རབ་ཏུ་གནས་པའི་ཆོ་ག་མདོར་བསྡུས།
རབ་ཏུ་གནས་པའི་ཆོ་ག་མདོར་བསྡུས་བཞུགས་སོ། །
ན་མོ་རཏྣ་ཏྲ་ཡ་ཡ། རབ་གནས་མདོར་བསྡུས་ཅུང་ཟད་རྒྱས་པར་སྤྲོ་ན། རྟེན་གསར་པའི་དྲུང་མཆོད་པ་སྣ་ཚོགས་གང་འབྱོར་དང་། མཎྜལ་ཚོམ་བུས་བརྒྱན་པ་སོགས་བཀོད་ལ། ལས་བུམ་བཅའ་ཞིང་། གོས་ཟུང་འདག་ཆལ་སོགས་དང་། འཐོར་ནས། ཡུངས་ཀར། གུ་གུལ། སྦྱང་ཆས་རྣམས་བཅས་འདུ་བར་བྱས་ནས། དང་པོ་གསོལ་འདེབས་གང་འོས་དང། སངས་རྒྱས་ཆོས་དང་ཚོགས་སོགས་དང་། སེམས་ཅན་ཐམས་ཅད་བདེ་བ་དང་སོགས་ལན་གསུམ་རེ། དེ་ལྟར་སྐྱབས་སེམས་སྔོན་དུ་སོང་ནས། ལས་བུམ་བསྐྱེད་ཆོག་ནི། སྭ་བྷཱ་ཝས་སྦྱངས། ལས་བུམ་མི་དམིགས་སྟོང་པའི་ངང་ཉིད་ལས། །རིན་ཆེན་ལས་གྲུབ་མཚན་ཉིད་ཡོངས་རྫོགས་དབུས། །པདྨ་ཉི་མའི་སྟེང་དུ་ཧཱུྃ་ཡིག་
ལས། །ཁྲོ་བོ་བདུད་རྩི་འཁྱིལ་པ་སྐུ་ཡི་མདོག །ལྗང་སྔོན་ཕྱག་གཡས་རྡོ་རྗེའི་དབྱུག་པ་དང་། །གཡོན་པ་སྡིགས་མཛུབ་ཁྲོ་ཆས་ཡོངས་སུ་རྫོགས། །ཐུགས་ཀར་ཉི་དཀྱིལ་ལྟེ་བར་ཧཱུྃ་ཡིག་གི། །མཐའ་མར་སྔགས་ཀྱི་ཕྲེང་བས་བསྐོར་བར་གྱུར། །ༀ་བཛྲ་ཨ་མྲི་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཅེས་ཅི་ནུས་བཟླ། ཁྲོ་བོ་ཁྱེད་ཀྱིས་བགེགས་བཟློག་མཛད་ནས་ནི། །འོད་ཞུ་བདུད་རྩིའི་བུམ་པ་གང་པར་གྱུར། །སྙམ་དུ་བསམ། དེ་ནས་མེ་ཏོག་བྱིན་རླབས་ནི། འབྲུ་རྣམས་རྟེན་འབྲེལ་གྱི་ཡིག་འབྲུའི་རང་བཞིན་དུ་གྱུར། པར་བསམ་ལ། ༀ་ན་མོ་བུདྡྷ་ཡ། ན་མོ་དྷརྨཱ་ཡ། ན་མོ་སདྒྷ་ཡ། ༀ་ཡེ་དྷརྨ་སོགས་བརྒྱའམ་ཉེར་གཅིག་བཟླས་ལ།
བྱིན་རླབས་བྱ། ཡུངས་ཀར་ལ། ཡུངས་ཀར་ཁྲོ་བོའི་ཚོགས་ཀྱི་རང་བཞིན་དུ་གྱུར། ༀ་བཛྲ་ཨ་མྲ་ྀཏ༴སུམ་བྷ་ནི་སྦྲེལ་མ་བདུན་ནམ་ཉེར་གཅིག་བརྗོད་པར་ཕུས་གདབ། དེ་ནས་རྟེན་གསར་པ་རྣམས་ཀྱི་དྲུང་དུ་སྦྱོང་གཏོར་བཤམས་ལ། ༀ་ཨ་ཀཱ་རོ་ཡིས་བྱིན་བརླབས། ༀ་སརྦ་བིགྷྣན་ན་མཿསརྦ་སོགས་ཀྱིས་ཞི་སྦྱང། ༀ་སརྦ་བིགྷྣཱན་ན་མཿསརྦ་སོགས་དང་། སུམ་བྷ་ནི་སྦྲེལ་མས་ཞི་དྲག་ཕྱེད་མས་སྦྱང་བ་དང་མཐར། སྐུ་གསུང་ཐུགས་ཀྱི་རྟེན་རབ་ཏུ་གནས་པ་ལ་བར་དུ་གཅོད་པའི་གདོན་བགེགས་ཞི་དྲག་ཕྱེད་མས་སྦྱང་བར་འོས་པ་ཐམས་ཅད་གཏོར་མ་འདིས་ཚིམ་པར་གྱིས་ལ་རང་རང་གནས་སུ་སོང་ཤིག །གལ་ཏེ་མི་འགྲོ་བ་དེ་དག་རྡོ་རྗེ་མེ་ལྕེས་བརླག་པར་འགྱུར་རོ། །ཞེས་ཀྱང་བརྗོད་དེ་ཕྱིར་བཏང་། དེ་ནས་དྲག་པོས་སྦྱོང་བ་ནི། ལྷ་ཡི་ང་རྒྱལ་དང་ལྡན་པས། རང་གི་ཐུགས་ཀའི་ས་བོན་གྱི་འོད་ཟེར་གྱིས་ཁྲོ་བོའི་ཚོགས་དཔག་ཏུ་མེད་པ་སྤྱན་དྲངས་པར་གྱུར། དྲིལ་སྟབས་དབྱངས་དང་བཅས། ཧཱུྃ། ཡེ་ཤེས་བསྐལ་པའི་མེ་ལྟར་འབར་བའི་འོད། །མ་རིག་འདོད་པའི་མུན་ཁམས་ཐམས་ཅད་བསྲེགས། །ཞེ་སྡང་གཤིན་རྗེའི་འཇིགས་པ་ཐམས་ཅད་འཇོམས། །དཔའ་བོ་ཆེན་པོའི་དཔའ་མཚན་སྟག་ལྤགས་ཅན། །ལོག་འདྲེན་སྲིན་པོའི་མཐའ་གནོན་དགྲ་འདུལ་བ། །རིག་པའི་རྒྱལ་པོ་ཁྲོ་བོ་བཞུགས་སུ་གསོལ། །ལོག་འདྲེན་འདུལ་བའི་སླད་དུ་སྤྱན་འདྲེན་ན། །འགྲོ་བའི་དོན་དུ་མཆོད་ཕྱིར་གཤེགས་སུ་གསོལ། །བཛྲ་ས་མ་
ཛཿༀ་བཛྲ་མ་ཧཱ་ཀྲོ་དྷ་རཱ་ཛ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། པཱ་དྱཾ༴པུཥྤེ༴ཧཱུྃ། ཆོས་ཉིད་སྟོང་པ་གཉིས་མེད་ངང་ཉིད་ལས། །འཇིག་རྟེན་སྤྱོད་པའི་ཚུལ་ཡང་མི་སྤོང་ཞིང་། །ཐབས་ལ་མཁས་པས་འཇིགས་བྱེད་སྐུར་སྟོན་པ། །ཁྲོ་ཆེན་འབར་བའི་ཚོགས་ལ་ཕྱག་འཚལ་ལོ། །ཡེ་ཤེས་ཞི་བའི་ངང་ལས་མ་གཡོས་ཀྱང། །སྐུ་ཡི་ཆ་ལུགས་ཟ་བྱེད་རྔམས་སྟབས་ཅན། །གསུང་གི་ང་རོ་འབྲུག་སྟོང་ལྡིར་བའི་སྒྲས། །མ་ལུས་དབང་དུ་སྡུད་ལ༴ལྷག་པའི་ཡེ་ཤེས་རོལ་པ་སྟོན་མཛད་ཅིང་། །བསྡིགས་པའི་མཚོན་ཆ་སྣ་ཚོགས་ཕྱག་ན་བསྣམས། །ཉོན་མོངས་དུག་ཆེན་རྩད་ནས་འཇོམས་མཛད་པ། །སྦྲུལ་གདུག་རྒྱན་གྱིས་བརྒྱན་ལ༴བསྐལ་པའི་མེ་ལྟར་འབར་བའི་ཀློང་དཀྱིལ་ནས། །དཔའ་བོའི་སྟངས་སྟབས་བརྐྱང་བསྐུམ་ཚུལ་དུ་བཞུགས། །ཉི་ཟླ་འབར་བའི་སྤྱན་གྱིས་སྡང་མིག་གིས། །བགེགས་དཔུང་བསྲེགས་པར་མཛད་ལ༴གཏུམ་ཆེན་དུས་མཐའི་མེ་ལྟར་གཟི་བརྗིད་འབར། །གློག་སྟོང་འགྱུ་འདྲའི་ཁྲོ་གཉེར་མཆེ་བ་གཙིགས། །རྔམས་པའི་ང་རོ་འབྲུག་སྒྲ་སྟོང་བཞིན་སྒྲོག །ཁྲོ་རྒྱལ་བགེགས་ཚོགས་འདུལ་ལ༴ཧཱུྃ། འཇིགས་པའི་ཧཱུྃ་སྒྲ་ངེས་སྒྲོགས་ཅན། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་
དགྲ་ལ་ཕྱག་འཚལ་ལོ། །ཧཱུྃ། དཀྱིལ་འཁོར་ཆེན་པོའི་ས་གཞི་ལ་གནས་པའི། །ལྷ་ལ་སོགས་པའི་བགེགས་ཚོགས་ཀུན་ཉོན་ཅིག །ང་ནི་གནས་འདིར་རབ་ཏུ་གནས་པར་བྱེད། །ཁྱོད་རྣམས་འདི་ནས་གཞན་དུ་འགྲོ་བར་གྱིས། །གལ་ཏེ་ང་ཡི་བཀའ་ལས་འདའ་བྱེད་ན། །ཡེ་ཤེས་ཅན་གྱི་རྡོ་རྗེ་འབར་བ་ཡིས། །མགོ་བོ་ཚལ་པ་བརྒྱ་ནི་འགས་འགྱུར་ཞིང་། །བགེགས་རྣམས་བརླག་པར་འགྱུར་བ་གདོན་མི་ཟ། །ནས་བཀའ་བསྒོས་ནས། ༀ་བཛྲ་ཨ་མྲི་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། སུམ་བྷ་ནི་སོགས་བརྗོད་ཅིང་རྟེན་གུ་གུལ་གྱིས་བདུག །ཡུངས་ཀར་གྱིས་བྲབ་ལ་བགེགས་བསྐྲད་བྱ། ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། སྲུང་འཁོར་བསྒོམ། དེ་ནས་སྡིག་སྦྱངས་ནི། སྙིང་ཁར་ཀཾ་ལས་སྡིག་སྒྲིབ་ཀྱི་ངོ་བོ་སྡིག་པའི་གཟུགས་སུ་གྱུར་པ་ལྟེ་བར་ཧཱུྃ་ལས་རྡོ་རྗེ་གནོད་སྦྱིན་དུ་གྱུར་པའི་སྣ་སྒོའི་ལམ་ནས་དེད་ཅིང་མདུན་གྱི་ཏིལ་ལ་ཐིམ་པར་གྱུར། ༀ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཁ་ཁ་ཁཱ་ཧི་ཁཱ་ཧི། སརྦ་པ་པཾ་ད་ཧ་ན་བྷསྨིན་ཀུ་རུ་ཧཱུྃ་ཕཊ་སྭཱ་ཧཱ། གཡས་སུ་ཡེ་ཤེས་ཀྱི་མེར་བསྲེག །གཡོན་དུ་རྒྱ་མཚོ་ཆེན་པོར་དོར་བས་བྱང་ཞིང་དག་པར་གྱུར། ཅེས་བརྗོད་ལ་ཕྱིར་དོར། དེ་ནས་རྟེན་རྣམས་ལ་ལས་བུམ་གྱི་ཆུས་བསངས་ལ། ཨ་མྲྀ་ཏ་སོགས། སྭ་བྷ་ཝས། སྟོང་པའི་ངང་ལས་རྟེན་རྣམས་སྐད་ཅིག་གིས། །སེང་གེའི་ཁྲི་མཆོག་མཐོ་ཞིང་རྒྱ་ཆེའི་སྟེང་། །པད་ཟླའི་གདན་ལ་
བསྟན་པའི་བདག་པོ་མཆོག །གསེར་སྦྱངས་བཙོ་མའི་མདོག་ལས་ལྷག་པའི་མཆོག །མཚན་བཟང་སོ་གཉིས་དཔེ་བྱད་བརྒྱད་ཅུས་སྤྲས། །ཕྱག་གཡས་ས་གནོན་གཡོན་པས་མཉམ་བཞག་མཛད། །ངུར་སྨྲིག་རྣམ་གསུམ་ན་བཟའི་རྒྱན་གྱིས་མཛེས། །འོད་ཀྱིས་སྟོང་གསུམ་ཁྱབ་པ་དེའི་དཔྲལ་བར། །ༀ་དང་མགྲིན་པར་ཨཱཿསྟེ་ཐུགས་ཀར་ཧཱུྃ། །གིས་མཚན་དེ་ལས་འོད་འཕྲོས་ཡེ་ཤེས་སེམས། །ཐོགས་མེད་སྤྱན་དྲངས་བཛྲ་ས་མ་ཛཿདེ་ནས་ཐམས་ཅད་འགྲེང་སྟེ་གུས་པ་ཆེན་པོས་སྤོས་རོལ་དང་བཅས་ཏེ། མ་ལུས་སེམས་ཅན་ཀུན་གྱི་མགོན་སོགས་ནས། གཤེགས་སུ་གསོལ། བར། ཇི་ལྟར་སངས་རྒྱས་རྣམས་ནི་དགའ་ལྡན་ན། །སྤྲུལ་པ་དམ་པ་ཏོག་དཀར་ལྷ་ཡི་བུས། །མི་ཕམ་མགོན་ལ་རྒྱལ་ཚབ་དབང་བསྐུར་ནས། །གཟིགས་པ་རྣམ་བཞིས་འཛམ་བུའི་གླིང་གཟིགས་ཏེ། །གླང་ཆེན་ཐལ་དཀར་ལྟར་གཤེགས་ལྷུམས་ཞུགས་ནས། །རྡོ་རྗེ་རིན་ཆེན་པདྨའི་རིགས་མཆོག་དང་། །ལས་ཀྱི་རིགས་དང་དེ་བཞིན་གཤེགས་པའི་རིགས། །ཕྱོགས་བཅུའི་རྒྱལ་བ་སྲས་དང་བཅས་པ་རྣམས། །དུས་འདིར་བདག་གི་དད་པས་སྤྱན་འདྲེན་ནས། །རྟེན་མཆོག་འདི་ལ་འབྱོན་པར་མཛད་དུ་གསོལ། །ལན་བདུན་ནམ་ཉེར་གཅིག་བརྗོད་དོ། །བཅོམ་ལྡན་འདིར་ནི་བྱོན་པ་ལེགས། །སོགས། བཞུགས་
སུ་གསོལ། བར། སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པར་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །ན་མཿསརྦ་ཏ་ཐཱ་ག་ཏ་པདྨ་ཀ་མ་ལ་ཡེ་སྟྭཾ། ཞེས་པའང་བརྗོད། ཛཿཧཱུྃ་བྃ་ཧོ། གཉིས་སུ་མེད་པར་གྱུར། སླར་ཡང་ཐུགས་ཀའི་ས་བོན་དེ་དག་ལས། །འོད་འཕྲོས་རིགས་ལྔ་འཁོར་བཅས་སྤྱན་དྲངས་ཏེ། །ༀ་ཨ་བྷི་ཥིཉྩ་ཏུ་མཾ། ༀ་བཛྲ་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུངས་དབང་བསྐུར་སྐུ་གང་དྲི་མ་དག །ཆུ་ལྷག་ཡར་ལུད་རྣམ་སྣང་དབུ་བརྒྱན་པའི། །དཔྲལ་བར་ༀ་དཀར་མགྲིན་པར་ཨཱཿདམར་པོ། །ཐུགས་ཀར་ཧཱུྃ་ཡིག་དེ་དག་མཚན་པར་གྱུར། །ཞེས་བརྗོད་ཅིང་སྤྱན་དབྱེ་བའི་དམིགས་པས། ཀུན་མཁྱེན་ཡེ་ཤེས་སྤྱན་ལྡན་སྐྱོན་བྲལ་ཡང་། །གུས་པས་འཕགས་པའི་སྤྱན་ནི་དབྱེ་བགྱིས་པས། །ནམ་མཁའི་མཐར་ཐུག་གྱུར་པའི་སེམས་ཅན་རྣམས། །སངས་རྒྱས་ཡེ་ཤེས་སྤྱན་ནི་ཐོབ་པར་ཤོག །ༀ་ཙཀྵུ་ཙཀྵུ་ས་མནྟ་ཙཀྵུ་བི་ཤྭ་དྷ་ནི་སྭཱ་ཧཱ། ཞེས་བརྗོད། སྐབས་འདིར་ཁྲུས་གསོལ་ཅུང་ཟད་རྒྱས་པར་སྤྲོ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། སྐྱེས་བུ་འདུལ་བ། ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་
ཀྱི་སྟོན་པ་སངས་རྒྱས་བཅོམ་ལྡན་འདས་ལ་བདག་གིས་ཡོ་བྱད་ཐམས་ཅད་དང་ལྡན་པའི་ཁྲུས་འདི་གསོལ་བར་བགྱིའོ། །ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེ་བྲེས་པ་དེར། །སྟོང་གསུམ་ཀུན་ཏུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་ཀུན་གྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །ༀ་སརྦ་ཏ་ཐཱ་ག་ཏ་ཀཱ་ཡ་བི་ཤྭ་དྷ་ནི་སྭཱ་ཧཱ། འདག་ཆལ་བྱུག །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་ལོ། །ༀ་སརྦ་ཏ་ཐཱ་ག་ཏ་༴སོགས། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིས་ནི། །ཅི་འདོད་དངོས་གྲུབ་སྩོལ་བར་མཛོད། །ༀ་སརྦ་ཏ་ཐཱ་ག་སོགས། རྒྱལ་བའི་སྐུ་གསུང་ཐུགས་ལ་ཉོན་མོངས་མི་མངའ་ཡང། །སེམས་ཅན་ལུས་ངག་ཡིད་གསུམ་སྒྲིབ་པ་སྦྱང་སླད་དུ། །རྒྱལ་བའི་སྐུ་གསུང་ཐུགས་ལ་ཁྲུས་ཆབ་འདི་གསོལ་པས། །སེམས་ཅན་ལུས་ངག་ཡིད་གསུམ་སྒྲིབ་པ་དག་གྱུར་ཅིག །ན་མཿསརྦ་ཏ་ཐཱ་ག་ཏ་ཀཱ་ཡ་ཝཱཀྐ་ཙིཏྟ་བི་ཤྭ་དྷ་ནི་ཧཱུྃ། རྒྱས་པར་ན། འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་
མ་སྦྱང་མཛད་ཅིང་། །གཏོང་བ་དྲི་ཡིས་ལེགས་བསྒོས་ཆུ། །ཁྲུས་ལེགས་མཛད་ཀྱིས་ཁྲུས་གསོལ་ལོ། །ན་མཿསརྦ་ཏ་ཐཱ་ག༴འདི་ནི་ཚུལ་ཁྲིམས་རང་བཞིན་ཆུ། །ཁྲིམས་འཆལ་དྲི་མ༴ཚུལ་ཁྲིམས་དྲི་ཡིས༴ཁྲུས་ལེགས་མཛད་ཀྱིས་༴འདི་ནི་བཟོད་པའི་རང་བཞིན༴ཁོང་ཁྲོའི་དྲི་མ༴བཟོད་པ་དྲི་ཡིས༴ཁྲུས་ལེགས་མཛད་ཀྱིས༴འདི་ནི་བརྩོན་འགྲུས་རང་༴ལེ་ལོའི་དྲི་མ༴བརྩོན་འགྲུས་དྲི་ཡིས༴ཁྲུས་ལེགས༴འདི་ནི་བསམ་གཏན༴རྣམ་གཡེང་དྲི་མ༴བསམ་གཏན་དྲི་ཡིས༴ཁྲུས་ལེགས་མཛད༴འདི་ནི་ཤེས་རབ་རང་བཞིན༴ཤེས་འཆལ་དྲི་མ་སྦྱང༴ཤེས་རབ་དྲི་ཡིས་ལེགས༴ཁྲུས་ལེགས་མཛད་ཀྱིས་༴ན་མཿསརྦ་ཏ་ཐཱ༴སོགས། ཆུ་བོ་དྲུག་གི་ཁྲུས་བྱས་པས། །བག་ཆགས་རྣམ་དྲུག་སྦྱང་ནས་ནི། །གང་ལ་ཉེས་པ་མི་མངའ་བའི། །ཁྲུས་ལེགས་མཛད་ལ་ཕྱག་འཚལ་ལོ། །དྲི་ཆུ་དྲུག་གིས་ཁྲུས་བྱས་པས། །དྲི་མ་རྣམ་དྲུག་སྦྱང་མཛད་ཅིང་། །རྒྱ་ཆེན་ཡོན་ཏན་དྲུག་ལྡན་པ། །ཁྲུས་ལེགས་མཛད་ལ་ཉེས་མི་མངའ། །དྲི་མ་རྣམ་དྲུག་དག་པ་ཡི། །ཡོན་ཏན་ཐམས་ཅད་དང་ལྡན་པ། །སངས་རྒྱས་ཐམས་ཅད་མཆོད་དོན་དུ། །དད་པས་བདག་གིས་ཁྲུས་བགྱིའོ། །སྔགས་བརྗོད། དེ་བཞིན་གཤེགས་པ་
རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱི་ཆུས། །ཡིད་འོང་ལེགས་པར་གང་བའི་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ༀ་ན་མཿསརྦ་ཏ་ཐཱ་སོགས་བརྗོད། སྟོན་མཆོག་དམ་པ་ལྷ་མིའི་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཞི་བ་ཆགས་བྲལ་ལྷ༴ཆོས་ལ་ཕྱག་འཚལ་དེང་༴སེམས་ཅན་གང་དག༴དེ་དག་ཐམས་ཅད༴ཚོགས་ཀྱི་དམ་པ་ལྷ་མིའི་མཆོད༴དགེ་འདུན༴ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ཡང་བདེ་ལེགས་ཤིང་། །ཉིན་མཚན་རྟག་ཏུ་བདེ་ལེགས་པའི། །དཀོན་མཆོག་གསུམ་གྱི་བདེ་ལེགས་ཤོག །གོས་ཟུང་འབུལ་ལ། རྒྱལ་དང་རྒྱལ་བའི་སྲས་ཀྱི་སྐུ་རྣམས་ལ། །རས་དཀར་སྨན་དང་ལྡན་པས་སྐུ་ཕྱིས་བས། །མི་ཤེས་སྒྲིབ་པ་མ་ལུས་ཀུན་བསལ་ནས། །ཉེས་པའི་ཚོགས་རྣམས་མ་ལུས་དག་གྱུར་ཅིག །ༀཿཧཱུྃཿཏྲཱཾ་ཧྲཱིཿཨཱཿཞེས་བརྗོད་ཅིང་ཁྲུས་རས་ལ་ས་བོན་དེ་ལྔ་མཚོན་བྱེད་ཀྱི་དྲི་ཡི་ཐིག་ལེ་ལྔ་བྱས་ལ། ཀ་ཡ་བི་ཤྭ་དྷ་ནི་སྭཱ་ཧཱ། དེ་ནས་དེ་ལ་ཁ་དོག་ལེགས་བསྒྱུར་བའི། །ན་གཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་
དང་། །རྒྱན་མཆོག་བརྒྱ་ཕྲག་དེ་དང་དེ་དག་གིས། །འཕགས་པ་ཀུན་ཏུ་བཟང་དང་འཇམ་དབྱངས་དང་། །འཇིག་རྟེན་དབང་ཕྱུག་སོགས་ལའང་བརྒྱན་པར་བགྱི། །ༀ་བཛྲ་ཝསྟྲ་ཨཱཿཧཱུྃ། སྲབ་འཇམ་ཡང་པ་ལྷ་ཡི་གོས། །མི་བསྐྱོད་རྡོ་རྗེའི་སྐུ་བརྙེས་ལ། །མི་ཕྱེད་དད་པས་བདག་འབུལ་ན། །བདག་ཀྱང་རྡོ་རྗེའི་སྐུ་ཐོབ་ཤོག །ༀ་བཛྲ་ཝསྟྲ་ཨཱཿཧཱུྃ། ལྷག་བསམ་དག་པའི་ན་བཟའ་འདི་ཕུལ་བས། །ལུས་ལ་ངུར་སྨྲིག་གོས་གྱོན་སེམས་ལ་ནི། །ངོ་ཚ་ཁྲེལ་ཡོད་བཟོད་པའི་གོས་གྱོན་ནས། །རྒྱལ་བ་བསྐྱེད་པའི་ཡུམ་ལ་མཆོད་པར་བགྱི། །སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །གང་ལ་རེག་ན་བདེ་བའི་རྒྱུར་གྱུར་པ། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །ཅེས་བརྗོད་པར་བྱའོ། །མཎྜལ་ནི། དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་སིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །དམ་ཆོས་དཀོན་མཆོག་ཐམས་ཅད་དང་། །མཆོད་རྟེན་རྣམས་དང་སྐུ་གཟུགས་ལ། །རིན་ཆེན་མེ་ཏོག་ལ་སོགས་ཆར། །རྒྱུན་མི་འཆད་པ་འབབ་པར་ཤོག །ཇི་ལྟར་འཇམ་དབྱངས་ལ་སོགས་པ། །རྒྱལ་བ་རྣམས་ལ་མཆོད་མཛད་པ། །དེ་
བཞིན་བདག་གིས་དེ་བཞིན་གཤེགས། །མགོན་པོ་སྲས་དང་བཅས་རྣམས་མཆོད། །ཡོན་ཏན་རྒྱ་མཚོ་རྣམས་ལ་བདག །བསྟོད་དབྱངས་ཡན་ལག་རྒྱ་མཚོས་བསྟོད། །བསྟོད་དབྱངས་སྙན་སྤྲིན་དེ་དག་ལ། །ངེས་པ་ཀུན་ཏུ་འབྱུང་གྱུར་ཅིག །ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས། སོགས་ཚང་བར་འདོན། ཐམས་ཅད་བདག་གིས་བྱང་ཆུབ་ཕྱིར་བསྔོའོ། །བར། ༀ་བཛྲ་སཏྭ་ས་མ་ཡཱ། སོགས་བརྗོད། ༀ་བཛྲ་བྷཱུ་མི་ཨཱཿཧཱུྃ། གཞི་རྣམ་པར་དག་པ་སོགས་ཚང་བར་བརྗོད། བཞེས་ནས་བྱིན་གྱིས་བརླབ་ཏུ་གསོལ། །ཞེས་དང། ས་གཞི་སྤོས་ཆུས་སོགས། རྣམ་དག་ཞིང་ལ་སྤྱོད་པར་ཤོག །ཞེས་དང། ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །བླ་མ་རྡོ་རྗེ་སློབ་དཔོན་དང་། །ཡི་དམ་ལྷ་ཚོགས་འཁོར་དང་བཅས། །དུས་གསུམ་བདེ་གཤེགས་མ་ལུས་ལ། །གླིང་བཞི་རི་རབ་བཅས་པ་དང་། །གླིང་བཞི་བྱེ་བ་ཕྲག་བརྒྱ་དང་། །བྱེ་བ་འབུམ་དང་དུང་ཕྱུར་ཏེ། །མཎྜལ་གཅིག་ཏུ་བསྡུས་ནས་ནི། །མོས་བློས་གོང་མ་རྣམས་ལ་འབུལ། །ཐུགས་རྗེས་བརྩེར་དགོངས་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །ༀ་མཎྜལ་པཱུ་ཛ་མེ་གྷ་ས་མུ་ཏྲ་སྥ་ར་ན་ས་མ་ཡེ་ཨཱཿཧཱུྃ། མཉེས་བྱེད་མཎྜལ་བཟང་པོ་སོགས།
འགྲོ་བ་སྒྲོལ་བར་ཤོག །བར་རོ། །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་འཚང་རྒྱ་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོའི་གཟེབ་ལས་གྲོལ། །ཕྱག་འཚལ་བ་དང་མཆོད་ཅིང་བཤགས་སོགས་ནས། ཐམས་ཅད་བདག་གིས་བྱང་ཆུབ་ཕྱིར་བསྔོའོ། །དེ་ནས་མཆོད་པ་བྱིན་རླབས་ནི། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་བརླབས་པའི་སྟོབས་དང་། བདག་གི་བསོད་ནམས་དང་སྨོན་ལམ་གྱི་སྟོབས་དང་། རིགས་སྔགས་ཀྱི་སྟོབས་ཀྱིས་སངས་རྒྱས་དང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྣམས་ལ་མཆོག་ཏུ་རྒྱ་ཆེན་པོ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལས་མངོན་པར་མཐོ་བའི་མཆོད་པའི་སྤྲིན་ཆེན་པོ་རབ་ཏུ་འཕྲོ་བར་གྱུར་ཅིག །ན་མཿསརྦ་བུདྷ་བོདྷི་སཏྭཱ་ནཱཾ། སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་ས་མནྟ་སྭཱ་ཧཱ། ཞེས་ལན་བརྒྱད་བཏོན་ལ་བྱིན་བརླབས་ནས། འཇིག་རྟེན་ཁམས་ནི་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པས་བཤམས་པ་འདི། །རྒྱལ་བ་སྲས་དང་བཅས་རྣམས་མཆོད། །ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡཱེ་ཧཱུྃ། འཇིག་རྟེན་ཁམས་ནི་དཔག་མེད༴ཞབས་བསིལ་ཇི༴བདག་གིས་གུས།
རྒྱལ་བ་སྲས༴ན་མཿསརྦ་ཏ་ཐཱ་ག་ཏ་པདྱཾ་པྲ༴འཇིག་རྟེན་ཁམས་ནི་དཔག༴མེ་ཏོག༴བདག་གིས༴རྒྱལ་བ༴ན་མཿསརྦ་ཏ་ཐཱ་ག་ཏ་པུཥྤེ༴འཇིག་རྟེན་ཁམས་ནི་དཔག༴བདུག་སྤོས༴བདག་གིས༴རྒྱལ་བ་སྲས་དང་༴ན་མཿསརྦ་ཏ་ཐཱ་ག་ཏ་དྷཱུ་པེ༴འཇིག་རྟེན་ཁམས་ནི་དཔག༴སྣང་གསལ༴བདག་གིས༴རྒྱལ་བ༴ན་མཿསརྦ་ཐཱ་ག་ཏ་ཨ་ལོ་ཀཻ༴འཇིག་རྟེན་ཁམས་ནི་དཔག་མེད༴དྲི་ཆབ༴བདག་གིས༴རྒྱལ་བ་སྲས༴ན་མཿསརྦ་ཏ་ཐཱ་ག་ཏ་གྷནྡྷེ༴འཇིག་རྟེན་ཁམས་ནི་དཔག༴ཞལ་ཟས་ཇི༴བདག་གིས་གུས༴རྒྱལ་བ་སྲས་དང་༴ན་མཿ་སརྦ་ཏ་ཐཱ་ག་ཏ་ནཻ་ཝིདྱ༴འཇིག་རྟེན་ཁམས་ནི་དཔག༴སྒྲ་སྙན་ཇི་སྙེད༴བདག་གིས་གུས་པས༴རྒྱལ་བ་སྲས་དང་བཅས་རྣམས་མཆོད། ན་མཿསརྦ་ཏ་ཐཱ་ག་ཏ་ཤབྡ་པྲ་ཏིཙྪ་པཱུ་ཛ་མེ་གྷ༴ཞེས་རྐང་འཐོན་དུ་འབུལ། རྡོ་རྗེ་སེམས་དཔའ་བསྡུས་པ་ན། ༀ་བཛྲ་སཏྭ་སུ་སྃ་གྲ་ཧ། ༀ་བཛྲ་ལཱ་སྱ་ཧཱུྃ། རྡོ་རྗེ་རིན་ཆེན་བླ་ན་མེད། ༀ་བཛྲ་རཏྣ་མ་ནུཏྟ་རཾ། ༀ་བཛྲ་མ་ལེ་ཏྲཾ། རྡོ་རྗེ་ཆོས་ཀྱི་གླུ་བླངས་པས། ༀ་བཛྲ་དྷརྨ་ཀཱ་ཡ་ནི། ༀ་བཛྲ་གཱིརྟི་ཧྲཱིཿརྡོ་རྗེ་ལས་ཀུན་བྱེད་པར་འགྱུར། །ༀ་བཛྲ་ཀརྨ་ཀ་རོདྒྷ་ཝེ། ༀ་བཛྲ་ནྲྀཏྱེ་ཨཱཿདེ་བཞིན་དུ། རྡོ་རྗེ་སེམས་དཔའ་བསྡུས་པ་ན། །ༀ་བཛྲ་དྷཱུ་པེ་ཧཱུྃ། རྡོ་རྗེ་རིན་ཆེན་བླ་ན་
མེད། །ༀ་བཛྲ་པུཥྤེ་ཏྲྃ། རྡོ་རྗེ་ཆོས་ཀྱི་གླུ་བླངས་པས། །ༀ་བཛྲ་ཨཱ་ལོ་ཀེ་ཧྲཱིཿརྡོ་རྗེ་ལས་ཀུན་བྱེད་པར་གྱུར། །ཨོ་བཛྲ་གནྡྷེ་ཨཱཿབཅས་སྒེག་སོགས་བརྒྱད་ཀྱིས་མཆོད། བདེ་བར་གཤེགས་པ་ཐམས་ཅད་ལ། །འཁོར་ལོ་རིན་ཆེན་འདི་འབུལ་བས། །སྲིད་པའི་འཁོར་ལོ་རྒྱུན་བཅད་དེ། །ཆོས་ཀྱི་འཁོར་ལོ་བསྐོར་བར་ཤོག །ༀ་སརྦ་ཏ་ཐཱ་ག་ཏ་ཙཀྲ་རཏྣ་པཱུ་ཛི་ཏེ་ཨཱཿཧཱུྃ། དེ་བཞིན་དུ། རྒྱལ་བ་སྲས་བཅས་ཐམས་ཅད་ལ། །ནོར་བུ་རིན་ཆེན་འདི་ཕུལ་བས། །བཀྲེས་ཤིང་ཕོངས་པ་རྒྱུན་བཅད་དེ། །འབྱོར་པ་ཕུན་སུམ་ཚོགས་པར་ཤོག །ༀ་སརྦ་ཏ་ཐཱ་ག་ཏ་མ་ནི་རཏྣ༴བཙུན་མོ་རིན་ཆེན་འདི་ཕུལ་བས། །མ་རིག་མུན་པ་རྒྱུན་བཅད་དེ། །ཤེས་རབ་དབྱིངས་ཀྱི་དོན་རྟོགས་ནས། །ཐབས་དང་ཤེས་རབ་འབྲེལ་བར་ཤོག །ༀ་སརྦ་ཏ་ཐཱ་ག་ཏ་སྟྲཱི་རཏྣ༴བློན་པོ་རིན་ཆེན་འདི་ཕུལ་བས། །ཕྱི་ནང་གསང་གསུམ་ཐེག་གསུམ་ལྡན། །བསམ་ཡས་བསྟན་པ་རབ་འཛིན་ཅིང་། །ཡོན་ཏན་ཐམས་ཅད་ལྡན་པར་ཤོག །ༀ་སརྦ་ཏ་ཐཱ་ག་ཏ་པུ་རུ་ཥ་རཏྣ་པཱུ་ཛི་ཏེ་ཨཱཿཧཱུྃ། གླང་པོ་རིན་ཆེན་འདི་ཕུལ་བས། །ལྟ་ངན་རྣམས་ནི་རབ་བསལ་ནས། །བླ་མེད་ཐེག་པར་རབ་ཞོན་ཏེ། །ཐམས་ཅད་མཁྱེན་གྲོང་བགྲོད་པར་ཤོག །ༀ་སརྦ་ཏ་ཐཱ་ག་ཏ་ཧསྟི་རཏྣ༴རྟ་མཆོག་རིན་ཆེན་འདི་ཕུལ་བས། །སྲིད་པའི་གཟེབ་ལས་ངེས་གྲོལ་ཏེ། །རྫུ་འཕྲུལ་མཆོག་གི་
ཤུགས་ཐོབ་ནས། །སངས་རྒྱས་ཞིང་དུ་བགྲོད་པར་ཤོག །ༀ་སརྦ་ཏ་ཐཱ་ག་ཏ་ཏུ་ུརདྒ་ཨ་ཤྭ་རཏྣ༴དམག་དཔོན་རིན་ཆེན་འདི་ཕུལ་བས། །ཉོན་མོངས་དགྲ་ལས་རྒྱལ་གྱུར་ནས། །ཕས་ཀྱི་རྒོལ་བ་ཚར་བཅད་དེ། །བསྙེངས་བྲལ་མཆོག་ནི་ཐོབ་པར་ཤོག །ༀ་སརྦ་ཏ་ཐཱ་ག་ཏ་ཁདྒ་རཏྣ་པཱུ་ཛི༴རྒྱལ་སྲིད་སྣ་བདུན་དང་། རིན་ཆེན་གདུགས་དང་གསེར་ཉ་པདྨ་དུང། །བུམ་པ་དཔལ་བེའུ་རྒྱལ་མཚན་འཁོར་ལོ་སྟེ། །ལྷ་ཡི་དགའ་ཚལ་མཛེས་པར་བྱེད་པ་ཡི། །བཀྲ་ཤིས་རྟགས་བརྒྱད་རྣམས་ནི་འབུལ་བར་བགྱི། །ན་མཿསརྦ་ཏ་ཐཱ་ག་ཏ་ཨཥྚ་ཧེ་ཏུ་མདྒ་ལ་པྲ་ཏཱི་ཙྪ་ཨཱཿཧཱུྃ། ཞེས་པས་བཀྲ་ཤིས་རྟགས་བརྒྱད་རྣམས་ཕུལ། ཁ་དོག་དབྱིབས་ལེགས་ཡིད་འོང་རྒྱན་ཕྲེང་ལྡན། །ཕྱོགས་དུས་ཀུན་ནས་གཟུགས་མཆོག་ཅི་མཆིས་པ། །མོས་བློས་རྒྱལ་བ་སྲས་བཅས་ལ་འབུལ་ན། །བཞེས་ནས་བླ་མེད་གྲུབ་མཆོག་སྩལ་དུ་གསོལ། །ༀ་སརྦ་ཏ་ཐཱ་ག་ཏ་རཱུ་པ་ཀཱ་མཱ་གུ་ཎ་བཛྲ་པཱུ་ཛི་ཏེ་ཨཱཿཧཱུྃ་སྭཱ་ཧཱ། དེ་བཞིན་དུ། ཕྱོགས་དུས་ཀུན་ནས་ཟིན་དང་མ་ཟིན་པའི། །ཡོན་ཏན་ཚིག་བརྗོད་སྒྲ་སྙན་ཡིད་འོང་ལྡན། །མོས་བློས༴བཞེས་ནས༴ༀ་སརྦ་ཏ་ཐཱ་ག་ཏ་ཤབྡ༴ཕྱོགས་དུས་ཀུན་ན་ཙནྡན་སྦྲུལ་སྙིང་དང་། །ཨ་ཀར་ལ་སོགས་དབང་པོ་ཚིམ་བྱེད་དྲི། །མོས་བློས༴བཞེས་ནས༴ༀ་སརྦ་ཏ་ཐཱ་ག་ཏ་གནྡྷེ༴
ཕྱོགས་དུས་ཀུན་ན་རོ་དང་བཅུད་ལྡན་པའི། །ལུས་སེམས་བརྟས་བྱེད་རོ་མཆོག་ཅི་མཆིས་པ། །མོས་བློས་རྒྱལ༴བཞེས་ནས༴ༀ་སརྦ་ཏ་ཐཱ་ག་ཏ་ར་ས༴ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱ་ཁྱད་པར་འཕགས་པ་ཅི་མཆིས་པ། །མོས་བློས་རྒྱལ༴བཞེས་ནས་བླ་མེད༴ༀ་སརྦ་ཏ་ཐཱ་ག་ཏ་སྤཪྴེ་པྲ་ཏིཙྪ༴སོགས་འདོད་ཡོན་ལྔས་མཆོད། བསྟོད་པ་ནི། རྒྱལ་བ་ཟླ་བ་དྲི་མ་མེད་པའི་སྐུ། །རྒྱལ་བ་ཉི་མ་འོད་ཟེར་སྟོང་གི་འོད། །རྒྱལ་བ་པདྨ་དྲི་མ་མེད་པའི་སྤྱན། །རྒྱལ་བ་མེ་ཏོག་པད་རྩ་རྡུལ་མེད་ཚེམས། །རྒྱལ་བའི་ཡོན་ཏན་རྒྱ་མཚོ་ལྟ་བུ་སྟེ། །རིན་པོ་ཆེ་ནི་དུ་མའི་འབྱུང་གནས་གྱུར། །རྒྱལ་བ་རྒྱ་མཚོ་ཡེ་ཤེས་ཆུ་ཡིས་གང་། །ཏིང་འཛིན་བརྒྱ་ཕྲག་སྟོང་གིས་ཀུན་ཏུ་གང་། །རྒྱལ་བའི་ཞབས་ནི་འཁོར་ལོ་བྲིས་པ་སྟེ། །ཁོར་ཡུག་མུ་ཁྱུད་དེ་བཞིན་རྩིབས་མ་སྟོང་། །ཕྱག་དང་ཞབས་ནི་དྲྭ་བས་སྤྲས་པ་སྟེ། །ཞབས་ཀྱི་དྲྭ་བ་ངང་པའི་དབང་པོ་བཞིན། །གསེར་གྱི་རི་བོ་ལྟ་བུར་རབ་ཏུ་གདའ། །རྒྱལ་བ་དྲི་མེད་གསེར་གྱི་རི་དབང་པོ། །ཡོན་ཏན་ཐམས་ཅད་རི་དབང་འདྲ་བ་སྟེ། །སངས་རྒྱས་རི་དབང་རྒྱལ་ལ་ཕྱག་འཚལ་ལོ། །དེ་བཞིན་གཤེགས་པ་ཟླ་བ་ཆུ་ཟླ་འདྲ། །ནམ་མཁའ་དང་ཡང་མཚུངས་ཤིང་འདྲ་བ་སྟེ། །སྒྱུ་མ་སྨིག་རྒྱུ་ལྟ་བུར་ཆགས་པ་མེད། །རྒྱལ་བ་དྲི་མ་མེད་ལ་ཕྱག་
འཚལ་ལོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་སྒྲོལ་ཞིང་། །གཅིག་ཏུ་དོན་དམ་མཆོག་གྱུར་པའི། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ཞིང་། །དགེ་འདུན་ལ་ཡང་ཕྱག་འཚལ་ལོ། །བསྟོད་པ་དང་། ཡང་ན། མཚན་མཆོག་ལྡན་པ་དྲི་མེད་ཟླ་བའི་ཞལ། །གསེར་མདོག་འདྲ་བ་ཁྱོད་ལ་ཕྱག་འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཆེན་ཁྱེད་ལ་ཕྱག་འཚལ་ལོ། །མི་མཆོག་འདུལ་བ་ཁ་ལོ་སྒྱུར་མཛད་ཅིང་། །ཀུན་སྦྱོར་འཆིང་བ་གཅོད་མཛད་དེ་བཞིན་གཤེགས། །དབང་པོ་ཞི་ཞིང་ཉེར་ཞི་ཞི་ལ་མཁས། །མཉན་ཡོད་བཞུགས་པ་དེ་ལ་ཕྱག་འཚལ་ལོ། །རྣམ་དག་སྐུ་མངའ་མཆོག་ཏུ་གཟུགས་བཟང་བ། །ཡེ་ཤེས་རྒྱ་མཚོ་གསེར་གྱི་ལྷུན་པོ་འདྲ། །གྲགས་པ་འཇིག་རྟེན་གསུམ་ན་ལྷང་ངེ་བ། །མགོན་པོ་མཆོག་བརྙེས་ཁྱོད་ལ་ཕྱག་འཚལ་ལོ། །རྫོགས་སངས་གང་དུ་བལྟམས་པ་དང་། །གང་དུ་བྱང་ཆུབ་ལ་རེག་དང་། །ཞི་བའི་འཁོར་ལོ་བསྐོར་བ་དང་། །
ཟག་མེད་མྱ་ངན་འདས་པ་དང་། །བདེ་གཤེགས་གང་དུ་བཞུགས་པ་དང་། །འཆག་པ་དང་ནི་བཞེངས་པ་དང་། །སེདྒེ་ལྟ་བུར་གཟིམས་པ་ཡི། །གནས་དེ་ལ་ཡང་ཕྱག་འཚལ་ལོ། །སྟེང་དང་འོག་དང་བར་དག་དང་། །ཕྱོགས་དང་ཕྱོགས་མཚམས་རྣམས་སུ་ཡང་། །སྐུར་བཅས་སྐུ་ནི་མེད་པ་ཡི། །མཆོད་རྟེན་རྣམས་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །བསྟོད་ཕྱག་འབུལ་བར་བྱའོ། །ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་སེམས་ཐམས་ཅད་པ། །བདག་ལ་བརྩེ་བས་དགོངས་སུ་གསོལ། །བཅོམ་ལྡན་ཐུབ་པ་ཆེན་པོ་ཉིད། །ཇི་སྲིད་ནམ་མཁའི་མཐའ་མཉམ་པའི། །འགྲོ་བ་སེམས་ཅན་མཐའ་དག་ནི། །མི་གནས་མྱང་འདས་མ་ཐོབ་པར། །བརྟན་པར་བཞུགས་ནས་བྱེ་བྲག་ཏུ། །འབྱུང་བཞིའི་གནོད་པས་མ་གོས་པར། །བརྟན་པར་མཛད་དེ་བཞུགས་སུ་གསོལ། །ལན་གསུམ་བརྗོད། དེ་ནས་བཅོམ་ལྡན་འདས་ཐུབ་པ་ཆེན་པོ་འོད་དུ་ཞུ་བ་ལས་བྱུང་བའི་སྐུ་གསུང་ཐུགས་ཀྱི་རྟེན་སོ་སོའི་རྣམ་པར་གྱུར། །པར་བསམ་ལ་གསུང་རྟེན་དང་གསུང་རབ་སོགས་གསང་གསུམ་རྟེན་རྣམས་དེ་བཞིན་དུ་གྱུར་པར་བསམ་ནས། དེ་ནས་རྟེན་རྣམས་ལ་བྱིན་གྱིས་བརླབ། མེ་ཏོག་འཐོར་ལ། ༀ་ན་མོ་བུདྡྷ་ཡ། ན་མོ་དྷརྨཱ་ཡ། ན་
མོ་སདྒཱ་ཡ། ༀ་ཡེ་དྷརྨ་ཧེ་ཏུ་པྲ༴ༀ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་ཅི་ནུས་བརྗོད། མཐར། ཕྱོགས་བཅུའི་རྒྱལ་བ་སྲས་དང་བཅས་པ་རྣམས། འབྲུ་དང་ཐ་དད་མེད་པར་བྱོན་ནས་རྟེན་སོ་སོ་ལ་ཐིམ་པས་གཉིས་སུ་མེད་པར་གྱུར། །པར་མོས་ལ། དེ་ནས་བཅོམ་ལྡན་འདས་ཀྱི་ཁྱིམ་བདག་དེས་པ་ལ་གསུངས་ཏེ་བཀྲ་ཤིས་ཀྱི་ཚིགས་སུ་བཅད་པ་འདི་ཉིད་བརྗོད་པར་བྱའོ། །དཀོན་མཆོག་གསུམ་ལ་ཕྱག་འཚལ་ལོ། །ཆེ་བའི་ཆེ་མཆོག་སྟོན་མཆོག་བླ་ན་མེད། །ཆོས་རྗེ་ཉི་མ་རྒྱལ་བའི་བྱིན་རླབས་ཀྱིས། །བདུད་དང་བགེགས་རིགས་གནོད་པའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཆོས་ཉིད་བདེན་པའི་ཆོས་མཆོག་བླ་ན་མེད། །དམ་ཆོས་བདུད་རྩི་བདེན་པའི་བྱིན་རླབས་ཀྱིས། །ཉོན་མོངས་སྡུག་བསྔལ་གདུང་བའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །དགེ་བདུན་ཡོན་ཏན་རིན་ཆེན་དཔལ་འབར་བ། །རྒྱལ་སྲས་ཕན་མཛད་བདེན་པའི་བྱིན་རླབས་ཀྱིས། །ཉེས་པའི་སྐྱོན་བྲལ་དགེ་ཚོགས་རྣམ་པར་འཕེལ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཚངས་དང་ལྷ་དབང་སྲུང་མའི་བྱིན་རླབས་ཀྱིས། །ཕན་མཛད་ལྷ་ཡི་བཀྲ་ཤིས་གནས་གྱུར་ཏེ། །བདེ་ལེགས་བསམ་པ་ཡིད་བཞིན་འགྲུབ་པ་དང་། །ཚེ་རིང་ནད་མེད་བདེ་སྐྱིད་ལྡན་པར་ཤོག །གཞན་ཡང་བཀྲ་ཤིས་དང་། ཐབས་མཁས་ཐུགས་རྗེ་ཤཱཀྱའི་སོགས། རྒྱ་གར་པཎ་ཆེན་སོགས། འཇིག་རྟེན་འདྲེན་སོགས། བདག་གི་ཚེ་རབས་སོགས། དཔལ་ལྡན་ལྷ་མོ་སོགས། དུས་གསུམ་རྒྱལ་བ་སོགས། ཤེས་བྱའི་མཁའ་ལ་སོགས། རྒྱལ་མཚན་རྩེ་མོ་སོགས། མི་
འགྱུར་ལྷུན་པོ་སྐུ་ཡི་སོགས། ཕྱོགས་བཅུར་བཞུགས་སོགས། བྱ་སྤྱོད་རྣལ་འབྱོར་རྒྱུད་སོགས། བཅོམ་ལྡན་འདས་ཀྱི་སྤྱན་སོགས། ཟབ་ཅིང་རྒྱ་ཆེ་སོགས། འབད་དང་རྩོལ་བ་སོགས། འབྱུང་པོ་གང་དག་སོགས། གནས་སྐབས་སུ་ཡང་སོགས། ལོ་བརྒྱ་འཚོ་ཞིང་སྟོན་སོགས། བསོད་ནམས་རི་བོ་སོགས། བགེགས་རིགས་སྟོང་ཕྲག་བརྒྱད་ཅུ་ཞི་སོགས། གནས་འདིར་ཉིན་མོ་བདེ་ལེགས་སོགས། སྐབས་ཐོབ་རྒྱས་བསྡུས་གང་བདེ་བརྗོད་པར་བྱའོ། །དེ་ནས་བསྔོ་སྨོན་ནི། སྐུ་མཆོག་མཚན་དང་དཔེ་བྱད་ལྡན་པ་ནི། །རྣམ་དཀར་དགེ་བའི་འབྲས་བུའི་མཆོག་དེ་ཡིན། །སྦྱིན་པའི་བདག་པོས་བསྐྲུན་པའི་བཟོ་བོ་བཅས། །འདི་ནས་བྱང་ཆུབ་སྙིང་པོ་མ་ཐོབ་པར། །བླ་མ་དཀོན་མཆོག་གསུམ་གྱིས་རྗེས་བཟུང་སྟེ། །ཐོག་མེད་ནས་བསགས་ཐར་པའི་གེགས་གྱུར་པ། །བདག་འཛིན་སྒྲིབ་ཚོགས་སྤྲིན་གྱིས་རབ་འཐུམས་ཏེ། །མ་ནོར་ལམ་སྟོན་རྩ་བའི་བླ་མ་ཡི། །སྐུ་གསུང་ཐུགས་ཀྱི་དམ་ཚིག་ཕྱི་ནང་གསང་། །ཉི་ཤུ་རྩ་བདུན་དང་ནི་སོ་སོ་ཐར། །བྱང་སེམས་ཚུལ་ཁྲིམས་ཏིང་འཛིན་ཤེས་རབ་བསླབ། །གསང་བ་རིག་འཛིན་སྔགས་ཀྱི་དམ་ཚིག་ཆེ། །འགལ་ཉམས་ལྟུང་བ་མཐའ་དག་ཅི་མཆིས་པ། །སྙིང་ནས་འགྱོད་སེམས་དྲག་པོས་མཐོལ་ཞིང་བཤགས། །རྒྱལ་བསྟན་མཆོག་ལས་གཞན་སྟོང་དབུ་མའི་ལམ། །ཉམས་ལེན་མཐར་ཕྱིན་བསྟན་པ་འཛིན་སྐྱོང་སྤེལ། །ཚེ་རིང་ནད་མེད་དཔལ་འབྱོར་ལང་ཚོ་
རྒྱས། །དུས་གསུམ་དགེ་ཚོགས་གཅིག་ཏུ་བཟླུམས་བྱས་ནས། །མཁའ་མཉམ་མ་རྒན་བྱང་ཆུབ་ཆེན་པོར་བསྔོ། །དེ་ལྟར་དགེ་ཚོགས་འབྲས་བཟང་ཡོན་ཏན་ལས། །བག་ཆགས་རྣམ་རྟོག་རྒྱུན་ཆད་ཡེ་ཤེས་ཀྱི། །གནས་ལུགས་ཁོར་མོ་ཡུག་ཏུ་འཆར་བ་ཡིས། །འགྲོ་ཀུན་ཐར་པའི་ལམ་དུ་འདྲེན་བྱེད་པའི། །བསླུ་མེད་དེད་དཔོན་མཆོག་ཏུ་གྱུར་པར་ཤོག །གཞན་ཡང་འཇིག་རྟེན་ཁམས་འདིར་རྟག་པ་རུ། །ནད་མུག་འཁྲུགས་རྩོད་མིང་ཡང་མི་གྲགས་ཤིང་། །ཆར་ཆུ་དུས་འབབས་ལོ་འབྲས་ཕུན་ཚོགས་རྒྱས། །ཐམས་ཅད་བསམ་དོན་ཆོས་བཞིན་ཡོངས་འགྲུབ་ཤོག །ན་མོ་རཏྣ་ཏྲ་ཡ་ཡ། ཏདྱ་ཐཱ། པཉྩ་པྲི་ཡ་ཨ་ཝ་བྷོ་ཏ་ན་ཡ་སྭཱ་ཧཱ། རྗེས་ཆོག་གི་མཆོད་བསྟོད་ནི། དང་པོ་མཆོད་པ་ནི། མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པའི་བདུག་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པ་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །
བསྟོད་པ་རྒྱས་པ་བྱས་ན། མཉམ་མེད་མི་གཡོ་མཉམ་མེད་མཆོག་གི་ཆོས་ཉིད་ཅན། །ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་མེད་དམ་པའི་ཆོས་མཆོག་ཅན། །ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དཔེ་ནི་ནམ་མཁའ་དང་ཡང་བསྒྲུན་དུ་ཡོད་མ་ཡིན། །དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་མེད་པ་ཐུགས་རྗེའི་ཤུགས་ལས་བྱུང་། །སྨོན་ལམ་གྲུབ་པ་འགགས་པ་མེད་པའི་ཆོས་ཉིད་ཅན། །འགྲོ་བའི་དོན་སྒྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང་། །ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡི། །བདེ་བར་གཤེགས་པའི་གོ་འཕང་དམ་པ་བརྙེས་གྱུར་ཀྱང་། །ཁམས་གསུམ་རྣམས་ལ་དངོས་གྲུབ་མཆོག་སྩོལ་མཛད་པ་ཡི། །ཐུགས་རྗེའི་སྤྱོད་པ་མི་གཡོ་འགགས་པར་ཡོང་མི་འགྱུར། །ཨེ་མའོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ནས་གོ་འཕང་མཆོག་བརྙེས་པ། །ཁམས་གསུམ་ཀུན་ལ་རྟག་ཏུ་དངོས་གྲུབ་མཆོག་སྩོལ་མཛད། །མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པ། །དམ་ཚིག་མཆོག་གསུམ་
དངོས་གྲུབ་དམ་པ་བདག་ལ་སྩོལ། །འདི་དེ་སངས་རྒྱས་ཐམས་ཅད་ཀྱི། །ཡང་དག་ཡོན་ཏན་རྒྱས་པ་སྟེ། །ལན་གཅིག་ཙམ་ཞིག་བརྗོད་པས་ཀྱང་། །གསང་སྔགས་ཐམས་ཅད་འགྲུབ་པར་འགྱུར། །ཞེས་དང་། བསྡུ་ན། བསྟོད་པ་འོས་པ་སོགས་ཀྱིས་བསྟོད། དེ་ནས་བཟོད་གསོལ་ནི། མ་འབྱོར་པ་དང་ཉམས་པ་དང་། སོགས། ཡི་གེ་བརྒྱ་པས་ལྷག་ཆད་ཁ་བསྐང་། མཆོད་སྦྱིན་གནས་འདིར་གང་སོགས། དཀོན་མཆོག་རིན་ཆེན་གསུམ་ལ་སོགས། ཆོས་དབྱིངས་བྱང་ཆུབ་སེམས་དཀྱིལ་འཁོར་དུ། །བདག་སོགས་སོགས་བརྗོད་པར་བྱའོ། །ཞེས་པ་འདི་ཤཱཀྱའི་དགེ་སློང་ཀརྨ་པ་བདུད་ཚོགས་འདུལ་བའི་རྡོ་རྗེས་གནས་མདོ་བའི་དགེ་བཤེས་ལུང་རྟོགས་ཡོན་ཏན་དུ་མའི་མངའ་བདག་ཤེས་བྱ་ལ་བློ་གྲོས་རྒྱས་པ་སྟེ། དེ་ཕྱིར་ཡོན་ཏན་བློ་གྲོས་ཞེས་བྱས་བསྐུལ་པའི་དོན་བཞིན་ཆུ་སྟོད་ཟླ་བའི་ཚེས་བཞི་ལ་མཉམ་མེད་ཐུབ་པ་མཆོག་གིས་ཆོས་འཁོར་བསྐོར་བའི་དུས་ཆེན་ལ་བྲིས་པ་ཤུ་བྷ་པུཥྚིཾ། དེ་ལྟར་རྒྱལ་མཆོག་བཅུ་གསུམ་པས་མཛད་པའི་རབ་གནས་བྱིན་རླབས་ཆར་འབེབས་ཀྱི་ཞལ་རྒྱུན་ལྟ་བུ་ཅུང་ཟད་རྒྱས་པ་རང་གཞན་ཀུན་ལ་སྨན་ཆེད། སི་ཏུ་པདྨ་ཉིན་བྱེད་དབང་པོས་བཀོད་པ་འགལ་བ་མཆིས་ན་དག་ཚངས་སྩོལ། །དགེ་བས་བསྟན་འགྲོ་བཀྲ་ཤིས་སྩོལ། །མདྒ་ལམ། །