བསྟན་རྒྱས་སྨོན་ཚུལ།
བསྟན་པ་སྒོ་ཐམས་ཅད་ནས་རྒྱས་པར་བྱེད་ནུས་པར་བྱིན་གྱིས་རློབ་པའི་ཆེད་གསོལ་བ་བཏབ་པར་འཕགས་པ་ཐོགས་མེད་དང་ཙོང་ཁ་པ་ཆེན་པོའི་ལོ་རྒྱུས་ལྟར། སྒོ་ཐམས་ཅད་ཅེས་པ་ནི། འཆད། རྩོད། རྩོམ། གཙུག་ལག་ཁང་བཞེངས་པ། ཆོས་གཞི་འཛུགས་པ་དང༌། རྙེད་བཀུར་གྱིས་མཆོད་པ། དགེ་འདུན་གྱི་སྡེ་སྤེལ་བ། གསུང་རབ་ཀྱི་གླེགས་བམ་སྤེལ་བ། སྒྲུབ་ཚུགས། རྒྱལ་པོ་ཆེན་པོ་སོགས་ཆོས་ཀྱིས་དབང་དུ་བྱེད་པ་ལྟ་བུ། དེ་ཐམས་ཅད་མངོན་ཤེས་ཡོད་ན་ཕུལ་བྱུང་དུ་བྱེད། དེའང་ཡུལ་དུས་སྐྱེ་བའི་སྒོ་ནས་ཡོངས་སུ་མ་ཆད་པ་བཟུང་བྱའནག་ཕྱོགས་རེར་མ་ཆད་ཅིང༌། སངས་རྒྱས་ཐམས་ཅད་ཀྱི་དང༌། བཟུང་ཚུལ་ཡང་མ་རྟོགས་ལོག་རྟོག་ཐེ་ཚོམ་གྱི་དྲི་མས་མ་སྦག་ཅིང༌། བསམ་པ་རླབས་ཆེ་ལ་ཕུན་སུམ་ཚོགས་པས་རྒྱལ་བའི་དགོངས་པ་ཇི་བཞིན་གཟུང་ངོ། །བསྟན་པ་དངོས་སུ་འཛིན་བྱེད་ནི་བཤད་སྒྲུབ་གཉིས་སུ་ངེས་ཏེ། མཛོད་ལས། སྟོན་པའི་ནས་ཁོ་ན་ཡིན། །ཞེས་པའི་ཁོ་ནའི་སྒྲས་སོ། །ཉན་པ་ཡང་སྨྲ་བས་བསྡུས་ཏེ། སྨྲ་བ་དེ་ཉིད་སློབ་པར་ཟད་པའི་ཕྱིར་རོ། །རྩོམ་པ་ཡང་སྨྲ་བས་བསྡུས་ཏེ། བཤད་པ་ཉིད་ཡི་གེར་བཀོད་པར་ཟད་པའི་ཕྱིར་རོ། །རྩོད་པ་དང༌། ཀློག་པ་དང༌། ཁ་ཏོན་སྨྲ་བས་བསྡུས་པ་ནི་སླའོ། །དེའང་སྒོ་གསུམ་གྱི་བྱ་བ་མཐའ་དག་བསྟན་པའི་བྱ་བ་བཟང་ཞིང་དྲི་མ་མེད་ལ་རླབས་ཆེ་བ་ཤ་སྟག་ཏུ་ངང་གིས་འགྱུར་བ་དང༌། བདག་མཐོང་བ་དང་ཐོས་པ་དང་དྲན་
རེག་ཙམ་ཡང་དངོས་སམ་བརྒྱུད་ནས་བསྟན་པ་ལ་ཕན་འདོགས་པ་ཁོ་ནའི་དོན་དུ་འགྱུར་བར་སྨོན་དགོས། ཚེ་རབས་ཐམས་ཅད་དུ་རྒྱལ་བསྟན་ཚང་ལ་མ་ནོར་བ་རྒྱལ་དགོངས་ཇི་བཞིན་འཛིན་པའི་བསམ་སྦྱོར་ཕུལ་བྱུང་རྒྱུན་མི་འཆད་པར་སྨོན་པ་གལ་ཆེ། རྒྱུན་དེ་ཆད་ན་ཟངས་རྦབ་རི་སྐེད་ནས་ཤོར་བའམ། གཅིག་ནས་འཆུགས་ན་ལྔའི་བར་ལྟར་སོགས། འདི་ནི་ལམ་བཟང་སྒྲུབ་པ་བར་མི་འཆད་པའི་སྨོན་ལམ་སྟེ། སྐྱེ་བའང་དེ་ཁོ་ན་དང་མཐུན་པའི་མངོན་མཐོ་ལ་སྨོན་དགོས། བཤེས་གཉེན་དམ་པས་འཛིན་པའི་སྨོན་ལམ་སོགས་ཀྱང་དེ་ལྟར་འགྲེའོ།། །།