སྒྲོལ་མ་ཕྱག་འཚལ་ཉི་ཤུ་རྩ་གཅིག་གི་བསྟོད་པའི་རྣམ་བཤད་གསལ་བའི་འོད་ཟེར།
སྒྲོལ་མ་ཕྱག་འཚལ་ཉི་ཤུ་རྩ་གཅིག་གི་བསྟོད་པའི་རྣམ་བཤད་གསལ་བའི་འོད་ཟེར་ཞེས་བྱ་བ་བཞུགས་སོ། །
ན་མོ་བུདྡྷཱ་ཡ། བསྟོད་པ་འདི་ལ་དོན་གཉིས་ཏེ། བསྟོད་པ་དངོས་དང་ཕན་ཡོན་ནོ། །དང་པོ་ལ་གསུམ་སྟེ། སྐུའི་རྣམ་པས་ལོངས་སྐུའི་སྒོ་ནས་བསྟོད་པ་དང་། ཆོས་སྐུའི་སྒོ་ནས་བསྟོད་པ་དང་། ཕྲིན་ལས་ཀྱི་སྒོ་ནས་བསྟོད་པའོ། །དང་པོ་ལ་གསུམ། མཚན་གྱི་སྒོ་ནས་ལོ་རྒྱུས་བསྟན་པ་དང་། སྐུའི་རྣམ་པ་དང་། རྒྱན་དང་ཆ་ལུགས་སོ། །བར་མ་གཉིས་ལ། ཞི་བའི་སྐུའི་སྒོ་ནས་བསྟོད་པ་དང་། ཁྲོ་མོའི་སྐུའི་སྒོ་ནས་བསྟོད་པའོ། །དང་པོ་ལ་གསུམ། འོད་ཟེར་གྱི་སྒོ་ནས་དང་། ཕྱག་མཚན་དང་ཡོན་ཏན་གྱི་སྒོ་ནས་དང་། སངས་རྒྱས་དང་བྱང་ཆུབ་སེམས་དཔས་བཀུར་བའི་སྒོ་ནས་བསྟོད་པའོ། །ཁྲོ་མོའི་སྐུའི་སྒོ་ནས་བསྟོད་པ་ལ་གསུམ། མཐུའི་སྒོ་ནས་དང་། འཇིག་རྟེན་པའི་ཆེན་
པོ་རྣམས་ཀྱི་བསྟོད་པའི་སྒོ་ནས་དང་། ཕྲིན་ལས་ཀྱི་སྒོ་ནས་བསྟོད་པའོ། །དེ་ལ་གཉིས། ཐུན་མོང་གི་ཕྲིན་ལས་དང་། ཐུན་མོང་མ་ཡིན་པའིི་སྒོ་ནས་བསྟོད་པའོ། །རྒྱན་དང་ཆ་ལུགས་ཀྱི་སྒོ་ནས་བསྟོད་པ་ལ་བཞི། ཞི་བའི་ཆ་ལུགས་ཀྱི་སྒོ་ནས་དང་། །དྲག་པོའི་ཆ་ལུགས་ཀྱི་སྒོ་ནས་དང་། ཐུན་མོང་གི་དབུ་རྒྱན་གྱི་སྒོ་ནས་དང་། དྲག་པོའི་ཆ་ལུགས་ཀྱི་སྒོ་ནས་བསྟོད་པའོ། །དང་པོ་ལ་གཉིས། ཕྱག་མཚན་དང་དབུ་རྒྱན་ནོ། །དྲག་པོའི་འོག་མ་ལ་གསུམ། འོད་ཟེར་དང་། བཞུགས་ཚུལ་དང་། །ཕྱག་མཚན་གྱི་སྒོ་ནས་བསྟོད་པའོ། །སྤྱི་དོན་གསུམ་པ་ཕྲིན་ལས་ཀྱི་སྒོ་ནས་བསྟོད་པ་ལ་དྲུགགསང་སྔགས་ཀྱི་སྒོ་ནས་དང་། དབང་གི་སྒོ་ནས་དང་། དུག་ཞི་བའི་སྒོ་ནས་དང་། བར་ཆད་སེལ་བའི་སྒོ་ནས་དང་། རིམས་ནད་སེལ་བའི་སྒོ་ནས་དང་། མི་མཐུན་པ་
སེལ་བའི་སྒོ་ནས་བསྟོད་པའོ། །སྤྱི་དོན་གཉིས་པ་ཕན་ཡོན་ལ་བཞི། བསམ་པའི་ཁྱད་པར་དང་། དུས་ཀྱི་ཁྱད་པར་དང་། ཕན་ཡོན་དངོས་རྒྱས་པར་བཤད་པ་དང་། གྲངས་ཀྱི་སྒོ་ནས་ཕན་ཡོན་བསྡུས་ཏེ་རྒྱས་པར་བཤད་པའོ། །དགེ་བསྙེན་གྲགས་པ་རྒྱལ་མཚན་གྱིས་སྦྱར་པའོ། །ༀ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། ཕྱག་འཚལ་སྒྲོལ་མ་ནི་འཁོར་བའི་དུཿཁ་ལས་སྒྲོལ་མ། མྱུར་མ་ནི་སེམས་ཅན་གྱི་དོན་ལ་མྱུར་མ། དཔའ་མོ་ནི་ཉོན་མོངས་པ་འཇོམས་པས་དཔའ་མོ། སྤྱན་ནི་སྐད་ཅིག་གློག་དང་འདྲ་མ། །ཞེས་པ་ནི། འོད་གསལ་བའི་དཔེའོ། །འཇིག་རྟེན་གསུམ་མགོན་ཆུ་སྐྱེས་ཞལ་གྱི། །ཞེས་པ་ནི། འཇིག་རྟེན་གསུམ་གྱི་མགོན་པོ་སྤྱན་རས་གཟིགས། ཆུ་སྐྱེས་ཞལ་གྱི་ཞེས་པ་ནི། དེའི་སྤྱན་ཆབ་ལས་བྱུང་བའི། པད་མའམ་ཨུཏྤལ། གེ་སར་བྱེ་བ་ལས་ནི་བྱུང་མ། །ཞེས་པ་ནི། པདྨ་ཁ་བྱེ་བ་ལས་སྒྲོལ་མ་བྱུང་པའོ། །ཕྱག་འཚལ་སྟོན་ཀའི་ཟླ་བ་ཀུན་ཏུ། །ཞེས་པ་ནི། འོད་དཀར་བའི་དཔེའོ། །གང་བ་ནི་ཉ་གང་བ་ལྟ་བུའོ། །བརྒྱ་ནི་བརྩེགས་པའི་ཞལ་མ། ཞེས་པ་ནི། ཟླ་བ་ཉ་གང་བ་དེ་ཡང་བརྒྱ་ཕྲག་དུ་མ་སྤུངས་པ་ཙམ་གྱི་ཞལ་ལོ། །སྐར་མ་སྟོང་ཕྲག་ཚོགས་པ་རྣམས་ཀྱིས། །རབ་ཏུ་ཕྱེ་བའི་འོད་རབ་འབར་མ། །ཞེས་པ་ནི། དེ་གཉིས་འོད་ཟེར་དཔག་ཏུ་མེད་པ་འཕྲོ་བའི་དཔེའོ། །ཕྱག་འཚལ་གསེར་སྔོ་ནི་ཁ་དོག་གསེར་བཙོ་མའི་འོད་ལྟར་གསལ་བའོ། །ཆུ་ནས་སྐྱེས་ཀྱི་ཞེས་པ་ནི། ཕྱག་མཚན་
པད་མའོ། །པདྨས་ཕྱག་ནི་རྣམ་པར་བརྒྱན་མ། །ཞེས་པ་ནི། ཕྱག་གཡོན་ན་པདྨ་བསྣམས་པའོ། །སྦྱིན་པ་ནི་སྦྱིན་པའི་ཕ་རོལ་དུ་ཕྱིན་པའོ། །བརྩོན་འགྲུས་ནི་བརྩོན་འགྲུས་ཀྱི་ཕ་རོལ་དུ་ཕྱིན་པའོ། །དཀའ་ཐུབ་ནི་ཚུལ་ཁྲིམས། ཞི་བ་ནི་ཉོན་མོངས་པ། བཟོད་པ་ནི་བཟོད་པའི་ཕ་རོལ་དུ་ཕྱིན་བའོ། །བསམ་གཏན་ནི་བསམ་གཏན་གྱི་ཕ་རོལ་དུ་ཕྱིན་པའོ། །སྤྱོད་ཡུལ་ཉིད་མ་ནི་ཤེས་རབ་སྟེ། ཕ་རོལ་ཏུ་ཕྱིན་པ་དྲུག་པོ་དེ་སྤྱད་པ་ལས་སྒྲོལ་མའི་སྐུ་ཐོབ་སྟེ། དེ་མཚན་པ་ལས་ཨུཏྤལ་མཚོན་པའོ། །ཕྱག་འཚལ་དེ་བཞིན་གཤེགས་པའི་གཙུག་ཏོར། །ཞེས་པ་ནི། དེ་བཞིན་གཤེགས་པ་ཐམས་ཅད་ཀྱི་དབུའི་གཙུག་ཏོར་ལྟ་བུའོ། །མཐའ་ཡས་རྣམ་པར་རྒྱལ་བ་སྤྱོད་མ། །ཞེས་པ་ནི། བདུད་དང་དགྲ་ལ་སོགས་པ་ཕྱིར་རྒོལ་བ་ཐམས་ཅད་ལས་རྣམ་པར་རྒྱལ་བར་སྤྱོད་པའོ། །མ་ལུས་ཕ་རོལ་ཕྱིན་པ་ཐོབ་པའི། །ཞེས་པ་ནི། ས་བཅུ་མ་ལུས་པའི་ངོ་བོ་ཕ་རོལ་ཕྱིན་པ་བཅུ་ཐོབ་པའོ། །རྒྱལ་བའི་སྲས་ཀྱིས་ཤིན་ཏུ་བརྟེན་མ། །ཞེས་པ་ནི། རྒྱལ་བའི་སྲས་ནི་བྱང་ཆུབ་སེམས་དཔའ་ཐམས་ཅད་དོ། །ཤིན་ཏུ་བརྟེན་མ་ཞེས་པ་ནི། དེ་རྣམས་ཀྱིས་ཕུད་དུ་ཁུར་བའོ། །ཕྱག་འཚལ་ཏུཏྟཱ་ར་ཧཱུྃ་ཡི་གེས། །ཞེས་པ་ནི། ཏུཏྟཱ་རེ་ཧཱུྃ་ཞེས་སྔགས་སོ། །ཡི་གེ་ཞེས་པ་སྔགས་ཀྱི་ཡི་གེ་དེ་རྣམས་ཀྱི་མཐུ་དང་འོད་ཟེར་གྱིས་སོ། །འདོད་དང་ཕྱོགས་དང་ནམ་མཁའ་གང་མ། །ཞེས་པ་ནི་འདོད་ཁམས་
དང་གཟུགས་ཁམས་དང་གཟུགས་མེད་ཀྱི་ཁམས་གང་བའོ། །འཇིག་རྟེན་བདུན་པོ་ཞབས་ཀྱིས་མནན་ཏེ། །ཞེས་པ་འདོད་ཁམས་གྱི་འགྲོ་བ་ལྔ་དང་། གཟུགས་ཁམས་དང་གཟུགས་མེད་ཁམས་དང་བདུན་མནན་པའོ། །ལུས་པ་མེད་པར་འགུགས་པར་ནུས་མ། །ཞེས་པ་ནི། ལུས་པ་མེད་པ་ནི་སེམས་ཅན་གྱི་དོན་མ་ལུས་པར་བྱེད་པའོ། །འགུགས་པར་ནུས་མ་ནི། རྒྱལ་པོ་ལ་སོགས་དབང་དུ་སྡུད་ནུས་པའོ། །ཕྱག་འཚལ་བརྒྱ་བྱིན་མེ་ལྷ་ཚངས་པ། །རླུང་ལྷ་སྣ་ཚོགས་དབང་ཕྱུག་མཆོད་མ། །ཞེས་པ་ནི། ལྷའི་དབང་པོ་བརྒྱ་བྱིན་དང་། མེ་ལྷ་དང་ཚངས་པ་དང་། རླུང་ལྷ་དང་། དེ་རྣམས་ཀྱི་བདག་པོར་གྱུར་པ་དབང་ཕྱུག་ཆེན་པོས་ཞབས་ལ་མཆོད་པ་འབུལ་བའོ། །འབྱུང་པོ་རོ་ལངས་དྲི་ཟ་རྣམས་དང་། །གནོད་སྦྱིན་ཚོགས་ཀྱིས་མདུན་ནས་བསྟོད་མ། །ཞེས་པ་ནི་འབྱུང་པོ་ནི་ཚོགས་བདག་ལ་སོགས་པའོ། །རོ་ལངས་ནི་དབང་ཕྱུག་ཆེན་པོ་ལ་སོགས་པའོ། །དྲི་ཟ་ནི་ཟུར་ཕུད་ལྔ་པ་ལ་སོགས་པའོ། །གནོད་སྦྱིན་ནི་རྣམ་ཐོས་སྲས་ལ་སོགས་པའོ། །ཚོགས་ཀྱིས་ཞེས་པ་དེ་ལ་སོགས་པ་ལྷ་སྲིན་སྡེ་བརྒྱད་ཀྱིས་མདུན་ནས་བསྟོད་པའོ། །ཕྱག་འཚལ་ཏྲད་ཅེས་བྱ་དང་ཕཊ་ཀྱིས། །ཕ་རོལ་འཁྲུལ་འཁོར་རབ་ཏུ་འཇོམས་མ། །ཞེས་པ་ནི། དྲག་པོའི་གསུང་གིས་གཞན་གྱིས་བྱས་པའི་སྦྱོར་བ་ངན་པ་བཤིག་ཅིང་ཕྱིར་བཟློག་པའོ། །གཡས་བསྐུམ་གཡོན་བརྐྱང་ཞེས་པ་ནི་བཞུགས་ཚུལ་ལོ། །ཞབས་ཀྱིས་མནན་ཏེ། ཞེས་པ་ནི། གོང་དུ་བཤད་པའི་དོན་ཏོ། །མེ་འབར་འཁྲུགས་པ་ཤིན་ཏུ་འབར་མ། །
ཞེས་པ་ནི། མེ་འབར་བའི་དབུས་ན་བསྒྱིངས་ནས་བཞུགས་པའོ། །ཕྱག་འཚལ་ཏུ་རེ་འཇིགས་པ་ཆེན་མོས། །ཞེས་པ་ནི། ཏུ་རེའི་འཇིགས་པས་བདུད་ཐམས་ཅད་སེལ་བ་སྟེ། བདུད་སྐྲག་པར་བྱེད་པས་འཇིགས་པ་ཆེན་མོའོ། །བདུད་ཀྱི་དཔའ་བོ་རྣམ་པར་འཇོམས་མ། །ཞེས་པ་ནི། དཔའ་བོ་ནི་ཉོན་མོངས་པའི་བདུད་དོ། །དེ་བཅོམ་པས་གསུམ་པོ་ཞོར་ལ་འཇོམས་སོ། །ཆུ་སྐྱེས་ཞལ་ནི་ཁྲོ་གཉེར་ལྡན་མཛད། །ཞེས་པ་ནི། ཆུ་སྐྱེས་ཞལ་ནི། པདྨ་ཁ་བྱེ་བ་ལྟར་ཡིད་དུ་འོང་བའི་དཔལ་མོའི་ཞལ་ལོ། །ཁྲོ་གཉེར་ལྡན་མཛད་ནི། ཁྲོ་མོར་བཞུགས་པའོ། །དགྲ་བོ་ཐམས་ཅད་མ་ལུས་གསོད་མ། །ཞེས་པ་ནི། མི་མཐུན་པའི་ཕྱོགས་ཉོན་མོངས་པ་ལ་སོགས་པ་ཐམས་ཅད་གསོད་པའོ། །ཕྱག་འཚལ་དཀོན་མཆོག་གསུམ་མཚོན་ཕྱག་རྒྱའི། །སོར་མོས་ཐུགས་ཀར་རྣམ་པར་བརྒྱན་མ། །ཞེས་པ་ནི། གཡོན་པའི་ཕྱག་མཐེབ་སྲིན་གྱིས་པདྨ་ཐུགས་ཀར་བསྣམས་པས་བརྒྱན་པའོ། །སོར་མོ་གསུམ་བརྐྱངས་པ་ནི་དཀོན་མཆོག་གསུམ་མཚོན་པའི་བརྡའོ། །མ་ལུས་ཕྱོགས་ཀྱི་འཁོར་ལོས་བརྒྱན་པའི། །ཞེས་པ་ནི་གཡས་པས་མཆོག་སྦྱིན་མཛད་པའི་ཕྱག་མཐིལ་འཁོར་ལོས་བརྒྱན་པའོ། །རང་གི་འོད་ཀྱི་ཚོགས་རྣམས་འཁྲུག་མ། །ཞེས་པ་ནི། ཕྱག་གི་འཁོར་ལོ་ལས་འོད་ཟེར་འཕྲོས་པས་འོད་གཞན་ཟིལ་གྱིས་གནོན་པའོ། །ཕྱག་འཚལ་རབ་ཏུ་དགའ་བར་
བརྗིད་པའི། །དབུ་རྒྱན་འོད་ཀྱི་ཕྲེང་བས་སྤེལ་མ། །ཞེས་པ་ནི། རབ་ཏུ་དགའ་བའི་སེམས་ཅན་ཐམས་ཅད་ཀྱི་འདོད་པ་བསྐང་བ། བརྗིད་པ་ནི་གཞན་ཟིལ་གྱིས་གནོན་པའོ། །དབུ་རྒྱན་རིན་པོ་ཆེ་དུ་མའི་ཕྲེང་བས་མཛེས་པར་བྱས་པའོ། །བཞད་པས་རབ་བཞད་ཏུཏྟཱ་ར་ཡིས། །ཞེས་པ་ནི། སྔགས་ཀྱིས་བཞད་སྒྲ་སྒྲོགས་པའོ། །བདུད་དང་འཇིག་རྟེན་དབང་དུ་མཛད་མ། །ཞེས་པ་ནི། སྔགས་ཀྱི་བཞད་སྒྲ་དེས། བདུད་དང་འཇིག་རྟེན་དབང་དུ་མཛད་པའོ། །ཕྱག་འཚལ་ས་གཞི་སྐྱོང་བའི་ཚོགས་རྣམས། །ཞེས་པ་ནི། ཕྱོགས་སྐྱོང་བཅུའོ། །ཐམས་ཅད་འགུགས་པར་ནུས་པ་ཉིད་མ། །ཞེས་པ་ནི། ཅི་གསུང་ཉན་པའི་སྒོ་ནས་ཕོ་ཉ་བྱེད་པའོ། །ཁྲོ་གཉེར་གཡོ་བའི་ཡི་གེ་ཧཱུྃ་གིས། །ཞེས་པ་ནི། ཁྲོ་མོར་བཞུགས་པའི་ཐུགས་ཀ་ན་ཡི་གེ་ཧཱུྃ་གིས་མཚན་པའོ། །ཕོངས་པ་ཐམས་ཅད་རྣམ་པར་སྒྲོལ་མ། །ཞེས་པ་ནི། མི་མཐུན་པའི་ཕྱོགས་ཀྱིས་གཟིར་ཞིང་། མཐུན་པའི་ཕྱོགས་ཀྱིས་ཕོངས་པའི་སེམས་ཅན་ཐམས་ཅད་སྡུག་བསྔལ་ལས་བསྒྲལ་ནས་བདེ་བ་ལ་འགོད་པའོ། །ཕྱག་འཚལ་ཟླ་བའི་དུམ་བུས་དབུ་རྒྱན། །ཅེས་པ་ནི། ཚེས་གཅིག་ཟླ་བས་དབུ་བརྒྱན་པའོ། །བརྒྱན་པ་ཐམས་ཅད་ཤིན་ཏུ་འབར་མ། །ཞེས་པ་ནི། ཟླ་བ་དེ་ལས་འོད་ཟེར་འབར་བའོ། །རལ་པའི་ཁྲོད་ན་འོད་དཔག་མེད་ལས། །ཞེས་པ་ནི། རལ་པའི་གསེབ་ན་སྣང་བ་མཐའ་ཡས་ཀྱིས་དབུ་བརྒྱན་པའོ། །རྟག་པར་ཤིན་
ཏུ་འོད་ནི་མཛད་མ། །ཞེས་པ་ནི། སྣང་བ་མཐའ་ཡས་ཀྱིས་སེམས་ཅན་དོན་དུ་འོད་ཟེར་དཔག་ཏུ་མེད་པར་འགྱེད་པའོ། །ཕྱག་འཚལ་བསྐལ་པའི་མཐའ་མའི་མེ་ལྟར། །འབར་བའི་ཕྲེང་བའི་དབུས་ན་གནས་མ། །ཞེས་པ་ནི། བསྐལ་པ་མཐའ་མ་ཉི་མ་བདུན་ཤར་བའི་དུས་སུ་ུས་རྡོ་རི་བྲག་ཐམས་ཅད་མེ་ལྟར་འབར་ནས་འོང་བས། དེ་ལྟ་བུའི་དབུས་ན་བཞུགས་པའོ། །གཡས་བརྐྱང་གཡོན་བསྐུམ་ཀུན་ནས་བསྐོར་དགའི། །ཞེས་པ་ནི། བཞུགས་ཚུལ་སྔ་མ་ལས་བཟློག་པའོ། །དགྲ་ཡི་དཔུང་ནི་རྣམ་པར་འཇོམས་མ། །ཞེས་པ་ནི། མི་མཐུན་པ་ཐམས་ཅད་འཇོམས་པའོ། །ཕྱག་འཚལ་ས་གཞིའི་ངོས་ལ་ཕྱག་གི། །མཐིལ་གྱིས་བསྣུན་ཅིང་ཞབས་ཀྱིས་བརྡུང་མ། །ཞེས་པ་ནི། ཕྱག་གཡོན་པ་ས་ལ་བརྡབས་ནས་སྡིགས་མཛུབ་མཛད་པའོ། །ཁྲོ་གཉེར་ཅན་མཛད་ཡི་གེ་ཧཱུྃ་གིས། །ཞེས་པ་ནི། ངག་ཏུ་ཧཱུྃ་ཞེས་བརྗོད་པས་ཕྱག་གཡས་རྡོ་རྗེ་འཛིན་པ་དེ་ལས་འོད་ཟེར་འཕྲོས་པས་འགྲོ་བ་རིགས་བདུན་གྱི་གནས་བཀང་ནས། དེ་རྣམས་ཀྱི་བར་ཆད་ཐམས་ཅད་སེལ་བས་ན། རིམ་པ་བདུན་པོ་རྣམས་ནི་འགེམས་མ། །ཞེས་པའམ་ཡང་ན་ས་འོག་རིམ་པ་བདུན་ན་གནས་པའི་ཀླུ་དང་ལྷ་མིན་སོགས་དུམ་བུར་འཐོར་བར་མཛད་པའོ། །ཕྱག་འཚལ་བདེ་མ་དགེ་མ་ཞི་མ། །ཞེས་པ་ནི། བདེ་མ་ནི་ཟག་མེད་ཀྱི་བདེ་བ་དང་ལྡན་མ། དགེ་མ་ནི་བླང་བྱ་ཉོན་མོངས་པ་དང་བྲལ་
བས་དགེ་མ། ཞི་མ་ནི་སྡུག་བསྔལ་ཞི་བ་དེའི་ངང་ནས་སྤྱོད་པའོ། །མྱ་ངན་འདས་ཞི་སྤྱོད་ཡུལ་ཉིད་མ། །ཞེས་པ་ནི། རྟོག་པ་ཟད་པས་མྱ་ངན་འདས། སྡུག་བསྔལ་ཞི་བས་ཞི་བདེའི་ངང་ལ་སྤྱོད་པའོ། །སྭཱ་ཧཱ་ༀ་དང་ཡང་དག་ལྡན་པས། །སྡིག་པ་ཆེན་པོ་འཇོམས་པ་ཉིད་མ། །ཞེས་པ་ནི། བདག་ཆོས་སྐུའི་ངོ་བོས་ནི། གཞན་གྱི་སྤང་བྱ་ཉོན་མོངས་པ་འཇོམས་པའོ། །ཕྱག་འཚལ་ཀུན་ནས་བསྐོར་རབ་དགའ་བའི། །དགྲ་ཡི་ལུས་ནི་རབ་ཏུ་འགེམ་མ། །ཡི་གེ་བཅུ་པའི་ངག་ནི་བཀོད་པའི། །ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་པ་ཞི་བའི་སྔགས་སོ། །རིག་པ་ཧཱུྃ་ལས་སྒྲོལ་མ་ཉིད་མ། །ༀ་ན་མཿཧཱ་རེ་ན་མོ་ཧ་རི་ཧཱུྃ་ཧ་ར་སྭཱ་ཧཱ། ཞེས་པ་ཁྲོ་མོའི་སྔགས་སོ། །ཕྱག་འཚལ་ཏུ་རེའི་ཞབས་ནི་བརྡབས་པས། །ཧཱུྃ་གི་རྣམ་པའི་ས་བོན་ཉིད་མ། །ཞེས་པ་ནི། ཧཱུྃ་ལས་ཁྲོ་མོའི་སྐུར་བསྐྱེད་པའོ། །རི་རབ་མན་དྷཱ་ར་དང་འབིགས་བྱེད། །ཞེས་པ་ནི། སྟོང་གསུམ་གྱི་ཕྱི་རོལ་ན་རི་རབ་མན་དཱ་ར་བ་ཞེས་བྱ་བ་ཡང་ཡི་གེ་ཧཱུྃ་གི་འོད་ཟེར་གྱིས་འབིགས་པར་བྱེད་པའོ། །འཇིག་རྟེན་གསུམ་པོ་གཡོ་བ་ཉིད་མ། །ཞེས་པ་ནི། འདོད་ཁམས་གཟུགས་ཁམས་གཟུགས་མེད་ཁམས་གཡོ་བར་བྱེད་པའོ། །ཕྱག་འཚལ་ལྷ་ཡི་མཚོ་ཡི་རྣམ་པའི། །རི་དྭགས་རྟགས་ཅན་ཕྱག་ན་བསྣམས་མ། །ཞེས་པ་ནི། ཟླ་བའི་དཀྱིལ་འཁོར་ལྷའི་མཚོ་ལྟ་བུའི་ཟླ་བའི་དཀྱིལ་འཁོར་ཕྱག་ན་བསྣམས་པའོ། དེ་ཉོན་མོངས་པའི་དུག་སེལ་པའི་རྟགས་
སོ། །རི་དྭགས་རྟགས་ཅན་ཞེས་པ་ཟླ་བའོ། །ཏཱ་ར་གཉིས་བརྗོད་ཕཊ་ཀྱི་ཡི་གེས། །དུག་རྣམས་མ་ལུས་པར་ནི་སེལ་མ། །ཏཱ་ར་ཞེས་པའི་སྔགས་དེས་བརྟན་པ་དང་གཡོ་བའི་དུག་སེལ་བའོ། །ཕྱག་འཚལ་ལྷ་ཡི་ཚོགས་རྣམས་རྒྱལ་པོ། །ལྷ་དང་མི་འམ་ཅི་ཡིས་བསྟེན་མ། །ཞེས་པ་གཉིས་ནི་ལྷ་ཚོགས་དེ་རྣམས་ཀྱི་དཔོན་ནམ་མི་འམ་ཅི་ཡི་རྒྱལ་པོ་ལྗོན་པ་ལ་སོགས་པས་ཞབས་ལ་མཆོད་པའོ། །ཀུན་ནས་གོ་ཆ་དགའ་བའི་བརྗིད་ཀྱི། །ཞེས་པ་ནི། ལྷའི་སྐུ་དང་སྔགས་ཀྱི་གོ་ཆའི་ཚུལ་དུ་གནས་པའོ། །རྩོད་དང་རྨི་ལམ་ངན་པ་སེལ་མ། །ཞེས་པ་མུ་སྟེགས་ཀྱི་རྩོད་པ་དང་རྨི་ལམ་ངན་པ་སེལ་པའོ། །ཕྱག་འཚལ་ཉི་མ་ཟླ་བ་རྒྱས་པའི། །སྤྱན་གཉིས་པོ་ལ་འོད་རབ་གསལ་མ། །ཧ་ར་གཉིས་བརྗོད་ཏུཏྟཱ་རེ་ཡིས། །ཤིན་ཏུ་དྲག་པོའི་རིམས་ནད་སེལ་མ། །ཞེས་པ་ནི། ཉི་མ་ཟླ་བ་རྒྱས་པ་ནི། སྤྱན་གཡས་པ་ཟླ་བ་གཡོན་པ་ཉི་མས་མཚོན་པ་སྟེ་འོད་རབ་གསལ་མ་ནི་གོང་གི་ཉི་ཟླ་གཉིས་ལས་འོད་བྱུང་ཞིང་གསལ་བའོ། །ཧ་ར་གཉིས་བརྗོད་ཅེས་པ་ནི་ཞི་ཁྲོ་གཉིས་ཀྱིས་སྔགས་ཀྱི་གསུང་གིས་ཤིན་ཏུ་དྲག་པོའི་རིམས་ནད་ལ་སོགས་པ་སེལ་པའོ། །ཕྱག་འཚལ་དེ་ཉིད་གསུམ་རྣམས་བཀོད་པས། །ཞེས་པ་ནི། སྐུ་གསུང་ཐུགས་ལ་ༀ་ཨཱཿཧཱུྃ་གསུམ་བཀོད་པའོ། །ཞི་བའི་མཐུ་དང་ཡང་དག་ལྡན་
མ། །ཞེས་པ་ནི། ཉོན་མོངས་པ་ཞི་བའི་མཐུ་དང་ལྡན་པའོ། །གདོན་དང་རོ་ལངས་གནོད་སྦྱིན་ཚོགས་རྣམས། །ཞེས་པ་ནི། བར་དུ་གཅོད་པ་ཐམས་ཅད་ཞི་བའོ། །འཇོམས་པ་ཏུ་རེ་རབ་མཆོག་ཉིད་མ། །ཞེས་པ་ནི། ཡི་གེ་བཅུ་པའི་སྔགས་ཀྱི་མཐུས་མི་མཐུན་པའི་ཕྱོགས་ཐམས་ཅད་འཇོམས་པའོ། །རྩ་བའི་སྔགས་ཀྱི་བསྟོད་པ་འདི་དང་། །ཞེས་པ་ནི། ཞི་བ་དང་ཁྲོ་མོའི་བསྟོད་པ་འདི། ཕྱག་འཚལ་བ་ནི་ཉི་ཤུ་རྩ་གཅིག །གིས་བསྟོད་པ་འདི་རང་ངོ་། །ལྷ་མོ་ལ་གུས་ཡང་དག་ལྡན་པའི། །ཞེས་པ་ནི། ལུས་ངག་ཡིད་གསུམ་ལྷ་མོ་ལ། །བློ་ལྡན་གང་གིས་རབ་དང་བརྗོད་པས། །སྲོད་དང་ཐོ་རངས་ལངས་པར་བྱས་ཏེ། །ཞེས་པ་ནི། སྲོད་ཁྲོ་མོའི་སྐུ་དྲན་པ་དང་ཐོ་རངས་ཞི་བའི་སྐུ་དྲན་པའོ། །དྲན་པས་མི་འཇིགས་ཐམས་ཅད་རབ་སྟེར། །ཞེས་པ་ནི། ལྷའི་སྐུ་དྲན་པ་ཙམ་གྱིས་མི་འཇིགས་པ་སྦྱིན་པའོ། །སྡིག་པ་ཐམས་ཅད་རབ་ཏུ་ཞི་བ། །ཞེས་པ་ནི། དྲན་པ་ཙམ་གྱིས་སོ། །ངན་འགྲོ་ཐམས་ཅད་འཇོམས་པ་ཉིད་དོ། །ཞེས་པ་ནི། ངན་འགྲོའི་འབྲས་བུ་ཞི་བའོ། །རྒྱལ་བ་བྱེ་བ་ཕྲག་བདུན་རྣམས་ཀྱིས། །ཞེས་པ་ནི། བར་མ་ཆད་པར་བདག་ལ། མྱུར་དུ་དབང་ནི་བསྐུར་བར་འགྱུར་ལ། །འདི་ལས་ཆེ་བ་ཉིད་ནི་འཐོབ་ཅིང་། །ཞེས་པ་ནི་ཚེ་འདི་དང་། དེར་ཡང་མ་ཟད། སངས་རྒྱས་གོ་འཕང་མཐར་ཐུག་དེར་འགྲོ། །ཐུན་མོང་གི་འབྲས་བུའང་།
དེ་ཡི་དུག་ནི་དྲག་པོ་ཆེན་པོ། །གཏན་ལ་གནས་པའམ་གཞན་ཡང་འགྲོ་བ་ཞེས་པ་ནི། ནག་པོ་བརྩེགས་པ་སོགས་དང་། སྡིག་སྦྲུལ་སོགས་བརྟན་གཡོ་དུག་དྲག་པོ་ཆེན་པོ་རྣམས་སོ། །ཟོས་པ་དང་ནི་འཐུང་པ་ཉིད་ཀྱང་། །ཞེས་པ་ནི། དུག་ཟོས་པ་དང་ནི་འཐུང་པ་ཉིད་ཀྱང་ནི། དྲན་པས་རབ་ཏུ་སེལ་བ་ཉིད་འཐོབ་སྟེ། བསྟོད་པ་དང་ལྷ་དང་སྔགས་དྲན་པས་དུག་རྣམས་སེལ་ལོ། །གདོན་དང་རིམས་དང་དུག་གིས་གཟིརབའི། །རྒྱུ་དང་འབྲས་བུས་བསྡུས་པ་ནི། སྡུག་བསྔལ་ཚོགས་ནི་རྣམ་པར་སྤངས་ཏེ། །རང་ལ་གནས་པ་རྣམས་སྒྲོལ་མའི་རིགས་སྔགས་ཀྱི་མཐུས་སྤངས་པའོ། །སེམས་ཅན་གཞན་པ་རྣམས་ལ་ཡང་ངོ་། །ཞེས་པ་ནི། བདག་གི་དེ་བཞིན་དུ་སེམས་ཅན་གཞན་པ་རྣམས་ལའང་ཕན་པར་ནུས་སོ། །གཉིས་གསུམ་བདུན་དུ་མངོན་པར་བརྗོད་ན། །ཞེས་པ་ནི། བདག་དང་མདུན་ན་ལྷ་མོ་བསྟེན་པའི་ཕྱིར་ཅིས་ཀྱང་གདོན་ནོ། །བུ་འདོད་པས་ནི་བུ་ཐོབ་འགྱུར་ཞིང་། །ནོར་འདོད་པ་ནི་ནོར་རྣམས་ཉིད་འཐོབ། །འདོད་པ་ཐམས་ཅད་ཐོབ་པར་འགྱུར་ཏེ། །ཞེས་པ་ནི། མཆོག་དང་ཐུན་མོང་ཐམས་ཅད་འགྲུབ། བགེགས་རྣམས་མེད་ཅིང་སོ་སོར་འཇོམས་འགྱུར། །ཞེས་པ་ནི། ཟློས་བ་ལ་བར་ཆད་མེད་པས་བགེགས་རྣམས་མེད། སྤང་བྱ་དེ་དག་གཉེན་པོ་རེས་འཇོམས་པར་སོ་སོར་འགྱུར་རོ། །བཅོམ་ལྡན་
འདས་མ་སྒྲོལ་མ་ལ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ཆེན་པོས་བསྟོད་པ་གསུངས་པ། སློབ་དཔོན་འཕགས་པ་ཀླུ་སྒྲུབ་ནས་བརྒྱུད་པ། ལོཙྪ་བ་གཉན་གྱིས་བསྒྱུར་བ། རྗེས་བཙུན་ཆེན་པོ་གྲགས་པ་རྒྱལ་མཚན་གྱིས་གཏན་ལ་ཕབ་པའོ། །ཕྱག་འཚལ་ཉི་ཤུ་རྩ་གཅིག་གི་བསྟོད་པའི་རྣམ་པར་བཤད་པ་གསལ་བའི་འོད་ཟེར་ཞེས་བྱ་བ་རྫོགས་སོ།། །།