ཡེ་དརྨཱའི་ཟིན་བྲིས་ནྱ་གྲོ་དྷའི་ས་བོན།
ཡེ་་ཟིན་བྲིས་ནྱ་གྲོ་དྷའི་ས་བོན། ན་མ་་མུ་ན་ཡེ། སྟོབས་བཅུའི་རྩལ་གྱིས་རྣམ་བསྒྱིངས་ཤིང༌། །འཁོར་གྱི་ནང་ན་བསྙེང་དང་བྲལ། །རྟེན་འབྱུང་སེང་གེའི་སྒྲ་སྒྲོག་པ། །སྐྱེས་བུའི་ཁྱུ་མཆོག་དེ་ལ་འདུད། །རྟེན་འབྲེལ་སྙིང་པོའི་ཚིགས་བཅད་འདི་ནི་འཕགས་པ་རྟ་ཐུལ་གྱིས་ཤཱ་རིའི་བུ་ལ་བཤད་པའི་བྱིན་གྱིས་བརླབས་པའི་བཀར་ཡོངས་སུ་གྲགས། དེ་ཁོ་ནར་ཡང་མ་ངེས་ཏེ། སྟོན་པ་རི་རབ་ཀྱི་རྩེ་མོར་བཞུགས་དུས་མཆོད་རྟེན་བྱེད་པར་འདོད་པའི་ལྷ་མང་པོའི་དོན་དུ་འཕགས་པ་འཇིག་རྟེན་དབང་ཕྱུག་གིས་ཞུས་ནས་གསུངས་པ་གཟུངས་ཆེན་སྡེ་ལྔའི་ཡ་གྱལ་དུ་བཞུགས་ཤིང༌། སྤྱོད་རྒྱུད་རྣམ་སྣང་མངོན་བྱང་ལས་ཀྱང་གསུངས། བྱ་བའི་རྒྱུད་དཔུང་བཟང་དུ་ཡང༌། གཙང་ཞིང་དབེན་པའི་ས་ཡི་ཕྱོགས་སུ་ནི། །འཇིམ་པའམ་ནི་བྱེ་མ་ལས་བྱས་པའི། །བདེ་གཤེགས་མཆོད་རྟེན་རྟེན་འབྲེལ་སྙིང་པོ་ཅན། །སྡིག་པ་སྦྱང་བའི་ཕྱིར་ནི་རྟག་ཏུ་གདབ། །ཅེས་གསུངས་ཤིང༌། དེའི་འགྲེལ་པར་རྟེན་འབྲེལ་སྙིང་པོ་ནི་རྣམ་སྣང་མངོན་བྱང་ལས་གསུངས་པར་བཤད། དུས་འཁོར་འགྲེལ་ཆེན་དྲི་མེད་འོད་ལས་ཀྱང༌། ལྷ་ཐམས་ཅད་ལ་ཕྱག་རྒྱས་འདེབས་པ་ནི་རྡོ་རྗེ་སེམས་དཔའ་དང༌། ཆོས་ཕུང་བརྒྱད་ཁྲི་བཞི་སྟོང་ལ་ཕྱག་རྒྱས་འདེབས་པ་ནི་ཡེ༌། ཞེས་གསུངས་ལ། གྲུབ་ཆེན་ནག་པོ་སྤྱོད་པས། དཔྱིད་ཐིག་ཏུ་ཡང་དྲངས་པ་སོགས་བླ་མེད་ཀྱི་ཆོས་སྐོར་ནས་ཀྱང་མང་དུ་བཤད་དོ། །ཤཱ་རིའི་བུས་ཚིགས་བཅད་འདི་
ལན་གཅིག་ཐོས་པ་ཁོ་ནས་དོན་ཁོང་དུ་ཆུད་པ་དང༌། ཚིགས་བཅད་གཅིག་པོ་འདིས་དོན་མང་པོ་ལ་ཞུགས་པ་དང༌། ཤིན་ཏུ་ཕྲ་བའི་དོན་རྙེད་པ་དང༌། འདི་ཐོས་པའི་མོད་ལ་ཟག་པ་མེད་པའི་ཤེས་རབ་སྐྱེས་པ་དང༌། འདི་ཁོ་ན་ལས་བརྩམས་ཏེ་ཡུན་རིང་པོར་དྲིས་ལན་བྱས་ཀྱང་ཟད་མི་ཤེས་པས་ན་གོ་རིམ་བཞིན་དུ། ཤེས་རབ་མྱུར་བ། ཤེས་རབ་མགྱོགས་པ། ཤེས་རབ་རྣོ་བ། ངེས་པར་འབྱུང་བའི་ཤེས་རབ་ཅན། ཤེས་རབ་ཡངས་པ་ཞེས་མདོ་སྡེ་ལས་བཤད་པར་རྣམ་བཤད་རིག་པ་ནས་གསུངས། འདི་བོད་སྐད་དུ་བསྒྱུར་བའི་འགྱུར་ལ་མི་འདྲ་བ་བཅུ་སྐོར་ཙམ་འབྱུང་ཡང་བཟང་ཤོས། ཆོས་གང་རྒྱུས་བྱུང་དེ་དག་དང༌། །རྒྱུ་དང་དེ་འགོག་གང་ཡིན་པའང༌། །དེ་བཞིན་གཤེགས་པས་བཀའ་སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །ཞེས་དཔུང་བཟང་གི་འགྲེལ་པ་ན་སྣང་བ་འདུལ་བ་ལུང་གི་ཤཱ་རིའི་བུའི་ཐད་ན། ཆོས་རྣམས་གང་དག་རྒྱུ་ལས་བྱུང་བ་དང༌། །དེ་ཡི་རྒྱུ་དང་དེ་འགོག་གང་ཡིན་པའང༌། །དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུངས་པའི་ཚུལ་ཅན་དགེ་སྦྱོང་ཆེ། །ཞེས་འབྱུང་བ་དང་ཤིན་ཏུ་མཐུན་ནོ། །ཆོས་གང་རྒྱུས་བྱུང༌། ཞེས་ཡར་བཅད། དེ་དག་ཅེས་མར་བཅད་པའི་དབང་དུ་བཏང་ན། ཆོས་གང་རྒྱུས་བྱུང་དེ་དག་གི། །རྒྱུ་དང་ཞེས་པའང་གོ་བདེའོ། །མདོ་འདིའི་དོན་ཇི་བཞིན་ཤེས་པ་ནི་རྟེན་འབྲེལ་མདོ་འགྲེལ་དང༌། ས་ལུ་ལྗང་པ་རྩ་འགྲེལ། དབུ་མ་རིགས་ཚོགས་སོགས་ཞིབ་ཏུ་བལྟ་བ་ལ་རག་
ལས་ཀྱང༌། འདིར་ཚིག་འབྲུ་གནོན་ཚུལ་རྐྱང་པ་ཙམ་བརྗོད་ན། ཆོས་གང་ཞེས་པ་རྒྱུས་བྱུང༌། འོག་གི་རྒྱུ་དང་ཞེས་པ་གཉིས་ཆར་ལ་སྦྱོར་ཏེ། རྒྱུ་བྱུང་གི་ཆོས་གང་དང༌། རྒྱུར་གྱུར་པའི་ཆོས་གང་ཞེས་པའོ། །རྒྱུས་བྱུང་ཞེས་པ་ནི་སྤྱིར་འདུ་བྱེད་མ་རིག་པའི་རྒྱུས་བྱུང་བ་སོགས་ཡོད་ཀྱང་སྐབས་འདིར་དེ་ལ་མི་བྱའི། རྣམ་ཤེས། མིང་གཟུགས། སྐྱེ་མཆེད། རེག་པ། ཚོར་བ། སྐྱེ་བ། རྒ་ཤི་སྟེ་སྡུག་བསྔལ་གྱི་ལམ་བདུན། རྒྱུ་དང་ཞེས་པ་མ་རིག་པ་དང་སྲེད་ལེན་གཉིས་ཏེ་ཉོན་མོངས་གསུམ། འདུ་བྱེད་དང་སྲིད་པ་སྟེ་ལས་ཀྱི་ལམ་གཉིས་དང་ལྔའོ། །དེ་རྣམས་ལ་ཆོས་གང་ཞེས་གསུངས་པའི་རྒྱུ་མཚན་ནི། དབུ་མ་རྟེན་འབྲེལ་སྙིང་པོར། འགྲོ་ཀུན་རྒྱུ་དང་འབྲས་བུ་སྟེ། །འདི་ལ་སེམས་ཅན་གང་ཡང་མེད། །ཅེས་གསུངས་པ་ལྟར་སེམས་ཅན་འཁོར་བར་འཁོར་ཞེས་པ་རྒྱུ་དང་འབྲས་བུའི་ཆོས་འདི་རྣམས་འཁོར་ལོ་བཞིན་དུ་འབྱུང་བ་ལ་བརྟེན་ནས་བཏགས་པར་ཟད་ཀྱི། འཁོར་བ་པོའི་གང་ཟག་གི་བདག་ནི་ཅུང་ཟད་ཀྱང་མེད་དོ་ཞེས་བསྟན་པའི་ཆེད་ཡིན་ནོ། །ཆོས་གང་རྒྱུས་བྱུང་ཞེས་སྦྱར་བས་རྣམ་ཤེས་ལ་སོགས་པའི་ཆོས་འདི་དག་ནི་རང་གི་རྒྱུ་ལས་ཉོན་གྱི་གཞན་དབང་ཁོ་ནས་བྱུང་གི། རང་དབང་གཏན་ནས་མེད་དོ་ཞེས་ཕྲ་བའི་སྡུག་བསྔལ་བསྟན། རྒྱུས་བྱུང་ཚུལ་ནི་སྔ་མ་ལས། ཁ་ཏོན་མེ་ལོང་མར་མེ་རྒྱ། །མེ་ཤེལ་ས་བོན་སྐྱུར་དང་སྒྲས། །ཕུང་པོ་ཉིང་མཚམས་
སྦྱོར་བ་ཡང༌། །མི་འཕོ་བར་ཡང་མཁས་རྟོགས་བྱ། །ཞེས་དཔེ་བརྒྱད་གསུངས་པ་ལྟར་རྒྱུ་མེད་པར་དེ་དག་མི་འབྱུང་ལ། རྒྱུ་ཉིད་དེ་དག་ཏུ་འཕོ་བའང་མ་ཡིན་གྱི། རྒྱུ་ལ་བརྟེན་ནས་འབྱུང་བའི་རྟེན་འབྲེལ་ཙམ་མོ། །རྒྱུ་འབྲས་སུ་འགྱུར་ཚུལ་ནི། མ་རིག་པ་དང་འདུ་བྱེད་གཉིས་འཕེན་བྱེད་ཀྱི་རྒྱུ། སྲེད་ལེན་སྲིད་པ་གསུམ་འགྲུབ་བྱེད་ཀྱི་རྒྱུ། རྣམ་ཤེས་ནས་ཚོར་བའི་བར་འཕང་འབྲས། སྐྱེ་བ་རྒ་ཤི་གཉིས་གྲུབ་པའི་འབྲས་བུ་སྟེ། མ་རིག་པའི་དབང་གིས་ཡང་སྲིད་མངོན་པར་འདུ་བྱེད་པའི་འདུ་བྱེད་ཀྱི་ལས་བསགས་ཏེ། རྣམ་ཤེས་ནས་ཚོར་བའི་བར་ལྔ་འགྲུབ་རུང་དུ་འཕང་བ་སྲེད་ལེན་གྱིས་གསོས་བཏབ་པས་འདུ་བྱེད་ཀྱི་བག་ཆགས་སྲིད་པའི་རྟེན་འབྲེལ་དུ་གོ་འཕོས་ཏེ་སྐྱེ་བ་འགྲུབ་ཅིང༌། དེའི་ཉེས་དམིགས་སུ་རྒ་ཤི་འཁོར་བཅས་འབྱུང་བ་ཡིན་ནོ། །བདག་ཉིད་ཆེན་པོ་ཉེ་རྒྱལ་ལྟ་བུའི་ཚེ་རབས་གཞན་དུ་རྟེན་འབྱུང་སྟོང་པའི་དོན་དུ་འགྲོ་ཚུལ་ལ་བློ་ཤིན་ཏུ་བྱང་བ་རྣམས་ལ་འདི་ལྟར་བརྟེན་ནས་བྱུང་བའི་རྟེན་འབྱུང་གི་ཆོས་བསྟན་པ་ཉིད་མཐའ་བྲལ་དབུ་མའི་དེ་ཁོ་ན་ཉིད་ཀྱི་ཆོས་ཡོངས་རྫོགས་བསྟན་པར་ཡང་འགྱུར་ཏེ། བརྟེན་ནས་སྐྱེས་པ་ཉིད་ཀྱིས་གཏན་མ་སྐྱེས་པ་དང་རང་དབང་བའི་སྐྱེ་བའམ་ངོ་བོ་ཉིད་ཀྱིས་སྐྱེ་བ་གཉིས་ཆར་གྱི་སྒྲོ་འདོགས་གཅོད་ནུས་པའི་ཕྱིར་རོ། །མངོན་རྟོགས་རྒྱན་ལས། བྱང་ཆུབ་དང་ནི་རྟེན་མཆོད་ཉིད། །ཅེས་པའི་ཐད་ཀྱི་བརྒྱད་སྟོང་འགྲེལ་ཆེན་དུ་
ཚིགས་བཅད་འདིས་གང་ཟག་གི་བདག་མེད་ཙམ་བསྟན་པར་གསུངས་ཏེ། འདི་སྐོར་ལ་བཤད་རྒྱུ་མང་ངོ༌། །འཕང་འབྲས་འཕེན་བྱེད་ལ་བརྟེན་ནས་འབྱུང་བ་ལ་སོགས་པའི་རྟེན་འབྲེལ་གྱི་ངང་ཚུལ་ཤེས་པ་ན་དེའི་ལོག་ཕྱོགས་བདག་ཏུ་སྒྲོ་འདོགས་པ་དེ་རྨོངས་པ་མ་རིག་པ་དང་འཁོར་བའི་རྩ་བར་ཤེས་ལ། དེ་ཞེན་ཡུལ་ལ་འཁྲུལ་པའི་ལོག་ཤེས་སུ་མཐོང་ནས་རྟེན་འབྱུང་རྟོགས་པའི་ཤེས་རབ་ཀྱིས་སྤོང་ནུས་སུ་ཡང་མཐོང་བར་འགྱུར་ཏེ། བདེན་བཞིའི་བདེན་པ་དང་པོ་གཉིས་ཀྱི་གོ་རིམ་ཡང་དེ་ལྟར་རོ། །དེ་དག་ནི་ཀུན་ཉོན་ཕྱོགས་ཀྱི་རྟེན་འབྲེལ་ཡིན་ལ། དེ་འགོག་ཅེས་པས་རྣམ་བྱང་ཕྱོགས་བསྟན་ཏེ། དེའང་ཚིག་ཟུར་དང་པོ་དེ་ཞེས་པ་འདི་རྒྱུས་བྱུང་དང༌། རྒྱུ་གཉིས་ཆར་ལ་མི་བྱ་བར། རྒྱུ་ཁོ་ནའི་དོན་ལ་བྱ་དགོས་ཏེ། འདིའི་འགྱུར་ཁ་ཅིག་ཏུ། རྒྱུ་ལ་འགོག་པ། ཞེས་འབྱུང་བ་ལྟར་ཡིན་ཞིང༌། འགོག་ཅེས་པའི་དོན་ནི་འཕགས་པས་མཛད་པའི་ཆོས་ཀྱི་དབྱིངས་ཀྱི་སྙིང་པོ་རྣམ་པར་འགྲེལ་པ་ལས་གསུངས་པ་ལྔར་འགོག་པ་ཉིད་གང་ཡིན་པ་འགོག་བདེན་དང༌། གང་གིས་འགོག་པ་ལམ་བདེན་གཉིས་སུ་བྱ་སྟེ། རྒྱུས་བྱུང་བདུན་པོ་སླར་མི་སྐྱེ་བའི་ཆོས་ཅན་དུ་བྱེད་པ་ནི་རྒྱུ་ལྔའི་རྒྱུན་འབྱུང་བ་བཀག་པའི་འགོག་བདེན་ཐོབ་སྟོབས་ཁོ་ནས་ཡིན་ཏེ། འདིས་སྡུག་བསྔལ་ཉེར་ཞིའི་འགོག་བདེན་འཐོབ་ཚུལ་དང༌། འཐོབ་ནུས་གཉིས་ཀ་ཤེས་ནུས། ངེས་འབྱུང་གི་བསམ་པ་ཡོངས་རྫོགས་སྐྱེ་བ་ལ་དེ་ལྟར་ཤེས་པ་ངེས་པར་དགོས་གསུངས། དེ་ལྟ་
བུའི་འགོག་བདེན་ནི་རང་སྡེ་ཁ་ཅིག་རྫས་གྲུབ་དང༌། གཞན་དག་བྲལ་ཆ་ཙམ་ལ་བཞེད་ཀྱང་འཕགས་པ་ཀླུ་སྒྲུབ་ནི། དེ་ཁོ་ན་ཉིད་ཀྱི་ཁྱད་པར་ལམ་དང་རིག་པའི་དགག་བྱ་གཉིས་བཅད་པས་རབ་ཏུ་ཕྱེ་བ་ལ་བཞེད་དེ། རྒྱུས་བྱུང་བདུན་པོ་འགག་པ་རྒྱུ་འགག་པ་ཁོ་ནའི་སྟོབས་ཀྱིས་ཡིན་པར་ཤེས་པ་ན། རྒྱུ་འགོག་བྱེད་ཀྱི་ལམ་དེ་རྒྱུས་བྱུང་འགག་པའི་འགོག་བདེན་འཐོབ་བྱེད་དུ་མཐོང་བར་འགྱུར་ལ། རྒྱུ་ལྔའི་ནང་ནས་ཀྱང་ཉོན་མོངས་པའི་ལམ་ནི་རྩ་བ་གཅིག་བཅད་པས་ལས་དང་ཉོན་མོངས་ཐམས་ཅད་རང་ལོག་ཏུ་འགྲོ་བར་བྱར་ཡོད་ཅིང་ལས་ལ་ཚུལ་དེ་མེད་པ་དང༌། ཉོན་མོངས་པའི་རྩ་བ་ཡང་མ་རིག་པ་གཅིག་པུར་གོང་དུ་བརྗོད་ཟིན་པས་མདོར་ན་མ་རིག་པ་ཟློག་བྱེད་དེ་ཐར་པའི་ལམ་གྱི་དངོས་གཞིར་ངོས་ཟིན་ནོ། །དེའང་མ་རིག་པའི་འཛིན་སྟངས་ཀྱི་བཟློག་ཕྱོགས་སུ་འཇུག་པའི་བདག་མེད་རྣམ་ཅན་གྱི་ལམ་ཁོ་ན་དགོས་ཀྱི་མ་རིག་པ་ཚེར་མ་དབྱུང་བ་བཞིན་བྱར་མེད་ལ། བདག་མེད་གཏན་ལ་འབེབས་ཚུལ་ཡང་རྟེན་འབྱུང་སྟོང་པའི་དོན་དང་སྟོང་པ་རྟེན་འབྱུང་གི་དོན་དུ་འཆར་བའི་ཚིགས་བཅད་ཕྱེད་འདིས་བསྟན་པ་ཉིད་ལས་ལྷག་པ་གཞན་མེད་པས་ལམ་སྒོམ་ཚུལ་ལ་ངེས་པ་རྙེད་དོ། །འདས་ལམ་བར་ཆད་མེད་ལམ་དང་རྣམ་གྲོལ་ལམ་གྱི་དབྱེ་བ་ཐམས་ཅད་ཀྱང་གཙོ་བོར་ཉོན་མོངས་དང་དེ་ལས་ཀྱང་བདག་འཛིན་སྤོང་བ་དང་སྤངས་པའི་ལམ་གྱི་སྟེང་ནས་བཞག་པ་ལས་སྡུག་བསྔལ་སྤོང་བ་དང་སྤངས་པའི་རིམ་པས་བཞག་པ་མེད་དོ། །རྟེན་སྙིང་གཟུངས་ཆོག་ལས། ལས་དང་
ཉོན་མོངས་མེད་ན་འཁོར་བ་ལས་ཀྱང་ལྡོག །ཅེས་པར་ཡང་འདི་དག་དྲན་དགོས། འང་སྒྲས་འཁོར་བའི་འཇུག་རིམ་དུ་མ་ཟད་ལྡོག་ཚུལ་ཡང་བསྟན་ཞེས་པའོ། །རྐང་པ་གཉིས་པོ་འདིའི་དོན་དངོས་སྨྲ་བས་གཞན་དུ་བཤད་ཚུལ་ཡང་ཡོད་མོད་ཀྱི། སློབ་དཔོན་གྱི་རིན་ཆེན་ཕྲེང་བ་ལྟར་བྱེད་དགོས་སོ། །དེ་བཞིན་གཤེགས་པས་བཀའ་སྩལ་ཏེ། ཞེས་པ་ནི་སྔར་དྲངས་པའི་ལུང་ལས། དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །ཞེས་ཉིད་ཀྱི་སྒྲ་ཡོད་ཅིང༌། ཏོག་གཟུངས་ལས། སྨྲ་བའི་ཁྱུ་མཆོག་དེ་ཡིས་རང་གིས་མཁྱེན་ཏེ་གསུངས། །ཞེས་འབྱུང་བ་ལྟར་བཀའ་སྩལ་ཚུལ་ཁྱད་པར་ཅན་ཞིག་ཡིན་ཏེ། མངོན་འབྱུང་གི་མདོ་ལས། རང་གིས་མངོན་པར་ཤེས་ན་སུ་ལ་བསྟེན། །ཞེས་སློབ་དཔོན་མེད་པར་རང་དབང་དུ་གསུངས་པའོ། །དེ་སྐད་གསུངས་པ་ཞེས་པ་ནི་ལུང་ལས། དེ་སྐད་གསུངས་པའི་ཚུལ་ཅན་ཞེས་པ་ལྟར་ཏེ་འཕགས་པ་རང་སངས་རྒྱས་རྣམས་ཀྱང་སློབ་དཔོན་མེད་པར་རྟེན་འབྱུང་གཟིགས་པ་ཡིན་ཡང་མཛོད་འགྲེལ་ལས་གསུངས་པ་ལྟར་སྐྱེ་དགུ་རྒྱུན་ཕྱོགས་སུ་འཇུག་པ་རྒྱུ་ལས་བཟློག་པར་དཀའ་བའི་ཕྱིར་དང༌། སྙིང་རྗེ་དམན་པའི་ཕྱིར་དང༌། ཤེས་སྒྲིབ་མ་སྤངས་པས་གདུལ་བྱའི་ཁམས་དབང་མོས་པའི་ཁྱད་པར་ཕྲ་མོ་བཞིན་དུ་རྟེན་འབྱུང་གི་ཆོས་སྟོན་པ་ལ་འཇིགས་པ་དང་བཅས་པའི་དབང་གིས་ཉིད་ཀྱིས་བཀའ་སྩལ་ཞེས་མི་བརྗོད་ཅིང༌། དེ་སྐད་
གསུངས་པའི་ཚུལ་ཅན་ཞེས་ཀྱང་མི་བརྗོད་དེ། སངས་རྒྱས་བཅོམ་ལྡན་འདས་ནི་རྒྱུ་མཚན་དེ་ལས་བཟློག་པས་དེ་སྐད་གསུངས་པ་ཞེས་དང་གསུངས་པའི་ཚུལ་ཅན་ཞེས་བྱའོ། །དེའང་རྟེན་འབྱུང་གི་གཏམ་གསུངས་པའི་ཆེད་དུ་སྔོན་སྨོན་ལམ་བཏབ་ནས་བསྐལ་པ་གྲངས་མེད་གསུམ་དུ་རྟེན་འབྱུང་རྟོགས་པའི་ལམ་སྤྱོད་པ་རྒྱ་ཆེན་པོའི་གྲོགས་དང་བཅས་ཏེ་སྦྱང་བ་མཐར་སོན་ཏེ་འཇིག་རྟེན་དུ་བྱུང་བ་དང༌། ཆོས་བསྟན་པ་ཐམས་ཅད་དེ་ལས་བརྩམས་ཏེ་འཇུག་ཅིང༌། དེ་གསུངས་པ་ལ་སྐྱོ་དུབ་མི་མངའ་བ་དང༌། རྟེན་འབྱུང་གི་ཕྱག་རྒྱས་མ་བཏབ་པ་གང་ཡང་མི་གསུངས་པས་རྟེན་འབྱུང་གསུངས་པའི་ངང་ཚུལ་ཅན་ཞེས་པའི་ཚིག་ནུས་པ་ཅན་སྨོས་ཏེ། ཚུལ་ཅན་ཞེས་པ་དངོས་སུ་ཡོད་མེད་ཇི་ལྟར་ཡང་རྟ་ཐུལ་གྱིས་ཉེ་རྒྱལ་ལ་བཤད་པའི་ཚིགས་བཅད་ཀྱི་རྐང་པ་ཐ་མ་གཅིག་པོ་དེ་ཡིན་པས་དོན་གཅིག་པར་བཤད་དགོས་སོ། །དགེ་སྦྱོང་ནི་ཉོན་མོངས་པའི་དགྲ་ཐུལ་བ་དང༌། ཆེ་ཞེས་པ་ནི་དེ་རྣམས་ཀྱི་མཆོག་སྟེ་བཤད་མ་ཐག་པའི་བདེན་པ་བཞི་བསྟན་པའི་རྟགས་ཀྱིས་ལེགས་པར་སྤངས་པ་དང༌། མི་ལྡོག་པར་སྤངས་པ། མ་ལུས་པར་སྤངས་པའི་བདེ་གཤེགས་འགྲུབ་ཚུལ་རྣམ་འགྲེལ་ལེའུ་གཉིས་པ་ལས། རྒྱ་ཆེར་བཤད་པ་བཞིན་ནོ། །རྟེན་འབྱུང་སྨྲ་བ་ལས་ཕྱི་རོལ་དུ་གྱུར་པ་ལ་དགེ་སྦྱོང་གི་ཚུལ་དང་དགེ་སྦྱོང་ཚུལ་གྱི་འབྲས་བུ་གང་ཡང་མི་སྲིད་པས་བཅོམ་ལྡན་འདས་ཉིད་ཀྱིས། འདི་ཁོ་ན་ལ་བྲམ་ཟེ་ཡོད་ཀྱི། བསྟན་པ་
གཞན་ནི་དགེ་སྦྱོང་དང་བྲམ་ཟེ་དག་གིས་སྟོང་པ་ཡིན་ནོ། །ཞེས་སེང་གེའི་སྒྲས་གསུངས་སོ། །མདོར་ན་རྟེན་འབྱུང་གསུངས་པ་ཉིད་ཀྱིས་སྟོན་པ་མཚུངས་པ་མེད་པར་བསྟན་པ་སྟེ། དོན་འདི་ལ་དགོངས་ནས་རྩ་བ་ཤེས་རབ་ལས་ཀྱང༌། གང་ཞིག་རྟེན་ཅིང་འབྲེལ་བར་འབྱུང༌། །ཞེས་པ་ནས། སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ། ཞེས་དང༌། འཇིག་རྟེན་ལས་འདས་པར་བསྟོད་པ་ལས། རྟེན་ཅིང་འབྲེལ་བར་གང་འབྱུང་བ། །དེ་ཉིད་ཁྱོད་ཀྱིས་སྟོང་པར་བཞེད། །དངོས་པོ་རང་དབང་ཡོད་མིན་ཞེས། །མཉམ་མེད་ཁྱོད་ཀྱི་སེང་གེའི་སྒྲས། །ཞེས་སོགས་ཆེས་མང་དུ་གསུངས་སོ། །ནམ་ཞིག་འཕགས་ལམ་ཐོབ་དུས་སངས་རྒྱས་ལ་ཤེས་ནས་དད་པ་རྙེད་དེ་བདུད་དང་ཕས་ཀྱི་རྒོལ་བས་བཀྲིར་མི་བཏུབ་པའི་དགེ་འདུན་དཀོན་མཆོག་ཅེས་པའི་གྲངས་སུ་འགྲོ་བའང་རྟེན་འབྱུང་གི་དེ་ཉིད་མཐོང་བའི་སྒོ་ནས་སྟོན་པ་ལ་ཡིད་ཆེས་རྙེད་པ་འདིར་ཐུག་པས་ཚེ་རབས་ཀུན་ཏུ་སྟོན་པ་གཞན་ལ་མི་བསྟེན་པའི་དམ་པའི་གྲལ་དུ་སྡོད་པར་འདོད་ན་འདི་ལ་གཅེས་སྤྲས་ཆེན་པོ་བྱ་སྟེ། དོན་ཚུལ་བཞིན་བསམ་ན་ལྟ་ཅི་སྨོས། ཚིག་ཙམ་བཟླས་པ་ལ་ཡང་ཕན་ཡོན་ཚད་མེད་པ་འབྱུང་བའི་ཕྱིར་ཏེ། གཟུངས་ཆོག་ལས། རྟག་ཏུ་བཟླས་བརྗོད་བྱས་གྱུར་ན། །དམ་པའི་ཆོས་ཀྱང་བཟུང་བར་འགྱུར། །ཞེས་དང༌། མདོ་སྡེ་ལས། སངས་རྒྱས་
འབྱུང་བ་རྙེད་པར་དཀའོ། །ཆོས་ཐོས་པ་རྙེད་པར་དཀའོ། །ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བ་དཔག་ཏུ་མེད་པས་ཡོངས་སུ་བསྒོས་པའི་གསང་སྔགས་ཀྱི་ཚིག་འདི་དག་ཀྱང་རྙེད་པར་དཀའོ། །ཞེས་གསུངས་པ་ལྟར་རོ། །བཀའ་འགྱུར་གྱི་གྲར་འདིའི་གཟུངས་ཆོག་ཚིགས་བཅད་མ་ཞིག་བཞུགས་ཤིང༌། རྟེན་སྙིང་གི་ཆོ་ག་ཞིབ་མོ་ཞེས་པ་ཚིགས་ལྷུག་ཏུ་མཛད་པ་ཞིག་བསྟན་འགྱུར་ཁྲོད་དུ་བཞུགས་ཏེ། ཕྱི་མ་འདི་ནེརྦན་རཀྵི་ཏས་རང་གི་བླ་མ་ལས་རྟེན་སྙིང་གི་ལས་ཀྱི་ཆོ་ག་བརྒྱ་ཐོས་པ་ལས་ཕྱིས་སུ་ཕལ་ཆེར་བརྗེད་དེ་ལྷག་མ་རྣམས་ཀྱི་བརྗེད་བྱང་དུ་བཏབ་པ་ཡིན་པར་གཞུང་རང་གི་མཇུག་ཏུ་གསལ་ལ། དེ་གཉིས་ཚིགས་བཅད་ལྷུག་ཙམ་ལས་ཁྱད་པར་མི་སྣང་ཞིང༌། ཚིགས་བཅད་མའི་མཐར་ཡང༌། དགེ་སློང་ནེརྦན་རཀྵི་ཏས། །ཐོ་གར་ཡུལ་ནས་རྙེད་པ་སྟེ། །ཞེས་འབྱུང་བས་གཉིས་ཀ་བསྟན་བཅོས་ཡིན་ནོ། །རྟེན་འབྲེལ་སྙིང་པོའི་སྔགས་ཐེམས་ཞིབ་མོར་བཀོད་པ་ཞེས་བྱ་བ་ཇོ་བོ་རྗེ་དང་ནག་ཚོས་བསྒྱུར་བ་ཞིག་དང༌། རྟེན་སྙིང་གི་སྲུང་བ་རྗེ་བཙུན་བིརྦ་པ་ནས་ས་སྐྱ་པ་ཆེན་པོ་ལ་བརྒྱུད་པའི་གདམས་སྐོར་དང༌། རྟེན་སྙིང་གི་ཟིན་བྲིས་འཇམ་དབྱངས་ས་པཎ་གྱིས་གསུང་སྒྲོས་ལྟར་འཕགས་པ་རིན་པོ་ཆེས་བཀོད་པ་དང༌། ཆོས་ཀྱི་དབྱིངས་ཀྱི་སྙིང་པོའི་རྣམ་བཤད་ཅེས་ཀླུ་སྒྲུབ་ཞབས་ཀྱིས་མཛད་པ་དང༌། རྟག་པའི་རྡོ་རྗེས་མཛད་པའི་
འགྲེལ་པ་དང༌། ལྕང་སྐྱ་ངག་དབང་བློ་བཟང་ཆོས་ལྡན་གྱིས་མཛད་པའི་རྟེན་སྙིང་གི་རྣམ་བཤད་བདེ་གཤེགས་དགོངས་རྒྱན་ཞེས་བྱ་བ་སོགས་ཡོད་པས་དོན་དུ་གཉེར་བ་རྣམས་ཀྱིས་དེ་དག་ལས་ཀྱང་བཙལ་བར་བྱའོ། །ཞེས་པའང་རྔ་ཆེན་ནག་ཟླའི་དགའ་བ་བཞི་པ་ལའོ།། ༄༅། །རྟེན་སྙིང་གི་གླེང་གཞི་ལས་འཕྲོས་ཏེ་འཕགས་པ་ཤཱ་རིའི་བུའི་ལོ་རྒྱུས་ཆད་དུམ་འགའ་ཞིག་བྲིས་པ། ཤཱ་རིའི་བུས་ཚིགས་བཅད་འདི་ལན་གཅིག་གསན་པ་ཁོ་ནས་བདུད་རྩི་རྟོགས་ཤིང༌། མཽང་གལ་བུས་ལན་གཉིས་གསན་ནས་རྟོགས་གསུངས། ཤཱ་རིའི་བུ་མངལ་ན་གནས་དུས་མ་ཤཱ་རི་ཀས་ས་སྟེང་གི་རྩོད་པ་སྨྲ་བའི་ཁྱུ་མཆོག་བྲམ་ཟེ་སྐར་རྒྱལ་ཚར་བཅད། སྟོན་པས། དེ་བཞིན་གཤེགས་པ་མ་གཏོགས་པ། །འཇིག་རྟེན་ཀུན་གྱི་ཤེས་རབ་ཀྱིས། །ཤཱ་རིའི་བུ་ཡི་ཤེས་རབ་ལ། །བཅུ་དྲུག་ཆར་ཡང་མི་ཕོད་དོ། །ཞེས་གསུངས། བྲམ་ཟེ་ཤིན་ཏུ་མཁས་པ་ཞིག་གིས་སྟོན་པ་ལ་བདག་རབ་ཏུ་བྱུང་ནས་ཆོས་བཀླག་ན་ཤཱ་རིའི་བུའི་བློ་གྲོས་ཙམ་འོང་ངམ་ཞུས་ཚེ་མི་འོང་གསུངས་ནས་རབ་ཏུ་མ་བྱུང༌། དེ་ཕྱིས་སྤོས་འཚོང་གི་བུར་སྐྱེས་པ་འཕགས་པ་ཉེ་སྦས་ཏེ། འདི་ལ་སློབ་མ་ཉིན་གཅིག་ལ་བདེན་མཐོང་འབུམ་ཕྲག་བཅོ་བརྒྱད་བྱུང་བ་དང༌། ཕུག་གྲུ་བཅུ་གཉིས་པ་དགྲ་བཅོམ་པས་བོར་བའི་ཤིང་བུས་གང་བ་སོགས་ཀྱིས་མཚན་མེད་པའི་སངས་རྒྱས་སུ་གྲགས། དྲང་སྲོང་རི་བོས་སྟོན་པ་ལ། ཁྱོད་ཀྱི་སློབ་མ་
ཁྱོད་ཀྱི་རྗེས་སུ་ཆོས་ཀྱི་འཁོར་ལོ་སྐོར་ཞིང་ཤེས་རབ་ཀྱི་འོད་བྱེད་པ་སུ་ཡོད་ཞུས་པས། ཉེ་རྒྱལ་ཡོད་ཅེས་སངས་རྒྱས་གཉིས་པར་བསྔགས། དྲང་སྲོང་ལས་རབ་ཏུ་བྱུང་བ་སྟོང་ལས་ལྔ་བརྒྱ་ཀ་པི་ན་ལ་དང༌། ཉིས་བརྒྱ་ལྔ་བཅུ་རེ་མཆོག་ཟུང་གཅིག་ལ་གཏད་ནས་སོ་སོར་བཏུལ་བས་ཟླ་བ་གསུམ་ན་ཀ་པི་ནས་གདམས་ངག་བཏབ་པ་རྣམས་དགྲ་བཅོམ། མཽང་གལ་བུས་བཏབ་པ་རྣམས་ཕྱིར་མི་འོང༌། ཤཱ་རིའི་བུས་བཏབ་པ་རྣམས་རྒྱུན་ཞུགས་ཐོབ་པས། བཅོམ་ལྡན་འདས་ཀྱིས་ལྔ་བརྒྱ་པོ་དབང་རྣོན་དང༌། ལྷག་མ་འབྲིང་དང་རྟུལ་པོ་ཡིན་པས་གལ་ཏེ་ཤཱ་རིའི་བུའི་སློབ་མ་རྣམས་ཀ་པི་ན་དང་མཽང་གལ་བུ་ལ་གཏད་ན་དེའི་ཚེ་གཅིག་གིས་ཀྱང་རྒྱུན་ཞུགས་མི་འཐོབ་གསུངས་ཏེ་གདུལ་བ་ལ་མཁས་པའི་ཁྱད་དེ་འདྲ་ཡོད། མཚོ་མ་དྲོས་པར་ལས་ཀྱི་རྒྱུ་བ་ལུང་སྟོན་པའི་སྐབས་སུ། མཆོག་ཟུང་རྫུ་འཕྲུལ་འགྲན་པས་མཽང་གལ་བུ་ཕམ་པ་ན། སྟོན་པས་ངས་རྫུ་འཕྲུལ་ལ་མང་དུ་གནས་པའི་སྒོ་ནས་མཽང་གལ་བུ་རྫུ་འཕྲུལ་ཅན་གྱི་མཆོག་ཏུ་བསྟན་གྱི། རྫུ་འཕྲུལ་གྱི་ཡུལ་ཤེས་པའི་སྒོ་ནས་ནི་མ་ཡིན་ཞེས་དང༌། འཕགས་པ་མཽང་གལ་བུ་གང་ལ་སྙོམས་པར་འཇུག་པའི་ཏིང་ངེ་འཛིན་ཕལ་ཆེར་གྱི་མིང་ཙམ་ཡང་ཉན་ཐོས་གཞན་གྱིས་མི་ཤེས། གང་ལ་ཤཱ་རིའི་བུ་སྙོམས་པར་འཇུག་པའི་ཏིང་ངེ་འཛིན་ཕལ་ཆེར་མཽང་གལ་བུས་མིང་ཙམ་ཡང་མི་ཤེས་སོགས་བཀའ་སྩལ། མཆོག་ཟུང་དམྱལ་བ་མནར་མེད་རྒྱུར་བྱོན་པ་ན་མཽང་གལ་བུས་མནར་མེད་ཀྱི་འགྲོ་བ་ལ་སྙིང་
བརྩེ་བས་ཤིང་རྟའི་འཕང་ལོ་ཙམ་གྱི་ཆར་རྒྱུན་ཕབ་པ་མེ་འོད་ཀྱིས་སྐམ་སྟེ་ས་ལ་འབབས་རྒྱུ་མ་བྱུང༌། ཤཱ་རིའི་བུས་མོས་པ་ལས་བྱུང་བའི་ཏིང་ངེ་འཛིན་གྱིས་མནར་མེད་པའི་འཇིག་རྟེན་བསིལ་བར་མཛད། དེ་ནས་མི་རིང་བར་ཤཱ་རིའི་བུ་དགྲ་བཅོམ་བརྒྱད་ཁྲི་དང་བཅས་པ་གྲོང་ན་ལན་དར་མྱ་ངན་ལས་འདས་ཚེ་འཕགས་པ་ཀུན་དགའ་བོས་སྟོན་པ་ལ་ཤཱ་རིའི་བུ་སྟོན་པ་གཉིས་པ་ལྟ་བུ་མྱ་ངན་ལས་འདས་པས་དེའི་ཤེས་རབ་དང་ཆོས་ཀྱི་ལོངས་སྤྱོད་དྲན་ནས་བདག་གི་ཡིད་མྱ་ངན་གྱིས་འཁྲུགས་ཏེ་ཕྱོགས་བསླད། ཐོས་པའི་ཆོས་རྣམས་ཀྱང་བརྗེད་སོགས་ཞུས་ཚེ། རི་ཉིལ་བ་ན་ཐོག་མར་རྩེ་མོའི་ཆ་འཇིག་པ་དང༌། ཤིང་གི་འབྲས་བུ་སྨིན་པ་ལྷུང་བ་ན་དང་པོར་རྩེ་ན་ཡོད་པ་རྣམས་ལྷུང་བ་ལྟར་ཉན་ཐོས་ཆེན་པོ་རྣམས་ཞི་བར་མནལ་བ་ན་ཐོག་མར་ཉན་ཐོས་ཐམས་ཅད་ཀྱི་ཏོག་འཕགས་པ་ཤཱ་རིའི་བུ་ལྟ་བུ་མྱ་ངན་འདའ་བ་ཡིན་གསུངས། ཤཱ་རིའི་བུའི་སྐུ་གདུང་ཀུན་དགའ་བོའི་ཕྱག་ན་བཞུགས་པ་ཁྱིམ་བདག་མགོན་མེད་ཟས་སྦྱིན་གྱིས་ཞུས་པས་ཁོ་བོ་ཉིད་ཀྱིས་མཆོད་པ་བྱེད་དགོས་གསུང་ནས་མ་བྱིན། དེར་སྟོན་པས་འདི་ཙམ་གྱིས་ཁྱོད་ཤཱ་རིའི་བུ་ལ་དྲིན་གཟོ་མི་ནུས། དེ་ཁྱིམ་བདག་ལ་བྱིན་ཅིག་གསུངས་ནས་གདོད་བྱིན་ཏེ། ཁྱིམ་བདག་གིས་མཆོད་རྟེན་བརྩིགས་ཤིང་མཆོད་པ་རྒྱ་ཆེར་བྱས་སོ།། །།དགེ་ཞིང་བཀྲ་ཤིས།། །།