རྟ་ནག་རྣམ་འགྲེལ།

པོད། ཁ༽

རྗེ་རྟ་ནག་པ་དགེ་འདུན་བློ་བཟང་།

Nitartha international

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

ཚད་མར་གྲུབ་པའི་ལེའུའི་མཐའ་དཔྱོད།

༄༅། །རྒྱས་པའི་བསྟན་བཅོས་ཚད་མ་རྣམ་འགྲེལ་གྱི་ལེའུ་གཉིས་པའི་མཐའ་དཔྱོད་མཁས་པའི་དབང་པོ་རྗེ་རྟ་ནག་པ་དགེ་འདུན་བློ་བཟང་གི་གསུང་རྒྱུན་དྲི་མ་མེད་པའི་གླེགས་བམ་གཉིས་པ་བཞུགས་སོ། །

ཚད་མ་བསླུ་མེད་ཅན་ཤེས་པ། །དོན་བྱེད་ནུས་པར་གནས་པ་ནི། །མི་བསླུ། ཞེས་པ་འདི་གང་ལས་འཕྲོས་ན། །དེ་ཡང་ཐར་པ་དང་ཐམས་ཅད་མཁྱེན་པ་དང་དེར་བགྲོད་པའི་ལམ་འབྲས་བུ་དང་བཅས་པ་ཚད་མ་གྲུབ་པའི་ལེའུ་འདིས་འཆད་པར་བྱེད་པ་ཡིན་ལ། །འདི་ལ་ལེའུའི་འཚམས་སྦྱར་བ་དང་། །ལེའུའི་གཞུང་བཤད་པ་གཉིས་ལས། དང་པོ་ནི། རང་དོན་རྗེས་དཔག་གི་ལེའུའི་རྗེས་ཐོག་དེ་མ་ཐག་ཏུ། ཚད་མ་གྲུབ་པའི་ལེའུ་འཆད་པའི་རྒྱུ་མཚན་གང་ཞེ་ན། དེ་ལྟར་འཆད་པའི་རྒྱུ་མཚན་ཡོད་དེ། དེ་ལྟར་འཆད་པ་སྐབས་སུ་བབས་པ་ཡིན་པའི་ཕྱིར། དེ་ཡང་ཡིན་ཏེ། རང་དོན་རྗེས་དཔག་གི་ལེའུ་དེར་ཚད་མ་མདོའི་དོན་འཆད་བྱེད་ཀྱི་ཐབས་ཀྱི་གཙོ་བོ་རང་དོན་རྗེས་དཔག་བསྟན་ནས། ཚད་མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་འཚལ་ཏེ། །ཞེས་པ་འདིའི་དོན་རྟོགས་དཀའ་བས་དེ་ལ་དགོངས་ནས། འདིའི་དོན་ལུགས་འབྱུང་ལུགས་ལྡོག་གི་སྒོ་ནས་གཙོ་བོར་བཤད་ཅིང་། ཚད་མར་སྒྲུབ་ཕྱིར་རང་གི་གཞུང་ཀུན་ལས། །བཏུས་ཏེ་སྣ་ཚོགས་འཐོར་རྣམས་འདིར་གཅིག་བྱ། །ཞེས་པའི་དོན་རྟོགས་སླ་བ་ལ་དགོངས་ནས། འདིའི་དོན་ཞར་བྱུང་གི་ཚུལ་གྱིས་འཆད་པར་བྱེད་པ་ལ། ཚད་མ་བསླུ་མེད་ཅན་ཤེས་པ། །ཞེས་པ་ནས། བསྟན་ཕྱིར་དེ་ཡང་གསལ་བར་བཤད། །ཅེས་པའི་བར་བྱུང་བ་ཡིན་ཏེ། དེ་སྐད་དུ་ཡང་། ལྷ་དབང་བློས། སློབ་དཔོན་གྱིས་ཚད་མའི་མཚན་ཉིད་ཀྱི་བསྟན་བཅོས་བཤད་པའི་རྒྱུ་རྗེས་སུ་དཔག་པ་སྔར་རྣམ་པར་བཞག་ནས་སྐབས་སུ་བབས་པའི་ཚད་མ་ཞེས་པ་ལ་སོགས་པ་ཕྱག་འཚལ་བའི་ཚིགས་སུ་བཅད་པའི་བཤད་པ་མཛད་པ་བརྩམས་པ་ཡིན་ནོ། །ཞེས་གསུངས། །

ཚད་མ་མདོ་ལས་གསུངས་ཚུལ་བཀོད་པ།

༈ གཉིས་པ་ལེའུའི་གཞུང་བཤད་པ་ལ་ཚད་མ་མདོ་ལས་གསུངས་ཚུལ་དང་། དེ་བསྟན་བཅོས་རྣམ་འགྲེལ་འདིར་འགྲེལ་ཚུལ་གཉིས། དང་པོ་ལ། བཤད་བྱའི་ལུང་འགོད་པ་དང་། ལུང་གི་དོན་འཆད་པ་གཉིས། དང་པོ་ནི། ཚད་མ་མདོ་ལས། ཚད་མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་འཚལ་ཏེ། །ཚད་མར་སྒྲུབ་ཕྱིར་རང་གི་གཞུང་ཀུན་ལས། །བཏུས་ཏེ་སྣ་ཚོགས་འཐོར་རྣམས་འདིར་གཅིག་བྱ། །ཞེས་གསུངས་ལ། གཉིས་པ་ལ། ལུང་དོན་སྤྱིར་འཆད་པ་དང་། སོ་སོར་འཆད་པ་དང་། ལུང་དོན་རིགས་པའི་སྒོ་ནས་བསྒྲུབ་པ་དང་གསུམ། དང་པོ་ནི། ཚད་མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་འཚལ་ཏེ། །ཞེས་པས་མཆོད་བརྗོད་དེ་བསྟན། ཚད་མར་སྒྲུབ་ཕྱིར་རང་གི་གཞུང་ཀུན་ལས། །ཞེས་སོགས་རྐང་པ་གཉིས་ཀྱིས་རྩོམ་པར་དམ་བཅའ་བ་དེ་བསྟན། གཉིས་པ་ལུང་དོན་སོ་སོར་བཤད་པ་ནི། ཚད་མར་གྱུར་པ། ཞེས་པས། རྣམ་བཅད་ལ་ཕྱི་རོལ་པའི་སྟོན་པ་དེ་ཚད་མའི་སྐྱེས་བུ་མཐར་ཐུག་དང་། དེའི་བསྟན་པ་དེ་བསྟན་པ་རྣམ་དག་དང་། དེས་འདོད་པའི་ཚད་མ་ལ་སོགས་པ་ཚད་མ་རྣམ་དག་ཡིན་པར་བཅད་ནས། ཡོངས་གཅོད་ལ། རང་རེའི་སྟོན་པ་དེ་ཚད་མའི་སྐྱེས་བུ་མཐར་ཐུག་དང་། དེའི་ལུང་རྟོགས་ཀྱི་བསྟན་པ་རྣམས་བསྟན་པ་རྣམ་དག་དང་། དེའི་ལུང་གི་བསྟན་པ་ལས་བཤད་པའི་ཚད་མ་མངོན་རྗེས་གཉིས་པོ་དེ་འཇུག་བྱའི་ཚད་མ་རྣམ་དག་དང་། རྒྱུ་བསམ་སྦྱོར་ཕུན་ཚོགས་གཉིས་ཉམས་སུ་བླང་བྱའི་ལམ་རྣམ་དག་ཏུ་བསྟན། འོ་ན། ཐུབ་པ་སངས་རྒྱས་བཅོམ་ལྡན་འདས་དེ་ཚད་མའི་སྐྱེས་བུ་མཐར་ཐུག་ཏུ་གང་ལས་འཁྲུངས་ཤེ་ན། དེ་ཡང་། གྱུར་པ། ཞེས་པས་རྣམ་བཅད་ལ་ཕྱི་རོལ་པའི་སྟོན་པ་དེ་སྒྲུབ་བྱེད་ཕུན་ཚོགས་ཤིག་ལ་བརྟེན་ནས་ཚད་མའི་སྐྱེས་བུ་མཐར་ཐུག་ཏུ་འཁྲུངས་པ་དེ་བཅད་ནས། ཡོངས་གཅོད་ལ་རང་རེའི་སྟོན་པ་དེ་སྒྲུབ་བྱེད་ཕུན་ཚོགས་ཤིག་ལ་བརྟེན་ནས་ཚད་མའི་སྐྱེས་བུ་མཐར་ཐུག་ཏུ་འཁྲུངས་པ་དེ་བསྟན། འོ་ན། དེ་ལྟར་ཡིན་ན་སྒྲུབ་བྱེད་དེ་གང་ཞེ་ན། དེ་ཡང་འགྲོ་ལ་ཕན་བཞེད་པ། སྟོན་པ། ཞེས་པས་རྣམ་བཅད་ལ་ཕྱི་རོལ་པའི་སྟོན་པ་དེ། རང་རྒྱུ་བསམ་སྦྱོར་ཕུན་ཚོགས་ཉམས་སུ་བླངས་པ་ལ་བརྟེན་ནས་ཚད་མའི་སྐྱེས་བུ་མཐར་ཐུག་ཏུ་འཁྲུངས་པ་དེ་བཅད་ནས། ཡོངས་གཅོད་ལ་རང་རེའི་སྟོན་པ་དེ། རང་རྒྱུ་བསམ་སྦྱོར་ཕུན་ཚོགས་ཉམས་སུ་བླངས་པ་ལ་བརྟེན་ནས་ཚད་མའི་སྐྱེས་བུ་མཐར་ཐུག་ཏུ་འཁྲུངས་པ་དེ་བསྟན། འོ་ན། རང་རེའི་སྟོན་པ་སངས་རྒྱས་དེ་ལ་ཡོན་ཏན་ཇི་ལྟ་བུ་མངའ་ཞེ་ན། དེ་ཡང་། བདེ་གཤེགས་སྐྱོབ། ཅེས་པས་རྣམ་བཅད་ལ། ཕྱི་རོལ་པའི་སྟོན་པ་དེ། རང་དོན་ཕུན་ཚོགས་བདེ་བར་གཤེགས་པ་དང་། གཞན་དོན་ཕུན་ཚོགས་གཟུགས་སྐུ་གཉིས་བརྙེས་པ་ལ་སོགས་པ་བཅད་ནས། ཡོངས་གཅོད་ལ། རང་རེའི་སྟོན་པ་དེ་རང་དོན་ཕུན་ཚོགས་བདེ་བར་གཤེགས་པ་དང་། གཞན་དོན་ཕུན་ཚོགས་གཟུགས་སྐུ་གཉིས་བརྙེས་པའི་སྐྱེས་བུ་མཐར་ཐུག་ཏུ་བསྟན་ལ། ཕྱག་འཚལ་ཏེ། ཞེས་པས་ཕྱག་འཚལ་བ་དེ་བསྟན། འོ་ན། དེ་ལྟ་བུའི་ཐུབ་པ་སངས་རྒྱས་བཅོམ་ལྡན་འདས་དེ་ལ་ཕྱག་འཚལ་བ་ལ་དགོས་པ་ཅི་ཡོད་ཅེ་ན། དེ་ལྟར་ཕྱག་འཚལ་བ་ལ་དགོས་པ་ཡོད་དེ། རང་རེའི་སྟོན་པ་དེ་སྟོན་པ་རྣམ་དག་དང་། དེའི་ལུང་རྟོགས་ཀྱི་བསྟན་པ་རྣམས་བསྟན་པ་རྣམ་དག་དང་། དེའི་ལུང་གི་བསྟན་པ་ལས་བཤད་པའི་ཚད་མ་མངོན་རྗེས་གཉིས་འཇུག་བྱའི་ཚད་མ་རྣམ་དག་དང་། རྒྱུ་བསམ་སྦྱོར་ཕུན་ཚོགས་གཉིས་ཉམས་སུ་བླངས་པ་ལ་བརྟེན་ནས་འབྲས་བུ་དོན་གཉིས་ཕུན་སུམ་ཚོགས་པའི་ཆོས་སྐུ་ཐོབ་ཚུལ་ཤེས་པར་བྱ་བའི་ཆེད་ཡིན་པའི་ཕྱིར། དེ་ལྟར་ཤེས་པར་བྱ་བ་ལ་ཆོས་ཅན། དགོས་པ་ཡོད་དེ། ཐར་འདོད་རྣམས་ཀྱིས་རང་རེའི་སྟོན་པའི་རྗེས་སུ་འབྲངས་ནས། བསྟེན་བྱ་དགེ་བའི་བཤེས་གཉེན་ཞིག་ལ་བརྟེན་ནས་སྟོན་པའི་ལུང་གི་བསྟན་པ་ལ་ཐོས་བསམ་གྱིས་ཞུགས། རྒྱུ་བསམ་སྦྱོར་ཕུན་སུམ་ཚོགས་པ་ཉམས་སུ་བླངས་པ་ལ་བརྟེན་ནས་འབྲས་བུ་དོན་གཉིས་ཕུན་སུམ་ཚོགས་པའི་ཆོས་སྐུ་ཐོབ་པར་བྱ་བའི་ཆེད་ཡིན་པའི་ཕྱིར། འོ་ན། དེ་ལྟ་བུའི་ཐུབ་པ་སངས་རྒྱས་བཅོམ་ལྡན་འདས་ལ་ཕྱག་འཚལ་ནས་ལས་སུ་བྱ་བ་ཅི་བྱེད་ཅེ་ན། ཀུན་བཏུས་རྩོམ་པའི་བྱ་བ་ལ་འཇུག་གོ། ཞེས་འཆད་པར་བྱེད་པ་ལ། འདིར་གཅིག་བྱ། ཞེས་པ་འདི་བྱུང་། འོ་ན། ཚུལ་ཇི་ལྟར་དུ་རྩོམ་ཞེ་ན། དེ་ཡང་རང་གི་རླུང་གི་རབ་དབྱེ་ལ་སོགས་པའི་ཚད་མའི་བསྟན་བཅོས་བརྒྱ་རྩ་བརྒྱད་ཀྱི་བརྗོད་བྱའི་དོན་ཕྱོགས་གཅིག་ཏུ་བསྡུས་ནས། ཚད་མའི་མདོ་ཀུན་ལས་བཏུས་པ་འདི་རྩོམ་མོ། །ཞེས་འཆད་པར་བྱེད་པ་ལ། རང་གི་གཞུང་ཀུན་ལས། བཏུས་ཏེ་སྣ་ཚོགས་འཐོར་རྣམས། ཞེས་པ་འདི་བྱུང་། འོ་ན། དགོས་པ་གང་གི་ཕྱིར་དུ་རྩོམ་ཞེ་ན། དེ་ཡང་། རང་རེའི་སྟོན་པ་དེ་སྟོན་པ་རྣམ་དག་དང་། དེའི་ལུང་རྟོགས་ཀྱི་བསྟན་པ་རྣམས་བསྟན་པ་རྣམ་དག་དང་། དེའི་ལུང་གི་བསྟན་པ་ལས་བཤད་པའི་ཚད་མ་མངོན་རྗེས་གཉིས་པོ་དེ། འཇུག་བྱའི་ཚད་མ་རྣམ་དག་དང་། རྒྱུ་བསམ་སྦྱོར་ཕུན་ཚོགས་གཉིས་པོ་དེ་ཉམས་སུ་བླངས་བྱའི་ལམ་རྣམ་དག་ཏུ་དངོས་སྟོབས་ཀྱི་རིགས་པས་སྒྲུབ་པའི་ཕྱིར་དུ། རྩོམ་ཞེས་འཆད་པར་བྱེད་པ་ལ། ཚད་མར་སྒྲུབ་ཕྱིར། ཞེས་པ་འདི་བྱུང་། གསུམ་པ་ལུང་དོན་རིགས་པའི་སྒོ་ནས་བསྒྲུབ་པ་ལ། ལུགས་འབྱུང་གི་སྒོ་ནས་བསྒྲུབ་པ་དང་། ལུགས་ལྡོག་གི་སྒོ་ནས་བསྒྲུབ་པ་གཉིས། དང་པོ་ནི། ཐུབ་པ་སངས་རྒྱས་ཆོས་ཅན། ཚད་མའི་སྐྱེས་བུ་མཐར་ཐུག་ཡིན་ཏེ། རང་རྒྱུ་བསམ་པ་ཕུན་ཚོགས་ཉམས་སུ་བླངས་པ་ལ་བརྟེན་ནས་ཐམས་ཅད་མཁྱེན་པའི་སྐྱེས་བུ་མཐར་ཐུག་ཏུ་འཁྲུངས་པའི་ཕྱིར། དེ་ཆོས་ཅན། དེ་ཡིན་ཏེ། རང་རྒྱུ་སྦྱོར་བ་ཕུན་ཚོགས་ཉམས་སུ་བླངས་པ་ལ་བརྟེན་ནས་ཐམས་ཅད་མཁྱེན་པའི་སྐྱེས་བུ་མཐར་ཐུག་ཏུ་འཁྲུངས་པའི་ཕྱིར། བསྒྲུབ་ཆོས་དང་ཆོས་ཅན་འདྲ་བ་ལ། རང་དོན་ཕུན་ཚོགས་བདེ་བར་གཤེགས་པ་མངའ་བའི་སྐྱེས་བུ་མཐར་ཐུག་ཡིན་པའི་ཕྱིར། གཞན་དོན་ཕུན་ཚོགས་སྐྱོབ་པ་གཟུགས་སྐུ་གཉིས་བརྙེས་པའི་ཕྱིར། འཆད་ཚུལ་འདི་ལ་ལུགས་འབྱུང་གི་སྒོ་ནས་འཆད་པ། ཞེས་བརྗོད་པའི་རྒྱུ་མཚན་ཡོད་དེ། ལུང་དེའི་གོ་རིམ་ཇི་ལྟ་བ་བཞིན་དུ་མཐུན་པར་འཆད་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། གཉིས་པ་ལུགས་ལྡོག་གི་སྒོ་ནས་བསྒྲུབ་པ་ནི། ཐུབ་པ་སངས་རྒྱས་ཆོས་ཅན། གདུལ་བྱའི་སྐྱོབ་པ་མཐར་ཐུག་ཡིན་ཏེ། གདུལ་བྱ་ལ་བདེན་བཞིའི་གནས་ལུགས་ཕྱིན་ཅི་མ་ལོག་པར་སྟོན་པའི་སྐྱེས་བུ་མཐར་ཐུག་ཡིན་པའི་ཕྱིར། དེ་ཆོས་ཅན། རང་དོན་བདེ་བར་གཤེགས་པ་མངའ་བ་ཡིན་ཏེ། གཞན་དོན་ཕུན་ཚོགས་སྐྱོབ་པ་གཟུགས་སྐུ་གཉིས་བརྙེས་པའི་སྐྱེས་བུ་མཐར་ཐུག་ཡིན་པའི་ཕྱིར། དེ་ཆོས་ཅན། རྒྱུ་བསམ་སྦྱོར་ཕུན་ཚོགས་ཉམས་སུ་བླངས་པ་ལ་བརྟེན་ནས། ཐམས་ཅད་མཁྱེན་པའི་སྐྱེས་བུ་མཐར་ཐུག་ཏུ་འཁྲུངས་པ་ཡིན་ཏེ། རང་དོན་ཕུན་ཚོགས་བདེ་བར་གཤེགས་པ་མངའ་བའི་སྐྱེས་བུ་མཐར་ཐུག་ཡིན་པའི་ཕྱིར། དེ་ན། འཆད་ཚུལ་འདི་ལ། ལུགས་ལྡོག་གི་སྒོ་ནས་འཆད་པ། ཞེས་བརྗོད་པའི་རྒྱུ་མཚན་ཡོད་དེ། དེ་ལུགས་འབྱུང་གི་གོ་རིམ་དེ་ལས་ལྡོག་སྟེ་བཤད་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། དེ་ན་ལུགས་འབྱུང་གི་སྐབས་སུ་སྟོན་པ་ལམ་གང་ནས་བྱོན་པའི་ཚུལ་བཤད་ཅིང་། ལུགས་ལྡོག་གི་སྐབས་སུ་དེ་ལྟར་བྱོན་པའི་ཤེས་བྱེད་འཆད་པ་ཡིན་ནོ། །

བསྟན་བཅོས་འདིར་འགྲེལ་ཚུལ་བཤད་པ།

གཞུང་གི་སྤྱི་འཕྲོས་དང་ཉེ་འཕྲོས་བཤད་པ།

༈ གཉིས་པ་བསྟན་བཅོས་འདིར་འགྲེལ་ཚུལ་ནི། དེ་ཡང་། ཚད་མ། ཞེས་པའི་དོན་འཆད་པའི་སྒོ་ནས་ཐུབ་པ་སངས་རྒྱས་བཅོམ་ལྡན་འདས་ཚད་མའི་སྐྱེས་བུ་མཐར་ཐུག་ཏུ་སྒྲུབ་པའི་སྒྲུབ་བྱེད་དཔེ་དང་བཅས་ཏེ་འཆད་པར་བྱེད་པ་ལ། ཚད་མ་བསླུ་མེད་ཅན་ཤེས་པ། །ཞེས་པ་ནས། དེ་ལྡན་བཅོམ་ལྡན་ཚད་མ་ཉིད། །ཅེས་པའི་བར་བྱུང་། གྱུར་པ། ཞེས་པའི་དོན་འཆད་པའི་སྒོ་ནས་ཐུབ་པ་སངས་རྒྱས་བཅོམ་ལྡན་འདས་ཚད་མའི་སྐྱེས་བུ་མཐར་ཐུག་ཏུ་སྒྲུབ་པའི་སྒྲུབ་བྱེད་མདོར་བསྟན་གྱི་ཚུལ་གྱིས་འཆད་པར་བྱེད་པ་ལ། མ་སྐྱེས་པ་ནི་བཟློག་དོན་དུ། །ཞེས་པ་ནས། ཚུར་ཤོག་བྱ་རྒོད་བསྟེན་པར་གྱིས། །ཞེས་པའི་བར་བྱུང་། བསྐལ་པ་དུ་མར་སྙིང་རྗེ་ཆེན་པོ་གོམས་པ་མཐར་ཕྱིན་པའི་སྐྱེས་བུ་དེ། ཐུབ་པ་སངས་རྒྱས་བཅོམ་ལྡན་འདས་ཚད་མའི་སྐྱེས་བུར་སྒྲུབ་པའི་སྒྲུབ་བྱེད་དུ་བསྟན་པའི་སྒོ་ནས། འགྲོ་ལ་ཕན་བཞེད་པ། ཞེས་པའི་དོན་འཆད་པར་བྱེད་པ་ལ། སྒྲུབ་བྱེད་ཐུགས་རྗེ་གོམས་ལས་དེ། །ཞེས་པ་ནས། ཆགས་བྲལ་ཆགས་དང་ཡིད་ལོག་བཞིན། །ཞེས་པའི་བར་བྱུང་། ཐེག་ཆེན་འཕགས་པའི་རྒྱུད་ཀྱི་ཕ་རོལ་ཏུ་ཕྱིན་པ་དྲུག་གི་ཉམས་ལེན་དེ། འབྲས་བུའི་སྟོན་པ་ཐོབ་བྱེད་ཀྱི་ཐབས་ཀྱི་གཙོ་བོ་ཡིན་པས། དེ་ལ་སྟོན་པ། ཞེས་པའི་མིང་གིས་བཏགས་ནས་བསྟན་པའི་སྒོ་ནས། སྟོན་པ། ཞེས་པའི་དོན་འཆད་པར་བྱེད་པ་ལ། བརྩེ་ལྡན་སྡུག་བསྔལ་གཞོམ་པའི་ཕྱིར། །ཞེས་པ་ནས། གཉིས་པོ་འདི་ནི་རྒྱུ་རུ་བཤད། །ཅེས་པའི་བར་བྱུང་། སྡུག་ཀུན་གཉིས་ལེགས་པར་སྤངས་པ། མ་ལུས་པར་སྤངས་པ། སླར་མི་ལྡོག་པར་སྤངས་པའི་ཁྱད་པར་གསུམ་ལྡན་གྱི་སྤངས་པ་མཐར་ཐུག་དེ། སྐབས་འདིར་བསྟན་གྱི་བདེ་བར་གཤེགས་པར་བསྟན་པའི་སྒོ་ནས། བདེ་གཤེགས། ཞེས་པའི་དོན་འཆད་པར་བྱེད་པ་ལ། རྒྱུ་སྤངས་ཡོན་ཏན་གསུམ་བདེ་གཤེགས། །ཞེས་པ་ནས། དེ་ཤེས་པ་ཡང་གྲུབ་པ་ཡིན། །ཞེས་པའི་བར་བྱུང་། སྐྱོབ་པ། ཞེས་པའི་དོན་འཆད་པར་བྱེད་པ་ལ། སྐྱོབ་པ་ཉིད་གཟིགས་ལམ་གསུངས་པ། །ཞེས་སོགས་རྐང་པ་བཞི་བྱུང་། དེའི་དོན་བསྡུ་འཆད་པར་བྱེད་པ་ལ། དེ་ཕྱིར་ཚད་ཡིན། ཞེས་པ་འདི་བྱུང་། དེ་ཡན་གྱིས་ལུགས་འབྱུང་གི་སྒོ་ནས་འཆད་པ་དེ་སོང་ནས། ལུགས་ལྡོག་གི་སྒོ་ནས་འཆད་པ་ནི། ཐུབ་པ་སངས་རྒྱས་བཅོམ་ལྡན་འདས་དེས་གདུལ་བྱ་ལ་བདེན་བཞིའི་གནས་ལུགས་ཕྱིན་ཅི་མ་ལོག་པར་སྟོན་པས་ན། དེ་ལ་སྐྱོབ་པ་ཞེས་བརྗོད་ཅིང་བདེན་བཞིའི་གནས་ལུགས་ཇི་ལྟར་སྟོན་ན་སྡུག་ཀུན་གཉིས་དོར་བྱ་དང་། འགོག་ལམ་གཉིས་ཉམས་སུ་བླང་བྱར་སྟོན་པ་ཡིན་ཅིང་། གང་ཟག་གི་བདག་འཛིན་འཁོར་བའི་རྩ་བ་དང་། གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་དེ་གྲོལ་ལམ་རྣམ་དག་ཏུ་བསྟན། གྲངས་ཅན་གྱིས་སྤྱི་གཙོ་བོ་དང་། རང་བཞིན་ཐ་དད་དུ་ཤེས་པ་ལ་བརྟེན་ནས་ཐར་པ་ཐོབ་པར་འཛིན་པའི་བློ་འདི་དང་། རིག་པ་ཅན་པས་ལྷ་དབང་ཕྱུག་ཆེན་པོས་དབང་བསྐུར་བྱས་པ་ཙམ་ལ་བརྟེན་ནས་ཐར་པ་ཐོབ་པར་འཛིན་པའི་བློ་འདི་དང་། གཅེར་བུ་པས། ཟས་གཅོད་པ་དང་། མེ་ལྔ་བསྟེན་པ་ལ་བརྟེན་ནས་ཐར་པ་ཐོབ་པར་འཛིན་པའི་བློ་འདི་དང་། བྱེ་བྲག་པས། དབང་སོགས་བདག་གི་བ་སྡུག་བསྔལ་དུ་བསྒོམ་པ་ལ་བརྟེན་ནས་ཐར་པ་ཐོབ་པར་འཛིན་པའི་བློ་འདི་རྣམས་གྲོལ་ལམ་ཡིན་པ་བཀག་པའི་སྒོ་ནས། སྐྱོབ་པ། ཞེས་པའི་དོན་བསྡུ་འཆད་པར་བྱེད་པ་ལ། ཡང་ན་སྐྱོབ། བདེན་པ་བཞི་ནི་སྟོན་མཛད་པའོ། །ཞེས་པ་ནས། བདེ་བ་ལས་ཀྱང་འདོད་མི་འགྱུར། །ཞེས་པའི་བར་བྱུང་། དེ་ཁོ་ན་ཉིད་མཁྱེན་པ། མཁྱེན་པ་བརྟན་པ། མ་ལུས་པར་མཁྱེན་པའི་ཁྱད་ཆོས་གསུམ་ལྡན་གྱི་རྟོགས་པ་མཐར་ཐུག་དེ་སྐབས་འདིར་བསྟན་གྱི་བདེ་བར་གཤེགས་པར་བསྟན་པའི་སྒོ་ནས། བདེ་གཤེགས། ཞེས་པའི་དོན་འཆད་པར་བྱེད་པ་ལ། སྐྱོབ་ལས་དེ་ཉིད་དང་བརྟན་དང་། །ཞེས་པ་ནས། མི་སློབ་ལས་ལྷག །ཅེས་པའི་བར་བྱུང་། སྟོན་པ། ཞེས་པའི་དོན་འཆད་པར་བྱེད་པ་ལ། དེ་ཡི་ཕྱིར། གཞན་དོན་མཁྱེན་སྦྱོར་དེ་སྟོན་པ། །ཞེས་པ་འདི་བྱུང་། འགྲོ་ལ་ཕན་བཞེད་པ། ཞེས་པའི་དོན་འཆད་པར་བྱེད་པ་ལ། དེ་ལས་བརྩེ་ཡིན་གཞན་དོན་ངོར། །ཞེས་སོགས་རྐང་པ་གཉིས་བྱུང་། ཚད་མར་གྱུར་པ། ཞེས་པའི་དོན་འཆད་པར་བྱེད་པ་ལ། བརྩེ་བས་ལེགས་དང་ཡེ་ཤེས་ལས། །ཞེས་པ་ནས། གང་ཕྱིར་དེ་ན་ཚད་མ་ཉིད། །ཅེས་པའི་བར་བྱུང་། དེ་དག་གི་དོན་བསྡུས་ཏེ་ཐུབ་པ་སངས་རྒྱས་བཅོམ་ལྡན་འདས་ལ་ཚད་མ་དང་འདྲ་བའི་སྒོ་ནས་བསྟོད་པའི་དགོས་པ་དེ་འཆད་པར་བྱེད་པ་ལ། དེ་ལྟའི་དངོས་སྟོན་བསྟོད་པ་ནི། །ཞེས་པ་ནས། བསྟན་ཕྱིར་དེ་ཡང་གསལ་བར་བཤད། །ཅེས་པའི་བར་བྱུང་། དེ་ཡན་གྱིས་སྤྱིའི་འཕྲོས་དེ་སོང་ནས། །

༈ ཉེ་འཕྲོས་ནི། ཚད་མ་བསླུ་མེད་ཅན་ཤེས་པ། །ཞེས་པའི་གཞུང་འདི་གང་ལས་འཕྲོས་ན། ཚད་མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་འཚལ་ཏེ། །ཞེས་འཆད་པ་ལས་འཕྲོས། འོ་ན། ཐུབ་པ་སངས་རྒྱས་བཅོམ་ལྡན་འདས་ལ་ཚད་མ་ཞེས་བརྗོད་པའི་རྒྱུ་མཚན་གང་ཞེ་ན། དེ་ལྟར་བརྗོད་པའི་རྒྱུ་མཚན་ཡོད་དེ། ཚད་མ་དང་འདྲ་བའི་སྒོ་ནས་དེ་ལྟར་བརྗོད་པའི་ཕྱིར། འོ་ན། འདྲ་ཡུལ་གྱི་ཚད་མའི་ངོ་བོ་དེ་གང་། ཐུབ་པ་སངས་རྒྱས་བཅོམ་ལྡན་འདས་ཚད་མ་དང་འདྲ་བའི་རྒྱུ་མཚན་གང་ཞེ་ན། འདྲ་ཡུལ་གྱི་ཚད་མའི་ངོ་བོ་བཞག་ཏུ་ཡོད་དེ། གསར་དུ་མི་བསླུ་བའི་རིག་པ་དེ་དེ་ཡིན་པའི་ཕྱིར། ཞེས་འཆད་པར་བྱེད་པ་ལ། ཚད་མ་བསླུ་མེད། ཅེས་སོགས་བྱུང་བ་ཡིན་ཏེ། དེ་སྐད་དུ་ཡང་། ལྷ་དབང་བློས། ཚད་མར་གྱུར་པ་ནི་ཚད་མར་འཁྲུངས་པའོ། །ཚད་མ་དང་འདྲ་བས་ན་ཚད་མ་སྟེ། བཅོམ་ལྡན་འདས་སོ། །ཞེས་གསུངས། འོ་ན། དེ་ལྟར་ཡིན་ན་མི་བསླུ་བའི་རིག་པའི་དོན་གང་ཞེ་ན། མེ་འཛིན་དབང་མངོན་ཆོས་ཅན། མི་བསླུ་བའི་རིག་པ་ཡིན་ཏེ། མེས་བཙོ་སྲེག་གི་དོན་བྱེད་ནུས་པ་གང་ཞིག །དེ་ལ་སྒྲོ་འདོགས་དངོས་སུ་གཅོད་བྱེད་ཀྱི་རིག་པ་ཡིན་པའི་ཕྱིར། ཞེས་འཆད་པར་བྱེད་པ་ལ། དོན་བྱེད་ནུས་པར་གནས་པ་ནི། །མི་བསླུ། ཞེས་པ་འདི་བྱུང་། རང་རེས་གོང་དུ་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་ཁས་བླངས་པ་དེ་ལ། མ་ཁྱབ། ཁྱབ་ཆེས། མི་སྲིད་པའི་སྐྱོན་གསུམ་སྤོང་བ་ལས། དང་པོ་ལ། ཁ་ཅིག་ན་རེ། སྒྲ་བྱུང་གི་ཚད་མ་ཆོས་ཅན། གསར་དུ་མི་བསླུ་བའི་རིག་པ་ཡིན་པར་ཐལ། ཚད་མ་ཡིན་པའི་ཕྱིར། ཟེར་ན། ཁྱོད་ཀྱི་སྒྲ་བྱུང་གི་ཚད་མ་དེ་གང་ལ་བྱེད། སྒྲ་མི་རྟག་ཅེས་པའི་ཚིག་གི་རྟགས་ལས། ཚུར་མཐོང་ལྷས་སྦྱིན་ལས་སྐྱེས་པའི་སྒྲ་མི་རྟག་ཅེས་པའི་ཚིག་རང་སྨྲ་བ་པོའི་གང་ཟག་གི་རྒྱུད་ལ་ཀུན་སློང་གི་བསམ་པ་ཡོད་པར་རྟོགས་པའི་རྗེས་དཔག་འདི་ལ་བྱེད་དམ། སྒྲ་རྟག་ཅེས་པའི་ངག་གི་རྟགས་ལས། མདུན་གྱི་གཞི་འདིར་སྒྲ་རྟག་པ་ཡོད་པར་རྟོགས་པའི་རྗེས་དཔག་འདི་ལ་བྱེད། དང་པོ་ལྟར་ཡིན་ནོ། །ཟེར་ན། དེ་འདྲའི་རྗེས་དཔག་དེ་ཚད་མ་ཡིན་ཏེ། སྒྲ་མི་རྟག་ཅེས་པའི་ཚིག་དེ་ལྷས་སྦྱིན་ལས་སྐྱེས་པའི་སྒྲ་མི་རྟག་ཅེས་པའི་ཚིག་རང་སྨྲ་བ་པོའི་གང་ཟག་གི་རྒྱུད་ལ་ཀུན་སློང་གི་བསམ་པ་ཡོད་པར་སྒྲུབ་པའི་རྟགས་ཡང་དག་ཡིན་པའི་ཕྱིར། ཞེས་འཆད་པར་བྱེད་པ་ལ། སྒྲ་ལས་བྱུང་བ་ཡང་། མངོན་པར་འདོད་པ་སྟོན་ཕྱིར་རོ། །ཞེས་སོགས་བྱུང་། གཉིས་པ་ལྟར་རོ། །ཟེར་ན། དེ་འདྲའི་རྗེས་དཔག་ཚད་མ་མ་ཡིན་ཏེ། སྒྲ་རྟག་ཅེས་པའི་ངག་དེ་མདུན་གྱི་གཞི་འདིར་སྒྲ་རྟག་པ་ཡོད་པར་སྒྲུབ་པའི་རྟགས་ཡང་དག་མ་ཡིན་པའི་ཕྱིར། དེར་ཐལ། དེ་དེ་ལྟར་སྒྲུབ་པའི་འབྲས་རྟགས་མ་ཡིན་པའི་ཕྱིར། དེར་ཐལ། སྒྲ་རྟག་ཅེས་པའི་ངག་དེ། སྒྲ་རྟག་པ་རང་རྒྱུར་བྱས་པ་ལ་བརྟེན་ནས་བྱུང་བ་མ་ཡིན་པའི་ཕྱིར། ཞེས་འཆད་པར་བྱེད་པ་ལ། དོན་གྱི་དེ་ཉིད་རྒྱུ་ཅན་མིན། །ཞེས་པ་འདི་བྱུང་། ཁྱབ་ཆེས་པའི་སྐྱོན་སྤོང་བ་ལ། ཁ་ཅིག་ན་རེ། སྔོན་འཛིན་དབང་སྔོན་གྱིས་དྲངས་ནས་སྐྱེས་པའི་སྔོན་པོ་དོན་མཐུན་ངེས་པའི་ངེས་ཤེས་ཆོས་ཅན། ཚད་མ་ཡིན་པར་ཐལ། གསར་དུ་མི་བསླུ་བའི་རིག་པ་ཡིན་པའི་ཕྱིར། ཟེར་ན། དེ་ཆོས་ཅན། གསར་དུ་མི་བསླུ་བའི་རིག་པ་ཡིན་པར་མི་འཐད་དེ། རང་འདྲེན་བྱེད་ཀྱི་ཚད་མ་སྔ་མས་རྟོགས་ཟིན་གྱི་བྱེད་པ་མ་ཉམས་པའི་དོན་ལ་བསྣན་ནས་འཇུག་པའི་ཚད་མ་མ་ཡིན་པའི་རིག་པ་ཡིན་པའི་ཕྱིར། ཞེས་འཆད་པར་བྱེད་པ་ལ། གཟུང་བ་འཛིན་ཕྱིར་ཀུན་རྫོབ་ནི། །མི་འདོད། ཅེས་པ་འདི་བྱུང་། མི་སྲིད་པའི་སྐྱོན་སྤོང་བ་ལ། བྱེ་བྲག་སྨྲ་བ་ན་རེ། གསར་དུ་མི་བསླུ་བའི་རིག་པ་ཚད་མའི་མཚན་ཉིད་ཡིན་པ་མི་འཐད་པར་ཐལ། རྟེན་བཅས་ཀྱི་མིག་དབང་གཟུགས་ཅན་པ་ཚད་མ་ཡིན་པའི་ཕྱིར། ཟེར་ན། དེ་ཚད་མ་མ་ཡིན་ཏེ། དེ་དང་གསར་དུ་མི་བསླུ་བའི་རིག་པ་གཉིས་ཀྱི་ནང་ནས། གསར་དུ་མི་བསླུ་བའི་རིག་པ་ཁོ་ན་བར་ཆོད་པའི་ཚད་མའི་འབྲས་བུ་དང་། བར་མ་ཆོད་པའི་ཚད་མའི་འབྲས་བུ་བསྒྲུབ་པ་ལ་གཙོ་ཆེ་བ་ཡིན་གྱི། རྟེན་བཅས་ཀྱི་མིག་དབང་གཟུགས་ཅན་པས་དེ་ལྟར་བསྒྲུབ་མི་ནུས་པའི་ཕྱིར། ཞེས་འཆད་པར་བྱེད་པ་ལ། བློ་ནི་ཚད་མ་ཉིད། བླང་དང་དོར་བྱའི་དངོས་པོ་ཡི། །འཇུག་ལ་དེ་གཙོ་ཡིན་ཕྱིར་དང་། །ཞེས་པ་འདི་བྱུང་། དེ་ལྟར་གཙོ་ཆེ་བ་ཡང་ཡིན་ཏེ། སྔོན་པོའི་རྣམ་པར་ཤར་ནས་སྔོན་པོ་ལ་གསར་དུ་མི་བསླུ་བའི་རིག་པ་ཡོད་ན། སྔོན་པོ་དངོས་སུ་རྟོགས་པའི་ཚད་མ་ཡོད་དགོས། དེ་མེད་ན་སྔོན་པོ་དངོས་སུ་རྟོགས་པའི་ཚད་མ་མེད་དགོས་པའི་ཕྱིར། དཔེར་ན། སྔོན་འཛིན་དབང་མངོན་དེ་ལ་སྔོན་པོའི་རྣམ་པ་ཤར་ནས། སྔོན་པོ་ལ་གསར་དུ་མི་བསླུ་བའི་རིག་པ་ཡིན་པའི་ཆ་ནས་དེ་སྔོན་པོ་དངོས་སུ་རྟོགས་པའི་ཚད་མར་སོང་། དེ་ལ་བུམ་པའི་རྣམ་པ་ཤར་ནས། བུམ་པ་ལ་གསར་དུ་མི་བསླུ་བའི་རིག་པ་མ་ཡིན་པའི་ཆ་ནས། བུམ་པ་དངོས་སུ་རྟོགས་པའི་ཚད་མ་མ་ཡིན་པར་སོང་བའི་དཔེ་དེ་བཞིན་ནོ། །ཞེས་འཆད་པར་བྱེད་པ་ལ། ཡུལ་རྣམ་ཅན་ནི་ཐ་དད་པས། །ཞེས་སོགས་རྐང་པ་གསུམ་བྱུང་། འོ་ན། ཚད་མའི་མཚན་གཞིའི་སྟེང་དུ་མཚན་ཉིད་ངེས་བྱེད་ཀྱི་ཚད་མ་དེ་གང་ཞེ་ན། དེ་འཆད་པར་བྱེད་པ་ལ། རང་ལས་རང་གི་ངོ་བོ་རྟོགས། །ཞེས་སོགས་རྐང་པ་གསུམ་བྱུང་། དེ་ལྟར་ཡིན་ན། མི་བསླུ་བའི་རིག་པ་ཙམ་གྱིས་ཚད་མའི་མཚན་ཉིད་ཡོངས་སུ་རྫོགས་པ་ཡིན་ནམ་ཞེ་ན། དེ་མ་ཡིན་ཏེ། ཚད་མའི་མཚན་ཉིད་ཀྱི་ཟུར་དུ་གསར་དུ་ཞེས་པའི་ཁྱད་པར་ཞིག་སྨོས་དགོས་པའི་ཕྱིར། ཞེས་འཆད་པར་བྱེད་པ་ལ། མ་ཤེས་དོན་གྱི་གསལ་བྱེད་ཀྱང་། །ཞེས་པ་འདི་བྱུང་། ཡང་རང་རེས་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་བསྟན་པ་དེ་ལ་ཁོ་ན་རེ། སྔོན་འཛིན་དབང་མངོན་གྱིས་དྲངས་ནས་སྐྱེས་པའི་སྔོན་པོ་དོན་མཐུན་དུ་ངེས་པའི་ངེས་ཤེས་ཆོས་ཅན། སྔོན་པོ་ལ་ཚད་མར་ཐལ། སྔོན་པོའི་སྤྱི་རྟག་དངོས་ལ་གསར་དུ་མི་བསླུ་བའི་རིག་པ་ཡིན་པའི་ཕྱིར། ཞེས་པའི་འདོད་པ་བརྗོད་པར་བྱེད་པ་ལ། རང་གི་ངོ་བོ་རྟོགས་འོག་ཏུ། །ཞེས་སོགས་རྐང་པ་གཉིས་བྱུང་། འོ་ན། དེ་ལྟ་བུའི་ངེས་ཤེས་དེ། སྔོན་པོའི་སྤྱི་རྟག་དངོས་ལ་གསར་དུ་མི་བསླུ་བའི་རིག་པ་ཡིན་པའི་ཆ་ནས་དེ་སྔོན་པོ་ལ་ཚད་མ་ཡིན་པར་འགྱུར་རམ་ཞེ་ན། མི་འགྱུར་ཏེ། དེ་སྔོན་པོའི་སྤྱི་རྟག་དངོས་ལ་གསར་དུ་མི་བསླུ་བའི་རིག་པ་ཡང་མ་ཡིན། སྔོན་པོ་ལ་ཚད་མ་ཡང་མ་ཡིན་པའི་ཕྱིར། རྟགས་གཉིས་ཀ་གྲུབ་སྟེ། སྔོན་པོ་ལ་ཚད་མ་ཡིན་ན། རང་མཚན་དུ་གྱུར་པའི་སྔོན་པོ་ལ་ཚད་མ་ཡིན་དགོས་པའི་ཕྱིར། དེར་ཐལ། སྔོན་པོ་དོན་གཉེར་གྱི་སྐྱེས་བུ་དེས་སྔོན་པོ་ལ་དཔྱད་ནས་འཇུག་པའི་ཚེ། རང་མཚན་དུ་གྱུར་པའི་སྔོན་པོ་ལ་དཔྱད་ནས་འཇུག་པ་ཡིན་གྱི། སྔོན་པོའི་སྤྱི་རྟག་དངོས་ལ་དཔྱད་ནས་སྔོན་པོ་ལ་འཇུག་པ་མ་ཡིན་པ། སློབ་དཔོན་ཕྱོགས་གླང་གིས་བཞེད་པའི་ཕྱིར། ཞེས་འཆད་པར་བྱེད་པ་ལ། རང་གི་མཚན་ཉིད་མི་ཤེས་པ། །ཞེས་སོགས་རྐང་པ་གསུམ་བྱུང་། དེས་ན་ཐུབ་པ་སངས་རྒྱས་བཅོམ་ལྡན་འདས་དེ་ཚད་མ་དང་འདྲ་བ་ཡིན་ཏེ། ཚད་མས་རང་གི་གཞལ་བྱ་གསར་དུ་རྟོགས་ཤིང་དེ་ལ་མི་བསླུ་བ་ཡིན་པ་ལྟར་དུ། ཐུབ་པ་སངས་རྒྱས་བཅོམ་ལྡན་འདས་ཀྱིས་ཀྱང་། བདེན་བཞིའི་གནས་ལུགས་གསར་དུ་རྟོགས་ཤིང་གདུལ་བྱ་ལ་བདེན་བཞིའི་གནས་ལུགས་ཕྱིན་ཅི་མ་ལོག་པར་བསྟན་པའི་སྒོ་ནས་གདུལ་བྱའི་གནས་སྐབས་དང་མཐར་ཐུག་གི་དོན་འགྲུབ་པ་ལ་མི་བསླུ་བའི་སྐྱབས་གནས་མཐར་ཐུག་ཡིན་པའི་ཕྱིར། ཞེས་འཆད་པར་བྱེད་པ་ལ། དེ་ལྡན་བཅོམ་ལྡན་ཚད་མ་ཉིད། །ཅེས་པ་འདི་བྱུང་། །

འདྲ་ཡུལ་ཚད་མའི་ངོ་བོ་སོགས་ལ་མཐའ་དཔྱད་པ།

༈ དེས་ན་སྐབས་འདིར་མཐའ་དཔྱད་ལ། ཁ་ཅིག་ན་རེ། མི་བསླུ་བའི་རིག་པ་ཚད་མའི་མཚན་ཉིད་ཡིན་ནོ། །ཟེར་ན། དེ་མི་འཐད་པར་ཐལ། ཚད་མའི་མཚན་ཉིད་ཀྱི་ཟུར་དུ་གསར་དུ་ཞེས་པའི་ཁྱད་པར་ཞིག་སྨོས་དགོས་པའི་ཕྱིར་ཏེ། མ་ཤེས་དོན་གྱི་གསལ་བྱེད་ཀྱང་། །ཞེས་གསུངས་པའི་ཕྱིར། གཞན་ཡང་། མི་བསླུ་བའི་རིག་པ་ཙམ་གྱིས་ཚད་མའི་མཚན་ཉིད་ཡོངས་སུ་མ་རྫོགས་པར་ཐལ། ཚད་མ་ཡིན་ན་རང་གི་གཞལ་བྱ་ལ་གསར་དུ་མི་བསླུ་བའི་རིག་པ་ཡིན་དགོས་པའི་ཕྱིར། དེར་ཐལ། ཚད་མའི་སྐད་དོད་ཀྱི་པྲ་མ་ཎ། ཞེས་པའི་པྲ་དང་པོ་དང་། མ་ཎ་འཇལ་བ་ལ་འཇུག་ཅིང་། དང་པོ། ཞེས་པའི་དོན་ཡང་གསར་དུ་ཞེས་པ་ལ་བྱེད་རིགས་པའི་ཕྱིར། ཁ་ཅིག་ན་རེ། རང་གི་གཞལ་བྱ་ལ་སྒྲོ་འདོགས་གཅོད་བྱེད་ཀྱི་རིག་པ་ཚད་མའི་མཚན་ཉིད་ཡིན་ཟེར་ན། སྔོན་འཛིན་དབང་མངོན་གྱིས་དྲངས་ནས་སྐྱེས་པའི་སྔོན་པོ་དོན་མཐུན་ངེས་པའི་ངེས་ཤེས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། སྔོན་པོ་སྔོན་པོ་མ་ཡིན་པར་སྒྲོ་འདོགས་པའི་སྒྲོ་འདོགས་གཅོད་བྱེད་ཀྱི་རིག་པ་ཡིན་པའི་ཕྱིར་ཏེ། དེ་འདྲའི་ངེས་ཤེས་དེ་དང་སྔོན་པོ་སྔོན་པོ་མ་ཡིན་པར་སྒྲོ་འདོགས་པའི་སྒྲོ་འདོགས་གཉིས་པོ་གནོད་བྱ་གནོད་བྱེད་ཡིན་པའི་ཕྱིར་ཏེ། གནོད་བྱ་གནོད་བྱེད་ངོ་བོའི་ཕྱིར། །ཞེས་གསུངས་པའི་ཕྱིར། ཁ་ཅིག་ན་རེ། རང་གི་གཞལ་བྱ་གསར་དུ་རྟོགས་པའི་རིག་པ་ཚད་མའི་མཚན་ཉིད་ཟེར་ན། བུམ་འཛིན་རྟོག་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། བུམ་པ་གསར་དུ་རྟོགས་པའི་རིག་པ་ཡིན་པའི་ཕྱིར། འདོད་ན། དེ་ཆོས་ཅན། རྗེས་སུ་དཔག་པའི་ཚད་མ་ཡིན་པར་ཐལ། ཚད་མ་གང་ཞིག །རྟོག་པ་ཡིན་པའི་ཕྱིར། འདོད་ན། དེ་ཆོས་ཅན། རང་གི་རྟེན་དུ་གྱུར་པའི་རྟགས་ཡང་དག་ལ་བརྟེན་ནས་བསྐྱེད་པར་ཐལ། འདོད་པའི་ཕྱིར། ཁྱབ་སྟེ། རྟགས་ནི་རྗེས་དཔག་རྟེན་ཡིན་ནོ། །ཞེས་གསུངས་པའི་ཕྱིར། འདོད་ན། ཁྱོད་ཀྱི་རྟེན་དུ་གྱུར་པའི་རྟགས་ཡང་དག་མེད་ན་ཁྱོད་མེད་དགོས་པར་ཐལ་ལོ། །ཁ་ཅིག་ན་རེ། རང་གི་འཇུག་ཡུལ་ཐོབ་པའི་རིག་པ་ཚད་མའི་མཚན་ཉིད་ཟེར་ན། སེམས་ཅན་གྱི་རྒྱུད་ཀྱི་རྣམ་མཁྱེན་རྟོགས་པའི་རྗེས་དཔག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། རྣམ་མཁྱེན་ཐོབ་པའི་རིག་པ་ཡིན་པར་ཐལ། འདོད་པ་གང་ཞིག །རྣམ་མཁྱེན་དེ་ཁྱོད་ཀྱི་འཇུག་ཡུལ་ཡིན་པའི་ཕྱིར། འདོད་ན། སེམས་ཅན་དེ་རྣམ་མཁྱེན་ཐོབ་པའི་གང་ཟག་ཏུ་ཐལ། དེའི་རྒྱུད་ཀྱི་རྣམ་མཁྱེན་རྟོགས་པའི་རྗེས་དཔག་དེ་རྣམ་མཁྱེན་ཐོབ་པའི་རིག་པ་ཡིན་པའི་ཕྱིར། རྟགས་ཁས། བྱས་པ་ལ་ཁོ་ན་རེ། སེམས་ཅན་གྱི་རྒྱུད་ཀྱི་རྣམ་མཁྱེན་རྟོགས་པའི་རྗེས་དཔག་དེ་རྣམ་མཁྱེན་ཐོབ་པའི་རིག་པ་ཡིན་པར་ཐལ། དེ་རྣམ་མཁྱེན་འཇུག་ཡུལ་དུ་ཐོབ་པའི་རིག་པ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེའི་རྒྱུད་ཀྱི་བུམ་པ་རྟོགས་པའི་རྗེས་དཔག་དེ་བུམ་པ་འཇུག་ཡུལ་དུ་ཐོབ་པའི་རིག་པ་ཡིན་པའི་ཕྱིར། ཁ་ཅིག་ན་རེ། རང་གི་གཞལ་བྱ་ལ་སྒྲོ་འདོགས་གསར་དུ་གཅོད་བྱེད་ཀྱི་རིག་པ་ཚད་མའི་མཚན་ཉིད་ཟེར་ན། དེ་ལ་སྐྱོན་འཕེན་པ་ཁ་ཅིག་ན་རེ། སྒྲ་མི་རྟག་པར་འཛིན་པའི་རྟོག་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། སྒྲ་མི་རྟག་པ་ལ་སྒྲོ་འདོགས་གསར་དུ་གཅོད་བྱེད་ཀྱི་རིག་པ་ཡིན་པའི་ཕྱིར་ཏེ། སྒྲ་མི་རྟག་པ་ལ་སྒྲོ་འདོགས་གཅོད་བྱེད་ཀྱི་རིག་པ་གང་ཞིག །དེ་ལ་སྒྲོ་འདོགས་ཆོད་ཟིན་གཅོད་པའི་རིག་པ་མ་ཡིན་པའི་ཕྱིར། རྟགས་དང་པོ་གྲུབ་སྟེ། སྒྲ་རྟག་པར་སྒྲོ་འདོགས་པའི་སྒྲོ་འདོགས་གཅོད་བྱེད་ཀྱི་རིག་པ་ཡིན་པའི་ཕྱིར་ཏེ། སྒྲོ་འདོགས་དེའི་ཞེན་ཡུལ་ཁེགས་པའི་རིག་པ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། སྒྲ་རྟག་པ་ཁེགས་པའི་རིག་པ་ཡིན་པའི་ཕྱིར་ཏེ། སྒྲ་མི་རྟག་པ་རྟོགས་པའི་རིག་པ་ཡིན་པའི་ཕྱིར། རྩ་བར་འདོད་ན། བུམ་འཛིན་རྟོག་པ་ཡང་ཚད་མར་ཐལ་ལོ། །ཁ་ཅིག་ན་རེ། རང་གི་གཞལ་བྱ་ལ་གསར་དུ་མི་བསླུ་བའི་རིག་པ་ཚད་མའི་མཚན་ཉིད་ཟེར་ན། དེ་ལ་སྐྱོན་འཕེན་པ་ཁ་ཅིག་ན་རེ། སྒྲ་མི་རྟག་པར་འཛིན་པའི་རྟོག་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། སྒྲ་མི་རྟག་པ་ལ་གསར་དུ་མི་བསླུ་བའི་རིག་པ་ཡིན་པའི་ཕྱིར་ཏེ། སྒྲ་མི་རྟག་པ་ལ་མི་བསླུ་བའི་རིག་པ་གང་ཞིག །དེ་རྟོགས་ཟིན་རྟོགས་པའི་རིག་པ་མ་ཡིན་པའི་ཕྱིར། དང་པོ་གྲུབ་སྟེ། སྒྲ་མི་རྟག་པར་གཞལ་བ་གཞལ་བ་ལྟར་དུ་གྲུབ་པའི་རིག་པ་ཡིན་པའི་ཕྱིར། ཁྱབ་སྟེ། མེས་བཙོ་སྲེག་གི་དོན་བྱེད་ནུས་པ་གཞལ་བ་གཞལ་བ་ལྟར་དུ་གྲུབ་པའི་རིག་པ་ཡིན་ན། དེ་ལ་མི་བསླུ་བའི་རིག་པ་ཡིན་དགོས་པའི་ཕྱིར་ཏེ། དོན་བྱེད་ནུས་པར་གནས་པ་ནི། །མི་བསླུ། ཞེས་གསུངས་པའི་ཕྱིར་ན་མ་ཁྱབ་སྟེ། དེ་ལ་སྒྲོ་འདོགས་གསར་དུ་གཅོད་བྱེད་ཀྱི་རིག་པ་ཡིན་ན། དེ་ལ་མི་བསླུ་བའི་རིག་པ་ཡིན་དགོས་པ་ལུང་དེའི་དོན་ཡིན་པའི་ཕྱིར། ཁ་ཅིག་ན་རེ། སྒྲོ་འདོགས་གཅོད་བྱེད་ཀྱི་རིག་པ་ཚད་མའི་མཚན་ཉིད་ཟེར་ན། སྔོན་འཛིན་དབང་མངོན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། སྒྲོ་འདོགས་གཅོད་བྱེད་ཀྱི་ཚད་མ་ཡིན་པར་ཐལ། འདོད་པ་གང་ཞིག །ཚད་མ་ཡིན་པའི་ཕྱིར། འདོད་ན། སྒྲོ་འདོགས་ཀྱི་ཞེན་ཡུལ་བཀག་པའི་ཚད་མ་ཡིན་པར་ཐལ། འདོད་པའི་ཕྱིར། འདོད་ན། སྒྲོ་འདོགས་ཀྱི་ཞེན་ཡུལ་ཆོས་ཅན། སྔོན་འཛིན་དབང་མངོན་ཁྱོད་བཀག་པའི་ཚད་མ་མ་ཡིན་པར་ཐལ། སེར་འཛིན་དབང་མངོན་དེ་ཁྱོད་བཀག་པའི་ཚད་མ་ཡིན་པའི་ཕྱིར། བྱས་པ་ལ་ཁོ་ན་རེ། སྔོན་འཛིན་དབང་མངོན་དེ། སྒྲོ་འདོགས་གཅོད་བྱེད་ཀྱི་ཚད་མ་ཡིན་པར་ཐལ། སྒྲོ་འདོགས་དེ་སྔོན་འཛིན་དབང་མངོན་གྱི་བཅད་བྱར་གྱུར་པའི་སྒྲོ་འདོགས་ཡིན་པའི་ཕྱིར། དེ་སངས་འཕགས་ཀྱི་རྒྱུད་ཀྱི་སྔོན་འཛིན་དབང་མངོན་གྱི་བཅད་བྱར་གྱུར་པའི་སྒྲོ་འདོགས་ཡིན་པའི་ཕྱིར་ན་མ་ཁྱབ། ཁ་ཅིག་ན་རེ། གསར་དུ་མི་བསླུ་བའི་རིག་པ་དེ། ཚད་མ་བསླུ་མེད་ཅན་ཤེས་པ། །ཞེས་པའི་སྐབས་ནས་དངོས་བསྟན་བསྟན་བྱའི་གཙོ་བོར་གྱུར་པའི་ཚད་མའི་མཚན་ཉིད་ཡིན་ཟེར་ན། ཉན་ཐོས་ཀྱི་མཐོང་ལམ་བར་ཆད་མེད་ལམ་ཆོས་ཅན། དེའི་སྐབས་ནས་དངོས་སུ་བསྟན་པའི་ཚད་མ་ཡིན་པར་ཐལ། མཚན་ཉིད་དེའི་ཕྱིར། འདོད་ན། གཞུང་དེའི་ཆེད་དུ་བྱ་བའི་གདུལ་བྱར་གྱུར་པའི་ཐེག་དམན་གྱི་རིགས་ཅན་གཅིག་ཡོད་པར་ཐལ་ལོ། །འདོད་མི་ནུས་ཏེ། གཞུང་དེ་ཐེག་ཆེན་ཐུན་མོང་མ་ཡིན་པའི་གཞུང་ཡིན་པའི་ཕྱིར་ཏེ། ཚད་མ་གྲུབ་པའི་ལེའུ་འདི་ཐེག་ཆེན་ཐུན་མོང་མ་ཡིན་པའི་གཞུང་ཡིན་པའི་ཕྱིར་ཏེ། བསྟན་བཅོས་འདི་ཐེག་ཆེན་ཐུན་མོང་མ་ཡིན་པའི་བསྟན་བཅོས་ཡིན་པའི་ཕྱིར། བྱས་པ་ལ་ཁོ་ན་རེ། དེ་དེས་དངོས་བསྟན་བསྟན་བྱའི་གཙོ་བོར་བྱས་ནས་བསྟན་པར་ཐལ། དེ་ཆོས་ཅན། ཚད་མ་ཡིན་ཏེ། གསར་དུ་མི་བསླུ་བའི་རིག་པ་ཡིན་པའི་ཕྱིར། ཞེས་པའི་སྦྱོར་བ་འདི་གཞུང་དེའི་དངོས་བསྟན་གྱི་སྦྱོར་བ་ཡིན་པའི་ཕྱིར། རྟགས་གྲུབ་སྟེ། དེའི་དངོས་བསྟན་གྱི་སྦྱོར་བ་ཡོད་པའི་ཕྱིར་ཟེར་ན་མ་ཁྱབ། ཁོ་རང་ལ། གསར་དུ་མི་བསླུ་བའི་རིག་པ་དེ། གཞུང་དེའི་དངོས་བསྟན་བསྟན་བྱའི་གཙོ་བོར་གྱུར་པའི་ཚད་མའི་མཚན་ཉིད་ཡིན་པར་ཐལ། གཞུང་དེས་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་དངོས་ཀྱི་བསྟན་བྱའི་གཙོ་བོར་བྱས་ནས་བསྟན་པའི་ཕྱིར་ཏེ། མེ་འཛིན་དབང་མངོན་ཆོས་ཅན། ཚད་མ་ཡིན་ཏེ། གསར་དུ་མི་བསླུ་བའི་རིག་པ་ཡིན་པའི་ཕྱིར། ཞེས་པའི་སྦྱོར་བ་འདི། གཞུང་འདིའི་དངོས་ཀྱི་བསྟན་བྱའི་དེར་གྱུར་པའི་སྦྱོར་བ་ཡིན་པའི་ཕྱིར་ཏེ། དེའི་དངོས་ཀྱི་བསྟན་བྱའི་དེར་གྱུར་པའི་དེ་ཡོད་པའི་ཕྱིར། ཁྱབ་པ་ཁས། རྩ་བར་འདོད་ན། ཉན་ཐོས་ཀྱི་མཐོང་ལམ་བར་ཆད་མེད་ལམ་ཆོས་ཅན། གཞུང་འདིའི་དངོས་བསྟན་བསྟན་བྱའི་དེར་གྱུར་པའི་ཚད་མ་ཡིན་པར་ཐལ། གསར་དུ་མི་བསླུ་བའི་རིག་པ་ཡིན་པའི་ཕྱིར། ཁྱབ་པ་ཁས། དེ་དེའི་མཚན་ཉིད་དུ་གཞུང་གིས་བསྟན་ཚུལ་ལ། ཁ་ཅིག་ན་རེ། ཚད་མ་བསླུ་མེད་ཅན་ཤེས་པ། །ཞེས་པའི་གཞུང་འདིས་ཚད་མའི་མཚན་ཉིད་ཀྱི་ཟུར་གྱི་མི་བསླུ་བ་དེ་བསྟན། མ་ཤེས་དོན་གྱི་གསལ་བྱེད་ཀྱང་། །ཞེས་པས་དེའི་ཟུར་གྱི་གསར་དུ་ཞེས་པ་དེ་བསྟན། གཞུང་དེ་གཉིས་ཀ་ཚོགས་པས་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་བསྟན་ཅིང་། གཞུང་དང་པོ་དེས་ཚད་མའི་མཚན་ཉིད་ཡོངས་རྫོགས་མ་བསྟན་ནོ། །ཟེར་ན། གཞུང་དེས་ཚད་མའི་མཚན་ཉིད་མ་བསྟན་པར་ཐལ། དེས་ཚད་མའི་མཚན་ཉིད་ཡོངས་རྫོགས་མ་བསྟན་པ་གང་ཞིག །དེའི་མཚན་ཉིད་ཡིན་ན་དེའི་མཚན་ཉིད་ཡོངས་རྫོགས་ཡིན་དགོས་པའི་ཕྱིར། འདོད་མི་ནུས་ཏེ། ལྷ་དབང་བློས། དེ་ལྟར་ན་མི་བསླུ་བའི་ཚད་མའི་མཚན་ཉིད་གཅིག་བཤད་ཟིན་ཏོ། །མ་ཤེས་དོན་གྱི་གསལ་བྱེད་ཀྱང་། །ཞེས་པ་གཞན་ཚད་མའི་མཚན་ཉིད་གཉིས་པ་ཡིན་ནོ། །ཞེས་གསུངས་པའི་ཕྱིར། གཞན་ཡང་། གཞུང་དང་པོ་དེས་ཚད་མའི་མཚན་ཉིད་ཡོངས་རྫོགས་བསྟན་པར་ཐལ། དེས་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་བསྟན་པའི་ཕྱིར་ཏེ། དེས་དེ་དེའི་མཚན་ཉིད་དུ་བསྟན་པ་ལ། མ་ཁྱབ། ཁྱབ་ཆེས། མི་སྲིད་པའི་སྐྱོན་གསུམ་སྤོང་བར་བྱེད་པ་ལ། སྒྲ་ལས་བྱུང་བ་ཡང་། ཞེས་པ་ནས། དེ་ཡོད་ན་ཡོད་མེད་ཕྱིར་རོ། །ཞེས་པའི་བར་བྱུང་བའི་ཕྱིར། ཁ་ཅིག་ན་རེ། ཚད་མ་བསླུ་མེད་ཅན་ཤེས་པ། །ཞེས་པའི་གཞུང་དེས་ཚད་མའི་མཚན་ཉིད་ཀྱི་ཟུར་གྱི་མི་བསླུ་བ་དེ་དངོས་སུ་བསྟན། མ་ཤེས་དོན་གྱི་གསལ་བྱེད་ཀྱང་། །ཞེས་པས། དེའི་ཟུར་གྱི་གསར་དུ་ཞེས་པ་དེ་དངོས་སུ་བསྟན། དེ་གཉིས་དྲིལ་བས་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་དངོས་སུ་བསྟན་ཅིང་། གཞུང་དང་པོ་དེས་གསར་དུ་མི་བསླུ་བའི་རིག་པ། ཚད་མའི་མཚན་ཉིད་དུ་དངོས་སུ་མ་བསྟན་པ་ཡིན་ནོ། །ཟེར་ན། གཞུང་དང་པོ་དེས་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་དངོས་སུ་བསྟན་པར་ཐལ། དེས་མེ་འཛིན་དབང་མངོན་ཚད་མའི་མཚན་གཞིར་དངོས་སུ་བསྟན་པའི་ཕྱིར་ཏེ། མེ་འཛིན་དབང་མངོན་ཆོས་ཅན། ཚད་མ་ཡིན་ཏེ། གསར་དུ་མི་བསླུ་བའི་རིག་པ་ཡིན་པའི་ཕྱིར། ཞེས་པའི་སྦྱོར་བ་དེ་གཞུང་དེའི་དངོས་བསྟན་གྱི་སྦྱོར་བ་ཡིན་པའི་ཕྱིར་ཏེ། དེའི་དངོས་བསྟན་གྱི་སྦྱོར་བ་གཅིག་ཡོད་པའི་ཕྱིར། བྱས་པ་ལ་ཁོ་ན་རེ། གཞུང་དེས་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་སྒྲས་ཟིན་ལ་བསྟན་པར་ཐལ། དེས་དེ་དངོས་སུ་བསྟན་པའི་ཕྱིར་ན་མ་ཁྱབ། འདོད་ན། དེས་ཚད་མའི་མཚན་ཉིད་ཀྱི་ཟུར་གྱི་གསར་དུ་ཞེས་པ་དེ་ཡང་ཚིག་ཟིན་ལ་བསྟན་པར་ཐལ་ལོ། །འདོད་མི་ནུས་ཏེ། རྣམ་ངེས་ཊཱིཀ་ཆེན་ལས། ཚད་མ་བསླུ་མེད་ཅན་ཤེས་པ། །ཞེས་པ་དང་པོ་དང་། གསར་པའི་དོན་གསལ་པོར་མེད་ཀྱང་དོན་ཁོང་ན་གནས་པས་ཕྱི་མས་མཚན་ཉིད་ཀྱི་ཁྱད་པར་ལ་དོགས་པ་གཅོད་པ་ཡིན་ནོ། །ཞེས་གསུངས་པའི་ཕྱིར། གཞན་ཡང་། ཁོ་ན་རེ། ཚད་མ་བསླུ་མེད་ཅན་ཤེས་པ། །ཞེས་པས། གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་སྒྲས་ཟིན་ལ་བསྟན་པར་ཐལ། དེས་མེ་འཛིན་དབང་མངོན་ཚད་མའི་མཚན་གཞིར་སྒྲས་ཟིན་ལ་བསྟན་པའི་ཕྱིར་ཏེ། མེ་འཛིན་དབང་མངོན་ཆོས་ཅན། ཚད་མ་ཡིན་ཏེ། གསར་དུ་མི་བསླུ་བའི་རིག་པ་ཡིན་པའི་ཕྱིར། ཞེས་པའི་སྦྱོར་བ་འདི་གཞུང་དེའི་སྒྲས་ཟིན་གྱི་སྦྱོར་བ་ཡིན་པའི་ཕྱིར་ཏེ། གཞུང་དེའི་སྒྲས་ཟིན་གྱི་དེ་ཡོད་པའི་ཕྱིར། ཁྱབ་པ་ཁས། ཟེར་ན་མི་འགྲིག་གོ། འོ་ན། གཞུང་དེའི་དངོས་བསྟན་གྱི་སྦྱོར་བ་ཡིན་ན། དེའི་སྒྲས་ཟིན་གྱི་སྦྱོར་བ་ཡིན་དགོས་པར་ཐལ། ཁྱོད་ཀྱི་དེ་ལ་ཁྱབ་འབྲེལ་ཡོད་པའི་ཕྱིར། འདོད་ན། གཞུང་དེའི་དངོས་བསྟན་གྱི་བརྗོད་བྱ་ཡིན་ན། དེའི་སྒྲས་ཟིན་གྱི་བརྗོད་བྱ་ཡིན་དགོས་པར་ཐལ། འདོད་པའི་ཕྱིར། འདོད་ན། ཚད་མ་ཞེས་པའི་ངག་གི་དངོས་ཀྱི་བརྗོད་བྱ་ཡིན་ན། དེའི་སྒྲས་ཟིན་གྱི་དེ་ཡིན་དགོས་པར་ཐལ་ལོ། །འདོད་ན། ཚད་མའི་དོན་སྤྱི་ཆོས་ཅན། དེར་ཐལ། དེའི་ཕྱིར། ཁ་ཅིག་ན་རེ། ཚད་མ་དེ་ལ། མཚོན་བྱ་དོན་གྱི་ཚད་མ་དང་། མཚོན་བྱེད་དཔེའི་ཚད་མ་གཉིས་སུ་ཡོད་དོ། །ཟེར་ན། མཚོན་བྱ་དོན་གྱི་ཚད་མ་ཡིན་ན་ཚད་མ་ཡིན་དགོས་པར་ཐལ། དམ་བཅའ་འཐད་པའི་ཕྱིར། འདོད་ན། སྟོན་པ་མཆོག་གི་སྤྲུལ་སྐུ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། ཚད་མའི་སྐྱེས་བུ་མཐར་ཐུག་ཡིན་པའི་ཕྱིར། འདོད་ན། དེ་ཆོས་ཅན། སངས་འཕགས་ཀྱི་རྒྱུད་ཀྱིས་བསྡུས་པའི་ཚད་མ་ཡིན་པར་ཐལ། སངས་འཕགས་ཀྱི་རྒྱུད་ཀྱིས་བསྡུས་པ་གང་ཞིག །ཚད་མ་ཡིན་པའི་ཕྱིར། འདོད་ན། རྣམ་མཁྱེན་དུ་ཐལ་ལོ། །གཞན་ཡང་། ཚད་མ་ལ་དེ་གཉིས་སུ་དབྱེ་བར་མི་འཐད་པར་ཐལ། ཚད་མ་ཡིན་ན་མཚོན་བྱེད་དཔེའི་ཚད་མ་ཡིན་དགོས་པའི་ཕྱིར་ཏེ། ཚད་མ་ཡིན་ན་རང་གི་གཞལ་བྱ་ལ་གསར་དུ་མི་བསླུ་བའི་རིག་པ་ཡིན་དགོས་པའི་ཕྱིར། བྱས་པ་ལ་ཁོ་ན་རེ། མཚོན་བྱ་དོན་གྱི་ཚད་མ་ཡིན་ན་ཚད་མ་ཡིན་དགོས་པར་ཐལ། དེ་ལྡན་བཅོམ་ལྡན་ཚད་མ་ཉིད། །ཅེས་པའི་སྐབས་ནས་བསྟན་པའི་ཚད་མ་ཡིན་ན་ཚད་མ་ཡིན་དགོས་པ་གང་ཞིག །གཞུང་དེས་མཚོན་བྱ་དོན་གྱི་ཚད་མ་བསྟན་པའི་ཕྱིར་ན་མ་ཁྱབ། བྱས་པ་ལ་ཁོ་ན་རེ། སྟོན་པ་མཆོག་གི་སྤྲུལ་སྐུ་ཆོས་ཅན། ཚད་མ་ཡིན་པར་ཐལ། གཞུང་དེའི་སྐབས་ནས་བསྟན་པའི་ཚད་མ་ཡིན་པའི་ཕྱིར་ཏེ། ཚད་མར་གྱུར་པ། ཞེས་པའི་སྐབས་ནསབསྟན་པའི་ཚད་མ་ཡིན་པའི་ཕྱིར། རྟགས་གྲུབ་སྟེ། ལྷ་དབང་བློས། ཚད་མར་གྱུར་པ་ནི་ཚད་མར་འཁྲུངས་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ། སྟོན་པ་མཆོག་གི་སྤྲུལ་སྐུ་དེ་རང་རྒྱུ་བསམ་སྦྱོར་ཕུན་ཚོགས་ཉམས་སུ་བླངས་པ་ལ་བརྟེན་ནས་ཚད་མའི་སྐྱེས་བུ་མཐར་ཐུག་ཏུ་འཁྲུངས་པ་ལུང་དེའི་དོན་ཡིན་པའི་ཕྱིར། དེ་ལྟར་མ་ཡིན་ན། སྟོན་པ་མཆོག་གི་སྤྲུལ་སྐུ་དེ། ཚད་མ་བསླུ་མེད་ཅན་ཤེས་པ། །ཞེས་པའི་སྐབས་ནས་དངོས་སུ་བསྟན་པའི་ཚད་མ་ཡིན་པར་ཐལ། དེ་ཚད་མར་གྱུར་པ། ཞེས་པའི་སྐབས་ནས་བསྟན་པའི་ཚད་མ་ཡིན་པ་གང་ཞིག །ཚད་མར་གྱུར་པ། ཞེས་པའི་ཚིག་དོན་འཆད་པར་བྱེད་པ་ལ། ཚད་མ་བསླུ་མེད་ཅན་ཤེས་པ། །ཞེས་པ་ནས། ཚུར་ཤོག་བྱ་རྒོད་བསྟེན་པར་གྱིས། །ཞེས་པའི་བར་བྱུང་བ་ཡིན་པའི་ཕྱིར། བྱས་པ་ལ་ཁོ་ན་རེ། འོ་ན། སྟོན་པ། ཞེས་པའི་སྐབས་ནས་བསྟན་པའི་སྟོན་པ་ཡིན་ན་སྟོན་པ་ཡིན་དགོས་པར་ཐལ། ཚད་མར་གྱུར་པ། ཞེས་པའི་སྐབས་ནས་བསྟན་པའི་ཚད་མ་ཡིན་ན། ཚད་མ་ཡིན་དགོས་པའི་ཕྱིར་ན། འདོད་བྱས་པ་ལ། བྱང་སེམས་འཕགས་པའི་རྒྱུད་ཀྱི་གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེ་དེར་ཐལ། དེའི་རྒྱུད་ཀྱི་བྱམས་སྙིང་རྗེ་བྱང་ཆུབ་ཀྱི་སེམས་དེ། འགྲོ་ལ་ཕན་བཞེད་པ། ཞེས་པའི་སྐབས་ནས་བསྟན་པའི་བསམ་པ་ཕུན་ཚོགས་ཡིན་པའི་ཕྱིར་ན་མ་ཁྱབ། འོ་ན། ཁོ་རང་ལ། སྟོན་པ། ཞེས་པའི་སྐབས་ནས་བསྟན་པའི་རྒྱུའི་སྟོན་པ་ཡིན་ན། དེའི་སྐབས་ནས་བསྟན་པའི་སྟོན་པ་ཡིན་དགོས་པར་ཐལ། དེའི་སྐབས་ནས་བསྟན་པའི་རྒྱུའི་སྟོན་པ་ཡོད་པའི་ཕྱིར། འདོད་ན། རྒྱུའི་སྟོན་པ་ཡིན་ན་སྟོན་པ་ཡིན་དགོས་པར་ཐལ་ལོ། །འདོད་མི་ནུས་ཏེ། སྟོན་པ་ཡིན་ན་སངས་འཕགས་ཡིན་དགོས་པའི་ཕྱིར། བྱས་པ་ལ་ཁོ་ན་རེ། ཕྱི་རོལ་པའི་སྟོན་པ་ཆོས་ཅན། དེར་ཐལ། དེའི་ཕྱིར། མ་གྲུབ་ན། ཕྱི་རོལ་པའི་སྟོན་པ་སྟོན་པ་ཡིན་པར་ཐལ། དེའི་བསྟན་པ་བསྟན་པ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེའི་བསྟན་བཅོས་བསྟན་བཅོས་ཡིན་པའི་ཕྱིར། ཁོ་རང་ལ། སྟོན་པ་མཆོག་གི་སྤྲུལ་སྐུ་དེ། ཚད་མར་གྱུར་པ་ཞེས་པའི་སྐབས་ཀྱི་ཚད་མ་ཡིན་པར་ཐལ། དེ་དེའི་སྐབས་ནས་བསྟན་པའི་ཚད་མ་ཡིན་པའི་ཕྱིར། རྟགས་ཁས། འདོད་མི་ནུས་ཏེ། དེ་དེའི་སྐབས་ཀྱི་ཚད་མ་དང་འདྲ་བའི་རྒྱུ་མཚན་གྱིས་དེ་ལ་ཚད་མའི་མིང་གིས་བཏགས་ནས་བསྟན་པའི་ཕྱིར་ཏེ། ལྷས། ཚད་མ་དང་འདྲ་བས་ན་ཚད་མ་སྟེ་བཅོམ་ལྡན་འདས་སོ། །ཞེས་གསུངས་པའི་ཕྱིར། གཞན་ཡང་། སྟོན་པ་མཆོག་གི་སྤྲུལ་སྐུ་དེ། ཚད་མར་གྱུར་པ། ཞེས་པའི་སྐབས་ནས་བསྟན་པའི་ཚད་མ་མ་ཡིན་པར་ཐལ། རྣམ་མཁྱེན་དེ་དེའི་སྐབས་ནས་བསྟན་པའི་ཚད་མ་ཡིན་པའི་ཕྱིར་ཏེ། རྣམ་མཁྱེན་དེ། དེ་ལྡན་བཅོམ་ལྡན་ཚད་མ་ཉིད། །ཅེས་པའི་སྐབས་ནས་བསྟན་པའི་ཚད་མ་ཡིན་པའི་ཕྱིར་ཏེ། སངས་རྒྱས་ཀྱི་ཡེ་ཤེས་ཆོས་ཅན། ཇི་ལྟ་བ་དང་ཇི་སྙེད་པ་ལ་ཚད་མ་ཡིན་ཏེ། དེ་ལ་གསར་དུ་མི་བསླུ་བའི་རིག་པ་ཡིན་པའི་ཕྱིར། ཞེས་པའི་སྦྱོར་བ་འདི་གཞུང་དེའི་དོན་སྦྱོར་རྣམ་དག་ཡིན་པའི་ཕྱིར་ཏེ། དེའི་དོན་སྦྱོར་རྣམ་དག་ཡོད་པའི་ཕྱིར། ཁ་ཅིག་ན་རེ། བསམ་པ་ཕུན་ཚོགས་དང་སྦྱོར་བ་ཕུན་ཚོགས་གང་རུང་ཡིན་ན། འགྲོ་ལ་ཕན་བཞེད་པ། སྟོན་པ་ཞེས་པའི་སྐབས་ནས་དངོས་སུ་བསྟན་པའི་བསམ་པ་ཕུན་ཚོགས་དང་། སྦྱོར་བ་ཕུན་ཚོགས་གང་རུང་ཡིན་པས་ཁྱབ་ཟེར་ན། ཉན་རང་དགྲ་བཅོམ་པའི་རྟོགས་པ་སྔོན་དུ་སོང་བའི་བྱང་སེམས་འཕགས་པའི་རྒྱུད་ཀྱི་ཀུན་རྫོབ་སེམས་བསྐྱེད་ཆོས་ཅན། གཞུང་དེའི་སྐབས་ནས་དངོས་སུ་བསྟན་པའི་བསམ་པ་ཕུན་ཚོགས་ཡིན་པར་ཐལ། བསམ་པ་ཕུན་ཚོགས་ཡིན་པའི་ཕྱིར། རྟགས་གྲུབ་སྟེ། ཀུན་རྫོབ་སེམས་བསྐྱེད་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། དམན་ལམ་སྔོན་དུ་མ་སོང་བའི་མཁྱེན་པ་ཡིན་པར་ཐལ་ལོ། །ཁ་ཅིག་ན་རེ། བྱམས་སྙིང་རྗེ་བྱང་ཆུབ་ཀྱི་སེམས་དེ། འགྲོ་ལ་ཕན་བཞེད་པ། སྟོན་པ། ཞེས་པའི་སྐབས་ནས་དངོས་སུ་བསྟན་པའི་བསམ་པ་ཕུན་ཚོགས་དང་། གང་ཟག་གི་བདག་མེད་རྟོགས་པའི་ཤེས་རབ་དེ། དེའི་སྐབས་ནས་དངོས་སུ་བསྟན་པའི་སྦྱོར་བ་ཕུན་ཚོགས་ཡིན་ཟེར་ན། བྱམས་སྙིང་རྗེ་བྱང་ཆུབ་ཀྱི་སེམས་ཆོས་ཅན། སློབ་པའི་རྒྱུད་ཀྱི་མཁྱེན་པ་ཡིན་པར་ཐལ། དེའི་སྐབས་ནས་དངོས་སུ་བསྟན་པའི་བསམ་པ་ཕུན་ཚོགས་ཡིན་པའི་ཕྱིར། འདོད་མི་ནུས་ཏེ། ཁྱོད་རྒྱུད་ལ་ལྡན་པའི་སངས་འཕགས་ཡོད་པའི་ཕྱིར། གཉིས་པ་ལ་ཡང་དེས་མཚོན་ནོ། །ཁ་ཅིག་ན་རེ། བདེ་གཤེགས། ཞེས་པའི་སྐབས་ནས་དངོས་སུ་བསྟན་པའི་བདེ་བར་གཤེགས་པ་ཡིན་ན། སྤངས་པ་ཕུན་ཚོགས་དང་རྟོགས་པ་ཕུན་ཚོགས་གང་རུང་ཡིན་པས་ཁྱབ་ཟེར་ན། སྤངས་པ་ཕུན་ཚོགས་དང་རྟོགས་པ་ཕུན་ཚོགས་གཉིས་ཀ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། སྤངས་པ་ཕུན་ཚོགས་དེ་ཡང་དེ་ཡིན། རྟོགས་པ་ཕུན་ཚོགས་དེ་ཡང་དེ་ཡིན་པའི་ཕྱིར། དང་པོ་གྲུབ་སྟེ། སྤངས་པ་ཕུན་ཚོགས་དེ་ལུགས་འབྱུང་གི་སྐབས་དེར་བསྟན་པའི་བདེ་བར་གཤེགས་པ་ཡིན་པའི་ཕྱིར། གཉིས་པ་གྲུབ་སྟེ། རྟོགས་པ་ཕུན་ཚོགས་དེ་ལུགས་ལྡོག་གི་སྐབས་དེར་བསྟན་པའི་བདེ་བར་གཤེགས་པ་ཡིན་པའི་ཕྱིར། ཁ་ཅིག་ན་རེ། སྐྱོབ་པ། ཞེས་པའི་སྐབས་ནས་དངོས་སུ་བསྟན་པའི་སྐྱོབ་པ་ཡིན་ན། ལོངས་སྐུ་དང་སྤྲུལ་སྐུ་གང་རུང་ཡིན་པས་ཁྱབ་ཟེར་ན། དེ་གཉིས་ཀ་ཆོས་ཅན། དེར་ཐལ། དེའི་ཕྱིར། ཁ་ཅིག་ན་རེ། ཚད་མའི་སྐྱེས་བུ་ཡིན་ན། ཚད་མའི་སྐྱེས་བུ་མཐར་ཐུག་ཡིན་པས་ཁྱབ་ཟེར་ན། སློབ་དཔོན་ཕྱོགས་གླང་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། རྟགས་གྲུབ་སྟེ། བྱང་ཆུབ་སེམས་དཔའ་གང་ཞིག །ཁྱོད་ཀྱིས་ཡོད་པར་ཁས་བླངས་ན་ཡོད་པས་ཁྱབ། ཁྱོད་ཀྱིས་མེད་པར་ཁས་བླངས་ན་མེད་པས་ཁྱབ་པའི་ཕྱིར། རྩ་བར་འདོད་ན། དེ་ཆོས་ཅན། སངས་འཕགས་ཡིན་པར་ཐལ། ཚད་མའི་སྐྱེས་བུ་མཐར་ཐུག་ཡིན་པའི་ཕྱིར། ཁ་ཅིག་ན་རེ། མཁས་པའི་སྐྱེས་བུ་ཡིན་ན་ཚད་མའི་སྐྱེས་བུ་ཡིན་པས་ཁྱབ་ཟེར་ན། སློབ་དཔོན་དབྱིག་གཉེན་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེར་ཐལ། དེ་ལ་ཀུན་མཁྱེན་གཉིས་པར་གྲགས་པའི་ཕྱིར། རྩ་བར་འདོད་ན། དེ་ཆོས་ཅན། ཁྱོད་ཀྱིས་ཡོད་པར་ཁས་བླངས་ན་ཡོད་པས་ཁྱབ་པར་ཐལ། འདོད་པའི་ཕྱིར། འདོད་མི་ནུས་ཏེ། དེས་ཀུན་གཞིའི་རྣམ་ཤེས་ཡོད་པར་ཁས་བླངས་པ་གང་ཞིག །ཀུན་གཞིའི་རྣམ་ཤེས་མེད་པའི་ཕྱིར། ཕྱི་མ་གྲུབ་སྟེ། རང་དབང་བའི་ང་མེད་པའི་ཕྱིར་ཏེ། རང་དབང་བའི་ང་ཞེན་ཡུལ་དུ་བྱེད་པའི་ལྟ་བ་དེ་འཇིག་ལྟ་ཡིན་པའི་ཕྱིར་ཏེ། སེམས་ཅན་ལ་ལྟ་ལྷན་ཅིག་སྐྱེས། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། སློབ་དཔོན་དབྱིག་གཉེན་ཆོས་ཅན། ཚད་མའི་སྐྱེས་བུ་ཡིན་པར་ཐལ། བྱང་ཆུབ་སེམས་དཔའ་ཡིན་པའི་ཕྱིར་ན་མ་ཁྱབ། མ་གྲུབ་ན། དེ་ཆོས་ཅན། བྱང་ཆུབ་སེམས་དཔའ་ཡིན་པར་ཐལ། བྱང་སེམས་ཚོགས་ལམ་པ་ཡིན་པའི་ཕྱིར། ཁ་ཅིག་ན་རེ། ཚད་མ་དེ་ལ་མངོན་སུམ་གྱི་ཚད་མ་དང་། རྗེས་སུ་དཔག་པའི་ཚད་མ་གཉིས་ཡོད་པ་ལས་རང་གི་གཞལ་བྱ་དོན་སྤྱིའི་ཚུལ་གྱིས་རྟོགས་པའི་རྟོག་པ་ཡིན་ན། རྗེས་སུ་དཔག་པའི་ཚད་མ་ཡིན་པས་ཁྱབ་ཟེར་ན། དམན་ལམ་སྔོན་དུ་མ་སོང་བའི་བྱང་སེམས་སྦྱོར་ལམ་པའི་རྒྱུད་ཀྱི་གང་ཟག་གི་བདག་མེད་ལ་རྩེ་གཅིག་ཏུ་མཉམ་པར་བཞག་པའི་མཉམ་བཞག་ཡེ་ཤེས་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། གང་ཟག་གི་བདག་མེད་དོན་སྤྱིའི་ཚུལ་གྱིས་རྟོགས་པའི་རྟོག་པ་ཡིན་པའི་ཕྱིར་ཏེ། གང་ཟག་གི་བདག་མེད་དོན་སྤྱིའི་ཚུལ་གྱིས་རྟོགས་པའི་མཁྱེན་པ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། བསམ་བྱུང་གི་བློ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། བསྒོམ་བྱུང་གི་བློ་ཡིན་པའི་ཕྱིར། ཁ་ཅིག་ན་རེ། རང་གི་གཞལ་བྱ་རྟོགས་པའི་རིག་པ་མི་བསླུ་བའི་རིག་པའི་མཚན་ཉིད་ཟེར་ན། བུམ་འཛིན་རྟོག་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། བུམ་པ་རྟོགས་པའི་རིག་པ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། གསར་དུ་མི་བསླུ་བའི་རིག་པ་ཡིན་པར་ཐལ། འདོད་པ་གང་ཞིག །བཅད་ཤེས་མ་ཡིན་པའི་ཕྱིར། འདོད་ན། དེ་ཆོས་ཅན། རྗེས་སུ་དཔག་པའི་ཚད་མ་ཡིན་པར་ཐལ། འདོད་པ་གང་ཞིག །རྟོག་པ་ཡིན་པའི་ཕྱིར། འདོད་ན། དེ་ཆོས་ཅན། རང་གི་རྟེན་དུ་གྱུར་པའི་རྟགས་ཡང་དག་ལ་བརྟེན་ནས་སྐྱེས་པར་ཐལ་ལོ། །བྱས་པ་ལ་ཁོ་ན་རེ། བུམ་འཛིན་རྟོག་པའི་རྟེན་དུ་གྱུར་པའི་རྟགས་ཡང་དག་ཡོད་པར་ཐལ། བུམ་འཛིན་རྟོག་པ་དོན་མཐུན་གྱི་རྟེན་དུ་གྱུར་རྟགས་ཡང་དག་ཡོད་པའི་ཕྱིར་ཏེ། བུམ་པ་དེ་དེ་ཡིན་པའི་ཕྱིར་ཏེ། བུམ་པ་དེ་དེའི་རྟེན་གཞི་གང་ཞིག །བུམ་པ་རྟགས་ཡང་དག་ཡིན་པའི་ཕྱིར་ན་མ་ཁྱབ། དང་པོ་གྲུབ་སྟེ། དེ་བུམ་པ་ལ་བརྟེན་པའི་ཕྱིར་ཏེ། དེ་བུམ་པ་ལ་ལྟོས་པའི་ཕྱིར་ཟེར་ན། འོ་ན། ཁོ་རང་ལ། བུམ་འཛིན་དབང་མངོན་གྱི་རྟེན་དུ་གྱུར་པའི་རྟགས་ཡང་དག་ཡོད་པར་ཐལ། བུམ་པ་དེ་དེ་ཡིན་པའི་ཕྱིར། རྟགས་ཀྱི་སྒྲུབ་བྱེད་ཁོ་རང་གིས་གང་བྱས་པ་དང་འདྲ་ལ། འདོད་ན། བུམ་འཛིན་དབང་མངོན་དེས་རང་གི་རྟེན་དུ་གྱུར་པའི་རྟགས་ཡང་དག་ལ་བརྟེན་ནས་བུམ་པ་རྟོགས་པར་ཐལ། དེའི་རྟེན་དུ་གྱུར་པའི་རྟགས་ཡང་དག་ཡོད་པའི་ཕྱིར། འདོད་མི་ནུས་ཏེ། བུམ་འཛིན་དབང་མངོན་དེ། བུམ་པ་ལ་འཛིན་པ་རང་དབང་ཅན་གྱི་བློ་ཡིན་པའི་ཕྱིར་ཏེ། དེ་ལ་འཛིན་པ་རང་དབང་ཅན། །ཞེས་གསུངས་པའི་ཕྱིར། ཁ་ཅིག་ན་རེ། མི་བསླུ་བ་དེ་ལ་ཡུལ་གྱི་མི་བསླུ་བ་དང་ཡུལ་ཅན་གྱི་དེ་གཉིས་སུ་ཡོད་དོ། །ཟེར་ན། ཡུལ་གྱི་མི་བསླུ་བ་ཡིན་ན། མི་བསླུ་བ་ཡིན་དགོས་པར་ཐལ། དམ་བཅའ་འཐད་པའི་ཕྱིར། འདོད་ན། སྒྲ་རྟག་འཛིན་རྟོག་པ་ཆོས་ཅན། དེར་ཐལ། དེའི་ཕྱིར། རྣམ་མཁྱེན་མི་བསླུ་བའི་རིག་པར་སོང་བའི་ཡུལ་ཡིན་པའི་ཕྱིར། འདོད་མི་ནུས་ཏེ། བསླུ་བའི་རིག་པ་ཡིན་པའི་ཕྱིར། བྱས་པ་ལ་ཁོ་ན་རེ། མི་བསླུ་བ་ཡིན་ན། ཡུལ་ཅན་གྱི་མི་བསླུ་བ་ཡིན་དགོས་པར་ཐལ། ཡུལ་ཅན་གྱི་མི་བསླུ་བ་ཡིན་ན་མི་བསླུ་བ་ཡིན་པས་ཁྱབ་པའི་ཕྱིར་ན་མ་ཁྱབ། འདོད་ན། ངོ་བོ་ཉིད་སྐུ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། མི་བསླུ་བའི་སྐྱབས་གནས་མཐར་ཐུག་ཡིན་པའི་ཕྱིར། འདོད་ན། ཡུལ་ཅན་དུ་ཐལ་ལོ། །ཁ་ཅིག་ན་རེ། རང་ཡུལ་མ་རྟོགས་པའི་རིག་པ་དེ། ཚད་མིན་གྱི་བློའི་མཚན་ཉིད་ཟེར་ན། བཅད་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། ཆོས་ཅན་དེའི་ཕྱིར། ཁ་ཅིག་ན་རེ། ཚད་མ་མ་ཡིན་པའི་བློ་དེ་ལ་ལྔ་ཡོད་པ་ལས། རང་ཡུལ་ལ་ཕྱིན་ཅི་ལོག་ཏུ་ཞུགས་པའི་བློ་དེ་ལོག་ཤེས་ཀྱི་མཚན་ཉིད་ཟེར་ན། སྒྲ་རྟག་འཛིན་རྟོག་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་རང་ཡུལ་ལ་སྒྲོ་འདོགས་པའི་བློ་ཡིན་པར་ཐལ། འདོད་པའི་ཕྱིར། འདོད་ན། དེ་སྒྲ་རྟག་པ་ལ་སྒྲོ་འདོགས་པའི་བློ་ཡིན་པར་ཐལ། འདོད་པ་གང་ཞིག །སྒྲ་རྟག་པ་དེ་དེའི་ཡུལ་ཡིན་པའི་ཕྱིར། འདོད་མི་ནུས་ཏེ། དེ་སྒྲ་མི་རྟག་པ་ལ་སྒྲོ་འདོགས་པའི་བློ་ཡིན་པའི་ཕྱིར་ཏེ། སྒྲ་མི་རྟག་པ་རྟོགས་པའི་རྗེས་དཔག་དེ། སྒྲ་མི་རྟག་པ་ལ་སྒྲོ་འདོགས་གསར་དུ་གཅོད་བྱེད་ཀྱི་རིག་པ་ཡིན་པའི་ཕྱིར། གཞན་ཡང་། སྒྲ་རྟག་འཛིན་རྟོག་པ་དེ། རང་ཡུལ་ལ་ཕྱིན་ཅི་ལོག་ཏུ་ཞེན་པའི་རིག་པ་ཡིན་པར་ཐལ། དེ་རང་ཡུལ་ལ་ཕྱིན་ཅི་ལོག་ཏུ་ཞུགས་པའི་རིག་པ་ཡིན་པའི་ཕྱིར། འདོད་ན། དེའི་ཡུལ་དེ་དེའི་ཞེན་ཡུལ་ཡིན་པར་ཐལ། འདོད་པའི་ཕྱིར། འདོད་ན། དེའི་ཡུལ་ཆོས་ཅན། མེད་པར་ཐལ། སྒྲ་རྟག་འཛིན་རྟོག་པའི་ཞེན་ཡུལ་ཡིན་པའི་ཕྱིར། ཁ་ཅིག་ན་རེ། རང་ཡུལ་ལ་མཐའ་གཉིས་སུ་དོགས་པའི་རིག་པ་དེ། ཐེ་ཚོམ་གྱི་མཚན་ཉིད་ཟེར་ན། ཐེ་ཚོམ་དང་མཚུངས་ལྡན་དུ་གྱུར་པའི་གཙོ་སེམས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། ཐེ་ཚོམ་དེ་དེ་ཡིན་པ་གང་ཞིག །ཐེ་ཚོམ་དང་ཐེ་ཚོམ་དང་མཚུངས་ལྡན་དུ་གྱུར་པའི་གཙོ་སེམས་གཉིས་མཚུངས་ལྡན་རྣམ་པ་ལྔ་མཚུངས་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། སེམས་བྱུང་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། གཙོ་སེམས་ཡིན་པའི་ཕྱིར། ཁ་ཅིག་ན་རེ། རང་ཡུལ་ལ་མཐའ་གཉིས་སུ་དོགས་པའི་སེམས་བྱུང་དེ་ཐེ་ཚོམ་གྱི་མཚན་ཉིད་ཟེར་ན། སྒྲ་རྟག་གམ་མི་རྟག་གམ་སྙམ་པའི་ཐེ་ཚོམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། སྒྲ་དེ་དེ་འདྲའི་ཐེ་ཚོམ་གྱི་ཡུལ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། སྒྲ་དེ་དེའི་སྣང་ཡུལ་ཡང་མིན། དེའི་ཞེན་ཡུལ་ཡང་མིན་པའི་ཕྱིར། དང་པོ་གྲུབ་སྟེ། དེའི་སྣང་ཡུལ་དུ་གྱུར་པའི་རང་མཚན་མེད་པའི་ཕྱིར། ཕྱི་མ་གྲུབ་སྟེ། དེའི་ཞེན་ཡུལ་མེད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་ཞེན་ཡུལ་མེད་པར་ཐལ། ཁྱོད་ཐེ་ཚོམ་ཡིན་པའི་ཕྱིར། བྱས་པ་ལ་ཁོ་ན་རེ། སྒྲ་རྟག་གམ་མི་རྟག་གམ་ཕལ་ཆེར་མི་རྟག་ལས་ཆེ་སྙམ་དུ་འཛིན་པའི་ཐེ་ཚོམ་ཆོས་ཅན། ཁྱོད་ཀྱི་ཞེན་ཡུལ་མེད་པར་ཐལ། ཁྱོད་ཐེ་ཚོམ་ཡིན་པའི་ཕྱིར། ཟེར་ན། འདོད་བྱས་པ་ལ། དེ་ཆོས་ཅན། ཁྱོད་ཀྱི་ཞེན་ཡུལ་ཡོད་པར་ཐལ། ཁྱོད་སྒྲ་མི་རྟག་པར་འཛིན་པའི་ཞེན་རིག་ཡིན་པའི་ཕྱིར་ཏེ། ཁྱོད་སྒྲ་མི་རྟག་པར་འཛིན་པའི་བློ་གང་ཞིག། ཁྱོད་ཞེན་རིག་ཡིན་པའི་ཕྱིར། དང་པོ་གྲུབ་སྟེ། ཁྱོད་སྒྲ་མི་རྟག་གམ་སྙམ་དུ་འཛིན་པའི་བློ་ཡིན་པའི་ཕྱིར་ན་མ་ཁྱབ་སྟེ། འོ་ན། ཁོ་རང་ལ། སྒྲ་རྟག་མི་རྟག་ཆ་མཉམ་དུ་འཛིན་པའི་བློ་ཆོས་ཅན། སྒྲ་མི་རྟག་པར་འཛིན་པའི་བློ་ཡིན་པར་ཐལ། སྒྲ་མི་རྟག་གམ་སྙམ་དུ་འཛིན་པའི་བློ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། སྒྲ་རྟག་པར་འཛིན་པའི་བློ་ཡིན་པའི་ཕྱིར་ཏེ། སྒྲ་རྟག་གམ་སྙམ་དུ་འཛིན་པའི་བློ་ཡིན་པའི་ཕྱིར། ཁྱབ་པ་ཁས། ཁ་ཅིག་ན་རེ། རང་ཡུལ་ཚད་མས་མ་ངེས་ཤིང་རང་ཡུལ་ངེས་པའི་ཞེན་རིག་དེ། ཡིད་དཔྱོད་ཀྱི་མཚན་ཉིད་ཟེར་ན། གྲངས་ཅན་གྱི་རྒྱུད་ཀྱི་སྒྲ་མི་རྟག་པར་འཛིན་པའི་རྟོག་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། གྲངས་ཅན་གྱི་རྒྱུད་ལ་སྒྲ་མི་རྟག་པར་འཛིན་པའི་ཡིད་དཔྱོད་ཡོད་པའི་ཕྱིར། དེའི་རྒྱུད་ལ་བྱས་པའི་རྟགས་ལས་སྒྲ་མི་རྟག་པར་འཛིན་པའི་ཡིད་དཔྱོད་ཡོད་པའི་ཕྱིར་ཏེ། སྤྱིར་རྒྱུ་མཚན་ཡོད་ཀྱང་རྒྱུ་མཚན་གཏན་ལ་མ་ཕབ་པའི་ཡིད་དཔྱོད་ཡོད་པའི་ཕྱིར། ཁ་ཅིག་ན་རེ། རང་ཡུལ་སྣང་ཞིང་། རང་ཡུལ་མ་ངེས་པའི་རིག་པ་དེ། སྣང་ལ་མ་ངེས་ཀྱི་བློའི་མཚན་ཉིད་ཟེར་ན། ཚུར་མཐོང་གི་རྒྱུད་ཀྱི་གཟུགས་འཛིན་དབང་མངོན་སྐད་ཅིག་ཐ་མ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། རང་ཡུལ་མ་རྟོགས་པའི་མངོན་སུམ་ཡིན་པའི་ཕྱིར། འདོད་ན། དེའི་ཡུལ་དེ། དེ་ལ་སྣང་བར་ཐལ། འདོད་པའི་ཕྱིར། འདོད་ན། གཟུགས་འཛིན་དབང་མངོན་གྱི་ཡུལ་དེ། གཟུགས་འཛིན་དབང་མངོན་ལ་སྣང་བར་ཐལ། འདོད་པའི་ཕྱིར། །

རང་ལུགས་ཀྱི་བློའི་རྣམ་གཞག་སྤྱིར་བཤད་པ།

༈ རང་ལུགས་བཞག་པ་ལ། བློའི་རྣམ་གཞག་སྤྱིར་བཤད་པ་དང་། ཚད་མ་དང་མི་བསླུ་བའི་ཤེས་པའི་དོན་བྱེ་བྲག་ཏུ་བཤད་པ་གཉིས། དང་པོ་ལ། མཚན་ཉིད་དང་། དབྱེ་བ་གཉིས། དང་པོ་ནི། གསལ་ཞིང་རིག་པ་བློའི་མཚན་ཉིད་ཡིན་ཏེ། དེ་སྐད་དུ་ཡང་། རིགས་གཏེར་ལས། རིག་པ་བློ་ཡི་མཚན་ཉིད་ཡིན། །ཞེས་གསུངས་པའི་ཕྱིར། གཉིས་པ་བློ་ལ་དབྱེ་ན། མངོན་སུམ་གྱི་ཚད་མ། རྗེས་སུ་དཔག་པའི་ཚད་མ། བཅད་ཤེས། ལོག་ཤེས། ཐེ་ཚོམ། ཡིད་དཔྱོད། སྣང་ལ་མ་ངེས་ཀྱི་བློ་དང་བློ་རིག་བདུན་དུ་འབྱེད་རིགས་པ་ཡིན་ཏེ། བློ་དེ་ལ་རང་ཡུལ་ལ་སྒྲོ་འདོགས་གཅོད་པར་བྱེད་པའི་མི་བསླུ་བའི་རིག་པ་གཅིག་དང་། རང་ཡུལ་ལ་སྒྲོ་འདོགས་གཅོད་པར་མི་བྱེད་པའི་བསླུ་བའི་རིག་པ་གཉིས་སུ་ངེས་པ་ལས། དང་པོའི་དབང་དུ་བྱས་ནས་མངོན་སུམ་གྱི་ཚད་མ་དང་། རྗེས་སུ་དཔག་པའི་ཚད་མ། བཅད་ཤེས་གསུམ་བཞག །གཉིས་པའི་དབང་དུ་བྱས་ནས་ཕྱི་མ་བཞི་པོ་དེ་བཞག་པ་ཡིན་པའི་ཕྱིར། དང་པོའི་དབང་དུ་བྱས་ནས་དེ་ལྟར་བཞག་པ་ཡང་ཡིན་ཏེ། དང་པོ་དེ་ལ། རང་ཡུལ་ལ་སྒྲོ་འདོགས་གསར་དུ་གཅོད་པར་བྱེད་པའི་མི་བསླུ་བའི་རིག་པ་གཅིག་དང་། རང་གི་གཞལ་བྱ་ལ་སྒྲོ་འདོགས་ཆོད་ཟིན་ཆོད་པའི་མི་བསླུ་བའི་རིག་པ་གཉིས་སུ་ངེས་པ་ལས། དང་པོའི་དབང་དུ་བྱས་ནས་མངོན་རྗེས་ཀྱི་ཚད་མ་གཉིས་བཞག །ཕྱི་མའི་དབང་དུ་བྱས་ནས་བཅད་ཤེས་བཞག་པ་ཡིན་པའི་ཕྱིར། དང་པོ་དེ་ཡང་བཞག་པ་ཡིན་ཏེ། དང་པོ་དེ་ལ་རང་ཡུལ་དུ་གྱུར་པའི་རང་མཚན་གསལ་བར་སྣང་བའི་སྒོ་ནས་རང་ཡུལ་ལ་སྒྲོ་འདོགས་གསར་དུ་གཅོད་པར་བྱེད་པའི་མི་བསླུ་བའི་རིག་པ་གཅིག་དང་། རང་ཡུལ་དུ་གྱུར་པའི་སྤྱི་མཚན་མི་གསལ་བར་སྣང་བའི་སྒོ་ནས་རང་ཡུལ་ལ་སྒྲོ་འདོགས་གསར་དུ་གཅོད་པར་བྱེད་པའི་མི་བསླུ་བའི་རིག་པ་གཉིས་སུ་ངེས་པ་ལས། དང་པོའི་དབང་དུ་བྱས་ནས་མངོན་སུམ་གྱི་ཚད་མ་བཞག །གཉིས་པའི་དབང་དུ་བྱས་ནས་རྗེས་སུ་དཔག་པའི་ཚད་མ་བཞག་པའི་ཕྱིར། གཉིས་པ་རང་ཡུལ་ལ་སྒྲོ་འདོགས་གཅོད་པར་མི་བྱེད་པའི་བསླུ་བའི་རིག་པའི་དབང་དུ་བྱས་ནས་ཕྱི་མ་བཞི་པོ་བཞག་པ་ཡིན་ཏེ། དེ་ལ་ཁོ་རང་ཡིན་པ་གཞི་བཞག་གི་སྟེང་དུ། རང་གི་དམིགས་ཡུལ་ལ་མཐའ་གཉིས་སུ་དོགས་པའི་སྒོ་ནས་རང་ཡུལ་འཛིན་པར་བྱེད་པའི་བསླུ་བའི་རིག་པ་གཅིག་དང་། རང་ཡུལ་མཐའ་གཅིག་ཏུ་འཛིན་པའི་བསླུ་བའི་རིག་པ་གཉིས་སུ་ངེས་པ་ལས། དང་པོའི་དབང་དུ་བྱས་ནས་ཐེ་ཚོམ་བཞག །གཉིས་པའི་དབང་དུ་བྱས་ནས་ཡིད་དཔྱོད། ལོག་ཤེས། སྣང་ལ་མ་ངེས་ཀྱི་བློ་གསུམ་བཞག་པ་ཡིན་པའི་ཕྱིར། གཉིས་པ་དེའི་དབང་དུ་བྱས་ནས་དེ་ལྟར་བཞག་པ་ཡང་ཡིན་ཏེ། གཉིས་པ་དེ་ལ་ཁོ་རང་ཡིན་པ་གཞིར་བཞག་གི་སྟེང་དུ་རང་ཡུལ་ཚད་མས་གྲུབ་པ་མཐའ་གཅིག་ཏུ་འཛིན་པའི་ཞེན་རིག་དོན་མཐུན་གཅིག་དང་། རང་ཡུལ་ཕྱིན་ཅི་ལོག་ཏུ་མཐའ་གཅིག་ཏུ་འཛིན་པའི་རིག་པ་གཅིག་དང་། རང་ཡུལ་དུ་གྱུར་པའི་རང་མཚན་སྣང་ཞིང་དེ་མ་ངེས་པའི་མངོན་སུམ་གཅིག་དང་གསུམ་དུ་ངེས་པ་ལས། དང་པོའི་དབང་དུ་བྱས་ནས་ཡིད་དཔྱོད་བཞག །གཉིས་པའི་དབང་དུ་བྱས་ནས་ལོག་ཤེས་བཞག །གསུམ་པའི་དབང་དུ་བྱས་ནས་སྣང་ལ་མ་ངེས་ཀྱི་བློ་བཞག་པ་ཡིན་པའི་ཕྱིར། བློ་རིག་བདུན་པོ་སོ་སོའི་ངོ་བོ་ནི། རྟོག་པ་དང་བྲལ་ཞིང་གསར་དུ་མི་བསླུ་བའི་མ་འཁྲུལ་བའི་རིག་པ་དེ་མངོན་སུམ་གྱི་ཚད་མའི་མཚན་ཉིད། རང་གི་རྟེན་དུ་གྱུར་པའི་རྟགས་ཡང་དག་ལ་བརྟེན་ནས་སྐྱེས་པའི་གསར་དུ་མི་བསླུ་བའི་ཞེན་རིག་དེ། རྗེས་སུ་དཔག་པའི་ཚད་མའི་མཚན་ཉིད། བཅད་ཤེས་ཀྱི་ངོ་བོ་འོག་ཏུ་འཆད་དོ། །ཕྱི་མ་བཞི་པོ་སོ་སོའི་ངོ་བོ་ནི། དེ་བཞི་པོ་གང་རུང་ཡང་ཡིན། རང་ཡུལ་ཕྱིན་ཅི་ལོག་ཏུ་མཐའ་གཅིག་ཏུ་འཛིན་པ་ཡང་ཡིན་པའི་གཞི་མཐུན་པར་གྱུར་པའི་རིག་པ་དེ། ལོག་ཤེས་ཀྱི་མཚན་ཉིད། དེ་ལ་དབྱེ་ན། རྟོག་པ་ལོག་ཤེས་དང་། རྟོག་མེད་ལོག་ཤེས་གཉིས། དང་པོ་ནི། སྒྲ་རྟག་འཛིན་རྟོག་པ་ལྟ་བུ། གཉིས་པ་ནི། ཟླ་བ་གཉིས་སྣང་གི་དབང་ཤེས་ལྟ་བུའོ། །དེ་བཞི་པོ་གང་རུང་ཡང་ཡིན། རང་གི་དམིགས་ཡུལ་ལ་མཐའ་གཉིས་སུ་དོགས་པའི་སྒོ་ནས། རང་ཡུལ་འཛིན་པ་ཡང་ཡིན་པའི་གཞི་མཐུན་པར་གྱུར་པའི་རིག་པ་དེ་ཐེ་ཚོམ་གྱི་མཚན་ཉིད། དེ་ལ་དབྱེ་ན། དོན་འགྱུར་གྱི་ཐེ་ཚོམ་དང་། དོན་མི་འགྱུར་གྱི་ཐེ་ཚོམ། ཆ་མཉམ་པའི་དེ་དང་གསུམ། དང་པོ་ནི། སྒྲ་རྟག་གམ་མི་རྟག་གམ་ཕལ་ཆེར་མི་རྟག་ལས་ཆེ་སྙམ་དུ་འཛིན་པའི་ཐེ་ཚོམ་ལྟ་བུ། གཉིས་པ་ནི། སྒྲ་རྟག་གམ་མི་རྟག་ཕལ་ཆེར་རྟག་ལས་ཆེ་སྙམ་དུ་འཛིན་པའི་ཐེ་ཚོམ་ལྟ་བུ། གསུམ་པ་ནི། སྒྲ་རྟག་མི་རྟག་ཆ་མཉམ་དུ་འཛིན་པའི་ཐེ་ཚོམ་ལྟ་བུའོ། །དེ་བཞི་པོ་གང་རུང་ཡང་ཡིན། རང་ཡུལ་ཚད་མས་གྲུབ་པ་མཐའ་གཅིག་ཏུ་འཛིན་པའི་ཞེན་རིག་དོན་མཐུན་ཡང་ཡིན་པའི་གཞི་མཐུན་པར་གྱུར་པའི་རིག་པ་དེ། ཡིད་དཔྱོད་ཀྱི་མཚན་ཉིད། དེ་ལ་དབྱེ་ན། རྒྱུ་མཚན་འགལ་བའི་ཡིད་དཔྱོད་དང་། རྒྱུ་མཚན་མེད་པའི་དེ། རྒྱུ་མཚན་མ་ངེས་པའི་དེ། རྒྱུ་མཚན་མ་གྲུབ་པའི་དེ། རྒྱུ་མཚན་ཡོད་ཀྱང་གཏན་ལ་མ་ཕབ་པའི་དེ་དང་ལྔ། དང་པོ་ནི། དངོས་མེད་ཀྱི་རྟགས་ལས་སྒྲ་མི་རྟག་པར་གོ་བའི་ཡིད་དཔྱོད་ལྟ་བུ་ཡིན་ཏེ། དངོས་མེད་ཀྱི་རྟགས་ཀྱིས་སྒྲ་མི་རྟག་པར་སྒྲུབ་པའི་ཁྱབ་པ་འགལ་བའི་ཕྱིར། གཉིས་པ་ནི། སྒྲ་མི་རྟག་ཅེས་པའི་ངག་ལ་བརྟེན་ནས་སྐྱེས་པའི་སྒྲ་མི་རྟག་པར་གོ་བའི་ཡིད་དཔྱོད་ལྟ་བུ་ཡིན་ཏེ། དེས་སྒྲ་མི་རྟག་པར་གོ་ཡང་སྒྲ་མི་རྟག་པར་མ་རྟོགས་པའི་ཕྱིར། གསུམ་པ་ནི། གཞལ་བྱའི་རྟགས་ཀྱིས་སྒྲ་མི་རྟག་པར་གོ་བའི་ཡིད་དཔྱོད་ལྟ་བུ་ཡིན་ཏེ། གཞལ་བྱའི་རྟགས་ཀྱིས་སྒྲ་མི་རྟག་པར་སྒྲུབ་པའི་ཁྱབ་པ་མ་ངེས་པའི་ཕྱིར། བཞི་པ་ནི། མིག་ཤེས་ཀྱི་གཟུང་བྱའི་རྟགས་ཀྱིས་སྒྲ་མི་རྟག་པར་གོ་བའི་ཡིད་དཔྱོད་ལྟ་བུ་ཡིན་ཏེ། མིག་ཤེས་ཀྱི་གཟུང་བྱ་སྒྲའི་སྟེང་དུ་འགོད་ཚུལ་དང་མཐུན་པར་མ་གྲུབ་པའི་ཕྱིར། ལྔ་པ་ནི། བྱས་པའི་རྟགས་ལས་སྒྲ་མི་རྟག་པར་གོ་བའི་ཡིད་དཔྱོད་ལྟ་བུ་ཡིན་ཏེ། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཚུལ་གསུམ་ཡོད་ཀྱང་། དེ་འདྲའི་ཡིད་དཔྱོད་དེ། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ལ་བརྟེན་ནས་མ་སྐྱེས་པའི་ཕྱིར། དེ་བཞི་པོ་གང་རུང་ཡང་ཡིན། རང་ཡུལ་དུ་གྱུར་པའི་རང་མཚན་སྣང་ཞིང་། དེ་མ་ངེས་པ་ཡང་ཡིན་པའི་གཞི་མཐུན་པར་གྱུར་པའི་མ་འཁྲུལ་བའི་རིག་པ་དེ། སྣང་ལ་མ་ངེས་ཀྱི་བློའི་མཚན་ཉིད། དེ་ལ་དབྱེ་ན། ཁོ་རང་དུ་གྱུར་བའི་དབང་མངོན། ཡིད་མངོན། རང་རིག་དང་གསུམ། དང་པོ་ནི། ཚུར་མཐོང་གི་རྒྱུད་ཀྱི་གཟུགས་འཛིན་དབང་མངོན་སྐད་ཅིག་ཐ་མ་ལྟ་བུ། གཉིས་པ་ནི། དེའི་རྒྱུད་ཀྱི་གཟུགས་འཛིན་ཡིད་མངོན་ལྟ་བུ། གསུམ་པ་ནི། སྒྲ་རྟག་འཛིན་རྟོག་པ་ཉམས་སུ་མྱོང་བའི་རང་རིག་ལྟ་བུའོ། །

ཚད་མ་དང་མི་བསླུ་བའི་དོན་བྱེ་བྲག་ཏུ་བཤད་པ།

༈ གཉིས་པ་ཚད་མ་དང་མི་བསླུ་བའི་དོན་བྱེ་བྲག་ཏུ་བཤད་པ་ནི། ཚད་མ་ལ་མཚན་ཉིད་དང་། དབྱེ་བ་གཉིས། དང་པོ་ནི། གསར་དུ་མི་བསླུ་བའི་རིག་པ་དང་། རང་གི་གཞལ་བྱ་ལ་གསར་དུ་མི་བསླུ་བའི་རིག་པ་གཉིས་རེ་རེ་ནས་ཚད་མའི་མཚན་ཉིད་ཡིན། དེ་ཡང་། མི་བསླུ་བའི་རིག་པ། ཞེས་པས་ཚད་མའི་ངོ་བོ་མཚོན། གསར་དུ། ཞེས་པས་བྱེད་ལས་མཚོན་པ་ཡིན་ནོ། །དེས་ན་ཚད་མའི་མཚན་ཉིད་ཀྱི་ཟུར་དུ་གསར་དུ་སྨོས་པ་ལ་དགོས་པ་ཡོད་དེ། ཐལ་འགྱུར་བས་བཅད་ཤེས་ཚད་མར་འདོད་པས། དེ་བཅད་པར་བྱ་བའི་ཆེད་ཡིན་པའི་ཕྱིར། དེའི་མཚན་ཉིད་ཀྱི་ཟུར་དུ་མི་བསླུ་བ་སྨོས་པའི་དགོས་པ་ཡོད་དེ། ཡིད་དཔྱོད་ཚད་མར་འདོད་པའི་ལོག་རྟོག་ཡོད་པས་དེ་བཅད་པར་བྱ་བའི་ཆེད་ཡིན་པའི་ཕྱིར། དེའི་མཚན་ཉིད་ཀྱི་ཟུར་དུ་རིག་པ་སྨོས་པ་ལ་དགོས་པ་ཡོད་དེ། བྱེ་བྲག་སྨྲ་བས། རྟེན་བཅས་ཀྱི་མིག་དབང་གཟུགས་ཅན་པ་ཚད་མར་འདོད་པའི་ལོག་རྟོག་ཡོད་པས་དེ་བཅད་པར་བྱ་བའི་ཆེད་ཡིན་པའི་ཕྱིར། གཉིས་པ་དེ་ལ་ངོ་བོའི་སྒོ་ནས་དབྱེ་ན། མངོན་རྗེས་ཀྱི་ཚད་མ་གཉིས། རྟེན་གྱི་སྒོ་ནས་དབྱེ་ན། སོ་སྐྱེའི་རྒྱུད་ཀྱི་ཚད་མ་དང་། འཕགས་རྒྱུད་ཀྱི་ཚད་མ་གཉིས། མཚན་གཞིའི་སྒོ་ནས་དབྱེ་ན། རང་ལས་ངེས་ཀྱི་ཚད་མ་དང་། གཞན་ལས་ངེས་ཀྱི་ཚད་མ་གཉིས་སུ་ཡོད། ཡང་དེ་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན། སྐྱེས་བུ་ཚད་མ། ངག་ཚད་མ། ཤེས་པ་ཚད་མ་དང་གསུམ་ཡོད། དང་པོ་ནི། སངས་འཕགས་ལྟ་བུ། གཉིས་པ་ནི། བསྟན་བཅོས་རྣམ་འགྲེལ་ལྟ་བུ། གསུམ་པ་དང་ཚད་མ་དོན་གཅིག །རང་གི་གཞལ་བྱ་ལ་སྒྲོ་འདོགས་གཅོད་བྱེད་ཀྱི་མི་བསླུ་བའི་རིག་པ་དེ། མི་བསླུ་བའི་ཤེས་པའི་མཚན་ཉིད་ཡིན། མི་བསླུ་བ་དེ་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན། ཡུལ་གྱི་མི་བསླུ་བ་དང་། ཡུལ་ཅན་གྱི་མི་བསླུ་བ་གཉིས། དང་པོ་ནི། བུམ་པ་ལྟ་བུ། གཉིས་པ་ནི། བུམ་འཛིན་དབང་མངོན་ལྟ་བུ། བུམ་པ་ལ་ཡུལ་གྱི་མི་བསླུ་བ་ཞེས་བརྗོད་པའི་རྒྱུ་མཚན་ཡོད་དེ། བུམ་འཛིན་དབང་མངོན་མི་བསླུ་བའི་རིག་པར་སོང་བའི་ཡུལ་ཡིན་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། བུམ་འཛིན་དབང་མངོན་ལ་ཡུལ་ཅན་གྱི་མི་བསླུ་བ་ཞེས་བརྗོད་པའི་རྒྱུ་མཚན་ཡོད་དེ། དེ་ཡུལ་བུམ་པ་ལ་མི་བསླུ་བའི་རིག་པ་ཡིན་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། དེ་བུམ་པ་ལ་མི་བསླུ་བའི་གོ་དོན་བཞག་ཏུ་ཡོད་དེ། བུམ་པ་དོན་གཉེར་གྱི་སྐྱེས་བུ་དེས། བུམ་འཛིན་དབང་མངོན་ལ་བརྟེན་ནས་བུམ་པ་ཚོལ་བ་ལ་ཞུགས་པ་དེའི་ཚེ་ན། བུམ་པ་དང་འཕྲད་པ་ཡོད་པའི་ཕྱིར། དེས་ན། མི་བསླུ་བའི་ཡུལ་ཅན་དེ་ལ་དབྱེ་ན། མི་བསླུ་བའི་སྐྱེས་བུ། མི་བསླུ་བའི་ངག །མི་བསླུ་བའི་ཤེས་པ་དང་གསུམ་དུ་ཡོད། དང་པོ་དང་ཚད་མའི་སྐྱེས་བུ་དོན་གཅིག །གཉིས་པ་དང་ངག་རྣམ་དག་དོན་གཅིག །གསུམ་པ་ལ་དབྱེ་ན། ཚད་མ་དང་བཅད་ཤེས་གཉིས་སུ་ཡོད། དེས་ན། སྒྲ་མི་རྟག་པར་ཚད་མས་ངེས་པའི་གང་ཟག་གིས་སྨྲས་པའི་སྒྲ་མི་རྟག་པར་དམ་བཅས་པའི་དམ་བཅའ་དང་། དེའི་རྒྱུད་ཀྱི་སྒྲ་མི་རྟག་པར་རྟོགས་པའི་རྗེས་དཔག་གཉིས་ལ། ཡུལ་ཅན་གྱི་མི་བསླུ་བ། ཞེས་བརྗོད་པའི་རྒྱུ་མཚན་ཡོད་དེ། དེ་གཉིས་རྒྱུ་མཚན་ལྟར་སྣང་གང་གིས་ཀྱང་ལྡོག་པར་མི་ནུས་པས་དེ་ལྟར་བརྗོད་པའི་ཕྱིར། སྒྲ་མི་རྟག་པར་ཚད་མས་མ་ངེས་པའི་གང་ཟག་གིས་སྨྲས་པའི་སྒྲ་མི་རྟག་པར་དམ་བཅས་པའི་དམ་བཅའ་དང་། དེའི་རྒྱུད་ཀྱི་སྒྲ་མི་རྟག་པར་འཛིན་པའི་རྟོག་པ་གཉིས་ལ་ཡུལ་ཅན་གྱི་བསླུ་བ། ཞེས་བརྗོད་པའི་རྒྱུ་མཚན་ཡིད་དེ། དེ་གཉིས་རྒྱུ་མཚན་ལྟར་སྣང་གཞན་གྱིས་བཟློག་ནུས་པའི་ཕྱིར། ངག་དོན་ནི། མེ་འཛིན་དབང་མངོན་ཆོས་ཅན། ཚད་མ་ཡིན་ཏེ། གསར་དུ་མི་བསླུ་བའི་རིག་པ་ཡིན་པའི་ཕྱིར། །

༈ རྩོད་པ་སྤང་བ་ལ། ཁ་ཅིག་ན་རེ། ཚད་མ་བསླུ་མེད་ཅན་ཤེས་པ། །ཞེས་པའི་གཞུང་འདིས་མེ་འཛིན་དབང་མངོན་ཚད་མའི་མཚན་གཞིར་དངོས་སུ་བསྟན་པར་ཐལ། ངག་དོན་འཐད་པའི་ཕྱིར། འདོད་ན། གཞུང་དེས་མེ་འཛིན་དབང་མངོན་ཚད་མར་དངོས་སུ་བསྟན་པར་ཐལ། འདོད་པའི་ཕྱིར། འདོད་ན། དེས་མེ་འཛིན་དབང་མངོན་དངོས་སུ་བསྟན་པར་ཐལ་ལོ། །འདོད་ན། ཚད་མ་ཡིན་ན། གཞུང་དེའི་སྐབས་ནས་དངོས་སུ་བསྟན་པའི་ཚད་མ་ཡིན་དགོས་པར་ཐལ། གཞུང་དེས་མངོན་སུམ་ཡང་དངོས་སུ་བསྟན། རྗེས་དཔག་ཀྱང་དངོས་སུ་བསྟན་པའི་ཕྱིར། གཞན་ཡང་། ཁོ་ན་རེ། གཞུང་དེས་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་དངོས་སུ་བསྟན་པར་ཐལ། གཞུང་དེས་མེ་འཛིན་དབང་མངོན་ཚད་མའི་མཚན་གཞིར་ཡང་དངོས་སུ་བསྟན་པའི་ཕྱིར། འདོད་ན། གཞུང་དེ་ལས་ལོགས་སུ། མ་ཤེས་དོན་གྱི་གསལ་བྱེད་ཀྱང་། །ཞེས་པའི་གཞུང་སྨོས་པ་ལ་དགོས་པ་མེད་པར་ཐལ་ལོ། །ཟེར་ན། སྐྱོན་མེད་དེ། ཚད་མ་བསླུ་མེད་ཅན་ཤེས་པ། །ཞེས་པས། ཚད་མའི་མཚན་ཉིད་ཀྱི་ཟུར་གྱི་གསར་དུ་ཞེས་པ་སྒྲས་ཟིན་ལ་མ་བསྟན་པས། དེ་ཤེས་པའི་ཕྱིར་དུ་མ་ཤེས་དོན་གྱི་གསལ་བྱེད་ཀྱང་། །ཞེས་པ་འདི་བྱུང་བའི་ཕྱིར། ཁ་ཅིག་ན་རེ། བཅད་ཤེས་ཆོས་ཅན། ཚད་མ་ཡིན་པར་ཐལ། གསར་དུ་མི་བསླུ་བའི་རིག་པ་ཡིན་པའི་ཕྱིར་ཏེ། གསར་དུ་མི་བསླུ་བའི་རིག་པར་སྐྱེས་པའི་ཕྱིར་ཏེ། མི་བསླུ་བའི་རིག་པར་གསར་དུ་སྐྱེས་པའི་ཕྱིར་ན་མ་ཁྱབ། རྟགས་དེར་ཐལ། མི་བསླུ་བའི་རིག་པར་སྐྱེས་པའི་ཕྱིར། གཞན་ཡང་། དེ་ཆོས་ཅན། གསར་དུ་མི་བསླུ་བའི་རིག་པར་སྐྱེས་པར་ཐལ། དེ་དང་གསར་དུ་བསླུ་བའི་རིག་པ་གང་རུང་དུ་སྐྱེས་པ་གང་ཞིག །ཕྱི་མ་དེར་མ་སྐྱེས་པའི་ཕྱིར། དང་པོ་གྲུབ་སྟེ། གསར་དུ་རིག་པར་སྐྱེས་པའི་ཕྱིར་ན་མ་ཁྱབ། གཉིས་པ་མ་གྲུབ་ན། དེ་ཆོས་ཅན། བསླུ་བའི་རིག་པ་ཡིན་པར་ཐལ། མ་གྲུབ་པ་དེའི་ཕྱིར། ཁ་ཅིག་ན་རེ། རྣམ་མཁྱེན་སྐད་ཅིག་གཉིས་པ་ཆོས་ཅན། རང་གི་གཞལ་བྱ་ལ་གསར་དུ་མི་བསླུ་བའི་རིག་པ་ཡིན་པར་ཐལ། ཚད་མ་ཡིན་པའི་ཕྱིར། འདོད་མི་ནུས་ཏེ། དེས་གསར་དུ་རྟོགས་པ་མེད་པའི་ཕྱིར། དེར་ཐལ། གཞི་གྲུབ་ན་རྣམ་མཁྱེན་སྐད་ཅིག་དང་པོའི་གཞལ་བྱ་ཡིན་དགོས་པའི་ཕྱིར་ཟེར་ན་མ་ཁྱབ། ཁ་ཅིག་ན་རེ། རྣམ་མཁྱེན་སྐད་ཅིག་གཉིས་པའི་དུས་སུ་རྣམ་མཁྱེན་སྐད་ཅིག་གཉིས་པ་གསར་དུ་གྲུབ་པ་དེ་རྣམ་མཁྱེན་སྐད་ཅིག་གཉིས་པས་གསར་དུ་རྟོགས་པ་ཡིན་ཞིང་། དེ་རྣམ་མཁྱེན་སྐད་ཅིག་དང་པོས་མ་རྟོགས་པའི་ཆོས་ཡིན་ནོ། །ཟེར་ན། དེ་མི་འཐད་པར་ཐལ། རྣམ་མཁྱེན་སྐད་ཅིག་དང་པོས་མ་རྟོགས་པའི་ཆོས་མེད་པའི་ཕྱིར་ཏེ། གཞི་གྲུབ་ན། རྣམ་མཁྱེན་སྐད་ཅིག་དང་པོའི་གཞལ་བྱ་ཡིན་དགོས་པའི་ཕྱིར་ཏེ། དབུ་མ་རྒྱན་ལས། མཁྱེན་པའི་སྐད་ཅིག་གཅིག་གིས་ནི། །ཤེས་བྱའི་དཀྱིལ་འཁོར་ཁྱབ་པར་མཛད། །ཅེས་གསུངས་པའི་ཕྱིར། གཞན་ཡང་། དེ་རྣམ་མཁྱེན་སྐད་ཅིག་དང་པོས་རྟོགས་པར་ཐལ། རྣམ་མཁྱེན་སྐད་ཅིག་དང་པོས་དེ་རྟོགས་པའི་ཕྱིར། རྣམ་མཁྱེན་སྐད་ཅིག་གཉིས་པ་དེ། རང་དུས་སུ་རྣམ་མཁྱེན་སྐད་ཅིག་དང་པོའི་གཞལ་བྱ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་དུས་སུ་རྣམ་མཁྱེན་སྐད་ཅིག་དང་པོའི་གཞལ་བྱ་ཡིན་པར་ཐལ། རྣམ་མཁྱེན་སྐད་ཅིག་དང་པོའི་གཞལ་བྱ་ཡིན་པའི་ཕྱིར། ཁྱབ་སྟེ། ཚད་མའི་གཞལ་བྱ་ལ་དེའི་ཕྱིར། དེར་ཐལ། ཚད་མས་དམིགས་པ་ལ་དེའི་ཕྱིར། བྱས་པ་ལ་ཁོ་ན་རེ། གཟུགས་རྟོགས་པའི་ཚད་མ་ཡིན་ན། རང་དུས་སུ་གཟུགས་རྟོགས་པའི་ཚད་མ་ཡིན་དགོས་པར་ཐལ། རྣམ་མཁྱེན་སྐད་ཅིག་དང་པོའི་གཞལ་བྱ་ཡིན་ན། རང་དུས་སུ་དེ་སྐད་ཅིག་དང་པོའི་གཞལ་བྱ་ཡིན་དགོས་པའི་ཕྱིར་ཟེར་ན། འདོད་བྱས་པ་ལ། གཟུགས་འཛིན་དབང་མངོན་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་རང་དུས་སུ་གཟུགས་རྟོགས་པར་ཐལ། ཁྱོད་རང་དུས་སུ་དེ་རྟོགས་པའི་ཚད་མ་ཡིན་པའི་ཕྱིར་ན་མ་ཁྱབ། འདོད་ན། རང་དུས་སུ་གཟུགས་ཡོད་པར་ཐལ་ལོ། །གཞན་ཡང་། གཟུགས་ཀྱི་འབྲས་བུར་གྱུར་པའི་རྣམ་མཁྱེན་ཆོས་ཅན། རང་དུས་སུ་གཟུགས་ཡོད་པར་རྟོགས་པའི་ཚད་མ་ཡིན་པར་ཐལ། གཟུགས་ཡོད་པར་རྟོགས་པའི་ཚད་མ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། རང་དུས་སུ་དེ་མེད་པར་རྟོགས་པའི་ཚད་མ་ཡིན་པའི་ཕྱིར་ཏེ། ཁྱོད་རང་དུས་སུ་ཚད་མ་གང་ཞིག །ཁྱོད་ཀྱིས་རང་དུས་སུ་དེ་མེད་པར་རྟོགས་པའི་ཕྱིར་ཟེར་ན་མ་ཁྱབ། ཁོ་རང་ལ། གཟུགས་འཛིན་དབང་མངོན་ཆོས་ཅན། རང་དུས་སུ་གཟུགས་རྟོགས་པའི་ཚད་མ་ཡིན་པར་ཐལ། གཟུགས་རྟོགས་པའི་ཚད་མ་གང་ཞིག །རང་དུས་སུ་གཟུགས་འཛིན་དབང་མངོན་ཡིན་པའི་ཕྱིར། ཕྱི་མ་གྲུབ་སྟེ། གཟུགས་འཛིན་དབང་མངོན་ཡིན་པའི་ཕྱིར། ཁ་ཅིག་ན་རེ། རྒྱུན་མཐའི་བར་ཆད་མེད་ལམ་ཆོས་ཅན། སྟོང་ཉིད་ལ་ཚད་མར་ཐལ། དེ་ལ་གསར་དུ་མི་བསླུ་བའི་རིག་པ་ཡིན་པའི་ཕྱིར། འདོད་ན། ཐེག་ཆེན་གྱི་མཐོང་ལམ་བར་ཆད་མེད་ལམ་དེ། སྟོང་ཉིད་ལ་ཚད་མ་ཡིན་པར་ཐལ། འདོད་པའི་ཕྱིར། འདོད་ན། སྟོང་ཉིད་མངོན་སུམ་གྱིས་རྟོགས་པའི་ཐེག་ཆེན་གྱི་མཐོང་ལམ་བར་ཆད་མེད་ལམ་སྐད་ཅིག་གཉིས་པ་དེ། སྟོང་ཉིད་ལ་ཚད་མར་ཐལ་ལོ། །འདོད་ན། སྟོང་ཉིད་མངོན་སུམ་དུ་རྟོགས་པའི་མངོན་སུམ་སྐད་ཅིག་གཉིས་པ་དེ། སྟོང་ཉིད་ལ་ཚད་མ་ཡིན་པར་ཐལ་ལོ། །འདོད་ན། གཟུགས་མངོན་སུམ་གྱིས་རྟོགས་པའི་མངོན་སུམ་སྐད་ཅིག་གཉིས་པ་དེ་གཟུགས་ལ་ཚད་མར་ཐལ། འདོད་པའི་ཕྱིར་ན་རེ་ཞིག་མ་ཁྱབ། འདོད་ན། གཟུགས་འཛིན་དབང་སྔོན་སྐད་ཅིག་གཉིས་པ་དེ་ཡང་གཟུགས་ལ་ཚད་མར་ཐལ་ལོ། །ཟེར་ན། ཁོ་རང་ལ། ཐེག་ཆེན་གྱི་མཐོང་ལམ་བར་ཆད་མེད་ལམ་དེ་སྟོང་ཉིད་ལ་ཚད་མ་མ་ཡིན་པར་ཐལ། དེ་དེ་ལ་མངོན་སུམ་གྱི་ཚད་མ་མ་ཡིན་པའི་ཕྱིར་ཏེ། དམན་ལམ་སྔོན་དུ་མ་སོང་བའི་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་ཐེག་ཆེན་གྱི་སྦྱོར་ལམ་ཆོས་མཆོག་ཐ་མའི་ཡེ་ཤེས་དེ། སྟོང་ཉིད་ལ་མངོན་སུམ་གྱི་ཚད་མ་མ་ཡིན་པའི་ཕྱིར། མ་གྲུབ་ན། དེ་འདྲའི་ཡེ་ཤེས་ལ་གནས་པའི་བྱང་སེམས་དེ་སྟོང་ཉིད་མངོན་སུམ་དུ་རྟོགས་པའི་གང་ཟག་ཏུ་ཐལ་ལོ། །ཁ་ཅིག་ན་རེ། ཚད་མ་ཚད་མས་ངེས་པའི་གང་ཟག་ཡིན་ན། ཚད་མ་རིག་པར་ཚད་མས་ངེས་པའི་གང་ཟག་ཡིན་དགོས་པར་ཐལ། རིག་པ་ཚད་མའི་མཚན་ཉིད་ཀྱི་ཟུར་གཅིག་ཡིན་པའི་ཕྱིར། འདོད་ན། བྱེ་བྲག་སྨྲ་བ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། ཚད་མ་ཚད་མའི་གཞལ་བྱ་འཇལ་བྱེད་དུ་ཚད་མས་ངེས་པའི་གང་ཟག་ཡིན་པའི་ཕྱིར་ཏེ། ཚད་མའི་གཞལ་བྱ་ཚད་མའི་གཞལ་བྱར་ཚད་མས་ངེས་པའི་གང་ཟག་ཡིན་པའི་ཕྱིར་ན་མ་ཁྱབ། ཁོ་རང་ལ། ཡོད་པ་ཚད་མས་ངེས་ནས། ཚད་མ་ཚད་མས་མ་ངེས་པའི་གང་ཟག་ཆོས་ཅན། ཚད་མ་ཚད་མས་ངེས་པའི་གང་ཟག་ཏུ་ཐལ། ཚད་མ་ཚད་མས་དམིགས་པའི་དམིགས་བྱེད་དུ་ཚད་མས་ངེས་པའི་གང་ཟག་ཡིན་པའི་ཕྱིར་ཏེ། ཚད་མས་དམིགས་པ་ཚད་མས་དམིགས་པར་ཚད་མས་ངེས་པའི་གང་ཟག་ཡིན་པའི་ཕྱིར། ཁྱབ་པ་ཁས། རྟགས་དེར་ཐལ། ཚད་མས་དམིགས་པ་ཚད་མས་ངེས་པའི་གང་ཟག་ཡིན་པའི་ཕྱིར་ཏེ། ཡོད་པ་ཚད་མས་ངེས་པའི་གང་ཟག་ཡིན་པའི་ཕྱིར། གཞན་ཡང་། རྒྱང་འཕེན་པ་ཆོས་ཅན། རང་རྒྱུད་ཀྱི་རྗེས་སུ་དཔག་པའི་ཚད་མ། རང་རྒྱུད་ཀྱི་རྗེས་སུ་དཔག་པའི་ཚད་མར་ཚད་མས་ངེས་པའི་གང་ཟག་ཡིན་པར་ཐལ། རང་རྒྱུད་ཀྱི་རྗེས་སུ་དཔག་པའི་ཚད་མ། རང་རྒྱུད་ཀྱི་རྗེས་སུ་དཔག་པའི་ཚད་མའི་གཞལ་བྱ་འཇལ་བྱེད་དུ་ཚད་མས་ངེས་པའི་གང་ཟག་ཡིན་པའི་ཕྱིར་ཏེ། རང་རྒྱུད་ཀྱི་རྗེས་སུ་དཔག་པའི་ཚད་མའི་གཞལ་བྱ། རང་རྒྱུད་ཀྱི་རྗེས་སུ་དཔག་པའི་ཚད་མའི་གཞལ་བྱར་ཚད་མས་ངེས་པའི་དེ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། རང་རྒྱུད་ཀྱི་རྗེས་སུ་དཔག་པའི་ཚད་མའི་གཞལ་བྱ་ཚད་མས་ངེས་པའི་དེ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། རང་རྒྱུད་ཀྱི་རྗེས་སུ་དཔག་པའི་ཚད་མ་ཚད་མས་ངེས་པའི་དེ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། རང་རྒྱུད་ཀྱི་རྗེས་སུ་དཔག་པའི་ཚད་མ་མེད་པར་བདེན་ཞེན་གྱིས་འདོད་པའི་གང་ཟག་ཡིན་པའི་ཕྱིར། ཁ་ཅིག་ན་རེ། རང་གི་གཞལ་བྱ་ལ་གསར་དུ་མི་བསླུ་བའི་རིག་པ་ཚད་མས་ངེས་པའི་གང་ཟག་ཡིན་ན། གསར་དུ་མི་བསླུ་བའི་རིག་པ་ཚད་མས་ངེས་པའི་གང་ཟག་ཡིན་དགོས་པར་ཐལ། དེ་གཉིས་རེ་རེ་ནས་ཚད་མའི་མཚན་ཉིད་ཡིན་པའི་ཕྱིར། འདོད་ན། གསར་དུ་མི་བསླུ་བའི་རིག་པ་ཚད་མས་མ་ངེས་པའི་གང་ཟག་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། རང་རྒྱུད་ཀྱི་ཚད་མ་རང་རྒྱུད་ཀྱི་ཚད་མར་སོང་བའི་གཞལ་བྱ་ལ་གསར་དུ་མི་བསླུ་བའི་རིག་པར་ཚད་མས་ངེས་པའི་གང་ཟག་ཡིན་པའི་ཕྱིར་ཏེ། རང་རྒྱུད་ཀྱི་ཚད་མ་རང་རྒྱུད་ཀྱི་ཚད་མར་སོང་བའི་གཞལ་བྱ་ཚད་མས་ངེས་པའི་གང་ཟག་ཡིན་པའི་ཕྱིར་ཏེ། རང་རྒྱུད་ཀྱི་ཚད་མའི་གཞལ་བྱ་རང་རྒྱུད་ཀྱི་ཚད་མའི་གཞལ་བྱར་ཚད་མས་ངེས་པའི་གང་ཟག་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། རང་རྒྱུད་ཀྱི་ཚད་མའི་གཞལ་བྱ་ཚད་མས་ངེས་པའི་གང་ཟག་ཡིན་པའི་ཕྱིར། ཁ་ཅིག་ན་རེ། སེམས་ཅན་གྱི་རྒྱུད་ཀྱི་གང་ཟག་གི་བདག་མེད་རྟོགས་པའི་རྗེས་དཔག་ཆོས་ཅན། རང་གི་གཞལ་བྱ་ལ་སྒྲོ་འདོགས་གཅོད་བྱེད་ཀྱི་རིག་པ་ཡིན་པར་ཐལ། ཚད་མ་ཡིན་པའི་ཕྱིར། འདོད་ན། དེ་འདྲའི་རྗེས་དཔག་དེ་གང་ཟག་གི་བདག་ཡོད་པར་སྒྲོ་འདོགས་པའི་སྒྲོ་འདོགས་གཅོད་བྱེད་ཀྱི་ཚད་མར་ཐལ་ལོ། །འདོད་པའི་ཕྱིར། འདོད་ན། དེ་གང་ཟག་གི་བདག་འཛིན་གཅོད་བྱེད་ཀྱི་རིག་པར་ཐལ་ལོ། །འདོད་ན། དེ་འཁོར་བའི་རྩ་བ་གཅོད་བྱེད་ཀྱི་རིག་པར་ཐལ། འདོད་པ་གང་ཞིག །གང་ཟག་གི་བདག་འཛིན་འཁོར་བའི་རྩ་བ་ཡིན་པའི་ཕྱིར་ན་མ་ཁྱབ། འདོད་ན། སེམས་ཅན་དེ་འཁོར་བའི་རྩ་བ་ཆོད་པའི་གང་ཟག་ཏུ་ཐལ་ལོ། །ཁ་ཅིག་ན་རེ། རྣམ་མཁྱེན་ཆོས་ཅན། གང་ཟག་གི་བདག་ལ་ཚད་མར་ཐལ། དེ་ལ་སྒྲོ་འདོགས་གསར་དུ་གཅོད་བྱེད་ཀྱི་རིག་པ་ཡིན་པའི་ཕྱིར་ཏེ། གང་ཟག་གི་བདག་ཡོད་པར་སྒྲོ་འདོགས་པའི་སྒྲོ་འདོགས་གསར་དུ་གཅོད་བྱེད་ཀྱི་རིག་པ་ཡིན་པ་གང་ཞིག །གང་ཟག་གི་བདག་ཡོད་པར་སྒྲོ་འདོགས་པའི་སྒྲོ་འདོགས་དེ། གང་ཟག་གི་བདག་ལ་སྒྲོ་འདོགས་པའི་སྒྲོ་འདོགས་ཡིན་པའི་ཕྱིར། ཕྱི་མ་གྲུབ་སྟེ། ཀ་བུམ་གཉིས་མེད་པར་སྒྲོ་འདོགས་པའི་སྒྲོ་འདོགས་དེ། ཀ་བུམ་གཉིས་ལ་སྒྲོ་འདོགས་པའི་སྒྲོ་འདོགས་ཡིན་པའི་ཕྱིར་ཏེ། ཀ་བུམ་གཉིས་ལ་སྒྲོ་འདོགས་པའི་སྒྲོ་འདོགས་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། ཀ་བུམ་གཉིས་ཀ་བུམ་གཉིས་དང་གཅིག་མ་ཡིན་པར་སྒྲོ་འདོགས་པའི་སྒྲོ་འདོགས་དེ་དེ་ཡིན་པའི་ཕྱིར། ཁ་ཅིག་ན་རེ། ཉན་ཐོས་ཀྱི་སྒོམ་ལམ་བར་ཆད་མེད་ལམ་ཆོས་ཅན། སྟོང་ཉིད་ལ་གསར་དུ་མི་བསླུ་བའི་རིག་པ་ཡིན་པར་ཐལ། དེ་ལ་ཚད་མ་ཡིན་པའི་ཕྱིར། འདོད་ན། ཉན་ཐོས་སྒོམ་ལམ་པ་དེ། སྟོང་ཉིད་མངོན་སུམ་གྱིས་རྟོགས་ཟིན་རྒྱུད་ལྡན་དུ་སྒོམ་པར་བྱེད་པའི་གང་ཟག་མ་ཡིན་པར་ཐལ། ཉན་ཐོས་ཀྱི་སྒོམ་ལམ་བར་ཆད་མེད་ལམ་དེ་སྟོང་ཉིད་ལ་གསར་དུ་མི་བསླུ་བའི་རིག་པ་ཡིན་པའི་ཕྱིར་ན་མ་ཁྱབ། །

བཅད་ཤེས་ཀྱི་ངོ་བོ་ལ་མཐའ་དཔྱད་དང་རང་ལུགས་བཞག་པ།

༈ གཟུང་བ་འཛིན་ཕྱིར་ཀུན་རྫོབ་ནི། །མི་འདོད། ཅེས་པའི་སྐབས་སུ། མཐའ་དཔྱད་པ་ལ། ཁ་ཅིག་ན་རེ། རང་གི་ཉེར་ལེན་དུ་གྱུར་པའི་ཚད་མ་སྔ་མས་རྟོགས་ཟིན་གྱི་དོན་རྟོགས་པའི་མི་བསླུ་བའི་རིག་པ་དེ། བཅད་ཤེས་ཀྱི་མཚན་ཉིད་ཟེར་ན། རྣམ་མཁྱེན་སྐད་ཅིག་གཉིས་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། རང་གི་ཉེར་ལེན་དུ་གྱུར་པའི་རྣམ་མཁྱེན་སྐད་ཅིག་དང་པོས་རྟོགས་ཟིན་གྱི་དོན་རྟོགས་པའི་མི་བསླུ་བའི་རིག་པ་ཡིན་པའི་ཕྱིར། མ་གྲུབ་ན། དེར་ཐལ། རྣམ་མཁྱེན་སྐད་ཅིག་དང་པོས་རྟོགས་ཟིན་གྱི་ཆོས་ཐམས་ཅད་རྣམ་མཁྱེན་སྐད་ཅིག་གཉིས་པའི་གཞལ་བྱ་ཡིན་པའི་ཕྱིར། ཁ་ཅིག་ན་རེ། རང་གི་ཉེར་ལེན་དུ་གྱུར་པའི་ཚད་མ་སྔ་མས་རྟོགས་ཟིན་གྱི་དོན་རྟོགས་པའི་གསར་དུ་མི་བསླུ་བའི་རིག་པ་མ་ཡིན་པའི་མི་བསླུ་བའི་རིག་པ་བཅད་ཤེས་ཀྱི་མཚན་ཉིད་ཟེར་ན། བྱས་པའི་རྟགས་ལས་སྒྲ་མི་རྟག་རྟོགས་ཀྱི་རྗེས་དཔག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། ཁྱབ་པ་ཁས། རྟགས་གྲུབ་སྟེ། དེ་རང་གི་ཉེར་ལེན་དུ་གྱུར་པའི་སྒྲ་འཛིན་དབང་མངོན་གྱིས་རྟོགས་ཟིན་གྱི་དོན་རྟོགས་པའི་གསར་དུ་མི་བསླུ་བའི་རིག་པ་མ་ཡིན་པའི་མི་བསླུ་བའི་རིག་པ་ཡིན་པའི་ཕྱིར་ཏེ། དེ་ཁོ་རང་གི་ཉེར་ལེན་དུ་གྱུར་པའི་སྒྲ་འཛིན་དབང་མངོན་གྱིས་རྟོགས་ཟིན་གྱི་དོན་སྒྲ་རྟོགས་པའི་གསར་དུ་མི་བསླུ་བའི་རིག་པ་མ་ཡིན་པའི་མི་བསླུ་བའི་རིག་པ་ཡིན་པའི་ཕྱིར་ཏེ། དེ་རང་གི་ཉེར་ལེན་དུ་གྱུར་པའི་སྒྲ་འཛིན་དབང་མངོན་གྱིས་རྟོགས་ཟིན་གྱི་དོན་སྒྲ་རྟོགས་པའི་བཅད་ཤེས་ཡིན་པའི་མི་བསླུ་བའི་རིག་པ་ཡིན་པའི་ཕྱིར། བྱས་པ་ལ་ཁོ་ན་རེ། བྱས་པའི་རྟགས་ལས་སྒྲ་མི་རྟག་རྟོགས་ཀྱི་རྗེས་དཔག་གི་ཉེར་ལེན་དུ་གྱུར་པའི་ཚད་མ་སྔ་མ་དེས། དེ་འདྲའི་རྗེས་དཔག་གི་གཞལ་བྱ་རྟོགས་པར་ཐལ། དེ་འདྲའི་རྗེས་དཔག་དེས། དེ་འདྲའི་རྗེས་དཔག་གི་ཉེར་ལེན་དུ་གྱུར་པའི་ཚད་མ་སྔ་མའི་གཞལ་བྱ་རྟོགས་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་འདྲའི་རྗེས་དཔག་དེས། རང་གི་ཉེར་ལེན་དུ་གྱུར་པའི་ཚད་མ་སྔ་མས་རྟོགས་ཟིན་གྱི་དོན་རྟོགས་པའི་ཕྱིར། རྩ་བར་འདོད་ན། དེ་འདྲའི་རྗེས་དཔག་དེ་རང་གི་གཞལ་བྱ་རྟོགས་ཟིན་གྱི་དོན་རྟོགས་པའི་རིག་པ་ཡིན་པར་ཐལ་ལོ། །འདོད་མི་ནུས་ཏེ། དེ་རང་གི་གཞལ་བྱ་གསར་དུ་རྟོགས་པའི་རིག་པ་ཡིན་པའི་ཕྱིར། འོ་ན། ཁོ་རང་ལ། བྱས་པའི་རྟགས་ལས་སྒྲ་མི་རྟག་པར་རྟོགས་པའི་རྗེས་དཔག་གི་ཉེར་ལེན་དུ་གྱུར་པའི་སྒྲ་འཛིན་དབང་མངོན་དེས། དེ་འདྲའི་རྗེས་དཔག་གི་གཞལ་བྱ་རྟོགས་པར་ཐལ། དེ་འདྲའི་རྗེས་དཔག་དེས། རང་གི་ཉེར་ལེན་དུ་གྱུར་པའི་སྒྲ་འཛིན་དབང་མངོན་གྱི་གཞལ་བྱའི་གཙོ་བོ་རྟོགས་པའི་ཕྱིར། ཁྱབ་པ་ཁས། དེར་ཐལ། དེས་དེའི་གཞལ་བྱའི་གཙོ་བོ་སྒྲ་རྟོགས་པའི་ཕྱིར། རྩ་བར་འདོད་ན། དེའི་ཉེར་ལེན་དུ་གྱུར་པའི་སྒྲ་འཛིན་དབང་མངོན་དེས། སྒྲ་མི་རྟག་པར་རྟོགས་པར་ཐལ་ལོ། །སྔར་གྱི་མཚན་ཉིད་དེ་ལ་སྐྱོན་འཕེན་པ་ཁ་ཅིག་ན་རེ། བྱས་པའི་རྟགས་ལས་སྒྲ་མི་རྟག་པར་རྟོགས་པའི་རྗེས་དཔག་སྐད་ཅིག་གཉིས་པ་ཆོས་ཅན། དེའི་ཉེར་ལེན་དུ་གྱུར་པའི་ཚད་མ་སྔ་མས་རྟོགས་ཟིན་གྱི་དོན་རྟོགས་པའི་གསར་དུ་མི་བསླུ་བའི་རིག་པ་མ་ཡིན་པའི་མི་བསླུ་བའི་རིག་པ་ཡིན་པར་ཐལ། བཅད་ཤེས་ཡིན་པའི་ཕྱིར། འདོད་ན། དེ་ཆོས་ཅན། རང་གི་ཉེར་ལེན་དུ་གྱུར་པའི་ཚད་མ་སྔ་མའི་གཞལ་བྱ་རྟོགས་པའི་རིག་པ་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། རང་གི་ཉེར་ལེན་དུ་གྱུར་པའི་བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཚུལ་གསུམ་རྟོགས་པའི་ཚད་མའི་གཞལ་བྱ་རྟོགས་པའི་རིག་པ་ཡིན་པར་ཐལ། འདོད་པ་གང་ཞིག །ཁྱོད་ཀྱི་ཉེར་ལེན་དུ་གྱུར་པའི་དེ་སྐོར་གྱི་ཚུལ་གསུམ་རྟོགས་པའི་ཚད་མ་ཡོད་པའི་ཕྱིར་ན་མ་ཁྱབ། འདོད་ན། དེ་ཆོས་ཅན། བྱས་རྟགས་ཀྱིས་དེ་སྒྲུབ་ཀྱི་ཚུལ་གསུམ་རྟོགས་པའི་རིག་པ་ཡིན་པར་ཐལ་ལོ། །ཁ་ཅིག་ན་རེ། རང་ཡིན་པའམ་རང་གི་ནང་ཚན་དུ་གྱུར་པའི་ཚད་མ་མེད་པ་གང་ཞིག །མི་བསླུ་བའི་རིག་པ་བཅད་ཤེས་ཀྱི་མཚན་ཉིད་ཟེར་ན། སྒྲ་རྟོགས་པའི་བཅད་ཤེས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། ཁྱོད་ཡིན་ན་ཚད་མ་མ་ཡིན་དགོས་པར་ཐལ། འདོད་པའི་ཕྱིར། འདོད་ན། སྒྲ་མི་རྟག་པར་རྟོགས་པའི་རྗེས་དཔག་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། དེ་སྒྲ་ལ་བཅད་ཤེས་ཡིན་པའི་ཕྱིར། བྱས་པ་ལ་ཁོ་ན་རེ། སྒྲ་མི་རྟག་པར་རྟོགས་པའི་རྗེས་དཔག་ཆོས་ཅན། སྒྲ་རྟོགས་པའི་སྒྲ་མི་རྟག་པ་ལ་གསར་དུ་མི་བསླུ་བའི་རིག་པ་ཡིན་པར་ཐལ། སྒྲ་རྟོགས་པའི་བཅད་ཤེས་སུ་གྱུར་པའི་སྒྲ་མི་རྟག་པ་ལ་གསར་དུ་མི་བསླུ་བའི་རིག་པ་ཡིན་པའི་ཕྱིར། འདོད་ན། དེ་ཆོས་ཅན། སྒྲ་རྟོགས་པའི་རང་གི་གཞལ་བྱ་ལ་གསར་དུ་མི་བསླུ་བའི་རིག་པ་ཡིན་པར་ཐལ། འདོད་པ་གང་ཞིག། སྒྲ་མི་རྟག་པ་དེ་ཁྱོད་ཀྱི་གཞལ་བྱའི་གཙོ་བོ་ཡིན་པའི་ཕྱིར་ན་མ་ཁྱབ། འདོད་ན། སྒྲ་རྟོགས་པའི་ཚད་མ་ཡིན་པར་ཐལ། འདོད་པའི་ཕྱིར། ཁ་ཅིག་ན་རེ། རང་གི་གཞལ་བྱ་རྟོགས་ཟིན་རྟོགས་པའི་རིག་པ་དེ་བཅད་ཤེས་ཀྱི་མཚན་ཉིད་ཟེར་ན། རྣམ་མཁྱེན་སྐད་ཅིག་གཉིས་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རང་གི་གཞལ་བྱ་རྟོགས་ཟིན་རྟོགས་པའི་རྣམ་མཁྱེན་ཡིན་པའི་ཕྱིར། མ་གྲུབ་ན། རྣམ་མཁྱེན་སྐད་ཅིག་གཉིས་པའི་གཞལ་བྱ་རྟོགས་ཟིན་ཆོས་ཅན། རྣམ་མཁྱེན་སྐད་ཅིག་གཉིས་པ་ཁྱོད་རྟོགས་པའི་རྣམ་མཁྱེན་ཡིན་པར་ཐལ། ཁྱོད་གཞི་གྲུབ་པའི་ཕྱིར། བྱས་པ་ལ་ཁོ་ན་རེ། རྣམ་མཁྱེན་སྐད་ཅིག་གཉིས་པ་དེ། རང་གི་གཞལ་བྱ་ལ་གསར་དུ་མི་བསླུ་བའི་རིག་པ་མ་ཡིན་པར་ཐལ། དེ་རང་གི་གཞལ་བྱ་རྟོགས་ཟིན་རྟོགས་པའི་རིག་པ་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། ཚད་མ་ཡིན་པའི་ཕྱིར། ཁོ་རང་ལ། རྣམ་མཁྱེན་སྐད་ཅིག་གཉིས་པ་དེ། རང་རྒྱུ་ལས་གསར་དུ་སྐྱེས་པའི་དངོས་པོ་མ་ཡིན་པར་ཐལ། དེ་རང་རྒྱུ་ལས་སྐྱེས་ཟིན་སྐྱེས་པའི་དངོས་པོ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེ་སྐྱེ་བ་ཐུག་བཅས་དང་། དོན་བཅས་ཀྱི་དངོས་པོ་ཡིན་པའི་ཕྱིར། རྩ་བར་འདོད་མི་ནུས་ཏེ། དེ་རང་གི་རྒྱུའི་དུས་སུ་མེད་ཅིང་། རང་རྒྱུ་ལས་གསར་དུ་སྐྱེས་པའི་དངོས་པོ་ཡིན་པའི་ཕྱིར། ཁ་ཅིག་ན་རེ། ངེས་ཤེས་ཡིན་ན་བཅད་ཤེས་ཡིན་པས་ཁྱབ་ཟེར་ན། དེ་ལ་སྐྱོན་འཕེན་པ་ཁ་ཅིག་ན་རེ། ཡིད་དཔྱོད་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། རང་གི་གཞལ་བྱ་ངེས་པའི་ངེས་ཤེས་ཡིན་པའི་ཕྱིར་ཏེ། དེའི་གཞལ་བྱ་ཡོད་པའི་ཕྱིར་ཏེ། རང་ཡུལ་དུ་གྱུར་པའི་ལྐོག་འགྱུར་མཐའ་གཅིག་ཏུ་གོ་བའི་ཡིད་དཔྱོད་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། སྒྲ་མི་རྟག་པར་ཚད་མས་མ་ངེས་པའི་གང་ཟག་གི་རྒྱུད་ཀྱི་སྒྲ་མི་རྟག་པར་འཛིན་པའི་རྟོག་པ་དེ་དེ་ཡིན་པའི་ཕྱིར་ཏེ། དེ་སྒྲ་མི་རྟག་པ་མཐའ་གཅིག་ཏུ་གོ་བའི་བསླུ་བའི་ཞེན་རིག་དོན་མཐུན་ཡིན་པའི་ཕྱིར་ཟེར་ན། ཁོ་རང་ལ། ཡིད་དཔྱོད་དེ་རང་གི་གཞལ་བྱ་རྟོགས་པའི་བློ་ཡིན་པར་ཐལ། དེ་རང་གི་གཞལ་བྱ་ངེས་པའི་བློ་ཡིན་པའི་ཕྱིར། རྟགས་ཁས། འདོད་མི་ནུས་ཏེ། དེ་རང་གི་གཞལ་བྱ་མ་རྟོགས་པའི་བློ་ཡིན་པའི་ཕྱིར་ཏེ། དེ་མ་རྟོགས་པའི་བློ་ཡིན་པའི་ཕྱིར་ཏེ། ཤིང་ཞེས་པའི་ངག་ལ་བརྟེན་ནས་སྐྱེས་པའི་ཤིང་མ་ཡིན་པ་ལས་ལོག་པ་གོ་བའི་ཡིད་དཔྱོད་དེ་མ་རྟོགས་པའི་བློ་ཡིན་པའི་ཕྱིར། གཞན་ཡང་། ཡིད་དཔྱོད་དེ་ངེས་ཤེས་མ་ཡིན་པར་ཐལ། ངེས་ཤེས་དོན་མཐུན་དེ་བཅད་ཤེས་ཡིན་པའི་ཕྱིར་ཏེ། སྔོན་འཛིན་དབང་མངོན་གྱིས་དྲངས་ནས་སྐྱེས་པའི་སྔོན་པོ་དོན་མཐུན་དུ་ངེས་པའི་ངེས་ཤེས་དེ་བཅད་ཤེས་ཡིན་པའི་ཕྱིར་ཏེ། དེ་སྔོན་པོ་སྔོན་པོ་མ་ཡིན་པར་སྒྲོ་འདོགས་པའི་སྒྲོ་འདོགས་ཆོད་ཟིན་ཆོད་པའི་རིག་པ་ཡིན་པའི་ཕྱིར་ཏེ། ངེས་པ་དང་ནི་སྒྲོ་འདོགས་ཡིད། །ཅེས་གསུངས་པའི་ཕྱིར། ཁ་ཅིག་ན་རེ། གཟུང་བ་འཛིན་ཕྱིར་ཀུན་རྫོབ་ནི། །ཞེས་པའི་དོན་དུ་བསམས་ནས། བཅད་ཤེས་ཡིན་ན། བློ་ཀུན་རྫོབ་པ་ཡིན་པས་ཁྱབ་ཟེར་ན། དེ་མི་འཐད་པར་ཐལ། མངོན་སུམ་བཅད་ཤེས་ཡོད་པའི་ཕྱིར་ཏེ། གཏན་ཚིགས་ཐིགས་པ་ཆོས་མཆོག་ཏུ་དྲངས་པ་ལས། མངོན་སུམ་དང་རྗེས་དཔག་སྐད་ཅིག་དང་པོ་གཉིས་ནི་ཚད་མ་ཡིན་ལ། དེ་དག་གི་རྒྱུན་དུ་གྱུར་པའི་གྲུབ་པ་དང་བདེ་བ་ཐ་མི་དད་པའི་ཕྱིར། ཕྱི་མ་རྣམས་ནི་ཚད་མ་ཡིན་པ་སྤངས་པའོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། མངོན་སུམ་སྐད་ཅིག་གཉིས་པ་བཅད་ཤེས་སུ་ཐལ། མངོན་སུམ་བཅད་ཤེས་ཡོད་པའི་ཕྱིར་ན་མ་ཁྱབ། འདོད་མི་ནུས་ཏེ། གཞི་གྲུབ་ན་མངོན་སུམ་སྐད་ཅིག་གཉིས་པས་གསར་དུ་རྟོགས་པས་ཁྱབ་པའི་ཕྱིར། གཞི་གྲུབ་ན། རྣལ་འབྱོར་མངོན་སུམ་སྐད་ཅིག་གཉིས་པས་གསར་དུ་རྟོགས་པས་ཁྱབ་པའི་ཕྱིར་ཏེ། གཞི་གྲུབ་ན་རྣམ་མཁྱེན་སྐད་ཅིག་གཉིས་པས་གསར་དུ་རྟོགས་པས་ཁྱབ་པའི་ཕྱིར། ཁ་ཅིག་ན་རེ། མངོན་སུམ་བཅད་ཤེས་ཡོད་ཀྱང་། རྗེས་དཔག་བཅད་ཤེས་མེད་དོ། །ཟེར་ན། དེ་ཡོད་པར་ཐལ། སྒྲ་མི་རྟག་པ་རྟོགས་པའི་རྗེས་དཔག་སྐད་ཅིག་གཉིས་པ་དེ་དེ་ཡིན་པའི་ཕྱིར་ཏེ། དེ་རྗེས་དཔག་གང་ཞིག །བཅད་ཤེས་ཡིན་པའི་ཕྱིར། དང་པོ་གྲུབ་སྟེ། དེ་སྒྲ་མི་རྟག་པ་རྟོགས་པའི་རྗེས་དཔག་ཡིན་པའི་ཕྱིར། གཉིས་པ་གྲུབ་སྟེ། རྗེས་དཔག་སྐད་ཅིག་གཉིས་པ་རྗེས་དཔག་ཡིན་པའི་ཕྱིར་ཏེ། མངོན་སུམ་སྐད་ཅིག་གཉིས་པ་མངོན་སུམ་ཡིན་པའི་ཕྱིར། བྱས་པ་ལ་ཁོ་ན་རེ། རྗེས་དཔག་བཅད་ཤེས་མེད་པར་ཐལ། རྗེས་དཔག་དང་རྗེས་སུ་དཔག་པའི་ཚད་མ་གཉིས་མཚན་ཉིད་གཅིག་གིས་མཚོན་ནུས་པའི་ཕྱིར་ཏེ། རང་དོན་རྗེས་སུ་དཔག་པ་དང་རང་དོན་རྗེས་སུ་དཔག་པའི་ཚད་མ་གཉིས་མཚན་ཉིད་གཅིག་གིས་མཚོན་ནུས་པའི་ཕྱིར་ཏེ། རང་གི་རྟེན་དུ་གྱུར་པའི་རྟགས་ཡང་དག་ལ་བརྟེན་ནས་སྐྱེས་པའི་གསར་དུ་མི་བསླུ་བའི་ཞེན་རིག་དེ། རང་དོན་རྗེས་དཔག་གི་མཚན་ཉིད་ཀྱང་ཡིན། གཅིག་ཤོས་ཀྱི་མཚན་ཉིད་ཀྱང་ཡིན་པའི་ཕྱིར། དང་པོ་གྲུབ་སྟེ། ཚད་མ་མདོ་ལས། རྗེས་དཔག་རྣམ་གཉིས་རང་དོན་ནི། །ཚུལ་གསུམ་རྟགས་ལས་དོན་མཐོང་ཡིན། །ཞེས་གསུངས་པའི་ཕྱིར་ན་མ་ཁྱབ་སྟེ། རང་གི་རྟེན་དུ་གྱུར་པའི་རྟགས་ཡང་དག་ལ་བརྟེན་ནས་སྐྱེས་པའི་གསར་དུ་མི་བསླུ་བའི་ཞེན་རིག་དེ་རང་དོན་རྗེས་སུ་དཔག་པའི་ཚད་མའི་མཚན་ཉིད་ཡིན་པ་དེ། ལུང་དེའི་དོན་ཡིན་པའི་ཕྱིར། དེ་ལྟར་མ་ཡིན་ན་རྗེས་དཔག་གསར་དུ་མི་བསླུ་བའི་རིག་པ་དེ། རྗེས་དཔག་ཚད་མའི་མཚན་ཉིད་དུ་ཐལ། མངོན་སུམ་གསར་དུ་མི་བསླུ་བའི་རིག་པ་དེ། མངོན་སུམ་ཚད་མའི་མཚན་ཉིད་ཡིན་པའི་ཕྱིར། འདོད་ན། རྗེས་དཔག་གསར་དུ་མི་བསླུ་བའི་རིག་པར་ཚད་མས་ངེས་ནས། གཅིག་ཤོས་ཚད་མས་མ་ངེས་པའི་གང་ཟག་ཆོས་ཅན། རྗེས་དཔག་ཚད་མ་ཚད་མས་ངེས་པའི་གང་ཟག་ཏུ་ཐལ། རྗེས་སུ་དཔག་པའི་ཚད་མ་དེ་ཚད་མས་ངེས་པའི་གང་ཟག་ཡིན་པའི་ཕྱིར་ཏེ། རྗེས་དཔག་ཚད་མས་ངེས་པའི་གང་ཟག་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། རྗེས་དཔག་གསར་དུ་མི་བསླུ་བའི་རིག་པར་ཚད་མས་ངེས་པའི་དེ་ཡིན་པའི་ཕྱིར་ཏེ། ཆོས་ཅན་དེའི་ཕྱིར། དེ་ལྟར་བྱས་པ་ལ་ཁོ་ན་རེ། རྗེས་དཔག་གི་གསར་དུ་མི་བསླུ་བའི་རིག་པ་དེ། རྗེས་དཔག་གི་ཚད་མའི་མཚན་ཉིད་ཡིན་པར་ཐལ། རྗེས་དཔག་གསར་དུ་མི་བསླུ་བའི་རིག་པ་དེ། རྗེས་དཔག་ཚད་མའི་མཚན་ཉིད་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། རང་གི་རྟེན་དུ་གྱུར་པའི་རྟགས་ཡང་དག་ལ་བརྟེན་ནས་སྐྱེས་པའི་གསར་དུ་མི་བསླུ་བའི་རིག་ཞེན་དེ། རྗེས་དཔག་གི་ཚད་མའི་མཚན་ཉིད་ཡིན་པའི་ཕྱིར། ཁོ་རང་ལ། མངོན་སུམ་གྱི་གསར་དུ་མི་བསླུ་བའི་རིག་པ་དེ། མངོན་སུམ་གྱི་ཚད་མའི་མཚན་ཉིད་ཡིན་པར་ཐལ། མངོན་སུམ་གསར་དུ་མི་བསླུ་བའི་རིག་པ་དེ། མངོན་སུམ་ཚད་མའི་མཚན་ཉིད་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། མངོན་སུམ་ཚད་མའི་མཚན་ཉིད་ཡོད་པའི་ཕྱིར། འདོད་མི་ནུས་ཏེ། རྟོག་པ་དང་བྲལ་ཞིང་མ་འཁྲུལ་པའི་གསར་དུ་མི་བསླུ་བའི་རིག་པ་དེ། མངོན་སུམ་གྱི་ཚད་མའི་མཚན་ཉིད་ཡིན་པའི་ཕྱིར། དེ་ལྟར་ན། མངོན་སུམ་བཅད་ཤེས་ཡོད་དེ། ཚུར་མཐོང་གི་རྒྱུད་ཀྱི་གཟུགས་འཛིན་དབང་མངོན་སྐད་ཅིག་གཉིས་པ་བཅད་ཤེས་ཡིན་པའི་ཕྱིར་ཏེ། དེ་དང་ཚུར་མཐོང་གི་རྒྱུད་ཀྱི་གཟུགས་འཛིན་དབང་མངོན་སྐད་ཅིག་དང་པོ་གཉིས་ཀྱི་ནང་ནས། དང་པོ་ཁོ་ན་ཚད་མ་ཡིན་པའི་ཕྱིར་ཏེ། གཏན་ཚིགས་ཐིགས་པ་ལས། དང་པོར་ཡུལ་ཐུན་མོང་མ་ཡིན་པར་མཐོང་བ་གང་ཡིན་པ་ཁོ་ན་ཚད་མ་ཡིན་ལ། ཞེས་གསུངས་པའི་ཕྱིར། ཁ་ཅིག །དྲན་ཤེས་ཡིན་ན། བཅད་ཤེས་ཡིན་པས་ཁྱབ་ཟེར་ན། སྔར་ཁང་ནང་དུ་ཙནྡན་གྱི་མེ་མཐོང་བའི་མངོན་སུམ་གཅིག་ལ་བརྟེན་ནས། ཕྱིས་དུ་བའི་རྟགས་ལས། སྔར་ཁང་ནང་གི་ཙནྡན་གྱི་མེ་དེ་འདིའོ། །སྙམ་པའི་ཁྱད་པར་ངོ་ཤེས་ཀྱི་བློ་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེ་དེར་ཐལ། ཞེན་པ་མཁས་པས་དྲན་པར་ཤེས། །ཞེས་གསུངས་པའི་ཕྱིར། བྱས་པ་ཁོ་ན་རེ། དེ་འདྲའི་ཁྱད་པར་ངོ་ཤེས་ཀྱི་བློ་ཆོས་ཅན། ངེས་ཤེས་ཡིན་པར་ཐལ། དྲན་ཤེས་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། ལོག་ཤེས་ཡིན་པའི་ཕྱིར། ཁོ་རང་ལ། ངེས་ཡིན་ན་དྲན་ཤེས་ཡིན་དགོས་པར་ཐལ། དྲན་ཤེས་ཡིན་ན་ངེས་ཤེས་ཡིན་དགོས་པའི་ཕྱིར། འདོད་ན། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་སྒྲུབ་ངག་ཡང་དག་འགོད་པ་སྐབས་སུ་བབས་པའི་ཕྱི་རྒོལ་ཡང་དག་གི་རྒྱུད་ཀྱི་བྱས་རྟགས་ཀྱིས་སྒྲ་མི་རྟག་པ་སྒྲུབ་པའི་ཚུལ་གསུམ་འཇལ་བའི་ཚད་མས་དྲངས་ནས་སྐྱེས་པའི་དེ་སྐོར་གྱི་ཚུལ་གསུམ་ངེས་པའི་ངེས་ཤེས་ཆོས་ཅན། དེར་ཐལ། དེའི་ཕྱིར། ཆོས་ཅན་དེའི་ཕྱིར། མ་གྲུབ་ན། དེ་ཁོ་ཁོ་རང་དུ་ཐལ། དེ་ཡོད་པའི་ཕྱིར། དེའི་རྒྱུད་ཀྱི་དེ་སྐོར་གྱི་ཚུལ་གསུམ་འཇལ་བའི་ཚད་མ་དེ། རང་གི་གཞལ་བྱ་ལ་ངེས་ཤེས་འདྲེན་ནུས་ཀྱི་ཚད་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་གི་གཞལ་བྱ་ལ་དེར་ཐལ། ཚུར་མཐོང་གི་རྒྱུད་ཀྱི་ཚད་མ་ཡིན་པའི་ཕྱིར། ཁ་ཅིག་ན་རེ། ཤ་ཟ་འཇལ་བའི་བཅད་ཤེས་ཡིན་ན། རང་གི་ཉེར་ལེན་དུ་གྱུར་པའི་ཤ་ཟ་འཇལ་བའི་ཚད་མ་ལས་བྱུང་བས་ཁྱབ་ཟེར་ན། བཅད་ཤེས་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། ཁྱོད་དེ་ལ་འབྲེལ་བར་ཐལ། ཁྱོད་དེ་ལས་བྱུང་བའི་ཕྱིར། འདོད་ན། དེ་མེད་ན་ཁྱོད་མེད་དགོས་པར་ཐལ་ལོ། །བྱས་པ་ལ་ཁོ་ན་རེ། ཤ་ཟ་འཇལ་བའི་བཅད་ཤེས་ཡིན་ན། རང་གི་ཉེར་ལེན་དུ་གྱུར་པའི་ཤ་ཟ་འཇལ་བའི་ཚད་མ་ལས་བྱུང་བས་ཁྱབ་པར་ཐལ། འཇུག་པ་བློ་སྔོན་ཅན་ཉིད་ཕྱིར། །ཞེས་གསུངས་པའི་ཕྱིར་ན་མ་ཁྱབ་སྟེ། ཤ་ཟ་འཇལ་བའི་བཅད་ཤེས་ཡིན་ན། རང་གི་ཉེར་ལེན་དུ་གྱུར་པའི་ཤ་ཟ་འཇལ་བའི་ཚད་མ་སྔོན་དུ་སོང་བས་ཁྱབ་པ་དེ་ལུང་དེའི་དོན་ཡིན་པའི་ཕྱིར། བྱས་པ་ལ་ཁོ་ན་རེ། བཅད་ཤེས་ཆོས་ཅན། དེར་ཐལ། དེའི་ཕྱིར། འདོད་ན། བཅད་ཤེས་ཀྱི་ཉེར་ལེན་དུ་གྱུར་པའི་ཤ་ཟ་འཇལ་བའི་ཚད་མ་ཡོད་པར་ཐལ། འདོད་པའི་ཕྱིར། འདོད་ན། དེ་འདྲའི་ཚད་མ་དེ་ཁོ་ཁོ་རང་དུ་ཐལ། འདོད་པའི་ཕྱིར་ན་མ་ཁྱབ། འདོད་ན། དེ་དེའི་ཉེར་ལེན་དུ་ཐལ་ལོ། །འོ་ན། ཁོ་རང་ལ་བཅད་ཤེས་ཀྱི་རྒྱུ་ཡང་ཡིན། ཤ་ཟ་འཇལ་བའི་ཚད་མ་ཡང་ཡིན་པའི་གཞི་མཐུན་པར་གྱུར་པའི་ཚད་མ་དེ་ཁོ་ཁོ་རང་དུ་ཐལ། ཁོ་ཡོད་པའི་ཕྱིར། ཁྱབ་པ་ཁས། རྟགས་གྲུབ་སྟེ། བཅད་ཤེས་ཀྱི་རྒྱུར་གྱུར་པའི་རྣམ་མཁྱེན་དེ་དེ་ཡིན་པའི་ཕྱིར། འདོད་ན། དེ་ཆོས་ཅན། བཅད་ཤེས་ཀྱི་རྒྱུ་ཡིན་པར་ཐལ་ལོ། །འདོད་ན། ཁྱོད་མེད་ན་བཅད་ཤེས་མེད་དགོས་པར་ཐལ་ལོ། །

༈ རང་ལུགས་བཞག་པ་ལ། བཅད་ཤེས་ལ་མཚན་ཉིད་དང་། དབྱེ་བ་གཉིས། དང་པོ་ནི། རང་གི་ཉེར་ལེན་དུ་གྱུར་པའི་ཚད་མ་སྔ་མས་རྟོགས་ཟིན་གྱི་དོན་ལ་བསྣན་ནས་འཇུག་པའི་རིག་པ་ཡང་ཡིན། གསར་དུ་མི་བསླུ་བའི་རིག་པ་མ་ཡིན་པ་ཡང་ཡིན་པའི་གཞི་མཐུན་པར་གྱུར་པའི་མི་བསླུ་བའི་རིག་པ་དེ་བཅད་ཤེས་ཀྱི་མཚན་ཉིད། གཉིས་པ་དེ་ལ་དབྱེ་ན། མངོན་སུམ་བཅད་ཤེས་དང་། རྟོག་པ་བཅད་ཤེས་གཉིས། དང་པོ་ནི། ཚུར་མཐོང་གི་རྒྱུད་ཀྱི་གཟུགས་འཛིན་དབང་མངོན་སྐད་ཅིག་གཉིས་པ་ལྟ་བུ། གཉིས་པ་ནི། སྒྲ་མི་རྟག་རྟོགས་ཀྱི་རྗེས་དཔག་སྐད་ཅིག་གཉིས་པ་ལྟ་བུ་ལ་བྱེད་དོ། །

རང་ངེས་དང་གཞན་ངེས་ཀྱི་རྣམ་བཞག

གཞུང་གི་འཕྲོས་ཚུལ་དང་མཐའ་དཔྱད་པ།

༈ རང་ལས་རང་གི་ངོ་བོ་རྟོགས། །ཞེས་སོགས་ཀྱི་གཞུང་འདི་གང་ལས་འཕྲོས་ན། ཚད་མ་བསླུ་མེད་ཅན་ཤེས་པ། །ཞེས་པའི་སྐབས་སུ་མེ་འཛིན་དབང་མངོན་ཚད་མའི་ཚད་གཞིར་ཁས་བླངས་པ་ལ། དེ་ལྟར་ཡིན་ན། དེ་རིག་པ་ཡིན་པ་གང་ལས་འགྲུབ། དེ་ཚད་མ་ཡིན་པ་གང་ལས་འགྲུབ་ཅེ་ན། དེ་རིག་པ་ཡིན་པ་དེ། རང་ཉམས་སུ་མྱོང་བའི་རང་རིག་ལས་འགྲུབ། ཞེས་འཆད་པར་བྱེད་པ་ལ། རང་ལས་རང་གི་ངོ་བོ་རྟོགས། །ཞེས་པ་འདི་བྱུང་། དེ་ཚད་མ་ཡིན་པ་དེ། ཕྱིས་འབྱུང་ཐ་སྙད་པའི་ཚད་མ་གཞན་ཞིག་ལ་བརྟེན་ནས་འགྲུབ་བོ། །ཞེས་འཆད་པར་བྱེད་པ་ལ། ཐ་སྙད་ལས་ནི་ཚད་མ་ཉིད། །ཅེས་པ་འདི་བྱུང་། ཚད་མའི་མཚན་ཉིད་སྟོན་པའི་བསྟན་བཅོས་བརྩམ་པ་ལ་དགོས་པ་གང་ཡོད་ཅེ་ན། དེ་ཡོད་དེ། ཚད་མའི་མཚན་ཉིད་ལ་རྨོངས་པ་བཟློག་ཕྱིར་དུ་ཡིན་ནོ། །ཞེས་འཆད་པར་བྱེད་པ་ལ། བསྟན་བཅོས་རྨོངས་པ་བཟློག་བྱེད་ཡིན། །ཞེས་པ་འདི་བྱུང་། །

༈ འདིའི་སྐབས་སུ་བཤད་བྱའི་ལུང་འགོད་པ་དང་། ལུང་གི་དོན་བཤད་པ་གཉིས། དང་པོ་ནི། ལྷ་དབང་བློས། འོ་ན། གལ་ཏེ་ཁྱེད་ཅག་གི་ཚད་མ་ཉིད་དུ་ཇི་ལྟར་གྲུབ་པ་ཡིན་ཞེ་ན། ཁོ་བོ་ཅག་ནི། རང་ལས་རང་གི་ངོ་བོ་རྟོགས། །རང་རིག་པ་ལས་ཚད་མ་ཞེས་བྱ་བ་དེ་ཤེས་པ་ཡོད་པ་ཉིད་དུ་འགྲུབ་པ་ཡིན་གྱི་ཚད་མ་ཉིད་ནི་མ་ཡིན་ནོ། །གལ་ཏེ་ཤེས་པ་ཡོད་པ་ཉིད་ལས་ཐ་དད་པ་མེད་པའི་ཕྱིར། ཚད་མ་ཉིད་ཀྱང་གཟུང་བ་ཉིད་ཡིན་ནོ། །ཞེ་ན། བདེན་ཏེ། མངོན་སུམ་དེ་ཚད་མར་སྐྱེས་པ་མ་ཡིན་པར་དེ་ཡང་གཟུང་བ་ཉིད་ནི་ཡིན་མོད་ཀྱིས། འོན་ཀྱང་། གཟུང་བའི་རྣམ་པ་གང་ཡིན་པ་དག་ལ་ངེས་པ་སྐྱེས་པར་བྱེད་པ་དེ་ལ་འཇུག་པར་བྱེད་པའི་ཕྱིར། ཚད་མ་ཉིད་དུ་འདོད་ཀྱི་གཞན་དུ་ནི་མ་ཡིན་ནོ། །མཐོང་བ་ལ་ཁྱད་པར་མེད་ན་ཡང་། རྣམ་པ་གང་དོན་དུ་གཉེར་བ་དང་གོམས་པ་དང་སྐབས་ལ་སོགས་པ་ངེས་པའི་རྒྱུ་ཡོད་ན་དེ་ངེས་པ་ཡིན་གྱི་གཞན་ཆོད་པ་ནི་མ་ཡིན་ནོ། །དེས་ན་ཤེས་པ་ཡོད་པ་ཉིད་དམིགས་པ་ན་ཚད་མ་ཉིད་གཟུང་དུ་ཟིན་ཀྱང་མ་གཟུང་བ་དང་འདྲ་བ་ཡིན་ཏེ། ངེས་པ་མེད་པའི་ཕྱིར། འོ་ན། ཚད་མ་ཉིད་ཇི་ལྟར་ངེས་པར་བྱ་ཞེ་ན། ཐ་སྙད་ལས་ནི་ཚད་མ་ཉིད་དུ་ཕྱིས་འབྱུང་བ་ཅན་གྱི་དོན་དེ་བྱེད་པའི་ཡུལ་ཅན་གྱི་ཤེས་པས་སོ། །ཞེས་གསུངས། གཉིས་པ་ལུང་དེའི་དོན་འཆད་པ་ནི། ཚད་མ་བསླུ་མེད་ཅན་ཤེས་པ། །ཞེས་པའི་སྐབས་སུ་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དང་། སྔོན་འཛིན་དབང་མངོན་དང་། མེ་འཛིན་དབང་མངོན་ཚད་མའི་མཚན་གཞིར་བསྟན་པ་ལ། ཁ་ཅིག་ན་རེ། སྔོན་འཛིན་དབང་མངོན་ཤེས་པར་སྒྲུབ་བྱེད་ཀྱི་ཚད་མ་དེ་གང་ཡིན། དེ་ཚད་མར་སྒྲུབ་བྱེད་ཀྱི་ཚད་མ་དེ་ཇི་ལྟ་བུ་ཞེ་ན། ཞེས་པའི་དྲི་བ་ནི། འོ་ན། གལ་ཏེ་ཁྱེད་ཅག་གི་ཚད་མ་ཉིད་དུ་ཇི་ལྟར་གྲུབ་པ་ཡིན་ཞེ་ན། ཞེས་པས་འཆད། ལན་ནི། སྔོན་འཛིན་དབང་མངོན་ཆོས་ཅན། ཁྱོད་ཤེས་པར་སྒྲུབ་བྱེད་ཀྱི་ཚད་མ་ཡོད་དེ། སྔོན་འཛིན་དབང་མངོན་ཉམས་སུ་མྱོང་བའི་རང་རིག་དེས་ཁྱོད་ཤེས་པར་སྒྲུབ་པའི་ཕྱིར། ཞེས་འཆད་པར་བྱེད་པ་ལ། ཁོ་བོ་ཅག་ནི། ཞེས་པ་ནས། ཚད་མ་ཉིད་ནི་མ་ཡིན་ནོ། །ཞེས་པའི་བར་གསུངས། ཁོ་ན་རེ། སྔོན་འཛིན་དབང་མངོན་ཉམས་སུ་མྱོང་བའི་རང་རིག་དེས་སྔོན་འཛིན་དབང་མངོན་ཚད་མ་ཡིན་པ་དེ་རྟོགས་པར་ཐལ། དེས་སྔོན་འཛིན་དབང་མངོན་ཚད་མ་ཡིན་པ་དེ་གཟུང་བའི་ཕྱིར་ཏེ། དེས་སྔོན་འཛིན་དབང་མངོན་ཤེས་པ་ཡིན་པ་དེ་གཟུང་བ་གང་ཞིག །སྔོན་འཛིན་དབང་མངོན་ཤེས་པ་ཡིན་པ་དང་། དེ་ཚད་མ་ཡིན་པ་གཉིས་གྲུབ་བདེ་རྫས་གཅིག་ཡིན་པའི་ཕྱིར། ཞེས་པའི་རྩོད་པ་ནི། གལ་ཏེ་ཤེས་པ་ཡོད་པ་ཉིད། ཅེས་སོགས་ཀྱིས་བཤད། ལན་ནི། སྔོན་འཛིན་དབང་མངོན་ཉམས་སུ་མྱོང་བའི་རང་རིག་དེ་རང་ཡུལ་ལ་ཆ་ཤས་སུ་ཕྱེ་ནས་འཇུག་པ་མ་ཡིན་པས། དེས་སྔོན་འཛིན་དབང་མངོན་ཚད་མ་ཡིན་པ་དེ་གཟུང་བ་ཡིན་མོད་ཀྱི། དེ་སྔོན་འཛིན་དབང་མངོན་ཚད་མ་ཡིན་པ་དེ་ལ་ཚད་མ་མ་ཡིན་ཏེ། དེས་དེ་ལ་རང་སྟོབས་ཀྱིས་ངེས་པ་འདྲེན་མི་ནུས་པའི་ཕྱིར། ཞེས་འཆད་པ་ལ། བདེན་ཏེ། ཞེས་པ་ནས། གཞན་ནི་མིན་ནོ། །ཞེས་པའི་བར་གསུངས། ཁོ་ན་རེ། སྔོན་འཛིན་དབང་མངོན་ཉམས་སུ་མྱོང་བའི་རང་རིག་དེ། སྔོན་འཛིན་དབང་མངོན་ཤེས་པ་ཡིན་པ་དེ་དང་། དེ་ཚད་མ་ཡིན་པ་གཉིས་ལ་ངེས་པ་འདྲེན་ནུས་སུ་མཚུངས་པར་ཐལ། དེ་གཉིས་གཟུང་བར་མཚུངས་པའི་ཕྱིར་ཞེ་ན། མ་ཁྱབ་སྟེ། སྔོན་འཛིན་དབང་མངོན་ཉམས་སུ་མྱོང་བའི་རང་རིག་དེས། སྔོན་འཛིན་དབང་མངོན་ཤེས་པ་དང་། དེ་ཚད་མ་ཡིན་པ་གཉིས་གཟུང་བར་མཚུངས་ཀྱང་། སྔོན་འཛིན་དབང་མངོན་ཤེས་པ་ཡིན་པ་དེ་ལ་གོམས་པ་ཤས་ཆེ་བའི་སྟོབས་ཀྱིས་ངེས་པ་འདྲེན་ནུས། དེ་ཚད་མ་ཡིན་པ་ལ་གོམས་པ་ཤས་ཆུང་བའི་སྟོབས་ཀྱིས་ངེས་པ་འདྲེན་མི་ནུས་པའི་ཕྱིར། ཞེས་འཆད་པར་བྱེད་པ་ལ། མཐོང་བ་ལ། ཞེས་པ་ནས། ཆོད་པ་ནི་མ་ཡིན་ནོ། །ཞེས་པའི་བར་བྱུང་། སྔར་བཤད་པ་དེ་རྣམས་ཀྱི་དོན་བསྡུ་འཆད་པ་ལ། དེས་ན་ཤེས་པ་ཡོད་པ་ཉིད། ཅེས་པ་ནས། ངེས་པ་མེད་པའི་ཕྱིར། ཞེས་པའི་བར་གསུངས། སྔོན་འཛིན་དབང་མངོན་ཉམས་སུ་མྱོང་བའི་རང་རིག་དེས། སྔོན་འཛིན་དབང་མངོན་ཚད་མ་ཡིན་པ་མ་གྲུབ་ན། དེ་ཚད་མ་ཡིན་པ་གང་གིས་རྟོགས་ཤེ་ན། གསར་དུ་མི་བསླུ་བའི་རིག་པའི་རྟགས་ལས། སྔོན་འཛིན་དབང་མངོན་ཚད་མར་རྟོགས་པའི་ཕྱིས་འབྱུང་ཐ་སྙད་པའི་ཚད་མ་ལ་བརྟེན་ནས་རྟོགས། ཞེས་འཆད་པར་བྱེད་པ་ལ། འོ་ན། ཚད་མ་ཉིད་ཇི་ལྟར་ངེས་པར་བྱ། ཞེས་པ་ནས། ཡུལ་ཅན་གྱི་ཤེས་པས་སོ། །ཞེས་པའི་བར་གསུངས། །

༈ དེས་ན། རང་ལས་རང་གི་ངོ་བོ་རྟོགས། །ཞེས་པའི་སྐབས་སུ། མཐའ་དཔྱད་པ་ལ། ཁ་ཅིག་ན་རེ། རང་གི་གཞལ་བྱ་ལ་ངེས་པ་རང་སྟོབས་ཀྱིས་འདྲེན་ནུས་པའི་གསར་དུ་མི་བསླུ་བའི་རིག་པ། རང་ལས་ངེས་ཀྱི་ཚད་མའི་མཚན་ཉིད་ཡིན། དེ་ལྟར་མི་ནུས་པའི་གསར་དུ་མི་བསླུ་བའི་རིག་པ་དེ་གཞན་ལས་ངེས་ཀྱི་ཚད་མའི་མཚན་ཉིད་ཡིན་ཟེར་ན། དང་པོ་ལ། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། དེ་འདྲའི་རྒྱང་རིང་པོའི་ཁ་དོག་དམར་ལམ་པ་དེ་ལ་ངེས་པ་རང་སྟོབས་ཀྱིས་འདྲེན་ནུས་པའི་གསར་དུ་མི་བསླུ་བའི་རིག་པ་ཡིན་པའི་ཕྱིར། འདོད་ན། དེ་ཆོས་ཅན། རང་གི་གཞལ་བྱའི་བདག་ཉིད་མཐར་ཐུག་པ་ཡུལ་སྟེང་ན་གནས་པ་མེད་ན། རང་ཉིད་མི་འབྱུང་བའི་ཆ་ལ་ངེས་པ་རང་སྟོབས་ཀྱིས་འདྲེན་ནུས་པ་ཡིན་པར་ཐལ། འདོད་པའི་ཕྱིར། འདོད་ན། དེ་འདྲ་བ་དེ་དེ་འདྲའི་རྒྱང་རིང་པོའི་ཁ་དོག་དམར་ལམ་པ་མེའི་ཁ་དོག་ཡིན་པ་དེ་ལ་ངེས་པ་རང་སྟོབས་ཀྱིས་འདྲེན་ནུས་ཡིན་པར་ཐལ། འདོད་པའི་ཕྱིར། འདོད་ན། དབང་མངོན་དེའི་རྗེས་སུ་འབྲངས་ནས་སྐྱེས་པའི་དེ་འདྲའི་རྒྱང་རིང་པོའི་ཁ་དོག་དམར་ལམ་པ་མེའི་ཁ་དོག་ཏུ་འཛིན་པའི་དབང་མངོན་དེ་བཅད་ཤེས་སུ་ཐལ་ལོ། །འདོད་མི་ནུས་ཏེ། ཊཱིཀྐ་ལས། ངེས་བྱེད་ཀྱི་ཚད་མ་ཕྱི་མ་བཅད་ཤེས་སུ་ཐལ་བ་དང་། ཞེས་གསུངས་པའི་ཕྱིར། ཁ་ཅིག་ན་རེ། རང་ཉིད་མི་བསླུ་བ་ཡིན་པ། རང་ཉིད་ཀྱིས་ངེས་པའི་གསར་དུ་མི་བསླུ་བའི་རིག་པ་དེ། རང་ལས་ངེས་ཀྱི་ཚད་མའི་མཚན་ཉིད་ཟེར་ན། སྔོན་འཛིན་དབང་མངོན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེས་ཁོ་རང་ངེས་པར་ཐལ། དེས་ཁོ་རང་མི་བསླུ་བར་ངེས་པའི་ཕྱིར། འདོད་མི་ནུས་ཏེ། དེས་ཁོ་རང་དང་སྔོན་པོ་གཉིས་ཀྱི་ནང་ནས་སྔོན་པོ་ཁོ་ན་ངེས་པའི་ཕྱིར་ཏེ། གཅིག་གིས་གཉིས་ཤེས་མ་ཡིན་ཏེ། །དབང་པོའི་སེམས་ནི་ངེས་ཕྱིར་དང་། ཞེས་གསུངས་པའི་ཕྱིར། གཞན་ཡང་། རྒྱང་འཕེན་གྱི་རྒྱུད་ཀྱི་རྗེས་དཔག་ཆོས་ཅན། མཚན་ཉིད་དེར་ཐལ། དེའི་ཕྱིར། རྟགས་གྲུབ་སྟེ། རྗེས་སུ་དཔག་པའི་ཚད་མ་ཡིན་པའི་ཕྱིར། ཁྱབ་སྟེ། ཤཱཀྱ་བློས། མངོན་སུམ་ལ་རང་ལས་ངེས་པ་དང་། གཞན་ལས་ངེས་པ་ཡོད་ཀྱི། རྗེས་དཔག་ནི་རང་ཁོ་ན་ལས་ངེས་པའོ། །ཞེས་གསུངས་པའི་ཕྱིར། རྩ་བར་འདོད་ན། རྒྱང་འཕེན་དེས་ཀྱང་དེ་མི་བསླུ་བར་རྟོགས་པར་ཐལ་ལོ། །འདོད་མི་ནུས་ཏེ། དེས་དེ་མེད་པར་བདེན་ཞེན་གྱིས་འདོད་པའི་ཕྱིར། བྱས་པ་ལ་ཁོ་ན་རེ། རྒྱང་འཕེན་དེས་རྒྱང་འཕེན་གྱི་རྒྱུད་ཀྱི་རྗེས་དཔག་རྟོགས་པར་ཐལ། རྒྱང་འཕེན་གྱི་རྗེས་དཔག་ཉམས་སུ་མྱོང་བའི་རང་རིག་དེས་དེའི་རྒྱུད་ཀྱི་རྗེས་དཔག་རྟོགས་པའི་ཕྱིར། མ་གྲུབ་ན། དེའི་རྒྱུད་ཀྱི་རྗེས་དཔག་ཆོས་ཅན། ཁྱོད་ཉམས་སུ་མྱོང་བའི་རང་རིག་མངོན་སུམ་གྱིས་ཁྱོད་རྟོགས་པར་ཐལ། ཁྱོད་ཚད་མ་ཡིན་པའི་ཕྱིར། ཁྱབ་སྟེ། ཊཱིཀ་ཆེན་ལས། རང་རྒྱུད་ཀྱི་ཚད་མ་ཡིན་ན། ངེས་པར་རང་ཉམས་སུ་མྱོང་བའི་རང་རིག་མངོན་སུམ་གྱིས་གྲུབ་དགོས་པས། ཞེས་གསུངས་པའི་ཕྱིར་ན་མ་ཁྱབ། ཁ་ཅིག་ན་རེ། རང་ཉིད་ལ་བརྟེན་ནས། རང་ཉིད་མི་བསླུ་བའི་རིག་པ་ཡིན་པར་ངེས་ནུས་པའི་གསར་དུ་མི་བསླུ་བའི་རིག་པ་དེ། རང་ལས་ངེས་ཀྱི་ཚད་མའི་མཚན་ཉིད་ཟེར་ན། ཐལ་འགྱུར་བའི་རྒྱུད་ཀྱི་རྗེས་དཔག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཐལ་འགྱུར་བ་དེས། རང་རྒྱུད་ཀྱི་རྗེས་དཔག་གསར་དུ་མི་བསླུ་བའི་རིག་པར་རྟོགས་པར་ཐལ། འདོད་པའི་ཕྱིར། འདོད་མི་ནུས་ཏེ། དེས་འདུས་བྱས་ཐམས་ཅད་རྫུན་པ་བསླུ་བའི་ཆོས་ཅན་དུ་བདེན་ཞེན་གྱིས་འདོད་པའི་ཕྱིར། ཁ་ཅིག་ན་རེ། རང་གི་ངོ་བོ་རང་ཉིད་ཀྱིས་ངེས་པའི་གསར་དུ་མི་བསླུ་བའི་རིག་པ་དེ། རང་ལས་ངེས་ཀྱི་ཚད་མའི་མཚན་ཉིད་ཟེར་ན། ཚུར་མཐོང་གི་རྒྱུད་ཀྱི་སྔོན་འཛིན་དབང་མངོན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེས་ཁོ་རང་ངེས་པར་ཐལ། དེས་ཁོ་རང་གི་ངོ་བོ་ངེས་པའི་ཕྱིར། བྱས་པ་ལ་ཁོ་ན་རེ། རང་ལས་ངེས་ཀྱི་ཚད་མ་ཡིན་ན། རང་གི་ངོ་བོ་རང་ཉིད་ཀྱིས་ངེས་པའི་གསར་དུ་མི་བསླུ་བའི་རིག་པ་ཡིན་དགོས་པར་ཐལ། རང་ལས་རང་གི་ངོ་བོ་རྟོགས། །ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེའི་དོན་ནི། སྔོན་འཛིན་དབང་མངོན་ལྟ་བུ་རིག་པ་ཡིན་པ་དེ། ཁོ་རང་ཉམས་སུ་མྱོང་བའི་རང་རིག་གིས་གྲུབ། ཅེས་པའི་དོན་ཡིན་པའི་ཕྱིར། ཁ་ཅིག་ན་རེ། རང་ཉིད་མི་བསླུ་བ་ཡིན་པའི་ཆ། རང་སྟོབས་ཀྱིས་ངེས་ནུས་པའི་གསར་དུ་མི་བསླུ་བའི་རིག་པ་དེ། རང་ལས་ངེས་ཀྱི་ཚད་མའི་མཚན་ཉིད་ཟེར་ན། ཚུར་མཐོང་གི་རྒྱུད་ཀྱི་སྔོན་འཛིན་དབང་མངོན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་ཁྱོད་མི་བསླུ་བ་ཡིན་པར་ངེས་པར་ཐལ། འདོད་པའི་ཕྱིར། འདོད་ན། ཁྱོད་ཀྱིས་ཁྱོད་ངེས་པར་ཐལ། འདོད་པའི་ཕྱིར། བྱས་པ་ལ་ཁོ་ན་རེ། རང་ལས་ངེས་ཀྱི་ཚད་མ་ཡིན་ན། རང་ཉིད་མི་བསླུ་བ་ཡིན་པའི་ཆ་རང་སྟོབས་ཀྱིས་ངེས་ནུས་པའི་གསར་དུ་མི་བསླུ་བའི་རིག་པ་ཡིན་དགོས་པར་ཐལ། ཊཱིཀྐ་ལས། དེས་ན་མི་བསླུ་བའི་ཆ་རང་སྟོབས་ཀྱིས་ངེས་ན་རང་ངེས་དང་། གཞན་སྟོབས་ཀྱིས་ངེས་ན་གཞན་ངེས་སོ། །ཞེས་གསུངས་པའི་ཕྱིར་ན་མ་ཁྱབ་སྟེ། རང་ཉིད་མི་བསླུ་བའི་རིག་པ་ཡིན་པ་རང་ཉིད་ཀྱིས་ངེས་པའི་གསར་དུ་མི་བསླུ་བའི་རིག་པ་ཡིན་ན། རང་ལས་ངེས་ཀྱི་ཚད་མ་ཡིན་པས་ཁྱབ་པ་དེ་ལུང་དེའི་དོན་ཡིན་པའི་ཕྱིར། བྱས་པ་ལ་ཁོ་ན་རེ། ཚུར་མཐོང་གི་རྒྱུད་ཀྱི་སྔོན་འཛིན་དབང་མངོན་དེས། ཁོ་རང་མི་བསླུ་བ་ཡིན་པ་དེ་ཚད་མ་གཞན་ལ་བརྟེན་ནས་རྟོགས་དགོས་པར་ཐལ། ཁོ་རང་གིས་དེ་ལྟར་མ་རྟོགས་པའི་ཕྱིར། འདོད་ན། དེ་གཞན་ལས་ངེས་ཀྱི་ཚད་མར་ཐལ། འདོད་པའི་ཕྱིར། ཁྱབ་སྟེ། ཊཱིཀྐ་ལས། གཞན་སྟོབས་ཀྱིས་ངེས་ན་གཞན་ངེས་སོ། །ཞེས་གསུངས་པའི་ཕྱིར་ན་མ་ཁྱབ་བོ། །ཁ་ཅིག་ན་རེ། རང་ཉིད་མི་བསླུ་བ་ཡིན་པ་རང་ཉམས་སུ་མྱོང་བའི་རང་རིག་མངོན་སུམ་ལ་བརྟེན་ནས་རྟོགས་ནུས་པའི་གསར་དུ་མི་བསླུ་བའི་རིག་པ་དེ། རང་ལས་ངེས་ཀྱི་ཚད་མའི་མཚན་ཉིད་ཟེར་ན། ཚུར་མཐོང་གི་རྒྱུད་ཀྱི་སྦྱིན་པ་བཏང་བ་ལ་བརྟེན་ནས་ལོངས་སྤྱོད་འབྱུང་བར་རྟོགས་པའི་རྗེས་དཔག་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཚུར་མཐོང་དེས། རང་རྒྱུད་ཀྱི་སྦྱིན་པ་བཏང་བ་ལ་བརྟེན་ནས་ལོངས་སྤྱོད་འབྱུང་བར་རྟོགས་པའི་རྗེས་དཔག་མི་བསླུ་བ་ཡིན་པ་དེ། མངོན་སུམ་གྱིས་རྟོགས་པར་ཐལ། ཚུར་མཐོང་གི་རྒྱུད་ཀྱི་དེ་འདྲའི་རྗེས་དཔག་དེ། རང་ཉིད་མི་བསླུ་བ་ཡིན་པ། རང་ཉམས་སུ་མྱོང་བའི་རང་རིག་མངོན་སུམ་ལ་བརྟེན་ནས་རྟོགས་ནུས་པའི་གསར་དུ་མི་བསླུ་བའི་རིག་པ་ཡིན་པའི་ཕྱིར། འདོད་ན། ཚུར་མཐོང་དེས། རང་རྒྱུད་ཀྱི་དེ་འདྲའི་རྗེས་དཔག་རང་གི་གཞལ་བྱ་ལ་མི་བསླུ་བ་ཡིན་པ་མངོན་སུམ་གྱིས་རྟོགས་པར་ཐལ་ལོ། །འདོད་ན། ཚུར་མཐོང་དེས། སྦྱིན་པ་བཏང་བ་ལ་བརྟེན་ནས་ལོངས་སྤྱོད་འབྱུང་བ་དེ། མངོན་སུམ་གྱིས་རྟོགས་པར་ཐལ། འདོད་པའི་ཕྱིར། ཁྱབ་སྟེ། སྦྱིན་པས་ལོངས་སྤྱོད་ཁྲིམས་ཀྱིས་བདེ། །ཞེས་པའི་ལུང་རང་གི་བསྟན་བྱའི་དོན་ལ་མི་བསླུ་བ་ཡིན་པ་དེ་མངོན་སུམ་གྱིས་རྟོགས་པའི་གང་ཟག་ཡིན་ན། སྦྱིན་པ་བཏང་བ་ལ་བརྟེན་ནས་ལོངས་སྤྱོད་འབྱུང་བ་དེ། མངོན་སུམ་གྱིས་རྟོགས་པའི་གང་ཟག་ཡིན་དགོས་པའི་ཕྱིར་ཏེ། སྦྱིན་པ་བཏང་བ་ལ་བརྟེན་ནས་ལོངས་སྤྱོད་འབྱུང་བ་དང་། ཚུལ་ཁྲིམས་སྲུངས་བ་ལ་བརྟེན་ནས་མངོན་མཐོའི་གོ་འཕང་ཐོབ་པ་སྒྲུབ་ཕྱིར་དུ། སྦྱིན་པས་ལོངས་སྤྱོད་ཁྲིམས་ཀྱིས་བདེ། །ཞེས་པའི་ལུང་རང་གི་བསྟན་བྱའི་དོན་ལ་མི་བསླུ་བར་སྒྲུབ་པའི་རིགས་པ་ཡང་དག་འགོད་རིགས་པའི་ཕྱིར། རྩ་བར་འདོད་ན། ཚུར་མཐོང་དེ། ཤིན་ཏུ་ལྐོག་འགྱུར་མངོན་སུམ་གྱིས་རྟོགས་པའི་གང་ཟག་ཏུ་ཐལ། དེ་སྦྱིན་པ་བཏང་བ་ལ་བརྟེན་ནས་ལོངས་སྤྱོད་འབྱུང་བ་མངོན་སུམ་གྱིས་རྟོགས་པའི་གང་ཟག་ཡིན་པའི་ཕྱིར། འདོད་ན། དེ་འཕགས་པ་ཡིན་པར་ཐལ་ལོ། །བྱས་པ་ལ་ཁོ་ན་རེ། ཚུར་མཐོང་དེས་རང་རྒྱུད་ཀྱི་སྦྱིན་པ་བཏང་བ་ལ་བརྟེན་ནས་ལོངས་སྤྱོད་འབྱུང་བ་རྟོགས་པའི་རྗེས་དཔག་མི་བསླུ་བ་ཡིན་པ་དེ་མངོན་སུམ་གྱིས་རྟོགས་པར་ཐལ། དེས་རང་རྒྱུད་ཀྱི་ཤིན་ཏུ་ལྐོག་འགྱུར་རྟོགས་པའི་རྗེས་དཔག་མི་བསླུ་བ་ཡིན་པ་དེ་མངོན་སུམ་གྱིས་རྟོགས་པའི་ཕྱིར་ཏེ། དེས་རང་རྒྱུད་ཀྱི་ཤིན་ཏུ་ལྐོག་གྱུར་རྟོགས་པའི་རྗེས་དཔག་ཚད་མ་ཡིན་པ་དེ་མངོན་སུམ་གྱིས་རྟོགས་པའི་ཕྱིར་ཏེ། དེས་རང་རྒྱུད་ཀྱི་ཤིན་ཏུ་ལྐོག་གྱུར་རྟོགས་པའི་རྗེས་དཔག་མངོན་སུམ་གྱིས་རྟོགས་པའི་ཕྱིར་ཏེ། དེས་རང་རྒྱུད་ཀྱི་ཅུང་ཟད་ལྐོག་གྱུར་རྟོགས་པའི་རྗེས་དཔག་མངོན་སུམ་གྱིས་རྟོགས་པའི་ཕྱིར་ན་མ་ཁྱབ། ཁོ་རང་ལ། ཚུར་མཐོང་དེས་ཤིན་ཏུ་ལྐོག་གྱུར་མངོན་སུམ་གྱིས་རྟོགས་པར་ཐལ། དེས་ཅུང་ཟད་ལྐོག་གྱུར་མངོན་སུམ་གྱིས་རྟོགས་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེས་སྒྲ་བྱས་པ་མངོན་སུམ་གྱིས་རྟོགས་པའི་ཕྱིར། འདོད་ན། དེ་འཕགས་པ་ཡིན་པར་ཐལ་ལོ། །སྔར་གྱི་མཚན་ཉིད་དེ་ལ། སྐྱོན་འཕེན་པ་ཁ་ཅིག་ན་རེ། ཆོས་ཉིད་རྟོགས་པའི་རྗེས་དཔག་ཆོས་ཅན། རང་ཉིད་མི་བསླུ་བ་ཡིན་པ་རང་ཉམས་སུ་མྱོང་བའི་རང་རིག་མངོན་སུམ་ལ་བརྟེན་ནས་རྟོགས་ནུས་པའི་གསར་དུ་མི་བསླུ་བའི་རིག་པ་ཡིན་པར་ཐལ། རང་ལས་ངེས་ཀྱི་ཚད་མ་ཡིན་པའི་ཕྱིར། འདོད་ན། ཆོས་ཉིད་རྟོགས་པའི་རྗེས་དཔག་མི་བསླུ་བ་ཡིན་པ་དེ། རྗེས་དཔག་ཏུ་ཐལ་ལོ། །འདོད་མི་ནུས་ཏེ། དེ་ཆོས་ཉིད་ཡིན་པའི་ཕྱིར་ཏེ། ཤིན་ཏུ་ལྐོག་གྱུར་རྟོགས་པའི་རྗེས་དཔག་མི་བསླུ་བ་ཡིན་པ་དེ། ཤིན་ཏུ་ལྐོག་གྱུར་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་རང་གི་གཞལ་བྱ་ལ་མི་བསླུ་བ་ཡིན་པ་དེ་ཤིན་ཏུ་ལྐོག་གྱུར་ཡིན་པའི་ཕྱིར་ཏེ། ཤིན་ཏུ་ལྐོག་གྱུར་སྟོན་པའི་ལུང་རང་གི་བསྟན་བྱའི་དོན་ལ་མི་བསླུ་བ་ཡིན་པ་དེ། ཤིན་ཏུ་ལྐོག་གྱུར་ཡིན་པའི་ཕྱིར་ཏེ། སྦྱིན་པས་ལོངས་སྤྱོད་ཁྲིམས་ཀྱི་བདེ། །ཞེས་པའི་ལུང་རང་གི་བསྟན་བྱའི་དོན་ལ་མི་བསླུ་བ་ཡིན་པ་དེ། ཤིན་ཏུ་ལྐོག་གྱུར་ཡིན་པའི་ཕྱིར། ཁ་ཅིག་ན་རེ། རང་གི་གཞལ་བྱའི་བདག་ཉིད་མཐར་ཐུག་པ་ཡུལ་སྟེང་ན་གནས་པ་མེད་ན། རང་ཉིད་མི་བསླུ་བའི་ཆ་ལ་ངེས་ཤེས་རང་སྟོབས་ཀྱིས་འདྲེན་ནུས་པའི་གསར་དུ་མི་བསླུ་བའི་རིག་པ་དེ། རང་ལས་ངེས་ཀྱི་ཚད་མའི་མཚན་ཉིད་ཟེར་ན། རྣམ་མཁྱེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། རྣམ་མཁྱེན་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་དྲངས་པའི་ངེས་ཤེས་ཡོད་པར་ཐལ། འདོད་པའི་ཕྱིར། འདོད་ན། ཁྱོད་ཀྱིས་ཉེར་ལེན་བྱས་པ་ལ་རྟེན་ནས་བྱུང་བའི་ངེས་ཤེས་ཡོད་པར་ཐལ་ལོ། །འདོད་ན། ཁྱོད་ཀྱིས་ཉེར་ལེན་བྱས་པ་ལ་བརྟེན་ནས་བྱུང་བའི་རྟོག་པ་ཡོད་པར་ཐལ་ལོ། །འདོད་ན། སངས་འཕགས་ཀྱིས་ཉེར་ལེན་བྱས་པ་ལ་བརྟེན་ནས་བྱུང་བའི་སེམས་ཅན་ཡོད་པར་ཐལ་ལོ། །བྱས་པ་ལ་ཁོ་ན་རེ། རྣམ་མཁྱེན་གྱིས་དྲངས་པའི་ངེས་ཤེས་ཡོད་པར་ཐལ། རྣམ་མཁྱེན་གྱི་འབྲས་བུར་གྱུར་པའི་ངེས་ཤེས་དེ། དེ་ཡིན་པའི་ཕྱིར་ཏེ། རྣམ་མཁྱེན་དེ། དེ་འདྲའི་ངེས་ཤེས་འདྲེན་ནུས་ཀྱི་བློ་ཡིན་པའི་ཕྱིར། མ་གྲུབ་ན། རྣམ་མཁྱེན་ཆོས་ཅན། ཁྱོད་རང་གི་འབྲས་བུར་གྱུར་པའི་ངེས་ཤེས་འདྲེན་བྱེད་ཀྱི་བློ་ཡིན་པར་ཐལ། ཁྱོད་རང་གི་འབྲས་བུར་གྱུར་པའི་ངེས་ཤེས་སྐྱེད་བྱེད་ཀྱི་བློ་ཡིན་པའི་ཕྱིར་ན་མ་ཁྱབ། ཁ་ཅིག་ན་རེ། རང་གི་གཞལ་བྱ་ལ་ངེས་པ་རང་སྟོབས་ཀྱིས་འདྲེན་ནུས་པའི་གསར་དུ་མི་བསླུ་བའི་རིག་པ་དེ། རང་ལས་ངེས་ཀྱི་ཚད་མའི་མཚན་ཉིད། དེ་ལྟར་མི་ནུས་པའི་གསར་དུ་མི་བསླུ་བའི་རིག་པ། གཞན་ལས་ངེས་ཀྱི་ཚད་མའི་མཚན་ཉིད། ཚད་མ་ཡིན་ན། རང་ལས་ངེས་ཀྱི་ཚད་མ་ཡིན་པས་ཁྱབ། གཞན་ལས་ངེས་ཀྱི་ཚད་མ་ཡིན་ན། སྣང་ལ་མ་ངེས་ཀྱི་བློ་ཡིན་པས་ཁྱབ་བོ། །ཟེར་ན། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་ཆོས་ཅན། རང་ལས་ངེས་ཀྱི་ཚད་མ་ཡིན་པར་ཐལ། མཚན་ཉིད་དེའི་ཕྱིར། འདོད་ན། དེ་ཆོས་ཅན། རང་གི་གཞལ་བྱའི་བདག་ཉིད་མཐར་ཐུག་པ་ཡུལ་སྟེང་ན་གནས་པ་མེད་ན། རང་ཉིད་མི་འབྱུང་བའི་ཆ་ལ་ངེས་པ་རང་སྟོབས་ཀྱིས་འདྲེན་ནུས་ཡིན་པར་ཐལ། འདོད་པའི་ཕྱིར། འདོད་ན། དེ་འདྲའི་དབང་མངོན་དེ་དེ་འདྲའི་ཁ་དོག་དམར་ལམ་པ་མེའི་ཁ་དོག་ཡིན་པ་དེ་ལ་ངེས་པ་རང་སྟོབས་ཀྱིས་འདྲེན་ནུས་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེས་དེ་འདྲའི་རྒྱང་རིང་པོའི་ཁ་དོག་དམར་ལམ་པ་མེའི་ཁ་དོག་ཡིན་པ་དེ་ཕྱིས་འབྱུང་ཐ་སྙད་པའི་ཚད་མ་གཞན་ལ་བརྟེན་ནས་ངེས་དགོས་པའི་ཕྱིར་ཏེ། ཐ་སྙད་ལས་ནི་ཚད་མ་ཉིད། །ཅེས་གསུངས་པའི་ཕྱིར། གཞན་ཡང་། ཚད་མའི་མཚན་གཞི་དང་། གཞན་ལས་ངེས་ཀྱི་ཚད་མའི་གཞི་མཐུན་མེད་པར་ཐལ། གཞན་ལས་ངེས་ཀྱི་ཚད་མ་ཡིན་ན། སྣང་ལ་མ་ངེས་ཀྱི་བློ་ཡིན་པས་ཁྱབ་པའི་ཕྱིར། རྟགས་ཁས། འདོད་ན། ཐ་སྙད་ལས་ནི་ཚད་མ་ཉིད། །ཅེས་པའི་གཞུང་འདི། ཚད་མའི་མཚན་གཞི་གཅིག་གི་སྟེང་དུ་གསར་དུ་མི་བསླུ་བའི་རིག་པ་གཏན་ལ་འབེབས་བྱེད་ཀྱི་ཚད་མ་འཆད་བྱེད་ཀྱི་གཞུང་མ་ཡིན་པར་ཐལ་ལོ། །འདོད་མི་ནུས་ཏེ། ཐ་སྙད་ལས་ནི་ཚད་མ་ཉིད། །ཅེས་གསུངས་པའི་ཕྱིར། བྱས་པ་ལ་ཁོ་ན་རེ། དོན་ལ་མི་རྟག་པ་ཡིན་ཞིང་མི་རྟག་པ་ཡིན་མིན་ཐེ་ཚོམ་ཟ་དུས་ཀྱི་སྒྲ་འཛིན་དབང་མངོན་དེ། གཞན་ལས་ངེས་ཀྱི་ཚད་མ་ཡིན་པར་ཐལ། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་དེ། གཞན་ལས་ངེས་ཀྱི་ཚད་མ་ཡིན་པའི་ཕྱིར་ན་མ་ཁྱབ། འདོད་ན། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཕྱི་རྒོལ་ཡང་དག་གི་རྒྱུད་ཀྱི་སྒྲ་འཛིན་དབང་མངོན་དེ་ཡང་གཞན་ལས་ངེས་ཀྱི་ཚད་མ་ཡིན་པར་ཐལ་ལོ། །འདོད་མི་ནུས་ཏེ། དེ་རང་ལས་ངེས་ཀྱི་ཚད་མ་ཡིན་པའི་ཕྱིར། དེ་སྒྲ་ལ་རང་ལས་ངེས་ཀྱི་ཚད་མ་ཡིན་པའི་ཕྱིར། གཞན་ཡང་། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་ཆོས་ཅན། རང་ལས་ངེས་ཀྱི་ཚད་མ་ཡིན་པར་ཐལ། རང་གི་གཞལ་བྱའི་གཙོ་བོ་ལ་རང་ལས་ངེས་ཀྱི་ཚད་མ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་འདྲའི་རྒྱང་རིང་པོའི་ཁ་དོག་དམར་ལམ་པ་དེ་ལ་རང་ལས་ངེས་ཀྱི་ཚད་མ་གང་ཞིག །དེ་ཁྱོད་ཀྱི་གཞལ་བྱའི་གཙོ་བོ་ཡིན་པའི་ཕྱིར། ཁོ་རང་ལ། སྒྲ་མི་རྟག་པ་རྟོགས་པའི་རྗེས་དཔག་ཆོས་ཅན། མ་འཁྲུལ་བའི་ཚད་མར་ཐལ། རང་གི་གཞལ་བྱའི་གཙོ་བོ་ལ་མ་འཁྲུལ་བའི་ཚད་མ་ཡིན་པའི་ཕྱིར། རྟགས་གྲུབ་སྟེ། སྒྲ་མི་རྟག་པ་ལ་མ་འཁྲུལ་བའི་ཚད་མ་གང་ཞིག །སྒྲ་མི་རྟག་པ་ཁྱོད་ཀྱི་གཞལ་བྱ་གཙོ་བོ་ཡིན་པའི་ཕྱིར། དང་པོ་གྲུབ་སྟེ། དེ་རང་གི་འཇུག་ཡུལ་ལ་མ་འཁྲུལ་བའི་ཚད་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་གི་འཇུག་ཡུལ་ལ་མ་འཁྲུལ་བའི་ཚད་མ་ཡིན་པར་ཐལ། ཚད་མ་ཡིན་པའི་ཕྱིར། རྩ་བར་འདོད་མི་ནུས་ཏེ། འཁྲུལ་པའི་ཚད་མ་ཡིན་པའི་ཕྱིར། ཡང་ཁོ་ན་རེ། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་ཆོས་ཅན། རང་ལས་ངེས་ཀྱི་ཚད་མ་ཡིན་པར་ཐལ། རང་གི་གཞལ་བྱ་ལ་རང་ལས་ངེས་ཀྱི་གསར་དུ་མི་བསླུ་བའི་རིག་པ་ཡིན་པ་གང་ཞིག །དེ་རང་ལས་ངེས་ཀྱི་ཚད་མའི་མཚན་ཉིད་ཡིན་པའི་ཕྱིར། ཕྱི་མ་དེར་ཐལ། རང་གི་གཞལ་བྱ་ལ་གསར་དུ་མི་བསླུ་བའི་རིག་པ་ཚད་མའི་མཚན་ཉིད་ཡིན་པའི་ཕྱིར་ན་མ་ཁྱབ་སྟེ། འོ་ན། ཁོ་རང་ལ། སྒྲ་མི་རྟག་རྟོགས་ཀྱི་རྗེས་དཔག་ཆོས་ཅན། མ་འཁྲུལ་བའི་ཚད་མར་ཐལ། རང་གི་གཞལ་བྱ་ལ་མ་འཁྲུལ་བའི་གསར་དུ་མི་བསླུ་བའི་རིག་པ་གང་ཞིག །དེ་མ་འཁྲུལ་བའི་ཚད་མའི་མཚན་ཉིད་ཡིན་པའི་ཕྱིར། ཕྱི་མ་གྲུབ་སྟེ། རང་གི་གཞལ་བྱ་ལ་གསར་དུ་མི་བསླུ་བའི་རིག་པ་ཚད་མའི་མཚན་ཉིད་ཡིན་པའི་ཕྱིར། ཁྱབ་པ་ཁས། ཡང་ཁོ་ན་རེ། དོན་ལ་མེའི་ཁ་དོག་ཡིན་ཞིང་། ཞེས་སོགས་ཀྱི་དབང་མངོན་ཆོས་ཅན། དེ་འདྲའི་རྒྱང་རིང་པོའི་ཁ་དོག་དམར་ལམ་པ་རྟོགས་པའི་རང་ལས་ངེས་ཀྱི་ཚད་མ་ཡིན་པར་ཐལ། དེ་ལ་རང་ལས་ངེས་ཀྱི་གསར་དུ་མི་བསླུ་བའི་རིག་པ་ཡིན་པའི་ཕྱིར། འདོད་ན། རང་ལས་ངེས་ཀྱི་ཚད་མར་ཐལ། འདོད་པའི་ཕྱིར་ན་མ་ཁྱབ། འོ་ན། ཁོ་རང་ལ། སྒྲ་མི་རྟག་རྟོགས་ཀྱི་རྗེས་དཔག་ཆོས་ཅན། མ་འཁྲུལ་བའི་ཚད་མར་ཐལ། སྒྲ་མི་རྟག་པ་རྟོགས་པའི་མ་འཁྲུལ་བའི་ཚད་མ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། སྒྲ་མི་རྟག་པ་ལ་མ་འཁྲུལ་བའི་ཚད་མ་ཡིན་པའི་ཕྱིར། རང་རེས། ཆོས་དེ་ལ་ཚད་མ་ཡིན་ན་ཆོས་དེ་ལ་རང་ལས་ངེས་ཀྱི་ཚད་མ་ཡིན་པས་ཁྱབ། ཆོས་དེ་ལ་ཚད་མ་ཡིན་ན། ཆོས་དེ་ལ་མ་འཁྲུལ་བའི་ཚད་མ་ཡིན་པས་ཁྱབ། བྱས་པ་ལ་ཁོ་ན་རེ། གྲངས་ཅན་གྱི་རྒྱུད་ཀྱི་སྒྲ་འཛིན་དབང་མངོན་ཆོས་ཅན། མི་རྟག་པར་གྱུར་པའི་སྒྲ་ལ་རང་ལས་ངེས་ཀྱི་ཚད་མར་ཐལ། དེ་ལ་ཚད་མ་ཡིན་པའི་ཕྱིར། འདོད་ན། དེའི་རྒྱུད་ཀྱི་སྒྲ་འཛིན་དབང་མངོན་དེས་མི་རྟག་པར་གྱུར་པའི་སྒྲ་ཁོ་ཁོ་རང་དུ་རྟོགས་པར་ཐལ། འདོད་པའི་ཕྱིར་ན་མ་ཁྱབ། འདོད་ན། གྲངས་ཅན་གྱིས་ཀྱང་དེ་ཁོ་ཁོ་རང་དུ་རྟོགས་པར་ཐལ་ལོ། །ཁོ་རང་ལ། གྲངས་ཅན་གྱི་རྒྱུད་ཀྱི་སྒྲ་རྟོགས་པའི་རྗེས་དཔག་དེས། མི་རྟག་པར་གྱུར་པའི་སྒྲ་ཁོ་ཁོ་རང་དུ་རྟོགས་པར་ཐལ། དེ་མི་རྟག་པར་གྱུར་པའི་སྒྲ་ལ་རང་ལས་ངེས་ཀྱི་ཚད་མ་ཡིན་པའི་ཕྱིར། རྟགས་གྲུབ་སྟེ། དེ་དེ་ལ་རྗེས་སུ་དཔག་པའི་ཚད་མ་ཡིན་པའི་ཕྱིར། རྩ་བར་འདོད་ན། གྲངས་ཅན་གྱིས་ཀྱང་དེ་ཁོ་ཁོ་རང་དུ་རྟོགས་པར་ཐལ་ལོ། །ཡང་ཁོ་ན་རེ། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་མེའི་ཁ་དོག་ཡིན་མིན་ཐེ་ཚོམ་ཟ་བའི་གང་ཟག་གི་རྒྱུད་ཀྱི་དོན་ལ་མེའི་ཁ་དོག་ཏུ་གྱུར་པའི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་ཆོས་ཅན། དོན་ལ་མེའི་ཁ་དོག་ཏུ་གྱུར་པའི་རྒྱང་རིང་པོའི་ཁ་དོག་དམར་ལམ་པ་དེ་ལ་རང་ལས་ངེས་ཀྱི་ཚད་མར་ཐལ། དེ་ལ་ཚད་མ་ཡིན་པའི་ཕྱིར། འདོད་ན། དེ་འདྲའི་དབང་མངོན་དེས་དོན་ལ་མེའི་ཁ་དོག་ཏུ་གྱུར་པའི་རྒྱང་རིང་པོའི་ཁ་དོག་དམར་ལམ་པ་དེ་ཁོ་ཁོ་རང་དུ་རྟོགས་པར་ཐལ། འདོད་པའི་ཕྱིར་ན་མ་ཁྱབ། འདོད་ན། དེ་འདྲའི་དབང་མངོན་དེས། དེ་མེའི་ཁ་དོག་ཏུ་རྟོགས་པར་ཐལ་ལོ། །འདོད་མི་ནུས་ཏེ། དེས་དེ་མེའི་ཁ་དོག་ཏུ་རྟོགས་པ་ལ་ཕྱིས་འབྱུང་ཐ་སྙད་པའི་ཚད་མ་གཞན་ལ་བརྟེན་ནས་རྟོགས་དགོས་པའི་ཕྱིར་ཟེར་ན། ཁོ་རང་ལ། བྱས་རྟགས་ཀྱིས། སྒྲ་མི་རྟག་པར་སྒྲུབ་པའི་ཕྱི་རྒོལ་ཡང་དག་གི་རྒྱུད་ཀྱི་སྒྲ་འཛིན་དབང་མངོན་དེ་དོན་ལ་མི་རྟག་པ་ཡིན་པའི་སྒྲ་ཁོ་ཁོ་རང་དུ་རྟོགས་པའི་བློ་ཡིན་པར་ཐལ། དེ་དོན་ལ་མི་རྟག་པ་ཡིན་པའི་སྒྲ་ལ་རང་ལས་ངེས་ཀྱི་ཚད་མ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེའི་རྒྱུད་ཀྱི་སྒྲ་རྟོགས་པའི་རྗེས་དཔག་དེ་དེ་ལ་རང་ལས་ངེས་ཀྱི་ཚད་མ་གང་ཞིག །དེ་དང་དེའི་རྒྱུད་ཀྱི་སྒྲ་འཛིན་དབང་མངོན་གཉིས། རང་ལས་ངེས་ཀྱི་ཚད་མར་མཚུངས་པའི་ཕྱིར། འདོད་ན། དེ་སྐོར་གྱི་ཕྱི་རྒོལ་ཡང་དག་དེས། མི་རྟག་པ་ཡིན་པའི་སྒྲ་ཁོ་ཁོ་རང་དུ་རྟོགས་པར་ཐལ་ལོ། །གཞན་ཡང་། ཁོ་རང་ལ། གཞན་ལས་ངེས་ཀྱི་ཚད་མ་ཡིན་ན། རང་གི་གཞལ་བྱ་ལ་གཞན་ལས་ངེས་ཀྱི་ཚད་མ་ཡིན་དགོས་པར་ཐལ། ཚད་མ་ཡིན་ན། རང་གི་གཞལ་བྱ་ལ། རང་ལས་ངེས་ཀྱི་ཚད་མ་ཡིན་པས་མ་ཁྱབ་པའི་ཕྱིར། འདོད་ན། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་མེའི་ཁ་དོག་ཡིན་མིན་ཐེ་ཚོམ་ཟ་བའི་གང་ཟག་གི་རྒྱུད་ཀྱི་དོན་ལ་མེའི་ཁ་དོག་ཏུ་གྱུར་པའི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། རང་གི་གཞལ་བྱ་ལ་རང་ལས་ངེས་ཀྱི་ཚད་མ་ཡིན་པའི་ཕྱིར། དེར་ཐལ། རྒྱང་རིང་པོའི་ཁ་དོག་དམར་ལམ་པ་དེ་ལ། རང་ལས་ངེས་ཀྱི་ཚད་མ་ཡིན་པའི་ཕྱིར། མཚན་གཞི་ལ། ཁ་ཅིག་ན་རེ། རིགས་གཏེར་ལས། དང་པོ་པ་དང་ཡིད་མ་གཏད། །འཁྲུལ་རྒྱུ་ཅན་རྣམས་གཞན་ལས་ངེས། །ཞེས་པའི་དོན་དུ་བསམས་ནས་གཞན་ལས་ངེས་ཀྱི་ཚད་མ་ལ་དབྱེ་ན། དང་པོ་པའི་ཚད་མ། ཡིད་མ་གཏད་པའི་ཚད་མ། འཁྲུལ་རྒྱུ་ཅན་གྱི་ཚད་མ་གསུམ། དང་པོ་ནི། པདྨ་ར་གའི་ཁ་དོག་སྔར་མཐོང་མ་མྱོང་བའི་གང་ཟག་གི་རྒྱུད་ཀྱི་པདྨ་ར་གའི་ཁ་དོག་འཛིན་པའི་དབང་མངོན་ལྟ་བུ། གཉིས་པ་ནི། ཡིད་གཟུགས་མཛེས་ལ་ལྷག་པར་ཆགས་བཞིན་པའི་སྐྱེས་བུའི་རྒྱུད་ཀྱི་སྒྲ་འཛིན་ཉན་ཤེས་ལྟ་བུ། གསུམ་པ་ནི། སྨིག་རྒྱུ་ལ་ཆུ་འཛིན་གྱི་སྒྲོ་འདོགས་དངོས་སུ་འདྲེན་པར་བྱེད་པའི་སྨིག་རྒྱུའི་ཁ་དོག་འཛིན་པའི་དབང་མངོན་ལྟ་བུའོ། །ཟེར་ན། མཚན་གཞི་གཉིས་པ་མི་འཐད་པར་ཐལ། ཡིད་གཟུགས་མཛེས་ལ་ལྷག་པར་ཆགས་བཞིན་པའི་སྐྱེས་བུའི་རྒྱུད་ལ་སྒྲ་འཛིན་ཉན་ཤེས་མེད་པའི་ཕྱིར། ཤིན་ཏུ་གསལ་བའི་སེམས་གཅིག་གིས། །ནུས་པ་ཉམས་པར་བྱས་པའི་ཕྱིར། །ཞེས་གསུངས་པའི་ཕྱིར། མཚན་གཞི་གསུམ་པ་དེ་མི་འཐད་པར་ཐལ། དེ་འདྲའི་དབང་མངོན་དེས། རང་ཡུལ་ལ་ངེས་པ་འདྲེན་པར་མི་ནུས་པའི་ཕྱིར་ཏེ། དེས་སྨིག་རྒྱུ་ལ་ཆུ་འཛིན་གྱི་སྒྲོ་འདོགས་དངོས་སུ་འདྲེན་པར་བྱེད་པའི་ཕྱིར། གཞན་ཡང་། འཁྲུལ་རྒྱུ་ཅན་གྱི་ཚད་མ་མེད་པར་ཐལ། ཚད་མ་ཡིན་ན། དེ་མ་ཡིན་དགོས་པའི་ཕྱིར་ཏེ། མངོན་རྗེས་ཀྱི་ཚད་མ་གང་རུང་ཡིན་ན་དེ་མ་ཡིན་དགོས་པའི་ཕྱིར། བྱས་པ་ལ་ཁོ་ན་རེ། ཡིད་སྒྲ་སྙན་ལ་ལྷག་པར་ཆགས་བཞིན་པའི་སྐྱེས་བུའི་རྒྱུད་ལ་གཟུགས་འཛིན་མིག་ཤེས་མེད་པར་ཐལ། ཡིད་གཟུགས་མཛེས་ལ་ལྷག་པར་ཆགས་བཞིན་པའི་སྐྱེས་བུའི་རྒྱུད་ལ་སྒྲ་འཛིན་ཉན་ཤེས་མེད་པའི་ཕྱིར། འདོད་ན། དེའི་རྒྱུད་ལ་མིག་ཤེས་མེད་པར་ཐལ་ལོ། །འདོད་ན། དེ་ལོང་བ་ཡིན་པར་ཐལ། འདོད་པའི་ཕྱིར་ན་མ་ཁྱབ་སྟེ། འོ་ན། ཁོ་རང་ལ། ལོང་བ་མ་ཡིན་པའི་གཉིད་འཐུག་པོ་ལོག་བཞིན་པའི་འདོད་ཁམས་པའི་སེམས་ཅན་དེ་ལོང་བ་ཡིན་པར་ཐལ། དེའི་རྒྱུད་ལ་མིག་ཤེས་མེད་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེའི་རྒྱུད་ལ་རྟེན་བཅས་ཀྱི་མིག་དབང་གཟུགས་ཅན་པ་མེད་པའི་ཕྱིར། དེའི་རྒྱུད་ཀྱི་མིག་དབང་གཟུགས་ཅན་པ་དེ་དེ་མཚུངས་ཀྱི་མིག་དབང་གཟུགས་ཅན་པ་ཡིན་པའི་ཕྱིར། ཁ་ཅིག་ན་རེ། རིགས་གཏེར་ལས། དོན་རིག་གཉིས་དང་རང་རིག་དང་། །རྗེས་སུ་དཔག་རྣམས་རང་ལ་ངེས། །ཞེས་པའི་དོན་དུ་བསམས་ནས། གོམས་པ་ཅན་གྱི་མངོན་སུམ། དོན་བྱེད་སྣང་ཅན་གྱི་མངོན་སུམ། རང་དོན་རྗེས་དཔག་རྣམས་གང་རུང་ཡིན་ན། རང་ལས་ངེས་ཀྱི་ཚད་མ་ཡིན་པས་ཁྱབ་ཟེར་ན། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཕྱི་རྒོལ་ཡང་དག་གི་རྒྱུད་ཀྱི་སྒྲ་འཛིན་དབང་མངོན་ཆོས་ཅན། སྒྲ་མི་རྟག་པ་ལ་ཚད་མར་ཐལ། དེ་ལ་མངོན་སུམ་ཡིན་པའི་ཕྱིར། ཁྱབ་པ་ཁས། འདོད་ན། དེ་སྐོར་གྱི་ཕྱི་རྒོལ་ཡང་དག་དེས། སྒྲ་མི་རྟག་པར་ཚད་མས་གྲུབ་པ་ཐལ། འདོད་པའི་ཕྱིར། འདོད་ན། སྒྲ་མི་རྟག་པ་དེ་སྐོར་གྱི་ཕྱི་རྒོལ་ཡང་དག་གི་མངོན་སུམ་གྱིས་ཚད་མས་གྲུབ་པར་ཐལ་ལོ། །འདོད་ན། སྒྲ་མི་རྟག་པ་ཆོས་ཅན། དེ་སྐོར་གྱི་ཕྱི་རྒོལ་ཡང་དག་གི་མངོན་སུམ་གྱིས་ཚད་མས་མ་གྲུབ་པར་ཐལ། དེ་སྐོར་གྱི་གཞན་དོན་བསྒྲུབ་བྱ་ཡང་དག་ཡིན་པའི་ཕྱིར། ཁྱབ་སྟེ། ངོ་བོ་མ་གྲུབ། ཅེས་གསུངས་པའི་ཕྱིར། བྱས་པ་ལ་ཁོ་ན་རེ། མངོན་སུམ་བཅད་ཤེས་ཡོད་པར་ཐལ། མངོན་སུམ་ལ་ཚད་མས་མ་ཁྱབ་པའི་ཕྱིར། འདོད་ན། རིགས་གཏེར་ལས། དེས་ན་མངོན་སུམ་བཅད་ཤེས་ཀྱི། །གཞི་མཐུན་སྲིད་པ་ཤེས་པས་བཀག །ཅེས་གསུངས་པ་མི་འཐད་པར་ཐལ། འདོད་པའི་ཕྱིར་ན་མ་ཁྱབ། མངོན་སུམ་ཚད་མ་དང་བཅད་ཤེས་ཀྱི་གཞི་མཐུན་མེད་པ་དེ། ལུང་དེའི་དོན་ཡིན་པའི་ཕྱིར། ཁ་ཅིག་ན་རེ། དོན་ལ་མེ་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་དེ་གཞན་ལས་ངེས་ཀྱི་ཚད་མ་ཡིན་ཟེར་ན། མེ་དང་ཁ་དོག་གི་གཞི་མཐུན་ཡོད་པར་ཐལ། དམ་བཅའ་འཐད་པའི་ཕྱིར། འདོད་མི་ནུས་ཏེ། མེ་ཡིན་ན། རེག་བྱའི་སྐྱེད་མཆེད་དང་འབྱུང་བ་ཡིན་དགོས། ཁ་དོག་ཡིན་ན་གཟུགས་ཀྱི་སྐྱེ་མཆེད་ཡིན་དགོས་པའི་ཕྱིར། བྱས་པ་ལ་ཁོ་ན་རེ། མེ་དང་ཁ་དོག་གི་གཞི་མཐུན་ཡོད་པར་ཐལ། མེ་དམར་པོ་དེ་འདྲའི་གཞི་མཐུན་ཡིན་པའི་ཕྱིར་ཏེ། དེ་དང་པོ་གང་ཞིག །ཕྱི་མ་ཡིན་པའི་ཕྱིར། དང་པོ་གྲུབ་སྟེ། དེ་མེ་དམར་པོ་ཡིན་པའི་ཕྱིར་ན་མ་ཁྱབ་བོ། །འདོད་ན། མི་དམར་པོ་དེ་དམར་པོ་ཡིན་པར་ཐལ། མེ་དམར་པོ་དམར་པོ་ཡིན་པའི་ཕྱིར། འདོད་ན། དེ་ཆོས་ཅན། ཁ་དོག་ཡིན་པར་ཐལ། དམར་པོ་ཡིན་པའི་ཕྱིར། འདོད་མི་ནུས་ཏེ། ལྡན་མིན་འདུ་བྱེད་ཡིན་པའི་ཕྱིར། བྱས་པ་ལ་ཁོ་ན་རེ། མེ་དང་ཁ་དོག་གི་གཞི་མཐུན་ཡོད་པར་ཐལ། མེ་དང་མིག་ཤེས་ཀྱི་གཟུང་བྱའི་གཞི་མཐུན་ཡོད་པའི་ཕྱིར། འགལ་མེ་འཁོར་ལོར་སྣང་བའི་མིག་ཤེས་དེ་ལ། འགལ་མེ་སྣང་བའི་ཕྱིར་ཏེ། དེ་ལ་འགལ་མེ་འཁོར་ལོར་སྣང་བའི་ཕྱིར། དེ་འདྲའི་མིག་ཤེས་ཡོད་པའི་ཕྱིར་ཏེ། འགལ་མེ་ལ་སོགས་མྱུར་འཇུག་གི། རྗེས་སུ་འགྲོ་བའི་གནོད་པ་ཅན། །ཞེས་གསུངས་པའི་ཕྱིར་ན་མ་ཁྱབ་སྟེ། འགལ་མེའི་ཁ་དོག་འཁོར་ལོའི་ཁ་དོག་ཏུ་སྣང་བའི་མིག་ཤེས་ཡོད་པ་དེ་དེའི་དོན་ཡིན་པའི་ཕྱིར། ཁ་ཅིག་ན་རེ། དོན་ལ་མེའི་ཁ་དོག་ཡིན་ཞིང་། རྟོག་པས་མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་དེ། གཞན་ལས་ངེས་ཀྱི་ཚད་མ་ཡིན་ཟེར་ན། དེ་མི་འཐད་པར་ཐལ། དོན་ལ་མེའི་ཁ་དོག་ཡིན་ཞིང་། རྟོག་པས་མེའི་ཁ་དོག་ཡིན་མིན་ཐེ་ཚོམ་ཟ་བ་མེད་པའི་ཕྱིར། མེའི་ཁ་དོག་ཡིན་ན་རྟོག་པས་མེའི་ཁ་དོག་ཏུ་རྟོགས་པས་ཁྱབ་པའི་ཕྱིར། བྱས་པ་ལ་ཁོ་ན་རེ། རྟོག་པས་དེ་ཡིན་མིན་ཐེ་ཚོམ་ཟ་བ་ཡོད་པར་ཐལ། རྟོག་པས་ཐེ་ཚོམ་ཟ་བ་ཡོད་པའི་ཕྱིར་ཏེ། གང་ཟག་གིས་ཐེ་ཚོམ་ཟ་བ་ཡོད་པའི་ཕྱིར་ཏེ། གང་ཟག་གི་རྒྱུད་ཀྱི་ཐེ་ཚོམ་གྱིས་ཐེ་ཚོམ་ཟ་བ་ཡོད་པའི་ཕྱིར་ཟེར་ན་མ་ཁྱབ་བོ། །འོ་ན། ཁོ་རང་ལ། དོན་ལ་མེའི་ཁ་དོག་ཡིན་ཞིང་། རྟོག་པས་མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་དེ་ཁོ་ཁོ་རང་དུ་ཐལ། ཁོ་ཡོད་པའི་ཕྱིར། འདོད་ན། དེ་འདྲའི་ཁ་དོག་དམར་ལམ་པ་ཆོས་ཅན། རྟོག་པས་མེའི་ཁ་དོག་ཡིན་མིན་ཐེ་ཚོམ་ཟ་བ་ཡིན་པར་ཐལ། དོན་ལ་མེའི་ཁ་དོག་ཡིན་ཞིང་། རྟོག་པས་མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་ཡིན་པའི་ཕྱིར། བྱས་པ་ལ་ཁོ་ན་རེ། མ་ཁྱབ་སྟེ། འོ་ན། རྟོག་པ་ཕྱི་རོལ་ཡུལ་ལ་འཇུག་པ་བསྡུས་ཤིང་ཏིང་ངེ་འཛིན་ལ་མཉམ་པར་བཞག་པའི་རྣལ་འབྱོར་པ་དེ་ནི་ཆོས་ཅན། ཁྱོད་ཀྱི་རྟོག་པ་ཕྱི་རོལ་ཡུལ་ལ་འཇུག་པ་བསྡུས་པར་ཐལ། ཁྱོད་ཆོས་ཅན་དེའི་ཕྱིར། ཁྱབ་པ་ཁས། ཟེར་ན་མི་འགྲིག་གོ། མ་གྲུབ་ན། དེ་འདྲའི་རྣལ་འབྱོར་པ་དེ་ཁོ་ཁོ་རང་དུ་ཐལ། ཁོ་ཡོད་པའི་ཕྱིར་ཏེ། ཐམས་ཅད་ལས་ནི་སེམས་བསྡུས་ནས། །ནང་གི་བདག་ཉིད་གཡོ་མེད་པ། །ཞེས་གསུངས་པའི་ཕྱིར། རྩ་བར་འདོད་ན། དེ་འདྲའི་རྟོག་པ་དེ་ཕྱི་རོལ་གྱི་ཡུལ་ལ་མི་འཇུག་པར་ཐལ་ལོ། །འདོད་མི་ནུས་ཏེ། དེ་ཀ་བ་དང་བུམ་པ་ལ་སོགས་པ་ལ་འཇུག་པའི་ཕྱིར། ཁ་ཅིག་ན་རེ། དོན་ལ་མེའི་ཁ་དོག་ཡིན་ཞིང་མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་དེ་སྣང་བ་རང་ལས་ངེས་ཤིང་། བདེན་པ་གཞན་ལས་ངེས་ཀྱི་ཚད་མ་དང་། དོན་ལ་ཤ་པ་ཡིན་ཞིང་། ཤ་པ་ཡིན་མིན་གྱི་ཐེ་ཚོམ་ཟ་དུས་ཀྱི་རྒྱང་རིང་པོའི་ཡལ་ག་ལོ་འདབ་དང་བཅས་པའི་ཤིང་འཛིན་པའི་དབང་མངོན་དེ། སྤྱི་རང་ལས་ངེས་ཤིང་། ཁྱད་པར་གཞན་ལས་ངེས་ཀྱི་ཚད་མ་ཡིན་ནོ། །ཟེར་ན། དང་པོ་ལ། དེ་ཆོས་ཅན། སྣང་བ་རང་ལས་ངེས་ཀྱི་ཚད་མ་ཡིན་པར་ཐལ། སྣང་བ་རང་ལས་ངེས་ཤིང་། བདེན་པ་གཞན་ལས་ངེས་ཀྱི་ཚད་མ་ཡིན་པའི་ཕྱིར། འདོད་ན། དེ་ཆོས་ཅན། རང་ལས་ངེས་ཀྱི་ཚད་མར་ཐལ། འདོད་པའི་ཕྱིར། འདོད་མི་ནུས་ཏེ། གཞན་ལས་ངེས་ཀྱི་ཚད་མ་ཡིན་པའི་ཕྱིར་ཏེ། བདེན་པ་གཞན་ལས་ངེས་ཀྱི་ཚད་མ་ཡིན་པའི་ཕྱིར་ཏེ། སྣང་བ་རང་ལས་ངེས་ཤིང་། བདེན་པ་གཞན་ལས་ངེས་ཀྱི་ཚད་མ་ཡིན་པའི་ཕྱིར། གཉིས་པ་དེ་ཡང་ཆོས་ཅན། སྤྱི་རང་ལས་ངེས་ཀྱི་ཚད་མར་ཐལ། སྤྱི་རང་ལས་ངེས་ཤིང་། ཁྱད་པར་གཞན་ལས་ངེས་ཀྱི་ཚད་མ་ཡིན་པའི་ཕྱིར། འདོད་ན། རང་ལས་ངེས་ཀྱི་ཚད་མ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། གཞན་ལས་ངེས་ཀྱི་ཚད་མ་ཡིན་པའི་ཕྱིར། སྤྱི་རང་ལས་ངེས་ཤིང་། ཁྱད་པར་གཞན་ལས་ངེས་ཀྱི་ཚད་མ་ཡིན་པའི་ཕྱིར། བྱས་པ་ལ་ཁོ་ན་རེ། དེ་འདྲའི་ཤིང་འཛིན་པའི་དབང་མངོན་དེ། སྤྱི་རང་ལས་ངེས་ཀྱི་ཚད་མ་ཡིན་པར་ཐལ། དེས་ཁོ་རང་ལ་སྣང་བའི་ཡལ་ག་ལོ་འདབ་དང་བཅས་པའི་ཤིང་དེ་ངེས་པའི་ཕྱིར་ན་མ་ཁྱབ། ཁ་ཅིག་ན་རེ། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་དེ། དོན་ལ་མེའི་ཁ་དོག་ཏུ་གྱུར་པའི་རྒྱང་རིང་པོའི་ཁ་དོག་དམར་ལམ་པ་དེ་ལ་རང་ལས་ངེས་ཀྱི་ཚད་མ་དང་། དོན་ལ་མེའི་ཁ་དོག་ཏུ་གྱུར་པའི་རྒྱང་རིང་པོའི་ཁ་དོག་དམར་ལམ་པ་མེའི་ཁ་དོག་ཡིན་པ་དེ་ལ། གཞན་ལས་ངེས་ཀྱི་ཚད་མ་ཡིན་ནོ། །ཟེར་ན། སྒྲ་མི་རྟག་རྟོགས་ཀྱི་རྗེས་དཔག་ཆོས་ཅན། སྒྲ་མི་རྟག་པའི་དོན་སྤྱི་ལ་འཁྲུལ་པའི་ཚད་མ་ཡིན་པར་ཐལ། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་དེ། དོན་ལ་མེའི་ཁ་དོག་ཏུ་གྱུར་པའི་རྒྱང་རིང་པོའི་མེའི་ཁ་དོག་དམར་ལམ་པ་མེའི་ཁ་དོག་ཡིན་པ་དེ་ལ་གཞན་ལས་ངེས་ཀྱི་ཚད་མ་ཡིན་པའི་ཕྱིར། འདོད་ན། དེ་དེ་ལ་ཚད་མར་ཐལ་ལོ། །བྱས་པ་ལ་ཁོ་ན་རེ། དེ་འདྲའི་དབང་མངོན་དེ་དོན་ལ་མེའི་ཁ་དོག་ཏུ་གྱུར་པའི་རྒྱང་རིང་པོའི་ཁ་དོག་དམར་ལམ་པ་མེའི་ཁ་དོག་ཡིན་པ་དེ་ལ་གཞན་ལས་ངེས་ཀྱི་ཚད་མ་ཡིན་པར་ཐལ། དེ་གཞན་ལས་ངེས་ཀྱི་ཚད་མར་སོང་བའི་ཡུལ་ཡོད་པའི་ཕྱིར། མ་གྲུབ་ན། དེ་འདྲའི་དབང་མངོན་ཆོས་ཅན། ཁྱོད་གཞན་ལས་ངེས་ཀྱི་ཚད་མར་སོང་བའི་ཡུལ་ཡོད་པར་ཐལ། ཁྱོད་གཞན་ལས་ངེས་ཀྱི་ཚད་མ་ཡིན་པའི་ཕྱིར་ན་མ་ཁྱབ་སྟེ། འོ་ན། སྒྲ་མི་རྟག་རྟོགས་ཀྱི་རྗེས་དཔག་ཆོས་ཅན། ཁྱོད་འཁྲུལ་པའི་ཚད་མར་སོང་བའི་ཡུལ་ཡོད་པར་ཐལ། ཁྱོད་འཁྲུལ་པའི་ཚད་མ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། དེ་སྒྲ་མི་རྟག་པ་ལ་ཡང་འཁྲུལ་པའི་ཚད་མ་མ་ཡིན། དེ་སྒྲ་མི་རྟག་པའི་དོན་སྤྱི་ལ་ཡང་འཁྲུལ་པའི་ཚད་མ་མ་ཡིན་པའི་ཕྱིར་རོ། །

རང་ལུགས་དང་རྩོད་སྤོང་བཤད་པ།

༈ རང་ལུགས་བཞག་པ་ལ། རང་ལས་ངེས་ཀྱི་ཚད་མ་དང་། གཞན་ལས་ངེས་ཀྱི་ཚད་མ་སོ་སོའི་ངོ་བོ་དང་། དབྱེ་བ་གཉིས། དང་པོ་དེ་གཉིས་སོ་སོའི་ངོ་བོ་འཆད་པར་བྱེད་པ་ལ། རྣམ་ངེས་ཊཱིཀ་ཆེན་ལས། གསར་དུ་མི་བསླུ་བའི་རིག་པ་གང་ཞིག །རང་གི་གཞལ་བྱའི་བདག་ཉིད་མཐར་ཐུག་པ་ཡུལ་སྟེང་ན་གནས་པ་མེད་ན་ཚད་མ་རང་ཉིད་མི་འབྱུང་བ་ལ་ངེས་པ་རང་སྟོབས་ཀྱིས་འདྲེན་ནུས་པ་དང་། ཚད་མ་གཞན་ལ་བརྟེན་ནས་ངེས་པའོ། །ཞེས་དང་། ཐར་ལམ་གསལ་བྱེད་ལས། དེས་ན་མི་བསླུ་བའི་ཆ་རང་སྟོབས་ཀྱིས་ངེས་ན་རང་ངེས་དང་། གཞན་སྟོབས་ཀྱིས་ངེས་ན་གཞན་ངེས་སོ། །ཞེས་གསུངས་པའི་ཕྱིར། འདི་གཉིས་ཀྱི་དོན་ནི། རང་གི་གཞལ་བྱའི་བདག་ཉིད་མཐར་ཐུག་པ་ཡུལ་སྟེང་ན་གནས་པ་མེད་ན་རང་ཉིད་མི་འབྱུང་བའི་ཆ་ལ་ངེས་པ་རང་སྟོབས་ཀྱིས་འདྲེན་ནུས་པའི་གསར་དུ་མི་བསླུ་བའི་རིག་པ་དེ། རང་ལས་ངེས་ཀྱི་ཚད་མའི་མཚན་ཉིད་དང་། དེ་ལྟར་མི་ནུས་པའི་གསར་དུ་མི་བསླུ་བའི་རིག་པ་དེ། གཞན་ལས་ངེས་ཀྱི་ཚད་མའི་མཚན་ཉིད་ཡིན། གཉིས་པ་དབྱེ་བ་ནི། རང་ལས་ངེས་ཀྱི་ཚད་མ་ལ་དབྱེ་ན། གོམས་པ་ཅན་གྱི་མངོན་སུམ་གྱི་ཚད་མ། དོན་བྱེད་སྣང་ཅན་གྱི་མངོན་སུམ་གྱི་ཚད་མ། རང་རིག་ཚད་མ། རྗེས་སུ་དཔག་པའི་ཚད་མ་དང་བཞི་ཡོད། དེ་བཞི་པོ་གང་རུང་ཡིན་ན། རང་ལས་ངེས་ཀྱི་ཚད་མ་ཡིན་པས་ཁྱབ། དང་པོ་ནི། བུའི་རྒྱུད་ཀྱི་ཕའི་གཟུགས་འཛིན་པའི་དབང་མངོན་ལྟ་བུ། གཉིས་པ་ནི། མེ་འཛིན་དབང་མངོན་ལྟ་བུ། གསུམ་པ་ནི། མེ་འཛིན་དབང་མངོན་ཉམས་སུ་མྱོང་བའི་རང་རིག་ལྟ་བུ། བཞི་པ་ནི། སྒྲ་མི་རྟག་རྟོགས་ཀྱི་རྗེས་དཔག་ལྟ་བུ། གཞན་ལས་ངེས་ཀྱི་ཚད་མ་དེ་ལ་དབྱེ་ན། སྣང་བ་རང་ལས་ངེས་ཤིང་བདེན་པ་གཞན་ལ་བརྟེན་ནས་ངེས་དགོས་པའི་གཞན་ལས་ངེས་ཀྱི་ཚད་མ་གཅིག་དང་། སྤྱི་རང་ལས་ངེས་ཤིང་ཁྱད་པར་གཞན་ལ་བརྟེན་ནས་ངེས་དགོས་པའི་གཞན་ལས་ངེས་ཀྱི་ཚད་མ་གཅིག་དང་གཉིས། དང་པོ་ནི། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་ལྟ་བུ་ལ་བྱེད་ཅིང་། དེ་ལྟ་བུའི་དབང་མངོན་དེ་ལ། སྣང་བ་རང་ལས་ངེས་ཤིང་། བདེན་པ་གཞན་ལ་བརྟེན་ནས་ངེས་དགོས་པའི་གཞན་ལས་ངེས་ཀྱི་ཚད་མ། ཞེས་བརྗོད་པའི་རྒྱུ་མཚན་ཡོད་དེ། དེས་ཁོ་རང་ལ་སྣང་བའི་རྒྱང་རིང་པོའི་ཁ་དོག་དམར་ལམ་པ་དེ། རང་སྟོབས་ཀྱིས་ངེས་ཤིང་། དེ་མེའི་ཁ་དོག་ཡིན་པ་དེ། ཕྱིས་འབྱུང་ཐ་སྙད་པའི་ཚད་མ་ལ་བརྟེན་ནས་ངེས་དགོས་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། དེ་འདྲའི་རྒྱང་རིང་པོའི་ཁ་དོག་དམར་ལམ་པ་འཛིན་པའི་དབང་མངོན་དེས། རང་གི་གཞལ་བྱའི་བདག་ཉིད་མཐར་ཐུག་པ་ཡུལ་སྟེང་ན་གནས་པ་མེད་ན། རང་ཉིད་མི་འབྱུང་བའི་ཆ་ལ་ངེས་པ་རང་སྟོབས་ཀྱིས་འདྲེན་མི་ནུས་ཏེ། མེའི་ཁ་དོག་དེ། དོན་ལ་མེའི་ཁ་དོག་ཏུ་གྱུར་པའི་རྒྱང་རིང་པོའི་ཁ་དོག་དམར་ལམ་པའི་བདག་ཉིད་ཡིན་ལ། དེ་འདྲའི་དབང་མངོན་དེས་མེའི་ཁ་དོག་དེ་དོན་ལ་མེའི་ཁ་དོག་ཏུ་གྱུར་པའི་རྒྱང་རིང་པོའི་ཁ་དོག་དམར་ལམ་པའི་སྟེང་དུ་འགོད་ཚུལ་དང་མཐུན་པར་མ་རྟོགས་པའི་ཕྱིར། དེར་ཐལ། དེས་མེའི་ཁ་དོག་ཏུ་གྱུར་པའི་རྒྱང་རིང་པོའི་དམར་ལམ་པ་དེ་མེའི་ཁ་དོག་ཏུ་མ་རྟོགས་པའི་ཕྱིར། དོན་ལ་ཤ་པ་ཡིན་ཞིང་། དེ་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཡལ་ག་ལོ་འདབ་དང་བཅས་པའི་ཤིང་འཛིན་པའི་དབང་མངོན་ལྟ་བུ། གཉིས་པའི་མཚན་གཞི་ཡིན་ཞིང་། དེ་འདྲའི་དབང་མངོན་དེ་ལ་སྤྱི་རང་ལས་ངེས་ཤིང་། ཁྱད་པར་གཞན་ལ་བརྟེན་ནས་ངེས་དགོས་པའི་གཞན་ལས་ངེས་ཀྱི་ཚད་མ། ཞེས་བརྗོད་པའི་རྒྱུ་མཚན་ཡོད་དེ། དེས་ཁོ་རང་ལ་སྣང་བའི་ཡལ་ག་ལོ་འདབ་དང་བཅས་པའི་ཤིང་དེ་ཁོ་རང་གི་སྟོབས་ཀྱིས་ངེས་ཤིང་། དེ་ཤ་པ་ཡིན་པ་དེ་ཕྱིས་འབྱུང་ཐ་སྙད་པའི་ཚད་མ་གཞན་ལ་བརྟེན་ནས་ངེས་དགོས་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། ངག་དོན་ནི། མེ་འཛིན་དབང་མངོན་ཆོས་ཅན། ཁྱོད་ཤེས་པར་རྟོགས་བྱེད་ཀྱི་ཚད་མ་ཡོད་དེ། ཁྱོད་མྱོང་བའི་རང་རིག་མངོན་སུམ་དེས་ཁྱོད་ཤེས་པར་རྟོགས་པའི་ཕྱིར། དེ་ཆོས་ཅན། ཁྱོད་ཚད་མར་རྟོགས་བྱེད་ཀྱི་ཚད་མ་ཡོད་དེ། གསར་དུ་མི་བསླུ་བའི་རིག་པའི་རྟགས་ལས། མེ་འཛིན་དབང་མངོན་ཚད་མར་རྟོགས་པའི་ཕྱིས་འབྱུང་ཐ་སྙད་པའི་ཚད་མ་དེས། ཁྱོད་དེར་རྟོགས་པའི་ཕྱིར། ཚད་མའི་མཚན་ཉིད་སྟོན་པའི་བསྟན་བཅོས་བརྩམས་པ་ལ་ཆོས་ཅན། དགོས་པ་ཡོད་དེ། ཚད་མའི་མཚན་ཉིད་ལ་རྨོངས་པ་བཟློག་པར་བྱ་བའི་ཆེད་ཡིན་པའི་ཕྱིར། །

༈ རྩོད་པ་སྤོང་བ་ལ། ཁ་ཅིག་ན་རེ། དོན་ལ་མེའི་ཁ་དོག་ཡིན་ཞིང་། མེའི་ཁ་དོག་ཡིན་མིན་ཐེ་ཚོམ་ཟ་དུས་ཀྱི་རྒྱང་རིང་པོའི་ཁ་དོག་དམར་ལམ་པ་རྟོགས་པའི་རྗེས་དཔག་ཆོས་ཅན། རང་ལས་ངེས་ཀྱི་ཚད་མ་ཡིན་པར་ཐལ། རྗེས་སུ་དཔག་པའི་ཚད་མ་ཡིན་པའི་ཕྱིར། མ་གྲུབ་ན། དེར་ཐལ། དེ་ཡོད་པའི་ཕྱིར། མ་གྲུབ་ན། དེ་འདྲའི་རྒྱང་རིང་པོའི་ཁ་དོག་དམར་ལམ་པ་ཆོས་ཅན། ཁྱོད་རྟོགས་པའི་རྗེས་དཔག་ཡོད་པར་ཐལ། ཁྱོད་རྗེས་དཔག་གི་གཞལ་བྱ་ཡིན་པའི་ཕྱིར་ན་ཆོས་ཅན་སྐྱོན་ཅན་ཡིན་ནོ། །གཞན་ཡང་། དེ་འདྲའི་རྒྱང་རིང་པོའི་ཁ་དོག་དམར་ལམ་པ་དེ་ཁ་དོག་ཏུ་ཐལ། དེ་ཡོད་པའི་ཕྱིར། འདོད་ན། དེ་ཆོས་ཅན། སངས་འཕགས་ཀྱི་རྒྱུད་ལ་ཁྱོད་འཛིན་དབང་མངོན་ཡོད་པར་ཐལ། ཁྱོད་ཁ་དོག་ཡིན་པའི་ཕྱིར་ན་ཆོས་ཅན་སྐྱོན་ཅན་ཡིན་ནོ། །འདོད་ན། སངས་འཕགས་ཀྱི་རྒྱུད་ལ་གཞན་ལས་ངེས་ཀྱི་ཚད་མ་ཡོད་པར་ཐལ་ལོ། །ཁ་ཅིག་ན་རེ། ཤིན་ཏུ་ལྐོག་འགྱུར་རྟོགས་པའི་རྗེས་དཔག་ཆོས་ཅན། རང་གི་གཞལ་བྱའི་བདག་ཉིད་མཐར་ཐུག་པ་ཡུལ་སྟེང་ན་གནས་པ་མེད་ན། རང་ཉིད་མི་འབྱུང་བ་ལ་ངེས་པ་རང་སྟོབས་ཀྱིས་འདྲེན་ནུས་པར་ཐལ། དེ་རང་ལས་ངེས་ཀྱི་ཚད་མ་ཡིན་པའི་ཕྱིར། འདོད་ན། དེ་འདྲའི་རྗེས་དཔག་དེས་ཤིན་ཏུ་ལྐོག་འགྱུར་མེད་ན། ཤིན་ཏུ་ལྐོག་འགྱུར་རྟོགས་པའི་རྗེས་དཔག་མི་འབྱུང་བའི་ཆ་ལ་ངེས་པ་རང་སྟོབས་ཀྱིས་འདྲེན་ནུས་པར་ཐལ། དེས་རང་གི་གཞལ་བྱའི་བདག་ཉིད་མཐར་ཐུག་པ་ཡུལ་སྟེང་ན་གནས་པ་མེད་ན་རང་ཉིད་མི་འབྱུང་བའི་ཆ་ལ་ངེས་པ་རང་སྟོབས་ཀྱིས་འདྲེན་ནུས་པའི་ཕྱིར། འདོད་ན། དེ་འདྲའི་རྗེས་དཔག་དེས་ཤིན་ཏུ་ལྐོག་འགྱུར་མེད་ན། དེ་རྟོགས་པའི་རྗེས་དཔག་མི་འབྱུང་བ་དེ་རྟོགས་པར་ཐལ། འདོད་པའི་ཕྱིར་ན་མ་ཁྱབ། འདོད་ན། དེས་ཤིན་ཏུ་ལྐོག་འགྱུར་རྟོགས་པའི་རྗེས་དཔག་ཤིན་ཏུ་ལྐོག་འགྱུར་ལ་འབྲེལ་བ་དེ་རྟོགས་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་དེ་ལ་འབྲེལ་བ་ཅུང་ཟད་ལྐོག་འགྱུར་ཡིན་པའི་ཕྱིར། །

མཚོན་བྱ་དོན་གྱི་ཚད་མའི་སྐྱེས་བུ་ངོས་བཟུང་བ།

༈ དེ་ལྡན་བཅོམ་ལྡན་ཚད་མ་ཉིད། །ཅེས་པ་འདི་གང་ལས་འཕྲོས་ན། ཚད་མ་བསླུ་མེད་ཅན་ཤེས་པ། །ཞེས་པ་ནས། རང་གི་མཚན་ཉིད་དཔྱད་ཕྱིར་རོ། །ཞེས་པའི་བར་གྱིས་ཚད་མའི་ངོ་བོ་དེ་བསྟན་ནས། ཐུབ་པ་སངས་རྒྱས་བཅོམ་ལྡན་འདས་ཚད་མ་དང་འདྲ་བའི་རྒྱུ་མཚན་འཆད་པར་བྱེད་པ་ལ། གཞུང་འདི་བྱུང་། ངག་དོན་ནི། སངས་འཕགས་ཀྱི་རྒྱུད་ཀྱི་ཡེ་ཤེས་ཆོས་ཅན། ཇི་ལྟ་བ་དང་ཇི་སྙེད་པ་ལ་ཚད་མ་ཡིན་ཏེ། དེ་ལ་གསར་དུ་མི་བསླུ་བའི་རིག་པ་ཡིན་པའི་ཕྱིར། །

༈ མཐའ་དཔྱད་པ་ལ། ཁ་ཅིག་ན་རེ། བདེན་པ་བཞི་ལ་ཚད་མའི་སྐྱེས་བུ་ཡིན་ན། ཚད་མའི་སྐྱེས་བུ་ཡིན་པས་ཁྱབ་ཟེར་ན། སློབ་དཔོན་དབྱིག་གཉེན་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། དེའི་རྒྱུད་ཀྱི་ཚད་མ་དེ་བདེན་པ་བཞི་ལ་ཚད་མ་ཡིན་པའི་ཕྱིར། རང་ལུགས་ནི། མི་བསླུ་བའི་སྐྱེས་བུར་དམིགས་པ་ཚད་མའི་སྐྱེས་བུའི་མཚན་ཉིད་ཡིན། དེ་ལ་དབྱེ་ན། ཚད་མའི་སྐྱེས་བུ་མཐར་ཐུག་དང་། མི་བསླུ་བའི་ཚད་མའི་སྐྱེས་བུ་གཉིས། དང་པོ་དང་སངས་འཕགས་དོན་གཅིག །གཉིས་པ་ནི། སློབ་དཔོན་ཕྱོགས་གླང་ལྟ་བུ་ལ་བྱེད། རྩོད་པ་སྤོང་བ་ལ། ཁ་ཅིག་ན་རེ། མི་བསླུ་བའི་ཤེས་པ་ཡིན་ན། ཤེས་པ་ཚད་མ་ཡིན་དགོས་པར་ཐལ། མི་བསླུ་བའི་སྐྱེས་བུ་ཡིན་ན། སྐྱེས་བུ་ཚད་མ་ཡིན་དགོས་པའི་ཕྱིར་ན་མ་ཁྱབ། འདོད་ན། བཅད་ཤེས་ཆོས་ཅན། དེར་ཐལ། དེའི་ཕྱིར། འོ་ན། ཁོ་རང་ལ། མི་བསླུ་བའི་ཤེས་པ་ཡིན་ན། ཤེས་པ་ཚད་མ་ཡིན་དགོས་པར་ཐལ། མི་བསླུ་བའི་ངག་ཡིན་ན། ངག་ཚད་མ་ཡིན་དགོས་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེ་ཡིན་ན། ངག་རྣམ་དག་ཡིན་དགོས། ངག་རྣམ་དག་ཡིན་ན། ངག་ཚད་མ་ཡིན་དགོས་པའི་ཕྱིར། །

འབྲས་མཚུངས་ཀྱི་ལྟག་ཆོད་བཤད་པ།

༈ བསྒྲུབ་བྱའི་རྗེས་འགྲོ་ཕྱིར་འབྲས་བུ། །ཞེས་སོགས་རྐང་པ་བཞི་པོ་འདི་གང་ལས་འཕྲོས་ན། སྡོད་འཇུག་དབྱིབས་ཀྱི་ཁྱད་པར་དང་། །དོན་བྱེད་པ་ལ་སོགས་པ་དག། །ཅེས་པའི་སྐབས་སུ། མུ་སྟེགས་དབང་ཕྱུག་པས། དབྱིབས་ལྡན་དེ་རི་བོའི་དབྱིབས་སྐྱེས་བུས་བྱས་པར་སྒྲུབ་པའི་རྟགས་ཡང་དག་ཏུ་ཁས་བླངས་པ་དེ་འགོག་པར་བྱེད་པ་ཡིན་ལ། འདི་ལ་བསྒྲུབ་བྱ་ལ་བརྟགས་ནས་འགོག་པ་དང་། སྒྲུབ་བྱེད་ལ་བརྟགས་ནས་འགོག་པ་གཉིས། དང་པོ་འཆད་པར་བྱེད་པ་ལ། འདོད་པ་གྲུབ་པའམ་དཔེ་མ་གྲུབ། །ཅེས་སོགས་རྐང་པ་གཉིས་བྱུང་། གཉིས་པ་སྒྲུབ་བྱེད་ལ་བརྟགས་ནས་འགོག་པ་ནི། དབྱིབས་ལྡན་དེ་རི་བོའི་དབྱིབས་སྐྱེས་བུས་བྱས་པར་སྒྲུབ་པའི་རྟགས་ཡང་དག་མ་ཡིན་པར་ཐལ། སྐྱེས་བུས་བྱས་པའི་དབྱིབས་དེ་ཡང་དེ་ལྟར་སྒྲུབ་པའི་རྟགས་ཡང་དག་མ་ཡིན། སྐྱེས་བུས་བྱས་པའི་དབྱིབས་དང་དབྱིབས་ཙམ་དུ་མཚུངས་པ་དེ་ཡང་དེ་ལྟར་སྒྲུབ་པའི་རྟགས་ཡང་དག་མ་ཡིན། སྐྱེས་བུས་བྱས་པའི་དབྱིབས་དང་དབྱིབས་ཞེས་པའི་སྒྲ་འཇུག་རུང་དུ་མཚུངས་པ་དེ་ཡང་དེ་ལྟར་སྒྲུབ་པའི་རྟགས་ཡང་དག་མ་ཡིན་པའི་ཕྱིར། དང་པོ་མ་ཡིན་ཏེ། དེ་དེ་ལྟར་སྒྲུབ་པའི་ཕྱོགས་ཆོས་མ་ཡིན་པའི་ཕྱིར། ཞེས་འཆད་པར་བྱེད་པ་ལ། བྱིན་རློབས་ཡོད་མེད་རྗེས་འཇུག་ཅན། །ཞེས་སོགས་རྐང་པ་བཞི་བྱུང་། གཉིས་པ་མ་ཡིན་ཏེ། དེའི་རྟགས་ཀྱིས་དེ་སྒྲུབ་ཀྱི་ཁྱབ་པ་འཁྲུལ་བའི་ཕྱིར་ཏེ། དཔེར་ན། སྐྱ་རྫས་ཀྱི་རྟགས་ཀྱིས་དུ་ལྡན་ལ་ལ་མེ་ཡོད་པར་སྒྲུབ་པའི་ཁྱབ་པ་འཁྲུལ་བ་བཞིན་ནོ། །ཞེས་དཔེ་དང་བཅས་ཏེ་འཆད་པར་བྱེད་པ་ལ། ཐ་དད་དངོས་ལ་རབ་གྲུབ་པ། །ཞེས་སོགས་རྐང་པ་བཞི་བྱུང་། ཁོ་ན་རེ། དེའི་རྟགས་ཀྱིས་དེ་སྒྲུབ་ཀྱི་ཁྱབ་པ་མ་འཁྲུལ་བ་ཡིན་ནོ། ཟེར་ན། འོ་ན་གྲོག་མཁར་ཆོས་ཅན། རྫ་མཁན་གྱིས་བྱས་པ་ཡིན་པར་ཐལ། རྫ་མཁན་གྱིས་བྱས་པའི་རྫ་བུམ་དང་། འཇིམ་པའི་རྣམ་འགྱུར་འགའ་ཞིག་འདྲ་བར་མཚུངས་པའི་ཕྱིར། ཁྱབ་པ་ཁས། ཞེས་འཆད་པར་བྱེད་པ་ལ། དེ་ལྟ་མིན་ན་རྫ་མཁན་གྱིས། །ཞེས་སོགས་རྐང་པ་བཞི་བྱུང་། དེ་ལྟར་བྱས་པ་ལ་མུ་སྟེགས་དབང་ཕྱུག་པ་ན་རེ། བྱས་པ་སྒྲ་མི་རྟག་པར་སྒྲུབ་པའི་རྟགས་ཡང་དག་མ་ཡིན་པར་ཐལ། སྒྲའི་བྱས་པ་ཡང་དེ་སྒྲུབ་ཀྱི་དེ་མ་ཡིན། བུམ་པའི་དེ་ཡང་དེ་སྒྲུབ་ཀྱི་རྟགས་ཡང་དག་མ་ཡིན་ཕྱིར། ཁྱབ་པ་མཚུངས་སོ། །ཞེ་ན། མི་མཚུངས་ཏེ། ཁྱོད་ཀྱིས་བུམ་པའི་བྱས་པ་ཡང་། སྒྲ་མི་རྟག་པར་སྒྲུབ་པའི་རྟགས་ཡང་དག་མ་ཡིན། སྒྲའི་དེ་ཡང་དེ་སྒྲུབ་ཀྱི་རྟགས་ཡང་དག་མ་ཡིན་པས་བྱས་པ་དེ་སྒྲུབ་ཀྱི་རྟགས་ཡང་དག་མ་ཡིན་པར་འགྱུར། ཞེས་སུན་འབྱིན་པའི་སུན་འབྱིན་དེ་འབྲས་མཚུངས་ཀྱི་ལྟག་ཆོད་ཡིན་ལ། ངེད་ཀྱིས་སྐྱེས་བུས་བྱས་པའི་དབྱིབས་དེ་ཡང་རི་བོའི་དབྱིབས་སྐྱེས་བུས་བྱས་པར་སྒྲུབ་པའི་རྟགས་ཡང་དག་མ་ཡིན། དེ་དང་དབྱིབས་ཙམ་དུ་མཚུངས་པ་དེ་ཡང་དེ་སྒྲུབ་ཀྱི་རྟགས་ཡང་དག་མ་ཡིན། དེ་དང་དབྱིབས་ཞེས་པའི་སྒྲ་འཇུག་རུང་དུ་མཚུངས་པ་དེ་ཡང་། དེ་སྒྲུབ་ཀྱི་རྟགས་ཡང་དག་མ་ཡིན་པས། དབྱིབས་ལྡན་དེ་རི་བོའི་དབྱིབས་སྐྱེས་བུས་བྱས་པར་སྒྲུབ་པའི་རྟགས་ཡང་དག་མ་ཡིན་པར་འགྱུར་རོ། །ཞེས་སུན་འབྱིན་པའི་སུན་འབྱིན་དེ། འབྲས་མཚུངས་ཀྱི་ལྟག་ཆོད་མ་ཡིན་པའི་ཕྱིར། དང་པོ་དེ་ཡིན་ཏེ། དེ་འདྲའི་སུན་འབྱིན་དེ་བསྒྲུབ་བྱ་སྒྲུབ་ནུས་ཀྱི་སྤྱི་རྟགས་སུ་བཀོད་པ་ལ་ཁྱད་པར་ལ་བརྟགས་ནས་སུན་འབྱིན་པའི་སུན་འབྱིན་ཡིན་པའི་ཕྱིར་ཏེ། བྱས་པ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པའི་ཕྱིར། ཞེས་འཆད་པར་བྱེད་པ་ལ། བསྒྲུབ་བྱའི་རྗེས་འགྲོ་ཕྱིར་འབྲས་བུ། །ཞེས་སོགས་རྐང་པ་བཞི་བྱུང་། གཉིས་པ་མ་ཡིན་ཏེ། དེ་འདྲའི་སུན་འབྱིན་དེ། བསྒྲུབ་བྱ་སྒྲུབ་ནུས་ཀྱི་སྤྱི་རྟགས་སུ་བཀོད་པ་ལ། ཁྱད་པར་ལ་བརྟགས་ནས་སུན་འབྱིན་པའི་སུན་འབྱིན་མ་ཡིན་པའི་ཕྱིར་ཏེ། དབྱིབས་ལྡན་དེ་རི་བོའི་དབྱིབས་སྐྱེས་བུས་བྱས་པར་སྒྲུབ་པའི་རྟགས་ཡང་དག་མ་ཡིན་པའི་ཕྱིར། ཞེས་ཤུགས་ལ་འཆད་པར་བྱེད་པ་ལ། བསྒྲུབ་བྱའི་རྗེས་འགྲོ་ཕྱིར་འབྲས་བུ། །ཞེས་སོགས་རྐང་པ་བཞི་བྱུང་། །

༈ མཐའ་དཔྱད་པ་ལ། ཁ་ཅིག་ན་རེ། བསྒྲུབ་བྱ་སྒྲུབ་ནུས་ཀྱི་སྤྱི་རྟགས་སུ་བཀོད་པ་ལ། ཁྱད་པར་ལ་བརྟགས་ནས་སུན་འབྱིན་པའི་སུན་འབྱིན་དེ། འབྲས་མཚུངས་ཀྱི་ལྟག་ཆོད་ཀྱི་མཚན་ཉིད། མཚན་གཞི་ནི། བྱས་པ་སྒྲ་མི་རྟག་པར་སྒྲུབ་པའི་རྟགས་ཡང་དག་མ་ཡིན་པར་ཐལ། སྒྲའི་བྱས་པ་ཡང་དེ་སྒྲུབ་ཀྱི་རྟགས་ཡང་དག་མ་ཡིན། བུམ་པའི་དེ་ཡང་དེ་སྒྲུབ་ཀྱི་དེ་མ་ཡིན་པའི་ཕྱིར། ཞེས་པའི་སུན་འབྱིན་ལྟ་བུ་ལ་བྱེད་ཟེར་ན། དེ་འདྲའི་སུན་འབྱིན་དེ་ཆོས་ཅན། སུན་འབྱིན་ལྟར་སྣང་དུ་ཐལ། འབྲས་མཚུངས་ཀྱི་ལྟག་ཆོད་ཡིན་པའི་ཕྱིར། འདོད་མི་ནུས་ཏེ། སུན་འབྱིན་ཡང་དག་ཡིན་པའི་ཕྱིར་ཏེ། ཐལ་འགྱུར་ཡང་དག་ཡིན་པའི་ཕྱིར། ཁྱོད་ཐལ་འགྱུར་ཡང་དག་ཏུ་སོང་བའི་གང་ཟག་ཡོད་པའི་ཕྱིར། གཞན་ཡང་། བུམ་པའི་གཞལ་བྱ་ཡང་། སྒྲ་མི་རྟག་པར་སྒྲུབ་པའི་མ་ངེས་པའི་གཏན་ཚིགས་མ་ཡིན། ཀ་བའི་དེ་ཡང་དེ་སྒྲུབ་ཀྱི་མ་ངེས་པའི་གཏན་ཚིགས་མ་ཡིན་པས། གཞལ་བྱ་དེ་སྒྲུབ་ཀྱི་མ་ངེས་པའི་གཏན་ཚིགས་མ་ཡིན་པར་འགྱུར། ཞེས་སུན་འབྱིན་པའི་སུན་འབྱིན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། མ་ངེས་པའི་འབྲས་མཚུངས་ཀྱི་ལྟག་ཆོད་ཡིན་པའི་ཕྱིར། འདོད་ན། གཞལ་བྱ་དེ་སྒྲུབ་ཀྱི་བསྒྲུབ་བྱ་སྒྲུབ་ནུས་ཀྱི་གཏན་ཚིགས་ཡིན་པར་ཐལ། འདོད་པའི་ཕྱིར། ཁ་ཅིག་ན་རེ། སྒྲུབ་བྱེད་ཡང་དག་ཁས་བླངས་པ་ལ། ཁྱད་པར་ལ་བརྟགས་ནས་སུན་འབྱིན་པའི་རིགས་སུ་གནས་པའི་སུན་འབྱིན་ལྟར་སྣང་དེ། འབྲས་མཚུངས་ཀྱི་ལྟག་ཆོད་ཀྱི་མཚན་ཉིད་ཟེར་ན། སྔར་གྱི་དེ་གཉིས་ཀ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་སྒྲུབ་ཟིན། འདོད་ན། གཞལ་བྱ་སྒྲ་མི་རྟག་པར་སྒྲུབ་པའི་སྒྲུབ་བྱེད་ཡང་དག་ཏུ་ཐལ། འདོད་པའི་ཕྱིར། །

༈ རང་ལུགས་བཞག་པ་ལ། བཤད་བྱའི་ལུང་འགོད་པ་དང་། ལུང་གི་དོན་བཤད་པ་གཉིས། དང་པོ་ནི། ཚད་མ་མདོ་ལས། འབྲས་ཉིད་གཞན་གྱི་ཆ་ཡི་ནི། །བསྒྲུབ་བྱ་མ་སྒྲུབ་པར་དོན་གང་། །དེས་ན་འབྲས་མཚུངས་སྨྲ་བ་པོའི། །བསམ་པ་ལ་ལྟོས་གསུམ་དུ་འགྱུར། །ཞེས་གསུངས་སོ། །གཉིས་པ་ལུང་གི་དོན་བཤད་པ་ནི། དེ་ཡང་ཚིག་རྐང་དང་པོ་གཉིས་ཀྱིས་འབྲས་མཚུངས་ཀྱི་ལྟག་ཆོད་ཀྱི་ངོ་བོ་དེ་བསྟན། དེ་ན་འབྲས་མཚུངས། ཞེས་པས། འབྲས་མཚུངས་ཀྱི་ལྟག་ཆོད་ཁོ་རང་མཚོན་བྱར་བསྒྲུབས། སྨྲ་བ་པོའི། བསམ་པ་ལ་ལྟོས་གསུམ་དུ་འགྱུར། །ཞེས་པས། དེའི་དབྱེ་བ་དེ་བསྟན། དེས་ན་འབྲས་མཚུངས་ཀྱི་ལྟག་ཆོད་ལ་མཚན་ཉིད། དབྱེ་བ། སྒྲ་བཤད་པ་དང་གསུམ། དང་པོ་ནི། ཚད་མས་གྲུབ་པའི་དོན་ཁས་བླངས་པ་ལ། ཁྱད་པར་ལ་བརྟགས་ནས་སུན་འབྱིན་པའི་རིགས་སུ་གནས་པའི་སུན་འབྱིན་ལྟར་སྣང་དེ། འབྲས་མཚུངས་ཀྱི་ལྟག་ཆོད་ཀྱི་མཚན་ཉིད། གཉིས་པ་དེ་ལ་དབྱེ་ན། སྒྲུབ་བྱེད་ལ་ལྟོས་པའི་དེ། བསྒྲུབ་བྱ་ལ་ལྟོས་པའི་དེ། བྱ་བྱེད་ལ་ལྟོས་པའི་དེ་དང་གསུམ། དང་པོ་ནི། བྱས་པ་སྒྲ་མི་རྟག་པར་སྒྲུབ་པའི་རྟགས་ཡང་དག་ཏུ་ཁས་བླངས་པ་ལ། སྒྲའི་བྱས་པ་ཡང་དེ་སྒྲུབ་ཀྱི་རྟགས་ཡང་དག་མ་ཡིན། བུམ་པའི་དེ་ཡང་དེ་སྒྲུབ་ཀྱི་དེ་མ་ཡིན་པས། བྱས་པ་དེ་སྒྲུབ་ཀྱི་རྟགས་ཡང་དག་མ་ཡིན་པར་འགྱུར། ཞེས་སུན་འབྱིན་པའི་སུན་འབྱིན་ལྟ་བུ་ལ་བྱེད། གཉིས་པ་ནི། སྒྲ་མི་རྟག་པ་སྒྲ་མི་རྟག་པར་སྒྲུབ་པའི་བསྒྲུབ་བྱ་ཡང་དག་ཏུ་ཁས་བླངས་པ་ལ། བུམ་པའི་མི་རྟག་པ་ཡང་དེ་སྒྲུབ་ཀྱི་བསྒྲུབ་བྱ་ཡང་དག་མ་ཡིན། ཀ་བའི་དེ་ཡང་དེ་སྒྲུབ་ཀྱི་དེ་ཡང་དག་མ་ཡིན་པས་སྒྲ་མི་རྟག་པ་སྒྲ་མི་རྟག་པར་སྒྲུབ་པའི་བསྒྲུབ་བྱ་ཡང་དག་མ་ཡིན་པར་འགྱུར། ཞེས་སུན་འབྱིན་པའི་སུན་འབྱིན་ལྟ་བུ་ལ་བྱེད། གསུམ་པ་ལ་མཚན་མཚོན་ལ་ལྟོས་པའི་དེ་དང་། རྒྱུ་འབྲས་ལ་ལྟོས་པའི་དེ་གཉིས། དང་པོ་ལ། མཚོན་བྱ་ལ་ལྟོས་པའི་དེ་དང་། མཚན་ཉིད་ལ་ལྟོས་པའི་དེ་དང་གཉིས། དང་པོ་ནི། དངོས་པོ་དོན་བྱེད་ནུས་པའི་མཚོན་བྱར་ཁས་བླངས་པ་ལ། བུམ་པའི་དངོས་པོ་དེ་ཡང་དེའི་མཚོན་བྱ་མ་ཡིན། ཀ་བའི་དེ་ཡང་དེའི་མཚོན་བྱ་མ་ཡིན་པས། དངོས་པོ་དེའི་མཚོན་བྱ་མ་ཡིན་པར་འགྱུར། ཞེས་སུན་འབྱིན་པའི་སུན་འབྱིན་ལྟ་བུ་ལ་བྱེད། གཉིས་པ་ནི། དོན་བྱེད་ནུས་པ་དངོས་པོའི་མཚན་ཉིད་དུ་ཁས་བླངས་པ་ལ། བུམ་པའི་དོན་བྱེད་ནུས་པ་ཡང་དེའི་མཚན་ཉིད་མ་ཡིན། ཀ་བའི་དོན་བྱེད་ནུས་པ་ཡང་དེའི་མཚན་ཉིད་མ་ཡིན་པས་དོན་བྱེད་ནུས་པ་དེའི་མཚན་ཉིད་མ་ཡིན་པར་འགྱུར། ཞེས་པའི་སུན་འབྱིན་ལྟ་བུ་ལ་བྱེད། གཉིས་པ་རྒྱུ་འབྲས་ལ་ལྟོས་པའི་དེ་ལ་ཡང་། རྒྱུ་ལ་ལྟོས་པའི་དེ་དང་། འབྲས་བུ་ལ་ལྟོས་པའི་དེ་གཉིས། དང་པོ་ནི། མེ་དུ་བའི་རྒྱུར་ཁས་བླངས་པ་ལ། ཙནྡན་གྱི་མེ་ཡང་དུ་བའི་རྒྱུ་མ་ཡིན། ཤུག་པའི་མེ་ཡང་དུ་བའི་རྒྱུ་མ་ཡིན་པས། མེ་དུ་བའི་རྒྱུ་མ་ཡིན་པར་འགྱུར། ཞེས་སུན་འབྱིན་པའི་སུན་འབྱིན་ལྟ་བུ་ལ་བྱེད། གཉིས་པ་ནི། དུ་བ་མེའི་འབྲས་བུར་ཁས་བླངས་པ་ལ། ཙནྡན་གྱི་དུ་བ་དེ་ཡང་མེའི་འབྲས་བུ་མ་ཡིན། ཤུག་པའི་དུ་བ་ཡང་མེའི་འབྲས་བུ་མ་ཡིན་པས། དུ་བ་མེའི་འབྲས་བུ་མ་ཡིན་པར་འགྱུར། ཞེས་སུན་འབྱིན་པའི་སུན་འབྱིན་ལྟ་བུ་ལ་བྱེད། ཡང་འབྲས་མཚུངས་ཀྱི་ལྟག་ཆོད་ལ་དབྱེ་ན། འགལ་བའི་དེ་དང་། མ་ངེས་པའི་དེ་དང་། མ་གྲུབ་པའི་དེ་དང་གསུམ། དང་པོ་ནི། བྱས་པ་སྒྲ་རྟག་པར་སྒྲུབ་པའི་འགལ་རྟགས་སུ་ཁས་བླངས་པ་ལ། བུམ་པའི་བྱས་པ་ཡང་དེ་སྒྲུབ་ཀྱི་འགལ་རྟགས་མ་ཡིན། ཀ་བའི་བྱས་པ་ཡང་དེ་སྒྲུབ་ཀྱི་འགལ་རྟགས་མ་ཡིན་པས། བྱས་པ་དེ་སྒྲུབ་ཀྱི་འགལ་རྟགས་མ་ཡིན་པར་འགྱུར། ཞེས་སུན་འབྱིན་པའི་སུན་འབྱིན་ལྟ་བུ་ལ་བྱེད། གཉིས་པ་ནི། གཞལ་བྱ་སྒྲ་མི་རྟག་པར་སྒྲུབ་པའི་མ་ངེས་པའི་གཏན་ཚིགས་སུ་ཁས་བླངས་པ་ལ། བུམ་པའི་གཞལ་བྱ་ཡང་དེ་མ་ཡིན། ཀ་བའི་དེ་ཡང་དེ་མ་ཡིན་པས། གཞལ་བྱ་དེ་མ་ཡིན་པར་འགྱུར། ཞེས་སུན་འབྱིན་པའི་སུན་འབྱིན་ལྟ་བུ་ལ་བྱེད། གསུམ་པ་ནི། བྱས་པ་སྒྲ་མི་རྟག་པར་སྒྲུབ་པའི་མ་གྲུབ་པའི་གཏན་ཚིགས་མ་ཡིན་པར་ཁས་བླངས་པ་ལ། བུམ་པའི་བྱས་པ་ཡང། སྒྲའི་སྟེང་དུ་འགོད་ཚུལ་དང་མཐུན་པར་མ་གྲུབ། ཀ་བའི་དེ་ཡང། དེའི་སྟེང་དུ་འགོད་ཚུལ་དང་མཐུན་པར་མ་གྲུབ་པས། བྱས་པ་སྒྲ་མི་རྟག་པར་སྒྲུབ་པའི་མ་གྲུབ་པའི་གཏན་ཚིགས་ཡིན་པར་འགྱུར། ཞེས་སུན་འབྱིན་པའི་སུན་འབྱིན་ལྟ་བུ་ལ་བྱེད། སྒྲ་བཤད་པ་ནི། སྔར་གྱི་དེ་རྣམས་ལ་འབྲས་མཚུངས་ཀྱི་ལྟག་ཆོད། ཅེས་བརྗོད་པའི་རྒྱུ་མཚན་ཡོད་དེ། དེ་རྣམས་རང་སྨྲ་བ་པོའི་གང་ཟག་གིས་སྨྲས་པའི་འབྲས་བུའི་ཉེས་པ་དེ། རང་སྨྲ་བ་པོའི་གང་ཟག་རང་ལ་མཚུངས་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། །

༈ རྩོད་པ་སྤང་པ་ལ། ཁ་ཅིག་ན་རེ། བྱས་པ་མི་རྟག་པར་སྒྲུབ་པའི་རྟགས་ཡང་དག་ཏུ་ཁས་བླངས་པའི་ཁས་བླངས་དེ། ཚད་མས་གྲུབ་པའི་དོན་ཁས་བླངས་པའི་དེར་ཐལ། དམ་བཅའ་འཐད་པའི་ཕྱིར། འདོད་ན། ཁས་བླངས་རྣམ་དག་ཡིན་ན་ཚད་མས་གྲུབ་པའི་དོན་ཁས་བླངས་པའི་ཁས་བླངས་ཡིན་དགོས་པར་ཐལ། འདོད་པའི་ཕྱིར། འདོད་ན། དམ་བཅའ་ཡང་དག་ཡིན་ན། ཚད་མས་གྲུབ་པའི་དོན་ཞེན་དོན་དུ་བྱེད་པའི་དམ་བཅའ་ཡིན་དགོས་པར་ཐལ། འདོད་པའི་ཕྱིར་ན་མ་ཁྱབ། །

རྟག་པ་རང་བྱུང་གི་དབང་ཕྱུག་འཇིག་རྟེན་གྱི་བྱེད་པོར་འགོག་ཚུལ།

༈ སྒྲ་མ་གྲུབ་ཀྱང་དངོས་པོ་ནི། །ཞེས་སོགས་རྐང་པ་བཞི་གང་ལས་འཕྲོས་ན། གོང་དུ་དབང་ཕྱུག་པས། དབྱིབས་ལྡན་དེ། རི་བོའི་དབྱིབས་སྐྱེས་བུས་བྱས་པར་སྒྲུབ་པའི་རྟགས་ཡང་དག་ཏུ་ཁས་བླངས་པ་ལ། དབྱིབས་ལྡན་དེ་དེ་སྒྲུབ་ཀྱི་རྟགས་ཡང་དག་མ་ཡིན་པར་ཐལ། སྐྱེས་བུས་བྱས་པའི་དབྱིབས་དེ་ཡང་དེ་སྒྲུབ་ཀྱི་རྟགས་ཡང་དག་མ་ཡིན། སྐྱེས་བུས་བྱས་པའི་དབྱིབས་དང་། དབྱིབས་ཙམ་དུ་མཚུངས་པ་དེ་ཡང་དེ་སྒྲུབ་ཀྱི་རྟགས་ཡང་དག་མ་ཡིན། སྐྱེས་བུས་བྱས་པའི་དབྱིབས་དང་དབྱིབས་ཞེས་པའི་སྒྲ་འཇུག་རུང་དུ་མཚུངས་པ་དེ་ཡང་དེ་སྒྲུབ་ཀྱི་རྟགས་ཡང་དག་མ་ཡིན་པའི་ཕྱིར། དང་པོ་མ་ཡིན། ཞེས་འཆད་པར་བྱེད་པ་ལ། བྱིན་རློབས་ཡོད་མེད་རྗེས་འཇུག་ཅན། །ཞེས་སོགས་བྱུང་། གཉིས་པ་མ་ཡིན། ཞེས་འཆད་པར་བྱེད་པ་ལ། ཐ་དད་དངོས་ལ་རབ་གྲུབ་པ། །ཞེས་སོགས་བྱུང་། རང་ལ་མཚུངས་པ་དེ་སྤོང་བར་བྱེད་པ་ལ། བསྒྲུབ་བྱའི་རྗེས་འགྲོ་ཕྱིར་འབྲས་བུ། །ཞེས་སོགས་བྱུང་། གསུམ་པ་ཡིན་ནོ། །ཟེར་ན། དེ་དེ་སྒྲུབ་ཀྱི་རྟགས་ཡང་དག་མ་ཡིན་པར་ཐལ། དེའི་རྟགས་ཀྱིས་དེ་སྒྲུབ་ཀྱི་ཁྱབ་པ་འཁྲུལ་བའི་ཕྱིར། དཔེར་ན། གཽ་ཞེས་པའི་སྒྲ་འཇུག་རུང་གི་རྟགས་ལས་ངག་དང་ཕྱོགས་ལ་སོགས་པ་རྭ་ཅན་དུ་སྒྲུབ་པའི་ཁྱབ་པ་འཁྲུལ་བའི་དཔེ་འདི་བཞིན་ནོ། །ཞེས་འཆད་པར་བྱེད་པ་ལ། རིགས་ཀྱི་ཁྱད་པར་ལ་གྲུབ་པ། །ཞེས་སོགས་རྐང་པ་བཞི་བྱུང་། དེ་ལྟར་མ་ཡིན་ན་སྐྱེས་བུ་ཐམས་ཅད་ཀྱི་དོན་ཐམས་ཅད་འབད་མེད་དུ་གྲུབ་པ་ཡིན་པར་ཐལ། ཆོས་དེ་ཞེས་པའི་སྒྲ་འཇུག་རུང་ཡིན་ན་ཆོས་དེ་ཡིན་དགོས་པའི་ཕྱིར། དེར་ཐལ། རྗོད་བྱེད་ཀྱི་སྒྲ་ཐམས་ཅད་དོན་ཐམས་ཅད་ལ་འཇུག་རུང་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། རྗོད་བྱེད་ཀྱི་སྒྲ་ཐམས་ཅད་རང་ཡུལ་ལ་འདོད་པའི་དབང་གིས་འཇུག་པའི་གཞན་དབང་ཡིན་པའི་ཕྱིར། ཞེས་འཆད་པར་བྱེད་པ་ལ། བརྗོད་པར་འདོད་པའི་གཞན་དབང་ཕྱིར། །ཞེས་སོགས་རྐང་པ་བཞི་བྱུང་། དེ་ན་དབྱིབས་ལྡན་དེ་རི་བོའི་དབྱིབས་སྐྱེས་བུས་བྱས་པར་སྒྲུབ་པའི་རྟགས་ཡང་དག་ཡིན་པ་བཀག་པའི་རིགས་པ་དེས་ནི་ཆོས་ཅན། དགོས་པ་གཞན་ཡང་ཡོད་དེ། གྲངས་ཅན་གྱིས་སྐྱེ་འཇིག་ཅན་དེ་བློ་བདེ་སེམས་མེད་དུ་སྒྲུབ་པའི་རྟགས་ཡང་དག་ཏུ་འདོད་པ་དེ་དང་། གཅེར་བུ་པས། ཤུན་པགས་བཤུས་ན་འཆི་བ་དེ་ཤིང་སེམས་ལྡན་དུ་སྒྲུབ་པའི་རྟགས་ཡང་དག་ཏུ་འདོད་པ་དེ་ཁེགས་སོ། །ཞེས་ཤེས་པར་བྱ་བའི་ཆེད་ཡིན་པའི་ཕྱིར། ཞེས་འཆད་པར་བྱེད་པ་ལ། འདིས་ནི་སེར་སྐྱ་ལ་སོགས་ཀྱི། །ཞེས་སོགས་རྐང་པ་བཞི་བྱུང་། དེས་ན། བྱིན་རློབས་ཡོད་མེད་རྗེས་འཇུག་ཅན། །ཞེས་པའི་སྐབས་སུ་དབྱིབས་ལྡན་དེ་རི་བོའི་དབྱིབས་སྐྱེས་བུས་བྱས་པར་སྒྲུབ་པའི་རྟགས་ཡང་དག་ཡིན་པ་བཀག་པ་ལ་བརྟེན་ནས་རྟགས་ཡང་དག་ཏུ་འགྱུར་བ་ལ་རྟགས་ཀྱི་ཁྱད་པར་དང་། ངོ་བོ་གཉིས་ཀྱི་ནང་ནས་ངོ་བོ་གཙོ་ཆེ་བར་གྲུབ་བོ། །ཞེས་འཆད་པར་བྱེད་པ་ལ། དངོས་པོའི་ངོ་བོ་མ་གྲུབ་ན། །ཞེས་སོགས་རྐང་པ་བཞི་བྱུང་། རིགས་ཀྱི་ཁྱད་པར་ལ་གྲུབ་པ། །ཞེས་པའི་སྐབས་སུ་སྐྱེས་བུས་བྱས་པའི་དབྱིབས་དང་དབྱིབས་ཞེས་པའི་སྒྲ་འཇུག་རུང་དུ་མཚུངས་པ་དེ། རི་བོའི་དབྱིབས་སྐྱེས་བུས་བྱས་པར་སྒྲུབ་པའི་རྟགས་ཡང་དག་ཡིན་པ་བཀག་པ་ལ་བརྟེན་ནས་རྟགས་ཡང་དག་ཏུ་འགྱུར་བ་ལ། རྟགས་ནི་སྒྲ་དང་དོན་གཉིས་ཀྱི་ནང་ནས་དོན་གཙོ་ཆེ་བར་གྲུབ་བོ། །ཞེས་འཆད་པར་བྱེད་པ་ལ། སྒྲ་མ་གྲུབ་ཀྱང་དངོས་པོ་ནི། །ཞེས་སོགས་རྐང་པ་བཞི་བྱུང་། ངག་དོན་ནི། བྱས་པ་ཆོས་ཅན། སྒྲ་ཁྱོད་ཅེས་པའི་སྒྲའི་བརྗོད་བྱར་མ་གྲུབ་ཀྱང་། ཁྱོད་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་ཏེ། སྒྲ་ཁྱོད་ཅེས་པའི་སྒྲའི་བརྗོད་བྱར་མ་གྲུབ་ཀྱང་ཁྱོད་སྒྲའི་སྟེང་དུ་འགོད་ཚུལ་དང་མཐུན་པར་གྲུབ་པའི་སྒོ་ནས་ཁྱོད་ཀྱི་རྟགས་ཀྱིས་སྒྲ་མི་རྟག་པར་སྒྲུབ་པའི་ཚུལ་གསུམ་གྲུབ་པའི་ཕྱིར། དཔེར་ན། སངས་རྒྱས་པས་བྱེ་བྲག་པའི་ངོར་འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། རེག་བྱ་ཅན་ཡིན་པའི་ཕྱིར། ཞེས་བཀོད་པའི་ཚེ་ན་བྱེ་བྲག་པས་ལུས་ཅན་ཞེས་པའི་སྒྲ་དེ་འབྱུང་བཞིའི་རྡུལ་ཕྲན་ལ་འཇུག་པར་ཚད་མས་མ་གྲུབ་ཀྱང་། དེའི་ཚེ་ན་བྱེ་བྲག་པས་འབྱུང་བཞིའི་རྡུལ་ཕྲན་རེག་བྱ་ཅན་དུ་གྲུབ་པའི་སྒོ་ནས་རེག་བྱ་ཅན་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་ཕྱོགས་ཆོས་སུ་འགྲུབ་པའི་དཔེ་འདི་བཞིན་ནོ། །ཞེས་འཆད་པར་བྱེད་པ་ལ། གཞུང་འདི་བྱུང། །

༈ འདིའི་སྐབས་སུ་མཐའ་དཔྱད་པ་ལ། ཁ་ཅིག་ན་རེ། སངས་རྒྱས་པས་བྱེ་བྲག་པའི་ངོར་འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། ལུས་ཅན་ཡིན་པའི་ཕྱིར། ཞེས་བཀོད་པའི་ཚེ་ན། རེག་བྱ་ཅན་དེ་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་ཕྱོགས་ཆོས་ཡིན་ཟེར་བ་དང་། བཀོད་ཚེ་མ་ནུས་ཡོད་འདོད་པ་ནང་འགལ་ཏེ། འོ་ན། འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། ལུས་ཅན་ཡིན་པའི་ཕྱིར། ཞེས་བཀོད་པའི་ཚེ་ན་རེག་བྱ་ཅན་དེ་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་ཕྱོགས་ཆོས་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། སྒྲ་ཆོས་ཅན། མི་རྟག་སྟེ། བྱས་པའི་ཕྱིར། ཞེས་བཀོད་པའི་ཚེ་ན་སྐྱེས་པ་སྒྲ་མི་རྟག་པར་སྒྲུབ་པའི་ཕྱོགས་ཆོས་ཡིན་པར་ཐལ། འདོད་པའི་ཕྱིར། འདོད་ན། དེའི་ཚེ་ན་དངོས་པོ་ཡང་དེ་སྒྲུབ་ཀྱི་ཕྱོགས་ཆོས་ཡིན་པར་ཐལ། འདོད་པའི་ཕྱིར། བྱས་པ་ལ་ཁོ་ན་རེ། མ་ཁྱབ་སྟེ། འོ་ན། བ་སྤྱི་རྟག་དངོས་རང་གི་གསལ་བ་དུ་མ་ལ་དོན་དམ་པར་འཕྲོ་འདུ་མ་འབྲེལ་བར་བསྒྲུབ་པ་ལ་བྱས་པ་རྟགས་སུ་བཀོད་པའི་ཚེ་ན་བ་ལང་གི་དོན་སྤྱི་དེ་བ་སྤྱི་རྟག་དངོས་རང་གི་གསལ་བ་དུ་མ་ལ་དོན་དམ་པར་འཕྲོ་འདུ་མ་འབྲེལ་བར་སྒྲུབ་པའི་ཤེས་འདོད་ཆོས་ཅན་སྐྱོན་མེད་ཡིན་པར་ཐལ། དེ་ལྟར་སྒྲུབ་པ་ལ་དུ་མ་མ་ཡིན་པ་རྟགས་སུ་བཀོད་པའི་ཚེ་ན། བ་ལང་གི་དོན་སྤྱི་དེ་དེ་སྒྲུབ་ཀྱི་ཤེས་འདོད་ཆོས་ཅན་སྐྱོན་མེད་ཡིན་པའི་ཕྱིར། ཁྱབ་པ་ཁས་ཟེར་ན་མི་འགྲིག་གོ། རྟགས་གྲུབ་སྟེ། དེའི་ཚེ་ན་དུ་མ་མ་ཡིན་པ་དེ་དེ་སྒྲུབ་ཀྱི་རྟགས་ཡང་དག་ཡིན་པའི་ཕྱིར། རྩ་བར་འདོད་མི་ནུས་ཏེ། བྱས་པ་དེ་སྒྲུབ་ཀྱི་མ་གྲུབ་པའི་གཏན་ཚིགས་ཡིན་པའི་ཕྱིར། ཁ་ཅིག་ན་རེ། སངས་རྒྱས་པས་བྱེ་བྲག་པའི་ངོར་འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། ལུས་ཅན་ཡིན་པའི་ཕྱིར། ཞེས་བཀོད་པའི་ཚེ་ན་ལུས་ཅན་དེ་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་ཕྱོགས་ཆོས་ཡིན་ཟེར་བ་དང་། སྒྲ་བྱས་པར་ཚད་མས་མ་གྲུབ་པའི་གང་ཟག་གི་ངོར་སྒྲ་ཆོས་ཅན། མི་རྟག་སྟེ། བྱས་པའི་ཕྱིར། ཞེས་བཀོད་པའི་ཚེ་ན་བྱས་པ་སྒྲ་མི་རྟག་པར་སྒྲུབ་པའི་མ་གྲུབ་པའི་གཏན་ཚིགས་ཡིན་ཟེར་ན་ནང་འགལ་ཏེ། དེའི་ཚེ་ན་བྱས་པ་སྒྲ་མི་རྟག་པར་སྒྲུབ་པའི་མ་གྲུབ་པའི་གཏན་ཚིགས་མ་ཡིན་པར་ཐལ། དེའི་ཚེ་ན་བྱས་པ་དེ་སྒྲུབ་ཀྱི་ཕྱོགས་ཆོས་ཡིན་པའི་ཕྱིར། དེར་ཐལ། འབྱུང་བཞིའི་རྡུལ་ཕྲན་ལུས་ཅན་དུ་ཚད་མས་མ་གྲུབ་པའི་གང་ཟག་གི་ངོར་འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། ལུས་ཅན་ཡིན་པའི་ཕྱིར། ཞེས་བཀོད་པའི་ཚེ་ན་ལུས་ཅན་དེ་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་ཕྱོགས་ཆོས་ཡིན་པའི་ཕྱིར། དེར་ཐལ། སངས་རྒྱས་པས་དེ་འདྲའི་གང་ཟག་གི་ངོར་དེ་འདྲའི་རྟགས་སྦྱོར་བཀོད་པའི་ཚེ་ན། ལུས་ཅན་དེ་དེ་སྒྲུབ་ཀྱི་ཕྱོགས་ཆོས་ཡིན་པའི་ཕྱིར། དེར་ཐལ། སངས་རྒྱས་པས་བྱེ་བྲག་པའི་ངོར་དེ་འདྲའི་རྟགས་སྦྱོར་བཀོད་པའི་ཚེ་ན་ལུས་ཅན་དེ་དེ་སྒྲུབ་ཀྱི་ཕྱོགས་ཆོས་གང་ཞིག །བྱེ་བྲག་པ་དེ་འབྱུང་བཞིའི་རྡུལ་ཕྲན་ལུས་ཅན་དུ་ཚད་མས་མ་གྲུབ་པའི་གང་ཟག་ཡིན་པའི་ཕྱིར། ཁ་ཅིག་ན་རེ། སངས་རྒྱས་པས་བྱེ་བྲག་པའི་ངོར་འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། རེག་བྱ་ཅན་ཡིན་པའི་ཕྱིར། ཞེས་བཀོད་པའི་ཚེ་ན་རེག་བྱ་ཅན་དེ་བྱེ་བྲག་པའི་ངོར་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་རྟགས་ཡང་དག་ཀྱང་ཡིན། དེའི་ཚེ་ན་བྱེ་བྲག་པའི་ངོར་རེག་བྱ་ཅན་དེ་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་རྟགས་ཡང་དག་ཀྱང་ཡིན་ནོ། །ཟེར་ན། དང་པོ་ལ། དེའི་ཚེ་ན་རེག་བྱ་ཅན་ཆོས་ཅན། བྱེ་བྲག་པའི་ངོར་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་རྟགས་ཡང་དག་ཡོད་པར་ཐལ། ཁྱོད་དེ་སྒྲུབ་ཀྱི་རྟགས་ཡང་དག་ཡིན་པའི་ཕྱིར། འདོད་ན། བྱེ་བྲག་པ་དེ་འབྱུང་བཞིའི་རྡུལ་ཕྲན་རྟག་མི་རྟག་ཐེ་ཚོམ་ཟ་བའི་གང་ཟག་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། བྱེ་བྲག་པ་དེ་འབྱུང་བཞིའི་རྡུལ་ཕྲན་རྟག་པར་ཁས་ལེན་པའི་གང་ཟག་ཡིན་པའི་ཕྱིར། གཞན་ཡང་། དེའི་ཚེ་ན་བྱེ་བྲག་པ་བྱེ་བྲག་པ་མ་ཡིན་པར་ཐལ། དེའི་ཚེ་ན་བྱེ་བྲག་པ་དེ་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་རྟགས་ཡང་དག་འགོད་པ་སྐབས་སུ་བབས་པའི་གང་ཟག་ཡིན་པའི་ཕྱིར། དེར་ཐལ། དེའི་ཚེ་ན་བྱེ་བྲག་པའི་ངོར་རེག་བྱ་ཅན་དེ་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་རྟགས་ཡང་དག་ཡིན་པའི་ཕྱིར། འདོད་ན། དེའི་ཚེ་ན་བྱེ་བྲག་པ་སངས་རྒྱས་པ་ཡིན་པར་ཐལ། འདོད་པའི་ཕྱིར། འདོད་ན། དེའི་ཚེ་ན་བྱེ་བྲག་པ་དེས་ལུས་ཅན་ཞེས་པའི་སྒྲ་དེ་འབྱུང་བཞིའི་རྡུལ་ཕྲན་ལ་འཇུག་པར་ཁས་ལེན་པར་ཐལ། འདོད་པའི་ཕྱིར། འདོད་མི་ནུས་ཏེ། ཊཱིཀྐ་ལས། ལུས་ཅན་ཞེས་པའི་སྒྲ་དེ་སྦྱོར་ས་རྒོལ་ཕྱི་རྒོལ་མཐུན་སྣང་དུ་མ་གྲུབ་སྟེ། ཞེས་གསུངས་པའི་ཕྱིར། གཞན་ཡང་། སངས་རྒྱས་པས་བྱེ་བྲག་པའི་ངོར་བ་སྤྱི་རྟག་དངོས་ཆོས་ཅན། དུ་མར་ཐལ། རང་གི་གསལ་བ་དུ་མ་ལ་དོན་དམ་པར་འཕྲོ་འདུ་འབྲེལ་བའི་ཕྱིར། ཞེས་པའི་ཐལ་འགྱུར་འཕང་པའི་ཚེ་ན་བྱེ་བྲག་པ་དེ་དུ་མ་མ་ཡིན་པའི་རྟགས་ཀྱིས་བ་སྤྱི་རྟག་དངོས་རང་གི་གསལ་བ་དུ་མ་ལ་དོན་དམ་པར་འཕྲོ་འདུ་མ་འབྲེལ་བར་སྒྲུབ་པའི་སྒྲུབ་བྱེད་ཡང་དག་འཕེན་པའི་ཐལ་འགྱུར་ཡང་དག་འཕེན་པ་སྐབས་སུ་བབས་པའི་གང་ཟག་ཡིན་པར་ཐལ། སངས་རྒྱས་པས་བྱེ་བྲག་པའི་ངོར་འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། རེག་བྱ་ཅན་ཡིན་པའི་ཕྱིར། ཞེས་བཀོད་པའི་ཚེ་ན་བྱེ་བྲག་པ་དེ་རེག་བྱ་ཅན་གྱི་རྟགས་ཀྱིས་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་རྟགས་ཡང་དག་འགོད་པ་སྐབས་སུ་བབས་པའི་གང་ཟག་ཡིན་པའི་ཕྱིར། འདོད་ན། དེའི་ཚེ་ན་བྱེ་བྲག་པ་དེས་དུ་མ་མ་ཡིན་ན། རང་གི་གསལ་བ་དུ་མ་ལ་དོན་དམ་པར་འཕྲོ་འདུ་མ་འབྲེལ་བའི་ཁྱབ་པ་ཁས་ལེན་པར་ཐལ། འདོད་པའི་ཕྱིར། འདོད་མི་ནུས་ཏེ། དེའི་ཚེ་ན་བྱེ་བྲག་པ་དེ་དུ་མ་མ་ཡིན་པ་དང་། རང་གི་གསལ་བ་དུ་མ་ལ་དོན་དམ་པར་འཕྲོ་འདུ་འབྲེལ་བའི་གཞི་མཐུན་ཁས་ལེན་པའི་གང་ཟག་ཡིན་པའི་ཕྱིར། དེར་ཐལ། དེའི་ཚེ་ན་དེ་འདྲའི་ཐལ་འགྱུར་དེ་བྱེ་བྲག་པའི་ཁས་བླངས་ངན་པ་རྟགས་སུ་བཀོད་ནས། བྱེ་བྲག་པ་ལ་མི་འདོད་པ་ཐལ་བར་འཕེན་པའི་ཐལ་འགྱུར་ཡིན་པའི་ཕྱིར་ཏེ། གཞན་གྱི་བཏགས་པ་ཡིས། །ཞེས་གསུངས་པའི་ཕྱིར། གཞན་ཡང་། སངས་རྒྱས་པས་བྱེ་བྲག་པའི་ངོར་འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། རེག་བྱ་ཅན་ཡིན་པའི་ཕྱིར། ཞེས་བཀོད་པའི་ཚེ་ན་བྱེ་བྲག་པ་བྱེ་བྲག་པ་ཡིན་པར་ཐལ། དེའི་ཚེ་ན་བྱེ་བྲག་པ་ཡོད་པའི་ཕྱིར། དེར་ཐལ། དེའི་ཚེ་ན་བྱེ་བྲག་པ་དེ་གང་ཟག་ཡིན་པའི་ཕྱིར། དེར་ཐལ། དེའི་ཚེ་ན་བྱེ་བྲག་པ་དེ་རེག་བྱ་ཅན་གྱི་རྟགས་ཀྱིས་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་ཕྱི་རྒོལ་ཡིན་པའི་ཕྱིར། དེར་ཐལ། དེ་སྐོར་གྱི་ཕྱི་རྒོལ་ཡང་དག་ཡིན་པའི་ཕྱིར། བྱས་པ་ལ་ཁོ་ན་རེ། དེའི་ཚེ་ན་བྱེ་བྲག་པ་དེ་རེག་བྱ་ཅན་གྱི་རྟགས་ཀྱིས་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་རྟགས་ཡང་དག་འགོད་པ་སྐབས་སུ་བབས་པའི་གང་ཟག་ཡིན་པར་ཐལ། དཔལ་ལྡན་ཆོས་གྲགས་ཀྱིས་བྱེ་བྲག་པའི་ངོར་འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། རེག་བྱ་ཅན་ཡིན་པའི་ཕྱིར། ཞེས་བཀོད་པའི་ཚེ་ན་བྱེ་བྲག་པ་དེ་དེ་སྐོར་གྱི་རྟགས་ཡང་དག་འགོད་པ་སྐབས་སུ་བབས་པའི་གང་ཟག་ཡིན་པའི་ཕྱིར། དེར་ཐལ། དེའི་ཚེ་ན་དཔལ་ལྡན་ཆོས་གྲགས་དེས་དེའི་ཚེ་ན་བྱེ་བྲག་པའི་ངོར་རེག་བྱ་ཅན་དེ་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་རྟགས་ཡང་དག་ཏུ་བཀོད་པའི་ཕྱིར། དེར་ཐལ། དེའི་ཚེ་ན་དཔལ་ལྡན་ཆོས་གྲགས་དེས་དེའི་ཚེ་ན་བྱེ་བྲག་པའི་ངོར་རེག་བྱ་ཅན་དེ་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་རྟགས་ཡང་དག་ཏུ་བཀོད་པའི་དུས་ནི་ཡོད། དེའི་ཚེ་ན་དཔལ་ལྡན་ཆོས་གྲགས་དེ་རེག་བྱ་ཅན་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་རྟགས་ཡང་དག་ཏུ་འགོད་པའི་དུས་དང་། དུས་མ་ཡིན་པ་ལ་མཁས་པའི་གང་ཟག་ཡིན་པའི་ཕྱིར་ན་མ་ཁྱབ་སྟེ། འོ་ན། སྒྲ་བྱས་པར་ཚད་མས་མ་གྲུབ་པའི་གང་ཟག་གི་ངོར་སྒྲ་ཆོས་ཅན། མི་རྟག་སྟེ། བྱས་པའི་ཕྱིར། ཞེས་བཀོད་པའི་ཚེ་ན་སྒྲ་བྱས་པར་ཚད་མས་མ་གྲུབ་པའི་གང་ཟག་དེ་བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཡང་དག་འགོད་པ་སྐབས་སུ་བབས་པའི་གང་ཟག་ཡིན་པར་ཐལ། དཔལ་ལྡན་ཆོས་གྲགས་ཀྱིས་སྒྲ་བྱས་པར་ཚད་མས་མ་གྲུབ་པའི་གང་ཟག་གི་ངོར་སྒྲ་ཆོས་ཅན། མི་རྟག་སྟེ། བྱས་པའི་ཕྱིར། ཞེས་བཀོད་པའི་ཚེ་ན་སྒྲ་བྱས་པར་ཚད་མས་མ་གྲུབ་པའི་གང་ཟག་དེ་དེ་སྐོར་གྱི་རྟགས་ཡང་དག་འགོད་པ་སྐབས་སུ་བབས་པའི་གང་ཟག་ཡིན་པའི་ཕྱིར། དེར་ཐལ། དེའི་ཚེ་ན་དཔལ་ལྡན་ཆོས་གྲགས་དེས་དེའི་ཚེ་ན་སྒྲ་བྱས་པར་ཚད་མས་མ་གྲུབ་པའི་གང་ཟག་གི་ངོར་བྱས་པ་དེ་སྒྲུབ་ཀྱི་རྟགས་ཡང་དག་ཏུ་བཀོད་པའི་ཕྱིར། དེར་ཐལ། དེའི་ཚེ་ན་དཔལ་ལྡན་ཆོས་གྲགས་དེས་དེའི་ཚེ་ན་སྒྲ་བྱས་པར་ཚད་མས་མ་གྲུབ་པའི་གང་ཟག་གི་ངོར་བྱས་པ་དེ་སྒྲུབ་ཀྱི་རྟགས་ཡང་དག་ཏུ་བཀོད་པའི་དུས་ནི་ཡོད། དེའི་ཚེ་ན་དཔལ་ལྡན་ཆོས་གྲགས་དེ་བྱས་པ་དེ་སྒྲུབ་ཀྱི་རྟགས་ཡང་དག་ཏུ་འགོད་པའི་དུས་དང་། དུས་མ་ཡིན་པ་ལ་མཁས་པའི་གང་ཟག་ཡིན་པའི་ཕྱིར། ཁྱབ་པ་ཁས། རང་རེས། སངས་རྒྱས་པས་བྱེ་བྲག་པའི་ངོར་འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། ལུས་ཅན་ཡིན་པའི་ཕྱིར། ཞེས་བཀོད་པའི་ཚེ་ན་ལུས་ཅན་དེ་འབྱུང་བཞིའི་རྡུལ་ཕྲན་མི་རྟག་པར་སྒྲུབ་པའི་ཕྱོགས་ཆོས་ཡིན། སངས་རྒྱས་པས་བྱེ་བྲག་པའི་ངོར་འབྱུང་བཞིའི་རྡུལ་ཕྲན་ཆོས་ཅན། མི་རྟག་སྟེ། རེག་བྱ་ཅན་ཡིན་པའི་ཕྱིར། ཞེས་བཀོད་པའི་ཚེ་རེག་བྱ་ཅན་དེ་ཡང་དེ་སྒྲུབ་ཀྱི་ཕྱོགས་ཆོས་ཡིན་ནོ། །བྱས་པ་ལ་ཁོ་ན་རེ། གྲངས་ཅན་གྱིས་སངས་རྒྱས་པའི་ངོར་བློ་བདེ་ཆོས་ཅན། སེམས་མེད་ཡིན་ཏེ། སྐྱེ་འཇིག་ཅན་ཡིན་པའི་ཕྱིར། ཞེས་བཀོད་པའི་ཚེ་ན་སྐྱེ་འཇིག་ཅན་དེ་བློ་བདེ་སེམས་མེད་དུ་སྒྲུབ་པའི་ཕྱོགས་ཆོས་ཡིན་པར་ཐལ། དམ་བཅའ་འཐད་པ་གང་ཞིག །སྤྱིར་སྐྱེ་འཇིག་ཅན་དེ་བློ་བདེ་སེམས་མེད་དུ་སྒྲུབ་པའི་ཕྱོགས་ཆོས་ཡིན་པའི་ཕྱིར། འདོད་མི་ནུས་ཏེ། འདིས་ནི་སེར་སྐྱ་ལ་སོགས་ཀྱི། །མི་རྟག་སོགས་ཕྱིར་ཡང་སེམས་མེད། །ཅེས་གསུངས་པའི་ཕྱིར་ན་མ་ཁྱབ་སྟེ། དེའི་ཚེ་ན་སྐྱེ་འཇིག་ཅན་དེ་དེ་སྒྲུབ་ཀྱི་རྟགས་ཡང་དག་མ་ཡིན་པ་དེ་ལུང་དེའི་དོན་ཡིན་པའི་ཕྱིར། གཞན་ཡང་། ཁ་ཅིག་ན་རེ། གཅེར་བུ་པས་སངས་རྒྱས་པའི་ངོར་ཤིང་ཆོས་ཅན། སེམས་ལྡན་ཡིན་ཏེ། ཤུན་པ་བཤུས་ན་འཆི་བའི་ཕྱིར། ཞེས་བཀོད་པའི་ཚེ་ན་ཤུན་པ་བཤུས་ན་འཆི་བ་དེ་ཤིང་སེམས་ལྡན་དུ་སྒྲུབ་པའི་ཕྱོགས་ཆོས་ཡིན་པར་ཐལ། གྲངས་ཅན་གྱིས་སངས་རྒྱས་པའི་ངོར་བློ་བདེ་ཆོས་ཅན། སེམས་མེད་ཡིན་ཏེ། སྐྱེ་འཇིག་ཅན་ཡིན་པའི་ཕྱིར། ཞེས་བཀོད་པའི་ཚེ་ན་སྐྱེ་འཇིག་ཅན་དེ་བློ་བདེ་སེམས་མེད་དུ་སྒྲུབ་པའི་ཕྱོགས་ཆོས་ཡིན་པའི་ཕྱིར་ན་མ་ཁྱབ་སྟེ། འོ་ན། གཅེར་བུ་པས་སངས་རྒྱས་པའི་ངོར་དེ་ལྟར་བཀོད་པའི་ཚེ་ན་ཤུན་པ་བཤུས་ན་འཆི་བ་དེ་ཤིང་གི་སྟེང་དུ་འགོད་ཚུལ་དང་མཐུན་པར་གྲུབ་པ་ཐལ། གྲངས་ཅན་གྱིས་སངས་རྒྱས་པའི་ངོར་དེ་ལྟར་བཀོད་པའི་ཚེ་ན་སྐྱེ་འཇིག་ཅན་དེ་བློ་བདེའི་སྟེང་དུ་འགོད་ཚུལ་དང་མཐུན་པར་གྲུབ་པའི་ཕྱིར། ཁྱབ་པ་ཁས། འདོད་ན། ཤིང་དེ་དེའི་ཚེ་ན་ཤུན་པ་བཤུས་ན་འཆི་བ་ཡིན་པར་ཐལ། འདོད་པའི་ཕྱིར། འདོད་ན། ཤིང་ཤུན་པགས་བཤུས་ན་འཆི་བར་ཐལ། འདོད་པའི་ཕྱིར། འདོད་ན། ཤིང་འཆི་བ་ཡིན་པར་ཐལ། འདོད་པའི་ཕྱིར། འདོད་ན། ཤིང་སེམས་ལྡན་ཡིན་པར་ཐལ་ལོ། །

༈ རང་ལུགས་བཞག་པ་ལ། བྱེ་བྲག་པའི་ལུགས་ཅུང་ཟད་བརྗོད་པ་དང་། སྒྲ་བཤད་པ་གཉིས། དང་པོ་ནི། སྤྱིར་བྱེ་བྲག་པ་དེས་ཤེས་བྱ་ཐམས་ཅད་ཚིག་གི་དོན་དྲུག་ཏུ་འདུས་པར་འདོད་པ་ཡིན་ལ། ཚིག་གི་དོན་དྲུག་པོ་དེ་ཡང་། རྫས། ཡོན་ཏན། ལས། སྤྱི། བྱེ་བྲག །འདུ་བ་རྣམས་ལ་བྱེད་པ་ཡིན། དེ་ཡང་ཡོན་ཏན་དོན་གཞན་གྱི་རྟེན་བྱེད་པ་དེ་རྫས་ཀྱི་མཚན་ཉིད་ཡིན། དེ་ལ་དབྱེ་ན། རྟག་པའི་རྫས་དང་། མི་རྟག་པའི་རྫས་གཉིས། དང་པོ་ནི། བདག་དང་། ཕྱོགས་དང་། དུས་དང་། ནམ་མཁའ་ལ་སོགས་པ་ལ་བྱེད། གཉིས་པ་ནི། འབྱུང་བཞིའི་རྡུལ་ཕྲན་ལ་སོགས་པ་ལ་བྱེད། ཡང་དེ་ལ་དབྱེ་ན། ཐམས་ཅད་དུ་སོང་བའི་རྫས་དང་། ཐམས་ཅད་དུ་མ་སོང་བའི་རྫས་གཉིས། དང་པོ་ནི། བདག་དང་། ཕྱོགས་དང་། དུས་དང་། ནམ་མཁའ་ལ་སོགས་པ་ལ་བྱེད། གཉིས་པ་ནི། འབྱུང་བཞིའི་རྡུལ་ཕྲན་ལ་སོགས་པ་ལ་བྱེད་ཅེས་ཟེར། རྫས་དོན་གཞན་གྱི་རྟེན་བྱེད་པ་དེ་ཡོན་ཏན་གྱི་མཚན་ཉིད། ཡོན་ཏན་དེ་ལ་ཁྱད་ཆོས་གསུམ་དང་ལྡན་པ་གཅིག་དགོས་ཏེ། སྤྱིར་རྫས་ལ་བརྟེན་པ། ཡོན་ཏན་གཉིས་པ་ལ་མི་བརྟེན་པ། འཕྲོད་པ་འདུ་བའི་རྒྱུ་བྱེད་པ་སྟེ། ཁྱད་ཆོས་གསུམ་དང་ལྡན་པ་གཅིག་དགོས་པའི་ཕྱིར། ཡོན་ཏན་དེ་ལ་དབྱེ་ན། གཟུགས། དྲི། རོ། རེག་བྱ། གྲངས། ཚད། སོ་སོ། ལྡན་པ་ལ་སོགས་པ་བཅུ་ཡོད། གཟུགས་དེ་མིག་ཤེས་ཀྱི་གཟུང་བྱ་ཡིན་པས་ས་ཆུ་མེ་གསུམ་གྱི་ཡོན་ཏན་ཡིན། དྲི་དེ་སྣའི་རྣམ་ཤེས་ཀྱི་གཟུང་བྱ་ཡིན་པས་སའི་ཡོན་ཏན་ཡིན། རོ་དེ་ལྕེའི་རྣམ་ཤེས་ཀྱི་གཟུང་བྱ་ཡིན་པས་ཆུའི་ཡོན་ཏན་ཡིན། རེག་བྱ་དེ་ལུས་ཀྱི་རྣམ་ཤེས་ཀྱི་གཟུང་བྱ་ཡིན་པས་འབྱུང་བ་བཞིའི་ཡོན་ཏན་ཡིན། གྲངས་དེ་གཅིག་དང་གཉིས་ལ་སོགས་པ་ཐ་སྙད་འདོགས་པའི་རྒྱུར་གྱུར་པའི་དངོས་པོ་ཞིག་གི་ཡོན་ཏན་ཡིན། ཚད་དེ་ཆེ་བ་དང་ཆུང་བ་ལ་སོགས་པ་ལ་ཐ་སྙད་འདོགས་པའི་རྒྱུར་གྱུར་པའི་དངོས་པོ་ཞིག་གི་ཡོན་ཏན་ཡིན་ནོ། །ཞེས་ཟེར། བྱ་བ་དོན་གཞན་གྱི་རྟེན་བྱེད་པ་ལས་ཀྱི་མཚན་ཉིད། ལས་དོན་གཞན་གྱི་རྟེན་བྱེད་པ་དེ་བྱ་བའི་མཚན་ཉིད། བྱེ་བྲག་དོན་གཞན་གྱི་རྟེན་བྱེད་པ་དེ་སྤྱིའི་མཚན་ཉིད། སྤྱི་དོན་གཞན་གྱི་རྟེན་བྱེད་པ་དེ་བྱེ་བྲག་གི་མཚན་ཉིད་ཟེར། ཐར་པ་ཐོབ་ཚུལ་ནི། གཟུགས་ལ་སོགས་པའི་ཡོན་ཏན་བཅུ་པོ་དེ་དག་བདག་ལ་འཕྲོད་པ་འདུ་བ་དེ་སྲིད་དུ་ཆོས་དང་ཆོས་མ་ཡིན་པའི་ལས་བསགས་པས་བདེ་འགྲོ་དང་ངན་འགྲོར་སྐྱེས་ནས་འཁོར་བར་འཁྱམས་པ་ཡིན་ལ། དབང་པོ་སོགས་བདག་གི་བ་སྡུག་བསྔལ་དུ་སྒོམ་པས་གཟུགས་ལ་སོགས་པའི་ཡོན་ཏན་བཅུ་པོ་དེ་དག་སྤངས་ནས་བདག་རྟག་པ་འབའ་ཞིག་ཏུ་གནས་པ་དེའི་ཚེ་ཐར་པ་ཐོབ་པ་ཡིན་ནོ། །ཞེས་བྱེ་བྲག་པ་ཟེར། གཉིས་པ་སྒྲ་བཤད་པ་ནི། འུག་པ་པ་ལ་སངས་རྒྱས་པས། །ཞེས་བྱེ་བྲག་པ་ལ་འུག་པ་པ་ཞེས་བརྗོད་པའི་རྒྱུ་མཚན་གང་ཞེ་ན། དེ་ལྟར་བརྗོད་པའི་རྒྱུ་མཚན་ཡོད་དེ། འུག་པའི་རྟུལ་ཞུགས་འཛིན་པའི་རྒྱུ་མཚན་གྱིས་དེ་ལྟར་དུ་བརྗོད་པའི་ཕྱིར། འོ་ན། རིན་ཆེན་ཕྲེང་བ་ལས། འཇིག་རྟེན་གྲངས་ཅན་འུག་ཕྲུག་དང་། །གོས་མེད་བཅས་ལ་གལ་ཏེ་ཞིག །ཅེས་བྱེ་བྲག་པ་ལ་འུག་ཕྲུག་པ། ཞེས་བརྗོད་པའི་རྒྱུ་མཚན་གང་ཞེ་ན། དེ་ལྟར་བརྗོད་པའི་རྒྱུ་མཚན་ཡོད་དེ། བྱེ་བྲག་པ་དེ་བདེ་བྱེད་པའམ་དབང་ཕྱུག་པའི་སློབ་མ་ཡིན་པའི་རྒྱུ་མཚན་གྱིས་དེ་ལྟར་དུ་བརྗོད་པའི་ཕྱིར། །

ལུགས་བྱུང་གི་སྒོ་ནས་ཐུབ་པ་ཚད་མར་སྒྲུབ་ཚུལ།

རྒྱུ་བསམ་སྦྱོར་གཉིས་ལས་འབྲས་བུ་དོན་གཉིས་གྲུབ་ཚུལ།

༈ སྒྲུབ་བྱེད་ཐུགས་རྗེ་གོམས་ལས་དེ། ཞེས་པ་འདི་གང་ལས་འཕྲོས་ན། ཐུབ་པ་སངས་རྒྱས་བཅོམ་ལྡན་འདས་ཚད་མའི་སྐྱེས་བུར་སྒྲུབ་ཚུལ་དེ་ལ། ལུགས་འབྱུང་གི་སྒོ་ནས་སྒྲུབ་ཚུལ་དང་། ལུགས་ལྡོག་གི་སྒོ་ནས་སྒྲུབ་ཚུལ་གཉིས། དང་པོ་ལ། རྒྱུ་བསམ་པ་ཕུན་ཚོགས་ཀྱི་སྒོ་ནས་བསྒྲུབ་པ། སྦྱོར་བ་ཕུན་ཚོགས་ཀྱི་སྒོ་ནས་བསྒྲུབ་པ། བདེར་གཤེགས་ཀྱི་སྒོ་ནས་བསྒྲུབ་པ། སྐྱོབ་པའི་སྒོ་ནས་བསྒྲུབ་པ་དང་བཞི། དང་པོ་འཆད་པར་བྱེད་པ་ལ་གཞུང་འདི་བྱུང་། ངག་དོན་ནི། ཐུབ་པ་སངས་རྒྱས་བཅོམ་ལྡན་འདས་ཆོས་ཅན། ཚད་མའི་སྐྱེས་བུ་ཡིན་ཏེ། རང་རྒྱུ་བསམ་པ་ཕུན་ཚོགས་ཉམས་སུ་བླངས་པ་བརྟེན་ནས་ཚད་མའི་སྐྱེས་བུ་མཐར་ཐུག་ཏུ་འཁྲུངས་པའི་ཕྱིར། །

༈ མཐའ་དཔྱད་པ་ལ་ཁ་ཅིག་ན་རེ། སྙིང་རྗེ་ཡིན་ན་སྙིང་རྗེ་ཚད་མེད་ཡིན་པས་ཁྱབ་ཟེར་ན། བསམ་གཏན་གྱི་དངོས་གཞི་སྙོམས་འཇུག་མ་ཐོབ་པའི་སོ་སྐྱེའི་རྒྱུད་ཀྱི་སྙིང་རྗེ་ཆོས་ཅན། དེར་ཐལ། དེའི་ཕྱིར། འདོད་ན། རང་གི་བདག་རྐྱེན་དུ་གྱུར་པའི་བསམ་གཏན་གྱི་དངོས་གཞིའི་སྙོམས་འཇུག་ལས་བྱུང་བར་ཐལ། འདོད་པའི་ཕྱིར། ཁྱབ་སྟེ། མངོན་པ་ཀུན་བཏུས་ལས། དག་པའི་བསམ་གཏན་བཞི་ལ་བརྟེན་ནས་ཚད་མེད་པ་རྣམས་མངོན་པར་གྲུབ་བོ། །ཞེས་གསུངས་པའི་ཕྱིར། འདོད་ན། དེ་འདྲའི་སོ་སྐྱེ་དེས་བསམ་གཏན་གྱི་དངོས་གཞིའི་སྙོམས་འཇུག་ཐོབ་པར་ཐལ། དེའི་རྒྱུད་ཀྱི་སྙིང་རྗེ་དེ་རང་གི་བདག་རྐྱེན་དུ་གྱུར་པའི་བསམ་གཏན་གྱི་དངོས་གཞིའི་སྙོམས་འཇུག་ལས་བྱུང་བའི་ཕྱིར། ཁ་ཅིག་ན་རེ། སྙིང་རྗེ་ཆེན་པོ་ཡིན་ན་སྙིང་རྗེ་ཚད་མེད་ཡིན་པས་ཁྱབ། སྙིང་རྗེ་ཚད་མེད་ཡིན་ན་སྙིང་རྗེ་ཆེན་པོ་ཡིན་པས་ཁྱབ་ཟེར་ན། ཕྱི་རོལ་པའི་རྒྱུད་ཀྱི་སྙིང་རྗེ་ཚད་མེད་ཆོས་ཅན། སྙིང་རྗེ་ཆེན་པོ་ཡིན་པར་ཐལ། སྙིང་རྗེ་ཚད་མེད་ཡིན་པའི་ཕྱིར། མ་གྲུབ་ན། དེ་དེ་ཡིན་པར་ཐལ། དེ་ཡོད་པའི་ཕྱིར། དེར་ཐལ། མངོན་པ་ཀུན་བཏུས་ལས། ཕྱི་རོལ་པའམ། ཉན་ཐོས་སམ། བྱང་ཆུབ་སེམས་དཔའ་ཡང་རུང་། ཞེས་གསུངས་པའི་ཕྱིར། རྩ་བར་འདོད་ན། དེ་ཆོས་ཅན། སེམས་ཅན་ཐམས་ཅད་སྡུག་བསྔལ་དང་བྲལ་འདོད་ཀྱི་རྣམ་པ་ཅན་གྱི་བློ་ཡིན་པར་ཐལ། འདོད་པའི་ཕྱིར། གཞན་ཡང་། ཉན་ཐོས་དགྲ་བཅོམ་པའི་རྒྱུད་ཀྱི་སྙིང་རྗེ་ཚད་མེད་ཆོས་ཅན། སྙིང་རྗེ་ཆེན་པོ་ཡིན་པར་ཐལ། སྙིང་རྗེ་ཚད་མེད་ཡིན་པའི་ཕྱིར། མ་གྲུབ་ན། དེ་དེ་ཡིན་པར་ཐལ། དེ་ཡོད་པའི་ཕྱིར། རྟགས་གྲུབ་སྟེ། མངོན་པ་ཀུན་བཏུས་ལས། ཉན་ཐོས་སམ། ཞེས་གསུངས་པའི་ཕྱིར། འདོད་མི་ནུས་ཏེ། སྙིང་རྗེ་དམན་པ་ཡིན་པའི་ཕྱིར། མ་གྲུབ་ན། དེ་སྙིང་རྗེ་དམན་པ་ཡིན་པར་ཐལ། སྙིང་རྗེ་དམན་པ་ཉིད་ཕྱིར་དང་། །ཞེས་གསུངས་པའི་ཕྱིར། གཞན་ཡང་། སྙིང་རྗེ་ཆེན་པོ་གསར་དུ་སྐྱེ་བའི་རྟེན་གྱི་གང་ཟག་ཡིན་ན་སྙིང་རྗེ་ཚད་མེད་གསར་དུ་སྐྱེ་བའི་རྟེན་གྱི་གང་ཟག་ཡིན་དགོས་པར་ཐལ། སྙིང་རྗེ་ཆེན་པོ་ཡིན་ན་སྙིང་རྗེ་ཚད་མེད་ཡིན་དགོས་པའི་ཕྱིར། འདོད་ན། ངན་སོང་གི་རྟེན་ལ་སྙིང་རྗེ་ཚད་མེད་གསར་དུ་སྐྱེ་བ་ཡོད་པར་ཐལ། དེའི་རྟེན་ལ་སྙིང་རྗེ་ཆེན་པོ་གསར་དུ་སྐྱེ་བ་ཡོད་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེའི་རྟེན་ལ་ཐེག་ཆེན་སེམས་བསྐྱེད་གསར་དུ་སྐྱེ་བ་ཡོད་པའི་ཕྱིར། འདོད་ན། ངན་སོང་གི་རྟེན་ལ་བསམ་གཏན་གྱི་དངོས་གཞིའི་སྙོམས་འཇུག་གསར་དུ་སྐྱེ་བ་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། ངན་སོང་པ་རྣམས་བསམ་གཏན་གྱི་དངོས་གཞིའི་སྙོམས་འཇུག་གསར་དུ་སྐྱེ་བའི་གེགས་རྣམ་སྨིན་གྱི་སྒྲིབ་པ་ཤས་ཆེན་པོ་དང་ལྡན་པའི་ཕྱིར། །

༈ རང་ལུགས་བཞག་པ་ལ། རྒྱུ་བསམ་སྦྱོར་ཕུན་ཚོགས་ངོས་བཟུང་བ་དང་། འབྲས་བུ་དོན་གཉིས་ཕུན་ཚོགས་ངོས་བཟུང་བ་གཉིས། དང་པོ་ལ། རྒྱུ་བསམ་པ་ཕུན་ཚོགས་ལ་བརྟེན་ནས་རྣམ་མཁྱེན་དུ་བགྲོད་པའི་ཚུལ་བཤད་པ་དང་། རྒྱུ་བསམ་པ་ཕུན་ཚོགས་དངོས་བཤད་པ་གཉིས། དང་པོ་ནི། དེ་ལྟར་བགྲོད་པའི་ཚུལ་བཞག་ཏུ་ཡོད་དེ། ཐར་འདོད་རྣམས་ཀྱིས་དང་པོར་བསྟེན་བྱ་དགེ་བའི་བཤེས་གཉེན་མཚན་ཉིད་དང་ལྡན་པ་གཅིག་བསྟེན། དེ་ལ་བརྟེན་ནས་སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རིམ་པ་ལ་བློ་ལེགས་པར་སྦྱངས། དེ་ལ་བརྟེན་ནས་སེམས་ཅན་ཐམས་ཅད་མར་ཤེས་པ། དྲིན་དྲན་པ། དྲིན་གཟོ་བའི་བློ་གསུམ་བསྐྱེད། དེ་ལ་བརྟེན་ནས་སེམས་ཅན་ཐམས་ཅད་ལ་ཡིད་འོང་གི་རྣམ་པ་ཅན་གྱི་བྱམས་པ་བསྐྱེད། དེ་ལ་བརྟེན་ནས་སེམས་ཅན་ཐམས་ཅད་སྡུག་བསྔལ་དང་བྲལ་འདོད་ཀྱི་རྣམ་པ་ཅན་གྱི་སྙིང་རྗེ་ཆེན་པོ་བསྐྱེད། དེ་ལ་བརྟེན་ནས་སེམས་ཅན་ཐམས་ཅད་སྡུག་བསྔལ་ལས་བདག་གིས་བསྒྲལ་བར་བྱའོ། །སྙམ་པའི་བློའི་ཁུར་ལེགས་པར་འཁྱེར་བའི་ལྷག་བསམ་རྣམ་དག་བསྐྱེད། དེ་ལ་བརྟེན་ནས་སེམས་ཅན་ཐམས་ཅད་སྡུག་བསྔལ་ལས་སྒྲོལ་བའི་ཕྱིར་དུ་རྫོགས་པའི་སངས་རྒྱས་ཐོབ་པར་བྱའོ། །སྙམ་པའི་བྱང་ཆུབ་ཀྱི་སེམས་བསྐྱེད། དེ་ལ་བརྟེན་ནས་རྣམ་མཁྱེན་དུ་བགྲོད་པར་བྱེད་པ་ཡིན་པའི་ཕྱིར། གཉིས་པ་རྒྱུ་བསམ་པ་ཕུན་ཚོགས་དངོས་བཤད་པ་ནི། བྱང་སེམས་ཀྱི་རྒྱུད་ཀྱི་བྱམས་སྙིང་རྗེ་བྱང་ཆུབ་ཀྱི་སེམས་དང་ལྷག་བསམ་རྣམ་དག་ལ་སོགས་པ་རྒྱུ་བསམ་པ་ཕུན་ཚོགས་ཡིན་ལ། འདི་ལ་ཚད་མེད་བཞི་བཤད་པ། སྙིང་རྗེ་ཆེན་པོ་བཤད་པ། ལྷག་བསམ་རྣམ་དག་བཤད་པ། ཐེག་ཆེན་སེམས་བསྐྱེད་བཤད་པ་དང་བཞི། དང་པོ་ནི། ཚད་མེད་བཞིའི་ནང་ཚན་གང་ཞིག །རང་གི་བདག་རྐྱེན་དུ་གྱུར་པའི་བསམ་གཏན་གྱི་དངོས་གཞི་སྙོམས་འཇུག་ལ་བརྟེན་ནས་བྱུང་ཞིང་རང་གི་དམིགས་ཡུལ་དུ་གྱུར་པའི་སེམས་ཅན་ཚད་མེད་པ་བདེ་བ་དང་འཕྲད་པར་འདོད་པའི་རྣམ་པ་ཅན་གྱི་རབ་ཏུ་ཕྱེ་བའི་སེམས་བྱུང་དེ་བྱམས་པ་ཚད་མེད་ཀྱི་ངོ་བོ་ཡིན། དེ་གང་ཞིག། རང་གི་བདག་རྐྱེན་དུ་གྱུར་པའི་བསམ་གཏན་གྱི་དངོས་གཞིའི་སྙོམས་འཇུག་ལ་བརྟེན་ནས་བྱུང་ཞིང་རང་གི་དམིགས་ཡུལ་དུ་གྱུར་པའི་སེམས་ཅན་ཚད་མེད་པ་སྡུག་བསྔལ་དང་བྲལ་བར་འདོད་པའི་རྣམ་པ་ཅན་གྱིས་རབ་ཏུ་ཕྱེ་བའི་སེམས་བྱུང་དེ་སྙིང་རྗེ་ཚད་མེད་ཀྱི་ངོ་བོ་ཡིན། དེ་གང་ཞིག །རང་གི་བདག་རྐྱེན་དུ་གྱུར་པའི་བསམ་གཏན་གྱི་དངོས་གཞིའི་སྙོམས་འཇུག་ལ་བརྟེན་ནས་བྱུང་ཞིང་རང་གི་དམིགས་ཡུལ་དུ་གྱུར་པའི་སེམས་ཅན་ཚད་མེད་པ་བདེ་བ་དང་མི་འབྲལ་བར་འདོད་པའི་རྣམ་པ་ཅན་གྱི་རབ་ཏུ་ཕྱེ་བའི་སེམས་བྱུང་དེ་དགའ་བ་ཚད་མེད་ཀྱི་ངོ་བོ་ཡིན། དེ་གང་ཞིག །རང་གི་བདག་རྐྱེན་དུ་གྱུར་པའི་བསམ་གཏན་གྱི་དངོས་གཞིའི་སྙོམས་འཇུག་ལ་བརྟེན་ནས་བྱུང་ཞིང་རང་གི་དམིགས་ཡུལ་དུ་གྱུར་པའི་སེམས་ཅན་ཚད་མེད་པ་ལ་ཕན་འདོགས་པར་འདོད་པའི་རྣམ་པ་ཅན་གྱི་རབ་ཏུ་ཕྱེ་བའི་སེམས་བྱུང་དེ་བཏང་སྙོམས་ཚད་མེད་ཀྱི་ངོ་བོ་ཡིན། གཉིས་པ་སྙིང་རྗེ་ཆེན་པོ་བཤད་པ་ནི། སྙིང་རྗེ་ཆེན་པོ་དང་ལྷག་བསམ་རྣམ་དག་གང་རུང་ཡང་ཡིན། སེམས་ཅན་མཐའ་དག་སྡུག་བསྔལ་དང་བྲལ་བར་འདོད་པའི་རྣམ་པ་ཅན་གྱི་རབ་ཏུ་ཕྱེ་བའི་སེམས་བྱུང་ཡང་ཡིན་པའི་གཞི་མཐུན་པར་དམིགས་པ་དེ་སྙིང་རྗེ་ཆེན་པོའི་ངོ་བོ་ཡིན་ལ། འདི་ལ་དབྱེ་ན། སེམས་ཅན་ཙམ་ལ་དམིགས་པའི་སྙིང་རྗེ་ཆེན་པོ། ཆོས་ལ་དམིགས་པའི་སྙིང་རྗེ་ཆེན་པོ། དམིགས་མེད་ལ་དམིགས་པའི་སྙིང་རྗེ་ཆེན་པོ་དང་གསུམ། འདི་གསུམ་གྱི་ཁྱད་པར་བཤད་པ་ལ། སེམས་ཙམ་པའི་ལུགས་དང་། མདོ་སྡེ་པའི་ལུགས་གཉིས། དང་པོ་འཆད་པ་ལ། ཚིག་ལས་ཆགས་ཅན་ལ་སོགས་བཞིན། །ཞེས་པའི་ཐད་ཀྱི་ཊཱིཀྐ་ལས། བྱམས་པ་དང་སྙིང་རྗེ་སོགས་ནི་རྣམ་པ་གསུམ་སྟེ། སེམས་ཅན་ལ་དམིགས་པ་དང་། ཆོས་ལ་དམིགས་པ་དང་། དམིགས་པ་མེད་པ་ལ་དམིགས་པའོ། །དང་པོ་ནི། གང་གིས་ཀྱང་ཁྱད་པར་དུ་མ་བྱས་པར་སེམས་ཅན་ཙམ་ལ་དམིགས་ནས་བདེ་བ་དང་འཕྲད་པ་དང་། སྡུག་བསྔལ་དང་བྲལ་བར་འདོད་པ་དང་། གཉིས་པ་ནི། གང་ཟག་གི་བདག་དང་བྲལ་བར་རྟོགས་པའི་ཤེས་རབ་ཀྱིས་ཟིན་པའི་ངང་ནས་སེམས་ཅན་ལ་དམིགས་པ་དང་། གསུམ་པ་ནི། གཟུང་འཛིན་རྫས་གཞན་གྱིས་སྟོང་བཞིན་དུ་དེར་ཞེན་པའི་སེམས་ཅན་འདི་དག་ནི་སྙམ་དུ་དམིགས་ནས་རྣམ་པ་སྔར་ལྟར་རོ། །ཞེས་གསུངས་ཤིང་། འདིའི་དོན་ཡང་སེམས་ཅན་མི་རྟག་པར་ཚད་མས་མ་ངེས་པའི་གང་ཟག་གི་རྒྱུད་ཀྱི་མི་རྟག་པ་དང་གང་ཟག་གི་བདག་མེད་ཀྱིས་ཁྱད་པར་དུ་མ་བྱས་ཤིང་། རང་གི་དམིགས་ཡུལ་དུ་གྱུར་པའི་སྡུག་བསྔལ་གྱིས་མནར་བའི་སེམས་ཅན་ཙམ་ལ་དམིགས་ནས་སྡུག་བསྔལ་དང་བྲལ་བར་འདོད་པའི་རྣམ་པ་ཅན་གྱི་སྙིང་རྗེ་དེ་སེམས་ཅན་ཙམ་ལ་དམིགས་པའི་སྙིང་རྗེ་ཆེན་པོར་འཇོག །སེམས་ཅན་མི་རྟག་པར་ཚད་མས་ངེས་པའི་གང་ཟག་གི་རྒྱུད་ཀྱི་མི་རྟག་པས་ཁྱད་པར་དུ་བྱས་པའི་སེམས་ཅན་ལ་དམིགས་ནས་སྡུག་བསྔལ་དང་བྲལ་བར་འདོད་པའི་རྣམ་པ་ཅན་གྱི་སྙིང་རྗེ་དེ་ཆོས་ལ་དམིགས་པའི་སྙིང་རྗེར་འཇོག །སེམས་ཅན་གང་ཟག་གི་བདག་མེད་དུ་ཚད་མས་ངེས་པའི་གང་ཟག་གི་རྒྱུད་ཀྱི་གང་ཟག་གི་བདག་མེད་ཀྱིས་ཁྱད་པར་དུ་བྱས་པའི་སེམས་ཅན་ལ་དམིགས་ནས་སྡུག་བསྔལ་དང་བྲལ་བར་འདོད་པའི་རྣམ་པ་ཅན་གྱི་སྙིང་རྗེ་ཡང་ཆོས་ལ་དམིགས་པའི་སྙིང་རྗེ་ཡིན་ནོ། །སེམས་ཅན་ཆོས་ཀྱི་བདག་མེད་དུ་རྟོགས་པའི་གང་ཟག་གི་རྒྱུད་ཀྱི་གཟུགས་དང་གཟུགས་འཛིན་ཚད་མ་རྫས་གཞན་གྱིས་སྟོང་པའི་ཁྱད་པར་དུ་བྱས་པའི་སེམས་ཅན་ལ་དམིགས་ནས་སྡུག་བསྔལ་དང་བྲལ་བར་འདོད་པའི་རྣམ་པ་ཅན་གྱི་སྙིང་རྗེ་དེ་དམིགས་མེད་ལ་དམིགས་པའི་སྙིང་རྗེར་འཇོག་པ་ཡིན་ནོ། །གཉིས་པ་མདོ་སྡེ་པའི་ལུགས་ནི། དང་པོའི་ཚད་གཞི་འཛིན་ཚུལ་སྔར་དང་འདྲ། སེམས་ཅན་མི་རྟག་པར་ཚད་མས་ངེས་པའི་གང་ཟག་གི་རྒྱུད་ཀྱི་མི་རྟག་པས་ཁྱད་པར་དུ་བྱས་པའི་སེམས་ཅན་ལ་དམིགས་ནས་སྡུག་བསྔལ་དང་བྲལ་བར་འདོད་པའི་རྣམ་པ་ཅན་གྱི་སྙིང་རྗེ་དེ་ཆོས་ལ་དམིགས་པའི་སྙིང་རྗེར་འཇོག །སེམས་ཅན་གང་ཟག་གི་བདག་མེད་དུ་ཚད་མས་ངེས་པའི་གང་ཟག་གི་རྒྱུད་ཀྱི་གང་ཟག་གི་བདག་མེད་ཀྱིས་ཁྱད་པར་དུ་བྱས་པའི་སེམས་ཅན་ལ་དམིགས་ནས་སྡུག་བསྔལ་དང་བྲལ་བར་འདོད་པའི་རྣམ་པ་ཅན་གྱི་སྙིང་རྗེ་དེ། དམིགས་མེད་ལ་དམིགས་པའི་སྙིང་རྗེར་འཇོག་པ་ཡིན་ནོ། །ལྷག་བསམ་རྣམ་དག་དང་སྙིང་རྗེ་ཆེན་པོ་གང་རུང་ཡང་ཡིན། སེམས་ཅན་མཐའ་དག་བདག་གིས་སྡུག་བསྔལ་ལས་སྒྲལ་བར་བྱའོ། །སྙམ་པའི་བློའི་ཁུར་ལེགས་པར་འཁྱེར་བའི་རྣམ་པ་ཅན་གྱི་སེམས་བྱུང་ཡང་ཡིན་པའི་གཞི་མཐུན་པར་དམིགས་པ་དེ་ལྷག་བསམ་རྣམ་དག་གི་ངོ་བོ་ཡིན་ལ། རང་གི་གྲོགས་སུ་གྱུར་པའི་གཞན་དོན་དུ་རྫོགས་བྱང་ཐོབ་འདོད་ཀྱི་འདུན་པ་དང་མཚུངས་ལྡན་དུ་བྱུང་ཞིང་། ཐེག་ཆེན་ལམ་གྱི་འཇུག་སྒོའི་རིགས་སུ་གནས་པའི་ཐེག་ཆེན་གཙོ་བོའི་ཡིད་ཀྱི་རྣམ་རིག་དེ་ཀུན་རྫོབ་སེམས་བསྐྱེད་ཀྱི་ངོ་བོ་ཡིན། དེ་དང་ཐེག་ཆེན་སེམས་བསྐྱེད་དོན་གཅིག །གཉིས་པ་རྒྱུ་སྦྱོར་བ་ཕུན་ཚོགས་ངོས་གཟུང་བ་ནི། བྱང་སེམས་ཀྱི་རྒྱུད་ཀྱི་གང་ཟག་གི་བདག་མེད་རྟོགས་པའི་ཤེས་རབ་དང་ཕ་རོལ་ཏུ་ཕྱིན་པ་དྲུག་གི་ཉམས་ལེན་ལྟ་བུ་དེ་རྒྱུ་སྦྱོར་བ་ཕུན་ཚོགས་ཡིན་ལ། སྦྱིན་པ་སོགས་དྲུག་སོ་སོའི་ངོ་བོ་ཡང་སྦྱིན་སོགས་དྲུག་གི་ནང་ཚན་གང་ཞིག། རང་སྟོབས་ཀྱིས་གཏོང་བའི་སེམས་བྱུང་དུ་དམིགས་པ་དེ་དེའི་ནང་ཚན་དུ་གྱུར་པའི་སྦྱིན་པའི་ངོ་བོ་ཡིན། དེ་གང་ཞིག །རང་སྟོབས་ཀྱིས་བསྲུང་བའི་སེམས་བྱུང་དུ་དམིགས་པ་དེ་དེའི་ནང་ཚན་དུ་གྱུར་པའི་ཚུལ་ཁྲིམས་ཀྱི་ངོ་བོ་ཡིན། དེ་གང་ཞིག །རང་སྟོབས་ཀྱིས་མི་ཁྲོ་བའི་སེམས་བྱུང་དུ་དམིགས་པ་དེ་དེའི་ནང་ཚན་དུ་གྱུར་པའི་བཟོད་པའི་ངོ་བོ་ཡིན། དེ་གང་ཞིག །རང་སྟོབས་ཀྱིས་དགེ་བ་ལ་སྤྲོ་བའི་སེམས་བྱུང་དུ་དམིགས་པ་དེ་དེའི་ནང་ཚན་དུ་གྱུར་པའི་བརྩོན་འགྲུས་ཀྱི་ངོ་བོ་ཡིན། དེ་གང་ཞིག །རང་སྟོབས་ཀྱིས་དགེ་བ་ལ་སེམས་རྩེ་གཅིག་པའི་ཏིང་ངེ་འཛིན་དེ་དེའི་ནང་ཚན་དུ་གྱུར་པའི་བསམ་གཏན་གྱི་ངོ་བོ་ཡིན། དེ་གང་ཞིག །རང་སྟོབས་ཀྱིས་ཆོས་རབ་ཏུ་རྣམ་པར་འབྱེད་པའི་སེམས་བྱུང་དུ་དམིགས་པ་དེ་དེའི་ནང་ཚན་དུ་གྱུར་པའི་ཤེས་རབ་ཀྱི་ངོ་བོ་ཡིན། དེ་ལྟར་ན་སྦྱིན་སོགས་དྲུག་འགལ་ཡང་སྦྱིན་སོགས་ཕར་ཕྱིན་དྲུག་མི་འགལ་ཏེ། ཕར་ཕྱིན་དྲུག་དང་རྣམ་མཁྱེན་ཡིན་ཁྱབ་མཉམ་ཡིན་པའི་ཕྱིར། གཉིས་པ་འབྲས་བུ་དོན་གཉིས་ཕུན་ཚོགས་ངོས་བཟུང་བ་ལ། རང་དོན་ཕུན་ཚོགས་ངོས་བཟུང་བ་དང་། གཞན་དོན་ཕུན་ཚོགས་ངོས་བཟུང་བ་གཉིས། དང་པོ་ལ། རང་དོན་སྤང་པ་ཕུན་ཚོགས་ངོས་བཟུང་བ་དང་། རང་དོན་རྟོགས་པ་ཕུན་ཚོགས་ངོས་བཟུང་བ་གཉིས། དང་པོ་ནི། སྡུག་ཀུན་གཉིས་ལེགས་པར་སྤངས་པ། མ་ལུས་པར་སྤངས་པ། སླར་མི་ལྡོག་པར་སྤངས་པའི་སྤང་པ་མཐར་ཐུག་ལྟ་བུ་ལ་བྱེད། གཉིས་པ་ནི། དེ་ཁོ་ན་ཉིད་མཁྱེན་པ། མཁྱེན་པ་བརྟན་པ། མ་ལུས་པར་མཁྱེན་པའི་ཁྱད་པར་གསུམ་ལྡན་གྱི་མཁྱེན་པ་མཐར་ཐུག་ལྟ་བུ་ལ་བྱེད། གཞན་དོན་ཕུན་ཚོགས་ནི་གཟུགས་སྐུ་གཉིས་ལྟ་བུ་ལ་བྱེད་དོ། །

སྐྱེ་བ་སྔ་ཕྱི་སྒྲུབ་བྱེད་ཀྱི་རིགས་པ་བཤད་པ།

༈ སྐྱེ་བ་ཡོངས་སུ་ལེན་པ་ན། །འབྱུང་རྔུབ་དབང་པོ་བློ་དག་ནི། །ཞེས་སོགས་རྐང་པ་བཞི་གང་ལས་འཕྲོས་ན། སྒྲུབ་བྱེད་ཐུགས་རྗེ་གོམས་ལས་དེ། །ཞེས་པའི་སྐབས་སུ་ཐུབ་པ་སངས་རྒྱས་བཅོམ་ལྡན་འདས་དེ་སྐྱེ་བ་སྔ་མ་ནས་སྙིང་རྗེ་ཆེན་པོ་གོམས་པ་མཐར་ཕྱིན་པ་ལ་བརྟེན་ནས་ཚད་མའི་སྐྱེས་བུར་འཁྲུངས་པར་བསྟན་པ་ལ། རྒྱང་འཕེན་པ་ན་རེ། དེ་མི་འཐད་པར་ཐལ། སྐྱེ་བ་སྔ་ཕྱི་མེད་པའི་ཕྱིར་ཏེ། སྐྱེས་བུའི་ལུས་ཞིག་པ་ན་སེམས་ཀྱང་ཞིག་པའི་ཕྱིར་ཏེ། སྐྱེས་བུའི་སེམས་དེ་སྐྱེས་བུའི་ལུས་ལ་བརྟེན་པའི་ཕྱིར། ཞེས་པའི་འདོད་པ་བརྗོད་པར་བྱེད་པ་ལ། བློ་ནི་ལུས་ལ་བརྟེན་པའི་ཕྱིར། །གོམས་པས་གྲུབ་པ་མེད་ཅེ་ན། །ཞེས་པ་འདི་བྱུང་། རྒྱང་འཕེན་གྱིས་སྐྱེ་བ་སྔ་ཕྱི་མེད་པར་དམ་བཅས་པའི་དམ་བཅའི་ཞེན་དོན་འགོག་བྱེད་ཀྱི་རིགས་པ་མདོར་བསྟན་གྱི་ཚུལ་གྱིས་འཆད་པར་བྱེད་པ་ལ། མ་ཡིན་རྟེན་ནི་བཀག་ཕྱིར་རོ། །ཞེས་པ་འདི་བྱུང་། དེ་རྒྱས་པར་འཆད་པར་བྱེད་པ་ལ། སྐྱེ་བ་ཡོངས་སུ་ལེན་པ་ན། །ཞེས་པ་ནས། དེ་འདྲའི་སྒྲུབ་བྱེད་ལྷག་ལྡན་འདོད། །ཅེས་པའི་བར་བྱུང་། འདི་ལ་སྐྱེ་བ་སྔ་མ་སྒྲུབ་བྱེད་ཀྱི་རིགས་པ་བཤད་པ། ཕྱི་མ་སྒྲུབ་བྱེད་ཀྱི་རིགས་པ་བཤད་པ། སྐྱེ་བ་སྔ་ཕྱི་མེད་པ་འགོག་བྱེད་ཀྱི་རིགས་པ་བཤད་པ་དང་གསུམ། དང་པོ་འཆད་པར་བྱེད་པ་ལ། སྐྱེ་བ་ཡོངས་སུ་ལེན་པ་ན། །ཞེས་པ་ནས། ཧ་ཅང་ཐལ་ཕྱིར། ཞེས་པའི་བར་བྱུང་། གཉིས་པ་འཆད་པར་བྱེད་པ་ལ། མཚམས་སྦྱོར་བར། ཞེས་པ་ནས། ཐམས་ཅད་ཚེ་ན་མཐོང་བ་ཉིད། །ཅེས་པའི་བར་བྱུང་། གསུམ་པ་འཆད་པར་བྱེད་པ་ལ། ཐ་མའི་སེམས་ནི་སེམས་གཞན་དང་། །མཚམས་སྦྱོར་བ་ལ་འགལ་ཅི་ཡོད། །ཅེས་པ་འདི་བྱུང་། །

༈ མཐའ་དཔྱད་པ་ལ་ཁ་ཅིག་ན་རེ། བྱིས་པ་སྐྱེས་མ་ཐག་པའི་རིག་པ་ཆོས་ཅན། རང་གི་རྒྱུར་གྱུར་པའི་རིག་པ་སྔ་མ་སྔོན་དུ་སོང་བ་ཡིན་ཏེ། རིག་པ་ཡིན་པའི་ཕྱིར། ཞེས་པའི་རིགས་པ་འདི་དང་། རྒན་པོ་འཆི་ཁ་མའི་རིག་པ་ཆོས་ཅན། རང་གི་འབྲས་བུར་གྱུར་པའི་རིག་པ་ཕྱི་མ་མཚམས་སྦྱོར་བ་ཡིན་ཏེ། རིག་པ་ཡིན་པའི་ཕྱིར། ཞེས་པའི་རིགས་པ་འདི་གཉིས་སྐྱེ་བ་སྔ་ཕྱི་སྒྲུབ་བྱེད་ཀྱི་རིགས་པ་ཡིན་ནོ། །ཟེར་ན། རང་གི་རྒྱུར་གྱུར་པའི་རིག་པ་སྔ་མ་སྔོན་དུ་སོང་ན། རང་གི་ཉེར་ལེན་དུ་གྱུར་པའི་རིག་པ་སྔ་མ་སྔོན་དུ་སོང་བའི་ཁྱབ་པ་དང་། རང་འབྲས་རིག་པ་ཕྱི་མ་སྐྱེད་བྱེད་ཡིན་ན་རང་གི་ཉེར་འབྲས་སུ་གྱུར་པའི་རིག་པ་སྐྱེད་བྱེད་ཡིན་པས་ཁྱབ་པ་གཉིས་ཀ་ཡོད་པར་ཐལ། དམ་བཅའ་འཐད་པ་གང་ཞིག །བྱིས་པ་སྐྱེས་མ་ཐག་པའི་རིག་པ་ཆོས་ཅན། རང་གི་ཉེར་ལེན་དུ་གྱུར་པའི་རིག་པ་སྔ་མ་སྔོན་དུ་སོང་བ་ཡིན་ཏེ། རིག་པ་ཡིན་པའི་ཕྱིར། ཞེས་པའི་རིགས་པ་འདི་དང་། རྒན་པོ་འཆི་ཁ་མའི་རིག་པ་ཆོས་ཅན། རང་གི་ཉེར་འབྲས་སུ་གྱུར་པའི་རིག་པ་ཕྱི་མ་མཚམས་སྦྱོར་བ་ཡིན་ཏེ། རིག་པ་ཡིན་པའི་ཕྱིར། ཞེས་པའི་རིགས་པ་འདི་གཉིས་སྐྱེ་བ་སྔ་ཕྱི་སྒྲུབ་བྱེད་ཀྱི་རིགས་པ་ཡང་དག་ཡིན་པའི་ཕྱིར། འདོད་ན། གཟུགས་ཆོས་ཅན། ཁྱབ་པ་དང་པོ་ལ་དེར་ཐལ། དེའི་ཕྱིར། འདོད་མི་ནུས་ཏེ། ཁྱོད་ཀྱི་ཉེར་ལེན་དུ་གྱུར་པའི་རིག་པ་མེད་པའི་ཕྱིར། ཁྱབ་པ་གཉིས་པ་ལ་ཡང་། གཟུགས་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། ཁྱོད་ཀྱིས་ཉེར་ལེན་བྱས་པ་ལ་བརྟེན་ནས་བྱུང་བའི་རིག་པ་མེད་པའི་ཕྱིར། མ་གྲུབ་ན། གཟུགས་ཀྱིས་ཉེར་ལེན་བྱས་པ་ལ་བརྟེན་ནས་བྱུང་བའི་རིག་པ་མེད་པར་ཐལ། རྣམ་ཤེས་མིན་པ་རྣམ་ཤེས་ཀྱི། །ཉེར་ལེན་མིན་པའི་ཕྱིར་ཡང་གྲུབ། །ཅེས་གསུངས་པའི་ཕྱིར། ཁ་ཅིག་ན་རེ། འཁོར་བ་ལ་ཐོག་མའི་མཐའ་མེད་ཀྱང་། འཁོར་བ་ལ་ཐོག་མ་ཡོད་པ་ཡིན་ནོ། །ཟེར་ན། འཁོར་བ་ཐོག་མེད་མ་ཡིན་་པར་ཐལ། འཁོར་བ་ལ་ཐོག་མ་ཡོད་པའི་ཕྱིར། གཞན་ཡང་། ཤེས་པ་ལ་ཐོག་མ་ཡོད་པར་ཐལ། འཁོར་བ་ལ་ཐོག་མ་ཡོད་པའི་ཕྱིར། འདོད་ན། ཤེས་པ་སྐད་ཅིག་དང་པོ་དེ་ཤེས་པའི་ཐོག་མ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེའི་ཉེར་ལེན་དུ་གྱུར་པའི་ཤེས་པ་ཡོད་པའི་ཕྱིར། བྱས་པ་ལ་ཁོ་ན་རེ། འཁོར་བ་ལ་ཐོག་མ་ཡོད་པར་ཐལ། འཁོར་བའི་ཐོག་མ་ཡོད་པའི་ཕྱིར། རྟེན་འབྲེལ་ཡན་ལག་བཅུ་གཉིས་ཀྱི་ཐོག་མ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། རྟེན་འབྲེལ་ཡན་ལག་བཅུ་གཉིས་ཀྱི་ནང་ཚན་དུ་གྱུར་པའི་མ་རིག་པ་དེ་དེ་ཡིན་པའི་ཕྱིར། གཞན་ཡང་། ཁོ་ན་རེ། ཤེས་པ་ལ་ཐོག་མ་ཡོད་པར་ཐལ། དབང་མངོན་ལ་ཐོག་མ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། གཟུགས་འཛིན་དབང་མངོན་ལ་ཐོག་མ་ཡོད་པའི་ཕྱིར། དེར་ཐལ། གཟུགས་འཛིན་དབང་མངོན་སྐད་ཅིག་དང་པོ་དེ་དེ་ཡིན་པའི་ཕྱིར་ཟེར་ན། དབང་མངོན་ཡིན་ན། རང་གི་ཉེར་ལེན་དུ་གྱུར་པའི་དབང་མངོན་ལས་བྱུང་དགོས་པར་ཐལ། ཤེས་པ་ཡིན་ན། རང་གི་ཉེར་ལེན་དུ་གྱུར་པའི་ཤེས་པ་ལས་བྱུང་དགོས་པའི་ཕྱིར། ཁྱབ་པ་ཁས། འདོད་ན། གཟུགས་འཛིན་དབང་མངོན་ཡིན་ན། རང་གི་ཉེར་ལེན་དུ་གྱུར་པའི་གཟུགས་འཛིན་དབང་མངོན་ལས་བྱུང་དགོས་པར་ཐལ། འདོད་པའི་ཕྱིར། འདོད་ན། གཟུགས་འཛིན་དབང་མངོན་སྐད་ཅིག་དང་པོ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། དེའི་ཉེར་ལེན་དུ་གྱུར་པའི་གཟུགས་འཛིན་དབང་མངོན་མེད་པའི་ཕྱིར། དེར་ཐལ། དེ་གཟུགས་འཛིན་དབང་མངོན་གྱི་ཐོག་མ་ཡིན་པའི་ཕྱིར། ཡང་ཁོ་ན་རེ། ཤེས་པའི་ཐོག་མ་ཡོད་པར་ཐལ། རྣམ་མཁྱེན་གྱི་ཐོག་མ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། རྣམ་མཁྱེན་སྐད་ཅིག་དང་པོ་དེ་རྣམ་མཁྱེན་གྱི་ཐོག་མ་ཡིན་པའི་ཕྱིར། དེར་ཐལ། རྣམ་མཁྱེན་སྐད་ཅིག་དང་པོའི་ཉེར་ལེན་དུ་གྱུར་པའི་རྣམ་མཁྱེན་མེད་པའི་ཕྱིར། །

༈ རང་ལུགས་བཞག་པ་ལ། སྐྱེ་བ་སྔ་མ་སྒྲུབ་བྱེད་ཀྱི་རིགས་པ་བཤད་པ། ཕྱི་མ་སྒྲུབ་བྱེད་ཀྱི་རིགས་པ་བཤད་པ། གཏན་ལ་ཕབ་པའི་དགོས་པ་བཤད་པ་དང་གསུམ། དང་པོ་ནི། བྱིས་པ་སྐྱེས་མ་ཐག་པའི་རིག་པ་ཆོས་ཅན། རང་གི་ཉེར་ལེན་དུ་གྱུར་པའི་རིག་པ་སྔ་མ་སྔོན་དུ་སོང་བ་ཡིན་ཏེ། རིག་པ་ཡིན་པའི་ཕྱིར། དཔེར་ན། ད་ལྟར་གྱི་རིག་པ་སྐད་ཅིག་གཉིས་པ་བཞིན། གཉིས་པ་ནི། རྒན་པོ་འཆི་ཁ་མའི་རིག་པ་ཆོས་ཅན། རང་གི་ཉེར་འབྲས་སུ་གྱུར་པའི་རིག་པ་ཕྱི་མ་མཚམས་སྦྱོར་བ་ཡིན་ཏེ། རིག་པ་ཡིན་པའི་ཕྱིར། དཔེར་ན། ད་ལྟར་གྱི་རིག་པ་སྐད་ཅིག་དང་པོ་བཞིན། གསུམ་པ་གཏན་ལ་ཕབ་པའི་དགོས་པ་བཤད་པ་ནི། རིགས་པ་དང་པོ་གཏན་ལ་ཕབ་པ་ལ་དགོས་པ་ཡོད་དེ། རིགས་པ་དེ་ལ་བརྟེན་ནས་འཁོར་བའི་ཡ་མཐའ་ཐུག་མེད་དུ་ཤེས་པའི་སྒོ་ནས་སེམས་ཅན་ཐམས་ཅད་ལ་མར་ཤེས་པའི་བློ་བྱུང་། དེ་ལ་བརྟེན་ནས་དྲིན་དྲན་པའི་བློ་བྱུང་། དེ་ལ་བརྟེན་ནས་དྲིན་གཟོ་བའི་བློ་བྱུང་། དེ་ལ་བརྟེན་ནས་སེམས་ཅན་ཐམས་ཅད་ལ་ཡིད་འོང་གི་རྣམ་པ་ཅན་གྱི་བྱམས་པ་བྱུང་། དེ་ལ་བརྟེན་ནས་སེམས་ཅན་ཐམས་ཅད་སྡུག་བསྔལ་དང་བྲལ་འདོད་ཀྱི་རྣམ་པ་ཅན་གྱི་སྙིང་རྗེ་ཆེན་པོ་བྱུང་། དེ་ལ་བརྟེན་ནས་སེམས་ཅན་ཐམས་ཅད་བདག་གིས་སྡུག་བསྔལ་ལས་བསྒྲལ་བར་བྱའོ། །སྙམ་པའི་ལྷག་བསམ་རྣམ་དག་བྱུང་། དེ་ལ་བརྟེན་ནས་སེམས་ཅན་ཐམས་ཅད་སྡུག་བསྔལ་ལས་སྒྲོལ་བའི་ཕྱིར་དུ་རྫོགས་པའི་བྱང་ཆུབ་ཐོབ་པར་བྱ་སྙམ་པའི་ཐེག་ཆེན་སེམས་བསྐྱེད་བྱུང་། དེ་ལ་བརྟེན་ནས་རྣམ་མཁྱེན་བྱུང་བའི་ཕྱིར། རིགས་པ་གཉིས་པ་གཏན་ལ་ཕབ་པ་ལ་དགོས་པ་ཡོད་དེ། སྐྱེས་བུ་གསུམ་གྱི་ལམ་གྱི་རིམ་པ་ཡང་རིགས་པ་གཉིས་པ་འདི་ལ་བརྟེན་དགོས་སོ། །ཞེས་ཤེས་པར་བྱ་བའི་ཆེད་ཡིན་པའི་ཕྱིར། སྐྱེས་བུ་ཆུང་ངུའི་ལམ་གྱི་རིམ་པ་ཡང་རིགས་པ་འདི་ལ་བརྟེན་དགོས་པ་ཡིན་ཏེ། ཚེ་ཕྱི་མ་ངན་སོང་གི་སྡུག་བསྔལ་ལ་སྐྲག་ནས་དེའི་རྒྱུ་མི་དགེ་བཅུ་སྤོང་བ་དང་། བདེ་འགྲོའི་རྒྱུ་དགེ་བ་བཅུ་སྒྲུབ་པ་ཡང་རིགས་པ་འདི་ལ་བརྟེན་དགོས་པའི་ཕྱིར། སྐྱེས་བུ་འབྲིང་གི་ལམ་གྱི་རིམ་པ་དེ་ཡང་རིགས་པ་འདི་ལ་བརྟེན་དགོས་པ་ཡིན་ཏེ། ཚེ་ཕྱི་མ་འཁོར་བའི་སྡུག་བསྔལ་ལ་སྐྲག་ནས་དེའི་རྒྱུ་བདག་འཛིན་སྤོང་བ་དང་། བདག་འཛིན་སྤངས་པའི་ཐར་པ་དེ་ཐོབ་པ་ལ་བསླབ་པ་གསུམ་ཉམས་སུ་ལེན་དགོས། དེ་ཉམས་སུ་ལེན་པ་དེ་ཡང་རིགས་པ་འདི་ལ་བརྟེན་དགོས་པའི་ཕྱིར། སྐྱེས་བུ་ཆེན་པོའི་ལམ་གྱི་རིམ་པ་དེ་ཡང་རིགས་པ་འདི་ལ་བརྟེན་དགོས་པ་ཡིན་ཏེ། སེམས་ཅན་ཐམས་ཅད་སྤྱིར་འཁོར་བའི་སྡུག་བསྔལ་དང་ཁྱད་པར་ངན་སོང་བ་རྣམས་ངན་སོང་གི་སྡུག་བསྔལ་གྱིས་མནར་བ་ལ་མི་བཟོད་ཅིང་དེ་རྣམས་བདེ་བ་ལ་འགོད་པ་དང་། སྡུག་བསྔལ་ལས་སྒྲོལ་བ་ལ་ཐེག་པ་ཆེན་པོར་སེམས་བསྐྱེད་དགོས། དེ་ལྟར་སྐྱེད་པ་དེ་ཡང་རིགས་པ་འདི་ལ་བརྟེན་དགོས་པའི་ཕྱིར། དེ་ལྟར་སྐྱེ་བ་སྔ་ཕྱི་སྒྲུབ་བྱེད་ཀྱི་རིགས་པ་གཏན་ལ་ཕབ་པ་ལ་དགོས་པ་ཡོད་དེ། ཐེག་པ་ཆེ་ཆུང་གི་ལམ་གྱི་རྩ་བ་དེ་ཡང་རིགས་པ་འདི་ལ་བརྟེན་དགོས་སོ། །ཞེས་ཤེས་པར་བྱ་བའི་ཆེད་ཡིན་པའི་ཕྱིར། །

༈ རྩོད་པ་སྤང་པ་ལ། ཁ་ཅིག་ན་རེ། ཆགས་བཅས་ཀྱི་རིག་པ་དེ་རྒན་པོ་འཆི་ཁ་མའི་རིག་པ་རང་གི་ཉེར་འབྲས་སུ་གྱུར་པའི་རིག་པ་ཕྱི་མ་མཚམས་སྦྱོར་བར་སྒྲུབ་པའི་རྟགས་ཡང་དག་མ་ཡིན་པར་ཐལ། རིག་པ་དེ་དེ་ལྟར་སྒྲུབ་པའི་རྟགས་ཡང་དག་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། སློབ་དཔོན་ཀ་མ་ལ་ཤཱི་ལས། ཆགས་བཅས་ཀྱི་རིག་པ་དེ་དེ་ལྟ་བུའི་རྟགས་ཡང་དག་ཏུ་བཤད་པའི་ཕྱིར། དེར་ཐལ། དེ་ཉིད་ཀྱི་འགྲེལ་པ་ལས། གང་ཆགས་པ་དང་བཅས་པའི་སེམས་གང་ཡིན་པ་དེ་ལས་རང་གི་ཉེ་བར་བླང་བར་བྱ་བའི་སེམས་གཞན་སྐྱེ་བ་སྟེ། དཔེར་ན། མངལ་གྱི་གནས་སྐབས་ཀྱི་སེམས་བཞིན་ནོ། །ཐ་མལ་པ་འཆི་ཁའི་སེམས་ཀྱང་ཆགས་པ་དང་བཅས་པ་ཡིན་ནོ། །ཞེས་བྱ་བ་ནི་རང་བཞིན་གྱི་གཏན་ཚིགས་སོ། ཞེས་གསུངས་པའི་ཕྱིར། །

དགྲ་བཅོམ་ཐ་མའི་སེམས་ཡོད་མེད་ལ་དཔྱད་པ།

༈ དགྲ་བཅོམ་སེམས་གང་ཡིན་དེ་ཡང་། །གང་ལས་མཚམས་སྦྱོར་མེད་པར་འདོད། །ཅེས་པ་འདི་གང་ལས་འཕྲོས་ན། སྐྱེ་བ་ཡོངས་སུ་ལེན་པ་ན། །ཞེས་སོགས་ཀྱི་སྐབས་སུ་རིག་པ་དེ་རྒན་པོ་འཆི་ཁ་མའི་རིག་པ་རང་གི་ཉེར་འབྲས་སུ་གྱུར་པའི་རིག་པ་ཕྱི་མ་མཚམས་སྦྱོར་བར་སྒྲུབ་པའི་རྟགས་ཡང་དག་ཏུ་བསྟན་པ་ལ། རྒྱང་འཕེན་པ་ན་རེ། དེ་མི་འཐད་པར་ཐལ། འཆི་སེམས་ཡིན་ན་རང་གི་ཉེར་འབྲས་སུ་གྱུར་པའི་རིག་པ་ཕྱི་མ་མཚམས་མི་སྦྱོར་བས་ཁྱབ་པའི་ཕྱིར། དགྲ་བཅོམ་པ་ཐ་མའི་སེམས་དེ་འཆི་སེམས་ཀྱི་རྟགས་ཀྱིས་རྒན་པོ་འཆི་ཁ་མའི་སེམས་རང་གི་ཉེར་འབྲས་སུ་གྱུར་པའི་རིག་པ་ཕྱི་མ་མཚམས་མི་སྦྱོར་བར་སྒྲུབ་པའི་མཐུན་དཔེ་ཡང་དག་ཡིན་པའི་ཕྱིར་ཟེར། འོ་ན། དགྲ་བཅོམ་ཐ་མའི་སེམས་ཆོས་ཅན། དེ་ལྟར་སྒྲུབ་པའི་མཐུན་དཔེ་ཡང་དག་མ་ཡིན་པར་ཐལ། དེ་ལྟར་སྒྲུབ་པའི་མཐུན་དཔེ་ཡང་དག་ཏུ་ཚད་མས་མ་གྲུབ་པའི་ཕྱིར། ཞེས་འཆད་པར་བྱེད་པ་ལ། དགྲ་བཅོམ་སེམས་གང་ཡིན་དེ་ཡང་། །ཞེས་རྐང་པ་གཉིས་བྱུང་། །

༈ འདིའི་སྐབས་སུ་མཐའ་དཔྱད་པ་ལ། ཁ་ཅིག་ན་རེ། དགྲ་བཅོམ་ཐ་མའི་སེམས་མེད་དོ། །ཟེར་ན། དེ་ཡོད་པར་ཐལ། དགྲ་བཅོམ་ཐ་མ་ཡོད་པའི་ཕྱིར། དེར་ཐལ། ཉན་ཐོས་དགྲ་བཅོམ་ཐ་མ་ཡོད་པའི་ཕྱིར། དེར་ཐལ། ཉན་ཐོས་དགྲ་བཅོམ་སྐད་ཅིག་ཐ་མ་ཡོད་པའི་ཕྱིར། བྱས་པ་ལ་ཁོ་ན་རེ། དགྲ་བཅོམ་ཐ་མ་མེད་པར་ཐལ། དགྲ་བཅོམ་ཡིན་ན། རང་གི་ཉེར་ལེན་བྱས་པ་ལས་བྱུང་བའི་དགྲ་བཅོམ་ཡོད་དགོས་པའི་ཕྱིར་ན་མ་ཁྱབ། རྟགས་གྲུབ་སྟེ། གང་ཟག་ཡིན་ན། རང་གི་ཉེར་ལེན་བྱས་པ་ལས་བྱུང་བའི་གང་ཟག་ཡོད་དགོས་པའི་ཕྱིར། ཁོ་རང་ལ། སྐྱེ་བ་ཐ་མ་མེད་པར་ཐལ། སྐྱེ་བ་ཡིན་ན་རང་གི་ཉེར་ལེན་བྱས་པ་ལས་བྱུང་བའི་སྐྱེ་བ་ཡོད་དགོས་པའི་ཕྱིར། ཁྱབ་པ་ཁས། འདོད་མི་ནུས་ཏེ། སྐྱེ་བ་ཕྱི་མ་ཡོད་པའི་ཕྱིར། དེར་ཐལ། སྐྱེ་བ་སྔ་ཕྱི་ཡོད་པའི་ཕྱིར། དེར་ཐལ། སྐྱེ་བ་སྔ་ཕྱི་སྒྲུབ་བྱེད་ཀྱི་རིགས་པ་ཡོད་པའི་ཕྱིར། ཁ་ཅིག་ན་རེ། མཐར་ཐུག་ཐེག་པ་གསུམ་དུ་གྲུབ་པར་ཐལ། དགྲ་བཅོམ་ཐ་མ་ཡོད་པའི་ཕྱིར་ན་མ་ཁྱབ། འདོད་ན། རང་རྒྱུད་ཀྱི་ཆགས་པ་གཏན་ནས་སྤོང་མི་ནུས་པའི་སེམས་ཅན་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། རང་རྒྱུད་ཀྱི་ཆགས་པ་གཏན་ནས་སྤོང་མི་ནུས་པའི་སེམས་ཅན་ཡོད་པར་དམ་བཅས་པའི་དམ་བཅའི་ཞེན་དོན་ལ་ཚད་མས་གནོད་པའི་ཕྱིར་ཏེ། རྟག་ཉིད་ཕྱིར་རམ་ཐབས་མེད་ཕྱིར། །ཡང་ན་ཐབས་ནི་མི་ཤེས་ཕྱིར། །ཞེས་གསུངས་པའི་ཕྱིར། མཁས་པའི་དབང་པོ་ཁ་ཅིག་ན་རེ། མཐར་ཐུག་ཐེག་པ་གསུམ་དུ་གྲུབ་བོ། །ཟེར་ན། ལྷག་མེད་ཀྱི་གནས་སྐབས་སུ་རིག་པ་རྒྱུན་ཆད་པར་ཐལ། དམ་བཅའ་འཐད་པའི་ཕྱིར། འདོད་ན། རིག་པ་རྒྱུན་ཆད་པའི་དུས་སྲིད་པར་ཐལ། འདོད་པའི་ཕྱིར། འདོད་ན། ལས་ཉོན་རྒྱུན་ཆད་པའི་དུས་སྲིད་པར་ཐལ། འདོད་པའི་ཕྱིར། འདོད་ན། འཁོར་བའི་རྒྱུར་གྱུར་པའི་ལས་ཉོན་རྒྱུན་ཆད་པའི་དུས་སྲིད་པར་ཐལ། འདོད་པའི་ཕྱིར། འདོད་ན། འཁོར་བ་རྒྱུན་ཆད་པའི་དུས་སྲིད་པར་ཐལ། འདོད་པའི་ཕྱིར། འདོད་ན། འཁོར་བ་སྟོང་པའི་དུས་སྲིད་པར་ཐལ། འདོད་པའི་ཕྱིར། འདོད་ན། སེམས་ཅན་ཐམས་ཅད་ཀྱིས་ཐར་པ་ཐོབ་པའི་དུས་སྲིད་པར་ཐལ། འདོད་པའི་ཕྱིར། འདོད་ན། སེམས་ཅན་ཐམས་ཅད་སངས་རྒྱས་པའི་དུས་སྲིད་པར་ཐལ། འདོད་པའི་ཕྱིར། འདོད་ན། མཐར་ཐུག་ཐེག་པ་གཅིག་ཏུ་གྲུབ་པར་ཐལ། འདོད་པའི་ཕྱིར། གཞན་ཡང་། ལྷག་མེད་ཀྱི་གནས་སྐབས་སུ་རིག་པ་རྒྱུན་ཆད་པ་མི་འཐད་པར་ཐལ། ལྷག་མེད་མྱང་འདས་ཐོབ་པའི་ཉན་ཐོས་དགྲ་བཅོམ་པའི་རྒྱུད་ལ་རིག་པ་ཡོད་པའི་ཕྱིར། དེར་ཐལ། ལྷག་མེད་མྱང་འདས་ཐོབ་པའི་དགྲ་བཅོམ་པ་ཡོད་པའི་ཕྱིར། མ་གྲུབ་ན། ལྷག་མེད་མྱང་འདས་དོན་དུ་གཉེར་བའི་ཉན་ཐོས་རྣམས་ཀྱིས་ལྷག་མེད་མྱང་འདས་ཐོབ་པའི་ཕྱིར་དུ་ལམ་བསྒོམས་པ་དོན་མེད་པར་ཐལ། ལྷག་མེད་མྱང་འདས་ཐོབ་པའི་གང་ཟག་མེད་པའི་ཕྱིར། གཞན་ཡང་། མཐར་ཐུག་ཉན་ཐོས་ཀྱི་ཐེག་པ་ཡོད་པར་ཐལ། མཐར་ཐུག་ཐེག་པ་གསུམ་དུ་གྲུབ་པའི་ཕྱིར། འདོད་ན། ལམ་གྱི་བྱ་བ་མཐར་ཕྱིན་པའི་ཉན་ཐོས་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། ལམ་གྱི་བྱ་བ་མཐར་ཕྱིན་པའི་གང་ཟག་ཡིན་ན་སངས་འཕགས་ཡིན་དགོས་པའི་ཕྱིར། གཞན་ཡང་། ལྷག་མེད་ཀྱི་གནས་སྐབས་ན་རིག་པ་ཡོད་པར་ཐལ། ལྷག་མེད་དུ་མྱང་འདས་ལས་འདའ་ཁ་མའི་སེམས་ཅན་གྱི་རྒྱུད་ཀྱི་རིག་པ་དེ་རང་གི་ཉེར་འབྲས་སུ་གྱུར་པའི་རིག་པ་ཕྱི་མ་མཚམས་སྦྱོར་བ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་གི་ཉེར་འབྲས་སུ་གྱུར་པའི་རིག་པ་ཕྱི་མ་མཚམས་སྦྱོར་བ་ཡིན་པར་ཐལ། རིག་པ་ཡིན་པའི་ཕྱིར། བྱས་པ་ལ་ཁོ་ན་རེ། འགོག་པ་ལ་མཉམ་པར་འཇོག་ཁ་མའི་སེམས་ཅན་གྱི་རྒྱུད་ཀྱི་རིག་པ་ཆོས་ཅན། རང་གི་ཉེར་འབྲས་སུ་གྱུར་པའི་རིག་པ་ཕྱི་མ་མཚམས་སྦྱོར་བ་ཡིན་པར་ཐལ། རིག་པ་ཡིན་པའི་ཕྱིར། འདོད་ན། འགོག་པ་ལ་མཉམ་པར་བཞག་པའི་སེམས་ཅན་གྱི་རྒྱུད་ལ་རིག་པ་ཡོད་པར་ཐལ། འདོད་པའི་ཕྱིར། འདོད་ན། དེའི་རྒྱུད་ལ་སེམས་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། འགོག་པའི་སྙོམས་འཇུག་དེ་ལ་སེམས་མེད་སྙོམས་འཇུག །ཅེས་བརྗོད་པའི་ཕྱིར་ཟེར་ན་མ་ཁྱབ་སྟེ། འགོག་པ་ལ་མཉམ་པར་བཞག་པའི་སེམས་ཅན་གྱི་རྒྱུད་ལ་རྣམ་ཤེས་རགས་པ་མེད་པའི་རྒྱུ་མཚན་གྱིས་དེ་ལྟར་བརྗོད་པ་ཡིན་གྱི་འགོག་པ་ལ་མཉམ་པར་བཞག་པའི་སེམས་ཅན་གྱི་རྒྱུད་ལ་སེམས་ཡོད་པར་ཐལ། དེ་སེམས་ཅན་ཡིན་པའི་ཕྱིར། །

ལྡོག་བྱེད་ཀྱི་རྒྱུ་ཁྱད་པར་ཅན་ངོས་བཟུང་བ།

༈ རྟག་ཏུ་དེ་ཡི་རྗེས་འཇུག་ཕྱིར། །གང་ཞིག་ཡོད་པས་ཕན་འདོགས་བྱེད། །ཅེས་པ་འདི་གང་ལས་འཕྲོས་ན། མ་ཡིན་རྟེན་ནི་བཀག་ཕྱིར་རོ། །ཞེས་པའི་སྐབས་སུ་རྒྱང་འཕེན་གྱིས་བྱིས་པ་སྐྱེས་མ་ཐག་པའི་ལུས་དེ་བྱིས་པ་སྐྱེས་མ་ཐག་པའི་སེམས་ཀྱི་ཉེར་ལེན་དུ་ཁས་བླངས་པ་དེ་བཀག་ནས། འོ་ན། དེའི་ཉེར་ལེན་གང་ཞེ་ན། དེ་འཆད་པར་བྱེད་པ་ལ་གཞུང་འདི་བྱུང་། ངག་དོན་ནི། བྱིས་པ་སྐྱེས་མ་ཐག་པའི་སེམས་དེ་ཆོས་ཅན། རང་གི་ཉེར་ལེན་དུ་གྱུར་པའི་རིག་པ་ལས་བྱུང་བ་ཡིན་ཏེ། རང་གི་ཉེར་ལེན་དུ་གྱུར་པའི་རིག་པ་ཕན་འདོགས་བྱེད་དུ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པའི་ཕྱིར། །

༈ མཐའ་དཔྱད་པ་ལ་ཁ་ཅིག་ན་རེ། འབྲས་བུ་དེའི་ཐུན་མོང་བའི་རྒྱུ་དེ། འབྲས་བུ་དེའི་ལྷན་ཅིག་བྱེད་རྐྱེན་གྱི་མཚན་ཉིད། འབྲས་བུ་དེའི་ཐུན་མོང་མ་ཡིན་པའི་རྒྱུ་དེ། འབྲས་བུ་དེའི་ཉེར་ལེན་གྱི་མཚན་ཉིད་ཡིན་ཟེར་ན། རྟེན་བཅས་ཀྱི་མིག་དབང་གཟུགས་ཅན་པ་ཆོས་ཅན། རང་འབྲས་གཟུགས་འཛིན་མིག་ཤེས་ཀྱི་ཉེར་ལེན་ཡིན་པར་ཐལ། རང་འབྲས་གཟུགས་འཛིན་མིག་ཤེས་ཀྱི་ཐུན་མོང་མ་ཡིན་པའི་རྒྱུ་ཡིན་པའི་ཕྱིར། དེར་ཐལ། རང་འབྲས་གཟུགས་འཛིན་མིག་ཤེས་ཀྱི་ཐུན་མོང་མ་ཡིན་པའི་བདག་རྐྱེན་ཡིན་པའི་ཕྱིར། རྩ་བར་འདོད་མི་ནུས་ཏེ། བེམ་པོ་ཡིན་པའི་ཕྱིར། བྱས་པ་ལ་ཁོ་ན་རེ། རྟེན་བཅས་ཀྱི་མིག་དབང་གཟུགས་ཅན་པ་ཆོས་ཅན། རང་འབྲས་གཟུགས་འཛིན་མིག་ཤེས་ཁོ་ནའི་རྒྱུ་ཡིན་པར་ཐལ། རང་འབྲས་གཟུགས་འཛིན་མིག་ཤེས་ཀྱི་ཐུན་མོང་མ་ཡིན་པའི་རྒྱུ་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། རང་འབྲས་སྒྲ་འཛིན་ཉན་ཤེས་ཀྱི་རྒྱུ་ཡིན་པའི་ཕྱིར། གཞན་ཡང་། རྟེན་བཅས་ཀྱི་མིག་དབང་གཟུགས་ཅན་པ་ཆོས་ཅན། རང་འབྲས་གཟུགས་འཛིན་མིག་ཤེས་ཀྱི་ཐུན་མོང་མ་ཡིན་པའི་རྒྱུ་མ་ཡིན་པར་ཐལ། རང་འབྲས་གཟུགས་འཛིན་མིག་ཤེས་དང་། རང་འབྲས་སྒྲ་འཛིན་ཉན་ཤེས་གཉིས་ཀའི་ཐུན་མོང་བའི་རྒྱུ་ཡིན་པའི་ཕྱིར། དེར་ཐལ། དེ་གཉིས་ཀྱི་རྒྱུ་ཐུན་མོང་བ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་གཉིས་ཀའི་རྒྱུའི་གཞི་མཐུན་ཡིན་པའི་ཕྱིར། ཁ་ཅིག་ན་རེ། འབྲས་བུ་དེའི་ངོ་བོའི་རྫས་ལ་ཕན་འདོགས་བྱེད་དེ་འབྲས་བུ་དེའི་ཉེར་ལེན་གྱི་མཚན་ཉིད། འབྲས་བུ་དེའི་གནས་སྐབས་ཀྱི་རྫས་ལ་ཕན་འདོགས་བྱེད་དེ་འབྲས་བུ་དེའི་ལྷན་ཅིག་བྱེད་རྐྱེན་གྱི་མཚན་ཉིད་ཟེར་ན། ནས་མྱུག་གི་ལྷན་ཅིག་བྱེད་རྐྱེན་དུ་གྱུར་པའི་ཆུ་ལུད་དྲོད་གཤེར་ཆོས་ཅན། ནས་མྱུག་གི་ཉེར་ལེན་ཡིན་པར་ཐལ། ནས་མྱུག་གི་ངོ་བོའི་རྫས་ལ་ཕན་འདོགས་བྱེད་ཡིན་པའི་ཕྱིར། དེར་ཐལ། ནས་མྱུག་གི་ངོ་བོའི་རྫས་སུ་གྱུར་པའི་ནས་མྱུག་མ་ཡིན་པ་ལས་ལོག་པ་ལ་ཕན་འདོགས་བྱེད་ཡིན་པའི་ཕྱིར། རྩ་བར་འདོད་མི་ནུས་ཏེ། ནས་མྱུག་གི་ལྷན་ཅིག་བྱེད་རྐྱེན་ཡིན་པའི་ཕྱིར། གཉིས་པ་ལ། ནས་ཀྱི་ས་བོན་ཆོས་ཅན། ནས་མྱུག་གི་ལྷན་ཅིག་བྱེད་རྐྱེན་ཡིན་པར་ཐལ། ནས་མྱུག་གི་གནས་སྐབས་ཀྱི་རྫས་ལ་ཕན་འདོགས་བྱེད་ཡིན་པའི་ཕྱིར། དེར་ཐལ། ནས་མྱུག་གི་དབྱིབས་དང་ཁ་དོག་ལ་སོགས་པ་ལ་ཕན་འདོགས་བྱེད་ཡིན་པའི་ཕྱིར། རྩ་བར་འདོད་མི་ནུས་ཏེ། ནས་མྱུག་གི་ཉེར་ལེན་ཡིན་པའི་ཕྱིར། ཁ་ཅིག་ན་རེ། འབྲས་བུ་དེ་རང་དང་འདྲ་བར་སྐྱེད་བྱེད་དེ། འབྲས་བུ་དེའི་ཉེར་ལེན་གྱི་མཚན་ཉིད་ཟེར་ན། ཁ་དོག་སྔོན་པོ་ཅན་གྱི་ནས་མྱུག་གི་ལྷན་ཅིག་བྱེད་རྐྱེན་དུ་གྱུར་པའི་ཁ་དོག་སྔོན་པོ་ཅན་གྱི་ཆུ་དེ་ཆོས་ཅན། ཁ་དོག་སྔོན་པོ་ཅན་གྱི་ནས་མྱུག་གི་ཉེར་ལེན་ཡིན་པར་ཐལ། དེ་རང་དང་འདྲ་བར་སྐྱེད་བྱེད་ཡིན་པའི་ཕྱིར། དེར་ཐལ། དེ་སྐྱེད་བྱེད་ཡིན་པ་གང་ཞིག །ཁྱོད་དང་དེ་གཉིས་འདྲ་བའི་ཕྱིར། དེར་ཐལ། ཁྱོད་དང་དེ་གཉིས་ཁ་དོག་སྔོན་པོ་ཅན་དུ་འདྲ་བའི་ཕྱིར། །

༈ རང་ལུགས་ནི། འབྲས་བུ་དེ་རང་གི་རྫས་རྒྱུན་དུ་གཙོ་བོར་སྐྱེད་བྱེད་དེ། འབྲས་བུ་དེའི་ཉེར་ལེན་གྱི་མཚན་ཉིད། དཔེར་ན། ནས་ཀྱི་ས་བོན་གྱིས་ནས་མྱུག་གི་ཉེར་ལེན་བྱེད་པ་ལྟ་བུ། འབྲས་བུ་དེ་རང་གི་རྫས་རྒྱུན་མ་ཡིན་པར་སྐྱེད་བྱེད་ཀྱི་དངོས་པོ་དེ། འབྲས་བུ་དེའི་ལྷན་ཅིག་བྱེད་རྐྱེན་གྱི་མཚན་ཉིད། དཔེར་ན། ནས་མྱུག་གི་རྒྱུར་གྱུར་པའི་ཆུ་ལུད་དྲོད་གཤེར་གྱིས་ནས་མྱུག་གི་ལྷན་ཅིག་བྱེད་རྐྱེན་བྱེད་པ་ལྟ་བུའོ། །

རིགས་བརྗོད་དང་ཚོགས་བརྗོད་ཀྱི་སྒྲའི་ཁྱད་པར་བཤད་པ།

༈ དེས་ན་འདི་ནི་རིགས་དང་ནི། །ཚོགས་པ་བརྗོད་པའི་ཁྱད་པར་ཡིན། །ཞེས་པ་འདི་གང་ལས་འཕྲོས་ན། དེ་ལྡན་རང་གི་ངོ་བོ་དང་། །ཞེས་པའི་སྐབས་སུ་སྤྱི་རྫས་གཞན་བཀག་པ་ལ། འོ་ན། རིགས་བརྗོད་ཀྱི་སྒྲ་དང་ཚོགས་བརྗོད་ཀྱི་སྒྲའི་ཁྱད་པར་མི་འཐད་པར་ཐལ། རིགས་བརྗོད་ཀྱི་སྒྲས་རིགས་སྤྱི་རྫས་གཞན་བརྗོད་བྱར་མི་བྱེད། ཚོགས་བརྗོད་ཀྱི་སྒྲས་ཚོགས་སྤྱི་རྫས་གཞན་བརྗོད་བྱར་མི་བྱེད་པའི་ཕྱིར་ཏེ། སྤྱི་རྫས་གཞན་མེད་པའི་ཕྱིར་ཟེར་ན། རྩ་བར་མ་ཁྱབ་སྟེ། རིགས་བརྗོད་ཀྱི་སྒྲས་རིགས་ཅན་བརྗོད་བྱར་མི་སྤོང་། ཚོགས་བརྗོད་ཀྱི་སྒྲས་ཚོགས་པ་ཅན་བརྗོད་བྱར་སྤོང་བ་དེ་རིགས་བརྗོད་ཀྱི་སྒྲ་དང་ཚོགས་བརྗོད་ཀྱི་སྒྲའི་ཁྱད་པར་ཡིན་པའི་ཕྱིར། ཞེས་འཆད་པར་བྱེད་པ་ལ། དེས་ན་འདི་ནི་རིགས་དང་ནི། །ཚོགས་པ་བརྗོད་པའི་ཁྱད་པར་ཡིན། །ཞེས་པ་འདི་བྱུང་། ངག་དོན་ནི། རིགས་བརྗོད་ཀྱི་སྒྲ་དང་ཚོགས་བརྗོད་ཀྱི་སྒྲའི་ཁྱད་པར་བཞག་ཏུ་ཡོད་དེ། རིགས་བརྗོད་ཀྱི་སྒྲས་རིགས་ཅན་བརྗོད་བྱར་མི་སྤོང་བ་དང་། ཚོགས་བརྗོད་ཀྱི་སྒྲས་ཚོགས་པ་ཅན་བརྗོད་བྱར་སྤོང་བ་དེ་རིགས་བརྗོད་ཀྱི་སྒྲ་དང་ཚོགས་བརྗོད་ཀྱི་སྒྲའི་ཁྱད་པར་ཡིན་པའི་ཕྱིར། རིགས་བརྗོད་ཀྱི་སྒྲས་རིགས་ཅན་བརྗོད་བྱར་མི་སྤོང་བའི་གོ་དོན་བཞག་ཏུ་ཡོད་དེ། བུམ་པ་ཞེས་པའི་ངག་དེ་གསེར་བུམ་ལ་དངོས་སུ་འཇུག་པ་དེ་དེའི་གོ་དོན་ཡིན་པའི་ཕྱིར། ཚོགས་བརྗོད་ཀྱི་སྒྲས་ཚོགས་པ་ཅན་བརྗོད་བྱར་སྤོང་བའི་གོ་དོན་བཞག་ཏུ་ཡོད་དེ། བུམ་པ་ཞེས་པའི་ངག་དེ་བུམ་པའི་གཟུགས་དྲི་ལ་སོགས་པ་ལ་དངོས་སུ་མི་འཇུག་པ་དེ་དེའི་གོ་དོན་ཡིན་པའི་ཕྱིར། །

༈ མཐའ་དཔྱད་པ་ལ། ཁ་ཅིག་ན་རེ། རང་ཉིད་དངོས་མིང་དུ་འཇུག་པའི་གཞི་ཡོད་པ་གང་ཞིག །རང་ཉིད་དངོས་མིང་དུ་འཇུག་པའི་གཞི་ཡིན་ན་རིགས་སྤྱི་ཡིན་པས་ཁྱབ་པ་དེ་རིགས་བརྗོད་ཀྱི་སྒྲའི་མཚན་ཉིད་ཡིན། རང་ཉིད་དངོས་མིང་དུ་འཇུག་པའི་གཞི་ཡོད་པ་གང་ཞིག །རང་ཉིད་དངོས་མིང་དུ་འཇུག་པའི་གཞི་ཡིན་ན་ཚོགས་སྤྱི་ཡིན་པས་ཁྱབ་པ་དེ། ཚོགས་བརྗོད་ཀྱི་སྒྲའི་མཚན་ཉིད་ཟེར་ན། དེ་ལ་སྐྱོན་འཕེན་པ་ཁ་ཅིག་ན་རེ། བུམ་པ་ཞེས་པའི་ངག་དེ་ཆོས་ཅན། རང་ཉིད་དངོས་མིང་དུ་འཇུག་པའི་གཞི་ཡིན་ན་ཚོགས་སྤྱི་ཡིན་པས་ཁྱབ་པ་ཐལ། ཚོགས་བརྗོད་ཀྱི་སྒྲ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་ཅེས་པའི་ངག་དེ་ཚོགས་བརྗོད་ཀྱི་སྒྲ་ཡིན་པར་ཐལ། ཁྱོད་ཚོགས་སྤྱི་ཡིན་པའི་ཕྱིར། དེར་ཐལ། ཁྱོད་བེམ་པོ་ཡིན་པའི་ཕྱིར། རྩ་བར་འདོད་ན། བུམ་པའི་དོན་སྤྱི་ཆོས་ཅན། ཚོགས་སྤྱི་ཡིན་པར་ཐལ། བུམ་པ་ཞེས་པའི་ངག་དངོས་མིང་དུ་འཇུག་པའི་གཞི་ཡིན་པའི་ཕྱིར། དེར་ཐལ། བུམ་པ་ཞེས་པའི་ངག་གིས་དངོས་སུ་བརྗོད་པའི་གཞི་ཡིན་པའི་ཕྱིར་ན་མ་ཁྱབ། འོ་ན། ཁོ་རང་ལ་བ་ལང་གི་དོན་སྤྱི་ཆོས་ཅན། བ་ལང་ཞེས་པའི་ངག་དངོས་མིང་དུ་འཇུག་པའི་གཞི་ཡིན་པར་ཐལ། བ་ལང་ཞེས་པའི་ངག་དངོས་སུ་འཇུག་པའི་གཞི་ཡིན་པའི་ཕྱིར། ཁྱབ་པ་ཁས། དེར་ཐལ། བ་ལང་ཞེས་པའི་ངག་གིས་དངོས་སུ་བརྗོད་པའི་གཞི་ཡིན་པའི་ཕྱིར། ཁྱབ་པ་ཁས། རྩ་བར་འདོད་ན། དེ་ཆོས་ཅན། ཁྱོད་ཀྱིས་བ་ལང་གི་བྱ་བ་བྱེད་ནུས་པར་ཐལ། ཁྱོད་བ་ལང་ཞེས་པའི་ངག་དངོས་མིང་དུ་འཇུག་པའི་གཞི་ཡིན་པའི་ཕྱིར། ཁྱབ་སྟེ། སྤྱི་ནས་སྐྱེས་བུ་དོན་བྱེད་པ། །ཞེས་གསུངས་པའི་ཕྱིར། ཁ་ཅིག་ན་རེ། རང་ཉིད་དངོས་མིང་དུ་འཇུག་པའི་གཞི་ཡོད་པ་གང་ཞིག །རང་ཉིད་དངོས་མིང་དུ་འཇུག་པའི་གཞི་ཡིན་ན་རྡུལ་རྫས་བརྒྱད་འདུས་ཀྱི་གོང་བུ་ཡིན་པས་ཁྱབ་པ་དེ། ཚོགས་བརྗོད་ཀྱི་སྒྲའི་མཚན་ཉིད་ཟེར་ན། རྡུལ་རྫས་བརྒྱད་མ་འདུས་ཤིང་རྡུལ་དུ་མ་འདུས་པའི་གོང་བུ་ཞེས་པའི་ངག་དེ་ཆོས་ཅན། རང་ཉིད་དངོས་མིང་དུ་འཇུག་པའི་གཞི་ཡིན་ན། རྡུལ་རྫས་བརྒྱད་འདུས་ཀྱི་གོང་བུ་ཡིན་པས་ཁྱབ་པར་ཐལ། ཚོགས་བརྗོད་ཀྱི་སྒྲ་ཡིན་པའི་ཕྱིར། མ་གྲུབ་ན། རྡུལ་རྫས་བརྒྱད་མ་འདུས་ཤིང་རྡུལ་དུ་མ་འདུས་པའི་གོང་བུ་དེ་ཆོས་ཅན། ཁྱོད་ཅེས་པའི་ངག་དེ་ཚོགས་བརྗོད་ཀྱི་སྒྲ་ཡིན་པར་ཐལ། ཁྱོད་ཚོགས་སྤྱི་ཡིན་པའི་ཕྱིར། དེར་ཐལ། ཁྱོད་བེམ་པོ་ཡིན་པའི་ཕྱིར། རྩ་བར་འདོད་ན། རྡུལ་རྫས་བརྒྱད་མ་འདུས་ཤིང་རྡུལ་དུ་མ་འདུས་པའི་གོང་བུ་དེ་ཆོས་ཅན། རྡུལ་རྫས་བརྒྱད་འདུས་ཀྱི་གོང་བུ་ཡིན་པར་ཐལ། རྡུལ་རྫས་བརྒྱད་མ་འདུས་ཤིང་རྡུལ་དུ་མ་འདུས་པའི་གོང་བུ་ཞེས་པའི་ངག་དངོས་མིང་དུ་འཇུག་པའི་གཞི་ཡིན་པའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར་རོ། །ཁ་ཅིག་ན་རེ། རང་ཉིད་དངོས་མིང་དུ་འཇུག་པའི་གཞི་ཡོད་པ་གང་ཞིག །རང་ཉིད་དངོས་མིང་དུ་འཇུག་པའི་གཞི་ཡིན་ན། རྡུལ་དུ་མ་འདུས་པའི་གོང་བུ་ཡིན་པས་ཁྱབ་པ་དེ་ཚོགས་བརྗོད་ཀྱི་སྒྲའི་མཚན་ཉིད་ཟེར་ན། དབུས་རྡུལ་ཕྲ་མོ་གཅིག་ཉིད་ཅེས་པའི་ངག་ཆོས་ཅན། རང་ཉིད་དངོས་མིང་དུ་འཇུག་པའི་གཞི་ཡིན་ན། རྡུལ་དུ་མ་འདུས་པའི་གོང་བུ་ཡིན་དགོས་པར་ཐལ། ཚོགས་བརྗོད་ཀྱི་སྒྲ་ཡིན་པའི་ཕྱིར། མ་གྲུབ་ན། དབུས་རྡུལ་ཕྲ་མོ་གཅིག་ཉིད་ཆོས་ཅན། ཁྱོད་ཅེས་པའི་སྒྲ་དེ་ཚོགས་བརྗོད་ཀྱི་སྒྲ་ཡིན་པར་ཐལ། ཁྱོད་ཚོགས་སྤྱི་ཡིན་པའི་ཕྱིར། འདོད་ན། དབུས་རྡུལ་ཕྲ་མོ་གཅིག་ཉིད་ཆོས་ཅན། རྡུལ་དུ་མ་འདུས་པའི་གོང་བུ་ཡིན་པར་ཐལ། དབུས་རྡུལ་ཕྲ་མོ་གཅིག་ཉིད་ཅེས་པའི་ངག་དངོས་མིང་དུ་འཇུག་པའི་གཞི་ཡིན་པའི་ཕྱིར། འདོད་མི་ནུས་ཏེ། ཆོས་ཅན་དེའི་ཕྱིར། བྱས་པ་ལ་ཁོ་ན་རེ། དབུས་རྡུལ་ཕྲ་མོ་གཅིག་ཉིད་ཆོས་ཅན། རྡུལ་དུ་མ་འདུས་པའི་གོང་བུ་ཡིན་པར་ཐལ། རྡུལ་གང་ཞིག །དུ་མ་འདུས་པའི་གོང་བུ་ཡིན་པའི་ཕྱིར་ན་མ་ཁྱབ། ཕྱི་མ་དེར་ཐལ། སྐད་ཅིག་དུ་མ་འདུས་པའི་གོང་བུ་ཡིན་པའི་ཕྱིར། དེར་ཐལ། ཆ་བཅས་ཀྱི་དངོས་པོ་ཡིན་པའི་ཕྱིར། ཁ་ཅིག་ན་རེ། རིགས་བརྗོད་ཀྱི་སྒྲ་ཡིན་ན། རང་ཉིད་དངོས་མིང་དུ་འཇུག་པའི་གཞི་ཡོད་ན། རང་ཉིད་དངོས་མིང་དུ་འཇུག་པའི་གཞི་ཡང་ཡིན། རིགས་སྤྱི་ཡང་ཡིན་པའི་གཞི་མཐུན་ཡོད་པས་ཁྱབ་ཟེར་ན། མཚན་མཚོན་གཉིས་དང་བུམ་པ་གང་རུང་ཞེས་པའི་ངག་ཆོས་ཅན། རང་ཉིད་དངོས་མིང་དུ་འཇུག་པའི་གཞི་ཡོད་ན་རང་ཉིད་དངོས་མིང་དུ་འཇུག་པའི་གཞི་ཡང་ཡིན། རིགས་སྤྱི་ཡང་ཡིན་པའི་གཞི་མཐུན་པ་ཡོད་པས་ཁྱབ་པར་ཐལ། རིགས་བརྗོད་ཀྱི་སྒྲ་ཡིན་པའི་ཕྱིར། མ་གྲུབ་ན། དེ་གང་རུང་ཆོས་ཅན། ཁྱོད་ཅེས་པའི་ངག་དེ་རིགས་བརྗོད་ཀྱི་སྒྲ་ཡིན་པར་ཐལ། ཁྱོད་རིགས་སྤྱི་ཡིན་པའི་ཕྱིར། རྩ་བར་འདོད་ན། བུམ་པས་དག་པའི་ས་ཕྱོགས་ཆོས་ཅན། དེ་གང་རུང་ཞེས་པའི་ངག་དངོས་མིང་དུ་འཇུག་པའི་གཞི་ཡང་ཡིན། རིགས་སྤྱི་ཡང་ཡིན་པའི་གཞི་མཐུན་པ་ཡོད་པར་ཐལ། དེ་གང་རུང་ཞེས་པའི་ངག་དངོས་མིང་དུ་འཇུག་པའི་གཞི་ཡོད་པའི་ཕྱིར་ཏེ། དེ་གང་རུང་ཡོད་པའི་ཕྱིར། འདོད་ན། དེ་ཆོས་ཅན། དེ་གང་རུང་རིགས་སྤྱི་ཡིན་པར་ཐལ། འདོད་པའི་ཕྱིར། འདོད་ན། དེ་གང་རུང་གི་བྱེ་བྲག་ཡོད་པར་ཐལ་ལོ། །

༈ རང་ལུགས་བཞག་པ་ནི། མཉན་བྱ་གང་ཞིག །རང་ཉིད་དངོས་མིང་དུ་འཇུག་པའི་གཞི་ཡང་ཡིན། རིགས་སྤྱི་ཡང་ཡིན་པའི་གཞི་མཐུན་པ་སྲིད་པ་དེ་རིགས་བརྗོད་ཀྱི་སྒྲའི་མཚན་ཉིད། མཉན་བྱ་གང་ཞིག །རང་ཉིད་དངོས་མིང་དུ་འཇུག་པའི་གཞི་ཡང་ཡིན། ཚོགས་སྤྱི་ཡང་ཡིན་པའི་གཞི་མཐུན་པ་སྲིད་པ་དེ་ཚོགས་བརྗོད་ཀྱི་སྒྲའི་མཚན་ཉིད་ཡིན་ནོ། །འདི་གཉིས་ལ་མུ་བཞི་ལས། རིགས་བརྗོད་ཀྱི་སྒྲ་ཡིན་ལ། ཚོགས་བརྗོད་ཀྱི་སྒྲ་མ་ཡིན་པའི་མུ། ཚོགས་བརྗོད་ཀྱི་སྒྲ་ཡིན་ལ་རིགས་བརྗོད་ཀྱི་སྒྲ་མ་ཡིན་པའི་མུ། དེ་གཉིས་ཀ་ཡིན་པའི་མུ། དེ་གཉིས་ཀ་མ་ཡིན་པའི་མུ་དང་བཞི། དང་པོ་ནི། ཤེས་བྱ་ཞེས་པའི་ངག་ལྟ་བུ་ལ་བྱེད། གཉིས་པ་ནི། ཀ་བུམ་གཉིས་ཞེས་པའི་ངག་ལྟ་བུ་ལ་བྱེད། གསུམ་པ་ནི། བུམ་པ་ཞེས་པའི་ངག་ལྟ་བུ་ལ་བྱེད། བཞི་པ་ནི། རི་བོང་གི་རྭ་ཞེས་པའི་ངག་ལྟ་བུ་ལ་བྱེད་པ་ཡིན་ནོ། །

ཚད་མ་མདོའི་མཆོད་བརྗོད་ལུགས་ལྡོག་གི་སྒོ་ནས་བཤད་པ།

གཞུང་གི་སྤྱི་འཕྲོས་དང་རྣམ་གཞག་ལ་མཐའ་དཔྱད་པ།

༈ ཡང་ན་སྐྱོབ། བདེན་པ་བཞི་ནི་སྟོན་མཛད་པའོ། །ཞེས་པ་འདི་གང་ལས་འཕྲོས་ན། ཚད་མ་བསླུ་མེད་ཅན་ཤེས་པ། །ཞེས་པ་ནས། དེ་ཕྱིར་ཚད་ཡིན། ཞེས་པའི་བར་གྱིས་ཚད་མ་མདོའི་མཆོད་བརྗོད་ལུགས་འབྱུང་གི་སྒོ་ནས་བཤད་པ་ལ། འོ་ན། ལུགས་ལྡོག་གི་སྒོ་ནས་འཆད་ཚུལ་དེ་གང་ཞེ་ན། དེ་འཆད་པར་བྱེད་པ་ལ། ཡང་ན་སྐྱོབ། ཞེས་པ་ནས། བསྟན་ཕྱིར་དེ་ཡང་གསལ་བར་བཤད། །ཅེས་པའི་བར་བྱུང་། འོ་ན། དེའི་བར་གྱིས་ཚད་མ་མདོའི་མཆོད་བརྗོད་ལུགས་ལྡོག་གི་སྒོ་ནས་འཆད་ན་འཆད་ཚུལ་དེ་གང་ཞེ་ན། དེ་ལ་སྐྱོབ་པ་བཤད་པ། བདེ་གཤེགས་བཤད་པ། སྟོན་པ་བཤད་པ། འགྲོ་ལ་ཕན་བཞེད་པ་བཤད་པ། ཚད་མར་གྱུར་པ་བཤད་པ་དང་དུ་མ་ཡོད་པ་ལས། དང་པོ་སྐྱོབ་པ་འཆད་པར་བྱེད་པ་ལ། ཡང་ན་སྐྱོབ། བདེན་པ་བཞི་ནི་སྟོན་མཛད་པའོ། །ཞེས་པ་འདི་བྱུང་། འོ་ན། ཡང་ན་། ཞེས་སྨོས་པ་ལ་དགོས་པ་གང་ཡོད་ཅེ་ན། དེ་ལྟར་སྨོས་པ་དགོས་པ་ཡོད་དེ། ཚད་མ་མདོའི་མཆོད་བརྗོད་ལུགས་འབྱུང་གི་སྒོ་ནས་བཤད་པར་མ་ཟད། ལུགས་ལྡོག་གི་སྒོ་ནས་ཀྱང་འཆད་དོ། །ཞེས་ཤེས་པར་བྱ་བའི་ཆེད་ཡིན་པའི་ཕྱིར། འོ་ན། བདེན་པ་བཞི་སྟོན་ན། སྡུག་བསྔལ་བདེན་པ་དེ་གང་ཞེ་ན། འདི་ལ་ཐོས་པས་སྒྲོ་འདོགས་ཆོད་པའི་དབང་དུ་བྱས་ནས། མངོན་པ་ཀུན་བཏུས་ལས། སྡུག་བསྔལ་གྱི་བདེན་པ་གང་ཞེ་ན། སེམས་ཅན་སྐྱེ་བ་དང་། སྐྱེ་བའི་གནས་ཀྱིས་ཀྱང་རིག་པར་བྱའོ། །ཞེས་མ་དག་པའི་སྣོད་ཀྱི་འཇིག་རྟེན་དང་། མ་དག་པའི་བཅུད་ཀྱི་འཇིག་རྟེན་གཉིས་སྡུག་བསྔལ་བདེན་པའི་མཚན་གཞིར་བསྟན་ལ། འདིར་ནི་གོམས་པས་རྒྱུན་བསྲིང་པའི་དབང་དུ་བྱས་ནས། སྡུག་བསྔལ་འཁོར་བ་ཅན་ཕུང་པོ། །གོམས་ལས་འདོད་ཆགས་སོགས་གསལ་བ། །ཞེས་ཟག་བཅས་ཉེར་ལེན་གྱི་ཕུང་པོ་ལྔ་པོ་དེ་སྡུག་བསྔལ་བདེན་པའི་མཚན་གཞིར་བསྟན་པ་ཡིན་ནོ། །འོ་ན། ཟག་བཅས་ཉེར་ལེན་གྱི་ཕུང་པོ་ལྔ་པོ་དེ་སྡུག་བསྔལ་བདེན་པའི་མཚན་གཞིར་སྟོན་པའི་རྒྱུ་མཚན་གང་ཞེ་ན། དེ་ལྟར་སྟོན་པའི་རྒྱུ་མཚན་ཡོད་དེ། གཙང་བ་དང་། བདེ་བ་དང་། རྟག་པ་དང་། བདག་ཏུ་སྒྲོ་འདོགས་པ་དེ་ཡང་གཙོ་བོར་རང་གི་ཕུང་པོ་ལ་དམིགས་ནས་བྱུང་བ་ཡིན་པས། རང་གི་ཕུང་པོའི་སྟེང་དུ་རྟག་འཛིན་གྱི་སྒྲོ་འདོགས་མ་བསལ་ན་ཕྱིའི་རི་རྭ་བ་ཁང་ཁྱིམ་ལ་སོགས་པ་མི་རྟག་པར་ཁོང་དུ་མི་ཆུད་པའི་རྒྱུ་མཚན་གྱིས་དེ་ལྟར་བསྟན་པའི་ཕྱིར། །

༈ མཐའ་དཔྱད་པ་ལ་ཁ་ཅིག་ན་རེ། རང་གི་རྒྱུར་གྱུར་པའི་ཀུན་འབྱུང་བདེན་པའི་རྣམ་སྨིན་གྱི་འབྲས་བུར་གྱུར་པའི་ཟག་བཅས་དེ་སྡུག་བསྔལ་བདེན་པའི་མཚན་ཉིད་ཟེར་ན། མ་དག་པའི་སྣོད་ཀྱི་འཇིག་རྟེན་ཆོས་ཅན། རང་གི་རྒྱུར་གྱུར་པའི་ཀུན་འབྱུང་བདེན་པའི་རྣམ་སྨིན་གྱི་འབྲས་བུ་ཡིན་པར་ཐལ། སྡུག་བསྔལ་བདེན་པ་ཡིན་པའི་ཕྱིར། འདོད་ན། དེ་ཆོས་ཅན། རྣམ་སྨིན་གྱི་འབྲས་བུ་ཡིན་པར་ཐལ། འདོད་པའི་ཕྱིར། འདོད་ན། སེམས་ཅན་གྱི་རྒྱུད་ཀྱིས་བསྡུས་པར་ཐལ། འདོད་པའི་ཕྱིར། འདོད་མི་ནུས་ཏེ། ཕྱིའི་རྟེན་འབྲེལ་ཡིན་པའི་ཕྱིར། གཞན་ཡང་། འཁོར་བར་འཕེན་བྱེད་ཀྱི་མི་དགེ་བའི་ལས་ཆོས་ཅན། རང་གི་རྒྱུར་གྱུར་པའི་ཀུན་འབྱུང་བདེན་པའི་རྣམ་སྨིན་གྱི་འབྲས་བུ་ཡིན་པར་ཐལ། སྡུག་བསྔལ་བདེན་པ་ཡིན་པའི་ཕྱིར། དེར་ཐལ། ཀུན་འབྱུང་བདེན་པ་ཡིན་པའི་ཕྱིར། དེར་ཐལ། ལས་ཀྱི་ཀུན་འབྱུང་བདེན་པ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། རྣམ་སྨིན་གྱི་འབྲས་བུ་ཡིན་པར་ཐལ། འདོད་པའི་ཕྱིར། འདོད་ན། ལུང་མ་བསྟན་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། མི་དགེ་བ་ཡིན་པའི་ཕྱིར། དེར་ཐལ། ཆོས་ཅན་དེའི་ཕྱིར། ཁ་ཅིག་ན་རེ། རང་གི་རྒྱུར་གྱུར་པའི་ཀུན་འབྱུང་བདེན་པ་ལས་བྱུང་བའི་འཁོར་བས་བསྡུས་པའི་ཆོས་དེ། སྡུག་བསྔལ་བདེན་པའི་མཚན་ཉིད། རང་འབྲས་སྡུག་བསྔལ་བདེན་པ་སྐྱེད་བྱེད་ཀྱི་འཁོར་བས་བསྡུས་པའི་ཆོས་དེ། ཀུན་འབྱུང་བདེན་པའི་མཚན་ཉིད་ཟེར་ན། དང་པོ་ལ་ལྷག་བཅས་མྱང་འདས་ལ་གནས་པའི་ཉན་ཐོས་དགྲ་བཅོམ་པའི་རྒྱུད་ཀྱི་གཟུགས་ཕུང་ཆོས་ཅན། འཁོར་བས་བསྡུས་པའི་ཆོས་ཡིན་པར་ཐལ། སྡུག་བསྔལ་བདེན་པ་ཡིན་པའི་ཕྱིར། མ་གྲུབ་ན། དེ་སྡུག་བསྔལ་བདེན་པ་ཡིན་པར་ཐལ། དེའི་རྒྱུད་ཀྱི་མྱང་འདས་དེ་སྡུག་བསྔལ་བདེན་པའི་ལྷག་མ་དང་བཅས་པ་ཡིན་པའི་ཕྱིར། དེར་ཐལ། དེའི་རྒྱུད་ཀྱི་མྱང་འདས་ལྷག་བཅས་མྱང་འདས་ཡིན་པའི་ཕྱིར། རྩ་བར་འདོད་ན། དེའི་རྒྱུད་ཀྱི་གཟུགས་ཕུང་དེ་ཆོས་ཅན། འཁོར་བས་བསྡུས་པའི་ཆོས་མ་ཡིན་པར་ཐལ། འཁོར་བ་སྤངས་པའི་གང་ཟག་གི་རྒྱུད་ཀྱི་ཕུང་པོ་ཡིན་པའི་ཕྱིར། མཚན་ཉིད་གཉིས་པ་ལ། སྡུག་བསྔལ་བདེན་པ་སྐད་ཅིག་དང་པོ་ཆོས་ཅན། ཀུན་འབྱུང་བདེན་པ་ཡིན་པར་ཐལ། རང་འབྲས་སྡུག་བསྔལ་བདེན་པ་སྐྱེད་བྱེད་ཀྱི་འཁོར་བས་བསྡུས་པའི་ཆོས་ཡིན་པའི་ཕྱིར། དེར་ཐལ། རང་འབྲས་སྡུག་བསྔལ་བདེན་པ་སྐྱེད་བྱེད་གང་ཞིག །འཁོར་བས་བསྡུས་པའི་ཆོས་ཡིན་པའི་ཕྱིར། དང་པོ་གྲུབ་སྟེ། རང་འབྲས་སྡུག་བསྔལ་བདེན་པ་སྐད་ཅིག་གཉིས་པ་སྐྱེད་བྱེད་ཡིན་པའི་ཕྱིར། ཕྱི་མ་གྲུབ་སྟེ། སྡུག་བསྔལ་བདེན་པ་ཡིན་པའི་ཕྱིར། ཁྱབ་པ་ཁས། རྩ་བར་འདོད་ན། དེ་ཆོས་ཅན། ཤེས་པ་ཡིན་པར་ཐལ། ཀུན་འབྱུང་བདེན་པ་ཡིན་པའི་ཕྱིར། འདོད་ན། སྡུག་བསྔལ་བདེན་པ་དེ་ཡང་ཤེས་པ་ཡིན་པར་ཐལ། སྡུག་བསྔལ་བདེན་པ་སྐད་ཅིག་དང་པོ་དེ་ཤེས་པ་ཡིན་པའི་ཕྱིར། ཁ་ཅིག་ན་རེ། མི་རྟག །སྡུག་བསྔལ། སྟོང་། བདག་མེད་བཞིའི་གཞི་མཐུན་པ་དེ་སྡུག་བསྔལ་བདེན་པའི་མཚན་ཉིད་ཟེར་ན། མ་དག་པའི་སྣོད་ཀྱི་འཇིག་རྟེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། སྡུག་བསྔལ་ཡིན་པར་ཐལ། འདོད་པའི་ཕྱིར། འདོད་ན། སེམས་བྱུང་ཡིན་པར་ཐལ། འདོད་པའི་ཕྱིར། ཁ་ཅིག་ན་རེ། རྒྱུ། ཀུན་འབྱུང་། རབ་སྐྱེ། རྐྱེན་བཞིའི་གཞི་མཐུན་པ་དེ་ཀུན་འབྱུང་བདེན་པའི་མཚན་ཉིད་ཟེར་ན། འཆིང་བ་ཀུན་ལྡན་གྱི་སོ་སྐྱེ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེ་ཆོས་ཅན། དེར་ཐལ། འཆིང་བ་ཀུན་ལྡན་གྱི་སོ་སྐྱེ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཤེས་པ་ཡིན་པར་ཐལ། ཀུན་འབྱུང་བདེན་པ་ཡིན་པའི་ཕྱིར། བྱས་པ་ལ་ཁོ་ན་རེ། འཆིང་བ་ཀུན་ལྡན་གྱི་སོ་སྐྱེ་ཆོས་ཅན། ཀུན་འབྱུང་བདེན་པ་ཡིན་པར་ཐལ། ཀུན་འབྱུང་གང་ཞིག །བདེན་པ་ཡིན་པའི་ཕྱིར་ན་མ་ཁྱབ། དང་པོ་གྲུབ་སྟེ། ཆོས་ཅན་དེའི་ཕྱིར། ཕྱི་མ་གྲུབ་སྟེ། དོན་དམ་བདེན་པ་ཡིན་པའི་ཕྱིར། དེར་ཐལ། དངོས་པོ་ཡིན་པའི་ཕྱིར། ཁ་ཅིག་ན་རེ། ལས་ཉོན་གྱིས་འཕང་པའི་ཟག་བཅས་ཀྱི་ཕུང་པོ་དེ་སྡུག་བསྔལ་བདེན་པའི་མཚན་ཉིད་ཟེར་ན། སོ་སྐྱེ་ཐ་མལ་པ་ཆོས་ཅན། ལས་ཉོན་གྱིས་འཕང་པ་ཡིན་པར་ཐལ། སྡུག་བསྔལ་བདེན་པ་ཡིན་པའི་ཕྱིར། རྟགས་གྲུབ་སྟེ། སོ་སྐྱེ་ཐ་མལ་པ་ཡིན་པའི་ཕྱིར། འདོད་ན། དེ་ཆོས་ཅན། ལས་ཀྱིས་འཕང་པ་ཡིན་པར་ཐལ། ལས་ཉོན་གྱིས་འཕང་པ་ཡིན་པའི་ཕྱིར། འདོད་ན། དེ་ཆོས་ཅན། ལས་ཀྱི་འབྲས་བུ་ཡིན་པར་ཐལ། འདོད་པའི་ཕྱིར། འདོད་ན། སོ་སྐྱེའི་རྒྱུད་ཀྱི་ལས་དེ་དེའི་འབྲས་བུ་ཡིན་པར་ཐལ། སོ་སྐྱེ་དེ་ལས་ཀྱི་འབྲས་བུ་ཡིན་པའི་ཕྱིར། འདོད་མི་ནུས་ཏེ། དེ་ལས་ཀྱི་བྱེ་བྲག་ཡིན་པའི་ཕྱིར། ཁ་ཅིག་ན་རེ། ལས་དང་ཉོན་མོངས་གང་རུང་གིས་བསྡུས་པའི་སེམས་བྱུང་དེ། ཀུན་འབྱུང་བདེན་པའི་མཚན་ཉིད་ཟེར་ན། སངས་འཕགས་ཀྱི་རྒྱུད་ཀྱི་ལས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེ་ཆོས་ཅན། དེ་གང་རུང་གིས་བསྡུས་པའི་སེམས་འབྱུང་ཡིན་པར་ཐལ། ལས་ཀྱིས་བསྡུས་པའི་སེམས་འབྱུང་ཡིན་པའི་ཕྱིར། དེར་ཐལ། ལས་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཀུན་འབྱུང་བདེན་པ་མ་ཡིན་པར་ཐལ། ཀུན་འབྱུང་སྤངས་པའི་མཁྱེན་པ་ཡིན་པའི་ཕྱིར། ཁ་ཅིག་ན་རེ། ལམ། རིག་པ། སྒྲུབ་པ། ངེས་འབྱིན་བཞིའི་གཞི་མཐུན་པ་དེ་ལམ་བདེན་གྱི་མཚན་ཉིད་ཟེར་ན། རྣམ་མཁྱེན་མ་ཡིན་པ་ལས་ལོག་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། དེ་ཆོས་ཅན། ལམ་བདེན་ཡིན་པར་ཐལ། འཕགས་ལམ་ཡིན་པའི་ཕྱིར། རྩ་བར་འདོད་ན། རྣམ་མཁྱེན་མ་ཡིན་པ་ལས་ལོག་པ་ཆོས་ཅན། སྒྲུབ་པ་ཡིན་པར་ཐལ། དེ་བཞིའི་གཞི་མཐུན་ཡིན་པའི་ཕྱིར། འདོད་མི་ནུས་ཏེ། འགག་པ་ཡིན་པའི་ཕྱིར། མ་གྲུབ་ན། རྣམ་མཁྱེན་ཆོས་ཅན། ཁྱོད་མ་ཡིན་པ་ལས་ལོག་པ་འགག་པ་ཡིན་པར་ཐལ། ཁྱོད་ཡིན་པ་ཡོད་པའི་ཕྱིར། བྱས་པ་ལ་ཁོ་ན་རེ། འོ་ན། བྱང་སེམས་ཀྱི་ཚོགས་ལམ་མ་ཡིན་པ་ལས་ལོག་པ་ཆོས་ཅན། དགག་པ་མ་ཡིན་པར་ཐལ། སྒྲུབ་པ་ཡིན་པའི་ཕྱིར། དེར་ཐལ། ཐེག་ཆེན་གྱི་སྒྲུབ་པ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། བྱང་སེམས་ཀྱི་མཁྱེན་པ་ཡིན་པའི་ཕྱིར། ཁ་ཅིག་ན་རེ། འགོག་པ། ཞི་བ། གྱ་ནོམ། ངེས་འབྱུང་བཞིའི་གཞི་མཐུན་པ་དེ། འགོག་བདེན་གྱི་མཚན་ཉིད་ཟེར་ན། དེ་ལ་སྐྱོན་འཕེན་པ་ཁ་ཅིག་ན་རེ། ཉན་ཐོས་སྒོམ་ལམ་པའི་རྒྱུད་ཀྱི་འགོག་བདེན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེའི་རྒྱུད་ཀྱི་འགོག་བདེན་ཆོས་ཅན། ཞི་བ་ཡིན་པར་ཐལ། དེ་བཞིའི་གཞི་མཐུན་ཡིན་པའི་ཕྱིར། འདོད་ན། དེ་ཆོས་ཅན། ཉེར་ཞི་ཡིན་པར་ཐལ། འདོད་པའི་ཕྱིར་ན་མ་ཁྱབ། འདོད་ན། དེ་ཉེར་ཞི་མ་ཡིན་པར་ཐལ། ཉན་ཐོས་སྒོམ་ལམ་པ་དེ་ཉེར་ཞི་འཚོལ་བ་པོའི་གང་ཟག་ཡིན་པའི་ཕྱིར། གཞན་ཡང་། དེའི་རྒྱུད་ཀྱི་འགོག་བདེན་ཆོས་ཅན། ངེས་འབྱུང་ཡིན་པར་ཐལ། དེ་བཞིའི་གཞི་མཐུན་ཡིན་པའི་ཕྱིར། འདོད་ན། ངེས་པར་འབྱུང་བ་ཡིན་པར་ཐལ། ངེས་འབྱུང་ཡིན་པའི་ཕྱིར། འདོད་ན། འབྱུང་བ་ཡིན་པར་ཐལ། ངེས་པར་འབྱུང་བ་ཡིན་པའི་ཕྱིར་ན་མ་ཁྱབ། །

༈ སྡུག་བསྔལ་བདེན་པ་དང་། ལམ་བདེན་འགལ་མི་འགལ་དཔྱད་པ་ལ་ཁ་ཅིག་ན་རེ། དེ་གཉིས་མི་འགལ་བ་ཡིན་ནོ། །ཟེར་ན། དེ་གཉིས་འགལ་བར་ཐལ། སྡུག་བསྔལ་བདེན་པ་ཡིན་ན། ཀུན་ནས་ཉོན་མོངས་ཕྱོགས་ཀྱི་བདེན་པ་ཡིན་དགོས། ལམ་བདེན་ཡིན་ན་རྣམ་བྱང་ཕྱོགས་ཀྱི་བདེན་པ་ཡིན་དགོས་པའི་ཕྱིར། བྱས་པ་ལ་ཁོ་ན་རེ། སྡུག་བསྔལ་བདེན་པ་ཡིན་ན་འཕགས་པ་མ་ཡིན་དགོས་པར་ཐལ། དེ་ཡིན་ན་འཕགས་ལམ་མ་ཡིན་དགོས་པའི་ཕྱིར། དེར་ཐལ། དེ་ཡིན་ན་ལམ་བདེན་མ་ཡིན་དགོས་པའི་ཕྱིར། འདོད་མི་ནུས་ཏེ། ངེས་པའི་རྒྱུན་ཞུགས་སྲིད་པ་ལན་བདུན་པ་དེ་སྡུག་བསྔལ་བདེན་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། སྡུག་བསྔལ་བདེན་པ་ཡིན་པར་ཐལ། འཁོར་བར་ལས་ཉོན་གྱིས་སྐྱེ་བ་ལེན་པའི་གང་ཟག་ཡིན་པའི་ཕྱིར་ན་མ་ཁྱབ། ཁ་ཅིག་ན་རེ། ལམ་བདེན་ཡིན་ན་རང་གི་ཐོབ་བྱར་གྱུར་པའི་འགོག་བདེན་ཐོབ་བྱེད་ཀྱི་ཐབས་ཡིན་པས་ཁྱབ་ཟེར་ན། རྣམ་མཁྱེན་ཆོས་ཅན། དེར་ཐལ། དེའི་ཕྱིར། འདོད་ན། རྣམ་མཁྱེན་ཆོས་ཅན། ཁྱོད་ཀྱི་ཐོབ་བྱ་ཡོད་པར་ཐལ། ཁྱོད་རང་གི་ཐོབ་བྱར་གྱུར་པའི་འགོག་བདེན་ཐོབ་བྱེད་ཀྱི་ཐབས་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཀྱི་ཐོབ་བྱ་མེད་པར་ཐལ། ཁྱོད་རང་ཐོབ་བྱ་མཐར་ཐུག་ཡིན་པའི་ཕྱིར། ཁ་ཅིག་ན་རེ། སྡུག་བསྔལ་དེ་ལ། སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་དང་གསུམ་དུ་འབྱེད་རིགས་སོ། །ཞེ་ན། ཁྱབ་པ་འདུ་བྱེད་ཀྱི་སྡུག་བསྔལ་ཡིན་ན་སྡུག་བསྔལ་ཡིན་དགོས་པར་ཐལ། དམ་བཅའ་འཐད་པའི་ཕྱིར། འདོད་ན། ཟག་བཅས་ཉེར་ལེན་གྱི་ཕུང་པོ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། ཁམས་གསུམ་ལ་ཁྱབ་པའི་སྡུག་བསྔལ་བདེན་པ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། སེམས་བྱུང་ཡིན་པར་ཐལ། སྡུག་བསྔལ་ཡིན་པའི་ཕྱིར། བྱས་པ་ལ་ཁོ་ན་རེ། ཁྱབ་པ་འདུ་བྱེད་ཀྱི་སྡུག་བསྔལ་ཡིན་ན། སྡུག་བསྔལ་ཡིན་དགོས་པར་ཐལ། ཁམས་གསུམ་ལ་ཁྱབ་པའི་སྡུག་བསྔལ་ཡིན་ན། སྡུག་བསྔལ་ཡིན་དགོས་པའི་ཕྱིར་ན་མ་ཁྱབ། རྟགས་གྲུབ་སྟེ། ཁམས་གསུམ་ན་ཡོད་པའི་སྡུག་བསྔལ་ཡིན་ན། སྡུག་བསྔལ་ཡིན་དགོས་པའི་ཕྱིར་ཟེར་ན། ཁོ་རང་ལ་སྡུག་བསྔལ་བདེན་པ་ཡིན་ན། སྡུག་བསྔལ་ཡིན་དགོས་པར་ཐལ། ཁྱབ་པ་འདུ་བྱེད་ཀྱི་སྡུག་བསྔལ་ཡིན་ན། སྡུག་བསྔལ་ཡིན་དགོས་པའི་ཕྱིར། འདོད་ན། ཟག་བཅས་ཉེར་ལེན་གྱི་ཕུང་པོ་ཆོས་ཅན། དེར་ཐལ། དེའི་ཕྱིར། འདོད་ན། སེམས་བྱུང་ཡིན་པར་ཐལ་ལོ། །ཟག་བཅས་ཉེར་ལེན་གྱི་ཕུང་པོ་ཡིན་ན། ཁྱབ་པ་འདུ་བྱེད་ཀྱི་སྡུག་བསྔལ་ཡིན་པས་ཁྱབ་ཟེར་ན། སོ་སྐྱེ་ཐ་མལ་བའི་རྒྱུད་ཀྱི་སྡུག་བསྔལ་གྱི་སྡུག་བསྔལ་ཆོས་ཅན། ཁྱབ་པ་འདུ་བྱེད་ཀྱི་སྡུག་བསྔལ་ཡིན་པར་ཐལ། ཟག་བཅས་ཉེར་ལེན་གྱི་ཕུང་པོ་ཡིན་པའི་ཕྱིར། འདོད་ན། དེ་ཆོས་ཅན། སྡུག་བསྔལ་བདེན་པ་ཕྲ་མོ་ཡིན་པར་ཐལ། འདོད་པ་གང་ཞིག །སྡུག་བསྔལ་བདེན་པ་ཡིན་པའི་ཕྱིར། འདོད་མི་ནུས་ཏེ། སྡུག་བསྔལ་བདེན་པ་རགས་པ་ཡིན་པའི་ཕྱིར། དེར་ཐལ། སྡུག་བསྔལ་གྱི་སྡུག་བསྔལ་ཡིན་པའི་ཕྱིར། །

རང་ལུགས་ཀྱི་བདེན་བཞིའི་རྣམ་གཞག་བཤད་པ།

༈ རང་ལུགས་བཞག་པ་ལ། བདེན་པ་བཞི་སོ་སོའི་ངོ་བོ། མཚན་གཞི། ལོག་ཞུགས་བཅུ་དྲུག་ངོས་བཟུང་བ་དང་། དེ་དང་འགལ་བའི་བདེན་པའི་རྣམ་པ་བཅུ་དྲུག་ངོས་བཟུང་བ་དང་བཞི། དང་པོ་ནི། ཀུན་ནས་ཉོན་མོངས་ཕྱོགས་ཀྱི་བདེན་པ་གང་ཞིག། རང་གི་རྒྱུར་གྱུར་པའི་ཀུན་འབྱུང་བདེན་པ་ལ་བརྟེན་ནས་བྱུང་བའི་ཟག་བཅས་དེ། སྡུག་བསྔལ་བདེན་པའི་མཚན་ཉིད། དེ་ལ་དབྱེ་ན། མ་དག་པའི་སྣོད་ཀྱི་འཇིག་རྟེན་དང་། མ་དག་པའི་བཅུད་ཀྱི་འཇིག་རྟེན་གཉིས་ཡོད་དེ། མངོན་པ་ཀུན་བཏུས་ལས། སྡུག་བསྔལ་བའི་བདེན་པ་གང་ཞེ་ན། སེམས་ཅན་སྐྱེ་བ་དང་། སྐྱེ་བའི་གནས་ཀྱིས་ཀྱང་རིག་པར་བྱའོ། །ཞེས་གསུངས་པའི་ཕྱིར། ཡང་དེ་ལ་དབྱེ་ན། སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་དང་གསུམ་དུ་ཡོད། དང་པོ་ནི། མཁལ་མའི་ཟུག་གཟེར་གྱི་ཚོར་བ་སྡུག་བསྔལ་ལྟ་བུ་ལ་བྱེད། གཉིས་པ་ནི། ཟས་ཡིད་དུ་འོང་བ་ལ་སྲེད་པའི་ཚོར་བ་ལྟ་བུ་ལ་བྱེད། གསུམ་པ་ནི། ཟག་བཅས་ཉེར་ལེན་གྱི་ཕུང་པོ་ལྟ་བུ་ལ་བྱེད། ཀུན་ནས་ཉོན་མོངས་ཕྱོགས་ཀྱི་བདེན་པ་གང་ཞིག །རང་འབྲས་སྡུག་བསྔལ་བདེན་པ་སྐྱེད་བྱེད་ཀྱི་རིགས་སུ་གནས་པའི་ཟག་བཅས་སུ་གྱུར་པའི་སེམས་བྱུང་དེ་ཀུན་འབྱུང་བདེན་པའི་མཚན་ཉིད། དེ་ལ་དབྱེ་ན། ལས་ཀྱི་ཀུན་འབྱུང་བདེན་པ་དང་། ཉོན་མོངས་པའི་ཀུན་འབྱུང་བདེན་པ་གཉིས་ཡོད་དེ། མངོན་པ་ཀུན་བཏུས་ལས། ཀུན་འབྱུང་བའི་བདེན་པ་གང་ཞེ་ན། ཉོན་མོངས་པ་དང་ཉོན་མོངས་པའི་དབང་གིས་བྱུང་བའི་ལས་སོ། །ཞེས་གསུངས་པའི་ཕྱིར། འོ་ན། འཁོར་བས་བསྡུས་པའི་ལས་དང་ཉོན་མོངས་པ་གཉིས། ཀུན་འབྱུང་བདེན་པར་ངོས་འཛིན་པའི་རྒྱུ་མཚན་གང་ཞེ་ན། དེ་ལྟར་འཛིན་པའི་རྒྱུ་མཚན་ཡོད་དེ། དཔེར་ན། ནས་མྱུག་སྐྱེ་བ་ལ་རང་གི་ཉེར་ལེན་དུ་གྱུར་པའི་ནས་ཀྱི་ས་བོན་དང་རང་གི་ལྷན་ཅིག་བྱེད་རྐྱེན་དུ་གྱུར་པའི་ཆུ་ལུད་དྲོད་གཤེར་དགོས་པ་བཞིན་དུ་སྡུག་བསྔལ་གསུམ་དང་དྲུག་ལ་སོགས་པའི་མྱུ་གུ་སྐྱེད་པ་ལ་རང་གི་འཕེན་བྱེད་ཀྱི་རྒྱུ་ལས་དང་། འགྲུབ་བྱེད་ཀྱི་རྒྱུ་ཉོན་མོངས་པ་དགོས་པའི་རྒྱུ་མཚན་གྱིས་དེ་ལྟར་ངོས་བཟུང་བ་ཡིན་པའི་ཕྱིར། ལས་ཀྱི་ཀུན་འབྱུང་བདེན་པ་དེ་ལ་དབྱེ་ན། འཁོར་བས་བསྡུས་པའི་བསོད་ནམས་ཀྱི་ལས། འཁོར་བས་བསྡུས་པའི་བསོད་ནམས་མ་ཡིན་པའི་ལས། འཁོར་བས་བསྡུས་པའི་མི་གཡོ་བའི་ལས་དང་གསུམ། དང་པོ་དེ་ལ་ཡང་མིར་སྐྱེ་བ་འཕེན་བྱེད་ཀྱི་ལས་དང་། འདོད་ལྷར་སྐྱེ་བ་འཕེན་བྱེད་ཀྱི་ལས་གཉིས། དང་པོ་ལ་གླིང་བཞི་དང་གླིང་ཕྲན་ལ་སོགས་པར་སྐྱེ་བ་འཕེན་བྱེད་ཀྱི་ལས་རྣམས་སུ་ཡོད། གཉིས་པ་ལ། འདོད་ལྷ་རིགས་དྲུག་ཏུ་སྐྱེ་བ་འཕེན་བྱེད་ཀྱི་ལས་རྣམས་སུ་ཡོད། འཁོར་བས་བསྡུས་པའི་བསོད་ནམས་མ་ཡིན་པའི་ལས་དེ་ལ་ངན་སོང་གསུམ་དུ་སྐྱེ་བ་འཕེན་བྱེད་ཀྱི་ལས་གསུམ་ཡོད། འཁོར་བས་བསྡུས་པའི་མི་གཡོ་བའི་ལས་དེ་ལ་དབྱེ་ན། གཟུགས་ཁམས་སུ་སྐྱེ་བ་འཕེན་བྱེད་ཀྱི་ལས་དང་། གཟུགས་མེད་དུ་སྐྱེ་བ་འཕེན་བྱེད་ཀྱི་ལས་གཉིས། དང་པོ་ལ། བསམ་གཏན་དང་པོར་སྐྱེ་བ་འཕེན་བྱེད་ཀྱི་ལས་དང་། བསམ་གཏན་གཉིས་པར་སྐྱེ་བ་འཕེན་བྱེད་ཀྱི་ལས་དང་། བསམ་གཏན་གསུམ་པར་སྐྱེ་བ་འཕེན་བྱེད་ཀྱི་ལས་དང་། བསམ་གཏན་བཞི་པར་སྐྱེ་བ་འཕེན་བྱེད་ཀྱི་ལས་དང་བཞི། བསམ་གཏན་དང་པོར་སྐྱེ་བ་འཕེན་བྱེད་ཀྱི་ལས་དེ་ལ་ཚངས་རིས་སུ་སྐྱེ་བ་འཕེན་བྱེད་ཀྱི་ལས་དང་། ཚངས་པ་མདུན་ན་འདོན་དུ་སྐྱེ་བ་འཕེན་བྱེད་ཀྱི་ལས་དང་། ཚངས་ཆེན་དུ་སྐྱེ་བ་འཕེན་བྱེད་ཀྱི་ལས་གསུམ་ཡོད་དོ། །བསམ་གཏན་གཉིས་པར་སྐྱེ་བ་འཕེན་བྱེད་ཀྱི་ལས་དེ་ལ། འོད་ཆུང་དུ་སྐྱེ་བ་འཕེན་བྱེད་ཀྱི་ལས་དང་། ཚད་མེད་འོད་དུ་སྐྱེ་བ་འཕེན་བྱེད་ཀྱི་ལས་དང་། འོད་གསལ་དུ་སྐྱེ་བ་འཕེན་བྱེད་ཀྱི་ལས་དང་གསུམ་དུ་ཡོད་དོ། །བསམ་གཏན་གསུམ་པར་སྐྱེ་བ་འཕེན་བྱེད་ཀྱི་ལས་དེ་ལ། དགེ་ཆུང་དུ་སྐྱེ་བ་འཕེན་བྱེད་ཀྱི་ལས་དང་། ཚད་མེད་དགེར་སྐྱེ་བ་འཕེན་བྱེད་ཀྱི་ལས་དང་། དགེ་རྒྱས་སུ་སྐྱེ་བ་འཕེན་བྱེད་ཀྱི་ལས་དང་གསུམ་དུ་ཡོད་དོ། །བསམ་གཏན་བཞི་པར་སྐྱེ་བ་འཕེན་བྱེད་ཀྱི་ལས་དེ་ལ། སྤྲིན་མེད་དུ་སྐྱེ་བ་འཕེན་བྱེད་ཀྱི་ལས་དང་། བསོད་ནམས་སྐྱེས་སུ་སྐྱེ་བ་འཕེན་བྱེད་ཀྱི་ལས་དང་། འབྲས་བུ་ཆེ་བར་སྐྱེ་བ་འཕེན་བྱེད་ཀྱི་ལས་དང་གསུམ་དུ་ཡོད་དོ། །འོ་ན། བསམ་གཏན་བཞི་པའི་གནས་དེ་ལ་བརྒྱད་ཡོད་པ་ལས་སྐྱེ་བ་འཕེན་བྱེད་ལ་གསུམ་དུ་འཇོག་པའི་རྒྱུ་མཚན་གང་ཞེ་ན། དེ་ལྟར་འཇོག་པའི་རྒྱུ་མཚན་ཡོད་དེ། གཙང་མའི་གནས་སུ་སྐྱེ་བ་འཕེན་བྱེད་ཀྱི་ལས་མེད་པར་ལེགས་བཤད་གསེར་འཕྲེང་ལས་བཤད་པའི་ཕྱིར། གཟུགས་མེད་ཀྱི་སྐྱེ་བ་འཕེན་བྱེད་ཀྱི་ལས་དེ་ལ་བཞི་ཡོད་པ་ཡིན་ཏེ། ནམ་མཁའ་མཐས་ཡས་སྐྱེ་མཆེད་དུ་སྐྱེ་བ་འཕེན་བྱེད་ཀྱི་ལས་དང་། རྣམ་ཤེས་མཐའ་ཡས་སྐྱེ་མཆེད་དུ་སྐྱེ་བ་འཕེན་བྱེད་ཀྱི་ལས་དང་། ཅི་ཡང་མེད་པའི་སྐྱེ་མཆེད་དུ་སྐྱེ་བ་འཕེན་བྱེད་ཀྱི་ལས་དང་། སྲིད་རྩེར་སྐྱེ་བ་འཕེན་བྱེད་ཀྱི་ལས་དང་བཞི་ཡོད་པའི་ཕྱིར། ཉོན་མོངས་པའི་ཀུན་འབྱུང་བདེན་པ་དེ་ལ་དབྱེ་ན། རྩ་ཉོན་དྲུག་དང་། ཉེ་བའི་ཉོན་མོངས་པ་ཉི་ཤུར་ཡོད་དོ། །དང་པོ་དྲུག་ནི། འདོད་ཆགས། ང་རྒྱལ། ཁོང་ཁྲོ། ཉོན་མོངས་ཅན་གྱི་མ་རིག་པ། ཉོན་མོངས་ཅན་གྱི་ལྟ་བ། ཉོན་མོངས་ཅན་གྱི་ཐེ་ཚོམ་རྣམས་སོ། །རང་ཐོབ་བྱེད་ཀྱི་ཐབས་སུ་གྱུར་པའི་བར་ཆད་མེད་ལམ་གྱི་ངོས་སྐལ་གྱི་སྤང་བྱར་གྱུར་པའི་སྒྲིབ་པ་སྤངས་པའི་བྲལ་བ་དེ། འགོག་བདེན་གྱི་མཚན་ཉིད། འགོག་བདེན། བྲལ་བ། ཞི་བ་རྣམས་དོན་གཅིག །རང་རྒྱུད་ལ་ལྡན་པའི་གང་ཟག་གི་རྒྱུད་ཀྱི་གང་ཟག་གི་བདག་མེད་མངོན་སུམ་དུ་རྟོགས་པའི་ཤེས་རབ་ཀྱིས་ཟིན་པའི་མཁྱེན་པ་དེ། ལམ་བདེན་གྱི་མཚན་ཉིད། ལམ་བདེན་དེ་ལ་དམན་ལམ་སྔོན་དུ་མ་སོང་བའི་དབང་དུ་བྱས་ན་མཐོང་ལམ། སྒོམ་ལམ། མི་སློབ་ལམ་དང་གསུམ་དུ་ཡོད་དོ། །དམན་ལམ་སྔོན་དུ་སོང་བའི་དབང་དུ་བྱས་ན་ཁོ་རང་དུ་གྱུར་པའི་ལམ་ལྔ་ཀར་ཡོད། གསུམ་པ་ལོག་ཞུགས་བཅུ་དྲུག་ངོས་བཟུང་བ་ནི། ལོག་ཞུགས་བཅུ་དྲུག་བཞག་ཏུ་ཡོད་དེ། སྡུག་བསྔལ་བདེན་པའི་དབང་དུ་བྱས་པ་བཞི། ཀུན་འབྱུང་བདེན་པའི་དབང་དུ་བྱས་པ་བཞི། འགོག་བདེན་གྱི་དབང་དུ་བྱས་པ་བཞི། ལམ་བདེན་གྱི་དབང་དུ་བྱས་པའི་བཞི་རྣམས་སུ་ཡོད་པའི་ཕྱིར། དང་པོ་ལ་བཞི་བཞག་ཏུ་ཡོད་དེ། ཟག་བཅས་ཀྱི་ཕུང་པོ་ལ་དམིགས་ནས་ཟག་བཅས་ཀྱི་ཕུང་པོ་རྟག་པར་འཛིན་པ། གཙང་བར་འཛིན་པ། བདེ་བར་འཛིན་པ། བདག་ཏུ་འཛིན་པ་ལ་སོགས་པའི་ལོག་ཞུགས་བཞི་ཡོད་པའི་ཕྱིར། ཀུན་འབྱུང་བདེན་པའི་དབང་དུ་བྱས་པའི་ལོག་ཞུགས་བཞི་བཞག་ཏུ་ཡོད་དེ། སྡུག་བསྔལ་རྒྱུ་མེད་དུ་འཛིན་པ། རྒྱུ་གཅིག་ཁོ་ནས་བྱས་པར་འཛིན་པ། དབང་ཕྱུག་གིས་བློ་སྔོན་དུ་བཏང་ནས་བྱས་པར་འཛིན་པ། རང་བཞིན་རྟག་ལ་གནས་སྐབས་འགྱུར་བར་འཛིན་པ་ལ་སོགས་པའི་ལོག་ཞུགས་བཞི་ཡོད་པའི་ཕྱིར། འགོག་བདེན་གྱི་དབང་དུ་བྱས་པའི་ལོག་ཞུགས་བཞི་བཞག་ཏུ་ཡོད་དེ། ཐར་པ་ཡེ་མེད་དུ་འཛིན་པ། ཟག་བཅས་ཀྱི་ཁྱད་པར་འགའ་ཞིག་ཐར་པར་འཛིན་པ། སྡུག་བསྔལ་གྱི་ཁྱད་པར་འགའ་ཞིག་གྱ་ནོམ་པའི་ཐར་པར་འཛིན་པ། སྡུག་བསྔལ་སྤངས་ཀྱང་སྤངས་པ་སླར་ལྡོག་པར་འཛིན་པ་ལ་སོགས་པའི་ལོག་ཞུགས་བཞི་ཡོད་པའི་ཕྱིར། ལམ་བདེན་གྱི་དབང་དུ་བྱས་པའི་ལོག་ཞུགས་བཞི་བཞག་ཏུ་ཡོད་དེ། ཐར་ལམ་ཡེ་མེད་དུ་འཛིན་པ། གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་དེ་ཐར་ལམ་མ་ཡིན་པར་འཛིན་པ། བསམ་གཏན་གྱི་ཁྱད་པར་འགའ་ཞིག་ཐར་ལམ་དུ་འཛིན་པ། སྡུག་བསྔལ་གཏན་ཟད་དུ་བྱེད་པའི་ཐར་ལམ་མེད་པར་འཛིན་པ་ལ་སོགས་པའི་ལོག་ཞུགས་བཞི་རྣམས་སུ་ཡོད་པའི་ཕྱིར་ཏེ། བདེན་པ་བཞི་ལ་བརྟེན་པ་དང་། །བདེ་དང་ང་དང་ངའི་ཞེས་སོགས། །ཡང་དག་མིན་པ་རྣམ་བཅུ་དྲུག །སྒྲོ་བཏགས་ནས་ནི་ཡོངས་སུ་སྲེད། །ཅེས་གསུངས་པའི་ཕྱིར། གསུམ་པ་དེ་དང་འགལ་བའི་བདེན་པའི་རྣམ་པ་བཅུ་དྲུག་ངོས་བཟུང་བ་ནི། ཟག་བཅས་ཉེར་ལེན་གྱི་ཕུང་པོ་ཆོས་ཅན། མི་རྟག་སྟེ། རེ་འགའ་སྐྱེ་བའི་ཕྱིར། དེ་ཆོས་ཅན། སྡུག་བསྔལ་གྱི་རྣམ་པ་ཡིན་ཏེ། ལས་དང་ཉོན་མོངས་པའི་གཞན་དབང་ཅན་གྱི་ཕུང་པོ་ཡིན་པའི་ཕྱིར། དེ་ཆོས་ཅན། དོན་གཞན་གྱི་བདག་གིས་སྟོང་པ་ཡིན་ཏེ། དབང་སྒྱུར་པ་པོའི་བདག་དོན་གཞན་གྱིས་སྟོང་པའི་ཕུང་པོ་ཡིན་པའི་ཕྱིར། དེ་ཆོས་ཅན། བདག་མེད་ཡིན་ཏེ། རང་དབང་བའི་བདག་གི་ངོ་བོར་མ་གྲུབ་པའི་ཕུང་པོ་ཡིན་པའི་ཕྱིར། རྟེན་འབྲེལ་ཡན་ལག་བཅུ་གཉིས་ཀྱི་ནང་ཚན་དུ་གྱུར་པའི་སྲེད་པ་ཆོས་ཅན། རྒྱུ་ཡི་རྣམ་པ་ཡིན་ཏེ། རང་འབྲས་སྡུག་བསྔལ་གྱི་རྩ་བ་ཡིན་པའི་ཕྱིར། དེ་ཆོས་ཅན། ཀུན་འབྱུང་གི་རྣམ་པ་ཡིན་ཏེ། རང་འབྲས་སྡུག་བསྔལ་ཡང་ཡང་སྐྱེད་བྱེད་ཡིན་པའི་ཕྱིར། དེ་ཆོས་ཅན། རབ་སྐྱེའི་རྣམ་པ་ཡིན་ཏེ། རང་འབྲས་སྡུག་བསྔལ་ཤུགས་དྲག་སྐྱེད་བྱེད་ཡིན་པའི་ཕྱིར། དེ་ཆོས་ཅན། རྐྱེན་གྱི་རྣམ་པ་ཡིན་ཏེ། རང་འབྲས་སྡུག་བསྔལ་གྱི་ལྷན་ཅིག་བྱེད་རྐྱེན་ཡིན་པའི་ཕྱིར། སྡུག་བསྔལ་སྤངས་པའི་བྲལ་བ་ཆོས་ཅན། འགོག་པའི་རྣམ་པ་ཡིན་ཏེ། སྡུག་བསྔལ་སྤངས་པའི་བྲལ་བ་ཡིན་པའི་ཕྱིར། དེ་ཆོས་ཅན། ཞི་བའི་རྣམ་པ་ཡིན་ཏེ། ཉོན་མོངས་སྤངས་པའི་བྲལ་བ་ཡིན་པའི་ཕྱིར། དེ་ཆོས་ཅན། གྱ་ནོམ་པའི་རྣམ་པ་ཡིན་ཏེ། ཕུན་སུམ་ཚོགས་པའི་ཐར་པ་ཡིན་པའི་ཕྱིར། དེ་ཆོས་ཅན། ངེས་པར་འབྱུང་བའི་རྣམ་པ་ཡིན་ཏེ། སྡུག་བསྔལ་སླར་མི་ལྡོག་པར་སྤངས་པའི་བྲལ་བ་ཡིན་པའི་ཕྱིར། གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་ཆོས་ཅན། ལམ་གྱི་རྣམ་པ་ཡིན་ཏེ། ཐར་པར་བགྲོད་པའི་འཕགས་ལམ་ཡིན་པའི་ཕྱིར། དེ་ཆོས་ཅན། རིག་པའི་རྣམ་པ་ཡིན་ཏེ། ཉོན་མོངས་པའི་གཉེན་པོར་རིག་པའི་འཕགས་ལམ་ཡིན་པའི་ཕྱིར། དེ་ཆོས་ཅན། སྒྲུབ་པའི་རྣམ་པ་ཡིན་ཏེ། སེམས་ཀྱི་གནས་ལུགས་ཕྱིན་ཅི་མ་ལོག་པར་སྒྲུབ་པའི་འཕགས་ལམ་ཡིན་པའི་ཕྱིར། དེ་ཆོས་ཅན། ངེས་པར་འབྱིན་པའི་རྣམ་པ་ཡིན་ཏེ། སྡུག་བསྔལ་གཏན་ཟད་དུ་བྱེད་པའི་ཐར་ལམ་ཡིན་པའི་ཕྱིར། དེ་ན་ཐུབ་པ་སངས་རྒྱས་བཅོམ་ལྡན་འདས་ཆོས་ཅན། གདུལ་བྱའི་སྐྱོབ་པ་མཐར་ཐུག་ཡིན་ཏེ། གདུལ་བྱ་ལ་བདེན་བཞིའི་གནས་ལུགས་ཕྱིན་ཅི་མ་ལོག་པར་སྟོན་པ་མཐར་ཕྱིན་པའི་སྐྱེས་བུ་ཡིན་པའི་ཕྱིར།། །།

འདིས་ཀྱང་ཐུབ་པའི་བསྟན་པ་རིན་པོ་ཆེ་སྒོ་ཐམས་ཅད་ནས་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག། །སརྦ་མངྒ་ལམ།། །།