གླུད་ཆོག
རིན་པོ་ཆེའམ་རྫའི་སྣོད་དུ་ཆང་བུ་ཅི་འབྱོར་བཤམས། གླུད་གཟུགས་དཀོར་ཆ་དང་བཅས་པའང་འདུ་བྱ། ཆང་བུ་རྣམས་ལ་ཆབ་བྲན། ལས་སྔགས་དང༌། སྭ་བྷ་བས་བསང་སྦྱང༌། སྟོང་པའི་ངང་ལས་གླུད་གཏོར་འདོད་པའི་ཡོན་ཏན་ལྔ་དང་ལྡན་པ། ལན་ཆགས་ཀྱི་མགྲོན་རྣམས་ཀྱི་དབང་པོ་དྲུག་ལ་ཇི་ལྟར་འདོད་པ་བཞིན་འཆར་ཞིང་ནམ་ཡང་ཟད་མི་ཤེས་པའི་ལོངས་སྤྱོད་ཀྱི་གཏེར་ཆེན་པོར་གྱུར། ཨོཾ་ཨཱཿཧཱུྃ༌། ཅི་མང་བརྗོད། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བདེན་པ་དང༌། བཀའ་སྡོད་ཆོས་སྐྱོང་བ་རྣམས་ཀྱི་མཐུ་དཔུང་དང༌། ཆོས་ཀྱི་དབྱིངས་ཀྱི་བྱིན་རླབས་ཀྱིས་བདག་ཅག་འཁོར་དང་བཅས་པ་ལ་དངོས་དང་བརྒྱུད་ནས་གནོད་ཅིང་འཚེ་བར་བྱེད་པའི་སྟེང་གདོན་གཟའ། འོག་གདོན་ཀླུ། བར་གདོན་རྒྱལ་བསེན་ཐེལ་འགོང་སོ་སོའི་སྣ་ཁྲིད་སྡོང་ཟླ་རྒྱབ་བརྟེན་དང་བཅས་པ་ལན་ཆགས་གླུད་ཀྱི་གཏོར་མ་ལེན་པའི་སླད་དུ་སྦུར་མ་རླུང་གིས་དེད་པ་ལྟར་སྐད་ཅིག་ཉིད་ལ་འདིར་མཆིས་པར་གྱུར་ཅིག །སརྦ་བྷུ་ཏ་ཨ་ཀརྵ་ཡ་ཛཿལན་གསུམ་སོགས་བརྗོད། དེ་ནས་སཾ་བྷ་ར་བདུན་དང༌། མཚན་བཞི་ཚར་གཅིག་སེ་གོལ་ལན་གསུམ་བརྡབ་ཅིང༌། ཉི་ཟླ་ཁ་སྦྱོར་ལས་གསུངས་པའི། ཁྱེར་ཆིག་ཁྱེར་ཅིག་སྟོབས་ལྡན་རྣམས། །སྲེད་དང་
ཆགས་དང་ཞེན་པ་དང༌། །དྲན་དང་གཟུང་དང་བསམ་དང་རེག །ཀློད་དང་ཞི་དང་གྲོལ་བར་མཛོད། །ཚར་གཅིག་དེ་འདྲ་བ་ལན་གྲངས་ཅི་རིགས་ཀྱིས་ཆང་བུ་རྣམས་བསྔོ། དེ་ནས་གླུད་གཟུགས་སོགས་ལ་དམིགས་ཏེ། བསང་སྦྱང༌། སྟོང་པའི་ངང་ལས་ངར་ཕྱེའི་མི་གཟུགས་ཕུང་ཁམས་ཚང་བ། བཞིན་མཛེས་ལ་སྐྱེ་མཆེད་དྭངས་པ། ང་ལོང་གི་ཕྱག་རྒྱ་ཅན། གོས་འཕྱོར་རྒྱན་བཀྲག་ཤིག་སེ་བ། ལྷ་འདྲེའི་མིག་སྔར་བུ་བཞིན་སྡུག་པ། འདོད་ཡོན་ལོངས་སྤྱོད་ཀྱི་དཀོར་ནོར་བསམ་གྱིས་མི་ཁྱབ་པ་དང་བཅས་པར་གྱུར། ནམ་མཁའ་མཛོད་སྔགས་གསུམ་བརྗོད། འདོད་ཡོན་ལྔ་ལྡན་གླུད་གཏོར་བཟང་པོ་འདི། །འབྱུང་བ་ས་ཆུ་མེ་རླུང་བྲག་དང་ཤིང༌། །ནམ་མཁའ་ལ་བརྟེན་ལྷ་སྲིན་འབྱུང་པོའི་ཚོགས། །སྣང་ཞིང་སྲིད་པའི་ལྷ་འདྲེའི་ཚོགས་ལ་བསྔོ། །ཤ་ཁྲག་དྲོད་དབུགས་རྩ་རྒྱུས་པགས་པ་དང༌། །ལུས་ངག་ཡིད་གསུམ་གླུད་དུ་འདི་ཁྱེར་ལ། །བུ་ལོན་ལན་ཆགས་གནོད་འཚེ་ཀུན་བྲལ་ནས། །རང་གཞན་བདེ་ལེགས་ལམ་ལ་འཁོད་གྱུར་ཅིག །ཅེས་བསྔོ། གླུད་གཟུགས་མང་པོ་ཡོད་ན་དེ་ཉིད་བསྐྱར། ནད་སྤོ་གདོན་སྤོ་ནི། ཕྱགས་མ་ཐོགས་ལ། དཀོན་མཆོག་བདེན་མཐུ་མི་བསླུ་བས། །ནད་རྣམས་ཕྱུངས་ལ་གདོན་རྣམས་ཐོན། །ནད་གདོན་ཉེར་འཚེ་
གླུད་ལ་སྤོ། །འཕོས་ནས་ཕྱིར་མི་ལྡོག་པར་ཤོག །ཅི་མང་བརྗོད་མཐར་ངར་མི་ལ་ནད་པས་ཧ་གདབ། སླར་ཡང༌། བགེགས་དང་ལོག་འདྲེན་གྱི་རིགས་སུ་གྱུར་པ། ཕོ་གདོན་རྒྱལ་པོ། མོ་གདོན་བསེན་མོ། །ཀླུ་གཉན་ས་བདག །གནའ་འདྲེ་རྙིང་པ། ད་འདྲེ་གསར་པ། ཡུལ་འདྲེ་འཁྱམ་པོ། ཕ་རོལ་གྱི་རྦད་འདྲེ། གསོན་གྱི་བདུད་དང་གཤིན་གྱི་ལྕགས་བྱེད་པ། ཟས་ནོར་གྱི་གཡང་ལ་རྐུ་བ། ནད་སྣ་དང་གོད་སྣ་འདྲེན་པ། མི་ཁ་དང་འཁྲུགས་རྩོད་སློང་བ། འཕྲལ་ཡུན་གྱི་ཕུང་ཁྲོལ་མང་པོའི་ཚང་འཆའ་བ་ཐམས་ཅད་སོ་སོའི་ནད་དང་བཅས་ཏེ་དཀོན་མཆོག་གསུམ་གྱི་བདེན་པའི་མཐུ་དང་ཆོས་ཀྱི་དབྱིངས་བསམ་གྱིས་མི་ཁྱབ་པའི་སྟོབས་ཀྱིས་རྒྱ་ཁབ་ཀྱིས་ཚེར་མ་བླངས་པ་ལྟར་རང་དབང་མེད་པར་ཕྱིར་ཕྱུངས་ཏེ་གླུད་ལ་སྤོ་ཞིང་གླུད་ལ་དབབ། གླུད་དུ་བསྟིམས་ནས་རྒྱས་གདབ་པར་བགྱིའོ། །ནད་སྣ་ཐམས་ཅད་གླུད་ལ་བསྒྱུར། མི་ལ་ས་ཐོན་ཏེ་གླུད་ལ་ཞུགས། གདོན་ཁ་ཐམས་ཅད་གླུད་ལ་བསྐོར། མི་ལས་བཀྲོལ་ཏེ་གླུད་ལ་དཀྲིས། ནད་གདོན་གླུད་གསུམ་འགྲོགས་ལ་སོང༌། སོང་ནས་ཕྱོགས་འདིར་མ་འཁོར་དཀོན་མཆོག་གསུམ་གྱི་བཀའོ། །གསུམ་མམ་གཅིག་བདག་
ཅག་དཔོན་སློབ་འཁོར་དང་བཅས་པའི་བྱུར་དང་སྐལ་བ་ངན་པ་བཀྲ་མི་ཤིས་པ་ཐམས་ཅད་གླུད་ལ་འཕོ་བར་གྱུར་ཅིག །གླུད་ཀྱིས་ཁྱེར་བར་གྱུར་ཅིག །ཕྱིར་མ་ལྡོག་ཅིག །གསུམ་མམ་གཅིག་གི་མཐར། གཏོར་གླུད་རྣམས་ཁ་ཕྱིར་བསྒྱུར་ཏེ་བཏེགས་ལ། མཆོད་སྦྱིན་གནས་འདིར་གང་ལྷགས་པའི། །འབྱུང་པོ་ས་འོག་རྒྱུ་བ་དང༌། །གང་ཡང་ས་སྟེང་འཁོད་པ་དང༌། །ས་བླར་རྒྱུ་བ་གང་ཡིན་པ། །མགུ་བར་གྱིས་ལ་རང་གནས་སུ། །ཐམས་ཅད་ཐ་དད་འགྲོ་བར་གྱིས། །སརྦ་བྷུ་ཏ་གཙྪ། ཞེས་འདྲེ་ལྔ་གནས་པའི་ས་ཕྱོགས་རང་གནས་མི་མཐོང་བར་བསྐྱལ། ཤེར་སྙིང་སོགས་བསྲུང་བ་འདོན། བསྔོ་སྨོན་ཤིས་བརྗོད་བྱའོ། །ཆང་བུ་ལ་གླུད་ཀྱི་ཐ་སྙད་སྦྱོར་བ་མི་འཐད་སྙམ་ན། གླུད་ཀྱི་དོན་མ་གོ་བ་ཡིན་ཏེ། མདོ་སྡེ་ལས་བརྒྱ་པ་ལས་གླུད་བསླུ་རིན་གྱི་དོན་དུ་བཤད་ཅིང༌། མིའི་བསླུ་རིན་ལ་མི་གཟུགས་གཅིག་དགོས་པའི་ངེས་པ་མེད་པའི་ཕྱིར་སོགས་སྨྲོས། ཧོ་ཧོ།