ཆོས་སྐྱོང་སྐོར།
སྔགས་ཀྱི་སྲུང་མ་ལ་བསྟོད་ཅིང་ཕྲིན་ལས་འཆོལ་བའི་རིམ་པ།
དཔལ་ལྡན་སྔགས་ཀྱི་སྲུང་མ་ལ་བསྟོད་ཅིང་ཕྲིན་ལས་འཆོལ་བའི་རིམ་པ་བདུད་ལས་རྣམ་པར་རྒྱལ་བའི་རྔ་སྒྲ་ཞེས་བྱ་བ། ན་མ་ཤྲཱི་མ་ཧེ་ཤྭ་ར་ཧེ་རུ་ཀ་ཡ། ཧེ་རུ་ཀ་དཔལ་འབར་བའི་བཀའ་ཡིས་བསྟན་སྲུང་གཙོ་མོར་དབང་བསྐུར་བ། །ཤེས་རབ་ཕར་ཕྱིན་མ་མོའི་གཟུགས་འཆར་དབྱིངས་ཕྱུགས་རྡོ་རྗེ་རལ་གཅིག་མ། །སྒྲུབ་ལ་མི་མཉམ་བྱམས་པའི་མ་ཁྱོད་སྔགས་བདག་དྲེགས་པའི་དམག་དཔུང་བཅས། །པདྨའི་སྔགས་རྒྱུད་སྐྱོང་བར་ཞལ་བཞེས་ཐུགས་དམ་མ་གཡེལ་དུས་འདིར་དགོངས། །ཡེས་ཤེས་གཟི་ཆེན་ཉི་མའི་སྤྱན་གྱིས་བདུད་སྡེའི་དཀྱིལ་འཁོར་སྲེག་མཛད་ཅིང་། །ཁྲོས་པའི་གད་མོ་དྲག་པོར་དགོད་པས་བགེགས་ཀྱི་གྲོང་རྣམས་ཚལ་པར་འགས། །ཐུགས་རྗེའི་ནུ་བུམ་མཛེས་པར་དུད་ལས་དངོས་གྲུབ་འཛད་མེད་རྒྱུན་འཇོ་བའི། །ཁྱོད་ཀྱི་ངོ་མཚར་རྒྱ་མཚོ་འཕྱུར་བའི་དབའ་རླབས་རིང་པོ་ཕྱོགས་འདིར་སྤྲོས། །གདུག་སེམས་རླུང་གིས་ཉེ་བར་བསྐྱོད་པས་ཕ་རོལ་སྦྱོར་བ་ནག་པོའི་སྤྲིན། །དུག་མཚོན་མེ་སོགས་འཇིགས་བརྒྱའི་སྐྱིན་ཐང་ལྷོག་ལྷོག་ཁོལ་ཞིང་འོངས་པ་རྣམས། །ཕྱིར་བཟློག་དམོད་པའི་མཐོར་རླུང་ཆེན་པོས་རྡུལ་ཙམ་མེད་པར་
བཤིགས་པའི་ཤུལ། །དགེ་ལེགས་ཉི་གཞོན་སྣང་བའི་གོས་ཀྱིས་ཕྱོགས་ཀུན་ལི་ཁྲི་ལྡན་པར་མཛོད། །ལྗོངས་འདིར་ཕན་བདེའི་འབྱོར་བ་འཕྲོགས་ཤིང་འཐབ་རྩོད་དབུལ་ཕོངས་ནད་ལ་སོགས། །བྱུར་གྱི་མིག་མང་རྣམ་པར་རྩེ་བའི་མ་རུངས་ནག་ཕྱོགས་འབྱུང་པོའི་སྡེ། །སྲིད་པ་ཟ་བྱེད་འབར་བའི་ཞལ་ཧོམ་གནས་ས་གདངས་ལྟར་བཞད་པའི་ཀློང་། །ལྗགས་དམར་དུས་མཐའི་མེ་ཕུང་གཡོ་འདྲས་སྐད་ཅིག་ཉིད་དུ་དྲོངས་ལ་ཟོ། །དྲག་ཤུལ་གར་གྱི་རླུང་ཆེན་བསྐྱོད་པས་སྟོང་གསུམ་ཀུན་ནས་རབ་འཁྲུགས་སམ། །ཁྱོད་ཀྱིས་ས་འོག་འཇིག་རྟེན་དཀྲུགས་བྱེད་རོལ་པའི་རྫུ་འཕྲུལ་གར་མཛོད་ལ། །བདག་ཅག་ལག་འགྲོའི་གདོན་ལ་གཏད་དང་ཕུང་སེལ་བཅུག་པའི་མངལ་རྒྱ་རྣམས། །སྤྲུལ་ཏེ་ཕས་རྒོལ་བྱད་མའི་བྲང་ལ་ཁུ་ཚུར་དྲག་པོས་ཆད་པ་ཕོབ། །གཞན་ཡང་ཆེ་བཙན་དབང་ཕྱུག་གྲུབ་པས་བསྟན་པ་སྲུང་བར་གཉེན་ལྡན་པ། །དཔལ་འབར་རྡོ་རྗེ་ནག་པོ་ཆེ་དང་རྡོ་རྗེ་ལེགས་པ་སྒྲ་གཅན་ནག །དུར་ཁྲོད་བདག་མོ་ཡང་ལེ་བེར་སོགས་འཇིག་རྟེན་སྐྱོང་བའི་ཚོགས་རྣམས་ཀྱིས། དངོས་གྲུབ་བར་ཆད་བགེགས་རྣམས་མ་ལུས་དྲག་པོ་ལུས་ཀྱི་གཡུལ་དུ་རློག །མདོར་ན་ཐབས་མཆོག་ལྟེ་བ་རབ་
བརླིང་ཤེས་རབ་དམ་པའི་མུ་ཁྱུད་ཅན། །ལས་བཞིའི་རྩིབས་སྟོང་རྣམ་པར་བཀྲ་བའི་འཁོར་ལོ་རིན་ཆེན་ཁྱོད་ཀྱི་མཐུས། །བདུད་དང་ཕྱིར་རྒོལ་ལས་ཉོན་རྣམ་རྟོག་དགྲ་རྣམས་ཀུན་ལས་རྒྱལ་གྱུར་ཏེ། །རྣམ་གྲོལ་སྐུ་བཞིའི་རྒྱལ་ཐབས་དབང་སྒྱུར་ས་གསུམ་དགེ་བའི་བཀྲ་ཤིས་སྩོལ། །ཅེས་པའང་པདྨ་རྡོ་རྗེ་དང་བློ་བཟང་ཆོས་ལྡན་གཉིས་ཀྱི་ངོར། །༡བསྟན་པའི་ཉི་མས་འབར་བ་སྨིན་ཟླའི་ཉེར་དགུ་ལ་སྦྱར་བ་རྣམ་བཞིའི་ཕྲིན་ལས་ཐོགས་མེད་དུ་འགྲུབ་པའི་རྒྱུར་གྱུར་ཅིག །
དུར་ཁྲོད་ལྷ་མོ་ལ་བསྟོད་པ།
༈ དུར་ཁྲོད་ལྷ་མོ་ལ་བསྟོད་པ་གནོད་སྦྱིན་ཀུན་ཏུ་དགའ་བའི་དབྱངས་ཞེས་བྱ་བ། རྡོ་རྗེ་སྲིད་མོའི་ཉི་མའི་ཞལ་མངའ་གློགས་ལྟར་འབར་བའི་ཁྲོད་གཉེར་ཅན། །དམར་སེར་མེ་ཡི་རལ་པ་གྱེན་བརྫེས་སྐྱིན་ཐང་རླུང་ངག་གཡོ་བ་དང་། །སྨིན་མ་ཡོན་པོའི་ལྷ་སྟངས་རེས་ཀྱང་ས་གསུམ་མུན་པ་བཞིན་འཐིབ་པའི། །བདུད་ཀྱི་བདུད་ཆེན་གཏུམ་མོ་ཁྲོས་མས་བདུད་རྣམས་འཇིགས་པ་སྐྱེད་གྱུར་ཅིག །གླལ་བའི་ཤུགས་ཀྱིས་རབ་དམར་ཞལ་གདངས་དུག་རླངས་ན་བུམ་ཆེར་འཁྲིགས་ཤིང་། །སྟོང་ཁམས་མ་ལུས་དང་བཞིན་འདར་བའི་དམོད་སྔགས་འབྲུགས་སྟོང་ང་རོ་ལྡིར། །སྡིག་ཅན་སྙིང་ཁྲག་ཧུ་ཀྱིས་བཏུང་བའི་རྔམས་ཞལ་ཁྲག་གི་ཞམ་ཆུ་ཅན། །དྲན།
པའི་མོད་ལ་བདུད་སྡེ་མཐར་བྱེད་འཇིགས་མེད་ལྕམ་མོ་དེས་སྲུངས་ཤིང་། །སྤུ་གྲིའི་སེན་མོ་མདུང་ལྟར་གཟིངས་པས་བྱད་གདོན་སྙིང་རྩ་ཐལ་འབྱིན་ཞིང་། །མི་གསོན་ལྟོ་བ་ཐད་ཀར་བྲལ་ནས་ཁྲག་ལྡན་རྒྱུ་ལྟོ་ཞལ་འདྲེན་པ། །ཕུང་བྱེད་བདུད་མོ་བཤན་པའི་ལག་ཅན་དམ་ཉམས་སྲོག་དབུགས་མངའ་མཛད་མོ། བཀའ་སྡོད་འབར་མ་བྱེ་བའི་གཙོ་ཁྱོད་སྡིག་ཅན་བདུད་ལ་ནུས་མཐུ་སྟོན། །ཅེ་སྤྱང་མཆེ་བ་ཁྲག་གིས་དམར་རྣམས་བཟོད་པར་དཀའ་བའི་སྒྲ་སྒྲོགས་ཤིང་། །རོ་ལང་ཁྲོས་པས་བཤུགས་སྐད་རབ་འདོན་མོ་རོའི་ཁང་པ་ངམ་གནག་པར། །ཞིང་བཅུའི་ཀླད་ཁྲག་རུལ་བའི་མཚོ་ལ་མི་ཐོད་སྐྱོག་གིས་འཆུ་མཛད་མ། །དུར་ཁྲོད་མ་མོ་དམེ་བ་ཅན་ཁྱོད་ཉམས་པ་ཅན་ལ་ཁ་ཕྲུ་ཐོབ། །ལ་ལ་མེ་འབར་གཡང་གཞིའི་གོས་མནབས་ཀླུ་བདུད་ཁྲོས་པའི་སྐ་རགས་བཅིངས། །འགའ་ཞིག་གཅེར་མོ་གདུག་པའི་དྲི་འཐུལ་ལྟས་ངན་བརྒྱ་བའི་འོ་དོད་འབོད། །གཞན་དག་འཆི་མེད་ཡང་ཚོའི་ཉི་གཞོན་འཇིག་རྟེན་མངོན་པར་དགའ་བའི་དཔྱིད། །རྡོ་རྗེ་སྲིན་མོ་སྣ་ཚོགས་གཟུགས་ཁྱོད་དེང་འདིར་བདུད་ལ་མངོན་སྤྱོད་མཛོད། །པདྨའི་མིག་ཅན་པདྨོའི་མདོག་མཚུངས་པདྨ་ལྟ་བུར་འཛུམ་པའི་ཞལ། །འོ་འཛིན་པདྨ་ཁ་འབུས་དབྱིབས་
འདྲ་འཇམ་ཞིང་གཉེན་པ་པདྨའི་ལག །དགའ་ཆེན་པདྨོའི་ཞགས་པ་རེ་རེས་ཁམས་གསུམ་རྣམ་པར་འཆིང་ནུས་པ། །འོད་ཆེན་འབར་མ་ལྷ་བརྒྱའི་གཙོ་མོས་བདེ་བ་མཆོག་གི་དགའ་སྟོན་སྤེལ། །མཁའ་ལྟར་ཞི་བ་ཆོས་ཀྱི་སྐུ་ཡང་རྡོ་རྗེ་ཁྲོས་པའི་སྙེམས་འཆང་ཞིང་། །བདེ་ཆེན་སྙིང་རྗེའི་འཛུམ་དཀར་དགོད་ཀྱང་མི་སྡུག་སྲིན་མོའི་རྣམ་རོལ་ཅན། །དཔལ་ལྡན་ལྷན་ཅིག་སྐྱེས་མའི་མཆོག་ཀྱང་ངན་ནེ་མ་ཞེས་མཚན་བསྒྲགས་པ། །དེ་ཡིས་བདག་ལ་དོན་ཀུན་གྲུབ་པའི་དངོས་གྲུབ་རྒྱ་ཆེན་ཆར་དུ་སྙིལ། །དུར་ཁྲོད་ལྷ་མོའི་བསྟོད་པ་གནོད་སྦྱིན་ཀུན་ཏུ་དགའ་བའི་དབྱངས་ཞེས་བྱ་བ་རྡོ་ཤོད་ཀྱི་སྨྱོན་པ་འཇིགས་མེད་པས་སྦྱར་བའོ། མངྒ་ལཾ།
དཀོར་སྲུང་དུར་ཁྲོད་ལྷ་མོའི་མངའ་གསོལ།
༈ དཀོར་སྤུང་དུར་ཁྲོད་ལྷ་མོའི་མངའ་གསོལ་ཡིན་བཞིན་འཕྲུལ་གྱི་ལྕགས་ཀྱུ་ཞེས་བྱ་བ། ཧཱུཾ་བྷྱོ། དུས་གསུམ་འགྱུར་མེད་རྣམས་ཀུན་མཆོག་ལྡན་ཞལ། །ལྷུན་གྲུབ་དགའ་བཞིའི་རོལ་མོར་འབར་བའི་གཟུགས། །ཞི་ཆགས་ཁྲོ་མོའི་གར་གྱིས་རྣམ་རོལ་པ། །བསྟན་སྲུང་འབུམ་སྡེའི་རྗེ་མོར་མངའ་གསོལ་ལོ། །གནས་ཡུལ་དུར་ཁྲོད་རྒྱ་མཚོའི་ཞིང་སྐྱོང་གཙོ། །བརྟུལ་ཞུགས་གྲུབ་བརྙེས་ཡོངས་ཀྱི་མཛའ་ན་མོ། །དགའ་ཆེན་རྡོ་རྗེའི་ལམ་གྱི་ཕོ་ཉ་བ། །བདེ་སྟེར་ཌཱཀྐའི་གཙོ་
མོར་མངའ་གསོལ་ལོ། །འཕོ་འགྱུར་གཉིས་སྣང་རྟོག་པའི་དྲྭ་བ་ཀུན། །འཕོ་མེད་འོད་གསལ་དབྱིངས་སུ་བསྔམས་པ་ལས། །རྗེས་ཆགས་ཉམས་བརྒྱའི་གཟི་བྱིན་འཆང་བའི་དངོས། །ལྷན་སྐྱེས་རང་བྱུང་རྗེ་མོར་མངའ་གསོལ་ལོ། །དབྱིངས་ཕྱུག་སྔགས་ཀྱི་རྒྱལ་མོ་ཨེ་ཀ་ཙ། ཐེག་མཆོག་བསྟན་པ་རྒྱ་མཚོའི་སྲུང་མ་རུ། །ལས་བྱེད་འཁོར་གྱི་མཁའ་འགྲོའི་སྐུར་བཞེངས་པ། །གསང་རྒྱུད་གཉེར་འཛིན་ཆེན་མོར་མངའ་གསོལ་ལོ། །ཀྱན་ཁྱབ་རིག་སྟོང་རྡོ་རྗེའི་ཕྱག་རྒྱ་ཡིས། །ཁམས་གསུམ་ནམ་མཁའི་མཛོད་རྒྱས་བཏབ་པས། །དགྱེས་སྤྲིན་ལོངས་སྤྱོད་ཆེན་པོའི་མཛོད་བརྙེས་པ། །དཀོར་སྲུང་ཁྲོས་པའི་རྒྱལ་མོར་མངའ་གསོལ་ལོ། །སྲོག་རྩོལ་དབུ་མར་ཐིམ་པའི་བདེ་བ་མཆོག །རྡོ་རྗེ་ཆགས་པའི་གཟུགས་སྐུར་མངོན་བཞེངས་ཏེ། །ས་གསུམ་འཕྲུལ་གྱི་ལྕགས་ཀྱུས་འགུགས་མཛད་པ། །གནོད་སྦྱིན་མཛེས་ལྡན་ལྷ་མོར་མངའ་གསོལ་ལོ། །མདོར་ན་དུས་ཀུན་ལྷན་སྐྱེས་ཕོ་ཉ་མོ། །མཁའ་སྤྱོད་གྲུབ་པའི་ཞལ་སྐྱིན་ཁྱོན་མཆོད་ན། །མི་ཕྱེད་ཡེ་ཤེས་འཁྲོར་ལོར་རོ་གཅིག་པས། །གང་འདུལ་ཕྲིན་ལས་རྣམ་བཞིའི་འབྲས་སྨིན་མཛོད། ཅས་བཀའ་
སྡོད་ལས་ཀྱི་་མོའི་ཕྲིན་ལས་ཀྱི་འཛུམ་དཀར་གསར་པས་ཀུན་ནས་འཁྱུད་པའི་བྱིས་པ་གཞོན་ནུ་ཨ་བྷ་ལས་བྲིས་པ་ཀུན་ནས་ཀུན་ཏུ་དགེ་བ་གྱུར་ཅིག སརྦ་མངྒ་ལཾ། །