ཟབ་མོ་རྣོ་མཐོང་གི་མན་ངག
ཟབ་མོ་རྣོ་མཐོང་གི་མན་ངག་ཟླ་ཤེལ་ནོར་བུའི་མེ་ལོང་ཞེས་བྱ་བ་བཞུགས་སོ། །
བླ་མ་རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །རེ་ཞིག་དང་པོར་གནས་ཁང་མུན་པ་མེད་ཅིང་ཤིན་ཏུ་གཙང་ལ་ཉམས་དགའ་བར། གཟའ་སྐར་མིག་དམར་དང༌། བྲ་ཉེ་སྐག་སྣྲོན་ས་ག་རྣམས་མེད་ཅིང༌། ཉ་སྟོང་བརྒྱད་དང༌། དགུ་གསུམ་བྱི་བའི་ཉི་མ་དང༌། མ་རིག་རྣམ་ཤེས་སྲེད་ཚོར་རྒ་ཤིའི་རྟེན་འབྲེལ་སོགས་མ་ཡིན་པའི་དུས་བཟང་པོའི་སྔ་དྲོ་ཉི་མ་རྩེ་ཤར་གྱི་སྐབས། མོ་གདན་ཕྱིང་དཀར་གཙང་མ་གྲུ་བཞི་པའི་སྟེང་དུ་འབྲུ་ཚོམ་ལྔ་བཀོད་དེ། དབུས་མའི་ཁར་མེ་ལོང་བཤམ། མཐའ་སྐོར་དུ་མཆོད་པ་ལྔ་དང༌། ཕྱེ་མར། སྐྱེམས་ཕུད་བཅས་བཀོད། བྱུང་ན་རྟེན་འབྲེལ་སྙིང་པོའི་གཟུངས་ཆབ་ཀྱིས་ཁྲུས་བྱ། དེ་ནས་སྤོས་དཀར་སོགས་གུ་གུལ་མེད་
པའི་སྤོས་དང་བཟང་ཤིང་གི་དུད་པ་གཏོང་ཞིང༌། སྤོས་མེའི་པྲ་བརྟག །དུ་བ་དཀར་ན་རྒྱལ་པོ། དམར་ན་བཙན་བདུད། སྔོ་ན་ཀླུ་སྨན། སེར་ན་མི་ཁ༌།སྣ་ལྔ་རྒྱུན་རིང་བྱུང་ན། འཁྱིལ་བའི་ཚུལ་དེ་ཟས་ནོར་འཕེལ། འཚུབ་པའི་ཚུལ་དེ་དར་གུད་ཆེ། བརྐྱང་པའི་ཚུལ་དེ་ལམ་ངོ་ཡིན། བཀུག་པའི་ཚུལ་དེ་དགྲ་ངོ་ཡིན། །འཁྱིལ་ཞིང་ཀུན་ཁྱབ་དུས་བདེ་ཡོད། འཁྲིལ་བའི་ཚུལ་དེ་འཆི་ངོ་ཡིན། བསླང་བའི་ཚུལ་དེ་ལྷ་ངོ་མཐོ། མཆན་བུ། རྟེན་མཆོད་བྱིན་གྱིས་བརླབ། མདའ་དར་གཡོབ་ཅིང༌། ལྷ་འབོད་བདེན་བདར་རྒྱས་པར་བྱ། མོ་ནས་དང་སྐྱེམས་ཕུད་གཏོར། ཡེ་་མང་དུ་བཟླའོ། །དེ་ནས་དུང་ངམ། ལྷ་ཤིང་གཙང་མ་ལས་བཟོས་བའི་ཤྭ། ཤར་དུ་ཟླ་བ།
ལྷོར་ཆུ་གཏེར། ནུབ་ཏུ་མདའ། བྱང་དུ་མེ། བླ་འོག་ཏུ་མིག་དང་རོ་བཀོད་པ་ཟུང་གཅིག །འབྱུང་ལྔའི་སྔགས་ཨཱ་ལི་ཀཱ་ལི་དང༌། རྟེན་འབྲེལ་གྱི་སྔགས་ཡེ་་ཅི་མང་བཟླས་པས་བྱིན་གྱིས་བརླབས་ནས། གཅིག་བརྩི་བྱ་དང༌། ཅིག་ཤོས་ལེགས་ཉེས་ལུང་སྟོན་གྱི་མཚན་མར་བཟུང་ལ། ཕན་ཚུན་མི་ནོར་བར་བྱས་ཏེ། ཕྱྭ་དཀྱིལ་དུ་སྒྲིལ་ལོ། །དེའང་སྒྲིལ་ཐེང་བཞིར་བསྐྱར་བའི། མཛོད་མིག་དང་པོ་ཀླུང་རྟའི་རྒྱལ་མཚན་ཡིན་ཏེ། གཙོ་བོ་ཡོན་ཏན་ཅན་དང༌། དགྲ་ལྷའི་ས། ཕག་ལུག་ཡོས་གསུམ་གྱི་ལོ་མ་ལ། མོའི་མིག་ཡིན། གཉིས་པ་སྲོག་གི་ཀ་བ་ཡིན་ཏེ། མི་ཕོ་དང་རྟ་བོང་གི་ས། བྱི་འབྲུག་སྤྲེལ་གསུམ་གྱི་ལོ་མ་ལ། མོའི་སྲོག་ཡིན། གསུམ་པ་དབང་ཐང་གི་གདུང་མ་ཡིན་ཏེ། ཁྱིམ་བདག་མོ་དང་གནག་ཕྱུགས་ཀྱི་ས་བྱ་གླང་སྦྲུལ་གསུམ་གྱི་ལོ་མ་ལ། མོའི་སྙིང་ཡིན། བཞི་པ་ལུས་གཏན་པ་ཡིན་ཏེ། རྒན་བྱིས་དང་ར་ལུག་གིས། ཁྱི་རྟ་སྟག་གསུམ་གྱི་ལོ་མ་ལ། སྒོ་ཐེམ་ཕྱི་ནང་གི་ས་མཚམས་ཡིན། དེས་ན་གནས་མལ་དང་པོ་བཟང་ན། བནྡྷེས་ཆོས་མགོ་དང༌། སྔགས་པས་མཐུ་རྩལ་ཐོན། མཁས་བཙུན་གྱི་ཡོན་ཏན་བྲིན། གཙོ་བོའི་གྲོས་ཕུགས་ལེགས། དབང་ཕྱུག་དང་སྙན་གྲགས་ཆེན་པོ་འཐོབ། དགྲ་འདྲེའི་གཉའ་བ་རྡོག་པས་རྫི། ཁྱིམ་མི་སྤྱི་ལ་བཏབ་ཀྱང་ཕ་ཁུ་ཆེ་རྒན་
ནམ། བླ་མཆོད་རིགས་དང༌། ཀླུང་རྟ་མེ་ཁམས་པ་ལ་སྒོས་སུ་བཟང་ཞིང༌། དགྲ་ལྷའི་དབུ་རྨོག་མཐོ་བའི་ངོ་ཡིན། གཉིས་པ་བཟང་ན། ཚེའི་དབང་སྐལ་མི་དམན་ཞིང༌། བར་ཆད་ཀྱི་རྐྱེན་མེད། ཅུང་ཟད་ཡོད་ཀྱང་སྲོག་གི་གསེར་ཟམ་མི་འཆག་མ་འསྒྲིགས་ལྷུན་གྲུབ་ཀྱི་རིང་ཚོའི་རྟེན་འབྲེལ་མང༌། ཚེའི་སྲུང་བ་གང་བྱས་སྨིན་སླ། སྐྱེས་དར་མ་དང་ཀླུང་རྟ་ཤིང་ཁམས་པ། རྟ་ཕོའི་མོ་ལ་ཁྱད་པར་དུ་བཟང༌། གསུམ་པ་བཟང་ན། ནང་གི་དཀོར་མཛོད་དང༌། ཕྱིའི་རྨོ་ཞིང༌། བར་གྱི་གནག་ལྷས་ཐམས་ཅད་ཕྱུག་དར་འཛོམ། ནོར་གཡང་གི་ལྷ་འགོ༌།བུད་མེད་ལ་སྲིད་དང༌། བཟའ་བཏུང་ལ་བཅུད་འཆག །གསོག་སྲུང་སྤེལ་གསུམ་གང་བྱས་ཆུད་མི་ཟ། སྨན་དར་མ་དང༌། ཀླུང་རྟ་ཆུ་ཁམས་པ། གནག་ཕྱུགས་ཀྱི་མོ་ལ་ཁྱད་པར་དུ་བཟང༌། བཞི་པ་བཟང་ན། ལུས་ལ་ནད་གདོན་སོགས་ཀྱི་ཉེར་འཚེ་མེད་ཅིང༌། དབང་པོ་གསལ། བཀྲག་མདངས་ཡང་རྩལ་ཕུན་སུམ་ཚོགས། ལྟོ་གོས་སོགས་འཚོ་ཆས་ཐམས་ཅད་ལུས་དང་འཕྲོད། སྒོ་ཐེམ་བརླིང་བས་དཔལ་འབྱོར་བརྟན། གདོན་དང་རྐུན་པོའི་རྒྱུ་སྲང་འགག་རྒན་བྱིས་དང་ཀླུང་རྟ་ལྕགས་ཁམས་པ། ར་ལུག་ཁྱི་གསུམ་གྱི་མོ་ལ་ལྷག་པར་བཟང༌། དེ་བཞིན་དུ་མཛོད་མིག་དང་པོར་སྡིག་ལྟས་ཤར་ན་ལྷ་
སྲུང་གཟི་བྱིན་ཉམས། ལྷ་འཁྲུགས་སོང་ངམ། ཕ་མེས་ཀྱི་དུར་ས་ལྡང་ནའང་ཐང༌། གནམ་སྒོ་རལ་བའམ་གནམ་གྱི་འཇུ་ཐག་ཆད་པ་ཡིན་པས་ཐོག་སེར་དང་ཁྱིམ་གྱི་ཐོག་རྡིབ། གོང་མའི་བཀའ་ཆད་ལ་སོགས་པའི་འཇིགས་པ་འབྱུང༌། མཐོན་པོ་གནས་ནས་ལྷུང༌། བཙན་པོའི་ཁ་དྲག་ཉམས། བཟང་བྱས་ཀྱི་དགེ་མི་ཐོན། དགྲ་གཉེན་ཚན་དང༌། གྱོད་རྡོག་སྣེ་ནས་ལང༌། ཡོན་ཏན་ཅན་དང༌། ལོ་ཀླུང་མེ་ཁམས་པ་ལ་རྩུབ། གཙུག་ཏོར་དང་རྒྱལ་མཚན་རྩེ་མོ། །ལྷ་གསོལ་དང་བསང་མཆོད། ཀླུང་རྟ་ཀ་འཛུག་མཆོད་རྟེན་ཆེན་པོར་གདུགས་འདོགས་པ། ས་ཙྪ་ལོ་གྲངས། ལྷ་ཁང་མཆོད་རྟེན་མང་པོར་དཀར་མེ་སྙན་ཤལ། ཁམས་དང་མཐུན་པའི་དར་ཕྱར་འཛུགས། ལམ་འཕྲང་དང་ཟམ་པ་འཆོས་པ། མི་ཁ་བཟློག་གཏོ་དང༌། དགྲ་མནན་སོགས་གནས་མལ་རང་དང་བསྟུན་པའི་བཅོས་ཆོག་བྱ། གཉིས་པར་ཤར་ན། སྲོག་གི་འཁྲུལ་འཁོར་ཤུགས་བྲི་བས་འཕེལ་ཆུང་ཞིང་ཉམས་སླ། བར་ཆད་ཀྱི་རྐྱེན་མང་ལ་རྒོད། ཁང་ས་གྲུམ་པ་ཡིན་པས་མཁར་རྫོང་འཆོར་བའམ། གནས་ཁང་བཀྲ་མི་ཤིས། བྱ་བཞག་གང་ཡང་འདུན་མའི་ཁོག་ཤིང་འཆུག་སྟག་ཤར་དཔའ་བོའི་གྲ་མདངས་ཉམས། རྟ་བོང་རྔོག་འཕྲུ་ཅན་ལ་གཟན། ལོ་ཀླུང་ཤིང་ཁམས་པ་ལ་རྩུབ། གསོ་ཆོག་
ཏུ། ཚེ་ལྷའི་སྐུ་གཟུགས་བཞེངས་ཤིང༌། ཚེའི་མདོ་གཟུངས་སྒྲོགས་པ་གསུང་རབ་རྡོ་ལ་བརྐོ་བ། སྲོག་བསླུ་ཉེའུ་འདོན་པ། སྲོག་བསྐྱེད་པའི་འཁོར་ལོ་བཅང་བ། ཞི་རྒྱས་ཀྱི་སྦྱིན་སྲེག་ཁྲམ་ཟློག་ཚེ་དབང༌། བླ་བསླུ། བརྒྱ་བཞིའི་ཆོ་ག་སོགས་བྱ། གསུམ་པར་ཤར་ན། ནོར་བུ་ལོན་དུ་འགྱུར་བའི་མཚན་མ་ཡིན་པས། ཚོང་ཉེས་དང་དགྲ་ལ་འཇལ་སྟོང༌། ཕྱུགས་གོད་དང་ཤིད་ཀྱི་གཏོར་བརླག་སོགས་གྱོང་སྒོ་འབྱུང༌། ཟ་འདྲེ་འགོང་པོའི་རྒྱུ་ལམ་ཐོད་ཅིང༌། སའི་རྟེན་ཕུར་ཐོན་པ་དང༌། ཞིང་ས་སྟོང་པའི་མོ། །བྱ་བ་གང་བརྩམས་ལ་སྙིང་སྟོང་འོང༌། ཡུལ་འཕོ་ཡུལ་འཆུག་དང་ས་གཡོའི་འཇིགས་པ་འབྱུང་ཉེན་ཡོད། མ་བང་སྟོང་བས་སྲིད་ལ་ངན། ཁྱིམ་འཛིན་གྱི་བུད་མེད་དང་ལོ་ཀླུང་ཆུ་ཁམས་པ་ལ་རྩུབ། དཀོན་མཆོག་ལ་མཆོད་པ་རྒྱ་ཆེན། བྱ་ཁྱི་སྤྲང་གསུམ་ལ་སྦྱིན་པ། བྱིས་པ་ལོ་གྲངས་ལ་སྟོན་མོ། །གསེར་འོད་དམ་པ་སོགས་གསུང་རབ་འབྲི་ཀློག་ཆོས་སྨྲ་བ་ལ་མཆོད་སྟོན། གཏོར་མ། གཡང་ཆོག་ས་བདག་འཁྲུགས་བཅོས། དབང་ཐང་བསྐྱེད་པའི་འཁོར་ལོ་གདགས་པ་སོགས་བྱ། བཞི་པར་ཤར་ན། ལུས་ལ་སྔར་མེད་ཀྱི་ན་ཚ་འབྱུང༌། སྔར་ཡོང་གཏིང་ལྕི། སྒོ་ཐེམ་ཞིག་པས་ནང་གཡང་ཕྱིར་ཐོན། གཅན་
རྐུན་གྱི་ཟ་ཁ་འཛུག་བྲན་གཡོག་མཐའ་འདབ་ལ་དན། བྱིས་པའི་རྩེར་ཤོར། ར་ལུག་གི་ལྷས་མལ་སྟོང༌། རྒན་འཁོག་དང་ལོ་ཀླུང་ལྕགས་ཁམས་པ་ལ་རྩུབ། སྐུ་གཟུགས་མཆོད་རྟེན་ལ་དཀར་གསོལ་དང་ཞིག་གསོ། འབྱུང་བཞིའི་གཏོར་མ་དང་སཙྪ། གསུང་རབ་རྡུལ་སྤྲུག་སྨན་བླའི་ཆོ་ག་བྱ་བ་ཁྲུས། གླུད་དང་ཆང་བུ་བསྔོ་བ། མིང་སྤོ་ལུས་བསྒྱུར། སྲུང་བའི་འཁོར་ལོ་འདོགས་པ། མ་མོའི་ཁྲག་མདོས་སོགས་བྱ། ཁྱད་པར་དུ་ཕྱེ་ན། གཞི་ཕྱྭ་དཀྱུས་ལ་བཤད་མ་ཐག་པ་ལྟར་མཛོད་མིག་བཞི་ཀ་དང༌། ཆོས་ཕྱྭར་དང་པོ་གཙོ། སྲིད་ཕྱྭར་གསུམ་པ་མ་བང་དང་བཞི་པ་ཆུང་ཚང་གཙོ། བུའི་ཐོག་མར་ཕོ་མོ་གང་འབྱུང་ལ་གཉིས་པ་ཕོ་ས་དང་གསུམ་པ་མོ་ས་ངོ་གང་མཐོ་བལྟ། མཐོ་དམན་མཉམ་ན་འབྱུང་བ་ཕོ་མོའི་སྟེང་ནས་བཤད། བློ་ཕྱྭ་དང་དོན་ཕྱྭ་ཚོང་ཕྱྭ་ནོར་ཕྱྭ་ལོ་ཏོག་གི་མོ་རྣམས་ལ་གསུམ་པ་སྙིང་ཁྱིམ་གཙོ། མཛའ་བོ་ཨེ་རྙེད་ལ་སྒོ་ཐེམ་དང༌། རྙེད་ན་ལེགས་ཉེས་དཔྱོད་པར་སྙིང་ཁྱིམ་གཙོ། ས་ཆ་ཡུལ་བཟུང་ལ་གསུམ་པ་ས་སྒོ་གཙོ། མཚེར་ཕྱྭར་གཉིས་པ་ཁང་ས་དང་གསུམ་པ་ལྷས་མལ་གཙོ། དུར་ཁང་ཞིང་གསུམ་བཤད་ཟིན། ནད་པ་འཚོ་འཆིར་སྲོག་མཁར་གཙོ། ནད་ཡུན་རིང་ཐུང་ལ་ལུས་མལ་གཙོ། གདོན་ཕྱྭར་ཁྱིམ་ས་སྟེ་གསུམ་པ་དང་ལོ་མལ་གཙོ། ལེའུ་སྨན་པའི་མོ་ལ་དང་པོ་རྩི་འཛིན་དང་གསུམ་པ་
སྨན་ཕོར་གཙོ། སྨན་ཨེ་འཕྲོད་ལ་ལུས་མལ་གཙོ། ཞུ་བ་ཨེ་གནང་ལ་རྩེ་འཛིན་དང་སྙིང་ཁྱིམ་གཙོ། མགྲོན་པོ་ཨེ་ཡོང་ལ་སྒོ་ཐེམ་གཙོ། རྟ་ཕྱུགས་ར་ལུག་མོར་སོ་སོའི་ས་མལ་གཙོ། སྒོ་ཁྱི་དང་ར་ལུག་གནས་མལ་གཅིག་བོར་སྟོར་མོ་ལ་སྙིང་ཁྱིམ་དང་ཐེམ་པ་གཙོ། སྲོག་ཆགས་སྟོར་བ་ལ་ཉེར་འཚེ་ཨེ་འབྱུང་རང་རང་གི་ས་མལ་གཙོ། ཆང་དང་ཞོ་འོའི་མོར་སྐྱེམས་ཁང་དང་ཐེམ་བུ་གཉིས་ཀ་གསུམ་པ་ཡིན་པས་དེ་གཙོ། ཆང་འཚོང་མཁན་ཕོ་མོའི་ས་མལ་གང་དར་དེ་ཤིས། ཁ་ཆར་མོ་ལ་གནམ་སྒོ་གཙོ། དགྲ་ཕྱྭར་ཀླུང་རྟ་གཙོ་བོར་བཟུང་ངོ། །འོན་ཀྱང་གཞི་ཕྱྭ་དང༌། དགྲ་ཕྱྭ། ཐག་རིང་གི་ཚོང་ཕྱྭ་དང༌། མགྲོན་ཕྱྭ། བློ་ཕྱྭ་དོན་ཕྱྭ་རྒྱ་ཆེན་པོའི་སྐོར་སོགས་ལ་མཛོད་མིག་བཞི་ཀ་དང༌། དེ་ལས་གཞན་པའི་ཕྲན་ཚེགས་ཀྱི་སྐོར་རྣམས་ལ་དེ་དང་དེའི་གནས་མལ་ཁོལ་དུ་བཏོན་ཏེ་གདབ་པ་སོགས་སྐབས་དང་འཚམས་པར་སྦྱར་རོ། ༈ །གནས་མལ་དེ་རྣམས་སུ་ལེགས་ཉེས་ཀྱི་འབྱུང་འགྱུར་ལུང་སྟོན་བྱེད་དངོས་ནི། ཤྭ་མིག་གཅིག་ཤིང་བཞི་མེ་གཉིས་དྲུག་ས། །ལྔ་ལྕགས་གསུམ་ཆུ་གོ་རིམ་བཞིན། །ཡར་དེད་མ་ལ་མར་དེད་བུ། །ཨ་ཕྱི་དགྲ་ལ་ཚ་བོ་གྲོགས། །ཞེས་ངེས་པར་བྱས་ཏེ། སྔར་བཤད་པའི་ཤོ་གཉིས་པོ་ནང་འཛོམ་ཚུལ་གྱི་སྟེང་ནས་འཕྲད་དེ་དག་བརྩི་བར་བྱའོ། །དེ་ལ་གྲོགས་ཕྲད་
བཟང་ལ། མ་ཕྲད་རབ་སྟེ། ལྷག་པར་མ་ཕྲད་ལྕི་བས་བརྟན་ལས་ཀྱི་རིགས་ལ་བསྔགས་ཤིང༌། གྲོགས་ཕྲད་ཡང་བས་གཡོ་ཞིང་མྱུར་བའི་ལས་ལ་བསྔགས་ཏེ། དེས་འཕྲལ་མགྱོགས་སུ་སྒྲུབ་རྒྱུའི་རིགས་ལ་མ་ཕྲད་ཕྱི་དལ་ལམ་བུལ་ངོ་ཡིན་པ་དང༌། ལྕི་བརྟན་གྱི་རིགས་ལ་གྲོགས་ཕྲད་གཞི་མི་བརླིང་བར་བཤད་པའི་སྐབས་ཀྱང་ཡོད་པར་ཤེས་སོ། །གཞན་ཡང་མ་ཕྲད་མང་ཆེས་ན་སྐྱིད་ཀྱི་ལ་བརྒལ་དང༌། ནད་པ་ཧ་ཅང་ཟུངས་ཟད་ལྟ་བུའི་ཡུལ་མི་འཚམས་པ་ལ་བྱུང་ན་གཡུལ་ལོག་རྗེས་དགྲ་ངོ་ཞིང་ལྟར་མོ་མིག་ནས་ཐོན་པའི་ཉེན་ཡོད་ཅིང༌། གྲོགས་ཕྲད་མང་ཆེས་ན་བྲེལ་ཟིང་གི་ལྟས་སུ་འགྲོ་བའི་གནས་ཀྱང་ཡོད་དོ། །ས་མ་མེ་ཕྲད་ལྟ་བུར་འཕྲད་ལ་དཔྱད་ན་བརྟན་པ་དང༌། འབྱུང་ཁམས་ལ་བརྟགས་ན་གཡོ་བ་ཡིན་པས་ཁོག་བརྟན་ལ་ཅུང་ཟད་གཡོ་བ་རྒྱ་མཚོའི་རྦ་རླབས་ལྟ་བུར་བཤད་དེ། གཞི་ཕྱྭར་འཕྲལ་མཐོ་དམན་མང་པོ་འོང་ཡང་ཕུགས་ཆུས་བརྟན་པ་དང༌། མགྲོན་ཕྱྭར་ཕྱི་དལ་ཆེ་ཡང་མྱུར་དུ་ཁ་སྐད་གསལ་པོ་ཐོས་པར་ངོས་འཛིན་པ་ལ་སོགས་པས་མཚོན་ནས་འཕྲུལ་ཤེས་པར་བྱའོ། །འབྱུང་བ་བུ་འཕྲད་དུ་བྱུང་ན་ཉེར་འཚེ་ཕྲ་མོ་དང་ཁ་འགྱོད་ཡིན་ཏེ། གསོ་ཆོག་ཉུང་ངུ་འམ་ཕྲ་མོས་ཞི་བར་ནུས་ཤིང༌། དགྲ་ཕྲད་བྱུང་ན་འཇིགས་པ་ཆེན་པོ་དང་སྙིང་འགྱོད་ཡིན་ཏེ་བཅོས་ཐབས་ཆེན་པོ་དང་མང་པོས་ཞི་བའི་ཁྱད་མ་
གཏོགས་དེ་གཉིས་ཕྱོགས་མཚུངས་སུ་བཤད་རྒྱུ་ཡིན་ནོ། །ས་ནང་མ་ཕྲད་དང༌། ཆུ་ནང་གྲོགས་ཕྲད་དང་ཕྱོགས་མཐུན་པ་ལ། མ་གྲོགས་ལས་དམན་པ་ཙམ་དུ་བཤད་པར་བྱ་ཞིང༌། ཤིང་ལྕགས་མེ་གསུམ་ནང་ཕྲད་བཟང་ངན་འདྲེས་མ་དང༌། རྒྱལ་ཕམ་གཉིས་མེད། ལྷ་འདྲེས་འཐེན་རྩོད་ལྟ་བུའི་དབྱེ་བསལ་དཀའ་བ་དང༌། རིམ་གྲོའི་རྒྱབ་དཔུང་དྲག་ཞན་གྱི་རྗེས་སུ་འགྲོ་བར་ལུང་སྟོན་ནོ། །འབྱུང་བ་སོ་སོའི་སྒོས་བཤད་ཀྱིས་ཤིན་ཏུ་གསལ་བར་ལུང་སྟོན་ཚུལ་ནི། ཐོག་མར་སྤྱིའི་འགྲོ་ཕྱོགས་མ་བསླབས་ན་མང་དུ་བཤད་པས་མགོ་རྨོངས་པར་འགྱུར་བས་འདི་དག་བློ་ལ་བྱང་བར་བྱ་སྟེ། རུས་སྦལ་གྱི་རྩིབས་གཡས་ཤར་ཤིང་ཁམས། མགོ་བོ་ལྷོ་མེ་ཁམས། རྩིབས་གཡོན་ནུབ་ལྕགས་ཁམས། མཇུག་མ་བྱང་ཆུ་ཁམས་ཏེ། ལུང་པ་དང༌། ཁྱིམ་དང༌། མལ་དང༌། མི་དང་དུད་འགྲོ་ལ་སོགས་པའི་ལུས་ལའང་དེ་ལྟར་སྦྱར་རོ། །ཁ་དོག་ལྗང་ཀུ་ཤིང༌། དམར་པོ་མེ། སེར་པོ་ས། དཀར་པོ་ལྕགས། ནག་མཐིང་ཆུའོ། །གྲངས་ཤོ་མིག་བཞིན་ཏེ། མཉམ་པ་གསུམ་དང༌། མི་མཉམ་པ་གསུམ་མོ། །དབྱིབས་འཇོང་ནར་ཤིང༌། གྲུ་གསུམ་མེ། གྲུ་བཞི་ས། ཟླ་གམ་ལྕགས། ཟླུམ་པོ་ཆུའོ། །གནས་ལུགས་ཀེ་རེ་ལང་བ་ཤིང༌། ལྷབ་ལྷུབ་འབར་བ་མེ། ཅ་རེ་བསྡད་པ་ས། རྣོ་
ཟུར་རོག་པ་ལྕགས། ཞོད་དེ་འགྲོ་བ་ཆུའོ། །ལྕི་ཡང་ཤིང་མེ་ཆུ་གསུམ་ཡང་བ། ས་ལྕགས་གཉིས་ལྕི་བའོ། །མགོ་དབྱིབས་མགོ་ཕྲུག་ཤིང༌། རལ་བ་མེ། རྦད་མགོ་ས། ཅོ་བྲེག་ལྕགས། ལྟག་སྐྲ་ཆུའོ། །ཕོ་མོ་ཤིང་ལྕགས་ས་གསུམ་ཕོ། མེ་ཆུ་མོའོ། །མི་རིགས་རྒྱལ་རིགས་ས། རྗེ་རིགས་མེ། བྲམ་ཟེ་ཤིང༌། དམངས་རིགས་ཆུ། གདོལ་པ་ལྕགས་སོ། །ཡང་རྒྱལ་པོ་ཤིང༌། བུད་མེད་མེ། བཙུན་པ་ས། བྱིས་པ་ལྕགས། བོན་པོ་ཆུའོ། །བནྡེ་མེ། ཕྱུག་པོ་ས། སྟག་ཤར་ལྕགས། བུད་མེད་ཆུར་བཤད་པའང་ཡོད་དོ། །ཉེ་དུ་ཕ་ཁུ་ཤིང༌། བུ་ཚ་མེ། མ་ཕྱི་ཡུལ་མཁར་ས། ནོར་གྲོགས་ལྷ་སྲུང་ལྕགས། གཉེན་ལམ་མཐའ་བཞི་ཆུའོ། །བརྗོད་པ་སྐད་འགག་གྲེ་འདར་ཤིང༌། སོ་བར་སྒྲ་འདོན་མེ། སྣ་སྐད་འདོན་པ་ས། ཁ་གདང་ལྕེ་འཕྱར་ལྕགས། མཆུ་རུབ་མཆུ་འཛུམ་ཆུའོ། །མཚན་མ་ལྦ་བ་ཤིང༌། ངོ་རྨེན་ཅན་མེ། རྒུར་པོ་ས། མཆན་ཁུང་སྨེ་བ་ཅན་ལྕགས། ཤོ་རེ་ཆུའོ། །ལས་ཡང་ཞིང་གཡོ་བ་ཤིང༌། ཚ་བསྲེག་མེ། ལྕི་འཐིབ་ས། རྣོ་ཟུར་ལྕགས། རླན་གཤེར་ཆུའོ། །བཟོ་ཤིང་མཁན་ཤིང༌། རྫ་མཁན་སོགས་མེ། གྱང་མཁན་དང་ཞིང་པ་སོགས་ས། མགར་ར་ལྕགས། གྲུ་པ་དང་ལྷམ་མཁན་སོགས་ཆུའོ། །ལོངས་སྤྱད་
ར་དང་བོང་བུ་ཤིང་སྤྱད་སོགས་ཤིང༌། རས་སྣམ་གོས་དར་རྟ་སོགས་མེ། ཞིང་དང་གཡག་ལུག་སོགས་ས། རིན་པོ་ཆེ་དང་གོ་མཚོན་སོགས་ལྕགས། སྦྲ་ཕྱྭར་ཇ་སིག་སོགས་ཆུའོ། །ཟས་ཤིང་ཏོག་སྔོ་ཚོད་ཤིང༌། བསྲེག་ཤ་མགོ་ཤ་ཁྲག་ཚོད་མེ། ཁུར་བ་དང་རྐང་ལག་གི་ཤ་ས། རྩིབས་མའི་ཤ་དང་དཀར་གསུམ་ལྕགས། ཆང་དང་ཆུ་དང་དར་བ་ཆུའོ། །རོ་ཁ་བ་ཤིང༌། ཚ་བ་མེ། མངར་བ་ས། བསྐ་བ་ལྕགས། སྐྱུར་བ་ཆུའོ། །བྲོ་བ་རེངས་པ་ཤིང༌། སྐྱུར་བ་མེ། བསྐ་བ་ས། ཞིམ་མངར་ལྕགས། སླ་ལ་བསིང་བ་ཆུར་བཤད་པའང་འབྱུང་ངོ༌། །ནད་རྩ་རྒྱུས་རེངས་པ་དང་རླུང་ནད་ཤིང༌། མགོ་ནད་དང་ཚ་བ་མེ། ཤ་ནད་དང་ལྕི་འཐིབ་ས། གཟེར་ཟུག་རྣག་དང་རུས་ནད་ལྕགས། གྲང་བ་རོ་སྨད་ན་བ་ཆུའོ། །དོན་སྣོད་མཆིན་མཁྲིས་ཤིང༌། རྒྱུ་སྙིང་མེ། ཕོ་མཚེར་ས། གློ་ལོང་ལྕགས། མཁལ་ལྒང་ཆུའོ། །སྒོ་མིག་ཤིང༌། ལྕེ་མེ། མཆུ་ས། སྣ་ལྕགས། རྣ་བ་ཆུའོ། །འདྲེ་གཉན་དང་ཐེ་རང་ཤིང༌། བཙན་དང་གྲེ་ཕོ་མེ། ས་བདག་ཡུལ་འདྲེ་ས། དཀོར་བདག་རྒྱལ་པོ་ལྕགས། ཀླུ་དང་མ་མོ་ཆུ་སྟེ་ལྕགས་གྲི་གཤེད་དང༌། ཤིང་རྒྱལ་པོར་ཡང་བཤད་དོ། །ལོ་ཟླ་ཞག་དུས་ནི་སྟག་ཡོས་ཤིང༌། རྟ་སྦྲུལ་མེ། སྦྲེལ་བྱ་ལྕགས། བྱི་ཕག་ཆུ། གཤེད་བཞི་
ས་སྟེ། སྲོག་ཆགས་བཅུ་གཉིས་པོ་ཡང་དེ་ལྟར་སྦྱར་རོ། །དེ་དག་ཀྱང༌། ཕྱོགས་མདོག་གྲངས་དབྱིབས་གནས་ལུགས་དང༌། །ལྕི་ཡང་སྒྲ་ཚད་ཕོ་མོ་རིགས། །ཉེ་དུ་བརྗོད་པ་ཤ་མཚན་ལས། །ལོངས་སྤྱོད་ཟས་ཐོ་ནད་འདྲེ་ལོ། །ཞེས་སྡོམ་དུ་དྲིལ་ནས་བཟུང་ངོ། །དེ་ལྟར་ཤེས་པ་ན་ཕྲད་དང་འབྱུང་བ་རྐྱང་དཔྱད་གཉིས་སྦྲགས་ནས་སྟོན་ཚུལ་དངོས་ནི། རེ་ཞིག་ཡིག་ཚོགས་ཉུང་བའི་ཕྱིར་བཤད་པ་བཟང་ངན་འབྲིང་གསུམ་དུ་རིགས་བསྡུས་ནས། དགྲ་གྲོགས་ནང་ཕྲད་གསུམ་གྱིས་མཚོན་ཏེ་བརྗོད་པར་བྱའོ། ༈ །དེ་ལ། ཤིང་གྲོགས་ས་ཕྲད་དུ་བྱུང་ན། ཁྱིམ་ཕྱྭར་སྲིད་པའི་རི་རབ་རྨིང་འགྲམ་བརྟན་པས་བཟང་ཡང་མང་དྲག་ན་ཉི་མ་ལྷོ་ནུབ་ནས་འབྱུང་བ་ས་ཁམས་པའི་ཕྱོགས་ཀྱི་སྐད་ཆ་འུར་ཟིང་ཅན་ཡོད་ངོ་ཡིན། བསྟན་ཆུས་དང་ཆོས་ཕྱྭར་ཡང་གསེར་གྱི་ས་གཞི་ལ་དཔག་བསམ་གྱི་ཤིང་སྐྱེ་བའི་ངོ་ཡིན་པས་བཟང༌། སྲིད་མི་ཉེ་མི་རིང་བའི་དུས་སུ་ཐོན་བུ་བུ་ཕོ་སའི་མི་རིགས་ཤིག་འབྱུང་ལྟས་དང་བུ་ཚ་མིང་སྲིང་གཉིས་སམ་བཞི་སོགས་མཉམ་པའི་གྲངས་ཤིག་སྐྱེ་ངོ་ཡོད། མི་རབས་གཅིག་པའི་སྤུན་གྲངས་དེ་འདྲ་ཞིག་མ་བྱུང་རུང་རྒྱུད་ཀྱི་ཕྱི་མཐའ་དེ་འདྲ་ཞིག་ཏུ་སྡུད་ན་ཐང༌། བློ་ཕྱྭ་དང་དོན་ཕྱྭ་གཏན་ལས་རིགས་ལ་ཤིན་ཏུ་བཟང་སྟེ། མཐའ་བཟང་ལ་ཡིད་བརྟན་ཉན་པ་འོང༌། དེ་མིན་འཕྲལ་གྱི་བྱ་བ་ལ་དལ་ངོ་དང་ཕུགས་སུ་དགེ་ཞིང་ལེགས་
པའི་མཚན་མ་ཡིན། དེའང་ཉི་མ་ལྷོ་ནུབ་ནས་རྫ་མཁན་ནམ་ཕྱུག་པོ་གཙོ་བོའི་རིགས་ཀྱིས་གྲོགས་བྱས་ནས་ས་ཡུལ་གྲུ་གད་པ་སེར་པོ་ཡོད་པའམ་ཐང་ཆེན་པོའི་དཀྱིལ་དུ་དོན་ཆོད། ཚོང་ཕྱྭར་ལོངས་སྤྱོད་གཞི་བརྟན་ཅིང་ཁེ་སྤོགས་ཀྱི་འཕེལ་ཀ་ཆེ། ཁྱད་པར་དུ་རྫས་སེར་པོའི་རིགས་ལས་ཁེ་སྐྱེད་ཆེན་པོ་འབྱུང༌། ནོར་ཕྱྭ་དང་ལོ་ཏོག་ལེགས་ཉེས་ལའང་ཤིན་ཏུ་མཆོག་ཞུ་དོན་གཉེར་ན། བརྟན་ཆགས་ཀྱི་ལས་དོན་ཞིག་ཡིན་ན་ཤིན་ཏུ་འགྲུབ། དེ་མིན་ན་ཕྱི་དལ་ཆེ། མཛའ་བོ་ཨི་རྙེད་ན་ཁྱོད་ཀྱི་མཛའ་བོར་འོང་རྒྱུའི་མི་དེ་མདོག་སེར་་བ། ལུས་པོ་ལྕི་ཞིང་བོང་ཐུང་ལ་ཤ་ཆེ་བ། ཁ་ཉུང་ལ་གཏམ་བདེན་པ་ཞིག་ཡོད་ན་ཐང༌། དེ་མེད་ན་དེ་ལྟ་བུའི་མི་རིགས་ཀྱིས་གྲོགས་བྱས་ནས་ནམ་ཕུགས་དབང་དུ་འདུ་ངོ་དང་མཛའ་བ་བརྟན་ཆགས་འོང་བའི་ལྟས། དུར་མོ་དང་ཁང་ས་མཚེར་སའི་མོ་ལས་དཔལ་ཆེ་ཞིང་སྐྱིད་ཀྱི་དམུ་ཐག་ཡོད་པས་ཤིན་ཏུ་བཟང༌། ཞིང་ས་བཟང་ངན་ལ་ཞིང་གྲུ་བཞི་ངོས་མཉམ། ཁང་པའི་ལྷོ་ནུབ་སོགས་མཚམས་བཞིའི་གང་རུང་ཞིག་ཏུ་ཡོང་ན་ཐང་སྟེ་གང་ལྟར་ཡང་བཟང༌། ནད་ཕྱྭར་ཞག་བཞི་ཚུན་ཆད་ཁ་གསལ་ཞིག་འདུག་དེ་མ་བྱུང་ཚེ་གཏིང་ཅུང་ཟད་ལྕི་ཡང་ནམ་ཕུགས་སྐྱོན་མེད། གདོན་ཕྱྭར་མཚམས་བཞིའི་གང་རུང་ནས་གཞི་བདག་དང་རྒྱལ་པོ་གནོད་དེ་ད་ལྟ་འབྱུང་པོས་ཕྱི་ལམ་རྙོགས་
པའི་ངོ་ཡིན་པས་བཟང༌། ལེའུ་སྨན་པའི་མོ་དང་སྨན་བསྟེན་ན་འཕྲོད་མིན་འདེབས་ན། ས་བཟང་པོ་ལ་ཤིང་ནྱ་གྲོ་དྷའི་ས་བོན་བཏབ་པ་དང་འདྲ་སྟེ། སྲོག་ལུས་གཉིས་ཀའི་ས་ན་སྐྱེད་ཆེ། མགྲོན་ཕྱྭར། མགྲོན་པོ་མི་རིག་ཞྭ་ཐོད་རིག་པའི་ངོ་ཡིན་ཡང་ཐང༌། ཞག་བཞིའི་མཚམས་ཚུན་ཆད་མ་ཐོན་ན་ཤོལ་འགྱང་ཆེ། ལར་བྱེས་བགྲོད་ཉེ་ཞོ་མེད་ཅིང་རྫས་སྤྱད་སེར་པོའི་རིགས་ཀྱི་རྙེད་པ་དང༌། མངར་ཞིང་ཞིམ་པའི་བཟའ་བཏུང་གི་ཕམ་ཕབ་འོང༌། རྟ་ཕྱུགས་ཁྱི་དང་ར་ལུག་མོར་སྲོག་ཆགས་དེ་དང་དེ་ཤ་འཐུག་ཅིང་ཁ་དོག་སེར་པོ་ཞིག་ཡོད་ཤས་ཆེ་སྟེ། དགེ་ཞིང་ཕན་ཐོགས་འོང༌། བོར་སྟོར་མལ་ས་དང་ཁྱིམ་གྱི་གྲ་བཞི་གང་རུང་ཞིག་ཏུ་རྫ་སྣོད་དམ་ས་རྗེན་ལ་བརྟན་པའམ་གདུ་བུ་དང་ཕུ་དུང་ལྟ་བུའི་ཡན་ལག་གི་ཆས་ཅི་ཡང་རུང་བའི་ཟུར་དྲིལ་ཐུམ་སེར་པོ་ཅན་ཞིག་ན་ཡོད། ཕྱི་རོལ་དུ་སྟོར་ན་ལུང་པའི་གཡོན་ཕྱོགས་ཀྱི་ཕུ་ལྟ་བུར་ཡོད་དམ། ཐང་ཆེན་པོ་དང་རིའི་མཚམས་བཞི་གང་རུང་ནས་རྙེད་ངོ་ཡོད། ལར་རང་ས་མ་བོར་ན་མ་གཏོགས་རྙེད་ཅུང་ཟད་དཀའ། ཆང་དང་ཞོ་འོ་སྙོལ་ན་ཕྱུག་པོ་གཙོ་བོའི་ཁྱིམ་ནས་ཕབ་དང་ཞོ་གཏའ་ལོངས་ལ་ཚུལ་བཞིན་སྙོལ་དང་རོ་བཅུད་ནུས་པ་ཕུལ་བྱུང་འབྱུང༌། ཆང་བཙོ་མཁན་མཚམས་བཞིའི་ལོ་པ་དང་རྫ་མཁན་ལྟ་བུས་བཙོས་ན་བཟང༌། ཁ་ཆར་མོ་ལ་སྤྲིན་གྱི་ཟོ་བ་ལ་
ཐེམ་བུ་བཅུག་པས་རེ་ཞིག་མི་འབབ། འོན་ཀྱང་དུས་ཆར་འདོད་ན་སྤྲིན་ཆེན་པོའི་མདོ་ཀློག་སྒྲོགས་དང་གཞན་ཡང་འབྱུང་བ་ཆུའི་རྟེན་འབྲེལ་མང་པོ་བསྒྲིགས་ན་རྙེད་ངོ་འདུག་དགྲ་ཕྱྭར། ལྕགས་རིའི་ཤིང་རྡོ་མ་འགུལ་བས་དགྲ་མེད། ཡོད་ཀྱང་མི་མགོ་ལྕགས་ལས་སྲ་བས་དོན་ཕམ་མེད་དོ། ༈ །མེ་གྲོགས་ལྕགས་ཕྲད། ཁྱིམ་ཕྱྭར། མངའ་ཐང་སྟོབས་ཀྱི་འབྱོར་པ་རྡོ་རྗེའི་བྲག་ལྟར་སྲ་བས་བཟང༌། ཧ་ཅང་མང་ན་ཉི་མ་ནུབ་ཕྱོགས་ནས་འབྱུང་བ་ལྕགས་རིགས་ཀྱི་འུར་ངོ་ཡིན། བསྟན་ཆུས་དང་ཆོས་ཕྱྭར། ལྷ་སྲུང་བཟང་པོས་མགོན་བྱེད་པས་བཟང༌། འོན་ཀྱང་དཀའ་ཚེགས་ཆེན་པོས་འགྲུབ་པའི་ངོ་ཞིག་འདུག་སྲིད་ཕྱྭར། བག་ཙམ་རིང་བའི་དུས་སུ་ཐོན་བུ་བུ་ཕོ་ལྕགས་ཁམས་པ་ཞིག་འབྱུང་ལྟས་དང་གྲངས་མི་མཉམ་པ་སྐྱེ་ངོ་ཡིན། བུ་ཚ་ཅུང་ཟད་གསོ་དཀའ། བློ་ཕྱྭ་དང་དོན་ཕྱྭ་དཀའ་ལས་ཀྱིས་བསྒྲུབ་རྒྱུ་ཞིག་ཡིན་ན་ཐང༌། དེ་མིན་ན་དཀའ་དཀའ་ལྟར་རིམ་གྱིས་འགྲུབ། ལར་བཟང༌། དེའང་ནུབ་ཕྱོགས་ནས་བྱིས་པའམ་སྟག་ཤར་མགར་བ་བྱ་སྤྲེལ་ལོ་པ་ལྟ་བུས་གྲོགས་བྱས་ནས་ས་ཡུལ་ཟླ་གམ་མམ་མཚོན་ཆའི་དབྱིབས་ཅན་ས་ཤར་དང་གད་བྲག་དཀར་པོ་ཡོད་སར་དོན་ཆོད། ཚོང་ཕྱྭར། ཚོང་ར་མང་པོ་འགྲིམ། རྨེད་མང་པོ་བཅོལ་བའི་མཐའ་ཞིག་ན་ཁེ་སྤོགས་འོང༌། ཁྱད་པར་
དུ་རྫས་སྤྱད་དཀར་པོའི་རིགས་ལས་རྙེད་པ་འགྲུབ། ནོར་ཕྱྭ་དང་ལོ་ལེགས་མིན་ལའང་སྤྱིར་བཟང་མོད་ཀྱི་ལོ་ཏོག་སྐྱེ་ཚན་ཆུང༌། ཞུ་བ་ཨེ་གནང་ན། ཁ་སྲ་བཞིན་དོན་ལ་སྙིང་དགའ་འོང༌། མཛའ་བོ་འཚོལ་ན། མི་དེ་མདོག་དཀར་པོ། ཤ་གྱོང་བ། ཤེས་པ་གསལ་ཞིང་སྐད་འཐུག་པ། ཁྲོ་ཞིང་ཁ་ཚ་བ་ཞིག་ཡིན་མཆི། དེ་མིན་ན་དེ་འདྲའི་མི་རིགས་ཞིག་གིས་གྲོགས་བྱས་ནས་མི་རྙེད་འདྲ་བའི་ངང་ལ་རྙེད་པར་འགྱུར། དུར་མོ་དང་ཁང་མཚེར་ཕྱྭ་ཞིང་ས་བཟང་ངན་རྣམས་ལས་དེ་ཟླ་གམ་བྲག་ཆུང་དཀར་པོ་ཡོད་པ་ཞིག་ཡིན་ན་ཐང༌། མཚེར་སའི་རྩྭ་འབྲོག་དང་ཞིང་ནུབ་ཕྱོགས་ན་ཡོད་དེ་བཟང༌། ནད་ཕྱྭར་ཞག་ལྔ་ཚུན་ལ་ཁ་གསལ་ཅིག་འདུག་དེ་མིན་ན་སྨན་པ་བརྟེན་འཚོལ་སོགས་དཀའ་བ་དུ་མའི་མཐར་ནད་སོས་འཁུན་པ་དེངས། གདོན་ཕྱྭར། ནུབ་ཕྱོགས་ནས་གྲི་ཕོ་དང་དཀོར་བདག་གནོད་དེ་སྐྱོན་ཆུང༌། ལེའུ་སྨན་པའི་མོ་སོགས་ལ། ཁྱོད་ཀྱི་ལེའུ་སློབ་དཔོན་དང་སྨན་པ་དེ་དག་མི་ཁུག་པའི་ཉེན་ཅིག་འདུག་ཁུག་ན་ལྕགས་ལས་མེ་འབྱུང༌། སྨན་ལས་ནུས་པ་འཐོན། སྔགས་ལས་བྱིན་རླབས་འགྲུབ་པས་ཆེས་བཟང༌། མགྲོན་པོ་ཨེ་འོང་ན། མི་ཁྱོད་ཀྱི་མགྲོན་པོ་དེ་ལ་དཀའ་ཚེགས་མང་པོའི་ཡུས་ཅིག་འདུག་སྟེ་དོན་ཕམ་མི་འདུག་རྫས་སྤྱད་དཀར་པོའི་རིགས་ཀྱི་རྙེད་པ་དང༌། བཟའ་བཏུང་
རོ་བསྐ་བ་ཞིག་ཀྱང་གསར་རྙེད་ཡོད། ཞག་ལྔ་ཚུན་ལ་མ་སླེབས་ན་བུལ་ངོ་ཡིན། རྟ་ཕྱུགས་ཁྱི་དང་ར་ལུག་མོད། རྟ་རྒོད་དང་གཡག་རྒོད། ཁྱི་གཏུམ་བག་ཅན་ལྟ་བུ་ཁ་དོག་དཀར་ཤས་ཆེ་བ་ཡོད་ན་ཐང་སྟེ་བཟང༌། བོར་སྟོར་མལ་དང་ཁྱིམ་གྱི་གཡོན་ངོས་ཁྲོ་ལྕགས་ལྟ་བུའི་སྣོད་ནང་ངམ་ལྕགས་སྤྱད་ཀྱི་ཟུར་དང་དྲིལ་ཐུམ་དཀར་པོའི་ནང་དུ་ཡོད། ཕྱི་རོལ་དུ་ན་ལུང་པའི་གཡོན་ལག་ནུབ་ཕྱོགས་ཀྱི་རིའམ་རིའི་སྲིབ། རྫ་བྲག་ཆེན་པོའི་རྒྱུད་དང༌། རྡོ་ཁྲོལ་བུའི་ཁྲོད་སོགས་ན་ཡོད། ཚེགས་ཆེན་པོས་བཙལ་ན་རྙེད་མཆི། ཆང་དང་ཞོ་འོའི་མོར། ཞིམ་མངར་གྱི་བྲོ་བ་བཟང་དགུ་འབྱུང་བས་རབ་ཡིན། ཆང་བཙོ་མཁན་སྟག་ཤར་བྱ་སྤྲེལ་ལོ་པ་ལྟ་བུས་བཟང༌། ཁ་ཆར་ཨེ་འབབ་ལ། རེ་ཞིག་འབེབ་དཀའ་ཡང་གཉུག་བསྲིང་ན་གངས་དཀར་མུ་ཏིག་གི་དོགས་པ་ལྟ་བུ་འཐོར་ངོ་ཡོད། དགྲ་ཕྱྭར། དགྲ་ལྷ་ཕྲག་ན་བཞུགས་པས་མཛུབ་མོས་བསྣུན་ན་མདུང་དང་ཁུ་ཚུར་བརྡེག་ན་ཐོ་བར་འགྲོ་སྟེ་དགྲ་མགོ་གྱེན་དུ་མི་འབུར། ༈ །ས་གྲོགས་ཆུ་ཕྲད། ཁྱིམ་ཕྱྭར་སྲིད་པ་ལས་ཀྱི་རྒྱ་མཚོར་ཕྱྭ་གཡང་གི་ནོར་བུ་འདུ་བས་ཤིན་ཏུ་བཟང༌། མང་ཆེས་ན་འབྱུང་བ་ཆུ་ཁམས་ཀྱི་འུར་ངོ་ཡིན། བསྟན་ཆུས་དང་ཆོས་ཕྱྭར་ཡང་བཟང༌། ལྷ་སྲུང་མོ་རྒྱུད་རིགས་ཀྱིས་གྲོགས་བྱེད།
སྲིད་ཕྱྭར་དབང་ཐང་རིན་པོ་ཆེའི་གཞོང་པར། སྲིད་ཀྱི་གཡུ་མཚོ་འཁྱིལ་བས་བཟང༌། དུས་ཉེ་བའི་ས་ནས་ཐོན་བུ་བུ་མོ་འོང་ཞིང་ལར་མི་མཉམ་པའི་གྲངས་འབྱུང༌། བློ་ཕྱྭ་དང་དོན་ཕྱྭ་མྱུར་དུ་བསྒྲུབ་རྒྱུ་ཞིག་ཡིན་ན་འགྲུབ། དེ་མིན་ན་ཡོངས་རྫོགས་འགྲུབ་དཀའ་ཡང་ཅུང་ཟད་འགྲུབ། དེའང་བྱང་ཕྱོགས་ནས་གྲུ་པའམ་བུད་མེད་གོས་སྔོན་པོ་ཅན་བྱི་ཕག་ལོ་པ་དང་ཤོ་རེ་ཡོད་པས་གྲོགས་བྱས་ནས་ས་ཡུལ་ཟླུམ་པོ་གད་བྲག་སྔོན་པོའམ་ནག་པོ་ཡོད་པ་དང་མཚོའམ་ཆུ་བོའི་འགྲམ་ལྟ་བུར་དོན་ཆོད། ཚོང་ཕྱྭར་འབྱུང་བ་ཆུའི་མི་རིགས་ལས་ཚོང་སྤོགས་མྱུར་དུ་འགྲུབ། ཁྱད་པར་དུ་ཟོང་སྔོ་ནག་གི་རིགས་ལས་ཁེ་འབྱུང༌། ནོར་ཕྱྭ་དང་ལོ་ལེགས་ཉེས་ལ་དཔལ་ཆོག་ཤེས་དང་ནོར་རྒྱུན་མ་སོགས་གཡང་ལྷ་བུད་མེད་རིགས་ཀྱིས་མགོན་མཛད་པས་ཤིན་ཏུ་བཟང༌། དེ་དག་གི་གཟུངས་འདོན་ཟློས་དང་ཞིང་དཀྱིལ་དུ་གླུའི་གཏེར་བུམ་སྦ། ཞུ་དོན་འདོད་ན་ཁ་གྲོག་ཆེ་སྟེ་དོན་གྲོག་གི་ངོས་ན་མནོག་ཆེ་རྒྱུ་མི་འདུག་མཛའ་བོ་འཚོལ་ན། མི་དེ་མདོག་སྔོ་བ། ཀུ་ཅོ་མང་ལ་གཙང་སྦྲ་ཆུང་བ། འབྲོག་སྦྲ་ནག་ཅན་གྱི་རིགས་ཤིག་ཡིན་ན་ཐང༌། དེ་མིན་དེ་ལྟ་བུའི་མི་རིགས་ཀྱིས་གྲོགས་བྱས་ནས་མྱུར་དུ་རྙེད། དུར་དང་ཁང་མཚེར་ཞིང་ས་རྣམས་ལ་བྱང་གི་ཕྱོགས་ན་དབྱིབས་ཟླུམ་པོ་ཡུར་སྲུབ་དང་ཀོ་མོག་ཡོད་པའམ་ན་སྤང་མང་པོ་དང་
ཆུའི་འགྲམ་ལྟ་བུར་ཡོད་ན་ཐང༌། ཇི་ལྟར་ཡང་བཟང༌། ནད་ཕྱྭར། ཞག་གསུམ་ཚུན་ལ་རི་རྩེའི་སྨུག་པ་ཡར་དེངས་སུ་འགྲོ་བས་བཟང༌། གདོན་ཕྱྭར་བྱང་ཕྱོགས་ནས་མོ་གདོན་ནམ་དམ་སྲི་གནོད། གདོན་ངོ་ཡང་བས་སྙིང་སྟོང་མི་འགྲོ། ལེའུ་སྨན་པའི་མོ་ལ་མཆི་མེད་བདུད་རྩིའི་གཏེར་རྙེད་པས་ཤིན་ཏུ་བཟང༌། མགྲོན་འོང་ངམ་ཞེ་ན། མགྲོན་པོ་མི་ནག་རྟ་ནག་ཅན་ནོར་སྦྱད་སྔོན་པོའི་རིགས་དང་བཟའ་བཏུང་སྐྱུར་པོའི་རིགས་ཀྱི་རྙེད་པ་དང༌། ཁ་དགའ་གཏམ་སྙན་དང་བཅས་ཏེ་མྱུར་པོར་འོང༌། དེ་མིན་ཡང་བྱང་ཕྱོགས་ཀྱི་མི་བྱི་ཕག་ལོ་པའི་ངག་ལམ་ན་གཏམ་གསལ་ཡོད། རྟ་ཕྱུགས་ཁྱི་དང་ར་ལུག་མོར་རྒོད་མ་བ་འབྲི་ཁྱི་མོ་སོགས་ཤ་རིད་ཅིང་བོང་ཆུང་བ་ཞིག་ཡིན་ཤས་ཆེ། ཁ་ལྟ་བདེ་སྦྱིན་འོང༌། བོར་སྟོར་ཁྱིམ་མམ་མལ་སའི་སྒོའམ་རྟེན་མའི་ཕྱོགས་ཆུའི་ནང་དང་ཆུ་སྣོད་ཀྱི་ཟུར། སྒྱེ་ནག་ལྟ་བུ་ཆུ་རླུང་མི་ཆགས་པའི་སྣོད་དང་དྲིལ་སྔོན་པོའི་ནང་ན་ཡོད། ཕྱི་རོལ་དུ་ལུང་པའི་སྒོ་གཞུགས་དང་རིའི་བྱང་ངོས། ཆུ་འགྲམ་མམ། ས་བྲག་སྔོན་པོ་ཡོད་པའི་ནང་དུ་རྙེད་དེ་མགྱོག་ངོ་ཡོད། ཞོ་ཆང་མོར། དུང་གཡུའི་སྐྱེམས་བུམ་དུ་བདུད་རྩིའི་གཡང་ཞག་འཁྱིལ་བས་བཟང༌། ཆང་བཙོ་མཁན་སྨན་ཤར་བྱི་ཕག་ལོ་པ་ལྟ་བུས་བཙོས་ན་བཟང༌། ཁ་ཆར་ཨེ་འབབ་ན། སྤྲིན་དཀར་གྱི་རྒྱལ་བ་ཁ་རལ། ཆུའི་
གཏེར་རྡོལ་བས་ཤིན་ཏུ་འབབ། ཁ་ཆས་ཆུག་ཆར་ཟོན་གྱིས། དགྲ་ཕྱྭར། རང་མགོ་རི་ལས་མཐོ། དགྲ་མགོ་ཆུ་བས་དམའ་སྟེ་སྐྱོན་མེད་དོ། ༈ །ལྕགས་གྲོགས་ཤིང་ཕྲད། ཁྱིམ་ཕྱྭར། འཁོར་འདབ་ལོངས་སྤྱོད་ནྱ་གྲོ་དྷའི་ཡལ་ག་ལྟར་རྒྱས་པས་ཤིན་ཏུ་བཟང༌། མང་ཆེ་ན་ཤར་ཕྱོགས་ནས་ཤིང་ཁམས་པའི་སྐད་ཆ་འུར་ཅན་འོང༌། བསྟན་ཆུས་དང་ཆོས་ཕྱྭར་ལེགས་དགུའི་ཡོན་ཏན་ཡར་འཕེལ་དུ་འགྱུར་ཏེ་རབ་ཡིན། སྲིད་ཕྱྭར། ཤིན་ཏུ་མྱུར་བའི་དུས་སུ་ཐོན་བུ་བུ་ཕོ་ཤིང་ཁམས་པའི་མི་དང་མིང་སྲིང་མི་མཉམ་པའི་གྲངས་སུ་འབྱུང་ངོ་ཡིན། བློ་ཕྱྭ་དང་དོན་ཕྱྭར་བཟང་གཡོ་དྲག་མྱུར་བའི་ལས་ལ་ཁྱད་པར་དུ་མཆོག་དེའང་ཤར་ཕྱོགས་ནས་ཕུ་ནུའམ་ཤིང་མཁན་སྟག་ཡོས་ལོ་པ་དང་རྒྱལ་པོ་ལ་བུས་གྲོགས་བྱས་ནས་ས་ཡུལ་ནར་འཇོང་ལྗོན་ཤིང་གི་དབྱིབས་ལྟ་བུའམ་ཤིང་རྩི་བན་བུན་ཡོད་པ་དང་བྲག་གད་སྔོ་ལྗང་རིགས་ཡོད་པར་དོན་འགྲུབ། ཚོང་ཕྱྭར། ཚོང་ཡ་ཤིང་གི་མི་རིགས་ལས་ཁེ་སྤོགས་ཆེན་པོ་འོང༌། ཁྱད་པར་རྫས་སྤྱད་སྔོ་ལྗང་རིགས་སམ་ཤིང་ཆས་རིགས་ལས་རྙེད་པ་འགྲུབ། ནོར་ཕྱྭ་དང་ལོ་ལེགས་ཉེས་ལ་བཟང་རབ་ཀྱི་རྩེ་མོ་ཡིན། ཞུ་བ་གནང་ངམ་ཞེ་ན། གཙུག་ན་ཟླ་བའི་དབང་སྡུད་རླུང་གི་ཞགས་པ་དེ་མི་ཁྱོད་ལ་ཡོད་པས་འདུན་མའི་ཇུས་ལེགས། མཛའ་བོ་རྙེད་དམ་ན། མི་དེ་མདོག་སྔོ་ཞིང་ཁ་བློ་མང་བ།
བོང་རིང་རྒུར་པོ། འགྲོས་མགྱོགས་ཤིང་སྤུན་ཟླ་མང་བ་ཞིག་ཡིན་མཆི། རྙེད་ཀྱང་རྙེད་ལ་ཕན་ཐོགས་ཀྱང་འོང་ངོ། །དུར་དང་ཁང་མཚེར་ཞིང་ས་རྣམས་ལ་དབྱིབས་ནར་མོ། །ཤིང་རྩི་མང་པོ་ཡོད་པ་ཤར་གྱི་ཕྱོགས་སུ་ཡོད་ན་ཐང་སྟེ་བཟང༌། ནད་པར་ཞག་གཅིག་ཚུན་ལ་ཁ་གསལ་ཡོད། ནད་རྒྱུན་རིང་ཞིང་གཏིང་ཅན་ཡིན་ན་ཡང་ཆེས་པས་མི་བཟང༌། དོན་ཕྱྭར་ཤར་ཕྱོགས་ནས་གཉན་དང་རྒྱལ་པོ་ཐེའུ་རང་གནོད་དེ་ཉེས་སྐྱོན་མེད། ལེའུ་སྨན་པ་དང་སྨན་བསྟེན་ན་འཕྲོད་མིན་ནི། ཁྱོད་ཀྱི་ལེའུ་སློབ་དཔོན་ནམ་སྨན་པ་དེ་ཉི་མ་ཤར་གྱི་ཕྱོགས་སུ་ཡོད་ན་ཐང༌། ད་རེས་ཀྱི་གདམ་ཁ་འདི་མ་ནོར་འདུག་པས་བརྩོན་པ་བསྐྱེད་ཅིག་མགྲོན་ཕྱྭར། མེ་བུས། ཤིང་ཤོག་སྐྱེམས་སྐོལ་ལ་སྡོད་དང་མིག་མཐོང་གང་གི་སར་སླེབ་ལ་ཁད་དུ་འདུག་ནོར་ལྗང་སྔོན་ནམ་ཤིང་སྤྱད་བཟང་པོ་དང༌། བཟའ་བཏུང་རོ་ཁ་བའི་རིགས་ཀྱི་རྙེད་པ་ཡོད། ཡང་ན་ཤར་ཕྱོགས་ཀྱི་མི་ཤིང་ཁམས་པ་ཞིག་གི་ཁ་ནས་ངག་གསལ་ཐོས་ངོ་ཡོང༌། རྟ་ཕྱུགས་ཁྱི་དང་ར་ལུག་མོར་རྟ་མདོ་བ་འགྲོས་ལྡན་དང་ཁྱི་དབྱིབས་འཇོང་རིང་སོགས་ཡོང་ཤས་ཆེ། དོན་ལ་བཟང༌། བོར་སྟོར་མལ་ལམ་ཁྱིམ་གྱི་གཡས་ངོས་པར་བུ་ལྟ་བུའི་ཤིང་སྣོད་ཀྱི་ནང་ངམ་ཀ་བ་དང་ཤིང་སྤྱད་ཅི་ཡང་རུང་བའི་ཟུར་དྲིལ་ཐུམ་ལྗང་སྔོན་སོགས་ན་ཡོད།
ཕྱི་རོལ་དུ་ན་ལུང་པའི་གཡས་ཕྱོགས། རིའི་ཉིན་དང་ཤར་ཕྱོགས་ཀྱི་རི་བོའི་ངོས། ཤིང་རྩི་བན་བུན་ཡོད་པ་ནས་སྟག་ཡོས་ལོ་པ་དང་སྐད་འགགས་གྲེ་འདར་རིགས་ཀྱིས་རྙེད་དེ་མྱུར་དུ་ཚོལ། ཞོ་ཆང་གི་མོ་ལའང་ཤིན་ཏུ་བཟང༌། ཆང་བཙོ་མཁན་འབྱུང་བ་ཤིང་ཁམས་པས་བྱས་ན་བཟང༌། ཁ་ཆར་ཨེ་འབབ་ན། ཁྱིམ་གྱི་ཤར་ཕྱོགས་སུ་ཆུ་མིག་བཅུ་གསུམ་གྱི་ཟླ་བ་ལྟ་བུ་ཞིག་ཡོད་སྲིད་པས་དེའི་ངོགས་སུ་ཀླུ་གཏོར་རྒྱ་ཆེན་བཏང་ན་ཉི་མ་ཤར་ཕྱོགས་ནས་ཆུ་རླུང་ཆེན་པོས་བསྐྱོད་པའི་ཁ་ཆར་འོང༌། དགྲ་ཕྱྭར། མི་ཁྱོད་ལ་རྣོ་ཟུར་ལྕགས་ཀྱི་སྟོབས་ཡོད། དགྲ་ཕྱིར་རྒོལ་ལ་རྒྱ་ལྕང་ཕྲ་མོའི་སྟོབས་ལས་མེད་པས་རྒོལ་བ་ཡོང་སྙམ་མི་དགོས། ༈ །ཆུ་གྲོགས་མེ་ཕྲད། ཁྱིམ་ཕྱྭར། སྐྱེ་བོ་ཆེད་དགུའི་རིགས་ཀྱིས་འགྲམ་བཏེགས་ཏེ་ཆུས་སྲིད་བཙན་དར་ཆེ་བ་འོང༌། བསྟན་པའི་ཆུས་ཕྱྭ་དང་ཆོས་ཕྱྭར་དགེ་སྦྱོང་ངུར་སྨྲིག་ཅན་དང་བློ་གསལ་རིག་པ་མཁན་རྒྱུན་མི་འཆད་པས་རབ་ཡིན། སྲིད་ཕྱྭར། མི་རིང་བའི་དུས་སུ་ཐོན་བུ་བུ་མོ་འབྱུང༌། ཡང་ན་འབྱུང་བ་མེ་ཁམས་པའི་བུ་ཅིག་འོང༌། སྲིད་མཉམ་པའི་གྲངས་ཞིག་སྐྱེ་ངོ་ཡོད། བློ་ཕྱྭ་དང་དོན་ཕྱྭ་གང་ཡིན་ཀྱང་མྱུར་དུ་འགྲུབ་དེའང་ལྷོ་ཕྱོགས་ནས་བནྡྷེ་གོས་དམར་ཅན་དང་གོས་བཟོའམ་ཞང་ཉེ་རྟ་སྦྲུལ་ལོ་པ་ལྟ་བུས་གྲོགས་བྱས་ནས་ས་ཡུལ་གྲུ་གསུམ་ས་བྲག་དམར་པོ་ཡོད་པ།
ལུང་ཕུ་ལྟོར་བསྟན་ཞིག་ཏུ་དོན་འགྲུབ་ཤས་ཆེ། ཚོང་ཕྱྭར། ཡུལ་མཁར་དམར་པོའི་ནང་དུ་ཚོང་ཡ་རིགས་མཐོན་པོ་དང་གཞན་ཡང་མེ་ཁམས་པའི་ཕྱོགས་ཤིག་ལས་ཁེ་འོང༌། རྫས་སྤྱད་དམར་པོའི་རིགས་ལས་ཁྱད་པར་དུ་རྙེད། ནོར་ཕྱྭ་དང་ལོ་ཏོག་ལེགས་ཉེས་ལ། ཁྱོད་ཀྱི་ཕྱུགས་འཁོང་དང་ལོ་ཞིང་དེ་དག་ཉི་མ་ལྷོ་ཕྱོགས་སུ་ཡོད་ན་ཐང་སྟེ། ཕྲ་མོ་ཆེར་སྨིན་ཞིང་ཉུང་ངུ་མང་པོར་འཕེལ་བས་བཟང༌། ཞུ་བ་ཨེ་གནང་གི་མོ་ལ་མཆོག་ཡིན། མཛའ་བོ་འཚོལ་ན། མི་དེ་མདོག་དམར་ལ་བོང་འཚམས་པ། ཁ་འཕང་མཐོ་ཞིང་བློ་རྣོ་ལ་ཆོ་རིགས་བཙུན་པ་ཞིག་ཡིན་ཤས་ཆེ། དེ་མིན་ན་དེ་འདྲའི་མི་རིགས་ཤིག་གིས་གྲོགས་བྱས་ནས་མྱུར་དུ་རྙེད། དུར་མོ་དང་ཁང་མཚེར་མོར་ཡང་བཟང༌། ཞིང་ས་བཟང་ངན་ལ་ཁྱོད་ཀྱིས་ཞིང་དེ་ལྷོ་ཕྱོགས་སུ་དབྱིབས་གྲུ་གསུམ་ཞིག་ཡོད་ཐང་སྟེ། ཁ་དགེ་བཀྲ་ཤིས་འོང༌། ནད་ཕྱྭར། ནད་ཀྱི་གཞི་ཡང་བས་སྐྱོན་མེད། ཞག་བཞིའི་ནང་དུ་ཁ་གསལ་ཡོད། གདོན་ཕྱྭར། ལྷོ་ཕྱོགས་ནས་བདུད་བཙན་དང༌། བསེན་མོ་གནོད། གདོན་རང་ལམ་འདེད་པས་བཟང༌། ལེའུ་སྨན་པ་སོགས་ལ། སྐྱིད་ཀྱི་ཉི་མ་ལྷོ་ཕྱོགས་ནས་འཆར། པདྨ་ཁ་འབུས་པ་ལ་ཉི་ཟེར་རེག་པ་དང་འདྲ་སྟེ་མཆོག་སློབ་དཔོན་ལེའུ་མིང་ག་གེ་མོ་བྱ་བ་གཉིས་ལས་གང་དྲག་
ཟེར་ན། མེ་ཁམས་འདི་མཉམ་པའི་གྲངས་ཤིག་གི་ངོ་བོ་ཡིན་པས་འདྲི་བྱེད་ཀྱིས་ཐ་མར་སྨོས་པ་དེ་དགའ། མགྲོན་ཕྱྭར། མགྲོན་པོ་མི་དམར་ཅན་ད་ལྟ་སླེབ་ནའང་ཐང༌། ཞག་གསུམ་ཚུན་ཆད་ངེས་པར་འོང༌། དེ་མཐོན་ན་རྗེའུ་རིགས་རྟ་སྦྲུལ་ལོ་པ་ལས་གཏམ་གསལ་ཐོས། བྱེས་བགྲོད་ཀྱི་རྙེད་ནོར་རྫས་སྤྱད་དམར་པོའི་རིགས་དང་བཟའ་བཏུང་རོ་ཚ་བ་འགའ་རེ་འདུག་མོ་འདི་བབས་གྲངས་མང་ན་ཉི་མ་ལྷོ་ཕྱོགས་ཀྱི་འུར་ངོ་ཡོད། རྟ་ཕྱུགས་ཁྱི་དང་ར་ལུག་འདི་བསྟེན་ན་འཕྲོད་དམ་མི་འཕྲོད་ཅེ་ན། སྤུ་རྟགས་དམར་པོ་ཅན་མགོ་ཅུང་ཟད་ཆེ་བ། མེ་ཁམས་པའི་མི་ལག་ནས་བརྒྱུད་པ་ཞིག་ཡིན་ན་ཐང༌། ཤིན་ཏུ་འཕྲོད་དོ། །བོར་སྟོར་ཁྱིམ་མམ་མལ་སྔས་ཕུག་དང་སྔས་མགོ་མེ་མདའ་དང་མེ་ཆ་ལྟ་བུའི་མེ་རྫས་ཀྱི་ཟུར། དྲིལ་ཐུམ་སོགས་སྣོད་སྤྱད་དམར་པོའི་ནང་དུ་ཡོད་དེ་རྙེད། ཕྱི་རོལ་དུ་སྟོར་ན་ལུང་པའི་ཕུ། ལྷོ་ཕྱོགས་ཀྱི་རིའམ་རིའི་རྩེ་རྫ་བྲག་དམར་པོ་ཡོད་པའམ། ལམ་ཇ་བསྐོལ་བའི་མེ་སོལ་དང་སྒྱེད་རྡོ་ནགས་སུ་རེ་བ་ཡོད་སར་སོ་བར་སྒྲ་འདོན་ལྟ་བུས་རྙེད། ཞོ་ཆང་མོ་ལ། ཆང་བཙོ་མཁན་བུ་ཚ་རྟ་སྦྲུལ་ལོ་པ་ལྟ་བུས་བཙོས་ན་བཟང༌། ཁ་ཆར་ཨེ་འབབ་ན། འབབ་མི་འདོད་ནས་འདྲི་ན་སྤྲིན་མེད་ཉི་མ་འཆར་བས་ཤིན་ཏུ་བཟང༌། ཁ་ཆར་འདོད་ཐོག་ཡིན་ན་རང་དབང་དུ་མི་འབབ་
ཀྱང་ཆར་བྱུང་བགྱིས་ན་ངོ་སྙི་བར་འདུག་དགྲ་ཕྱྭར། མེ་འབར་རི་ལུང་ཚིག་ཀྱང་རྒྱ་མཚོ་ཆེན་པོའི་ཀློང་རུམ་ན་ཡང་མེད་པས་ཅི་བདེར་སྡོད། འབྱུང་བ་མ་ཕྲད་ཀྱང་དེས་འགྲེས། ༈ །ཤིང་དགྲ་ལྕགས་ཕྲད། ཁྱིམ་ཕྱྭར། ཕྱི་རོལ་དུ་མཚོན་དང་གནམ་ལྕགས་འབབ་པ་དང་རྦབ་རྒོད་ཀྱི་འཇིགས་པ་འོང༌། ནང་དུ་ལོག་ནས་འབྱུང་བའི་ནད་རིགས་སྐྱེ། ཕ་ཁུ་ཆེ་རྒན་ལ་རྩུབ། སྔགས་པ་བེར་ཕུར་ཅན་གྱི་བྱད་ཁ་ཡོད། གྲི་བཏུལ་དང་གདུགས་བཟློག་བྱ། རིགས་སྔགས་ཟབ་མོའི་རླུང་འཁོར་བསྐོར། བསྟན་ཆུས་དང་ཆོས་ཕྱྭར། ཆོས་དང་འདོད་པ། ནོར་དང་ཐར་པ་སྟེ་སྡེ་བཞིའི་ལྗོན་ཤིང་ལ་བདུད་ཀྱི་སྟ་གྲི་ཐེབས་པས་ཤིན་ཏུ་ངན། གནས་བརྟན་ཕྱག་མཆོད་དང་མདོ་སྡེ་ཀློག་སྒྲོག་སོགས་བསགས་སྦྱང་གི་བསྲུང་བ་གྱིས། སྲིད་ཕྱྭར། སྲིད་ཀྱི་སྡོང་པོ་སྐམ་པས་ཤིན་ཏུ་ངན། བློ་ཕྱྭ་དང་དོན་ཕྱྭར་གོང་དུ་བཤད་པའི་མི་རིགས་ལྕགས་ཁམས་པ་ཞིག་གིས་བར་ཆད་བྱེད་ངོ་ཡོད། དེ་མིན་ན་མི་བློ་འདྲེས་བརྐུས། དོན་ཆུང་ཆུང་གི་རྗེས་ན་བྱུར་ཆེན་པོ་ཡོད། ཚོང་ཕྱྭར། མཁར་དཀར་པོ་དང་ཕ་བོང་ཐག་ཐུག་ཡོང་སར་ཚོང་བྱས་པ་མི་འདྲ། ཇག་ཉེས་པ་འདྲ་བའི་ལོ་རྒྱུས་འབྱུང༌། ནོར་ཕྱྭར། ནོར་དཀར་མཚན་ཅན་མི་ལག་ཏུ་ཤོར་བས་རྐྱེན་བྱས་གཡང་གི་སྒོ་རལ། རི་སྦྱང་གི་ཟ་ཁ་དོད་པས་ངན། ནོར་གཟུངས་དང་གཡང་འབོད་
ཐོངས། ལོ་ལེགས་ཉེས་ལ་ཞིང་དགྲ་སེར་བའི་གནོད་པ་འོང་བས་སེར་གཅོད་ཀྱི་བསྲུང་བ་གྱིས། ཞུ་བ་གནང་ངམ་ན། ཞུས་དོན་མི་གནང་གི་སྟེང་དུ་མི་སྙན་པའི་ཚིག་ངན་སྟ་རེ་ལྟ་བུ་ཞིག་ཀྱང་ཐོས་ངོ་ཡོད། མཛའ་བོ་འཚོལ་ན། ཁ་གྲོག་དང་མ་ཕྲད་པར། སྣ་རྡོལ་ཐུག་པའི་ཉེན་ཅིག་འདུག་པས་བྱ་བ་མ་མང༌། དུར་ཕྱྭར། དུར་ས་ཕུ་ནུབ་བསྟན་གྲི་ཤི་གྲི་གཤེད་མང་པོའི་ཚང་བཅས་པ་ཞིག་འདུག་སྟེ་མི་འཕྲོད། ཁང་ཕྱྭར། ཁྱོད་ཀྱི་ཁང་པ་དེ་སྒོ་ནས་བལྟས་ན་ལམ་སྐྱ་དྲང་ངེ་མཐོང་བ་ཞིག་འདུག་དེར་བསྡད་ན་བཀྲ་མི་ཤིས་པས་སྤོས་དང་དགའ། ཞིང་གི་མོར་ས་ཞིང་ཟླ་གམ་ཅིག་ཡོད་ན་ཐང་སྟེ་ངན། བཅོས་ཀ་སླ། ནད་ཕྱྭར། ཕྱི་ཡུལ་རྒྱུས་པ། ནང་ཡུལ་གློ་ལོང་མེ་ཏོག་སྣ་སྟེ་དེ་རྣམས་གང་རུང་གི་ནད། གཉན་སྲིན་ལྟ་བུ་ཤིན་ཏུ་ཐུ་བ་གཅིག་འདུག་ཡང་ན་བད་རླུང་དང་སྐྲན་རིགས་ཡིན་ལར། ཤིན་ཏུ་ངན། རྟ་ཕྱག་ཁྱུང་གསུམ་གྱི་སྔགས་སྒྲུབ་སོགས་རྫས་སྔགས་ཀྱི་བསྲུང་བ་རྣོན་པོ་མེ་ལྟ་བུ་མང་དུ་བསྟེན། ད་ལྟ་གངས་བྲག་གམ་མཆོད་རྟེན་དཀར་ཞིང་རིང་བའི་གཤམ་ཆ་ཐེར་དཀར་པོ་ལྟ་བུའི་ནང་དུ་གནས་བཅས་ཡོད་ན་ཐང་བས་དེ་འདྲ་ན་རེ་ཞིག་སྡོད་མི་རུང༌། གདོན་ཕྱྭར། བྲག་གཉན་བཤིག་པས་ཉེས་ན་ཐང༌། དེ་མེད་ན་དམེ་མགར་ལྟ་བུའི་འགྲུལ་སྣ་དང༌། སྒམ་ཁོམ་ཕད་སྒྱེ་སོགས་སྣོད་དཀར་པོ། དར་རམ་
སྣམ་རས་དང་རིན་པོ་ཆེ་དཀར་པོའི་རིགས་སམ། ཤིང་ལྕགས་སྤྲད་མའི་རིགས་ཁྱིམ་གྱི་གཡོན་ཕྱོགས་ན་ཡོད་རྒྱུ་ཞིག་གྲིབ། ཡང་ན་དང་པོ་ནུབ་ཕྱོགས་ཀྱིས་ཡུལ་ཟླ་གམ་སོགས་ནས་བྱུང་བའི་འབྲུ་དང་ཤིང་ཐོག་དཀར་པོའི་རིགས་དང༌། ཞོ་དར་མར་ཐུད་ཁུར་བ་ཕུ་མ་དང་བྱ་སྤྲེལ་གྱི་ཤའམ་སྲོག་ཆགས་ཅི་ཡང་རུང་བའི་རྩིབས་མ་གཡོན་ཕྱོགས་ཀྱི་ཤ་སོགས་ཁ་ནུབ་ཏུ་བལྟས་ནས་ལྕགས་སྣོད་ལྟ་བུར་ཟོས་པ་དེ་ཉེས། རྫས་སྤྱད་དེ་དག་གི་ཕྱིར་འབྲང་ཡིན་ན་གདོན་རིགས་ངོས་བཟུང་མི་དགོས་ཀྱང༌། གཙོ་ཆེར་དཀོར་བདག་རྒྱལ་པོ་དང་གྲི་གཤེད་གནོད། དེ་དག་ལ་མདོས་ཡས་ཐོངས། གྲི་འདུལ་གནད་སྨིན་སྒྲུབ། ལྷ་སྲུང་ཁྲོས་པའི་དུར་ངོ་ཞིག་ཀྱང་འདུག་པས་བསྐང་བཤགས་ལ་བརྩོན། ལེའུ་སྨན་པའི་མོར། རང་རྡུང་གི་ཐོ་བ་ཡིན་ཏེ་ཤིན་ཏུ་ངན་ནོ། །མགྲོན་ཨེ་འོང་ན། མགྲོན་པོ་དགྲ་དང་ཕྲད། རལ་གྲིའི་ཁ་དབྲག་དང་མདའི་སོ་དབྲག་ན་ཡོད་དེ། ད་དུང་མི་སླེབ། རྟ་ཕྱུགས་ཁྱི་དང་ར་ལུག་མོར། གཏུམ་བག་སོགས་གྲོགས་ཕྲད་སྐབས་དང་འདྲ་ཡང་འདི་ཁོག་ངན་པས་སྤངས། བོར་སྟོར་ཤིན་ཏུ་རྙེད་དཀའ། ཉི་མ་ནུབ་ཕྱོགས་ཀྱི་རྐུན་པོ་ཅོ་སྐྲ་བྲེག་པ་ཁྲོ་གཏུམ་ཅན་སོགས་སྔར་བཤད་པའི་ལྕགས་ཀྱི་མི་རིགས་ལྔ་ལ་སོགས་པས་རྫ་ཁྲོད་ལྟ་བུར་བསྐུང་ཡོད་
ནའང་ཐང༌། དཀའ་ཚེགས་ཆེན་པོ་བྱས་པའི་མཐའ་ཞིག་ཏུ་རྩད་ཆོད་འབྱུང་སྲིད། ཆང་དང་འོ་ཞོའི་མོར། སྐྱེམས་འདྲེ་ཅན་དུ་འདུག་པས་མི་ཞིམ་པའམ། ཞིམ་ཀྱང་དེའི་སྣ་ལ་བྱུར་ཅིག་འདུག་ཆང་བཙོ་མཁན་མེ་ཁམས་པས་བྱས་ན་བཟང༌། ཁ་ཆར་འབབ་བམ་ཞེ་ན། མི་འདོད་ན་འབབ། འདོད་ན་མི་འབབ་པའི་ཕྱིན་ཅི་ལོག་ཏུ་འབྱུང༌། དགྲ་ཕྱྭར། དགྲ་ལྷའི་རུ་མཚོན་ཆག་པས་ངན། ཉི་མ་ནུབ་ཕྱོགས་ཀྱི་དགྲ་ཁ་བཙན་ཅན་འོང་ནས་གནོད་པ་བྱེད། ཁམས་དང་མཐུན་པའི་དར་འཕྱར་བ་དང༌། ལྷ་གསོལ་དགྲ་བྲུབ་འབྱུང་བའི་རྟེན་འབྲེལ་སོགས་བྱའོ། །འདིར་མཆན་བུ། འབྱུང་བ་མེ་ཁམས་པའི་གཟའ་སྐར་ཚེས་གྲངས་འཛོམ་དུས་རྟ་སྦྲུལ་ལོ་པས་གོས་དམར་པོ་གྱོན་ནས་དགྲ་འོང་ཕྱོགས་སུ་མེ་པུར་བྱ། ༈ །མེ་དགྲ་ཆུ་འཕྲད། ཁྱིམ་ཕྱྭར། ཆུའི་འཇིགས་པ་དང་འབྱུང་བ་ཆུའི་ནད་རིགས་སྐྱེ། བུ་ཚ་མ་སྨད་ལ་རྩུབ། གྲིབ་ཀྱི་རེ་སྒྱེ་ནག་པོ་མགོ་ལ་གྱོན་འདུག་པས་ངན། ཞི་རྒྱས་ཀྱི་སྦྱིན་སྲེག་དང༌། རྣམ་འཇོམས་བྱ་བ་ཁྲུས་ལྷ་བསང་ཆེན་པོ་སོགས་བྱའོ། །བསྟན་ཕྱྭ་དང་ཆོས་ཕྱྭར། ལྷའི་ནོར་བུ་མེ་ཤེལ་གཅིན་འདམ་དུ་ལྟུང་བའི་ངོ་ཞིག་ཡོད། ལྷ་གསོལ་དང་བར་ཆད་སེལ་བའི་ལྷ་བསྙེན་སྒྲུབ་ལ་འབད། སྲིད་ཕྱྭར། ཁྱོད་ཀྱི་མཆིས་བྲང་དེ་མོ་གཤམ་མམ་ཡང་ན་མངལ་འདྲེ་ཅན་དུ་འདུག་པས་མའི་བང་དང་བྱིས་པའི་རྩེར་གཉིས་སྟོང་
པར་འོང༌། བློ་ཕྱྭ་དང་དོན་ཕྱྭར། འབྱུང་བ་ཆུའི་མི་རིགས་ཀྱིས་ཁ་འགོག་བྱེད། དེ་མ་བྱས་རུང་དོན་ཉམས་ཞེ་འགྱོད་ཆེན་པོ་འོང་བས་མི་བཟང༌། ཚོང་ཕྱྭར། གྲུ་ཟམ་ཆེན་པོའི་འགྲམ་ལ་སོགས་པར་ཆུའི་མི་རིགས་ལས་དོན་ཕམ་འབྱུང༌། ནོར་ཕྱྭར། མ་འབྲི་སོགས་ལ་གོད་ཁ་འོང་བས་རིམ་གྲོ་བྱ། ལོ་ཏོག་ལ་འདེབས་ན་འཁྱག་སད་ཆེན་པོ་འོང༌། སད་སྲུང་ནན་ཏན་གྱིས། ཞུས་དོན་གཉེར་ན་མེ་ཆུ་ནང་དུ་འབུད་པ་དང་འདྲ་སྟེ་མི་འགྲུབ། མཛའ་བོ་ཚོལ་ན། མི་འདི་ལ་བློ་གཏད་མི་འདུག་མཛོད་ནས་མི་ལྡང་རྐུན་པོ་ལྡང་བྱ་བ་ཡིན་པས་བཤོལ་དགོས། དུར་དང་ཞིང་ཁང་གི་མོར། དུར་ས་ཕུ་བྱང་བསྟན་དང་གནས་ཁང་མུན་པ་ཅན་སོགས་ཡོད་ཐང༌། ཀླུ་སྲིན་མ་རུངས་པས་བདག་བྱས་པས་མི་འཕྲོད། ནད་ཕྱྭར། ཕྱི་ཡུལ་རོ་སྨད། ནང་ཡུལ་མཁལ་རྒང༌། སྒོ་རྣ་བ་གང་རུང་གི་ནད། བད་ཀན་གྲང་བ་དམུ་ཆུ་ཆུ་འགག་ཆུ་སེར་སོགས་བསིལ་ཞིང་འཇམ་པའི་རིགས་ཏེ་མི་ཁྱོད་ལ་རམ་འབར་ཐུམ་ཤི་འོང༌། །ཕྱག་སྐོར་གཏར་དཔྱད་སོགས་ནད་བབས་དང་བསྟུན་པའི་བཅོས་ཀ་བྱ། ད་ལྟ་ས་ཡུལ་དམའ་ཞིང་ནག་ལ་སྣུམ་པ། ཁང་ཁུང་དང་ཆུ་མིག་མང་པོ་ཡོད་སར་སྦྲ་ནག་ལྟ་བུའི་ནང་དུ་ཡོད་ན་ཡུལ་བརྗེ་གྱིས། གདོན་ཕྱྭར། མཚོ་སྨན་ཀླུ་དང་ཆུ་འདྲེ་དམ་སྲི་གནོད། དེའང་ཆུ་མིག་གཉན་ལ་ཕོག་ཐུག་སོང་
བའམ། མི་རིགས་ཆུ་ཁམས་པའི་འགྲུལ་སྣ་དང༌། སྒྱེ་ཕྱྭར་སྒམ་ཁོམ་སོགས་སྣོད་དང་སྤྱད་པ་དམ་གནག དབྱིབས་ཟླུམ་པོ་ཁྱིམ་གྱི་སྒོ་འགྲམ་ན་ཡོད་རྒྱུ་ཞིག་གྲིབ། ཡང་ན་བྱང་ཕྱོགས་ཀྱི་རྒྱུད་ནས་བྱུང་བའི་བཟའ་བཏུང་སླ་ལ་བཅུད་ཆུང་བའི་རིགས། ཉ་ཕག་དང་བྱི་བའི་ཤའམ་གཞུག་ཤ་སོགས་ཟས་སྤྱོད་ཉེས། གྲིབ་ངོ་ཤིན་ཏུ་ཆེ་བས་བསང་ཁྲུས་དང༌། གཞན་ཡང༌། རྒྱ་ཆེན་ཤུགས་ལྡན་གྱི་ཆུ་སྦྱིན་ཀླུ་གཏོར་དམ་སྲི་མནན་པ་འདྲེ་མོ་བཀར་ཡས་སོགས་གདོན་རིགས་དང་བསྟུན་པའི་རིམ་གྲོས་བཅོས། ལེའུ་སྨན་པའི་མོར། བདུད་རྩིའི་སྣོད་དུ་དུག་འཕྱུར་བས་ཆེས་ངན། མགྲོན་པོ་འོང་ངམ་ཞེ་ན། མགྲོན་ལམ་ཁ་བས་བཅད་དམ། ཆུ་ཆེན་ཟུམ་པས་སྔུན་འགག་ནས་འདུག་སྟེ་ད་དུང་མི་སླེབ། ཆུའམ་ཆུ་ཁམས་པའི་དགྲ་བོ་དང་ཐུག་ནས་སྙིང་འགྱོད་ཆེན་པོ་འོང་ངོ་ཡོད། རྟ་ཕྱུགས་ཁྱི་དང་ར་ལུག་མོར་ཡང་ངན་ཏེ་མི་འཕྲོད། བོར་སྟོར་ཆུ་ནང་དུ་ཆུད་ཟོས་པའམ། བྱང་ཕྱོགས་ཀྱི་རྐུན་པོ་ལྟག་སྐྲ་དང་ཤོ་རེ་ཅན་ཤ་མདོག་སོགས་སྔར་བཤད་པའི་ཆུའི་མི་རིགས་གསུམ་ལ་སོགས་པས་ཆུ་འགྲམ་དང་རི་ཞོལ་ལྟ་བུར་བསྐུང་ཡོད། ཆང་དང་འོ་ཞོའི་མོར། སྐྱུར་ཞིང་སླ་ལ་བཅུད་ཆུང་བ་ཞིག་འོང༌། ཆང་བཙོས་མཁན་ས་ཁམས་པས་བྱས་ན་དགའ། ཁ་ཆར་ཨེ་
འབབ་ན། འབབ་མོད་ཀྱི་ཆུའི་ཤྭ་སྣ་རྡོལ་བ་སོགས་ཆག་སྒོ་འོང༌། དགྲ་ཕྱྭར། གཉེན་ལམ་མཐའ་བཞིའི་རིགས་ཀྱི་ལེ་ལན་ཞིག་གིས་བྱང་ཕྱོགས་ནས་ཆུ་ཆེན་དལ་གྱིས་གཡོ་བ་ལྟ་བུའི་དགྲ་འབྱུང༌། དམག་མདོས་དང་འབྱུང་བ་སའི་རྟེན་འབྲེལ་སོགས་ཀྱི་བཟློག ༈ ས་དགྲ་ཤིང་ཕྲད། ཁྱིམ་ཕྱྭར། ཕྱེ་བྲལ་འཐོར་ཞིག་ས་འཕོ་ཡུལ་འཕོ་སོགས་དང༌། ཤིང་གི་ནད་རིགས་འོང༌། ཁ་སྨྲས་གླེང་བརྗོད་མང་པོའི་ངོ་ཡོད། རི་རབ་ས་རྡུལ་དུ་ཞིག་པས་ཤིན་ཏུ་ངན། རྟེན་སྙིང་སྲོག་ཞུགས་ཀྱི་སཙྪ་འབུམ་ཕྲག་དང༌། མཆོད་རྟེན་གསར་བཞེངས་དང་གདན་ཁྲི་ཞིག་གསོ། མི་ཁ་བྲམ་ཆུའི་བསྒྱུར་གཏོ་སོགས་བྱ། བསྟན་ཆུས་དང་ཆོས་ཕྱྭར། བྱ་བ་བློ་སྣ་མང་པོ་ཤིང་སྐམ་ཡལ་ག་རེངས་པ་ལྟ་བུས་རྐྱེན་བྱས་ནས་ལས་མཐའ་སད་ཀྱིས་འཁྱེར། སྲིད་ཕྱྭར། སྲིད་ཀྱི་གཞོང་པར་ཐེའུ་འགོང་གི་བཤལ་རྒྱགས་འབྱུང་བས་ངན། བློ་ཕྱྭ་དང་དོན་ཕྱྭར། ཁ་མང་བློ་མང་དང༌། ཁྱད་པར་འབྱུང་བ་ཤིང་ཁམས་པའི་མི་རིགས་ཀྱིས་བར་ཆད་བྱེད། ལར་ཡང་བྱ་བ་འདིས་ཕུང་བཤིག་པའི་ཐང་ཤིང་ཞིག་མིན་པ་ཡོང་རྒྱུར་མི་འདུག་ཚོང་ཕྱྭར། ཤར་ཕྱོགས་ཀྱི་གྲོང་དུ་རྫུན་པོ་ཆེའི་མགོ་སྐོར་འོང་བས་གཟབ། ག་གོན་དང་བཟང་པོ་ལ་
གསུངས་པའི་ཤིས་བརྗོད་ཀྱི་མདོ་སྟོང་ཕྲག་སོགས་བཀླག་ནོར་ཕྱྭར། རྡང་ཆད། ཕུར་པ་ཐོན། ཕྱུགས་ཁྱུ་འཐོར་འོང་བས་ངན། ལོ་ལེགས་ཉེས་ལའང་ཐན་པ་འོང༌། གཉིས་ཀར་ཕྱུགས་གླུད་དང་ཆབ་གཏོར་སོགས་མཆོད་སྦྱིན་རྒྱ་ཆེར་སྒྲུབ། ཞུ་བ་ཕུལ་ན། རླུང་ནག་འཚུབ་མའི་ནང་དུ་ས་རྡུལ་གཏོར་བ་ལྟར་སྙིང་པོ་སྟོང་ཐལ་གྱིས་འགྲོ། མཛའ་བོ་ཚོལ་ན། མི་དེ་བསམ་པ་འགྱུར་ལྡོག་ཆེ། རྙེད་སྲིད་ཀྱང་རྙེད་པ་ལ་ཏིག་ཏིག་མི་མཆི། དུར་དང་ཁང་མཚེར་ཞིང་ཕྱྭ་རྣམས་ལ། དུར་ས་ཕུ་ཤར་བསྟན་ན་རི་སྒོ་ཀླུང་སྒོ་ཡོད་པ་དང༌། ཁང་པ་སྒོ་ཤར་བསྟན་སྒོ་ནས་བལྟས་ན་ནེའུ་སེང་ངམ་ལྗོན་པ་སྔོ་ཕྱུགས་སེ་མཐོང་བ་དང༌། ཞིང་ནར་མོ་སོགས་ཡོད་ན་ཐང་སྟེ་ཤིན་ཏུ་ངན། ས་བཅོས་དང་རིམ་གྲོ་གྱིས། ནད་པར། ཕྱི་ཡུལ་རྐེད་པ། ནང་ཡུལ་མཆིན་མཁྲིས་སྒོ་སོ་མིག་གང་རུང་གི་ནད། འོན་ཏིག་སྨྱོ་འབོག་རླུང་དང་རྩ་རྒྱུས་རེངས་པའི་རིགས་སམ་གཞོགས་གཡས་ཀྱི་ནད་རིགས་ཡིན་ཡང་ཐང༌། སྨན་བླའི་ཆོ་ག་དང་མདོ་བརྒྱད་བརྒྱ་པ་ཀློག་སྒྲོགས་སོགས་སྤྱི་འགྲོའམ། བྱེ་བྲག་ནད་ཁམས་དང་བསྟུན་པའི་བཅོས་རིམ་བྱ། ད་ལྟ་ས་ཡུལ་གས་རལ་དང་གད་པ་ཧྲལ་ཧྲོལ་ཅན་ནགས་ཀླུང་ངམ་བུག་པ་མང་པོ་དོད་པ་དང༌། ཧ་ཅང་གཡེལ་བའི་ཤིང་ཁྱིམ་ལྟ་བུར་ཡོད་ན་གཞན་ན་སྤོས། གདོན་ཕྱྭར།
གཉན་དང་རྒྱལ་པོ་ཐེའུ་རང་གནོད། དེའང་ཤིང་གཉན་བཅད་པ་དང༌། མི་རིགས་ཤིང་ཁམས་པའི་འགྲུལ་སྣའམ། ཤིང་སྤྱད་དང་རྫས་སྔོ་ལྗང་རིགས་ཅུང་ཟད་ནར་བ་ཁྱིམ་གྱི་གཡས་ལོགས་ན་འཇོག་རྒྱུ་ཞིག་གྲིབ། ཡང་ན་བྱང་ཕྱོགས་ཀྱི་རྒྱུད་ནས་འོང་བའི་སྔོ་ཚོད་ཤིང་ཏོག་སྟག་དང་རི་བོང་གི་ཤ་སྤགས་རྩིབས་གཡས་ཕྱོགས་ཀྱི་ཤ་སོགས་ཟོས་པས་ཉེན། རྒྱལ་མདོས་དང་ཐེ་བཀར་སོགས་གཏོ་ཡས་མདོས་རྫོང་ཐོངས། ལེའུ་སྨན་པའི་མོར་ཡང༌། འཚུབ་ལྷོང་ཤིན་ཏུ་ཆེ་བས་སྟབས་གཟབ་དགོས། མགྲོན་པོ་འོང་ངམ་ན། འོང་ན་ཐང་སྟེ། ཁ་ངན་གཏམ་ངན་སྙིང་མྱ་ངན་ཕྱོད་དེ་བ་འབྱུང༌། རྟ་ཕྱུགས་ཁྱི་དང་ར་ལུག་མོར། སྣ་འདྲེས་དྲངས། བྱུར་གྱིས་རྗེས་དེད་པས་ངན། བོར་སྟོར་རླུང་གིས་ཁྱེར་རམ། ནགས་ཀླུང་འཐུག་པོར་སྟོར་ཏེ་རྙེད་དཀའ། ཤར་ཕྱོགས་ཀྱི་རྐུན་པོ་མགོ་ཕྲུག་ལྦ་བ་ཅན། སྨྲ་བློ་སོགས་གོང་སྨྲོས་ལྟ་བུས་ཁྱེར་ཏེ་ཤིང་ནང་དུ་བསྐུང་ནའང་ཐང༌། ཆང་དང་ཞོ་འོའི་མོར། བྲོ་བ་རེད་ཉམས་ཅན་ཤིན་ཏུ་མི་ཞིམ་པ་འབྱུང༌། འགོང་ཆིང་དང་དབྱུག་པ་མེ་འབར་སོགས་བསྲུང་བ་བསྒྲུབ། བཙོ་སྙོལ་མཁན་ལ་ལྕགས་ཁམས་པ་བཟང༌། ཁ་ཆར་འབྱུང་ངམ་ཞེ་ན། དུས་མིན་གྱི་རླུང་ལོག་འོང་ནས་གནོད་པ་བྱེད། རླུང་ནོན་གཟབ་ལ་
གྱིས། དགྲ་ཕྱྭར། ཉི་མ་ཤར་ཕྱོགས་ནས་དགྲ་ཀེ་རེ་ལང་བ་འབྱུང༌། གཏོར་བཟློག་དང་འབྱུང་བ་ལྕགས་ཀྱི་རྟེན་འབྲེལ་ལ་སོགས་པས་བཟློག ༈ ལྕགས་དགྲ་མེ་ཕྲད། ཁྱིམ་ཕྱྭར། མེའི་འཇིགས་པ་དང་ཚ་རིམས་འོང༌། ནོར་གྲོགས་དང་ལྷ་སྲུང་རྒུད་པས་ངན། རྗེ་བཙུན་འཕགས་མ་འཇིགས་པ་བརྒྱད་སྐྱོབ་ཀྱི་མཆོད་སྒྲུབ་སོགས་ལ་འབད། བསྟན་ཆུས་དང་ཆོས་ཕྱྭར། རལ་གྲིའི་རྣོ་དབལ་ཆགས་པས་ཤིན་ཏུ་ངན། ཕྱག་ན་རྡོ་རྗེ་དང་རྗེ་བཙུན་མའི་སྣང་བརྙན་འབུམ་ཕྲག་སོགས་བཞེངས་སྒྲུབ་བྱ། སྲིད་ཕྱྭར། སྲིད་མངལ་དུ་འཆགས་ཀྱང་མགོ་ཐོན་མི་འོང༌། གདོན་ཆེན་བཅོ་ལྔའི་མདོས་ཐོང༌། ཚོགས་གསོག་མང་དུ་གྱིས། བློ་ཕྱྭ་དོན་ཕྱར། འབྱུང་བ་མེ་ཁམས་པའི་མི་གདོང་ཚན་ཆེན་པོ་ཞིག་གིས་བར་ཆད་བྱེད་དམ། ཇི་ལྟར་ཡིན་ཡང་འགྲུབ་ངོ་ཞིག་མི་འདུག་ཚོང་ཕྱྭར། ཉི་མ་ལྷོ་ཕྱོགས་ཀྱི་གྲོང་པ་མདོག་དམར་ཏིང་ངེ་བར་ཟོང་གི་འགྱུར་ལྡོག་འོང༌། དབང་ཐང་སྐྱེད་པའི་འཁོར་ལོ་སོགས་ཀྱིས་འཆོས། ནོར་ཕྱྭར། ད་ལྟ་ཁྱིམ་དུ་ཤ་དམར་ལྤགས་དམར་འདྲ་མེད་ན་འཕར་གཅན་དང་ཕྱུགས་གོད་ཆེན་པོ་འབྱུང༌། ནོར་རྒྱུན་མའི་སྙིང་པོའི་བཟླས་བརྗོད་སོགས་བསྲུང་བ་སྒྲུབ། ལོ་ཏོག་མོ་ལ་བཙའ་རྡུལ་དམར་པོ་བར་སྣང་ནས་འཕྱུར་བས་ངན། བཙའ་བསྲུང་གི་རྟེན་འབྲེལ་གྱིས། ཞུ་དོན་
མོ་ལ། མི་ཆེན་པོའི་ས་ནས་གནམ་གྲུམ་པ་ལྟ་བུའི་ཚིག་ངན་ཐོས། ཡོས་བུ་རྔས་བྲན་དུ་འོང་བས་བྱ་གླག་དང་ཐུག་པས་བཤོལ་ཅིག་མཛའ་བོ་འཚོལ་ན། མི་རྙེད་ཤས་ཆེ། རྙེད་ན་ཡང་གདུག་ཅིང་སྙིང་རིང་བ་ཞིག་འདུག་པས་མི་དགེ་དུར་ཁང་མཚེར་ཞིང་གི་མོར། དུར་ས་ལྷོར་བལྟ་བའམ། རི་རྩེ་ཁ་བྲག་ཅན་དང༌། ཁང་པ་སྒོ་ནས་བལྟས་ན་རི་དམར་པོ་མདུང་འདྲ་མཐོང་བ་དང༌། ཞིང་ཟུར་གསུམ་སོགས་ཡོད་ན་ཐང༌། བཙན་གྱི་རྒྱུ་སྲང་སོགས་ངན་དགུ་དུག་བཅུ་འདུག་པས་གཞན་དུ་བསྒྱུར། ནད་ཕྱྭར། ཕྱི་ཡུལ་རོ་སྟོད། ནང་མཛོད་རྒྱུ་སྙིང་སྒོ་སོ་ལྕེའི་རིགས་ཀྱི་ནད་དམ། མགོ་དང་མཇིང་པའི་ནད་རིགས། ཁྲག་འཁྲུགས། འབྲུམ་ལྷོག་སོགས་ཚ་བའི་ནད་ཡིན། བྱ་སྤྲེལ་ལོ་པ་ཡོད་ན་སཙྪ་དཀར་པོ་ལོ་གྲངས་དང༌། གླུད་དཀར་པོ་ལོ་གྲངས་ནུབ་ཕྱོགས་སུ་བསྐྱལ། ད་ལྟ་ས་ཡུལ་དམར་རྩུབ། ཚེར་མ་དང་རྡོ་ཧྲལ་མེ་རི་འདྲ་བ་སོགས་ཡོད་པ། ཚད་རླང་ཧ་ཅང་ཆེ་བའི་རིགས་ཤིག་ཏུ་ཡོད་མདོག་ཁ་བས་དེ་སྤོས། གདོན་ཕྱྭར། རོ་བསྲེགས་དང་མེ་ཉེར་ཉལ་བ། བྲག་དམར་གཉན་པོའི་ཟུར་དུ་དམར་ཐབ་བཏང་བ་དང༌། ལྷོ་ཕྱོགས་ཀྱི་མགྲོན་མེ་ཁམས་པའི་འགྲུལ་སྣའམ། རྟ་རྐྱང་གི་ཤ་ལྤགས་སམ། རྟ་དམར་ཞུར་ཅན་དང༌། ཡང་ན་ཞྭ་ཐོད་ལྟ་བུའི་གོས་སྤྱད་དམར་པོ་གྲུ་
གསུམ་གྱི་མཚན་མ་ཅན་ཁྱིམ་གྱི་ཕུག་ཏུ་འཇོག་རྒྱུ་ཞིག་གྲིབ། ཁྲག་ཚོན་དང་མགོ་ཤ་ལྟ་བུའི་དམར་ངན་ཞིག་ཁ་ལྷོར་ཕྱོགས་པས་ཟངས་སྣོད་སོགས་སུ་བཟའ་བཏུང་བྱས་པས་བསླང་ནའང་ཐང༌། གདོན་གྱི་ངོ་བོ། །དམུ་བཙན་བདུད་དང་སྟེང་གདོན་སོགས་གནོད། བཙན་མདོས་དང་གཟའ་འཇོམས་ཀྱི་སྲུང་བ་བྲི་གདགས། གཟུངས་གྲྭ་ལྔ་ཀློག་འདོན་སོགས་རིམ་གྲོ་རྒྱ་ཆེར་བྱ། ལེའུ་སྨན་པའི་མོ་དང་དཔྱད་ཀྱི་མོ་ལ་ཤིན་ཏུ་ངན་པས་སྤང་བར་བྱ། མགྲོན་པོ་འོང་ངམ་ན། རྨ་ཁྲག་གི་ངོའམ་རྫས་དམར་འོད་ཅན་མི་ལག་ཏུ་ཤོར་བ་ལྟ་བུའི་འགྱོད་གཅིག་འདུག་ཞག་བཞིའི་ནང་དུ་ཁ་སྐད་གསལ་པོ་ཐོས། རྟ་ཕྱུགས་ཁྱི་དང་ར་ལུག་མོར། སྤུ་རྟགས་དམར་ཤས་ཅན་ཡིན་ན་ཐང་སྟེ་མི་འཕྲོད། བོར་སྟོར་མེ་ནང་དུ་ཚིག་གམ། ཡང་ན་ལྷོ་ཕྱོགས་ཀྱི་རྐུན་པོ་རལ་བ་དང་ངོ་སྨེན་ཅན་གྲངས་སོགས་སྔར་བཤད་ལྟ་བུས་ཁྱེར་ཏེ་རྫ་བྲག་དམར་པོའི་ནང་དུ་བསྐུང༌། སྒོ་ནོར་ཁྱེར་ན་བཤས་ཚར། ཆང་དང་ཞོའོའི་མོར། རོ་ཚ་སྐྱུར་གང་རུང་གི་རིགས་ཅན་འབྱུང་སྟེ་མི་ཞིམ། ཆང་བཙོ་མཁན་ཆུ་ཁམས་པའི་མི་རིགས་ཀྱིས་བྱས་ན་བཟང༌། ཁ་ཆར་ཨེ་འབབ་ན། མི་འབྱུང་དུ་མ་ཟད་སྤྲིན་མེད་ཉི་མའི་ཚ་དབལ་རྣོན་པ་འོང༌། དགྲ་ཕྱྭར། རི་ཀླུང་རྟ་རོ་དམར་པོ་ཁ་ཕྱེ་བ་ལྟ་བུའི་ནང་དུ། དགྲ་མི་དམར་རྟ་དམར་ཅན་འོང༌། དམར་ངོ་ཁྲག་ངོ་རྨས་འགྲམ་གྱི་ངོ་
ཡོད་པས་ངན། རྒྱལ་མཚན་རྩེ་མོའི་དཔུང་རྒྱན་འབྲི་ཀློག་སོགས་དགྲ་འཆོས་རེམ། ༈ །ཆུ་དགྲ་ས་ཕྲད། ཁྱིམ་ཕྱྭར། ས་གཡོ་དང་ཁང་པ་རལ་གྲུམ། སའི་ནད་རིགས་དང༌། བྱད་གཏད་ཀྱི་ངོ། ཉེས་པ་ཀུན་ཐུབ་ཀྱི་གསེར་འཁོར་འབྲི་འདོགས་དང༌། འབྱུང་བཞིའི་གཏོར་མ་སོགས་ཐོངས། བསྟན་ཆུས་དང་ཆོས་ཕྱྭར། བདུད་ནག་པོའི་ཐིབ་ཀྱིས་ནོན་པའི་ངོ་ཡིན། བདུད་བཟློག་དང་ཚོགས་བསགས་ལ་བརྩོན། སྲིད་ཕྱྭར། སྲིད་ཀྱི་ཆུ་མིག་ཞབས་རྡོལ་བས་ངན། དོན་ཕྱྭ་བློ་ཕྱྭའི་རིགས་ལའང་ངན། ཁྱད་པར་དུ་འབྱུང་བ་ས་ཁམས་པའི་མིས་གེགས་བྱེད། ཚོང་ཕྱྭར། རྒྱུ་དང་མི་རྒྱུའི་ས་ཁམས་གང་རུང་གིས་དོན་འགྱོད་འོང༌། སྐྱབས་འགྲོ་ཁ་ཏོན་གྱིས། ནོར་ཕྱྭར། ནོར་སེར་པོའི་རིགས་ལས་གྱོང་ཕམ་འབྱུང༌། ཡང་ན་སྨིག་ཟླུམ་གྱི་ལྷས་ངན་འོང༌། ཟ་འདྲེ་འགོང་པོ་ཁ་སྒྱུར་སོགས་ཐོངས། ལོ་ཏོག་མོ་ལའང་ཆེས་ངན། ཞུ་དོན་གཉེར་ན། གཏིང་ལྕི་བས་མི་འགྲུབ། མཛའ་བོ་འཚོལ་ན། རི་རབ་ཞགས་པས་འཐེན་པ་དང་འདྲ་སྟེ་མི་ཁུག་དུར་ཁང་འཆོར་ཞིང་གི་མོར། དུར་ས་ཁང་པ་མཚམས་བཞིར་ལྟ་བ་དང༌། ཞིང་ས་གྲུ་བཞི་སོགས་ཡོད་ན་ཐང༌། ས་བདག་གདུག་པ་ཅན་གནས་པས་མི་འཕྲོད། ནད་ཕྱྭར། ཕྱི་ཡུལ་
ཤ་དང་རྐང་ལག་ནང་མཛོད་ཕོ་མཚེར། སྒོ་མཆུ་སྟེ་དེ་རྣམས་གང་རུང་གི་ནད། ཤུ་ཐོར་དང༌། ཞ་གྲུམ། ཆམ་པ། ལྕི་འཐིབ་རིགས་ཏེ་བཅོས་དཀའ། སྲོག་བསླུ་དང་ཚེ་མདོ་ཁ་ཏོན་སོགས་རིམ་གྲོ་རྒྱ་ཆེན་གྱིས་ལ་སྨན་བསྟེན། ད་ལྟ་ས་ཆ་ཁོད་སྙོམས་ཤིང་མདོག་སེར་བ། གྲུ་བཞི་འཐུག་ཅིང་སྒུག་པ་ལྟ་བུ། འཐིབ་ཤས་ཆེ་བ་དེ་འདྲ་ན་མོད་མདོག་ཁ་བས་བརྗེ་དགོས། གདོན་ཕྱྭར། དུར་ལྡད་དང་ཐབ་འཆའ་འཛུགས་སོགས་ལྕི་བརྟན་ལས་ཀྱིས་ནོངས་པའམ། རྫ་སྣོད་དང་ཉེར་སྤྱད་སེར་པོའི་རིགས་གྲུ་བཞི་ཁྱིམ་གྱི་ཟུར་རམ་མལ་ཆའི་ཟུར་དུ་འཇོག་རྒྱུ་དང་མཆིལ་ལྷམ་སོགས་གྲིབ། ཡང་ན་ས་ཁམས་པའི་མི་ལས་ཐོབ་པའི་ཞུན་མར་ལུག་གླང་རྡོལ་བུ་འཕྱི་བ་གྲུམ་པ་ལྟ་བུའི་ཁོག་ཤ་དང་སྟུ་ཤ་དེ་མིན་ན་བཟའ་བཏུང་མངར་པོའི་རིགས་སོགས་གྲིབ། གདོན་གྱི་ངོ་བོ། ས་བདག་དང་ཡུལ་འདྲེ་རྒྱལ་གདོན་སོགས་གནོད། ས་བདག་འཁྲུགས་བཅོས་དང༌། གནམ་ས་སྣང་བརྒྱད་སོགས་གང་འཚམས་སྒྲུབ། ལེའུ་སྨན་པའི་མོར། མི་རྙེད་པའམ་རྙེད་ཀྱང་ཕན་མི་ཐོགས་ཀྱི་སྟེང་དུ་ཆུ་ས་རྡུལ་གྱིས་རྙོག་པ་ལྟར་ཇེ་ཐུར་འགྲོ་བས་སྤོངས། མགྲོན་ཕྱྭར། ཁྱོད་ཀྱི་མགྲོན་པོ་དེ་ད་ལྟ་གཞི་ནས་མ་ཁྱོགས་པས་མི་སླེབ། དེ་མིན་ན་དགྲ་ས་ཁམས་པ་དང་ཐུག་ནས་འདུག་རྟ་ཕྱུགས་
ཁྱི་དང་ར་ལུག་འདི་བསྲེལ་ན་རུང་ངམ་ཞེ་ན། མི་རུང་བའི་ངོ་ཡིན་ཏེ་རྒྱལ་གདོན་གྱི་འཁྲི་བ་ཡོད། བོར་སྟོར་རྡུལ་ཁྲོད་དུ་ཡོད་ན་ཐང་སྟེ་མི་རྙེད། སྔར་གྲོགས་ཕྲད་བཤད་པའི་སྐབས་བཞིན་ཡོད་ཀྱང་སྲིད་དེ་མི་རྙེད། མཚམས་བཞིའི་རྐུན་པོ་ལུས་རྒུར་ཞིང་རྦད་མགོ་བྱས་པ་གོང་གསལ་ལྟ་བུས་ཁྱེར་ཏེ་དོང་ནང་སོགས་སུ་སྦས་ཡོད། ཆང་དང་འོ་ཞོའི་མོར། སྐྱུར་འདྲེ་ཅན་དུ་འདུག་པས་མི་ལེགས། ཆང་བཙོ་མཁན་སྟག་ཡོས་ལོ་པས་གྱིས། ཁ་ཆར་ཨེ་འབབ་ན། སྔགས་བཙུན་ནུས་པ་ཅན་གྱིས་ཆར་ནོན་འདུག་པས་འབེབས་ཤིན་ཏུ་དཀའ། ཀླུ་ཁྲུས་དང་གཏོར་མ་ཐོངས། དགྲ་ཕྱྭར། ལྷོ་ནུབ་ནས་དགྲ་དཔུང་ཁུར་དུ་ལྕི་བ་རིས་ནོན་པ་ལྟ་བུ་འབྱུང༌། དུས་འགྱངས་ཤིག་ན་ཡོད་པས་ད་ལྟ་ནས་བཟློག་ཐབས་རེམ། འབྱུང་བ་བུ་ཕྲད་ཀྱང་འགྱོད་ཕུལ་ཆེ་ཆུང་ཙམ་མ་གཏོགས་ཕྱོགས་དེ་དང་འདྲ་བས་རིགས་འགྲེ་སྦྱར། ༈ །ཤིང་ནང་ཕྲད། ཁྱིམ་ཕྱྭར། འཐོར་ཞིག་དང༌། འཕོ་འགྱུར་མང་དུ་འོང༌། བསྟན་ཕྱྭ་དང་ཆོས་ཕྱྭ་རྩ་བ་གཡོ་ཞིང་མི་བརྟན་པས་ངན། སྲིད་རྒྱུད་ཆགས་དཀའ། དོན་ཕྱྭར་བློ་ཕྱྭ་གང་ཡང་སྟོང་འུད་ཆེ་སྟེ་དོན་ལ་མི་འགྲུབ། ཚོང་ཕྱྭར། ནོར་ལ་ཁ་འཐོར་འོང་བས་ལོངས་སྤྱོད་མི་ཆགས། ནོར་ཕྱྭ་དང་ལོ་ཏོག་མོར་ཡང་དེ་མཚུངས། ཞུ་དོན་ལ་
རྗེ་འབང་ཞལ་མི་འཆམ་སྟེ་འགྲུབ་དཀའ། མཛའ་བོའི་མོ་ལ་འཐེན་འཁྱེར་འོང་ཞིང་རྙེད་ཀྱང་འདུམ་མི་འོང༌། དུར་ཁང་སོགས་ལའང་ངན། ནད་ཕྱྭར། ཡང་ཞིང་གཡོ་བའི་མོ་འཚུབ་ཉམས་ཅན། གདོན་སྔར་བཞིན་ཆག་སྒོ་སྨིན་དྲུག་གི་རྔ་ཚུབ་ལྟ་བུ་འོང་ངོ་ཡོད། ལེའུ་སྨན་པ་སྨན་དཔྱད་སོགས་ཀྱིས་ནད་ཉལ་བ་སློང་ནུས་ཀྱང་བསླང་བ་གསོད་དཀའ། མགྲོན་ཕྱྭར། འུར་ཟིང་དང་སྐྲག་ངོ་ཡོད་དེ་མགྱོགས་པར་སླེབ། རྟ་ཕྱུགས་སོགས་མི་འཕྲོད། བོར་སྟོར་མྱུར་དུ་བཙལ་ན་རྙེད་ཐང་སྟེ་ཅུང་ཟད་རལ་གྲུམ་དང་མང་པོར་སོང་འདུག་སྐྱུར་གྱི་མོ་ལ་རོ་ངན། བཙོ་སྙོལ་མཁན་སྔར་བཞིན། ཁ་ཆར་ཤིན་ཏུ་དཀོན། དགྲ་ཕྱྭར། མཁོན་འཛིང་གི་ངོ་ཡོད་ཀྱང་རྒྱབ་བསྲུང་བཟང་ན་བསྔོ་ཐུབ། ༈ མེ་ནང་ཕྲད། ཁྱིམ་ཕྱྭར། དར་རྒུད་ཟོ་ཆུན་གྱི་འཁོར་ལོ་འདྲ་སྟེ་ཡིད་རྟོན་མི་མཆི། བསྟན་ཕྱྭ་དང་ཆོས་ཕྱྭ་ཡང་དེ་དང་ཕྱོགས་འདྲ། སྲིད་ཕྱྭར། སྲིད་ཆགས་ཀྱང་ངེས་ངེས་མི་འདུག་བློ་ཕྱྭར་དོན་ཕྱའི་རིགས་ལ་འགྲུབ་འགྲུབ་འདྲ་བོ་ཡོད་དེ་འགྱུར་ལྡོག་ཆེ། ཚོང་ཕྱྭ་ནོར་ཕྱྭ་ལོ་ཏོག་རྣམས་ལ་ཡང་ཉམས་ཡོད། ཞུ་དོན་དང་མཛའ་བོ་རྙེད་མིན་ཡང་དོན་ཕྱྭ་དང་འདྲ། འདི་དབང་སྡུད་རིགས་ལ་བཟང་བར་བཤད་པའང་ཡོད་པས་དེ་གཉིས་གུང་བསྒྲིགས། དུར་མོ་ལ་ངན། ཁང་ཞིང་གི་མོར་འབྲིང་
སྟོད་ཡིན། ནད་ཕྱྭ་གདོན་ཕྱྭར། འཕྲལ་སོས་སོས་འདྲ་ཡང་ཕུགས་མི་བདེན། ལེའུ་སྨན་པ་སོགས་ལ། ཕན་ཐོགས་ཅུང་ཟད་ཡོད་ཀྱང་གཅིག་ཐོག་ཏུ་སྡོད་དཀའ། མགྲོན་ཕྱྭར་མགྲོན་པོ་ཀྲོང་གིས་ལང་ཙོག་གེར་བསྡད་དེ་སྙེམ་ཐག་མ་ཆོད་པར་གདའ། རྟ་ཕྱུགས་སོགས་འཕྲལ་བཟང་ཡང་ནམ་ཞིག་ལད་ངོ་ཡོད། བོར་སྟོར་བྲི་གང་འཕེལ་འགྲིབ་ཀྱི་ངོ་ཞིག་ཡོད་དེ་ལར་རྙེད། སྐྱུར་གྱི་མོ་དང་ཁ་ཆར་ལ་ངན། དགྲ་ཕྱྭར། རྨ་ཁྲག་གི་ངོ་ཅུང་ཟད་ཡོད། ༈ །ས་ནང་ཕྲད། ཁྱིམ་ཕྱྭར། བརྟན་ཆགས་ཀྱི་ངོ། བསྟན་ཕྱྭ་ཆོས་ཕྱྭ་ཡང་དེ་མཚུངས། སྲིད་ཕྱྭར། དལ་འགྱང་ཆེ། ལར་རིམ་གྲོ་བསྒྲུབ་ན་འབྱུང་ཐང༌། བློ་ཕྱྭ་དོན་ཕྱྭ་ཚོང་ཕྱྭ་རྣམས་ལ་ཕྱི་དལ་ཆེ་ཡང་ཁོག་བརྟན་པས་བཟང༌། ནོར་ཕྱྭ་དང་ལོ་ཕྱྭ་ལ་རབ་ཡིན། ཞུ་བ་ཕུལ་ན་སྙན་སྲ་བར་འདུག་ཕུགས་འགྲུབ་ཀྱང་སྲིད། མཛའ་བོ་ཚོལ་ན་རྙེད་དཀའ། དེ་མིན་ན་བཟང༌། དུར་ཁང་གི་མོ་སོགས་ལ་ས་བདག་གཞན་གྱིས་བདག་བྱས་ན་ཐང་བས་བཅོས་ཐོངས་དང་བཟང༌། ནད་ཕྱྭ་གདོན་ཕྱྭ་ཕྲ་མོའི་རིགས་ལ་སྐྱོན་མེད། དེ་མིན་གཏིང་ལྕི། ལེའུ་སྨན་པ་སོགས་ལ། ངང་བསྲིང་ན་ཕན་ཐོགས་འོང༌། མགྲོན་པོ་ལ་ཉེ་ཞོ་མི་འདུག་ཀྱང་ཤོལ་སྡོད་ཆེ། རྟ་ཕྱུགས་སོགས་བསྲེལ་ན་ལེགས་
པར་འོང༌། བོར་སྟོར་རང་ཁྱིམ་ནས་མ་རྙེད་ན་འཚོལ་དཀའ། ཆང་དང་འོ་ཞོའི་མོར་བཟང༌། བཙོ་སྙོལ་མཁན་སྔར་གསལ། ཁ་ཆར་རེ་ཞིག་མི་འབྱུང་བས་ཆུ་འབོད་གྱིས། དགྲ་ཕྱྭར། ཕན་ཚུན་གཉིས་ཀར་རྒྱལ་ཕམ་ཆེར་མི་འགྲོ་སྟེ་འབྲིང་སྟོད། ༈ །ལྕགས་ནང་ཕྲད། ཁྱིམ་ཕྱྭར། གྲི་ཁ་ལྟ་བས་ངན། བསྟན་ཕྱྭ་ཆོས་ཕྱྭ་གང་ལའང་བར་ཆད་མང༌། སྲིད་ཕྱྭར་ཅུང་ཟད་ངན། བློ་ཕྱྭ་དོན་ཕྱྭ་ཚོང་ཕྱྭ་རྣམས་བསྒྲུབ་དཀའ། ནོར་ཕྱྭ་དང་ལོ་ལེགས་ཉེས་ལ་དགྲ་མང་བས་བསྲུང་བ་བྱ། ཞུ་བ་ཕུལ་ན་མི་འགྲུབ། མཛའ་བོ་མི་རྙེད། རྙེད་ཀྱང་མི་དགེ །དུར་ཁང་སོགས་ཀྱི་མོ་ལ་གྲི་ཚང་ཡིན་ཏེ་ངན། ནད་ཕྱྭ་གདོན་ཕྱྭར་འཚུབ་ཆ་ཆེ་བས་གཟབ། ལེའུ་སློབ་དཔོན་སྨན་པ་སོགས་མི་འཕྲོད། མགྲོན་པོ་ལ་དཀའ་ཚེགས་ཆེན་པོ་བྱུང་འདུག་ད་དུང་མི་སླེབ། རྟ་ཕྱུགས་སོགས་བསྲེལ་ན་མི་དགེ །བོར་སྟོར་ཚུལ་བཞིན་མི་རྙེད་པས་འབད་པ་མ་མང༌། སྐྱུར་གྱི་མོ་ལ་རོ་བཟང་ཡང་ཁ་དགེ་མི་འོང༌། བཙོ་སྙོལ་མཁན་གོང་གིས་ཤེས། ཁ་ཆར་མི་འབབ་སེར་བ་འདྲ་འབྱུང་ཐང༌། དགྲ་ཕྱྭར། མཚོན་འཁྲུགས་རྭ་ཅོ་བརྡར་བ་ལྟ་བུ་ཡོད་པས་དགྲ་འཆོས་གྱིས། ༈ ཆུ་ནང་ཕྲད། ཁྱིམ་ཕྱྭར། འཇམ་ཞིང་ཞི་བའི་མོ་སྟེ་བཟང༌། བསྟན་ཕྱྭ་ཆོས་ཕྱྭར་ལྷ་ངོ་དམའ་བས་རིམ་གྲོ་བྱ། ཧ་ཅང་ངན་
རྒྱུ་ཡང་མེད། སྲིད་ཕྱྭར། བུ་མོ་བཙའ་སྟེ་སྲིད་པའི་ལྟེ་བསྒྱུར་དང་རྒྱབ་ཆོས་དགེ་ལས་ལ་འབུང༌། བློ་ཕྱྭ་དོན་ཕྱྭ་ཚོང་ཕྱྭ་རྣམས་འབྲིང་ཙམ་འགྲུབ། ནོར་ཕྱྭ་དང་ལོ་ཏོག་ལ་བཟང༌། མཛའ་བོ་རྙེད་མིན་དང་ཁང་ཞིང་སོགས་ཀྱི་མོར་ཡང་དགེ་ཞིང་བཀྲ་ཤིས། ནད་ཕྱྭར་སྐྱོན་མེད། མྱུར་དུ་ཁ་གསལ་འོང༌། གདོན་ཕྱྭར་མོ་གདོན་གནོད་དེ་ངོ་ཡང་བས་བཅོས་སླ། ལེའུ་སོགས་བརྟན་ན་འཕྲོད། མགྲོན་མྱུར་དུ་སླེབ་བམ། ཡང་ན་སྐད་སྙན་ཐོས། རྟ་ཕྱུགས་སོགས་སྤྱིར་འཕྲོད་ཀྱང་རྟས་ཅུང་ཟད་དམའ་བས་རྟ་བདག་མཆོད། རྟ་གཟུངས་ཐོན། བོར་སྟོར་མྱུར་བར་རྙེད། སྐྱུར་གྱི་མོ་ལ་འབྲིང་སྨད་ཡིན། ཁ་ཆར་ཆེན་པོ་འབྱུང༌། དགྲ་ཕྱྭར། དགྲ་སྙིང་དར་བས་འཇམ་སྟེ་སྐྱོན་མེད་དོ། །དེའང་འཕྲད་དང་འབྱུང་བ་རྐྱང་དཔྱད་ལ་ཅུང་ཟད་མི་མཐུན་པ་འབྱུང་ན་གཙོ་བོ་ཕྲད་དཔྱད་ཀྱིས་བྱེད། དེ་ལ་སོགས་པ་གོང་འོག་གི་ལྷུ་ལེགས་པར་བསྒྲིགས་ནས་སྒྲིན་ཞིང་ཞིབ་མོའི་རྣམ་དཔྱོད་ཀྱིས་དཔྱོད་པ་གལ་ཆེའོ། །དཔལ་རྡོ་རྗེ་མཁའ་འགྲོ་དང་མཁའ་འགྲོ་རྒྱ་མཚོ་གདན་བཞི་སོགས་རྒྱུད་ཀྱི་རྒྱལ་པོ་དུ་མར་ཡང་མོ་གདབ་ཐབས་ཡོད་ལ། དཀོན་བརྩེགས་ལེའུ་གསུམ་པར་བརྟགས་རིལ་སྒྲིལ་བའི་ཁུངས་ཀྱང་ཡོད་པ་དང༌། གཞན་ཡང་གཡུང་དྲུང་བོན་ལུགས་ཚུན་ཆད་ཀྱི་མོའི་གཞུང་མང་པོ་ཡོད་
མོད་ཀྱི། ཉུང་ངུ་རྣམ་གསལ་ཡང་དག་རྫོགས། །ཞེས་པ་ལྟ་བུའི་ཁྱད་པར་ཅུང་ཟད་ཀྱིས་བརྒྱན་ཏེ་བཤད་པ་འདི་ནི་བློ་གསལ་རྣམས་འཇུག་པ་བདེ་བའི་ཆེད་དུ་ཁོ་བོས་བྱས་སོ། །རྣམ་དཔྱོད་འོ་མའི་ཆུ་གཏེར་འཁྱིལ་བའི་ངོགས། །གཙུག་ལག་ངང་མོ་འབུམ་ཕྲག་གར་རྩེས་པའི། །དབྱངས་སྙན་རྒྱང་གླུའི་འགྱུར་བ་ལྷུང་ལྷུང་འདི། །བློ་གསལ་ཁྱེའུ་ཆུང་རྣ་བ་རབ་དགའི་དཔྱིད། །མ་མཐོང་མཐོང་རྫུ་འཕགས་པའི་ཐ་སྙད་དང༌། །འགལ་བའི་རྫུན་ཚིག་བྱིས་པ་འདྲིད་པའི་ཟོག །སྤངས་ནས་ལྐོག་གྱུར་བལྟ་བའི་མེ་ལོང་འདིར། །ཡང་དང་ཡང་དུ་བློ་གྲོས་མིག་འབུར་གཏོད། །ཟབ་མོ་རྣོ་མཐོང་གི་མན་ངག་ཟླ་ཤེལ་ནོར་བུའི་མེ་ལོང་ཞེས་བྱ་བ་འདི་ནི་མདོ་ཁམས་ཤར་ཕྱོགས་ཀྱི་བནྡྷེ་འཇམ་དཔལ་རིག་པའི་རལ་གྲིས་སྔོན་ཆད་རྩིས་ནག་གི་གཞུང་ལ་སྦྱང་གོམས་ཆུང་ཡང་སྐབས་ཐོག་ཉེར་མཁོའི་དབང་གིས་བི་རོ་བྷི་ཞེས་པ་ས་མོ་གླང་གི་ལོའི་ནག་པ་ཉ་བའི་ཡར་ཚེས་ཀྱི་རྒྱལ་བ་དང་པོའི་ཉིན་རྫོགས་པར་བྱས་པ་དགེ་ཞིང་ཤིས་པའི་སྣང་བ་འབད་མེད་དུ་འཇོ་བའི་རྒྱུར་གྱུར་ཅིག་མངྒ་ལམ།། །།