བྱང་ཆུབ་སྤྱོད་པའི་སྨོན་ལམ་ཕན་བདེའི་ལྗོན་པའི་འགྲེལ་བ་རྒྱལ་སྲས་ལམ་གྱི་ཤིང་རྟའི་བསྡུས་དོན།
༄༅། །བྱང་ཆུབ་སྤྱོད་པའི་སྨོན་ལམ་ཕན་བདེའི་ལྗོན་པའི་འགྲེལ་བ་རྒྱལ་སྲས་ལམ་གྱི་ཤིང་རྟའི་བསྡུས་དོན་བཞུགས་སོ། །བྱང་ཆུབ་སྤྱོད་པའི་སྨོན་ལམ་ཕན་བདེའི་ལྗོན་པ་ཞེས་བྱ་བའི་འགྲེལ་བ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །བློ་གྲོས་གདེངས་ཅན་དབང་པོའི་གཙུག་རྒྱན་དུ། །ལེགས་བཤད་ནོར་བུའི་ཕྲེང་བ་སྦྱིན་མཛད་པའི། །མཁས་གྲུབ་བླ་མ་དེ་ལ་ཕྱག་འཚལ་ནས། །དམ་པའི་གསུངས་ངག་འགྲོལ་ལ་བརྩོན་པར་བྱ། །གཞན་ལུགས་དགག་དང་རང་གཞུང་གཞག་པ་དང་། །དེ་ལ་འགལ་བ་སྤོང་བའི་ཚུལ་གསུམ་གྱིས། །བསྟན་བཅོས་རྩོམ་པར་མཁས་ལ་གྲགས་མོད་དེ། །དེ་འདྲའི་ནུས་པ་བདག་ལ་ཅི་ཞིག་ཡོད། །འོན་ཏེ་རང་དང་སྐལ་མཉམ་བྱི་པ་ལ། །ལུང་རིགས་ཕབས་ཀྱིས་བྲན་པའི་ཟས་མཆོག་ལས། །མན་ངག་ནུ་ཞོའི་གཏུང་བ་ཕན་ཆེ་བར། །མཐོང་ནས་གཏམ་འདི་སྨྲ་ལ་ཞུམ་པའང་མེད། །དེ་ལ་འདིར་ཅིའི་ཕྱིར་བྱང་ཆུབ་སྤྱོད་པའི་སྨོན་ལམ་ཕན་བདེའི་ལྗོན་པ་ཞེས་བྱ་སྙམ་པ་ལ། འདིས་ནི་བསྟན་བཅོས་འདིའི་དགོས་སོགས་ཆོས་བཞི་ཉེ་བར་བསྟན་ཏེ། བྱང་ཆུབ་སེམས་དཔའི་ལམ་འབྲས་བུ་དང་བཅས་པའི་སྤྱོད་པ་རླབས་པོ་ཆེ་རྣམས་ནི་འདིའི་བརྗོད་བྱ་ཡིན་ལ། དེ་གང་གིས་སྟོན་པར་བྱེད་པའི་སྨོན་ལམ་གྱི་ཚིག་ལེའུར་བྱས་པ་འདི་ནི་བརྗོད་བྱེད་དོ། །འདི་ལ་ལུང་རིགས་དང་མི་འགལ་བའི་ཐོས་བསམ་ལེགས་པར་བྱས་པའི་མཐུས་བརྗོད་བྱ་མངོན་པར་རྟོགས་པའི་རིམ་པ་རྣམས་མ་ནོར་བར་ཁོང་དུ་ཆུད་པ་ནི་དགོས་པ་ཡིན་ལ། དགོས་པ་དེ་ཉིད་གུས་རྟག་གི་སྦྱོར་བའི་བརྩོན་འགྲུས་དག་གིས་ཚུལ་བཞིན་དུ་བསྒོམ་པ་ལ་བརྟེན་ནས་མཐར་ཐུག་གི་ཕན་པ་དང་གནས་སྐབས་ཀྱི་བདེ་བ་མ་ལུས་པ་ལྷའི་དཔག་བསམ་གྱི་ལྗོན་པ་ལས་འདོད་དགུ་འབད་པ་མེད་པར་འབྱུང་བ་བཞིན་དུ་ལྷུན་གྱིས་འགྲུབ་པ་ནི་ཉིང་དགོས་ཏེ་དེ་དག་ཀྱང་བརྗོད་བྱ་རྗོད་བྱེད་ཤེས་བྱ་དང་ཤེས་བྱེད་དུ་འགྲེལ་བས་མཚོན་ཕན་ཚུན་རྒྱུ་འབྲས་དེ་བྱུང་འབྲེལ་དང་། ངོ་བོ་བདག་གཅིག་གིས་འབྲེལ་བ་སྟེ་གཉིས་པོ་གང་རུང་དུ་གྲུབ་པ་ནི་འབྲེལ་བ་ཡིན་ཞིང་། འདིའི་རྣམ་གཞག་ལ་མཁས་པ་ཁ་ཅིག་རྗོད་བྱེད་ཡན་ལག་ཅན་དུ་བྱས་ཏེ། བརྗོད་བྱ་དང་། དགོས་པ་དང་། ཉིང་དགོས་དང་། འབྲེལ་བ་སྟེ་ཡན་ལག་གི་ཆོས་བཞིར་བཤད་པ་དང་། གཞན་དག་བརྗོད་བྱ་རྗོད་བྱེད། དགོས་པ་དང་།དགོས་པའི་ཡང་དགོས་པ་སྟེ། འབྲེལ་བ་ཡན་ལག་ཅན་དུ་བྱས་པའི་དགོས་འབྲེལ་ཡན་ལག་བཞིར་བཤད་པའང་ཡོད་དེ། དེ་ལ་ཡང་བསྟན་བཅོས་ལུས་ལ་ཡོད་པའི་དགོས་སོགས་ཆོས་བཞི་དང་། དགོས་འབྲེལ་ངག་ལ་ཡོད་པའི་དགོས་སོགས་ཆོས་བཞིར་དབྱེ་བ་སོགས་ཡོད་མོད་དེ། འདིར་ནི་གཞན་བཏང་སྙོམས་སུ་བྱས་ཏེ། དང་པོ་ཉིད་སྨྲས་པའོ། །ཅིའི་ཕྱིར་དགོས་སོགས་ཆོས་བཞི་སྔོན་དུ་སྨྲས་སྙམ་པ་ལ། སློབ་དཔོན་དབྱིག་གཉེན་གྱིས་མཛད་པའི་རྣམ་བཤད་རིག་པ་ལས། མདོ་དོན་སྨྲ་བ་དག་གིས་ནི། །དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་མཚམས་སྦྱོར་བཅས། །བརྒལ་ལན་བཅས་ཏེ་བསྙད་པར་བྱ། །ཞེས་བསྟན་བཅོས་སྤྱིའི་འཆད་ཐབས་ཀྱི་ཆིངས་ལྔ་གསུངས་པ་འདི་ཉིད་ཀྱི་རྗེས་སུ་འབྲང་ནས་དགོས་པའི་དོན་སྔོན་དུ་བཤད་པའོ། །དེ་ལྟར་བསྟན་བཅོས་ཀྱི་མིང་གདགས་པ་ལའང་དོན་ལས་མིང་བཏགས་པ་དབུ་མ་བདེན་གཉིས་ཞེས་པ་ལྟ་བུ་དང་། དཔེ་ལས་མིང་བཏགས་པ་སྐྱེས་རབས་དཔག་བསམ་འཁྲི་ཤིང་ཞེས་པ་ལྟ་བུ་དང་། གཞུང་ཚད་ལས་མིང་བཏགས་པ་འདུལ་བ་སུམ་བརྒྱ་བ་ཞེས་པ་ལྟ་བུ་དང་། བསྟན་བཅོས་རྩོམ་པ་པོ་ལས་མིང་བཏགས་པ་འགྲེལ་བཤད་བུདྡྷ་པ་ལི་ཏ་ཞེས་བྱ་བ་ལྟ་བུ་སྟེ་ལུགས་མང་དུ་ཡོད་ཀྱང་། དཔལ་མར་མེ་མཛད་ཡེ་ཤེས་ཞབས་ཀྱི་ཞལ་སྔ་ནས་ནི། བསྟན་བཅོས་ཀྱི་མིང་མཐའ་དག་དོན་ལས་གདགས་པར་བཞེད་དེ། འདིར་ཡང་དེ་ཉིད་ཀྱི་རྗེས་སུ་འབྲང་ངོ་། །དེ་ལྟར་མཚན་དོན་གྱི་ཁོང་ནས་དགོས་པའི་དོན་ལེགས་པར་བཤད་ནས་བསྡུས་པའི་དོན་ལ་འཇུག་པར་བྱ་སྟེ། དེ་སྟོན་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པ་སྨྲས་ཏེ། དེ་ཡང་བཱོ་ངྷི་ས་ཏྭ་ཞེས་པ་བྱང་ཆུབ་སེམས་དཔའ་དང་། མ་ཧཱ་ས་ཏྭ་ཞེས་པ་སེམས་དཔའ་ཆེན་པོ་ཞེས་པར་འགྱུར་བ་ལས། བོ་ངྷིའི་སྒྲ་ཉེས་པ་མ་ལུས་པ་རང་བཞིན་གྱིས་བྱང་བས་དང་། ཡོན་ཏན་མཐའ་དག་ངང་གིས་ཆུབ་པའི་རྒྱུ་མཚན་གྱིས་བྱང་ཆུབ་སྟེ་ཆོས་ཐམས་ཅད་ཀྱི་རང་བཞིན་སྟོང་བ་ཉིད་ཀྱི་ཚིག་བླ་དྭགས་སོ། །དེ་སྐད་དུའང་འཇམ་དཔལ་རྣམ་པར་རོལ་བའི་མདོ་ལས། སྲིང་མོ་གཞན་ཡང་ཕུང་པོ་རྣམས་ནི་འཕགས་པ་རྣམས་ཀྱི་ཐ་སྙད་ཡིན་པས་བྱང་ཆུབ་ཀྱང་འཕགས་པ་རྣམས་ཀྱི་ཐ་སྙད་དོ། །ཕུང་བོ་རྣམས་ནི་ཐ་སྙད་མེད་པའི་རང་བཞིན་ཅན་ཏེ། བྱང་ཆུབ་ཀྱང་ཐ་སྙད་མེད་པའོ། །ཕུང་བོ་ལྔའི་རང་བཞིན་གང་ཡིན་པ་དེ་ནི་དེ་བཞིན་གཤེགས་པས་ཐུགས་སུ་ཆུད་པའི་ཆོས་ཐམས་ཅད་ཀྱི་རང་བཞིན་ཏེ། དེ་ནི་བྱང་ཆུབ་ཅེས་བྱའོ། །སྲིང་མོ་དེ་ལྟར་ན་ཕུང་བོ་ལྔའི་རང་བཞིན་ནི་བྱང་ཆུབ་ཀྱི་རང་བཞིན་ནོ། །བྱང་ཆུབ་ཀྱི་རང་བཞིན་ནི་ཆོས་ཐམས་ཅད་ཀྱི་རང་བཞིན་ཏེ། སྲིང་མོ་ཕུང་བོ་ལྔའི་རང་བཞིན་གང་ཡིན་པ་དང་། བྱང་ཆུབ་ཀྱི་རང་བཞིན་གང་ཡིན་པ་དེ་ནི་སེམས་ཅན་ཐམས་ཅད་ཀྱི་རང་བཞིན་ཡིན་ཏེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །ཞེས་དང་། དེ་ལྟ་བུའི་རང་བཞིན་དེ་ཡང་སྟོང་བ་ཉིད་ཡིན་པའི་ཚུལ། འཕགས་པ་ཀླུ་སྒྲུབ་ཀྱི་ཞལ་སྔ་ནས། མེ་ཡི་རང་བཞིན་ཚ་བ་དང་། །བུ་རམ་རང་བཞིན་མངར་བ་ལྟར། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་བ་ཉིད་དུ་གསུངས། །ཞེས་བྱ་བ་འདི་བཀའ་སྩལ་ཏོ། །དེ་ལྟར་ན་ཆོས་ཐམས་ཅད་ཀྱི་ཆོས་ཉིད་རང་བཞིན་གྱིས་རྣམ་པར་དག་པ་ནི་བྱང་ཆུབ་ཅེས་བྱ་བ་ཡིན་ཀྱང་། དེ་ཉིད་མངོན་དུ་བྱས་མིན་ལ་ལྟོས་ནས་གཞི་ལམ་འབྲས་བུའི་རྣམ་པར་བཞག་པ་ལས། འདིར་བདག་གི་ཁྱད་པར་སྟོན་པའི་ཕྱིར་ས་ཏྭ་ཞེས་པའི་སྒྲ་ཉེ་བར་སྦྱར་ཏེ། དེ་ཉིད་བརྟན་པ་དང་། བསྡུས་པ་དང་། རྟོགས་པ་གསུམ་ལས། སེམས་ཅན་དང་། སེམས་དཔའ་དང་། སྙིང་སྟོབས་ཆེ་བ་སྟེ་གསུམ་དག་ཏུ་འཇུག་པ་ལས། བརྟན་པའི་བྱང་ཆུབ་སེམས་དཔའ་ནི། དེ་བཞིན་ཉིད་མི་འགྱུར་བའི་དོན་གྱིས་གཞི་ལ་ཉེ་བར་སྦྱར་རོ། །བསྡུས་པའི་བྱང་ཆུབ་སེམས་དཔའ་ནི། ཚོགས་རྣམ་པར་སྡུད་པའི་སྒོ་ནས་ལམ་ལ་ཉེ་བར་སྦྱར་རོ། །རྟོགས་པའི་བྱང་ཆུབ་སེམས་དཔའ་ནི། ཡེ་ཤེས་མངོན་དུ་བྱས་པའི་ཁྱད་པར་ལས་འབྲས་བུའི་སར་ཉེ་བར་སྦྱར་རོ། །སེམས་ཅན་ལ་སོགས་པའང་བག་ཆགས་གསོག་པའི་གཞི་བྱེད་པའི་ཆ་ནས་དང་། ལམ་རྗེས་སུ་བསྒྲུབ་པ་ལ་སེམས་དཔའ་བའི་ཆ་ནས་དང་། གཞན་དོན་སྒྲུབ་པའི་སྙིང་རྗེའི་སྟོབས་ཆེན་པོ་དང་ལྡན་པ་རྣམས་ཀྱི་རྒྱུ་མཚན་ལས་གཞི་ལ་སོགས་པར་རིམ་བཞིན་སྦྱར་བར་བྱའོ། །དེ་ལྟར་ན་འདིར་ནི་རེ་ཞིག་གཉིས་སུ་མེད་པའི་ཡེ་ཤེས་ལ་སྒྲ་དེ་འཇུག་པའི་རྒྱུ་མཚན་གྱིས་སེམས་དཔའི་སྒྲ་ཉེ་བར་བཟུང་སྟེ། འདི་ཡང་འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་བློ་གྲོས་མི་ཟད་པས་ཞུས་པའི་ལེའུ་ལས་རིགས་ཀྱི་བུ་འདི་ལ་བྱང་ཆུབ་ནི་བརྡའམ་གདགས་པའམ་ཐ་སྙད་དུ་མི་དམིགས་ཤིང་། བྱང་ཆུབ་ལས་གུད་ན་བྱང་ཆུབ་ཀྱི་སེམས་ཀྱང་མི་དམིགས། བྱང་ཆུབ་ནི་བརྗོད་དུ་མེད། སེམས་ནི་བཟུང་དུ་མེད། བསྟན་དུ་མེད། ཐོགས་པ་མེད། རྣམ་པར་རིག་པ་མེད་དེ། སེམས་དཔའ་ཡང་མི་དམིགས་སོ། །དེ་ཅིའི་ཕྱིར་ཞེ་ན། བྱང་ཆུབ་ནི་བརྗོད་དུ་མེད་པ་སྟེ་བྱང་ཆུབ་ཇི་ལྟ་བར་སེམས་ཀྱང་དེ་བཞིན་ནོ། །སེམས་ཇི་ལྟ་བར་བྱང་ཆུབ་ཀྱང་དེ་བཞིན་ནོ། །བྱང་ཆུབ་དང་སེམས་ཇི་ལྟ་བར་སེམས་དཔའ་རྣམས་ཀྱང་དེ་བཞིན་ནོ། །སེམས་དཔའ་རྣམས་ཇི་ལྟར་བར་འདས་པ་དང་། མ་འོངས་པ་དང་ད་ལྟར་བྱུང་བའི་ཆོས་ཐམས་ཅད་ཀྱང་དེ་བཞིན་ནོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཆེན་པོ་བྱང་ཆུབ་སེམས་དཔའི་མིང་འཐོབ་བོ། །ཆོས་ཐམས་ཅད་ཀྱི་རྗེས་སུ་སོང་བའི་སེམས་དེ་ནི་བྱང་ཆུབ་ཀྱི་སེམས་ཤེས་པར་བྱའོ། །བྱང་ཆུབ་ནི། འདས་པ་དང་། མ་འོངས་པ་དང་། ད་ལྟར་བྱུང་བ་མ་ཡིན་ཏེ་སེམས་ཀྱང་དེ་བཞིན་ནོ། །སེམས་དཔའ་ཡང་དེ་བཞིན་ནོ། །ཞེས་གསུངས་པ་ཡིན་ནོ། །འོ་ན་བྱང་ཆུབ་སེམས་དཔའ་ཞེས་སྨྲས་པས་ཆོག་གིས། སེམས་ཆེན་པོ་ཞེས་སྨྲས་པ་འདི་ལ་དགོས་པ་གཞན་མེད་དམ་སྙམ་པ་ལས། ལ་ལ་དག་ན་རེ། ཐོག་མར་བྱང་ཆུབ་ཀྱི་སེམས་ཀུན་རྫོབ་པའི་རྣམ་པར་བསྐྱེད་པ་ནས་བརྩམས་ཏེ་བྱང་ཆུབ་སེམས་དཔའ་ཞེས་པའི་མིང་ཐོབ་ཀྱང་། གང་གི་ཚེ་དོན་དམ་པའི་བྱང་ཆུབ་ཀྱི་སེམས་མངོན་དུ་མ་བྱས་པ་སྟེ་དེ་སྲིད་དུ་སེམས་དཔའ་ཆེན་པོ་ཞེས་པའི་མིང་མི་འཐོབ་བོ་ཞེས་ཟེར་རོ། །གཞན་དག་ན་རེ། ས་བདུན་པ་མན་ཆད་ཀྱི་ཐེག་ཆེན་འཕགས་པ་ནི་བྱང་ཆུབ་སེམས་དཔའ་ཡིན་ལ། དག་པ་ས་གསུམ་ལ་གནས་པའི་བྱང་སེམས་ནི་སེམས་དཔའ་ཆེན་པོ་ཡིན་ནོ་ཞེས་ཟེར་རོ། །འདིར་ཡང་སྔ་མ་ནི་རྒྱལ་སྲས་ཞི་བ་ལྷས་སྤྱོད་འཇུག་ཏུ། དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ཞེས་དང་། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རྭར་བསྡམས་པའི་ཉམ་ཐག་འགྲོ། །བདེ་བཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་གསུངས་པ་འདིའི་རྗེས་སུ་འབྲང་བ་སྟེ་རྒྱལ་བའི་སྲས་པོ་དང་བྱང་ཆུབ་སེམས་དཔའ་ནི་མིང་གི་རྣམ་གྲངས་སོ། །ཕྱི་མ་ནི་ས་དང་པོ་ཐོབ་པ་ལ་སེམས་དང་པོ་བསྐྱེད་པ་ལ་སོགས་པ་མདོ་ལས་གསུངས་པའི་དོན་སློབ་དཔོན་ཟླ་བ་གྲགས་པས་དབུ་མ་ལ་འཇུག་པར། ས་བཅུ་དང་། ཕར་ཕྱིན་བཅུ་དང་། སེམས་བསྐྱེད་པ་བཅུ་རྣམས་སྦྱར་ནས་གསུངས་པའི་རྗེས་སུ་འབྲང་བ་སྟེ། འདིའི་ཕྱོགས་འཛིན་པ་ཁ་ཅིག་སོ་སོ་སྐྱེ་བོའི་བྱང་སེམས་མེད་པར་འདོད་པ་ནི་རིགས་པ་མ་ཡིན་ཏེ། དེ་ལྟར་ན་བྱང་ཆུབ་སེམས་དཔའ་ལ་བཅས་པའི་ལྟུང་བ་མཐར་དག་འབྱུང་མི་སྲིད་པར་འགྱུར་ཏེ། འཕགས་པ་ལ་དེ་དག་མི་འབྱུང་བའི་ཕྱིར་དང་། བསླབ་བཏུས་སུ། སེམས་ཅན་དམྱལ་བ་ཆེན་པོའི་རྒྱུ། །ཞེས་ཉེས་པ་དེ་དག་སྤྱད་ན་ངན་སོང་དུ་ལྷུང་བར་གསུངས་པ་གང་ཞིག འཕགས་པ་ལ་དེ་མི་སྲིད་པའི་ཕྱིར་རོ། །དེས་ན་འདི་ལྟར་ཤེས་པར་བྱ་སྟེ། ས་དང་པོ་ལ་སོགས་པ་དེ་དག་རེ་རེར་ཡང་རང་རང་ལ་ལྟོས་པའི་སྦྱོར་བའི་ལམ་དང་། བར་ཆད་མེད་པའི་ལམ་དང་། རྣམ་གྲོལ་གྱི་ལམ་དང་། ཁྱད་པར་གྱི་ལམ་རྣམས་སོ་སོར་ཡོད་པ། གང་ཞིག ས་དང་པོའི་སྦྱོར་བའི་ལམ་ནི་སོ་སོ་སྐྱེ་བོའི་སས་བསྡུས་ཡིན་པ་དང་། དེར་ཡང་མོས་སྤྱོད་ཆེ་ཆུང་གི་ས་དག་ཡོད་པའི་ཕྱིར། ས་ལ་ཞུགས་པ་དང་། སར་ཆུད་པ་དང་། ས་ལ་གནས་པའི་བྱེ་བྲག་གིས་དབྱེ་བས། ཐོག་མར་སེམས་བསྐྱེད་པའི་དུས་ནས་ས་དང་པོའི་སྦྱོར་བར་ཞུགས་པའི་ཕྱིར་འགལ་བ་མེད་དོ་སྙམ་མོ། །དེ་བཞིན་དུ་ས་ལམ་དང་ཐེག་པའི་རྣམ་པར་གཞག་པ་མཐའ་དག་ཀྱང་། བྱང་ཆུབ་ཀྱི་སེམས་བསྐྱེད་པའི་གནས་དང་། རྟེན་དང་། ཐབས་ཀྱི་བྱེ་བྲག་ལས་གཞན་མ་ཡིན་པའི་ཕྱིར་བྱང་ཆུབ་ཀྱི་སེམས་བསྐྱེད་པ་ནི་རྒྱལ་བ་ཐམས་ཅད་ཀྱི་བགྲོད་པ་གཅིག་པའི་ལམ་དང་། ལམ་མགོ་གཅིག་པ་དང་། ཆོས་གཅིག་ཤེས་པས་ཐམས་ཅད་མཁྱེན་པར་གྱུར་པ་ལ་སོགས་པར་མདོ་ལས་མང་དུ་བཤད་པའི་རྗེས་སུ་འབྲང་སྟེ་བསྟན་བཅོས་འདིར་ཡང་དེ་ཉིད་བརྗོད་བྱའི་གཙོ་བོར་བསྟན་པ་ནི། འོག་ཏུ་རླབས་ཆེན་བྱང་ཆུབ་སེམས་མཆོག་བསྐྱེད་པར་ཤོག ཅེས་དང་། གཞན་གྱི་དོན་དུ་སངས་རྒྱས་སྒྲུབ་པའི་བློས། །ཞེས་པ་ལེགས་པར་གསུངས་ཤིང་གཞུང་འདིའི་ལུས་རྣམ་པར་བཞག་པ་སྟེ་བསྡུ་བའི་གཞི་ཉིད་དུ་རིག་པར་བྱའོ། །དེ་ཚུལ་ངེས་འབྱེད་ཀྱི་ཡན་ལག་བསྡུ་བ་ལ། རྒྱུ་འབྲས་ཀྱི་འགྲོས་གཉིས་ལས། དང་པོ་ནི། བྱང་ཆུབ་ཀྱི་སེམས་རིན་པོ་ཆེ་དེ་ཡང་རྒྱུ་གང་ལས་སྐྱེ་ན། འདིར་རང་གི་ངོ་བོ་དང་གཞན་གྱི་བསྟན་པའི་སེམས་བསྐྱེད་ཀྱི་རྒྱུ་དག་སོ་སོར་གསུངས་པ་ལས། དང་པོའི་དབང་དུ་བྱས་ཏེ། མདོ་སྡེའི་རྒྱན་དང་དབུ་མ་ལ་འཇུག་པ་ལ་སོགས་པར་ཉེར་ལེན་གྱི་རྒྱུ་སྙིང་རྗེ་ཆེན་པོ་ཡིན་པར་གསུངས་པ་དང་། ལྷན་ཅིག་བྱེད་པའི་རྐྱེན་ཡང་ཚོགས་བསགས་པ་དང་། སྐྱབས་སུ་འགྲོ་བ་དག་ཡིན་པ་ལ་དགོངས་ནས་ཀུན་ཆེན་བླ་མའི་ལེགས་བཤད་རྣམས་སུ་དེའི་རྒྱུ་སྙིང་རྗེ་ཆེན་པོ་དང་ལྡན་པ་བསམ་པའི་སྟོབས། ཚོགས་བསགས་པ་སྦྱོར་བའི་སྟོབས། སྐྱབས་སུ་འགྲོ་བ་རྒྱུ་ཡི་སྟོབས་ཏེ། སྟོབས་གསུམ་དུ་བསྡུ་བར་མཛད་པ་ཉིད་ཡོན་ཏན་རིན་པོ་ཆེའི་མཛོད་ཚིག་ལེའུར་བྱས་པར། སྟོབས་གསུམ་ལས་ནི་བྱང་ཆུབ་སེམས་སྐྱེ་བས། །སྙིང་རྗེ་ཆེ་དང་ཚོགས་བསགས་སྐྱབས་སུ་འགྲོ། །བསམ་དང་སྦྱོར་བ་རྒྱུ་ཡི་སྟོབས་སུ་བཤད། །ཅེས་བྲིས་པ་དང་མཐུན་པར་བྱང་ཆུབ་ཀྱི་སེམས་བསྟན་པ་དེའི་སྔ་ལོགས་སུ་སྟོབས་དང་པོ་བསམ་པའི་སྟོབས་སྙིང་རྗེ་སྟོན་པའི་ཕྱིར། ཐོག་མེད་དུས་ནས། ཞེས་པ་ནས། སྙིང་རྗེ་དང་བཅས་པས། ཞེས་པའི་བར་གྱི་ཚིགས་རྐང་བ་གསུམ་གསུངས། དེའི་སྔོན་དུ་ཡང་གཉིས་པ་རྒྱུའི་སྟོབས་སྐྱབས་སུ་འགྲོ་བ་ཉིད་སྟོན་པའི་ཕྱིར། སྐྱབས་སུ་འགྲོ་བའི་སྡོམ་པ་ནོད་པར་ཤོག །ཅེས་གསུངས་ཏེ། དེ་ཡང་ཡོན་ཏན་མཛོད་ལས། འཇིགས་དང་དད་དང་སྙིང་རྗེ་རྣམ་གསུམ་གྱིས། །སྐྱབས་སུ་འགྲོ་བ་སྐྱེས་བུ་ཆེན་པོའི་བློས། །ཞེས་པ་ལྟར། ཐུན་མོང་མ་ཡིན་པའི་སྐྱབས་འགྲོ་རྒྱུ་གསུམ་ལས་སྐྱེ་བར་གསུངས་ནའང་། འདིར་ཐུན་མོང་གི་སྐྱབས་འགྲོའི་རྒྱུ་འཇིགས་པ་དང་དད་པ་གཉིས་ལས། ཕྱི་མ་སྟོན་པའི་ཕྱིར། རང་གཞན་ཞེས་པ་ནས། བསམ་པ་རྩེ་གཅིག་གིས། ཞེས་པའི་བར་གྱི་རྐང་བ་གསུམ་གསུངས། དེའི་སྔོན་དུ་ཡང་སྐྱེས་བུ་ཆུང་འབྲིང་གི་ལམ་གྱིས་བློ་རིམ་བཞིན་སྦྱངས་ནས་འཁོར་བ་སྤྱི་དང་བྱེ་བྲག་ལ་འཇིགས་པའི་སེམས་བསྐྱེད་པ་དང་། དེའི་གཉེན་པོ་སྒྲུབ་པའི་མཐུན་རྐྱེན་ཚོགས་གསོགས་དགོས་པ་ལ་དགོངས་ནས། ཕྱི་མའི་དབང་དུ་བྱས་ཏེ། བྱང་ཆུབ་སྒྲུབ་ལ་ཞེས་པ་ནས་འགྲུབ་པར་ཤོག ཅེས་པའི་བར་གྱི་ཤྭ་ལོ་ཀ་གཅིག་དང་། སྔ་མའི་དབང་དུ་བྱས་ཏེ། དེ་མ་ཐོབ་པའི༴ ཞེས་པ་ནས། ཡིད་ནི་འབྱུང་བར་ཤོག ཅེས་པའི་བར་གྱི་ཤྭ་ལོ་ཀ་བཞིས་བློ་ལྡོག་གི་ཆོས་བཞི་བོ་རིམ་པ་བཞིན་དུ་བསྟན་ཏེ། དེ་རྣམས་ནི་སྐྱབས་སུ་འགྲོ་བའི་ཚོགས་སོ། །དེའི་སྔོན་དུ་ཡང་གསུམ་པ་སྦྱོར་བའི་སྟོབས་སྟོན་པའི་ཕྱིར་ཚོགས་གསོག་པའི་སྒོ་ཐམས་ཅད་ཡན་ལག་བདུན་དུ་འདུས་པ་ལ་དགོངས་ཏེ། འཕགས་པ་བཟང་པོ་སྤྱོད་པའི་སྨོན་ལམ་ལ་སོགས་པར་ཇི་ལྟར་གསུངས་པ་བཞིན། འདིར་ཡང་ཡན་ལག་བདུན་པོ་ཉིད་དོན་གཉིས་ལྷུན་གྲུབ་ཅེས་པ་ནས། གོང་འཕང་ཐོབ་པར་ཤོག ཅེས་པའི་བར་གྱི་ཤྭ་ལོ་ཀ་བདུན་གྱིས་རིམ་པ་བཞིན་དུ་བསྟན་ནས། དེ་དག་ནི་བྱང་ཆུབ་ཀྱི་སེམས་རིན་པོ་ཆེ་དེ་ཉིད་གང་ལས་སྐྱེ་བའི་རྒྱུ་ལུགས་ལྡོག་གི་རིམ་པས་སྨྲས་པ་ཡིན་ནོ། །གཉིས་པ་བྱང་ཆུབ་ཀྱི་སེམས་རིན་པོ་ཆེ་དེ་ཉིད་བསྒོམ་པའི་ཡན་ལག་གཞན་འབྲས་བུ་སྐྱེ་རིམ་གྱི་འགྲོས་བརྗོད་པ་ལ། ཐོག་མར་བྱང་ཆུབ་ཀྱི་སེམས་མ་སྐྱེས་པ་སྐྱེ་བ་དང་། སྐྱེས་པ་མི་ཉམས་ཤིང་གོང་ནས་གོང་དུ་འཕེལ་བར་བྱ་བའི་ཕྱིར། བྱམས་དང་སྙིང་རྗེ་ཞེས་པ་ནས། བརྩོན་པར་ཤོག ཅེས་པའི་བར་ཤོ་ལོ་ཀ་གཅིག་གིས་སྨོན་པ་དང་འཇུག་པའི་བསླབ་བྱ་དག་མདོར་བསྟན་ནས། བྱེ་བྲག་འཇུག་པའི་བསླབ་བྱ་བསྡུ་དངོས་བཞིས་བསྡུས་པའི་ཕ་རོལ་ཏུ་ཕྱིན་པ་དྲུག་ཉིད་རྒྱ་ཆེར་དབྱེ་བའི་ཕྱིར། གང་ལ་ཅི་འདོད་ཅེས་པ་ནས། ཤེས་རབ་ལྡན་པར་ཤོག ཅེས་པའི་བར་གྱི་ཤོ་ལོ་ཀ་དྲུག་རིམ་པར་གསུངས་སོ། །དེའི་རྗེས་སུ་དེ་ལྟར་བསམ་སྦྱོར་རྣམ་པར་དག་པས་བྱང་ཆུབ་ཀྱི་སེམས་བསྐྱེད་པས་ནི་ལམ་ལྔ་དང་ས་བཅུའི་ཡོན་ཏན་མཐའ་དག་རིམ་གྱིས་འཐོབ་པར་འགྱུར་བའི་ཕྱིར། བསམ་པ་བྱང་ཆུབ་ཅེས་པ་ནས་བསྒྲོད་པར་ཤོག ཅེས་པའི་བར་གྱི་ཤོ་ལོ་ཀ་གཅིག་གསུངས་ནས། དེ་རྒྱ་ཆེར་དབྱེ་བའི་ཕྱིར། དེ་ཡང་དྲན་པ་ཉེར་བཞག་ཅེས་པ་ནས་ས་བཅུ་བགྲོད་པར་ཤོག །ཅེས་པའི་བར་གྱི་ཤོ་ལོ་ཀ་བཞིས་སྐྱེས་འཕགས་ཀྱི་སས་བསྡུས་པའི་སློབ་ལམ་བཞིའི་ངོ་བོ་རྣམ་བྱང་ཕྱོགས་ཀྱི་ཆོས་སུམ་ཅུ་རྩ་བདུན་པོ་དག་རིམ་གྱིས་བསྟན་ནས། དེ་ཡང་དྲི་མེད་ཅེས་པ་ནས། ཀུན་ཏུ་འོད་ལ་གནས་པར་ཤོག །ཅེས་པའི་བར་ཤོ་ལོ་ཀ་གཅིག་གིས་འཕགས་ལམ་ས་བཅུ་གཅིག་པོ་བྱེ་བྲག་ཏུ་བཤད་དོ། །དེའི་རྗེས་སུ་དེ་ལྟར་བསྒོམ་ནས་ལམ་བགྲོད་པའི་འབྲས་བུ་སྐུ་དང་ཡེ་ཤེས་ལ་སོགས་པ་མངོན་དུ་འཐོབ་པའི་ཕྱིར། དེ་ལྟར་ལམ་ལྔ་ཅེས་པ་ནས། བདག་ཀྱང་འགྱུར་བར་ཤོག །ཅེས་པའི་བར་ཤོ་ལོ་ཀ་གཉིས་གསུངས་ཏེ། དེ་རྒྱ་ཆེར་དབྱེ་བ་ལས། དང་པོ་རྟེན་སྐུ་གསུམ་གྱི་རྣམ་དབྱེ། རང་བཞིན་རྣམ་དག་ཅེས་པ་ནས། གཞན་དོན་ལྷུན་གྲུབ་ཤོག །ཅེས་པའི་བར་ཤོ་ལོ་ཀ་གསུམ་གྱིས་རིམ་བཞིན་བསྟན་ནས། གཉིས་པ་བརྟེན་པ་ཡེ་ཤེས་ལྔ། ཆོས་ཀྱི་དབྱིངས་དང་། ཞེས་པ་ནས། དབང་འབྱོར་ཐོབ་པར་ཤོག །ཅེས་པའི་བར་ཤོ་ལོ་ཀ་གཅིག་གིས་བསྟན། དེའི་རྗེས་སུ་ཡོན་ཏན་གྱི་ཁྱད་པར་གཞན་བསྟན་པ་ལས། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་ཆོས་བཅོ་བརྒྱད་དང་། མཚན་དཔེ་དང་། ཟག་མེད་ཀྱི་ཕུང་པོ་དང་། སྤྱན་ལ་སོགས་པ་སྟེ་སྡེ་ཚན་དྲུག་པོ་རིམ་པ་བཞིན། གནས་དང་གནས་མིན་ཞེས་པ་ནས། མངོན་དུ་འགྱུར་བར་ཤོག ཅེས་པའི་བར་གྱི་ཤོ་ལོ་དྲུག་གིས་རིམ་བཞིན་བསྟན། དེའི་རྗེས་སུ་དེ་ལྟར་འབྲས་བུ་སངས་རྒྱས་ཐོབ་ནས་སླར་ཡང་འཁོར་བ་མ་སྟོང་གི་བར་དུ་གཞན་དོན་མཛད་དགོས་པའི་ཕྱིར། དེ་ལྟར་རྒྱལ་བའི་ཞེས་པ་ནས། བཀྲ་ཤིས་ཤོག ཅེས་པའི་བར་གྱི་ཤོ་ལོ་ཀ་དགུས་གཞན་དོན་སྒྲུབ་པའི་ཕྲིན་ལས་ཀྱི་བྱེ་བྲག་མཐའ་དག་བསྟན་བཤད་བསྡུས་གསུམ་གྱི་སྒོ་ནས་ལེགས་པར་གཏན་ལ་ཕབ་པའོ། །འདི་དག་ནི་བྱང་ཆུབ་ཀྱི་སེམས་རིན་པོ་ཆེ་བསྒོམ་པའི་འབྲས་བུ་ཇི་ལྟར་སྐྱེ་ཚུལ་མཐར་ཆགས་སུ་བརྗོད་པ་སྟེ། དེ་ལྟར་ན་ཆོས་དང་གང་ཟག་གཉིས་ཀའི་སྒྲ་གཞི་མཐུན་པར་བྱང་ཆུབ་སེམས་དཔའ་ཞེས་པའི་སྒྲ་དོན་རྣམ་པར་དབྱེ་བའི་སྒོ་ནས་བསྡུས་པའི་དོན་ལེགས་པར་བསྟན་ཏེ། བྱེ་བྲག་ཏུ་བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་ལ་དགོས་པའི་དབང་གི་ཕྱག་འཚལ་བ་ནི། བཟང་པོ་སྤྱོད་པའི་སྨོན་ལམ་ལས། རྒྱལ་བ་ཀུན་གྱི་སྲས་ཀྱི་ཐུ་བོ་བ། །གང་གི་མིང་ནི་ཀུན་ཏུ་བཟང་ཞེས་བྱ། །མཁས་པ་དེ་དང་མཚུངས་པར་སྤྱད་པའི་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ། །ཞེས་གསུངས་པ་ལྟར། བདག་ཉིད་ཆེན་པོ་འདིས་ནི་བྱང་ཆུབ་སེམས་པའི་སྤྱོད་པ་མཐའ་དག་སྨོན་ལམ་རྣམ་པར་དག་པའི་སྒོ་ནས་ལེགས་པར་སྤྱོད་དོ་ཞེས་ཡོངས་སུ་གྲགས་ཏེ། དེས་ན་འདིར་ཡང་ཇི་ལྟར་སྨོན་པའི་འབྲས་བུ་མངོན་དུ་འགྲུབ་པའི་ཕྱིར་དང་། སྟོན་པ་དང་བསྟན་བཅོས་ལ་རྒྱུ་མཚན་ཤེས་ནས་དད་པ་སྐྱེ་བར་འགྱུར་བ་ལ་སོགས་པའི་དགོས་པ་དུ་མ་ཉེ་བར་བཟུང་སྟེ་སྒོ་གསུམ་གུས་པས་ཕྱག་འཚལ་ལོ། །ཞེས་བརྗོད་པར་མཛད་དོ། །དེ་དག་གིས་ནི་བསྡུས་དོན་རྗེས་འབྲེལ་དང་བཅས་པ་སྨྲོས་ཏེ་ཀླད་དོན་སོང་། ཀུན་བཟང་དོན་གྱིས་འཕྲིན་ལས་ནི། རང་གཞུང་ལས། མཚམས་བཅད་བཤགས་པ་དཀྱིལ་འཁོར་ལས། །ཕྱག་འཚལ་མཆོད་དང་བཟླས་པ་དང་། །གཏོར་ཚོགས་རྗེས་ཀྱི་སྨོན་ལམ་དགུས། །བྱ་རྩོལ་མེད་པའི་ཕྲིན་ལས་བསྡུས། །ཞེས་གསུངས་པ་ལྟར་དགུ་ལས། དང་པོ་མཚམས་བཅད་པ་ནི། ཧཱུྃ་ཧཱུྃ་ཧཱུྃ། རྣམ་པར་རྟོག་པ་བགེགས་ཡིན་ཏེ། །བགེགས་རིགས་རང་གི་སེམས་ལས་བྱུང་། །ཡེ་ནས་སེམས་ཉིད་དག་ཅེ་ན། །བགེགས་ཞེས་བྱ་བ་གཞན་ན་མེད། །ཨོཾ་མ་ཧཱ་ཤུ་ནྱ་ཏ་ཛྙཱ་ན་ཨཱ༔ གཉིས་པ་བཤགས་པ་ནི། ཨོཾ་དོན་དམ་དམིགས་མེད་སྤྲོ་ལས་འདས་པས་ན། །རྣམ་རྟོག་གང་ཡང་དམིགས་པར་མི་འགྱུར་ཡང་། །ཀུན་རྫོབ་སྒྱུ་མ་ཙམ་གྱི་དབང་གིས་ན། །ནོངས་པ་མཆིས་ན་རབ་གནོང་བཟོད་པར་གསོལ། །ཨོཾ་བཛྲ་ཏྭ་ཨཱ༔ གསུམ་པ་དཀྱིལ་འཁོར་གྱི་ལས་ནི། ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བར་བཀོད་པའི་དཀྱིལ་འཁོར་ནི། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །བྱུང་དང་འབྱུང་འགྱུར་ཡབ་ཡུམ་ལྷུན་གྱིས་རྫོགས། ཧཱུྃ། གདོད་ནས་སྙིང་པོ་བྱང་ཆུབ་དང་། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །བདག་དང་དབྱེར་མེད་བརྟན་པར་བཞུགས། །ཨཱཿབཛྲ་ས་མ་ཡ་ཏིཥྛ། བཞི་བ་ཕྱག་འཚལ་བ་ནི། ཧཱུྃ་སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེར། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ན་མོ་ན་མ་ཧོ། ལྔ་བ་མཆོད་པ་ནི། ཧཱུཾ་དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེན་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཨོཾ་མ་ཧཱ་པཱུ་ཛ་ཧོ། དྲུག་པ་བསྡུས་པ་ནི། ཨོཾ་ཀུན་ཏུ་བཟང་མོ་གསང་བའི་བྷ་ག་ལ། །རྒྱལ་བའི་དཀྱིལ་འཁོར་རབ་འབྱམས་མ་ལུས་ཀུན། །འདུ་འབྲལ་མེད་པའི་ངང་དུ་རོ་གཅིག་པའི། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །ཨོཾ་ཨཱཿ ཧཱུྃ་སྭཱ་ཧཱ། བདུན་པ་གཏོར་མ་བཏང་བ་ནི། ཧཱུྃ་གཟུགས་སྒྲ་དྲི་རོ་རེག་བྱ་ཆོས་ལ་སོགས། །སྣང་སྟོང་རིག་སྟོང་གསལ་སྟོང་བདེ་སྟོང་དང་། །དྲན་སྟོང་གྲགས་སྟོང་ཚོར་སྟོང་མཆོད་པའི་ཚོགས། །བླ་མ་ཀུན་བཟང་ཞི་ཁྲོའི་ཚོགས་ལ་འབུལ། །ཨོཾ་ཤྲི་བྷ་ཏྲ་ཨཱཿ མ་ཧཱ་བ་ལིང་ཏ་ཁཱ་ཧི། བརྒྱད་པ་ཚོགས་མཆོད་ནི། ཧཱུྃ་ཚོགས་ཀྱི་རྒྱན་རྣམས་བཀྲམ་པ་ཡང་། །རང་བཞིན་གནས་པས་འགྲིབ་པ་མེད། ལྷུན་གྱིས་གནས་པས་མི་བསྡོ་སྟེ། །གདོད་ནས་དག་པའི་བདུད་རྩི་ཡིན། །ཨོཾ་མ་ཧཱ་ག་ན་ཙཀྲ་པུ་ཙ་ཧོ། །ནམ་མཁའི་མཐའ་ལྟར་ཀུན་ཏུ་ཐུག་པ་མེད། །ཆོས་སྐུ་འགྱུར་བ་མེད་པའི་ཀློང་ན་བཞུགས། །མ་བཅོས་ཐོག་མེད་དུར་ཁྲོད་གཅིག་ཏུ་འཁྱིལ། །མི་སྐྱེ་མི་འགག་ཀློང་དུ་ཐིག་ལེ་རྫོགས། །ཨཱཿ ཞེས་སོ། །སྨོན་ལམ་ནི་གཞན་དུ་གསལ་བ་ལྟར་རོ། །དགེའོ།། །།