སྒྲོལ་མ་ཕྱག་འཚལ་ཉེར་གཅིག་གི་ཟིན་བྲིས་མཐོང་བ་དོན་ལྡན་བཞུགས།
སྒྲོལ་མ་ཕྱག་འཚལ་ཉེར་གཅིག་གི། །ཟིན་བྲིས་མཐོང་བ་དོན་ལྡན་བཞུགས། །སྭ་སྟི། འཕགས་མ་ཉེར་གཅིག་དཀྱིལ་ཆོག་དུས་ཕྱིས་འདིར། །སྒྲུབ་དང་མཆོད་པའི་སྲོལ་རྒྱུན་དབེན་པས་ན། །བསླབ་གསུམ་མངོན་མཐོ་སྟོང་སྤྲུལ་ཕུན་ཚོགས་བརྟན། །རྣམ་དག་མོས་བློས་ཀུན་བསླང་ལྷ་རྫས་དང་། །འཕགས་མའི་སྐུ་བརྙན་ཛམྦུ་ཆུ་གསེར་ལས། །གྲུབ་པ་དང་བཅས་བསྐུལ་བས་དོན་ཡོད་ཕྱིར། །གཞུང་མཐུན་གོང་མ་དག་གིས་གསུང་རྒྱུན་གྱིས། །བརྒྱན་པའི་ཆོ་ག་སྦྱོར་དངོས་ཚུལ་ཙམ་བཀོད། །བདག་ལྟ་སོ་སྐྱེའི་ཅལ་སྒྲོག་འབྲས་མེད་པར། །དེས་ན་གཟུར་གནས་ཡིད་བརྟན་དཀའ་གྱུར་མོད། །འོན་ཀྱང་འཕགས་མཆོག་འཇིག་རྟེན་དབང་སྲས་མོ། །སྤྲུལ་བསྒྱུར་ཉེར་གཅིག་སྒྲུབ་ཐབས་འདི་དག་རྣམས། །ཡང་དག་རྫོགས་སངས་རྒྱས་ཀྱི་རྒྱུད་གསུངས་བཞིན། །ནཱ་གཱ་ཱརྫུ་ུན་ཨ་ཏི་ཤ་ལ་སོགས། །འཕགས་
ཡུལ་པཎ་གྲུབ་རིམ་གཉིས་རྟེན་ཐོབ་གཞི། །དཀྱིལ་ཆོག་རྒྱ་གཞུང་བོད་འདིར་སྔ་རབས་སུ། །ས་སྐྱ་དཀར་པོ་རྣམ་གསུམ་ཐུགས་དམ་མཐིལ། །གཞན་ཡང་རིས་མེད་མཁས་གྲུབ་སྤྱི་ནོར་ཏེ། །དར་རྒྱས་ཆེ་ལ་བྱིན་རླབས་ཡིད་ཆེས་གནས། །རྩོད་མེད་ལྷ་སྔགས་མཆོག་གྱུར་གཞིིར་གྲུབ་པ། །སྨོས་མ་དགོས་པར་བསྟན་ཅིང་ཆོ་ག་ཡི། །ཕྱག་བཞེས་རྒྱུན་བཟང་གཙོ་བོར་ཡིད་བཞིན་འཁོར། །བཀོད་འདི་རྒྱལ་དབང་དགུ་པའི་བཞེད་པ་སྟེ། །སྒྲོལ་དཀར་རྒྱུད་སྡེ་བཞི་ཀར་གཏོགས་ཅེས་གསུངས། །དེ་ན་རྟེན་འབྱུང་རྩ་སྒྲུབ་གཙོར་མཛད་བཞིན། །ཉེར་གཅིག་བླ་མེད་ཁོང་དུ་བཀྲལ་བ་དག །པཎ་ཆེན་ཉི་སྦས་ལུགས་ཏེ་གྲུབ་ཆེན་རྗེ། །མི་ཏྲ་ཛོ་ཀིའི་ཐུགས་དམ་བརྒྱ་རྩར་གྲགས། །རྗེ་བཙུན་ཏཱ་ར་ནཱ་ཐས་ཀུན་བཏུས་ཀྱི། །སྒྲུབ་ཐབས་རིན་འབྱུང་སོགས་དང་འབྲེལ་བ་ཡི། །ལྷ་སྔགས་ཞལ་ཕྱག་དབྱེ་ཚུལ་ཇི་བཞིན་པར། །བཀོད་ལ་ཟུར་ཙམ་ཁྱད་པར་སྣང་བ་ནི། །དེ་ཡང་དགུ་པར་སེང་ལྡེང་ནགས་སྒྲོལ་ལྗང་། །ཕྱག་གཡས་སྐྱབས་སྦྱིན་དང་ནི་རྒོལ་འཇོམས་སྒྲོལ། །ན་བཟའ་སེར་བསྣམས་ཞེས་པ་སྟོད་གཡོགས་ཚུལ། །རབ་རྒྱས་སྒྲོལ་མ་གླེགས་བམ་ཨུཏྤལ་མཚན། །བཀྲ་ཤིས་སྣང་སྒྲོལ་ལྕགས་ཀྱུ་གཉིས་བསྣམས་སོགས། །ཡིག་ཆ་ཁུངས་ལྡན་རྣམས་སུ་གསལ་བ་བཞིན། །དེ་ལྟར་འདུ་བགྱིས་འཁྲུལ་དྲིས་མ་གོས་སྙམ། །འདི་ཉིད་སྒྲུབ་
པར་སྤྲོ་ན་དམིགས་རྟེན་དུ། །འཕགས་མའི་སྐུ་དང་མཆོད་པ་གཏོར་མ་བཤམས། །གཙང་སྦྲ་དཀར་སྤྱད་དང་བཅས་མཚམས་བཅད་ལ། །དང་པོ་སྔོན་འགྲོ་ནས་བཟུང་སྲུང་འཁོར་བསྒོམ། །མཆོད་བྱིན་བརླབ་དང་སྐྱབས་སེམས་ཚོགས་ཞིང་མཆོད། །བདག་ལྷར་བསྐྱེད་དང་དམ་ཡེ་བསྲེ་དབང་བསྐུར། །རྒྱས་གདབ་མཆོད་བསྟོད་བྱ་ཞིང་འདི་སྐབས་སུ། །ཕྱག་འཚལ་ཉེར་གཅིག་རྗེས་ལ་བཞག་བཟླས་དམིགས། །གསལ་གདབ་བསྟེན་པ་ཚད་སྦྱར་འབུམ་ཕྲག་བཅུའི། །གྲངས་བསྙེན་ཐེམ་ཞིང་བྱེ་བ་བཟླས་པ་ཡིས། །ལས་ཀུན་འགྲུབ་གསུངས་སྤེལ་ཚིག་ཚེ་ཤམ་ཅན། །བརྒྱ་རྩ་བརྒྱད་བཟླས་སྤྱི་བོའི་འོད་དཔག་མེད། །ཕྱག་གིས་ལྷུང་བཟེད་བདུད་རྩི་ཁོལ་བབས་ནས། །རང་ལུས་གང་དམིགས་འཆི་མེད་འགྲུབ་པར་བསམ། །ལས་སྔགས་སྐབས་བསྟུན་བཟླས་ལ་ཐུན་མཚམས་སུ། །འོག་ནས་འབྱུང་བཞིན་གཏོར་འབུལ་མཆོད་པའི་རྗེས། །བསྟོད་ཕྱག་ཉེར་གཅིག་གཉིས་གསུམ་བདུན་གྱི་གྲངས། །ཐུན་རྣམས་སོ་སོར་གྲངས་ངེས་བརྗོད་དེ་ཡང་། །རང་གཞན་བཅུད་ཀྱི་སེམས་ཅན་དང་སྣོད་ཀྱི། །འབྱུང་ལྔའི་ཁམས་ལས་རང་སྒྲ་སྒྲོགས་ནས་སུ། །ཕྱག་བསྟོད་ཕུལ་བསམ་མདུན་རྟེན་ལྷའི་ཕྱག་གཡས། །མཆོག་སྦྱིན་རང་ངམ་དམིགས་བྱའི་སྤྱི་བོར་བཞག །བྱིན་རླབས་གང་གསོལ་འབད་མེད་ལྷུན་གྲུབ་
མོས། །དེ་ནས་ལྷ་དང་ལྷ་མིན་སོགས་འདོད་གསོལ། །ཡིག་བརྒྱས་ཁ་བསྐང་རྟེན་བཞུགས་བསྡུ་རིམ་བྱ། །ཟུང་འཇུག་སྐུར་སྣང་དགེ་བསྔོ་ཤིས་པ་བརྗོད། །དེ་བཞིན་ཐུན་བཅད་སྔོན་གཏོར་ཉིན་ལྟར་དུ། །མི་དགོས་མཆོད་པ་བྱིན་རླབས་ཕྱིན་དཀྱུས་མཚུངས། །བསྙེན་སྒྲུབ་གྲོལ་ཁར་སྤྲོ་ན་བུམ་མདུན་བསྐྱེད། །ལ་སོགས་གཞུང་ལྟར་བསྙེན་པའི་བཅུ་ཆ་ཡི། །ཁ་བསྐང་བྱ་ཚུལ་ཁོ་བོས་ཟིན་བཏབ་པ། །རྒྱལ་དབང་བཅུ་གསུམ་མཆོག་གིས་མཛད་སྒྲོལ་མ། །བཀྲ་ཤིས་དོན་འགྲུབ་རྒྱས་པའི་སྲེག་བླུགས་ཐབས། །དེར་གསལ་ལྷ་སྔགས་སྒྱུར་ཙམ་ཁྱད་པར་གདའ། །གཞན་ཡང་ཉེར་གཅིག་སོ་སོའི་སྒྲུབ་ལས་སྦྱོར། །བྱ་བར་འདོད་ན་པཎ་ཆེན་ཉེ་སྲས་ལུགས། །བཛྲེ་ཤྭ་རས་བཀྲལ་བ་དེས་མངོན་ཞིང། །ཚོགས་བསགས་སྒྲུབ་མཆོད་རིམ་པ་སྤྲོ་བ་ལ། །རྟེན་མཆོད་བཤམས་བཀོད་གཞུང་མཐུན་སྔོན་གཏོར་ནས། །བདག་བུམ་མདུན་བསྐྱེད་སོ་སོར་བསྟོད་ཕྱག་གྲངས། །ངེས་ཅན་བཟླས་པའི་གྲངས་ཀྱང་དེའི་རིགས་འགྲེ། །མཆོད་ཕྲེང་རྫོགས་ནས་དབང་གི་སྔོན་གཏོར་དང་། །སྲུང་འཁོར་བདག་འཇུག་ལ་སོགས་གཞུང་ལྟར་གྱི། ཁྲུས་ཆོག་དམིགས་བསལ་ཅན་ལས་འདིར་མི་བྱ། །དབང་ཆོག་མི་ཏྲའི་བཞེད་ལྟར་བཀོད་རང་གཞན། །དོན་ཆེན་ཕན་ཡོན་ཐོབ་ཕྱིར་རྒྱུད་སྡེའི་གསུང་། །
བྱང་ཆུབ་སྙིང་པོའི་འབྲས་གང་སྨིན་པའི་གཞི། །དེ་ལྟར་ཡོངས་ལ་སྨན་ཅིང་ཕན་བདེའི་ཆེད། །པདྨ་ཉིན་བྱེད་དབང་པོས་བཀོད་པ་སྟེ། །འགལ་འཁྲུལ་མཐོལ་བཤགས་དགེ་གང་མཆིས་པ་དེས། །རྒྱལ་བསྟན་ཡུན་གནས་བསྟན་འཛིན་ཞབས་པད་བརྟན། །དགེ་འདུན་སྡེ་རྒྱས་འགྲོ་རྣམས་བདེ་སྐྱིད་ལྡན། །སྲིད་ཞི་ལས་གྲོལ་ཐར་ཆེན་མཆོག་ཐོབ་ཤོག །སརྦ་མངྒ་ལྃ།། །།