིང་བརྟན་པར་གྱུར་པའི་མོས་པ་མཛོད། ཏིཥྛ་བཛྲ་བརྗོད་ལ་སྤྱི་བོར་རྡོ་རྗེ་བཞག །དེ་ནས་སྐུ་གསལ་སྟོང་ལྷུན་གྲུབ་འདུས་མ་བྱས་པ་ལྷ་ཡི་ངོ་བོ་བུམ་པའི་དབང་ལ་བརྟེན་པ་དང་། གསུང་གྲག་སྟོང་བརྗོད་

[Full Size]

མེད་ཟུང་འཇུག་བདེ་བ་ཆེན་པོའི་ངོ་བོ་ཀ་པཱ་ལ་བདུད་རྩིའི་དབང་དང་། ཐུགས་སྟོང་ཉིད་སྙིང་རྗེ་དབྱེར་མེད་ཀྱི་ངོ་བོ་རྡོ་རྗེ་དྲིལ་བུའི་དབང་དང་། དེ་ཁོ་ན་ཉིད་དོན་དམ་སྤྲོས་བྲལ་ཡེ་ཤེས་ཀྱི་ངོ་བོ་རིག་པའི་རྩལ་དབང་སྟེ་བཞི་ལས། དང་པོ་སྐུ་བུམ་པའི་དབང་ནི། བུམ་པ་ཐོགས་ལ། བུམ་པ་སྐྱེ་མེད་ཀུན་བཟང་སོགས། གཉིས་པ་གསུང་གསང་བའི་དབང་ནི། ཐོད་ཆང་ཐོགས་ལ། སྣང་བ་ཐབས་ཀྱི་སོགས། གསུམ་པ་ཐུགས་ཤེས་རབ་ཡེ་ཤེས་ཀྱི་དབང་ནི། རྡོར་དྲིལ་ཐོགས་ཏེ། སྟོང་དང་སྙིང་རྗེར་དབྱེར་མེད་སོགས། བཞི་པ་རིག་པའི་རྩལ་དབང་ནི། ཁྱེད་རྣམས་སེམས་མ་བཅོས་པར་རང་བབས་སུ་གློད་ལ་འཇོག་ཅིག །ཤེལ་ལམ་མེ་ལོང་ཐོགས་ལ། སེམས་ཉིད་ཀ་དག་སོགས་དང་། དེ་ལྟར་མཚོན་བྱ་རྫས་ཀྱི་དབང་བསྐུར་ནས། མཚོན་བྱེད་ཚིག་གིས་བརྡ་སྤྲད་པ་ནི། འཁོར་འདས་སྣང་བའི་སོགས་ཀྱིས་ངོ་སྤྲོད་བྱའོ། །དེ་ནས་དཀྱིལ་འཁོར་ཆེན་པོའི་ལྷ་དབང་ཡོངས་རྫོགས་བསྐུར་བའི་དོན་དུ་དམིགས་པ་འདི་བཞིན་མཛོད། སློབ་དཔོན་པདྨ་དྲག་པོ་དངོས་ཡིན་སྙམ་པའི་འདུ་ཤེས་དང་། མདུན་བསྐྱེད་ཆེ་མཆོག་པདྨ་དྲག་པོའི་དཀྱིལ་འཁོར་གྱི་ལྷ་ཚོགས་རྣམས་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་རིམ་བཞིན་ལྷ་སྐུ་རྣམས་འཕྲོས་ནས་ཁྱེད་རང་རྣམས་པདྨ་དྲག་པོར་གསལ་བའི་ལུས་ལ་སིབ་སིབ་ཐིམ་པར་སྒོམས་མཛོད་ཅིག །ཐོད་ཕྲེང་རྩལ་ཡབ་ཡུམ་སྐུ་སྤྱི་བོར་བཞག །རྒྱལ་བའི་སྤྱི་

[Full Size]

གཟུགས་སོགས་བརྗོད། དེ་ནས་གཙོ་བོ་ཀཱི་ལ་ཡ་དང་། ཁྱུང་། འཇམ་དཔལ། རྟ་མགྲིན། ཕྱག་རྡོར། མཁའ་འགྲོ་སྡེ་ལྔ། མེ་དབལ། ཁྲོ་བཅུ། གིང་ཆེན་སྡེ་བཞི་བཅས་སོ་སོའི་དབང་རྫོགས་པར་བསྐུར། དེ་ལྟར་གུ་རུ་དྲག་པོའི་དཀྱིལ་འཁོར་གྱི་ལྷ་ཚོགས་རྣམས་ཀྱི་གསང་གསུམ་ཡེ་ཤེས་རོལ་པའི་སྣང་ཆ་དང་གཉིས་མེད་རང་བྱུང་རིག་པའི་ཀློང་དུ་དབྱེར་མི་ཕྱེད་པར་གྱུར་པའི་ངེས་ཤེས་བརྟན་པོ་མཛོད་ཅིག །དེ་ནས་བཟླས་པའི་ལུང་འབོག་པའི་དོན་དུ་དམིགས་པ་འདི་བཞིན་མཛོད། སློབ་དཔོན་ཆེ་མཆོག་དཔལ་དུ་གསལ་བའི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཞིག་འཕྲོས། སློབ་དཔོན་གྱི་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཁྱེད་རང་རྣམས་དྲག་པོར་གསལ་བའི་ཙིཏྟ་རིན་པོ་ཆེ་ཟུར་བརྒྱད་པའི་གུར་ཁང་དུ་པད་ཟླ་ལ་ཧཱུྃ་ཡིག་མཐིང་ནག་གི་མཐའ་སྐོར་དུ་ཞི་བའི་སྙིང་པོ་ཟླ་བ་རྒྱུ་སྐར་གྱིས་བསྐོར་བ་ལྟ་བུར་གསལ་ཐོབ་ལ་སྔགས་འདིའི་རྗེས་ཟློས་མཛོད་ཅིག །ཕྲེང་བ་གཏད་ལ། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ལན་གསུམ། ཡང་པད་ཉི་ལ་ཧཱུྃ་ཡིག་གནས་འགྱུར་ཁ་དོག་དམར་པོ་དང་། དེ་མཐར་དྲག་སྔགས་འགལ་མེ་ལྟ་བུར་འཁོར་བ་གསལ་ཐོབ་ལ་སྔགས་འདིའི་རྗེས་ཟློས་མཛོད། ༀ་ཨཱ་ཿཧཱུྃ་ཨརྩིག་སོགས། སྔགས་རྣམས་ལན་གསུམ་རེ་དང་། སྣ་ཚོགས་ལས་གྲུབ་ཕྲེང་བ་སོགས། དེང་ཕྱིན་ཆད་འདི་ཉིད་རྩ་བའི་ཡི་དམ་དུ་བཟུང་ནས་

[Full Size]

བསྙེན་དང་སྒྲུབ་པ་མངོན་སྤྱོད་ལ་སོགས་ལས་བཞིའི་སྒོ་ནས་རང་གཞན་གྱི་དོན་དང་། བསྟན་པ་སྲུང་བའི་མེལ་ཚེ་ལ་དབང་ཐོབ་པར་མོས་ཤིག །དུར་ཁྲོད་དཔལ་ཆས་གཏད་ལ། དེ་ནས་དྲག་པོའི་ཕྲིན་ལས་མཐའ་དག་མངའ་དབང་འབྱོར་བའི་ཕྱིར་དུར་ཁྲོད་དཔལ་ཆས་བཅུ་ཡི་རྒྱན་དང་ཆ་ལུགས་རྫོགས་པའི་མོས་པ་མཛོད། ཧཱུྃ། ཆེ་མཆོག་དམར་ནག་སོགས་དང་། རྡོ་རྗེ་དང་ལྕགས་སྡིགས་གཏད་ལ། དེ་ནས་ཁྱེད་རྣམས་ཁྲོ་རྒྱལ་ཡོངས་ཀྱི་དབང་ཕྱུག་ཆེ་བཙན་འགྲན་ཟླ་དང་བྲལ་བར་མངའ་གསོལ་ཕྱིར་ཕྱག་མཚན་གནམ་ལྕགས་ཀྱི་རྡོ་རྗེ་རྩེ་དགུ་པ། ལྕགས་ཀྱི་སྡིགས་པ་ནག་པོ་མགོ་དགུ་པ་གཏད་པ་ཙམ་གྱིས་དྲེགས་པ་སྡེ་བརྒྱད་ཟིལ་གྱིས་ནོན་དབང་དུ་བསྡུས་དམ་ལ་བཞག །རྒྱལ་འགོང་དམ་སྲི་ཐམས་ཅད་མེ་དང་སྦུར་མ་འཕྲད་པ་ལྟར་གཞོབ་ཐུལ་གྱིས་བསྲེག་པའི་མོས་པ་མཛོད། ཁྲོ་རྒྱལ་ཀུན་གྱི་སོགས་དང་། གནམ་ལྕགས་སྡིགས་པ་སོགས་བརྗོད། ལག་གཡས་གཡོན་དུ་གཏད། དེ་ནས་མཐའ་རྟེན་གཏོར་མའི་དབང་བསྐུར་བ་ནི། གཏོར་མ་སྤྱི་བོར་བཞག་ལ། གཏོར་མ་འདི་ཉིད་དཔལ་ཆེ་མཆོག་གུ་རུ་དྲག་པོ་པདྨ་ཐོད་ཕྲེང་ཧེ་རུ་ཀའི་དཀྱིལ་འཁོར་གྱི་ལྷ་ཚོགས་དངོས་སུ་གསལ་བ་དེ་དག་གི་གསང་བ་གསུམ་ལས་འོད་ཟེར་འཕྲོས། ཁྱེད་རང་གི་ལུས་ངག་ཡིད་གསུམ་ལ་ཐིམ་པས་རྡོ་རྗེ་གསུམ་གྱི་བྱིན་རླབས་ཐོབ། དུག་གསུམ་རྟོགས་པའི་དྲི་མ་སྦྱང་། སྐུ་གསུམ་གྱི་བདག་ཉིད་ཆེན་པོའི་གོ་

[Full Size]

འཕང་མངོན་དུ་འགྱུར་ནུས་པའི་མཆོག་དང་ཐུན་མོང་གི་དངོས་གྲུབ་ཆར་ལྟར་བབས་ནས་བྱིན་གྱིས་བརླབས་པའི་མོས་པ་རྩེ་གཅིག་ཏུ་མཛོད་ཅིག །ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་བདེ་ཆེན་རྒྱལ་མོ། མངའ་བདག་ཆོས་རྒྱལ་ཁྲི་སྲོང་ལྡེའུ་བཙན། རིག་འཛིན་རྡོརྗེ་དྲག་པོ་ཕྲིན་ལས་འདུས་པ་ལས་རབ་བདེ་བ་རྩལ། བཀའ་བབས་ཆོས་བདག་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཁྱད་པར་དུ་དཔལ་ཡེ་ཤེས་ཀྱི་ཁྲོ་བོ་ཆེན་པོ་ཡོངས་ཀྱི་སྤྱི་དཔལ་ཁྲག་འཐུང་པདྨ་དྲག་པོ་ཀཱི་ལ་ཡ། ཡུམ་བཅོམ་ལྡན་འདས་མ་རྡོ་རྗེ་རྣལ་འབྱོར་མ། ཡེ་ཤེས་ཁྱུང་ཆེན་འབར་བ། འཇམ་དཔལ་ཁྲོས་པ་གཤིན་རྗེའི་གཤེད་པོ། རྟ་མཆོག་རྒྱལ་པོ་ཧེ་རུ་ཀ་དཔལ། གསང་བདག་ཕྱག་ན་རྡོ་རྗེ་གཏུམ་པོ། གནོད་སྦྱིན་ཆེན་པོ་ཡཀྴ་མེ་དབལ། རིགས་བཞིའི་ཌཱ་ཀི་སྡེ་ལྔ། རང་བྱུང་སྤྲུལ་པའི་ཁྲོ་བོ་བཅུ། བདུད་འདུལ་གིང་ཆེན་སྡེ་བཞི་ཡབ་ཡུམ་ལ་སོགས་པ་གཞན་ཡང་ཡེ་ཤེས་ལས་དང་ཆོས་ཀྱི་སྲུང་མ་རྣམས་ཀྱིས་དེང་འདིར་སྐལ་ལྡན་འདི་རྣམས་ལ་གནོད་ཅིང་འཚེ་བའི་དགྲ་བགེགས་བདུད་རིས་ལོག་པར་ལྟ་བའི་བར་ཆད་ཉེར་འཚེ་མི་མཐུན་བའི་ཕྱོགས་ཐམས་ཅད་ལས་རྣམ་པར་རྒྱལ་བར་བྱིན་གྱིས་བརླབ་ཏུ་གསོལ། གནས་སྐབས་སུ་ཚེ་དཔལ་སྙན་གྲགས་དང་

[Full Size]

འབྱོར་པ་རྒྱས་ཤིང་མཐུན་རྐྱེན་བསམ་པ་ཐམས་ཅད་ལྷུན་གྱིས་གྲུབ་པ་དང་། མཐར་ཐུག་སྐུ་དང་ཞིང་ཁམས་ཐ་མི་དད་པར་རྒྱལ་བའི་དཀྱིལ་འཁོར་དང་གཉིས་མེད་དབྱིངས་སུ་གཅིག་པའི་ངང་དུ་སངས་རྒྱས་པར་གྱུར་ཅིག །ཧཱུྃ། འགྲོ་བ་འདྲེན་མཛད་སོགས་སྔགས་དང་བཅས་བརྗོད། གཏོར་ཟན་དངོས་གྲུབ་ཀྱི་ཚུལ་དུ་རོལ་ནས་འཆི་མེད་ཚེ་ཡི་སྲོག་རྩ་བརྟན་པའི་མི་ཤིགས་པར་རྒྱས་གདབ་པའི་མོས་པ་མཛོད། གཏོར་ཟན་དང་། བདུད་རྩི་བཅས་སྦྱིན། དེ་ལྟར་ཆེ་མཆོག་དྲག་པོ་ཀཱི་ལ་ཡའི་དབང་བཞི་ཟབ་མོ་ཐོབ་པས་གསང་བ་སྔགས་ཀྱི་ཐེག་པ་ཕྱི་ནང་གསང་བས་བསྡུས་པའི་དམ་ཚིག་རྣམས་ཉམས་མེད་བསྲུང་སྙམ་པའི་སྒོ་ནས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་ལན་གསུམ། གཏང་རག་གི་མཎྜལ་ཕུལ། རྗེས་ཀྱི་རིམ་པ་ཚོགས་ལ་རོལ། ལྷག་གཏོར་བཏང་། བསྐུལ་ཆད་ཐོ། བརྟན་སྐྱོང་། དངོས་གྲུབ་ལེན་པ། མཆོད་བསྟོད། བཀྲ་ཤིས་སོགས་གཞུང་ལྟར་འགྲིགས་ཆགས་སུ་བྱའོ། །དེ་ལྟར་དགོངས་གཏེར་བླ་མ་དྲག་པོའི་སྨིན་དབང་གི་མཚམས་སྦྱོར་འདི་བཞིན་རོང་མོ་སྤྲུལ་སྐུ་ཀརྨ་རིན་ཆེན་གྱི་ཐུགས་བཞེད་ལྟར། སི་ཏུ་པདྨ་ཉིན་བྱེད་དབང་པོས་རབ་བྱུང་བཅུ་བཞི་པ་གནམ་ལོར་སྤྱོད་པའི་ཁྲུམས་སྟོད་ཟླ་བའི་དབང་ཕྱོགས་ཀྱི་རྒྱལ་བ་གཉིས་པར་ཡང་དབེན་དོན་དམ་བདེ་དགའ་གླིང་དུ་སྤེལ་བ་བཀྲ་ཤིས་པར་གྱུར་ཅིག །༈ སྭསྟི། གསུང་རབ་ཀྱི་རིགས་བཀླག་ལུང་ཇི་བཞིན་ཡོད་མེད་ལ་གདམས་གཏད་ཆགས་

[Full Size]

མེད་རིན་པོ་ཆེ་སོགས་ཀྱིས་བྱིན་རླབས་འཕོ་དབང་གནང་སྲོལ་ལ། ཁོ་བོས་གསར་བཀོད་རིགས་རྣམས་ཀྱང་དེའི་རྗེས་འབྲང་འོས་པར། དང་པོ། བདེ་གླིང་གཏེར་བྱོན་ཚིག་བདུན་གསོལ་འདེབས། བྱིན་འབེབས་སྔགས་བཅས་ཚར་གསུམ་གཏོན་ལ། ཡེ་དྷར་ལ་སུ་པྲ་ཏིཥྛ་བཏགས་པ་ལན་གསུམ་མེ་ཏོག་འཐོར་བཞིན་བརྗོད། རྒྱལ་ཀུན་ཐུགས་རྗེ་ཡོངས་འདུས་ཨོ་རྒྱན་རྗེའི། །གསང་གསུམ་བྱིན་རླབས་དེང་འདིར་འཇུག་ནས་སུ། །སྐལ་ལྡན་རྒྱུད་སྨིན་གྲོལ་བའི་དབང་ཐོབ་ཅིང་། །བསྟན་དང་འགྲོ་དོན་ཕྱོགས་མེད་སྤེལ་བ་ཡི། །མཐུ་སྟོབས་ནུས་པ་མཐར་ཕྱིན་ལྷུན་གྲུབ་ནས། །བླ་མེད་བྱང་ཆུབ་གོ་འཕང་ཐོབ་གྱུར་ཅིག །ཅེས་དད་ལྡན་སྔགས་འཆང་མངྒ་སཱ་ག་རའི་ངོར་སྤེལ་བ་དགེ། ༈ བྱིན་འབེབས་མདོར་བསྡུས། རང་ཉིད་ལྷར་གསལ་བའི་ཐུགས་ཀའི་འོད་ཟེར་ཀྱིས་བསྐུལ་བའི་མཆོག་གསུམ་རྩ་གསུམ་རབ་འབྱམས་རྒྱ་མཚོའི་ཞིང་དུ་བཞུགས་པའི་བླ་མ་ཡི་དམ་དཔའ་བོ་མཁའ་འགྲོ་ཡེ་ཤེས་ལས་དང་འཇིག་རྟེན་ཆོས་སྲུང་ནོར་ལྷ་གཏེར་བདག་ལ་སོགས་པ་རང་བཞིན་གྱི་གནས་དང་རང་རང་གི་གནས་ནས་མདུན་གྱི་ནམ་མཁར་སྤྱན་དྲངས་བཛྲ་ས་མཱ་ཛཿམདུན་བསྐྱེད་ཀྱི་རྟེན་ལ་དབྱེར་མེད་པར་བྱིན་དབབ་ནས། བདག་བསྐྱེད་སྐབས་རང་ཉིད་ལ་སིབ་སིབ་ཐིམ་པར་བསྒོམ། དེ་ནས་ལྷ་སོ་སོའི་ལས་བྱང་མངོན་རྟོགས་ལ་འཇུག་པར་བྱའོ། །ཀརྨ་བཀྲ་ཤིས་ངོར་སྤེལ་བ་དགེ། །།

བདེ་མཆོག་ལྷ་ལྔའི་སྒོ་ནས་སློབ་མ་རྗེས་སུ་འཛིན་པའི་རིམ་པ་ཟབ་མོའི་སྒོ་འབྱེད།

[Full Size]

བདེ་མཆོག་ལྷ་ལྔའི་སྒོ་ནས་སློབ་མ་རྗེས་སུ་འཛིན་པའི་རིམ་པ་ཟབ་མོའི་སྒོ་འབྱེད་ཅེས་བྱ་བ་བཞུགས་སོ། །

[Full Size]

ༀ་སྭསྟཱི། བདེ་མཆོག་དབང་བསྐུར་སྐབས། ཡུལ་གྲོང་གཏོར་མས་ས་བཟུང་བ་སོགས་གང་བདེ་སྐབས་ཐོབ་དང་། སྔོན་གཏོར་ནས་བདག་བསྐྱེད་དང་། བུམ་ཆོག་བསྐྱེད་བཟླས་གྲུབ་མཚམས། སློབ་མར་སྟ་གོན་ལ་ཁྲུས་དང་མེ་ཏོག་བཀྱེ་བསྡུ་བྱས་ཟིན་ནས། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྡོ་རྗེ་ཐེག་པའི་ཆོས་ཟབ་མོ་གསན་དགོངས་པའི་ཐུགས་བསྐྱེད་གསལ་བཏབ་ནས་གསན་པར་མཛད་འཚལ། གསན་པར་བྱ་བའི་ཆོས་ནི་གསང་སྔགས་རྡོ་རྗེ་ཐེག་པ་ཉིད་ཀྱི་དབང་དུ་བྱས་ན། སྒྲོན་གསལ་ལས། དེ་ལ་རབ་འབྲིང་གི་གཏི་མུག་ཅན་ལ་དགོངས་ཏེ་བྱ་བའི་རྒྱུད་བསྟན་ཏོ། །

[Full Size]

གཏི་མུག་དམན་པའི་རིགས་ཅན་རྣམས་ལ་སྤྱོད་པའི་རྒྱུད་བསྟན་ཏོ། །དམན་པ་དང་བར་མའི་འདོད་ཆགས་དང་ཞེ་སྡང་དང་གཏི་མུག་གི་རིགས་ཅན་རྣམས་ལ་རྣལ་འབྱོར་གྱི་རྒྱུད་བསྟན་ཏོ། །འདོད་ཆགས་དང་ཞེ་སྡང་གཏི་མུག་རབ་ཀྱི་རིགས་ཅན་རྣམས་ལ་རྣལ་འབྱོར་བླ་མེད་ཀྱི་རྒྱུད་བསྟན་ཏོ། །རབ་དང་རབ་ཀྱི་འདོད་ཆགས་དང་ཞེ་སྡང་གཏི་མུག་རིགས་ཅན་རྣམས་ལ་རྣལ་འབྱོར་མའི་རྒྱུད་བསྟན་ཏེ། ཞེས་དང་། རྡོ་རྗེ་གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་མཆོག །རྣལ་འབྱོར་བླ་མེད་དེ་ལྟག་གོ། །ཞེས་གསུངས་

[Full Size]

ཤིང་གདུལ་བྱའི་ཞིང་ཁམས་དང་མོས་པ་དབང་པོ་རབ་འབྲིང་ཐ་མའི་དོན་སོགས་ལ་དགོངས་ནས། བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དང་། རྣལ་འབྱོར་བླ་ན་མེད་པའི་རྒྱུད་དེ། རྒྱུད་སྡེ་རིན་པོ་ཆེ་རྣམ་པ་བཞིར་བཞུགས་པ་ལས་ཕྱི་མ་ཡིན་ཞིང་། །དེ་ལའང་ཐབས་ཤེས་ཀྱི་རྒྱུད་སྡེ་གཉིས་སུ་ཡོད་པ་ལས་ཤེས་རབ་ཀྱི་རྒྱུད་དམ་མ་རྒྱུད་ཡིན། །དེ་ལའང་རྡོ་རྗེ་གུར་ལས། མཁའ་འགྲོ་བདེ་དང་རྒྱ་མཚོ་བདེ་དང་ནམ་མཁའ་དང་། །གསེར་གྱི་ཆར་པ་དང་ནི་དགའ་ཆེན་ཟ་ནུས་དང་། །བདེ་ཆེན་སྒེག་པ་དང་ནི་གསང་པ་ཡིད་བདེ་དང་། །རྒྱུད་སྡེ་ཀུན་ལ་ཕན་པའི་རྡོ་རྗེ་མཁའ་འགྲོ་དང་། །སངས་རྒྱས་ཐམས་ཅད་དགྱེས་པའི་རྡོ་རྗེའི་དཀྱིལ་འཁོར་དང་། །གསང་བ་མཛོད་དང་རྡོ་རྗེ་བདུད་རྩི་ལས་བྱུང་བ། །འཁོར་ལོ་བདེ་མཆོག་གུར་དང་ཕུན་སུམ་ཚོགས་པ་རྣམས། །རྣལ་འབྱོར་མ་རྒྱུད་རྣམས་སུ་གྲགས་པ་ཡིན། །ཞེས་གསུངས་པའི་མ་རྒྱུད་སྤྱི་དང་། སྙིང་པོ་དང་། ཡང་སྙིང་གི་དབྱེ་བ་ཡོད་པ་ལས་འདིར་ཡང་སྙིང་འཁོར་ལོ་སྡོམ་པ་ཡིན་ཏེ། མར་པའི་མགུར་ལས། ཕ་རྒྱུད་གསང་བ་འདུས་པ་ཐོབ། །མ་རྒྱུད་མ་ཧཱ་མཱ་ཡཱ་ཐོབ། །སྙིང་པོ་ཀྱེ་ཡི་རྡོ་རྗེ་ཐོབ། །ཡང་སྙིང་འཁོར་ལོ་བདེ་མཆོག་ཐོབ། །ཅེས་པ་ལྟར་

[Full Size]

ལགས། དེའང་བདེ་མཆོག་རྩ་བའི་རྒྱུད་རྒྱས་པ་མངོན་བརྗོད་འབུམ་པ་ཞེས་བྱ་བ་ས་བཅུའི་དབང་ཕྱུག་རྣམས་ཀྱི་སྤྱོད་ཡུལ་དུ་གྱུར་པ་ཞིག་ཡོད་པ་ལས། བདེ་མཆོག་ཉུང་ངུའི་རྒྱུད་འདི་བསྡུས་པའི་རྒྱུད་ཡིན་ཏེ། སྒྲོལ་མ་འབྱུང་བའི་རྒྱུད་ལས། ཚེ་ཐུང་བརྩོན་འགྲུས་ཞེན་པ་དང་། །སྲོག་ཆགས་གསོད་ལ་དགའ་བ་དང་། །འདོད་ལ་སྤྱོད་ལས་གཡེང་གྱུར་པ། །དེ་ལྟར་རྒྱུད་རྣམས་ཉུང་ངུར་གསུངས། །ཞེས་གསུངས་པ་བཞིན་ནོ། །དེ་ལྟར་སྡོམ་པའི་རྒྱུད་ལེའུ་ལྔ་བཅུ་རྩ་གཅིག་པ་དེ་ཐེག་པ་ཆེན་པོའི་ཆོས་རྣམས་མི་ཡུལ་དུ་ཕེབས་པའི་སྐབས་སུ་བྱ་སྤྱོད་རྣལ་འབྱོར་གྱི་རྒྱུད་རྣམས་ཀྱང་ཕེབས་པ་ཡིན་ཅིང་། དེ་དག་དང་ལྷན་ཅིག་རྒྱུད་ཀྱི་རྒྱལ་པོ་འདི་ཡང་མི་ཡུལ་དུ་ཕེབས། དེ་ནས་ཕྱིས་ཤིག་ན་གྲུབ་ཐོབ་ཤ་བ་རི་པས་དཔལ་ལཱུ་ཧི་པ་ལ་གདམས། གྲུབ་ཆེན་དེ་ཉིད་སྡོམ་པའི་རྒྱུད་ཀྱི་བདག་པོར་གྱུར་ཅིང་རྣལ་འབྱོར་མ་ཀུན་སྤྱོད་ཀྱི་རྒྱུད་སྤྱན་དྲངས། རྡོ་རྗེ་དྲིལ་བུ་པས་དཔལ་མངོན་བརྗོད་བླ་མའི་རྒྱུད་སྤྱན་དྲངས། གྲུབ་ཆེན་ནག་པོ་སྤྱོད་པས་དཔལ་འཁོར་ལོ་སྡོམ་པའི་ཆོས་ཚུལ་རྒྱ་ཆེན་དར་བ་མཛད་པ་སྟེ། སློབ་དཔོན་དེ་གསུམ་ལ་ལཱུ་ནག་དྲིལ་གསུམ་ཞེས་རྒྱུད་འདིའི་སྲོལ་འབྱེད་ཉི་ཟླ་ལྟར་གྲགས་པ་ཡིན། གཞན་ཡང་བདེ་མཆོག་རྩ་བཤད་ཀྱི་རྒྱུད་རྣམས་ནས་དངོས་སུ་བསྟན་པའི་དཀྱིལ་འཁོར་རྒྱས་བསྡུས་མང་པོ་གྲུབ་བརྙེས་ཀྱི་སློབ་དཔོན་སོ་སོར་ནས་བརྒྱུད་པའི་བཀའ་སྲོལ་མི་འདྲ་བ་དུ་མ་ཞིག་ཡོད་ཀྱང་། འདིར་སློབ་

[Full Size]

དཔོན་ལཱུ་ཧི་པ་ནས་རིམ་པར་བརྒྱུད་དེ་དཔལ་ནཱ་རོ་པའི་ལུགས་ཀྱི་སྡོམ་པ་ལྷ་ལྔ་འདི་ནི་ཨུ་པའི་རྒྱུད་ལས་འཁོར་ལོ་གསུམ་གྱི་ལྷ་ཚོགས་ཐམས་ཅད་བསྟན་ཟིན་པའི་རྗེས་སུ་སླར་ཡང་རྣལ་འབྱོར་མ་བཞི་པོ་བསྐྱར་ཏེ་བསྟན་པ་ཡིན་ལ་ལྷོ་བྲག་མར་པ་ལོ་ཙཱ་དེ་ཉིད་འཕགས་ཡུལ་དུ་ལན་བཞི་བྱོན་པའི་རྗེས་མའི་དུས་ནཱ་རོ་པ་ཆེན་པོ་སྤྱོད་པ་ལ་གཤེགས་ཀྱང་། སྔར་བླ་མ་ཉིད་ཀྱི་བཀའ་གནང་ཡོད་བཞིན་དུ་དངོས་སུ་མཇལ་ནས་འཁོར་ལོ་སྡོམ་པའི་དབང་དང་རྒྱུད་བཤད་མན་ངག་ཞིབ་རྒྱས་སུ་བསྩལ། དེས་སྲས་ཀྱི་གཙོ་བོ་མི་ལ་མཐུ་ཆེན་ལ། དེས་རྒྱལ་བས་ལུང་བསྟན་ཆོས་རྒྱལ་ཟླ་འོད་གཞོན་ནུ་ལ། དེས་རྗེ་དུས་གསུམ་མཁྱེན་པ་ལ་ཡི་གེ་མེད་པའི་སྙན་བརྒྱུད་དུ་གནང་བ་ཐུགས་དམ་ལྔ་ཚན་ལྔའི་ནང་ནས་འཁོར་ལོ་སྡོམ་པ་ལྷ་ལྔའི་དཀྱིལ་འཁོར་དུ་དབང་བསྐུར་བ་ཡིན་ལ་བླ་མེད་སྔགས་ཀྱི་ཐེག་པ་མཐའ་དག་གི་འཇུག་སྒོ་ཐུན་མོང་མ་ཡིན་པ་ནི་སྨིན་བྱེད་ཀྱི་རིམ་པ་ཁོ་ན་སྟེ། སངས་རྒྱས་ཐོད་པའི་རྒྱུད་ལས། དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོང་པ་ཉིད། །དེ་བཞིན་དབང་དང་བྲལ་ན་ནི། །ཡེ་ཤེས་ཀུན་གྱིས་སྟོང་པ་ཉིད། །དཔེར་ན་པི་ཝང་སྦྱོར་ཀུན་གྱི། །རྒྱུད་དང་བྲལ་ན་བརྡུང་མི་རུང་། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་འགྲུབ་མི་འགྱུར། །རྨོངས་པ་

[Full Size]

གང་ཞིག་དབང་མེད་པར། །བདག་ནི་དབང་བསྐུར་ཞེས་སྨྲ་ན། །ཇི་སྲིད་སངས་རྒྱས་བཞུགས་ཀྱི་བར། །སློབ་མར་བཅས་ཏེ་དམྱལ་བར་འགྲོ། །ཞེས་དབང་མ་ཐོབ་པའི་ཉེས་དམིགས་དང་། ཐོབ་པའི་ཕན་ཡོན་ཡང་། དྲི་མེད་འོད་ལས། སྐྱེ་བ་བདུན་གྱི་མཐར་ཐུག་པར་བརྩོན་འགྲུས་མི་ལྡན་ཞིང་ཡེ་ཤེས་མ་བསྒོམ་པས་ཀྱང་སངས་རྒྱས་པར་འགྱུར་རོ། །ལམ་འདི་འགྲུབ་པའི་རྒྱུའི་གཙོ་བོ་ནི་དམ་ཚིག་དང་སྡོམ་པ་རྣམ་པར་དག་པ་དང་སྨོན་ལམ་གྱི་སྟོབས་ཡིན་ནོ། །ཞེས་པ་ལྟར་དཀྱིལ་འཁོར་དུ་འཇུག་ཅིང་སྨིན་པར་བྱེད་པའི་དང་པོ་བྱང་ཆུབ་མཆོག་ཏུ་ཐུགས་བསྐྱེད་པ་གལ་ཆེ་བར་གདམས་པ་ནི། གསང་བ་སྤྱི་རྒྱུད་ལས་གསུངས་པ་འདི་ལ་གསན་པས་ཁྱབ་པར་གདའ། སྔགས་ཀྱི་དངོས་གྲུབ་དོན་གཉེར་གང་། །དཀྱིལ་འཁོར་འདི་ནི་འཇུག་པར་བྱེད། །དེ་ལས་གཞན་པའི་དངོས་གྲུབ་འདོད། །གཞན་དག་འཇིག་རྟེན་གཞན་དོན་གཉེར། །འཇིག་རྟེན་ཕ་རོལ་དོན་གཉེར་བའི། །དད་པ་མང་དུ་བྱེད་པ་ཡི། །བློ་ལྡན་དཀྱིལ་འཁོར་འཇུག་བྱ་ཡི། །ཚེ་འདིའི་འབྲས་བུ་འདོད་མི་བྱ། །ཚེ་འདི་འདོད་པ་གྱུར་པ་ལ། །འཇིག་རྟེན་ཕ་རོལ་དོན་མི་འབྱུང་། །འཇིག་རྟེན་ཕ་རོལ་དོན་གཉེར་སྐྱེས། །ཚེ་འདིར་འབྲས་བུ་རབ་ཏུ་རྒྱས། །ཞེས་བཤད་པའི་ཐུགས་བསྐྱེད་

[Full Size]

དང་ལྡན་པའི་ངོས་ནས་སྟ་གོན་གྱི་ཆོས་རྣམས་ཞུ་བའི་ཡོན་དུ་མནྜལ་འབུལ་བར་ཞུ། དེ་ནས་མནྜལ་འབུལ། དེ་ལྟར་མནྜལ་འབུལ་བ་སྔོན་དུ་སོང་ནས་ཐལ་མོ་མེ་ཏོག་དང་བཅས་པའི་སྙིམ་པ་སྦྱར་ནས་གསོལ་བ་གདབ་པ་འདིའི་རྗེས་ཟློས་མཛོད། དགའ་ཆེན་ཁྱོད་བདག་སོགས་ལན་གསུམ། དེ་ནས་སྔར་གྱི་ལམ་ཐུན་མོང་མ་ཡིན་པ་འདིར་འཇུག་པ་དོན་ཆེ་བར་གདམས་པ་ནི། བུ་ཚུར་ཐེག་པ་ཆེན་པ ོ་པ། །ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པ་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱི་གསང་སྔགས་ཀྱི། །ཆོ་ག་ཟབ་མོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྦྱོར་བ་མཉམ་མེད་པས། །སྐྱོབ་པ་ཤཱཀྱ་སེང་གེ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །འཇིག་རྟེན་མཐུན་པར་གཤེགས་ནས་སུ། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡི་བློ་གྲོས་འདི་གྱིས་ཤིག །ཅེས་བརྗོད། དེ་

[Full Size]

ནས་ཁྱེད་རང་རྣམས་རྡོ་རྗེ་ཐེག་པའི་ལམ་དུ་རྒྱུད་སྨིན་པར་བྱེད་པ་ལ་རྒྱུད་དག་པ་གལ་ཆེ་བས་སློབ་དཔོན་དང་དཀྱིལ་འཁོར་གྱི་གཙོ་བོ་གཉིས་སུ་མེད་པའི་སྤྱན་སྔར་ལྔ་རྣམ་པར་དག་པར་བྱ་སྙམ་པས་འདི་ཡི་རྗེས་ཟློས་མཛོད། འདོད་ཆགས་ཞེ་སྡང་གཏི་མུག་ལས་གྱུར་པའི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བགྱིད་དང་དེ་བཞིན་བགྱིད་བསྩལ་རྣམས། །ཐམས་ཅད་རྒྱལ་བ་རྣམས་ཀྱི་མདུན་དུ་འཆགས། །གང་ཡང་དེ་བཞིན་གཤེགས་ཀུན་སངས་རྒྱས་དང་། །གཞན་ཡང་རྫོགས་པའི་སངས་རྒྱས་ལ་བརྟེན་དང་། །རང་སངས་རྒྱས་དང་བླ་མ་མཆོག་རྣམས་ཀྱི། །དགེ་བ་ཀུན་ལ་བདག་ནི་རྗེས་ཡི་རངས། །དུས་གསུམ་ཀུན་ཏུ་གཤེགས་པའི་སངས་རྒྱས་དང་། །ནམ་མཁའི་ཕྱོགས་ཁྱབ་བརྩེ་ལྡན་ཡོན་ཏན་ཚོགས། །ཆོས་དང་སྐྱོན་སྤངས་འཕགས་པའི་ཚོགས་རྣམས་ལ། །གུས་པས་བདག་ནི་སྐྱབས་སུ་ཉེ་བར་མཆི། །སྡིག་པ་ཐམས་ཅད་རྩད་ནས་ཟད་བྱེད་ཅིང་། །གང་འདིར་བསོད་ནམས་ཚོགས་ནི་ཉེར་བསགས་པ། །དངོས་བྲལ་གཟུང་འཛིན་རྣམས་སྤངས་ཆོས་བདག་མེད། དབྱེར་མེད་བྱང་ཆུབ་སེམས་ནི་བདག་གིས་བསྐྱེད། ཚངས་པ་དབང་པོ་སོགས་ཀྱིས་རྙེད་དཀའ་བ། །དྲི་མེད་རྣམ་དག་རྙོགས་པ་ཡང་མ་མཆིས། །

[Full Size]

བརྩེ་ལྡན་སྲས་བཅས་རྒྱལ་བས་གསུངས་པའི་ལམ། །རྣམ་དག་བསམ་ཡས་ཡང་དག་བསྟེན་པར་བགྱི། །ཞེས་ལན་གསུམ། དེ་ནས་སློབ་དཔོན་དཀྱིལ་འཁོར་གྱི་ལྷ་ཚོགས་འཁོར་དང་བཅས་པའི་སྤྱན་སྔར་རིགས་ལྔ་སྤྱི་དང་བྱེ་བྲག་གི་དམ་ཚིག་དང་སྡོམ་པ་རྣམས་ཁས་བླངས་ནས་ལེགས་པར་བསྲུང་སྙམ་པས་འདིའི་རྗེས་ཟློས་མཛོད། སངས་རྒྱས་སྲས་བཅས་ཐམས་ཅད་དང་། །དཔའ་བོ་རྣམ་འབྱོར་མ་རྣམས་ཀུན། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བགྱི་བས་ནི། །དུས་འདི་ནས་ནི་བཟུང་ནས་སུ། །བྱང་ཆུབ་སྙིང་པོར་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོ་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་བཟུང་བར་བགྱི། །ནམ་དུ་ཡང་ནི་མི་སྤང་ངོ་། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་

[Full Size]

བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ནི་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་བཟུང་པར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱིད། །བླ་ན་མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བརྒལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་བདག་གིས་གྲོལ། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་ལན་གསུམ་གྱིས་སྡོམ་པ་བཟུང་། དེ་ནས་ཁྱེད་རང་རྣམས་ཀྱི་གནས་གསུམ་བྱིན་གྱིས་བརླབ་པའི་དོན་དུ་དམིགས་པ་འདི་བཞིན་གནང་བར་ཞུ། སློབ་མའི་སྙིང་གར་མགྲིན་པར་དཔྲལ་བར་རྣམས་སུ། ཧཱུྃ་ཨཱཿༀ། བརྗོད་བཞིན་དྲི་ཡི་ཐིག་ལེ་བྱས། སྙིང་གར་རྡོ་རྗེའི་ལྟེ་བར་ཧཱུྃ་སྔོན་པོ། །མགྲིན་པར་པདྨའི་ཟེའུ་འབྲུར་ཨཱཿདམར་པོ། །དཔྲལ་བར་འཁོར་ལོར་ༀ་དཀར་གྱིས་མཚན་པར་གྱུར། །ཞེས་བྱིན་གྱིས་

[Full Size]

བརླབས། དེ་ལྟར་གདོད་མ་ནས་རྡོ་རྗེ་གསུམ་གྱི་བདག་ཉིད་དུ་གྱུར་པ་ལ། སློབ་དཔོན་གྱིས་མཆོད་པའི་མོས་པ་མཛོད། ༀ་བཛྲ་པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ་ཨཱཿཧཱུྃ། ཞེས་ཕྱག་རྒྱ་དང་བཅས་པས་མཆོད། དེ་ནས་མནྜལ་ལ་དྲི་བཟང་གི་ཆུས་གྲུ་བཞིར་བྱུག་ནས་སློབ་མའི་མདུན་དུ་བཞག །སློབ་མ་རྣམས་ལ་སོ་ཤིང་གཏད་ནས། དེ་ནས་དངོས་གྲུབ་ཀྱི་མཚན་མ་བརྟག་པར་བྱ་བའི་དོན་དུ་ཁྱེད་རང་རྣམས་ཞལ་ཤར་རམ་བྱང་དུ་ལྟ་བས་ཐལ་མོ་སྦྱར་བའི་བར་དུ་སོ་ཤིང་བཟུང་ནས་རྩེ་མོ་ཅུང་ཟད་འཆའ་བའི་ཚུལ་དང་བཅས་ཏེ། ༀ་བཛྲ་ཧཱ་ས་ཧ། ཞེས་བརྗོད་ནས་དཀྱིལ་འཁོར་དུ་འདོར་བར་ཞུ། ཞེས་སོ་ཤིང་འདོར་བཅུག་ལ། དེའི་དངོས་གྲུབ་ཀྱི་མཚན་མ་བཤད་པ་ནི། རྩེ་མོ་བདག་ལ་བལྟས་ན་མཆོག་གི་དངོས་གྲུབ། གྱེན་ཐུར་མཁའ་དང་ས་སྤྱོད་ཕྱོགས་བལྟས་ན་འཇིག་རྟེན་སྐྱོང་བ་བརྒྱད་ཀྱི་དངོས་གྲུབ་ཐོབ་བོ། །སྲུང་སྐུད་དམར་པོ་ལ། ༀ་ཁནྜ་རོ་ཧེ་ཧཱུྃ་ཧཱུྃ་ཕཊ། ཞེས་པའི་སྔགས་བདུན་བཟླས་བཞིན་མདུད་པ་གསུམ་རེ་གདབ་ལ། ཧཱུྃ་ཡིག་ལས་བསྐྱེད་པའི་སྲད་བུ་དམར་པོ་སྐྱེས་པའི་དཔུང་པ་གཡོན་དང་། བུད་མེད་ཀྱི་གཡས་སུ་བཅིངས་པས་བགེགས་ལ་སོགས་པ་མི་མཐུན་པའི་ཕྱོགས་ཐམས་ཅད་བསྲུང་བའི་མོས་པ་མཛོད། ༀ་བུདྡྷ་མཻ་ཏྲི་རཀྵ་རཀྵ་སརྦཾ་སྭཱ་ཧཱ། ཞེས་བརྗོད་བཞིན་

[Full Size]

སྐུད་པ་བཅིངས། བཾ་ཡིག་ལས་སྐྱེས་པའི་དུང་ཆོས་ཀྱི་ཆུས་སྡིག་སྒྲིབ་མཐའ་དག་བཀྲུ་བའི་མོས་པ་མཛོད། ༀ་ཧྲཱིཿབི་ཤུདྡྷ་དྡྷརྨཿསརྦ་པ་པཱ་ནི་ཙ་ཨ་སྱེ་བི་ཤྭ་དྷ་ཡ་སརྦ་བི་ཀལྤཱན་ཨ་པ་ན་ཡ་ཧཱུྃ། ཞེས་ཁྱོར་ཆུ་ལན་གསུམ་འཐུང་དུ་གཞུག །དེ་ནས་ཟབ་མོའི་ཆོས་བཤད་པ་ནི། རྣམ་སྣང་མངོན་བྱང་ལས་གསུངས་པ་འདི་ལ་གསན་པས་ཁྱབ་པར་གདའ། འཇིག་རྟེན་དུ་ནི་ཀུན་མཁྱེན་དག །ཨུ་དུམྦཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གི་སེམས་ཅན་མཉམ་མེད་དོན། །མྱ་ངན་མི་འདའ་བྱེད་པ་ནུས། །བསྐལ་པ་བྱེ་བ་དུ་མ་རུ། །སྡིག་པ་བྱས་པ་གྱུར་པ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་བྱང་བར་འགྱུར་ལགས་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་འདི་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་བརྟན་ཅིང་མི་གཡོ་བ། །དེ་དག་གིས་ནི་ངན་འགྲོའི་རྒྱུ། །སྡུག་བསྔལ་ཀུན་འབྱུང་རབ་ཏུ་བཅད། །བདག་ཉིད་ཆེན་པོ་ཁྱེད་རྣམས་ཀྱི། །རྙེད་པ་མཉམ་མེད་དེ་རིང་རྙེད། །གང་

[Full Size]

ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་སྐལ་པ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ཞེས་བརྗོད། ༀ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུྃ་ཕཊ། ཅེས་གསུངས། ཧཱུྃ་དང་དྷཱིཿཡིག་ལས་སྐྱེས་པའི་ཀུ་ཤའི་ཆུན་པོ་དག་མི་གཙང་བ་སེལ་ཞིང་དགེ་བའི་ལྟས་རྟོགས་པར་བྱེད་པའི་ནུས་ལྡན་དུ་འགྱུར། །ཧཱུྃ། དང་། བྷཱིཿདང་། ཁནྜ་རོ་ཧེ་སོགས་སོ་སོར་བདུན་རེ་ཙམ་བཟླས། ༀ་བཛྲ་ཏིཀྵྞ་བཾ། ཞེས་བརྗོད་བཞིན་ཆེ་བ་སྟན་དང་ཆུང་བ་སྔས་སུ་གཏད། དེ་ལྟར་གཏད་པའི་ཀུ་ཤའི་ཆུན་པོ་ཆེ་བ་སྟན་དང་། ཆུང་བ་སྔས་སུ་གྱིས་ལ་དཀྱིལ་འཁོར་གྱི་ཁང་པ་འདིར་ཉལ་ནས་ནངས་པར་རྨི་ལམ་གང་བྱུང་བ་ང་ལ་སྨྲོས་ཤིག །བསོད་ནམས་འདི་ཡིས་སོགས། དགེ་བ་བསྔོས་ནས་ཅི་བདེར་བྱའོ། །དངོས་སྟ་མ་སྦྲེལ་ན་འདིར་འདས་མ་འདས་གཏོར་བསྔོས་དང་། བདག་བསྐྱེད་བསྡུ་རིམ་སོགས་རྗེས་ཆོག་བྱ། ཕྱི་ཉིན་བདག་མདུན་བུམ་གསུམ་ཚོགས་བཅས་གྲུབ་ནས་དངོས་བཞི་དབང་བསྐུར་ཞིང་། སྦྲེལ་ན་འདིར་རས་བྲིས་

[Full Size]

བཤམས་ནས་མདུན་བསྐྱེད་འདོན། སྟ་གོན་གྱིས་ལྷ་རྣམས་བསྲེ། མཆོད་བསྟོད། གཏོར་བསྔོས། ཕྱི་རོལ་གཏོར་མ། ཉེ་རེག །བདག་འཇུག །ཚོགས་འཁོར་བཅས་གྲུབ་ནས་དངོས་གཞིའི་དབང་བསྐུར་སྐབས་སུ། ཁྲུས་དང་མེ་ཏོག་བཀྱེ་བསྡུ་གྲུབ་ནས། ནམ་མཁའ་དང་མཉམ་པའི་སེམས་ཅན་ཐམས་ཅད་ཁྱབ་བདག་རྡོ་རྗེ་འཆང་གི་གོ་འཕང་ལ་འགོད་པར་བྱ། དེའི་ཆེད་དུ་རྡོ་རྗེ་ཐེག་པ་དམ་པའི་ཆོས་ཟབ་མོ་གསན་དགོངས་པའི་ཐུགས་བསྐྱེད་གསལ་བཏབ་ནས་གསན་པར་ཞུ། གསན་པར་བྱ་བའི་ཆོས་ཀྱི་དབང་དུ་བྱས་ནས། འདིར་མ་རྒྱུད་ཐམས་ཅད་ཀྱི་ཡང་སྙིང་འཁོར་ལོ་སྡོམ་པ་ལྷ་ལྔའི་དཀྱིལ་འཁོར་དུ་དབང་བསྐུར་བར་བྱེད་པ་ལ། དེ་ཡང་དཀྱིལ་འཁོར་སྔོན་དུ་འགྲོ་བ་ཅན་ཡིན་པས། རྡོ་རྗེ་རྩེ་མོ་ལས། སེམས་ཅན་ཤིན་ཏུ་ུགདུལ་དཀའ་གང་། །སྡོམ་པ་འཛིན་པ་མི་མཛད་ཅིང་། །དད་དང་ལྡན་པ་མེད་པ་ཡང་། །འཇུག་པ་ཉིད་ནི་དགག་མི་བྱ། །ཞེས་གསུངས་པ་ལྟར་ཁར་སང་གི་སྐབས་སུ་སྔོན་དུ་འགྲོ་བ་སྟ་གོན་གྱི་རིམ་པ་རྣམས་གྲུབ་ནས། དེ་རིང་གི་སྐབས་འདིར་རྡོ་རྗེ་སློབ་དཔོན་གྱི་ངོ་སྐལ་དུ་གྱུར་པའི་བདག་བསྐྱེད་བུམ་བསྐྱེད་མདུན་བསྐྱེད་མཆོད་བསྟོད་བཟླས་པ་

[Full Size]

དང་བཅས་པ་བདག་ཉིད་འཇུག་ཅིང་དབང་བླང་པ་རྣམས་ལེགས་པར་སྔོན་དུ་སོང་ནས་དངོས་གཞིའི་དབང་བསྐུར་ལ། ཡེ་ཤེས་ཐེག་པ་ལས། ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལས་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་ལས་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་དུ་གསལ་བར་བྱ། །དེ་ནི་དྲུག་གི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། །རྣལ་འབྱོར་བླ་མ་ཡི་ནི་དབང་། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ཡང་དེ་བཞིན་ནོ། །ཞེས་པ་ལྟར་རྒྱུད་སྔེ་འོག་མ་དང་ཆ་མཐུན་བུམ་དབང་སྟེང་དུ་བླ་མེད་རྒྱུད་ཀྱི་རྣམ་བཞག་ཐུན་མོང་མ་ཡིན་པ་མཆོག་དབང་གོང་མ་གསུམ་བསྣན་ནས་དབང་བཞི་བསྐུར་བས་སྣོད་རུང་དུ་བྱ་བའི་ཐོག་མར་འཇུག་པའི་ཆོས་རྣམས་ཞུ་བའི་ཡོན་དུ་མནྜལ་འབུལ་བར་ཞུ། མནྜལ་འབུལ། དེ་ལྟར་མནྜལ་འབུལ་བ་སྔོན་དུ་སོང་ནས་སྔགས་ཀྱི་སྐལ་པ་ཡོད་མེད་བརྟག་པའི་དོན་དུ། བུ་ཁྱོད་ཅི་ཡིན་དངོས་པོ་ཅི་ལ་དགའ། །ཞེས་པའི་ལན་དུ་འདིའི་རྗེས་ཟློས་མཛོད། སྐལ་བཟང་བདག་ནི་བདེ་བ་ཆེན་པོ་ལའོ། །དེ་ནས་སྐལ་པ་དང་ལྡན་པར་འདུག་པས་དབང་བསྐུར་བའི་ཐོག་མར་སྔོན་ཆད་དཀྱིལ་འཁོར་ཆེན་པོ་འདི་མ་མཐོང་བའི་བརྡར་རས་ཡུག་

[Full Size]

དམར་པོ་ཁ་ཚར་མ་ཉམས་པ་རེས་གདོང་གཡོགས་འཆིང་བར་ཞུ། ༀ་ཙཀྵུ་བྷནྡྷ་ཝ་ར་མ་ན་ཡ་ཧཱུྃ། སླད་མར་དཀྱིལ་འཁོར་མཇལ་བའི་ཚེ་ཕྱག་རྟེན་མེད་པར་མཇལ་དུ་མི་གཏུབ་པས་ཐལ་མོ་སྦྱར་བའི་བར་དུ་ཡངས་ཤིང་སྙོམས་པའི་མེ་ཏོག་གི་ཕྲེང་བ་རེ་འཛིན་པའི་མོས་པ་མཛོད། ཨཱ་ཁཾ་བཱི་ར་ཧཱུྃཿཐལ་མོ་མེ་ཏོག་དང་བཅས་པའི་སྙིམ་པ་སྦྱར་ནས་གསོལ་བ་གདབ་པ་འདིའི་རྗེས་ཟློས་མཛོད། དགའ་ཆེན་སོགས་ལན་གསུམ། དེ་ནས་རྡོ་རྗེ་སློབ་དཔོན་དཀྱིལ་འཁོར་གྱི་འཁོར་ལོ་དང་གཉིས་སུ་མེད་པ་གཙོ་བོར་གྱུར་པའི་རྒྱལ་བ་སྲས་བཅས་རྣམས་ཀྱི་སྤྱན་སྔར་སྡིག་པ་བཤགས་པ་དང་། དགེ་བ་ལ་རྗེས་སུ་ཡི་རང་བ་དང་། སྐྱབས་སུ་འགྲོ་བ་དང་། སེམས་བསྐྱེད་པ་དང་། དགེ་བ་བསྔོ་བ་སྟེ་ལྔ་རྣམ་པར་དག་པ་ཚུལ་བཞིན་དུ་མཛད་སྙམ་པས་འདིའི་རྗེས་ཟློས་མཛོད། བདག་གིས་སྡིག་པ་བགྱིས་པ་དང་། །བགྱིད་དུ་བསྩལ་དང་ཡི་རང་བ། །སངས་རྒྱས་སྤྱན་སྔར་མཆིས་ནས་སུ། །དེ་དག་བདག་གིས་བཤགས་པར་བགྱི། །སངས་རྒྱས་བྱང་ཆུབ་སེམས་དཔའ་དང་། །རང་རྒྱལ་དགྲ་བཅོམ་འགྲོ་རྣམས་ཀྱི། །སྒོམ་དང་བཟླས་བརྗོད་བསོད་ནམས་གང་། །དེ་ལ་བདག་ནི་ཡི་རང་ངོ་། །སེམས་ཅན་མངོན་པར་སངས་རྒྱས་དང་། །ཆོས་ཀྱི་འཁོར་ལོ་

[Full Size]

བསྐོར་བ་དང་། །བྱང་ཆུབ་སེམས་དཔའི་ཚོགས་ཀྱི་མཆོག །དེ་ལ་བདག་ནི་སྐྱབས་སུ་མཆི། །སངས་རྒྱས་འབྱུང་བ་ཇི་ལྟ་བ། །སྐལ་ལྡན་བྱང་ཆུབ་སེམས་དཔའ་ཡིས། །བྱང་ཆུབ་ཏུ་ནི་སེམས་བསྐྱེད་ལྟར། །དེ་ཉིད་དུ་ནི་སེམས་བསྐྱེད་དོ། །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདིར་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོ་གཟིར་ལས་གྲོལ། །ཞེས་ལན་གསུམ་གྱིས་ལྔ་རྣམ་དག་བྱ། དེ་ནས་སྔགས་ཀྱི་ཐུན་མོང་མ་ཡིན་པའི་བྱང་ཆུབ་ཏུ་སེམས་བསྐྱེད་པའི་ཕྱིར་དམིགས་པ་འདི་བཞིན་དུ་མཛོད། བདག་ཉིད་ཧེ་རུ་ཀ་གསལ་སྙིང་གར་ནི། །ཀུན་རྫོབ་བྱང་སེམས་ངོ་བོའི་ཟླ་དཀྱིལ་དབུས། །དོན་དམ་བྱང་སེམས་ངོ་བོའི་རྡོ་རྗེ་དཀར། །རྩེ་ལྔ་འོད་ཟེར་འབར་བས་མཚན་པར་གྱུར། །དེ་ལྟར་གསལ་བཏབ་ནས་ཀུན་རྫོབ་དང་དོན་དམ་པ་གཉིས་སུ་མེད་པའི་བྱང་ཆུབ་ཀྱི་སེམས་བསྐྱེད་པའི་མོས་པས་འདིའི་རྗེས་ཟློས་མཛོད། །ༀ་སརྦ་ཡོ་ག་ཙིཏྟ་ཨུ་པཱ་ད་ཡ་མི། ལན་གསུམ། རྡོ་རྗེ་སྙིང་གར་རེག་ཅིང་། ༀ་སུ་ར་ཏེ་སྟྭཱྃ་ཧོཿསིདྡྷི་བཛྲ་ཡ་ཐཱ་སུ་ཁཾ། ཞེས་བརྟན་པར་བྱའོ། །དེ་ལྟར་སེམས་བསྐྱེད་པའི་གདམས་པ་བླངས་ནས་དེའི་བསླབ་བྱ་མཐའ་དག་ལ་ཚུལ་བཞིན་དུ་སློབ་སྙམ་པའི་འདིའི་རྗེས་ཟློས་མཛོད།

[Full Size]

སངས་རྒྱས་སྲས་བཅས་ཐམས་ཅད་དང་། །དཔའ་བོ་རྣལ་འབྱོར་མ་རྣམས་ཀུན། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བྱ་བ་ནི། །དུས་ནི་འདི་ནས་བཟུང་ནས་སུ། །བྱང་ཆུབ་སྙིང་པོར་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་བཟུང་བར་བགྱི། །ནམ་དུ་ཡང་ནི་མི་སྤང་ངོ་། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་བཟུང་བར་བགྱི། །

[Full Size]

ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བླ་ན་མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བརྒལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་བདག་གིས་གྲོལ། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་ལན་གསུམ་གྱིས་སྡོམ་པ་འཟུང་། དེ་ནས་ཁྱེད་རང་རྣམས་ཀྱི་གནས་གསུམ་བྱིན་གྱིས་བརླབས་པའི་དོན་དུ་དམིགས་པ་འདི་གཞིན་གནང་བར་ཞུ། སློབ་མའི་སྤྱི་མགྲིན་སྙིང་གར་གསུམ་དུ། ༀ་ཨཱཿཧཱུྃ། བརྗོད་ཅིང་དྲི་ཡི་ཐིག་ལེ་བྱ། སྤྱི་བོར་ཟླ་བའི་སྟེང་དུ་ༀ་དཀར་པོ། །མགྲིན་པར་པདྨའི་ལྟེ་བར་ཨཱཿདམར་པོ། །སྙིང་གར་ཉི་སྟེང་ཧཱུྃ་སྔོན་ལས་འོད་འཕྲོས། །ཕྱོགས་བཅུའི་སངས་རྒྱས་ཀུན་གྱི་སྐུ་གསུང་ཐུགས། །བྱིན་རླབས་བསྡུས་ཏེ་ཡི་གེ་སོ་སོར་ཐིམ། །དེ་ནས་སྔགས་ཀྱི་གསང་བ་སྐལ་དམན་ལ་མི་བསྒྲག་པར་གདམས་པ་ནི། དེང་ཁྱོད་དེ་བཞིན་གཤེགས་ཀུན་བྱིན་རླབས་ཀྱིས། །དེ་བཞིན་གཤེགས་པ་ཀུན་གྱི་གསང་བ་འདི། །ཁྱོད་ཀྱི་དཀྱིལ་འཁོར་མ་ཞུགས་པ་རྣམས་ལ། །སྨྲ་བར་མི་བྱ་མ་དད་པ་ལའང་མིན། །དེ་

[Full Size]

ནས་སློབ་དཔོན་གྱི་ལག་གི་རྡོ་རྗེའི་རྭ་སྣེ་ནས་ཁྱེད་རང་རྣམས་ཀྱིས་བཟུང་སྟེ་ཡོལ་བའི་ནང་དུ་ཁྲིད་པའི་མོས་པ་མཛོད་ཅིག །ཧཱུྃ་ཛཿཧཱུྃ། ཞེས་དཀྱིལ་འཁོར་ཡོལ་བ་ཕྱེ། ཁྱེད་རང་རྣམས་དཀྱིལ་འཁོར་གྱི་ཤར་གྱི་སྒོ་དྲུང་དུ་གནས་པས་ལུས་ངག་ཡིད་གསུམ་འདུད་པའི་བརྡར་ཐལ་མོ་གནས་གསུམ་དུ་སྦྱར་ནས་ཕྱག་འཚལ་བའི་མོས་པ་མཛོད། ༀ་ན་མ་སྟེ་ཧཱུྃ། ན་མ་མི་ཧཱུྃ། ན་མོ་ན་མ་ཧཱུྃ་སྭཱ-་ཧཱ། ལན་གསུམ། ཤར་གྱི་སྒོ་དྲུང་དེ་ཉིད་དུ་གནས་ཏེ་སྐྱབས་སུ་འགྲོ་བ་འདིའི་རྗེས་ཟློས་མཛོད། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། །གཙོ་བོར་ལྷ་མོར་བཅས་པ་ཡི། །རྣལ་འབྱོར་གསང་སྔགས་མཁའ་འགྲོ་མ། །འཁོར་ལོ་གསུམ་གྱི་བདག་ཉིད་ཅན། །ཀུན་ལ་བདག་ནི་སྐྱབས་སུ་མཆི། །ལན་གསུམ། སློབ་དཔོན་དཀྱིལ་འཁོར་གྱི་ལྷ་ཚོགས་ལ་ངོ་ཆེན་གྱི་ཚུལ་གྱིས་གསོལ་བ་གདབ་པ་ནི། དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གི་སློབ་མ་གཞུག་པར་བགྱི། །ཞེས་གསོལ་བ་བཏབ་པས་ཁྱེད་རང་རྣམས་དཀྱིལ་འཁོར་གྱི་ཤར་སྒོ་ནས་ཞུགས་སྟེ་སྒོ་ཁྱམས་སུ་གནས་པ་ལ་ཕན་ཡོན་གྱི་སྒོ་ནས་དམ་ལ་བཞག་པ་ནི། ཁྱེད་རང་

[Full Size]

རྣམས་ཀྱི་སྤྱི་བོར་རྡོ་རྗེ་བཞག་པའི་མོས་པ་མཛོད་ཅིག །དེང་ཁྱོད་དཔའ་བོ་རྣལ་འབྱོར་མ་ཀུན་གྱི། །རིགས་སུ་ཞུགས་ཀྱི་ངས་ཁྱོད་ལ་ཡེ་ཤེས། །གང་གི་བདེ་གཤེགས་ཀུན་གྱི་དངོས་གྲུབ་ཀྱང་། །ཐོབ་ན་དངོས་གྲུབ་གཞན་ལྟ་སྨོས་ཀྱང་ཅི། །དགོས་པས་དེ་ལྟར་ཡེ་ཤེས་བསྐྱེད་པར་བྱའི། །ཁྱེད་ཀྱིས་དཀྱིལ་འཁོར་མ་མཐོང་མདུན་ཉིད་དུ། །བརྗོད་མི་བྱ་སྟེ་དམ་ཚིག་ཉམས་ཏ་རེ། །ཞེས་རྡོ་རྗེ་མགོར་བཞག །དེ་ལྟར་ཉེས་དམིགས་ཀྱི་སྒོ་ནས་དམ་ལ་བཞག་པའི་ཆེད་དུ་སྙིང་གར་རྡོ་རྗེ་བཞག་པའི་མོས་པ་མཛོད། ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་སྙིང་གར་རྡོ་རྗེ་བཞག །དེ་ནས་ཕན་ཡོན་དང་ཉེས་དམིགས་གཉིས་ཀའི་སྒོ་ནས་དམ་ལ་བཞག་པའི་དོན་དུ་ཐོད་པའི་བདུད་རྩི་མཐེ་བོང་དང་མིང་མེད་སྦྱར་བས་བྱིན་པའི་མོས་པ་མཛོད། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་ཡིས་འགྲུབ། །ༀ་བཛྲ་ཨུ་ད་ཀ་ཋཿཋཿཋཿཞེས་དམ་ཆུ་སྦྱིན། ཡང་རྡོ་རྗེ་སློབ་དཔོན་གྱི་བཀའ་གཉན་པའི་སྒོ་ནས་དམ་ལ་བཞག་པ་ནི། ཁྱེད་རང་རྣམས་ཀྱི་སྤྱི་བོར་རྡོ་རྗེ་བཞག་པའི་མོས་པ་མཛོད། དེང་

[Full Size]

ནས་བརྩམས་ཏེ་ཁྱོད་ཀྱི་དཔལ་ཧེ་རུ། །ཀ་ང་ཡིན་གྱི་ངས་འདི་གྱིས་ཤིག་ཅེས། །བསྒོ་བ་གང་ཡིན་ཁྱོད་ཀྱིས་བྱ་དགོས་ཏེ། །ང་ལ་བརྙས་པར་མ་བྱེད་གལ་ཏེ་ན། །མི་བདེ་མ་སྤང་དུས་བྱས་དམྱལ་ཏ་རེ། །ཞེས་རྡོ་རྗེ་མགོར་བཞག །དེ་རྣམས་དམ་ལ་བཞག་པ་བཞི་བསྒྲགས་སུ་གྲགས་པ་ཡིན་ལ། ད་ནི་ཡེ་ཤེས་པ་དབབ་པའི་སླད་དུ་གསོལ་བ་བཏབ་པ་འདི་ཡི་རྗེས་ཟློས་མཛོད། དཔའ་བོ་རྣལ་འབྱོར་མ་ཀུན་བདག་བྱིན་རློབས། །ཧེ་རུ་ཀ་ཡི་ཡེ་ཤེས་བདག་ལ་ཕོབ། །ལན་གསུམ་བརྗོད། དེ་ནས་དམིགས་པ་འདི་བཞིན་དུ་མཛོད། ཁྱེད་རྣམས་ཧེ་རུ་ཀ་མཆོག་ཡབ་ཡུམ་དུ། །གསལ་བའི་ལྟེ་བར་ༀ་ལས་མེ་འབར་བས། །སྙིང་གའི་ཧཱུྃ་དང་མགྲིན་པའི་ཨོ་བསྲེགས་པས། །སྤྱི་བོའི་ཧཾ་ལས་བདུད་རྩིའི་རྒྱུན་བབས་ཏེ། །ལུས་ཀུན་ཟག་མེད་བདེ་ཆེན་སྐྱེས་པར་གྱུར། །ༀ་ཧྲཱིཿཧ་ཧ་ཧཱུྃ་ཧཱུྃ་ཕཊ། ཛྙཱ་ན་ཨ་ཝེ་ཤ་ཡཱ་ཨ་ཨ་ཨ་ཧྲི་བཾ། ཏིཥྛ་མ་ཧཱ་ཀྲོ་དྷ་ཨ་ཝེ་ཤ་ཡ་ཧཱུྃ། ཤྲཱི་ཧེ་རུ་ཀ་ཡ་བིསྨ་ཧེ་བིདྱ་ར་ཛ་ཡ་དྷཱི་མ་ཧེ་སྭཱ་ཧཱ། བརྗོད་ཅིང་རོལ་མོ་དཀྲོལ། གུ་གུལ་ལ་སོགས་པའི་དུད་པས་བདུག །དེ་ནས་ཡེ་ཤེས་པ་དེ་ཉིད་བརྟན་པར་བྱས་པའི་མོས་པ་མཛོད། ཏིཥྛ་བཛྲ། ཞེས་པས་བརྟན་པར་བྱས། ཁྱེད་རང་རྣམས་མིག་དར་གྱི་འོག་ནས་དཀྱིལ་འཁོར་གྱི་ཐད་ཀྱི་བར་སྣང་དུ་ལྟོས་ལ་ཁ་དོག་ཇི་ལྟར་མཐོང་བ་སྨྲོས་ཤིག །དེ་ལྟར་བལྟས་པས་ཁ་དོག་དཀར་པོ་མཐོང་ན་ཞི་བ། སེར་པོ་ལ་རྒྱས་པ།

[Full Size]

དམར་པོ་ལ་དབང་། ནག་པོ་ལ་དྲག་པོ། ཁ་དོག་སྣ་ཚོགས་མཐོང་ན་ལས་སྣ་ཚོགས་འགྲུབ་པ་ཡིན་ནོ། །ཁྱེད་རང་རྣམས་ལ་སྔར་བྱིན་པའི་མེ་ཏོག་གི་ཕྲེང་བ་དེ་ཉིད་སྔོན་ཚེ་གང་ལ་སྦྱོང་བའི་རིགས་ཀྱི་ལྷ་སྐལ་བརྟག་པའི་དོན་དུ་དཀྱིལ་འཁོར་གྱི་གཙོ་བོའི་དབུ་ལ་དབུལ་བའི་མོས་པས་མེ་ཏོག་ལྟོས་མེད་དུ་སྔགས་འདིས་འདོར་བར་ཞུ། པྲ་ཏཱིཙྪ་བཛྲ་ཧོཿཞེས་བརྗོད་པས་མེ་ཏོག་དོར། མེ་ཏོག་དབུས་ཀྱི་གཙོ་བོ་ལ་བབས་པར་གྱུར་པས་དེ་ཉིད་ལས་ལྷ་སྐུ་གཉིས་པ་ཞིག་འཕྲོས་ནས་ཁྱེད་རང་གི་སྤྱི་བོར་ཐིམ་པའི་མོས་པ་མཛོད། སེམས་དཔའ་སྟོབས་ཆེན་ཁྱོད་ཀྱིས་ནི། །འདི་ནི་རབ་ཏུ་བཟུང་བར་བགྱི། །ཞེས་མེ་ཏོག་སྤྱི་བོར་བཞག །མ་རིག་པའི་སྒྲིབ་གཡོགས་དང་མིག་དར་ལྷན་ཅིག་ཏུ་བསལ་བའི་མོས་པ་མཛོད། ༀ་བཛྲ་ནེ་ཏྲ་ཨ་པཱ་ཧཱ་ར་པ་ཊ་ལམ་ཧྲཱིཿབརྗོད་ཅིང་གདོང་གཡོགས་བསལ། དེ་ནས་རྟེན་དང་བརྟེན་པར་བཅས་པའི་དཀྱིལ་འཁོར་མཐའ་དག་མངོན་སུམ་དུ་མཐོང་བའི་མོས་པ་མཛོད། དེའང་ཕྱི་རོལ་དུ་དུར་ཁྲོད་ཆེན་པོ་བརྒྱད། དེའི་ནང་དུ་རྡོ་རྗེའི་རྭ་གུར་མེ་རི་དང་བཅས་པའི་སྲུང་འཁོར། དེའི་ནང་དུ་པདྨའི་རྭ་བ། དེའི་ནང་སྣ་ཚོགས་རྡོ་རྗེ་རྭ་ཉི་ཤུ་པའི་ལྟེ་བར་ཐར་པ་ཆེན་པོའི་གཞལ་མེད་ཁང་གྲུ་བཞི་སྒོ་བཞི་རྟ་བབས་བཞི་དང་ལྡན་པ། ཐོག་ཕྱུར་བུར་ཕུབ་པའི་རྩེ་མོར་རྡོ་རྗེ་ནོར་བུའི་ཏོག་གིས་

[Full Size]

སྤྲས་པ། དེའི་དབུས་སུ་སྣ་ཚོགས་པདྨ་འདབ་བརྒྱད་ཀྱི་ལྟེ་བར་ཉི་མ་དང་འཇིགས་དུས་ཀྱི་གདན་ལ་དཔལ་འཁོར་ལོ་སྡོམ་པ་ཧེ་རུ་ཀ་སྐུ་མདོག་མཐིང་ནག་རྡོ་རྗེ་དྲིལ་བུ་འཛིན་པས་ཡུམ་ལ་འཁྱུད་ཅིང་གཡས་བརྐྱང་གི་སྟབས་ཀྱིས་མེ་དཔུང་འབར་བའི་དབུས་སུ་བཞུགས་པའི་ཕྱོགས་ཀྱི་འདབ་མ་བཞི་ལ་གཡོན་བསྐོར་དུ་མཁའ་འགྲོ་མ། ལཱ་མཱ། དུམ་སྐྱེས་མ། གཟུགས་ཅན་མ་རྣམས་དང་། མཚམས་ཀྱི་འདབ་མ་བཞིར་བདུད་རྩི་ལྔས་བཀང་བའི་བུམ་པའི་སྟེང་དུ་ཤ་ལྔས་གང་བའི་ཐོད་པ་དང་བཅས་པ་རང་སེམས་བདེ་བ་ཆེན་པོའི་སྣང་ཆ་ལས་གཞན་མ་ཡིན་པ་མངོན་སུམ་དུ་མཇལ་བའི་མོས་པ་མཛོད། དེ་ལྟར་ཡོལ་བ་ཕྱི་ནང་དུ་འཇུག་པའི་རིམ་པ་རྣམས་ལེགས་པར་གྲུབ་ནས་དངོས་གཞི་དབང་བསྐུར་བ་ལ་བུམ་དབང་གསང་དབང་ཤེས་རབ་ཡེ་ཤེས་ཀྱི་དབང་དང་། དབང་བཞི་པ་རྣམས་སུ་ཡོད་པ་ལས་རིགས་པའི་དབང་ལྔ་ཞུ་བའི་ཡོན་དུ་མནྜལ་འབུལ་བར་ཞུ། དེ་ནས་གསོལ་བ་གདབ་པ་འདིའི་རྗེས་ཟློས་མཛོད། བྱང་ཆུབ་རྡོ་རྗེ་སངས་རྒྱས་ལ། །མཆོག་ཆེན་ཇི་ལྟར་བསྩལ་བ་ལྟར། །བདག་ཀྱང་སྐྱོབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་ལན་གསུམ་གྱིས་གསོལ་བ་བཏབ། དེ་ནས་མི་བསྐྱོད་པ་ཆུ་དབང་གི་སླད་དུ་དམིགས་པ་འདི་བཞིན་དུ་མཛོད། སློབ་མ་དང་དབང་

[Full Size]

རྫས་བུམ་པ་བཅས། ༀ་ཁཎྜ་རོ་ཧེ་ཧཱུྃ་ཧཱུྃ་ཕཊ། ཅེས་བསངས། ༀ་སྭ་བྷཱ་ཝ་ཤུདྡྷ་སརྦ་དྷརྨཱཿསྭ་བྷ་ཝཱ་ཤུདྡྷོ྅་ཧཾ། ཞེས་སྦྱངས། སྟོང་པའི་ངང་ལས་སློབ་མ་དབང་གི་རྫས། །བུམ་ཆུ་དང་བཅས་པད་ཉིར་ཧཱུྃ་ཡིག་ལས། །རྡོ་རྗེ་ཧཱུྃ་མཚན་ཡོངས་གྱུར་མི་བསྐྱོད་པ། །སྐུ་མདོག་སྔོན་པོ་རྡོ་རྗེ་དྲིལ་བུ་འཛིན། །རང་འདྲའི་ཡུམ་འཁྱུད་ཕྱག་རྒྱ་ལྔ་ཡིས་བརྒྱན། །གཡས་བརྐྱང་སྟབས་བཞུགས་སྙིང་གའི་ས་བོན་ལས། །འོད་འཕྲོས་བསྐྱེད་པ་དང་འདྲའི་ཡེ་ཤེས་སེམས། །སྤྱན་དྲངས་ཛཿཧཱུྃ་བྃ་ཧོཿགཉིས་མེད་གྱུར། །མི་བསྐྱོད་ཡབ་ཡུམ་སྙོམས་ཞུགས་ཞུ་གྱུར་པ། །བུམ་པའི་ཆུར་གྱུར་སྙིང་གའི་ས་བོན་གྱི། །འོད་ཀྱིས་དྲངས་པའི་དབང་ལྷ་མཁར་བཞུགས་པའི། །དེ་བཞིན་གཤེགས་རྣམས་དབང་གི་དགོངས་པ་མཛད། །ལྷ་མོ་རྣམས་ཀྱིས་བུམ་པ་བདུད་རྩི་ཡིས། །གང་བ་བསྣམས་ནས་དབང་བསྐུར་ཁྲོ་བོ་རྣམས། །བགེགས་བསྐྲད་སེམས་དཔའ་རྣམས་ཀྱིས་ཤིས་མཛད་དེ། །བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཐམས་ཅད་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་ལུས་སྐྱེད་བྱེད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །མཆོད་པའི་ལྷ་མོས་མཆོད་བཞིན་དབང་བསྐུར་རོ། །སངས་རྒྱས་

[Full Size]

རྣམས་ནི་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། །ཁམས་གསུམ་པ་ཡི་ཕྱག་བྱས་པ། །རྡོ་རྗེའི་དབང་བསྐུར་ཆེན་པོ་སྦྱིན། །ༀ་ཧྲཱིཿཧ་ཧ་ཧཱུྃ་ཧཱུྃ་ཕཊ། ༀ་བཛྲ་ཨ་བྷི་ཥིཉྩ་ཧཱུྃ། རཏྣ་ཏྲཾ། པདྨ་ཧྲཱིཿཀརྨ་ཨཱཿབུདྡྷ་ༀ། བཛྲོ་དཱ་ཀ་ཨ་བྷི་ཥིཉྩ་ཧཱུྃ། སུ་ར་ཏ་སྟྭཾ་ཨ་ཧཾ། བུམ་ཆུ་སྤྱི་བོར་བླུགས། དབང་ལྷ་སློབ་མ་ལ་ཐིམ་ཆུ་ཡི་དབང་། །བསྐུར་བས་ཉོན་མོངས་ཞེ་སྡང་རྣམ་ཤེས་ཀྱི། །ཕུང་པོ་གནས་གྱུར་མེ་ལོང་ཡེ་ཤེས་མཆོག །མངོན་བྱས་བཅོམ་ལྡན་མི་བསྐྱོད་དབུ་རྒྱན་གྱུར། །དེ་ནས་རིན་ཆེན་འབྱུང་ལྡན་ཅོད་པན་གྱི་དབང་གི་སླད་དུ་དམིགས་པ་འདི་བཞིན་མཛོད། ཅོད་པན་ཐོགས་ལ། བསངས་སྦྱངས། སྟོང་པའི་ངང་ལས་སློབ་མ་ཅོད་པན་བཅས། །པད་ཉིའི་སྟེང་དུ་ཨཱཾ་ལས་རིན་པོ་ཆེ། །ཨཱཾ་གིས་མཚན་པ་ཡོངས་གྱུར་རིན་འབྱུང་ནི། །སྐུ་མདོག་སེར་པོ་རིན་ཆེན་དྲིལ་བུ་འཛིན། །རང་འདྲའི་ཡུམ་འཁྱུད་ཕྱག་རྒྱ་ལྔ་ཡིས་བརྒྱན། །གཡས་བརྐྱང་སྟབས་བཞུགས་སྙིང་གའི་ས་བོན་ལས། །འོད་འཕྲོས་བསྐྱེད་པ་དང་འདྲའི་ཡེ་ཤེས་སེམས། །སྤྱན་དྲངས་ཛཿཧཱུྃ་བཾ་ཧོཿགཉིས་མེད་འགྱུར། །རིན་འབྱུང་ཡབ་ཡུམ་སྙོམས་ཞུགས་ཞུ་གྱུར་པས། །དབུ་རྒྱན་དུ་གྱུར་སྙིང་གའི་ས་བོན་གྱི། །འོད་ཀྱིས་དྲངས་པའི་དབང་ལྷ་མཁར་བཞུགས་པའི། །དེ་བཞིན་

[Full Size]

གཤེགས་རྣམས་དབང་གི་དགོངས་པ་མཛད། །ལྷ་མོ་རྣམས་ཀྱིས་རིན་ཆེན་ལས་གྲུབ་པ། །དབུ་རྒྱན་བསྣམས་ནས་དབང་བསྐུར་ཁྲོ་བོ་རྣམས། །བགེགས་བསྐྲད་སེམས་དཔའ་རྣམས་ཀྱིས་ཤིས་མཛད་དེ། །བཀྲ་ཤིས་གང་ཞིག༴ ཐམས་ཅད༴ དེས་ནི༴ མཆོད་པའི༴ སངས་རྒྱས་ཀུན་གྱི་རྒྱལ་སྲིད་ཆེ། །དབུ་རྒྱན་རིན་ཆེན་དམ་པ་སྟེ། །རིན་ཆེན་ཀུན་གྱིས་མཆོད་བྱེད་པ། །རྫོགས་སངས་རྒྱས་སུ་དབང་བསྐུར་རོ། །ༀ་སརྦ་བུདྡྷ་ཌཱ་ཀི་ནི༴ ༀ་ཨ་མུ་ཀུ་ཊཱ་ཨ་བྷི་ཥིཉྩ་ཧཱུྃ། སུ་ར་ཏ་སྟྭཾ་ཨ་ཧཾ། ཅོད་པན་མགོར་བཅིངས། བཛྲོ་དཱ་ཀ་ཨ་བྷི་ཥིཉྩ་ཧཱུྃ། སུ་ར་ཏ་སྟྭཾ་ཨ་ཧཾ། ཞེས་ཆུའི་དབང་ཡང་བསྐུར། དབང་ལྷ་སློབ་མ་ལ་ཐིམ་ཅོད་པན་དབང་། །བསྐུར་བས་ང་རྒྱལ་སེར་སྣ་ཚོར་བ་ཡི། །ཕུང་པོ་གནས་གྱུར་མཉམ་ཉིད་ཡེ་ཤེས་མཆོག །མངོན་བྱས་བཅོམ་ལྡན་རིན་འབྱུང་དབུ་རྒྱན་གྱུར། །དེ་ནས་འོད་དཔག་མེད་རྡོ་རྗེའི་དབང་གི་དོན་དུ་དམིགས་པ་འདི་བཞིན་མཛོད། རྡོ་རྗེ་ཐོགས་ལ། བསངས་སྦྱངས། སྟོང་པའི་ངང་ལས་སློབ་མ་རྡོ་རྗེ་བཅས། །པད་ཉིའི་སྟེང་དུ་ཛྲིཾ་ལས་པདྨ་འཛིན། །མཚན་པ་ཡོངས་སུ་གྱུར་ལས་འོད་དཔག་མེད། །སྐུ་མདོག་དམར་པོ་པདྨ་དྲིལ་བུ་འཛིན། །རང་འདྲའི་ཡུམ་འཁྱུད་ཕྱག་རྒྱ་ལྔ་ཡིས་བརྒྱན། །གཡས་བརྐྱང་སྟབས་བཞུགས་

[Full Size]

སྙིང་གའི་ས་བོན་ལས། །འོད་འཕྲོས་བསྐྱེད་པ་དང་འདྲའི་ཡེ་ཤེས་སེམས། །སྤྱན་དྲངས་ཛཿཧཱུྃ་བྃ་ཧོ་གཉིས་མེད་གྱུར། །འོད་དཔག་ཡབ་ཡུམ་སྙོམས་ཞུགས་ཞུ་གྱུར་པས། །རྡོ་རྗེ་རབ་གྱུར་སྙིང་གའི་ས་བོན་གྱི། །འོད་ཀྱིས་དྲངས་པའི་དབང་ལྷ་མཁར་བཞུགས་པའི། །དེ་བཞིན་གཤེགས་རྣམས་དབང་གི་དགོངས་པ་མཛོད། །ལྷ་མོ་རྣམས་ཀྱིས་རྡོ་རྗེ་འོད་འབར་བ། །གསོར་ཞིང་བསྣམས་ནས་དབང་བསྐུར་ཁྲོ་བོ་རྣམས། །བགེགས་བསྐྲད་སེམས་དཔའ་རྣམས་ཀྱིས་ཤིས་མཛད་དེ། །བཀྲ་ཤིས་གང་ཞིག༴ ཐམས་ཅད༴ སེམས་ཅན༴ དེས་ནི༴ མཆོད་པའི༴ སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཉིད་དུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོངས། །ༀ་བཛྲ་ཨ་བྷི་ཥིཉྩ་ཧཱུྃ། སྙིང་གར་སོགས་གནས་གསུམ་དུ་རེག་ཅིང་གསོར་བར་བྱའོ། །ༀ་བཛྲོ་དཱ་ཀ་ཨ་བྷི་ཥིཉྩ་ཧཱུྃ། སུ་ར་ཏ་སྟྭཾ་ཨ་ཧཾ། ཞེས་ཆུ་དབང་བསྐུར། དབང་ལྷ་སློབ་མ་ལ་ཐིམ་རྡོ་རྗེའི་དབང་། །བསྐུར་བས་ཉོན་མོངས་འདོད་ཆགས་འདུ་ཤེས་ཀྱི། །ཕུང་པོ་གནས་གྱུར་སོར་རྟོག་ཡེ་ཤེས་མཆོག །མངོན་བྱས་བཅོམ་ལྡན་འོད་དཔག་དབུ་བརྒྱན་གྱུར། །དེ་ནས་དོན་ཡོད་གྲུབ་པ་དྲིལ་བུའི་དབང་གི་དོན་དུ་དམིགས་པ་འདི་བཞིན་མཛོད། དྲིལ་བུ་ཐོགས་

[Full Size]

ལ། བསངས་སྦྱངས། སྟོང་པའི་ངང་ལས་སློབ་མ་དྲིལ་བུ་བཅས། །པད་ཉིའི་སྟེང་དུ་ཁཾ་ལས་རལ་གྲི་ཁཾ། །མཚན་པར་ཡོངས་གྱུར་དོན་ཡོད་གྲུབ་པ་ནི། །སྐུ་མདོག་ལྗང་གུ་རལ་གྲི་དྲིལ་བུ་འཛིན། །རང་འདྲའི་ཡུམ་འཁྱུད་ཕྱག་རྒྱ་ལྔ་ཡིས་བརྒྱན། །གཡས་བརྐྱང་སྟབས་བཞུགས་སྙིང་གའི་ས་བོན་ལས། །འོད་འཕྲོས་བསྐྱེད་པ་དང་འདྲའི་ཡེ་ཤེས་སེམས། །སྤྱན་དྲངས་ཛཿཧཱུྃ་བྃ་ཧོཿ་གཉིས་མེད་གྱུར། །དོན་གྲུབ་ཡབ་ཡུམ་སྙོམས་ཞུགས་ཞུ་གྱུར་པས། །དྲིལ་བུའི་སྒྲར་གྱུར་སྙིང་གའི་ས་བོན་ལས། །འོད་ཀྱིས་དྲངས་པའི་དབང་ལྷ་མཁར་བཞུགས་པའི། །དེ་བཞིན་གཤེགས་རྣམས་དབང་གི་དགོངས་པ་མཛད། །ལྷ་མོ་རྣམས་ཀྱིས་དྲིལ་བུ་སྒྲ་ལྡན་པ། །ཕྱག་ཏུ་བསྣམས་ནས་དབང་བསྐུར་ཁྲོ་བོ་རྣམས། །བགེགས་བསྐྲད་སེམས་དཔའ་རྣམས་ཀྱིས་ཤིས་མཛད་དེ། །བཀྲ་ཤིས་གང་ཞིག༴ ཐམས་ཅད༴ སེམས་ཅན༴ དེས་ནི༴ མཆོད་པའི༴ སངས་རྒྱས་ཀུན་གྱི་དྲིལ་བུའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཉིད་དུ་རབ་བསྒྲུབ་ཕྱིར། །དྲིལ་བུ་འདི་ནི་ཁྱོད་ཀྱིས་ལོངས། །རྡོ་རྗེ་དྲིལ་བུ་འཛིན་པས་ལྟེ་བའི་ཐད་དུ་འཁྱུད་པའི་ཚུལ་གྱིས། ༀ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མཾ་ཏིཥྛ་བཛྲ་ས་མ་ཡ་སྟྭཾ། ༀ་བཛྲོ་དཱ་ཀ་ཨ་བྷི་ཥིཉྩ་ཧཱུྃ། སུ་ར་ཏ་སྟྭཾ་ཨ་ཧཾ། ཆུ་དབང་

[Full Size]

ཡང་བསྐུར། དབང་ལྷ་སློབ་མ་ལ་ཐིམ་དྲིལ་བུའི་དབང་། །བསྐུར་བས་ཉོན་མོངས་ཕྲག་དོག་འདུ་བྱེད་ཀྱི། །ཕུང་པོ་གནས་འགྱུར་བྱ་གྲུབ་ཡེ་ཤེས་མཆོག །མངོན་བྱས་བཅོམ་ལྡན་དོན་གྲུབ་དབུ་བརྒྱན་གྱུར། །དེ་ནས་རྣམ་པར་སྣང་མཛད་མིང་གི་དབང་གི་དོན་དུ་དམིགས་པ་འདི་བཞིན་མཛོད། རྡོར་དྲིལ་ཐོགས་ལ། བསངས་སྦྱངས། སྟོང་པའི་ངང་ལས་སློབ་མ་མིང་གི་དབང་། །པད་ཉིའི་སྟེང་དུ་བཾ་ལས་འཁོར་ལོ་བུམ། །མཚན་པར་ཡོངས་གྱུར་རྣམ་པར་སྣང་མཛད་ནི། །སྐུ་མདོག་དཀར་པོ་འཁོར་ལོ་དྲིལ་བུ་འཛིན། །རང་འདྲའི་ཡུམ་འཁྱུད་ཕྱག་རྒྱ་ལྔ་ཡིས་བརྒྱན། །གཡས་བརྐྱང་སྟབས་བཞུགས་སྙིང་གའི་ས་བོན་ལས། །འོད་འཕྲོས་བསྐྱེད་པ་དང་འདྲའི་ཡེ་ཤེས་སེམས། །སྤྱན་དྲངས་ཛཿཧཱུྃ་བཾཿཧོཿ་གཉིས་མེད་གྱུར། །རྣམ་སྣང་ཡབ་ཡུམ་སྙོམས་ཞུགས་ཞུ་གྱུར་པས། །མཆོག་གི་མིང་གྱུར་སྙིང་གའི་ས་བོན་གྱི། །འོད་ཀྱིས་དྲངས་པའི་དབང་ལྷ་མཁར་བཞུགས་པའི། །དེ་བཞིན་བཤེགས་རྣམས་དབང་གི་དགོངས་པ་མཛད། །ལྷ་མོ་རྣམས་ཀྱིས་སྙན་པས་དབྱངས་ཀྱིས་མིང་། །འདོགས་པར་མཛད་ནས་དབང་བསྐུར་ཁྲོ་བོ་རྣམས། །བགེགས་བསྐྲད་སེམས་དཔའ་རྣམས་ཀྱིས་ཤིས་མཛད་དེ། །བཀྲ་ཤིས་གང་ཞིག༴ ཐམས་ཅད༴ སེམས་

[Full Size]

ཅན༴ དེས་ནི༴ མཆོད་པའི༴ སངས་རྒྱས་ཀུན་གྱི་མིང་གི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཉིད་དུ་རབ་བསྒྲུབ་ཕྱིར། །མིང་གི་དབང་མཆོག་ཆེན་པོ་སྦྱིན། །ༀ་བཛྲ་ས་ཏྭ་སྟྭཾ་ཨ་བྷི་ཥིཉྩ་མི་བཛྲ་ནཱ་མ་ཨ་བྷི་ཥི་ཀ་ཏ། ཀྱཻ་དཔལ་ཧེ་རུ་ཀ་ཞེས་བྱའི་དེ་བཞིན་གཤེགས་པའོ། །རྡོ་རྗེ་དྲིལ་བུ་སྤྱི་བོར་མཉམ་དུ་བཟུང་ལ་མིང་གི་དབང་བསྐུར། ༀ་བཛྲོ་དཱ་ཀ་ཨ་བྷི་ཥིཉྩ་ཧཱུྃ། སུ་ར་ཏ་སྟྭ-ཾ་ཨ་ཧཾ། ཞེས་ཆུ་དབང་ཡང་བསྐུར། དབང་ལྷ་སློབ་མ་ལ་ཐིམ་མིང་གི་དབང་། །བསྐུར་བས་ཉོན་མོངས་གཏི་མུག་བེམ་གཟུགས་ཀྱི། །ཕུང་པོ་གནས་གྱུར་ཆོས་དབྱིངས་ཡེ་ཤེས་མཆོག །མངོན་བྱས་བཅོམ་ལྡན་རྣམ་སྣང་དབུ་བརྒྱན་གྱུར། བརྟུལ་ཞུགས་ལ་གཉིས་ལས། དེ་ནས་རྡོ་རྗེའི་བརྟུལ་ཞུགས་ཀྱི་དོན་དུ་དམིགས་པ་འདི་བཞིན་མཛོད། རྡོ་རྗེ་ཐོགས་ཏེ། པད་ཟླའི་གདན་ལ་སློབ་མ་རྡོ་རྗེ་སེམས་། །སྐུ་མདོག་དཀར་པོ་རྡོ་རྗེ་དྲིལ་བུ་འཛིན། །རིན་པོ་ཆེས་བརྒྱན་སེམས་དཔའི་སྐྱིལ་ཀྲུང་བཞུགས། །འདི་དེ་སངས་རྒྱས་ཐམས་ཅད་ཀྱི། །དཔལ་ཧེ་རུ་ཀའི་ཕྱག་ན་བསྣམས། །ཁྱོད་ཀྱིས་ཀྱང་ནི་རྟག་ཏུ་བཅང་། །དཔལ་ཧེ་རུ་ཀའི་བརྟུལ་ཞུགས་བརྟེན། །ༀ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷཱ་ར་ཡ་མི་ཧཱི་ཧི་ཧི་ཧི་ཧཱུྃ། རྡོ་རྗེ་སྙིང་གར་བཟུང་ངོ་། །སྤྱོད་པའི་བརྟུལ་ཞུགས་ནི།

[Full Size]

སྤྱོད་པའི་བརྟུལ་ཞུགས་ཀྱི་སླད་དུ་དམིགས་པ་འདི་བཞིན་མཛོད། ཁ་ཏྭཱཾ་ཐོགས་ལ་བསངས་སྦྱངས། སློབ་མ་དབང་རྫས་བཅོམ་ལྡན་སྐུ་མདོག་མཐིང་། །བཅོམ་ལྡན་རྡོ་རྗེ་ཕག་མོ་ཡོངས་སུ་འཁྱུད། །དབང་རྫས་ཡབ་ཡུམ་ཡོངས་སུ་གྱུར་པ་ལས། །དབང་རྫས་ས་ས་སོ་སོའི་རྣམ་པར་གྱུར། །གཡས་སུ་ཅང་ཏེའུ། གཡོན་དུ་ཐོད་པ། གྲུ་ཁུང་གཡོན་པར་ཁ་ཊྭཱཾ་ག་ཚངས་སྐུད་སེ་རལ་ཁ་བྱིན་ལ། ཁ་ཊྭཱཾ་ཅང་ཏེའུ་ལྷུང་བཟེད་དག །དཔའ་བོས་བྱིན་པ་བླངས་ནས་ནི། །དཔལ་ཧེ་རུ་ཀའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །ཁ་ཊྭཱཾ་ག་ནི་ལྷ་སྐུ་བདེ་བ་ཆེ། །ཌཱ་མ་རུ་ནི་ཤེས་རབ་སྟོང་པ་ཉིད། །ཐོད་པ་དེ་ཉིད་འདུས་པ་བདེ་བ་སྐྱོང་། །ཚངས་སྐུད་རྣམ་པར་མི་རྟོག་པ་ཡི་དོན། །ལུང་བསྟན་པ་ནི། ཆོས་གོས་གྲྭ་རི་དྭགས་ཀྱི་རྣ་བ་ལྟར་བྱས་ཏེ་ལག་གཡོན་པས་བཟུང་། གཡས་མི་འཇིགས་པའི་ཕྱག་རྒྱ་བྱས་ལ། དེ་ནས་སློབ་དཔོན་སངས་རྒྱས་སྤྲུལ་པའི་སྐུའི་རྣམ་པར་བསྟན་པའི་མོས་པ་མཛོད། འདི་ལྟར་ང་ཡིས་ལུང་སྟོན་ཏེ། །འཁོར་ལོ་གསུམ་གྱི་བདག་ཉིད་ཁྱོད། །རང་ཉིད་སངས་རྒྱས་སྐུའི་རང་བཞིན། །ཧེ་རུ་ཀ་དཔལ་

[Full Size]

ཞེས་བྱ་ཡི། །དེ་བཞིན་གཤེགས་པ་ཉིད་ཡིན་ནོ། །ཤྲཱི་ཧེ་རུ་ཀ་ཏེ་ན་མཿཏ་ཐཱ་ག་ཏ་སིིདྡྷི་ས་མ་ཡ་སྟྭཾ། བྷུརྦྷུ་བཱ་སྭཱ། དབུགས་དབྱུང་བ་ནི། སློབ་དཔོན་སྤྲུལ་སྐུའི་རྣམ་པ་ཅན་དེ་ཉིད་ཀྱིས་དབུགས་དབྱུང་བར་མོས་མཛོད། ཁམས་གསུམ་ཀུན་གྱི་རྒྱལ་སྲིད་ཆེ། །དཔལ་ལྡན་ཡོན་ཏན་འབྱུང་བའི་གནས། །བདུད་ཚོགས་ཀུན་ལས་རྣམ་རྒྱལ་ཞིང་། །གྲོང་ཁྱེར་མཆོག་ཏུ་ཞུགས་པ་ཡིན། །སློབ་དཔོན་གྱི་དབང་ནི། སློབ་དཔོན་གྱི་དབང་བསྐུར་ཞུ་བའི་ཡོན་དུ་མནྜལ་ཕུལ། རྡོ་རྗེ་སློབ་དཔོན་གྱི་དབང་བསྐུར་ཞུ་བའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། ཕྱིར་མི་ལྡོག་པའི་དབང་བསྐུར་ཆེ། །དཔའ་བོ་ཆེན་པོས་བདག་ལ་སྩོལ། །འགྲོ་བ་མཚན་མ་མེད་བྱེད་པ། །དེ་ནི་དེང་འདིར་བསྩལ་དུ་གསོལ། །ཞེས་ལན་གསུམ་གསོལ་བ་བཏབ་སྟེ། དེ་ནས་དམ་ཚིག་གསུམ་སྦྱིན་པ་ལས་རྡོ་རྗེ་ཐུགས་ཀྱི་དམ་ཚིག་སྦྱིན་པ་ནི། ཧཱུྃ་བྱུང་རྡོ་རྗེ་མ་ཧཱ་བཛྲ་ཧཱུྃ། དྲིལ་བུ་གསུང་གི་དམ་ཚིག་སྦྱིན་པ་ནི། ཨཱཿབྱུང་དྲིལ་བུ་བཛྲ་གནྜེ་ཨཱཿཞེས་རྡོ་རྗེ་དྲིལ་བུ་འཛིན་དུ་གཞུག །སྦྱོར་བ་ཁ་སྦྱོར་གྱི་དམ་ཚིག་སྦྱིན་པ་ནི། སློབ་མ་སླར་ཡང་རྡོ་རྗེ་སེམས་དཔའ་དང་། །རྡོ་རྗེ་སྙེམས་མ་མཉམ་སྦྱོར་གསལ་བར་གྱུར། །རྡོ་རྗེ་ཆེ་དང་དྲིལ་བུ་ཆེ། །ཟུངས་ཤིག་རྡོ་རྗེར་བྱིན་གྱིས་རློབས། །དེ་རིང་རྡོ་རྗེ་སློབ་དཔོན་

[Full Size]

གྱུར། །སློབ་མའི་ཚོགས་རྣམས་བསྡུ་བར་གྱིས། །དེ་ལྟར་རྡོ་རྗེ་སློབ་དཔོན་ཆེན་པོའི་དབང་བསྐུར་བ་ཐོབ་ནས་བརྟན་པར་བྱ་བའི་ཆེད་དུ་དབང་ལྷ་རྣམས་ཀྱིས་བུམ་པའི་ཆུའི་དབང་བསྐུར་བའི་མོས་པ་མཛོད། བུམ་པ་ཐོགས་ལ། ཇི་ལྟར་བལྟམས་ཚེ་བཅོམ་ལྡན་ཁྲུས་གསོལ་ལྟར། །ལྷ་ཆུ་དག་པས་འདིར་ནི་ཁྲུས་བགྱིའོ། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་བུམ་ཆུ་སྦྱིན། ཞེས་དབང་བསྐུར་སྒོ་གསུམ་དྲི་མ་དག །སྤྱི་བོར་མི་བསྐྱོད་རྡོ་རྗེས་དབུ་བརྒྱན་གྱུར། །ཁྱོད་ཀྱིས་འཇིག་རྟེན་འཇིག་རྟེན་འདས་པ་ཡི། །འགྲོ་བ་ཀུན་གྱི་སློབ་དཔོན་ཉིད་དུ་གྱིས། །དབང་ལྷ་རྣམས་ཀྱང་སློབ་མ་ཉིད་ལ་ཐིམ། །ཞེས་དང་། དེ་ལྟར་དབང་ལྷ་རྣམས་དང་ཁྱེད་རང་དབྱེར་མེད་དུ་གྱུར་པ་ལ་ཉེར་སྤྱོད་ལྔས་མཆོད་པའི་མོས་པ་མཛོད། ༀ་བཛྲ་པུ་ཥྤེ་ནས། ནི་ཝིདྱ་པྲ་ཏཱིཙྪ་སྭཱ་ཧཱ། སོགས་ཀྱིས་མཆོད། དེ་ནས་ལྷ་མཆོད་པའི་རྗེས་གནང་ནི། དེང་ནས་བརྩམས་ཏེ་བུ་ཁྱོད་ཀྱིས། །དེ་ཉིད་ཤེས་ནས་དེ་ནས་ནི། །གཟུགས་སྒྲ་དྲི་རོ་རེག་ལ་སོགས། །འདོད་ཡོན་ལྔ་ལ་སྤྱོད་པར་གྱིས། །ཞེས་དང་། དེ་ནས་སྙིང་རྗེ་ཆེན་པོའི་སྒོ་ནས་འགྲོ་དོན་བྱེད་པ་རྗེས་སུ་གནང་བ་ནི། དེང་ནས་བཟུང་སྟེ་བུ་ཁྱོད་ཀྱིས། །ལུས་དང་སྲོག་ལ་མི་ལྟ་བར། །རྟེན་ཅིང་འབྲེལ་བར་འབྱུང་བའི་ཆོས། །འགྲོ་

[Full Size]

བའི་དོན་ནི་དཔག་མེད་བྱོས། །ཞེས་ལྷ་མཆོད་པ་དང་འགྲོ་དོན་གྱི་རྗེས་གནང་བྱིན། དཀྱིལ་འཁོར་ལྷའི་དེ་ཁོ་ན་ཉིད་བཤད་པ་འདི་ལ་མ་ཡེངས་པར་གསན་མཛོད། ཐར་པ་ཆེན་པོའི་ཕོ་བྲང་རྣམ་སྣང་གི། །རང་བཞིན་རིན་ཆེན་སྣ་ཚོགས་ལས་གྲུབ་པ། །གྲུ་བཞི་སྒོ་བཞི་རྟ་བབ་དུར་ཁྲོད་དང་། །རྡོ་རྭ་མེ་རི་བཅས་འདི་རང་གི་སེམས། །དཀྱིལ་འཁོར་ཉིད་དུ་སྣང་བའི་ཡོན་ཏན་གྱི། །ཁྱད་པར་རྣམས་ལས་བྱང་ཆུབ་ཕྱོགས་ཀྱི་ཆོས། །སོ་བདུན་སྒོ་རྒྱན་ལ་སོགས་སྣང་བ་འདི། །དཀྱིལ་འཁོར་དེ་བཞིན་ཉིད་དུ་ཤེས་པར་གྱིས། །ཞེས་དང་། བུམ་པའི་དབང་གི་ཕན་ཡོན་ནམ་རྟོགས་པ་བརྗོད་པ་ནི། རས་བྲིས་དཀྱིལ་འཁོར་ཉིད་ལས་བུམ་དབང་ཐོབ། །ལུས་ཀྱི་སྒྲིབ་བསལ་བསྐྱེད་རིམ་བསྒོམ་ལ་དབང་། །འབྲས་བུ་སྤྲུལ་སྐུ་འགྲུབ་པའི་སྐལ་ལྡན་གྱུར། །གསང་དབང་ནི། དེ་ལྟར་བུམ་དབང་རྫོགས་པར་གྲུབ་ནས་གསང་དབང་ཞུ་བའི་ཡོན་དུ་མནྜལ་འབུལ། དེ་ནས་གསོལ་བ་འདེབས་པ་འདིའི་རྗེས་ཟློས་མཛོད། བྱང་ཆུབ་རྡོ་རྗེ་སངས་རྒྱས་ལ། །སོགས། ནམ་མཁའི་རྡོ་རྗེ་དེང་བདག་སྩོལ། །ཞེས་ལན་གསུམ་གསོལ་བ་བཏབ། བྷ་གའི་དཀྱིལ་འཁོར་མ་མཐོང་བའི་བརྡར་གདོང་གཡོགས་འཆིང་བར་མཛོད། ༀ་ཙཀྴུ་བནྡྷ་ཝཱ་ར་མཱ་ནཱ་ཡ་ཧཱུྃ། ཞེས་གདོང་གཡོགས་འཆིང་། གསང་དབང་གི་དོན་དུ་

[Full Size]

དམིགས་པ་འདི་བཞིན་དུ་མཛོད། བཅོམ་ལྡན་ཡབ་ཡུམ་སྙོམས་ཞུགས་སྦྱོར་མཚམས་ནས། །བྱང་སེམས་བདུད་རྩིས་སངས་རྒྱས་ཐམས་ཅད་པར། །ཞུ་བའི་ངོ་བོའི་བདག་བྱིན་རློབ་པའི་ཚུལ། །གསང་བ་མཆོག་གི་ངོ་བོས་དབང་བསྐུར་རོ། །ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་རྣམས་དབང་བསྐུར་ལྟར། །བདག་གིས་གསང་བའི་སེམས་རྒྱུན་གྱིས། །དེང་འདིར་ཁྱོད་ལ་དབང་བསྐུར་རོ། །བདུད་རྩི་བྱིན། དམ་རྫས་བཏུང་ལ་འདིའི་རྗེས་ཟློས་མཛོད། ཨ་ཧོཿམ་ཧ་སུ་ཁཾ། ཅེས་བརྗོད་དུ་འཇུག་པས། བླ་མ་ཡབ་ཡུམ་བྱང་ཆུབ་སེམས་ཀྱི་རྫས། །མྱོང་བས་ལུས་ཀུན་བདེ་ཆེན་ཁྱབ་པར་སྐྱེས། །གཙོ་བོ་ལས་སྤྲོས་ལྷན་སྐྱེས་ཡབ་ཡུམ་ནི། །བཅོམ་ལྡན་སྣང་བ་མཐའ་ཡས་རྣམ་གྱུར་ནས། །མགྲིན་ཐིམ་རང་བཞིན་བརྒྱད་ཅུའི་རྟོག་པ་འགགས། །ཞེས་དང་། ཉེར་སྤྱོད་ལྔས་མཆོད་པའི་མོས་པ་མཛོད། ༀ་བཛྲ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝིདྱཾ་ཨཱཿཧཱུྃ། ཞེས་པས་མཆོད། བྷ་གའི་དཀྱིལ་འཁོར་མཐོང་བའི་བརྡར་གདོང་གཡོགས་སོལ་ཅིག །ༀ་བཛྲ་ནེ་ཏྲ་ཨ་བ་ཧ་ར་པ་ཏྲ་ལཾ་ཧྲཱིཿཞེས་གདོང་གཡོགས་བསལ། གསང་བའི་དབང་གི་རྟོགས་པ་བརྗོད་པ་ནི། བྷ་གའི་དཀྱིལ་འཁོར་མཐོང་ཞིང་གསང་དབང་ཐོབ། །ངག་

[Full Size]

གི་དྲི་མ་དག་ནས་རྩ་དང་རླུང་། །བསྒོམ་པར་དབང་ཞིང་ལོངས་སྐུ་འགྲུབ་པར་གྱུར། །དེ་ནས་ཤེར་དབང་ལ། ཤེས་རབ་ཡེ་ཤེས་ཀྱི་དབང་གི་དོན་དུ་མནྜལ་འབུལ། དེ་ནས་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་ཞི་བ་ཆེན་པོ་ཀྱེ། །རྡོ་རྗེ་རྣལ་འབྱོར་གཅིག་བཞེད་པ། །མི་ཕྱེད་ཕྱག་རྒྱ་སྒྲུབ་པ་པོ། །རྡོ་རྗེ་རྣལ་འབྱོར་ལས་བྱུང་བ། །ཇི་ལྟར་ཁྱོད་ནི་བདག་ཉིད་ཆེ། །མངའ་བདག་བདག་ལའང་དེ་ལྟར་མཛོད། །འཁོར་བ་འདམ་གྱི་མཚོ་ནང་དུ། །བྱིང་བ་སྐྱབས་མེད་བདག་ལ་སྐྱོབས། །ཞེས་གསོལ་བ་ལན་གསུམ་གདབ། ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་མ་མཐོང་བའི་བརྡར་གདོང་གཡོགས་འཆིང་བར་མཛོད། ༀ་ཙཀྴུ་བྷནྡྷ་ཝཱ་ར་མཱ་ནཱ་ཡ་ཧཱུྃ། ཤེས་རབ་ཡེ་ཤེས་ཀྱི་དབང་གི་དོན་དུ་དམིགས་པ་འདི་བཞིན་དུ་མཛོད། གཙོ་བོའི་ཡུམ་ལས་སྤྲོས་པའི་རྣལ་འབྱོར་མ། །མི་ཡི་བུ་མོ་གཟུགས་དང་ལང་ཚོ་ནི། །ཕུལ་དུ་བྱུང་བ་ཕྱག་གཡོན་གྱིས་བཟུང་ནས། །སློབ་མའི་ལག་པ་གཡས་སུ་གཏད་པར་གྱུར། །དགའ་སྟེར་གནས་སྟེར་ལྷ་མོ་ནི། །སྣ་ཚོགས་གཟུགས་ཅན་ཡིད་འོང་མ། །ཁྱེར་ཅིག་ཁྱེར་ཅིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། །སློབ་མ་ལྷན་སྐྱེས་ཡབ་ཡུམ་གསལ་བ་ཡི། །ཡབ་ཀྱི་གསང་བ་མི་དམིགས་པ་

[Full Size]

ལས་ཧཱུྃ། །དཀར་པོ་ལས་ནི་རྡོ་རྗེ་ནག་པོ་བྱཱ། །དམར་ལས་ནོར་བུའི་རྩེ་མོ་བྱཱ་སེར་པོ། །ཡུམ་གསང་མི་དམིགས་ཨཱ་ལས་པདྨ་དམར། །འདབ་གསུམ་བྱཱ་ལས་དཔའ་བོའི་བྱང་ཆུབ་སེམས། །མཚོན་པའི་ཟེའུ་འབྲུར་བྱཱ་མཚན་རང་གི་ལྟེར། །ༀ་བཛྲ་བཻ་རོ་ཙ་ནི་སྙིང་གར། ༀ་སརྦ་བུདྡྷ་མགྲིན་པར་ༀ་ཤྲཱི། །དཔྲལ་བར་ༀ་ཧྲཱིཿལྷ་མོའི་ལྟེ་བར་ནི། །ༀ་ཤྲཱི་སྙིང་གར་ༀ་ཧྲཱིཿམགྲིན་པར་ༀ། །བཛྲ་དཔྲལ་བར་ༀ་སརྦ་ཞེས་པའི། །ཡི་གེ་གསལ་བར་ཡབ་ཡུམ་སྙོམས་ཞུགས་པའི། །བྱང་སེམས་སྤྱི་ནས་མགྲིན་པར་དགའ་བ་དང་། །སྙིང་གའི་བར་དུ་མཆོག་དགའ་ལྟེ་བའི་བར། །ཁྱད་དགའ་ནོར་བུའི་རྩེ་མོར་སླེབས་པ་ན། །འཕོ་མེད་ལྷན་ཅིག་སྐྱེས་དགའ་མྱོང་བར་གྱུར། །དེ་ནས། ༀ་བཛྲ་པུཥྤེ། སོགས། ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་མཐོང་བའི་བརྡར་གདོང་གཡོགས་སོལ་ཞིག །ༀ་བཛྲ་ནཻ་ཏྲ་སོགས་གདོང་གཡོགས་བསལ། ཤེར་དབང་གི་རྟོགས་པ་བརྗོད་པ་ནི། ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་མཐོང་། །ཤེས་རབ་ཡེ་ཤེས་དབང་ཐོབ་ཡིད་ཀྱི་དྲི། །རྣམ་དག་རང་འོད་རིག་མ་བསྟེན་ལ་དབང་། །འབྲས་བུ་ཆོས་སྐུ་འགྲུབ་བའི་སྐལ་ཅན་གྱུར། །དེ་ནས་དབང་བཞི་པ། དེ་ནས་

[Full Size]

དབང་བཞི་པ་ཚིག་དབང་རིན་པོ་ཆེ་ཞུ་བའི་དོན་དུ་མནྜལ་འབུལ། དེ་ནས་གསོལ་བ་གདབ་པ་འདིའི་རྗེས་ཟློས་མཛོད། ཁྱོད་ཞབས་པདྨའི་བཀའ་དྲིན་གྱིས། །གཙོ་བོའི་དབང་བསྐུར་རྣམ་གསུམ་ཐོབ། །དེ་རིང་རིན་ཆེན་བཞི་པ་ཡང་། །བཀའ་དྲིན་གྱིས་ནི་བསྩལ་དུ་གསོལ། །ཞེས་ལན་གསུམ་གསོལ་བ་བཏབ། དོན་དམ་བྱང་ཆུབ་སེམས་ཀྱི་དཀྱིལ་འཁོར་མ་མཐོང་བའི་བརྡར་གདོང་གཡོགས་འཆིང་བར་མཛོད། ༀ་ཙཀྴུ--་སོགས། དབང་བཞི་པའི་དོན་དུ་དམིགས་པ་འདི་བཞིན་དུ་མཛོད། གཙོ་བོ་ལས་སྤྲོས་ལྷན་སྐྱེས་ཡབ་ཡུམ་ནི། །སྨིན་མཚམས་ཐིམ་པས་བདེ་སྟོང་ཡེ་ཤེས་སྐྱེས། །དེ་ལྟར་བདེ་སྟོང་གཉིས་སུ་མེད་པའི་ཡེ་ཤེས་སྤྲོས་མེད་ཕྱག་རྒྱ་ཆེན་པོའི་དོན་ཚིག་གིས་ངོ་སྤྲད་པ་འདི་ལ་མ་ཡེངས་པར་གསན་འཚལ། །ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་རང་ཡང་ནི་དེ་ཡི་ཕ། །དེ་ལྟར་སངས་རྒྱས་ཐམས་ཅད་ཀྱི། །ཡེ་ཤེས་ཀུན་ནི་སྐྱེ་བྱེད་ཕྱིར། །ཁྱོད་ནི་ཕ་དང་འདྲ་བ་ཡིན། །གསུམ་པའི་རྒྱུ་ལས་བཞི་པའང་ཡིན། །ཞེས་ངོ་སྤྲད། ༀ་བཛྲ་པུཥྤེ༴ སོགས།

[Full Size]

དོན་དམ་བྱང་ཆུབ་སེམས་ཀྱི་དཀྱིལ་འཁོར་མཐོང་བའི་བརྡར་གདོང་གཡོགས་སོལ་ཅིག །ༀ་བཛྲ་ནེ་ཏྲ་སོགས། དབང་བཞི་པའི་རྟོགས་པ་བརྗོད་པ་ནི། དོན་དམ་བྱང་ཆུབ་སེམས་ཀྱི་དཀྱིལ་འཁོར་མཐོང་། །དབང་བཞི་ཐོབ་ཅིང་སྒོ་གསུམ་དྲི་མ་དག །ཕྱག་ཆེན་བསམ་མི་ཁྱབ་པར་བསྒོམ་པར་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །ཅེས་བརྗོད། དེ་ལྟར་དཔལ་འཁོར་ལོ་བདེ་མཆོག་ལྷ་ལྔའི་དཀྱིལ་འཁོར་དུ་དབང་བཞི་ལེགས་པར་བསྐུར་ཟིན་པས་དེ་དག་གི་སྐབས་སུ་བབས་པའི་དམ་ཚིག་རྣམས་ཚུལ་བཞིན་དུ་འཛིན་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས། དབང་བཞི་རྫོགས་པར་ཐོབ་པའི་གཏང་རག་གི་ཡོན་དུ་མནྜལ་འབུལ། ལུས་ལོངས་སྤྱོད་ཐམས་ཅད་ལྟོས་མེད་དུ་འབུལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་སོགས། དེ་ལྟར་འཁོར་ལོ་སྡོམ་པ་ལྷ་ལྔའི་དབང་ལེགས་པར་སྒྲུབ་པ་ཡིན་པས་འདི་ཉིད་ཀྱི་སྒོ་ནས་རང་གཞན་གྱི་དོན་རྒྱ་ཆེན་པོ་བསྒྲུབ་མཛོད། བསོད་ནམས་འདི་ཡིས་སོགས་བརྗོད། དེ་ནས་ཚོགས་ལ་རོལ་ཞིང་ལྷག་མ་བཏང་། རྗེས་ཆོག་བཀྲ་ཤིས་སོགས་གཞུང་བཞིན་བྱའོ། །ཞེས་ཀུན་མཁྱེན་དྷརྨཱ་ཀ་རས་མཛད་པའི་མཚམས་སྦྱོར་ལ་ཚིག་སྣ་ཅུང་ཟད་བསྲིང་ནས་བལྟས་ཆོག་མ་བྲི་བ་པོ་ནི་སི་ཏུ་པདྨ་ཉིན་བྱེད་དབང་པོའོ། །སརྦ་མངྒ་ལཾ།། །།

འཕགས་མཆོག་སྤྱན་རས་གཟིགས་རྒྱལ་བ་རྒྱ་མཚོའི་དབང་བསྐུར་ཡེ་ཤེས་མྱུར་འབེབས།

[Full Size]

འཕགས་མཆོག་སྤྱན་རས་གཟིགས་རྒྱལ་བ་རྒྱ་མཚོའི་དབང་བསྐུར་ཡེ་ཤེས་མྱུར་འབེབས་ཞེས་བྱ་བ་བཞུགས་སོ། །

[Full Size]

ན་མོ་གུ་རུ་ལོ་ཀཱི་ཤྭ་ར་ཡ། འདིར་བཅོམ་ལྡན་འདས་རྒྱལ་བ་རྒྱ་མཚོའི་དཀྱིལ་འཁོར་དུ་སྐལ་ལྡན་གྱི་སློབ་མ་སྨིན་པར་བྱེད་པའི་རིམ་པ་ལ་ཐོག་མར་སྔོན་གཏོར་ནས་བདག་བསྐྱེད་རྫོགས་པར་བསྙེན་པ་བཅས་སོང་རྗེས། མདུན་བསྐྱེད་ཀྱི་གནས་སུ་མེ་ཏོག་གི་ཚོམ་བུ་ལྷ་དགུ་སོ་སོའི་གནས་སུ་བཀོད་ནས་མཆོད་པ་བསྐོར་བཤམས་བྱས་ཟིན་པ་དང་། མེ་ཏོག་ཚོམ་བུའི་གདན་གྱི་སྟེང་དུ་ཞེས་པ་ནས་གཞུང་དུ་གསལ་ལྟར་སྙན་གསན་ཕབ་པ་བཅས་སོང་རྗེས། ཨུ་ུཏིཥྛ་བར་དང་། དེ་ནས་བུམ་པ་ལྷག་གནས་གྲུབ་ནས། སློབ་མ་ཟུང་དུ་མ་གྱུར་པ་ཡོལ་བའི་ཕྱི་རོལ་དུ་ལས་བུམ་གྱི་ཆུས་ཁྲུས་བྱས་ལ་ནང་དུ་འོང་གྲལ་དུ་འཁོད་པ་ལ། ལས་ཀྱི་རྡོ་རྗེས་མནྜལ་བཀྱེ་བསྡུ་བྱས་ནས། སློབ་དཔོན་གྱིས། ནམ་མཁའ་དང་མཉམ་པའི་སེམས་ཅན་ཐམས་ཅད་ཕྱག་རྒྱ་ཆེན་པོའི་གོ་

[Full Size]

འཕང་ལ་བཞག་པར་བྱ། དེའི་ཆེད་དུ་བཅོམ་ལྡན་འདས་འཇིག་རྟེན་དབང་ཕྱུག་གི་དཀྱིལ་འཁོར་དུ་འཇུག་བར་བྱ་བ་ལས་སྔོན་དུ་འགྲོ་བ་སློབ་མ་ལྷག་པར་གནས་པའི་ཆོས་རྣམས་གསན་པའི་ཡོན་དུ་མནྜལ་ཕུལ། ཞེས་དཀྱིལ་ཆོག་གཞུང་ལྟར་མནྜལ་ཕུལ། དེ་ལྟར་མནྜལ་འབུལ་བ་སྔོན་དུ་སོང་ནས་གསང་ཆེན་བླ་ན་མེད་པའི་དཀྱིལ་འཁོར་དུ་འཇུག་པའི་བློས་གསན་འཚལ། དེའང་ཁྱེད་རང་རྣམས་རྙེད་པར་དཀའ་བའི་དལ་བ་བརྒྱད་དང་འབྱོར་བ་བཅུ་ལྡན་པའི་མིའི་ལུས་རྟེན་ཐོབ་ནས། སངས་རྒྱས་ཀྱི་བསྟན་པའི་སྙིང་པོ་ཀར་བརྒྱུད་རིན་པོ་ཆེའི་ཆོས་སྒོར་ཞུགས་ཤིང་ཐེག་པ་ཆེན་པོའི་དགེ་བའི་བཤེས་གཉེན་བསྟེན་པའི་སྐལ་བ་རྙེད་པ་འདི་ལྟ་བུ་ནི་སྔོན་གྱི་སྐྱེ་བ་མང་པོར་དགེ་པའི་རྩ་བ་དཔག་ཏུ་མེད་པ་

[Full Size]

བསྒྲུབས་པའི་མཐུ་ལས་དུས་འདིར་ཐུན་མོང་མ་ཡིན་པའི་སྐལ་བ་ཕུན་སུམ་ཚོགས་པ་ཐོབ་པར་གྱུར་པ་ཡིན་པས། དེ་ཉིད་ཆུད་མི་གསན་པ་གལ་ཆེ་སྟེ། གར་དབང་ཆོས་ཀྱི་དབང་ཕྱུག་གི་རྡོ་རྗེའི་གསུང་ལས། དལ་དང་འབྱོར་པའི་ལུས་ཐོབ་ཅིང་། །སྟོན་པའི་སྟོན་པ་རྙེད་གྱུར་ཏེ། །སྐལ་བ་ཕུན་སུམ་ཚོགས་པ་ལ། །སུ་ཞིག་འབྲས་བུ་མེད་པར་བྱེད། །ཅེས་གསུངས་པ་ལྟར་ཡིན། དེས་ན་སྣོད་ཀྱི་འཇིག་རྟེན་དང་བཅུད་ཀྱི་སེམས་ཅན་ཐམས་ཅད་ཀྱང་མི་རྟག་པའི་རང་བཞིན་ཡིན་ལ། མིའི་ལུས་རྟེན་འདི་ནི་རྟག་པར་གྲུབ་པ་མེད་པས་ངེས་པར་འཆི་བ་ཁོ་ན་ཡིན་ཏེ། བཤེས་སྤྲིངས་ལས། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེག་པས་ལུས་ཅན་འདི་དག་ཀྱང་། །ཐལ་བར་ཡང་ནི་ལུས་པར་མི་འགྱུར་ན། །ཤིན་ཏུ་ཉམ་ཆུང་མི་ལྟ་སྨོས་ཅི་འཚལ། །ཞེས་གསུངས་པ་ལྟར་མི་རྟག་ཅིང་མི་བརྟན་པའི་འཁོར་བ་ལས་ངེས་པར་འབྱུང་པའི་བློ་བསྐྱེད་ཅིང་ལས་རྒྱུ་འབྲས་ལ་བླང་དོར་བྱེད་པ་གལ་ཆེ་བ་ཡིན་པའང་། སློབ་དཔོན་ཀླུ་སྒྲུབ་ཀྱིས། གང་ཞིག་གསེར་སྣོད་རིན་ཆེན་སྤྲས་པ་ཡིས། །ངན་སྐྱུགས་འཕྱག་པར་འགྱིད་པ་དེ་བས་ནི། །གང་ཞིག་མི་རུ་སྐྱེས་ནས་སྡིག་པ་དག །བགྱིད་པ་དེ་ནི་ཆེས་རབ་བླུན་པ་ལགས། །ཞེས་གསུངས་པ་བཞིན་འཁོར་བ་ལས་བློ་ལྡོག་ཅིང་དམ་པའི་ཆོས་ཟབ་མོ་ལ་བརྩོན་དགོས་ཤིང་། དེས་ན་ཆོས་ཉན་པའི་སྐབས་སུ་འདོད་ཆགས་ཞེ་སྡང་གཏི་མུག་དང་བཅས་

[Full Size]

པའི་སྒོ་ནས་ཉན་ཀྱང་སྣོད་དུག་ཅན་དང་། ཁ་སྦུབ་དང་། ཞབས་རྡོལ་གྱི་ནང་དུ་ཆུ་ལ་སོགས་པ་བླུག་པ་བཞིན་ཕྱིན་ཅི་ལོག་ཏུ་འགྱུར་པ་ཡིན་པས་དད་པ་གསུམ་གྱིས་ཀུན་ནས་བསླང་སྟེ་རང་ཉིད་ལ་ནད་པའི་འདུ་ཤེས། བླ་མ་ལ་སྨན་པའི་འདུ་ཤེས། ཆོས་ལ་སྨན་གྱི་འདུ་ཤེས་ཉེ་བར་བཞག་ནས་གསན་འཚལ། སྔགས་ཀྱི་དངོས་གྲུབ་དོན་གཉེར་གང་། །དཀྱིལ་འཁོར་འདིར་ནི་འཇུག་བར་བྱ། །བསོད་ནམས་འདོད་པས་དེ་ལས་གཞན། །གཞན་ནི་འཇིག་རྟེན་ཕ་རོལ་གཉེར། །སླར་ཡང་དད་དང་ལྡན་པ་ཡིས། །འཇིག་རྟེན་ཕ་རོལ་ལ་དམིགས་ཏེ། །བློ་ལྡན་དཀྱིལ་འཁོར་འཇུག་པར་བྱ། །འདི་ཡི་འབྲས་བུ་དོན་གཉེར་ན། །འཇིག་རྟེན་ཕ་རོལ་འགྲུབ་མི་འགྱུར། །འཇིག་རྟེན་ཕ་རོལ་ལ་དམིགས་ན། །འདི་འབྲས་འབད་པ་མེད་པར་འགྲུབ། །ཞེས་གསུངས་ཤིང་། དེ་ལྟར་འཇིག་རྟེན་འདི་ལ་ལྟོས་པའི་ཞེན་འཛིན་གྱི་བློ་སྤངས་ཏེ་བདེ་ཆེན་ལམ་གྱི་བསྒྲུབ་བྱ་མཐའ་དག་སྒྲུབ་པར་བྱེད་དོ་སྙམ་པའི་སེམས་སྔོན་དུ་བཏང་ནས་ཐུན་མོང་མ་ཡིན་པ་གསང་སྔགས་ཀྱི་ཟག་མེད་བདེ་ཆེན་ལ་འཇུག་པའི་བློས་རྡོ་རྗེ་སློབ་དཔོན་ལ་དགའ་ཆེན་ཞེས་བོས་ཏེ་ཁྱོད་ནི་བདག་གི་འདྲེན་པ་མཆོག་ཏུ་བཟུང་ལགས་པ་དེའི་ཕྱིར། བདག་ཐར་པའི་གྲོང་ཁྱེར་དུ་འཇུག་པར་མཛད་དུ་གསོལ་སྙམ་པའི་སྒོ་ནས་འདིའི་རྗེས་ཟློས་མཛོད། རྡོ་རྗེ་ནམ་མཁའ་མཛེས་པ་ཡི། །བདག་གི་སྟོན་པ་དགའ་ཆེན་ཁྱོད། །སེམས་ཅན་ཀུན་གྱི་དོན་བརྩོན་པ། །མགོན་པོས་དམ་ཚིག་བདག་

[Full Size]

ལ་སྩོལ། །སྡོམ་པའི་མཆོག་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་སྩལ་དུ་གསོལ། །བྱང་ཆུབ་སེམས་ཀྱང་བདག་ལ་སྩོལ། །ཀུན་ཏུ་རྟོག་པ་སྤོང་པ་ཡི། །གྲོང་ཁྱེར་ཉམས་དགར་གཞུག་པར་འཚལ། །ཞེས་ལན་གསུམ། དེ་ནས་ཟབ་མོ་གསང་བ་སྔགས་ཀྱི་སྤྱོད་ཚུལ་བཤད་པར་བྱ་སྟེ། དུས་གསུམ་གྱི་སངས་རྒྱས་ཐམས་ཅད་ཀྱང་ཆོ་ག་ཟབ་མོ་འདི་ཉིད་ལ་བསྟེན་ཏེ་བྱང་ཆུབ་ཀྱི་སྗོན་ཤིང་དམ་པར་ཐམས་ཅད་མཁྱེན་པའི་གོ་འཕང་མངོན་དུ་བརྙེས་ཤིང་། བདུད་ཀྱི་སྡེ་ཐམས་ཅད་ཡོངས་སུ་བཅོམ་ཞིང་ཕམ་པར་མཛད་པ་ཡིན་ལ་དེ་ཉིད་ཀྱི་ཕྱིར་ན་རིགས་ཀྱི་བུ་ཁྱོད་རྣམས་ཀྱང་བླ་ན་མེད་པའི་བྱང་ཆུབ་ཀྱི་གོ་འཕང་མྱུར་དུ་ཐོབ་པའི་ཕྱིར། གསང་ཆེན་བླ་མེད་ཀྱི་ཆོ་ག་ཟབ་མོ་ལ་སྤྱད་པར་བྱ་བའི་བློ་གྲོས་རྣམ་པར་དག་པ་བསྐྱེད་ནས་སེམས་དགའ་སྤྲོ་དང་བཅས་པས་ཉོན་ཅིག །བུ་ཚུར་ཐེག་པ་ཆེན་པོ་པ། །ཁྱོད་ནི་ཚུལ་ཆེན་སྣོད་ཡིན་གྱི། །གསང་སྔགས་ཚུལ་ཆེན་ཆོ་ག་འདི། །ཁྱོད་ལ་ཡང་དག་བཤད་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱི་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པའི་ཚད་མ་བརྙེས། །གསང་སྔགས་སྦྱོར་བ་མཉམ་མེད་པས། །སྐྱོབ་པ་སངས་རྒྱས་ཧེ་རུ་ཀས། །བདུད་སྡེ་ཤིན་ཏུ་མི་བཟད་པའི། །

[Full Size]

དཔུང་ཆེན་དག་ཀྱང་འདི་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོས་ལེགས་པར་ཉོན། །བརྗེད་ངས་བློ་ལ་ཧེ་རུ་ཀ་སོགས་པའི། །བདེ་བར་གཤེགས་པ་རྣམས་ཀྱིས་བྱིན་མི་རློབས། །ཞེས་གསུངས་པ་ལྟར་མ་ཡེངས་པར་མདུན་གྱི་ནམ་མཁར་བླ་མ་དང་སངས་རྒྱས་བྱང་ཆུབ་སེམས་དཔའ་ཐམས་ཅད་དམིགས་ལ་འདིའི་ལད་མོ་གྱིས། ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །བླ་མ་རྡོ་རྗེ་སློབ་དཔོན་དང་། །ཡི་དམ་ལྷ་ཚོགས་འཁོར་དང་བཅས། །ཐམས་ཅད་བདག་ལ་དགོངས་སུ་གསོལ། །འཁོར་བ་ཐོག་མ་མེད་པ་ནས། །ཐ་མ་ད་ལྟ་ཐུག་གི་བར། །འདོད་ཆགས་ཞེ་སྡང་གཏི་མུག་གིས། །ལུས་ངག་ཡིད་གསུམ་སྒོ་ནས་ནི། །སྡིག་པ་དཔག་མེད་བགྱིས་པ་དང་། །བགྱིད་དུ་སྩལ་དང་ཡི་རང་ལ། །ཁྱེད་ཀྱི་སྤྱན་སྔར་བཤགས་པར་བགྱི། །སླན་ཆད་བདག་ནི་མི་བགྱིད་དོ། །སངས་རྒྱས་བྱང་ཆུབ་སེམས་དཔའ་དང་། །འཕགས་པ་ཉན་ཐོས་རང་རྒྱལ་གྱི། །ཡན་ལག་རྣམས་ཀྱང་གཟུང་བར་བགྱི། །འགྲོ་བ་ཀུན་གྱི་དགེ་བ་ལ། །བདག་ནི་རྗེས་སུ་ཡི་རང་ངོ་། །བདེ་གཤེགས་ཆོས་སྐུ་ལ་བཞུགས་ཀྱང་། །འགྲོ་བ་ཀུན་ལ་ཕན་དོན་དུ། །ཆོས་ཀྱི་འཁོར་ལོ་སྐོར་བར་ནི། །བདག་ནི་རྟག་ཏུ་གསོལ་བ་འདེབས། །བདེ་གཤེགས་མཛད་པ་མཐར་ཕྱིན་ནས། །མྱ་ངན་འདའ་བར་བཞེད་རྣམས་ལ། །

[Full Size]

བསྐལ་པའི་མཐའ་མར་བཞུགས་པར་ནི། །བདག་ནི་རྟག་ཏུ་གསོལ་བ་འདེབས། །བདག་གི་དགེ་པའི་རྩ་བ་གང་། །བགྱིས་སམ་བགྱིད་དུ་སྩལ་པ་དང་། །རྗེས་སུ་ཡི་རང་ཐམས་ཅད་ནི། །འགྲོ་བ་ཀུན་གྱིས་ཐོབ་པར་ཤོག །སྤྱན་རས་གཟིགས་དབང་ཐུགས་རྗེའི་དག །བླ་མར་བཅས་པ་ཐམས་ཅད་ལ། །བདག་གི་ལུས་འདི་ཕུལ་བ་ཡིས། །ཐེག་པ་དམན་ལ་མི་འཇུག་ཅིང་། །ཐེག་ཆེན་བླ་ན་མེད་པའི་ལམ། །ཟབ་ཅིང་རྒྱ་ཆེ་བསྟན་དུ་གསོལ། །ཞེས་ལན་གསུམ་བརྗོད། སྐྱབས་སུ་འགྲོ་བར་བྱ་སྙམ་པས་རྗེས་ཟློས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྐང་གཉིས་རྣམས་ཀྱི་མཆོག་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཐེག་པ་ཆེན་པོའི་ཆོས་ཞི་བ་མྱ་ངན་ལས་འདས་པ་རྣམས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་བྱང་ཆུབ་སེམས་དཔའི་དགེ་འདུན་ཕྱིར་མི་ལྡོག་པ་རྣམས་ལ་སྐྱབས་སུ་མཆིའོ། །ལན་གསུམ། སེམས་བསྐྱེད་པའི་ལད་མོ་གྱིས། ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །བཅོམ་ལྡན་རྡོ་རྗེ་འཛིན་དབང་པོ། །རྡོ་རྗེ་སློབ་དཔོན་དགོངས་སུ་གསོལ། །ཇི་ལྟར་དུས་གསུམ་མགོན་པོ་རྣམས། །སེམས་ཅན་རྣམས་གྱི་དོན་

[Full Size]

སླད་དུ། །བྱང་ཆུབ་མཆོག་ཏུ་ཐུགས་བསྐྱེད་ལྟར། །དེ་བཞིན་བདག་གིས་སེམས་བསྐྱེད་དོ། །ཇི་ལྟར་དུས་གསུམ་མགོན་པོ་རྣམས། །བསོད་ནམས་ཡེ་ཤེས་བྱང་ཆུབ་ལམ། །ཐབས་དང་ཤེས་རབ་གོམ་པས་བགྲོད། །དེ་བཞིན་བདག་གིས་ལམ་བགྲོད་དོ། །ཇི་ལྟར་དུས་གསུམ་མགོན་པོ་རྣམས། །ཐམས་ཅད་མཁྱེན་པར་སངས་རྒྱས་ནས། །མཁའ་མཉམ་སེམས་ཅན་དོན་མཛད་ལྟར། །དེ་བཞིན་བདག་གིས་དོན་བགྱིའོ། །མ་བརྒལ་བ་རྣམས་བསྒྲལ་བ་དང་། །མ་གྲོལ་བ་རྣམས་དགྲོལ་བ་དང་། །དབུགས་མ་ཕྱུང་རྣམས་དབུགས་དབྱུང་ཞིང་། །སེམས་ཅན་མྱ་ངན་འདའ་བ་དང་། །ཀུན་ཀྱང་སངས་རྒྱས་ཐོབ་པར་ཤོག །ཅེས་ལན་གསུམ། དེ་དག་ནི་ཕ་རོལ་ཏུ་ཕྱིན་པ་ནས་གསུངས་པ་དང་མཐུན་པར་འཇུག་པ་ཡིན་ལ། ད་ནི་བྱ་བ་དང་སྤྱོད་པ་དང་རྣལ་འབྱོར་གྱི་རྒྱུད་དང་མཐུན་པར་འཇུག་པར་བྱ་སྟེ། ཁྱེད་རང་གི་སྤྱི་བོར་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་རྡོ་རྗེ་ཐུགས་ཀར་བཏོད་དེ་འཛིན་པ། གཡོན་པས་དྲིལ་བུ་དཀུར་བརྟེན་པ། དར་གྱི་ན་བཟའ་དང་། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། དེ་ལྟ་བུར་གསལ་བའི་ཐུགས་ཀ་ནས་འཕྲོས་པའི་འོད་ཟེར་གྱིས་ལུས་ངག་ཡིད་གསུམ་གྱི་སྡིག་པ་དང་སྒྲིབ་པ་དག་པའི་མོས་པ་མཛོད་ལ་ཡི་གེ་བརྒྱ་པ་ཐོན་ཅིག །ཡི་གེ་བརྒྱ་པ་བརྗོད། དེ་ནས་རིགས་ལྔ་སྤྱིའི་

[Full Size]

སྡོམ་པ་དང་དམ་ཚིག་རྣམས་འཛིན་སྙམ་པའི་སྒོ་ནས་སྡོམ་བཟུང་འདིའི་ལད་མོ་མཛོད། སངས་རྒྱས་བྱང་ཆུབ་སེམས་དཔའ་རྣམས། །ཐམས་ཅད་བདག་ལ་དགོངས་སུ་གསོལ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །སྡོམ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་རྣམས། །བདག་གིས་བརྟན་པོར་གཟུང་བར་བགྱིས། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤང་ངོ་། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ལ། །ཉིན་རེ་བཞིན་དུ་དུས་དྲུག་ཏུ། །ཟང་ཟིང་ཆོས་དང་མི་འཇིགས་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བ། །པདྨའི་རིགས་མཆོག་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་ཆོས་སོ་སོར་གཟུང་བར་བགྱི། །ལས་ཀྱི་རིགས་མཆོག་བསྡུས་པ་ལ། །སྡོམ་པ་ཐམས་ཅད་ཡང་དག་ལྡན། །ཀུན་ནས་སོ་སོར་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །

[Full Size]

བདག་གིས་སྡོམ་པ་མ་ལུས་བཟུང་། །མ་བརྒལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་དགྲོལ་བར་བགྱི། །དབུགས་མ་ཕྱུང་རྣམས་དབུགས་དབྱུང་ཞིང་། །འགྲོ་ཀུན་མྱ་ངན་འདས་ལ་འགོད། །ཅེས་ལན་གསུམ། དེ་ནས་ཁྱེད་རང་རྣམས་སྐད་ཅིག་གིས་རྗེ་བཙུན་སྤྱན་རས་གཟིགས་སྐུ་མདོག་དཀར་པོ་ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐལ་མོ་སྦྱར་བ། གཡས་ཀྱི་འོག་མ་ན་བགྲང་ཕྲེང་། །གཡོན་གྱི་འོག་མ་ན་པདྨ་འཛིན་པ། དེའི་ཐུགས་ཀར་ཧྲཱིཿདཀར་པོ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱོང་བར་མོས་ལ་སྙིང་པོ་འདི་ཐོན་ཅིག །ༀ་མཎི་པདྨེ་ཧཱུྃ། ཞེས་ཅི་རིགས་བརྗོད་དུ་བཅུག །དེ་ལྟར་བསྒོམ་པས་ལུས་ངག་ཡིད་ཀྱི་སྒྲིབ་པ་དག་པ་དང་། བར་ཆད་ཀྱི་བགེགས་བསྲུང་བ་དང་། དངོས་གྲུབ་ཐོབ་བར་བཤད་དེ། པདྨ་རྒྱལ་པོའི་རྒྱུད་ལས། ༀ་མ་ཎི་པདྨེ་ཧཱུྃ། རྒྱ་མཚོའི་ནང་གི་རིན་ཆེན་བཞིན། །ལན་གཅིག་མོས་པས་བརྗོད་པ་ན། །སེམས་ཅན་དམྱལ་བའི་ནད་ལས་ཐར། །ལན་གཉིས་བརྗོད་པས་ཡི་དྭགས་སུ། །འགྲོ་བའི་སྒོ་ཡང་འགག་པར་འགྱུར། །གསུམ་བརྗོད་དུད་འགྲོའི་སྒོ་ཡང་འགག །འདོད་པའི་ཡོན་ཏན་ལྔ་སྤྱོད་ཀྱང་། །འདི་དང་མ་བྲལ་གཙང་མར་གནས། །བཟའ་དང་གཏུང་བའི་ལོངས་སྤྱོད་ཀྱང་། །འདི་ཉིད་དྲན་ན་ཉེས་པ་མེད། །བདུད་ཀྱི་བར་དུ་གཅོད་པ་ཀུན། །སྔགས་ཀྱི་རྒྱལ་པོ་བགྲང་བས་ཞི། །ཞེས་གསུངས་པ་རྣམས་ཡིད་ལ་བཞག་ནས་

[Full Size]

དེང་ནས་གཟུང་སྟེ་ཇི་སྲིད་འཚོ་བའི་བར་དུ་གསང་རིགས་གཟུངས་སྔགས་ཐམས་ཅད་ཀྱི་རྒྱལ་པོ་ཡི་གེ་དྲུག་པ་འདོན་པ་ལ་བརྩོན་པར་མཛོད་ཅིག །དྲི་ཞིམ་པོའི་ཤིང་སོར་བཅུ་གཉིས་པའི་སོ་ཤིང་། ༀ་ཨཱཿཧཱུྃ་གིས་བྱིན་གྱིས་བརླབ་ལ། སློབ་མའི་ལག་ཏུ་བྱིན། དེ་ནས་དངོས་གྲུབ་ཀྱི་མཚན་མ་བརྟག་པར་བྱ་བའི་ཕྱིར་དུ་ཁྱེད་རང་རྣམས་ཞལ་ཤར་ཕྱོགས་སམ་བྱང་དུ་བལྟ་བས་ཐལ་མོ་སྦྱར་བའི་བར་དུ་སོ་ཤིང་བཟུང་ནས་རྩེ་མོ་ཅུང་ཟད་འཆའ་བའི་ཚུལ་དང་བཅས་ཏེ་ༀ་བཛྲ་ཧཱ་ས་ཧ་ཞེས་བརྗོད་བཞིན་དུ་འདོར་བར་ཞུ། ཞེས་སོ་ཤིང་དོར་བཅུག །དེ་ལྟར་སོ་ཤིང་དོར་བའི་དངོས་གྲུབ་ཀྱི་མཚན་མ་བཤད་པ་ནི་རྩེ་མོ་ནམ་མཁར་བསྟན་ན་མཆོག་གི་དངོས་གྲུབ། ཤར་དུ་ཞི་བའམ་གྲུབ་པ་ཆེན་པོ་བརྒྱད། ལྷོར་རྒྱས་པའམ་འཇིག་རྟེན་པའི། ནུབ་ཏུ་དབང་གི་ལས་སམ་ཆོས་སྨྲ་བ། བྱང་དུ་དྲག་པོའམ་ཕྲིན་ལས་སྣ་ཚོགས་པ། ཐུར་དུ་ུས་འོག་གི་དངོས་གྲུབ། མཚམས་རྣམས་སུ་ཐུན་མོང་གི་དངོས་གྲུབ་ཐོབ་པར་འགྱུར་རོ། །དྲི་བཟང་པོའི་ཆུ་དང་བྱིན་གྱིས་བརླབས་པའི་ཆང་ཁྱོར་གང་བླུད་ཅིང་། བྃ་ཡིག་ལས་སྐྱེས་པའི་དུང་ཆོས་ཀྱི་ཆུས་སྡིག་སྒྲིབ་ཐམས་ཅད་བཀྲུས་པའི་མོས་པ་མཛོད། ༀ་ཧྲཱིཿབི་ཤུདྡྷ་སརྦ་དྷརྨ་སརྦ་པ་པྃྃ་ནི་ཙཱ་སྱ་སཾ་ཤོ་དྷ་ཡ་བི་ཀལྤ་ཨ་པ་ན་ཡ་ཧཱུྃ། ཞེས་ཁྱོར་ཆུ་བླུད། སྐུད་བ་དམར་པོ་སུམ་སྒྲིལ་ལ། སྙིང་པོ་རྣམས་དང་། ༀ་ཧྲཱིཿཔདྨནྟ་ཀྲི་ཏ་སོགས་བཟླས་ནས་མདུད་པ་བྱས་ལ། ཧཱུྃ་ཡིག་ལས་སྐྱེས་པའི་སྲད་བུ་དམར་པོས་བར་ཆད་མི་མཐུན་པའི་ཚོགས་རྣམས་ལས་སྲུང་བའི་མོས་པ་མཛོད།

[Full Size]

ༀ་བུདྡྷ་མཻ་ཏྲི་རཀྵ་རཀྵ་སརྦཱནྟཱུ་སྭཱ་ཧཱ། ཞེས་སྐྱེས་པའི་དཔུང་པ་གཡོན། བུད་མེད་ཀྱི་གཡས་ལ་གདབ་བོོ། །ཀུ་ཤའི་ཆུན་པོ་གཉིས། ཧཱུྃ་དང་དྷཱིཿས་བྱིན་གྱིས་བརླབ་ལ། ཧཱུྃ་དང་དྷིཿཡིག་ལས་སྐྱེས་པའི་ཀུ་ཤའི་ཆུན་པོ་དག་མི་གཙང་བ་སེལ་ཞིང་དགེ་བའི་ལྟས་རྨི་ལམ་དུ་རྟོགས་པར་བྱེད་པའི་ནུས་ལྡན་དུ་གྱུར། ༀ་བཛྲ་ཏཱིཀྵྞ་བཾ། གཅིག་གཡས་སུ་གཏད། ༀ་བཛྲ་སཏྭ་ཞེས་གཅིག་གཡོན་དུ་གཏད་ལ། དེ་ལྟར་བྱིན་པའི་ཀུ་ཤའི་ཆུན་པོ་གཉིས་སྔས་དང་སྟན་དུ་གྱིས་ལ། དཀྱིལ་འཁོར་གྱི་ཁང་པ་འདིར་ཉོལ་ཅིག །རྨི་ལམ་གྱི་མཚན་མ་ཇི་ལྟ་བུ་མཐོང་བ་དེ་ནངས་པར་ང་ལ་སྨྲོས་ཤིག །ཅེས་བརྗོད། དེ་ནས་ཟབ་པ་དང་རྒྱ་ཆེ་བའི་ཆོས་བཤད་པ་ནི། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གཉིས་མེད་ཟབ་མོའི་སྤྱོད་ཚུལ་འདིས། །སེམས་ཅན་སངས་རྒྱས་འགྲུབ་པར་འགྱུར། །བསྐལ་པ་བྱེ་བ་དུ་ུམ་རུ། །སྔོན་དུ་བྱས་པའི་སྡིག་པ་གང་། །དེ་ཀུན་བྱང་བར་འགྱུར་བ་ནི། །ཟབ་མོའི་དཀྱིལ་འཁོར་མཐོང་བས་སོ། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྲོ། །གང་དག་སྤྱོད་པ་མཆོག་འདི་ལ། །བློ་གྲོས་བརྟན་པོ་གཡོ་མེད་པ། །དེ་དག་གིས་ནི་ངན་འགྲོའི་རྒྱུ། །སྡུག་བསྔལ་

[Full Size]

ཀུན་འབྱུང་རབ་ཏུ་བཅད། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་ལ། །དབང་ཐོབ་འབྲས་བུ་སྐྱེ་བཞིན་པར། །དེ་དག་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བ། །ལམ་མཆོག་འདི་ནི་དཔལ་དང་ལྡན། །ལམ་འདིར་ཁྱེད་རྣམས་འགྲོ་བ་ལ། །རང་བྱུང་སྐལ་བ་ཆེན་པོ་པ། །འཇིག་རྟེན་ཀུན་གྱི་འདྲེན་པའི་གནས། །དེ་བཞིན་གཤེགས་པ་རྣམས་སུ་ུའགྱུར། །ཞེས་པ་འཇིག་རྟེན་དུ་འཁོར་ལོས་སྒྱུར་རྒྱལ་འབྱོན་པ་བས་ཨུ་དུམ་ཝ་རའི་མེ་ཏོག་འབྱུང་བ་དཀོན་ཅིང་། དེ་ལས་ཀྱང་རྣམ་པ་ཐམས་ཅད་མཁྱེན་པའི་སངས་རྒྱས་འབྱུང་བ་དཀོན། སངས་རྒྱས་བྱོན་རུང་གསང་སྔགས་ཀྱི་ཆོས་ནི་འགྲོ་བ་ཀུན་གྱི་སྤྱོད་ཡུལ་དུ་མི་འབྱོན་པ་ཡིན་ལ། རང་ཅག་གི་སྟོན་པ་འདིའི་བསྟན་པ་ལ་གསང་སྔགས་ཀྱི་ཆོས་རྣམས་མི་ཡུལ་དུ་བྱོན་པའི་མཐུས། རྡོ་རྗེ་སློབ་མ་ཁྱེད་རྣམས་ཀྱང་ད་ལྟ་དཀྱིལ་འཁོར་འདི་ལྟ་བུར་འཇུག་པའི་སྐལ་བ་དང་ལྡན་པ་ནི་འསོད་ནམས་མང་དུ་བསགས་པའི་འབྲས་བུ་ཡིན་པའི་ཕྱིར་དགའ་བ་རྒྱ་ཆེན་པོ་གྱིས་ཤིག །བསོད་ནམས་འདི་ཡིས་སོགས་བརྗོད། སློབ་མ་རང་གནས་སུ་བཏང་། དེ་ནས་སྟ་གོན་དང་དངོས་བཞི་ཉིན་གཉིས་སུ་བྱེད་ན་གཏོར་བསྔོས་དང་རྗེས་ཆོག་བྱ། ཕྱི་ཉིན་བདག་བུམ་མདུན་བསྐྱེད་བཅས་འདོན་ཞིང་དངོས་སྟ་བསྲེ། ཡང་དངོས་སྟ་སྦྲེལ་ཚེ་བདག་བུམ་བསྐྱར་མི་དགོས་ཤིང་རས་བྲིས་བཀྲམ་ནས་མདུན་བསྐྱེད་བཏོན་མཐར་སྟ་གོན་གྱི་

[Full Size]

ལྷ་བསྲེ། མཆོད་བསྟོད་བཟླས་པ་བདག་འཇུག་ཚོགས་དང་བཅས་པ་གྲུབ་ནས་དངོས་གཞིའི་དབང་བསྐུར་སྐབས་སུ། སློབ་མ་རྣམས་ཕྱི་རོལ་དུ་ལས་བུམ་ཆུས་ཁྲུས་བྱས་ནས་ནང་དུ་འོངས་ནས་གྲལ་དུ་བཀོད་པ་ལ། བར་ཆད་བསལ་བའི་དོན་དུ་སྔོན་འགྲོ་གཏོར་མ་བཏང་། ལས་བུམ་གྱི་ཆུས་བསངས་བའི་གདོང་གཡོགས་དམར་པོ་གཏད་ལ། དེ་ནས་གདོང་གཡོགས་བཅིང་བ་ནི། གྲུབ་ཆེན་ལ་ཝ་པས་སློབ་མ་དབང་པོ་རབ་འབྲིང་ཐ་མ་གསུམ་གྱི་རིམ་པས་གདོང་གཡོགས་སྲབ་མོ་འབྲིང་པོ་མཐུག་པོ་གསུམ་དུ་བཤད་ལ། དེའི་དགོས་ཆེད་ནི་དཀྱིལ་འཁོར་མ་བསྟན་གྱི་བར་དུ་བལྟ་བར་མི་རུང་བ་ཡིན་པས་རས་ཡུགས་དམར་པོ་ཁ་ཚར་མ་ཉམས་པ་རེའི་གདོང་གཡོགས་འཆིང་བར་མོས་མཛོད། ༀ་ཧྲཱིཿཔདྨ་ཏ་ཀྲི་ཏ་བཛྲ་ཀྲོདྷ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ། ༀ་ཙཀྵུརྦནྡྷ་ཝ་ར་མཱ་ན་ཡ་ཧཱུྃ། ཞེས་པས་བཅིངས། དཀྱིལ་འཁོར་དང་མཇལ་བའི་ཚེ་ཕྱག་རྟེན་མེད་པར་མཇལ་མི་རུང་བས་མེ་ཏོག་གི་ཕྲེང་བ་རེ་བྱིན་པའི་མོས་པ་མཛོད། ༀ་ཨཱཿཁཾ་ཝཱི་ར་ཧཱུྃ་གིས་མེ་ཏོག་གི་ཕྲེང་བ་བྱིན། མནྜལ་བཀྱེ་བསྡུ་བྱེད། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཟུང་འཇུག་སྐུ་བཞི་དང་ཡེ་ཤེས་ལྔའི་བདག་ཉིད་རིགས་ཀུན་ཁྱབ་བདག་རྡོ་རྗེ་འཆང་ཆེན་པོའི་གོ་འཕང་ཐོབ་པར་བྱ། དེའི་ཆེད་དུ་བཅོམ་ལྡན་འདས་འཇིག་རྟེན་དབང་ཕྱུག་རྒྱལ་བ་རྒྱ་མཚོའི་དབང་བཞི་རྫོགས་པར་ཞུ་སྙམ་པའི་སྒོ་ནས་གསན་འཚལ། དེའང་ཁྱེད་རྣམས་ཐུགས་རྗེ་ཆེན་པོའི་དཀྱིལ་འཁོར་དུ་དབང་ཞུ་བར་

[Full Size]

འདོད་པ་ཤིན་ཏུ་བཟང་། སངས་རྒྱས་ཀྱིས་གསུངས་པའི་ཆོས་ཐམས་ཅད་ཐེག་པ་ཆེ་ཆུང་གཉིས་དང་། སྡེ་སྣོད་གསུམ། རྒྱུད་སྡེ་བཞིར་གསུངས་པ་ལ། ཐུགས་རྗེ་ཆེན་པོ་འདི་རྒྱུད་སྡེ་བཞིའི་རྩ་བ་ཞག་བདུན་ཙམ་གྱིས་དངོས་གྲུབ་ཐོབ་པར་བྱེད་པ་ཡིན་ཏེ། བྱ་སྤྱོད་ཀྱི་རྒྱུད་དང་མཐུན་པར་ཨཱ་མོ་གྷ་པཱ་ཤའི་རྒྱུད་དང་། ཐུགས་རྗེ་ཆེན་པོའི་གཟུངས་དང་རྟོག་པ་རྣམས་ཡིན། རྣལ་འབྱོར་གྱི་རྒྱུད་དང་མཐུན་པ་ནི། པདྨ་ཅོད་པན་གྱི་རྒྱུད་དང་། སྒོ་དྲུག་པ་རྣམས་ཡིན། རྣལ་འབྱོར་བླ་ན་མེད་པའི་རྒྱུད་དང་མཐུན་པ་ནི། ཕ་བླ་ན་མེད་པ་པདྨ་རྒྱལ་པོ། མ་བླ་ན་མེད་པ་པདྨ་ཟབ་པའི་རྒྱུད་གསུངས་པ་ལས། འདི་ནི་པདྨ་ཟབ་པའི་རྒྱུད་ལ་བརྟེན་ནས་དུས་གསུམ་གྱི་སངས་རྒྱས་ཐམས་ཅད་ཀྱི་སྤྱི་གཟུགས་སློབ་དཔོན་ཆེན་པོ་པདྨ་འབྱུང་གནས་སམ་ཁྱེའུ་པདྨ་བཛྲ་སྟེ། པདྨ་བཛྲ་ཆུང་བར་ཡང་གྲགས་པ་དེས། རྒྱུད་དབང་བསྐུར་མན་ངག་དང་བཅས་པ་རྣམས་ཨོ་རྒྱན་གྱི་རྒྱལ་པོ་མ་ཧཱ་ཕ་ལ་དང་། མཁའ་འགྲོ་གྲུབ་པའི་རྒྱལ་མོའམ་བྷཾ་ག་ལའི་ཕག་མོར་གྲགས་པ་དང་། ཟ་ཧོར་གྱི་ཡུལ་དུ་ཛ་ལནྡྷ་ར་པ་གསུམ་ལ་གནང་བ་ཡིན། དེ་ཡང་རྒྱལ་པོ་མ་ཧཱ་ཕ་ལ་དེ་ནི་ཚེ་རབས་མང་པོར་སྤྱན་རས་གཟིགས་ཀྱིས་བྱིན་གྱིས་བརླབས་པ་དེ་ལ་ཐུགས་རྗེ་ཆེན་པོས་ལུང་བསྟན་ཏེ། ཨོ་རྒྱན་གྱི་སློབ་དཔོན་པདྨ་འབྱུང་གནས་དང་ཁྱོད་རང་འབྲེལ་པ་ཡོད་པས་དེ་ལ་དབང་བསྐུར་སྒྲུབ་ཐབས་དང་བཅས་པ་ཞུས་ཤིག་གསུངས་པ་བཞིན་ཕྱོགས་ཐམས་ཅད་དུ་བཙལ་

[Full Size]

བས་མ་རྙེད་དེ་གླང་མའི་རི་བོར་ཁྱེའུ་པདྨ་བཛྲ་བྱ་བ་ཞིག་ཡོད་པ་ལ་ཕྱག་དང་བསྐོར་བ་མང་པོ་བྱས་ཏེ་རྗེས་སུ་འཛིན་པར་གསོལ་བ་བཏབ་པས་ཁྱེའུ་དེ་སྤྱན་རས་གཟིགས་ཕྱག་སྟོང་སྤྱན་སྟོང་དུ་གྱུར་ནས་དབང་བཞི་རྫོགས་པར་བསྐུར་ནས་མཆོག་གི་དངོས་གྲུབ་བརྙེས་པ་ཡིན་ནོ། །དེ་ནས་གྲུབ་ཆེན་ཛ་ལནྡྷ་ར་པས། རིགས་ངན་གྱི་གྲོང་ཁྱེར་དྷཱུ་ཏིར་བྲམ་ཟེ་མཻ་ཏྲི་པ་ལ་དབང་བསྐུར། དེས་རྡོ་རྗེ་གདན་གྱི་ཤར་ཕྱོགས་སུ་རྒྱལ་རིགས་ཕྱག་ན་རྡོ་རྗེ་ལ། དེས་བལ་ཡུལ་རིན་ཆེན་ཚུལ་གྱི་བི་ཧ་རར་བལ་པོ་བྷ་དནྟ་སུ་མ་ཏི་ཀཱིརྟི་ལ། དེས་བལ་ཡུལ་ཡམ་བུར་རས་ཆུང་རྡོ་རྗེ་གྲགས་པ་ལ་དབང་བསྐུར་བ་ཡིན་ནོ། །ཡང་མ་ཅིག་གྲུབ་པའི་རྒྱལ་མོས། ཏི་པུ་པ་དྲི་མེད་བཤེས་གཉེན་ལ་དབང་བསྐུར། ཏི་པུ་པས་རས་ཆུང་བ་ལ་གནང་བ་ཡིན་ཞིང་། བླ་མ་ཏི་པུ་པས་ལུང་བསྟན་པ་ལྟར་གྲུབ་པའི་རྒྱལ་མོ་དངོས་སུ་མཇལ་ཏེ་ཏ་ལའི་ལོ་མར་ཐུགས་རྗེ་ཆེན་པོའི་ཆོས་སྐོར་རྣམས་མཁའ་འགྲོའི་བརྡ་ཡིག་ཏུ་བྲིས་པ་གནང་། རས་ཆུང་པས་ཐུགས་རྗེ་ཆེན་པོ་ཞལ་གཟིགས་ཤིང་། ཕྱིས་རྒྱ་དཔེ་དེ་གླན་ཆུང་ལོ་ཙཱ་བས་བོད་སྐད་དུ་བསྒྱུར་བ་ད་ལྟ་བ་མཁལ་མར་གྲགས་པ་འདི་ཀའོ། །དེ་དག་ནི་བཀའ་མའི་དབང་དུ་བྱས་པ་ཡིན་ཞིང་། གཏེར་མའི་དབང་དུ་བྱས་ན། ཆོས་སྐུ་སྣང་བ་མཐའ་ཡས་ཀྱི་ཐུགས་རྗེ་ཆེན་པོ་དང་། གསང་བ་ཡེ་ཤེས་ཀྱི་མཁའ་འགྲོ་དང་། དཔལ་རྟ་མགྲིན་

[Full Size]

གསུམ་སྤྲུལ་ཏེ་དེ་གསུམ་ཆར་གྱིས། སློབ་དཔོན་ཆེན་པོ་ལ། ཁྱོད་ནི་སྤྱིར་གདུལ་བྱ་གདུག་པ་ཅན་མཐའ་དག་དང་། ཁྱད་པར་གངས་ལྗོངས་ཀྱི་མི་དང་མི་མ་ཡིན་ཀུན་འདུལ་བར་སྣང་བ་མཐའ་ཡས་ཀྱི་སྤྲུལ་པ་ཡིན་པས་ངེད་ཅག་གིས་བྱིན་གྱིས་བརླབ་པ་དང་གྲོགས་བྱ་ཡི་གསུངས་ནས་དབང་བསྐུར། རྒྱུད་དང་སྒྲུབ་ཐབས་བཅས་གནང་བ་ཡིན། དེས་ཆོས་རྒྱལ་ཁྲི་སྲོང་ལྡེའུ་བཙན་དང་མཁའ་འགྲོ་ཡེ་ཤེས་མཚོ་རྒྱལ་གཉིས་ལ་གནང་བས་ལྷོ་བྲག་གནམ་སྐས་ཅན་དང་། ཤ་འུག་སྟག་སྒོ་ལྷོ་བྲག་ཁོན་མཐིང་གི་ལྷ་ཁང་སོགས་སུ་གཏེར་ཁ་དུ་མར་སྦས་པ་ལས་མངའ་བདག་ཉང་རལ་པས་ལྷོ་བྲག་ཁོན་མཐིང་གི་གཏེར་ཁ་བཏོན། ཉང་གི་སྲས་མི་བསྐྱོད་རྡོ་རྗེས་རས་ཆུང་པ་ལ་གནང་བ་ཡིན་ནོ། །རས་ཆུང་པས་བཀའ་གཏེར་ཆུ་བོ་གཉིས་འདུས་ཀྱི་གདམས་པ་རྣམས་ལོ་རོ་ཚེ་རྐང་གི་དགོན་པར་མགོ་སྟོན་དབང་ཕྱུག་རྡོ་རྗེའམ་ཟངས་རི་རས་པ་ལ་གནང་། དེས་ཡར་ལུང་སོག་ཁར་གྲུ་གུ་རས་ཆེན་ལ། དེས་སྤོམ་བྲག་པ་ཆེན་པོ་ལ། དེས་གྲུབ་ཆེན་ཀརྨ་པ་ཆེན་པོ་ལ་གནང་བས་ཐུགས་རྗེ་ཆེན་པོ་བཅུ་གཅིག་ཞལ་ནམ་མཁའ་ཁྱབ་པ་ཞིག་ཞལ་གཟིགས། ཤར་ཕྱོགས་སྤུངས་རིར་སྣང་བ་མཐའ་ཡས་དང་རྒྱལ་བ་རྒྱ་མཚོ་བགྲང་ལས་འདས་པ་ཞལ་གཟིགས་ནས་གཙོ་བོས་སྒྲུབ་ཐབས་བཤད། མཁའ་འགྲོ་གསང་བ་ཡེ་ཤེས་ཀྱིས་ཡི་གེ་དྲུག་པ་ཛཔྲ་དབྱངས་སུ་བཟླས་

[Full Size]

ལུང་གནང་། དེ་ཕྱིར་ཡིག་དྲུག་གི་ཛཔྲ་དབྱངས་ཁྲོམ་དུ་མཛད་པ་ཡིན། དེ་སོགས་དག་སྣང་གི་ལོ་རྒྱུས་དཔག་ཏུ་མེད་པ་བཞུགས་ཤིང་། གྲུབ་ཐོབ་ཀརྨ་པཀྴིའི་མན་ངག་སྐོར་གསུམ་དུ་རྡོ་རྗེ་སྙིང་པོའི་གཞུང་དང་། སྒྲོམ་ཆེན་པོ་བརྒྱད་དང་། གཞུང་འཇིགས་བྱེད་ཆེན་པོ་སོགས་རྒྱལ་བ་རྒྱ་མཚོའི་ཆོས་སྐོར་རྣམས་ཟབ་རྒྱས་སུ་བཞུགས་ཤིང་། འདི་དག་ནི་མིང་ཡོངས་སུ་གྲགས་པ་ཀརྨ་པ་དང་འཇིག་རྟེན་དབང་ཕྱུག་རྒྱལ་བ་རྒྱ་མཚོ་གཉིས་ཀྱི་བར་ན་བརྒྱུད་པ་གཞན་ཡོད་ཀྱང་རུང་མེད་ཀྱང་རུང་ཞེས་གསུངས་པ་ལྟར་བཅོམ་ལྡན་འདས་ཐུགས་རྗེ་ཆེན་པོ་དང་དབྱེར་མེད་པའི་གྲུབ་ཆེན་ཀརྨ་པཀྴིས་སྤུངས་རིའི་དགོན་པར་གཉན་རས་དགེ་འདུན་འབུམ་ལ་གནང་། དེས་ཀརྨ་པ་རང་བྱུང་རྡོ་རྗེ་ལ་གནང་། དེ་ནས་རིམ་བཞིན་མཁས་བཙུན་རིན་ཆེན་རྒྱལ་མཚན། མངྒ་ལ་ཀེ་ཏུ། རྗེ་བཙུན་རཏྣ་བྷ་དྲ། ཀུན་མཁྱེན་མཐོང་བ་དོན་ལྡན། གོ་ཤྲཱི་དཔལ་འབྱོར་དོན་གྲུབ་ནས་ཀརྨ་པ་ཆོས་གྲགས་རྒྱ་མཚོའི་བར་དུ་རིམ་པར་བརྒྱུད་ཅིང་། ཆོས་རྒྱལ་རཏྣ་གླིང་པས་ལྷོ་བྲག་གནམ་སྐས་ཅན་ནས་ཐུགས་རྗེ་ཆེན་པོ་གསང་བ་འདུས་པའི་ཆོས་སྐོར་རྣམས་གཏེར་ནས་སྤྱན་དྲངས་ཏེ་རྗེ་བདུན་པ་ལ་ཕུལ་ཞིང་ཆོས་ཀྱི་བདག་པོར་ལུང་གིས་བསྟན་པས་ལྷ་སྔགས་དེ་དག་གི་བྱིན་རླབས་ཀྱི་བཀའ་ཡང་དོན་གྱིས་འདིར་འདུས། དེས་རྗེ་བཙུན་མཉན་པ་གྲུབ་ཆེན་ལ་གནང་། དེ་ནས་འཇིགས་བྲལ་མི་བསྐྱོད་རྡོ་རྗེ་དང་། ཞྭ་

[Full Size]

དམར་དཀོན་མཆོག་ཡན་ལག །རྗེ་མཙུན་དབང་ཕྱུག་རྡོ་རྗེ། གར་དབང་ཆོས་ཀྱི་དབང་ཕྱུག །གྲུབ་ཐོབ་ཀརྨ་ཆགས་མེད། ཁྱབ་བདག་ཨཀྵོ་བྷྱའི་མཚན་ཅན། རིག་འཛིན་ཀརྨ་དོན་གྲུབ་སྙིང་པོ། དཔལ་ཆེན་ཆོས་ཀྱི་དོན་གྲུབ། འཇམ་མགོན་ཆོས་ཀྱི་འབྱུང་གནས། རིགས་བརྒྱའི་ཁྱབ་བདག་རྒྱལ་དབང་བདུད་འདུལ་རྡོ་རྗེ་འཆང་ཆེན་པོའི་བར་དུ་བརྒྱུད་ཅིང་། དེ་ཉིད་ཀྱི་དྲུང་ནས་ལེགས་པར་ཐོས་པས་ཤིན་ཏུ་ཟབ་ཅིང་བྱིན་རླབས་ཀྱི་ཚན་ཁ་མ་ཉམས་པའི་སྨིན་བྱེད་ཞུ་བར་བྱེད་པ་ལ། སློབ་དཔོན་གྱིས་བགྱི་བར་འོས་པའི་བདག་བདུན་བུམ་པ་སྒྲུབ་པ་བདག་ཉིད་འཇུག་ཅིང་དབང་བླང་བ་དང་བཅས་པ་གྲུབ་པས་ཁྱེད་རང་སློབ་མ་རྣམས་ཀྱིས་བགྱི་བར་འོས་པའི་མཎྜལ་ཕུལ། ཞེས་མཎྜལ་ཕུལ། དེ་ལྟར་མཎྜལ་འབུལ་བ་སྔོན་དུ་སོང་ནས་དཀྱིལ་འཁོར་འདིར་འཇུག་པ་ལ་སྔོན་དུ་གསོལ་བ་འདེབས་པ་འདིའི་རྗེས་ཟློས་མཛོད། བདག་ནི་འཁོར་བའི་ཆོས་ལ་སྐྱོ་བ་སྐྱེས། །འཇིག་རྟེན་བྱ་བ་ཐམས་ཅད་སྤངས་ནས་ནི། །ཐར་པ་ཆེན་པོའི་གྲོང་མཆོག་དམ་པ་འདིར། །མགོན་པོས་བདག་ནི་འཇུག་པར་མཛད་དུ་གསོལ། །ལན་གསུམ། དེ་ལྟར་གསོལ་བ་བཏབ་ནས་སླར་ཡང་གསང་སྔགས་ཀྱི་ཟག་མེད་བདེ་བ་ཆེན་པོ་འདོད་པའི་བློས་འདིའི་རྗེས་ཟློས་མཛོད། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །གཙོ་བོར་ལྷ་མོར་བཅས་པ་ཡི། །ལྷ་རྣམས་ལ་ཡང་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་པར་འཚལ། །ཞེས་

[Full Size]

ལན་གསུམ་གསོལ་བ་བཏབ། དེ་ནས་སློབ་དཔོན་གྱིས་དཀྱིལ་འཁོར་དུ་གསོལ་བ་བཏབ་པ་ནི། དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གི་སློབ་མ་གཞུག་པར་བགྱི། །ཁྱེད་རང་རྣམས་དཀྱིལ་འཁོར་གྱི་ཤར་གྱི་སྒོ་ནང་དུ་གནས་པས། ལྷ་ཚོགས་རྣམས་ཀྱི་ཞབས་ལ་གུས་པས་ཕྱག་འཚལ་བར་དམིགས་ལ་སྔགས་འདིའི་རྗེས་ཟློས་དང་བཅས་པས་ཕྱག་མཛོད་ཅིག །ༀ་མ་ཎི་པདྨེ་ཧཱུྃ། ཞེས་སྤྱི་བོར་ཐལ་མོ་སྦྱར་ནས། ན་མཿཏེ་ཧཱུྃ་མགྲིན་པར། ན་མཿམི་ཧཱུྃ་སྙིང་གར། ན་མོ་ན་མཿཧཱུྃ། སྒོ་དེ་ཉིད་ནས་ཐོན་ཏེ་དཀྱིལ་འཁོར་གྱི་ཕྱིར་གཡས་བསྐོར་གྱིས་སོང་ནས། ལྷོའི་སྒོ་ནང་དུ་གནས་པས། དཀྱིལ་འཁོར་གྱི་ལྷ་ལ་ཕྱག་མཛོད་ཅིག །སོགས་གོང་ལྟར། སླར་སྒོ་དེ་ཉིད་ནས་ཐོན་ཏེ། ནུབ་ཀྱི་སྒོ་ནང་དུ་གནས་པས་དཀྱིལ་འཁོར་གྱི་ལྷ་ལ་ཕྱག་མཛོད་ཅིག །ༀ་མ་ཎི་སོགས། སླར་སྒོ་དེ་ཉིད་ནས་ཐོན་ཏེ་བྱང་གི་སྒོ་དང་དུ་གནས་པས། དཀྱིལ་འཁོར་གྱི་ལྷ་ལ་ཕྱག་མཛོད་ཅིག །ༀ་མ་ཎི་སོགས། སླར་ཤར་གྱི་སྒོ་ནང་དུ་གནས་པས། དཀྱིལ་འཁོར་གྱི་ལྷའི་དྲུང་དུ་སྔགས་ཀྱི་དམ་ཚིག་དང་སྡོམ་པ་རྣམས་བླངས་ནས་བསྲུང་སྙམ་པས་འདིའི་རྗེས་ཟློས་མཛོད། སངས་རྒྱས་བྱང་ཆུབ་སེམས་དཔའ་རྣམས། །ཐམས་ཅད་བདག་ལ་དགོངས་སུ་གསོལ། །ཇི་ལྟར་དུས་གསུམ་མགོན་

[Full Size]

པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །སྡོམ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་རྣམས། །བདག་གིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤང་ངོ་། རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ལ། །ཉིན་རེ་བཞིན་དུ་དུས་དྲུག་ཏུ། །ཟང་ཟིང་ཆོས་དང་མི་འཇིགས་བྱམས། །སྦྱིན་པ་རྣམ་བཞི་རྟག་ཏུ་བྱིན། །བྱང་ཆུབ་ཆེན་པོ་ལས་བྱུང་བ། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་ཆོས་སོ་སོར་གཟུང་བར་བགྱི། །ལས་ཀྱི་རིགས་མཆོག་བསྡུས་པ་ལ། །སྡོམ་པ་ཐམས་ཅད་ཡང་དག་ལྡན། །ཀུན་ནས་སོ་སོར་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །བདག་གིས་སྡོམ་པ་མ་ལུས་བཟུང་། །མ་བརྒལ་བ་རྣམས་བསྒྲལ་པར་བགྱི། །མ་གྲོལ་བ་རྣམས་དགྲོལ་བར་བགྱི། །དབུགས་མ་

[Full Size]

ཕྱུང་རྣམས་དབུགས་དབྱུང་ཞིང་། །འགྲོ་ཀུན་མྱ་ངན་འདས་ལ་འགོད། །ཞེས་ལན་གསུམ། དེ་ནས་ཁྱེད་རང་རྣམས་སྐད་ཅིག་གིས་བཅོམ་ལྡན་འདས་ཐུགས་རྗེ་ཆེན་པོ་འཇིག་རྟེན་དབང་ཕྱུག་རྒྱལ་བ་རྒྱ་མཚོ་སྐུ་མདོག་དམར་པོ་ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་འོག་མས་མུ་ཏིག་དམར་པོའི་ཕྲེང་བ་འཛིན་པ། གཡོན་འོག་མས་མེ་ཏོག་པདྨ་དམར་པོ་འདབ་མ་བརྒྱད་པའི་ཡུ་བ་ནས་འཛིན་པ། དབུ་སྐྲ་རལ་པའི་ཐོར་ཚུགས་གྱེན་དུ་བཅིངས་པ་ལ་དར་གྱི་ཅོད་པན་དང་རིན་པོ་ཆེའི་རྩེ་བྲན་ལྔས་བརྒྱན་པ། རྣམ་བཀྲ་ལྷའི་དར་གྱི་ན་བཟས་མཛེས་པ། ཞབས་རྡོ་རྗེ་སྐྱིལ་མོ་ཀྲུང་གིས་བཞུགས་པར་སྒོམས་ཤིག །རྡོ་རྗེ་དང་བཅས་པའི་ཐལ་མོ་དྲིའི་ཆུ་དང་བཅས་པས་སྤྱི་བོ། མགྲིན་པ། སྙིང་གར་རེག་ཅིང་། དེ་ནས་གནས་གསུམ་བྱིན་གྱིས་བརླབ་པའི་ཕྱིར། སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། སངས་རྒྱས་རྣམས་ཀྱི་སྐུ་གསུང་ཐུགས་ཀྱི་རང་བཞིན་དུ་གྱུར། དེ་ནས་སྔགས་ཀྱི་རྡོ་རྗེའི་རྣལ་འབྱོར་དུ་སེམས་བསྐྱེད་པའི་ཕྱིར་ཡི་དམ་ལྷའི་ཐུགས་ཀར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་པའི་སྟེང་དུ། དོན་དམ་པ་བྱང་ཆུབ་སེམས་ཀྱི་ངོ་བོ་རྡོ་རྗེ་སྔོན་པོ་རྩེ་ལྔ་པ་རེ་བསྒོམ་ལ་འདིའི་རྗེས་ཟློས་མཛོད། ༀ་སརྦ་ཡོ་ག་ཙིཏྟཾ་ཨུཏྤ་ད་ཡཱ་མི། ཞེས་ལན་གསུམ། དེ་ལྟར་སེམས་བསྐྱེད་པ་དེ་ཉིད་

[Full Size]

བརྟན་པར་བྱས་པའི་མོས་པ་མཛོད། སྙིང་གར་རྡོ་རྗེ་བཞག །སུ་ར་ཏེ་ས་མ་ཡ་སྟྭཾ་ཧོ་སིདྡྷི་བཛྲ་ཡ་ཐཱ་སུ་ཁཾ། དེ་ནས་དམ་ཚིག་བསྒྲག་པ་ལས། དང་པོ་དཀྱིལ་འཁོར་ལྷའི་དམ་ཚིག་ནི། སྤྱི་བོར་རྡོ་རྗེ་བཞག །ཁྱོད་ནི་རྣལ་འབྱོར་རིགས་སུ་སྐྱེས། །ང་ཡིས་ཡེ་ཤེས་རྡོ་རྗེ་སྦྱིན། །བྱིན་པས་དངོས་གྲུབ་ཐོབ་པར་འགྱུར། །གང་གིས་འདི་འདྲ་མ་མཐོང་བའི། །དྲུང་དུ་སྨྲ་བར་མ་བྱེད་ཅིག །བག་མེད་སྨྲས་ན་ཉམས་པར་འགྱུར། །དེ་བས་ང་རྒྱལ་བཅོམ་ནས་ནི། །བདག་ཉིད་མ་འཁྲུལ་ཤེས་པར་གྱིས། །དེ་ལྟར་དམ་ཚིག་བསྒྲགས་ནས་ཙནྡན་དང་གུར་གུམ་ལ་སོགས་པས་བགོས་པའི་བྱིན་གྱིས་བརླབས་པའི་དམ་ཆུ་སྦྱིན་པ་ནི། བདུད་རྩི་ལྔའི་ཆུ་བླུད་ཅིང་། འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ༀ་སརྦ་པཉྩ་ཨམྲྀ་ཏ་ཨུ་ད་ཀ་ཋ་ཋ་ཧཱུྃ། དེ་ནས་རྡོ་རྗེ་སློབ་དཔོན་གྱི་བཀའ་གཉན་པའི་དམ་ཚིག་བསྒྲག་པ་ནི། སྤྱི་བོར་རྡོ་རྗེ་བཞག །དེང་འདི་ནས་ནི་བུ་ཁྱོད་ཀྱི། །རྡོ་རྗེ་འཛིན་པ་ང་ཡིན་གྱི། །ང་ཡིས་ཇི་ལྟར་བཀའ་སྩལ་པ། །ཁྱོད་ཀྱིས་སྐྱོ་བ་མེད་པར་སྒྲུབས། །གང་ཡང་ང་ལ་མ་གུས་མིན། །དེ་བཞིན་གུས་པར་མ་བྱས་ན། །བདུད་ཀྱིས་བཅོམ་ནས་ངན་འགྲོར་འགྲོ། །དེ་བས་དམ་ཚིག་གནས་པར་གྱིས། །དེ་དག་ནི་དཀྱིལ་འཁོར་དུ་འཇུག་པའོ། །དེ་ནས་ཡེ་ཤེས་ཀྱི་དཀྱིལ་འཁོར་དུ་འཇུག་པའི་དོན་དུ་མནྜལ།

[Full Size]

མནྜལ་ཕུལ་ནས། ད་ཁྱེད་རང་རྣམས་ལངས་ལ་སྤྱི་བོར་ཆོས་འབྱུང་གི་ཕྱག་རྒྱ་བྱས་ནས། ཡེ་ཤེས་ཀྱི་དཀྱིལ་འཁོར་དུ་འཇུག་པ་ལ་དམིགས་པ་འདི་ལྟར་མཛོད། ཁྱེད་རྣམས་བཅོམ་ལྡན་འདས་འཇིག་རྟེན་དབང་ཕྱུག་ཏུ་བསྒོམ་པའི་ལུས་ཀྱི་ནང་སྟོང་ཞིང་གསལ་བའི་ལྟེ་བར་པདྨ་འདབ་བཞིའི་སྟེང་དུ་གཡུང་དྲུང་དམར་པོ་གཡོན་དུ་འཁྱིལ་བ་རེ། དེའི་སྟེང་དུ་ཧྲཱིཿལས་སྔགས་ཀྱིས་བསྐོར་བ་ལས་འོད་ཟེར་འཕྲོས། སངས་རྒྱས་དང་བྱང་ཆུབ་སེམས་དཔའ་རྒྱལ་བ་རྒྱ་མཚོའི་དཀྱིལ་འཁོར་གྱི་ལྷ་ཚོགས་ལ་ཕོག་ཅིང་། འོད་ཟེར་ཚུར་འདུས་ནས་ལྟེ་བའི་ཧྲཱིཿལ་ཐིམ་པས་ལུས་སེམས་ཐམས་ཅད་བདེ་བ་ཆེན་པོས་ཁྱབ་པར་བསྒོམ་ལ་གསོལ་བ་འདེབས་པ་འདིའི་རྗེས་ཟློས་མཛོད་ཅིག །ཇོ་བོ་ཐུགས་རྗེ་ཆེན་པོ་བསྐལ་པ་བཟང་པོའི་སངས་རྒྱས་སྟོང་དང་བཅས་པས་བྱིན་གྱིས་བརླབ་ཏུ་གསོལ། སློབ་དཔོན་པདྨ་གྲུབ་ཐོབ་བརྒྱུད་པའི་ཚོགས་དང་བཅས་པས་བྱིན་གྱིས་བརླབ་ཏུ་གསོལ། དཔལ་རྟ་མགྲིན་དཔའ་བོ་རྒྱ་མཚོའི་ཚོགས་དང་བཅས་པས་བྱིན་གྱིས་བརླབ་ཏུ་གསོལ། གསང་བ་ཡེ་ཤེས་མཁའ་འགྲོ་མ་རྒྱ་མཚོའི་ཚོགས་དང་བཅས་པས་བྱིན་གྱིས་བརླབ་ཏུ་གསོལ། དམ་ཅན་ཆོས་སྐྱོང་བའི་སྲུང་མ་དང་བཅས་པས་བྱིན་གྱིས་བརླབ་ཏུ་གསོལ། གསུམ། ཞེས་གསོལ་བ་བཏབ་པས་བླ་མ་ཡི་དམ་མཁའ་འགྲོ་ཆོས་སྐྱོང་སྲུང་མ་དང་བཅས་པ་ཆར་བབ་པ་ལྟར་

[Full Size]

བྱོན་ནས། ཁྱོད་རང་གི་ལུས་ངག་ཡིད་གསུམ་ལ་ཐིམ་པའི་མོས་པ་རྩེ་གཅིག་ཏུ་མཛོད། གུ་གུལ་གྱིས་བདུག །རོལ་མོ་དང་བཅས་པས། ༀ་ཨཱཿཧཱུྃ་ཧྲཱིཿༀ་མཎི་པདྨེ་ཧཱུྃ། ༀ་བཛྲ་ཝཱ་རཱ་ཧི། བུདྡྷ་ཌཱ་ཀི་ནཱི་ཡེ། བཛྲ་ཝརྞ་ནཱི་ཡེ། བཛྲ་བཻ་རོ་ཙཱ་ནཱི་ཡེ་ཧ་རི་ནི་ས་ཧཱུྃ་ཕཊ་སྭཱ་ཧཱ། དྷུ་མ་གྷ་ཡེ་ན་མ་སྭཱ་ཧཱ། ཧ་རི་ནི་ས་ར་ཙ་ཧྲཱིཿཡ་ཧཱུྃ་ཛཿཨཱ་བེ་ཤ་ཡ། ཨཱ་བེ་ཤ་ཡ། ཨཿཨཿཞེས་ཡེ་ཤེས་པམ་ཕེབས་ཀྱི་བར་དུ་བརྗོད། དེ་ལྟར་ཕབ་བའི་ཡེ་ཤེས་པ་དེ་ཉིད་ངོ་སྤྲད་པའི་ཕྱིར་རྡོ་རྗེའི་གླུ་བླང་བ་ནི། ལྟོས་ཤིག་རང་གི་སེམས་ལ་ལྟོས། །སེམས་ཉིད་ཅིར་ཡང་གྲུབ་པ་མེད། གྲུབ་པ་མེད་པའི་སེམས་ཉིད་ལ། །སྣ་ཚོགས་སྣང་བ་ངོ་མཚར་ཆེ། །སྣང་ཙམ་ཉིད་ནས་སེམས་སུ་འདུས། །སེམས་ཅན་ཀུན་གྱི་སེམས་ཉིད་དེ། །བདེ་བ་ཆེན་པོའི་ཡེ་ཤེས་ཡིན། །རྣམ་པར་མི་རྟོག་བསམ་མི་ཁྱབ། །གསལ་བ་དེའི་ངོ་བོར་སྣང་། །མོས་པ་དུ་མའི་སེམས་ཅན་ལ། །ཐབས་རྣམས་སྣ་ཚོགས་སྟོན་པ་སྟེ། །སྣ་ཚོགས་སྒྱུ་མའི་སྦྱོར་བ་ཡི། །དཔའ་བོ་སེངྒེ་བཞིན་དུ་སྤྱོད། །བསམ་གྱིས་མི་ཁྱབ་གོ་འཕང་ཐོབ། །སྤྱན་རས་གཟིགས་ཀྱི་བྱིན་རླབས་ཡིན། །བླ་མ་བརྒྱུད་པའི་རིམ་པ་ནི། །སྣ་ཚོགས་ནོར་བུ་ཇི་བཞིན་དུ། །སྐལ་ལྡན་རྣམས་ཀྱི་སྤྱོད་ཡུལ་ཡིན། །སྤྱི་བོར་རྡོ་རྗེ་བཞག་ལ། དེ་ལྟར་དབབ་པའི་ཡེ་ཤེས་པ་དེ་ཉིད་བརྟན་པར་བྱས་པའི་མོས་པ་མཛོད། ༀ་ཏིཥྛ་བཛྲ་ཅེས་བརྗོད། མིག་རས་ཀྱི་

[Full Size]

འོག་ནས་དཀྱིལ་འཁོར་གྱི་བར་སྣང་ལ་ལྟོས་ལ་ཁ་དོག་ཇི་ལྟར་མཐོང་བ་སྨྲོས་ཤིག །ཁ་དོག་ཅི་མཐོང་བརྗོད་བཅུག །དེ་ལྟར་དཀར་པོ་ལ་ཞི་བ། སེར་པོ་ལ་རྒྱས་པ། དམར་པོ་ལ་དབང་། ལྗང་གུའམ་ནག་པོ་ལ་དྲག་པོ། ཁ་དོག་སྣ་ཚོགས་ལ་ལས་སྣ་ཚོགས་འགྲུབ་པར་འགྱུར་རོ། །ཅེས་བརྗོད། དེ་ནས་དཀྱིལ་འཁོར་གྱི་དྲུང་དུ་མེ་ཏོག་དོར་བའི་ཕྱིར་སློབ་དཔོན་གྱི་བདེན་པའི་བྱིན་རླབས་ཀྱི་ཚིག་བརྗོད་པ་ནི། ཡང་དག་པ་ཡི་དཀྱིལ་འཁོར་འདིར། །བདག་གི་སློབ་མ་གཞུག་པར་བགྱི། །ལྷ་རྣམས་ཀྱི་ནི་རིགས་ཇི་བཞིན། །ཇི་ལྟར་བསོད་ནམས་དེ་བཞིན་ཤོག །མེ་ཏོག་གི་ཕྲེང་བ་འདི་ཁྱོད་ཀྱི་སྐྱེ་བ་སྔ་མ་ལ་ལས་ཀྱི་འཕྲོ་ཡོད་པའི་ལྷ་གང་ཡིན་པ་ལ་ཕོག་པར་གྱུར་ཅིག་ཅེས་ཡིད་ལ་གྱིས་ལ་འདིའི་རྗེས་ཟློས། བདེ་གཤེགས་སྙིང་བོའི་དཀྱིལ་འཁོར་དུ། །རིག་པའི་མེ་ཏོག་འདི་དོར་བས། །སྔོན་ཚེ་གང་ལ་སྦྱངས་པའི་ལྷ། །གང་ཡིན་དེ་ལ་ཕོག་པར་ཤོག །པྲ་ཏཱིཙྪ་བཛྲ་ཧོཿཞེས་བརྗོད་བཞིན་པས་མེ་ཏོག་དཀྱིལ་འཁོར་ལ་འདོར་ཞིག །ཞེས་བརྗོད་ལ་དཀྱིལ་འཁོར་གྱི་སྟེང་དུ་དོར་དུ་བཅུག །སློབ་དཔོན་གྱིས་ལྷ་གང་ལ་ཕོག་པ་བརྟག་ལ་མེ་ཏོག་བླངས་ནས། མེ་ཏོག་གང་ལ་ཕོག་པའི་ལྷ་དེ་ཉིད་སྤྱི་བོར་ཐིམ་པར་སྒོམས་ཤིག །སེམས་དཔའ་སྟོབས་ཆེན་ཁྱོད་ཀྱིས་ནི། །འདི་ནི་རབ་ཏུ་གཟུང་བར་གྱིས། །པྲ་ཏི་གྲྀཧྣ་ཨི་མཾ་བ་ལ་མ་ཧཱ་ས་ཏྭ། ཁྱོད་གཙོ་བོ་འཇིག་རྟེན་དབང་ཕྱུག་གི་རིགས་

[Full Size]

ཡིན་པས་དཔལ་དགྱེས་པའི་པདྨ་ཞེས་བྱའོ། །གཞན་རིགས་ལྔ་གང་ལ་བབས་པའི་གསང་མཚན་སོ་སོར་བཏག་གོ། །ཞེས་མེ་ཏོག་སྤྱི་བོར་བཞག །དེ་ནས་གདོང་གཡོགས་བསལ་བ་ནི། གསེར་གྱི་ཐུར་མས་མ་རིག་པའི་ལིང་ཐོག་དང་མིག་དར་ལྷན་ཅིག་ཏུ་བསལ་པའི་མོས་པ་མཛོད། སྤྱན་རས་གཟིགས་དབང་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་བར་འགྱུར། །རྡོ་རྗེའི་མིག་ནི་བླ་ན་མེད། །ༀ་ཛྙཱ་ན་ཙཀྵུ་བི་ཤོ་དྷ་ཡ་སྭཱ-་ཧཱ། ཞེས་མིག་དར་བསལ། དེ་ནས་དཀྱིལ་འཁོར་བསྟན་པ་ནི། ལྟོས་ཤིག་ལྟོས་ཤིག་སེམས་དཔའ་ཆེ། །དཀྱིལ་འཁོར་སྙིང་པོ་འདི་ལ་ལྟོས། །ཞེས་དཀྱིལ་འཁོར་ལ་ལྟ་བར་བསྐུལ་ནས་རྟེན་དང་བརྟེན་པར་བཅས་པའི་ལྷ་རྣམས་ངོ་སྤྲད་པར་བྱ་སྟེ། དེའང་སངས་རྒྱས་ཀྱི་ཞིང་ཁམས་པདྨ་རཱ་ག་ལས་གྲུབ་པ་ཆོས་ཀྱི་དབྱིངས་དང་མཉམ་པའི་དབུས་སུ་སྣ་ཚོགས་རྡོ་རྗེའི་ལྟེ་བར་བྱང་ཆུབ་ཤིང་གི་སྟེང་དུ་པདྨ་འདབ་མ་འབུམ་ལྡན་གྱི་དབུས་སུ་གཞལ་ཡས་ཁང་ཡངས་ཤིང་རྒྱ་ཆེ་བ་གྲུ་བཞི་སྒོ་བཞི་རྟ་བབས་བཞི་ལྡན། ཀ་བ་བརྒྱད་ཀྱིས་མཛེས་པ། དབུས་སུ་ཟླུམ་སྐོར་གཙོ་བོའི་འདོམ་གང་བ། དེའི་མཐར་རྒྱ་གྲམ་དང་། རྡོ་རྗེ་དང་། འཁོར་ལོའི་གདུང་ཟླུམ་པོ། དེའི་མཐར་རྒྱ་གྲམ་གྱི་གདུང་གི་སྣ་བཞི་ཕྱིར་ལྷག་པ་ལ་རྡོ་རྗེ་རྒྱ་གྲམ་གྱིས་མཚན་པ། ཕྱིའི་དབྱིབས་གཙོ་བོའི་འདོམ་བརྒྱད་དང་ལྡན་པ། ཡེ་ཤེས་ལྔ་ཡི་རང་མདངས་ལྡན་པའི་རྩིག་པ་རིམ་པ་ལྔ་དང་། རིན་པོ་ཆེའི་ཕ་གུའི་སྟེང་དུ་མུན་སྣམ་ལ་རིན་པོ་ཆེའི་

[Full Size]

དྲྭ་བས་མཛེས་པ། དེའི་སྟེང་དུ་གདུང་གི་སྣར་རྒྱ་གྲམ་གྱིས་མཚན་ཅིང་ཕྱིར་ལ་འདོམ་ཕྱེད་ལྷག་པ་འདོད་སྣམ་དང་མཉམ་པའི་སྟེང་དུ་མདའ་ཡབ་ཀྱིས་བརྒྱན་པ། གཙོ་བོའི་ཏོག་གི་རྡོ་རྗེ་རྒྱ་གྲམ་གྱི་སྟེང་དུ་ཆོས་ཀྱི་འཁོར་ལོ་རིམ་པ་བཅུ་གསུམ་དང་། རྟ་བབས་རེ་རེའི་སྟེང་དུ་ཆོས་འཁོར་རིམ་པ་བཅུ་པ། དེ་རྣམས་གདུགས་ཆར་ཁེབས་དར་དཔྱངས་ཏོག་གིས་སྤྲས་པ། ཕྱོགས་བཞིར་རི་དྭགས་བཞི་བཞི། མཚམས་བཞི་ན་བ་དན་བཞི་བཞི། རྩིག་པའི་རྩ་བར་འདོད་སྣམ་གྱིས་འཁོར་བའི་ཟུར་བཅུ་གཉིས་ལ་བ་དན་གྱིས་མཚན་པ། དེའི་ཕྱི་རོལ་དུ་དུར་ཁྲོད་བརྒྱད། དེའི་ཕྱི་རོལ་དུ་རྡོ་རྗེའི་རྭ་གུར་མེ་རི་དང་བཅས་པའོ། །དབུས་སུ་སྣ་ཚོགས་པདྨ་དང་ཉི་མའི་དཀྱིལ་འཁོར་གྱི་སྟེང་དུ་བཅོམ་ལྡན་འདས་སྤྱན་རས་གཟིགས་འཇིག་རྟེན་དབང་ཕྱུག་རྒྱལ་བ་རྒྱ་མཚོ་སྐུ་མདོག་དམར་པོ་ཞལ་གཅིག་ཕྱག་བཞིའི་དང་པོ་གཉིས་ཡུམ་རྡོ་རྗེ་ཕག་མོ་སྐུ་མདོག་དམར་མོ་གྲི་ཐོད་འཛིན་པ་ལ་འཁྱུད་ཅིང་ཐལ་མོ་སྦྱར་བ། གཡས་ཀྱི་འོག་མས་རྡོ་རྗེ་རྩེ་ལྔ་པ་དང་། གཡོན་འོག་མས་པདྨ་འདབ་བརྒྱད་ཀྱི་ཡུ་བ་ནས་འཛིན་པ། དར་དང་རིན་པོ་ཆེའི་རྒྱན་གྱིས་སྤྲས་ཤིང་འོད་དང་འོད་ཟེར་འབར་བ། ཕྱོགས་བཞིར་རིགས་བཞིའི་སྤྱན་རས་གཟིགས་སྐུ་མདོག་དང་རྒྱན་ཆ་ལུགས་གཙོ་བོ་དང་མཚུངས་པ། ཕྱག་བཞིའི་དང་པོས་ཡུམ་ལ་འཁྱུད་ཅིང་ཐལ་མོ་སྦྱར་བ། གཡས་ཀྱི་འོག་མས་མུ་ཏིག་དམར་པོའི་

[Full Size]

ཕྲེང་བ་དང་། གཡོན་གྱི་འོག་མས་པདྨ་བསྣམས་པ། ཡུམ་བཞི་སྐུ་མདོག་སྔོ་སེར་དམར་ལྗང་ཕྱག་བཞིའི་དང་པོ་ཡབ་ལ་འཁྱུད་ཅིང་། གཡས་ཀྱི་འོག་མ་རྣམས་འཁོར་ལོ་དང་རིན་པོ་ཆེ་དང་པདྨ་དང་ཨུཏྤལ་འཛིན་པ། གཡོན་གྱི་འོག་མ་རྣམས་པདྨ་བསྣམས་པ། མཚམས་བཞིར་རིགས་བཞིའི་མཁའ་འགྲོ་མ་སྔོ་སེར་དམར་ལྗང་གཡས་རྣམས་ཀྱི་རྡོ་རྗེ་ནོར་བུ་བུམ་པ་རལ་གྲི། གཡོན་རྣམས་པདྨ་བསྣམས་པ། སྐུ་ལ་རུས་པ་དང་རིན་པོ་ཆེས་བརྒྱན་པ། ཕྱི་རོལ་དུ་འདོད་སྣམ་ལ་འཁོད་པའི་གཟུགས་སྒྲ་དྲི་རོ་རེག་བྱའི་རྡོ་རྗེ་ལྷ་མོ་རྣམས་དང་བཅས་པ་གསལ་བར་བཞུགས་པ་དེ་དག་ཀྱང་དོན་དམ་པར་རང་སེམས་བདེ་གཤེགས་སྙིང་པོའི་རང་མདངས་ཡེ་ཤེས་ཀྱི་རོལ་པ་མཚན་འཛིན་ཡིད་བྱེད་དང་བྲལ་བ་ཆོས་དབྱིངས་བསམ་མི་ཁྱབ་པའི་ངང་ཚུལ་དུ་བཞུགས་པ་གློ་བུར་གྱི་དྲི་མའི་སྦྱང་བྱ་མཐའ་དག་གསང་སྔགས་ཀྱི་ཐབས་ཟབ་མོས་སྐད་ཅིག་མ་འདིར་བྱང་ནས་མཚོན་བྱེད་དཔེའི་དཀྱིལ་འཁོར་ལ་བརྟེན་པའི་མཚོན་བྱ་དོན་གྱི་དཀྱིལ་འཁོར་ཡང་སྒྲིབ་མེད་མངོན་སུམ་དུ་མཐོང་པའི་མོས་པ་མཛོད། དེ་ནས་དེ་ལ་སྤྲོ་བ་བསྐྱེད་ནས་བཀའ་བསྒོ་བ་ནི། ད་ནི་དད་པ་རབ་ཏུ་བསྐྱེད། །ཁྱོད་ནི་རྣལ་འབྱོར་རིགས་སུ་སྐྱེས། །སྔགས་དང་ཕྱག་རྒྱས་བྱིན་གྱིས་རློབས། །འགྲོ་བ་ཕུན་ཚོགས་དངོས་གྲུབ་ཀུན། །ཐམས་ཅད་འདི་ལས་འབྱུང་བས་ན། །དམ་ཚིག་ཐམས་ཅད་སྤྱོད་པ་དང་། །དངོས་གྲུབ་ཐོབ་ཕྱིར་དམ་ཚིག་སྐྱོངས། །གསང་

[Full Size]

སྔགས་ལ་ཡང་བརྩོན་པར་གྱིས། །རས་བྲིས་ཀྱི་དཀྱིལ་འཁོར་བྲིས་བ་འདི་དཔེ་ཡིན་ཏེ། སངས་རྒྱས་ཀྱི་ཡོན་ཏན་ཐམས་ཅད་རྫོགས་པའི་གཞལ་མེད་ཁང་པ་ན་རིགས་ལྔའི་སྤྱན་རས་གཟིགས་དཔའ་བོ་མཁའ་འགྲོའི་ཚོགས་དང་བཅས་པ་འདི་ལྟ་བུར་བསྒོམས་པ་ལ་བརྟེན་ནས་སངས་རྒྱས་ཀྱི་གོ་འཕང་ཐོབ་པ་ཡིན་པས། བསྐྱེད་པའི་རིམ་པ་བསྒོམ་པ་ལ་བརྩོན་པར་གྱིས་ཤིག །ཅེས་ལྷ་ངོ་བསྟན། དེ་རྣམས་ཀྱིས་འཇུག་པའི་ཆོས་རྣམས་སོང་བ་ཡིན། དངོས་བཞིའི་དབང་བསྐུར་ཞུ་བའི་དོན་དུ་མཎྜལ་ཕུལ། ཞེས་མཎྜལ་ཕུལ་ལ། དེ་ནས་བླ་མ་དང་དཀྱིལ་འཁོར་གྱི་གཙོ་བོ་ཐ་དད་མེད་པའི་དྲུང་དུ་དབང་བཞི་རྫོགས་པར་ཞུ་བ་ལས་བུམ་དབང་གི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། པདྨ་དབང་གི་དཀྱིལ་འཁོར་དུ། །མགོན་པོ་གཟི་བརྗིད་འོད་དཔག་མེད། །རྒྱལ་སྲས་ཚོགས་དང་བཅས་པ་ལ། །དབང་བསྐུར་ཡོངས་སུ་རྫོགས་པ་ལྟར། །དེ་བཞིན་བླ་མ་ཁྱེད་ཀྱིས་ཀྱང་། །བདག་ལ་དབང་བསྐུར་བཛད་དུ་གསོལ། །ལན་གསུམ། དེ་ནས་ཁྱེད་རང་རྣམས་སྐད་ཅིག་གིས་བཅོམ་ལྡན་འདས་ཐུགས་རྗེ་ཆེན་པོ་འཇིག་རྟེན་དབང་ཕྱུག་རྒྱལ་བ་རྒྱ་མཚོ་སྐུ་མདོག་དམར་པོ་ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་འོག་མས་མུ་ཏིག་དམར་པོའི་ཕྲེང་བ་འཛིན་པ། གཡོན་འོག་མས་མེ་ཏོག་པདྨ་དམར་པོ་འདབ་མ་བརྒྱད་པའི་ཡུ་བ་ནས་འཛིན་པ། དབུ་

[Full Size]

སྐྲ་རལ་པའི་ཐོར་ཚུགས་གྱེན་དུ་བཅིངས་པ་ལ་དར་གྱི་ཅོད་པན་དང་རིན་པོ་ཆེའི་རྩེ་བྲན་ལྔས་བརྒྱན་པ། རྣམ་བཀྲ་ལྷའི་དར་གྱི་ན་བཟས་མཛེས་པ། ཞབས་རྡོ་རྗེ་སྐྱིལ་མོ་ཀྲུང་གིས་བཞུགས་པར་གྱུར་པ་ལ། བུམ་པའི་དབང་བསྐུར་བའི་དོན་དུ་མདུན་གྱི་ནམ་མཁར་ཡེ་ཤེས་ཀྱི་དཀྱིལ་འཁོར་གསལ་བ་དང་། ཕྱོགས་བཅུའི་སངས་རྒྱས་ཐམས་ཅད་དང་། མཁའ་འགྲོ་མའི་ཚོགས་རིན་པོ་ཆེའི་བུམ་པ་ཐོགས་པ་རྣམས་ཀྱིས་བུམ་པའི་དབང་བསྐུར་བའི་མོས་པ་མཛོད་ཅིག །བུམ་པ་སྤྱི་བོར་བཞག །སྤྱན་རས་གཟིགས་དབང་འཇིག་རྟེན་གསུམ་གྱི་མགོན། །སངས་རྒྱས་རྣམས་ཀྱིས་བུམ་པའི་དབང་། །རྒྱལ་སྲས་རྣམས་ལ་བསྐུར་བ་ལྟར། །དེང་འདིར་ཁྱོད་ལ་བསྐུར་བར་བྱ། །ཆོས་དབྱིངས་ཡེ་ཤེས་དབང་འདི་ཁྱོད་ཀྱིས་ལོངས། །སྐུ་མཆོག་བུམ་པའི་དབང་འདི་ཡོངས་རྫོགས་ཤོག །ཡི་གེ་བཅུ་པ་དང་། ༀ་བུདྡྷ་ཨ་བྷི་ཥིཉྩ་ༀ། བུམ་ཆུས་བཀྲུ་ཞིང་། ཇི་ལྟར་བལྟམས་པ་སོགས་བརྗོད། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཧཱུྃ། དེ་ལྟར་རྣམ་པར་སྣང་མཛད་ཀྱི་ངོ་བོ་བུམ་པའི་དབང་བསྐུར་པས་ཉོན་མོངས་པ་གཏི་མུག་དག །གཟུགས་ཀྱི་ཕུང་པོ་གནས་གྱུར། ཆོས་དབྱིངས་ཡེ་ཤེས་ཐོབ་པར་སྒོམས་ཤིག །དེ་ནས་རྡོ་རྗེའི་དབང་བསྐུར་པའི་དོན་དུ་མདུན་གྱི་ནམ་མཁར་ཡེ་ཤེས་ཀྱི་དཀྱིལ་འཁོར་གསལ་བ་དང་། ཕྱོགས་བཅུའི་

[Full Size]

སངས་རྒྱས་ཐམས་ཅད་དང་། མཁའ་འགྲོ་མའི་ཚོགས་རྣམས་ཀྱིས་རྡོ་རྗེའི་དབང་བསྐུར་བས། རྡོ་རྗེ་འདི་དང་ཐ་དད་མེད་པར། ཐུགས་རྡོ་རྗེ་མི་བསྐྱོད་པའི་ལྷ་ཚོགས་དཔག་ཏུ་མེད་པར་བྱོན་ནས། ཁྱེད་རང་རྣམས་ལ་ཐིམ་པའི་མོས་པ་མཛོད་ཅིག །རྡོ་རྗེ་གཡས་སུ་བྱིན་ལ། མི་བསྐྱོད་རྒྱལ་པོ་རིགས་ཀྱི་གཙོ། །ཞེ་སྡང་རྣམ་དག་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །མེ་ལོང་ཡེ་ཤེས་དབང་འདི་ཁྱོད་ཀྱིས་ལོངས། །ཐུགས་མཆོག་རྡོ་རྗེའི་དབང་འདི་ཡོངས་རྫོགས་ཤོག །ཡི་གེ་བཅུ་པ་དང་། ༀ་བཛྲ་ས་ཏྭ་ཨ་བྷི་ཥིཉྩ་ཧཱུྃ། དེ་ལྟར་མི་བསྐྱོད་པའི་ངོ་བོ་རྡོ་རྗེའི་དབང་བསྐུར་བས། ཉོན་མོངས་པ་ཞེ་སྡང་དག །རྣམ་པར་ཤེས་པའི་ཕུང་པོ་གནས་གྱུར། མེ་ལོང་ལྟ་བུའི་ཡེ་ཤེས་ཐོབ་བར་སྒོམས་ཤིག །དེ་ནས་གསུང་མཆོག་གླེགས་བམ་གྱི་དབང་བསྐུར་བའི་དོན་དུ་མདུན་གྱི་ནམ་མཁར་ཡེ་ཤེས་ཀྱི་དཀྱིལ་འཁོར་གསལ་བ་དང་། ཕྱོགས་བཅུའི་སངས་རྒྱས་ཐམས་ཅད་དང་། མཁའ་འགྲོ་མའི་ཚོགས་རྣམས་ཀྱིས་གླེགས་བམ་གྱི་དབང་བསྐུར་བས་གླེགས་བམ་འདི་དང་ཐ་དད་མེད་པར་སྣང་བ་མཐའ་ཡས་ཀྱི་ལྷ་ཚོགས་དཔག་ཏུ་མེད་པ་བྱོན་ནས་ཁྱེད་རང་རྣམས་ལ་ཐིམ་པས་གསུང་མི་ཟད་པ་རྒྱན་གྱི་འཁོར་ལོའི་དབང་ཐོབ་པའི་མོས་པ་མཛོད་ཅིག །ཡི་གེ་དྲུག་པའི་གླེགས་བམ་ལག་ཏུ་གཏད་ལ། པདྨ་དབང་གི་དཀྱིལ་

[Full Size]

འཁོར་དུ། །འདོད་ཆགས་རྣམ་པར་དག་པ་ཡི། །སངས་རྒྱས་རྣམས་ཀྱི་གསུང་མཆོག་དབང་། །དེང་འདིར་ཁྱོད་ལ་བསྐུར་བར་བྱ། །སོར་རྟོག་ཡེ་ཤེས་དབང་འདི་ཁྱོད་ཀྱིས་ལོངས། །གསུང་མཆོག་གླེགས་བམ་དབང་འདི་ཡོངས་རྫོགས་ཤོག །ཡི་གེ་བཅུ་པ་དང་། ༀ་པདྨ་ཨ་བྷི་ཥིཉྩ་ཧྲཱིཿདེ་ལྟར་འོད་དཔག་མེད་ཀྱི་ངོ་བོ་གླེགས་བམ་གྱི་དབང་བསྐུར་བས། ཉོན་མོངས་པ་འདོད་ཆགས་དག །འདུ་ཤེས་ཀྱི་ཕུང་པོ་གནས་གྱུར། སོ་སོར་རྟོག་པའི་ཡེ་ཤེས་ཐོབ་པར་སྒོམས་ཤིག །དེ་ནས་དབུ་རྒྱན་གྱི་དབང་བསྐུར་བའི་དོན་དུ་མདུན་གྱི་ནམ་མཁར་ཡེ་ཤེས་གྱི་དཀྱིལ་འཁོར་གསལ་བ་དང་། ཕྱོགས་བཅུའི་སངས་རྒྱས་ཐམས་ཅད་དང་། མཁའ་འགྲོ་མའི་ཚོགས་རྣམས་ཀྱིས་དབུ་རྒྱན་གྱི་དབང་བསྐུར་བས། དབུ་རྒྱན་འདི་དང་ཐ་དད་མེད་པར་རིན་ཆེན་འབྱུང་ལྡན་གྱི་ལྷ་ཚོགས་དཔག་ཏུ་མེད་པ་བྱོན་ནས་ཁྱེད་རང་རྣམས་ལ་ཐིམ་པས། རང་བྱུང་ཡེ་ཤེས་ཀྱི་དབང་ཐོབ་པའི་མོས་པ་མཛོད་ཅིག །དབུ་རྒྱན་དང་ཅོད་པན་རིན་པོ་ཆེའི་ཕྲེང་བ་མགོ་བོར་བཅིངས་ལ། རིན་ཆེན་མཆོག་གི་དཀྱིལ་འཁོར་དུ། །ང་རྒྱལ་རྣམ་པར་དག་པ་ཡི། །སངས་རྒྱས་རྣམས་ཀྱི་ཡོན་ཏན་དབང་། །དེ་རིང་ཁྱོད་ལ་བསྐུར་བར་བྱ། །མཉམ་ཉིད་ཡེ་ཤེས་དབང་འདི་ཁྱོད་ཀྱིས་ལོངས། །ཡོན་ཏན་དབུ་རྒྱན་དབང་འདི་ཡོངས་རྫོགས་ཤོག །ཡི་གེ་བཅུ་པ་དང་། ༀ་རཏྣ་ཨ་

[Full Size]

བྷི་ཥིཉྩ་ཏྲཱྃ། དེ་ལྟར་རིན་ཆེན་འབྱུང་ལྡན་གྱི་ངོ་བོ་དབུ་རྒྱན་གྱི་དབང་བསྐུར་བས་ཉོན་མོངས་པ་ང་རྒྱལ་དག །ཚོར་བའི་ཕུང་པོ་གནས་གྱུར། མཉམ་པ་ཉིད་ཀྱི་ཡེ་ཤེས་ཐོབ་པར་སྒོམས་ཤིག །དེ་ནས་དྲིལ་བུའི་དབང་བསྐུར་བའི་དོན་དུ་མདུན་གྱི་ནམ་མཁར་ཡེ་ཤེས་ཀྱི་དཀྱིལ་འཁོར་གསལ་བ་དང་། ཕྱོགས་བཅུའི་སངས་རྒྱས་ཐམས་ཅད་དང་། མཁའ་འགྲོ་མའི་ཚོགས་རྣམས་ཀྱིས་དྲིལ་བུའི་དབང་བསྐུར་བས། དྲིལ་བུ་འདི་དང་ཐ་དད་མེད་པར་དོན་ཡོད་གྲུབ་པའི་ལྷ་ཚོགས་དཔག་ཏུ་མེད་པ་བྱོན་ནས་ཁྱེད་རང་རྣམས་ལ་ཐིམ་པས་ཕྲིན་ལས་རྣམ་བཞིའི་དབང་ཐོབ་པའི་མོས་པ་མཛོད་ཅིག །ཅེས་དྲིལ་བུ་ལག་གཡོན་དུ་བྱིན་ལ། ཕྲིན་ལས་ཡོངས་རྫོགས་དཀྱིལ་འཁོར་དུ། །ཕྲག་དོག་རང་སར་དག་པ་ཡི། །སངས་རྒྱས་རྣམས་ཀྱི་ཕྲིན་ལས་དབང་། །དེ་རིང་ཁྱོད་ལ་བསྐུར་བར་བྱ། །བྱ་གྲུབ་ཡེ་ཤེས་དབང་འདི་ཁྱོད་ཀྱིས་ལོངས། །ཕྲིན་ལས་དྲིལ་བུའི་དབང་འདི་ཡོངས་རྫོགས་ཤོག །ཡི་གེ་བཅུ་པ་དང་། ༀ་ཀརྨ་ཨ་བྷི་ཥིཉྩ་ཨཱཿདེ་ལྟར་དོན་ཡོད་གྲུབ་བའི་ངོ་བོ་དྲིལ་བུའི་དབང་བསྐུར་བས། ཉོན་མོངས་པ་ཕྲག་དོག་དག །འདུ་བྱེད་ཀྱི་ཕུང་པོ་གནས་གྱུར། བྱ་བ་གྲུབ་པའི་ཡེ་ཤེས་ཐོབ་པར་སྒོམས་ཤིག །དེ་ནས་མིང་གི་དབང་བསྐུར་བའི་དོན་དུ་མདུན་གྱི་ནམ་མཁར་ཡེ་ཤེས་ཀྱི་དཀྱིལ་འཁོར་གསལ་བ་དང་། ཕྱོགས་བཅུའི་སངས་རྒྱས་

[Full Size]

ཐམས་ཅད་དང་། མཁའ་འགྲོ་མའི་ཚོགས་རྣམས་ཀྱིས་རྡོ་རྗེའི་མིང་གི་དབང་བསྐུར་བའི་མོས་པ་མཛོད། རྡོ་རྗེ་དྲིལ་བུ་མགོ་ཐོག་ཏུ་བཞག །སངས་རྒྱས་རྣམས་ཀྱི་མིང་གི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཉིད་དུ་རབ་བསྒྲུབ་ཕྱིར། །མིང་གི་དབང་མཆོག་ཆེན་པོ་བྱིན། །ཀྱེ་དཔལ་དགྱེས་པའི་པདྨ་ཞེས་བྱ་བའི་དེ་བཞིན་གཤེགས་པའོ། །རྡོ་རྗེའི་བརྟུལ་ཞུགས་ནི། ཕྱོགས་བཅུའི་སངས་རྒྱས་རྣམས་ཀྱིས་རིགས་དྲུག་པ་རྡོ་རྗེ་སེམས་དཔའི་ངོ་བོ་རྡོ་རྗེའི་བརྟུལ་ཞུགས་བྱིན་པར་མོས་ཤིག །རྡོ་རྗེ་ལག་ཏུ་གཏད་ལ། འདི་ནི་སངས་རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་བཅང་། །རྡོ་རྗེ་སེམས་དཔའི་བརྟུལ་ཞུགས་བརྟན། །ༀ་ན་མ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་སྟྭཾ། ཨེ་ཥ་དྷ་ར་ཡཱ་མི་ཧི་ཧི་ཧི་ཧི་ཧཱུྃ། དེ་ལྟར་རྡུལ་རས་བྲིས་མཆན་ཚོན་གྱི་དཀྱིལ་འཁོར་ལ་བརྟེན་ནས་ལུས་ལ་བུམ་པའི་དབང་བསྐུར་བས་ཉོན་མོངས་པ་ལྔ་དག །ཕུང་པོ་ལྔ་གནས་གྱུར། ཡེ་ཤེས་ལྔའི་སྤྱན་རས་གཟིགས་བསྒོམ་པ་ལ་དབང་བ་ཡིན་ནོ། །གསང་དབང་གི་དོན་དུ་མཎྜལ། མཎྜལ་ཕུལ་ལ། གསང་དབང་གི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། པདྨ་དབང་གི་དཀྱིལ་འཁོར་དུ། །མགོན་པོ་གཟི་བརྗིད་འོད་དཔག་མེད། །རྒྱལ་སྲས་ཚོགས་དང་བཅས་པ་ལ། །དབང་བསྐུར་ཡོངས་སུ་རྫོགས་པ་ལྟར། །དེ་བཞིན་བླ་

[Full Size]

མ་ཁྱེད་ཀྱིས་ཀྱང་། །བདག་ལ་དབང་བསྐུར་མཛད་དུ་གསོལ། །ཞེས་ལན་གསུམ། སྔོན་དུ་རྣམ་རྒྱལ་བུམ་པའི་སྟེང་དུ་བཞག་པའི་ཀ་པཱ་ལའི་བདུད་རྩི་དང་བྱང་ཆུབ་ཀྱི་སེམས་དཀར་དམར་སྦྱར་བ་མགྲིན་པར་གཏུགས་ལ། སློབ་དཔོན་བདག་ཉིད་ཀྱི་ཕུང་པོ་ཁམས་དང་སྐྱེ་མཆེད་ཐམས་ཅད་དེ་བཞིན་གཤེགས་པ་རིགས་ལྔའི་སྤྱན་རས་གཟིགས་དང་། ཡུམ་བཞི། སེམས་དཔའ་བརྒྱད་སོགས་སུ་རྣམ་པར་དག་པའི་བཅོམ་ལྡན་འདས་འཇིག་རྟེན་དབང་ཕྱུག་དང་། ཡུམ་གསང་བ་ཡེ་ཤེས་ཀྱི་མཁའ་འགྲོ་མ་ཡབ་ཡུམ་གཉིས་སུ་མེད་པར་སྦྱོར་བ་ལས། བདུད་རྩི་བྱང་སེམས་ཀྱི་དབང་བསྐུར་བ་ནི། སངས་རྒྱས་རྣམས་ཀྱི་ཐོད་པའི་དབང་། །སངས་རྒྱས་རྣམས་ཀྱིས་རབ་བསྒྲུབས་པ། །དེ་རིང་ཁྱོད་ལ་བསྐུར་བར་བྱ། །གསང་མཆོག་ཐོད་པའི་དབང་འདི་ཡོངས་རྫོགས་ཤོག །ༀ་ཨཱཿཧཱུྃ་ཧྲཱིཿༀ་མ་ཎི་པདྨེ་ཧཱུྃ། དྷུ་མ་གྷ་ཡེ་ན་མ་སྭཱ་ཧཱ། ཧ་རི་ནི་ས་ར་ཙ་ཧྲི་ཡ་ཧཱུྃ་ཛཿཨ་བྷི་ཥིཉྩ་ཏུ་མཱཾ། ཞེས་གཡོན་པའི་མཐེབ་སྲིན་གྱིས་བདུད་རྩི་སློབ་མའི་ལྕེ་ལ་བཞག་ལ། དེ་ལྟར་རྡོ་རྗེ་སློབ་དཔོན་གྱི་ལུས་ཀྱི་དཀྱིལ་འཁོར་ལ་བརྟེན་ནས་ངག་ལ་གསང་བའི་དབང་བསྐུར་བས་ངག་གི་སྒྲིབ་པ་དག་ནས། རླུང་རྡོ་རྗེའི་བཟླས་པ་བསྒོམ་པ་ལ་དབང་བ་ཡིན་ནོ། །ཤེས་རབ་དབང་གི་དོན་དུ་མཎྜལ། མཎྜལ་ཕུལ་ལ། ཤེས་རབ་ཡེ་ཤེས་ཀྱི་དབང་གི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། པདྨ་དབང་གི་དཀྱིལ་འཁོར་དུ། །མགོན་

[Full Size]

པོ་གཟི་བརྗིད་འོད་དཔག་མེད། །རྒྱལ་སྲས་ཚོགས་དང་བཅས་པ་ལ། །དབང་བསྐུར་ཡོངས་སུ་རྫོགས་པ་ལྟར། །དེ་བཞིན་བླ་མ་ཁྱེད་ཀྱིས་ཀྱང་། །བདག་ལ་དབང་བསྐུར་མཛད་དུ་གསོལ། །ཞེས་ལན་གསུམ། ཁྱེད་རང་རྣམས་སྐད་ཅིག་གིས་བཅོམ་ལྡན་འདས་ཐུགས་རྗེ་ཆེན་པོ་འཇིག་རྟེན་དབང་ཕྱུག་རྒྱལ་བ་རྒྱ་མཚོ་སྐུ་མདོག་དམར་པོ་ཞལ་གཅིག་ཕྱག་བཞི་པ་ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་འོག་མས་མུ་ཏིག་དམར་པོའི་ཕྲེང་པ་འཛིན་པ། གཡོན་འོག་མས་མེ་ཏོག་པདྨ་དམར་པོ་འདབ་མ་བརྒྱད་པའི་ཡུ་བ་ནས་འཛིན་པ། དབུ་སྐྲ་རལ་པའི་ཐོར་ཚུགས་གྱེན་དུ་བཅིངས་པ་ལ་དར་གྱི་ཅོད་པན་དང་རིན་པོ་ཆེའི་རྩེ་བྲན་ལྔས་བརྒྱན་པ། རྣམ་བཀྲ་ལྷའི་དར་གྱི་ན་བཟས་མཛེས་པ། ཞབས་རྡོ་རྗེ་སྐྱིལ་མོ་ཀྲུང་གིས་བཞུགས་པར་གྱུར་པ་ལ། སིནྡྷཱུ་རའི་དཀྱིལ་འཁོར་སྐད་ཅིག་གིས་ཡུམ་གསང་བ་ཡེ་ཤེས་ཀྱི་མཁའ་འགྲོ་མ་སྐུ་མདོག་དམར་མོ་ཞལ་གཉིས་ཕྱག་གཉིས་མ། ཕག་ཞལ་དམར་པོ་སྤྱི་གཙུགས་ཏུ་ཕྱུང་བ། རྩ་བའི་ཁྲོ་ཞལ་སྤྱན་གསུམ་པ། མཆེ་བ་གཙིགས་པ། དབུ་སྐྲ་གྲོལ་བ་ལ་ཐོད་པ་སྐམ་པོ་ལྔས་བརྒྱན་ཅིང་། ཐོད་བ་རློན་པ་ལྔ་བཅུས་དོ་ཤལ་བྱས་པ། རུས་བའི་རྒྱན་ཆ་ལྔས་བརྒྱན་པ། ཕྱག་གཡས་རྡོ་རྗེའི་གྲི་གུག་ནམ་མཁར་འཕྱར་བ། གཡོན་པས་ཐོད་ཁྲག་འཛིན་པར་གྱུར་པའི་རིག་མ་སྦྱིན་པ་ནི། གཟུངས་མ་ཡིད་འོང་འདི་ཁྱོད་ཀྱིས། །བསྟེན་བྱར་སངས་

[Full Size]

རྒྱས་རྣམས་ཀྱིས་བསྔགས། །འཁོར་ལོ་རིམ་པའི་སྦྱོར་བ་ཡིས། །བདེ་བ་དམ་པ་མྱོང་བར་གྱིས། །ཞེས་སློབ་མ་ལ་བྱིན་པ་ན་དེས་ཀྱང་གུར་གུམ་ལ་སོགས་པས་དྲི་ཞིམ་པར་བྱས་ཤིང་། ལུས་གོས་དང་བྲལ་བའི་ཆུ་སྐྱེས་སློབ་མ་ལ་མངོན་སུམ་དུ་བྱས་ནས། ཨེ་མ་བདག་གི་པདྨ་འདི། །བདེ་བ་ཐམས་ཅད་ཡང་དག་ལྡན། །གང་ཞིག་ཆོ་གས་བསྟེན་བྱེད་པ། །དེ་ཡི་མདུན་ན་བདག་གནས་སོ། །སངས་རྒྱས་བསྟེན་པ་ལ་སོགས་པ། །པདྨར་བྱ་བ་ཇི་བཞིན་གྱིས། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ནི་རྟག་ཏུ་བཞུགས། བྷཉྩ་མོ་ཀྵ-་ཧོཿདེ་ནས་ཡབ་ཡུམ་ལྷའི་གཟུགས་ཀྱིས་རྡོ་རྗེ་དང་པདྨ། ཧཱུྃ་དང་ཨ་ལས་སྐྱེས་པའི་ནོར་བུ་དང་། ཟེའུ་འབྲུ་དག་ༀ་དང་ཨ་ལས་བྱུང་བ། རྡོ་རྗེའི་ཁར་ཕཊ་སེར་པོས་མཚན་པར་གྱུར་པ། སངས་རྒྱས་ཀུན་གྱི་ཤེས་རབ་དབང་། །སངས་རྒྱས་ཀུན་གྱིས་རབ་བསྒྲུབས་པ། །དེང་འདིར་ཁྱོད་ལ་བསྐུར་བར་བྱ། །ཤེས་རབ་ཡེ་ཤེས་དབང་འདི་ཡོངས་རྫོགས་ཤོག །ༀ་དྷུ་མ་གྷ་ཡེ་ན་མཿསྭཱ་ཧཱ། ཧ་རི་ནི་ས་ར་ཙ་ཧྲི་ཡ་ཧཱུྃ་ཛཿཨ་བྷི་ཥིཉྩ་ཏུ་མཱཾ། ཞེས་བརྗོད་ལ་སིན་དྷཱུ་ར་སྙིང་གར་བྱུགས། གསང་བ་ཡེ་ཤེས་ཀྱི་མཁའ་འགྲོ་མ་དང་གཉིས་སུ་མེད་པ་ལས་དགའ་བ་བཞིའི་ཡེ་ཤེས་རྒྱུད་ལ་སྐྱེས་པར་མོས་ཤིག །དེ་ལྟར་ཆོས་ཀྱི་འབྱུང་གནས་སིན་དྷཱུ་རའི་དཀྱིལ་འཁོར་ལ་བརྟེན་ནས་སེམས་ལ་ཤེས་རབ་ཡེ་ཤེས་ཀྱི་

[Full Size]

དབང་བསྐུར་བས། སེམས་ཀྱི་སྒྲིབ་པ་དག་ནས། བྱང་ཆུབ་སེམས་ཀྱི་གདམས་ངག་བསྒོམ་པ་ལ་དབང་བ་ཡིན་ནོ། །དེ་ནས་བཞི་པ་ཚིག་དབང་རིན་པོ་ཆེ་སྣང་སྲིད་ཕྱག་རྒྱ་ཆེན་པོའི་དཀྱིལ་འཁོར་ལམ་མངོན་དུ་བྱེད་པའི་ཕྱིར་དེ་ཉིད་ཀྱི་སླད་དུ་མཎྜལ། མཎྜལ་ཕུལ་ལ། བཞི་པའི་དབང་གི་དོན་དུ་གསོལ་བ་འདེབས་བ་འདིའི་རྗེས་ཟློས་མཛོད། པདྨ་དབང་གི་དཀྱིལ་འཁོར་དུ། །མགོན་པོ་གཟི་བརྗིད་འོད་དཔག་མེད། །རྒྱལ་སྲས་ཚོགས་དང་བཅས་པ་ལ། །དབང་བསྐུར་ཡོངས་སུ་རྫོགས་པ་ལྟར། །དེ་བཞིན་བླ་མ་ཁྱེད་ཀྱིས་ཀྱང་། །བདག་ལ་དབང་བསྐུར་མཛད་དུ་གསོལ། །ལན་གསུམ། འདིར་དབང་བཞི་པའི་དོན་དུ་བླ་མའི་ཚིག་གིས་བརྡ་སྤྲད་པར་བྱ་སྟེ། མེ་ལོང་ཡོངས་སུ་དག་པ་ལ་ཤར་བའི་རྡོ་རྗེ་འཆང་གི་གཟུགས་བརྙན་ནི་གང་ལས་ཀྱང་མ་སྐྱེས། གནས་པའི་ཚེ་མེ་ལོང་གི་མདུན་རྒྱབ་བམ། རྡུལ་ཕྲ་རབ་དང་འདྲེས་པར་ཡང་མི་གནས། མི་སྣང་བར་གྱུར་པའི་ཚེ་གང་དུའང་བཞུད་པ་མི་དམིགས་ལ། མི་དམིགས་བཞིན་དུ་རྡོ་རྗེ་འཆང་གི་གཟུགས་བརྙན་གསལ་བར་སྣང་བ་ལྟར། རང་གི་ལུས་ཡི་དམ་གྱི་ལྷའི་སྐུ་སྟོང་བཞིན་དུ་ཉེ་བར་སྣང་བ། དེ་བཞིན་གཤེགས་པའི་མཚན་དཔེའི་ཁྱད་པར་དུ་མ་ཅན་ཤིན་ཏུ་འོད་གསལ་བ་ལ། དེ་ཉིད་ཀྱི་ཚེ་ཡང་སྣང་བ་ཉིད་རང་བཞིན་མེད་པའོ། །དེ་བཞིན་དུ་བྲག་ཆ་འབྱུང་བའི་ཕྱོགས་སུ་གསུང་རབ་

[Full Size]

ཡན་ལག་བཅུ་གཉིས་སོགས་ཚིགས་སུ་བཅད་པ་དང་། སྔགས་ཀྱི་སྒྲ་དང་བསྟོད་པ་དང་། སྐུར་འདེབས་སོགས་བརྗོད་པ་ན། བྲག་ཅ་ལས་ཀྱང་དེ་ཉིད་གསལ་བར་བརྗོད་པ་འབྱུང་བ་ན། རང་བཞིན་མི་དམིགས་པ་ལྟར་རང་གིས་བརྗོད་པའི་སྒྲ་གྲག་པ་ཉིད་ཀྱི་ཚེ་ནའང་རང་བཞིན་མེད་པར་སྟོང་བཞིན་དུ་ཨཱ་ལི་ཀཱ་ལི་སོགས་སྟོང་པ་ཉིད་ཀྱི་རང་སྒྲ་འབྱུང་བ་སྟེ་མེད་སྣང་རོ་མཉམ་པའོ། །དེ་བཞིན་དུ་སྨིག་རྒྱུ་ཆུ་མེད་པ་ལ་རི་དྭགས་རྣམས་ཀྱིས་ཆུར་འདུ་ཤེས་ནས་བསྙེགས་མོད་ཀྱི། དེ་ལ་ནམ་ཡང་ཆུ་མི་རྙེད་དེ་ཉམ་ཉེས་པར་འགྱུར་ལ། སྨིག་རྒྱུར་ཤེས་པ་ན་དེ་ལ་བརྟེན་པའི་ཉོན་མོངས་པ་དང་། ཉམ་ཉེས་པ་མི་འབྱུང་བ་ལྟར། སེམས་རྣམ་པར་གཡོ་བའི་རྒྱུན་སྨིག་རྒྱུ་ལྟར་ཉེ་བར་སྣང་བ་ལ་བྱིས་པ་རྣམས་ཀྱི་ངོར་བདེ་སྡུག་འཁོར་འདས་སོགས་ཉེ་བར་དམིགས་ཏེ་སྤང་བླང་སོགས་མཚན་མ་ལ་སྤྱོད་པས་ངལ་བ་ཐོབ་པར་འགྱུར་ལ། རང་གི་སེམས་སྨིག་རྒྱུ་ལྟར་སྣང་བ་འདི་ནི་ངེས་པར་རང་བཞིན་མེད་པ་སྟེ། འཁྲུལ་གྲོལ་གྱི་མཚན་མ་རྣམས་རྣམ་པ་ཐམས་ཅད་དུ་མ་དམིགས་པ། ཡིན་མིན་ཡོད་མེད་སོགས་མཐའ་དང་བྲལ་བ་མཉམ་པ་ཉིད་ཆེན་པོའི་དབྱིངས། བདེ་བར་གཤེགས་པའི་ཐུགས་ཤིན་ཏུ་རྣམ་པར་དག་པའི་ཡེ་ཤེས་གཞོམ་དུ་མེད་པ་ཉིད་དུ་བལྟ་བར་བྱའོ། །དེ་ལྟར་སྣང་སྲིད་ཕྱག་རྒྱ་ཆེན་པོའི་དཀྱིལ་འཁོར་ལ་བརྟེན་ནས་སྒོ་གསུམ་

[Full Size]

ལ་བཞི་པའི་དབང་བསྐུར་བས་སྒོ་གསུམ་ཆ་མཉམ་གྱི་སྒྲིབ་པ་དག་ནས་ལམ་ཕྱག་རྒྱ་ཆེན་པོ་སྒོམ་པ་ལ་དབང་བ་ཡིན་ནོ། །དབང་འདི་རྣམས་ཀྱི་དོན་ཡང་། པདྨ་ཟབ་པའི་རྒྱུད་ལས་གསུངས་པ། བུམ་པའི་དབང་ནི་དང་པོ་སྟེ། །གསང་བའི་དབང་ནི་གཉིས་པའོ། །ཤེས་རབ་ཡེ་ཤེས་གསུམ་པ་སྟེ། །ངེས་ཤེས་བསྐྱེད་པ་བཞི་པ་ཡིན། །ལྷ་དང་སྔགས་དང་སྟོང་པ་ཉིད། །བདེ་སྟོང་འདྲེས་པར་སྒོམ་པ་དབང་། །ཐ་མལ་ལུས་ཀྱི་རྣམ་རྟོག་ནི། །དང་པོ་བུམ་པའི་དབང་གིས་བཅད། །རང་བཞིན་ལྷ་ཡི་རྣམ་པ་བསྒོམ། །ཐ་མལ་ངག་གི་རྣམ་རྟོག་ནི། །གཉིས་པ་གསང་བའི་དབང་གིས་བཅད། །བཟླས་བརྗོད་རྒྱུན་དུ་བཟླས་པའོ། །ཐ་མལ་སེམས་ཀྱི་རྣམ་རྟོག་ནི། །གསུམ་པ་ཤེས་རབ་དབང་གིས་བཅད། །བདེ་དང་སྟོང་པའི་དོན་དྲན་བྱ། །འབྲས་བུ་ཐམས་ཅད་བསྡུས་པ་ནི། །བཞི་པ་ཡེ་ཤེས་དབང་ཡིན་ནོ། །ཞེས་གསུངས་པ་ཡིན་ནོ། །དེ་ནས་རྡོ་རྗེ་སློབ་དཔོན་དབང་གི་དོན་དུ་མཎྜལ། མཎྜལ་ཕུལ་ནས། རྡོ་རྗེ་སློབ་དཔོན་གྱི་དབང་གི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། གང་གིས་བདག་ནི་ཁྱོད་དྲིན་ལས། །རང་དང་གཞན་དོན་ནུས་འགྱུར་བ། །རྡོ་རྗེ་སློབ་དཔོན་གྱི་ནི་དབང་། །ཐུགས་རྗེའི་གཏེར་གྱིས་བདག་ལ་སྩོལ། །ལན་གསུམ། སློབ་དཔོན་གྱིས་རྡོ་རྗེ་ལག་ཏུ་བླངས་ཏེ། རྡོ་རྗེ་སྟོང་པའི་ངང་ལས་ཧཱུྃ་ལས་སྐྱེས་པའི་རྡོ་རྗེ་སེམས་དཔའི་གཟུགས་

[Full Size]

སུ་གྱུར། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་མའི་བདག་པོའི་བདག །བཅོམ་ལྡན་འདས་མཆོག་གི་དང་པོའི་སྐྱེས་བུའོ། །ཞེས་སློབ་མའི་ལག་པ་གཡས་སུ་གཏད། དེ་ནི་རྡོ་རྗེའི་དམ་ཚིག་གོ། །དྲིལ་བུ་སྟོང་པའི་ངང་ལས། ཨཱཿལས་སྐྱེས་པའི་དྲིལ་བུ། འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །བྱང་ཆུབ་མཆོག་ཏུ་རྒྱལ་བས་བཞེད། །ཁྱོད་ཀྱིས་ཀྱང་ནི་རྟག་ཏུ་བཟུང་། །གཡོན་དུ་གཏད། དེ་ནས་འདིའི་རྗེས་ཟློས་མཛོད། སྲིད་པ་ངོ་བོ་ཉིད་ཀྱིས་བདག །ངོ་བོ་ཉིད་དང་འགལ་སྲིད་བྱས། །རང་བཞིན་དག་མཆོག་སེམས་དཔའ་ཡིས། །དམ་པའི་སྲིད་པ་བྱེད་པར་འགྱུར། །ཞེས་བརྗོད་ཅིང་དཀྲོལ། དེ་ནི་དྲིལ་བུའི་དམ་ཚིག་གོ། །ཁྱེད་རང་བཅོམ་ལྡན་འདས་འཇིག་རྟེན་དབང་ཕྱུག་སྤྱན་རས་གཟིགས་སུ་གསལ་བ་དང་། ཡེ་ཤེས་ཀྱི་ཕྱག་རྒྱ་ཁ་སྦྱོར་གྱི་རིམ་པས་བྱིན་གྱིས་བརླབ་པ་ནི། འཁྱུད་པའི་ཚུལ་གྱིས། ཡིད་ཀྱི་ལུས་བརྟན་བརྟུལ་ཞུགས་ནི། །ཕྱག་རྒྱའི་དམ་ཚིག་རབ་ཏུ་བརྗོད། །གང་གི་ལུས་ནི་ཐམས་ཅད་བརྟན། །དེས་ན་ཕྱག་རྒྱར་རབ་ཏུ་བསྒྲགས། །ཞེས་བརྗོད། དེ་ནི་ཕྱག་རྒྱའི་དམ་ཚིག་གོ། །སློབ་མ་བདག་ཉིད་ཀྱི་ཞལ་དུ་ཞུགས་ཤིང་། སྐུའི་

[Full Size]

དབྱིབས་བརྒྱུད་དེ་ལྷ་མོའི་པདྨ་གནས་པ། སྟོང་པའི་ངང་ལས་ཧཱུྃ་དང་རྡོ་རྗེ་ལས་བྱུང་བའི་རྡོ་རྗེ་སེམས་དཔའ་ཡེ་ཤེས་སེམས་དཔའ་དང་དབྱེར་མེད་པ་ལ། ཕྱོགས་བཅུ་ན་བཞུགས་པའི་དེ་བཞིན་གཤེགས་པ་རྣམས་དང་། རིག་པའི་ལྷ་མོ་རྣམས་ལ་རང་གི་སྙིང་གའི་ས་བོན་གྱི་འོད་ཟེར་ལས་བྱུང་བའི་མཆོད་པའི་སྤྲིན་གྱིས་མཆོད་བར་བྱ་བ། ༀ་སརྦ་ཏ་ཐཱ་ག་ཏ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། པཱ་དྱཾ། དྷཱུ་པེ་སོགས། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩལ། །དེ་ལྟར་འདི་ལ་བསྩལ་དུ་གསོལ། །ཞེས་གསོལ་བ་བཏབ་པ་ལས་དེ་བཞིན་གཤེགས་པ་ཤེས་རབ་དང་སྙོམས་པར་ཞུགས་པས། དེ་རྣམས་འདོད་ཆགས་ཆེན་པོས་ཞུ་བར་གྱུར་ནས་རྣམ་སྣང་གི་སྒོ་ནས་ནང་དུ་ཞུགས་ཏེ། རྡོ་རྗེའི་ལམ་ནས་བྱུང་བའི་ཁུ་བས་དབང་བསྐུར་ནས། སླར་པདྨ་ནས་ཕྱུང་སྟེ་གྲལ་དུ་གནས་པ་ལ། ནམ་མཁའ་གང་བའི་དེ་བཞིན་གཤེགས་པ། སྤྱན་མ་ལ་སོགས་པའི་རིག་མ་དང་བཅས་པས་བུམ་པ་དཀར་པོ་བྱང་ཆུབ་སེམས་ཀྱི་བདུད་རྩིས་བཀང་བ་ཕྱག་གིས་ཅུང་ཟད་ཡོ་བར་འཛིན་པས། བཀྲ་ཤིས་ཀྱི་ཚིགས་སུ་བཅད་པ་དང་བཅས་པས་དབང་བསྐུར་བཞིན་པ་དང་། རྣམ་རྒྱལ་གྱི་བུམ་པའི་ཆུ་མི་བསྐྱོད་པའི་བདག་ཉིད་བྱང་ཆུབ་སེམས་ཀྱི་བདུད་རྩིས་དབང་བསྐུར་བར་གྱུར་པ་ནི། བུམ་པ་ཁ་རྒྱན་རྡོ་རྗེ་དང་

[Full Size]

བཅས་པ་སློབ་མའི་སྤྱི་བོར་རེག་ལ། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པ་ཡི་ཕྱག་བྱས་པ། །རྡོ་རྗེ་གསང་བ་གསུམ་བྱུང་བ། །སངས་རྒྱས་ཀུན་གྱིས་སྦྱིན་པར་བྱ། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ་སྭཱ་ཧཱ། ཞེས་དབང་བསྐུར་བས། བདེ་བ་ཆེན་པོ་ཕུན་སུམ་ཚོགས་པར་གྱུར་པའི་སྤྱི་བོར་མི་བསྐྱོད་པས་དབུ་བརྒྱན་ཅིང་དེ་བཞིན་གཤེགས་པ་གཞན་རྣམས་དང་ལྷ་མོ་རྣམས་ཡེ་ཤེས་སེམས་དཔའི་ངོ་བོར་བཅུག་པར་གྱུར། ༀ་སུ་པྲ་ཏིཥྛ་བཛྲེ་སྭཱ་ཧཱ། དེ་ལྟར་རྒྱུད་ཡོངས་སུ་སྨིན་པར་གྱུར་པ་ལ་མཆོད་པའི་སྤྲིན་རྒྱ་མཚོས་མཆོད་པར་མོས་མཛོད། མེ་ཏོག་ལ་སོགས་པ་མདུན་དུ་བཤམས་ནས། ༀ་བཛྲ་པུཥྤེ་སོགས་ཀྱིས་མཆོད་ལ། དེའང་འདི་ལྟ་བུ་གོ་བར་བྱ་སྟེ། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བ། །སློབ་དཔོན་གྱི་ནི་དབང་དུ་འདོད། །དེ་ལས་གཞལ་ཡས་ཀྱི་ཁང་པ་ནི། དེ་བཞིན་བཤེགས་པ་རྣམ་པར་སྣང་བཛད་ཀྱི་རང་བཞིན་ནོ་ཞེས་བྱ་བ་སོགས་དཀྱིལ་འཁོར་གྱི་དེ་ཁོ་ན་ཉིད་རྣམ་པར་དག་པ་དང་། མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་བསྒྲགས། །སྐྱེ་མཆེད་ཁམས་དང་དབང་པོ་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ཅེས་སོགས་ལྷ་རྣམས་ཀྱི་དེ་ཁོ་ཉིད་རྣམ་པར་དག་པ་དང་། དོན་དམ་པར་ནི་དཀྱིལ་འཁོར་ལ་སོགས་པ་རྣམས་ཀྱང་རང་བཞིན་མེད་པའི་བདག་ཉིད་དེ་བཞིན་ཉིད་ཁོ་ནའི་དེ་ཁོ་ན་ཉིད་རྣམ་པར་དག་

[Full Size]

པ་དང་། དེ་ཉིད་བཅུ་ལ་སོགས་པའི་སློབ་དཔོན་གྱི་ལས་ཀྱི་རིམ་པ་ཇི་སྙེད་པ་དག་དང་། འདའ་བར་བྱ་བ་མ་ཡིན་པའི་ངོ་བོ་དམ་ཚིག་དང་། བྱ་བ་དང་བྱ་བ་མ་ཡིན་པའི་བདག་ཉིད་ཅན་གྱི་སྡོམ་པ་རྣམས་ཤེས་པས་དེ་ཁོ་ན་ཉིད་བཞིན་དུ་མྱུར་དུ་བསྒྲུབ་པར་བྱ་ཞིང་། གཞན་དག་ཀྱང་གཞུག་པར་གྱིས་ཤིག །དེ་ནས་རྡོ་རྗེ་སློབ་དཔོན་གྱི་དབང་གི་དོན་དུ་རྡ་ོརྗེ་དང་དྲིལ་བུ་བྱིན་པར་མོས་ཤིག །རྡོ་རྗེ་དྲིལ་བུ་གཏད་ལ། རྡོ་རྗེ་དང་ནི་དྲིལ་བུ་ལོངས། །རྡོ་རྗེ་ལ་ནི་རབ་ཏུ་གནས། །དེ་རིང་རྡོ་རྗེ་སློབ་དཔོན་གྱུར། །སློབ་མ་བསྡུ་བ་ཉིད་དུ་གྱིས། །དེ་ནས་རིགས་ལྔའི་དེ་བཞིན་གཤེགས་པ་རྣམས་ཀྱི་སྒོ་ནས་འགྲོ་དོན་རྗེས་སུ་གནང་བའི་རིམ་པ་ནི། ལག་ཏུ་འཁོར་ལོ་གཏད་ལ། ཁྱེད་རང་རྣམས་བྱང་ཆུབ་མཆོག་གི་ཕྱག་རྒྱ་བྱས་ནས་དེ་བཞིན་གཤེགས་པ་རྣམ་པར་སྣང་མཛད་ཀྱི་ཏིང་ངེ་འཛིན་གྱིས། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པ། །ཆོས་ཀྱི་འཁོར་ལོ་བསྐོར་བར་གྱིས། །ཁྱོད་ཀྱིས་སེམས་ཅན་གཏི་མུག་ཅན་རྣམས་ཀྱི་དོན་གྱིས་ཤིག །རྡོ་རྗེ་ལག་ཏུ་བྱིན་ལ། ས་གནོན་དང་མཉམ་བཞག་བྱས་ནས་དེ་བཞིན་གཤེགས་པ་མི་བསྐྱོད་པའི་ཏིང་ངེ་འཛིན་གྱིས། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པ། །རྡོ་རྗེའི་འཁོར་ལོ་བསྐོར་བར་གྱིས། །ཁྱོད་ཀྱིས་སེམས་ཅན་ཞེ་སྡང་ཅན་རྣམས་ཀྱི་དོན་གྱིས་ཤིག །རིན་པོ་ཆེ་ལག་ཏུ་བྱིན་ལ།

[Full Size]

མཆོག་སྦྱིན་དང་མཉམ་བཞག་བྱས་ནས་དེ་བཞིན་གཤེགས་པ་རིན་ཆེན་འབྱུང་ལྡན་གྱི་ཏིང་ངེ་འཛིན་གྱིས། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པ། །ནོར་བུའི་འཁོར་ལོ་རབ་ཏུ་བསྐོར། །ཁྱོད་ཀྱིས་སེམས་ཅན་ང་རྒྱལ་ཅན་རྣམས་ཀྱི་དོན་གྱིས་ཤིག །པདྨ་ལག་ཏུ་བྱིན་ལ། མཉམ་བཞག་གི་ཕྱག་རྒྱ་བྱས་ནས་དེ་བཞིན་གཤེགས་པ་སྣང་བ་མཐའ་ཡས་ཀྱི་ཏིང་ངེ་འཛིན་གྱིས། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པ། །པདྨའི་འཁོར་ལོ་རབ་ཏུ་བསྐོར། །ཁྱོད་ཀྱིས་སེམས་ཅན་འདོད་ཆགས་ཅན་རྣམས་ཀྱི་དོན་གྱིས་ཤིག །སྣ་ཚོགས་རྡོ་རྗེ་ལག་ཏུ་བྱིན་ལ། སྐྱབས་སྦྱིན་དང་མཉམ་བཞག་བྱས་ནས་དེ་བཞིན་གཤེགས་པ་དོན་ཡོད་གྲུབ་པའི་ཏིང་ངེ་འཛིན་གྱིས། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པ། །རྒྱ་གྲམ་འཁོར་ལོ་བསྐོར་བར་གྱིས། །ཁྱོད་ཀྱི་སེམས་ཅན་ཕྲག་དོག་ཅན་རྣམས་ཀྱི་དོན་གྱིས་ཤིག །དེ་ནས་སླར་ཡང་སྐུ་གསུང་ཐུགས་ཀྱི་རྗེས་སུ་གནང་བ་ནི། སྤྱི་བོར་སིནྡྷུ་རའི་ཐིག་ལེ་བྱས་ལ། ཁྱེད་རྣམས་ཀྱིས་དུས་ཐམས་ཅད་དུ་བླ་མ་རྡོ་རྗེའི་འཛིན་པ་སྤྱི་བོར་བསྒོམ་པ་དང་། སངས་རྒྱས་རྣམས་ཀྱི་སྐུའི་ཕྲིན་ལས་བསྒྲུབ་པར་གྱིས་ཤིག །དེ་ནས་སྔགས་ཀྱི་བཟླས་ལུང་སྦྱིན་པའི་དོན་དུ་འདིའི་རྗེས་ཟློས་གྱིས། སྔགས་ཀྱི་དབང་བསྐུར་ཡེ་ཤེས་

[Full Size]

མཆོག །དངོས་གྲུབ་སྟེར་བ་བདག་ལ་སྩོལ། །ཞེས་བརྗོད། སློབ་དཔོན་གྱི་ཐུགས་ཀའི་ས་བོན་སྔགས་ཀྱིས་བསྐོར་བ་ལས། སྔགས་ཀྱི་ཕྲེང་བ་འཕྲོས་པས་ཞལ་ནས་བརྒྱུད་དེ་ཁྱེད་རང་གི་ཞལ་དུ་ཞུགས་ནས་སྙིང་གའི་ཧྲཱིཿལ་ཐིམ་པར་མོས་ལ་སྔགས་ཟློས་ཤིག །ༀ་ཨཱཿཧཱུྃ་ཧྲཱིཿༀ་མ་ཎི་པདྨེ་ཧཱུྃ། དྷུ་མ་གྷ་ཡེ་ན་མ་སྭཱ་ཧཱ། ཧ་རི་ནི་ས་ར་ཙ་ཧྲི་ཡ་ཧཱུྃ་ཛཿཞེས་བརྒྱ་རྩ་བརྒྱད་བརྗོད་ནས། སློབ་དཔོན་གྱིས་མེ་ཏོག་འཐོར་ཞིང་། བཅོམ་ལྡན་བདག་གིས་སྦྱིན་ལགས་ཀྱི། །འདི་ལ་ཉེ་བར་མཛད་དུ་གསོལ། །དེ་ཉིད་མི་འགྱུར་བ་བརྟན་པར་བྱ་བའི་ཕྱིར་མེ་ཏོག་འཐོར་བཞིན་དུ་འདིའི་རྗེས་ཟློས་མཛོད། བཅོམ་ལྡན་བདག་གིས་གཟུང་ལགས་ཀྱི། །བདག་ལ་འགོ་བར་མཛད་དུ་གསོལ། །ཞེས་ལན་གསུམ། དེང་ཕྱིན་ཆད་སྔགས་ཀྱི་བཟླས་པ་ལ་བརྩོན་པ་དང་སངས་རྒྱས་རྣམས་ཀྱི་གསུང་གི་ཕྲིན་ལས་བསྒྲུབ་པར་གྱིས་ཤིག །སྙིང་གར་སིནྡྷུ་ར་བྱུགས་ལ། དེང་ནས་བཟུང་སྟེ་སེམས་ཅན་རྣམས་ལ་སྙིང་རྗེ་ཆེན་པོ་བསྐྱེད་དེ། སངས་རྒྱས་རྣམས་ཀྱི་ཐུགས་ཀྱི་ཕྲིན་ལས་བསྒྲུབ་པར་གྱིས་ཤིག །སློབ་དཔོན་སྤྲུལ་སྐུའི་ཆ་ལུགས་ལག་པ་གཡོན་དྲིལ་བུ་དང་བཅས་པ་ཆོས་གོས་ཀྱི་གྲྭ་རི་དྭགས་ཀྱི་རྣ་བ་ལྟར་འཛིན་པ་སྙིང་གར་བཟུང་བ་དང་། གཡས་རྡོ་རྗེ་དང་བཅས་པ་མི་འཇིགས་པའི་ཕྱག་རྒྱས། དེ་ནས་ལུང་བསྟན་པ་དང་དབུགས་དབྱུང་བ་ནི། དེ་རིང་ངས་ཁྱོད་ལུང་བསྟན་ཏེ། །འོད་དཔག་མེད་པ་དེ་བཞིན་གཤེགས། །སྲིད་པ་ཤིན་ཏུ་དག་པས་ན། །སྲིད་པའི་སྡུག་བསྔལ་ཀུན་ལས་གྲོལ། །ཀྱཻ་དཔལ་དགྱེས་པའི་པདྨ་ཞེས་བྱ་བའི་དེ་བཞིན་གཤེགས་པའོ། །སརྦ་ཏ་ཐཱ་ག་ཏ་སིདྡྷི་ས་མ་ཡ་སྟྭཾ་བྷུར་བྷུ་ཝ་སྭཿ

[Full Size]

མ་འོངས་པ་ན་རིགས་ཀྱི་གསང་མཚན་དང་མཐུན་པའི་དེ་བཞིན་གཤེགས་པར་འགྱུར་ཏེ། གང་འདི་ལྟར་ལུང་བསྟན་པ་དེ། དེ་བཞིན་གཤེགས་པ་ཐམས་ཅད་ཀྱིས་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་ཡིན་ཏེ། སྙིགས་མའི་དུས་ཀྱི་སེམས་ཅན་གདུལ་དཀའ་བ་རྣམས་ཀྱི་དོན་དུ། དེ་བཞིན་གཤེགས་པ་ཐམས་ཅད་གཅིག་ཏུ་བསྡུས་པ་རྡོ་རྗེ་སློབ་དཔོན་གྱི་གཟུགས་སུ་གྱུར་པས་བདེ་བ་ལ་འགོད་བར་གསུངས་པའི་ཕྱིར་རོ། །དེས་ན་ཁྱེད་རྣམས་ཀྱིས་དེང་ཕྱིན་ཆད་བཅོམ་ལྡན་འདས་འཇིག་རྟེན་དབང་ཕྱུག་གི་སྒོ་ནས་འགྲོ་བའི་དོན་རྒྱ་ཆེན་བསྒྲུབ་པ་དང་ཕྱི་ནང་གསང་བའི་དམ་ཚིག་རྣམས་ཚུལ་བཞིན་འཛིན་སྙམ་པའི་སྒོ་ནས་འདིའི་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་པ། །སོགས། དེ་ལྟར་དབང་བཞི་རྫོགས་པར་ཐོབ་པའི་གཏང་རག་གི་མཎྜལ་ཕུལ། ལུས་ལོངས་སྤྱོད་དགེ་རྩ་དང་བཅས་པ་འབུལ་སྙམ་པས་རྗེས་ཟློས་མཛོད། དེང་ནས་བརྩམས་ཏེ་སོགས། དེས་བཅོམ་ལྡན་འདས་འཇིག་རྟེན་དབང་ཕྱུག་རྒྱལ་བ་རྒྱ་མཚོའི་དཀྱིལ་འཁོར་གྱི་སྒོ་ནས་དབང་བཞི་སྟན་ཐོག་གཅིག་ཏུ་བསྐུར་བ་ཡིན་པས་འདི་ཉིད་ཀྱི་སྒོ་ནས་རང་གཞན་གྱི་དོན་རྒྱ་ཆེན་པོ་བསྒྲུབ་མཛོད། བསོད་ནམས་འདི་ཡིས་སོགས་བརྗོད། དེ་ནས་ཚོགས་ལ་རོལ་ཞིང་ལྷག་མ་རྗེས་ཆོག་བཀྲ་ཤིས་སོགས་བྱའོ། །ཞེས་པ་འདི་ནི་དང་པོའི་བློ་ཅན་རྣམས་ལ་ཕན་ཕྱིར་སི་ཏུ་པདྨ་ཉིན་བྱེད་དབང་པོས་བསྒྲིགས་པའི་དགེ་བས་ལུས་ཅན་མཐའ་དག་འཕགས་མཆོག་འཇིག་རྟེན་དབང་ཕྱུག་གི་གོ་འཕང་ལ་འགོད་པའི་རྒྱུར་གྱུར་ཅིག །སརྦ་མངྒ་ལམ།། །།

བཅོམ་ལྡན་རྡོ་རྗེ་ཕག་མོའི་མངོན་དཀྱིལ་གསང་ཆེན་མྱུར་ལམ།

[Full Size]

བཅོམ་ལྡན་རྡོ་རྗེ་ཕག་མོའི་མངོན་དཀྱིལ་གསང་ཆེན་མྱུར་ལམ་ཞེས་བྱ་བ་བཞུགས་སོ། །

[Full Size]

ན་མོ་བཛྲ་དྷཱ་ར་ཡ། འདིར་པཎ་ཆེན་ནཱ་རོའི་བརྒྱུད་འཛིན་ཚེས་བཅུ་སོགས་དུས་བཟང་གི་མཆོད་པ་ལ་སྤྲོ་བའི་སྐལ་ལྡན་དམ་ཚིག་ཅན་མཆོག་དངོས་གྲུབ་པའི་གོ་འཕང་ཐོབ་འདོད་དག་གིས། དབེན་པའི་གནས་སུ་སྟེགས་ཀྱི་ཁར་དཀྱིལ་འཁོར་རས་བྲིས་བཀྲམ་ཞིང་། དབང་རྫས་རྣམས་དང་ནང་མཆོད། གཞན་ཡང་མཆོད་པ་དང་གཏོར་མ་ལ་སོགས་པ་གང་འབྱོར་དང་། ཁྱད་པར་ཐབས་ཤེས་ཚོགས་ཀྱི་ཡོ་བྱད་སྣ་ཚོགས་པ་གཙང་ཞིང་བཟང་བ་ལག་ལེན་མཐོང་རྒྱུན་ལྟར་དང་། ཌཱ་དྲིལ་སོགས་འདུ་བགྱིད་ལ། ཞལ་ནུབ་ཏུ་ཕྱོགས་བཞིན། དང་པོ། རང་ཉིད་སྐད་ཅིག་རྡོ་རྗེ་རྣལ་འབྱོར་མ། །རྒྱན་དང་ཆ་ལུགས་ཡོངས་རྫོགས་གསལ་བར་གྱུར། །དེ་ནས་ནང་མཆོད་བྱིན་རླབས་བསངས་སྦྱངས་ནི། ༀ་ཨཱཿབིགྷྣཱནྟ་ཀྲི་ཏ་ཧཱུྃ་ཕཊ། ༀ་སྭ་བྷཱ་

[Full Size]

ཝ་ཤུདྡྷཿསརྦ་དྷརྨཱ་སྭ་བྷཱ་ཝ་ཤུ་དྡྷོ྅ཧཾ། སྟོང་པར་གྱུར་པའི་ངང་ལས་ཡྃ་རྃ་ཀྃ། །རླུང་མེ་ཐོད་སྒྱེད་དེ་སྟེང་ཨ་ལས་ཐོད། །ཤ་ལྔ་བདུད་རྩི་ལྔས་གང་ས་བོན་མཚན། །འོད་ཟེར་འཕྲོ་འདུས་ཡེ་ཤེས་བདུད་རྩིར་གྱུར། །ༀ་ཨཱཿཧཱུྃ། ལན་གསུམ་གྱིས་བྱིན་བརླབས། དེ་ནས་སྔོན་འགྲོ་གཏོར་མའང་གོང་ལྟར་བྱིན་བརླབས་ནས། གཏོར་མགྲོན་སྤྱན་དྲངས་པ་ནི། འབར་བའི་ཕྱག་རྒྱ་དཔྲལ་བར་བསྐོར་ཞིང་། ཕེཾ་ཕེཾ་ཕེཾ། པད་སྐོར་རྡོར་ཐལ་ཁ་ཕྱེ་བས། ༀ་བཛྲ་ཨཱ་ར་ལི་ཧོཿཛཿཧཱུྃ་བྃ་ཧོཿབཛྲ་ཌཱ་ཀི་ནི་ས་མ་ཡ་སྟྭཾ་དྲྀ་ཤྱ་ཧོཿལན་གསུམ་དང་། པད་སྐོར་རྡོར་ཐལ་ཁ་ཕྱེ་བས། ༀ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཀྵ་ས་བྷུ་ཏ་པྲེ་ཏ་པི་ཤ་ཙ་ཨུནྨ་ད་ཨ་པ་སྨ་ར་ཌཱ་ཀ་ཌཱ་ཀི་ནྱ་ད་ཡ། ཨི་དཾ་བ་

[Full Size]

ལིང་གྲྀ་ཧྣནྟུ་ས་མ་ཡ་རཀྵནྟུ་མ་མ་སརྦ་སིདྡྷི་མྨེ་པྲ་ཡཙྪནྟུ་ཡ་ཐཻ་བཾ་ཡ་ཐཻཥྚཾཿབྷཱུཉྫ་ཐ་ཛི་གྷ་ཐ་པི་བ་ཐ་མ་ཏི་པྲ་མ་ཐ། མ་མ་སརྦ་ཀཱ་ར་ཏ་ཡ་སཏ་སུ་ཁཾ་བི་ཤུདྡྷ་ཡེ། སཱ་ཧཱ་ཡི་ཀ་བྷ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ལན་བཞི་བརྗོད། ཞིང་སྐྱོང་བརྒྱད་དང་མཁའ་འགྲོ་སོ་གཉིས་སོགས། །འཁོར་བཅས་མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་འདོད་དོན་ཡིད་བཞིན་འགྲུབ་པར་མཛོད། །ལོག་འདྲེན་བགེགས་ཀྱི་ཚོགས་རྣམས་ཕྱིར་དེངས་ཤིག །གཏོར་མ་ཕྱི་རོལ་ཕུལ། ༀ་སུཾ་བྷ་ནི་སུཾ་བྷ་ནི་ཧཱུྃ་ཧཱུྃ་ཕཊ། ༀ་གྲྀཧྞཱ་གྲྀཧྞཱ་ཧཱུྃ་ཧཱུྃ་ཕཊ། ༀ་གྲྀཧྣཱ་པ་ཡ་གྲྀཧྣཱ་པ་ཡ་ཧཱུྃ་ཧཱུྃ་ཕཊ། ༀ་ཨཱ་ན་ཡ་ཧོཿབྷ་ག་ཝཱན་བིདྱཱ་རཱ་ཛ་ཧཱུྃ་ཧཱུྃ་ཕཊ། ཞེས་བགེགས་བསྐྲད་ལ། རྡོ་རྗེའི་སྲུང་འཁོར་ཕྱོགས་བཅུར་འབར་བ་དང་། །སྒོ་མཚམས་ལྷ་མོ་རྣམས་ཀྱིས་བར་ཆད་བཟློག །ༀ་བཛྲ་ཝཱ་རཱ་ཧཱི་ཧྲིཿགྷ་གྷ་གྷཱ་ཏ་ཡ་གྷཱ་ཏ་ཡ། གནོད་བྱེད་སརྦ་དུཥྚཱན་ཧཱུྃ་ཕཊ་སྭཱ་ཧཱ། ཞེས་མཚམས་བཅད། མཆོད་པ་བྱིན་རླབས་ནི། ༀ་ཨཱཿབིགྷྣན་གྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་ཀ་པཱ་ལ། །ཡངས་པའི་སྣོད་རྣམས་ནང་དུ་ཧཱུྃ་ཡིག་ཚོགས། །འོད་ཞུ་ཀུན་བཟང་རྣམ་ཐར་ལས་ལྷག་པའི། །མཆོད་སྤྲིན་རྒྱ་མཚོ་ནམ་མཁའི་མཐའ་ཀླས་གྱུར། །ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། དེ་བཞིན་དུ། ༀ་བཛྲ་པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་བི་དྱེ། ཤབྡ་ཨཱཿཧཱུྃ་སྭཱ་ཧཱ། སྐྱབས་སེམས་ནི། ན་མོ། བདག་

[Full Size]

གཞན་མཁའ་མཉམ་སེམས་ཅན་རྣམས། །དཀོན་མཆོག་གསུམ་དང་རྩ་གསུམ་ལྷར། །སྐྱབས་སུ་མཆིའོ་འགྲོ་བའི་དོན། །བྱང་ཆུབ་བར་དུ་སེམས་བསྐྱེད་དོ། །གསུམ་མམ་བདུན་ནམ་ཉེར་གཅིག་བརྗོད། ཚོགས་ཞིང་ནི། རང་གི་ལྟེ་བའི་ཧྲཱིཿལས་འོད་འཕྲོས་པས། །རྣལ་འབྱོར་མ་དཔལ་འཁོར་བཅས་སྤྱན་དྲངས་གྱུར། །པདྨ་ཀ་མ་ལཱ་ཡ་སྟྭཾ། ཞེས་གདན་འབུལ་དང་། གུ་རུ་དེ་ཝ་ཌཱ་ཀི་ནི་ན་མོ། ཞེས་ཕྱག་འཚལ། སརྦ་པཱུ་ཛ་པྲ་ཏཱིཙྪ་ཨཱཿཧཱུྃ། ཞེས་དང་། ༀ་རཏྣ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཞེས་མཆོད་པ་ཕུལ། རྡོ་རྗེ་འཆང་ཆེན་དཔལ་ལྡན་འཁོར་ལོའི་མགོན། །རྩ་བ་བརྒྱུད་བཅས་ཡི་དམ་ལྷ་རབ་འབྱམས། །ཡེ་ཤེས་ཆོས་སྐྱོང་བཀའ་སྲུང་རྒྱ་མཚོ་ལ། །གསོལ་འདེབས་བདག་རྒྱུད་སྨིན་གྲོལ་བྱིན་གྱིས་རློབས། །ཞེས་གསོལ་བ་བཏབ། ཚོགས་ཞིང་འོད་ཞུ་རང་ཐིམ་དབྱེར་མེད་གྱུར། དེ་ནས་བདག་བསྐྱེད་ཀྱི་རིམ་པ་ལ། ཚད་མེད་བསྒོམ་པ། འགྲོ་བ་སེམས་ཅན་བདེ་ལྡན་སྡུག་བསྔལ་བྲལ། །དགའ་དང་ལྡན་ཞིང་བཏང་སྙོམས་གནས་གྱུར་ཅིག །ༀ་སྭ་བྷཱ་ཝས་སྦྱངས། གཟུང་འཛིན་ཆོས་ཀུན་སྟོང་པའི་ངང་ཉིད་ལས། །ཨེ་ལས་ཆོས་འབྱུང་གྲུ་གསུམ་གཞལ་ཡས་ཁང་། །ཕྱི་དཀར་ནང་དམར་དབུས་སུ་གདན་པདྨ། །རོ་དང་ཉི་སྟེང་རང་རིག་བུམ་མདུན་སྐབས་ཡི་གེ་ཞེས་ཁ་བསྒྱུར་དགོས། ཧྲཱིཿདམར་

[Full Size]

པོ། །འཕྲོ་འདུས་དོན་གཉིས་བྱས་ནས་རྣལ་འབྱོར་མ། །མདོག་དམར་འོད་ཀྱིས་སྟོང་གསུམ་ཀུན་ཁྱབ་གསལ། །ཆོས་སྐུ་ཉག་གཅིག་ཞལ་ལ་དུས་གསུམ་གཟིགས། །སྤྱན་གསུམ་བདུད་འཇོམས་ཁྲོ་གཉེར་ཞལ་ཨཾ་གཙིགས། །དབུ་སྐྲ་ཁམ་ནག་འབར་བར་རིགས་ལྔ་མཚོན། །ཐོད་སྐམ་དབུ་རྒྱན་ཐབས་ཤེས་ཕྱག་གཉིས་ཀྱིས། །གྲི་གུག་ཐོད་ཁྲག་རོལ་ཞིང་འགྱིང་བའི་ཚུལ། །ཐབས་ཀྱི་ཁ་ཊྭཱྃ་དཀུར་བརྟེན་བཅུ་དྲུག་གི། །ལང་ཚོ་སྒེག་པའི་དཀར་འཛིན་ཆུ་འཛིན་རྒྱས། །ཕྱིན་དྲུག་རང་བཞིན་རུས་པའི་ཕྱག་རྒྱ་ལྔ། །དྲིལ་གཡེར་རྒྱན་དང་འདུ་བྱེད་དག་པའི་བརྡར། །མགོ་རློན་དོ་ཤལ་མེ་ཏོག་དམར་པོའི་ཕྲེང་། །མཐའ་གཉིས་མི་གནས་གཡས་བསྐུམ་གཡོན་བརྐྱང་ཞབས། །དཔའ་མོ་རོལ་པའི་གར་སྟབས་དང་བཅས་བཞུགས། །གནས་བཞིར་ཧ་རི་ནི་སའི་ཡི་གེ་ལས། །མཁའ་འགྲོ་སྔོ་སེར་དམར་ལྗང་རྡོ་རྗེ་དང་། །རིན་ཆེན་པདྨ་རལ་གྲིས་མཚན་གྲི་གུག །ཐོད་པ་ཁ་ཊྭཱཾ་དཀུར་བརྟེན་རང་འདྲའི་འཁོར། །རིམ་བཞིན་སོ་གཉིས་བཅུ་དྲུག་བརྒྱད་དྲུག་ཅུ། །རྩ་བཞིས་བསྐོར་ཞིང་གཙོ་མོའི་གསང་གནས་སུ། །ཆོས་འབྱུང་བསྣོལ་དབུས་ཧྲཱིཿདང་མཁའ་འགྲོ་བཞི། །སོ་སོའི་ས་བོན་འོད་ཀྱིས་ཨོ་རྒྱན་ནས། །རྣལ་འབྱོར་མ་ཚོགས་མདུན་མཁར་སྤྱན་དྲངས་གྱུར། །བཛྲ་ས་མཱ་ཛཿདེ་རྣམས་སྐུ་ལས་སྐུ་འཕྲོས་གསུང་ལས་སྔགས། །ཐུགས་

[Full Size]

ལས་བྱང་སེམས་རྒྱུན་བབས་གསང་གསུམ་བྱིན། །བདེ་སྟོང་ཏིང་འཛིན་ཡེ་ཤེས་རྒྱུད་ལ་སྨིན། །ལྷ་རྣམས་རང་རང་སྐུར་ཐིམ་གཉིས་མེད་ངང་། །རྣམ་སྣང་ཧེ་རུ་ཀ་ཡིས་རྒྱས་གདབ་གྱུར། །དེ་ནས་བསྙེན་དམིགས་དོན་ཀུན་གྲུབ་པའི་འཁོར་ལོ་ནི། གསང་བར་ཆོས་འབྱུང་པདྨ་འདབ་བཞིའི་དབུས། །ཧྲཱིཿམཐར་སྔགས་ཕྲེང་གཡོན་འཁོར་ཕྱོགས་འདབ་བཞིར། །ཧ་རི་ནི་སས་མཚན་པའི་འོད་སྤྲོ་བསྡུས། །འཕགས་མཆོད་འགྲོ་བའི་དོན་བྱས་རང་ཐིམ་གྱུར། །ༀ་བཛྲ་བཻ་རོ་ཙ་ནཱི་ཡེ་ཧ་རི་ནི་ས་ཧཱུྃ་ཧཱུྃ་ཕཊ་སྭཱ་ཧཱ། ཅི་ནུས་བཟླའོ། །མཐར་ཐུན་བསྡུ་རྫོགས་རིམ་ནི། ཕྱི་ནང་སྣོད་བཅུད་འཁོར་རྣམས་རང་ལ་འདུས། །དེ་ཡང་འོད་ཞུ་ཧྲཱིཿར་ཐིམ་ཐིག་ལེ་དང་། །ནཱ་ད་ལས་འདས་དོན་དམ་སྟོང་ཉིད་ངང་། །ཅི་གནས་སུ་བཞག །དེ་ནས། སླར་ཡང་རྣལ་འབྱོར་མ་རུ་ལམ་གྱིས་གསལ། །ཅེས་ཐུན་མཚམས་ལ་འཇུག །ལག་མཆོད་བྱ་བ་ནི། བདུད་རྩི་བསངས་བ་དང་། ལག་གཉིས་ཀྱང་བསངས་ལ། ༀ་ཨཱཿབིགྷྣཱན་སོགས་དང་། མཚན་ལྡན་རྡོ་རྗེ་ཀ་པཱ་ལར། །ཨ་མྲྀ་ཏ་བཞིས་བཀང་དབུས་དང་། ལག་གཡོན་མཐིལ་བཅས་སོ་སོ་ལ། །ༀ་སྭ་བྷཱ་ཝ་སོགས་བརྗོད་ལ་གཡོན་དུ་ཟླུམ་སྐོར་དང་། ༀ་ཨཱཿཧཱུྃ་གིས་ཆོས་འབྱུང་བྲི། དབུས་དང་ཕྱོགས་བཞིར། ཧྲཱིཿཧ་རི་ནི་ས་ཐིག་ལེ་ལྔ་བཀོད། ཆོས་འབྱུང་པད་འདབ་བཞི་ལྡན་དབུས། །ཡི་གེ་ལྔ་ཡི་འོད་སྤྲོ་བསྡུས། །དོན་གཉིས་བྱས་ཏེ་

[Full Size]

ལྷ་ལྔར་གྱུར། །སརྦ་པཱུ་ཛ་ཨཱཿཧཱུྃ། ཤྲཱི་བཛྲ་ཡོ་གི་ནི་ན་མོ། སླར་ཡང་འོད་འཕྲོས་དཔའ་བོ་རྣལ་འབྱོར་མ། །མདུན་མཁར་ཡེ་ཤེས་འཁོར་ལོ་སྤྱན་དྲངས་གྱུར། །བཛྲ་སརྦ་པཱུ་ཛ་ཧོ། ༀ་ན་མོ་ན་མ་ཧཱུྃ། ནམ་མཁའི་ལྷ་རྣམས་ལག་པའི་ལྷར་འདུས་ནས། །ཆང་ནང་ལྷར་ཐིམ་ཡེ་ཤེས་བདུད་རྩིར་གྱུར། །ༀ་ཨཱཿཧཱུྃ། གཡོན་པའི་མཐེབ་སྲིན་གྱིས་བདུད་རྩི་འཐོར་བཞིན། ༀ་བཛྲ་བཻ་རོ་ཙ་ནི་སོགས་བརྗོད། སྲུང་དང་བཟློག་པའི་མཁའ་འགྲོའི་དྲྭ་གུར་གཏམས། །རང་ལ་འཐོར་ཞིང་སྔགས་བརྗོད། ལུས་ཀྱི་བ་སྦུའི་གྲངས་མཉམ་མཁའ་འགྲོས་ཁེངས། །ཚོགས་དང་མཆོད་རྫས་ལ་འཐོར་སྔགས་བརྗོད། གནས་དང་ཡོ་བྱད་དག་པ་ཆེན་པོར་བསྒྱུར། །བཀའ་བརྒྱུད་བླ་མ་ཡི་དམ་ཆོས་སྐྱོང་དང་། འགྲོ་ཀུན་ལྷར་གསལ་ཞལ་དུ་ༀ་ཨཱཿཧཱུྃ། བདུད་རྩི་འབུལ་ཞིང་། ༀ་ཨཱཿཧཱུྃ། རང་གིས་ཀྱང་མྱོང་། དེ་ནས་བུམ་བསྐྱེད་ནི། བདུད་རྩི་འཐོར་ལ། ༀ་ཨཱཿབིགྷྣཱན་གྱིས་བསངས། སྭ་བྷཱ་ཝས་སྦྱངས། སྟོང་ལས་བྷྲཱུྃ་ཡིག་ཡོངས་གྱུར་རིན་པོ་ཆེའི། །བུམ་བཟང་དམར་པོ་མཚན་ཉིད་ཡོངས་སུ་རྫོགས། །ལྷ་ཡི་དར་དང་ཙུ་ཏའི་ཡལ་གས་བརྒྱན། །ཉེར་ལྔའི་རྫས་གཏམས་བདུད་རྩིའི་ཆུས་གང་དབུས། །ཨེ་ལས་ཆོས་འབྱུང་གྲུ་གསུམ་སོགས་བདག་བསྐྱེད་ལྟར། གར་སྟབས་དང་བཅས་བཞུགས། །བར་དང་། ཕྱོགས་བཞིར་ཧ་རི་ནི་ས་ཡོངས་གྱུར་ལས། །རིགས་བཞི་

[Full Size]

མཁའ་འགྲོ་རང་མདོག་གྲི་ཐོད་དང་། །ཁ་ཊྭཱཾ་དཀུར་བརྟེན་གཙོ་མོའི་གསང་གནས་ཧྲཱིཿ། འཁོར་བཞིའི་ས་བོན་འོད་འཕྲོས་ཨོ་རྒྱན་ནས། །དཔའ་བོ་རྣལ་འབྱོར་མ་ཚོགས་སྤྱན་དྲངས་པའི། །སྦྱོར་མཚམས་བྱང་སེམས་དཀར་དམར་རྒྱུན་འབབས་པས། །མེ་ལོང་ཐོད་པ་བུམ་དཀྱིལ་དབྱེར་མེད་གྱུར། །བར་དམིགས་ལ་སྔགས་བཟླའོ། མཐར། དཀྱིལ་འཁོར་གསུམ་ཁེངས་བུམ་ལྷ་འོད་ཞུར་གྱུར། །དེ་ནས་མདུན་བསྐྱེད་བསྒྲུབ་པ་རས་བྲིས་བདུད་རྩིས་བསངས། སྟོང་ལས་མདུན་མཁར་ཆོས་འབྱུང་གཞལ་ཡས་ཁང་། །སོགས་བདག་བསྐྱེད་ལྟར་དང་། གར་སྟབས་དང་བཅས་བཞུགས། །བར་དང་། ཕྱོགས་བཞིར་ཧ་རི་ནི་ས་ཡོངས་གྱུར་ལས། །རིགས་བཞི་མཁའ་འགྲོ་རང་མདོག་གྲི་ཐོད་དང་། །ཁ་ཊྭཱྃ་དཀུར་བརྟེན་གཙོ་མོའི་གསང་གནས་ཧྲཱིཿའཁོར་བཞིའི་ས་བོན་འོད་འཕྲོས་ཨོ་རྒྱན་ནས། །གཙོ་འཁོར་སངས་རྒྱས་བྱང་སེམས་སྤྱན་དྲངས་གྱུར། །བཛྲ་ས་མཱ་ཛཿཧཱུྃ། ཆོས་དབྱིངས་སྤྲོས་བྲལ་བདེ་ཆེན་འདུས་མ་བྱས། །རང་སྣང་མ་འགགས་བཀའ་བརྒྱུད་བླ་མ་དང་། །ཡི་དམ་དཔའ་བོ་རྣལ་འབྱོར་མ་དཔལ་ཚོགས། །ཡེ་ཤེས་ཆོས་སྐྱོང་འཁོར་བཅས་གཤེགས་སུ་གསོལ། །ༀ་ཨེ་ཨཱ་རལླི་ཧོཿབཛྲ་ཝཱ་རཱ་ཧཱི་ས་པ་རི་ཝཱ་ར་ཛཿཧཱུྃ་བྃ་ཧོཿས་མ་ཡ་སྟྭཾ་དྱྀ་ཤྱ་ཧོ། ཕེཾ་ཕེཾ་ཕེཾ། ཞེས་སྤྱན་དྲངས་ལ། པདྨ་ཀ་མ་ལ་ཡ་སྟྭཾ། ༀ་ཤྲཱི་བཛྲ་ཝཱ་རཱ་ཧི་བཛྲ་ཨརྒྷཾ།

[Full Size]

པུཥྤེ། དྷུ་པེ། ཨཱ་ལོ་ཀེ། གནྡྷེ། ནཻ་བི་དྱེ། ཤབྡ་པྲ་ཏཱིཙྪ་ཨཱཿཧཱུྃ། པཉྩ་ཨ་མྲྀ་ཏ་ཨཱཿཧཱུྃ། ནང་མཆོད་ཕུལ་བ་དང་། འཁྱུད་རྒྱ་བྱས་ལ། མཱ་ཏངྒི་ཨཱཿཧཱུྃ། དེ་རྣམས་སྐུ་ལས་སྐུ་འཕྲོས་སོགས་བདག་བསྐྱེད་བཞིན་དང་། རྒྱས་གདབ་གྱུར། བར། མདུན་བསྐྱེད་ལ་དམིགས་ཏེ་བཟླས་པ་བྱ། དེ་ནས་བསྟོད་པ་ནི། བདེ་སྟོང་ཟུང་འཇུག་ལྷན་སྐྱེས་སྐུ། །རྣམ་པ་ཀུན་གྱི་མཆོག་ལྡན་མ། །དུས་གསུམ་རྒྱལ་རྣམས་བསྐྱེད་པའི་གཞི། །རྡོ་རྗེ་བཙུན་མོར་ཕྱག་འཚལ་བསྟོད། །ཕྱི་ནང་གི་མཆོད་པ་རྣམས་འབུལ་བ་ནི། ཡན་ལག་བརྒྱད་ལྡན་ཡིད་འོང་མཆོད་ཡོན་དང་། །ཆུ་དང་ཐང་སྐྱེས་ལྷ་ཡི་མེ་ཏོག་ཚལ། །སྤོས་ངད་ལྡང་བའི་སྤྲིན་ཆེན་དྲྭ་བ་མཛེས། །སྣང་གསལ་ཉི་ཟླའི་རང་བཞིན་ཅིར་ཡང་འཚེར། །དྲི་ཆབ་བསུང་ཞིམ་རླབས་ཕྲེང་ཆལ་ཆིལ་གཡོ། །རོ་བརྒྱ་ལྡན་པའི་བཤོས་གཙང་ཚར་དུ་དངར། །རྒྱུད་མངས་རོལ་མོའི་བྱེ་བྲག་སྲིད་གསུམ་ལྡིར། །རྣལ་འབྱོར་མ་མཆོག་འཁོར་དང་བཅས་ལ་འབུལ། །སོ་སོའི་སྔགས་རྒྱ་དང་བཅས། ༀ་ཤྲཱི་བཛྲ་ཝཱ་རཱ་ཧཱི་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། དེ་བཞིན་དུ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤབྡ། བར་སྔར་བཞིན་འགྲེའོ། །རྡོ་རྗེའི་གཟུགས་སྒྲ་དྲི་རོ་རེག་བྱ་ཆོས། །ཤ་ཆེན་གསུར་དུད་ཞུན་མེ་བྱང་སེམས་རྒྱུན། །རྡོ་རྗེ་དྲི་ཆེན་དྲི་ཆུ་ཅང་ཏེའུ། །མྱོས་བྱེད་

[Full Size]

བཞི་ལྡན་དམ་རྫས་ཨ་མྲྀ་ཏ། །མཚན་བཟང་བདེ་སྐྱོང་ཀ་པཱ་ལར་གཏམས་ནས། །ཐབས་ཤེས་དབྱེར་མེད་ངང་དུ་མཆོད་བཞེས་རོལ། །བླ་མེད་གྲུབ་མཆོག་ཡེ་ཤེས་དངོས་ཀུན་སྩོལ། །བཛྲ་ཝཱ་རཱ་ཧཱི་ༀ་ཨཱཿཧཱུྃ། དེ་བཞིན་དུ། བུདྡྷ་ཌཱ་ཀི་ནཱི་ཡེ། བཛྲ༴ རཏྣ༴ པདྨ༴ ཀརྨ༴ བི་ཤྭ༴ ལོ་ཀ་ཌཱ་ཀི་ནཱི་ཡེ་ༀ་ཨཱཿཧཱུྃ། སོགས་ཀྱིས་ནང་མཆོད་འབུལ་བ་དང་། བཀའ་བརྒྱུད་བླ་མ་ཡི་དམ་ཆོས་སྐྱོང་དང་། །འགྲོ་ཀུན་ལྷར་གསལ་ཞལ་དུ་ༀ་ཨཱཿཧཱུྃ། ཞེས་འབུལ། དེ་ནས་དབང་ལེན་པར་སྤྲོ་ན། ལས་བུམ་གྱིས་ཁྲུས་བྱས་ལ། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་དང་། ༀ་མཎྜལ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། གིས་མཎྜལ་དང་གསོལ་གདབ་ནི། བདག་ནི་འཁོར་བར་སྐྱོ་ཞིང་ཐར་པའི་ལམ། །འཇུག་འདོད་ལགས་ན་དམ་པས་རྗེས་འཛིན་གསོལ། །འདི་རིགས་ལན་གསུམ་མམ་གཅིག་བྱ། དགའ་ཆེན་སྟོན་པ་ཁྱོད་གཅིག་པུ། །བདག་ལ་དམ་ཚིག་དེ་ཉིད་དང་། །བྱང་ཆུབ་སེམས་དང་སྐྱབས་གསུམ་སྩོལ། །མགོན་པོས་ཐར་པའི་གྲོང་གཞུག་འཚལ། །ལན་གསུམ། རྒྱུན་བཤགས་ནི། མཆོག་གསུམ་སྐྱབས་མཆི་སྡིག་ཀུན་བཤགས། །དགེ་ལ་ཡི་རང་བྱང་སེམས་བཟུང་། །གཞན་ཕན་སེམས་བསྐྱེད་འགྲོ་དོན་གཉེར། །བྱང་ཆུབ་སྤྱོད་བཞིན་སངས་རྒྱས་ཤོག །

[Full Size]