རྒྱུད་ཐམས་ཅད་ཀྱི་རྒྱལ་པོ་སྒྱུ་འཕྲུལ་དྲྭ་བའི་རྩ་རྒྱུད་ལུང་གི་སྤྱི་གསང་བའི་སྙིང་པོའི་འགྲེལ་བ་ཀུན་བཟང་ཐུགས་ཀྱི་ཏི་ཀ

༄༅། །རྒྱུད་ཐམས་ཅད་ཀྱི་རྒྱལ་པོ་སྒྱུ་འཕྲུལ་དྲྭ་བའི་རྩ་རྒྱུད་ལུང་གི་སྤྱི་གསང་བའི་སྙིང་པོའི་འགྲེལ་བ་ཀུན་བཟང་ཐུགས་ཀྱི་ཏི་ཀ་ཞེས་བྱ་བ་བཞུགས་སོ། །རྒྱུད་ཐམས་ཅད་ཀྱི་རྒྱལ་པོ་སྒྲུ་འཕྲུལ་དྲྭ་བའི་རྩ་རྒྱུད་ལུང་གི་སྤྱི་གསང་བའི་སྙིང་པོའི་འགྲེལ་བ་ཀུན་བཟང་ཐུགས་ཀྱི་ཏི་ཀ་ཞེས་བྱ་བ། བཅོམ་ལྡན་འདས་ཐོག་མའི་མགོན་པོ་འོད་མི་འགྱུར་པ་ལ་ཕྱག་འཚལ་ལོ། །གང་གི་རང་བཞིན་ཟབ་ཞི་སྤྲོས་དང་བྲལ་པའི་དབྱིངས། །ཀུན་ནས་རྙོགས་བྲལ་འོད་གསལ་མཆོག་གི་བདག་ཉིད་ནི། །སྲིད་ཞིར་མི་གནས་མཉམ་པ་ཉིད་དུ་རྟག་བཞུགས་པའི། །ཆོས་སྐུའི་སྟོན་མཆོག་རང་རིག་ངང་ལས་དབྱེར་མི་ཕྱེད། །ཆོས་ཉིད་གང་ལས་ནམ་ཡང་འཕོ་འགྱུར་མེད་བཞིན་དུ། །ཕྱིར་གསལ་རང་གདངས་ཡེ་ཤེས་ལྔ་ཉིད་ཡོངས་སྨིན་གཟུགས། །རིགས་ལྔའི་གཙོ་བོ་སྒྱུ་འཕྲུལ་དྲྭ་བའི་རྣམ་རོལ་ཅན། །ལོངས་སྐུའི་མགོན་དེར་སྒོམ་པ་གོམས་པའི་ཕྱག་གིས་འདུད། །ཇི་བཞིན་ཉིད་ལས་ཇི་ལྟར་མཆེད་པའི་རོལ་པ་ནི། །ཐུབ་ཆེན་དྲུག་དང་ཉིད་ལས་མི་གཞན་གསང་འཛིན་ལྷ། །རིགས་གསུམ་མགོན་སོགས་རྒྱས་སྲས་མཆོག་བརྒྱད་བཙུན་མོར་བཅས། སྤྲུལ་སྐུའི་ཚུལ་བཟུང་ཇི་སྙེད་མཆིས་ལ་གུས་ཕྱག་འཚལ། །གང་དེའི་རྗེས་བཟུང་དྲྭ་མ་ལྔ་དང་རྒྱལ་པོ་ཛཿ ཀུ་ཀུ་ར་ཛ་ཨོ་རྒྱན་རྗེ་དང་སངས་རྒྱས་གསང་། །བི་མ་བཻ་རོ་རྨ་གཉགས་ཟུང་སོགས་གསང་རྒྱུད་ཉིད། །གསལ་མཛད་འཕགས་བོད་པཎ་གྲུབ་ཚོགས་རྣམས་སྤྱི་བོས་མཆོད། །ཁྱད་པར་གནུབས་ཟུར་བརྒྱུད་པར་བཅས་དང་རོང་ཟོམ་རྗེ། །ཀུན་མཁྱེན་སྐྱེ་དགུའི་མིག་གཅིག་ངག་གི་དབང་པོའི་ཞབས། །གང་དང་མི་གཉིས་རང་བྱུང་རྡོ་རྗེ་གྲུབ་པའི་གཙོ། །མཐའ་ཡས་ཤེས་བྱ་གཟིགས་རྣམས་ཚེ་རབས་ཀུན་ཏུ་བསྙེན། །དམ་པ་དེ་ཀུན་རྣམ་བྱང་ཆེན་པོར་འུབ་ཆུབ་པའི། །རང་བཞིན་དོན་དམ་རྡོ་རྗེ་འདུས་མ་བྱས་པའི་ཁམས། །ཚོགས་བརྒྱད་སྦུབས་ནས་ཇི་བཞིན་སྟོན་མཛད་བླ་མ་རྗེ། །རིགས་ཀྱི་བདག་པོར་བཞུགས་ལ་བདག་རྒྱུད་བྱིན་གྱིས་རློབས། །གང་གི་ཡེ་ཤེས་སྒྱུ་མའི་འཕྲུལ། །མི་ཕྱེད་རྡོ་རྗེར་འབྱམས་ཀླས་བཞིན། །དྲི་མེད་མཁའ་ཟླ་མཚོར་སྣང་ལྟར། །ཡོངས་ཤར་མགོན་དེས་བདག་བློ་སྐྱོངས། །རིང་ལུགས་ལེགས་བཤད་ཀུནྡའི་དགྲ། །བཤད་སྒྲུབ་མཁའ་ལ་ཆས་པའི་ཚེ། །ལོག་རྟོག་མུན་པ་འཇོམ་བྱེད་ཀྱང་། །བདག་བློའི་པདྨོ་རྣམ་པར་རྒྱས། །དེ་ཕྱིར་དེ་ཡིས་ལེགས་སྨིན་པའི། །རྒྱུད་དོན་རྣམ་བཀྲའི་དགའ་ཚལ་ནི། །སྐལ་ལྡན་མིག་གི་བདུད་རྩི་རུ། །འདི་ན་བཞད་ལ་ལྟད་མོ་ལྟོས། །དེ་ཡང་འདིར་གདོད་མའི་ནང་དབྱིངས་ཆེན་པོ་ངོ་བོ་ཀ་ནས་དག་ཅིང་རང་བཞིན་ལྷུན་གྱིས་གྲུབ་པའི་རོལ་པ་ཚད་མེད་པའི་ཐུགས་རྗེའི་འཆར་ཚུལ་དྲུག་དང་སྒོ་རྣམ་པ་གཉིས་སུ་གང་དུའང་བསྐྱོད་པ་མེད་བཞིན་ཅིར་ཡང་སྣང་བར་གྱུར་པ་ལས། །དེ་ཉིད་དུ་གཞན་རྐྱེན་ལ་མ་ལྟོས་པར་རང་བྱུང་གི་ཆོས་གསུམ་དང་ཁྱད་ཆོས་དྲུག་གི་ཚུལ་དུ་དག་པ་ཡེ་ཤེས་ཀྱི་སྒོ་ལྟར་སྣང་བ་ནས། ཐོག་མའི་གྲོལ་ས་གང་ཡིན་པ་ལ་བཙན་ས་ཟིན་པར་མཛད་པ་པོ་ནི་བདེ་གཤེགས་ཀུན་གྱི་སྤྱི་རིགས། རྒྱལ་བའི་ཡང་རྒྱལ། སྟོན་པའི་སྟོན་པ། སྲིད་བཞིའི་སྤྱི་དཔལ། ཀུན་ཏུ་བཟང་པོ་ཞེས་གྲགས་པ་དེ་ལགས་སོ། དེ་དང་ཆབས་ཅིག་དེ་ཉིད་དང་ངོ་བོ་གཅིག་གིས་བསྡུས་ཀྱང་ཁྱད་ཆོས་རྣམས་མ་རྟོགས་པ་ལ་ལྟོས་ནས། བདག་ཉིད་གཅིག་པའི་མ་རིག་པ་དང་གང་དང་ལྷན་ཅིག་མི་ཤེས་པའི་མཐུ་བརྟས་པས་ལྷན་ཅིག་སྐྱེས་པའི་མ་རིག་པ་སྟེ་གཉིས་ཀྱིས་རྒྱུ་བྱས། རང་སྣང་ལ་གཞན་དུ་བཟུང་བས་རྐྱེན་བྱས་ཏེ་མ་དག་པ་འཁྲུལ་པའི་སྒོ་ལྟར་སྣང་བ་ནས་འགྲོ་དྲུག་གི་སྣང་ཚུལ་ཐ་དད་པ་རྣམས་ཀྱང་མིག་འཕྲུལ་ཅི་བཞིན་ཡོངས་སུ་སྣང་བར་གྱུར་ཏོ། །དེའི་ཚེ་དེའི་དུས་ན་སྟོན་པ་ཀུན་ཤེས་རིག་པའི་རྒྱལ་པོ་ཉིད། །ཆོས་ཉིད་བསམ་གྱིས་མི་ཁྱབ་པའི་དབྱིངས་ལས་གང་དུའང་འཕོས་པ་མེད་བཞིན། །ཐུགས་རྗེ་ལྟར་འཆར་བའི་གོ་མ་འགག་པ་ནས་རང་སྣང་པའི་ཞིང་ཁམས་འོག་མིན་ཆེན་པོར། བདེ་གཤེགས་ཀུན་དང་གཉིས་སུ་མེད་ཅིང་ཀུན་གྱི་སྤྲུལ་གཞིར་གྱུར་པར་རིགས་བདག་དྲུག་པའི་ཕྱག་རྒྱར་སྣང་བར་མཛད་དེ། ཉིད་ལས་མི་གཞན་པའི་འཁོར་རྒྱལ་བ་རིགས་ལྔ་རྒྱལ་སྲས་སེམས་དཔའ། འཇོམ་བྱེད་ཁྲོ་བོ་དང་བཅས་པ་མངོན་པར་མཛད་ནས། །དུས་གསུམ་ལས་འདས་པ་རྟག་པ་རྒྱུན་གྱི་འཁོར་ལོར་གསང་བ་ཆེན་པོ་འདི་དག་འགྲོ་བར་མཛད་བཞིན་འགྲོ་འདུལ་སྤྲུལ་པའི་སྤྲིན་གྱིས་ཀྱང་འཇིག་རྟེན་གྱི་ཁམས་ཡོངས་སུ་ཁྱབ་པར་མཛད་དོ། །དེ་ལྟར་གསང་ཆེན་རྡོ་རྗེ་ཐེག་པའི་ཆོས་ཀྱི་འཁོར་ལོ་ཇི་སྙེད་ཅིག་བསྐོར་བར་མཛད་པ་ལས་འདིར་འཆད་པར་བྱ་བ་ནི་རྒྱུད་ཐམས་ཅད་ཀྱི་རྒྱལ་པོ། །ཐེག་པ་ཐམས་ཅད་ཀྱི་ཡང་རྩེ། བསྟན་པ་ཐམས་ཅད་ཀྱི་འབྱུང་གནས། ལུང་ཐམས་ཅད་ཀྱི་སྤྱི་འགྲེལ། རྒྱལ་བ་ཐམས་ཅད་ཀྱི་དགོངས་པའི་བཞེད་ཕུག །འབྲས་བུ་ཐམས་ཅད་ཀྱི་ཐུག་ས། འདས་པའི་སངས་རྒྱས་ཐམས་ཅད་ཀྱི་གཤེགས་ཤུལ། མ་འོངས་པའི་རྣལ་འབྱོར་པ་ཐམས་ཅད་ཀྱི་ལམ་དམ་པ་སྟེ། ཆེ་བའི་ཡོན་ཏན་བརྒྱད་དང་ལྡན་པ་སྒྱུ་འཕྲུལ་རྩ་བའི་རྒྱུད་དཔལ་གསང་བའི་སྙིང་པོ་ཉིད་འཆད་པར་བྱ་བ་ཡིན་ཏེ། དེ་ལྟར་ཡང་བི་མ་ལའི་ཁོག་གཞུང་གསལ་སྒྲོན་ལས། རང་བཞིན་གསང་བའི་སྙིང་པོ་འདི། །གཞན་ལས་དཔག་པ་ཆེ་བ་བརྒྱད། ཅེས་སོ། །ཆེ་བ་དེ་ལྡན་གྱི་རྒྱུད་འདི་ནི་མཚོན་བྱ་རང་བཞིན་གཞིའི་རྒྱུད་ཀྱི་གནས་ལུགས་སྒྲོ་སྐུར་དང་བྲལ་པ་ཉིད་འཛུབ་ཚུགས་སུ་སྟོན་པར་བྱེད་པའི་སྔགས་བླ་ན་མེད་པ་ཉིད་ཡིན་ཏེ། དེ་ཉིད་ལས། མཚོན་བྱ་རང་བཞིན་གཞི་ཡི་རྒྱུད། །སྒྲོ་སྐུར་མེད་པར་སྟོན་པ་ནི། །མཚོན་བྱེད་སྒྱུ་འཕྲུལ་དྲྭ་བ་སྟེ། །འཛུབ་མོས་རི་བོང་ཅན་བཞིན་ནོ། །ཞེས་སོ། དེ་ལྟ་བུའི་རྒྱུད་སྡེ་ཟབ་མོ་ཉིད་འཆད་བྱེད་ཀྱི་ཆོས་གང་གིས་འཆད་ཅེ་ན། རྒྱལ་བའི་བཀའ་ལུང་ཚད་མ། བླ་མའི་མན་ངག་ཚད་མ། རང་གི་རིག་པ་ཚད་མ་སྟེ། ཀུན་ཁྱབ་ཀྱི་ཚད་མ་གསུམ་གྱིས་འཆད་ལ། དེས་གཞལ་བས་རྒྱུད་དོན་ཤེས་པར་བྱ་བའི་གནས་གང་ཡིན་པ་མཐའ་དག་ཁོང་དུ་ཆུད་ནུས་པ་ཡང་། །རྡོ་རྗེ་མེ་ལོང་ལས། ལུང་དང་རིག་པ་མན་ངག་གི །ཚད་མ་དག་གིས་གང་གཞལ་བས། །ཤེས་བྱ་ཁོང་དུ་ཆུད་པར་འགྱུར། ཞེས་སོ། །དེ་བས་ན་སྒྱུ་འཕྲུལ་སྡེ་བརྒྱད་དང་། །བྱེ་བྲག་གི་བཤད་རྒྱུད་སྡེ་བཞི་ལ་སོགས་མདོ་རྒྱུད་ཚད་མ་དག་གི་ཚིག་དུམ་བུར་བཅད་ནས་འདིར་དྲངས་པས་གཞན་དག་ཡིད་ཆེས་པར་བྱ་བའི་དཔང་པོ་སྟེ། །རྒྱལ་བ་ནི་ཉེས་པ་མཐའ་དག་ཡོངས་སུ་ཟད་པའི་ཕྱིར། རྣམ་པ་ཀུན་དུ་རྫུན་གསུངས་མི་སྲིད་དེ་རྒྱུ་གཡོ་སྒྱུ་དང་བྲལ་བའི་ཕྱིར་རོ། །དེས་ན་དེའི་གསུང་མཐའ་དག་བདེན་པར་ངེས་ཏེ། མདོ་ལས། ལུང་ནི་ཡིད་ཆེས་ཚིག་ཡིན་ཏེ། །ཉེས་པ་ཟད་པས་རྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཉེས་ཟད་ལུང་དུ་ཤེས་པར་བྱ། ཞེས་སོ། །དེ་དང་རྗེས་སུ་མཐུན་པར་འཕགས་བོད་ཀྱི་པཎ་གྲུབ་རྣམས་ཀྱིས་ཇི་ལྟར་མཛད་པའི་དགོངས་པ་ཐམས་ཅད། བླ་མ་དམ་པ་རྣམས་ཀྱི་ཞལ་ལས་ཐོས་པའི་མན་ངག་ཚད་མ་དག་ཀྱང་རང་ཉིད་ཀྱིས་ཚེགས་ཆུང་ངུས་རྒྱུད་དོན་རླབས་པོ་ཆེ་རྟོགས་པར་འགྱུར་པའི་ཐབས་དང་གནས་སྐབས་སུ་བྱ་སླ་ཞིང་མཐར་ཐུག་དགོས་པ་དཔག་ཏུ་མེད་པ་འགྲུབ་ནུས་པ་ཞིག་སྟེ། །རྒྱུད་ལས། ཚེགས་ཆུང་དོན་ཆེ་ཐབས་དཔག་མེད། །བྱ་སླ་དཔག་དཀའ་མན་ངག་གོ །ཞེས་སོ། །དེ་བས་ན་དེ་གཉིས་ཀ་དང་འབྲེལ་བར་ཤེས་རབ་གསུམ་ལས་གཞན་དུ་མ་གྱུར་བའི་རིག་པ་ཚད་མས་གཞལ་ན་འཆད་བྱའི་དོན་ཇི་བཞིན་རྟོགས་ནུས་པ་ཡང་། རྒྱས་པའི་ལེའུ་དོན་ལྔ་པ་ལས། ཡངས་ལ་རྒྱ་ཆེ་གཏིང་ཟབ་པའི། །ཤེས་རབ་ཟབ་པས་རྟོགས་པར་འགྱུར། །ཞེས་དང་། དེ་ཕྱིར་བློ་ཅན་རྣམས་ཀྱིས་བརྩོན། ཞེས་པ་ལྟར་རོ། ད་ནི་ཇི་ལྟར་འཆད་པའི་ཚུལ་བརྗོད་པར་བྱ་སྟེ། །དེ་ལ་ཡང་སྤྱི་དང་བྱེ་བྲག་གཉིས་ལས། དང་པོ་ལ་ཡང་ཐུན་མོང་དང་ཐུན་མོང་མ་ཡིན་པའི་བཤད་ཚུལ་སོ་སོར་ཡོད་པ་ལས་དང་པོ་མདོ་རྒྱུད་ཐུན་མོངས་པ་རྣམས་ནི་སྤྱིའི་ཆིངས་ལྔའི་སྒོ་ནས་འཆད་དེ། ཇི་སྐད་དུ་རྣམ་བཤད་རིག་པ་ལས། མདོ་དོན་སྨྲ་བར་འདོད་རྣམས་ལ། །མན་ངག་ཅུང་ཞིང་སྦྱིན་པར་བྱ། །དེ་ལ་མན་ངག་འདི་ཡིན་ཏེ། །དགོས་པ་བསྡུས་པའི་དོན་བཅས་དང་། ཚིག་དོན་བཅས་དང་མཚམས་སྦྱོར་བཅས། །བརྒལ་ལན་བཅས་ཏེ་བསྙད་པར་བྱ། །ཞེས་པ་ལྟར་རོ། །དེ་ལས་རྒྱུད་སྡེའི་རྣམ་གྲངས་མ་ཧཱ་ཡོ་ག་སྤྱིའི་བཤད་ཚུལ་ནི་རྒྱན་བདུན་ཡིན་ཏེ། དེ་ཡང་འདི་ལྟར་ཧེ་རུ་ཀ་གལ་བོའི་རྒྱུད་ལས། མ་ཧཱ་ཡོ་གའི་རྒྱན་བདུན་ཡང་། གླེང་སློང་པ་དང་སངས་རྒྱས་ཚུལ། །རྒྱས་བཤད་མཐའ་དང་བཤད་པའི་ཚུལ། །དབྱེ་བའི་རྣམ་པ་གང་ཟག་སྣོད། །བདེན་པའི་དགོངས་པ་ཤེས་པར་བྱ། །ཞེས་པ་ལྟར་དང་། ཨ་ནུ་ཡོ་ག་རྣམས་ལུང་བདུན་གྱི་སྒོ་ནས་འཆད་པ་དང་། ཨ་ཏི་ཡོ་ག་རྣམས་སྤྱི་དོན་དྲུག་གི་སྒོ་ནས་འཆད་ཚུལ་སོགས་ཀྱང་རྒྱུད་དེ་ཉིད་དུ་གསུངས་པ་ལྟར་རོ། །གཉིས་པ་རྗོགས་པ་ཆེན་པོ་ཐུན་མོང་མ་ཡིན་པའི་བཤད་སྲོལ་ནི་ཆིངས་ཆེན་པོ་ལྔ་དང་། ཡན་ལག་བཞིས་ཤེས་པར་བྱ་བ་དང་པོ་ནི། ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །རྩ་བའི་དོན་གྱིས་མ་བཤད་ན། །ཆོས་རྣམས་རིག་པར་མི་འདུས་པས། །མཐའ་ཡས་པ་ཡི་སྐྱོན་དུ་འགྱུར། །ཡོ་གའི་དོན་གྱིས་མ་བཤད་ན། །ཐེག་པའི་རུ་ཤན་མི་ཕྱེད་པས། །ཆེ་ཆུང་རིམ་པ་དོན་མེད་འགྱུར། །ཚིག་གི་དོན་གྱིས་མ་བཤད་ན། །རྒྱུད་རྣམས་རིམ་པར་གསལ་པའི་ཚིག །འཕྲུལ་མི་ཆོམས་པའི་སྐྱོན་དུ་འགྱུར། །དགོས་ཆེད་དོན་གྱིས་མ་བཤད་ན། །རྫོགས་ཆེན་བྱ་བརྩོལ་མེད་པ་ལ། །དོན་མེད་པ་ཡི་སྐྱོན་དུ་འགྱུར། །ཞེས་དང་། ཡན་ལག་བཞི་ནི། རིག་པ་རང་གྲོལ་ལས། ཁྱུང་ཆེན་མཁའ་ལྡིང་ལྟ་བུའི་བློས། །དོན་གྱི་ཁོག་རྣམས་ཕུབ་སྟེ་བཤད། །སྟག་མོ་མཆོངས་སྟངས་ཤེས་རབ་བློས། །དོན་གྱི་ས་ཆེན་བཅད་དེ་བཤད། །རུས་སྦལ་ནུར་འགྲོའི་ལྟ་བུའི་བློས། །ཡི་གེའི་འབྲུ་རྣམས་ཆོམ་པར་བཤད། །མུ་ཏིག་བལྟར་བརྒྱུས་ལྟ་བུའི་བློས། །མན་ངག་དོན་དུ་བསྡེབས་ལ་བཤད། །ཅེས་སོ། །དེ་དག་གིས་སྤྱིའི་བཤད་ཐབས་ཅུང་ཟད་བསྟན་ནས། ད་ནི་བྱེ་བྲག་རྒྱུད་འདི་ཉིད་ཀྱི་བཤད་ཚུལ་ཅུང་ཟད་བརྗོད་པར་བྱ་སྟེ། དེ་ཡང་ཁོག་གཞུང་གསལ་སྒྲོན་ལས། ཕས་ཀྱི་ལན་གདབ་འབྲུ་གནོན་ཚིག །ཁོག་འབུབ་ས་བཅད་བཞི་རུ་གསུངས། །ཞེས་པས་ཁོག་འབུབ་པ་ལོ་རྒྱས་ཀྱི་དོན་དང་སྦྱར་ཏེ་བཤད་པ་དང་། ས་བཅད་པ་དཀྱུས་ཀྱི་དོན་དང་སྦྱར་ཏེ་བཤད་པ་དང་། འབྲུ་གནོན་པ་ཚིག་གི་དོན་དང་སྦྱར་ཏེ་བཤད་པ་དང་། གནས་སྐབས་བརྒལ་ལན་གྱི་དོན་དང་སྦྱར་ཏེ་བཤད་པ་དང་བཞིའི་སྒོ་ནས་འཆད་པ་ཡིན་ཡང་གོང་དུ་སྨོས་པའི་རྫོགས་ཆེན་གྱི་བཤད་པའི་ཡན་ལག་བཞི་དང་ཕྱོགས་མཚུངས་པ་ཡིན་ནོ། །གཞན་ཡང་ཆོས་ལྔའི་སྒོ་ནས་འཆད་པ་སོགས་ཟུར་པ་ཡབ་སྲས་ཀྱི་ཕྱག་བཞེས་དུ་མས་མཚོན། འཕག་བོད་ཀྱི་མཁས་གྲུབ་རྣམས་ཀྱིས་འཆད་སྲོལ་ཚིག་རིས་ཐ་དད་པ་མང་དུ་སྣང་ཡང་དོན་ལ་ནི་གཅིག་གི་ནང་དུ་ཀུན་འདུས་པས་ན་སྔོན་གྱི་བདག་ཉིད་ཆེན་པོ་རྣམས་ཀྱི་ཕྱག་སྲོལ་མི་ཉམས་པའི་ཆེད་ཙམ་དུ་ཟད་དོ། །དེ་བས་ན་འདིར་དེ་དག་རེ་ཞིག་བཏང་སྙོམས་སུ་བྱས་ནས་གོང་དུ་བརྗོད་ཟིན་པའི་བཤད་ཐབས་ཀུན་དང་འབྲེལ་བར་ས་བཅད་གཉིས་ཀྱི་སྒོ་ནས་འཆད་པ་ཡིན་ལ། དེ་ཡང་འདི་ལྟར། སྤྱི་དོན་ལོ་རྒྱུས་ཀྱི་སྒོ་ནས་ཁོག་འབུབ་པ་དང་། བྱེ་བྲག་གཞུང་དོན་གྱི་སྒོ་ནས་རྒྱས་པར་བཤད་པའོ། །དང་པོ་ནི་རྣ་རྒྱུད་ལུང་གི་ཕྲེང་བ་ལས། རྒྱལ་བ་རྣམས་ནི་འཇིག་རྟེན་བྱོན་པའི་ཚེ། དེ་ཡིས་གསུངས་པའི་ལུང་ཆེན་རྣམས་ལ་ནི། ཕྱི་རོལ་རྒོལ་པ་ངན་པ་འབྱུང་སྲིད་ཀྱིས། དང་པོ་སྲིད་པ་ཆོས་ཀྱི་ལོ་རྒྱུས་སྨྲོས། ཞེས་གསུངས་པ་ལྟར་གནས་སྐབས་སུ་དམིགས་ཀྱིས་བསལ་ནས་བཤད་བྱར་ངོས་བཟུང་པའི་རྒྱུད་སྡེ་ཉིད་ཀྱི་བྱུང་ཚུལ་མདོ་ཙམ་ཞིག་བརྗོད་པར་བྱ་བ་ཡིན་ལ། དེ་ལ་ཡང་གཉིས་ཏེ། བརྒྱུད་ཚུལ་གྱི་ལོ་རྒྱུས་དངོས་དང་ཇི་ལྟར་བརྒྱུད་པའི་གཞུང་ཉིད་ལ་ཕྱིན་ཅི་ལོག་གི་གླན་ཀ་སྤངས་པའོ། །དང་པོ་ནི་སྤྱིར་སྔ་འགྱུར་རྙིང་མའི་རྒྱུད་སྡེ་བཀའ་མ་ཐམས་ཅད་བརྒྱུད་པ་གསུམ་ལྡན་དང་གཏེར་མ་རྣམས་བརྒྱུད་ཚུལ་དྲུག་དང་བདུན་དང་དགུ་རྣམས་སུ་ངེས་པ་ལྟར། འདིར་ཡང་བཤད་རྒྱུད་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་པར་བརྒྱུད། །གང་ལ་ཐུག་གི་བར་དུའོ། །ཞེས་གསུངས་པ་ལྟར་ཁྱབ་བདག་རིགས་དྲུག་པ་ནས་བདག་ཅག་གི་བླ་མའི་བར་རྒྱལ་པ་དགོངས་པའི་བརྒྱུད་པ། རིག་འཛིན་རིག་པའི་བརྒྱུད་པ། གང་ཟག་རྣ་བར་བརྒྱུད་པ་སྟེ་གསུམ་གྱི་ཚུལ་དུ་བརྒྱུད་པའི་ཟམ་མ་ཆད་ཅིང་བྱིན་རླབས་ཀྱི་ན་བུན་མ་ཡལ་པ་ཞིག་གོ །དེ་ལྟར་བརྒྱུད་ཚུལ་གསུམ་གྱི་དང་པོ་ནི་གདོད་མའི་མགོན་པོ་ཉིད་གཙང་མའི་གནས་སྤངས་བའི་འོག་མིན་ཆེན་པོར་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་པ་གང་གི་ཚེ། ཕུན་སུམ་ཚོགས་པ་ལྔ་ལྡན་གྱི་གླེང་གཞི་ཇི་ལྟར་བྱུང་ཚུལ་ནི་རྒྱུད་འབྱུང་བའི་རྒྱུ་སྟེ། །གོང་དུ་ཕྱོགས་ཙམ་བསྟན་པ་ལྟར་འོག་ཏུ་གླེང་གཞིའི་ལེའུ་སྟེ་དང་པོའི་སྐབས་སུ་ཞིབ་མོར་འཆད་པར་འགྱུར་ལ། དེ་ཙམ་ན་སྟོན་པས་༼མ་དཔེ་མི་གསལ༽ཐུན་མོང་མ་ཡིན་པའི་ཐབས་ཤེས་དབྱེར་མེད་གསུམ་གྱི་ཆ་ནས་གླེང་བསླང་པས་འཁོར་གྱིས་བདེ་བས་དབྱེར་མེད་ཇི་ལྟར་རྟོགས་ཚུལ་དང་སྟོན་འཁོར་ཐུན་མོང་གིས་གླེང་སློང་ཇི་ལྟར་མཛད་ཚུལ་རྣམས་ནི་རྒྱུད་འབྱུང་མ་རགས་པའི་རྐྱེན་ཏེ་གླེང་སློང་གི་ལེའུ་སྟེ་གཉིས་པས་ཤེས་སོ། །དེ་ལྟ་བུའི་དགོངས་སྤྱོད་རྨད་དུ་བྱུང་བ་དོན་གྱི་ཟབ་དབང་གསུམ་ལ་བརྟེན་ནས་རང་གི་རོལ་པ་དང་རང་གི་རང་བཞིན་ངོ་བོ་དབྱེར་མེད་པར་གྱུར་བའི་ཚུལ་བསྟན་ནས། རིགས་ཀུན་དང་གཉིས་སུ་མེད་པར་བཞུགས་པ་དེའི་ངང་ལས་མ་གཡོས་བཞིན་དུ། གདུལ་བྱའི་ཁམས་སུ་ཆོ་འཕྲུལ་ཆེན་པོ་གསུམ་ཇི་ལྟར་སྣང་བར་མཛད་པ་ནི་འདི་ལྟ་སྟེ། སྐུའི་སྤྲུལ་པ་ལྟར་སྣང་བའི་ཆོ་འཕྲུལ་དང། གསུང་གི་སྤྲུལ་པ་ལྟར་སྣང་པའི་ཆོ་འཕྲུལ་དང་ཐུགས་ཀྱི་སྤྲུལ་པ་ལྟར་སྣང་པའི་ཆོ་འཕྲུལ་ལོ། དེ་དག་ཀྱང་གསང་བ་གསུམ་གྱི་ཐ་དད་དུ་སྤྲུལ་པ་ནི་མ་ཡིན་ཏེ། སྐུ་གསུང་ཐུགས་དབྱེར་མི་ཕྱེད་པའི་རྡོ་རྗེ་ལས་སོ། དེ་ཡང་འདི་ལྟར་དང་པོ་ལ་ཡང་གསུམ་སྟེ། རང་བཞིན་སྤྲུལ་པ་དང་འགྲོ་འདུལ་སྤྲུལ་པ་དང་སྣ་ཚོགས་སྤྲུལ་པའོ། །དང་པོ་ལ་ཡང་གདུལ་བྱའི་དབང་གིས་དངོས་གནས་པ་དང་ཕྱོགས་མཐུན་པ་གཉིས་སུ་ཡོད་པ་ལས། དང་པོ་ནི་ས་བཅུའི་སེམས་དཔའ་རྣམས་ཀྱི་སྣང་ངོར་མཁའ་ཟླ་ཆུ་མཚོར་སྣང་བ་ལྟར་ལོངས་སྐུ་རིགས་ལྔ་ཉིད་རང་གི་གནས་ནས་གང་དུའང་མ་བསྐྱོད་ཀྱང་རང་བཞིན་མ་འཁྲུལ་བར་སྣང་བས་ན་རང་བཞིན་སྤྲུལ་པའི་སྐུ་ལྔ་ཞེས་བརྗོད་ལ། གཞན་དུ་རང་རྒྱུད་སངས་རྒྱས་ཀྱི་སས་བསྡུས་ཤིང་གདུལ་བྱ་ལམ་པས་བསྡུས་པས་ན་ལམ་འབྲས་གཉིས་ཀར་སྣང་དུ་རུང་བས་ཕྱེད་སྤྲུལ་ལོངས་སྐུ་ཞེས་ཀྱང་བྱའོ། །དེ་ཡང་འདི་ལྟར་དབུས་ན་འོག་མིན་ཁང་བུ་བརྩེགས་པའམ་སྟུག་པོ་བཀོད་པ། ཤར་ན་མངོན་པར་དགའ་པ་ལྷོ་ན་རིན་ཆེན་བརྒྱད་པ་ནུབ་ན་བདེ་བ་ཅན་བྱང་ན་ལས་རབ་གྲུབ་པའི་ཞིང་དང་སྔར་སྟོན་པ་ཡང་རྣམ་པར་སྣང་མཛད་རྡོ་རྗེ་སེམས་དཔའ་རིན་ཆེན་འབྱུང་གནས་འོད་དཔག་མེད་དོན་ཡོད་གྲུབ་པ་སྡེ་ལྔས་འཁོར་ས་ཆེན་པོ་ལ་གནས་པ་རྣམས་ལ། ཆོས་ཐེག་པ་ཆེན་པོ་ཐུན་མོང་དང་ཐུན་མོང་མ་ཡིན་པའི་རྣམ་གྲངས་ཞལ་དང་ལྗགས་ལས་འོད་ཟེར་འཕྲོས་པའི་རྩེ་ལས་དུས་རྟག་པ་རྒྱུན་དུ་རང་སྣང་ཞིང་མེ་ལོང་ལྟ་བུའི་སྣང་བས་སྒྲིབ་པ་སྦྱོང་བར་འདོད་དེ། འདི་ཉིད་ཀྱི་ལེའུ་དྲུག་པ་ལས། འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། སོགས་ཀྱིས་སྟོན་པ་ལྟར་ཀུན་བྱེད་ལས་སྟོན་པ་ལོངས་སྤྱོད་རྫོགས་པའི་གནས་བསྟན་པ། འཇིག་རྟེན་མཚན་མ་ཀུན་གྱི་སྟེང་གྱུར་བ། གནས་ཀྱི་འོག་མིན་ཁང་བུ་བརྩེགས་པ་ཡི། གཞལ་ཡས་ཁང་སྟེ་གནས་ཀྱི་འོག་མིན་བཤད། ཅེས་དང་། སྟོན་པ་ལོངས་སྤྱོད་རྫོགས་སྐུའི་འཁོར་བསྟན་པ། མོས་སྤྱོད་བཞི་ཡིས་ས་ལས་འདས་པ་ཡིས། །དང་པོ་རབ་ཏུ་དགའ་བའི་ས་མནན་ནས། །ས་བཅུ་ཆོས་ཀྱི་སྤྲིན་གྱི་ས་པ་༼མ་དཔེ་མི་གསལ༽སྟེ། ཞེས་དང་། ཆོས་ཅི་ཞིག་སྟོན་པ་ཡང་དེ་ཉིད་ལས། །ས་བཅུ་པ་ཡི་བྱང་ཆུབ་སེམས་དཔའ་ལ། བྱང་ཆུབ་སེམས་ཏེ་སྐུ་དང་ཡེ་ཤེས་བཤད། ཅེས་དང་འཆད་ཚུལ་ཡང་ལོངས་སྤྱོད་རྫོགས་སྐུ་རང་གི་ངོ་བོས་སྟོན་ཞེས་སོ། །གཉིས་པ་གདུལ་བྱ་སྐྱེ་འཕགས་འདྲེས་མའི་དོན་དུ་འོག་མིན་ཕྱོགས་མཐུན་པར་བསྟན་པ་ནི། མི་མཇེད་ལ་སོགས་པའི་འཇིག་རྟེན་རྣམས་སུ་རང་རང་གི་གནས་ཀྱི་མཆོག་གཟུགས་ཁམས་བསམ་གཏན་བཞི་བའི་ནང་ཚན་གཙང་མ་རིས་ཀྱི་ལྷ་ལྔའི་ཐོག་མ་འོག་མིན་རྣམ་མཛེས་ཆེན་པོར་གྲགས་པ་དྭངས་མ་འོད་ཀྱི་རང་བཞིན་ལས་གྲུབ་པ་དེར། །འཇིག་རྟེན་དུ་སངས་རྒྱས་ནམ་འབྱོན་པར་འགྱུར་བ་དེའི་ཚེ། སྤྲུལ་པ་དེ་ཉིད་ལོངས་སྐུའི་ཆ་བྱད་ཀྱིས་དང་པོ་གནས་འདིར་བྱོན་ནས་ལྷ་དང་གྲུབ་པ་དང་རིག་སྔགས་འཆང་གི་དབང་པོ་ཚད་མེད་པ་ལ། བྱ་སྤྱོད་རྣལ་འབྱོར་གྱི་རྒྱུད་དང་། ཕ་རོལ་ཕྱིན་པའི་ཆོས་དུ་མ་སྟོན་པར་འགྱུར་ཏེ། །ལེགས་པར་གྲུབ་པའི་རྒྱུད་ལས། གཙང་མའི་འོག་མིན་རྣམ་མཛེས་པར། གྲུབ་པ་དབང་པོ་ལ་སོགས་ལ། རིག་སྔགས་གཟུངས་སྔགས་རྣལ་འབྱོར་དང་། རྒྱུ་ཆོས་དུ་མས་ཚིམ་པར་མཛད། ཅེས་སོ། །དེ་ལྟར་ན་དེའི་དུས་སུ་ལམ་མས་སྦྱངས་ཀྱི་སེམས་དཔའ་ས་ལ་གནས་པ་ལ་སོགས་པའི་གདུལ་བྱ་དེ་དག་སྲིད་དམ་ཞེ་ན། འདི་ནི་སྟོན་པ་རང་གི་སྤྲུལ་པ་སྣང་ཚུལ་གྱི་ངོས་ནས་བརྗོད་པ་ཡིན་གྱིས། །གདུལ་བྱ་དང་འདུལ་བྱེད་དེའི་དུས་ཁོ་ནར་ཚོགས་དགོས་པའི་ངེས་པ་ནི་མེད་དོ། འོན་ཀྱང་སྣང་ཚུལ་ནི་བསམ་གྱིས་མི་ཁྱབ་པ་ཞིག་ཡིན་ཏེ། ནམ་མཁས་གང་དུ་ཁྱབ་པ་དེ་ཙམ་དུ་ཆོས་སྐུ་དང་ལོངས་སྐུས་ཁྱབ་ཅིང་། དེས་གང་ཁྱབ་པ་དེ་ཙམ་གདུལ་བྱས་ཁྱབ་ལ། གདུལ་བར་བྱ་བའི་ཡུལ་ཇི་སྙེད་པའི་ཁམས་དེར་སྤྲུལ་སྐུ་དང་འཕྲིན་ལས་ཀྱིས་ཁྱབ་ན་རྒྱལ་བའི་ཞིང་ཁམས་འདི་ན་ཡོད་ཀྱིས་འདི་ན་མེད་ཅེས་སྨྲ་བར་མི་བྱ་སྟེ། སྡོང་པོ་དཀོད་པའི་མདོ་ལས། །སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། ཅེས་གསུངས་པ་ལྟར་སྤུ་ཡི་རྩེ་མོ་གཅིག་གི་སྟེང་ནའང་ཞིང་གི་རྡུལ་སྙེད་ཀྱི་གྲངས་དང་མཉམ་པའི་ཞིང་ཁམས་མེད་པར་མི་སེམས་ལ་དེ་དག་ཀྱང་གཅིག་ཏུ་གྱུར་པ་དང་རིགས་སུ་ཆད་པ་དང་ཕན་ཚུན་འདྲེས་པར་གྱུར་པ་ལྟ་བུ་མ་ཡིན་པས། ཡངས་དོག་ཕྱོགས་ཆ་དང་བྲལ་བར་ཤེས་པར་བྱའོ། གཉིས་པ་འགྲོ་འདུལ་སྤྲུལ་པ་ལ་ཡང་མདོ་སྡེ་རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །མྱ་ངན་འདས་པ་རྟག་སྟོན་པས། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་ནོ། །ཞེས་གསུངས་པ་ལྟར་བཟོ་དང་སྐྱེ་བ་མཆོག་གི་སྤྲུལ་སྐུ་གསུམ་དུ་ཡོད་པ་ལས་དང་པོ་ནི། སྐུ་གསུང་ཐུགས་ཀྱི་ཕྱག་རྒྱ་བཟོ་བོའི་འཕྲུལ་གྱིས་བྱས་པ་ལྟར་སྣང་བ་དག་ཡིན་ལ། དེ་དག་ཀྱང་རྒྱལ་བ་ཉིད་ཀྱི་ཐུགས་རྗེ་ལས་རང་སྣང་བའི་ཚུལ། ཕལ་པོ་ཆེ་ལས། ཇི་ལྟར་སེམས་ཅན་བསམ་པ་བཞིན། ཚད་མེད་པར་ནི་རབ་ཏུ་སྣང་། ཞེས་དང་། སྙན་གྱི་དགོངས་རྒྱན་ལས། ད་ནི་སྙིགས་མའི་དུས་ཀྱི་ཚེ། །བཟོ་དང་ཡི་གེའི་གཟུགས་སུ་འདུག །ང་ཡིན་སྙམ་དུ་དད་པར་བྱོས། །ཞེས་སོ། །དེ་ལ་ཁ་གཅིག་འདི་སྙམ་དུ། གཅིག་དེ་དག་རྒྱལ་བས་སྤྲུལ་པ་ཅིའི་ཕྱིར་ཡིན། ཁོ་བོ་ཅག་གིས་བྱས་པར་ཟད་དོ། སེམས་ན་མ་ཡིན་ཏེ། རང་རེ་ལ་ཆོས་སྣང་བའི་སྒོ་གཅིག་སྐྱེས་པ་དེ་ཡང་རྒྱལ་བའི་ཐུགས་རྗེ་ཁོ་ན་ལས་གཞན་དུ་མ་དམིགས་སོ། །གཉིས་པ་ནི་འགྲོ་དྲུག་སོ་སོའི་ལས་སྣང་དང་མཐུན་པར་འདུལ་བྱེད་ཀྱང་སྐྱེ་བ་ཐ་དད་དུ་སྣང་པ་དག་ཡིན་ཏེ། འདི་ལྟར་དགེ་བའི་བཤེས་གཉེན་དང་། དགེ་བའི་གྲོགས་པོ་དང་། དགེ་སྤྱོད་རྒྱལ་པོ་དང་། དམངས་རིགས་འབྱོར་ལྡན་དང་། གཞན་ཡང་དམག་དཔོན་དང་། ཤན་པ་དང་། སྨད་འཚོང་མ་དང་། གཅན་གཟན་གྱི་རྒྱལ་པོ་དང་། ལས་མཁན་དང་། བྱ་དང་རི་དྭགས་ལ་སོགས་པའི་རྣམ་པ་རིས་སུ་མ་ཆད་པ་དག་དང་། མུ་གེའི་ཚེ་ན་ཉ་བོ་ཆེ་དང་། དམྱལ་པའི་ཡུལ་དུ་གྱད་པཀྵི་ཏ་དང་། སྲིན་པོའི་གླིང་དུ་ཅང་ཤེས་བཱ་ལ་ཧ་ལ་སོགས་པ་གང་ལ་གང་འདུལ་གྱི་སྤྲུལ་པ་དཔག་ཏུ་མེད་པ་དག་ཡིན་ཏེ། འཕགས་པ་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པའི་མདོ་ལས། །འཇམ་དཔལ་དེ་བཞིན་གཤེགས་པའི་སྐུ་གསེར་གྱི་ཁ་དོག་ཏུ་མཐོང་བས་གདུལ་བར་བྱ་བ་ཡིན་ན། དེ་བཞིན་གཤེགས་པའི་སྐུ་ཡང་གསེར་གྱི་ཁ་དོག་ཏུ་སྣང་ངོ་། དེ་བཞིན་དུ་བཻ་ཌཱུརྱ་དང་། ཨནྜ་རྙིལ་དང། སྤུག་དང་། མུ་ཏིག་དམར་པོའི་ཁ་དོག་གིས་གདུལ་བར་བྱ་བ་ཡིན་ན། དེ་དག་གི་ཁ་དོག་ཏུ་བཞུགས་སོ། །དེ་བཞིན་དུ་འཇིག་རྟེན་སྐྱོང་བ་དང། བརྒྱ་བྱིན་དང་། ཚངས་པ་དང་། དབང་ཕྱུག་དང་། ལྷ་མ་ཡིན་དང་། མི་དང་། དུད་འགྲོ་དང་། དམྱལ་བ་དང་། གཤིན་རྗེའི་འཇིག་རྟེན་པས་གདུལ་བར་བྱ་བ་ཡིན་ན་དེ་དག་གི་གཟུགས་སུ་ཞུགས་ནས་ཆོས་སྟོན་ཏོ། །ཞེས་གསུངས་པ་ལྟར་ཡིན་པས་ན་རང་རེ་བྱིས་པའི་བློ་དང་མཛའ་བར་གྱུར་པ་དང་ད་དུང་འཕགས་པའི་ཡེ་ཤེས་དང་ནི་བཤེས་པར་གྱུར་པ་མ་ཡིན་པས་། དག་སྣང་ཕྱོགས་མེད་དུ་སྦྱངས་པ་མན་ངག་གི་མཐིལ་དུ་ཚུལ་འདི་དག་གིས་ཀྱང་གཟུ་བོར་གནས་པ་དག་ལ་ཕྱོགས་ཙམ་སྟོན་པ་ཡིན་ནོ། །གསུམ་པ་ནི་མཛད་པ་བཅུ་གཉིས་མཐར་ཕྱིན་ནས་འདུལ་བ་རྣམ་པ་བཞིས་འགྲོ་བ་འདྲེན་པར་མཛད་པ་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་ལ་སོགས་པའི་འདྲེན་པ་སྟོང་འཇམ་དཔལ་དང་ཕྱག་རྡོར་ཏེ། སེམས་དཔའ་གཉིས་དང་བཅས་པ་ཡོངས་སུ་གྲགས་པ་ལྟར་དང་། གཞན་ཡང་བར་སྐབས་ཀྱི་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་དང་བཅས་ཞིང་འདིའི་སྐྱེ་དགུའི་བསོད་ནམས་ཀྱི་བགོ་སྐལ་དུ་བྱོན་དང་འབྱོན་པར་འགྱུར་པ་དེ་བཞིན་དུ། མ་ལུས་ཤིང་ལུས་པ་མེད་པའི་ཞིང་གཞན་ལ་ཡང་ཡོངས་སུ་སྣང་བར་མཛད་ནས་ཆོས་ཀྱི་འཁོར་ལོ་ཡང་དེ་སྙེད་ཅིག་བསྐོར་ཏེ་འགྲོ་བ་རྣམས་ཡང་དག་པའི་ལམ་ལ་འགོད་པར་མཛད་པའི་ཚུལ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཀུན་བཟང་ལོངས་སྤྱོད་རྫོགས་པ་ལས། །འདུལ་བའི་སྤྲུལ་བ་གྲངས་མེད་ཅིང་། །ཁྱད་པར་མི་མཇེད་འཇིག་རྟེན་དུ། །སྟོང་རྩ་གཉིས་ཀྱི་སྐུར་སྣང་ངོ་། །ཞེས་དང་། རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་བའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་བཅས་རོལ་པ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་འཇོམས་དང་རྗོགས་པ་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་གསུངས་པ་ལྟར་དེ་དག་གི་ཟླས་དྲངས་པའི་ཐུབ་པ་གཞན་ལྔ་ཡང་ཡིན་ནོ། །དེ་ལྟར་ན་ཐུབ་པ་དྲུག་པོ་མཛད་པ་བཅུ་གཉིས་མཐར་ཕྱིན་པའི་མཆོག་གི་སྤྲུལ་སྐུར་ཁྱད་མེད་དམ་ཞེ་ན། འདི་ལྟར་གདུལ་བྱའི་མཐུན་སྣང་མ་ངེས་པ་ལ་ལྟོས་ནས། །མཛད་པ་སྣ་ཚོགས་སུ་སྣང་ཡང་། རང་ངོས་ནས་རྒྱལ་བ་ཉིད་ཀྱིས་སྤྲུལ་པའི་མཆོག་གི་སྤྲུལ་སྐུ་ལ་བཟང་ངན་མེད་ཕྱིར་ཁྱད་མེད་ལ། ཇི་ལྟར་མཛད་པ་རྣམས་ཀྱང་འགྲོ་བ་རྣམས་རྣམ་གྲོལ་གྱི་ལམ་ལ་དཀྲི་བར་བྱེད་པའི་ཡང་དག་པའི་མཛད་པ་ཁོ་ན་ལས་མ་འདས་སོ། །འོན་ཀྱང་མཆོག་སྤྲུལ་ཡིན་པ་གང་ཞིག་མཛད་པ་བཅུ་གཉིས་ཁོ་ནར་ངེས་དགོས་པ་དང་། གདུལ་བྱར་སྣང་ཚུལ་གཅིག་དགོས་པས་ཁྱབ་པ་ནི་མེད་དེ། མ་འོངས་པའི་འདྲེན་པ་བྱམས་པ་མགོན་པོ་ཡང་དཀའ་སྤྱད་ཀྱི་མཛད་པ་མི་མཛད་པར་གསུངས་པ་དང་། ཞིང་གཞན་འགའ་ཞིག་ན་བདུད་ཀྱང་མེད་ཕྱིར་དེ་འདུལ་བའི་མཛད་པ་ཡང་མི་མཛད་པ་དང་། སྣང་ཚུལ་ཡང་འོ་སྐོལ་གྱི་སྟོན་པ་འདི་ཉིད་གཅིག་པུ་ལ་ཡང་བདུད་རྣམས་ཀྱིས་ནི་བདུད་དུ་མཐོང་ངོ་། །ལྷས་སྦྱིན་གྱིས་ནི་སྤུན་ཟླར་མཐོང་ངོ་། །ཕྱི་རོལ་པ་དག་གིས་ནི་ལོག་ཆོས་ཅན་དུ་མཐོང་ངོ་། །ལེགས་སྐར་སོགས་ལོག་ལྟ་ཅན་འགའ་ཞིག་གིས་ནི་གཡོ་སྒྱུ་ཅན་དུ་མཐོང་ངོ་། །ཉན་ཐོས་རྣམས་ཀྱིས་ནི་དགྲ་བཅོམ་པར་མཐོང་ངོ་། །ཐེག་ཆེན་པ་ཕལ་གྱིས་ནི་སངས་རྒྱས་སྤྲུལ་སྐུར་མཐོང་བ་སོགས་མདོར་ན་སྣང་ཚུལ་མི་གཅིག་པ་ཐ་དད་དུ་ཡོད་ཀྱང་། དོན་ལ་ནི་གདོད་མའི་མགོན་པོ་ཀུན་ཏུ་བཟང་པོའི་རྣལ་རོལ་ལས་གཞན་དུ་མ་དམིགས་ཤིང་། དེའི་མཛད་པ་ཡང་སུམ་ཅུ་རྩ་དྲུག་ནས་བརྒྱད་ཀྱི་བར་མ་ངེས་པར་གསུངས་པ་དག་ཀྱང་སངས་རྒྱས་ཁོ་ནའི་མཛད་པ་ཡིན་པའི་ཕྱིར་མཐའ་གཅིག་ཏུ་ངེས་པ་མེད་དེ། བསྐལ་བ་སྐད་ཅིག་དང་སྐད་ཅིག་བསྐལ་བར་བསྒྱུར་བའི་ཆོ་འཕྲུལ་མངའ་བའི་ཕྱིར་རོ། །དེ་བས་ན་མཛད་པ་ཇི་ལྟར་སྣང་ཡང་གདུལ་བྱའི་སྣང་བ་ཙམ་ལས་སངས་རྒྱས་ལ་ནི་བདག་གིས་འདིའི་དོན་ཞི་བས་བྱེད་དང་། འདིའི་དོན་དྲག་པོས་བྱེད་སོགས་ཀྱི་ཉེ་རིང་ཡོད་པ་ནི་མ་ཡིན་ཀྱང་ཆུ་སྣོད་ལ་ཟླ་གཟུགས་ཤར་བའི་ཚུལ་དུ་ཡོངས་སུ་སྣང་བའི་ཚུལ། ཕལ་པོ་ཆེ་ལས། ཇི་ལྟར་ཟླ་བ་ཤར་གྱུར་པ། །ཚད་མེད་པ་ཡི་གཟུགས་བརྙན་རྣམས། །ཆུ་ཡི་སྣོད་དུ་སྣང་གྱུར་ཀྱང་། །ཟླ་བ་གཉིས་སུ་གྱུར་པ་མེད། །དེ་བཞིན་ཆགས་མེད་མཁྱེན་ལྡན་རྣམས། །ཆགས་མེད་རྣམ་པར་འཚང་རྒྱ་བ། །ཞིང་རྣམས་ཀུན་ན་རབ་ཏུ་སྣང་། །སངས་རྒྱས་ལ་ནི་གཉིས་སྣང་མེད། །འདི་ལ་གཅིག་ཀྱང་ཡོད་མ་ཡིན། །ཞེས་དང་། ཇི་ལྟར་སྒྱུ་མར་གྱུར་པའི་གཟུགས། །སྐྱེས་པ་མ་ཡིན་འོངས་པ་མིན། །དེ་ལྟར་དེ་བཞིན་གཤེགས་པའི་སྐུ། །སྐྱེ་བ་མེད་ལས་ཤིན་ཏུ་བསྟན། ཞེས་སོ། །འོན་ཀྱང་སྟོང་གསུམ་གྱི་སྟོང་ཆེན་པོ་རེ་རེའི་གདུལ་བྱ་སྐལ་བ་དང་ལྡན་པ་རྣམས་ནི་མཆོག་གི་སྤྲུལ་སྐུ་མང་པོ་ཡོངས་སུ་རྫོགས་པ་ལྟར་སྣང་བ་རེ་རེས་གདུལ་བ་ཡིན་ལ། གདུལ་བྱ་རིགས་ཐ་དད་པ་རྣམས་ནི་ཐུབ་པ་ཡང་མཛད་པ་ཐ་དད་པ་ལྟར་སྣང་བ་རེ་རེས་འདུལ་བར་ངེས་ཏེ། རྒྱུད་སྒྱུ་འཕྲུལ་བླ་མ་ལས། ལྷ་ཡི་གནས་ན་བརྒྱ་བྱིན་མགོན། །ལྷ་མ་ཡིན་ལ་ཐག་བཟང་རིས། །མི་ལ་བདུད་འདུལ་ཤཱཀྱའི་མགོན། །ཡི་དྭགས་གནས་ན་ཁ་འབར་དེ། །བྱོལ་སོང་སེངྒེ་ཉིད་དུ་སྨྲ། །དམྱལ་བ་ལ་ནི་གཤིན་རྗེའི་མགོན། །ཞེས་གསུངས་པ་ལྟར་རོ། །འོ་ན་གོང་དུ་བརྒྱ་བྱིན་སྐྱེ་བ་སྤྲུལ་སྐུར་བཤད་པ་མ་ཡིན་ནམ་སྙམ་ན། སངས་རྒྱས་ལོངས་སྐུས་འོག་མིན་ནས་ཐོག་མར་སྤྲུལ་བའི་ཐུབ་པ་དྲུག་ནི་མཆོག་གི་སྤྲུལ་སྐུ་ལས་མ་འདས་ཀྱང་དེ་དག་གིས་གང་ལ་གང་འདུལ་དུ་སྤྲུལ་པའི་དབང་པོ་ལ་སོགས་པའི་སྐྱེ་བ་ཐ་དད་དུ་སྣང་བ་རྣམས་ནི་སྐྱེ་བ་སྤྲུལ་སྐུར་ངེས་ཏེ། དཔེར་ན་སུམ་ཅུ་རྩ་གསུམ་གྱི་གནས་གཅིག་པུ་ལ་ཡང་ལྷ་དབང་བརྒྱ་བྱིན་ཉེ་དབང་སོ་གཉིས་སོགས་མང་དུ་སྣང་བ་ལྟར་ཡིན་ལ། དེ་ཡང་བརྒྱ་བྱིན་གྱི་མིང་ཙམ་བརྗོད་པས་ནི་ཅི་ཞིག་ནོངས་ཏེ། རང་རེས་གང་ཟག་ཕལ་བ་དག་ལ་ཡང་ཤཱཀྱ་སེངྒེར་བཏགས་པས་ཐུབ་པའི་དབང་པོར་མི་འགྲོ་བ་ལྟ་བུའོ། །འདི་དག་ཇི་ལྟར་སྤྲུལ་པའི་ཚུལ་ལ་སོགས་པ་ཞིབ་རྒྱས་སུ་ནི་འོག་ཏུ་ཆོས་ཐམས་ཅད་གཏན་ལ་ཕབ་པའི་ལེའུ་སྟེ་གསུམ་པའི་སྐབས་སུ་འཆད་པར་འགྱུར་རོ། །གསུམ་པ་སྣ་ཚོགས་སྤྲུལ་པ་ནི། རྒྱལ་བ་ཉིད་ཀྱི་ཐུགས་རྗེའི་བྱིན་བརླབས་ལས་རང་སྣང་བར་མཛད་པ་གཞལ་མེད་ཁང་དང་། སྐྱེད་མོའི་ཚལ་དང་། འདུན་ས་བཟང་པོ་དང་། ཀུན་དགའ་ར་བ་དང་། དཔག་བསམ་གྱི་ལྗོན་པ་དང་། གཞན་ཡང་གྲུ་དང་། ཟམ་པ་དང་། སྐྱེལ་མ་དང་། ལྷག་སྐྱོབས་ཀྱི་ཕུག་པ་དང་། གོས་ཀྱི་རིགས་དང་། བཟའ་བཏུང་དང་། ངལ་སྟེག་ལ་སོགས་པ་གནས་སྐབས་སུ་ཕན་པར་འགྱུར་བ་རྣམས་དང་། མདོར་ན་ཚ་བས་ཉེན་པ་ལ་གྲང་བའི་རེག་བྱ་དང་། གྲང་བས་ཉེན་པ་ལ་ཚ་བའི་མེ་འོད་ཙམ་ཚུན་ཆོད་སེམས་ཅན་རྣམས་ལ་གང་ལ་གང་ཕན་གྱི་ཚུལ་དུ་སྣང་བར་དཀོན་མཆོག་བརྩེགས་པ་ལ་སོགས་པའི་མདོ་རྣམས་སུ་གསུངས་པ་ལྟར། ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པའི་མདོ་ལས་ཀྱང་། གོང་དུ་གྲང་པའི་འཕྲོས་སུ། འདི་སྐད་དུ། འཇམ་དཔལ་དེ་བཞིན་དུ་སྐྱེད་མོའི་ཚལ་དང་། ནོར་བུ་དང་། སྨན་དང་། རིགས་སྔགས་དང་། ཉེ་བར་མཁོ་དགུའི་ཡོ་བྱད་དུ་སྣང་བས་གདུལ་བར་བྱ་བ་ཡིན་ན་དེ་དང་དེའི་གཟུགས་དང་ཁ་དོག་ཏུ་སྣང་ངོ་། །ཞེས་པ་ལ་སོགས་རྒྱ་ཆེར་གསུངས་པ་ལྟར་རོ། །དེ་དག་ཀྱང་སྐུའི་སྤྲུལ་པ་ལྟར་སྣང་ཡང་། སྐུ་ཇི་ལྟ་བ་བཞིན་དུ་སྣང་དགོས་པ་དང་། སྐུ་ཉིད་གསུང་དང་ཐུགས་སུ་ཡང་མི་འཕྲུལ་པའི་ངེས་པ་མེད་པ་ནི་མེད་པས་ན་ཆོ་འཕྲུལ་ཞེས་བརྗོད་པ་ཡིན་ནོ། །དེ་ལ་འདི་སྙམ་དུ། ཅི་ཞིག་ནམ་མཁས་གར་ཁྱབ་ཆོས་སྐུ་དང་ལོངས་སྐུའི་ཞིང་གིས་ཁྱབ་ཅིང་། དེ་ཙམ་དུ་སྤྲུལ་སྐུ་དང་དེའི་འཕྲིན་ལས་ཀྱིས་ཀྱང་གོ་མཚམ་མེད་པར་ཁྱབ་ན། སྐུ་གསུམ་གྱི་ཞིང་ཁམས་དེ་གཅིག་གམ་ཐ་དད། གཅིག་ན་ནི་གསུམ་དུ་བགྲང་བའང་དོན་མེད་ལ། ཐ་དད་ན་ནི་གཅིག་ལ་གཅིག་བཅུག་ལྟ་བུའམ་འདྲིས་པར་གྱུར་བ་གང་ལྟ་བུ་སྙམ་ན། དེ་ཉིད་འདི་ལྟར་ཤེས་པར་བྱ་སྟེ། སྤྱིར་གོང་དུ་སྨོས་པ་ལྟར་རྡུལ་ཕྲན་གྱི་ཁོངས་ན་རྡུལ་སྙེད་ཀྱི་གྲངས་དང་མཉམ་པའི་ཞིང་ཁམས་གནས་པ་དེ་དག་ཀྱང་རྡུལ་ཕྲན་ཆེན་པོར་སོང་བ་དང་། ཞིང་ཁམས་ཆུང་ངུར་སོང་བ་ཅུང་ཟད་ཀྱང་མེད་པའི་ཞིང་དེ་དང་དེ་ན་སངས་རྒྱས་དེའི་འཁོར་རྒྱལ་བའི་སྲས་པོ་ལ་ཆོས་གསུངས་པའི་ཚུལ། བཟང་པོ་སྤྱོད་པའི་སྨོན་ལམ་ལས། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །ཅེས་གསུངས་པ་བཞིན་རང་རེ་གནས་པའི་སྤྲུལ་སྐུའི་ཞིང་ཁམས་མི་མཇེད་ཀྱི་འཇིག་རྟེན་བྱེ་བ་ཕྲག་བརྒྱ་འདི་ཡང་ལོངས་སྐུ་རྣམ་སྣང་གངས་ཅན་མཚོའི་ཕྱག་གི་པདྨའི་སྡོང་པོའི་ཟེའུ་འབྲུ་ཕྲ་མོ་གཅིག་གི་སྟེང་ན་ཡོད་པར་གསུངས་པ་དེ་བཞིན་དུ་སྐུའི་བ་སྤུའི་ཁུང་བུ་ཐམས་ཅད་ནའང་སྤྲུལ་སྐུའི་ཞིང་ཁམས་དེ་སྙེད་ཅིག་ཡོད་པར་གསུངས་པ་རྣམས་ཀྱང་ཞིང་དེ་དག་ཧ་ཅང་ཆུང་ངུར་གྱུར་པ་དང་། སྐུ་ཉིད་གཏོས་ཆེན་པོ་གྱུར་བ་ནི་འགའ་ཡང་མེད་ལ། འོན་ཀྱང་ཞིང་ཁམས་ཆེན་པོར་གྱུར་པ་དང་སྐུ་ཆུང་ངུར་གྱུར་པའི་གོ་འཛོལ་བ་དང་། མེད་པ་ལ་ཡོད་པར་སྒྲོ་བཏགས་པའི་ལྡེམ་དགོངས་ཙམ་ཡང་མ་ཡིན་པར་ཕྱོགས་བཅུའི་ནམ་མཁའི་གང་དུ་ཁྱབ་པ་དེ་སྲིད་དུ་སྐུ་གསུམ་གྱི་ཞིང་ཁམས་དང་གསང་བ་གསུམ་གྱིས་ཀྱང་དེ་ལྟར་ཡོངས་སུ་ཁྱབ་པར་མཛད་པ་ཡིན་ཏེ། གསང་བ་བསམ་གྱིས་མི་ཁྱབ་པའི་མདོ་ལས། ནམ་མཁའི་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །སྐུ་ཡིས་ཇི་སྙེད་ཁྱབ་གྱུར་པ། །འོད་ཀྱིས་ཀྱང་ནི་དེ་སྙེད་ཁྱབ། འོད་ཀྱིས་ཇི་སྙེད་ཁྱབ་གྱུར་པ། །གསུང་གིས་ཀྱང་ནི་དེ་སྙེད་ཁྱབ། །གསུང་གིས་ཇི་སྙེད་ཁྱབ་གྱུར་པ། །ཐུགས་ཀྱིས་ཀྱང་ནི་དེ་སྙེད་ཁྱབ། །ཅེས་སོ། །དེ་ཡང་ཆོས་སྐུའི་ཞིང་ཁམས་ནི་ནང་དབྱིངས་བསམ་གྱིས་མི་ཁྱབ་པ་གཞོན་ནུ་བུམ་སྐུའི་སྦུབས། ལོངས་སྐུའི་ཞིང་ཁམས་ནི་ཕྱིར་གསལ་ལྷུན་འགྲུབ་ཆེན་པོའི་རང་གདངས་ངེས་པ་ལྔ་ལྡན། སྤྲུལ་སྐུའི་ཞིང་ཁམས་ནི་རྩལ་སྣང་ཅིར་ཡང་མཆེད་པ་སྣ་ཚོགས་གདུལ་བྱའི་ཁམས་ཏེ། ལྡོག་པ་ཐ་དད་པ་གསུམ་དུ་དབྱེ་ཡང་ངོ་བོ་ཆོས་ཉིད་རྣམ་པར་དག་པའི་དབྱིངས་གཅིག་གིས་བསྡུས་པས་གསུམ་དུ་བགྲང་བ་ཡང་མི་འགལ་ལ། གཅིག་ཏུ་ཁྱབ་པས་འདྲེས་པ་ལ་སོགས་པའི་སྐྱོན་ཡང་ཡོད་པ་མ་ཡིན་ནོ། །དེ་དག་ཀྱང་ཐུན་མོང་གདུལ་བྱའི་ངོར་སྣང་དབང་བཙན་དུ་བྱས་ནས་དབྱེ་བ་ཙམ་ལས། དོན་ལ་ནི་སངས་རྒྱས་ཐམས་ཅད་ཆོས་སྐུའི་ཞིང་ལས་གང་དུའང་གཡོས་པ་མེད་ན་གཅིག་དང་ཐ་དད་དུ་དབྱེ་བ་ཙམ་ཡང་འཐད་པ་མ་ཡིན་ཏེ། ཐེག་བསྡུས་ལས། བདག་ཏུ་འཛིན་པ་མེད་པའི་ཕྱིར། །གནས་ལ་ཐ་དད་ཡོད་མ་ཡིན། ཞེས་གསུངས་པ་ལྟར་རོ། །འོ་ན་སངས་རྒྱས་ཤཱཀྱ་ཐུབ་པའི་ཞིང་ཁམས་འདི་ཡང་ཆོས་སྐུའི་ཞིང་ཁམས་ཡིན་ནམ་ཞེ་ན། གདུལ་བྱ་སྤྱི་མཐུན་དུ་སྣང་བ་འདི་ནི་སྤྲུལ་སྐུའི་ཞིང་ཁམས་ལས་མ་འདས་མོད་ཀྱིས། འདི་ཉིད་རྣམ་པར་དག་པ་ལས་གཞན་པའི་ཆོས་སྐུའི་ཞིང་ཁམས་ཤིག་གུད་ན་ཡོད་པ་ཡང་མ་ཡིན་ཏེ། དཔེར་ན་ཆུ་གཅིག་པུ་འདི་ལའང་ངན་སོང་གི་འགྲོ་བ་ལ་སྣང་རྒྱུ་དེ་ལས་ངོ་བོ་ཐ་དད་པ་གཅིག་གཞན་དག་ལ་ཡོད་པ་མ་ཡིན་མོད་དེ་རྣམ་པ་སྣང་ཚུལ་ནི། དམྱལ་བ་པ་དག་གིས་ཁྲོ་ཆུ་དང་། ཡི་དྭགས་གྱིས་རྣག་ཁྲག །དུད་འགྲོས་བཏུང་དུ་རུང་བ་ཙམ། མིས་ཆུ། ལྷས་བདུད་རྩི། དག་པའི་ཞིང་ན་གནས་པས་བདུད་རྩི་ཆེན་པོར་མཐོང་བ་སོགས་དང་། གཞན་ཡང་ཆོས་ལ་དབང་ཐོབ་པའི་རིག་འཛིན་རྣམས་ལ་ཆུ་དེ་ཉིད་མཱ་མ་ཀཱིར་སྣང་སྟེ། བརླན་པའི་བྱ་བ་ཡང་བྱེད་ལ། རོལ་བས་བདེ་བ་ཡང་མྱོང་ཞིང་ཏིང་ངེ་འཛིན་ཀྱང་འཕྲུལ་ཏོ། །བག་ལ་ཉལ་ཤིན་ཏུ་ཟད་པ་ལ་ནི་སྤྲོས་པ་ཐམས་ཅད་དང་བྲལ་བའི་ངང་དུ་རོ་གཅིག་པར་སྣང་བ་དང་མི་སྣང་བའི་སྤྲོས་པ་ཉེ་བར་ཞི་བ་དེ་བཞིན་དུ་མཁྲིས་ནད་ཅན་གྱིས་དུང་དཀར་ལ་སེར་པོར་མཐོང་དུས་སེར་སྣང་དེ་དུང་གི་ཁ་དོག་མ་ཡིན་ཀྱང་ནད་ལས་གྲོལ་བའི་དུས་ཀྱི་དཀར་པོར་མཐོང་རྒྱུ་དེ་ཡང་དེ་ལས་གཞན་པ་ཞིག་མ་ཡིན་པ་ལྟར། ཞིང་འདི་ཡང་རང་སྣང་མ་དག་པ་འདི་ལྟར་སྣང་པ་ལས་དོན་ལ་དེ་ལྟར་མ་ཡིན་པའི་ཚུལ། དྲི་མ་མེད་པར་གྲགས་པའི་མདོ་ལས། བཙུན་པ་ཤཱ་རིས་བུས་སྨྲས་པ། བདག་གིས་ས་ཆེན་པོ་འདི་མཐོ་དམན་དང་གཡང་ས་དང་ལྗན་ལྗིད་ཀྱིས་གང་བར་མཐོང་ངོ་། །ཞེས་ཟེར་རོ། །སངས་རྒྱས་མྱ་ངན་མེད་པའི་ཞིང་ནས་འོངས་པའི་ཚངས་པ་རལ་བ་ཅན་གྱིས་སྨྲས་པ། བདག་གིས་ནི་བཅོམ་ལྡན་འདས་ཤཱཀྱ་ཐུབ་པའི་ཞིང་འདི་ཉིད་གཞན་འཕྲུལ་དབང་བྱེད་ཀྱི་ལྷའི་གནས་ཀྱི་བཀོད་པ་ཕུན་སུམ་ཚོགས་པ་བཞིན་དུ་ཡོངས་སུ་དག་པར་མཐོང་ངོ་། །ཞེས་ཟེར་རོ། །དེ་ནས་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་རྣམས་ལ་སངས་རྒྱས་ཀྱི་ཞིང་འདིའི་རང་བཞིན་བསྟན་པར་མཛད་པས། །ཐམས་ཅད་ཀྱིས་སངས་རྒྱས་རིན་པོ་ཆེའི་རྒྱན་བཀོད་པའི་ཞིང་ཁམས་བཞིན་ཡོངས་སུ་དག་པར་མཐོང་བར་གྱུར་པ་དེའི་ཚེ། བཅོམ་ལྡན་འདས་ཀྱིས་བཀའ་བསྩལ་པ། ངའི་སངས་རྒྱས་ཀྱི་ཞིང་འདི་ནི་རྟག་ཏུ་འདི་འདྲ་སྟེ། ཁྱེད་རྣམས་ཀྱིས་མི་མཐོང་ངོ་། །ཞེས་སོ། །ཚུལ་འདི་ལྟ་བུ་ལ་དགོངས་ནས་རེས་འགའ་ཞིང་དང་སྐུའི་བཀོད་པ་ཐ་དད་དུ་གསུངས་པ་དང་། །རེས་འགའ་གཅིག་ཏུ་གསུངས་པ་རྣམས་ཀྱང་བརྗོད་དོན་གཅིག་པ་ཡིན་ཏེ། དཔེར་ན་ཟླ་གཟུགས་ཆུ་སྣོད་ལ་ཤར་བའི་ཚེ་ཆུ་ཟླ་དུ་མ་ལ་ལྟོས་ནས་ཐ་དད་དུ་བརྗོད་པ་ཡང་ཡིན་ལ། །དེ་ཀུན་གྱི་ངོ་བོ་མཁའ་ཟླ་གཅིག་ལས་མ་འདས་པ་ལ་ལྟོས་ནས་གཅིག་ཏུ་བརྗོད་པ་ཡང་མི་འགལ་བ་བཞིན་ནོ། །འོ་ན་སྒྲིབ་བྱེད་ཡོངས་སུ་དག་པའི་སངས་རྒྱས་ལ་གདུལ་བྱ་མ་དག་པའི་ཞིང་ཞིག་སྣང་ངམ་མི་སྣང་ཞེ་ན་སངས་རྒྱས་རང་ངོས་ནས་མི་སྣང་ཡང་གཟིགས་པ་རྣམ་པར་དག་པས་ཅིར་ཡང་མཁྱེན་པ་ནི་མི་འགག་སྟེ། དེ་འགགས་ན་ཇི་སྙེད་མཁྱེན་པའི་ཡེ་ཤེས་ཀྱང་མེད་པར་ཐལ་བ་དང་། མདོ་ལས་ཀྱང་། ངས་སངས་རྒྱས་ཀྱི་སྤྱན་སྒྲིབ་པ་མེད་པས་ཡོངས་སུ་གཟིགས་པ་ན། འཇིག་རྟེན་ཁམས་དག་པ་དང་མ་དག་པ་དང་། སེམས་ཅན་དབང་པོ་མཆོག་དང་མཆོག་མ་ཡིན་པ་དག་ཀྱང་ཡང་དག་པ་ཇི་ལྟ་བ་བཞིན་དུ་མཁྱེན་ཏོ། །ཞེས་གསུངས་པ་དང་། ཡང་འགལ་བའི་ཕྱིར་རོ། །དེ་ཡང་འདི་ལྟར་རིན་པོ་ཆེའི་ཁང་བུ་ཞིག་ཏུ་མི་དུ་མ་ཚོགས་པ་ལས་འགའ་ཞིག་གཉིད་དུ་སོང་བའི་རྨི་ལམ་ལ་མཛེ་ནད་ལ་སོགས་པའི་སྡུག་བསྔལ་དྲག་པོ་དུ་མ་ཞིག་གིས་མནར་བ་རྨི་གྱིན་འདུག་པ་ན། དེར་མི་མངོན་ཤེས་དང་རྫུ་འཕྲུལ་མངའ་བ་ཞིག་འདུག་པ་དེས། གཞན་དེ་རྣམས་རིན་པོ་ཆེའི་ཁང་བུར་གནས་པ་ཡང་ཤེས་ལ། གཉིད་དུ་སོང་ནས་རྨི་ལམ་ལོག་པ་རྨི་གྱིན་ཡོད་པ་ཡང་ཤེས་ནས་དེ་མ་ཐག་དེ་དག་གི་གམ་དུ་སྤྲུལ་པ་བཀྱེས་ནས་འདི་སྐད། ཀྱེ་གྲོགས་པོ་དག་ཆོས་ཐམས་ཅད་ནི་ངོ་བོ་ཉིད་མེད་པ་དང་། མི་རྟག་པ། སྒྱུ་མ་ལྟ་བུ་ཡིན་ཏེ། ཁྱེད་ཅག་རྣམས་ལ་ད་ལྟར་སྣང་བ་འདི་ཡང་གཉིད་དུ་སོང་བའི་རྨི་ལམ་ལ་བདེན་པར་བཟུང་བ་ཙམ་མོ། །ཞེས་བརྗོད་ནས་རིམ་གྱིས་གཉིད་སད་པའི་ཐབས་ལ་སྦྱོར་བ་ལྟར། སངས་རྒྱས་ཀྱིས་ཀྱང་གདུལ་བྱའི་འཁྲུལ་སྣང་ཡང་མཁྱེན་ལ། དེ་ལས་གྲོལ་བའི་ཐབས་ཀྱང་མཁྱེན་ནས་ཐུགས་རྗེས་གཟིགས་པར་འགྱུར་བ་ཡིན་ནོ། །དེ་ལྟར་མཁྱེན་དུས་ཉིད་ནས་རང་ཉིད་ལ་ནི་འཁྲུལ་བ་མི་སྣང་བའི་ཚུལ་མི་དེ་དག་རིན་པོ་ཆེའི་ཁང་བུ་ལས་གང་དུའང་མ་བསྐྱོད་པ་ལྟ་བུའོ། །ཚུལ་དེ་བཞིན་དུ་གཟིགས་ནས་འགྲོ་བའི་ཁམས་སུ་སྤྲུལ་པ་བསམ་གྱིས་མི་ཁྱབ་པ་འདི་དག་སྤྲུལ་ནས་ཐེག་པའི་རིམ་པ་དཔག་ཏུ་མེད་པ་ཞིག་གསུངས་པའི་ཚུལ་རྣམས་ཀྱང་གོང་དུ་སྨོས་པའི་ལེའུ་གསུམ་པའི་སྨད་ཀྱིས་སྟོན་པ་དེ་ལྟར་འོག་ཏུ་འཆད་པར་འགྱུར་རོ། །དེ་ལྟར་སྐུའི་བཀོད་པ་ཟད་མི་ཤེས་པའི་ཆོ་འཕྲུལ་རྣམས་མངོན་དུ་སྣང་བ་དང་ཆབས་གཅིག་ཆོ་འཕྲུལ་གཉིས་པ་ཇི་ལྟར་སྣང་བར་མཛད་པ་ནི། གསུང་ཡི་གེའི་འཁོར་ལོ་སྟེ་སྟོན་པ་ཉིད་ཀྱི་གསང་གསུམ་དབྱེར་མི་ཕྱེད་པའི་དབྱིངས་ལས་སྐྱེ་མེད་སྟོང་པ་ཉིད་མཚོན་པའི་ཡི་གེ་ཨ་ཉིད་རང་སྣང་བར་མཛད་པ་ལས། རང་གི་ངོ་བོ་འཕེལ་འགྲིབ་དང་བྲལ་བཞིན་སྤྲུལ་པའི་ཡི་གེ་དག་དེ་ཉིད་ལས་ཅིར་ཡང་སྣང་བར་གྱུར་ཏོ། །དེ་ཡང་འདི་ལྟར་ཀུན་འདུས་རིན་པོ་ཆེའི་རྒྱུད་ལས། དབྱིངས་ལས་ཨ་བྱུང་ཨ་ལས་ནི། །ཡི་གེའི་ཚོགས་རྣམས་མ་ལུས་འཕྲོ། །ཞེས་དང་། །ཇི་ལྟར་འཕྲོས་པའི་ཚུལ་ཡང་། དེ་ཉིད་ལས། ཀ་ལ་སོགས་སུ་རྣམ་པ་ལྔ། །མགུར་གྱི་གསུང་གི་རང་བཞིན་ཡིན། །གཉིས་པ་ཙ་ལ་སོགས་པ་ལྔ། །ཟླ་གམ་ལྗགས་ཀྱི་རང་བཞིན་ཡིན། གསུམ་པ་ཏ་ལ་སོགས་པ་ལྔ། །ལྗགས་ཀྱི་རྩེ་མོའི་རང་བཞིན་ཡིན། །བཞི་བ་པ་ལ་སོགས་པ་ལྔ། །ཞལ་གྱི་སྒྲོས་ལས་བྱུང་བར་བཤད། །སྐྱེས་བུ་ཆེན་པོའི་སྨིན་མ་ལས། འཁོར་བར་མི་གནས་ཡིག་འབྲུ་ཡ། །སྐྱེས་བུ་ཆེན་པོའི་དཀུ་སྐབས་ལམ། །གཏི་མུག་སེལ་བའི་ཡིག་འབྲུ་ལྔ། །སྐྱེས་བུ་ཆེན་པོའི་སྟ་ཟུར་ལས། །འདོད་ཆགས་བསྲེག་པའི་ཡིག་འབྲུ་ར། །སྐྱེས་བུ་ཆེན་པོའི་དཔུང་པ་ལས། །རྟོག་པ་འཇོམས་པའི་ཡི་གེ་ལ། །ཐུགས་ལས་འཁྱིལ་བའི་དཔལ་བེའུ་ལས། །མཚན་མ་དག་པའི་ཡི་གེ་ཤ། །ཕྱག་གི་འཁོར་ལོའི་འོད་ཟེར་ལས། །ཆོ་འཕྲུལ་སྟོན་པའི་ཡི་གེ་ཥ། །སྐུ་ཡི་འབྲུ་ཚད་ལྟེ་བ་ནས། །འདོད་པ་འབྱུང་བའི་ཡི་གེ་ས། །ཞབས་ཀྱི་འཁོར་ལོའི་འོད་ཟེར་ལས། །སྒྲིབ་པ་བསྲེག་པའི་ཡིག་འབྲུ་ཧ། །གསང་བ་མཁའ་ཡི་རང་བཞིན་ནས། །ཆོ་འཕྲུལ་འབྱུང་བའི་ཡི་གེ་ཀྵཿ །སྐྱེས་བུ་ཆེན་པོའི་སྤྱན་གཉིས་ལས། །རང་བཞིན་ཡི་གེ་ཨི་གཉིས་ཤར། །སྐྱེས་བུ་ཆེན་པོའི་སྙན་གཉིས་ལས། །རང་བཞིན་ཡི་གེ་ཨུ་གཉིས་ཤར། །སྐྱེས་བུ་ཆེན་པོའི་ཞབས་གཉིས་ལས། །རང་བཞིན་ཡི་གེ་ཨེ་གཉིས་ཤར། །སྐྱེས་བུ་ཆེན་པོའི་སྤྱི་གཙུག་ལས། །རྒྱལ་བའི་ཡི་གེ་ཨོཾ་དུ་ཤར། །ཞེས་པ་ལྟར་ཡིན་ལ། དེ་ཡང་ལུང་སྔ་མར་ཨ་ལས་ཡི་གེ་གཞན་འཕྲོས་པ་དང་། ཕྱི་མར་སྐུའི་ཆ་ལས་འཕྲོས་པར་གསུངས་པ་གཉིས་འགལ་ལམ་སྙམ་ན། མ་ཡིན་ཏེ། །ཨ་ནི་རྒྱལ་བ་ཐམས་ཅད་ཀྱི་ཐུགས་གཉིས་སུ་མེད་པའི་རང་བཞིན་རྣམ་པར་དག་པའི་དབྱིངས་ཆོས་སྐུ་ཉིད་མཚོན་བྱེད་ཡིན་ལ། །དེའི་རྣམ་རོལ་མ་ཡིན་པའི་སྐུ་དང་། གསུངས་གང་ཡང་མ་མཆིས་ན་གཉིས་ཀ་ལྟར་མི་འགལ་ཞིང་། དེར་མ་ཟད་རང་རེས་བརྗོད་པའི་དབང་དུ་བྱས་ནའང་ཨ་ཉིད་ཡི་གེ་ཀུན་གྱི་ཁྱབ་བྱེད་དུ་ཡོད་ཀྱང་རང་གི་སྒྲ་ཁོང་ནས་འབྱུང་བས་ན། དེ་ལས་མཆེད་པ་ལུས་ཀྱི་ཆ་ཤས་གང་ནས་འཕྲོས་ཀྱང་མི་འགལ་བ་བཞིན་ནོ། །དོན་ལ་ནི་གསང་གསུམ་མི་ཤིག་པའི་ཐིག་ལེ་འགྱུར་བ་མེད་པ་ལས་རང་སྣང་བ་ཙམ་མོ། །དེ་ལ་ཡང་ཅུང་ཟད་དོགས་པ་བསལ་བར་བྱ་སྟེ། འདི་ལྟར་ཐོག་མར་ཆོས་སྐུའི་དབྱིངས་ལས་སྤྲུལ་པའི་ཡི་གེ་དེ་དག་དེའི་དུས་སུ་གཟུགས་སུ་གྲུབ་པ་ཞིག་སྤྲུལ་པ་ཡིན་ནམ། །སྒྲར་གྲགས་པ་ཞིག་སྤྲུལ་པ་ཡིན། དང་པོ་ལྟར་ན་སྤྲུལ་སྐུའི་ཞིང་གཅིག་གི་ཆ་ཤས་འཛམ་བུའི་གླིང་འདིར་གཅིག་པུ་ལའང་། རྒྱ་དཀར་ནག་བོད་ལ་སོགས་པའི་ཡི་གེའི་གཟུགས་མི་གཅིག་པ་བསམ་གྱིས་མི་ཁྱབ་པ་ཞིག་འདུག་ན་ཐོག་མར་སྤྲུལ་པའི་ཡི་གེ་དེའི་གཟུགས་གང་ལྟ་བུ་ཞིག་ཡིན། ཕྱི་མ་ལྟར་ན་ཆོས་སྐུའི་གསུང་སྒྲ་ཚིག་ལས་འདས་པ་དང་ཡང་འགལ་ལ། གལ་ཏེ་སྒྲར་གྲགས་སུ་ཆུག་དང་། །འགྲོ་བ་དྲུག་གི་སྐད་རིགས་མི་གཅིག་པ་དཔག་ཏུ་མེད་པ་དག་མཆིས་པས་གང་གི་སྐད་དུ་གྲགས་པ་ཡིན་སྙམ་ན། དེ་ལ་སྤྱིར་གང་ལྟར་ཡང་མི་འགལ་ཏེ། །གཟུགས་སུ་གྲུབ་ན་ཡང་གདུལ་བྱ་རང་རང་ལ་ཡི་གེའི་རིགས་བསམ་གྱིས་མི་ཁྱབ་པ་ཞིག་འདུག་པ་དེ་དང་དེ་ཡི་གཟུགས་སུ་སྤྲུལ་ལ། །སྒྲར་གྲགས་ན་ཡང་ཆོས་སྐུ་ལ་ཡི་གེ་སྒྲར་སྣང་རུང་མ་འགག་པར་ཡོད་པ་ནི་ཅི་ཡང་མི་འགལ་ཏེ། དེ་འགལ་ན་ཆོས་སྐུ་ལ་གཟུགས་སྐུ་སྣང་རུང་མ་འགག་པར་ཡོད་པ་དེ་ཡང་འགལ་བར་ཐལ་ལོ། །ཕྱིས་སུ་གྲགས་པ་ཡང་འགྲོ་དྲུག་གི་སྐད་རིགས་ཇི་སྙེད་པ་དེ་སྙེད་དུ་གྲགས་པ་ཡིན་ནོ། །ཞེས་བརྗོད་ཀྱང་འགལ་བ་མེད་དེ། འཕགས་པ་བཟང་པོ་སྤྱོད་པ་ལས། ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཅི་ཙམ་པ། །ཐམས་ཅད་སྐད་དུ་བདག་གིས་ཆོས་སྟོན་ཏོ། །ཞེས་གསུངས་པ་ལྟར་རོ། །འོན་ཀྱང་འདི་ལྟར་ཡིན་ཏེ། ཐོག་མར་སྤྲུལ་གཞིའི་ཡི་གེ་ཨ་དེ་ཡང་སྐྱེ་མེད་མཚོན་བྱེད་ཅེས་བརྗོད་ཀྱང་། མཚོན་བྱ་དང་མཚོན་བྱེད་ཐ་དད་དུ་གྲུབ་པ་དང་། དེ་ལས་དེ་བྱུང་དུ་སྤྲུལ་པ་ན་འགའ་ཡང་མེད་དེ། ཆོས་སྐུ་སྐྱེ་བ་མེད་པའི་དབྱིངས་ཉིད་ཡི་གེ་ཀུན་གྱི་འཆར་གཞིར་གྱུར་པ་ལ་ཞེས་ཐ་སྙད་ཙམ་དུ་བཏགས་པའོ། །དེའི་གདངས་མ་འགག་པ་ལས་གཟུགས་སྐུའི་རོལ་པ་ཅིར་ཡང་འཆར་བའི་གཞིའམ་རྒྱུར་གྱུར་པ་ལ་ཀ་ལ་སོགས་པའི་ཐ་སྙད་བཏགས་པ་ཡིན་ཏེ། སྤྱི་མདོ་ལས། གང་སྐྱེ་བ་མེད་པ་མཚོན་པར་བྱེད་པའི་ཡི་གེ་ལ་ནི་ཨ་ཞེས་བླ་དྭགས་སུ་བཏགས་སོ། །བྱ་བ་མཚོན་པར་བྱེད་པའི་ཡི་གེ་ལ་ནི་ཀ་ཞེས་བླ་དྭགས་སུ་བཏགས་སོ། །ཞེས་སོགས་རྒྱས་པར་གསུངས་པ་བཞིན་ཡིན་ལ། དེ་ཡང་ཐ་སྙད་ཙམ་དུ་སུ་ཞིག་གིས་བཏགས་སྙམ་ན། སྤྱིར་གདུལ་བྱར་སྣང་བ་ཙམ་ཡིན་མོད་ཀྱང་ཅུང་ཟད་སྒྲོ་བཏགས་ན། ཡི་གེའི་སྒྲར་སྣང་རུང་ཙམ་ཏུ་ནི་ཀུན་ཏུ་བཟང་པོ་ཉིད་ཀྱི་དགོངས་པའི་ཀློང་ན་རང་གསལ་བ་རྒྱལ་བ་རིགས་ལྔ་ལ་སོགས་པའི་ཐུགས་སུ་ཆུད་པར་མཛད་པ་ཉིད་སྒྲར་གྲགས་པའི་ཡི་གེ་དེ་ནི་གསང་བའི་བདག་པོས་བཏགས་ཤིང་། བརྡར་གྱུར་པའི་ཡི་གེ་འདི་དག་ནི་སྲིན་པོ་བློ་གྲོས་ཐབས་ལྡན་ལ་སོགས་པའི་ལྷ་ཀླུ་མི་ཡི་རིག་འཛིན་དང་གྲུབ་པ་དག་གིས་བཏགས་པ། དེ་ནས་ཀྱང་རིམ་པར་བརྒྱུད་པའི་ཚུལ་འཆད་པར་འགྱུར་རོ། །དེ་ལྟར་སྣང་བའི་ཡི་གེ་ཉིད་ལའང་དབྱེ་ན། ཆོ་འཕྲུལ་སྤྲུལ་པའི་ཡི་གེ །ལུས་གནས་རྩའི་ཡི་གེ །ཕོ་བྲང་ལྷའི་ཡི་གེ །མཚོན་བྱེད་སྒྲའི་ཡི་གེ་དང་། གཞིར་གནས་ཀྱང་སྔ་མ་ལས་མ་འཕྲོས་པའི་ཡི་གེའི་གཞི་ནི་གང་དུའང་གྲུབ་པ་མེད་དོ། །འོན་ཀྱང་གནས་སྐབས་སྣང་ཚུལ་གྱི་ངོས་ནས་བྱེད་ལས་ནི་ཐ་དད་དུ་ཡོད་དེ། །འདི་ལྟར་སྤྲུལ་པའི་ཡི་གེས་ནི་སེམས་ཅན་ཚད་མེད་པའི་དོན་དངོས་སུ་བྱེད་པའོ། །རྩའི་ཡི་གེས་ནི་སྐུ་དང་ཡེ་ཤེས་འདུ་འབྲལ་མེད་པའི་རྟེན་བྱེད་པའོ། །ལྷའི་ཡི་གེས་ནི་ལྷ་སོ་སོའི་འཕྲོ་གཞི་བྱེད་པའི་བསྐྱེད་རྗོགས་དག་པའི་དོན་བྱེད་པའོ། སྒྲའི་ཡི་གེས་ནི་གསང་སྔགས་འགྲུབ་པའི་རྒྱུ་བྱེད་པའོ། །དེ་བས་ན་ཆོས་ཐམས་ཅད་ལ་ཡི་གེར་མ་བརྟེན་པ་འགའ་ཡང་མི་སྲིད་ཅིང་། ཡི་གེ་ཡང་ཐུགས་ཀྱི་ཀློང་ནས་རང་བྱུང་ལ། དེ་གཉིས་ཀ་ཡང་སྐུ་ལ་རྟེན་བཅས་པས་ན། གསང་བ་གསུམ་གྱི་ངོ་བོ་དང་རྣམ་རོལ་བརྗོད་དོན་ཐ་དད་དུ་འཛིན་པ་ནི་རྨོངས་པའི་རང་རྟགས་ཙམ་མོ། །འདིར་དེ་དག་གི་ཚུལ་བརྗོད་པས་ལམ་རྐྱེན་ཡི་གེའི་རྒྱུད་འདི་ཡང་དེའི་དུས་ནས་སྒྲར་སྣང་བའི་རྒྱུད་དུ་གྲུབ་པར་ཤེས་ལ། གཞན་དུ་དེ་ལྟར་མ་ཡིན་ན་ཕྱིས་སུ་སྒྲར་གྲགས་པའི་རྒྱུད་དང་། བརྡར་གྱུར་པའི་རྒྱུད་འདི་དག་ཀྱང་འབྱུང་བར་མི་འཐད་དེ་རྒྱུ་མེད་པར་འབྲས་བུ་འབྱུང་མི་སྲིད་པ་དང་། གལ་ཏེ་ཕྱིས་ཀྱི་གང་ཟག་ཕལ་པ་ཞིག་གིས་ཁུངས་མེད་པར་རང་བཟོས་བྱས་སུ་ཆུག་ཀྱང་། ཡི་གེ་བཀླག་པ་དང་། སྔགས་བཟླས་པ་ལ་སོགས་པ་ལ་ཡང་དོན་འབྲས་ཆུང་བར་ཟད་དོ། །དེ་ལྟར་ནའང་དོན་གྱི་ཡི་གེར་སྣང་བ་ཙམ་ལས་ཚིག་ཏུ་གྲགས་པ་ནི་ཅང་མེད་དེ། །དེའི་སྐབས་སུ་རྒྱལ་བ་དགོངས་བརྒྱུད་ཡིན་པའི་ཕྱིར་རོ། །འདི་ལྟར་སྔོན་བྱུང་ལོ་རྒྱུས་དང་འབྲེལ་བར་བསྒོམ་རིམ་དང་སྦྱར་ཚུལ་སོགས་ཡི་གེ་སོ་སོའི་དོན་ཞིབ་རྒྱས་སུ་ནི་འོག་ཏུ་ཡི་གེ་འཕྲེང་བའི་འཁོར་ལོ་བསྐོར་བའི་ལེའུ་སྟེ་བཞི་པའི་སྐབས་སུ་ཇི་བཞིན་འཆད་པར་འགྱུར་རོ། །འདི་ལྟ་བུའི་གསུང་གི་སྤྲུལ་པ་ལྟར་སྣང་པའི་ཚུལ་ལ་ལེགས་པར་གཞིག་ན་སྔགས་ཀྱི་རང་སྒྲ་ལས་གཞན་པའི་སྒྲ་དེ་གང་ནའང་ཐོས་པར་དཀའ་ན་ཚུལ་འདི་ནི་ཆོ་འཕྲུལ་རྨད་དུ་བྱུང་བ་ཞིག་གོ །དེ་ལ་ཡང་དཔྱད་པ་དེ་ལྟར་ན་ཡི་གེ་ཉིད་སྒྲར་གྲགས་པ་ཐམས་ཅད་ཀྱི་རྟེན་ཙམ་དུ་གྱུར་པ་ལ་ནི་ཁྱད་མེད་ན་དེས་བསྡུས་པའི་སྒྲ་ལའང་བཟང་ངན་དང་དགེ་སྡིག་ལ་སོགས་ཡོད་དམ་མེད། ཡོད་ན་ནི་ཡི་གེ་ཡང་རེས་འགའ་བཟང་པོ་དང་། རེས་འགའ་ངན་པར་ཐལ་ལ། མེད་ན་ནི་རྫུན་ཕྲ་མ་ལ་སོགས་པའི་ངག་གི་འདུ་བྱེད་མི་དགེ་བ་དག་ཀྱང་སྔགས་དང་སྙིང་པོར་ཐལ་ཏེ། །སྒྲ་རྟེན་ཡི་གེས་བསྡུས་པའི་ཕྱིར་སྙམ་ན། དེ་ཉིད་འདི་ལྟར་ཡིན་ཏེ། སྤྱིར་ཐུན་མོང་ཐེག་པའི་ལུགས་ལའང་ཆོས་ཉིད་ཀྱི་བདེན་པ་ཇི་བཞིན་མཇལ་བའི་གང་ཟག་ལ་ནི་ཆོས་ཐམས་ཅད་རྨི་ལམ་དང་སྒྱུ་མ་ཙམ་དུ་མཉམ་པ་ལས་སྤང་བླང་བྱེད་རྒྱུ་འགའ་ཡང་མེད་པའི་ཚུལ། མདོ་ཏིང་འཛིན་རྒྱལ་པོ་ལས། །ཇི་ལྟར་སྐྱེ་བོ་མང་པོའི་དབུས་དག་ན། །སྒྱུ་མ་བྱེད་པ་དག་གིས་གཟུགས་སྤྲུལ་ཏེ། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་མི་བདེན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་ནམ་མཁའ་དྭངས་ལ་ཟླ་བ་ཤར། །དེ་ཡི་གཟུགས་བརྙན་དྭངས་བའི་མཚོར་སྣང་ཡང་། །ཆུ་ཟླ་སྟོང་པ་གསོག་སྟེ་སྙིང་པོ་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་སོས་གའི་ཉི་མ་ཕྱེད་དུས་ན། །སྐྱེས་བུ་སྐོམ་པས་གདུངས་ཤིང་འགྲོ་བ་དག །སྨིག་རྒྱུ་འགྱུ་བ་ཆུ་ཡི་ཕུང་པོར་སྣང་། །དེ་ལ་བརྟགས་ན་ཆུ་ནི་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་པ་ལ་སོགས་པ་མདོ་སྡེ་དུ་མར་གསུངས་པ་ལྟར་ཡིན་ལ། ཁྱད་པར་གསང་སྔགས་ཀྱི་ལུགས་ལ་དེ་ལས་ཀྱང་སྣང་གྲགས་རིག་གསུམ་ལྷ་སྔགས་ཆོས་སྐུའི་རང་བཞིན་ལས་གཞན་དུ་མེད་པའི་ལྟ་བ་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བར་འཆད་ན། སྒྲ་ཚིག་ཙམ་ལ་དེ་ཙམ་གྱི་སྤང་བླང་བྱེད་རྒྱུ་ཅི་ཞིག་ཡོད་དེ། འོན་ཀྱང་ལས་དང་པོ་པའི་དོགས་སེལ་དབང་བཙན་དུ་བྱས་ན། །སྤྱིར་ཁྱབ་བྱེད་དག་ཀྱང་ཁྱབ་བྱ་དག་དགོས་པ་དང་། ངོ་བོ་དག་ཀྱང་བྱེད་ལས་དག་དགོས་པའི་ཁྱབ་པ་ནི་འགའ་ཡང་མེད་དེ། དཔེར་ན་ཆུ་དག་པ་གཅིག་པུ་ལའང་། སྨན་དང་དུག་གི་རིགས་ཐ་དད་དུ་སྦྱར་ན་ཁྱབ་བྱེད་ཆུའི་ངོ་བོ་ཙམ་དག་པ་ལས་མ་འདས་མོད། དེ་ཁྱབ་བྱ་སྨན་དུག་གི་ནུས་པ་སོ་སོར་སྨིན་པ་ལྟ་བུ་དང་། ག་བུར་གཅིག་པུ་ལའང་ངོ་བོ་མ་འགྱུར་བཞིན་ཚད་པའི་སྨན་དང་། འཁྲིས་པའི་དུག་ཏུ་འགྱུར་བའི་བྱེད་ལས་ཐ་དད་དུ་ཡོད་པ་ལྟར་ཡིན་མོད་དེ། །འདིར་ཇི་བཞིན་འཆད་པ་ནི། གཞི་ཡི་གེ་ལ་བཟང་ངན་མེད་ཀྱང་། སེམས་ཅན་རྣམས་ཀྱིས་རྟོགས་མ་རྟོགས་དང་། ཀུན་རྟོག་ལོག་པའི་ཉེར་ལེན་གྱིས་ངག་གི་འདུ་བྱེད་ངན་པར་བསྒྱུར་མ་བསྒྱུར་གྱིས་ལས་གསོགས་ཚུལ་ནི་ཐ་དད་དུ་ཡོད་དེ། དཔེར་ན་སེམས་ཅན་གྱི་ཁམས་ལ་བདེ་གཤེགས་སྙིང་པོའི་ཆོས་ཉིད་ཀྱིས་ཁྱབ་ཚུལ་ཟླ་བ་སྒྲོན་མེའི་མདོ་ལས། །བདེ་གཤེགས་སྙིང་པོའི་འགྲོ་བ་ཡོངས་ལ་ཁྱབ། །ཅེས་དང་། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། ཞེས་གསུངས་པ་ལྟར་ཡིན་ནའང་། དེ་ལྟར་མ་རྟོགས་པའི་འགྲོ་བ་ལ་དེས་ཕན་མི་ཐོགས་པར་མ་ཟད་སྡུག་བསྔལ་གྱི་གཞིར་གྱུར་པ་བཞིན། །འདིར་ཡང་མི་དགེ་བ་ལྟར་སྣང་བའི་སྒྲ་ཚིག་གིས་ཀྱང་ཡི་གེའི་ངོ་བོ་ཅུང་ཟད་ཙམ་ཡང་ངན་དུ་མ་བཏངས་ཀྱང་། མ་རྟོགས་པ་དེ་སྲིད་དུ་དགེ་སྡིག་གི་ཉེར་ལེན་ལྟར་ལས་གསོགས་པའི་གཞི་དང་སྒྲའི་རྟེན་བྱེད་པ་ཡིན་ནོ། །དེ་བས་ན་འདིར་གསུང་ཡི་གེའི་འཁོར་ལོ་ཇི་ལྟར་སྣང་བར་མཛད་པ་དང་། ཆབས་ཅིག་ཐུགས་དགོངས་པའི་བྱིན་བརླབས་ལས་ཀྱང་དོན་མ་འཁྲུལ་བ་ཉིད་རྟོགས་པར་མཛད་པའི་ཚུལ་འཆད་མ་རགས་པའོ། །རྒྱུ་མཚན་དེ་དག་གི་ཕྱིར་མདོ་རྒྱུད་ཟབ་མོའི་གཞུང་ལ་ཐོས་བསམ་རྒྱ་ཆེན་པོ་བྱེད་མ་ནུས་ནའང་། རང་དེ་ལ་མཐུན་པར་སྣང་བའི་འཁོར་བའི་ཆོས་འདི་དག་གི་གནས་ལུགས་མ་འཁྲུལ་བ་ཉིད་ཅི་ལྟ་བུ་ཞིག་ཡིན་ཅུང་ཟད་རེ་དཔྱད་ཅིང་གཏན་ལ་འབེབས་པའི་བློ་མིག་མ་ཟུམ་པར་གྱུར་ནའང་། ལམ་འཁྱེར་དང་རྒྱས་འདེབས་སོགས་བློས་བྱས་ཀྱི་འཆིང་ཐག་ལ་གཅེས་ནོར་དུ་འཛིན་མི་དགོས་པ་ཙམ་གྱི་གོ་བ་ནང་ནས་རྙེད་པར་གདའ་སྟེ། གཟུ་བོར་གནས་པ་དག་གིས་མཁྱེན་པར་བྱས་ནས། དེའི་ངང་དུ་ཉམས་སུ་ལེན་པར་བྱ་བ་ལས། ཀུན་རྟོག་ལོག་པའི་ལམ་དུ་འཁྱེར་བ་དག་ལ་ནི་དེ་ལྟར་འཆད་པ་ཡང་མ་ཡིན་ལ། རྩོད་པ་ཡང་རེ་ཞིག་འདིར་མི་བྱའོ། །འོ་ན་འདི་དག་སྔོན་བྱུང་གིས་ལོ་རྒྱུས་ཡིན་ནམ། རྗེས་འཇུག་གི་ཉམས་ལེན་ཡིན་ཞེ་ན། གཉིས་ཀ་ཡིན་ཏེ་སྤྱིར་རྒྱུད་དབུ་ཞབས་ཀྱི་དོན་མཐའ་དག་ལོ་རྒྱུས་ལས་མ་འདས་ཤིང་། ཁྱད་པར་བརྒྱུད་པ་གསུམ་ལྡན་གྱི་བླ་མ་དམ་པ་རྣམས་ལོ་རྒྱུས་དེ་ཉིད་ཐུགས་ཉམས་སུ་བཞེས་པས་གྲོལ་ན། ཁོ་བོ་ཅག་ཀྱང་དེ་གས་ཡིད་ཚིམ་པ་ལགས་སོ། །དེ་ལྟར་གསུང་གི་གསང་བ་བསམ་གྱིས་མི་ཁྱབ་པའི་རྣམ་པར་རོལ་པ་ཅིར་ཡང་སྣང་བར་མཛད་པ་དང་། གཉིས་སུ་མེད་པར། གསང་གསུམ་དབྱེར་མི་ཕྱེད་པའི་ངང་ལས། ཆོ་འཕྲུལ་གསུམ་པ་ཇི་ལྟར་མངོན་དུ་མཛད་པ་ནི། འདི་ལྟར་ཡི་གེའི་སྒྱུ་འཕྲུལ་སྣང་བར་མཛད་པ་རྣམས་ཀྱི་བརྗོད་བྱའི་གནས་ལུགས་མ་འཁྲུལ་པའི་ཡེ་ཤེས་གང་ཡིན་པ་དེ་ཉིད་ཀྱི་ཐུགས་ལ་ཇི་ལྟར་མངའ་བ་བཞིན། ཉིད་ལས་མི་གཞན་པའི་འཁོར་ཡེ་ཤེས་རྒྱ་མཚོ་བཅུད་དུ་སྨིན་པའི་རང་གཟུགས་རྒྱལ་བ་རིགས་ལྔ་ལ་སོགས་པའི་ཐུགས་སུ་ཆུད་པར་བྱིན་གྱིས་བརླབས་ནས། དེ་ལྟར་མ་རྟོགས་པའི་འགྲོ་བ་རྣམས་ཀྱི་ཀུན་རྟོག་གི་རྒྱུན་ཆོས་ཉིད་དེ་བཞིན་ཉིད་དུ་ངལ་བསོ་བར་བྱ་བའི་ཕྱིར། །ཐེག་པ་ཀུན་གྱི་འཕྲོ་གཞི་རྒྱུད་ཀྱི་རྒྱལ་པོ་འདི་ཉིད་ལ་སོགས་པའི་གསང་བ་ཆེན་པོ་མཐའ་དག་གི རྒྱུད་དོན་ཚིག་དང་བཅས་པ་མ་ལུས་ཤིང་ལུས་པ་མེད་པ་རྣམས་ཉིད་ཀྱི་དགོངས་པའི་ཀློང་ནས། ཉིད་ཀྱི་ཐུགས་ལ་ཡོངས་སུ་མཁྱེན་པར་མཛད་དོ། །དེ་ལྟར་རྒྱུད་སྡེ་ཟབ་མོ་འདི་ཉིད་དངོས་ཀྱི་གདུལ་བྱར་མ་གྱུར་པ་རྣམས་ཀྱང་བརྒྱུད་ནས་གདུལ་བར་བྱ་བའི་ཕྱིར། རང་རང་དང་མཐུན་པའི་ཐུབ་པར་སྤྲུལ་ནས་ཐེག་པའི་རིམ་པ་བསམ་གྱིས་མི་ཁྱབ་པ་ཞིག་གསུངས་པར་འགྱུར་བའི་ཚུལ་གོང་དུ་བརྗོད་པ་དེ་དག་ཀྱང་འདི་ཉིད་ཀྱི་བྱིན་རླབས་ལས་ཤུགས་ལ་སྣང་བར་ཤེས་པར་བྱ་སྟེ། རང་གཞུང་ལས། འདུལ་བ་མདོ་སྡེ་ཆོས་མངོན་དང་། དམ་ཚིག་སྒྲུབ་དང་གྲུབ་པ་དང་། སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་རྣམས་སུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །ཞེས་སོགས་གསུངས་པ་ལྟར་ཡིན་ལ། དེ་བས་ན་ཆོ་འཕྲུལ་འདི་ནི་ཆོ་འཕྲུལ་གཞན་དག་གི་ཁྱབ་བྱེད་དང་སྤྲུལ་གཞི་ཡང་ཡིན་ལ། དེ་དག་གིས་གཏན་ལ་དབབ་པའི་དོན་མ་འཁྲུལ་བ་ལུང་དང་རྟོགས་པའི་བསྟན་པ་དང་། དེ་ཉིད་རྗེས་འཇུག་གིས་ཉམས་སུ་བླང་བའི་འབྲས་བུ་དང་བཅས་པའང་ཡིན་པས་ན་ཆོ་འཕྲུལ་ཀུན་གྱི་མཆོག་ཏུ་གསུངས་པ་ཡིན་ཏེ། མཛོད་ལས། ཆོ་འཕྲུལ་རྣམས་ལས་བསྟན་པ་མཆོག །མི་འཁྲུལ་ཕྱིར་དང་དང་མཐུན་ཕྱིར་དང་། །ཡིད་འོང་འབྲས་ལ་སྦྱོང་བྱེད་ཕྱིར། ཞེས་སོ། །དེ་ལྟ་བུའི་ཐུགས་ཀྱི་ཆོ་འཕྲུལ་ཉིད་ཀྱི་བརྗོད་བྱའི་གནས་ལུགས་ཇི་བཞིན་པའི་ངོ་བོ་ནི་ཡེ་ཤེས་ཁོ་ནས་སྤྱོད་ཡུལ་ལས་རྟོག་གེས་དཔྱད་པའི་རྟོགས་པར་མི་འགྱུར་བའི་ཚུལ། སྒྲ་གཅན་འཛིན་གྱིས་ཡུམ་ལ་བསྟོད་པ་ལས། །སོ་སོ་རང་རིགས་ཡེ་ཤེས་སྤྱོད་ཡུལ་པ། ཞེས་དང་། དགོངས་འདུས་ལས། དཔེའམ་ཚད་མའམ་གཏན་ཚིགས་སམ། །རྗེས་སུ་དཔག་པའི་ཤེས་རབ་ཀྱིས། །རྟོགས་པར་ནུས་པ་མ་ཡིན་ཏེ། །དམུས་ལོང་མཁའ་ལ་མཐོ་འཇལ་འདྲ། ཞེས་དང་། གལ་པོ་ལས། དོན་དམ་བློ་ཡིས་སྤྱོད་ཡུལ་མིན། །ཞེས་གསུངས་པ་ལྟར་རོ། །འོན་ཀྱང་འདིར་དེའི་རང་བཞིན་རྒྱུད་དོན་ཙམ་དབྱེ་གཞིར་བྱས་ནས་ཐ་སྙད་ཀྱིས་ལྡོག་པའི་ཆ་ནས། དབྱེ་བས་དོན་སྤྱིའི་ཚུལ་དུ་གཏན་ལ་འབེབ་པར་འཆད་པ་ལ་ནི་སྐྱོན་དེ་དག་ཡོད་པ་མ་ཡིན་ཏེ། དཔེར་ནམ་མཁའི་པདྨོ་དང་རི་བོང་གི་རྭ་ལ་སོགས་པ་ཤེས་བྱའི་གཞི་མ་གྲུབ་པ་དག་ཀྱང་། མ་དཔྱད་ན་ཡོད་མེད་ཀྱི་ཕྱོགས་གཅིག་ཏུ་ཁ་ཚོན་གཅོད་མི་ནུས་པ་དང་། ཐ་སྙད་ཙམ་དུ་དཔྱད་པའི་ཡུལ་དུ་བཞག་པ་ལ་ཡང་མི་འགལ་བ་བཞིན་ནོ། །དེ་ལྟར་ཡིན་ཡང་བརྗོད་བྱ་གཏན་ལ་མི་ཕེབ་པར་དབྱེ་བས་ཅི་ཞིག་བྱ་ཞེ་ན། དབྱེ་བ་ཤེས་པ་ཙམ་གྱིས་བརྗོད་བྱ་ཇི་བཞིན་པར་གཏན་ལ་མི་ཕེབ་ཀྱང་། ཀུན་ཁྱབ་ཀྱི་ཚད་མ་གསུམ་གྱིས་གཞལ་བས་དབྱེ་ཆོས་ཕྱོགས་ཙམ་གོ་བ་དེ་ཉིད་བསྐྱེད་རྫོགས་ཟབ་མོས་ཉམས་སུ་བླངས་ན། མཐར་རྣམ་སྨིན་རིག་འཛིན་ནས་རིམ་བཞིན་འཕགས་པའི་ཡེ་ཤེས་དང་མཇལ་བ་ཡིན་ལ། གཞན་དུ་གལ་པོ་ལས། ཤེས་བྱའི་ནང་ནས་དམ་པར་ནི། །གྱུར་ཕྱིར་ངེས་པའི་ཚིག་ཡིན་ནོ། ཞེས་དོན་དམ་ཤེས་བྱར་གསུངས་པ་ཡང་ཚུལ་འདི་ཙམ་དུ་དགོངས་པར་ཟད་དོ། །དེ་བས་ན་དོན་གྱི་ངོ་བོ་ཤེས་བྱ་ཤེས་བྱེད་ལས་འདས་ཀྱང་ཐ་སྙད་ཙམ་དུ་གཏན་ལ་ཕབ་པའང་། བརྒྱུད་ནས་རྟོགས་པའི་ཐབས་སུ་སོང་བའི་ཕྱིར་དོན་མེད་པའང་མ་ཡིན་ལ། ཤེས་པ་ཙམ་གྱིས་རྟོགས་པར་མ་ངེས་པས་ན་སྔ་མ་དང་ཡང་བརྗོད་དོན་གཅིག་པ་ཡིན་ནོ། །འདི་དག་ལ་སྔ་རབས་པ་དག་མང་དུ་རྩོད་པར་འདུག་ནའང་། རེ་ཞིག་འདིར་དེ་ཙམ་དུ་འཐུས་པར་བྱས་ནས་སྐབས་དོན་གྱི་བརྗོད་བྱ་བསམ་གྱིས་མི་ཁྱབ་པ་དག་བསྡུ་ན་གཞི་ལམ་འབྲས་བུའི་རྒྱུད་གསུམ་དུ་འདུ་བ་ཡིན་ཏེ། དེ་ལས་མང་མི་དགོས་ལ་ཉུང་ན་མི་འདུ་བའི་ཕྱིར། སྤྱན་འགྲེལ་ལས། གཞི་ལམ་འབྲས་བུའི་ཤེས་བྱ་རྣམས། །འབྲུ་མཐུན་ཚིག་དོན་ཤེས་བྱའི་ཕྱིར། །རྣམ་གསུམ་རྒྱུད་ཀྱི་དོན་དུ་བསྡུས། ཞེས་གསུངས་པ་ལྟར་གསུམ་གྱིས་དང་པོ་གཞི་ལ་ཡང་དབྱེ་ན་རིམ་གསུམ་ལས། ངོ་བོའི་གཞི་དང་བརྟགས་པའི་གཞི། ཞེས་པ་ལྟར་གཉིས་ལས། དང་པོ་ནི་ཁམས་བདེ་བར་གཤེགས་པའི་སྙིང་པོ་ཞེས། སེམས་ཀྱི་དམ་པའམ་སེམས་ཀྱི་ཆོས་ཉིད་རྣམ་པར་དག་པས། འཁོར་འདས་ཡོངས་ལ་ཁྱབ་པར་གནས་པ་དེ་ལ་གཏགས་པ་ཡིན་ཏེ། སྒྱུ་འཕྲུལ་རྒྱས་པ་ལས། །རྣམ་རྟོག་ཀུན་གཞི་མ་ཡིན་པ། །རང་བཞིན་མེད་པ་དོན་གྱི་གཞི། །དེ་ནི་ཆོས་ཀྱི་དབྱིངས་ཞེས་བྱ། །དེ་བཞིན་ཉིད་ཀྱི་ཡེ་ཤེས་སོ། །ཞེས་དང་། རྒྱན་སྟུག་པོ་བཀོད་པའི་མདོ་ལས། །ས་རྣམས་སྣ་ཚོགས་ཀུན་གཞི་སྟེ། །བདེ་བར་གཤེགས་པའི་སྙིང་པོའང་དེ། ཞེས་ཚོགས་བརྒྱད་ཀུན་གཞི་དང་བཅས་པ་རྣམ་པར་དག་པའི་རང་བཞིན་ནི་དངོས་གནས་པ་ཡིན་ལ། ལུང་ཕྱི་མར་ཀུན་གཞིའི་སྒྲས་སྨོས་པ་ནི། ཀུན་གཞིའི་ཡེ་ཤེས་ལ་དགོངས་པ་ཡིན་ཏེ། ཐེག་པ་ཐུན་མོང་པའི་ཆོས་སྐད་དུ་སོང་ལ། དེ་ཙམ་དུ་མ་ཟད་རང་བཞིན་གནས་རིགས་དང་། འགྱུར་མེད་ཡོངས་གྲུབ་སོགས་མང་དུ་གསུངས་པ་དག་ཀྱང་། དོན་འདི་ལས་མ་འདས་མོད་དེ་ཞིབ་མོར་ཤེས་པར་འདོད་ན་རྒྱ་གར་གྱི་ལྟ་གྲུབ་རྣམ་བཞིའི་གཞུང་བཀོད་པ་དག་ལས་རྟོགས་པར་བྱ་ཞིང་། འདིར་གཅིག་ཏུ་དྲིལ་ནས་འཆད་པར་བྱ་བའི་ངོ་བོ་ནི། རིམ་གསུམ་ལས། ངོ་བོ་ཐམས་ཅད་སེམས་ཉིད་དེ། །གསེར་གྱི་དཔེ་བཞིན་གཉིས་སུ་མེད། །ཅེས་གསུངས་པ་ལྟར་གསེར་དང་གསེར་གྱི་ཁ་དོག་དབྱེར་མེད་པ་བཞིན་དུ་གཞིའི་ཆོས་ཉིད་ཀྱིས་ཀྱང་། འཁོར་འདས་ཡོངས་ལ་དབྱེར་མེད་པར་ཁྱབ་ནའང་། རང་གི་ངོ་བོ་ལ་ནི་བཅིངས་གྲོལ་གང་ཡང་མེད་པའི་ཚུལ། འདི་ཉིད་ལས། བཅིངས་མེད་རྣམ་པར་གྲོལ་མེད་པའི། །སོགས་ཀྱིས་སྟོན་པ་ལྟར། རྨད་བྱུང་རྒྱལ་པོ་ལས། ཡེ་ནས་ལྷུན་འབྱམས་སངས་རྒྱས་ཆོས། །ཐོག་མ་ཐ་མ་དབུས་མ་མེད། །ནམ་མཁའ་ལྟ་བུའི་རང་བཞིན་ལ། །མི་ཤེས་བྱིས་པ་རྣམ་པར་འཁོར། །འོན་ཀྱང་བཅིངས་མེད་བཀྲོལ་མེད་པ། །སྒྱུ་མ་ལྟ་བུའི་རང་བཞིན་ནོ། །ཞེས་པས་ལེགས་པར་བསྟན་པ་ཡིན་ནོ། །གཉིས་པ་བརྟགས་པའི་གཞི་ནི། དེ་ལྟ་བུའི་གནས་ལུགས་ལ་སྒྲིབ་པར་བྱེད་པའི་གཉིས་སྣང་འཁོར་བའི་ཆོས་སུ་གྲུབ་པ་མཐའ་དག་སྟེ། དེའི་ངོ་བོ་ཡང་རིམ་གསུམ་ལས། ངོ་བོ་སྣོད་བཅུད་འཇིག་རྟེན་གྱི། །སྣང་དང་ཞེན་པའི་ཆོས་རྣམས་སོ། །ཞེས་གསུངས་པ་ལྟར་ཡིན་ལ། དེ་ཡང་ངོ་བོའི་གཞི་རྣམ་པར་དག་པ་ཞིག་ལ་འཁྲུལ་བ་བརྟགས་གཞི་མ་དག་པ་ཞིག་གིས་ཅིའི་ཕྱིར་བསྒྲིབ་སྙམས་ན། བདག་ཏུ་འཛིན་པ་ལ་མངོན་པར་ཞེན་ནས་རང་སྣང་ལ་གཞན་དུ་བཟུང་པས་བསྒྲིབ་ཏེ། འཕགས་པ་དཀོན་མཆོག་སྤྲིན་ལས། འདི་དག་ནི་བདག་མེད་པ་ཡིན་མོད་དེ་། འོན་ཀྱང་བྱིས་པ་སོ་སོའི་སྐྱེ་བོ་བདག་ཏུ་འཛིན་པ་ལ་ཞེན་པ་དག་ནི་བདག་གི་ཕུང་པོ་རྣམས་ལ་བདག་ཡོད་དོ། །ཞེས་མངོན་པར་ཞེན་པས་དེ་ཁོ་ན་ཉིད་ཁོང་དུ་མི་ཆུད་དོ། །ཟོ་ཆུན་གྱི་ཆུན་མོའམ་འགལ་མེའི་འཁོར་ལོ་ལྟར་འཁོར་བའི་འཁོར་ལོར་འཁྱམ་མོ། །ཞེས་སོ། དེས་ཇི་ལྟར་བསྒྲིབ་ནས་འཁྲུལ་སྣང་གྲུབ་ཚུལ་ཡང་། པདྨ་རྣམ་པར་རོལ་པའི་མདོ་ལས། ལྷའི་བུ་པདྨ་རྣམ་པར་རོལ་པས་འཇམ་དཔལ་ལ་སྨྲས་པ། འཇམ་དཔལ། ཕྱི་རོལ་གྱི་ཡུལ་འདི་དག་བྱེད་པ་པོས་བྱས་པའམ་ཇི་ལྟར་བལྟ་བར་བགྱི། འཇམ་དཔལ་གྱིས་སྨྲས་པ། ལྷའི་བུ། ཕྱི་རོལ་གྱི་ཡུལ་འདི་རྣམས་ནི་བྱེད་པ་པོས་བྱས་པ་མ་ཡིན་ཏེ། སེམས་སམ་རྟོག་པའི་བག་ཆགས་ཀྱི་སྣང་བ་ཡིན་ནོ། །ལྷའི་བུས་སྨྲས་པ། བག་ཆགས་ཇི་ལྟར་བརྟས་ཀྱང་རི་དང་རྒྱ་མཚོ་དང་། ཉི་མ་དང་ཟླ་བ་ལ་སོགས་པ་སྲ་ཞིང་འཐས་པ་ལྟར་གྱུར་པ་སྣང་བ་ག་ལ་རུང། འཇམ་དཔལ་གྱིས་སྨྲས་པ། ལྷའི་བུ་སྣང་དུ་རུང་སྟེ། གྲོང་ཁྱེར་ཆེན་པོ་ཝྺ་རཱ་ཎ་སཱི་ན་བྲམ་ཟེ་མེ་སྦྱིན་ཞེས་བྱ་བས་རང་གི་ལུས་སྟག་ཏུ་བསྒོམས་པས། གྲོང་ཁྱེར་གྱི་མི་རྣམས་ཀྱིས་སྟག་ཏུ་མཐོང་ནས་བྲོས་པས་གྲོང་ཁྱེར་སྟོངས་པ་བྱུང་ངོ་། །ཟད་པ་ས་དང་ཆུ་བསྒོམས་པས་ས་དང་ཆུར་སྣང་བ་དང་། རྣལ་འབྱོར་སྤྱོད་པའི་དགེ་སློང་གི་མི་གཙང་བའང་རུས་གོང་གི་འདུ་ཤེས་བསྒོམས་པས་དེར་སྣང་བ་ཡིན། ཐོག་མ་མེད་པའི་བག་ཆགས་བརྟས་པས་ཅི་སྟེ་མི་སྣང་། ལྷའི་བུས་སྨྲས་པ། བག་ཆགས་བརྟས་པའི་དབང་གིས་རྣམ་པ་སྣ་ཚོགས་པའི་དབང་གིས་དུ་མར་སྣང་བ་ཡིན། འཇམ་དཔལ་གྱིས་སྨྲས་པ། སྣང་བ་ཐམས་ཅད་མ་ངེས་པ་ཡིན་ཏེ། ལ་ལའི་སྣང་བ་ནི་ལ་ལས་མུན་པ་ཡིན་ནོ། །འདི་ལྟར་ས་ལ་སར་འདུ་ཤེས་པ་དང་། ས་ལ་ཆུར་འདུ་ཤེས་པའང་ཡོད། ས་ལ་མེར་འདུ་ཤེས་པའང་ཡོད། ས་ལ་ལོངས་སྤྱོད་དུ་འདུ་ཤེས་པའང་ཡོད། །ས་ལ་སྡུག་བསྔལ་དུ་འདུ་ཤེས་པའང་ཡོད། །མེ་ལ་མེར་འདུ་ཤེས་པའང་ཡོད། མེ་ལ་ལོངས་སྤྱོད་དུ་འདུ་ཤེས་པའང་ཡོད། མེ་ལ་གནས་སུ་འདུ་ཤེས་པའང་ཡོད། མེ་ལ་ཟས་སུ་འདུ་ཤེས་པའང་ཡོད། ཆུ་ལ་ཆུར་འདུ་ཤེས་པའང་ཡོད། ཆུ་ལ་མེར་འདུ་ཤེས་པའང་ཡོད། ཆུ་ལ་སར་འདུ་ཤེས་པའང་ཡོད། ཆུ་ལ་བདུད་རྩིར་འདུ་ཤེས་པའང་ཡོད། ཆུ་ལ་གནས་སུ་འདུ་ཤེས་པའང་ཡོད། ནམ་མཁའ་ལ་ནམ་མཁར་འདུ་ཤེས་པའང་ཡོད། ནམ་མཁའ་ལ་གནས་སུ་འདུ་ཤེས་པའང་ཡོད། ནམ་མཁའ་ལ་སར་འདུ་ཤེས་པའང་ཡོད། དེ་བས་ན་ངེས་པ་མེད་པའི་ཕྱིར་བག་ཆགས་ཀྱི་དབང་གིས་གང་ལྟར་ཡང་སྣང་བ་ཡིན་ནོ། །ཞེས་ཤིན་ཏུ་གསལ་བ་གསུངས་པ་ལྟར་འཁྲུལ་སྣང་མཐའ་གཅིག་ཏུ་མ་ངེས་པ་རྨི་ལམ་ལྟར་ཤེས་པར་བྱ་ཞིང་། གཞན་ཡང་རྫས་གཅིག་ལ་དུ་མ་དང་། མི་གཅིག་ལ་དགྲ་གཉེན་ཐ་དད་དུ་སྣང་བ་ཡང་མི་འགལ་བའི་ཚུལ། དོ་ཧ་མཛོད་ལས། ཇི་ལྟར་རླུང་གིས་བརྒྱབ་པས་མི་གཡོ་བའི། །ཆུ་ཡང་གཡོ་བའི་རྦ་རླབས་རྣམས་སུ་འགྱུར། དེ་ལྟར་རྒྱལ་པོ་མདའ་བསྣུན་སྣང་བ་ཡང་། གཅིག་ཉིད་ན་ཡང་རྣམ་པ་སྣ་ཚོགས་བྱེད། ཇི་ལྟར་རྨོངས་པས་ལོག་ནས་བལྟས་པ་ཡིས། །མར་མེ་གཅིག་ཉིད་གཉིས་སུ་སྣང་བར་འགྱུར། །དེ་ལྟར་བལྟ་བྱ་ལྟ་བྱེད་གཉིས་མེད་ལ། ཀྱེ་མ་བློ་ནི་གཉིས་ཀྱི་དངོས་པོ་སྣང་། ཞེས་ཆུ་གཅིག་ཉིད་རླུང་གིས་བསྐྱོད་པས་རྦ་རླབས་མང་པོར་སྣང་བ་དང་། མར་མེ་གཅིག་ཉིད་མིག་བཙིར་བས་གཉིས་སུ་སྣང་བ་དང་། ས་ར་ཧ་གཅིག་ཉིད་བཟང་ངན་གཉིས་སུ་མཐོང་བ་ལྟར་ཆོས་ཐམས་ཅད་དོན་ལ་གཉིས་སུ་མེད་པ་ལ་གཉིས་སུ་འཛིན་པས་བསླད་པ་དེ་དང་འདྲ་བར་གསུངས་པ་ལྟར་ཡིན་ལ། དེ་ཡང་ཐོག་མའི་སྤྱི་གཞིའི་སྟེང་ནས་རྒྱུ་མ་རིག་པ་གཉིས་དང་། རྐྱེན་བཞིས་འཁྲུལ་སྣང་མཐུ་བརྟས་ཏེ་བག་ཆགས་སོ་སོར་གྲུབ་པའི་ཚུལ་ནི་སྔོན་དུའང་མདོ་ཙམ་བསྟན་ལ། འོག་ཏུ་གཞུང་དོན་གྱི་སྐབས་སུ་ཡང་ཅི་རིག་པར་སྟོན་པ་ཡིན་ནོ། །དེ་ལྟ་བུའི་གཞིའི་གནས་ལུགས་གང་ལ་འཁོར་འདས་ཀྱི་ཆོས་ཐམས་ཅད་བསྟེན་པས་སམ། ཆོས་ཐམས་ཅད་དེ་ལས་འབྱུང་བས་ན་དེས་ཚིག་ཀྱང་། རིམ་གསུམ་ལས། ཐ་སྙད་གཉིས་ཀྱི་ཆོས་རྣམས་ཀུན། །མ་ལུས་འབྱུང་ཕྱིར་གཞི་ཞེས་བྱ། ཞེས་སོ། གཉིས་པ་ལམ་རྒྱུད་ནི་གཞི་རྒྱུད་དེ་གློ་བུར་གྱི་དྲི་མ་དང་བྲལ་བར་བྱེད་པའི་ཐབས་ཤེས་ཟུང་འཇུག་གི་བྱེད་རྩོལ་དང་བཅས་པ་སྟེ། དེ་ལ་ཡང་ལམ་དངོས་བཤད་པ་དང་། དེའི་ཡན་ལག་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་གཉིས་ལས། དང་པོ་ལ་ཡང་དབྱེ་ན་བཤད་རྒྱུད་རྒྱ་མཚོ་ལས། གྲོལ་ལམ་ཐབས་སུ་རྣམ་པར་བསྟན། །ཞེས་པ་ལྟར་ཐབས་གྲོལ་གྱི་ལམ་གཉིས་ལས། དང་པོ་ཐབས་ལམ་ནི་ཐབས་ཀྱི་ཁྱད་པར་བརྟུལ་ཞུགས་ཀྱི་སྤྱོད་པ་རྨད་དུ་བྱུང་བའི་སྒོ་ནས་འབྲས་བུ་མྱུར་དུ་ཐོབ་པར་བྱེད་པ་སྟེ། དཔེར་ན་རིན་པོ་ཆེ་མ་ཀྵེ་ཀའི་སྦྱོར་བས་ལྕགས་ཁམས་ཡུད་ཙམ་གྱིས་གསེར་དུ་བསྒྱུར་བ་བཞིན་ཏེ། དེ་ལའང་རིམ་གསུམ་ལས། གདམས་ངག་སྟེང་དང་འོག་གི་སྒོ །ཞེས་པ་ལྟར་རིམ་གྱིས་དང་ཅིག་ཅར་གྱི་ལམ། སྟེང་སྒོ་འཇུ་བརྟུལ་དང་། འོག་སྒོ་བདེ་བ་ཆེན་པོ་གཉིས་སུ་ཡོད་ཀྱང་འདིར་དེ་ཙམ་མོ། །གཉིས་པ་གྲོལ་ལམ་ནི་གཙོ་བོར་ཤེས་རབ་རྣམ་པ་གསུམ་གྱི་སྒོ་ནས་རང་རྒྱུད་ཀྱི་འཆིང་བ་ཆོས་ཉིད་དུ་གྲོལ་བར་བྱེད་པ་སྟེ། རིན་པོ་ཆེ་ཀཽ་ཏུ་བྷ་དང་ལྷན་ཅིག་བཞག་པའི་རྡོའི་ཁམས་རིམ་གྱིས་གསེར་དུ་འགྱུར་བ་བཞིན་ཏེ། དེ་ལ་ཡང་ལམ་རིམ་ལས། རིང་པའང་རིམ་དང་ཅིག་ཅར་བའོ། །ཞེས་པ་ལྟར་གྲོལ་ལམ་ཅིག་ཅར་བ་དང་། རིམ་གྱིས་པ་གཉིས་སུ་ཡོད་པ་ལས། དང་པོ་ནི། དབང་པོ་ཡང་རབ་ཁ་ཅིག་སྔོན་གྱི་སྨོན་ལམ་དང་བླ་མའི་ཐུགས་རྗེ་ལ་བརྟེན་ནས་གནས་སྐབས་སུ་མོས་གུས་དྲག་པོ་ཙམ་གྱིས་རྐྱེན་བྱས་ཏེ་སྐད་ཅིག་ལ་རྟོགས་གོམས་མཐར་ཕྱིན་པར་བྱེད་པ་ཡིན་ཀྱང་། འདི་ལའང་མཆོག་དམན་གྱི་ཁྱད་ནི་ཡོད་པར་མངོན་ཏེ། དཔེར་ན་ཨོ་རྒྱན་གྱི་རྒྱལ་པོ་ཨིནྡ་བྷོ་ཏི་ལྟ་བུ་དབང་དུས་སུ་རྟོགས་གོམས་ཆིག་རྫོགས་སུ་གྱུར་པའི་ཚུལ་དང་། སློབ་དཔོན་ཆེན་པོས་མན་ངག་ལྟ་ཕྲེང་དུ་ནི་འཆད་འགྱུར་གྱི་མཚན་ཉིད་གསུམ་གྱི་རིམ་པས་གོམས་པ་མཐར་ཕྱིན་པར་བྱེད་པའི་ཚུལ་མྱུར་བུལ་ཙམ་མ་གཏོགས་རིམ་གྱིས་པ་དང་ལམ་གྱི་འགྲོས་གཅིག་པར་གསུངས་པ་གཉིས་ལ་དཔྱད་པས་ཤེས་སོ། །གཉིས་པ་རིམ་གྱིས་པ་ལའང་རང་གཞུང་ལས། ཤེས་འཇུག་མཚན་ཉིད་འབྱོར་བས་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ ། །རིགས་འཛིན་རྒྱལ་བའི་ཞིང་དུ་གྲགས། །ཞེས་པ་ལྟར་རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་གྱུར་འབྲས་བུའི་མཚན་ཉིད་རིག་འཛིན་བཞི་སྟེ་གསུམ་ལས། དང་པོ་ནི་ལམ་རིམ་ལས། གཞི་དང་གཏན་ཚིག་གྲུབ་པའི་དོན་ཞེས་པས་གཞལ་བྱ་ཞེན་སྣང་དང་བཅས་པའི་གཞི་རྒྱུད་གང་ཞིག་ འཇལ་བྱེད་གཏན་ཚིག་རྣམས་ཀྱིས་གཏན་ལ་ཕབ་པས་གྲུབ་དོན། ཐུན་མོང་ཡིད་དཔྱོད་ཀྱི་ལྟ་བ་རྗེས་དཔག་ཙམ་མ་ཡིན་པར་ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བར་མངོན་སུམ་དུ་གཏན་ལ་ཕེབས་པ་ནི་གྲུབ་པའི་མཐའ་ཡིན་ཏེ། ལམ་རིམ་ལས། རྒྱ་མཚོ་དྭངས་བའི་གཟུགས་བརྙན་ལྟར། །སྒྲ་བརྟེན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བ། །རང་གསལ་གསུམ་བྲལ་མི་བསྒུལ་བར། །ངེས་པར་གདེངས་སུ་གང་བྱས་པ། །ཐོས་བསམ་བརྟེན་པའི་ལྟ་མཐར་ཕྱིན། །ཞེས་སོ། །ཚུལ་འདི་ལ་འཇམ་མགོན་ས་སྐྱ་པཎྜི་ཏས་སྡོམ་གསུམ་རབ་དབྱེར་དགོངས་གཞི་དང་བཅས་ནས་དགོངས་པ་དུ་མས། །ཕ་རོལ་ཕྱིན་པའི་སྤྲོས་བྲལ་ལས། །ལྷག་པའི་ལྟ་བ་ཡོད་ན་ནི། །ལྟ་དེ་སྤྲོས་པ་ཅན་དུ་འགྱུར། །ཞེས་གསུངས་པ་ལ་གཞུང་འདི་འཛིན་པའི་བདག་ཉིད་ཆེན་པོ་ཐུན་མོང་དང་ཐུན་མོང་མ་ཡིན་པའི་གྲུབ་པའི་མཐའ་རྒྱ་མཚོའི་ཕ་རོལ་དུ་སོན་ཅིང་། ཁྱད་པར་གསང་ཆེན་བླ་ན་མེད་པའི་རྒྱུད་སྡེའི་དགོངས་དོན་ཟབ་མོ་ཤིན་ཏུ་གསང་བ་དག་གིས་ཐུགས་རྒྱུད་ཡོངས་སུ་གཏམ་པའི་མཁས་གྲུབ་བསྟན་པའི་བདག་པོ་དག་གིས་ཐུགས་མ་རངས་པའི་རྣམ་འགྱུར་དང་བཅས་ནས་འདི་སྐད་དུ། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་ཕྱིར་དང་། དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། ཞེས་དང་། མདོ་སྡེ་གདམས་ངག་འབོག་པའི་རྒྱལ་པོ་ལས། འཇམ་དཔལ་གྱིས་སྟོན་པ་ལས། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མ་གསུངས། །ཞེས་ཞུས་པའི་ལན་དུ། སྟོན་པས། རྒྱུ་ལ་མོས་པར་རྒྱུའི་ཆོས་ཀྱི། །འཁོར་ལོ་རབ་ཏུ་བསྐོར་བྱས་ན། །རྡོ་རྗེ་ཐེག་པའི་ཉེ་ལམ་ནི། །མ་འོངས་དུས་ན་འབྱུང་བར་འགྱུར། ཞེས་སྔགས་ནི་འབྲས་བུ་ལམ་དུ་བྱེད་པ་དང་། སངས་རྒྱས་དངོས་ཡོད་པར་སྟོན་པས་ན་ངེས་དོན་མཐའ་ཐུགས་གི་ཐེག་པ་སྟེ། ལུང་སྔ་མར་མ་རྨོངས་དང་ཞེས་པས། ཕར་ཕྱིར་ཐེག་པ་ལ་ཟབ་གསལ་གང་ཐད་ནས་ཀྱང་རྨོངས་པའི་ཆ་ཕྱོགས་རེ་ད་དུང་ཡོད་པར་གསུངས་པ་དང་། དབང་པོ་རྣོན་པོ་ཞེས་པས། མདོ་ལས་སྔགས་ཀྱི་ཤེས་རབ་ཡང་ཁྱད་པར་ཅན་དུ་བསྟན་པས་ན་ལྟ་བའང་དེའི་ཁྱད་པར་གྱི་ཆོས་སུ་རིག་པར་བྱ་ལ། ལུང་ཕྱི་མར་རྒྱུ་འབྲས་ལྷུན་གྲུབ་ཏུ་ཞེས་སོགས་ཀྱིས་མཆོག་ཏུ་མི་འགྱུར་པའི་བདེ་བ་ཆེན་པོ་ལྷན་སྐྱེས་དེ་བཞིན་ཉིད་ཀྱི་ཡེ་ཤེས་ནི་རྡོ་རྗེ་ཐེག་པའི་སྔགས་ཀྱི་ཁྱད་ཆོས་སུ་གསུངས་པ་ཡིན་ཏེ། ཁྱེད་ཅག་མོས་པའི་རྒྱུད་དུས་ཀྱི་འཁོར་ལོ་ལས་ཀྱང་། དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་སྔགས་ཀྱི་ཐེག་པར་བསྟན། ཞེས་སོགས་གསར་རྙིང་རིས་མེད་ཀྱི་མདོ་རྒྱུད་ཚད་མ་དག་ལས་འབྱུང་བ་མ་མཐོང་བར་ཟད་དོ་ཞེས་ལན་འདེབས་པར་བྱེད་པ་ལ། ཚུལ་དེ་དག་གི་དགོངས་པ་ཇི་བཞིན་མ་རྟོགས་པའི་རྨོངས་པ་དག །བདག་ཏུ་འཛིན་པའི་གཉིས་འཐུང་ལོག་པར་ལྟ་བའི་མྱོས་བྱེད་ཀྱིས་རབ་ཏུ་རྒྱགས་པར་བྱས་ནས་ཕྱོགས་ལྷུང་གི་གཡང་སར་རྩ་ལྟུང་དྲུག་པའི་ནོངས་པ་ཆེན་པོ་བདག་གིར་བྱས་ཏེ་ཐར་པའི་སྲོག་རྩ་ཉེ་བར་བསུབ་པའི་གཏམ། གཅིག་སྟེ་ལེགས་ན་ཅིག་ཤོས་ནི་གཞན་ནོ་ཞེས་སྨྲ་བར་བྱེད་པ་ནི་རྣམ་པ་ཀུན་ཏུ་འོས་པ་མ་ཡིན་པའི་ལུང་རིགས་ཀྱི་མཚོན་ཆ་རྣོན་པོ་སྙིང་ལ་གཟེན་པ་ཉིད་དེ། རྒྱུད་བླ་མ་ལས། ཁམས་གསུམ་དག་ན་ཉོན་མོངས་སྤོང་བྱེད་གསུངས། །ཞི་བའི་ཡོན་ཏན་བརྗོད་པར་མཛད་པ་གང་། །དེ་ནི་དྲང་སྲོང་གསུངས་ཡིན་ལྡོག་པ་གཞན། ཞེས་ཐར་པའི་ལམ་དང་འབྲེལ་པའི་ཆོས་ཐམས་ཅད་སངས་རྒྱས་ཀྱི་གསུང་ཁོ་ན་ཡིན་པར་གསུངས་པའི་ཕྱིར་རོ། །དེས་ན་ཁོ་བོ་ཅག་ནི་ཚུལ་འདི་གཉིས་དགོངས་དོན་གཅིག་པར་མཐོང་ཏེ། དཔེར་ན་རྒྱ་མཚོ་ཆེན་པོ་ལས་ཀུ་ཤའི་ཆུན་པོས་ཉེ་བར་བླངས་པའི་ཆུ་ཐིག་དེ་རྒྱ་མཚོའི་ཆུ་ཡིན་པས་ཁྱབ་ཀྱང་། རྒྱ་མཚོ་ནི་ཆུ་ཐིག་དེ་ཡིན་པས་མ་ཁྱབ་ལ། ཆུའི་ངོ་བོ་ཙམ་ལ་ལྟོས་ནས། རྒྱ་མཚོའི་ཆུ་ཡང་འདི་ལས་མི་ལྷག་གོ །ཞེས་བརྗོད་ཀྱང་དེ་ཀས་རྒྱ་མཚོའི་ཁྱད་ཆོས་རྣམས་མེད་དུ་མི་འགྲོ་བ་ལྟར། གསང་ཆེན་བླ་ན་མེད་པའི་རྒྱུད་སྡེ་འདི་ལས་འཕྲོས་པའི་ཐེག་པ་ཐུན་མོང་པ་དག་གི་ལྟ་བ་ཡང་སྔགས་ཀྱི་ལྟ་བ་ཡིན་པས་ཁྱབ་ལ། སྔགས་ཀྱི་ལྟ་བ་ཡིན་ན་དེའི་ལྟ་བ་ཡིན་པའི་མ་ཁྱབ་ཅིང་། གནས་སྐབས་སུ་དགོས་ཆེད་དང་བཅས་ནས་དབུ་མའི་ལྟ་བ་ལྟ་བུ་ལ་སྤྲོས་པ་དང་བྲལ་བའི་ཆ་ནས། སྔགས་སྤྲོས་བྲལ་གྱི་ལྟ་བ་ཡང་འདི་ལས་མི་ལྷག་གོ་ཞེས་བརྗོད་ཀྱང་། དེ་ཀའི་སྔགས་ཀྱི་མི་འགྱུར་པའི་བདེ་བ་ཆེན་པོ་ལ་སོགས་འཕགས་ཆོས་རྣམས་མེད་དུ་འགྲོ་མི་དགོས་པར་གྲུབ་ལ། ཚུལ་དེས་སྔ་མའི་རྒོལ་བ་ཡང་དགོངས་གཞི་དགོངས་པ་དང་བཅས་པ་སྟེ། དགོངས་གཞི་ནི་ངོ་བོ་སྤྲོས་བྲལ་ཙམ་ལ་བྱས་ནས། དགོངས་པ་དེང་སྐབས་སྔགས་པར་ཁས་འཆེ་ནས་ཕ་རོལ་ཕྱིན་པའི་ལྟ་སྤྱོད་ཟབ་མོ་རྒྱང་དུ་བོར་ཏེ། དེ་དང་དངོས་སུ་མ་འབྲེལ་པའི་ལྟ་བ་ཁྱད་པར་ཅན་གཞན་ཞིག་སྔགས་ལ་ཡོད་དོ་ཞེས། ཁྱད་གཞི་མེད་པའི་ཁྱད་ཆོས་གྱི་གོ་བ་ཙམ་ལ་གདེངས་བཅས་ནས་སྔགས་ཀྱི་སྦྱོར་སྒྲོལ་ཟབ་མོ་བརླང་པོར་སྤྱོད་པ་དག་ཏུ་སྔར་གོལ་དུ་ཉེ་བ་དགགས་པའི་ཕྱིར་ཡིན་ལ། ཕྱི་མའི་བརྒལ་ལེན་ཡང་། དགོངས་གཞི་བདེན་པ་གཉིས་ཀའི་ཐད་ནས་དོན་གྱི་ཁྱད་པར་བསམ་གྱིས་མི་ཁྱབ་པ་དག་སྲིད་པ་ལ་བྱས་ནས། དགོངས་པ་གསང་ཆེན་བླ་ན་མེད་པ་འདི་ཉིད་ཉམས་མི་དམའ་བའི་ཁྱད་ཆོས་རྣམས་མངོན་དུ་འདོན་པའི་ཕྱིར་ཡིན་ཏེ། དེ་ལྟར་མ་ཡིན་ན་འཇམ་མགོན་ས་པཎ་ཡང་སྔགས་བླ་མེད་ཀྱི་གཞན་དོན་མ་མཐོང་བའི་གང་ཟག་ཏུ་དམ་འཆའ་དགོས་ན་ཚུལ་དེའི་ཕྱོགས་འཛིན་པ་དག་ཀྱང་ཧ་ཅང་ཐལ་ལོ། །གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་ལའང་མོས་སྒོམ་དང་ངེས་རྫོགས་གཉིས་ལས། དང་པོ་ནི། ཏིང་ངེ་འཛིན་ལ་བསྟན་པ་མ་ཐོབ་ཀྱང་སྤྱིའི་རྣམ་པ་ཙམ་ཞིག་མོས་པས་ལམ་དུ་བྱེད་པ་ཡིན་ལ། གཉིས་པ་ནི་ལམ་སོ་སོའི་ཏིང་ངེ་འཛིན་མཐར་ཕྱིན་པར་བྱེད་པའི་ཚུལ་སྐྱེ་འཆི་བར་དོ་གསུམ་སྦྱོངས་བའི་ཟག་བཅས་ཀྱི་ལམ་ལྔ་སྟེ། ལམ་རིམ་ལས། སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་བཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོན། །ཞེས་འཆི་བ་འོད་གསལ་དང་རྗེས་སུ་མཐུན་པའི་ལམ་སྟོང་པ་ཆེན་པོ། དེ་བཞིན་དུ་བར་དོ་དང་འབྲེལ་བའི་ལམ་སྙིང་རྗེ་སྒྱུ་མ། སྐྱེས་པའི་རིམ་པ་མངལ་ན་གནས་པ་དང་། བཙས་ནས་འགྲོ་འདུག་ནུས་པའི་བར་དང་། འཁོར་གྱིས་བསྐོར་ནས་དགྲ་འདུལ་གཉེན་སྐྱོང་གི་ལས་བྱེད་པའི་དུས་ཚོད་གསུམ་དང་མཐུན་པའི་ལམ་ཕྱག་རྒྱ་གཅིག་པ། ཕྱག་རྒྱ་སྤྲོས་བཅས། ཚོམ་བུ་ཚོགས་སྒྲུབ་སྟེ་ཟག་པ་དང་བཅས་པའི་ལམ་གྱི་རྣལ་འབྱོར་ལྔ་ཡིན་ལ། དེ་ལས་ཀྱང་དང་པོ་བཞི་ནི་ཟག་ལྡོག་གཉིས་ཀ་ཡོད་པ་ཚོགས་ལམ་གྱི་རྣལ་འབྱོར་སྟེ། ལམ་རིམ་ལས། དེ་ཕྱིར་ལམ་བཞི་ཟག་ལྡོག་ཡོད། ཅེས་སོ། །ཚོགས་སྒྲུབ་པའི་སྦྱོར་ལམ་གྱི་རྣལ་འབྱོར་ཡིན་པས་ཟག་པ་ཡོད་ཀྱང་ལྡོག་པ་མེད་པའི་ལམ་སྟེ། སྤྱོད་པའི་དུས་གྲངས་ངེས་པས་ཟག་མེད་ལ་དངོས་སུ་སྦྱོར་བའི་བར་ཆད་མེད་ལམ་ཡིན་པའི་ཕྱིར་རོ། །གསུམ་པ་ལམ་གྱུར་གྱི་འབྲས་བུ་ནི། ཟག་ལྡོག་གཉིས་ཀ་མེད་པའི་ལམ་མཐོང་སྒོམ་མཐར་ལམ་གསུམ་གྱིས་བསྡུས་པ་རིག་འཛིན་བཞི་སྟེ། དེ་ཡང་མཐོང་ལམ་པ་ལའང་ཆོས་ཉིད་ཀྱི་བདེན་པ་མཐོང་ཡང་བློའི་ནུས་སྟོབས་ཆེ་ཆུང་གིས་བྱུང་བ་སྙིགས་མའི་ལུས་ཡེ་ཤེས་ཀྱི་མེས་སྦྱོངས་པར་མ་ནུས་པ་རྣམ་སྨིན་རིག་འཛིན་དང་། སྦྱོང་བར་ནུས་པས་སྐྱེ་འཆི་མེད་པར་དྭངས་མའི་ལུས་སུ་གྱུར་པ་ལམ་མཆོག་ཡོངས་སུ་རྫོགས་པའི་ཚེ་དབང་རིག་འཛིན་གཉིས་སུ་ཡོད་པ་ཡིན་ཏེ། ལམ་ཆུང་ལས། ནུས་པ་ཐོབ་དང་མ་ཐོབ་པས། །མཐོང་ལམ་གཉིས་སུ་འགྱུར་བ་ཡིན། ཞེས་སོ། །འདི་ལ་ཀུན་མཁྱེན་ཆེན་པོས་ནི། ལས་དང་པོ་པའི་ས་ནས་སངས་རྒྱས་ཀྱི་སའི་བར་གྱི་མདོའི་ལམ་ལྔ་སྔགས་ཀྱི་རིག་འཛིན་བཞིས་བགྲོད་ཅིང་བསྡུས་པའི་ཕྱིར་རྣམ་སྨིན་རིགས་འཛིན་སྦྱོར་ལམ་པར་གསུངས་པ་ལྟར་རིག་འཛིན་ཆེན་པོ་འཇིགས་མེད་གླིང་པས་ཀྱང་བཞེད་དོ། །དེ་ལ་མཁན་ཆེན་རིན་པོ་ཆེ་དྷརྨཱ་ཤྲཱིས་ནི་ལུང་སྔ་མས་ཀྱང་གནོད་ལ། འོན་ཀྱང་རྣམ་སྨིན་རིག་འཛིན་དེ་ཟག་བཅས་ཡིན་ནམ་ཟག་མེད་ཡིན། སྔ་མ་ལྟར་ན་འཕགས་པའི་ཡེ་ཤེས་ད་དུང་མ་མཐོང་བར་ཐལ་བ་དང་། ཕྱི་མ་ལྟར་ན་སྦྱོར་ལམ་ཟག་བཅས་སུ་ངེས་པ་ལ་སོགས་པས་གནོད་དོ་གསུངས་ནའང་། དོན་གཅིག་པ་ཡིན་ཏེ། དཔེར་ན་ལྕགས་ཀྱུས་ཟིན་པའི་ཉ་དེ་འཆོང་མི་སྲིད་པས་ན་སྐམ་སར་ཐོན་པ་དང་འདྲ་ཡང་། ལུས་དངོས་ཆུ་ནང་ནས་ད་དུང་མ་ཐོན་པ་ལྟར། རྣམ་སྨིན་རིག་འཛིན་དེ་ཡང་འཕགས་པའི་ཡེ་ཤེས་སྒྲིབ་པ་དང་བྲལ་བ་མངོན་དུ་མཐོང་བས་ན་མཐོང་ལམ་པར་ཡང་སྨོས་ཏེ། ཟག་མེད་ཀྱི་ས་ནོན་པ་དང་འདྲ་ཡང་ལུས་ཀྱི་ཟག་པ་དང་ད་དུང་མ་བྲལ་བར་རྣམ་སྨིན་གྱི་ལུས་དེའི་སྦུབས་ནས་སེམས་ལྷའི་སྐུར་སྨིན་པས་ན་སྦྱོར་ལམ་ཟག་བཅས་ཙམ་གྱིས་ཀྱང་འགལ་བ་མ་ཡིན་ནོ། དོན་ལ་ནི་ཚུ་རི་ལ་ལྟོས་ནས་ཕ་རི། ཕ་རི་ལ་ལྟོས་ནས་ཚུ་རི་ཞེས་བརྗོད་པ་ལྟར། གང་ལའང་རེག་པའི་ས་མཚམས་སུ་ཤེས་པར་བྱའོ། གང་ལྟར་ཡང་རྣམ་སྨིན་དང་ཚེ་དབང་གཉིས་ཀ་རྒྱུའི་ཐེག་པའི་ས་མཚམས་དང་སྦྱར་བའི་ཚེ་ས་དང་པོ་རབ་ཏུ་དགའ་བ་ཐོབ་པའི་བྱང་ཆུབ་སེམས་དཔའ་དང་སྐལ་བ་མཉམ་པར་བཞེད་དོ། །སྒོམ་ལམ་པ་ནི་ཡེ་ཤེས་སྒྱུ་མའི་སྐུ་ཅན་ཕྱག་ཆེན་རིག་འཛིན་ཡིན་ཏེ། རྒྱུད་ལས། སྒྲུབ་པས་སྒོམ་པའི་ལམ་ལ་འབད། །ལྷ་སྐུ་འཇའ་ཚོན་ཕྱག་རྒྱ་ཆེ། །ཞེས་པ་ལྟར་སྒོམ་ལམ་ས་དགུ་བོ་ཕྱག་ཆེན་རིག་འཛིན་གྱིས་བགྲོད་པ་ཡིན་ཏེ། དེ་ལའང་ནང་གསེས་སུ་དབྱེ་ན་ས་གཉིས་པ་ནས་ལྔ་པའི་བར་ལ་རྡོ་རྗེའི་རིག་འཛིན་དང་། དྲུག་པ་དང་བདུན་པ་གཉིས་ལ་འཁོར་ལོའི་རིག་འཛིན་དང་། བརྒྱད་པ་རིན་པོ་ཆེའི་རིག་འཛིན། དགུ་པ་པདྨའི་རིག་འཛིན་དང་། བཅུ་པ་རལ་གྲིའི་རིག་འཛིན་ཞེས་བྱ་སྟེ། ལམ་རིམ་ལས། ལོངས་སྤྱོད་གཉིས་པ་ཕྱག་རྒྱའི་རིག །རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིག་འཛིན་འགྱུར། ཞེས་སོ། །མཐར་ལམ་ས་ནི་སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་ལུགས་འཛིན་པ་ལྷུན་གྲུབ་རིག་འཛིན་ཏེ། ལམ་རིམ་ལས། སྔ་མའི་རིགས་ལ་མཐུ་རྫོགས་པས། བཤད་པ་བཞིན་དུ་དྲི་མ་སྦྱངས། སངས་རྒྱས་ས་ཡི་ཤེས་རབ་གསུམ། ལྷུན་གྱིས་གྲུབ་པའི་རིགས་སུ་འགྱུར། ཞེས་སངས་རྒྱས་ཀྱི་ཆེ་བའི་ཡོན་ཏན་ཕལ་ཆེར་ལ་རང་དབང་བསྒྱུར་ནུས་པར་གསུངས་སོ། །གཞན་དུ་ལམ་ཆུང་ལས། དེ་ཡང་དང་པོ་དང་པོ་དང་། །སྐལ་མཉམ་གཉིས་པའི་རིགས་མཆོག་དེ། །བརྒྱད་པའི་སེམས་དཔར་སྐལ་བ་མཉམ། །གསུམ་པ་བཅུ་དང་སྐལ་མཉམ་མོད། །དགོངས་སྤྱོད་རྒྱ་མཚོའི་ཁྱད་པར་འཕགས། ཞེས་ཚེ་དབང་རིག་འཛིན་དང་ས་དང་པོ། ཕྱག་ཆེན་དང་ས་བརྒྱད་པ། ལྷུན་གྲུབ་དང་ས་བཅུ་པ་མཉམ་གསུངས་ཀྱང་། དགོངས་སྤྱོད་བསམ་གྱིས་མི་ཁྱབ་པས་འཕགས་སོ་ཞེས་པས་སྔ་མ་དང་ཕྱོགས་མཐུན་པར་བསྟན་ཏོ། །ཚུལ་ཇི་ལྟར་བྱས་ཀྱང་ལམ་གྱི་འགྲོས་འདྲ་མཚུངས་སུ་སྦྱར་བ་ལས་དེ་དང་དེ་ཇི་བཞིན་གཅིག་པ་ནི་མ་ཡིན་ལ། ལྷུན་གྲུབ་རིག་འཛིན་ཡང་རྒྱུའི་ཐེག་པའི་ཀུན་ཏུ་འོད་བཏགས་པ་བ་དེ་དང་དོན་གཅིག་པ་ཡིན་ཏེ། བསམ་གཏན་མིག་སྒྲོན་གྱི་རང་འགྲེལ་ལས། ཀུན་ཏུ་འོད་བསྟི་གནས་ཀྱི་སའོ། །དེ་ནི་འདིར་ལྷུན་གྱིས་གྲུབ་པའི་རིག་འཛིན་དངོས་སོ། །ཞེས་གསུངས་པའོ། །ད་ནི་ལམ་གྱི་བགྲོད་ཚུལ་བརྗོད་པར་བྱ་སྟེ། དེ་ཡང་རྣམ་སྨིན་རིག་འཛིན་གྱི་དངོས་འབྲས་རྒྱ་ཆེན་དུ་ངེས་པའི་ཕྱིར། །མཐོང་ལམ་གཉིས་པོ་ལམ་མཐར་ཆགས་ཀྱི་སྐབས་སུའང་རིམ་པར་བགྲོད་པར་མི་སྲིད་ཅིང་། རྣམ་སྨིན་ནས་ཐོད་རྒལ་དུ་བགྲོད་པ་ཡང་མི་འབྱུང་ངོ་། །གཞན་དུ་ཅིག་ཅར་པའི་རིགས་མ་ཡིན་པའི་ལམ་པ་བློ་ཆེ་བ་འགའ་ཞིག་ཕྱག་རྒྱ་གཅིག་སྤྲོས་གཉིས་ནས་སྦྱོར་མཐོང་དང་། ཚེ་དབང་ནས་ལྷུན་གྲུབ་རིག་འཛིན། ཚེ་དབང་དང་རྒྱ་ཆེན་གཉིས་ཀ་ནས་སངས་རྒྱས་ཀྱི་སར་ལམ་གཞན་བར་ནས་བོར་ཏེ་ཐོད་རྒལ་དུ་སྦྱོར་བ་སྲིད་པ་ཡིན་ཏེ། དེ་དག་ལ་ངང་གི་བློ་ཆེ་བ་དང་། ཟུང་འཇུག་གི་ལམ་སྒོམ་པ་དང་། ལམ་གཞན་བར་ནས་བོར་དུ་ཡོད་པ་སྟེ་ཐོད་རྒལ་འབྱུང་བའི་ཆོས་གསུམ་པོ་ཚང་བའི་ཕྱིར་རོ། །དེ་ལྟར་ན་ཚོགས་སྒྲུབ་ནས་ཀྱང་ཐོད་རྒལ་འབྱུང་བ་སྲིད་དམ་སྙམ་ན། མ་ཡིན་ཏེ། ལམ་རིམ་ལས། ལམ་མཆོག་དབྱེ་ས་གཅིག་ཡིན་ནོ། །ཞེས་ཟག་མེད་ལམ་གྱི་དབྱེ་ས་དང་ཟག་བཅས་ཀྱི་འདུས་མཐོང་ལམ་ཡིན་པར་གསུངས་པའི་ཕྱིར་རོ། དེ་ལྟར་ཐབས་ཀྱིས་ངེས་པའི་ལམ་དང་། ཤེས་རབ་རྣམ་པར་གྲོལ་པའི་ལམ་གཉིས་ཀའི་ངོ་བོ་ནི། རིམ་གསུམ་ལས། ངོ་བོ་ཤེས་རབ་རྣམ་གསུམ་གྱིས། །སེམས་ལྔ་སྐྱེས་པར་བསྟན་པ་ཡིན། ཞེས་སྐྱེས་བྱེད་ཐོས་བསམ་སྒོམ་པའི་ཤེས་རབ་གསུམ་གྱིས་བསྐྱེད་བྱ་ཐུན་མོང་དང་མཆོག་གི་སེམས་ལྔ་སྐྱེས་སམ་སྐྱེས་པའོ། །དེ་ཡང་སྤྱིར་གང་ཟག་ལ་རང་བཞིན་གྱིས་དབང་པོ་རྣོན་པོ་དང་སྦྱངས་པའི་དབང་པོ་རྣོན་པོ་གཉིས་སུ་ཡོད་པ་ལས། ཐུན་མོང་གི་སེམས་ལྔ་ནི། སྦྱངས་པའི་དབང་པོ་རྣོན་པོ་ལ། ལམ་ལ་ཞུགས་ཟིན་ནས་སྐྱེ་བ་ཡིན་པས་གོ་སླ་ལ། མཆོག་གི་སེམས་ལྔ་ལའང་གཉིས་ལས། ཐབས་ལམ་གྱི་སེམས་ལྔ་ནི། རྩ་གནས་ནས་ཐིག་ལེ་གཡོ་བ་སོགས་དང་སྦྱར་ཏེ། གཡོ་ལྡང་བྱང་ཆུབ་ཀྱི་སེམས་དང་། འཇིག་འཇུག་བྱང་ཆུབ་ཀྱི་སེམས། །གནས་པ་བྱང་ཆུབ་ཀྱི་སེམས། སྨོན་པ་བྱང་ཆུབ་ཀྱི་སེམས། འགྲོ་འོང་བྱང་ཆུབ་ཀྱི་སེམས་དང་གང་ཡང་ཅུང་ཟད་མི་འདྲ་བ་ཡིན་ཡང་འདིར་མི་སྤྲོའོ། གཉིས་པ་ལ་གྲོལ་ལམ་གྱི་ངོ་བོ་སེམས་ལྔ་ནི། ཐེག་པ་དམན་པའི་ཞེ་འདོད་ལས་གྲོལ་ཏེ་གསང་སྔགས་ལ་དད་པ་སོགས་གཡོ་བའི་འགོ་ལྡང་པ་ནི་གཡོ་ལྡང་བྱང་ཆུབ་ཀྱི་སེམས་དང་། དེའི་ལྟ་བ་ལྷག་པའི་བདེན་པ་དབྱེར་མེད་ཀྱི་དོན་ཁོང་དུ་ཆུད་པར་སྨོན་པ་ནི་སྨོན་པ་བྱང་ཆུབ་ཀྱི་སེམས་དང་། དབྱེར་མེད་ཀྱི་དོན་ལ་འཇུག་པ་ནི་འཇུག་པ་བྱང་ཆུབ་ཀྱི་སེམས་དང་། ཞུགས་ནས་དེ་ལ་གནས་པ་ནི་གནས་པ་བྱང་ཆུབ་ཀྱི་སེམས་དང་། གནས་པས་ལམ་ལྔ་མཐར་ཕྱིན་པ་ནི། མཐར་ཕྱིན་པ་བྱང་ཆུབ་ཀྱི་སེམས་སྟེ་ལྔའོ། །གཞན་ཡང་ལམ་རིམ་ལས། ཀུན་ཀྱང་སྨིན་ཟིན་བགྲོད་པ་མེད། །དེ་ཉིད་ལམ་གྱི་ངོ་བོ་སྟེ། ཞེས་བགྲོད་བྱའི་ངོས་ནས་ལམ་གྱི་ངོ་བོའི་རྣམ་བཞག་སོགས་མང་དུ་གསུངས་ནའང་། པཎ་ཆེན་བི་མ་མི་ཏྲས་ནི་ཁོག་གཞུང་གསལ་སྒྲོན་སོགས་གཞུང་དུ་མ་ཞལ་མཐུན་པར་། གང་ཟག་རིམ་ཅིག་ཅར་སུས་ཀྱང་ལམ་གྱི་ངོ་བོ་གོང་དུ་སྨོས་པའི་སེམས་གསུངས་པས་ན་འདིར་ཡང་དེ་ལྟར་རོ། །འོ་ན་ཅིག་ཅར་བ་ལ་སེམས་ལྔ་རིམ་གྱིས་སམ་ཅིག་ཅར་དུ་སྐྱེ། སྔ་མ་ལྟར་ན་ཅིག་ཅར་བ་ཡིན་པ་དང་ཡང་འགལ་ལ། ཕྱི་མ་ལྟར་ན། གཡོ་ལྡང་སྐྱེས་པའི་ཚེ། མཐར་ཕྱིན་བྱང་སེམས་སྐྱེའམ་མི་སྐྱེ། སྐྱེས་ན་བར་གྱི་སེམས་གསུམ་ཆད་པར་འགྱུར་ལ། མི་སྐྱེ་ན་རིམ་གྱིས་དང་ཁྱད་མེད་པར་ཐལ་ལོ་ཞེ་ན། གང་ལྟར་ཡང་མི་འགལ་ཏེ། རིམ་གྱིས་སྐྱེས་ནའང་མྱུར་བུར་ཡོད་པ་ཡིན་ཏེ། དཔེར་ན་གཅིག་ཅར་པས་ནི་ཤོ་མང་ལྔ་བརྩེགས་ཁབ་ཀྱིས་མྱུར་པོར་འབུགས་པ་ལྟ་བུ་དང་། རིམ་གྱིས་པས་ནི་ཤིང་ལེབ་ལྔ་བརྩེགས་གསོར་གྱིས་འབུབས་པ་ལྟར་བུལ་བས་ན་དེར་ཐལ་བའི་སྐྱོན་ཡང་མེད་ལ། ཅིག་ཅར་དུ་སྐྱེས་ནའང་སེམས་ལྔ་ག་དབྱེར་མེད་ཅིག་ཆོད་དུ་སྐྱེ་བས་ན་ཆད་པའི་སྐྱོན་ཡང་མེད་དེ། སྒྱུ་འཕྲུལ་བྱེ་བྲག་བསྟན་པ་ལས། ལྷུན་གྱིས་རྟོག་ནས་ལྷུན་གྱིས་སྒོམ། །རིམ་བྲལ་དེ་ཉིད་གསལ་འགྱུར་འབྲེལ། ཞེས་གསུངས་པ་ལྟར་རོ། །འོན་ཀྱང་གཉིས་ཀ་ཡིན་ཏེ། ཅིག་ཅར་པ་ལའང་ཁྱད་ཡོད་པ་གང་དུ་སྨོས་པ་བཞིན་ངེས་པའི་ཕྱིར་རོ། དེ་ལྟ་བུའི་ལམ་གང་ཞིག་ཐོབ་བྱ་འབྲས་རྒྱུད་ཉིད་མངོན་དུ་བྱེད་པའི་རྐྱེན་དང་། གང་གིས་གང་དུ་བགྲོད་པའི་རྟེན་གྱི་མཚན་ཉིད་དང་ལྡན་པས་ན་ཐབས་སམ་ལམ་གྱི་རྒྱུད་ཅེས་པའི་ངེས་ཚིགས་ཀྱང་དེ་ཡིན་ཏེ། ༼མ་དཔེ་མི་གསལ༽ བགྲོད་པས་བདེ་ཆོས་ལྡན་པ་དང་། ཞེས་སོ། །དེ་ལ་ཡང་བཤད་རྒྱུད་རྒྱ་མཚོ་དང་རང་གཞུང་ལེའུ་བདུན་པའི་རྗེས་སུ་འབྲང་ནས་འདིར་ཆགས་པ་ཆེ་ཆུང་གི་སྒོ་ནས་ལམ་ཐབས་གྲོལ་གཉིས་སུ་དབྱེ་བ་ཡིན་ཡང་། གཞན་དུ་བློ་ཆེ་ཆུང་གི་སྒོ་ནས་ཅིག་ཅར་དང་རིམ་གྱིས་སུ་དབྱེ་བ་དང་། མཚན་མ་ཆེ་ཆུང་གིས་ལྷ་དང་རྟོགས་པར་དབྱེ་བ་དང་། གདུལ་བྱ་དྲག་ཞན་གྱིས་ཁྲོ་བོ་དང་ཞི་བར་དབྱེ་བ་དང་། རིམ་པ་འདོར་མིན་གྱིས་ཐོད་རྒལ་དང་མཐར་ཆགས་སུ་དབྱེ་བ་སོགས་མང་དུ་སྣང་ཞིང་། ཁྱད་པར་ཀུན་གཟིགས་རོང་ཟོམ་པཎ་ཆེན་དང་། ཀུན་མཁྱེན་ཆོས་ཀྱི་རྒྱལ་པོས་ནི་རྫོགས་པ་ཆེན་པོ་ལྟར་བཀྲལ་བ་ལ། མཁན་ཆེན་རིན་པོ་ཆེས་ནི། རྫོགས་ཆེན་ནས་བློས་བྱས་ཀྱི་བསྐྱེད་རྫོགས་གོལ་སར་གསུངས་ཤིང་འདིར་དེ་ཉིད་གཙོ་ཆེར་བསྟན་པས་ན་འཐད་པ་མ་ཡིན་ནོ་གསུངས་ཀྱང་། དེ་དག་ཀུན་འགལ་བ་མ་ཡིན་ཏེ། སྔ་མ་རྣམས་ནི་གཅིག་གི་ཁོང་དུ་གཅིག་ཞོར་གྱིས་ཚངས་པ་དང་། རྫོགས་ཆེན་དུ་བཀྲལ་བ་ཡང་རྫོགས་ཆེན་ཁོ་ནར་ངེས་པར་གསུངས་པ་ཡང་མ་ཡིན་ལ། འོན་ཀྱང་མ་ཡིན་པ་ཡིན་པར་བཀྲལ་བ་མདོ་སྡེ་སྔགས་སུ་འགྲེལ་བ་ལྟ་བུ་ཡང་མ་ཡིན་པའི་ཚུལ། གོང་དུ་ཐེག་པ་ཀུན་གྱི་འཕྲོ་གཞིར་ངོས་བཟུང་པས་ཀྱང་གོ་ལ། འོག་ཏུ་རྒྱུད་སྡེའི་རྣམ་གྲངས་དབྱེ་བའི་སྐབས་སུ་ཡང་འཆད་པར་འགྱུར་རོ། །དེ་བས་ན་མདོ་རྒྱུད་གང་ཡང་འདི་ཉིད་ཀྱིས་ཕར་འགྲེལ་ནས་གཏན་ལ་ཕབས་ཀྱང་རུང་ལ། འདི་ཉིད་དེ་དག་གིས་འགྲེལ་ཡང་རུང་བས་ན་ཁོ་བོ་ཅག་ཀྱང་ལུང་ཐ་དད་པ་ཀུན་ནས་བཏུས་པའི་གནད་ཀྱང་དེ་ཡིན་ནོ། །དེས་ལམ་དངོས་བཤད་པ་དེ་སོངས་ནས། གཉིས་པ་ལམ་གྱི་ཆ་རྐྱེན་རྒྱུད་ཀྱི་དངོས་པོ་སོ་སོར་དབྱེ་ནས་བཤད་པ་ལ་ཡང་བཞེད་ཚུལ་མང་དུ་ཡོད་དེ། ཀུན་གཟིགས་རོང་པ་ནི། འདི་སྐད་དུ། རྒྱུད་ཐམས་ཅད་ཀྱི་བསྟན་པར་བྱ་བའི་དངོས་པོ་མདོར་བསྡུ་ན་རྣམ་པ་དགུ་ཡིན་ཏེ། འདི་ལྟར་དཀྱིལ་འཁོར་དང་། དམ་ཚིག་དང་། སྒྲུབ་པ་དང་། དབང་དང་། འཕྲིན་ལས་ཏེ། གཞི་རྣམ་པ་ལྔ། སྔགས་དང་། ཕྱག་རྒྱ་དང་། ཏིང་འཛིན་དང་། མཆོད་པ་སྟེ། དེ་ལྟར་ཡན་ལག་བཞིའོ། །ཞེས་རྒྱུད་ཀྱི་དངོས་པོ་དགུར་བཞེད་པ་དང་། ཀུན་མཁྱེན་ཆེན་པོས་ནི་དམིགས་ཀྱིས་མ་གསལ་ཡང་ཚུལ་འདི་དང་དགོངས་པ་གཅིག་པ་ཡིན་ལ། གཞན་དུ་འཇམ་དཔལ་སྒྱུ་དྲྭའི་བཤད་རྒྱུད་རིན་པོ་ཆེའི་ཕྲེང་བ་ལས། ལྟ་བ་དཀྱིལ་འཁོར་དབང་དམ་དང་། །སྒྲུབ་པ་འཕྲིན་ལས་སྔགས་ཕྱག་རྒྱ། ཏིང་འཛིན་མཆོད་དང་རྣམ་བཅུ་ཡིས། །གསང་སྔགས་རྒྱུད་ཀྱི་དབྱེ་བ་བསྟན། ཞེས་སྔགས་དང་ཕྱག་རྒྱ་སོ་སོར་དབྱེ་བའི་དངོས་པོ་བཅུར་གསུངས་པ་སོགས་མང་ཡང་། འདིར་ས་ཁུང་ཞིབ་མོར་རྟོགས་པའི་ཕྱིར་། ཇི་སྐད་དུ། ལྟ་བ་སྤྱོད་པ་དཀྱིལ་འཁོར་དབང་། །དམ་ཚིག་འཕྲིན་ལས་སྒྲུབ་པ་དང་། །ཏིང་འཛིན་མཆོད་པ་སྔགས་ཕྱག་རྒྱ། །ཕྱི་མ་གཉིས་བསྡོམ་བཅུ་རུ་འགྱུར་། ཞེས་པ་ལྟར་བཅུར་དབྱེ་བ་ལས། དང་པོ་དེ་ཁོ་ན་ཉིད་ལྟ་བ་ལ་ཡང་། དགོས་ཆེད། སྒྲ་དོན། ངོ་བོ། རྣམ་གྲངས། མ་རྟོགས་པའི་སྐྱོན། རྟོགས་པའི་ཡོན་ཏན་ཏེ་དྲུག་སྟེ་དབྱེ་བ་ཉིད་དངོས་པོ་འོག་མ་རྣམས་ལའང་སྦྱོར་བའི་སྲོལ་དང་། གཞན་དུ་འཇམ་དཔལ་བཤད་རྒྱུད་ལས། ལྟ་བའི་དོན་ལ་རྣམ་བཅུ་སྟེ། ཞེས་སོགས་གསུངས་པ་ལྟར་དབྱེ་ལུགས་མང་དུ་སྣང་ནའང་། འདིར་བསྡུས་པའི་དབང་དུ་བྱས་ཏེ་གསུམ་རེར་དབྱེ་བ་ལས། དང་པོ་ལྟ་བའི་ངོ་བོ་ནི། ལམ་རིམ་ལས། ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལས། །ཀུན་རྫོབ་ཏུ་ནི་མཉམ་རྗོགས་སོ། །ཞེས་ཐབས་ཀྱི་ཐེག་པ་སྟེ་གསང་སྔགས་རྣལ་འབྱོར་ཆེན་པོའི་ལྟ་བ་ནི། ཐུན་མོང་ཐེག་པའི་མཐར་ཐུག་བླ་ན་མེད་པའི་ཟབ་མོ་དབུ་མའི་ལྟ་བ་ལས་ཀྱང་བདེན་པ་གཉིས་ཀའི་ཕྱོགས་ནས་ལྷག་པར་འཕགས་པས་ན་ལྷག་པའི་བདེན་པ་ཞེས་པའི་སྒྲ་ཞུགས་པ་ཡིན་ཏེ། དེ་ཡང་དེ་ལྟར་ན། རྒྱུའི་ཐེག་ཆེན་གྱིས་དོན་དམ་པ་ཡང་སྤྲོས་པའི་མཐའ་ཐམས་ཅད་དང་བྲལ་པའི་མཚན་མ་ཉེ་བར་ཞི་བ་ཙམ་དུ་འདོད་ཀྱང་། སྐུ་གསུང་ཐུགས་ཡོན་ཏན་འཕྲིན་ལས་དབྱིངས་དང་ཡེ་ཤེས་ཏེ་དཀོར་བདུན་ངོ་བོ་ཉིད་དུ་མ་འགགས་པར་ལྷུན་གྱིས་གྲུབ་པའི་ཚུལ་ལ་རྨོངས་པར་གྱུར་ནས་མ་རྟོགས་པ་དང་། ཀུན་རྫོབ་ཀྱང་བདེན་པར་མ་གྲུབ་པ་སྒྱུ་མ་དང་རྨི་ལམ་ལྟར་འཁྲུལ་སྣང་ཙམ་དུ་འདོད་ཀྱང་། སྣོད་བཅུད་དག་མཉམ་ཆེན་པོ་རྒྱལ་བའི་དཀྱིལ་འཁོར་ཉིད་དུ་མ་རྟོགས་པས་འབྲས་བུ་ཕྱི་དུས་ལ་རེ་ཞིང་། གནས་སྐབས་སུ་ཡང་བདེན་གཉིས་བཟང་ངན་རེས་འཇོག་ཅན་དུ་བལྟ་བས་ཟུང་འཇུག་གི་དོན་དང་རིང་པར་གྱུར་པ་ཉིད། འདིར་དེ་དང་དེར་རྟོགས་པར་མ་ཟད་བདེན་པ་གཉིས་པོ་གནས་ལུགས་དེ་བཞིན་ཉིད་དུའང་མཉམ་ལ། སྣང་ལུགས་སྐུ་དང་ཡེ་ཤེས་སུའང་མཉམ་ཞིང་། དེ་ཡང་དབྱེར་མེད་ཟུང་འཇུག་ཆེན་པོ་བློས་སྤྱོད་ཡུལ་ལས་འདས་པར་རྟོགས་པས་ན་ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བ་ཞེས་ཐ་སྙད་ཙམ་དུ་བཏགས་པ་ན། ད་ལྟ་ནས་འབྲས་བུ་ལམ་དུ་བྱེད་པས་ན་འབྲས་བུའི་ཐེག་པ་སྟེ་གསང་ཆེན་རྡོ་རྗེ་ཐེག་པའི་ལྟ་བའི་ངོ་བོའོ། གཉིས་པ་ངེས་ཚིག་ནི། ཌྀཥྚའི་སྒྲ་ལས་ལྟ་བ་སྟེ། ཆོས་ཐམས་ཅད་ཀྱི་གནས་ལུགས་ཇི་བཞིན་པ་ཉིད་མ་འཁྲུལ་པར་གཏན་ལ་འབེབ་པར་བྱེད་པའི་ཤེས་རབ་ཁྱད་པར་ཅན་གང་ཡིན་པ་དེ་ལ་ཟེར་ཡང་། ལྟ་བྱ་བལྟ་བྱེད་སོ་སོ་བས་གཏན་ལ་ཕབས་པ་ནི་མ་ཡིན་ཏེ། ཆོས་ཉིད་རང་དང་གཉིས་སུ་མེད་པའི་ཡེ་ཤེས་ཀྱིས། །གང་བསམ་གྱིས་མི་ཁྱབ་པའི་རང་བཞིན་བློ་འདས་ཆེན་པོར་རྟོགས་པ་ལ་ལྟ་བ་ཞེས་ཚིགས་ཙམ་དུ་བཏགས་པ་ཉིད་དེ། རྒྱས་པ་ལས། ལྟ་དང་ལྟ་བ་བྱར་མེད་དུ། །ཞེས་སོ། གསུམ་པ་དབྱེ་བ་ལ་ཡང་། ལམ་རིམ་ལས། །མཉམ་ཉིད་ངང་ལས་མི་སྐྲག་པའི། །མངོན་བྱས་ངེས་པའི་ཤེས་རབ་དང་། །རྣམ་པ་ཀུན་ལྡན་སྟོང་ཆེན་མཐོང་། །རང་རིག་ཡེ་ཤེས་སྙིང་རྗེས་གཟིགས། །ཕྱག་རྒྱ་གཅིག་སྐུ་འབྲས་བུར་བལྟ། །ཐམས་ཅད་གསལ་པའི་ལྟ་བ་དང་། །བར་ཆད་མེད་པའི་ཚོགས་ཆེན་མཐོང་། །དབང་བསྒྱུར་མཉམ་ཉིད་མི་གཡོ་བ། །ཡེ་ཤེས་ཀུན་མཁྱེན་ལྟ་བ་དགུ། །ཞེས་ཟག་བཅས་ཟག་མེད་དང་བཅས་པའི་ལམ་ཡོངས་སུ་རྫོགས་པ་ལ་ཁྱབ་པའི་ལྟ་བ་སྟེ། ཉམས་སུ་ལེན་བྱེད་ལམ་གྱི་རིམ་པའི་ལྟ་གྲངས་དགུ་དང་། རྒྱས་པ་ལས། དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་ལྟ་བ་དམ་ཚིག་ཡིན། །ཞེས་པ་ལ་སོགས་གསུངས་པ་ལྟར། རྒྱུད་ཀྱི་དངོས་པོ་ལྷག་མ་དགུ་པོ་ལ་ཡང་ཁྱབ་བྱེད་ལྟ་བས་ཁྱབ་པའི་ཕྱིར། དེ་དག་དང་རྗེས་སུ་མཐུན་པའི་བླང་བྱ་རྒྱུད་དོན་གྱི་ལྟ་གྲངས་དགུ་སྟེ་དོན་གྱི་ལྟ་གྲངས་བཅོ་བརྒྱད་དང་། མིང་གི་རྣམ་གྲངས་ཤེས་རབ་ཀྱི་ཚོགས་བརྒྱད་ལ་སོགས་པར་གསུངས་ཀྱང་། འདིར་གང་ཟག་དབང་པོ་རབ་འབྲིང་ཐ་མའི་རྟོགས་ཚུལ་གྱི་ལྡོག་པས་དབྱེ་བ་གསུམ་ལས། དང་པོ་དབང་པོ་རབ་ལ་གཏན་ཚིགས་ཀྱིས་རྟོགས་པར་བྱ་བ་ལ་ཡང་། ལམ་རིམ་ལས། དེ་ཉིད་དངོས་ལྔ་ཚུལ་དང་ཚིག །ཅེས་སྔོན་བྱུང་དངོས་ལྔའི་གཏན་ཚིགས། རྗེས་འཇུག་ཚུལ་ལྔ་དང་། ཚིགས་ལྔའི་གཏན་ཚིགས་ཏེ། ལྔ་ཚན་གསུམ་ལས་དང་པོ་ནི་དེ་ཉིད་ལས། །ཡང་དག་རྫོགས་སངས་རྒྱས་སྟོན་པ། །སྐུ་ལྔས་འདུལ་བའི་འཁོར་རྣམས་ལ། །གསུངས་ལྔས་བསྟན་པས་དེ་ཁོ་ན། །གཏན་ལ་འབེབས་ཤིང་འཇལ་བྱེད་པའོ། །ཞེས་སོ། །ཚུལ་འདི་ཀ་ལ་དཔྱད་པས་ཀྱང་དགོངས་བརྒྱུད་ཀྱི་དུས་སུ་སྒྲ་ཚིག་ཡོད་མེད་ཀྱི་རྩོད་པ་ཡང་ཉེ་བར་ཞི་ནུས་པ་ཡིན་ནོ། །གཉིས་པ་ནི། དེ་དང་ཚུལ་མཐུན་པ་སྟེ་སྔ་མ་ལས། བརྗོད་དང་འདྲ་བའི་བརྡ་སྤྲོད་པས། །ངོ་བོ་ཉིད་ཀྱིས་བཤད་པའི་ཕྱིར། །མ་འོངས་དོན་དུ་གཏན་ཚིགས་ངེས། ཞེས་སོ། །གསུམ་པ་ནི། ཡང་དེ་ཉིད་ལས། ངོ་བོ་སྣང་ཚིག་རང་སྣང་ཚིག །ལྡེམ་དགོངས་ཚིག་དང་བཀྲི་གྲངས་ཚིག །འདོད་ཅན་ཚིག་དང་རྡོ་རྗེའི་ཚིག །རང་རིག་མངོན་གསལ་ཚིག་གིས་མཚོན། །ཞེས་སོ། དེ་དག་ཀྱང་བསྡུ་ན་དཔྱད་དུ་ཡོད་མེད། གཉིས་སུ་འདུ་བ་ཡིན་ཏེ། སྔ་མ་ལས། དེ་ལྟར་མོད་ཀྱང་བསྡུ་ན་གཉིས། །བཞི་རྗེས་མི་སྤྱོད་གཅིག་རྗེས་སྤྱོད། །ཅེས་དཔྱད་པ་ལ་མ་ལྟོས་པར་དོན་གོ་བ་སྐུ་བཞིའི་གཏན་ཚིགས་ཏེ། དེའི་རྗེས་སུ་སྤྱོད་ནུས་པ་མ་ཡིན་པས། འདིར་བཏགས་དཔྱད་ལ་བརྟེན་ནས་དོན་གོ་བ་སྤྲུལ་སྐུའི་གཏན་ཚིགས་ཏེ། དེའི་རྗེས་སུ་སྤྱོད་པར་བྱའོ། །དེ་ལའང་ཚད་མ་བཀའ་གཞུང་གི་གཏན་ཚིགས་དང་སྒྲ་མཐུན་དོན་དཔག་གི་གཏན་ཚིགས་གཉིས་ལས། དང་པོ་ལའང་། རྟོགས་པ་བཞིའི་གཏན་ཚིགས། དག་པ་གསུམ་གྱི་གཏན་ཚིགས། མཉམ་པ་བཞི་ཡི་གཏན་ཚིགས། བདག་ཉིད་ཆེན་པོའི་གཏན་ཚིགས་སྟེ་བཞིར་དབྱེ་བ་ལས། དེ་དག་དེས་གཞལ་བྱ་གང་ཞིག་ཅི་ལྟར་འཇལ་བའི་ཚུལ་སོ་སོའི་གྲུབ་དོན་དང་བཅས་པ་ནི་གཞུང་དོན་གྱི་སྐབས་སུ་རང་ཐད་རང་ཐད་ནས་སྟོན་པ་ལས། འདིར་སྤྱི་དོན་གྱི་སྐབས་ཡིན་པ་དང་ཡི་གེ་མང་དུ་དོགས་ནས་མི་སྤྲོའོ། །གཉིས་པ་ནི། ཐུན་མོང་ཐེག་པའི་དུག་ལྔ་སྤོང་སྦྱོང་བྱེད་པ་དང་། འདིར་རང་བཞིན་མ་གྲུབ་པར་བལྟ་བ་གཉིས་ཉོན་མོངས་རང་རྒྱུད་པ་སྤང་བའི་ཕྱོགས་ནས་བཟའ་ཤིང་གི་ར་བར་དུག་སྡོང་སྐྱེས་པའི་དཔེས་མཚོན་པས་སྒྲ་མཐུན་པ་ཡིན་ཡང་དོན་གྱི་ཁྱད་པར་དཀའ་ཚེགས་ལ་མ་ལྟོས་པ་དང་། ཡེ་ཤེས་སུ་འགྱུར་བ་སོགས་བསམ་གྱིས་མི་ཁྱབ་པས་དཔག་ལ། དེ་ཡང་རང་བཞིན་མ་གྲུབ་པའི་ཚུལ་ནི་ཉོན་མོངས་རང་ཐད་ནས་གཏན་ཚིགས་ཀྱིས་གཞལ་བས་ཤེས་པ་དང་། གཉིས་པ་དབང་འབྲིང་ལ་རང་བཞིན་དང་འབྲས་བུའི་རྟགས་ལ་བརྟེན་ནས་རྟོགས་པར་བྱ་བ་ལའང་གཉིས་ལས། དང་པོ་རང་བཞིན་གྱི་རྟགས་ནི། འདི་ལྟར་མ་དག་པའི་འཇིག་རྟེན་འདི་ཡང་ཡེ་ནས་རིག་པ་ཡེ་ཤེས་ལྔའི་ཆོ་འཕྲུལ་ཡིན་ཏེ། དེའི་རྟགས་སུས་ཀྱང་མ་བྱས་པར། ཡུལ་ལྔ། འབྱུང་བ་ལྔ། ཁ་དོག་ལྔ་སོགས་རང་བཞིན་གྱིས་ཡོད་པ་ལྟ་བུའོ། །གཉིས་པ་འབྲས་བུའི་རྟགས་ནི། སེམས་ཉིད་ལ་འབྲས་བུ་སྐུ་དང་ཡེ་ཤེས་རང་ཆས་སུ་བཞུགས་པའི་མཚོན་བྱེད་ཆུ་ཚོན་སོགས། དཔེའི་དཀྱིལ་འཁོར་ལ་བརྟེན་ནས་རྟོགས་པའོ། །དེ་ཡང་དཔེ་ལ་ནི་རྟགས་ཞེས་བརྗོད་པ་མ་ཡིན་ཏེ། དེ་ནི་རང་ངོ་སྤྲོད་བྱེད་ཀྱི་བརྡ་ལས་མ་འདས་མོད་ཀྱང་། དེའི་དུས་སུ་ངོ་འཕྲོད་པའི་ལྟ་བ་དེ་ལའོ། གསུམ་པ་དབང་བརྟུལ་ལ་བརྒྱུད་ནས་རྟོགས་པར་བྱ་བ་ལ་ཡང་ཉེ་རིང་གཉིས་ལས། ཉེ་བ་ནི། ཐོས་བསམ་གྱིས་མི་གོ་བའི་རིགས་འགའ་ཞིག་ལ། དང་པོ་དམིགས་པ་ཕྲ་མོ་རེ་བསྟན་ནས་སྒོམ་དུ་བཅུགས་པས་མཐར་གནས་ལུགས་རྟོགས་པར་འགྱུར་པ་དང་། རིང་བ་ནི། རེ་ཞིག་རྟོགས་པའི་སྐལ་བ་མེད་པ་རྣམས་སྒྲིབ་སྦྱངས་ལ་འབད་དུ་བཅུག་པའི་མཐུས་རྟོགས་པར་འགྱུར་བ་སྟེ་གཉིས་སོ། །གཉིས་པ་ལ་དོར་བ་སྤྱོད་པ་ལ་ཡང་གསུམ་ལས། དང་པོ་ངོ་བོ་ནི། རིམ་གསུམ་ལས། ཏིང་འཛིན་ཁྱད་པར་འགྱུར་བའི་ཕྱིར། །རྗེས་མཐུན་སྤྱོད་པ་གཞུང་བཞིན་སྤྱད། ཅེས་ལམ་པའི་གང་ཟག་གིས་ཏིང་ངེ་འཛིན་བོགས་དབྱུང་བའི་ཕྱིར་ཐབས་སྙིང་རྗེ་ཆེན་པོ་དང་། ཤེས་རབ་སྟོང་ཉིད་ཆེན་པོ་ཟུང་དུ་འཇུག་པའི་རྩིས་ཟིན་བཞིན་པར་མཉམ་བཞག་གི་སྐབས་སུ་བསྒོམ་བྱ་གང་ཡིན་པ་ལས་མི་འདའ་བར་སྤྱོད་པ་དང་། རྗེས་ཐོབ་ཏུ་འཆད་འགྱུར་སྒོམ་གསུམ་གྱི་སྤྱོད་པ་མཐའ་དག་ལ་བླང་དོར་རེ་དོགས་མེད་པར་སྤྱོད་པས་རྒྱུད་དག་པར་བྱེད་པ་ཞིག་གོ །གཉིས་པ་ངེས་ཚིག་ནི། ཙརྱའི་སྒྲ་ལས་སྤྱོད་པ་སྟེ། སྦྱོར་སྒྲོལ་ལ་སོགས་སྤྱད་བྱ་གང་ཡིན་པ་ལ་དུས་ཚོད་དང་འབྲེལ་བར་ཙུལ་བཞིན་དུ་སྤྱོད་པའོ། །གསུམ་པ་དབྱེ་བ་ལ་ཡང་སྤྱིར་དབྱེ་བ་དང་། བྱེ་བྲག་ཏུ་དབྱེ་བ་གཉིས་ལས། དང་པོ་ལ་ཡང་གསུམ་སྟེ། ལས་དང་པོའི་དུས་སུ་དྲན་ཤེས་བག་ཡོད་དང་ལྡན་པ་དགེ་སྦྱོང་གཞོན་ནུ་ལྟ་བུའི་སྤྱོད་པ་དང་། ཅུང་ཟད་བསྟན་པ་ཐོབ་ནས་མཉམ་རྗེས་བསྲེ་ནུས་ཚེ་རྟོག་པ་རྐྱེན་ཁར་མ་ཤོར་བ་སྨྱོན་པ་ལྟ་བུ་བརྟུལ་ཞུགས་ཀྱི་སྤྱོད་པ་དང་། བསྟན་པ་ཆེར་ཐོབ་ཚེ་གཞན་ཕན་ཁོ་ན་ལ་བརྩོན་པ་རྒྱལ་པོ་ས་འཛིན་ཀྱི་སྤྱོད་པ་ལྟ་བུ་སྟེ་གསུམ་མོ། །གཉིས་པ་བྱེ་བྲག་ཏུ་དབྱེ་བ་ལ་ཡང་ཐབས་གྲོལ་གྱི་སྤྱོད་པ་གཉིས་ལས། དང་པོ་ནི། ཐབས་ལམ་བརྟུལ་ཞུགས་ཀྱི་སྤྱོད་པ་ཞེས་ཐབས་ཀྱི་ལམ་གང་ལའང་ཐེ་ཚོམ་མེད་པར་འཇུག་ནུས་པ་ཞིག་གོ །གཉིས་པ་གྲོལ་ལམ་བག་ཡོད་ཀྱི་སྤྱོད་པ་ལ་ཡང་བརྒྱད་ལས། དང་པོ་རིམ་གྱིས་པའི་སྤྱོད་པ་བདུན་ནི། ལྟ་བ་གཏན་ལ་འབེབས་དུས་སུ་དད་བརྩོན་གྱིས་སྤྱོད་པ་དང་། ལམ་བསྒོམ་པ་ལ་ཞུགས་ནས་རིམ་པ་ལྟར་མཉམ་རྗེས་གཉིས་ཀར་སྟོང་ཆེན་གྱི་དུས་ཤེས་རབ་དང་མཐུན་པའི་སྤྱོད་པ་དང་། སྙིང་རྗེ་སྒྱུ་མའི་དུས་ཐབས་དང་མཐུན་པའི་སྤྱོད་པ་དང་། ཕྱག་རྒྱ་གཅིག་པའི་དུས་ཕྱོགས་གཅིག་པའི་སྤྱོད་པ་དང་། ཕྱག་རྒྱ་སྤྲོས་བཅས་དུས་སྤྲོས་པ་དང་བཅས་པའི་སྤྱོད་པ་དང་། ཚོགས་སྒྲུབ་སྐབས་ཡོ་བྱད་ལྔ་ལ་མ་ཆགས་པར་སྤྱོད་པ་ཚོགས་སྤྱད་དང་། རིག་འཛིན་བཞི་ཐོབ་པའི་དུས་རྫུ་འཕྲུལ་གྱི་སྤྱོད་པ་སྟེ་མདོར་ན་མཉམ་བཞག་ཏུ་གང་བསྒོམ་པ་ཉིད་རྗེས་ཐོབ་ཏུའང་ལམ་དུ་ཁྱེར་བའོ། །གཉིས་པ་ཅིག་ཅར་བའི་སྤྱོད་པ་ནི། ཆོས་ཐམས་ཅད་ལ་བླང་དོར་མེད་པར་མཉམ་པ་ཆེན་པོའི་ངང་དུ་གནས་པ་སྟེ། རྒྱས་པ་ལས། རྣལ་འབྱོར་སྤྱོད་པ་ཆེན་པོ་ནི། ཐམས་ཅད་ཀུན་ལ་དབྱེར་མེད་སྤྱོད། ཅེས་སོ། །གསུམ་པ་བཀོད་པ་ལ་དཀྱིལ་འཁོར་ལ་ཡང་གསུམ་ལས། ངོ་བོ་ནི། ཐུགས་ཐིག་ལས། གནས་སྐབས་བདུན་དུ་སྙིང་པོ་ལེན། བཀོད་པ་གང་རྫོགས་དེ་ངོ་བོ། ཞེས་དཀྱིལ་འཁོར་རང་རང་གི་སྐབས་དང་འབྲེལ་བའི་ལྷའི་བཀོད་པ་ཡོངས་སུ་རྫོགས་པར་སྣང་པ་ཞིག་གོ །ངེས་ཚིག་ནི་མཎྜལ་ཞེས་པའི་སྒྲ་ལས། མཎྜ་ནི་སྙིང་པོའམ་བཅུད་དང་། ལ་ནི་འཛིན་པའམ་ལེན་པ་སྟེ། སྙིང་པོའི་ཡོན་ཏན་གྱི་གཞི་འཛིན་པས་ན་སྙིང་པོ་ལེན་པ་ཞེས་དང་། ཡང་ན་སྒྲ་དེ་གཟུགས་པོ་ཟླུམ་པོའམ་བསྐོར་བའི་དོན་ལའང་འཇུག་པས་ན་གང་གཙོ་བོ་ལ་འཁོར་གྱིས་བསྐོར་བའི་ཕྱིར་དཀྱིལ་འཁོར་རོ། །དབྱེ་བ་ལ་ཡང་འགྲེལ་ཆུང་ལས། དཀྱིལ་འཁོར་རྣམ་པ་བཅུ་གཉིས་ཏེ། །དེ་བཞིན་ཉིད་དང་རང་བཞིན་དང་། །ཐུགས་རྗེ་འདུལ་བའི་དཀྱིལ་འཁོར་དང་། །ཏིང་ངེ་འཛིན་དང་གཟུགས་བརྙན་དང་། །ལྷག་པའི་ཏིང་འཛིན་གཟུགས་བརྙན་དང་། །བྱང་ཆུབ་སེམས་དང་ལྷག་བྱང་སེམས། །ཚོགས་དང་ལྷུན་གྲུབ་དཀྱིལ་འཁོར་རོ། །ཞེས་བཅུ་གཉིས་སུ་དབྱེ་བ་སོགས་མང་དུ་ཡོད་ཀྱང་། འདིར་རྒྱས་པ་ལས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་གསུམ། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། ཞེས་པ་ལྟར་བདུན་ལས། དང་པོ་རང་བཞིན་གྱི་དཀྱིལ་འཁོར་ནི། ཆོས་ཐམས་ཅད་ཀྱི་རང་བཞིན་རྣམ་པར་དག་པ་ཉིད་སྐུ་དང་ཡེ་ཤེས་ཀྱི་དཀྱིལ་འཁོར་དུ་ཡེ་ནས་ལྷུན་གྱིས་གྲུབ་པ་ལ་བརྗོད་པ་ཡིན་ཏེ། རྒྱས་པ་ལས། རང་བཞིན་དཀྱིལ་འཁོར་ཡང་དག་ནི། ཆོས་དབྱིངས་བདག་དང་དབྱེར་མེད་པས། མཉམ་པར་སྦྱོར་ཞིང་དག་པའོ། །ཞེས་སོ། །དེ་ཉིད་མངོན་དུ་གྱུར་པའི་འབྲས་བུ་སངས་རྒྱས་ལའང་རང་བཞིན་འབྲས་བུ་མཐར་ཕྱིན་པའི་དཀྱིལ་འཁོར་ཞེས་ནང་གསེས་སུ་དབྱེ་བའང་ཡོད་དོ། །གཉིས་པ་གཟུགས་བརྙན་གྱི་དཀྱིལ་འཁོར་ནི། དོན་དམ་པའི་རྩལ་ཀུན་རྫོབ་གཟུགས་བརྙན་གྱི་རྣམ་པར་ཤར་བའི་སྣོད་བཅུད་མཐའ་དག་ཞིང་དང་ལྷའི་དཀྱིལ་འཁོར་དུ་ལྷུན་གྱིས་གྲུབ་པ་ཉིད་དེ། རྒྱས་པ་ལས། ཕྱི་ནང་སྣོད་བཅུད་དག་རྣམས་ལ། སོགས་ཀྱིས་སྟོན་ནོ། །གསུམ་པ་ལྷག་པ་གཟུགས་བརྙན་གྱིས་དཀྱིལ་འཁོར་ནི། དེ་ཉིད་མངོན་དུ་སྟོན་པའི་ཕྱིར་ལས་ཀྱི་བྱ་བས་ལྷག་པར་བསྒྲུབ་པའི་དཀྱིལ་འཁོར་གསུམ་སྟེ། བཀའ་བརྒྱད་བདེ་གཤེགས་འདུས་པའི་དབང་ཆོག་དག་ལས། རབ་འབྲིང་ཐ་མར་གསུངས་པ་ཡི། མེ་ཏོག་བྲིས་སྐུ་རྡུལ་ཚོན་གསུམ། ཞེས་པ་ལྟར་འབྲུ་ཚོམ། རས་བྲིས། རྡུལ་ཚོན་གྱི་དཀྱིལ་འཁོར་སྟེ་གསུམ་གྱིས་མཚོན་པའི་སྐུ་གསུང་ཐུགས་རྟེན་དཀྱིལ་འཁོར་གྱི་རྣམ་པར་བསྒྲུབ་པ་ཐམས་ཅད་དོ། །དེ་ཡང་དགོས་པའི་དུས་ཀྱིས་དབྱེ་ན། མཆོད་པའི་དཀྱིལ་འཁོར་དང་། དབང་གི་དཀྱིལ་འཁོར་དང་། སྒྲུབ་པའི་དཀྱིལ་འཁོར་དང་། འཕྲིན་ལས་ཀྱི་དཀྱིལ་འཁོར་དང་། བསོད་ནམས་རྟེན་གྱི་དཀྱིལ་འཁོར་ཏེ་ལྔའོ། བཞི་པ་ཏིང་ངེ་འཛིན་གྱི་དཀྱིལ་འཁོར་ནི། རང་བཞིན་ཆོས་སྐུའི་དཀྱིལ་འཁོར་ཉིད་ལྷུན་གྲུབ་གཟུགས་སྐུར་ཤར་བ་གདན་གསུམ་ཚངས་པའི་དཀྱིལ་འཁོར་ཏེ། དེ་ཉིད་ཏིང་ངེ་འཛིན་གྱི་ཡུལ་དུ་བྱས་པའོ། །ལྔ་པ་ལྷག་པ་ཏིང་ངེ་འཛིན་གྱི་དཀྱིལ་འཁོར་ནི། སྔ་མ་ཉིད་བསྒོམ་པའི་བྱ་བས་ལྷག་པར་བཅོས་ནས་དཀྱིལ་འཁོར་དུ་བསྒྲུབ་པ་བསྐྱེད་རིམ་སྟེ། དེ་ལའང་སྐུ་མདོག་དང་ཕྱག་མཚན་ཞལ་ཕྱག་གི་གྲངས་ལ་སོགས་པའི་ཆེད་དུ་དམིགས་པ་ཞི་ཁྲོའི་དཀྱིལ་འཁོར་གཉིས་སོ། །དྲུག་པ་བྱང་ཆུབ་སེམས་ཀྱི་དཀྱིལ་འཁོར་ལའང་དོན་དམ་ཀུན་རྫོབ་གཉིས་ལས། དང་པོ་ནི་རང་བཞིན་གྱི་དཀྱིལ་འཁོར་དང་ཕྱོགས་མཚུངས་ལ། གཉིས་པ་ནི། བདེ་བ་ཆེན་པོའི་ཡེ་ཤེས་བསྐྱེད་བྱེད་ཀུན་རྫོབ་བྱང་ཆུབ་ཀྱི་སེམས་ཀྱི་ཐིག་ལེ་དཀར་དམར་རྣམས་དཀྱིལ་འཁོར་གྱི་རྣམ་པར་གནས་པ་ལ་ཟེར་བས་ན། དེ་བསྒོམ་པའི་ཐབས་གསང་བའི་དཀྱིལ་འཁོར་ཡང་འདིར་བསྡུའོ། བདུན་པ་ཚོམ་བུ་ཚོགས་ཀྱི་དཀྱིལ་འཁོར་ནི། རྣལ་འབྱོར་པ་ཕོ་མོ་རྣམས་ཀྱིས་འཁོར་གྱི་རྣམ་པར་འཚོགས་ནས་ཞི་ཁྲོ་སོ་སོའི་ཚོམ་བུ་གཅིག་གསུམ་ལྔ་བ་གང་རུང་གི་ཚོགས་སྒྲུབ་བྱེད་པ་དེའོ། །བཞི་པ་རིམ་པ་བགྲོད་པ་དབང་ལའང་གསུམ་ལས། ངོ་བོ་ནི་ཐུགས་ཐིག་ལས། རྒྱུ་གཉིས་རྐྱེན་བཞིར་ཡན་ལག་ལྔར། །དྲུག་ལ་དབང་བའི་ཐོབ་བྱ་དེ། །ངོ་བོ་ཉིད་ཅེས་རྣམ་པར་བཤད། ཅེས་པས། དང་པོ་རྒྱུ་གཉིས་ནི། གདོད་ནས་རང་ལ་བདེ་གཤེགས་སྙིང་པོའི་ཆོས་ཉིད་རང་ཆས་སུ་གནས་པ་མཚུངས་ལྡན་གྱི་རྒྱུ་དང་། དེ་ཉིད་བརྡ་ཐབས་ཀྱི་སྒོ་ནས་རིགས་སད་པར་བྱེད་པའི་རྟེན་འབྲེལ་གྱིས་དབང་རྗེས་རབ་གནས་དང་ལྡན་པ་རྣམས་ནི་ལྷན་གཅིག་བྱེད་པའི་རྒྱུ་སྟེ་གཉིས་སོ། རྐྱེན་བཞི་ནི་ཕན་ནུས་ཟབ་མོའི་དབང་གི་སྣོད་ལྡན་གྱི་སློབ་བུ་ནི་རྒྱུའི་རྐྱེན། དབང་གསུམ་བསྐུར་བའི་མཚན་ཉིད་དང་ལྡན་པའི་སློབ་དཔོན་ནི་བདག་པོའི་རྐྱེན། རྫས་སྔགས་ཏིང་ངེ་འཛིན་གསུམ་གྱིས་དབང་ནུས་ལྡན་དུ་བྱས་པ་ནི་དམིགས་པའི་རྐྱེན། དབང་སྔ་མས་གོ་ཕྱེས་ནས་ཕྱི་མ་ཐོབ་མ་རགས་པར་གྱུར་པ་ནི་དེ་མ་ཐག་པའི་རྐྱེན་དེ་བཞིའོ། །དེ་ལྟར་རྒྱུ་གཉིས་རྐྱེན་བཞི་སྟེ་དྲུག་པོ་ཚོགས་པ་ལ་བརྟེན་ནས་གང་ལ་དབང་བའི་གོ་འཕངས་ཀྱི་ཆོས་རྒྱུད་ལ་བཞག་པས་ཐར་བའི་མྱུ་གུ་མངོན་དུ་བསྐྱེད་པའམ། སྐྱེ་ངེས་ཀྱི་ནུས་ལྡན་དུ་སྨིན་པར་བྱས་པའོ། ངེས་ཚིག་ནི། ཨ་བྷི་ཥིཉྩའི་སྒྲ་ལས། མངོན་པར་གཏོར་བའམ་བླུགས་པ་སྟེ། སྒོ་གསུམ་གྱི་དྲི་མ་འཁྲུད་པས་ན་གཏོར་བ་དང་། འབྲས་བུ་ཡེ་ཤེས་ཀྱི་ནུས་པ་རྒྱུད་ལ་འཇོག་པས་ན་བླུགས་པ་སྟེ། དོན་ལ་ལམ་དེ་དང་དེ་བསྒོམ་པ་ལ་དབང་བར་བྱེད་པས་ན་དབང་ངོ་། །དབྱེ་བ་ལ་ཡང་རྒྱུད་ཕྱི་མ་ལས། སློབ་དཔོན་གསང་བ་ཤེས་རབ་དང་། དེ་མ་ཐག་པ་བཞི་པ་སྟེ། ཞེས་པ་ལྟར་བཞི་དང་། དེའི་དང་པོ་བུམ་དབང་ལ་ནང་གསེས་ཕན་ནུས་གཉིས་སུ་ཕྱེ་བས་སྔར་འགྱུར་ཏེ། རྡོ་རྗེ་ལས། དང་པོ་ས་བོན་འཇོག་པ་སྟེ། །གཉིས་པ་ནུས་པ་བསྐྱེད་པ་ཡིན། །གསུམ་པ་ཉམས་མྱོང་བསྐྱེད་པའོ། །བཞི་བས་དེ་ཉིད་བརྟན་པར་བྱེད། །ལྔ་བས་བསྟན་པ་ཉམས་ལོན་པས། །མཆོག་གི་དངོས་གྲུབ་ཚེ་འདིས་འགྲུབ། ཅེས་ཞི་ཁྲོ་གཉིས་ཀར་རྩ་བ་ལྔ་དང་། བྱེ་བྲག་ཡན་ལག་གི་དབྱེ་བ་ཞི་བ་ལ་ཕན་དབང་བཅུ། ནུས་དབང་ལྔ། ཟབ་དབང་གསུམ་སྟེ་བཅོ་བརྒྱད་དུ་ངེས་པ་ཡང་ཐུགས་ཐིག་ལས། རྩ་བ་རྣམ་ལྔ་བཅོ་བརྒྱད་དང་། ཞེས་སོ། །ཁྲོ་བོ་ལ་ནུས་དབང་ཟབ་དབང་གཉིས་གོང་དང་འདྲ་ཡང་ཕན་དབང་ལ། གདན་དང་ལྷ་དབང་ཕྱག་མཚན་དང་། ཆས་བཅུ་བསྒྲུབ་རྫས་བཅོ་ལྔ་སྟེ། ཞེས་པ་ལྟར་ཉེར་བརྒྱད་དུ་གྱེས་པས་བསྡོམ་སུམ་ཅུ་རྩ་དྲུག་སྟེ། ཐུགས་ཐིག་ལས། བསྒྱུར་བ་ལ་སུམ་ཅུ་དྲུག །ཅེས་སོ། །དེ་ལས་ཆས་བཅུ་ནི། །དབུ་རྒྱན་བུམ་པ་སྙིང་པོ་ལྔ། །ཅོད་པན་གོ་ཆ་ཕྲེང་བ་བརྒྱན། །ཐོད་ཕྲེང་རྟགས་གསུམ་མེ་དཔུང་ངོ་། །ཞེས་སོ། །སྒྲུབ་རྫས་བཅོ་ལྔ་ནི། བདུད་རྩི་ལྔ་དང་ཤ་ལྔ་དང་། རཀྟ་རྒྱལ་མཚན་གདུགས་ཁ་ཊྭཾ། །ཕུར་པ་རྡོར་དྲིལ་རྔེའུ་ཆུང་དང་། ཡུངས་དཀར་གཟུངས་མ་ཕྲེང་བ་དང་། ཚེ་དང་བཟའ་བཏུང་མིང་དབང་ངོ་། །ཞེས་སོ། །དེ་ཡང་ཞི་བ་དང་མི་མཚུངས་པ་རྣམས་ཀྱང་ཐོད་པའི་དབུ་རྒྱན་སོགས་ཞི་དྲག་གི་རྫས་ཀྱི་ཁྱད་ཡོད་པ་ཤེས་པར་བྱའོ། །དེ་དག་ཀྱང་གདུལ་བྱ་གང་ལ་དཀྱིལ་འཁོར་གང་དུ་བསྐུར་ཚུལ་ནི། གདུལ་བྱ་དད་པ་ཅན་ལ་ཕྱི་ཕན་པའི་དབང་རྡུལ་ཚོན་གྱི་དཀྱིལ་འཁོར་ལ་བརྟེན་ནས་བསྐུར་བ་དང་། བརྩོན་འགྲུས་ཅན་ལ་ནང་ནུས་པའི་དབང་། རས་བྲིས་སམ་ཚོམ་བུ་ལ་བརྟེན་ནས་བསྐུར་བ་དང་། བརྟུལ་ཞུགས་ཅན་ལ་གསང་བ་ཟབ་མོའི་དབང་གསུམ་པོ་སྤྱིར་བདག་གི་དེ་ཁོ་ན་ཉིད་ལུས་ཀྱི་དཀྱིལ་འཁོར་ལ་བརྟེན་ནས་བསྐུར་བ་དང་། བྱེ་བྲག་ཏུ་གསང་སྔགས་ཀྱི་དེ་ཁོ་ན་ཉིད་ཡི་གེ་བྷ་གའི་དཀྱིལ་འཁོར་དང་། ཤེས་རབ་དབང་ལྷའི་དེ་ཁོ་ན་ཉིད་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དང་། བདེ་བ་ཆེན་པོའི་དབང་གི་ཡེ་ཤེས་ཀྱི་དེ་ཁོ་ན་ཉིད་དོན་དམ་བྱང་ཆུབ་སེམས་ཀྱི་དཀྱིལ་འཁོར་རྣམས་ལ་བརྟེན་ནས་བསྐུར་རོ། །ལྔ་པ་མི་འདའ་བ་དམ་ཚིག་ལའང་གསུམ་ལས། ངོ་བོ་ནི། རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོད། །རྨི་ལམ་དུའང་དམ་ཚིག་བརྗོད། །དམ་བཅའ་བ་ནི་སྡོམ་པས་ཞོག །ཅེས་པས། བསྲུང་བྱའི་དོན་ཁྱད་པར་ཅན་ལས་དངོས་སུ་མི་འདའ་བར་མ་ཟད། རྨི་ལམ་གྱི་གནས་སྐབས་སུའང་དམ་བཅའ་འདི་ལས་འདའ་བར་མི་བྱའོ་སྙམ་པའི་སེམས་པ་ས་བོན་དང་བཅས་པའོ། །ངེས་ཚིག་ནི་ས་མ་ཡའི་སྒྲ་ལས། དངོས་སུ་ཁས་བླངས་པའི་ཐ་ཚིག་ལ་འཇུག་པས་ན། གང་གི་ཚེ་དམ་བཅས་པ་ལས་འདའ་བར་དཀའ་བས་སམ། ཡང་ན་རྡོ་རྗེ་ལས། དམ་པ་འདི་ལས་སུ་འདའ་བ། རྡོ་རྗེ་ཅན་ཡང་ཚིག་པར་འགྱུར། ཞེས་པ་ལྟར་བསྲུང་བྱ་དམ་པ་གང་ཡིན་པ་ལས་འདས་ན་གསང་བདག་ཕྱག་ན་རྡོ་རྗེའང་དམྱལ་བའི་མེས་འཚིག་པར་བྱེད་ན་གཞན་དག་སྨོས་ཅི་དགོས་ཞེས་ཉམས་པའི་ཉེས་དམིགས་ཀྱི་སྒོ་ནས་དམ་ཚིག་གམ། ཡང་ན་དམ་པ་འདི་ཉིད་བསྲུང་བའི་གང་ཟག་ལ་གནོད་པར་བྱེད་པ་རྣམས་རྡོ་རྗེའི་མེས་འཚིགས་པར་འགྱུར་པས་ན་བསྲུང་བའི་ཕན་ཡོན་གྱི་སྒོ་ནས་ཀྱང་གསུངས་སོ། །གཞན་དུ་ཀུན་གཟིགས་རོང་པས་ནི། །ཀུན་ཐོབ་འགྲོ་དང་རྟོགས་པ་དང་། སོགས། སྒྲའི་འཇུག་ཚུལ་བཅུ་དྲུག་ཏུ་གསུངས་སོ། །དབྱེ་བ་ལ་སྤྱི་དང་བྱེ་བྲག་གཉིས་ལས། དང་པོ་ལ་ཡང་རྒྱུད་སྡེ་སོ་སོའི་དགོངས་པ་མང་ཡང་། གསར་རྙིང་ཐུན་མོང་དུ་གྲགས་པ་རྩ་ལྟུང་བཅུ་བཞི། ཡན་ལག་སྦོམ་པོ་བརྒྱད་ལ་སོགས་པ་རྣམས་དང་། ཁྱད་པར་སྔ་འགྱུར་དུ་གྲགས་པ་སྤྱི་དང་ཁྱད་པར་ལྷག་པའི་དམ་ཚིག་རྣམས་ཏེ། སོ་སོའི་གཞུང་ལས་རྟོགས་པར་བྱའོ། གཉིས་པ་བྱེ་བྲག་གཞུང་འདི་ཉིད་དུ་གྲགས་པ་ནི་རྩ་བའི་དམ་ཚིག་ལྔ་དང་། ཡན་ལག་གི་དམ་ཚིག་བཅུ་སྟེ་བཅོ་ལྔ་ཡིན་ལ། དེ་ལས་ཀྱང་དབྱེ་ན་སུམ་བརྒྱ་དྲུག་ཅུ་ལ་སོགས་པའོ། །དེ་ཡང་དམ་ཚིག་ཡིན་ན་སྔགས་སྡོམ་ཡིན་པས་མ་ཁྱབ་ལ། སྔགས་སྡོམ་ཡིན་ན་དམ་ཚིག་གིས་ཁྱབ་པ་སོགས་སྡོམ་པ་དང་དམ་ཚིག་ནི་དབྱེ་བ་ཤེས་པར་བྱས་ནས། རང་ལྡོག་མ་འདྲེས། དགག་དགོས་ཡོངས་རྫོགས། ངོ་བོ་གནས་འགྱུར། ཡོན་ཏན་ཡར་ལྡན། གནད་ཀྱིས་མི་འགལ། དུས་སྐབས་གཙོར་སྤྱོད་དེ་སྡོམ་པའི་ཁྱད་ཆོས་དྲུག་གི་ཚུལ་དུ་སོ་བྱང་སྔགས་གསུམ་ནང་མི་འགལ་བར་བསྲུང་ཚུལ་སོགས་འདིར་འཆད་སྲོལ་འདུག་ཀྱང་། ཕལ་ཆེ་གཞུང་དོན་གྱི་སྐབས་སུ་གསལ་བ་ཡིན་ནོ། །དྲུག་པ་རོལ་པ་འཕྲིན་ལས་ལའང་གསུམ་ལས། ངོ་བོ་ནི། ཐུགས་ཐིག་ལས། ཕྱི་རོལ་ཚད་མེད་ཉིད་ལས་བཞི། ཞེས་པས་རྒྱུ་ཚད་མེད་པ་བཞིས་ཀུན་ནས་བསླང་བའི་བྱང་ཆུབ་ཀྱི་སེམས་དང་། ཤེས་རབ་ཆེན་པོས་ཟིན་པས་སྒོ་ནས་གཙོ་བོར་གཞན་དོན་སྒྲུབ་པ་ལ་དམིགས་པའི་ཐབས་མཁས་ཀྱི་མཛད་སྤྱོད་དོ། །ངེས་ཚིག་ནི། ཀརྨ་ཞེས་པའི་སྒྲ་ལས། སྒོ་གསུམ་གྱི་བྱ་བ་བྱེད་པའི་ལས་ཀྱི་མཚན་ཉིད་ཅན་ཏེ། འདིར་རྒྱལ་བའི་མཛད་པ་བསྒྲུབ་པའི་ལས་གང་ཡིན་པ་ལ་འཇུག་པས་ན་འཕྲིན་ལས་སོ། །དབྱེ་བ་ལའང་། ཕྱི་མ་འགོས་འགྱུར་ལས། ཞི་བ་ལ་སོགས་རབ་དབྱེ་བས། །ལས་ནི་རྣམ་པ་བཞིར་བསྡུས་སོ། །ཞེས་པ་ལྟར། ཞི་བ་དང་། རྒྱས་པ་དང་། དབང་དང་། དྲག་པོ་སྟེ་ལས་ཆེན་བཞི་དང་། དེ་རེ་རེ་ཞིང་ཐུན་མོང་དང་མཆོག་གི་ལས་གཉིས་རེར་དབྱེ་བས་བརྒྱད་དམ། ཡང་ན་མཆོག་གི་ལས་གཅིག་ཏུ་བསྡོམ་ནས་ལྔར་དབྱེ་བའང་ཡོད་དོ། དེ་དག་ཀྱང་གང་གིས་བྱ་བའི་ཐབས་ཀྱི་རིམ་པ་ནི་ལྔར་ངེས་པ་སྟེ། ཁོག་གཞུང་ལས། བདག་གཞན་དོན་སྒྲུབ་འཕྲིན་ལས་ནི། །མཆོད་རྟེན་ཕྱག་རྒྱའི་སྒོ་དང་ནི། །ཧོམ་བྲོ་གླུ་དང་རྫས་ཀྱིས་བྱ། ཞེས་པ་ལྟར་མཆོད་རྟེན་གྱི་སྒོ་ནས་ལས་མཐུན་གྱི་མནན་པ་བྱ་བ་དང་། ཕྱག་རྒྱའི་སྒོ་ནས་ལས་མཐུན་གྱི་ཕྱག་རྒྱ་བཅའ་བ་དང་བསྒྱུར་དམིགས་བྱེད་པ་དང་། མེ་ཧམ་གྱི་སྒོ་ནས་ལས་མཐུན་གྱི་སྦྱིན་སྲེག་བླུགས་པ་དང་། ལུ་གུ་རྒྱུད་ཀྱི་སྒོ་ནས་ལས་མཐུན་གྱི་གླུ་བྲོ་བྱ་བ་དང་། རྫས་ཀྱི་སྒོ་ནས་ལས་མཐུན་གྱི་ལིང་ག་བཅའ་བ་དང་བསྒྲལ་བསྟབ་བྱེད་པ་སྟེ་ལྔའོ། །བདུན་པ་དོན་དུ་གཉེར་བ་སྒྲུབ་པ་ལ་ཡང་གསུམ་ལས། ངོ་བོ་ནི། རྒྱུད་ཕྱི་མ་ཆེའི་འགྱུར་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པའི་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པའི་སྦྱོར་བས་སོ། །ཞེས་པ་ཐབས་ཁྱད་པར་ཅན་བསྐྱེད་རྫོགས་རིམ་པ་གཉིས་ལ་བརྟེན་ནས་མཆོག་ཐུན་མོང་གི་དངོས་གྲུབ་རྣམ་པ་གཉིས་ལས་གང་འདོད་པ་ཞིག་དོན་དུ་གཉེར་བའོ། །ངེས་ཚིག་ནི། སིདྷིའི་སྒྲ་ལས་དངོས་གྲུབ་སྟེ་བསྒྲུབ་བྱ་དང་། སཱ་དྷ་ནའི་སྒྲ་ལས་ཀུན་ཏུ་ལེན་པ་སྟེ། འདོད་པའི་དོན་ལེན་ཅིང་ཐོབ་པར་བྱེད་པའམ་སྒྲུབ་པར་བྱེད་པས་ན་སྒྲུབ་པའོ། །དབྱེ་བ་ལ་ཐུན་མོང་དང་མཆོག་གི་སྒྲུབ་པ་གཉིས་ལས། དང་པོ་ནི་ཁོག་གཞུང་ལས། རོ།་ལངས་ཚེ་དང་པྲ་སྒྲུབ་དང་། །ལྷ་ཆེན་པོ་དང་རྒྱལ་བོ་བཞི། །གདུག་པ་ཀླུ་འདུལ་རྒྱལ་བློན་གྱི། །ཆུང་མ་དབང་དུ་བྱ་བ་གཉིས། །ཡུལ་ཁམས་ཅེ་སྤྱང་རྐང་མགྱོགས་བསྐྲད། །མི་སྣང་གཟུགས་སྒྲུབ་ལྷ་ཀླུ་མོ། །རྒྱལ་བློན་དམག་དཔོན་ཞིང་བློན་སྒྲུབ། །ཚེ་འདིའི་ཆེད་ཕྱིར་འཇིག་རྟེན་པའོ། །ཞེས་པ་ལྟར་དང་། ཡང་ན་གཞུང་འདིར་དངོས་སུ་གསལ་བ། ཡོན་ཏན་འབྱུང་བའི་དངོས་གྲུབ་དྲུག །འབྱུང་ལྷའི་དངོས་གྲུབ་ལྔ་ལས་ཕྲན་ཚེགས་བརྒྱད་དང་བཅས་པ་རྣམས་སོ། །གཉིས་པ་ལ་ཡང་ལུང་སྔ་མ་ལས། ཡི་གེ་སྒྱུ་འཕྲུལ་ཚོགས་སྒྲུབ་དང་། །རྡོ་རྗེ་སེམས་དང་སྨན་སྒྲུབ་དང་། །རིགས་ལྔ་སྒྲུབ་དང་ཡུམ་ལྔ་སེམས། །བྱིན་དབབ་སྒྲུབ་པ་རྣམ་གཉིས་སོ། །ཞེས་སོ། །ཇི་ལྟར་བསྒྲུབ་པའི་ཚུལ་ནི། བྱེ་བྲག་སོ་སོའི་སྒྲུབ་ཐབས་གུད་དུ་བྱུང་བ་རྣམས་དང་སྒྱུ་འཕྲུལ་རྒྱལ་པོ་ལས་རྟོགས་པར་བྱ་ལ། འདིར་གཙོ་བོར་སྟོན་པ་ནི་ཚོམ་བུ་ཚོགས་སྒྲུབ་སྟེ། གཞི་ཕུན་སུམ་ཚོགས་པ་ལྔ་ཚངས་པའི་སྒོ་ནས་བསྙེན་སྒྲུབ་ཡན་ལག་བཞིའི་ཐབས་ཀྱིས་སྒྲུབ་པའོ། །བརྒྱད་པ་མི་གཡོ་བའི་ཏིང་ངེ་འཛིན་ལ་ཡང་གསུམ་ལས། ངོ་བོ་ནི་ཧེ་རུ་ཀ་འདུས་པ་ལས། གང་དང་གང་དུ་གསལ་བའི་ཡིད། །མ་ཡེངས་པ་ཉིད་ཏིང་འཛིན་ཏེ། ཞེས་པ་ལྟར་བསྒོམ་བྱའི་དོན་ཁྱད་པར་ཅན་གང་ཡིན་པ་ལས་སེམས་གཞན་དུ་མ་ཡེངས་པ་རྩེ་གཅིག་ཏུ་གནས་པ་ཞིག་གོ །ངེས་ཚིག་ནི། ས་མ་དྷིཿའི་སྒྲ་ལས་མཉམ་པའི་བློ་སྟེ། རྣམ་པར་རྟོག་པས་མི་མཉམ་པ་མེད་པར། དམིགས་པའི་རྟེན་ལ་སེམས་ལྷན་ནེར་འཛིན་པས་ན་ཏིང་ངེ་འཛིན་ནོ། །དབྱེ་བ་ལ་ཐབས་བསྐྱེད་པའི་རིམ་པའི་ཏིང་ངེ་འཛིན་དང་། ཤེས་རབ་རྫོགས་པའི་རིམ་པའི་ཏིང་ངེ་འཛིན་གཉིས་ལས། དང་པོ་ནི་རྒྱུད་ཕྱི་མ་ཁ་ཆེ་འགྱུར་ལས། །ལྷ་ཡི་རྣམ་པའི་སྦྱོར་བ་ཡི། ཟླ་བ་རྡོ་རྗེ་ལ་སོགས་རིམ། །བསྐྱེད་པའི་རིམ་པ་ཞེས་སུ་བཤད། །ཅེས་པ་ལྟར་མ་དག་འཁྲུལ་ཤེས་ཀྱི་སྣང་བ་འདི་ཀུན་དག་པ་ལྷར་སྣང་དུ་སྦྱོར་བའི་ཕྱིར། གཞལ་ཡས་ཁང་གདན་དང་བཅས་པ་ནས་རིམ་པར་སྐུ་ཡོངས་སུ་རྫོགས་པའི་བར་བསྐྱེད་པ་ནི་བསྐྱེད་རིམ་སྟེ། དེ་ལའང་དབྱེ་ན་སྔ་མ་ལས། མངལ་སྐྱེས་ལ་སོགས་དབྱེ་བ་ཡིས། །དེ་ཡང་རྣམ་པ་བཞི་རུ་འདོད། ཅེས་པ་ལྟར་སྐྱེ་གནས་བཞིའི་བག་ཆགས་སྦྱོངས་ཕྱིར་བསྐྱེད་རིམ་ཡང་བཞི་སྟེ། འདི་ལྟར་ལས་དང་པོའི་དུས་སུ་སྒོང་སྐྱེས་སྦྱོངས་ཕྱིར་རྒྱས་པ་ཆེན་པོའི་བསྐྱེད་རིམ་བདག་སྲས་ལྔ་དང་གཞན་སྲས་བརྒྱད་ཀྱི་ཚུལ་དུ་བསྒོམ་པ་དང་། ཅུང་ཟད་གོམས་ཚེ་མངལ་སྐྱེས་སྦྱོངས་ཕྱིར་རྒྱས་པ་འབྲིང་གི་བསྐྱེད་རིམ་ནང་གི་མངོན་བྱང་ལྔ་དང་། མངོན་བྱང་བཞི་ཅན། རྡོ་རྗེའི་ཆོ་ག་གསུམ་ཅན་རྣམས་བསྒོམ་པ་དང་། ཆེར་གོམས་པ་བརྟན་ཚེ་དྲོད་གཤེར་སྐྱེས་སྦྱོངས་ཕྱིར་བསྐྱེད་རིམ་འབྲིང་པོ་ས་བོན་ནམ་བསྐྱེད་སྔགས་བཟླས་པ་ཙམ་གྱི་མུར་བསྒོམ་པ་དང་། ཤིན་ཏུ་བརྟན་པ་ཐོབ་ཚེ་རྫུས་སྐྱེས་སྦྱོངས་ཕྱིར་བསྡུས་པའི་བསྐྱེད་རིམ་སྐད་ཅིག་དྲན་རྫོགས་ཀྱིས་བསྒོམ་པ་སྟེ་བཞིའམ། ཡང་ན་ལམ་རིམ་ལྟར་སྲིད་པ་མངལ་སྐྱེས་རྫུས་སྐྱེས་གཉིས་དང་བསྟུན་ཏེ། རིམ་གྱིས་དང་ཅིག་ཅར་དུ་བསྒོམ་མོ། །གཉིས་པ་ཡང་སྔ་མ་ལས། རང་བཞིན་གྲུབ་པའི་རྣལ་འབྱོར་ནི། །རྫོགས་པའི་རིམ་པ་ཞེས་བྱར་བརྗོད། །ཅེས་པ་ལྟར་ལྷར་སྣང་བདེན་གྲུབ་ཏུ་ཞེན་པ་ཉིད་རང་བཞིན་ཡོངས་གྲུབ་ཆེན་པོའི་ངང་དུ་ཉེ་བར་ཞི་བའི་ཐབས་སྣང་མེད་དང་སྣང་བཅས་ཀྱི་རྣལ་འབྱོར་གང་རུང་ལ་བསླབ་པ་ནི་སྤྱིར་རྫོགས་རིམ་གྱི་དོད་པོ་ཡིན་ཀྱང་། འདིར་མཚན་བཅས་ཀྱང་རྫོགས་རིམ་དམིགས་ཀྱིས་བསལ་བ་ལྟར་ཐབས་ལམ་སྟེང་འོག་གི་སྒོ་ལ་བརྟེན་པ་དང་གྲོལ་ལམ་ཟུང་འཇུག་གི་རྣལ་འབྱོར་རིམ་ཅིག་ཅར་གཉིས་ཀྱིས་བསྡུས་པ་རྣམས་སོ། །དེ་ཡང་རིམ་པ་གཉིས་པོ་གང་གི་སྐབས་སུའང་། དེ་དང་དེ་ལ་སེམས་རྩེ་གཅིག་ཏུ་གཏོད་པ་ལས་གཞན་དུ་མ་ཡེངས་པའི་ཆ་དེ་ཏིང་ངེ་འཛིན་ཡིན་པས་ན་ཐབས་ཀྱི་ལྡོག་པ་ལས་བྱེས་པ་ཙམ་དུ་ཟད་ཀྱིས། གཞན་དུ་བསྐྱེད་རྫོགས་ཡིན་ན་ཏིང་ངེ་འཛིན་ཡིན་པས་ཁྱབ་པ་དང་། ཏིང་ངེ་འཛིན་ཡིན་ན་བསྐྱེད་རྫོགས་ཡིན་པས་ཁྱབ་པ་ནི་མེད་དེ། དེ་ཡོད་ཚེ་སྔ་མ་ལྟར་ན་གསང་སྔགས་ཀྱི་ལམ་མཐའ་དག་རིམ་པ་གཉིས་ཀྱིས་བསྡུས་ཕྱིར་ཐམས་ཅད་ཏིང་ངེ་འཛིན་དུ་ཐལ་བ་དང་། ཕྱི་མ་ལྟར་ན་ཐེག་དམན་གྱི་ཏིང་ངེ་འཛིན་ཡང་སྔགས་ཀྱི་བསྐྱེད་རྫོགས་སུ་ཐལ་བའི་སྐྱོན་སྤོང་མི་ནུས་སོ། །དགུ་བ་གནས་སུ་སྟོབས་པ་མཆོད་པ་ལ་ཡང་གསུམ་ལས། ངོ་བོ་ནི་ཐུགས་ཐིག་ལས། བྱ་བྱེད་བྱ་བ་བྱེད་འདུས་པས། དགྱེས་ཚིམ་གྱུར་བའི་དངོས་པོ་ཉིད། ཅེས་པ་ལྟར་མཆོད་བྱ་རྫས་སོགས་དང་མཆོད་བྱེད་གང་ཟག་མཆོད་པའི་བྱ་བ་བྱེད་པ་ལ་ཚོགས་ནས། སྒོ་གསུམ་ཉེས་སྐྱོན་དང་བྲལ་བས་ལྷ་ཚོགས་རྣམས་དགྱེས་པ་བསྐྱེད་ཕྱིར་མཆོད་པ་འབུལ་བ་ལ་ཡིད་གཅིག་ཏུ་གཞོལ་བའོ། །ངེས་ཚིག་ནི། པཱུ་ཛའི་སྒྲ་ལས་སྔོན་དུ་བསྐྱེད་པ་དང་། ཡང་དང་ཡང་དུ་དགྱེས་པ་བསྐྱེད་པ་དང་། བཀུར་བའི་དོན་རྣམས་ལ་འཇུག་པས་ན། དགེ་བའི་ལས་གང་གིས་ཀྱང་སྔོན་དུ་འགྲོ་དགོས་པས་དང་། དགྱེས་པ་བསྐྱེད་ཕྱིར་གནས་སུ་སྟོབས་བྱ་ཡིན་པས་ན་མཆོད་པའོ། །དབྱེ་བ་ལ་སྤྱི་བྱེ་བྲག་གཉིས་ལས། དང་པོ་ལའང་འཇིག་འདས་ཀྱི་མཆོད་པ་གཉིས་སྟེ། དེའི་ཁྱད་པར་ནི་བཞི་རེ་སྟེ་འདི་ལྟར་སྐྱབས་ཡུལ་དང་། འབྲས་བུ་དང་། ཡོངས་བསྔོ་དང་། མཆོད་རྫས་སོ། །དེ་ཡང་འཇིག་རྟེན་པས་ནི། སྐྱབས་ཡུལ་ཚངས་པ་ཁྱབ་འཇུག་སོགས་འཇིག་རྟེན་པའི་དྲེགས་པ་ཅན་ལ། འབྲས་བུ་མཐོ་རིས་ལ་དམིགས་ནས། ཡོངས་བསྔོ་དེ་ཉིད་ཐོབ་ཕྱིར། མཆོད་རྫས་འདོད་ཡོན་ལྔ་སོགས་འཇིག་རྟེན་པའི་ཡོ་བྱད་འབུལ་བའོ། དེ་ལས་ཕྱི་མ་ནི་ཀུན་སློང་དམ་པས་ཟིན་ན་མྱང་འདས་ཀྱི་རྒྱུར་ཡང་དབུལ་རུངས་བ་ཡིན་ནོ། །འདས་པའི་སྐྱབས་ཡུལ་ནི་བླ་མ་དང་མཆོག་གསུམ་ལ། འབྲས་བུ་སངས་རྒྱས་ལ་དམིགས་ནས། ཡོངས་བསྔོ་དེ་ཉིད་ཐོབ་ཕྱིར། མཆོད་རྫས་ཐུན་མོང་དང་ཐུན་མོང་མ་ཡིན་པ་དག་འབུལ་བའོ། །གཞན་ཆོས་ལ་ཐོས་བསམ་བསྒོམ་གསུམ་བྱེད་པ་ཡང་རྒྱལ་བ་གཉེས་བྱེད་དོན་གྱི་མཆོད་པར་ངེས་སོ། །གཉིས་པ་བྱེ་དྲག་ཏུ་དབྱེ་བ་ལ་ཡང་ཕྱི་ཉེར་སྤྱོད་ནང་དམ་རྫས་བདུད་རྩི། གསང་བ་སྦྱོར་བསྒྲོལ་ཟབ་མོའམ་ཞི་ཁྲོའི་མཆོད་པ་བཅུ་བཞི་ལ་སོགས་པ་སྟེ་གསུམ་ལས། དང་པོ་ནི་འཇིག་རྟེན་པ་དང་ཐུན་མོང་དུ་སྤྱད་བྱར་གྱུར་པ་མེ་ཏོག་ལ་སོགས་པ་སྟེ་ཕྱི་མཆོད་ཅེས་བྱའོ། །གཉིས་པ་ནི་ཐེག་པ་འོག་མ་ལ་མ་གྲགས་ཤིང་གསང་སྔགས་ནང་པ་སྤྱིས་སྤྱད་བྱར་གྱུར་པ་བདུད་རྩི་ལ་སོགས་པ་སྟེ་ནང་མཆོད་ཅེས་བྱའོ། །གསུམ་པ་ནི་བླ་མེད་ལ་ཞུགས་པ་ཙམ་ཀུན་གྱིས་ཀྱང་སྤྱད་བྱར་མ་གྱུར་པ་ན་གསང་མཆོད་ཅེས་སྦྱོར་བསྒྲོལ་ཟབ་མོ་དང་། དེའི་ཟླས་དྲངས་པ་ཞི་ཁྲོའི་མཆོད་པ་རྣམས་སྟེ་འདི་ནི་རང་གི་མཆོད་པ་བྱེ་བྲག་པར་ངེས་པས་ན་དེ་སྐད་ཅེས་བརྗོད་པ་ཡིན་ནོ། དེ་དག་སོ་སོའི་དབྱེ་བ་ནི་གཞུང་ན་གསལ་ལོ། །བཅུ་བ་འཆིང་ཟློས་སྔགས་དང་ཕྱག་རྒྱ་ལ་ཡང་གསུམ་ལས། ངོ་བོ་ནི་ཐུགས་ཐིག་ལས། ཡི་གེ་འདུས་པ་གྲུབ་པ་བཞིས། །མཐུ་ཅན་རེད་པ་གང་ཡིན་པ། །བཞི་རྫོགས་ཉིད་ལས་མི་འདའ་བ། །གང་ལ་སྣང་བ་དེ་ངོ་བོ། །ཞེས་པ་ལྟར་ཐབས་ཤེས་ཀྱི་ཡི་གེ་ཨཱ་ལི་ཀཱ་ལི་འདུས་པ་ཉིད། ཆོས་ཉིད་ངོ་བོ་ཉིད་ཀྱིས་གྲུབ་པ། ཆོས་ཅན་རང་བཞིན་གྱིས་གྲུབ་པ། བྱིན་གྱིས་བརླབས་ཀྱིས་གྲུབ་པ། མཐུས་གྲུབ་པ་སྟེ་གྲུབ་པ་བཞིས་བྱིན་གྱིས་བརླབས་པ་གཞུང་མཐུ་ཅན་དུ་གྱུར་བ་ནི་སྔགས་ཀྱི་ངོ་བོ་དང་། རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་གསལ་བ་ལས་མི་འདའ་བར་ཤེས་ངོར་ས་ལེར་སྣང་བ་ནི་ཕྱག་རྒྱའི་ངོ་བོའོ། །ངེས་ཚིག་ནི། མནྟྲའི་སྒྲ་ལས་ཤེས་སྐྱོབས་ཏེ། ཡིད་ཤེས་བདེ་གྱུར་དུ་སྐྱོབ་པས་ན་སྔགས་དང་། མུ་དྲའི་སྒྲ་ལས་འདེབས་ཤིང་མཚོན་པར་བྱེད་པའམ། རྒྱས་བཏབ་པ་ལས་འདའ་བར་དཀའ་བ་རྒྱལ་པོའི་བཀའ་རྟགས་ཀྱི་ཕྱག་རྒྱ་ལྟ་བུར་ངེས་པས་ན་སྐུ་གསུང་ཐུགས་ཀྱི་མཚན་མར་གྱུར་པ་ལ་ཕྱག་རྒྱ་ཞེས་བྱའོ། །དེ་ཡང་མཚན་ཉིད་བཞི་ལྡན་ཞིག་སྟེ། དམ་པའི་མཚན་མར་གྱུར་པ་དང་། གང་གིས་གཞིག་དཀའ་བ་དང་། ཆོས་ཀྱི་རྒྱལ་པོ་ལས་ཐུན་མོང་དུ་མ་གྱུར་པ་དང་། སངས་རྒྱས་ཀྱི་མཛད་པ་བསྒྲུབ་ནུས་པའོ། །དེ་ལྟར་མཚན་མའི་ཕྱག་རྒྱ་ལས་བཏུད་ནས་མཚན་མ་མེད་པའི་དོན་དང་། དམ་པའི་སྐུ་གསུང་ཐུགས་དངོས་ལའང་འཇུག་གོ །དབྱེ་བ་ལ་སྔགས་དང་ཕྱག་རྒྱ་གཉིས་ལས། དང་པོ་སྔགས་ལའང་དོན་ཡེ་ཤེས་ཀྱི་སྒོ་ནས་དབྱེ་བ་དང་། རྟགས་བཟླས་པའི་སྒོ་ནས་དབྱེ་བ་གཉིས་ཀྱི་དང་པོ་ནི་གསང་སྔགས་རིག་སྔགས་གཟུངས་སྔགས་གསུམ་སྟེ། །དེ་ལས་གསང་སྔགས་ནི་སྙིང་རྗེ་དང་ཤེས་རབ་ཟུང་དུ་འཇུག་པའི་སྒོ་ནས་གཙོ་བོར་འཁྲུལ་རྟོག་གི་གཉེན་པོར་གྱུར་པ་ཞིག་སྟེ། རྟགས་ཀྱང་ལྷ་ཕོའི་རྣམ་པ་ཤས་ཆེར་སྟོན་པའོ། །རིག་སྔགས་ནི་ཡེ་ཤེས་དང་ཤེས་རབ་ཟུང་དུ་འཇུག་པའི་སྒོ་ནས་གཙོ་བོར་མ་རིག་པའི་གཉེན་པོར་གྱུར་པ་ཞིག་སྟེ། རྟགས་ཀྱང་ལྷ་མོའི་རྣམ་པ་ཤས་ཆེར་སྟོན་པའོ། །གཟུངས་སྔགས་ནི་དྲན་པ་དང་ཤེས་རབ་ཟུང་དུ་འཇུག་པའི་སྒོ་ནས་གཙོ་བོར་དྲན་ཉམས་ཀྱི་གཉེན་པོར་གྱུར་བ་ཞིག་སྟེ། རྟགས་ཀྱང་ལྷ་ཡབ་ཡུམ་ཟུང་འཇུག་གི་རྣམ་པ་ཤས་ཆེར་སྟོན་པའོ། །གཞན་ཡང་ཆོས་ཉིད་མ་འཁྲུལ་བའི་ཡེ་ཤེས་གང་ཞིག་རྟག་ཆད་ཀྱི་མཐའ་དང་བྲལ་བ་ཐབས་ཤེས་ཟུང་འཇུག་གི་བདག་ཉིད་ཅན་དུ་གནས་པ་ནི་གསང་སྔགས་ཀྱི་ངོ་བོ་དང་། དེའི་དོན་རྟོགས་པ་རིག་སྔགས་ཀྱི་ངོ་བོ། རྟོགས་བཞིན་ངང་ལ་གནས་པ་གཟུངས་སྔགས་ཀྱི་ངོ་བོའོ་ཞེས་ཀྱང་གསུངས་སོ། གཉིས་པ་དེ་དག་གི་སྒོར་གྱུར་པ་རྟགས་བཟླས་པའི་སྒོ་ནས་དབྱེ་བ་ནི། གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། ཞེས་པ་ལྟར། ས་བོན་ཧཱུྃ་ལྟ་བུ་རྒྱུ་མ་ནོར་བར་རྩ་བའི་སྔགས། ལྷ་སོ་སོའི་བྱེ་བྲག་གི་སྔགས་བཛྲ་དྷྲིག་ལྟ་བུ་བསྐྱེད་པ་རྐྱེན་གྱི་སྔགས། དེ་གཉིས་སྦྲེལ་བ་ཧཱུྃ་བཛྲ་དྷྲིག་ལྟ་བུ་བཟླས་པ་ལས་ཀྱི་སྔགས་སྟེ་གསུམ་མོ། །གཉིས་པ་ཕྱག་རྒྱ་ལའང་སྤྱིར་རྟོག་ཚོགས་ཡེ་ནས་ལྷའི་དཀྱིལ་འཁོར་དུ་གནས་པ་ལས་འདའ་བར་དཀའ་བས་ན་རང་བཞིན་གྱི་ཕྱག་རྒྱ་དང་། དེའི་དོན་གྱི་ཡིན་ལུགས་རྟོགས་པ་ལྟ་བའི་ཕྱག་རྒྱ། དེ་གཉིས་མངོན་དུ་གྱུར་པ་འབྲས་བུའི་ཕྱག་རྒྱ་སྟེ་གསུམ་དུ་དབྱེ་ཡང་བྱེ་བྲག་གི་སྒོ་ནས་ཡན་ལག་བཞི་བཞི་དང་ལྡན་པ་སྟེ། གསལ་བཀྲ་ལས། དམ་ཚིག་ལས་དང་ཆོས་དང་ནི། སྐུ་ཉིད་ཕྱག་རྒྱ་ཆེན་པོ་བཞི། ཞེས་སོ། །དེ་ཡང་དམ་ཚིག་གི་ཕྱག་རྒྱ་ནི་རང་བཞིན་དུ་གནས་པས་ཐུགས་ཀྱི་མཚན་མ་སྟེ། དོན་ལ་མཚན་མ་མེད་པའི་དོན་གྱིས་མཚན་བཅས་ཐམས་ཅད་ལ་རྒྱས་བཏབ་པ་དེའོ། །གནས་སྐབས་སུ་ནི་ལྷ་དམ་ཚིག་པ་དང་། དམ་ཚིག་གི་རྫས་ཕྱག་རྒྱ་བཅས་བསམ་སོགས་ལའང་འཇུག་གོ །ལས་ཀྱི་ཕྱག་རྒྱ་ནི་ཡོན་ཏན་དང་འཕྲིན་ལས་ཀྱི་སྒོ་ནས་འགྲོ་དོན་བྱེད་པའི་མཚན་ཉིད་ཅན་ཏེ། དོན་ལ་དག་པའི་ལས་ཀྱིས་མ་དག་པའི་བྱ་བྱེད་ལ་རྒྱས་འདེབས་པ་དེའོ། །གནས་སྐབས་སུ་ནི་ཕྱག་རྒྱ་བསྒྱུར་བཀྲོལ་དང་མཆོད་པ་དང་དཀྱིལ་འཁོར་གྱི་བྱེད་ལས་སོགས་ལའང་འཇུག་གོ །ཆོས་ཀྱི་ཕྱག་རྒྱ་ནི་གཞན་ལ་ཆོས་སྟོན་པར་བྱེད་པ་གསུང་གི་མཚན་ཉིད་ཅན་ཏེ། དོན་ལ་འཁོར་བའི་ཆོས་ལ་ཡང་དག་པའི་ཆོས་སྙིང་པོ་སྔགས་ཀྱིས་རྒྱས་འདེབས་པ་ཞིག་གོ །གནས་སྐབས་སུ་ནི་ཐུགས་ཀར་རང་རང་གི་ས་བོན་གསལ་བཏབས་ནས་ངག་ཏུ་སྔགས་བརྗོད་པ་ལའང་འཇུག་གོ །ཕྱག་རྒྱ་ཆེན་པོ་ནི་རང་བཞིན་གྱིས་རྣམ་པར་དག་པའི་གདངས་མ་འགགས་པ་ཉིད་ཕྱག་རྒྱའི་རྣམ་པར་ཤར་བ་སྐུའི་མཚན་ཉིད་ཅན་ཏེ། དོན་ལ་ཐ་མལ་སྙིགས་མའི་ཕུང་པོ་ལྔ་ལ་དེ་ལས་གྲོས་གཞན་པ་ཞིག་གིས་རྒྱས་འདེབས་པ་དེའོ། །གནས་སྐབས་སུ་ནི་བདག་ཉིད་ཞི་ཁྲོ་གང་རུང་གི་ལྷ་སྐུ་ཞིག་ཏུ་བསྐྱེད་ནས་ཡེ་ཤེས་པ་འགུག་བསྟིམ་བགྱིས་པས་དམ་ཡེ་དབྱེར་མེད་ཀྱི་བདག་ཉིད་ཅན་གང་ལའང་འཇུག་གོ །དེ་དག་ཀྱང་བསྡུ་ན་རང་བཞིན་གྱིས་མ་གྲུབ་པའི་དེ་བཞིན་ཉིད་ཀྱིས་མཚན་མའི་ཆོས་ཐམས་ཅད་ལ་རྒྱས་འདེབས་པ་མཚན་མེད་ཀྱི་ཕྱག་རྒྱ་དང་། གང་དང་གང་གིས་བཏབ་པ་དེ་ལས་འདའ་བར་དཀའ་བ་དང་དམ་པའི་མཚན་མར་གྱུར་པ་མཚན་བཅས་ཀྱི་ཕྱག་རྒྱ་སྟེ་གཉིས་སུ་འདུའོ། །དེ་ཡང་འདི་སྙམ་དུ། རེ་འགའ་ལྟ་བ་ཡིན་པ་དེ་རེ་འགའ་ཕྱག་རྒྱ་དང་དཀྱིལ་འཁོར་དུ་གྱུར་པ་ལྟ་བུ་གང་རུང་རུང་དེ་གང་རུང་རུང་དུ་འགྱུར་རམ་སྙམ་ན་མ་ཡིན་ཏེ། འདི་ལྟར་རང་བཞིན་གྱིས་རྣམ་པར་དག་པའི་དེ་བཞིན་ཉིད་མཆོག་ཏུ་མི་འགྱུར་བའི་བདེ་བ་ཆེན་པོ་ལྟ་བུ་ལ་མཚོན་ན། དེའི་ཡིན་ལུགས་མ་འཁྲུལ་བར་རྟོགས་པའི་ལྟ་བ་དང་། དེ་ལམ་དུ་འཁྱེར་བའི་ཆ་ནས་མཉམ་པའི་སྤྱོད་པ། དེ་ཉིད་ཀྱི་རང་བཞིན་སྐུ་དང་ཡེ་ཤེས་སུ་གནས་པའི་ཆ་ནས་རང་བཞིན་གྱི་དཀྱིལ་འཁོར། དེ་ཉིད་རྟོགས་སྒོམ་ལ་དབང་བས་ན་ཟབ་པའི་དབང་། དེ་ལས་ནམ་ཡང་འདའ་བར་བྱ་བ་མ་ཡིན་པས་ན་འབྲས་བུའི་དམ་ཚིག །དེ་ཉིད་ཀྱི་རོལ་པས་ལས་རབ་འབྱམས་བསྒྲུབ་པར་བྱེད་པས་ན་ལྷུན་གྱིས་གྲུབ་པའི་འཕྲིན་ལས། དེ་འང་དངོས་གྲུབ་དམ་པའི་གཞིར་གྱུར་པས་ན་མཆོག་གི་སྒྲུབ་པ། དེའི་ངང་དུ་མཉམ་པར་འཇོག་པས་ན་དམིགས་པ་མེད་པའི་ཏིང་ངེ་འཛིན། དེ་ཉིད་ལ་གཉིས་མེད་དུ་རོལ་པས་ན་དེ་ཁོ་ན་ཉིད་ཀྱི་མཆོད་པ། དེའི་ངོ་བོ་ཐབས་ཤེས་ཟུང་འཇུག་ཏུ་གནས་པས་ན་དོན་གྱི་སྔགས། དེ་ཉིད་ཀྱིས་རྒྱས་ཆོས་ཐམས་ཅད་ལ་ཁྱབ་པར་བཏབ་པས་ན་མཚན་མེད་ཀྱི་ཕྱག་རྒྱ་སྟེ། དཔེར་ན་ཉི་མ་གཅིག་པུ་ལ་མུན་པ་སེལ་བའི་ཆ་ནས་སྣང་བྱེད། པདྨོ་བཞད་པར་བྱེད་པས་ན་པདྨོའི་གཉེན་རླུང་གི་རྟས་བརྟེགས་པས་ན་རྟ་ལྗང་ཅན་སོགས་བརྗོད་པ་ཉིད་ངོ་བོ་གཅིག་ལ་བྱེད་ལས་ཀྱི་ལྡོག་པ་ཐ་དད་དུ་སྣང་བཞིན་བཏགས་པ་ལྟར། འདིར་ཡང་རང་ལྡོག་གི་ངོས་ནས་བརྗོད་པ་ཙམ་ལས། དོན་ལ་ནི་གཞི་ལམ་འབྲས་གསུམ་གྱི་ལྡོག་པས་དབྱེ་བའི་ལམ་གྱི་ངོ་བོ་དང་ཆ་རྐྱེན་ཙམ་དུ་ཟད་དོ། །ཚུལ་དེ་བཞིན་དུ་མཚན་བཅས་དག་ལའང་དཔྱད་པ་མང་དུ་སྣང་ཡང་། གནད་འདི་མ་རྟོགས་པར་རྒྱུད་ཀྱི་དངོས་པོ་རྣམས་ཧ་ཅང་མ་འདུམ་པར་ཤེས་བྱའི་གཞི་ཐ་དད་དུ་འདོད་ན་ནི་ཕན་ཚུན་འཆོལ་བའི་སྐྱོན་སྤང་བར་དཀའ་ལ། འཆོལ་བཞིན་འགྲེལ་བའང་འགའ་ཞིང་སྣང་མོད། གཞན་དུ་རྒྱུད་ཀྱི་ཚིག་ཙམ་ལས་དོན་ལ་དཔྱད་པ་ཡེ་མ་ཞུགས་པའི་ཧམ་གཏམ་གྱི་ཀུ་ཅོ་ཡང་སྒྲ་འཛིན་དོག་པོར་བགྱིད་པ་ཙམ་དུ་སྒྲོགས་པར་བྱེད་ཀྱང་འདིར་མི་སྤྲོའོ། །དེ་ལྟ་བུའི་རྒྱུད་ཀྱི་དངོས་པོ་བཅུ་བོ་དེ་རང་གཞུང་ལེའུ་གང་དང་གང་གིས་སྟོན་ཞེ་ན། སྤྱིར་ལྟ་སྤྱོད་གཉིས་ལེའུ་རིལ་པོས་མི་སྟོན་ཀྱང་འཐོར་བུའི་ཚུལ་གྱིས་སྟོན་པ་ཡིན་ལ། གཞན་དག་ཞི་ཁྲོ་སོ་སོར་ལེའུ་རིལ་པོས་སྟོན་པ་ཡིན་ནོ། །དེའི་ཚུལ་བརྗོད་ན་སྒྱུ་འཕྲུལ་དྲྭ་བ་བསྒྲུབ་པའི་ཏིང་ངེ་འཛིན་གྱི་ལེའུ་སྟེ་ལྔ་པས་ཏིང་ངེ་འཛིན་སྟོན། དཀྱིལ་འཁོར་སྤྲོས་པའི་ལེའུ་སྟེ་དྲུག་པས་ཞི་བའི་སྐུ་དཀྱིལ་དང་། ཁྲོ་བོའི་དཀྱིལ་འཁོར་བསྟན་པའི་ལེའུ་སྟེ་བཅུ་བདུན་པས་ཁྲོ་བོའི་སྐུ་དཀྱིལ་སྟོན། དཀྱིལ་འཁོར་བསྡུས་པ་དང་གསང་སྔགས་ཀྱི་ལེའུ་སྟེ་བདུན་པས་ཞི་བ་དང་། ཁྲོ་བོའི་ཚོགས་ཆེན་པོའི་གསུང་གི་དཀྱིལ་འཁོར་སྤྲོས་པའི་ལེའུ་སྟེ་བཅུ་དྲུག་པས་ཁྲོ་བོ་སྟེ་ཞི་ཁྲོའི་གསུང་གི་དཀྱིལ་འཁོར་སྙིང་པོའི་སྔགས་སྟོན། ཕྱག་རྒྱ་སྤྲོས་པའི་ལེའུ་སྟེ་བརྒྱད་པས་ཕྱག་རྒྱ་སྟོན། གསང་བའི་དམ་ཚིག་གི་ལེའུ་སྟེ་དགུ་པས་དབང་གི་སྔོན་འགྲོའི་དཀྱིལ་འཁོར་དང་དབང་སྦྱིན་པའི་ལེའུ་སྟེ་བཅུ་པས་དབང་དངོས་སྟོན། ཚོགས་ཀྱི་དཀྱིལ་འཁོར་གྱི་ལེའུ་སྟེ་བཅུ་གཅིག་པ་དང་ཚོགས་སྒྲུབ་པའི་ལེའུ་སྟེ་བཅུ་གཉིས་པས་སྒྲུབ་པ་སྟོན། །ཤིན་ཏུ་གསང་བ་མན་ངག་གི་སྙིང་པོའི་ལེའུ་སྟེ་བཅུ་གསུམ་པས་དངོས་པོ་ཀུན་གྱི་མདོ་ཆིངས་རྫོགས་རིམ་གཙོ་བོར་སྟོན། མཉེས་པའི་མཆོད་པའི་ལེའུ་སྟེ་བཅུ་བཞི་པ་དང་། ཁྲོ་བོ་ལ་བསྟོད་པའི་ལེའུ་སྟེ་ཉེར་གཅིག་པས་ཞི་ཁྲོའི་གླུ་མཆོད་དང་། མཆོད་སྦྱིན་དམ་པ་བསྟེན་པའི་ལེའུ་སྟེ་བཅོ་བརྒྱད་པས་མཆོད་པ་དངོས་སྟོན། དམ་ཚིག་གི་ལེའུ་སྟེ་བཅུ་དགུ་པས་དམ་ཚིག་སྟོན། འཕྲིན་ལས་བྱིན་གྱིས་རློབས་པ་ཞེས་བྱ་བའི་ལེའུ་སྟེ་ཉི་ཤུ་པས་འཕྲིན་ལས་སྟོན་པ་ཡིན་ནོ། །དེ་དག་ཀྱང་གཙོ་བོར་སྟོན་པའི་དབང་དུ་བྱས་པ་ཡིན་ལ། །བྱེ་བྲག་དུམ་བུ་སྟོན་པའི་དབང་དུ་བྱས་ན། ལྟ་བ་ལེའུ་བཞིས་སྟོན་ཏེ། གཞལ་བྱ་གཏན་ཚིགས་གྲུབ་མཐའ་བཞི་གསུམ་མདོར་བསྟན་པ་དང་། ཐེག་པ་སྣ་ཚོགས་ཀྱི་ལྟ་བ་ལེའུ་གསུམ་པས་སྟོན། དངོས་གྲུབ་བསྒྲུབ་པའི་ལྟ་བ་ལེའུ་ལྔ་པས་སྟོན། ཚད་མ་བཀའ་གཞུང་གི་གཏན་ཚིགས་ལེའུ་བཅུ་གཅིག་པས། ལྟ་བ་དང་འབྲེལ་བའི་མཚན་ཉིད་གསུམ་མདོར་བསྟན་པ་ལེའུ་བཅུ་གཉིས་པས་སྟོན་ནོ། སྤྱོད་པ་སྟོན་པའི་ལེའུ་གསུམ་སྟེ། དངོས་གྲུབ་སྒྲུབ་པའི་སྤྱོད་པ་ལྔ་པས། ཚོགས་སྒྲུབ་ཀྱི་སྤྱོད་པ་བཅུ་གཅིག་པ་དང་བཅུ་གཉིས་པས་སྟོན་ནོ། །བཀོད་པ་དཀྱིལ་འཁོར་སྟོན་པའི་ལེའུ་དྲུག་སྟེ། ཞི་བ་རང་བཞིན་གྱི་དཀྱིལ་འཁོར་དང་པོས་སྐུའི་དཀྱིལ་འཁོར་དྲུག་པས། ཁྲོ་བོ་རང་བཞིན་གྱི་དཀྱིལ་འཁོར་བཅོ་ལྔ་པས། ལྷག་པ་ཏིང་ངེ་འཛིན་གྱི་དཀྱིལ་འཁོར་བཅུ་བདུན་པས། ཞི་ཁྲོའི་ལྷག་པ་གཟུགས་བརྙན་གྱི་དཀྱིལ་འཁོར་དགུ་པས། ཚོགས་ཀྱི་དཀྱིལ་འཁོར་བཅུ་གཅིག་པ་དང་བཅུ་གཉིས་པས་སྟོན་ནོ། དབང་སྟོན་པའི་ལེའུ་གཉིས་ཏེ། དབང་གི་དཀྱིལ་འཁོར་དེར་འཇུག་པ། སྣོད་དང་སྦྱར་ཏེ་བསྐུར་ཚུལ་སོགས་དགུ་པས། བསྐུར་ཐབས་དངོས་བཅུ་པས་སྟོན་ནོ། དམ་ཚིག་སྟོན་པའི་ལེའུ་གཅིག་སྟེ་བཅུ་དགུ་པའོ། །འཕྲིན་ལས་སྟོན་པའི་ལེའུ་གཉིས་ཏེ། དགུ་པར་མེའི་སྒོ་ནས་འཕྲིན་ལས་བྱ་ཚུལ་ཟུར་ཙམ་དང་། གཙོ་བོར་ཉི་ཤུ་པས་སྟོན་ནོ། སྒྲུབ་པ་ལེའུ་བརྒྱད་ཀྱིས་སྟོན་ཏེ། ལྔ་པས་བསྒྲུབ་པར་བྱ་བ་དངོས་གྲུབ་ཀྱི་རྣམ་གྲངས། སྒྲུབ་ཐབས་རིམ་པ་གཉིས་ཀྱི་བསྐྱེད་རིམ་ལ་ཞི་བའི་རྒྱུའི་ས་བོན་བཞི་པས། བསྐྱེད་བྱ་དཀྱིལ་འཁོར་དྲུག་པས། བསྐྱེད་པ་རྐྱེན་གྱི་སྔགས་བདུན་པས། ཕྱག་རྒྱ་བཞིས་རྒྱས་གདབ་པ་བརྒྱད་པས། བཅུ་དྲུག་པས་ཁྲོ་བོས་བསྐྱེད་སྔགས། བཅུ་བདུན་པས་བསྐྱེད་བྱ་ཁྲོ་བོའི་དཀྱིལ་འཁོར་སྟོན་ནོ། །རྫོགས་རིམ་ནི་ལེའུ་བཅུ་གསུམ་པས་སྟོན་ནོ། །ཏིང་ངེ་འཛིན་ནི་མཚན་བཅས་བསྐྱེད་རིམ་ནས་འབྱུང་ཞིང་མཚན་མེད་ལྟ་བ་དང་འབྲེལ་ལོ། མཆོད་པ་སྟོན་པའི་ལེའུ་ལྔ་སྟེ། ཞི་བ་ཕྱག་རྒྱའི་མཆོད་པ་བརྒྱད་པས། ལྷག་པ་ཏིང་ངེ་འཛིན་གྱི་མཆོད་པ་དགུ་པས། གླུ་ཡེ་ཤེས་རྒྱན་གྱི་མཆོད་པ་བཅུ་བཞི་པས། སྦྱོར་བསྒྲོལ་དང་དམ་རྫས་ཀྱི་མཆོད་པ་བཅོ་བརྒྱད་པས། ཁྲོ་བོ་གཏུམ་ཆེན་གྱི་བསྟོད་པ་ཉེར་གཅིག་པས་སྟོན་ནོ། སྔགས་སྟོན་པའི་ལེའུ་གཉིས་ཏེ། ཞི་སྔགས་བདུན་པ་དང་ཁྲོ་སྔགས་བཅུ་དྲུག་པས་སྟོན་ནོ། ཕྱག་རྒྱ་ནི་བརྒྱད་པ་གཅིག་པུས་སྟོན་ནོ། །དེ་ལས་ཀྱང་སིལ་བུས་སྟོན་ཚུལ་བརྗོད་ན་ཤིན་ཏུ་མང་ཡང་འདིར་མ་སྤྲོས་སོ། གསུམ་པ་འབྲས་རྒྱུད་ནི་སྦྱང་གཞི་བདེ་གཤེགས་སྙིང་པོའི་ཁམས་ཉིད་སྦྱང་བྱ་གློ་བུར་གྱི་དྲི་མས་སྒྲིབ་པ་དེ་སྦྱོང་བྱེད་ལམ་རྒྱུད་ཀྱིས་ལེགས་པར་སྦྱངས་པས། གཞིའི་ཆོས་ཉིད་རྣམ་པར་དག་པ་ཉིད་མངོན་དུ་གྱུར་ནས་ཐོབ་བྱ་གཉིས་པ་ཞིག་གུད་ནས་བཙལ་དུ་མེད་པར་གྱུར་པ་ལ་བྱ་སྟེ། སྒྱུ་འཕྲུལ་བྱེ་བྲག་བསྟན་པ་ལས། གྲུབ་པའི་རྣལ་འབྱོར་རྣལ་འབྱོར་ཆེ། །ལྷུན་གྲུབ་ཇི་བཞིན་མངོན་བྱས་པའང་། །བཏགས་པ་ཙམ་སྟེ་གཉིས་པ་མེད། །དེ་ཕྱིར་དེ་ལ་དེ་བརྗོད་དོ། ཞེས་སོ། །དེ་ལའང་དབྱེ་ན་ཁོག་གཞུང་ལས། །འབྲས་བུའི་ངོ་བོ་སྐུ་གསུང་ཐུགས། །ཡོན་ཏན་འཕྲིན་ལས་རྣམ་པ་ལྔ། །དེ་ཡང་སྐབས་ཀྱི་ལྔ་ལྔ་སྟེ། ཞེས་པ་ལྟར་འབྲས་ཆོས་ཉེར་ལྔ་ལས་དང་པོ་སྐུ་ལྔ་ནི། ཆོས་སྐུ་ལོངས་སྐུ་སྤྲུལ་སྐུ་མངོན་པར་བྱང་ཆུབ་པའི་སྐུ། མི་འགྱུར་རྡོ་རྗེའི་སྐུ་སྟེ་ལྔའོ། །གསུང་ལྔ་ནི། ཆོས་སྐུ་སྐྱེ་མེད་དོན་གྱི་གསུང་། །ལོངས་སྐུའི་དགོངས་པ་བརྡའི་གསུང་། །སྤྲུལ་སྐུ་ཚངས་པའི་དབྱངས་ཀྱི་གསུང་། །མངོན་བྱང་རིག་པ་བྱིན་རླབས་ཀྱི་གསུང་། །དབྱེར་མེད་རྡོ་རྗེའི་གསུངས་དང་ལྔའོ། །ཐུགས་ལྔ་ནི། ཆོས་སྐུའི་ཐུགས་ཆོས་དབྱིངས་ཡེ་ཤེས། ལོངས་སྐུའི་ཐུགས་མཉམ་ཉིད་ཡེ་ཤེས། སྤྲུལ་སྐུའི་ཐུགས་བྱ་གྲུབ་ཡེ་ཤེས། མངོན་བྱང་གི་ཐུགས་མེ་ལོང་ཡེ་ཤེས། །རྡོ་རྗེའི་ཐུགས་སོར་རྟོག་ཡེ་ཤེས་དང་ལྔའོ། །ཡོན་ཏན་ལྔ་ནི། རྣམ་པར་དག་པའི་ཞིང་ཁམས། རྒྱ་ཆད་བྲལ་པའི་གཞལ་ཡས་ཁང་། གསལ་ཞིང་དག་པའི་འོད་ཟེར། ཁྱད་པར་འཕགས་པའི་གདན་ཁྲི། དགྱེས་དགུར་སྤྱོད་པའི་ལོངས་སྤྱོད་དང་ལྔའོ། འཕྲིན་ལས་ལྔ་ནི། ཞི་རྒྱས་དབང་དྲག་ལྷུན་གྲུབ་དང་ལྔའོ། །དེ་དག་ཀྱང་བསྡུ་ན་རྟེན་སྐུ། བརྟེན་པ་ཡེ་ཤེས། མཛད་པ་འཕྲིན་ལས་དང་གསུམ་དུ་འདུ་བ་ལས། དབང་པོ་སྐུ་ལའང་གསུམ་མམ་ལྔ་ལས། ཆོས་སྐུ་ནི་སྤྲོས་པ་དང་བྲལ་བའི་དབྱིངས་དང་ལྷུན་གྱིས་གྲུབ་པའི་ཡེ་ཤེས་ཟུང་དུ་འཇུག་པའི་བདག་ཉིད་ཅན་ནོ། །ལོངས་སྐུ་ནི་དེའི་གདངས་མ་འགགས་པའི་རོལ་བ་གདུལ་བྱ་ས་བཅུ་པའི་སྣང་ངོར་ཞལ་ཕྱག་གི་རྣམ་པར་ཤར་བ། ཁ་སྦྱོར་བདུན་གྱི་བདག་ཉིད་ཅན་ནོ། སྤྲུལ་སྐུ་ནི་གདུལ་བྱ་མ་ངེས་པའི་སྣང་ངོར་གང་ལ་གང་འདུལ་དུ་སྤྲུལ་པ། ཐུགས་རྗེས་མཛད་པ་རླབས་ཆེན་པོ་སྣ་ཚོགས་སུ་སྟོན་པའི་བདག་ཉིད་ཅན་ནོ། དེ་ལྟར་གསུམ་གྱིས་སྟེང་དུ་དབྱིངས་ལ་ཡོན་ཏན་རྫོགས་པས་སམ། སྐུ་གསུམ་སྣང་ཆ་མ་འདྲེས་པའི་ཆ་ནས་མངོན་བྱང་དང་། ངོ་བོ་དབྱེར་མི་ཕྱེད་པའི་ཆ་ནས་རྡོ་རྗེའི་སྐུ་སྟེ་གཉིས་པོ་བསྣན་པས་སྐུ་ལྔའོ། འདིར་ཡང་ཀུན་མཁྱེན་ཆེན་པོས་ནི་སྐུ་མཚན་ཉིད་པ་ནི་ནང་གསལ་སྐུ་གསུམ་ཡིན་ལ། ཕྱིར་གསལ་གཟུགས་སྐུ་གཉིས་ནི་གདུལ་བྱར་སྣང་བ་ཙམ་ཏེ་བཏགས་པ་པའོ། །ཞེས་གསུངས་སོ། གཉིས་པ་བརྟན་པ་ཡེ་ཤེས་ནི། དེ་ལྟར་སྐུ་ལྔ་མངོན་དུ་གྱུར་པའི་ཚེ་ཚོགས་བརྒྱད་ཀུན་གཞི་དང་བཅས་པ་གནས་འགྱུར་བའི་ཡེ་ཤེས་ལྔ་སྟེ། དེ་ཡང་བྱེད་ལས་མཚུངས་པའི་དབང་དུ་བྱས་ཏེ། ཀུན་གཞི་དང་། ཀུན་གཞིའི་རྣམ་ཤེས་དང་། ཉོན་ཡིད་དང་། ཡིད་ཀྱི་རྣམ་ཤེས་དང་། སྒོ་ལྔའི་རྣམ་ཤེས་རྣམས་རིམ་པ་ལྟར། ཅིར་ཡང་མི་དམིགས་པ་ཆོས་དབྱིངས་ཡེ་ཤེས་དང་། གསལ་ལ་རྟོག་པ་མེད་པ་མེ་ལོང་ལྟ་བུའི་ཡེ་ཤེས་། འཁོར་འདས་ཀྱི་མཐའ་ལ་མི་གནས་པ་མཉམ་ཉིད་ཡེ་ཤེས། ཆོས་ཅན་མ་ལུས་པ་མངོན་སུམ་དུ་ས་ལེར་གཟིགས་པ་སོར་རྟོག་ཡེ་ཤེས། འགྲོ་དོན་མཛད་པ་ལ་ཐོགས་པ་མེད་པའི་འཕྲིན་ལས་འདུག་པ་བྱ་བ་གྲུབ་པའི་ཡེ་ཤེས་རྣམས་སུ་གནས་འགྱུར་པའོ། །དེ་དག་ཀྱང་བསྡུ་ན་ཆོས་དབྱིངས་ཡེ་ཤེས་ཇི་ལྟ་བ་མཁྱེན་པའི་ཡེ་ཤེས་དང་། ཕྱི་མ་བཞི་པོ་ཇི་སྙེད་མཁྱེན་པའི་ཡེ་ཤེས་སྟེ་གཉིས་སུ་འདུའོ། །གསུམ་པ་མཛད་པ་འཕྲིན་ལས་ནི། དེ་ལྟར་ཤེས་ཉོན་བག་ཆགས་དང་བཅས་པའི་སྒྲིབ་པ་རྣམས་ཡོངས་སུ་བཅོམ་པའི་སྤང་བ་ཕུན་སུམ་ཚོགས་པ་དང་། ཤེས་བྱའི་ཆོས་ཐམས་ཅད་མ་འདྲེས་པར་ཡོངས་སུ་མཁྱེན་པའི་རྟོགས་པ་ཕུན་སུམ་ཚོགས་པ་སྟེ། སྤངས་རྟོགས་མཐར་ཕྱིན་པའི་སྒོ་ནས་གདུལ་བྱ་སོ་སོའི་སྐལ་བ་དང་མཐུན་པར་འཕྲིན་ལས་ཀྱི་འཇུག་པ་ཟད་མི་ཤེས་པ་དུས་ལས་ཡོལ་བ་མེད་པར་འབྱུང་བའོ། །དེ་ལྟར་སྤངས་རྟོགས་ཕུན་སུམ་ཚོགས་པའི་འབྲས་བུ་གང་དེའི་ངོ་བོ་ཡང་ལམ་རིམ་ལས། སྐུ་དང་གསུང་དང་ཐུགས་ཉིད་དང་། །ན་ཏན་འཕྲིན་ལས་རྨད་བྱུང་བ། ཞེས་པ་ལྟར་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་རྣམས་ལའང་ཐུན་མོང་དུ་མ་གྱུར་བའི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་ཡོན་ཏན་གང་བྱུང་བ་དག་ལ་མངའ་བརྙེས་པ་ཞིག་གོ །དེས་ན་ངེས་ཚིགས་ཀྱང་ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། ཅེས་བླ་ན་མེད་པ་མཆོག་གི་འབྲས་བུ་དོན་དུ་གཉེར་བ་གང་ཞིག་གིས། ཡིད་ལ་བརྣག་པའི་བསྒྲུབ་བྱ་གྲུབ་ནས་ཡོན་ཏན་མཐའ་དག་མཐར་ཕྱིན་པར་གྱུར་པས་ན་འབྲས་བུའོ། །དེ་དག་ཀྱང་རང་གཞུང་ལེའུ་དྲུག་པ་ལས། གྲུ་ཡི་ཕྱག་རྒྱ་ཆེ་མཆོག་ནི། སོགས་ཀྱིས་སྟོན་པ་ཡིན་ནོ། །དེ་ཡང་སྤྱིར་རྩ་རྒྱུད་འདི་ལ་ལེའུ་ཉེར་གཉིས་ཡོད་པ་ལས། དེ་དག་སོ་སོའི་སྟོན་ཚུལ་གྱི་བབས་འདི་ལ་དམ་པ་གོང་མ་རྣམས་བཞེད་པ་ཅུང་ཟད་མི་མཐུན་པ་འགའ་ཞིང་སྣང་སྟེ། སློབ་དཔོན་སྒེག་པ་རྡོ་རྗེས་ནི་ལེའུ་གསུམ་པའི་སྟོད་ཡན་ཆད་ཀྱིས་སྤྱི་དང་ཁྱད་པར་གྱི་རྒྱུ་མཚན་རྫོགས་ནས། དེ་བཞིན་གཤེགས་པ་ཐམས་ཅད་ཀྱིས་ཆེད་དུ་བརྗོད་པ་འདི་བརྗོད་དོ། །ཞེས་པ་མན་ཆད་ཀྱི་ལེའུ་ཕྱེད་དང་བཅུ་དགུས་རྒྱུད་ཀྱི་དངོས་པོ་རྣམས་བསྟན་པར་བཞེད་ལ། བསྟན་པའི་བདག་པོ་ཟུར་པ་ཡབ་སྲས་ཀྱི་འཆད་སྲོལ་ཀྱང་ཕལ་ཆེར་ཞིག་འདི་ཁོ་ན་ལྟར་མཛད་འདུག་གོ །སློབ་དཔོན་ཆེན་པོ་བི་མ་ལས་ནི་ལེའུ་གཉིས་པས་ཡབ་ཡུམ་གྱི་གླེང་བསླང་བས་རྒྱུ་རྐྱེན་རྫོགས་ནས་དེ་ནས་གཉིས་སུ་མེད་པའི་བདག་ཉིད་ཆེན་པོས་ཞེས་པ་མན་ཆད་གྱིས་རྒྱུད་དོན་བསྟན་པར་བཞེད། ཀུན་གཟིགས་རོང་ཟོམ་པས་ནི། ལེའུ་དང་པོར་གླེང་གཞི། གཉིས་པར་ཀུན་བཟང་ཡབ་ཡུམ་གྱི་གླེང་བསླང་དང་། དེ་མ་རྟོགས་པའི་འགྲོ་བ་ལ་བྱང་ཆུབ་ཀྱི་སེམས་གཉིས་བསྐྱེད་པ། གསུམ་པར་དེའི་བྱིན་རླབས་ཐུབ་དྲུག་སྤྲོས་ཏེ་འདུལ་བ་བཞིས་འགྲོ་དོན་མཛད་ཚུལ་བསྟན་ནས། ལེའུ་བཞི་པ་མན་ཆད་ཀྱིས་རྒྱུད་ཀྱི་དངོས་པོ་བསྟན་པར་བཞེད་དོ། །ཞིན་དུ་དངོས་པོའི་ནང་གསེས་སྟོན་ཚུལ་ལའང་བཞེད་ཚུལ་འགའ་ཞིག་སྣང་ལ་དགོངས་པ་ལེན་ཚུལ་ཀྱང་ཐ་དད་པ་ལྟ་བུ་མང་ངོ་། །འོ་ན་འདིར་གང་གཟུང་བར་བྱ་ཞེ་ན། འདིར་ནི་དེ་དག་ཀུན་དགོངས་པའི་གནད་གཅིག་ཅིང་འགལ་མེད་དུ་བཟུང་ནས་དེའི་ཚུལ་གྱིས་འཆད་པར་བྱ་སྟེ། དེ་ཡང་སྤྱིར་གླེང་གཞི་གླེང་སློང་གི་རྒྱུ་མཚན་དང་། རྒྱུད་དོན་དངོས་པོ་རྣམས་བརྗོད་དོན་ཐ་དད་པར་གྱུར་བ་ཞིག་མ་ཡིན་ཏེ། དཔེར་ན་གླེང་གཞི་ལྟ་བུའི་སྐབས་སུ་ཕུན་ཚོགས་ལྔ་ལྡན་གྱི་དཀྱིལ་འཁོར་རྒྱས་པར་བཤད་པ་དེས་རང་བཞིན་གཟུགས་བརྙན་གྱི་དཀྱིལ་འཁོར་བསྟན་ཟིན་པ་དེ་བཞིན་དུ། ལམ་དུས་ཀྱི་ལྷག་པ་ཏིང་ངེ་འཛིན་གྱི་དཀྱིལ་འཁོར་ཡང་དེ་ལྟར་མ་འདས་ལ། མཐར་ཕྱིན་འབྲས་བུའི་དཀྱིལ་འཁོར་ཡང་འདི་ཉིད་མངོན་དུ་གྱུར་བ་ལས་གཞན་མེད་དོ། ཚུལ་དེས་མཚོན་ནས་གཟུགས་བརྙན་དང་ལྷག་པ་གཟུགས་བརྙན་གྱི་དཀྱིལ་འཁོར་སོགས་ཀྱང་འདི་ཉིད་ཀྱི་བརྡའ་དོན་རྟགས་ཀྱི་དབྱེ་བ་ལས་གཞན་མེད་པ་དེ་བཞིན་དུ་དངོས་པོ་འོག་མ་ཀུན་ལའང་སྦྱར་དུ་ཡོད་མོད། དེ་ལྟ་ན་འོག་ཏུ་ཞི་ཁྲོ་སོ་སོའི་སྐུ་དང་གསུང་གི་དཀྱིལ་འཁོར་བསྟན་པ་སོགས་རྒྱུད་ཀྱི་དངོས་པོ་རྣམས་སོ་སོར་ཕྲལ་ནས་གསུངས་པ་ལ་དགོས་པ་མེད་ཞིང་ཟློས་པར་འགྱུར་རམ་སྙམ་ན། དེ་ལ་དམ་པ་གོང་མ་རྣམས་འདི་སྐད་དུ། ལྷན་ཅིག་པའི་འཁོར་རྣམས་ཀྱིས་གླེང་གཞི་གླེང་སློང་ལ་བརྟེན་ནས་རྒྱུད་དོན་རྟོགས་ཀྱང་གོ་ཕྱེ་བའི་འཁོར་གྱི་དོན་དུ་གསུངས་སོ། །ཞེས་དང་། འགའ་ཞིག་གླེང་གཞི་གླེང་སློང་གིས་མདོར་བསྟན་ནས་གཞུང་གིས་རྒྱས་པར་བཤད་དོ། །ཞེའོ། །འགའ་ཞིག་གླེང་གཞི་གླེང་སློང་བཀའ་བསྡུ་བ་པོས་རྒྱུ་མཚན་དུ་བྱས་པ་ཡིན་གྱི་སྟོན་པའི་གསུངས་མ་ཡིན་ནོ། ཞེས་སོགས་འཆད་དོ། དེ་ཡང་འདི་ལྟར་ཤེས་པར་བྱ་སྟེ། སྤྱིར་སྟོན་པ་ཉིད་ཀྱིས་ཇི་ལྟར་མཁྱེན་པའི་དགོངས་དོན་ཐམས་ཅད་ཉིད་དང་གཉིས་སུ་མེད་པའི་དཀའི་བསྡུ་བ་པོས་དགོངས་པ་དང་བརྡ་ལ་བརྟེན་ནས་རྟོགས་པའི་ཚུལ་བསྟན་ཏེ། སླར་ལྷ་ཀླུ་མིའི་འཇིག་རྟེན་རྣམས་སུ་རང་རང་གི་སྐལ་བ་དང་མཐུན་པར་ཚིག་དང་ལེའུར་བྱས་ནས་སྒྲར་གྲགས་པའི་རྒྱུད་དུ་གསུངས་པ་དེའི་ཚེ་འདི་སྐད་ཆེད་དུ་བརྗོད་དོན་དང་། བཀའ་སྩལ་པའི་ཐ་སྙད་བཏགས་པ་ཙམ་ཉིད་ལས་ཚིག་དེ་རྣལ་མར་བཟུང་ན་ནི། དགོངས་བརྒྱུད་དང་བརྡ་རྒྱུད་དུ་བརྗོད་པ་དང་ཡང་འགལ་བར་མ་ཟད་རང་ཉིད་གནས་ལུགས་དེ་བཞིན་ཉིད་ཀྱི་དོན་དང་སྔར་འདྲིས་ཙམ་ཡང་མ་མྱོང་བའི་རང་མཚང་ལྷུག་པར་སྟོན་པར་ངེས་པས་ན། ཚུལ་འདི་ལ་གོ་བ་ལེགས་པོར་ཆགས་ཚེ་གཞུང་གི་སྐབས་སུ། རྒྱུད་ཀྱི་མཚན་སྟོན་པའི་གསུངས་དང་རྒྱུད་དོན་ཡིན་མིན་རྩོད་པ་དང་། གསང་བདག་སྟོན་དགོངས་ཡིན་མིན་དང་། འདི་སྐད་བཤད་པའི་དུས་ན་སོགས་ལ་བརྒལ་བརྟགས་ཀྱིས་རྩོད་པ་སོགས་ཀྱང་སྙིང་པོས་དབེན་པར་མཐོང་སྟེ། དོན་དེ་ཉིད་ཡིན་པས་མི་ཆོག་པར་སྟོན་པའི་གསུངས་རིལ་པོ་ཞིག་གུད་ནས་བཙལ་དགོས་ན་རང་རེ་གདུལ་བྱ་རྣམས་ནི་སྟོན་པའི་གསུངས་མཇལ་བའི་སྐལ་བ་དང་བྲལ་བ་ཉིད་དེ། ཅིའི་ཕྱིར་ན། གངས་ཅན་གྱི་ལྗོངས་འདི་ལྟ་བུ་ལ་མཚོན་ན་འདི་ཀའི་ཡིག་འབྲུ་ནས་གླེགས་བམ་གྱི་བར་ལོ་ཙཱ་བས་བྱས་ཤིང་གསུངས་པས་ན་དེ་ཀའི་གསུངས་སུ་ཐལ་ལ། དེ་བཞིན་དུ་གདུལ་བྱ་ཐ་དད་པ་རྣམས་ལའང་རང་རང་དང་མཐུན་པའི་སྤྲུལ་པ་རེ་སྣང་ནས་དེས་དེ་ཉིད་གདུལ་གྱི། སངས་རྒྱས་ཆོས་སྐུ་ནི་གདུལ་བྱ་སྤྱི་མཐུན་པར་དངོས་སུ་སྣང་ནས་ཆོས་མི་སྟོན་པའི་ཕྱིར་རོ། །ཚུལ་འདི་དང་འདི་ལྟ་བུ་ལ་བསམ་ཚེ་སྔ་འགྱུར་སྙིང་མའི་རིང་ལུགས་ལ་རྒྱུད་སྡེ་གཏེར་མ་དང་དག་སྣང་མ་རྣམས་ཀྱང་བཀར་བསྡུ་བ་འདི་ཡང་ཆོས་སྐད་གཞན་ལས་འཕགས་པའི་ཁྱད་ཆོས་ཅན་དུ་ངེས་པ་རྙེད་དོ། །དེས་ན་ལེགས་པར་བཤད་པ་ཚིགས་སུ་བཅད་པ་གཅིག་ནས་འགྲོ་ལ་ཕན་པར་འགྱུར་བའི་གཏམ་གླེང་བ་ཚུན་ཆོད་ཀྱང་དངོས་སམ་བརྒྱུད་ནས་རྒྱལ་བའི་བཀའ་ངེས་ཤིང་། རྒྱལ་བ་ནི་རྫུན་མི་སྨྲ་བའི་དཔེར་འོས་པའི་ཕྱིར་པཎ་ཆེན་བཻ་རོ་ཙ་ནས། མ་བདེན་དོན་དང་འགལ་ན་རྒྱལ་བའི་བཀའ་ཡང་ཞོག །བདེན་ཞིང་འཐད་ན་ལེགས་བཤད་བྱིས་པའི་ཚིག་ཀྱང་ཉོན། གསུངས་པ་འདི་ཆོས་དང་ཆོས་མིན་དབྱེ་བའི་ལྡེ་མིག་ཏུ་མཐོང་ངོ་། །དེ་བས་ན་ནང་གསེས་ཀྱི་དབྱེ་བ་ཕྲ་མོ་འདི་དག་ཀྱང་ཐ་སྙད་ཙམ་དུ་གང་ལྟར་བཏགས་ཀྱང་མི་འགལ་བ་ལ་དགོངས་ནས་དམ་པ་གོང་མ་རྣམས་ཀྱིས་བཤད་སྲོལ་ཚིག་རིས་ཐ་དད་པར་མཛད་པ་ཡིན་གྱི་གཅིག་ལེགས་ཤིང་ཅིག་ཤོས་གཞན་དུ་གྱུར་པ་ནི་གང་ཡང་མེད་དོ། དེས་ན་ཐ་སྙད་ཙམ་དུ་ནི་དེར་མ་ཟད་འགྲེལ་ཚུལ་གཞན་དག་བྱས་ན་ཡང་མི་འགལ་ལ། དོན་གྱི་ངོས་ནས་ནི་སྟོན་པ་ཉིད་ཀྱིས་འཁོར་རྣམ་པ་གཉིས་ལ་དགོངས་ནས་དུས་རིམ་པར་ཆོས་རྒྱས་བསྡུས་གཉིས་གསུངས་པ་ནི་འགའ་ཡང་མེད་དེ། སངས་རྒྱས་རྣམས་ནི་དུས་རྟག་པ་རྒྱུན་དུ་རང་བཞིན་གསང་བའི་སྙིང་པོའི་ཆོས་ཀྱི་འཁོར་ལོ་བསམ་གྱིས་མི་ཁྱབ་པའི་དབྱིངས་སུ་བསྐོར་བཞིན་པ་ལས་མ་འདས་ཀྱང་། གདུལ་བྱར་སྣང་ཚུལ་ནི་ཅིར་ཡང་མ་ངེས་པར་གྱུར་པས་ན། ད་ལྟར་རང་རེ་ལའང་གནས་འདིར་གསུངས་ཀྱིན་མེད་པར་མི་སེམས་ཏེ། སངས་རྒྱས་ཀྱི་ཐུགས་རྗེ་ལ་ཉེ་རིང་མེད་པས་ན་རང་རེ་གླས་སུ་མ་བོར་། འོག་མིན་ལ་མཐའ་དབུས་མེད་པས་ན་རང་རེའི་གནས་འདི་གུད་དུ་མ་ཆད། དུས་ལ་རྒྱུན་ཆད་མེད་པས་ན་རྩ་རྒྱུད་ལེའུ་ཉེར་གཉིས་ཞིག་སྔར་གསུངས་ནས་རྫོགས་ཟིན་པའང་མ་ཡིན། གསུངས་པ་དེ་དག་ཀྱང་སྒྲ་ཚིག་བརྗོད་པ་ཁོ་ན་ལ་བརྟེན་པའང་མ་ཡིན་པས་ན། དྲང་དོན་དུ་གསུངས་ངེས་དོན་དུ་མ་གསུངས་དང་། ༼མ་དཔེ་མི་གསལ༽ གསུངས་དོན་དམ་དུ་མ་གསུངས་དང་། དུམ་བུར་བསྒོམ་ནས་འགའ་ཞིག་གསུངས་འགའ་ཞིག་མ་གསུངས་དང་། སྔོན་གནས་ག་ཤེད་དུ་གསུངས་ཀྱིས་ཕྱིས་མ་གསུངས་ལ་སོགས་པའི་གཉིས་ཆོས་འགལ་འདུ་འབའ་ཞིག་སྨྲ་མི་དགོས་པའི་ཚུལ། ཚིག་ཙམ་ལ་མི་ཞེན་པར་ལམ་རྐྱེན་ཡི་གེའི་རྒྱུད་རང་ཉིད་ཀྱི་གཞུང་གི་འབྲུ་དོན་ལ་ཞིབ་དཔྱད་བྱས་པས་གོ་ནུས་པ་ཡིན་ནོ། །དེ་ཡང་རང་རང་གི་སྐལ་བ་དང་དབང་པོའི་ཁྱད་པར་གྱིས་མཐའ་གཅིག་ཏུ་མ་ངེས་ཀྱང་། ཅུང་ཟད་སྒྲོ་བཏགས་ཏེ་བཤད་ན་རང་ཉིད་ཀྱིས་རྒྱུད་དོན་གང་ནས་རྟོགས་པ་དེ་རང་ཐད་ནས་རྒྱུད་ཀྱི་དངོས་གཞིར་གྱུར་ནས་ལྷག་མ་རྣམས་ཀྱང་དེ་དང་རྗེས་སུ་མཐུན་པའི་མཐའ་དཔྱད་ཙམ་དུ་འགྱུར་གྱི། གཅིག་ལ་རྒྱུད་ཀྱི་དངོས་གཞིར་གྱུར་པ་ཐམས་ཅད་ལ་དངོས་གཞིར་འགྱུར་བ་དང་། གཅིག་ལ་གླེང་གཞི་གླེང་སློང་གི་རྒྱུ་མཚན་དུ་གྱུར་བ་ཀུན་ལ་དེ་ལྟར་འགྱུར་དགོས་པས་ཁྱབ་པ་ནི་མེད་དོ། །དཔེར་ན་འགའ་ཞིག་གི་མཚན་དོན་གྱི་སྟེང་ནས་རྒྱུད་དོན་རྟོགས་པའང་ཡོད། །འགའ་ཞིག་གིས་གླེང་གཞི་གླེང་སློང་གི་སྟེང་ནས་རྒྱུད་དོན་རྟོགས་པའང་ཡོད། འགའ་ཞིག་གིས་དབུ་ཞབས་རིལ་པོར་རྫོགས་པས་རྒྱུད་དོན་རྟོགས་པའང་ཡོད་པས་ན་གཅིག་ཏུ་མ་ངེས་པའི་ཕྱིར་རོ། །གཞན་དུ་འགའ་ཞིག་གིས་ཇི་ལྟར་བསླབ་ཀྱང་རེ་ཞིག་འདི་ཉིད་དངོས་ཀྱི་དོན་མི་རྟོགས་པ་ལྟར་གྱུར་ནས། དེ་དག་གི་ཁམས་དང་མཐུན་པར་འདི་ལས་འཕྲོས་ཏེ་སྣང་བ་དག་ལ་འཇུག་པའང་ཡོད་དེ། དེ་རྣམས་ཀྱིས་ནི་ཁྱབ་མཉམ་དུ་རྒྱུད་ཀྱི་དངོས་དོན་རྣལ་མ་རྟོགས་པར་མ་ངེས་ཏེ། ཇི་བཞིན་རྟོགས་པ་དང་། ཕྱོགས་ཙམ་རྟོགས་པ་དང་། ལོག་པར་རྟོགས་པ་སོགས་ཐ་དད་དུ་འགྱུར་བ་ཡིན་ལ། དེར་ཡང་བརྡ་སྤྲོད་པར་བྱེད་པ་བླ་མ་དགེ་བའི་བཤེས་གཉེན་ལ་སོགས་པའི་རྣམ་པར་ཡང་སྣང་བར་འགྱུར་རོ། །དེ་ལ་ཡང་འགའ་ཞིག་གིས་ནི་སངས་རྒྱས་སུ་མཐོང་། འགའ་ཞིག་གིས་ནི་བྱང་ཆུབ་སེམས་དཔར་མཐོང་། འགའ་ཞིག་གིས་ནི་སོ་སོའི་སྐྱེ་བོར་མཐོང་བ་སོགས་མཐོང་ཚུལ་མ་ངེས་པར་འགྱུར་ཞིང་། དེས་ཀྱང་འགའ་ཞིག་ལ་དགོངས་པ་གཏད་པས་རྟོགས་པར་བྱེད། འགའ་ཞིག་ལ་བརྡ་ཙམ་གྱིས་རྟོགས་པར་བྱེད། འགའ་ཞིག་ལ་གདམས་ངག་ཚིག་དང་ཡི་གེའི་ལམ་ནས་དངོས་སུ་གདམས་ནས་རྟོགས་པར་བྱེད་དོ། ཚུལ་དེ་དག་ཀྱང་རང་ཉིད་དག་པ་དང་མ་དག་པའི་སྣང་བ་ཙམ་ལས་སངས་རྒྱས་ལ་ནི་ཉེ་རིང་དང་གཉིས་སྣང་ཡོད་པ་མ་ཡིན་ནོ། །དེས་ན་ཁོ་བོ་ཅག་གིས་ཀྱང་གདོད་མའི་མགོན་པོ་ཀུན་ཏུ་བཟང་པོ་ལས་དངོས་སུ་ཉན་ནོ་ཞེས་བརྗོད་ཀྱང་མི་ནོངས་པ་འདི་བྱུང་བ་ཡིན་པས་ན་བརྒྱུད་པའི་བབས་འདི་ཡང་རང་རང་ལ་སྣང་ལུགས་ཙམ་དུ་ཟད་ཅིང་། བརྒྱུད་པ་དེ་ལས་བྱུང་བའི་ཆོས་ཀྱང་དཔེ་ཆ་བམ་པོ་རེ་ལ་ཕྱོགས་ཞེན་གྱིས་གདམས་ངག་བཟང་པོར་བཏགས་པ་ཙམ་མ་ཡིན་པར་གང་སྣང་ཐམས་ཅད་བརྡ་དང་རྟེན་འབྲེལ་གྱི་སྒོ་ནས་གནས་ལུགས་ཟབ་མོའི་དེ་བཞིན་ཉིད་གཏན་ལ་འབེབ་བྱེད་ཀྱི་རྒྱུད་ལུང་མན་ངག་ཏུ་ཡེ་ནས་གྲུབ་ཟིན་པ་དེ་ལ་བཟང་པོ་དང་ངན་པར་སུ་ཞིག་གིས་དབྱེ། དེ་དག་ནི་སྣང་ཡུལ་དྲུག་ཏུ་གཏོགས་པ་རྣམས་ཀྱང་བརྡ་སྟོན་བྱེད་ཀྱི་སངས་རྒྱས་སམ་བླ་མའི་དཀྱིལ་འཁོར་ལས་མ་འདས་ན་བརྒྱུད་པའི་ཆུ་འགོ་གང་ནས་འདྲེན། ཡིན་ལུགས་རྟོགས་པ་པོ་རང་གི་གནས་ཚུལ་ཀྱང་ཆོས་དང་བླ་མའི་ངང་དུ་རོ་གཅིག་ཅིང་དབྱེར་མེད་ན་སྟོན་འཁོར་གྱི་དབྱེ་བ་ཅི་ཞིག་གིས་འབྱེད་དེ་དགོད་བྲོ། གནད་འགགས་འདི་ལྟ་བུ་ལ་དགོངས་ནས་གྲུབ་པའི་ས་འཐོན་པོར་གཤེགས་པ་དག་གིས། སྣང་སྲིད་བླ་མའི་དཀྱིལ་འཁོར། གང་སྣང་ཡེ་ཤེས་ཆམ་བརྡལ། ཡུལ་སྣང་བརྡ་དང་དཔེ་ཆ། ཞེས་སྣང་སྲིད་དཔེ་ཆར་ཤར་ནས་མགྲིན་པ་ལོངས་སྤྱོད་འཁོར་ལོའི་རྩ་མདུད་གྲོལ་ཏེ། རྡོ་རྗེའི་གླུའི་བང་མཛོད་ཀྱི་སྒོ་ཕྱེས་པ་དེ་གྲུབ་པ་ཡིན་པས་ན་རང་རང་གིས་ལོག་རྟོག་གིས་བཏགས་པའི་གྲུབ་མཐའ་རེ་ལ་མཆོག་ཏུ་འཛིན་པ་ནི་འཆིང་བའི་ལས་མ་འདས་པའི་ཕྱིར། ཕ་ཅིག་དམ་པས། གང་ལ་ཞེན་པ་བྱུང་ན་དེ་ཡང་ཐོང་། ཅིས་ཀྱང་དགོས་པ་མེད་དོ་དིང་རི་པ། ཞེས་དང་རྗེ་བཙུན་མི་ལས། རྫོགས་པའི་སངས་རྒྱས་ཞལ་རྫུན་མཁན། ཆོས་དྲང་དོན་གྱི་བསླུ་ཁྲིད་གསུངས་གསུངས་ནས། ངེས་པའི་དོན་ལ་རྟོགས་དུས་མེད། །ཐ་སྙད་སྤོངས་ཤིང་རས་ཆུང་པ། ཞེས་དང་། ས་ཆེན་གྲགས་པ་རྒྱལ་མཚན་གྱིས། །ཆགས་ན་ལྷ་ལ་ཆགས་ཀྱང་འཆིང་། །འདོད་ན་སངས་རྒྱས་འདོད་ཀྱང་འཁྲུལ། ཞེས་སོགས་འཕགས་བོད་ཀྱི་མཁས་གྲུབ་རྣམས་ཀྱིས་རྡོ་རྗེའི་གླུར་ཡང་ནས་ཡང་དུ་བླང་བ་དང་། བྱེ་བྲག་ཏུ་རྫོགས་པ་ཆེན་པོའི་ཏནྟྲ་རྣམས་ལས་ཤིན་ཏུ་གསལ་བར་གསུངས་པ། ཀུན་མཁྱེན་ཆོས་ཀྱི་རྒྱལ་པོས་མཛོད་ཆེན་བདུན་ལ་སོགས་པས་ལེགས་པར་གཏན་ལ་ཕབ་ཟིན་པ་ལྟར། འཕགས་ཡུལ་གྲུབ་བརྒྱའི་སྤྱི་མེས་ས་ར་ཧའི་རྟོགས་བརྗོད་དོ་ཧ་རྡོ་རྗེའི་གླུ་ལ་སོགས་པ་ན་གསལ་བ་ཡིན་ནོ། །གཞན་དུ་འགའ་ཞིག་གིས་སྐུ་གསུམ་སྟོན་པའི་རྣམ་གཞག་འདི་དག་ལ་ཡིན་མིན་གྱི་རྩོད་པ་དང་། དེ་ལས་འཕྲོས་ཏེ་རྒྱུད་འདི་ཉིད་གསུངས་པའི་དུས་སྤྲུལ་སྐུ་ཤཱཀྱ་ཐུབ་པས་འཛམ་བུའི་གླིང་དུ་ཆོས་གསུངས་པའི་དུས་དང་མཉམ་པ་དང་། དེ་ལས་སྔ་བ་ལ་སོགས་རྩོད་མི་དགོས་པ་མང་པོ་ཞིག་རྩོད་ཀྱིན་འདུག་པ་ཡང་གནད་འདི་མ་རྟོགས་པས་ནོངས་ཏེ། ཇི་ལྟར་ན། དམ་པ་གོང་མ་རྣམས་ཀྱིས་ནི་རྒྱུད་དོན་ཇི་ལྟ་བ་བཞིན་མཁྱེན་ནས་འགྲོ་བའི་སྣང་ཚུལ་དང་མཐུན་པར་ཐ་སྙད་ཙམ་དུ་ཇི་ལྟར་བཏགས་ཀྱང་མི་འགལ་བའི་ཚུལ་འདི་གཟིགས་ནས་གསུངས་པ་ཡིན་མོད་དེ། །དེ་ལྟར་མ་རྟོགས་པ་རྣམས་ཀྱིས་ཚིག་ཙམ་དེ་སོ་སོར་བདེན་པར་བཟུང་ནས་རང་ཕྱོགས་བསྒྲུབ་ཕྱིར་འཁྲུལ་བས་འཁྲུལ་བ་བརྟགས་པ་འབའ་ཞིག་ལས་གཞན་གང་ཡང་མེད་དེ། སྤྲུལ་སྐུ་ཤཱཀྱ་ཐུབ་པ་ཉིད་ཀྱང་སྟོན་པ་ཀུན་ཏུ་བཟང་པོའི་རྣམ་པར་རོལ་བ་དེའི་དུས་ཀྱི་གདུལ་བྱ་འགའ་ཞིག་ལ་སྣང་ཞིང་། སྣང་ཚུལ་ཀྱང་ཐ་དད་པར་གྱུར་པའི་ཚུལ་གོང་དུ་སྐུའི་ཆོ་འཕྲུལ་གྱི་སྐབས་སུ་བརྗོད་ཟིན་པ་ལྟར་ལ་དེ་དང་གཉིས་སུ་མེད་པ་ད་ལྟ་རང་ཅག་ལ་སྣང་བཞིན་པའི་བླ་མ་དགེ་བའི་བཤེས་གཉེན་ལ་སོགས་པར་ཡང་གདུལ་བྱའི་མཐོང་སྣང་གཅིག་ཏུ་མ་ངེས་པའི་ཚུལ་བཤད་ཟིན་མ་རགས་པ་ལྟར་ན་སྐུ་གསུམ་གཅིག་དང་ཐ་དད་དུ་སུ་ཞིག་གིས་དབྱེ། འོན་ཀྱང་ཐ་སྙད་ཙམ་དུ་དབྱེ་བ་ནི་མི་འགལ་བའི་ཚུལ་བརྗོད་ཟིན་ཏོ། །དེ་བཞིན་དུ་དུས་ཀྱང་ཇི་སྟེ་དམིགས་ཀྱིས་བསལ་བ་ཞིག་དགོས་ན་རང་ཉིད་རྒྱུད་སྡེ་ཟབ་མོའི་དགོངས་དོན་དང་ནམ་མཇལ་བར་གྱུར་བ་དེའི་ཚེ་ནའོ། །ཞེས་བདག་འཆད་དོ། འོ་ན་སྔོན་གྱི་བྱུང་ཚུལ་ནས་བརྒྱུད་པ་འདྲེན་པར་འགྱུར་པ་མ་ཡིན་ནམ་ཞེ་ན། དེ་ནི་ལམ་རྐྱེན་ཡི་གེའི་རྒྱུད་འདི་ཉིད་གདུལ་བྱ་སྣང་ཚུལ་མཐུན་པ་འགའ་ཞིག་ལ་གསང་བའི་བདག་པོས་སྒྲར་གྲགས་པའི་རྒྱུད་དུ་ཇི་ལྟར་གསུངས་ཚུལ་ནས་འདྲེན་གྱི། རང་བཞིན་གསང་བའི་སྙིང་པོའི་རྒྱུད་ནི་བརྗོད་བྱེད་ཀྱི་ཡི་གེ་དེ་གཅིག་པུར་མ་ཟད་པ་འཆད་བཞིན་པའོ། །དེ་ལྟར་ན་འདིའི་བརྗོད་བྱ་ལ་མ་འདུས་པའི་རྒྱུད་དོན་ཞིག་གུད་ན་ཡོད་དམ་ཞེ་ན། དེ་ན་མ་མཆིས་ཏེ་ཡོད་པར་སུ་ཞིག་གིས་དམ་བཅས། དོན་གཏན་ལ་དབབ་བྱའི་ངོས་ནས་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཀྱི་གནས་ལུགས་འདིའི་བརྗོད་བྱར་ངེས་ཤིང་འདིར་འདུ་ལ། འདིས་གཏན་ལ་འབེབས་པར་ཡང་བྱེད་ཅིང་དེ་དག་རང་ཐད་རང་ཐད་ནས་གཏན་ལ་འབེབ་བྱེད་ཀྱི་ཐབས་དག་ཀྱང་འདི་ཉིད་རྟོགས་པའི་ཕྱིར་ཁོ་ནར་གྱུར་ཏེ་ཐབས་དེས་གྲུབ་དོན་ཡང་འདི་ལས་གཞན་དུ་མེད་པས་ན། རྒྱ་མཚོ་ལས། །སོ་སོར་སྟོན་པ་རྒྱ་མཚོའི་རྒྱུད། །འདིར་སྟོན་འདིས་སྟོན་འདི་ཕྱིར་སྟོན། །དོན་ཀུན་འདི་ལ་དྲིལ་བས་ན། །ལུང་གི་སྤྱིར་ཞེས་བྱ་བ་ཡིན། ཞེས་གསུངས་ཏེ། ཚུལ་དེ་ནི་ཁྱོད་ཀྱི་ཞེན་དོན་དུ་མ་སོང་བར་མ་ཟད་བདག་གིས་གོང་དུ་སྨྲས་པ་ཐམས་ཅད་ཀྱི་སྒྲུབ་བྱེད་གཏན་ཚིག་ཏུ་སོང་བས་ན། ཚིག་དང་དོན། བརྗོད་བྱ་དང་རྗོད་བྱེད་ལེགས་པོར་ཕྱེས་ནས་གོ་དགོས་པ་ཡིན་ནོ། དེས་ན་སྟོང་གསུམ་དར་ཡུག་ཆེན་པོའི་དཔེས་གསུངས་པ་ལྟར་གྱི་དོན་ལ་རང་དབང་བསྒྱུར་ནས་རྣམ་གྲངས་པའི་སྟོང་ཉིད་ཙམ་པོ་པ་ལ་ངེས་དོན་མཐར་ཐུག་ཏུ་མི་རེ་བར་བསྐལ་བ་སྐད་ཅིག་དང་སྐད་ཅིག་བསྐལ་བ། གཅིག་དུ་མ་དང་དུ་མ་གཅིག་ཏུ་རུང་བར་ཡིན་མིན་ཏུ་རྩོད་པ་ཐམས་ཅད་འཁྲུལ་རྟོག་གི་འཁོར་ལོར་མཐོང་སྟེ། ཅི་ཡང་མིན་ལ་ཅི་ཡང་ཡིན་པའི་ཆོ་འཕྲུལ་ཆེན་པོ། སངས་རྒྱས་རྣམས་ཀྱི་ཐུགས་ཀྱི་གསང་བ་བསམ་གྱིས་མི་ཁྱབ་པ། དེ་ལ་སེམས་ཅན་ཀྱི་བཏགས་པའི་སྣང་ལུགས་ཀྱང་བསམ་གྱིས་མི་ཁྱབ་པ་སྟེ། བསམ་གྱིས་མི་ཁྱབ་པའི་དོན་ལ་བསམ་གྱིས་མི་ཁྱབ་པར་ལོངས་སྤྱོད་པའི་སྐལ་བ་དང་ལྡན་པ་ཨ་ལ་ལ། གཏམ་དེ་ཡང་སྒྲ་བརྙན་གྱི་རྗེས་སུ་སོང་བའི་ཕྱིར་རང་མཐོང་མངོན་རློམས་དང་ཡིན་མིན་གྱི་རྩོད་པ་ཡང་ནམ་མཁའི་པདྨོར་འདྲེན་སོང་ངོ་། །ད་དུང་ཡང་བླ་མ་དམ་པ་ཆོས་ཉིད་ཀྱི་བདེན་པ་ཇི་བཞིན་གཟིགས་པ་རྣམས་ཀྱི་གསུངས་གི་བདུད་རྩི་དྲི་མ་མེད་པ་རྣ་བར་སོན་པའི་རྗེས་སུ་ཡིད་ཉེ་བར་ཕྱོགས་པའི་གཏམ་གྱི་དགའ་སྟོན་གསར་བ་འགའ་ཞིག་ཅིར་ཡང་གླེང་དུ་ཡོད་ནའང་། ད་ནི་སྙིགས་མའི་སྐྱེ་བོ་ལོག་པར་རྟོག་པས་ཀུན་ཏུ་ནོན་པ་དག་ལ་ཕན་པ་ཆུང་བ་དང་། རང་ཉིད་ནི་གནས་འདི་ལ་སོམ་ཉི་ཅུང་ཟད་ཀྱང་མ་མཆིས་པའི་ཕྱིར་སྤྲོ་བར་མི་བྱའོ། །འོན་ཀྱང་དཔྱོད་ལྡན་རྣམས་ཀྱིས་ནི་སྤྱི་དོན་འདིའི་ཁོག་འབུབ་ཚུལ་དང་། སྐབས་སྐབས་སུ་འདི་འདྲའི་ཚིག་འགའ་ཞིག་ཐལ་བ་དག་ལ་དང་པོ་ཉིད་ནས་དགག་ཚིགས་ཀྱི་སྤྲོས་པ་བདག་གིར་མི་བགྱིད་པར། ས་བཅད་འགའ་ཞིག་གོ་ལྡོག་པ་ལྟར་བྱས་པ་དང་། བརྗོད་དོན་ཐ་དད་པ་ལྟ་བུར་སྣང་བ་འགའ་ཞིག་འགལ་མེད་དུ་ཕྱོགས་རེར་བསྡུས་ནས་བཤད་པ་དག་ལ་ཞིབ་ཏུ་དཔྱད་པས་ཀྱང་འཁྲིག་ཚུད་པར་འགྱུར་བ་ཡིན་ནོ། །རྒྱུ་མཚན་དེ་དག་གི་ཕྱིར་འདིར་ཡང་སྤྱི་དོན་གྱི་སྐབས་འདིར་རྒྱུད་དབུ་ཞབས་ཀྱི་དོན་མཐའ་དག་གླེང་གཞི་གླེང་སློང་གི་ཁོང་ནས་རྒྱུད་བྱུང་ཚུལ་གྱི་ལོ་རྒྱས་ལྟར་བཤད་ནས། གཞུང་དོན་གྱི་སྐབས་སུ་དབུ་ཞབས་མཐའ་དག་གི་དོན་གདུལ་བྱའི་ཉམས་ལེན་ལྟར་འཆད་པར་འགྱུར་ལ། དེ་གཉིས་ཀྱང་བརྗོད་དོན་མི་འགལ་བར་གཅིག་ཏུ་བསྡུ་བར་བྱ་སྟེ། དེ་ཡང་འདི་ལྟར་རྒྱུད་དོན་རྟོགས་པར་འགྱུར་བའི་རྒྱུ་རྐྱེན་ཚོགས་པ་གླེང་གཞི། དེ་ལས་བརྡ་ཐབས་རྟེན་འབྲེལ་གྱིས་སམ་དངོས་སུ་ཉན་བཤད་བགྱིད་པ་གླེང་སློང་། དེའི་མཐུས་དོན་གྱི་ཡིན་ལུགས་རྟོགས་པར་གྱུར་བ་རྒྱུད་དོན་སྟེ། དང་པོ་གྲུབ། དེ་ཉིད་རང་གིར་བྱས་པ་གདམས་ངག་གཏད་དེ་དེ་ལས་རྗེས་འཇུག་ལའང་ཉམས་སུ་ལེན་རྒྱུ་གཞན་མེད་པས་གཉིས་པ་གྲུབ། དེ་གཉིས་ཀ་རྒྱུད་གཅིག་གི་སྟེང་ན་གནས་པས་གསུམ་པ་གྲུབ་བོ། །དེ་དག་གིས་དམ་པ་གོང་མ་རྣམས་ཀྱིས་བཞེད་ཚུལ་མཐའ་དག་དགོངས་པའི་གནད་གཅིག་ཏུ་འབབ་ཚུལ་གྱི་དོགས་གཅོད་ཅུང་ཟད་བགྱིས་ནས། ད་ནི་རྒྱུད་དོན་གཞི་ལམ་འབྲས་བུ་གསུམ་པོ་དེ་ལ་རྒྱུད་ཅེས་བྱ་བའི་དོན་འཆད་པར་བྱ་སྟེ། དེ་ཡང་རྡོ་རྗེ་རྩེ་མོ་ལས། འབྲེལ་དང་མ་ཚངས་མེད་ཕྱིར་དང་། །ཕུན་སུམ་ཚོགས་པའི་རྒྱུད་ཅེས་བྱ། ། ཞེས་གསུངས་པ་ལྟར་རྒྱུན་མ་ཆད་པར་འབྲེལ་བ་དང་། དངོས་གྲུབ་བསྒྲུབ་པའི་ཡན་ལག་མ་ཚང་བ་མེད་པ་དང་། ཕུན་སུམ་ཚོགས་པའི་ཡན་ལག་ཐམས་ཅད་དང་ལྡན་པས་ན་རྒྱུད་ཅེས་བྱ་སྟེ། དེ་ལའང་དབྱེ་ན་དོན་གྱི་སྒོ་ནས་དབྱེ་བ་གཞི་ལམ་འབྲས་གསུམ་དང་། ཚིག་གི་སྒོ་ནས་དབྱེ་བ་སྒྲར་སྣང་བའི་རྒྱུད། སྒྲར་གྲགས་པའི་རྒྱུད། བརྡར་གྱུར་བའི་རྒྱུད་དང་གསུམ་སྟེ། ཚིག་དོན་བསྡོམ་པས་དྲུག་གོ །ལྟ་བ་དང་སྤྱོད་པའི་སྒོ་ནས་དབྱེ་ན་སྤྱོད་པ་གཙོ་བོར་སྟོན་པ་བྱ་བའི་རྒྱུད། དེ་ལའང་དངོས་དང་། བྱེ་བྲག་གི་རྒྱུད་དམ་ཆ་མཐུན་གྱི་རྒྱུད་གཉིས། ལྟ་བ་གཙོ་བོར་སྟོན་པ་རྣལ་འབྱོར་གྱི་རྒྱུད་དེ་ལའང་དངོས་དང་རྣལ་འབྱོར་ཆེན་པོའམ་རྣལ་འབྱོར་བླ་མེད་ཀྱི་རྒྱུད་གཉིས་སྟེ་བཞིའོ། །དེ་ལས་བླ་མེད་ལའང་བསྐྱེད་པ་སྐུའི་རྒྱུད་བྱིན་ཆེ་བར་སྟོན་པ་མ་ཧཱ་ཡོ་ག རྫོགས་པ་གསུང་གི་རྒྱུད་ཞལ་གསལ་བར་སྟོན་པ་ཨ་ནུ་ཡོ་ག རྫོགས་པ་ཆེན་པོ་ཐུགས་ཀྱི་རྒྱུད། བསྐྱེད་རྫོགས་གཉིས་སུ་མེད་པར་སྟོན་པ་ཨ་ཏི་ཡོ་ག་སྟེ་གསུམ་དུ་དབྱེ་བས་རྒྱུད་སྡེ་དྲུག་ཏུའང་འགྱུར་རོ། །རྩ་བ་དང་ཡན་ལག་གི་སྒོ་ནས་དབྱེ་ན་རྒྱུད་འདི་ཉིད་ལྟ་བུ་རྩ་བའི་རྒྱུད། རྒྱུད་ཕྱི་མ་ལྟ་བུ་ཕྱི་མའི་རྒྱུད། བཤད་རྒྱུད་སྡེ་བཞི་ལྟ་བུ་བཤད་པའི་རྒྱུད། བཤད་རྒྱུད་རྒྱས་པ་ལྟ་བུ་རྟོགས་པ་༼མ་དཔེ་མི་གསལ༽རྟོགས་པའི་རྒྱུད་དེ་བཞིའོ། །དེ་དག་ལས་དོན་གྱི་སྒོ་ནས་དབྱེ་བ་གསུམ་ནི་རྒྱུད་ཀྱི་དབྱེ་བ་དངོས་ཡིན་ལ། གཞན་རྣམས་ནི་ལམ་རྐྱེན་ཡི་གེའི་རྒྱུད་ཀྱི་དབྱེ་བར་གཏོགས་སོ། །དེས་ན་གཞི་དང་ལམ་ཤེས་བྱ་ཤེས་བྱེད་དུ་འབྲེལ་ཞིང་གཞི་ལ་ཤེས་བྱའི་ཡོན་ཏན་ཚངས་ཏེ་ལམ་ལ་ཤེས་བྱེད་ཀྱི་ཡོན་ཏན་ཚངས་བ་ཞིག་གོ །དེ་བཞིན་དུ་འབྲས་བུ་དང་ལམ་ཐོབ་བྱ་འཐོབ་བྱེད་དུ་འབྲེལ་ཏེ་འབྲས་བུ་ལ་ཐོབ་བྱའི་ཡོན་ཏན་ཚངས་ཤིང་ལམ་ལ་བགྲོད་བྱེད་དམ་འཐོབ་བྱེད་ཀྱི་ཡོན་ཏན་ཚངས་པའོ། །འབྲས་བུ་དང་གཞི་ངོ་བོ་བདག་གཅིག་གིས་འབྲེལ་ཏེ་གཞི་ལ་མངོན་དུ་འགྱུར་བྱ་ངོ་བོའི་ཡོན་ཏན་སྐུ་དང་ཡེ་ཤེས་ཐམས་ཅད་ཚངས་ཤིང་། འབྲས་བུ་ལ་དེ་ཉིད་མངོན་དུ་གྱུར་པའི་ཡོན་ཏན་ཚངས་པའོ། །དེ་དང་མཚུངས་པར་ལམ་རྐྱེན་ཡི་གེའི་རྒྱུད་རྣམས་ཀྱང་རང་རང་གི་ཐད་ནས་ཚིག་དང་དོན་དུ་འབྲེལ་བསམ། གཞི་འབྲས་དང་ཤེས་ཐོབ་ཀྱི་རྐྱེན་དུ་གྱུར་པས་འབྲེལ་ཏེ་རང་གི་ངོས་ནས་ལམ་གྱི་བླང་དོར་ཐམས་ཅད་སྟོན་པར་བྱེད་བའི་བརྡར་གྱུར་པའི་ཡོན་ཏན་དང་། ལམ་གནད་རྟོགས་པར་བྱེད་པའི་བྱིན་རླབས་དང་ལྡན་པ་ཞིག་གོ །དེས་ན་རྒྱུན་ཆགས་ཤིང་འབྲེལ་བ། གཞིའམ་རྒྱུའི་རྒྱུད། ཐབས་སམ་ལམ་གྱི་རྒྱུད། མངོན་གྱུར་འབྲས་བུའི་རྒྱུད་དེ་གསུམ་གྱི་མཚན་ཉིད་དང་ལྡན་པ་ཞིག་སྟེ། རྒྱུད་ཕྱི་མ་འགོས་འགྱུར་ལས། རྒྱུད་ནི་རྒྱུན་ཆགས་ལ་བྱ་སྟེ། ཐབས་དང་རྒྱུ་ལས་འབྲས་བུའོ། །ཞེས་སོ། །དེ་ལྟར་ཐུགས་ཀྱི་ཆོ་འཕྲུལ་གཞི་ལམ་འབྲས་བུའི་རྒྱུད་དོན་ཐམས་ཅད་སྟོན་པ་ཀུན་ཏུ་བཟང་པོ་ཉིད་ཀྱིས་ཇི་ལྟར་མཁྱེན་པ་བཞིན། ཉིད་དང་གཉིས་སུ་མེད་པའི་འཁོར་རྒྱལ་བ་རིགས་ལྔ་རྒྱལ་སྲས་སེམས་དཔའ། འཇོམས་བྱེད་ཁྲོ་བོ་དང་བཅས་པའི་སྔོན་བྱུང་དངོས་ལྔའི་གཏན་ཚིགས་ལ་བརྟེན་ནས་རྟོགས་པར་མཛད་པའི་ཚུལ་བསྟན་པ་ལ་རྒྱལ་བ་དགོངས་བརྒྱུད་ཀྱི་བླ་དྭགས་བཏགས་པའོ། །འོ་ན་ལམ་རྐྱེན་ཡི་གེའི་རྒྱུད་འདི་ཡང་ཐུགས་ཀྱི་ཆོ་འཕྲུལ་ཡིན་ནམ་ཞེ་ན། འདི་ནི་གསུམ་གའི་ཆར་གཏོགས་ཏེ། ཡི་གེའི་གཟུགས་སུ་གྲུབ་པ་སྐུ་ཉིད་གསུང་གི་ཕྱག་རྒྱར་སྤྲུལ་པ་ཞེས་བྱ་སྟེ་སྐུའི་ཆོ་འཕྲུལ། དེ་ལ་དོན་གྱི་ཡིན་ལུགས་ཐམས་ཅད་བརྡའི་སྒོ་ནས་སྟོན་པར་བྱེད་ནུས་པའི་བྱིན་རླབས་དང་ལྡན་པ་ནི་གསུངས་ཤིང་ཐུགས་སུ་འཕྲུལ་བ་ཞེས་བྱ་སྟེ་གསུང་གི་ཆོ་འཕྲུལ་དེའི་མཐུས་དོན་གྱི་གནས་ལུགས་ཀྱི་ལྟ་བ་བཞིན་གཏན་ལ་ཐེབས་ནས་དངོས་སུ་ཚིག་ཏུ་བརྗོད་པའམ། འབྲས་བུ་མངོན་དུ་འབྱིན་ནུས་པ་ནི་ཐུགས་ཉིད་སྐུ་དང་གསུང་དུ་འཕྲུལ་བ་ཞེས་བྱ་སྟེ་ཐུགས་ཀྱི་ཆོ་འཕྲུལ་ལོ། །དེས་ན་ཆོ་འཕྲུལ་གསུམ་དང་རྗེས་སུ་འབྲེལ་བའི་རྒྱུད་དོན་ཚིག་དང་བཅས་པ་རྣམས་གདམས་གཏད་གྱི་ལེའུ་སྟེ་ཉེར་གཉིས་པ་སྟོན་པ་ལྟར། གདམས་པ་གཏད་ཡུལ་གསུམ་གྱི་དང་པོ་བཀའི་བསྡུ་བ་པོ་གསང་བའི་བདག་པོ་རྡོ་རྗེ་འཛིན་ནམ། ལག་ན་རྡོ་རྗེས་དྲི་བ་དྲིས་ལན་ལ་མ་ལྟོས་པར་རྗེས་འཇུག་ཚུལ་ལྔའི་གཏན་ཚིགས་ཀྱིས་གཏན་ལ་ཕབ་ནས་བཀའ་བསྡུ་མཛད་པ་ཡིན་ཏེ། ཁོག་གཞུང་ལས། གསང་བདག་ཕྱག་ན་རྡོ་རྗེ་ཡིས། །ཐུན་མོང་མ་ཡིན་ངེས་པའི་རྒྱུད། །དྲིས་ལན་མི་མངོན་དོན་གྱིས་བསྡུས། །བྱིན་རླབས་མི་ཡུལ་གྲགས་པ་ཡིན། ཞེས་སོ། །དེ་ནས་ཀྱང་ཚིག་ལྔའི་གཏན་ཚིགས་ཀྱིས་སྒྲར་གྲགས་པའི་རྒྱུད་དུ་གསུངས་པ་ལའང་དཔྱད་པས་དོན་གོ་བ་དང་། དཔྱད་པ་ལ་མ་ལྟོས་པར་གོ་བ་གཉིས་སུ་ཡོད་པའི་ཚུལ་ལྟ་བའི་སྐབས་སུ་བརྗོད་ཟིན་ཏོ། །དེ་ལ་ཡང་འགའ་ཞིག་འདི་སྙམ་དུ། །འོ་ན་གསང་བའི་བདག་པོ་ལ་སོགས་པའི་སྤྲུལ་པ་དག་གིས་འཇིག་རྟེན་གྱི་ཁམས་སུ་སྒྲར་གྲགས་པའི་རྒྱུད་དུ་གསུངས་པ་ལས། །རྒྱལ་བ་དགོངས་བརྒྱུད་ཀྱི་སྐབས་སུ་སྒྲ་ཚིག་དང་ཡི་གེར་ཡོངས་སུ་མ་གྲགས་ན། ཁྱོད་ཀྱི་དགོངས་བརྒྱུད་ཀྱི་ཁོང་ནས་ལམ་རྐྱེན་ཡི་གེའི་རྒྱུད་ཀྱི་དོན་ཐམས་ཅད་བཤད་ཟིན་པ་འགལ་བ་མ་ཡིན་ནམ་སྙམ་ན། འདི་ལྟར་སྤྱིར་དེའི་དུས་སུ་དགོངས་པ་དང་བརྡས་སྒོ་ནས་དོན་རྟོགས་པར་མཛད་པ་ལ་སྒྲ་ཚིག་གི་ཐ་སྙད་བཏགས་པ་ཙམ་ནི་མི་འགལ་བའི་ཚུལ་ལམ་རིམ་ལས། །ངོ་བོ་སྣང་ཚིག་རང་སྣང་ཚིག ལ་སོགས་པ་གང་དུ་ཚིག་ལྔའི་གཏན་ཚིགས་ཀྱི་སྐབས་སུ་བཤད་ཟིན་པ་ལྟར། ནང་གསལ་སྐུ་གསུམ་གྱི་གསུངས་ལའང་ཚིག་གི་ཐ་སྙད་སྦྱར་པ་ཡིན་ལ། ཡི་གེ་ཡང་སྒྲར་སྣང་བའི་ཚུལ་དུ་གྲུབ་ཚུལ་གསུང་གི་ཆོ་འཕྲུལ་གྱི་སྐབས་སུ་བརྗོད་ཟིན་པ་ལྟར་ཡིན་ཏེ། དེས་ན་དེ་ཉིད་དུ་དགོངས་པ་དང་བརྡའི་སྒོ་ནས་གཏན་ལ་ཕབ་པ་ཡང་རྒྱུད་དོན་འདི་ཉིད་ལས་མི་འདའ་ལ། འདིར་གང་བཤད་ནས་གཏན་ལ་ཕབ་པ་ཡང་དེ་ཡི་དུས་ཀྱི་རྒྱུད་དེ་ལས་མི་འདའ་པའི་ཕྱིར་འགལ་བའི་གཞི་མ་གྲུབ་བོ། །འདི་ཡན་ཆད་ཀྱི་རྒྱལ་བ་དགོངས་བརྒྱུད་ཀྱི་ཁོང་ནས་རྒྱུད་ཀྱི་སྤྱི་དོན་ལེགས་པར་བཤད་ཟིན་ཏོ། །གཉིས་པ་རིག་འཛིན་རིག་པའི་བརྒྱུད་པ་ལའང་གཉིས་ལས། དང་པོ་རིག་འཛིན་མི་མ་ཡིན་གྱི་བརྒྱུད་པ་ནི། རིགས་གསུམ་སེམས་དཔའ་སོ་སོ་ནས་རྒྱུད་ཀྱི་རྒྱལ་པོ་འདི་དང་འདི་ལས་འཕྲོས་པའི་མདོ་རྒྱུད་རྣམས་ལྷ་ཀླུ་གནོད་སྦྱིན་གྱི་གནས་ཐ་དད་དུ་གསུངས་པའི་བརྒྱུད་ཚུལ་ཏེ། དེ་ཡང་སོ་སོ་ནས་ལྟ་སྒོམ་སྤྱོད་པའི་ཕྱོགས་བཟུང་ཚུལ་འཆད་དུ་ཡོད་ནའང་། འདི་གདུལ་བྱ་རང་གི་སྐལ་བ་དང་མཐུན་པར་འཇམ་དཔལ་གཞོན་ནུ་མཛེས་པའི་སྐུ་དང་ལྡན་པ་དེས། ལྷ་རྣམས་ཀྱི་ལུས་དང་བསམ་པ་དང་མཐུན་པར་ལྷ་གྲགས་ལྡན་ཕྱོགས་སྐྱོང་ལ་བཤད། དེས་ཚངས་པ་རིན་ཆེན་འོད་འབར་ལ། དེས་ཚངས་པ་སྐྱེ་རྒུའི་བདག་པོ་ལ། དེས་ཚངས་པ་ཀུན་གྲོལ་ལ། དེས་ཚངས་པ་གཙུག་ཕུད་འཛིན་ལ། དེས་ལྷ་དབང་བརྒྱ་བྱིན་ལ། དེས་ལྷའི་རིག་འཛིན་ཚོམ་བུ་འབུམ་སྡེ་ལ་བཤད་པས། ལྷ་རྣམས་ཀྱང་བྱང་ཆུབ་སེམས་དཔའི་རིག་འཛིན་ཞིང་སངས་རྒྱས་ཀྱི་གདུང་སོབ་པར་གྱུར་ཏོ། །སྤྱན་རས་གཟིགས་བདུད་རྩི་སྨན་གྱི་སྐུ་དང་ལྡན་པ་དེས། ཀླུ་དུག་ཅན་རྣམས་ཀྱི་ལུས་སེམས་དང་མཐུན་པར་ཀླུ་རྒྱལ་མགྲིན་པ་ནག་པོ་ལ་བཤད། དེ་ནས་རིམ་པར། ཀླུ་མོ་ཁ་འདུལ་མ། ཀླུ་མོ་འདུལ་ཚང་མ། ཀླུ་ཡིད་འོང་དགའ་བ། ཀླུ་རྒྱལ་འཇོག་པོ། ཚོམས་པུ་འབུམ་སྡེ་རྣམས་སྔ་མ་ལྟར་གྱུར་ཏོ། ཕྱག་ན་རྡོ་རྗེ་འཇིགས་ཚུལ་བསྡིགས་པའི་སྐུ་དང་ལྡན་པ་དེས། གནོད་སྦྱིན་རྣམས་ཀྱི་ལུས་སེམས་དང་མཐུན་པར་གནོད་སྦྱིན་ཀུན་ཏུ་བཟང་པོ་ལ་བཤད། དེ་ནས་རིམ་པར། གནོད་སྦྱིན་གྲགས་ལྡན་ཕྱོགས་སྐྱོང་། གནོད་སྦྱིན་ལམ་ན་རྡོ་རྗེ། གནོད་སྦྱིན་སྐར་མདའ་གདོང་། གནོད་སྦྱིན་ཚོམ་བུ་འབུམ་སྡེ་རྣམས་གོང་བཞིན་གྱུར་ཏོ། །དེ་དག་མདོར་བསྡུས་ཙམ་ལས་རང་རེའི་བརྒྱུད་པ་འདི་ནས་འདྲེན་མི་དགོས་པས་མ་སྤྲོས་སོ། །གཉིས་པ་ཁྱད་པར་གྱི་བརྒྱུད་ཚུལ་རིག་འཛིན་མི་དང་མི་མ་ཡིན་གཉིས་ཀ་ལ་བརྒྱུད་པ་ནི། ད་ལྟའི་བསྐལ་པ་འདི་ནི་་གདུལ་བྱ་རྣམས་ཀྱི་སྣང་ངོར་ཆོས་སྐུ་ཀུན་ཏུ་བཟང་པོ་ཉིད་རྣམ་འདྲེན་སྟོང་གི་རྣམ་པར་འཕྲུལ་པ་ལས། རྣམ་འདྲེན་བཞི་པ་བདག་ཅག་གི་སྟོན་པ་ཤཱཀྱ་ཐུབ་པ་ཉིད་ཚེ་ལོ་བརྒྱ་བའི་དུས་སུ་བྱོན་ཏེ། རང་བཞིན་གསང་བའི་སྙིང་པོ་ལས་འཕྲོས་པའི་སྡེ་སྣོད་གསུམ་དང་། རྒྱུད་སྡེ་དྲུག་ལ་སོགས་པའི་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་དག་དགོང་ལོ་བརྒྱད་བཅུའི་བར་བསྐོར་ནས། མཐར་གཟུགས་སྐུ་དེ་ཉིད་མྱ་ངན་ལས་འདའ་བའི་ཚུལ་སྟོན་པར་ཉེ་བ་ན། འཁོར་རྣམས་བསྡུས་ཏེ། ཐེ་ཚོམ་ཆོད་ཅིག་ཅེས་བསྐུལ་པས། འཁོར་གྱི་ནང་ནས་རིག་འཛིན་གྱི་རྒྱལ་པོ་ཀུ་ཛ་ར་ཞེས་བྱ་བ་སྟན་ལས་ལངས་ཏེ། དྲི་བ་ལྔ་དྲིས་པའི་དང་པོ་གསང་སྔགས་ནམ་འབྱུང་ཞེས་པའི་ལན་དུ། སྤྱིར་བྱུང་ཚུལ་བཅུ་གཉིས་ཀྱིས་ཐེ་ཚོམ་འབྱུང་བར་ལུང་བསྟན་པ་ལས། ཁྱད་པར་ལུང་ཆེར་ངེས་པར་བསྟན་པའི་ཚུལ་ལས། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །མི་ལས་སྐལ་ལྡན་རིག་ཅན་ཏེ། །རྒྱལ་པོ་ཛ་ཞེས་བྱ་བ་ལ། །སྔོན་དུ་ལྟས་སྣང་བྱུང་གྱུར་ནས། །དྲག་ཤུལ་ཅན་ཞེས་བྱ་བའི་རྩེར། །གྲོགས་ཀྱི་སེམས་ཅན་དམན་པའི་ལུས། །ལང་ཀའི་བདག་པོ་ལ་སོགས་ལ། །ལག་ན་རྡོ་རྗེས་གནང་བར་འགྱུར། །ཞེས་སོགས་ལུང་བསྟན་ཏེ་མྱ་ངན་ལས་འདའ་བའི་ཚུལ་བསྟན་ཏོ། །དེ་ནས་ལོ་བརྒྱད་དང་བཅུ་ཚན་གཉིས་ཏེ་ཉི་ཤུ་རྩ་བརྒྱད་འདས་པ་ན། ལྷ་གྲགས་ལྡན་ཕྱོགས་སྐྱོང་། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། ཀླུ་རྒྱལ་འཇོག་པོ། མི་ལས་སྐལ་ལྡན་དགེ་སློང་ལི་ཙ་བཱི་དྲི་མེད་གྲགས་པ་སྟེ། དམ་པའི་རིགས་ཅན་དྲ་མ་ལྔ་ནང་དུ་མཉམ་པར་འཇོག་པ་ལས་ལངས་པ་ན། རང་རང་གི་མངོན་པར་ཤེས་པས་སངས་རྒྱས་མྱ་ངན་ལས་འདས་པ་དང་། གསང་སྔགས་བསྐུལ་བའི་དུས་ལ་བབས་པར་ཤེས་ནས། རྫུ་འཕྲུལ་གྱི་བྱ་བས་ཟ་ཧོར་གྱི་ཡུལ་དང་ཉེ་བ་ན་དཔལ་ཕྱག་ན་རྡོ་རྗེའི་ཞབས་ཀྱིས་བཅགས་པའི་རི་མ་ལ་ཡ་གནམ་ལྕགས་ཡོད་པའི་རྩེ་ཞེས་བྱ་བ། རྩེ་མོ་ན་རི་དྭགས་ཀྱི་རྒྱལ་པོ་སེང་གེས་འཁྲབ་པར་འགྱུར་བ། འདབ་ཤོད་ན་གཅན་གཟན་སྟག་གི་ཕྲེང་བ་ཡོད་པ། རྩ་བ་ན་སྡོང་པོ་ཤུན་པགས་དང་ལོ་འབྲས་སྲན་སྣ་ཚོགས་སུ་གྱུར་བའི་ཤིང་སྐྱེས་པ། ངོས་ལ་བྲག་དཀར་པོ་སེངྒེས་ཁྱི་ཚུགས་བཅས་པ་འདྲ་བ་ཡོད་པ་ཞིག་འདུག་པ་དེའི་རྩེར་འདུས་ནས། ཤིན་ཏུ་ཉམ་ཐག་པའི་ང་རོས། ཀྱེ་མ་ཀྱི་ཧུད་ཀྱེ་མ་ཀློང་། །སྟོན་པ་སྒྲོན་མེའི་འོད་ནུབ་ན། །འཇིག་རྟེན་མུན་པ་གང་གིས་སེལ། །ལ་སོགས་པའི་གདུང་ཚིགས་ཉེར་གཅིག་བཏོན་ཏེ་རྨག་ཆད་པར་ངུས་པས། ཕྱོགས་བཅུའི་སངས་རྒྱས་རྣམས་ཀྱིས་ཀྱང་གསང་སྔགས་གསུངས་པའི་ལུང་བསྟན་དུས་ལ་བབས་པར་མཁྱེན་ནས། གསང་བའི་བདག་པོ་ལག་ན་རྡོ་རྗེ་ལ་བསྐུལ་བས་དེ་མ་ཐག་རིགས་ཅན་ལྔ་ལ་གསང་བདག་དངོས་སུ་སྣང་བར་གྱུར་ཏོ། །སྣང་ནས་ཀྱང་ཆོས་སྟོན་པར་ཞལ་གྱིས་བཞེས་ཏེ་དེ་ཉིད་དུ་གསང་ཆེན་རྡོ་རྗེ་ཐེག་པའི་སྒྲོན་མ་བསམ་གྱིས་མི་ཁྱབ་པ་དག་འཇིག་རྟེན་གྱི་ཁམས་སུ་སྣང་བར་མཛད་དོ། །དེ་ལྟར་ཆོས་ཀྱི་འཁོར་ལོ་ཇི་སྙེད་ཅིག་བསྐོར་བ་རྣམས་སྲིན་པོ་བློ་གྲོས་ཐབས་ལྡན་གྱིས་ཚིག་ཏུ་བསྡུས་ཏེ། གསེར་ཞུན་མའི་ཤོག་གུ་ལ་བཻ་ཌཱུརྱཱ་ཞུན་མས་ཡི་གེར་བྲིས་ཏེ་རྒྱ་རང་ནན་དུ་བྱས་པ་དགོངས་པའི་རྩལ་བདུན་གྱིས་ནམ་མཁའ་ལ་མི་སྣང་བར་རྒྱས་བཏབ་བོ། དེའི་ཚེ་དེའི་བྱིན་རླབས་ཀྱིས་རྒྱུད་ཀྱི་གླེགས་བམ་རྣམས་དངོས་སུ་འཇིག་རྟེན་གྱི་ཁམས་སུ་ཇི་ལྟར་བབས་ཚུལ་ནི། ཀྲི་ཡའི་རྒྱུད་རྣམས་ཝཱ་རྭ་ཎ་སཱི་ལ་བབས། ཨུ་པ་ཡ་རྣམས་རི་བོ་བྱ་རྐང་ཅན་དང་བསིལ་བའི་ཚལ་དུ་བབས། ཡོ་ག་རྣམས་མེ་རི་འབར་བར་བབས། མ་ཧཱ་ཡོ་ག་རྣམས་རྒྱལ་པོ་ཛའི་ཁང་ཐོག་ཏུ་བབས། ཨ་ནུ་ཡོ་ག་རྣམས་རི་བོ་མ་ལ་ཡའི་རྩེ་དེ་གར་བབས། གནས་འདི་ལ་འདོད་ཚུལ་འགའ་ཞིག་འཆད་ཀྱང་དོན་ལ་སྔོན་བཅོམ་ལྡན་འདས་ལང་ཀའི་བདག་པོ་སྒྲ་སྒྲོགས་ཀྱི་བུ་མགྲིན་བཅུས་སྤྱན་དྲངས་ནས། བློ་གྲོས་ཆེན་པོས་ཞུས་ཏེ་ལང་ཀར་གཤེགས་པའི་མདོ་གསུངས་པའི་གནས་འཛམ་གླིང་ཤར་ལྷོ་མཚམས་ན་ཡོད་པ་དེ་ཡིན་ཞིང་། ཡུལ་དེ་ཀ་སྔོན་སྲིན་པོས་བཟུང་བས་ལང་ཀའི་ཡུལ་དང་། ཕྱིས་དེ་དཔོན་སེངྒེས་བཟུང་བས་སེངྒཱ་ལའི་གླིང་ཞེས་གྲགས། དེ་ན་ཡོད་པའི་རི་དེ་ལའང་མ་ལ་ཡ་གནམ་ལྕགས་འབར་བ་དང་། ཆོས་འཛིན་རིགས་ཀྱི་སྒྲུབ་གནས་སོགས་མིང་གི་རྣམ་གྲངས་དུ་མར་གྱུར་ཡང་དོན་ལ་འདི་ཉིད་ཡིན་པའི་ལུང་རིགས་དུ་མ་ཡོད་པས་ན་ལྷོ་ནུབ་སྲིན་པོའི་ཡུལ་དང་ནོར་བར་མི་བྱའོ། །དེ་བཞིན་དུ་ཨ་ཏི་ཡོ་ག་རྣམས་ཨོ་རྒྱན་དྷ་ན་ཀོ་ཤའི་གླིང་དུ་བབས། དེ་ལས་རྒྱུད་སྡེ་གཞན་རྣམས་ནི་ཡི་གེའི་གླེགས་བམ་དངོས་སུ་བབས་པ་ཡིན་ལ། ཨ་ཏི་ཡོ་ག་ནི་རྒྱལ་པོ་ཨུ་པ་ར་ཛ་དང་ཡུམ་སྣང་གསལ་འོད་ལྡན་གཉིས་ཀྱི་སྲས་མོ་སུ་དྷརྨའི་སྲས་རིག་འཛིན་དགའ་རབ་རྡོ་རྗེས་རྡོ་རྗེ་སེམས་དཔའ་ལས་དངོས་སུ་གསན་པ་ཡིན་ནོ། །གཞན་ཡང་སྟོན་པ་ཉིད་ཀྱིས་སྤྲུལ་པ་ཚད་མེད་པ་དང་བཅས་ཏེ་གནས་ཐ་དད་པར་གསུངས་པ་དང་། གོང་དུ་རིག་འཛིན་མི་མ་ཡིན་གྱི་རྒྱུད་པ་དྲངས་ཟིན་པ་ལྟར་ལྷ་ཀླུ་གནོད་སྦྱིན་གྱི་གནས་སོ་སོ་ནས་སླར་མི་ཡུལ་དུ་བརྒྱུད་པ་སོགས་མང་དུ་ཡོད་དེ། འདི་ལྟར་མ་ཧཱ་ཡོ་གའི་ནང་ཚན་ཐུགས་ཀྱི་རྒྱུད་གསང་བ་འདུས་པ་ལྟ་བུ་སྟོན་པ་ཉིད་རྡོ་རྗེ་འཆང་གི་རྣམ་པར་རོལ་པས་རྒྱལ་པོ་ཨིནྚ་བྷོ་ཏི་ཆེན་པོ་ལ་བཤད་པ་དང་། དཔལ་དུས་ཀྱི་འཁོར་ལོ་རྒྱལ་པོ་ཟླ་བཟང་ལ་གསུངས་པ་དང་། ལྷོ་ཕྱོགས་གྱད་ཡུལ་དུ་འཇམ་པའི་དབྱངས་སུ་སྤྲུལ་ནས་འཇམ་དཔལ་གྱི་ལེའུ་ཁྲི་དྲུག་སྟོང་སོགས་གསུངས་པ་དང་། བསིལ་བ་ཚལ་དུ་རིགས་གསུམ་མགོན་པོར་སྤྲུལ་ནས་ཀྲི་ཡའི་རྒྱུད་འགའ་ཞིག་གསུངས་པ་དང་། ཨོ་རྒྱན་གྱི་ཡུལ་གྷན་རྡོ་ལའི་དྲི་གཙང་ཁང་དུ་ཧེ་བཛྲ་དུ་སྤྲུལ་ནས་དགྱེས་པ་རྡོ་རྗེའི་སྐོར་གསུངས་པ་དང་། ཡུལ་ཉེར་བཞིར་རྡོ་རྗེ་འཆང་གི་རྣམ་པས་བདེ་མཆོག་འཁོར་ལོའི་སྐོར་གསུངས་པ་དང་། རི་མ་ལ་ཡར་གཤིན་རྗེ་གཤེད་དུ་སྤྲུལ་ནས་གཤིད་རྗེའི་རྒྱུད་ཁ་ཅིག་དང་། དུར་ཁྲོད་བརྒྱད་དུ་སྟོན་པ་ཧེ་རུས། སངས་རྒྱས་ཐོད་པ། རྡོ་རྗེ་གདན་བཞི། མ་ཧཱ་མཱ་ཡཱ་སོགས་གསུངས་པ་དང་། སྨྲེ་ཁྲོད་ཀྱི་གྲོང་ཁྱེར་དང་རི་བྱ་རྐང་ཅན་དུ་ནང་རྒྱུད་ཁྱད་པར་ཅན་འགའ་ཞིག་གསུངས་པ་རྣམས་སོ། །དེ་དག་ཀྱང་ཁ་ཅིག་ནི་མཁའ་འགྲོ་མ་དང་ལྷ་ཀླུ་རྣམས་ཀྱིས་སྤྱན་དྲངས་ཏེ་ཕྱིས་གྲུབ་ཐོབ་རྣམས་ཀྱིས་དེ་དག་གི་ཡུལ་ནས་བླངས། ཁ་ཅིག་ནི་དུས་དེ་ཉིད་ནས་མི་ཡུལ་དུ་བརྒྱུད་དོ། །ཡང་གནོད་སྦྱིན་གྱི་ཡུལ་ནས་བྱུང་བ། དཔལ་རྡོ་རྗེ་གུར་ལ་སོགས་པ་གནོད་སྦྱིན་གྱི་དེད་དཔོན་གསང་བ་པས། སློབ་དཔོན་མཐུ་སྟོབས་ར་ཛ་ལ་བཤད། སྲིན་པོའི་ཡུལ་ནས་བྱུང་བ་དཔལ་འབྱུང་བ་དང་དཔལ་དམ་པའི་རྒྱུད་སོགས། བྱང་སེམས་བློ་གྲོས་རྒྱ་མཚོས་གྲོང་ཁྱེར་དགའ་པ་ཅན་དུ་སློབ་དཔོན་ཨིནྜ་བྷི་དྷི་བར་མ་ལ་བཤད། གཤིན་རྗེའི་ཡུལ་ནས་བྱུང་བ་དགྲ་ནག་གི་རྒྱུད་ཁ་ཅིག་དང་། ཁ་ཐུན་ཟླ་གསང་ལ་སོགས་པ་སློབ་དཔོན་ལ་ལའི་བཛྲ་གྱིས་སྤྱན་དྲངས་ཏེ་འཇམ་དཔལ་བཤེས་གཉེན་ལ་བཤད་དོ། །དེ་དག་རྣམས་ཀྱང་རང་བཞིན་གསང་བ་སྙིང་པོ་ལས་འཕྲོས་ཏེ་གདུལ་བྱའི་ཁམས་དབང་དང་མཐུན་པར་ནམ་འདུལ་བའི་དུས་དེར་སྣང་བ་ལས་གཅིག་ཏུ་ངེས་པ་ནི་མེད་དོ། །དེས་ན་སངས་རྒྱས་ནི་རྟག་པར་འགྲོ་བའི་དོན་མཛད་ལ། བྱིན་རླབས་ཀྱི་བཀའ་ཡང་རི་དང་ཤིང་དང་། པདྨ་དང་དཔག་བསམ་གྱི་ཤིང་དང་། བུད་མེད་དང་། བུ་མོ་དང་། བྱ་དང་རི་དྭགས་ལ་སོགས་པ་ལས་ཀྱང་ཆོས་ཀྱི་སྒྲ་བྱུང་པ་དེ་བཀའ་ཡིན་པར་གསུངས་ན། ད་ལྟའང་རྒྱུད་མི་འབྱུང་པར་མི་སེམས་སོ། །དེ་ལ་ཁ་ཅིག་འདི་སྙམ་དུ། འོ་ན་དགོངས་འདུས་སུ། ངེས་པའི་ཐེག་པ་ཡོངས་མ་གསུངས། ཞེས་ཕྱིར་སུ་འབྱུང་བར་ལུང་བསྟན་པ་ལས། སངས་རྒྱས་ཤཱཀྱ་ཐུབ་པ་ཉིད་ཀྱི་ཞལ་བཞུགས་པའི་དུས་ཡན་ཆད་ལ་གསང་སྔགས་མ་གསུངས་པར་བཤད་པ་མ་ཡིན་ནམ་ཞེ་ན། དེ་ནི་འཇིག་རྟེན་གྱི་ཁམས་སུ་གསང་སྔགས་ཀྱི་སྒྲ་ཡོངས་སུ་མ་གྲགས་པ་ཙམ་ལ་དགོངས་ཀྱི། གཞན་དུ་ན་ངེས་པ་མེད་དེ། སྔོན་བསྐལ་པ་རྫོགས་ལྡན་གྱི་དུས་སུ་བྱ་རྒྱུད་དང་། གསུམ་ལྡན་གྱི་དུས་སུ་སྤྱོད་རྒྱུད། གཉིས་ལྡན་གྱི་དུས་སུ་རྣལ་འབྱོར་རྒྱུད་སོགས་གསུངས་པ་དང་། ཐུབ་པའི་དབང་པོ་ཉིད་ཀྱི་ཞལ་ནས་གསུངས་པ་ཡང་གོང་དུ་བརྗོད་པ་ལྟར་ངེས་པའི་ཕྱིར་རོ། །དེ་ལྟར་རྒྱུད་སྡེ་སྤྱིའི་བབས་ལུགས་ཅུང་ཟད་ཅིག་བཤད་པ་ལས། སོ་སོར་རྒྱས་པར་ཤེས་འདོད་པ་དག་གིས་ནི་རང་རང་གིས་བབས་ལུགས་ལས་རྟོགས་པར་བྱའོ། །འདིར་ནི་མ་ཧཱ་ཡོ་ག་གཙོ་བོར་གྱུར་པའི་རྒྱུད་སྡེ་སྒྱུ་འཕྲུལ་རྒྱལ་པོ་ཛའི་ཁང་སྟེང་དུ་ཇི་ལྟར་བབས་པའི་ཚུལ་བརྗོད་པར་བྱ་སྟེ། དེ་ཡང་འདི་ལྟར་གོང་དུ་བརྗོད་ཟིན་པའི་རི་མ་ལ་ཡ་དེ་གའི་ཤར་ལྷོ་ན་ཏྲི་ཤཾ་ཨ་སུ་ར་ཞེས་བྱ་བ་གནོན་སྦྱིན་གྱི་ཕུག་པ་ཡོད་དེ། ཕུག་པ་དེ་ནི་སྒོ་ཟླ་གམ་ལ་ངོ་མཚར་གྱི་རི་མོ་རང་བྱུང་བ། ཕུག་ན་རཏྣ་ཟུར་བརྒྱད་ལ་ཉི་ཟླའི་རི་མོ་རང་སྣང་བ། ཐོག་རིམ་གསུམ་དང་ལྡན་པ། སྟེང་ན་བྱ་ཀ་ལན་ཏ་ཀ་ཞེས་བྱ་བ་ཆོས་ཐམས་ཅད་ཐིག་ལེ་ཉག་གཅིག་ཏུ་སྒྲོགས་པར་བྱེད་པས་ཚངས་བཅས་པ། རྩ་བ་ན་བདུད་རྩིའི་ཆུ་མིག་དང་མདུན་ན་མེ་ཏོག་གི་སྣམ་བུ་ལ་སོགས་སྐྱེད་མོའི་ཚལ་ཉམས་དགའ་པར་བྱེད་པའི་ཡོན་ཏན་ཕུན་སུམ་ཚོགས་པ་དག་གིས་ཡོངས་སུ་བཏུད་པ། གང་ཟག་ལས་སྐལ་དང་ལྡན་པ་དག་གིས་བགྲོད་པར་འགྱུར་ཡང་། ཕལ་བ་རྣམས་ཀྱིས་ནི་ནམ་ཡང་ཕྱིན་པར་མི་འགྱུར་པའི་གནས་དེར། ས་ཧོ་རའམ་ཟ་ཧོར་གྱི་རྒྱལ་པོ་ཨུ་ཏ་ཛྙ་ནའི་སྲས་སྐལ་ལྡན་རྒྱལ་པོ་ཛཿ ཞེས་བྱ་བ་དེ་སྔགས་ཕྱི་རྒྱུད་ཀྱི་སྒྲུབ་པ་ལ་ནན་ཏན་སྙིང་པོར་བྱེད་ཀྱིན་ཡོད་པའི་སྐབས་ཤིག་ན་རྨི་ལྟས་ངོ་མཚར་བ་བདུན་རྨིས་ཏེ། དེ་ཡང་འདི་ལྟར། དང་པོ། རི་དེའི་རྩེ་མོར་དཔལ་ཕྱག་ན་རྡོ་རྗེ་བྱོན་ཏེ། སྐུའི་ཁྱོན་ལས་འོད་སྔོན་པོ་འཕྲོས་པས་འཇིག་རྟེན་ཐམས་ཅད་བསྲེགས་ནས་མི་སྣང་བར་བྱས། གསུང་གི་སྒྲ་འབྲུག་སྟོང་ལྡིར་བ་ལྟ་བུ་བསྒྲགས་པ་ཐོས། ཐུགས་ལས་རྡོ་རྗེ་འོད་འབར་པ་ཞིག་འཕྲོས་ནས་རྒྱལ་པོའི་ཐུགས་ཀར་ཐིམ། སྤྱི་པོ་དང་རྐང་མཐིལ་ལས་ཉི་ཟླའི་འོད་འབར་བ་རེ་འཕྲོས་ནས་རྒྱལ་པོ་རང་གི་སྤྱི་བོ་དང་རྐང་མཐིལ་དུ་ཐིམ་ནས་སྣང་སྲིད་ཐམས་ཅད་ལྟོ་བ་ནས་འཕྱོ་བ་རྨིས་སོ། །རྨི་ལྟས་གཉིས་པ་ནི་དེ་བཞིན་གཤེགས་པ་ཐམས་ཅད་ཆོས་ཀྱི་བགྲོ་བ་མཛད་ཅིང་ཉི་ཟླ་ལ་ཆིབས་ནས་ཆོས་ཀྱི་འཁོར་ལོ་བསྐོར་ཞིང་། སྲིད་གསུམ་ཁ་ལོ་གྱེན་དུ་བསྒྱུར་བ་ཞིག་རྨིས་སོ། །གསུམ་པ་ནི་ནམ་མཁའ་འོད་ལས་སྤྲིན་གསེར་གྱི་སྙིང་པོ་ཅན་གྱི་ཁ་ཏོག་ནི་འཐིབ། ཆོ་འཕྲུལ་འབྲུག་སྒྲ་གོ་བར་སླ་ཞིང་སྙན་པ་ཚིམ་པར་ནི་གྲགས་རཏྣ་སྣ་ཚོགས་ཀྱི་སྨུགས་པ་ནི་འཐིབས། རཏྣ་བཻ་ཌཱུརྱའི་འོད་ནི་ལྷུངས། སྣང་སྲིད་གསལ་གསལ་བའི་གློག་ནི་འཁྱུག རིན་པོ་ཆེའི་གླེགས་བམ་གྱི་ཆར་ནི་མངོན་པར་འབབས་པ་ཞིག་རྨིས་སོ། །བཞི་པ་ནི། ལོ་ཀ་སྟེ་འཇིག་རྟེན་གྱི་ཁམས་སུ་རཏྣ་འབར་བའི་སྒྲོན་མེ་སྦར་བའི་གང་བར་བྱས་པས་སྣང་སྲིད་ཀྱི་མུན་པ་ནི་བསལ། བདུད་རྩི་སྨན་གྱི་ཆར་བབས་པས་འགྲོ་བ་རྣམས་ཀྱི་གཅོང་རྙིང་ནི་སྦྱངས། སེམས་ཅན་མ་ལུས་པ་ཡང་རྡོ་རྗེ་རྣལ་འབྱོར་ཞེས་སྒྲ་དི་རི་རི་སྒྲོགས་པ་ཞིག་རྨིས་སོ། །ལྔ་བ་ནི། སྤྲིན་གྱི་ནང་ནས་ཉི་མའི་དཀྱིལ་འཁོར་རཏྣ་སྣ་ཚོགས་ཀྱི་འོད་ཟེར་ཅན་ཞིག་འབར་བའི་དཀྱིལ་ནས་རཏྣ་སྨུག་པོ་དཔལ་གྱི་བེའུ་སྒྲོམ་འོད་དང་བཅས་པ་ཕྱི་ནང་ཐམས་ཅད་གསལ་བར་སྣང་བའི་ནང་ནས་གསེར་གྱི་གླེགས་བམ་ལ་བཻ་ཌཱུརྱ་ཞུན་མས་རྒྱ་རང་མནན་དུ་བྲིས་པའི་གླེགས་བམ་མང་པོ་སྐར་མཐའ་ཐང་ལ་ལྷུང་བ་བཞིན་འབབ་པ་ཞིག་རྨིས་སོ། །དྲུག་པ་ནི། གླེགས་བམ་དེ་དག་ལ་བྱང་ཆུབ་སེམས་དཔའ་མང་པོ་དང་། རིག་འཛིན་ལྷ་དང་ལྷ་མོ་ཚད་མེད་པས། ཡོན་ཏན་སྒྲོག་ཅིང་མཆོད་བསྟོད་སྐོར་གློག་བྱེད་པ་ཞིག་རྨིས་སོ། །བདུན་པ་ནི། ནམ་མཁའི་སྤྲིན་གསེབ་ནས་ལུང་བསྟན་པའི་སྒྲ་བྱུང་སྟེ། འདི་ལྟར། །ལས་དང་སྐལ་བར་རབ་ལྡན་ཞིང་། །རྒྱལ་བས་འབྱུང་བར་ལུང་བསྟན་པའི། །བསོད་ནམས་ཆེན་པོ་དྲྭ་མ་ཁྱོད། །སྤྲུལ་པ་ཅི་ལྟར་ལུང་བསྟན་པའི། །ད་ལྟའི་དུས་འདིར་མངོན་ཤར་གྱི། །འཁོར་བར་སྙིང་པོ་བྱི་བའི་ཕྱིར། །ང་ཡི་ཆོ་འཕྲུལ་བྱིན་རླབས་ཀྱིས། །བསྟན་པའི་སྙིང་པོ་དམ་པ་ཞིག །སྐལ་ལྡན་ཁྱོད་ལ་བསྟན་པར་བྱ། །མ་ལ་ཡ་ཞེས་བྱ་བའི་རྩེར། །དགོན་པ་ཆེན་པོའི་གནས་ཤིག་ཏུ། །ཡེ་ཤེས་སྙིང་པོ་ཅན་རྣམས་ཀྱི། །གསང་བ་བྱ་བའི་དམ་པ་ཞིག །ཡོད་ཀྱི་གསང་བ་ནན་ཏན་གྱི། །དེ་ལ་སེམས་ཀྱི་མེ་ལོང་གིས། །མངོན་དུ་གསལ་བར་རྟོགས་མ་ཐག །སངས་རྒྱས་ས་ལ་སྐལ་བ་མཉམ། །བདེ་བ་ཅན་ཞེས་བྱ་བར་ནི། །འོད་ཀྱི་རྒྱལ་པོ་ཞེས་བྱ་བའི། །ཀུན་རིག་བདེ་བ་ཆེན་པོར་འགྱུར། །རྡོ་རྗེ་གསང་ཆེན་གསང་བ་ཡི། །དམ་པའི་མཛོད་གཉིས་གཅིག་ལ་ནི། །ལྷ་དང་མི་ཡི་རིག་འཛིན་ལ། །རིམ་པས་བརྒྱུད་དེ་གྲགས་པར་འགྱུར། །ཞེས་གྲགས་པར་རྨིས་སོ། །དེ་དག་ཀྱང་དགོངས་འདུས་ཀྱི་འགྲེལ་བ་ལུང་བསྟན་རྡོ་རྗེ་ལས། །སྐུ་གསུང་ཐུགས་རྟགས་ཐིམ་པ་དང་། །ལ་སོགས་གསུངས་པ་དང་གཅིག་གོ །དེ་ནས་ནང་པར་མནལ་སད་པ་ན་རབ་ཏུ་དགྱེས་ཏེ་འཁོར་རྣམས་བསྡུས་ནས། རྨི་ལམ་དུ་བྱུང་བའི་ལོ་རྒྱུས་བརྗོད་པ། མདང་སུམ་དུ་བདག་ལ་རྨི་ལམ་འདི་ལྟར་བྱུང་། རི་མ་ལ་ཡ་གནམ་ལྕགས་ཡོད་རྩེ་ལ། །ཕྱག་ན་རྡོ་རྗེའི་ཕོ་བྲང་གནས་བཞུགས་ཏེ། །སྐུ་ལས་འོད་འཕྲོས་སྣང་སྲིད་བྱི་དོར་བྱས། གསུང་གི་སྒྲ་ཡིས་ལོ་ཀ་གཡོ་ཞིང་འགུལ། །ཐུགས་ལས་འོད་བྱུང་བདག་གི་སྙིང་གར་ཐིམ། །ཉི་ཟླ་སྤྱི་བོ་རྐང་པའི་མཐིལ་དུ་ནུབ། །བདག་གི་ལྟོ་ནས་སྣང་སྲིད་འཕྱོ་བ་རྨིས། །དང་པོའི་རྨིས་ལྟས་བག་ཆགས་སྦྱོང་བའི་རྟགས། །དེ་ནས་བདག་ལ་སངས་རྒྱས་མང་པོ་རྣམས། །རྨད་བྱུང་གསང་བའི་དོན་ལ་འགྲོ་བ་མཛད། །ཅེས་སོགས་གསུངས་ཏེ་གོང་གི་རྨི་ལམ་གྱི་ཚིགས་སུ་བཅད་པ་དག་ཀྱང་བརྗོད་ནས། རྨི་ལམ་འདི་དག་དང་སྦྱར་ན་བདག་ངེས་པར་སྐལ་པ་དང་ལྡན་པར་ངེས་སོ་ཞེས་གསུངས་པས། འཁོར་རྣམས་ཀྱིས་ཀྱང་དེ་ལྟར་ལེགས་སོ་ཨ་ལ་ལ་ཞེས་ངོ་མཚར་དུ་གསོལ་ཏེ། ཡང་བཀའ་སྩལ་བ། དེ་ལྟར་ཡིན་ན་ཕོ་བྲང་གི་རྩེ་མོར་ཕྱིན་ལ་ཆོ་འཕྲུལ་གྱི་ས་དེ་ལ་དམིགས་པ་བཅས་ཏེ། མཆོད་པ་དང་སྒྲུབ་པ་ཆེན་པོ་ཞིག་བྱས་ན་དགའ་བ་ཆེན་པོ་ཞིག་སྐྱེ་བར་ངེས་པས། བདག་ཡང་ཐོག་ཏུ་གཤེགས་སོ་གསུངས་ཏེ་བྱོན་པ་ལས། རྨི་ལམ་དུ་ཇི་ལྟར་བྱོན་པའི་ངོས་ཤིག་ལ། རཏྣ་སྨུག་པོ་ལས་གྲུབ་པའི་བཛྲ་པཱ་ཎིའི་སྐུ་ཁྲུ་གང་པ་ཞིག་འདུག་པས་རྒྱལ་པོ་དགྱེས་ནས་ཕྱག་དང་བསྐོར་བ་བྱས་ཏེ་ཚིགས་སུ་བཅད་པ། སྔོན་ཚེ་གང་ནས་བསྒྲུབ་པ་ཡི། །ལས་ཀྱིས་མཇལ་བའི་ལྷ་མཆོག་ནི། །བསྐལ་པར་གཞལ་ཡང་མི་གཏང་ངོ་། །འདྲེན་པ་མཆོག་དཔལ་ལ་སོགས་གྲངས། །མོས་པའི་གཟུངས་ཀྱི་ལྷ་མཆོག་འཛིན། །ཞེས་གསོལ་ནས་སྐུ་དེ་ཉིད་ཀྱིས་སྒྲུབ་རྟེན་བྱས་ཏེ་གནས་དེར་ཟླ་བ་བདུན་དུ་བསྒྲུབས་པས། རྒྱུད་ཀྱི་གླེགས་བམ་རྣམས་རྨི་ལམ་དུ་ཇི་ལྟར་བྱུང་བ་བཞིན་དངོས་སུ་བབས་སོ། །དེར་རྒྱལ་པོ་དགྱེས་བཞིན་ནང་དུ་སྤྱན་དྲངས་ཏེ་ཞལ་ཕྱེས་ནས་བཀླགས་པས་ཚིག་གཅིག་ཀྱང་བརྡ་མ་འཇལ་བས་སོམ་ཉིར་གྱུར་ཏེ། ཨེ་མ་ཧོ་སྔགས་ཀྱི་ཚུལ་རྟགས་དང་སྦྱར་ན་གླེགས་བམ་འདི་དག་ལས་ངོ་མཚར་དུ་གྱུར་པའི་དོན་ཆེན་པོ་ཞིག་འབྱུང་བར་ངེས་ཏེ། བདག་གིས་མི་རྟོགས་པ་ཅི་ཉེས་སྙམ་དུ་བཤུམ་མོ། །དེ་ནས་ཅུང་ཟད་ཅིག་ནས་ཐེ་ཚོམ་ཞི་ནས། ལོ་ཀ་འདི་ན་འདི་དག་བརྡ་འཇལ་བ་སུ་ཡོད་ཅེས་སྒྲགས་པས། ཟ་ཧོར་རྒྱལ་པོ་ཨུ་པ་རཱ་ཛ་ཞེས་བྱ་བ་མཁྱེན་པ་ཆེ་བར་ཡོད་དོ་ཞེས་ཟེར་ནས། ཕོ་ཉ་བ་བརྫངས་ནས་ལོ་རྒྱུས་ཞིབ་ཏུ་ཞུས་ཏེ་སྤྱན་དྲངས་པས་མ་གནང་སྟེ། གལ་ཏེ་བདག་གིས་མ་ཤེས་ན་དེར་ཕྱིན་པ་ལ་དོན་མེད་དགོངས་ནས་ཚུར་སྐྱོལ་ཅིག་ཅེས་སྨྲས་སོ། །དེ་ནས་ཕོ་ཉ་རྣམས་ཀྱིས་དེ་ཚུལ་རྒྱལ་པོ་ལ་བསྙད་པས། ཐུགས་ལ་འཐད་བཞིན་གླེགས་བམ་རྣམས་མཆོད་པའི་བྱེ་བྲག་དུ་མ་དང་བཅས་གླང་པོ་ཆེ་ལ་བསྐལ་ཏེ་བསྐྱལ་ལོ། །དེ་ཀྱང་བརྡ་མ་འཇལ་ནས། བདག་གིས་སྤྱོད་ཡུལ་དུ་མ་གྱུར་པས་རྒྱལ་པོ་ཉིད་ཀྱི་ཐུགས་ཀྱིས་རྗེས་སུ་དཔོགས་འཚལ་ཞེས་སླར་བརྫངས་སོ། །ཡང་ཁྱིའི་རྒྱལ་པོ་ལག་ཐུང་དང་ཡུམ་སྐྲའི་ལྭ་བ་ཅན་གཉིས་ཀྱི་བུ་དགེ་སློང་ཀུ་ཀུ་རཱ་ཛ་ཞེས་བྱ་བ་ཚེ་ལོ་སྟོང་ཐུབ་པ་སངས་རྒྱས་རིན་ཆེན་མང་གི་སྤྲུལ་པ་ཞིག་ཡོད་ཅེས་ཐོས་ནས་དེ་ལ་ཡང་སྔར་ལྟར་བརྫངས་པས་བརྡ་མ་འཇལ་བར་སླར་བསྐྱལ་ལོ། །དེ་ནས་རྒྱལ་པོ་ཉིད་ཀྱིས་སྒྲིབ་སྦྱངས་དང་ཚོགས་གསོག་རྒྱ་ཆེན་པོ་བགྱིས་ཏེ་བརྟགས་པས་རྡོ་རྗེ་སེམས་དཔའ་ཞལ་མཐོང་གི་ལེའུ་རྟོགས་ནས་དེ་བཞིན་བསྒྲུབ་པས། རྡོ་རྗེ་སེམས་དཔའི་ཞལ་དངོས་སུ་གཟིགས་ཏེ། རིགས་ཀྱི་བུ་དངོས་གྲུབ་ཅི་འདོད་གསུངས་པ་ལ། གླེགས་བམ་ཐམས་ཅད་ཀྱི་དོན་རྟོགས་པར་གསོལ་བས་རིགས་ཀྱི་བུ་དེ་ལྟར་ན་རང་གི་ཕུང་པོ་སྦྱོངས་ཤིག ཁྱོད་ཀྱི་སྟོན་པ་གསང་པའི་བདག་པོ་ཡིན་གྱི། དེས་དོན་མ་ལུས་པ་སྟོན་པར་འགྱུར་རོ། །གསུངས་ནས་མི་སྣང་བར་གྱུར་ཏོ། །དེ་ནས་དགའ་བ་ཆེན་པོ་སྐྱེས་ཏེ་བསྐྱེད་རིམ་གྱིས་ཕུང་པོ་སྦྱངས་པས་ས་དག་ཀྱང་ཆེར་གཡོས་ཏེ། བཛྲ་པཱ་ཎིའི་ཞལ་མངོན་སུམ་དུ་གཟིགས་ནས། བརྟུལ་ཞུགས་མཛད་བཞིན་རྡོ་རྗེ་ནམ་མཁའ་ལ་སྤར་ནས། ཧཱུྃ་ཧཱུྃ་རྡོ་རྗེ་འདུལ་བ་ལ་སོགས་པའི་ཚིག་སྔགས་དང་སྤོང་ལེན་བརྟུལ་ཞུགས་སྤྱོད་པའི་དབང་། དགེ་བར་བསྐུར་ན་ཉེས་པ་མེད། །ལ་སོགས་པའི་ཚིགས་སུ་བཅས་པ་དག་བརྗོད་པས་ལོ་ཀའི་དྲེགས་པ་ཅན་ཐམས་ཅད་འཁོར་དུ་བསྡུས། རྡོ་རྗེ་གསང་བའི་མིང་སོ་སོར་བཏགས་ནས་ལུང་གསང་སྒོར་ཕྱེ་སྟེ། དམ་པའི་མཛོད་སུམ་རྒྱ་ཆེར་བཤད་པ་རྣམས། རྒྱུད་ཡན་ལག་བཅོ་བརྒྱད་དུ་བསྡུས་ནས་གསུངས་སོ། །དེ་སྐད་དུའང་རྒྱལ་པོ་ཉིད་ཀྱིས་མཛད་པའི་ལམ་རྣམ་བཀོད་ལས། ཤར་ཕྱོགས་ཨིནྜའི་ལུང་པ་ན། །རྒྱ་ལུང་རྡོ་རྗེ་བརྩེགས་པ་རུ། །རིགས་ཅན་ཨིནྜ་བྷུ་ཏི་བས། །གསང་བའི་བདག་པོས་མངོན་བསྟན་པའི། །སྒྱུ་འཕྲུལ་དྲ་བའི་སྒྲུབ་པ་ཡང་། །ཚོམ་བུ་ལྔ་བཅུ་སྟོང་དང་བཅས། །ཕྱག་ན་རྡོ་རྗེ་མངོན་གྲུབ་ཏེ། །སྤོང་ལེན་བརྟུལ་ཞུགས་སྤྱོད་པའི་དབང་། །དགེ་བར་བསྐུར་ན་སྡིག་པ་མེད། །དེ་ནས་ས་ལ་རེག་པར་བྱས། །ཞེས་གསུངས་སོ། །དེ་ལ་ཏནྟྲ་སྡེ་བཅོ་བརྒྱད་ནི། སྐུ་གསུང་ཐུགས་ཡོན་ཏན་འཕྲིན་ལས་ལྔའི་ནང་གསེས་དབྱེ་བའི་བཅོ་ལྔ་དང་། སྤྱི་རྒྱུད་གསུམ་སྟེ་བཅོ་བརྒྱད་དོ། །སྐུའི་སྐུ་རྒྱུད་གླང་པོ་རབ་འབོག སྐུའི་གསུང་རྒྱུད་གླང་པོ་ཆུར་འཇུག སྐུའི་ཐུགས་རྒྱུད་སངས་རྒྱས་མཉམ་སྦྱོར། གསུང་གི་སྐུ་རྒྱུད་རི་བོ་བརྩེགས་པ། གསུང་གི་གསུང་རྒྱུད་པདྨ་དབང་ཆེན། གསུང་གི་ཐུགས་རྒྱུད་ཟླ་གསང་ཐིག་ལེ། ཐུགས་ཀྱི་སྐུ་རྒྱུད་རྩེ་མོ་འདུས་པ། ཐུགས་ཀྱི་གསུང་རྒྱུད་གཅིག་ལས་འཕྲོས་པ། ཐུགས་ཀྱི་ཐུགས་རྒྱུད་གསང་བ་འདུས་པ། ཡོན་ཏན་གྱི་སྐུ་རྒྱུད་སྒྲོན་མ་འབར་བ། ཡོན་ཏན་གྱི་གསུང་རྒྱུད་བདུད་རྩི་ས་མ་ཡ་འབུམ་སྡེ། ཡོན་ཏན་གྱི་ཐུགས་རྒྱུད་དཔལ་མཆོག་དང་པོ། འཕྲིན་ལས་ཀྱི་སྐུ་རྒྱུད་དཔལ་འཕྲེང་དཀར་མོ། འཕྲིན་ལས་ཀྱི་གསུང་རྒྱུད་མ་མོ་རྒྱུད་ལུང་། འཕྲིན་ལས་ཀྱི་ཐུགས་རྒྱུད་ཏ་མ་ལ་འབུམ་སྟེ། སྤྱིའི་སྐུ་རྒྱུད་ཐབས་ཞགས། སྤྱིའི་གསུངས་རྒྱུད་ས་མ་ཡ་བཀོད་པ། སྤྱིའི་ཐུགས་རྒྱུད་སྒྱུ་འཕྲུལ་དྲ་བའོ། །དེ་ལས་སྒྱུ་འཕྲུལ་གྱི་ནང་གསེས་འོག་ཏུ་འཆད་དོ། འདི་དག་གི་དབྱེ་བ་ལའང་དབྱེ་ཚུལ་མང་དུ་སྣང་བ་ཀུན་ཡིན་མོད་དེ། འདིར་ཀུན་མཁྱེན་ཆོས་རྗེས་བཀའ་བཙན་པར་བཟུང་ངོ་། །དེ་ལྟར་ཏནྟྲ་སྡེ་བཅོ་བརྒྱད་པོ་རྒྱལ་བོ་ཛས། སློབ་དཔོན་ཀུ་ཀུ་རཱ་ཛ་ཚོམ་བུ་འབུམ་སྡེ་ལ་གསུངས། དེས་རྒྱལ་པོ་ཨིནྟྲ་བོ་དྷི་ཆེན་པོ་འཁོར་ཚོམ་བུ་ཁྲི་དང་བཅས་པ་ལ་གསུངས། དེས་སེངྷ་རཱ་ཛ་ཚོམ་བུ་སྟོང་ལ། དེས་ཨུ་པ་རཱ་ཛ་ཚོམ་བུ་ལྔ་བརྒྱ་ལ། དེས་སྲས་མོ་གོ་མ་འཁོར་ཚོམ་བུ་བརྒྱ་དང་བཅས་པ་ལ་གསུངས་ཏེ། དེ་ཐམས་ཅད་ཀྱིས་ཚོམ་བུ་ཚོགས་སྒྲུབ་མཛད་པས་དངོས་སུ་རིག་འཛིན་གྱི་ས་ལ་གཤེགས་སོ། འདི་དག་ལ་འགའ་ཞིག་སློབ་དཔོན་ཀུ་ཀུ་རཱ་ཛས་རྟོགས་ནས་རྒྱལ་པོ་ལ་བཤད་ཟེར་བ་སོགས་འཆད་ལུགས་མང་དུ་ཡོད་པ་ཡང་། འཇིག་རྟེན་པས་རྟོག་པ་བསལ་ཕྱིར་དེ་ལྟར་ཡང་རུང་མོད་དེ། འདིར་ནི་རྒྱལ་པོ་ཉིད་ཀྱི་གསུངས་པའི་ལུང་སྔ་མ་དང་། སངས་རྒྱས་གསང་བའི་ལམ་རིམ་དུའང་། གསང་བའི་བདག་པོ་མངོན་གཤེགས་ནས། །ལྷ་ཀླུ་གནོད་སྦྱིན་སྲིན་པོ་དང་། མི་ལས་སྐལ་ལྡན་འདུས་པ་ལས། །དབང་པོས་ཇི་ལྟར་ལུང་བསྟན་དུས། །རྒྱལ་བུ་རིག་ཅན་ལྟས་ཤར་བ། །འབྲེལ་བས་སྣང་བ་མངོན་རྟགས་པས། །ཐུགས་ཀྱི་སྒྲུབ་པ་མངོན་རྟོགས་ཏེ། །དེ་ཉིད་བསྒོམས་ནས་དེ་ཉིད་འགྲུབ། །བསྟན་པའི་དངོས་གྲུབ་དེ་ནས་ཐོབ། །དོན་དམ་བཅུད་ཀྱིས་དེ་ནས་རྒྱས། །འདོད་པའི་བསམ་པ་དེ་ནས་འགྲུབ། །སྨོན་པའི་ལྷ་དང་དེ་རུ་མཇལ། །དེ་ནས་རྡོ་རྗེ་གདན་སྟེང་གི། །འཛམ་གླིང་ཤར་ལྷོའི་ཕྱོགས་མཚམས་སུ། །ཕོ་བྲང་རིན་ཆེན་དམ་པ་དེར། །བཀྲ་ཤིས་པ་ཡི་ཁང་པ་རུ། །ཀུ་ཀུ་རཱ་ཛ་ཨིནྟྲ་བོ་དྷི་དང་། །སིདྷ་ཨུ་པ་རཱ་ཛ་དང་། །སྲས་མོ་གོ་མ་ས་ལ་སོགས། །སྒྱུ་འཕྲུལ་དྲ་བའི་དབང་ཐོབ་ནས། །ཚོགས་ཀྱི་དཀྱིལ་འཁོར་མངོན་བསྒྲུབས་ཏེ། །རྡོ་རྗེ་འཆང་སར་མངོན་དུ་གཤེགས། །ཞེས་སོགས་གསུངས་པ་ངེས་པའི་ཕྱིར་རོ། །དེས་ན་འདི་ཡན་ཆད་ཚོམ་བུའི་འཁོར་དང་བཅས་ཏེ་དངོས་སུ་རིག་འཛིན་གྱི་ས་ལ་གཤེགས་ཤིང་རིག་པ་ཁྱད་པར་ཅན་གྱི་བརྒྱུད་པ་ཟམ་མ་ཆད་པས་རིག་འཛིན་རིག་པའི་བརྒྱུད་པར་འདྲེན་པ་ཡིན་ཏེ། གཞན་དུ་ན་རིག་འཛིན་བརྡ་རྒྱུད་ཅེས་གྲགས་པ་ནི་རྒྱལ་བ་རིགས་ལྔས་རྒྱལ་སྲས་སེམས་དཔའ་ལ་བརྡས་སྒོ་ནས་ཆོས་སྟོན་པ་དེ་ལ་ཟེར་ཡང་། དེ་ནི་འདིར་རྒྱལ་བ་དགོངས་བརྡའི་བརྒྱུད་པ་ཞེས་རྒྱལ་བ་དགོངས་བརྒྱུད་ཀྱི་གྲལ་དུ་བཤད་ཟིན་ལ། དེ་ནས་བརྒྱུད་པའི་ཁྱད་པར་གོང་དུ་སྨོས་པའི་རིག་འཛིན་མི་མ་ཡིན་རྣམས་ཀྱང་ལྷ་ཀླུ་གནོད་སྦྱིན་སོ་སོའི་ཚོམ་བུ་འབུམ་སྡེའི་བར་རིག་འཛིན་གྱི་བརྒྱུད་པར་གསུངས་པས་ན་འདིར་མིའི་རིག་འཛིན་རིག་འཛིན་བརྒྱུད་པའི་གྲལ་ནས་བཏོན་པ་ལ་དགོས་པ་གཞན་མེད་དོ། །དེས་ན་འགའ་ཞིག་གིས་གསང་བའི་བདག་པོའི་རིགས་ཅན་ལྔ་ལ་གསུངས་པ་རིག་འཛིན་རིག་པའི་བརྒྱུད་པ་དང་། རྒྱལ་པོ་ཛཿནས་གང་ཟག་སྙན་བརྒྱུད་དུ་བཤད་པ་ཅུང་མི་ལེགས་སོ། འོན་ཀྱང་ཀུན་མཁྱེན་ཆེན་པོ་དང་། མཁན་ཆེན་ཆོས་དཔལ་རྒྱ་མཚོ་ཡང་སྔ་རབས་པ་འགའ་ཞིག་གི་ཕྱག་བཞེས་ཀྱི་རྗེས་སུ་འབྲང་ནས་དངོས་སུ་ས་བཅད་དེ་ལྟར་མཛད་ཀྱང་། འདི་ཡན་ཆད་རིག་འཛིན་གྱི་བརྒྱུད་པ་ཤ་རྟག་གོ །ཞེས་ཚིག་ཟིན་གྱིས་བསྟན་པ་ཡིན་ནོ། །དེས་ན་ཁོ་བོ་ནི་ཚིག་དེ་ཐ་དད་དྲངས་སུ་ཁས་བླངས་ནས་འདི་ཡན་ཆད་རག་པའི་བརྒྱུད་པར་འཆད་དོ། །འོ་ན་དངོས་སུ་རིག་འཛིན་གྱི་ས་ལ་གཤེགས་པ་ཕྱིས་སུའང་འགའ་ཞིག་བྱུང་འདུག་པའི། དེ་དག་ཀྱང་རིག་འཛིན་བརྒྱུད་པར་འདྲེན་ནམ་ཞེ་ན། དེ་ནི་མ་ངེས་ཏེ། གང་ཟག་རང་ངོས་ནས་རིག་འཛིན་གྱི་བརྒྱུད་པར་མ་ཟད། རྒྱུད་དོན་རྒྱལ་བ་དགོངས་བརྒྱུད་ཀྱི་ཚུལ་དུ་རྟོགས་པའང་སྲིད་ཚུལ་གོང་དུ་བརྗོད་པ་ལྟར་ཡིན་མོད་དེ། །འདིར་ཚོམ་བུའི་འཁོར་དང་བཅས་ཏེ་རིག་འཛིན་གྱི་ས་ལ་གཤེགས་པའི་བརྒྱུད་པ་ཟམ་མ་ཆད་པར་བྱུང་བའི་ས་མཚམས་དམིགས་ཀྱིས་བསལ་བས་ན་ཅི་ཡང་མི་འགལ་ལོ། །ཡང་མཁན་ཆེན་རིན་པོ་ཆེས། རྒྱུད་ཀྱི་གླེགས་བམ་རྣམས་རྒྱལ་པོའི་སྒྲུབ་ཁང་གི་སྟེང་འདིར་བབས་པ་མི་འཐད་དེ། ཤེར་ཕྱིན་ཚུལ་བརྒྱ་ལྔ་བཅུ་བའི་འགྲེལ་པར་ཟ་ཧོར་གྱི་ཡུལ་ཉིད་དུ་བབས་པར་གསུངས་པའི་ཕྱིར་གསུངས་ཀྱང་། འགལ་བར་མ་མཐོང་ཏེ། སྤྱིར་ཟ་ཧོར་གྱི་ཡུལ་དེ་རྒྱ་གར་གྱི་ཤར་ཕྱོགས་ན་ཡོད་ཅིང་། འདིར་ཤར་ལྷོའི་ཚིག་ཟིན་གྱིས་ལང་ཀའི་ཡུལ་གླིང་དེ་དེའི་ལྷོ་ཕྱོགས་ན་ཡོད་པ་གྲུབ་ཏེ། ཐུག་སྒྲུབ་རིན་པོ་ཆེ་འབར་བ་ལས། ཟ་ཧོར་ཡུལ་ཞེས་པ་དེ། །རྒྱ་མཚོའི་གླིང་གི་མ་ཧ་དོ། །གནས་པ་འཛམ་གླིང་ཤར་ན་གནས། །རྒྱ་མཚོའི་གླིང་ལ་བརྒྱུད་མ་རུ། །སྲིན་པོ་ལང་ཀ་མགྲིན་བཅུའི་ཡུལ། །ལང་ཀ་པུ་ར་དག་དང་འབྲེལ། །སྲིན་པོ་སྲིན་མོ་ཤ་ཟ་རྣམས། །ཀུན་ལ་དབང་བསྒྱུར་ལོངས་སྤྱོད་ཆེ། །ཞེས་སོ། །དེས་ན་ཟ་ཧོར་གྱི་ཉེ་འཁོར་ན་ཡོད་ཅིང་མི་དང་སྲིན་པོ་ཕན་ཚུན་རྒྱུ་འདྲུལ་མ་ཆད་པས་དང་། ཟ་ཧོར་རྒྱལ་པོ་ཉིད་ཀྱི་སྒྲུབ་གནས་ཐུན་མོང་མ་ཡིན་པར་གྱུར་པས་ན། ཕྱོགས་རགས་བསྡུས་ཙམ་དུ་ཟ་ཧོར་ཡུལ་གླིང་ཆེ་བའི་དབང་དུ་བྱས་ཏེ། རྒྱ་གར་ཤར་ཕྱོགས་ཟ་ཧོར་གྱི་ཡུལ་དུ་བབས་ཞེས་བརྗོད་ཀྱང་མི་འགལ་བའི་ཕྱིར་རོ། །གསུམ་པ་གང་ཟག་རྣ་བར་བརྒྱུད་པ་ནི། སྲས་མོ་ཀོ་མ་ས་ལས་ཁྱིའི་རྒྱལ་པོ་ཀུ་ཀུ་རཱ་ཛ་སྟེ། ཀུ་ཀུ་རཱ་ཛ་ཕྱི་མ་སློབ་དཔོན་སྒེག་པ་རྡོ་རྗེ་སློབ་དཔོན་སངས་རྒྱས་གསང་བ་གསུམ་ལ་བཤད། ཀུ་ཀུ་རཱ་ཛས། རོ་ལངས་བདེ་བའི་དངོས་གྲུབ་དང་དྲང་སྲོང་བྷ་ཤི་ཏ་གཉིས་ལ་བཤད། སྔ་མས་རྡོ་རྗེ་བཞད་པ་ལ། དེ་དང་བྷ་ཤི་ཏ་གཉིས་ཀས་ཟ་ཧོར་གྱི་རྒྱལ་པོ་པྲ་བྷ་ཧསྟི་ལ་བཤད། དེས་ཨོ་རྒྱན་སངས་རྒྱས་གཉིས་པ་ལ་གསུངས་པའི་རྒྱུད་ཚུལ་གཅིག་དང་། ཡང་སྒེག་པ་རྡོ་རྗེ་དང་སངས་རྒྱས་གསང་བ་གཉིས་ཀས་པཎ་ཆེན་བི་མ་ལ་མི་ཏྲ་ལ་བཤད་དེ་དེ་ནས་བརྒྱུད་ཚུལ་གཅིག་ཏེ། བརྒྱུད་པའི་བབས་ལུགས་གཉིས་པོ་བོད་དུ་ཇི་ལྟར་བྱུང་ཚུལ་ནི། གངས་ཅན་གྱི་ཁྲོད་འདིར་ཤཱཀྱ་ལི་ཙ་བའི་རིགས་ལས་ཆད་པའི་རྒྱལ་རབས་རིམ་པར་བྱུང་བ་ཉེར་ལྔ་པ་ན། འཕགས་པ་ནམ་མཁའི་སྙིང་པོའི་སྤྲུལ་པ་ལྷ་ཐོ་རི་སྙན་ཤལ་ཞེས་བྱ་བ་བྱོན་ཏེ། དེའི་རིང་ལ་མདོ་སྡེ་ཟ་མ་ཏོག་བཀོད་པ་དང་སྤང་བསྐོང་ཕྱག་རྒྱ་པ་ལ་སོགས་པ་ཕོ་བྲང་གི་སྟེང་དུ་བབས་ཏེ་དམ་པའི་ཆོས་ཀྱི་དབུ་བརྙེས། དེ་ནས་རྒྱལ་རབས་ལྔ་ན། སྤྱན་རས་གཟིགས་ཀྱི་སྤྲུལ་པ་ཆོས་རྒྱལ་སྲོང་བཙན་སྒམ་པོ་ཞེས་གྲགས་པ་དབུ་གཙུག་ན་ཨ་མི་དེ་ཝའི་ཞལ་དངོས་སུ་ཡོད་པ་དེ་བྱོན་ནས་དམ་པའི་ཆོས་ཀྱི་སྲོལ་གཏོད། དེ་ནས་རྒྱལ་རབས་ལྔ་འདས་པ་ན་འཕགས་པ་འཇམ་དཔལ་གྱི་སྤྲུལ་པ་ཆོས་རྒྱལ་ཁྲི་སྲོང་ལྡེ་བཙན་ཞེས་བྱ་བ་བྱོན་ནས། སློབ་དཔོན་པདྨ་དང་བི་མ་ལ་སོགས་པའི་པཎྜི་ཏ་ལྔ་བརྒྱ་རྩ་བརྒྱད་བོད་དུ་སྤྱན་དྲངས། བཻ་རོ་ཙ་ན་དང་སྐ་ཅོག་རྨ་གཉགས་ལ་སོགས་པའི་ལོ་ཙཱ་བ་བརྒྱ་རྩ་བརྒྱད་ཀྱིས་ལོ་ཙཱ་བསླབ་ནས། འཕགས་ཡུལ་ན་བཞུགས་སོ་འཚལ་གྱི་བཀའ་དང་དགོངས་འགྲེལ་ཐམས་ཅད་མ་ལུས་པར་བསྒྱུར་ནས་དམ་པའི་ཆོས་དར་རྒྱས་སུ་མཛད་པ་ཡིན་ནོ། །དེས་ན་སྤྱིར་སྡེ་སྣོད་གསུམ་དང་རྒྱུད་སྡེ་དྲུག །བྱེ་བྲག་ཏནྟྲ་སྡེ་བཅོ་བརྒྱད་ཀྱི་ནང་གསེས་ཇི་ལྟར་བསྒྱུར་བ་ནི་འདིར་བརྗོད་དུ་མི་ལང་ལ། ཁྱད་པར་སྒྱུ་འཕྲུལ་དྲ་བའི་སྐོར་ལ། སྒྱུ་འཕྲུལ་སྡེ་བརྒྱད་བཤད་རྒྱུད་སྡེ་བཞི། དེ་དག་གི་མན་ངག་ཕྲ་མོ་དྲུག་ཅུ་རྩ་བཞི་དང་བཅས་པ་བསྒྱུར་བ་ཡིན་ནོ། །དེ་ལས་སྒྱུར་འཕྲུལ་སྡེ་བརྒྱད་ནི། འཁོར་འདས་ཀྱི་ཆོས་ཐམས་ཅད་རང་སྣང་བདེན་པ་དབྱེར་མེད་དུ་སྟོན་པ་རྡོ་རྗེས་སེམས་དཔའ་སྒྱུ་འཕྲུལ་དྲ་བ་ལས་ཚོགས་རྒྱས་པར་སྟོན་པ་རྣམ་སྣང་སྒྱུ་འཕྲུལ་དྲ་བ། སྡེ་སྣོད་ཡོངས་ལ་ཁྱབ་པར་སྟོན་པ་འཇམ་དཔལ་སྒྱུ་འཕྲུལ་དྲ་བ། དཀྱིལ་འཁོར་རྒྱས་པར་སྟོན་པ་སྒྱུ་འཕྲུལ་བརྒྱད་པ། འཕྲིན་ལས་རྒྱས་པར་སྟོན་པ་བཞི་བཅུ་པ། དབང་གཙོ་བོར་སྟོན་པ་བླ་མ། ཡོན་ཏན་མཐའ་ཕྱིན་པར་སྟོན་པ་བརྒྱད་ཅུ་པ། དམ་ཚིག་མཆོག་ཏུ་སྟོན་པ་ལེ་ལག་དང་བརྒྱད་དོ། །བཤད་རྒྱུད་སྡེ་བཞི་ནི་གྲོལ་ལམ་རིམ་གྱིས་དང་ཅིག་ཅར་དུ་སྟོན་པ་ཡེ་ཤེས་སྙིང་པོ་དང་རྡོ་རྗེ་མེ་ལོང་། ཐབས་ལམ་རིམ་གྱིས་དང་ཅིག་ཅར་སྟོན་པ་སྒྱུ་འཕྲུལ་རྒྱ་མཚོ་དང་ཐལ་བ་སྟེ་བཞིའོ། །འདིའི་གྲངས་ལ་དབྱེ་ཚུལ་མི་གཅིག་པ་གཞན་དག་ཀྱང་ཡོད་དོ། །དེ་ལྟར་སྒྱུ་འཕྲུལ་སྡེ་བཅུ་གཉིས་པོ་ཕལ་ཆེར་རྨ་གཉགས་ཀྱིས་བསྒྱུར་ཀྱང་། འདིར་སྒྱུ་འཕྲུལ་རྩ་བའི་རྒྱུད་གསང་པའི་སྙིང་པོ་ནི་སྔ་ཕྱིར་ལན་གསུམ་བསྒྱུར་ཏེ། དང་པོ་ནི་དུས་དེར་འཕགས་ཡུལ་གྱི་སློབ་དཔོན་སངས་རྒྱས་གསང་བ་བོད་དུ་སྤྱན་དྲངས་པས། གངས་རི་ཏི་སེའི་བར་བྱོན་ནས་རྟེན་འབྲེལ་ཀྱི་གནད་ཞིག་གིས་དེ་གར་གདན་འཇག་པ་ན། བོད་ཀྱི་རྒྱལ་པོས་སྐྱེས་ཆེན་པོ་དང་བཅས་ཏེ་པཎ་ཆེན་བཻ་རོ་ཙ་ན་དེར་བརྫངས་པས་སློབ་དཔོན་དགྱེས་བཞིན་སྨིན་གྲོལ་གྱི་གདམས་པ་སྤྱི་དང་བྱེ་བྲག་གི་སྒྱུ་འཕྲུལ་འདི་ཉིད་ཀྱི་སྐོར་གནང་ནས། སངས་རྒྱས་གསང་བའི་ལམ་རིམ་དུ་གྲགས་པ་དེ། དེའི་དུས་སུ་གསུངས་ནས་རྒྱལ་པོ་ལ་སྐྱེས་ལན་གྱི་ཚུལ་དུ་བསྐུར་བ་ཡིན་སྐད། འདི་ལ་སངས་རྒྱས་གསང་བ་དང་བཻ་རོའི་སྔ་འགྱུར་ཟེར། གཉིས་པ་ནི་ཨོ་རྒྱན་སངས་རྒྱས་གཉིས་པ་བོད་དུ་སྤྱན་དྲངས་པའི་སྐབས་སུ་གཉགས་ཛྙ་ན་ཀུ་མ་རས་ལོ་ཙཱ་བ་བགྱིས་ཏེ་བསྒྱུར་བ་ཡིན་ཏེ། འདི་ལ་པདྨ་དང་གཉགས་ཀྱི་བར་འགྱུར་དུ་གྲགས། གསུམ་པ་ནི། ཕྱིས་སུ་པཎ་ཆེན་དྲི་མེད་བཤེས་གཉེན་བྱོན་སྐབས། རྨ་རིན་ཆེན་མཆོག་དང་གཉགས་ཛྙ་ན་ཀུ་མ་ར་རྣམ་པ་གཉིས་ལས་ལོ་ཙ་བ་བྱས་ནས་བསྒྱུར་བ་སྟེ། འདི་ལ་བི་མ་དང་། རྨ་གཉགས་ཟུང་གི་ཕྱི་འགྱུར་ཞེས་གྲགས་སོ༎ ཆོས་ཚན་འདིའི་མཇུག་མི་ཚང་། །