ཇོ་བོ་སྔགས་ཀྱི་བདག་པོའི་གཡང་སྐྱབས་དངོས་གྲུབ་འབྱུང་བའི་རྒྱ་མཚོ།
ཇོ་བོ་སྔགས་ཀྱི་བདག་པོའི་གཡང་སྐྱབས་དངོས་གྲུབ་འབྱུང་བའི་རྒྱ་མཚོ་ཞེས་བྱ་བ་བཞུགས་སོ།
སྔོན་འགྲོའི་རིམ་པ་ལ་དང་པོ། བུམ་པ་རྫས་ལྡན་དང་། འོ་དཀར། ཐུན་རྡོ་ལ་སོགས་འདུ་བྱས་ལ། བདག་བསྐྱེད་ཟིན་པའི་རྗེས་སུ། ༀ་སྭ་བྷཱ་ཝས་སྦྱངས། སྟོང་པའི་ངང་ལས་མཚན་ཉིད་ཡོངས་རྫོགས་པའི། །ལས་བུམ་དབུས་སུ་པདྨ་ཉི་མའི་སྟེང་། །ཧཱུྃ་ཡིག་ཡོངས་གྱུར་བཅོམ་ལྡན་བདུད་རྩི་འཁྱིལ། །ལྗང་སྔོན་ཁྲོ་བོའི་ཆས་རྫོགས་ཕྱག་གཉིས་ཀྱིས། །རྒྱ་གྲམ་བསྣམས་ཤིང་སྡིགས་མཛུབ་ཞབས་འདོར་སྟབས། །ཡེ་ཤེས་མེ་དཔུང་འཕྲོ་བའི་ཀློང་དུ་གསལ། །གནས་གསུམ་འབྲུ་གསུམ་མཚན་ལས་འོད་འཕྲོས་པས། །ཕྱོགས་བཅུའི་རྒྱལ་བ་རབ་འབྱམས་སྤྱན་དྲངས་ནས། །བུམ་པའི་ལྷར་ཐིམ་མཆོད་པས་མཉེས་པར་བྱས། །སླར་ཡང་ཐུགས་ཀར་ཧཱུྃ་ཡིག་སྔོན་པོའི་མཐར། །སྔགས་ཕྲེང་འཁོར་ཞིང་སྐུ་ལས་དག་
བྱེད་རྒྱུན། །བབས་པས་བུམ་པ་བདུད་རྩིས་གང་བར་གྱུར། །ༀ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། བཟླ་ཞིང་རྡོ་ཐུན་ལའང་སྔགས་བཏབ་ལ་མཐར། ༀ་བཛྲ་ཨརྒྷཾ་སོགས་ཀྱིས་མཆོད་ལ། སེམས་ཅན་ཉོན་མོངས་བདུད་བཞིའི་གཡུལ་ངོ་ལས། །རྣམ་པར་རྒྱལ་བའི་མཐུ་སྟོབས་ཐོགས་པ་མེད། །འཇིགས་བྱེད་ཁྲོ་བོའི་རྒྱལ་པོ་ཡོངས་ཀྱི་གཙོ། །བདུད་རྩི་འཁྱིལ་པའི་ལྷ་ལ་ཕྱག་འཚལ་ལོ། །བཅོམ་ལྡན་ཁྲོ་བོས་བགེགས་བཟློག་མཛད་དུ་གསོལ། །བུམ་ལྷ་འོད་ཞུ་བདུད་རྩིའི་རང་བཞིན་གྱུར། །ཅེས་བསྟོད། གཉིས་པ་བགེགས་རིགས་རྣམས་ལ་ལན་ཆགས་བསྔོ་བ་ནི། སྣོད་བོར་ཆོག་ཞིག་གི་ནང་དུ་ངར་མི་དང་ཏིང་ལོ་བཅའ། ཡོན་བདག་གི་ཆངས་བུ་དང་། འབྲུ་དཀར་ནག་
དར་ཚོན། ཡོས་བཀྲ། ཡུངས་ལོ་དང་སྙེ་མ། རམ་པ། སྦང་མ། ཞོ་ལད། འོ་རུལ། ཇ་ལོ། སྒོག་བཙོང་། ཕྱུགས་རྣམས་ཀྱི་སྤུ་རིགས། སླས་དང་ཞིང་གི་ས་སྣ་ལ་སོགས་པ་གླུད་རྫས་རྣམས་ཚང་བར་བཀོད་ལ། ཧཱུྃ། ང་ནི་གསང་བདག་རྡོ་རྗེ་འཛིན། །སྤྲུལ་པ་ཡང་སྤྲུལ་ཁྲོ་བོ་དང་། །ཁྲོ་མོའི་ཚོགས་ཀྱིས་གནམ་ས་གང་། །མ་རུང་འདུལ་བའི་གཉེན་པོར་གསལ། །ཧཱུྃ་ཉོན་ཅིག་ལན་ཆགས་བགེགས་རིགས་དང་། །ཀླུ་ཐེལ་བསེ་རག་འགོང་པོ་རྣམས། །མཆོད་སྦྱིན་གཏོར་མ་ལེན་པའི་ཕྱིར། །ཐམས་ཅད་མ་ལུས་འདིར་འདུས་ཤིག །ཡིད་མཐུན་སྣོད་ཀྱི་ནང་དུ་ནི། །གླུད་གཏོར་འདོད་ཡོན་ལྔ་ལྡན་པ། །ཡིག་འབྲུ་གསུམ་གྱིས་བྱིན་བརླབས་ནས། །གང་འདོད་ཟད་མེད་རང་བཞིན་གྱུར། །ཐལ་མོ་སྦྱར་ལ། བདེ་བར་གཤེགས་པ་གཟུགས་མཛེས་འབྱམས་ཀླས་དང་། །འཇིགས་བྲལ་རིན་ཆེན་མང་ལ་ཕྱག་འཚལ་ལོ། །མཆོག་སྦྱིན་པའི་ཕྱག་རྒྱ་དང་བཅས། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེེ་ༀ་སམྦྷ་ར་སམྦྷ་ར་ཧཱུྃ། ལན་བདུན་བརྗོད། གང་ཡང་འདིར་འདུས་འབྱུང་པོའི་ཚོགས། །དམ་སྲི་ལྟོག་འགོང་བསེ་རག་དང་། །ཀླུ་ཐེལ་དབུལ་སྲི་གོད་འདྲེ་དང་། །གྲི་བོ་གྲི་མོ་རྒབ་འདྲེའི་རིགས། །ཀུན་ཀྱང་རྒྱལ་བའི་བཀའ་ལ་ཉོན། །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་
བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །བདེན་ཚིག་བཀའ་ལས་མ་འདའ་ཞིག །མཆོད་སྦྱིན་གླུད་གཏོར་འདི་ལོངས་ལ། །ཚིམ་ཞིང་དགའ་མགུ་ལྡན་གྱུར་ཅིག །བདག་དང་རྒྱུ་སྦྱོར་ཡོན་བདག་དང་། །ཚེ་རབས་ཐོག་མེད་ནས་བསགས་པའི། །ལན་ཆགས་བུ་ལོན་ཤ་མཁོན་བྱང་། །སོ་སོའི་མཐུན་རྫས་འདི་ཁྱེར་ལ། །ཁྱིམ་སྒོ་ལམ་སྲང་འདི་ཉིད་དུ། །མ་གནས་རྒྱ་མཚོའི་ཕ་རོལ་ན། །གསེར་གྱི་ས་གཞི་བརྡལ་བ་དེར། །མྱུར་བ་ཉིད་དུ་ཕྱིར་དེངས་ཤིག །སརྦ་བིགྷྣཱན་གཙྪ། གླུད་གཏོར་རྒྱང་རིང་བར་བསྐྱལ། དེ་ནས་ཐུན་གྱིས་བྲབ་ལ། ཨ་མྲྀ་ཏ་དང་སུམྦྷ་ནི་བརྗོད་ཁྱིམ་དང་ཕྱུགས་སླས་རྣམས་ལ་རྡོ་ཐུན་བྲབ་པ་དང་། གུ་གུལ་བདུག །སྲུང་འཁོར་ནི། ཧཱུྃ། རང་ཉིད་གསང་བདག་ཐུགས་ཀ་ནས། །འོད་ཟེར་ཡེ་ཤེས་མེ་དཔུང་དང་། །ཁྲོ་ཆུང་སྤྲུལ་པ་དཔག་མེད་སྤྲོས། །ཕྱོགས་མཚམས་ཁོར་ཡུག་བར་མེད་གཏམས། །ༀ་བཛྲ་མ་ཧཱ་ཀྲོ་དྷཱ་རཀྵ་རཀྵ་ཧཱུྃ་ཧཱུྃ། གསུམ་པ་ཁྱིམ་ཁྲུས་བྱ་བ་ལས་བུམ་ཐོགས་ལ། མེ་ལོང་ཁྲུས་གསོལ་ནི། ཇི་
ལྟར་བལྟམས་པ་སོགས་དང་། འདི་ནི་ཁྲུས་མཆོག་སོགས་ཁྲུས་སྔགས་དང་བཅས། བདུད་བཞི་བཅོམ་པའི་མཐུ་སྟོབས་ཀྱི། །ཡེ་ཤེས་ལྔ་ལྡན་ཁྲོ་བོའི་རྒྱལ། །བདུད་རྩི་འཁྱིལ་པའི་བྱིན་རླབས་ཀྱི། །ཡེ་ཤེས་བདུད་རྩིའི་རང་བཞིན་ལས། །ཉོན་མོངས་དག་བྱེད་ཆུ་རྒྱུན་གྱིས། །དེང་འདིར་ཁྲུས་གསོལ་བདེ་ལེགས་ཤོག །ཁྲུས་སྔགས་བརྗོད། ཁྱིམ་ལྷ་ཕུག་ལྷ་ཐབ་ལྷ་སོགས། །འགོ་པའི་ལྷ་དང་ཕ་མཚུན་ལྷ། །གཡང་གི་ལྷ་སོགས་ཞིང་ནོར་ལྷ། །དེང་འདིར་ཁྲུས་གསོལ༴ཁྲུས་སྔགས། གང་དག་མི་གཙང་དྲི་མ་ཡིས། །ཁྱེད་རྣམས་མནོལ་ཞིང་གུད་པ་དང་། །ཉམས་གྲིབ་མ་ལུས་དག་གྱུར་ཅིག །དེང་འདིར་ཁྲུས་གསོལ༴ཁྲུས་སྔགས། གནས་ཡུལ་ཁང་ཁྱིམ་མི་ནོར་ལ། །ཐབ་མཁོན་སེལ་ཡུག་རྨེ་ནལ་གྲིབ། །ཟས་གོས་རོ་བག་གྲིབ་རིགས་དང་། །སྡིག་སྒྲིབ་བག་ཆགས་ཉེས་པའི་ཚོགས། །ཐམས་ཅད་བྱང་ཞིང་དག་གྱུར་ཅིག །དེང་འདིར་ཁྲུས་གསོལ་བདེ་ལེགས་ཤོག །ཁྲུས་སྔགས་དང་། ཨ་མྲྀ་ཏ་དང་། རྡོ་རྗེ་རྣམ་པར་འཇོམས་པའི་གཟུངས་སྔགས་བརྗོད་བཞིན་ཁྱིམ་དང་ནོར་སླས་རྣམས་ལ་འོ་དཀར་ཤུག་ལོས་འཐོར་བར་བྱའོ། །དེ་ནས། སངས་རྒྱས་བསོད་ནམས་མཐུ་དག༴སོགས་ལ་ཤླཽ་ཀ་གསུམ་གྱིས་ཤིས་བརྗོད་མེ་ཏོག་འཐོར་ཞིང་།
དེ་ནས་གཡང་སྒྲུབ་མདུན་བསྐྱེད་ལ་འཇུག་པར་བྱའོ།། །།ༀ་སྭ་སྟི། གདོད་ནས་ཀུན་ཁྱབ་ཀུན་བཟང་གཉུག་མའི་གཤིས། །གཤིས་ལུགས་མི་གཡོ་མི་ཕམ་རྒྱལ་བའི་སྲས། །གྲུབ་པ་གྲུབ་པ་ཀུན་ལས་ཆེས་འཕགས་པ། །རྒྱལ་བ་ཀུན་དངོས་ཀརྨ་ཀ་དེ་རྒྱལ། །ཞེས་མཆོད་པར་བརྗོད་ནས། འདིར་སྒྲུབ་བརྒྱུད་ཀརྨ་ཀཾ་ཚང་གི་ཐུན་མོང་མིན་པའི་བཀའ་སྲུང་ཇོ་བོ་སྔགས་ཀྱི་བདག་པོའི་སྒོ་ནས་གཡང་སྐྱབས་བྱ་བ་ནི། སྟེགས་ཀྱི་ཁར་རིན་པོ་ཆེའི་སྣོད་དུ་དཀར་གསུམ་མངར་གསུམ་ཀླུ་སྨན་གྱིས་སྦགས་པའི་གཡང་བཤོས་ནོར་བུ་འབར་བའི་དབྱིབས་ཅན་དང་། མདུན་དུ་མཆོད་གཏོར་སྦྲུལ་དཀྲིས་ཅན། གཞན་ཡང་ཉེར་སྤྱོད་བདུན། གསེར་སྐྱེམས། མདའ་དར་སོགས་གཡང་རྫས་སྤྱི་མཐུན་གཙང་ཞིང་རྒྱ་ཆེ་བ་བཤམས་ལ། ཟླ་བ་གང་ཡང་རུང་བའི་དཀར་ཕྱོགས་ཀྱི་རྒྱལ་ཕུར་འཛོམས་པའི་དུས་སམ་གཟའ་སྐར་ཚེས་གྲངས་བཟང་བར། རྣལ་འབྱོར་པ་ཤ་ཆང་སོགས་སྤངས་ནས་ཁྲུས་དང་གཙང་སྦྲ་ལྡན་བཞིན་པའི་ཐོག་མར་སྐྱབས་སེམས་སྤྱི་ལྟར་སྔོན་དུ་འགྲོ་བས། ༀ་སྭ་བྷཱ་ཝ་སོགས། སྟོང་པའི་ངང་མདངས་རང་རིག་ཧཱུྃ་མཐིང་ཀ། ཡོངས་གྱུར་རྒྱལ་ཀུན་མཐུ་སྟོབས་གཅིག་བསྡུས་པ། །བཅོམ་ལྡན་གསང་བའི་བདག་པོ་སྐུ་མདོག་མཐིང་། །ཞལ་གཅིག་སྤྱན་གསུམ་ཁྲོ་བོའི་ཆས་རྣམས་རྫོགས། །འདོར་སྟབས་
ཕྱག་གཡས་རྡོ་རྗེ་གཡོན་སྡིགས་མཛུབ། །མེ་ཡི་ཞགས་པས་ལོག་འདྲེན་གཞོབ་ཐུལ་བསྲེགས། །གནས་གསུམ་འབྲུ་གསུམ་འོད་ཀྱིས་ཡེ་ཤེས་པ། །སྤྱན་དྲངས་གཉིས་མེད་གྱུར་པའི་ཐུགས་ཀར་ནི། །ཉི་སྟེང་ཧཱུྃ་མཐར་སྔགས་ཀྱིས་བསྐོར་བར་གྱུར། །ༀ་བཛྲ་ཙཎྜ་མ་ཧཱ་རོ་ཥ་ན་ཧཱུྃ་ཕཊ། །ཅེས་ཅི་ནུས་བཟླས། ཨརྒྷཾ་སོགས། ལྕང་ལོ་ཅན་གྱི་གནས་མཆོག་དམ་པ་སོགས་ཀྱིས་བསྟོད། དེ་ནས་མདུན་བསྐྱེད་ཀྱི་རྟེན་རྣམས་བསངས་སྦྱངས་ཤིང་བསྐྱེད་པ་ནི། ༀ་ཨཱཿབིགྷྣཱན་སོགས་དང་། ༀ་སྭ་བྷཱ་ཝ་སོགས། རང་ཉིད་ཡི་དམ་གྱི་ལྷར་གསལ་བའི་མདུན་དུ་ཕྱི་མཐའི་རྒྱ་མཚོ་ཆེན་པོ་ལ། ནང་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཀྱི་ཁང་པ་རྒྱན་དང་བཀོད་པ་ཕུན་སུམ་ཚོགས་པ་ཡངས་ཤིང་རྒྱ་ཆེ་བའི་དབུས་སུ། པྃ་ལས་པདྨ་དཀར་པོ་འདབ་མ་བརྒྱད་པའི་ལྟེ་བར་ཟླ་བའི་གདན་གྱི་སྟེང་དུ་ཡི་གེ་ཕུཿསེར་པོ། དེ་འོད་དུ་ཞུ་བ་ལས་ཇོ་བོ་སྔགས་ཀྱི་བདག་པོ། སྐུ་སྟོད་མི་རུ་འདུག་པ། སྐུ་སྨད་སྦྲུལ་དུ་འདུག་པ། སྐུ་མདོག་སེར་ཞིང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། གཞོན་ནུ་མཛེས་པའི་ཆ་བྱད་ཅན། དབུ་ལ་སྦྲུལ་མགོ་བདུན་གྱི་གདེངས་ཀ་དང་ལྡན་པ། སྐུ་ཡིས་སྲིད་པ་གསུམ་ལ་ཁྱབ་པ། དེ་ཡི་ཕྱི་རིམ་པད་འདབ་བརྒྱད་ལ་ཟླ་བའི་སྟེང་དུ་ཡི་གེ་ཕུཿབརྒྱད་ཡོངས་
སུ་གྱུར་པ་ལས། ཤར་དུ་མཐའ་ཡས་དཀར་པོ་ཨུཏྤལ་འཛིན་པ། ལྷོར་པདྨ་དམར་པོ་པདྨ་འཛིན་པ། ནུབ་ཏུ་འཇོག་པོ་དམར་པོ་དགྲ་སྟྭ་འཛིན་པ། བྱང་དུ་ནོར་རྒྱས་སེར་པོ་བུམ་པ་འཛིན་པ། བྱང་ཤར་དུ་པད་ཆེན་དཀར་པོ་སྦྲུལ་ཞགས་འཛིན་པ། ཤར་ལྷོར་དུང་སྐྱོང་སེར་པོ་དུང་ཕོར་འཛིན་པ། ལྷོ་ནུབ་ཏུ་ཀརྐོ་ཊ་ནག་པོ་སྦྲུལ་ཞགས་འཛིན་པ། ནུབ་བྱང་དུ་རིགས་ལྡན་དཀར་པོ་རིན་པོ་ཆེའི་རྐྱལ་བུ་འཛིན་པ་སྟེ། ཐམས་ཅད་ཀྱང་ལྟེ་བ་ཡན་ཆད་ཁྱེའུའི་གཟུགས་ཅན། ལུས་སྨད་ལྟོ་འགྲོའི་མཇུག་མ་དང་། མགོ་བོ་གདེངས་ཀ་དང་ལྡན་ཞིང་། རིན་པོ་ཆེའི་རྒྱན་གྱིས་མཛེས་པ། བཀའ་ཉན་དང་གསུང་སྡོད་ཀྱི་ཚུལ་དུ་གནས་པ་གཙོ་འཁོར་ཐམས་ཅད་ཀྱི་ཐུགས་ཀར་མེ་ལོང་ལ་གཟུགས་བརྙན་ཤར་བ་བཞིན་དུ་ཡི་གེ་ཕུཿགསལ་བ་དེ་ལས་འོད་ཟེར་འཕྲོས་པས་རི་རབ་ལྷུན་པོའི་ལྷོ་ཕྱོགས་མ་དྲོས་རྒྱ་མཚོ་ཆེན་པོ་དང་། རོལ་པའི་མཚོ་བདུན་ལ་སོགས་པ་ནས། ཇོ་བོ་སྔགས་ཀྱི་བདག་པོ་ལ་བཙུན་མོ་སྲས་དང་ཀླུ་ཆེན་བརྒྱད་སོགས་འཁོར་ཀླུ་རིགས་བྱེ་བ་དུང་ཕྱུར་དཔག་ཏུ་མེད་པས་བསྐོར་བ་སྤྱན་དྲངས་པར་གྱུར། ཧཱུྃ་རི་རབ་ལྷོ་ཕྱོགས་མ་དྲོས་ན། །རིན་ཆེན་བརྩེགས་པའི་ཁྲི་སྟེང་ནས། །ཀླུ་ཡི་རྒྱལ་པོ་སོག་མ་མེད། །ཀླུ་ཆེན་མང་པོའི་འཁོར་དང་བཅས། །
བདག་གིས་མཆོད་ཕྱིར་སྤྱན་འདྲེན་ན། །དམ་ཚིག་དབང་གིས་གཤེགས་ནས་ཀྱང་། །རིན་ཆེན་པདྨའི་ཁྲི་སྟེང་དུ། །བརྗིད་ཅིང་འགྱིང་བར་བཞུགས་སུ་གསོལ། །ལྕགས་ཀྱུའི་ཕྱག་རྒྱ་དང་བཅས་ནས། ༀ་ཕུཿཏ་ཕུཿཏ་མ་ཧཱ་ཀྲོ་དྷ་ཧཱུྃ། སིདྡྷཱི་སིདྡྷི་སྥོ་ཊ་ཡ་ཧཱུྃ། ནཱ་ག་རཱ་ཛ་ས་པ་རི་ཝཱ་ར་ཨཱ་ཀཪྵ་ཡ་ཛཿཛཿཧཱུྃ་བྃ་ཧོཿཧྲཱིཿཛཿཨརྒྷཾ་སོགས། ཛཿཧཱུྃ་བྃ་ཧོཿདམ་ཚིག་པ་དང་དབྱེར་མེད་དུ་གྱུར། རང་གི་ཐུགས་ཀ་ནས་སྔགས་ཀྱི་འོད་ཟེར་བྱུང་སྟེ་སྔགས་བདག་གི་ཐུགས་ཀར་འཁོར་བས་ཐུགས་དམ་གྱི་རྒྱུད་བསྐུལ་བར་གྱུར། ༀ་ཕུཿཏ་ཕུཿཏ་མ་ཧཱ་ཀྲོ་དྷ་ཧཱུྃ། སིདྡྷི་སིདྡྷི་སྥོ་ཊ་ཡ་ཧཱུྃ་ཕཊ་སྭཱ་ཧཱ། ཞེས་བཟླས། ཨཥྚ་ནཱ་ག་ས་པ་རི་ཝཱ་ར་སརྦ་སིདྡྷི་ཕ་ལ་བྷྲཱུྃ། ཞེས་པའི་བཟླས་པའང་བྱ། དེ་ནས་མཆོད་གཏོར་རྣམས། བིགྷྣན་གྱིས་བསངས། སྭཱ་བྷཱ་ཝས་སྦྱངས། བྷཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། བཅུད་ལྷ་དང་མིའི་ལོངས་སྤྱོད་འདོད་པའི་ཡོན་ཏན་སྣ་ཚོགས་ཀྱིས་གང་བར་གྱུར། ༀ་ཨ་མྲྀ་ཏེ་ཧཱུྃཿལན་གསུམ། དམ་ཚིག་གི་བདུད་རྩིའི་རྒྱ་མཚོ་ཆེན་པོར་ༀ་ཨཱཿཧཱུྃ། ལན་གསུམ། ཡེ་ཤེས་ཀྱི་བདུད་རྩི་ཆར་བཞིན་དུ་བབ་ཅིང་དམ་ཚིག་གི་བདུད་རྩི་དང་འདྲེས་པས་ཟག་པ་མེད་པའི་བདེ་བ་སྐྱེད་པར་བྱེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར།
ཨ་ཀཱ་རོ་ལན་གསུམ་བརྗོད་པས་བྱིན་གྱིས་བརླབས་ལ། ཧཱུྃ་སྟོང་གསུམ་སྟོང་གི་འཇིག་རྟེན་ན། །ལྷ་རྫས་དགེ་བའི་མཆོད་གཏོར་འདི། །ཀླུ་རྒྱལ་འཁོར་དང་བཅས་ལ་འབུལ། བཞེས་ནས་དངོས་གྲུབ་སྩལ་དུ་གསོལ། །དག་གསལ་དྲི་ཞིམ་ལེགས་ལྡན་པའི། །དྲི་ཆབ་བདུག་སྤོས་མེ་ཏོག་སོགས། །ཀླུ་རྒྱལ་ཁྱོད་ལ་འབུལ་ལགས་ན། །བདག་གི་ལས་རྣམས་འགྲུབ་པར་མཛོད། །ཡིད་འོང་ལེགས་སྦྱར་རོ་ལྡན་པའི། །སྦྲང་རྩི་དང་ནི་ཤིང་ཏོག་སོགས། །ཀླུ་རྒྱལ་ཁྱོད་ལ་འབུལ་ལགས་ན། །བདག་ཅག་འཁོར་བཅས་བཀྲ་ཤིས་མཛོད། །ཕུན་ཚོགས་དབྱིབས་ལེགས་ཡིད་འོང་དང་། །ཡིད་འཛིན་སྒྲ་སྙན་རོལ་མོ་དང་། །དྲི་ཞིམ་ཡིད་འོང་ཕུན་སུམ་ཚོགས། །འབྲས་ཆེན་ལ་སོགས་ཞལ་ཟས་དང་། །འཇམ་མཉེན་མཛེས་པའི་ན་བཟའ་དང་། །ཀླུ་རྒྱལ་འཁོར་དང་བཅས་ལ་འབུལ། །བདག་གི་བསམ་པ་འགྲུབ་པ་དང་། །སངས་རྒྱས་བསྟན་པ་དར་བར་མཛོད། །ནཱ་ག་རཱ་ཛ་ཨཥྚ་ནཱ་ག་ནཱ་གི་ས་པ་རི་ཝཱ་ར་ཨརྒྷཾ་སོགས་ནས། ཤབྡའི་བར་གྱིས་མཆོད་ནས། ཀླུ་རྒྱལ་འཁོར་དང་བཅས་པ་རྣམས་ཀྱི་ལྗགས་འོད་ཟེར་གྱི་ཚུལ་དུ་གཏོར་མ་ལ་ཟུགས་ནས་གསོལ་བས་མཉེས་ཤིང་དགྱེས་པ་བསྐྱེད་པར་གྱུར། ༀ་ཕུཿཏ་ཕུཿཏ་མ་ཧཱ་ཀྲོ་དྷ་ཧཱུྃ་
ཕཊ། སིདྡྷི་སིདྡྷི་སྥོ་ཊ་ཡ་ཧཱུྃ། ཨི་དམ་བ་ལིང་ཁ་ཁ་ཁཱ་ཧི་ཁཱ་ཧི། ཞེས་བདུན་ནམ་ཉེར་གཅིག་བརྗོད། ༀ་ཨ་ནན་ཏ་བ་སུ་ཀི་ཏ་ཀྵ་ཀ། ཀརྐོ་ཊ་ཀ། པདྨ། མ་ཧཱ་པདྨ། ཤཾ་ཁ་པཱ་ལ། ཀུ་ལི་ཀ། ༀ་བྷཀྵ་བྷཀྵ་ཨཱ་གཙྪ་ཨཱ་གཙྪ། མ་ཧཱ་ནཱ་ག་ཨ་དྷི་པ་ཏི་སརྦ་བྷུར་བྷུ་ཝ་ཕྲུཾ་ཕུ་སྭཱ་ཧཱ། ཞེས་གཏོར་མ་ཕུལ། དེ་ནས་བཀའ་བསྒོ་བ་དང་ཕྲིན་ལས་བཅོལ་བ་ནི། སྔགས་ཀྱི་བདག་པོ། འཇིག་རྟེན་མཐུ་ཆེན་སྲིད་གསུམ་ཚར་གཅོད། འགྲོ་དྲུག་དབང་སྡུད། ཁམས་གསུམ་བདག་པོ། གསོད་བྱེད་ཆེན་པོ། སྦྲུལ་མགོ་བདུན་པ། ཟུར་ཕུད་ལྔ་པ། ཁྱེའུ་ཆུང་གཞོན་ནུ། གཞོན་ནུ་མཛེས་པ། གཞོན་ནུ་གཏུམ་པོ། ནག་པོ་ཆེན་པོ། བདུད་པོ་ཆེན་པོ། ཀླུ་རྒྱལ་སོག་མ་མེད། ལས་མཁན་ཆེན་པོ། གཡོག་པོ་ཆེན་པོ། ཁོལ་པོ་ཆེན་པོ། སྲས་དང་བཙུན་མོ། ཀླུ་ཆེན་བརྒྱད་དང་། གཞན་ཡང་ས་བདག་ཀླུ་གཉན་འཁོར་ཚོགས་བྱེ་བ་འབུམ་སྡེའི་ཚོགས་རྣམས་ཀྱིས། མཆོད་པ་དམ་པ་འདི་བཞེས་ལ། བདག་གི་བྲན་པོའི་ཚུལ་གྱིས་ཤིག །བདག་གི་གཡོག་པོའི་ཚུལ་གྱིས་ཤིག །བདག་གི་ལས་མཁན་གྱི་ཚུལ་གྱིས་ཤིག །སྔགས་ཀྱི་བདག་པོ་འཁོར་དང་བཅས་པ་རྣམས་ཀྱིས་བདག་གིས་བསྒོ་
བ་བཞིན་གྱིས་ཤིག །ནཱ་ག་རཱ་ཛ་ས་པ་རི་ཝཱ་ར་དགའ་བ་དང་དགྱེས་པར་གྱུར་ཅིག །བསྟོད་པ་བྱ་བ་ནི། ཀླུ་ཡི་རྒྱལ་པོ་སོག་མ་མེད། །གསེར་གྱི་མདོག་ཅན་གཞོན་ནུའི་གཟུགས། །སངས་རྒྱས་སྟོང་གི་ཕྲིན་ལས་མཛད། །སྔགས་བདག་སྐུ་ལ་ཕྱག་འཚལ་བསྟོད། །ཀླུ་ཡི་རྒྱལ་པོ་སོག་མ་མེད། །སྐལ་བཟང་བྱང་ཆུབ་སེམས་དཔའ་སྟེ། །གཞོན་ནུ་གཏུམ་པོ་སྦྲུལ་མགོ་ཅན། །ཕྲིན་ལས་ཀུན་འགྲུབ་ཕྱག་འཚལ་བསྟོད། །ཀླུ་ཡི་རྒྱལ་པོ་སོག་མ་མེད། །རི་རབ་ལྷོ་ཕྱོགས་མ་དྲོས་ན། །གཞོན་ནུ་གཏུམ་པོ་མདངས་དང་ལྡན། །སེམས་དཔའ་ཆེ་ལ་ཕྱག་འཚལ་བསྟོད། །རྒྱ་མཚོ་ཆུ་ཀླུང་ལྟེང་ཀ་སོགས། །ཀུན་ལ་དབང་བསྒྱུར་ཀླུ་ཆེན་བརྒྱད། །ཀླུ་རིགས་བྱེ་བ་འབུམ་སྡེའི་ཚོགས། །འཁོར་དང་བཅས་ལ་ཕྱག་འཚལ་བསྟོད། །ཅེས་དང་། ཧཱུྃ། ཕྱག་ན་རྡོ་རྗེའི་བཀའ་ཉན་གསུང་སྡོད་པའི། །ཐུགས་རྗེ་རྣམ་དག་པད་ཟླའི་གདན་སྟེང་ན། །སྐུ་མདོག་དམར་སེར་ཕྱག་གཉིས་ཐུགས་ཀར་སྦྱར། །སྐུ་ལ་རིན་ཆེན་སྣ་ཚོགས་མཛེས་པས་བརྒྱན། །དབུ་ལ་སྦྲུལ་མགོ་བདུན་གྱི་གདེངས་ཀ་ལ། །བརླ་གཉིས་ལྟོ་འཕྱེའི་མཇུག་མས་རྒྱན་དུ་དཀྲིས། །རྣལ་འབྱོར་དབང་ཕྱུག་སྐྱོང་བའི་གང་
ཟག་གི། །བར་ཆད་སེལ་ཞིང་ཅི་འདོད་སྒྲུབ་པོ་ཞེས། །རྡོ་རྗེ་འཛིན་པའི་སྤྱན་སྔར་འདུད་པའི་ཚུལ། །སྔགས་ཀྱི་བདག་པོ་འཇིག་རྟེན་མཐུ་བོ་ཆེ། །སྲིད་གསུམ་ཚར་གཅོད་འགྲོ་དྲུག་དབང་དུ་སྡུད། །ཁམས་གསུམ་བདག་པོ་གསོད་བྱེད་ཆེན་པོ་སྟེ། །སྦྲུལ་མགོ་བདུན་དང་ཟུར་ཕུད་ལྔ་ཡིས་བརྒྱན། །གཞོན་ནུ་མཛེས་པ་ཁྱེའུ་ཆུང་གཞོན་ནུའི་ཚུལ། །གཞོན་ནུ་གཏུམ་པོ་ནག་པོ་ཆེན་པོ་སྟེ། །བདུད་པོ་ཆེན་པོ་ཀླུ་རྒྱལ་སོག་མ་མེད། །བྲན་པོ་ཆེན་པོ་ལས་མཁན་ཆེན་པོ་སྟེ། །ཁོལ་པོ་ཆེན་པོ་ཐུགས་རྗེས་གཡོག་པོའི་ཚུལ། །ཁྱོད་ལ་འབུལ་ལོ་མཆོད་པ་འདི་བཞེས་ལ། །རྣལ་འབྱོར་བདག་གི་བྲན་དང་གཡོག་པོར་མཛོད། །ལས་མཁན་ཆེན་པོ་ཁོལ་པོའི་ཚུལ་གྱིས་སྒྲུབས། །འདོད་པའི་དོན་རྣམས་ཐམས་ཅད་འགྲུབ་པར་མཛོད། །ཅེས་དང་། གཡང་འགུགས་ནི། ཧཱུྃ། ཆོས་དབྱིངས་ཡེ་ཤེས་ཆེན་པོའི་ཀློང་། །འགྱུར་མེད་མཐའ་བྲལ་ཞིང་ཁམས་ནས། །བླ་མེད་དཀོན་མཆོག་རིན་ཆེན་གསུམ། །རབ་འབྱམས་རྒྱལ་བའི་ལྷ་ཚོགས་ཀྱི། །ཐུགས་རྗེ་བྱིན་རླབས་ནུས་པའི་རྩལ། །སྤྱན་ལྔ་མངོན་པར་ཤེས་པ་ལྔ། །ལས་བཞི་གྲུབ་པ་ཆེན་པོ་བརྒྱད། །བྲལ་སྨིན་ཡོན་ཏན་བྱེ་བའི་ཚོགས། །མཆོག་དང་ཐུན་
མོང་གྲུབ་པ་གཉིས། །བསམ་གྱིས་མི་ཁྱབ་ཕྱྭ་དང་གཡང་། །བདག་དང་ཡོན་བདག་འདི་ཉིད་ལ། །དུས་འདི་ཉིད་ལ་བསྩལ་དུ་གསོལ། །སྟེང་ཕྱོགས་འདོད་ལྷ་རིགས་དྲུག་དང་། །གཟུགས་ཁམས་གཟུགས་མེད་ཁམས་ཀྱི་གནས། །འདོད་པའི་ཡོན་ཏན་སྣ་ཚོགས་ཀྱི། །ལོངས་སྤྱོད་དཔལ་འབྱོར་ཕུན་ཚོགས་དང་། །བསམ་གཏན་ནང་གི་དགའ་བདེ་ཅན། །འཆི་མེད་བདུད་རྩིའི་བཏུང་བ་ལ། །རྟག་པར་སྤྱོད་པའི་ཕྱྭ་དང་གཡང་། །སྤྲིན་ཕུང་གཏིབས་པ་ཇི་བཞིན་དུ། །བདག་དང་ཡོན་བདག༴། དུས་འདི༴། བར་ཕྱོགས་འཛམ་གླིང་ལས་ཀྱི་ས། །རི་གླིང་རོལ་མཚོ་ཉི་ཟླས་བརྒྱན། །ས་ཆུ་མེ་རླུང་འབྱུང་ལྔ་ཡིས། །ཡོན་ཏན་སྲ་གཤེར་དྲོད་དང་གཡོ། །རྩི་སྨན་རིན་ཆེན་གཏེར་གྱི་ཚོགས། །མ་རྨོས་ལོ་ཏོག་དཔག་བསམ་ཤིང་། །ལྷ་ཀླུ་གཉན་གྱི་ཕོ་བྲང་སོགས། །སྣོད་ཀྱི་འཇིག་རྟེན་ཕྱྭ་དང་གཡང་། །སྦྲང་ཆར་བབས་པ་ཇི་བཞིན་ཏུ། །བདག་དང་༴དུས་འདི༴ནང་བཅུད་སྐྱེ་འགྲོའི་ཚེ་བསོད་དང་། །དཔལ་འབྱོར་དགེ་བཅུ་སྤྱོད་པའི་འབྲས། །ཁྱད་པར་འཁོར་ལོས་བསྒྱུར་པའི་སྲིད། །མཆོག་གི་རིན་ཆེན་སྣ་བདུན་དང་། །ཉེ་བའི་རིན་ཆེན་རྣམ་པ་བདུན།
བཀྲ་ཤིས་རྫས་རྟགས་བརྒྱད་ལ་སོགས། །མདོར་ན་བཅུད་ཀྱི་སེམས་ཅན་གྱི། །ལོངས་སྤྱོད་དཔལ་འབྱོར་ཕྱྭ་དང་གཡང་། །ན་བུན་གཏིབས་པ་ཇི་བཞིན་དུ། །བདག་དང་༴དུས་འདི༴འོག་ཕྱོགས་གདེངས་ཅན་ཀླུ་ཡི་ཡུལ། །རྒྱ་མཚོ་ཆེ་དང་ཆུ་ཀླུང་སོགས། །ཀླུ་ཡི་ཕོ་བྲང་སྐྱེད་མོས་ཚལ། །ཁང་བཟང་ནོར་བུའི་ཁྲི་སྟན་དང་། །ཡིད་བཞིན་བསམ་འཕེལ་ནོར་བུའི་རིགས། །བསམ་གྱིས་མི་ཁྱབ་སྤུངས་པའི་གནས། །སྣ་ཚོགས་རྫུ་འཕྲུལ་སྟོབས་ཀྱི་བདག །འཛམ་བུའི་གླིང་དུ་ཆར་གྱི་རྒྱུན། །འབེབས་མཛད་རྒྱལ་རིགས་རྗེའུ་རིགས་དང་། །བྲམ་ཟེ་གདོལ་པ་ཀླུ་རིགས་བཞིའི། །དངོས་གྲུབ་ལོངས་སྤྱོད་ཕྱྭ་དང་གཡང་། །རྒྱ་མཚོ་འཁྱིལ་བ་ཇི་བཞིན་དུ། །བདག་དང་༴། དུས་འདི༴། གཞན་ཡང་རབ་འབྱམས་རྒྱལ་བའི་ཞིང་། །སྟོང་གསུམ་སྟོང་ཆེན་མི་མཇེད་ཁམས། །གླིང་བཞི་བྱེ་བ་ཕྲག་བརྒྱ་སོགས། །ལྷ་ཀླུ་མི་ཡི་དབང་པོ་ཡི། །ལོངས་སྤྱོད་ཚེ་དཔལ་བསོད་ནམས་སྟོབས། །འཁོར་འདས་རབ་འབྱམས་སྣོད་བཅུད་ཀྱི། །ཕུན་ཚོགས་ཡོན་ཏན་ཕྱྭ་དང་གཡང་། །བདག་དང་༴། དུས་འདི༴། བདག་དང་རྒྱུ་སྦྱོར་ཡོན་བདག་བཅས། །ཚེ་དཔལ་
རི་རབ་ལྟ་བུར་བརྟན། །སྙན་གྲགས་ལྷ་ཡི་རྔ་བཞིན་སྒྲོགས། །ལོངས་སྤྱོད་དཔག་བསམ་འབྲས་ལྟར་རྒྱས། །ཆོས་བརྒྱུད་ཆུ་བོའི་གཞུང་བཞིན་རིང་། །བུ་སློབ་གཟའ་སྐར་གྲངས་བཞིན་འཕེལ། །ཀླུང་རྟ་མངའ་ཐང་སྟོབས་རྩལ་རྒྱས། །དཔལ་འབྱོར་ལོངས་སྤྱོད་གུད་མེད་ཅིང་། །མི་མཆོག་འཁོར་ལོས་སྒྱུར་རྒྱལ་བཞིན། །སྦྱིན་པའི་ཕར་ཕྱིན་ཡོངས་རྫོགས་ཏེ། །གཏན་བདེ་རྫོགས་པའི་སངས་རྒྱས་ཀྱི། །གོ་འཕང་བདེ་བླག་འགྲུབ་པ་ཡི། །སྡོང་གྲོགས་མགོན་སྐྱབས་དཔུང་གཉེན་རྣམས། །ཀླུ་རྒྱལ་འཁོར་དང་བཅས་རྣམས་ཀྱིས། །ཐོགས་པ་མེད་པར་བསྒྲུབ་ནས་ཀྱང་། །ཕྲིན་ལས་ཕྱོགས་མཐར་རྒྱས་པར་མཛོད། །ཅེས་བརྗོད། གྲངས་བསགས་ན་མཆོད་གཏོར་བྱིན་རླབས་མན་ཆད་མཐར་ཆགས་སུ་འདོན། གྲོལ་ཉིན་གཡང་གཏད་བྱ་བའམ་མིན་ཀྱང་གཏོར་མ་མཛོད་དུ་སྦ་ཞིང་། ཧཱུྃ། གསང་བདག་རྡོ་རྗེ་འཛིན་པའི་བཀའ་སྡོད་ཆེ། །ལས་མཁན་ཇོ་བོ་མཐུ་ཆེན་སྔགས་ཀྱི་བདག །ཡབ་ཡུམ་སྲས་འཁོར་སྤྲུལ་དང་ཡང་སྤྲུལ་རྣམས། །མཆོད་བསྟོད་ལས་ཀྱིས་དགྱེས་པ་བསྐང་བའི་མཐུས། །འཁོར་འདས་རབ་འབྱམས་སྟོང་གསུམ་འཇིག་རྟེན་གྱི། །ལྷ་ཀླུ་མི་ཡི་ཚེ་དཔལ་བསོད་ནམས་དང་།
ཕྱྭ་གཡང་དངོས་གྲུབ་བསམ་གྱིས་མི་ཁྱབ་ཀུན། །དེང་འདིར་རྣལ་འབྱོར་བདག་ལ་བསྩལ་ནས་ཀྱང་། །འཛམ་གླིང་སྤྱི་དང་ཁྱད་པར་ཡུལ་ཕྱོགས་འདིར། །ལོ་དགྲ་བཙའ་སད་སེར་བ་འབུ་སྲིན་སོགས། །རྟག་པར་རྒྱུན་ཆད་ཆར་ཆུ་དུས་སུ་འབེབས། །ལོ་ལེགས་སྐྱ་རྒྱལ་འབྲུ་རྣམས་འཕེལ་བར་མཛོད། །མི་རྣམས་བཙན་ཕྱུག་དཔའ་ཞིང་རྟ་རྣམས་མགྱོགས། །རྐང་བཞི་གནག་ལུག་འཕེལ་ཞིང་རྒྱས་པ་སོགས། །ཡིད་ལ་རེ་བའི་འབྲས་བཟང་རྫོགས་པ་དང་། །ལས་བཞིའི་ཕྲིན་ལས་གང་བརྩམ་མྱུར་འགྲུབ་ཅིང་། །མི་མཐུན་གཡུལ་ལས་རྣམ་པར་རྒྱལ་བ་ཡི། །རྒྱལ་མཚན་མི་ནུབ་སྲིད་མཐར་སྒྲེང་བར་མཛོད། །རྒྱལ་བའི་བསྟན་པ་ལུང་དང་རྟོགས་པའི་ཆོས། །ཕྱོགས་དུས་ཀུན་ཏུ་ནུབ་མེད་དར་ཞིང་རྒྱས། །ཁྱད་པར་སྒྲུབ་བརྒྱུད་ཀརྨ་ཀཾ་ཚང་གི། བསྟན་དང་བརྒྱུད་པའི་བསྟན་འཛིན་བུ་སློབ་ཚོགས། །ཐུགས་ཀྱི་བཞེད་པའི་དོན་རྣམས་ལྷུན་གྲུབ་ཅིང་། །ཆོས་དང་ལོངས་སྤྱོད་འཁོར་སློབ་རྒྱས་པར་མཛོད། །མདོར་ན་བདག་གིས་ཅི་ལྟར་བཅོལ་པའི་ལས། །མ་ལུས་གེགས་མེད་མྱུར་དུ་འགྲུབ་པ་ཡི། །ཕྲིན་ལས་དུས་ལ་བབ་པོ་དམ་ཚིག་ཅན། །རིག་འཛིན་ཆེན་པོ་པདྨཱ་ཀ་ར་དང་། །གྲུབ་མཆོག་
ཀརྨ་པཀྵིའི་སྤྱན་སྔ་རུ། །ཇི་ལྟར་ཁས་བླངས་དམ་བཅའ་དེ་བཞིན་དུ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་དང་། མེ་ཏོག་འཐོར་བཞིན་བཀྲ་ཤིས་བརྗོད་པ་ནི། རྡོ་རྗེ་འཆང་ཆེན་ཆོས་དབྱིངས་དག་པའི་མཁར། །ཏཻ་ལོ་པ་སོགས་བཀའ་བརྒྱུད་གྲུབ་བརྙེས་ཀྱི། །རྣམ་འཕྲུལ་ཉི་ཟླའི་འོད་ཟེར་འབུམ་སྤྲོ་བས། །གདུལ་བྱའི་པད་ཚལ་རྒྱས་པའི་བཀྲ་ཤིས་ཤོག །ཐབས་ཤེས་གཉིས་སུ་མེད་པའི་རྒྱུད་སྡེ་བཞིའི། །རྒྱ་མཚོ་མཆོག་ལས་རིམ་གཉིས་ནོར་བུ་གང་། །སྐལ་ལྡན་དེད་དཔོན་དག་གིས་གུས་བླངས་པས། །མཆོག་ཐུན་དངོས་གྲུབ་ཀུན་སྩོལ་བཀྲ་ཤིས་ཤོག །ཡེ་ཤེས་སྒྱུ་མའི་རོལ་པ་མཐའ་ཡས་ཀྱི། །རྡོ་རྗེའི་མེ་ཆར་དྲག་པོ་རྟག་འབེབས་པས། །ལོག་འདྲེན་འཐག་བྱེད་ཆོས་སྲུང་རྒྱ་མཚོ་ཡི། །མྱུར་མགྱོགས་ཕྲིན་ལས་ཟབ་མོའི་བཀྲ་ཤིས་ཤོག །བདུད་བཞི་ལས་རྒྱལ་རྒྱལ་བའི་ཕྲིན་ལས་པ། །ཀརྨ་པ་བསྟན་བསྟན་པའི་སྙིང་པོ་ནི། །ཕྱོགས་མཐར་ཀུན་ཁྱབ་ཁྱབ་ཅིང་རྒྱུན་མི་ཆད། །རྟག་པར་རབ་འཕེལ་འཕེལ་བའི་བཀྲ་ཤིས་ཤོག །ཅེས་སོགས་བརྗོད་དེ་སྦྱིན་བདག་རང་གནས་སུ་བཏང་། ཕྱེ་མར་དྲངས། གཡང་རྫས་རྣམས་མཛོད་དུ་སྦས་ཏེ་ཕྱི་ལ་མི་འཁྱར་བ་བྱ། རྗེས་ནི།
ཨརྒྷཾ་སོགས། བསྟོད་པར་འོས་པ་སོགས། མ་འབྱོར་པ་དང་སོགས་ཡི་གེ་བརྒྱ་པ་ལན་གསུམ་བརྗོད། ལྷ་རྣམས་ནོངས་པ་གང་མཆིས་བཟོད་པར་གསོལ། །སོགས་དང་། བསྔོ་བ་སྨོན་ལམ་གྱིས་མཐའ་བརྒྱན་པར་བྱའོ། །སྨྲས་པ། སྦྱིན་པའི་འབྲས་རབ་རྫོགས་བྱས་ནས། །སྲིད་པའི་ཁམས་ཀུན་གཏོང་མིན་པའི། །གཏན་བདེའི་དབྱིག་གི་ཆར་ཆེན་གྱི། །འདོད་གཏེར་བུམ་པ་བཟང་པོའོ། །ཞེས་པའང་སྒྲུབ་བརྒྱུད་མཆོག་གི་རིང་ལུགས་ལ་མི་ཕྱེད་པའི་འདུན་པ་དང་ལྡན་པ་ཀརྨ་བདེ་དགའ་ཞེས་བྱས་བསྐུལ་ངོར། སི་ཏུ་པདྨ་ཉིན་བྱེད་དབང་པོས་སྤེལ་བ་ཕྱོགས་དུས་ཀུན་ཏུ་དགེ་ལེགས་དཔལ་ཡོན་ཡོངས་སུ་རྒྱས་པའི་རྒྱུར་གྱུར་ཅིག །སརྦ་མངྒ་ལམ།། །།