ཐུགས་དམ་ནང་གི་གཏོར་བསྔོས།
ཐུགས་དམ་ནང་གི་གཏོར་བསྔོས་གསང་སྔགས་ནང་གཏོར་ཀུན་གྱི་དོན་བསྡུས་དམིགས་རིམ་ཞོར་ལ་གསལ་བའི་ཁྱད་ཆོས་ཏིང་འཛིན་སྔགས་ཕྱག་རྒྱ་གྱེར་སྒོམ་གྱི་བསྔོ་ལུགས་བཞི་ཀ་ཚང་བའོ། །
ༀ། རང་ཉིད་ཡི་དམ་ལྷར་གསལ་ཐུགས་ཀ་ནས། །རྃ་ཡྃ་ཁྃ་གསུམ་མེ་ཆུ་རླུང་གསུམ་གྱུར། །གཏོར་རྫས་མི་གཙང་དྲི་མ་བསྲེག་གཏོར་བཀྲུས། །གདོད་ནས་དག་པ་སྐྱེ་མེད་སྟོང་པ་ཉིད། །སྐྱེ་བའི་ཆོ་འཕྲུལ་རཾ་ཡཾ་ཀཾ་ཨ་ལས། །རླུང་མེ་ཐོད་སྒྱེད་སྟེང་དུ་ཀ་པཱ་ལ། །ཕྱི་དཀར་ནང་དམར་ཉི་ཟླའི་རང་བཞིན་སྣོད། །ཡངས་ཤིང་རྒྱ་ཆེའི་ནང་གི་ཕྱོགས་མཚམས་དབུས། །དངོས་གྲུབ་འགུགས་པའི་ལྕགས་ཀྱུ་ཤ་ཆེན་ལྔ། །དབུགས་སོང་དྲོད་མ་བྲལ་བ་ཆེ་ཞིང་ཚོ། །ཡེ་ཤེས་གསལ་བའི་སྒྲོན་མེ་བདུད་རྩི་ལྔ། །དྲོད་དང་མ་བྲལ་རླངས་པ་འཕྱུར་བའོ། །དེ་སྟེང་འབྲུ་གསུམ་ཡི་གེ་དཀར་དམར་མཐིང་། །རླུང་
དཀྱིལ་མེ་གཡོས་མེ་དཀྱིལ་དྲུག་ཏུ་འབར། །ཐོད་པ་དྲོས་ནས་དམ་རྫས་བཅུ་པོ་ཞུ། །དམ་ཚིག་བདུད་རྩིའི་རྒྱ་མཚོས་བྷནྡྷ་ཁེངས། །མཁའ་སྤྱོད་དག་པའི་ཞིང་ཁམས་ཐམས་ཅད་ནས། །ཡེ་ཤེས་བདུད་རྩི་སྤྱན་དྲངས་གཉིས་མེད་ཐིམ། །ཧཱུྃ་ཞུ་ཐིམ་པས་ཐུགས་ཀྱི་བདུད་རྩི་སྔོ། །ཨཱཿཞུ་ཐིམ་པས་གསུང་གི་བདུད་རྩི་དམར། །ༀ་ཞུ་ཐིམ་པས་སྐུ་ཡི་བདུད་རྩི་དཀར། །ཧ་ཞེས་བརྗོ་པས་ཁ་དོག་མུ་ཏིག་མདོག །ཧོཿཞེས་བརྗོད་པས་དྲི་བཟང་དཔག་མེད་འཐུལ། །ཧྲཱིཿཞེས་བརྗོད་པས་རོ་བཅུད་ཕུན་སུམ་ཚོགས། །སྭཱ་ཞེས་བརྗོད་པས་དགོས་འདོད་ལྷུན་གྱིས་གྲུབ། །ཧཱ་ཞེས་བརྗོད་པས་མགྲོན་
རྣམས་དགྱེས་པ་བསྐྱེད། །ༀ་ཨཱཿཧཱུྃ་ཧ་ཧོ་ཧྲཱིཿསྭཱ་ཧཱ། བདུད་རྩིའི་རླངས་པར་མཆོད་པའི་ལྷ་མོ་ནི། །བྱེ་བ་དུང་ཕྱུར་སངས་རྒྱས་ཞིང་ཀུན་ཁྱབ། །ཕྱག་ན་རིན་ཆེན་ལས་གྲུབ་བྷནྡྷའི་སྐྱོགས། །ཉི་ཟླའི་ཚད་ཙམ་བསྣམས་པས་བདུད་རྩི་གཅུས། །ལྷ་ཚོགས་སོ་སོའི་མདུན་དུ་བཏེགས་ཙམ་གྱིས། །ལྗགས་ལས་འོད་ཟེར་སྦུ་གུས་བདུད་རྩི་གསོལ། །མཉེས་ཤིང་ཚིམ་ནས་སྐུ་ལུས་བཀྲག་རྒྱས་གྱུར། །དེ་ནི་དམིགས་པས་བསྔོ་བའོ། །ན་མོ་གུ་རུ་དེ་ཝ་ཌཱ་ཀི་ནི་སརྦ་དྷརྨ་པཱ་ལ་ཨི་དཾ་བ་ལིངྟི་ཁ་ཁ་ཁཱ་ཧི་ཁཱ་ཧི། དེ་ནི་སྔགས་ཀྱིས་བསྔོ་བའོ། །བསྡུ་ན་དེས་ཆོག །རྒྱས་པར་སྤྲོ་ན་བཛྲ་གུ་རུ་སོགས་དང་། ༀ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙ་ན་དྷརྟུ་ཨཱཿༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། ༀ་ཤྲཱི་མ་ཧཱ་ཀཱ་ལ་ག་ཎ་གུ་ཧྱ་རཾ་སིདྡྷི་ཧཱུྃ་ཕཊ། དཔེ་གཅིག་ནང་འདི་བཞིན་འདུག །མཆན། བླ་མ་ཡི་དམ་མཁའ་འགྲོ་ཆོས་སྐྱོང་གི་རྩ་སྔགས་ལ་ཨི་དཾ་བ་ལིངྟ་ཁཱ་ཧི་བཏགས། ལག་པར་ཐལ་མོ་སྦྱར་ལ་ཁ་གྱེན་དུ་བསྟན་ནས་ཕྱེ་ལ་བྷནྡྷའི་དབྱིབས་བྱ། ཁཱ་ཧི་ཟེར་བ་ཙམ་ནས་སེ་གོལ་རེ་བཏབ། དེ་ནི་ཕྱག་རྒྱས་བསྔོ་བ་ཡིན། དེ་ནས་གྱེར་གྱི་བསྔོ་བ་ནི། ཧྲཱིཿཆོས་སྐུ་སྣང་བ་མཐའ་ཡས་ཚེ་དཔག་མེད། །ཚེ་བདག་རིགས་ལྔ་ཡབ་ཡུམ་ལྷ་མོ་ལྔ། མགྱོགས་མ་བཞི་དངསྒོ་མ་བཞི་ལ་སོགས། །འཆི་མེད་ཚེ་ཡི་ལྷ་ཚོགས་ཐམས་ཅད་ཀྱིས། །མ་ཧཱ་བ་ལིངྟ་ཡི་གཏོར་མ་འདི་ལ་དཔེ་གཅིག་ནང་འདུག །མཆན།
བཞེས། །འཆི་མེད་ཚེ་དང་ནད་མེད་བདེ་བ་སྩོལ། །ལོངས་སྐུ་ཐུགས་རྗེ་ཆེན་པོ་སྤྱན་རས་གཟིགས། །ཡབ་ཡུམ་སྲས་འཁོར་བསྐལ་བཟང་སངས་རྒྱས་སྟོང་། །ཐུགས་རྗེས་འགྲོ་འདུལ་ལྷ་ཚོགས་ཐམས་ཅད་ཀྱིས། །ཡེ་ཤེས་བདུད་རྩིའི་གཏོར་མ་འདི་བཞེས་ལ། །འབྲེལ་ཚད་དོན་ལྡན་འཁོར་བ་དོང་སྤྲུགས་མཛོད། །སྤྲུལ་སྐུ་པདྨ་འབྱུང་གནས་ཐོད་ཕྲེང་ལྔ། །མཚན་བརྒྱད་འཕྲུལ་མཚན་བཞི་བཅུ་ཐམ་པ་དང་། །ཨོ་རྒྱན་བྱེ་བ་ཕྲག་བརྒྱ་ལ་སོགས་པའི། །པད་འབྱུང་ཞི་བའི་ལྷ་ཚོགས་ཐམས་ཅད་ཀྱིས། །མ་ཧཱ་བ་ལིངྟ་ཡི་གཏོར་མ་བཞེས། །སྐྱེ་འཆི་མེད་པའི་དངོས་གྲུབ་སྩལ་དུ་གསོལ། །དགའ་རབ་ཤྲཱི་སེང་རྒྱ་གར་རིག་འཛིན་བརྒྱད། །རྗེ་འབངས་ཉེར་ལྔ་གཏེར་སྟོན་བརྒྱ་རྩ་བརྒྱད། །མཚུངས་མེད་རཱ་ག་ཨསྱ་ལ་སོགས་པ། །དབང་ལུང་མན་ངག་གང་ནས་བརྒྱུད་པ་ཡི། །རིག་འཛིན་སློབ་དཔོན་ལྷ་ཚོགས་ཐམས་ཅད་ཀྱིས། །ཡེ་ཤེས་བདུད་རྩིའི་གཏོར་མ་འདི་བཞེས་ལ། །བྱིན་རླབས་འཛད་མེད་ཆུ་བོའི་རྒྱུན་བཞིན་སྩོལ། །དམར་ནག་མེ་ཕྲེང་ཡབ་ཡུམ་གོ་ཆའི་ལྷ། །དྲག་པོ་རིགས་བཞི་མཁའ་འགྲོ་སྡེ་བཞི་དང་། །ཕྲིན་ལས་ལྷ་བཞི་ཁྲོ་བཅུ་སྒོ་བར་བཅས། །རིག་འཛིན་ཁྲོས་པའི་ལྷ་ཚོགས་ཐམས་ཅད་ཀྱིས། །མ་ཧཱ་ཱབ་ལིངྟ་ཡི་གཏོར་མ་བཞེས། །ལུས་ངག་ཡིད་གསུམ་བསྲུང་ཞིང་བསྐྱབ་ཏུ་གསོལ། །
ཀུན་བཟང་རིགས་ལྔ་ཞི་བ་བཞི་བཅུ་གཉིས། །ཁྲག་འཐུང་རིགས་དྲུག་འབར་བ་ལྔ་བཅུ་བརྒྱད། །སྒྱུ་འཕྲུལ་ཞི་ཁྲོ་རབ་འབྱམས་ལྷ་ཚོགས་ཀྱིས། །མ་ཧཱ་བ་ལིངྟ་ཡི་གཏོར་མ་བཞེས། བར་དོར་རང་སར་གྲོལ་བར་མཛད་དུ་གསོལ། །ཆེ་མཆོག་དཔལ་དགུའི་དཀྱིལ་འཁོར་ལྷ་ཚོགས་ནི། །བདུན་བརྒྱ་ཉི་ཤུ་རྩ་ལྔ་ཐམས་ཅད་ཀྱིས། །མ་ཧཱ་བ་ལིངྟ་ཡི་གཏོར་མ་བཞེས། །ཕྱི་ནང་གསང་བའི་བར་ཆད་ཞི་བར་མཛོད། །བླ་མ་དགོངས་འདུས་རྩ་གསུམ་སྲུང་མའི་ཚོགས། །རྒྱུད་སྡེ་བཞི་དང་ཐེག་དགུའི་ལྷ་ཚོགས་ཀྱིས། །ཡེ་ཤེས་བདུད་རྩིའི་བ་ལིང་འདི་བཞེས་ལ། །སྲུང་སྐྱོབ་ཚེ་དབང་མཆོག་གི་དངོས་གྲུབ་སྩོལ། །རྡོར་སེམས་རྣམ་འཇོམས་དཀར་པོ་གསང་བའི་བདག །རྡོ་རྗེ་གཞོན་ནུ་ཡབ་ཡུམ་སྲས་མཆོག་བཞི། །ཁྲོ་བཅུ་ཡབ་ཡུམ་ཁྲག་འཐུང་ཕུར་སྲུང་སོགས། །བདུད་འདུལ་ཕུར་བའི་ལྷ་ཚོགས་ཐམས་ཅད་ཀྱིས། །མ་ཧཱ་བ་ལིངྟ་ཡི་གཏོར་མཆོད་བཞེས། །བདུད་དགྲ་དམ་སྲི་འདུལ་བའི་ཕྲིན་ལས་མཛོད། །རྡོ་རྗེ་འཇིགས་བྱེད་དུག་ཧྲུལ་ཡུམ་དང་བཅས། །དགྲ་ནག་གཤེད་དམར་ཕྱག་རྒྱ་ཟིལ་གནོན་སོགས། །འཇམ་དཔལ་སྐུ་ཡི་ལྷ་ཚོགས་ཐམས་ཅད་ཀྱིས། །དམ་རྫས་བརྒྱན་པའི་གཏོར་མ་འདི་བཞེས་ལ། །འཆི་བདག་གཤིན་རྗེའི་བར་ཆད་བཟློག་པར་མཛོད། །ཁྲོ་ཆུ་དུག་གདོང་ལས་གཤིན་དྲུག་དང་བཅས། །ཀིང་
ཀང་དམར་ནག་འཆར་ཀ་ནག་གྱད་ཆེན། །མ་ཧཱ་ཱབ་ལིངྟ་ཡི་གཏོར་མ་བཞེས། །བྱད་ཁ་ཕུར་ཁ་བཟློག་པའི་ལས་མཛོད་ཅིག །དབང་ཆེན་དམར་ནག་རིགས་བཞི་ཡུམ་དང་བཅས། །མེ་དབལ་གནོད་སྦྱིན་ལྕགས་སྡིག་བྱ་ཁྱུང་སོགས། །པདྨ་གསུང་གི་ལྷ་ཚོགས་ཐམས་ཅད་ཀྱིས། །དམ་རྫས་བ་ལིང་མཆོད་པ་འདི་བཞེས་ལ། །སྣང་སྲིད་ཟིལ་གྱིས་གནོན་པའི་དངོས་གྲུབ་སྩོལ། །ཡེ་ཤེས་མཁའ་འགྲོ་སེང་གེའི་གདོང་པ་ཅན། །ཕག་ཁྲོས་ལ་སོགས་ཌཱ་ཀི་བྱེ་བ་འབུམ། །རི་རབ་སོ་གཉིས་རྡུལ་མཉམ་མཁའ་འགྲོ་དང་། །རིན་ཆེན་མཁའ་འགྲོ་དོན་གྲུབ་ལྷ་ལྔ་རྣམས། །དམ་ཚིག་རྫས་ཀྱི་བ་ལིང་འདི་བཞེས་ལ། །རྟེན་འབྲེལ་སྣ་ཚོགས་འཆར་བའི་ཕྲིན་ལས་མཛོད། །མ་ནིང་སྡེ་ལྔ་སྲོག་བདུད་དཔལ་འབར་མ། །ཡང་འཁོར་བརྒྱད་དང་བདུད་དམག་བྱེ་བ་འབུམ། །མགོན་ཆེན་བཞི་བཅུ་རྩ་ལྔ་ཐམས་ཅད་ཀྱིས། །མ་ཧཱ་བ་ལིངྟ་ཡི་གཏོར་མ་བཞེས། །ཕྲིན་ལས་རྣམ་བཞི་ཐོགས་མེད་འགྲུབ་པར་མཛོད། །རེ་ཏི་མཆེད་གསུམ་དུད་སོལ་དམག་ཟོར་རྒྱལ། །སྲིད་པ་མོ་རྒྱུད་ཀུན་འདུས་སྲུང་མའི་གཙོ། །མ་ཧཱ་བ་ལིངྟ་ཡི་གཏོར་མ་བཞེས། །ཕྲིན་ལས་རྣམ་བཞི་ཐོགས་མེད་འགྲུབ་པར་མཛོད། །སེང་གདོང་ཡབ་ཡུམ་བམ་རོ་སྡེ་བརྒྱད་དང་། །ནག་པོ་སྟོང་དང་ཤ་ཟ་འབུམ་གྱི་ཚོགས། །མ་མོ་བྱེ་བ་གནོད་སྦྱིན་ཁྲི་ཕྲག་རྣམས། །
དུར་བདག་མགོན་དཀར་ངས་ནུས་སྤྱང་ཞོན་མཆེད། །དམ་རྫས་བ་ལིང་མཆོད་པ་འདི་བཞེས་ལ། །གསང་སྔགས་བསྟན་པ་རྒྱས་པའི་ཕྲིན་ལས་མཛོད། །རྣམ་སྲས་ཛམ་དམར་ཛམ་ལྷ་སེར་ནག་དཀར། །ནོར་ལྷ་ཕོ་དགུ་མོ་དགུ་ཚོགས་བདག་དང་། །ལྷ་མོ་དཔལ་ཆེན་མ་ཧཱ་དེ་ཝ་དང་། །ཆོས་ཀྱི་སྒྲོན་མ་ཚེ་རིང་མཆེད་ལྔ་དང་། །ཞང་བློན་སྤོམ་ར་ཨཱཪྱ་རེ་མནྟ། །ནོར་ལྷ་རྒྱ་མཚོར་གཏོར་མའི་མཆོད་པ་འབུལ། །ལོངས་སྤྱོད་ཆར་ལྟར་འབེབས་པའི་དངོས་གྲུབ་སྩོལ། །ཨ་ཏི་བླ་མེད་བཀའ་ཡི་བྱ་ར་མ། ཨེ་ཀ་ཛ་ཊི་གཟའ་མཆོག་རཱ་ཧུ་ལ། །དགྲ་འདུལ་སྐྱེས་མཆོག་བཛྲ་ཐིག་ལེ་རྩལ། །བཀའ་སྲུང་གསུམ་པོས་དམ་རྫས་བ་ལིང་བཞེས། །རྫོགས་ཆེན་ཉམས་རྟོགས་འཕེལ་བའི་གྲོགས་མཛོད་ཅིག །སྡེ་དཔོན་སུམ་ཅུ་དྲེགས་ཆེན་བཅོ་བརྒྱད་དང་། །བཙན་བདུད་ཀླུ་མགོན་སྤུ་གྲི་མཆེད་གསུམ་པོ། །དགེ་བསྙེན་ཉེར་གཅིག་གདོང་ལྷ་མཆེད་གསུམ་དང་། །རིགས་མཚུན་ལྷ་སྲུང་རྡོ་རྗེ་དགྲ་འདུལ་རྩལ། །དམག་རྒྱལ་སྤུན་གསུམ་འཁོར་བཅས་གཏོར་མ་བཞེས། །བདག་གི་ལས་ཀུན་འགྲུབ་པའི་གྲོགས་མཛོད་ཅིག །ཕྱི་ནང་གསང་བའི་ལྷ་སྲིན་སྡེ་བརྒྱད་དང་། །སྨྱོ་ཁ་མཁར་ནག་ཐང་ལྷ་ལ་སོགས་པའི། །གནས་བརྒྱད་མཚན་བརྒྱད་ལྡན་པའི་མཐུ་བོ་ཆེ། །ས་བརྒྱད་སེམས་དཔའ་ཆེན་པོས་མཆོད་གཏོར་བཞེས། །
རྒྱལ་འགོང་དམ་སྲིའི་བར་ཆད་བསྲུང་བར་མཛོད། །པདྨ་གསུང་གི་བཀའ་སྲུང་ཆེན་མོ་དང་། །གནོད་སྦྱིན་གཞན་གྱིས་མི་ཐུབ་པ་དང་ནི། །ཡེ་ཤེས་གྲགས་དང་སྐྱེས་བུ་ལུང་བཙན་གཉེན། ནོར་བསྙག་ལ་སོགས་གསང་སྔགས་བསྟན་སྲུང་རྣམས། །མ་ཧཱ་བ་ལིངྟ་ཡི་གཏོར་མ་བཞེས། །རྣལ་འབྱོར་བསམ་དོན་ལྷུན་གྲུབ་ཕྲིན་ལས་མཛོད། །ལྷ་སྲིན་ཀུན་གྱི་ནང་ནས་དམ་ཚིག་ཅན། །མཁའ་རི་ལྕམ་དྲལ་འཁོར་བཅས་གཏོར་མཆོད་བཞེས། །རབ་དངོས་འབྲིང་ཉམས་ཐ་མ་རྨི་ལམ་དུ། །བདག་དང་ཨོ་རྒྱན་མཇལ་བའི་མཇལ་ཁ་མཛོད། །སློབ་དཔོན་ཆེན་པོ་པདྨའི་སྤྱན་སྔ་རུ། །འཇིག་རྟེན་བོད་ཁམས་སྐྱོང་བར་ཞལ་བཞེས་པའི། །རྡོ་རྗེ་གཡུ་སྒྲོན་བསྟན་མའི་ཚོགས་དང་བཅས། །དཔལ་མགོན་བདུན་ཅུ་ཡུལ་ལྷ་གཞི་བདག་ཚོགས། །དམ་རྫས་དཀར་གསུམ་བརྒྱན་པའི་གཏོར་མ་བཞེས། །བདག་གི་ཕྲིན་ལས་ཀུན་འགྲུབ་མཐུན་རྐྱེན་མཛོད། །ཧཱུྃ། རིན་ཆེན་སྣོད་དམ་རང་བྱུང་བྷནྡྷའི་སྣོད། །རྩ་གསུམ་ཀུན་འདུས་གཏོར་མ་རིན་ཆེན་འབར། །ལོག་གསུམ་ནོར་བུ་རྩ་གསུམ་ལྷ་ཚོགས་མཉེས། །ཟུར་གསུམ་ཕོ་རྒྱུད་མོ་རྒྱུད་མ་ནིང་མཉེས། །གཏོར་སྨད་ཟླུམ་པོས་འཇིག་རྟེན་མགྲོན་ཀུན་མཉེས། །པད་འདབ་བཞིས་བསྐོར་རིགས་བཞི་མ་མོ་མཉེས། །ཀྱུ་གུ་བཞིས་མཚན་ཕྲིན་ལས་རྣམ་བཞི་འགྲུབ། །
དཀར་རྩི་དམར་རྩི་ཐབས་ཤེས་འདུ་འབྲལ་མེད། །མཆོད་པའི་སྤྲིན་འཕྲོས་སངས་རྒྱས་ཞིང་ཀུན་ཁྱབ། །དངོས་འབྱོར་བཤམས་པའི་རྟེན་འབྲེལ་དམ་རྫས་འདི། །རྩ་བ་གསུམ་གྱི་ལྷ་ཚོགས་རྣམས་ལ་འབུལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཕྱི་སྣོད་འཇིག་རྟེན་ཡངས་པའི་གཏོར་གཞོང་དུ། །ནང་བཅུད་སེམས་ཅན་ཐམས་ཅད་གཏོར་མར་བཤམས། །རི་རབ་བྱེ་བ་ཕྲག་བརྒྱའི་དཔལ་བཤོས་ལ། །ཉི་ཟླ་བྱེ་བ་ཕྲག་བརྒྱས་གཏོར་རྒྱན་སྤྲས། །གླིང་བཞི་བྱེ་བ་ཕྲག་བརྒྱའི་མཐེབ་ཀྱུས་བསྐོར། །ལྷ་ཀླུ་མི་ཡི་ལོངས་སྤྱོད་གཏོར་མའི་བཅུད། །སྣང་སྲིད་གཞིར་བཞེངས་རང་བྱུང་བ་ལིངྟ། །བདེ་གཤེགས་ཞི་ཁྲོ་རབ་འབྱམས་ལྷ་ལ་འབུལ། །བླང་དོར་མེད་པའི་ཚུལ་གྱིས་བཞེས་ནས་ཀྱང་། །བདག་དང་འགྲོ་ཀུན་ཚོགས་རྫོགས་སྒྲིབ་སྦྱངས་ཏེ། །ཁམས་གསུམ་འཁོར་བ་སྟོང་པའི་ཕྲིན་ལས་མཛོད། །ༀ་ཨཱཿཧཱུྃ་ཧྲཱིཿམ་ཧཱ་བ་ལིངྟ་ཁཱ་ཧི། ཞེས་ཨ་མཆོད་ཡོན་ཏན་གྱིས་བསྐུལ་ནས་རཱ་ག་ཨ་སྱེས་རྟ་ལོ་ཐ་སྐར་ཟླ་བའི་སྔ་དྲོའི་ཐུན་ལ་སྨྲས། ཡི་གེ་པ་ནི་ཤཱཀྱའི་དགེ་སློང་པདྨ་ཐབས་མཁས་ཀྱིས་བྲིས་པའོ། །ཆོས་སྐྱོང་གྲིབ་མ་བཞིན་འཁོར་བར་ཤོག །ཅེས་རྗེ་ཀརྨ་ཆགས་མེད་ཞབས་ཀྱིས་མཛད་པ་ལ། གཏོར་མགྲོན་དམིགས་བསལ་ཁ་ཤས་འཛུད་དགོས་ཞེས། གར་དབང་རིན་པོ་ཆེ་མཆོག་གིས་
བཀའ་གནང་ལྟར། སི་ཏུ་པདྨ་ཉིན་བྱེད་དབང་པོས་བགྱིས་པ་འགལ་བ་མཆིས་ན་རྩ་གསུམ་ལྷ་ལ་བཤགས་ཤིང་། དགེ་བས་འགྲོ་རྣམས་ཀུན་བཟང་རྡོ་རྗེ་འཆང་གི་གོ་འཕང་ཐོབ་པར་གྱུར་ཅིག །། །