གནོད་སྦྱིན་ཡང་ལེ་བེར་གྱི་བསང་མཆོད་མདོར་བསྡུས།
བླ་མ་ལ་ཕྱག་འཚལ་ལོ། །གནོད་སྦྱིན་ཡང་ལེ་བེར་གྱི་བསང་མཆོད་མདོར་བསྡུས་ན། བསང་རྫས་གཙང་མ་དྲི་བསུང་རོ་བཅུད་དང་ལྡན་པ་རྣམས་ཤིང་གི་མེ་ལ་བསྲེག་ཅིང༌། བདག་གི་རྣལ་འབྱོར་སྔོན་འགྲོས། རཾ་ཡཾ་ཁཾ། རང་གི་ཐུགས་ཀ་ནས་ཡེ་ཤེས་ཀྱི་མེ་རླུང་ཆུ་རྣམས་སྤྲོས་ཏེ་མེ་ཐབ་བསང་རྫས་དང་བཅས་པའི་ཉེས་སྐྱོན་ཐམས་ཅད་བསྲེག་གཏོར་སྦྱངས། སྟོང་པའི་ངང་ལས་ཞི་བའི་མེ་ཐབ་ཡངས་ཤིང་རྒྱ་ཆེ་བར་ཤིས་པའི་མེ་འོད་འབར་ཞིང་འཕྲོ་བའི་དབྱིངས་སུ་བསང་རྫས་འདོད་ཡོན་གྱི་རོལ་པ་ལྷ་སྲུང་དགྱེས་པའི་དུད་སྤྲིན་ཕྱོགས་བརྒྱར་སྤྲོ་བས་འདོད་དགུའི་ལོངས་སྤྱོད་མི་ཟད་པའི་ཆར་དུ་འབེབ་པར་གྱུར་བར་བསམ་ལ། སྔགས་དྲུག་ཕྱག་དྲུག་གིས་བྱིན་རླབས་བྱ། དེ་ནས་མགྲོན་སྤྱན་དྲང་བ་ནི། རྔ་བརྡུང་ཞིང༌། ཀྱེ། རྒྱལ་ཀུན་གསུང་མཆོག་རྡོ་རྗེ་གར་དགུའི་ཉམས། །དབང་ཆེན་རྟ་སྐད་རྔམས་བཞད་ཧེ་རུ་ཀའི། །རྡོ་རྗེའི་བཀའ་ཉན་བསྟན་སྲུང་དྲེགས་པའི་རྗེ། །ཆེ་བཙན་མྱུར་མགྱོགས་མཐུ་སྟོབས་རྫུ་འཕྲུལ་བདག །རྗེ་ཡི་དགྲ་ལྷ་རྣལ་འབྱོར་སྐྱོང་བའི་གཉེན། །ཆོས་འཁོར་གཉན་པོའི་སྲུང་མ་གནོད་སྦྱིན་གཙོ། །འཇིགས་བྱེད་རོལ་པ་སྐྱ་བདུན་འཁོར་དང་བཅས། །བདུད་རྩི་བསང་མཆོད་མགྲོན་ལ་ཐོགས་མེད་གཤེགས། །ཡཀྵ་མ་ཧཱ་རཱ་ཛ་ས་པཱ་རི་ཝ་ར་བཛྲ་ས་མ་ཡ་ཛཿ བསྟོད་དེ་འབུལ་བ་དངོས་ནི། ཀྱེ། སྔོན་ཚེ་རང་བྱུང་པདྨ་འབྱུང་གནས་དང༌། །རྗེ་འབངས་སྤྲུལ་པའི་ལོ་པཎ་ཚོགས་རྣམས་ཀྱིས། །བོད་ཡུལ་ཆོས་ཀྱི་སྣང་ཆེན་བདལ་བའི་ཚེ། །གངས་ཅན་མཐའ་
དབུས་དྲེགས་པ་དབང་བསྡུས་ནས། །བསྟན་པ་སྐྱོང་བའི་ཕྲིན་ལས་གཉེར་དུ་གཏད། །བདག་ནི་རིག་འཛིན་དེ་ཡི་ཆོས་ཀྱི་གདུང༌། ཁྱོད་ཀྱང་ཕྲིན་ལས་དེ་ཡི་གཉེར་ལེན་ཏེ། །སྔོན་གྱི་ཐ་ཚིག་ཞལ་བཞེས་བསྐུལ་བ་དང༌། །མ་འོངས་ལས་བཅོལ་གཞུང་དུ་སྲོང་བ་དང༌། །ད་ལྟ་རྣལ་འབྱོར་གཡར་དམ་སྲེ་བའི་ཕྱིར། །བཀྲ་ཤིས་ཡིད་འོད་གཙང་མའི་གནས་མཆོག་འདིར། །དྲག་རྩལ་མྱུར་མགྱོགས་དགྲ་ལྷ་ཁྱོད་བོས་ནས། །དགེ་མཚན་བདུད་རྩི་ཅན་གྱི་ཤིང་སྣའི་ཚོགས། །གཙང་ཞིང་གཙང་མར་སྦྱར་བའི་བདུག་སྤོས་དང༌། །དཀར་མངར་ཤ་ཁྲག་དབང་པོའི་རྣམ་ལྔའི་གསུར། །གཟི་འབར་བྱིན་ཟའི་ཞལ་དང་མཉམ་སྦྱར་ཏེ། །མ་དག་དངོས་སྣང་སྟོང་ཆེན་ཐིག་ལེར་སྦྱངས། །དག་པའི་ཡེ་ཤེས་མིག་འཕྲུལ་རོལ་པ་ལྟའི། །རྣམ་འགྱུར་ཅིར་ཡང་འཆར་བ་ཆུ་ཟླའི་གར། །རྡོ་རྗེའི་གཟུགས་སྒྲ་དྲི་རོ་རེག་བྱ་སྟེ། །འདོད་ཡོན་སྒྱུ་མའི་སྤྲིན་ཕུང་འབྱམས་ཀླས་པར། །བྱིན་གྱིས་བརླབས་པའི་བསང་མཆོད་བདུད་རྩི་འདིས། །སྲིད་ན་ཆེ་བཙན་དབང་དྲག་ལས་ཀྱི་ལྷ། །སྙན་བརྗིད་གྲགས་པ་རླུང་གི་ཤེ་མོང་ཅན། །བཙན་རྒོད་ཡང་ལེ་བེར་གྱི་དགྱེས་པ་བསྐང༌། །གནོད་སྦྱིན་ཆེན་པོའི་སྐུ་ཡི་རྣམ་འཕྲུལ་བ། །གདུག་བྱེད་འབར་བ་མཆེད་དྲུག་དགྱེས་པ་བསྐང༌། །ཐུགས་འཛིན་འཕྲུལ་གྱི་བཙུན་མོ་བརྒྱ་ཕྲག་དང༌། །བཀའ་ཡི་བློན་འཁོར་སྡེ་བརྒྱད་དྲེགས་པའི་ཚོགས། །བཙན་དམག་བྱེ་བ་འབུམ་སྡེའི་དཔུང་དང་
བཅས། །མ་ལུས་ལུས་མེད་ཐམས་ཅད་དགྱེས་པ་བསྐང༌། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །སྒོ་གསུམ་མི་ཤེས་བག་མེད་དབང་གྱུར་ནས། །དམ་ཅན་གཡེལ་དང་ཞུད་ཅིང་ཆད་པའི་ལས། །བགྱིས་དང་བགྱིད་སྩལ་ནོངས་པ་ཐོལ་ཞིང་བཤགས། །སྲུང་མའི་དགྱེས་ཞལ་ཟླ་ལྟར་འཛུམ་པ་དང༌། །མཐུ་སྟོབས་གཟི་བྱིན་ཉི་མའི་བཀྲག་འབར་བས། །བདག་ཅག་དཔོན་སློབ་མི་ནོར་ཡོན་མཆོད་ཀུན། །སྲུང་སྐྱོབས་ར་གུར་མཚམས་ལས་མི་འདོར་ཞིང༌། །གཞི་ལ་བཀྲ་ཤིས་བྱེས་སུ་གང་བསམ་འགྲུབ། །ཆོས་དང་སྲིད་ཀྱི་ལེགས་ཚོགས་གོང་འཕེལ་བས། །གནས་སྐབས་བསྟན་འགྲོའི་དོན་ཆེན་འགྲུབ་པ་དང༌། །མཐར་ཐུག་བདུད་འདུལ་གར་དབང་ཧེ་རུ་ཀའི། །གོ་འཕང་ཡིད་བཞིན་འགྲུབ་པའི་ཕྲིན་ལས་མཛོད། །ཡིག་བརྒྱ་བརྗོད། ཁྱེད་ཀྱི་སོགས། ཤིས་བརྗོད་བྱའོ། །ཁུངས་མེད་ཀྱི་སྨྱོ་གཏམ་འབྲི་འདུན་མེད་ཀྱང༌། ཤྲཱིའི་ངོ་མ་ཆོག་པར་རྡོ་སྟོང་སྨྱོན་པས་སྐད་ཅིག་ལ་བྱུང་རྒྱལ་བྲིས། །