ཞལ་གདམས་ཕྱོགས་བསྡུས།
ན་མོ་གུ་རུ་ཤི་པདྨཱ་ཀ་ར་ཡ། །དལ་བ་རྙེད་དང་བསྟན་ལ་མཇལ་བ་དང༌། །དད་པ་མང་དང་རབ་ཏུ་བྱུང་ཐོབ་པ། །འདི་འདྲ་རྙེད་པར་དཀའ་བས་འབད་པ་བརྒྱས། །སྙིང་པོ་ལེན་པའི་ཐབས་ལ་བསླབ་འཚལ་ལོ། །མཐོན་པོའི་ཐོབ་དང་ཕྱུག་པོའི་ལོངས་སྤྱོད་དང༌། །བཙན་པོའི་དཔུང་ཤེད་གཞོན་ནུའི་ལང་ཚོ་སོགས། །མཐའ་དག་བོར་ནས་ངེས་པར་འཆི་དགོས་ན། །ཚེ་འདི་ཁོ་ནར་སེམས་པ་ཤིན་ཏུ་བླུན། །སྟོན་པས་འཁོར་ལོས་སྒྱུར་བའི་སྲིད་སྤངས་ནས། །ཤིང་དྲུང་རྩ་ཡི་གདིང་བ་བསྟེན་མཛད་ན། །དུས་ངན་འདུ་འཛི་སྦྲུལ་གྱི་ཚང་ནང་ལྟར། །འཇིགས་པའི་གནས་འདིར་བདག་ཅག་ཇི་ལྟར་དགའ། །ཐུབ་པ་ཆགས་བྲལ་ཞི་བའི་མཐར་སོན་པའང༌། །འདུ་འཛི་སྤངས་ནས་བྱང་ཆུབ་མཆོག་བརྙེས་ན། །ཉེས་བརྒྱས་རྨས་པ་བདག་ཅག་ཆགས་སྡང་གི༌།ཡུལ་ངན་ནང་དུ་དགེ་བ་ག་ལ་འཕེལ། །གཞུང་མང་སྦྱངས་ཤིང་མན་ངག་ཐོས་པ་དང༌། །སྒྲུབ་ལ་འདུན་པའི་སྐྱེས་བུ་བརྒྱ་རྙེད་དག །འདོད་དང་འདུ་འཛིའི་ཆོམ་རྐུན་གྱིས་བཅོམ་སྟེ། །ཚོང་དང་གྱོད་དང་ཁྱིམ་གྱི་སྒྲོག་ཏུ་ཚུད། །ཕྱི་སྣོད་ཕལ་ཆེར་གོག་ཅིང་ཞིག་ཤུལ་གྱུར། །སྐྱེ་དགུ་ཕལ་ཆེར་ལས་ཀྱི་ཆད་པས་མནར། །གང་ལ་བལྟས་ཀྱང་འཇིགས་དང་སྐྱོ་བའི་རྒྱུ། །འདི་འདྲའི་ནང་དུ་བདེ་སྐྱིད་ཅི་ཞིག་ཡོད། །མདོར་ན་འཆིང་བ་མི་བཟད་འདོད་པའི་དགྲར། །སྐྱོ་བ་སྐྱེད་ལ་བསྐྱེད་ནས་མང་དུ་བསླབ། །སྐྱོ་འདི་བྱང་ཆུབ་ལམ་གྱི་གླེང་གཞི་རུ། །འཇིག་
རྟེན་གཉེན་གྱིས་ལན་ཅིག་མིན་པར་གསུངས། །འཇིག་རྟེན་བྱ་བ་སྤུན་པ་འཕྱར་བ་བཞིན། །སྙིང་པོ་མེད་པར་གཏིང་ནས་རིག་གྱུར་ན། །དམ་ཆོས་སྒྲུབ་ལ་ཅིས་ཀྱང་མི་བཟློག་པའི། །ཐག་ཆོད་བློ་སྣ་འདི་འདྲ་ཟིན་པ་འོང༌། །ཕྱུག་པོའི་ནོར་བཞིན་དམ་ཆོས་ཐང་བདལ་ཡང༌། །གང་ལ་འཇུས་ཀྱང་ཕག་སྣ་བྲག་ཐུག་བཞིན། །གཅིག་ཏུ་རྡུག་འདི་ཆོས་བརྒྱད་འགོང་པོ་ཡིས། །རང་རྒྱུད་ཟིལ་གྱིས་མནན་པས་ནོངས་པར་གསུངས། །དམ་ཆོས་བྱེད་འདོད་ལྷད་དང་བྲལ་ངེས་ཤིག །ཡོད་ན་ད་ལྟ་ཐུབ་བསྟན་གནས་པའི་ཕྱིར། །མངོན་མཐོ་ངེས་ལེགས་ཆོས་སྐོར་གང་འདོད་ཀྱང༌། །རིན་ཆེན་གླིང་ནས་གསེར་བཞིན་བླང་བས་ཆོག །དེ་ཚེ་གདམས་པས་རང་གི་བྱ་བ་བྱེད། །ཆོས་ལ་བློ་འགྲོ་སོང་ནས་ཕྱིར་མི་ལྡོག །ཆོས་དང་རང་རྒྱུད་དཔྱིད་དང་ལྡུམ་ར་བཞིན། །མཐུན་པའི་རྟེན་འབྲེལ་ངང་གིས་འགྲིགས་པ་ལགས། །ཆོས་ཀྱི་ཉིང་ཁུ་ཐེག་པ་མཆོག་གི་ལམ། །མཐོ་རིས་ཐར་པ་སྒྲུབ་པའི་ལམ་རྣམས་ཀུན། །དེ་ལ་གཞོལ་ཞིང་དེ་ཡི་ཁོང་ཆུད་དེ། །སངས་རྒྱས་ཐེག་པ་གངས་ཆེན་མཚོ་འདྲར་བསྔགས། །ཐེག་མཆོག་ལམ་བཟང་ངེས་པར་སྒྲུབ་སྙམ་ན། །ལམ་དེའི་སྔོན་འགྲོ་ཅི་ཙམ་སྦྱང་བ་དང༌། །ལམ་དེའི་འཇུག་སྒོ་གང་ལ་བྱེད་པ་དང༌། །འཇུག་སྒོ་དེ་ལ་ཇི་ལྟར་སློབ་པ་དང༌། །ཞུགས་ནས་ཅི་ཞིག་བྱ་བའི་རྣམ་བཞག་སོགས། །རྒྱལ་བས་གསུངས་ཤིང་ཤིང་རྟ་ཆེན་པོས་བཀྲལ། །མཁས་ནས་མཁས་པར་བརྒྱུད་པའི་མན་ངག་བཞིན། །བརྩོན་འགྲུས་
ཆེན་པོས་ལེགས་པར་སྦྱངས་པ་གཅེས། །འོན་ཏེ་ཚིག་ཕྲེང་ཉུང་ངུས་ལམ་གྱི་གནད། །ཚང་བར་འདོམས་པའི་ཞལ་གདམས་ལ་དགྱེས་ན། །སངས་རྒྱས་སྲས་པོ་དཔལ་ལྡན་ཞི་བ་ལྷའི། །སྤྱོད་འཇུག་གཞུང་ལ་ཆོག་ཤེས་མེད་པར་གཟིགས། །གཞུང་ཉུང་དོན་རྒྱས་ཚིག་སྦྱོར་གསལ་ཞིང་སྙན། །རིགས་པའི་རྒྱན་ལྡན་ཉམས་ལེན་གནད་དུ་འདྲིལ། །རྒྱ་བོད་མཁས་པའི་ཐུགས་དམ་བྱིན་རླབས་ཅན། །འདི་འདྲ་རྙེད་དཀའ་ལྷག་པ་གང་ནས་རྙེད། །ཡང་ཡང་བལྟ་ཞིང་མཁས་པས་ཞིབ་ཏུ་མཉན། །དུས་ཀུན་སེམས་ཤིང་དབྱངས་ཀྱིས་ཁ་ཏོན་བྱ། །སྔས་སུ་བཞག་ཅིང་སྨོན་ལམ་རྒྱ་ཆེན་གདབ། །སྒོ་རྣམས་ཀུན་ནས་འདི་ལ་བྱ་བ་མཛོད། །བཀྲ་ཤིས་མཐའ་བཟང་མིས་མཆོད་རང་སེམས་གཙང༌། །ལྷ་དགའ་འདྲེ་ཞི་རྒྱལ་དང་མཁས་པ་དགྱེས། །རྨི་ལམ་ཚུན་ཆད་ལེགས་པའི་ལམ་དུ་འོང༌། །དགེ་སྦྱོར་དེ་ཡིན་ཆོས་སྤྱོད་དེ་ལ་ཟེར། །དེ་ལྟར་ཐེག་པ་མཆོག་ལ་བློ་སྦྱངས་ནས། །སངས་རྒྱས་རིགས་ཀྱི་ནུས་པ་ཆེར་རྒྱས་ན། །དོན་གཉིས་བསམ་པ་མྱུར་དུ་རྫོགས་སླད་དུ། །བླ་མེད་རྡོ་རྗེ་ཐེག་ལ་འཇུག་པར་བྱ། །འཇུག་སྒོ་དབང་དང་དབང་སྲོག་དམ་ཚིག་གིས། །བཟུང་དང་སྨིན་ལམ་རིམ་པ་དང་པོ་དང༌། །དངོས་གཞི་རྫོགས་རིམ་བོགས་འདོན་ཐབས་དང་བཅས། །གསར་རྙིང་རྒྱུད་སྡེའི་ལམ་སྲོལ་གྲངས་མེད་ཀྱང༌། །རང་ཅག་ལས་སྨོན་དཀར་པོའི་མེ་ཏོག་ཕྲེང༌། །སྔ་འགྱུར་ཆོས་ཀྱི་རེ་ཁཱ་ལ་བབས་ཕྱིར། །
སྐྱབས་གཅིག་ཨོ་རྒྱན་པདྨའི་བཀའ་བརྒྱུད་འདིར། །བློ་རྩེ་གཅིག་ཏུ་དྲིལ་ནས་འཇུས་ན་འཐད། །དེ་སྐད་རང་བློར་གང་ཤར་ཡི་གེའི་ཕྲེང༌། །རྐང་པར་བཅད་འདི་བསོད་ནམས་དཔལ་ལྡན་པས། །བསྐུལ་ནས་ནགས་ཀྱི་མི་རྒན་བྷུ་སུ་ཀུས། །བྲིས་པའི་དགེ་བའི་འགྲོ་ལ་ཕན་བྱེད་ཤོག། ༈ །།མཁྱེན་པས་བཟང་གོམས་ཁོ་ན་སྙིང་པོར་དགོངས། །བརྩོན་པས་ངན་གོམས་བག་ཆགས་དྲུངས་ནས་ཕྱུངས། །དེ་མཐུས་བཟང་གོམས་རབ་ཀྱི་རྩེར་སོན་པ། །ཐུབ་མཆོག་ཟླ་མེད་དེ་ལ་མགོས་ཕྱག་འཚལ། །ཡོན་ཏན་མཐའ་དག་གོམས་པའི་རྗེས་འགྲོ་ཞིང༌། །གོམས་པ་རང་གིས་འབད་རྩོལ་ལ་གནས་ཀྱང༌། །ཡོན་ཏན་ལ་དགའ་དེ་ཉིད་མངོན་འདོད་ཅིང༌། །གོམས་ཕྱིར་རྩོལ་བ་སྣ་གཅིག་མི་བྱེད་མཚར། །ངན་གོམས་ཁོ་ནའི་དབང་སོང་གདུལ་བྱ་ཡི། ཁ་ལོ་སྒྱུར་ཕྱིར་སངས་རྒྱས་འཇིག་རྟེན་བྱོན། །དེ་ཡི་རྗེས་ཞུགས་བཟང་གོམས་མི་སློབ་ན། །རྗེས་ཞུགས་ཟེར་བའང་མཛུབ་མོ་བཙུག་ཡུལ་དཀའ། །ཤིན་ཏུ་བླུན་ཡང་གོམས་པ་ལྷུར་བླངས་པས། །ཚིགས་བཅད་གཅིག་གིས་ལམ་པས་ཁྱད་པར་རྟོགས། །བློ་རྣོ་སྨྲ་ལྕེ་བདེ་བའི་ཁེངས་ལྡན་བརྒྱ། །ལེ་ལོའི་དབང་གྱུར་ལག་པ་སྟོང་པར་འགྲོ། །རང་བློ་ཆོས་ལ་བཅུག་ཀྱང་མི་འཇུག་པ། །ཚེ་སྔོན་བཟང་གོམས་མེད་པའི་ལག་རྗེས་ཏེ། །ད་ལྟའི་མི་ཚེའང་ངན་གོམས་ལ་བཏང་ན། །ཕྱི་མའི་ཚེ་ཡང་ལམ་བཟང་ཇི་ལྟར་རྙེད། །སྐད་ཅིག་བསམ་ཀྱང་དོན་ཆེན་མི་ཟད་པའི། །སྒོར་གྱུར་
སངས་རྒྱས་བསྟན་པ་བདུད་རྩིའི་རོ། །རྙེད་ནས་མ་མྱང་ཆོས་ཀྱི་སྒྲ་ཙམ་ཡང༌། །མི་ཐོས་དམྱལ་བར་སོང་ཚེ་ཅི་ཞིག་བྱ། །བདེ་འགྲོའི་རྟེན་རྙེད་ལམ་སྟོན་བླ་མ་དང༌། །ཆོས་ཚུལ་དཔྱོད་པའི་བློ་མིག་འཛོམ་དུས་སུ། །བཟང་གོམས་མི་བསྟེན་སྐྱབས་མེད་མགོན་མེད་དུ། །ངན་འགྲོར་སོང་ཚེ་བཟང་གོམས་ཇི་ལྟར་འོང༌། །ན་ཚོད་ཐོག་མར་རྩེད་མོས་ནམ་ཟླ་ཕུལ། །དར་མའི་རྣམ་དཔྱོད་ངན་གོམས་ལང་ཤོར་བཏང༌། །རྒུད་ཚེ་བཟང་གོམས་བསླབ་ཀྱང་སྟོབས་མེད་པས། །ཀྱེ་མའོ་གོ་འཕང་བཟང་པོར་ཇི་ལྟར་འགྲོ། །འདུ་འཛིའི་ནང་དུ་འཇིག་རྟེན་ལོང་གཏམ་སྤེལ། །གཅིག་པུར་འདུག་དུས་བཙེམ་དྲུབ་ཤིང་བཟོར་བརྩོན། །སང་རྗེས་གནངས་འོང་རྣམ་རྟོག་ལུ་གུ་རྒྱུད། །དེ་འདྲའི་དཀྱིལ་ནས་བཟང་གོམས་ནམ་ཡོང་སོམས། །བྲེལ་དུས་བྲེལ་བས་གཡེངས་ཤིང་སོས་དལ་དུས། །རྒྱ་བོད་ཧོར་སོགས་འདུ་འཛིའི་གཏམ་གྱིས་འདའ། །དུས་རྣམས་ཀུན་ཏུ་ཤག་དང་བཞད་གད་སྦྱང༌། །བཟང་གོམས་མ་བྱུང་ཟེར་ཏེ་གང་ནས་འབྱུང༌། །ཉིན་མོ་གཏུག་འགྲུལ་ལས་མང་བྱ་དགོས་སྙམ། །མཚན་མོ་གཉིད་བྲོད་མྱུར་དུ་ཉལ་དགོས་སྙམ། །ཉིན་མཚན་མཐའ་དག་དེ་འདྲའི་ངང་སོང་ན། །མི་ཚེའི་ལྷག་མ་ཞེས་བྱ་གཞན་ཡོད་མིན། །ཉམས་མྱོང་སྤྱོད་ལམ་ཀུན་དང་སྲེ་བ་ལ། །ཆོས་ཀྱི་ཉམས་མྱོང་སྣ་གཅིག་ཡོད་པ་དགོས། །རྗེས་དྲན་དྲུག མཆན་༌།འོན་ཀྱང་སྒྲ་སྤྱིའི་གོ་ཡུལ་རྗེས་དྲན་ཙམ། །སྤྱོད་ལམ་རྣམ་བཞིར་སྦྱོང་བ་བྱ་དཀའ་མིན། །འཇིག་
རྟེན་བླུན་པོ་ཆོས་ལ་མ་འདྲིས་པའང༌། །ཕོངས་པས་ཉེན་ཚེ་དཀོན་མཆོག་དྲན་བྱེད་ན། ། རྗེས་འབྲངས་བྲེལ་བ་ཕྲ་མོའི་ཕྱིར། །དམ་ཆོས་བརྗེད་དོ་ཟེར་ན་ངོ་ཡང་ཚ། །མཆོག་གསུམ་ལན་རེ་དྲན་ཡང་ཚེ་རབས་སུ། །འཚེད་ངེས་བསོད་ནམས་རོ་བརྒྱགས་ཐོབ་འགྱུར་ན། །རྩེ་རྒོད་གཡེང་བས་བརྗེད་ངས་དགྲ་འབོད་པ། །བདུད་ཀྱི་མེ་ཏོག་ཉག་ཕྲན་མངོན་སུམ་བཞིན། །བྲེལ་བས་མ་ཁོམས་ཟེར་ཏེ་ཇི་ལྟར་ཡང༌། །དེ་ཚེ་འདུ་འཛིའི་གཏམ་དང་ཤག་འགྱེད་ནི། །བྲིས་ན་གླེགས་བམ་ཆེ་ཚད་བགྱིད་དུ་བྱུང༌། །ཆོས་ཚིག་གཅིག་དྲན་མ་ཁོམས་ཅང་བདེན་ནམ། །གྱོད་དང་ཁེ་སྤོགས་ཉེ་དུའི་ཁ་འཛིན་སོགས། །ལོག་པའི་ཡུལ་བསམ་དེ་ལ་དགའ་བ་བསྒོམ། །དེ་ཉིད་བཟླས་བརྗོད་བྱེད་ཅིང་ཡིད་གཏད་ན། །མི་དགེ་ངན་གོམས་མ་བསླབ་ཅི་ཞིག་བསླབ། །གཡོ་སྒྱུ་ཁྲམ་སོགས་འཇིག་རྟེན་ཁྱིམ་པ་ཡི། །ངན་སྤྱོད་ཁོ་ནའི་རྒྱུས་ལ་སྦྱང་བྱས་པས། །དཀར་ཆོས་ཟླ་བ་ཡར་ངོ་ལྟར་འགྱུར་ན། །རྒྱུ་འབྲས་མི་འཆོལ་ཞེས་པ་རྫུན་དུ་བས། ཁེ་བས་ཚོང་དང་ཆོམ་རྐུན་གཡོ་ཐབས་དང༌། །སྣ་བོས་གྱོད་དང་བནྡེས་ཆོས་གཏམ་སོགས། །གོམས་ཤུགས་ཇི་བཞིན་ངག་ཀྱང་རྗེས་འབྲངས་བས། །གཏམ་རྣམས་འདོད་པའི་ཕྱོགས་བཞིན་འགྲོ་ཞེས་གྲགས། །དམ་པ་ཡིན་མིན་སེམས་རྒྱུད་བཟང་ངན་ཁྱད། །སེམས་རྒྱུད་བཟང་བ་གོམས་པ་བཟང་ལ་རག །ངན་པའི་སྤྱོད་ཚུལ་གོམས་པ་ལྷུར་ལེན་ཅིང༌། །བཟང་པོར་རེ་ན་དུ་བས་རྒྱ་མཚོ་དཔོགས། །
དྲང་སྲོང་རྒྱལ་མཚན་ཐོགས་པའི་གྲལ་རིང་གིས། །བཙོག་གཏམ་ཆོས་ལྟར་འདོན་ལ་མི་ཁྲེལ་བར། །རབ་བྱུང་ཁ་ནས་ཆོས་གཏམ་ཐོན་པ་ལ། །ཚུལ་འཆོས་ཡིན་ཞེས་ཞེ་ཁྲེལ་གཏོང་བའང་མཐོང༌། ཁྱིམ་པས་ངན་ལས་གང་དང་ཅི་བྱེད་ཀྱང༌། །རང་གི་ལས་སྐལ་ཡིན་ཅེས་མགྲིན་གཅིག་སྒྲོགས། །རབ་བྱུང་ཆོས་ལ་གུས་ཤིང་ཆོས་སྨྲ་ན། །ལས་སྐལ་མི་ཟེར་ཟོལ་མ་ཡིན་ཞེས་འཕྱ། །ཀྱི་ཧུད་འཇིག་རྟེན་བླ་མའི་བསྟན་པ་ནི། །འདི་ལྟར་ཐ་མའི་གནས་སྐབས་སོན་མཐོང་ཡང༌། །ཡིད་འབྱུང་མི་སྐྱེ་དམུ་རྒོད་བག་མེད་ཀྱི། །ཕྱི་རྗེས་ཅི་སྙོགས་བྱེད་པ་སྐྱོ་བའི་ཡུལ། །འདུ་འཛི་བཅད་ན་དེ་འདྲ་མིན་ནོ་ལོ། །དབེན་པའི་གནས་སུའང་མཐོ་བའི་སར་སོང་སྟེ། །གྲོང་ལ་བལྟ་ཞིང་གྲོང་གི་གཏམ་འདྲི་ཕྱིར། །ལམ་འགྲུལ་འཚོལ་ན་འདུ་འཛི་ནམ་ཞིག་འཆད། །ནེའུ་སེང་མཛེས་པས་ཕྱུགས་ཀྱི་རྩ་ལྷས་དང༌། །ནགས་ཚལ་དྲ་བས་རྩབ་ཏུ་ཤིང་འབྲེག་དང༌། །དབེན་པའི་སྐྱིབས་ཀྱིས་རྐུན་པོའི་གབ་ཁུང་དང༌། །རི་དྭགས་ཚོགས་ལས་རྔོན་པའི་མེ་མདའ་སོགས། །མདོར་ན་གང་གང་དབེན་པའི་འབྱོར་བ་མཆོག །དེ་དེ་འདུ་འཛི་རྗེས་དྲན་སྒོར་སོང་ནས། །འདུ་འཛི་རྨི་ལམ་ནང་དུའང་མི་བརྗེད་པའི། །ཚུལ་འདིས་དབེན་ཡང་དོན་དུ་འགྱུར་བ་དཀའ། ཁ་ཅིག་འདི་ལྟར་ངན་གོམས་ཆེར་མཐོང་བས། །སྐྲག་ནས་བཟང་གོམས་འབའ་ཞིག་རྩལ་སྦྱོང་བྱེད། །རི་ཀླུང་ཕལ་ཆེར་
མེ་ཡིས་འབར་མཐོང་ཚེ། །མིག་ལྡན་སྐྱེ་བོ་བསིལ་བའི་ཕྱོགས་སུ་འབྲོས། །གཞན་དག་ཁོ་བོ་བཟང་གོམས་མི་སློབ་པའི། །རྒྱུ་མཚན་ངན་གོམས་འཐུག་པས་ནོངས་སོ་ཟེར། །མེ་ཆེན་དུ་བས་ནགས་ཀླུང་གླལ་བ་ན། །བསམ་མེད་བྱ་ཚོགས་ནན་གྱིས་མེ་ནང་འཇུག །ལམ་འགྲུལ་འཕྱིས་ན་དོ་ནུབ་འདོད་པའི་སར། །མི་སླེབ་ཟེར་ཏེ་སྔ་ནས་སྒ་ཆས་འཇུག །ཚེ་ཕྱེད་རྫོགས་ཀྱང་བཟང་གོམས་བསླབ་འཕྱིས་པས། །འཆི་དུས་འདོད་སར་མི་སླེབ་ཡོང་མི་སེམས། །ཐོག་མེད་ངན་གོམས་དྲག་པོའི་རི་གཟར་རྦབ། །བརྩོན་འགྲུས་ཤུགས་ཀྱིས་བཟུང་སྟེ་བདེ་མཐོའི་སར། །འདྲེན་འདི་ལོ་རེ་ཟླ་རེས་སྒྲུབ་ནུས་པའི། །བགྱི་བ་ཆུང་ངུ་མིན་ཏེ་སུ་ཡིས་ཤེས། །རྒས་པའི་འོག་ཏུ་མྱུར་བ་མྱུར་བར་ནི། །བཟང་གོམས་མཐར་དབྱུང་སྙམ་པ་སྙིང་སྟོབས་ཆེ། །སེམས་ཤེད་རྒྱས་དུས་བཟང་གོམས་ཕྲ་མོ་ནས། །གསོག་ལ་ཞུམ་པ་སྙིང་སྟོབས་ཤིན་ཏུ་དམན། །རི་བོ་བགས་ཀྱིས་འཛེགས་ཤིང་གྲོག་མའི་མཁར། །བགས་ཀྱིས་བསགས་ནས་ཆེན་པོར་གྱུར་པ་ལྟར། །བགས་ཀྱིས་སྦྱངས་ཤིང་མཐར་གྱིས་བསླབ་ནས་སུ། །གོམས་པར་འགྱུར་འདི་སྲས་བཅས་རྒྱལ་བའི་ལུགས། །མ་བཅུས་བཀོད་མའི་ཆུ་ཡང་སྐམ་འགྱུར་ལ། །བུས་ན་མེ་སྟག་ཕྲ་མོའང་མཆེད་འགྱུར་ལྟར། །བསླབ་ན་སྐད་ཅིག་རེས་ཀྱང་བཟང་གོམས་འཕེལ། །བསྐྱུར་ན་སྔོན་གོམས་རྣམས་ཀྱང་བརྗེད་ནས་འགྲོ། །འོན་ཀྱང་བགས་ཀྱིས་སློབ་
ཟེར་རྫུན་དུ་ཟད། །ནམ་ཞིག་ཅིག་ཆར་ཁོ་ནར་སྒྲུབ་བོ་ཞེས། །སྨྲ་འདི་རྒྱ་ནག་ཧྭ་ཤང་སྐུ་འདས་ནས། །སྔོན་མེད་སྤྲུལ་པའི་གར་གྱིས་རྩེན་ནམ་སྙམ། །གཞུང་མང་དཀྱུས་གཅིག་འཛིན་པ་ཆེས་སླ་སྟེ། །ཉིན་རེར་ཚིག་རེ་འཛིན་པ་ཤིན་ཏུ་དཀའ། །དགེ་སྦྱོར་ཆིག་དྲིལ་སྦྱོང་ལ་ཚེགས་མེད་དེ། །ཞར་དང་ཞོར་ལ་སྒྲུབ་པ་ཆེས་རབ་དཀའ། །དེ་སྐད་སྨྲ་ན་ལྟ་བ་སྙིགས་མའི་དུས། །ངོ་མཚར་མེད་མོད་སྔོན་བྱོན་མཁས་གྲུབ་ཀྱི། །མདུན་སར་གཏུག་ན་ངོ་མཚར་ཆེན་པོ་ཡི། །གླེང་གཞིར་མཛད་ངེས་བསྟན་བཅོས་ལྟོས་དང་ཤེས། །ནམ་མཁར་ཡལ་རྒྱུའི་ལོང་གཏམ་ཕྲེང་བ་བགྲང༌། །རང་དང་འགྲོགས་པའི་དགེ་སྦྱོར་རྒྱབ་ཏུ་འཕང༌། །སྤྲུལ་ལྟར་འཇིགས་པའི་ངན་གོམས་མགུལ་བར་བཏགས། །འདི་ལྟར་འཇིག་རྟེན་གཞན་དུ་འགྲོ་ནུས་སམ། །དགེ་སྦྱོར་ཞེས་བྱ་ཕྱག་སྐོར་ཙབ་ཙུབ་དང༌། ཁ་ཏོན་འབག་འབུག་རྐྱང་དུ་ཟད་པ་མིན། །རྒྱལ་བས་འཇིག་རྟེན་སེམས་ཙམ་ཞེས་གསུངས་པས། །རང་སེམས་བཟང་གོམས་སྦྱོང་བ་གནད་ཀྱི་མཐིལ། །འདི་ལྟར་དམ་པའི་གསུང་སྒྲོས་དུ་མ་ལས། །མཐོང་ཡང་བཟང་གོམས་ཕྱོགས་སུ་མི་ཁྱེར་བར། །ཟེར་མོད་ཤེས་མོད་ཁོ་ནར་བསྐྱལ་བ་ཡིས། །བློ་དྲེད་ཆོས་ལས་ཞུད་པ་འདི་འདྲར་བྱུང༌། །བླང་འོས་གདམ་པའི་ཁྱད་པར་ཅི་མཐོང་ཡང༌། །དོན་ལ་མི་དཔྱོད་ཚིག་གི་སྙན་ཆ་རྟོག །སྙིང་པོ་མི་ལེན་རྩོམ་མཁན་བཟང་ངན་སྨྲ། །རྒོད་བག་རྩེད་
མོའི་གླེང་གཞིར་བྱེད་པ་ཡིས། །དོན་ལ་མི་རྟོན་ཚིག་འབྲུར་རྟོན་པ་དང༌། །ཆོས་ལ་མི་རྟོན་གང་ཟག་ལ་རྟོན་དང༌། །ཆོས་ཀྱི་ཞིང་ལ་ངག་འཁྱལ་རྨོ་བ་སོགས། །དེ་ལྟར་བྱེད་ན་གདམས་པའི་དགོས་པ་ཅི། །ཆོས་ཀྱི་རྗེ་ཡིས་རང་གི་ལེགས་བཤད་ལ། །རྟོན་པ་རྣམ་བཞིའི་ཚུལ་གྱིས་འཇུག་གསུངས་པ། །གཉིས་སུ་མི་འགྱུར་གཅིག་ཏུ་བདེན་གསུངས་པའི། །བཀའ་ཡིན་དེ་ཕྱིར་གཞན་དུ་བྱར་མི་རུང༌། །ཆོས་འདི་རྒྱལ་བས་སྐུ་ཚེ་གྲངས་མེད་དུ། །འབད་པ་བརྒྱ་ཡིས་བཙལ་ནས་ལེགས་བསྒྲུབས་ཏེ། །ཉིད་ཀྱིས་རི་མོར་མཛད་ནས་བཤད་པའི་ཕྱིར། །འདི་ལ་འཆལ་གཏམ་རྩེད་མོ་བགྱིར་མི་རུང༌། །ཇི་སྲིད་བདེ་གཤེགས་བསྟན་པ་གནས་ཀྱི་བར། །ས་སྟེང་ལེགས་བཤད་ཁྱད་པར་གང་འབྱུང་བ། །དེ་ཀུན་རྒྱལ་བ་སྟོན་པའི་ཆོས་འཁོར་དུ། །རོ་གཅིག་ཉིད་ཅེས་མདོ་སྡེ་རྣམས་ལས་འབྱུང༌། །ཚུལ་འདིས་རྣམ་པར་འཐག་པ་བསྡུས་པའི་མདོར། །དམ་ཆོས་སྤོང་བའི་ལས་སྒྲིབ་ཆེས་ཕྲ་ཞེས། །གསུངས་པའི་གནད་ལའང་ངེས་པ་བཙལ་དགོས་ཏེ། །འདི་ལས་དོན་ཆེ་གཞན་ནི་འགའ་མ་མཐོང༌། །མང་དུ་བརྗོད་པས་ཅི་བྱ་མདོར་དྲིལ་ན། །དྲན་པ་འདྲིས་པའི་དམིགས་པ་ཁོ་ན་ལས། །སྐྱེ་བར་གསུངས་ཤིང་འཕྲིན་གྱི་ཕོ་ཉ་བས། །འཕྲིན་ཚིག་སྐྱོར་དང་སྐུད་མདུད་འདོགས་ལ་ལྟོས། །དམ་ཆོས་མི་བརྗེད་བྱེད་པའི་འཕེན་པ་བསམ། །ཆོས་ཀྱི་གནད་འགག་སྙིང་པོ་མཚན་མར་བཟུང༌། །དེ་ཉིད་ཡིད་ཀྱིས་མང་བརྗོད་འདྲིས་སུ་
གཞུག །ཡང་ཡང་དྲན་ཕྱིར་སྲད་བུའི་བརྗེད་བྱང་གདགས། །དུས་རྣམས་ཀུན་ཏུ་དབང་པོའི་སྒོ་སྡོམ་ཞིང༌། །རང་གིས་རང་བརྟགས་རང་ཉིད་རང་གིས་བཅོས། །ཐབས་ཚུལ་དུ་མས་དམུ་རྒོད་སེམས་ཀྱི་རྟ། །འདུལ་སྦྱོང་བྱས་ཏེ་ལེགས་པའི་ལམ་དུ་གཞུག །རྩ་ཤིང་བེམ་པོར་བློ་གྲོས་ཡོད་མིན་ཡང༌། །སངས་རྒྱས་དབང་གིས་ཆོས་སྒྲ་འབྱིན་བྱེད་ལྟར། །བདག་ཀྱང་བཟང་གོམས་ཡོན་ཏན་ཡོད་མིན་ཡང༌། །འདི་ལྟར་བརྗོད་ནུས་དཔལ་ལྡན་བླ་མའི་མཐུ། །རིང་ནས་བསགས་པའི་ངན་གོམས་མ་ཞུའི་ནད། །སུན་འབྱིན་འཕྲུལ་ཐལ་རྣོན་པོའི་སྦྱོར་བ་འདིས། །བཤིགས་ཏེ་ཆོས་ཀྱི་ལུས་ལ་ནད་མེད་ཅིང༌། །ཆོས་སྐྱེས་བདེ་བས་ཉིན་མཚན་འདའ་བར་ཤོག །ལུས་ཅན་ཀུན་གྱི་ངན་གོམས་རྒྱ་མཚོའི་ཆུ། །སྐེམ་བྱེད་རྟ་གདོང་རི་བོང་ཁྱོད་འགྱུར་ཞིང༌། །བརྩོན་འགྲུས་མེ་ཆེན་འཁྲུགས་པའི་དམར་འོད་ཀྱིས། །བདུད་སྡེའི་སྙིང་ལ་འཇིགས་པ་སྟེར་གྱུར་ཅིག །བདག་ཅག་པདྨ་རྒྱལ་པོའི་ཞབས་དྲུང་དུ། །ཕན་ཚུན་དམ་ཆོས་སྤྱོད་པའི་གྲོགས་གྱུར་ཏེ། །ཐེག་མཆོག་བདེ་བའི་ལམ་བཟང་གཅིག་ཉིད་ནས། །གཉིས་མེད་ཆོས་སྐུ་གཅིག་ཏུ་འགྲུབ་པར་ཤོག །བློ་ལ་ཆོས་ཀྱི་གནད་དོན་ལེགས་བཟུང་སྟེ། །རང་བློ་ཆོས་ཀྱི་སྣོད་དུ་བསྒྲུབ་བྱ་ཞིང༌། །བློ་དང་ཆོས་སྲེས་བློ་ཆོས་རོ་གཅིག་ཏུ། །འགྲོ་བར་མཛོད་ཅེས་གལ་ཆེན་ལན་དགུ་རུ། །བསྐྱར་འདི་རྡོ་རོང་ཡུལ་གྱི་མུ་ཏོ་བ། །མིང་ལ་སྙན་པ་འཇིགས་མེད་བསྟན་པའི་ཉི། །དོན་ལ་ལོད་པ་ཆོས་
མེད་རོ་ཉལ་མཁན། །དེ་ཡིས་བྱ་མང་འདུ་བའི་ནགས་སུ་བྲིས། །མངྒ་ལམ།། ༈ །།བསླབ་བྱའི་སྙིང་གཏམ་ཞིམ་མངར་སྦྲང་རྩིའི་གོང་བུ་བཞུགས་སོ། །དྲིན་ཆེན་རྩ་བའི་བླ་མ་ལ་ཕྱག་འཚལ་ལོ། །སྤྱིར་དམ་པའི་ཆོས་སྒྲུབ་པའི་རྟེན་ལ་ཁྱིམ་པ་དང་རབ་བྱུང་གི་ཕྱོགས་གཉིས་ལས། །དང་པོ་ལྟར། དཔོན་གྱིས་མངའ་རིས་དང༌། འབང་མིས་ཀྱང་རང་ཁྱིམ་ཆོས་ཀྱི་ལམ་དང་མི་འགལ་བར་སྐྱོང་ཚུལ་དང༌། བརྟུལ་ཞུགས་ཀྱི་གཞི་ལྔ་དང༌། རྫས་ལས་བྱུང་བའི་བསོད་ནམས་ཀྱི་གཞི་བདུན་སོགས་ལ་བརྟེན་ནས་འཇིག་རྟེན་ཕ་རོལ་གྱི་བརྒྱགས་སྒྲུབ་ལུགས་མང་དུ་ཡོད་ཀྱང་བཤད་པའི་སྐབས་སུ་མ་བབ། །ཕྱོགས་གཉིས་པ་རབ་བྱུང་ཡིན་ན། །དགེ་ཚུལ་སློང་གང་ཡིན་ཀྱང་དེ་དང་དེའི་བསླབ་བྱ་ལེགས་པར་ཉན་ནས་འབད་པ་ཆེན་པོས་སྲུང་བ་གཞིར་བཞག་སྟེ། །ཐོས་པ་ལ་དང་པོར་བརྩོན་དགོས། དེ་ལ་སྒྲ་སྙན་སྐར་རྩིས་སོགས་ཀྱང་སྤྱིར་མཁས་བྱའི་གནས་ཙམ་ཡིན་ཀྱང༌། སྙིགས་དུས་ཀྱི་ཚེ་ཐུང་འདིར་དེ་འདྲའི་སྤྲོས་པ་མང་པོ་ལ་གཡེང་ཆེས་ན་ཟན་རྒུམ་ཐུས་པས་ཟན་ལོག་རྦབ་ལ་ཤོར་བའི་དཔེ་བཞིན་འགྱུར་བས། །བྱང་ཆུབ་སྒྲུབ་པའི་ལམ་ཚང་ལ་མ་ནོར་བ་འབའ་ཞིག་གཙོ་བོར་བཟུང་ནས་ཅི་ཤེས་བྱེད་དགོས། དེ་བྱེད་ན་སྟོན་པ་སངས་རྒྱས་ནས་བཟུང་སྟེ་ཆོས་བརྒྱུད་ཀྱི་བྱིན་རླབས་བར་མ་ཆད་པར་ཐོབ་དགོས་པས། དཔེ་ལྟས་རྐྱང་པ་ལྟ་བུས་མི་ཆོག་གི༌།སྐྱེས་བུ་དམ་པ་ལ་བསྟེན་ནས་གདམས་ངག་གི་ཞུན་ཐར་ལེགས་པར་གཅོད། །དེ་ནས་
ཁ་ཕྱིར་བལྟས་ཀྱི་སློབ་གཉེར་ཁོ་ནའི་རྗེས་སུ་མགོ་བོ་མི་འཁོར་བར། རྩེ་གཅིག་ཏུ་སྒྲུབ་ཚུགས་བཟུང་སྟེ་ཐོས་པ་ལ་སྙིང་པོ་ལེན་དགོས་ཀྱང༌། གྲོགས་ངན་འདུ་ལོང་གི་གསེབ་ཏུ་མཐུན་འཇུག་ངོ་བསྲུང་དང༌། །དགྲ་གྱོད་འཁོན་གསུམ། ཚོང་སོ་ནམ། །བསམ་བློ་འདུན་གྲོས། ཟད་མེད་ངག་འཁྱལ་གྱི་འཁོར་ལོ་སོགས་བྱ་བ་ངན་པ་ལ་མི་ཚེ་ཟད་ནས་སྒྲུབ་པ་རྣལ་མ་ཉིན་གཅིག་ཀྱང་བྱེད་རྒྱུ་མི་འབྱུང་བས་འདུ་འཛི་རྒྱང་བསྲིང་ནས་དབེན་པ་བསྟེན། དབེན་པར་བསྡོད་ཀྱང་བག་མེད་རྣམ་གཡེང༌། སོས་དལ་རོ་ཉལ། དྲན་ཚད་ལག་ལེན་གྱི་ངང་ལ་ནམ་ཟླ་བསྐྱལ་ན་ཕྱུགས་རྫི་རི་ཁར་ཉལ་བ་དང་ཁྱད་མེད་པས། དུས་རྒྱུན་དུ་བློ་ལྡོག་རྣམ་པ་བཞིས་རང་གི་རྒྱུད་བཏུལ་ཏེ། །བློ་སྣ་ཆོས་ལ་འགྲོ་བ་དང༌། བསམ་རྒྱུ་ཆོས་ལས་མེད་པ། ཡེང་མ་ལམ་དུ་སྐད་ཅིག་ཙམ་ལུས་ཀྱང་ལོང་མེད་ཀྱི་འདུ་ཤེས་དྲན་སོས་ནང་ནས་བསྐུལ་བ་ལ་བསླབ། །དེའང་རེས་མ་སྒོམ་ཀྱང་འོང་ལ། རེས་སྒོམ་ཀྱང་མི་འཆར་བའི་གློ་བུར་གྱི་ངེས་འབྱུང་སྤུ་སུ་ཙམ་སྐྱེ་བ་ལ་སྔོན་དུ་ཚུལ་བཞིན་སྦྱང་དགོས་པའི་ངེས་པ་མེད་ཀྱང༌། ངེས་འབྱུང་གི་བསམ་པ་ཆིག་རྐྱ་ཕེར་བ་དང༌། ནམ་དགོས་ཀྱི་དུས་སུ་སླེབ་པ་འོང་བ་ལ་བློ་ལྡོག་རྣམ་བཞི་ཁྲིད་གཞུང་ནས་བཤད་པ་བཞིན་དུ་བསྒོམ་དགོས་པ་ཡིན། ནང་མ་རེ་བཞིན་དེ་རིང་དྲང་སྲོང་གི་གནས་སུ་ཐ་མལ་པའི་ཀུན་སྤྱོད་མི་བྱ་བར་དགེ་སྦྱོར་ཁོ་ན་སྐྱོང་དགོས་སྙམ་དུ་འཕེན་པ་བཏང༌། ཐུན་ནང་དུ་ཆོས་བསམ་ལོ་བྱས་ཀྱང་ཐུན་མཚམས་
རྣམས་སུ་ཤེས་པ་ངན་ལང་ལ་བཏང་ན་ཡང་སྐྱེད་མེད་ཅིང་རིམ་གྱིས་བློ་དྲེད་ལ་འགྲོ་བས་དུས་ཐམས་ཅད་དུ་རང་གི་རྒྱུད་ལ་བརྟག་ཅིང་དགེ་སྦྱོར་གྱི་རྒྱུན་མི་བརྗེད་པའི་དྲན་པ་ནར་རེ་བསྟེན། དེ་འདྲའི་རྩོལ་བ་ཧ་ཅང་བསྟེན་དྲག་ནའང་ཞེ་སུན་སྐྱེས་ནས་སྡོད་སྙིང་མི་འདོད་པ་འབྱུང་བས་གྲིམས་ལ་ལྷོད་ཆགས་པ་པི་ཝང་གི་རྒྱུད་ལྟ་བུའི་བརྩོན་འགྲུས་རྩོམ་ཚུལ་ཤེས་དགོས། བར་སྐབས་ཅི་རིགས་པར་གོང་མའི་རྣམ་ཐར་ཉན་ཅིང་བལྟས་ན་བརྩོན་འགྲུས་ཀྱི་བོགས་འདོན་ཡོང་བས་རྗེ་བཙུན་མི་ལ་སོགས་བཀའ་བརྒྱུད་གོང་མ་དང༌། ཞི་བྱེད་དང༌། སྨྱུང་གནས་ཀྱི་བླ་བརྒྱུད། རྫོགས་ཆེན་སྙིང་ཐིག་གི་བརྒྱུད་པ་སོགས་ཀྱི་རྣམ་ཐར་བལྟ་ཞིང་སྤྲོ་བ་བསྐྱེད། །དེ་དག་གི་རྗེས་སུ་སློབ་པའི་ཡི་དམ་བཅའ། །ནུབ་རེ་བཞིན་ཉིན་དེར་དགེ་སྦྱོར་གྱི་འཕེལ་འགྲིབ་གང་བྱུང་བརྩིས་ལ། འགྲིབ་ནས་སྣང་ན་རང་ལ་ཉེས་པ་བགྲང་ཞིང༌། སང་ཉིན་ནས་འདི་ལྟར་མ་སོང་བར་བྱའོ་སྙམ་པའི་འཕེན་པ་དྲག་པོ་གཏོང༌། འཕེལ་བར་འདུག་ན། འདི་འདྲ་དབེན་པ་བསྟེན་པ་ལས་བྱུང་སྙམ་དུ་ཕྱི་ཕྱིར་དབེན་པ་ལ་དགའ་བ་བསྒོམ་ཞིང༌། དཀོན་མཆོག་གི་བཀའ་དྲིན་དྲན་པ་དང༌། སྨོན་ལམ་རྣམ་པར་དག་པའི་རྒྱས་འདེབས་སོགས་བྱ། བྱ་བཏང་དང་རྣལ་འབྱོར་པའི་ཤ་ཚུགས་བཟུང་ཡང༌། དེ་ལ་མངོན་རློམས་ཀྱི་གཡའ་ཞུགས། གཞན་ལ་བརྙས་སྨོད་དང་ཁྱད་གསོད་གཏོང༌། རང་ལ་གཞན་གྱིས་བཟང་པོར་མཐོང་དུ་རེ་ཞིང༌། ནང་དུ་ཡོན་ཏན་ཅི་སྐྱེས་ངོམ་ཆོས་སུ་ཁྱེར། རྟོགས་པ་མ་ཤར་བཞིན་དུ་
ཆོས་བཤད་ལ་དགའ། །དྲོད་མ་ཐོབ་བཞིན་དུ་ཐོ་ཅོ་རྩིང་སྤྱོད་བྱེད་པ་སོགས་ཆོས་མ་འགྲུབ་གོང་ནས་བདུད་འགྲུབ་པའི་རྒྱུ་ཡིན་པས་ས་འོག་གི་གཏེར་དང་ཐལ་དོང་གི་མེ་བཞིན་དུ་སྦས་པའི་བརྟུལ་ཞུགས་བཟུང༌། ལར་བློ་ཆོས་སུ་འགྲོ་བ་དང༌། ཆོས་ལམ་དུ་འགྲོ་བ་ཐམས་ཅད་བླ་མ་དཀོན་མཆོག་གི་དྲིན་ལ་རག་ལས་པས་དུས་རྟག་ཏུ་གསོལ་འདེབས་མོས་གུས་ལ་འབད་ཅིང༌། ཉམས་རྟོགས་སྐྱེ་བའི་འགལ་རྐྱེན་སྟོབས་བཞིའི་བཤགས་པས་སྦྱོང་བ་དང༌། ཚོགས་བསགས་ཀྱི་སྒོ་མང་པོའི་མཐུན་རྐྱེན་བསྟེན་པ་གལ་ཆེ། དེ་ལྟར་མན་ངག་གི་གནད་དང་ལྡན་པས་དབེན་པའི་གནས་སུ་སྒྲུབ་པ་སྙིང་པོར་བྱས་ན་རིམ་ནས་རིམ་གྱིས་ཕྱིན་ཅི་ལོག་གི་བློ་སྣ་ཤས་ཇེ་ཆུང༌། ཕྱིན་ཅི་མ་ལོག་པའི་བློ་སྣ་ཤུགས་ཇེ་ཆེ་དང་ཇེ་མང་ལ་འགྲོ་སྟེ། དེ་འདྲ་བ་ལ་སེམས་འདུལ་བ་ཟེར། སེམས་འདུལ་བ་མིན་པའི་གདམས་ངག་གི་དོན་པོ་གཞན་མེད་དེ། འཕགས་པ་ཀླུ་སྒྲུབ་ཞབས་ཀྱིས། བསྙེངས་དང་བྲལ་ལ་མང་དུ་གསོལ་ཅི་འཚལ། །ཕན་པའི་གདམས་ངག་དོན་པོ་འདི་ལགས་ཏེ། ཁྱོད་ཀྱི་ཐུགས་དུལ་མཛོད་ཅིག་བཅོམ་ལྡན་གྱིས། །སེམས་ནི་ཆོས་ཀྱི་རྩ་བ་ལགས་པར་གསུངས། །ཞེས་ཇི་སྐད་གསུངས་པ་བཞིན་ནོ། །སྐྱབས་འགྲོ་དང་བློ་ལྡོག་རྣམ་བཞིས་ཆོས་ཀྱི་རྩ་བ་ཚུགས་པ་ན་ཐེག་ཆེན་སྤྱིའི་ལམ་གྱི་སྙིང་པོ་བྱང་ཆུབ་སེམས་གཉིས་ལ་ཉམས་ལེན་གྱི་མཐིལ་དུ་བཟུང་ནས་སློབ་དགོས་ཏེ། དེའི་ཚུལ་ནི་འདིར་མགོ་མེད་མཇུག་
རྡུམ་ཅིག་བྲིས་ཀྱང་གོ་མི་ཆོད་པས་སྤྱོད་འཇུག་དང༌། རྫོགས་ཆེན་སེམས་ཉིད་ངལ་གསོའི་འགྲེལ་པ་ཤིང་རྟ་ཆེན་པོ། དྭགས་པོ་རིན་པོ་ཆེའི་ཐར་རྒྱན་སོགས་ལས་ཞིབ་ཏུ་ཤེས་པར་བྱ། ཁྱད་པར་དུ་དོན་དམ་བྱང་ཆུབ་ཀྱི་སེམས་སྒོམ་ཚུལ་ཐུན་མོང་མ་ཡིན་པ་ཕྱག་རྫོགས་ཀྱི་རྣལ་འབྱོར་ལ་འཇུག་ན། གཞི་དབང་དང་དམ་ཚིག་གིས་བཟུང་སྟེ། སོ་སོའི་ངོ་སྤྲོད་དང༌། ལྟ་སྒོམ་སྤྱོད་པའི་རྣམ་དབྱེ། གེགས་སེལ་བོགས་འདོན་སོགས་མཁས་གྲུབ་གོང་མའི་གསུང་རབ་དང༌། བླ་མ་ཉམས་མྱོང་ཅན་གྱི་ཞལ་གྱི་བདུད་རྩི་ལྟར་ཉམས་སུ་བླང་བས་རིང་པོར་མི་ཐོགས་པར་ས་ལམ་གྱི་ཡོན་ཏན་དབྱར་གྱི་མྱུ་གུ་ལྟར་རྒྱས་པར་འགྱུར་རོ། །ཞེས་པའང་ཡིད་ལྷུང་ལྷ་རུ་དབོན་སྲས་ཀརྨ་ངེས་དོན་ཆོས་ཀྱི་རྒྱ་མཚོ་ཞེས་དམ་པའི་ཡོན་ཏན་གྱིས་ཐུགས་རྒྱུད་ཕྱུག་པ་གང་གིས་ཕྲིན་ཡིག་གནང་རྟེན་དང་བཅས་པས་བསྐུལ་བ་ལྟར། ཞལ་གདམས་སློང་བའི་དོན་གཉེར་མཁན་གཞན་འགའ་ཞིག་ལའང་ཕན་པར་བསམས་ཏེ། འཇིགས་མེད་བསྟན་ཉིས་རང་གིས་ཆོས་བྱེད་མ་མྱོང་ཡང༌། རྒྱལ་སྲས་ཞིབ་ལྷ་སོགས་ཆོས་ལ་ཉམས་ལེན་མཐར་ཕྱིན་པའི་དམ་པ་རྣམས་ཀྱི་གསུང་རྒྱུན་ཟེག་མ་ཙམ་བྲིས་པ་མཆོག་ཏུ་དགེ་བར་གྱུར་ཅིག། །།དགེའོ། །དགེའོ། །བྷ་ཝནྟུ། ཤུ་བྷཾ།། ༈ །།བླ་མ་དཀོན་མཆོག་མཁྱེན། དེ་མཆོད་བརྗོད་ཡིན། དེང་སང་ལ་ལས་རྒྱུ་ཟས་མེད་པས་ལྟོ་རྒྱབ་ཀྱིས་མི་བཟོད་འདུག་ཟེར་ཞིང༌། ཚོང་རྐུ་ཇག་གསུམ་ལ་འགྲོ། འདུན་མ་ཡག་ཉེས་མོ་ཐོབ་དང་ཟེར་ནས་མོ་ཕྱྭ་བྱེད། ཕལ་ཆེར་ལ་མོ་ངན་བབས་ཟེར་ཏེ་བདེན་པར་སྣང༌། ཕལ་ཆེར་མི་བསད། རྒྱུ་
ཕྲོགས། མཛུབ་མོ་ཁ་ལ་བཅུག་ནས་ཐོན་འདུག །ལ་ལས་དམ་པའི་ཆོས་ཤིག་སྒྲུབ་དགོས་པས་གནས་སྐོར་ལ་འགྲོ། །གཉན་ས་འགྲིམ། འདི་ལས་བཟང་བའི་ཆོས་མེད་ཟེར་ཏེ། དེ་ཚོར་འགྲོ་ས་ནས་སྡོམ་པ་ཤོར་བ་དང༌། འདྲེས་ཁྱེར་བ་སོགས་མང་པོ་ཡོད་པས་དཔྱད་དགོས། ལ་ལ་ཅི་བསམ་འདི་བསམ། སྔར་དཔྱད་ཕྱི་འདང་གང་ཡང་མེད་པར་རོ་ཉལ་བརྒྱབ་སྡོད་དེ། དེ་རིང་ཉལ་བསྡད་པས་མི་ཡོང༌། །སང་ཉིན་གྱི་ཟ་ཆས་ཞིག་སྔོན་ནས་མ་བསྒྲུབས་ན། བ་ཉལ་བའི་ཁ་ལ། རྩ་གནམ་གྱིས་མི་སྤྲོད་པ་ཡིན། ལ་ལས་ད་ལོ་འདི་བྱེད། སང་ཕོད་འདི་ཡོང༌། །དེ་དུས་འདི་འདྲ་དགོས་ཞེས་ཕོར་ཆག་ནང་དུ་ཡུལ་གླིང་གི་བཀོད་པ་བྲིས། ཡར་རྒྱུག་མར་མདུར། རྡོ་ལ་བུག་པ་འབུག་ཟེར་ཏེ་གཅིག་རྗེས་གཉིས་མཐུད་མང་པོ་དྲན་རྒྱུ་བྱེད་རྒྱུ་ཡོད་ཀྱང༌། བསམ་པའི་སྟེང་དུ་གོམ་པ་སོང་བ་རེ་ཟུང་ཙམ་རེད། ངས་བསམ་ཚད་ཐིག་ལས་མི་བཟུར། བཤད་ཚད་ས་ལ་མི་ལྷུང་སྙམ་ནས་རང་ལ་བརྩི་འཇོག་གནམ་སྔོན་པོ་ཙམ་ཡོད་པ་རྣམས་ཀྱང༌། བསམ་པ་ལ་ཁར་ལུས་བཞིན་དུ། ཕུང་པོ་དུར་ཁྲོད་དུ་སླེབས་པས་སྐྱོ། ཞེས་པ་ལྟར་འགྲོ་བའི་དུས་ལ་བབས་ཚེ། ཕག་སྣ་བྲག་ལ་ཐུག་པ་ལྟར་ཐབས་མེད་སྟོབས་ཤོར། མཐུ་རྡུག་སྟེ་ཁ་སྐྱ་ཀྲད་དེ། །གདོང་མཆི་མ་ཙ་རེ། ས་ཚུགས་མེད་པའི་ཕྱོགས་སུ་འགྲོ་གི་འདུག །དེ་ལྟར་ན་དེ་འདྲའི་རིགས་ཐམས་ཅད་ཐབས་བཟོ་མོ་དང༌། ཐབས་མཁས་
པོ་ཡིན་ཡིན་མི་འདྲ། དེ་ཅི་ལ་འདྲ་སྟེ། ཐམས་ཅད་འོལ་ཚོད་མུན་པ་མདའ་འཕེན་དང༌། བཟོ་ཆག་ཚད་ལ་མ་ཕབ་པ་ཤ་སྟག་རེད་པས། འདོད་དོན་གྱི་འབེན་ལ་མ་བཅར་བ་དང༌། ལྷག་ཆད་ནོར་འཁྲུལ་སོང་བ་ལ་ཡུས་ཅི་ཡོད། འདོད་དོན་སྒྲུབ་པ་ལ་མི་བསླུ་ངེས་པའི་ཐབས་བཟོ་མོ་ཟེར་བ་དེ། ཐབས་དང་ཐབས་བྱུང༌། ཐབས་མིན་ཉེས་དམིགས་དང་བཅས་པའི་རྒྱུས་ལ་མཁས་པའི་བླ་མས་བསྟན་ཅིང༌། ཐབས་དང་ཐབས་མིན་གྱི་དབྱེ་བ་ལེགས་པར་དཔྱོད་ནུས་པ་མང་པོས་གཏན་ལ་ཕབ་པ་ཞིག་དགོས། ཐབས་དེ་འདྲ་སྟོན་པའི་བླ་མ་དེ་སུ་རེད་ཟེར་ན། སྲིད་པ་གསུམ་ན་བླ་མ་གཅིག །རྐང་གཉིས་ནང་ན་གཙོ་བོ་གཅིག །སྨྲ་བའི་ནང་ན་ཟླ་མེད་གཅིག་སྟེ་སངས་རྒྱས་བཅོམ་ལྡན་འདས་ཁོ་ན་ཡིན། ཁོང་གིས་སེམས་ཅན་བདེ་སྐྱིད་དང་སྤྲོད་པའི་ཐབས་བསྟན་ཆེད་མངོན་མཐོ་སྒྲུབ་བྱེད་དང༌། ངེས་ལེགས་སྒྲུབ་བྱེད་གཉིས་སུ་འདུ། དེའང་མངོན་མཐོ་ལ་བརྟེན་ནས་ངེས་ལེགས་སྒྲུབ་དགོས་པས། དང་པོར་མངོན་མཐོ་སྒྲུབ་དགོས། དེའི་ཚུལ་མང་ཡང་མངོན་མཐོ་ཁྱད་པར་ཅན་དག་པའི་ཞིང་གི་མངོན་མཐོ་བསྒྲུབས་པའི་སྟེང་ནས་ངེས་ལེགས་སྒྲུབ་པ་འདི་ཐེག་ཆེན་གྱི་མདོ་སྡེ་མང་པོ་ནས་བསྔགས་བསྔགས་པ་ཡིན། དེའི་ནང་ནས་བདེ་བ་ཅན་དུ་སྐྱེ་བ་ལེན་པའི་རྒྱུ་ཚོགས་སྒྲུབ་ལུགས་གླེན་གཏམ་བྱས་ན། སངས་རྒྱས་འོད་དཔག་མེད་རྣམ་པའི་སྒོ་ནས་ཡང་ཡང་ཡིད་ལ་བྱེད་པ་དང༌། ཡན་ལག་བདུན་པ་སོགས་ཀྱི་དགེ་
རྩ་མང་པོ་རྒྱུན་མི་གཅོད་པར་གསོག་པ་དང༌། ཐེག་ཆེན་སེམས་བསྐྱེད་ཅི་ནུས་སུ་སྦྱང་བ་དང༌། དགེ་རྩ་གང་བསྒྲུབ་བདེ་བ་ཅན་དུ་སྐྱེ་བའི་རྒྱུར་བསྔོ་བ་དང་བཞི་པོ་འདི་བློ་ལ་བཟུང་ནས་ཆེ་ཤེས་ཆུང་ཤེས་བསླབ་དགོས། འདི་བཞི་ལ་མང་དུ་བསླབས་ནས་བསྐྱུར་བས་མི་ཆོག །ད་ལྟ་མང་དུ་བསླབ། རྒྱུད་ཐོག་ཏུ་འདྲེས་ངེས་བསླབ། འཆི་རན་དུས་བར་དུ་འཕྲོ་མ་ཆད་པར་བསླབ་ནས། གནས་གང་དུ། རྐྱེན་གང་གིས། སྡུག་བསྔལ་ཆེ་ཆུང་དང་ཡུན་རིང་ཐུང་ཇི་ལྟ་བུའི་ངང་ནས་ཤི་རུང་འཆི་ཁ་བག་ཆགས་སྟོབས་ལྡན་སད་ངེས་པ། རང་ཞེ་རང་ལ་ཁེལ་ཤག་ཤག་བྱ་དགོས། དེ་ལ་ད་ལྟ་རང་གི་སེམས་ཞིང་སྦྱང་གི་ཚོགས་ལ་ཤིན་ཏུ་ལོབ་ཅིང་བྱང་བ། རྟ་རྩལ་ཅན་དལ་བྲེལ་གྱི་གནས་སྐབས་ཀུན་ཏུ་རྟ་ལས་མི་ལྷུང་བ་འདྲ་བ་ཞིག་སྦྱང་དགོས། དེ་ཡོང་བ་ལ་དང་པོ་མི་འགྲུལ་བཅད། སྐད་ཆ་བསྐྱུར། ཕག་ལྟས་ལྐོག་ཉན་སོགས་ལྟ་དགའ་ཉན་སྲེད་མང་པོའི་རྒྱུན་རྦད་ཀྱིས་བསྐུམ་སྟེ། སེམས་ཕྱི་རོལ་དུ་མ་ཤོར་བས་རྒྱུ་ཚོགས་བཞི་པོ་རྩེ་གཅིག་ཏུ་བསྒོམ། འདི་དུས་སངས་རྒྱས་ཀྱི་སྐུ་དང་ཞིང་ཁམས་ཀྱི་ཡོན་ཏན་བཀོད་པ་རྣམས་ལ་བསྐྱེད་རིམ་གྱི་གསལ་སྣང་འདོན་ལུགས་ལྟ་བུ་མི་དགོས། ད་ལྟ་ཐག་རིང་ན་བླ་མ་བཟང་པོ་བཞུགས་རབས། དེ་ལ་ཡོན་ཏན་འདི་དང་འདི་ཡོད། ཆོས་འདི་དང་འདི་འདྲ་གསུང༌། དེའི་བཞུགས་གནས་ན་ཆོས་དང་ཟང་ཟིང་གི་དཔལ་འབྱོར་འདི་ཙམ་ཡོད་སོགས་
ཞིབ་ཏུ་ཐོས་ནས། དེ་ལ་བསམ་བློ་མང་དུ་བཏང་བས་དེ་ཁོ་ནས་སེམས་ཕྲོགས་པ་བཞིན་སོང་སྟེ། ཨེ་ཤི་རེ། བླ་མ་དེ་བཞུགས་སར་ནམ་ཐོན་ན། དེར་ཐོན་རྒྱུ་ཞིག་ཡོད་ན་ཕ་མ། ཕུ་ནུ། ཉེ་མཛའ་སོགས་སུའི་ཁ་ལའང་མི་ཉན། སུ་ལའང་བློ་འདྲི་གྲོས་བསྟུན་མི་བྱེད་པར་བུད་མི་འགྲོ་ན་སྙམ་དུ་ཁོ་ཐག་ཆོད་པ་དང༌། དོན་དེ་བརྗེད་མི་ཐུབ་པར་རྒུན་འབྲུམ་གྱི་ཆང་འཐུང་བ་ལྟར་ཡོན་ཏན་གྱི་རོ་མངར་ཡང་མྱང་ན་ཡང་འདོད་པ། ཅི་ཙམ་མྱང་ཡང་ཚིམ་པ་མེད་པ་དེ་ལ་སེམས་ཡང་ཡང་འཁོར་ཡོང་བ་དེ་ངོ་མ་ལྟ་བུ་ཞིག་བྱས་ནས་སྦྱོང་རྒྱུ་རེད། ཞིང་བཀོད་སོགས་འདིར་བྲི་མ་ཐུབ་པས་གཞན་ནས་ཨི་ཤེས་ལྟོས། བདེ་བ་ཅན་ན་ཤིང་དང་ཆུ་དང་མེ་ཏོག་དང་ཟས་གོས་སོགས་ལོངས་སྤྱོད་དང༌། རིན་པོ་ཆེའི་ས་གཞིའི་ཡོན་ཏན་སོགས་བཤད་པ་རྣམས་འབྲོག་ན་མར་མོད་རབས་དང་རོང་ན་ཇ་ནས་འབོལ་རབས། ས་སྐྱིད་རབས། མི་བཟང་རབས་བཤད་བསྡད་པ་ལྟ་བུར་གོ་མི་ཉན། སེམས་ཅན་ལས་ངན་སྡིག་ཅན་མང་པོས་བཟུང་བའི་ཡུལ་དུ་དགེ་བ་བྱེད་མཁན་རེ་རེ་གཉིས་གཉིས་ཡོད་ཀྱང་རང་འོད་མི་འབྱིན་ཞིང་སྟོབས་ཆུང༌། དེ་སྡིག་པའི་དབང་འབྲས་ཀྱི་ནུས་པ་རེད། དེས་ན་དེ་འདྲའི་ཡུལ་དུ་དགེ་བ་བྱེད་མཁན་ཚེ་ཐུང༌། ཁས་དམན། མི་འདོད་པ་གང་ན་ཡོང་བ་མང༌། སེམས་ཅན་དགེ་བ་ཅན་མང་པོའི་ལས་ཀྱི་དབང་འབྲས་བདོ་བའི་ཡུལ་དུ་ཆོས་བྱེད་མཐུ་ཆེ། སྨན་དང་རིག་སྔགས་ཀྱི་ནུས་པའང་འཕྲལ་ལ་མཐོང༌། སྨོན་ལམ་དཀར་པོ་འགྲུབ་སླ། དགེ་བའི་སྟོབས་
མངོན་ཚན་ཆེ་བ་སོགས་ཡོང༌། དེ་བཞིན་དུ་བདེ་བ་ཅན་གྱི་ཞིང་ན་སངས་རྒྱས་འོད་དཔག་མེད་ཀྱི་སྔོན་གྱི་སྨོན་ལམ་དང༌། ཚོགས་གཉིས་ཀྱི་མཐུ་ལས་བྱུང་བའི་གནས་དང་ཡོ་བྱད་ཁོ་ན་མ་གཏོགས། སེམས་ཅན་ཐ་མལ་པའི་ལས་ཉོན་གྱི་དབང་གིས་གྲུབ་པའི་ས་ཕྱར་བ་ཙམ་མམ། སྤར་མཐིལ་ཙམ་ཡང་མེད། དེ་ཇི་ལྟར་ཡིན་ན། ཞིང་དེའི་ལྗོན་ཤིང་གཅིག་ཙམ་མམ། མེ་ཏོག་རྡོག་གཅིག་ཙམ་ལའང་སངས་རྒྱས་འོད་དཔག་མེད་ཀྱི་སྔོན་སྨོན་དང་སྤྱོད་པའི་ལག་རྗེས་འདི་དང་འདི་ལྟར་ཡོད། དེའི་དབང་གིས་ཞིང་དེར་ཐེག་ཆེན་གྱི་ལམ་བསྒྲུབ་པ་ཐམས་ཅད་སྟོབས་ཆེ། ཤུགས་དྲག །འགྲུབ་མྱུར། ཚེགས་ཆུང་ཞེས་བསྟན་པ་རེད། དེའི་བར་སྐབས་ཐམས་ཅད་དུ་བཟང་སྤྱོད་སྨོན་ལམ་ཅི་ཐུབ་འདོན། ལར་འདི་དུས་འདོན་པ་གཙོ་བོར་མི་བྱེད། བསམ་རྒྱུ་གཙོ་བོར་བྱེད། དེའང་ལྷོད་ཆེས་ནས་རྣམ་གཡེང་གི་རླུང་གིས་ཁྱེར་བ་དང༌། དམ་དྲག་ནས་ཤེས་པ་སྣ་སུན་ལ་འགྲོ་བ་གཉིས་གང་ཡང་མི་བྱ་བར་གྲིམ་གྱི་ནང་ན་ལྷོད་ཡོད་པ་གཞུ་བརྡུངས་པའི་རྒྱུད་འདྲ་བ་དགོས་ཤིང༌། ཡུན་ཐུང་གྲངས་མང་ཁང་རྒན་ཆུ་ཐིག་གི་དཔེ་བཞིན་ག་ལེ་བསླབ། ངལ་བསོ་ལ་སྡོད་སྐབས་རྣམས་སུ་ཡང༌། རྩ་བའི་དམིགས་པ་བཏང་བ་ཙམ་མ་གཏོགས། དེ་དང་ཕྱོགས་གཏན་ནས་འཛོལ་བའི་ཚོང་དང་གྱོད་དང་ཁྱིམ་གྱི་སོ་ནམ་སོགས་ལ་རྟོག་པ་སྤྲོ་མི་ཉན་པས། དགེ་བ་དང་ལུང་མ་བསྟན་གྱི་སེམས་ལ་ངལ་གསོ། ཚུལ་དེ་ལྟ་
བུས་ལོ་རེའི་ནང་དུ་ཟླ་བ་གསུམ་རེའམ། རེ་རེའམ། ཐ་ནའང་ཞག་བཅུ་རེ་ལྟ་བུར་བཅད་རྒྱ་བྱས་ནས་བསྒོམ། དེ་དག་གི་དུས་སུ་བསྒོམ་པ་དེ་དུས་གཞན་ཐམས་ཅད་དུའང་ཁྱེར་ནས་དཔའ་བོའི་རལ་གྲི་སྐེད་དང་མི་འབྲལ་བ་བཞིན་དུ་འགྲོ་འདུག་ཟ་ཉལ་སོགས་སྤྱོད་ལམ་དང་སྤྱོད་པ་ཐམས་ཅད་ལ་སླེབས་གང་ཐུབ་བྱ། ནངས་པར་ལང་ཚེ་བླ་མ་འོད་དཔག་མེད་དང༌། རྒྱལ་སྲས་ཐུ་བོ་རྣམ་གཉིས་སོགས་ལ་དམིགས་ནས་ཕྱག་གསུམ་རེ་བཙལ་ཏེ། དེ་རིང་གི་ཉི་མ་འདི་དྲོན་ཛར་ལ་མི་གཏང་བར་བདེ་བ་ཅན་དུ་འགྲོ་བའི་རྟ་ཁལ་དང་གྲོ་བརྒྱགས་ཚགས་སུ་ཅི་ཚུད་བྱ་དགོས། མི་གཞན་མའི་རྟ་ཁལ་གྱིས་ཉི་མ་བཅའ་བཅུ་ལ་ཨེ་འཕོང་མི་འཕོང་བཤད་གི་འདུག་པས་དེས་བདེ་བ་ཅན་དུ་འཁྱོལ་བའི་རེ་བ་མི་འདུག །ཇའི་རྩིགས་པ་བརྒྱབ། མར་གྱི་ཡ་དོ་བརྩིགས། ནས་རྒྱལ་གྱི་རག་ཐེན། ཤ་ཐུད་མར་ཁུའི་ཁྲོད་དུ་འབོགས་རྐྱལ་བྱེད་གི་ཡོད་པའི་ཕྱུག་པོ་ཐམས་ཅད་རྩམ་ཁུག་དང་ཁ་ཕོར་ཚུན་ཆད་ཤུལ་དུ་བསྐྱུར་ནས་བུད་སོང་བས་དེ་འདྲའི་གྲོ་བརྒྱགས་ཅི་ཙམ་ཡོད་ཀྱང་ཚེ་ཕྱི་མ་མི་དགོས། བར་དོའི་འཕྲང་ལ་ཡང་འཁྱེར་ཐབས་མི་འདུག །དེས་ན་རང་ཉིད་ད་གཟོད་གནས་གཏན་འཕོ། ཡུལ་གཏན་བརྗེ་བྱས་ནས། ཤི་དང་འཕོ་དང་ཤི་འཕོ་དུས་བྱས་པ། །ཕྱིར་མི་འོང་ཞིང་ཕྲད་པར་འགྱུར་མ་ཡིན། །ཞེས་གསུངས་པ་ལྟར། ཁ་མི་འཁོར་གི་སར་འགྲོ་དུས། ཞོན་རྒྱུའི་རྟ། འདེད་རྒྱུའི་ཁལ། འཚོ་བའི་བརྒྱགས།
འགྲོགས་པའི་གྲོགས་ཐམས་ཅད་ཀྱི་སྐལ་པ་རྒྱུ་ཚོགས་གོང་སྨོས་བཞི་པོ་ཁོ་ན་མ་གཏོགས་ཅི་ཡང་མེད། ད་རེས་ཀྱི་ཚེ་མཇུག་འདི་ལ་ཉེ་འུས་ཀོ་མོག་ལ་རྒྱ་མཚོར་ཤེས་པ་བཞིན་དུ་རིང་པོ་ཞིག་ཡོད་སྣང་ཤར་ནས་རང་གིས་རང་བསླུས་པ་མ་གཏོགས་དོན་ལ་ལུག་གི་རྔ་མ་གཡུག་པ་ལྟར་ཐུང་རྩེད་དེ་བ་ཞིག་ལས་ཅི་ཡང་མེད། ཚེ་ཕྱི་མ་ཟེར་རྒྱུ་དེ་རིང་ཚད་ཐུང་ཚད་འདི་ཙམ་ཞེས་འཇོག་རྒྱུའི་མཚམས་མི་ཟིན་པ་ཞིག་ཡིན་ཏེ། འཁོར་བ་ཡ་མཐའ་ཐུག་མེད་ནས་ད་བར་འོང་བ་ལ། མགོ་ནས་རྫོགས་ཏེ་རྔ་མ་ལ་ཟད་འགྲོ་རྒྱུ་མེད་དུས། ད་དུང་ཡང་དེ་འདྲ་བ་ཞིག་ལོས་ཡིན་ཏེ། སྐྱེ་བོའི་རྗེས་སུ་སྤྱོད་པའི་འཁོར་བ་བས། །དེ་བས་ཆེས་མང་བ་ཞིག་བཏུང་འཚལ་ལོ། །ཞེས་གསུངས། དེས་ན་ང་རང་ལ་ཚེ་ཕྱི་མའི་རྟ་གྲོ་རོགས་གསུམ་བསྡུ་ཚག་བྱེད་པ་འདི་ལས་གལ་ཆེ་བའི་ཁེབ་གཅིག་ཀྱང་མེད་པས། འདི་ཁོ་ན་ལ་ཧྲིལ་གྱིས་འདྲིལ་སྙམ་དུ་འཕེན་པ་ཤུགས་དྲག་གཏོང༌། དར་ཅིག་མལ་དུ་བསྡད་ལ་སྔར་བསྒོམ་པའི་རྒྱུ་བཞི་ཚང་བའམ། མིན་ཀྱང་ཤ་ཆོད་རུས་ཆོད་གསོས་བཏབ། དེ་ནས་མེ་འབུད་ཇ་བསྐོལ་སོགས་ཀྱི་ཚེ་ཡང་དེའི་རྩི་དང་མི་འབྲལ་བ་ཅི་ཡོད་བྱེད། གཞན་དུ་འགྲོ་དུས་ཀྱང་འདི་བཞིན་དུ་རང་གཞན་སེམས་ཅན་ཐམས་ཅད་ཕྱོགས་བཅུའི་སངས་རྒྱས་རྣམས་ཀྱི་དྲུང་དུ་ཆོས་མཉན་པའི་ཕྱིར་རྫུ་འཕྲུལ་གྱིས་འགྲོ་བར་ཤོག་ཅིག་ཅེས་དང༌། རང་ཁྱིམ་དུ་ཡོད་དུས་འདི་བཞིན་འོད་
དཔག་མེད་ཀྱི་སྤྱན་སྔར་སླར་འཇུག་པར་ཤོག་ཅིག་དང༌། ཟས་ཟ་དུས་འདི་བཞིན་དུ་བདེ་བ་ཅན་དུ་བསམ་གཏན་དང་ཆོས་ཀྱི་དགའ་བའི་ཟས་ལ་སྤྱོད་པར་དང༌། སྐད་ཆ་ཆལ་ཆོལ་ལབ་དུས་བདེ་བ་ཅན་དུ་བྱང་ཆུབ་སེམས་དཔའི་དགེ་འདུན་རྣམས་དང་ལྷན་ཅིག་སྨྲ་བར་དང༌། ཉོ་ཚོང་དུས། ཡང་ན་རིག་པ་རིག་པ་བརྗེ། ཟེར་བ་ལྟར་བྱང་སེམས་རྣམས་དང་ཆོས་ཀྱི་ཉོ་ཚོང་གིས་དུས་འདའ་བར་ཤོག་སོགས་རྩལ་སྦྱང་ན། ཚིག་ཟིན་གྱི་ཁུངས་མི་སྣང་ཡང་མདོ་སྡེ་རྒྱན་དུ། རྒྱལ་སྲས་སྤྱོད་ཚེ་ཇི་ལྟ་བུར། །སོགས་དང༌། མདོ་ཕལ་པོ་ཆེའི་སྤྱོད་ཡུལ་ཡོངས་སུ་དག་པའི་ལེའུ་དང་ཤིན་ཏུ་འགྲོས་མཐུན་པས་མི་ལེགས་པ་ཅི་ཡོད་སྙམ། གཞན་ཡང་འཇིགས་སྐྲག་དང་སྡུག་བསྔལ་གྱི་ཡུལ་རྐྱེན་མང་པོས་ཡིད་སྐྱོ་བ་ན་བདེ་བ་ཅན་དུ་འགྲོ་དགོས་པའི་བྱ་གཏོང་དུ་ཤེས་པ་དང༌། བདེ་སྐྱིད་ཀྱི་ཡུལ་རྐྱེན་ཉམས་དགའ་བས་སེམས་བྲིད་པ་ན་བདེ་བ་ཅན་གྱི་བདེ་བ་དང་བདེ་བའི་རྒྱུ་ཚོགས་ལ་བསམ་ཚེ། སྦྲང་ཚང་ལྟར་རྒྱ་ཆུང་བ། དུར་ཁྲོད་ཀྱི་རྫས་ལྟར་ངན་ཞིང་སྨད་པ། དུག་ཅན་གྱི་ཟས་ཞིམ་ལྟར་མཐའ་ངན་པ་འདི་འདྲ་ལ་དགའ་རྒྱུ་ཅི་ཡོད། ང་བདེ་བ་ཅན་དུ་འགྲོ་བའི་ལམ་རྒྱགས་བོར་ནས་འདི་འདྲའི་ནང་དུ་མགོ་འཁོར་བ་ནི་ལྷའི་རྒྱལ་སྲིད་བསྐྱུར་ནས་སྲིན་མོའི་འཛུམ་དཀར་ལྟ་བ་དང་འདྲ་སྙམ་དུ་དྲན་པ་བསྟེན། སྡུག་པ་ཡིད་འོང་གི་དངོས་པོ་ཅི་མཐོང་བ་དང༌། ཟས་གོས་ལ་ལོངས་སྤྱོད་པ་སོགས་ཀྱི་ཚེ་སངས་རྒྱས་འོད་
དཔག་མེད་མཆོད་སྙམ་པ་སོགས་མདོར་ན་རྒྱུ་བཞིའི་ཕྱོགས་ཀྱི་དྲན་འདུན་མ་བོར་བ་བྱེད། ནུབ་མོ་ཉལ་ཁར་དེ་རིང་རྒྱུ་བཞི་ལ་བག་ཆགས་ཅི་ཙམ་ཐེབ་པ་བྱས་འདུག །ཕྱུག་པོས་འདུ་འགོད་རྩི་རྩི་བྱས་ནས་ཆེར་མ་བྱུང་འདུག་ན། ང་རང་ལོ་སུམ་ཅུ་ལྷག་ལོན་ཚར། མྱི་ཚེ་གཅིག་ལ་ལོ་མང་མེད་དེ། ད་འདུག་ལོང་ཅི་ཙམ་ཡོད་སུས་ཤེས། ལོ་གཅིག་ལ་ཟླ་བ་བཅུ་གཉིས། ཟླ་བ་གཅིག་ལ་ཞག་སུམ་ཅུ་ལས་མེད། དེའི་གཅིག་དེ་རིང་ཡིན། ལོང་ཡོད་ཡོད་ལ་སོང་ན་ཉི་མ་ལུས་འཕགས་གླིང་གི་ཕྱེད་སྟེང་གི་ནམ་མཁའ་ལ་སླེབས་པ་ནས་བཟུང་སྟེ། བ་གླང་སྤྱོད་ཀྱི་ནམ་མཁའ་ལ་ཐོན་འགྲོ་བའི་བར་ན་དཔག་ཚད་ཁྲི་ཚོ་བཅོ་ལྔ་སྐོར་ཡོད། དེ་རྫོགས་རིང་ལ་ངས་འདུན་མ་རླུང་ལ་བསྐུར་ནས་ལག་སྟོང་ཁར་བཅུག་རྒྱུ་རེད་འདུག །སྙིགས་དུས་ཚེ་ཐུང་གི་མིར་སྐྱེས། འབྱུང་བ་བཞི་དང་གདོན་རྒོད་སོགས་འཆི་རྐྱེན་རགས་ལ་མང་བའི་ནང་དུ་རླུང་གསེབ་ཀྱི་མར་མེ་ལྟར་གནས་པས་དེ་རིང་ཁོ་ནར་མ་ཤི་བ་ཡང་སངས་རྒྱས་ཀྱི་བཀའ་དྲིན་ཡིན་པ་ལ། དེ་ཆུད་ཟོས་ལ་བཏང༌། མདོ་ཤོར་ཟེར་ན་དེ་ལ་ཟེར། བློ་ཉེས་ཟེར་ན་དེ་ལ་ཟེར། རྩམ་ཁུག་ཁྱིས་ཁྱེར་དུས་དེ་རིང་ང་ལ་གྱོང་བརྡབ་ཟེར་བའི་རྐེ་མིན། ཧ་བོ། ཧ་བོ། སྙམ་དུ་ཡང་ཡང་བསམ་ལ། སང་ཉིན་མ་ཤི་བར་མགོ་བོ་བཏེགས་རྒྱུ་ཡོད་ན་ནི་དེ་འདྲ་བྱེད་རེ་ཤི་ཞེས་དམ་བཅའ་བཟུང༌། རྒྱུ་བཞི་དགའ་ཚད་བསོགས་འདུག་ན། ཨ་ལེ། ངས་དེ་རིང་
སངས་རྒྱས་བྱུང་བ་མཉེས་པར་བགྱིས་སོ། །དེ་རིང་ངའི་མགོ་ལ་ཉི་མ་ཤར་བ་ལ་དོན་འབྲས་བྱུང་ངོ༌། །འདི་ལྟར་ང་རང་བེམ་གོག་མི་མཇེད་ཀྱི་ཞིང་དུ་ཡོད་ཀྱང༌། བདེ་བ་ཅན་དུ་སྔ་སྐྱས་བཏེགས་ཟིན་ཏེ། སྐྱིད་པའི་མགོ་ཚུགས་སོ། །ཕྱིའི་རྟེན་འབྲེལ་ལ། རྒྱུ་ཡུངས་ཀར་གྱི་བཞི་ཆ་ཙམ་ལས་ནྱ་གྲོ་དྷའི་སྡོང་པོ་དཔག་ཚད་ཙམ་སྐྱེ་ལ། དེ་བས་ནང་གི་རྟེན་འབྲེལ་ཤིན་ཏུ་འགྱུར་ཆེ་བར་གསུངས་པས། དུས་དེ་རིང་ཁོ་ནར་ཛམ་གླིང་གི་རྡུལ་གྲངས་དང་མཉམ་པའི་ལོར་ལྷ་དང་མིའི་བདེ་བ་མྱོང་བ་དང༌། རྒྱལ་སྲས་ཀྱི་ལམ་བཟང་སྒྲུབ་པའི་ས་བོན་བཏབ་འདུག །འོན་ཀྱང་དེ་རང་ཉིད་བཟང་བའི་ཤེ་མོང་མ་རེད། སངས་རྒྱས་དང་བླ་མའི་དྲིན་རེད། རུས་སྦལ་ནམ་མཁའ་ལ་འགྲོ་བ་རང་ཤེད་མ་རེད། ངང་པའི་ཤེ་མོང་རེད། ད་དུང་ཅོལ་ཆུང་མགོ་ཡང་བྱས་ན་ཁ་ནས་ཤིང་ལོ་འཆོར། དེ་ཤོར་ན་འགྲོ་ས་མཐོ་བས་མི་ཕན། ཐུར་དུ་ལྷུང་ཡོང་བས། སང་ཉིན་ཕན་ཆད་ཀྱང་དགེ་སྦྱོར་གྱི་འཕྲོ་ཇེ་བཟང་ལ་གཏོང་དགོས་སྙམ་དུ་འཕེན་པ་གཏོང་ཞིང༌། ཉལ་བའི་འོག་ཏུ་བདེ་བ་ཅན་གྱི་སྣོད་བཅུད་ལ་སེམས་གཏད་དེ་གཉིད་ལོག །དེ་ལྟར་བྱས་ན་རིམ་གྱིས་དགེ་བའི་བག་ཆགས་ཤུགས་རྗེ་ཆེར་འཕེལ་བའི་རྟགས་སུ་རྨི་ལམ་ན་ཡང་ཞིང་བཀོད་དྲན་པ་དང༌། སངས་རྒྱས་ཀྱི་སྤྲུལ་པ་སྣ་ཚོགས་རྨི་བ་སོགས་འོང༌། དེ་ནས་ཀྱང་སྒོམ་འཕྲོ་རླུང་ལ་མ་བསྐུར་ན། ངེས་པར་ཕྱི་མའི་ཚེ་ལ་བདེ་བ་ཅན་དུ་རྣམ་འདྲེན་འོད་དཔག་
མེད་ཀྱིས་རྗེས་སུ་འཛིན་པར་འགྱུར་རོ། །ཞེས་པའང་དགེ་ཚུལ་ངེས་ལེགས་ཀྱི་ནན་ངོར་བསྟན་པའི་ཉི་མས་ཤ་ཟིན་སྤུ་ཟིན་བྲིས་པ་དགེ་བར་གྱུར་ཅིག། ༈ །།དགེ་ཚུལ་ཡེ་ཤེས་བཟང་པོ་ནས་ཞལ་གདམས་ཉུང་དུ་བྲིས་ཤིག་ཟེར། ཁྱོད་ཀྱིས་ན་ནིང་མི་ཉག་དགེ་སློང་ལས་ཀློང་སྙིང་སྔོན་འགྲོའི་ཁྲིད་ཡིག་ཚིག་འགྲེལ་ཨེ་ཤེས་བལྟས་འདུག་པ་ཤིན་ཏུ་གོ་བཅད། ད་དུང་ཡང་དེ་དུས་ཀྱི་ཚིག་རྒུམ་ཚོ་བརྗེད་དུ་མི་འཇུག་པར་བཤར་སྦྱང་བཏང༌། འདི་ཚོ་རང་རྒྱུད་ལ་ཨེ་ཁེལ་རེ་ལྟ་དགོས་སྙམ་པའི་དྲན་འདུན་བསླབ་ན། དེ་ལས་ལྷག་པའི་ཞལ་གདམས་ཅི་ཡང་མེད། ལ་ལས་ཞལ་གདམས་དགོས་ཟེར། ཨེན་རེ་བྲིས་ནས་བྱིན་ཙ་ན་ཡིག་ཉོབ་ཅིག་གི་ནང་དུ་བཅུག །དོན་བསམ་རྒྱུ་མ་དགོས། ཚིག་ཅི་ཡོད་ཙམ་ཡང་མ་བལྟས་པར། ཤིང་མདའ་སྒྲོ་མེད་ནགས་སུ་འཕང་བ་ལྟ་བུ་ཤ་སྟག་མཐོང༌། དེ་འདྲ་བྲིས་ནས་ཅི་བྱེད། བྲིས་ཤིག་ཟེར་ནས་ཀྱང་ཅི་བྱེད། གང་ལྟར་ཡང་འཕྲལ་དུ་ལག་སྣེར་བབས་ཚོད་ཅིག་འབྲི་ན། ཁམས་གསུམ་འཁོར་བ་ཟེར་རྒྱུ་འདི་ཟོ་ཆུན་གྱི་འཁྲུལ་འཁོར་ལྟར་ངང་གིས་ཐུར་དུ་འགྲོ་ཞིང༌། གྱེན་དུ་འབད་པ་དུ་མས་ཀྱང་འཐེན་དཀའ་བས་ཤིན་ཏུ་སྐྱོ་བའི་གནས་ཤིག་ཡིན་པར་བཅོམ་ལྡན་འདས་ཀྱིས་གསུངས། དེའི་ཚོད་ཀ་དང་སྦྱར་ན་ཁྱོད་ཀྱང་དལ་རྟེན་གཙང་མ་ཐོབ། བྱིས་པའི་དུས་ནས་ཆོས་སྒོར་འཇུག་རྒྱུའི་རྩིས་བཏིང༌། རིམ་གྱིས་མཁན་སློབ་ཀྱི་དྲུང་དུ་བསྟེན་ནས་རབ་ཏུ་བྱུང༌། གདམས་
ངག་ཀྱང་ཅི་རིགས་ཐོབ་པས་ད་སྔོན་ཡར་ལ་སོང་བའི་ལུགས་ཡིན། ད་ཕྱིན་ཆད་ཡར་མར་གར་འགྲོ་རང་ཉིད་ལ་ཐུག་པ་ཡིན་ཏེ། རྒྱ་ཆེར་རོལ་པ་ལས། གཞན་གྱིས་གླེང་བའི་སྐབས་ནི་མ་དབྱེ་བར། །བདག་ནི་རྟག་ཏུ་སྒྲིམ་ཏེ་འབད་པར་བྱོས། །ལ་ལས་བྱས་ཤིང་སྦྱིན་པ་ཡོད་མ་ཡིན། །མ་བྱས་པར་ཡང་འགྲུབ་པར་འགྱུར་བ་མེད། །ཅེས་གསུངས་པ་འདི་བདེན་པའི་བཀའ་གཞན་དུ་མི་འགྱུར་བ་ཡིན། དེས་ན་ད་ལྟ་རྒ་རྒས་རྣམས་ཀྱིས་བན་གཞོན་ཚོ་ལ་ཁ་ཏ་བྱེད་ཙ་ན། ཁྱེད་ཚོ་བྱ་ཁང་འོག་ཏུ་བཅུག་པའི་ལྟ་ལུགས་འདྲ་བ་བྱེད་དགོས། ཁྱི་ཁང་ཐོག་ཏུ་ཕུད་པ་འདྲ་བ་བྱེད་མི་ཉན་ཟེར། དེའི་དོན་འདི་འདྲ་ཡིན། བྱ་ཁང་པ་གཏིང་རིང་གི་ནང་དུ་ཚུད་ན། སྟེང་ན་གོས་གདང་སོགས་འཕུར་ས་གར་ཡོད་བལྟས་ནས་སྐད་ཅིག་ཀྱང་སྡོད་མི་ཚུགས་པར་དེའི་སྟེང་དུ་འཕུར་ནས་འགྲོ་ཞིང༌། དེ་ཙམ་གྱིས་ཀྱང་ཆོག་ཤེས་མི་བྱེད་པར། ད་དུང་སྟེང་ན་གནམ་སྐར་སོགས་གར་ཡོད་བལྟས་ཏེ། ཇི་སྲིད་ཕྱི་རོལ་གྱི་གནམ་ལ་འཕུར་ས་རྙེད་ཀྱི་བར་དུ་སྟེང་ནས་སྟེང་དུ་ལྟ་ཞིང་ངལ་གསོ་མེད་པར་ཨེ་ཐར་ཁོ་ན་བྱེད་པ་ཡིན། དཔེ་དེ་བཞིན་དུ་རབ་ཏུ་བྱུང་ནས་ཅི་བྱེད་དང་འདི་སྒྲུབ་ཀྱི་འདུན་མ་སྣ་གཅིག་མེད་པར། ཉར་རེ་ཉོར་རེའི་ངང་ལ་མི་ཚེ་བསྐྱལ་བ་མ་ཡིན་པར་ཆོས་ཚིག་རེ་རེ་ཙམ་ཡང་ཨེ་ཟིན་དང༌། བསླབ་བྱ་རེ་རེ་ཙམ་ཡང་ཨེ་ཤེས་བལྟས། ཆེ་ཤེས་ཆུང་ཤེས་མཁོ་མེད་དུ་གཡུག་ནས་མི་བཏང་བར་གཅེས་སྤྲས་
ཆེན་པོས་ཞིབ་ཏུ་བསམ། རྒྱུད་ལ་བསྲེ། དད་པ་སྦྱང༌། སྨོན་ལམ་ཚུན་ཆད་བཏབ། དེ་ཙམ་གྱིས་ཆོག་ཤེས་ཀྱང་མི་བྱེད་པར་གོང་ནས་གོང་དུ་བློ་སྐྱེད་ཅི་ཐོན་ལ་ངལ་གསོ་མེད་པར་འབད་ན། རིམ་གྱིས་བློ་ཁ་ཇེ་མཐོ། རྒྱུད་ཇེ་བཟང༌། ཡོན་ཏན་ཇེ་འཕེལ་ལ་འགྲོ། ཁྱི་ནི་ཁང་པ་རྩག་རིམ་མང་པོ་ཅན་གྱི་སྟེང་དུ་བཞག་ན་བག་མི་ཕེབས་ཤིང་རྩག་གཉིས་པའི་ཐོག་ཏུ་མར་མཆོང་གྲབ་ཀྱིས་བྲེལ་འཚུབ་ཟིང་ཟིང་བྱེད། དེར་མཆོང་བ་ན་དེ་ལས་ཀྱང་དམའ་བའི་རྩག་གསུམ་པ་སོགས་འོག་ནས་འོག་ཏུ་ཇི་སྲིད་ཐང་ལ་མ་ཐུག་པར་ལྕེབ་ཅིང་འགྲོ་བ་ཡིན། དཔེ་དེ་ལྟར་ལས་འཕྲོ་ངན་པའི་མི་རྣམས་བནྡྷེའི་ལྷ་གྲལ་དུ་བཞག་ཀྱང༌། ཆོས་ཀྱི་སོ་ནམ་ལ་མི་ལྟ་བར། ཆགས་སྡང་སྒོམ། འཆལ་གཏམ་གྱི་ངང་ལ་མགོ་འཁོར། དམུ་རྒོད་བག་མེད་ཀྱི་ཀུན་སྤྱོད་ཁོ་ནས་དུས་འདའ། རིམ་གྱིས་ཇེ་ཐུར་སོང་སྟེ། ཚོང་དྲན། གྱོད་རྨོ། གཡོ་སྒྱུ་ཁྲམ་གསུམ་ལ་སློབ་གཉེར་བྱས། ཕོ་སྐྱ་མོ་ཉོག་གི་དཀྱིལ་དུ་བསྡད། བུད་མེད་དང་ལྷན་ཅིག་རྩེ་དགོད་དང་བཙོག་གཏམ་གཏོང༌། ཉིན་མཚན་ཀུན་ཏུ་བུད་མེད་དྲན། དེ་ནས་རིམ་གྱིས་ཚངས་སྤྱོད་ཀྱི་བརྟུལ་ཞུགས་མགོ་ཞབས་ལོག །སྐ་རག་སེར་པོ། །གོས་འཇོལ་བཅིང༌། སྐྱ་སེར་གང་ཡིན་ངོས་མི་ཟིན་པ་བྱས། དེ་བས་ཀྱང་སྡོམ་སེམས་ཀྱི་ལྷག་མ་ཟད་དེ། བེའུ་མཆུ་རྟོལ་མཆུ་ཚུན་ཆད་བཅིང༌། ཕྲུ་གུ་མང་པོས་མཐའ་འཁོར། ལུས་མ་བརྗེས་བཞིན་དུ་ཡི་དྭགས་ཀྱི་འགྲོ་བར་སོང་བ་དེ་འོང༌།
དེ་དག་ཀྱང་ཞིབ་ཏུ་ཕྱེ་ན། བྱ་ཁང་པའི་འོག་ནས་སྟེང་དུ་ཕུར་གྱིས་འཕུར་བ་ལ། མིག་ཡར་ལ་གཏད་ནས་མཐོ་ཞིང་མཐོ་བའི་ཕྱོགས་སུ་འཕུར་འདོད་པའི་བློ་དེ་ངེས་པར་སྔོན་དུ་འགྲོ་དགོས་པ་བཞིན། ཆོས་མཐུན་གྱི་སྤྱོད་པ་ཇེ་བས་ཇེ་བཟང་དུ་འགྲོ་བ་ལ། དམ་པའི་རྣམ་ཐར་དང་མཛད་སྲོལ་གང་ཤེས་ཀྱི་རྗེས་བཞིན་བལྟས་ནས་དེ་འདྲའི་རྗེས་ཅི་ཟིན་བྱ་སྙམ་པ་དང༌། ཚེ་འདི་བས་ཕྱི་མ། དེ་བས་ཀྱང་ཕྱི་མའི་ཕྱི་མ་སོགས་ཇེ་སྐྱིད་ཇེ་བཟང་དུ་འགྲོ་བའི་ཐབས་ཁོ་ན་ལ་རེམ་དགོས་སྙམ་པའི་ཞེ་བཅད་བརྟན་པོ་ཞིག་ངེས་པར་ཡོད་དགོས། ཁྱི་ཁང་སྟེང་དུ་ཕྱིན་པ་ལྟར་སྤྱོད་པ་མར་མར་གཞོལ་བ་རྣམས་ཀྱང༌། བསམ་པ་ལ་མ་ཤར་བར་སྤྱོད་པ་ཐུར་དུ་ཤོར་བ་མིན། །ཤ་སྦྲང་མེ་ཏོག་གི་དྲིལ་མི་འཁོར་བར་ཤ་རུལ་གྱི་དྲི་ངན་ལ་ཆགས་པ་དང༌། ཁ་ཏ་བུ་རམ་གྱི་ལ་དུ་བསྐྱུར་ནས་བཤང་ཁང་ཉུལ་བ་ལྟར་མ་རབས་ཀྱི་སེམས་ངན་ངོ་ཚ་བོར་བའི་ངན་སྤྱོད་ལ་དགའ་ཞིང༌། ཚེ་ཕྱི་མར་བདེ་བའི་ཐབས་རྣམས་ཁ་རྗེ་བསོད་ནམས་ཀྱིས་མ་འཆུན་ནས་ཡིད་ཆེས་དོན་གཉེར་མེད་པས་ལན་ནོ། །གཏན་གྱི་འདུན་མ་ད་རེས་འཆུག་མི་རུང་སྙམ་པའི་ཞེ་བཅད་སྔ་མ་འདྲ་བ་ཞིག་ཡོད་ན། ལན་རེ་ཉེས་སྤྱོད་ཀྱི་དབང་དུ་སོང་ཡང་དེ་མ་ཐག་དྲན་པ་རྙེད་ནས་ཕྱིར་བཅོས་ཀྱི་ཐབས་ཀྱིས་ལྟུང་བ་ལས་ལྡང་སྟེ། བྱ་ས་ལ་བབས་ཀྱང་མྱུར་དུ་གནམ་ལ་འཕུར་བ་ལྟར་གོ་འཕང་མཐོན་པོར་འགྲོ་བ་ལ་ཚེགས་མེད་པར་ཤེས་པར་བྱའོ། །དེ་དག་ནི་བསྟན་བཅོས་ཡིན་
ལ། བསྟན་བཅོས་ཇི་ལྟར་བརྩམས་པའི་ཚུལ་བཤད་པ་ནི། ཆགས་མེད་རིན་པོ་ཆེས། ལག་པ་ན་ཡང་འབད་ནས་བྲིས། །ཞེས་གསུངས་པ་ལྟར་རོ། །དགེའོ།། ༈ །།ལགས་དམ་པའི་ཆོས་གཤའ་མ་ཞིག་མཛད་ན་འདི་བཞིན་འཚལ་ཏེ། འཇིག་རྟེན་གྱི་བྱ་བ་ཇི་ལྟར་བསྒྲུབ་ཀྱང་སྙིང་པོ་རྡུལ་ཙམ་ཡང་མེད་པས་སོ་ནམ་གྱི་ཁུར་པོ་ཕོག །ཟས་ནོར་གྱི་འབྱོར་པ་རི་རབ་ཙམ་ཡོད་ཀྱང་ངོམ་པ་དང་ཆོག་ཤེས་སྤུ་རྩེ་ཙམ་ཡང་མེད་པས་གསོག་བསྲུང་གི་བྲེལ་དོ་སྐྱུར། རྣམ་གཡེང་གི་བྱ་བ་བསྐལ་ཆེན་འབུམ་དུ་བསྒྲུབ་ཀྱང་ཟིན་པ་དང་ཚིམ་པ་ཏིལ་འབྲུ་ཙམ་ཡང་མེད་པས་ཆོས་བརྒྱད་ཀྱི་བགྱི་བ་ཐོང༌། གཉེན་གྲོགས་ཀྱི་ཁ་འཛིན་ལ་བསྐལ་བར་འབད་ཀྱང་འགྲུབ་པ་དང་ཚར་ཕྱིན་པ་ཆུ་ཐིགས་ཙམ་ཡང་མེད་པས་མཛའ་བཤེས་ཀྱི་ཞེན་པ་བོར། ད་ལྟ་ལོངས་སྤྱོད་ལ་ཆགས་པ། ཟས་གོས་ལ་བསོགས་འཇོག །འདི་སྣང་ལ་ཞེན་སྲེད། སྲིད་སྡེ་ལ་དགའ་གདུང་སོགས་འཇིག་རྟེན་ཚེ་འདིའི་བྱ་བ་ཅི་འདྲ་ཞིག་བསྒྲུབ་ཀྱང་འཆི་བའི་ཚེ་ཅུང་ཟད་ཙམ་ཡང་རྗེས་སུ་མི་འབྲང༌། དམ་པའི་ཆོས་གཅིག་པུ་མ་གཏོགས་སུས་ཀྱང་སྐྱོབ་མི་ནུས་པར་ཐམས་ཅད་ཀྱིས་གླས་ལ་བོར་ཏེ་འགྲོ་བ་ན་སེམས་ཕམ་པ་ཞིག་ཡོང༌། འཇིག་རྟེན་གྱི་ལས་ཐབས་ཇི་ལྟར་མཁས་ཀྱང་འཆི་བདག་གཤིན་རྗེ་ལ་ནི་མི་ཐབས་བྱེད་རྒྱུ་མེད། བཙན་པོ་སྟོབས་རྩལ་ཅན་ཇི་ལྟ་བུ་ཞིག་ཡིན་ཀྱང་འཆི་བདག་གི་གཡུལ་ངོ་བཟློག་
མཁན་ནི་ཡེ་མི་འདུག །ཕྱུག་པོ་མངའ་ཐང་ཅན་ཇི་ལྟར་ཡིན་ཀྱང་གཤིན་རྗེ་འཆི་བདག་གི་རྒྱལ་པོ་ལ་ལྐོག་ཟས་ནི་མི་འཕྲོད། ད་ལྟ་སྐྱིད་པོའི་གནས་ཁང་ན་འདུག །བདེ་བའི་མལ་ན་ཉལ། ཞིམ་པོའི་ཟས་ཟ། མངར་པོའི་སྐོམ་འཐུང༌། དྲོན་པོའི་གོས་གྱོན། འཁོར་འབངས་དུ་མ་བཅས་ཏེ་ལྷ་གཡག་ཞོལ་མོ་འགྱིང་བ་བཞིན། བརྗིད་མེར་རེ། སྣུམ་ཆིལ་ལེ། གཟི་འོད་ལམ་ལམ་དུ་འདུག་ཀྱང་སྒྲེན་མོ་ལག་པ་སྟོང་པར་འཇིག་རྟེན་ཕ་རོལ་ཏུ་སོང་སྟེ། རོ་སྔོ་སྒོག་གེ༌།གདོང་སྐྱ་ལམ་མེ། མགོ་ས་ཁ་ལེ་སྤོ་ཐོ་ཞིག་སྔས་ལ་བཞག་ཁ་ཕོར་དེ་སྔས་མགོར་སྦུབས་ནས་མི་རྟག་སྒྱུ་ལུས་ཀྱི་ཁང་པ་ཤུལ་དུ་བཞག་སྟེ། གཅིག་པུ་ས་ཚུག་མེད་པའི་ཕྱོགས་སུ་འགྲོ་བ་ན་དམ་པའི་ཆོས་མ་གཏོགས་པ་གླིང་དང་སྐྱབས་སུ་ཞིག་ཡོད། ད་ལོ་བླ་མ་ཡིན་ཟེར་གྱི་ལང་རྒྱན་གྱིས་བརྒྱན་པ་ལ་ཞོན། ངེས་མེད་ཀྱི་ཡུལ་དུ་གདུལ་བྱའི་དོན་དུ་ཕེབས་ཟེར། དར་ཁའི་མདུད་པ་བོར་ནས་བྱིན་རྟེན་དུ་འགྱེད། ཧཱུྃ་རེ་གསུང་ནས་རྟ་རེ། ཕཊ་རེ་བྱས་ནས་མཛོ་རེ་ལེན་གྱིན་ཡོན་བདག་གྱི་སྒོ་དྲུང་འགྲིམ། མི་ཀླད་མེད་ཚོས་ཞབས་པད་བཏེགས་ཙ་ན་ཐུགས་རྒྱལ་ཆེར་སོང༌། དངུལ་རྒྱབ་ཁུར་མང་པོ་སྒྲོམ་བུར་བསགས་ཀྱིན་བསགས་ཀྱིན་སྐུ་ཚེ་ཐམས་ཅད་ཆོས་བརྒྱད་ལ་དྲིལ་ཏེ་མྱ་ངན་ལས་འདས་པའི་ཐ་སྙད་བརྗོད་པ་ན་ཐུགས་གཙིག་ཆེ་བའི་དཔལ་འབྱོར་ལ་བརྩེ་བར་དགོངས་ཏེ་གསེར་ཞྭ་རྟ་བེར་གྱི་བདག་ཉིད་ཆེན་པོ་
མཐུ་ལྡན་དྲེགས་པའི་སྐུར་བཞེངས་པ་ལ་ལྟོས། འཇིག་རྟེན་གྱི་བྱ་བ་ལ་ཞེན་པའི་འབྲས་རྟགས་མི་ཤེས་པ་ཁ་མེད་དུ་གདའ། རྟོགས་ལྡན་རྣལ་འབྱོར་གྱི་དབང་ཕྱུག་ཡིན་ཟེར། རྒྱལ་ཁམས་ཕྱོགས་མེད་དུ་འགྲིམ། སྦྱིན་བདག་ཤིན་ཏུ་མང༌། མངོན་ཤེས་དང་རྫུ་འཕྲུལ་ཆེན་པོར་སྟོན། ལྟ་སྟངས་ནམ་མཁའ་ལ་སྒྲིལ། དད་ཟས་དང་འབུལ་ནོར་བྲག་ཕུག་ཏུ་བསགས་ནས། སྐུ་ཚེ་བཏང་མ་ཐག་གྲོང་ཉུལ་མྱུར་མགྱོགས་ཅན་འགྲོ་བ་ལ་ལྟོས། ཆོས་བརྒྱད་དབང་ཆེ་བའི་རྟགས་མཚན་ཅིའི་ཕྱིར་མི་མཐོང༌། ད་ཚུལ་དེ་ལེགས་པར་བསམས་ནས་ཚེ་འདི་བློས་བཏང༌། གྱོང་ལྟོ་གོས་གཏམ་གསུམ་ལ་སྐུར། དགྲ་གཉའ་རེང་དུ་བཏང༌། ཞིང་ཐ་རེང་དུ་བཞག་ནས། མཐོན་པོའི་ངོ་དགའ། དམའ་མོའི་སྐྱོང་བྲན། མཉམ་པོའི་ཁ་འཛིན་ཐམས་ཅད་ཆམ་གྱིས་བཞག་སྟེ། མི་མེད་ཀྱི་ལུང་སྟོང་སྐམ་པོར་སོང་ལ་སྡོད་ཅིག །ལུང་སྟོང་སྐམ་པོ་ན་འདུལ་རྒྱུའི་དགྲ་མི་འདུག །བསྐྱང་རྒྱུའི་གཉེན་མི་འདུག །ལྗོན་ཤིང་དང་བྲག་རིས་ནི་འགྲས་མི་གསོག །བྱ་དང་རི་དྭགས་ཀྱིས་ནི་འགྲས་མི་གསོག །རྩ་ལྗང་དང་ཆུ་ཀླུང་གིས་ནི་འགྲས་མི་གསོག་ན་ཅིའི་ཕྱིར་མི་བདེ། བྱ་དང་རི་དྭགས་ནི་འགྲོགས་ན་བདེ་བ་ལགས་ཏེ། གཏམ་གྱི་ལན་འཇལ་མི་དགོས། མགུ་འཁང་དང་ཆགས་སྡང་མི་དགོས། སྔ་དྲོ་མཛའ་བོར་ཡོད་བཞིན་དུ་ཕྱི་དྲོ་དགྲར་སྡང་བའི་བྱིས་པ་དང་མི་འདྲ། བྱ་དང་རི་དྭགས་ནི་གྲོགས་བཟང་པོ་ལགས་
ཏེ། ཟས་བགོ་དང་ནོར་བགོ་མི་དགོས། ངོ་བསྲུང་དང་ཡུས་ཆེ་མི་ཡོང༌། ཕན་པ་བརྒྱ་འཇལ་བ་གནོད་པ་གཅིག་གིས་འཇོམས་པའི་བྱིས་པ་དང་མི་འདྲ། བྱ་དང་རི་དྭགས་ནི་ཆོས་མཐུན་གྱི་གྲོགས་པོ་ལགས་ཏེ། འདུས་ནས་སོ་སོར་གྱེས་ཏེ་འདུས་མཐའ་འབྲལ་ལོ་ཞེས་བརྡ་སྟོན། གང་བྱུང་དེ་ཉིད་དུ་སྤྱོད་པས་གསོགས་འཇོག་སྤོངས་ཤིག་ཅེས་གཏམ་འདོམས། གཟའ་གཏད་མེད་པར་རྒྱུ་བས་ངེས་མེད་འགྲིམས་ཤིག་ཅེས་བསྐུལ་མ་འདེབས། འཇིག་རྟེན་གྱི་བྱ་བ་སྒྲུབ་ནས་འཁོར་བ་མཐའ་མེད་དུ་འགྲིམ་དུ་འཇུག་པའི་བྱིས་པ་དང་མི་འདྲ། བྱ་དང་རི་དྭགས་ནི་གེགས་མེད་ཀྱི་གྲོགས་པོ་ལགས་ཏེ། ཆགས་པ་དང་མཛའ་བོར་བདག་བཟུང་མི་བྱེད། འཁོན་པ་དང་ཁྲོས་པའི་ཞེ་འགྲས་མི་འགྲེམ། འདུག་ན་སྣེ་བཏོག། སོང་ན་གེགས་བྱེད་པའི་བྱིས་པ་དང་མི་འདྲ། མདོར་བསྡུ་ན་སྣ་ཐག་རང་མགོ་ལ་གཟད་དེ། རྡོ་བ་དང་ཤིང་ལོས་གང་བའི་ས་ཕྱོགས་སུ་ཆུ་དང་ལོ་མའི་འཚོ་བ་ལ་བརྟེན་པ་ཞིག་བཀའ་དྲིན་མི་ཆུང་བར་ཅི་ནས་ཀྱང་ཞུ་ཞུ་ཞུ་མཁྱེན་མཁྱེན་མཁྱེན་རེམ་རེམ་རེམ།། ༈ །།ལར་སྟོན་པ་ཐམས་ཅད་མཁྱེན་པའི་བསྟན་པ་སྡེ་སྣོད་རིན་པོ་ཆེ་འདི་གོ་བར་བྱ་བའི་ཆོས་ཡིན། འདྲིས་པར་བྱ་བའི་གཞུང་ཡིན་ཏེ། བྱང་ཆུབ་སེམས་དཔའ་འདི་དག་ལ་བསླབ་ན་ཐམས་ཅད་གཟིགས་པའི་ཡེ་ཤེས་ཀྱི་རྒྱུ་ཚོགས་འཕེལ་བ་དང་མོས་པ་སྣ་ཚོགས་པའི་སེམས་ཅན་གྱི་ཁམས་སྨིན་པའི་ཐབས་ལ་མཁས་པར་འགྱུར་བའི་
ཕྱིར་རོ། །འོན་ཀྱང་དེང་སང་གི་སློབ་གཉེར་མཁན་པོ་ཁ་ཅིག་ནི་ཅི་ཙམ་དུ་ཐོས་པ་མང་བ་དེ་ཙམ་དུ་ཁེངས་པས་དྲེགས་ཏེ། ང་ནི་མང་དུ་ཐོས་པ་གཞུང་ལུགས་ཤེས་པ། སྡེ་སྣོད་ལ་མཁས་པའོ་ཞེས་རྟོག་ཅིང༌། གང་ཟག་གཞན་ཐོས་པ་མ་བསགས་པ་དག་མཐོང་བ་ནའང་འདི་དག་ནི་བླུན་པ་རྟུལ་བ་བུས་པ་གླེན་པ་མི་མཁས་པ་ཡིན་ནོ་ཞེས་ཁྱད་དུ་གསོད་ལ། མཁས་པ་གཞན་དག་གི་གཞུང་ལུགས་ཤིག་བཀླག་ཀྱང་དམ་པའི་ཆོས་ལ་གུས་ཤིང་དོན་དུ་གཉེར་བ་མེད་བཞིན་དུ་དང་པོ་གླེགས་ཐག་དཀྲོལ་དུས་ནས་འདིའི་ནང་ན་ག་འདྲ་ཞིག་ཡོད། ཅི་འདྲ་ཞིག་བྲིས་འདུག་ཨང་སྙམ་ནས་མཚར་ལྟས་ཀྱི་འདུ་ཤེས་བཞག་སྟེ། རིག་པ་རྩ་མགོ་ལ་བཀྲམ། མཛུབ་རྩེ་གདོང་ཉག་ལ་བཙུགས། མགོ་ལ་སྒྲི་ལང་སྟེ། ཆེ་གེ་མོ་ཞིག་ཟེར་ན་ཚད་མའི་གཞུང་དང་མི་འགྲིགས། ག་གེ་མོ་ཞིག་འདོད་ན་མངོན་པ་དང་མི་མཐུན། ཅིག་ལེ་ཞིག་ཁས་བླང་ན་རིགས་པ་འདི་འདྲ་ཞིག་གིས་གནོད་འདུག་ཅེས་དཔྱད་དཔྱད་ནས་དཔེ་ཆ་དེ་བལྟས་ཟིན་པ་ན་བསྡུ་རྒྱུ་བདག་རྒྱུ་འདོད་རྒྱུ་འཇོག་རྒྱུ་ཐམས་ཅད་ཅི་ཡིན་འདི་ཡིན་མེད་པ་ཞིག་ཏུ་སོང༌། ད་ག་རེ་ང་རང་གི་རང་ལུགས་འདི་འདྲ་ཞིག་བཞག་ནས་གཞན་ཞིག་དང་བརྩད་ན་དེས་འདི་ཟེར་ཡོང༌། དེ་ལ་འདི་ཟེར་དགོས། དེས་ལན་འདི་འདེབས་ཡོང༌། དེ་ལ་ཅི་དྲག་བསམ་ནས་བསྡད་དུས་ཉིན་བློ་མི་བདེ། མཚན་གཉིད་མི་ཡོང༌། གལ་ཏེ་
གཉིད་ཞིག་བྱུང་ཡང་རྨི་ལམ་ཚོར་དེ་འདྲ་དེ་དག་ཁོ་ན་རྨིས་རྨིས་ནས་ཐོ་རང་སད་འོང་དུས་ཀྱང་ཡིད་མ་བདེ་སིང་སིང་འགྲོ། ལམ་ཟབ་མོ་བྱང་ཆུབ་ཀྱི་སེམས་དང་སྙིང་རྗེའི་སྒོམ་རིམ་ལྟ་བུ་རེ་འདུག་ན་དེ་གོ་སླ་ཨའུ་ཙི་སྙམ་ནས་སྐྱུར། རྟོག་གེའི་གཞུང་ཕྲན་རེ་མཐོང་ན། འོ་འོ་དེ་ཀ་ལ་གཅིག་བལྟ་དགོས་ཟེར་ནས་ཁ་ཕྱེས། དེ་མ་ཐག་ཤེས་པ་ཧུར་ཕྱུང་སྟེ། ག་རེ་དེ་དོན་ལྡོག་རེད་དམ། གཞི་ལྡོག་ཞིག་རེད། དགག་པ་ཞིག་རེད་དམ། སྒྲུབ་པ་ཞིག་རེད་དམ། འདི་ཁྱབ་པ་གྲུབ་བམ། འགལ་བ་འདུའམ་ཞེས་དྲན་རྟོག་གི་སྤུ་རིས་བྲིས་བྲིས་ནས་ཕྱི་དྲོ་ཙ་ན་སྙིང་ཕྱོད་ཕྱོད་གློ་བ་ཏིག་ཏིག་པོར་འགྲོ། སངས་རྒྱས་ཀྱི་ལྡོག་པ་དང་སེམས་ཅན་གྱི་རྫས་སྤྱི་ལ་གཏད་འདུག་ས་ནས་དད་པ་དང་ངེས་འབྱུང་གི་བློ་སྣ་ཐམས་ཅད་ཇེ་ཆུང་ཇེ་འགྲིབ་ཏུ་སོང༌། འཆི་ཙ་ན་ཐོས་ཚད་ཚིག་རོ། དཔྱད་ཚད་སྟོང་འདང༌། བལྟས་ཚད་ཆུད་ཟོས་སུ་དྲོན་པའི་རྫུན་རྐུབ་དེ་བུད། གཟུགས་ཤེས་ལྡན་མིན་འདུ་བྱེད་བརྩིས་ཤིང་དཔྱད་ཚད་པོ་ཐམས་ཅད་མུན་ནག་ནང་དུ་རྡོ་འཕང་བ་ལྟར་གྱུར་ཏེ་རྗེན་ཅེར་རེ་ཕེབས་ཡོང༌། ལེགས་པར་བསམ་ན་རིགས་ལམ་འདིས་ལོག་རྟོག་བཟློག་དགོས་པར་འདུག །དེ་བཟློག་ནས་རང་ཉིད་ཡང་དག་པའི་ལམ་ལ་འཇུག་དགོས་པར་འདུག །དེར་ཞུགས་ནས་རྣམ་པར་གྲོལ་བའི་ཡེ་ཤེས་མངོན་དུ་བྱེད་དགོས་པར་འདུག །ཆོས་མང་དུ་ཐོས་པ་ཞེས་བྱ་བ་མང་པོ་ཞིག་ཉན་པ་ཙམ་ལ་མི་འཇུག །ཐོས་པ་གང་ཞིག་
ལ་བརྟེན་ནས་ཁམས་གསུམ་ལ་སྐྱོ་བར་འགྱུར་བ་དེ་ཉིད་མང་དུ་ཐོས་པ་ཡིན་ཞེས་ཆོས་མངོན་པ་ལས་བཤད་པས། ཚིག་གི་འཛིན་མཚམས་ཕྲན་ཕྲིན་རེ་ཤེས་པས་མཁས་པར་སྨྲ་བ་འདིའང་བརྟག་དགོས། སྒྱུ་མ་མཁན་བཟང་པོས་ཞུས་པའི་མདོར། ཆོས་ཐོས་ནས་རང་གིས་ཉམས་སུ་ལེན་པ་དང༌། གཞན་ལ་ལེགས་པར་བཤད་པས་ཕན་འདོགས་པ་གཉིས་ཐོས་པ་མང་བའི་སྙིང་པོ་ཡིན་ཞེས་བསྟན་པས། དོན་འབྲས་འདི་དག་མི་ལེན་བཞིན་དུ་ཚུར་མཐོང་གི་རིགས་ལམ་གྱོང་པོ་འགའ་ཞིག་གིས་མཁས་པའི་རྣམ་ཐར་སྐྱོང་བར་རློམ་པ་འདིའང་དཔྱད་དགོས། ངེད་ཀྱི་སློབ་གཉེར་འདི་སྲིན་བུ་པདྨའི་རྗེས་ཤུལ་གྱི་ཆུ་ཙམ་ལས་མེད་ཀྱང་རྣམ་ཐར་འདི་ཚོ་ལ་ཉམས་མྱོང་རེ་ཡོད་པས་གཞན་འགའ་ལའང་འདྲའམ་སྙམ་ནས་སྤྲང་སྨྱོན་འཇིགས་མེད་པས་སྨྱོ་གཏམ་བྱས་པའོ།། ༈ །།ལགས། བདག་ཅག་གི་སྟོན་པ་སྟོབས་བཅུའི་དབང་ཕྱུག་ཉིད་ཀྱིས་ཀྱང་སློབ་པའི་ལམ་གྱི་གནས་སྐབས་ན་བརྩོན་འགྲུས་ཕུན་སུམ་ཚོགས་པས་ལེགས་པར་བཙལ་བའི་ཆོས་ནི་ཕྲད་པར་དཀའ་བ་ལགས་ཏེ། བརྒྱ་ལམ་ན་མེ་ཏོག་ཨུ་དུམ་ཝཱ་ར་སྐྱེ་བ་བཞིན་ནོ། །དེའི་ཕྱིར་ཁྱོད་ཀྱིས་འཁོར་ལོ་ཆེན་པོ་བཞི་དང་ལྡན་པའི་ལུས་རྟེན་འདི་ལྟ་བུ་རྙེད་པ་ན་དམ་པའི་ཆོས་ལ་དོན་དུ་གཉེར་བ་ཤུགས་དྲག་པོ་ལྷུར་བླང་སྟེ། མང་དུ་ཐོས་པའི་ཡོན་ཏན་གྱིས་མི་ངོམས་པར་བུང་བ་རྣམས་པདྨ་དག་ལས་སྦྲང་རྩི་ལེན་པ་བཞིན་ཡང་དང་
ཡང་དུ་ཐོས་པ་རིན་པོ་ཆེ་ཚོལ་བ་ནི་ངོ་མཚར་ཏོ། །འོན་ཀྱང་ཐོས་པ་ཇི་ལྟར་བསགས་ཀྱང་དེ་འདོད་ཆགས་དང་འབྲལ་བ་དང༌། ཟག་པ་དང་བཅས་པའི་ཕུང་པོ་ལ་མངོན་པར་སྐྱོ་བའི་རྒྱུར་མ་གྱུར་ན་དེ་ལ་ནི་མང་དུ་ཐོས་པར་མི་གདགས་སོ་ཞེས་ཆོས་མངོན་པ་ལ་སོགས་པ་ལས་བསྟན་པ་ཡིན་པས་ཐོས་པའི་ཆོས་ལ་དངོས་པོ་སྟོབས་ཞུགས་ཀྱི་རིགས་པ་ཡང་དག་གི་ལམ་ནས་ངེས་ཤེས་བསྐྱེད་ཅིང༌། ངེས་ཤེས་གང་ལ་འདྲོངས་པའི་དོན་དེ་སྒོམ་པའི་ཕྱིར་ཚེ་འདི་བློས་ཐོང༌། ཆོས་བརྒྱད་རྡོག་པས་ནོན་ལ་མི་མེད་ཀྱི་ལུང་སྟོང་དུ་ཞི་བའི་ཏིང་ངེ་འཛིན་སྒྲུབས་ཤིག །ཚེ་འདི་བློས་བཏང་བར་སྟོན་པའི་སླད་དུ་རྒོད་སྣ་ཡུམ་བྱས་ཏེ་བྱ་བྲལ་གྱི་ལྟར་སྣང་ལིང་ལིང་ལིང་བྱེད་པ་རྒྱལ་ཁམས་ན་མང་མོད་ཀྱི། སྙིང་ནས་འཇིག་རྟེན་གྱི་ཆོས་བརྒྱད་ལམ་ཁའི་རོ་བཞིན་དུ་འབོར་ནུས་པ་དེ་ཉིན་མོའི་སྐར་མ་ལྟར་འདུག་པ་དགོངས་ཆུབ་ལྟར་ལགས། དེའི་ཕྱིར་ཁྱོད་ཀྱིས་དལ་རྟེན་རྙེད་པར་དཀའ་ལུགས། རྙེད་ན་ཕན་པ་ཆེ་ལུགས། ཚེ་ལ་རྟག་པ་མེད་ལུགས། འཆི་བདག་ཟློག་ཐབས་བྲལ་ལུགས། ཤི་ཚེ་དམ་པའི་ཆོས་མ་གཏོགས་པ་ལོངས་སྤྱོད་དང་ཉེ་དུས་སྐྱོབ་མི་ནུས་པར་རང་ཉིད་གཅིག་པུར་ས་ཚུགས་མེད་པའི་ཕྱོགས་སུ་འགྲོ་ལུགས་ལ་བསམ་བློ་བཏང་སྟེ། དམ་པའི་ཆོས་འབའ་ཞིག་ལ་བློ་སྣ་གཏད་དེ། ཤ་དང་རུས་པའི་རི་བོ་བསྙིལ་ཐུབ་པ། ཁྲག་དང་མཆི་མའི་རྒྱ་མཚོ་སྐམ་ནུས་པ་ཞིག་དགོས། དམ་པའི་ཆོས་ཞེས་བྱ་བ་ཉམས་སུ་ཇི་ལྟར་ལེན་ན། དལ་འབྱོར་རྙེད་
དཀའ་བསམ་པ་ནས་ཐེག་མཆོག་རྫོགས་པ་ཆེན་པོའི་བར་གྱི་གཞུང་ལམ་ཐམས་ཅད་འགལ་མེད་ལམ་གྱི་ཆ་རྐྱེན་གཅིག་ཏུ་རྟོགས་ཏེ། དགེ་བའི་བཤེས་གཉེན་ལ་སངས་རྒྱས་སུ་ལྟ་བའི་མོས་གུས་གཞིར་བཟུང༌། འཁོར་བ་སྡུག་བསྔལ་དུ་ཤེས་ཏེ་ཐར་འདོད་ཀྱི་བློ་སྔོན་དུ་བཏང༌། བསླུ་མེད་གཏན་གྱི་སྐྱབས་གནས་དཀོན་མཆོག་གསུམ་ཁོ་ན་ལ་འཇིགས་པ་ལས་སྒྲོལ་བའི་དཔུང་གཉེན་དུ་སྐྱབས་ཚོལ། འགྲོ་དྲུག་མར་ཤེས་ཤིང་སེམས་ཅན་གྱི་དོན་དུ་སངས་རྒྱས་ཀྱི་སེང་གེའི་སྒྲ་ཆེན་པོ་འཇིག་རྟེན་དུ་བསྒྲག་པར་བྱའོ་ཞེས་བྱང་ཆུབ་ཀྱི་སེམས་རིན་པོ་ཆེ་ལ་དྲན་པ་མངོན་དུ་བཞག་སྟེ། བདག་ཉིད་ཆེན་པོ་རྣམས་ཀྱི་རྗེས་སུ་སློབ་ནུས་པ་ཞིག་བྱུང་ན་ཁྱོད་འདུན་མ་ལེགས་པའི་རྩེ་མོར་བྱོན་པ་ལགས། གཏམ་དུ་བྱ་བ་ཐོར་བུ་ཡང་དགའ་ཞིག་བྱ་བར་བདག་སྤོབས་ཏེ། གང་ཞིག་ཤིང་རྟ་ཆེན་པོའི་གཞུང་ལུགས་ལ་གསན་བསམ་མཐར་ཕྱིན་པའི་བདག་ཉིད་ཆེན་པོ་རྣམས་ཀྱིས་ཀྱང་ཆོས་དང་ཆོས་མ་ཡིན་པ་རྣམ་པར་ཕྱེ་ཞིང་དམ་པའི་ཆོས་ལས་རིང་བ་རྣམས་ལ་བརྒལ་བརྟག་མཛད་པ་ནའང་རྟོག་གེ་བས་ནི་ཆོས་སྤོང་ངོ་ཞེས་སྐྱེ་བོ་བླུན་པོ་རྣམས་ཀྱིས་སྡང་ཞིང་སྤོང་བར་བྱེད་ན་རང་ཅག་ལྟ་ཅི་སྨོས། དེའི་ཕྱིར་ཁྱོད་སྒྲིམ་ལ་གཞན་སུན་འབྱིན་མ་སྨྲ་ཞིག །དོན་དུ་མི་འགྱུར་གྱི་ཆགས་སྡང་གི་གཞིར་འགྱུར་ཏ་རེ། གཞན་ཡང་བདག་གིས་འདི་བྱའམ་མི་བྱ་ནའང་ལེགས་སོ་ཞེས་ལས་ཀྱི་མཐའ་སྣ་ཚོགས་སྒྲུབ་པར་
འདོད་ནས་བློ་གཅིག་ཏུ་མི་ཚུགས་པ་ནི་སྐྱེས་བུ་བརྟན་པ་རྣམས་ཀྱི་ཚུལ་མ་ཡིན་གྱི། བློ་རི་རབ་བཞིན་དུ་བརྟན་པས་རིགས་པའི་བྱ་བ་འབའ་ཞིག་ལས་མི་འདའ་བ་ཞིག་དགོས་པ་ལགས། ཞེས་སྦྲང་སྨྱོན་འཇིགས་མེད་པས་རང་ཉིད་ལ་ཡོན་ཏན་སྤུ་ཉག་ཙམ་ཡང་མེད་པས་དོན་མཐུན་གྱི་བསྡུ་བ་དང་མི་ལྡན་པར་རིག་ཅིང་ཤེས་བཞིན་དུ་ཆོས་གྲོགས་་མིང་ཅན་གྱི་ངོ་མི་ལྡོག་ཙམ་དུ་བྲིས་པའོ།། ༈ །།རྣལ་འབྱོར་པས་སྒྲོལ་བའི་ལས་བྱེད་པ་ལ། དང་པོ་ཆོས་ཉིད་དེ་བཞིན་ཉིད་ཀྱི་གནས་ལུགས་ལྟ་བས་གཏན་ལ་ཕབ། སྒོམ་པའི་ཏིང་ངེ་འཛིན་གྱིས་གོམས་པར་བྱས་ནས་རྣམ་པར་རྟོག་པའི་སྲོག་རང་བཞིན་སྐྱེ་བ་མེད་པའི་དབྱིངས་སུ་གཅོད་པ་ནི་རྟོགས་པས་བདག་བསྒྲལ་བ་ཞེས་བྱ་བ་ཡིན་ཏེ། གསང་བ་སྙིང་པོ་ལས། ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་སེམས་ཅན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱའོ། །ཞེས་སོ། །ཐུགས་རྗེས་གཞན་སྒྲོལ་བ་ནི། དགྲ་བོ་འདིས་ང་ལ་གནོད་པ་འདི་བྱས། ངའི་ཡོན་བདག་ལ་གནོད་པ་འདི་བྱས་སྙམ་ནས་དགྲ་ལ་ཞེ་སྡང་དང་སྦྱིན་བདག་ལ་ཆགས་པ་སྐྱེས་ནས་དགྲ་འདི་བསྒྲལ་དགོས་སྙམ་ན་ཆགས་སྡང་འཁོར་བའི་རྒྱུ་ཡིན་པ་མདོ་རྒྱུད་དུ་མ་ནས་གསུངས་ཡོད་མོད། དེས་ན་སེམས་ཅན་ཐམས་ཅད་ཡེ་ནས་སངས་རྒྱས་ཀྱི་རང་བཞིན་ཡིན་པ་ལ་རང་ངོ་རང་གིས་མ་ཤེས་པར་ང་མེད་ལ་ང་རུ་བཟུང༌།
བདག་མེད་ལ་བདག་ཏུ་བཟུང་ནས་མཐའ་མེད་འཁོར་བའི་གནས་སུ་འཁྱམས་པ་འདི་རྣམས་སྙིང་རེ་རྗེ། གང་དག་ཞི་བས་མི་འདུལ་བ་དག་ལ་བདག་གིས་མངོན་སྤྱོད་དྲག་པོས་བསྒྲལ་ནས་སངས་རྒྱས་ཐོབ་པ་ཞིག་ཅི་ནས་ཀྱང་བྱ་སྙམ་པའི་སྙིང་རྗེ་བྱང་ཆུབ་སེམས་ཀྱིས་ཀུན་ནས་བསླང་བ་ཞིག་ཅི་ནས་གལ་ཆེ། དེ་ནི་དོན་གྱི་སེམས་ཟེར་བ་ཡིན། སྟོང་ས་ཀྱི་སེམས་ནི་ལས་ལ་སྦྱོར་ཚེ་ཁྲོ་ཞིང་གཏུམ་པའི་སེམས་དང་ལྡན་པས་བདག་མདུན་གྱི་ལྷ་ཐམས་ཅད་སྐུ་མདོག་ནག་པོ་རབ་ཏུ་ཁྲོ་བ་དྲག་པོའི་ལས་ལ་རྔམས་པའི་ཚུལ་དུ་བསྐྱེད་དེ། ལྷ་ཚོགས་རྣམས་ཀྱི་ཐུགས་ཀ་ནས་ཕོ་ཉ་ཕྱག་རྒྱ་བཞིའི་ཚོགས་བསམ་གྱིས་མི་ཁྱབ་པ་འཕྲོས་པས་སེམས་ཅན་ཐམས་ཅད་ཀྱི་རྒྱུད་ཀྱི་ངར་འཛིན་གྱི་དགྲ་བོ་དང་ཁྱད་པར་དུ་དམིགས་བྱ་གང་ཡིན་པ་དེ་སྙིང་རྗེའི་ལྕགས་ཀྱུས་སྙིང་ནས་དྲངས། བྱམས་པའི་ཞགས་པས་སྐེ་ནས་བཅིང༌། དགའ་བའི་ལྕགས་སྒྲོག་གིས་ཡན་ལག་བསྡམ། བཏང་སྙོམས་ཀྱི་དྲིལ་བུས་དབང་པོ་མྱོས་པར་བྱས་ཏེ་ལིངྒ་ལ་ཕྱེ་མར་ཆུ་བླུག་པ་བཞིན་ཐིམ་པས་ཏིང་ངེ་འཛིན་གྱི་གནད་དང་ལྡན་པས་བཀུག་རྗེས། བསྒྲལ་བ་དངོས་ལ་བབས་ཚེ། རང་དཔལ་ཆེན་པོ། སྒྲོལ་ཕུར་བཛྲ་ཀཱི་ལ་ཡ། དམིགས་བྱ་ཞིང་བཅུ་ཚང་བ་དངོས་སུ་གསལ་ཏེ་ཕུར་པ་ཁོའི་སྙིང་གར་དྲིལ་བས་ཚེ་བསོད་ནམས་ཐམས་ཅད་རྣྲི་ལྗང་གུའི་རྣམ་པར་བདག་ལ་ཐིམ་པས་བདག་འཚོང༌། བསྒྲལ་བྱའི་རྣམ་ཤེས་ཨ་དཀར་པོའི་
རྣམ་པ་དེ་རང་གི་ཤངས་བུག་ནས་དྲངས་སྐུའི་དབྱིབས་བརྒྱུད་ཡུམ་གྱི་མཁའ་ལ་བབས་ཧཱུྃ་ཡིག་ཏུ་གྱུར་སྡིག་སྒྲིབ་ཐམས་ཅད་དག་ནས་རྡོ་རྗེ་སེམས་དཔའི་རྣམ་པར་མཁའ་ནས་ཐོན་ཟླ་དཀྱིལ་ལ་གནས་པ་རླུང་གིས་བཏེགས་ནས་འོག་མིན་དུ་ཕཊ་ཀྱིས་འཕང་བས་རྒྱལ་བའི་སྲས་སུ་གྱུར་ཏེ་སངས་རྒྱས་པས་དགྲ་འཚེངས། རྣམ་སྨིན་གྱི་ལུས་ཡེ་ཤེས་ཀྱི་མཚོན་ཆས་གཏུབས་ཏེ་ཤ་ཁྲག་ཡེ་ཤེས་ཀྱི་བདུད་རྩིར་བྱིན་གྱིས་རླབས་ཏེ་ལྷ་ཚོགས་རྣམས་ཀྱི་ཞལ་དུ་བསྟབས་པས་ལྷ་འཚེང་སྟེ་འཚེང་བ་གསུམ་དང༌། བདག་དཔལ་ཆེན་པོར་གསལ་བས་ལོག་པའི་སྐྱོན་བསལ། ཕུར་བ་སྲས་མཆོག་ཀཱི་ལ་ཡར་གསལ་བས་རྡུག་པའི་སྐྱོན་བསལ། དམིགས་བྱ་ཞིང་བཅུ་ཚང་བ་དངོས་སུ་གསལ་བས་འབྱམས་པའི་སྐྱོན་བསལ་བའོ། །དེ་ལྟ་བུའི་དགོངས་པ་དང་ལྡན་ན་སྔགས་པ་ཕུར་སོའི་ཁ་ནས་འཚང་རྒྱ་བའི་གདམས་ངག་ཡིན་ཏེ། ཕུར་པ་ཞེ་སྡང་ཁྲོས་པའི་རྒྱུད་ལས། སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེར་གཏམས་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །ཞེས་པའི་དོན་ནོ། །དེ་ལྟར་མ་ཡིན་པར་ལྷ་རང་རྒྱུད་དུ་བཟུང༌། སྔགས་ལོག་པར་བསྒྲངས། རང་ཕྱོགས་ལ་ཆགས། གཞན་ཕྱོགས་ལ་སྡང༌། ཆགས་སྡང་གཉིས་ལས་མ་འདས་པའི་ལྷ་དྲག་པོ་ཞིག་གཞན་ན་ཡོད་པར་བཟུང༌། དེ་འགྲུབ་ཏུ་རེ་ནས་དྲག་སྔགས་མང་པོ་བགྲང༌། འདྲེ་བགེགས་ལ་ཞེ་སྡང་
དྲག་པོ་བསྐྱེད་ནས་ཧཱུྃ་སྒྲ་དང་ཕཊ་སྒྲས་ལུང་པ་བཀང་ནས་མིག་སྡང་མིག་བསྒྲད་ཀྱང་འདྲེ་སེམས་ཀྱི་རྣམ་རྟོག་གི་རྩལ་ཡིན་པར་མ་ཤེས་ན། འདྲེ་ཞེ་སྡང་གི་རང་གཟུགས་ལ་ཞེ་སྡང་བ་བསྐྱེད་ན་མེ་འབར་བའི་སྟེང་དུ་ཤིང་བསྣན་པ་དང་འདྲ་བས། སྤ་རྒྱབ་དང་གནས་བརྟན་མུ་གེའི་རྣམ་ཐར་དྲན་དགོས་སོ། །འདྲེ་སྙིང་རྗེས་འདུལ་དགོས་ཏེ། ལྷ་བསྐྱེད་དང་སྔགས་བཟླ་ཤེས་པའི་འདྲེ་མང་པོ་མཐོང་ཆོས་སུ་གྲུབ་སྟེ། སྙིང་རྗེ་ཅན་གྱི་འདྲེ་མི་སྲིད་དོ། །དེས་ན་ལྷ་ཁྲོ་བོ་ཡང་ཞི་བས་ཞེ་སྡང་ལངས་ཏེ་ཁྲོ་བོའི་སྐུར་བཞེངས་པ་ནི་མིན་མོད། ཉན་ཐོས་རྣམས་ལའང་ཞེ་སྡང་མེད་ན་སངས་རྒྱས་ལ་ལྟ་ཅི་སྨོས། དེའི་ཕྱིར་ན་བདག་འཛིན་གྱི་གཉེན་པོར་བདག་མེད་རྟོགས་པའི་ཤེས་རབ་ལྷ་སྐུའི་ཕྱག་རྒྱར་སྣང་བ་ལས། གཞན་ན་ཁྲོ་བོ་ཞེས་ཁ་གདངས་མིག་བསྒྲད་ནས་རྒྱུན་དུ་ཁྲོས་ཡོད་པའི་རང་མཚན་པ་ཞིག་ཡོད་པ་རྒྱུད་སྡེ་གང་ནའང་མ་བཤད་དེ། ཞི་བ་རང་རྒྱུད་དུ་བཟུང་ན་འདོད་ཁམས་ཀྱི་ལྷ་དང༌། ཁྲོ་བོ་རང་རྒྱུད་དུ་བཟུང་ན་ལས་ཀྱི་གཤིན་རྗེར་སྐྱེ་བར་གསུང་པས། དེང་སང་གྲོང་ཆོག་པ་རྣམས་ཀྱི་མཐའ་གྱེན་དུ་མི་འགྲོ་བ་ནི། ལྷ་དང་འདྲེ་གཞན་དུ་བཟུང་ནས། སྦྱིན་བདག་ལ་ཆགས། འདྲེ་ལ་སྡང་ནས་རྒྱལ་བའི་བཀའ་ཆགས་སྡང་གིས་བསླད་ནས་རང་གཞན་གཉིས་ཀ་གནས་སྐབས་རྒྱལ་འགོང་དང༌། མཐར་དམྱལ་བའི་རྒྱུ་བསྒྲུབ་པ་འདིས་ལན་པ་ཡིན། དེ་མིན་ན་ཞི་བའི་དབང་བསྐུར་བ་དང༌། དྲག་
པོའི་མནན་བསྲེག་འཕང་གསུམ་བྱེད་པ་གཉིས་ཀ་སྣང་ཚུལ་མི་མཐུན་ཡང༌། དོན་ལ་དམིགས་བྱའི་སྒྲིབ་པ་སྦྱངས་ཤིང་གནས་སྤར་བ་ལ་ཁྱད་མེད་པས་དབང་བསྐུར་བ་ལ་བཟང་པོ་དང༌། མནན་བསྲེག་འཕང་གསུམ་ངན་པར་བཟུང་ན་སངས་རྒྱས་ཀྱི་ཆོས་ལ་ལར་བཟང་བར་འདུ་ཤེས་ལ་ལར་ངན་པར་འདུ་ཤེས་ན་ཆོས་སྤོང་གི་ལས་ཡིན་པས་གནད་ཤེས་པ་གལ་ཆེ་ཞིང༌། ཁྱད་པར་མནན་བསྲེག་འཕང་གསུམ་གང་གི་ཚེ་ནའང༌། རང་རྒྱུད་ཆགས་སྡང་གིས་བསླད་དེ་རྒྱལ་ངན་དུ་སྐྱེ་བའི་རྒྱུ་མི་བསགས་པར་བྱམས་སྙིང་རྗེ་བྱང་ཆུབ་སེམས་ཀྱིས་ཟིན་པ་ཞིག་གལ་པོ་ཆེའི་གནད་དམ་པ་ཡིན་པས་གྲོང་ཆོག་པ་དག་གིས་ཐུགས་ལ་ཞོག །རེམ་རེམ། སྐུ་མཁྱེན་གསུང་མཁྱེན་ཐུགས་མཁྱེན། ཞེས་པ་འདི་ནི་གྲོང་ཆོག་པ་མི་ཚེ་སྟོང་ཟད་མཁན་རྣམས་ལ་ཕན་པའི་བློས་ཨ་བྷྱཱའི་མིང་གིས་བྲིས་པ་སྟེ། ཐོག་མཐའ་བར་དུ་དགེའོ།། ༈ །།ཤར་རྒྱལ་མོ་རོང་བ་འཇིགས་མེད་ཡེ་ཤེས་ལ་ཡིག་འཛར་ཕུལ་བ། འོད་གསལ་རྫོགས་པ་ཆེན་པོའི་ལམ་མ་ནོར་བ་དེ་བརྒྱུད་ལྡན་གྱི་བླ་མའི་བྱིན་རླབས་ལ་བརྟེན་དགོས་པས་བསགས་སྦྱང་སྤེལ་གསུམ་གྱི་གནད་འདུས་པ་བླ་རྣམ་ལ་འབད་པ་གལ་ཆེ། དེ་ནས་ཨོ་རྒྱན་པདྨ་དང་རང་སེམས་དབྱེར་དུ་བསྲེས་ལ། བཟང་ངན་གྱི་རྣམ་རྟོག་གང་གིས་ཀྱང་མ་བསླད་ཅིང་སྤང་བླང་དགག་སྒྲུབ་ཀྱི་རྩོལ་བས་མ་གོས་པའི་གཤིས་རང་བབས་ཀྱི་རིག་ཆ་རྗེན་པ་དེ་ཤེས་པར་བྱས་ཏེ། ཕྱིའི་ཡུལ་སྣང་མི་སྣང་དང༌། ནང་རྣམ་རྟོག་
འཆར་མི་འཆར་སོགས་ལ་རྗེས་འདེད་རྩིས་འདེབས་གང་ཡང་མི་བྱ་བར། རིག་པ་ཟང་ཐལ་གྱི་ངང་ལས་མ་གཡོས་པ་ལ་བསླབ། ཅུང་ཟད་ཡེངས་གྲབ་བྱེད་ཚེ་ཡང༌། ང་ཡེངས་འགྲོའམ་ཞེས་དང༌། འདི་ལྟར་ཡེངས་འདུག་ཅེས་དང༌། མི་ཡེངས་པའི་ཕྱིར་དུ་གཉེན་པོ་ཇི་ལྟར་བརྟེན་ན་དྲག་ཅེས་སོགས་ཙབ་ཙུབ་ཟང་ཟེང་གཏན་ནས་མི་བྱེད་པར་རིག་པ་དེ་ཀ་ཧུར་ཕྱུང་ལ་གཤིས་ཐོག་ཏུ་ས་བཟུང༌། མདོར་ན་ངོ་སྤྲོད་གེགས་སེལ་བོག་འདོན་ཐམས་ཅད་ཁ་ཁ་སོ་སོ་མང་པོ་མི་དགོས། ད་ལྟའི་རིག་པ་ངོ་བོ་མི་རྟོག་པ། གདངས་མ་འགགས་པ། རྩལ་ཕྱོགས་མེད་དུ་འཆར་བ་ཉམས་སུ་མྱོང་ཡང་བརྗོད་མི་ཤེས་པ་དེ་ཀའི་རང་འགྲོས་བཟོ་མེད་དུ་སྐྱོང་བས་ཆོག་པར་གསུངས་ཡོད་པས་ཐུགས་ལ་ཟུངས་མཛོད། ང་རང་ནད་རོས་མནར་ནས་ཞལ་གདམས་བསླབ་སྟོན་ཟེར་བའི་ཟ་ཟིའི་རིགས་ཅི་ཡང་འབྲི་ལོང་མེད་ཀྱང་ཁྱེད་ཐག་རིང་ནས་འོང་བ་ཤ་ཚ་ནས་གླེན་གཏམ་ཡིང་ནག་ཏུ་ཕབ་སྟེ་བྱིན་པ་དགེ་བར་གྱུར་ཅིག། ༈ །།ལགས། ཚིག་གི་སྦྱོར་བ་དམ་པོས་བསྙད་ན་གོ་བར་དཀའ་བས་གྲོང་ཚིག་ཁོ་ནས་ཕན་པའི་གཏམ་བྱ་བ་ལ། མང་པོ་ཞིག་ཞུ་མི་ནུས་མོད། དོན་ལ། དེ་རིང་གཤིན་རྗེ་འཆི་བདག་གི་རྒྱལ་པོ་སླེབས་ཏེ། སྲོག་གི་རྒྱུ་བ་ཕྲ་མོ་ནི་བཅད། ཚེའི་འདུ་བྱེད་ཀྱི་རྒྱུ་བ་ནི་འགགས། དབུགས་མེད་སྟག་ལྟ་བུ་ནི་ཡར་ཏེ། གཅེས་པར་བསྐྱངས་པའི་ལུས་ནི་ཤུལ་དུ་བཞག །བརྩེ་བས་འགྲོགས་པའི་
གྲོགས་ནི་རྗེས་སུ་མི་འབྲང༌། ཚེ་གང་བསགས་པའི་ལོངས་སྤྱོད་ནི་གཏན་འཇོག་ཏུ་སོང༌། བར་དོའི་སྣང་བ་མང་པོ་མཚན་མོའི་སྐར་མ་བཞིན་དུ་སྣང་སྟེ་འཇིགས་པའི་མུན་ནག་ཆེན་པོ་ལ་འཇུག །སྡུག་བསྔལ་གྱི་འཕྲང་གཟར་མོ་ལ་བཤར། ལས་ངན་གྱི་རང་རྟགས་མང་པོ་ཕྱིར་ཤར་ཙ་ན་སོས་དལ་དུ་འདུག་རྒྱུ་ཡོད་པ་ཨེ་གདའ། དེང་སང་འཆི་བ་ཡོད་ཟེར་རུང༌། ཚེ་མི་རྟག་ཟེར་རུང༌། དོན་དུ་སྔ་དྲོ་ཆོས་ཉན་པ་དང་བཤད་པ་ལ་བསམ་གྱིན་ཕྱི་དྲོ་ཚེ་འདིའི་འདུག་ཆུས་ལ་ལིང་ལིང་བྱེད་ལུགས་ལ་འཆི་བ་དྲན་ཡོད་པ་མི་འདུག་པ་དངོས་གསལ་རེད་མོད། ད་སྔར་སོང་དེ་ཚར་ཐལ་བ་ལགས་ཀྱང་ཕྱིན་ཆད་ནམ་ཡར་ལང་དུས་མུན་ཐུར་རུབ་དུས་ཐམས་ཅད་དུ་འཆི་བ་འོང་དུས་མི་འགྱོད་པ་ཞིག་ཅི་དྲག་སྙམ་དུ་ཐུགས་ལ་འཇོག་ཐུབ་པ་མ་འཆུག་རེམ་རེམ་རེམ། སྐད་ཆ་ལབ་དུས། རྒྱུ་འགྲུལ་བྱེད་དུས། གཤང་གཅི་འདོར་དུས། ཁ་ཟས་ཟ་དུས་ནམ་ཡིན་ཀྱང་འདིར་སྣང་གི་བྱ་བ་ལ་སྐྱུག་ལོག་པས་བློ་སྐྱོ་ཐིབས་སེ་ཡོད་པ་ཞིག་དགོས་པ་ལགས། དམ་པའི་ཆོས་བསྒྲུབ་པ་བྱ་བ་གཞན་ན་ཅི་ཡོད། དཀོན་མཆོག་གསུམ་ལ་དད་པ་སྐད་ཅིག་མ་གཅིག་སྐྱེས་ཀྱང༌། སྙིང་རྗེ་ཏིལ་འབྲུ་ཙམ་བློ་ལ་ཤར་ཡང་དམ་པའི་ཆོས་ཡིན། དམ་པའི་ལམ་ཅི་འགྲུབ་ཞིག་མ་བྱས་ན་ད་རེས་ཀྱི་ཐོད་རུས་ས་ལ་བཞག་ཕན་ཆད་ནི་མི་ལུས་རྟ་བྲུན་འཐོར་འཐོར་དུ་འོང་རྒྱུ་མེད་དོ། །ཉིད་གཉེར་ཁང་དུ་ཕེབས་ལ་དབྱར་ཁ་ཤ་རུལ་དུམ་དུམ་རེའི་འཁྲིས་
སུ་ཆགས་པའི་ཤ་འབུ་ཅི་ཙམ་ཡོད་གཟིགས་དང་ངན་འགྲོ་དང་མི་ལུས་ལ་མང་ཉུང་ཡོད་པ་མཁྱེན་སླ་བར་འདུག །ཤིང་ཁ་ཤོག་ལྕེའི་དཔེ་ལྟར་ཐར་ལམ་ཡང་དག་གིས་མ་ཟིན་པའི་བཟླས་བརྗོད་ཤབ་ཤུབ་དང༌། ཚེ་འདི་དོན་གཉེར་གྱི་ནད་རོ་ཁོང་དུ་བསྙལ་ནས་ལྟར་སྣང་གི་སྒོམ་སྒྲུབ་བྱེད་ལོ་དེ་འདྲས་ག་འདྲ་ཡོང་བ། ད་ལེགས་པར་བསམ་བློ་ཐོང་ལ་དམ་པའི་ཆོས་ཀྱིས་དུས་འདའ་བ་ཞིག་ལ་བློ་ཐག་རྦད་ཀྱིས་བཅད། ཟོག་པོ་བརྫུས་མའི་སངས་རྒྱས་ལ་ཡིད་མ་གཏོད། མཁའ་ལ་རྒྱུ་བའི་ཡི་དྭགས་ལ་སྐྱབས་མ་འཚོལ། སྡིག་གྲོགས་བྱིས་པའི་སྐྱེ་བོ་ལ་གྲོས་མ་འདྲི། བསླུ་མེད་ཀྱི་སྐྱབས་གནས་དཀོན་མཆོག་གསུམ་ལ་བློ་སྙིང་བྲང་གསུམ་གཏོད། བླ་མ་ལ་སངས་རྒྱས་སུ་བལྟ་བའི་མོས་གུས་མ་བརྗེད། སྐྱེས་བུ་དམ་པ་ལ་སྐུར་བ་མ་འདེབས། གཉེན་གྱི་ཁ་འཛིན་ལ་ཤི་སྤར་མ་འཐམ། དགྲས་གནོད་པ་བསྐྱལ་བའི་སྡུ་གཡུས་སེམས་ཐོག་ཏུ་མ་ལེན། གཞན་གྱིས་ཚིག་བརླངས་པོ་ཞེར་འདེབས་པ་འདྲ་མོ་ཞིག་བྱུང་ཚེ་འདིས་ང་ལ་ཅིའི་ཕྱིར་ངན་སྨྲས་བྱེད་ཅེས་སྙིང་གི་དབུས་སུ་ལྷང་ལྷང་འཆར་ཙ་ན་ཕུང་བྱེད་ཀྱི་འགོང་པོ་སླེབས་བྱུང༌། འདིས་ང་གྱོད་ལ་གཏུག་གོ་ཞེས་བྲང་བརྡུང་ལ་གཉེན་པོའི་ཡེ་ཤེས་དན་དན་འབྱུང་བ་ཞིག་དགོས། ནོར་བསོག་བྲུན་དང་མཛའ་བཤེས་ཀྱི་ངོ་སྲུང་ལ་རེམ་རྒྱུ་དེ་དང༌། གཞན་ཕྱོགས་ལ་སེམས་འཁུ་བ་དེ་ཚོ་ཆགས་སྡང་གི་རབ་ཏུ་ཕྱེ་བ་ལགས་ཏེ། ཉོན་མོངས་ཀྱི་ཞབས་ཕྱི་ཞུས་པ་ཡིན། ཉོན་
མོངས་ཀྱི་ཞབས་ཏོག་བསྒྲུབ་ན་ཅི་སྡུག་འདི་སྡུག་མེད་པ་ཞིག་ཡོང་སྟེ། འཁོར་བ་ཐོག་མེད་ནས་ཉོན་མོངས་ཀྱི་གཡོག་བྱས་པས་ད་ལྟ་ཟག་བཅས་ཉེར་ལེན་གྱི་ཕུང་པོའི་རང་བཞིན་ཅན་གྱི་འཁོར་བ་ན་འུ་ཅག་སྡུག་ཙུམ་མེ་ལུས་ཡོད་རྒྱུ་འདི་ཨེ་གཟིགས། དེང་ཕན་ཆད་ཉོན་མོངས་དགྲར་བལྟས། གནོད་བྱེད་ཀྱི་མི་ལ་གཉེན་དུ་བཟུང༌། རང་རེའི་རྒྱབ་ན་ཤིག་གིས་ཟོས་ཚེ་ཨ་ཙ་འདྲེ་ཤིག་རྣམས་ཟེར་ཞིང་མི་བཟོད་ན་སྡུག་བསྔལ་དོས་ཆེན་པོ་རྣམས་ལྟ་ཡང་ཅི་སྨོས། དེ་བཞིན་དུ་སེམས་ཅན་གཞན་རྣམས་ཀྱང་བདེ་བ་འདོད་སྡུག་བསྔལ་མི་འདོད་པ་ཤ་སྟག་སྟེ། བྱིས་པ་རྣམས་ཀྱི་ཁ་སྒྲུང་དུ། སྐྱིད་ལྷག་ལྷག་སྡུག་ཙུམ་ཙུམ་ཟེར་བ་ལྟར། སྡུག་བསྔལ་ཕྲ་མོ་རེ་བྱུང་ཡང་བློ་མ་བདེ་སིང་སིང་འགྲོ་བ་འབའ་ཞིག་ཡིན་ཚུལ་བློ་ཐོག་ཏུ་ལོངས་ལ་བསམ་པ་བཟང་པོ་ཨེ་འོང་ལྟོས། འདི་མ་བརྗེད། འདི་མ་བརྗེད། འདི་མ་བརྗེད། སྐུ་ཚེ་རིང༌། ཞེས་སྤྲང་པོ་འཇིགས་མེད་པས་དགེ་རྒན་དཔལ་དགེའི་བཞེད་སྐོང་དུ་བྲིས་པ་ལགས།། ༈ །།ཇི་སྐད་དུ། འཕགས་པ་ཡུལ་འཁོར་སྐྱོང་གིས་ཞུས་པའི་མདོ་ལས། སངས་རྒྱས་འཇིག་རྟེན་ཕན་པ་དྲང་སྲོང་ཆེ། །བསྐལ་པ་བྱེ་བ་བརྒྱ་ལམ་འབྱུང་སྲིད་ཙམ། །ད་ལྟ་དལ་འབྱོར་དམ་པ་རྙེད་པ་ལ། །གང་དག་ཐར་འདོད་བག་མེད་སྤང་བར་གྱིས། །ཞེས་གསུངས་པ་ལྟར། དེ་བཞིན་གཤེགས་པ་འཇིག་རྟེན་ལ་ཕན་པར་བཞེད་པ་དོན་བཞེད་པ་རྣམས་ནི་མེ་ཏོག་ཨུ་དུམྦ་ར་བཞིན་དུ་འབྱུང་བར་དཀའ། དེའི་བསྟན་པ་དཔྱད་པ་གསུམ་གྱིས་
དག་པའི་གཞུང་ནི་འཕྲད་པར་དཀའ། དེའི་ལམ་སྲིད་པ་ཟློག་བྱེད་ཀྱི་ཐབས་ཡང་དག་པ་ནི་རྙེད་པར་དཀའ། དལ་བ་ཕུན་སུམ་ཚོགས་པའི་ལུས་རྟེན་ནི་འཐོབ་པར་དཀའ་བ་ལགས་ཏེ། ཉིན་མོའི་སྐར་མ་བཞིན་ནོ། །མི་ལུས་ལའང་རྣམ་གྲངས་མང་མོད་དེ་གང་དམ་པའི་ཆོས་ལས་འཇིག་རྟེན་གཅེས་པར་འཛིན་པ། འཇིག་རྟེན་ཕ་རོལ་ལས་ཚེ་འདི་གཙོ་བོར་འཛིན་པ། དམ་པའི་བརྟུལ་ཞུགས་ལས་ཁ་ན་མ་ཐོ་བ་ལྷུར་ལེན་པ། ཡང་དག་པའི་ལམ་བཟང་དུར་ཁྲོད་ཀྱི་མི་རོ་ནག་པོ་བཞིན་དུ་འདོར་བ་རྣམས་ནི་མི་ལུས་བྱུར་པོ་ཆེ་ཞེས་བྱ་སྟེ། ཁྱེད་དེའི་གྲངས་སུ་མ་འདུག་ཅིག་ཡུན་རིང་པོར་རྨས་ཏ་རེ། གང་མི་དགེ་བའི་ལས་ཀྱི་ལམ་མཐའ་དག་སྡོམ་ཞིང༌། དགེ་བའི་ཆོས་ལ་དྲན་པ་མངོན་དུ་འཇོག་ལ། དབང་པོའི་སྒོ་མཐའ་དག་དྲན་པ་དང་ཤེས་བཞིན་གྱིས་བསྡམས་ཏེ། དུལ་ཞིང་ངེས་པའི་ཚུལ་ལས་འདའ་བར་མི་བྱེད་ན། དེ་ནི་མི་ལུས་རིན་པོ་ཆེ་ཞེས་བྱ་སྟེ། ཁྱེད་ཀྱིས་དེའི་ངང་ཚུལ་ཟུངས་ཤིག་དང༌། ཁྱོད་དྲང་སྲོང་གི་རྒྱལ་མཚན་ཅན་དུ་འགྱུར་རོ། ཁྱོད་སྐྱེ་བོ་མངའ་ཐང་ཅན་དུ་སོང་སྟེ། ཆེན་པོའི་མདུན་གྲོས་ལ་དབང་བ། ལུགས་ཀྱི་བྱ་བཞག་ལ་མཁས་པ། འབྱོར་བའི་གསོག་བསྐྲུན་ལ་བྱང་བ། དགྲའི་འདུལ་ཐབས་ཤེས་པ། གཉེན་གྱི་སྐྱོངས་ལུགས་རིག་པ། ཁ་མཆུའི་སྒྱུ་ཐབས་རྟོགས་པ། ཆེ་དགུའི་མི་གྲལ་ན་སླེབས་པར་གྱུར་ཀྱང༌། དེས་ཁྱེད་ཀྱི་དལ་རྟེན་དོན་ཡོད་དུ་གྲུབ་པ་མ་ལགས། ཚེ་རབས་ཀྱི་འདུག་ཆུས་གྲུབ་པ་མ་ལགས། ངན་འགྲོའི་
སྒོ་འཕར་བཅད་པ་མ་ལགས། ཐར་པའི་སྒོ་མོ་ཆེ་ཕྱེས་པ་མ་ལགས་ཏེ་མྱ་ངན་གྱི་མཆི་མ་བཀུ་བའི་ལྟས་ངན་ཤར་བ་ལགས་སོ། །གལ་ཏེ་ཁྱོད་སྟོབས་ཆེན་གྱི་ལྷ་གྲལ་དུ་སོན་ཏེ། སྐྱེ་བོས་མཆོད་གནས་བྱེད་པ། དད་ཟས་སྤྲིན་ལྟར་འདུག །སྙན་གྲགས་རྔ་ལྟར་ལྡིར་བ། གསོན་པོའི་སྐྱབས་འཇུག་གནང་བ། གཤིན་པོའི་སྐྲ་རྟགས་ལེན་པ། འབུལ་ནོར་གྱིས་རི་ལུང་འགེང་བ། སྦྱིན་བདག་གིས་ས་སྟེང་ཁྱབ་པར་གྱུར་ཀྱང༌། དེས་ཁྱོད་ལ་བདག་ཉིད་ཆེན་པོ་རྣམས་མི་བསྔགས་མི་བསྟོད་མངོན་པར་མི་བཀུར། རྗེས་སུ་ཡི་རང་བར་མི་མཛད་དེ། ཁྱོད་རང་ཉིད་ཡུན་རིང་པོ་རོ་མྱག་གི་འདམ་རྫབ་དང༌། ཆུ་བོ་རབ་མེད་པར་འོ་དོད་འབོད་པའི་སྟ་གོན་སྣང་བ་ཡིན་ཏེ་དྲང་པོར་སྨྲས་པ་ཡིན་ནོ། །དེ་ལྟ་བས་ན་ཁྱོད་ཀྱིས་དལ་འབྱོར་རྙེད་པར་དཀའ་ལུགས། ཚེ་སྲོག་རྟག་པ་མེད་ལུགས། འཁོར་བ་སྡུག་བསྔལ་གྱི་རང་བཞིན་ཡིན་ལུགས། འཇིག་རྟེན་བྱ་བ་ལ་ཡིད་བརྟན་མེད་ལུགས་ལ་བསམ་བློ་བཏང་སྟེ་ཚེ་འདི་བློས་ཐོང༌། ནམ་འཇིག་རྟེན་གྱི་ཆོས་བརྒྱད་ལམ་ཁའི་རོ་བཞིན་དུ་འབོར་ནུས་པ་དེའི་ཚེ་ཁྱོད་ཀྱིས་རྒྱལ་བ་གོང་མའི་རྗེས་ཤུལ་ཟིན་པ་ཡིན། སྐྱེས་བུ་དམ་པའི་རྣམ་ཐར་འཁྱོངས་པ་ཡིན། མྱ་ངན་ལས་འདས་པའི་གོ་འཕང་ཉེ་དྲུང་ན་འདུག་པར་གྱུར་པ་ཡིན་ནོ། །དེའི་ཕྱིར་དེ་ཉིད་གཞིར་བཟུང་སྟེ། ད་གདོད་ཐེག་པ་ཆེན་པོའི་ལམ་ལ་ཞུགས་ཤིག །ཐེག་པ་ཆེན་པོའི་ལམ་ཞེས་བྱ་བ་ཁུར་དུ་འཁུར་བའང་མེད། ཁར་བཅུག་སྟེ་མིད་པར་བྱ་
བའང་མེད། ཀུན་ཏུ་ཉུལ་ཏེ་བཙལ་བར་བྱ་བའང་གཞན་མེད་དེ། ཆོས་གཅིག་དང་ལྡན་ན་ཐེག་པ་ཆེན་པོའི་ལམ་ལ་ཞུགས་པ་ཡིན་ནོ། །ཆོས་གཅིག་གང་ཞེ་ན། ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་ཀྱི་སེམས་ཏེ། གཞན་ཕན་དོན་གཉེར་དང་རྫོགས་བྱང་དོན་གཉེར་ལ་བཅོས་མིན་གྱི་མྱོང་བ་ཐོན་པའི་ཡིད་ཀྱི་རྣམ་པར་ཤེས་པ་ཞིག་གོ །དེ་ཡང་འདི་ལྟར་ནམ་མཁའི་མཐའ་ཀླས་པའི་འགྲོ་བ་མཐའ་དག་སྲིད་པའི་རྩ་བ་བདག་འཛིན་གྱི་དབང་གིས་ཟག་པ་དང་བཅས་པའི་ཉེར་ལེན་གྱི་ཕུང་པོ་རྣམ་པ་ལྔ་ཡོངས་སུ་བླངས་ཏེ། སྐྱེ་བ་སྔ་མ་དང་ཕྱི་མ་རིམ་པར་བརྒྱུད་ཅིང༌། སེམས་ཅན་དམྱལ་བ་པ་རྣམས་ཚ་གྲང་གི་སྡུག་བསྔལ་གྱིས་གདུང༌། གཤིན་རྗེའི་འཇིག་རྟེན་པ་རྣམས་བཀྲེས་སྐོམ་གྱི་རེག་བྱས་རྒུད། དུད་འགྲོའི་སྐྱེ་གནས་སུ་སོང་བ་རྣམས་བཀོལ་སྤྱོད་ཀྱི་དུཿཁས་གཟིར། མིར་གྱུར་པ་རྣམས་ཀྱང་འཚོ་བ་ཐུང་ངུར་གྱུར་པ་ལ་སོགས་པས་ཉམས་སྨད། ལྷའི་རིས་རྣམས་ཀྱང་འཆི་འཕོ་ལྟུང་བའི་སྡུག་བསྔལ་ཙམ་གྱིས་སྨ་ཕབ་སྟེ། འདོད་པའི་ཁམས་ཀྱི་ཕྱོགས་དེ་དག་དང༌། གཟུགས་ཀྱི་ཁམས་ཀྱི་བསམ་གཏན་གསུམ་པ་མན་ཆད་ནི་འདུ་བྱེད་ཀྱི་སྡུག་བསྔལ་དང༌། འགྱུར་བའི་སྡུག་བསྔལ་གྱིས་ཁྱབ་པ་ཡིན་ལ། བསམ་གཏན་བཞི་པ་ཡན་ཆད་ནི་འདུ་བྱེད་ཀྱི་སྡུག་བསྔལ་ཙམ་ཞིག་སྟེ། མདོར་ན་སྲིད་པ་མཐའ་དག་ལ་ཁྱབ་པ་འདུ་བྱེད་ཀྱི་སྡུག་བསྔལ་གྱིས་དམ་ལ་མ་བཞག་པ་ནི་མ་
མཆིས་སོ། །དེ་ལྟར་སྡུག་བསྔལ་གྱི་འཁྲུལ་འཁོར་དུ་ལྟུང་བའི་སེམས་ཅན་དེ་དག་འོ་སྐོལ་གྱི་མར་གྱུར་མྱོང་ཤ་སྟག་སྟེ། འདི་ལྟར་ཟག་བཅས་ཀྱི་སེམས་ལ་ཐུག་པར་གྱུར་པའི་ཐོག་མ་མེད་པ་བཞིན་དུ། ལུས་ཀྱི་ཡ་མཐའ་འང་མི་སྲིད་པ་ཡིན་ལ། དེ་ཉིད་ཇི་ལྟ་བ་བཞིན་དུ་མའི་ཐོག་མའང་སྲིད་པ་མ་ཡིན་པའི་ཕྱིར་རོ། །དེ་དག་སྔ་མ་གྲུབ་པས་ནི་གཏན་ཚིགས་ཕྱི་མ་དག་འགྲུབ་པར་ནུས་མོད་ཀྱི། སྔ་མ་ནི་མ་གྲུབ་བོ་ཞེན་མ་ཡིན་ཏེ། བདག་ཏུ་ལྟ་བ་འདི་ལྟར་ཆེ་བ། འདི་ལྟར་སྟོབས་དང་ལྡན་པ། འདི་ལྟར་གཏིང་ཟབ་པ། སྦྱོང་དཀའ་བ། གདུལ་དཀའ་བ། འཆོས་དཀའ་བར་འདུག་པ་འདི་བདག་ལྟ་སྔ་མ་སྔ་མས་ཕྱི་མ་ཕྱི་མ་ལ་ཕན་བཏགས་ཤིང་ནུས་པ་ཆེར་བགོས་པ་ལས་བྱུང་བར་རྟོགས་སོ། །དེ་ལྟ་བུའི་ཡིད་ཅན་རྣམས་ལ་ཕན་འདོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྒྲུབ་པར་འདོད་པ་ཞིག་གལ་ཆེ། ཚིག་འདི་སྙིང་ལ་ཕུར་ཅིག །དོན་འདི་ཡིད་ལ་ཟུངས་ཤིག །འདི་ངས་རང་གི་རྒྱུད་ལ་ཐེག་པ་ཆེན་པོའི་ལམ་ཉམས་སུ་བླངས་ནས་རང་གི་རྟོགས་པ་བཞིན་དུ་སྨྲས་པ་ནི་མ་ཡིན་ཏེ། སྐད་ཅིག་གཅིག་ལ་ཁ་ནང་དུ་ལོག་སྟེ་བསམ་པ་བཟང་པོ་སྦྱང་བ་མེད་པ་དགོངས་གསལ་ལྟར་ལགས་མོད་ཀྱི། དགེ་བའི་བཤེས་གཉེན་ཆོས་སྨྲ་བ་རྣམས་ཀྱི་ཞལ་ལུང་དང་མཐུན་པར་གཞོན་ནུ་འཇིགས་མེད་པས་བྲིས་པ་སྟེ། གཏམ་དུ་བྱ་བའི་ཡི་གེ་འདི་ཤོག་དཀར་གྱི་ངོས་སུ་དྲིལ་ཏེ་ལྟེབ་མ་འཇོག །སེམས་ལ་ལེན་པ་ཞིག་སྐུ་ཚེ་རིང༌།
ཞེས་འཇིགས་མེད་རབ་རྒྱས་ལའོ།། ༈ །།དཔལ་རི་བ་དོན་གྲུབ་རྡོ་རྗེ་ལ་ཕན་པའི་གཏམ་བྱ་བ། འཕགས་པའི་ཡུལ་གྱི་ཤིང་རྟ་ཆེན་པོ་དཔལ་མགོན་འཕགས་པ་ཀླུ་སྒྲུབ་ཀྱི་ཞལ་ནས། མགོ་འམ་གོས་ལ་གློ་བུར་མེ་ཤོར་ན། །དེ་དག་བཟློག་ཕྱིར་བགྱི་བ་བཏང་ནས་ཀྱང༌། །ཡང་སྲིད་མེད་པར་བགྱི་སླད་འབད་འཚལ་ཏེ། །དེ་བས་ཆེས་མཆོག་དགོས་པ་གཞན་མ་མཆིས། །ཞེས་གསུངས་པ་ལྟར་མི་སྐྱེ་ཞིང་མི་རྒ་ལ་ན་བ་དང་འཆི་བ་མེད་པའི་མྱང་འདས་མཆོག་གི་གོ་འཕང་ལ་འགྲོ་བར་བཞེད་ན་མྱུར་པོ་མྱུར་པོར་སྒེག་མོའི་མགོ་ལ་མེ་ཤོར་བ་དང༌། སྡར་མའི་པང་དུ་སྦྲུལ་ཞུགས་པ་ལྟར། དམ་པའི་ལྷ་ཆོས་གཤའ་མ་མ་མཛད་ན་སང་བྱ་གནངས་བྱའི་ངང་ལ་མི་ཚེ་ཟད་ནས། སྲོག་ནི་འགྲིབ། ཤེས་པ་ནི་ཉམས། བེམ་རིག་གི་འབྲལ་བ་ནི་རྒྱུན་ཆད། ཚེ་འདིའི་སྣང་བ་ནི་ནུབ། ཕྱི་མའི་སྣང་བ་འཆར། གཡང་ས་དོག་པོར་ཞུགས། མུན་པ་སྟུག་པོར་ཆུད་དེ་ངན་སོང་གི་སྡུག་བསྔལ་རང་ཐོག་ཏུ་བབ་ཙ་ན་བཟོད་བརླག་མེད་དེ། ད་ལྟ་ཅོ་སྐྲ་ཉག་མ་རེ་འཐེན་ནམ་འབུ་སྲིན་ཕྲ་མོ་ཙམ་ཞིག་གིས་ལུས་ལ་ཟོས་སམ་མེ་སྟག་ཆུང་ངུ་ཙམ་ཞིག་གིས་ལུས་ལ་འཚིག་ཀྱང་གདོང་ཤའི་ཚུགས་འཆོར་བའི་སྡུག་བསྔལ་ཞིག་འདུག་ན། ངན་སོང་གསུམ་གྱི་སྡུག་བསྔལ་ལྟ་ཡང་ཅི་སྨོས། གལ་ཏེ་ངན་སོང་དུ་རེ་ཞིག་མཆིས་ཀྱང་སླར་མི་ལུས་རྙེད་ནས་དམ་པའི་ཆོས་བསྒྲུབ་པའི་སྐལ་པ་ཅན་དུ་འགྱུར་རོ་ཞེས་མ་སེམས་ཤིག །དེ་ཅིའི་
ཕྱིར་ཞེ་ན་མི་ལུས་རིན་པོ་ཆེ་ཐོབ་པ་ནི་ཕོ་གོ་ཆེ་བས་མ་ཡིན། སྟེས་དབང་ལེགས་པས་མ་ཡིན། རྒྱུ་མེད་རྐྱེན་མེད་དུ་མ་ཡིན་པར། རྒྱུ་ལེགས་པར་བྱེད་པའི་ཚུལ་ཁྲིམས་དང༌། རྐྱེན་སྨོན་ལམ་བཟང་པོ་ཟུང་དུ་འབྲེལ་བའི་མཐུ་ལས་ཡིན་ན། ད་ལྟ་རང་རེའི་རྣམ་ཐར་བཞིན་གང་བྱུང་བྱུང༌། ཅི་ཐོད་ཐོད་བྱས་པས་ག་ལ་འོང༌། ཚུལ་ངན་པ་དེ་ལྟ་བུས་ནི་བསྐལ་པ་བྱེ་བ་བརྒྱ་སྟོང་མང་པོར་བདེ་འགྲོའི་སྒྲ་ཙམ་ཡང་མི་ཐོས་པའི་ངན་སོང་གི་གཏིང་རྡོ་ཆེན་པོར་འགྱུར་ཏ་རེ། དེ་ལྟ་བས་ན་མྱུར་དུ་ངེས་པར་འབྱུང་འདོད་ཀྱི་བློ་ཤུགས་དྲག་པོ་བསྐྱེད་དེ་ཐར་པའི་ལམ་རྣལ་མ་ལ་ལོང་བས་གླང་རྔ་དེ་ཟིན་ཞིག་དགོས། ཐོད་པ་བོར་ཆོག་མ་ཞིག་དགོས། ཤ་དང་རུས་པའི་རི་བོ་བསྙིལ་ཐུབ་པ་ཞིག་དགོས། ཁྲག་དང་མཆིལ་མའི་རྒྱ་མཚོ་སྐེམས་ནུས་པ་ཞིག་དགོས། མྱུར་དུ་བྱང་ཆུབ་སྙིང་པོའི་ས་མཐོར་འགྲོ་བ་ཞིག་དགོས། དེ་ལྟ་བུ་ཞིག་ཨེ་འོང་སྙམ་དུ་དགོངས་ན་འཇིག་རྟེན་གྱི་ཆོས་བརྒྱད་ལ་ཞེན་པ་གཏིང་ནས་ལོག་པ་སྐྱུགས་ནད་ཅན་ལ་བཙོ་ཟན་བྱིན་པ་ལྟ་བུ་ཞིག་དགོས། འདོད་ཡོན་གྱི་སྣང་བ་ལ་ལམ་ཁའི་རོ་བཞིན་དུ་ཅིས་ཀྱང་དགོས་མེད་དུ་ཤེས་པ་ཞིག་དགོས། རྙེད་བཀུར་དང་སྙན་གྲགས་ལ་སྙིང་པོ་མེད་པ་ཆུའི་ཆུ་བུར་བཞིན་དུ་ཤེས་པ་ཞིག་དགོས། སྡིག་གྲོགས་ཀྱི་སྐྱེས་བུ་ནི་དགའ་བ་འཕེལ་བའི་གནས་མ་ཡིན་པ་གཅན་ཟན་གདུག་པའི་ཁྲོད་བཞིན་དུ་ཤེས་པ་ཞིག་དགོས། གདམས་ངག་སྟོན་པའི་བླ་མ་མ་གཏོགས་གཞན་ཟེར་གྱི་ངག་ལ་མི་ཉན་པ་སྨྱོན་
པ་འུར་ལང་བ་ལྟ་བུ་ཞིག་དགོས། བློ་སྣ་དཀོན་མཆོག་ལ་གཏོད་ཅིང་བསམ་རྒྱུ་དཀོན་མཆོག་ལས་མེད་པ་རྟག་ཏུ་སྐྱབས་འགྲོ་ལ་འབད་པ་ཞིག་དགོས། ལྷ་ཆོས་ཀྱིས་སེམས་རྒྱུད་ཐུལ་བ་ཕྱེ་ཐུག་ལ་ཟོ་མར་བཏབ་པ་ལྟ་བུ་ཞིག་དགོས། ཁམས་གསུམ་གྱི་སེམས་ཅན་ཐམས་ཅད་བདག་གི་བསྐྱེད་མར་མ་གྱུར་པ་གཅིག་ཀྱང་མེད་པས་ད་ལྟའི་ཕ་མ་བཞིན་དུ་ཤེས་པ་ཞིག་དགོས། ཕ་མར་གྱུར་ནས་ཀྱང་ཕན་འདོགས་དང་གནོད་སྤོང་གི་བྱ་བ་གྲངས་མེད་པས་བདག་ངེས་པར་བསྐྱངས་པ་ཡིན་པས་འགྲོ་དྲུག་དྲིན་མོ་ཆེར་ཤེས་པ་ཞིག་དགོས། སེམས་ཅན་ལ་དྲིན་གཟོ་བའི་ཕྱིར་འགྲོ་དོན་དུ་སངས་རྒྱས་བསྒྲུབ་པ་ལ་བློ་གཅིག་ཏུ་འདུན་པ་བཀྲེས་པ་ཟས་ལ་གདུང་བ་ལྟ་བུ་ཞིག་དགོས། ད་ལྟ་བདག་བདེ་བ་འདོད་པ་དང་སྡུག་བསྔལ་མི་འདོད་པ་བཞིན་དུ་སེམས་ཅན་གཞན་ཡང་ཕན་པ་འདོད་ལ་གནོད་པ་མི་འདོད་པར་མཚུངས་པ་ཤེས་ནས་རང་དང་གཞན་སྲུང་མཉམ་བྱེད་པ་ཞིག་དགོས། རང་དང་གཞན་གོ་བརྗེས་ནས་སེམས་ཅན་གཅེས་པར་འཛིན་པ་བྱང་ཆུབ་སེམས་དཔའ་སྤྲེའུའི་རྣམ་ཐར་ལྟ་བུ་ཞིག་དགོས། ཅི་བྱས་ཕ་རོལ་ཏུ་ཕྱིན་པ་དྲུག་གི་ཡོ་ལང་ལས་མི་འདའ་བར་གཞན་དོན་མིག་འབྲས་ལྟར་སྲུང་བ་ཞིག་དགོས། གནད་ཆེན་པོ་བཅུ་གསུམ་དང་ལྡན་ནས་བླ་ན་མེད་པའི་བྱང་ཆུབ་བདེ་བར་མ་སོང་ན་ངས་ཁྱོད་བསླུས་པར་ཟད་དོ། །ཅི་སྟེ་ལུས་རྟེན་འདི་ལ་རྣམ་གྲོལ་མཆོག་གི་གོ་འཕང་མངོན་དུ་བགྱི་བར་འདོད་ཅིང་རང་
བཞིན་ཐེག་མཆོག་རྒྱལ་པོའི་དོན་ལ་བཅོས་མིན་གྱི་མོས་གུས་དང་ལྡན་པས་ཤིན་ཏུ་རྣལ་འབྱོར་གྱི་ཚུལ་ལ་ཐུགས་དམ་མཛད་ན་འདི་བཞིན་འཚལ་ཏེ། མོས་གུས་སྲོག་ཏུ་བཟུང༌། སེམས་བསྐྱེད་ཀྱིས་གཞི་བཏིངས། ཕྱི་སྣང་བ་དང་ནང་ཤེས་པས་བསྡུས་པའི་ཆོས་ཐམས་ཅད་སྐྱེ་མེད་འགག་མེད་གནས་མེད་ཆེན་པོར་གཏན་ལ་ཕབ་ནས། དངོས་གཞི་ད་ལྟའི་ཐ་མལ་གྱི་ཤེས་པ་རྟོག་པའི་བསྒྱུར་བཀོད་དང་བྲལ་ཞིང་འདི་ཡིན་གྱི་ངོས་བཟུང་མེད་པ་རང་སྟོང་བློ་བྲལ་ཆེན་པོ་རང་གསལ་མཁའ་མཉམ་ཡངས་པ། བདེ་བའི་ཉམས་ལ་མ་ཞེན། གསལ་བའི་ཉམས་ལ་མ་ཆགས་མི་རྟོག་པའི་རོ་ལ་མ་བརྐམས་པའི་ཅོག་བཞག་རང་ཡན་ཆེན་པོར་གློད་ཙ་ན་རྣམ་རྟོག་གི་འགྱུ་བ་ཅི་ལྟར་ཤར་ཡང་དེ་ལ་བདག་རྐྱེན་མི་སྤྲད། རྦད་ཆོད་མི་བྱ། རྗེས་སུ་མི་འབྲང་བར་ལྷོད་དེ་འཇོག །དེའི་ཚེ་ཚོགས་དྲུག་གི་ཡུལ་སྣང་གང་སྣང་ཡང་དེར་འཛིན་གྱི་ལྷད་མ་ཞུགས་པ་གལ་ཆེ། དེའང་ལས་དང་པོའི་སྐབས་སྐད་ཅིག་དང་པོར་འདི་གཟུགས་སོ། །འདི་སྒྲའོ་ཞེས་འཛིན་ཤེས་འཇུག་མོད་ཀྱི་འོན་ཀྱང་སྐད་ཅིག་གཉིས་པ་ལ་འཛིན་པ་དེ་ཉིད་ཆུའི་རི་མོ་རང་ཞིག་པ་བཞིན་དུ་ཤར་གྲོལ་ཟུང་འཇུག་ཆེན་པོར་དེངས་འགྲོ་བ་ཞིག་ཡིན། ད་དུང་དེ་ལྟ་བུ་རེ་ལ་དགོངས་པ་གཏད་ན་འོད་གསལ་སྣང་བཞིའི་ལམ་ཟབ་ལས་ཡང་ཟབ་རྣམས་ཕྱི་ནས་བརྒྱུད་ལྡན་བླ་མའི་མན་ངག་ལས་རྟོགས་པར་འགྱུར་རོ། །གཏམ་འདི་ཡལ་བར་མ་དོར་ཉམས་སུ་
ལོངས། ཚིག་འདི་ཡན་པར་མ་སྐྱུར་སྙིང་ལ་འཆོངས། །དོན་འདི་ཡི་གེར་མ་བཞག་སེམས་ལ་ཟུངས། །སྙིང་གཏམ་དེ་ལས་མེད་དོ་ཨ་མོ་གྷ། །ཞེས་པའང་གཞོན་ནུ་འཇིགས་མེད་བསྟན་པའི་རྒྱལ་མཚན་གྱིས་བྲིས་པའོ།། ༈ །།རྩིས་མདའི་གར་དབང་གི་མགོ་ལ་གནམ་ཡིག་བབས་པ། །ཀྭ་ཡེ་ཁྱོད་ཀྱིས་མངོན་མཐོའི་རྟེན་བཟང་ནི་རྙེད་ནས་གདའ་ཡི། །དུད་འགྲོ་དང་ཤན་ཐང་འབྱེད་པའི་ལས་ཤིག་མི་བྱེད་དམ། །ཚེ་འདིའི་བཟང་ཤོས་ཕལ་ཆེར་ནི་འདས་ནས་གདའ་ཡིས། འདུག་ཆས་ལས་ཀྱང་འགྲོ་ཆས་འདམ་པའི་དུས་སུ་མ་སླེབ་བམ། །ཕན་པའི་གདམས་ངག་མང་པོ་ནི་ཐོས་ནས་གདའ་ཡི། །ད་ཅི་ཞིག་བསམ་ནས་མཛུབ་མོ་ཁ་ལ་བཅུག་སྟེ་འདུག །རྟེན་འབྲེལ་ད་རེས་ལས་ལྷག་པ་འགྲིགས་ཐབས་མེད་ཀྱིས། །མཚམས་འདི་ལས་ཐལ་ན་ནི་འགྱོད་ཀྱང་འཕྱིས་སོ། །དམ་ཆོས་རང་གིས་བོར་ནས་མ་བྱུང་བ་ཡིན་གྱི། །བསྒྲུབ་ནས་མ་གྲུབ་པ་ནི་ཤེས་བྱའི་ལུགས་ན་མེད་དོ། །བྱས་ན་ཉི་མ་རེར་ཡང་དམ་ཆོས་མང་དུ་འགྲུབ་སྟེ། །རང་གིས་མ་བྱས་ན་ནི་ཚེ་གཅིག་ལ་ཡང་ཆོས་སྤྱོད་སྣ་གཅིག་ཇི་ལྟར་འགྲུབ། །བག་ཆགས་འཇིག་རྟེན་གྱི་འཁྲུལ་པ་ལ་བསགས་ནས། །ཡར་འདྲེན་ཆོས་ཀྱིས་བྱེད་ལུགས་ཅང་ཡོད་དམ། །སྐྱིད་སྡུག་གང་བྱུང་གི་རེ་ལྟོས་འཇིག་རྟེན་ལ་བཅོལ་ནས། །འཆི་དུས་དཀོན་མཆོག་གསུམ་ལ་རང་འབྱར་དུ་འགྲོ་བ་ནི་སྲིད་དམ། །ཤེས་རྒྱུད་ཁྱིམ་ནས་མ་བྱུང་ན།
ལུས་རབ་ཏུ་འབྱུང་ལོ་བྱས་ཀྱང་རྒྱལ་པོ་ཀྲི་ཀྲིའི་གླང་མཇུག་སྐར་ཁུང་ལ་ཐོགས་པའི་རྨི་ལམ་ལྟར་མི་འགྲོའམ། ལར་ཅི་ལྟར་བྱས་ཀྱང་ཡར་ལ་མི་འདྲོངས་བ་ཟངས་རྦབ་རི་སྐེད་ནས་ཤོར་བ་བཞིན་དུ་སོང་ན། ཉིན་མཚན་གཡེལ་བ་མེད་པར་དཀོན་མཆོག་ལ་ཤི་སྤར་འཐོམ་དང༌། ཁོང་གིས་ཅིས་ཀྱང་མི་བསླུ་ཡིས། དཀོན་མཆོག་ལ་ཤི་སྤར་འཐམ་པ་བྱ་བ་ཁའི་འདོན་འདོན་མང་པོ་ལ་མི་ཟེར། སེམས་དཀོན་མཆོག་གི་ཕྱོགས་སུ་བར་མཚམས་མེད་པར་དྲངས་པ་ལ་བྱེད། རང་གི་འཁྲུལ་བ་རང་གིས་མ་བརྟགས་ཤིང༌། །རང་གི་མགོ་འདོན་རང་གིས་མ་བྱས་ན། །རྟ་ན་སོ་བརྒྱད་པའི་ཁ་ལོ་གཞན་སུས་འདུལ། །ཞལ་གདམས་དགོས་ན། མི་ཡི་གྲུ་ལ་བརྟེན་ནས་ནི་སོགས། རྨོངས་པ་དུས་སུ་གཉིད་མ་ལོག །ཅེས་པ་དེ་ལས་བཟང་བ་སུས་ཐོན། དེའི་གླེགས་བམ་སྣོད་རྐུབ་ཏུ་བཅུག་ནས་གཞན་ལ་ཞལ་གདམས་རེ་བ་ཅི་ཡིན། ཞེས་པའི་གནམ་ཡིག་འདི་རག་བཀྲམ་བྱམས་པ་གླིང་ན་ལྷུང་འདུག་ཟེར་ལོ།། ༈ །།བླ་མ་ཀུན་དགའ་ལ་གཏམ་བྱ་བ། སྙིང་ནས་འཆི་ཆོས་ཤིག་འདོད་ན་འཇིག་རྟེན་ཚེ་འདིའི་སྣང་ཤེས་ཐམས་ཅད་རྟག་པ་དང་བརྟན་པ་ཏིལ་འབྲུ་ཙམ་ཡང་མེད་པར་ཤེས་ནས། ཚེ་ཕྱི་མའི་འདུག་ཆུས་ཁོ་ན་ལ་རྡོག་པ་གཏད་དེ། གོང་གི་དཔོན། ཐད་ཀྱི་གྲོགས། འགབ་ཀྱི་གཡོག་ཐམས་ཅད་ལ་ངོ་བསྲུང་དང་སྐྱོང་ཞེན་གྱི་བློ་སྣ་མཐའ་དག་བསྟུང་ལ། ཚེ་རབས་གཏན་གྱི་སྐྱབས་གནས་
བླ་མ་དང༌། དཀོན་མཆོག་རིན་པོ་ཆེ་གསུམ་ལ་སྐྱབས་བཅོལ་ཏེ། སྟོན་པ་ཐམས་ཅད་མཁྱེན་པ་ལ་མི་ཕྱེད་པའི་མོས་གུས་ཀྱི་སྲོག་མཁར་ཚུགས་པ་ཞིག་དང༌། དུས་དང་གནས་སྐབས་ཐམས་ཅད་དུ་ལྷ་ཆོས་ཡིད་བཞིན་གྱི་ནོར་བུ་གཞན་དོན་དུ་བྱང་ཆུབ་ཀྱི་སེམས་ལ་མོས་པ་མི་གཏོང་བ་ཞིག་དང༌། སྐྱེས་བུ་དམ་པའི་རྣམ་ཐར་ལ་ལྟ་བ་མ་གཏོགས་དམ་པ་མིན་པའི་ལད་མོ་ལ་སྐད་ཅིག་ཙམ་ཡང་མི་རྒྱུག་པ་ཞིག་མཛད་ན་མི་བསླུ་བའི་བརྟུལ་ཞུགས་གྲུབ་པ་ལགས། འཇིགས་མེད་པས་སོ།། ༈ །།མེ་ཏོག་འཛུམ་པའི་ལང་ཚོར་ཅོ་འདྲིའི་དབུ་དང་ཕྱག་གི་ཁོར་ཡུག་ལ། །ས་སྲུང་གླང་པོའི་སྟོབས་ཀྱིས་མི་མཚོན་སྒྱུ་རྩལ་སྟོང་གིས་ཉེར་བསྲུངས་བ། །དེ་ལ་མཐུ་སྟོབས་དཔུང་བས་བརྫི་བའི་གོ་སྐབས་སུས་ཀྱང་མི་འབྱེད་མོད། །སློང་མོའི་དོན་སླད་ཨུད་པལ་འདབ་འདྲའི་རལ་གྲིས་ཉིད་ལ་ཉིད་གཅོད་མཛད། །གཡུལ་ངོའི་འཇིགས་པས་བསྡིགས་པ་མེད་ཀྱང་བདག་ཉིད་ཆེན་པོའི་ཡན་ལག་ཐོབ། །གཡོ་སྒྱུའི་ཞགས་པས་བཏབ་པ་མེད་ཀྱང་སྙིང་རྗེའི་བདག་ཉིད་བྲན་ལྟར་བྱས། །འབྲུ་དང་ནོར་གྱིས་ཉོས་པ་མིན་ཡང་བྱང་ཆུབ་སེམས་དཔའི་བདོག་པ་རྙེད། །སེམས་ཅན་ཆེན་པོའི་གནས་ཀྱི་སྒོ་གཏན་སྐལ་ཆེན་སློང་མོ་དེ་འདྲས་ཁེབས། །ས་ཕྱོགས་གང་ན་འཁར་བའི་འཁྲི་ཤིང་སོར་མོས་བསྟེན་པའི་མི་མཐོང་བ། །དེ་ཡི་མོད་ལ་སྦྱིན་པའི་ཕར་ཕྱིན་གཡབ་མོས་འབོད་པ་འདི་བྱུང་ཞེས། །
ཉི་མས་དགོད་པའི་ཆུ་སྐྱེས་ཇི་བཞིན་མཆུ་ཡི་མཛུམ་མདངས་སྟོང་ངོམ་ཞིང༌། །ལུས་དང་ལོངས་སྤྱོད་སྲིད་སྡེར་བཅས་ལ་གཏོང་བའི་ལག་པ་སྐྱོང་དུ་རིངས། །སློང་བ་བཟློག་པའི་ཆོ་ག་བགྱིད་ལ་རིང་མོའི་དུས་ནས་མི་བཤེས་ཤིང༌། །སེམས་ཅན་སེམས་ལ་རབ་དགའི་དུས་སྟོན་སྟེར་བའི་དམ་བཅའི་ཁུར་ལྕི་བས། །ཡིད་འོང་མཁོ་དགུའི་བདོག་པ་འབུམ་ཕྲག་ཆར་དུ་སྙིལ་བའི་ལེགས་བྱས་ཀྱིས། །གཏོང་བ་དོན་གཉེར་ད་རི་དྲྭ་བའི་རེ་བའི་ཤིང་རྟ་ཕྱུར་བུར་འགེངས། །གང་ཚེ་འབྱོར་པའི་སྤྲིན་ཕུང་ཆེན་པོས་བཀྲེན་ལྡན་ཀུན་ཏུ་ཚིམ་བྱས་ཚེ། །རྙེད་དཀའི་བྱང་ཆུབ་མགྲོན་དུ་འགུགས་པའི་ཐབས་འདི་བདག་གིས་གྲུབ་བོ་ཞེས། །དེ་བློ་རབ་དགའི་ངོ་མཚར་དེ་འདྲ་སྦྱིན་གནས་དེས་ཀྱང་མ་ཐོབ་སྟེ། །དེ་ནི་དེ་ལྟར་འཇིག་རྟེན་གསུམ་དུ་ཕན་པ་རླབས་ཆེན་བསྒྲུབ་ཕྱིར་གནས། །དབང་ཕྱུག་བརྙེས་པའི་ཆེན་པོ་རྣམས་ཀྱིས་ཡང་དང་ཡང་དུ་སྨད་བྱས་ཤིང༌། །གོས་ཀྱི་ཐ་གྲུ་རོ་རས་དུམ་བུས་བརྩེགས་ཤིང་བརྩེགས་མར་གཡོགས་གྱུར་ཏེ། །ལུས་ལ་གཤིན་དྲི་ཀུན་ཏུ་མནམ་པའི་དབུལ་ཕོངས་སྐྱེ་བོ་ཉམ་ཐག་བརྒྱ། །སྦྱིན་པ་ཆེན་པོའི་བསོད་ནམས་ཞིང་དུ་སྙིང་རྗེའི་བདག་ཉིད་མཆོག་གིས་བཀུར། །ཡོ་བྱད་གཏོང་བ་ཁོ་ནར་མ་ཟད་ལུས་དང་སྲོག་གིས་སློང་མོ་མཆོད། །སློང་མོར་ཕན་པ་ཁོ་ནར་མ་བས་མཐའ་ཀླས་ཡིད་ཅན་དོན་དུ་ཆེ། །གཞན་ཕན་འབྲས་བུ་ཉི་ཚེ་མ་ཡིན་སྟོབས་བཅུའི་ཁྲི་འཕང་མཐོ་ལ་འཛེགས། །སྦྱིན་པའི་ཆེ་
བ་བློ་ཡིས་མི་ཐུག་བདག་ཉིད་ཆེན་པོའི་སྤྱོད་པ་མངའ། །ཤ་དང་ཁྲག་ལ་གཅིག་ཏུ་རྔམ་པའི་བདུད་དང་སྲིན་པོའི་དམག་དཔུང་ཡང༌། །འཇིགས་བྱེད་གཤེད་ཀྱི་ཕྱོགས་སུ་མི་བཞེད་དེ་ལ་བསྔགས་པས་མདུན་བསུས་ཏེ། །མ་མས་བུ་སྡུག་ནུ་ཞོས་གསོ་ལྟར་རང་གི་ལུས་ཀྱིས་ཚིམ་མཛད་ཕྱིར། །བྱམས་ཆེན་མངའ་བའི་གྲགས་པ་དེ་ཀོ་དེ་ལ་ཆུས་ཟོས་ཡོང་མ་གྱུར། །བསོད་ནམས་མཆོག་གི་མཆོད་སྡོང་ཉིད་གྱུར་ཡན་ལག་ཕུལ་བྱུང་འཆང་བཞིན་དུ། །དམན་པའི་ཤ་ཁྲག་བསླངས་ནས་སྟེར་བ་ཚུལ་དུ་ཤེས་པ་མ་ཡིན་ཞེས། །སེམས་དཔའ་མཆོག་ནི་རང་གི་ལུས་ལས་གནོད་སྦྱིན་དགའ་བའི་མགྲོན་འགྱེད་ཀྱི། །རིག་བྱེད་སྨྲ་བའི་མཆོད་སྦྱིན་གཏམ་ལ་ཕུ་དུད་མཛད་པ་མ་ཡིན་ནོ། །བྱེ་བ་ཁྲག་ཁྲིག་བསྐལ་བའི་ཡུན་ལ་མནར་མེད་ཞུགས་ཀྱིས་རབ་སྦྱང་ཡང༌། །དེ་ཡི་ལུས་ཀྱིས་བཙས་མཆོག་བཞག་པ་འགའ་ཡང་ཡོད་པ་མ་ཡིན་གྱི། །ལྷག་པའི་སེམས་ཀྱིས་ཁྲག་གི་ཆུ་རྒྱུན་ཕྲ་མོ་ཙམ་ཞིག་སྦྱིན་བྱས་པའང༌། །བླ་མེད་བྱང་ཆུབ་ལག་རྩེར་སྦྱིན་པའི་ཕོ་ཉ་ཡིན་ཞེས་དགའ་བ་འཕེལ། །རྐང་གི་དུམ་བུ་ཉུང་ཤས་སྟེར་བས་གདུང་བ་རྣམ་མང་འཕེལ་གྱུར་ཀྱང༌། །དེ་ལ་ཁོ་བོ་གདུངས་བའི་གདུངས་ཞེས་ཞུམ་པས་གཤུང་བར་མི་འགྱུར་གྱི། །དེ་ལས་ཆེས་ལྷག་སེམས་ཅན་དམྱལ་སོགས་སྡུག་བསྔལ་མང་ལྡན་འཁོར་བ་པར། །ལྷག་པའི་སྙིང་རྗེ་ལྷག་པར་རྒྱས་ཏེ་བྱང་ཆུབ་སྤྱོད་ལ་ལྷག་པར་དགའ། །སྲིད་
པའི་ཐོག་མ་གཞལ་དུ་མི་སྤྱོད་ཡུན་ནི་ཤིན་ཏུ་རིང་པོ་ནས། བདག་གི་དོན་ལ་རྗེས་སུ་ཆགས་པའི་ངང་ཚུལ་ཡིད་ལ་བརྟན་བྱས་པའང༌། །སྙིང་རྗེ་ཆེན་པོའི་མཐུ་དཔུང་གཅིག་གིས་མིང་ཙམ་ལྷག་མར་ལུས་གྱུར་ཏེ། །ཀྱེ་མའོ་སེམས་ཀྱི་རྒྱུད་ནི་གོམས་པའི་ཤུགས་ལས་བསྐྱེད་པ་ཡིན་ཞེས་ངེས་པ་རྙེད། །བྱང་ཆུབ་སེམས་དཔའི་སྦྱིན་པ་ལ་བསྔགས་པའི་གཏམ་ཐུང་ངུ་མིའམ་ཅིའི་དབྱངས་སྙན་ཞེས་བྱ་བ། གཞོན་ནུ་འཇིགས་མེད་པས་གང་དྲན་བྲིས་པ་དགེ། ༈ །།ལྷག་བསམ་ཆུ་གཏེར་སྦུབས་ནས། །མཛད་བཟང་པདྨོའི་ལང་ཚོ། །འགོག་མེད་ཅིར་ཡང་སྣང་བའི། །འཕགས་མཆོག་དེ་ལ་འདུད་དོ། །ལྷག་བསམ་མཆོག་གིས་བསྐྲུན་པའི། །རྣམ་དཀར་ལེགས་བྱས་མེད་ན། །ལྷ་བས་ལྷག་པའི་ལུས་རྟེན། །འདི་འདྲ་རྙེད་པ་སྲིད་དམ། །ལུས་རྟེན་མཆོག་ཅིག་ཐོབ་ཀྱང༌། །ལྷག་བསམ་དགེ་བ་དཀོན་པས། །ལྷག་བསམ་ལན་རེ་སྐྱེས་ཀྱང༌། །གོང་འཕེལ་ཐབས་མཁས་བརྟེན་མཛོད། །ལྷག་བསམ་རྣམ་དག་མེད་ན། །སྤྱོད་པ་རྣམ་དག་མི་འབྱུང༌། །སྤྱོད་པ་རྣམ་དག་མེད་ན། །གཞན་ཕན་རྣམ་དག་འབྱུང་ངམ། །ལྷག་བསམ་རྣམ་དག་མེད་ན། །བྱང་ཆུབ་སེམས་མཆོག་འབྱུང་ངམ། །བྱང་ཆུབ་སེམས་མཆོག་མེད་ན། །བྱང་ཆུབ་བླ་མེད་འཐོབ་བམ། །ལྷག་བསམ་རྒྱལ་སྲས་སྤྱི་ནོར། །རྒྱལ་སྲས་ལྷག་བསམ་ལས་སྐྱེས། །ལྷག་པའི་བསམ་པ་མེད་ན། །རྒྱལ་དང་རྒྱལ་སྲས་མི་འབྱུང༌། ཁམས་གསུམ་
སྲིད་པའི་གྲོང་ན། །འགྲོ་དྲུག་སེམས་ཅན་དཔག་མེད། །འདི་ལྟར་ལྷག་བསམ་སྐྱེ་ཡུལ། འདི་ལ་ལྷག་བསམ་བསྐྱེད་མཛོད། །ལྷག་བསམ་མཆོག་དང་བྲལ་བའི། །རང་དོན་དོན་གཉེར་བྱིས་པ། །དེ་དག་བློ་གྲོས་ཉམས་རྩལ། །བྱ་ནག་གཤོག་རྩལ་འདྲའོ། །འགྲོ་ཀུན་དྲིན་ཆེན་ཕ་མ། །འདི་ལ་སྙིང་རྗེས་དྲངས་པའི། །གཞན་ཕན་དོན་གཉེར་ཆེན་པོ། །དེ་ཀ་ལྷག་བསམ་ལགས་སོ། །རྣམ་དཀར་བག་ཙམ་བསྒྲུབ་ཀྱང༌། །བློ་གྲོས་ཕུར་ཁུང་མ་ཐུག །ལྷག་བསམ་ཆེ་ཆེ་མཛོད་དང༌། །ཆུང་ངུ་ཆེན་པོར་འགྱུར་རོ། །དགེ་སློང་ལྷག་བསམ་རབ་དཀར། །བཏགས་མིང་དོན་ལྡན་བཞེད་ན། །དྲི་མེད་ལྷག་པའི་བསམ་བཟང༌། །ཡར་ཟླ་བཞིན་དུ་སྤེལ་ཅིག་ཁ་ཅིག་ན་རེ་དལ་འབྱོར་ཐོབ་པ་ལ་ལྷག་བསམ་དགོས་ན་མིར་གྱུར་པ་ལ་གཞན་ཕན་དོན་གཉེར་དགོས་པ་ཧ་ཅང་ཐལ་ལོ་ཞེ་ན། དེ་ནི་སྐབས་ཐོབ་ཀྱི་དབང་ལས་གོ་དགོས་ཏེ་དཔེར་ན་རྟོགས་པ་ཞེས་པ་སྤང་བྱའི་རྣམ་རྟོག་དང་ཟབ་མོའི་ཉམས་རྟོགས་གཉིས་ལ་འཇུག་ཀྱང་སྐབས་སོ་སོར་གོ་བ་ལེན་དགོས་པ་བཞིན་ནོ། །དགེའོ།། ༈ །།དུས་གསུམ་རྒྱལ་བའི་རྣམ་འཕྲུལ། །ཐར་འདོད་འགྲོ་བའི་མིག་གཅིག །དོན་གཉིས་འདོད་དགུ་སྦྱིན་པའི། །བླ་མ་སངས་རྒྱས་མཁྱེན་ནོ། །གྲངས་མེད་བསྐལ་པར་བཙལ་ཀྱང༌། །རྙེད་དཀའ་དམ་ཆོས་རིན་ཆེན། །བརྒྱུད་ལྡན་བླ་མའི་དགོངས་བཅུད། །ཐུགས་ཀྱི་བུམ་པར་བསྐྱིལ་ནས། །
དུས་དང་སྐལ་བ་ཇི་བཞིན། །དོན་གཉེར་བུ་ལ་སྩོལ་བའི། །དྲིན་ཆེན་བླ་མ་རྗེ་བཙུན། །མཁྱེན་ནོ་ཐུགས་རྗེས་བཟུང་མཛོད། །དུས་བརྒྱ་ཟ་མ་གཅིག་བཞིན། །རྒྱལ་བསྟན་ལན་གཅིག་མཇལ་ཚེ། །རྙེད་དཀའ་དོན་ཆེར་ཤེས་ནས། །སྒྲུབ་ལ་གཅེས་སྤྲས་བྱེད་ཅིང༌། །ས་རྙིང་བཀའ་བརྒྱུད་ལ་སོགས། །རིས་མེད་ཆོས་བརྒྱུད་མཐའ་དག །སངས་རྒྱས་གཅིག་གི་བསྟན་འཛིན། །བསྟན་པ་གཅིག་ལ་ཞུགས་པ། །གུས་པའི་ཞིང་མཆོག་ཁོ་ནར། །ཡིད་ཆེས་ཁོང་ནས་རྙེད་དེ། །དག་སྣང་པདྨོ་རྒྱས་པར། །རྗེ་ཡིས་བྱིན་གྱིས་རློབས་དང༌། །ཐོག་མེད་འཁོར་བའི་འབྲོག་ཏུ། །རང་སེམས་འཁྲུལ་པས་དུབ་པ། །འོད་གསལ་གཉུག་མའི་དབྱིངས་སུ། །ངལ་བསོའི་བདུད་རྩི་སྩོལ་དང༌། །ཟབ་རྒྱས་ལམ་བཟང་མཐའ་དག །འོད་གསལ་སྙིང་པོའི་ལམ་སྟེགས། །ཀུན་གྱི་རྩེ་མོར་སོན་པའི། །ངེས་དོན་མཆོག་གི་ཟབ་ལམ། །སྣང་སྟོང་ཕྱོགས་རེ་མིན་པར། །ཟུང་འཇུག་བརྗོད་བྲལ་ཆེན་པོར། །གདོད་ནས་འདུ་འབྲལ་མེད་པའི། །རང་སེམས་གཉུག་མའི་དེ་ཉིད། །བཅོས་བསླད་བྲལ་བའི་ངང་དུ། །སྣང་སེམས་སྤྲོས་པའི་རྫུན་རིས། །ཆུ་རླབས་མཚོ་ལ་ཐིམ་བཞིན། །རང་གྲོལ་ཕྱག་རྒྱ་ཆེན་པོ། །འགྱུར་མེད་མཆོག་བདེའི་གོ་འཕང༌། །ད་ལྟ་ཉིད་དུ་མཐོང་བར། །མཉམ་མེད་རྗེ་བཙུན་བླ་མས། །བདག་རྒྱུད་བྱིན་གྱིས་རློབས་མཛོད། །མ་འོངས་སྐྱེ་བའི་ཕྲེང་བར། །བླ་མ་སངས་རྒྱས་
མཇལ་ཞིང༌། །གདམས་ངག་བདུད་རྩིའི་བཏུང་བས། །བློ་སྟོབས་རྒྱས་པར་ཤོག་ཅིག །ཕྱག་རྫོགས་སྒོམ་ལུགས། དག་སྣང་སྦྱང་ལུགས། །བླ་མའི་གསོལ་འདེབས་ཁ་ཁ་སོ་སོར་ང་རང་ནད་པ་ཐབས་རྡུགས་ཡིན་ཕྱིར་འབྲི་མི་ཐུབ་པས། གསུང་མི་གཅོག་ཙམ་དུ་དེ་ལྟར་བྲིས་སོ།། ༈ །།ཉོན་དང་མཐའ་གྲོལ་ཞལ་གདམས་སློང་མི། །ཞལ་གདམས་ཉམས་ལེན་འདོད་མཁན་ཡིན་ན། །ཤོག་ཤར་གཅིག་ལ་བྲིས་པས་མི་ཕན། །ཀུན་མཁྱེན་བླ་མའི་གསུང་རབ་བལྟ་དགོས། །གསུང་དེ་བལྟ་བའི་ནུས་པ་ཆུང་རུང༌། །བསྟན་པ་ཡོངས་རྫོགས་སྐྱེས་བུ་གསུམ་གྱི། །ལམ་དུ་དྲིལ་བ་སྔོན་འགྲོའི་ཁྲིད་ཡིག །དྲན་པ་ཉེར་བཞག་ཡིན་པས་དེར་ལྟོས། །བློ་ལྡོག་བཞི་ནས་བྱང་ཆུབ་སེམས་གཉིས། །སྒོམ་པའི་བར་ཀུན་ཐེག་མཆོག་རྒྱལ་པོའི། །རྟེན་གཞིར་བཟུང་ནས་ཉམས་སུ་ལེན་པ། །ཕ་གཅིག་ཀུན་མཁྱེན་བརྒྱུད་པའི་རིང་ལུགས། །སོར་རྩེ་ཙམ་གྱི་གདམས་ངག་ཁོ་ནས། །དམ་པའི་ལམ་སྲོལ་ཟླ་བ་སྟོན་པའི། །འཕྲུལ་ཐབས་འདི་ཉིད་བསྟན་པའི་ཉི་མས། །གང་ཤར་བཟོ་མེད་ལྷུག་པར་བྲིས་སོ།། ༈ །།བསོད་རྒྱམ་ན་རེ་ཞལ་གདམས་དགོས་ཟེར། །ང་ཡི་ཁ་སྒོ་གདམས་པས་བརྒྱན་འདི། །ཤེས་རྒྱུད་དུལ་བའི་ཉམས་མྱོང་མཐུས་མིན། །དམ་ཆོས་ཉུང་ཟད་ཐོས་པའི་མེ་ཏོག །ང་ཡི་སྒོ་གསུམ་སྡིག་དང་ལྟུང་བ། །འདི་གཉིས་ཁོ་ནར་ཕྱག་ལེན་བྱེད་
འདི། །ཆོས་ནས་དེ་ལྟར་བཤད་པས་མ་ཡིན། །ལས་ཀྱིས་ནོངས་པའི་རང་བློ་འདིས་ལན། །དེ་ཕྱིར་རང་གི་རྒྱུད་ལ་བརྟགས་ཚེ། །གསུང་རབ་རིན་ཆེན་གླིང་དུ་སླེབས་ནས། །ལག་པ་སྟོང་པར་རྒ་ཤིའི་གྲོང་སྒོར། །ཕྱིན་པའི་ངང་ཚུལ་བསམ་ནས་འགྱོད་དོ། །རེས་འགའ་བསྐལ་མང་སྒྲ་ཙམ་ཐོས་དཀའི། །དྲང་སྲོང་གསུང་རབ་བདུད་རྩིའི་ཟིལ་ཐིགས། །ཅུང་ཟད་རྣ་བའི་སྙིམ་པས་ཐོབ་འདི། །འབྲས་མེད་མིན་སྙམ་གློ་བ་དགའ་འོ། །གང་ཕྱིར་རྒྱལ་བའི་རྟོགས་པའི་བསྟན་པ། །ཇི་བཞིན་རང་གི་རྒྱུད་ལ་མེད་ཀྱང༌། །ལུང་གི་ཆོས་མཛོད་ཕྱོགས་ཙམ་རིག་པས། །ནམ་ཞིག་བག་ཆགས་དཀར་པོར་སད་སྙམ། །འོན་ཀྱང་དད་བརྩེ་འཚོ་བ་དག་ཅིང༌། །ཐོས་པས་ཕོངས་ཡང་མ་ཎི་བཟླས་པས། །འཆི་བ་དགའ་ཚལ་འགྲོ་ལྟར་མཐོང་བའི། །སྐྱེ་བོའི་མདུན་སར་ངོ་ཡང་ཚའོ། །ཚུལ་འདིས་བདག་དང་བདག་འདྲའི་སྤྱོད་ཚུལ། །དམ་པའི་མདུན་སར་སྣ་བཅད་བཞིན་དུ། །དམན་འདི་བློ་ངན་ལངས་ལ་ཤོར་བའི། །ཉེས་དམིགས་ཡིན་པས་གནས་འདིར་གཟོབ་མཛོད། །དེ་ཕྱིར་ཁྱོད་ཀྱིས་ཡིད་ཀྱི་གླང་པོ། །ཤུགས་དྲགས་ཉེས་སྤྱོད་གཡང་ལ་འཇུག་འདི། །སྐྱོ་ཤས་ངེས་འབྱུང་ལྕགས་ཀྱུས་གཙགས་ནས། །གཏན་བདེའི་ཕྱོགས་སུ་ཁ་ལོ་སྒྱུར་ཅིག །དེ་ལྟ་ན་ཡང་གཏན་བདེ་ཐབས་བཅས། །ཅི་ཡང་མི་ཤེས་དེ་སྒྲུབ་རློམ་པ། །ལོང་བ་སྨྱོ་འགྲོས་བྱེད་དང་མཚུངས་པས། །དམ་ཆོས་མཉན་སླད་བརྩོན་པ་
མ་འབོར། །ཆོས་དེ་ལོགས་ནས་འཚོལ་དགོས་མིན་གྱི། །རྒྱལ་བསྟན་སྤྱི་དང་ཁྱད་པར་ཐེག་ཆེན། །མདོ་སྔགས་ཀུན་དང་ལྷག་པར་གསང་སྔགས། །རྒྱུད་སྡེ་མཐའ་དག་དགོས་སུ་བླ་མེད། །རྡོ་རྗེ་རྩེ་མོའི་ལམ་གནད་མ་ལུས། །གྲུ་བཞི་ལམ་ཁྱེར་ཀུན་མཁྱེན་བརྒྱུད་པའི། །གསུང་རབ་ཡིད་བཞིན་ནོར་བུའི་གཏེར་ཁ། །འདི་འདྲར་མཇལ་ཚེ་སྙིང་པོ་ལེན་དགོས། ཁ་ནས་ཞལ་གདམས་སྐུལ་མཁན་མང་སྟེ། །བསྒོ་བའི་ངག་བཞིན་བྱེད་མཁན་མི་འདུག །མང་པོའི་ཆོས་མཐའ་ཚོང་དང་ནག་ཆང༌། །གྱོད་ཀྱི་ཕྱག་ལེན་ཁོ་ནས་ཆོད་སོང༌། །ད་ནི་འོ་མས་ཁ་ཚིག་བྱིས་པ། །ཞོ་འཁྱགས་འཐུང་ལའང་སུན་པ་སྐྱེས་ནས། །བཏང་སྙོམས་ངང་ལ་སྡོད་པར་སྤྲོ་ཡང༌། །རྔ་ལས་སྒྲ་འབྱུང་དབྱུག་པའི་གཞན་དབང༌། །འཛིར་ཀའི་བནྡྷེ་པུཎྱེ་དྷཱ་ཛའི་ངོར། ཁ་མང་ཁྭ་ཏ་གཉིས་པ་བསྟན་ཉིས་བྲིས། །དགེའོ།། ༈ །།ལར་དངོས་གཞིའི་ལམ་གྱི་གཞི་རྟེན་དང༌། །གེགས་སེལ་དུ་སྔོན་འགྲོའི་ཆོས་ཁྲིད་ཀྱི། །ཉམས་ལེན་ལ་སྦྱོང་བ་གནད་དུ་ཆེ། །དེར་སྦྱང་གོམས་ཅུང་ཟད་སོང་བ་ན། །ལམ་ཟབ་མོའི་མཐར་ཐུག་རྫོགས་པ་ཆེ། །བློ་ཡིད་བྱེད་བཅོས་མའི་གཟེབ་སྤངས་པའི། །གཤིས་ཀ་དག་ཕྱོགས་ཡན་ཆེན་པོའི་ངང༌། །ཅོག་བཞག་གི་ཉམས་ལེན་སྐྱོང་བ་གཅེས། །དུས་དེ་ཚེ་དགྲ་འདྲེའི་འཚུབ་ལྷོང་དང༌། །འཁོར་འཕེལ་འགྲིབ་ལོངས་སྤྱོད་དར་རྒུད་སོགས། །རྐྱེན་
བཟང་ངན་ཇི་ལྟར་སྣང་བ་ཀུན། །དོན་ཟང་ཐལ་རིག་པའི་རྩལ་སྦྱོང་དུ། །འཁྱེར་ཤེས་ན་གེགས་སེལ་གཞན་མི་དགོས། །གནད་དེ་ཤེས་བྱ་བ་ལེགས་ཉེས་དང༌། །རང་སྐྱིད་སྡུག་གནས་སྐབས་ཅི་བྱུང་ཡང༌། །ཡིད་རེ་མེད་དོགས་མེད་གུ་ཡངས་ངང༌། །ངལ་བསོས་ནས་སྐྱིད་ཉལ་བརྒྱབ་པས་ཆོག །དེ་ཚེ་ཕོག་ཐུག་བཟེ་རེ་མེད། །དེ་ཚེ་ཆགས་སྡང་གླེང་བརྗོད་བྲལ། །དེ་ཚེ་སྣང་བ་བདེ་བར་ཤར། །རང་བདེ་གཞན་སྐྱིད་སྐྱིད་དགུ་འཛོམ། །དེ་ལུང་བསྟན་མང་པོའི་དོན་བསྡུས་ཡིན། །ཕ་ཀུན་མཁྱེན་བརྒྱུད་པའི་ཞལ་ཏ་ཡིན། །བུ་བསྟན་པའི་ཉི་མའི་གླུ་དབྱངས་ཡིན། །དོན་ཐུགས་ལ་བཅང་ན་ཟབ་པར་མཆིས། །ནམ་མཁའ་རྒྱ་མཚོར་གསུངས་པ་རེད།། ༈ །།མགོན་སྲས་བཅས་རྒྱལ་བའི་ཐུགས་རྗེའི་འཕྲུལ། །དུས་སྙིགས་མའི་འགྲོ་བ་རྗེས་འཛིན་ཕྱིར། །ཐ་མལ་གྱི་གཟུགས་བཟུང་དམ་ཆོས་བསྟན། །ཕ་དྲིན་ཆེན་བླ་མ་སྤྱི་བོར་བཞུགས། །ལར་འདབ་ཆགས་བླུན་པོ་ཅ་ཅོ་ཆེ། །དོན་མེད་ཀྱང་ལས་ཀྱིས་བསྐོས་ཚུལ་ཡིན། །དེ་བསྐྱར་ཟློས་བྱེད་ན་བྱིས་པའི་རྟགས། །བཏང་སྙོམས་སུ་ཞོག་མཛོད་རྒན་རབས་ཚོ། །མི་བསམ་མེད་རྨོངས་པའི་སུག་བྲིས་དེ། །དོན་བཤད་རིན་མེད་ཀྱང་རྩེད་མོ་ཙམ། །དེར་རྩ་འགྲེལ་གྱི་ཐ་སྙད་དགོད་རེ་བྲོ༌།སྨྱོ་གཏམ་འགྲེལ་ན་འཆལ་བའི་རྟགས། །གཞོན་ལུས་སེམས་རྒྱས་ཚེ་ཆོས་ལ་སྦྱངས། །ཆོས་ཁ་ལ་མ་སྤུར་རྒྱུད་དང་སྦྱར། །རང་བཙན་ས་ཟིན་
ནས་འཆད་རྩོམ་གྱིས། །ལས་གཞན་དོན་སྒྲུབ་པ་དམ་པའི་སྲོལ། །གཞོན་བྱིས་པའི་མི་ཚེ་རྩེད་མོས་བསྐྱལ། །ཆོས་རྣ་བས་ཐོས་ཚད་ཁ་ནས་སྤུར། །རྒན་ལང་ཚོ་སོང་ཚེ་རང་སེམས་ལ། །འདི་འཛིན་སྙམ་མེད་པ་བདག་འདྲའི་ལུགས། །གླུ་འདི་འདྲ་འགྲེལ་དགོས་ཟེར་ཙ་ན། ཁྱོད་བོད་ཡུལ་འཕགས་པའི་ཞིང་སྐྱེས་ཀྱང༌། །བག་མེད་ཀྱི་ཀུན་སྤྱོད་འདི་ལྟ་བུས། །མགོ་དཀར་པོར་སླེབ་ཅེས་སྤྱོ་བ་འདྲ། །ད་ཚེ་མཇུག་དགུན་ཉིའི་ཕྱི་དྲོ་འདིར། །གླུ་འདི་འདྲ་འགྲེལ་བའི་ལོང་མེད་ཀྱིས། །ཚིག་བརྗོད་པ་དོན་ལྡན་འཕགས་པའི་གསུང༌། །དོན་ཟབ་ཅིང་རྒྱ་ཆེ་གདམ་པའི་གཏེར། །མདོ་རྒྱུད་ཀྱི་སྙིང་པོ་ཡི་གེ་དྲུག །དེ་མ་བརྗེད་སྙིང་ལ་རི་མོར་བྲིས། །དབུགས་མ་ཆད་བར་དུ་སྐྱོར་སྦྱངས་གྱིས། །བློས་མ་ལྕོགས་བར་དུ་འགྲེལ་པ་རྒྱོབས། །ཚེ་འདི་ཡི་རྒྱབ་ཏུ་ཕྱི་མ་འོང༌། །དེར་སྐྱིད་པོ་འདོད་ན་མ་ཎི་ཐོན། །ཆོས་ཡི་གེ་དྲུག་མའི་ཞབས་རྟེན་ལ། །ལས་སྡིག་སྤྱོད་ཐག་པ་མ་འདོགས་ཨང༌། ཁམས་གསུམ་གྱི་འགྲོ་བ་མ་རྒན་ཡིན། །དྲིན་ཆེའོ་སྙམ་ན་མ་ཎི་ཐོན། །ལམ་བྱམས་དང་སྙིང་རྗེར་འབྲེལ་བ་ཞོག །ཚེ་ཕྱི་མར་སྒོམ་པའི་སྨོན་ལམ་ཐོབ། །བོད་བསིལ་ལྡན་ཡུལ་འདི་འཕགས་པས་བསྐྱངས། །དེའི་བཀའ་དྲིན་དྲན་ན་མ་ཎི་ཐོན། །ཚེ་སྔོན་ནས་འབྲེལ་བས་མགོན་དུ་ཐོབ། །རང་རྩེ་གཅིག་འཇུས་ན་སླར་ཡང་མཇལ། །མཐོ་ཉི་ཟླ་རི་རྩེར་འཆར་བའི་
དཔེས། །སྐྱབས་བླ་མ་སྤྱི་བོའི་གཙུག་ཏུ་སྒོམས། །དམའ་ཀླུང་ཆེན་རྒྱ་མཚོར་གཞོལ་བའི་དཔེས། །རང་བློ་ཁ་དམ་པའི་ཆོས་ཕྱོགས་དྲོངས། །ས་རི་ཐང་དབྱར་ཀས་བསྒྱུར་བའི་དཔེས། །རྒྱུད་ངན་པ་འཕགས་པའི་ཐུགས་རྗེས་གྲོལ། །ཚེ་འདིར་བདེ་ཕྱི་སྐྱིད་གཏན་དུ་འཚེང༌། །འདུན་མ་རྩེ་མོར་ཕྱིན་པའི་བཀྲ་ཤིས་ཤོག །དབལ་ཤུལ་ཁྱོ་ཁོའི་སྔགས་རྒན་དད་པས་རྒྱུད་ཕྱུག་པ་ཆོས་འབྱུང་ནས། ཁོ་བོ་གཞོན་ནུས་རྩེད་མོར་བྲིས་པའི་གླུ་ཅལ་ཅོལ་ཅིག་ལ་འགྲེལ་པ་བྲིས་ཞེས་རིན་པོ་ཆེའི་རྟེན་བཅས་བསྐུལ་བའི་ལན་དུ་སྤྲང་པོ་བསྟན་པའི་ཉི་མས་སྨྲས་པ་དགེ་བར་གྱུར་ཅིག། ༈ །།བླ་མ་ཐུབ་དབང་སེང་གེ་ཡི། །ཞབས་ལ་སྒོ་གསུམ་གུས་པས་ཕྱག་བགྱིས་ནས། །གཏན་འདུན་འཆུག་མེད་སྒྲུབ་པའི་མན་ངག་འདི། །མདོར་བསྡུས་གོ་སླའི་ངག་གི་ཕྲེང་བར་སྤེལ། །གང་ཞིག་ཐེག་མཆོག་རིགས་ལ་གནས་པ་ཡི། །སྐལ་བཟང་སྐྱེ་བོ་རྣམས་ལ་བརྩེ་བ་ཡིས། །ཐེག་མཆོག་ལམ་གྱི་རིམ་པ་ཇི་སྙེད་ཅིག །ཀུན་མཁྱེན་ཞལ་གྱི་བུམ་པ་ནས་འོངས་པའི། །སྙིང་པོ་ལུང་བསྟན་བརྙེས་པའི་པཎ་ཆེན་གྱིས། །བཀྲལ་བའི་རང་ལུགས་དྲི་མ་མེད་བཟུང་སྟེ། །རྣམ་པར་བཤད་པའི་མཛོད་ཆེན་རྣམ་བདུན་པོ། །གཞུང་ལུགས་གདམས་པའི་མཐིལ་དུ་འཆར་འདོད་ན། །དང་པོ་དལ་འབྱོར་རྙེད་དཀའ་སེམས་པ་ནས། །ཇི་སྲིད་རང་བཞིན་ཐེག་མཆོག་རྒྱལ་པོའི་བར། །འགལ་མེད་ལམ་གྱི་ཕུང་པོ་གཅིག་ཉིད་དུ། །སྒྲིགས་པའི་མན་ངག་འདི་
ལ་གོམས་པར་མཛོད། །མངོན་མཐོའི་ཕུན་ཚོགས་རྣམ་པ་བརྒྱ་དག་དང༌། ངེས་པར་ལེགས་པའི་ཡོན་ཏན་འབྱོར་པ་ཀུན། །མ་ཚང་མེད་པར་འདུ་བའི་ཡེ་ཤེས་ཀྱི། །གཏེར་དེ་རྒྱལ་བ་ཉག་གཅིག་གོ་འཕང་ཡིན། །དེ་ཕྱིར་གོ་འཕང་མཆོག་དེ་སྒྲུབ་པའི་སྒོ། །བླ་མེད་ཐེག་པ་མཆོག་གི་ཆོས་ཚུལ་དུ། །མངོན་མཐོ་སྒྲུབ་བྱེད་གསུང་རབ་ཀུན་དོན་དང༌། །ངེས་ལེགས་སྒྲུབ་པའི་ཐབས་ཀུན་ཚང་བར་འདུ། །གང་ཡང་འཇིག་རྟེན་ཕྱི་མའི་ཕུན་ཚོགས་ལ། །བློ་ཁ་ཅུང་ཟད་ཙམ་ཡང་མ་ཕྱོགས་རུང༌། །གཏན་བདེ་ཞི་བ་སྒྲུབ་པའི་བསྙོན་ཧམ་ཅན། །དེ་དག་བྱིས་པ་ལས་ཀྱང་ཆེས་ཐ་ཤལ། །རང་ཉིད་སྲིད་པའི་བདེ་འབྱོར་ལ་ཆགས་བཞིན། །འགྲོ་ཀུན་སྡུག་བསྔལ་མཐའ་དག་ལས་སྒྲོལ་ཞེས། །སྨྲ་བ་དེ་དག་ད་དུང་ཅི་ཞིག་ལས། །འགྲོ་ཀུན་སྒྲོལ་བའི་ངག་དོན་འཚོལ་བར་རིགས། །དེ་སླད་སྐྱེས་བུ་ཆུང་དང་འབྲིང་པོ་དང༌། །ཐུན་མོང་ལམ་གྱི་རིམ་པ་ལ་སྦྱངས་ནས། །ད་གདོད་ཐེག་མཆོག་ཐུན་མོང་མ་ཡིན་པའི། །རྟོགས་རིགས་འདོད་རྣམས་སྐྱེ་བོ་མཛངས་པ་ཡིན། །ཤིན་ཏུ་རྙེད་དཀའ་རྙེད་ན་དོན་ཆེ་བའི། །རྟེན་དེ་ད་ལྟ་རང་གི་ལག་མཆིས་པས། །འབྲས་མེད་མི་བགྱི་འཆི་ཆོས་གཅིག་ཁོ་ནར། །མི་ཚེ་དྲིལ་བའི་བློ་སྣ་འདི་དང་གཅིག །དེ་ཡང་སྐྱེ་བ་ད་རེས་བྱ་སྙམ་ལོས། །མི་ཆོག་ལོང་མེད་འཆི་བའི་ཚུལ་མཐོང་ནས། །སྐད་ཅིག་རེ་རེའང་མི་ཚེ་དོན་ལྡན་དུ། །བགྱིད་པའི་དགེ་སྦྱོར་ཅི་ནུས་བྱེད་
སྙམ་གཉིས། །རྒྱུ་ཡི་དགེ་སྦྱོར་དེ་ལ་མང་ཡོད་ཀྱང༌། །སྟོན་པས་ཆེ་ལོང་བསྡུས་པ་དགེ་བཅུའི་ཁྲིམས། །ཡང་དག་ལྟ་བས་བརྒྱན་པ་འདི་ཉིད་ལས། །བརྩམས་ཏེ་མཁས་པར་སྦྱང་བ་འདི་དང་གསུམ། །དཀྱུས་ས་མ་མཐོང་རྟ་རྒྱུག་བྱེད་པ་བཞིན། །སྡིག་པའི་ཉེས་དམིགས་ཅི་ཞིག་ལྟར་མཐོང་ནས། །དགེ་ལ་འདུན་པའི་རྒྱུ་མཚན་མེད་མིན་པར། །ངན་འགྲོའི་སྡུག་བསྔལ་མང་དུ་སེམས་དང་བཞི། །སྐྱེས་བུ་ཆུང་ངུའི་ལམ་དང་ཐུན་མོང་བའི། །སེམས་སྦྱོང་ཡིན་ཏེ་འཁོར་བ་སྡུག་བསྔལ་དུ། །ཤེས་ནས་ཐར་པ་སྒྲུབ་པའི་སྔོན་འགྲོ་རུ། །མི་བསྒོམ་མི་རུང་རིམ་པ་ངེས་པ་ལགས། །དེ་ནས་སྲིད་པའི་རྩེ་མོའི་འཇིག་རྟེན་བར། །སྐད་ཅིག་འགྱུར་བ་གློག་གི་ཕྲེང་འདྲ་དང༌། །དེ་ཡང་ལས་དང་ཉོན་མོངས་གཞན་དབང་བའི། །འདུ་བྱེད་སྡུག་བསྔལ་གཙོ་བོར་སེམས་པ་ཡིས། །དྲང་བའི་ཐར་འདོད་ཤུགས་དྲག་རྒྱུན་རིང་དུ། །སྐྱེས་ཚེ་ངེས་འབྱུང་ཆོས་སྒོར་ཞུགས་པ་སྟེ། །སྡུག་ཀུན་འགོག་པའི་གོ་རིམ་སྒྲུབ་ཚུལ་སོགས། །འདི་ལས་འཕྲོས་ཏེ་ཞིབ་ཏུ་མཁྱེན་པར་མཛོད། །ནམ་ཞིག་སྲིད་པའི་འཁོར་ལོ་ཆ་ལྔ་འདི། །མེ་འབར་འཁྲུགས་པའི་རླབས་ལྟར་མཐོང་བ་ཡི། །ཡིད་འབྱུང་དེ་ཡི་མྱོང་བ་ལ་དཔགས་ནས། །སྐྱེ་དགུའི་སྡུག་བསྔལ་ཞི་འདོད་བདེ་བླག་སྐྱེ། །འགྲོ་བ་སྡུག་བསྔལ་མཚོ་ལས་ཐར་འདོད་དང༌། །དེ་དག་སྡུག་བསྔལ་འཕྲང་ལས་བསྒྲལ་འདོད་བློ། །གཅིག་པ་མིན་ཕྱིར་ཕྱི་མ་
འདི་སྐྱེད་དང༌། །སྤེལ་བའི་སླད་དུ་བརྩོན་འགྲུས་བརྒྱུད་མར་སྦྱང༌། །དེ་ཡང་རྒྱུ་མཚན་རྣམ་དག་དུ་མ་ལས། །འགྲོ་ཀུན་ཕ་མར་ཤེས་པའི་ངེས་ཤེས་དང༌། །བདག་གཞན་མཉམ་བརྗེ་སྒོམ་པའི་སྦྱོར་བ་ལས། །བཟོད་མེད་སྙིང་རྗེ་ཆེན་པོ་འདྲེན་པའི་ཚུལ། །རྒྱས་པར་ངེས་དོན་ཤིང་རྟ་ཆེན་པོ་དང༌། །རྣམ་བཤད་བདེན་གཉིས་ཤིང་རྟར་གསུངས་པས་ན། །ཀློག་དང་སྒོམ་པའི་ངལ་བ་བརྒྱ་ཕྲག་གིས། །ཐེག་ཆེན་རིགས་ཀྱི་ནུས་པ་ཅི་རྒྱས་མཛོད། །སྙིང་རྗེ་ཆེན་པོ་བཅོས་མ་མིན་རྙེད་ན། །དེ་ཡི་ཤུགས་ཀྱིས་རྫོགས་བྱང་དོན་གཉེར་གྱི། །སེམས་བསྐྱེད་ཟུར་ཡང་མཚན་ཉིད་ཚང་ནུས་པས། །བློ་འདི་ཐེག་པ་མཆོག་གི་རྩ་བར་གསུངས། །སེམས་དེ་བསྐྱེད་ཀྱང་རྒྱལ་སྲས་སྤྱོད་པ་ཡི། ཁུར་ཆེན་རྫོགས་པར་ཉམས་སུ་མ་བླང་ན། །དམ་བཅའ་ཙམ་གྱིས་སངས་རྒྱས་མི་འཐོབ་པས། །ཚུལ་ཁྲིམས་ཕུང་པོ་ཡོངས་སུ་རྫོགས་པར་བླང༌། །བྱང་ཆུབ་སེམས་དཔའི་ཚུལ་ཁྲིམས་ཀུན་བསྡུ་ན། །སྡོམ་སྡུད་དོན་བྱེད་རྣམ་པ་གསུམ་ཡིན་ཏེ། །དེ་དག་རྣམ་བཞག་ཡོན་ཏན་མཛོད་ལ་སོགས། །བསྟན་བཅོས་རྒྱས་པ་རྣམས་སུ་ལེགས་པར་ཚོལ། །རྒྱལ་སྲས་སྤྱོད་པའི་སྒོ་མོ་གྲངས་མེད་པ། །ཤེས་པར་དཀའ་ཕྱིར་མདོ་སྡེ་བལྟ་བ་དང༌། །བཤེས་གཉེན་དམ་པ་རིང་དུ་བསྟེན་དགོས་པར། །ཞི་བ་ལྷ་སོགས་ཤིང་རྟ་ཆེ་རྣམས་གསུངས། །བྱང་སེམས་སྤྱོད་ལ་སློབ་ཚེར་མ་
ཟད་ཀྱི། །ཐོག་མཐའ་བར་དུ་དགེ་བའི་ལམ་ཐམས་ཅད། །བཤེས་གཉེན་དམ་པའི་དྲིན་གྱིས་རྙེད་དགོས་པར། །ནོར་བཟང་དཔའ་བོའི་རྣམ་པར་ཐར་ལས་བྱུང༌། །དེ་སླད་བསམ་དང་སྦྱོར་བས་དགེ་བའི་བཤེས། །བསྟེན་ཚུལ་མདོ་སྡེ་རྒྱན་ལས་གསུངས་པ་སོགས། །ཡིད་བཞིན་རིན་པོ་ཆེ་ཡི་མཛོད་འགྲེལ་དུ། །བཀའ་སྩལ་དེ་དག་ལམ་གྱི་གཞི་མ་ཡིན། །རྒྱལ་སྲས་རྣམས་ཀྱི་མཁས་བྱའི་གནས་མང་ཡང༌། །སྒྲིབ་པ་མཐའ་དག་ངེས་པར་ཞི་བའི་སྒོ། །གནས་ལུགས་རྟོགས་པའི་ཡེ་ཤེས་ཚོལ་བ་ཡི། །ཐབས་ཚུལ་རྒྱས་པར་སློབ་ལ་སྙིང་པོར་འཛིན། །ཆོས་ཀུན་རང་རང་མིང་ཙམ་ཟད་པ་ཡི། །རྟེན་ཅིང་འབྲེལ་འབྱུང་སྒྱུ་མ་བཞིན་ཤེས་ནས། །གདོད་ནས་རང་བཞིན་ཆ་ཙམ་དམིགས་མིན་པའི། །དེ་བཞིན་ཉིད་ཀྱི་བཞུགས་ཚུལ་རྗེན་པ་མཐོང༌། །རྒྱལ་བའི་ཤེར་ཕྱིན་མདོ་སྡེ་མང་པོ་རུ། །སྟོང་ཉིད་བཅུ་དྲུག་དེ་བཞིན་ཉི་ཤུ་དང༌། །བདག་མེད་གཉིས་སོགས་དབྱེ་བ་མང་མཛད་པ། །ཀུན་ཀྱང་ཆོས་ཉིད་ཚུལ་གཅིག་འདི་ལས་ཕྱེ། །ཇི་ལྟར་མི་ཡི་སྐྱེད་ཚལ་སྟོང་མཐོང་ཡང༌། །ལྷ་ཡི་ཁང་བཟང་བཀོད་པའི་ཁྱད་པར་ལ། །སྒྲོ་འདོག་ཆོད་པ་མ་ཡིན་དེ་འདྲའི་ཚུལ། །དེ་བཞིན་ཉིད་ལ་ཡོང་ཡེ་མི་མཆི་སྟེ། །རང་བཞིན་མེད་པས་ཐ་སྙད་མེད་པ་མིན། །རྟེན་ཅིང་འབྲེལ་འབྱུང་རང་མཚན་གྱིས་ཡོད་མིན། །ཡོད་མིན་མེད་མིན་འདི་འདྲ་འདི་ཁོ་ནར། །སྲིད་དང་ཞི་བའི་ཆོས་ཀུན་མཉམ་པ་ཉིད། །དེ་བཞིན་
ཉིད་མཐོང་གཞན་ན་ཡོད་མིན་ཏེ། །སྐྱེ་འགགས་རྟག་ཆད་འགྲོ་འོང་མཚན་མ་སོགས། །སྤྲོས་པའི་མཐའ་བརྒྱད་ཉེ་བར་ཞི་བ་ཡི། །དབྱིངས་དེར་ཀུན་རྟོག་ཞི་བའི་བརྡ་ཆད་ཙམ། །ཇི་སྲིད་རྟེན་འབྲེལ་ཟབ་མོའི་རྣམ་བཞག་འདི། །རྣམ་པར་དཔྱོད་པའི་རྩལ་ཁྱད་མ་སྦྱང་བ། །དེ་སྲིད་མུ་བཞི་སྐྱེ་འགོག་གཏན་ཚིགས་སོགས། །མང་དུ་བཤད་ཀྱང་སྙིང་པོ་སྟོར་བར་ཟད། །དེ་ལྟར་མེད་ན་ཇི་ལྟར་ཡོད་སྙམ་དུ། །ཐེ་ཚོམ་དེས་ཀྱང་ལྟ་བ་མ་རྙེད་ན། །རང་བཞིན་མེད་ན་ཆོས་ཀུན་མེད་དོ་ཞེས། །ལོག་པར་བཟུང་རྣམས་ཇི་ལྟར་དབུ་མ་པ། །དེ་སླད་ཡོན་ཏན་མཛོད་ཀྱི་གནས་དགུ་པར། །རྟེན་འབྲེལ་ཤེས་པའི་བསྔགས་པ་མང་གསུངས་ཏེ། །ད་ལྟའི་དུས་ཀྱི་རྣལ་འབྱོར་དབང་ཕྱུག་ཕལ། །ཀུན་མཁྱེན་གཞུང་གི་སྙིང་པོ་སྟོར་ནས་འདུག །ངེས་དོན་ལྟ་བའི་མཐར་ཐུག་རྙེད་པ་ན། །གྲོགས་སུ་བསོད་ནམས་ཚོགས་ཆེན་བདེ་བླག་ཏུ། །རྫོགས་པའི་ཐབས་མཁས་གསང་སྔགས་རྒྱུད་སྡེ་ལས། །ཤེས་པར་འདོད་ན་དབང་སྐུར་ཚུལ་བཞིན་ནོད། །དེར་ནི་འབྲས་བུ་ལམ་བྱེད་རྣལ་འབྱོར་མཐུས། །མཐར་ཐུག་གཟུགས་སྐུ་སྒྲུབ་པའི་མན་ངག་དང༌། །བལྟས་དང་དགོད་སོགས་བདེ་བ་ལམ་བྱེད་པས། །ཡེ་ཤེས་ཚོགས་ཆེན་སྒྲུབ་པའི་ཟབ་གནད་ཀྱི། །མྱུར་ཁྱད་ཟེར་སྒྲོས་ཙམ་གྱིས་མི་ཚིམ་པར། །ཡིད་ཆེས་རྙེད་ནས་དེ་བཞིན་སྒྲུབ་ནུས་ན། །ཆེད་དུ་བྱ་བའི་གོ་འཕང་དུས་རིང་མཐར། །
མི་འགྱང་སྟན་ཐོག་གཅིག་ཏུ་འགྲུབ་པ་ཡོད། ཁྱད་པར་རང་བཞིན་རྫོགས་པ་ཆེན་པོའི་ལམ། །ཟབ་མོ་ཀ་དག་ཁྲེགས་ཆོད་ལྟ་བ་དང༌། །རྒྱ་ཆེན་ལྷུན་གྲུབ་ཐོད་རྒལ་གོམས་པའི་མཐུས། །ཕུང་པོ་འཇའ་སྐུར་དེངས་པའི་ཟབ་ཁྱད་ཅན། །དེང་སང་ལག་ལེན་བྱེད་མཁན་མང་མོད་དེ། །ཡིན་ལུགས་ཐོག་ཏུ་ཁེལ་བ་ཉུང་མཐོང་བས། །གཟུ་ལུམ་མི་བྱ་ཤིང་རྟ་ཆེ་སྲོལ་འདིར། །དཔང་གྱུར་རིག་འཛིན་གཞུང་དུ་ཞུན་ཐར་ཆོད། །གདོད་ནས་རྣམ་གྲོལ་རང་བྱུང་རིག་པའི་བབ། །རྣམ་པར་མི་རྟོག་འོད་གསལ་གཉུག་མ་འདི། །རང་ངོ་ཤེས་ནས་ཇི་བཞིན་ཉིད་བསྐྱང་ན། །སེམས་རིག་མྱོང་སྟོབས་ཀྱིས་ཀྱང་བྱེད་པ་འབྱུང༌། །འོན་ཀྱང་ཉམས་མྱོང་དེ་འདྲ་མ་སྐྱེས་པར། །ངོ་སྤྲོད་གནད་ལ་ཞིབ་ཏུ་མཁས་བྱ་ཞིང༌། །བཞག་ཐབས་འཆུགས་མེད་གཅིག་ཏུ་འདྲིས་བྱ་སྟེ། །བོགས་འདོན་གེགས་སེལ་རྣམས་ཀྱང་སྒྲོ་འདོགས་ཆོད། ཁྲེགས་ཆོད་རྟོགས་པའི་གདེངས་ཆེན་རྙེད་པའི་ཚེ། །འོད་གསལ་སྒྲོན་མ་རྣམ་བཞིའི་གསེང་ལམ་ནས། །ནང་དབྱིངས་ལྷུན་གྲུབ་སྦུབས་སུ་འཇུག་པའི་ཚུལ། །མན་ངག་གནད་གསང་རིག་ལ་སླ་བ་ཡིན། །ཇི་ལྟ་ཅལ་ཅོལ་མང་དུ་སྨྲ་བ་ཡི། །བྱིས་རྣམས་མི་རྒན་རྣམས་ཀྱིས་གཙེ་བ་བཞིན། །ཆོས་གྲོགས་རོང་ཐའི་བླ་མ་དེས་བསྐུལ་ནས། །སྤྲང་སྨྱོན་གང་དྲན་རྣམ་རྟོག་གང་བབ་བྲིས། །དགེ་བས་ཉམ་ཐག་མ་རྒན་འགྲོ་དྲུག་ཀུན། །སྲིད་མཚོ་རྣམ་གྲོལ་ཞི་བའི་གནས་ཐོབ་ཤོག །ཕྲིན་ཡིག་བྱིས་པའི་ཅ་ཅོ་འདི་
དག་ཀྱང༌། །བསྐུལ་བ་པོ་ཡི་རྣ་བ་གཙེར་གྱུར་ཅིག །ཅེས་པའང་བཙུན་པ་གུ་རུ་ཡེ་ཤེས་ཀྱིས་སྐྱེས་དང་བཅས་ཏེ་ཡི་གེའི་ལམ་ནས་བསྐུལ་བ་ལྟར་འཇིགས་མེད་བསྟན་ཉིས་ཤར་མར་བྲིས་པ་མདྒ་ལཾ།། ༈ །།དགེ་ཚོགས་ས་ཆེན་ཡངས་པའི་མངལ་ནས་འཁྲུངས། །སངས་རྒྱས་ཆོས་ཚུལ་ཉི་མའི་འོད་ཀྱིས་ཕྱེ། །མཁྱེན་བརྩེའི་འདབ་མ་ཀུན་ནས་དཀྱུས་རིང་བ། །མི་ཡི་པདྨ་དེ་ལ་མཆིད་འདི་གསོལ། །བསིལ་ལྡན་ལྗོངས་འདི་སྣ་ཚོགས་རིག་གནས་ཀྱི། །རིན་ཆེན་མང་པོས་བརྒྱན་པས་འཕགས་ཡུལ་དང༌། །བགོ་སྐལ་མཉམ་དེ་འཇམ་མགོན་ས་སྐྱ་པའི། །བཀའ་དྲིན་བདུད་རྩི་དཀར་པོའི་ཆ་ཤས་ལགས། །འཇིག་རྟེན་མིག་དེའི་རྣམ་ཐར་ནོར་བུའི་ཕྲེང༌། །མགུལ་བར་བཞེས་ནས་རྒྱལ་བསྟན་བཤད་སྒྲུབ་ཀྱི། །བྱ་བས་ངལ་མེད་རིང་དུ་བྲེལ་བ་ཁྱོད། །སྐུ་ཁམས་བདེ་བར་བཞུགས་པས་ཡིད་རབ་དགའ། ཁྱོད་ནི་གཉིས་མེད་གསུང་བའི་ཆོས་ལ་དགྱེས། །ལུང་གི་སྒྲ་ཙམ་སྨྲ་ལའང་གུས་པས་འདུད། །ཉུང་ངུ་ཤེས་པའང་གཅེས་སྤྲས་ཡུལ་དུ་དགོངས། །ཚོང་དཔོན་རིན་ཆེན་རྒྱུས་ལ་མཁས་པ་བཞིན། །དེ་སླད་ཤིན་ཏུ་དམན་ཞིང་ཉམ་ཆུང་བ། །བདག་འདྲའནག་ཐུབ་པའི་ལེགས་བཤད་ཚིག་འགའ་ཙམ། །སྨྲ་བ་གཅིག་པུའི་རྒྱུ་མཚན་ཉེར་བཟུང་སྟེ། །གཟིགས་པར་དགོངས་ཤིང་ཕྲད་ལ་དོན་གཉེར་མཛད། །འོན་ཀྱང་བདག་ནི་ལས་ཀྱི་ཤ་ཟས་གཙེས། །སྣ་ཚོགས་ནད་ཀྱི་ཚོར་བས་ལུས་སེམས་དཀྲུགས། །འཆད་ལ་སྤྲོ་མེད་སྒྲུབ་ལ་མོས་དང་བྲལ། །
ཉིན་མཚན་ཀུན་ཏུ་སྡུག་བསྔལ་འབའ་ཞིག་སེམས། །རྒ་བས་ངལ་ཞིང་ན་བས་དུབ་པའི་ཡིད། །ལང་ལོང་འདུ་འཛིའི་ཁུར་པོ་མི་ཐེག་ཕྱིར། །མི་མང་མི་འཕྲད་སྨྲ་མང་མི་ཐོས་པར། །རི་དྭགས་བཞིན་དུ་བསྐུང་ནས་ཉལ་བར་དགའ། །རང་གི་ནུས་པ་ཇི་བཞིན་ཆོས་ཚིག་གི༌།སྐྱེས་བཟང་ཅུང་ཟད་ཅིག་ནི་ཡོངས་འཛིན་ལོར། །ཕུལ་བ་དེ་ལགས་མ་འོངས་དུས་སུ་ཡང༌། །ལེགས་བཤད་མཆོད་སྤྲིན་སྟོབ་པའི་སྨོན་ལམ་འདེབས། །ད་རེས་ཁོ་བོ་འགྲུལ་རྒྱ་བསྡམས་པ་དང༌། །གཅིག་ངོ་བཟུང་ན་གཞན་ངོ་བཟློག་དཀའ་བའི། །ཚུལ་འདི་ཁྱོད་ཀྱིས་མི་མཁྱེན་མི་སྲིད་ཅིང༌། །བརྩེ་ཆེན་ལྡན་ཕྱིར་ཕུར་ཚུགས་མཛད་མི་འཚལ། །ལུས་ནི་སྒུར་ཞིང་བྱད་བཞིན་གཉེར་མས་ཁྱབ། །ཤིན་ཏུ་མི་སྡུག་མཐོང་ན་སྐྱུག་བྲོ་བ། །བདག་འདྲ་མཐོང་བས་ཅི་བྱ་དེ་ལས་ནི། །འབུམ་འགྱུར་ལྷག་པའི་མན་ངག་ཚིག་འགའ་གསོལ། །བསྟན་འཛིན་རྣམས་ཀྱིས་ངེས་པར་བྱ་བ་ནི། །རྒྱལ་བའི་བསྟན་པ་བཤད་དང་སྒྲུབ་པ་སྟེ། །བཤད་སྒྲུབ་མེད་ན་ལུང་རྟོགས་ཅི་ཡིས་འཛིན། །དམ་པའི་ལམ་སྲོལ་འཛིན་ན་དེ་ལྟར་དགོངས། །ཚུལ་བཞིན་མ་བསྒྲུབས་ཆོས་ཀྱིས་ཇི་ལྟར་གྲོལ། །བསྒྲུབ་བྱ་མ་ཤེས་སྒྲུབ་པ་ཅི་ལ་བྱེད། །བདེ་གཤེགས་ཆོས་ཚུལ་མ་ཐོས་མི་ཤེས་ཏེ། །འཇུག་རིམ་མ་ནོར་མཛད་ན་དེ་ལྟར་དགོངས། །ཐོས་པས་སྒྲུབ་ལ་བག་ཆགས་འཇོག་པ་དགོས། །སྒྲུབ་པས་མང་ཐོས་སྙིང་པོ་ལོན་པ་དགོས། །ཐོས་བསམ་སྒོམ་གསུམ་རྟ་ཤིག་ཕྲུག་འདྲ་དགོས། །བརྩོན་པ་དོན་ཡོད་མཛད་
ན་དེ་ལྟར་དགོངས། །ཤེས་ཀྱང་ཚིམ་སླ་མི་བྱ་ཞིབ་ཏུ་སྦྱང༌། །རྟོགས་དཀར་གྱུར་ཀྱང་མི་ཞུམ་ཡུན་དུ་བསླབ། །མི་དྲག་མི་དལ་ཆུ་བོའི་རྒྱུན་བཞིན་བརྩོན། །ཐོས་པའི་ལོངས་སྤྱོད་གསོག་ན་དེ་འདྲ་དགོས། །མཁས་པའི་ལུགས་མང་མ་འཛིང་ཞིབ་མོར་དཔྱོད། །གང་ལའང་ཆགས་སྡང་དབང་གིས་རིས་མི་གཅོད། །རང་ལུགས་ངོས་བཟུང་ངེས་པ་མི་འཕྲོག་བྱ། །ཕ་ཆོས་གྲུབ་མཐའ་འཛིན་ན་དེ་འདྲ་དགོས། །བློ་སྣ་མི་མང་འདུན་མ་གཅིག་ཐོག་བཞག །ངང་ཐུང་མི་བྱེད་སེམས་ཁོང་གློད་ལ་བསྒྲུབ། །རེ་དོགས་མི་གཙུབ་གླང་པོའི་ལྟ་སྟངས་བྱ། །སྒོམ་སྒྲུབ་སྙིང་པོར་མཛད་ན་དེ་འདྲ་དགོས། །ཏིང་འཛིན་བརྟན་ན་འདུ་འཛིས་ཡིད་མི་འཕྲོག །སྙིང་རྗེ་འབྱོངས་ན་བདེ་སྡུག་རྐྱེན་སྣ་ཐེག །མངོན་ཤེས་གྲུབ་ན་བརྩམ་པ་འབྲས་བུར་བཅས། །འཁོར་མང་སློབ་ཚོགས་སྡུད་ན་དེ་འདྲ་དགོས། །བདེན་ལ་རབ་གནས་སྐྱེ་བོས་ཚད་མར་འཛིན། །སྤྱི་སྙོམས་ཆེ་བས་ཀུན་གྱིས་མ་བཞིན་འཁུར། །སྒམ་ཞིང་ཟབ་པས་འཁོར་གྱིས་ཡོང་མི་བརྙས། །ཆེན་པོའི་གོ་ས་སྐྱོང་ན་དེ་འདྲ་དགོས། །བདག་ལ་ཆོས་མེད་འཇིག་རྟེན་ཤེས་པ་མེད། །འོན་ཀྱང་གནག་རྫིས་རྒྱལ་པོའི་ཕྱུགས་བགྲང་ལྟར། །བསྙད་འདི་དམ་པའི་མན་ངག་ལ་བརྟེན་ཕྱིར། །ཐུགས་ལ་བཅང་ན་འཕྲོད་པར་འགྱུར་བ་སྙམ། །དེ་སྐད་ཀློང་ཆེན་བརྒྱུད་པའི་གྲལ་མཐའ་པ། །ཕྱི་རྐྱེན་དབྱར་གྱི་དགའ་བས་སེམས་བྲིད་ཅིང༌། །ནང་རྐྱེན་ནད་ཀྱི་ཟུག་རྔུས་ཡིད་གདུངས་པའི། །དུ་མ་དགོད་དེས་དབེན་རིར་འབད་ནས་
བྲིས། །དེང་སང་དཔྱིད་ཀྱི་རླུང་ཆེན་ལྡང༌། །དབྱར་ཀ་འབྱུང་བའི་རྟེན་འབྲེལ་ལགས། །བདག་ཀྱང་འདི་ལྟར་ཅ་ཅོ་སྒྲོགས། །དགེ་ལེགས་འཕེལ་བའི་རྟེན་འབྲེལ་ལགས། །ཧ་ཧ།། ༈ །།བློ་གྲོས་སྣང་བ་འབུམ་འཇོ་བས། །ཕྱིན་ཅི་ལོག་བློའི་མུན་ནག་ཆེ། །འཇོམས་མཛད་འཇམ་མགོན་ཉི་ཟླ་ལ། །བཏུད་ནས་མི་རྟག་ཚུལ་བཤད་བྱ། །མལ་ཁྲིའི་ཐ་མ་ཞིག་ལ་རང་འདུག་སྟེ། །བཞིན་གྱི་གཟི་མདངས་ཉམས་པའི་གདོང་པ་ནི། །གཤིན་རྗེའི་གྲོང་ཁྱེར་ཆེན་པོར་མངོན་ཕྱོགས་ཚེ། །འཆི་བ་དེ་རིང་འོངས་ཞེས་སྡུག་བསྔལ་སྐྱེ། །བསགས་པའི་ལོངས་སྤྱོད་མཐའ་དག་ཀུན་སྤངས་ཏེ། །ཉེ་དུ་མཆི་མ་ཅན་གྱིས་མཐའ་སྐོར་ཞིང༌། །གཏམ་གྱི་ཐ་མ་སྨྲ་བར་ཞུགས་པའི་ཚེ། །ང་འདྲའི་སྐལ་ངན་མེད་ཅེས་སྙམ་སེམས་བྱེད། །གླིང་བཞིའི་ཕུན་ཚོགས་ཀུན་ལ་དབང་བསྒྱུར་ཀྱང༌། ཁབ་དང་སྐུད་པ་ཙམ་ཡང་མི་དབང་བར། །གཅེར་བུ་ལག་པ་སྟོང་པར་འགྲོ་བའི་ཚེ། །འཆི་བདག་ད་རེས་སླེབས་ཅེས་སྙིང་ཁམས་གཡོ། །མི་ཚེ་གང་པོར་གསོས་གསོས་བསྐྱངས་བསྐྱངས་བའི། །སྒྱུ་ལུས་སྒྱུ་མའི་ཁང་པ་ཤུལ་དུ་བཞག །གཅིག་པུས་ཚུགས་མེད་པར་འགྲོ་ཙ་ན། །བར་དོའི་འཕྲང་རིང་ཆེན་པོར་འོ་རེ་བརྒྱལ། །ཕོ་གྲུང་ཞ་ཆུས་སྒྲུབ་ལ་མཁས་མོད་ཀྱང༌། །འཆི་ཚེ་བློ་གདེང་ཐེབས་པ་མི་འདུག་ན། །འཆི་བདུད་ཞགས་པ་ནག་པོས་བཏབ་ཙ་ན། །འཆི་བའི་སྐྱེས་ཆེན་བཟློག་མཁན་དཀའ་མོ་ཡོད། །འཇིགས་རུང་དམྱལ་བའི་གྲོང་སྒོ་མཐོང་ཙ་ན། །སྙིང་ལ་མྱ་ངན་ཤུམ་ཤུམ་
བྱེད་པའི་ཚེ། །ཕྱི་མའི་གྲབ་ཤོམ་སྔ་ནས་མ་བྱས་ཞེས། །འགྱོད་པའི་མེ་ཆེན་འབར་བའི་དུས་ཤིག་འོང༌། །རྣམ་ཤེས་མི་རྟག་མགྲོན་པོ་ལས་དབང་སོང༌། །སེམས་མེད་རོ་སྒོག་སྐམ་པོ་ཤུལ་དུ་ལུས། །སྐྲ་སེན་རི་ལུང་མང་པོར་འཐོར་བའི་ཚེ། །ཆོས་བརྒྱད་བསྒྲུབ་ལ་སྙིང་པོ་ཅི་འདུག་སོམས། །བསགས་པའི་ནོར་གྱིས་མི་བསྟུངས་འཆི་བའི་གནས། །བཙན་པོ་གཡུལ་གྱིས་མི་བཟློག་གཤིན་རྗེའི་ཁྲིམས། །སྣ་ཚོགས་ཐབས་ཀྱིས་བཅོས་མེད་སྐྱེ་ཤིའི་འཕྲང༌། །འདི་ལས་ཐར་ཐབས་ལྷ་ཆོས་རིན་པོ་ཆེ། །ལྷ་ཆོས་ལོ་ཟླར་གྲབ་ཤོམ་བྱས་བྱས་ནས། །ག་ལེར་ག་ལེར་བསྒྲུབ་རྒྱུ་མི་འདུག་སྟེ། །ལྷ་ཆོས་སེམས་ཀྱི་སྟེང་ནས་འཇོག་རྒྱུ་འདི། །མཉམ་མེད་རྒྱལ་བ་གོང་མའི་ཚུལ་ལུགས་ཡིན། །འགྲོ་འདུག་ཇི་ལྟར་བྱས་ཀྱང་ལྷ་ཆོས་བསྒྲུབ། །སྤྱོད་ལམ་གང་བྱེད་དམ་པའི་ཆོས་སུ་དྲིལ། །ཟ་ཉལ་འཆག་ཚད་བྱང་ཆུབ་ལམ་གྲོགས་སུ། །ཤེས་འདི་བྱང་ཆུབ་སེམས་དཔའི་ངང་ཚུལ་ཡིན། །དགེའོ།། ༈ །།ན་མོ་མཉྫུ་ཤྲི་ཡེ། །གྲོང་ཁྱེར་ཝ་ར་ཎ་སིར་སངས་རྒྱས་ཀྱིས། །བདེན་བཞིའི་ཆོས་འཁོར་བསྐོར་བའི་ཐོག་མ་རུ། །འདི་ནི་སྡུག་བསྔལ་ཞེས་གསུངས་དེ་ཡི་ཕྱིར། །རང་གི་ལོངས་སྤྱོད་ཆ་རྒྱུས་ཤེས་པའང་དཀའ། །ཚེ་རབས་ཐོག་མ་མེད་ནས་ད་བར་དུ། །རང་ཉིད་གར་མ་སྐྱེས་ཤིང་ཅི་ལྟ་བུར། །མ་ཤི་ཚུལ་དེ་བསམ་ནས་མི་སྐྱོ་བར། །གཞན་གྱི་འཆི་བ་མཐོང་ནས་སྐྱོ་མི་རིགས། །ད་དུང་ཚེ་བསོགས་ནོར་དང་སྙིང་
བརྩེའི་གཉེན། །ཐམས་ཅད་ཤུལ་དུ་བཞག་ནས་ཚེ་ཕྱི་མའི། །ལམ་རིང་གཅིག་པུར་བླང་སྟེ་འགྲོ་དགོས་ན། །ཡི་མུག་སུ་ལ་བྱེད་དེ་སུ་ཡིས་བྱེད། །འཆི་བས་མདུན་བསུ་གསོན་ལ་ཞེན་ཆགས་ཤིང༌། །གསོན་པོའི་འབབ་སྟེགས་འཆི་བས་ཡི་མུག་པ། །འདི་འདྲའི་དབང་གིས་ཡང་དང་ཡང་དུ་ནི། །འཆི་བའི་བྱུར་སྡུད་ཕུང་པོ་འདི་འདྲ་འཐོབ། །ལུས་ལ་མི་ཆགས་འབྲལ་བས་མི་གདུང་སྟེ། །ཚུལ་དེ་མ་ཤེས་རྒྱུད་ལྔའི་འཇིག་རྟེན་དུ། །ལས་ཀྱིས་བསྡུས་ཤིང་ལས་ཀྱིས་ཁ་ཕྲལ་བའི། །འགྱུར་བ་མཐའ་དག་སྡུག་བསྔལ་སྣོན་མར་འཆར། །རླུང་མར་ནང་དུ་མར་མེ་གཞོན་ནུ་དང༌། །སྣུམ་ཟད་མར་མེ་ངང་གིས་རྒས་པ་གཉིས། །འདི་འཆི་ཚུལ་མིན་འདི་ཉིད་ཚུལ་བཞིན་ཞེས། །དབྱེ་བ་ཨེ་འདུག་བསམ་བློ་ལེགས་པར་ཐོངས། །དེ་ལྟར་དུས་མིན་གློ་བུར་རྐྱེན་དབང་དང༌། །ན་ཚོད་ལོ་མང་ཐལ་ནས་ཤི་བ་གཉིས། །འདི་འདྲ་མི་འཚམས་འདི་འདྲ་འཇིག་རྟེན་སྤྱིའི། །དཔེ་ཁེབས་ཡིན་ཞེས་དབྱེ་བ་བྱེད་རྒྱུ་ཅི། །འཆི་འདི་སྡུག་བསྔལ་ནང་ནས་ཟིལ་ཐིགས་ཙམ། །དེ་འདྲའི་སྡུག་བསྔལ་བསམ་ཡས་མི་ཟད་ཕྱིར། །འཁོར་བ་སྡུག་བསྔལ་རྒྱ་མཚོ་ཞེས་བྱ་སྟེ། །རྒྱ་མཚོར་ཉལ་ནས་ཐིགས་པས་ཅི་ཞིག་འཇིགས། །སྐྲག་ཅིག་ཤེས་ན་རང་རེའི་ཐོག་མེད་ཀྱི། །སྐྱེ་ཤིའི་གནས་འདི་ཧྲིལ་གྱིས་སྡུག་བསྔལ་ཕྱིར། །སྡུག་བསྔལ་མཐར་བྱེད་སྟོན་པ་བླ་མེད་ཀྱི། །བསྟན་དང་མཇལ་དུས་ཅི་ཟིན་ཅི་ཐོབ་དགོས། །རང་གིས་མཚད་
ནམ་མཁའི་གར་ཁྱབ་ཀྱི། །འགྲོ་ཀུན་དྲིན་གྱིས་བསྐྱངས་པའི་མ་རྒན་ཏེ། །དེ་དག་འདི་འདྲའི་སྡུག་བསྔལ་མཚོར་བྱིངས་པ། །བསམ་ཞིང་བསམ་ན་སྐྱོ་རྒྱུ་མང་པོ་འདུག །འོན་ཀྱང་རྒྱལ་བ་ཀུན་གྱི་ཐུགས་གསང་མཛོད། །སེམས་ཅན་ཕོངས་པ་སྐྱོབ་པའི་གཉེན་གཅིག་པུ། །རྣམ་དག་བྱང་ཆུབ་སེམས་མཆོག་ཡིད་བཞིན་ནོར། །བསྒོམ་རྒྱུ་ཡོད་བཞིན་མྱ་ངན་བྱ་མི་དགོས། །སེམས་འདི་སྐྱེས་ཚད་འཇིག་རྟེན་དམིགས་བུ་སྟེ། །གཞན་ཕྱིར་སྙིང་བརྩེ་ཡོད་ན་ངེས་པར་སྒོམས། །ཤེས་ཆུང་ཉམས་མྱོང་མེད་པའི་སྤྲང་པོའི་ཁར། །ཞལ་གདམས་རེ་བ་མི་འཐད་དེ་ལྟ་ནའང༌། །གདུངས་བ་ཡིད་གསོ་བྱེད་པའི་སྐད་ཆ་ཞིག །དགོས་ཞེས་སྲང་ཚེས་བསྐུལ་ངོར་སྨྱོན་པས་བྲིས། །དགེ་ཞིང་བཀྲ་ཤིས།། ༈ །།བླ་མ་ལ་ཕྱག་འཚལ་ལོ། །ཉོན་དང་བསོད་ནམས་རྡོ་རྗེ་བགྲེས་པོ་ཁྱོད། །སྔོན་བསགས་བསོད་ནམས་ཆེ་བས་དལ་རྟེན་ཐོབ། །འཕྲད་དཀའ་རྒྱལ་བསྟན་རིན་ཆེན་གླིང་དང་ཕྲད། །ད་རེས་བརྒལ་ནས་འདི་འདྲ་རྙེད་པ་དཀའ། ཁྱོད་ཀྱིས་ངན་སོང་འགྲོ་ལ་ཕར་ལྟོས་དང༌། །དྲག་ཤོས་རྟ་དང་གླང་པོ་མཆོག་རྣམས་ཀྱང༌། །ཡིག་དྲུག་ཚར་གཅིག་འདོན་པའི་མཐུ་མེད་ཕྱིར། །ད་རེས་སྨྲ་ཤེས་དོན་གོ་དོན་ཡོད་མཛོད། །ཐུགས་རྗེའི་དབང་ཕྱུག་མཐུ་སྟོབས་བསམ་ཡས་གཏེར། །སྤྱན་རས་གཟིགས་འདྲ་བོད་ཀྱི་ལྷར་བཞུགས་ཀྱང༌། །རྗེས་འཛིན་རྒྱུ་ཚོགས་རང་གིས་མ་བསྒྲུབས་པས། །མགོན་
མེད་ཉེས་སྤྱོད་རྒྱ་མཚོར་བྱིང་བ་མང༌། །གྲོགས་ཁྱོད་སྐུ་ཚེ་ཉི་ཟླའི་མཆེད་པོར་ཤོག །འོན་ཀྱང་སྙིགས་མ་ལྔ་བདོའི་དུས་མཐར་སྐྱེས། །ཚེ་ལོ་བདུན་ཅུའི་ཤུལ་རིང་རྒྱབ་ཏུ་བཞག །དགྲ་ཆེན་འཆི་བ་ནམ་འོང་མི་ཤེས་ཀྱིས། །ཚེ་འདིའི་འདུན་མ་མགྲོན་ཁང་སོ་ནམ་ལྟར། །དོན་ཆུང་འདི་ལ་རང་མགོ་མ་སྐོར་བར། །གཏན་བདེ་རིན་ཆེན་གླིང་དུ་འཁྲིད་པའི་མགོན། །ཐུགས་རྗེ་ཆེན་པོའི་ཞབས་ལ་རྩེ་གཅིག་འཇུས། །ལུས་ཀྱི་སྤྲེའུ་བག་ཡོད་ཁྱིམ་དུ་ཆུག །ངག་གི་ཟོང་ངན་མ་ཎིའི་བརྒྱགས་སུ་སྒྱུར། །སེམས་ཀྱི་བུམ་པ་དགེ་བའི་བདུད་རྩིས་ཁོངས། །གཅིག་པུར་འགྲོ་ཚེ་མཁོ་བའི་དུས་ཞིག་འབྱུང༌། །བྱང་ཆུབ་སེམས་དང་ཟབ་མོའི་ལྟ་བ་དང༌། །ཐེག་པའི་རྒྱལ་པོ་འོད་གསལ་རྫོགས་ཆེན་སོགས། །ཇི་བཞིན་ཤེས་པའི་ཉམས་མྱོང་དཀའ་མོད་ཀྱང༌། །རླབས་ཆེན་སྨོན་ལམ་ཐོབ་དང་དོན་ཆེར་མཆིས། །བསོད་ནམས་དཔྱིད་ཀྱི་དུས་སུ་ཞིང་རྨོ་བཞིན། །འཕྲལ་དང་འཕྲལ་ལ་འབྲས་བུ་མི་མཐོང་ཡང༌། །གྲོགས་མེད་གཉེན་མེད་འཇིག་རྟེན་ཕ་རོལ་དུ། །སྟོན་ཀའི་ལོ་ཏོག་ལེགས་བཞིན་སྤྱད་དུ་ཡོད། །དེ་ཕྱིར་སྙིང་ནས་བརྩེ་བའི་སྙན་བསྐུལ་འདི། །དོན་མེད་བར་སྣང་རླུང་བཞིན་མ་སོང་བར། །བརྗོད་དོན་ཐུགས་ཀྱི་རས་ལ་ཚོན་འཕོས་བཞིན། །བཟུང་ནས་ཚེ་མཇུག་ཆོས་ཀྱིས་འདའ་བར་མཛོད། །སྤྲང་རྒན་གྱིས་བྲིས་པ་མངྒ་ལཾ།། ༈ །།བཤད་ན་ཉམས་མྱོང་མེད་རུང་ཆོས་རྒྱུས་བདོག །བཤད་རྒྱུ་
ཆོས་མཐུན་ཡིན་རུང་ཉན་མཁན་དཀོན། །གདམས་མཁན་ཉེས་པ་སྟོང་གིས་གང་ནའང༌། །གདམས་དོན་ཉམས་སུ་བླང་ན་སྐྱོན་ཡོད་མིན། །དང་པོ་དཀོན་མཆོག་གསུམ་གྱི་སྐྱབས་ཞབས་སུ། །ཕན་བདེའི་བསིལ་གཡབ་འཁོར་བའི་ཚུལ་མཐོང་ནས། །གཙུག་ཕུད་སྙེ་མའི་མཆོད་པ་སངས་རྒྱས་ལ། །ཕུལ་དེས་མི་ལུས་སྐལ་པ་བཟང་པོར་བྱས། །འོན་ཀྱང་འཕགས་པའི་དགེ་བསྙེན་ཆེ་རྣམས་ཀྱི། །སྤུན་ཟླ་མིང་དོན་མཐུན་པར་བྱེད་སྙམ་ན། །རྣམ་དག་བསླབ་པའི་གཞི་ལྔ་རང་སྲོག་དང༌། །བརྡོས་ནས་གཅེས་པར་བཟུང་བ་གནད་དུ་ཆེ། །དམར་སེར་གོས་ཀྱི་མདངས་ལ་རབ་དགའ་ནས། ཁས་ལེན་མིག་འཕང་གྱེན་ལ་ཕྱོགས་ན་ཡང༌། །བག་ཡངས་ནག་ཆང་རོལ་བའི་ཉམས་དགའ་ལ། །བལྟས་ནས་ལག་ལེན་ཐུར་དུ་སོང་བ་མང༌། །དམ་པ་མིན་པས་ཤིན་ཏུ་བསྲུང་དཀའ་དང༌། །དམ་པར་གྱུར་པས་ནན་གྱིས་སློབ་དགོས་པ། །བསླབ་པ་འགངས་སུ་ཆེ་བའི་རྟགས་ཡིན་པས། །རང་གི་རིན་ཆེན་ཆུད་ཟོས་མ་བྱེད་ཨང༌། །ཇི་སྲིད་འཚོའི་བར་དུས་མཚམས་གཞན་མེད་པའི། ཁྲིམས་ཀྱི་ཆུས་སྲིད་ལ་དབང་ཐུབ་པའི་སྲས། །རྟག་ཏུ་བསླབ་པའི་ནོར་མེད་མ་རབས་ཀྱི། །མི་དང་ཀུན་སྤྱོད་འདྲེ་བ་སྨྱོན་པ་ཡིན། །རིན་ཆེན་མེ་ལོང་ཕྱིས་འདྲའི་དགའ་ཚལ་ནང༌། །ཡིད་འཛིན་མེ་ཏོག་ཆོ་ལོ་ལ་རྩེ་ཞིང༌། །འཆི་མེད་བདུད་རྩིའི་ཁྱད་པར་མང་སྤྱད་ནས། །ལྷག་མ་ཐམས་ཅད་ཟད་པའི་མྱང་འདས་
དབྱིངས། །འཇུག་པའི་ཐེམ་སྐས་ཡོན་ཏན་མཐའ་དག་གི༌།རྩ་བ་ཚུལ་ཁྲིམས་བོར་ནས་གདོང་དམར་མའི། ཁོལ་པོ་རྒྱབ་སྐྱར་སོང་ན་ཆེས་ཕངས་པས། །སྐྱིད་ཀྱིས་རང་སྡུག་མ་ཉོ་སྙིང་ལ་ཕུར། །ཚུལ་ཁྲིམས་ཡོད་ན་ཐོས་ཉུང་བློ་དམན་ཡང༌། །ཏིང་འཛིན་ཤེས་རབ་སྐྱེད་ལ་དཀའ་བ་མེད། །རྩ་བ་མེད་ལ་ལོ་མེད་འབྲས་བུ་མེད། །དེ་སླད་ལམ་གྱི་རྟེན་འབྲེལ་མགོ་ནས་སྒྲིགས། །ཟ་བདེ་མཁུར་བར་འཚམས་པའི་ཟན་ཆང་དང༌། །གོ་བདེ་བློ་དང་མཐུན་པའི་ཚིགས་བཅད་འདི། །མ་འབོར་མ་བརྗེད་ཡིད་ལ་ཉ་ར་གྱིས། །མཁོ་ཆེ་བེད་ཆོད་ངེས་པའི་ནོར་གཅག་ཡིན། །སྨན་ལྷའི་ངོར། །བསྟན་པའི་ཉི་མས་བྲིས། །དགེའོ། །བཀྲ་ཤིས།། ༈ །།ཚེ་འདིའི་བྱ་བ་མཆིལ་མའི་ཐལ་བ་བཞིན། །འབོར་བའི་ཐབས་ཚུལ་བསམ་གྱིས་མི་ཁྱབ་ཀྱང༌། །རྩ་བ་གསུམ་དང་རྒྱུ་མཚན་རྣམ་པ་དགུ། །ཐག་བཅད་གསུམ་གྱིས་འཆི་བ་བསམ་བྱས་ན། །ཞེན་ལོག་སྐྱེ་བའི་འབྱུང་གནས་ཆེན་པོ་ཡིན། །ཚེ་སྲོག་མི་རྟག་ངེས་པར་འཆི་བ་དང༌། །ཡུན་རིང་མི་སྡོད་མྱུར་དུ་འཆི་བ་དང༌། །འཆི་ཚེ་ཆོས་མིན་གང་གིས་མི་ཕན་ཞེས། །ཡིད་ལ་བྱ་བ་རྩ་བ་རྣམ་གསུམ་ཡིན། །འཆི་བདག་བདུད་ལ་བཟློག་ཐབས་མེད་པ་དང༌། །སྐྱེས་བུའི་ཚེ་ལ་སྣོན་པ་མེད་པ་དང༌། །གཤིན་རྗེའི་ཁྲིམས་ལ་ཕྱིར་བཞག་མེད་པ་གསུམ། །ངེས་པར་འཆི་བའི་རྒྱུ་མཚན་གསུམ་ཞེས་བྱ། །ཚེ་ཡི་འདུ་བྱེད་ཡིད་བརྟན་མེད་པ་དང༌། །སྒྱུ་མའི་ལུས་ལ་སྙིང་པོ་མེད་པ་དང༌། །གསོན་
རྐྱེན་ཉུང་ཞིང་འཆི་རྐྱེན་མང་བ་གསུམ། །ནམ་འཆི་ངེས་པ་མེད་པའི་རྒྱུ་མཚན་ཡིན། །འཆི་ཚེ་ལུས་དང་གཏན་བྲལ་བྱེད་པ་དང༌། །ཉེ་དུ་འབྲེལ་བས་ཕན་པ་མེད་པ་དང༌། །ལོངས་སྤྱོད་འབྱོར་པ་ཤུལ་དུ་འཇོག་པ་གསུམ། །འདི་སྣང་བསྒྲུབ་ལ་དགོས་པ་མེད་པའི་རྟགས། །ལྷ་ཆོས་བསྒྲུབ་པར་བློ་ཐག་བཅད་པ་དང༌། །མྱུར་དུ་དམ་ཆོས་བརྩོན་པར་ཐག་བཅད་དང༌། །འཆི་ཚེ་ཕན་ངེས་ཆོས་ཞིག་བསྒྲུབ་དགོས་ཞེས། །འདུན་ཕུགས་བཅའ་བ་ཐག་བཅད་རྣམ་གསུམ་ཡིན། །ཡུན་རིང་དུས་ནས་སྲིད་པའི་གྲོང་ཁྱེར་དུ། །ཆོས་བརྒྱད་བྱ་བ་ཤི་སྤར་འཐམ་ན་ཡང༌། །ཕན་པའི་སྙིང་པོ་རྡུལ་ཙམ་མི་འདུག་ན། །འདི་ལ་སྤར་འཐམ་བྱེད་རྒྱུ་ཅི་ཞིག་ཡོད། །དེ་རིང་མལ་གྱི་ཐ་མ་ལ་འདུག་སྟེ། །ཕྱི་མའི་གྲོང་ཁྱེར་ཆེན་པོར་འགྲོ་དགོས་ན། ཁྱོད་ལ་མི་འཇིགས་དཔའ་གདེང་ཅི་ཞིག་ཡོད། །བསམ་བློ་ནང་དུ་ཐོང་དང་གོ་རྒྱུ་འདུག །བུག་པ་འདག་ཞལ་བྱས་ནས་ཀུན་འབྱུང་སྒོམ། །ཐུགས་དམ་གཙིགས་སུ་མཛད་པའི་རྟོགས་ལྡན་པ། །ཐུགས་རྒྱ་ཆེ་རུ་སོང་བའི་འདུག་ཆས་འདི། །འཆི་བ་ཐུགས་ལ་མ་བཞག་བཀའ་དྲིན་ཡིན། །ལྟ་བ་ཟབ་མོ་རྟོགས་རུང་མ་རྟོགས་རུང༌། །གནས་ལུགས་ཟབ་མོ་མཐོང་རུང་མ་མཐོང་རུང༌། །འཆི་བའི་འགྲོ་ཆས་ཁོ་ན་འདུན་མའི་རྩེར། །གཏད་ན་དམ་པའི་ལྷ་ཆོས་ལག་ན་འདུག །འཆི་ཆོས་བསྒྲུབ་ལ་ཤོམ་ར་མི་དགོས་ཏེ། །འགྲོ་ཞོར་འདུག་ཞོར་གནས་སྐབས་
ནམ་ཡང་རུང༌། །བསམ་པ་བཟང་པོ་གཅིག་ལས་མི་འདའ་ན། །དམ་པའི་ལྷ་ཆོས་ལེགས་པར་བསྒྲུབས་ཅེས་བྱ། །ཐུགས་ལ་ཟུངས་ཤིག་སྐལ་པ་ཅན། །སེམས་ལ་འཆོངས་ཤིག་བློ་གྲོས་བཟང༌། །སྤྲང་ཕྲུག་སྨྱོན་པའི་སྨྱོན་གཏམ་འདི། །མ་བརྗེད་མ་བརྗེད་སྐུ་ཚེ་རིང༌། །ཞེས་གཞོན་ནུ་འཇིགས་མེད་པས་བྲིས་པ་དགེའོ།། ༈ །།ལག་པ་དལ་མེད་ལང་ཤོར་འཇིགས་མེད་པ། །ལག་བཟང་མི་མཁོ་དགུ་མཁོའི་རྟོགས་ལྡན་དེས། །བསྐུལ་ནས་ཅི་ཀ་ལེ་དང་ཉོ་ཀ་ཐོའི། །ཡིག་རིས་མི་བྲི་ཟེར་བའི་དམ་བཅའ་ཤོར། །བྲིས་ན་ཚོང་དུས་ཇ་ཤོག་ཟད་པ་མེད། །བཤད་ན་རྣམ་རྟོག་འཆར་སྒོ་རྫོགས་དུས་མེད། །བྱས་ན་རྣམ་གཡེང་རྩེད་མོ་ཟིན་དུས་མེད། །ད་ནི་བྱུང་རྒྱལ་མལ་དུ་ཉལ་ན་ལེགས། །ཐོས་ཀྱང་ཐོས་པ་ཕལ་ཆེར་རྟོག་གེའི་གཏམ། །བཤད་ཀྱང་འཆད་ཉན་ཕལ་ཆེར་ཚིག་གི་རོ། །བསྒོམ་ཀྱང་ཉམས་ལེན་ཕལ་ཆེར་སེམས་ཀྱི་བདུད། །ཐམས་ཅད་གོས་མེད་ཤིག་མེད་གཅེར་ཉལ་མཛོད། །མ་ཉན་ཉན་ལོ་ཐོས་ལོ་རྣ་བའི་དགྲ། །ཉན་ན་ཤེས་རྒྱུད་འདུལ་བའི་ཆོས་གཅིག་ཉོན། །མ་སེམས་སྡུག་བསམ་མུག་བསམ་སྟོང་པའི་འདངས། །བསམ་ན་ཉོན་མོངས་སྤོང་བའི་ཐབས་ཤིག་སོམས། །མ་སྒོམ་ས་སྒོམ་རྡོ་སྒོམ་ཉམས་ཞེན་བདུད། །སྒོམ་ན་ཞེན་མེད་ལྟ་བའི་བབ་ཅིག་སྒོམས། །མ་བྱེད་ཕུ་བྱེད་མདོ་བྱེད་རྣམ་རྟོག་དགྲ། །བྱེད་ན་འདུན་མ་ལེགས་པའི་ལམ་ཞིག་བྱོས། །
སྒོམ་ཆེན་སྒོམ་གྱི་མཐོ་སྐད་ཟེང་མ་འདི། །ཉན་ན་འགྲམ་ཆུ་ལྡང་བའི་སྣང་ལུགས་ཞིག །ཡོད་མོད་ཀིམ་པའི་ཤིང་ཐོག་ཟོས་པ་བཞིན། །མྱང་ན་རང་མཚང་རྡོལ་བའི་སྣང་ཤེས་སྐྱེ། །གནས་པའི་དྲེད་མོང་ལག་གདངས་སྦྲེལ་བ་ཡང༌། །དྲན་རིག་ས་ལའི་ནགས་འདབ་མ་སྙེགས་ན། །འགྱུ་དྲན་འཕར་བ་རྔ་ནག་འདིས་སླེབས་ཚེ། །འཕོང་འགོ་ལག་པས་འགེབ་རྒྱུའི་སྡུག་ལ་ཐུག། གཉིད་ཀྱི་མི་རྒན་བྱིས་པའི་མགོ་ཅན་དང༌། །འཕྲོ་རྒོད་མོན་པ་འགྲོ་ཤེས་ཨ་དགེ་སྤྲེལ། །གོལ་སྒྲིབ་ཁྱི་མང་ནང་གི་བན་རྒན་ཁྱོད། །གེགས་སེལ་སྤྱོད་པའི་བེར་རྒ་རིང་པོར་ཟུངས། །གཡོ་མེད་སེམས་ཀྱི་རྒྱ་མཚོ་མེར་བ་འདིར། །ཆེད་འཛིན་གཉེན་པོའི་དབྱུག་མདུང་མ་མཛད་དང༌། །སྤང་བླང་རྟོག་པའི་རྙོག་པ་དྭངས་པའི་ཁམས། །རྩོལ་སྒྲུབ་མེད་པའི་བསམ་གཏན་ཤུགས་ལ་འཆར། །ལྤགས་སྐྱའི་ཕུ་དུང་གྱོན་པའི་དགེ་སྦྱོང་ཁྱོད། །དྲང་སྲོང་རྒྱལ་མཚན་འཛིན་པ་ཡིན་མཆི་ན། །ད་ནི་ཡོན་ཏན་དམ་པའི་རྒྱལ་མཚན་དེ། །ལྟར་སྣང་ཕྱི་ན་མི་འདུག་ནང་དུ་ཚོལ། །གང་ཚེ་སེམས་ཀྱི་གླང་པོ་གཉའ་རེང་པོ། །གདུལ་ན་མི་གཙང་ལུས་ཀྱི་ཁང་པ་ཡང༌། །གྲོང་ཁྱེར་སྐྱིད་པའི་འབྱུང་གནས་ཞེས་བྱ་སྟེ། །དེ་ཚེ་བདག་ཉིད་ཆེན་པོ་ལག་བཟང་ཡིན། །ཞེས་པའང་ཁང་སྐུང་གི་བན་རྒན་མ་ཎི་པས་ཕུལ།། ༈ །།ན་མ་་མུ་ན་ཡེ། །ཕུན་ཚོགས་ཞི་བ་དམ་པའི་ལྡིང་ཁང་ནས། །ཚངས་དབྱངས་ཆོས་
ཀྱི་རྔ་སྒྲ་ལེགས་བསྒྲགས་པས། །ལུས་ཅན་ཕན་བདེའི་དགའ་སྟོན་ལ་འབོད་པ། །མཉམ་མེད་སྐྱོབ་པ་དེ་ཡིས་ཁྱོད་ལ་སྲུངས། །དམ་ཆོས་ཐོས་ཀྱང་རྒྱུད་ལ་མ་སྦྱར་བས། །སྒོ་གསུམ་ཉེས་སྤྱོད་ཁོལ་པོར་རྒས་གྱུར་པ། །བདག་འདྲས་ཆོས་གཏམ་འབུལ་བ་མི་འཚམ་ཡང༌། ཁྱོད་གསུང་མ་བཟློག་ནེ་ཙོའི་མ་ཎི་གསོལ། །འཁོར་བ་ལས་ཀྱི་རི་མོའི་གྲོང་ཁྱེར་ན། །ལུས་རྟེན་མང་སྟེ་མངོན་མཐོ་ཐོབ་པ་ཉུང༌། །ཐོབ་ཀྱང་སྙིང་པོ་ལེན་པ་ཆེས་ཉུང་བས། །སྲིད་འདི་ཆུ་ལྟར་འོག་ཏུ་གཞོལ་བ་ལགས། ཁྱོད་ཀྱིས་ཕུན་ཚོགས་མི་ཡི་བདེ་བ་བརྙེས། །ཐུབ་པའི་ལེགས་བཤད་བདུད་རྩིས་བློ་མིག་སད། །འཕགས་པའི་ཆོས་ལ་རབ་དགའ་ཆེར་འཁྲུངས་པ། །བསོད་ནམས་དམ་པའི་མཐུ་ཡིན་སྟེས་དབང་མིན། །དེ་ལྟ་མོད་ཀྱི་པད་དཀར་ལང་ཚོ་ཡང༌། །སྟོན་ཀའི་སྣང་བས་ལྷག་པར་རྒྱས་པ་བཞིན། །ཡོན་ཏན་ལེགས་ཚོགས་བཤེས་གཉེན་དམ་པའི་མཐུས། །རྒྱས་པར་འགྱུར་གྱིས་དམ་པའི་མགོན་ལ་བསྟེན། །ཆོས་ཚུལ་གསན་ཅིང་ཆོས་ལ་དགའ་བ་དང༌། །ཆོས་མཆོད་ཆོས་ཀྱི་རྗེས་སུ་གོམས་མཛད་ན། །རིན་ཆེན་ཆོས་ཀྱི་བྱིན་རླབས་མི་བསླུ་བས། །སྐུ་ཚེ་བརྒྱུད་མར་དོན་ཆེན་བརྙེས་པར་འགྱུར། །རྒྱལ་པོས་སྐྱེ་དགུ་སྐྱོང་བའི་ཐབས་ཚུལ་ཡང༌། །བག་ཡོད་སྙིང་རྗེ་ལགས་པར་སངས་རྒྱས་གསུངས། །དེ་དག་ཉིད་ཀྱང་ཆོས་མིན་ལ་མེད་ཕྱིར། །ཆོས་ལ་གནས་ཏེ་འཇིག་རྟེན་སྐྱོང་བར་མཛོད། །བདེན་དང་དུལ་
དང་གཏོང་བའི་བསིལ་གྲིབ་ཀྱིས། །འབངས་རྣམས་བཀབ་ན་སྐྱེ་དགུ་བསྐྱང་འགྱུར་གྱི། །ཆོས་མིན་སྤྱོད་པས་མངའ་རིས་སུན་ཕྱུང་ན། །དེ་ཡིས་བདག་ཉིད་མིན་པ་སུ་ཞིག་བསྐྱངས། །སྡིག་སྤྱོད་མེ་ཡིས་འདིར་ཡང་དཔལ་འབྱོར་དང༌། །གྲགས་པའི་དགའ་ཚུལ་ཡིད་འོང་ཀུན་ཉམས་ཏེ། །སླར་ཡང་ས་འོག་མེ་ཡིས་གདུང་འགྱུར་ཕྱིར། །གཉིས་སུ་བདག་ཀྱང་དེ་ཡིས་བསྐྱང་མི་འགྱུར། །ཆབ་སྲིད་རྒྱས་ཤིང་མངའ་རིས་བདེ་བ་དང༌། །གཡུལ་གྱི་ནང་དུ་རྒྱལ་བ་རྙེད་འགྱུར་དང༌། །མཐུ་ཆེན་ལྷ་རྣམས་སྲུང་བ་བྱེད་པ་སོགས། །དགོས་དགུ་མཐའ་དག་ཆོས་ལས་འབྱུང་བར་འགྱུར། །དེ་ཕྱིར་བསྟན་འགྲོའི་དགེ་མཚན་བུང་བའི་གསོས། །ཡོན་ཏན་དྲི་བཟང་རྫོགས་པའི་ལེགས་སྤྱད་ཀྱི། །པདྨ་རྒྱས་འདིས་སྙིགས་མའི་དགུན་ཟླར་ཡང༌། །བློ་མིག་ལྡན་རྣམས་དགའ་བ་སྐྱེད་པར་མཛོད། །རྒྱལ་བས་མཁས་པ་བདེན་པར་སྨྲ་བ་དང༌། །རྨོངས་པ་ངོ་བསྟོད་བྱས་པས་མགུ་འགྱུར་ཞེས། །གསུངས་ཕྱིར་བདེན་པར་སྨྲ་བའི་མེ་ཏོག་འདི། །མི་ཡི་གཙོ་བོ་ཁྱོད་ལ་བདག་གིས་འབུལ། །ཐུབ་རྣམས་ཆོས་ཀྱི་གདུང་ལས་བལྟམས་པ་དང༌། །ལྷ་མིའི་རྒྱལ་སྲིད་ཆོས་ལ་བརྟེན་པ་ཡི། །བདེན་པས་འཇིག་རྟེན་སྐྱོང་བ་ཁྱོད་ཀྱི་དཔལ། །ཀུན་དགའི་ཟླ་བ་གསར་པར་གནས་གྱུར་ཅིག །ཅེས་པའང་བོད་གཞུང་ས་ཆེན་པོའི་གསེར་ཁྲིམས་ཀྱི་ཁ་ལོ་འཛིན་པ་ཇ་སག་མི་དབང་བསོད་ནམས་སྟོབས་རྒྱས་ཀྱི་
ཐུགས་དམ་གསལ་འདེབས་སུ། རྡོ་རོང་གི་སྤྲང་འཆལ་འཇིགས་མེད་བསྟན་པའི་ཉི་མས་བྲིས་ཏེ་ཕུལ་བ་དགེ་བར་གྱུར་ཅིག །དགེའོ།། ༈ །།ན་མོ་གུ་རུ། །བླ་མ་བསོད་ནམས་རྡོ་རྗེའི་བཀའ་མཆིད་དུ། །སྙིང་ལ་ཕན་པའི་གཏམ་ཞིག་བྲིས་ཤིག་ཅེས། །བསྐུལ་ཚིག་དབྱུག་པས་བདག་ཡིད་བརྡུང་མོད་དེ། །རྨོངས་པའི་ལྕེ་འདི་ཉེས་བཤད་རྒྱལ་བ་ལགས། །འོན་ཀྱང་རིག་འཛིན་གོང་མའི་བཀའ་ལུང་གི༌།ལད་མོ་ཤོར་བས་བཏགས་པའི་ཚིག་གི་རྒྱུད། །ཅུང་ཞིག་མགྲིན་པའི་ལམ་ནས་གླུར་བླང་ན། །རྒྱུ་མའི་ལྟད་མོ་བ་བཞིན་དེང་གཟིགས་ཤིག །འཇིག་རྟེན་སྣང་བ་བཀྲ་སྟེ་འཇའ་ཁྱིམ་འདྲ། །འཇའ་ཁྱིམ་རང་བཞིན་མེད་དེ་སྨིག་རྒྱུ་བཞིན། །སྨིག་རྒྱུ་ངོ་བོས་སྟོང་སྟེན་མ་མཁའ་འདྲ། །ནམ་མཁའ་མཚན་མར་མེད་ཀྱང་རྟོག་བཏགས་ཙམ། །རྟོག་བཏགས་གདོད་ནས་ཡིན་མོད་རྟོགས་པ་དཀོན། །མ་རྟོགས་སྲིད་པའི་འཁོར་ལོ་བརྒྱུད་ཅིང་འགྲོ། །འགྲོ་དྲུག་སྡུག་བསྔལ་རྒྱ་མཚོར་ངང་གིས་འཕྱན། །སྡུག་བསྔལ་ལག་རྩེར་འདུག་ཀྱང་བདེ་བར་སྒོམ། །སྡུག་བསྔལ་མྱོང་མཁན་མང་སྟེ་བཟོད་མཁན་དཀོན། །སྡུག་བསྔལ་འདོད་མཁན་མེད་དེ་བཟློག་མཁན་དཀོན། །སྡུག་བསྔལ་བཟློག་འདོད་ཡོད་ན་བཟློག་ཐབས་འབད། །གང་བྱུང་བྱུང་རྒྱལ་བྱས་པས་ཅི་སྟེ་ལྟོ། །ཐར་འདོད་ཚེ་འདི་སྒྲུབ་པ་ཡ་རེ་ཆ། །ཞེན་ལོག་ཚེ་འདི་གཉེར་བ་ཡ་རེ་ཆ། །གྲུབ་ཆེན་འཁྲུལ་པས་དེད་པ་ཡ་རེ་ཆ། །ཡ་ཆའི་ལད་མོ་ཤོར་ན་དགོད་
རེ་བྲོ། །སྙིང་ནས་འཆི་བ་དྲན་ན་འཆི་ཆོས་གྱིས། །ཕྱི་མའི་འགྲོ་བརྒྱགས་བཞེད་ན་ལྷ་ཆོས་རེམས། ཁ་ནས་འཁྲུལ་པ་ཞིག་ལོས་མི་ཕན་གྱི། །རང་དྲིན་རང་ལ་ཆེ་བའི་ཆོས་ཤིག་མཛོད། །བླུན་པོའི་བླུན་སེམས་མགུ་བ་སླ་མོད་དེ། །འཆི་བདག་མགོ་བོ་བསྐོར་རྒྱུ་ཡོད་དོགས་མེད། །རང་སེམས་དབང་པོར་ཐུབ་པའི་ལྷ་ཆོས་ཤིག །མཛད་ན་འཆི་བདག་བཟློག་པའི་ཐབས་ཤིག་ཡོད། །སྔ་དྲོ་ཐར་པ་འདོད་ཟེར་རི་ཁྲོད་བཟུང༌། །ཕྱི་དྲོ་གཞན་ཕན་ཡིན་ཟེར་ཡོན་བདག་ཚོལ། །ཟོག་པོ་དམ་པར་བརྫུ་བའི་ཆོས་གཟུགས་ཚོའི། །རྣམ་ཐར་སྙིང་ལ་བཅག་ན་ཨ་རེ་སྡུག་ཁྱོད་ཀྱང་སྙིང་ནས་ཐར་པ་འཐོབ་བཞེད་ན། །ཚེ་འདིའི་བྱ་བ་བཏང་ནས་དབེན་རི་སྙོགས། །གཞན་ཕན་སྙིང་ལ་བཅག་ནས་བྱང་སེམས་སྒོམས། །གཏན་དུ་འདུན་མ་ལེགས་པའི་རྩེ་མོར་འགྲོ། །དང་པོ་འགྲོ་དྲུག་སྙིང་རྗེའི་ཡུལ་དུ་གཟིགས། །བར་དུ་གཞན་ཕན་དོན་གཉེར་ལྷག་བསམ་འབྱོང༌། །ཐ་མ་རྫོགས་བྱང་དོན་གཉེར་བཅོས་མིན་རྙེད། །དེ་ཚེ་རྒྱལ་བའི་སྲས་པོའི་གྲངས་སུ་ཚུད། །སྤྲང་པོའི་སྤྲང་འབོད་གསན་འོས་མ་ལགས་མོད། །གསན་ན་སྤྲང་ཚིག་ཚིག་རྩོག་དོན་ཟབ་མ། །འདི་འདྲ་ཐུགས་ལ་བཞག་ཀྱང་ཕན་ཏེ་མཆི། །ངས་ནི་ཕན་སེམས་ཁོ་ནས་གསོལ་བ་ལགས། །ཞེས་པའང་སྤྲང་སྨྱོན་འཇིགས་མེད་པས་སོ།། ༈ །།ཞལ་གདམས་ཟེར་བ་ཤོག་ཚར་ཆུང་ངུ་ལ། །
ལྐོག་གཏམ་བྲིས་པ་ཙམ་དུ་གོ་མི་རུང༌། །དལ་འབྱོར་རྙེད་དཀའི་ཁྲིད་ནས་རྫོགས་ཆེན་བར། །གང་ཐོས་གདམས་པའི་མཐིལ་དུ་ཤེས་པ་གཅེས། །དང་པོ་འཁོར་བ་ཟེར་བའི་ཚིག་རྐྱང་ལ། །ཡི་མུག་སྒོམ་པ་ངེས་འབྱུང་སྒྲུབ་ཚུལ་མིན། །སྡུག་བསྔལ་རྣམ་གསུམ་རྒྱལ་བས་བཀའ་སྩལ་ལྟར། །ལེགས་པར་ཤེས་ནས་མང་དུ་སེམས་པ་གཅེས། །དེ་ནས་གཞན་ཕྱིར་དམྱལ་བའི་མེ་དོང་དུ། །འཇུག་གོ་སྙམ་པའི་ཚིག་སྐམ་སྙིང་རྗེ་མིན། །བྱམས་བརྩེའི་དམིགས་རྣམ་ཇི་ལྟར་སྒོམ་ཚུལ་བཅས། །ཚང་ལ་མ་ནོར་ཤེས་ནས་སློབ་པ་གཅེས། །མཐར་ཐུག་རྡོ་རྗེའི་ལམ་ལ་སྦྱོང་སྙམ་ན། །ངོ་སྤྲོད་སེམས་འཛིན་གཅིག་པུས་ཆོག་པ་མིན། །དབང་ཐོབ་དམ་ཚིག་ཚུལ་བཞིན་སྲུང་བ་ཡིས། །ལེགས་དགུའི་རྟེན་འབྲེལ་རྩ་བ་ཚུགས་པ་གཅེས། །གནས་བདེ་གསལ་སྟོང་འགྱུ་བ་ངོ་ཤེས་ཙམ། །ཡོད་ཀྱང་རྫོགས་ཆེན་སྒོམ་པའི་རྣལ་འབྱོར་མིན། །བཞི་ཆ་གསུམ་བྲལ་ཡེ་བབས་རིག་པའི་ཀློང༌། །བསལ་བཞག་བྲལ་བའི་སྐྱོང་ཚུལ་ཤེས་པ་གཅེས། །ཚོགས་དྲུག་སྣང་བ་བཟོ་མེད་ལྷུག་པའི་ངང༌། །དྲན་པས་ཟིན་ཙམ་རྗེས་ཐོབ་རྣལ་འབྱོར་མིན། །སྣང་སེམས་དབྱེར་མེད་རིག་པས་གཟེར་བཏབ་སྟེ། །རྦ་རླབས་རྒྱ་མཚོར་གྲོལ་བའི་མན་ངག་གཅེས། །སྐྱིད་ན་ཆོས་ཀྱི་དྲིན་དུ་ལྟ་བ་གཅེས། །སྡུག་ན་ར་མདའ་ཆོས་ལ་བཅོལ་བ་གཅེས། །
གསོན་ན་ཚེ་མཇུག་ཆོས་སུ་སྐྱེལ་བ་གཅེས། །ཤི་ན་དམ་ཆོས་བརྒྱགས་སུ་ཁྱེར་བ་གཅེས། །ཤི་གསོན་སྐྱིད་སྡུག་གནས་སྐབས་ཅི་བྱུང་ཡང༌། །བློ་གཏད་མི་འགྱུར་ཆོས་ལ་མཛོད་ཅིག་ཅེས། །སྨྲས་འདི་ཐོགས་མེད་ངེས་ལེགས་གཉིས་ཀྱི་ངོར། །བསྟན་པའི་ཉི་མས་ནགས་འདབས་མལ་ནས་བཀོད།། ༈ །།གང་ཞིག་སྲིད་པའི་སེམས་ཅན་མ་ལུས་པ། །འདུལ་བའི་དོན་སླད་བདུད་རྩིའི་ལམ་སྟོན་པ། །སྟོན་པ་ཟླ་མེད་ཞབས་ལ་ཕྱག་བྱས་ནས། །ཕན་བྱེད་གཏམ་གྱི་ཟེག་མ་འདི་འཐོར་རོ། །སྤྲང་པོའི་བྱིས་པ་འཇིགས་མེད་བསྟན་རྒྱམ་པར། །དམ་པའི་གྲོགས་ཀྱིས་ཞལ་གདམས་བྲིས་ཤིག་ཅེས། །བསྐུལ་ཚིག་ངག་གི་ཕྲེང་བ་སྩལ་མོད་ཀྱི། །འདི་འདྲའི་ཚུལ་ལ་བདག་ཡིད་རངས་མ་གྱུར། །དོན་བཞིན་རྟོགས་ནས་ཚུལ་བཞིན་ཆོས་བསྟན་ཏེ། །གཞན་ཕན་སྤྱོད་ལ་ཁོ་བོ་སྤྲོ་མོད་ཀྱི། །མ་རྟོགས་རྟོགས་བརྫུས་ཟོབ་གཏམ་སྨྲ་བ་ལ། །བདག་གི་ཡིད་ནི་ཀུན་ཏུ་སྤྲོ་མ་གྱུར། །རྒྱལ་བའི་བསྟན་ལ་མོས་པས་ཞུགས་རློམ་ཡང༌། །རྒྱལ་བསྟན་འགལ་མེད་ལམ་གྱི་ཆ་ལག་ཏུ། །རྟོགས་པ་མེད་བཞིན་ཆོས་སྤོང་མ་གསོགས་ཞེས། །གཏམ་འདི་སྨྲ་ལ་ཁོ་བོ་སྤྲོ་མ་ལགས། །ཚུལ་གཉིས་གཞུང་ལུགས་གུས་པས་ཉན་རློམ་ཡང༌། །རྟོགས་པའི་ཉམས་མྱོང་རྡུལ་ཙམ་མ་ཐོན་བཞིན། །ཐོས་དོན་མ་
ནོར་ཐུགས་ཉམས་ཞོག་ཅིག་ཅེས། །སྨྲ་བའི་གཏམ་འདིར་ཁོ་བོ་སྤྲོ་བ་མེད། །སྟོན་པའི་བསྟན་ལ་ལེགས་པར་ཕྲད་གྱུར་ཀྱང༌། །བསྟན་དོན་སྙིང་པོ་རང་སེམས་མ་བཏུལ་བཞིན། །ཐུབ་བསྟན་རིན་ཆེན་སྒྲུབ་པས་སྐྱོངས་ཤིག་ཅེས། །འདི་སྨྲ་བ་ལ་ཁོ་བོ་སྤྲོ་མ་ལགས། །སྲད་བུ་གཅིག་ལའང་ཞེན་པ་མ་ཆོད་པར། །ཆོས་བརྒྱད་སྣང་བ་རོ་བཞིན་དོར་མཛོད་ཅེས། །མིག་ལྡན་རྣམས་ལ་ལོང་བས་ལམ་སྟོན་བཞིན། །རང་གི་ཚིག་ལ་རང་སེམས་ཁྲེལ་བར་ཟད། །ཚེ་འདིའི་མ་ལའང་སྙིང་རྗེ་མེད་བཞིན་དུ། །བྱང་ཆུབ་སེམས་ཀྱིས་རང་རྒྱུད་སྦྱོངས་ཤིག་ཅེས། །མཛེ་བོས་ཁྱུང་སྒྲུབ་གཞན་ལ་སློབ་པ་ལྟར། །ང་དང་ང་འདྲའི་ཆོས་གཏམ་ཡི་རེ་མུག། འདི་དང་འདི་འདྲའི་ཀུན་སྤྱོད་ཡ་ང་བ། །འཕགས་པའི་ལམ་དང་རང་རྒྱུད་མ་འདྲེས་ཤིང༌། །ཐོས་དོན་མ་ནོར་སེམས་ལ་མ་སྦྱར་ཏེ། །ཆོས་དང་རང་སེམས་ཐ་དད་སོང་བས་ལན། །དེ་སླད་ཁྱོད་ཀྱང་དེ་འདྲར་དགོངས་མཛད་ནས། །ལོག་པའི་ལམ་ངན་དུག་ལྟར་ཐག་བསྲིངས་ཏེ། །ཡང་དག་ལམ་བཟང་བདུད་རྩིའི་སྒོར་ཞུགས་ལ། །དགེ་བའི་བཤེས་ཀྱི་གདམ་ངག་དོན་ཡོད་མཛོད། །ཆོས་པ་ཡིན་ཟེར་ཆོས་བརྫུའི་གཟུགས་མང་ཡང༌། །འདི་སྣང་ཞེན་པ་རྨིང་ནས་མ་ཕྱུང་ན། །བཅོས་མའི་ཆོས་ཀྱིས་ཆོས་མཐའ་མི་ཐོན་པས། །འཆི་ཆོས་བྱེད་ན་ཆོས་བརྒྱད་རྡོག་པས་
ནོན། །དམ་པ་ཡིན་ཟེར་དམ་པའི་ཟོལ་མང་ཡང༌། །ནང་ནས་རང་སེམས་ཆོས་ཀྱིས་མ་བཏུལ་ན། །གཞན་གྱི་མིག་སྔར་མཛེས་པས་ཅི་ལྟོ་སྟེ། །དམ་པ་བཞེད་ན་དམ་པའི་ལམ་བཟང་བསྟེན། །མཁས་པ་ཡིན་ཟེར་མཁས་པར་རློམ་མང་ཡང༌། །སེམས་འདུལ་ཐབས་ལ་ནན་ཏན་མ་མཁས་ན། །རྟོག་གེ་རླུང་སྤུར་བཤད་པས་ཅི་བགྱི་སྟེ། །མཁས་པ་བཞེད་ན་བྱས་པའི་ཆོས་ཐག་ཆོད། །དཔའ་བོ་ཡིན་ཟེར་ངར་སྐད་འདོན་མང་ཡང༌། །མ་རིག་འཁྲུལ་པ་བཟློག་ལ་མ་དཔའ་ན། །ལྤགས་སྐམ་འབིག་ལ་མཁས་ཀྱང་མི་ཕན་གྱི། །དཔའ་བོ་བཞེད་ན་རྒ་ཤིའི་རྩ་བ་ཆོམས། །ཕོ་གྲུང་ཡིན་ཟེར་ཤེས་རློམ་མང་མོད་ཀྱི། །ཚེ་རབས་གཏན་གྱི་འདུག་ཆུས་མ་གྲུབ་ན། །འཁྲུལ་པས་འཁྲུལ་པ་སྒྲུབ་པས་ཅི་རུང་སྟེ། །ཕོ་གྲུང་བཞེད་ན་འདུན་མ་གཏན་ལེགས་མཛོད། །གྲུབ་ཐོབ་ཡིན་ལོའི་གྲུབ་རྟགས་འཇོག་མང་ཡང༌། །བདག་སྲེད་རི་བོ་རྨང་འགྱེལ་མ་ནུས་ན། །རྡོ་ལ་རྐང་རྗེས་བཞག་ཀྱང་ཅི་མཚར་ཏེ། །གྲུབ་རྟགས་འཇོག་ན་བདེན་ཞེན་རྩད་ནས་ཆོད། །རྒྱལ་བའི་སྲས་ཞེས་མིང་སྙན་འཆང་མང་ཡང༌། །སྙིང་རྗེ་ཆེན་པོས་རང་སེམས་མ་བཏུལ་ན། །སྙིང་རྗེའི་རོ་མདོག་བསྟན་ཡང་མི་ཕན་པས། །ཐེག་ཆེན་བཞེད་ན་སྙིང་རྗེ་ཆེན་པོར་སློབས། །རྟོགས་ལྡན་ཡིན་ཟེར་ཆེ་རློམ་མང་མོད་
དེ། །སེམས་ཀྱི་གཞི་རྩ་གཏིང་ནས་མ་ཆོད་ན། །མཉམ་ཉིད་རྟོགས་པའི་མིང་གིས་མི་ཕན་གྱིས། །རྟོགས་ལྡན་བཞེད་ན་སྣང་བའི་རྫུན་ཕུག་གཏིབ། །མདོར་ན་རང་སེམས་འདུལ་བའི་ཐབས་ཀྱི་མཆོག །དང་པོ་ཐར་འདོད་ངེས་འབྱུང་བསམ་པ་བསྐུལ། །བར་དུ་གཞན་ཕན་བྱང་ཆུབ་སེམས་གཉིས་སྦྱོངས། །ཐ་མ་མཉམ་ཉིད་ཆོས་སྐུའི་གཏན་སྲིད་ཟུངས། །དང་པོ་འཆི་བས་འཇིགས་ནས་དགེ་སེམས་བསྐུལ། །བར་དུ་འཁོར་བའི་ཉེས་པས་ལྷག་པར་སྐྲག །ཐ་མ་བྱང་ཆུབ་ཞི་བའི་ཡོན་ཏན་དྲན། །ངེས་འབྱུང་ཡིད་ཀྱི་ཁམས་གསོ་སྦྱིན་བྱེད་ཡིན། །དང་པོ་འགྲོ་དྲུག་མར་ཤེས་ཡིད་འོང་བསྒྲུབ། །བར་དུ་སེམས་ཅན་རྣམས་ཀྱི་སྡུག་བསྔལ་དྲན། །ཐ་མ་བླ་མེད་བྱང་ཆུབ་དོན་གཉེར་བསྐྱེད། །བྱང་ཆུབ་སེམས་ཀྱི་བསྐུལ་མ་འདི་ཡིན་ནོ། །དང་པོ་དགག་བྱ་ངེས་པའི་རྨིང་གཞི་བཏིང༌། །བར་དུ་རང་བཞིན་མེད་རྟོགས་མཁར་རྫོང་བཟུང༌། །ཐ་མ་རྟེན་འབྲེལ་ངེས་པའི་རྒྱན་བཀྲམ་སྟེ། །ཟབ་མོ་བཟོད་པའི་ཡེ་ཤེས་སྙིང་ལ་ཞོག །དེ་སྐད་ཕན་པར་སྨྲ་བའི་གཏམ་གྱི་ཆ། །གང་འདི་དགེ་བའི་བཤེས་ཀྱི་རྣམ་ཐར་ཅན། །པདྨ་བདེ་ཆེན་དགོངས་བཞེད་སྐོང་ཕྱིར་དུ། །སྤྲང་སྨྱོན་འཇིགས་མེད་ཞེས་བྱས་གང་དྲན་བྲིས།། ༈ །།ན་མོ་གུ་རུ། །སྲིད་འདིར་འགྲོ་བའི་ཁྱད་པར་ཇི་སྙེད་དང༌། །དེ་ཡི་བདེ་སྡུག་རྣམ་གྲངས་བསམ་ཡས་པས། །ཐམས་ཅད་རྨོངས་པ་མ་
རིག་གཅིག་པུ་ལས། །སྤྲུལ་པར་ཟད་ཅེས་གཉིས་མེད་གསུངས་པས་བསྟན། །འཕགས་པའི་གང་ཟག་དབྱེ་བ་རྣམ་མང་དང༌། །དེ་དག་ཡོན་ཏན་འབྱོར་བའི་ཁྱད་པར་ཀུན། །རྟེན་འབྱུང་ཤེས་པའི་བློ་ཡི་སྣང་བ་ཡིས། །རྨོངས་པའི་མུན་སྟུག་བསལ་ལས་འབྱུང་བར་གསུངས། །དེ་ཕྱིར་དགྲ་བོའི་ནང་ན་རྨོངས་པ་དང༌། །དེ་འདུལ་གཉེན་པོའི་ནང་ན་ཤེས་རབ་མཆོག །ཤེས་རབ་བསྐྱེད་ནས་རྨོངས་པ་འཇོམས་པ་ལས། །ཆེས་ལྷག་དཔའ་བོའི་ལས་གཞན་ཡོད་མ་ཡིན། །ཚོང་ལ་སྒྲིམ་དང་ཤག་འགྱེད་བྱང་བ་དང༌། །རྫུན་དང་གཡོ་སྒྱུའི་ལས་ཐབས་མཁས་པ་སོགས། །ཤེས་རབ་ངན་པ་རྨོངས་པའི་མུན་ཁང་ལ། །རིམ་དགུའི་རྩིག་པས་སྣོན་པ་བཏང་བར་ཟད། །འགྲོ་བའི་མིག་གཅིག་རྫོགས་པའི་སངས་རྒྱས་ཀྱི། །བསྟན་པའི་གནད་ལ་བློ་གློས་མིག་བསྒྲུབས་ནས། །ཚུལ་བཞིན་སེམས་པའི་མིག་སྨན་རྣོན་པོ་ཡིས། །ལེགས་པར་སྦྱངས་ན་ཆོས་མིག་དྲི་མེད་འབྱུང༌། །དེང་སང་ལྟ་བ་ཤིན་ཏུ་སྙིགས་མའི་དུས། །ཤེས་རབ་ལྡན་པ་ཉུང་ཞིང་བརྒྱ་ལམ་ན། །ཡོད་ཀྱང་འཆལ་བའི་ཤེས་རབ་གོལ་སླ་བས། །ཕུལ་བྱུང་ཞིང་གི་མཐུ་ལ་བརྟེན་པ་གཅེས། །ཐུབ་པ་མྱ་ངན་འདའ་ཚེ་ང་འདས་ནས། །བསྟན་པའི་མཛོད་འདི་ཁྱོད་ཀྱིས་ཟུངས་ཤིག་ཅེས། །རྒྱལ་སྲས་འཁོར་གྱི་དབུས་སུ་འཇམ་པའི་དབྱངས། །ཐེག་མཆོག་ཆོས་མཛོད་སྐྱོང་བའི་གཉེར་དུ་བསྐོས། །དེ་ཕྱིར་
ཀླུ་སྒྲུབ་ཕྱོགས་གླང་ཞི་བ་ལྷ། །སངས་རྒྱས་བསྐྱང་དང་ཟླ་གྲགས་ཞི་འཚོ་སོགས། །འཕགས་བོད་པཎ་གྲུབ་ནམ་མཁའི་སྐར་ཚོགས་སྙེད། །འཇམ་པའི་དབྱངས་ལས་བློ་མཆོག་དངོས་གྲུབ་བརྙེས། །འདི་ཡི་སྔོན་སྨོན་ཐུགས་བསྐྱེད་བྱིན་རླབས་ལས། །མཚན་བརྗོད་རྒྱུད་ཆེན་འཛམ་གླིང་བྱེ་བ་བརྒྱར། །བཀླགས་པས་གྲུབ་པའི་དངོས་གྲུབ་གཏེར་ཆེན་དུ། །ཉི་ལྟར་གྲགས་ཅེས་དཔེ་མེད་འཚོ་ཡིས་བཤད། །བསིལ་ལྡན་ལྗོངས་འདིར་ཁྱིམ་པའི་ཚོགས་སུ་ཡང༌། །རྒྱུད་འདི་ཉི་ཟླ་ལྟ་བུར་གྲགས་ཆེ་ཞིང༌། །ཀུན་གྱི་མགྲིན་པའི་རྒྱན་དུ་འཛིན་བྱེད་པ། །བསྒྲུབ་སླའི་ཆོས་སྐལ་ཡིན་པའི་རྟགས་སུ་ངེས། །སངས་རྒྱས་ཡོན་ཏན་ལེགས་བསྔགས་བསྟོད་པའི་མཚོ། །རྡོ་རྗེའི་ལམ་བཟང་སྣང་བྱེད་ཉིན་མོའི་མགོན། །ཟབ་དང་རྒྱ་ཆེའི་ལེགས་བཤད་ཟ་མ་ཏོག །བཀླགས་པས་མཆོག་སྦྱིན་རིགས་སྔགས་རྒྱལ་པོ་ཆེ། །འདི་འདྲ་ཀློག་དང་སེམས་པ་ལྟ་ཅི་སྨོས། །གླེགས་བམ་ལན་རེ་མཐོང་དང་མཆོད་པས་ཀྱང༌། །སྲིད་པའི་འབྱོར་པ་སྟོང་གིས་མི་མཚོན་པའི། །ངེས་ལེགས་མཆོག་གི་སྐལ་བཟང་འཛད་མེད་སྟེར། །དེ་ཚུལ་རྒྱ་ཆེར་བདག་འདྲས་ག་ལ་ཤེས། ། གཙོ་བོས་གསང་བདག་དཔའ་བོ་ལ། །ལེགས་པར་གསུངས་པའི་ཕན་ཡོན་རྗེས་བསྔགས་ལས། །ཞིབ་ཏུ་མཁྱེན་མཛོད་མཁྱེན་ནས་ཉམས་ལེན་མཛོད། །བདག་ཀྱང་སྐྱེ་བའི་ཕྲེང་བར་བླ་མ་མཆོག །འཇམ་པའི་དབྱངས་ཀྱི་ཞབས་པད་གུས་བསྟེན་ཏེ། །བསྟོད་
པ་གླུར་བླངས་རྒྱུད་ཀྱི་རྔ་བོ་ཆེས། །ས་གསུམ་རྨོངས་པའི་གཉིད་འཐུག་དཀྲོག་བྱེད་ཤོག །དགེ་སློང་མདོ་སྔགས་ནས་བསྐུལ་བ་ལྟར་སྤྲང་བན་བསྟན་པའི་ཉི་མས་ཐང་སྟོང་རྒྱལ་པོའི་གཞལ་མེད་ཁང་བྱ་བརྒྱ་སིལ་སྙན་ལེན་པའི་གནས་སུ་ཤར་མར་སྤེལ་བའོ།། ༈ །།ཆོས་ཀྱི་དང་པོ་ཚེ་འདིའི་བདེ་སྐྱིད་ལ། །ཞེན་པ་ལོག་པའི་བློ་འདིར་ཐུག་པས་ན། །ཚེ་འདིའི་བདེ་སྐྱིད་མི་རྟག་མི་བརྟན་པར། །མངོན་སུམ་མཐོང་འདིས་སྐྱོ་བ་སྐྱེད་ལ་སྒོམས། །གཉེན་དང་ལོངས་སྤྱོད་ཁང་ཁྱིམ་ས་ཞིང་སོགས། །ཐམས་ཅད་བཞག་ནས་གཅིག་པུར་འགྲོ་བ་ནི། །མྱུར་དུ་རང་གི་ཐོག་ཏུའང་འོང་བས་ན། །བློ་གཏད་ཐུབ་པ་ཆོས་ལས་གཞན་པ་མེད། ཁྲི་ཐོག་དཔོན་དང་སྤྲང་པོ་དབྱུག་བཟུང་བར། །ཐམས་ཅད་རོ་སྐྱེལ་དོན་དུ་སྐྱེས་པ་བཞིན། །གཅིག་ཀྱང་མི་ལུས་ཕྱི་མའི་ལམ་འཇུག་ཀྱང༌། །སྐྱོ་ཤས་མི་སྐྱེ་རྟག་འཛིན་བདུད་ཀྱིས་བསླུས། །སྐྱེས་མཐའ་འཆི་ཤིང་འདུས་མཐའ་བྲལ་བ་འདི། །ཐོག་མེད་དུས་ནས་ཉམས་སུ་མྱོང་གྱུར་ཅིང༌། །ད་དུང་འཁོར་བའི་མཐའ་བར་མྱོང་དགོས་པས། །སེམས་ཤིག་ཡོད་ན་ཐར་འདོད་ཅིས་མི་སྐྱེ། །འདབ་ཆགས་དུ་བས་བདུག་ནས་འཕུར་འདོད་བཞིན། །སྡུག་བསྔལ་མང་པོའི་འབྱུང་ཁུངས་འཁོར་བ་འདིར། །སྐྱོ་ནས་བསམ་རྒྱུ་ཆོས་ལས་མེད་ཙ་ན། །འདི་ཕྱི་ཀུན་ཏུ་འཚེང་བས་སྐྱིད་འགོ་ཚུགས། །ཞེས་འཇིགས་མེད་བསྟན་ཉིས་བྲིས།། ༈ །།ཟླ་བྲལ་སྟོན་པ་དབུ་ཡི་རྒྱན་དུ་ཐོབ། །བསྟན་པ་ལུང་གི་ཕྲེང་བ་
ཞལ་སྒོར་ཆགས། །བསྟན་འཛིན་བརྒྱུད་པའི་བྱིན་རླབས་ཐུགས་ལ་ཞུགས། །དཀོན་མཆོག་གསུམ་གྱི་ཕྲིན་ལས་གཉེར་འཆང་བ། །དཔལ་ལྡན་བླ་མ་མཆོག་ལ་གསོལ་བ་འདེབས། །འདི་དང་བར་དོ་ཚེ་རབས་ཕྲེང་བ་ཀུན། །ཐེག་མཆོག་སྟོན་པའི་བཤེས་དང་མི་འབྲལ་ཞིང༌། །བཀའ་བཞིན་སྒྲུབ་ལ་བརྩོན་པར་བྱིན་གྱིས་རློབས། །འདུ་འཛིའི་ནང་དུ་གཡེང་བས་ཁྱེར་བའི་ཚེ། །ལོང་མེད་འཆི་བ་དྲན་པར་བྱིན་གྱིས་རློབས། །དབེན་པའི་གནས་སུ་སྒྲུབ་ལ་གཞོལ་བའི་ཚེ། །བརྩོན་འགྲུས་མཐར་སྐྱེལ་ནུས་པར་བྱིན་གྱིས་རློབས། །སྣ་ཚོགས་ཆོས་ཀྱི་འགལ་རྐྱེན་ལྷགས་པའི་ཚེ། །རྐྱེན་སྣང་ལམ་དུ་ལོངས་པར་བྱིན་གྱིས་རློབས། །ཅི་བྱེད་དམ་པའི་ཆོས་སུ་འགྲོ་བ་ཡིས། །དལ་རྟེན་སྙིང་པོ་ལོན་པར་བྱིན་གྱིས་རློབས། །ཀུན་དགའི་ངོར་ཨ་བྷྱས་བྲིས་པ་དགེའོ།། ༈ །།ཀྱེ་ལགས་ཁྱེད་ནི་མཛངས་པའི་རིགས་སུ་འཁྲུངས། །སྐུ་ལུས་གཞོན་པས་ཐག་རིང་ས་མཐའ་འཁོར། །ཐུགས་རིག་གསལ་བས་མང་པོ་མཁྱེན་ཏེ་མཆིས། །བརྟགས་དཔྱད་མཛད་ཚེ་ལེགས་པ་གང་ཞིག་དགོངས། །ཚེ་གང་འཇིག་རྟེན་བྱ་བས་བྲེལ་བྲེལ་ནས། །ཟིན་མེད་ངང་ལ་བཞག་སྟེ་འགྲོ་བ་དང༌། །སྒོ་གསུམ་ཆོས་ཀྱི་མལ་དུ་སོས་གདལ་ཏེ། །བདེ་ནས་བདེ་བར་འགྲོ་གཉིས་གང་ལ་དགྱེས། །བྱ་སྤུ་བཞིན་དུ་རླུང་གིས་ཁྱེར་བ་དང༌། །གསེར་ཐིག་བཞིན་དུ་སྡོད་ཚུགས་ཐུབ་པ་གཉིས། །སྐྱིད་ཀྱི་སྟེང་
ནས་དམ་ཆོས་བྱར་བཏུབ་པ། །སུ་ལ་ཡོད་འདུག་འདམ་ན་གང་ཞིག་བཟུང༌། །འདུ་འཛིའི་ནང་དུ་སྨྲ་བ་ལྷུར་ལེན་ཅིང༌། །ཆགས་སྡང་སྒོམ་པས་རྟག་ཏུ་ངལ་བ་དང༌། །དྲང་སྲོང་གནས་སུ་ཆོས་ཀྱི་བདེ་བའི་རོས། །ངལ་གསོ་ཐོབ་དག་སྐྱིད་ཤོས་གང་དུ་གཟིགས། །སྐྱིད་པར་མཁྱེན་གང་ཉིད་ཀྱི་གདན་དུ་ཐིང༌། །སྡུག་པོར་གང་གཟིགས་ལམ་ཁའི་རོ་བཞིན་སྐྱུར། །སྐྱིད་སྡུག་དབྱེ་བ་ཞིབ་མོའི་བློ་ཡིས་དཔྱོད། །བདག་ནི་རྒན་འཆལ་བཅོས་གཏམ་སྨྲ་བར་ཟད། །སང་ཚང་སྤྲུལ་སྐུའི་གསུང་ངོར་བྲིས།། ༈ །།རྒ་བས་ནོན་ཅིང་ནད་ཀྱིས་ཉམ་ཐག་པ། །བདག་འདྲ་མཐོང་ལས་སྙིང་པོ་བླང་རྒྱུ་ནི། །རྒ་ན་འཆི་བས་གཙེས་པའི་འཁོར་བ་པར། །སྐྱོ་ཤས་ཡིད་འབྱུང་སྐྱེ་ལས་གཞན་ཡོད་མིན། །དེ་ཕྱིར་ཁྱོད་ཀྱིས་སྤུན་སྐོག་ལྟ་བུ་ཡི། །བདག་ལུས་མཐོང་ལ་གཙིགས་སུ་མ་མཛད་པར། །དེ་ཡི་སྙིང་པོ་ལྟ་བུའི་སྐྱོ་ཤས་ལ། །གོམས་པར་བསླབ་ནས་ཆོས་ལ་ནན་ཏན་མཛོད། །དེང་སང་ཆགས་སྡང་སོ་ནམ་སུ་མཁས་ལ། །ཕོ་སྐྱེས་མོ་གྲུང་བཟང་པོར་རྩི་ན་ཡང༌། །བདག་ལྟར་རྒ་ན་འཆི་བས་གཏུག་ཙ་ན། །དམ་པའི་ཆོས་མིན་ཅིས་ཀྱང་སྐྱོབ་མི་འགྱུར། །ངས་ཀྱང་ཁྱོད་ལ་དམ་ཆོས་མ་བཤད་མིན། །རྒྱལ་བ་ཕན་མཛད་དེ་ཡིས་དམ་ཆོས་ཀྱི། །རྩ་བ་སྡུག་བསྔལ་སེམས་པ་འདིར་གསུངས་པས། །ཆོས་ཀྱི་གཞི་མ་འདི་ནས་ཚུགས་པར་མཛོད། །འདི་ཡང་ཐོགས་མེད་ངེས་ལེགས་
གཉིས་པ་གདམས་པའོ།། ༈ །།གུས་པས་ཉོན་དང་ཞལ་གདམས་དོན་གཉེར་ཅན། །གུས་པ་མེད་པར་གཞུང་མང་ཐོས་ན་ཡང༌། །ཐུབ་པའི་ཆོས་ལ་བྱས་གཟོ་མི་འབྱུང་སྟེ། །རྟོག་གེས་དྲེགས་པས་ཆོས་དྲེད་འགའ་ལ་ལྟོས། །གུས་བཅས་གདམས་ངག་ཚིག་གཅིག་ཐོས་ན་ཡང༌། །ཚུལ་བཞིན་སྒྲུབ་པས་སྙིང་པོ་རྙེད་འགྱུར་ཏེ། །སྔོན་གྱི་སེམས་དཔའ་ཆེ་རྣམས་ཡོན་ཏན་ཀུན། །ཆོས་ལ་གུས་པའི་རྒྱུ་ལས་བྱུང་བ་ཡིན། །གུས་པ་དེ་ཡང་ཕྱོགས་རེ་ཙམ་མིན་པར། །མངོན་མཐོའི་ཆོས་ནས་འོད་གསལ་རྫོགས་པ་ཆེའི། །རྒྱུད་སྡེར་ཐུག་པའི་གདམས་ངག་མཐའ་དག་ལ། །སྒྲུབ་པ་སྙིང་པོར་བྱེད་པའི་གུས་པ་སྐྱེད། །འདི་ན་ཚུལ་ཁྲིམས་ཏིང་འཛིན་ཤེས་རབ་བམ། །ཐུན་མོང་ཐུན་མིན་ལམ་གྱི་ཡུལ་ཅན་གྱི། །ནན་ཏན་སྲང་གི་མཐོ་དམན་འདྲ་བ་ཕལ། །ཆོས་ལ་གུས་པ་ཕྱོགས་རེར་སོང་བས་ནོངས། །དེ་འདྲ་དེ་ཡིས་ཚེ་འདི་ཟད་ཟད་དུ། །ཆོས་ལ་ཉམས་ལེན་བྱེད་ལོ་བགྱིས་ན་ཡང༌། །བསྟན་པ་ཡོངས་རྫོགས་གྲུ་བཞི་ལམ་མེ་རུ། །རྒྱུད་ལ་སྦྱོར་བའི་སྐལ་པ་ཡོད་མ་ཡིན། །ཚུལ་དེ་བསམས་ནས་སྔོན་འགྲོ་དངོས་གཞི་ཡི། །ལམ་གྱི་ཆ་ཀུན་རིམ་པ་མ་ནོར་བར། །ཉམས་སུ་ལེན་ལ་གུས་པ་བརྟན་པོ་རུ། །སྒྲུབ་འདི་ཞལ་གདམ་བསྐུལ་བའི་ལན་དུ་གདམས། །མངྒ་ལམ།། ༈ །།འཕགས་མཆོག་ལག་ན་རལ་གྲིའི་ཞབས་མཆོད་
ནས། །ཐར་པ་འདོད་ལ་གཏམ་གྱི་སྐྱེས་ཤིག་སྤྲོ། །གྲོགས་དག་དལ་བས་བརྒྱན་པའི་ལུས་རྟེན་འདི། །ཤིན་ཏུ་རྙེད་དཀའ་ཨུ་དུམྦ་ར་འདྲ། །ད་རེས་ཕན་པའི་ཆོས་ཤིག་མ་མཛད་ན། །ངན་འགྲོའི་འཕྲང་ལ་འཛེགས་ཚེ་སྐྲག་མོ་ཡོད། །ཚེ་འདིའི་བྱ་བ་མང་པོ་བསྒྲུབས་བསྒྲུབས་ནས། །གཅེར་བུ་ལག་པ་སྟོང་པར་འཆི་ཙ་ན། །གཤིན་རྗེའི་སྒྲ་སྐད་སྙིང་ལ་བརྡེག་བཞིན་དུ། །ཕྱི་མའི་གྲོང་ཁྱེར་ཆེན་པོར་འགྲོ་དོགས་ཡོད། །ད་ལྟ་ངན་འགྲོའི་སྡུག་བསྔལ་ཐོས་གྱུར་ཀྱང༌། །སེམས་ལ་སྐད་ཅིག་ཙམ་ཡང་མི་འཇོག་པར། །རྣམ་གཡེང་ལེ་ལོའི་ངང་དུ་ཉལ་ཉལ་ནས། །འཆི་ཁ་བྲང་ལག་འཐབ་མོ་འབྱུང་དོགས་ཡོད། །ཆོས་བརྒྱད་བྱ་བ་བསྒྲུབ་པའི་འབད་རྩོལ་གྱིས། །མི་ཚེ་གང་པོ་ཡོངས་སུ་འདས་གྱུར་མོད། །ལྷ་ཆོས་ཉིན་གཅིག་ཙམ་ཡང་མི་བསྒྲུབ་པའི། །བྱེད་སྤྱོད་འདི་ལ་བསམ་བློ་ཞིབ་མོ་ཐོངས། །དེ་བཞིན་གཤེགས་པ་རྣམས་ནི་འབྱུང་བར་དཀའ། །དཔྱད་གསུམ་དག་པའི་ཆོས་ནི་འཕྲད་པར་དཀའ། །འབྱོར་པ་བཅུ་པའི་ལུས་ནི་རྙེད་པར་དཀའ། །ད་རེས་ཐོད་པ་འབོར་ཆོག་བྱས་ན་ལེགས། །སྟོན་རློམ་ཆེན་པོའི་གང་ཟག་མང་མོད་དེ། ཁྱོད་ལ་གཏན་གྱི་སྐྱབས་གནས་གཞན་ཞིག་མེད། །མི་བསླུ་ཚད་མའི་བླ་མ་དཀོན་མཆོག་གསུམ། ཁྱེད་ཤེས་བློ་གཏད་ཡུལ་དུ་བྱས་ན་ལེགས། །འཇིག་རྟེན་བྱིས་པའི་སྐྱེ་བོར་གྲོས་མ་འདྲི། །སྡིག་གྲོགས་ཟོག་པོའི་མི་ལ་བློ་མ་
གཏད། །གཅིག་ཏུ་དགེ་བའི་ཆོས་ལ་སྙིང་མ་རིང༌། །རྟག་ཏུ་རང་སེམས་དཔང་པོར་ཐུབ་པ་དགོས། །སྔོན་བྱོན་རྒྱལ་བ་གོང་མའི་རྣམ་ཐར་སོམས། །དབང་པོའི་སྒོ་རྣམས་ཐམས་ཅད་སྡོམ་ལ་སློབས། །བག་མེད་ཉེས་པའི་སྤྱོད་ལ་དུག་ལྟར་འཛེམས། །སྡིག་གྲོགས་སྐྱེ་བོ་རྣམས་ཀྱིས་བསླུས་ཏ་རེ། །གཏམ་འདི་ཉམས་མཚར་རྩེད་མོ་མ་ལགས་ཏེ། ཁྱོད་ལ་ཕན་པའི་ངག་གིས་སྨྲས་པ་ཡིན། །དོན་འདི་སེམས་ལ་ཕུར་ཅིག་སྐལ་བཟང་དག །མ་བརྗེད་མ་བརྗེད་གཏམ་འདི་སྙིང་ལ་ཆོངས། །ཞེས་གཞོན་ནུ་འཇིགས་མེད་པས་སོ།། ༈ །།རྫིང་ན་མེད་པ་ཡུར་བར་ཅི་ཞིག་འདྲེན། །རང་གིས་མ་བསྒོམས་གཞན་ལ་ཅི་ཞིག་གདམས། །འོན་ཀྱང་ལག་དལ་ཉི་མ་རིང་བའི་གཏམ། །ཅུང་ཟད་བགྱིད་འདིར་རྩེད་མོའི་ཆོ་ལོ་མཛོད། །ཤེས་མཐོང་མང་བའི་རྒན་ཉམས་ཡོད་མིན་ཡང༌། །བློ་ཉེས་ངང་ལ་མི་ཚེ་སོང་བའི་ཕྱིར། །རང་ལ་འགྱོད་གནས་མང་དུ་བྱུང་བ་རྣམས། །བཤད་ན་ཁྱེད་ཀྱང་བག་ཟོན་མཛད་དམ་སྙམ། །ཚུལ་ཁྲིམས་ལས་སྨོན་དཀར་པོའི་རྟེན་འབྲེལ་ལས། །དལ་བ་རྙེད་ཅིང་བསྟན་དང་མཇལ་ན་ཡང༌། །བག་མེད་ལེ་ལོའི་ངང་ལ་དུས་དྲོན་ནས། །རྒས་འདི་གཅིག་པོར་འགྲོ་ཚེ་སྐྱོ་བའི་ཡུལ། །དང་པོ་བླ་མ་བསྟེན་ལོ་མང་བྱས་ཀྱང༌། །བདེ་གཤེགས་ཆོས་ལ་གུས་པ་དམན་པའི་ཕྱིར། །རང་རྒྱུད་ཆོས་དང་བླ་མའི་བྱིན་རླབས་ཀྱིས། །མ་གོས་ཆུ་ནང་རྡོ་བ་བཞིན་དུ་སོང༌། །བར་དུ་དམ་ཆོས་
ཉན་ལོ་མང་བྱས་ཀྱང༌། །སྒྲུབ་པ་སྙིང་པོར་བྱེད་འདོད་མེད་པའི་ཕྱིར། །རང་སེམས་འདུལ་བའི་གདམ་ངག་མ་བཙལ་བར། །སྨྲ་མཁས་ཙམ་གྱི་དཔལ་ལ་ཡིད་སྨོན་བྱས། །དེ་ནས་གདམ་ངག་འཚོལ་ལོ་མང་བྱས་ཚེའང༌། །ཆོས་དེས་རང་རྒྱུད་འདུལ་ཚུལ་མ་ཤེས་པར། །ཟབ་དགུའི་གདམས་པ་གཞན་ན་ཡོད་སྙམ་ནས། །ཡོད་སར་མ་བལྟས་མེད་སར་བཙལ་བས་ངལ། །ད་ལྟ་མདོ་སྔགས་ཆོས་ཚུལ་རྒྱ་མཚོ་ཀུན། །སེམས་རྒྱུད་གདུལ་ཐབས་ཁོ་ནར་ཡིད་ཆེས་ཀྱང༌། །དེ་ལ་རྩེ་གཅིག་ནན་ཏན་མི་བྱེད་པར། །ལོག་པའི་ཡུལ་གྱི་ཁོལ་པོར་དུས་ཀུན་འཕྱན། །དམ་ཆོས་མ་ཐོས་བླུན་རྨོངས་ལོང་བ་སྟེ། །ཐོས་ཀྱང་མ་བསམ་ཆོས་དྲེད་བསྒྲུབ་པའི་རྒྱུ། །འདི་འདྲར་འགྱུར་དོགས་དམ་ཆོས་མཉན་པ་དང༌། །ཉན་ནས་གང་ཤེས་སྒྲུབ་ལ་བརྩོན་པར་མཛོད། །ནེ་ཙོའི་ཆོས་སྒྲུང་མཛེ་བོའི་ཁྱུང་སྒྲུབ་ལྟར། །རང་བློ་ཁྲེལ་བའི་ཆོས་གཏམ་ཚིགས་བཅད་འདི། །དྲི་མེད་འོད་ཟེར་ཁྱོད་ལ་མེ་ཏོག་གི །དོ་ཤལ་བཞིན་དུ་བཏེགས་ནས་བདག་གིས་ཕུལ། །ཞེས་པ་སྤྲང་རྒན་བསྟན་པའི་ཉི་མས་བྲིས།། ༈ །།ཐམས་ཅད་མཁྱེན་པ་ལ་ཕྱག་འཚལ་ལོ། །རྒྱལ་བསྟན་ལྔ་བརྒྱ་ཐ་མའི་དུས་ཀྱི་ཚེ། །དམ་ཆོས་དྲན་པ་མང་སྟེ་བྱེད་པ་དཀོན། །ཐེག་མཆོག་འདོད་པ་མང་སྟེ་ཤེས་པ་དཀོན། །གདམས་ངག་ཞུ་མཁན་མང་སྟེ་སྒྲུབ་མཁན་ཉུང༌། །འོན་ཀྱང་སངས་རྒྱས་དགྱེས་པའི་ལམ་གྱི་གནད། །དུས་ངན་འདི་
འདྲར་ཐོས་པའང་རྙེད་དཀའ་བས། །ཞི་བའི་ནགས་འདིར་བྱང་ཆུབ་སེམས་ཀྱི་སྒྲ། །སྒྲོགས་པའི་བློ་གསལ་ཁྱོད་ལ་ཡི་རང་འབུལ། །བྱང་ཆུབ་འདོད་པའི་སེམས་ལ་བྱང་ཆུབ་ཀྱི། །སེམས་ཞེས་བརྗོད་མོད་བྱང་ཆུབ་ཅི་ཡིན་དང༌། །དེ་ཡི་ཡོན་ཏན་ཅི་ཡང་མ་མཐོང་བར། །བྱང་ཆུབ་དོན་གཉེར་ཚིག་ཙམ་ཞིག་ཏུ་ཟད། །དེ་ཕྱིར་རྒྱལ་བའི་ཡོན་ཏན་ཉན་པ་དང༌། །དོན་དེ་སྟོན་པའི་གསུང་རབ་བལྟ་བ་དང༌། །དེ་ཡི་རྗེས་སུ་ལན་མང་སེམས་བྱས་ཏེ། །དད་པ་སྒོམ་འདི་སེམས་དེའི་རྩ་བ་ཡིན། །ཐེག་དམན་བྱང་ཆུབ་འདོད་པས་མི་གཡོ་དང༌། །དཀའ་སྤྱད་མཐའ་ཡས་རྣམས་ཀྱིས་མི་བརྫི་བའི། །བྱང་ཆུབ་བླ་མེད་འདོད་པའི་སྙིང་སྟོབས་མཐུ། །བརྟན་པོར་སྐྱེ་བ་སྙིང་རྗེ་ཆེ་ལ་རག །འགྲོ་ལ་གཅེས་འཛིན་གོམས་པའི་བློ་དང་ནི། །དེ་དག་སྡུག་བསྔལ་མཐོང་བའི་འབྲལ་འདོད་བློ། །ཟུང་འབྲེལ་སྦྱངས་པས་གཞན་དོན་ཁུར་ཁྱེར་གྱི། །བརྩེ་ཆེན་འབྱུང་བར་བདག་ཉིད་ཆེ་རྣམས་བཞེད། །དེ་དག་སྦྱོང་བའི་ཚུལ་དང་གོ་རིམ་དང༌། །དེ་ཡི་སྔོན་དུ་ཇི་ལྟར་བྱ་བ་སོགས། །རྒྱ་ཆེར་ཡོད་ཀྱིས་བརྩོན་པ་བསྐྱེད་མཛོད་ལ། །ཚད་ལྡན་མཁས་པའི་ལེགས་བཤད་ལོངས་ལ་ལྟོས། །དེ་སྐད་སྨྲས་འདི་ཁང་སྟོང་རྔ་གོག་བཞིན། །བས་མཐར་ཁ་རོག་ཉལ་བའི་སྤྲང་རྒན་དེ། །རྔ་གོག་དབྱུག་པས་བརྡུང་ལྟར་དབལ་ཤུལ་གྱི། །བླ་མས་རྣ་བར་གཙེར་ནས་གང་བབས་བྲིས།། ༈ །།ལུས་ཅན་ཕན་བདེ་འབྱུང་
བའི་སྒོ་གཅིག་པུ། །གཉིས་མེད་གསུང་བའི་བསྟན་པ་ཉག་གཅིག་ཕྱིར། །ཚུལ་དེར་ཉན་བཤད་སྒྲུབ་པའི་བྱ་བ་ཡིས། །ལང་ཚོ་ཡོལ་བ་འདུན་མའི་རྩེ་མོ་ཡིན། ཁྱད་པར་བསྟན་འདི་སྒྲུབ་པ་ལྷུར་ལེན་གྱིས། །འཕགས་པར་གསུངས་ཤིང་ཐུབ་པས་ལན་མང་དུ། །སྒྲུབ་ལ་བརྩོན་པའི་ཡོན་ཏན་བསྔགས་པ་ལ། །དགོངས་ནས་སྒྲུབ་པ་འབའ་ཞིག་སྙིང་པོར་མཛོད། །ས་མཐོར་བཞུགས་པའི་རྒྱལ་སྲས་དབང་ལྡན་རྣམས། །སྐད་ཅིག་རེར་ཡང་ཞིང་མང་རྡུལ་སྙེད་ཀྱི། །བདེ་གཤེགས་བསྟན་ལ་བྱ་བ་ཆེར་མཛད་པ། །དེ་དག་རྣམས་ཀྱང་སྒྲུབ་ལ་བརྩོན་པའི་མཐུ། །དེ་ཕྱིར་ཐོས་པའི་འོ་མཚོ་ནི། །ཚུལ་བཞིན་སེམས་པའི་སྐྱ་བ་ཡིས། །ལེགས་པར་བསྲུབས་ནས་མངོན་རྟོགས་ཀྱི། །མར་དཀར་སྙིང་པོ་ལེན་པར་བསྐུལ། །སརྦ་ཛ་ག་ཏཾ།། ༈ །།དཀོན་མཆོག་གསུམ་ལ་ཕྱག་འཚལ་ལོ། །རྙེད་དཀའ་དལ་རྟེན་རིན་ཆེན་ཐོབ་དུས་འདིར། །དམ་ཆོས་རྣམ་དག་སྒྲུབ་པ་འདུན་མའི་རྩེ། །གལ་ཏེ་དེ་བཞིན་བརྩོན་པར་མ་ནུས་ན། །ཡ་རབས་འཇིག་རྟེན་སྤྱོད་པའི་རྗེས་སུ་ཞུགས། །བདེན་ཞིང་བརྟན་ལ་མཛངས་ཤིང་ཞི་བ་དང༌། །དེས་ཤིང་སྙིང་བརྩེར་ལྡན་པའི་སྐྱེས་བུ་ནི། །འཇིག་རྟེན་སྤྱོད་པའི་ལམ་སྲང་ལ་བརྟེན་ནས། །དམ་ཆོས་འཆི་མེད་གྲོང་དུ་རིམ་གྱིས་འགྲོ། །ཉེས་པ་སྦེད་ཅིང་ཡོན་ཏན་ཟོལ་གྱིས་འཆོས། །གྱ་གྱུའི་ལམ་དུ་བློ་གྲོས་གོམས་བྱེད་ཅིང༌། །སྨྲས་པའི་རྗེས་སུ་
སྤྱོད་པ་མི་འཇུག་པ། །དེ་འདྲ་སྤོང་བ་བདེན་པར་གནས་ཞེས་བྱ། །འཇིག་རྟེན་དཔང་རྒྱ་གཏམ་དང་མནའ་ཐོ་དང༌། །རྒན་རབས་འཁུར་དང་དམ་ཚིག་སྡོམ་པ་སྟེ། །དན་པའི་གནས་ལྔ་འདི་ལས་མི་གཡོ་བའི། །སྐྱེ་བོ་དེ་དག་བརྟན་པའི་ཡོན་ཏན་ཅན། །རང་ཉིད་ལུགས་ལ་མཁས་ཤིང་བྱ་བཞག་ལ། །མཁས་པ་གཞན་ཡང་ལེགས་པར་བསྟེན་བྱས་ཏེ། །བཟང་པོའི་ལམ་སྲོལ་ཞིབ་མོར་དཔྱོད་ནུས་པ། །མ་འཛིང་མ་འཁྲུགས་མཛངས་པའི་བློ་ལྡན་ཡིན། །རྒྱན་པོ་འགྱེད་དང་བཞད་གད་ཤག་འགྱེད་སོགས། །རྟག་ཏུ་སྡོམ་པའི་ཉེ་བར་ཞི་བ་ནི། །ཟབ་ཅིང་གཏིང་དཔག་དཀའ་བའི་གཟི་བྱིན་གྱིས། །འཁོར་གྱི་དབུས་ན་མཆོག་ཏུ་བརྗིད་པར་གསུངས། །འཇིག་རྟེན་ཡ་རབས་སྤྱོད་པའི་གཞི་གཅིག་པུ། །དེས་ཤིང་འཇམ་པ་ཡིན་ཏེ་དེ་ཡོད་ན། །སྐྱེ་བོའི་གླང་ཆེན་འགྲོགས་ན་བདེ་བ་ཡི། །ཡོན་ཏན་ལྕགས་ཀྱུས་མོད་ལ་དབང་དུ་བྱེད། །གསོད་དང་འཕྲོག་སོགས་གཞན་ལ་འཚེ་བ་ཡི། །བསམ་སྦྱོར་སྤངས་ནས་བཟོད་དང་གཏོང་བ་སོགས། །སྙིང་རྗེའི་ངང་ཚུལ་ལྡན་པའི་ཀུན་སྤྱོད་ལ། །གཅིག་ཏུ་གཞོལ་བ་འདི་ཕྱིར་དགེ་བ་ཡིན། །རང་མགོ་མི་ཐོན་རོགས་ལ་ཅི་ཞིག་གདམས། །འོན་ཀྱང་དགོས་པ་ཡོད་སྙམ་བྲིས་པ་མིན། ཁྱོད་ཀྱིས་བསྐུལ་བའི་ནན་ངོ་མི་བཟློག་ཆེད། །ཐོལ་བྱུང་རྟོག་པའི་བྱ་རྗེས་ཤོག་བུར་བཀོད།། ༈ །།རྨོས་ཀྱིན་དུལ་བ་སེམས་ཀྱི་ཞིང་
ས་ཡིན། །བཏབ་ཀྱིན་སྐྱེ་བ་དགེ་བའི་ས་བོན་ཡིན། །སྤྱད་ཀྱིན་འཕེལ་བ་ཆོས་ཀྱི་ལོ་ཐོག་ཡིན། །སོ་ནམ་མཛོད་དང་ཇེ་བས་ཇེ་ཕྱུག་འོང༌། །དང་པོ་ས་རྒོད་རེངས་པ་འདུལ་ཐབས་གཅེས། །བློ་ལྡོག་རྣམ་བཞི་ཡིན་གྱིས་ཡུན་དུ་སྲིང༌། །དེ་ནས་ས་བོན་མ་ནོར་འདེབས་པ་གཅེས། །བྱང་ཆུབ་སེམས་སྦྱོང་ཡིན་གྱིས་སྲོག་ཏུ་གཟུངས། །མཐུན་རྐྱེན་དྲོད་གཤེར་ཟུང་དུ་འཛོམ་པ་གཅེས། །ཚོགས་བསགས་སྒྲིབ་སྦྱོང་ཡིན་གྱིས་ཡང་ཡང་བསླབ། །ཞིང་མཐའ་ར་བ་བརྟན་པོས་སྲུང་བ་གཅེས། །ཚུལ་ཁྲིམས་ཡིན་གྱིས་ཞིག་རལ་མ་སོང་བྱ། །དུས་དང་དུས་སུ་ཡུར་མ་ཡུར་བ་གཅེས། །བདེ་སྡུག་གཏོང་ལེན་ཡིན་གྱིས་མང་དུ་སྒོམ། །མདོར་ན་སེམས་བསྐྱེད་ཡི་དམ་མཐིལ་དུ་འཛིན། །སྤྱོད་པ་རྒྱ་མཚོས་སེམས་བསྐྱེད་རྩལ་སྦྱང་འབད། །ཐེག་ཆེན་གཞུང་ལམ་ཡིན་ནོ་ལམ་ཕྲན་མིན། །གསང་སྔགས་གཞི་རྟེན་ཡིན་ནོ་ལམ་གཞན་མིན། །སྔོན་འགྲོའི་གདམས་ངག་ཡིན་ནོ་དོན་ཆུང་མིན། །བླ་མ་མཉེས་ཤིང་དབང་བསྐུར་རྫོགས་པ་དང༌། །དམ་ཚིག་ཟོལ་མེད་སྒྲུབ་ལ་བརྩོན་པ་ཡིས། །མན་ངག་བཞིན་དུ་སྙིང་པོའི་དོན་ལ་སྦྱོང༌། །མན་ངག་མེད་པར་བསམ་གཏན་གཟུགས་མེད་ཀྱི། །ཏིང་འཛིན་ཙམ་ཡང་འགྲུབ་པར་མི་འགྱུར་ན། །བསམ་གྱིས་མི་ཁྱབ་སོ་སོ་རང་རིག་ཡུལ། །ཕོ་ཚོད་ཙམ་གྱིས་འཇལ་བ་སྨྱོ་འགྲོས་ཡིན། །གསང་སྔགས་བྱིན་རླབས་ལམ་ཞེས་
ཡོངས་སུ་གྲགས། །རང་གིས་མ་བསྒོམས་དྲེད་པོ་ཁ་བཤད་མཁན། །བདག་འདྲས་ཟབ་ཟབ་མང་པོ་བཤད་ན་ཡང༌། །བྱིན་རླབས་བཅུད་བྲལ་ཚིག་གི་ལྦུ་བར་ཟད། །དེ་སླད་བརྒྱུད་པ་རིན་ཆེན་སེལ་མེད་ཅིང༌། །ཉམས་ལེན་བྱིན་རླབས་རྟོགས་པའི་ཚ་དྲོད་ཅན། །མཚན་ལྡན་བླ་མའི་ཞལ་གསུང་བདུད་རྩིའི་བཅུད། །འཐུང་ལ་སེམས་ཀྱི་ཟུངས་སུ་ཐེབ་ངེས་མཛོད། །གཏེར་གྱི་ཁ་བྱང་ལྟ་བུའི་ཚིག་རྐང་ནི། །སེམས་ཀྱི་ངོ་བོ་རྗེན་པར་མཐོང་བ་དང༌། །མཐོང་ནས་ཅོག་བཞག་གནད་ཀྱིས་སྐྱོང་བ་དང༌། །གེགས་སེལ་བོགས་འདོན་ཆིག་ཆོད་བྱེད་པའོ། །དེ་སྐད་འཇིགས་མེད་དབང་དྲག་དེས་བསྐུལ་ནས། །རྡོ་རྒན་འཆལ་བས་ཡིད་ལ་གང་བབ་བྲིས། །དགེའོ།། ༈ །།ལམ་གྱི་རྩ་བ་ངེས་འབྱུང་སེམས་བསྐྱེད་སྒོམས། །རྩ་བ་མེད་པར་ཡལ་ག་ཅི་ལས་སྐྱེ། །ལམ་གྱི་སྙིང་པོ་མཐའ་བྲལ་ལྟ་བ་སྐྱོངས། །སྙིང་པོ་མེད་པའི་ཡལ་ག་ཅི་རུ་རུང༌། །ལམ་གྱི་མཐར་ཐུག་འོད་གསལ་རྫོགས་ཆེན་ཚོལ། །མཐར་ཐུག་མ་རྙེད་རིང་ལམ་ཉི་ཚེ་བ། །འོན་ཀྱང་མཐར་ཐུག་མ་རྙེད་རིང་ལམ་ཡོད། །གྲོལ་ལམ་མ་རྙེད་གོང་ན་སྨིན་ལམ་ཡོད། །སྨིན་ལམ་བོར་བའི་གྲོལ་ལམ་ལྟར་སྣང་བ། །ཐུན་མོང་བསྐྱུར་བའི་གསེང་ལམ་གཟུགས་བརྙན་ཙམ། །དེ་ཕྱིར་མགོ་བོ་མེད་པའི་མཇུག་མ་ལས། །མཇུག་མ་མེད་པའི་མགོ་བོ་གཙོར་ཤེས་བྱོས། །དེ་ནས་
རིམ་གྱིས་ཐོག་མཐའ་བར་གསུམ་ཆ། །ཡོངས་རྫོགས་ཐེག་མཆོག་ལུས་བཟང་རྒྱས་པར་འགྱུར།། ༈ །།ལེགས་ཚོགས་བརྒྱ་ལས་ལེགས་འོང་ལྷ་ཡི་ཚུལ། །སྐལ་བཟང་བསོད་ནམས་སྐལ་བར་ས་སྟེང་འོངས། །ཡིད་བཞིན་འབྱོར་བས་ཡིད་རབ་འཕྲོག་བྱེད་པ། །གང་འདིར་གནས་པ་གང་ཡིན་དེ་རབ་དགའ། །བྱ་བ་བསྙུང་ཞིང་བྱ་ལྟར་གསོག་འཇོག་བྲལ། །འདུ་འཛིའི་ནང་ལྟར་འདུ་འགོད་བརྩི་བའང་མེད། །ཅི་ལྟར་བྱས་ཀྱང་ཅི་ནས་བློ་བདེ་བ། །དབེན་པའི་མལ་དུ་དབེན་གསུམ་སྒོམ་རྣམས་བདེ། །ཟླ་མེད་ཟླ་བ་བཞིན་དུ་གཅིག་པུར་མཛེས། །ནོར་སྤངས་ནོར་བུས་མི་མཚོན་ཆོག་ཤེས་གཏེར། །འདོད་ཆུང་འདོད་ལྷའི་མདས་ཀྱང་མི་ཕིག་པ། །བསམས་ཤིང་བསམ་ན་བསམ་གཏན་སྤྱོད་རྣམས་བདེ། །སྟོབས་ལྡན་སྟོབས་མེད་ལྟ་བུར་གཞན་དབང་སོང༌། །སྣ་ལ་སྣ་ཚོགས་མཚོན་བཏགས་དགྲ་འཇོམས་པའི། །གླང་ཆེན་གླང་རྫིས་བཏུལ་བའི་ཚུལ་སོམས་དང༌། །ཆེན་པོའི་ཆེ་ཐོབ་འདི་ཡང་སྙིང་པོ་ཆུང༌། །ད་ནི་ད་ལྟ་ཉིད་ནས་བློ་སྣ་བསྟུང༌། །སུ་བསམ་སུ་ཟེར་དབང་དུ་མི་གཏོང་བར། །རང་དྲིན་རང་ཆོད་ངེས་པའི་དམ་ཆོས་ཞིག །ཨེ་བྱེད་མི་བྱེད་རང་ལ་རགས་ལས་སོ།། ༈ །།སྙིང་ནས་བྱང་ཆུབ་འདོད་ན་འདི་འདྲ་དགོས། །ཐེག་མཆོག་དགེ་བའི་བཤེས་ལ་བསྟེན་པ་དགོས། །བསྟེན་ནས་
གདམས་ངག་ཚུལ་བཞིན་བླང་བ་དགོས། །གདམས་དོན་སྒྲུབ་པ་སྙིང་པོར་བྱེད་པ་དགོས། །དགོས་པ་གསུམ་དང་ལྡན་ན་འཚེང་སྟེ་མཆི། །བླ་མ་དམ་པ་དོན་གསལ་གྱི་གསུང་ངོར་བྲིས།། ༈ །།ཀྱེ་ལགས་རྣམ་གྲོལ་བདེ་བ་དོན་གཉེར་ན། །རྣམ་དག་ཐར་ལམ་བལྟ་བའི་སྒྲོན་མེ་ཆེ། །ཐུབ་པའི་ལེགས་བཤད་མང་དུ་ཐོས་པ་གཅེས། །ཐོས་པའི་ཆོས་ལ་སྙིང་པོ་ལེན་བྱེད་པ། །ཚུལ་བཞིན་སེམས་པའི་སྦྱོར་བ་བསྟེན་པ་གཅེས། །ཡོན་ཏན་མི་ཉམས་གོང་དུ་འཕེལ་བའི་གཞི། །དམ་པའི་མགོན་ལ་བསྟེན་ཡུན་རིང་བ་གཅེས། །གཅེས་པའི་གནད་ལ་གཅེས་སྤྲས་ཆེན་པོར་མཛོད། །བློ་གསལ་དམ་པ་དཔལ་དབྱངས་ཀྱི་བཞེད་པ་ལྟར་བྲིས།། ༈ །།ཚེ་འདིའི་ཕུན་ཚོགས་ཆུ་བོའི་རླབས་ལྟར་གཡོ། །འཁོར་བ་མཚན་མོའི་ནགས་རླུང་རྒྱུ་བར་དཀའ། །ལན་ཅིག་རྙེད་པའི་དལ་རྟེན་རིན་ཆེན་འདིར། །གཏན་འདུན་འཆུག་མེད་བསྒྲུབ་ན་མི་ལེགས་སམ། །དོན་གཉེར་ཅན་གྱི་ངོར་བྲིས།། ༈ །།རྒྱལ་བས་ཚུལ་ཁྲིམས་ཡོན་ཏན་གཞི་མར་གསུངས། །བག་མེད་ཉེས་པ་ཀུན་གྱི་རྟེན་དུ་གསུངས། །དེ་སླད་ཁྱོད་ཀྱི་བག་ཡོད་གོམས་མཛད་ཅིང༌། །ཚུལ་ཁྲིམས་མིག་བཞིན་བསྲུང་ལ་འབད་འཚལ་ལོ། །ཛྙཱ་ན་བྷ་དྲའི་ངོར་བྲིས་ཏེ་ཕུལ།། ༈ །།ཡོན་ཏན་རྟེན་གཞི་ཚུལ་ཁྲིམས་ཡིན་གསུངས་ཀྱང༌། །ཚུལ་ཁྲིམས་མི་ཤེས་ལྟ་བ་མཐོ་སྙམ་དུ། །རྟེན་མེད་ནམ་མཁར་ཉལ་བའི་སྒྱུ་མ་
མཁན། །རྨོངས་པས་ངོ་མཚར་བྱེད་པ་མང་པོ་ཡོད། །དེ་འདྲ་མང་བས་ངོ་མཚར་མི་ཆེ་མོད། །ཚུལ་ཁྲིམས་ནོར་བུའི་ཐེམ་སྐས་ལེགས་བཙུགས་ཏེ། །སྲིད་ན་གནས་ཀྱང་ཞི་བའི་ལམ་ཕྱིན་པའི། །སྐལ་བཟང་དེ་དག་མཁས་པའི་ངོ་མཚར་གནས། ཁྱོད་ཀྱིས་ངོ་མཚར་སྔ་མ་མ་མཛད་པར། །ངོ་མཚར་བྱེད་པའི་ལམ་སྲང་གཉིས་པ་འདིར། །བློ་རྩེ་གཅིག་ཏུ་དྲིལ་ལ་བསྟེན་མཛད་ན། །ངོ་མཚར་ཡོན་ཏན་རིམ་གྱིས་རྙེད་པར་འགྱུར། །དམེ་ངོ་མཚར་ལ་བྲིས།། ༈ །།གོམ་རེ་བཞིན་ཡང་ཡར་སོང་ན། །མཐོན་པོའི་རི་རྩེར་བུད་ནས་འགྲོ། །ཉིན་རེ་བཞིན་དུ་བློ་བཅོས་ན། །ཡོན་ཏན་ཚོགས་ཀྱིས་ཇེ་མཐོར་འགྲོ། །ཐོག་སོ་སྟོང་གི་རྩེར་གནས་ཀྱང༌། །ལྕེབ་ན་གཡང་ལ་ལྟུང་བར་འགྱུར། །དགེ་སྦྱོར་མང་པོ་བྱས་སྙམ་ཡང༌། །བསམ་ཉེས་གཅིག་གིས་ཐུར་དུ་འགྲོ། །རི་གཟར་ངོས་ཀྱི་རྦབ་རྡོ་ལྟར། །ཡར་འཐེན་འབད་ནས་བྱ་དགོས་དང༌། །ཐུར་དུ་འབད་མེད་འགྲོ་བ་འདི། །འཁོར་བའི་སེམས་ཅན་སྤྱི་ཡི་ལུགས། །ནོར་དང་བུད་མེད་འདུ་འཛི་སོགས། །སྐྱིད་དུ་བསྒོམ་ནས་སྡུག་འོག་འཛུལ། །མར་མེ་ལང་ཚོ་རྒྱས་པ་དང༌། །རྩེའོ་སྙམ་ནས་ཕྱེ་ལེབ་འཆི། །གང་དང་གང་ལ་འཁོར་བ་པ། །དགའ་བའི་གནས་དེ་ཐུར་འགྲོའི་རྒྱུ། །འབྱུང་པོས་ཟིན་རྣམས་ཡིད་འོང་ཡུལ། །མཐོང་བ་འགག་གྲིར་འཆི་བའི་ལྟས། །ལོག་པའི་ཡུལ་ལ་གོམས་པའི་སེམས། །གློད་ན་མི་བཟང་བཟུང་ན་
བཟང༌། །སྨྱོན་པ་གཡང་ས་ཉུལ་བ་དེ། །མངག་ན་མི་ལེགས་བཀྱིག་ན་ལེགས། །འདུན་མ་ལེགས་ཉེས་མཐའ་ལ་ལྟོས། །གནས་སྐབས་ལེགས་ཀྱང་ལྟར་སྣང་ཙམ། །སྲིན་མོའི་གླིང་གི་ཚོང་པ་ཡང༌། །འཕྲལ་ལ་ཉམས་དགའ་ལྟ་བུར་གནས། །རེ་ཞིག་སྐྱིད་སྐྱིད་མི་འདྲ་ཡང༌། །ནམ་ཕུགས་ལེགས་པའི་ཆོས་དེ་ཟུངས། །ནད་མེད་བདེ་བ་འདོད་པ་ཡིས། །སྐྱུག་བྲོའི་སྨན་ཡང་བསྟེན་ལ་སོམས། །དམ་པའི་རྣམ་ཐར་རྗེས་སུ་སློབས། །བསླབས་ནས་མ་ལོབ་གཅིག་ཡོད་མིན། །དྲང་སྲོང་གནས་པའི་ནགས་ཁྲོད་ཀྱི། །ནེ་ཙོའང་རིག་བྱེད་འདོན་ཞེས་ཐོས། །རང་བློ་ཆོས་ལམ་མ་ཚུད་ན། །ཕྱི་ཚུལ་བཟང་ཡང་རྟག་མི་ཐུབ། །སྣ་ཆད་ལྷ་ཡི་འབག་གྱོན་པ། །མཛེས་མཛེས་འདྲ་ཡང་ག་ལ་བདེན། །ཆོས་བྱེད་རྒྱལ་པོའི་བླ་མ་སྟེ། །སྡིག་སྤྱོད་བུད་མེད་ཁོལ་པོ་ཡིན། །སྐྱིད་པོ་འདོད་ན་དམྱལ་བ་དང༌། །བདེ་འགྲོའི་ལམ་སྣེ་ནོར་མི་རུང༌། །འདོད་པའི་བདེ་བ་ཁྱི་ལའང་ཡོད། །ཆོས་ཀྱི་བདེ་བ་འཕགས་པའི་ནོར། །མཐོ་རིས་བདུད་རྩིའི་ཟད་ཅན་ལྷ། །གྲོང་མཐའི་རུས་གོང་ཅི་ལ་བསྡུ། །རང་ཉིད་ཉེས་པར་སྤྱོད་མཐོང་ཡང༌། །ངོ་ཚ་མེད་ན་ཅིར་མི་སེམས། །དེ་ཕོས་འཁྲིགས་པ་མི་སྦེད་པ། །ངོ་ཚ་བྲལ་བའི་རྣམ་འགྱུར་ཡིན། །ངོ་ཚ་བོར་ན་བྱ་བ་དང༌། །བྱ་མིན་ཞེས་བྱ་ཅི་ཡང་མེད། ཁྱི་རྒན་སྣ་རྫི་ཤོར་བ་ལ། །བཟའ་དང་བཟའ་མིན་དབྱེ་བ་ཅི། །སྙིགས་དུས་མི་རྣམས་
ངོ་ཚའི་གོས། །བོར་བ་སྤོབས་པ་མཐོ་བར་རྩི། །ཙུ་ཏའི་ཡུལ་དུ་རྐང་པ་གཉིས། །མ་ཚང་གཟུགས་བཟང་ཡིན་པར་སེམས། །ངོ་ཚ་ཡོད་ན་རང་སེམས་ལས། །གཞན་དུ་སློབ་དཔོན་བཙལ་མི་དགོས། །རྟ་མཆོག་ཅང་ཤེས་འགྲོ་བ་ལ། །ལྕགས་ཚན་བརྡབ་ནས་བསྐུལ་མི་དགོས། །ཆོས་ཀྱི་སྲོག་མཁར་ཚུལ་ཁྲིམས་ཏེ། །སྲུང་ཐབས་ངོ་ཚ་ཤེས་པ་བཟང༌། ཁྱིམ་ན་གཅེས་པ་བུ་ཆུང་སྟེ། །སྲུང་མཁན་མ་མ་བཟང་མོ་དགོས། །སངས་རྒྱས་གསུང་རྒྱུན་ཟེག་མ་ཡིན། །ཉམས་སུ་ལེན་ན་ཞལ་གདམས་ཡིན། །མི་ལེན་ཁ་མཚར་རྩེད་མོ་ཡིན། །གང་ཡང་བཀྲ་ཤིས་དཔལ་འབར་ཤོག། ༈ །།ཉེར་ལེན་ཕུང་པོའི་རེ་ཧྲུལ་ལ། །སེམས་ཅན་རྨོངས་པ་སྐྱིད་སྣང་སྐྱེས། །ཆོས་ཀྱིས་ཕོངས་པའི་མུ་གེ་ཡིས། །བདེ་སྐྱིད་ཤ་ཕྲི་རུས་ལ་ཐུག །སྤྱི་སེམས་ཆེ་བའི་མི་མཆོག་ཅིག །དཀའ་སྤྱད་བརྒྱ་ཡིས་ཐག་རིང་བགྲོད། །ཀུན་མཁྱེན་རིན་ཆེན་གླིང་དུ་སོན། །འགྲོ་མགོན་་བླ་མར་གྲགས། །དེ་ནི་དམ་ཆོས་འབུར་ནོར་གྱི། །ཕམ་ཕབ་ས་ལ་ཤོང་དཀའ་བ། །བསྣམས་ནས་མི་མཇེད་ཛམ་གླིང་འདིར། །གདུལ་བྱའི་ཚོགས་ལ་སྙོམས་པར་བཀྱེས། །བླང་ན་མང་པོ་ཐོབ་འགྱུར་ཏེ། །དོར་ན་གཅིག་ཀྱང་རྙེད་མི་འགྱུར། །དེ་སླད་དགའ་སྟོན་ཆེན་པོ་འདིར། །བགོ་སྐལ་ཡོད་མེད་སྣ་ཚོགས་བྱུང༌། །རྣམ་དཔྱོད་ལག་པ་རིང་ན་
བཟང༌། །དད་པའི་སློང་ཕོར་ཆེ་ན་དགའ། །སློང་ལ་སྐྱོ་དུབ་མེད་པ་གཅེས། །འདི་གསུམ་ལྡན་ན་ཕྱུག་པོ་འོང༌། །རྣམ་དཔྱོད་བསླབ་ན་སྐྱེ་འགྱུར་ཞིང༌། །དད་པ་སྦྱང་ན་འཕེལ་འགྱུར་སྟེ། །བསླབ་སྦྱང་འབད་པ་ལ་གནས་པས། །གསུམ་པོའི་ནང་ན་བརྩོན་འགྲུས་གཙོ། །གད་ཐོག་ལྷུན་པོས་སེམས་ལ་གང་ཤར་ཅིག་བྲིས་ཟེར་བར་ཨ་མཚར་བྲིས་ནས་ཕུལ།། ༈ །།ཕུན་ཚོགས་ཚངས་དབྱངས་བདུད་རྩིའི་སྣང་བས། །ས་གསུམ་འགྲོ་བའི་གདུང་བ་འཕྲོག་མཛད། །དཔལ་ལྡན་་རིགས་ཀྱི་ཟླ་བ། །དེ་ཡིས་ཁྱོད་ལ་དགེ་ལེགས་སྩོལ་ཅིག །ཉོན་དང་ཤར་ཕྱོགས་བསམ་སའི་ཡུལ་གྱི། །དད་ལྡན་འགྱུར་མེད་རྡོ་རྗེའི་མིང་ཅན། །གཏད་ཆོག་རེ་ས་གཞན་ན་མེད་ཀྱིས། །བློ་རྩེ་དམ་པའི་ཆོས་ལ་དྲིལ་དང༌། །བསླུ་བྲིད་སྒྱུ་མའི་རྩེད་འཇོར་ཡེངས་ལྟར། །ཚེ་འདིའི་རྣམ་གཡེང་ཟ་ཟིའི་ངང་དུ། །མི་ཚེ་ཕལ་ཆེར་སོང་ནས་གདའ་ཡིས། །ཆོས་ཤིག་བྱེད་ན་བྱེད་རན་འདུག་གོ །ཐོག་མ་མེད་ནས་སྐྱེ་ཤི་བརྒྱུད་ཀྱང༌། །རྒྱལ་བསྟན་མཇལ་བ་ད་རེས་ཙམ་ཡིན། །ཐེང་ཅིག་རྙེད་པའི་དལ་འབྱོར་རྟེན་འདི། །ཆུད་ཟོས་སོང་ན་མི་ཕན་སྲིད་དམ། །བཙན་ཕྱུག་སྐྱིད་དར་འཇོམས་པའི་ཆེ་དགུ། །ཀུན་ཀྱང་གཅིག་པུར་སྒྲེན་མོ་ལག་སྟོང༌། །དབང་མེད་འཇིག་རྟེན་ཕ་རོལ་སོང་བའི། །ཚུལ་འདི་སོམས་ལ་བློ་སྣ་སྟུང་དང༌། །འདི་ཕྱི་བར་དོའི་གནས་སྐབས་ཀུན་ཏུ། །སྐྱིད་སྡུག་ཅི་འོང་ལས་ཀྱིས་ཤེས་
ཏེ། །རང་བྱས་ལས་ལ་མཛུབ་མོ་བཀུག་ཚེ། །མི་འཇིགས་སྙམ་པའི་བློ་རྩེ་ཅི་འདུག །ཚེ་ལྷག་ལུག་གི་མཇུག་མ་ཙམ་འདི། །ཇི་ལྟར་བྱས་ཀྱང་ཕྱིད་ནས་འགྲོ་སྟེ། །ཤུལ་རིང་འཇིག་རྟེན་ཕྱི་མར་སླེབས་དུས། །སྐྱིད་པའི་འདུན་མ་ལེགས་པ་དཀའ་འོ། །དཀའ་འོ་སྙམ་པའི་ངང་ལ་བསྡད་ན། །ཅི་ཡང་མ་ནུས་ངང་དུ་ཤི་ཡོང༌། །བླང་དོར་ཇི་ལྟར་ནུས་བཞིན་བྱས་ན། །ཉིན་བཞིན་ཤེས་རྒྱུད་ཆོས་ཀྱིས་གང་ཡོང༌། །ད་ལྟ་རྨོངས་པ་མགོ་འཕང་མཐོ་དུས། །ཆོས་བྱེད་པས་ཀྱང་སྡིག་བྱེད་བྲིན་ཏེ། །ནམ་ཞིག་ཆོས་མིན་ཅིས་ཀྱང་བསླུ་བར། །ཐོག་ཏུ་ཁེལ་བའི་དུས་ཤིག་ཡོང་གིས། །དད་དང་སྙིང་སྟོབས་དཔའ་མཛངས་རྩལ་ཤུགས། །ཅི་ཡོད་ཆོས་ཀྱི་ཕྱོགས་སུ་སྤྲུགས་ནས། །ཆོས་དང་ལྷན་ཅིག་བདེ་ནས་བདེ་བར། །འགྲོ་བའི་མི་དེ་རྒོད་པོའི་ཡང་རྩེ། །རྒྱལ་དབང་བདེན་པ་གསུང་བ་དེ་ཡིས། །ཆོས་ཀུན་སྨོན་ལམ་རྩ་བ་ཅན་དུ། །གསུངས་ཕྱིར་བློ་ལྡོག་བཞི་ནས་བརྩམས་ཏེ། །འོད་གསལ་རྡོ་རྗེ་རྩེ་མོའི་བར་གྱི། །ལམ་བཟང་མཐའ་དག་ཚང་ལ་མ་ནོར། །གོ་རིམ་མ་འཁྲུགས་ཇི་བཞིན་ཉིད་དུ། །སྐྱེ་དང་གནས་དང་འཕེལ་བའི་དོན་ཕྱིར། །རྣམ་དག་སྨོན་ལམ་རྒྱུན་དུ་ཐོབ་དང༌། །སྨོན་ལམ་འགྲུབ་པའི་རྒྱུ་ཡི་གཙོ་བོ། །ཚུལ་ཁྲིམས་ཉག་གཅིག་ཡིན་པར་གསུངས་པས། །ཚུལ་ཁྲིམས་ཀུན་གྱི་དང་པོའི་སྒོར་གྱུར། །མི་དགེ་བཅུ་སྤོང་འབད་ནས་སློབ་དང༌། །ཀུན་སྤྱོད་བསྡམ་པའི་
ལུས་ངག་རྣམ་རིག །ཚུལ་ཁྲིམས་སྲུང་བའི་སྒོ་ཙམ་ཡིན་ཀྱང༌། ཁྲིམས་ཀྱི་ངོ་བོ་སྡོམ་སེམས་བརྟན་པ། ཁོ་ན་ཡིན་གྱིས་རྩ་བ་མ་འབོར། །གཉིད་དང་རྨི་ལམ་སད་པའི་དུས་ཀུན། །འདི་འདྲའི་དགེ་སྦྱོར་གཙང་མར་སྲེས་དང༌། །ནམ་ཞིག་འཆི་ཁ་བར་དོའི་ཚེ་ཡང༌། །ཆོས་ཀྱི་བག་ཆགས་སད་ནས་འོང་གིས། །རང་ཅག་ཆོས་ལ་འབད་ལོ་བྱས་ཀྱང༌། །རྡོ་རྦབ་རི་རྩེར་སྐྱེལ་བའི་དཔེ་བཞིན། །གྱེན་འགྲོ་དཀའ་ཞིང་བག་རེའི་རྐྱེན་གྱིས། །དཀའ་ཚེགས་མེད་པར་ཐུར་དུ་ལྟུང་བས། །བསྟེན་ན་མི་བསླུ་དཀོན་མཆོག་རྣམ་གསུམ། །འདི་ཕྱིའི་བློ་གཏད་ཁོང་ལ་ཞུས་དང༌། །ཟིན་ནས་མི་འཆོར་ཐུགས་རྗེའི་ལྕགས་ཀྱུས། །སྨོན་པའི་གནས་སུ་དྲང་ནས་འགྲོ་ཡིས། །སྔོན་ཆད་བདེ་སྐྱིད་འབྱོར་བ་གང་བྱུང༌། །དཀོན་མཆོག་ཁོ་ནའི་བཀའ་དྲིན་ཡིན་ཅིང༌། །ད་དུང་ཡོན་ཏན་ཆེ་སྐྱེ་ཆུང་འགྲུབ། །རྩ་བ་དཀོན་མཆོག་མིན་པ་མེད་ཀྱིས། །དུས་རྣམས་ཀུན་ཏུ་མཆོག་གསུམ་མ་བརྗེད། །གཅིག་ཆོག་རེ་ལྟོས་ཁོང་ལ་བཅོལ་ནས། །མི་འགྱུར་དད་པའི་གསེར་སྦྱང་མཎྜལ། །གཡེལ་མེད་ཉིན་མཚན་རྒྱུན་དུ་ཕུལ་ཅིག །གདམས་ངག་རྒྱུད་དང་འབྱོར་བ་དགོས་ཀྱི། །སྣ་ཁ་མང་བའི་སྟེང་ན་མི་འདུག །གལ་ཆེན་ཚིག་གཅིག་ལན་དགུར་བཟླས་འདི། །སོམས་ལ་ཐུགས་ཀྱི་ཟེའུ་འབྲུར་ཆོངས་མཛོད། །སྐྱེ་ཞིང་སྐྱེ་བའི་ཕྲེང་བ་ཀུན་ཏུ། །མཆོག་གསུམ་ཐུགས་རྗེའི་གདུགས་དཀར་བསིལ་གྲིབ། །བུ་ཁྱོད་གཏན་བདེའི་
ངལ་འཚོ་རྙེད་པར། །སྲས་བཅས་རྒྱལ་བས་བྱིན་གྱིས་རློབས་ཤིག །དེ་སྐད་སྤོ་མཐོའི་ནགས་ཚལ་ཁྲོད་ནས། །སྤྲང་རྒན་མདོ་མེད་བསྟན་པའི་ཉི་མས། །ཕན་སེམས་ཟླ་བའི་མདངས་ལྟར་དཀར་བས། །བྲིས་འདི་དགེ་བའི་གསོས་སུ་གྱུར་ཅིག། ༈ །།ཕ་ཀུན་མཁྱེན་བརྒྱུད་པའི་ཞབས་རྡུལ་མཆོད། །དུས་ལན་གཅིག་དཔྱིད་ཀའི་ཉི་རིང་ལ། །གྲོགས་ལ་ལས་ཤོག་བྱང་རེ་གཏད་ནས། །འདིའི་ངོས་ལ་ཞལ་གདམས་འབྲི་དགོས་ཟེར། །ལར་གཞན་རྒྱུད་གདམས་པས་འདུལ་མཁན་དེ། །རང་གདམས་དོན་ཅུང་ཟད་སྒྲུབ་པ་དགོས། །དོན་དེ་ཕྱིར་ནེ་ཙོ་ཆོས་སྨྲ་ལྟའི། །གྲོགས་འཆལ་བ་ང་འདྲར་མ་བསྙེན་ཨང༌། །རྟེན་མཚན་ཉིད་ཀུན་ལྡན་བླ་མས་ཀྱང༌། །ཡུལ་སྣོད་མིན་འགྲོ་བ་མི་ཐུལ་བས། །རང་དམ་པའི་གདུལ་བྱར་བྱེད་སྙམ་ན། །རྒྱུད་དད་བརྩོན་བློ་ཡིས་ལེགས་པར་སྦྱོངས། །ལུས་བླ་མའི་ཆོས་གྲལ་མང་ཕྱིན་ཡང༌། །སེམས་ཆོས་ཀྱི་ཆོས་ཁས་མ་ཕོག་པ། །འདི་གང་ཐོས་རྒྱུད་དང་སྦྱར་སྙམ་པའི། །བློའི་འཆོས་ཚུལ་གཞི་ནས་སྟོར་བས་ནོངས། །རྒྱུད་ཆོས་ལ་འཁུལ་དུ་མི་བཏུབ་ཅིང༌། །ཆོས་བྱས་ཚད་གཏན་བདེའི་འདུན་མ་རུ། །འགྲོར་མི་སྟེར་ལྟས་ངན་འུག་པའི་གདོང༌། །དགྲ་ཆོས་བརྒྱད་འགོང་པོར་གདོང་བཟློག་ཐོངས། །སྔོན་སྨར་ཤོད་བྱིས་པ་ལོ་ལྔའི་གཟུགས། །དུས་དེང་སང་དར་ཡོལ་སྐྲ་དཀར་ཅན། །ང་ཁྱོད་ཀྱིས་མཐོང་ལུགས་གཉིས་བྱུང་བའི། །དཔེ་འདིས་ཀྱང་རྒ་ཤིའི་འགྱུར་བ་སོམས། །
ཚུལ་དེ་བཞིན་ཁྱོད་ཀྱང་ན་མཐོར་སླེབ། །དགྲ་འཆི་བདག་རྒྱལ་པོ་ཇེ་ཉེར་འོང༌། །ལས་བྱས་པ་ཆུད་ཟད་མི་འགྲོ་བས། །ཚེ་ཕྱི་མའི་དོན་ལ་རྟོག་དཔྱོད་ཐོངས། །ལམ་ཐེག་མཆོག་རྩ་བ་སེམས་བསྐྱེད་དེ། །སེམས་དེ་ཡི་རྩ་བ་སྙིང་རྗེ་ཆེ། །བློ་འདི་གཉིས་ཡོད་ན་གང་བྱས་སླ། །ཆོས་གཅེས་དགུའི་སྙིང་པོ་མ་ནོར་མཛོད། །དགོས་སངས་རྒྱས་ཐེག་པའི་རྒྱལ་མཚན་ཏོག །དཔལ་རྡོ་རྗེ་རྩེ་མོའི་གསེང་ལམ་ནས། །གྲོལ་འདོད་ན་སེམས་དེ་གཅེས་སྤྲས་ཀྱིས། །རྟེན་དམ་ཚིག་སྡོམ་པ་རྣམ་དག་སྲུངས། །མགོན་བླ་མའི་བྱིན་བརྒྱུད་སྙིང་དབུས་སུ། །རྐྱེན་མོས་གུས་དྲག་པོའི་མཚམས་སྦྱོར་གྱིས། །དབང་མེད་དུ་འགུགས་པའི་གནད་ཤེས་ན། །ལམ་རྫོགས་ཆེན་རྟོགས་ལ་དཀའ་བ་ཆུང༌། །གཤིས་གདོད་ནས་དག་པའི་འོད་གསལ་དང༌། །ཡུམ་ཤེར་ཕྱིན་ཟབ་མོའི་ཉམས་མྱོང་གཉིས། །ཐབས་ཅོག་བཞག་འཁྱིལ་བའི་མན་ངག་གིས། །སྲེ་ནུས་པ་རྣལ་འབྱོར་དབང་པོ་ཡིན། །དབྱིངས་ཀ་དག་གཞོན་ནུ་བུམ་སྐུའི་ཀློང༌། །མདངས་ལྷུན་གྲུབ་སྒྲོན་བཞིའི་སྣང་ཆ་ཡིས། །ཟབ་རྒྱ་ཆེའི་དགའ་སྟོན་འབྱམས་ཀླས་པ། །དུས་རྟག་ཏུ་འགྱེད་ལ་རྩལ་སྦྱོང་མཛོད། །དབྱངས་དེ་སྐད་ཀུན་མཁྱེན་བརྒྱུད་པའི་གསུང༌། །བློ་དད་པའི་བྲག་རིར་ཕྲད་པ་ལས། །རང་ནུས་པ་མེད་ཀྱང་གཞན་དབང་གིས། །སྒྲ་བརྙན་དུ་གྲགས་པ་དགེ་གྱུར་ཅིག །སྨར་འཕྲང་གཉིས་བར་གྱི་བནྡེ་ཐོས་བསམ་ཟེར་བ་རང་ཉིད་བྱིས་པར་གྱུར་པའི་དུས་ཀྱི་
གྲོགས་པོས་བསྐུལ་ནས་སྤྲང་འཆལ་བསྟན་པའི་ཉི་མས་བྲིས་པ་མངྒ་ལཾ།། ༈ །།དམ་པའི་ངང་ཚུལ་མ་སྨད་པའི། །མཆོག་སྤྲུལ་ཟླ་བའི་གཙུག་ཕུད་ཅན། །དེ་ལ་བྱིས་པའི་ཁྱབ་འཇུག་ཞིག །གཏམ་གྱི་མེ་ཏོག་གསར་པས་མཆོད། །འདི་ན་སྟོན་ཆེན་ཆོས་བརྒྱད་མཁན། །ཆུ་རྡུལ་བཞིན་དུ་མང་མོད་དེ། །དེ་དག་རྣམས་ཀྱི་གྲལ་ན་ཁྱོད། །ནམ་ཡང་བཞུགས་པར་མི་མཛད་གསོལ། །འཕགས་པའི་རྣམ་ཐར་མེད་བཞིན་དུ། །གྲགས་སྐམ་རི་ལུང་བརྡལ་གྱུར་ཀྱང༌། །སྙིང་པོ་མེད་པའི་ཐན་སྙེ་བཞིན། །བླང་བར་བྱ་བ་མ་ལགས་སོ། །འདོད་ལྷའི་ཉག་ཕྲན་མདེའུ་རྣོ། །སྡིག་པའི་གྲོགས་པོ་བསླུ་ཐབས་ཆེ། །རྣམ་པར་རྟོག་པ་འབྲིད་པ་སླ། །དེ་བས་ཐུགས་ནི་སྒྲིམ་པོར་གསོལ། །བློ་གྲོས་རི་རབ་ལྟར་བརྟན་ཞིང༌། །དགོངས་པ་ཕྱོགས་མཐའི་མཚོ་བཞིན་ཟབ། །དེ་ལ་གཡོན་ཅན་བདུད་ཀྱི་སྡེས། །གླགས་སྐབས་རྙེད་པར་སླ་བ་མིན། །ཀུན་སྤྱོད་ངེས་པ་མ་མཆིས་དང༌། །གཏམ་ལ་ཡིད་བརྟན་མི་རུང་དང༌། །བློ་རྩེ་དུ་མར་གཡོ་བ་ལ། །མ་རབས་གྲགས་པ་ཐག་མི་རིང༌། །སྒམ་ཞིང་དབང་པོ་བསྡམ་པ་དང༌། ཁྲེལ་བག་སྨད་པར་མ་གྱུར་པ། །དེ་ལ་ཡ་རབས་དམ་པའི་ཚུལ། །གན་ན་འདུག་པ་ཁོ་ན་ལགས། །གང་ན་གཞོན་དང་མི་གཞོན་དང༌། །ནོར་གྱིས་འབྱོར་དང་མ་འབྱོར་མི། །ཀུན་ལ་ཐུགས་ནི་སྙོམས་མཛད་ན། །ཀུན་གྱིས་མ་ལྟར་བཀུར་བར་འགྱུར། །གཟུར་གནས་ཐུགས་ཀྱིས་དཔྱོད་ལས་གཞན། །ཕྱོགས་སུ་ལྷུང་བའི་སྐྱེ་བོ་ལ། །ཐུགས་ནི་ཧ་
ཅང་རྟོན་མཛོད་ན། །ཟླ་བ་གཟའ་ཡིས་ཟིན་ལྟར་འགྱུར། །རྣམ་པར་རྒོད་ཅིང་གསར་ངས་ཆེ། །ཤེས་རབ་རྩིང་ཞིང་བབ་ཅོལ་ཆེ། །དེ་ཡིས་སྙན་པ་མིན་པའི་ཚིག །རིན་གྱིས་ཉོས་པ་འབའ་ཞིག་ལགས། །འཇིག་རྟེན་གནས་ལ་མི་ཆགས་བཞིན། །འཇིག་རྟེན་མཐུན་འཇུག་ལྟར་སྟོན་པ། །བྱང་ཆུབ་སེམས་དཔའ་བདག་ཉིད་ཆེའི། །ཐབས་ལ་མཁས་པའི་བྱེ་བྲག་ཡིན། །འཇིག་རྟེན་སྤྱོད་ལ་མཁས་གྱུར་ཀྱང༌། །དམ་པའི་སྤྱོད་ལ་མ་གཟིགས་པ། ཁྱོད་ཀྱི་རྣམ་ཐར་མི་འོས་ཀྱིས། །དམ་པའི་ངང་ཚུལ་མཁྱེན་མཛད་གསོལ། །སྲིད་རྩ་རྨིང་ནས་འཇིག་པའི་ཐབས། །ཟབ་མོ་དཔྱད་གསུམ་དག་པའི་ལམ། ཁྱོད་ཀྱིས་ཐོས་ཤིང་དགོངས་མཛད་དེ། །ཆོས་ཀྱི་སྤྱན་ལྡན་ཆེན་པོ་མཛོད། །ཡང་དང་ཡང་དུ་ཐོས་པ་ཚོལ། །རྟག་པར་རྒྱུན་དུ་ཐོས་པ་བརྟེན། །ཐབས་ཚུལ་དུ་མས་ཐོས་པ་བསྐྱེད། །ཐོས་པས་ཁྱོད་ཉིད་མཁས་པར་བྱེད། །ཇི་ལྟར་མང་དུ་གསན་པ་བཞིན། །དངོས་སྟོབས་རིགས་པ་གོང་དུ་སྤེལ། །ཇི་ལྟར་ངེས་ཤེས་སྐྱེས་པ་བཞིན། །བསྒོམ་པའི་ཤེས་རབ་མཐར་ཕྱིན་མཛོད། །རང་གི་ཐུགས་སུ་ཆུད་པའི་དོན། །ཟང་ཟིང་མེད་པར་གཞན་ལ་སྟོན། །གཞན་ལ་དགེ་བའི་ཆོས་སྟོན་ན། ཁྱོད་ཉིད་དགེ་བའི་བཤེས་གཉེན་ལགས། །དེ་སླད་ཁྱོད་ཀྱིས་ཚུལ་འདི་ལ། །ཅི་ནས་དྲན་པ་མངོན་དུ་ཞོག །དོན་འདི་ཐུགས་ལ་བསྟིམ་པ་ཞིག །ཐལ་མོ་སྦྱར་ཏེ་གསོལ་བ་ལགས། །ཞེས་པའང་འཇིགས་མེད་པས་སོ།། །།