དཔེ་སྐྲུན་གསལ་བཤད།

༧གྲུབ་དབང་རྒྱལ་བ་རྫོགས་ཆེན་པའི་མཁན་རབས་གཉིས་པ། ཕྱི་མའི་དུས་སུ་ཡུལ་མདོ་ཁམས་ཀྱི་ལྗོངས་ན་སྔ་འགྱུར་རྙིང་མའི་འདུལ་བསྟན་གྱི་སྒྲོན་མེ་སྦར་བའི་གནས་བརྟན་ཆེན་མོ། ཁྱབ་བདག་བཀའ་འགྱུར་བ་རྒྱལ་སྲས་གཞན་ཕན་མཐའ་ཡས་ནི་དམ་པའི་ཚུལ་དགུའི་ཡོན་ཏན་གྱིས་ཕྱུག་པའི་མཁས་གྲུབ་གཉིས་ལྡན་གྱི་སྐྱེས་བུ་ཆེན་པོར་བྱོན་པ་ཡོངས་ལ་གྲགས་ཤིང་ཀུན་གྱིས་མངོན་པར་བསྟོད་མོད། ད་དུང་འོལ་སྤྱི་ཙམ་མིན་པར་རྗེ་འདི་ཉིད་ཀྱི་ཐུགས་བསྐྱེད་དང་ཕྲིན་ལས་ལ་ཞིབ་མོའི་བློས་རྗེས་དྲན་བྱས་ཚེ་སྨོན་ལམ་རྒྱ་མཚོའི་མཐུ་གྲུབ་པའི་འཕགས་ཆེན་དམ་པར་ཡང་དུ་ངེས་པ་མི་འདྲེན་པ་ག་ལ་སྲིད། ཁོང་ཉིད་དགུང་གྲངས་ལྔ་བཅུ་རྩ་དྲུག་ལས་ཞལ་མ་བཞུགས་ཀྱང་དུས་ཡུན་ཐུང་ངུ་འདིའི་ནང་རྒྱལ་བསྟན་སྤྱི་དང་ཁྱད་པར་སྔ་འགྱུར་པའི་བསྟན་པ་ལ་རླབས་ཆེན་གྱི་མཛད་རྗེས་རབ་དང་རིམ་པ་མངོན་པ་བྱུང་ཞིང་། ཐུགས་བསྐྱེད་དང་ཕྲིན་ལས་ཀྱི་མཛད་རྒྱུན་ཕྱི་མའི་དུས་སུའང་ཉམས་པ་མེད་པ་གོང་ནས་གོང་དུ་འཕེལ་བཞིན་པ་ནི་ཆེས་ངོ་མཚར་བ་ཞིག་སྟེ། དང་པོ། རྗེ་ཉིད་དགུང་གྲངས་ཉེར་དགུ་ཙམ་ན་རུ་དམ་ཤྲཱི་སེངྷའི་བཤད་གྲྭ་ཕྱག་བཏབ་ཅིང་མདོ་སྔགས་རིག་གནས་དང་བཅས་པའི་གཞུང་བཤད་ཀྱི་སྲོལ་བཙུགས་པ་ནི། བོད་ཁམས་ཁུལ་དུ་ཆེས་ཐོག་མའི་བཤད་གྲྭ་གཅིག་པོ་ཡིན་པ་སྟེ་འདིའི་སྔོན་དགོན་གནས་ཆེ་ཕྲ་རྣམས་སུ་འཆད་ཉན་ཐོས་བསམ་གྱི་སྲོལ་དར་ནའང་དམིགས་བསལ་མཚན་ཉིད་ཀྱི་སྡེ་གྲྭ་དང་བཤད་གྲྭ་ཞེས་མཚན་དུ་གྲགས་པ་མེད་པར་སྙམ། ཕྱིས་སུ་དུས་རབས་བཅུ་དགུ་པ་དང་ཉི་ཤུ་པའི་ནང་རིམ་པས་བཤད་གྲྭ་འདི་ཉིད་ལ་མིག་དཔེ་བྱས་ཏེ་ཁམས་ཕྱོགས་ཀྱི་སྔ་འགྱུར་རྙིང་མ་དང་། བཀའ་བརྒྱུད། ས་སྐྱའི་ཕྱོགས་སུ་བཤད་གྲྭ་ཆེ་ཕྲ་མང་པོ་ཆར་རྗེས་ཀྱི་མེ་ཏོག་བཞིན་རྡོལ་ཏེ་དབུས་གཙང་དང་ཨ་མདོའི་ཕྱོགས་སུའང་འཕེལ། གཉིས་པ། རྗེ་ཉིད་ཀྱིས་རུ་དམ་ཤྲཱི་སེངྷའི་ཆོས་གྲྭ་ནས་སྔ་འགྱུར་སྨད་འདུལ་གྱི་སྡོམ་བརྒྱུད་སྤེལ་ཞིང་གྲུབ་དབང་རྫོགས་ཆེན་པའི་ཆོས་བརྒྱུད་གཙོ་བོར་གྱུར་པའི་དགོན་སྡེ་ཆེ་ཕྲ་མང་པོར་གཞི་གསུམ་གྱི་ཕྱག་བཞེས་ནན་ཏན་གྱིས་སྤེལ་བའི་རྒྱུན་ཡོངས་སུ་འཕེལ་ཏེ། དེང་དུས་སྨད་འདུལ་ཞི་འཚོའི་སྡོམ་རྒྱུན་ལས་རབ་ཏུ་བྱུང་བ་དང་བསྙེན་པར་རྫོགས་པ་ཞིག་ཡིན་ཕྱིན་རྗེ་འདི་ཉིད་ཀྱི་སྡོམ་བརྒྱུད་ཏུ་མ་གྱུར་པ་མེད་ཅིང་སྔ་འགྱུར་རྙིང་ཕྱོགས་སུ་དགེ་འདུན་གྱི་སྡེ་ཆེན་པོས་ཡོངས་སུ་ཁྱབ་པ་བྱུང་། གསུམ་པ། དམ་པ་ཉིད་སྟོད་ཀྱི་གངས་རི་ཏི་སེ་ནས་སྨད་རྒྱ་ནག་གླང་ཆེན་འགྱིང་རིའི་བར་གནས་གཟིགས་སྒྲུབ་པ་མཛད་དེ་ཕེབས་ཤིང་། དེ་དག་གི་སྐབས་སུ་བཤེས་གཉེན་བཅུ་ཕྲག་ལྔ་ལྷག་གི་ཞལ་སྔ་ནས་བཀའ་བསྟན་མཆིས་སོ་ཅོག་གི་ལུང་དང་བཤད་པ། སྔ་འགྱུར་རྙིང་ལུགས་བཀའ་གཏེར་གྱི་སྨིན་ཁྲིད་མན་ངག་ཕྱག་བཞེས་བཅས་གསན་བསམ་ཕྱོགས་མེད་དུ་མཛད་དེ་ཁམས་ཕྱོགས་སུ་སྤེལ་བའི་རྒྱུན་ད་ལྟའི་བར་མ་ཉམས་པ་ཡོངས་སུ་འཕེལ་བ་སྟེ། རྒྱལ་བཀའ་རིན་པོ་ཆེ་ཁོ་ནའང་ལན་གྲངས་དུ་མར་གསུངས་པས་ཁྱབ་བདག་བཀའ་འགྱུར་པ་གཞན་ཕན་མཐའ་ཡས་ཞེས་མཚན་དུ་གྲགས་པ་བྱུང་། བཞི་པ། རྗེ་ཉིད་ཀྱིས་ཐུགས་སྲས་ཞལ་སློབ་མཁས་གྲུབ་ཀྱི་སྐྱེས་བུ་བཟང་ལ་མང་བ་བསྐྱེད་སྲིང་གནང་བ་ལས་དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་། མཁན་ཆེན་པདྨ་བཛྲ། ཨོ་རྒྱན་བསྟན་འཛིན་ནོར་བུ་སྟེ་ཉི་ཟླ་སྐར་གསུམ་ལྟ་བུའི་མཁས་གྲུབ་སྐྱེས་ཆེན་བྱོན་ཞིང་། དམ་པ་འདི་གསུམ་གྱི་སྐུ་ཚེ་གང་བོར་མཁས་ཚུལ་གསུམ་གྱིས་རྗེ་གང་གི་བཤད་སྒྲུབ་ཕྲིན་ལས་ཀྱི་རྒྱུན་བསྐྱངས་པའི་རྣམ་ཐར་རྨད་དུ་བྱུང་བ་སྟེ། ཞལ་སློབ་མཁས་གྲུབ་ཀྱི་ཁྱུ་ཚོགས་ལས་འཇམ་མགོན་མི་ཕམ་རྣམ་རྒྱལ་དང་། མཁན་ཆེན་གཞན་ཕན་སྣང་བ་རྣམ་གཉིས་བྱོན་པས་སྔ་འགྱུར་གཞུང་བཤད་ཀྱི་བསྟན་པ་རྒྱས་པར་བྱས་ཏེ་མཁས་པའི་ཚང་ཆེན་པོ་རྡོལ་བ་བྱུང་། ལྔ་པ། རྗེ་ཉིད་དགུང་གྲངས་བཞི་བཅུ་རྩ་གཅིག་པར་སྔ་འགྱུར་བཀའ་མའི་སྒྲུབ་འཕྲིན་ཐེངས་དང་པོ་བསྡུ་སྒྲིག་མཛད་དེ་གླེགས་བམ་ཐེག་དགུའི་གྲངས་ལྡན་ཤིང་པར་དུ་རྐོས་ཤིང་དབང་ལུང་གི་རྒྱུན་སྤེལ་བས་སྔ་འགྱུར་མདོ་སྒྱུ་སེམས་གསུམ་གྱི་ཟབ་པ་སྒྲུབ་སྡེའི་བསྟན་པའི་རྒྱུན་མཐུད་པར་བྱས་ཤིང་། དེ་ནས་ད་ལྟའི་བར་སྔ་འགྱུར་བཀའ་མ་རྒྱབ་ཆོས་བཅས་བསྡུ་སྒྲིག་ཐེངས་བཞི་བྱུང་བའི་ཕྲིན་ལས་ཀྱི་སྒོ་མོ་ཕྱེས་པའི་རྒྱུན་གོང་ནས་གོང་དུ་འཕེལ་བཞིན་པ་བཅས་སྐུ་ཚེའི་མཛད་ཆེན་ཁག་ལྔ་ཚན་གཅིག་ཏུ་སྙིང་པོར་དྲིལ་ན་དོན་ལ་ཁེལ་བར་སེམས་ཤིང་། མདོར་ན་རྗེ་འདི་ཉིད་ཕྱི་དུས་འདིར་མདོ་ཁམས་ཀྱི་ཕྱོགས་སུ་སྔ་འགྱུར་རྙིང་མའི་བསྟན་པ་དར་རྒྱས་ཆེ་བ་བྱུང་བའི་རྩ་ལག་ཉག་གཅིག་ཏུ་གྱུར་པ་མཁྱེན་སྤྱན་ཡངས་པ་ཀུན་ལ་སྣང་བྱེད་བཞིན་གསལ་བས་མང་དུ་སྨྲ་ག་ལ་དགོས། ད་ལམ་རྗེ་གང་གི་གསུང་འབུམ་ཐོར་བུར་ལུས་པ་རྣམས་བསྡུ་སྒྲིག་ཞུས་དག་གིས་དཔེ་སྐྲུན་ཇི་ལྟར་བྱས་པའི་ཚུལ་ནི། སྔར་དུས་ཤྲཱི་སེང་ཆོས་གྲྭར་བཞུགས་པའི་གསུང་འབུམ་དང་བཀའ་མ་པོད་དགུའི་ཤིང་པར་རྣམས་དུས་ཀྱི་གོད་ཆག་གིས་རྩ་མེད་དུ་གྱུར་ཞིང་ཐ་ན་ཡིག་རྙིང་ཁ་ཚང་བའི་ཕྱི་མོ་ཞིག་ཀྱང་མཐོང་བ་མེད་པར་གྱུར། གངས་ལྗོངས་རྒྱལ་བསྟན་ཡང་དར་གྱི་དུས་སུ་སྐྱབས་རྗེ་པདྨ་སྐལ་བཟང་མཆོག་ནས་ཐུགས་བསྐྱེད་གོ་ཆ་ལྷུར་བཞེས་ཀྱིས་ཤྲཱི་སེང་ཆོས་གྲྭ་ཆེན་མོ་སྐྱར་གསོའི་སྐབས་དཔེ་རྙིང་ལུས་པ་རྣམས་བསྡུ་སྒྲིག་གིས་གསུང་འབུམ་ཐོར་བུ་པོད་གཅིག་ཤིང་པར་དུ་རྐོས་པ་ནས་དཔེ་ལུང་གི་རྒྱུན་མ་ཆད་པའི་བཀའ་དྲིན་རྨད་དུ་བྱུང་། ཉེ་བའི་ལོ་ཤས་ནས་རྗེ་གང་གི་གསུང་གི་ཕྲིན་ལས་ལ་སྲི་ཞུའི་ལྷག་བསམ་ཆེར་བསྐྱེད་ཀྱིས་གསུང་ཚན་བཞུགས་སོ་ཅོག་ཀུན་འཚོལ་བསྡུ་ཅི་ནུས་བྱས་པས་འགའ་ཞིག་གསར་རྙེད་བྱུང་སྟེ་སྔར་གྱི་སྟེང་ཁ་སྣོན་བྱུང་བས་སྤྲོ་བ་རབ་ཏུ་འཕེལ། གསང་བ་སྙིང་པོའི་འགྲེལ་བའི་མ་དཔེ་ཁག་གཉིས་ཙམ་ལག་སོན་བྱུང་ཡང་མཇུག་མི་ཚང་བ་འདྲ་མཚུངས་སུ་འདུག་ཕྱིར་སྔར་ནས་རྩོམ་པ་མཇུག་མ་རྫོགས་པ་སྙམ་མོད། གལ་ཏེ་ཆོས་ཚན་འདི་ཉིད་ཀྱི་མཇུག་དང་། གཞན་དག་གསར་རྙེད་བྱུང་ཚེ་འདི་གའི་དཔེ་ཚོགས་བསྡུ་སྒྲིག་ཁང་ལ་འབྲེལ་གཏུག་གནང་བར་འཚལ་ཞེས་ཞུ་བ་དང་། ཐེངས་འདིར་ཆོས་ཚན་གྱི་གོ་རིམ་འཆོལ་བ་སྡེ་ཚན་དུ་སྒྲིག་ཅིང་ཡི་གེ་ནོར་བ་ལན་གྲངས་དུ་མར་ཞུས་དག་ནན་ཟབ་ཀྱིས་བཅོས་པར་བྱས་ཀྱང་དམ་པའི་གསུང་ལ་སྣོན་འཕྲིའི་སྐྱོན་དུ་གྱུར་པ་སྲིད་ཚེ་ཆོས་སྤྱན་ཡངས་པ་ཡོངས་ལ་བཟོད་གསོལ་དང་། ལེགས་བྱས་ཀྱི་དགེ་ཚོགས་འགྲོ་ཀུན་ཤེས་རབ་ཀྱི་མིག་དང་ལྡན་པའི་གྱུར་ཡོངས་སུ་བསྔོ་བ་ལགས་ན་དེ་བཞིན་མཐུན་འགྱུར་གནང་བར་ཞུ། །

གངས་ལྗོངས་མཁས་པའི་འབྱུང་གནས་རྫོགས་ཆེན་ཤྲཱི་སེང་ལྔ་རིག་ཆོས་གྲྭ་ཆེན་མོ་ནས་དཔེ་སྐྲུན་གྱི་དགོས་ཆེད་དུ་བསྟན་འཛིན་ལུང་རྟོགས་ཉི་མས་སྤེལ་བ་དགེ།