རྟེན་འབྲེལ་གྱི་བསྡུས་དོན་སྟོང་ཉིད་ལ་འཇུག་པའི་སྒོ།
༄༅། །རྟེན་འབྲེལ་གྱི་བསྡུས་དོན་སྟོང་ཉིད་ལ་འཇུག་པའི་སྒོ་ཞེས་བྱ་བ་བཞུགས་སོ། །ཤེས་བྱའི་ཆོས་ཀུན་གཞལ་བྱ་བྱས་པ་ན། །གདག་གཞི་གྲུབ་ཕྱིན་རྟེན་འབྱུང་ཡིན་ནོ་ཞེས། །སྟོན་མཛད་ཐུབ་དབང་ཉིད་དང་དེ་ཡི་སྲས། །འཕགས་མཆོག་ཀླུ་སྒྲུབ་ཞབས་ཀྱིས་བདག་བློ་སྐྱོངས། །དེ་ཡང་འདིར་རྟེན་ཅིང་འབྲེལ་བར་འབྱུང་བ་ཞེས་བྱ་བ་ནི་བརྗོད་བྱ་ཤིན་ཏུ་རྒྱ་ཆེ་བ་ཞིག་ཡིན་ཕྱིར་ཡི་གེ་ཉུང་ངུས་དོན་ཅི་བཞིན་མཚོན་མི་ནུས་མོད། འདིར་ནི་དེའི་རྣམ་གྲངས་ཙམ་ཞིག་འགོད་པ་ལ། སྤྱིར་རྟེན་ཅིང་འབྲེལ་བར་འབྱུང་བ་ཞེས་བྱ་བ་ནི་རྒྱལ་བ་ཉིད་ཀྱིས་གསུང་རབ་མཐའ་དག་ན་རྒྱ་ཆེར་བསྟན་ཅིང་ཁྱད་པར་ས་ལུ་ལྗང་བའི་མདོ་སོགས་ནས་ཆེད་དུ་གསུངས་པའང་ཡོད་དེ། དེ་ཡང་གཞི་གྲུབ་ན་རྟེན་འབྱུང་ཡིན་པས་ཁྱབ་པའི་ཚུལ་གྱིས་ཆོས་ཐམས་ཅད་རང་གི་འདུག་ཚུལ་གྱི་ངོས་ནས་རྟེན་འབྱུང་དུ་གཏན་ལ་ཕབས་ཀྱི་ཤེས་བྱའི་ཆོས་གཞན་དུ་བྱས་ནས་དེ་ལས་ཐ་དད་པའི་རྟེན་འབྱུང་ཞིག་གུད་ན་ཡོད་པར་འདོད་པ་ནི་མ་ཡིན་ནོ། །དེ་ལྟ་བུའི་དགོངས་པ་འགྲེལ་པ་པོ་ཡང་འཕགས་པ་ཀླུ་སྒྲུབ་ཡིན་ལ། སློབ་དཔོན་གཞན་ནི་གྲུབ་མཐའ་གཞན་འཛིན་པའང་ཡོད་དོ། །སློབ་དཔོན་འཕགས་པ་འདི་ནི་རྒྱལ་བ་ཉིད་ཀྱིས་རང་གི་དགོངས་པ་འགྲེལ་བ་པོར་ལུང་བསྟན་པ་ཡིན་ཕྱིར་རྩོད་པ་མེད་ལ། དེས་མཛད་པའི་བསྟན་བཅོས་ཀྱང་། དབུ་མ་རིགས་ཚོགས་ལ་སོགས་ཕལ་ཆེར་ཞིག་སྔ་འགྱུར་ཁོ་ན་ཡིན་ཕྱིར་རྙིང་མའི་གཞུང་རང་ཡིན་ནོ། །དེར་མ་ཟད་ལུགས་འདི་སྔ་འགྱུར་གྱི་གྲུབ་མཐའི་མཐར་ཐུག་ཀྱང་ཡིན་ཏེ་ཆོས་རྒྱལ་ཆེན་པོའི་བཀས། དེང་ཕྱིན་ཆད་ངའི་བོད་འབངས་རྣམས་ཀྱིས་ལྟ་བ་ཀླུ་སྒྲུབ་ལུགས་དང་སྤྱོད་པ་མཁན་པོའི་ལུགས་བཞིན་དགོས་ཞེས་ཁྲིམས་སུ་བཅས་པའི་ཕྱིར་རོ། །དེ་ལྟ་ན་སློབ་དཔོན་ཉིད་ཀྱི་བཀའ་ལས། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པ་ཡིན་ནོ། །འོ་ན་རྟེན་འབྱུང་དེའི་དབྱེ་བ་ཇི་ཞིག་ཞེ་ན། བསྟན་བཅོས་བྱེད་པོའི་ཆོས་སྐད་ཀྱི་དབང་གིས། ཁ་ཅིག་ན་རེ། ཀུན་ནས་ཉོན་མོངས་ཕྱོགས་ཀྱི་རྟེན་འབྱུང་དང་། རྣམ་བྱང་ཕྱོགས་ཀྱི་རྟེན་འབྱུང་ངོ་། །ཞེས་ཟེར། ཡང་ཁ་ཅིག་ན་རེ། རྟེན་འབྱུང་ནི་གསུམ་སྟེ། འཁོར་བའི་རྟེན་ཅིང་འབྲེལ་འབྱུང་དང་། །མྱང་འདས་རྟེན་ཅིང་འབྲེལ་འབྱུང་དང་། །གཤིས་ཀྱི་རྟེན་ཅིང་འབྲེལ་འབྱུང་ངོ་། །ཞེས་ཟེར་རོ། །དེ་དག་ཀྱང་བརྗོད་བྱའི་གནད་རྟོགས་ན་ཐ་དད་པ་མ་ཡིན་ཏེ་དགོངས་གཞི་གཅིག་ཏུ་འབབ་པ་ཁོ་ན་ཡིན་ནོ། །དེ་ཡང་འདིར་དེ་དག་སྤྱིའི་གོ་བ་ཙམ་བརྗོད་ནས་རྣམ་པར་དབྱེ་བ་བཏང་སྙོམས་སུ་བྱས་ཏེ། འཁོར་བའི་རྟེན་འབྲེལ་བཅུ་གཉིས་ཀྱི་གོ་རིམ་ཙམ་ཞིག་འགོད་པ་ནི། བཀའ་ལས་མ་རིག་པའི་རྐྱེན་གྱིས་འདུ་བྱེད་དོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པའོ། །ཞེས་སོགས་རྒྱ་ཆེར་གསུངས་པ་རྣམས་ཡིན་ལ། དེ་ཡང་བསྡུ་ན། ཉོན་མོངས་པའི་ལམ་དང་། ལས་ཀྱི་ལམ་དང་། རྣམ་པར་སྨིན་པའི་ལམ་དེ་གསུམ་ལ་འདུ་བ་ཡིན་ནོ། །དེ་ཡང་། དང་པོ་བརྒྱད་པ་དགུ་ཉོན་མོངས། །ཞེས་སོགས་གསུངས་པ་ལྟར། དང་པོ་མ་རིག་པ་དང་། བརྒྱད་པ་སྲེད་པ་དང་དགུ་བ་ལེན་པ་རྣམས་ནི་ཉོན་མོངས་པ་ཡིན་ནོ། །འདུ་བྱེད་དང་། སྲིད་པ་ནི་ལས་སོ། །ལྷག་མ་བདུན་ནི་རྣམ་པར་སྨིན་པ་སྟེ། དེ་ཡང་ཐེག་པ་ཆེ་ཆུང་གི་དབང་གིས་ཚེ་གཅིག་དང་། སྐྱེ་བ་གསུམ་སོགས་སུ་རྟེན་འབྲེལ་བཅུ་གཉིས་པོ་རྫོགས་པར་བཞེད་ཚུལ་མི་གཅིག་པ་དག་ཡོད་མོད་དེ། འདིར་ནི་ཤེས་པ་ཡུལ་ལ་འཇུག་པའི་རྣམ་འགྱུར་གྱིས་བྱ་བ་རྫོགས་པའི་སྐད་ཅིག་མ་གཅིག་ལའང་དེ་བཅུ་གཉིས་པོ་རྫོགས་པ་ཡོད་པར་འདོད་དེ། མིག་ཤེས་ཀྱི་ཡུལ་གཅིག་པུར་མཚོན་ན་ཡང་ཡུལ་དང་རང་གི་དེ་ཁོ་ན་ཉིད་མ་རྟོགས་པས་བདེན་པར་འཛིན་པ་ནི་མ་རིག་པ། དེའི་དབང་གིས་ཡུལ་ལ་གཡོ་བར་རྩོམ་པ་འདུ་བྱེད། ཡུལ་རིག་པ་པོ་རྣམ་ཤེས། ཕུན་ཚུན་གྱི་དམིགས་པ་ནི་མིང་གཟུགས། ཡུལ་ལ་བསྐྱོད་པ་ནི་སྐྱེ་མཆེད། དབང་ཡུལ་ཤེས་གསུམ་འདུས་པ་ནི་རེག་པ། ཡུལ་ཤེས་པས་ཉམས་སུ་མྱོང་བ་ནི་ཚོར་བ། དེ་ལ་ཞེན་པ་ནི་སྲེད་པ། ཡང་ཡང་དང་དུ་ལེན་པར་རྩོམ་པ་ནི་ལེན་པ། དེ་ཕྱི་མའི་ས་བོན་འདེབས་པ་ནི་སྲིད་པ། རྟོག་པ་གསར་བ་སྐྱེ་བ་དང་། དེའི་ཕྱི་མར་འགགས་པ་ནི་སྐྱེ་བ་དང་རྒ་ཤི་སྟེ། རིམ་པ་འདིས་ཚོགས་དྲུག་གི་ཡུལ་གང་ལའང་སྦྱར་བར་བྱའོ། །དེ་ལྟར་ན་རང་ཅག་གི་ཤེས་པ་ཡུལ་ལ་གཡོ་བ་ཙམ་ནས་འཁོར་བའི་འཁོར་ལོར་འཕྱན་པ་ཁོ་ན་ལས་མ་འདས་པའི་ཚུལ་འདི་ཤེས་པར་བྱས་ནས། ཐར་བ་དོན་དུ་གཉེར་བ་རྣམས་ཀྱིས་ཐོག་མ་ཉིད་དུ་སྲིད་པའི་རྟེན་འབྲེལ་བཅུ་གཉིས་པོ་འདི་དག་གི་འཇུག་ལྡོག་ཁོང་དུ་ཆུད་པར་བྱས་ནས། གདོད་བདག་མེད་རྟོགས་བྱེད་ཀྱི་ཤེས་རབ་ཁྱད་པར་ཅན་ལ་བརྟེན་ནས་སྲིད་པའི་རྩ་བ་མ་རིག་པ་དྲུང་ནས་འབྱིན་པར་མཛོད་ཅིག་དང་། ཡིད་ལ་དམིགས་པའི་དོན་དེ་ཉིད་བདེ་བླག་ཏུ་འགྲུབ་པར་འགྱུར་བ་ཡིན་ནོ། །དེ་ཡང་བསམ་པའི་ཁྱད་པར་གྱིས་མྱང་འདས་གསུམ་གང་ལ་དམིགས་པ་དེ་ཉིད་མངོན་དུ་བྱེད་པ་ཡིན་པའི་ཕྱིར། དེ་དང་དེའི་སྦྱོར་བ་ལ་བརྩོན་པ་ནའང་ལམ་གྱི་རྟེན་ཅིང་འབྲེལ་བར་འབྱུང་བ་དག་ལ་འཇུག་པ་ཉིད་གལ་ཤིན་ཏུ་ཆེ་བར་ཟུངས་ཤིག དེས་ན་ཐེག་པ་ཆེ་ཆུང་གང་ལ་འཇུག་པས་ཀྱང་། གནས་འདི་དག་ལ་རྨོངས་པར་བྱས་ནས་ཐར་བ་ཐོབ་པའི་ཐབས་གཞན་ཞིག་དོན་དུ་གཉེར་བར་སེམས་པ་ནི་མིག་སྤངས་ནས་གཟུགས་མཐོང་བར་འདོད་པ་དང་གཉིས་སུ་མེད་དོ། །འདིར་སྨྲས་པ། འབྲས་ཡུམ་གསུམ་པོ་གང་རུང་ལ། །དམིགས་ནས་སྲིད་ལས་ཐར་འདོད་པ། །དེ་ཀུན་སུས་ཀྱང་ཤེས་བྱའི་གནས། །མཆོག་ནི་རྟེན་འབྲེལ་འདི་ཡིན་ནོ། །དེ་ཕྱིར་རྣམ་མཁྱེན་ལྟ་ཅི་སྨོས། །ཐར་བ་ཙམ་ཞིག་དོན་གཉེར་ཡང་། །རྟེན་ཅིང་འབྲེལ་བར་འབྱུང་བའི་ཆོས། །ཤེས་ནས་སྟོང་ཉིད་བཙལ་བར་གྱིས། །གང་ཞིག་སྟོང་ཉིད་མ་རྟོགས་པར། །བདག་ཏུ་འཛིན་པ་མི་འགོགས་ལ། །བདག་འཛིན་ཡོད་རུང་སྲིད་འབྱུང་ཕྱིར། །སྲིད་ལས་རྣམ་གྲོལ་ཇི་ལྟར་འགྱུར། །དེ་ཕྱིར་སྟོང་ཉིད་རྟོགས་ཐབས་ལ། །རྟེན་འབྱུང་ཁོ་ན་ཟབ་པ་སྟེ། །གང་ཕྱིར་རྟེན་ཅིང་འབྲེལ་འབྱུང་བ། །དེ་ཉིད་སྟོང་བ་ཉིད་ཡིན་ཕྱིར། །དེས་ན་འདི་བཤད་དགེ་བ་ཡང་། །འགྲོ་ཀུན་རྟེན་འབྱུང་ཟབ་མོའི་ཆོས། །རྟོགས་པའི་ཉེ་རྒྱུར་ཡོངས་བསྔོ་ན། །སྨོན་པས་སྲིད་རྩ་དྲུང་འབྱིན་ཤོག །ཅེས་པའང་མཁྱེན་དཔྱོད་མཆོག་ཏུ་ཡངས་པ་དབོན་སངས་རྒྱས་ཆོས་འཕེལ་ནས་རྟེན་འབྲེལ་གྱི་བསྡུས་དོན་ཉུང་ངུ་ཞིག་བླུན་རྨོངས་རྣམས་ལ་ཕན་ཕྱིར་འབྲི་དགོས་ཞེས་ལྷ་རྫས་དང་བཅས་བསྐུལ་ངོར་བཙུན་ཆུང་གཞན་ཕན་མཐའ་ཡས་པས་ཤར་མར་སྤེལ་བ་མངྒ་ལཾ། །དགེའོ།། །།