མཚུངས་བྲལ་རྒྱལ་བའི་མྱུ་གུ་ཨོ་རྒྱན་འཇིགས་མེད་ཆོས་ཀྱི་དབང་པོའི་རྟོགས་བརྗོད་ཕྱོགས་ཙམ་གླེང་བ་བདུད་རྩིའི་ཟིལ་ཐིགས།
(༡༡༥)མཚུངས་བྲལ་རྒྱལ་བའི་མྱུ་གུ་ཨོ་རྒྱན་འཇིགས་མེད་ཆོས་ཀྱི་དབང་པོའི་རྟོགས་བརྗོད་ཕྱོགས་ཙམ་གླེང་བ་བདུད་རྩིའི་ཟིལ་ཐིགས་ཞེས་བྱ་བ་བཞུགས།
(༡༡༦)དཔལ་ལྡན་བླ་མ་ལ་ཕྱག་འཚལ་ལོ། །རྒྱལ་ཀུན་ཡབ་གཅིག་རྒྱལ་བའི་ཞིང་ཀུན་ཏུ། །རྒྱལ་སྲས་གཞོན་ནུའི་གཟུགས་ཀྱིས་རྣམ་རོལ་པ། །འཇམ་པའི་དབྱངས་ཞེས་གྲགས་པའི་རྔ་བོ་ཆེའི། །རང་སྒྲས་སྲིད་གསུམ་འགེངས་པ་དེ་ལ་འདུད། །དེ་ཡིས་འཇིགས་མེད་སྤོབས་པའི་མཆོག་བྱིན་ཏེ། །ཟབ་རྒྱས་ཆོས་ཀྱི་སྒྲ་དབྱངས་མི་ཟད་པས། །ཐར་འདོད་རྣམ་བྱང་དབང་པོ་རྒྱས་མཛད་པ། །མཚུངས་མེད་བླ་མ་དེ་ལ་གུས་ཕྱག་འཚལ། །ཞེས་མཆོད་པར་བརྗོད་ནས། བདག་ཅག་གི་དཔལ་ལྡན་བླ་མ་དམ་པ། སྐུ་ཚེ་དཔག་ཏུ་མེད་པ་ནས་བྱང་ཆུབ་ཀྱི་སྤྱོད་པ་རླབས་པོ་ཆེ་ལ་བསླབས་ཤིང་། །རྒྱལ་བའི་དམ་ཆོས་འཛིན་པའི་སྨོན་ལམ་ལེགས་པར་བསྒྲུབས་པ། གསུང་རབ་ཀྱི་དགོངས་དོན་གསལ་བར་བྱེད་པའི་
(༡༡༧)བཤད་པ་དང་དབེན་པར་ཡང་དག་འཇོག་ལ་བརྩོན་པའི་སྒྲུབ་པ་སྟེ་འཁོར་ལོ་གཉིས་ཀྱིས་ཐེག་པ་མཆོག་གི་བསྟན་པའི་སྲོག་བཟུང་བ། །བསྟན་པའི་སྣང་བ་ཆེས་མི་གསལ་བའི་ཡུལ་གྱི་སྐྱེ་བོའི་ཚོགས་འབུམ་ཕྲག་དུ་མ་ལ་ཡང་མངོན་མཐོ་ངེས་ལེགས་ཀྱི་ལམ་བཟང་ཉིན་མོ་ལྟར་གསལ་བར་མཛད་པས་འགྲོ་བའི་བླ་མ། འཇིག་རྟེན་གྱི་མགོན་པོ་ཞེས་ཕྱོགས་དང་ཕྱོགས་བྲལ་གྱི་དམ་པ་རྣམས་ཀྱིས་སྙན་པའི་རྒྱུད་མངས་མགྲིན་གཅིག་ཏུ་བླངས་པ། དོན་གྱིས་སླད་དུ་མཚན་ནས་སྨོས་ཏེ་ཨོ་རྒྱན་འཇིགས་མེད་ཆོས་ཀྱི་དབང་པོའི་རྟོགས་བརྗོད་ཕྱོགས་ཙམ་གླེང་བ་ལ་གཉིས་ཏེ། སྐུ་ཚེ་སྔ་མའི་བྱུང་བ་དང་། སྐུ་ཚེ་འདི་ཉིད་ཀྱི་མཛད་པའོ། །དང་པོ་ནི། རྒྱ་གར་འཕགས་པའི་ཡུལ་དུ་སློབ་དཔོན་ཆེན་པོ་ཞི་བ་ལྷ་དང་། བོད་ཡུལ་
(༡༡༨)དུ་ཨ་རོ་ཡེ་ཤེས་འབྱུང་གནས་སུ་གྱུར་པ་ལ་སོགས་པའི་འཁྲུངས་རབས་ཀྱི་ཕྲེང་བ་དུ་མ་ཞིག་རྗེ་བླ་མ་ཐམས་ཅད་མཁྱེན་གཟིགས་ཆེན་པོ་འཇམ་དབྱངས་མཁྱེན་བརྩེའི་དབང་པོའི་ཟབ་གཏེར་འགྲོ་འདུལ་འཕགས་པ་སེམས་ཉིད་ངལ་གསོའི་ཆོས་སྐོར་ན་བཞུགས་པར་གྲགས་ཀྱང་དེང་དུས་མཇལ་དུ་མི་སྣང་བས་འཆད་པར་མ་ནུས་ལ། སྐུ་འདིའི་སྔ་རོལ་དེ་མ་ཐག་པར་ཡོངས་སུ་གྲགས་པ་ནི་བྱང་རྒྱུད་རྫ་ཆུའི་འགྲམ་གྱི་སྟོད་ཕྱོགས་སུ་བྱུང་བའི་དཔལ་དགེ་བསམ་གཏན་ཕུན་ཚོགས་ཞེས་བྱ་བ་འཕགས་པ་འཇམ་དཔལ་ལ་ཐུགས་དམ་གྱི་ལྷར་མཛད་ཅིང་མཚན་བརྗོད་འབུམ་ཕྲག་ལྷག་པ་ཞལ་འདོན་དུ་མཛད་པ། སྔོན་དུས་རྨོག་གྲུབ་ནམ་མཁའ་ཆོས་དབང་རྫ་སྟོད་མ་མོའི་ཐང་དུ་ཕེབ་སྐབས་ས་ཕྱོགས་འདིར་འཕགས་པ་ཐུགས་རྗེ་ཆེན་པོའི་སྤྲུལ་པའི་སྐྱེས་བུ་ཞིག་གི་དམ་ཆོས་ཡི་གེ་དྲུག་མའི་རྡོ་འབུམ་ངོ་མཚར་ཅན་བཞེངས་པར་འགྱུར་ཞེས་ལུང་བསྟན་པ་ལྟར་དཔལ་དགེའི་རྡོ་རིང་མར་གྲགས་པའི་རྟེན་བཞེངས་ཆེན་པོ་མཛད་དེ་མཐོང་ཐོས་དྲན་རེག་གི་འགྲོ་བ་དཔག་ཏུ་མེད་པ་ལ་དཀར་པོ་རྣམ་པར་འཕེལ་བའི་ས་བོན་བཏབ་ཅིང་ད་དུང་དུ་ཡང་ཕྲིན་ལས་ཀྱི་རྒྱུན་ཆུ་བོའི་རྒྱུན་ལྟར་འཇུག་བཞིན་པ་དེའོ། །གཉིས་པ་ནི། བོད་ཀྱི་རུས་ཆེན་སྡེ་ལྔའི་ནང་ཚན་གདོང་སྨུག་པོའི་རིགས་ཀྱི་བྱེ་བྲག་དགེ་རྩེ་ཞེས་པའི་སྡེར་རྒྱལ་ཐོག་ཞེས་པའི་གདུང་ལས་རབ་ཡིད་རྣམ་བྱུང་ཞེས་པས་འབྲུག་གི་ལོར་སྐྱེ་བའི་མྱུ་གུ་སད། དབུ་གདུགས་
()ལྟར་འདུག་པ་དང་ཞལ་རས་པདྨ་ལྟར་རྒྱས་པ། སྐྱེ་མཆེད་ཤིན་ཏུ་དྭངས་པ། རང་བཞིན་གྱིས་སྙུན་ཉུང་བ། ཆུང་ངུ་ཉིད་ནས་ཤེས་རབ་དང་། སྙིང་རྗེ་དང་། སྙིང་སྟོབས་ཆེས་ཆེ་བ། སྤོབས་པའི་གཟེངས་མཐོ་ཞིང་སྨྲ་མཁས་པ་སོགས་ཡོན་ཏན་གྱི་འབྱོར་པ་ཚད་མེད་པས་མཐོ་བ་ཞིག་བྱུང་། འབྲི་ཀློག་དཀའ་བ་མེད་པར་མཁྱེན། རྡོ་བླ་མཁས་གྲུབ་ཆེན་པོ་འཇིགས་མེད་སྐལ་བཟང་གིས་དཔལ་དགེ་བསམ་གཏན་ཕུན་ཚོགས་ཀྱི། སྤྲུལ་པའི་སྐུར་ངོས་བཟུང་ཞིང་། གྲུབ་པའི་དབང་ཕྱུག་འཇིགས་མེད་ཕྲིན་ལས་འོད་ཟེར་ལའང་དེ་ཚུལ་གྱི་རྒྱུ་མཚན་ཞུས་པས། ཁོང་གི་ཞལ་ནས། དེ་ཁྱེད་ཀྱིས་ངོས་འཛིན་བྱས་པ་ལྟར་ཡིན་ངེས། ངས་ཀྱང་ཀློང་ཆེན་སྙིང་ཐིག་གི་བསྟན་པ་ཡོངས་རྫོགས་དགོངས་གཏད་སྨོན་ལམ་དང་བཅས་པས་དེ་ལ་གཏད་པ་ཡིན་ཅིང་། ཨོ་རྒྱན་འཇིགས་མེད་ཆོས་ཀྱི་དབང་པོར་མཚན་གསོལ་བ་ཡིན་ཞེས་ཕྱི་མཐའ་གཟིགས་པའི་ལུང་བསྟན་སྩལ། དེ་དག་ལ་བརྟེན་ནས་དཔལ་དགེ་གོང་མའི་དབོན་པོ་དཀོན་མཆོག་གིས་བླ་བྲང་དུ་སྤན་དྲངས་ཏེ་སྤྲུལ་པའི་སྐུར་མངའ་གསོལ། རིག་འཛིན་འཇིགས་མེད་གླིང་པའི་ཐུགས་སྲས་འཇིགས་མེད་རྒྱལ་བའི་མྱུ་གུ་ཞེས་འབྲེལ་ཚད་དོན་ལྡན་གྱི་སྐྱེས་བུ་དམ་པ་དེ་ལས་སྔ་ཕྱིར་ཀློང་ཆེན་སྙིང་ཐིག་གི་སྔོན་འགྲོའི་ལམ་ཁྲིད་ཁོ་ནའང་ཚར་ཉི་ཤུ་རྩ་ལྔ་གསན་ཅིང་། ཁྲིད་སྦྱང་ཡང་དེ་སྙེད་གྲུབ་པར་མཛད། གཞན་ཡང་རྩ་རླུང་དང་
(༡༢༠)རྫོགས་ཆེན་གྱི་ཁྲིད་སོགས་ཤིན་ཏུ་སྨིན་པ་དང་། སྔ་འགྱུར་བཀའ་མའི་སྐོར་སོགས་མང་དུ་གསན། གོང་སྨོས་ཀྱི་མཁས་པ་འཇིགས་མེད་སྐལ་བཟང་དང་ཀུན་མཁྱེན་གྱི་དངོས་སློབ་རྗེ་བླ་མ་འཇིགས་མེད་ངོ་མཚར། རྒྱལ་སྲས་གཞན་ཕན་མཐའ་ཡས་སོགས་ལས་ཀྱང་ངལ་གསོ་སྐོར་གསུམ། སྤྱོད་འཇུག །རྩ་རྒྱུད་གསང་བ་སྙིང་པོ། རིག་གནས་སྐོར་འགའ་ཞིག་སོགས་དང་། ཞེ་ཆེན་དབོན་སྤྲུལ་མཐུ་སྟོབས་རྣམ་རྒྱལ་ལས་བཀའ་འགྱུར་གྱི་ལུང་དང་སྒྲ་རིག་གསན། གང་གསན་དེ་དག་ལན་རེ་ཙམ་གྱིས་ཐུགས་སུ་ཆུད་ཅིང་། གཙོ་བོར་བཀའ་བསྟན་འགྱུར་རོ་ཅོག་དང་ཀུན་མཁྱེན་ཡབ་སྲས་ས་པ་རྗེ་ཙོང་ཁ་པ་སོགས་རིས་མེད་པའི་སྐྱེས་ཆེན་རྣམས་ཀྱི་ལེགས་བཤད་ལ་དཔེ་གཟིགས་ཁོ་ན་རྟག་འགྲུས་སུ་བརྩོན་པར་མཛད་པས་ཉིན་རེ་ཞིང་མཁྱེན་རྟོགས་ཟླ་བ་ཡར་ངོ་ལྟར་གོང་འཕེལ་དུ་འགྱུར། ཐ་ན་འཇིག་རྟེན་གྱི་ཕོ་སྒོ་འང་འགྲན་ཟླ་མེད་པ་ཞིག་སྟེ། སྐུ་ན་ཤིན་ཏུ་ཆུང་བའི་དུས་ཤིག་དཔལ་དགེ་དབོན་པོ་ལ་བཙན་པོས་གཉའ་གནོན་ལྟ་བུའི་ཁ་མཆུ་ཞིག་ཕོག་སྟེ་སྡེ་དགེའི་སྐུ་ཚབ་རྩར་གཏུག་ཤེར་བྱས་སྐབས་བྱང་སྡེ་རྫ་ཆུ་ཁ་ཙམ་ན་ཕོ་རྒོད་ཡ་མེད་དུ་གྲགས་པའི་འབུམ་ཤུལ་མཐུ་སྟོབས་མགོན་པོ་བྱ་བ་དེ་རྗེ་འདིས་ལན་གཅིག་མ་ཡིན་པར་ཤགས་ཀྱིས་ཕམ་པར་བྱས་ནས་རྒྱལ་ཁ་བླངས་པས་དཔལ་དགེ་དབོན་པོ་མགུ་སྟེ་སྤྲུལ་སྐུ་ཡིན་རུང་མིན་རུང་ལོ་མ་སྤྱད་ཅིག་རེད་ཟེར་སྐད། ཀུན་མཁྱེན་མཆོག་སྤྲུལ་རིན་པོ་
(༡༢༡)ཆེ་འཇིགས་མེད་ཡེ་ཤེས་རྡོ་རྗེ་རིག་པ་བརྟུལ་ཞུགས་ཀྱི་སྤྱོད་པ་མཛད་ཅིང་ཕེབས་སྐབས་ཤིག་རྗེ་འདིས་ཉེ་སྐོར་དུ་བྱོན་ནས་དཔལ་དགེ་ཞེས་བོས་ཏེ། ཁྱེད་དཔའ་སྙིང་ཅི་འདྲ། བཟང་ན་འདིར་ཤོག་གསུངས་ནས་སྐུ་རྩར་ཕྱིན་པ་དང་སྐྲ་ནས་བཟུང་སྟེ་ས་ལ་བརྡབས་ཤིང་དྲུད་དེ་བྱོན་པས་མཚམས་ཤིག་ན་ཆང་གི་དྲི་ཞིག་ཆིལ་གྱིས་བྱུང་། དེར་འོ་ཁོང་གིས་ཆང་གསོལ་ཡོད་པ་འདྲ་གྲུབ་ཐོབ་ཆེན་པོ་འདི་འདྲ་ཡང་ཆང་བཟས་འཆོལ་སྤྱོད་འདི་འདྲ་མཛད་པས་བཅོམ་ལྡན་འདས་ཀྱིས་ཆང་གི་ཉེས་དམིགས་མང་པོ་བཀའ་སྩལ་པ་ཐོག་ཏུ་བབས་སྙམ་པ་ཅིག་བྱུང་བའི་མོད་ཕྱག་གིས་བཏང་སྟེ་ཁྱེད་ཚོ་རྟོག་གེ་བ་བྱ་བ་འདི་འདྲའི་རྣམ་རྟོག་ངན་པ་འཆར་བ་ཕའུ། ཁྱོད་ཁྱི་རྒན་རེད་ཅེས་གདོང་ལ་ཞལ་མཆིལ་བཏབ། མཛུ་གུ་ཆུང་བསྟན་ནས་བཞུད། དེ་འཕྲལ་ག་རེ་ང་འཁྲུལ། །དེ་ངོ་སྤྲོད་ཅིག་ཡིན་པར་འདུག་སྙམ་ནས་ལུས་གནད་བཅོས་ཏེ་བཞུགས་པས་ཟང་ཐལ་གྱི་རིག་པ་ནམ་མཁའ་གཡའ་ཐག་ཆད་པ་ལྟ་བུ་ཞིག་མངོན་དུ་གྱུར་ཏེ་སྔོན་ནས་འཇིགས་མེད་རྒྱལ་བའི་མྱུ་གུས་རིག་ངོ་སྤྲད་པ་དེ་ནམ་ལང་བའི་སྟེང་དུ་ཉི་མ་ཤར་བ་བཞིན་སོང་། ཕྱིས་སུ་ཡང་ཁྱི་རྒན་ཟེར་བ་འདི་སྐུ་ཕྱོགས་མཁྱེན་བརྩེས་ང་ལ་གསང་མིང་བཏགས་པ་ཡིན་ཞེས་ཞལ་རྩེད་གནང་། སྦས་པའི་རྣལ་འབྱོར་པ་ཆེན་པོ་བསོད་ནམས་དཔལ་དགའི་ཞལ་སྔ་ནས་དང་ལྷན་ཅིག་ཀློང་སྙིང་རྩ་རླུང་གི་ཁྲིད་སྦྱང་ཤིན་ཏུ་རྒྱུན་རིང་བསྐྱངས།
(༡༢༢)དཔལ་དགེ་དབོན་པོ་འདས་ནས་གཤེགས་རྗེས་ཀྱི་བྱ་བ་རྣམས་རྫོགས་འཕྲལ་བླ་བྲང་བསྡུས་ནས་ཀུན་སྤང་ཀུན་ཏུ་རྒྱུའི་ཚུལ་གྱིས་གནས་ངེས་མེད་དུ་ཕེབས། རྫོགས་ཆེན་གདན་སར་ཡུན་རིང་ཙམ་བཞུགས། སྐྱབས་མགོན་རྫོགས་ཆེན་རིན་པོ་ཆེ་མི་འགྱུར་ནམ་མཁའི་རྡོ་རྗེ་དང་། སྐུ་ཞབས་གཞན་ཕན་མཐའ་ཡས་འོད་ཟེར་སོགས་ལས་དམ་པའི་ཆོས་ཀྱི་བདུད་རྩི་མཐའ་ཡས་པ་བཞེས། རུ་དམ་ཡང་དབེན་གཤིན་རྗེའི་སྒྲུབ་ཕུག་དང་ཚེ་རིང་ཕུག་སོགས་སུ་ཐུགས་དམ་མཛད་པས་བྱང་ཆུབ་སེམས་གཉིས་དང་། ཁྱད་པར་རང་བཞིན་རྫོགས་པ་ཆེན་པོའི་གནས་ལུགས་ཀྱི་རྟོགས་པ་ནམ་མཁའ་དང་མཉམ་པ་བརྙེས། ཀློང་ཆེན་སྙིང་ཐིག་གི་སྔོན་འགྲོའི་ཁྲིད་ཡིག་ཆེན་མོ་དང་ཐེག་ཆེན་མདོ་སྡེ་མཐོང་བའི་ཕན་ཡོན་སོགས་ལེགས་བཤད་ཀྱི་རྩོམ་པའང་མང་དུ་མཛད། དགུང་ལོ་སུམ་ཅུའི་ནང་ཤེད་ཨ་མདོ་ཞབས་དཀར་བ་ཚོགས་དྲུག་རང་གྲོལ་གྱི། སྙན་པ་གསན་ནས་མཇལ་དུ་བྱོན་ཡང་། ཞབས་དཀར་གཤེགས་ཚར་བའི་སྐད་ཆ་ལམ་བར་དུ་གསན་ནས་གདུང་དབྱངས་ཀྱི་ཚིགས་བཅད་མཛད་ཅིང་གསེར་ཐལ་ཕྱོགས་ཡར་ལུང་པདྨོ་བཀོད་དུ་དགེ་མང་སྐུ་ཞབས་ཀྱི་གྲྭ་འཁོར་གསེབ་ཏུ་ཞུགས་ནས་ཕེབས། དེར་དགེ་མང་རིན་པོ་ཆེས་གསང་སྙིང་རྒྱུད་བཤད་རྒྱས་པར་གནང་སྐབས་རྗེ་འདིས་ཁྲིད་དཔོན་མཛད་ཅིང་། དེ་རྗེས་ཀྱང་གནས་དེར་ལོ་གཉིས་ཙམ་ལ་ཞག་ཞེ་ལྔ་རེའི་རིང་རྒྱུད་བཤད་ཤིན་ཏུ་རྒྱས་པ་བཀའ་དྲིན་
(༡༢༣)དུ་བསྩལ་བས་སྔ་འགྱུར་རྡོ་རྗེ་ཐེག་པའི་བསྟན་པ་སྤྲིན་མཐོངས་ཀྱི་ཉི་ཞུར་ཙམ་གསལ་བར་བྱུང་བས། ཡུལ་གསེར་སྟོད་དུ་སྙིང་པོའི་བསྟན་པ་དར། ཞེས་པའི་ལུང་བསྟན་ཐོག་ཏུ་ཁེལ་བར་གླེང་། དཔལ་ཤུལ་སྟོབས་རྒྱལ་སོགས་ཀྱིས་སྤྱན་དྲངས་ཏེ་དཔལ་ཤུལ་ཁག་གསུམ། གསེར་ཐལ་ཚོ་མ་ལག་བཅོ་བརྒྱད་ཕལ་མོ་ཆེ་དང་བཅས་པ་ལ་སྤྱོད་འཇུག མ་ི་བཀའ་འབུམ། བདེ་སྨོན་སོགས་ཆོས་ཀྱི་སྦྱིན་པ་གྲངས་མེད་པ་སྩལ་ཞིང་བདེ་སྨོན་དང་ཡི་གེ་དྲུག་མའི་ཕྲིན་ལས་ཁྱབ་གདལ་དུ་སྤེལ། གསོན་རིམ་དང་གཤིན་ཆོག་ལ་སྐམ་ལུག་མང་པོ་བསད་དེ་དགེ་འདུན་ལ་དམར་སྟོན་བྱེད་པའི་སྲོལ་ངན་རྒྱུན་བཅད་ཅིང་ཇག་རྒྱ་རྐུན་ཁྲིམས་བཞག་སྟེ་ཕན་བདེའི་ལམ་སྲོལ་ཆེན་པོ་བཏོད་རིམ་གྱིས་རྡོ་ཡུལ་དུ་ཕེབས་ཤུག་ཆུང་དགོན་སོགས་སུ་ཆོས་ཅི་རིགས་བསྟན། ཤུག་ཆེན་སྟག་མགོར་ཡུན་རིང་བཞུགས་ནས་བཀའ་འགྱུར་རིན་པོ་ཆེ་ཞིབ་ཏུ་གཟིགས་ཤིང་བཀླག་པས་མདོ་སྡེ་མང་པོ་ཐུགས་ལ་ཟིན་གསུངས། ཨ་རིའི་ནགས་ཀྱི་ལྗོན་ཤིང་ཡལ་འདབ་རྒྱས་པ་ཞིག་གི་དྲུང་དུ་ཟླ་བ་ཁ་ཤས་བཞུགས་ཏེ། ནགས་ཚལ་ས་ཕྱོགས་དབེན་ཞིང་ཉམས་དགའ་དང་། །ཞེས་པ་དེ་འདི་འདྲ་ལ་ཟེར་བ་ཡིན་ཞེས་ཐུགས་སྤྲོ་ཉམས་མཛད། དེར་གཞི་ཆེན་སྤྲུལ་སྐུ་སོགས་དོན་གཉེར་ཅན་མང་པོ་ལ་སེམས་ཉིད་ངལ་གསོ་དང་ཡོན་ཏན་མཛོད་ཀྱི་བཤད་ཁྲིད་རྒྱུན་རིང་དུ་བསྐྱངས། འཛི་ཀར་ཡང་ཕེབས་ཏེ་མ་ི་བཀའ་འབུམ་སོགས་
(༡༢༤)གསུངས་ཤིང་ཡིག་དྲུག་གི་ཕྲིན་ལས་རྒྱས་པར་མཛད། ཛ་མཐང་དུ་ཀུན་མཁྱེན་དོལ་པོའི་འགྲེལ་པའི་སྟེང་ནས་རྒྱུད་བླ་མ་རྒྱས་པར་བཤད་ཅིང་བསྡུས་དོན་བརྩམས། གཙང་པ་དགེ་སློང་ངག་དབང་ཆོས་འབྱོར་ལས་སྦྱོར་དྲུག་གསན། མི་ཉག་གི་ཡུལ་དུ་བྱོན་ཏེ་འདྲ་བ་དགེ་བཤེས་ཚུལ་ཁྲིམས་རྣམ་རྒྱལ་ལ་ཕར་ཕྱིན་སྐོར་གྱི་དྲི་བ་མང་པོ་ཞུས་པས་ཁྱོད་སུ་ཡིན་གང་ནས་འོང་གསུངས་པར། དཔལ་དགེ་ཟེར་བ་ཁམས་རྫ་ཆུ་ཁ་པ་ཞིག་ཡིན་ཞུས། ཕྱིར་ཕེབས་རྗེས་དགེ་བཤེས་ཆེན་པོ་དེས་ཉེ་གནས་ལ་དེ་སུ་ཡིན། ཁོ་དཔལ་དགེ་བྱ་བ་ཡིན་ཟེར་ཏེ་རྒྱལ་ཁམས་ན་ཡོངས་སུ་གྲགས་པའི་སྐྱེས་བུ་དམ་པ་ཞིག་ཡིན་པའི་འོས་སུ་འདུག་གསུང་སྐད། སྨར་ཁོག་སྟོད་སྨད་མང་པོར་ཡང་མ་ི་བཀའ་འབུམ་གཙོ་བོར་གྱུར་པའི་དམ་པའི་ཆོས་ཀྱི་ཆར་ཕབ་སྟེ་བ་ལང་ལྟ་བུའི་སྐྱེ་བོ་བླུན་པོ་རྣམས་ལའང་ཐར་པ་དང་ཐམས་ཅད་མཁྱེན་པའི་ས་བོན་བསྐྲུན། དད་པ་དང་སྙིང་རྗེ་ཆུང་བ་དཀར་ཕྱོགས་ལ་སྡང་ཞིང་སྡིག་ལ་འཛེམ་མེད་དུ་སྤྱོད་པའི་མི་དཔོན་དང་ཇག་དཔོན་ང་རྒྱལ་ཅན་ཤིན་ཏུ་གདུལ་དཀའ་བ་རྣམས་ཀྱང་སྙིང་རྗེའི་དཀའ་ཐུབ་གྲུབ་པའི་གསུང་གི་མཚམས་ལས་འདའ་བར་མ་ནུས་ཏེ་རྐུན་རྒྱ་ཇག་ཁྲིམས་དང་རྔོན་པ་མང་པོའི་སྡིག་འཕྲོ་གཅོད་པ་སོགས་ཀྱི་སྒོ་ནས་ཡུལ་ཁམས་དཀར་པོར་བསྒྱུར། སྨར་རོང་གི་ཡུལ་མཐའ་སྔོན་ཆད་ཡིག་དྲུག་འདོན་པ་ལྟ་ཅི་བསྒྲང་ཕྲེང་ལག་ཏུ་འཛིན་སྲོལ་ཙམ་ཡང་གཏན་མེད་པའི་ཕྱོགས་སོགས་སུའང་ཆོས་བསྟན་ཏེ་མ་ི་འདོན་པའི་
(༡༢༥)སྲོལ་ལམ་པོ་ཆེ་བཞིན་དུ་ཡངས་པོར་བཏོད་པས་མཚོན་གདུལ་དཀའ་འདུལ་བའི་ཕྲིན་ལས་བསམ་གྱིས་མི་ཁྱབ། སླར་ཡང་རྡོ་ཡུལ་དུ་བྱོན་ནས་དྷི་ཆུང་ཕུག་ཏུ་བཞུགས་སྐབས་སྐུ་ཞབས་མཁྱེན་བརྩེ་རིན་པོ་ཆེ་སྒར་པ་དར་རྩེ་མདོ་ཕྱོགས་ནས་བཏེགས་ཏེ་གཉན་པོ་གཡུ་རྩེའི་གནས་མདུན་སྔོ་མཚོའི་ཁར་ཕེབས་པ་གསན་ནས་དེར་ཆེད་གཏད་ཀྱིས་བྱོན། སྐུ་ཞབས་ཀྱང་ཤིན་ཏུ་དགྱེས་ནས་ཆོས་ཀྱི་གསུང་གླེང་མང་དུ་མཛད། མཁའ་འགྲོ་བདེ་ཆེན་རྒྱལ་མོའི་དབང་ཞིག་གནང་བར་ཞུས་པས། དེ་ངས་གསང་རྒྱས་བཏབ་ནས་སུ་ལའང་མ་བྱིན་པར་ལོ་མང་སོང་བ་ཡིན་ཏེ། ད་རེས་ཁྱོད་ལ་སྟེར་ཞེས་དགྱེས་བཞིན་གནང་། ལོ་བརྒྱད་ཅུར་འཚོ་བའི་ལུང་བསྟན་དང་འབྲེལ་ཚད་དོན་ལྡན་གྱི་དབུག་དབྱུང་སོགས་ཕྱི་ནང་གསང་བའི་བཀའ་ལུང་མང་པོ་ཐོབ་ནས་སླར་ཡང་རྡོ་ཡུལ་དུ་ཕྱགས་ཕེབས། སྟོད་སྨད་ཕན་ཚུན་གྱིས་སའི་ཆ་དུ་མར་སྤྱོད་འཇུག་གཙོ་བོར་གྱུར་པའི་ཆོས་སྦྱིན་བཀྱེས། དེ་ནས་མི་རིང་བར་སྟོད་ཕྱོགས་སུ་ཞབས་པད་བཀོད། རྫོགས་ཆེན་དགོན་སེང་གེ་རིའི་ཆོས་གྲྭ་དང་པད་མའི་ཐང་དང་ནགས་ཆུང་མའི་རི་ཁྲོད་སོགས་སུ་མངོན་རྟོགས་རྒྱན་དང་། རྩ་བ་ཤེས་རབ། མདོ་སྡེ་རྒྱན། མངོན་པ་མཛོད། སྒྱུ་འཕྲུལ་གསང་སྙིང་། ཡོན་ཏན་མཛོད། སྡོམ་གསུམ་རྣམ་ངེས་སོགས་མང་དུ་བཤད། ལོ་སྔ་ཕྱི་དུ་མར་སྤྱོད་འཇུག་གསུང་སྐབས་ས་ཕྱོགས་དེར་མེ་ཏོག་གསེར་ཆེན་འདབ་མ་སུམ་ཅུ་དང་ལྔ་བཅུ་ཡོད་པ་
(༡༢༦)སོགས་སྔར་མེད་མང་དུ་སྐྱེས་པ་ལ་སྤྱོད་འཇུག་མེ་ཏོག་ཏུ་གྲགས་པ་བྱུང་། མངོན་རྟོགས་རྒྱན་ལ་ལེགས་བཤད་གསེར་ཕྲེང་གི་རྗེས་སུ་འབྲང་བའི་སྒོམ་རིམ་བརྩམ་པ་ཕྱིས་སུ་རྗེ་མི་ཕམ་པས་འདི་ལས་ངོ་མཚར་ཆེ་བ་མ་མཐོང་ཞེས་ཆེད་དུ་བསྔགས། མཁན་པོ་ཤེས་རབ་བཟང་པོ་ལས་རབ་ཏུ་བྱུང་སྟེ་མཚན་འཇིགས་མེད་དགེ་བའི་འབྱུང་གནས་སུ་གསོལ། སྡེ་དགེ་ལྷ་སྲས་འཆི་མེད་རྟག་པའི་རྡོ་རྗེ་སྐུ་མཆེད་ཉག་སྐེད་པའི་འོག་ནས་ཐར་ཏེ་རྒྱལ་སར་འཁོད་དུས་རྫོགས་ཆེན་བླ་བྲང་ནས་གདན་ཞུས་དགའ་སྟོན་ཕུལ། དེ་སྐབས་རྗེ་འདིས་ཀྱང་བཟང་པོ་སྤྱོད་པའི་ཆོས་འབྲེལ་དགྱེས་བཞིན་གནང་། འདི་དུས་མཆོག་གྱུར་བདེ་ཆེན་གླིང་པའང་རྫོགས་དགོན་དུ་བྱོན་ཏེ་རུ་དམ་གངས་ཁྲོད་ནས་བདེ་མཆོག་སངས་རྒྱས་མཉམ་སྦྱོར་གྱི་གཏེར་ཁ་བཞེས། ཆོས་སྐོར་དེ་དང་རིགས་གསུམ་སྙིང་ཐིག་སོགས་ཀྱི་ཆོས་བདག་ཏུ་ངོས་འཛིན་གནང་བ་ལྟར་རྗེ་འདིས་ཀྱང་ཐུགས་དད་ཆེན་པོས་དབང་ལུང་ཁྲིད་གསུམ་ཡོངས་རྫོགས་བ་རྣོག་ཆོས་སུ་གསན། སླར་ཡང་དགེ་འདུན་ཚོགས་མང་ལ་དགོངས་འདུས་སྒྲུབ་ཐབས་སྐོར་གྱི་ལུང་གནང་བར་རྗེ་འདིས་གསོལ་བ་བཏབ་ནས་དེ་བཞིན་བསྩལ་བ་མཇུག་རྫོགས་མཚམས་སུ་གསུང་མཐོན་པོས་འོ་དེ་རིང་རང་རེ་རྣམས་ཀྱིས་གཏེར་སྟོན་སངས་རྒྱས་གླིང་པའི་མདུན་ནས་བླ་མ་དགོངས་འདུས་ཐོབ་པའི་སྐལ་བཟང་བྱུང་བ་རེད་པས་ཀུན་གྱིས་བསྙེན་སྒྲུབ་རེ་གྱིས། ཞེས་གསུངས། ཀ་ཐོག་རྡོ་རྗེ་
(༡༢༧)གདན་དུའང་ཞབས་ཀྱིས་བཅགས་ཏེ། དམ་གཙང་བྱམས་གསུམ་གྱི་གདུང་འབུམ་ལ་ཕྱག་སྐོར་མང་དུ་མཛད་ཅིང་། སི་ཏུ་མཆོག་སྤྲུལ་དམ་པ་ཆོས་ཀྱི་བློ་གྲོས་སོགས་ཀྱིས་གསོལ་བ་བཏབ་པ་ལྟར། གཙུག་ལག་ཁང་ཆེན་མོར་འདུས་སྡེ་ཡོངས་ལ་སྤྱོད་འཇུག་རྒྱས་པར་གསུངས། ཞིང་སྐྱོང་རིན་པོ་ཆེས་ཀྱང་ཆོས་ཐུན་གཅིག་ཙམ་གསན། དགེ་རྩེ་སེར་ཤུལ་དགོན་དང་། ལབ་ཁྲི་འདུ་དགོན་ཆུ་ཧོར་དགོན་སོགས་རི་བོ་དགེ་ལྡན་པའི་དགོན་ཆེན་མང་པོར་བྱོན་ནས་སྤྱོད་འཇུག་སོགས་ཀྱི་བཤད་པ་རྒྱ་ཆེར་སྩལ། དེ་དག་གི་ཚེ་ཡང་གསར་རྙིང་གི་གྲུབ་མཐའི་ཕྱོགས་འཛིན་དང་། དགག་བཞག་གི་ཟེར་མཆུ་རང་བསྟོད་གཞན་སྨོད་སོགས་སྐབས་སུ་མ་བབས་པ་དང་། དུས་ཀྱིས་དབང་ལས་ཆགས་སྡང་གི་རྒྱུར་འགྲོ་བའི་གཏམ་རྣམས་ཆ་ཤས་ཙམ་ཡང་མ་འདྲེས་པར་འགྲེལ་པ་མཁན་སུའི་ལུགས་ལྟར་བཤད་པ་དེ་དང་དེའི་རང་བཞེད་ཁ་གཙང་། གསལ་ཞིང་དག་ལ་ཟུར་ཕྱིན་པ། དོན་གྱི་གནད་ཐོག་ཏུ་འདྲིལ་ཞིང་། ཧ་ཅང་རྒྱས་བསྡུས་ཀྱི་མཐར་མ་ལྷུང་བ་ཉམས་ལེན་གྱི་སྟེང་དུ་བསྐོར་ནས་གསུངས་པས་ལྷ་ལྡན་སྨོན་ལམ་རབ་འབྱམས་པ་མང་པོས་ཀྱང་ཡི་རང་གི་མེ་ཏོག་འཐོར་ཞིང་གུས་པས་བཏུད། ཧོར་ཁང་གསར་སྐྱབས་མགོན་བྱོན་ནས་གདོལ་པའི་དྲང་སྲོང་གི་གཏམ་དུ་གྲགས་པ། གང་གིས་ཁམས་གསུམ་ཁམས་ཟས་སུ། །ཞེས་པའི་དབུ་ཅན་དེ་བཤད་ཁྲིད་ཀྱི་ལུགས་སུ་གསུང་པར་ཞུས་པས་སྤྱི་དོན་བཀོད་ནས་བཀྲལ་ཏེ་གསུངས་
(༡༢༨)འདན་པདྨ་རི་མཐོའི་ཤེལ་དཀར་ཕུག་ཏུ་རྒྱང་ཙམ་བཞུགས་སྐབས་སྡེ་དགེའི་གཟིམ་དཔོན་བཀྲ་ཤིས་དགེ་ལེགས་ཀྱིས་ཞུས་ངོར་ལྷ་ཆོས་དང་མཐུན་པའི་གཏམ་པདྨའི་ཚལ་གྱི་ཟློས་གར་ཞེས་བྱ་བའི་ཡ་མཚན་ཅན་དེ་དང་། སྐུ་ཞབས་མཁྱེན་བརྩེའི་གསོལ་འདེབས་ཆེན་མོ་བཀྲ་ཤིས་དགེ་ལེགས་མཛད། ཕྱིས་སུ་གཙོ་བོར་བླ་མ་སྤྱན་རས་གཟིགས་ཀྱི་གདན་ས་རྫ་རྒྱལ་དགོན་གྱི་ཉེ་སྐོར་ཉིད་དུ་བཞུགས་ཤིང་བྱམས་ཆོས་དང་རྩ་ཤེས། བུད་དྷ་པཱ་ལི་ཏ། སྤྱོད་འཇུག །ཡོན་ཏན་མཛོད། བཟང་སྤྱོད་བཤད་པ་སོགས་ཅི་རིགས་པར་གནང་། སྔོན་དུས་དཔལ་དགེ་བསམ་གཏན་ཕུན་ཚོགས་ཀྱིས་རྡོ་འབུམ་ཆེན་མོ་བཞེངས་སྐབས་ད་དུང་ངས་སྐྱེ་བ་ཕྱི་མར་ད་ལྟའི་འདི་ལས་རྒྱ་མི་ཆུང་བའི་རྡོ་འབུམ་ཁ་གསོ་བྱེད་རྒྱུ་ཡིན་ཞེས་ཞལ་གྱིས་བཞེས་པར་གྲགས་པ་ལྟར་ཨ་ཐུབ་ཚོང་དཔོན་ཆེན་པོའི་རིགས་ལས་བྱུང་བའི་དད་ལྡན་འཇམ་དབྱངས་བློ་གྲོས་སོགས་བཀས་བསྐུལ་ཞིང་ལོ་བཞི་ལྔ་ཙམ་དུ་མཆོག་དམན་སུས་དད་འབུལ་ཆེ་ཕྲ་བྱུང་ཚད་སྔོན་དུས་དང་མི་འདྲ་བར་བརྩེ་བ་ཞེས་མཛད་དེ་རྡོ་བསྐོས་བཟང་ལ་མང་བ་སོགས་ནས་སྔོན་གྱི་རྡོ་འབུམ་ལས་ཀྱང་རྒྱ་ཆེ་ཞིང་དཔངས་མཐོ་བས་ཁ་གསོ་གནང་ཞིང་རྡོ་བརྐོས་འབུར་ཐམས་ཅད་རྩིས་ལེན་ཞིབ་གཟིགས་ནན་ཏན་དུ་མཛད་པས་ཤིན་ཏུ་འབྱོན་གཙང་སྤུས་ལེགས་མཐའ་རྒྱས་སུ་གྲུབ། བཀའ་ལས་རྟེན་བཞེངས་འདི་སེམས་ཅན་མང་པོ་ལ་ཕན་ཐོགས་ཆེ་བར་འདུག་ཀྱང་ས་འབུམ་དང་ས་
(༡༢༩)སྐུ་སོགས་ནི་ཆར་ཆུས་འཇིག །ཟངས་གསེར་སོགས་ལས་བྱས་པ་ནི་བདག་པོ་ངན་ན་ཆོམ་རྐུན་ཡང་ལྡང་། ལོགས་རིས་དང་ཐང་ཀ་ཡང་རྐྱེན་ཁྱག་ཆུང་། གཙུག་ལག་ཁང་བཞེངས་ན་ནི་ཐིགས་ཚག་སོགས་གཉེར་ཅག་ལེགས་པོ་བྱེད་པའི་དཀོན་གཉེར། དེའི་ཟས་གོས་སྒྲུབ་རྟེན་སོགས་འབད་རྩོལ་བརྒྱ་ཕྲག་དགོས་ཤིང་། དེ་བྱས་ཀྱང་དཀོན་གཉེར་བཟང་པོ་ཡང་བརྒྱུད་མར་རྙེད་དཀའ། གསུང་རྟེན་གླེག་བམ་ཡང་འཐོར་བརླག་ཆུད་ཟོས་སུ་འགྲོ་སླ་ཞིང་། སྤར་བརྐོ་དུས་སྤར་ཡིག་ལ་ཞུ་དག་ལན་དགུ་རེ་བྱས་ཀྱང་ད་དུང་མི་དག་པ་མང་དུ་སྣང་ཟེར་གྱི་འདུག་པས་ཆད་ལྷག་འཁྲུལ་གསུམ་གྱིས་མ་གོས་པ་དཀའ་ཚོད་རེད། རྡོ་འབུམ་འདི་ནི་བཞེངས་ཚར་ནས་དབྱར་དུས་ཐིགས་ཚག་དང་དགུན་དུས་ཁ་བ་ཕྱགས་སྦྲུགས་ཕུག་རོན་དང་བྱི་བ་བསྲུང་བ་དཀོན་གཉེར་བསྐོ་འཇགས་སོགས་གང་ཡང་མི་དགོས། ཡིག་འབྲུ་དྲུག་པོ་དེ་མ་ནོར་ཕན་ཆད་ཞུ་དག་བྱ་མི་དགོས་ཤིང་། དེ་རྡོ་བརྐོས་མི་ནག་པ་རྣམས་ཀྱིའང་བློ་ལ་ཡོད་པས་དཔེ་གཞན་ལ་མི་ལྟོས། མ་ི་འདི་སངས་རྒྱས་ཉིད་ཀྱིས་ཆོས་ཕུང་བརྒྱད་ཁྲི་བཞི་སྟོང་གི་ནང་བཅུད་ཡིག་འབྲུ་དྲུག་ཏུ་བསྡུས་ནས་བྱིན་གྱིས་བརླབས་པ་ཡིན་པས་རྟེན་བཞེངས་གཞན་མང་པོ་ནི་ཡལ་ག་ལ་འཇུས་པ་དང་ངས་འདི་ནི་ལྗོན་ཤིང་གི་རྩ་བའི་གནད་ནས་བཟུང་བ་དང་འདྲ། ལུང་པ་དམག་གིས་ཁེངས་ཡང་འདི་ལ་ཆོམ་རྐུན་ཡོད་དོགས་མི་དགོས་པས་མི་རབས་མང་པོའི་མཐར་
(༡༣༠)ཡང་གནས་ཆོག །གནའ་མྱིའི་ཁ་ངག་ལ། མ་ིའི་རྡོ་ལ་གདན་བཏིང་ན་ད་གཟོད་གཤིན་རྗེ་ཆོས་རྒྱལ་གྱི་དྲུང་དུ་དགེ་སྡིག་རྒྱ་མ་ལ་བཀྱག་དུས་གདན་གྱི་ལྗིད་དེ་དགེ་བའི་ཁ་སྣོན་ལ་བཀྱག་ཆོག་ཟེར། གང་ལྟར་ཡང་འདི་ལ་ནི་འཛམ་བུའི་ཆུ་གསེར་གྱི་གདན་བཏིང་ཡང་འོས་པ་ལས་ལྷག་ཀྱང་ཡིན་ཏེ། འཁོས་ཀྱིས་མི་ལྕོགས། འོན་ཀྱང་ངས་ནི་ས་ཆེན་པོ་འདི་རྡོ་གདན་ལ་བཞག་པ་ཡིན་ཞེས་ངག་ཡིད་གཉིས་ཀས་བསྡོས་ཡོད། ངའི་དགེ་བ་རྒྱ་མ་ལ་བཀྱག་ན་ཨི་མི་ལྗི་སྙམ་ཞེས་གསུངས་ཏེ་རྡོ་འབུམ་འདི་ནི་ཕྱི་རབས་ནས་ཕྱི་རབས་སུ་མཐོང་ཐོས་དྲན་རེག་གི་འགྲོ་བ་གྲངས་མེད་པའི་དོན་དུ་རྗེ་ཉིད་ཀྱི་ཞལ་ཚབས་བྱིན་གྱིས་བརླབས་པ་ཡིན་པར་སྣང་ངོ། །རྫོགས་ཆེན་མཆོག་སྤྲུལ་ལྔ་པ་དང་སྐུ་ཞབས་དགེ་མང་མཆོག་སྤྲུལ། མཁན་ཆེན་རྡོ་རྗེ་འཆང་པདྨ་བཛྲ་དང་། མཁན་པོ་དཀོན་མཆོག་འོད་ཟེར་སོགས་ལ་གསང་སྙིང་རྒྱུད་བཤད་གནང་སྐབས་རྡོ་རིང་ལ་རབ་གནས་མཛད་དུ་བཅུག །སླར་ཡང་རྫོང་གསར་དུ་ཀུན་མཁྱེན་བླ་མ་རྡོ་རྗེ་འཆང་འཇམ་དབྱངས་མཁྱེན་བརྩེའི་ཞབས་ཀྱི་སྤྱན་སྔར་དར་ནང་མཛོད་དང་དངུལ་རྟ་རྨིག་གི་ཞུ་རྟེན་བཅས་རབ་གནས་ཀྱི་ཆེད་དུ་ཕྲིན་གྱིས་གསོལ་འདེབས་མཛད་པས། ཆུ་སྟོད་ཟླ་བའི་ཚེས་བཅུར་ལྷག་གནས་མཛད་རྒྱུའི་ཞལ་བཞེས་གནང་པ་ལྟར་དུས་ཚོད་དེ་ནས་བརྩམས་པའི་ཉིན་ཞག་གསུམ་ཙམ་གྱི་རིང་རྡོ་འབུམ་གྱི་སྟེང་ཤོད་བར་གསུམ་ཡོངས་རྫོགས་ལྷག་པར་གནས་
(༡༣༡)པའི་མེ་ཏོག་གིས་ཁྱབ་པའི་ངོ་མཚར་བསྟན། དེ་དང་ལྷག་པར་ལྕེ་བཙུན་སྙིང་ཐིག་གཟིགས་པ་སོགས་ཀྱིས་ཐུགས་དྲངས་ཏེ། དིལ་སྤྲུལ་ཚང་འདི་ནི་རྒྱ་གར་གྱི་གྲུབ་ཆེན་ལྟ་བུའི་ཚོད་དུ་འདུག་ཅེས་དང་། སློབ་མ་མང་པོ་ལའང་། ཁོང་ཀུན་མཁྱེན་ཀློང་ཆེན་པ་དངོས་རང་ཡིན་ཚོད་རེད། ད་ལྟས་སྟེང་ན་ཁོང་ཆེ། དེའི་ཞལ་ཅིག་མཐོང་ན་ཁྱེད་ཚོའི་དཔྲལ་བ་ན་མིག་ཅིག་ཡོད་པ་དེ་ལ་དོན་འབྲས་བྱུང་བ་ཡིན་ཞེས་སོགས་ལན་ཅིག་མིན་པར་བསྔགས། སླད་ནས་ཞབས་བརྟན་གྱི་ཚིག་བཅད་ཚེ་དཔག་མེད་ཀྱི་སྐུ་རྟེན་དང་སྦྲག་པ་ལན་མང་དུ་ཕུལ་བའི་ནང་ནས། རྒྱལ་བའི་རྒྱལ་ཚབས་རིག་འཛིན་བླ་མ་ཆོག་ཅེས་པའི་དབུ་ཅན་སོགས་ཞབས་བརྟན་ཚིགས་བཅད་རེ་ཟུང་ད་ལྟའང་བཀའ་འབུམ་གྱི་ཁྲོད་ན་སྣང་། འཇིགས་མེད་རྒྱལ་བའི་མྱུ་གུར་་ཁྲ་མ་བླ་མ་ཞེས་བཞུགས་མཚན་ཆགས་པའི་ཁྲམ་ལུང་དུ་དགེ་མང་རྗེ་དབོན་རིན་པོ་ཆེ་བསྟན་འཛིན་ནོར་བུ་སོགས་སྣོད་ལྡན་མཆོག་གི་འགའ་ཞིག་དང་ལྷན་ཅིག་འཁོར་འདས་རུ་ཤན་ནས་བཟུང་རྫོགས་ཆེན་ཐུན་མིན་གྱི་སྔོན་འགྲོ་དང་དངོས་གཞི་ཁྲེགས་ཆོད་ཐོད་རྒལ་ཡོངས་རྫོགས་ཀྱི་མྱོང་ཁྲིད་ཤིན་ཏུ་སྨིན་པར་མཛད་པ་དང་སྦྲག་ནས་རྗེ་རང་གིས་ཀྱང་ཁྲིད་སྦྱང་ཡུན་རིང་དུ་གནང་། དགེ་མང་དབོན་རིན་པོ་ཆེའི་ཞལ་ནས། སྔོན་ཆད་ངེད་ཚོས་ཆེན་གོ་ལོ་ཐོས་ལོ་དང་བཤད་མདོག་བྱས་ཚད་ཚིག་སྤྱི་ཡམ་མེ་བ་ཙམ་ལས་ཆེར་ཤེས་པ་མ་བྱུང་། ཁྲམ་ལུང་
(༡༣༢)དུ་ཉམས་ཁྲིད་བཀའ་དྲིན་བསྐྱང་བ་ནས་བཟུང་ཆོས་འདི་ལ་གོ་རྟོགས་མཐིལ་ཕྱིན་པ་ཞིག་ཐོབ་སྙམ་བྱུང་གསུངས། རྫོགས་ཆེན་གྱི་ལམ་སྒྲུབ་པ་པོ་གཉིས་ལས་རིག་པ་རང་སྣང་གི་བློ་ཅན་ཡིན་ཡང་བརྟུལ་ཞུགས་རུ་ཤན་གྱི་སྤྱོད་པ་དང་མོས་གུས་བླ་མའི་རྣལ་འབྱོར་དང་སྦྲེལ་ནས་ཉམས་སུ་བླང་ན་བོགས་ཆེ་བས་སྔ་གོང་རུ་དམ་དུ་བཞུགས་དུས་ཀྱང་གངས་ཁྲོད་དང་ཉེ་བའི་རྫ་གསེབ་ཏུ་རུ་ཤན་མཛད་པར་གྲགས་ཤིང་། ཕྱིས་སྐུ་ན་ཆེས་མཐོན་པོར་ཕེབས་དུས་ཀྱང་མཚན་མོའི་རིང་ཀློང་སྙིང་བླ་མའི་རྣལ་འབྱོར་ལ་ཐུགས་དམ་མཛད་དེ་སྲོད་དང་ནམ་གུང་གི་དུས་མང་པོར། རྗེ་བཙུན་ཆེན་པོ་པད་འབྱུང་མཁྱེནཿ ཞེས་གདུང་དབྱངས་མཛད་ལྕང་མ་ལུང་དུ་སྡོད་སྐབས་བདག་ཅག་གིས་ཀྱང་མངོན་སུམ་དུ་གྱུར། བསྒྲུབས་འབྲས་ཀྱི་གཙོ་བོ་ནི་བསྒོམས་རྟགས་ཉོན་མོངས་ཆུང་བ་ཞེས་གྲགས་པ་ལྟར། སྨྱོ་ཤུལ་ལུང་རྟོགས་ཞབས་པད་ཡུན་རིང་དུ་བསྟེན་པའི་ཐུགས་གྱི་སློབ་མ་ཡིན་པས་ལན་ཅིག་ཁོང་ལ། ཁྱོད་བླ་མ་སུ་ལ་གསོལ་བ་འདེབས་ཀྱིན་ཡོད་གསུངས་པར། གསོལ་འདེབས་ཀྱང་ཆེར་མི་ཐུབ་འདུག་ཞུས་པས། མི་ཐུབ་དུས་དེར་ཟད་ཐུབ་དུས་སུ་ལ་འདེབས་གསུངས། དེར་འཇིགས་བཞིན་དུ། ཁྱེད་ལ་གསོལ་བ་རེ་འདེབས་པ་ཡིན་ཞེས་གཅོམ་ཆུང་ངུས་ཞུས་པས། རྒྱལ་ཁམས་ན་བླ་མ་འདིའི་མང་ཉུང་ལ་ང་ལ་གསོལ་བ་འདེབས་པ་ཅི་ཡིན་གསུངས་རང་ལ་དགེ་སེམས་སྐད་ཅིག་མ་རེ་སྐྱེས་ཀྱང་འོ་དེ་ཅི་ལས་བྱུང་བསམ་ཙ་ན་ཁྱེད་ཀྱིས་ཆོས་རེ་བཤད་ཀྱི་
(༡༣༣)བསྡད་པའི་མཐུ་ཁོ་ན་རེད་འདུག་པས་དྲིན་ཆེ་སྙམ་པ་ལགས་ཞུས་པས། དེ་ཡིན་ན་ཨ་ཐོ་བདེན་ཐང་ད་ནི་གསོལ་བ་རེ་བཏབ་ཀྱང་རུང་བ་འདྲ། ངའི་རྒྱུད་འདི་ན་ཉོན་མོངས་པ་ཟེར་རྒྱུ་དེ་ཚོ་གཏན་ནས་འཆར་རྒྱུ་མི་འདུག་ཅེས་གསུང་མཐོན་པོ་བྱོན། རྟག་ཏུ་རྗེས་སུ་བཟུང་བའི་ལྷག་པའི་ལྷ་ནི་རྗེ་བཙུན་འཇམ་པའི་དབྱངས་ཏེ། གསོ་རིག་གི་མན་ངག་དྭངས་མ་འགྲིམ་པའི་རྩ་དགུའི་རྣམ་བཤད་ཁྱད་པར་ཅན་ཅིག་མཛད་པ་ན་མན་ངག་དེ་གཡུ་ཐོག་སྙིང་ཐིག་གི་གསོལ་འདེབས་བསྙེན་པ་མཛད་སྐབས་སྨན་རྒྱལ་གུ་འི་ཞབས་དང་འཇམ་པའི་དབྱངས་དབྱེར་མེད་པས་དངོས་སུ་གདམས་པ་ཚིག་ཟིན་ལ་ཐོན་ཅིང་། གཞན་དུ་ཡང་། རབ་དཀར་ཀེལ་ཤ་དཔལ་མཛེས་པ་ལ། །བཻ་ཌཱུར་ཐོར་ཚུགས་བཀོད་དང་གང་མཚུངས་པ། །འཇམ་དཔལ་དཔའ་བོ་རྗེས་འཛིན་མཚུངས་མེད་ལྷས། །ཚེ་རབས་ཕྲེང་བ་རྣམས་སུ་སླར་ཡང་སྐྱོངས། །ཞེས་གསུངས་པ་འདི་འདྲའི་རིགས་མང་པོ་ཞིག་སྣང་། དེའི་ཕྱིར་སྐུ་ན་ཤིན་ཏུ་གཞོན་ནུ་ནས་ཇི་སྲིད་མྱ་ངན་ལས་འདས་ཀྱི་བར་དུ་ཉིན་མཚན་རྒྱུན་གྱི་འཁོར་ལོ་ཕལ་ཆེ་བར་འཇམ་དཔལ་མཚན་བརྗོད་འབའ་ཞིག་ཐུགས་དམ་གྱི་མཐིལ་དུ་མཛད། བཀའ་དགོངས་འགྲེལ་གྱི་ཆོས་གང་ཡང་གཟིགས་པ་ཙམ་གྱིས་དོན་ཐུགས་སུ་ཆུད་ཅིང་། །སྤྱོད་འཇུག་རྩ་བ་དང་མཚན་བརྗོད་ཀྱི་གླེག་བམ་ཞིག་རེས་ཡོད། རེས་གཞན་ལ་གནང་ནས་མེད། དེ་ཙམ་མ་གཏོགས་འགྲེལ་པ་དང་བརྗེད་བྱང་
(༡༣༤)སོགས་ཀྱི་དཔེ་ཆ་ཤོག་ལྡེབ་གཅིག་དང་ཐ་ན་སྣག་སྙུག་ཙམ་ཡང་ཚགས་མཛད་པ་མེད་པར། ཀོག་དེ་ལངས་ན་གཞིས་རྫོགས་པ། བྱ་བ་དེ་ཁོ་ནར་བཞུགས་ཀྱང་དབུ་ཕར་མངོན་པ་སོགས་གཞུང་གང་འཆད་རུང་དཔེ་ཆ་མང་པོ་སྡུ་རྩོལ་དང་ཐུགས་གསོས་སུ་གཟིགས་རྟོག་སྐྱོར་བའི་རིགས་གང་ཡང་མི་དགོས་པར་རལ་གྲི་ཕྱུང་རྒྱགས་ཀྱི་ཚུལ་དུ་ཐོགས་པ་མེད་པར་བཤད་པས་ཆོག་པ་ཡང་འཕགས་པ་འཇམ་དཔལ་གྱིས་མཆོག་སྦྱིན་པའི་བྱིན་རླབས་ཀྱི་ཆ་ཤས་ཞིག་ཏུ་མངོན། རུ་དམ་གཤིན་རྗེའི་སྒྲུབ་ཕུག་འོག་མར་རྗེ་བླ་མ་ཉིད་བཞུགས་ཤིང་། ཕུག་པ་གོང་མར་རྒྱལ་མོ་རོང་པའི་ཆོས་པ་གླེན་ནེ་བ་ཞིག་ཡོད་སྐབས། ཉིན་གཅིག་རྗེའི་ཞལ་ནས། འདི་ལྟར་དབེན་པའི་གནས་སུ་དགེ་སྦྱོར་བྱས་ཏེ་བསྡད་ན་རྣམ་གཡེང་མེད་ཅིང་རིག་པ་ངང་གིས་དྭངས་པས་སྔོན་གནས་རྗེས་དྲན་སོགས་འོང་བ་ལ་ཡང་ཚེགས་མེད། ཁྱོད་ལ་དེ་འདྲ་ཅང་ཨེ་བྱུང་གསུངས་པར། ཁོས་ཅི་ཡང་མ་བྱུང་ཟེར། ངས་ནི་རེས་འགའ་སྔ་མའི་ཚེ་རབས་བརྒྱ་ཕྲག་ལྷག་པ་ཡང་དྲན་པར་བྱུང་། སྔོན་དུས་གྲུབ་ཆེན་ནག་པོ་སྤྱོད་པ་གྲོང་ཁྱེར་དུ་བྱོན་དུས་ཤིག་ང་རང་གྲོང་ཁྱེར་གྱི་སྨད་འཚོང་མར་གྱུར་པས་གསེར་གྱི་གདུ་བུ་ཞིག་ཕུལ་བ་དེ་ཚུན་ཆད་དུ་བླུན་རྨོངས་ཕག་ཐོམ་ལྟ་བུར་ནམ་ཡང་མ་སྐྱེས་པ་ཞིག་ཀྱང་དྲན་གསུངས་སྐད། འདི་ལྟར་མངོན་པར་ཤེས་པ་མངའ་བའི་གསུང་སྒྲོས་སུ་གཏོགས་པ་གཞན་ཡང་རྡོ་སྟོད་ཀྱི་སའི་ཆ་དྷི་ཆུད་ཕུག་ཏུ་བཞུགས་དུས་ཤིག་
(༡༣༥)བོད་ཆུང་རྟ་ཤུལ་གྱི་རྒད་པོ་ཞིག་ཚོང་ལ་འགྲོ་བའི་ལམ་དུ་ཆུས་ཁྱེར་ནས་ཤི་བ་ཟླ་བོ་རྣམས་ཀྱིས་རོ་བཀལ་ནས་ཕུག་པ་དང་ཉེ་བའི་ཕྱོགས་སུ་ཕྱིན་ཏེ་འཕོ་བ་ཞུས་པས་ཆོས་ཞུ་མང་པོ་དང་བཅས་པས་འཕོ་ལུང་གསུངས། མཚམས་ཤིག་ནས་རྗེ་བླ་མ་ཉིད་རྒྱ་ཆེར་བཞད་དེ་འཕོ་ལུང་གསུངས་འཕྲོ་ལུས་ཀྱང་འཁོར་རྣམས་ཀྱིས་མཇུག་རྫོགས་པར་བཏོན། །དེ་སྐབས་ཅི་ཡང་མ་གསུངས། ཕྱིས་རྫ་སྟོད་དུ་རྒྱུ་ཞིང་བཞུད་སྐབས་ཤིག་འཁོར་ཁ་ཅིག་ལ་དེའི་ལོ་རྒྱུས་གསུངས་ནས། དེ་དུས་རྒད་པོ་ཤི་བ་དེའི་བར་སྲིད་སུམ་ཅུ་རྩ་གསུམ་པའི་ལྷ་ཡུལ་དུ་ལྷའི་བྱིས་པའི་གཟུགས་ཀྱིས་སླེབས་པ་ཞིག་མཐོང་ནས། མདུན་དེར་རྒད་པོའི་རོ་མགོ་སེ་ཡེ་རེ་བ་འདུག་བལྟས་པས། རྒད་པོ་སེ་བོ་འདིའི་མགྱོག་པ་ལ་ཨང་སྙམ་ནས་ང་དགོད་ཁ་ཤོར་ཏེ་འཕོ་ལུང་འདོན་འཕྲོ་ཆད་པ་ཞིག་བྱུང་ཞེས་གསུངས་པ་ལྟ་བུ་འགའ་རེ་ཡོད་ཚོད་འདུག ཡང་སྔོན་ང་རང་གཤིན་རྗེའི་ཕུག་པར་འདུག་སྐོར་ཞིག་ལ་གཞན་འགའ་རེས་ཁྱོད་ཀྱི་ཤ་མདོག་སོགས་ལ་བལྟས་ན་མཛེ་ནད་ཀྱི་དོགས་པ་ཞིག་འདུག་ཟེར། རང་ལའང་ཀླུ་གདོན་གྱི་རྟགས་མཚན་འགའ་རེ་བྱུང་བར། རཏྣ་གླིང་པའི་གཏེར་ཁའི་རྟ་ནག་དེའི་བསྒོམ་བཟླས་བྱས་པས་རང་གི་ལུས་ལས་སྦྲུལ་ཆེན་པོ་ཕྱིར་ཐོན་པ་རལ་གྲིས་དུམ་བུར་བཅད་པ་སོགས་རྨི་ལྟས་ཡ་མཚན་ཆེ་བ་དང་བཅས་ཞག་བདུན་ཁོ་ནས་ནད་དེ་ཡུལ་བུད་གསུངས། ཡང་མཆོག་གྱུར་གླིང་པའི་རིགས་
(༡༣༦)གསུམ་སྙིང་ཐིག་གི་འཇམ་དཔལ་རྫོགས་ཆེན་དེ་ལ་ངས་བསྙེན་སྒྲུབ་ཅིག་བྱས་པས་དེའི་གཞུང་ནས་བཤད་པའི་རྨི་རྟགས་ཚོ་གསལ་པོ་བྱུང་། མཆོག་གྱུར་བདེ་ཆེན་གླིང་པ་དེ་གཏེར་སྟོན་བདེན་པ་ཞིག་རེད་གསུངས་པ་སོགས་ལས་དཔག་ན་བསྙེན་སྒྲུབ་ཀྱི་རིགས་གཞན་ཡང་མང་པོ་མཛད་ཡོད་ཚོད་སྣང་ཡང་ཕྱིར་མི་མངོན་པས་ཤེས་དཀའ། དུས་ནམ་ཡང་བྱམས་སྙིང་རྗེ་བྱང་ཆུབ་ཀྱི་སེམས་ཁོ་ན་ཐུགས་དམ་དགེ་སྦྱོར་ཐམས་ཅད་ཀྱི་རྩ་བར་འཛིན་ཅིང་། སྐྱེ་བོ་མཆོག་དམན་ཐམས་ཅད་ལ་བསམ་པ་བཟང་པོ་བཟང་པོ་གྱིས་འདི་ལས་གལ་ཆེ་བ་མེད་གསུངས། བསྙེན་སྒྲུབ་བྱེད་པ་ཀུན་ལ་ཡང་། སྡེ་སྣོད་མང་པོ་ཤེས་པ་དང་། སྟོང་པ་ཉིད་ཀྱི་ལྟ་བའི་ཕྱོགས་མཐོང་ཡོད་པ་དང་། ལྷ་བསྒོམ་སྔགས་བཟླས་ཀྱིས་ལོ་ཟླ་མང་པོ་ཕུལ་བ་སོགས་ཀྱང་བསམ་པ་ངན་པའི་དབང་གིས་གདུག་འདྲེར་སྐྱེས་པ་མང་། །སྙིང་རྗེ་ཡི་དམ་གྱི་མཐིལ་པོར་འཛིན་པ་ལ་གདུག་འདྲེར་སྐྱེས་པ་གཅིག་ཀྱང་མི་སྲིད་པས་འདི་ཁོ་ན་གད་མེད་གཡང་མེད་ཀྱི་ཆོས་ཡིན་གསུངས། མིང་གནང་བར་ཞུ་མཁན་ཚོར་ཡང་སྙིང་རྗེ་ཐོག་མར་སྦྱར་ནས་བཏགས་སྣང་། བཅོམ་ལྡན་འདས་ཀྱིས་མདོ་སྡེ་ལས་དེ་བཞིན་གཤེགས་པའི་གསུང་རབས་ནི་ལེགས་པར་མ་བཀླས་པའི་ཉེས་པས་ནུབ་ཚུལ་གསུངས་པ་ཐུགས་ལ་བཞག་ནས་རྟག་ཏུ་དམ་པའི་ཆོས་འཆད་ཉན་གྱི་བྱ་བ་ལ་གཅེས་སྤྲ་མཛད་ཅིང་། གཞན་ཉ་བཤད་བྱེད་པ་ཀུན་ལ་ཡང་དགྱེས་པ་ཚད་མེད་འབྱུང་། ཆོས་གང་
(༡༣༧)གསུང་ཡང་མཁས་ངོམ་གྱི་སྤྲོས་པ་གང་མང་ཙམ་མིན་པར་གདུལ་བྱའི་བློ་ཚོད་དང་བསྟུན་ནས་ཕན་གང་ཆེ་མཛད་པས། མཁས་པས་བརྟགས་ན་དོན་བཟང་བ། བླུན་པོས་ཉན་ཡང་གོ་སླ་བ། གནད་འདུམ་ལ་འཛིན་བདེ་བ། རན་ལ་འབྲེལ་ཆགས་པ། སྙན་ལ་རོ་ཉམས་དང་ལྡན་པ། འཇམ་རྩུབ་ཇི་ལྟར་བཤད་ཀྱང་གདམ་ངག་གི་རོ་གཅིག་ཏུ་མཐུན་པར་འབྱུང་བས་མཁས་རྨོངས་བར་མའི་སྐྱེ་བོ་མཐའ་དག་གི་ཡིད་འཕྲོགས་པ་ཡོད། རྫ་ཁོག་ག་ཤེད་འདྲེ་ངན་ཁོག་བརླམ་གྱི་སྨྱོན་པ་གཉིས་ཡིད་གཅུག་པའི་གླེང་མོ་མང་དུ་བྱེད་ཀྱིན་འདུག་པར་གཞན་ཅིག་གིས་ཅི་ཡིན་དྲིས་པས་རྫ་སྟོད་དུ་དཔལ་སྤྲུལ་ཚང་གིས་སྤྱོད་འཇུག་བཤད་དུས་པར་མ་ཟེར་བའི་ལུང་པ་དེའི་མདོ་ཡན་ཆད་གང་བའི་ལྷ་འདྲེའི་ཁྲོམ་ཚོགས་ཀྱིས་ཆོས་ཞུས། དེ་དུས་ངེད་གཉིས་གྲོགས་མཆེད་དུ་གྱུར་པས་ངོ་ཤེས་ཀྱི་སྐད་ཆ་ལབ་པ་ཡིན་ཟེར་བས་མཚོན་ཆོས་སྦྱིན་གྱིས་བསྡུས་ཤིང་བསྐྱང་བའི་མི་མིན་གྱི་འཇིག་རྟེན་ཡང་ཚད་མེད་པ་ཞིག་ཡོད་པར་མངོན། སྔོན་དུས་མཚན་ཉིད་ཀྱི་ཆོས་གྲྭ་ཆེ་བ་འདྲ་མ་གཏོགས་གཞན་དུ་སྤྱོད་འཇུག་སོགས་མཚན་ཙམ་ལས་དོན་ཤེས་པ་ལྟ་ཅི། གླེགས་བམ་འཆང་ཙམ་ཡང་དཀོན་པ་ལས་སླད་ནས་རྗེ་བླ་མ་འདི་ཁོ་ནའི་དྲིན་གྱིས་སྟོད་སྨད་བར་གསུམ་ཀུན་ཏུ་སྤྱོད་འཇུག་དང་བྱམས་ཆོས། སྡོམ་གསུམ། ཡོན་ཏན་མཛོད་སོགས་ཀྱི་འཆད་ཉན་ས་ལང་རྡོ་ལང་དུ་དར་ཞིང་བཙུན་ཆུང་ལོ་བཅའ་བཅུ་པ་ཡན་ཆད་ཀྱི་ནང་ན་སྤྱོད་
(༡༣༨)འཇུག་གིས་མགྲིན་པ་བརྒྱན་པ་ཆེས་མང་དུ་ཐོན་པ་དང་། རྒྱུ་མཚན་དེས་ཐེག་པ་ཆེན་པོའི་ལམ་གྱི་ལུས་ཡོངས་རྫོགས་ལས་དང་པོ་པའི་དུས་ནས་ཉམས་སུ་ལེན་པའི་རིམ་པ་ལ་བློ་ཁ་ལེགས་པར་ཕྱོགས་ནས་ཕྱོགས་མོས་བྱེད་པ་ཆེས་མང་བས་ས་འདི་དཔལ་ཡོན་ལྡན་པར་གྱུར་པ་དང་། གསང་སྔགས་རྙིང་མའི་བསྐྱེད་རྫོགས་རྫོགས་པ་ཆེན་པོའི་བསྟན་པ་སྤྱིའི་སྒྲོ་མ་ཆུ་འགོ་གངས་ལ་ཐུག་པ་ལྟ་བུ་སྒྱུ་འཕྲུལ་གསང་སྙིང་ཡིན་ཡང་དེའི་ཆོས་རྒྱུན་ཕལ་ཆེར་ནུབ་ལ་ལ་བ་ཡང་བདག་ཉིད་ཆེན་པོ་དགེ་མང་གཞན་ཕན་མཐའ་ཡས་དང་དམ་པ་འདི་གཉིས་ཀྱི་དྲིན་ལས་ད་ལྟའི་བར་དུ་མ་ནུབ་པར་བཞུགས་པ་དང་། ཐེག་མཆོག་བསྟན་པའི་ཡང་རྩེ་འོད་གསལ་རྡོ་རྗེ་རྩེ་མོའི་རིང་ལུགས་ཀྱང་བླུན་སྒོམ་ཡིད་དཔྱོད་ཀྱི་དྲི་མས་མང་དུ་བསླད་དེ་གསེར་ལ་གཡའ་ཞུགས་པ་ལྟ་བུར་གྱུར་པ་རྗེ་བཙུན་འདིས་ཀུན་མཁྱེན་དྲི་མེད་འོད་ཟེར་ཡབ་སྲས་ཀྱི་ལེགས་བཤད་ལ་བརྟེན་ནས་བྱི་དོར་མཛད་དེ་ཀུན་བཟང་དགོངས་པའི་གནད་གསང་གསལ་བར་མཛད་པའི་བཀའ་དྲིན་གྱི་བདུད་རྩི་ནོད་དེ་རི་སུལ་དུ་གྲུབ་ཐོབ་གོང་མའི་ལུགས་བཞིན་རྫོགས་ཆེན་སྒོམ་པའི་རྣལ་འབྱོར་པ་མང་དུ་བྱུང་བ་དང་། འཇིག་རྟེན་མི་ནག་གི་སྐྱེ་བོ་ཕོ་མོ་རྣམས་ཀྱང་སྤྱོད་འཇུག་བཤད་པའི་ཆོས་གྲལ་དུ་བག་ཙམ་རེ་ཉན་པས་ཐེག་པ་ཆེན་པོའི་ཆོས་ཀྱི་སྲོག་རྩ་བསམ་པ་བཟང་པོ་བྱང་ཆུབ་ཀྱི་སེམས་ཡིན་པའི་འགྲོ་ཕྱོགས་ཤེས་ཤིང་། བདེ་སྨོན་གསུངས་པ་རྣམས་ཐོས་ནས་བདེ་བ་ཅན་དུ་སྨོན་ལམ་འདེབས་
(༡༣༩)པ་དང་། སངས་རྒྱས་འོད་དཔག་མེད་ཀྱི་མཚན་བརྒྱ་སྟོང་ཁྲི་འབུམ་སོགས་བརྗོད་པ་ལ་ཡི་དམ་ནར་མར་འཛིན་པ་དང་། སྟོབས་བཞིས་སྡིག་པ་སྦྱོང་བའི་ཐབས་ཀྱི་སྒོ་མཐོང་ནས་དེ་ལ་ནན་ཏན་བྱེད་པ་སོགས་དབྱར་གྱི་རྩི་ཤིང་ལྟར་མང་བ་བྱུང་བས་སྙིགས་ལས་ཆེར་སྙིགས་པའི་སྐལ་ངན་གྱི་མུན་རུམ་སྟུག་པོའི་ཁྲོད་དུ་བསྟན་འཛིན་དམ་པའི་ཟླ་བ་སྙིང་རྗེའི་གཟི་རྗིད་ཅན་འདི་ལྟ་བུས་རྗེས་སུ་བཟུང་བ་ནི་དུས་མཐའི་འགྲོ་བ་རྣམས་བསོད་ནམས་ཀྱི་བགོ་སྐལ་མི་དམན་པར་སྣང་ངོ་། །དགུང་གྲངས་བདུན་ཅུ་སྐོར་ཞིག་ལ་རྫ་སྟོད་མ་མོའི་ཐང་དུ་ཁྲོམ་ཚོགས་སྟོང་ཕྲག་ཁ་ཤས་འདུས་པར་བདེ་སྨོན་གྱི་ཁྲིད་རྒྱས་པར་སྩལ། དེ་ཕྱིན་ཆད་ཆོས་ཆེར་མ་གསུངས་ཤིང་ཆོས་ཞུར་འོང་བ་རྣམས་དབོན་རིན་པོ་ཆེ་བསྟན་འཛིན་ནོར་བུ་སོགས་ཀྱི་དྲུང་དུ་གཏོང་། ནན་བསྐྱེད་དེ་གདམ་ངག་ཞུ་བ་ཕལ་ཆེར་བཀའ་བཀྱོན་གནང་། སུ་ལ་ཅི་ཙམ་བཀྱོན་ཡང་ཕྱི་ཕྱིར་དད་གུས་ཇེ་འཕེལ་དུ་འགྲོ་བ་མ་གཏོགས་མི་མཐུན་པར་འཛིན་པ་སུ་ཡང་མེད་པས་རྗེ་ཉིད་ཀྱི་གསུང། དབེན་པའི་རྣལ་འབྱོར་སྨྱོན་པ་རྒྱལ་ཁམས་ཀྱི་གཅེས་ཕྲུག །ལྷག་བསམ་བྱང་སེམས་འབྱོང་བ་འགྲོ་ཀུན་གྱི་སྐྱབས་མགོན། །ཞེས་གསུངས་པ་ལྟར་སེམས་ཅན་ཐམས་ཅད་དང་མ་བཞིན་དུ་མཐུན། སྤྱིར་གྱོང་ཚིག་འཇིགས་ལ་ཟིལ་ཆེ་བ་གནང་ཡང་ཆགས་སྡང་སོགས་ཀྱི་གཏམ་དང་ཡོང་ཡེ་མི་འདྲེ་ཞིང་བརྟགས་ཤེས་ན་དངོས་སམ་བརྒྱུད་ནས་གདམ་ངག་འབའ་ཞིག་ཏུ་ཡོད། གང་
(༡༤༠)གསུང་ཐམས་ཅད་བདེན་ཞིང་ངོ་ལྐོག་མེད་ལ་ཟོལ་ཟོག་གི་ལྷད་དང་གཏན་མི་འགྲོགས་པའི་རིན་ཆེན་གསེར་ལྟར་བཙུན་པ་ཁོ་ནར་གནས་པས་མཆོག་དམན་ཐམས་ཅད་ཀྱིས་ཚད་མར་རྩི། མཐོན་པོ་ལ་ངོ་སྲུང་སེམས་འཛིན་དང་དམན་པ་ལ་བརྙས་བཅོས་ཁྱད་གསོད་མི་མཛད་པར་ཆོས་འགལ་སུས་བྱེད་ཀྱང་བཅོས་སུ་མི་རུང་བའི་གཤིས་ངན་དུ་གཟིགས་ན་མ་གཏོགས་མཚང་ནས་རྒོལ་ཞིང་ཆོས་བཞིན་སྤྱོད་པ་རྣམས་ལ་གཟེང་བསྟོད་དབུགས་དབྱུང་མཛད། བསྙེན་པར་དཀའ་བ་ལྟར་སྣང་ཡང་དྲུང་དུ་ཅི་ཙམ་འགྲོགས་ཀྱང་ཕྱོགས་འཛིན་རེ་དོགས་འགྱུར་ལྡོག་འགལ་འཛོལ་སོགས་ཐེང་གཅིག་ཡོང་མི་སྲིད་པར་འདྲེས་རྟག་ལ་འགྲོགས་བདེ་བ་བག་ཡངས་ཤིང་ལེགས་ཉེས་ཐམས་ཅད་བཟོད་པའི་ངང་ཚུལ་ཅན་ཡིན་པས་འབྲེལ་མི་ཕོད་པ་འབའ་ཞིག་འོང་། བསམ་སྤྱོད་གཡོ་སྒྱུ་ཁྲམ་གསུམ་ལ་གོམས་པའི་བྱི་ལའི་བརྟུལ་ཞུགས་ཅན་རྣམས་ལ་གཏིང་ནས་མི་མཉེས་ཤིང་རྗེ་ཉིད་གཡོ་མེད་དྲང་པོར་གསུང་བའི་ངང་ཚུལ་ལས་ནམ་ཡང་མི་འདའ་བ་གོང་སྨྲོས་ལྟར་བཞུགས་ཀྱང་ཐུགས་ཀྱི་གཏིང་སུས་ཀྱང་དཔོག་པར་དཀའ་བའི་རྒྱ་མཚོ་ལྟར་ཟབ་ཅིང་སྒམ་པའང་ཡིན་པ་དང་། འཇིག་རྟེན་ཡ་རབས་ཀྱི་སྤྱོད་ཚུལ་ནས་བཟོ་དང་ལས་ཀྱི་གནས་ཕྲ་མོ་ཡན་ཆད་ཀྱི་རྒྱུས་ཞིབ་མོར་འབྱེད་པའི་བློ་གྲོས་ཀུ་ཤའི་རྩེ་ལྟར་མ་འདྲེས་པ་མངའ་ཡང་གང་ལའང་ཆེད་འཛིན་རྩིས་གདབ་མི་མཛད་པར་ལྟོས་མེད་བག་ཡངས་སུ་སྤྱོད་པའི་བྱ་བཏང་གི་རྒྱལ་པོར་བཞུགས། རང་ཉིད་
(༡༤༡)ཀྱི་བཀའ་ལས། བརྗོད་གཞི་མེད་པའི་སྟོང་སྐད་བསྟོད་ར་གཅིག །ཕན་པ་མེད་པའི་ཆེ་བཀྱག་བཀུར་སྟི་གཉིས། །རྣམ་སྨིན་ལྕི་བའི་དད་རྫས་འབུལ་ནོར་གསུམ། །སྤངས་ནས་ཁྱི་རྒན་ཁྱི་བཞིན་འཆི་ནུས་ཤོག །ཅེས་ཕེབས་པ་ལྟར་ང་རྒྱལ་དང་ཆེ་ཚུགས་བཤིག་ཅིང་གསོལ་ཞལ་དང་འཕྲལ་འཚོ་ཙམ་གྱི་ཟས་གོས་མ་གཏོགས་མངའ་ཐང་གི་གཟི་བྱིན་མཆིལ་མའི་ཐལ་བ་ལྟར་བོར་ཏེ་གདོལ་པའི་བྱིས་པ་སྲང་མདོ་ན་རྒྱུ་བ་ལྟ་བུའི་ཀུན་སྤྱོད་ཀྱིས་བཞུགས་ཀྱང་ཐུགས་བརྟན་ཅིང་སྒམ་ལ་ཆོས་ཀྱི་གཟི་བྱིན་མཚུངས་པ་མེད་པའི་ཆེ་བས་སྟོབས་འབྱོར་གྱི་དྲེགས་པའི་བླ་དཔོན་ཆེ་དགུ་སོགས་ཀྱང་ཟིལ་གྱིས་མནན་ནས་ཐམས་ཅད་ཀྱིས་གདོང་སྨད་དེ་ཞུམ་བཞིན་དུ་བཏུད། མདོར་ན་གསེར་ས་འོག་ཏུ་ཡོད་ན་འོད་ནམ་མཁའ་ལ་འཕྲོ་བའི་དཔེ་ལྟར་སྐུ་ཚེ་རིལ་པོ་སྦས་པའི་བརྟུལ་ཞུགས་ལ་བསྐྱལ་ཡང་ཅི་མཛད་ཐམས་ཅད་བྱང་ཆུབ་ཀྱི་སྤྱོད་པའི་མཚམས་ལས་མི་འདའ་བའི་ཤུགས་ཀྱིས་གང་ནས་བལྟས་ཀྱང་མཛེས་ཤིང་འཚམས་པ། ཅི་ཙམ་བརྟགས་ཀྱང་དག་ཅིང་གཙང་བ། བསམས་ཤིང་བསམ་ན་དད་པ་འཕེལ་བའི་རྣམ་ཐར་འབའ་ཞིག་ཅན་དུ་བཞུགས་པ། གཟུར་གནས་བློ་གྲོས་དད་ལྡན་པ་ཀུན་གྱི་མདུན་སར་རླུང་ལྟར་གྲགས་པ་ཡིན་ནོ། །སྐུ་ཚེའི་མཇུག་ལ་ཉེ་བ་ན་ཨོ་རྒྱན་སངས་རྒྱས་གཉིས་པ་སྲིན་ཡུལ་དུ་བཞུད་ཀར་ཞི་ཁྲོ་ན་རག་དོང་སྤྲུགས་ཀྱི་ཆོ་གས་བོད་འདིར་སྐུ་དངོས་ཀྱི་གདུལ་བྱའི་འཕྲོ་རྫོགས་པར་མཛད་པ་བཞིན་བླ་མ་མཚམས་
(༡༤༢)པ་རིན་པོ་ཆེའི་སྐུ་གདུང་གི་དྲུང་དུ་དོང་སྤྲུགས་ཀྱི་སྒྲུབ་མཆོད་ལོ་ལྔའི་བར་རྒྱུན་ཆགས་སུ་མཛད་དེ་གདུལ་བྱ་དཔག་ཏུ་མེད་པའི་སྲིད་པའི་རྒྱ་མཚོ་གཏིང་སྤྲུགས། རབ་ཚེས་ཐམས་ཅད་འདུལ་ཞེས་པ་མེ་ཕག་གི་ལོའི་སྟོད་ལ་སྐུ་ཁམས་ཅུང་ཟད་རྙོག་ཚུལ་བསྟན། དེ་སྐབས་མ་འོངས་ལུང་བསྟན་སོགས་གཟིགས་སྣང་གི་འཆར་སྒོ་མཐའ་ཡས་པའི་གསུང་གི་དབྱིབས་དོད་ཀྱང་སྔར་དུས་དེ་འདྲ་ཞུ་བ་ལ་མི་མཉེས་པའི་དབང་གིས་སུས་བཀའ་འདྲི་ཞུ་བར་མ་སྤོབས། གནའ་དུས་སྤྱོད་འཇུག་གསུང་བའི་ཞོར་དུ་བདེ་བ་ཅན་གྱི་ཞིང་གི་ཆེ་བ་བཤད་པའི་འཕྲོས་ཤིག་ཏུ། །དག་པའི་ཞིང་ཁམས་ཡོན་ཏན་མཐའ་ཡས་པ་དང་སྨོན་ལམ་བཏབ་ན་སྐྱེ་སླ་བ་གཉིས་འཛོམ་པ་ཞིག་ལ་ཤར་ཕྱོགས་མངོན་པར་དགའ་བ་འགྲན་ཟླ་མེད། དེའི་འོག་ན་བདེ་བ་ཅན་ཁྱད་པར་དུ་འཕགས་ཞེས་གསུངས་ཤིང་། དེ་རྗེས་ཞབས་འབམ་གྱི་བསྙུང་གཡོག་ལ་གླིང་བླའི་དབོན་པོ་འཇམ་དཔལ་ཟེར་བའི་སྨན་པ་དེ་སྡོད་སྐབས། ལན་ཅིག་ཁོང་གིས་ཨ་བུ་ཚང་གི་སྔ་ཕྱིའི་གསུང་སྒྲོས་གང་ལ་བསམ་ཀྱང་ངེད་རང་ཚོས་ཚེ་ཕྱི་མའི་དོན་དུ་སྨོན་ལམ་འདེབས་པ་དེ་ནུབ་ཕྱོགས་བདེ་བ་ཅན་ཁོ་ན་ལ་མཐིལ་གཏད་ན་སྙམ་པ་དེ་ལྟར་ལགས་སམ་ཞུས་པས། ཅུང་ཟད་བཞུགས་ནས། འོ་ཁྱོད་ནུབ་ང་ཤར་རེད་པ་ཞེས་བཀའ་སྩལ། མཐར་བསྙུན་ཚུལ་བསྟན་སྐབས་འདིར་ཡང་ཉིན་མོའི་རེས་ཤིག་ཅུང་ཟད་གཟིམ་ལ་གཡུར་བ་ལྟར་མཛད་རྗེས། ད་རེས་ང་གཉིད་དུ་སོང་བའི་རྨི་ལམ་ན། བནྡེ་འདྲ་བ་གཉིས་ཀྱིས་ཁྱོད་ཀྱི་གདུལ་
(༡༤༣)བྱ་ཤར་ཕྱོགས་ན་ཡོད་ཟེར་བ་ཞིག་བྱུང་། ང་འདྲ་བ་ལ་གདུལ་བྱ་དག་ཅང་ཡོད་དམ་གསུང་། ཡང་སྔར་དུས་ཤིག་ཏུ་ནང་གཅིག་ངེད་ཚོས་གཞན་ལ་བདེ་སྨོན་འདྲ་བ་བཤད་རང་གིས་ཀྱང་དག་པའི་ཞིང་ཁམས་རེར་སྨོན་ལམ་མང་པོ་འདེབས་མདོག་བྱས་པ་ཡིན་ཡང་མདང་སུམ་ཚོར་ཀོ་མོའི་འོ་ལུ་ན་སྔར་དུས་བཞིན་བསྡད་ཡོད་པའི་ཉིད་འཁྲུལ་ཁོ་ནས་མཚན་ཐོག་ཐག་ཡོལ་བ་བྱུང་། ད་དུང་ཡང་དེར་གཅིག་ཡོང་དགོས་པ་ཡིན་ནམ་ཞེས་ཀྱང་གསུངས་སྐད། ལོ་དེའི་ས་ག་ཟླ་བའི་ཚེས་བཅོ་བརྒྱད་ཉིན་སྐུ་དྲང་པོར་བསྲངས། ཕྱག་མཉམ་བཞག །ཞབས་རྡོ་རྗེ་སྐྱིལ་ཀྲུང་མཛད་དེ་འཆི་སྲིད་རྣམ་པར་དག་པ་ཀ་དག་གི་ནང་དབྱིངས་ཆེན་པོར་སྙོམས་པར་ཞུགས་གཤེགས་རྗེས་ཀྱི་བྱ་བ་རྣམས་དགེ་མང་རྗེ་དབོན་རིན་པོ་ཆེ་དང་ཐུགས་ཟིན་གྱི་ཞམ་རིང་བ་བསོད་ནམས་ཚེ་རིང་སོགས་ཀྱིས་མཐའ་རྒྱས་སུ་བསྒྲུབས། བདག་ཉིད་ཆེན་པོ་འདིའི་སློབ་མར་གྱུར་པ་ནི། ཀ་ཐོག་སི་ཏུ་མཆོག་སྤྲུལ་ཆོས་ཀྱི་བློ་གྲོས། རྫོགས་ཆེན་མཆོག་སྤྲུལ་ལྔ་པ། རྒྱ་རོང་ནམ་སྤྲུལ་རིན་པོ་ཆེ་ཀུན་བཟང་ཐེག་མཆོག་རྡོ་རྗེ། རྫོགས་ཆེན་གླིང་སྤྲུལ་ཐུབ་བསྟན་རྒྱལ་མཚན། རྡོ་གྲུབ་ཡང་སྲིད་འཇིགས་མེད་ཕུན་ཚོགས་འབྱུང་གནས་དང་དྲི་མེད་གྲགས་པ་རྣམ་གཉིས། སྐུ་ཞབས་མཁྱེན་བརྩེའི་རིགས་སྲས་བདེ་ཆེན་རིག་པའི་རལ་གྲི། འགྲོ་འདུལ་སེམས་དཔའ་ཆེན་པོ་འཇིགས་མེད་རྒྱལ་བའི་མྱུ་གུའི་ཡང་སྲིད་ཀུན་བཟང་བདེ་ཆེན་རྡོ་རྗེ།
(༡༤༤)སྐུ་ཞབས་དགེ་མང་རིན་པོ་ཆེའི་མཆོག་སྤྲུལ་གཞན་ཕན་ཆོས་ཀྱི་སྣང་བ། ཨ་འཛོམ་འབྲུག་པ་སྤྲུལ་སྐུ་འགྲོ་འདུལ་རྡོ་རྗེ། སྤྲུལ་པའི་གཏེར་སྟོན་ལས་རབ་གླིང་པ། རིག་གནས་མང་པོ་ལ་མཁས་པ་དཔལ་ཤུལ་རིག་བཟང་དང་དེའི་གཅུང་རྡོ་རྗེ་འཛིན་པ་བསོད་ནམས་རྣམ་རྒྱལ། སེ་རའི་གྲྭ་སར་མཁས་གྲགས་ཀྱི་རྒྱལ་མཚན་ཐོབ་པའི་སེར་ཤུལ་ལྷ་རམ་པ་ཐུབ་བསྟན། དཔལ་སྤུངས་བླ་མ་བཀྲ་ཤིས་འོད་ཟེར། མུ་ར་སྤྲུལ་སྐུ་ཐུབ་བསྟན་ཆོས་དཔལ་བཟང་པོ། ཧོར་འབའ་ཕུག་སྤྲུལ་སྐུ་ཆོས་དཔལ་རྒྱ་མཚོ། སྡེ་དགེ་ས་དབང་སྐུ་མཆེད། འཇུ་བླ་མ་གྲགས་པ་རྒྱལ་མཚན། བླ་སྤྲུལ་ཆེན་པོའི་མིང་མ་བཏགས་ཀྱང་གཞན་ཕན་གྱི་མཛད་པ་བཟང་པོ་ཅན་མགོ་ལོག་བླ་མ་འགྱུར་མེད་དང་ཨ་བོས་དགེ་ལེགས་དང་རྡོ་རྒུ་ཚུལ་ཁྲིམས་སོགས་བགྲང་གིས་མི་ལང་བ་ཡོད་ཀྱང་དམ་པའི་ཆོས་ཉན་བཤད་ཀྱི་ཕྲིན་ལས་ལྷག་པར་སྐྱོང་བའི་སློབ་མ་ནི་མཁན་ཆེན་རྡོ་རྗེ་འཆང་བ་པདྨ་དམ་ཆོས་འོད་ཟེར་དང་། དགེ་མང་རྗེ་དབོན་ཨོ་རྒྱན་བསྟན་འཛིན་ནོར་བུ། མཁས་གྲུབ་ཆེན་པོ་མི་ཕམ་རྣམ་རྒྱལ། རྟོགས་ལྡན་དམ་པ་ལུང་རྟོགས་འཕེལ་རྒྱས་བཟང་པོ། འདུལ་འཛིན་མཁས་པའི་དབང་ཕྱུག་ཐུབ་བསྟན་ཆོས་ཀྱི་གྲགས་པ། རྗེ་མདོ་སྔགས་རྒྱ་མཚོ་སོགས་མང་དུ་བྱོན་ཏེ་དེ་དག་གི་དྲིན་ལས་མཚུངས་བྲལ་རྗེ་བཙུན་མཆོག་གི་རྣམ་དཀར་ཕྲིན་ལས་ཀྱི་འོད་སྣང་དབྱིག་འཛིན་ཡངས་པའི་རྒྱན་དུ་ད་ལྟའང་གནས་བཞིན་པ་སྟེ། ད་དུང་ཡང་བསྐལ་བཟང་སྒྲོན་མེ་ལྔ་པའི་ཉིན་བྱེད་ཀྱིས་
(༡༤༥)འཆར་ཀའི་འོད་དམར་སྤྲོ་བ་ལ་ཕྱོགས་པའི་བར་དུ་འཕེལ་རྒྱས་འབྱུང་བར་གྱུར་ཅིག་གུ །ཡོན་ཏན་རྒྱ་ཆེ་དགོངས་པ་ཤིན་ཏུ་ཟབ། །སྦས་པའི་བརྟུལ་ཞུགས་གཞན་གྱིས་མི་ཤིགས་པ། །བདག་ཉིད་ཆེན་པོའི་རྣམ་ཐར་དཔག་དཀའ་ཡང་། །ཕྱོགས་ཙམ་མཛུ་བ་མོས་ཟླ་བ་བཞིན་དུ་བསྟན། །དད་པའི་འབབ་སྟེགས་ལས་འོང་ཚིག་གི་ཆུ། །དོན་བཟང་རིན་ཆེན་བྱེ་མ་འདྲེན་པའི་རྒྱུན། །ཕབ་འདིས་ལུས་ཅན་སྡིག་པའི་དྲི་འཁྲུད་ཅིང་། །རྗེ་བཙུན་བླ་མ་མཆོག་དེའི་བཀའ་འབངས་ཀྱི་ཐ་ཆུང་འཇིགས་མེད་བསྟན་པའི་ཉི་མས་ཡིད་ལ་དྲན་ཚད་སྨྲས་རིམ་ལྟར་དཀོན་མཆོག་ཆོས་འཕེལ་བཟང་པོས་ཡི་གེར་བྲིས་པ་དགེ་བར་གྱུར་ཅིག །མཛད་པའི་གོ་རིམ་སོགས་རང་གིས་ཇི་བཞིན་མ་ངེས་པའི་འཁྲུལ་པ་མང་དུ་ཡོད་ཤས་ཆེ་བས་རྣམ་ཐར་ལ་འདྲིས་ཞིབ་ཆེ་བ་རྣམས་ཀྱིས་བཅོས་རོགས་མཛད་ན་རྗེས་སུ་ཡི་རང་ངོ་།། །།
(༡༤༦)