ཏཱའི་སི་ཏུ་པདྨའི་ལྗགས་ལྡན་དང་པོ་རྗེ་པདྨ་ཉིན་བྱེད་དབང་པོའི་བཀའ་འབུམ་གྱི་དཀར་ཆག་ཡིད་འཕྲོག་བདུད་རྩིའི་གཏེར་མཛོད།
ཏཱའི་སི་ཏུ་པདྨའི་ལྗགས་ལྡན་དང་པོ་རྗེ་པདྨ་ཉིན་བྱེད་དབང་པོའི་བཀའ་འབུམ་གྱི་དཀར་ཆག་ཡིད་འཕྲོག་བདུད་རྩིའི་གཏེར་མཛོད་ཅེས་བྱ་བ་བཞུགས་སོ།།
ན་མོ་གུ་རུ་མཉྫུ་ཤྲི་ཡེ། པ༵དྨ༵འི་འདབ་ལྟར་ཡངས་པའི་སྤྱན་རས་དང་། །ལྷན་ཅིག་རང་བྱུང་ཡེ་ཤེས་གཟིགས་པ་ཡི། །དགེ་མཚན་ཉི༵ན་བྱེ༵ད་བྱེ་བའི་དཔལ་འབར་བ། །སྲིད་ཞིའི་རྣམ་འདྲེན་དབ༵ང་པོ༵་གང་དེར་འདུད། །ཁམས་གསུམ་ཆོས་ཀྱི་རྒྱལ་པོའི་མངའ་ཐང་ལ། །བཟང་པོ་སྤྱོད་པའི་རྣམ་ཐར་རྒྱ་མཚོ་ཡིས། །རྟག་གནས་དོན་ཀུན་གྲུབ་པའི་བརྟུལ་ཞུགས་ནི། །ལྷུན་གྱིས་གྲུབ་པ་ཁྱོད་འདྲ་སྲིད་ན་དཀོན། །དེ་ཕྱིར་གདོད་ནས་དང་པོའི་སངས་རྒྱས་དང་། །གཉིས་སུ་མེད་པའི་བདག་ཉིད་ཆེན་པོ་སྟེ། །འདི་ན་བདེ་གཤེགས་བྱེ་བ་ཕྲག་བརྒྱ་ཡི། །སྤྱི་གཟུགས་ཉིད་དུ་ངེས་པ་ཅིས་མི་རྙེད། །དད་
དང་གུས་པས་བསྙེན་རྣམས་ལྟ་ཅི་སྨོས། །སྐད་ཅིག་ཡིད་མཁར་ཤར་བས་ཀྱང་མཆོག་དངོས། །བདེ་བླག་ཉིད་འགྲུབ་དེས་ན་སྐལ་བཟང་གི། །འགྲོ་བ་ཕྱི་མཐར་ཐུག་པའང་འགོག་ཏུ་ཅི། །གང་དང་གང་ལ་ཕན་བདེ་ཁྱད་པར་ཅན། །སྲིད་མཐའི་བར་དུ་སྟེར་སླད་དོན་ཆེ་བ། །གང་གསུང་ཆོས་འཁོར་སླར་ལ་འདོད་འཇོའི་སྤྲིན། །མི་ཟད་དབྱིག་ཏུ་དེང་དུས་འཆར་འདི་རྨད། །ཐམས་ཅད་མཁྱེན་གཟིགས་ཏཱའི་སི་ཏུ་ཞེས་པའི་སྐྱེ་ཕྲེང་རྣམས་རྒྱལ་དབང་འཇིག་རྟེན་དབང་ཕྱུག་མཆོག་དང་ངོ་བོ་ཐུགས་རྒྱུད་དབྱེ་བ་མེད་པར་ཞལ་གྱིས་བཞེས་པ་ལྟར་ལ་རྣམ་པ་ཐུགས་སྲས་ཀྱི་ཐུ་བོའི་ཚུལ་བཟུང་ནས་བསྟན་འགྲོའི་དོན་
རླབས་པོ་ཆེ་མཛད་པའི་བདག་ཉིད་ཅན་ཏེ་དཔལ་ལྡན་དུས་གསུམ་མཁྱེན་པའི་སྐབས་སི་ཏུ་འགྲོ་མགོན་རས་ཆེན་ནས་བཟུང་དེང་བར་ཉི་མ་དང་ཟེར་བཞིན་སྐྱེ་བའི་ཕྲེང་བ་ལྷན་ཅིག་ཏུ་རྒྱུན་མི་ཆད་པ་བསྟར་བ་རྣམས་འཕགས་ཆེན་ཁོ་ནའི་རྣམ་ཐར་བྲི་གང་དང་བྲལ་བ་འཛིན་པ་ཤ་སྟག་མུ་ཏིག་བསྟར་ལ་བརྒྱུས་པ་དང་འདྲ་བ་ཚར་དུ་དངར་བའི་ཕུལ་དུ་བྱོན་པ་བྱུང་ཞིང་། ལྷག་པར་སངས་རྒྱས་ཀརྨ་པའི་ཕྲིན་ལས་འཛིན་པ་ལ་ཐུགས་བསྐྱེད་དང་སྨོན་ལམ་ཁྱད་པར་འཕགས་པ་ལྟ་བུས་ཐུགས་སྲས་རྒྱ་མཚོའི་ནང་ནས་གསང་གསུམ་མཛད་རླབས་དང་བཅས་པ་གང་ཅིའི་ཐད་སི་ཏུའི་སྐྱེས་རབས་རྣམས་དང་མཉམ་པ་འགའ་ཡང་མ་བྱུང་བ་འདྲ་སྟེ། སི་ཏུ་ཆོས་ཀྱི་རྒྱལ་མཚན་གྱིས་རྒྱལ་དབང་ལྔ་པ་རྒྱ་ནས་ཡར་ཕེབས་ཀརྨའི་དགོན་དུ་བཞུགས་སྐབས་སྟོན་འཁོར་ཁྲི་ཚོ་མང་པོར་ཡུན་རིང་ཞབས་ཏོག་བསྙེན་བཀུར་འདོད་འཇོའི་ཆར་བཞིན་ཞུས་པ་ཙམ་ཁོ་ན་ཡང་གཞན་སུ་ལའང་བྱུང་སྐད་མི་འདུག་པ་སོགས་ཀྱིས་མཚོན་ནོ། །སི་ཏུ་བཀྲ་ཤིས་དཔལ་འབྱོར་ཉིད་རྒྱལ་དབང་ཆོས་གྲགས་རྒྱ་མཚོ་རང་གི་སྤྲུལ་སྐུ་ཡིན་པར་ཞལ་གྱིས་བཞེས་པས་མཚོན་རྒྱལ་དབང་རིམ་ཅན་ནས་རྟོགས་པ་དོན་གྱི་ཐུགས་རྒྱུད་དབྱེ་བ་མེད་པའི་དགོངས་བཞེས་ཐོག །མཐོང་གྲོལ་པདྨ་རཱ་གའི་ཅོད་པན་དབུར་བཅིངས་པ་ནས་བཟུང་སི་ཏུའི་སྐུ་ཕྲེང་རྣམས་རྒྱལ་དབང་རྣམས་
དང་གདན་གཅིག་དང་། བཅུ་གཉིས་པ་བྱང་ཆུབ་རྡོ་རྗེས་ཀུན་མཁྱེན་ཆོས་འབྱུང་ལ་འཇའ་ས་དང་ཤེལ་ཐམ་གནང་པ་སོགས་ཞྭ་དམར་གྱི་མཚན་གཉིས་པ་འདྲ་མཉམ་དུ་བྱུང་བ་ལྟ་བུ་ནི། ཕྱིས་ཞྭ་དམར་དངོས་སྐུ་སྐྱེའི་སྤྲོས་པར་དགོངས་གཏད་མི་མཛད་པའི་རྗེས་སུ་ཞྭ་དམར་པའི་རྒྱལ་ཚབ་ཏུ་དོན་གྱིས་མངའ་གསོལ་བའི་རྟེན་འབྱུང་གི་གནད་དུ་ཡིན་པར་མངོན་ཏེ། དེང་སང་ཞྭ་དམར་ནག་གཉིས་ཞེས་མཚན་ལྷུར་ལེན་ཡོངས་སུ་གྲགས་པ་ལྟར་རོ། །གང་ལྟར་ཡང་གདན་ས་བར་མའི་འདུ་ཁང་ཆེན་མོའི་སྦུག་ཏུ་བཞུགས་ཁྲི་རྙིང་པ་མདུན་ཕྱོགས་བསྟན་ལ་བལྟས་ན་མཐོ་དམན་ཨན་ཙམ་ལས་མི་འདུག་པ་སྔར་ནས་ཡབ་སྲས་གསུམ་པོ་ཐོབ་ཐང་མཉམ་ཉིད་དུ་མཛད་སྲོལ་ཡོད་པ་འདྲའོ། །ཆོས་ཀྱི་འབྱུང་གནས་བར་ཀརྨ་དགོན་གྱི་བསྟན་བདག་ཏུ་བསྐོ་བཞག་མཛད་དོན་ལྟར་བཞུགས་པ་ཤ་སྟག་དང་། ཆོས་ཀྱི་རྒྱལ་མཚན་སྔ་མ་ལ་འཇམ་དབྱངས་གོང་མ་ཆེན་པོས་ལས་ལུང་གི་གཟེངས་བསྟོད་མཚན་གསོལ་གནང་བ་ནས། ཏཱའི་སི་ཏུ་ཞེས་པའི་མཚན་ཆགས་པ་ཡིན་འདུག་ཅིང་། དེ་ནས་བཟུང་སི་ཏུ་ཞེས་པའི་སྐྱེ་ཕྲེང་བསྒྲངས་པའི་སི་ཏུ་བརྒྱད་པ་ཀུན་མཁྱེན་ཆོས་ཀྱི་འབྱུང་གནས་ནི་འཁྲུངས་ཡུལ་གྱི་དབང་གིས་མེ་ཏོག་ཕོག་པའི་ལྷ་སྐལ་ཞེས་གདན་སར་བསླུར་མ་བཏང་བར་དབང་ཤུགས་ཀྱིས་ཆོས་རྒྱལ་
བསྟན་པ་ཚེ་རིང་ཞེས་གྲགས་པའམ། རྒྱལ་བས། ཆུ་བོ་གསེར་ལྡན་འབབ་པའི་འགྲམ། །རྒྱལ་པོ་བྱིས་པའི་མིང་ཅན་འབྱུང་། །ཞེས་ལུང་བསྟན་པའི་ལུང་དོན་དང་མཐུན་པར་མིང་བླ་དྭགས་བུ་ཞེས་འབོད་པ་དེ་ཉིད་ཀྱིས་བདག་བཟུང་མཛད་ཐོག་དགུང་ལོ་ཉེར་བརྒྱད་དུས་དཔལ་སྤུངས་དགོན་ཞེས་པའི་ལྷ་ཁང་དང་འབྲེལ་བའི་ཆོས་སྡེ་གསར་དུ་བསྐྲུན་ནས་དགེ་འདུན་གྱི་སྡེ་བཙུགས། ཡུལ་འབྲོག་གཉིས་ཆར་ནས་གྲྭ་རྩ་རྣམས་དང་རྣམ་དཀར་མཆོད་ཐེབས་རྩ་བ་ས་ཞིང་སྡེ་འཁོར་སོགས་ཤིན་ཏུ་རྒྱ་ཆེ་ཕུལ་སྦྱོར་སྟེང་གདན་ས་འདིར་བཞུགས་སུ་གསོལ་བ་སོགས་ཀྱི་མཐུན་རྐྱེན་བླ་མེད་དུ་མཛད་པས་བཀའ་བརྒྱུད་བསྟན་པའི་དོན་དུ་སྔོན་སྨོན་གྱིས་མཚམས་སྦྱར་བའི་མཆོད་ཡོན་ཐུན་མིན་གྱི་རྟེན་འབྲེལ་ལེགས་འགྲིགས་སུ་གྱུར་ཅིང་། དེ་ཡི་སྲས་བླ་ཆེན་ཕུན་ཚོགས་བསྟན་པ་ནས་ལྷག་པར་དར་རྒྱས་སུ་བཏང་བ་ཡིན་འདུག་པས་གཙོས་སྡེ་དགེ་ས་དབང་རིམ་བྱོན་ནས་ཞབས་འདེགས་སྲི་ཞུ་གང་སྨར་རྒྱུན་བསྲིངས་དེང་སང་བར་བྱུང་དང་འབྱུང་བཞིན་པ་བཅས། དཔལ་སྤུངས་དགོན་ཞེས་རྒྱ་བོད་ཧོར་སོག་གི་ལྗོངས་རྣམས་ཡོངས་སུ་གྲགས་པ་ཀར་དགོན་ཀུན་གྱི་འཆེལ་ས་བཤད་སྒྲུབ་ཀྱི་ཆོས་སྡེ་ཆེན་པོ་འགྲན་ཟླ་དང་བྲལ་བ་འདི་བྱུང་ངོ་། །འདི་ཉིད་སྤྲུལ་པའི་སྐྱེས་ཆེན་འགྲན་ཟླ་ཀུན་བྲལ་ཡིན་རྒྱུའི་ཡོན་ཏན་ངོ་
མཚར་བ་རྣམས་ནི་ཐུན་མོང་སྣང་ངོ་ལའང་སྐུ་བཙས་མ་ཐག་པ་ནས་འཕགས་མཆོག་དངོས་དང་མཚུངས་པ་བྱིས་པའི་སྤྱོད་ཡུལ་ལས་འདས་པ་ཕལ་ཆེར་ལྷན་སྐྱེས་སུ་མངའ་བའི་ཚུལ་བསྟན་མཛད་པ་སོགས་རྣམ་ཐར་གཞན་དུ་ཡོངས་གྲགས་ལྟར་ལས་མ་མཆིས་ཤིང་། །འཕགས་ཡུལ་གྱི་པཎྜི ཏའི་བག་ཆགས་ཐུགས་ལ་སད་པ་ལྟ་བུས་ལེགས་སྦྱར་གྱི་གཞུང་ལ་རང་སྟོབས་ཀྱིས་ལྷག་པར་མངའ་དབང་འབྱོར་ཞིང་། རྒྱ་གར་པའི་ཕལ་སྐད་རྣམས་སྔོན་གནས་རྗེས་དྲན་དུ་བྱུང་གསུངས་འདུག་པ་ལྟར་དང་བཅས་ཆོས་བསྒྱུར་བ་ལ་པཎྜིཏ་དང་ལོ་ཙཱ་གཉིས་འཛོམས་མི་དགོས་པར་རང་སྟོབས་ཀྱིས་གཙང་ཞིང་དག་པར་བསྒྱུར་བ་དང་། སྔར་བསྒྱུར་རིགས་འགྱུར་བཅོས་མཛད་པ་སོགས་ལ་གཞིག་ན་སྔོན་བྱོན་ལོ་ཙཱ་མང་པོ་བྱོན་རིགས་ཕལ་ཆེ་བས་འགྲན་དུ་མེད་པར་རིས་མེད་མཁས་གྲུབ་ཡོངས་ཀྱིས་མགྲིན་གཅིག་ཆེད་དུ་བརྗོད་པ་ལྟར་རོ། །རྒྱལ་མཆོག་བཅུ་གཉིས་པ་དང་། ཁྱད་པར་བཅུ་གསུམ་བདུད་འདུལ་རྡོ་རྗེའི་རིགས་བདག་གཅིག་པུར་གྱུར་ཅིང་། ཀར་བསྟན་ལ་འཕོ་འགྱུར་ཅུང་བྱུང་བའི་སྐབས། འཕགས་ཡུལ་བའི་མཁས་པ་སྒོ་དྲུག་སོགས་དང་འདྲ་བའི་མཚན་དང་སྙན་གྲགས་ནོར་འཛིན་ཡངས་པའི་ཁྱོན་རྣམས་སུ་རླུང་ལྟར་རྒྱུ་བས་རྒྱ་བོད་སོག་གསུམ་སོགས་ཀྱི་ལྗོངས་ཀུན་
ཏུ་བླ་ཆེན་དཔོན་ཆེན་ཆེ་རྒུ་ཀུན་གྱི་དབུས་མཆོག་དམན་སེར་སྐྱ་མཐའ་དག་རྣམ་ཐར་ཡོན་ཏན་གྱི་ཆེ་བས་དད་གུས་ཀྱི་ལམ་དུ་དབང་བསྒྱུར་དུ་བྱུང་བ་ཉག་གཅིག་ལ་བརྟེན། ཐབས་མཁས་ཐུགས་རྗེ་གཞན་དྲིང་མི་འཇོག་པས་མཚམས་སྦྱར་ནས། ཀརྨ་ཀཾ་ཚང་གི་བསྟན་པའི་མེ་རོ་རྨང་ནས་གསོ་བའི་ཕྱག་རྗེས་འགྲན་ཟླ་དང་བྲལ་བས་ན་སྙིང་པོའི་བསྟན་པ་ལ་བཀའ་དྲིན་ཤིན་ཏུ་ཆེ་བར་གྱུར་པ་སྟེ། བླ་སློབ་ནང་མའི་བཀའ་འགྲོས་ཐོག་ཀཾ་ཚང་སྟོན་བསྟན་ཁོ་ནའི་ཆེད་དུ་ནམ་སྙིང་རྣམ་འཕྲུལ་རིག་འཛིན་ཚེ་དབང་ནོར་བུ་ཞལ་ཚབ་ཏུ་དབུས་ཕྱོགས་སུ་ཕེབས་ཏེ་སྐུ་ཚེ་རིལ་པོར་རྒྱུན་བཞུགས་མཛད་ནས་མཁས་གྲུབ་ཀྱི་གཟི་བརྗིད་མེ་ལྟར་འབར་བས་བོད་ཁམས་ཀུན་དབང་དུ་བསྡུས་ནས་གོང་བཀུར་མཆོད་འོས་སུ་བྱུང་སྐབས་ཀར་བསྟན་ལ་ཞབས་འདེགས་ཤིན་ཏུ་གོང་ལེགས་སྟེང་། མཐིང་དམར་ཅོད་པན་འཆང་བ་སྦུག་མཇལ་ནམ་བྱུང་སྐབས་གོང་ས་ལྷ་མིའི་གཙུག་རྒྱན་ཆེན་པོ་གསེར་ཁྲི་ལས་བཞེངས་ཏེ་ཐང་ཤད་ཀྱི་ཕྱག་ལེན་ཙམ་གནང་རྒྱུའི་གཟིགས་བཟོས་གཟེངས་བསྟོད་རྒྱུན་འཇགས་སུ་ཐོབ་བྱུང་བས་ཡབ་སྲས་ཟུང་གི་བསྟན་སྲིད་ལ་སྲི་ཞུ་ནི་ཕྱོགས་ལས་རྣམ་རྒྱལ་གྱུར་སོང་ངོ་ཞེས་རིག་འཛིན་དེ་ཉིད་ཀྱིས་རྗེ་ཆོས་འབྱུང་ལ་གནང་བའི་གསུང་ཕྲིན་ཕྱག་བྲིས་ངོ་མ་མིག་མཐོང་དུ་བྱུང་བ་སོགས་ཀྱིས་ཀྱང་དུ་བའི་རྟགས་
ཀྱིས་མེ་བཞིན་རྒྱུ་མཚན་མཚོན་ནུས་སོ། །སྤྱིར་སི་ཏུའི་སྐུ་ཕྲེང་རྣམས་བྱམས་པ་མགོན་པོའི་རྣམ་འཕྲུལ་ནི་ཡོངས་གྲགས་ལྟར་ལ། འཕགས་ཡུལ་གྱི་གྲུབ་པའི་དབང་ཕྱུག་ཌོམྦྷི་ཧེ་རུ་ཀ །བོད་ཡུལ་དུ་མར་པ་ལོ་ཙཱ་སོགས་དང་། དགོངས་འདུས་བཀའ་རྒྱ་མ་ལས། ཨོ་རྒྱན་ཆེན་པོ་པདྨའི་རྣམ་རོལ་ཆོས་ཀྱི་སྤྱན་ཅན་དྲུག་དང་། པདྨའི་ལྗགས་ལྡན་དྲུག་འབྲེལ་ཆགས་སུ་འབྱུང་བ་ལུང་དུ་བསྟན་པ་དང་། དམིགས་བསལ་རྗེ་འདི་རང་ཉིད་ཀྱི་སྔོན་གནས་རྗེས་དྲན་ལྟ་བུ་འགའ་ཞིག །ཤྲཱི་སིདྷ། ལོ་ཙཱ་བ་འདན་མ་རྩེ་མང་། སྤང་མཁན་ཆེན་འོད་ཟེར་བླ་མ་སོགས་གསལ་བར་བྱུང་འདུག་ཅིང་། གཞན་ཡང་ཡོངས་དགེ་མི་འགྱུར་རྡོ་རྗེས། ས་སྐྱ་པཎ་ཆེན། བོ་དོང་འཇིགས་བྲལ། ཇོ་ནང་རྗེ་བཙུན། རྔོག་ལོ་ཆེན་པོ། རྗེ་ཙོང་ཁ་པ་སོགས་ཀྱི་སྐུ་སྐྱེ་ཡིན་ཚུལ་ཡང་ཡང་ཞལ་ནས་གསུངས་པ་དང་། དབུས་ནས་རྒྱ་ནག་ཏུ་འགྲོ་བའི་མཁན་ནང་ཞིག་བུད་མེད་སོགས་ཀྱིས་ཇ་ཆང་གིས་སྐྱེལ་ནས་བཞད་འཐེན་གྱིས་གཤར་ཡོང་བ་དང་འཕྲད་ནས་བཞད་ཀྱི་གླུ་རྟ་འདི་གདངས་ཞིག་ལ་སྦྱར་ན་རུང་ངོ་སྙམ་ནས་གྲོ་ལོད་སྤྱན་འདྲེན་སོགས་ལ་སྦྱར་དགོས་དགོངས་ཏེ་ཐུགས་ལ་གསལ་འདེབས་སྐབས་ནམ་མཁའ་ས་གཞི་བར་སྣང་ཐམས་ཅད་གང་བའི་གྲོ་ལོད་ཀྱི་སྐུ་ཆེ་ཕྲ་དུ་མའི་ཞལ་གཟིགས། མཚུར་ཕུ་གུང་གི་
རི་ཁྲོད་དུ་སྒྲོལ་དཀར་ལྗགས་བསྙེན་མཛད་སྐབས་སྒྲོལ་དཀར་གྱི་ཞལ་གཟིགས། དཔལ་སྤུངས་དགུ་གཏོར་གྱི་གྲལ་དབུར་བྱོན་ནས་མགོན་པོའི་གདན་འབུལ་སྐབས་ཤིག་མགོན་པོ་བེར་ནག་གསལ་བར་མཇལ་རྒྱུ་དང་དཔལ་འཁོར་ལོ་བདེ་མཆོག་གི་སྐུ་གཟུགས་ཤིན་ཏུ་ཆེ་བ་གསལ་བར་མཇལ་རྒྱུ་བྱུང་འདུག་པ་སོགས་ནི་ཆ་ཤས་ཙམ་མོ། །ཙཱ་རི་རྩེ་སྐོར་ལ་ཕེབས་དུས་ས་རྡོ་རི་བྲག་སོགས་ཡུལ་ཁམས་དང་དེར་ཡོད་མི་ཐམས་ཅད་སྟོང་གཟུགས་འཇའ་འོད་ཀྱི་རང་བཞིན་དུ་གཟིགས། དབུ་མ་སོགས་གསན་བསམ་ཁོང་ནས་རྒྱུད་བླ་གསན་ནུབ་འཕགས་པ་ཐོགས་མེད་ཡིན་སྙམ་པའི་ལྷའི་རྣམ་པ་ཞིག་གསལ་བར་མཇལ་བའི་ཉམས་སྣང་བྱུང་བ་ལ་བརྟེན། དགོན་འདི་ལ་ས་ལ་སྤྱོད་པའི་དགའ་ལྡན་ཡིད་དགའ་ཆོས་འཛིན་ཞེས་བའི་མིང་དུ་བཏགས་པ་ཡིན་གསུངས་འདུག །བླ་མའི་གཙོ་བོ་ཞྭ་དམར་བརྒྱད་པ། རིག་འཛིན་ཚེ་དབང་ནོར་བུ་སོགས་དང་། སློབ་མའི་གཙོ་བོ་རྒྱལ་དབང་བཅུ་གཉིས་པ་དང་། བཅུ་གསུམ་པ། ཞྭ་དམར་བཅུ་པ། རིག་འཛིན་ཆེན་པོ་དང་། ཀར་འབྲུག་ཡོངས་རྫོགས་ཀྱི་བསྟན་འཛིན་གྱི་སྐྱེས་བུ་ཡོད་དོ་ཅོག་དང་། ས་དགེ་རྙིང་སོགས་ཀྱི་བསྟན་འཛིན་དགེ་བཤེས་དཔག་ཏུ་མེད་པ་རྣམས་སོ། །སྦྱིན་བདག་གི་གཙོ་བོ་ལུང་ནས་ཟིན་རིགས་མི་དབང་བསོད་ནམས་སྟོབས་རྒྱལ། སྡེ་དགེ་
བསོད་ནམས་མགོན་པོ། ཆོས་རྒྱལ་བསྟན་པ་ཚེ་རིང་། ཆོས་རྒྱལ་ཤཱཀྱ་རྒྱལ་མཚན་སྐུ་མཆེད་ཡབ་སྲས་རྣམས་དང་། རྡོ་སྟོད་སྨད་ཀྱི་དཔོན་ལ་སོགས་པའོ། །ཆོས་ཀྱི་འབྱུང་གནས་ཀྱི་སྤྲུལ་པའི་སྐུ་དེ་མ་ཐག་པ་སི་ཏུ་དགུ་པ་རྗེ་པདྨ་ཉིན་བྱེད་དབང་པོ་ཞེས་མཚན་ཡོངས་སུ་གྲགས་པ་དེ་ཉིད་ཀྱི་ཕྱི་ནང་གསང་བའི་རྣམ་པར་ཐར་པ་ནི་བསམ་གྱིས་མི་ཁྱབ་ཀྱང་། རྣམ་ཐར་གསོལ་འདེབས་ཚིགས་བཅད་ལོ་ཆེན་གྱིས་མཛད་པ་ཞིག་དང་། འཇམ་མགོན་རིན་པོ་ཆེས་གཏེར་བརྒྱའི་རྣམ་ཐར་གྲས་སུ་ས་བོན་ཙམ་སྨོས་པ་ལྟར་ལས། ཞིབ་ཏུ་ཡི་གེར་བཀོད་པ་སོགས་གང་ཡང་མཇལ་རྒྱུ་མི་འདུག །འདི་ཉིད་ཀརྨ་པ། ཞྭ་དམར། དཔའ་བོ་གསུམ་གྱིས་ངོས་འཛིན་མཛད། ཁྱད་པར་དཔའ་བོས། སློབ་དཔོན་པད་འབྱུང་ཆོས་དབྱིངས་ཡེ་ཤེས་ཀྱི་ཀློང་དུ་མཇལ་ནས། སྦྲ་སྒོ་ཤར་དུ་བསྟན་ཅིང་། །ལོངས་སྤྱོད་འགྲང་ལྟོགས་སྙོམས་པར། །བྱིས་པ་ཤིང་རྟ་ལོ་པ། །མགྲིན་རྩ་དུང་དཀར་དབྱིབས་འདྲ། །ལྟེ་ལྟག་སྨེ་བ་དམར་ནག །བརླ་གཡས་སྟག་རིས་ཡོད་དེ། །འཕགས་པའི་ས་ལ་བཞུགས་པའི། །བྱང་ཆུབ་སེམས་དཔའ་ཆེན་པོའི། །རྣམ་འཕྲུལ་ཆོས་ཀྱི་འབྱུང་གནས། །འཁྲུལ་མེད་སྤྲུལ་སྐུ་ཉིད་དོ། །ཞེས་ལུང་བསྟན་པ་དང་རྗེ་
གོང་མའི་ཞལ་ཆེ མས་དང་ཡང་མཐུན་པར་ཡིད་ལྷུང་འབྲོག་སྡེའི་ནང་དུ་ངོ་མཚར་བའི་ལྟས་དང་བཅས་ཏེ་འཁྲུངས། ཞྭ་དམར་ཆོས་འགྲུབ་རྒྱ་མཚོས་ཁྲི་འདོན་སོགས་གནང་། དགོངས་འདུས་ལུང་བྱང་ཆོས་འབྱུང་ཡན་ཆོས་ཀྱི་སྤྱན་ཅན་དྲུག་རྫོགས་ནས། རྗེ་འདི་ཉིད་པདྨའི་ལྗགས་ལྡན་དང་པོར་ངེས་པས་པདྨ་དབང་ཆེན་ཞེས་པའི་མཚན་དང་དཔའ་བོས་ཀྱང་དག་སྣང་དུ་དེ་བཞིན་གསལ་བ་ལྟར། དཔལ་ལྡན་འགྱུར་མེད་བསྟན་འཛིན་ཕྱོགས་ལས་རྣམ་གྲོལ་པདྨ་ཉིན་བྱེད་དབང་པོའི་སྡེ་ཞེས་པའི་མཚན་གྱི་ཅོད་པན་བཅིངས་། གཏེར་ཆེན་བདུད་འདུལ་བའི་མ་འོངས་སྤྱི་ལུང་དུ། ཡིད་ལྷུང་ཕྱོགས་ནས་པདྨའི་མིང་ཅན་འབྱུང ༔ ཞེས་པའི་མིང་དང་ཤུགས་ཀྱིས་འགྲིགས་པར་གྱུར། རྒྱལ་དབང་བཅུ་གསུམ་པ་ལས་རབ་བྱུང་གསན་སྐབས། དཔལ་ལྡན་བསྟན་འཛིན་ཉིན་བྱེད་ཕྲིན་ལས་ཀུན་ཁྱབ་ཕྱོགས་ལས་རྣམ་པར་རྒྱལ་བའི་སྡེ་ཞེས་པའི་མཚན་གནང་། རྒྱལ་བ་དེ་ཉིད་དང་། ཞྭ་དམར་ཆོས་འགྲུབ་རྒྱ་མཚོ། འབྲུག་ཆེན་ཀུན་གཟིགས་ཆོས་ཀྱི་སྣང་བ། གར་དབང་ཆོས་སྐྱོང་འགྱུར་མེད། འཛི་སྒར་བཀའ་བརྒྱུད་ཕྲིན་ལས་རྣམ་རྒྱལ་སོགས་བླ་མར་བསྟེན་ཅིང་། གཙོ་བོར་རྗེ་བདུད་འདུལ་རྡོ་རྗེ་རྩ་བའི་བླ་མར་འཛིན། དེ་རྣམས་ལས་བཀའ་བརྒྱུད་ཀཾ་ཚང་གི་སྨིན་གྲོལ་ཡན་ལག་དང་བཅས་པའི་རྒྱུན་ཅི་མཆིས་
དང་། འབྲི་འབྲུག་སྟག་ལུང་ཤངས་པ་ཞི་བྱེད་བཀའ་གདམས་སྐོར། རྙིང་མ་བཀའ་གཏེར་གྱི་ཆོས་རྒྱུན་ཕལ་ཆེ་བ་སོགས་གྲུབ་མཐའ་རིས་མེད་ཀྱི་ཆོས་ལུགས་ཀུན་ལ་གསན་བསམ་རྒྱ་ཆེར་མཛད། ཁྱད་པར་སྡོམ་པ་གསུམ་གྱི་བཅས་ཁྲིམས་ཕྲ་མོ་ཙམ་ལས་ཀྱང་ནམ་ཡང་མི་འདའ་བའི་སྐུ་བཙུན་པའི་མཆོག་ཏུ་གྱུར། སྐྱེས་ཐོབ་ཀྱི་ཡོན་ཏན་འབད་མེད་དུ་སད་པའི་དབང་གིས་རིག་གནས་སྐོར་དང་། ལྷག་པར་མདོ་སྔགས་ཀྱི་གཞུང་ལུགས་ཀུན་ལ་མཁྱེན་པ་རྒྱས་པས་མཁས་པའི་ཕུལ་དུ་སོན། གཞན་ཡང་རྒྱ་དཀར་ནག་གི་ཡིག་རིས། སྐུ་བརྙན་གྱི་བྲི་བཀོད། གསར་རྙིང་རྒྱུད་སྡེ་རྒྱ་མཚོའི་ཕྱག་ལེན་གར་ཐིག་དབྱངས་རོལ་སོགས་ཤེས་བྱ་ཆེ་ཕྲ་མཐའ་དག་རང་བཞིན་གྱིས་མ་མཁྱེན་པ་གང་ཡང་མེད་པ་ངོ་མཚར་བའི་གནས་དང་། སྒོམ་བྱུང་གི་ཤེས་རབ་ཀློང་ནས་བརྡོལ་བས་འཆད་རྩོམ་རིགས་ལ་འཇིགས་པ་མེད་པའི་སྤོབས་པ་ཐོབ། མགྲིན་པའི་རྩ་མདུད་གྲོལ་བས་རྡོ་རྗེའི་མགུར་མ་ཐོལ་བྱུང་དུ་བླངས་པ་རྣམས་ལྷག་པར་ངོ་མཚར་ཆེ། བསྟན་འགྲོའི་དོན་ལ་གཅིག་ཏུ་གཞོལ་བའི་ཐུགས་བསྐྱེད་རླབས་ཆེན་དུ་མངའ་བས་བཟང་པོའི་ཕྲིན་ལས་མཁའ་ཁྱབ་ཏུ་བརྡལ། ཀརྨ་པ་བཅུ་གསུམ་པས་ངེས་དོན་སྙིང་པོའི་བསྟན་པ་གཏད། བཅུ་བཞི་པའི་རིགས་བདག་གཅིག་པུར་ཕེབས། དབུས་
ཕྱོགས་སུ་ལན་གསུམ་བཞུད། གཞི་བྱེས་ཀུན་ཏུ་ཕྱོགས་འདུས་བགྲང་དུ་མི་ལངས་པ་ལ། རྟག་པར་ཆོས་ཀྱི་འཁོར་ལོ་རྒྱ་ཆེན་བསྐོར་བས་དུས་འདའ་བར་མཛད། སྟོད་མངའ་རིས་ནས་འཇང་རྒྱ་མཚམས་ཡན། རྡོ་སོག་ཚུན་བཀའ་བརྒྱུད་ཀྱི་བསྟན་པ་གང་མཆིས་ཉམས་པ་སོར་ཆུད། མ་ཉམས་གོང་འཕེལ་ཐོག །དགོན་སྡེ་གསར་བསྐྲུན་འགའ་ཞིག་དང་། དེ་དག་རྣམས་སུ་དབང་ལུང་ཁྲིད་གསུམ་སོགས་སྨིན་གྲོལ་ཆོས་ཀྱི་ཆར་པ་ཕབ་ཅིང་། བླང་དོར་བཅས་ཁྲིམས་ཀྱི་རིམ་པ་ལས་ནམ་ཡང་འདའ་བ་མེད་པའི་བཅའ་བཀོད་གཙང་བཙན་བསྟར། མཆོད་རྒྱུན་དང་སྒྲུབ་རྒྱུན་བརྒྱ་ཕྲག་མང་པོ་བཙུགས། སྐུ་གསུང་ཐུགས་གསུམ། མཆོད་ཆས་ཡོ་བྱད་སྐོར་སོགས་བགྲང་ཡས་སྤུས་ཁྱད་གྱ་ནོམ་ལྡན་པ་བསྟན་དགོན་ཆེ་ཆུང་གི་བབས་དང་བསྟུན་པའི་རྟེན་བཞག་ཤིན་ཏུ་རྒྱ་ཆེར་གནང་བས་མ་ཐེམ་པ་སུའང་མེད་པ་ལྟ་བུ་མངོན་སུམ་དུ་གྲུབ་པ་ལྟར་དང་། སྔ་ཕྱིར་དངུལ་འགྱེད་སྤོམ་མཐོ་ཁོ་ན་ལན་གསུམ་སོགས་ལན་མང་གནང་བས་མཚོན། རྟེན་བཞག་སོགས་མཛད་ཚུལ་བཀའ་འབུམ་ནང་ཐོ་ཙམ་འདི་རེས་འགའ་བ་ཞིག་སྟེས་དབང་གིས་ཡི་གེར་འཁོད་པ་མ་གཏོགས་དེ་ལས་རྒྱ་ཆེ་བ་ཕལ་ཆེར་མངོན་སུམ་མཐོང་ཆོས་སུ་གསལ་རུང་མཐའ་དག་ཡིག་
རིས་སུ་བཀོད་རྒྱུའི་སྤྲོས་པ་ཆེད་གཏད་མཛད་སྲོལ་མེད་འདྲ་སྟེ་མདོར་ན་བློ་ཡི་རྭ་བ་ལས་འདས་པ་ལྟ་བུའོ། །སྤྱིར་རྒྱུན་དུ་རྟེན་བཞེངས་རྒྱ་ཆེ་ཁོར་མོ་ཡུག་ཏུ་མཛད་རིགས་རྣམས་ཀར་དགོན་བརྒྱ་དང་བརྒྱད་ཅུ་ཞེས་གྲགས་པའི་དགོན་ཁག་ལ་སོགས་པ་རྣམས་སུ་ཆེད་དུ་གནང་རྒྱུའི་སྤྲོས་པ་ལས་གདན་ས་འདིར་དགོས་འོས་གལ་ཆེ་འགའ་ཞིག་ལས་དམིགས་བསལ་རྒྱ་ཆེར་མཛད་པའི་བཞེད་སྲོལ་མེད་པ་ལྟ་བུར་གྲུབ་བོ། །དེས་ན་ཕྱི་དུས་བསྟན་པ་ཉམས་དམན་སྐབས་བཀའ་བརྒྱུད་བསྟན་པ་སྔར་ཡོད་རྣམས་ཕྱོགས་གང་དུ་ཡང་ཉི་མ་ནུབ་རིར་མ་ཕྱོགས་ཙམ་བྱུང་བ་འདི་སི་ཏུ་གོང་འོག་གི་བཀའ་དྲིན་ཐུགས་རྗེ་ཁོ་ན་ལ་རག་ལས་པ་སྟེ། དེ་ལྟ་བུ་རྒྱུ་མཚན་དུ་བྱས་ནས་དཔལ་སྤུངས་དགོན་འདི་བཀའ་བརྒྱུད་བསྟན་པ་རྒྱ་མཚོའི་ཆུ་མགོ་གཉིས་པ་ཁྱད་འཕགས་ཉིད་དུ་གྱུར་ཏོ་ཞེས་གྲགས་པ་དོན་ལ་གནས་པ་ཉིད་དོ། །གཙོ་བོར་དུས་དང་རྒྱུན་དུ་ཟབ་མོའི་རྣལ་འབྱོར་ཁོ་ན་ལ་གཞོལ་ཞིང་། ཉམས་བཞེས་ཀྱི་གཙོ་བོ་བདེ་ཕག །རྒྱལ་རྒྱམ། དཀོན་སྤྱི་སོགས་དང་། ཁྱད་པར་ཡི་དམ་སྙིང་པོ་སྒྲོལ་དཀར་ལ་མཛད། བློ་སྦྱོང་། ཆོས་དྲུག །ཕྱག་ཆེན། རྫོགས་ཆེན་ཁྲེགས་ཐོད་སོགས་ལ་རྟག་ཏུ་བརྩོན་ཅིང་བསྐྱེད་རྫོགས་ཀྱི་ཏིང་འཛིན་མཐར་ཕྱིན་པའི་སྒོ་ནས་གྲུབ་པའི་གོ་འཕང་མཐོན་པོར་གཤེགས་པ་སྟེ། དབང་རབ་ཀྱི་འབྲིང་
ཙམ་གྱི་ཚུལ་བསྟན། ཐུན་བཞི་བཅད་ཁྲིགས་ནམ་ཡང་ཐང་ལྷོད་མེད་ཅིང་། མཚན་མོར་ཡང་ཅུང་ཟད་རེ་མནལ་བ་ལས་ཕལ་ཆེར་གཉིད་སྤང་གི་བརྟུལ་ཞུགས་འཛིན་པ་སོགས་གདོད་ནས་སངས་རྒྱས་ཀྱང་ལམ་སྦྱོང་བའི་ཚུལ་སྟོན་གྱི་རིམ་པ་ཡང་དཔེ་ལས་འདས་པའི་ཐུགས་བརྩོན་གནང་ཞིང་། ཕྱིས་སུ་རྗེས་འཇུག་གདུལ་བྱ་རྣམས་མིག་ལྟོས་འདྲེན་སླད་དགུང་ལོ་རེ་གཅིག་ནས་བརྒྱད་ཅུའི་བར་སྒྲུབ་ཁང་ཆེན་མོར་ཐེམ་པ་མི་འདའ་བའི་སྤོང་བ་བསམ་གཏན་གྱི་འཁོར་ལོར་རྩེ་གཅིག་ཏུ་བཞུགས་པ་ཉིད་དོ། །རྣམ་ཀུན་གསོལ་འདེབས་རྗེས་དྲན་གྱི་ཡུལ་ནི་བླ་མ་ཀུན་འདུས་ཨོ་རྒྱན་རིན་པོ་ཆེ་ཁོ་ན་ཡིན་པར་སྣང་སྟེ། རྗེ་བཅུ་གསུམ་པས། པདྨ་འབྱུང་གནས་ཐུགས་རྗེའི་སྟོབས་ཆེན་པོ། །མཆོག་གི་སྤྲུལ་སྐུ་པདྨ་ཉིན་བྱེད་ཞབས། །ཞེས་ཨོ་རྒྱན་ཆེན་པོའི་སྤྲུལ་པ་དངོས་ཡིན་རྒྱུར་གསུངས་པའི་བག་ཆགས་ཐུགས་ལ་འཁྱིལ་བའི་ཉེར་ལེན་གྱི་དབང་དུ་གྱུར་པས་སོ། །ཐུགས་སྲས་ཀྱི་གཙོ་བོ་ནི་དཔལ་ཀརྨ་པ་ཐེག་མཆོག་རྡོ་རྗེ། འབྲུག་ཆེན་རིན་པོ་ཆེ། དཔའ་བོ་གཙུག་ལག་ཆོས་རྒྱལ། ཏྲེ་ཧོ་སོགས་ཀར་འབྲུག་གི་སྐྱེས་ཆེན་མཐའ་ཡས་རྣམས་དང་། ནང་ཐུགས་ཀྱི་སྲས་ཟླ་བཟང་ངེས་དོན་བསྟན་པ་རབ་རྒྱས། ཁྱད་པར་དུ་རྒྱལ་བས་ལུང་བསྟན་ཛམ་གླིང་ཆོས་ཀྱི་ཤིང་རྟ་འཇམ་མགོན་ཀོང་སྤྲུལ་
རིན་པོ་ཆེ་ཡོན་ཏན་རྒྱ་མཚོ་གཉིས་ཡིན་ལ། དེ་མཚུངས་ཀུན་གཟིགས་འཇམ་དབྱངས་མཁྱེན་བརྩེའི་དབང་པོ་ལ་ཕྱག་ཆེན་ཆོས་དྲུག་སོགས་སྨིན་གྲོལ་ཅི་རིགས་པ་གནང་། ཐུགས་གཏད་ཤིན་ཏུ་ཆེ། དོན་བརྒྱུད་བྱིན་གྱིས་བརླབས་པར་ཞལ་གྱིས་བཞེས། ཐུགས་སྲས་ཀྱི་མཆོག་ཏུ་གྱུར། གཏེར་རྙིང་སྐོར་འཆད་སྤེལ་དང་། ཕྱོགས་བསྡུ་བྱུང་ན་ལེགས་ཚུལ་བཀའ་ཕེབས་པའང་རིན་གཏེར་ཆེན་མོའི་ལུང་བསྟན་དོན་གྱིས་གནང་བ་མཐར་ཕྱིན་མངོན་དུ་གྱུར་པ་འདི་ལྟར་ཡིན་འཇམ་མགོན་རིན་པོ་ཆེས་གསུངས། གཞན་ཡང་རྙིང་ཕྱོགས་ཀྱི་བསྟན་འཛིན་རྣམས་དང་། རང་དགོན་དབོན་སྤྲུལ་གོང་འོག་རྣམས་དང་། དཔལ་ཡུལ་ཀརྨ་འགྱུར་མེད་སོགས་ཤིན་ཏུ་མང་ངོ་། །གྲུབ་པའི་ཡོན་ཏན་ནི། ཏེ་ལོ་ནཱ་རོ། མར་མི་དྭགས་གསུམ་སོགས་དང་མཉམ་ཡང་དགོངས་གཞི་དགོས་པའི་དབང་གིས་བཀའ་གདམས་པའི་དགེ་བཤེས་རྣམས་ཀྱི་རྣམ་ཐར་ལྷུར་ལེན་མཛད་སྟབས་རང་གི་ཡོན་ཏན་བུམ་ནང་གི་མར་མེ་ལྟར་སྦེད་ཅིང་གསང་བ་སྲུང་བ་ལ་ཐུགས་ཤིན་ཏུ་སྒམ་པས་ཕྱི་ནང་སུས་ཀྱང་ཕྲ་མོ་ཙམ་ཡང་གཏིང་མི་དཔོག །སྐབས་འགར་རབ་གནས་ཟང་ཐལ་དུ་ཕེབས་ཤིང་། རྡོ་ལ་ཞབས་རྗེས། ཞབས་ས་ལ་མི་རེག་པ་སོགས་དང་། ཆུ་རྡོ་ནག་པོ་ལ་ཨ་དཀར་
འབུར་དུ་དོད་པ་རྫུ་འཕྲུལ་གྱིས་རང་བྱོན་དུ་བརྐོས་པ་ཞིག་ད་ལྟ་སྒྲུབ་ཁང་གི་རྟེན་སྒམ་དུ་མཇལ་རྒྱུ་ཡོད་པ་སོགས་ཐུན་མོང་གི་སྤྱོད་ཡུལ་དུ་དེ་འདྲ་འགའ་ཞིག་བསྟན། ལྷག་པར་གཞན་སེམས་མཁྱེན་པ་སོགས་ཟག་མེད་ཀྱི་མངོན་ཤེས་ནི་སངས་རྒྱས་ལྟ་བུ་མཉམ་རྗེས་དབྱེ་བ་མེད་པར་རྒྱུན་ལྡན་མངའ་བ་ཡོངས་སུ་གྲགས་ཤིང་། སྤྲུལ་སྐུ་ངོས་འཛིན་གནང་རིགས་རྣམས་ཀྱང་འཁྲུལ་པ་དང་བྲལ་བ་བསྟན་པ་ལ་ཕན་ཐོགས་པའི་ཡོན་ཏན་ཁྱད་འཕགས་དང་ལྡན་པ་ཤ་སྟག་བྱུང་ངོ་། །ངེས་དོན་སྙིང་པོའི་བསྟན་པ་ཀརྨ་པ་བཅུ་བཞི་དང་། འཇམ་མགོན་བླ་མ་ཟུང་ལ་གཏད། བགྲང་བྱ་བརྒྱད་ཅུར་ཕེབས་པ་ན་གཞན་དོན་དུ་གཟུགས་སྐུའི་བཀོད་པ་བསྡུ་བའི་ཚུལ་བསྟན་པའི་སྐབས། འདི་ལྟར། ནམ་མཁའ་སྤྲིན་དང་རླུང་སེར་རྡུལ་ཙམ་མེད་པའི་གཡའ་དག །ས་བཅུ་པ་ཆོས་ཀྱི་སྤྲིན་ལ་གནས་པའི་རྟགས་སུ་ཡངས་པའི་ས་ཆེན་རྣམ་པ་དྲུག་ཏུ་གཡོས། སྐུ་སྤུར་བཞུགས་གདན་ལ་མ་རེག་པར་ཞག་བདུན་ཕྲག་ལྔའི་བར་དུ་བར་སྣང་ལ་ཏིང་ངེ་འཛིན་དུ་བཞུགས་ཤིང་། སྤུར་སྦྱོང་བའི་དུས་རྗེས་འཇུག་སློབ་ཚོགས་དང་། འཇིག་རྟེན་ལྷ་མི་ཀུན་གྱི་ཕྱག་མཆོད་རྟེན་དུ་དབུ་བུམ་རིལ་དུ་བྱོན་ཅིང་། དེ་ལ་གུ་རུ་རིན་པོ་ཆེའི་སྣང་བརྙན་ཟ་ཧོར་ལུགས་འབུར་དུ་དོད་པ། ལུགས་སུ་བླུགས་པ་ལྟ་བུ་
རང་བྱོན་དུ་ཕེབས་པ་སོགས་ངོ་མཚར་དུ་མ་མངའ་བའི་འཕགས་ཆེན་དམ་པ་ཉིད་དོ་ཞེས་འཇམ་མགོན་རིན་པོ་ཆེས་ཡི་གེར་བཀོད་པའི་ཕྱག་བྲིས་ངོ་མ་མཇལ་དུ་བྱུང་བ་སོགས་ཡ་མཚན་མཐའ་ཡས་པ་ལགས་སོ། །རྗེ་འདི་ཉིད་ཀྱི་གཅུང་དཔའ་བོ་བརྒྱད་པ་སྟེ། ཟབ་གཏེར་སོགས་ཀྱི་བཀའ་བབས་ཤིང་དམ་པའི་སྐྱེས་བུ་འགྲན་ཟླ་བྲལ་བ་ཞིག་བཞུགས་པར་གྲགས་སོ། །རྗེ་པདྨ་ཉིན་བྱེད་དབང་པོའི་སྐུ་སྐྱེ་སི་ཏུ་བཅུ་པ་པདྨ་ཀུན་བཟང་ཆོས་ཀྱི་རྒྱལ་པོ་དེ་ཉིད་ནི་རྗེ་ཉིད་ཞིང་གཞན་དུ་ཕེབས་ཁར་ཐུགས་སྲས་རྣམས་ཀྱིས་གསོལ་བ་བཏབ་པ་བཞིན་བསྟན་འགྲོའི་དཔུང་གཉེན་དུ་ཡང་སྲིད་མྱུར་དུ་འབྱོན་པར་ཞལ་གྱིས་བཞེས། དེ་རྒྱལ་དབང་རིན་པོ་ཆེར་ཞུས་དང་ཐེ་ཚོམ་དང་བྲལ་བར་ཐག་ཆོད་པ་འབྱུང་ངོ་ཞེས་གསུངས་པ་ལྟར་བཅུ་བཞི་པ་ཐེག་མཆོག་རྡོ་རྗེས་ཟག་བྲལ་ཡེ་ཤེས་ཀྱི་གཟིགས་པར་སྐུ་འཁྲུངས་པའི་ཡུལ་དང་སྦྲ་ཁྱིམ་ཡབ་ཡུམ་གྱི་མཚན་དགུང་སྙིང་རིགས་རུས་བཅས་ས་ལེར་ཤར་བ་རང་བྱུང་རྡོ་རྗེའི་མགུར་མ་ཚིགས་སུ་བཅད་པ་མང་པོས་ལུང་བསྟན་པ་ངེས་གསལ་སོམ་ཉི་དང་བྲལ་བ་ནི་བྱང་གནམ་མཚོ་ཁར་ཤིང་ཕག་ལོར་འཁྲུངས་འདུག་པ་ངེས་རྙེད་གྱུར་ཏེ་ཐུགས་ཐག་བཅད་ནས་ངོས་འཛིན་མཛད། དུས་གསུམ་སྒྲིབ་བྲལ་དུ་མཁྱེན་ཅིང་སྔོན་གནས་རྗེས་དྲན་
སོགས་ངོ་མཚར་བའི་ཡོན་ཏན་དུ་མ་མངའ། གཏེར་ཆེན་མཆོག་གླིང་གི་ཡེལ་ཕུག་ནམ་མཁའ་མཛོད་ཀྱི་ཆོས་སྡེ་ལས་ཀྱང་། ཐང་གི་ལྷ་ལ་གནམ་གྱི་མཚོ་ཡོད་པར། །ང་ཡི་སྤྲུལ་པ་ས་མནྟ་བྷ་དྲ། །ཤིང་ཕག་ལོ་ལ་འགྲོ་བའི་དོན་བྱེད་འབྱུང་། །ཞེས་སོགས་ཀྱི་ལུང་བྱང་དང་ཡང་ཇི་ལྟ་བ་བཞིན་དུ་འགྲིགས་པར་གྱུར་ནས་ཀུན་ཀྱང་ཡིད་ཆེས་ཀྱི་ཕུལ་དུ་གྱུར། རྗེ་ཉིད་སྐུ་གཤེགས་ཁར་ཐང་ལྷའི་ཞལ་ཐང་ནུབ་ནས་ཤར་དུ་ཡོང་པ་ཞིག་བྲི་དགོས་གསུངས་ནས་བྲི་རྒྱུ་མཛད་པའང་འདི་ལྟའི་རྟེན་འབྲེལ་གྱི་བརྡ་སྟོན་ཡིན་པར་གསུངས། འཇམ་མགོན་ཀོང་སྤྲུལ་རིན་པོ་ཆེ་སྟོན་འཁོར་མཚུར་ཕུར་གདན་ཞུས་སུ་ཆེད་ཕེབས་ཐོག་རིམ་པར་དཔལ་སྤུངས་དགོན་དུ་སྤྱན་དྲངས་པ་དང་ལྷན་ཅིག །ཀརྨ་པ་ཆེན་པོས་ཁྲི་ཁར་མངའ་གསོལ། སྐུ་ཆུང་ངུའི་དུས་ནས་མངོན་ཤེས་དང་རྫུ་འཕྲུལ་ཡ་མ་ཟུང་སྟོན་པ་ལ་ཐོགས་པ་མེད། རྒྱལ་དབང་རིན་པོ་ཆེའི་མདུན་ནས་རབ་བྱུང་བསྙེན་རྫོགས་གསན། རྣམ་ཀུན་སུམ་ལྡན་རྡོ་རྗེ་འཛིན་པའི་ཚུལ་དུ་བཞུགས། མཁན་ཆེན་བླ་མ་བཀྲ་ཤིས་འོད་ཟེར་ཡོངས་འཛིན་དུ་བསྟེན་ནས་བོད་བརྡ་སུམ་རྟགས་སོགས་དང་གཞུང་ལུགས་འགའ་རེ་གསན། ཀརྨ་པའི་མདུན་ནས་དོན་བརྒྱུད་ཀྱི་མན་ངག་སྙིང་པོར་དྲིལ་བ་རྣམས་དང་། འཇམ་མགོན་རིན་པོ་ཆེའི་མདུན་ནས་བཀའ་བརྒྱུད་སྔགས་
མཛོད། རིན་ཆེན་གཏེར་མཛོད་སོགས་ཤིན་ཏུ་རྒྱ་ཆེན་དང་། ཀུན་གཟིགས་མཁྱེན་བརྩེའི་མདུན་ནས་དེ་བཞིན་དབང་ལུང་ཁྲིད་སོགས་མང་དུ་གསན། རིགས་བདག་གི་བླ་མ་མང་དུ་བསྟེན་ཀྱང་། གཙོ་བོར་ཀརྨ་པ་དང་འཇམ་མགོན་རྣམ་གཉིས་རྩ་བའི་བླ་མར་འཛིན། དགོན་འདིའི་ཚོགས་སྒོ་སྔར་ཡོད་དང་། གསར་སྤྲོས་ཀྱི་རིམ་པ། བཅའ་ཁྲིམས། སྒྲིག་ལམ་སྐོར་ཡར་འཕེལ་ཚགས་ཚུད་ཁོར་མོ་ཡུག་ཏུ་དཔེ་ཟླ་བྲལ་པར་མཛད། གཞན་ཁམས་བོད་ཀྱི་དགོན་ལག་མཐའ་དག་རྣམས་ལུགས་གཉིས་ཀྱི་སྒོ་ནས་གཟིགས་རྟོག་ཉམས་སྐྱོང་། ཉམས་གསོའི་ཐེབས་རྩ། ཕན་ཆ་སྦྱིན་སྒོ་སོགས་བསྟན་པ་ཉམས་མེད་ཡར་དར་ཡོང་བའི་ཐུགས་ཁུར་ཟབ་པ་ཁོ་ན་ལ་རྩེ་གཅིག་རྒྱུན་བརྩོན་གནང་། དབུས་ཕྱོགས་སུ་ལན་ཁ་ཤས་ཕེབས། གཏེར་ཁ་གསར་རྙིང་སྔ་ཕྱི་དུ་མ་ནས་པདྨའི་སྙིང་པོ་ཞེས་ལུང་དུ་བསྟན་ཅིང་། པདྨའི་ལྗགས་ལྡན་གཉིས་པར་སོན། ཐུགས་རྗེ་ཡས་སྤྲུལ་གྱི་བདག་ཉིད་ཨོ་རྒྱན་ཆེན་པོ་སྐུ་ཤ་རློན་པ་དངོས་སུ་གྲུབ་བོ་ཞེས་ཀུན་གཟིགས་མཁྱེན་བརྩེས་དུས་རྒྱུན་དད་འདུན་བསྔགས་བརྗོད་གནང་བ་ལྟར། དུས་གསུམ་ས་ལེར་གཟིགས་པ་ལས་ནམ་ཡང་གཡོ་བ་མི་མངའ། ལྐོག་གྱུར་དང་། མ་འོངས་པ་ལུང་དུ་བསྟན་
རིགས་ཐམས་ཅད་ཐོག་ཏུ་མ་ཁེལ་བ་གཅིག་ཀྱང་མེད་པས་ཀུན་གྱིས་ཡིད་ཆེས་ཚད་མར་འཛིན་པར་གྱུར། སྐུ་ཤིན་ཏུ་ཆུང་ངུའི་དུས་བླ་བྲང་དུ་བཞུགས་ཡོད་པའི་ཉིན་གུང་ཞིག་ལ་རི་ཁྲོད་རྒྱབ་རིའི་ཕྱོགས་ནས་འཇམ་མགོན་རིན་པོ་ཆེ་བྱོན་པ་ཆིབ་བརྡབ་ཕོག་པ་དེ་འཕྲལ་དུ་མཁྱེན་ནས་སྐྲག་དངངས་ཤོར་ཏེ་སྐྱབས་གསོལ་མཛད་པ་དེ་ཉིན་ཁོང་ལ་བར་ཆད་ཆེ་བ་ཞིག་ཡོད་འདུག་པ་སྐྱབས་མགོན་རིན་པོ་ཆེས་བསལ་བ་ཡིན་འདུག །གཞན་དང་མི་འདྲ་ཚུལ་ཕྱིས་ཀྱང་རྒྱུན་ལྡན་གསུང་སྲོལ་ཡོད་དར་བཤད་རྒྱུ་འདུག །ཚུར་མཐོང་གྲུབ་པ་ཆེན་པོའི་བརྟུལ་ཞུགས་འཆང་བའི་ཚུལ་འཛིན་པས། སྣང་སེམས་རོ་གཅིག་ཏུ་འདྲེས་པའི་རྟགས་གདན་ས་འདི་དང་། རང་གཏོགས་དགོན་ཁག་ཕྱོགས་དང་ས་ཡུལ་གང་དང་གང་དུ་གཤེགས་པ་ན་སྲ་མཁྲེགས་རྡོ་ལ་ཕྱག་ཞབས་ཀྱི་རྗེས་འདམ་བུའི་ཚལ་དུ་གླང་པོའི་རྗེས་བཞིན་བཞག་པ་མང་ཞིང་། ཁྱད་པར་བྱང་ཁ་རྫ་རྒྱུད་ཀྱི་ས་ཆར་རྡོ་ལེབ་སྲ་མཁྲེགས་ཤིན་ཏུ་ཆེན་པོ་ཞིག་གི་སྟེང་དུ་ཞབས་རྗེས་དང་། ཆིབས་པའི་རྗེས་རེ་ཟུང་ཟབ་ལ་གསལ་བ་ཁྱད་མཚར་ཞིག་བཞག་པ་དེང་སང་མཇལ་རྒྱུ་ཡོད། ཕྱོགས་དེའི་གཞི་བདག་ནག་ཕྱོགས་པ་ཞིག་དམ་ལ་བཏགས་པའི་ཆེད་དུ་ཡིན་པར་གྲགས། ཕྱིས་སུ་རྒྱལ་དབང་ཐམས་ཅད་མཁྱེན་པ་ཆེན་པོ་བཅོ་ལྔ་པ་མཁའ་ཁྱབ་རྡོ་རྗེ་དེ་གཟིགས་ས་ཆེད་དུ་ཕེབས་པ་ན་
གཞན་མཚུངས་མེད་པའི་རྗེས་རྣམས་དང་། ཁྱད་པར་ཆིབས་པའི་རྗེས་འདི་འདྲ་ཤིན་ཏུ་དཀའ་བས་ངོ་མཚར་མཆོག་ཏུ་ཆེ་སྟེ་ཨོ་རྒྱན་རིན་པོ་ཆེ་དངོས་ཡིན་འདུག་ཅེས་ཐུགས་ཡིད་འཕྲོག་པའི་གསུང་དངོས་སུ་ཐོས་ཚུལ་གྲྭ་སློབ་འགའ་ཞིག་གི་ཁ་ནས་བཤད་རྒྱུ་འདུག །འདན་ཁོགས་ཕྱོགས་ནས་འབྲི་ཆུ་ཆེན་མོར་ཆིབས་བཅིབས་པ་དང་བཅས་སྐུ་སྟོད་མན་ནུབ་ཙམ་ཐོལ་བྱུང་གིས་བརྒལ་བས་ཕ་རིར་ཟིན་ཁར་རྟ་དང་སྐུ་ལུས་ན་བཟའ་ལ་ཆུ་ཡི་ཟིལ་པ་ཙམ་ཡང་གོས་མི་འདུག་པ་མངོན་སུམ་མཐོང་ཞེས་ཕྱོགས་དེར་ཡོད་པ་རྣམས་ཀྱིས་གླེང་རྒྱུ་བྱུང་བ་སོགས་འབྲི་ཆུ་ལ་ཟང་ཐལ་དུ་གཤེགས་པ་ལན་ཁ་ཤས་དང་། བོད་དུ་ཕེབས་ལམ་ཆུ་ཆེན་རྒྱལ་མོ་དངུལ་ཆུ་དབྱར་ཆུ་རྒྱས་པས་གྲུས་ཀྱང་བརྒལ་དུ་བྱ་ཐབས་མེད་དུས། རྟ་དྲེལ་སྟོན་འཁོར་ཚང་མ་ཚམ་ཚོམ་མེད་པར་དྲག་རྩལ་གྱིས་གཤེགས་རྒྱུར་མཛད་བྱུང་བས་ཆུ་རྐང་པ་ནུབ་ཙམ་ལས་མ་མཐོང་ངོས་ཕར་ཀར་བདེ་བླག་ཏུ་འབྱོར་སོང་ཞེས་གྲྭ་ཚང་དུ་སོང་བའི་གྲྭ་རྒན་འགའ་ཡི་ངག་ནས་དངོས་སུ་ཐོས། ཉིན་གཅིག་འབྲལ་སྤང་བེར་ནག་སྐུ་བརྙན་མདུན་རང་ཕྱོགས་ཀྱི་བསྟན་དང་བསྟན་འཛིན་ལ་སྐྱོབ་སྲུང་མེད་ཁར་བསྟན་དགྲ་མི་སྒྲོལ་བར་དོན་མེད་ཞལ་གདངས་མཆེ་གཙིགས་སུ་བཞུགས་པ་ཅི་འདྲ་ཡིན་ཞེས་བཀའ་བཀྱོན་ལྟ་བུར་མཛད་སོང་
བས་དེ་ཉིན་རྒྱལ་རོང་ཤུ་བྷམ་དགོན་པའི་བསྟན་པ་ལ་ཕན་ཐོགས་དཔེ་ཟླ་བྲལ་བ་ཅན་ཁྲོ་ཆུ་རྒྱལ་པོའི་སྲས་བླ་མ་ཉིད་དགོན་པར་གཟིགས་རྟོག་ཕྱོགས་ལྷུང་ཆེ་བར་མ་བཟོད་ནས་སྤུན་ཡ་དཔོན་སྐྱ་ནག་ཕྱོགས་ཅན་ནས་ནང་དམེ་བྱས་ཏེ་བསད་སོང་བ་ཡིན་རྒྱུ་དང་། ཁོ་རང་ཡང་དེ་འཕྲལ་དུ་རྐྱེན་ལམ་སོང་བ་ཡིན་ཚུལ་སོགས་ཀྱི་གླེང་གཞི་བཅས། སྤྱིར་གར་བྱོན་ཐམས་ཅད་དུ་རྫུ་འཕྲུལ་སྣ་ཚོགས་སྟོན་རྒྱུ་དང་། དགོས་པའི་དུས་མངོན་ཤེས་ལུང་བསྟན་ཐོགས་མེད་དུ་སྟོན་པ་སོགས་ཀྱི་ལོ་རྒྱུས་ངོ་མཚར་བ་རྒྱུས་ཡོད་བླ་རྒན་རྣམས་ནས་འབྱམས་ཀླས་བཤད་རྒྱུ་འདུག་ཀྱང་བརྗེད་ཐོར་མ་འཁོད་པ་སོགས་ཀྱིས་འདིར་ཇི་བཞིན་བྲི་བ་རྔོ་མ་ཐོགས། འཇང་དང་། རྒྱལ་རོང་། རྡོ་སོགས་དགོན་ལག་འགའ་རེར་རབ་གནས་ཟླ་ལམ་ཙམ་རེར་ཟང་ཐལ་དུ་སོང་བ་དང་། སྤུ་བོ་ཤུལ་རྫོང་དགོན་དུ་རབ་གནས་ཀྱི་མེ་ཏོག་འདི་ནས་འཐོར་བ་ལྷ་ཁང་ནང་དུ་ཁ་བ་བཞིན་བབས་བྱུང་བ་ཁོ་ན་ཚུར་བསྡུས་པ་ད་ལྟ་འདང་བརྒྱད་དགུ་ཙམ་ལོངས་པ་ནང་རྟེན་དུ་བཞག་འདུག་ཟེར། མཐའ་ཡི་དགོན་ལག་རིགས་གྲྭ་རྒོད་རྣམས་རང་མོས་བྱུང་རྒྱལ་གྱི་སྤྱོད་པ་དང་། དགོན་ཡུལ་སྡེ་གང་ས་ནས་ཁྲིམས་མེད་ངན་པ་ལང་ཤོར་བྱུང་རིགས་རྣམས་རྫུ་འཕྲུལ་གྱིས་སྤ་བཀོང་བ་དང་། སྨན་དཔྱད་ཀྱིས་ཀྱང་བཅོས་རྒྱུ་མེད་པའི་ཕོ་སྐྲན་
རིགས་ཀྱིས་གཙོས། ནད་གདོན་བགེགས་རིགས་རྣམས་འགའ་ཞིག་གསང་ཆབ་ཁ་ལ་སོང་བ་སོགས་ཀྱིས་རྩད་ནས་འཇོམས་པ་དང་། འགའ་ཞིག་ཕྱག་འབེབས་དང་ཞབས་དབང་ཙམ་གྱིས་འཇོམས་པ་སོགས་མང་དུ་བྱུང་བ་ཀུན་ལ་ཡོངས་གྲགས་ལྟར་དང་། ནད་པ་ཚེ་ཟད་ཤི་ལ་ཁད་པ་འགའ་ཐུགས་གཏད་ཙམ་གྱིས་ཚེ་རིང་དུ་བསྲིང་བ་སོགས་དེ་དང་དེ་འདྲ་བའི་ལོ་རྒྱུས་ཤིན་ཏུ་མང་། ལྷ་གདན་དུ། མ་ད་ནས་བཀང་བའི་དཀར་ཡོལ་གྱི་ཁ་སྨན་ཁུག་བཞིན་དུ་བསྡུས་ནས་བལ་པོའི་ཚོང་པ་ཞིག་ལ་གཡང་རྟེན་དུ་གནང་བ། ཕྱིས་སྣོད་བཅུད་གཉིས་ཀ་མ་ཉམས་པ་དངོས་སུ་མཐོང་ཞེས་ཁམས་པའི་ཚོང་དཔོན་ཞིག་གི་ཁ་ནས་ལབ་པ་ཐོས། རྩ་གསུམ་ལྷ་ཡི་ཞལ་གཟིགས་དང་། ཁྱད་པར་སྲུང་མའི་གཙོ་བོ་བེར་ནག་པོ་ཅན་འཁོར་བཅས་ལུས་དང་གྲིབ་བཞིན་འགྲོགས་པས་མཚོན་རང་བསྟན་སྲུང་མ་རྒྱ་མཚོས་ཅི་བཅོལ་བཀའ་བཞིན་བསྒྲུབ་པ་དང་། ན་བཟའ་ཕྱག་མདུད་ཙམ་འཆང་བ་རྣམས་ཕ་རོལ་དགྲ་སོགས་ཀྱི་མཚོན་ཆ་ལུས་ལ་མི་ཐེབས་ཤིང་། ནད་གདོན་བགེགས་བར་སོགས་ཀྱིས་མི་ཚུགས་པ་དེ་འདྲ་མངོན་སུམ་མཐོང་ཆོས་སུ་གྱུར་པ་བགྲང་ལས་འདས་སོ། །སློབ་མའི་ཚོགས་བཀའ་བརྒྱུད་བསྟན་འཛིན་ཆེ་གྲས་རྣམས་ཏེ། སྐུ་ཚེ་ཆེར་མ་བཞེས་སྟབས་
ཡོངས་གྲགས་མང་ཚན་ཡོད་པར་མ་མངོན་ནོ། །ཕྱི་དུས་ཀྱི་གྲུབ་ཐོབ་ཆེན་པོ་བྷྱོ་རིག་འཛིན་སྤྲུལ་བསྒྱུར་གྱིས་དགའ་ལྡན་དུ་ཕེབས་པས་བྱམས་པའི་མདུན་སྐུ་ཞབས་སི་ཏུ་ཕེབས་འོང་རྒྱུའི་འུར་སྒྲ་ཞིག་གི་ངང་དགའ་ལྡན་ཕོ་བྲང་དུ་དངོས་སུ་བྱོན་བྱུང་བ་མཇལ་བས་ད་ནི་ཞིང་འདིར་ཡུན་རིང་མི་བཞུགས་ངོ་མ་ལ་བྱམས་པ་དངོས་ཡིན་འདུག་པའི་ད་ལྟ་མཇལ་རྒྱུ་ཡོད་དུས་མཇལ་སར་མགྱོགས་པར་སོང་ཞེས་སློབ་ཚོགས་རྣམས་ལ་བཀའ་ཕེབས་པ་ལྟར་ཐམས་ཅད་ཅི་མགྱོགས་ཀྱིས་ཡོང་བས་བསྙུན་ཁམས་ལྗིད་སྐབས་ཁེལ་འདུག་རུང་རྒྱུ་མཚན་ཞུས་པས་ཞལ་མཇལ་ཙམ་བྱུང་བས་གྲུབ་ཐོབ་ཆེན་པོས་དོན་ཆེན་པོ་འགྲུབ་འདུག་ཅེས་གསུངས་བྱུང་ཚུལ་ཐུགས་སྲས་ཀྱི་ཐུ་བོ་བཀའ་འགྱུར་བ་བླ་མ་ལྷ་རྒྱལ་གྱི་ཞལ་ལས་དངོས་སུ་ཐོས་སོ། །ལྗགས་གླིང་རྫོང་སར་མ་ཞེས་སྔོན་མེད་གསར་རྩོམ་འདི་ཡང་དེང་སང་ཀར་རྙིང་ཀུན་དང་། སེ་འབྲས་དགའ་གསུམ། ས་སྐྱ་གོང་མན་དགོན་ཁག་ཀུན་ལ་ལུགས་སྲོལ་ཁྱབ་བརྡལ་ཆེ་ཐང་དུ་གྱུར་སྐད་འདུག་པ་དགོངས་གཞི་དགོས་པ་ཁྱད་པར་ཅན་འཕགས་པའི་སྤྱོད་ཡུལ་གྱི་གནས་སོ། །གཞན་དོན་དུ་གཤེགས་དགོས་པའི་དགོངས་པ་ལྟར་བགྲང་བྱ་སོ་གཉིས་ལ་གཟུགས་སྐུའི་བཀོད་པ་བསྡུ་བའི་ཚུལ་བསྟན་པའི་དེ་མ་ཐག་ཀུན་གཟིགས་མཁྱེན་བརྩེའི་མདུན་དུ་ཕེབས་ནས་ད་ནི་འདི་
ཕྱོགས་ནས་འགྲོ་དོན་མི་འོང་བས་རྒྱ་ནག་གི་ཡུལ་ཕྱོགས་སུ་གཤེགས་ཚུལ་གསུངས་པ་དེ་འདྲ་ལ་དགོངས་པ་མི་གཏད་པའི་བཤོལ་འདེབས་ནན་ཏན་ཞུས་པས་མཐར་ལི་ཐང་ཕྱོགས་ནས་བསྐོར་ཏེ་ཡར་བཞུད་ཡོང་བས་མྱུར་དུ་མཇལ་ཡོང་ཞེས་གསུངས་ནས་མི་སྣང་བར་གྱུར་ཅེས་རྗེ་བླ་མའི་ཞལ་ནས་དངོས་སུ་ཐོས་ཞེས་ཞབས་སློབ་རིགས་ཀྱི་ཞལ་ནས་ཐོས་སོ། །ཁུངས་བཙུན་གང་ཐོས་ཕྲན་བུ་འདི་ཙམ་ལས་རྣམ་ཐར་ཡི་གེར་བཀོད་པ་སོགས་ཀྱི་རྩོལ་བ་སུས་ཀྱང་མ་མཛད་སྟབས་ཕྱི་ནང་གསང་གསུམ་གྱི་རྣམ་ཐར་ཞིབ་པ་ནི་གདུལ་བྱ་ཐུན་མོང་ངོར་སྣང་མེད་དུ་གྱུར་པ་སྟེ། མདོར་ན་འཕགས་བོད་ཀྱི་གྲུབ་ཐོབ་ཆེན་པོ་སོགས་དང་མཉམ་ངེས་པ་བཅས་དུས་ཕྱིས་བོད་ཁམས་སུ་གྲུབ་ཐོབ་ཀྱི་སྤྱོད་པ་ཅན་འདི་འདྲ་བ་འགའ་ཡང་མ་བྱུང་བ་ལྟ་བུའོ། །པདྨ་ཀུན་བཟང་ཆོས་ཀྱི་རྒྱལ་པོའི་སྐུ་སྐྱེ་དེ་མ་ཐག་པ་ནི་སི་ཏུ་སྐྱེ་ཕྲེང་བཅུ་གཅིག་པདྨ་དབང་མཆོག་རྒྱལ་པོ་ཞེས་ད་ལྟ་འཚོ་ཞིང་གཞེས་པ་ཉིད། རྒྱལ་དབང་བཅོ་ལྔ་པས་ཚེ་རིང་མཆེད་ལྔ་དང་ཞུ་བ་ཞུ་ལན་དུ་བགྲོས་ནས་ལུང་བསྟན་ཚིགས་སུ་བཅད་པ་མང་པོའི་དོན་དང་མཐུན་པར་ཡབ་ཡུམ་ཀྱི་མཚན་དང་། ས་ཆ་ཡུལ་རིས་ཁང་ཁྱིམ་སོགས་ས་བཀྲར་བཀོད་པ་ནས། འཇམ་མགོན་རྣམ་གཉིས་ཀྱི་གཟིགས་པ་སྔར་ཞིག་ནས་ཐུགས་ལ་མངའ་བ་དང་ཡང་དགོངས་པ་གཅིག་མཐུན་གྱིས་ལི་
ཐང་གནམ་ཆེན་བྲག་དཀར་གྱི་ཉེ་འདབས་དང་འབྲེལ་བའི་ཡུལ་ལྗོངས་སུ་སྔགས་རིག་འཛིན་པ་ཆེན་པོའི་རིགས་རུས་གཙང་མར་རབ་བྱུང་བཅུ་དྲུག་པའི་ནང་གསེས་མེ་ཁྱི་ལོར་སྐུ་འཁྲུངས་པ་ངེས་རྙེད་གྱུར་ནས་ངོས་འཛིན་མཛད། ཀརྨ་པ་དང་གོང་མའི་ཕྱག་ཕྲེང་སོགས་སོ་སོར་ངོས་འཛིན་ཡིད་ཆེས་སུ་གནང་། བལྟམས་མ་ཐག་ནས་བཟུང་ངོ་མཚར་བའི་ལྟས་ཁྱད་འཕགས་མཐུན་སྣང་དུ་གྲུབ། ཆུང་དུས་ནས་ཆགས་ཐོགས་མེད་པའི་མཁྱེན་པ་ལ་མངའ་དབང་འབྱོར། དགུང་ལོ་བཞི་སོན་པས་གླང་ལོར་དཔལ་སྤུངས་གདན་སར་སྤྱན་དྲངས། རྒྱལ་དབང་བཅོ་ལྔ་པས་ཁྲི་འདོན་མཛད། མཚན། དཔལ་ལྡན་ཀུན་ཁྱབ་ངེས་དོན་སྨྲ་བའི་སེངྒེ་འཆི་མེད་པདྨ་དབང་མཆོག་གྲུབ་པ་ཕྱོགས་ལས་རྣམ་པར་རྒྱལ་བའི་སྡེ། ཞེས་པ་གསོལ། རབ་ཏུ་བྱུང་བར་མཛད་ནས། ཚུལ་བསྟན་ལྗགས་ཀློག་སྐོར་ཚེགས་མེད་པ་དང་། ཡིག་རིས། སུམ་རྟགས། སྙན་ངག །སྒྲ་ཙཱནྜ་པ་སོགས་རིག་གནས་ལ་བརྩོན་པ་ཆེན་པོས་སྦྱངས། ཀརྨ་པ། འཇམ་མགོན་རིན་པོ་ཆེ། འཇམ་དབྱངས་མཁྱེན་བརྩེ། མཁན་ཆེན་བཀྲ་ཤིས་འོད་ཟེར། བླ་མ་སྟོབས་ལྡན་ནམ་ཐུབ་བསྟན་རྒྱལ་མཚན། ངོར་དཔོན་སློབ་འཇམ་དབྱངས་བློ་གཏེར་དབང་པོ། བཀའ་འགྱུར་བ་བླ་མ་བཙད་པོ་ལྷ་རྒྱལ་སོགས་བླ་མ་མང་དུ་བསྟེན། དེ་དག་རྣམས་ལས་ཀཾ་ཚང་རང་ལུགས་གཙོ་བོར་གྱུར་པའི་བཀའ་
བརྒྱུད་སྤྱི་བྱེ་བྲག་གི་སྨིན་གྲོལ་གྱི་རིམ་པ་དང་། ཕྱག་ཆེན། ཆོས་དྲུག་སོགས་མན་ངག་ཟབ་གནད་ཀྱི་རྒྱུན་ཅི་མཆིས་ལྷག་མེད་བཞེས་པས་མཚོན་རིས་སུ་མ་ཆད་པའི་བསྟན་པ་ཀུན་ལ་གཅིག་ཏུ་གུས་པས་ས་དགེ་རྙིང་གསུམ་གྱི་སོ་སོའི་བཤད་སྒྲུབ་གྱི་རྒྱུན་ཕལ་ཆེ་བ་གསན་པ་སོགས་ནི་ཞིབ་པར་གསན་ཡིག་ཏུ་གསལ། དགུང་ལོ་ཉེར་བཞིའི་དུས་མཁན་ཆེན་བླ་མ་བཀྲ་ཤིས་འོད་ཟེར་མདུན་ནས་རབ་བྱུང་བསྙེན་རྫོགས་ཀྱི་སྡོམ་པ་སྟབས་གཅིག་བཞེས། དགེ་སློང་གི་མཚན། ཀརྨ་བཤད་སྒྲུབ་ཆོས་ཀྱི་སེང་གེ་ངེས་དོན་བསྟན་པའི་རྒྱལ་མཚན་ཕྲིན་ལས་ཀུན་ཁྱབ་དཔལ་བཟང་པོ། ཞེས་པ་གསོལ། དགུང་ལོ་ཉེར་ལྔའི་དུས་ནས་བཟུང་ལོ་བཅུ་ཕྲག་ལྷག་ཙམ་བར་དཔལ་སྤྲུལ་རིན་པོ་ཆེའི་སློབ་བརྒྱུད་འཇམ་པའི་དབྱངས་གཞན་ཕན་ཆོས་ཀྱི་སྣང་བའི་མདུན་ནས། དབུ་ཕར་འདུལ་མཛོད་སོགས་གཞུང་ཆེན་བཅུ་གསུམ་ཆ་ལག་དང་བཅས་པ། སྒོམ་རིམ་སོགས་མདོ་ཕྱོགས་ཀྱི་སྐོར་རྣམས་དང་། རྒྱུད་གསང་སྙིང་སོགས་སྔགས་གཞུང་གི་སྐོར་དང་། རོང་ཟོམ་པ། ཀློང་ཆེན་པའི་རྫོགས་ཆེན་སྐོར་གྱི་མན་ངག་ཟབ་མོ་རྣམས་ཞིབ་པར་གསན་སྦྱངས་མཛད་པས་མཚོན་མདོ་སྔགས་ཀྱི་གཞུང་ལུགས་རིག་གནས་དང་བཅས་པ་ལ་མཁས་པའི་ཕུལ་དུ་སོན། སུམ་ལྡན་རྡོ་རྗེ་འཛིན་པ་ཆེན་པོའི་ཚུལ་དུ་བཞུགས་པས་བཙུན་པའི་མཆོག་
ཏུ་གྱུར། གདུལ་བྱ་གང་ལ་གང་འདུལ་རྣམས་སུ་ཐབས་མཁས་ཐུགས་རྗེ་ཆོས་དང་ཟང་ཟིང་མི་འཇིགས་པའི་སྦྱིན་པ་སོགས་ཕན་བདེ་ཁོར་མོ་ཡུག་ཏུ་བརྡལ། རང་གཏོགས་བཀའ་དགོན་སྤྱི་བྱེར་རྣམས་ལ་དུས་གཟར་ཅི་ཆེའི་སྐབས་ཉམས་པ་སོར་ཆུད་ཉམས་ཕན་འཚོ་སྐྱོང་། མ་ཉམས་གོང་འཕེལ་སོགས་ཅི་འགབ་དང་། སྒྲིག་ཁྲིམས་བཅའ་བ་ཉམས་གསོས་ཐེབས་རྩ། རྟེན་བཞག་སྦྱིན་སྒོ་སོགས་རྒྱ་ཆེ་མུ་མེད་དང་། དབང་ལུང་ཁྲིད་གསུམ། སོ་ཐར་སྡོམ་འབོག་སོགས་བགྲང་ཡས་དང་། གཞན་རྒྱ་བོད་འཁྲུགས་ཟིང་སྐབས་སོགས་སུ་རྫོགས་ཆེན་གཙོས་རྙིང་དགོན་རིགས་དང་ས་དགོན་སོགས་ལ་ཞབས་འདེགས་ཕན་ཆ་ཅི་དྲག་དང་། སྡེ་དགེའི་རྒྱལ་ཁབ་ལའང་རང་དབང་བདག་ཐོབ་ཡོང་བ་སོགས་ཀྱི་ཐུགས་ཁུར་ལྷུར་བཞེས་གནང་བ་སོགས་བཟང་པོའི་ཕྲིན་ལས་ཚད་ལས་འདས། ལོ་རེ་བཞིན་སྲོག་བླུ་བརྒྱ་ཕྲག་མང་པོ། ཉམ་ཐག་དུད་འགྲོ་ཡན་བྱམས་པས་སྐྱོང་བ་སོགས་སྙིང་རྗེའི་མངའ་བདག་ཏུ་གྱུར། དུས་བཟང་སྐབས་སོགས་དུས་རྒྱུན་མར་མེ་སྟོང་དང་ཁྲི་མང་པོ་ཁ་ཡར་གང་འགྲོ། མཆོད་འབུལ་ཚོགས་གསོག་རྒྱ་གང་ཆེ། རྡོ་འབུམ་ཤིན་ཏུ་བགྲང་ཡས། རྡོར་སེམས་སྒྲུབ་མཆོད་ཚད་ལྡན་གསར་འཛུགས། དགོན་འདིའི་མཆོད་ཆས་སྐོར་གསེར་དངུལ་ལས་གྲུབ་པ་སྤུས་དག་དང་། ཚེས་བཅུ་ཆེན་མོའི་ཡོ་བྱད་ནོམ་
ལྡན་རིན་ཐང་བྲལ་བ་རྣམས་བཞེངས། སྤར་ཁང་། དུང་འཁོར་ཁང་། ཁྱད་པར་འདུ་ཁང་ཆེན་མོ་བླ་བྲང་གོང་འོག་རྣམས་དང་བཅས་པ་ཞིག་གསོས་འགྲན་བྲལ་མཐོང་བས་ཡིད་འཕྲོག་ཅན་རྐང་ནས་གསར་བཟོས། ནང་རྟེན་བྱམས་ཆེན་གཙོས་གསེར་ཟངས་ལས་གྲུབ་པའི་སྐུ་བརྙན་དང་མཆོད་རྟེན་རིགས་ཤིན་ཏུ་ཆེ་ལེགས་གྲངས་མང་། ཐུབ་པ་དང་། བྱམས་པའི་སྐྱེས་རབས། ཕུར་པ་གཙོ་འཁོར་བཅས་པའི་ཞལ་ཐང་དཔེ་བྲལ་སྐོར། མཛོད་ཆེན་རྣམ་ལྔའི་ཁ་སྐོང་དང་། བསྟན་བཅོས་བཀའ་དང་མཚུངས་རིགས་སྤར་དུ་བརྐོས་པ་པུསྟི་ཀ་ཤིན་ཏུ་གྲངས་མང་ལོངས་པ་སོགས་ཕྱི་ནང་རྟེན་བཞེངས་རིགས་ཁོར་མོ་ཡུག་ཏུ་མཛད་དང་མཛད་བཞིན་པ་སྟེ། དགོན་འདིར་སྔར་ཐུབ་ཆེན་འདག་བཟོ་ཙམ་ལས་གསེར་ཟངས་ལས་གྲུབ་པའི་སྐུ་བརྙན་སོགས་ཆེ་རིགས་གྲངས་མང་འགའ་ཡང་མི་བཞུགས་པ་ལྟར་ན། དེང་སང་རྟེན་གསུམ་མང་ཉུང་ཆེ་ཆུང་ཇི་བཞུགས་མཆོད་ཆས་ཡན་བཅས་ཕྱི་བཀོད་ནང་རྟེན་ཚང་མ་སྐྱབས་མགོན་འདི་ཉིད་ཀྱི་ཕྱག་རྗེས་ཏེ། མདོར་ན་རྣམ་དཀར་གྱི་བྱ་བ་རླབས་སུ་ཆེ་བ་བསམ་ལས་འདས་པ་འདི་འདྲ་ནི་སི་ཏུ་སྐུ་ཕྲེང་གོང་མ་རིམ་བྱོན་རྣམས་ལའང་མ་བྱུང་བ་མངོན་སུམ་ལྟར་རོ། །ཕྱི་དུས་རྒྱ་ནག་རྒྱལ་ཁབ་ནས་ཀྱང་སྐྱབས་འཇུག་ཞུ་རྒྱུ་ཡོང་བ་སོགས་ཀྱིས་མཚོན་ཆོས་སྲིད་གཉིས་ཀའི་མཁྱེན་རྒྱ་ཆེ་བས་རྒྱ་བོད་ཕལ་ཆེར་གུས་འདུད་དབང་དུ་འདུས་ཤིང་། དྲག་ཞན་སེར་སྐྱ་སུ་ཡང་
མཇལ་མ་ཐག་ཏུ་དད་པས་ཡིད་དགའ་ཞིང་གྲོལ་བ་དང་། ཅི་གསུང་བཀའ་ལ་ཉན་པ་འབའ་ཞིག་ཏུ་གྱུར། ཡབ་སྲས་ལི་ཐང་དུ་ཕེབས་སྐབས་སྨྲི་ཏི་དང་ལྕག་སྦུབ་ཟེར་བ་གཉིས་དམེ་འཁྲུགས་ལོ་མང་དེ་ཕྱོགས་ཀྱི་ཡུལ་ཁམས་སྡུག་མནར་ཆེ་བ་དྲུང་ལྷན་རྒྱས་ནས་བསྡུམས་པར་མཛད་པས་དགེ་ཕན་ཤིན་ཏུ་ཆེ་བར་གྱུར། ཀུན་གཟིགས་མཁྱེན་བརྩེས་ཀྱང་ཁོང་གི་ཐུགས་རྒྱུད་འཕོ་བའི་སྤྲུལ་སྐུ་ཡིན་རྒྱུར་འཇམ་མགོན་རིན་པོ་ཆེ། མཁན་ཆེན་བླ་མ་སོགས་ལ་ཞལ་བཞེས་གནང་བ་དང་། རྟེན་འབྲེལ་ཞིག་གི་རྒྱུ་རྐྱེན་ལས་སྐུ་བསོད་དབང་ཐང་། འགྲོ་དོན་ཕྲིན་ལས་ཆེན་པོ་ཞིག་ཡོང་གསུངས་པའང་ཐོས། སྤྲུལ་སྐུ་ངོས་འཛིན་དགོས་རིགས་འཁྲུལ་པ་དང་བྲལ་བའི་ངོས་འཛིན་ངོ་མཚར་བ་ཤ་སྟག་དང་། ཁྱད་པར་རྒྱལ་དབང་ཀརྨ་པ་བཅུ་དྲུག་རང་བྱུང་རིག་པའི་རྡོ་རྗེ་ཉིད་སྒྲིབ་བྲལ་ཡེ་ཤེས་ཀྱི་གཟིགས་པར་ཤར་བའི་ཐོལ་བྱུང་དུ་ངོས་འཛིན་གནང་བ་ཕྱིས་གོང་མའི་འདའ་ཀའི་ཞལ་ཆེམས་ཉེ་གནས་རྣམས་ཀྱིས་གསང་རྒྱས་བཏབ་པ་དང་གུང་འགྲིགས་ཏེ་རང་གཞན་ཐམས་ཅད་ཡིད་ཆེས་ཡ་མཚན་གྱི་གནས་སུ་གྱུར། སྐབས་སུ་བབས་པའི་ཚེ་ན་བཟའ་མཚན་གསོལ་དང་། གདན་སར་ཁྲི་འདོན་ལེགས་གྲུབ་སོགས་ཀྱི་མཛད་པ་དང་འབད་པ་བརྒྱ་ཕྲག་བསྐྱངས་བ་མཐར་ཕྱིན་བྱུང་བ་འདི་ཉིད་ནི་རྣམ་ཐར་རྒྱ་མཚོའི་སྙིང་པོ་ལྟ་བུའོ། །དུས་
ཕྱིས་དགོན་འདིར་སྡོམ་ཞིབ་དབྱེ་བསལ་ཤིན་ཏུ་ཚད་ལྡན་ཐོག་ཕྱིན་ཆད་གཙང་གྲའི་སྲོལ་ཁྲིགས་ཆགས་ཀྱི་དམ་རྒྱ་རྒྱུན་མཛེས་སུ་བསྟར་བ་ནི་ཀུན་ལ་མིག་ལྟོས་ཡར་ལྡན་གྱི་མཛད་པ་ཆེ་ཤོས་དང་། སྤྱིར་སྐྱབས་མགོན་འདིའི་སྐུ་རིང་ཀར་དགོན་ཆེ་ཕྲ་ཚང་མར་འདུལ་ཁྲིམས་ལ་གཅེས་སྤྲས་གཙོར་བཟུང་འཁོར་ལོ་གསུམ་གྱི་འདུས་སྡེ་དབྱར་མཚོ་ལྟར་འཕེལ་རྒྱས་སུ་བྱུང་བ་ཡང་མངོན་སུམ་ཡོངས་གྲགས་བཞིན་ནོ། །རྒྱལ་དབང་བཅོ་ལྔ་པ་དང་། འཇམ་མགོན་བླ་མ་ཟུང་ནས་ངེས་དོན་སྙིང་པོའི་བསྟན་པ་གཏད། རྒྱལ་དབང་བཅུ་དྲུག་རང་བྱུང་རིག་པའི་རྡོ་རྗེ་མཆོག་ནས། རབ་བྱུང་སོ་ཐར་ནས་བཟུང་། ཀཾ་ཚང་རང་ལུགས་ཀྱི་སྨིན་གྲོལ་གྱི་ཆོས་སྐོར་ཇི་སྙེད་ཀྱིས་མཚོན་སྔགས་མཛོད་དང་གདམས་མཛོད། སྒྲུབ་བཏུས་སོགས་ཤིན་ཏུ་ཆོས་བཀའ་རྒྱ་ཆེན་གསན་དང་གསན་འགྱུར་བཅས། རིགས་བདག་གཙུག་གི་ནོར་བུ་གཅིག་པུར་བཀུར་བར་མཛད་ཅིང་། རྒྱལ་དབང་གོང་མ་ནས་ཀྱང་བཀའ་བརྒྱད་དགོངས་འདུས་ཀྱི་ལུང་སོགས་སྨིན་གྲོལ་ཅི་རིགས་གསན། སྤྱིར་བཀའ་བརྒྱུད་སྔགས་མཛོད་ལན་གྲངས་དང་། དབང་ལུང་གསན་རིགས་ཕལ་ཆེར་སྐབས་སྐབས་འཆད་སྤེལ་གྱི་ཆོས་འཁོར་རྒྱ་ཆེ་བ་བསྐོར་བར་མཛད་པ་སོགས་མདོར་ན་བསྟན་འགྲོར་སྨན་པའི་ཕྲིན་ལས་ནི་བསམ་གྱིས་མི་ཁྱབ་པའི་རང་བཞིན་ནོ། །དེར་མ་ཟད་མཁན་ཆེན་བཀྲ་ཤིས་འོད་ཟེར་དགོངས་བཞེད་ཉག་གཅིག་འཇམ་པའི་དབྱངས་གཞན་དགའ་རིན་པོ་ཆེ་འདི་དགོན་དུ་
གདན་ཞུས་ཡུན་རིང་བཞུགས་འཇགས་སྟེང་རིན་པོ་ཆེས་གསན་བསམ་གོང་སྨོས་ལྟར་དང་། དབྱར་གནས་སུ་མདོ་སྔགས་སློབ་གྲྭའི་རྒྱུན་གསར་འཛུགས་བཤད་སྒྲུབ་གཉིས་ཀ་ཚང་བའི་ཆོས་སྡེ་ཆེན་པོའི་མཚན་གཞི་ཐོགས་པའི་རྒྱུར་ངོ་མཚར་བའི་མཛད་པ་བླ་མེད་དུ་ཆེ་ཞིང་དར་རྒྱས་ཡུན་དུ་གནས་པར་སྨོན་ནོ། །བླ་མ་མང་དུ་བཞུགས་པའི་ནང་ནས་ཡིད་འཕྲོག་དོན་གྱི་བླ་མ་ནི་ཀརྨ་པ་བཅོ་ལྔ་པ། འཇམ་མགོན་རིན་པོ་ཆེ། མཁན་ཆེན་བཀྲ་ཤིས་འོད་ཟེར། གཞན་ཕན་ཆོས་ཀྱི་སྣང་བ་རྣམ་པ་བཞི་པོ་ཁོ་ན་དང་། རྩ་བའི་བླ་མ་དངོས་འཇམ་མགོན་རིན་པོ་ཆེ་ཡིན་པ་འདྲའོ། །གདོད་ནས་སངས་རྒྱས་ཐུགས་རྗེ་ཡས་སྤྲུལ་ལ་ས་ལམ་སྦྱངས་ཅི་ལ་དགོས་ཀྱང་། ཚུལ་བསྟན་ཙམ་དུ་ཕྱག་རྫོགས་ཆོས་དྲུག་སོགས་ཉམས་བཞེས་ལ་དུས་རྟག་ཏུ་རང་བབ་ཀྱིས་བརྩོན་ཅིང་རིག་པ་གཅིག་ཅར་བའི་འགྲོས་ཀྱིས་གནས་ལུགས་ལ་རང་བྱན་ཆུབ་པའི་ཀློང་ཆེན་པོར་གཡོ་བ་མེད་པ་མཉམ་རྗེས་དབྱེར་མེད་དུ་བཞུགས་པར་ངེས་ཀྱང་དགོངས་པ་རྒྱ་མཚོའི་འཇིང་ལྟར་ཟབ་པས་སུས་ཀྱང་གཏིང་མི་དཔོག །ཡི་དམ་གྱི་ལྷ་གང་ལ་མཛད་ངེས་ཏིག་མ་འཚལ་ཡང་ཐུན་མོང་ཙམ་དུ་སྒྲོལ་དཀར་ལ་མཛད་ཅིང་ལྗགས་བསྙེན་དུང་ཕྱུར་ཁ་ལོངས་པ་དང་། སོའུ་མང་དུ་སྐྱེས་པ་སོགས་འགྲུབ་རྟགས་ཀྱང་ཅི་རིགས་བྱུང་བར་མངོན། དག་སྣང་མོས་གུས་ཕྱོགས་མེད་དུ་འབྱོངས་པ་མཐུན་སྣང་དུ་གྲུབ་ཅིང་། རྣམ་ཀུན་ཁྱེར་སོ་གསུམ་གྱི་རང་གཤིས་རྣལ་དུ་རྩོལ་མེད་འབྱོར་བཞིན་བཞུགས། ལྷག་པར་རང་བཞིན་ཤུགས་འབྱུང་དང་། དགོས་པའི་དུས་སུ་གསུང་ཟུར་ཕེབས་
པ་སོགས་དང་དཔག་དུས་གསུམ་ས་ལེར་མཁྱེན་པར་གདོན་མི་ཟ་བའི་མཚན་མ་ནི་རང་གཞན་ཀུན་གྱི་སྣང་ངོར་སྐབས་འགར་མངོན་སུམ་གསལ། འོན་ཀྱང་ཞལ་གཟིགས་ལུང་བསྟན། མངོན་ཤེས་ཉམས་སྣང་སོགས་ལ་ཐུགས་དགྱེས་ཚོར་ཆེར་མི་མཛད། རྩིང་སྤྱོད་མཁན་རྣམས་རྟག་ཏུ་དཔའ་བར་འགྲོ་བའི་ཏིང་ངེ་འཛིན་གྱིས་ཟིལ་གྱིས་མནན། འདོད་ཆུང་ཆོག་ཤེས། མཁས་བཙུན་བཟང་གསུམ། ཐོས་བསམ་སྒོམ་གསུམ་དང་ལྡན་པའི་གང་ཟག་ཆོས་ལ་སྤྱོད་པ་རྣམས་དང་ལེན་གོང་བཀུར་དཔེ་མེད་གནང་། གཞན་དུ་མ་རོ་གཅིག་ལ་མངའ་དབང་འབྱོར་པའི་རྟགས། འདི་ཕྱོགས་དང་། རྫ་རྒྱུད་བྱང་ཁ་སོགས་སུ་ཞབས་རྗེས་བཞག་པ་མང་ཞིང་། ས་སྟག་ལོར་ཡབ་སྲས་ལྷན་རྒྱས་ལི་ཐང་འདབ་སྨད་དུ་ཕེབས་པ་ན་སྤང་ཕུག་དགོན་གྱི་གཙུག་ལག་ཁང་མདུན་རྒྱབ་ཉེ་ལོགས་སོགས་ལ་ཀརྨ་པ་གཞོན་ནུའི་ཞབས་རྗེས་མང་ཙམ། རིན་པོ་ཆེའི་ཞབས་རྗེས་གསལ་བར་ཁ་ཤས། ལྷག་པར་སི་ཏུ་རིན་པོ་ཆེ་ཉིད་ཀྱི་ཆིབ་པ་ཐང་སྨུག་གི་རྗེས་འདམ་ནང་བརྫིས་པ་ལྟ་བུ་དྲུག་བདུན་ཙམ་འཆམ་སར་རྡོ་གཅལ་སྟེང་དུ་ཟབ་ལ་གསལ་བ་བཞག་འདུག་པ་དེར་ཡོད་ཀུན་གྱི་མིག་གི་སྤྱོད་ཡུལ་དུ་གྱུར། སྔར་བྱེས་ཕེབས་ཞིག་གི་སྐབས་སྒ་སྟོད་ནས་ཕེབས་ལམ་འབྲི་ཆུ་ལ་ལྷ་དར་
ཞག་གཅིག་ཙམ་གློ་བུར་ཆགས། དབུ་ཆེ་ནས་རབ་གནས་ཀྱི་མེ་ཏོག་འཐོར་བ་དཔེ་ཝར་འབལ་མོ་ནང་གི་གཞི་བདག་གི་རི་མགོར་ཟང་ཐལ་དུ་སོང་བ་མངོན་སུམ་དང་། རྒྱལ་དབང་ཆིབ་སྐྱེལ་བོད་ཕེབས་སྐབས་ཧོར་སོག་སྡེ་དང་འབྲང་སྡེ་གཉིས་ཤ་འཁོན་ཐུག་སྒོ་ཆེ་བའི་འབྲང་སྟོད་དཔོན་ནས་སྐྱབས་འཇུག་ཞུས་པ་གསོལ་ཀ་དང་དགྲ་ཆོས་རྒྱས་པ་ཚར་གཅིག་གསུངས་པས་དེ་རྗེས་སོག་སྡེའི་དམག་རྒྱུས་ཡོད་ཀྱིས་འབྲང་དཔོན་གྱི་དགུན་རུ་སྡོད་བཞིན་པའི་ས་ཆར་བབས་ཀྱང་དཔོན་གྱི་སྦྲ་དང་རུ་འཁོར་བཅས་གཏན་ནས་མ་མཐོང་ཞིང་ལུང་སྟོང་ཞིག་ཏུ་མཐོང་ནས་ཕྱིར་ལོག་སོང་བ་ཡིན་ཞེས་སོག་སྡེའི་དམག་འགྲོ་མཁན་རྣམས་ཀྱི་ཁ་ནས་ཡོངས་གྲགས་ལབ་པ་དང་། འབྲང་དཔོན་ནས་ཀྱང་ལུང་པའི་རི་དྭགས་རྣམས་སུ་བསྐོར་ཉུལ་བྱས་ནས་རང་བཞིན་གྱིས་ཕྱིར་ཐེགས་སོང་ཞེས་དངོས་སུ་བཤད་རྒྱུ་འདུག་པ་སོགས་འདི་འདྲའི་རིགས་ཤིན་ཏུ་ཆེས་མང་སྟེ་བྲི་བ་ལ་དགོས་པ་ཆེར་མི་འདུག །གནས་གཟིགས་ཕེབས་སྐབས་གཙང་འབྲུག་ར་ལུང་དགོན་དུ་གླིང་རྗེ་རས་པའི་འདྲ་ཞལ་གསུང་བྱོན་མ་དེའི་ཞལ་ངོ་ཚོན་དཀར་པོ་བྱུགས་པ་ཅན་ཞིག་རེད་འདུག་ནན་ཏན་གསུངས་ཀྱང་ཡང་ཡང་བལྟས་པས་དངོས་གནས་གསེར་ཆབ་གསོལ་བ་ཞིག་ཡིན་འདུག་གོ། ནད་པ་ཚབ་ཆེན་རིགས་
བཀའ་བསྒོ་བྱིན་རླབས་དང་ཐུགས་གཏད་ཙམ་གྱིས་འཇོམས་པ། ཕྱག་མདུད་ལུས་ལ་འཆང་བ་འགའ་ཞིག་ཕ་རོལ་གྱི་མཚོན་གྱིས་མི་ཚུགས་པ། གཅན་གཟན་གྱི་འཇིགས་པ་ལས་སྐྱོབ་པ་སོགས་དངོས་མཐོང་རེ་དང་། ཁང་པ་མེ་ཤོར་བ་སོ་སོའི་ཁུངས་སུ་དད་རྟེན་ཆགས་ལྷྭམ་དང་། ཆོས་གོས་གནང་བ་ཡོད་པ་འགའ་ཞིག་ལ་མེ་དྲེག་ཙམ་ཡང་གོས་མི་འདུག་ཚུལ་ལྗོངས་ཕྱོགས་ཕྱོགས་འགའ་ནས་བཤད་རྒྱུའང་འདུག །འབྲང་སྲས་བླ་མ་བློ་གྲོས་རབ་གསལ་དུས་རྒྱུན་ནད་གདོན་གྱིས་མནར་བ་ལ་གུ་གུལ་ལ་ལྗགས་སྔགས་ཤིག་མཛད་ནས་རྒྱུན་དུ་བདུག་རྒྱུ་གནང་བའི་ནང་ཕྱིས་སུ་རིང་བསྲེལ་དཀར་པོ་བརྒྱ་ཕྲག་སོགས་གྲངས་མང་འཁྲུངས་འདུག་པ་བདག་གིས་ཀྱང་དངོས་མཐོང་བྱུང་བ་སོགས་མཐའ་ཡས་སོ། །སློབ་མའི་གཙོ་བོ་ནི་རྒྱལ་དབང་བཅུ་དྲུག་པ། དཔའ་བོ་རིན་པོ་ཆེ། ཏྲེ་བོ་ཞབས་དྲུང་། སངས་རྒྱས་མཉན་པ། ཟུར་མང་བསྟན་སྤྲུལ། འདིར་དགོན་གྱི་སྐུ་མཆེད་རྣམས་སོགས་ཀྱིས་གཙོས་བཀའ་བརྒྱུད་པའི་བླ་སྤྲུལ་ཕལ་ཆེ་བ་རྣམས་སོ། །སྐྱབས་མགོན་འདི་ཉིད་ཀྱི་རྣམ་ཐར་ཅུང་ཞིབ་རྒྱས་ནི་སློབ་མའི་ཐུ་བོ་མཁས་བཙུན་གྲུབ་པའི་བདག་ཉིད་ཅན་གྱིས་རྩོམ་པར་གནང་འགྱུར་ལྟར་ལས་མ་མཆིས་ཤིང་། འདིར་དཔལ་སྤུངས་དགོན་གྱི་གདན་རབས་ཀྱི་རྣམ་ཐར་སྐྲ་རྩེ་ཙམ་བཀའ་འབུམ་
དཀར་ཆགས་ཀྱི་ཁོགས་དབུབ་ལྟ་བུར་བྲིས་པ་ཡིན་ལ། ཡང་སྙིང་སི་ཏུའི་སྐུ་ཕྲེང་རྣམས་ནི་བྱམས་པ་མགོན་པོ་དང་། ཨོ་རྒྱན་རིན་པོ་ཆེ་ཟུང་དུ་འཇུག་པའི་རྣམ་འཕྲུལ་ཤ་སྟག་པ་སྟེ། མ་འོངས་རྣམ་འདྲེན་ལྔ་པར་འཚང་རྒྱ་རྒྱུར་མགྲིན་གཅིག་ལུང་ནས་གསལ་བ་བཅས་སངས་རྒྱས་དངོས་སུ་གྲུབ་པ་ལ་རྨོངས་པས་དོན་མི་འགྱུར་པའི་གྱ་ཚོམ་གྱི་ཚིག་རིས་མང་པོ་བྲི་བ་ནི་སྒྲོ་སྐུར་གྱི་གཞི་དང་ཡོན་ཏན་བསླད་པའི་སྐྱོན་དུ་འགྱུར་ཉེན་ཆེ་བས་འབྲེལ་ཡོད་མེད་ནི་ཅི་ཆ་སྟེ་སྤྱིར་འཐད་པ་དང་བྲལ་ལོ་སྙམ་མོ། །དམིགས་བསལ་སྐབས་དོན་ངོ་མ། རྗེ་བདག་ཉིད་ཆེན་པོ་མཆོག་འདི་གསུང་རྩོམ་ཆོག་བསྒྲིགས་སོགས་སྔར་ཡོད་ལས་གསར་སྤྲོས་རིགས་ལ་ཐུགས་དགྱེས་ཚོར་ཆེར་མེད་ཚུལ་གསུངས་པ་ལྟར་ཡང་། རྒྱལ་དབང་རིན་པོ་ཆེས་གཙོས་སློབ་མ་རྣམས་དང་། གཞན་མཆོག་ཕལ་གྱི་གདུལ་བྱ་རྣམས་ཀྱིས་ནན་ཏན་དུ་གསོལ་བ་བཏབ་པའི་ངོར། སྒྲུབ་དཀྱིལ་དང་ཆོག་བསྒྲིགས། དབང་ཆོག་མཚམས་སྦྱོར་བཅས་དང་། ཞལ་གདམས་གསོལ་འདེབས། མཆོད་ཆོག །སྨོན་ལམ། ཟིན་བྲིས་ཀྱི་རིམ་པ་ཇི་སྙེད་སོགས་དང་། ཁྱད་པར་ཨོ་རྒྱན་རྗེ་འབངས་ཉེར་ལྔའི་སྒྲུབ་ཐབས་འདི་དགོངས་གཏེར་བྱིན་རླབས་ཀྱི་ཚན་ཁ་ཆེས་ཁྱད་འཕགས་དང་ལྡན་པ་
ཡིན་ཞེས་འཇམ་མགོན་རིན་པོ་ཆེས་ཞལ་གྱིས་བཞེས་པ་བཅས་གང་ཅིར་བྲིས་མ་གླེགས་བམ་གསུམ་ཙམ་བཞུགས་པ་འདི་རིགས་ཉེར་མཁོ་ཤིན་ཏུ་ཆེ་བ་མེད་ན་ཐབས་ཆག་ལྟ་བུ་མང་བར་མ་ཟད། མཛོད་ལྔའི་ཤིང་རྟ་པདྨའི་རྒྱལ་ཚབ་རྗེ་རང་གི་ཐུགས་ཀྱི་སྲས་གཅིག་རྒྱལ་བས་ལུང་བསྟན་འཇམ་མགོན་ཀོང་སྤྲུལ་རིན་པོ་ཆེ་ལ་ལྗགས་ལུང་གདམས་གཏད་དང་། དེ་རྗེས་ཡེ་ཤེས་ཀྱི་སྐུས་ཀྱང་ལན་གཅིག་བསྐྱར་གནང་ཉེ་བརྒྱུད་ཀྱི་བྱིན་རླབས་ངོ་མཚར་བ་དང་། གཞན་ལའང་འཆད་སྤེལ་དགོས་པའི་བཀའ་ལུང་བཅས་ཆེད་དུ་བསྩལ་འདུག་པ་སོགས་བྱིན་རླབས་ཀྱི་ངད་མ་ཡལ་བའི་ལུང་རྒྱུན་ཁྱད་འཕགས་ད་ལྟ་བཞུགས་བཞིན་པ་སོགས་སྒོ་གང་ཐད་ནས་སྤར་དུ་བསྐྲུན་པའི་ཐུགས་རྩོལ་ཞིག་བཀའ་དྲིན་མ་ཆུང་ཞེས་མཁས་བཙུན་བཟང་གསུམ་སོགས་དམ་པའི་ཚུལ་དགུས་ཕྱུག་པ་ཟུར་མང་བསྟན་འཛིན་སྤྲུལ་སྐུ་མཆོག་ནས་གསོལ་བ་བཏབ་པ་ཐུགས་ལ་བཞག་པ་དང་འབྲེལ་སྒྲུབ་བརྒྱུད་བསྟན་པ་རྒྱ་མཚོའི་མངའ་བདག་ཀུན་གཟིགས་བྱམས་མགོན་རིན་པོ་ཆེ་སི་ཏུ་སྐུ་ཕྲེང་བཅུ་གཅིག་པ། ཀརྨ་པ་དང་། འཇམ་མགོན་བླ་མ་ཟུང་གི་ལུང་དོན་དང་མཐུན་པའི་མཚན་བསྡུས་པ་ཡོངས་གྲགས་སུ་པདྨ་དབང་མཆོག་རྒྱལ་པོ་ཞེས་གསོལ་བའི་པདྨའི་ལྗགས་ལྡན་གསུམ་པས་ཆོས་སྦྱིན་གྱི་ཕྱི་མོར་རབ་བྱུང་བཅུ་དྲུག་པའི་ནང་གསེས་ས་ཡོས་ལོ་ནས་འགོ་བརྩམས། བྲིས་རྐོས་མི་
མགོ་བརྒྱད་དགུ་རེ་ལ་ལག་བརྐོས་སུ་བརྐོ་བཅོལ་རྒྱུ་མཛད་པ་འདི་ལོ་ཁྱུ་མཆོག་ཅེས་པ་ལྕགས་སྦྲུལ་སྟོན་ཀའི་ལང་ཚོ་དར་ལ་བབས་པའི་སྐབས་སུ་ཞུ་དག་བརྐོ་བཙུགས་བཅས་མཐར་ཕྱིན་པར་གྲུབ་པ་ཡིན་ནོ། །གཞི་ནས་བཀའ་འབུམ་ཆེད་དུ་བསྒྲིག་རྒྱུའི་ཐུགས་གཉེར་ཡོད་མ་འདྲ་བ་དང་། ཉེར་མཁོ་ཆེ་རིགས་རྣམས་འཐོར་འཁྱར་དུ་སོང་བ་ཡིན་སྙམ་བཅས་ད་དུང་འདི་ནང་གསུང་ཡོངས་རྫོགས་མ་ཚང་བ་མང་ཚན་ཡོད་ངེས་ཏེ། མ་དཔེ་བྲིས་མའི་ཀ་ཐོ་ནང་དུའང་མ་འཁོད་པ་དངོས་མཐོང་མང་ཞིང་། འཁོད་རིགས་གྲས་ནས་ཞྭ་ནག་རྟོགས་བརྗོད་དང་། དབང་བསྐུར་གྱི་དགེ་བསྐུལ། ཚེ་རིང་མའི་གཡང་སྐྱབས་སོགས་མཁོ་ཁྱད་ཆེ་བ་ཅན་འགའ་དང་འགའ་ཞིག་ཀྱང་ཕྱིས་སུ་དཔེ་གྲས་སུ་མ་བཞུགས་པ་སོགས་ཀྱིས་མཚོན། སླད་ནས་གསུང་ཚོགས་ངོ་མ་རིགས་ཕྱོགས་གང་ནས་གལ་སྲིད་ཤུགས་འབྱུང་དང་རྩོལ་བ་ཟུང་དུ་འཇུག་པས་ངེས་རྙེད་ལྟ་བུ་བྱུང་ཚེ་རིམ་པར་ཁ་སྐོང་དུ་འཇོག་འོས་ཤིན་ཏུ་ཆེ་བའང་ཞར་བྱུང་གི་འཕྲོས་པའོ། །དེ་ལྟར་རྣམ་པར་དཀར་བའི་ལེགས་བྱས་རབ་ཏུ་བསྒྲུབས་པའི་དགེ་བའི་རྩ་བ་ཟླ་བ་བདུད་རྩི་ལྟ་བུ་ཅི་མཆིས་པ་ཐམས་ཅད་ཀྱང་བླ་ན་མེད་པའི་བྱང་ཆུབ་སྙིང་པོར་ཡོངས་སུ་སྨིན་པའི་རིམ་པ་ནི་དམིགས་མེད་ཐུགས་རྗེ་ཆེན་པོའི་ཀློང་ནས་ཀུན་
མཁྱེན་བྱམས་མགོན་རིན་པོ་ཆེ་མཆོག་གིས་འཁོར་གསུམ་རྙོག་བྲལ་གྱི་རང་བཞིན་དུ་བསྔོ་བའི་དགོངས་གཏད་རྩོལ་མེད་ལྷུན་གྱིས་གྲུབ་པར་གནང་བ་གོར་མ་ཆག་པ་ལྟར་ལས་གཞན་དུ་སྤྲོས་འོས་མ་མཆིས་སོ། །ད་ནི་དཀར་ཆག་གི་རིམ་པ་དངོས་འགོད་པ་ལ། མདོ་རྗི་ༀ་ཨཱཿཧཱུྃ་དང་འབྲེལ་བའི་པོད་གསུམ་དུ་བསྒྲིགས་པ་སྟེ།
དང་པོར། ༀ། པོད་ལ།
དང་པོར། ༀ། པོད་ལ། ལམ་ཟབ་བླ་མའི་རྣལ་འབྱོར་སྤྱི་དང་བྱེ་བྲག་རྣམས་ཕྱོགས་གཅིག་ཏུ་བསྡེབས་པ་ཡེ་ཤེས་བདུད་རྩིའི་གཏེར་མཛོད་ལ་ལྡེབ། ༩༤ གུ་རུ་དྷརྨ་རཱ་ཛའི་རྣལ་འབྱོར་གྱི་ཉམས་དབྱངས་མཆོད་སྤྲིན་རབ་འབྱམས་ཀྱི་གླུ་ཞེས་བྱ་བ་ལ་ལྡེབ། ༢ བདེ་ཆེན་ཞིང་གི་སྒྲུབ་པ་ལྷ་དང་བླ་མ་དབྱེར་མེད་ཀྱི་རྣལ་འབྱོར་རྟ་མཆོག་བ་ལ་ཧ་ལ་ལྡེབ། ༧ ཨོ་རྒྱན་རིན་པོ་ཆེ་བདེ་གཤེགས་སྤྱི་དྲིལ་དུ་བསྒྲུབས་པའི་རྣལ་འབྱོར་གྲུབ་གཉིས་ནོར་བུའི་ཆར་འབེབས་ལ་ལྡེབ། ༡༤ ཨོ་རྒྱན་རིན་པོ་ཆེ་རྗེ་འབངས་ཉེར་ལྔའི་ལས་བྱང་དངོས་གྲུབ་སྤྲིན་ཕྲེང་བྱིན་རླབས་ཆར་འབེབས་ལ་ལྡེབ། ༨ རྒྱུན་ཁྱེར་གྱི་རིམ་པ་ཕྱོགས་གཅིག་ཏུ་བསྡེབས་པ་དངོས་གྲུབ་བདུད་རྩིའི་གཏེར་མཛོད་ལ་ལྡེབ། ༡༥ གསོ་སྦྱོང་རྒྱུན་ཁྱེར་ལྡེབ། ༢ མ་ཧཱ་མཱ་ཡའི་ཚོགས་མཆོད་འདོད་རྒུ་མྱུར་སྟེར་ལ་
ལྡེབ། ༤ གསོལ་འདེབས་ཀྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་བྱིན་རླབས་བདུད་རྩིའི་གཏེར་མཛོད་ལ་ལྡེབ། ༥༣ ཐུན་མིན་ཞལ་གདམས་ཀྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ངེས་དོན་བདུད་རྩིའི་གཏེར་མཛོད་ལ་ལྡེབ། ༣༣ དབང་བཤད་ཀྱི་སྐོར་ཕྱོགས་གཅིག་ཏུ་བསྡེབས་པ་ངོ་མཚར་བདུད་རྩིའི་གཏེར་མཛོད་ལ་ལྡེབ། ༣༥ བདེ་མཆོག་ལྷ་ལྔའི་སྒོ་ནས་སློབ་མ་རྗེས་སུ་འཛིན་པའི་རིམ་པ་ཟབ་མོའི་སྒོ་འབྱེད་ལ་ལྡེབ། ༢༢ འཕགས་མཆོག་སྤྱན་རས་གཟིགས་རྒྱལ་བ་རྒྱ་མཚོའི་དབང་བསྐུར་ཡེ་ཤེས་མྱུར་འབེབས་ལ་ལྡེབ། ༢༥ བཅོམ་ལྡན་འདས་རྡོ་རྗེ་ཕག་མོའི་མངོན་དཀྱིལ་གསང་ཆེན་མྱུར་ལམ་དང་དབང་བསྐུར་བདེ་ཆེན་ལམ་གྱི་སྣང་བྱེད་སྦྲེལ་མ་ལ་ལྡེབ། ༣༡ ཀུན་རིག་དབང་བསྐུར་རྣམ་གྲོལ་སྒོ་ཆེན་འབྱེད་པའི་ལྡེའུ་མིག་ལ་ལྡེབ། ༡༥ རྗེ་མཁའ་སྤྱོད་དབང་པོས་མཛད་པའི་མ་མགོན་ཞལ་སྦྱོར་གྱི་དབང་བཞི་ཡོངས་རྫོགས་རྒྱན་དབང་དང་བཅས་པའི་ཡིག་སྣ་གཉིས་གབ་སྤྲད་འཁྲུགས་བསལ་བལྟས་ཆོག་ཏུ་བཀོད་པ་ལ་ལྡེབ། ༣༩ བཅས། །།
གཉིས་པ། ཨཱཿ པོད་ལ།
གཉིས་པ། ཨཱཿ པོད་ལ། ཚེ་དཔག་ལྷ་དགུའི་དཀྱིལ་ཆོག་སྨིན་དབང་རབ་གསལ་སྣང་བའི་ཉིན་བྱེད་ལ་ལྡེབ། ༢༡ འཕགས་སྒྲོལ་
བཀྲ་ཤིས་དོན་འགྲུབ་མའི་སྒྲུབ་ཐབས་རྗེས་གནང་དང་བཅས་པ་ལ་ལྡེབ། ༢༦ སྒྲོལ་དཀར་ཡིད་བཞིན་འཁོར་ལོའི་སྒྲུབ་ཐབས་རྗེས་གནང་དང་བཅས་པ་གྲུབ་གཉིས་མཆོག་སྩོལ་ལ་ལྡེབ། ༢༠ འཕགས་མ་སྒྲོལ་མ་ཉེར་གཅིག་གི་ཆོ་ག་དབང་ཆོག་དང་བཅས་པ་མེ་ཏོག་པད་དཀར་ཕྲེང་བ་ལ་ལྡེབ། ༣༦ སྒྲོལ་མའི་རྣམ་བཤད་གསལ་པའི་འོད་ཟེར་སྔར་ཡོད་ལྡེབ། ༧ གཙུག་ཏོར་རྣམ་རྒྱལ་མའི་མཆོད་ཆོག་ཡིད་བཞིན་རེ་སྐོང་ནོར་བུའི་གྲུ་ཆར་ལ་ལྡེབ། ༡༨ རྩ་གསུམ་དྲིལ་སྒྲུབ་ཚེ་གཡང་འགུགས་པའི་རིམ་པ་འདོད་རྒུའི་བུམ་བཟང་ལ་ལྡེབ། ༤༠ སྟོན་པ་མཆོག་དང་འཕགས་པའི་གནས་བརྟན་ཆེན་པོ་བཅུ་དྲུག་འཁོར་བཅས་མཆོད་ཅིང་གསོལ་བ་དང་སྨོན་ལམ་གདབ་པའི་ཆོ་ག་བྱང་ཆུབ་ཆེན་པོའི་སྤྱོད་པ་རབ་ཏུ་རྒྱས་པ་ཞེས་བྱ་བ་ལ་ལྡེབ། ༣༧ ཆོས་དྲུག་བདུད་རྩིའི་ཉིང་ཁུའི་སྔོན་འགྲོ་དངོས་གྲུབ་མྱུར་སྩོལ་ལ་ལྡེབ། ༤ ཟབ་ལམ་ནཱ་རོ་ཆོས་དྲུག་གི་འཁྲུལ་འཁོར་ཟིན་བྲིས་མཐོང་བས་ཁོང་ཆུད་གསུང་རྒྱུན་གོ་བདེ་རབ་གསལ་ལ་ལྡེབ། ༩ དཔལ་དུས་ཀྱི་འཁོར་ལོའི་སྦྱོར་དྲུག་སྔོན་འགྲོ་ཆོས་སྤྱོད་ཀྱི་ངག་འདོན་བརྒྱུད་འདེབས་དང་བཅས་པ་ལ་ལྡེབ། ༡༢ དཀོན་མཆོག་སྤྱི་འདུས་ཀྱི་ཁྲིད་ཡིག་གུ་རུའི་དགོངས་རྒྱན་ཉིན་བྱེད་སྙིང་པོའི་རྫོགས་རིམ་སྐོར་གྱི་ཟབ་ཁྲིད་ལ་ལྡེབ།
༢༢ རྫོགས་པ་ཆེན་པོ་འཇའ་ལུས་རྡོ་རྗེའི་སྲོག་སྒྲུབ་ཀྱི་སྔོན་འགྲོའི་འདོན་ཆ་རབ་གསལ། ཁྲིད་ཡིག་མན་ངག་བླ་མའི་ཞལ་ཤེས་ཀྱི་ཟིན་བྲིས། རྩ་གསུམ་འཆི་མེད་དྲིལ་སྒྲུབ་རྒྱུན་ཁྱེར་བཅས་སྦྲེལ་མ་ལ་ལྡེབ། ༤༥ རབ་གནས་ཆོ་ག་མདོར་བསྡུས་ལྡེབ། ༡༣ སྨོན་ལམ་གྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཐར་ལམ་བདུད་རྩིའི་གཏེར་མཛོད་ལ་ལྡེབ། ༤༤ གསང་སྔགས་ནང་གཏོར་ཀུན་གྱི་དོན་བསྡུས་ལ་ལྡེབ། ༦ གཏོར་བསྔོས་ཁྱེར་བདེའི་རིགས་རྣམས་ཕྱོགས་གཅིག་ཏུ་བསྡེབས་པ་ཕྲིན་ལས་བདུད་རྩིའི་གཏེར་མཛོད་ལ་ལྡེབ། ༡༨ སྔགས་ཡིག་སྣ་ཚོགས་པ་ལྡེབ། ༣ ཇོ་བོ་སྔགས་ཀྱི་བདག་པོའི་གཡང་སྐྱབས་དངོས་གྲུབ་འབྱུང་བའི་རྒྱ་མཚོ་ལ་ལྡེབ། ༡༠ རྡུལ་ཚོན་ཆུར་གཤེགས་སམ་ཀླུ་ཆོག་གདེངས་ཅན་འདོད་འཇོ་ལ་ལྡེབ། ༢ བཅས། །
གསུམ་པ། ཧཱུྃ། པོད་ལ།
གསུམ་པ། ཧཱུྃ། པོད་ལ། བསྟན་པའི་བཀའ་སྲུང་ཨ་ཕྱི་ཆེན་མོའི་མཆོད་ཕྲེང་བཀྲ་ཤིས་ཆར་འབེབས་ལ་ལྡེབ། ༢༣ བསང་མཆོད་ཀྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཕན་བདེ་བདུད་རྩིའི་གཏེར་མཛོད་ལ་ལྡེབ། ༨༥ ཟིན་བྲིས་ཀྱི་རིམ་པ་སྣ་ཚོགས་པའི་སྐོར་རྣམས་ཕྱོགས་གཅིག་ཏུ་བསྡེབས་པ་ཡོན་ཏན་བདུད་རྩིའི་གཏེར་མཛོད་ལ་ལྡེབ། ༡༣༡ ཡན་ལག་བརྒྱད་
པའི་གསོ་སྦྱོང་སྨྱུང་གནས་སྒྲུབ་ཐབས་དང་འབྲེལ་བའི་ཕན་ཡོན་མདོར་བསྡུས་སྐལ་ལྡན་ངལ་གསོ་ལ་ལྡེབ། ༥༡ སྤྲིངས་ཡིག་གི་རིམ་པ་རྣམས་ཕྱོགས་གཅིག་ཏུ་བསྡེབས་པ་རྡོ་རྗེ་བདུད་རྩིའི་གཏེར་མཛོད་ལ་ལྡེབ། ༨ བཅའ་ཡིག་ལེ་ཚན་གསུམ་ལ་ལྡེབ། ༡༥ འབུལ་ཐོ་སྐོར་ལྡེབ། ༢༡ ཕྲིན་ཡིག་སྐོར་ལྡེབ། ༦ རྟེན་བཞག་སྐོར་ལྡེབ། ༡༡ སྤྲུལ་སྐུ་མྱུར་འབྱོན་གྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་མཆོག་སྣང་བདུད་རྩིའི་གཏེར་མཛོད་ལ་ལྡེབ། ༡༧ ཞབས་བརྟན་གྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཚེ་མཆོག་བདུད་རྩིའི་གཏེར་མཛོད་ལ་ལྡེབ། ༢༡ ཆོས་སྦྱིན་ཕྱི་མོའི་འཕྲུལ་དུ་བསྒྲུབས་པའི་བཀའ་འབུམ་གྱི་དཀར་ཆག་ཡིད་འཕྲོག་བདུད་རྩིའི་གཏེར་མཛོད་ལ་ལྡེབ། ༢༤ བཅས་བཞུགས། སྨྲས་པ། མཁའ་ཁྱབ་གདུལ་བྱའི་ཡུལ་རྣམས་དོན་གཉིས་ལ། །ལོངས་སུ་སྤྱོད་པའི་ཉེར་ལེན་བྱིན་རླབས་དང་། །དངོས་གྲུབ་ཕྲིན་ལས་ཀུན་གྱི་འབྱུང་གནས་ཕུལ། །རྩ་གསུམ་རྒྱལ་བ་རྒྱ་མཚོས་དེང་འདིར་སྐྱོངས། །གང་ཞིག་འདྲེན་པ་མཆོག་རྣམས་གཞན་དོན་སླད། །ཆོས་ཀྱི་འཁོར་ལོ་བསྐོར་ལ་དུས་ནམ་ཡང་། །འདའ་བ་མེད་པས་འགྲོ་ལ་རྣམ་གྲོལ་གྱི། །སྒོ་ཆེན་མཁའ་དང་མཉམ་པར་རྟག་ཏུ་ཕྱེས། །འདི་ན་རྒྱལ་
ཀུན་ཡེ་ཤེས་གཅིག་འདུས་པ། །བཀའ་བརྒྱུད་བླ་མའི་ཚོགས་རྣམས་གསང་གསུམ་གྱི། །རྣམ་ཐར་མཛད་སྒོ་ལྔ་ལྡན་ཞིང་ཁམས་ཀྱི། །མཚན་ཉིད་ཡོངས་སུ་རྫོགས་ལས་གཞན་དུ་མིན། །ལྷག་པར་མདོ་སྔགས་ཆོས་ཀྱི་རང་གཟུགས་དངོས། །བྱམས་པ་མགོན་དང་པདྨཱ་ཀཱ་ར་སྟེ། །ཟུང་འཇུག་རྣམ་འཕྲུལ་པདྨའི་མཚན་ཅན་མཆོག །སྟོན་པ་ཀུན་ཏུ་བཟང་དང་རྣམ་དབྱེ་ཅི། །གང་ཉིད་གཅིག་ཤེས་ཀུན་གྲོལ་རྒྱལ་ས་ལ། །ལྷུན་གྲུབ་རྡོ་རྗེའི་སྐྱིལ་མོ་ཀྲུང་བཅས་ནས། །ཐམས་ཅད་མཁྱེན་པར་བཞུགས་བཞིན་སྐུ་གསུམ་གྱི། །ཁ་ལོ་སྒྱུར་བའི་ཆོ་འཕྲུལ་ཅི་ཡང་ངོམ། །རང་བྱུང་ཡེ་ཤེས་ཀློང་ནས་རྩོལ་མེད་དུ། །དགོངས་པའི་རྩལ་ཕྱུངས་རིམ་གཉིས་ཟབ་དོན་གྱི། །སྙིང་པོ་གསེར་གྱི་ཞུན་མ་བརྒྱ་ཕྲག་དག །སྤྲོས་འདི་ཁྱད་ཆོས་འབུམ་དང་ལྡན་པས་འཕགས། །ཐེག་པ་སྣ་ཚོགས་དཀོན་མཆོག་ཀུན་འདུས་བཞིན། །ཁྱད་པར་གསང་ཆེན་ཐབས་གྲོལ་མན་ངག་བཅས། །མཚན་ཉིད་ལྡན་པའི་སྙིང་ཐིག་བྱིན་རླབས་ཀྱི། །ངད་དང་ལྡན་ལ་འདི་འདྲ་སྲིད་ན་དཀོན། །མཆོག་དམན་བར་མ་ཀུན་གྱི་སྤྱོད་ཡུལ་དུ། །ཉེར་འབབས་ཀུན་ལ་ཟུག་རྔུ་བཅིལ་བའི་སྨན། །སྙིང་གའི་རྫིང་བུར་གལ་ཏེ་བསྐྱིལ་ཙམ་ན། །བདུད་རྩིའི་ཆུ་དང་མཚུངས་མིན་ད་གདོད་ཤེས། །སོ་སོར་རྟོག་པས་ལེགས་
ཕྱེས་ཚིག་དང་དོན། །རིགས་འདུས་ཆོས་ཀྱི་ཕོ་བྲང་ཕྱོགས་གཅིག་ཅེས། །དགོངས་བརྡ་སྙན་བརྒྱུད་རྣམས་ཀྱང་གཟེངས་མཐོ་ནས། །དལ་གྱིས་རྩེ་དགས་འཁྱུད་ལ་བྲེལ་བ་བཞིན། །རྡོ་རྗེ་འཆང་ནས་རིམ་བརྒྱུད་མན་ངག་སྒོར། །ཐབས་དང་སྤྲོས་པ་འཕྱུགས་མེད་བསྟན་པའི་རྒྱུན། །སྲིད་མཐར་བཟུང་སླད་ལེགས་བཤད་ཆ་རེ་ཡང་། །རྒྱལ་བསྟན་གཡང་དུ་ཆགས་པའི་རྒྱུ་རུ་མཛེས། །རང་གཞན་བདེ་ལེགས་ལག་ཏུ་བསྟར་འདོད་པ། །ཀུན་ལ་ཆུ་བཞིན་བྲིམ་པའི་ཆོས་བཀའ་སྟེ། །དེ་ཕྱིར་ཁྱབ་བདལ་འཕེལ་བའི་རི་མོ་དག །འབྲི་བ་འདི་འདྲར་ཕན་ཡོན་བརྗོད་མི་ཤེས། །འདི་བྲིས་ལྷག་བསམ་རྣམ་པར་དཀར་བའི་མཐུས། །ལེགས་བྱས་ཉིད་དུ་རློམ་ན་དགེ་བའི་ཚོགས། །ཅི་མཆིས་མཁའ་ཁྱབ་སྐྱེ་རྒུ་མུ་མེད་རྣམས། །བྱང་ཆུབ་ལམ་ལ་འགོད་པའི་རྒྱུ་རུ་བསྔོ། །ལུང་རྟོགས་བསྟན་པ་བཤད་སྒྲུབ་ཟུང་འབྲེལ་སྒོར། །དར་ཞིང་རྒྱས་ལ་བསྟན་འཛིན་སྐྱེས་བུ་རྣམས། །བསྐལ་བརྒྱར་ཞབས་བརྟན་སྣོད་བཅུད་རྫོགས་ལྡན་གྱི། །དཔལ་དང་ལྡན་པའི་དགེ་མཚན་ལྷུན་འགྲུབ་ཤོག །ཅེས་བྱམས་མགོན་ཆོས་ཀྱི་རྒྱལ་པོ་པདྨའི་ལྗགས་ལྡན་དང་པོ་གང་གི་གསུང་རབ་རྣམས་ཆོས་སྦྱིན་ཕྱི་མོའི་འཕྲུལ་དུ་བསྒྲུབས་པ་ལས་བརྩམས་པའི་དཀར་ཆག་དང་འབྲེལ་བའི་འགྲོས་གཏམ་ཉུང་ངུ་འདི་ཡང་འཇམ་དབྱངས་ཆོས་ཀྱི་རྒྱལ་མཚན་ནས་སུག་བྲིས་སུ་བགྱིས་པ་དགེའོ། །