བྱད་གཏད་ཕྱིར་བཟློག
སྤྲོ་ན་དཀར་དམར་གྱི་གཏོར་མ་བཤམས་ལ་ཐོག་མར་ཨཿཀཿཕྲེང་སྐོར་ཅི་རིགས་བཟླ། དེ་ནས་གཏོར་མ་འབྲུ་གསུམ་གྱིས་བརླབ། མཆོག་གསུམ་ངོ་བོ་དཔལ་མགོན་བླ་མ་དང་སོགས་ཉེར་གཅིག་སོགས་ཀྱིས་མཐར་དཔེ་མི་གསལ་བདག་དེ་མ་བྱུང་ན་འདི་ཀ་དངོས་རྐྱང་བཏོན་ཡང་ཆོག །གང་གི་འོད་གསལ་ཐུགས་ཀྱི་ཐིག་ལེ་རུ། །རྩ་གསུམ་སྲུང་མར་བཅས་ཀུན་ཡོངས་བཟླུམ་པ། །ཐབས་མཁས་ཐུགས་རྗེ་ནུས་པའི་གཏེར་གཅིག་པུ། །ཐོད་ཕྲེང་རྩལ་ཁྱོད་བུ་ཡི་མགོན་དུ་བཞུགས། །རྒྱལ་བའི་ཡུམ་གཅིག་རྡོ་རྗེ་རྣལ་འབྱོར་མ། །འབར་བའི་སྐུར་བཞེངས་བདུད་འདུལ་སེང་གེའི་གདོང༌། །ཡེ་ཤེས་ཕྲ་མེན་མཁའ་འགྲོའི་འཁོར་དང་བཅས། །བཅོམ་ལྡན་གདུགས་དཀར་ཅན་དང་འོད་ཟེར་ཅན། །ཁྲོ་གཉེར་ཅན་སོགས་རིག་པའི་རྒྱལ་མོ་ཆེ། །རྡོ་རྗེའི་རྣམ་ཐར་མཐའ་ཡས་རྩལ་མངའ་རྣམས། །སོ་སོའི་སྤྲུལ་འཁོར་ཕོ་ཉའི་ཚོགས་དང་བཅས། །ཐུགས་དམ་བསྐུལ་ལོ་ཐུགས་རྗེའི་མཐུ་རྩལ་ཕྱུངས། །བདག་ཅག་དཔོན་སློབ་སྡེ་དགོན་ཆོས་བརྒྱུད་རྣམས། །ཕྱི་ནང་བན་བོན་སྔགས་པའི་བྱད་གཏད་ཀྱིས། །བཅིང་དང་གཟིར་མནན་སྦྱོར་བས་ཉམ་ང་ཆེ། །མཐུ་སྟོབས་རྡོ་རྗེ་འབར་བའི་མཚོན་རྣོན་གྱིས། །རིག་སྔགས་ཆོད་ལ་དམོད་པའི་འཁྲུལ་འཁོར་ཤིགས། །ལྷ་ཀླུ་སྡེ་བརྒྱད་འབྱུང་པོའི་ཟ་ཁ་སྒྱུར། །སྲི་ངན་མི་ཁ་བྲ་མཆུའི་རིགས་གཏོགས་དང༌། །བྱ་འདྲེ་འགོང་པོ་གསར་སྐྱེས་འདྲེ་རྒོད་སོགས། །མི་རུང་མི་ཤིས་བྱུར་གྱི་སྣ་འདྲེན་པ། །བུ་ཡུག་བཞིན་དུ་
འཚུབས་ཤིང་འཁོར་ཏོ་ཅོག །ཤུགས་དྲག་ཡེ་ཤེས་ཕྱག་རྒྱའི་འཐོར་རླུང་གིས། །གདོད་ནས་རྣམ་དག་སྟོང་ཆེན་ཆོས་དབྱིངས་སུ། །ཕྱིར་བཟློགས་རྗེས་ཤུལ་མེད་པར་ཚར་ཆོད་ལ། །ཆོས་སྲིད་ལེགས་ཚོགས་རྒྱས་པའི་ཕྲིན་ལས་མཛོད། །སྟོན་མཆོག་བདུད་ལས་རྣམ་རྒྱལ་མིའི་སེང་གེ། །ཏོག་སོགས་བསྐལ་བཟང་འདྲེན་པ་སྟོང༌། །རྒྱལ་སྲས་ཕྱིར་མི་ལྡོག་པའི་དགེ་འདུན་འཁོར། །བསམ་ཡས་ཞིང་རྡུལ་གྲངས་སྙེད་ཚོགས་བཅས་དང༌། །གཞན་ཡང་ཕྱོགས་བཅུའི་ཞིང་བཞུགས་རྒྱལ་བའི་དབང༌། །རྒྱལ་སྲས་ཉན་ཐོས་དགེ་འདུན་འཁོར་དང་བཅས། །ཡེ་ཤེས་གཟིགས་པ་སྒྲིབ་མེད་སྤྱན་ལྡན་རྣམས། །ཐུགས་དམ་བསྐུལ་ལོ་སོགས་ནས། ཕྲིན་ལས་མཛོད། །འཁོར་འདས་ཟིལ་གནོན་ཆེ་མཆོག་ཧེ་རུ་ཀ༌།ཚེ་བདག་འཆར་ཁ་ཀིང་ཀང་དམར་ནག་དང༌། །དུག་གདོང་ལ་སོགས་རིགས་ལྔའི་གཤིན་རྗེ་གཤེད། །རྟ་མཆོག་ཡང་དག་རྡོ་རྗེ་གཞོན་ནུ་ཆེ། །རྦོད་གཏོང་མ་མོ་རིག་འཛིན་ཞི་དྲག་དང༌། །མཆོད་བསྟོད་དྲེགས་པ་དྲེག་སྔགས་དམོད་པའི་ལྷ། །གསང་བདག་དྲང་སྲོང་དྲི་མེད་ཞི་དང་ཁྲོ། །རང་རང་རིགས་ཀྱི་ཚམ་བུའི་འཁོར་དང་བཅས། །ཐུགས་དམ་བསྐུལ་ལོ་སོགས་ནས། ཕྲིན་ལས་མཛོད། །ཡེ་ཤེས་མ་མོ་སྔགས་སྲུང་རལ་གཅིག་མ། །དུར་ཁྲོད་མ་མོ་བོད་སྐྱོང་བརྟན་མའི་སྡེ། །ལྷ་ཆེན་དཔལ་འབར་སྤྲུལ་པའི་མགོན་པོ་ལྔ། །གཟའ་བདུད་ཆེན་པོ་སྐྱེས་མཆོག་ཐིག་ལེ་རྩལ། །རྒྱལ་ཆེན་སྐུ་ལྔ་
རོལ་པ་སྐྱ་བདུན་དང༌། །གཞན་ཡང་གཙང་རིས་མགོན་པོ་བདུན་ཅུ་སོགས། །རྒྱལ་བའི་བསྟན་སྲུང་དམ་ཅན་དྲེགས་པའི་ཚོགས། །ཐམས་ཅད་ལས་ཀྱི་ལྷ་སྟེ་ལས་བཅོལ་སྒྲུབ། །བདག་ཅག་དཔོན་སློབ་སོགས་ནས་ཆོས་སྲིད་ལེགས་ཚོགས་རྒྱས་པའི་ཕྲིན་ལས་མཛོད། །ཅེས་པའང་འཕྲལ་དུ་ཉེར་མཁོའི་དབང་གིས་ཁ་སྨོད་བྱེད་པ་པོ་འཇིགས་མེད་གོ་ཆ་ཡེ་ཤེས་བསྲུང་བའི་རྡོ་རྗེའོ། །རྡོ་གྲུབ་འཇིགས་མེད་བསྟན་པའི་རྒྱལ་མཚན་གསུང༌།