བརྗེད་ཐོ་སྣ་ཚོགས།
བརྗེད་ཐོ་སྣ་ཚོགས། བྱིན་རླབས་ཀྱི་རྩ་བ་བླ་མ་ཡིན་པས། འདིའི་སྒོ་ནས་རང་ཉིད་སྐལ་པ་མཆོག་ལྡན་དུ་བྱིན་གྱིས་བརླབས་ཤིང༌། སྔར་ལྷ་དང་མཁའ་འགྲོའི་བྱིན་རླབས་གཡེལ་བཞུད་དུ་སོང་བ་སོགས་ཀྱང་ལེགས་པར་གསོས་སྟེ། དེ་ནས་ཡི་དམ་དུ་བསྒྱུར་ནས་སྒྲུབ་ན་བར་ཆད་མེད་ཅིང་དངོས་གྲུབ་ཤིན་ཏུ་མྱུར་ལ། དེ་ནས་མཁའ་འགྲོའི་སྒྲུབ་པས་བོགས་དབྱུང་བར་བྱེད་པས། རྩ་གསུམ་སྒྲུབ་ཐབས་ཀྱི་གཞུང་བཀོད་པའི་རིམ་པའང་ལེགས་པར་གནས་སོ། །དེས་ན་དང་པོར་བླ་མའི་སྒྲུབ་ལུགས་ཉིད་ལ་བརྩོན་པར་བྱ་སྟེ། རས་ལ་དང་པོར་འབྱར་རྩི་བརྒྱབ་སྟེ། གདོད་ཚོན་ཆུར་བཅུག་ན་ཇི་ལྟར་འདོད་པར་ཚོན་འཛིན་དུ་བཏུབ་པས་ཁ་དོག་བཟང་པོ་འབྱུང་བ་བཞིན་ནོ། །དེའང་གསང་རྫོགས་ལས། སྒྲུབ་སྡེ་ཆེན་པོ་བརྒྱད་ཀྱི་ལྷའི་འཁོར་ལོ་དངོས་སུ་མཐོང་མི་ནུས་པའི་གདུལ་བྱའི་དོན་དུ། དཀྱིལ་འཁོར་གྱི་བདག་པོ་ཧེ་རུ་ཀ་བརྒྱད་པོ་ཉིད་རིག་པ་འཛིན་པའི་གཙོ་བོའི་ཚུལ་དུ་སྣང་ཞེས་འབྱུང་སྟེ། བཀའ་སོ་སོ་བའི་རིག་འཛིན་པདྨ་གསུང་གི་ནཱ་ག་ཛུ་ན་སོགས་བརྒྱད་དང་བཀའ་བརྒྱད་སྤྱི་དྲིལ་གྱི་རིག་འཛིན་པདྨ་ཀཱ་རའི་ཞབས་ཉིད་དུ་བཤད་དོ། །དེ་ནི་གཞན་ལས། ལོངས་སྐུ་དང་མཆོག་སྤྲུལ་དངོས་དང་མི་མཇལ་བ་རྣམས་ལ། སངས་རྒྱས་རྣམས་སློབ་དཔོན་གྱི་ལུས་ལ་ཞུགས་ནས་རྗེས་སུ་འཛིན་པར་གསུངས་པས། སློབ་དཔོན་ལ་རྟོགས་པ་མཐོ་དམན་གྱི་རིམ་པ་མང་དུ་ཡོད་པ་ལས། ཆེས་མཐོན་པོ་འགའ་ཞིག་གི་ཁྱད་པར་རོ། །དེས་ན་སྐུའི་རྣམ་པ་འདི་ནི་དེ་བཞིན་
གཤེགས་པའི་སྐུ་པདྨ་གར་དབང་དང་ཧེ་རུ་ཀ་སོགས་ཀྱི་རྣམ་པར་མཐོང་བའི་ནུས་པ་མ་རྙེད་པའི་གདུལ་བྱ་མང་པོར་དངོས་སུ་ཞལ་བསྟན་ནས། གསང་སྔགས་བླ་མེད་ཁོ་ནའི་ལམ་ནས་འཁྲིད་པའི་རྡོ་རྗེ་སློབ་དཔོན་མཛད་པའི་ཕྱིར། གསུང་རྡོ་རྗེ་འོད་དཔག་མེད་ཀྱིས་རང་ཉིད་ཀྱི་སྐུ་ལུས་དེ་ལྟར་ཆེད་དུ་བྱིན་གྱིས་བརླབས་པ་ཡིན་པས། ཡི་དམ་གཞན་ལས་འགྲུབ་ཐག་ཉེ་བ་སྟེ། བྱིན་རླབས་དངོས་གྲུབ་ཁྱད་པར་མྱུར་འདོད་ན༔་རྩ་གསུམ་ཀུན་འདུས་པདྨ་ང་ཉིད་སྒོམ༔་ཞེས་ཡེ་ཤེས་སྙིང་པོར་རོ། །ཇི་སྐད་བཤད་པའི་གནད་ཀྱིས་སྐུའི་རྣམ་འགྱུར་འདིའི་འཁྲུངས་རབས་ཐམས་ཅད་ཀྱང་རྣལ་འབྱོར་བླ་མེད་པའི་ཀུན་སྤྱོད་ཉག་ཅིག་གི་སྟེང་ནས་སོང་ཡོད་པས། གར་མཁན་རྔ་མཁན་གྱང་དང་རོལ་མོ་མཁན། །ཞེས་སོགས་ལྟ་བུའི་བཟོ་སྐྱེའི་སྤྲུལ་སྐུ་གཞན་དང་ཡང་མི་མཉམ་སྟེ། སྤྲུལ་སྐུ་མཆོག་དམན་ནི་རྒྱུད་ཚོད་ལས་མིན་གྱི། མཛད་སྤྱོད་ཀྱིས་ཕྱེ་བའི་ཕྱིར་རོ། །བླ་མེད་ཀྱི་སྔགས་པའི་ནང་ནས་ཀྱང༌། གཙོ་བོར་པདྨའི་རིགས་ཀྱི་སྒྲུབ་པ་པོ་དང༌། གྲུབ་ཆེན་གྱི་གཟུགས་སུ་བསྟན་པའི་སྐུ་ཡིན་ཏེ། བལྟམས་དུས་ནས་མཚན་མཁན་རྣམས་ཀྱིས་དེ་ལྟར་མཚན་བསྒྲགས་པ་དང༌། མཁའ་འགྲོ་ཀུན་དགའ་མོ་ལ་དབང་བཞེས་པ་དང༌། མ་ར་ཏི་ཀ་དང༌། ཨོ་རྒྱན་རང་བྱུང་གི་ཕུག་ཏུ་སྒྲུབ་པ་མཛད་པའི་ལོ་རྒྱུས་དང༌། གཏེར་ཕྱོགས་ཀུན་ན་ཆོས་སྐུ་འོད་མཛད། ལོངས་སྐུ་སྤྱན་རས་གཟིགས། སྤྲུལ་སྐུ་པདྨ་ཞེས་གསུངས་པ་དང༌། ཤ་འུག་ཐུགས་
རྗེ་ཆེན་པོར། གུ་རུ་ཉིད་རིགས་ཐམས་ཅད་ལས་པདྨའི་རིགས་སུ་སྒྲུབ་ན་སྔོན་སྨོན་གྱི་དབང་གིས་ལྷག་པར་མྱུར་བར་གསུངས་པ་སོགས་མཐའ་ཡས་པས་ཤེས་པའི་ཕྱིར་རོ། །དེ་ལྟ་བུའི་སྐུ་དེ་ཉིད་གླིང་བཞི་པའི་འཇིག་རྟེན་འདི་ཉིད་ཀྱི་རྔ་ཡབ་གླིང་ན་ད་ལྟའནག་དངོས་སུ་བཞུགས་པ་དང༌། བསམ་ཡས་ཀྱི་གཙུག་ལག་ཁང་དང༌། སྒྲུབ་གནས། སྐུ་ཚབ། སྐུ་དང་ཕྱག་ཞབས་ཀྱི་རྗེས། ཚེས་བཅུའི་དུས། གཏེར་སྟོན། གཏེར་གནས་སོགས་ནས། ཐ་ན་བོད་ཀྱི་ལྷ་འདྲེ་ཆེན་པོ་རྣམས་གུ་རུ་རིན་པོ་ཆེ་རྗེས་དྲན་གྱི་སྒོར་སོང་འདུག་པའི་བར་དུ་རྗེས་དྲན་གྱི་མཚན་མ་བཞག་པ་དང༌། རྒྱུད་འབུམ་བསྒྱུར་ཞུས། ཇོ་བོ་རྗེ། མི་ཏྲ། སྙིང་པོའི་ཞབས་སོགས་སྤྲུལ་པའི་མཛད་པ། བཀའ་ནས་བཀར་བརྒྱུད་པ། གཏེར་བརྒྱུད། དག་སྣང་གི་བརྒྱུད་པའི་རྒྱུན་བསམ་གྱིས་མི་ལངས་པ་བཙུགས་ཏེ། དབང་ལུང་མན་ངག་གི་ལམ་སྲོལ་བརྒྱུད་མར་ཕྱེ་བ་ལ་སོགས་པའི་སྒོ་ནས་བོད་ཀྱི་ཡུལ་འདི་ལྷག་པར་ཕྱག་མཚན་དུ་བཞེས་པ་ལ་ལེགས་པར་བསམ་ན། བོད་ཀྱི་བླ་མའི་སྐལ་པ་གུ་རུ་ཉིད༔་ཅེས་པའི་བཀའ་ལ་ངེས་པ་སྟེར་རོ། །བཀའ་བརྒྱད་ཀྱི་སྒྲུབ་ཆེན་དུས་ཞག་རེར་བྱིན་འབེབས་ལེན་དྲུག་རེ་དགོས་པར་གསུངས་པའི་བྱིན་འབེབས་རིག་འཛིན་བརྒྱད་དམ་དགུའི་འབེབས་ཆོག་ལ་བྱེད་པ་ཡང་མ་ལ་ཡའི་ནགས་ཀྱི་དྲི་བསུང་གི་ཁ་ལོ་རླུང་གིས་བསྒྱུར་ནས་འོང་བ་ལྟར། དཔལ་ཧེ་རུ་ཀའི་དངོས་གྲུབ་བླ་མ་རིག་འཛིན་གྱི་བྱིན་རླབས་ཀྱིས་
སྣ་དྲངས་ཏེ་འབྱུང་བའི་རྒྱུ་མཚན་གྱིས་ཡིན་ནོ། །ཉང་གི་མཁའ་འགྲོ་ཆེན་མོའི་ཆོས་སྐོར་སློབ་དཔོན་པདྨའི་གསོལ་འདེབས་ཆེན་མོ་ལས། ཕྱི་རབས་ཀྱི་གང་ཟག་སློབ་དཔོན་གྱི་གཏེར་དང་ཕྲད་པ་རྣམས་བཀྲ་ཤིས་པར་བྱ་བ་དང་ཿ བྱིན་རླབས་ཆེ་བར་བྱ་བ་དང་ཿ དངོས་གྲུབ་མྱུར་བར་བྱ་བའི་དོན་དུཿ སློབ་དཔོན་པདྨའི་གསོལ་འདེབས་འདི་ལ་དོན་བཅུ་སྟེཿ ཞེས་དང༌། འདིས་ནི་སྒྲིབ་པ་སྦྱང་བ་དང་ཿ དངོས་གྲུབ་ཐོབ་པ་དང་ཿ སློབ་དཔོན་གྱི་ཆོས་གང་བསྒྲུབ་ཀྱང་འགྲུབ་པ་དང་༔་དུས་ཕྱི་མའི་སློབ་དཔོན་གྱི་གཏེར་གྱི་ཆོས་དང་ཕྲད་པའི་གང་ཟག་ལ་བྱིན་རླབས་དང་དངོས་གྲུབ་མྱུར་དུ་འབྱུང་བར་བྱ་བའི་ཕྱིརཿ སློབ་དཔོན་པདྨར་ལུང་ཞུས་ནསཿ མཚོ་རྒྱལ་བདག་གིས་ཡི་གེར་བཀོདཿ སློབ་དཔོན་པདྨའི་ཆོས་དང་གང་ཕྲད་དེཿ སློབ་དཔོན་པདྨ་ལ་མོས་པ་ཆེ་རུ་མཛོདཿ བྱིན་རླབས་དངོས་གྲུབ་ཡ་མཚན་ཐོབ་པར་འོང་ཿ ཞེས་གསུངས་སོ། །འདི་དག་གིས་ནི་རྩ་གསུམ་གྱི་དང་པོར་བླ་མ་སྒྲུབ་པ་གལ་ཆེ་བ་དང༌། ཁྱད་པར་དུ། ཐུགས་རྗེ་ཆེན་པོ་ཞི་ཁྲོ་བསྒྲུབ་ན་ཨོ་རྒྱན་རིན་པོ་ཆེའི་སྒྲུབ་པ་གལ་ཆེ་བ་དང༌། པདྨའི་བརྒྱུད་འཛིན་ཡིན་ན་དེའི་རྩ་བའི་ཐུགས་དམ། དབང་ཆེན་ཞི་ཁྲོ་ལ་ཡི་དམ་བྱས་ན་སྔགས་རྒྱུད་བྱིན་གྱིས་བརླབས་ཡོད་པས་དངོས་གྲུབ་ཆེ་ཞིང་མྱུར་བ་ཀུན་བསྟན་ཏོ། །གསང་སྔགས་ཀྱི་བླ་མའི་མཚན་ཉིད་རྣམས་ཀྱི་གཙོ་བོར་རྣམ་དག་དབང་གི་ཆུ་བོའི་མཛོད་འཆང་བ་ཞིག་དགོས་
ཏེ། སྔགས་ཀྱི་སྐབས་འདིར་དབང་ནི་རྒྱ་ཆུང་ཆུང་ཞིག་མིན་གྱི་བསྟན་པ་ཡོངས་རྫོགས་ཀྱི་སྒྲོམ་ཆེན་པོ་ཡིན་ནོ། །དེའི་རིགས་པས་བླ་སྒྲུབ་ཀྱི་རྗེས་འབྲེལ་ལ་ཡང་དབང་གི་བཀའ་བབས་དང༌། འབྲེལ་བའི་བྱིན་རླབས་འཇུག་ཆོག་ཅིག་ཤིན་ཏུ་གལ་ཆེ་ཡི། ལས་ཚོགས་གཞན་དེ་ཙམ་མི་གཙོའོ། །དེའི་ཕྱིར་བསྙེན་པ་ཐེམས་ནས་ནི་འདིའི་བདག་འཇུག་ལ་འབད་པ་གཅེས་སོ། །ཡང་མཁའ་འགྲོ་ཆེན་མོའི་རྟ་ཕག་གི་གསང་སྒྲུབ་བཀའ་རྒྱ་ཅན་ལས། ལྷ་སྒོམ་པའི་དང་པོར་རང་ཐ་མལ་པའི་སྤྱི་བོའི་སྟེང་དུ་བླ་མ་བཀའ་དྲིན་ཆེ་བ་གཅིག་བསམཿ དེ་ཡང་ཡི་དམ་དང་ཐ་མི་དད་དུ་བསམཿ དཀོན་མཆོག་གསུམ་གྱི་རྩ་བ་བླ་མ་ཡིན་སྙམ་དུ་འདུན་པ་དྲག་པོ་བྱའོཿ དེས་སྒྲུབ་པ་ལ་བར་ཆད་མི་ཡོང་ཞིང་ཿ བྱིན་རླབས་མྱུར་དུ་འགྲུབ་པར་བྱེད་པ་ཡིན་ནོཿ ཞེས་ཀྱང་བྱུང༌། སངས་རྒྱས་གཉིས་པ་སློབ་དཔོན་ཆེན་པོའི་རྣམ་ཐར་འཆད་ཚུལ་གྱི་སྒོ་མཐའ་ཡས་ཀྱང༌། གཙོ་བོ་ནི་རིག་འཛིན་སློབ་དཔོན་གྱི་རྣམ་པ་ཅན་ཡིན་པས་རིག་འཛིན་རྣམ་པ་བཞིའི་སྒྲོམ་ནས་འཆད་པ་འདི་ཡིན་ཏེ། དང་པོར་ཨོ་རྒྱན་གྱི་རྒྱལ་པོའི་སྲིད་སྤངས་ནས་དུར་ཁྲོད་བརྒྱད་དུ་བརྟུལ་ཞུགས་ཀྱི་སྤྱོད་པས་མ་མོ་མཁའ་འགྲོ་ཐམས་ཅད་དབང་དུ་བསྡུས་པ་དང༌། ས་གསུམ་གྱི་དྲེགས་པ་རྣམས་བྲན་དུ་བཀོལ་བ་དང༌། རྡོ་རྗེ་དབྱིངས་ཀྱི་ལྷ་ཚོགས་ཞལ་གཟིགས་པ་སོགས་ནི་རྣམ་སྨིན་རིག་འཛིན་ལ་བཞུགས་པའི་
སྐབས་དང༌། དེ་ནས་བྲག་ཕུག་མཱ་ར་ཏི་ཀར་མནྡ་རཱ་ལ་བསྟེན་ནས་ལམ་མཆོག་ཡོངས་སུ་རྫོགས་པའི་ཚེ་དབང་བརྙེས་ཏེ་ས་ཧོ་ར་དང་ཨོ་ཊི་ཡཱ་ནར་རྫུ་འཕྲུལ་ཆེན་པོ་བསྟན་པ་དང༌། རྡོ་རྗེ་གདན་དུ་མུ་སྟེགས་ཀྱི་རྒོལ་བ་ངན་པ་རིགས་པ་དང་སྔགས་ཀྱིས་བཏུལ་བ་སོགས་ནི་ཚེ་དབང་རིག་འཛིན་ལ་བཞུགས་དུས་ཀྱི་མཛད་པ་དང༌། ཡང་ལེ་ཤོད་དུ་་དེ་བ་དང་ལྷན་ཅིག་ཕྱག་རྒྱ་ཆེན་པོ་གྲུབ་སྟེ། བོད་དུ་མི་དང་མི་མིན་གྱི་གདུལ་བྱ་དཔག་ཏུ་མེད་པ་རྡོ་རྗེ་ཐེག་པའི་ལམ་ནས་སྨིན་གྲོལ་དུ་མཛད་པ་དང་མཐའ་དབུས་ཐམས་ཅད་དཔའ་བོ་མཁའ་འགྲོ་རང་བཞིན་གྱིས་འདུ་བའི་གནས་ཆེན་མང་པོས་བཀང་བ་དང༌། ཆོས་དང༌། ནོར་དང༌། གྲུབ་པའི་རྫས་ཀྱི་གཏེར་ཁ་གྲངས་མེད་པ་བཅུག་པ་སོགས་ནི་ཕྱག་ཆེན་རིག་འཛིན་ལ་བཞུགས་པའི་མཛད་པ་དང༌། ལྷོ་ནུབ་རྔ་ཡབ་གླིང་གི་རིག་པ་འཛིན་པའི་གནས་ཁྱད་པར་ཅན་ན་རིག་འཛིན་གྱི་འཁོར་ལོས་སྒྱུར་བ་མཆོག་གི་གཟུགས་སུ་བཞུགས་པ་ནི་ལྷུན་གྲུབ་རིག་འཛིན་དང༌། སྲིན་པོའི་འཇིག་རྟེན་ཐམས་ཅད་སྒྱུ་འཕྲུལ་གྱི་རོལ་པ་ཚད་མེད་པས་འདུལ་བ་དང༌། བོད་དུ་སྤྲུལ་པ་མང་པོ་འགྱེད་ཅིང་སྐལ་ལྡན་གྱི་དོན་མཛད་པ་སོགས་ནི་ལྷུན་གྲུབ་རིག་འཛིན་ལ་བཞུགས་ཚུལ་བསྟན་པའི་མཛད་པ་སྟེ། འདི་གལ་ཆེ་ཡང་ཤེས་མཁན་ནི་ཉུང་གསུང༌། སློབ་དཔོན་འདི་ནི་ཤིན་ཏུ་གདུལ་དཀའ་བའི་གདུལ་བྱ་ཤས་ཆེར་འདུལ་བའི་ཕྲིན་ལས་ཅན་ཏེ། འཕགས་པའི་ཡུལ་དང༌། འགྲོ་ལྡིང་གི་ཡུལ་དང༌། བོད་ཡུལ་དང༌། སྲིན་པོའི་
རྒྱལ་ཁམས་རྣམས་སྔ་མ་སྔ་མ་ལས་ཕྱི་མ་ཕྱི་མ་གདུལ་ཞིང་རྒྱ་ཆེ་བར་རྗེ་བཙུན་ཏཱ་ར་ནཱ་ཐས་བཤད། ༈ །སྔགས་ཀྱི་གོ་ཆའི་སྐབས། གནས་གསུམ་བྱིན་རླབས་འདི་གོ་ཆའི་རྣལ་འབྱོར་དུ་ངོ་འཕྲོད་པ་ཉུང་ཡང༌། ཐུན་མཚམས་ཀྱི་ལྷར་ལྡང་སྐབས། ཕྱག་རྒྱ་གཅིག་པའི་གནས་གསུམ་དུཿ ཡི་གེས་མཚན་པས་རྣམ་རྟོག་སྲུང་ཿ ཞེས་པ་ལྟ་བུའི་གཏེར་ལུང་སྨོས་ཀྱིས་མི་ལྡང་ཞིང༌། སྒྱུ་འཕྲུལ་ལས་ཀྱང་ཐུན་མཚམས་ཀྱི་ལྷའི་གནས་གསུམ་དུ་འབྲུ་གསུམ་བསྒོམས་ནས། བཛྲ་ཀཱ་བ་ཙི་རྐྵ་ཧཾ། ཞེས་བརྗོད་པར་བཤད་དེ། འདུས་པའི་དཀྱིལ་ཆོག་སོགས་གསར་མའི་གཞུང་ཚད་ལྡན་དུ་མར་ཡང༌། མིག་སོགས་སྐྱེ་མཆེད་བྱིན་རླབས་དང༌། གནས་གསུམ་བྱིན་རླབས་གཉིས་རྒྱས་བསྡུས་ཙམ་ལས་འདྲ་བར་བཤད་པ་ལ་སོགས་པས་ཤེས་ནུས། དེས་ན་ཏིང་ངེ་འཛིན་གསུམ་གྱིས་བསྐྱེད་རིམ་པའི་སྐུ་གསུམ་སྒྲུབ་པ་དེ་ཉིད་བགེགས་ཀྱི་མཚོན་ཆས་མི་ཤིགས་པར་བྱེད་པའི་གོ་ཆའི་རྣལ་འབྱོར་གཞན་ཐམས་ཅད་གནས་གསུམ་སྲུང་བ་ཉིད་ལ་འདུ་བར་དགོངས་འདུས་རྣམ་བཤད་དུའོ། །པདྨའི་ལམ་རིམ་ལས་ཀྱང༌། སྲུང་འཁོར་དྲུག་གི་ཐད་དུ། གནས་གསུམ་གྱི་འབྲུ་གསུམ་ཇེ་ཆེར་སོང༌། ལུས་ཀྱི་ཕྱིར་ཐོན་ནས་རྫོང་དང་གོ་ཁྲབ་ཀྱི་ཚུལ་དུ་གཡོགས་པར་བསམ་པར་བཤད་དོ། །རློབ་བྱེད་ཐོག་མེད་ནས་གྲུབ་པའི་རྒྱལ་བ་ཐམས་ཅད་རྡོ་རྗེ་གསུམ་གྱི་རིགས་སུ་
བསྡུས་ནས། དེ་གསུམ་འབྲུ་གསུམ་དུ་ཤར་བའི་རྒྱས་བཏབ་པར་བསྒོམས་པས་རིས་མེད་པའི་དེ་པ་སྲས་དང་བཙུན་མོར་བཅས་པ་ཐམས་ཅད་ཀྱི་བྱིན་རླབས་ཀྱི་གོ་ཆའམ་སྲུང་བར་འགྱུར་བ་ནི། སྒྱུ་འཕྲུལ་སྐོར་ན། ཨོཾ་གྱི་འོད་ཟེར་གྱིས་བསྐུལ་བས་སྐུ་རྡོ་རྗེའི་ལྷ་ཚོགས་ནམ་མཁའ་གང་བར་བྱོན། ཨོཾ་ལ་ཐིམ། དེ་པ་ཐམས་ཅད་ཀྱི་སྐུ་དང་གཉིས་སུ་མེད་པར་གྱུར་སོགས་སྤྱིའི་ལུགས་སོ། །འབྲུ་གསུམ་དེ་ཉིད་བརླབ་བྱ་རང་གི་ལུས་ངག་ཡིད་གསུམ་དང་དབྱེར་མེད་དུ་བལྟ་དགོས་པ་ཡིན་ལ། དེ་ཉིད་རང་གི་སྒོ་གསུམ་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་ངོ་བོ་ཉིད་དམ་བདག་ཉིད་དུ་བརླབས་པ་སྟེ་བསྒྱུར་བའི་དོན་དུའང་གོ་དགོས་སོ། །འདི་ལའང་བསྐྱེད་ཆོག་རྒྱས་བསྡུས་མང་སྟེ་གནད་འདྲའོ། །གང་བརླབ་བྱའི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་ཀྱང་གསང་སྲོག་གསུམ་དུ་ངོ་སྤྲོད་ཚུལ་རིག་འཛིན་ཡོངས་འདུས་ལས། ཐབས་ནི་ཨོཾ་ལ་ཤེས་རབ་ཨཱཿ དབྱེར་མེད་ངོ་བོ་ཧཱུྃ་དུ་འདུསཿ སྣང་བ་ཨོཾ་ལ་སྟོང་པ་ཨཿ ཟུང་འཇུག་ངོ་བོ་ཧཱུྃ་དུ་འདུསཿ ཞེས་དང༌། སྣོད་ནི་ཨོཾ་ལ་བཅུད་ནི་ཨཱཿ ངོ་བོ་གཅིག་པུ་ཧཱུྃ་དུ་འདུསཿ ཞེས་སོགས་ལྟར་ཤེས་ནས། དེ་ནས་ཡི་གེ་གསུམ་པོ་དེ་རྒྱལ་བ་རྣམས་ཀྱི། ཁྱེད་ཀྱི་སེམས་ལུས་ལྟ་བུ་དང༌། །སོགས་དང༌། ཀུན་ཏུ་དབུ་དང་ཕྱག་ལྡན་གྱི། །སོགས་ལྟར་རོ་མཉམ་གྱི་རྡོ་རྗེ་གསུམ་གྱི་རང་བཞིན་དུ་མོས་ཏེ། དེ་ལྟར་བྱས་པས་རང་གི་སྒོ་གསུམ་སོགས་
སྣོད་བཅུད་ཀྱི་དངོས་སྣང་ཐམས་ཅད་ལ་སངས་རྒྱས་ཀྱི་གསང་སྲོག་གསུམ་ཞུགས་ནས་བྱིན་གྱིས་བརླབ་པར་བལྟས་ན་རང་གི་གནས་ལུས་ལོངས་སྤྱོད་ཐམས་ཅད་འབྲུ་གསུམ་གྱི་སྒྲོམ་དུ་བཅུག་པར་འགྲོའོ། །སྒྱུ་འཕྲུལ་གྱི་འབྲུ་གསུམ་གོ་བགོའི་སྐབས་སུ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱིས་ཀུན་ལ་ཁྱབ། །ཅེས་དང༌། གསང་རྫོགས་མ་ཧཱའི་སྒོམ་ཁོག་ཏུ། །ཨོཾ་སྣང་བ་སྐུ་ཡི་དཀྱིལ་འཁོར་དུ། ཨཱཿསྒྲ་གྲགས་གསུང་གི། ཧཱུྃ་དྲན་རྟོག་ཐུགས་ཀྱི་དཀྱིལ་འཁོར་དུ་དག་པའི་རྒྱ་རྟགས་སུ་སྒོམ་པར་བཤད་པ་ལ་ཤིན་ཏུ་འགྲིགས་པ་ཡིན་ནོ། །གོ་ཆ་དང་སྲུང་འཁོར་གྱི་ཏིང་ངེ་འཛིན་འདི་རྣམས་སྤྱིར་དུས་ཐམས་ཅད་དང༌། ཁྱད་པར་དུ་ཐུན་མཚམས་དང༌། དེ་ལས་ཀྱང་སྲོད་དུས་སོགས་ལ་སྒོམ། གནས་གསུམ་གྱི་གོ་ཆ་འདིས་ལུས་ནད་མཚོན་དུག་གསུམ་སོགས་ལས་སྐྱོབ་པ་དང༌། ངག་བྱད་དུ་ཆུད་པ་སོགས་ལས་སྲུང་བ་དང༌། བཟླས་བརྗོད་ཀྱི་ནུས་པ་སྐྱེད་པ་དང༌། སྨྲ་བ་གསལ་བ་དང༌། ཚིག་བཙན་པར་བྱེད་པ་དང༌། ངག་གིས་རང་གཞན་ལ་ཕན་ཐོགས་པ་དང༌། ཀུན་གྱིས་ཡིད་དུ་འོང་ཞིང་མཐུན་པའི་ངག་འཐོན་པ་དང༌། ཡིད་རྨོངས་པ་དང༌། སྨྱོ་འཐིབ། བརྗེད་ངས། ཕྱིན་ཅི་ལོག་གི་རྟོག་ངན་སོགས་ལས་སྲུང་བ་དང༌། ཏིང་ངེ་འཛིན་བརྟན་པ་དང༌། སྤོབས་པའི་སྟོབས་སམ་གཟི་བརྗིད་མི་ཆོམ་པ་སྐྱེད་པ་སོགས་མཐའ་མེད་པ་འཕྲུལ་རུང་ངོ༌། །དེའང་ཡི་གེ་དེ་དང་
དེའི་འོད་ཟེར་གྱིས་ལུས་ཐམས་ཅད་བཀང་བས་ཐ་མལ་གྱི་སྣང་ཞེན་ལག་རྗེས་དང་བཅས་པ་མུན་ཁུང་དུ་ཉི་ཟེར་ཞུགས་པ་ལྟར་དག་པར་དམིགས་པར་བྱའོ། །བཞིན་ལག་རྣམ་ཅན་གྱི་གོ་ཆའི་ལྷ་མེད་ཀྱང༌། གོ་ཆའི་ལྷ་མེད་མི་དགོས་ཏེ། འབྲུ་གསུམ་དེ་རྡོ་རྗེ་གསུམ་གྱི་ལྷར་འགྱུར་བའི་ཕྱིར་ཏེ། སྡོམ་འབྱུང་ལས། སྔགས་ཉིད་རྣལ་འབྱོར་མ་ཡི་གཟུགས། །སྔགས་ཀྱི་གཟུགས་ཅན་རྣལ་འབྱོར་མ། །གལ་ཏེ་གོ་འཕང་མཆོག་འདོད་ན། །དེ་དག་དབྱེ་བ་བརྟགས་མི་བྱ། །ཞེས་ལྷ་ལ་སྔགས་ཀྱི་དང༌། སྔགས་ལ་ལྷའི་ང་རྒྱལ་འཇོག་པར་གསུངས་སོ། །སེམས་ཅན་དུས་ཀྱང་བཞིན་ལག་མ་དོད་ཀྱང་གང་ཟག་ཏུ་ཡོད་པ་ནི། ནུར་ནུར་པོའི་དུས་ཀྱི་སེམས་ཅན་ལྟ་བུ་ཡིན་ནོ། །སྨན་མཆོད་མཐར། གནས་གསུམ་གྱི་ལྷ་དེ་དག་མཆོད་པའི་བསམ་པས། སོ་སོའི་གནས་སུ་ཐིག་ལེ་བྱས་པས་ཤིན་ཏུ་མཉེས་ཤིང་སྐུ་གསུང་ཐུགས་ཀྱི་དམ་ཚིག་ཉམས་ཆག་ཐམས་ཅད་བསྐང་བར་བསམ་པར་བཤད་དེ། གོ་ཆའི་ལྷ་གཟི་བརྗིད་སྐྱེད་པའི་ཆོ་ག་སྟེ། བདུད་རྩིའི་ཆེ་བ་བརྗོད་པ་ན། ལྷ་ལ་ཕོག་ན་དགྱེས་པ་སྐྱེདཿ མཆེད་ལ་ཕོག་ན་གཡར་དམ་སྐོང་ཿ བགེགས་ལ་ཕོག་ན་རྡུལ་དུ་རློགཿ ཅེས་མཁའ་འགྲོ་ཆེན་མོ་དང༌། གཏེར་གསང་བི་མའི་བླ་སྒྲུབ་སོགས་མང་པོ་ལས་གསུངས་པ་ལྟར་ངེས་པ་སྐྱེད། ༈ །འཕགས་པའི་ཕྱག་མཚན་ཐམས་ཅད་ཀྱི་གཙོ་བོ་ནི། ཉིད་ཀྱི་མཚན་ལའང་ཕྱག་ན་
པདྨ་ཞེས་གྲགས་པ་དང༌། མཚན་བརྒྱར། པདྨ་དྲི་མེད་ཕྱག་གི་དབུས་ན་བསྣམས། །ཞེས་པ་ལྟར་པདྨ་ཡིན་ཏེ། ལྷ་འདི་པདྨའི་རིགས་ཀྱི་འཁོར་ལོས་སྒྱུར་བ་ཡིན་ཞིང༌། རིགས་དེའི་མཚན་མཐུན་མིན་ནི་དེ་ཡིན་པའི་ཕྱིར་ཏེ། རྡོ་རྗེ་རིགས་ཀྱི་འཁོར་སྒྱུར་ལག་ན་རྡོ་རྗེའི་ཕྱག་མཚན་རྡོ་རྗེ་བཞིན་ནོ། །དོན་ཞགས་དང་ཕྱག་སྟོང་གི་ཆོ་ག་ཞིབ་མོ་ལས་པདྨའི་ལས་ཚོགས་ངོ་མཚར་བ་གསུངས་ཤིང༌། དེ་ཉིད་བསྡུས་པ་དང༌། རྡོ་རྗེ་སྙིང་པོ་རྒྱན་ལས་པདྨའི་རིགས་ཀྱི་དངོས་གྲུབ་རབ་འབྱམས་ཐམས་ཅད་པདྨ་ལ་བརྟེན་ནས་སྒྲུབ་ཚུལ་རབ་འབྱམས་བསྟན་ཏོ། །དེ་ལ་པད་དཀར་གྱི་དེ་ཉིད་སློབ་དཔོན་སངས་རྒྱས་གསང་བའི་རྣམ་སྣང་མངོན་བྱང་གི་འགྲེལ་པ་ལྟར་བཀྲལ་ན། འགྲེལ་པ་དེར། སྤྱན་རས་གཟིགས་ཀྱི་གདན་པད་དཀར་འཆད་པ་ན། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་དག་པའི་མཚོན་བྱེད་དུ་བཤད་ཀྱང༌། གཙོ་ཆེ་བའི་དབང་དུ་བཏང་ན། རྣམ་སྣང་གི་གདན་གྱི་སྐབས་པད་དཀར་བསོད་ནམས་ཀྱི་ཚོགས་སུ་གསུངས་པ་ལྟར་རོ། །བསོད་ནམས་ཀྱི་ཚོགས་སུ་བཤད་པ་འདི་གདན་ཁོ་ནའི་མིན་པ་ནི། ཡོ་གར། ཇི་ལྟར་པདྨ་དམར་པོ་འདི། །ཞེས་སོགས་དང་བཤད་ཚུལ་མི་འདྲ་བའི་དོགས་སྤོང་མཛད་པ་དང༌། རྟ་མགྲིན་གྱི་རྒྱན་གྱི་པདྨ་ལ་ཡང་དེ་ལྟར་གསུངས་པས་ཤེས་སོ། །གདན་གྱི་ཐད་དུ། ས་བཅུ་དང་ཕྱིན་དྲུག་གི་གྲངས་ཚད་
ཀྱིས་སོར་བཅུ་དྲུག་པར་བྱ་བར་བཤད་པ་སོགས་སློབ་ལམ་སྐབས་དང་སྦྱར་མོད། དེ་ཁོ་ན་མིན་པར་དེའི་རྒྱུ་མཐུན་ལས་བྱུང་བ་སངས་རྒྱས་ཀྱི་སའི་བསོད་ནམས་ལ་ཡང་བྱ་སྟེ། སྤྱན་རས་གཟིགས་འདི་ལོངས་སྐུ་ཡིན་པར་རྒྱུད་དེའི་བསྡུས་དོན་དུ། ཕྱག་ན་པདྨོའི་ལུས་འདྲ་བ། །ཞེས་སོགས་རྒྱུད་ཚིག་གིས་བསྒྲུབས་ཤིང་དཀྱིལ་འཁོར་རིམ་པ་ནང་མ་ལ་འགོད་པའི་རྒྱུ་མཚན་གྱིས་ཤེས་ལ། པདྨ་དང་རྡོ་རྗེ་སོགས་ཐུགས་མི་ཟད་པ་བཀོད་པའི་རྒྱན་གྱི་དཀྱིལ་འཁོར་དུ་བསྡུས་དོན་ལས་གསུངས་པས་སངས་རྒྱས་ཉིད་ཀྱི་ཐུགས་མཚོན་བྱེད་ཡིན་པས་སོ། །དེའང་བསྡུས་དོན་དེར། ཡི་གེའི་དཀྱིལ་འཁོར་གྱི་མདུན་དུ་ཆོས་ཀྱི་དབྱིངས་ཀྱི་རང་བཞིན་གྱི་པདྨ་ལ་དབང་སྐུར་བར་གསུངས་པའི་ཐད་ན། སེམས་ཅན་གྱི་དོན་ལ་རྗེས་སུ་ཆགས་ཀྱང༌། ཉེས་པ་ཐམས་ཅད་ཀྱིས་མི་གོས་པའི་མཚོན་བྱེད་དུ་བཤད་པ་འདི་དང་བསྒྲིགས་ནས། ཇི་ལྟར་མེ་ཏོག་པདྨ་ནི་རླན་གྱིས་ཡོངས་སུ་གང་བའི་རློན་པར་དམིགས་ཏེ། དེ་བཞིན་དུ་འཇམ་དཔལ་རྩ་རྒྱུད་ལས། མགོན་པོ་སྤྱན་རས་གཟིགས་པ་ཡི། །ཐུགས་ནི་ཐུགས་རྗེ་བྱུང་བ་དང༌། །ཐུགས་རྗེ་ཆེན་པོས་ཐུགས་བརླན་པར། །སངས་རྒྱས་སྔ་མས་གསུངས་པའང་དྲན། །ཞེས་པ་ལྟར་བཅོམ་ལྡན་འདས་ཀྱི་བསོད་ནམས་ཀྱི་སྡོང་པོ་ཡང་སྙིང་རྗེ་ཆེན་པོའི་རླན་གྱིས་ཤིན་ཏུ་ནོན་པ་དང༌། པདྨ་ནི་ཆུ་སྟེ་རླན་ལས་སྐྱེ་ཞིང༌། ཆུའི་ནང་ཁོ་ནར་
འཕེལ་གྱི་གཞན་དུ་མ་ཡིན་པ་ལྟར། སྦྱིན་སོགས་བསོད་ནམས་ཀྱི་ཚོགས་རྣམས་ཀྱང་འཁོར་བ་ལ་བརྟེན་ནས་སྐྱེ་ཞིང༌། ཡུན་རིང་པོར་འཁོར་བ་ན་གནས་ཏེ་བསྐྱེད་བསྲིང་པས་ཤིན་ཏུ་རྒྱས་པར་འགྱུར་བ་ཡིན་གྱི། གཞན་དུ་མ་ཡིན་པ་དང༌། པད་དཀར་གྱི་ཁ་དོག་ཟླ་བ་ར་རི་མེད་པ་སྟོན་གནམ་ལ་ཤར་བ་ལྟར་དག་པའི་ཚོན་དུ་བྱུང་ལ། ཆུ་ཞག་དང་ཉ་ལྕིབ་དང་དྲི་ང་བ་སོགས་ཆུའི་ཉེས་པ་ཀུན་གྱིས་མ་བསླད་པར་སྐྱེ་བ་ལྟར། བསོད་ནམས་ཀྱི་ཚོགས་དེ་ཡང་ཆོས་ཐམས་ཅད་རང་བཞིན་དག་པར་རྟོགས་པའི་ཤེས་རབ་ཀྱིས་ཁ་དོག་བསྒྱུར་བས། བདེན་ཞེན་གྱི་དྲི་མ་མེད་པའི་ཤིན་ཏུ་གཙང་མ་ཁོ་ནར་སྐྱེ་སྟེ། འགྲེལ་པ་དེར་པད་དཀར་བསོད་ནམས་ཀྱི་ཚོགས་ཙམ་ལ་མ་སྦྱར་བར་བསོད་ནམས་ཀྱི་ཚོགས་ཡོངས་སུ་དག་པ་དང་སྦྱར་བའང་དེ་ལྟར་ཡིན་ཏེ། ཡོངས་སུ་དག་པ་མ་སྨོས་ན་དཀར་པོའི་དོན་མ་ཚང་ངོ༌། །ཡོ་ག་ལས་པདྨ་དམར་པོར་བཤད་པ་དང་འགལ་སྤོང་སྐབས། ཤེས་རབ་ཀྱིས་ཆོས་ཐམས་ཅད་ཤིན་ཏུ་དག་པར་རྟོགས་པའི་མཚོན་བྱེད་དུ་དཀར་པོར་བསྟན་ཅེས་པ་ཙམ་ལས་མི་གསལ་ཡང༌། འཇིག་རྟེན་དབང་ཕྱུག་གསང་སྔགས་ནི། །ལས་ཀྱི་བྱེ་བྲག་དག་ལས་དཀར། །ཞེས་པའི་འགྲེལ་པར། སོར་རྟོག་ཡེ་ཤེས་ཀྱི་རང་བཞིན་ཡིན་པས་སྤྱན་རས་གཟིགས་ཀྱི་ལྷ་སྔགས་སོགས་དཀར་པོར་བཤད་དེ། རྒྱུད་འདིར་པད་གདན་སོགས་
དཀར་པོ་གང་བྱུང་དུ་རྣམ་པར་དག་པའི་མཚོན་བྱེད་ཅེས་བཤད་ཀྱང༌། སོར་རྟོག་ཡེ་ཤེས་ལ་སྦྱར་བ་ནི་ལྷ་འདིའི་སྒོས་ཆོས་ཏེ། དེའི་གོང་དུའང༌། སྤྱན་རས་གཟིགས་སོར་རྟོག་ཡེ་ཤེས་ཀྱི་ངོ་བོ་ཉིད་དང༌། སྟོན་པ་རྣམ་སྣང་ཉིད་ཆོས་དབྱིངས་ཡེ་ཤེས། ཕྱག་རྡོར་བྱ་གྲུབ་ཡེ་ཤེས་སོགས་སུ་བཤད་པས་སོ། །པདྨ་ཆུ་དང་འགྲོགས་པས་ཆེས་ཡིད་དུ་འོང་བའི་ལང་ཚོ་རྒྱས་པར་འགྱུར་གྱི་ཆུའི་ཉེས་པས་ཅུང་ཟད་ཀྱང་མི་གོས་པ་ནི་དེའི་མ་འདྲེས་པ་སྟེ། དེ་བཞིན་དུ་ཐེག་མཆོག་བསོད་ནམས་ཀྱི་ཚོགས་རྣམས་འཁོར་བའི་རྙོག་པ་ཐམས་ཅད་ཀྱི་ནང་དུ་སྤྱོད་ཀྱང་དེ་དག་གིས་བག་ཙམ་ཡང་མི་གོས་ཤིང༌། སླར་ལ་ཀུན་ཏུ་བཟང་པོའི་གཟི་མདངས་འབར་བར་འགྱུར་བ་ནི་ཐབས་མཁས་ཀྱི་ཆེ་བ་སྟེ། ཆེས་ཡ་མཚན་པའོ། །པད་འདབ་ཀྱི་གྲངས་ནི་བརྒྱད་དུ་བྱེད་པར་སྤྱན་རས་གཟིགས་ཀྱི་དཀྱིལ་འཁོར་བྲིས་ཐད་ཀྱི་འགྲེལ་པར། རྡོ་རྗེ་དེའི་སྟེང་དུ་པདྨོ་ཆེན་པོ་འདབ་མ་བརྒྱད་པ་བྲིས་ཏེ། ཞེས་སོ། །དེའང་རྣམ་ཤེས་ཚོགས་བརྒྱད་གནས་གྱུར་པའི་ཡེ་ཤེས་ཀྱི་ལྡོག་པ་བརྒྱད་ལ་སོ་སོར་བསོད་ནམས་ཀྱི་ཚོགས་དེ་གྲོགས་སུ་འབྲང་བའི་ཆ་བརྒྱད་དམ། བསོད་ནམས་ཀྱི་ཚོགས་ཡེ་ཤེས་ཀྱི་ལྡོག་པ་བརྒྱད་ཀྱི་སྒོ་ནས་རྒྱས་པ་མཚོན། ཡང་ན་དཀར་བའི་དེ་ཉིད་དུ་འོང་རྒྱུའི་སོར་རྟོག་ཡེ་ཤེས་དེ་ཉིད་ཡེ་ཤེས་ཀྱི་ལྡོག་པ་བརྒྱད་ཀྱི་བདག་ཉིད་དུ་དགོངས་པ་སྟེ། འདི་ཡང་རྒྱུད་འགྲེལ་ཉིད་ལ་བརྟེན་པའོ། །
པདྨའི་ཟེ་བའི་དེ་ཉིད་ནི། འགྲེལ་པར། ཟེ་བ་རྣམས་ནི་སངས་རྒྱས་བཅོམ་ལྡན་འདས་ཀྱི་རྒྱུའི་ཡོན་ཏན་ཏིང་ངེ་འཛིན་དང་གཟུངས་དང་རྣམ་པར་ཐར་པ་དང་སྟོབས་དང་མི་འཇིགས་པ་ལ་སོགས་པའི་མཚན་མར་བརྟགས་པ་ཡིན་ལ། བསོད་ནམས་ཀྱི་ཚོགས་དེ་ཡོན་ཏན་དེ་རྣམས་དང་ལྡན་པའོ། །ཞེས་གསུངས་ཏེ། འདི་རྣམ་སྣང་གི་གདན་གྱི་ཐད་དུ་བཤད་པ་སྟེ། དེའི་གདན་པདྨ་ལ་བྱེད་པ་ནི་པདྨའི་དེ་ཉིད་ཀྱི་འབྱུང་ཁུངས་ཅན་ཡིན་པས་སོ་ཞེས་བཤད་པའི་རིགས་པས། པདྨའི་ཟེ་བ་ལ་བཞུགས་པ་ཡང་རྣམ་སྣང་ཉིད་ཟེ་བའི་དེ་ཉིད་ལས་བལྟམས་པ་རྒྱུ་མཚན་དུ་བྱེད་པར་མངོན་ལ། གཟུགས་སྐུའི་འབྱུང་ཁུངས་ཆོས་སྐུ་ཡིན་པས་ཆོས་སྐུའི་ཕྱོགས་ཀྱི་ཡོན་ཏན་ཁོ་ན་མ་གཏོགས་མཚན་དཔེ་སོགས་ཟེ་བའི་དེ་ཉིད་དུ་མི་བཤད་པའང་དེའི་གནད་ཀྱིས་ཡིན་ནམ་སྙམ་སྟེ། དེ་བཞིན་དུ་འདིར་ཡང་ཕྱག་མཚན་ཐུགས་ཀྱི་གསང་བའི་མཚན་མར་བཤད་པས། ཐུགས་ཡེ་ཤེས་ཆོས་སྐུའི་ཕྱོགས་ཀྱི་ཡོན་ཏན་དང་སྦྱོར་འཐད་དོ། །འདིར་འོ་ན་རྣམ་སྣང་ཡང་པདྨའི་རིགས་ཡིན་ནམ་ཞེས་པའི་དོགས་པའང་བཅད་པར་བྱའོ། །པདྨའི་མཛེས་སྡུག་གིས་སྐྱེ་དགུའི་དགའ་བ་སྐྱེད་པའི་དེ་ཉིད་ནི་དངོས་ཟིན་དེ་དག་ཏུ་མི་གསལ་ཡང༌། དེ་ཉིད་སྣང་ཆེན་ལས། རབ་དགའ་དེ་ཉིད་དོན་ནི་མཛེས་པའི་དེ་ཁོ་ན་ཉིད་དེ། རང་བཞིན་གྱིས་དག་པའི་དོན་ལ་དེ་སྐད་
ཅེས་བྱའོ། །རྡོ་རྗེ་པདྨོ་ཞེས་བྱ་བ་ནི་བཅོམ་ལྡན་འདས་ཀྱི་པདྨོའི་ཕྱག་རྒྱ་ལ་བྱའོ། །རབ་དགའ་བྱེད་ཅེས་བྱ་བ་ནི། རང་བཞིན་གྱིས་རྣམ་པར་དག་པའི་ཆོས་ཉིད་ཀྱི་ཡེ་ཤེས་ཀྱིས་སེམས་ཅན་རྣམས་ཤིན་ཏུ་སྦྱོང་བར་་འདི་སེམས་དབང་དུ་གྱུར་པ་མཐར་སོན་པའི་སོར་རྟོག་གིས་རང་རྒྱུད་ལ་ཤིན་སྦྱང་གི་དགའ་བདེ་ཕུལ་བྱུང་འདྲེན་པའི་དོན་དུ་བཤད་དགོས། མཆན། མཛད་པས་ན་རབ་དགའ་བྱེད་དོ། །ཞེས་བཤད་པས་དཔག་ན། དག་ཅིང་དགེ་བ་ནི་འདིར་མཛེས་པའི་དོན་དང༌། དེ་འདྲ་བའི་དཔལ་གྱིས་འགྲོ་བ་ཐམས་ཅད་ཀྱི་ཡིད་དུ་འོང་ཞིང༌། སེམས་ཀྱི་རྙོག་པ་དང་བར་བྱེད་ལ། ཟང་ཟིང་མེད་པའི་དགའ་བ་དཔེ་ལས་འདས་པས་རྒྱུད་ཚིམ་པར་བྱེད་པ་ཞེས་བཤད་དུ་རུང་ངམ་སྙམ། གཞན་ཡང་རྣམ་སྣང་མངོན་བྱང་ལས། །སངས་རྒྱས་རྣམས་ནི་ཐམས་ཅད་དང༌། །དེའི་སྲས་བློ་ལྡན་རྣམས་ཀྱི་གདན། །པདྨ་ཡིད་ལས་བྱུང་བའི་མཆོག །བཀྲི་ཤིས་འཇིག་རྟེན་རྣམས་ཀྱིས་བསྔགས། །ཞེས་བཀྲ་ཤིས་པ་དང༌། ཀུན་གྱིས་བསྔགས་པའི་ཡོན་ཏན་གསུངས་ཤིང་ཕྱག་རྒྱའི་ལེའུ་ལས། རྒྱལ་བ་རྣམས་བྱང་ཆུབ་བརྙེས་པ་ན་པདྨའི་གདན་ལ་བཞུགས་ཏེ་འཚང་རྒྱ་ཞིང༌། བྱང་སེམས་ཆེན་པོ་རྣམས་ཀྱང་པདྨ་ལས་འཁྲུངས། ཞེས་པདྨ་ལ་ཆེ་བརྗོད་མཛད་དོ། །ཡང་དེ་ཉིད་ལས། དབུས་སུ་པདྨ་དཀར་པོ་མཆོག །དེ་ནི་སྙིང་པོ་ཞེས་སུ་བསྒྲགས། །དཀྱིལ་འཁོར་སྙིང་རྗེ་འབྱུང་བ་ཀུན། །དེས་ནི་སྙིང་པོ་ཅན་དུ་བྱས། །
ཞེས་གསུངས་ཏེ། དོན་ནི། པད་དཀར་ནི་བསོད་ནམས་ཀྱི་ཚོགས་དག་པའོ། །རྐང་པ་གཉིས་པའི་སྙིང་པོ་ཞེས་པ་ནི་འབྱུང་བའི་གནས་ཏེ། སྐད་དོད་ཀྱི་སྟེང་ནས་སོ། །དེའང་བསོད་ནམས་ཀྱི་ཚོགས་དེ་དེ་བཞིན་གཤེགས་པའི་སྙིང་རྗེ་ཆེན་པོ་འབྱུང་བའི་གནས་སོ་ཞེས་པའོ། །སྙིང་རྗེ་དེ་ལས་དཀྱིལ་འཁོར་འདི་འབྱུང་བས་རྐང་པ་གསུམ། འདི་སྙིང་རྗེ་ཆེན་པོ་སྟེ་བསོད་ནམས་ཀྱི་ཚོགས་ཀྱི་རིགས་དང་བསོད་ནམས་ཀྱི་ཚོགས་ཐམས་ཅད་བསྡུས་པ་ཡིན་པ་ལ་བཤད་ནས་དེ་པད་དཀར་ཉིད་དང་སྦྱར་ནའང་འགལ་བ་མ་མཐོང༌། དེ་ལྟར་བྱེད་ན་པདྨ་བསོད་ནམས་ཀྱི་ཚོགས་ཡིན་ཞེས་པའི་བསོད་ནམས་ཚོགས་ནི་སྙིང་རྗེ་ཆེན་པོའོ། །མཆན། པ་མན་ཆད་དོ། །རྐང་པ་གཉིས་པའི་དོན་ནི། དེ་བཞིན་གཤེགས་པའི་སྙིང་རྗེ་ཆེན་པོའི་ཏིང་ངེ་འཛིན་དེ་ཉིད་ཆོས་དབྱིངས་ཀྱི་མཐའ་ཀླས་པའི་འགྲོ་བ་ཐམས་ཅད་ཀྱི་དགོས་པ་མཐའ་དག་སྐལ་བ་ཇི་ལྟ་བ་བཞིན་དུ་རྫོགས་པར་བྱ་བ་ལ་ཡིད་བཞིན་གྱི་ནོར་བུ་བཞིན་དུ་འབྱུང་བ་ནི། སྔོན་བསྐལ་པ་དཔག་མེད་དུ་བསོད་ནམས་ཀྱི་ཚོགས་རྒྱ་ཆེན་པོ་སྦྱངས་པ་ལས་བྱུང་ཞེས་པ་སྟེ། སྙིང་རྗེ་ཆེན་པོ་འབྱུང་བའི་ལེའུ་ཀླད་ནས་ཤེས་སོ། །དེ་ལྟར་ན་འདིར་ཡང༌། སྙིང་རྗེས་འགྲོ་བ་སྐྱོང་བའི་རིགས་ཀྱི་ཕྱག་མཚན་གྱི་བཤད་པར། སྙིང་རྗེ་ཆེན་པོའི་རླན་དེ་ཉིད་བསོད་ནམས་ཀྱི་ཚོགས་དག་པའི་པདྨ་དཀར་པོ་དང་འབྲེལ་ན་སེམས་ཅན་ཐམས་ཅད་དགའ་བར་བྱེད་ནུས་ཞེས་བཤད་པ་ལ་
ངེས་པ་ཐོབ་བོ། །ཡོ་ག་ལས་རྣམ་པར་སྣང་མཛད་པདྨའི་དེ་ཉིད་ཀྱི་རྣམ་པར་ཐུགས་རྩེ་གཅིག་ཏུ་མཛད་པ་ལས་འཕགས་པ་སྤྱན་རས་གཟིགས་ཀྱི་གཟུགས་འཛིན་པར་གྱུར་པར་དང༌། དེ་སློབ་ལམ་དུ་པདྨའི་དེ་ཉིད་བསྒོམས་པ་ལ་འཁྲུངས་པའི་ཕྱིར་པདྨ་སྐྱེས་ཞེས་བརྗོད་པར་གསུངས་པ་ལྟར་གཙོ་བོར་པདྨའི་དེ་ཉིད་ལས་གྲུབ་པས་ན་པདྨའི་རིགས་སམ་སྐྱེ་གནས་པར་འཇོག་པ་ནི་འདྲའམ་སྙམ། དེའང་པདྨའི་རང་ལྡོག་གི་དེ་ཉིད་ལས་མང་དུ་བསྒོམ་ན། དེ་དང་རྗེས་སུ་མཐུན་པའི་འཇིག་རྟེན་གསུམ་དབང་དུ་འགྱུར་བ་སོགས་ཤས་ཆེར་འཐོབ་ཅིང༌། དཀར་བའི་དེ་ཉིད་ཀྱི་སྟེང་ནས་བསྒོམ་པ་གཙོ་བོར་བྱས་ན་དྲན་པ་དང་ཤེས་རབ་འཕེལ་བ་དང༌། ཚེ་རབས་ཐམས་ཅད་དུ་འཁོར་བའི་རྙོག་པ་དང་མི་འདྲེ་བ་ལ་སོགས་པ་ཤས་ཆེར་འཐོབ་བོ། །སྲོང་བཙན་གྱིས་མཛད་པའི་བསྟོད་པར། ཕྱག་གཡོན་པདྨ་དཀར་པོ་བསྣམས། །འགྲོ་དྲུག་གནས་སུ་དོན་མཛད་ཀྱང༌། །འཁོར་བའི་སྐྱོན་གྱིས་མ་གོས་རྟགས། །རྗེ་ཡེ་སངས་རྒྱས་ལ་ཕྱག་འཚལ་བསྟོད། །ཅེས་པའང་འདི་དག་གི་དོན་བསྡུ་ལྟ་བུར་སྣང༌། །ཡོ་གར་སངས་རྒྱས་རྣམས་ཀྱིས་པདྨ་ཕྱིན་ནས་རྡོ་རྗེ་སྤྱན་ནམ་སྤྱན་རས་གཟིགས་ཞེས་མིང་རྡོ་རྗེའི་ཅོད་པན་བཏགས་ཏེ་དབང་བསྐུར་བར་བཤད་པ་སོགས་ངོ་མཚར་བའི་གཏམ་གཞན་ཡང་དྲན་པར་བྱའོ། །འདི་འབྲི་བ་ལ་ཞུགས་ཚེ་ཁྱད་མཚར་གྱི་ལྟས་ཀྱང་བྱུང་གསུང༌། ༈ །གདུང་
པདྨ་ལས་འཁྲུངས་པ་ནི་རང་ཉིད་ཀྱང་པདྨའི་མཚན་ཉིད་དང་ལྡན་པར་གོ་དགོས་ཏེ། ནས་ཀྱི་རིགས་ལས་སྐྱེས་པའི་འབྲུ་ནས་ཡིན་པའམ་གདུང་ཡིན་ན་རང་ཉིད་ཀྱང་ཡིན་པ་བཞིན་ནོ། །འཕགས་པ་ཉིད་པདྨ་ལྟ་བུར་འཇོག་ལུགས་ནི་དཔེར་ན། དཀོན་མཆོག་སྤྲིན་ལས། རིགས་ཀྱི་བུ་ཆོས་བཅུ་དང་ལྡན་ན་བྱང་ཆུབ་སེམས་དཔའ་པདྨ་དང་འདྲ་བ་ཉིད་ཡིན་ནོ། །བཅུ་གང་ཞེ་ན། འདི་ལྟ་སྟེ། མ་གོས་པ་རྣམས་ཡིན། སྡིག་པ་ཆུང་ངུ་དང་ཡང་ལྷན་ཅིག་མི་གནས་པ་རྣམས་ཡིན། ཚུལ་ཁྲིམས་ཀྱི་དྲི་ཞིམ་པ་རྣམས་ཡིན། གཙང་བ་རྣམས་ཡིན། བཞིན་འཛུམ་པ་རྣམས་ཡིན། མི་རྩུབ་པ་ཉིད་ཡིན། མཐོང་ན་བཀྲ་ཤིས་པ་རྣམས་ཡིན། བློ་རྣམ་པར་ཕྱེ་བ་རྣམས་ཡིན། བློ་ཡོངས་སུ་སྨིན་པ་རྣམས་ཡིན། ཤིན་ཏུ་ཡོངས་སུ་བཟུང་བ་རྣམས་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་མ་གོས་པ་རྣམས་ཡིན་པ་ནས་ཇི་ལྟར་ན་ཤིན་ཏུ་ཡོངས་སུ་བཟུང་བའི་བར་དུ་ཡིན་ཞེ་ན། རིགས་ཀྱི་བུ་འདི་ལྟ་སྟེ། དཔེར་ན་པདྨ་ནི་ཆུའི་ནང་ནས་འབྱུང་ཡང་མི་ཆགས་པར་སྐྱེའོ། །དེ་ཅིའི་ཕྱིར་ཞེ་ན། འདི་ལྟར་དེའི་ཆོས་ཉིད་ཐོབ་པའི་ཕྱིར་རོ། །དེ་བཞིན་དུ་བྱང་ཆུབ་སེམས་དཔའ་འཁོར་བའི་ཆུ་ལས་འབྱུང་ཡང་མི་ཆགས་པར་སྐྱེའོ། །དེ་ཅིའི་ཕྱིར་ཞེ་ན། འདི་ལྟར་དེའི་ཐབས་དང་ཤེས་རབ་ཀྱི་ཆོས་ཉིད་ཐོབ་པའི་ཕྱིར་རོ། །བྱང་ཆུབ་
སེམས་དཔའ་ཐབས་མཁས་པ་ནི་འཁོར་བ་ན་སྤྱོད་ཀྱང་འཁོར་བའི་ཉེས་པ་དག་གིས་མ་གོས་ཏེ། དེའི་ཐབས་དེ་ནི་ཤེས་རབ་ཀྱིས་ཡང་དག་པར་ཟིན་པ་ཡིན་ནོ། །རིགས་ཀྱི་བུ་འདི་ལྟ་སྟེ། དཔེར་ན་པདྨ་ལ་ནི་ཆུའི་ཐིགས་པ་ཆུང་ངུ་ཡང་མི་ཆགས་སོ། །དེ་བཞིན་དུ་བྱང་ཆུབ་སེམས་དཔའ་ལ་སྡིག་པ་ཆུང་ངུ་ཡང་མི་ཆགས་སོ། །རིགས་ཀྱི་བུ་འདི་ལྟ་སྟེ། དཔེར་ན་སའི་ཕྱོགས་གང་དུ་པདྨ་སྐྱེས་པར་གྱུར་པའི་སའི་ཕྱོགས་དེ་དྲིས་ཁྱབ་པར་འདུག་གོ། །དེ་བཞིན་དུ་ཡུལ་དང་ཡུལ་གྱི་ཕྱོགས་གང་ན་བྱང་ཆུབ་སེམས་དཔའ་གནས་པ་དེ་ཐམས་ཅད་ཚུལ་ཁྲིམས་ཀྱི་དྲིས་ཁྱབ་པར་འདུག་གོ། །རིགས་ཀྱི་བུ་འདི་ལྟ་སྟེ། དཔེར་ན་པདྨ་ནི་སའི་ཕྱོགས་གར་སྐྱེས་པའི་ས་ཕྱོགས་དེ་གཙང་ཞིང་བྲམ་ཟེ་དང་རྒྱལ་རིགས་དང་གྲོང་པ་དང་ཡུལ་གྱི་མི་ཐམས་ཅད་ཀྱང་འདུ་བ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་གར་སྐྱེས་ཀྱང་རུང༌། འདི་ལྟ་སྟེ། ཚུལ་ཁྲིམས་དང༌། གཙང་སྦྲ་ཀུན་ཏུ་སྤྱོད་པས་གཙང་བ་ཡིན་ཏེ། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་འདུ་བ་ཡིན། སངས་རྒྱས་བཅོམ་ལྡན་འདས་རྣམས་ཀྱིས་དགོངས་པ་ཡིན། བྱང་ཆུབ་སེམས་དཔའ་རྣམས་ཀྱིས་རབ་ཏུ་བསྔགས་པ་ཡིན་ནོ། །རིགས་ཀྱི་བུ་འདི་ལྟ་སྟེ། དཔེར་ན་པདྨ་ནི་ཁ་ཕྱེ་ན་འདི་ལྟ་སྟེ། སེམས་ཅན་
རྣམས་ཀྱི་ཡིད་དུ་འོང་བས་འཛུམ་པ་ལྟ་བུར་སྣང་ངོ༌། །དེ་བཞིན་དུ་བྱང་ཆུབ་སེམས་དཔའ་ཡང་ཁྲོ་གཉེར་མེད་ཅིང་དབང་པོ་ཤིན་ཏུ་དང་བས་བཞིན་རྟག་ཏུ་འཛུམ་པ་ཡིན་ནོ། །རིགས་ཀྱི་བུ་འདི་ལྟ་སྟེ། དཔེར་ན་པདྨ་ནི་རང་བཞིན་གྱིས་འཇམ་ཞིང་མི་རྩུབ་པ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་ཡང་རང་བཞིན་གྱིས་འཇམ་ཞིང་དལ་གྱིས་སྨྲ་བ་ཡིན་མི་བརླང་ཞིང་མུ་ཅོར་མི་སྨྲ་བའི་རང་བཞིན་ཅན་ཡིན་ནོ། །རིགས་ཀྱི་བུ་འདི་ལྟ་སྟེ། དཔེར་ན་པདྨ་ནི་རྨི་ལམ་དང་ལྟས་དང་ཡུད་ཙམ་དག་ལ་མཐོང་ན་ཡང་འདི་ལྟ་སྟེ། དོན་འགྲུབ་པའི་ཕྱིར་བཀྲ་ཤིས་ཤིང་རབ་ཏུ་བསྔགས་པ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་མཐོང་བ་ཡང་འདི་ལྟ་སྟེ། ཐམས་ཅད་མཁྱེན་པ་ཉིད་ཐོབ་པར་བྱ་བ་ལ་དུས་ཐམས་ཅད་དུ་བཀྲ་ཤིས་ཤིང་རབ་ཏུ་བསྔགས་པ་ཡིན་ནོ། །རིགས་ཀྱི་བུ་འདི་ལྟ་སྟེ། དཔེར་ན་པདྨ་ནི་ནམ་སྐྱེས་པ་དེ་ན་རྣམ་པར་ཕྱེ་བ་ཞེས་བྱའོ། །དེ་བཞིན་དུ་བྱང་ཆུབ་སེམས་དཔའ་ཡང་ནམ་ཤེས་རབ་དང་བྱང་ཆུབ་ཀྱི་ཡན་ལག་མེ་ཏོག་རྒྱས་པ་དེ་ན་བློ་རྣམ་པར་ཕྱེ་བ་ཞེས་བྱའོ། །རིགས་ཀྱི་བུ་འདི་ལྟ་སྟེ། དཔེར་ན་པདྨ་ནི་ནམ་ཡོངས་སུ་སྨིན་པར་གྱུར་པ་དེ་ན་བལྟས་ན་མིག་གི་དབང་པོ་ཚིམ་པར་བྱེད་དོ། །མཉན་ན་རྣ་བའི་དབང་པོ་ཚིམ་པར་བྱེད་དོ། །བསྣམས་ན་སྣའི་དབང་པོ་ཚིམ་པར་བྱེད་དོ། །རེག་ན་ལུས་ཀྱི་དབང་པོ་ཚིམ་པར་བྱེད་དོ། །སེམས་རབ་ཏུ་དགའ་བས་ཡིད་ཀྱི་དབང་པོ་ཚིམ་པར་བྱེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་ནམ་ཤེས་རབ་ཀྱི་སྣང་བ་ཡོངས་
སུ་སྨིན་པར་གྱུར་པ་དེའི་ཚེ་བལྟས་ན་མིག་གི་དབང་པོ་ཡོངས་སུ་དག་པར་བྱེད། མཉན་ན་རྣ་བའི་དབང་པོ་ཡོངས་སུ་དག་པར་བྱེད། ཚུལ་ཁྲིམས་དང་ཡོན་ཏན་གྱི་དྲི་བསྣམས་ན་སྣ་བའི་དབང་པོ་ཡོངས་སུ་དག་པར་བྱེད། རེག་པ་དང་བསྙེན་བཀུར་བྱས་ན་ལུས་ཀྱི་དབང་པོ་ཡོངས་སུ་དག་པར་བྱེད། ཡོན་ཏན་བརྗོད་པ་རྣམ་པར་བསམ་པས་ཡིད་ཀྱི་དབང་པོ་རྣམ་པར་དག་པར་བྱེད་དོ། །རིགས་ཀྱི་བུ་འདི་ལྟ་སྟེ། དཔེར་ན་པདྨ་ནི་སྐྱེ་བའི་ཚེ་འདི་ལྟ་སྟེ། མི་དང་མི་མ་ཡིན་པ་དག་གིས་ཤིན་ཏུ་ཡོངས་སུ་བཟུང་བ་ཡིན་ཏེ། དེ་བཞིན་དུ་བྱང་ཆུབ་སེམས་དཔའ་ཡང་སྐྱེ་བའི་ཚེ་སངས་རྒྱས་དང་བྱང་ཆུབ་སེམས་དཔའ་རྣམས་དང་དེ་མ་ཡིན་པ་གཞན་བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་དག་གིས་ཤིན་ཏུ་ཡོངས་སུ་བཟུང་བ་ཡིན་ནོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་མ་གོས་པ་ནས་ཤིན་ཏུ་ཡོངས་སུ་བཟུང་བའི་བར་དུ་ཡིན་ཏེ། རིགས་ཀྱི་བུ་ཆོས་བཅུ་པོ་དེ་དག་དང་ལྡན་ན་བྱང་ཆུབ་སེམས་དཔའ་པདྨ་དང་འདྲ་བ་རྣམས་ཡིན་ནོ། །ཞེས་གསུངས་པ་ལྟ་བུའོ།། ༈ །།སློབ་དཔོན་རིན་པོ་ཆེས་དང་པོར་ཨོ་ཌི་ཡཱ་ནའི་སྐྱེད་ཚལ་ཞིག་ཏུ་བསྙེན་སྒྲུབ་ཟླ་དྲུག་མཛད་པས། ཐོག་མར་ཁྱིམ་ཞིག་པ་དང༌། ཚལ་ལ་མེ་ཤོར་བ་སོགས་ལྟས་མ་རུང་བ་མང་དུ་བྱུང་ཡང་དེའི་དབང་དུ་མ་བཏང་བར་བསྒོམས་པས་ཇི་ཞིག་ན་འདོད་པའི་དངོས་གྲུབ་བརྟན་པོ་བརྙེས་པར་གསུངས་ཤིང༌། དཔལ་
མར་མེ་མཛད་ཀྱིས་ཀྱང༌། གཞོན་ནུའི་དུས་ནང་ཅིག་སྡིག་པ་ར་ཙའི་ཕུང་པོ་ཞིག་མདུན་དུ་ཧྲིགས་ཀྱིས་འབབས་པ་གཟིགས། དེས་ཐུགས་མ་གཡོས་པའི་ཕྱིར་ན་འཕགས་མ་སྒྲོལ་མས་མངོན་སུམ་དུ་བྱིན་གྱིས་བརླབས་ཤིང༌། འཁོར་རྣམས་ཀྱིས་དུས་དེར་ཇོ་བོའི་མདུན་དུ་ཨུཏྤལ་གསར་པའི་ཆུན་པོ་ཆེ་བ་ཞིག་མཐོང་བར་བཤད་པ། འཕགས་བོད་ཀྱི་སྐྱེས་མཆོག་རྣམས་ཀྱི་ལོ་རྒྱུས་ན་འདི་འདྲ་ཆེས་མང་དུ་འབྱུང་བས། མཚམས་སྒྲུབ་སོགས་ཀྱི་ཚེ་གློ་བུར་ཡེ་འདྲོགས་ན་ཚ་དང་ལྟས་ངན་སོགས་ཅི་བྱུང་ཡང་ཁྱི་རྡོ་རྗེས་སུ་སྙེགས་པ་ལྟ་བུའི་རེ་དོགས་ཀྱི་ཙབ་ཙུབ་མི་བྱ་བར་དགེ་སྦྱོར་གྱི་རང་ས་འཛིན་ནུས་ན་རྣལ་འབྱོར་མགོ་རྒྱལ་དུ་འགྲོ་བའི་གནད་ཅིག་དེ་ན་ཡོད་དོ། ༈ །བཀའ་བརྒྱད་རང་ཤར་གྱི་ལྷ་ཁྲིད་ལས། ལྷ་ཡི་དམ་གང་མོས་པ་གཅིག་ལ་བདེ་གཤེགས་ཀུན་དོན་འདུས་ཚུལ་ནི༔་དཔེར་ན་ལྤགས་རློན་ཆུས་བཀང་བ་ཁད་དེ་གནས་པ་ལ་མཛུབ་མོས་སྟོད་སྨད་གང་ན་མནན་སར་ཆུ་བྱོ་བ་ལྟ་བུཿ ཡི་དམ་གང་མོས་གཅིག་ལ་བསྙེན་སྒྲུབ་མཐར་ཕྱིན་པར་བྱས་ནཿ བདེ་གཤེགས་ཡོངས་ཀྱི་བྱིན་རླབས་འབྱུང་ཞིང་ཿ ཕྲིན་ལས་ཐམས་ཅད་འགྲུབ་བོཿ ཅིའི་ཕྱིར་ལུང་ལསཿ ཐམས་ཅད་ངོ་བོ་མཉམ་ཉིད་སྐུ་གསུང་ཐུགསཿ ཆོས་སྐུར་གཅིག་ཕྱིར་གཅིག་འགྲུབ་ཀུན་གྱི་ངང་ཿ ཞེས་གསུངས་སོཿ ཞེས་སོ། །གཞན་ལ་དབང་བསྐུར་བ་སོགས་ཀྱིས་
སྔགས་ཀྱི་ནུས་པ་ཉམས་པ་རྟེན་འབྲེལ་སྙིང་པོའི་གཟུངས་སྒྲུབ་ཀྱིས་གསོ་བར་འབྲི་གུང་ཆོས་གྲགས་ཀྱིས་བཤད་པའང་མཁོ། །དེའང་རབ་གནས་ཀྱི་གཞུང་ལྟར་བྱའམ་དཔྱད། ལྷའི་བྱིན་རླབས་ཞུད་པ་ཞེས་བྱ་བ་ནི། བྱིན་རླབས་འདྲེད་པ་ཞེས་པའི་དོན་ཏེ། སྲིན་དུག་ཤོར་མ་ལ་སྲིན་སྨན་མི་ཐེབས་པའམ་མི་ཟུག་པར་དར་ཞུད་འཐེན་པ་ལྟར་སོང་བ་ལ་སྨན་འདྲེད་པ་དང་དྲེད་པར་འཇོག་ཆོག་པ་ལྟ་བུར་མངོན། དེ་ལ་རྐྱེན་གང་གིས་གཡེལ་ཞུད་དུ་གྱུར་པ་ཡིན་ཡང་གཏོར་ཚོགས་དང་བསྐང་བཤགས་ཀྱིས་གསོ་བར་ཆོས་དབང་གི་སྲིད་པའི་གཏེར་ཁྱིམ་ལས་བཤད་དེ། དོན་དུ་བདག་གནས་ཡོ་བྱད་ལ་འབྱར་རྩི་རྒྱགས་པ་གལ་ཆེ་ཞིང༌། འབྱར་རྩི་ཡང་ཚོགས་གསོགས་ཡིན་པ་དང༌། དེ་འབྱར་རྩིར་འགྲོ་བ་རས་གཞིའི་དྲི་མ་སྦྱོང་བ་ལྟ་བུའི་སྡིག་སྦྱང་ལ་ལྟོས་པར་དགོངས་པ་སྟེ། བྱུར་དང་མི་ཤིས་པ་སྦྱོང་བའི་ཆོ་ག་གཞན་རྣམས་ཀྱང་གལ་ཆེ་བ་འདྲའོ། །སྒོམ་བཟླས་ཀྱིས་དངོས་གྲུབ་མཐོང་ཆོས་ལ་འགྲུབ་པ་ནི་དག་པའི་སྣང་ཞེན་འགྲུས་པ་དང་རྒྱུན་མི་འཆད་པར་གོམས་པའི་མཐུ་ཡིན་པར་བསམ་གཏན་ཕྱི་མའི་འགྲེལ་པར་གསུངས་ཤིང༌། གཞན་དུ་གཙུབ་ཤིང་ངལ་གསོ་ཞིང་གཙུབ་པས་མེ་མི་འབྱུང་བའི་དཔེས་གསུངས་པ་དང༌། གཞན་དུ་གཡེངས་པའི་སེམས་ཀྱིས་ནི། །བསྐལ་པར་བཟླས་ཀྱང་འབྲས་མི་འབྱིན། །ཞེས་གསུངས་ཏེ། དཀྱུས་གཅིག་ལ་བྱས་པ་མིན་པའི་བསྙེན་
པས་བསྙེན་པའི་གོ་མི་ཆོད་པ་དང༌། གཡེང་བཞིན་བཟླས་པའང་དེ་དང་འདྲ་བ་དང༌། ཐུན་མཚམས་སུའང་དྲན་འཛིན་ཆེན་པོ་བསྟེན་ནས་སྤྱོད་ལམ་གྱི་རྣལ་འབྱོར་ལས་མི་འདའ་བ་བྱེད་དགོས་པ་ཀུན་དེའི་གནད་ཀྱིས་ཡིན་ནོ། ༈ །བླ་མ་དགོངས་འདུས་ཀྱི་ཆིངས་ལྔ་ལས། ཆོས་ལོ་ལེགས་པའི་སྙེ་མ་མཐོང་བའམ་བུ་ཆུང་མེ་ཏོག་གི་ཚལ་དུ་སླེབས་པ་ལྟར་གང་བྱས་ན་དྲག་གམ་གང་ཉམས་སུ་བླང་ན་དྲག་གམ་སྙམ་ནས་འདམ་རེས་ཀྱི་ངང་དུ་མི་ཚེ་བུད་པ་མ་ཚོར་བ་འབྱུང་སྲིད་པསཿ དེ་ལྟར་མ་ཡིན་པར་རང་ཉམས་དང་བསྟུན་པར་ཆོས་གང་དད་པ་ཞིག་གི་ཕུ་ཐག་བཅད་དེ་སྤང་ལེན་ཐང་སློད་རེ་དོགས་གཉིས་འཛིན་མེད་པར་རྩེ་གཅིག་ཏུ་ཉམས་སུ་བླང་ཿ དེ་ལྟར་བསྐྱེད་རྫོགས་ལ་སོགས་གང་ཡིན་གཅིག་ལ་བརྟན་པ་ཐོབ་ཕན་ཆད་ཆོས་ཐམས་ཅད་ཀྱི་དགོངས་པ་ལོན་ནས་གཅིག་ཤེས་ཀུན་ལ་མཁས་པར་འགྱུར་རོཿ ཞེས་དང༌། པདྨའི་གསང་སྔགས་ལམ་རིམ་གྱི་རང་འགྲེལ་ལས་ཀྱང་འདི་ཁོ་ན་བཞིན་ནན་ཏན་དུ་གདམས་སོ། །འདི་ནི་སྐྱབས་རྗེ་གཏེར་ཆེན་བླ་མ་རྣམ་པ་གཉིས་ཀས་ཡང་དང་ཡང་དུ་གདམས་པར་མཛད་ཅིང༌། སྔོན་གྱི་མཁས་གྲུབ་ཆེན་པོ་རྣམས་ཀྱི་སྤྱི་ལུགས་གལ་པོ་ཆེར་སྣང་ངོ༌། །རང་གི་ཡི་དམ་གྱི་ལྷ་དང་གདམས་ངག་ལ་གཉིས་འཛིན་མི་བྱ་བར་རྣམ་པ་ཐམས་ཅད་ཀྱིས་ཐམས་ཅད་དུ་བློ་ཧྲིལ་གཏོད་པ་ནི་སྲོག་ལྟར་གཅེས་སོ།། ༈ །།སེམས་ཉིད་ངལ་བསོ་རྩ་བའི་ཕྲིན་ལས་སུ། དེ་བཞིན་གཤེགས་པ་ཐམས་
ཅད་ཀྱིཿ སྙིང་པོ་ཡི་གེ་བརྒྱ་པ་ཡང་ཿ ཐུན་མཚམས་རྣམས་སུ་ཉེ་བར་བཟླཿ སྒྲིབ་དག་ནུས་པ་མཆོག་ཏུ་འགྱུརཿ ཞེས་གསུངས་ཤིང༌། གཞན་དུ་མར་ཡང་ཡིག་བརྒྱས་ཆད་ལྷག་གི་ཉེས་པ་ཞི་བ་དང༌། བྱིན་རླབས་བརྟན་པར་བྱེད་པར་གསུངས་པས་ཐུན་མཚམས་སུ་བཟླ་བ་གཅེས་སོ། །འདི་གཡེལ་ཞུད་སྐོར་སྲུང་བ་ལ་ཟབ་པར་དེ་ཉིད་བསྡུས་པ་ལས་གསུངས། ༈ །ཟབ་གཏེར་ཆེན་པོ་རྣམས་ལ་སྒྲུབ་འབྲས་མཐོང་ཆོས་སུ་འབྱིན་པའི་འབྲས་བུའི་དུས་དང༌། ཉམས་ལེན་ཚད་ལྡན་བྱེད་པ་རེ་མང་ཡོད་པའི་སྒྲུབ་པའི་དུས་དང༌། དབང་ལུང་ཁྲིད་གསུམ་གྱི་རྒྱུན་ཙམ་རྣལ་མ་ཡོད་པའི་ལུང་གི་དུས་དང༌། དེའང་ཉམས་པ་རྟགས་ཙམ་འཛིན་པའི་དུས་ཀྱི་རིམ་པ་སོ་སོར་ཡོད་པར་རྗེ་བླ་མས་གསུངས། དེ་ནི་གཏེར་ཁ་གོང་འོག་དང༌། བི་མ་དང་མཁའ་འགྲོའི་སྙིང་ཐིག་བྱང་གཏེར་སོགས་ཀྱི་ལོ་རྒྱུས་ལ་བརྟགས་ན་ཤེས་པ་ཡོད་དོ། །དེའང་རཏྣའི་གཏེར་ལུང་ལས། ཤིན་ཏུ་ཟབ་པའི་མཐར་ཐུག་སྙིང་པོ་རྣམསཿ སྤྱིར་ཡང་བོད་རྣམས་གསར་ངས་ཆེ་བ་དང་ཿ སྙིགས་མའི་འགྲོ་ལ་ལྷག་པར་སྙིང་བརྩེ་བསཿ མཐའ་དབུས་ཐམས་ཅད་གཏེར་གྱིས་བཀང་ནས་བཞགཿ ལས་ཅན་བུ་དང་ཕྲད་པའི་སྨོན་ལམ་བཏབཿ ཅེས་པ་ལྟར་བོད་ན་སྔགས་ཀྱི་གདུལ་བྱ་མང་བ་དང༌། དེའི་ནང་ནས་ཀྱང་མང་པོ་ཞིག་སྨོན་ལམ་གྱི་མཐུ་ཅན་ཡིན་ཡང་གསར་ངས་ཆེ་བ་ཡིན་
པས། དེ་ལ་སྙད་བཏགས་ནས་གསུང་རྡོ་རྗེ་པདྨ་སཾ་བྷ་ཝས་གཏེར་ཆོས་རྣམས་ལ་ཐད་ཀ་ཐད་ཀའི་འབྲས་བུའི་དུས་རེ་བྱིན་གྱིས་བརླབས་པར་སྣང་སྟེ། གསང་སྔགས་ཀྱི་ཆོས་ཀྱི་བྱིན་རླབས་ནི་གདུལ་བྱས་དད་གུས་དང་གསང་རྒྱ་སོགས་གཅེས་སྤྲས་མ་ཉམས་པས་ལྷག་པར་འགྱུར་ལ་གཅེས་སྤྲས་དེའང་གསར་ངས་ཅན་གྱིས་ནི་གསར་པ་ལ་སྒྲིམ་ཞིང་རྙིང་པ་ལ་ལྷོད་པའི་ཕྱིར་རོ། །རྒྱུ་མཚན་དེའི་ཕྱིར་ན་གཏེར་ཆོས་གསར་པ་རྣམས་ལ་མཁའ་འགྲོའི་ཁ་རླང་དད་པ་མ་ཡལ་བའི་ཆོས་ཞེས་གཙིགས་ཆེར་འཛིན་ཏེ། ཆོས་དབང་གཏེར་བྱོན་མཁའ་རིའི་ཞུས་ལན་དུའང༌། བོད་འདིར་ཐུགས་གཏེར་ལྔ་དང༌། གཏེར་ཆེན་བརྒྱ་རྩ། གཏེར་ཕྲན་བྱེ་བ་སྦས་པར་གསུངས་ནས། དེ་ཙམ་དུ་མང་བ་སྦེད་པའི་རྒྱུ་མཚན་བོད་ཀྱི་རྒྱལ་ཁམས་གསར་ངས་ཆེ་བའི་ཕྱིར་རོ་ཞེས་བཤད། སྙིགས་མའི་གདུལ་བྱ་བརྩོན་འགྲུས་དང་ཤེས་རབ་དམན་པ་རྣམས་ལ་སློབ་དཔོན་རིན་པོ་ཆེ་ཉིད་བཀའ་དྲིན་ཟླ་མེད་པར་བྱེད་དོ། །གཏེར་དཔེ་ལས་ཆོས་བསྒྱུར་དུས་རྟོག་པ་གཞན་གྱིས་གཏན་ནས་བར་མ་ཆོད་པ་དགོས་ཏེ། དེ་ཆོད་ན་ངེས་པར་བཅོས་ཕོག་པའི་ཉམས་ཀྱི་འཆར་ཆ་དང༌། བླ་མ་མཁའ་འགྲོའི་བྱིན་རླབས་ཀྱིས་ཚུར་གཏད་པའི་སྣང་བ་གང་ཡིན་བྱེད་མི་ནུས་པར་སོང་ནས་ཚིག་དོན་ལ་བསླད་སྐྱོན་ཞུགས་འགྲོ་བས། གཏེར་ཆོས་དེ་
ལ་ལྷད་ཞུགས་མ་ཞུགས་གཏེར་སྟོན་རང་གིས་ཀྱང་ངེས་དཀའ་བ་ལྟ་བུར་ཡོད་ཅེས་གསུང་རྒྱུན་དུ་འབྱུང་སྟེ། ཆོས་རྒྱལ་རིན་ཆེན་གླིང་པའི་གཏེར་ཆོས་སོགས་ལའང་ལྷད་ཅན་ཡོད་པར་མཁའ་འགྲོ་ཡང་ཏིག་ལས་གསུངས་པ་དེ་འདྲ་ལ་དགོངས་ཀྱི་རྫུན་ལབ་ཟེར་བ་མིན་ནོ། །འདི་ལ་ནི་ནང་ཏིང་ངེ་འཛིན་ཤིན་ཏུ་བརྟན་པ་དང༌། ཕྱི་བླ་མ་མཁའ་འགྲོའི་བྱིན་རླབས་སྨིན་ཚབས་ཆེ་བ་དགོས་ཏེ། གཏེར་སྟོན་བརྒྱུད་པའི་གསང་ཚིག་གཅིག་གོ༌།དེས་ན་གཏེར་གསར་གྱི་ནང་ནས་ཀྱང་བདེ་བ་ཆེན་པོའི་རྣལ་འབྱོར་ལས་རུང་མཐར་སོན་པ་རླབས་པོ་ཆེའི་གཏེར་སྟོན་གྱི་ཆོས་ལ་གཙོ་བོར་བྱ་དགོས་སོ། །གཏེར་གསར་དུས་ཀྱི་ལོ་ཏོག་བརྗེ་བ་ལྟར་བརྒྱུད་མར་འབྱུང་བའི་སྒོ་ནས་གུ་རུ་བཀའ་དྲིན་ཆེ་བར་བྱེད་པའི་ཚུལ་ད་དུང་བཤད་ན། རིང་རྒྱུད་རྣམས་སྣོད་མིན་ལ་འཕེལ་བས་བཀའ་འཆལ་བ་དང༌། དམ་སེལ་གྱིས་བར་བཅད་པ་དང༌། གཟུ་ལུམ་རང་བཟོའི་ལྷད་སྐྱོན་ཞུགས་པ་དང༌། བརྒྱུད་པ་ལ་འདྲེ་སོགས་བར་ཆད་འཇུག་པའི་སྲོལ་དོད་པ་དང༌། བར་སྐབས་སུ་བརྒྱུད་འཛིན་བརྩོན་འགྲུས་ཆུང་བས་ལེགས་པར་མ་བསྒྲུབ་པའི་ཉེས་པས་བསྒྲུབ་འབྲས་ཐོབ་པ་མ་བྱུང་ནས་ཡུན་རིང་སོང་བ་ལ་སོགས་རྒྱུ་མཚན་མང་པོ་ཞིག་གིས་དངོས་གྲུབ་ཤིན་ཏུ་འགྲུབ་པར་དཀའ་བའི་དུས་ན་གཏེར་བརྒྱུད་གསར་པ་ལ་བརྟེན་ནས་གསང་སྔགས་སྒྲུབ་སླ་བར་མཛད་ཅིང༌། དེའང་མི་ཐོག་རེ་གཉིས་ལ་དེ་འདྲ་བྱུང་བ་ཙམ་མིན་པར་མ་འོངས་ཕྱི་མ་ཕྱི་
མའི་དུས་མཐའི་བར་དུ་ཚུལ་དེས་གསང་སྔགས་ཀྱི་བསྟན་པ་གསོ་བའི་ཕྲིན་ལས་རྒྱུན་མི་ཆད་པར་འབྱུང་བ་ལ་བསམས་ན་དུས་ངན་སྙིགས་ལས་ཆེར་སྙིགས་འདི་ལྟ་བུར་མཐའ་འཁོབ་ཀྱི་ཡུལ་དུ་སྐྱེས་པའི་སྔགས་ཀྱི་གདུལ་བྱ་རྣམས་ལ་མ་ལྟར་བརྩེ་བའི་མགོན་པོ་འདི་དང་མཉམ་པ་སུ་ཞིག་རྙེད་དེ། ངམ་ཤོད་རྡོར་སེམས་ཁ་བྱང་ལས། སློབ་དཔོན་པདྨ་འབྱུང་གནས་ཀྱིསཿ གདོང་དམར་བོད་ཀྱི་རྒྱལ་ཁམས་སུཿ མདོ་སྔགས་ཆོས་ཀྱི་སྒྲོན་མེ་སྤརཿ ཉོན་མོངས་དུག་ལྔའི་མུན་པ་བསལཿ མ་འོངས་སྐྱེ་བོ་བྱོལ་ཉོག་པསཿ གཟུ་ལུམ་རས་ཆོད་དར་བའི་ཚེཿ ཟབ་ཆོས་ཕལ་གྱི་ནུས་མཐུ་ཡལཿ བསྒྲུབ་ཀྱང་དོན་མེད་ངལ་བས་ནཿ བརྩེ་ཆེན་འགྲོ་ལ་ཕན་བཞེད་ནསཿ ཟབ་མོའི་གདམས་པ་ཇི་སྙེད་པཿ བཀའ་རྒྱས་བཏབས་ནས་གཏེར་ཏུ་སྦསཿ དུས་རྟགས་གདུལ་བྱ་འཛོམས་པ་ནཿ རིམ་བཞིན་བཏོན་ནས་དོན་བྱེད་པརཿ སྨོན་ལམ་གཏད་རྒྱས་གཉེར་དུ་གཏདཿ ཅེས་སོ། །འདི་དག་ཨོ་རྒྱན་རིན་པོ་ཆེའི་བྱིན་རླབས་དང༌། དེའི་སྤྱན་སྔར་སྨོན་ལམ་མཐུ་ཆེན་ཐེབས་པའི་གཏེར་སྟོན་རྣམས་ཀྱི་ལས་སྨོན་གཉིས་འཛོམས་པ་ལས་བྱུང་བས། གཏེར་སྟོན་སྤྲུལ་པའི་སྐུ་རྣམས་ཀྱི་བཀའ་དྲིན་དུའང་སྦྱོར་ཆོག་གོ།། ༈ །།གུ་རུ་རིན་པོ་ཆེས་བོད་ཡུལ་འདི་ལྷག་པར་ཕྱག་མཚན་དུ་བཞེས་ཚུལ་ནི། ཕྱོགས་འདིར་བསྟན་པ་ལ་འགལ་རྐྱེན་བྱེད་པ་
རྣམས་ཚར་བཅད་པ་ནི། བཀའ་གདམས་གླེགས་བམ་དུ། སྤྲུལ་པ་གཅིག་ནི་ལྷ་འདྲེ་འདུལ་དུ་འགྲོ། །ཞེས་པ་ལྟར་རྒྱལ་བའི་ཕྲིན་ལས་ལ་བར་ཆད་བྱེད་པའི་ལྷ་འདྲེ་ཆེན་པོ་རྣམས་བཏུལ། ནང་བོད་ཁམས་རང་དང༌། ཕྱི་རོལ་ཀླ་ཀློ་སོགས་བསྟན་པ་ལ་སྡང་བའི་མི་རྣམས་དང་ཕྱི་དུས་གསར་སྐྱེས་ཀྱི་ལྷ་འདྲེ་ནག་ཕྱོགས་པ་རྣམས་ཚར་བཅད་ཕྱིར་དྲག་སྔགས་མང་པོ་བསྟན་ཅིང་གཏེར་དུ་བསྐུངས། ཆོས་འགལ་གྱི་བོན་རྣམས་བསྣུབས། སྡོམ་གསུམ་རབ་དབྱེར། རྒྱལ་པོ་ཁྱོད་ཀྱི་བོད་ཡུལ་འདི། །སློབ་དཔོན་པདྨ་འབྱུང་གནས་ཀྱིས། །སོགས་ལྟར་བརྟན་མ་བཅུ་གཉིས་ལ་བོད་དུ་མུ་སྟེགས་པ་མི་འཇུག་པའི་གཉེར་གཏད་མཛད་པ་སོགས་སོ། །བསྟན་པའི་མཐུན་རྐྱེན་འདུ་མཛད་པ་ནི། ཕན་བདེའི་རྩ་ལག་བསམ་ཡས་ཀྱི་གཙུག་ལག་ཁང་བཞེངས་ཤིང་རབ་གནས་མཛད། དཀོན་མཆོག་འབངས་ཀྱི་སྐྱེས་རབས་ལས། གནས་པའི་ཕོ་བྲང་ཆེན་པོ་ལྟར་བྱིན་གྱིས་རློབས་པ་ཞེས་པ་དང་ཚུལ་མཐུན་པར། དཀྱིལ་ཆོག་དང༌། ཚོགས་འཁོར་མང་པོ། ལྟ་ཕྲེང་ཉན་བཤད། ཟབ་གཏེར་སྦས་པ་སོགས་ཀྱི་སྒོ་ནས་མཐའ་དབུས་ཀྱིས་ཆ་མང་པོ་རྡོ་རྗེའི་གནས་ཡུལ་དུ་བྱིན་གྱིས་བརླབས་ནས་སངས་རྒྱས་མཐོང་བའི་ལྷ་དང༌། སྔགས་བསྟན་ཀླུ་ལ་ཆུ་གཡང་ལྟར་ཆགས་པའི་རིག་འཛིན་ཌཀྐི་རྣམས་དབྱར་སྤྲིན་བཞིན་འདུ་བའི་རྩ་གསུམ་སྲུང་མའི་བླ་ཆགས་ཀྱི་གནས་སུ་
མཛད། ཉིད་ཀྱིའནག་སྐུ་ཚབ་དང་ཕྱག་ཞབས་ཀྱི་རྗེས་སོགས་ཤིན་ཏུ་མང་བ་བསྟན་པའི་བཙས་སུ་བརླབས་ཏེ་བཞག །ཡུལ་མིའི་བསམ་སྤྱོད་ནི་ཡུལ་བདག་བྱེད་པའི་ལྷ་སྲུང་གི་དབང་གིས་སྒྱུར་བར་བཤད་ཅིང༌། ལྷག་པར་བོད་མ་སང་འདྲེའི་ཡུལ་ཟེར་བ་ལྟར་རྟག་ཆགས་ཀྱི་ཡུལ་ལྷ་ཤམ་པོ་དང་ཐང་ལྷ་སོགས་ནི་བོད་འདིར་དབང་ཆེ་བ་ཡིན་པས། དེ་རྣམས་སྐྱབས་འགྲོ་དང་བརྟུལ་ཞུགས་ཀྱི་གཞི་ལྔ་ལ་བཀོད་དེ། སེམས་བསྐྱེད་ཕོག །དཀྱིལ་འཁོར་དུ་བཅུག་ནས་གསང་སྔགས་ཀྱི་སྲུང་མར་བསྐོས་པ་ནི། ཕྱོགས་འདིར་བསྟན་པ་སྤྱི་དང༌། བྱེ་བྲག་བསྟན་པའི་ཉིང་ཁུ་སྔགས་བསྟན་རྒྱས་ཤིང་ནུབ་དཀའ་བའི་ཐབས་མཁས་ཆེན་པོའོ། །ཚེ་སྒྲུབ་དང་ནོར་སྒྲུབ། དབང་སྡུད་སྣ་ཚོགས། ཆོས་ལྡན་རྒྱལ་པོ་སོགས་ཀྱི་རིགས་བརྒྱུད་དང་མངའ་ཐང་གསོ་བ་ལ་སོགས་པའི་གཏེར་ཁ་ཟད་མི་ཤེས་པ་རྣམས་ཀྱང་མཐུན་རྐྱེན་ནོ། །བསྟན་པ་ཉིད་གསལ་བར་མཛད་ཚུལ་ནི། ཞི་འཚོ་དང༌། བླ་ཆེན་པོ། དཔལ་ལྡན་ཨ་ཏི་ཤ་རྣམས་ཀྱང་གུ་རུ་འདི་ཉིད་ཡིན་པར་བཀའ་གདམས་གླེགས་བམ་དུ་འབྱུང་ལ། དེར་སྤྲུལ་པ་གཅིག་ནི་མདོ་ཁམས་སྨད་དུ་འགྲོ། །ཞེས་པ་རྗེ་བཙུན་ཙོང་ཁ་པར་གྲགས་ཏེ། རྗེ་དགེ་འདུན་རྒྱ་མཚོ། པཎ་ཆེན་ཆོས་རྒྱན་སོགས་ཀྱིས་ཀྱང་བཤད་དོ། །དེས་ན་དེ་དག་གིས་བསྟན་པ་སྤྱིར་བསྐྱངས་པའི་
མཛད་པ་རྣམས་ཀྱང་འདིའི་མཛད་པར་ངེས་ཤིང༌། སྐུའི་རྣམ་འགྱུར་འདི་དབང་དུ་ན། ལམ་རིམ་དུ། པདྨ་སཾ་བྷ་བས་བསྟན་པའི་སྲོལ་གཙུགས། ཞེས་ཏེ། ཇོ་བོའི་རྣམ་ཐར་ན། སློབ་དཔོན་པདྨས་མཁའ་འགྲོའི་གནས་ནས་རྫུལ་འཕྲུལ་གྱིས་བླང་བར་མངོན། ཞེས་དང༌། དེ་དུས་ཀྱི་བསྟན་པ་འདྲ་བ་རྒྱ་གར་ནའང་དཀའ། ཞེས་པ་ལྟར་སྔགས་རྒྱུད་ཁྱད་པར་ཅན་མང་པོ་སྤྱན་དྲངས་ཤིང༌། བསྒྱུར་ཞུས་མཛད། སྒྱུ་འཕྲུལ་དང༌། སངས་རྒྱས་མཉམ་སྦྱོར། བཀའ་བརྒྱད་ལ་སོགས་པའི་ཆོས་འཁོར་བསྐོར་ཏེ་རྒྱུད་སྡེ་རབ་འབྱམས་ལ་མཁས་པ་དང༌། དངོས་གྲུབ་བརྙེས་པའི་སྐྱེས་མཆོག་བཻ་རོ་དང་ནམ་སྙིང་རྨ་ལོ་སོགས་བགྲང་བར་དཀའ་བའི་བསྟན་འཛིན་བསྐྲུན་ཅིང་བསྟན་རྒྱུན་བཞག །གཏེར་བརྒྱུད་ཀྱིས་སྔགས་བསྟན་བརྒྱུད་མར་གསོ་བའི་ཞལ་བཞེས་སྩལ་བ་ལྟར་བདེན་འབྲས་མངོན་སུམ་དུ་བསྟན། དེ་སྲིད་དུ་གུ་རུ་ཉིད་ཀྱི་གདུལ་བྱའི་འཕྲོ་སྐྱོང་ཞིང་ཕྲིན་ལས་ཀྱི་རྒྱུན་གསོ་བའི་ཆོས་ཀྱི་རྒྱལ་ཚབ་རེའང་རྒྱུན་མི་འཆད་དུ་འབྱུང་བ་ཡིན་ནོ། །དེའི་ཕྱིར་ས་པཎ་གྱིས། བརྡུལ་ཞུགས་གྲུབ་པ་པདྨ་སཾ་བྷ་བ། །སྙིགས་མའི་དུས་ཀྱི་རྒྱལ་བ་གཉིས་པ་ཡིན། །ཞེས་སོ། །དེ་ལ་དགོངས་ནས་དཔལ་ལྡན་ཞི་འཚོས། པདྨ་སཾ་བྷ་བ་ཞེས་བྱ་བ་འཛམ་བུའི་གླིང་ན་ཆེ་བའི་རིགས་སྔགས་མཁན་ཞིག་ཡོད། དེ་སྤྱན་དྲངས་ན་ཆོས་རྒྱལ་ཉིད་དང་སྨོན་ལམ་གཅིག་པས་དོན་འགྲུབ་པར་འགྱུར་ཞེས་
ཁྲི་སྲོང་ལ་ལུང་བསྟན་ནོ། །ལར་གུ་རུ་ཞི་བ་བྱང་ཆུབ་སྟེར་བ་དང༌། དྲག་པོ་བར་ཆད་འདུལ་བ་ལ་བསྔགས། དང་པོ་འདི་ལ་གཏེར་ཕྱོགས་སུ་ཟ་ཧོར་མ་ཤས་ཆེ་བས། དེའི་རྒྱུ་མཚན་བཤད་ན། བཀའ་གདམས་གླེགས་བམ་ལས་བླ་མ་དྲི་མ་མེད་པ་རྒྱ་གར་དུ་གྲུབ་ཐོབ་ལྔ་བཅུར་གྲགས་ཚུལ་གྱི་ཐད་ན། ཐམས་ཅད་ཀྱང་ཉན་ཐོས་ཀྱི་ཆ་བྱད་ཁོ་ནར་སྟོན་ནོ། །ཞེས་པ་ལྟར། ཆོས་གོས་གསོལ་བ་ནི་དཀྱུས་མའི་ཆ་བྱད་ཡིན་ཏེ། སྔ་ནས་རབ་འབྱུང་གི་ཆས་སུ་བཞུགས་པས་སོ། །གསང་ཕོད་བེར་འདུང་པད་ཞྭ་རྣམས་ནི་ས་ཧོ་རའི་རྒྱལ་པོ་གཙུག་ལག་འཛིན་གྱིས་རང་གི་ཞྭ་གོས་གསར་པ་ཆེ་རྟགས་སུ་ཕུལ་བའི་དུས་ཀྱི་སྐུ་ཆས་སོ། །དེའང་སློབ་དཔོན་རིན་པོ་ཆེ་འཛམ་གླིང་ཡུལ་དབུས་ཀྱི་མིའི་སྐྱེ་བོ་བགྲང་བར་དཀའ་བའི་མདུན་དུ་མཐུན་སྣང་ལ་སྔགས་ཀྱི་ཐེག་པ་རྒྱ་ཆེར་བཤད་པར་གསོལ་བ་འདེབས་པ་པོའི་ཐོག་མ་ནི་རྒྱལ་ཆེན་གཙུག་ལག་འཛིན་ཡིན་ལ། དེས་གང་གི་ཚེ་གསོལ་བ་བཏབ་པ་ནི། ཡུལ་དེར་སྔགས་ཀྱི་ཀུན་སྤྱོད་དང་འབྲེལ་བའི་རྫུ་འཕྲུལ་ཆེན་པོ་བསྟན་པ་ནའོ། །ཚུལ་ཇི་ལྟར་བཏབ་ན། དཔག་ཚད་དུ་མར་ཁྱབ་པའི་མིའི་ཁྲོམ་ཚོགས་ཀྱི་དབུས་སུ་ས་ཧོ་རའི་རྒྱལ་སྲིད་ཕུལ་ཞིང༌། དེའི་རྟགས་སུ་རང་གི་ཞྭ་ཐོད་ཟབ་བེར་སོགས་སྐུ་ལ་གསོལ་ནས་སོ། །དེའི་ལྷའི་དབང་པོ་བརྒྱ་བྱིན་འཁོར་བཅས་ཀྱིས་ཀྱང་བསྟོད་དབྱངས་རོལ་མོ་དང་བཅས་པས་མཆོད་དེ།
མདོར་ན་མི་དང་ལྷ་ཡུལ་པའི་གཙོ་བོ་དག་གིས་དྲེགས་པའི་རལ་པ་དུས་གཅིག་ཏུ་བསྙིལ་ནས་བཏུད་དོ། །དེར་གུ་རུ་ཉིད་ཀྱིས་ཀྱང༌། རྒྱལ་པོ་འཁོར་བཅས་ཀྱི་ཚོགས་རྫོགས་པའི་ཕྱིར་ཆས་འདི་དག་བཞེས་པའི་སྟེང་ནས་སྔགས་ཀྱི་ཆོས་འཁོར་ཁྱབ་གདལ་དུ་བསྐོར་རོ། །འདི་སྐབས་ནི་སྐལ་ལྡན་བརྒྱ་འམ་སྟོང་སོགས་སྨིན་གྲོལ་ལ་བཀོད་པ་ཙམ་མིན་གྱི། ཟ་ཧོར་མ་སྨིན་བར་དུ་བསྡད་ཀྱིས་གསུངསཿ སེམས་ཅན་མ་སྨིན་པ་ནི་གཅིག་ཀྱང་མེདཿ ཅེས་ཡུལ་འཁོར་ཆེན་པོའི་མི་ཚོགས་སངས་རྒྱས་ཀྱིས་ལ་ཁྱུ་དེད་བཏང་བའི་མཛད་ཆེན་ནོ། །ཐུན་མོང་བའི་སྣང་ངོར་སྐུ་ཚེ་འདིར་འགྲོ་འདུལ་གྱི་ཕྲིན་ལས་རྒྱ་ཆེར་རྒྱས་པའི་ཐོག་མ་ནི་དེ་ཡིན་པར་གཏེར་ཕྱོགས་ཞིབ་ཏུ་བལྟས་ན་ཤེས་སོ། །འདི་ཟངས་གླིང་མ་དང་དགོངས་འདུས་ལོ་རྒྱུས་ཤེལ་གྱི་མེ་ལོང་དང༌། ཆོས་དབང་མཛད་པ་བཅུ་གཅིག་མར་མ་ར་ཏི་ཀར་ཚེ་དབང་བསྒྲུབས་རྗེས་ཀྱི་དང༌། ཤེལ་བྲག་མར་མ་བསྒྲུབ་གོང་གི་མཛད་པ་ལྟར་བཤད། དགེ་སློང་གི་རྣམ་པར་ནི་དེ་གོང་ནས་བཞུགས་པས་ཆས་དེ་ནི་མཛད་ཆེན་དེ་བསྟན་རྗེས་སུ་དང་མ་བསྟན་གོང་གཉིས་ཀའི་སྐུ་ཆས་ཐུན་མོང་བ་ཡིན་ལ། ཆ་བྱད་འདི་ནི་དེ་ཚུན་མ་གཏོགས་མེད་པས་ཐུན་མིན་ཏེ། དེས་ན་གུ་རུས་རྡོ་རྗེ་ཐེག་པའི་བསྟན་པ་ཁྱབ་གདལ་དུ་སྤེལ་བའི་མཛད་པ་བསྟན་རྗེས་ཀྱི་སྐུའི་རྣམ་པ་བྱེ་བྲག་ཏུ་མཚོན་ནུས་པ་ལ་འདི་ཁོ་ན་བཟང་བས། རྡོ་རྗེ་ཐེག་པའི་ཆོས་ཀྱི་ཕྲིན་ལས་ཐུན་མོང་མ་ཡིན་
པས་རྗེས་སུ་འཛིན་པར་འདོད་ན་འདི་གཙོ་བོར་བྱེད་དགོས་སོ། །ཆ་བྱད་སྣ་ཚོགས་བསྲེས་པ་འདིས་འདོད་དགུར་བསྒྱུར་བའི་འཕྲུལ་མཚན་དང༌། མཛད་པ་སྣ་ཚོགས་ཅན་དུའང་མཚོན། དེ་དག་གི་ཕྱིར་གཏེར་སྦེད་ཀྱི་མཛད་པ་སྟོན་དུས་ཀྱང་ཆ་བྱད་འདི་བཞེས་པར་བཤད་དེ། དེས་ན་གཏེར་སྦེད་ཀྱི་གླེང་གཞི་དང་འབྲེལ་བའི་ཆ་ལུགས་འདི་ཡིན་པའི་གནད་ཀྱིས་གཏེར་གཞུང་རྣམས་སུ་འདི་མང་བ་ཡིན་ནམ་སྙམ། ཕྱག་མཚན་ལ། མཉམ་བཞག་ཐོད་པ་ཅན་སོགས་ཀྱང་ཡོད་མོད་དེ། འདིར་ནི་རྡོ་རྗེས་དངོས་གྲུབ་ཀྱི་བར་ཆད་ཚར་གཅོད་པ་དང༌། བུམ་ཐོད་སྒྲུབ་པ་པོ་དངོས་གྲུབ་ཀྱིས་རྗེས་སུ་འཛིན་པ་སྟེ། ཕྱི་མ་ལའང༌། བདེ་ཆེན་ཡེ་ཤེས་ཀྱི་དངོས་གྲུབ་སྟེར་བ་དང༌། དེ་ལ་བརྟེན་ནས་འཆི་མེད་ཀྱི་དངོས་གྲུབ་སྟེར་བའི་མཚན་མར་ཐོད་ཆང་དང༌། ཚེ་བུམ་རིམ་བཞིན་ནོ། །དངོས་གྲུབ་བརྟན་གཟིགས་སུ། རྡོ་རྗེ་ལས་གུར་དྲག་དང༌། ཐོད་བུམ་ལས་ལྷ་མོ་མགྱོགས་མ་སྤྲོ་བར་བཤད་པའང་འདི་དང་མཐུན། སྐུ་འདི་དང་པོར་པདྨའི་མཚོ་གླིང་དུ་བལྟམས་དུས་ནས་ཕྱག་མཚན་རྡོར་ཐོད་ཅན་དུ་བྱུང་བར་ཟངས་གླིང་མ་ལས་བཤད་ཅིང༌། ཕྱིས་ཀྱང་དེ་དང་མཐུན་པའི་མཛད་པ་ཅན་དུ་བྱོན་པར་སྣང་སྟེ། ལྷ་སྲིན་དམ་འདོགས་སོགས་སྣང་སྲིད་ཟིལ་གྱིས་གནོན་པའི་ཕྲིན་ལས་ནི། རྡོ་རྗེ་བསྡིགས་མཛུབ་ཀྱི་དང༌། སྐལ་ལྡན་གྲངས་མེད་ལ་དགོངས་པ་
གཏད་ཅིང༌། བདེ་བ་ཆེན་པོའི་ལམ་དབང་རིམ་གཉིས་བཅས་བསྟན་ནས་འཆི་མེད་ཀྱི་གོ་འཕང་ལ་སྦྱར་བ་ནི་མཉམ་བཞག་བུམ་ཐོད་ཀྱིའོ། །ཞལ་ཞི་འཛུམ་ཁྲོས་པའི་ཉམས་སུ་བཤད་པའང་འདིས་བཤད་ནུས། པད་ཞྭའི་སྐབས། པད་ཞྭ་གང་ཡིན་ཟ་ཧོར་མའི་ཆས་སུ་བྱེད་དགོས་པ་ནི་མིན་ཏེ། པདྨ་ཁ་འབུས་ཀྱི་ལོ་རྒྱུས་སོགས་ཀྱིས་ཤེས་སོ། །དེས་ན་གུ་རུ་ཟ་ཧོར་མ་ཡིན་མིན་ཀུན་ལ་པད་ཞྭ་ལྷུབ་ཆེན་སོགས་པད་ཞྭ་རེ་གསོལ་བ་ནི། ཞྭ་བྱས་ཀྱང་དོན་དུ་པདྨའི་རྣམ་པའི་ཅོད་པན་འཆང་བ་སྟེ། པདྨའི་རིགས་སུ་སྟོན་པའོ། ༈ །བསྙེན་མཚམས་སྐབས། སྔོན་དུ་དཀོན་མཆོག་ལ་མཆོད་པ། སྡིག་ལྟུང་སྤྱི་དང་ཁྱད་པར་ཉམས་ཆག་བཤགས་སྦྱངས། གསུང་རབ་སྒྲོགས་པ། སཙྪ་གདབ་པ། སྲོག་བསླུ་བ། ལམ་འཕྲང་འཆོས་པ་ཆ་གསུམ་དང་ཆུ་གཏོར་སོགས་གཏོར་མའི་རྣལ་འབྱོར་གྱིས་མཚོན་དགེ་བའི་དཔུང་ཅི་འགྲུབ་བསྒྲུབས་པར་བྱས་ན་རྒྱུད་འབྱོངས་ཤིང་བར་ཆད་མི་འཇུག་པ་དང༌། དངོས་གྲུབ་མྱུར་དུ་འཐོབ་པར་གསུངས། མ་གྲུབ་ཀྱང་ཆད་སྐྱོན་དུ་མི་འགྱུར། དེ་ནས་གནས་བྱི་དོར་བྱ་སྟན་འོག་ཏུ་འབྲས་སམ་ས་དཀར་པོས་གཡུང་དྲུང་གཡས་བསྐོར་འབྲི། ཀུ་ཤའི་གདིང་བ་བཀྲམ། སྔར་སྔོན་འགྲོའི་བསགས་སྦྱང་མ་སོང་བ་འམ་སོང་ཡང་ཁ་གསོའི་ཚུལ་དུ་བྱེད་ན། དུས་བཟང་པོའི་
དགོང་མོ་བདག་བསྐྱེད་ཕྱག་རྒྱ་གཅིག་པའི་རྣལ་འབྱོར་བཟླས་པའི་བར་གྱི་མཐར། བསྡུ་ལྡང་བྱས་ཏེ། ཕྱོགས་སྐྱོང་སྡེ་བརྒྱད་གཞི་བདག་སོགས་དཀར་ཕྱོགས་པ་ལ་གཏོར་མ་ཕུལ་ནས་ཕྲིན་ལས་བཅོལ། ནག་ཕྱོགས་པ་ལ་བགེགས་གཏོར་བྱིན་ནས་བཀའ་བསྒོ་སྔགས་ཐུན་སོགས་ཀྱིས་བགེགས་བསྐྲད་བྱེད། སྲུང་འཁོར་བསྒོམ། དེ་ནས་བློ་ལྡོག་བཞི་ཅི་ནུས་སུ་བསྒོམས་པས་རྒྱུད་བསྐུལ་ཏེ། སྐྱབས་སེམས་ཡིག་བརྒྱ་མཎྜལ་རྣམས་དང༌། བླ་རྣམ་གྱི་ཡན་ལག་བཅུ་པ་དང༌། གསོལ་འདེབས། སིདྡྷི་རྣམས་ཐུན་དུ་བཅད་དེ་ཤར་སྒོམ་གྱི་ཚུལ་དུ་ཅི་འགྲུབ་བྱ། མཎྜལ་བླ་རྣམ་དུ་བཅུག་ཀྱང་རུང་བ་འདྲ། ཐུན་རེ་བཞིན་སྔོན་འགྲོ་ཁ་ཚང་རེ་གཏོང་བའི་ལུགས་ཏེ། ཐུན་བཞི་བྱ། དེ་ལྟར་ཞག་གསུམ་མམ་བདུན་ནམ་ཉེར་གཅིག་སོགས་འབད། དེ་སོང་ནས་ཡང་བདག་བསྐྱེད་དཀར་གཏོར། བགེགས་སྐྲོད་རྣམས་སྔར་བཞིན་བཏང་རྗེས། རྒྱལ་ཐོའི་ཆོ་གས་ཐོ་གཟུགས། སྲུང་ཁོར་རྒྱས་པར་བསྒོམ། འདི་ནས་བཟུང་སྔར་དམིགས་འོག་ཏུ་མ་བཅུག་པའི་ངོ་གསར་དང་མི་འཕྲད་ཅིང་ཆས་ཀའི་གཏོང་ལེན་ཀྱང་སྤང༌། དེ་ནས་བཤམས་བཀོད་གཙང་དག་བྱ། དེ་ཀའི་དགོང་མོ་ལས་གཞུང་མི་སྲོང་ན་བྱིན་འབེབས། མཆོད་རློབ། ཤིས་བརྗོད་བཅས་ཐུན་མཚམས་ཀྱི་ལྷའི་ང་རྒྱལ་གྱིས་
བྱས་ནའང་ལེགས་སྙམ། འཕྲོ་རྣམས་སླ། སྔོན་འགྲོའི་བསགས་སྦྱང་འབུམ་ལྔ་སྐོར་གསོག་མི་དགོས་ན་ནི་མཚམས་གཅོད་ཐང་གཉིས་མི་དགོས་ཏེ། ལར་གཞུང་ལས། མེད་དུ་མི་རུང་ལམ་སྟེགས་སོཿ ཞེས་གསུངས་པས་སྔོན་འགྲོའི་སྐོར་གསོག་ནི་ངེས་པར་གསོག་དགོས་སོ། །ཡང་རིལ་སྒྲུབ་དང་གཏོར་བཟློག་སོགས་ཤིན་ཏུ་གཟབ་སྤྲོ་བྱེད་སྐབས་ནི། སྔར་བསྙེན་སྒྲུབ་སོང་ཚར་ཡང་ཁ་གསོའི་བསྙེན་སྒྲུབ་ཐེམ་པར་བྱས་ལ་གདོད་བརྩམ་པར་བྱ་སྟེ། ལྷག་པར་དབང་གི་སྐབས་ལ་བསྙེན་པ་ཁ་གསོ་གལ་ཆེའོ། །གཏོར་ཟློག་གི་དུས་སྔོན་དུ་ལྷ་སྲུང་མཆོད་གཏོར་གྱིས་མཉེས་པ་དང༌། འབྱུང་པོ་གཏོར་མས་བརྔན་པ་གལ་ཆེ་བར་གསང་རྫོགས་གཏོར་ཟློག་ཏུ་བཤད་དེ། དེའང་དཀྱིལ་འཁོར་པ་རྣམས་ཐུགས་དམ་སྐོང་དགོས་ཚུལ་ལས་ཟུར་དུ་བཤད། ལར་ཡང་སྲུང་མ་ལ་གཏོར་མ་མི་སྦྱིན་པ་དང༌། བྱིན་ཡང་ཆུང་ཞིང་ངན་པ་དང༌། ཁྱད་པར་དུ་གཏོར་མ་མེད་པར་ལས་བཅོལ་ནན་གྱིས་བྱས་ན་སྔགས་པ་ལྟོགས་ཤིང་དབུལ་ཕོངས་འོང་བར་བཤད། གཡང་སྒྲུབ་མཁན་པོ་ཁ་ཅིག་རྫས་ཆ་དང་བསེ་རག་བཀར་བ་སོགས་གཟབ་ནས་བྱེད་ཀྱང་སྦྱིན་བདག་སོགས་ཇེ་དབུལ་དུ་འགྲོ་བར་སྣང་བ་ཡང་གཏོར་ཚོགས་ཞན་པས་ཡིན་ནམ་སྙམ། ཆར་འབེབས་ལའང་དང་པོར་ཀླུ་གཏོར་བཟང་མང་གཙང་སྦྲ་ཐོན་པར་བསྔོས་ན་ཆར་མོད་པ་དང་
མཐའ་བཟང་བའི་གནད་ཡོད་པ་འདྲ་སྟེ། ཀླུ་དབུལ་པོ་ལ་ཆར་སློང་བྱས་ན་འབབས་ཀྱང་མང་པོ་མི་འབྱུང་ཞིང༌། དེ་ལ་ཧ་ཅང་ཆར་བྱུང་ཆེས་ན་ཀླུ་རྒུད་ནས་ཡུལ་གྱི་ས་བཅུད་ལ་གནོད་པར་བཤད་ཡོད། ཀླུ་བུམ་སྦས་ནས་ས་བཅུད་གསོ་བའི་གོ་དོན་ཡང༌། ས་བདག་ཆུ་བདག་བྱེད་པའི་ཀླུ་རྣམས་ལ་བུམ་པ་བཟང་པོའི་དངོས་གྲུབ་བྱིན་ནས་ཕྱུག་དང་བདེ་སྐྱིད་འཛོམ་པའི་གོ་འཕང་ལ་བཀོད་པའི་སྒོ་ཕྱི་སྣོད་ཀྱི་དཔལ་འབྱོར་གསོ་བ་ཡིན་པར་སྣང༌། ཡང་པདྨ་གསུང་གི་སློབ་དཔོན་ལ། ཐབས་ལ་མཁས་པ་ཕུན་སུམ་ཚོགས་པ་དང༌། བཟླས་བརྗོད་ལ་རྟག་ཏུ་དགའ་ཞིང་བརྩོན་པ་དང༌། སྤྱོད་ལམ་ཐམས་ཅད་དུ་སེང་གེ་ལྟར་སྤྱོད་པ་དང༌། གླུ་གར་རོལ་མོ་རྣམས་ལ་དགའ་ཞིང༌། མཆོད་པའི་བྱེ་བྲག་ལ་མཁས་པ་དང༌། ལྷ་དང་བླ་མའི་འཀའ་བཞིན་དུ་བྱེད་པ་ལས་མི་འདའ་བ་དང༌། སྤུན་ལ་གདུང་ཞིང་སེམས་ཅན་ལ་འདུད་པ་དགོས་པ་དང༌། དེའི་སློབ་མ་ལ་ཡང༌། འགྲོ་བའི་སེམས་མི་དབྱུང་བ་དང༌། གླུ་གར་རོལ་མོ་སྣ་ཚོགས་ལ་བརྩོན་ཞིང་མཁས་པ་སོགས་དགོས་པར་ངེས་པར་འབྱུང་བ་ཕྱི་མའི་རྒྱུད་ལས་གསུངས་སོ།། ༈ །།ཐུགས་སྲོག་ཧྲཱིཿཡིག་གི་དོན་ནི། འདི་ནས་ལྡེབ་གྲངས་ཉེར་ལྔའི་བར་ཐུགས་ཆེན་སྐོར་ལྡེབ་གྲངས་དྲུག་ཅུ་རེ་ལྔ་པར་འཁོད་འདུག་ཀྱང་ཤིང་པར་དུ་དེ་བཞིན་བཀོད་འདུག་པས་བཅོས་བསླད་མ་བྱས། དེ་ཉིད་བསྡུས་པའི་དུམ་བུ་གསུམ་པ་ལས། དེ་ནས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆོས་ཀྱི་དམ་ཚིག་ལས་བྱུང་བའི་བྱིན་གྱིས་
བརླབས་པདྨོ་ཞེས་བྱ་བའི་ཏིང་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་དམ་ཚིག་ཅེས་བྱ་བ་དེ་བཞིན་གཤེགས་པ་ཐམས་ཅད་ཀྱི་སྙི་པོ་འདི་རང་གི་ཐུགས་ཀ་ནས་ཕྱུང་ངོ༌། །ཧྲཱིཿ དེ་ནས་དེ་ཕྱུང་མ་ཐག་ཏུ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་པདྨ་ལྟ་བུའི་འོད་ཟེར་ཁ་དོག་དང་གཟུགས་དང་རྟགས་དང་སྤྱོད་ལམ་དང་འོད་རྣམ་པ་དུ་མ་བྱུང་སྟེ། འཇིག་རྟེན་གྱི་ཁམས་ཐམས་ཅད་དུ་འདོད་ཆགས་ལ་སོགས་པ་རྣམ་པར་དག་པ་དང༌། ཆོས་ཉིད་ཀྱི་ཡེ་ཤེས་ཡང་དག་པར་སྦྱངས་ནས་ཡང་སླར་ལོག་སྟེ་འཕགས་པ་སྤྱན་རས་གཟིགས་ཀྱི་དབང་པོའི་ཐུགས་ཀར་ཞུགས་སོ། །ཞེས་གསུངས་ཏེ། སྙིང་པོ་འདི་ལ་དེ་པ་ཐམས་ཅད་ཀྱི་ཆོས་ཀྱི་དམ་ཚིག་ཅེས་གསུངས་པའི་ཆོས་ནི་པདྨའི་རིགས་རྣམས་ཏེ། རང་བཞིན་དག་པའི་ཆོས་མཁྱེན་པའི་ཤེར་ཕྱིན་གྱི་ངོ་བོ་ཉིད་ཡིན་པས་སོ། །དམ་ཚིག་ནི་རྒྱུའི་དོན་ཏེ། རིགས་དེ་སྤྲུལ་པའི་རྒྱུ་ཡིན་པས་སོ། །དེ་པ་ཐམས་ཅད་ཀྱི་སྙིང་པོ་ཞེས་པ་ནི་ཐུགས་ཀའི་སེམས་པའི་རྡོ་རྗེའི་ངོ་བོ་ཉིད་ཡིན་པས་སོ། །དེ་བྱུང་མ་ཐག་ཏུ་སོགས་ཀྱིས་ནི་ཧྲཱིཿཞེས་བྱ་བའི་སྙིང་པོ་འདིས་པདྨའི་རིགས་ཐམས་ཅད་སྤྲུལ་ཚུལ་དང༌། སྤྲུལ་ནས་རང་གི་རིགས་དང་མཐུན་པའི་མཛད་པ་མཛད་ཚུལ་རྣམས་སྟོན་ཏེ་ཀུན་སྙིང་ལྟར་བྱས་སོ། །དཔལ་མཆོག་ལས་ཀྱང༌། དེ་ནས་བཅོམ་ལྡན་འདས་དེ་བཞིན་གཤེགས་པ་ངོ་བོ་ཉིད་དག་པའི་ཆོས་ཉིད་ཐོབ་པ་ཡང་
ཆོས་ཐམས་ཅད་ཀྱི་མཉམ་པ་ཉིད་སྤྱན་རས་གཟིགས་དབང་ཕྱུག་གི་ཡེ་ཤེས་ཀྱི་ཕྱག་རྒྱ་ཞེས་བྱ་བ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་ཏེ། འདོད་ཆགས་ཐམས་ཅད་རྣམ་པར་དག་པ་ཉིད་ཀྱིས་འཇིག་རྟེན་ན་ཞེ་སྡང་ཐམས་ཅད་རྣམ་པར་དག་པར་འགྱུར་རོ། །དྲི་མ་ཐམས་ཅད་རྣམ་པར་དག་པ་ཉིད་ཀྱིས་འཇིག་རྟེན་ན་སྡིག་པ་ཐམས་ཅད་རྣམ་པར་དག་པར་འགྱུར་རོ། །ཆོས་ཐམས་ཅད་རྣམ་པར་དག་པས་འཇིག་རྟེན་ན་སེམས་ཅན་ཐམས་ཅད་རྣམ་པར་དག་པར་འགྱུར་རོ། །ཤེས་པ་ཐམས་ཅད་རྣམ་པར་དག་པས་འཇིག་རྟེན་ན་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་འགྱུར་རོ། །ཞེས་པ་ནས། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དོན་གྱི་གནས་འདི་ཉིད་ཡང་རྒྱ་ཆེར་སྟོན་ཅིང་བཞིན་རབ་ཏུ་འཛུམ་དམུལ་ཏེ་པདྨའི་འདབ་མ་ཁ་འབྱེད་པས་འདོད་ཆགས་ལ་སོགས་པའི་དྲི་མས་མི་གོས་པ་ལ་ལྟ་ཞིང༌། འགྲོ་བ་ཐམས་ཅད་ཀྱི་ཕྱིར་པདྨའི་གཟུགས་སྣ་ཚོགས་ཞེས་བྱ་བའི་སྙིང་པོ་འདི་གསུངས་སོ། །ཧྲཱིཿ དེ་ནས་འདི་གསུངས་པ་ཙམ་གྱིས་པདྨ་ཆེན་པོ་དེ་ལས་དེ་བཞིན་གཤེགས་པ་ལ་སོགས་པའི་གཟུགས་ཐམས་ཅད་བཅོམ་ལྡན་འདས་དང་འདྲ་བའི་པདྨས་མཚན་པའི་གཟུགས་ཅན་ངེས་པར་བྱུང་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་གི་རིམ་པ་དང་པོའི་དཀྱིལ་འཁོར་གྱི་ཚུལ་དུ་བཞུགས་པར་གྱུར་ཏོ། །ཞེས་གསུངས་ཏེ། སྤྱན་རས་
གཟིགས། དོན་གྱི་གནས་འདི་ཉིད་ཅེས་པ་ནི། འདོད་ཆགས་རྣམ་པར་དག་པ་སོགས་གོང་གི་གཞུང་ཚན་བཞིས་བསྟན་པ་རྣམས་ཏེ། ཡང་རྒྱ་ཆེར་སྟོན་ཅིང་ཞེས་ནི་ཧྲཱིཿ ཞེས་བྱ་བའི་ཡི་གེ་སྤྲུལ་པའི་སྒོ་ནས་སླར་ཡང་སྟོན་པར་མཛད་པའོ། །འགྲོ་བ་ཐམས་ཅད་ནི་པདྨའི་རིགས་རྣམས་ཏེ། དེ་ཡོངས་སུ་རྫོགས་པར་སྐྱེད་པའི་ཕྱིར་སྙིང་པོ་འབྲུ་གཅིག་འདི་གསུངས་པའོ། །པདྨའི་གཟུགས་སྣ་ཚོགས་པ་ཞེས་པ་ནི་སྙིང་པོའི་ཡི་གེ་ཧྲཱིཿ ཞེས་པ་འདིའི་མིང་ངོ་ཞེས་དཔལ་མཆོག་འགྲེལ་ཆེན་ལས་སོ། །པདྨའི་གཟུགས་སྣ་ཚོགས་ཞེས་བྱ་བའི་སྙིང་པོ་ཞེས་པ་འདི་ལ་ཤེར་དུམ་གྱི་འགྲེལ་པར། ཀུན་སྙིང་གི་འགྲོ་བ་ཐམས་ཅད་ཀྱི་གཟུགས་སུ་སྣང་བས་ན་གཟུགས་སྣ་ཚོགས་དང༌། དེ་ལྟར་སྣང་ཡང་འཁོར་བའི་ཉེས་པ་རྣམས་ཀྱིས་མི་གོས་པས་ན་པདྨ། དེ་འདྲའི་སྙིང་པོ་དངོས་ནི་གཟུགས་ཐམས་ཅད་ངེས་པར་སྟོན་པའི་ཡེ་ཤེས་ཉིད་ཡིན་ཡང༌། དེ་མཚོན་པར་བྱེད་པའི་ཧྲཱིཿ ཡིག་ལ་བཏགས་ནས་བསྟན་གསུངས། འདི་གསུངས་པ་ཙམ་གྱིས་སོགས་ནི། སྙིང་པོ་འདིའི་མཐུས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་ལ་སོགས་པ་ཐམས་ཅད་པདྨའི་རིགས་ཀྱི་རྣམ་པར་གྱུར་ནས་འཕགས་པ་སྤྱན་རས་གཟིགས་ཀྱི་ཕྱག་མཚན་པདྨོ་ལས་བྱུང་ཞེས་པདྨའི་རིགས་སྤྲོ་བྱེད་དུ་གསུངས་པའོ། །མན་སྙེ་ལས། ཧྲཱིཿནི་གསལ་བར་གྱིས་ཤིག་པ་སྟེ། ཉེ་བ་མ་
ཡིན་པ་ཉེ་བར་གྱུར་པ་གསལ་པོར་གྱིས་ཤིག་པའོ། །ཞེས་སྐབས་གཞན་དུ་བཤད་དེ། ཤེར་ཕྱིན་གྱི་ས་བོན་ཡིན་པ་དང༌། གསལ་བར་བྱེད་པ་ལ་སྦྱར་བ་གཉིས་གནད་འདྲ་བར་མཐོང་ཞེས་དམ་པ་དག་འཆད། དེ་དཔལ་མཆོག་དང་བསྒྲིགས་ན། པདྨ་ལྟ་བུ་གོས་པ་མེད་པའི་ཤེར་ཕྱིན་གྱི་རིགས་ཀྱི་གཟུགས་སྣ་ཚོགས་གསལ་བར་གྱིས་ཞེས་པར་བཤད་དགོས་པ་འདྲ། གྲོལ་ཐིག་གཏེར་གཞུང་དུ་ཆོས་ཀྱི་དབྱིངས་ཀྱི་མཐའ་དང་དབུས་མེད་པར་སྟོན་པར་བྱེད་པའི་ཡི་གེ་ཧྲཱིཿ ཞེས་པ་ལྟར་ན། རྒྱུད་བླ་མར། གཞལ་མེད་གྲངས་མེད་མི་མཉམ་དང་སོགས་ངོ་བོ་ཉིད་སྐུ་ཁྱད་པར་ལྔ་ལྡན་དུ་གསུངས་པ་ལྟར། ཤེར་ཕྱིན་གྱི་མཐུས་ཆོས་ཀྱི་དབྱིངས་ཀྱི་གཏིང་གཡོགས་པ་ཐམས་ཅད་དང་བྲལ་བའི་ཚུལ་གྱིས་ས་ལེར་གསལ་བར་གྱིས་ཤིག་ཅེས་འཆད་ཚུལ་ཡང་ཡོད་དམ་སྙམ། གཡུང་དྲུང་འཁྱིལ་བ་གསུམ་གྱི་ཞལ་གདམས་དང༌། དོ་ཧ་སྐོར། ཡེ་ཤེས་འོད་མཆོག་གི་བཤད་ཚུལ་གཞན་དུ་ལྟོས། ༈ ཡིག་དྲུག་གི་སྔགས་དོན་ལ། ཨོཾ་ཨ་ཨུ་མ་གསུམ་གྱིས་སྐུ་གསུང་ཐུགས་གསུམ་མཚོན་ལ། དེ་གསུམ་གཅིག་ཏུ་སྦྱར་བའི་ཨོཾ་ཡིག་གིས་རྡོ་རྗེ་གསུམ་དབྱེར་མེད་པའི་གོ་འཕང་མཚོན་ཏེ། སྔགས་དོན་དེ་ལྟར་དྲན་ནས་བརྗོད་པས་མཆོག་སྩོལ་ཞིང་བསོད་ནམས་ལེན་པའི་ཕྱིར་ནོར་བུ་འཛིན་པ་ཞེས་རྡོ་རྗེ་རྩེ་མོར་རོ། །དེ་ནས་ནི། རྡོ་རྗེ་གུར་གྱི་ལེའུ་བཅོ་ལྔ་པར་ཡིག་དྲུག་འདི་ནད་
ཐམས་ཅད་ཞི་བར་བྱེད་པའི་སྔགས་སུ་གསུངས་པའི་འགྲེལ་པར་ལྷའི་རིགས་ཀྱི་བློ་གྲོས་ཆེན་པོས། མ་ཎི་ཞེས་བྱ་བ་ནི་ཤིན་ཏུ་རིན་ཐང་མེད་པའི་ནོར་བུ་དང་འདྲ་བའི་སོ་སོར་རྟོག་པའི་ཡེ་ཤེས་སོ། །ཅི་སྟེ་ཡེ་ཤེས་སོ་སོར་རྟོག་པ་ཡིན་ན་རྟོག་པ་དང་བཅས་པར་མི་འགྱུར་རམ་ཞེ་ན། པདྨ་ཞེས་བྱ་བ་སྨོས་ཏེ་ཇི་ལྟར་པདྨ་འདམ་གྱིས་མ་གོས་པ་ལྟར་ཡེ་ཤེས་དེ་རྟོག་པའི་སྐྱོན་གྱིས་གོས་པ་མེད་དོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་ཧཱུྃ་ཕཊ་ཅེས་བྱ་བ་སྨོས་ཏེ། ཧཱུྃ་ཞེས་བྱ་བ་ནི་གཟུང་བ་དང་འཛིན་པས་སྟོང་པའི་ཡིད་དོ། །ཕཊ་ཅེས་བྱ་བ་ནི་རྣམ་པར་རྟོག་པ་འདྲལ་བའོ། །ཞེས་གསུངས་ཏེ། སོར་རྟོག་ཡེ་ཤེས་ནོར་བུའི་རྒྱལ་པོ་དང་འདྲ་ཚུལ་ནི། མདོ་རྒྱན་ལས་སོ་སོར་རྟོག་པའི་ཡེ་ཤེས་ནི། །ཤེས་བྱ་ཀུན་ལ་རྟག་མི་ཐོགས། །ཏིང་ངེ་འཛིན་དང་གཟུངས་རྣམས་ཀྱི། །གཏེར་དང་འདྲ་བ་ཁོ་ན་ཡིན། །འཁོར་གྱི་དཀྱིལ་འཁོར་རྣམས་སུ་ནི། །འབྱོར་པ་ཐམས་ཅད་སྟོན་མཛད་པ། །ཐེ་ཚོམ་ཐམས་ཅད་གཅོད་བྱེད་པའི། །ཆོས་ཆེན་ཆར་ནི་རབ་ཏུ་འབེབས། །ཞེས་འཕགས་པ་སངས་རྒྱས་ཀྱིས་ལ་བརྟེན་ནས་བཤད་དོ། །ཡེ་ཤེས་དེ་སོ་སོར་རྟོག་པ་ཡིན་ན། རྣམ་པར་མི་རྟོག་པའི་ཡེ་ཤེས་སུ་མི་འཐད་དོ་ཞེ་ན། པདྨ་འདམ་ལས་སྐྱེས་ཀྱང་ཆུ་ཞག་དང་ཉ་ལྕིབས་སོགས་འདམ་གྱི་ཉེས་པ་རྣམས་ཀྱིས་མ་སྦགས་པ་ལྟར། ཡེ་ཤེས་དེ་མིང་ཚིག་ཡི་གེའི་རྣམ་པ་ཅན་གྱི་རྟོག་པ་ཡོངས་སུ་
གྱུར་པ་ལས་སྐྱེས་ཀྱང༌། ཕྱིན་ཅི་ལོག་གི་ཆ་ཐམས་ཅད་ལོག་པའི་ཕྱིར་གཉིས་སྣང་འཁྲུལ་པའི་རྟོག་པ་གཏན་མིན་ཞེས་པ་སྟེ། རྟོག་པ་ནི་མི་གསལ་བ་སྟེ། འདམ་གྱིས་སྦགས་པའི་ནག་ནོག་ཏུ་འགྱུར་བ་དང་འདྲའོ། །ཡེ་ཤེས་འདི་ནི་སོར་རྟོག་ཡིན་ཡང་ཤེས་བྱ་ཐམས་ཅད་མངོན་སུམ་དུ་བལྟ་བ་ལ་བཟང་ཞིང་ཤིན་ཏུ་གསལ་བའི་ཡོན་ཏན་གྱིས་མཛེས་པའམ། འཁྲུལ་པའི་བག་ཆགས་ཀྱི་གཉིད་མ་ལུས་པ་སད་པས་ཤིན་ཏུ་རྒྱས་ཤིང་ཁ་ཕྱེ་བས་ན་པདྨ་ལྟ་བུར་བཤད་ཅེས་འཆད་དམ་བརྟགས། མཆན། སངས་རྒྱས་ལ་ཞེན་རིག་གི་རྟོག་པ་གཏན་མེད་ཀྱང༌། ཐ་སྙད་བྱེད་པའི་བློ་རིག་ཡོད་དགོས་ཏེ། སོ་རིག་བཞིས་ཤེས་པའི་ཕྱིར་རོ། །དེས་ན་གཉིས་སྣང་གི་འཁྲུལ་པའི་རབ་རིབ་མཐའ་དག་དང་བྲལ་བའི་སོ་སོར་རྟོག་པའི་སྤྱན་ཤིན་ཏུ་གསལ་བ་ཡིན་ཞེས་ཧཱུྃ་གིས་བསྟན་ཏོ། །འདི་ལྟར་ན་སོར་རྟོག་ཡེ་ཤེས་གཅིག་པོ་དེ་གདུལ་བྱའི་བསམ་པ་རྫོགས་པར་མཛད་པའི་ཆ་ནས་ནོར་བུ་དང༌། དེ་ཉིད་གདུལ་བྱའི་བསམ་པ་ཐ་དད་པ་དང༌། དེ་ལ་ཇི་ལྟར་འཚམས་པའི་ཆོས་ཀྱི་ལོངས་སྤྱོད་སྣ་ཚོགས་པ་ཐམས་ཅད་མ་འཛིང་བར་འབྱེད་པའི་སོར་རྟོག་ཡིན་ཡང༌། རྟོག་པའི་སྐྱོན་གྱིས་མ་གོས་པར་མི་འགལ་བའི་ཆ་ནས་པདྨ་སྟེ་གཉིས་ཀར་འཇོག་པར་གསལ་ལོ། །ད་དུང་གོ་བདེ་བར་བཤད་ན། སོར་རྟོག་ཡེ་ཤེས་ནི་རྣམ་པར་རྟོག་པ་མེད་པའི་ཕྱིར་དང༌། འགྲོ་བའི་རེ་བ་སྐོང་བའི་མཐུ་ཕུལ་དུ་བྱུང་བའི་ཕྱིར་མ་ཎི་སྟེ་ནོར་བུའི་རྒྱལ་པོའོ། །དེ་རྣམ་རྟོག་མེད་པར་མི་འཐད་དེ། སོར་རྟོག་ཡིན་པའི་ཕྱིར་རོ་ཞེ་ན།
དེ་རྟོག་པ་ལས་སྐྱེས་ཀྱང༌། རྟོག་པའི་དྲི་མས་མ་བསླད་པར་སྐྱེས་ཏེ། པདྨ་འདམ་ལས་སྐྱེས་ཀྱང་འདམ་གྱི་ཉེས་པས་མ་གོས་བར་སྐྱེ་བ་བཞིན་ནོ། །དེར་མ་ཟད་སོར་རྟོག་དེ་ཉིད་ཀྱི་མཐུས་གཟུང་འཛིན་འཁྲུལ་པའི་གཡེང་བའི་གནས་ངན་ལེན་གྱི་ཆ་མ་ལུས་པ་འཇོམས་ཤིང་འགོག་པས་ན་ཧཱུྃ་ཞེས་སོ། །བདེ་ཆེན་ཤེས་རབ་སྙིང་རྗེ་མཆོག །ཅེས་པའི་སྒྲུབ་ཐབས་སུ་དཔལ་མི་ཏྲ་ཛོ་ཀིས་ནི། ཨོ་མ་ཎི་ཧཱུྃ། ཤེས་རབ་ཆེན་པོ་དྲི་མ་མེད། །རྣམ་པར་ཤེས་ཀུན་མཚན་ཉིད་དེ། །མ་སྐྱེས་མི་གནས་འགག་པ་མེད། །གདོད་ནས་རྣམ་གྲོལ་མངོན་སུམ་པ། །ཨོཾ་ཨཱ་ཧྲཱི་པདྨེ་ཧཱུྃ། །སྙིང་རྗེ་ཆེན་པོ་ལྷུན་གྱིས་གྲུབ། །དམིགས་པ་ཀུན་གྱི་མཚན་ཉིད་དེ། །མི་ཕྱེད་མི་འགྱུར་འབྲལ་བ་མེད། །སྐྱོ་མེད་རེ་བ་རྣམ་སྤངས་པའོ། །ཞེས་བཤད་དེ། མ་ཎི་ནི་ཤེས་རབ་ཀྱི་ཕར་ཕྱིན་ཏེ་རྣམ་རྟོག་མེད་ཅིང༌། མཐུ་བསམ་གྱིས་མི་ཁྱབ་པའི་ཕྱིར་རོ། །པདྨ་ནི་སྙིང་རྗེ་ཆེན་པོ་སྟེ། །འདམ་རྫབ་ལྟ་བུའི་འཁོར་བ་ལ་བརྟེན་ནས་སམ་དམིགས་ནས་སྐྱེ་བ་དང༌། སེམས་ཅན་ཐམས་ཅད་དགའ་བར་བྱེད་པའི་ཕྱིར་རོ། །དེའང་བྱང་སེམས་ཀྱི་མཉམ་བཞག་ཏུ་ནི་སྙིང་རྗེས་ཟིན་པའི་ཤེས་རབ་མངོན་གྱུར་དུ་འཇུག་སྟེ་སྤང་བྱ་དངོས་སུ་སྤོང་བ་སོགས་ལ་འདི་ཁོ་ན་དགོས་ཤིང་སྙིང་རྗེའི་མཐུ་དང་བྱེད་ལས་གཞན་ཡང་དེ་ལ་ཡོད་དོ། །རྗེས་ཐོབ་ཏུ་ནི་ཤེས་རབ་ཀྱིས་ཟིན་པའི་སྙིང་རྗེ་སྟེ། དམིགས་མེད་ཀྱི་སྙིང་རྗེ་ཆེན་པོ་མངོན་དུ་འགྱུར་ཏེ། གཞན་དོན་གྱི་བྱ་བ་དངོས་སུ་སྒྲུབ་པ་
སོགས་ལ་འདི་ཁོ་ན་དགོས་ཤིང༌། ཤེས་རབ་ཀྱི་མཐུ་དང་བྱེད་ལས་གཞན་ཡང་དེ་ལ་ཡོད་དོ། །སངས་རྒྱས་ཀྱི་ས་ན་ནི་དེ་གཉིས་ཀ་བློ་གཅིག་ལ་མངོན་གྱུར་དུ་ལྡན་པས་སྲིད་ཞིའི་མཐའ་གཉིས་ལ་མི་གནས་པའི་བྱང་ཆུབ་ཅེས་བརྗོད་པ་ཡིན་ཏེ། འདི་དག་ནི་ལམ་དང་འབྲས་བུའི་དུས་ཀུན་ཏུ་མ་ཎི་དང་པདྨེ་གཉིས་མི་འབྲལ་བར་ཕན་ཚུན་གྲོགས་སུ་འཇུག་པའི་ཚུལ་ལོ། །ཐེག་ཆེན་གྱི་བསམ་སྦྱོར་གཉིས་ལས་བསམ་པ་སྙིང་རྗེ་ཆེན་པོ་པདྨེ་དང༌། སྦྱོར་བའམ་སྤྱོད་པའི་གཙོ་བོ་དང་རབ་མཆོག་ཤེར་ཕྱིན་མ་ཎིར་བཞག་པས། རྡོ་རྗེ་རྒྱལ་མཚན་གྱི་བསྔོ་བ་དང་ས་བཅུ་པར་བཤད་པའི་སྨོན་ལམ་འབུམ་ཕྲག་གྲངས་མེད་བཅུ་སོགས་པདྨེར་སྡུད་ཅིང༌། སྦྱིན་སོགས་ཕར་ཕྱིན་སྔ་མ་ལྔ་མ་ཎིར་བསྡུ་བ་འདྲ། ཕྱི་མ་ཅུང་ཟད་བཤད་ན། དཔེར་ན་མ་རིག་པ་ནི་མ་འདྲེས་པའི་མ་རིག་པ་ཙམ་དུ་མ་ཟད་ཀྱི། ཆགས་སོགས་ཉོན་མོངས་པའི་སྒོ་སྣ་ཚོགས་དང་བསྡོང་ནས་ཕྱི་ཕྱིར་སྟོབས་རྒྱས་པར་འགྱུར་བས། ཆགས་སོགས་དེ་དག་ནི་མ་རིག་པའི་དཔུང་གྲོགས་སོ། །དེ་བཞིན་དུ་ཤེར་ཕྱིན་ཡང་རང་རྐྱང་ཙམ་སྒོམ་པ་མིན་གྱི། སྦྱིན་སོགས་རྒྱ་ཆེ་བའི་སྤྱོད་ཕྱོགས་ཐམས་ཅད་དེས་མ་ཟིན་པ་མེད་པར་བྱས་ཏེ་སྦྱངས་པས། སྒོ་སྣ་ཚོགས་ཤིག་ནས་ཤེར་ཕྱིན་སྟོབས་རྒྱས་པར་འགྱུར་ཏེ། དེས་ན་རྣམ་ཀུན་མཆོག་ལྡན་གྱི་སྟོང་ཉིད་ཅེས་རི་མོ་མཁན་དུ་མས་འཁོར་སྒྱུར་གྱི་གཟུགས་གཅིག་འདྲི་བའི་དཔེས་མདོ་དང་རྒྱུད་བླ་མར་བཤད་པའི་
རིགས་པས་མཚན་ཉིད་ཡོངས་སུ་རྫོགས་པའི་ཤེར་ཕྱིན་གྱི་རྟོགས་པ་རྙེད་པ་ནི་ཚོགས་མཐའ་ཡས་པ་ལ་ལྟོས་པས་ཚོགས་དེ་དག་ནི་དེའི་དོན་དུ་གསུངས་སོ། །རྐང་པ་གཉིས་པ་གཉིས་ཀྱི་དོན་ནི། མ་ཎིར་འཇོག་རྒྱུའི་ཤེས་རབ་ཏེ་ཤེས་པ་རྣམ་པར་དག་པ་རང་དོན་ཕུན་ཚོགས་ཟབ་པ་ཡེ་ཤེས་ཆོས་སྐུའི་ངོ་བོ་ཉིད་དང༌། པདྨེར་འགྲོ་རྒྱུའི་སྙིང་རྗེ་དེ་དམིགས་པའམ་ཤེས་བྱ་རྣམ་པར་དག་པ་གཞན་དོན་ཕུན་ཚོགས་རྒྱ་ཆེ་བ་གཟུགས་སྐུའི་མཚན་ཉིད་དམ་འཇོག་བྱེད་ཡིན་པ་སྟེ། དེ་ལྟར་ན་སྔར་ཕྱག་མཚན་ཐད་དུ་བརྗོད་པ་ལྟར་བྱས་ཀྱང་འགྲིགས་པ་ཡོད། དེའང་ཐེག་ཆེན་གཉིས་ཀྱི་ཐུན་མོང་ལྟར་ཡིན་ལ། ད་དུང་བརྒྱུད་པའི་ཟབ་རྒྱ་ཆེའི་ལམ་གཉིས་སྒྲུབ་ཚུལ་ནས། སྔགས་བླ་མེད་པའི་འོད་གསལ་དང༌། ཤེས་བྱ་ཡེ་ཤེས་ཀྱི་སྐུ་སྒྲུབ་ལུགས་ཀྱི་བར་སོ་སོར་སྦྱར་ནས་བཤད་ན་རླབས་ཆེའོ། །པདྨ་ཞེས་བྱ་རྒྱུ་ལ། པདྨེ་ཞེས་སྦྱར་བ་ནི་བོད་པའི་དོན་ཏེ། ནོར་བུ་པདྨ་ཞེས་སྤྱན་རས་གཟིགས་ལ་ཉེ་བའི་སྒོ་ནས་བོད་པའི་དོན་ཡིན་པས་འཕགས་པའི་ཐུགས་རྒྱུད་རང་ལ་ཉེ་ལྷང་བ་ལྟ་བུར་ཡོད་པར་བསྒོམ་ལ་བཟླ་ཞེས་རྒྱལ་དབང་དགེ་འདུན་རྒྱ་མཚོས་བཤད། །ཡང་སྒྲུབ་ཐབས་དེ་ཉིད་ལས། རྣལ་འབྱོར་རྒྱལ་པོ་ཤེས་རབ་ཐབས། །རིག་འཛིན་དཀྱིལ་འཁོར་བླ་ན་མེད། །དཔལ་ལྡན་ཕ་རོལ་ཕྱིན་དྲུག་དངོས། །ཆོ་གའི་དམ་པ་འདི་གསུངས་སོ། །ཨོཾ་མ་ཎི་པདྨེ་ཧཱུྃ། གསང་སྔགས་རྒྱལ་པོ་ཡི་གེ་དྲུག །ལུགས་འབྱུང་བ་དང་ལུགས་ལྡོག་ལས། །རྒྱུད་དྲུག་འགོག་དང་ལམ་དྲུག་སྦྱོང༌། །
འབྲས་བུ་དྲུག་ལ་རབ་སྦྱོར་ཉིད། །དེ་བཞིན་རྒྱུད་དྲུག་བསྐྱེད་པ་དང༌། །ལམ་དྲུག་ལ་ནི་སྦྱོར་བ་དང༌། །འབྲས་བུ་དྲུག་ནི་མངོན་དུ་བྱ། །གཟི་བརྗིད་དྲུག་པ་ཞེས་བཤད་དོ། །ཞེས་ཡི་གེ་དྲུག་པོ་ཕ་རོལ་ཏུ་ཕྱིན་པ་དྲུག་གི་ངོ་བོ་ཉིད་དང༌། འགྲོ་བ་དྲུག་སྦྱོང་བྱེད་སོགས་སུ་གསུངས་ཏེ། འདི་ནི་སྲོང་བཙན་བཀའ་འབུམ་དང་བཀའ་གདམས་གླེགས་བམ་སོགས་སུའང་བཤད་དོ། །སྲོང་བཙན་བཀའ་འབུམ་ན་གཞན་ཡང་རྡོ་རྗེ་དང་རིན་པོ་ཆེ་ལ་སོགས་པ་རིགས་ལྔ་རིགས་ཐམས་ཅད་བསྡུས་པ་དང་བཅས་པའི་དྲུག་གི་ངོ་བོར་སྦྱོར་ཚུལ་དང༌། ཡེ་ཤེས་ལྔ་ལྷན་སྐྱེས་ཡེ་ཤེས་དང་དྲུག་ལ་སྦྱར་བ་དང༌། སྐུ་གསུང་ཐུགས་ཡོན་ཏན་ཕྲིན་ལས་ལྔའི་བྱིན་རླབས་སོ་སོར་འབེབས་པ། བྱིན་རླབས་ཐམས་ཅད་ཐོགས་མེད་དུ་འབྱུང་བ་དང་བཅས་པའི་དྲུག་ལ་སྦྱར་བ་དང༌། དུག་ལྔ་ཉོན་མོངས་སྤྱི་དང་དྲུག་སྦྱོར་བྱེད་དུ་སྦྱར་བ། འབྱུང་བ་ལྔ་སོ་སོ་དང༌། ཐམས་ཅད་འདུས་པ་སྟེ་དྲུག་ལ་སྦྱར་བ་སོགས་ཆེས་མང་དུ་གསུངས་ཤིང༌། ཕྱིན་དྲུག་དང་སྦྱོར་ཚུལ་ལ་ཡང་ཨོཾ་སྦྱིན་པ་ནས་ཧཱུྃ་ཤེས་རབ་ཀྱི་བར་གོ་རིམ་བཞིན་དུ་སྦྱར་བ་དང༌། ཨོཾ་ཤེས་རབ། མ་བསམ་གཏན། ཎི་ཚུལ་ཁྲིམས། པད་བརྩོན་འགྲུས། མེ་སྦྱིན་པ། ཧཱུྃ་བཟོད་པ་དང་སྦྱར་ཏེ་བསྟན་པ་སོགས་ཡོད་དེ་དེ་ཉིད་དུ་བལྟ་བར་བྱའོ། །ལྷན་སྐྱེས་རོལ་པས་མཛད་པའི་སྒྲུབ་ཐབས་སུ། སངས་རྒྱས་ཐམས་ཅད་ཀྱི་སྙིང་པོ་རྟོག་པའི་སྔགས་ཀྱི་རྒྱལ་པོ་ཡིད་བཞིན་གྱི་ནོར་བུ་འདི་མཚན་མ་མེད་
པའི་སྦྱོར་བས་བལྟ་ཞིང་བཟླས་པ་བྱའོ། །ཨོཾ་མ་ཎི་པདྨེ་ཧཱུྃ་ཞེས་སོགས་རྒྱ་གཞུང་རྣམས་ལས་ཡིག་དྲུག་ཁོ་ན་འབྱུང་ཡང༌། བྱང་གཏེར་ལས། ཕྱི་ནི་སྲོག་སྦས་ཞི་བའི་ཚུལཿ ཡི་གེ་དྲུག་པ་རྡོ་རྗེའི་སྒྲཿ ཞེས་པ་ནས། གསང་བ་སྲོག་གི་མཐའ་རྟེན་ཅནཿ སྙིགས་མའི་དུས་སུ་སྲོག་མཐར་རྟེནཿ ཞེས་གསུངས་ཏེ། སྤྱིར་ཡིག་དྲུག་རང་ཡང་ཐུགས་སྲོག་བསྐུལ་བའི་སྔགས་ལས་མ་འདས་མོད། འོན་ཀྱང་སྐུལ་བྱེད་ཡིག་དྲུག་དང༌། བསྐུལ་བྱ་སྲོག་ཡིག་གཉིས་ཀ་དངོས་སུ་སྦྲེལ་ནས་བཟླས་ན་ཐུགས་གནད་ནས་བསྐུལ་བ་ལ་ལྷག་པར་རྣོ་བས་སྔགས་འགྲུབ་པར་དཀའ་བའི་དུས་སུ་འདི་གཙོ་བོར་བཟུང་ཞེས་པ་ཡིན་ནམ་དཔྱོད། ༈ །དེ་ཉིད་སྣང་ཆེན་དང་དཔལ་མཆོག་འགྲེལ་པར། སེམས་ཅན་གཏི་མུག་ཤས་ཆེ་བ་རྣམས་སྦྱོང་བྱེད་དུ་ཤེས་རབ་ཀྱི་ཕར་ཕྱིན་འཇིག་རྟེན་དབང་པོའི་དཀྱིལ་འཁོར་དུ་སྤྲུལ་པར་གསུངས་པ་དང༌། རང་བཞིན་དག་པའི་ཆོས་ལ་སོར་རྟོག་ཡེ་ཤེས་ཀྱི་སྤྱན་གྱིས་གཟིགས་པའི་ཆ་ནས་སྤྱན་རས་གཟིགས་སུ་བརྗོད་ཚུལ་དང༌། སྒྱུ་མ་ལྟ་བུའི་ཏིང་ངེ་འཛིན་གྱི་མདོ་དང་དོན་ཞགས་སོགས་མང་པོར་སྒྱུ་མ་ལྟ་བུའི་ཏིང་ངེ་འཛིན་གྱི་སྒོས་ལྷར་བསྔགས་པ་དང༌། རྣམ་སྣང་མངོན་བྱང་དང་ཡོ་ག་དང་བླ་མེད་རྒྱུད་ཀུན་ཏུ་སོར་རྟོག་ཡེ་ཤེས་ཀྱི་ལྷ་མཐར་ཐུག་ཏུ་བཤད་ཅིང་ཡེ་ཤེས་དེ་སྔོན་ཆོས་བསྟན་པའི་རྒྱུ་ལས་བྱུང་བ་དང༌། ཆོས་ཀྱི་ལོངས་
སྤྱོད་རྒྱས་པའི་བྱེད་ལས་ཅན་དུ་མདོ་རྒྱན་ལས་གསུངས་པ་དང༌། གསང་འདུས་སོགས་ལས་འདི་ཉིད་རྡོ་རྗེ་སེམས་དཔའི་ལྗགས་ལྷའི་གཟུགས་སུ་ཤར་བར་གསུངས་ཏེ་ལྗགས་ནི་གསུང་རབ་ཐམས་ཅད་ཀྱི་བདག་པོ་ཡིན་ཚུལ་བསྔགས་འོས་བསྔགས་བསྟོད་ཀྱི་བཅུ་གཅིག་པ་ལྟར། དེ་སོགས་མང་པོས་དཔྱད་ན་འཕགས་པ་འདི་བློ་འཕེལ་གྱི་ལྷ་ཕུལ་དུ་བྱུང་བ་ཡིན་ཞིང༌། རྡོ་རྗེ་སྙིང་པོ་རྒྱན་ལས། འཇིག་རྟེན་གསུམ་གྱི་རྒྱལ་སྲིད་ནི། །སོགས་དང༌། བཤེས་སྤྲིང་ལས། འཇིག་རྟེན་ཀུན་གྱི་རྣལ་འབྱོར་དབང་མཛད་ནས། །ཞེས་པ་རྩ་འགྲེལ་དང༌། ཡོ་གའི་མཁས་པ་གསུམ་གྱིས་པདྨའི་དེ་ཉིད་ལ་གཟིགས་པས་ཁམས་གསུམ་གྱི་དབང་པོ་བརྙེས་ཚུལ་རྒྱ་ཆེར་བཤད་པ་སོགས་དབང་བྱེད་ཀྱི་ལྷར་བསྔགས་པའི་མཚོན་བཤད་རྒྱུ་མང་ཡང༌། སྒྲུབ་ཐབས་ཕལ་ཆེར་ལས་སྙིང་རྗེའི་ལྷར་བསྔགས་པ་ཤས་ཆེ། དབང་བྱེད་ཀྱི་ལྷར་བསྔགས་པ་ཡང་ཕུག་གཏུགས་ན་འདི་དང་གཅིག་དེ་ཡང་ཟ་མ་ཏོག་བཀོད་པར་འཕགས་པ་འདིའི་རྣམ་ཐར་ཐམས་ཅད་སེམས་ཅན་སྡུག་བསྔལ་བ་རྣམས་ལ་རྗེས་བརྩེ་མཛད་ཚུལ་འབའ་ཞིག་གི་སྟེང་ནས་གསུངས་ཤིང༌། སྡོང་པོ་བཀོད་པར། བདེ་གཤེགས་སྲས་པོ་ངས་ནི་རྣམ་ཐར་གཅིག་བསྒོམས་ཏེ། །ཡེ་ཤེས་སྙིང་པོ་རྒྱལ་བ་ཀུན་གྱི་ཐུགས་རྗེ་སྡུག །འགྲོ་བ་ཐམས་ཅད་བསྐྱབ་ཅིང་ཡོངས་སུ་བསྡུ་ཕྱིར་བྱུང༌། །ཞེས་སོགས་རྒྱ་ཆེར་གསུངས་པ་དང༌།
ཆོས་ཡང་དག་པར་སྡུད་པའི་གོང་འོག་གཉིས་སུ་རྗེ་བཙུན་འདིས་སྟོན་པའི་སྤྱན་སྔར་རང་གི་རྟོགས་པ་བརྗོད་པ་ན་སྙིང་རྗེ་ཆེན་པོ་ཉིད་ཀྱི་སྟེང་ནས་བརྗོད་པ་དང༌། ༈ །སྤྱོད་འཇུག་ཏུ་བདག་གཅེས་འཛིན་གོམས་པའི་དབང་གིས་རང་ལ་མི་སྙན་པ་ཆུང་ངུའང་མི་བཟོད་པ་ལྟར། བརྩེ་བ་གོམས་པའི་ཤུགས་རྒྱས་པ་ན་གཞན་གྱི་མི་བདེ་བ་ཕྲ་མོ་ཡང་མི་བཟོད་པའི་དཔེར་རྗེ་བཙུན་འདིའི་རྣམ་ཐར་དྲངས་ཏེ། དེ་བས་ཇི་ལྟར་སོགས་ནས། མཚན་ཡང་བྱིན་གྱིས་བརླབས། ཅེས་པའི་བར་རོ། །མཆན། །སྙིང་རྗེ་པད་དཀར་ལས་སྤྱན་རས་གཟིགས་ཞེས་པའི་མཚན་འདི་ཡང་སྙིང་རྗེ་ཆེན་པོའི་ཡོན་ཏན་གྱི་སྒོ་ནས་སྔོན་གྱི་སངས་རྒྱས་ཀྱིས་བཏགས་པར་གསུངས་པ་དང༌། ལག་ན་རྡོ་རྗེ་དབང་བསྐུར་གྱི་གླེང་གཞིར་སངས་རྒྱས་འོད་དཔག་མེད་ཀྱིས་རྗེ་བཙུན་ལ་དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོའི་སྟོབས་ཀྱི་རྡོ་རྗེ་པདྨའི་མཆོག་གི་སྙིང་པོ་བྱིན་ནས་གཞི་དང་སྙིང་པོ་མེ་ཏོག་གི་རྒྱན་བཀོད་པའི་ཞིང་འདི་ལུས་ཀྱི་སྤྲིན་རྣམས་ཀྱིས་བཀང་ནས་སྣང་བར་བྱེད་དུ་བཏང་བར་གསུངས་པ་དང༌། དེ་ཉིད་བསྡུས་པར་བདག་ཅག་གི་སྟོན་པ་རྣམ་སྣང་ཉིད་སྙིང་རྗེའི་ཉམས་ཀྱིས་འདུལ་བའི་སེམས་ཅན་གདུལ་ཕྱིར་འཕགས་པ་སྤྱན་རས་གཟིགས་ཀྱི་སྐུར་བསྟན་པར་འགྲོ་བ་འདུལ་བའི་དཀྱིལ་འཁོར་གྱི་ཐད་དུ་གསུངས་པ་དང༌། སྤྱན་རས་གཟིགས་ཞེས་པའི་སྒྲ་བཤད་ཀྱང་སོར་རྟོག་ཡེ་ཤེས་ཀྱི་སྤྱན་གྱིས་རང་བཞིན་དག་པའི་ཆོས་ལ་རྟག་ཏུ་གཟིགས་
པ་དང༌། ཐུགས་རྗེ་ཆེན་པོའི་སྤྱན་གྱིས་འཇིག་རྟེན་ཐམས་ཅད་ལ་གཟིགས་པ་ལྷུར་ལེན་པའི་ཕྱོགས་ནས་བཤད་ཚུལ་གཉིས་དེ་ཉིད་སྣང་ཆེན་དང༌། ཀོ་ས་ལའི་རྒྱན། དཔལ་མཆོག་འགྲེལ་ཆེན་རྣམ་སྣང་མངོན་བྱང་གི་འགྲེལ་པ་རྣམས་སུ་གསུངས་པའི་ཕྱི་མ་དང༌། ལེགས་གྲུབ་ཏུ་ཡང༌། སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་བསགས་པ། །སྤྱན་རས་གཟིགས་ཞེས་མཚན་གསོལ་བ། །རྟག་པར་བརྩེ་ལ་ཕྱག་འཚལ་ལོ། །ཞེས་སོགས་མཐའ་ཡས་སོ། །རི་དྭགས་་པགས་པས་ནུ་གཡོན་བཀབ་པར་བཤད་པའང་དེ་ལྟར་ཡིན་ཏེ། དབུ་མ་སྙིང་པོར། སྙིང་རྗེའི་པགས་པ་གནག་འཆང་ཞིང༌། ཞེས་པར་འདྲའོ། །འདིར་ལམ་གྱི་གཙོ་བོ་སྙིང་རྗེ་ཆེན་པོར་བྱེད་པའི་རྒྱུ་མཚན་ཡང༌། མདོ་སྔགས་ཁྱད་འབྱེད་སྐབས་གཞན་དོན་བཟོ་ཁོག་དང༌། རྫོགས་བྱང་སྒྲུབ་པའི་ལམ་ཐམས་ཅད་དེའི་ཆ་ལག་ཏུ་བྱེད་པ་ལ་ཐེག་ཆེན་གཉིས་འདྲ་བར་བཤད་པ་བཞིན། ཚུལ་ཁྲིམས་ཏིང་འཛིན་ཤེས་རབ་གཟུངས་སྤོབས་མངོན་ཤེས་སོགས་ཡོན་ཏན་ཐམས་ཅད་སྙིང་རྗེ་ཆེན་པོའི་བཞེད་དོན་སྒྲུབ་བྱེད་ཀྱི་འཁོར་ཁོ་ནར་ཟད་པས། རིན་ཆེན་བདུན་གྱི་བདག་པོ་འཁོར་སྒྱུར་ཡིན་པ་ལྟར། ཡོན་ཏན་དེ་ཐམས་ཅད་ཀྱི་རྩ་བའི་སྙིང་རྗེ་ཆེན་པོ་ཡིན་ནོ། །དེའི་ཕྱིར་སངས་རྒྱས་ཀྱི་སའི་ཡོན་ཏན་ཐམས་ཅད་ཀྱི་གཙོ་བོའམ་བདག་པོའང་སྐྱེ་ལ་ཐུགས་
རྗེ་ཆེན་པོ་ཡིན་ཏེ། འབྲས་དུས་ཀྱི་རྣམ་གཞག་མང་པོ་སྔོན་གྱི་རྗེས་སུ་འབྲངས་པའི་སྒོ་ནས་བྱེད་པར་གསུངས་པ་བཞིན་ནོ། །དེའང་སློབ་ལམ་དུ་སྙིང་རྗེ་ཆེན་པོ་དེ་ཐེག་གསུམ་གྱི་རྟོགས་རིགས་མཐའ་དག་དང་འབྲེལ་བར་སྦྱངས་པའི་མཐར་སོན་པ་ན་བརྩེ་ཆེན་གྱི་བློ་མངོན་གྱུར་པ་དེ་ཉིད་ལམ་གྱི་རྣམ་པ་མ་ལུས་པའི་ངོ་བོར་སྐྱེ་བ་ལ་བགེགས་སུ་གྱུར་པའི་གནས་ངན་ལེན་གྱི་ཆ་ཐམས་ཅད་རྒྱུན་མཐའི་རྡོར་ཏིང་གིས་བཅོམ་ནས། དེའི་རྣམ་གྲོལ་ལམ་ལ་སླར་ཡང་སྙིང་རྗེ་ཆེན་པོ་མངོན་གྱུར་དུ་འབྱུང་སྟེ། དེ་ནི་སྟོང་ཉིད་ལ་མཉམ་པར་བཞག་པ་སོགས་ལུང་རྟོགས་ཀྱི་ཡོན་ཏན་རྣམ་པ་ཐམས་ཅད་པའི་མཚན་ཉིད་ཅན་དུ་སྐྱེའོ། །དངོས་གྲུབ་ཀྱི་སྙིང་པོ་དེ་ལྟར་ངོས་ཟིན་ནས་དེ་ཉིད་རྒྱ་གང་ཆེ་ནས་བསྒྲུབ་དགོས་ཀྱི། གཞན་དུ་དཔེར་ན་བླ་མ་མཁས་གྲུབ་ཆེན་པོ་དང་མཇལ་ཡང་སྐར་མའི་དཔྱད་ལྟ་བུའི་དོན་དམན་པ་ཞིག་ལས་ཅི་ཡང་མ་དྲིས་ན་གདམས་པའི་མཆོག་རྣམས་ཟུར་ཙམ་ཡང་མི་ཐོབ་པ་དང་འདྲའོ། །སྤྱིར་ཡང་སྒོ་ཐམས་ཅད་ནས་སྙིང་རྗེ་ལ་མང་དུ་གནས་པར་བྱ་བ་ནི་སྤྱན་རས་གཟིགས་ཀྱི་བསྔགས་པའི་ཁྱད་པར་གྱི་དམ་ཚིག་ཡིན་པར་ཕྱག་སྟོང་སྤྱན་སྟོང་གི་མདོ་དང༌། རྒྱལ་པོ་བཀའ་འབུམ། ཀུན་བཟང་ཐུགས་གཏེར་སོགས་ལས་ནན་ཏན་དུ་གསུངས་ཏེ། དེ་ལ་བརྩོན་ན་འཕགས་པ་དང་བརྟུལ་ཞུགས་གཅིག་ལ་གནས་པར་འགྱུར་བས་འཕགས་པ་དགྱེས། དེའང་སྤྱིར་སྙིང་རྗེ་སྒོམ་པ་ཙམ་གྱིས་མི་ཆོག་གི༌།དེ་འཕགས་པ་
དགྱེས་པའི་ཆེད་དུ་དམིགས་ནས་སྒོམ་པ་ཞིག་དགོས་ཏེ། འདིའི་དམ་ཚིག་ཁྱད་པར་བར་འགྲོ་ལུགས་ཤེས་པའི་སྟེང་ནས་སོ། །མཆན། པའི་དཀའ་ཐུབ་ཀྱི་ནོར་ཅན་ཏེ། རྗེས་འཛིན་གྱི་གནད་ཆེས་ཆེན་པོའོ། ༈ །ཧ་རླུང༌། ར་གཏུམ་མོ། །ཨ་བདེ་བ། ཨི་དོན་དམ། ཧ་ལོངས་སྐུ། ར་སྤྲུལ་སྐུ། ཨ་ཨི་སྦྱར་བ་ཆོས་སྐུའོ། །དེ་ལྟར་ན་རླུང་གིས་གཏུམ་མོ་བསྐུལ་བས་བདེ་སྟོང་གི་ཡེ་ཤེས་སྐྱེས་པ་ལ་བརྟེན་ནས་སྐུ་གསུམ་གྱི་གོ་འཕང་ལ་སྦྱོར་ཞེས་པ་ཚེ་སྒྲུབ་ཡེ་ཤེས་འོད་མཆོག་ལྟར་རོ།། ༈ །།བླ་མ་ལ་ཕྱག་འཚལ་ལོ། །སྲིད་པའི་བདེ་སྡུག་དངོས་ཀུན་སེམས་ལས་བྱུང༌། །འཁྲུལ་དང་གྲོལ་བ་གཉིས་ཆར་སེམས་ཀྱིས་བྱས། །དེ་ཕྱིར་རང་སེམས་འདུལ་བའི་མན་ངག་ལ། །གཙིགས་སུ་འཛིན་པ་འདུན་མའི་འགྲོ་ཕྱོགས་བཟང༌། །སེམས་འདུལ་ཐབས་མཆོག་ཐེག་པ་ཆེ་ཆུང་དང༌། །ཐེག་ཆེན་མདོ་སྔགས་གསང་སྔགས་ཕྱི་ནང་གི། །ལྟ་སྒོམ་སྤྱོད་པའི་རྣམ་གྲངས་མཐའ་ཡས་ལས། །ཐར་ཐུག་སྙིང་པོ་རྡོ་རྗེ་རྩེ་མོ་ཡིན། །དེ་ཡི་གནད་གསང་རྒྱ་མཚོ་ལྟར་ཟབ་ཅིང༌། །མཁའ་ལྟར་རྒྱ་ཆེ་བྱིས་བློས་དཔག་དཀའ་ཡང༌། །འགག་དོན་སེམས་དང་རིག་པ་ཤན་ཕྱེ་སྟེ། །རིག་པ་རྐྱང་འདེད་བྱེད་པ་གཅིག་པུར་འདུས། །ཡུལ་གྱིས་མ་གོས་སེམས་ཀྱིས་མ་བཅིངས་ཤིང༌། །དཔྱད་འཇོག་ཐབས་ཀྱིས་གསར་དུ་བྱས་མིན་པ། །སྤང་བླང་བསལ་བཞག་བྲལ་བའི་
རང་བབས་ཀྱི། །ཤེས་རིག་མ་བཅོས་ཐད་ཀར་སྐྱོང་བ་གཅེས། །གང་ལྟར་བརྟགས་ཀྱང་བློ་ཡི་རི་མོ་སྟེ། །ཅི་ཙམ་བཅོས་ཀྱང་ཀུན་རྟོག་སྤྲོས་པའི་གཟེབ། །ངོས་བཟུང་བསམ་ཡུལ་ལས་འདས་རིག་པའི་གཤིས། །གཏད་མེད་ངང་ལ་འཛིན་མེད་ལྷུག་པར་ཞོག །སྣ་ཚོགས་ཡུལ་སྣང་སྒྱུ་མའི་བསླུ་བྲིད་དང༌། །བཟང་ངན་ཕྲ་རགས་རྣམ་རྟོག་སྤྲེའུ་གར། །ཇི་ལྟར་ཤར་ཡང་གླང་པོའི་ལྟ་སྟངས་ཀྱིས། །བོར་ཏེ་བཟང་ཐལ་རིག་པ་རང་སོ་བཟུང༌། །དེ་ལ་གཏད་མེད་གཡང་མེད་འཕྲང་དང་བྲལ། །གོལ་ཤོར་ནོར་གསུམ་ཟེར་བ་ཚིག་ཏུ་ཟད། །རྒྱ་ཡན་ཁྱབ་གདལ་རིག་པའི་བདེ་ཐང་ནས། །སྐུ་ལྔའི་ས་ལ་མིག་འཕྲུལ་བཞིན་དུ་སླེབ། །ཆོས་འདི་སྐལ་ལྡན་སྤྱི་ཡི་ནོར་ཡིན་ཀྱང༌། །ལྷག་པར་མོས་གུས་དམ་ཚིག་ལྡན་པ་དང༌། །བློ་བརྟན་བརྩོན་འགྲུས་ཅན་གྱི་ནོར་ཡིན་ཕྱིར། །བརྩོན་པས་རྩེ་གཅིག་སྒྲུབ་ལ་སྙིང་སྟོབས་སྐྱེད། །ཅེས་པའང་ཆོས་ཤུལ་བླ་མ་མཐུ་དཔལ་གྱི་ངོར་འཇིགས་མེད་བསྟན་ཉིས་སྨྲས་རིམ་བཞིན་དཀོན་མཆོག་ཆོས་འཕེལ་གྱིས་བྲིས་པ་དགེ།