བླ་མ་དང་ཨོ་རྒྱན་དབྱེར་མེད་དུ་སྒྲུབ་ལུགས།
ན་མོ་གུ་རུ། །གང་ཞིག་བླ་མ་དང་དཔལ་ཨོ་རྒྱན་ཆེན་པོ་ཐ་མི་དད་དུ་ཤེས་པས་གསོལ་འདེབས་ཀྱི་སྒྲུབ་ལུགས་ཉམས་སུ་བླང་བར་འདོད་པས། གནས་གཙང་མར་གུ་རུའི་སྐུ་གཟུགས་ཀྱི་སྤྱན་སྔར་མཆོད་པ་གང་འབྱོར་བཤམས། མ་གྲུབ་ན་ཡིད་ཀྱི་ཆོ་ག་བྱ། སྔོན་དུ་བློ་ལེགས་པར་བཅོས་ཏེ། དགེ་སེམས་ཁྱད་པར་ཅན་གྱི་ངང་ནས། བདག་གཞན་འཇིགས་པ་ཀུན་ལས་ཐར་བྱའི་ཕྱིར། །དཀོན་མཆོག་རྣམ་གསུམ་སྙིང་ནས་སྐྱབས་སུ་བཟུང༌། །རྣལ་འབྱོར་ཟབ་མོས་བྱང་ཆུབ་མཆོག་བསྒྲུབས་ཏེ། །མཁའ་ཁྱབ་འགྲོ་བ་སྒྲོལ་བར་སེམས་བསྐྱེད་དོ། །ལན་གསུམ། ཨོཾ་མ་ཧཱ་ཤུ་ནྱ་ཏ་སོགས། གདོད་ནས་རྣམ་དག་འོད་གསལ་སྟོང་པ་ཉིད། །ཀུན་ཁྱབ་ཀུན་ཏུ་སྣང་བའི་རོལ་པ་ལས། །ཕྱི་སྣོད་པདྨ་འོད་ཀྱི་གཞལ་མེད་ཁང༌། །ནང་བཅུད་རིག་འཛིན་མཁའ་འགྲོའི་འཁོར་ལོ་ཆེ། །དེ་དབུས་རང་ཉིད་མཚོ་རྒྱལ་རྣལ་འབྱོར་མ། །བྱུ་རུའི་མདོག་ཅན་ཞི་འཛུམ་རྗེས་ཆགས་ཉམས། །གཅེར་མོ་རུས་པའི་རྒྱན་ལྡན་གྲི་ཐོད་འཛིན། །བཞེངས་སྟབས་མོས་གུས་སྤྱན་གསུམ་ནམ་མཁར་གཟིགས། །རང་མདུན་བར་སྣང་ཡེ་ཤེས་འོད་ལྔའི་ཀློང༌། །རྩ་བའི་བླ་མ་རྗེ་བཙུན་པདྨ་འབྱུང༌། །དཀར་དམར་གཞོན་ཚུལ་མཚན་དཔེའི་དཔལ་རབ་འབར། །པཎ་ཞྭ་ཆོས་
གོས་གསོལ་ཞིང་རྡོར་ཐོད་བསྣམས། །མཆན་ཁུང་གཡོན་ན་སྦས་ཡུམ་ཁ་ཊྭཱཾ་འཆང༌། །ཞབས་ཟུང་རྡོ་རྗེ་སྐྱིལ་ཀྲུང་པད་ཟླར་བཞུགས། །འཛུམ་ཞལ་དགྱེས་པའི་ཉམས་བཅས་བདག་ལ་གཟིགས། །སྐྱབས་གནས་ཐམས་ཅད་འདུས་པའི་ངོ་བོར་གསལ། །ཞེས་དམིགས་ཏེ། ཧཱུྃ། ཨོཾ་རྒྱན་ཡུལ་གྱི་སོགས་ལན་གསུམ་མམ་བདུན་གྱིས་ཡེ་ཤེས་པ་དང་བསྲེ། མ་བཅོས་སྤྲོས་བྲལ་སོགས། རྡོ་རྗེ་འཆང་ལ་ཕྱག་འཚལ་ལོ། །འོག་མིན་ཆོས་ཀྱི་སོགས། རྩ་བའི་བླ་མའི་ཞབས་ལ་ཕྱག་འཚལ་ལོ། །ཇི་སྙེད་སུ་དག་སོགས་ཀྱིས་ཡན་ལག་བདུན་པ་འབུལ། གསོལ་བ་གདབ་པ་ནི། མཁྱེན་པས་ཞི་བའི་དབྱིངས་ཀྱི་དེ་ཉིད་གཟིགས། །སྙིང་རྗེས་སྲིད་པའི་འགྲོ་བ་རྗེས་སུ་འཛིན། །མཁྱེན་བརྩེས་སྲིད་ཞིའི་མཐའ་གཉིས་རིང་སྤངས་པ། །དཔལ་ལྡན་བླ་མའི་ཞབས་ལ་གསོལ་བ་འདེབས། །དགོངས་པ་སངས་རྒྱས་ཀུན་དང་རྣམ་དབྱེར་མེད། །རྒྱལ་བ་ཀུན་གྱི་དམ་ཆོས་སྒྲོམ་གཅིག་པུ། །དུས་གསུམ་འཕགས་པའི་ཚོགས་རྣམས་སྐྱེད་པའི་ཡབ། །དཀོན་མཆོག་གསུམ་དངོས་ཁྱོད་ལ་གསོལ་བ་འདེབས། །བཞུགས་པའི་གནས་མཆོག་དཔལ་རི་པདྨ་འོད། །ཐུགས་རྗེའི་གདུལ་ཞིང་རིས་མེད་འཇིག་རྟེན་ཁམས། །
མཛད་པའི་ཆོ་འཕྲུལ་ཕྱོགས་དུས་ཀུན་ཏུ་ཁྱབ། །སྤྱོད་ཡུལ་ཚད་མེད་ཁྱོད་ལ་གསོལ་བ་འདེབས། །བདག་འདྲ་ཤུགས་དྲག་ཉོན་མོངས་ཆུ་བོས་ཁྱེར། །ལས་ཀྱི་དབང་གིས་སྙིགས་མའི་འདམ་དུ་བྱིང༌། །ཕྱི་ནང་འགལ་རྐྱེན་རླུང་མར་བཞིན་དུ་འཚུབས། །ཐར་བར་འདོད་ཀྱང་ཕྱི་ཕྱིར་འོག་ཏུ་ལྟུང༌། །འཇིག་རྟེན་བླ་མའི་ཉིན་བྱེད་ཆོས་དབྱིངས་མནལ། །བསྟན་འཛིན་ཕལ་ཆེར་དེ་ཡི་ཕྱི་བཞིན་ནུབ། །སྐྱབས་མེད་མགོན་མེད་ལྔ་བདོའི་གཅོང་རོང་དུ། །འོ་དོད་འབོད་པ་བདག་ལ་ཐུགས་རྗེས་གཟིགས། ཁྱོད་ནི་སངས་རྒྱས་གདུལ་བྱའི་ལྷག་མ་རྣམས། །ལྷག་པར་སྒྲོལ་ལ་སྲས་བཅས་རྒྱལ་བ་ཡིས། །དབང་བསྐུར་ནོར་བུའི་ཅོད་པན་དབུ་ལ་གསོལ། །ཉམ་ཐག་སྐྱོབ་ནུས་སེང་གེའི་སྒྲ་ཡང་སྒྲོག །དེ་ཕྱིར་བདག་ནི་ཁྱོད་ལ་མགོ་གཏད་ཅིང༌། ཁྱོད་མིན་རེ་ས་གཞན་དུ་མི་ཚོལ་གྱིས། །ཡེ་ཤེས་པདྨའི་སྤྱན་གྱིས་ལེགས་གཟིགས་ནས། །ཐུགས་རྗེའི་ཕྱག་ཡངས་རྒྱས་པས་རྗེས་སུ་ཟུངས། ཁྱོད་ཞལ་རྗེས་དྲན་ཁྱོད་ཀྱི་རྣམ་ཐར་སེམས། ཁྱོད་མཚན་གསང་སྔགས་རྒྱལ་པོ་ཟློ་བྱེད་པ། །བདག་ལ་མཐུ་རྩལ་ཅི་མཆིས་འདིར་ཟད་པས། །རྗེ་ཁྱོད་དགོངས་པའི་དུས་ནི་འདི་ལགས་སོ། །
འདི་ནས་བྱང་ཆུབ་བར་གྱི་ཚེ་རབས་ཀུན། །མགོན་ཁྱོད་བདག་གི་བླ་མར་འགྱུར་བ་དང༌། །བསམ་སྦྱོར་དག་པས་ཁྱོད་ཐུགས་མཉེས་བྱས་ནས། །བཀའ་དྲིན་འདུད་རྩིས་འཚོ་བར་བྱིན་གྱིས་རློབས། །སྲིད་པའི་བདེ་འབྱོར་དཔལ་ལ་མི་ཆགས་པར། །གཏན་འདུན་ཆོས་ཀྱི་བདེ་བས་ཡིད་དྲངས་ཏེ། །འཇིག་རྟེན་འདྲེན་པའི་བསྟན་ལ་རབ་འབྱུང་ཞིང༌། །ཚུལ་ཁྲིམས་སྲོག་ལྟར་བསྲུང་བར་བྱིན་གྱིས་རློབས། ཁྱད་པར་ཐེག་མཆོག་བསྟན་པའི་གནད་ཀྱི་མཐིལ། །རླབས་ཆེན་སྙིང་རྗེས་དྲངས་པའི་སེམས་བསྐྱེད་དང༌། །སྤྱོད་པ་རྒྱ་མཚོའི་དཔུང་དང་ལྡན་པ་ཡི། །ངེས་དོན་ལམ་བཟང་རྙེད་པར༴ དབང་གིས་རྒྱུད་སྨིན་དམ་ཚིག་སྲོག་ཏུ་བཙའ། །བསྐྱེད་པའི་རིམ་པས་ལམ་བཟང་གཞི་ཚུགས་ཤིང༌། །རྫོགས་རིམ་ཟབ་མོས་སྐྱེ་འཆི་བར་དོ་ཡི། །སྣང་ཞེན་ལམ་དུ་ལོངས་པར༴ འཁྲུལ་པའི་ན་བུན་ཆོས་དབྱིངས་མཁའ་ལ་དྭངས། །འོད་གསལ་ཉི་མ་མཐའ་དབུས་མེད་པར་ཤར། །སྣང་སྤྱོད་མ་ལུས་དག་པ་རབ་འབྱམས་ཀྱི། །དཀྱིལ་འཁོར་གཅིག་ཏུ་འབར་བར༴ མཐར་ཐུག་དག་པ་གཉིས་ལྡན་དབྱིངས་ཀྱི་རྒྱན། །ཡེ་ཤེས་ཐིག་ལེ་གཅིག་པུའི་རང་འོད་ཀྱིས། །འགྲོ་བའི་ཡིད་མུན་མ་
ལུས་འཕྲོག་བྱེད་པ། ཁྱོད་དང་རྣམ་ཐར་དབྱེར་མེད་བྱིན་གྱིས་རློབས། །སྤྲོ་ན་བླ་མ་སྐུ་གསུམ་མའི་གསོལ་འདེབས་སོགས་ཀྱང་བྱ། ཨོཾ་ཨཱཿཧཱཾཨུ་ཞེས་འབྲུ་གསུམ་དང༌། གུ་རུ་སིདྡྷི་བཟླ། མཐར། གུ་རུའི་གནས་གསུམ་སངས་རྒྱས་ཐམས་ཅད་ཀྱི། །རྡོ་རྗེ་གསུམ་མཆོག་ཡི་གེའི་གཟུགས་སྣང་བ། །ཨོཾ་ཨཱཿཧཱཾཨུ་གསུམ་དཀར་དམར་མཐིང་ཀའི་མདོག །རང་རང་རིགས་ཀྱི་འོད་ཟེར་འབར་བས་མཚན། །དེ་དག་འོད་ཀྱིས་བདག་གི་གནས་གསུམ་ཁེངས། །སྒོ་གསུམ་སྒྲིབ་སྦྱང་རྡོ་རྗེ་གསུམ་གྱི་ལམ། །སྐྱེ་བརྟན་འཕེལ་བའི་རྟེན་འབྲེལ་ལེགས་བསྒྲིགས་ཤིང༌། །སྐུ་གསུམ་གོ་འཕང་འགྲུབ་པའི་ནུས་ལྡན་བྱས། །སླར་ཡང་འོད་ཟེར་གསུམ་གྱི་བདུད་རྩིའི་རྒྱུན། །གཅིག་ཏུ་འདྲེས་ནས་རང་གི་གནས་གསུམ་ཞུགས། །ཆ་མཉམ་སྒྲིབ་སྦྱངས་བཞི་པའི་དབང་དོན་རྟོགས། །ངོ་བོ་ཉིད་སྐུའི་སྐལ་བ་རྒྱུད་ལ་བཞག །ཅེས་དབང་བླང༌། དེ་མཐར་བླ་མ་རང་སེམས་འོད་གསལ་དབྱིངས། །རོ་གཅིག་རྣམ་འདྲེས་དགོངས་པའི་རྩལ་ཆེན་རྫོགས། །གདོད་ནས་རྣམ་དག་དང་པོའི་མགོན་པོའི་ཞལ། །སྨྲ་བསམ་བརྗོད་བྲལ་ངང་དུ་ལྷག་པར་མཐོང༌། །ཞེས་ཐུགས་ཡིད་བསྲེ། སླར་ཡང་ལྷའི་སྣང་ཞེན་གསལ་བཏབ་ལ། དོང་སྤྲུགས་སྨོན་ལམ་སོགས་ཀྱི་བསྔོ་བ་
བྱའོ། །ཞེས་པའང་སྡོམ་བརྩོན་ཤྲིའི་མིང་ཅན་གྱི་ངོར། །བསྟན་ཉིས་བྲིས་པ་དགེ །བཀྲ་ཤིས།། ༈ །།ན་མོ་གུ་རུ་བྷྱཿ གང་གིས་བླ་མ་སྒྲུབ་འདོད་པས། །སློབ་དཔོན་རིགས་རྣམས་ཀུན་འདུས་ཉིད། །དད་པའི་ཡུལ་དུ་རབ་བྱས་ཏེ། །རྣལ་འབྱོར་འདི་ལ་སྙིང་པོར་བྱ། །གང་ཞིག་དྲན་པས་ཡེ་ཤེས་མཆོག་སྟེར་བ། །སློབ་དཔོན་སངས་རྒྱས་ཀུན་དངོས་རིགས་ཀུན་བདག །དེ་ལ་མི་ཕྱེད་གུས་པས་སྐྱབས་མཆི་ཞིང༌། །གཞན་ཕན་རླབས་ཆེན་བསྒྲུབ་ཕྱིར་ཁྱོད་བསྒོམ་བྱ། །ལན་གསུམ། ཨོཾ་སྭ་བྷ་ཝ་སོགས། །སྲིད་དང་ཞི་བའི་ཆོས་རྣམས་མ་ལུས་པ། །རང་བཞིན་གདོད་ནས་མི་དམིགས་མཉམ་པ་ཆེའི། །རྩལ་སྣང་རྟེན་འབྱུང་རོལ་མོ་འཕྲུལ་པའི་གར། །མདུན་གྱི་ནམ་མཁར་སེང་ཆེན་ནོར་བུའི་ཁྲིར། །དཔལ་ལྡན་བླ་མ་འཁོར་ལོའི་དབང་ཕྱུག་ནི། །མཚན་དཔེའི་ཞལ་བཟང་ལྟ་བས་མི་ངོམས་ཤིང༌། །ཕྱག་གཉིས་ཐུགས་ཀར་ཆོས་འཆད་ཕྱག་རྒྱ་མཛད། །ཞབས་ཟུང་རྡོ་རྗེའི་སྐྱིལ་ཀྲུང་གདན་ལ་བཞུགས། །སྐུ་ལ་ངུར་སྨྲིག་རྡུལ་གཟན་མཐང་གོས་མནབ། །པན་ཞྭ་དམར་སེར་མདངས་ལྡན་དབུ་ལ་གསོལ། །དཀོན་མཆོག་རྩ་གསུམ་རྒྱ་མཚོའི་ངོ་བོ་ཉིད། །ཕུལ་བྱུང་ཡེ་ཤེས་མཆོག་གི་སྐུ་རུ་གསལ། །
ཞེས་བརྗོད། །ཇི་སྙེད་སུ་དག་སོགས། །ཡན་ལག་བདུན་པ་བྱ་ཞིང་ཕྱག་འཚལ། །དེ་མཐར་ཕུར་ཚུགས་སུ་གསོལ་བ་གདབ་པ་ནི། འཇིགས་མེད་ཐེག་མཆོག་ཆོས་ཀྱི་སེང་གེའི་སྒྲས། །ཚུལ་གཉིས་བསྟན་པའི་རྒྱལ་མཚན་སྒྲེང་མཛད་པ། །དཔལ་ལྡན་བླ་མ་མཆོག་ལ་གསོལ་བ་འདེབས། །བདག་རྒྱུད་འཕགས་པའི་ལམ་དུ་བསྒྱུར་བྱིན་རློབས། །ཞེས་མང་དུ་བརྗོད་ཅིང་བསམ། སྤྲོ་ན་རྒྱང་འབོད་རྐང་པ་བཅུ་དྲུག་པ་བྱ་སྟེ། མཁྱེན་ནོ་མཁྱེན་ནོ་དྲིན་ཅན་གྱི་བླ་མ། །གཟིགས་ཤིག་གཟིགས་ཤིག་ཐུགས་རྗེ་ཡི་མངའ་བདག །དག་པ་གཉིས་ལྡན་ཆོས་ཉིད་ཀྱི་ཀློང་ནས། །ཡེ་ཤེས་སྒྱུ་མའི་རྣམ་རོལ་གྱིས་བཞེངས་ཤོག །བདེ་གཤེགས་ཀུན་དངོས་དཔལ་ལྡན་གྱི་བླ་མ། །ཐར་ལམ་སྟོན་མཛད་བྱང་ཆུབ་ཀྱི་ས་མཁན། །ཐུགས་རྗེས་སྐྱོངས་ཤོག་ཁམས་གསུམ་གྱི་འདྲེན་པ། །བྱིན་རླབས་སྩོལ་ཤོག་དྲིན་ཆེན་གྱི་ཆོས་རྗེ། །བཀའ་དྲིན་འཁོར་མེད་རྗེ་བཙུན་གྱི་བླ་མ། །སྐྱོབ་པ་མཚུངས་མེད་སྲིད་ཞི་ཡི་གདུང་སེལ། །ཐུགས་རྗེས་དགོངས་ཤིག་དྲན་ཆོག་གི་སྐྱབས་གཅིག །བྱིན་རླབས་མཆོག་སྩོལ་རིགས་ཀུན་གྱི་སྤྱི་གཟུགས། །ཡང་ཡང་དྲན་ནོ་དྲིན་ཆེན་གྱི་བླ་མ། །སྙིང་ནས་
དྲན་ནོ་བྱིན་རླབས་ཀྱི་གཏེར་ཆེན། །ཚེ་རབས་ཀུན་ཏུ་ཐུགས་རྗེ་ཡིས་བཟུང་ནས། །དངོས་གྲུབ་མཆོག་གི་ཆར་ཆེན་ཞིག་ཕོབ་ཤོག །ཅེས་བརྗོད། འདི་སྐབས་འབྲུ་གསུམ་བཟླས་པ་བྱས་མཐར། བླ་མའི་སྐུ་ལས་སྣ་ཚོགས་འོད་ཀྱི་སྤྲིན། །དཔག་མེད་བདག་གི་སྙིང་དབུས་ཞུགས་པའི་མོད། །ཇི་སྙེད་སྒྲིབ་པའི་ཚོགས་རྣམས་ཡོངས་སྦྱངས་ཏེ། །ཟག་མེད་ཡེ་ཤེས་སྣང་བ་རྒྱས་པར་གྱུར། །དེ་མཐར་བླ་མ་མཆོག་གི་ཡེ་ཤེས་སྐུ། །འོད་ཞུ་བདག་དང་རོ་གཅིག་འདྲེས་གྱུར་ནས། །སྤྲོས་མེད་མཉམ་པ་ཆེན་པོའི་གཞི་དབྱིངས་སུ། །གཉིས་མེད་ཡེ་ཤེས་ཞི་བར་མཉམ་པར་བཞག །ཅེས་རྟོགས་པར་བསྐྱེད། །རྒྱལ་བ་ཀུན་གྱི་སོགས་ཀྱིས་བསྔོ་སྨོན་བྱའོ། །ཞེས་པའང་དགེ་བའི་བཤེས་གཉེན་པདྨ་བདེ་ཆེན་གྱི་ངོར་སྤྲང་སྨྱོན་འཇིགས་མེད་པས་བྲིས་པ་དགེ། ༈ །།དཔལ་ལྡན་གྲུ་འཛིན་དབང་པོའི་ཐུགས་ཀ་ནས། །ཟླ་མདོག་འོད་ཀྱི་འཁྲི་ཤིང་རིང་པོའི་རྩེར། །རྗེ་བཙུན་བླ་མ་དམིགས་མེད་བརྩེ་བའི་གཏེར། །རྒྱལ་བའི་ཅོད་པན་འཆང་བ་གཤེགས་སུ་གསོལ། །རང་མདུན་ནམ་མཁར་སེང་ཁྲི་པདྨ་དང༌། །ཆ་རྫོགས་ཟླ་བ་གསར་པའི་དཀྱིལ་འཁོར་སྟེང༌། །བདག་གི་བསོད་ནམས་མྱུ་གུ་སྤེལ་བའི་ཕྱིར། །འཆི་མེད་སྤྲིན་གྱི་བ་གམ་བརྩེགས་ལྟར་བཞུགས། །རྒྱལ་བ་ཀུན་དངོས་
དཔལ་ལྡན་བླ་མ་ལ། །གུས་པས་ཕྱག་འཚལ་མཆོད་སྤྲིན་དུ་མས་མཆོད། །སྡིག་ལྟུང་མ་ལུས་གནོང་འགྱོད་དྲག་པོས་བཤགས། །རང་གཞན་དགེ་ཚོགས་ཀུན་ལ་རྗེས་ཡི་རང༌། །ཟབ་ཅིང་རྒྱ་ཆེའི་ཆོས་ཚུལ་བསམ་ཡས་པ། །གདུལ་བྱའི་སྐལ་པ་ཇི་བཞིན་སྣང་མཛད་ཅིང༌། །བསྟན་འགྲོའི་ཉེར་འཚོར་བཞུགས་པར་གསོལ་བ་འདེབས། །བསོད་ནམས་བྱང་ཆུབ་ཆེན་པོའི་རྒྱུ་རུ་བསྔོ། །ལན་གསུམ། །ཐེག་མཆོག་ཆོས་ཚུལ་ལ་མཁས་འཇམ་པའི་དབྱངས། །འགྲོ་ལ་ཕན་བདེའི་དཔལ་སྟེར་སྤྱན་རས་གཟིགས། །བསོད་ནམས་ཞིང་དུ་སྲས་བཅས་རྒྱལ་རྣམས་དང༌། །དབྱེར་མེད་རྗེ་བཙུན་བླ་མར་གསོལ་བ་འདེབས། །ཅི་ནུས། དཔལ་ལྡན་བླ་མ་ཁྱོད་ཀྱི་བཀའ་དྲིན་ནི། །སྤེལ་ལེགས་ནོར་བུའི་ཐེམ་སྐས་ལ་འཛེགས་ནས། །རྒྱལ་བའི་ལུང་རྟོགས་འཆི་མེད་དགའ་ཚལ་དུ། །བདག་སོགས་འགྲོ་རྣམས་རྟག་ཏུ་རོལ་པར་ཤོག །བསྔོ་བ་གཞན་ཡང་བྱའོ། །ཆོས་གྲགས་ཀྱི་གསུང་མ་བཅག་ཙམ་དུ། །སྤྲོ་བ་མེད་བཞིན་སྨྱོ་གཏམ་ཅལ་ཅོལ་བྲིས། མངྒ་ལམ།། ༈ །།བླ་མ་ལ་ཕྱག་འཚལ་ལོ། །གང་ཞིག་གིས་བླ་མའི་རྣལ་འབྱོར་ལ་བརྩོན་པར་འདོད་པས། སྐྱབས་སེམས་སྔོན་དུ་བཏང་ལ། ཨོཾ་སྭ་བྷ་ཝ་ཤུདྡྷོ་སརྦ་
སོགས། །མི་དམིགས་སྟོང་པའི་རང་གདངས་འགགས་མེད་པ། །ཀུན་སྣང་དག་ཆེན་རོལ་མོར་འཆར་བའི་གཟུགས། །མདུན་གྱི་ནམ་མཁར་རིན་ཆེན་སེང་གེའི་ཁྲིར། །རྗེ་བཙུན་བླ་མ་དགྱེས་པའི་འཛུམ་མདངས་ཅན། །ཞལ་གཅིག་ཕྱག་གཉིས་མཉམ་བཞག་ཕྱག་རྒྱ་མཛད། །ཞབས་གཉིས་མཉམ་པའི་སྐྱིལ་ཀྲུང་གིས་བཞུགས་ཤིང༌། །སྐུ་ལ་ངུར་སྨྲིག་བགོ་བས་མཛེས་པར་ཀླུབས། །དབུ་ལ་པཎ་ཞུ་དམར་པོ་ལེགས་པར་མནབས། །རྩ་གསུམ་རྒྱལ་བ་ཀུན་དང་དབྱེར་མེད་བཞུགས། །ཞེས་གསལ་བཏབ། རྒྱལ་ཀུན་སྤྱི་གཟུགས་རྗེ་བཙུན་བླ་མ་ལ། །གུས་པས་ཕྱག་འཚལ་མཆོད་སྤྲིན་རྒྱ་མཚོས་མཆོད། །སྡིག་ལྟུང་ཀུན་བཤགས་དགེ་ལ་རྗེས་ཡི་རང༌། །ཆོས་འཁོར་བསྐོར་བསྐུལ་མྱ་ངན་མི་འདར་གསོལ། །དགེ་ཚོགས་བླ་མེད་བྱང་ཆུབ་སྙིང་པོར་བསྔོ། །ཞེས་ཚོགས་བསགས། དཔལ་ལྡན་བླ་མ་སངས་རྒྱས་ཀུན་དངོས་ལ། །རྩེ་གཅིག་མི་ཕྱེད་གུས་པས་གསོལ་བ་འདེབས། །བདག་བློ་དམ་པའི་ཆོས་སུ་འདྲེས་ནས་ཀྱང༌། །ཡེ་ཤེས་སྣང་བ་རྒྱས་པར་བྱིན་གྱིས་རློབས། །ཞེས་ཕུར་ཚུགས་སུ་གསོལ་བ་གདབ། ཨོཾ་ཨཱཿམ་ཧཱ་གུ་རུ་སརྦ་སིདྡྷི་ཧཱུྃ། ཞེས་བཟླ། ཐུན་མཐར། བླ་མའི་གནས་
གསུམ་ཡི་གེ་འབྲུ་གསུམ་ལས། །འོད་འཕྲོས་རང་གི་སྤྱི་མགྲིན་སྙིང་གར་ཐིམ། །སྒྲིབ་པ་བཞི་སྦྱངས་དབང་བཞི་རྫོགས་པར་ཐོབ། །སྐུ་བཞིའི་གོ་འཕང་རྒྱུད་ལ་བཞག་པར་གྱུར། །དེ་མཐར་བླ་མ་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་ཀུན་བཟང་ཆོས་སྐུའི་ཞལ། །མངོན་གྱུར་ཁྱད་ཆོས་དྲུག་གིས་གདོད་མའི་དབྱིངས། །དག་པ་གཉིས་ལྡན་ཆེན་པོར་རོ་གཅིག་གྱུར། །ཅེས་མཉམ་པར་བཞག །ཐུན་མཇུག་དགེ་བསྔོ་སོགས་བྱའོ། །ཅེས་པའང་དད་ལྡན་མགོན་པོ་རྡོ་རྗེའི་ངོར་འཇིགས་མེད་པས་སོ།། ༈ །།གང་ཞིག་གིས་བླ་མ་སྒྲུབ་པར་འདོད་པས་སྐྱབས་སེམས་དང་སྭ་བྷ་ཝ་སྔོན་དུ་སོང་རྗེས། སྤྲོས་བྲལ་ཟབ་མོའི་གནས་ལུགས་དེ་བཞིན་ཉིད། །འགགས་མེད་སྒྱུ་འཕྲུལ་རོལ་མོར་སྣང་བའི་གར། །རྒྱལ་ཀུན་སྤྱི་གཟུགས་དཔལ་ལྡན་བླ་མ་མཆོག །ཞལ་གཅིག་ཕྱག་གཉིས་ཆོས་འཆད་ཕྱག་རྒྱ་མཛད། །ཞབས་གཉིས་རྡོ་རྗེའི་སྐྱིལ་ཀྲུང་གདན་ཁར་བརྗིད། །སྐུ་ལ་དུར་སྨྲིག་བགོ་བས་རབ་མཛེས་ཤིང༌། །མཐོང་ན་མི་མཐུན་ཞི་བའི་ཡེ་ཤེས་སྐུ། །སྣང་སྟོང་སྒྱུ་འཕྲུལ་དྲྭ་བའི་ངོ་བོར་བཞུགས། །ཞེས་གསལ་བཏབ། སྐྱབས་གནས་ཀུན་འདུས་རྗེ་བཙུན་བླ་མ་ལ། །རྩེ་གཅིག་གུས་པའི་
ཡིད་ཀྱིས་ཕྱག་འཚལ་ཞིང༌། །མི་ཟད་མཆོད་སྤྲིན་རྒྱ་མཚོས་རྟག་ཏུ་མཆོད། །སྡིག་ལྟུང་གནོང་འགྱོད་དྲག་པོས་མཐོལ་ཞིང་འཆགས། །དུས་གསུམ་དགེ་ཚོགས་ཀུན་ལ་རྗེས་ཡི་རང༌། །ཚུལ་གཉིས་ཆོས་ཀྱི་འཁོར་ལོ་བསྐོར་བར་བསྐུལ། །འགྲོ་བའི་དོན་དུ་བསྐལ་བརྒྱར་བཞུགས་གསོལ་འདེབས། །དགེ་ཚོགས་བྱང་ཆུབ་སྙིང་པོའི་ས་ལ་བསྔོ། །ཞེས་ཚོགས་བསགས། འཇིགས་མེད་ཡེ་ཤེས་དམ་པའི་རལ་གྲི་ཡིས། །ལོག་རྟོག་དྲྭ་བ་སྟུག་པོ་གཅོད་མཛད་པ། །བླ་མ་ཆོས་ཀྱི་དབང་པོར་གསོལ་བ་འདེབས། །བདག་རྒྱུད་དམ་པའི་ཆོས་སུ་འདྲེས་བྱིན་རློབས། །ཞེས་གསོལ་བ་ཡང་ཡང་གདབ། ཨོཾ་ཨཱཿམ་ཧཱ་གུརྦྦ་བྷྱ་་སིདྡྷི་ཧཱུྃ། ཅི་ནུས་བཟླས། ཐུན་མཐར། བླ་མའི་སྐུ་ལས་འོད་ཟེར་དཔག་མེད་འཕྲོས། །བདག་གི་གནས་གསུམ་ཐིམ་པའི་མོད་ཉིད་ལ། །མཆོག་དང་ཐུན་མོང་དངོས་གྲུབ་ཀུན་ཐོབ་སྟེ། །བླ་མའི་ཐུགས་དང་རང་སེམས་དབྱེར་མེད་གྱུར། །ཅེས་བརྗོད་ཅིང་བླ་མ་རང་ལ་བསྟིམ་ཞིང་མཉམ་པར་བཞག །དགེ་བ་འདི་ཡིས་མཁའ་ཁྱབ་ཡིད་ཅན་ཀུན། །རྨད་བྱུང་ཟབ་མོའི་ལམ་དང་མི་འབྲལ་ཞིང༌། །རྣམ་འདྲེན་དགེ་བའི་བཤེས་ཀྱིས་རྗེས་བཟུང་སྟེ། །ཐེག་ཆེན་ལམ་གྱི་བགྲོད་པ་
མཐར་ཕྱིན་ཤོག །ཅེས་པའང་བཙུན་པ་གསང་སྔགས་ཀྱི་ངོར་འཇིགས་མེད་པས་སོ།། ༈ །།བླ་མ་ལ་ན་མོ། །ཨོ་རྒྱན་རིན་པོ་ཆེ་ལ་གསོལ་བ་འདེབས་པ། ཚིག་རྐང་བདུན་པའི་བཀླག་ཐབས་མདོར་བསྡུས་པ་ནི། སྐྱབས་སེམས་སྔོན་དུ་བཏང་ལ། མདུན་གྱི་ནམ་མཁར་རིན་ཆེན་སེང་གེའི་ཁྲིར། །སྣ་ཚོགས་པདྨ་ཉི་མའི་གདན་སྟེང་དུ། །རྩ་བའི་བླ་མ་མཚོ་སྐྱེས་ཐོད་ཕྲེང་རྩལ། །སྐུ་མདོག་དཀར་དམར་ཞལ་གཅིག་ཕྱག་གཉིས་པ། །རྡོ་རྗེ་ཐོད་བུམ་འཛིན་ཅིང་སྐྱིལ་ཀྲུང་བཞུགས། །སྐུ་ལ་ཟ་འོག་བེར་སྨུག་བརྗིད་ལྡན་གསོལ། །མཐོང་གྲོལ་འདབ་ལྡན་རིགས་ལྔའི་ཞྭ་ཐོད་ཅན། །ཟུང་འཇུག་བདེ་སྟོང་ཕྱག་རྒྱའི་འཁོར་ལོར་བཞུགས། །སྐྱབས་གནས་ཀུན་འདུས་རྡོ་རྗེ་འཆང་དབང་དང༌། །དབྱེར་མེད་དཔའ་བོ་མཁའ་འགྲོའི་ཚོགས་ཀྱི་རྗེའི། །ཡོན་ཏན་ཡིད་ལ་དྲན་པའི་མོས་གུས་ཀྱིས། །བསྔགས་བརྗོད་རྒྱུད་མངས་འཁྲོལ་བའི་མཆོད་སྤྲིན་སྤྲོ། །ཞེས་པའི་མཐར། ཧཱུྃཿ ཨོ་རྒྱན་ཡུལ་གྱི་སོགས། ཅི་མང་བཟླ། མཐར། བླ་མའི་གནས་གསུམ་ཡི་གེའི་འོད་ཟེར་གྱིས། །བདག་རྒྱུད་སྒོ་གསུམ་འཁྲུལ་པའི་ཁམས་སྦྱངས་ཏེ། །མཐར་ནི་བླ་མ་འོད་ཞུ་རང་
ལ་ཐིམ། །ཐུགས་ཡིད་རོ་གཅིག་འདྲེས་པའི་ངང་ལ་བལྟ། །ཞེས་མཉམ་པར་བཞག །བསྔོ་སྨོན་བྱའོ། །ཞེས་པའང་སྲས་ལྷ་དབང་ངོར་སྤྲང་རྒན་འཇིགས་མེད་པས་སོ།། ༈ །།ཨེ་མ་ཧོ། །ཀ་དག་སྐྱེ་མེད་རྡོ་རྗེའི་ཕོ་བྲང་ནས། །ལྷུན་གྲུབ་བདེ་བའི་སྐུ་ཅན་པདྨ་འབྱུང༌། །རྩ་གསུམ་ཆོས་སྐྱོང་རྒྱ་མཚོའི་སྤྱི་དཔལ་ཆེ། །གངས་ཅན་བསྟན་འགྲོའི་མགོན་པོ་ད་བཞེངས་ཤིག །མཐའ་དམག་དམ་སྲིའི་རུ་མཚོན་གཟིངས་པའི་ཚེ། །རིག་འཛིན་མཁའ་འགྲོའི་གཙོ་མཆོག་པདྨ་འབྱུང༌། །ཐུགས་རྗེའི་ཐུགས་དམ་མ་གཡེལ་དུས་ལ་བབས། །བདུད་འདུལ་གར་དགུའི་མཐུ་བྱིན་ད་བསྐྱེད་ཅིག །བསྟན་ཞབས་ཀླ་ཀློས་སྡུད་ལ་རིངས་པའི་ཚེ། །བདེ་མཆོག་གྲུབ་པའི་དཔའ་བོ་པདྨ་འབྱུང༌། །མངོན་སྤྱོད་ལས་ལ་དགྱེས་པའི་དུས་ཡིན་གྱི། །དཔའ་གཏུམ་རྡོ་རྗེའི་གཟུགས་སྐུར་ད་བཞེངས་ཤིག །བོད་ཁམས་མཐའ་འཁོབ་སྐྱེ་བོས་འཇིག་པའི་ཚེ། །འཇིགས་མེད་བརྟུལ་ཞུགས་མཆོག་གྲུབ་པདྨ་འབྱུང༌། །ཕས་རྒོལ་ལྷག་མར་མཛད་པའི་དུས་ལ་བབས། །དྲག་ཤུལ་རལ་གྲིའི་རྣོ་དབལ་ད་ཕྱུངས་ཤིག །དུས་འཁྲུགས་མཚོན་ཆའི་རུ་འཛིང་རྔོམས་པའི་ཚེ། །འཇིགས་མཛད་ཧེ་རུ་ཀ་དཔལ་
པདྨ་འབྱུང༌། ཁམས་གསུམ་སྟོབས་ཀྱིས་གནོན་པའི་དུས་ལ་བབས། །བདེ་ཆེན་རྡོ་རྗེའི་མཐུ་ནུས་ད་སྤོར་ཅིང༌། །དབྱིངས་ནས་དག་ཆེན་མཉམ་པའི་ཡེ་ཤེས་ཆེ། །གཏུམ་རྔམ་ཨ་ལ་ཧ་ལའི་གད་རྒྱང་དང༌། །ལྷན་ཅིག་ཁྲོ་ལ་ཁྲོས་པའི་སྐུར་སྟོན་ཞིང༌། །བདུད་སྲིན་དམ་སྲིའི་སྙིང་ཁྲག་ད་རོལ་ཅིག །མཉམ་ཉིད་ཞི་བ་ཆེན་པོ་ཆོས་སྐུའི་ཐུགས། ཁྲག་འཐུང་ཁྲོས་པའི་གཟུགས་སྐུར་མངོན་བཞེངས་ལ། །མཐའ་དམག་དུས་ཀྱི་འཁྲུག་རྩོད་ཞི་བ་དང༌། །བོད་ཁམས་བདེ་ལ་འགོད་པའི་ཕྲིན་ལས་མཛོད། །ཅེས་པའང་མཐའ་དམག་དུ་རུ་ཀའི་བྱ་མ་རྟ་ཁྲག་ཚོས་ནམ་མཁའ་བཞིན་རས་སུ་བྱུག་པའི་ཚེ། སྤྲང་སྨྱོན་འཇིགས་མེད་པས་བྲིས་པ་ཀླ་ཀློའི་འདུན་གྲོས་འཇིག་པའི་ཐོ་ལུམ་དུ་གྱུར་ཅིག། ༈ །།བླ་མ་ལ་ཕྱག་འཚལ་ལོ། །ཨོ་རྒྱན་རིན་པོ་ཆེའི་གསོལ་འདེབས་ཚིག་བདུན་མ་ཁ་ཏོན་བྱེད་དུས་ཀྱི་དམིགས་རིམ་ཤིན་ཏུ་ཉུང་ལ་གོ་སླ་བར་བརྗོད་ན། གྲུབ་ན་གུ་རུ་རིན་པོ་ཆེའི་སྣང་བརྙན་སོགས་རྟེན་གསུམ་གྱི་དྲུང་དུ་མཆོད་པ་ཅི་འབྱོར་བཤམས། ཁ་ལྷོ་ནུབ་ཏུ་བལྟས་ཏེ། ལེའུ་བདུན་མར། ཁྱེའུས་ཕ་མར་འབོད་འདྲའི་གདུང་དབྱངས་ལ༔ པི་ཝཾ་གླིང་བུའི་གདངས་ལྟར་སྙན་པ་
ཡིས༔ ཉིན་མཚན་དུས་དྲུག་རྣམས་སུ་གསོལ་བ་ཐོབ༔ ཅེས་གསུངས་པ་ལྟར་སེམས་རྩེ་གཅིག་ཏུ་གཏད་དེ་གདུང་བའི་དབྱངས་སུ་འདོན་པར་བྱའོ། །དེའང་ཚིག་བདུན་ཉིད་ཀྱི་འབྲུ་ནོན་རག་རིམ་ཞིག་བྱས་ན་སྐབས་དོན་འགྲུབ་པས་དེ་ལ་ཧཱུྃ་ཞེས་པས་གསོལ་འདེབས་ཀྱི་བྱང་དྲངས་ཏེ་སྙན་གསན་ཕབ་ལ། ཨོ་རྒྱན་གྱི་ཡུལ་གྱི་ནུབ་བྱང་མཚམས་ན་དྷ་ན་ཀོ་ཤའི་མཚོ་ཆེན་པོ་ཡོད་པའི་གླིང་དུ་མེ་ཏོག་པདྨ་ཆེན་པོ་གེ་སར་ཏེ་ཟེའུ་འབྲུ་ཤིན་ཏུ་རྒྱས་པའི་སྡོང་པོ་ལ་བརྫུས་ཏེ་འཁྲུངས་ཤིང་འཁྲུངས་དུས་ཉིད་ནས་སངས་རྒྱས་ཐམས་ཅད་ཀྱིས་དབང་བསྐུར་ཞིང་མཁའ་འགྲོ་མ་རྣམས་ཀྱིས་མཆོད་བསྟོད་ཕུལ་བ་ལ་སོགས་པའི་ཡ་མཚན་པ་སྟེ་ངོ་མཚར་དང་ལྡན་པ། སྔར་ནས་སངས་རྒྱས་སྣང་བ་མཐའ་ཡས་ཀྱི་ངོ་བོར་མཆོག་གི་དངོས་གྲུབ་བརྙེས་པའམ་ཐོབ་ཟིན་ནས་འཛམ་བུའི་གླིང་མཐའ་དབུས་ཀྱི་གདུལ་བྱ་གདུལ་བའི་ཆེད་དུ་བསྟན་པའི་སྤྲུལ་པའི་སྐུ་པདྨའི་རིགས་ཡིན་པ་དང་པདྨ་ལས་འཁྲུངས་པའི་ཆ་ནས་པདྨ་འབྱུང་གནས་ཞེས་སུ་དཔའ་བོ་མཁའ་འགྲོའི་ཞིང་ཁམས་ཐམས་ཅད་ན་ཡོངས་སུ་གྲགས་པ་དེ། དང་པོ་རྒྱ་གར་གྱི་ཡུལ་དུ་རྒྱལ་པོ་ཨིནྡྲ་བྷོ་དྷི་སོགས་རྒྱལ་ཆེན་མང་པོ་དང་རྗེ་བཙུན་དམ་པ་སངས་རྒྱས་
སོགས་ཛོ་ཀི་ལྷ་ལྕམ་མནྡྷ་ར་བ་སོགས་རིགས་ལྡན་གྱི་བུད་མེད་ལ་སོགས་པ་གདུལ་བྱ་དཔག་ཏུ་མེད་པའི་དོན་མཛད། བར་དུ་བོད་ཀྱི་ཡུལ་དུ་སངས་རྒྱས་ཀྱི་བསྟན་པ་ཡོངས་སུ་རྫོགས་པའི་རྩ་བ་ཐོག་མར་བཙུགས་ཤིང་མི་དང་མི་མིན་གྱི་གདུལ་བྱ་མཐའ་ཡས་པ་སྨིན་གྲོལ་ལ་བཀོད། །སྙིགས་དུས་ཀྱི་རྒུད་པ་ཞི་བའི་ཆེད་དུ་གཏེར་ཁ་བྱེ་བ་ཕྲག་བརྒྱ་བསམ་གྱིས་མི་ཁྱབ་པ་སྦས། ཐ་མ་འགྲོ་ལྡིང་གི་ཡུལ་དུ་རྫུ་འཕྲུལ་དང་གདམས་ངག་གི་སྒོ་ནས་ཕྲ་མེན་རྣམས་དམ་ལ་བཏགས་ཤིང་མིའི་འགྲོ་བ་མང་པོའི་དོན་མཛད་དེ་མཐར་རྔ་ཡབ་སྲིན་པོའི་གླིང་གི་ལྟེ་བ་མཐིང་ཞུན་གྱི་རྒྱ་མཚོའི་དབུས་ཟངས་མདོག་དཔལ་གྱི་རི་བོའི་རྩེ་དག་པའི་ཞིང་གི་བཀོད་པ་བསམ་གྱིས་མི་ཁྱབ་པའི་ནང༌། པདྨ་འོད་ཀྱི་གཞལ་མེད་ཁང་ཁྲ་ཕུང་ངེ་བ་ན་འཁོར་དུ་ཡེ་ཤེས་དང་འཇིག་རྟེན་གྱི་མཁའ་འགྲོ་སྟེ་དཔའ་བོ་དང་མཁའ་འགྲོ་མ་མང་པོས་བསྐོར་ནས་རྡོ་རྗེ་ལྟ་བུའི་སྐུ་ད་ལྟ་ཡང་སྐྱེ་འཆི་བགྲེས་རྒུད་དང་བྲལ་བར་བཞུགས་ཡོད་ཚུལ་ཞིབ་ཏུ་བསམ་ནས་ཆེ་བའི་ཡོན་ཏན་གྱིས་ཡིད་རང་དབང་མེད་པར་འཕྲོགས་པའི་དད་པ་འདྲེན་ངེས་བྱ། དེ་ནས་གུ་རུ་རིན་པོ་ཆེ་ཁྱེད་ཀྱི་རྗེས་སུ་བདག་ཞུགས་ནས་བསྐྱེད་རྫོགས་ཀྱི་ལམ་མཐོན་པོ་ཚོ་རེ་ཞིག་ཉམས་
སུ་མ་ལོངས་ཀྱང་གསོལ་འདེབས་དང་མོས་གུས་ཀྱི་གདུང་བ་དྲག་པོས་རྩེ་གཅིག་ཏུ་སྒྲུབ་པར་བྱེད་ཀྱི། གུ་རུའི་སྐུ་སྲིན་ཡུལ་ན་བཞུགས་ཀྱང་ཐུགས་རྗེ་ཉེ་རིང་མེད་ཅིང་མཁྱེན་པ་ཆགས་ཐོགས་མི་མངའ་བར་འཇུག་པས་ན། བདག་ཅག་གི་ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་སོགས་མངོན་མཐོ་དང་ངེས་ལེགས་ཀྱི་ཕུན་ཚོགས་ལ་བར་དུ་གཅོད་པ་ཐམས་ཅད་སྐད་ཅིག་ཉིད་ལ་ཞི་བ་དང༌། ཚེ་བསོད་དཔལ་འབྱོར་ལུང་དང་རྟོགས་པའི་ཡོན་ཏན་མཐུན་པའི་རྐྱེན་དང་བཅས་པ་ཐམས་ཅད་འབད་མེད་དུ་འགྲུབ་པར་བྱིན་གྱིས་བརླབ་པའི་ཕྱིར་དུ་ཡིད་མགྱོགས་ཀྱི་རྫུ་འཕྲུལ་ཆེན་པོའི་སྟབས་སུ་གཤེགས་སུ་གསོལ་ལོ་ཞེས་འདོད་དོན་ལ་ཐུགས་རྗེ་བསྐུལ་ཞིང་སྤྱན་འདྲེན་པའི་གསོལ་འདེབས་ཕུར་ཚུགས་སུ་བྱ་ཞིང་གསོལ་འདེབས་ཀྱི་དོན་བསྡུས་པ་བླ་ན་མེད་པའི་ཡོན་ཏན་གྱི་ཁུར་གྱིས་ལྕི་བས་གུ་རུ་སྟེ་བླ་མར་བྱ་བའི་ཁྱད་ཆོས་ཅན། པདྨའི་རིགས་གཙོ་བོ་པདྨ་ལས་འཁྲུངས་པའི་མཚན་ཡང་པདྨ་ཞེས་བོས་ཏེ་བདག་ལ་མཆོག་དང་ཐུན་མོང་གི་སིདྡྷི་སྟེ་དངོས་གྲུབ་མ་ལུས་པ་ཧཱུྃ་ཞེས་སྩོལ་ཅིག་པར་བསྐུལ་བའི་སྔགས་ཀྱང་སྦྲེལ་ལ་ཐུན་རེར་སྟོང་ཕྲག་ལ་སོགས་པར་དག་
ཅིང་གསལ་བའི་ངག་གིས་མི་ཚིག་དང་མ་འདྲེས་པར་འདོན། ཨོ་རྒྱན་རིན་པོ་ཆེ་ཟངས་མདོག་དཔལ་རི་ན་བཞུགས་པའི་ད་ལྟའི་གནས་ཚོད་དེ་ཉིད་ཚོགས་ཞིང་དུ་བྱས་ནས་གསོལ་བ་འདེབས་པ་ཡིན་པས་རྗེས་ལ་བསྡུ་རིམ་སོགས་མི་དགོས། ཐུན་མཐར་བསམ་པ་མྱུར་འགྲུབ་དང་དགེ་བསྔོ་བྱ། དེ་ལྟར་ཉམས་སུ་བླང་བའི་ཕན་ཡོན་ཡང་གཏེར་གཞུང་ཉིད་ལས། འདི་ལྟར་གསོལ་བ་བཏབ་པའི་བུ༔ ང་ཡིས་སྐྱོབ་པ་སྨོས་ཅི་དགོས༔ དུས་གསུམ་རྒྱལ་བའི་སྲས་སུ་འགྱུར༔ ཞེས་སུ་གསུངས་ཏེ་གུ་རུས་ནམ་ཡང་རྫུན་མི་གསུངས་པ་ལ་ངེས་ཤེས་སྐྱེད་དེ་ཐེ་ཚོམ་མེད་པའི་ཡིད་ཀྱིས་ཉམས་སུ་ལེན་པ་གཅེས་སོ། །ཞེས་པའང་རིགས་དབོན་བསོད་ནམས་དཔལ་ལྡན་གྱི་བརྗེད་ཐོར་བསྟན་པའི་ཉི་མས་སྨྲས་རིམ་མ་ཏི་བྷ་བྲས་བྲིས་པ་དགེ། །།