པར་བྱང་སྨོན་ཚིག
ན་མོ་བུདྡྷ་བཛྲ་དྷ་ར་ཡེ། ཟག་བྲལ་རང་བཞིན་འདུས་མ་བྱས་པ་དོན་དམ་ཆོས་ཉིད་ལྷུན་གྲུབ་འགྱུར་བ་མེད་པའི་རྩལ་དང་མདངས། །ཟག་བཅས་འགྲོ་བའི་འདུས་བྱས་ཀུན་རྫོབ་ཡིད་ཀྱི་དབང་པོར་གདོད་ནས་ལས་སྨོན་ཇི་བཞིན་གསལ་བ་ནི། །ཁྱབ་བདག་རྒྱལ་བ་རྡོ་རྗེ་འཆང་དབང་གང་འདུལ་རོལ་པར་དུས་མེད་རྒྱུན་གྱི་འཁོར་ལོ་ཤར་བ་ཉིད། །དག་གཙང་མོས་གུས་སེམས་བསྐྱེད་ལས་འཁྲུངས་བརྒྱུད་པའི་བྱིན་རླབས་ཚོགས་གཉིས་ཡེ་ཤེས་གནས་ལུགས་གཞི་ལ་འཁྲུངས། །རབ་འབྱམས་མཐའ་ཡས་ཞིང་ཀུན་ཏུ། །རྫོགས་པའི་སངས་རྒྱས་བགྲང་ཡས་ཀྱང་། །ཞིང་འདིའི་རྣམ་འདྲེན་བཞི་པ་ནི། །བདག་སོགས་གདུལ་བྱའི་སྐྱབས་ཀྱི་མཆོག །ཉིད་ཀྱི་ཟབ་གསལ་དམ་པའི་ཆོས། །གང་འདུལ་དེར་སྣང་མཐའ་ཡས་པ། །བརྒྱུད་འཛིན་པཎ་གྲུབ་ཚོགས་རྣམས་ཀྱིས། །ཐེག་པ་གསུམ་དུ་བསྡུས་ཏེ་སྤེལ། །ཉན་ཐོས་ཐེག་པའི་ལྟ་སྒོམ་སྤྱོད། །རྣམ་གྲངས་མང་ཡང་སྙིང་པོའི་དོན། །སྡུག་བསྔལ་ཀུན་འབྱུང་འགོག་པ་ལམ། །ཞི་ལྷག་ཟུང་འཇུག་ཉམས་ལེན་ཉིད། །ཐེག་ཆེན་ཟབ་མོ་ལྟ་བ་དང་། །རྒྱ་ཆེན་སྤྱོད་པ་སྟོང་རྟེན་འབྱུང་། །སྨོན་འཇུག་སེམས་བསྐྱེད་ཚད་མེད་ཀུན། །ཕ་རོལ་ཕྱིན་པ་དྲུག་ཏུ་འདུས། །རྡོ་རྗེ་ཐེག་པའི་གཞི་ལམ་འབྲས། །རྒྱུད་སྡེ་བཞི་དྲུག་བསྐྱེད་རྫོགས་ཀུན། །སྙིང་པོ་ཕྱག་རྫོགས་མན་ངག་དང་། །ཡང་སྙིང་ཟུང་འཇུག་རྣལ་འབྱོར་ཆེ། །སྔར་བྱོན་མེས་པོ་བཀའ་དྲིན་ཅན། །རྒྱ་བལ་པཎ་གྲུབ་ཆེ་རྣམས་དང་། །བོད་ཀྱི་སྐྱེས་ཆེན་ལོ་ཙཱ་བ། །ཆོས་རྒྱལ་དད་འབངས་བཅས་པ་ཀུན། །སྡེ་སྣོད་གསུམ་དང་རྒྱུད་སྡེ་བཞི། །བཀའ་དང་དེ་འབྲེལ་བསྟན་བཅོས་ཚོགས། །གཞུང་རྒྱུད་ཁྲིད་དང་མན་ངག་བཅས། །
སྔ་བར་ཕྱི་མར་བསྒྱུར་ཅིང་ཞུས། །རྒྱལ་བའི་གདུང་འཚོབ་འཚོ་སྐྱེས་རྗེ། །གྲུབ་པའི་དབང་ཕྱུག་དུ་མ་ཡི། །གསར་རྙིང་གཏེར་ཁ་ལས་འཁྲུངས་པའི། །ཟབ་ཆོས་ཉེ་བརྒྱུད་དུས་སུ་སྨིན། །རྙིང་མ་ལམ་འབྲས་བཀའ་གདམས་པ། །མར་པ་བཀའ་བརྒྱུད་ཤངས་པ་དང་། །ཞི་བྱེད་སྦྱོར་དྲུག་རྡོ་རྗེ་བསྙེན། །ཤིང་རྟ་བརྒྱད་ཀྱི་བརྒྱུད་པ་འཁྲུངས། །སྟོད་ཀྱི་མངའ་རིས་སྐོར་གསུམ་དང་། །བར་གྱི་དབུས་གཙང་རུ་བཞི་དང་། །སྨད་ཀྱི་མདོ་ཁམས་སྒང་དྲུག་ཏུ། །བསྟན་པའི་རྩ་བ་ཟབ་ཅིང་བརྟན། །སྟོན་མཆོག་ཐུབ་པའི་དབང་པོ་དང་། །གུ་རུའི་ལུང་བཞིན་སྒྱུ་འཕྲུལ་གར། །རྒྱལ་ཚབ་བྱམས་མགོན་ཆོས་ཀྱི་རྗེ། །མངའ་བདག་མར་པ་ལོ་ཙཱ་བྱོན། །རྒྱ་གར་འཕགས་པའི་ཡུལ་དུ་ཕེབས། །ན་རོ་མཻ་ཏྲི་ལ་སོགས་བསྟེན། །གདམས་ངག་ཟབ་དགུ་མ་ལུས་པ། །བོད་དུ་སྤྱན་དྲངས་སློབ་ཚོགས་བསྐྱངས། །ཡང་སྤྲུལ་འགྲོ་མགོན་རས་ཆེན་དང་། །རྒྱལ་བའི་དབང་པོ་ཀརྨ་ཀ། དམ་ཚིག་གོང་བུ་གཅིག་ཏུ་བརྒྱུད། །གདན་ས་ཀརྨ་རིན་ཆེན་གླིང་། །གྲུབ་ཆེན་ཆོས་ཀྱི་རྒྱལ་མཚན་ཉིད། །གོང་མ་གཡུང་ལོས་གཙུག་ཏུ་བཀུར། །སྐུ་ཡི་ཕྲེང་བ་བརྒྱད་པ་ནི། །ཀུན་མཁྱེན་ཆོས་ཀྱི་འབྱུང་གནས་འཁྲུངས། །བོད་ཀྱི་ཆོས་རྒྱལ་ཁྲི་སྲོང་གི། །མགར་བློན་རིག་པ་ཅན་གྱི་རྒྱུད། །སྡེ་དགེ་ཆོས་རྒྱལ་ཆེན་པོ་ཡིས། །དབུ་ཡི་མཆོད་གནས་གཙུག་ན་འཛིན། །མདོ་སྔགས་རྒྱུད་ལུང་མན་ངག་དང་། །གཞུང་ལུགས་རིག་གནས་མ་ལུས་པའི། །ཆུ་མགོ་ཀུན་ཕན་འཛམ་གླིང་རྒྱན། །དཔལ་ཀུན་སྤུངས་པའི་གདན་ས་བཏབས། །༧གོང་ས་བསྐལ་བཟང་རྒྱ་མཚོའི་དབུས། །བསྟན་འཛིན་སྐྱེས་ཆེན་དུ་མ་དང་། །ཐུགས་ཡིད་བསྟན་པའི་རྒྱན་དུ་གཅིག །མཐའ་དབུས་རྒྱལ་བློན་
འབངས་བཅས་བཀུར། །པདྨའི་ལྗགས་ལྡན་ཉིན་བྱེད་དབང་། །འགྲོ་མགོན་མཁྱེན་ཀོང་མཆོག་གསུམ་གྱིས། །བསྟན་པའི་ཉི་མ་དགུང་ལ་བསྟོད། །ཕྲིན་ལས་ཐ་གྲུ་ཀུན་ཏུ་རྒྱས། །དགོན་ལག་བརྒྱ་དང་བརྒྱད་ཅུ་དང་། །དགོན་ཕྲན་སྟོང་དང་རྩ་གཉིས་སོགས། །ཆོས་སྡེ་ཆེན་པོ་བཅུ་གསུམ་བཅས། །བོད་དང་བོད་ཆེན་ལྗོངས་ཀུན་ཁྱབ། །དུས་རབས་ཉི་ཤུའི་གཞུང་གི་མཐར། །འདུས་བྱས་ཆོས་ཉིད་མི་རྟག་བཞིན། །གངས་ལྗོངས་རྒྱལ་བསྟན་སྤྱི་བྱེ་བྲག །སྣུམ་ཟད་མར་མེ་བཞིན་དུ་གྱུར། །སྟོན་པའི་ཐུགས་བསྐྱེད་ཚད་མེད་སྟོབས། །བསྟན་པའི་ཕྲིན་ལས་མ་རྫོགས་ཤིང་། །གདུལ་བྱའི་བསོད་ནམས་མ་ཟད་པས། །ལུང་རྟོགས་བསྟན་པའི་ཉི་མ་ཤར། །སྤྱན་རས་གཟིགས་དབང་ཐམས་ཅད་མཁྱེན། །རྒྱལ་བའི་དབང་པོ་རྡོ་རྗེ་འཆང་། །རང་བྱུང་རིག་པའི་རྡོ་རྗེ་རྩལ། །ཁོ་བོའི་རིགས་ཀྱི་བདག་པོར་བཞུགས། །སངས་རྒྱས་དངོས་སྣང་ཆོས་ཀྱི་རྗེས། །སོ་བྱང་སྔགས་ཀྱི་གདམས་པ་དང་། །ཟུང་འཇུག་མན་ངག་ཡང་ཟབ་ཀུན། །བུམ་པ་གང་བྱོའི་ཚུལ་དུ་བསྩལ། །གསུམ་ལྡན་རྡོ་རྗེ་འཛིན་པ་ཡི། །སྐྱེས་ཆེན་མཁན་སློབ་དུ་མའི་དྲུང་། །རིག་གཞུང་དབང་ལུང་མན་ངག་ཚོགས། །རང་བློ་ཚིམས་པའི་བཀའ་དྲིན་ཐོབ། །རྒྱ་མཚོ་ཆུ་ཐིགས་དཔེ་ཇི་བཞིན། །འཕགས་ཡུལ་བྱང་ཕྱོགས་དབེན་གནས་སུ། །གདན་ས་དཔལ་སྤུངས་ཤེས་རབ་གླིང་། །གོང་མའི་མཛད་རྗེས་བསྐྱང་ཕྱིར་བཏབས། །བཤད་སྒྲུབ་ལས་ཀྱི་འཁོར་ལོ་གསུམ། །ངལ་བ་བརྒྱ་ཕྲག་ཁུར་ཁྱེར་ཏེ། །ལྟོས་བཅས་རྗེས་འཇུག་ལྷག་བསམ་ཅན། །གདུང་ཤུགས་ཕྱར་བ་གྲུ་འདེགས་བྱས། །རྒྱལ་བའི་བསྟན་པ་ལུང་རྟོགས་གཉིས། །དེ་འཛིན་བཤད་དང་སྒྲུབ་པའི་སྡེ། །
བསྟན་པ་གསུང་རབ་དམ་པའི་ཆོས། །ཡང་སྙིང་དམ་གཙང་བརྒྱུད་པ་ཉིད། །གསུང་རབ་བཀའ་དང་བསྟན་བཅོས་དང་། །རིག་གནས་རྒྱལ་རབས་ཆོས་འབྱུང་སོགས། །ཉམས་པ་གསོ་ཞིང་སྤེལ་བ་ནི། །བསྟན་འགྲོའི་དོན་ཆེན་ཡིན་པར་མཐོང་། །དཔལ་སྤུངས་ཆོས་ཀྱི་བང་མཛོད་དུ། །བཞུགས་པའི་མདོ་སྔགས་རིག་གཞུང་ཀུན། །དུས་རབས་གསར་བའི་ལག་རྩལ་གྱིས། །ཕྱི་མོ་ཉིད་དུ་པར་བསྐྲུན་བྱས། །འབད་བརྩོན་ལྷག་བསམ་ཞབས་འདེགས་ཀུན། །དཔལ་སྤུངས་གསུང་རབ་ཉམས་གསོ་ཁང་། །སྤྲོ་བཞིན་བསྒྲུབས་པའི་འགན་འཛིན་དང་། །ལས་བྱེད་ཡོངས་ཀྱིས་འབད་དེ་བསྒྲུབས། །བཟང་པོའི་བྱ་བ་འདིར་འབྲེལ་ཀུན། །འདི་ཕྱི་ཀུན་ཏུ་དགེ་བ་དང་། །བསྟན་དང་འགྲོ་ལ་ཕན་པའི་ཕྱིར། །སྐྱབས་གནས་དམ་པས་དགེ་ལེགས་སྩོལ། །གང་ཞིག་སྔོན་ཚེ་འཕགས་མཆོག་ཀུན་ཏུ་བཟང་པོའི་སྨོན་ལམ་བཞིན། །རྒྱལ་དང་དེ་སྲས་མཁས་གྲུབ་དགོངས་བཅུད་གསུང་རབ་སྤེལ་བ་འདིས། །བསྟན་པ་རིན་ཆེན་འདི་ཉིད་དར་རྒྱས་ཡུན་དུ་གནས་པ་དང་། །འགྲོ་ཀུན་བདེ་བའི་ལམ་བཟང་མཐོང་བའི་མིག་ཏུ་འགྱུར་བར་ཤོག །ཕྱོགས་བཅུའི་རྒྱལ་བ་སྲས་དང་བཅས་པའི་བྱིན་རླབས་བདུད་རྩིའི་ཆར་རྒྱུན་རིགས་དྲུག་འགྲོ་བའི་གཙུག་ན་བབས། །ཚངས་དང་བརྒྱ་བྱིན་ཁྱབ་འཇུག་ལ་སོགས་ལྷ་ཡི་ཚོགས་ཀྱིས་སྨན་སྤྲིན་མེ་ཏོག་མཛེས་པས་ལྗོངས་ཀུན་གཏམས། །སྐྱེ་འགྲོ་ཡོངས་ཀྱི་སེམས་རྒྱུད་གདོད་ནས་དག་པའི་བྱིན་རླབས་ཡེ་ཤེས་བཟང་པོ་ལྷུན་གྲུབ་ནང་ནས་གྲོལ། །འཇིག་རྟེན་ཁམས་ཀུན་ཟག་པ་མེད་པའི་སྐལ་བཟང་དགའ་སྟོན་རྫོགས་ལྡན་ཞིང་མཆོག་རྟག་ཏུ་མངོན་གྱུར་ཤོག །ཅེས་པ་འདི་ཉིད་འཕགས་ཡུལ་གདན་ས་དཔལ་སྤུངས་ཤེས་
རབ་རྣམ་པར་རྒྱལ་བའི་གླིང་གི་གསུང་རབ་ཉམས་གསོ་ཁང་ནས་རྒྱལ་བའི་བཀའ་དང་དེ་འབྲེལ་བསྟན་བཅོས། མཁས་གྲུབ་རྣམས་ཀྱི་གསུང་རབ་ཁྲིད་ཡིག །བཀའ་འབུམ། གཏེར་ཆོས། གདངས་དབྱངས། གར་འཆམ། མཆོད་བཞེངས་སོགས་ཆོ་ག་ཕྱག་ལེན། རིག་གནས། རྒྱལ་རབས་ཆོས་འབྱུང་སོགས་ཡོད་དོ་ཅོག་མ་ཉམས་གོང་འཕེལ་དང་ཉམས་པ་སོར་ཆུད་ཆེད་པར་བསྐྲུན་བགྱིད་རྒྱུའི་ཐོག་མར་གདན་ས་ཆེན་པོ་ཤར་སྡེ་དགེ་དཔལ་སྤུངས་ཐུབ་བསྟན་ཆོས་འཁོར་གླིང་གི་པར་ཁང་དམ་ཆོས་བང་མཛོད་དུ་བཞུགས་པའི་དཔེ་ཆ་ཡོངས་རྫོགས་པར་བསྐྲུན་བྱེད་པའི་སྐབས་པར་བྱང་སྨོན་ཚིག་ཏུ་འཕགས་ཡུལ་གདན་ས་དཔལ་སྤུངས་ཤེས་རབ་རྣམ་པར་རྒྱལ་བའི་གླིང་གི་བྱང་ཆུབ་ཆེན་པོའི་གཙུག་ལག་ཁང་དུ་ཀྭན་ཏིང་ཏཱའི་སི་ཏུ་པས་བོད་རབ་བྱུང་༡༧པའི་ཤིང་བྱ་ཟླ་༥ཚེས་༤ཡེ་ལོ་༢༠༠༥ཟླ་༧ཚེས་༡༠ཉིན་ཤར་མར་བྲིས་པ་དགེ་ལེགས་འཕེལ། ཤྲཱི་བི་ཛ་ཡནྟུ།། །