སུམ་ཅུ་བ་དང་རྟགས་ཀྱི་འཇུག་པའི་འབྲུ་འགྲེལ་འཕྲུལ་གྱི་ལྡེ་མིག༄༅། །སུམ་ཅུ་བ་དང་རྟགས་ཀྱི་འཇུག་པའི་འབྲུ་འགྲེལ་འཕྲུལ་གྱི་ལྡེ་མིག་ཅེས་བྱ་བ་བཞུགས་སོ། །བླ་མ་དང་དབྱེར་མེད་པ་འཇམ་མགོན་སྨྲ་བའི་དབང་ཕྱུག་ལ་ཕྱག་འཚལ་ལོ། །ཨ་ཡིག་སྐྱེ་བ་མེད་པའི་དབྱིངས་ཉིད་ལ། །རྟོག་པའི་གྲྭ་ཟུར་རྩུབ་མོ་ཉེར་ཞི་ཡང་། །མཁྱེན་གཉིས་ལང་ཚོ་གཅིག་ཏུ་བདོ་བའི་གར། །ཁོ་བོའི་སྙིང་ལ་ཅིར་ཡང་བརྩོན་པར་མཛོད། །འདི་ན་མ་རྟོགས་ལོག་རྟོག་ཕྱོགས་རྟོགས་ཀྱི། །འཕྲང་ལས་ལེགས་བཤད་སྨྲ་བའི་ལམ་དོག་ཀྱང་། །ནང་གི་མུན་སེལ་དེ་ཡིས་དེངས་བཟུངས་བས། །ནང་གི་དགའ་ཚལ་གང་ཞིག་བཞད་པར་བྱས། །དེ་ཕྱིར་སྐལ་ལྡན་མེ་ཏོག་ཟས་ཅན་དག །མན་ངག་བཅུད་ལྡན་བརྡ་སྦྱོར་གཞུང་འདི་ལ། །དད་དམ་མཆོག་ལྡན་ངང་ནས་རོལ་མཛོད་དང་། །སླར་ཡང་བློ་ལྡན་དགྱེས་པའི་གཏམ་འདི་སྤྲོ། །ཞེས་ཚིགས་སུ་བཅད་པས་མདུན་བསུས་ཏེ་བཤད་པར་བྱ་བ་ནི། རང་རེ་གངས་ཅན་པ་རྣམས་ཀྱི་ཡི་གེ་དང་བརྡ་སྦྱོར་གྱི་གཞུང་ཐོག་མར་མཛད་པ་པོ་ཐུ་མི་སཾ་བྷོ་ཊ་ཞེས་གྲགས་པ་གང་དེས་བོད་ལ་ཉེ་བར་མཁོ་བའི་བསྟན་བཅོས་བརྒྱད་མཛད་པའི་ཕྱི་མོ་ལྟ་བུར་གྱུར་པ་སུམ་ཅུ་བ་དང་། དེའི་རྟགས་ཀྱི་འཇུག་ཚུལ་གུད་དུ་བཤད་པ་དང་བཅས་པ་སྟེ། དེ་ལྟར་གཉིས་ལས། དང་པོ་སུམ་ཅུ་བའི་གཞུང་འཆད་པ་ལ་ཡང་། བསྟན་བཅོས་རྩོམ་པ་ལ་འཇུག་པའི་ཡན་ལག་དང་། བསྟན་བཅོས་དངོས་གཉིས་ཀྱི་དང་པོ་ལའང་མཚན་སྨྲོས་པ་དང་། འགྱུར་ཕྱག་གོ །དེ་ལས་སྔ་མ་ལའང་མཚན་དངོས་བཤད་པ་དང་། དེའི་དོན་བཤད་པ་གཉིས་ལས། དང་པོ་ནི། རྒྱ་གར་སྐད་དུ། བྱཱ་ཀ་ར་ཎ་མཱུ་ལ་ཏྲིཾ་ཤད་ན་མ། བོད་སྐད་དུ། ལུང་སྟོན་པ་རྩ་བ་སུམ་ཅུ་བ་ཞེས་བྱ་བ། ཞེས་འབྱུང་བའི་སྐད་གཉིས་ཤན་སྦྱར་ན། བྱཱ་ཀ་ར་ཎ་ལུང་སྟོན་པ། མཱུ་ལ་རྩ་བ། ཏྲིཾ་ཤད་སུམ་ཅུ་བ། ན་མ་ཞེས་བྱ་བའོ། །གཉིས་པ་དེའི་དོན་ནི། སྒྲའི་མཚན་ཉིད་ཐམས་ཅད་ལུང་དུ་སྟོན་པར་བྱེད་ཅིང་ལེའུ་ཕྱི་མ་རྣམས་ཀྱི་རྩ་བ་ལྟ་བུར་གྱུར་པ་གང་ཞིག་བསྟན་བཅོས་སྤྱིའི་ཡན་ལག་བརྩམ་པར་དམ་བཅའ་བ་ཡན་ཆད་དོར་བས་རང་གི་གཞུང་ཚད་ཤྭ་ལོ་ཀ་སུམ་ཅུ་ཐམ་པ་རུ་གནས་པས་ན་དོན་དང་མཐུན་པར་མིང་ཡང་དེ་ལྟར་རོ་ཞེས་བྱ་བའོ། །གཉིས་པ་འགྱུར་ཕྱག་ནི། ངག་གི་དབང་ཕྱུག་འཇམ་པའི་དབྱངས་ལ་ཕྱག་འཚལ་ལོ། །ཞེས་སྨྲོས་ཏེ། དེ་ཡང་བསྟན་བཅོས་འདི་རྒྱ་གར་གྱི་སྒྲ་གཞུང་རྣམས་དང་ཕྱོགས་བསྟུན་ནས་གཏན་ལ་ཕབ་པ་ཡིན་པས་ན་རྗེས་འཇུག་རྣམས་ཀྱིས་ཀྱང་འཕགས་ཡུལ་ནས་བསྒྱུར་པའི་བསྟན་བཅོས་ཁྱད་པར་འཕགས་པ་རྣམས་དང་མཚུངས་པར་ལྟ་ཞིང་དོན་དུ་གཉེར་རིགས་སོ་ཞེས་འདོམས་པའི་དོན་དུ་ཐུ་མི་ཉིད་ཀྱིས་བསྒྱུར་པའི་མདོ་རྒྱུད་རྣམས་ཀྱི་འགྱུར་ཕྱག་དང་མཐུན་པར་འཕགས་པ་འཇམ་དཔལ་ལ་ཕྱག་འཚལ་བར་མཛད་པ་སྟེ་ཚིག་གི་དོན་ནི་འོག་ཏུ་གསལ་ལོ། །གཉིས་པ་བསྟན་བཅོས་དངོས་ལ། གཞུང་སྤྱིའི་ཡན་ལག་ཏུ་མཆོད་པར་བརྗོད་ཅིང་བརྩམ་པར་དམ་བཅའ་བ་དང་། སྐབས་དོན་དངོས་སུམ་ཅུ་བ་ཉིད་རྒྱས་པར་བསྟན་པའོ། །དང་པོ་ལ། ནང་གསེས་མཆོད་བརྗོད་དང། བཤད་པར་དམ་བཅའ་བ་གཉིས་ལས། སྔ་མ་ལའང་དབྱེ་ན། སྤྱིར་དཀོན་མཆོག་གསུམ་ལ་ཕྱག་འཚལ་བ་དང་། བྱེ་བྲག་ཏུ་འཇམ་པའི་དབྱངས་ལ་ཕྱག་འཚལ་བ་དང་། དགོས་པའི་དབང་གི་རྟག་ཞི་བ་ལ་ཕྱག་འཚལ་བ་དང་། དྲིན་གཟོ་བའི་ཕྱིར་མཁས་པ་སྤྱི་དང་བྱེ་བྲག་ལ་ཕྱག་འཚལ་བ་སྟེ་བཞི་ལས། དང་པོ་ནི། གང་ལ་ཡོན་ཏན་མཆོག་མངའ་བའི། །དཀོན་ཅོག་དེ་ལ་ཕྱག་འཚལ་ལོ། །ཞེས་པས་བསྟན། དེ་ཡང་སུ་གང་ཞིག་ལ་སྤངས་པ་དང་རྟོགས་པའི་ཡོན་ཏན་ཐམས་ཅད་ཀྱི་མཆོག་མངའ་བ་པོ་ནི་བསླུ་བ་མེད་པའི་སྐྱབས་གནས་རིན་པོ་ཆེ་འཇིག་རྟེན་འདི་ན་དཀོན་པའི་མཆོག་ཏུ་གྱུར་པ་སངས་རྒྱས་ཆོས་དང་དགེ་འདུན་གསུམ་སྟེ། དེས་ན་སྐྱབས་ཡུལ་དེ་གསུམ་ལ་གཞུང་ཉིད་ཡང་དག་པར་བསྒྲུབ་པའི་ཕྱིར་སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཞེས་པའོ། །གཉིས་པ་ནི། གང་གིས་སྒྲ་དབྱངས་ཀུན་གསུངས་པའི། །འཇམ་པའི་དབྱངས་ལ་ཕྱག་འཚལ་ལོ། །ཞེས་པས་བསྟན། དེ་ཡང་གང་སུ་ཞིག་གིས་བརྗོད་པ་སྒྲ་ཡི་དབྱངས་ཀུན་ཐོག་མར་གསུང་བ་པོ་ནི། རྒྱལ་བ་ཐམས་ཅད་ཀྱི་ཐུགས་རྣམ་པར་མི་རྟོག་པའི་དབྱིངས་དང་གཉིས་སུ་མེད་པའི་འཇམ་དཔལ་ཡེ་ཤེས་སེམས་དཔའ་ཞེས་བྱ་བ་སྟེ། དེ་ཡང་ཉེས་པའི་རྩུབ་རེག་ཐམས་ཅད་ཡོངས་སུ་སྤངས་པས་འཇམ་པའི་ཡོན་ཏན་དང་ལྡན་པའི་ཕྱིར་འགྲོ་བ་ཐམས་ཅད་ཀྱི་ཁམས་དབང་དང་མཐུན་པར་རྗེས་སུ་འཇུག་པའི་དབྱངས་ཀྱི་བདག་ཉིད་དེ་ལ་ཕྱག་འཚལ་ལོ། །ཞེས་པའོ། །གསུམ་པ་ནི། གང་གིས་མིང་གཞི་སྔོན་གསུངས་པ། །རྟག་ཞི་བ་ལ་ཕྱག་འཚལ་ལོ། །ཞེས་པས་བསྟན། དེ་ཡང་སུ་གང་ཞིག་གིས་མིང་ཚིག་བརྗོད་པ་ཀུན་གྱི་གཞིར་གྱུར་པ་ཡི་གེའི་སྦྱོར་བ་ཉིད་སྔོན་གྱི་དུས་སུ་གསུང་བ་པོ་ནི་རིག་བྱེད་ཀྱི་གཞུང་དུ་བྱེད་པོ་ཉེར་བཞིར་བཤད་པའི་ནང་ཚན་ཡི་གེའི་བྱེད་པོ་ལྷ་ཆེན་དབང་ཕྱུག་སྟེ། དེ་ལ་འཕགས་ཡུལ་བ་རྣམས་ཀྱིས་ས་ཏཱ་ཤི་པ་ཞེས་རྟག་ཏུ་ཞི་བར་འབོད་པ་གང་ལ། ཕྱི་ནང་གཉིས་ཀ་རྗེས་སུ་འཛིན་པར་བྱ་བའི་ཕྱིར་དང་། གཞུང་འདི་ཐུན་མོང་གི་རིག་གནས་ཡིན་པའི་ཕྱིར་དང་། ཡི་གེའི་བྱེད་པོ་ཡིན་པའི་ཕྱིར་ལ་སོགས་དགོས་པ་དུ་མའི་དབང་གིས་ཕྱག་འཚལ་ལོ། །ཞེས་པ་སྟེ། དེ་ཡང་མདོ་སྡེ་ཟ་མ་ཏོག་བཀོད་པ་ལ་སོགས་པར་ལྷ་ཆེན་པོ་འདི་འཕགས་པ་འཇིག་རྟེན་དབང་ཕྱུག་གི་སྤྲུལ་པར་ལུང་བསྟན་པའི་ཕྱིར་འཇིག་རྟེན་པ་ལ་ཕྱག་འཚལ་བའི་སྐྱོན་ཡང་འདི་ལ་འཇུག་པ་མ་ཡིན་ནོ། །བཞི་བ་ནི། སྡེབ་སྦྱོར་ལེགས་མཛད་མཁས་རྣམས་དང་། །བླ་མ་ལ་ཡང་ཕྱག་འཚལ་ནས། །ཞེས་པས་བསྟན། དེ་ཡང་སྒྲ་སྐད་ཀྱི་བརྗོད་པ་དང་དོན་སྡེབ་ཇི་ལྟར་སྦྱོར་བའི་ཚུལ་ལེགས་པར་སྟོན་པའི་སྒོ་ནས་ཚིག་དོན་གཉིས་ཀ་ལ་མི་རྨོངས་པའི་ཤེས་རབ་བསྐྱེད་པར་བྱེད་ནུས་པའི་གཞུང་རྩོམ་ཞིང་འདོམས་པར་མཛད་པའི་མཁས་པ་རྣམས་དང་། བྱེ་བྲག་ཏུ་མཁན་པོ་ཉིད་ལ་དེ་ལྟའི་བྱ་བ་མཛད་པའི་བྲམ་ཟེ་ལི་བི་ཀ་ར་ལ་སོགས་པའི་བླ་མ་རྣམས་ལ་ཡང་ཕྱག་འཚལ་ལོ། །ཞེས་པའི་དོན་དང་། ནས་ཀྱི་སྒྲ་ནི། དེ་ལྟར་བཙལ་ནས་ཕྱི་མ་རྣམས་ཀྱང་རིམ་པར་འཆད་དོ། །ཞེས་སྟོན་པའི་ཕྱིར་ལྷག་མ་འདྲེན་པའི་ཚིག་གོ །གཉིས་པ་རྩོམ་པ་དམ་བཅའ་བ་ནི། བསླབ་པ་ཀུན་གྱི་གཞི་འཛིན་ཅིང་། །རིག་བྱེད་སྨྲ་བ་རྣམས་ཀྱི་རྒྱུ། །མིང་ཚིག་བརྗོད་པ་ཀུན་གྱི་གཞི། །ཡི་གེའི་སྦྱོར་བ་བཤད་པར་བྱ། །ཞེས་པས་བསྟན། དེ་ཡང་ལྷག་པ་ཚུལ་ཁྲིམས་ཀྱི་བསླབ་པ་ལ་སོགས་པའི་ནང་བ་སངས་རྒྱས་པའི་བསླབ་པར་བྱ་བ་ཀུན་གྱི་གཞི་ཡང་ལྟོས་པའི་སྒོ་ནས་འཛིན་པར་བྱེད་ཅིང་། ཕྱི་རོལ་པའི་ངེས་བརྗོད། མཆོད་སྦྱིན། སྙན་ཚིག སྲིད་སྲུང་སྟེ་རིག་བྱེད་བཞི་ཡན་ལག་དང་བཅས་པ་རྣམས་དང་། བཟོ་གསོ་ལ་སོགས་ཤེས་བྱ་རིག་གནས་ཀྱི་གཞུང་ལུགས་མཐའ་དག་སྨྲ་བ་རྣམས་ཀྱི་རྒྱུའང་ཡིན་ལ། སྤྱིར་ཡི་གེ་ལས་མིང་། མིང་ལས་ཚིག་འབྱུང་བ་ཡིན་པའི་ཕྱིར་འཇིག་རྟེན་དང་འཇིག་རྟེན་ལས་འདས་པའི་བརྗོད་པ་ཀུན་གྱི་གཞིར་གྱུར་པ་ནི་ཡི་གེའི་སྦྱོར་བ་སྟེ། དེས་ན་དེའི་སྦྱོར་ཚུལ་འདིར་བཤད་པར་བྱའོ། །ཞེས་པའོ། །གཉིས་པ་སྐབས་དོན་སུམ་ཅུ་བ་དངོས་ལ། ཡི་གེའི་སྦྱོར་བ་རྒྱས་པར་བཤད་པ་དང་། གདམས་ངག་བརྗོད་པས་མཇུག་བསྡུ་བའོ། །དང་པོ་ལ་སྦྱར་བྱ་ཡི་གེའི་རྣམ་བཞག་དང་། སྦྱོར་ཚུལ་ཚིག་ཕྲད་ཀྱི་འཇུག་པ་བཤད་པ་གཉིས་ལས་དང་པོ་ལའང་བོད་ཡིག་གི་དབྱངས་གསལ་ངོས་བཟུང་བ་དང་། ཁྱད་པར་གྱི་དབྱེ་བ་བསྟན་པ་གཉིས་ལས་དང་པོ་ནི། ཡི་གེ་ཨཱ་ལི་ཀཱ་ལི་གཉིས། །ཨཱ་ལི་གསལ་བྱེད་ཨི་སོགས་བཞི། །ཀཱ་ལི་སུམ་ཅུ་ཐམ་པའོ། །ཞེས་པས་བསྟན། དེ་ཡང་ཡི་གེ་ཞེས་བྱ་བ་ལེགས་སྦྱར་གྱི་སྐད་དུ་ཨཀྵ་ར་སྟེ་མིག་ལྟ་བུ་ལྟ་བྱེད་འདྲེན་བྱེད་ལ་སོགས་པ་མིང་དུ་མས་བསྙད་དུ་ཡོད་ལ་ཀ་ལྟ་བུ་ནི་གཞན་གྱིས་མ་ཡིན་པས་འགྱུར་མེད་དང་། བྱཉྫ་ནཾ་སྟེ་མིང་ཚིག་མཐའ་དག་འདིས་གསལ་བས་ན་གསལ་བྱེད་དང་། ཝཪྞ་སྟེ་དོན་མཐའ་དག་འདིས་བརྗོད་པའི་ཕྱིར་རྗོད་བྱེད་ཀྱང་ཡིན་ཞིང་དེ་ཉིད་ལྷའི་སྐད་ཀྱི་དབང་གིས་དབྱངས་ཡིག་བཅུ་དྲུག་དང་། གསལ་བྱེད་སུམ་ཅུ་རྩ་གསུམ་དུ་བསྡུ་བ་སོགས་སྐད་ཀྱི་བྱེ་བྲག་དང་སྐབས་ཐོབ་ལས་སྣ་ཚོགས་པར་འགྱུར་ནའང་རིགས་མཐུན་ཚོགས་པར་བྱས་པའི་དབྱངས་གསལ་གཉིས་སུ་དབྱེ་བ་ཙམ་གྱི་སྒོ་ནས་ཡི་གེ་མཐའ་དག་བསྡུས་པའི་ཕྱིར་ཨཱ་ལི་སྟེ་ཨ་ཕྲེང་དང་ཀཱ་ལི་སྟེ་ཀ་ཕྲེང་གཉིས་སུ་དབྱེའོ། །དེ་ལས་བོད་འདིར་འཇེབས་པར་བརྩི་བའི་སྐད་ལ་ཡོངས་སུ་གྲགས་ཤིང་ཉེ་བར་མཁོ་བ་ནི་ཨཱ་ལིའི་བྱ་བ་གསལ་བར་མཚོན་པར་བྱེད་པའི་ཡི་གེ་ཨི་སོགས་སྟེ་ཨུ་ཨེ་ཨོ་གསུམ་བསྣན་པའི་བཞི་དང་། ཀཱ་ལི་མཚོན་པར་བྱེད་པ། ཀ་ཁ་ག་ང་། ཅ་ཆ་ཇ་ཉ། ཏ་ཐ་ད་ན། པ་ཕ་བ་མ། ཙ་ཚ་ཛ་ཝ། ཞ་ཟ་འ་ཡ། ར་ལ་ཤ་ས། ཧ་ཨ་སྟེ་སུམ་ཅུ་ཐམ་པ་ཡོད་པའོ། །དེ་ལས་ཀྱང་དབྱངས་ཡིག་བཞི་ནི་གི་གུ། ཞུབས་ཀྱུ། འགྲེང་བུ། རྣ་རུ་བཞིས་མཚོན་ནུས་པ་ཙམ་ལ་དགོངས་པ་ལས། རྒྱ་གར་གྱི་ལྟར་གསལ་བྱེད་སྲོག་མེད་ལ་དབྱངས་ཡིག་སྲོག་ཞུགས་འདོད་པ་ནི་མ་ཡིན་ནོ། །གཉིས་པ་ཁྱད་པར་ཀྱི་དབྱེ་བ་བསྟན་པ་ལ། མདོར་བསྟན་པ་དང་། རྒྱས་པར་བཤད་པ་གཉིས་ལས་དང་པོ་ནི། དེ་ལ་རྗེས་འཇུག་བཅུ་ཡིན་ཏེ། །དེ་ལས་ལྔ་ནི་སྔོན་དུའང་འཇུག །མི་འཇུག་པ་ནི་ཉི་ཤུའོ། །ཞེས་པས་བསྟན། དེ་ཡང་བཤད་མ་ཐག་པའི་ཡི་གེ་ཀཱ་ལི་དེ་དག་ལ་རྗེས་སུ་འཇུག་པ་ནི་བཅུ་ཡོད་པ་ཡིན་ཏེ། རྗེས་འཇུག་དེ་ཉིད་ལས་ལྔ་ནི་སྔོན་དུའང་འཇུག་པས་སྔོན་འཇུག་ལྔ་ཞེས་ཀྱང་བྱའོ། །སྔོན་རྗེས་གཉིས་ཀར་མི་འཇུག་པ་ནི་ཉི་ཤུ་སྟེ་ཚན་པ་གསུམ་དུ་དབྱེ་བའོ། །དེ་ཡང་སྔོན་རྗེས་མིང་གསུམ་གང་རུང་ལ་འཇུག་པའི་ཡི་གེ་ནི་སྔོན་འཇུག་ལྔའོ། །མིང་གཞི་རྗེས་འཇུག་གང་རུང་ལ་འཇུག་པའི་ཡི་གེ་ནི་སྔོན་འཇུག་དོར་བའི་ལྷག་མའི་རྗེས་འཇུག་ལྔའོ། །མིང་གཞི་རྐྱང་བ་ལ་འཇུག་པའི་ཡི་གེ་ནི་དེའི་ལྷག་མ་ཉི་ཤུ་བོ་ཡིན་ནོ། །གཉིས་པ་རྒྱས་བཤད་ལ་དབྱེ་སྒོ་སྤྱིར་བསྟན་པ་དང་། བྱེ་བྲག་སོ་སོར་བཤད་པ་གཉིས་ལས་དང་པོ་ནི། ཀཱ་ལི་ཕྱེད་དང་བརྒྱད་སྡེ་ནི། ། བཞི་བཞི་དག་ཏུ་ཕྱེ་བ་ལས། །ཞེས་པས་བསྟན། དེ་ཡང་རྗེས་འཇུག་ལ་སོགས་པར་དབྱེ་བའི་ཐོག་མར་སྡེ་བ་སོ་སོར་ངེས་པར་བྱ་དགོས་པས། ཀཱ་ལི་དེ་རྣམས་སྡེ་བ་ཕྱེད་དང་བརྒྱད་དུ་བགོས་པའི་སྡེ་བ་དེ་དག་ནི། སླར་ཡང་སྡེ་ཚན་རེ་རེ་བཞིན་ཡི་གེ་བཞི་བཞི་དག་ཏུ་ཕྱེ་བ་ཡིན་ཏེ། དེའང་། ཀ་ཁ་ག་ང་སྡེ་བ་དང་པོ་སོགས་ནས་ཧ་ཨ། སྡེ་བ་ཕྱེད་པའི་བར་དུ་སོ་སོའི་མིང་ཤེས་པར་བྱའོ། །ལས་ཞེས་པ་ནི། དབྱེ་བ་བྱས་པ་འདི་ལས་འོག་ཏུ། དང་པོ་གསུམ་པ་སོགས་ཀྱི་སྐབས་སུ་སོ་སོའི་ཡི་གེ་རྣམས་དྲན་པར་བྱའོ་ཞེས་པའི་དོན་ཏེ་འབྱུང་ཁུངས་དང་འདྲ་བའི་རྒྱུ་མཚན་གྱི་སྒྲའོ། །གཉིས་པ་བྱེ་བྲག་སོ་སོར་བཤད་པ་ལ། རྗེས་འཇུག་བཤད་པ། སྔོན་འཇུག་བཤད་པ། མི་འཇུག་པ་བཤད་པ་དང་གསུམ་ལས། དང་པོ་ནི། དང་པོ་གསུམ་པ་བཞི་བ་ལ། །མས་གཉིས་དྲུག་པའི་གསུམ་པ་དང་། །བདུན་པ་ལ་ནི་ཤ་མ་གཏོགས། །རྗེས་འཇུག་ཡི་གེ་བཅུ་རུ་འདོད། །ཅེས་པས་བསྟན། དེ་ཡང་གོང་དུ་རྗེས་འཇུག་བཅུ་ཞེས་བཤད་པ་དེ་གང་ཞེ་ན། སྡེ་བ་དང་པོ་གསུམ་པ་དང་བཞི་བ་རྣམས་ཀྱི་གཤམ་ལ་གནས་པའི་མས་ཀྱི་ཡི་གེ་གཉིས་གཉིས་ཏེ། ག་ང་ད་ན་བ་མ་རྣམས་དང་། སྡེ་བ་དྲུག་པའི་གསུམ་པ་འ་དང་། བདུན་པའི་སྡེ་བ་ལ་ནི་ཤ་མ་གཏོགས་པའི་ལྷག་མ་ར་ལ་ས་གསུམ་མོ། །དེའང་ཡི་གེ་ཐམས་ཅད་ཀྱི་རྗེས་སུ་འདི་དག་འཇུག་པའི་ཕྱིར་རྗེས་འཇུག་ཅེས་བྱ་ཞིང་ཡི་གེའི་གྲངས་བཅུ་རུ་འདོད་པ་ཡིན་ནོ། །ཞེས་པའོ། །གཉིས་པ་སྔོན་འཇུག་བཤད་པ་ནི། རྗེས་འཇུག་ཡི་གེ་བཅུ་ཉིད་ལས། །དང་པོ་གསུམ་པ་ལྔ་བ་དྲུག །བདུན་པ་རྣམས་ནི་སྔོན་དུའང་འཇུག །ཅེས་པས་བསྟན། དེ་ཡང་གོང་དུ་སྔོན་འཇུག་ཅེས་པ་དེ་གང་ཞེ་ན་རྗེས་འཇུག་ཡི་གེ་བཅུ་བོ་དེ་དག་ཉིད་ལས། དང་པོ་ག གསུམ་པ་ད། ལྔ་བ་བ། དྲུག་པ་མ། བདུན་པ་འ་རྣམས་ཡིན་ཏེ། དེ་དག་ནི་རྗེས་སུ་འཇུག་པར་མ་ཟད་ཡི་གེ་རྣམས་ཀྱི་སྔོན་དུའང་འཇུག་གོ །ཞེས་པའོ། །སྔོན་རྗེས་འདི་དག་གི་འཇུག་ཚུལ་ནི་རྟགས་འཇུག་གིས་རྒྱས་པར་འཆད་པར་འགྱུར་རོ། །གསུམ་པ་མི་འཇུག་པ་བཤད་པ་ནི། མིང་གཞི་གཉིས་སམ་གསུམ་སྒྲེལ་ལམ། །དེ་ལ་དབྱངས་ཀྱི་བཞི་ལྡན་ཡང་། །གང་དུའང་འཇུག་མིན་སྦྱར་བའང་མིན། །ཞེས་པས་བསྟན། དེ་ཡང་སྔོན་འཇུག་དང་རྗེས་འཇུག་བསལ་བའི་ལྷག་མ་མིང་གཞི་ཁོ་ན་ཡིན་པ། ཀ་ཁ། ཅ་ཆ། ཇ་ཉ། ཏ་ཐ། པ་ཕ། ཙ་ཚ་ཛ་ཝ། ཞ་ཟ་ཡ། ཤ་ཧ་ཨ་སྟེ་ཡི་གེ་ཉི་ཤུ་ཐམ་པ་དེ་དག་ནི་ཚེག་བར་གཅིག་ཏུ་གཉིས་སམ་གསུམ་སྦྲེལ་ལམ། དེ་ལ་དབྱངས་ཡིག་ཨི་སོགས་ཀྱིས་བཞི་ལྡན་དུ་བྱས་པ། ཙ་ཀ ཚ་ཕ་ཁ། ཝ་ཟི་ཡ། ལྟ་བུ་གང་ཡང་བོད་དུ་གྲགས་པའི་ཐ་སྙད་གང་དུའང་འཇུག་པ་མིན་པས་འདི་བཞིན་སྦྱར་བར་རིགས་པའང་མིན་ནོ། །ཞེས་པའོ། །དེ་ཡང་སྤྱིར་མིང་ཚིག་གི་གཞིར་གྱུར་པའི་མིང་གཞི་ནི་གོང་སྨྲོས་ལྟར་ཡི་གེ་ཐམས་ཅད་ཡིན་ཀྱང་། སྔོན་རྗེས་མིང་གསུམ་གྱི་ཟླས་ཕྱེ་བའི་མིང་གཞི་ནི་འཕུལ་རྟེན་གྱི་འཇུག་ཡུལ་ཙམ་ལ་སྨྲོས་པ་སྟེ། དེ་ནི་གསལ་བྱེད་སུམ་ཅུ་བོ་མཐའ་དག་ཡིན་ཞིང་དེ་ལ་དབྱངས་དང་ལྡན་པའི་གི་གུ་སོགས་ནི་དེ་ལས་ཀྱང་མིང་གཞིའི་ཡན་ལག་ཙམ་སྟེ་བོད་ཀྱི་དབྱངས་གཅིག་པུས་འཕུལ་རྟེན་གྱི་འཇུག་ཡུལ་མི་བྱེད་པའི་ཕྱིར་རོ། །དེ་དག་ལས་སྐབས་འདིར་བཤད་པའི་མིང་གཞི་ནི་མིང་གཞི་ཁོ་ན་ལས་གཞན་གང་ལའང་མི་འཇུག་པ་ཉིད་ཡིན་པས་ན་འདི་དག་གི་ཁྱད་པར་འབྱེད་པ་གལ་ཆེའོ། །གཉིས་པ་སྦྱོར་ཚུལ་ཚིག་ཕྲད་ཀྱི་འཇུག་པ་བཤད་པ་ལ། རྗེས་འཇུག་ལ་ལྟོས་པའི་ཕྲད་རྣམ་དབྱེ་དང་བཅས་པ་དང་། ཕྲད་རང་དབང་ཅན་བཤད་པ་གཉིས་ལས། དང་པོ་ལའང་། སླར་བསྡུ། ལ་དོན། ཨི་ལྡན་གྱི་རྣམ་དབྱེ། རྒྱན་སྡུད། ལྷག་བཅས། འབྱེད་སྡུད། འབྱུང་ཁུངས། བོད་པའི་སྒྲ་བསྟན་པ་སྟེ་བརྒྱད་ཡོད་པ་ལས། དང་པོ་ནི། རྗེས་འཇུག་ཡི་གེ་བཅུ་བོ་ནི། །མིང་གང་གི་ནི་མཐའ་སྦྱར་བ། །དེ་ལ་ཨཱ་ལི་བཞི་བ་སྦྱར། །སླར་བསྡུ་བར་ནི་ཤེས་པར་བྱ། །ཞེས་པས་བསྟན། དེ་ཡང་སྔར་བཤད་པའི་རྗེས་འཇུག་ཡི་གེ་བཅུ་བོ་དེ་རྣམས་ནི་མིང་ཚིག་གང་ཡང་རུང་བ་ཞིག་གི་ནི་མ་མཐར་སྦྱར་བ། དེ་དག་ལ་ཨཱ་ལི་བཞི་བ་ཨོ་ཡིག་སྟེ། རྣ་རུ་སྦྱར་བ། གོ་ངོ་དོ་ནོ་བོ་མོ་འོ་རོ་ལོ་སོ་སྟེ་བཅུ་དང་། ད་དྲག་གི་མཐར་དོན་གྱིས་ཐོབ་པ་ཏོ་རྣམས་ཏེ། འདི་དག་ནི་སྐབས་བབས་ཀྱི་བརྗོད་བྱའི་དོན་ནམ་ཚིག་དེ་ཉིད་དེ་ཙམ་གྱིས་བསྡུ་བར་སོང་བས་སླར་བསྡུའི་སྒྲ་ཞེས་བྱ་བར་ནི་ཤེས་པར་བྱ་དགོས་སོ། །ཞེས་པའོ། །གཞན་དུ་རྫོགས་ཚིག་ཅེས་པ་དང་ཟླ་སྡུད་ཅེས་གྲགས་པ་རྣམས་ཀྱང་འདི་ཁོ་ན་ལས་མ་འདས་པ་ཤེས་པར་བྱའོ། །གཉིས་པ་ལ་དོན་ལའང་། གཞུང་དོན་འགྲོལ་བ་དང་སྦྱོར་ཚུལ་བཤད་པ་གཉིས་ལས། དང་པོ་ནི། རྗེས་འཇུག་ཡི་གེ་བཅུ་རྣམས་ལས། །གང་མིང་མཐའ་ན་བཅུ་བ་གནས། །དེ་ལ་ཨཱ་ལི་གཉིས་པ་སྦྱར། །གང་མིང་མཐའ་ན་བརྒྱད་པ་གནས། །དེ་ལ་གཉིས་པ་ཨུ་ཡང་སྦྱར། །གང་མིང་མཐའ་ན་གསུམ་པ་གནས། །དེ་ལ་ཨཱ་ལི་གཉིས་པ་སྦྱར། །བཞི་བ་དགུ་བ་དངོས་ཀྱང་སྟེ། །ལས་དང་ཆེད་དང་རྟེན་གནས་དང་། །དེ་ཉིད་ཚེ་སྐབས་ལ་སྒྲ་ཡིན། །ཞེས་པ་སྟེ། དེ་ཡང་རྗེས་འཇུག་ཡི་གེ་བཅུ་བོ་དེ་རྣམས་ཉིད་ལས། གང་ཡང་རུང་བའི་མིང་གི་མཐའ་ན་ལ་དོན་གྱི་རྣམ་དབྱེ་སྦྱར་བའི་ཆེད་དུ་བཅུ་བ་ས་ཡིག་གནས་པ། དེ་ལ་ཨཱ་ལི་གཉིས་པ་ཨུ་ཡིག་སྟེ་ཞབས་ཀྱུ་སྦྱར་བས་སུ་ཞེས་གྲུབ་པ་དང་། དེ་བཞིན་དུ་གང་ཡང་རུང་བའི་ཚེག་བར་གཅིག་ཉིད་དུ་མིང་གཞིའི་མཐའ་ན་བརྒྱད་པ་ར་ཡིག་སྦྱར་ཏེ་གནས་པ་ལྷག་པར་ལྟ་བུ་དང་། ཡང་ར་ཡིག་དེ་ཉིད་ཚེག་བར་ཕྱིས་པ་ལ་ཨཱ་ལི་གཉིས་པ་ཨུ་སྟེ་ཞབས་ཀྱུ་སླར་ཡང་སྦྱར་བས་རུ་ཞེས་གྲུབ་པ་དང་། གང་ཡང་རུང་བའི་མིང་མཐའ་ན་རྗེས་འཇུག་གསུམ་པ་ད་ཡིག་གནས་པ་དེ་ལ་ཨཱ་ལི་གཉིས་པ་སྟེ་སྔ་མ་ལྟར་ཞབས་ཀྱུ་སྦྱར་བས་དུ་ཞེས་པ་དང་། རྗེས་འཇུག་བཞི་བ་ན་དང་དགུ་བ་ལ་གཉིས་ནི་དབྱངས་ཀྱིས་མ་བརྒྱན་པའི་དངོས་པོ་ཉིད་དུ་གནས་པ་དེ་ཉིད་ཀྱང་ཡིན་སྟེ། དེས་ན་དྲུག་པོ་དེ་དག་དང་། འདི་ནས་མ་གསུངས་ཀྱང་གོང་བཤད་སླར་བསྡུའི་སྐབས་ལྟར་དོན་གྱིས་ཐོབ་པའི་ཏ་ཡིག་ཨུ་ཞུགས་དང་བཅས་ལ་དོན་བདུན་དུ་ངེས་ཤིང་། འདི་དག་ཀྱང་སྐྱབས་སུ་མཆིའོ། །ལྟ་བུ་རྣམ་དབྱེ་གཉིས་པ་ལས་སུ་བྱ་བའི་དོན་ཅན་དུ་སྦྱར་ན་ལས་ཀྱི་སྒྲ་དང་། དབུལ་ཕོངས་ལ་སྦྱིན་པ་གཏོང་ལྟ་བུ་ཆེད་དུ་བྱ་བའི་དོན་ཅན་ཡིན་དགོས་ཆེད་ཀྱི་སྒྲ་དང་། ཤར་ཕྱོགས་སུ་ཡོད་ལྟ་བུ་བདུན་པ་གནས་གཞིའི་དོན་ཅན་ཡིན་ན་རྟེན་གནས་ཀྱི་སྒྲ་དང་འོད་དུ་གསལ་ལྟ་བུ་སྤྱིར་བཏང་ལས་ཀྱི་སྒྲ་ཡིན་པ་ལས། ཁྱད་པར་ལས་དང་བྱ་བ་ཐ་མི་དད་པའི་རང་གི་དེ་ཁོ་ན་ཉིད་སྟོན་པའི་དོན་ཅན་ཡིན་ན་དེ་ཉིད་ཀྱི་སྒྲ་དང་། ཉི་མ་ཤར་བ་ན་ཆོས་སྟོན་ལྟ་བུ་དུས་བརྗོད་པའི་བདུན་པ་ཡིན་ན་ཚེ་སྐབས་ཀྱི་སྒྲར་ཤེས་དགོས་ཤིང་། དེ་དག་ཐམས་ཅད་རྣམ་དབྱེར་སྦྱོར་བ་ན་ལ་སྒྲའི་འཇུག་པ་དང་ཕལ་ཆེར་མཐུན་པས་ལ་སྒྲ་ཞེས་ཀྱང་བརྗོད་པར་བྱ་བ་ཡིན་ནོ། །ཞེས་པའོ། །འདི་དག་གི་དཔེ་བརྗོད་རྒྱས་པ་ནི་ཟུར་དུ་འགོད་པར་བྱའོ། །གཉིས་པ་སྦྱོར་ཚུལ་ལའང་སྒྲ་དོན་གྱི་སྦྱོར་ཚུལ་གཉིས་ལས་དང་པོ་ནི། སྐབས་འདིའི་གཞུང་གི་དངོས་བསྟན་དུ་རྣམ་དབྱེའི་རྐྱེན་གྱི་ངོ་བོ་ཙམ་ལས་དེ་དག་མིང་མཐའི་རྗེས་འཇུག་དང་སྦྱོར་ཚུལ་མི་གསལ་ཡང་ཤུགས་ཀྱིས་རྟོགས་ནུས་པའི་དབང་དུ་མཛད་པས་རྗེས་འཇུག་ག་བ་གཉིས་དང་ད་དྲག་ཅན་གྱི་མཐར་གོང་སྨྲོས་ལྟར་དོན་གྱིས་ཐོབ་པས་ཏ་ཡིག་ཨུ་ལྡན་ཏུ་ཉིད་སྦྱར་བ་དང་། ང་ད་ན་མ་ར་ལ་རྣམས་ཀྱི་རྗེས་སུ་དུ་དང་། ས་མཐར་སུ་འ་ཡིག་གི་མཐའ་ར་ཡིག་རྐྱང་བའམ་རུ་སྦྱར་བར་བྱ་ཞིང་། ལ་ན་དག་ནི་སྐབས་དང་བསྟུན་ཏེ་རྗེས་འཇུག་ཐམས་ཅད་ལ་བྱེ་བྲག་མེད་པར་ཅི་རིགས་སུ་སྦྱར་བར་བྱའོ། །དེ་དག་ལས་ཀྱང་ཏ་ཡིག་ཨུ་ལྡན་སྦྱོར་བ་རྣམས་ནི་ཕོས་ཕོའི་མིང་མཐའ་འདྲེན་པའི་ལུགས་ཏེ་ཀློག་ཚུལ་ཟུར་ཕྱིན་པ་དག་ལ་ནི་བརྗོད་པ་དེའང་ཡིན་ནོ། །དེ་བཞིན་དུ་ང་མ་འ་རྣམས་ལ་དུ་སོགས་སྦྱོར་བའི་ཚུལ་དེ་ནི་མོས་མོ་ཡིག་འདྲེན་པ་དང་། ས་མཐར་སུ་སྦྱོར་བ་དང་། ད་མཐར་དུ་སྦྱོར་བ་དག་ནི་རྟགས་མཚུངས་སུ་སྦྱར་ན་བརྗོད་མི་བདེ་བས་བརྗོད་བདེ་འདྲེན་པ་དང་། ལྷག་མ་ན་ར་ལ་རྣམས་ལ་དུ་སྦྱོར་བ་ནི་རྟགས་མཚུངས་དྲང་དུ་མེད་པས་བརྗོད་བདེ་འདྲེན་པའི་ལུགས་སུ་བྱས་པའོ། །གཉིས་པ་དོན་གྱི་སྦྱོར་ཚུལ་ནི། སྤྱིར་སུ་ར་རུ་དུ་ཏུ་ལྔ་པོ་དེ་རྣམས་ནི་ལས་སོགས་དོན་ལྔ་ལ་མཚུངས་པར་འཇུག་ཅིང་ན་ལ་གཉིས་ནི་གཞན་བཞི་བོར་འཇུག་ཀྱང་དེ་ཉིད་ལ་མི་འཇུག་པ་དང་འདིར་དངོས་དུ་མ་བསྟན་པའི་འཇུག་ཚུལ་གཞན་ཡོད་དེ། འདི་ལྟར་ནའི་སྒྲ་དམིགས་ཀྱིས་དབྱེ་བའི་དོན་དུ་སྦྱར་བ་དངོས་སུ་ན་མདོར་བསྡུ་ན་ལྟ་བུ་དང་། རྒྱུ་མཚན་གྱི་དོན་དུ་སྦྱར་བ་འདི་ཡོད་ན་འདི་འབྱུང་། མེ་ཡོད་ན་དུ་བ་འབྱུང་ལྟ་བུ་དང་། རྒྱུ་མཚན་དོན་གྱིས་བསྟན་པའི་དོན་དུ་སྦྱར་བ་འདིར་ཤིང་ཡང་མེད་ན་ཤིངྴ་པ་ཇི་ལྟར་ཡོད་ལྟ་བུ་དང་། སྔ་མ་དེ་ལས་ཚིག་ཕྱི་མ་འགལ་བའམ་མ་ཡིན་པ་སོགས་སྟོན་པའི་དོན་དུ་སྦྱར་བ། འདི་སྔོན་དུ་སྡིག་པ་སྤྱོད་པ་ཞིག་ན་ད་ནི་དགེ་བ་ལ་ཡིད་འཇུག་པར་བྱེད་དོ། །ཞེས་པ་ལྟ་བུ་དང་། འོས་པར་དཀའ་བ་སྟེ་མི་འོས་པའི་ཚིག་གམ་ཚོད་འཛིན་པའི་སྒོ་ནས་ཚིག་དོན་ཕྱི་མ་ངེས་པར་བྱེད་པའི་དོན་དུ་སྦྱར་བ་ལྷས་བཏུད་ན་མིས་ལྟ་ཅི་སྨྲོས་ལྟ་བུ་དང་། འོས་པ་ནན་གྱིས་བཟུང་ནས་ཕྱི་ཚིགས་ངེས་པར་བྱེད་པའི་དོན་དུ་སྦྱར་བ། དུད་འགྲོ་རྣམས་བླུན་པ་ཉིད་ན་མིའང་དེ་ལྟ་བུ་དག་མཐོང་ངོ་ལྟ་བུ་དང་། སྨོན་པའི་དོན་དུ་སྦྱར་བ་བདག་བྱང་ཆུབ་ཐོབ་ན་ཅི་མ་རུང་ལྟ་བུ་དང་། ཐེ་ཚོམ་གྱི་གཞིའི་དོན་དུ་སྦྱར་བ། ས་བོན་ནི་བཏབ་ཟིན་ན་འདི་ལས་མྱུ་གུ་འབྱུང་ངམ་མི་འབྱུང་ལྟ་བུ་སྟེ་མང་དུ་འབྱུང་ངོ་། །དེ་བཞིན་དུ་ལའི་སྒྲ་ཡང་ཚིག་ལྷག་མ་འདྲེན་པ་ལྷག་བཅས་ཀྱི་དོན་དུ་སྦྱར་བ། མཉམ་པར་བཞག་ལ་དེ་ཁོ་ན་ཉིད་སེམས་ལྟ་བུ་དང་། ཚིག་སྔ་ཕྱི་མཚམས་སྦྱོར་བ་ཙམ་གྱི་དོན་དུ་སྦྱར་བ། བདེ་བ་དང་ལྡན་ལ་གནོད་པ་མི་མངའ་བ་གསལ་ཞིང་དྭངས་ལ་དྲི་མ་མེད་པ་ཞེས་སོགས་རྒྱ་ཆེར་འབྱུང་བ་རྣམས་ཏེ། འདི་དག་ན་འདིར་གབ་པ་ཉིད་སྨྲ་སྒོ་ལས་འབྱུང་བ་ལྟར་བཀྲལ་བའོ། །གསུམ་པ་ཨི་ལྡན་གྱི་རྣམ་དབྱེ་འཆད་པ་ལའང་། མདོར་བསྟན་དང་། རྒྱས་པར་བཤད་པ་གཉིས་ལས། དང་པོ་ན། རྗེས་འཇུག་ཡི་གེ་བཅུ་བོ་ལ། །ཨི་དང་མཐུན་ལུགས་འདི་ཞེས་བྱ། །ཞེས་པ་སྟེ། དེ་ཡང་རྗེས་འཇུག་ཡི་གེ་བཅུ་བོ་དེ་དག་གང་རུང་རྗེས་སུ་ཞུགས་པའི་མིང་རྣམས་ལ། ཨི་ཡིག་དང་སྦྱར་བའི་རྣམ་དབྱེའི་ཕྲད་རྣམས་ཇི་ལྟར་མཐུན་པར་སྦྱོར་བའི་ལུགས་འདི་དང་འདིའོ། །ཞེས་བསྟན་པར་བྱའོ། །ཞེས་པའོ། །གཉིས་པ་རྒྱས་བཤད་ལའང་། འབྲེལ་སྒྲ་བཤད་པ་དང་། བྱེད་པ་པོའི་སྒྲ་བཤད་པ་གཉིས་ལས་དང་པོ་ནི། དང་པོ་གཉིས་ལ་དང་པོ་མཐུན། །གསུམ་ལྔ་བཅུ་ལ་ཀྱ་དང་སྦྱར། །བདུན་པ་ཉིད་ལ་བདུན་པ་སྟེ། །ལྷག་མ་རྣམས་ལ་གྱ་སྦྱར་བ། །དེ་དག་ཨི་སྦྱར་འབྲེལ་བའི་ས། །ཞེས་པས་བསྟན། དེ་ཡང་རྗེས་འཇུག་བཅུའི་དང་པོ་ག་དང་ང་གཉིས་གང་རུང་རྗེས་སུ་ཞུགས་པའི་མིང་རྣམས་ལ་ནི། རྗེས་འཇུག་དང་པོ་ག་ཉིད་མཐུན་ཞིང་། དེ་བཞིན་དུ་རྗེས་འཇུག་གསུམ་པ་ད། །ལྔ་བ་བ་བཅུ་བ་ས་རྣམས་རྗེས་སུ་ཞུགས་པ་ལ་ཀྱ་དང་སྦྱར་བ་དང་། བདུན་པ་འ་ཡིག་གི་མཐའ་ཅན་རྣམས་ལ་དངོས་སུ་འ་ཡིག་ཡོད་དམ་མེད་ཀྱང་རུང་སྟེ་དེ་ཉིད་ལ་རྗེས་འཇུག་བདུན་པ་འ་ཉིད་སྦྱར་བ་དང་། འདིར་རྗེས་འཇུག་གི་ཡི་གེའི་བྱ་བ་གཙོ་བོར་བསྟན་པས་དངོས་སུ་མི་འབྱུང་ཡང་འ་ཡིག་གི་མཐར་རྐང་བ་ཁ་སྐོང་དགོས་པའི་ཚེ་ཡ་ཡིག་སྦྱར་བ་སྟེ། དེ་ལས་གཞན་ལྷག་མ་ན་མ་ར་ལ་བཞི་བོའི་མཐའ་ཅན་རྣམས་ལ་ནི་གྱ་ཉིད་སྦྱར་བ་མཐུན་པ་བཅས། དེ་དག་ཐམས་ཅད་ལ་རིམ་པ་བཞིན་ཨི་ཡིག་སྟེ་གི་གུ་སྦྱར་བས་གི་ཀྱི་འི་ཡི་གྱི་རྣམས་སུ་གྲུབ་པ་དེ་རྣམས་གང་ཞིག་གང་དང་སྒྲ་མཐུན་པའི་མིང་མཐའ་སོ་སོ་དང་སྦྱར་བས། བདག་གི གང་གི ཐམས་ཅད་ཀྱི། རབ་ཀྱི། ཕྱོགས་ཀྱི། དེའི། དེ་ཡི། གཏན་གྱི། ལམ་གྱི། གསེར་གྱི། དཔལ་གྱི་སོགས་སུ་འགྱུར་ཏེ་དེ་དག་ནི་གཞུང་གཞན་དུ་རྣམ་དབྱེ་དྲུག་པ་ཞེས་འབྱུང་བ་རྟེན་དང་བརྟེན་པའམ་ཡན་ལག་དང་ཡན་ལག་ཅན་སོགས་མིང་དོན་ཕན་ཚུན་འབྲེལ་བ་བརྗོད་པའི་དོན་ཅན་གྱི་སྒྲ་ཡིན་པས་འབྲེལ་བའི་ས་ཞེས་བྱའོ། །ཞེས་པའོ། །གཞན་ཡང་འདི་ནི་བདེན་གྱི་གཞན་ནི་གཏི་མུག་གོ །དེ་ལྟ་མོད་ཀྱི་འོན་ཀྱང་ལྟ་བུ་ཕྱི་ཚིག་འགལ་བའམ་མི་མཐུན་པར་སྟོན་པའི་ཚིག་གི་རྒྱན་ལའང་འདི་དང་འཇུག་པ་ཤེས་པར་བྱའོ། །གཉིས་པ་བྱེད་སྒྲ་ནི། དེ་ཉིད་ལ་ནི་བཅུ་བ་སྦྱར། །བྱེད་པ་པོ་རུ་ཤེས་པར་བྱ། །ཞེས་པས་བསྟན་ཏེ། དེ་ཡང་བཤད་མ་ཐག་པའི་རྣམ་དབྱེ་དྲུག་པའི་སྒྲ་གི་ལ་སོགས་པ་དེ་དག་ཉིད་ལ་ནི་རྗེས་འཇུག་བཅུ་བ་ས་ཡིག་སྦྱར་བས་གིས། ཀྱིས་འིས་ཡིས་གྱིས་རྣམས་སུ་གྲུབ་པ་ནི་བྱེད་པ་པོས་བྱ་བ་ལ་སྦྱོར་བ་སྟོན་པས་ན། གཞུང་གཞན་དུ་རྣམ་དབྱེ་གསུམ་པ་ཞེས་འབྱུང་བ་བྱེད་པ་པོའི་ས་རུ་ཤེས་པར་བྱའོ། །ཞེས་པའོ། །དེ་རྣམས་མིང་མཐར་སྦྱོར་ཚུལ་ནི་འབྲེལ་སྒྲའི་སྐབས་ལྟར་རོ། །གཞན་ཡང་བྱེད་དུ་རུང་གིས་གྱིས་ཤིག་ལྟ་བུའི་བྱེད་སྒྲ་རྣམས་ནི་རྒྱུ་མཚན་གྱི་དོན་གྱིས་བྱེད་པ་པོའི་རྣམ་དབྱེ་ཡིན་པ་ཤེས་དགོས་སོ། །བཞི་བ་རྒྱན་སྡུད་ཀྱི་སྒྲ་ནི། ཨཱ་ལི་ཕྱིས་ནས་གཉིས་པ་སྦྱར། །ཚིག་རྒྱན་གཉིས་དང་སྡུད་པར་འགྱུར། །ཞེས་བསྟན། དེ་ཡང་གོང་དུ་བཤད་པའི་འབྲེལ་སྒྲ་དེ་དག་ལས། ཀྱི་འི་གཉིས་ཀྱི་ཨཱ་ལི་སྟེ་གི་གུ་ཕྱིས་ནས་སོ་སོར་རྗེས་འཇུག་གཉིས་པ་ང་ཡིག་སྦྱར་བས་ཀྱང་འང་ཞེས་གྲུབ་པ་དང་། འདིར་མ་བསྟན་ཀྱང་དོན་གྱིས་ཐོབ་པའི་ཡང་གི་སྒྲ་དང་གསུམ་པོ་དེ་རྣམས་ནི། མཛེས་ཀྱང་མཛེས་ལྟ་བུ་ཚིག་སྔ་ཕྱི་མཐུན་པའི་རྒྱན་དང་། བཏུལ་ཀྱང་ཁྲོ་ལྟ་བུ་མི་མཐུན་པའི་རྒྱན་སྟེ་གཉིས་དང་། འདི་ནི་ཨུཏྤལའང་ཡིན་ལ་སྔོན་པོའང་ཡིན་ལྟ་བུ། གཞི་གཅིག་ལ་ཆོས་གཉིས་སམ་དུ་མ་སྡུད་ཅིང་སྦྱོར་བའི་སྒྲ་སྟེ་གསུམ་པོ་དེ་རྣམས་ལ་འཇུག་པར་འགྱུར་རོ། །ཞེས་པའོ། །དེ་རྣམས་མིང་མཐར་ཇི་ལྟར་སྦྱོར་ཚུལ་ཡང་རྗེས་འཇུག་གི་ཕོ་ཡིག་ག་ད་བ་ས་རྣམས་དང་ད་དྲག་གི་མཐར་རྟགས་མཚུངས་བརྗོད་པ་དེ་གཉིས་ཀའི་སྒོ་ནས་སྒྲ་མཐུན་པ་ཀྱང་ཉིད་སྦྱར་ཞིང་། དེ་བཞིན་དུ་དངོས་སུ་ཡོད་མེད་ཇི་ལྟར་རུང་འ་མཐའ་ཅན་རྣམས་ལའང་དང་། ང་མ་དག་གི་མཐའ་ཡང་གི་སྒྲ་འཇུག་པ་དང་། ན་ར་ལ་གསུམ་གྱི་རྗེས་སུ་བརྗོད་བདེ་ཁོ་ནའི་དབང་གིས་ཡང་ཉིད་འཇུག་གོ །ཚིགས་བཅད་ཀྱི་རྐང་བ་ཁ་སྐོང་དགོས་པའི་ཚེ་ནི་འ་མཐར་ཡང་ཡང་གི་སྒྲ་སྦྱར་དགོས་སོ། །ལྔ་བ་ལྷག་བཅས་ཀྱི་སྒྲ་བཤད་པ་ནི། ལ་དོན་སུ་ལ་ཨུ་ཕྱིས་ནས། །དེ་ལ་གསུམ་པའི་དང་པོ་སྦྱར། །དེ་ལ་ཨཱ་ལི་གསུམ་པ་སྦྱར། །དེ་ནི་ལྷག་དང་བཅས་པའོ། །ཞེས་པ་སྟེ། དེ་ཡང་སྔར་བཤད་པའི་ལ་དོན་གྱི་ནང་ཚན་སུ་ཞེས་པ་དེ་ལ་ཨུ་སྟེ་ཞབས་ཀྱུ་ཕྱིས་ནས། ས་ཞེས་གནས་པ་དེ་ལ་ཀཱ་ལི་སྡེ་བ་གསུམ་པའི་དང་པོ་ཏ་ཡིག་སྦྱར་ཞིང་། དེ་ལ་སླར་ཡང་སྟེང་དུ་ཨཱ་ལི་གསུམ་པ་སྟེ་འགྲེང་བུ་སྦྱར་བས། སྟེ་ཞེས་གྲུབ་པ་དེ་དང་། འདིར་དངོས་སུ་མ་བཤད་ཀྱང་ཤུགས་ཀྱིས་བསྟན་པ་ཏེ་དེ་གཉིས་ཏེ་གསུམ་པོ་འདི་ནི་མིང་ཚིག་གང་གི་མཐར་སྦྱར་ཡང་བསྟན་བྱའི་ལྷག་མ་འདྲེན་པའི་དོན་དུ་འགྱུར་བས་ལྷག་མ་དང་བཅས་པའི་སྒྲ་ཞེས་བྱའོ། །ཞེས་སོ། །དེ་དག་མིང་མཐའ་ཇི་ལྟར་སྦྱོར་ཚུལ་ཡང་། ག་ང་བ་མ་འ་རྣམས་ཀྱི་མཐར་སྟེ་ཡིག་ས་ཡི་སྒྲ་དང་ལྡན་པ་དེ་བརྗོད་བདེ་བས་འཇུག་ཀྱང་། ན་ར་ལ་གསུམ་དང་ད་དྲག་གི་མཐར་ནི་དེ་ཉིད་ཤིན་ཏུ་བརྗོད་མི་བདེ་བའི་ཕྱིར་དང་། ས་ཡིག་གི་མཐར་ནི་ས་སྒྲ་སྔ་མ་དེ་ཉིད་དང་། སྟེ་ཡིག་གི་ས་སྒྲ་གཅིག་ཏུ་འདྲེས་པས་སོ་སོར་མི་མངོན་པའི་ཕྱིར་དགོས་པ་མེད་པས། དེ་རྣམས་ཀྱི་མཐར་ས་ཡིག་ཕྱིས་ནས་ཏེ་རྐྱང་ཉིད་སྦྱར་བ་དང་། དེ་བཞིན་དུ་ད་མཐར་ཡང་ས་སྒྲ་ཅན་ཀློག་མི་བདེ་བས་ལ་དོན་གྱི་སྐབས་སུ་ད་མཐར་དུ་སྦྱོར་བ་ལྟར་དེ་ཉིད་སྦྱར་རོ། །དེ་དག་ཀྱང་ལྷག་མ་འདྲེན་ཚུལ་གྱི་སྒོ་ནས་དབྱེ་ན་གསུམ་དུ་འགྱུར་ཏེ། མཚམས་སྦྱོར་དང་། དམ་བཅའ་དང་། གཞན་འདྲེན་ནོ། །དང་པོ་ལའང་མདའ་འཕངས་ཏེ་ཕོག་ལྟ་བུ། ཚིག་སྔ་མ་བྱེད་པ་དང་ཕྱི་མ་བྱ་བར་སྦྱོར་བའི་འདྲེན་བྱེད་དང་འདྲེན་བྱ་དུས་རིམ་པར་འཇུག་པ་ཞིག་དང་། ལྷ་མཆོད་དེ་ལས་བྱ་ལྟ་བུ། སྔ་ཕྱི་གཉིས་ཀ་བྱ་བར་སྦྱོར་ཞིང་དུས་རིམ་གྱིས་འཇུག་པ་ཞིག་དང་། དེ་ཉིད་ལ་སྔ་ཕྱི་མེད་པ། ཚེག་སྒྲ་དང་བཅས་ཏེ་འབར་ལྟ་བུ་ཞིག་སྟེ་གསུམ་ཡོད་ལ། འདི་རྣམས་ནི་ནས་དང་ཅིང་སོགས་ཀྱི་ཕྲད་དང་ཡང་འཇུག་པ་མཐུན་ནོ། །དམ་བཅའ་ཞེས་པ་ནི་ཚིག་སྔ་མ་དམ་བཅས་པ་དེའི་གསལ་བྱེད་དམ་སྒྲུབ་བྱེད་དུ་ཚིག་ཕྱི་མ་འདྲེན་པ་སྟེ། དེ་ལའང་དབྱེ་ན། དངོས་པོ་ནི་གསུམ་སྟེ། བེམ་པོ་དང་། ཤེས་པ་དང་། ལྡན་མིན་འདུ་བྱེད་དོ། །ཞེས་པ་ལྟ་བུ་དབྱེ་བ་འདྲེན་པ་དང་། རྟག་པ་ཡིན་ཏེ་འདུས་མ་བྱས་ཡིན་པའི་ཕྱིར་ལྟ་བུ་གཏན་ཚིག་འདྲེན་པ་དང་། སངས་རྒྱས་ཏེ་མ་རིག་པའི་གཉིད་སངས་པ། ཤེས་བྱ་ལ་བློ་གྲོས་རྒྱས་པའོ་ཞེས་པ་ལྟ་བུ་ངེས་ཚིག་འདྲེན་པ་དང་། བསླབ་པ་ཀུན་གྱི་གཞི་འཛིན་ཅིང་། །ཞེས་གསུངས་ཏེ། བསླབ་པ་ནི་ལྷག་པ་ཚུལ་ཁྲིམས་དང་། སེམས་དང་། ཤེས་རབ་ཀྱི་བསླབ་པ་གསུམ་དུ་ནང་བ་ལ་གྲགས་པ་དང་། ཕྱི་རོལ་པ་ལའང་འདི་ལྟར་ཞེས་སོགས་དབྱེ་བ་ལྟ་བུ། རྒྱས་བཤད་འདྲེན་པ་སྟེ། དེ་ལྟ་བུའི་ནང་གསེས་མང་བོ་ཡོད་དོ། །གཞན་འདྲེན་ནི་མཚམས་སྦྱོར་དང་དམ་བཅའ་གཉིས་སུ་མ་གཏོགས་པའི་ལྷག་མ་ཡོད་པ་ཙམ་སྟོན་པའི་སྒྲ་གཞན་རྣམས་ཏེ། ཁྱོད་ནི་དཔལ་ཏེ་ཁྱོད་ནི་མགོན། །ལྟ་བུ་རྣམས་ཏེ་འདི་དག་ཀྱང་སྨྲ་སྒོར་གསལ་བ་ལྟར་རོ། །གཞན་གོང་དུ་སྨྲོས་པའི་ལ་དང་འཆད་འགྱུར་གྱི་ནས་དག་ལྷག་བཅས་ལ་འཇུག་པ་ནི་རྗེས་འཇུག་གི་ཁྱད་པར་ལ་མི་ལྟོས་པའི་ཕྱིར་ཕྲད་རང་དབང་ཅན་དུ་ཤེས་པར་བྱའོ། །དྲུག་པ་འབྱེད་སྡུད་ནི། རྗེས་འཇུག་ཡི་གེ་བཅུ་བོ་ལ། །དྲུག་པ་སྦྱར་ན་འབྱེད་སྡུད་ཡིན། །ཞེས་པས་བསྟན། དེ་ཡང་རྗེས་འཇུག་གི་ཡི་གེ་བཅུ་བོ་དེ་རྣམས་ལ་དེ་ཉིད་ཀྱི་དྲུག་པ་མ་ཡིག་སྦྱར་བ་ན། གམ་ངམ་དམ་ནམ་བམ་མམ་འམ་རམ་ལམ་སམ་རྣམས་སུ་གྲུབ་པ་དེ་དག་དང་། དོན་གྱིས་ཐོབ་པའི་ཏམ་བཅས་བཅུ་གཅིག་པོ་རྣམས་ནི། ཆོས་ནི་གཉིས་ཏེ། འདུས་བྱས་སམ་འདུས་མ་བྱས་སོ། །ལྟ་བུ་དབྱེ་གཞི་གཅིག་ལས་དུ་མར་འབྱེད་པའི་དོན་དང་། འདུས་བྱས་སམ་འདུས་མ་བྱས་ནི་ཆོས་སོ། །ལྟ་བུ་ཚིག་དོན་དུ་མ་དོན་གཅིག་ཏུ་སྡུད་པའི་སྒྲ་སྟེ་གཉིས་ལ་འཇུག་པ་ཡིན་ནོ། །ཞེས་སོ། །དེ་རྣམས་མིང་ཚིག་གང་གི་མཐར་ཡང་རུང་སླར་བསྡུའི་སྐབས་དང་མཚུངས་པར་སྤྱིར་བཏང་རྗེས་འཇུག་སོ་སོར་རང་རང་ལ་མ་ཡིག་སྦྱར་བ་ཉིད་འཇུག་པ་མཐུན་པ་ཡིན་ཡང་། དམིགས་བསལ་ད་དྲག་ཅན་རྣམས་ཀྱི་མཐར་ཏམ་ཡིག་སྦྱོར་དགོས་པ་ཡིན་ནོ། །གཞན་དུ་རྟག་གམ་མི་རྟག་ལྟ་བུ་དྲི་བ་དང་ཐེ་ཚོམ་གྱི་ཚིག་ཅན་རྣམས་ཀྱང་དོན་གྱི་ཁྱད་པར་བརྟག་ཅིང་འབྱེད་པའི་དོན་ཡིན་པས། དེ་འདྲའི་འམ་ལ་སོགས་པའང་འབྱེད་པའི་སྒྲར་བསྡུའོ། །བདུན་པ་འབྱུང་ཁུངས་ལའང་། དངོས་དང་། དེ་དགར་སྡུད་ལ་འཇུག་པའི་ཚུལ་གཉིས་ལས། དང་པོ་ནི། རྗེས་འཇུག་ཡི་གེ་བཅུ་བོ་ཡི། །བཞི་བ་དགུ་བ་ལ་བཅུ་བ། །སྦྱར་བ་འབྱུང་ཁུངས་ས་ཡིན་ཏེ། །ཞེས་པས་བསྟན། དེ་ཡང་རྗེས་འཇུག་ཡི་གེ་བཅུ་བོ་དེ་ཡི་ནང་ནས་བཞི་བ་ན་དང་དགུ་བ་ལ་གཉིས་ལ་སོ་སོར་བཅུ་བ་ས་ཡིག་སྦྱར་བས་ནས་ལས་ཞེས་གྲུབ་པ་ནི། ཆོས་གང་ལས་གང་ཞིག་བྲལ་བའམ། བྱུང་བ་སྟོན་པའི་དོན་དུ་མཚུངས་པར་འཇུག་པ། དཔེར་ན་རྒྱ་མཚོ་ནས་ནོར་བུ་བླངས། མཁས་པ་ལས་རིགས་པ་བསླབ་ལྟ་བུ་དངོས་དང་། དེ་དངོས་མ་ཡིན་ཡང་སྐབས་དེར་དེ་ལས་བྱུང་བས་འབྱུང་ཁུངས་དང་འདྲ་བ་རྟ་ལས་ལྷུང་། ཤར་ཕྱོགས་ནས་འོད་སྣང་ལྟ་བུ་དག་སྟེ། འདི་དག་གཞུང་གཞན་དུ་རྣམ་དབྱེ་ལྔ་བ་ཞེས་བཤད་པ་འབྱུང་ཁུངས་ཀྱི་ས་ཡིན་ནོ། །ཞེས་པའོ། ཏེ་ཞེས་པ་ནི་ལྷག་མ་འདྲེན་པའི་དོན་ཏོ། །གཞན་དུ་དུ་བ་ལས་མེར་ཤེས་ལྟ་བུ་ལས་ཀྱི་སྒྲ་ཁོ་ན་རྒྱུ་མཚན་ལ་འཇུག་པ་ཡོད་ཀྱང་། མེར་ཤེས་པ་སོགས་རྒྱུ་མཚན་དེ་དུ་བ་མཐོང་བ་སོགས་ཀྱི་རྒྱུ་མཚན་ལས་བྱུང་བའི་ཕྱིར་འབྱུང་ཁུངས་དང་འདྲ་བའི་རྣམ་དབྱེ་ལྔ་བ་ཉིད་དོ། །གཉིས་པ་ནི། དགར་དང་སྡུད་པའང་དེ་བཞིན་ཡིན། །ཞེས་པ་སྟེ། བཤད་མ་ཐག་པའི་ནས་ལས་ཀྱི་སྒྲ་དེ་དག་འབྱུང་ཁུངས་ཁོ་ནར་མ་ཟད་རྣམ་དབྱེ་སྦྱར་གཞི་དེ་ལས་རིགས་དང་བྱ་བ་ཡོན་ཏན་རྣམས་ཀྱི་ཁྱད་པར་གང་ཡང་རུང་བ་ལོགས་སུ་དགར་བའི་དོན་ཏེ། མིའམ་ཅི་ལས་དྲི་ཟ་ཐ་དད་དོ། །མི་རྣམས་ཀྱི་ནང་ནས་རྒྱལ་རིགས་དཔའ་ལྟ་བུ་གཞི་གམ་ཐ་དད་ལས་དགར་བ་དག་སྟེ། དེ་དག་ལའང་ནང་གསེས་མཆོག་དགར་བ། དམན་པ་དགར། ཐ་དད་པ་དགར་བ་སོགས་མང་དུ་འབྱུང་ཞིང་དེ་ཀུན་ལ་ནས་ལས་ཀྱི་འཇུག་པའང་སོ་སོར་ཡོད་དེ། དེས་ན་དགར་སྒྲ་དེ་དང་། དེ་ལས་ཀྱང་བྱེ་བྲག་ནས་ཀྱི་སྒྲ་གཅིག་པུ་ནི། གཟུགས་ནས་རྣམ་མཁྱེན་གྱི་བར་ལྟ་བུ་ཡུལ་དང་དུས་དང་། དངོས་པོ་ལ་སོགས་པ་མཚམས་འཛིན་ཅིང་སྡུད་པའི་དོན་དུའང་དེ་བཞིན་དུ་འཇུག་པ་ཡིན་ནོ། །ཞེས་པའོ། །དེ་ལྟར་དགར་སྡུད་ལ་འཇུག་པའི་སྒྲ་འདི་རྣམས་ཀྱང་ཕྲད་གཞན་མ་ཡིན་པར་རྣམ་དབྱེ་ལྔ་བའི་ཡན་ལག་གཉིས་སུ་ཤེས་དགོས་ཏེ། དགར་བ་ནི་གང་ལས་དགར་བའི་གཞི་དེ་ལས་ཁྱད་པར་དུ་བྱུང་བ་ལྟར་སྣང་བ་དང་། སྡུད་པ་ནི་ཐོག་མ་གང་ནས་བརྩམ་པ་དེ་ལས་བསྡུ་རྒྱུའི་གནས་སྐབས་ཐམས་ཅད་བྱུང་བ་དང་འདྲ་བའི་ཕྱིར་འབྱུང་ཁུངས་ཀྱི་རྣམ་དབྱེ་སྦྱར་བར་སྣང་བའི་ཕྱིར་རོ། །གཞན་དུ་ཕྱག་འཚལ་ནས་བཤད་ལྟ་བུ། ནས་ཀྱི་སྒྲ་ཉིད་མཚམས་སྦྱོར་བའི་ལྷག་བཅས་ལའང་འཇུག་ཚུལ་གོང་དུ་ལྷག་བཅས་ཀྱི་སྐབས་སུ་ཕྱོགས་ཙམ་སྨོས་པ་བཞིན་ནོ། །བརྒྱད་པ་བོད་པའི་སྒྲ་ནི། གང་མིང་བརྗོད་པའི་དང་པོ་རུ། །ཀྱེ་སྦྱར་ན་ནི་བོད་པ་ཡིན། །ཞེས་པས་བསྟན་ཏེ། གང་ཡང་རུང་བའི་མིང་བརྗོད་པའི་དང་པོ་སྟེ་ཐོག་མ་རུ་ཀྱེ་ལྷ་ཡི་ལྷ་ལྟ་བུར་ཀྱེ་ཞེས་བྱ་བ་སྦྱར་བར་བྱས་ན་ནི་བོད་པའི་རྣམ་དབྱེ་གསལ་བར་བྱེད་པའི་སྒྲ་ཡིན་ནོ། །ཞེས་པའོ། །དེ་ཡང་ཐོག་མར་སྦྱོར་བ་གཙོ་ཆེ་བའི་དབང་གིས་གསུངས་པ་ལས། ཚིགས་བཅད་སོགས་སྦྱོར་བའི་ཚེ་བདག་ལ་དགོངས་ཤིག་མགོན་པོ་ཀྱེ། ལྟ་བུ་མཐར་སྦྱར་བའང་ཡོད་དོ། །འདི་ནས་མ་བསྟན་པ། ཀ་ཡེ། ཀྭའི་སྒྲ་དག་ཀྱང་བོད་པ་གསལ་བྱེད་ཡིན་མོད་ཀྱང་དམན་པ་ལས་གོང་མ་ལ་བརྗོད་མི་བདེ་བ་ཙམ་ཡིན་ནོ། །གཉིས་པ་ཕྲད་རང་དབང་ཅན་ཁོ་ན་བཤད་པ་ལ། ནི་སྒྲ། དང་སྒྲ། དེ་སྒྲ། གང་སྒྲ། བདག་སྒྲ། དགག་སྒྲ་བཤད་པ་སྟེ་དྲུག་ལས། དང་པོ་ནི། གང་མིང་མཐའ་དང་མཐུན་པ་ཡི། །བཞི་བ་ལ་ནི་ཨི་སྦྱར་བ། །དགར་དང་བརྣན་པའི་ཚིག་ཏུ་གྱུར། །ཞེས་སྟེ། གང་ཡང་རུང་བའི་མིང་ཚིག་གི་མཐའ་དང་མཐུན་པར་སྦྱར་རུང་བ་ཡི་ཕྲད་དུ་རྗེས་འཇུག་བཞི་བ་ན་ཡིག་ལ་ནི་དབྱངས་ཨི་སྦྱར་བས་ནི་ཞེས་གྲུབ་པ་དེ་ནི་ཁྱབ་འཇུག་ནི་ལྷ་རྣམས་ཀྱི་ནང་ནས་བརྟུལ་ཕོད་པའོ་ལྟ་བུ། གཞི་ལས་མཆོག་ཏུ་དགར་བའམ་རིགས་རྣམས་ལས་ནི་གདོལ་བའི་རིགས་ཐ་ཆད་དོ་ལྟ་བུ། དམན་པར་དགར་བའམ། མཐིང་ག་ནི་སྔོ་སངས་ལས་གཞན་ནོ། །ལྟ་བུ་ཐ་དད་པ་ཙམ་དུ་དམིགས་བཟུང་ནས་དགར་བ་སྟེ་དགར་བའི་སྒྲ་དང་། ཁྱོད་ནི་གཉེན་དང་ཁྱོད་ནི་བཤེས་ལྟ་བུ། དོན་གང་ཡིན་པ་དེ་ཉིད་ལ་ནན་ཏན་དུ་བརྣན་པའི་དོན་ལའང་འཇུག་པའི་ཚིག་ཏུ་འགྱུར་རོ། །ཞེས་སོ། །གཉིས་པ་དང་སྒྲའི་འཇུག་ཚུལ་ནི། མིང་གང་རུང་བའི་བར་མཚམས་སུ། །གསུམ་པ་ལ་ནི་གཉིས་པ་སྦྱར། །དེ་ནི་སྡུད་དང་འབྱེད་པ་དང་། །རྒྱུ་མཚན་ཚེ་སྐབས་གདམས་ངག་ལྔའོ། །ཞེས་པས་བསྟན། དེ་ཡང་མིང་ཚིག་གང་ཡང་རུང་བའི་བར་མཚམས་རྣམས་སུ་རྗེས་འཇུག་གསུམ་པ་ད་ཡིག་ལ་ནི་གཉིས་པ་ང་ཡིག་སྦྱར་བས། དང་ཞེས་གྲུབ་པ་དེ་ནི། འདུས་བྱས་དང་འདུས་མ་བྱས་ནི་ཆོས་སོ་ལྟ་བུ་ཚིག་སྔ་ཕྱི་ཕྱོགས་གཅིག་ཏུ་སྡུད་པའི་སྒྲ་དང་། ཆོས་ནི་འདུས་བྱས་དང་འདུས་མ་བྱས་པའོ། །ལྟ་བུ་སོ་སོར་འབྱེད་པའི་སྒྲ་དང་། སྨན་ཟོས་པ་དང་ནད་སོས་སོ་ལྟ་བུ་རྒྱུ་མཚན་གྱི་དོན་དང་། ཉི་མ་ཤར་བ་དང་ཆོས་སྟོན་ལྟ་བུ་ཚེ་སྐབས་ཀྱི་དོན་དང་། ཁ་ཏོན་གྱིས་དང་། ཡིད་ལ་ཟུངས་དང་། ལྟ་བུ་གཞན་ལ་གདམས་ངག་བརྗོད་པའི་དོན་ཏེ། དོན་ལྔ་ལ་འཇུག་པའོ། ཞེས་སོ། །གསུམ་པ་དེ་སྒྲའི་འཇུག་ཚུལ་བཤད་པ་ནི། གང་མིང་གི་ནི་ཡ་མཐའ་རུ། །གསུམ་པ་ལ་ནི་ཨེ་སྦྱར་བ། །ཐ་སྙད་དབང་དུ་གསུམ་ཡིན་ཏེ། །དངོས་པོའི་དབང་དུ་བཞི་རུ་འགྱུར། །དུས་ཀྱི་དབང་དུ་གཉིས་ཡིན་ནོ། །ཞེས་པས་བསྟན་ཏེ། གང་ཡང་རུང་བའི་མིང་གི་ནི། ཡ་མཐའ་སྟེ་ཐོག་མ་རུ་རྗེས་འཇུག་གསུམ་པ་ད་ཡིག་ལ་ནི། དབྱངས་ཨེ་སྟེ་འགྲེང་བུ་སྦྱར་བས། དེ་ཞེས་གྲུབ་པ་ནི་ཐ་སྙད་ཙམ་གྱི་དབང་དུ་བྱས་ན། དེ་བཞིན་བཤེགས་པ། དེ་དེ་བཞིན་ནོ་ལྟ་བུ་ཚིག་ཟིན་ལ་དངོས་སུ་གསལ་མིན་གང་ལྟར་ཡང་རྣམ་གྲངས་གཞན་ཞིག་ལ་སྦྱོར་རྒྱུ་ཡོད་པར་སྟོན་པའི་དོན་ཅན་དང་། ཤིང་བཅད་དེ་ཅི་བྱེད་ལྟ་བུ་ལྷག་མ་དང་བཅས་པའི་དོན་ཏེ། དབྱེ་བ་མཚན་ཉིད་པ་གཉིས་དང་། དབྱེ་གཞི་སྤྱི་ཁྱབ་ཏུ་དུས་ད་ལྟ་དང་མ་འོངས་པ་བསལ་བའི་འདས་པ་ཁོ་ནར་འཇུག་པ། ཤིང་བཅད་དེ་འབུད་ལྟ་བུ་ཚིག་དོན་གཉིས་ཀ་འདས་མ་ཐག་པ་དང་། ཐ་སྙད་སྔ་མ་གཉིས་ཀྱང་དུས་གསུམ་ལས་འདས་པར་ངེས་ཚུལ་གྱི་དབྱེ་བ་རྗེས་མཐུན་པ་གཅིག་བཅས་གསུམ་དུ་ངེས་པ་ཡིན་ཏེ། དེ་ཡང་སྤྱིར་ལྷག་བཅས་མ་གཏོགས་དེ་སྒྲའི་འཇུག་པ་ཐམས་ཅད་ལ་རྣམ་གྲངས་གཞན་ཡོད་ཀྱི་ཁྱབ་ཚུལ་ཡང་ཤེས་དགོས་སོ། །འདི་དག་ནི་ཐ་སྙད་ཀྱི་སྒོ་ནས་དབྱེ་བ་ཡིན་ཏེ། དངོས་པོའི་དབང་དུ་བྱས་ན་ནི། །དེ་ཁོ་ན་ཉིད་དོ་ལྟ་བུ་བདེན་པའི་དངོས་པོ་སྟོན་པ་དང་། སྔར་སྨྲོས་པ་དེ་ཡོད་དམ་ལྟ་བུ་གསང་བའི་དངོས་པོ་སྟོན་པར་བྱེད་པ་དང་། བདག་གི་ལྷ་དེ་ལྟ་བུ་བདག་གི་བའི་དངོས་པོ་སྟོན་པ་དང་། ཁྱོད་ཀྱི་ནོར་དེ། གཞན་གྱི་རྫས་དེ་ལྟ་བུ་ཕ་རོལ་པོའམ་བཞན་གྱི་དངོས་པོ་སྟོན་པ་སྟེ། བཞི་བོ་དེ་རུ་དུས་གསུམ་གར་འཇུག་པར་འགྱུར་ཡང་། རང་གིས་རང་ལ་དེ་ཞེས་མི་བརྗོད་པའི་ཕྱིར་བདག་ཉིད་ཀྱི་དངོས་པོ་ལ་ནི་འཇུག་པ་མ་ཡིན་ནོ། །འདི་དག་ནི་དངོས་པོ་ཁོ་ནའི་དབང་དུ་བྱས་པ་ཡིན་ཏེ། དེ་དག་ལ་མ་ལྟོས་པར་དུས་བརྗོད་པ་གཅིག་པུ་ཉིད་ཀྱི་དབང་དུ་བྱས་ན་སྔོན་གྱི་དུས་དེ། སྐད་ཅིག་སྔ་མ་དེ་ལྟ་བུ་འདས་པའི་དུས་བརྗོད་པ་དང་། འབྱུང་འགྱུར་གྱི་དུས་དེ། སྐད་ཅིག་མ་ཕྱི་མ་དེ་ལྟ་བུ་མ་འོངས་པའི་དུས་བརྗོད་པ་དང་འབྲེལ་བ་སྟེ་གཉིས་ལ་འཇུག་པ་ཡིན་ནོ། །ཞེས་པའོ། །ད་ལྟའི་དུས་བརྗོད་པ་ལ་ནི་ནམ་ཡང་མི་འཇུག་སྟེ། ད་ལྟའི་ལོ་འདིར་སོགས་ལས། ད་ལྟའི་ལོ་དེར་སོགས་མི་བརྗོད་པའི་ཕྱིར། དེ་ལྟར་གཞུང་ནས་མིང་གི་ཡ་མཐར་འཇུག་ཚུལ་གསུངས་པ་ཡང་གཙོ་ཆེ་བའི་དོན་ཡིན་གྱི་མཐའ་གཅིག་ཏུ་ངེས་པ་ནི་མ་ཡིན་ནོ། །བཞི་བ་གང་སྒྲའི་འཇུག་ཚུལ་ནི། གང་མིང་བརྗོད་པའི་དང་པོ་རུ། །དང་པོ་ལ་ནི་གཉིས་པ་སྦྱར། །སྤྱི་ལ་ཁྱབ་པ་ཉིད་དུ་འགྱུར། །ཞེས་པས་བསྟན་ཏེ། གང་ཡང་རུང་བའི་མིང་བརྗོད་པའི་དང་པོ་རུ་རྗེས་འཇུག་དང་པོ་ག་ལ་ནི་གཉིས་པ་ང་སྦྱར་བས། གང་ཞེས་གྲུབ་པ་དེ་ནི་གཙོ་བོར་དོན་གྱི་བྱེ་བྲག་དམིགས་སུ་མི་འཛིན་པར་སྤྱི་ལ་ཁྱབ་པའི་དོན་ཅན་གྱི་སྒྲ་ཉིད་དུ་ངེས་ཏེ། དེ་ཡང་གང་ཞིག་རྟག་ཏུ་གང་ཡང་རུང་བ་ལྟ་བུ་སྤྱི་སྒྲ་དངོས་དང་། གང་ཞིག་བསྟེན་ན་མཆོག་སྦྱིན་བླ་མ་ཉིད་ལྟ་བུ་བྱེ་བྲག་ལ་འཇུག་པའི་སྤྱིའི་སྒྲ་དང་། ཁྱོད་ཀྱི་ལྷ་གང་ཡིན། ལྟ་བུ་སྤྱི་སྒྲ་འདྲི་བའི་དོན་དུ་སྦྱར་བ་རྣམས་སུ་འགྱུར་རོ། །ཞེས་པའོ། །འདིར་མིང་ཐོག་ཏུ་སྦྱར་བར་གསུངས་པའང་གཙོ་ཆེ་བ་ཙམ་ལ་དགོངས་པ་སྔ་མ་ལྟར་རོ། །འདི་ནས་མ་བསྟན་ཀྱང་། ཅི་དང་ཇི་དང་། སུའི་སྒྲ་རྣམས་ཀྱང་གང་དང་སྐབས་ཕལ་ཆེར་འཇུག་པ་མཚུངས་ཀྱང་། རྣམ་པ་ཐམས་ཅད་དུ་མཚུངས་པ་ནི་མ་ཡིན་ཏེ། སུའི་སྒྲ་གང་ཟག་ཁོ་ན་ལ་སྦྱོར་གྱི་བེམ་པོ་སོགས་དངོས་པོ་གཞན་ལ་མི་འཇུག་པ་དང་། ཇི་སྙེད་དང་ཇི་སྲིད་ལྟ་བུ་ལ་གང་སྒྲ་མི་འཇུག་པ་དང་། ཅེས་ཀྱང་ལྟ་བུ་ལའང་གང་དང་ཇིའི་སྒྲ་མི་འཇུག་པ་སོགས་ཀྱང་ཤེས་པར་བྱའོ། །ལྔ་བ་བདག་སྒྲ་བཤད་པ་ནི། གང་མིང་གི་ནི་མ་མཐའ་ན། །པུ་ལིངྒ་ཡི་སྒྲ་མེད་པ། །དེ་ལ་པུ་ལིངྒ་སྦྱར་ན། །བདག་པོའི་སར་ནི་ཤེས་པར་བྱ། །ཞེས་པ་སྟེ། གང་ཡང་རུང་བའི་མིང་གི་ནི་མ་མཐའ་རྣམས་ན། །པུ་ལིངྒ་སྐྱེས་བུའི་རྟགས་མཚོན་པར་བྱེད་པ་ཡི་སྒྲ་སྔར་མེད་པ་ཞིག་ཡིན་ན། དེ་ལ་པུ་ལིངྒའི་སྒྲ་པ་དང་པོ་གཉིས་གང་རུང་སྦྱར་བ་ན་དེའི་དོན་གསལ་བར་ནུས་པ་སྟེ། དེ་ཡང་སྔར་མེད་པ་ལ་གསར་དུ་སྦྱར་བ། བྲིས་པ་གཏོང་བ་པོ་སོགས་དང་། སྔོན་ནས་ཡོད་པའི་སྒྲའི་བདག་པོའི་དོན་མི་སྟོན་པའི་པུ་ལིངྒའི་སྒྲ་མིན་པས་སླར་པུ་ལིངྒའི་སྒྲ་སྦྱར་བ་དེ་བདག་པོའི་དོན་ཅན་དུ་སོང་བ། ཡོད་པ་པ། ཤེས་པ་པོ་ལྟ་བུ་དག་སྟེ། དེ་རྣམས་ནི་བདག་པོའི་ངོ་བོ་སྟོན་པར་བྱེད་པའི་སར་ནི་ཤེས་པར་བྱའོ། །ཞེས་པའོ། །དྲུག་པ་དགག་སྒྲ་བཤད་པ་ནི། གང་མིང་བརྗོད་པའི་ཡ་མཐའ་ན། །སྟྲི་ལིངྒ་ཡི་སྒྲ་མེད་པ། །དེ་ལ་སྟྲི་ལིངྒ་སྦྱར་ན། །དགག་པའི་གནས་སུ་ཤེས་པར་བྱ། །ཞེས་པ་སྟེ། གང་ཡང་རུང་བའི་མིང་བརྗོད་པའི་ཡ་མཐའ་སྟེ་ཐོག་མ་ན་སྟྲི་ལིངྒ་སྟེ། མོ་ཡི་རྟགས་ཀྱི་སྒྲ་མེད་པ་དེ་རྣམས་ལ་སྟྲི་ལིངྒའི་སྒྲ་དངོས་མ་དང་། ཞར་གྱིས་ཐོབ་པའི་མི་གཉིས་སྦྱར་བ་ན་སྦྱོར་ཡུལ་གྱི་དོན་དེ་མ་ཡིན་པའམ་མེད་པར་སྟོན་པ་མ་ཡིན། མི་སྣང་ལ་སོགས་པ་ལྟ་བུ་དག་སྟེ། འདི་དག་ནི་དགག་པའི་གནས་སུ་ཤེས་པར་བྱའོ། །ཞེས་པའོ། །དོན་གཉིས་པ་གདམས་ངག་བརྗོད་པས་མཇུག་བསྡུས་པ་ལ་བཞི་སྟེ། ཚིག་བཅད་འགྲོལ་ཚུལ་ལ་འདོམས་པ། ཉན་པ་པོ་སྤྲོ་བ་སྲིང་བའི་སྒོ་ནས་འདོམས་པ་དང་། བསླབ་ཚུལ་གྱི་གོ་རིམ་ལ་འདོམས་པ། གདམས་ངག་སྣོད་རུང་ལ་བསྟན་དགོས་པར་འདོམས་པའོ། །དང་པོ་ནི། ཚིགས་སུ་བཅད་པའི་མཚམས་སྦྱོར་རྣམས། །ཅུང་ཟད་བསྡུས་པ་ཡོད་ན་ཡང་། །དེ་ནི་དེ་བཞིན་སྦྱར་བར་བྱ། །ཞེས་པ་སྟེ་དེའང་བདེ་བར་གཤེགས་པའི་བཀའ་དགོངས་འགྲེལ་དང་བཅས་པ་རྣམས་ལ་ཚིགས་སུ་བཅད་པ་ཡང་དག་པར་སྦྱར་བའི་རྣམ་དབྱེ་དང་ཚིག་ཕྲད་ལ་སོགས་པའི་མཚམས་སྦྱོར་རྣམས་མང་དུ་བསྡུས་པ་ཡོད་ན་ལྟ་ཅི་སྨྲོས། ཅུང་ཟད་བསྡུས་པར་གྱུར་པ་ཡོད་ན་ཡང་། དེ་ནི་འདིར་སྔོན་དུ་བསྟན་པའི་སླར་བསྡུ་ལ་སོགས་པ་ཇི་སྐད་བཤད་པ་དེ་བཞིན་དུ་བསྣན་ཅིང་སྦྱར་ཏེ་བཤད་པས་དོན་ཁོང་དུ་ཆུད་པར་བྱའོ། །ཞེས་སོ། །དེ་ཡང་། ཟག་བཅས་ཟག་པ་མེད་ཆོས་རྣམས་ཞེས་པ་ལྟ་བུར་ཟག་པ་དང་བཅས་པའི་ཆོས་རྣམས་དང་། ཟག་པ་མེད་པའི་ཆོས་རྣམས་ཞེས་སྡུད་པའི་སྒྲ་དང་འབྲེལ་སྒྲ་སོགས་བསྣན་ནས་དོན་རང་གིས་བསམ་པ་དང་གཞན་ལ་འཆད་དགོས་བཞིན་ཚིག་ལྷུག་ལའང་སྦྱར་ཤེས་པར་བྱའོ། །གཉིས་པ་ལ། རྗེས་འཇུག་མེད་མི་རུང་དུ་བསྟན་པ། རྗེས་འཇུག་ཤེས་པའི་དགོས་པ་བསྟན་པ། དེ་དོན་ལ་དབབ་པའི་ཚུལ་བསྟན་པ་དང་གསུམ་ལས། དང་པོ་ནི། སྔོན་འཇུག་ཡོད་དམ་མེད་ཀྱང་རུང་། །མིང་གཞིའི་ཡི་གེ་གང་ཡིན་ལ། །གཉིས་འབྲེལ་ཡོད་དམ་གསུམ་འབྲེལ་ཡོད། །ཨཱ་ལི་བཞི་ལས་གང་ལྡན་ཡང་། །རྗེས་འཇུག་བཅུ་བོ་མ་ཞུགས་ན། །མིང་གཞན་སྦྱོར་བ་ཡོད་མི་སྲིད། །ཅེས་པ་སྟེ། དེ་ཡང་མིང་ཚིག་གི་སྦྱོར་བ་རྣམས་ལ་གོང་དུ་བཤད་པའི་སྔོན་འཇུག་གི་ཡི་གེ་རྣམས་སྔོན་དུ་ཞུགས་པ་ཡོད་དམ་མེད་ཀྱང་རུང་སྟེ། བསྒྲུ་སྒྲུ་ལྟ་བུ་ཅི་རིགས་པར་སྣང་ཞིང་འཕུལ་རྟེན་གྱི་འཇུག་ཡུལ་མིང་གཞིའི་ཡི་གེ་གང་ཡིན་ལའང་། ལྔ་ལྷ་ལྟ་བུ་གཉིས་འབྲེལ་ཡོད་དམ། སྒྲ་རྒྱ་ལྟ་བུ་གསུམ་འབྲེལ་ཡོད་དམ། དེ་དག་ལ་ཨཱ་ལི་བཞི་ལས་གང་ཡང་རུང་བ་ལྡན་པ་ལྷུ་སྒྲོ། ལྟ་བུ་རྣམས་ལ་ཡང་རྗེས་འཇུག་བཅུ་བོ་གང་ཡང་རུང་བ་ཞིག་མ་ཞུགས་ན་ཡི་གེའི་གཟུགས་དེ་ཉིད་ལས་མིང་དོན་གཞན་ལ་འཇུག་ཅིང་སྦྱོར་བ་ནི་ཚུལ་འདི་ལ་ནམ་ཡང་ཡོད་མི་སྲིད་དོ། །ཞེས་པའོ། །གཉིས་པ་ནི། རྗེས་འཇུག་བཅུ་ཡི་དོན་ཤེས་ན། །འབྲི་དང་ཀློག་དང་བཤད་རྣམས་ཀྱི། །མཚམས་སྦྱོར་སྒྲ་ལ་ཐོགས་མེད་ཅིང་། །འབྲེལ་བ་སྨྲ་བའི་མཆོག་ཏུ་འགྱུར། །གཞན་ཡང་རྗེས་འཇུག་ཤེས་པ་ཡིས། །དོན་གྱི་སྦྱོར་བ་མ་མཐོང་ཡང་། དོན་དང་མཐུན་པའི་སྦྱོར་བ་ཤེས། །ཞེས་པ་སྟེ། དེ་ལྟར་རྗེས་འཇུག་གི་ཡི་གེ་བཅུ་ཡི་བྱ་བ་དང་གཙོ་བོར་འབྲེལ་བའི་ཕྲད་དང་རྣམ་དབྱེ་ལ་སོགས་པའི་སྒྲ་དོན་གྱི་འཇུག་ཚུལ་ལེགས་པར་ཤེས་ན། མདོ་རྒྱུད་བསྟན་བཅོས་རྣམས་ཡི་གེར་འབྲི་བ་དང་བྲིས་ཟིན་པ་རྣམས་དག་པར་ཀློག་པ་དང་། ཚིག་དོན་རྒྱ་ཆེར་བཀྲོལ་ནས་བཤད་པ་དང་། དེར་མ་ཟད་རྩོད་པ་དང་རྩོམ་པ་ལ་སོགས་པ་རྣམས་ཀྱི་ཚེའང་ཚིག་དོན་སྔ་ཕྱི་མཚམས་སྦྱོར་བའི་སྒྲ་དོན་རྣམས་ལ་བློ་གྲོས་ཀྱི་སྣང་བ་འཇུག་པར་ཐོགས་པ་མེད་ཅིང་ཚིག་དང་དོན་མི་འབྲེལ་བ་ལ་སོགས་པའི་སྐྱོན་མེད་པར་འབྲེལ་ཆགས་པ་ཁོ་ན་སྨྲ་བའི་མཆོག་ཏུ་འགྱུར་བ་དང་། གཞན་ཡང་རྗེས་འཇུག་གི་དོན་ཚུལ་བཞིན་ཤེས་པ་དེ་ཡིས་ནི། ཡི་གེ་མཐོང་བའམ། གཞན་གྱིས་ལེགས་པར་སྨྲས་པ་ཐོས་ཀྱང་རུང་། རང་ཉིད་ཀྱིས་དེའི་དོན་གྱི་སྦྱོར་བ་སྔར་མ་མཐོང་བ་སྟེ་སྤྱོད་ཡུལ་དུ་མ་གྱུར་པ་ཞིག་ཡིན་ཡང་། བརྗོད་པ་དེའི་ཕྲད་སོགས་ཀྱི་ནུས་པས་དོན་དང་མཐུན་པའི་སྦྱོར་བ་གང་ཡང་རྗེས་སུ་དཔག་སྟེ་ཤེས་པར་ནུས་པ་ཡིན་ནོ། །ཞེས་སོ། །གསུམ་པ་ནི། རྗེས་འཇུག་སྦྱོར་བ་མཁས་པ་ན། །ལུང་གི་དོན་དང་སྦྱོར་བ་དང་། །བླ་མའི་མན་ངག་གསུམ་སྦྱར་ནས། །དོན་གྱི་ཐོག་ཏུ་དབབ་པར་བྱ། །ཞེས་པས་བསྟན། དེ་ཡང་རྗེས་འཇུག་གི་སྦྱོར་བ་རྣམས་ལ་མཁས་པར་གྱུར་པའི་གང་ཟག་གིས་རང་ཉིད་ཤེས་བྱ་རིགས་པའི་གནས་གང་ལ་འཇུག་ཅིང་ཤེས་པར་འདོད་པ་ན་དེ་དང་དེའི་ལུང་ཐུན་མོང་བ་དྲང་སྲོང་དང་པཎྜི་ཏས་བྱས་པའི་བསྟན་བཅོས་དང་། ཐུན་མོང་བ་མ་ཡིན་པ་བཅོམ་ལྡན་འདས་ཀྱི་གསུངས་རབ་དགོངས་འགྲེལ་དང་བཅས་པ་དག་གི་དོན་དང་སྐབས་སུ་ཇི་ལྟར་མཚམས་སྦྱོར་བར་བྱེད་པ་དང་། བསླབ་པར་བྱ་བ་གང་ཡིན་པ་དེ་ལ་མཁས་ཤིང་དོན་ཚུལ་བཞིན་དུ་འདོམས་པའི་བླ་མའི་མན་ངག་དག་ཀྱང་མཉན་ནས། རྗེས་འཇུག་གི་སྦྱོར་བ། ལུང་གི་དོན། བླ་མའི་མན་ངག་སྟེ་གསུམ་པོ་དེ་དག་ཕྱོགས་གཅིག་ཏུ་སྦྱར་ནས་གང་ཤེས་པར་འདོད་པའི་དོན་དེ་ཉིད་ཀྱི་ཐོག་ཏུ་དབབ་པས་བདེ་བླག་ཏུ་རྟོགས་པར་འགྱུར་བས་དེ་ལྟར་བྱའོ། །ཞེས་པའོ། །དེ་དག་ཀྱང་ཚིག་སྦྱོར་ཕྲ་མོ་རེའི་དོན་ལའང་དེ་གསུམ་ག་ངེས་པར་འཚོགས་དགོས་པའི་ངེས་པ་ནི་མེད་དོ། །གསུམ་པ་བསླབ་ཚུལ་གྱི་གོ་རིམ་ལ་འདོམས་པ་ནི། བསླབ་ལ་བརྩོན་པའི་གང་ཟག་གིས། །དང་པོར་ང་རོ་རྣམས་ལ་སྦྱངས། །སྔོན་འཇུག་མིང་གཞི་རྗེས་འཇུག་གསུམ། །ཀློག་གི་ཆེད་དུ་བསླབ་པ་ཡིན། །རྗེས་འཇུག་བཞི་ཡི་སྦྱོར་བ་ནི། །མཉན་བསམ་བསྟན་པའི་དོན་དུ་སྦྱར། །ཡན་ལག་དེ་དག་མཐུ་ཡིས་ནི། །འབྲས་བུའི་ཆེད་དུ་དོན་ལ་དབབ། །བསླབ་པའི་རིམ་པ་འདི་ཡིས་ནི། གང་ཞིག་འབད་པ་ཆུང་ངུས་ཀྱང་། ཤེས་རབ་མྱུར་དུ་གྲོལ་བར་འགྱུར། །དེ་ཕྱིར་དང་པོར་འདི་ཉིད་བསླབ། །དེ་ནས་རྒྱས་པ་མཉན་བྱས་ཏེ། །བསླབ་པ་གང་ལ་དད་པ་ཡི། །གཞུང་ཉིད་བླ་མ་དག་ལས་མཉན། །ཞེས་པས་བསྟན། དེ་ཡང་རིག་པའི་ཚུལ་གང་ཞིག་བསླབ་པར་བྱ་བ་ལ་བརྩོན་པས་འཇུག་པར་བྱེད་འདོད་པའི་གང་ཟག་ལས་དང་པོ་བདག་གིས་ནི། དང་པོ་ཉིད་དུ་ང་རོ་སྟེ་ཡི་གེ་རྐྱང་བ་རྣམས་རང་རང་གི་སྐྱེ་གནས་དང་མ་གྲུབ་པ་དང་། དབྱངས་ལྡན་རྣམས་ཀྱང་སོ་སོའི་ང་རོ་དབྱུང་ཚུལ་བཅས་ཡི་གེ་རེ་རེ་ནས་ཀློག་པའི་སྒྲ་གདངས་ལ་སྦྱང་བར་བྱ་ཞིང་། དེ་ནས་སྔོན་འཇུག་ལྔ་དང་འཕུལ་རྟེན་གྱི་འཇུག་ཡུལ་མིང་གཞི་སུམ་ཅུ་དང་། དེ་ལས་རྗེས་འཇུག་བཅུ་སྟེ། དེ་གསུམ་ཅི་རིགས་པར་ཚེག་བར་གཅིག་ཏུ་སྦྱོར་བའི་ཚུལ་ཡང་ཀློག་ལེགས་པར་ཤེས་པ་དག་གིས་ཆེད་དུ་བསླབ་པར་བྱ་བ་ཡིན་པ་དང་། ཀློག་ཚུལ་ལ་བྱང་ནས་རྗེས་འཇུག་སྟེ་དེར་སྔོན་འཇུག་ཀྱང་འདུས་པས་དེ་དག་རྟགས་འཇུག་ནས་བཤད་པ་ལྟར་སྒྲ་དོན་གང་ལ་འཇུག་པ། ཡི་གེ་གང་གིས་འཇུག་པ། ཚུལ་ཇི་ལྟར་འཇུག་པ། དགོས་པ་ཅིའི་ཕྱིར་འཇུག་པ་སྟེ་རྣམ་པ་བཞི་ཡི་སྦྱོར་བ་རྣམས་ནི། བླ་མ་སོགས་ལས་ཆོས་མཉན་པ་དང་། ཉན་པའི་དོན་ལ་བསམ་བཞིག་གཏོང་བ་དང་། དོན་དེ་རང་གིས་རྟོགས་ནས་གཞན་ལ་བསྟན་པར་བྱ་བ་ལ་སོགས་པའི་དོན་དུ་སྦྱར་བར་བྱ་སྟེ། ཀློག་དང་བརྡ་སྦྱོར་གྱི་ཡན་ལག་དེ་དག་གི་མཐུ་ཡིས་ནི། གང་བསླབ་པར་བྱ་བ་དེ་ཤེས་པའི་འབྲས་བུ་ཐོབ་པར་བྱ་བའི་ཆེད་དུ་དོན་ལ་དབབ་ནས་ཉམས་སུ་བླང་བར་བྱའོ། །དེ་ལྟར་བསླབ་པར་བྱ་བའི་རིམ་པ་འདི་ཡིས་ནི་སྐྱེས་བུ་གང་ཞིག་ཐོས་བསམ་ལ་བརྩོན་འགྲུས་ཆེན་པོ་དང་ལྡན་པ་རྣམས་ནི་སྨྲོས་ཅི་དགོས་ཏེ་འབད་པ་ཆུང་ངུ་ཙམ་བྱས་པས་ཀྱང་ཚིག་དོན་ལ་རྨོངས་པ་མེད་པའི་ཤེས་རབ་མྱུར་དུ་གྲོལ་པར་འགྱུར་རོ། །རྒྱུ་མཚན་དེའི་ཕྱིར་མཁས་པར་འདོད་པ་རྣམས་ཀྱིས་དང་པོ་ཁོ་ནར་སུམ་ཅུ་པའི་གཞུང་འདི་ཉིད་བསླབ་པར་བྱ་ཞིང་འདི་ཤེས་པ་དེ་ནས་རྟགས་འཇུག་ལ་སོགས་པ་འདིའི་སྐབས་ཕྱི་མ་རྣམས་དང་། བརྡ་སྤྲོད་པའི་གཞུང་རྒྱས་པ་གཞན་དང་གཞན་པའང་མཉན་པར་བྱས་ཏེ་ཁོང་དུ་ཆུད་པར་ན། ཐེག་པ་གསུམ་གྱི་གཞིར་གྱུར་པའི་བསླབ་པ་གང་ལ་རང་ཉིད་དད་ཅིང་སློབ་པར་འདོད་པ་ཡི་གཞུང་ལུགས་ཡན་ལག་དང་བཅས་པ་ཉིད་བླ་མ་དག་ལས་མཉན་པར་བྱའོ། །ཞེས་པའོ། །བཞི་བ་སྣོད་རུང་ལ་གདམས་ངག་བསྟན་དགོས་པར་འདོམས་པ་ནི། སློབ་དཔོན་དེ་ཉིད་དུ་འཛིན་ཅིང་། ལེ་ལོ་གཡེང་བ་རྣམ་པར་སྤངས། །ཟོ་བཟང་དད་པ་ལ་བརྟེན་པ། །སྐྱེས་བུ་དེས་ནི་མྱུར་རྟོགས་ཏེ། །དེ་ལ་དུས་སུ་འདོམས་པར་བྱ། །ཅིག་ཤོས་དེ་ལས་ལྡོག་པའོ། །ཞེས་པ་སྟེ། དེ་ཡང་བརྡའི་སྦྱོར་བ་ལ་མཁས་པར་བྱེད་པའི་བསྟན་བཅོས་འདི་ལྟ་བུའི་གདམས་ངག་བསྟན་ཏུ་རུང་བའི་སྣོད་ནི་གདམས་ངག་སྟོན་མཁན་གྱི་སློབ་དཔོན་དེ་ཉིད་ལ་སློབ་དཔོན་དུ་འཛིན་ཅིང་ཞེ་ས་དང་བཅས་པས་དྲིན་དུ་གཟོ་བ་དང་། རིག་པ་སློབ་པའི་མི་མཐུན་ཕྱོགས་བསླབ་བྱ་དེ་ལ་མི་སྤྲོ་བའི་ལེ་ལོ་དང་། བྱ་བ་གཞན་ལ་འཇུག་པའི་གཡེང་བ་གཉིས་ཀ་རྣམ་པར་སྤངས་པ་སྟེ། སྐྱོན་དེ་དག་གི་གླག་མི་རྙེད་པའི་རྟག་སྦྱོར་གྱི་བརྩོན་འགྲུས་དང་ལྡན་པ་དང་། རིག་པ་སློབ་པའི་མཐུན་རྐྱེན་ཟོ་སྟེ་རང་བཞིན་ནམ་ངང་ཚུལ་བཟང་ཞིང་བསླབ་པར་བྱ་བའི་གནས་ལ་མཆོག་ཏུ་དད་པ་ལ་བརྟེན་པའི་གུས་སྦྱོར་གྱི་བརྩོན་འགྲུས་དང་ལྡན་པ་སྟེ། མཚན་ཉིད་གསུམ་དང་ལྡན་པ་དེ་ལྟ་བུའི་སྐྱེས་བུ་དེས་ནི་བསླབ་པར་བྱ་བ་གང་ཡིན་དེ་མྱུར་དུ་རྟོགས་པར་འགྱུར་ཏེ། དེས་ན་དེ་ལ་དུས་ཤེས་པར་བྱས་ནས་དུས་སུ་འདོམས་པར་བྱ་ཞིང་། ཅིག་ཤོས་གཞན་ནི་དེ་ལས་ལྡོག་པ་སྟེ། སློབ་དཔོན་ལ་མི་གུས་པ་དང་། ལེ་ལོ་དང་གཡེང་བ་ཅན་དང་། རང་བཞིན་ངན་ཞིང་དད་པ་མེད་པ་རྣམས་ལ་སྣོད་དང་མི་ལྡན་པས་རེ་ཞིག་འདོམས་པར་བྱ་བ་མ་ཡིན་ཀྱང་ཕྱི་ནས་དོན་དུ་གཉེར་ཞིང་འདུན་པར་གྱུར་ན་ནི་ལེགས་པར་རྗེས་སུ་བསྟན་པར་བྱའོ། །ཞེས་མཇུག་བསྡུས་པའོ། །དེ་དག་གིས་རྩ་བ་སུམ་ཅུ་པའི་འབྲུ་འགྲེལ་ལེགས་པར་བཤད་ཟིན་ཏོ། ། ༈ ད་ནི་སྤྱི་དོན་གཉིས་པ་དེ་དག་གི་རྟགས་ཀྱི་འཇུག་པའི་འབྲུ་འགྲེལ་ཅུང་ཟད་ཅིག་འཆད་པ་ལ་གསུམ་སྟེ། མིང་གཞིའི་ཡི་གེ་སྤྱིའི་རྟགས་ཀྱི་དབྱེ་བ་བཤད་པ་དང་། སྔོན་འཇུག་གི་རྟགས་ཀྱི་འཇུག་པ་བཤད་པ་དང་། རྗེས་འཇུག་གི་རྟགས་ཀྱི་འཇུག་པ་བཤད་པའོ། །དང་པོ་ནི། ཕོ་ཡི་ཡི་གེ་འབའ་ཞིག་ལ། །སྡེ་བ་ཕྱེད་དང་བརྒྱད་གནས་པའང་། །སྡེ་ཚན་ལྔ་རུ་དྲིལ་བྱས་ནས། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་བཞི་རུ། །སྡེ་བ་བཞི་བ་ཡན་ཆད་དབྱེ། །ལྷག་མ་བཅུ་བཞི་གནས་པ་ལ། །ཙ་སོགས་གསུམ་ནི་ཅ་སོགས་སྦྱར། །ཝ་ནི་བ་དང་སྦྱར་བར་བྱ། །ལྷག་མ་དྲུག་ནི་མོ་རུ་སྦྱར། །ར་ལ་ཧ་ན་མོ་གཤམ་སྟེ། །ཨ་ནི་མཚན་མེད་ཅེས་ཀྱང་བྱ། །ཞེས་པས་བསྟན་དེ་ཡང་སྤྱིར་བོད་སྐད་ལ་ཉེ་བར་གྲགས་པའི་ཡི་གེ་རྣམས་ལ་ཕོ་མོ་གཉིས་སུ་དབྱེ་བའི་དབང་དུ་བྱས་ན་དབྱངས་ཡིག་མཚོན་བྱེད་ཨི་ཨུ་ཨེ་ཨོ་བཞི་ནི་ཤེས་རབ་ཀྱི་རང་བཞིན་མོ་དང་། ཀ་ནས་ཨའི་མཐར་ཐུག་པ་གསལ་བྱེད་སུམ་ཅུ་པོ་རྣམས་ནི་ཐབས་ཀྱི་རང་བཞིན་ཕོར་ཤེས་པར་བྱའོ། །དེས་ན་ཕོ་ཡི་ཡི་གེ་འབའ་ཞིག་སྟེ། གསལ་བྱེད་སུམ་ཅུ་པོ་ཁོ་ན་ལ་གོང་དུ་སུམ་ཅུ་པའི་སྐབས་སུ་བཤད་པ་ལྟར་སྡེ་བ་ཕྱེད་དང་བརྒྱད་དུ་གནས་པ་དེའང་། འདིར་ཕོ་མོ་མ་ནིང་ཤིན་ཏུ་མོ་མོ་གཤམ་སྟེ་སྡེ་ཚན་ལྔ་རུ་དྲིལ་བར་བྱས་ནས་འཆད་པ་ལ། དེ་གང་གི་དབྱེ་ཚུལ་ཡང་སྡེ་བ་དང་པོ་ནས་སྡེ་ཚན་རེ་རེ་བཞིན་ཕོ་དང་། མ་ནིང་དང་། མོ་དང་ནི། ཤིན་ཏུ་མོ་དང་བཞི་རེ་བཞི་རེ་རུ་སྡེ་བ་བཞི་བ་ཡན་ཆད་དབྱེ་བ་ཡིན་ཏེ། དེ་ཡང་ཇི་ལྟར་ན་སྡེ་བ་བཞི་བོ་རྣམས་ཀྱི་དང་པོ་ཀ་ཅ་ཏ་པ་རྣམས་ཕོ་དང་། གཉིས་པ་ཁ་ཆ་ཐ་ཕ་རྣམས་མ་ནིང་དང་། གསུམ་པ་ག་ཇ་ད་བ་རྣམས་མོ་དང་། བཞི་བ་ང་ཉ་ན་མ་ཤིན་ཏུ་མོར་ཤེས་པར་བྱའོ། །དེར་མ་ཕྱེ་བའི་ལྷག་མ་ཙ་སྡེ་ནས་བཟུང་ཡི་གེ་བཅུ་བཞི་གནས་པ་ལ། ཙ་སོགས་སྟེ་ཙ་ཚ་ཛ་གསུམ་ནི་རིམ་བཞིན་སྔར་བསྟན་པའི་ཅ་ལ་སོགས་པ་གསུམ་དང་འགྲོས་སྦྱར་བར་བྱ་སྟེ། འདི་ལྟར་ཙ་ཕོ་ཚ་མ་ནིང་ཛ་མོར་ཤེས་པར་བྱའོ། །དེ་བཞིན་དུ་ཝ་ནི་བ་དང་སྦྱར་བས་མོ་རུ་ཤེས་པར་བྱའོ། །དེའི་ལྷག་མ་ཞ་ཟ་འ་ཡ་ཤ་ས་སྟེ་དྲུག་པོ་དེ་རྣམས་ཀྱང་ནི་མོའི་ཡི་གེ་རུ་སྦྱར་བར་བྱའོ། །ར་ལ་ཧ་གསུམ་ནི་མོ་གཤམ་གྱི་ཡི་གེ་ཞེས་བྱ་སྟེ། ཨ་ཡིག་ནི་མོ་གཤམ་གྱི་ཡི་གེ་ཡིན་པར་མ་ཟད་མཚན་མེད་ཀྱི་ཡི་གེ་ཉིད་ཅེས་ཀྱང་བྱའོ། །ཞེས་པའོ། །འདིར་མིང་བཞིའི་ཡི་གེ་རྣམས་ཕོ་ལ་སོགས་པར་རྒྱུ་མཚན་གང་གི་སྒོ་ནས་བཞག་པའང་འདི་ལྟར་ཤེས་དགོས་ཏེ། དེ་ཡང་ཡི་གེ་རྣམས་སོ་སོར་ངག་ནས་བརྗོད་པའི་ཚེ་སོ་སོའི་སྐྱེ་གནས་ཀྱང་། བོད་ཡིག་གི་དབང་དུ་བྱས་ན། ཀ་ཁ་ག་ང་ཧ་ཨ་འ་རྣམས་ཀྱི་སྐྱེ་གནས་མགྲིན་པ། ཅ་ཆ་ཇ་ཉ་ཙ་ཚ་ཛ་ཞ་ཡ་ཤ་ཨི་ཨེ་རྣམས་ཀྱི་སྐྱེ་གནས་རྐན། ཏ་ཐ་ད་ན་ཟ་ལ་ས་རྣམས་ཀྱི་སྐྱེ་གནས་སོ། པ་ཕ་བ་མ་ཝ་ཨུ་ཨོ་རྣམས་ཀྱི་སྐྱེ་གནས་མཆུ། ར་ཡིག་གི་སྐྱེ་གནས་ལྕེ་རྩེ་དང་ཉེ་བའི་སྤྱི་བོ་སྟེ་ལྕེ་རྩེའི་སྟེང་ཕྱོགས། དེ་ལས་ང་ཉ་ན་མ་རྣམས་ནི་རང་རང་གི་གནས་སུ་མ་ཟད་སྣ་དང་བཅས་པའོ། །དེས་ན་རང་རང་གི་སྐྱེ་གནས་དང་ཕྲད་པའི་ཚེ་བྱེད་རྩོལ་གྱི་ཤུགས་ཆེ་ཆུང་ངམ་གྲིམ་ལྷོད་ཀྱི་དབང་གིས་ཤུགས་ཆེ་བའམ་གྲིམས་པ་རྣམས་ཕོ་ཡིག་དང་། རན་པ་རྣམས་མ་ནིང་དང་། ཅུང་ཟད་ཆུང་བའམ་ལྷོད་པ་རྣམས་མོ་དང་། དེ་ལས་ཀྱང་ཆུང་བའམ་ལྷོད་པ་རྣམས་ཤིན་ཏུ་མོ་དང་། ཤིན་ཏུ་རྩོལ་བ་ལྷོད་ཅིང་ཞན་པ་རྣམས་མོ་གཤམ་དུ་བཞག་པའོ། །དེས་ན་ཨ་ཡིག་ཀྱང་རྩོལ་བ་ཤིན་ཏུ་ལྷོད་པའི་སྒོ་ནས་མོ་གཤམ་དུ་བཞག་མོད་ཀྱི་ར་ལ་ཧ་གསུམ་ལ་ལྟོས་པའི་དེ་ལས་ཀྱང་རྩོལ་བ་ཞན་པའི་ཕྱིར་མཚན་མེད་དུའང་བཞག་གོ །གཉིས་པ་སྔོན་འཇུག་གི་རྟགས་ཀྱི་འཇུག་པ་བཤད་པ་ལའང་། མིང་གཞི་ལས་སྔོན་རྗེས་དབྱུང་བའི་ཚུལ། སྔོན་འཇུག་གི་རྟགས་ཀྱི་དབྱེ་བ། དེའི་འཇུག་ཚུལ་བཤད་པ་དང་གསུམ་གྱི་དང་པོ་ནི། མོ་ཡི་ཡི་གེའི་ནང་ནས་ནི། །འཇུག་པའི་ཡི་གེ་བཅུ་དབྱུང་བྱ། །འཇུག་པ་བཅུ་ཡི་ནང་ནས་ནི། །སྔོན་འཇུག་ཡི་གེ་ལྔ་དབྱུང་བྱ། །ཞེས་པས་བསྟན། དེ་ཡང་བཤད་མ་ཐག་པའི་མོ་ཡི་ཡི་གེ་ལ་མོ་ཙམ་དང་ཤིན་ཏུ་མོ་མོ་གཤམ་སྟེ་གསུམ་དུ་གནས་པ་སོ་སོར་མ་ཕྱེ་བའི་ནང་ནས་ནི་སུམ་ཅུ་བའི་སྐབས་ལྟར་རྗེས་སུ་འཇུག་པའི་ཡི་གེ་ག་སོགས་བཅུ་བོ་རྣམས་དབྱུང་བར་བྱ་ཞིང་། རྗེས་སུ་འཇུག་པ་བཅུ་བོ་དེ་ཡི་ནང་ནས་ནི་སྔོན་འཇུག་གི་ཡི་གེ་ལྔ་བོ་དབྱུང་བར་བྱའོ། །ཞེས་སོ། །གཉིས་པ་སྔོན་འཇུག་གི་རྟགས་ཀྱི་དབྱེ་བ་བཤད་པ་ནི། སྔོན་འཇུག་ཡི་གེ་ལྔ་བོ་ལ། །ཕོ་དང་མ་ནིང་མོ་དང་ནི། །ཤིན་ཏུ་མོ་དང་བཞི་རུ་དབྱེ། །ཞེས་པས་བསྟན། དེ་ཡང་བཤད་མ་ཐག་པའི་སྔོན་འཇུག་གི་ཡི་གེ་ལྔ་བོ་དེ་ལ། ཕོ་བ་ཡིག་དང་། མ་ནིང་ག་ད་གཉིས་དང་། མོ་འ་ཡིག་དང་ནི་ཤིན་ཏུ་མོ་མ་ཡིག་དང་བཅས་བཞི་རུ་དབྱེ་བར་བྱའོ། །ཞེས་སོ། །དེ་དག་གི་རྟགས་ཀྱི་དབྱེ་ཚུལ་ཡང་མིང་གཞི་ལྟར་སྔོན་འཇུག་གི་ཡི་གེ་རང་རང་ཀློག་པའི་སྒྲ་གྲིམས་ལྷོད་སོགས་ལས་ནི་མ་ཡིན་ཏེ། འཆད་འགྱུར་ལྟར་དེ་དག་འཇུག་ཡུལ་གྱི་མིང་གཞིའི་ཡི་གེ་དང་སྦྱར་ནས་ཀློགས་པའི་ཚེ་སྒྲ་གདངས་ཤུགས་ཆེ་ཆུང་དུ་འགྱུར་བའི་ཆ་ནས་བཞག་པའོ། །གསུམ་པ་དེའི་འཇུག་ཚུལ་བཤད་པ་ལའང་། འཇུག་ཚུལ་རྟོགས་བྱེད་ཀྱི་ཡན་ལག་རྣམས་མདོར་བསྟན་པ་དང་། དྲི་ལན་གྱི་སྒོ་ནས་རྒྱས་པར་བཤད་པ་སྟེ་གཉིས་ལས། དང་པོ་ནི། དེ་དག་རེ་རེའང་བཞི་བྱེད་དེ། གང་ལ་འཇུག་བྱེད་གང་གིས་བྱེད། །ཇི་ལྟར་འཇུག་བྱེད་ཅི་ཕྱིར་བྱེད། །ཅེས་པས་བསྟན་ཏེ། སྔོན་འཇུག་དེ་དག་གི་ཕོ་སོགས་རེ་རེའི་འཇུག་ཚུལ་ལའང་རྣམ་པ་བཞི་བཞིར་བྱེད་པ་ཉིད་དེ་བཞི་བཞིའི་སྒོ་ནས་རྟོགས་པར་བྱེད་དགོས་སོ། །དེའང་འཇུག་ཡུལ་མིང་གཞིའི་ཡི་གེ་གང་དང་གང་ལ་འཇུག་པར་བྱེད་པ་དང་། འཇུག་པ་པོ་སྔོན་འཇུག་གང་གིས་འཇུག་པར་བྱེད་པ་དང་། སྒྲའི་ཚུལ་ཇི་ལྟ་བུར་འཇུག་པར་བྱེད་པ་དང་། དགོས་པ་ཅིའི་ཕྱིར་འཇུག་པར་བྱེད་པ་རྣམས་སོ། །གཉིས་པ་དྲི་ལན་གྱི་སྒོ་ནས་རྒྱས་པར་བཤད་པ་ལ། གང་ལ་འཇུག་པར་བྱེད་པ་དང་། གང་གིས་འཇུག་པར་བྱེད་པ་ཐུན་མོང་དུ་བསྟན་པ་དང་། ཇི་ལྟར་འཇུག་པར་བྱེད་པ་བསྟན་པ་དང་། ཅིའི་ཕྱིར་འཇུག་པར་བྱེད་པ་སྟེ་གསུམ་མོ། །དང་པོ་ལ་དྲི་བས་མཚམས་སྦྱར་བ་དང་། ལན་གྱིས་བསྟན་པའོ། །དང་པོ་ནི། གང་ལ་འཇུག་པར་བྱེད་ཅེ་ན། །ཞེས་པའོ། །གཉིས་པ་ལན་ལ། ལན་དངོས་དང་། ཞར་བྱུང་མི་འཇུག་པ་བཤད་པ་གཉིས་ཀྱི་དང་པོ་ནི། ཕོ་ནི་ཕོ་དང་མོ་ལ་འཇུག །མོ་ནི་མོ་དང་མ་ནིང་ལ། མ་ནིང་ཡང་ནི་ཕོ་མོ་ལའོ། །ཤིན་ཏུ་མོ་ནི་མ་ནིང་དང་། །མོ་དང་ཤིན་ཏུ་མོ་ཉིད་ལའོ། །ཞེས་པས་བསྟན། དེ་ལ་གང་གིས་འཇུག་པར་བྱེད་པ་པོ་སྔོན་འཇུག་གི་ཕོའི་ཡི་གེ་བ་ནི་རང་གི་སྡེ་བ་མ་ཡིན་པའི་མིང་གཞིའི་ཕོ་ཡིག་ཀ་ཅ་ཏ་ཙ་རྣམས་དང་མོ་ཡིག་ག་ང་ཇ་ཉ་ད་ན་ཛ་ཞ་ཟ་ར་ལ་ཤ་ས་རྣམས་ལ་འཇུག་སྟེ། དེ་ཡང་ཀ་ག་གཉིས་ལ་བརྩེགས་འདོགས་རྐྱང་གསུམ་གར་དང་། ཏ་ཙ་ད་གསུམ་ལ་རྐྱང་བརྩེགས་གཉིས་ཀར་དང་། ང་ཇ་ཉ་ན་ཛ་ལ་རྣམས་ལ་བརྩེགས་མ་ཁོ་ནར་དང་། ཅ་ཞ་ཤ་གསུམ་ལ་རྐྱང་བ་ཁོ་ནར་དང་། ཟ་ས་གཉིས་ལ་རྐྱང་འདོགས་གཉིས་ཀར་དང་། ར་ལ་འདོགས་ཅན་ཁོ་ནར་སྟེ་དེ་རྣམས་ལ་འཇུག་པ་ཡིན་ནོ། །དེ་བཞིན་དུ་སྔོན་འཇུག་གི་མོ་འ་ཡིག་ནི། མིང་གཞིའི་མོ་ག་ཇ་ད་བ་ཛ་རྣམས་དང་མ་ནིང་ཁ་ཆ་ཐ་ཕ་ཚ་རྣམས་ལ་རྐྱང་འཕུལ་གྱིས་འཇུག་ཅིང་། དེ་རྣམས་ལས་ག་ད་བ་ཁ་ཕ་རྣམས་ལ་འདོགས་འཕུལ་དུའང་འཇུག་གོ །སྔོན་འཇུག་གི་མ་ནིང་ག་ད་གཉིས་པོ་ཡང་ནི་འདི་ལྟར་འཇུག་སྟེ། ག་ཡིག་མིང་གཞིའི་ཕོ་ཅ་ཏ་ཙ་རྣམས་དང་། མོ་ཉ་ད་ན་ཞ་ཟ་ཡ་ཤ་ས་རྣམས་ལ་རྐྱང་འཕུལ་ཁོ་ནར་འཇུག་པ་དང་། ད་ཡིག་ནི་མིང་གཞིའི་ཕོ་ཀ་བ་གཉིས་དང་། མོ་ག་བ་གཉིས་ཏེ་བཞི་ལ་རྐྱང་འདོགས་གཉིས་ཀར་འཇུག་ཅིང་། མོ་ཡིག་ང་མ་གཉིས་ལ་རྐྱང་འཕུལ་ཁོ་ནར་འཇུག་པའོ། །སྔོན་འཇུག་གི་ཤིན་ཏུ་མོ་མ་ཡིག་ནི། མིང་གཞིའི་མ་ནིང་ཁ་ཆ་ཐ་ཚ་རྣམས་དང་། མོ་ཡིག་ག་ཇ་ད་ཛ་རྣམས་དང་། ཤིན་ཏུ་མོ་ང་ཉ་ན་རྣམས་ཉིད་ལ་རྐྱང་འཕུལ་གྱིས་འཇུག་ཅིང་། དེ་ལས་ཁ་ག་གཉིས་ལ་འདོགས་འཕུལ་དུའང་འཇུག་པའོ། །ཞེས་སོ། །འདིར་རྐྱང་བ་སོགས་ཀྱི་གོ་དོན་ནི་སྔོན་འཇུག་གི་འཇུག་ཡུལ་དུ་རྗེས་འཇུག་མི་བརྩི་བའི་མིང་གཞིའི་ཡི་གེ་ཉིད་རེ་རེ་ཡིན་ན་རྐྱང་བ་དང་། གཉིས་གསུམ་འབྲེལ་བ་ཡིན་ན་བརྩེགས་མའི་ཐ་སྙད་འཇུག་ཅིང་འདོགས་ཅན་ཞེས་ཐ་སྙད་ཟུར་དུ་བྱེད་པའང་བརྩེགས་མའི་བྱེ་བྲག་ཉིད་ཡིན་ཏེ། རིམ་པ་ལྟར། བཀའ་ལྟ་བུ་དང་། བསྐོན་ལྟ་བུ་དང་། བསྐྱེད་བཀྲག་སོགས་ལྟ་བུ་སྟེ་ཕྱི་མ་ནི་ཡ་ར་ལ་གསུམ་གྱི་འདོགས་ཟུར་དུ་བཤད་པ་ཙམ་མོ། །གཉིས་པ་ཞར་བྱུང་དུ་མི་འཇུག་པ་བཤད་པ་ནི། ཕོ་ནི་མ་ནིང་ལ་མི་འཇུག །མོ་ནི་ཕོ་ལ་འཇུག་པ་མིན། །མ་ནིང་རང་ལ་རང་མི་འཇུག །རང་གི་སྡེ་དང་འཕྲད་པ་ན། །ཕོ་ཡང་མོ་ལ་འཇུག་མི་འགྱུར། །མ་ནིང་མོ་ཡང་དེ་བཞིན་ནོ། །ཞེས་པས་བསྟན། དེ་ཡང་སྔོན་འཇུག་གི་ཕོ་བ་ཡིག་ནི་མིང་གཞིའི་མ་ནིང་ད་ཁ་ཆ་ཐ་ཕ་ཚ་རྣམས་ལ་མི་འཇུག་ཅིང་། སྔོན་འཇུག་མོ་འ་ཡིག་དང་དེའི་ཤུགས་ཀྱིས་ཤིན་ཏུ་མོ་མ་ཡིག་དག་ནི་མིང་གཞིའི་ཕོ་ཀ་ཅ་ཏ་པ་ཙ་རྣམས་ལ་འཇུག་པ་མིན། དེ་བཞིན་དུ་མ་ནིང་ནི་མིང་གཞིའི་མ་ནིང་ཁ་ཆ་ཐ་ཕ་ཚ་རྣམས་རང་ལ་སྔོན་འཇུག་གིའང་མ་ནིང་རང་ག་ད་གཉིས་པོ་མི་འཇུག་པ་ཡིན་ནོ། །ཡང་གོང་དུ་ཕོ་ནི་ཕོ་དང་མོ་ལ་འཇུག །ཅེས་སོགས་བཤད་པའི་དམིགས་བསལ་སྔོན་འཇུག་རྣམས་རང་རང་གི་གནས་ཡུལ་སྡེ་བ་སྟེ། བཞི་ཚན་སོ་སོའི་མིང་གཞིའི་ཡི་གེ་རྣམས་དང་འཕྲད་པའི་ཚེ་ན་སྔོན་འཇུག་གི་ཕོ་བ་ཡིག་ཡང་ནི་མིང་གཞིའི་མོ་བ་མ་དག་ལ་འཇུག་པར་མི་འགྱུར་ལ། ཡང་སྒྲས་ཕོ་ཡིག་པ་ལའང་མི་འཇུག་པར་བསྟན་པ་དང་། དེ་བཞིན་དུ་སྔོན་འཇུག་གི་མ་ནིང་ག་ད་གཉིས་ཀྱང་རང་སྡེའི་ཕོ་མོ་དག་ལ་མི་འཇུག་སྟེ། ག་ཡིག་ནི་མིང་གཞིའི་ཀ་ག་ད་རྣམས་དང་། ང་ཡིག་ཏ་ད་ན་རྣམས་ལ་མི་འཇུག་པའོ། །སྔོན་འཇུག་གི་མོ་ཡིག་ལ་ནི་རང་སྡེའི་མིང་གཞིའི་མོ་ཞ་ཟ་འ་ཡ་རྣམས་དང་ཡང་སྒྲའི་ཤུགས་ཀྱིས་མོ་ཡིག་ཤ་ས་དག་ལའང་མི་འཇུག་པ་དང་། དེ་བཞིན་ཏུ་སྔོན་འཇུག་གི་ཤིན་ཏུ་མོ་མ་ཡིག་ནི་རང་སྡེའི་མིང་གཞིའི་མ་ནིང་ཕ་དང་མོ་དང་ཤིན་ཏུ་མོ་བ་མ་རྣམས་ལའང་མི་འཇུག་པ་ནི་སྔ་མ་དེ་དག་བཞིན་ནོ། །ཞེས་སོ། །གཉིས་པ་ཇི་ལྟར་འཇུག་པར་བྱེད་པ་བསྟན་པ་ལ་དྲི་བས་མཚམས་སྦྱར་བ་དང་། ལན་གྱིས་བསྙད་པ་གཉིས་ལས་དང་པོ་ནི། ཇི་ལྟར་འཇུག་པར་བྱེད་ཅེ་ན། ཞེས་པའོ། །གཉིས་པ་ནི། ཕོ་ནི་དྲག་པའི་ཚུལ་གྱིས་ཏེ། །མ་ནིང་རན་པར་འཇུག་པ་ཡིན། །མོ་ནི་ཞན་པའི་ཚུལ་གྱིས་ཏེ། །ཤིན་ཏུ་མོ་ནི་མཉམ་པས་སོ། །ཞེས་པ་སྟེ། དེ་ཡང་སྔོན་འཇུག་གི་ཕོ་ཡིག་བ་ནི་མིང་གཞིའི་ཡི་གེ་རང་གི་འཇུག་ཡུལ་དུ་རྣམས་ལ་སྒྲ་དང་བྱེད་རྩོལ་དྲག་པའི་ཚུལ་གྱིས་འཇུག་པ་ཡིན་ཏེ། མ་ནིང་ག་ད་གཉིས་ནི་སྒྲ་རྩོལ་རན་པར་འཇུག་པ་ཡིན་ལ། མོ་ཡིག་འ་ནི་སྒྲ་རྩོལ་ཞན་པའི་ཚུལ་གྱིས་འཇུག་པ་ཡིན་ཏེ། ཤིན་ཏུ་མོ་མ་ནི་སྒྲ་རྩོལ་མཉམ་པ་སྟེ་ཤིན་ཏུ་ལྷོད་པའི་ཚུལ་གྱིས་འཇུག་པ་ངེས་སོ། །ཞེས་པའོ། །སྐབས་འདིའི་འཇུག་ཚུལ་ཡང་དྲག་ཞན་སོགས་སྒྲ་གདངས་ཁོ་ནའི་སྒོ་ནས་བཞག་པའང་མ་ཡིན་ཏེ། མོ་དང་མ་ནིང་གི་འཇུག་ཚུལ་ལ་སྒྲ་དྲག་ཞན་གྱི་དབྱེ་བ་ཆེར་མེད་ཀྱང་གཙོ་བོར་བྱེད་རྩོལ་ཆེ་ཆུང་གི་སྒོ་ནས་འབྱེད་དགོས་ཤིང་། གཞན་རྣམས་ལའང་སྒྲ་གདངས་དྲག་ཞན་དུ་མ་ཟད་བྱེད་རྩོལ་ཆེ་ཆུང་གི་ཁྱད་པར་རེའང་ཞིབ་མོའི་བློས་དཔྱད་ན་མངོན་སུམ་གྱིས་གྲུབ་བའི་ཕྱིར་རོ། །གསུམ་པ་ཅིའི་ཕྱིར་འཇུག་པར་བྱེད་པ་བསྟན་པ་ལ་དྲི་བས་མཚམས་སྦྱར་བ་དང་། ལན་གྱིས་བསྙད་པའོ། དང་པོ་ནི། ཅིའི་ཕྱིར་འཇུག་པར་བྱེད་ཅེ་ན། །ཞེས་པའོ། །གཉིས་པ་ལ་ཕོ་ཡིག་གི མ་ནིང་གི མོ་ཡིག་གི ཤིན་ཏུ་མོའི་འཇུག་དོན་བཤད་པ་སྟེ་བཞི་ལས། དང་པོ་སྔོན་འཇུག་གི་ཕོ་ཡིག་དགོས་པ་ཅིའི་ཕྱིར་འཇུག་པ་ནི། ཕོ་ནི་འདས་དང་གཞན་བསྒྲུབ་ཕྱིར། །ཞེས་པ་ལྟར། དེ་ཡང་སྔོན་འཇུག་གི་ཕོ་ཡིག་བ་ནི་དགོས་པ་དུས་གསུམ་ལས་བྱེད་པ་པོ་གཞན་དང་དངོས་སུ་འབྲེལ་བའི་བྱ་བ་བྱས་ཟིན་འདས་པ་བསྒྲུབ་པའི་ཕྱིར་ཞུགས་པ། ཆུས་བཀང་། གོས་བཀབ། ལྟ་བུ་དག་སྟེ། དེ་ཡང་བུམ་པ་ཆུས་བཀང་ལྟ་བུ་སྔོན་འཇུག་ཁོ་ནའི་བྱེད་པས་འདས་ཚིག་ཏུ་གྲུབ་པ་དང་། ཐུགས་དམ་བསྐངས་ལྟ་བུ་སྔོན་འཇུག་ཕོ་ཡིག་དང་འབྲེལ་བ་ཙམ་ལས་གཙོ་བོ་རྗེས་འཇུག་གི་བྱེད་པས་འདས་ཚིག་ཏུ་གྲུབ་པ་སོགས་བྱེ་བྲག་ཕྱེས་ནས་ཤེས་པར་བྱ་སྟེ། དེས་ན་འདས་ཚིག་གི་དོན་དེ་དང་དངོས་པོ་བདག་གཞན་གཉིས་ལས་གཞན་ཏེ་བྱེད་པ་པོ་གཞན་དང་དངོས་སུ་འབྲེལ་བའི་བྱ་བའི་ཡུལ་བསྒྲུབ་པའི་ཕྱིར་ཞུགས་པ། བཀན་བྱའི་ལག་པ། བཀྱིག་བྱའི་དགྲ། ལྟ་བུ་དག་དང་བྱ་ཚིག་གིས་གསལ་མ་དགོས་པར་ཡུལ་གྱི་སྒྲ་མཚོན་ནུས་པ། གོས་སོགས་ལ་བགོ་བ། རྟ་ལ་བཅིབ་པ། བསླབ་བྱ་ལ་བསླབ་པ་སོགས་དང་། འཆད་འགྱུར་མ་ནིང་གི་འཇུག་པའི་སྐབས་སུ། གདམས་བྱ་ལ་གདམས་པ་སོགས་དང་། མོ་དང་ཤིན་ཏུ་མོའི་འཇུག་པའི་སྐབས་སུའང་དེ་འདྲ་མང་དུ་འབྱུང་བ་གོ་དགོས་སོ། །དེ་བཞིན་དུ་བ་ཡིག་དངོས་པོ་གཞན་བྱ་བའི་ཡུལ་དང་འབྲེལ་བའི་བྱ་བ་ཉིད་ལ་འཇུག་པ་ནི། བཀལ་བར་བྱའོ། །བཀལ་ལོ། །ལྟ་བུ་དག་སྟེ་འདི་རྣམས་ལ་འཇུག་པ་ཡིན་ནོ། །ཞེས་པའོ། །གཉིས་པ་སྔོན་འཇུག་གི་མ་ནིང་དགོས་པ་གང་གིས་ཕྱིར་འཇུག་པ་ནི། མ་ནིང་གཉིས་ཀ་ད་ལྟར་ཆེད། །ཅེས་པས་བསྟན་ཏེ། སྔོན་འཇུག་གི་མ་ནིང་ག་ད་གཉིས་ནི་དངོས་པོའི་དབང་དུ་བྱས་ན་བདག་གཞན་གཉིས་ཀ་ལ་འཇུག་སྟེ། འདི་ལྟར་ག་ཡིག་བདག་བྱེད་པ་པོ་ལ་འཇུག་པ་ནི། རྔོ་བ་གཅོག་པ་པོ། གཅོག་བྱེད་ལྟ་བུ་དང་། བྱེད་པ་པོ་བདག་ལ་ཡོད་པའི་ལས་སམ་བྱེད་པ་ཙམ་ལ་འཇུག་པ་ནི། གཅར་བར་བྱེད། གཅར་རོ་ལྟ་བུ་དང་། གཞན་ཡང་ག་ཡིག་གཞན་བྱ་བའི་ཡུལ་ཉིད་ལ་འཇུག་པ་ནི། བཅད་བྱའི་ཤིང་། གཉེར་བྱའི་དོན་ལྟ་བུ་རྣམས་དང་། གཞན་བྱ་བའི་གཞི་དང་འབྲེལ་བའི་ལས་སམ་བྱ་བ་ཙམ་ལ་འཇུག་པ་ནི། གཅད་པར་བྱ། གཅད་དོ་ལྟ་བུ་རྣམས་ལ་འཇུག་ཅིང་། དེ་བཞིན་དུ་ད་ཡིག་བདག་བྱེད་པ་པོར་འཇུག་པ་ནི། སྣལ་མ་དཀྲི་བ་པོ། དཀྲི་བྱེད་ལྟ་བུ་དང་། བྱེད་པ་ཙམ་ལ་འཇུག་པ་ནི། དཀྲི་བར་བྱེད། དཀྲིའོ་ལྟ་བུ་རྣམས་དང་། གཞན་ཡང་ད་ཡིག་གཞན་བྱ་བའི་ཡུལ་ལ་འཇུག་པ་ནི། དཀྲི་བྱའི་མདོས་རིས། དགག་བྱའི་སྐྱོན་ལྟ་བུ་དང་། བྱ་བ་ཙམ་ལ་འཇུག་པ་དཀྲི་བར་བྱ། དཀྲི་ལྟ་བུ་དག་སྟེ། དེས་ན་མ་ནིང་གི་སྔོན་འཇུག་གཉིས་པོ་དེ་བཤད་མ་ཐག་པའི་འཇུག་ཡུལ་གཉིས་པོ་དེར་མི་གཏོགས་པའི་དུས་ད་ལྟར་གྱི་ཆེད་དུའང་འཇུག་སྟེ། འདི་ལྟར་གཅར་གྱིན་སྣང་ངོ་། །གཅར་བཞིན་པའོ། །དཀྲི་ཡིན་སྣང་ངོ་། །དཀྲི་བཞིན་པའོ། །ལྟ་བུ་སྔར་སྨོས་པའི་བདག་སྒྲའི་བྱེད་ཚིག་དེ་རྣམས་བརྗོད་ཚུལ་ཚིག་གྲོགས་ཀྱི་ཁྱད་པར་དང་བཅས་དཔེར་བརྗོད་པར་བྱའོ། །གསུམ་པ་སྔོན་འཇུག་གི་མོ་ཡིག་དགོས་པ་གང་གི་ཕྱིར་འཇུག་པ་ནི། མོ་ནི་བདག་ད་མ་འོངས་ཕྱིར། །ཞེས་པས་བསྟན། དེ་ཡང་སྔོན་འཇུག་གི་མོ་ཡིག་འ་ནི། ཁུར་འཁུར་བ་པོ། ཁུར་བྱེད་ལྟ་བུ། གང་ཞིག་ལས་སམ་བྱ་བ་དེ་ལས་ངེས་པར་ཐ་དད་པར་གྱུར་པའི་བདག་བྱེད་པ་པོའི་དངོས་པོ་སྟོན་པའི་ཚིག་དངོས་དང་། གང་ཞིག་ལས་སམ་བྱ་རྒྱུ་དེ་དང་ཐ་མི་དད་པ་ལྟར་སྣང་བའི་བྱེད་པ་པོའི་ཚིག འཁོར་བར་འཁོར་བ་པོ། འཁོར་བྱེད་ལྟ་བུ་རྣམས་དང་། བདག་དང་འབྲེལ་བའི་བྱེད་པ་ཙམ་ལ་འཇུག་པ་སྐུད་པ་འཁལ་བར་བྱེད་པ། འཁལ་ལོ་ལྟ་བུ་རྣམས་ལ་འཇུག་ཅིང་། དེར་མ་ཟད་སྔོན་འཇུག་གི་མོ་འ་ཡིག་དེ་ཉིད་གོང་སྨྲོས་ལྟར་བདག་གཞན་གྱི་དབྱེ་བ་མ་བསྡུས་པའི་དུས་ད་ལྟ་བར་འཇུག་པ་ནི། འཁལ་བཞིན་པ། འཁལ་གྱིན་སྣང་། ལྟ་བུ་དག་དང་། དེ་བཞིན་དུ་བདག་གཞན་གྱི་དབྱེ་བས་མ་བསྡུས་པའི་དུས་མ་འོངས་པའི་དོན་དུ་འཇུག་པ། གཞན་དུ་འཁྱར་བར་འགྱུར། ཡུལ་དུ་འཁྱམས་པར་འགྱུར། ལྟ་བུ་དག་སྟེ། རང་གི་ངང་གིས་འབྱུང་བ་ལྟ་བུ་བྱེད་པོ་གཞན་མེད་པ་དང་། རག་པར་བྱ་བྱེད་ཐ་དད་དུ་མི་སྣང་བའི་འབྱུང་འགྱུར་གྱི་ཚིག་རྣམས་ཏེ། དེ་དག་སྟོན་པའི་ཕྱིར་འཇུག་གོ །ཞེས་པའོ། གཞན་ཡང་། འགག འགྱུར། འགྲུབ་ལྟ་བུ་དག་ཀྱང་འདིར་བསྡུའོ། །བཞི་བ་སྔོན་འཇུག་གི་ཤིན་ཏུ་མོ་དགོས་པ་གང་གི་ཕྱིར་འཇུག་པ་ནི། ཤིན་ཏུ་མོ་ནི་མཉམ་ཕྱིར་རོ། །ཞེས་པའོ། །དེ་ཡང་སྔོན་འཇུག་གི་ཤིན་ཏུ་མོ་མ་ཡིག་ནི་སྔར་བཤད་པའི་བདག་གཞན་དང་དུས་གསུམ་གྱི་བྱེ་བྲག་མེད་པར་ཐམས་ཅད་ལ་མཉམ་པ་སྟེ། མཚུངས་པ་ཉིད་བསྒྲུབ་པའི་ཕྱིར་འཇུག་སྟེ། འདི་ལྟར། མཁས་པར་བྱས། མཁས་པ། མཁས་པར་བྱེད། མཁས་བྱ། མཁས་པར་བྱ། མཁས་བཞིན་པ། མཁས་པར་འགྱུར་ལྟ་བུ་དང་། མཆི། མཆིས། མཆེད། མཆོད་ལ་སོགས་པ། བདག་གཞན་དང་དུས་གསུམ་ལ་སོ་སོར་མི་དགོས་པར་ཅི་རིགས་པར་སྦྱར་རོ། །ཞེས་སོ། །དེ་ཡང་མངག་དང་མཆིས་སོགས་འདས་ཚིག་ལ་ཁྱད་པར་ཡོད་པ་རྣམས་ནི་རྗེས་འཇུག་གི་བྱེད་པ་ཡིན་པས་སྔོན་འཇུག་མ་ཡིག་གི་འཇུག་པ་མི་མཉམ་པར་ཐལ་བའི་སྐྱོན་ཡང་མེད་དོ། །གཞན་ཡང་འདིར་བདག་གཞན་བྱ་བྱེད་དང་དུས་གསུམ་གྱི་ཚུལ་གསུངས་པ་ཡང་འདི་ལྟར་ཡིན་ཏེ། ལས་གང་ཞིག་བྱེད་པོ་གཞན་དང་དངོས་སུ་འབྲེལ་བའི་དབང་དུ་བྱས་ནས། བྱེད་པ་པོའི་དངོས་པོ་དེ་ཉིད་དང་དེའི་བྱེད་པ་དང་བཅས་པ་ལ་ནི་བདག་ཅེས་བྱ་ཞིང་། དེའི་བསྒྲུབ་པར་བྱ་བའི་ཡུལ་གྱི་དངོས་པོ་བྱ་བ་དང་བཅས་པ་ལ་ནི་གཞན་ཞེས་བྱའོ། །དེ་བཞིན་དུ་བྱེད་པ་པོ་གཞན་དང་དངོས་སུ་འབྲེལ་མ་འབྲེལ་ཇི་ལྟར་ཡང་རུང་བྱ་བ་བྱས་ཟིན་པ་ནི་དུས་འདས་པ་དང་། བྱ་བ་བྱེད་པར་འགྱུར་བ་ནི་དུས་མ་འོངས་པ་དང་། བྱ་བ་བྱེད་བཞིན་པ་ནི་དུས་ད་ལྟ་བ་ཡིན་ནོ། །གཞན་དུ་བྱེད་པའི་ལས་དང་བྱ་བའི་ལས་ཞེས་ལས་ཀྱི་ཚེག་ལ་གཉིས་སུ་དབྱེ་བའང་དབྱེ་བ་དེ་དག་ཏུ་འདུས་ཏེ་དུས་གསུམ་གྱི་དབང་གིས་བྱེད་པའི་ལས་ནི་དུས་ད་ལྟ་བ་དང་། བྱ་བའི་ལས་ནི་དུས་མ་འོངས་པར་འདུ་ཞིང་བདག་གཞན་གྱི་དབང་གིས་བྱེད་པོ་གཞན་དང་དངོས་སུ་འབྲེལ་བའི་བྱེད་པ་བདག་དང་། བྱ་བ་གཞན་ཡིན་པ་བཤད་མ་ཐག་པ་ལྟར་རོ། །རྒྱུ་མཚན་འདིས་དུས་གསུམ་གྱི་དབྱེ་བས་ནི་བྱེད་ལས་དང་འབྲེལ་བའི་ངག་གི་སྦྱོར་བ་ཐམས་ཅད་ལ་ཁྱབ་ཅིང་། བདག་གཞན་གྱི་དབྱེ་བས་ནི་དེ་ཙམ་དུ་ཁྱབ་པ་མ་ཡིན་ཡང་། གཞུང་འདིར་བྱེད་པ་པོ་དང་བྱ་བའི་ཡུལ་གྱི་སྒྲ་རྣམས་བསྡུ་བའི་ཕྱིར་བདག་གཞན་གྱི་དབྱེ་བ་ཟུར་དུ་མཛད་པ་ཡིན་ཞིང་། དེའི་ཞར་ལས་བདག་གཞན་དང་འབྲེལ་བའི་བྱ་བྱེད་ཀྱི་ཚིག་ཕན་ཚུན་ཤེད་མཚུངས་པ་རྣམས་ཀྱང་བསྡུས་པ་ཡིན་ནོ། །གསུམ་པ་རྗེས་འཇུག་གི་རྟགས་ཀྱི་འཇུག་པ་ལ་གཉིས། རྟགས་སོ་སོར་ངོས་འཛིན་པ་དང་། དེའི་འཇུག་པ་རྒྱས་པར་འཆད་པའོ། །དང་པོ་ལ་སྤྱིར་རྟགས་གསུམ་དུ་དབྱེ་བ་དང་། ནང་གསེས་བརྒྱད་དུ་དབྱེ་བ་གཉིས་ཀྱི་དང་པོ་ནི། རྗེས་འཇུག་ཡི་གེ་བཅུ་བོ་ལ། །ཕོ་མོ་མ་ནིང་གསུམ་དུ་དབྱེ། །ཞེས་པས་བསྟན། དེ་ཡང་རྗེས་འཇུག་ཡི་གེ་ག་ང་ད་ན་བ་མ་འ་ར་ལ་ས་སྟེ་བཅུ་བོ་དེ་རྣམས་ལའང་གསུམ་དུ་དབྱེ་བར་བྱ་སྟེ། འདི་ལྟར་ག་ད་བ་ས་བཞི་ཕོ་ཡིག་དང་། ང་མ་འ་གསུམ་མོ་ཡིག་དང་། ན་ར་ལ་གསུམ་མ་ནིང་སྟེ། །ས་བཅད་གསུམ་དུ་དབྱེ་བར་བྱའོ། །ཞེས་པའོ། །འདིར་ཕོ་མོ་མ་ནིང་གི་དབྱེ་ཚུལ་ཡང་རྗེས་འཇུག་དེ་ཉིད་མིང་གཞིའི་ཡི་གེ་གང་ལ་ཞུགས་པ་ལས་བརྗོད་པའི་སྒྲ་གདངས་དྲག་ཞན་བར་མར་འགྱུར་བའི་ཆ་ནས་བཞག་པ་སྟེ། དེ་ཡང་མིང་གཞི་གང་གི་མཐར་ཡང་རུང་ག་ད་བ་ས་རྣམས་ཞུགས་པ་སྒྲ་དྲག་པ་དང་། ང་མ་འ་རྣམས་ཞུགས་པ་སྒྲ་ཞན་པ་དང་། ན་ར་ལ་རྣམས་ཞུགས་པ་སྒྲ་བར་མ་གྱུར་པ་རྣམས་དག་པར་བཀླག་པའི་དབང་དུ་བྱས་ན་མངོན་སུམ་གྱིས་གྲུབ་པ་ཡིན་ནོ། །གཉིས་པ་དེའི་ནང་གསེས་ཀྱི་དབྱེ་བ་ནི། ཕོ་ལ་སྐྱེས་བུ་རབ་འབྲིང་གསུམ། །མོ་ལ་མོ་དང་ཤིན་ཏུ་མོ། །མ་ནིང་འགྱུར་དང་མཚན་གཉིས་དང་། །མཚན་མེད་དག་དང་གསུམ་དུ་འདོད། །ཞེས་པས་བསྟན་ཏེ། དེ་ལྟར་རྗེས་འཇུག་རྟགས་གསུམ་དུ་ཕྱེ་བ་དེ་ལ་སླར་ཡང་ནང་གསེས་ཀྱི་སྒོ་ནས་རྣམ་པ་བརྒྱད་དུ་དབྱེ་སྟེ། འདི་ལྟར་རྗེས་འཇུག་ཕོ་ལ་དབྱེ་ན། རྗེས་འཇུག་ག་ཡིག་ལ་ཡང་འཇུག་ས་ཞུགས་པ་ནི་རྗེས་འཇུག་ནང་ཕྲད་ཀྱི་སྟོབས་ལས་སྒྲ་དྲག་པའི་དྲག་པར་འགྱུར་བའི་ཕྱིར་སྐྱེས་བུ་རབ་དང་། རྗེས་འཇུག་བ་ལ་ཡང་འཇུག་ས་ཡིག་ཞུགས་པ་ནི་སྒྲ་དྲག་པའི་འབྲིང་དུ་འགྱུར་བས་སྐྱེས་བུ་འབྲིང་བོ་དང་། ག་བ་གཉིས་ཀྱི་མཐར་ཡང་འཇུག་མ་ཞུགས་པ་དང་། ས་དའི་མཐའ་རྣམས་ནི་སྒྲ་དྲག་པའི་ཞན་པར་འགྱུར་བས་སྐྱེས་བུ་ཐ་མ་སྟེ་གསུམ་མོ། །དེ་བཞིན་དུ་རྗེས་འཇུག་གི་མོ་ལའང་དབྱེ་ན། ང་མ་གཉིས་ལ་ཡང་འཇུག་ཞུགས་པ་ནི་སྒྲ་ཞན་པའི་དྲག་པར་འགྱུར་བས་མོ་ཙམ་དང་། དེ་གཉིས་ལ་ཡང་འཇུག་མ་ཞུགས་པ་དང་འ་ཡིག་གི་མཐའ་རྣམས་ནི་སྒྲ་ཤིན་ཏུ་ཞན་པར་འགྱུར་བས་ཤིན་ཏུ་མོ་སྟེ་གཉིས་སུ་དབྱེ་བ་དང་། རྗེས་འཇུག་མ་ནིང་ལའང་དབྱེ་ན། མ་ནིང་ན་ར་ལ་གསུམ་པོ་མིང་གཞིའི་ཕོ་ཡིག་གི་མཐར་ཡང་འཇུག་ཡོད་མེད་གང་རུང་དང་མོ་ཡིག་གི་རྗེས་སུ་ཡང་འཇུག་མེད་པ་ཞུགས་པའི་ཚེ་ནི་སྒྲ་བར་མའི་དྲག་པའམ་ཞན་པར་འགྱུར་བས་འགྱུར་བ་མ་ནིང་དང་། མིང་གཞིའི་མོ་ཡིག་གི་མཐའ་ཞུགས་ཤིང་ཡང་འཇུག་དང་བཅས་པར་གྱུར་པའི་ཚེ་ནི་སྒྲ་བར་མ་ལས་དྲག་ཞན་གཉིས་ཀའི་ཆ་དང་ལྡན་པར་འགྱུར་བས་མ་ནིང་མཚན་གཉིས་པ་དང་། མིང་གཞིའི་མ་ནིང་གི་མཐར་ཞུགས་པའི་ཚེ་ཡང་འཇུག་ཡོད་མེད་ཇི་ལྟར་རུང་སྒྲ་བར་མ་ཙམ་ལས་དྲག་ཞན་གང་དུའང་མི་འགྱུར་བའི་ཕྱིར་འདི་རྣམས་ནི་མཚན་མེད་མ་ནིང་དག་སྟེ། དེ་དང་གསུམ་དུ་འདོད་པ་ཡིན་ནོ། །ཞེས་པའོ། །དེ་ལྟར་རྟགས་གསུམ་བསྡོམས་པའི་ནང་གསེས་བརྒྱད་དུ་འགྱུར་བ་ཡིན་ནོ། །གཉིས་པ་རྟགས་དེ་རྣམས་ཀྱི་འཇུག་པ་རྒྱས་པར་བཤད་པ་ལ། མདོར་བསྟན་པ་དང་རྒྱས་པར་བཤད་པ་གཉིས་ལས། དང་པོ་ནི། དེ་ཡང་བྱེད་པ་བཞི་བྱེད་དེ། །གང་ལ་འཇུག་བྱེད་གང་གིས་བྱེད། །ཇི་ལྟར་འཇུག་བྱེད་ཅིའི་ཕྱིར་བྱེད། །ཅེས་པས་བསྟན། དེ་ཡང་རྗེས་འཇུག་ཕོ་མོ་མ་ནིང་གསུམ་རེ་རེ་ལའང་བྱེད་པ་བཞི་བཞིའི་སྒོ་ནས་འཇུག་ཚུལ་ཤེས་པར་བྱེད་དགོས་པ་ཉིད་དེ། འདི་ལྟར་འཇུག་ཡུལ་ཡི་གེ་གང་ལ་འཇུག་པར་བྱེད་པ་དང་། འཇུག་པ་པོ་གང་གིས་འཇུག་པར་བྱེད་པ་དང་། ཚུལ་ཇི་ལྟར་འཇུག་པར་བྱེད་པ་དང་། དགོས་པ་ཅིའི་ཕྱིར་འཇུག་པར་བྱེད་པ་སྟེ་བཞིའོ། །ཞེས་སོ། །གཉིས་པ་དེ་དག་རྒྱས་པར་བཤད་པ་ལ་རྣམ་པ་བཞི་ལས། དང་པོ་གང་ལ་འཇུག་པ་ནི། །གང་ལ་ཡི་གེ་ཐམས་ཅད་ལ། །ཞེས་པས་བསྟན། དེ་ཡང་རྗེས་འཇུག་གི་ཡི་གེ་བཅུ་བོ་དེ་དག་འཇུག་ཡུལ་ཡི་གེ་གང་དང་གང་ལ་འཇུག་པ་ནི་མིང་གཞིའི་ཡི་གེ་ཐམས་ཅད་ལ་བྱེ་བྲག་མེད་པར་འཇུག་པ་ཡིན་ནོ། །ཞེས་པའོ། །གཉིས་པ་གང་གིས་འཇུག་པ་ནི། །གང་གིས་བཅུ་བོ་དེ་དག་གིས། །ཞེས་པས་བསྟན། དེ་ཡང་ཡི་གེ་ཐམས་ཅད་ཀྱི་རྗེས་སུ་འཇུག་པ་པོ་ཡི་གེ་གང་དང་གང་ཞིག་གིས་འཇུག་པར་བྱེད་ཅེ་ན་སྔར་བཤད་པའི་རྗེས་འཇུག་ཡི་གེ་བཅུ་བོ་དེ་དག་གིས་འཇུག་གོ །ཞེས་པའོ། །གསུམ་པ་ཇི་ལྟར་འཇུག་པ་འཆད་པ་ལ་མདོར་བསྟན་པ་དང་རྒྱས་བཤད་གཉིས་ལས། དང་པོ་ནི། ཇི་ལྟར་རྣམ་པ་གཉིས་ཡིན་ཏེ། །སྒྲ་ཡི་འཇུག་ཚུལ་དོན་གྱི་ཚུལ། །ཞེས་པས་བསྟན་ཏེ། རྗེས་འཇུག་རྣམས་ཚུལ་ཇི་ལྟར་འཇུག་པའང་རྣམ་པ་གཉིས་ཀྱི་སྒོ་ནས་ཤེས་པར་བྱ་དགོས་པ་ཡིན་ཏེ། རྗེས་འཇུག་ཞུགས་ཚུལ་གྱིས་སྒྲ་དྲག་ཞན་དུ་གྱུར་པ་སྒྲ་ཡི་འཇུག་ཚུལ་དང་། དེ་ལྟར་ཞུགས་པས་དོན་ཅི་ཞིག་སྟོན་པ་དོན་གྱི་འཇུག་ཚུལ་ལོ། །ཞེས་པའོ། །གཉིས་པ་རྒྱས་བཤད་ལ་སྒྲའི་འཇུག་ཚུལ་དང་དོན་གྱི་འཇུག་ཚུལ་གཉིས་ལས། དང་པོ་ལའང་། དྲག་ཞན་སྤྱིར་འཇུག་ཚུལ་དང་། ནང་གསེས་ཞིབ་ཏུ་འཇུག་ཚུལ་གཉིས་ལས། དང་པོ་ནི། ཕོ་གསུམ་མོ་གཉིས་མ་ནིང་གསུམ། །དྲག་ཞན་བར་མ་གསུམ་དུ་འཇུག །ཅེས་པ་སྟེ། དེའང་རྗེས་འཇུག་གི་ཡི་གེ་བཅུ་ལས་ཕོ་སྐྱེས་བུ་རབ་འབྲིང་ཐ་གསུམ་དང་། མོ་མོ་ཙམ་དང་ཤིན་ཏུ་མོ་གཉིས། མ་ནིང་འགྱུར་དང་མཚན་གཉིས་མཚན་མེད་གསུམ་སྟེ་འཇུག་ཚུལ་གྱི་སྒོ་ནས་དབྱེ་བ་དེ་རྣམས་རིམ་པ་བཞིན་དུ་ཕོ་གསུམ་མིང་གཞིའི་ཡི་གེ་གང་ལ་ཞུགས་ཀྱང་རྗོད་པའི་སྒྲ་གདངས་དྲག་པར་འགྱུར་བས་དྲག་པར་འཇུག་པ་དང་། དེ་བཞིན་དུ་མོ་གཉིས་ཞན་པར་འཇུག་པ་དང་། མ་ནིང་བར་མ་སྟེ་རན་པར་འཇུག་པ་དང་གསུམ་དུ་འཇུག་གོ །ཞེས་སོ། །དེ་ལྟར་དྲག་ཞན་བར་མ་གསུམ་དུ་འཇུག་པའི་རྒྱུ་མཚན་དེས། སྤྱིར་བཏང་རྗེས་འཇུག་ལ་ཕོ་མོ་མ་ནིང་གསུམ་དུ་རྣམ་པར་བཞག་པའང་ཡིན་ནོ་ཞེས་ཞར་ལས་བསྟན་པར་གྲུབ་བོ། །གཉིས་པ་ནང་གསེས་ཀྱི་འཇུག་ཚུལ་ནི། དྲག་པ་གསུམ་ཉིད་ནང་ཕྲད་དམ། །གལ་ཏེ་ཞན་པ་ནང་ཕྲད་ན། །དེ་ལའང་ནང་གི་ཆ་ཤས་ཀྱིས། །དེ་ཡང་དྲག་ཞན་གཉིས་སུ་དབྱེ། །མ་ནིང་གསུམ་དུ་གང་གཏོགས་པ། །དྲག་དང་ཕྲད་ན་དྲག་པར་འགྱུར། །ཞན་དང་ཕྲད་ན་ཞན་པར་འགྱུར། །གཉིས་ཀ་དག་དང་ཕྲད་གྱུར་ན། །དེ་ནི་གཉིས་ཀ་ཅན་དུ་འགྱུར། །གཉིས་ཀ་དག་དང་མ་ཕྲད་ན། །གང་དུ་ཡང་ནི་མི་འགྱུར་རོ། །དེས་ན་འགྱུར་དང་མཚན་གཉིས་དང་། མཚན་མེད་དག་དང་གསུམ་དུ་འདོད། །དེ་ནི་སྒྲ་ཡི་འཇུག་ཚུལ་ལོ། །ཞེས་པས་བསྟན། དེ་ཡང་རྟགས་ངོས་འཛིན་གོང་དུ་སོང་བ་ལྟར་རྗེས་འཇུག་ལ་ནང་གསེས་ཀྱིས་རྟགས་བརྒྱད་དུ་དབྱེ་བ་ནི་སྒྲའི་འཇུག་ཚུལ་གྱི་དབང་གིས་ཡིན་པས་དེ་རྣམས་ལ་སྒྲའི་འཇུག་ཚུལ་ཐ་དད་པ་བརྒྱད་དུ་ཅི་ལྟར་དབྱེ་ཞེ་ན། དྲག་པ་གསུམ་སྟེ་ཕོ་ཡིག་སྐྱེས་བུ་རབ་འབྲིང་ཐ་གསུམ་ནི་རྗེས་འཇུག་ཉིད་ནང་ཕྲད་དུ་གྱུར་པ་ལ་ལྟོས་ནས་དབྱེ་སྟེ་མིང་གཞི་གང་གི་མཐར་ཡང་རུང་རྗེས་འཇུག་གི་ཕོ་ཡིག་རྣམས་ཡང་འཇུག་དང་བཅས་ཞུགས་པས་སྒྲ་དྲག་པ་གཞིར་བཞག་པའི་ནང་གསེས་དྲག་འབྲིང་གང་རུང་དུ་གྱུར་པའི་ཆ་ནས་སྐྱེས་བུ་རབ་འབྲིང་གཉིས་སུ་འབྱེད་ཅིང་། ཡང་འཇུག་མེད་པར་ཞུགས་པས་སྒྲ་དྲག་པའི་ཞན་པར་འགྱུར་བའི་ཆ་ནས་སྐྱེས་བུ་ཐ་མར་འབྱེད་པའི་ཕྱིར། འདིར་དམ་ཞེས་པ་སྡུད་པའི་ཚིག་ཕྲད་དེ་གཤམ་དུ་དབྱེ་ཞེས་གསུངས་པ་དང་སྦྲེལ་བའི་སླད་དུའོ། །དེ་བཞིན་དུ་གལ་ཏེ་ཞན་པ་སྟེ་མོ་ཡིག་རྣམས་རྗེས་འཇུག་ནང་ཕྲད་ཀྱིས་མིང་གཞིར་ཞུགས་པ་ཡོད་ན་དེར་ལྟོས་པས། དེ་དག་ལའང་ནང་གི་ཆ་ཤས་སྒྲ་འཇུག་དྲག་ཞན་སོགས་ཀྱིས། སྤྱིར་ཞན་པ་དེ་ལ་ཡང་ནད་གསེས་དྲག་ཞན་གཉིས་སུ་དབྱེ་སྟེ། ཡང་འཇུག་དང་བཅས་པའི་མོ་ཡིག་ཞུགས་པ་མོ་ཙམ་དང་། ཡང་འཇུག་མེད་ན་ཤིན་ཏུ་མོར་འབྱེད་པའི་ཕྱིར་རོ། །དེ་བཞིན་དུ་འགྱུར་བ་སོགས་མ་ནིང་གསུམ་དུ་གང་ཞིག་གཏོགས་པར་གྱུར་པའི་རྗེས་འཇུག་གི་ཡི་གེ་དེ་རྣམས་ནི་མིང་གཞིར་འཇུག་ཚུལ་དང་རྗེས་འཇུག་ནང་ཕྲད་གཉིས་ཀ་ལ་ལྟོས་ནས་དབྱེ་སྟེ། དེ་རྣམས་མིང་གཞིའི་ཡི་གེ་དྲག་པ་དང་ཕྲད་པར་གྱུར་ན་ཡང་འཇུག་ཡོད་མེད་ཇི་ལྟར་རུང་སྒྲ་དྲག་པར་འགྱུར་ཞིང་། ཞན་པ་དང་ཕྲད་པར་གྱུར་ན་ཡང་འཇུག་མེད་པའི་ཚེ་ཞན་པར་འགྱུར་བ་དང་། མིང་གཞི་ཞན་ཅིང་ཡང་འཇུག་དྲག་པའི་བར་དུ་ཆུད་པས་དྲག་ཞན་གཉིས་ཀ་དག་དང་ཕྲད་པར་གྱུར་ན། མ་ནིང་དེ་རྣམས་ནི་སྒྲ་དྲག་ཞན་གཉིས་ཀ་ཅན་དུ་འགྱུར་བ་དང་། མིང་གཞི་དྲག་ཞན་གཉིས་ཀ་དག་དང་མ་ཕྲད་པ་སྟེ་བར་མ་མ་ནིང་གི་ཡི་གེ་རྣམས་ལ་ཞུགས་པའི་ཚེ་ན་ཡང་འཇུག་ཡོད་མེད་ཇི་ལྟར་རུང་སྒྲ་དྲག་ཞན་གང་དུ་ཡང་ནི་མི་འགྱུར་བར་བར་མ་ཉིད་དུ་གནས་པར་འགྱུར་རོ། །དེ་ལྟར་གསུམ་དུ་འགྱུར་བའི་རྒྱུ་མཚན་དེས་ན་རིམ་པ་བཞིན་དུ་འགྱུར་བ་མ་ནིང་དང་མཚན་གཉིས་མ་ནིང་དང་མཚན་མེད་མ་ནིང་དག་དང་གསུམ་དུ་འབྱེད་པར་འདོད་པ་ཡིན་ཏེ། དེ་དག་ནི་སྒྲ་ཡི་འཇུག་པའི་ཚུལ་ལོ། །ཞེས་པའོ། །གཉིས་པ་དོན་གྱི་འཇུག་ཚུལ་ལའང་མདོར་བསྟན་པ་དང་རྒྱས་པར་བཤད་པ་གཉིས་ལས། དང་པོ་ནི། དོན་ནི་རྣམ་པ་གཉིས་ཡིན་ཏེ། །སྔ་མ་གང་ལྟར་གྱུར་པ་དང་། །ཕྱི་མ་གང་ལྟར་འགྱུར་བའོ། །ཞེས་པས་བསྟན་ཏེ། རྗེས་འཇུག་རྣམས་དོན་གང་དང་གང་ལ་འཇུག་པར་འགྱུར་བའི་ཚུལ་ནི་རྣམ་པ་གཉིས་ཡིན་ཏེ། སྔ་མ་རྗེས་འཇུག་ཉིད་གང་ལ་ཞུགས་ཤིང་གནས་པའི་མིང་དེའི་དོན་གང་ལྟར་དེ་ཇི་ལྟ་བུ་ཞིག་ཏུ་གྱུར་པ་དང་། ཕྱི་མ་རྗེས་འཇུག་གམ་མཐའ་དེའི་མིང་མཐའ་ལ་སོགས་པ་འདྲེན་ཚུལ་གྱི་དོན་གང་ལྟར་འགྱུར་བ་ཤེས་པར་བྱ་བའོ། །ཞེས་སོ། །གཉིས་པ་དེ་རྒྱས་པར་འཆད་པ་ལ་གཉིས་ལས། དང་པོ་སྔ་མ་གང་ལྟར་གྱུར་པ་ནི། སྔ་མ་སྔོན་འཇུག་ལྔ་བཞིན་སྦྱར། །ཞེས་པས་བསྟན། དེ་ཡང་རྗེས་འཇུག་རྣམས་གང་ལ་ཞུགས་པའི་མིང་དེ་ཉིད་མིང་མཐའ་སོགས་ལ་ལྟོས་ནས་སྔ་མར་གྲུབ་པ་དེས་བདག་གཞན་སོགས་དོན་ཅི་ཞིག་སྟོན་པ་ནི་མིང་དེའི་སྔོན་དུ་གནས་པ་སྔོན་འཇུག་ལྔ་ལས་གང་ཞིག་ཡིན་པ་དེའི་དོན་དང་ཅི་ལྟ་བ་བཞིན་དུ་སྦྱར་ནས་རྟོགས་པར་བྱའོ། །ཞེས་པའོ། །དེས་ན་གཙོ་བོར་སྔོན་འཇུག་གི་ནུས་པ་དང་སྦྱར་ནས་རྗེས་འཇུག་རྣམས་ཀྱིས་ཀྱང་ཅི་རིགས་པར་བདག་གཞན་དང་དུས་གསུམ་གྱི་དོན་རྣམས་དེ་དང་མཚུངས་པར་སྟོན་པར་འགྱུར་བའི་ཚུལ་ཅུང་ཟད་ཅིག་སྨོས་ན་སྐྱེས་བུའི་རྟགས་རབ་འབྲིང་ཐ་གསུམ་ཅི་རིགས་པར་དུས་འདས་པ་ལ་འཇུག་པ་ནི། བརྟགས། བསྒྲུབས། བཀག བལྟས། བཅད། བརྒྱབ་ལྟ་བུ་དང་། དེ་རྣམས་བྱེད་པ་བདག་ལ་འཇུག་པ་ནི། འདོགས་བྱེད། གཞིབས་བྱེད། འཇོག་བྱེད་ལྟ་བུ་སོགས་དང་། དེ་རྣམས་བྱ་བ་གཞན་ལ་འཇུག་པ་ནི། གདགས་བྱ། གཏུབས་བྱ། དགག་བྱ་ལ་སོགས་པ་ལྟ་བུ་དང་། དེ་རྣམས་བདག་གཞན་གྱི་དབྱེ་བས་མ་བསྡུས་པའི་ད་ལྟ་དང་མ་འོངས་པ་ཅི་རིགས་པར་འཇུག་པ་ནི། འདེགས་བཞིན་པ། གཏུབས་བཞིན་པ་སོགས་དང་། གཤེགས་པར་འགྱུར། འགྲུབ་པར་འགྱུར་ལ་སོགས་ལྟ་བུའོ། །དེ་བཞིན་དུ་མོ་རྟགས་གཉིས་འདས་པ་ལ་འཇུག་པ་ནི། བསྐངས། བསྐུམས། བཀང་། བཀྲམ། ལྟ་བུ་རྣམས་དང་། དེ་ཉིད་བདག་ལ་འཇུག་པ་ནི། འདོམས་བྱེད། འགེངས་བྱེད་སོགས་དང་། གཞན་ལ་འཇུག་པ། གདམས་བྱ། བཟའ་བྱ། དགང་བྱ་སོགས་དང་། ད་ལྟ་དང་མ་འོངས་པར་འཇུག་པ་ནི། འདོམས་བཞིན་པ། གསུངས་བཞིན་པ་སོགས་དང་། འདོམས་པར་འགྱུར་ལ་སོགས་པ་ལྟ་བུའོ། །མ་ནིང་གསུམ་འདས་པ་ལ་འཇུག་པ། བསྟནད། བཀནད། བསྟརད། བཅོལད། མནནད། བགརད། བསལད། མཁྱེནད། མཚརད། འཁྲུལད། ལྟ་བུ་རྣམས་དང་། དེ་ཉིད་བདག་ལ་འཇུག་པ་བསྟུནད་བྱེད། གནོན་བྱེད་སོགས་དང་། གཞན་ལ་འཇུག་པ། བསྟེན་བྱ། བསྐུར་བྱ་སོགས་དང་། ད་ལྟ་དང་། མ་འོངས་པར། བསྟུན་བཞིན་པ་སོགས་དང་། དཀོན་པར་འགྱུར་ལ་སོགས་པ་ལྟ་བུ་རྣམས་སོ། །དེ་དག་ནི་སྔོན་འཇུག་ལ་ལྟོས་པ་གཙོ་བོར་གསུངས་པའི་དབང་དུ་བྱས་པ་སྟེ་གཞན་དུ་སྔོན་འཇུག་མེད་པར་དེ་དག་ལ་འཇུག་པའང་། གྲགས། བྱབས་སོགས། སྒྲོགས་བྱེད། ཀླུབས་བྱེད་སོགས་དང་། རྟོགས་བྱ་རྟོགས་བཞིན་པ། རྟོགས་པར་འགྱུར་སོགས་དང་། སྤངས། ཁེངས། སྟོངས་བྱེད། སྤངས་བྱ། རངས་བཞིན་པ། སྟོངས་པར་འགྱུར་སོགས་དང་། རྩལད། སྦྲནད། སྟོནད་བྱེད། སྦྱར་བྱ། སྟོནད་བཞིན་པ། ཕྱིནད་པར་འགྱུར་ལ་སོགས་པ་ལྟ་བུ་སྟེ་རྒྱ་ཆེར་ཤེས་པར་བྱའོ། །གཞན་ཡང་གཞུང་འདིར་དམིགས་བསལ་དུ་མ་བསྟན་ཀྱང་རྗེས་འཇུག་ས་ཡིག་གི་འཇུག་ཡང་འཇུག་གཉིས་ཀ་དང་། ད་ཡིག་ཡང་འཇུག་གིས་དུས་འདས་པ་ཤིན་ཏུ་མང་ཞིང་འ་ཡིག་འདས་པ་ལ་མི་འཇུག་པའི་ཁྱད་པར་ཙམ་ཡོད་པ་ནི་དཔེར་བརྗོད་དག་གིས་གསལ་ལ། གཞན་རྗེས་འཇུག་རྣམས་སྐུལ་ཚིག་ལ་འཇུག་པའི་ཚུལ་ཡང་། གཞུང་འདིའི་དངོས་ཤུགས་གཉིས་ཀར་མ་བསྟན་ཡང་ཞར་ལས་རྟོགས་པར་བྱ་བའི་ཕྱིར་སྨོས་ན། ས་ད་གཉིས་དང་ཁྱད་པར་ས་ཡིག་སྐུལ་ཚིག་ལ་འཇུག་པ་མང་སྟེ། ཀློགས་ཤིག བསློབས་ཤིག བྱོས་ཤིག སོལད་ཅིག ཉོནད་ཅིག་སོགས་ལྟ་བུ་དང་། རྗེས་འཇུག་གཞན་དེར་འཇུག་པ། ཤོག་ཅིག ཟུངས་ཤིག མ་སྨྲ་ཞིག་ལྟ་བུ་སྟེ། དེས་ན་སྐུལ་ཚིག་ཕར་ཆེར་ལ་སྔོན་འཇུག་མེད་ཅིང་། སྔོན་འཇུག་སྦྱར་དགོས་པའང་ཡོད་དེ། བཀྲོས་ཤིག མ་འགྲོ་ཞིག་སོགས་ཏེ་རྒྱ་ཆེར་ཤེས་པར་བྱའོ། །གཉིས་པ་ཕྱི་མ་གང་ལྟར་འགྱུར་བ་འཆད་པ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ཕྱི་མ་དག་གི་འདྲེན་ཚུལ་ནི། །ཞེས་པ་སྟེ། ཕྱི་མ་མིང་མཐའ་དང་རྣམ་དབྱེ་དག་གི་ཐོབ་ཐང་གི་དོན་ཇི་ལྟར་འཇུག་པར་འགྱུར་བའི་ཚུལ་ནི་སྔ་མའི་རྗེས་འཇུག་དང་ཕྱི་མའི་བརྗོད་བྱ་དག་ལ་ཅི་རིགས་པར་ལྟོས་པའི་སྒོ་ནས་འདྲེན་པའི་ཕྱིར་དེའི་ཚུལ་སྨྲོས་པ་ནི། ཞེས་པའོ། །གཉིས་པ་རྒྱས་བཤད་ལ་མིང་མཐའ་འདྲེན་ཚུལ་དང་། རྣམ་དབྱེ་སོགས་འདྲེན་ཚུལ་འཆད་པ་སྟེ་གཉིས་ལས་དང་པོ་ནི། ཕོ་ཡིས་ཕོ་ཡི་མིང་མཐའ་དྲང་། །མོ་ཡིས་མོ་ཡི་མིང་མཐའ་དྲང་། །མ་ནིང་གིས་ནི་མ་ནིང་ངོ་། །ཞེས་པས་བསྟན་ཏེ། མིང་སྔ་མའི་མཐའི་རྗེས་འཇུག་ཕོ་ཡིས་ནི། ཕོ་ཡི་མིང་མཐའ་སྟེ་དེ་ཉིད་ཀྱི་ཕྱི་མའི་མིང་གཞིའི་ཕོ་ཡིག་དྲང་བ། རྟག་པ། སྟོནད་ཀ འགྲུབ་པ། བཟླས་པ་ལྟ་བུ་དང་། དེ་བཞིན་དུ་མིང་མཐའི་རྗེས་འཇུག་མོ་ཡིས་མོ་ཡི་མིང་མཐའ་སྟེ་མིང་གཞིའི་མོ་ཡིག་དྲང་བ། གང་བ། གསུམ་ག དཔའ་བ་ལྟ་བུ་སོགས་དང་། རྗེས་འཇུག་མ་ནིང་གིས་ནི་ཕྱི་མའི་མིང་གཞིའི་མ་ནིང་དྲང་བ། སྟོན་ཁ། དབྱར་ཁ། རལ་ཁ་སོགས་ཏེ། མིང་མཐའ་འདྲེན་ཚུལ་དེ་དག་ཏུ་ངེས་པར་མཐོང་ངོ་། །ཞེས་པའོ། །དེ་ལྟར་མིང་མཐའ་རྟགས་མཚུངས་ཁོ་ནར་འདྲེན་པ་ལྟ་བུར་གསུངས་པ་ནི་ཕོ་མོའི་རྟགས་ཕལ་ཆེར་གྱིས་དེ་ལྟར་འདྲེན་པས་གཙོ་ཆེ་བ་ཙམ་ལ་དགོངས་པ་སྟེ། འཆད་འགྱུར་ལྟར། དེ་ཉིད་རང་གི་སྒྲ་མཐུན་པའི། །ཞེས་གསུངས་པ་དང་སྦྱར་ན་འདྲེན་ཚུལ་གཞན་ཡང་ཡོད་པར་འགྲུབ་ཅིང་མངོན་སུམ་གྱིས་ཀྱང་འགྲུབ་སྟེ། བརྗོད་བདེའི་དབང་དུ་བྱས་ནས་མ་ནིང་གིས་མོ་རྟགས་དྲང་བ། ཤར་བ། འཐུལ་བ། སོགས་དང་། མོ་རྟགས་ཀྱིས་ཕོ་ཡིག་དྲང་བ། དམ་པ། སྟོང་པ་སོགས་དང་། ཕོ་ཡིག་གིས་རྟགས་དྲང་བ། བཙས་མ། ལྟད་མོ། སྟག་མ་སོགས་ཏེ། དེས་ན་འདིར་བརྗོད་བདེ་གཙོ་ཆེར་བྱས་པའང་ཡོད་པ་ཤེས་པར་བྱའོ། །གཉིས་པ་རྣམ་དབྱེ་སོགས་འདྲེན་ཚུལ་ལའང་། སྤྱིར་འདྲེན་ཚུལ་དང་། ནང་གསེས་འཇུག་ཚུལ་བཤད་པ་གཉིས་ལས། དང་པོ་ནི། མིང་མཐའ་དེ་དག་ཉིད་ཀྱིས་ནི། །དེ་ཉིད་རང་གི་སྒྲ་མཐུན་པའི། །ཆོས་དངོས་ལས་དང་བྱེད་པ་དང་། །སྦྱིན་དང་འབྱུང་ཁུངས་འབྲེལ་བ་དང་། །གནས་དང་བོད་པའི་སྒྲ་ཡང་དྲང་། །གཞན་ཡང་སླར་བསྡུ་ལྷག་བཅས་དང་། །འབྱེད་སྡུད་བསྣན་དང་བདག་པོ་དང་། །དགག་སྒྲུབ་རྒྱན་དང་དུས་ལའང་འཇུག །དེ་དག་སྔ་ཤུགས་འདྲེན་པས་འབྱུང་། །ཞེས་པས་བསྟན། དེ་ཡང་བཤད་མ་ཐག་པའི་མིང་མཐའ་སྔ་ཕྱི་དེ་དག་ཉིད་ཀྱིས་ནི། མིང་མཐའ་དེ་ཉིད་རང་གི་རྟགས་མཚུངས་པའམ་བརྗོད་པ་བདེ་བས་སྒྲ་མཐུན་པར་འགྱུར་བའི་རྣམ་དབྱེ་དང་པོ་ཆོས་དངོས་ངོ་བོ་ཙམ་བརྗོད་པ་དང་། གཉིས་པ་ལས་སུ་བྱ་བ་དང་། གསུམ་པ་བྱེད་པའི་སྒྲ་དང་། བཞི་བ་སྦྱིན་པའི་ཡུལ་གྱིས་མཚོན་ནས་ཆེད་དུ་བྱ་བ་དང་། ལྔ་བ་འབྱུང་ཁུངས་དང་། དྲུག་པ་འབྲེལ་བ་དང་། བདུན་པ་གནས་གཞི་དང་། དེར་འཐུས་པ་བོད་པའི་སྒྲ་དང་བརྒྱད་པོ་ཡང་དྲང་བར་བྱ་ཞིང་། དེ་བཞིན་དུ་གཞན་ཡང་རྣམ་དབྱེའི་ཡན་ལག་ཏུ་གྱུར་པའམ་མ་གྱུར་པའི་ཚིག་ཕྲད། སླར་བསྡུ་དང་། ལྷག་བཅས་དང་། འབྱེད་སྡུད་དང་། བསྣན་པ་དང་། བདག་པོ་དང་། དགག་པ་དང་། སྒྲུབ་པ་དང་། ཚིག་རྒྱན་དང་། དུས་ཏེ་ཚེ་སྐབས་དང་བཅས་པ་ལའང་འཇུག་པའི་སྒྲ་ལ་སོགས་པ་དེ་དག་རྣམས་ཀྱང་སྔ་མ་མིང་མཐའི་ཤུགས་ཀྱིས་འདྲེན་པར་བྱས་པས་སྦྱར་ཚུལ་ལེགས་པར་འབྱུང་བ་ཡིན་ནོ། །ཞེས་པ་སྟེ་དེ་དག་རྣམས་ཇི་ལྟར་དྲངས་པ་ནི་སུམ་ཅུ་བའི་སྐབས་སུ་བཤད་ཟིན་ཏོ། །གཉིས་པ་ནང་གསེས་ཀྱི་འཇུག་ཚུལ་འཆད་པ་ལ། མདོར་བསྟན་རྒྱས་བཤད་གཉིས་ལས་དང་པོ་ནི། དེ་དག་ནང་གསེས་གང་འཇུག་པ། །མཐར་སྦྱར་འོག་མའི་མིང་དོན་ལས། །ཞེས་པ་སྟེ། དེ་ལྟར་རྣམ་དབྱེ་དང་ཚིག་ཕྲད་དེ་དག་གི་ནང་གསེས་གང་དང་གང་ཞིག་འཇུག་པ་ནི་གཙོ་བོར་རྣམ་དབྱེའམ་ཕྲད་དང་བཅས་པའི་མིང་ཚིག་དེའི་མཐར་སྦྱར་རྒྱུའི་འོག་མའི་མིང་དོན་ལས་ཤེས་པར་བྱའོ། །ཞེས་པའོ། །གཉིས་པ་རྒྱས་བཤད་ལ་རྣམ་དབྱེའི་ནང་གསེས་གང་ཞིག་འཇུག་པ་དང་། ཕྲད་ཀྱི་ནང་གསེས་གང་ཞིག་འཇུག་པ་གཉིས་ལས་དང་པོ་ནི། སྤྱི་འཇུག་ཡོད་དམ་བྱེད་པ་ཡོད། དེ་བཞིན་ཆེད་བྱེད་རྟེན་བྱེད་དང་། །ལས་བྱ་བླང་བྱ་བསྒྲུབ་པར་བྱ། །སྔོན་དུ་འོས་པ་གནས་པའང་། །ཞེས་པས་བསྟན་ཏེ། དེ་ལ་རྣམ་དབྱེའི་ནང་གསེས་གང་དང་གང་འཇུག་པ་ནི་རྣམ་དབྱེ་སྦྱར་བའི་མིང་བདུད་རྩི་ལྟ་བུ་ལ་དེའི་རྗེས་སུ་སྤྱི་ལ་འཇུག་པའི་སྒྲ་གང་ཞིག་ལྟ་བུ་ཡོད་ན་མིང་སྔ་མ་ལ་རྣམ་དབྱེ་དང་པོ་འཇུག་པ་ཡིན་ཡང་བོད་སྐད་ལ་མིང་རྐྱང་དང་རྣམ་དབྱེ་སོ་སོར་མཚོན་མི་ནུས་པས་མིང་རྐྱང་དེ་གར་གནས་པ་བདུད་རྩི་གང་ཞིག་ལྟ་བུར་འགྱུར་བ་ཉིད་དམ། མིང་དེའི་མཐར་འཚོ་བར་བྱེད་ལྟ་བུ་བྱེད་པའི་སྒྲ་ཡོད་ན་རྣམ་དབྱེ་གསུམ་པ་འཇུག་པས་བདུད་རྩིས་འཚོ་བར་བྱེད། ཅེས་པར་འགྱུར་བ་དང་། དེ་བཞིན་དུ་སྦྱར་དེ་མིང་དེའི་མཐར་ཆེད་དུ་བྱེད་པའི་སྒྲ་མོས་པ་ལྟ་བུ་ཡོད་ན་རྣམ་དབྱེ་བཞི་བ་འཇུག་པས་བདུད་རྩི་ལ་མོས་པ་ཞེས་སུ་འགྱུར་བ་དང་། བརྟེན་ལྟ་བུ་རྟེན་བྱེད་ཀྱི་སྒྲ་ཡོད་ན་བདུན་པ་འཇུག་པས་བདུད་རྩི་ལ་བརྟེན་ཅེས་པ་དང་། བསྒྱུར་ལྟ་བུ་ལས་སུ་བྱ་བའི་སྒྲ་ཡོད་ན་གཉིས་པ་ཐོབ་པས་བདུད་རྩིར་བསྒྱུར་ཅེས་དང་། བླང་བར་བྱ་ལྟ་བུ་བླང་བྱའི་སྒྲ་ཡོད་ན་ལྔ་བ་འཇུག་པས་བདུད་རྩི་ལས་བླང་བར་བྱ་ཞེས་དང་། བསྒྲུབ་པར་བྱ་བ་རྒྱ་མཚོ་ལྟ་བུའི་སྒྲ་ཡོད་ན་དྲུག་པ་འཇུག་པས་བདུད་རྩིའི་རྒྱ་མཚོ་ཞེས་དང་། སྔོན་དུ་འབོད་པར་འོས་པའི་མིང་མདུད་རྩི་མ་ལྟ་བུ་གནས་པ་ལ། ལས་བཅོལ་རྒྱུ་ལྟ་བུ་འབོད་པར་འོས་པའི་དོན་ཡོད་ནའང་རྣམ་དབྱེ་དང་པོ་འཇུག་ཅིང་བོད་པ་གསལ་བྱེད་ཀྱི་སྒྲ་དང་སྦྱར་བར་བྱ་སྟེ། བདུད་རྩི་མ་ཀྱེ་བདག་ལ་འཆི་མེད་སྩོལ་ལ་སོགས་པར་ཤེས་པར་བྱའོ། །ཞེས་པའོ། །འམ་ཞེས་པ་ནི་ཕྱི་མ་དང་སྦྲེལ་བའི་ཕྱིར་སྡུད་པའི་ཚིག་ཕྲད་དོ། །གཉིས་པ་ཕྲད་ཀྱི་ནང་གསེས་གང་ཞིག་འཇུག་པ་ནི། གཞན་ཡང་ཚིག་དོན་འོག་མ་ལས། །བསྡུས་རྒྱུ་ཡོད་དམ་མེད་པ་དང་། །གོང་མ་ལས་ཀྱང་དེ་བཞིན་ཏེ། །རྣམ་གྲངས་དག་ཀྱང་བཀོད་པ་ལས། །བསྐྱར་བ་ཡོད་དམ་མེད་པ་དང་། །ཕོ་སྒྲ་དང་ནི་མོ་སྒྲ་དག །མིང་གི་མཐའ་ན་ཡོད་མེད་དང་། །རྒྱན་དུ་གྱུར་པ་རྣམས་ལ་ཡང་། །དོན་ལ་བསྙེགས་པ་ཡོད་མེད་དང་། །བསྟན་བྱ་ལྷག་མ་ཡོད་མེད་དང་། །ཚིག་དོན་རྫོགས་དང་མ་རྫོགས་ཀྱིས། །དེ་དག་ནང་གསེས་རྣམ་པར་དབྱེ། །ཞེས་པས་བསྟན་ཏེ། གཞན་ཡང་མིང་མཐའ་ཚིག་ཕྲད་ཀྱི་བྱེ་བྲག་གང་ཞིག་འདྲེན་པར་འགྱུར་བ་ནི་ཕལ་ཆེར་དེའི་མཐར་སྦྱར་རྒྱུའི་ཚིག་དོན་འོག་མ་ལས་ཤེས་དགོས་ཤིང་ཕྱི་ཚིག་ལ་ལྟོས་མ་དགོས་པར་བརྗོད་འདོད་ཙམ་གྱིས་འགྲུབ་པའང་ཡོད་པ་དཔེར་ན་ཚིག་དོན་འོག་མ་དེ་ཉིད་དང་མཚུངས་པ་ལས་སྔ་མ་བསྡུ་རྒྱུ་ཡོད་པ་ཡིན་ན། མིང་སྔ་མ་སྔ་མའི་མཐར་སྔ་མ་སྡུད་པའི་ཚིག་ཕྲད་སྦྱར་བར་བྱ་སྟེ། ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཡི་རང་སྟེ། ལྟ་བུ་ཉིད་དམ་གལ་ཏེ་བསྡུ་རྒྱུ་མེད་པ་ལའང་འཇུག་པ་དང་། ཚིག་དོན་གོང་མ་དེ་ཉིད་དང་མཚུངས་པ་ལས་ཀྱང་ཕྱི་མ་བསྡུ་རྒྱུ་ཡོད་པ་ཡིན་ན་དེ་ལའང་གོང་བཞིན་དུ་ཕྱི་མ་བསྡུ་བའི་ཚིག་ཕྲད་འཇུག་པ་ཡིན་ཏེ། ལྷས་ཀྱང་བཏུད་ན་མིས་ལྟ་ཅི་སྨྲོས་ལྟ་བུ་དང་། མཇུག་ཏུ་བྱ་ཚིག་ལྟ་བུར་ལྷན་ཅིག་ཏུ་སྦྲེལ་བའི་ཕྱིར་ཚིག་དོན་སྔ་མ་ལ་ཕྱི་མ་བསྣན་དགོས་པ་ཡོད་ནའང་སྡུད་པའི་བྱེ་བྲག་བསྣན་པའི་ཕྲད་སྦྱར་ཏེ། སངས་རྒྱས་པའི་གྲུབ་མཐར་མ་ཟད། ཕྱི་རོལ་པའང་ཞེས་པར་བྱ་ལྟ་བུ་དང་། ཕྱི་མར་མིང་ཚིག་གི་རྣམ་གྲངས་དག་ཀྱང་གཅིག་གམ་གཉིས་སམ་མང་བོ་བཀོད་པ་ལས། དེ་ལའང་གལ་ཏེ་བསྐྱར་བ་ཡིན་ནའང་སྔ་མ་སྔ་མར་རྣམ་གྲངས་ཀྱི་འབྱེད་པའམ་སྡུད་པའི་ཕྲད་སྦྱར་བར་བྱ་སྟེ། དོན་བསྐྱར་བ་ལ། ཉི་འོད་ནི་གསལ་བའམ་སྣང་བའོ། །འཆི་མེད་དམ། རྣམ་སད་དམ། མིག་མི་འཛུམ་ནི་ལྷའོ། །ལྟ་བུ་དང་། ཚིག་དོན་གཉིས་ཀ་བསྐྱར་བ་ལ། བསྐོར་ཅིང་བསྐོར་ཅིང་སླར་ཡང་དེ་རུ་འབབ། ཞེས་པ་དེ་ལྟ་བུ་ཡོད་དམ། གལ་ཏེ་མེད་པ་ལའང་འཇུག་པ་དང་། མིང་གི་མཐར་ཕོ་སྒྲ་སྟེ་པུ་ལིངྒའི་སྒྲ་གསར་དུ་སྦྱར་བ། ཡོད་ན་མིང་མཐའ་དེ་ཉིད་བདག་པོའི་སྒྲར་འགྱུར་བ་ལ། རྟ་བ། བྱེད་པ་པོ། ལྟ་བུ་དང་། བདག་པོའམ། དགག་པའི་དོན་དུ་གསར་དུ་སྦྱར་བ་མ་ཡིན་པའི་མིང་མཐའ་ཉིད་པུ་ལིངྒའམ། སྟྲི་ལིངྒར་གནས་པ་ནི་ངོ་བོའམ་བྱ་བ་གང་ཡིན་དེ་ཉིད་དུ་སྒྲུབ་པའི་སྒྲར་འགྱུར་བ། རྟག་པ། དམ་པ། བླ་མ། གོང་མ་སོགས་ལྟ་བུ་དང་ ནི། མིང་གི་མཐར་དགག་དོན་དུ་སྦྱར་བའི་མོ་སྒྲ་སྟེ་སྟྲི་ལིངྒའི་སྒྲར་གཏོགས་པ་ཡོད་ན་ངོ་བོའམ་བྱ་བ་གང་ཡིན་དེ་ཉིད་དགག་པའི་སྒྲར། འཆི་མེད། གཟུགས་མེད། ལྟ་བུ་དང་། ཡོད་མིན་མེད་མིན་ལྟ་བུ་དག་སྟེ། དེ་རྣམས་ཀྱང་མིང་གི་མཐའ་ན་ཡོད་མེད་གང་ལྟར་འགྱུར་ལ་སོགས་པའང་བརྗོད་ཟིན་མ་རག་པ་ལྟར་དང་། ཚིག་དོན་སྔ་མ་དང་། ཆོས་མཐུན་པའི་ཕྱི་ཚིག་གཞི་གཅིག་ཏུ་བསྡུ་རྒྱུ་ཡོད་ན། སྔ་མ་ལ་མཐུན་པའི་རྒྱན་ཏུ་གྱུར་པའི་ཕྲད་སྦྱར་ཏེ། མཛེས་ཀྱང་མཛེས་ལ་འོད་ཀྱང་འཚེར་ལྟ་བུ་དང་། སྔ་ཕྱི་ཆོས་མི་མཐུན་པ་གཞི་གཅིག་ཏུ་བསྡུ་ན་སྔ་མར་མི་མཐུན་པའི་རྒྱན་འཇུག་སྟེ། ལྷ་ཉིད་ཡིན་ཡང་བདུད་ཀྱི་བདུད་ལྟ་བུ་སྟེ་རྒྱན་དུ་གྱུར་པའི་ཚིག་ཕྲད་དེ་དག་རྣམས་ལ་ཡང་ངེས་པར། དོན་ལ་བསྙེགས་པ་ཡོད་ན་མི་སྦྱར་མི་རུང་ཞིང་། དེ་འདྲ་མེད་པར་ཚིག་མཛེས་པར་བྱེད་པའི་རྒྱན་ཙམ་ཁོ་ན་ཡིན་ན་སྦྱོར་རམ་མི་སྦྱོར་ཇི་ལྟར་འདོད་པ་རུང་བ་དང་། ཚིག་དོན་སྔ་མའི་འཕྲོས་དེ་མ་ཐག་ཏུ་བསྟན་བྱ་ལྷག་མ་ཡོད་ན་སྔ་མ་ལ་ལྷག་བཅས་ཀྱི་ཕྲད་འཇུག་སྟེ། རྟག་སྟེ་འཇིག་པ་མེད་པའི་ཕྱིར། ལྟ་བུ་དང་ཚིག་གི་དོན་དེ་ཉིད་ཀྱི་འཕྲོས་དེ་མ་ཐག་ཏུ་བསྟན་བྱ་མེད་པས་རྫོགས་པ་ཡིན་ན་སླར་བསྡུའི་ཕྲད་སྦྱར་ཏེ། རྟག་གོ །རྫོགས་སོ། །ལྟ་བུ་རྣམས་དང་། དེའང་ཇི་ལྟར་དབྱེ་ན་ཚིག་དོན་རྫོགས་པ་དང་མ་རྫོགས་ཀྱིས་རྣམ་དབྱེ་དང་ཕྲད་དེ་དག་གི་ནང་གསེས་གང་དང་གང་ཞིག་འཇུག་ཅིང་དོན་ཅི་འདྲ་ཞིག་སྟོན་པ་རྣམ་པར་དབྱེ་བར་བྱའོ། །ཞེས་སོ། །དེ་ཡང་རྣམ་དབྱེ་དང་ཕྲད་ཀྱི་ཁྱད་པར་ནི་ཕྲད་ཀྱང་ཡིན་ལ་རང་གི་ནུས་པས་ཀྱང་བྱ་བ་མཚོན་ནུས་པ་ནི་རྣམ་དབྱེ་བདུན་པོ་དང་། གཞན་ལ་མ་ལྟོས་པར་རང་གཅིག་པུས་བྱ་བ་མཚོན་མི་ནུས་པ་རྣམ་དབྱེའི་རྐྱེན་དུ་གྱུར་པའི་སྦྱོར་བྱེད་ཙམ་ནི་ཚིག་ཕྲད་དོ། །བཞི་བ་རྗེས་འཇུག་གི་ཡི་གེ་རྣམས་དགོས་པ་ཅིའི་ཕྱིར་འཇུག་པ་འཆད་པ་ལ། རྗེས་འཇུག་གི་དགོས་པ་དངོས་བཤད་པ་དང་། ཞར་བྱུང་དུ་ཡི་གེའི་འཇུག་པ་སྤྱིའི་དགོས་པ་བཤད་པ་གཉིས་ལས་དང་པོ་ནི། ཅིའི་ཕྱིར་འཇུག་པར་བྱེད་ཅེ་ན། །ཡི་གེའི་ཁོངས་ན་མིང་དབྱུང་སྟེ། །མིང་གི་ཁོངས་ནས་ཚིག་ཕྱུངས་ནས། །ཚིག་གིས་དོན་རྣམས་སྟོན་པར་བྱེད། །ཅེས་པས་བསྟན། དེ་ཡང་རྗེས་འཇུག་གི་ཡི་གེ་བཅུ་བོ་དེ་རྣམས་དགོས་པ་ཅིའི་ཕྱིར་དུ་འཇུག་པར་བྱེད་ཅེ་ན། སྔོན་འཇུག་ཡོད་མེད་གང་ཡང་རུང་བའི་མིང་གཞིའི་ཡི་གེ་གཅིག་གམ་གཉིས་སམ་དུ་མ་འདུས་པ་ཡིན་ཡང་རུང་རྗེས་འཇུག་ཡི་གེ་གང་རུང་ཞིག་མ་ཞུགས་པར་དོན་གྱི་ངོ་བོ་སྟོན་པའི་མིང་དུ་གྲུབ་པ་མི་སྲིད་པས་ན་ཡི་གེའི་ཁོངས་ནས་མིང་དབྱུང་བར་བྱ་བའི་ཕྱིར་ཏེ། མིང་དེ་ཡང་གཅིག་གམ་གཉིས་སམ་དུ་མ་སྦྲེལ་དུ་ཟིན་ཀྱང་མཚམས་སྦྱོར་བར་བྱེད་པའམ་དོན་གསལ་བར་བྱེད་པའི་རྣམ་དབྱེ་དང་ཕྲད་སོགས་ཕལ་ཆེར་རྗེས་འཇུག་ལས་བྱུང་ཞིང་རྗེས་འཇུག་ལ་ལྟོས་པ་དེ་རྣམས་མ་ཞུགས་ན་དོན་གྱི་ཁྱད་པར་བརྗོད་པའི་ཚིག་ཏུ་འགྲུབ་པ་མི་སྲིད་པའི་ཕྱིར་མིང་གི་ཁོངས་ནས་ཚིག་རྣམས་ཕྱུང་ནས་ཚིག་དེ་དག་གིས་འཇིག་རྟེན་དུ་དོན་གྱི་ངོ་བོ་དང་ཁྱད་པར་རྣམས་ཀྱང་སྟོན་པར་བྱེད་པས་ན་དོན་མཚོན་པའི་བརྗོད་པ་ཇི་སྙེད་པའང་རྗེས་འཇུག་གི་ཡི་གེ་རྣམས་འཇུག་པའི་དགོས་པར་གྲུབ་བོ། །ཞེས་སོ། །གཉིས་པ་ཞར་བྱུང་ཡི་གེའི་འཇུག་པ་སྤྱིའི་དགོས་པ་བཤད་པ་ལ། ཡི་གེའི་འཇུག་པ་རྣམས་ཀྱི་རང་བཞིན་གྱི་དགོས་པ་བཤད་པ་དང་། ཡི་གེའི་འཇུག་པ་ལྟར་སྦྱོར་བའི་ཚུལ་གྱི་བསྟན་བཅོས་འདི་ཉིད་བརྩམས་པའི་དགོས་པ་བཤད་པ་གཉིས་ལས་དང་པོ་ལའང་དགོས་པ་ལྡོག་ཕྱོགས་ནས་བསྟན་པ་དང་། ཉིང་དགོས་ལྡོག་ཕྱོགས་ནས་བསྟན་པའོ། །དང་པོ་ནི། མོ་ཡི་ཡི་གེ་མེད་པ་ན། །ཕོ་ཡིག་བརྗོད་པ་མེད་པར་འགྱུར། །ཕོ་ཡིག་དེ་དག་རྣམས་ལ་ཡང་། །འཇུག་པར་བཅས་པ་མེད་ན་ནི། །མིང་དང་ཚིག་ཀྱང་གསལ་མི་ནུས། །མིང་ཚིག་གསལ་བ་མེད་ན་ནི། །དོན་རྣམས་བརྗོད་པར་མི་འགྱུར་རོ། །ཞེས་པས་བསྟན་ཏེ། མོ་ཡི་ཡི་གེ་གི་གུ་སོགས་ཨཱ་ལི་བཞི་བོ་མེད་པ་ན་ཕོ་ཡིག་ཀཱ་ལི་རྣམས་ཁོ་ནས་བརྗོད་པ་མེད་པར་འགྱུར་ཏེ་ཨཱ་ལི་རྣམས་ལ་ལྟོས་པའི་བརྗོད་པ་དེ་སྙེད་མི་ཚང་བར་འགྱུར་བའི་ཕྱིར་དང་། ཕོ་ཡིག་ཀཱ་ལི་དེ་དག་རྣམས་ལ་ཡང་ཨཱ་ལི་དང་ལྡན་མི་ལྡན་ཇི་ལྟར་ཡང་འཇུག་པར་བཅས་པ་སྟེ་འཇུག་པའི་ཡི་གེ་བཅུ་མེད་པར་གྱུར་ན་ནི་དོན་གྱི་ངོ་བོ་སྟོན་པའི་མིང་དང་དོན་གྱི་ཁྱད་པར་སྟོན་པའི་ཚིག་ཀྱང་གསལ་བར་མི་ནུས་ཏེ། ཡི་གེའི་ཁོངས་ནས་མིང་དབྱུང་དགོས་ཚུལ་སོགས་བཤད་མ་ཐག་པ་ལྟར་ངེས་པའི་ཕྱིར་དང་། མིང་དང་ཚིག་གསལ་བར་གྱུར་པ་མེད་ན་ནི་དོན་གྱི་རྣམ་པ་རང་དང་གཞན་ལ་མཚོན་ཞིང་གོ་བར་བྱེད་པ་རྣམས་ཀྱི་བརྗོད་པ་ཡང་ཡོད་པར་མི་འགྱུར་རོ། །དེས་ན་ཨཱ་ལི་རྣམས་ནི་ཨཱ་ལིའི་ཡི་གེ་རྣམས་ཀྱི་བརྗོད་པའི་ཡན་ལག་ཡོངས་སུ་རྫོགས་པའི་ཕྱིར་དང་། འཇུག་པའི་ཡི་གེ་རྣམས་ནི་གསལ་བར་བྱ་བའི་ཕྱིར་དང་། ཡི་གེའི་འཇུག་པ་མཐའ་དག་དང་ལྡན་པའི་མིང་ཚིག་རྣམས་ནི་དོན་ཇི་སྙེད་པ་དག་མཚོན་ཞིང་བརྗོད་པའི་ཕྱིར་འཇུག་པ་ཡིན་པས་ཡི་གེ་དང་ཡི་གེའི་ཚོགས་དང་སྦྱོར་བ་དེ་རྣམས་ནི་རང་གི་ངང་གིས་དོན་ནམ་དགོས་པ་དང་བཅས་པ་ཡིན་ནོ། །ཞེས་པའོ། །གཉིས་པ་ཉིང་དགོས་ལྡོག་ཕྱོགས་ནས་བསྟན་པ་ནི། དེ་ལྟར་གྱུར་ན་འཇིག་རྟེན་དུ། །དོན་མཚོན་བརྗོད་པ་ཀུན་ཀྱང་མེད། །རིག་བྱེད་སྨྲ་བའང་ཡོད་མི་འགྱུར། །ཉན་ཐོས་རང་རྒྱལ་སངས་རྒྱས་ཀྱི། །བསླབ་པ་རྣམས་ཀྱང་མེད་པར་འགྱུར། །ཞེས་པས་བསྟན་ཏེ། དེ་ལྟར་མིང་ཚིག་བརྗོད་པ་ཐམས་ཅད་མེད་པར་གྱུར་ན་ནི་འཇིག་རྟེན་འདི་ཉིད་དུ་དོན་མཚོན་པར་བྱེད་པའི་བརྗོད་པ་སྟེ་ལུང་དུ་སྟོན་པའི་སྒྲ་སྐད་ཀུན་ཀྱང་མི་འབྱུང་བས་མེད་ལ། དེས་ན་དེ་ལ་ལྟོས་པའི་འཇིག་རྟེན་པ་དང་ཐུན་མོང་བའི་བཟོ་གནས་དང་རྩིས་དང་སྙན་ངག་སོགས་རིག་བྱེད་སྨྲ་བ་མ་ལུས་པའང་ཡོད་པར་མི་འགྱུར་ཞིང་། འཇིག་རྟེན་ལས་འདས་པར་འཇུག་པའི་ཤེས་བྱ་ཐུན་མོང་མིན་པ་ཉན་ཐོས་དང་རང་རྒྱལ་དང་རྫོགས་པའི་སངས་རྒྱས་ཀྱི་བསླབ་པ་རྣམས་སྟོན་ཅིང་སྨྲ་བ་དག་ཀྱང་མེད་པར་འགྱུར་བ་དེའི་ཕྱིར། མིང་ཚིག་བརྗོད་པ་ཐམས་ཅད་ལེགས་པར་སྦྱར་བ་འཇིག་རྟེན་དུ་ཡོད་པའི་རང་བཞིན་གྱི་དགོས་པ་ནི་འཇིག་རྟེན་དང་འཇིག་རྟེན་ལས་འདས་པའི་ཤེས་བྱ་དང་བསླབ་བྱ་མཐའ་དག་ཅི་རིགས་པར་སྟོན་ཅིང་སྨྲ་བ་འབྱུང་བ་དང་། དེ་དག་ལ་ཞུགས་ཤིང་བླང་དོར་ཕྱིན་ཅི་མ་ལོག་པར་བྱས་པ་ལ་བརྟེན་ནས་འདི་དང་གཏན་གྱི་བདེ་བ་དམ་པ་ཕུན་སུམ་ཚོགས་པར་འབྱུང་བ་རྣམས་ཡིན་ནོ། །ཞེས་པའོ། །གཉིས་པ་ཡི་གེའི་འཇུག་པ་སྟོན་པའི་བསྟན་བཅོས་འདིའི་དགོས་པ་བསྟན་པ་ལ་དངོས་དང་། དགོས་པ་དེ་འགྲུབ་པར་སྨོན་པ་གཉིས་ལས་དང་པོ་ནི། ཇི་ལྟར་འཇིག་རྟེན་སེམས་ཅན་རྣམས། །ཕུང་བོ་ཁམས་དང་སྐྱེ་མཆེད་དང་། །གྲུབ་མཐའ་གཞན་ཡང་ཡོད་ན་ཡང་། །རང་ཉིད་ཀྱིས་ནི་མི་ཤེས་བཞིན། །དེ་བཞིན་ཡི་གེའི་འཇུག་ཚུལ་རྣམས། །སྨྲ་བ་ཀུན་ལ་གནས་གྱུར་ཀྱང་། །རང་ཚུལ་དེ་ཉིད་མི་ཤེས་པས། །དོན་ལ་སྤྱོར་བ་ག་ལ་ཤེས། །དེ་ཕྱིར་སྨྲ་བའི་དབང་ཕྱུག་གི །རྗེས་སྨྲས། ཞེས་གསུངས་ཏེ། དཔེ་ཇི་ལྟར་ན་འཇིག་རྟེན་གྱི་སེམས་ཅན་རྣམས་ལ། གཟུགས་ཕུང་ལ་སོགས་པའི་ཕུང་བོ་དང་། མིག་གི་ཁམས་ལ་སོགས་ཁམས་དང་། མིག་གི་སྐྱེ་མཆེད་ལ་སོགས་པའི་སྐྱེ་མཆེད་རྣམས་རང་རང་ལ་ཡོད་པ་དང་དེར་མ་ཟད། གྲུབ་པའི་མཐའ་བཞག་པ་གཞན་ཡང་གྲངས་ཅན་པའི་དེ་ཉིད་ཉེར་ལྔ་དང་། ནང་བའི་ཐེག་ཆེན་ལུགས་རྣམ་ཤེས་ཚོགས་བརྒྱད་སོགས་གཞན་དང་གཞན་ཡང་ཡོད་ཅིང་། ཐོག་མ་མེད་པའི་དུས་ནས་ལྷན་ཅིག་ཏུ་འགྲོགས་པ་ཡིན་ན་ཡང་ཐོག་མ་ནས་དེ་ལྟ་བུའི་རྣམ་བཞག་རང་ཉིད་ཀྱིས་ནི་ཕྱོགས་ཙམ་ཡང་མི་ཤེས་བཞིན་ཡོད་པ་ལ། དེ་བཞིན་དུ་རང་རང་གི་ཡི་གེའི་ཇི་ལྟར་འཇུག་པའི་ཚུལ་རྣམས་ཀྱང་ཡུལ་སོ་སོའི་ལུང་སྟོན་པའི་སྒྲ་སྐད་ཀྱི་སྨྲ་བ་ཀུན་ལ་རང་བཞིན་གྱིས་གནས་པར་གྱུར་པ་སྟེ་མེད་པ་མི་སྲིད་ཀྱང་གཞན་གྱི་བརྡ་སྤྲོད་པ་ལ་སོགས་པའི་རྐྱེན་མེད་པར་ཐོག་མ་ནས་ཡི་གེ་རྣམས་མིང་ཚིག་སོགས་ལ་ཇི་ལྟར་འཇུག་པའི་ངང་ཚུལ་དེ་ཉིད་ཀྱང་མི་ཤེས་པས་ན་མིང་ཚིག་ལ་སོགས་པ་དེ་རྣམས་བྱེ་བྲག་ཕྱེ་ནས་དོན་ལ་ཇི་ལྟར་སྦྱོར་བའི་ཚུལ་ག་ལ་ཤེས་ཏེ་མི་ཤེས་སོ། །དེ་བས་ན་ཐུ་མི་བདག་གིས་གངས་ཅན་པ་རྣམས་ལ་རབ་ཏུ་བརྩེ་བའི་བློས་འདི་དང་གཏན་གྱི་བདེ་བ་སྒྲུབ་པའི་ཐབས། ཐུན་མོང་དང་ཐུན་མོང་མིན་པའི་རིག་བྱེད་དང་བསྟན་བཅོས་དང་བསླབ་པ་གསུམ་དང་ཐོས་བསམ་སྒོམ་གསུམ་སོགས་ལེགས་པར་སློབ་ཅིང་ཤེས་སུ་རུང་བ་བརྡ་ཇི་ལྟར་སྦྱོར་བའི་ཚུལ། ཡི་གེ་དང་མིང་དང་ཚིག་གི་འཇུག་པ་རྣམས་ཚུལ་བཞིན་དུ་རྟོགས་པ་ལ་རག་ལས་པར་མཐོང་ནས་དགོས་པ་ཁྱད་པར་ཅན་དེ་ལྟ་བུའི་ཕྱིར་དུ་ཡུལ་འདི་ཉིད་ཀྱི་སྐད་དང་རྗེས་སུ་འཚམས་པའི། ཡི་གེའི་འཇུག་པ་གསལ་བར་ཕྱེད་པའི་བསྟན་བཅོས་འདི་འཕགས་ཡུལ་བ་ལ་སོགས་པའི་སྨྲ་བའི་དབང་ཕྱུག་མཁས་པ་དག་གི་བརྡ་སྤྲོད་པའི་བསྟན་བཅོས་འཆད་པའི་ཚུལ་གྱི་རྗེས་སུ་འབྲང་ནས་སྨྲས་པ་ཡིན་ནོ། །ཞེས་པའོ། །གཉིས་པ་ནི། འདི་ཀུན་རྟོགས་གྱུར་ཅིག ཅེས་པ་སྟེ། དེ་ལྟར་ཡི་གེའི་འཇུག་པ་ལེགས་པར་སྦྱར་བའི་ཚུལ་འདི་གངས་ཅན་གྱི་སྐྱེ་བོ་ཀུན་གྱིས་རྟོགས་ནས་མིང་ཚིག་བརྗོད་པ་ཐམས་ཅད་ལ་རྨོངས་པ་མེད་པར་སྨྲ་བའི་དབང་ཕྱུག་ཆེན་པོར་གྱུར་ཅིག ཅེས་པ་སྟེ། ཞར་ལ་སྔར་སྨྲོས་པའི་ཉིང་དགོས་དེ་རྣམས་ཀྱང་འགྲུབ་པའི་སྨོན་ལམ་མཛད་པ་ཡིན་ནོ། །དེས་ན་རེ་ཞིག་རྟགས་ཀྱི་འཇུག་པའི་འབྲུ་འགྲེལ་རྣམས་བཤད་ཟིན་ཏོ། །སླར་སྨྲས་པ། གངས་རིའི་ར་བས་འཁྱུད་ཀྱང་རྒྱལ་བསྟན་སྣང་བས་ཆེར་དབེན་མུན་གླིང་འདིར། །ཟླ་ཉི་འབུམ་ཕྲག་གིས་ཀྱང་འགྲན་བཟོད་མ་ཡིན་དམ་ཆོས་འོད་སྟོང་ཅན། །འདྲེན་པའི་ཁྱུང་སྔོན་སྐྱེས་ཀྱང་སྔོན་ནས་འགའ་མེད་ཐུ་མི་སམྦྷོ་ཊ། །དེ་གཞུང་འགྲེལ་བྱེད་དག་ཀྱང་ཕྱི་མར་བྱུང་ཀུན་དོན་མཐོང་མིན་བཞིན་སྨྲ། །དེ་ཚེ་ཡིན་དང་མ་ཡིན་པ། །འབྱེད་ཕྱིར་སླར་ཡང་ཐུ་མི་ཉིད། །སི་ཏུ་ཆོས་ཀྱི་སྣང་བ་རུ། འདི་ན་བྱོན་པ་དོན་དང་ལྡན། །འགའ་ཞིག་སྡེ་སྣོད་སྔ་འགྱུར་པའི། །བརྗོད་བྱའི་ནུ་ཞོས་འཚོ་བཞིན་དུ། །དེ་ལ་སླར་ཡང་འབུལ་བ་འདི། །འཛངས་པ་ལགས་སམ་གཟུར་གནས་དག །དེ་ཕྱིར་དེ་འདྲའི་རྣམ་ཐར་གྱིས། །མ་བསླད་བརྡ་སྦྱོར་རྩ་འགྲེལ་གཞུང་། །འདི་ལྟ་བུ་ལ་མི་བརྩོན་པའི། །ཐར་འདོད་འགའ་ཞིག་ཡོད་མ་ཡིན། །ཚུལ་དེ་ཡིད་ལ་ངེས་བྱས་ནས། །དང་པོའི་ལས་ཅན་མཐའ་དག་ལ། །ཕན་འདོད་བསམ་པས་བདག་གིས་ཀྱང་། །འགྲེལ་ཆེན་གཞུང་ནས་འདི་ཉིད་བཏུས། །དེ་ལས་བྱུང་བའི་དགེ་ཚོགས་ནི། །ཇི་སྟེ་འགའ་ཞིག་བསགས་ཡོད་ན། །དེའང་འཕྲལ་བདེའི་ཆེད་དུ་མིན། །རྣམ་མཁྱེན་ཁོ་ནའི་རྒྱུར་བསྔོའོ། །ཞེས་པའང་རྗེ་བཙུན་བླ་མ་དམ་པ་ཀུན་དགའ་རྒྱལ་མཚན་དཔལ་བཟང་པོའི་ཞལ་སྔ་ནས་དང་། རང་ཉིད་ཀྱི་རྡོ་རྗེའི་མཆེད་པོ་བསོད་ནམས་རིན་ཆེན་སོགས་ཀྱི་བཀས་བསྐུལ་ངོར་ལས་དང་པོ་བ་རྣམས་ལ་ཕན་པའི་ཕྱིར། ༧གྲུབ་དབང་རྫོགས་ཆེན་པ་ཡབ་སྲས་ཀྱི་བཀའ་འབངས་ཀྱི་ཐ་ཤལ་རྒྱལ་སྲས་གཞན་ཕན་མཐའ་ཡས་འོད་ཟེར་དུ་འབོད་པས་སི་ཏུའི་འགྲེལ་ཆེན་ལས་བཏུས་པ་སྟེ་འདི་ཉིད་ཤེས་ནས་སླར་གཞུང་དེ་ཉིད་ཞིབ་ཏུ་བལྟ་བ་གལ་ལོ། །དེས་ན་འགྲེལ་བ་གཞན་ལས་ཁྱད་པར་དུ་འཕགས་པའི་གཞུང་ལ་བརྟེན་པ་ཡིན་པས་ནོར་འཁྲུལ་མེད་ཕྱིར་ཀུན་གྱིས་བརྩོན་པ་མི་གཡེལ་བར་འདི་ལ་ནན་ཏན་བགྱིད་པར་ཞུའོ།། །།ཨོཾ་སྭ་སྟི། ཟླ་བྲལ་ཐུབ་དབང་མཆོག་དེའི་ལུང་རྟོགས་ཀྱི། །བསྟན་པ་རིན་ཆེན་གངས་རིའི་ལྗོངས་འདི་རུ། །གསལ་བྱེད་འཇམ་དཔལ་དབྱངས་དངོས་ཐུ་མི་ཡིས། །བོད་ལ་ཉེར་མཁོའི་བསྟན་བཅོས་བརྒྱད་མཛད་པའི། །ཐོག་མ་སུམ་ཅུ་བ་དང་རྟགས་འཇུག་གཉིས། །རིག་གནས་ཀུན་གྱི་གཞི་མར་ལེགས་དགོངས་ནས། །སྨྲ་བའི་ཉི་མ་རྒྱལ་སྲས་ཆོས་ཀྱི་རྗེའི། །མཁྱེན་རབ་ལས་འཁྲུངས་བློ་གསལ་གོ་བདེའི་ཕྱིར། །དགོངས་དོན་ཟབ་མོའི་གཏེར་མཛོད་སྒོ་འཕར་ནི། །འབྱེད་བྱེད་འཕྲུལ་གྱི་ལྡེ་མིག་འདི་རྨད་བྱུང་། །གང་ཞིག་ཐོས་བསམ་དོན་གཉེར་ལྡན་པ་ལ། །ཆོས་སྦྱིན་འཛད་མེད་སྤར་དུ་སྒྲུབས་བྱེད་པ། །རྗེ་དེའི་གསུང་གི་བདུད་རྩིར་སྤྱོད་པ་ཡི། །ཞལ་སློབ་རྣམས་ཀྱིས་བཞེངས་ཚེ་དོ་དམ་པ། །འོད་གསལ་གྱིས་བགྱིས་རྣམ་དཀར་དགེ་དེའི་མཐུས། །ཕན་བདེའི་འབྱུང་གནས་རྒྱལ་བསྟན་དར་ཞིང་རྒྱས། །སྐྱེ་དགུ་མ་ལུས་རྫོགས་ལྡན་དཔལ་གྱིས་འཚོ། །ཁྱད་པར་ཐོས་བསམ་སྒོམ་ལ་སྤྱོད་པ་ཡི། །སྐལ་བཟང་སྐྱེ་བོས་ས་འདི་ཡོངས་གང་ཞིང་། །རྒྱལ་བསྟན་ཡུན་རིང་གནས་པའི་བཀྲ་ཤིས་ཤོག །ཅེས་འཇམ་དབྱངས་ཐུ་མིས་མཛད་པའི་བརྡ་སྤྲོད་ཀྱི་གཞུང་སུམ་ཅུ་པ་དང་རྟགས་འཇུག་གཉིས་ཀྱི་འབྲུ་འགྲེལ་རྗེ་བླ་མས་གསུང་བ་འདི་ཉིད་ཐོས་བསམ་བྱེད་པ་རྣམས་ལ་མཆོག་ཏུ་ཕན་པར་རིག་ནས་རྗེ་དེ་ཉིད་ཀྱི་གདན་ས་ཐུབ་བསྟན་ཉིན་བྱེད་གླིང་དུ་སྤར་དུ་སྒྲུབ་སྐབས་སྤར་བྱང་ཉུང་ངུ་འདི་བཞིན་དགོས་ཞེས་དད་དམ་ཐོས་པའི་ནོར་གྱིས་ཕྱུགས་པའི་བླ་མ་དམ་པ་འོད་གསལ་སྙིང་བོ་ནས་ལྷ་རྫས་བཅས་བཀའ་ཕེབས་གནང་བཞིན་རྗེ་བླ་མའི་ཞལ་སློབ་ཀྱི་ཡང་མཐའ་སྤྲུལ་མིང་བ་ཐུབ་བསྟན་རྒྱལ་མཚན་དཔལ་བཟང་པོས་སྨྲས་པ་དགེ་ཞིང་བཀྲ་ཤིས་བར་གྱུར་ཅིག། དགེའོ། ། |