རྗེ་བཙུན་ཏཱ་ར་ནཱ་ཐའི་ཞལ་གདམས་མགུར་འབུམ་གྱི་སྐོར།

ཉམས་ལེན་ཟབ་མོའི་གནད་དུ་བསྐུལ་བའི་གཏམ་མདོར་བསྡུས་པ།


TNT01_Page_0723
[མ་དཔེ་གཟིགས་ན་འདིར་གནོན།]

རྗེ་བཙུན་ཏཱ་ར་ནཱ་ཐའི་ཞལ་གདམས་མགུར་འབུམ་གྱི་སྐོར་བཞུགས་སོ། །


TNT01_Page_0724
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། ཚད་མེད་ཐུགས་རྗེ་ཕྱོགས་བཅུར་ཁྱབ་པ་ཡི། །སྟོན་པ་གཽ་ཏམ་རྒྱལ་བ་དེ་ལ་འདུད། །བདེ་གཤེགས་ལམ་ལས་དཔག་ཡས་འགྲོ་བ་རྣམས། །འདྲེན་མཛད་ཀུན་མཁྱེན་སྲས་ལའང་བདག་ཕྱག་འཚལ། །འཕོ་འགྱུར་མེད་པའི་ཡེ་ཤེས་ཀྱིས། །འཁོར་བ་ཇི་སྲིད་གནས་ཀྱི་བར། །མྱ་ངན་མི་འདའ་རྟག་པར་བཞུགས། །བླ་མ་འགྱུར་མེད་སྐུ་ལ་འདུད། །གསུང་མཆོག་གྲགས་སྟོང་བརྗོད་དུ་མེད། །རྒྱལ་གསུང་ལེགས་བཤད་རིན་ཆེན་སྒྲོན། །གསུང་གཅིག་གདུལ་བྱ་ཐམས་ཅད་ཀྱི། །བསམ་པ་དང་མཚུངས་སོ་སོར་གོ །ཐུགས་ནི་དབྱིངས་ལས་མ་གཡོས་ཀྱང༌། །སྨོན་ལམ་དབང་གིས་སྤྲུལ་པའི་སྐུ། །མཛད་པ་ལྷུན་གྲུབ་རྒྱུན་མི་འཆད། །ཞིང་ཁམས་རྒྱ་མཚོར་དབང་བསྒྱུར་ཁྱོད། །སངས་རྒྱས་ཀུན་དངོས་


TNT01_Page_0725
[མ་དཔེ་གཟིགས་ན་འདིར་གནོན།]

རིན་པོ་ཆེ། །རྗེ་བཙུན་བླ་མ་དེ་ལ་འདུད། །རྣམ་འཕྲུལ་བསམ་གྱིས་མི་ཁྱབ་པས། །འབྲལ་མེད་ཐུགས་རྗེས་བཟུང་དུ་གསོལ། །འཁོར་བའི་ཆོས་ལ་བློ་ལོག་ཅིང༌། །གཏན་གྱི་འདུན་མ་བྱང་ཆུབ་དེ། །ཐོབ་པར་འདོད་ན་གཏམ་འདི་གསོན། །འཕགས་པའི་ཆོས་ཀྱི་བཀའ་མཆིད་ཡོད། །མི་བདག་ལ་མོས་པའི་བློ་ཅན་འགའ། །ཡོང་སྲིད་ན་ཡིན་མིན་ཐུགས་ལ་ཞོག །ཆོས་ཡིན་ངེས་ཐུགས་སུ་འཕྲོད་པ་ལ། །དད་པ་དང་ཤེས་རབ་ཀྱི་ལས་འཕྲོ་དགོས། །ཟད་མེད་འཁོར་བའི་འཁོར་ལོ་བསྐོར་བསྐོར་ནས། །སྲིད་འདིར་སྡུག་བསྔལ་མྱོང་བའི་མཐའ་གྲངས་མེད། །དཀའ་ལས་དཀའ་དགུ་མྱོང་སྟེ་དོན་མེད་ཡིན། །མཚམས་མེད་བྱས་པས་དམྱལ་བ་མནར་མེད་དུ། །སྐྱེས་པའི་ཕ་མཐའ་བགྲངས་ཀྱང་སུ་ཡིས་ཆོད། །རང་གིས་


TNT01_Page_0726
[མ་དཔེ་གཟིགས་ན་འདིར་གནོན།]

མ་བསྡད་པ་ཡིས་ས་སྟེ་ཅི། །ལས་སྟབས་འདི་མ་བྱས་ཞེས་གཅིག་ཀྱང་མེད། །སྡུག་བསྔལ་མ་མྱོང་བྱ་བ་ག་ལ་ཡོད། །ས་ཕྱོགས་གཅིག་ཏུ་ཆད་པས་མགོ་བཅད་པའི། །མགོ་བོ་འབའ་ཞིག་སྤུངས་པར་གྱུར་ན་ཡང༌། །སྟོང་གསུམ་འཇིག་རྟེན་འདི་རུ་ག་ལ་ཤོང༌། །འཁོར་བའི་སྡུག་བསྔལ་འདི་ལ་ཟད་པ་མེད། །དམྱལ་བའི་གནས་ཀྱི་སྡུག་བསྔལ་བསམས་གྱུར་ན། །ཡུད་ཙམ་གཅིག་ཀྱང་བཟོད་སྐབས་ག་ལ་ཡོད། །ད་ལྟ་འབད་ན་བཟློག་པའི་ཐབས་མཆིས་ཀྱང༌། །ལེ་ལོའི་ངང་ལ་མི་ཚེ་སྐྱེལ་ལུགས་འདིས། །ནམ་ཞིག་དབང་མེད་ངན་སོང་གཡང་སར་ལྷུང༌། །དེ་ཚེ་འགྱོད་ཀྱང་འཕྱིས་པའི་དུས་གཅིག་འོང༌། །གཤིན་རྗེའི་སྐྱེས་བུས་རང་ལུས་དུམ་བུར་གཏུབས། །སླར་ཡང་འགྲིག་ནས་བརྒྱ་སྟོང་དུ་མར་གཤགས། །ཤ་རུས་རྐང་གི་བར་དུ་མེས་ཚིག་ནས། །ཡང་གསོས་ཡང་བསྲེག་ཚུལ་གྱིས་བསྐལ་མང་འདས། ཁྲོ་ཆུ་འབར་བའི་གཏིང་དུ་འཇུག་པ་དང༌། །ལྕགས་ཀྱི་ཐང་ལ་ལན་བརྒྱར་བགྲེ་བ་སོགས། །སྡུག་བསྔལ་བསམས་ན་དབང་མེད་སྐྱི་ཤ་བུང༌། །གྲང་བས་ཉེན་ནས་པད་མའི་འདབ་ལྟར་གས། །ཚེའི་ཚད་ནི་བརྒྱ་སྟོང་ས་མ་ཡ། །འདི་ལ་བཟོད་ཐབས་འདུག་གམ་སྙིང་མེད་པོ། །ལོ་བརྒྱའི་བར་དུ་ཟས་སྐོམ་མིང་ཡང་མེད། །འཐབ་རྩོད་དབང་གིས་རང་ལུས་ལན་བརྒྱར་རྨས། །ཚ་གྲང་སྡུག་བསྔལ་བཟོད་པར་དཀའ་བ་ཡི། །ཡི་དྭགས་གནས་སུ་སྐྱེས་ན་ཇི་ལྟར་བགྱི། །གནས་ཀྱི་སྐྱབས་མེད་གཅིག་ལ་གཅིག་ཟ་བ། །དགྲ་ཡི་འཇིགས་པས་


TNT01_Page_0727
[མ་དཔེ་གཟིགས་ན་འདིར་གནོན།]

རྟག་ཏུ་སྐྲག་ཅིང་འཁྲུལ། །གསོད་གཅོད་བྲན་དུ་བཀོལ་བའི་སྡུག་བསྔལ་ཅན། །དུད་འགྲོའི་ཚུལ་ལ་བསམས་ན་བཟོད་ཐབས་མེད། །མིར་སྐྱེས་ན་ཡང་སྡུག་བསྔལ་འབའ་ཞིག་ལགས། །འཐབ་རྩོད་འཁྲུགས་དང་དབུལ་འཕོངས་བརླག་པ་སོགས། །སྐྱེ་རྒ་ན་འཆིའི་སྡུག་བསྔལ་བསམ་ལས་འདས། །འཁོར་ལོས་བསྒྱུར་རྒྱལ་ཐོབ་ཀྱང་དམྱལ་བར་སྐྱེས། །མཐོ་དམན་འབྱོར་རྒུད་ཡིད་བརྟན་ཅི་ཡང་མེད། །ལྷ་དང་ལྷ་མིན་གཟུགས་ཁམས་གཟུགས་མེད་ཁམས། །ཐོབ་ཀྱང་ཡིད་བརྟན་མེད་པར་ངན་འགྲོར་འགྲོ། །འཆི་འཕོ་འཐབ་རྩོད་ལ་སོགས་སྡུག་བསྔལ་མང༌། །ཞེས་པ་ནི་སྡུག་བསྔལ་གྱི་གཏམ་སྟེ་དང་པོའོ། །སྡུག་བསྔལ་དེ་དག་ཐམས་ཅད་ཀྱང༌། །རྒྱུ་མེད་མ་ཡིན་ལས་ལས་སྐྱེས། །སྡིག་པའི་དབང་གིས་ངན་འགྲོར་འགྲོ། །ལུང་མ་བསྟན་ལ་རྣམ་སྨིན་མེད། །དགེ་བས་མཐོ་རིས་འགྲོ་བར་གསུངས། །འཇིག་རྟེན་ལས་ཀྱི་རི་མོ་བཀྲ། །དེ་བས་བླང་དོར་ལ་འབད་འཚལ། །དགེ་སྡིག་ཆུང་ལའང་བརྙས་མི་བྱ། །རྙེད་དཀའི་མི་ལུས་ཐོབ་པ་ལ། །སྡུག་བསྔལ་གྱི་འཁོར་ལོ་མ་སྐོར་ཅིག །ནམ་ཞིག་ནམ་འཆི་ཆ་མེད་པས། །དགེ་བ་ལ་འཕྲལ་དུ་འབད་པ་ཞུ། །རང་ལ་རང་དབང་མེད་བཞིན་དུ། །འཁོར་གཡོག་གི་མགོ་འདོན་ཨ་ལ་ལ། །དམ་ཚིག་རྩ་ལྟར་བོར་བ་ལ། །ཉམས་ལེན་གྱི་ཁེངས་གཏམ་བཞད་གད་བྲོ། །མཚན་ལྡན་གྱི་བླ་མ་མི་མཉེས་པའི། །བརྩོན་འགྲུས་ཀྱི་འབད་འབུངས་


TNT01_Page_0728
[མ་དཔེ་གཟིགས་ན་འདིར་གནོན།]

ཨ་རེ་རེ། །ཆེ་འདོད་དང་ཆོས་བརྒྱད་མ་ཞིག་པའི། །ཞེན་ལོག་སྐད་ཟེར་ཏེ་བརྫུན་རེ་ཆེ། །གྲགས་འདོད་ཀྱི་རླུང་དམར་མ་ཞི་བའི། །དབེན་པ་འགྲིམས་པས་ཅི་ལ་ཕན། །རང་གཞན་གྱི་ཕྱོགས་རིས་ཇེ་འཕེལ་ལ། །སྒྲུབ་པ་བྱེད་སྐད་དེ་ཟོག་རྒན་ཡིན། །འཕྲལ་ཇོ་བཟང་མི་གཤིས་ལེགས་ལེགས་འདྲ། །ཕུགས་སུ་གྱོད་སྦྱོར་དེ་ཕུང་རྒན་ཡིན། །ཆོས་པའི་རྣམ་ཐར་གཙང་བ་དེ། །ཅི་བྱེད་ཆོས་དང་མཐུན་པ་ཡིན། །ཆོས་བརྒྱད་ཀྱི་འཁོར་ལོ་བསྐོར་བ་དེ། །འགྲོ་དོན་སྐད་ཟེར་ཀྱང་ཐེ་ལེ་ལེ། །དྲིན་ཅན་ཕ་མ་མི་འདྲེན་པར། །ཞི་བདེ་དོན་གཉེར་གྱིས་ག་ལ་འོང༌། །གཡོ་ཅན་དྲང་གཏམ་གྱིས་སླུ་བ་ལ། མི་ཤེས་ཀླད་མེད་ཀུན་ཆུ་ལྟར་རྒྱུག །གཏིང་སྐྱོན་འདོན་པའི་གཏམ་སྟེ་གཉིས་པའོ། །མཐའ་ཡས་དུས་ཀྱི་བསྐལ་པ་ལའང༌། །སངས་རྒྱས་འབྱུང་བ་བརྒྱ་ལམ་ཙམ། །སྐྱེ་བ་འབུམ་ཕྲག་དུ་མ་ལའང༌། །མི་ལུས་ཐོབ་པ་ལན་རེ་ཙམ། །མི་ལུས་མ་ཐོབ་པའི་སྐྱེ་བ་གཞན། །ལས་འབྲས་ལ་སྤང་བླང་བྱེད་པ་དཀོན། །དམ་ཆོས་ཀྱི་ཉམས་ལེན་ག་ལ་ཞིག །དམ་ཆོས་རྣ་བར་ཡང་མི་འགྲོ་བའི། །བཟའ་བཏུང་ལོངས་སྤྱོད་སྒྲུབ་ལ་མཁས་པ་དེ། །དུད་འགྲོ་དང་ཁྱད་པར་ཅུང་ཟད་མེད། །དམ་ཆོས་ཉམས་སུ་མ་བླངས་ན། །འཁོར་བའི་འཁོར་ལོ་བསྐོར་བ་ཡིན། །རང་སེམས་འདུལ་ཐབས་ལམ་འབད་ན། །འཁོར་བ་ལ་རང་ཐར་མི་ཡོང་སྟེ་མཆི། །དུས་ད་རེས་བླ་མ་དང་མཇལ་དུས་འདིར། །འཁོར་བ་ལ་ཕྱི་ཕྱག་འཚལ་བ་


TNT01_Page_0729
[མ་དཔེ་གཟིགས་ན་འདིར་གནོན།]

ཞུ། །མི་ལུས་ཐོབ་ཀྱང་ཆོས་དང་མཇལ། །མཚན་ལྡན་བླ་མའི་ཞབས་པད་བསྟེན། །གདམས་ངག་ཟབ་དགུ་ཐོབ་དུས་འདིར། །ཉམས་ལེན་མི་བྱེད་ན་རང་ལ་སྡིག །མི་ནོར་ཆེན་སེར་སྣས་བཅིངས་པ་ཞིག །ནོར་ལོངས་སྤྱོད་ཀྱིས་བང་མཛོད་མང་ཡོད་ཀྱང༌། །ཟ་མ་ནུས་ལྟོགས་ནས་ཤི་བ་བཞིན། །ཉམས་ལེན་ཅུང་ཟད་ཀྱང་མི་བྱེད་པའི། །ཆོས་སྣ་མང་པོ་བསགས་པ་སྟེ། །དཔེ་བུམ་གྱིས་མཛོད་ཕུག་བཀང་ན་ཡང༌། །རང་རྒྱུད་ཐ་མལ་དུ་ལུས་ཤིང་འཆི། །དགོས་དུས་ཕན་པ་མི་འབྱུང་ངོ༌། །འདུས་བྱས་མི་རྟག་པའི་རང་བཞིན་གྱིས། །ནམ་ཟླ་དུས་བཞིའི་འགྱུར་བ་དང༌། །ཉིན་མཚན་སྡོད་མེད་ཀྱི་འཁོར་ལོ་བསྐོར། །ཉི་ཟླ་གཟའ་སྐར་གྱི་འཆར་ནུབ་འདི། །དུས་སྡོད་མེད་དུ་སྟོན་པའི་སློབ་དཔོན་ལགས། །གཞན་ཤི་བ་མཐོང་དང་ཐོས་པ་དང༌། །འཕྲལ་ནད་ཀྱིས་བཏབ་དང་རྒས་པ་སོགས། །རྒྱལ་ཁམས་དང་ཡུལ་མིའི་འགྱུར་ལུགས་ཀུན། །ཅིས་ཀྱང་འཆི་བའི་བྱ་གཏོང་ཡིན། །རྒན་གཞོན་དང་དྲག་གཞན་གྱི་དབྱེ་བ་མེད། །ཀུན་གྱིས་བཀུར་བའི་རྒྱལ་པོ་དང༌། །ཤིན་ཏུ་གཅེས་པའི་གྲོགས་དང་བུ། །གཟུགས་བཟང་ནད་མེད་དཔའ་རྩལ་འཛོམ། །འཁོར་དམག་དཔུང་འཛོམ་པའི་ཁ་དྲག་པོ། །ཟད་མེད་ལོངས་སྤྱོད་ཀྱི་དབུས་ན་ཉལ་བ་ཡང༌། །ནམ་ཞིག་འཆི་བ་ལ་ཐུག་པའི་ཚེ། །ཐབས་ཅིས་ཀྱང་ཕན་པ་མི་གདོག་པས། །བསགས་པའི་ནོར་དང་མཛའ་བའི་གྲོགས། །འཚོ་བའི་ཟས་དང་སྙན་


TNT01_Page_0730
[མ་དཔེ་གཟིགས་ན་འདིར་གནོན།]

པའི་གཏམ། །ཐམས་ཅད་དབང་མེད་ཤུལ་དུ་ལུས། །འཆི་བདག་རྒྱལ་པོས་ཟིན་པ་ལ། །གཡོ་སྒྱུ་དང་ཐབས་ཀྱིས་མི་ཟློག་ཅིང༌། །ནོར་རྫས་དང་དབང་ཐང་གིས་ཅི་བྱར་ཡོད། །ནམ་ཞིག་འབྱུང་བཞིའི་ཕུང་པོ་འདི། །ནམ་འགྱེས་ཀྱི་དུས་བཏབ་མི་གདོག་པས། །འཕྲལ་འཕྲལ་དུ་དམ་ཆོས་ལ་མ་འབད་ན། །ཤིན་ཏུ་འགྱོད་པར་གྱུར་ཏ་རེ། །ལང་ཚོ་ཡོལ་བར་མ་གྱུར་ཞིང༌། །ནད་ཀྱི་མ་བཏབ་དབང་པོ་གསལ། །སྐད་ཅིག་ཀྱང་སྡོད་པའི་དབང་མེད་པར། །སྨྲ་འཕྲོ་ལ་ཤི་བ་མ་མཐོང་ངམ། །སྤྱིར་ངེས་པར་འཆི་དང་མྱུར་དུ་འཆི། །ནམ་འཆི་ཆ་མེད་ཀྱི་ལོང་མེད་བསམ། །ཅིས་ཀྱང་མི་ཕན་པའི་ངེས་འབྱུང་བསྐྱེད། །བློ་ཆོས་སུ་འགྲོ་བའི་གདམས་ངག་ལགས། །མི་ལུས་རྙེད་པར་དཀའ་ཞིང་མི་རྟག་པའི་གཏམ་སྟེ་གསུམ་པའོ། །རྙེད་དཀའ་དོན་ཆེན་ཐོབ་དུས་འདིར། །སླུ་བ་མེད་པའི་ལས་འབྲས་ལ། །སྤང་བླང་འཁྲུལ་པ་མེད་པར་འཚལ། །མཆོག་དམན་ཀུན་ལ་གདམས་ངག་ཡིན། །དགེ་སྡིག་གི་ལས་ལ་སྤྱད་པ་ནི། །བདེ་སྡུག་གི་འབྲས་བུ་རྒྱ་ཆེར་འཕེལ། །ནས་བྲེ་གང་སྦྱིན་པར་བཏང་བ་ཡང༌། །ཞིང་བསམ་པ་རྣམ་པར་དག་གྱུར་ན། །གནས་མཐོ་རིས་སུ་སྐྱེ་བ་དཔག་མེད་པར། །བདེ་སྐྱིད་ཀྱི་འབྲས་བུ་བསམ་མི་ཁྱབ། །ལས་ཉིན་གཅིག་བསགས་པའི་སྡིག་ལའང༌། །ལོ་གྲངས་མེད་དམྱལ་བར་སྡུག་བསྔལ་མྱོང༌། །གཞན་སྐྱེ་བ་བརྒྱ་སྟོང་དུད་འགྲོ་དང༌། །ཡི་དྭགས་ཀྱི་གནས་སུ་ཁར་མ་འཁོར། །


TNT01_Page_0731
[མ་དཔེ་གཟིགས་ན་འདིར་གནོན།]

རྒྱ་ལ་མི་རུ་སྐྱེས་ཀྱང་འཕོངས་པ་དང༌། །ཚེ་ཐུང་ལ་སོགས་སྡུག་བསྔལ་ཟད་པ་མེད། །དགེ་བ་ལས་སྡུག་བསྔལ་མྱོང་བ་དང༌། །སྡིག་པ་ལས་བདེ་སྐྱིད་འབྱུང་བ་ནི། །གང་ནའང་སྲིད་པ་མ་ཡིན་པས། །ཕྲ་མོ་ནས་ཞིབ་ཏིག་གལ་རེ་ཆེ། །སྟོང་ཉིད་ཀྱི་རྦད་ཁམ་མ་ཆེ་ཨང༌། །བདག་ཉིད་སྡིག་པས་མ་གོས་ན། ཁམས་གསུམ་གྱི་སེམས་ཅན་དགྲར་ལངས་ཀྱང༌། །ངན་སོང་དུ་འཁྲིད་པའི་གོ་སྐབས་མེད། །བདག་རང་གིས་བྱས་པ་མ་ཡིན་པར། །ཕན་པའི་དགེ་བ་དང་གནོད་པའི་སྡིག །རང་ཅི་འདོད་སྤོ་ཐབས་མི་གདོག་ཅིང༌། །ལས་མ་བྱས་པ་དང་འཕྲད་པ་མེད། །དུས་བསྐལ་པ་འབུམ་ཕྲག་བརྒྱ་འདས་ཀྱང༌། །ལམ་བསྒོམས་ཤིང་སྦྱོང་ཐབས་མ་བྱས་ན། །ལས་རྙིང་ནས་ཆུད་ཟོས་འགྱུར་བ་སོགས། །དོན་མེད་དུ་ཟད་པ་ཡོང་མི་སྲིད། །དེ་ལྟར་འཕེལ་བ་ཆེ་དང་འབྲས་བུ་དེས། །མ་བྱས་འཕྲད་མེད་བྱས་པ་ཆུད་མི་གསོན། །མཚན་ཉིད་བཞི་དང་ལྡན་ཕྱིར་དགེ་སྡིག་གི །ལས་ལ་སྤང་བླང་བྱེད་པ་གལ་རེ་ཆེ། །རང་སེམས་བདག་ཏུ་འཛིན་པས་བཅིངས་པ་ལས། །ཉོན་མོངས་དུག་གསུམ་གྱི་འཆར་སྒོ་འབྱུང༌། །དུག་གསུམ་གྱི་རྣམ་རྟོག་རྒྱ་ཡན་གྱིས། །ལས་བྱས་ཚད་སྡུག་བསྔལ་གཡོས་སུ་མཐོང༌། །འབད་ནས་སྒྲུབས་པའི་དགེ་བ་ཡང༌། །མཐར་འཁོར་བར་འཁྱམས་པའི་རྒྱུ་རུ་འགྱུར། །ལས་གཞན་ལྟ་སྨོས་ཀྱང་ག་ལ་དགོས། །དུས་ད་རེས་གཏན་གྱི་མདུན་མ་སྒྲུབས། །ཉོན་མོངས་པས་ལས་བསགས་སྡུག་


TNT01_Page_0732
[མ་དཔེ་གཟིགས་ན་འདིར་གནོན།]

བསྔལ་མྱོང༌། །མ་དག་འཁོར་བའི་སྣང་བ་ཤར། །དར་གྱི་སྲིན་བུ་ཇི་བཞིན་དུ། །རང་གིས་རང་ཉིད་བཅིངས་ནས་ནི། །ནམ་ཡང་ཐར་པ་མེད་པ་ཡིན། །སྡུག་བསྔལ་དཔག་མེད་མྱོང་བ་ལགས། །རང་སེམས་རང་གནས་སུ་མ་ཆུག་པས། །གཅིག་ལ་ཆགས་ཤིང་གཅིག་ལ་སྡང༌། །གནས་ལུགས་མ་རྟོགས་མགོ་བོ་འཁོར། །ཉོན་མོངས་གང་སྐྱེས་ཀྱང་རང་སེམས་ཡིན། །ལས་ནི་ཉོན་མོངས་ཀྱིས་གསོག་པའི་ཕྱིར། །སྡུག་བསྔལ་གྱི་འཁོར་ལོ་བསྐོར་བ་འདིའི། །རྩ་བ་ནི་རང་གི་སེམས་ལས་བྱུང༌། །གྲོལ་ཡང་རང་གི་སེམས་སུ་གྲོལ། །ལས་དང་འབྲས་བུའི་གཏམ་སྟེ་བཞི་པའོ། །འཁོར་བའི་གནས་ཚུལ་དེ་ལགས་པས། །ཟད་མེད་ཀྱི་སྡུག་བསྔལ་བཟློག་པ་དང༌། །དུས་གཏན་དུ་བདེ་བའི་གོ་འཕང་ཞིག །ད་རེས་ཅིས་ཀྱང་ཐོབ་པར་འཚལ། །ལྟ་བ་དང་སྤྱོད་པ་བསྒོམ་པ་གསུམ། །འཛོམ་ཞིང་ལག་ལེན་ལ་ཐེབས་པ་དགོས། །དཔེ་མདུང་སྒྲོམ་བཞག་པ་ཇི་བཞིན་དུ། །དེ་གསུམ་གཅིག་ལ་གཅིག་བརྟེན་ལགས། །ལྟ་མེད་ཀྱི་སྤྱོད་པ་བཟང་ན་ཡང༌། །མཚན་འཛིན་འཁོར་བའི་རྒྱུ་ཞིག་ལགས། །སྤྱོད་པ་ཉམས་པའི་ལྟ་བ་ནི། །བསོད་ནམས་ཚོགས་ཀྱང་མ་རྫོགས་ལ། །ཆད་ལྟའི་གཡང་ལ་ལྷུང་ཉེན་ཡོད། །སྒོམ་པ་མེད་ན་ལྟ་སྤྱོད་ཀྱང༌། །ས་འོག་གཏེར་བཞིན་ཕན་མི་ཐོགས། །ཇི་ལྟར་དབུལ་པོའི་ཁྱིམ་གྱི་འོག །ཏ་ལ་བདུན་སྲིད་ཙམ་ཞིག་ན། །མི་ཟད་རིན་ཆེན་གཏེར་ཡོད་ཀྱང༌། དབུལ་


TNT01_Page_0733
[མ་དཔེ་གཟིགས་ན་འདིར་གནོན།]

པོ་བཀྲེས་པས་ངལ་བ་བཞིན། །ལྟ་སྤྱོད་བཟང་པོ་མང་བཤད་ཀྱང༌། །སྒོམ་པས་སྒྲུབ་པ་དང་བྲལ་བ་ལ། །སེམས་དང་ཆོས་སུ་མ་འདྲེས་པས། །དགོས་དུས་ཕན་ཐོག་འབྱུང་བ་དཀའ། །སངས་རྒྱས་སེམས་ཅན་གྱི་སྤྱི་མེས་དེས། །སེམས་ཅན་རྣམས་ལ་ཕན་དོན་དུ། །ཚུལ་ཁྲིམས་ཤེས་རབ་སེམས་ཞེས་པའི། །བསླབ་པ་རྣམ་གསུམ་གསུངས་པ་ཡིན། །ཚུལ་ཁྲིམས་ཀྱི་བསླབ་པ་སྤྱོད་པ་སྟེ། །ཤེས་རབ་ཀྱི་བསླབ་པ་ལྟ་བ་ཡིན། །སྒོམ་པ་སེམས་ཀྱི་བསླབ་པ་སྟེ། །བསླབ་གསུམ་འདི་ལ་ནན་ཏན་འཚལ། །ལྟ་བའི་རྒྱལ་པོ་མཐའ་བྲལ་སྟེ། །ཡོད་འཛིན་རྟག་པའི་མཐའ་དང་བྲལ། །མེད་འཛིན་ཆད་པའི་མཐའ་དང་བྲལ། །ཅིར་ཡང་མི་འཛིན་དབུ་མའི་ལམ། །ཡ་གི་ཞིག་རྫོགས་པའི་སངས་རྒྱས་ནས། །མ་གི་དམྱལ་ཁམས་ཡན་ཆད་དུ། །ཕྱི་ས་རྡོ་རི་བྲག་འཇིག་རྟེན་དང༌། །ནང་ཕུང་པོ་ཁམས་དང་དབང་པོ་སོགས། །འགྲོ་དྲུག་སྲོག་ཆགས་སུ་སྣང་བ་དང༌། །ཡུལ་གཟུགས་སྒྲ་དྲི་རོ་རེག་བྱ་ཆོས། །ཐམས་ཅད་རང་སེམས་ཀྱི་སྣང་བ་ཙམ། །ཕྱི་རོལ་ན་མེད་ཀྱང་ཡོད་པར་སྣང༌། །འདི་ལྟར་སྣང་བ་ཐམས་ཅད་ནི། །ཕྱི་ན་མེད་ཅིང་ནང་ནའང་མེད། །ཡུལ་དང་སེམས་སུ་གྲུབ་པ་མེད། །ཇི་ལྟར་སྨྱོ་བའི་འཁྲུལ་སྣང་ལ། །དོན་ལ་དགྲ་བོ་མེད་ན་ཡང༌། །དགྲ་བོས་རང་ཉིད་འདེད་པར་སྣང༌། །དེ་དགྲ་བོར་སྣང་བ་སེམས་སྣང་ཡིན། །ཕྱི་རུ་མེད་པར་མ་ཟད་ཀྱི། །འཁྲུལ་བས་དགྲ་བོར་སྣང་བ་ལྟར། །


TNT01_Page_0734
[མ་དཔེ་གཟིགས་ན་འདིར་གནོན།]

སེམས་ཀྱི་ངོ་བོར་ཡང་ག་ལ་གྲུབ། །གཟུགས་གདོད་ནས་གྲུབ་པ་མེད་པའི་ཕྱིར། །རང་སེམས་འཁྲུལ་པའི་སྣང་བ་ལ། །གཟུགས་ཀྱི་རྣམ་པར་སྣང་མོད་ཀྱི། །གཟུགས་ཕྱིན་མེད་པར་མ་ཟད་ཀྱི། །སེམས་ཀྱི་ངོར་ཡང་ག་ལ་གྲུབ། །རི་བོང་མགོ་ལ་རྭ་མེད་ན། །རྨི་ལམ་དུ་རི་བོང་རྭ་རྨི་ཡང༌། །དེ་འཁྲུལ་པ་ཙམ་གྱི་སྣང་ངོ་ལས། །ཕྱི་ནང་གང་ནའང་ཡོད་མ་ཡིན། །དེ་བཞིན་ཆོས་རྣམས་ཐམས་ཅད་དེ། །འཁོར་བ་གདོད་ནས་སྟོང་པར་མ་ཟད་ཀྱི། །ལམ་གྱི་འཆར་སྒོ་སྣ་ཚོགས་དང༌། །འབྲས་བུ་དག་སྣང་རབ་འབྱམས་ཀྱང༌། །ཐམས་ཅད་སེམས་ཀྱི་ཆོ་འཕྲུལ་ཡིན། །སེམས་ཀྱི་རང་བཞིན་ནམ་མཁའ་འདྲ། །ནམ་ཡང་འགྱུར་བ་མི་སྲིད་ཅིང༌། །གང་ལའང་ཕྱོགས་ཆ་ཉེ་རིང་བྲལ། ཁ་དོག་དབྱིབས་སོགས་མཚན་ཉིད་མེད། །བལྟར་མེད་གཟུང་དུ་མེད་པ་ལ། །ཇི་ལྟར་བྱས་ཀྱང་ཤོང་བ་དང༌། །སྣོད་བཅུད་ཐམས་ཅད་འཆར་དུ་རུང༌། །ཡོད་མེད་གང་དུའང་བརྗོད་མི་ནུས། །རིན་ཆེན་སེམས་ཀྱི་རྒྱལ་པོ་འདི། །ཅི་ཡང་མ་ཡིན་དམིགས་སུ་མེད། །ཆོས་རྣམས་གང་གིའང་མཚན་ཉིད་དུ། །འདི་ལྟར་ཡོད་ཅེས་བརྗོད་དུ་མེད། །འཁོར་བ་སྣོད་བཅུད་འཇིག་རྟེན་དང༌། །ལས་དང་ཉོན་མོངས་སྡུག་བསྔལ་སོགས། །དད་པ་སྙིང་རྗེ་སྟོང་ཉིད་སྒོམ། །ས་དང་ལམ་གྱི་རིམ་པ་དང༌། །ཉམས་རྟོགས་ཡོན་ཏན་འཆར་སྒོ་དང༌། །འབྲས་བུ་སངས་རྒྱས་ཀྱི་ཐུགས་རྗེ་དང༌། །ཡེ་ཤེས་རྫུ་འཕྲུལ་མཐུ་སྟོབས་དང༌། །འཕྲིན་ལས་རྒྱུན་ཆད་མེད་


TNT01_Page_0735
[མ་དཔེ་གཟིགས་ན་འདིར་གནོན།]

པར་སྣང་བ་སྟེ། །གཞི་ལམ་འབྲས་བུའི་འཆར་སྒོ་ཟད་མེད་འདི། །རང་སེམས་གཅིག་པུའི་སྣང་བར་ཤར། །དེ་ཕྱིར་མེད་ཅེས་མི་བརྗོད་དོ། །འཁོར་བ་ཐོག་མ་མེད་པ་ནས། །ཕྱི་མའི་མུ་མཐར་ཐུག་གི་བར། །སེམས་ཀྱི་རང་བཞིན་གསལ་སྟོང་སྟེ། །ངན་སོང་དམྱལ་བར་སྐྱེས་དུས་ཀྱང༌། །ངོ་བོ་ངན་དུ་མ་སོང་ཞིང༌། །ནམ་ཞིག་རྫོགས་སངས་རྒྱས་དུས་སུ། །ངོ་བོར་བཟང་པོར་འགྱུར་བ་མེད། །གསལ་ཆ་རྒྱུན་མི་འཆད་ཕྱིར་མེད་པ་མིན། །ཡེ་ནས་ངོས་བཟུང་མེད་ཕྱིར་ཡོད་པ་མིན། །གཉིས་ཀ་མ་ཡིན་གཉིས་ཀ་མིན་པའང་མིན། །དེ་དག་མ་ཡིན་གཞན་ཡང་མ་ཡིན་པས། །རང་སེམས་འདི་ལ་འདི་ཡིན་བརྗོད་དུ་མེད། །བརྗོད་མེད་བསམ་མེད་དབྱིངས་ལ་མཉམ་པར་བཞག །ལྟ་བ་གཙོ་བོར་གྱུར་པའི་གཏམ་སྟེ་ལྔ་པའོ། །རང་བཞིན་ལྟ་བ་རྣམ་དག་དེ། །སྤྱོད་པའི་གྲོགས་དང་སྦྲེལ་བར་བྱ། །དཀར་ནག་ལས་འབྲས་ཀྱི་ཕྲ་ཞིབ་ལ། །བླངས་དོར་ནན་ཏན་དུ་འབད་པ་དང༌། །དམ་ཚིག་དང་སྡོམ་པ་སྲོག་བཞིན་བསྲུངས། །དམ་དུ་བཅས་ཤིང་ཁས་བླངས་པའི། །དགེ་བ་ནན་ཏན་དུ་སྒྲུབ་པ་གཅེས། །གང་བསྟེན་ན་དམ་ཆོས་འཕེལ་བ་དང༌། །དགེ་ལ་སྦྱོར་ཞིང་བློ་མཐུན་ལ། །ཆོག་ཤེས་ལྡན་ཞིང་ཅི་བྱེད་ཀྱང༌། །སྒོ་གསུམ་ཆོས་དང་མཐུན་པ་སྟེ། །མཐོ་དམན་ཇི་ལྟར་ཡིན་ན་ཡང༌། །གྲོགས་བཟང་དེ་འདྲ་རྙེད་ན་བསྟེན། །ད་ལྟ་དུས་ཀྱི་སྐྱོན་ཁོ་ནས། །དེའི་འདྲའི་གྲོགས་བཟང་རྙེད་དཀའ་བས། །གཅིག་


TNT01_Page_0736
[མ་དཔེ་གཟིགས་ན་འདིར་གནོན།]

པུ་དབེན་པར་གནས་པར་བྱ། །ཆོས་ཀྱི་བར་ཆད་བྱེད་པ་དང༌། །སྡིག་པའི་ལས་ལ་སྦྱོར་བ་ཡི། །གྲོགས་ངན་རིང་དུ་སྤང་བར་བྱ། །གྲོགས་སུ་ཞིག་ཡིན་ཡང་ཚེ་འདི་ཡི། །ཆེ་འདོད་དང་སྣང་ཤས་ཆགས་སྡང་སོགས། །ཇེ་འཕེལ་དུ་འགྲོ་བར་འདུག་ན་ནི། །ལུང་པ་གཅིག་ཏུའང་མི་སྡོད་དེ། །རྒྱང་རིང་ཕ་རོལ་འགྲོ་བ་མཆོག །ཆོས་བྱེད་ཉམས་ལེན་འཕེལ་བའི་ས། །གནས་ཆེན་ཡིན་པས་ཡུན་རིང་སྡོད། །ཆགས་སྡང་དང་ཕྱོགས་འཛིན་འཕེལ་བ་དེར། །གྲུབ་ཐོབ་གོང་མའི་བཞུགས་གནས་སམ། །དགེ་འདུན་གྱི་སྡེའམ་ཆོས་ཀྱི་གྲྭ། །བླ་མའི་གདན་ས་ཡིན་ན་ཡང༌། །མི་སྡོད་དབེན་པའི་གནས་སུ་འགྲོ། །ཕྱག་དང་སྐོར་བ་ལ་སོགས་པ། །ལུས་ཀྱི་དགེ་བ་ཅི་འགྲུབ་བྱ། །མི་ལུས་ཐོབ་པ་ལ་མདོ་དོན་ཡོད་པ་ཡིན། །མདོ་འདོན་གསོལ་འདེབས་སྔགས་བཟླས་སོགས། །ངག་གི་དགེ་བ་ཅི་ནུས་བྱ། །ངག་ནུས་པ་རྙེད་པའི་ཕན་ཡོན་ཡོད། །ལྷ་སྒོམ་དང་དད་པ་ཡི་རང་སོགས། །ཡིད་ཀྱི་དགེ་བ་ལ་འབད་པར་བྱ། །སེམས་ཏིང་འཛིན་ལ་རང་བྱང་ཆུབ་ནས་འོང༌། །དགོས་མེད་བྲེལ་བའི་ཡལ་ཡུལ་དང༌། །ལོང་གཏམ་ཟད་མེད་ཀྱི་སྨྲ་བརྗོད་དང༌། །སེམས་མི་འགྱུ་དགུ་འགྱུའི་རྣམ་རྟོག་མཁན། །ལུས་དབེན་པར་བསྡད་ཀྱང་མདོ་མེད་ཡིན། །རྙེད་དཀའི་དལ་འབྱོར་མི་ལུས་འདི། །སོས་དལ་དུ་མ་གཏོང་ཆོས་ལ་འབུངས། །མཆོད་དང་གཏོར་མ་ལ་བརྩོན་པ་དང༌། །ཡོན་གནས་ཀྱི་ཞིང་མཆོག་དགེ་


TNT01_Page_0737
[མ་དཔེ་གཟིགས་ན་འདིར་གནོན།]

འདུན་དང༌། །སྐུ་གཟུགས་དང་མཆོད་རྟེན་ལ་མཆོད་བགྱིད་ཅིང༌། །དབུལ་འཕོངས་རྣམས་ལ་སྦྱིན་པ་གཏོང༌། །ཀུན་འདུས་ཀྱི་བླ་མ་རིན་པོ་ཆེ། །མཉེས་པར་བྱེད་ཅིང་ཅི་གསུང་སྒྲུབ། །མཐའ་ཡས་འགྲོ་དྲུག་གི་སེམས་ཅན་རྣམས། །ཡི་དམ་དུ་བསྒོམ་ཞིང་གུས་པར་བྱེད། །ཕ་མར་བསྒོམ་ཞིང་ཕན་འདོགས་ན། །མཆེད་གྲོགས་ཀྱི་དག་སྣང་ལྟ་ཅི་སྨོས། །སེམས་ཅན་དང་བསྟན་པ་ལ་གནོད་འདུག་ན། །རང་གི་དོན་ཆེན་ཅི་ཡིན་ཡང༌། །དེ་མ་ཐག་ཏུ་བོར་བ་གཅེས། །དཀོན་མཆོག་ལ་སྨོད་པའི་རྒྱུར་འགྱུར་དང༌། །བཤད་སྒྲུབ་ཀྱི་ཆོས་གྲྭ་ལ་གནོད་པ་དང༌། །དགེ་འདུན་སྡེ་འཁྲུགས་ཀྱི་རྒྱུར་སོང་ན། །རང་གི་ཆེད་དུ་མ་བསམས་ཀྱང༌། །སྡིག་པའི་ཕུང་པོ་མུ་མཐའ་མེད། །བསྐལ་པ་གྲངས་མེད་དུ་དམྱལ་བར་གནས། །ཆེད་དུ་བསམས་ལ་སྨོས་ཅི་དགོས། །ཕ་བསད་ནས་མ་ལ་མཆོད་བྱས་ཀྱང༌། །དགེ་བར་འགྱུར་བ་ག་ལ་ཡོད། །གཞན་གྱི་བསྟན་པ་ལ་གནོད་བྱས་ནས། །རང་བསྟན་པ་འཛུགས་ཟེར་ཨ་ཙ་མ། །བདག་ཉིད་སྤྱོད་པ་ཕུན་ཚོགས་ཀྱང༌། །གཞན་ལ་བརྙས་པ་མི་འཚལ་ཞིང༌། །སྤྱོད་པ་ལ་བཟང་དུ་མི་འཛིན་པར། །བླང་དོར་དུ་སྣང་བ་ཇི་སྙེད་ཀྱང༌། །ཐམས་ཅད་སྒྱུ་མའི་རང་སྣང་ཙམ། །ལས་འབྲས་ཀྱང་རྨི་ལམ་ལྟར་ཤེས་པས། །ཅི་བྱེད་དྲན་པའི་སོ་བས་བཟུང༌། །བླང་དོར་རོ་མཉམ་གྱི་ངང་དུ་ཞོག །སྤྱོད་པའི་སྐབས་ཀྱི་གཏམ་སྟེ་


TNT01_Page_0738
[མ་དཔེ་གཟིགས་ན་འདིར་གནོན།]

དྲུག་པའོ། །ལྟ་བ་མཐའ་དབུས་མེད་པ་དང༌། །སྤྱོད་པ་བླང་དོར་བྲལ་བ་ཞིག །སྒོམ་པ་ཡེངས་མེད་ཀྱིས་ཉམས་སུ་ལོང༌། །ངེས་པར་དོན་དུ་འགྱུར་ཏེ་མཆི། །སེམས་རང་རིག་རང་གསལ་སོ་མ་ལ། །བཅས་བཅོས་མི་བྱ་རང་དགར་བཞག །ཚོགས་དྲུག་གི་སྣང་བ་འགག་མེད་ལ། །ལྷུག་པའི་ངང་ནས་རང་སོ་བཟུང༌། །གང་ཤར་ལ་ངོ་ཤེས་རྗེན་པ་འཚལ། །གང་ཤར་རང་ངོ་མ་ཤེས་ན། །སྟོང་ཉིད་མི་རྟོག་པའི་སྒོམ་པ་ཡང༌། །བློ་བྱས་ཀྱི་ཆོས་ལས་མ་འདས་པས། །རྟག་ཀྱང་མི་ཐུབ་ཀུ་རེ་དོག །མ་བཅོས་ཀློང་དུ་གྱུར་པའི་ཚེ། །སྤྲོས་བཅས་ཀྱི་སྒོམ་པ་ཅི་བྱས་ཀྱང༌། །རང་ངོ་ཤེས་པའི་གནད་མཆོག་དེས། །ཅི་བྱས་བྱར་མེད་ཀྱི་དབྱིངས་སུ་ཐིམ། །སྣང་བ་དང་རྣམ་རྟོག་ཅི་ཤར་ཡང༌། ཁོ་རང་གི་རང་ངོ་ཤེས་དུས་ན། །གསལ་སྟོང་བརྗོད་མེད་བློ་ལས་འདས། །རང་ཞལ་རྗེན་པར་ལྷང་གིས་མཐོང༌། །སེམས་རང་བཞིན་སྟོང་གསལ་བདེ་བ་དེ། །རྐྱེན་གྱིས་འབྱུང་བ་མ་ཡིན་ལ། །བླ་མ་གདམས་ངག་མཁས་ནས་ཡིན། །སློབ་མ་ཤེས་རབ་ཆེས་པས་མིན། །གཞི་ནས་དངོས་པོའི་གནས་ལུགས་ལགས། །ཡིན་པ་ལ་ཡིན་པར་ངོ་ཤེས་འཚལ། །དྲན་པ་རྒྱུན་ཆགས་མཆོག་ཏུ་གཅེས། །བླ་མ་སངས་རྒྱས་རིན་ཆེན་ལ། །ཡིད་མོས་གུས་དྲག་པོས་གསོལ་བ་འདེབས། །བླ་མའི་ཐུགས་དང་རང་གི་སེམས། །སྤྲོས་བྲལ་ནམ་མཁའ་ལྟ་བུ་གཉིས། །གཅིག་ཏུ་འདྲེས་ལ་གསོལ་བ་ཐོབ། །རང་སེམས་


TNT01_Page_0739
[མ་དཔེ་གཟིགས་ན་འདིར་གནོན།]

ཆོས་སྐུའི་རང་མཚང་རིག །རང་ལུས་ལྷ་སྐུར་ཤེས་པར་བྱ། །དག་སྣང་རབ་འབྱམས་མཆེད་པ་ཡིན། །འགྲོ་དྲུག་ཕ་མར་ཤེས་པར་བྱ། །སྙིང་རྗེ་མཁའ་ལྟར་ཁྱབ་པ་ཡིན། །སྣང་བ་སྒྱུ་མར་ཤེས་པར་བྱ། །འཛིན་པ་རང་སར་གྲོལ་བར་འགྱུར། །རང་སེམས་སྐྱེ་མེད་དུ་ཤེས་པར་བྱ། །འགྱུར་མེད་ཀྱི་བཙན་ས་ཟིན་པ་ལགས། །གཟུང་བ་ཕྱི་རུ་མ་ལུས་ཤིང༌། །འཛིན་པ་ནང་དུ་མ་ལུས་པར། །གཟུང་འཛིན་གཉིས་སྤངས་ཀྱི་ཤེས་པ་དེ། །རིག་སྟོང་དབྱེར་མེད་ཆོས་ཀྱི་སྐུ། །ཇི་ལྟར་ཆུ་ལ་ཆུ་བླུག་དང༌། །ཇི་ལྟར་མར་ལ་མར་བཞག་བཞིན། །སྣང་སེམས་གཅིག་ཏུ་བསྲེ་བ་ལ། །དྲན་དང་ཤེས་བཞིན་གྱིས་སྐྱོང་བར་འཚལ། །སྒོམ་པའི་སྐབས་ཀྱི་གཏམ་སྟེ་བདུན་པའོ། །སྦྱིན་དང་ཚུལ་ཁྲིམས་བཟོད་པ་དང༌། །བརྩོན་འགྲུས་བསམ་གཏན་ལྔ་པོ་ཡང༌། །དམིགས་མེད་ཀྱིས་ཟིན་ན་ཕར་ཕྱིན་ཡིན། །ཤེས་རབ་ཉིད་ལ་ལྟ་ཅི་སྨོས། །གོང་ལྟ་སྤྱོད་སྒོམ་པར་བཤད་པ་དེ། །ཉམས་སུ་བླངས་ན་ཕར་ཕྱིན་དྲུག །ཐམས་ཅད་དེ་ཀར་འདུས་པ་ཡིན། །མཆོད་གཏོར་སྦྱིན་པ་ཅི་འགྲུབ་བརྩོན། །ཉེས་སྤྱོད་སྡིག་ལས་ཀུན་ཏུ་བཟློག །ཅི་བྱེད་གཞན་དོན་གྱི་ཚུལ་ཁྲིམས་ཅན། །ཆོས་ཕྱིར་དཀའ་སྤྱད་བཟོད་པ་དང༌། །གཞན་གྱི་གནོད་པ་བཟོད་པར་བྱ། །ཉིན་མཚན་གཡེལ་མེད་བརྩོན་འགྲུས་དང༌། །རྩེ་གཅིག་སེམས་ཀྱིས་བསམ་གཏན་སྒྲུབ། །སྤྲོས་བྲལ་ཤེས་པའི་ཤེས་རབ་སྟེ། །ཐམས་ཅད་དམིགས་མེད་ཀྱིས་


TNT01_Page_0740
[མ་དཔེ་གཟིགས་ན་འདིར་གནོན།]

རྒྱས་ཐེབས་དགོས། །ཕ་རོལ་དུ་ཕྱིན་པ་དྲུག་པོ་ཡི། །སྒྲུབ་པ་ཉམས་ལེན་གཞན་ཡོད་མིན། །སྦྱིན་པས་སེམས་ཅན་མགུ་བར་བྱ། །ཆོས་གདམས་ངག་བློ་དང་འཚམ་པར་སྟོན། །ཆོས་བཞིན་ཉམས་ལེན་བྱེད་དུ་གཞུག །རང་ཡང་ཆོས་དང་མཐུན་པར་སྤྱོད། །སྦྱིན་དང་སྙན་པར་སྨྲ་བ་དང༌། །དོན་མཐུན་པ་དང་དོན་གཅིག་སྤྱོད། །བསྡུ་བའི་དངོས་པོ་བཞི་ཞེས་པ། །གཞན་དོན་སྒྲུབ་པའི་ཆོས་སུ་གསུངས། །ལར་རང་སེམས་ལ་རང་གིས་སྒོམ་པ་འདི། །ཤེས་རབ་ཀྱི་ཕ་རོལ་ཕྱིན་པ་ཡིན། །རང་བཞིན་འོད་གསལ་གྱི་རྣལ་འབྱོར་ཡིན། །སྣང་གྲགས་ཀུན་ལ་གདོད་མ་ནས། །རྒྱས་བཏབ་ཕྱག་རྒྱ་ཆེན་པོ་ཡིན། །འཁོར་འདས་གཉིས་ཀྱི་དཀྱིལ་འཁོར་ལ། །སེམས་ཀྱི་རྒྱལ་པོ་མ་གོ་ན། །ཆོས་བྱས་པ་རྣམས་ཀྱང་ལྷ་མིའི་རྒྱུར། །ད་སྟོང་ཉིད་མཐར་ཐུག་ཡིན་སྙམ་ཡང༌། །གཟུགས་མེད་ཁམས་སུ་གོལ་ཉེ་གདོག །ལུས་ངག་གི་སྤྱོད་པ་ཟབ་ལགས་ཀྱང༌། །སུམ་ཅུ་རྩ་གསུམ་ལྷ་ཡི་བུ། །ཙིཏྟ་སྙིང་གི་གུར་ཁང་དུ། །རིན་ཆེན་བླ་མ་བསྒོམས་ནས་ཀྱང། །མོས་གུས་ལ་ལྟེམ་འགྱང་མི་འཚལ་ཏེ། །རང་སེམས་ལ་ལྟ་ཞིང་མཉམ་པར་ཞོག །བྱམས་སྙིང་རྗེ་རྒྱུན་མི་འཆད་པར་སྒོམས། །དབྱིངས་སྟོང་པ་དང་རིག་པ་དབྱེར་མེད་པས། །རྣམ་རྟོག་དང་མི་རྟོག་དགག་སྒྲུབ་མེད། །སྣང་བ་དང་སྟོང་པ་དབྱེར་མེད་པས། །ཉོན་མོངས་དང་ཡེ་ཤེས་སྤང་བླང་མེད། །བདག་གཞན་དང་བཟང་ངན་དབྱེར་མེད་པས། །ལྷ་དང་


TNT01_Page_0741
[མ་དཔེ་གཟིགས་ན་འདིར་གནོན།]

འདྲེ་ལ་སྤངབླང་མེད། །འཁོར་བ་དང་མྱང་འདས་དབྱེར་མེད་པས། །བདེ་སྡུག་ལ་དགག་སྒྲུབ་ག་ལ་དགོས། ཁྱེད་སྤང་བླང་མི་བྱ་ཕྱག་ཆེན་སྒོམས། །མཉམ་ཉིད་རོ་སྙོམས་ཀྱི་ངང་ལ་ཞོག །དུ་མ་རོ་གཅིག་གི་ངང་དུ་གནས། །རེ་དོགས་མེད་པར་བསྐྱུར་ལ་ཐོང༌། །བདག་གཟུང་མེད་པར་བོར་ལ་ཞོག །རང་སེམས་དང་ཆོས་དབྱིངས་དབྱེ་བ་མེད། །ཤི་གསོན་ལ་ཁྱད་པར་མི་གདའོ། །གཞི་དད་པ་འགྱུར་བ་མེད་པ་དེ། །ཡོན་ཏན་ཀུན་གྱི་རྩ་བ་ཡིན། །རང་འདོད་མ་འཁྲིས་པའི་གཞན་དོན་དེ། །ཐེག་ཆེན་ལམ་གྱི་རྩ་བ་ཡིན། །ཅིས་ཀྱང་དགོས་མེད་ཀྱི་ཞེན་ལོག་འདི། །བློ་ཆོས་སུ་འགྲོ་བའི་རྩ་བ་ཡིན། །ཉམས་མྱོང་རྟོགས་པ་དང་དད་པ་དེ། །ཉམས་ལེན་མཁན་ལ་དགོས་པ་ཡིན། །རྐྱེན་གང་བྱུང་རོ་སྙོམས་ཐུབ་པ་དེ། །བོགས་འདོན་མཁན་ལ་དགོས་པ་ཡིན། །སྒྱུ་མའི་ཉམས་སྣང་ཤར་ཙམ་ན། །ཆོས་བརྒྱད་ཀྱི་རྣམ་རྟོག་ནུབ་པ་སྙམ། །ཆུ་ལ་མི་འབྱིང་མེས་མི་འཚིག །ཚ་གྲང་སྡུག་བསྔལ་མེད་སྙམ་སོགས། གཞན་ཡང་ཡོན་ཏན་བརྒྱད་ལ་སོགས། །ཡོན་ཏན་ཐན་ཐུན་སྐྱེས་པའི་ཚེ། །ང་རྒྱལ་སྙེམས་བྱེད་ཀྱི་བདུད་བྱུང་ནས། །སྒོམ་ཐུར་དུ་འབབ་པའི་ཉེན་གདོག་པས། །བཟང་འཛིན་དང་དགའ་སེམས་ཅི་དགར་བོར། །རྨི་ལམ་ལ་དགའ་བའི་སྒོམ་ཆེན་དེ། །གཉིས་འཛིན་གྱི་སྒྲོག་ཏུ་ཆུད་པ་ཡིན། །ཆེ་འདོད་ཀྱི་ཡོན་ཏན་ལ་དགའ་བ་དེ། །གཡེང་བའི་རླུང་གིས་


TNT01_Page_0742
[མ་དཔེ་གཟིགས་ན་འདིར་གནོན།]

ཁྱེར་བ་ཡིན། །སྒོམ་པ་ཚོགས་སུ་ཚུད་པ་ན། །རྩོལ་མེད་ཀྱི་དབྱིངས་སུ་ངང་གིས་འཇུག །སངས་རྒྱས་དང་འཁོར་བའི་བར་ཤེད་ན། །རིག་པ་སྐད་ཅིག་མའི་ཁྱད་པར་ཡོད། ཁམས་གསུམ་འཁོར་བའི་སྣང་བ་ཀུན། །རང་ངོ་མ་ཤེས་པའི་སེམས་སྣང་ཡིན། །སེམས་ཀྱི་སྐད་ཅིག་དོན་ཀུན་རིག །སངས་རྒྱས་ཀྱི་ཡེ་ཤེས་དེ་ལ་ཟེར། །ཡེ་ཤེས་གཅིག་པུའི་རང་སྣང་ལ། །སྐུ་གསུམ་ཡེ་ཤེས་ལྔ་རུ་བཏགས། །རང་བཞིན་སྟོང་ཉིད་མཐའ་བྲལ་ལ། །ཆོས་ཀྱི་སྐུ་ཞེས་རབ་ཏུ་བསྒྲགས། །སེམས་དེའི་གསལ་ཆ་འགག་མེད་དུ། །མཚན་དཔེ་དག་པའི་དཀྱིལ་འཁོར་སོགས། །རྒྱུན་འཆད་མེད་པར་སྣང་བ་ནི། །ཐུབ་པའི་ལོངས་སྤྱོད་རྫོགས་སྐུར་འགྱུར། །རང་བཞིན་མ་རྟོགས་པའི་སེམས་ཅན་ལ། །སྙིང་རྗེ་མཁའ་ལྟར་ཁྱབ་པའི་ཕྱིར། །གང་ལ་གང་འདུལ་ཐབས་སུ་སྟོན། །རྒྱལ་བ་སྤྲུལ་པའི་སྐུ་རུ་ཤེས། །ཅིག་ཅར་ཤེས་བྱ་ཀུན་མཁྱེན་ཡང༌། །དེ་དང་དེ་ལ་དེར་འཛིན་མེད། །རྒྱུན་མི་འཆད་ཅིང་ཀུན་ལ་ཁྱབ། །མེ་ལོང་གཟུགས་བརྙན་འདྲ་བས་ན། །འདི་ནི་མེ་ལོང་ཡེ་ཤེས་ཡིན། །ཆོས་རྣམས་མཉམ་པ་ཉིད་མཐོང་བས། །བདག་གཞན་མཉམ་པའི་ཐུགས་རྗེ་ཅན། །མཉམ་པ་ཉིད་ཀྱི་ཡེ་ཤེས་ཡིན། །ཆགས་ཐོགས་མེད་པར་དངོས་ཀུན་གྱི། །རང་བཞིན་གསལ་ལ་མ་འདས་པ། །གཟིགས་པ་མེད་པའི་ཚུལ་གྱིས་གཟིགས། །སོ་སོར་རྟོག་པའི་ཡེ་ཤེས་ཡིན། །རྣམ་པར་རྟོག་མེད་ལྷུན་གྲུབ་པར། །


TNT01_Page_0743
[མ་དཔེ་གཟིགས་ན་འདིར་གནོན།]

འགྲོ་དོན་ཕྱོགས་མེད་འབྱུང་བ་སྟེ། །བྱ་བ་སྒྲུབ་པའི་ཡེ་ཤེས་ནི། །ཡིད་བཞིན་ནོར་བུ་འདྲ་བ་ཡིན། །ཆོས་ཀྱི་དབྱིངས་ཀྱི་ཡེ་ཤེས་ནི། །ཕྱོགས་ལྷུང་མེད་ཅིང་རྒྱར་མ་ཆད། །བརྗོད་བྲལ་དབྱིངས་ཀྱི་སེམས་ཉིད་དེ། །ཡེ་ཤེས་ཐམས་ཅད་འདི་ལས་བྱུང༌། །སེམས་ནི་དྲི་མར་བཅས་པའི་ཚེ། །ལས་ཉོན་སྡུག་བསྔལ་ཟད་མེད་སྣང༌། །སེམས་ལས་བྱུང་ཞིང་སེམས་ལ་ཐིམ། །རྣལ་འབྱོར་ལམ་ལ་གནས་པའི་ཚེ། །དག་དང་མ་དག་འདྲེས་པ་ན། །ལུས་ངག་ཡིད་ཀྱི་ཉམས་དང་རྩལ། །སེམས་སྣང་གི་ཡོན་ཏན་ཇི་སྙེད་པ། །སེམས་ལས་སྐྱེས་ནས་སེམས་སུ་འགག །སེམས་ཉིད་ཤིན་ཏུ་རྣམ་དག་ཚེ། །སངས་རྒྱས་ཞེས་བྱར་མིང་ཐོགས་ཏེ། །སྐུ་གསུམ་ཡེ་ཤེས་ལྔ་དང་ནི། །ཡོན་ཏན་འཕྲིན་ལས་ཟད་མེད་པ། །སེམས་ཀྱི་རང་རྩལ་རྒྱུན་ཆད་མེད། །སེམས་ཅན་བྱང་ཆུབ་སེམས་དཔའ་དང༌། །སངས་རྒྱས་ཞེས་བྱ་རྣམ་གསུམ་པོ། །སེམས་ཉིད་གཅིག་པུའི་མིང་འདོགས་ཡིན། །སེམས་ཉིད་གཏན་ལ་ཕེབས་པའི་ཚེ། །གཞི་ལམ་འབྲས་གསུམ་གཏན་ལ་ཕེབས། །དམ་ཆོས་ཀྱི་རྒྱལ་པོ་ཕྱག་རྒྱ་ཆེ། །གཅིག་ཤེས་ཀུན་གྲོལ་ལ་ནན་ཏན་འཚལ། །བདག་ཅག་ཕྱོགས་མེད་རིས་མེད་ཀྱི། །རྣལ་འབྱོར་ཏཱ་ར་ནཱ་ཐ་ལ། །དད་པ་དང་སྐལ་པར་ལྡན་པ་ཡི། །གྲོགས་དང་སློབ་མས་བསྐུལ་བའི་ངོར། །མཐའ་ཡས་ཚིག་གི་སྤྲོས་པ་སྤངས། །སྡེབ་སྦྱོར་ལེགས་ཁྲིགས་ལ་མ་


TNT01_Page_0744
[མ་དཔེ་གཟིགས་ན་འདིར་གནོན།]

བལྟས་པར། །ཉམས་ལེན་ཟབ་མོའི་གནད་བསྐུལ་གཏམ། །མདོར་བསྡུས་བྲིས་ནས་ཕུལ་བ་ལགས།། །།མངྒ་ལཾ།། དགེའོ།།

ལྟ་སྒོམ་སྤྱོད་གསུམ་གྱི་གདམས་པ་མདོ་སྔགས་ལམ་གྱི་སྙིང་པོ།


TNT01_Page_0745
[མ་དཔེ་གཟིགས་ན་འདིར་གནོན།]

ལྟ་སྒོམ་སྤྱོད་གསུམ་གྱི་གདམས་པ་མདོ་སྔགས་ལམ་གྱི་སྙིང་པོ་བཞུགས། །ན་མོ་གུ་རུ། བདེ་ཆེན་ཆོས་སྐུ་ནམ་མཁའ་དག་པ་ལ། །མཐའ་དག་སྲིད་གསུམ་སྣང་བ་ཅི་ཡང་ཤར། །ཟུང་འཇུག་གདོད་མའི་ཡེ་ཤེས་མངོན་དུ་གྱུར། །བླ་མ་མཆོག་ལ་དངོས་པོ་ཀུན་གྱིས་འདུད། །བརྗོད་མེད་རང་རིག་དོན་དམ་རྟོགས་པའི་ཐབས། །དད་ལྡན་སློབ་མས་བསྐུལ་ཕྱིར་འདིར་བརྗོད་བྱ། །ངེས་པའི་དོན་ནི་ཚིག་གི་ཡུལ་མིན་ཡང༌། །བརྡ་ལ་བརྟེན་ནས་དོན་དམ་རྟོགས་པར་འགྱུར། །དངོས་པོའི་གནས་ལུགས་གཏན་ལ་དབབ་པའི་ཕྱིར། །འཁྲུལ་མེད་ལྟ་བའི་ངེས་གསང་རྟོགས་པར་བྱ། །གནས་ལུགས་བཞིན་དུ་ཉམས་སུ་མྱོང་བའི་ཕྱིར། །ཉམས་ལེན་སྒོམ་པའི་གནད་ལ་འཁྲུལ་མེད་དགོས། །རྒྱུ་འབྲས་རྟེན་འབྲེལ་བསླུ་བ་མེད་པའི་ཕྱིར། །ལག་ལེན་སྤྱོད་པ་རྣམ་པར་དག་པ་གཅེས། །གཞིའི་གནས་ལུགས་ཇི་བཞིན་མངོན་གྱུར་པ། །རྒྱུ་འབྲས་དབྱེར་མེད་འབྲས་བུ་མངོན་གྱུར་གནད། །རང་བཞིན་འགྱུར་བ་མེད་དང་སྤྲོས་བྲལ་དང༌། །ལྷན་ཅིག་སྐྱཻས་དང་རང་རིག་རང་གསལ་དང༌། །ཀུན་ཁྱབ་མཐའ་བྲལ་བརྗོད་མེད་ཅེས་པ་སྟེ། །གནས་ལུགས་ལྟ་བའི་གནད་བདུན་རིག་པར་བྱ། །འཇིག་རྟེན་སྲིད་པ་ཆགས་འཇིག་ཅི་


TNT01_Page_0745
[མ་དཔེ་གཟིགས་ན་འདིར་གནོན།]

བྱུང་ཡང༌། །མཁའ་ལ་ཡངས་དོག་མེད་ཅིང་འགྱུར་བ་མེད། འཁོར་འདས་བདེ་སྡུག་མཐོ་དམན་ཐམས་ཅད་ལ། །སེམས་ཀྱི་རང་བཞིན་བཟང་ངན་འཕོ་འགྱུར་མེད། །སྣང་བ་ཅི་ཡང་འཆར་བས་མེད་པ་མིན། །རང་བཞིན་ངོས་གཟུང་བྲལ་ཕྱིར་ཡོད་པ་མིན། །གདོད་ནས་ཅི་ཡང་མིན་པའི་རང་བཞིན་ལ། །བློ་ཡིས་བཞག་པའི་སྤྲོས་པ་ཀུན་དང་བྲལ། །དངོས་པོའི་གནས་ལུགས་སེམས་ཀྱི་རང་བཞིན་འདི། །གསར་བྱུང་མ་ཡིན་གདོད་ནས་ལྷན་ཅིག་སྐྱེས། །འདས་དང་མ་འོངས་ད་ལྟ་དུས་གསུམ་ཡང༌། །ཐ་སྙད་ཙམ་ལས་རང་བཞིན་ཐ་དད་མེད། །ཅང་མེད་མ་ཡིན་རིག་སྟོང་མ་འགགས་པས། །གསལ་ལ་ངོས་བཟུང་མེད་ཅིང་གཏད་སོ་བྲལ། འཁོར་དང་མྱ་ངན་འདས་པའི་སྣང་བ་ཀུན། །རྟག་ཏུ་འཆར་ཞིང་ཤར་དུས་ཉིད་ནས་སྟོང༌། །ནམ་མཁའ་རང་བཞིན་སྟོང་པ་ཙམ་འདི་ལ། །ཤར་ནུབ་ལ་སོགས་ཕྱོགས་ཆ་ཉེ་རིང་མེད། །ཀ་བའི་ནམ་མཁའ་བུམ་པའི་ནམ་མཁའ་ཞེས། །ཚིག་ཙམ་ཡིན་གྱི་སུས་ཀྱང་འབྱེད་མི་ནུས། །དེ་ཕྱིར་སེམས་ཀྱང་མཁའ་ལྟར་ཀུན་ཏུ་ཁྱབ། །ཉམས་ལེན་མ་བྱས་འཁྲུལ་པའི་སེམས་ཉིད་དང༌། །ལམ་གྱི་གནས་སྐབས་རྣལ་འབྱོར་པ་ཡི་སེམས། །འཁྲུལ་སྣང་དག་པ་རྫོགས་སངས་རྒྱས་ཀྱི་སེམས། །མིང་འདོགས་ཐ་དད་དོན་ལ་ཁྱད་པར་མེད། །ཅིར་


TNT01_Page_0746
[མ་དཔེ་གཟིགས་ན་འདིར་གནོན།]

ཡང་འཆར་ལ་ཅི་ཡང་མ་ཡིན་པ། །སྟོང་གསལ་ངོས་བཟུང་བྲལ་བ་གཅིག་པུ་ལ། །འཁྲུལ་པས་སོ་སོར་བཏགས་པ་ཁོ་ན་ལགས། །གང་དུའང་གཟུང་རྒྱུ་མེད་པས་མཐའ་དང་བྲལ། །དངོས་པོར་འཛིན་ན་རྟག་པའི་མཐའ་ཡིན་ལ། །སྟོང་པར་འཛིན་ན་ཆད་པའི་མཐའ་ཞེས་གསུངས། །གང་དུའང་མ་གྲུབ་ཕྱིར་ན་བློ་ལས་འདས། །བཟང་ངན་དངོས་པོ་དངོས་མེད་འདུས་བྱས་དང༌། །འདུས་མ་བྱས་སོགས་སྣང་ཞིང་གྲགས་པ་ཡི། །མིང་དང་ཐ་སྙད་ཇི་ཙམ་བརྗོད་ཀྱང་རུང༌། །དངོས་པོའི་གནས་ལུགས་རྟོགས་པར་མི་འགྱུར་ཞིང༌། །སྡོད་ལུགས་ཇི་བཞིན་བརྗོད་པར་མི་ནུས་པས། །ཚིག་གི་ལམ་ལས་འདས་ཤིང་བརྗོད་བྲལ་ཡིན། །དཔལ་ལྡན་བླ་མ་མཆོག་གི་བྱིན་རླབས་ཀྱིས། །རང་རིག་ཙམ་གྱིས་ཉམས་སུ་མྱོང་བྱ་ལགས། །གྲུབ་མཐའ་ཐ་དད་སྣ་ཚོགས་ལྟ་བའི་དོན། །ཀུན་དང་འདི་ཉིད་མཐུན་ཞིང་ཀུན་ལས་ལྷག །གཞན་རྣམས་གནས་ལུགས་ཕྱོགས་རེ་ཙམ་ལ་སྤྱོད། །གདོད་མའི་གནས་ཚུལ་འཁྲུལ་མེད་འདི་ཁོ་ན། །ཉན་ཐོས་པ་རྣམས་གང་ཟག་བདག་མེད་སྒོམ། །རང་རྒྱལ་གཟུང་བའི་ཡུལ་རྣམས་བདེན་མེད་དང༌། །རྣལ་འབྱོར་སྤྱོད་པ་གཉིས་སྟོང་ཡེ་ཤེས་དང༌། །དབུ་མ་པ་རྣམས་ཆོས་ཀུན་བདེན་མེད་ཟེར། །གསང་སྔགས་ཕྱི་བ་སྣང་སྟོང་ལྷ་ཡི་སྐུ། །བླ་མེད་པ་རྣམས་བདེ་སྟོང་དབྱེར་མེད་དེ། །ཐམས་ཅད་རང་སེམས་གཅིག་པུའི་མིང་འདོགས་ཡིན། །


TNT01_Page_0747
[མ་དཔེ་གཟིགས་ན་འདིར་གནོན།]

རང་སེམས་གཅིག་པུ་གཏན་ལ་འབེབས་པ་ཡིན། །བྱ་བྱེད་བྱེད་པོ་ཀུན་དང་བྲལ་བའི་ཕྱིར། །གང་ཟག་བདག་མེད་ཅེས་པ་སེམས་འདི་ཉིད། །ཡུལ་སྣང་ཐམས་ཅད་སེམས་ཉིད་གཅིག་པུའི་རྩལ། །དེ་ཕྱིར་གཟུང་བ་ཆོས་ཀྱི་བདག་མེད་ཡིན། །ཆུ་རླབས་ཆུ་དང་དབྱེ་བ་མེད་པ་བཞིན། །སྣང་བ་ཐམས་ཅད་རང་སེམས་གཅིག་པུའི་རྩལ། །དེ་ཕྱིར་གཟུང་དང་འཛིན་པའི་དབྱེ་བ་མེད། །རང་བཞིན་གསལ་སྟོང་རྒྱུན་ཆད་མེད་པ་འདི། །གཉིས་མེད་ཡེ་ཤེས་དོན་དམ་གནས་ལུགས་ཡིན། །གཏད་སོ་མེད་ཅིང་དམིགས་སུ་མེད་པ་དང༌། །གཟུང་མེད་བརྗོད་པའི་ཡུལ་ལས་འདས་པའི་ཕྱིར། ནམ་ཡང་ཡོད་མ་མྱོང་བའི་ཆོས་ཉིད་ཡིན། །འཁོར་འདས་ཀུན་གྱི་རྣམ་པར་འཆར་བ་དང༌། །ཤར་ཙམ་ཉིད་ནས་སྟོང་པས་གསལ་སྟོང་ཡིན། མི་རྟག་སྡུག་བསྔལ་ལ་སོགས་ཐ་སྙད་ཙམ། །དོན་ལ་ངོ་བོ་མ་གྲུབ་བྲག་ཆ་བཞིན། །རང་བཞིན་མི་འགྱུར་བདེ་བ་ཆེན་པོ་ལ། །གང་ཡང་འཛིན་དུ་མེད་པས་བདེ་སྟོང་ཡིན། །ལྟ་བའི་རྒྱལ་པོ་མཐའ་བྲལ་ནམ་མཁའི་དཔེ། །གནས་ལུགས་ཟབ་མོ་ཐུགས་ལ་ངེས་པར་འཚམ། དེ་དག་ལྟ་བའི་གནས་ཚུལ་མདོ་ཙམ་མོ། །ལྟ་བ་མཁའ་ལྟར་ཡངས་པ་སྟེ། །སྒོམ་པར་ཉམས་སུ་མྱོང་བ་གཅེས། །ཉམས་མྱོང་མེད་པའི་ལྟ་བ་ནི། །ཡིད་དཔྱོད་གོ་བ་ཙམ་ལ་ལུས། །ལས་དང་པོ་ཡི་རྣལ་འབྱོར་


TNT01_Page_0748
[མ་དཔེ་གཟིགས་ན་འདིར་གནོན།]

པས། །རྗེས་ཐོབ་གཉུག་མའི་ཡེ་ཤེས་ལ། །རང་ངོ་འཕྲོད་པ་དཀའ་བའི་ཕྱིར། །ཞི་ལྷག་གཉིས་ལ་འབད་པ་གཅེས། །སེམས་ཀྱི་གནས་ཐབས་དགུ་ལ་སོགས། །ཞི་གནས་སྒོམ་པའི་རིམ་པ་དང༌། །འཇིག་རྟེན་འཇིག་རྟེན་འདས་པ་ཡི། །ལྷག་མཐོང་ལ་སོགས་རྣམ་གཞག་མང༌། ཁོ་བོ་སྙིང་པོ་ལ་དགའ་བས། །སྤྲོས་པ་དུ་མ་འདིར་མི་འཆད། །ཟབ་མོའི་དེ་ཉིད་ཉམས་མྱོང་དང༌། །རྗེས་སུ་འབྲེལ་བ་མདོ་ཙམ་ནི། །དཔྱད་འཇོག་སྤེལ་མར་སྒོམ་པ་སོགས། །གཞུང་ལུགས་རྣམས་ལས་མང་བཤད་པ། །དེ་ཡང་ལམ་དུ་འགྱུར་མོད་ཀྱི། །མན་ངག་ཅན་ལ་འདི་མི་དགོས། །རང་བཞིན་གདོད་ནས་སྤྲོས་བྲལ་ལ། །དེ་ལྟར་ཡིན་པར་ངོ་ཤེས་པའི། །ཐབས་ཀྱི་རྒྱལ་པོ་ཟླ་མེད་པ། །མཚན་ལྡན་བླ་མའི་མོས་གུས་ཡིན། །རང་གི་སེམས་ཀྱིས་རང་སེམས་ལ། །རང་དབང་འབྱོར་ཕྱིར་ཞི་གནས་སྒོམ། །རང་བཞིན་གདོད་ནས་སྤྲོས་བྲལ་ལ། །ཐག་ཆོད་སྐྱེ་ཕྱིར་སེམས་འཚོལ་བྱ། །གཏན་ལ་ཕེབས་པའི་རང་སེམས་དེ། །ངོ་ཤེས་གཅིག་པུས་ཆོག་པའི་ཕྱིར། །དྲན་པ་འབྲལ་མེད་རྒྱུན་དུ་བསྟེན། །དྲན་པ་མེད་ལ་ངོ་ཤེས་དཀའ། །གནས་ལུགས་གདོད་མ་ཡིན་པའི་ཕྱིར། །མ་བཅོས་སོ་མ་གནད་དུ་ཆེ། །གང་ཤར་གཉུག་མ་ཡིན་པའི་ཕྱིར། །ལྷུག་པར་འཇོག་པ་སྒོམ་གྱི་གནད། །བྱ་བྱེད་ཉམས་ལེན་ཐམས་ཅད་ཀྱི། །མཐར་ཕྱིན་བྱེད་པ་བོགས་འདོན་གནད། །བླ་མ་ཆོས་སྐུར་མཐོང་བ་ཡི། །མོས་གུས་


TNT01_Page_0749
[མ་དཔེ་གཟིགས་ན་འདིར་གནོན།]

བྱིན་རླབས་ལམ་བྱེད་དེ། །སྒོམ་པ་ཉམས་སུ་ལེན་པ་ཡིན། །གནད་མཆོག་བདུན་པོ་བླ་མའི་གསུང༌། །ཉམས་ལེན་མཐའ་རུ་སྐྱོང་བ་ལ། མེད་ཐབས་མེད་པའི་གལ་པོ་ཆེ། །བྱིང་རྒོད་གཉིས་ཀྱིས་མ་སླད་པའི། །རང་སེམས་གསལ་སྟོང་འཛིན་མེད་ནི། །བཏང་འགྲོ་བཞག་སྡོད་རང་དབང་འབྱོར། །ཞི་གནས་སྒོམ་གྱི་རྩ་བ་ཡིན། །བྱིང་ན་སྒྲིམ་ཞིང་ངར་ཆ་འདོན། །རྒོད་ན་སློད་ལ་ལྟ་སྟངས་ཕབ། །ཐུན་མཚམས་སྤྱོད་ལམ་ཅི་བྱེད་ཀྱང༌། །གནས་པའི་རང་སོ་འཛིན་པ་གཅེས། །ལྷ་སྐུ་ཐིག་ལེ་ལ་སོགས་པ། །དམིགས་པའི་རྣམ་གཞག་གང་གསུངས་ཀྱང༌། །རྟེན་མེད་རིག་པ་སྒོམ་མེད་དུ། །འཇོག་པ་ཁོ་ན་ཟབ་པར་འཁུམས། །རང་སེམས་ལ་རང་སེམས་ཀྱིས་བལྟས་པས། །གསལ་ལ་བརྗོད་བྲལ་ངོས་གཟུང་མེད་པར་འཁུམས། །ཀུན་རྫོབ་གཟུགས་དང་ཁ་དོག་གནས་དང་དུས། །བཙལ་བས་མ་རྙེད་གདོད་མའི་གནས་ལུགས་མཐོང༌། །དེ་ཚེ་རང་སེམས་སྟོང་གསལ་ཆོས་ཀྱི་སྐུ། །རྒྱུན་དུ་ཡོད་ཀྱང་སྔོན་ཆད་མ་ཤེས་པ། །ངོ་ཤེས་རྒྱུན་ཆད་མེད་པ་དགོས་པས་ན། །རྟག་ཏུ་དྲན་པས་སྐྱོང་བ་གནད་དུ་ཆེ། །དྲན་བྱ་དྲན་བྱེད་དབྱིངས་སུ་མ་དག་པར། །དྲན་པ་སྐྱེས་དུས་རང་ཞལ་ལྟ་ཤེས་ཀྱིས། །དྲན་པ་ཉམས་ཚེ་ཐ་མལ་པ་དང་འདྲ། །ངོ་ཤེས་དྲན་པའི་རྩ་བར་ཐུག་པ་ཡིན། །ངོ་ཤེས་མེད་པའི་གནས་པ་གཏི་མུག་


TNT01_Page_0750
[མ་དཔེ་གཟིགས་ན་འདིར་གནོན།]

ཡིན། །རང་ངོ་ཤེས་ནས་རྣམ་རྟོག་ཆོས་ཀྱི་སྐུ། །ཤེས་ན་ཐམས་ཅད་ཆོས་སྐུའི་ཡོ་ལངས་ཏེ། །མིན་ན་ཐམས་ཅད་སྤྲོས་པའི་མགོ་སྐོར་ཡིན། །ཆུ་དང་མར་མེ་རང་གསལ་གཅིག་ཏུ་ཞོག །བྲམ་ཟེ་ཆེན་པོས་དེ་སྐད་གསུངས་པ་བཞིན། །མ་བཅོས་སོ་མ་ཉམས་ལེན་སྒོམ་གྱི་མཐིལ། །བཅོས་མའི་ཉམས་མྱོང་བཟང་ཡང་ན་བུན་འདྲ། །རིག་པས་དཔྱད་པའི་སྟོང་ཉིད་སྒོམ་པ་དང༌། རིལ་འཛིན་རྗེས་གཞིག་སྤྲོ་བསྡུའི་སྟོང་ཉིད་དང༌། །ལྷ་སྒོམ་སྔགས་བཟླས་སོགས་ཀྱི་བྱིན་རླབས་དང༌། །རྩ་ཡི་རྣལ་འབྱོར་སྒོམས་པའི་སྟོང་ཉམས་དང༌། །རླུང་གི་གདམ་ངག་བསྒོམས་པའི་གསལ་བ་དང༌། །ཐིག་ལེ་བསྒོམས་པའི་བདེ་བའི་ཡེ་ཤེས་དང༌། །རྟག་སྣང་འཆར་སྒོ་སྣ་ཚོགས་འབྱུང་བ་རྣམས། །ཐམས་ཅད་རྐྱེན་ལ་ལྟོས་ཤིང་གློ་བུར་བ། །རྫས་སྔགས་འཛོམ་པས་མིག་འཕྲུལ་མཐོང་བ་བཞིན། །རྒྱུ་རྐྱེན་འཛོམ་ཚེ་འབྱུང་ལ་གཞན་མི་འབྱུང༌། །མི་བརྟན་མི་རྟག་འཕེལ་འགྲིབ་ཡལ་ཡོལ་བྱེད། །གདོད་མ་མ་ཡིན་འཕྲལ་དུ་སྐྱེ་ཞིང་འཇིག །མ་བཅོས་གཉུག་མའི་ཉམས་ལེན་གྱིས་ཟིན་ན། །དེ་དག་ཀུན་ཡང་འགྱུར་མེད་ཆོས་ཀྱི་སྐུ། །བློས་བྱས་བསྒོམ་དེ་ཇི་ལྟར་བཟང་ན་ཡང༌། །གསོག་གསོབ་སྙིང་པོ་མེད་པ་ཡ་མ་རླ། །བཟང་པོར་མིང་བཏགས་གཉེན་པོར་བཅོས་པ་དང༌། །རྣམ་རྟོག་འཁྲུལ་པས་སྣ་ཚོགས་བཅོས་པ་འདི། །


TNT01_Page_0751
[མ་དཔེ་གཟིགས་ན་འདིར་གནོན།]

མཁའ་ལ་ན་བུན་སྤྲིན་གྱིས་སྒྲིབ་པ་བཞིན། །གནས་ལུགས་རང་ཞལ་བལྟ་བའི་བར་ཆད་ཡིན། །གསེར་གྱི་ཐིག་པོ་གསེར་དུ་བསྒྱུར་མི་དགོས། །སྣང་གྲགས་ཐམས་ཅད་རང་བཞིན་སྤྲོས་བྲལ་ལ། །ཐབས་ཀྱིས་གསར་དུ་སྤྲོས་པ་བཅོས་མི་དགོས། །རང་བཞིན་དེ་ལ་བཟོ་བཅོས་མེད་པར་བཞག །རྟོག་མེད་རང་ངོ་ཤེས་ཤིང་སེམས་གནས་ན། །མཁའ་དབྱིངས་ལྟ་བུའི་ངང་དེར་ལྷན་ནེ་སྒཽམ། །བཟང་ངན་རྣམ་རྟོག་ཇི་ལྟར་ཤར་ན་ཡང༌། །དེ་ལ་བཟོ་བཅོས་མེད་པར་ལྷུག་པར་བཞག །ཉོན་མོངས་སྐྱེས་ཀྱང་གང་སྐྱེས་གསལ་སྟོང་ཡིན། །ངེས་འབྱུང་སྙིང་རྗེ་སྐྱེས་ཀྱང་གསལ་སྟོང་ཡིན། །གང་སྐྱེས་གང་ཤར་ཐམས་ཅད་རོ་གཅིག་ལ། །སྤང་བླང་དགག་སྒྲུབ་བྱེད་ན་རང་ལ་སྡིག །ཉོན་མོངས་རྣམ་རྟོག་ཆེད་དུ་མི་དགག་ཅིང༌། །ཡེ་ཤེས་བཟང་རྫུ་ལོགས་ནས་མི་འཚོལ་བར། །སྤང་གཉེན་རོ་མཉམ་ངོ་བོ་ཐ་དད་མེད། །གདོད་མའི་དབྱིངས་ལས་ལོགས་སུ་མ་གྲུབ་པས། །མཉམ་ཉིད་ངང་དེར་མཉམ་པར་བཞག་པར་བྱ། །རྩོལ་མེད་བྱར་མེད་ཀློང་དུ་གྱུར་པ་ན། །སྤྲོས་པའི་སྣང་བ་ཇི་ལྟར་བསྟན་ན་ཡང༌། །ཆུ་ཟླ་བཞིན་དུ་ལས་མེད་བདག་པོ་མེད། །གཟུགས་སོགས་ཡུལ་སྣང་ཇི་ལྟར་ཤར་ན་ཡང༌། །རང་བཞིན་གཉུག་མའི་དོན་ལས་མ་འདས་པས། །དེ་ལ་བཟོ་བཅོས་མི་དགོས་ལྷུག་པར་ཞོག །ནམ་


TNT01_Page_0752
[མ་དཔེ་གཟིགས་ན་འདིར་གནོན།]

མཁའ་ལྟ་བུར་འགྱུར་བ་མེད་པ་ཡིན། །ལུས་ངག་ཡིད་ཀྱི་སྤྱོད་པ་ཅི་བྱེད་དང༌། །སྤྲོས་བཅས་ཉམས་ལེན་ཇི་ལྟར་བྱེད་ན་ཡང༌། །ཐམས་ཅད་གཉུག་མ་ལྷན་ཅིག་སྐྱེས་པ་ཡི། །རང་འོད་ཙམ་དུ་ཤེས་པའི་ངང་དུ་སྤྱོད། །མཚན་ལྡན་བླ་མ་རང་སེམས་སྣང་བ་ཙམ། །བླ་མ་རང་བཞིན་གསལ་སྟོང་སྐྱེ་འགག་མེད། །རང་གི་སེམས་ཀྱང་དེ་དང་གཅིག་པར་ཤེས། །སྣང་བ་ཐམས་ཅད་སེམས་ཀྱི་གཟུགས་བརྙན་ཙམ། །རང་སེམས་བླ་མ་སྣང་བ་རྣམ་གསུམ་པོ། །མིང་འདོགས་ཐ་དད་དོན་ལ་ཁྱད་པར་མེད། །ཐམས་ཅད་རོ་མཉམ་ནམ་མཁའ་ལྟ་བུར་རྟོགས། །ཆོས་སྐུར་རྟོགས་ན་མོས་གུས་ཚུད་པ་ལགས། །ཀུན་རྫོབ་སྣང་བར་མཛད་སྤྱོད་ཅི་མཛད་ཀྱང༌། །རང་སྣང་ཙམ་དུ་ཆོས་སྐུའི་རྣམ་རོལ་དང༌། །གཞན་སྣང་སེམས་ཅན་འཁོར་བར་འདྲེན་པའི་ཐབས། ཁོ་ནར་མཐོང་ཚེ་མོས་གུས་ཚད་དུ་ཕྱིན། །ཅི་མཛད་ཡེ་ཤེས་རོལ་པར་མཐོང་བ་ལ། །བླ་མ་ལོངས་སྐུར་མཐོང་བའི་མོས་གུས་ཟེར། །ལེགས་ཉེས་གང་མཛད་གཞན་དོན་ཁོ་ནར་ཤེས། །མཚན་ལྡན་བླ་མ་སྤྲུལ་སྐུར་མཐོང་བ་ཡིན། །བླ་མ་རང་སེམས་དབྱེར་མེད་ཆོས་སྐུར་མཐོང༌། །གནས་ལུགས་དོན་གྱི་རྟོགས་པ་འགྱུར་བ་མེད། །ལོངས་སྤྱོད་རྫོགས་དང་སྤྲུལ་སྐུའི་མོས་གུས་སྐྱེ། །འབད་མེད་གཞན་དོན་ཕྲིན་ལས་འབྱུང་ཞེས་གསུངས། །སྒོམ་པས་ཉམས་སུ་


TNT01_Page_0753
[མ་དཔེ་གཟིགས་ན་འདིར་གནོན།]

བླང་ཚུལ་མདོ་ཙམ་མོ། །ལྟ་སྒོམ་མཐའ་རུ་ཕྱིན་བྱེད་སྤྱོད་པ་སྟེ། །ལག་ལེན་བླང་དོར་འཁྲུལ་པ་མེད་པ་གཅེས། །དཀར་ནག་ལས་འབྲས་བསླུ་བ་མེད་མོད་ཀྱི། །སྒྱུ་མ་ལྟ་བུར་སྣང་བ་རང་བཞིན་མེད། །སྡིག་སྤོང་དགེ་བ་སྒྲུབ་དང་དབུ་མའི་ལམ། །ཅི་བྱེད་གཞན་དོན་སྒྱུར་དང་དུས་ཀུན་ཏུ། །དག་སྣང་ལྷ་སྐུ་སྟོང་ཉིད་དང་འབྲེལ་བ། །གདོད་མའི་དབྱིངས་ལས་གཡེལ་བ་མེད་པར་སྤྱོད། །དེ་ལྟར་གནས་བདུན་རྣམ་དག་སྤྱོད་པ་ལགས། །མི་དགེ་རྒྱུ་འབྲས་གདོད་ནས་སྟོང་ཉིད་དུ། །ལེགས་པར་རྟོགས་པའི་སྒོ་ནས་སྤང་པ་དང༌། །ཉིན་མཚན་ཕྱེད་པར་དགེ་ལ་འབད་བྱེད་ཀྱང༌། །ཆུ་ཟླ་བཞིན་དུ་ང་རྒྱལ་རློམ་སེམས་མེད། །འདོད་ཡོན་གང་ལའང་ཞེན་པ་སྤངས་བྱས་ནས། །ཚོགས་ཀྱིས་མི་སྒྲུབ་ཀུན་སྤངས་སྤྱོད་པ་ཅན། །ཆོས་བཞིན་འབད་པ་མེད་པར་རྙེད་གྱུར་ན། །རང་སེམས་སྙིང་པོར་འཇོག་བཞིན་ལོངས་སྤྱོད་པ། །འདོད་པའི་མཐའ་དང་ངལ་ཞིང་དུབ་པ་སྟེ། །མཐའ་གཉིས་སྤངས་པ་དབུ་མའི་ལམ་ཞེས་གསུངས། །འདོད་ཆུང་ཆོག་ཤེས་ལྡན་པའི་སྒོ་ནས་ཀྱང༌། །འདི་ལྟར་བསྒྲུབས་ན་སྤྱོད་པ་རྣམ་པར་དག །བྱ་བ་ཅི་བྱེད་ལེགས་ཉེས་ཅི་བྱུང་ཡང༌། །བྱང་ཆུབ་སེམས་ཀྱིས་ཟིན་ན་གཞན་དོན་ཡིན། །ཐུན་དང་ཐུན་མཚམས་སྤྱོད་ལམ་ཐམས་ཅད་དུ། །སྣང་སྲིད་དག་སྣང་


TNT01_Page_0754
[མ་དཔེ་གཟིགས་ན་འདིར་གནོན།]

ལྷ་སྐུའི་ལམ་ཁྱེར་བྱ། །ཇི་ལྟར་སྤྱོད་པ་ཐམས་ཅད་རང་གི་སེམས། །སེམས་ཉིད་ངོས་བཟུང་བྲལ་བ་དགག་སྒྲུབ་མེད། །བྱ་བ་ཐམས་ཅད་བྱས་སྟོང་ངང་དུ་ཐིམ། །སྟོང་པའི་ངང་ལས་སྤྱོད་པའི་རྩ་མ་འགགས། །རང་ངོ་ཤེས་ཚེ་སྤྱོད་པ་ཅི་སྤྱད་ཀྱང༌། །བྱ་བྱེད་རོ་མཉམ་དབྱེར་མེད་གདོད་མའི་གཤིས། །དབྱིངས་ལས་གཞན་དུ་འཕོ་འགྱུར་མེད་པ་ལ། །རྩོལ་མེད་ལྷུན་གྲུབ་ཐོབ་པར་བྱ་ཕྱིར་འབད། །ལྟ་སྒོམ་སྤྱོད་གསུམ་རྣམ་དག་ལ་འབད་ན། །འབྲས་བུ་མཆོག་ལ་སོམ་ཉི་ག་ལ་ཡོད། །ལམ་ལྔ་ས་བཅུའི་རིམ་པ་མངོན་གྱུར་ནས། །བརྩོན་འགྲུས་ལྡན་པས་ཚེ་འདིར་བྱང་ཆུབ་འགྲུབ། །རང་བཞིན་འགྱུར་མེད་སྐུ་གསུམ་དང༌། །གློ་བུར་མ་ཡིན་རྒྱུན་ཆད་མེད། །བསམ་གྱིས་མི་ཁྱབ་པ་ཡི་གནས། །འབྲས་བུ་འགྲུབ་པའི་གནད་བདུན་ཡིན། །ཐོག་མ་མེད་པའི་དུས་ཀྱི་དབྱིངས། །ཤེས་བྱ་གཤིས་ཀྱི་གནས་ལུགས་ཏེ། །རྟོགས་ཤིང་གཏན་ལ་ཕེབས་པ་ལ། །འབྲས་བུ་ཐོབ་པར་མིང་དུ་བཏགས། །སངས་རྒྱས་ཞེས་བྱ་བཟང་བཟང་པོ། །ལེགས་ནས་བྱུང་བ་མ་ཡིན་ཏེ། །གཞི་ཡི་གནས་ལུགས་འགྱུར་མེད་དེ། །རང་གིས་རང་ས་ཟིན་པ་ལགས། །སྟོང་པའི་རང་བཞིན་ཆོས་ཀྱི་སྐུ། །གསལ་བའི་རང་བཞིན་ལོངས་སྤྱོད་རྫོགས། །བྱ་བྱེད་སྣང་བ་སྤྲུལ་པའི་སྐུ། །སེམས་ཉིད་གཅིག་པུ་སྐུ་གསུམ་དངོས། །འབྲས་བུ་སངས་


TNT01_Page_0755
[མ་དཔེ་གཟིགས་ན་འདིར་གནོན།]

རྒྱས་ཡོན་ཏན་ཀུན། །སེམས་ཀྱི་རང་སྣང་མ་འགགས་པའི། །རྩལ་ཡིན་རྐྱེན་ལས་བྱུང་བ་མིན། །དུས་གསུམ་སྣང་བ་འཁྲུལ་པའི་ཆོས། །དོན་ལ་འདས་དང་མ་འོངས་མེད། །རང་བཞིན་ངོས་གཟུང་མེད་པ་ལ། །སྐྱེ་འགག་རྒྱུན་ཆད་ག་ལ་ཡོད། །འབྲས་བུའི་ཡེ་ཤེས་བསམ་ཡས་ཕྱིར། །ཚིག་དང་བརྗོད་པའི་ཡུལ་ལས་འདས། །རྣམ་རྟོག་བློ་ཡིས་གཞལ་དུ་མེད། །བཟང་ངན་འཛིན་པའི་ཡུལ་ལས་འདས། །གདོད་ནས་དམིགས་གཏད་མེད་པ་ལ། །རེ་དོགས་བྱ་ས་མ་རྙེད་པས། །ཞེན་མེད་འབད་མེད་བརྩོན་འགྲུས་ཀྱིས། །འབྲས་བུ་ཀློངས་སུ་འགྱུར་བར་འཚལ། །གདོད་མའི་རང་བཞིན་ཉམས་མྱོང་གིས། །གཏན་ལ་འབེབས་ཚེ་ཚོགས་ཀྱི་ལམ། །ཆོད་ནས་སྦྱོར་ལམ་སྐྱེས་པར་ཤེས། །རྩ་བྲལ་མངོན་གྱུར་མཐོང་བའི་ལམ། །དེ་ནས་རྟོགས་པའི་རང་ངོ་ལ། །གསར་དུ་སྐྱེད་བོགས་དབྱུང་རྒྱུ་མེད། །མེ་ལོང་ཡེ་ཤེས་སྣང་བའི་རྩལ། །འགག་མེད་ཕྱོགས་བཅུར་རྒྱས་པའི་ཕྱིར། །ཕྱི་ནང་སྤྱོད་པ་ལེགས་སྤྱད་པས། །སྒྲིབ་གཉིས་རྩད་ནས་དག་པའི་ཚེ། །འབྲས་བུ་རྫོགས་པའི་སངས་རྒྱས་ཟེར། །དེ་འདྲའི་ཉམས་ལེན་རིམ་པ་ནི། །འདུ་འཛི་སྤངས་ཏེ་དབེན་པའི་གནས། །བསྟེན་ཞིང་བསམ་གཏན་དང་མཐུན་པའི། །ཡོ་བྱད་ཅུང་ཟད་ལ་བརྟེན་ཏེ། །བླ་མ་དམ་པའི་ཞལ་


TNT01_Page_0756
[མ་དཔེ་གཟིགས་ན་འདིར་གནོན།]

ལུང་བཞིན། །མན་ངག་རྩེ་གཅིག་ཉམས་སུ་བླང༌། །ལུས་ངག་འདུ་འཛིས་དབེན་པ་དང༌། །སེམས་ནི་ཐ་མལ་རྟོག་པས་དབེན། །རྙེད་དཀའ་འཇིག་སླའི་མི་ལུས་ཐོབ་དུས་འདིར། །སྡུག་བསྔལ་འཁོར་བ་འཁྲུལ་པའི་འཁོར་ལོ་ལ། །ངེས་པར་འབྱུང་ཞིང་མཐའ་ཡས་སེམས་ཅན་རྣམས། །རང་གི་སེམས་ལ་རང་ཉིད་འཁྲུལ་མཐོང་ནས། །འགྲོ་ཀུན་འཁྲུལ་པའི་རང་འཚང་བཤིག་པའི་ཕྱིར། །བླ་མེད་བྱང་ཆུབ་མཆོག་ལ་འདུན་པ་བསྐྱེད། །ཐུན་མགོར་ངེས་འབྱུང་སྐྱབས་འགྲོ་སེམས་བསྐྱེད་བསྒོམ། །འཇུག་ཏུ་ཡང་ཡང་བསྔོ་བས་རྒྱས་འདེབས་གཅེས། །དངོས་གཞིའི་ཉམས་ལེན་ཞི་གནས་ལྷག་མཐོང་གཉིས། །སྤྱོད་པ་ཕར་ཕྱིན་དྲུག་དང་བསྡུ་དངོས་བཞི། །ཐུན་མཚམས་ཕྱག་མཆོད་ལ་སོགས་ཡན་ལག་བདུན། ཁྱད་པར་བདག་གཞན་བརྗེ་བའི་ཉམས་ལེན་གཅེས། །འདི་དག་ཕ་རོལ་ཕྱིན་པའི་ཉམས་ལེན་ཡིན། །བརྒྱད་ཁྲི་བཞི་སྟོང་ཆོས་ཀྱི་ཕུང་པོའི་བཅུད། །གཞན་ཡང་གསང་སྔགས་ཐུན་མོང་མིན་པའི་ལམ། །འབྲས་བུ་ལམ་དུ་བྱེད་པའི་གནད་མཆོག་ནི། །སེམས་ཀྱི་རང་རྩལ་འགགས་པ་མེད་པ་ལ། །གཟུགས་སྐུའི་སྣང་བ་འཆར་བའི་ནུས་པ་ཡོད། །གཞི་འབྲས་གཉིས་དང་མཐུན་པར་བསྐྱེད་རིམ་བསྒོམ། །བསྒོམས་པས་མ་དག་སྣང་བ་དབྱིངས་སུ་


TNT01_Page_0757
[མ་དཔེ་གཟིགས་ན་འདིར་གནོན།]

འདག རང་བཞིན་བདེ་སྟོང་ཀུན་གཞིའི་ངོ་བོ་ལས། །ཆོས་སྐུའི་གནས་ལུགས་ལོགས་སུ་མེད་པའི་ཕྱིར། །གཞི་འབྲས་གཉིས་དང་མཐུན་པར་རྫོགས་རིམ་ལམ། །བདེ་སྟོང་དབྱེར་མེད་བསྒོམས་པས་ཆོས་སྐུ་འགྲུབ། །སེམས་ལ་འཁྲུལ་པའི་བག་ཆགས་བཞི་ཡོད་པས། །ལུས་ལ་འཁོར་ལོ་བཞི་ཡི་རྩ་ཁམས་ཆགས། །དེ་ལས་གནས་སྐབས་བཞི་ཡི་འཁྲུལ་སྣང་འབྱུང༌། །དེ་རྣམས་གནད་ཀྱིས་ཟིན་ན་སྐུ་བཞིའི་རྒྱུ། །སྙིང་གར་གཉིད་འཐུག་རྨོངས་པའི་འཁྲུལ་པ་འཆར། །གནས་དེར་འོད་གསལ་ཕྱག་རྒྱ་ཆེ་བསྒོམས་པས། །སྤྲོས་ཀུན་ཉེ་བར་ཞི་བའི་ཆོས་སྐུ་འགྲུབ། །གཞི་ལམ་འབྲས་གསུམ་རྟོག་མེད་དབྱིངས་སུ་མཐུན། །མགྲིན་པས་རྨི་ལམ་བར་དོའི་གསལ་སྣང་འཆར། །རྨི་ལམ་ལྷ་སྐུའི་ལམ་ཁྱེར་མགྲིན་པའི་གནད། །འབྲས་བུ་ལོངས་སྐུའི་དག་སྣང་རབ་འབྱམས་འབྱུང༌། །འདི་གསུམ་གསལ་སྣང་ཕྲ་མོ་རང་བཞིན་གཅིག །སད་དུས་འཁྲུལ་སྣང་རགས་པ་ལྟེ་བའི་མཐུ། །སྒྱུ་ལུས་ལྷ་སྐུ་བདེན་མེད་གནད་ཀྱང་དེ། །སྣ་ཚོགས་སྤྲུལ་པས་དོན་བྱེད་སྤྲུལ་སྐུ་འབྲས། །གཞི་ལམ་འབྲས་གསུམ་རགས་པའི་སྣང་བར་མཐུན། །འགྱུར་བའི་བདེ་བ་སྤྱི་བོའི་གནད་ལས་འབྱུང༌། །གཏུམ་མོའམ་ལས་རྒྱ་གནད་དུ་བསྣུན་པའང་ཏེ། །འབྲས་བུ་འགྱུར་མེད་བདེ་བ་ཆེན་པོའི་


TNT01_Page_0758
[མ་དཔེ་གཟིགས་ན་འདིར་གནོན།]

སྐུ། །གཞི་ལམ་འབྲས་གསུམ་བདེ་བའི་ངོ་བོར་མཐུན། །སེམས་ནི་རང་བཞིན་སྟོང་དང་གསལ་བ་དང༌། །གསལ་བའི་རང་གདངས་སྣ་ཚོགས་འཆར་བ་དང༌། །རང་བཞིན་བདེ་བ་ཆེན་པོར་གནས་པ་ལགས། །རང་ངོ་མ་ཤེས་འཁྲུལ་པའི་གནས་སྐབས་བཞི། །རང་བཞིན་གནས་ལུགས་མངོན་གྱུར་སྐུ་བཞི་ཡིན། །བླ་མེད་རྡོ་རྗེ་ཐེག་པའི་ཉེ་ལམ་གྱི། །གནད་ཀྱི་སྙིང་པོ་བསྡུས་པའང་དེ་ཙམ་སྟེ། །ཟབ་དོན་བདུད་རྩིས་རང་སེམས་ཚིམ་པར་མཛོད། །དེ་ལྟར་མདོ་སྔགས་ལམ་གྱི་གདམས་པ་འདི། །སྐལ་ལྡན་ཁྱེད་ཀྱི་ཐུགས་ལ་རབ་འཕྲོད་ནས། །དཔག་ཡས་འགྲོ་རྣམས་བྱང་ཆུབ་ལ་འགོད་པའི། །ཐབས་བཟང་མཆོག་གིས་སྨིན་ཞིང་གྲོལ་བྱེད་ཤོག །འདི་དག་ཉམས་མྱོང་དུ་མ་དང་འབྲེལ་མོད་ཀྱི། །རང་བཟོས་སྦྱར་བ་མ་ཡིན་ཏེ། །སྙིང་པོ་ལོགས་ནས་མི་བཙལ་བའི། །ལྟ་བ་མ་བཅོས་ལྷུག་པ་ནི། །རྒྱལ་བ་ཏིང་འཛིན་རྒྱལ་པོའི་མདོར། །གཟུགས་ཀྱི་རང་བཞིན་གཞན་ཡིན་ལ། །སྟོང་ཉིད་གཞན་དུ་མ་གསུངས་སོ། །གང་གིས་གཟུགས་རྣམས་རབ་ཤེས་པ། །དེས་ན་སྟོང་པ་རབ་ཏུ་ཤེས། །གང་གིས་སྟོང་ཉིད་རབ་ཤེས་པས། །དེས་ནི་མྱ་ངན་འདས་པ་ཤེས། །རྣམ་པ་འདིས་ནི་མི་ཤེས་པའི། །དམིགས་པ་ཅན་རྣམས་རབ་ཏུ་རླག །ཅེས་གསུངས་ལང་གར་གཤེགས་མདོ་ལས། །འཇིག་རྟེན་སྐྱེ་འཇིག་མ་མཆིས་ཏེ། །ནམ་མཁའི་མེ་ཏོག་རབ་ཏུ་འདྲ། །


TNT01_Page_0759
[མ་དཔེ་གཟིགས་ན་འདིར་གནོན།]

ཁྱོད་ཀྱིས་ཡོད་དང་མེད་མ་དམིགས། །ཞེས་གསུངས་སོ། །གཟུང་འཛིན་མེད་ཅིང་གཉིས་མེད་ཀྱི། །ཡེ་ཤེས་ཡོད་དང་རྣམ་ཤེས་མེད། །རྣམ་པར་མི་རྟོག་ཡེ་ཤེས་ནི། །ལས་དང་སྤྱོད་པ་ཀུན་འདྲ་བར། །རྣམ་པར་རྟོག་མེད་ལྷུན་གྱིས་གྲུབ། །དུས་གསུམ་སངས་རྒྱས་ལས་བྱེད་པ། །སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རྒྱུ་མེད་པ། །ཞེས་གསུངས་བྲམ་ཟེ་ཆེན་པོས་ཀྱང༌། །ཇི་སྲིད་སེམས་ལས་རྣམ་འཕྲོས་པ། །དེ་སྲིད་མགོན་པོའི་རང་བཞིན་ཏེ། །ཆུ་དང་རླབས་དག་གཞན་ཡིན་ནམ། །ཉམས་ལེན་སྒོམ་ནི་སམྦུ་ཊིར། །སྟོང་པ་བསྒོམ་པར་མི་བྱ་སྟེ། །སྟོང་མིན་བསྒོམ་པར་མི་བྱའོ། །སྟོང་པ་མི་སྤང་རྣལ་འབྱོར་པས། །སྟོང་མིན་ཡོངས་སུ་མི་སྤང་ངོ༌། །སེམས་ལ་སྐུ་གཉིས་ཚང་ཚུལ་ནི། །དགྱེས་པ་རྡོ་རྗེའི་རྩ་རྒྱུད་ལས། །ཞལ་ཕྱག་རྣམ་པའི་གཟུགས་ཅན་ཏེ། །མཆོག་ཏུ་བདེ་བ་གཟུགས་མེད་པ། །དེ་ཕྱིར་འགྲོ་ཀུན་ལྷན་ཅིག་སྐྱེས། །རང་བཞིན་ལྷན་ཅིག་སྐྱེས་ཞེས་བརྗོད། །ཅེས་གསུངས་སྐུ་བཞིའི་འབྲེལ་རྩི་བ། །སྐྱེ་གནས་སྙིང་མགྲིན་མགོ་བོར་ཡང༌། །སྐུ་གསུམ་པོ་ནི་རྣམ་པར་གནས། །ཞེས་སོགས་རྒྱུད་དུ་གསལ་བར་གསུངས། །ཞེས་པ་ནི་སྒྲུབ་པ་མཆོག་ལ་ཉེ་བར་གཞོལ་པ། སློབ་མའི་དོན་པོ་བྱམས་པ་རིན་ཆེན་གྱིས་ཉེ་བར་བསྐུལ་ནས། རྒྱལ་ཁམས་པ་ཏཱ་ར་ནཱ་ཐས་ཕོ་བྲང་ཆེན་པོ་སྣེའུ་གདོང་རྩེར་སྦྱར་བའོ།། །།དགེ་ལེགས་འཕེལ། །

ཞལ་གདམས་རིན་ཆེན་འཕྲེང་བ།


TNT01_Page_0760
[མ་དཔེ་གཟིགས་ན་འདིར་གནོན།]

ཞལ་གདམས་རིན་ཆེན་འཕྲེང་བ། ཀྱཻ། སློབ་དཔོན་དུ་རང་གི་སེམས་འདི་བཟང༌། །ལམ་སྣ་རུ་བླ་མ་རྗེ་འདི་བཟང༌། །ལྟ་བ་རུ་གང་ཤར་ངོས་འཛིན་བཟང༌། །སྒོམ་པ་རུ་མ་བཅོས་སོ་མ་བཟང༌། །ངན་པའི་སྤྱོད་པ་འདི་འགོས་རེ་སླ། ཁྲེལ་མེད་ཀྱི་གྲོགས་འདི་བློ་བྲིད་མཁས། །དུས་ངན་གྱི་མི་འདི་འཆར་ཁ་རྒོད། །ཚེ་འདིའི་སྣང་བ་འདི་འབྲིད་རེ་རྐྱེན། །འདོད་ཡོན་དང་ཞེན་ཆགས་འདི་འདྲིས་ཁ་ཡང༌། །རིག་པ་རྣམ་རྟོག་འདི་ཅོལ་རེ་ཆུང༌། །རང་འདོད་ཀྱི་བཏགས་པ་འདི་མ་ཚོར་རམ། །གཡང་སར་ལྟུང་བ་འདི་མ་ཚོར་རམ། །འཁོར་བར་འཁྱམས་པ་འདི་མ་ཚོར་རམ། །ད་རེས་ལམ་སྣ་ཅིག་མ་ཟིན་ན། །གཏན་གྱི་རྡོག་སྣ་གཅིག་འདྲེད་དེ་མཆི། །ཆོས་བྱེད་དགོས་སྙམ་ཀྱང་རེ་བ་ལུས། །ཚེ་ལོང་མེད་འདི་དོན་མེད་ཀྱི་ངང་དུ་འདས། །དུས་ད་རེས་མདོ་མེད་གཅིག་མི་འབྱུང་ངམ། །རང་འདོད་ཀྱི་ལྕགས་སུ་བཅུག་ནས་ཀྱང༌། །སྡུག་བསྔལ་སྣ་དགུ་འབྱུང་བ་ཉམས་རེ་ང༌། །ལག་ལེན་མེད་པའི་བཤད་པ་དེ། །ཆ་མེད་རྒྱུས་གཏམ་སྒྲོག་པ་འདྲ། །དགོས་དུས་ཕན་པ་མི་གདའ་འོ། །ཉམས་མྱོང་མེད་པའི་གདམས་ངག་དེ། །ཤོག་རིལ་དཔེ་རིལ་གྱི་ཁུར་པོ་ཡིན། །ཡི་གེ་ཙམ་ལ་ལུས་ཏེ་མཆི། །ཐག་ཆོད་མེད་པའི་ཉམས་


TNT01_Page_0761
[མ་དཔེ་གཟིགས་ན་འདིར་གནོན།]

རྩལ་དེ། །སྤྲེའུ་ཤིང་ཁར་རྩེ་བ་དང་འདྲ། །ཟར་ཟིར་མང་ལ་དོན་གོ་ཆུང༌། །རང་ངོ་ཤེས་པའི་རྣམ་རྟོག་དེ། །རྫིང་བུར་རྡེའུ་སྐྱུར་པ་འདྲ། །ཡལ་ཡོལ་མེད་ཀྱང་རང་བཞིན་གྱི་དང༌། །སེམས་ལ་མི་ཕན་པའི་བཤད་རླབས་འདི། ཁ་སྦྱང་མཁས་པའི་འཕྱོན་མ་དང་འདྲ། །ཟེར་ཚོད་དང་ལག་ལེན་འཇོལ་ནས་ཐལ། །མི་རྟག་འཁོར་བའི་གནས་ཚུལ་ལ། །ཡིད་བརྟན་བྱེད་པ་ཚོ་དང་འཁྲུལ། །དེ་བས་རྨི་ལམ་གྱི་རྒྱ་ཡིས་ཐོབ། །ལུས་མི་བརྟན་མྱུར་དུ་འཇིག་འཇིག་འདྲ། །ཤ་རུས་ཀྱི་ཕུང་པོ་འདི་འགྱེས་འགྱེས་འདྲ། ཁ་སྣའི་དབུགས་འདི་འཆད་འཆད་འདྲ། །མངའ་རིགས་དང་ཕྱོགས་རིས་འདི་འཁྲུལ་འཁྲུལ་འདྲ། །ཕ་ཚན་དང་སྡེ་ཚན་འདིས་སླུ་སླུ་འདྲ། །གཉེན་འབྲེལ་གྱི་གདུང་སེམས་འདི་འཇིག་འཇིག་འདྲ། །འཁོར་གཡོག་འདི་ཀུན་དང་འབྲལ་འབྲལ་འདྲ། །སྡུག་བསྔལ་ན་ཚའི་ཚད་འདི་འཇིག་འཇིག་འདྲ། །རྣག་ཁྲག་གི་རྐྱལ་བུ་འདི་རལ་རལ་འདྲ། །ཤ་ཁྲག་གི་སྤེའུ་འདི་འགྱེལ་འགྱེལ་འདྲ། །རྨ་ཤུ་བའི་མཁར་འདི་འཇིག་འཇིག་འདྲ། །སྦྲང་མ་ཀུན་སྦྲང་རྩི་གསོག་གསོག་ནས། །དབྱར་སོས་ཀྱི་ཟླ་བ་དྲུག་ཀྱང་ཐལ། །སྐད་ཅིག་གཅིག་ལ་གཞན་གྱིས་འདོན། །བུ་གསག་ལ་མ་དགའ་སྒྲུབ་པ་གྱིས། །ཕྱི་མ་ངན་སོང་གི་འཐེན་ཐག་དང༌། །ཚེ་འདིར་ཡང་


TNT01_Page_0762
[མ་དཔེ་གཟིགས་ན་འདིར་གནོན།]

ཡིད་བརྟན་མ་མཆིས་པར། །ཐ་མལ་གྱི་གཉེན་ལ་གཏད་པ་མེད། །བུ་གཉེན་གྱི་གཙོ་བོར་བླ་མ་བསྟེན། །ཐབས་སྣ་ཚོགས་ཀྱིས་བཏུལ་ཀྱང་ཐུལ་བར་དཀའ། །དགྲ་བཏུལ་བས་རང་ཉིད་དམྱལ་བར་ལྷུང༌། །བླུན་པོ་ཀུན་མདུན་མའི་འཆུག་ལུགས་ལ། །དགྲ་ཕྱི་ནས་མ་འདུལ་རང་སེམས་ཐུལ། །དུས་གསུམ་གྱི་རྒྱལ་བའི་གཤེགས་ཤུལ་དེ། རྩེ་གཅིག་ཏུ་སྒོམ་པ་ཡིན་ལགས་ཀྱང༌། །མི་འདི་ཀུན་ཐ་སྙད་ལ་དགའ་དགའ་འདྲ། །བུ་ཐ་སྙད་ལ་མ་དགའ་རྩེ་གཅིག་བསྒོམས། །དོན་ནི་རྩེ་གཅིག་ཏུ་སྒོམས་ན་ཆེ། །གདམས་ངག་ཀུན་གྱི་གཙོ་བོ་དེ། །ཞེན་མེད་དང་བྱ་བཏང་འདི་ལགས་མོད་ཀྱང༌། །མི་འདི་ཀུན་ཟང་ཟིང་ལ་དགའ་དགའ་འདྲ། །བུ་ཟང་ཟིང་ལ་མ་དགའ་ཆོས་ལ་འབུངས། །སོ་མ་རང་དགར་སྐྱོང་བ་འདི། །ཆོས་ཀུན་གྱི་དགོངས་པ་ཡིན་ལགས་ཀྱང༌། །དམིགས་བཅས་ལ་མི་འདི་དགའ་དགའ་འདྲ། །སེམས་བཅུར་ཐག་མ་གཏོང་རང་དགར་ཞོག །ནན་ཏན་གྱིས་གཏན་ལ་དབབ་རྒྱུ་སྟེ། །རང་གི་སེམས་ཉིད་ཡིན་པ་ལ། ཁ་ཕྱིར་ལྟ་ལ་དགའ་བ་འདི་ཡ་རེ་ཆ། །རང་ངོ་ལ་ལྟོས་དང་སྐལ་ལྡན་གྱི་བུ། །ཚེ་གཅིག་གི་སངས་རྒྱས་འགྲུབ་པ་སྟེ། །གསང་སྔགས་ཀྱི་ཟབ་ལམ་ཡིན་ལགས་ཀྱང༌། །འདི་ཀུན་གྱི་བློར་མི་ཤོང་བ་གདའ། །བུ་ཟབ་མོའི་ཆོས་ལ་དག་སྣང་སྦྱོངས། །འཁོར་འདས་


TNT01_Page_0763
[མ་དཔེ་གཟིགས་ན་འདིར་གནོན།]

ངོ་བོ་རོ་གཅིག་འདི། །སྤྲོས་དང་བྲལ་བ་གཅིག་ཡིན་པ་ལ། །བློ་བྱས་སྒོམ་པ་ནི་རྒོད་རེ་བྲོ། །བུ་གཅེར་མཐོང་ངོ་ཤེས་ཕྱོགས་མེད་དུ་སྐྱོངས། །ཡིད་ཆེས་ཀྱི་དད་པ་སྐྱོན་མེད་འདི། །གདམས་ངག་ཟབ་མོའི་སྣོད་ཡིན་ཀྱང༌། །རང་བློས་རྒྱས་བཀབ་ཀྱི་ཕོ་ཚོད་འདི་འཁྲུལ། །བུ་དད་པ་ངོ་ལྐོག་མེད་པར་སྦྱོངས། །མི་རྟག་འཆི་བ་བསམ་པ་འདི། །ཆོས་ཀྱི་སྐུལ་མར་གདའ་བ་ལ། །འདི་ཀུན་གྱི་རྣ་བར་མི་སྙན་པ་གདའ། །སྙན་པ་ལ་མ་སེམས་དོན་ལ་ལྟོས། །ཆོས་ཉམས་སུ་བླང་བའི་འབྲས་བུ་དེ། །རང་སེམས་ཐུལ་བ་གཅིག་དགོས་པ་ལ། །ཆོས་ཕྱིར་དུ་འཐབ་མོ་འོང་བ་ཞིག་གདའ། །ཆོས་དང་སེམས་སུ་འདྲེ་བ་གཅིག་འཚལ། །ཐོས་པ་བྱས་པའི་འབྲས་བུ་དེ། །ཉམས་སུ་ལེན་པ་ཅིག་ཡིན་པ་ལ། །སྡེ་རིགས་ཀྱི་རུ་དཔོན་ཅིག་དོན་དུ་གཉེར། །བུ་ཁ་དྲག་ལ་མ་དགའ་ཉམས་སུ་ལོང༌། །གདམས་ངག་དཔེ་རིས་ཀྱི་ཚིག་ཙམ་གྱི། །ཉམས་མྱོང་མེད་པར་སློབ་མར་འཁྲིད། །ལོང་བས་ལོང་ཁྲིད་བྱེད་པ་མ་ལགས་སམ། །དཔེ་རིས་ལ་མ་ལྟ་བསྒོམ་པ་ཅིག་འཚལ། །ཀུ་རེ་དང་ཀྱལ་ཀའི་ཕྱིར་དུ་ཡང༌། །སྡིག་པ་རྔམ་པོ་ཆེ་གསོག་པ་མཐོང༌། །བཟང་འཛིན་གྱི་རློམ་སེམས་ཆེ་བ་ཡང༌། །ཆོས་ཀྱི་ཐ་མ་སྡིག་ལ་སྐྱེལ། །ཆོས་མི་ནུས་ཟེར་


TNT01_Page_0764
[མ་དཔེ་གཟིགས་ན་འདིར་གནོན།]

ནས་སྐྱུར་སྐྱུར་བ། །ད་རེས་མི་ཁོམ་འདུག་ཅེས་བཞག་བཞག་པ། །ལོང་ཡོད་དོ་སྙམ་ནས་དོར་དོར་བ། །ང་གཞོན་ནུ་ཡིན་སྙམ་ཁེངས་ཁེངས་པ། །བདེན་མི་བདེན་ཐེ་ཚོམ་ཟོས་ཟོས་པ། །འཆོར་རང་མཐོང་སྐྱེས་ནས་བོར་བོར་བ། །ཕྱིས་བྱེད་དགོས་སྙམ་ནས་ལུས་ལུས་པ། །ང་གཞན་དབང་ཐལ་ཞེས་ཟེར་ཟེར་བ། །ཐང་ཆད་པར་འདུག་ཅེས་ཉལ་ཉལ་བ། །རྗེ་མཚན་ལྡན་བླ་མ་བརྗེད་བརྗེད་པ། །རྒྱུད་ཡིད་གཉིས་ཀྱི་ཚེར་མས་གང་གང་བ། །རྟག་མི་ཐུབ་པའི་གསར་འགྲོགས་བྱེད་བྱེད་པ། །ལྐོག་མི་ཐུབ་ཚུལ་འཆོས་བྱེད་བྱེད་པ། །སྡིག་ཤེས་བཞིན་ཁྱད་དུ་གསོད་གསོད་པ། །ཆོས་བརྒྱད་ཀྱི་གྲྭ་ཟུར་རྒྱས་རྒྱས་པ། །མཚན་ལྡན་གྱི་བླ་མ་མཇལ་དུས་སུ། །ཡིད་གཉིས་དང་ལོག་རྟོག་བྱེད་བྱེད་པ། །ཟབ་དོན་གྱི་ཆོས་དང་མཇལ་བ་ལ། །གཡེངས་མའི་ལམ་ལ་ལུས་ལུས་པ། །ཆོས་ཐམས་ཅད་ཉམས་ལེན་དུ་བྱེད་རྒྱུ་ལ། །ཐེག་པ་ལ་བཟང་ངན་འབྱེད་འབྱེད་པ། །ཆོས་ལ་ཕྱོགས་རིགས་སུ་སྤྱོད་སྤྱོད་པ། །ད་བླ་མའི་འཁྲུལ་བ་མི་རྟོག་འཚལ། །གཞན་རྒྱུད་ལ་ཕོ་ཚོད་མི་རྒྱག་འཚལ། །རང་གི་ཡོན་ཏན་ལ་མི་རློམ་ཞིང༌། །གཞན་གྱི་སྐྱོན་ལ་ཡང་མ་རྟོག་ཅིག །ང་རྒྱལ་གྱི་རི་རྩེ་མ་འགྲིམ་ཅིག །སྙེམས་བྱེད་ཀྱི་ཞགས་པས་མ་འཆིང་ཞིག །ཆོས་བརྒྱད་ཀྱི་སྨིག་སྒྱུ་འདིས་སླུ་སླུ་འདྲ། །འདོད་ཡོན་འདམ་


TNT01_Page_0765
[མ་དཔེ་གཟིགས་ན་འདིར་གནོན།]

ལ་མ་བྱིང་ཞིག ཁ་ལྟའི་གཡང་ལ་འཆོར་ཉེན་གདོག །ལས་འབྲས་ཁྱད་དུ་མ་གསོད་ཅིག །སངས་རྒྱས་ཀྱི་བསྟན་པ་ཡུད་ཙམ་ལ། །ལོང་ཡོད་ཀྱི་སྐབས་ཅིག་མེད་མེད་འདྲ། །མཚན་ལྡན་གྱི་བླ་མ་རིན་ཆེན་འདི། །ཨུ་དུམྦ་ར་ལྟར་དཀོན་པོ་ཅིག་ལགས། དང་བ་ཁམས་གསོ་ནུས་པ་གཅིག་འཚལ། །ཚེ་འདི་ཡི་ཁེངས་གྲགས་ལ་སྤྱོད་མཁན་ནམ། །ཟོག་རྒན་གཅིག་དང་འཕྲད་ཉེན་གདོག །སེམས་གཉུག་མ་དོན་གྱི་འདུག་ལུགས་ལ། །ལྟ་རྒྱུ་མེད་ཀྱང་བྱར་ཅིག་འཚལ། །དམིགས་པ་མེད་པའི་སྙིང་རྗེ་ལ། །ཕྱོགས་རིགས་མེད་པ་གལ་རེ་ཆེ། །གཞི་རང་བཞིན་ལྷུན་གྱི་གྲུབ་པ་དེ། །སྐྱེ་མེད་དུ་རྟོགས་ན་ཆོས་སྐུ་ཡིན། །བློ་བྱས་སུ་ཤོར་ན་གོལ་བ་ཡིན། །རྐྱེན་གྱི་འཆར་སྒོ་སྣ་ཚོགས་འདི། །སྤྲུལ་སྐུ་ལགས་པས་རང་སར་ཞོག །ཐོབ་བྱ་རུ་བཟང་འཛིན་མ་བྱེད་ཅིག །གདོད་མའི་རང་བཞིན་ཟུང་འཇུག་དེ། །གཞི་རང་སེམས་ལོངས་སྤྱོད་རྫོགས་པ་ཡིན། །རྐྱེན་གྱིས་མ་བཅོས་སོ་མར་ཞོག །སྣང་སེམས་དབྱེར་མེད་དུ་མ་ཤར་ན། །བདེ་གསལ་མི་རྟོག་སྐྱོང་བདེ་ཡང༌། །འཁོར་བའི་སྒྲུབ་ཐབས་ཅིག་ལགས་པས་ཕན་མི་གདའ། །ལོངས་སྤྱོད་རྣམ་གཡེངས་ཀྱི་རླུང་པོ་ཡིན། །མངའ་རིས་ཀུན་འཇའ་ཚོན་གྱི་རི་མོ་ཡིན། །རང་གཞན་ཞེས་བཙལ་པས་མ་རྙེད་ན། །འགྲོ་དོན་རང་གང་ལ་


TNT01_Page_0766
[མ་དཔེ་གཟིགས་ན་འདིར་གནོན།]

གང་གིས་བྱེད། །དེ་ཙམ་ན་སྙིང་རྗེའི་གཞན་དོན་ཡོང༌། །སྤུ་གྲི་ལ་སྦྲང་རྩི་ཆགས་པ་བཞིན། །བདེ་སྐྱིད་ལ་ཆགས་ཞེན་མི་འཚལ་ལོ། །དུས་རེ་ཞིག་མི་ཚེ་འདི་ལ་ཡང༌། །རང་བས་གཞོན་པ་ཡང་ཇི་ཙམ་ཞིག་ཤི །མཉམ་པ་དང་རྒན་པ་ཡང་ཇི་ཙམ་རང་འདས། །དེ་ཡང་ཡང་ཐུགས་བསམ་མཛད་པ་ཞུ། །ཉོན་མོངས་དང་རྣམ་རྟོག་ཅི་བྱུང་ཡང༌། །སེམས་ལ་བལྟ་བ་འདི་ཁེ་རེ་ཆེ། །རྣམ་རྟོག་དང་སྡིག་པ་རང་རླག་ལ་འགྲོ། །ལྟ་བ་དང་སྒོམ་པ་ཡེངས་ཐུབ་དགོས། །སྤྱོད་པ་ལ་སོ་ཐུབ་ངོ་ལྐོག་མེད། །གདམས་ངག་ལ་རང་བྱན་ཆུད་པ་ཞུ། །ཆོས་ཁ་ཕྱིར་དང་ཚིག་ཕྱིར་མ་འབྲང་ཅིག །མོ་རྩིས་ཀྱི་འགྲོ་དོན་མ་སྐྱོང་ཅིག །ཕྱོགས་གཟུང་གི་ཕན་འདོག་མ་བྱེད་ཅིག །ཉོན་མོངས་རང་ཡན་ལ་མ་གཏོང་ཅིག །ཞེ་འདོད་ཀྱི་འཕྲིན་ལས་མ་སྐྱོང་ཅིག །མིག་མཐོང་གི་མངོན་ཤེས་མི་འཚལ་ལོ། །མཉམ་རྗེས་མེད་པར་སྒོམས་ཤིག་ཨང༌། །བདུད་ཀྱི་ཞགས་པས་ག་ལ་ཟིན། །ང་བཟང་གི་མཐོ་གནོན་མི་བྱ་ཞིང༌། །སྙིང་རྗེ་ལ་ཁག་གཏང་གི་ཞེན་ཆགས་སྡང༌། །ཟུར་མགོ་མ་རགས་གང་དགའ་ཐོང༌། །ཚུལ་ཁྲིམས་དང་ཚུལ་འཆོས་ནོར་ཉེན་གདའ། །ཤུགས་འབྱུང་གི་སྤྱོད་པ་ངོ་མཚར་ཆེ། །འགྲོ་སྡོད་བྱ་བྲེལ་ཅི་བྱུང་ཡང༌། །ཡེངས་པ་མེད་ན་སྒོམ་ཆེན་ཡིན། །སྤྲོས་བྲལ་གྱི་ལྟ་བ་བཤད་ཙ་ན། །ལྟ་བ་ནམ་མཁའ་ལྟ་བུ་ལགས། །ནམ་


TNT01_Page_0767
[མ་དཔེ་གཟིགས་ན་འདིར་གནོན།]

མཁའ་མཐའ་དབུས་མེད་པ་ཡིན། །འཁོར་བ་མྱང་འདས་རང་བཞིན་མེད། །གཉིས་ཀར་འཁྲུལ་བའི་ཆོས་སུ་སྣང༌། །སྤང་བླང་མེད་པའི་དོན་གཅིག་རྟོགས། །ཞེན་མེད་ཀྱི་བསྒོམ་པ་བཤད་ཙ་ན། །སེམས་དང་སྣང་བ་རྣམ་རྟོག་གསུམ། །ཆུ་ལ་ཆུ་བཞག་བཞིན་དུ་ཐལ། །མཉམ་རྗེས་རོ་གཅིག་དམིགས་གཏད་བྲལ། །ལྟ་ཉུལ་རྩོལ་བ་མི་དགོས་སོ། །མན་ངག་གི་རྒྱལ་པོ་དྲན་པ་ཡིན། །སྤྱོད་པ་ཤུགས་འབྱུང་བཤད་ཙམ་ན། །འཛིན་ཞེན་མེད་པ་གུ་རེ་ཡངས། །ཕྱོགས་མེད་དུ་སྤྱོད་པ་ཉམས་རེ་དགའ། །ངོ་ལྐོག་མེད་པས་འཚང་རེ་ཆུང༌། །བུ་ཆུང་བཞིན་དུ་ལྷུག་པར་བཞག །བཟའ་གཏད་དང་བྲལ་བ་སྨྱོན་པ་འདྲ། །བླང་དོར་མེད་པའི་གནས་ལུགས་རྟོགས། །ལས་བྱས་ཀྱང་བྱར་མེད་ངང་དུ་གདའ། །བསགས་ཀྱང་སོགས་པར་མི་གདའ་འོ། །འབྲས་བུ་ལྷུན་གྲུབ་བཤད་ཙམ་ན། །བཟོ་བཅོས་མེད་པའི་རང་སེམས་འདི། །དུས་གསུམ་རྒྱལ་བའི་དགོངས་པར་གདའ། །བཅོས་མའི་སངས་རྒྱས་འཁྲུལ་པ་ཡིན། །སངས་རྒྱས་ལ་རེ་དོགས་མི་འཚལ་ལོ། །བླ་མ་ཆོས་སྐུར་མ་མཐོང་བའི། །མོས་གུས་དེ་ཕྱོགས་ཞེན་ཟང་མ་ལགས། །སྙིང་རྗེ་མེད་པའི་སྟོང་རྐྱང་དེ། །ཆད་ལྟ་ཟང་མ་ཅིག་མ་ལགས་སམ། །སེམས་ཅན་ལ་གནོད་ཀྱང་མི་འཛེམ་པའི། །བཙུན་ཚུགས་དེ་ཚུལ་འཆོས་


TNT01_Page_0768
[མ་དཔེ་གཟིགས་ན་འདིར་གནོན།]

མ་ལགས་སམ། །ཉེ་རིང་མེད་པ་མ་བྱུང་ན། །ཕན་སེམས་བྱེད་པ་འདོད་ཞེན་ཡིན། །ཟས་གོས་ལ་ཞེན་པ་ཇེ་རྒྱས་ལ། །འཛིན་ཆགས་མེད་ཅེས་མ་ཟེར་ཅིག །རྒྱུ་འབྲས་ལས་ལ་མི་འཛེམ་ན། །ཐོས་སྒོམ་ཀུན་ཆུ་ལ་ཕོ་བ་ལགས། །སེམས་ཆོས་སུ་སོང་བ་ཞིག་མ་བྱུང་ན། །མན་ངག་ཀུན་ཚིག་ཕྱིར་ལུས་པ་ལགས། །དམ་པ་ལ་སྐུར་བ་འདེབས་སྣང་ན། །ཕྲག་དོག་གི་གདོན་གྱིས་ཟིན་པ་ཡིན། །རྣམ་རྟོག་ཆུ་བུར་དུ་ཤེས་ཙ་ན། །རང་གྲོལ་གྱི་རྣལ་འབྱོར་ཟེར་བ་ཡིན། །སེམས་བཅས་བཅོས་མ་བྱེད་མ་སླད་པར། །གསལ་སིང་ངེ་ཡེ་རེ་ཝལ་ལེ་བ། །ཧྲིག་གེ་ཞོག་དང་གསལ་གྱིས་ཡོང༌། །རྩོལ་བ་སྐྱེད་དང་སྒྲིམ་པར་ཞུ། །སེམས་ཇེ་དྭངས་འཕྲོ་ཚུལ་བྱེ་ཐུད་བྱེད། །སྒོམ་ཁོ་ན་ལ་འདོད་པ་སྐྱོ་བར་གདའ། །རིག་པ་འདི་གང་ལ་ཡང་མ་རེག་པར། །རྟེན་མེད་དུ་ཞོག་དང་རྣལ་འབྱོར་པ། །ཕྱི་ཤུན་པ་བཤུས་པ་བཞིན་དུ་སོང༌། །ངོ་བོ་མ་རྙེད་པ་རྙེད་རྒྱུ་ཞིག་དེ་ན་གདའ། །ངོ་མ་ཤེས་པ་ཤེས་རྒྱུ་ཞིག་དེ་ན་གདའ། །སེམས་སྤྲོ་ལ་དྭངས་པའི་དུས་ཤིག་གདའ། །དེ་ཉམས་མྱོང་གི་དང་པོ་མ་ལགས་སམ། །སེམས་སྣང་བ་ལ་བཏང་ཡང་མི་འགྲོ་ན། །ཉམས་མྱོང་གཉིས་པ་ཤར་བ་ལགས། །འཕྲལ་སྣང་བ་དུ་མ་ཤར་ན་ཡང༌། །དབྱིངས་གདོད་མའི་སེམས་སུ་རོ་གཅིག་པ། །དེ་ཡང་རྨི་ལམ་


TNT01_Page_0769
[མ་དཔེ་གཟིགས་ན་འདིར་གནོན།]

ལྟ་བུར་མྱོང༌། །རེས་འཕྲོ་བ་ཙུག་བྱེད་ཀྱང་རིག་སྟོང་གི་ངང༌། །ངོ་བོ་ལྷན་གྱིས་བཞག་ཙ་ན། །རྣམ་རྟོག་ཀུན་གར་སོང་ཆ་མེད་དུ་ཐལ། །དེ་མྱོང་བའི་རིམ་པ་གསུམ་པ་ལགས། །ཕྱི་སྣང་བའི་འཆར་སྒོ་ཇི་སྙེད་དང༌། །ནང་ཉོན་མོངས་རྣམ་རྟོག་ཤར་ཙམ་ན། །རིག་པ་དང་སྟོང་པ་འཕྲོད་པ་འདིས། །རང་སྟོང་ཉིད་དུ་རྗེན་ནེ་འཆར། །དེ་ཀ་ལ་ངོ་ཤེས་རྒྱུན་ཆད་མེད། །མཉམ་རྗེས་མེད་པའི་རྣལ་འབྱོར་ཟེར། །རྩ་བྲལ་དུ་ཤེས་པ་མ་ལགས་སམ། །སྨྲ་བསམ་བརྗོད་མེད་དང་བློ་འདས་དང༌། །རང་རིག་རང་གསལ་ཞེས་ཟེར་ན་ཡང༌། །གོ་བ་དང་ཉམས་ཀྱི་སྒྲོག་གིས་བཅིངས། །སེམས་རོ་དང་འདྲ་ན་སྒོམ་ཆེན་མིན། །སེམས་པ་མེད་ཀྱང་ངོ་ཤེས་ཅན། །ནམ་མཁའ་ལྟ་བུར་དཔངས་མཐོ་ལ། །ས་གཞི་ལྟར་མི་གཡོ་རྒྱ་རེ་ཆེ། །མར་མེ་ལྟར་གསལ་ལ་ཤེལ་ལྟར་དེངས། །ཆུ་ལྟར་ངང་གི་དྭངས་པ་ལ། །སྒོམ་དུས་རེ་དོགས་མེད་པ་དང༌། །ཐུན་མཚམས་སུ་ཧད་དེ་ལུང་མ་བསྟན། །བརྩོན་འགྲུས་དྲག་པོ་ཅིག་སྐྱེད་པ་ཞུ། །འཇིག་རྟེན་ཆོས་ཀྱི་ཞེན་པ་ལྡོག །སྤྲོས་པ་རིག་པའི་ཆོ་འཕྲུལ་དུ་གདའ། །རིག་པ་གསལ་སྟོང་རྗེན་ནེ་བ། །བཏང་སྙོམས་སུ་མ་ལུས་པ་དར་ཞིག་སྐྱེད། །ཆོས་རང་སར་དག་པ་ལ་ངེས་ཤེས་སྐྱེད། །རྣམ་རྟོག་ལ་གཉེན་པོ་


TNT01_Page_0770
[མ་དཔེ་གཟིགས་ན་འདིར་གནོན།]

མི་དགོས་པར། །རང་སྟོངས་སུ་འགྲོ་བའི་ངེས་ཤེས་སྐྱེད། །རྟོག་དཔྱོད་ཀུན་ཟད་ཅིང་སིམ་མེར་གདའ། །ནང་དུ་བལྟས་ན་སིང་ངཻ་བ། །ཕྱི་རུ་བལྟས་ན་ཡུལ་ལེ་བ། །དོན་སྤྱི་དང་མ་འདྲེས་ཉམས་སུ་ལོང༌། །ཕྲག་དོག་དང་ཆགས་སྡང་རང་དགར་དག །རྣམ་རྟོག་དང་ཉམས་དང་རྟོགས་པ་གསུམ། །དབྱེར་མེད་དུ་ངོ་ཤེས་ནམ་མཁའ་འདྲ། །ཅི་ཡང་མ་ཡིན་འདུ་འབྲལ་མེད། །ཐ་མལ་གྱི་ཤེས་པ་གྲ་མ་ཆག །མ་བསྣན་མ་ཁྲི་ཟུར་མ་ཉམས། །ཐམས་ཅད་སེམས་ཀྱི་རང་སྩལ་ལ། །བཅོས་མ་སྒོམ་ཚད་འཁྲུལ་པ་ཡིན། །སྟོང་ཉིད་ཀྱི་ངོ་བོ་སྒོམ་དུ་མེད། །ཉམས་མྱོང་གི་རྩི་ལ་མ་ཞེན་ཞིག །འོན་ཀྱང་བྱང་སེམས་དང་འབྲལ་བ་མེད། །མི་གུས་པ་ཡོང་ལ་རེ་བ་དང༌། །བརྙས་པ་བྱས་ན་མི་དགའ་བ། །བསྟོད་ན་དགའ་ལ་སྨད་ན་སྡུག །རྨི་ལམ་གྱི་བདེ་བ་ལ་ཞེན་པ་འདི། །རྙེད་བཀུར་དོན་གཉེར་དུ་གདའ་བས་ན། །སྐྱེ་བོ་ཕལ་པ་དང་ཁྱད་ཅི་གདོག །སྒོམ་ཆེན་གྱི་དྲི་ཡང་མི་གདའོ། །ཀུན་རྫོབ་དང་དོན་དམ་ལ་ཉེ་རིང་མེད། །སྟོང་པ་དེ་སྒྲུབ་ཀྱང་མི་དགོས་ལ། །སྣང་བ་ལ་བཀག་བྱ་མི་འཚལ་ལོ། །རིག་པས་དཔྱད་པའི་སྟོང་ཉིད་དེ། །བཟང་ཡང་དོན་སྤྱིའི་རྒྱ་རུ་ཆུད། །དམིགས་བཅས་ཀྱི་རྣམ་གཞག་མང་ལགས་ཀྱང༌། །རྣམ་རྟོག་ལ་ཡང་ལ་ཡང་


TNT01_Page_0771
[མ་དཔེ་གཟིགས་ན་འདིར་གནོན།]

སིངས་ཡིན། །མི་ཆང་གིས་བཟི་བའི་ཉམས་བཞིན་ནམ། །གཞོན་ནུ་མ་ཡི་བདེ་བ་དེ། །མྱོང་མ་ཐག་ཏུ་ཡལ་བ་བཞིན། །ཐག་ཆོད་མེད་པའི་བདེ་གསལ་དེ། །ན་བུན་བཞིན་དུ་སྙིང་པོ་མེད། །འགྱུར་མེད་ཀྱི་བརྟན་ས་ཅིག་ཟིན་པ་འཚལ། །འཕྲལ་གོ་ཆོད་ལས་སྣ་ཟིན་ན་ཡང༌། གྲྭ་རོགས་དང་འཁོར་འདབས་ཀྱི་ཆགས་སྡང་གིས། །རང་གཞན་ཀུན་ངན་པར་སྐྱུར་ཉེན་གདའ། །བུ་ལོན་དང་འཚོ་འཚིས་མི་འཚལ་ལ། །འཁོར་འདབས་སྤངས་ལ་རི་ཁྲོད་འགྲིམས། །སངས་རྒྱས་ཀྱི་བསྟན་པ་ཡང་མྱུར་དུ་འཇིག །མི་ཚེ་འདི་ཡང་གློ་བུར་བ། །གློག་དང་ཟིལ་བ་བཞིན་ཤེས་པ་ཞིག་འཚལ། །བྱ་སྙམ་འདི་ཀུན་ལ་ཡོད་མོད་ཀྱང༌། །ཚད་ཚད་ཀྱི་ངང་ལ་མི་ཚེ་ལུས། །ཆོས་ཕྱིར་དཀའ་བ་སྤྱོད་ནུས་ན། །ལྟོ་རྒྱབ་ཀུན་ཞོར་ལ་འོང་བ་ཞིག་གདའ། །རང་གི་དམ་ཚིག་མ་ཉམས་ན། །མཐུན་རྐྱེན་མཁའ་འགྲོས་སྒྲུབ་པ་ཞིག་གདའ། །ལོང་མེད་ཀྱི་བསམ་པས་ཀུན་བསླངས་ནས། །ཡེངས་མེད་ཀྱི་སྒྲུབ་པ་གལ་རེ་ཆེ། །ཚུལ་བཞིན་དུ་སྒྲུབས་ན་གདམས་ངག་ཡིན། ཁ་ལྟར་ཤོར་ན་ཀུ་རེ་མཛོད། །ཅེས་པའང་རྒྱལ་ཁམས་པ་ཏཱ་ར་ནཱ་ཐས་སློབ་མ་འགའ་ཞིག་ལ་གདམས་པ་སྟེ་གཡོ་རུ་གོང་དཀར་དུའོ།། །།

འཁོར་ལོ་རིན་པོ་ཆེའི་གཏམ།


TNT01_Page_0772
[མ་དཔེ་གཟིགས་ན་འདིར་གནོན།]

འཁོར་ལོ་རིན་པོ་ཆེའི་གཏམ་བཞུགས། །ཨོཾ་སྭཱ་སྟི། བགྲང་ཡས་ཤེས་བྱའི་དཀྱིལ་འཁོར་ལས། །ཡེ་ཤེས་བདུད་རྩིའི་འོད་སྤྲོ་བ། །བླ་མེད་སྨྲ་བའི་ཟླ་བ་ནི། །བླ་མ་སངས་རྒྱས་སྲས་བཅས་འདུད། །དྲན་པ་ལེགས་པར་མཉམ་བཞག་ན། །དེ་ལ་ཤེས་བཞིན་ལྡན་པའི་ཤེས་རབ་སྐྱེད། །ཏིང་འཛིན་སྒོ་བརྒྱ་ལྡན་པའི་ཁང་བཟང་མཆོག་བགྲོད་དེ། །རྒྱལ་བའི་ཡོན་ཏན་སེང་གེའི་ཁྲི་ལ་མྱུར་དུ་འཁོད་པར་འགྱུར། །དྲན་ཉམས་ཆོས་ཀུན་ཉམས་པས་དེ་ཕྱིར་དྲན་པ་རྟག་ཏུ་བསྲུང༌། །མི་གཙང་ལུས་དང་མཐའ་དག་འཁོར་བ་སྡུག་བསྔལ་ཏེ། །འདུས་བྱས་མི་རྟག་ཆོས་ཀུན་བདག་མེད་ཅེས། །ཤེས་བཞིན་དྲན་པ་ཉེ་བར་བཞག །འདི་ན་ལམ་དང་ཡོན་ཏན་ཀུན་གྱི་གཞི། །ལུས་ངག་ཡིད་ཀྱི་སྤྱོད་པ་དངོས་ཀུན་རང་བཞིན་བཅས། །ཇི་བཞིན་དོན་ལ་ཡེངས་མེད་དྲན་དང་དེའི། །རིགས་དང་མི་རིགས་རྣམ་དཔྱོད་ཤེས་བཞིན་བསྟེན་པའོ། །དྲན་པ་གསེར་བཟང་པོ་ལྟ་བུའི་གཏམ་མོ། །འཇིག་རྟེན་འདི་ན་ཕུན་ཚོགས་གང་ཡིན་པ། དེ་དག་གཞན་ལ་ཕན་འདོད་སེམས་ལས་བྱུང༌། འཐབ་དང་རྩོད་དང་བཅིང་དང་བརྡེག །འགྲོ་ལ་ཕན་སེམས་ལྡན་ལ་མེད། །བྱང་ཆུབ་སེམས་ཀྱི་ས་བོན་ལས། །དགེ་བའི་སྡོང་པོ་རྒྱས་གྱུར་ཏེ། །བྱང་ཆུབ་ཆེན་པོའི་འབྲས་བུར་སྨིན་གྱུར་པ། །དུས་མཐའི་བར་དུ་སེམས་ཅན་ཀུན་གྱི་ཉེར་འཚོ་བྱེད། །ཕ་རོལ་ཕྱིན་པའི་ཡལ་འདབས་རྣམ་རྒྱས་པ། །


TNT01_Page_0773
[མ་དཔེ་གཟིགས་ན་འདིར་གནོན།]

སྔོན་མེད་བྱང་ཆུབ་སེམས་ཀྱི་དཔག་བསམ་ཤིང་ཆེན་ཏེ། །གང་བློ་ནགས་ཀྱི་བདག་པོ་སྐྲུན་འདི་རྨད། །སྲིད་ཞིའི་ཡ་མཚན་དཔག་མེད་རྣམ་པར་འཕེལ་བར་འགྱུར། །གཞན་ཕན་གྱི་བློ་ལྟེ་བ་ལྟར་བརྟན་པའི་གཏམ་མོ། །གང་ཞིག་དཀོན་མཆོག་གསུམ་པོ་ལ། །གུས་པའི་སེམས་ཀྱིས་མཆོད་བྱ་སྟེ། །དེ་ལས་འབྲས་བུ་བདེ་བ་ནི། །བསམ་ཡས་འདི་དང་ཕྱི་མར་འབྱུང༌། །མངོན་དུ་གྱུར་དང་མ་གྱུར་དེ་བཞིན་གཉིས་ཀ་དང༌། །མཆོད་དང་མཆོད་པར་འཇུག་དང་རང་གཞན་གཉིས་ཀས་མཆོད། །རྙེད་བཀུར་དེ་བཞིན་སྒྲུབ་པའི་མཆོད་དང་རྒྱ་ཆེ་དང༌། །ཉོན་མོངས་ཅན་མིན་ཞེས་ཏེ་མཆོད་པ་རྣམ་པ་བཅུ། །ཡོན་ཏན་བླ་མེད་དེ་བཞིན་ཕན་ཐོགས་བླ་ན་མེད་དང་འགྲོ་བའི་མཆོག་གྱུར་དང༌། །ཤིན་ཏུ་དཀོན་དང་འབའ་ཞིག་མཆོག་དང་ཕུན་ཚོགས་ཀུན་གྱི་གཞིར་གྱུར་ཡིན་ནོ་ཞེས། །གུས་པའི་བསམ་པ་དྲུག་དང་སངས་རྒྱས་ཆོས་དང་དགེ་འདུན་ཕྱག་འོས་ཞེས་བྱ་བ། །མཆོད་པའི་ཡུལ་བཞིས་རབ་ཏུ་ཕྱེ་བས་མཆོད་པ་དེ་ཡང་རྣམ་པ་བརྒྱར་འགྱུར་རོ། །རིན་ཆེན་ལྕགས་ཟངས་བ་གླང་རྟ། །གླང་པོ་བུ་མོ་ཡུལ་འཁོར་དང༌། །འདོད་པའི་ཆུང་མ་རང་གི་ཤ། སྦྱིན་པ་རྣམ་པ་བཅུ་རུ་འདོད། །ཆུང་དང་འབྲིང་དང་ཆེན་པོ་ཚད་མེད་དང༌། །ཡུལ་གྱི་ཁྱད་པར་མཆོག་དམན་བར་པ་གསུམ། །སེམས་ཅན་བྱང་ཆུབ་གསུམ་ལ་འགོད་འདོད་


TNT01_Page_0774
[མ་དཔེ་གཟིགས་ན་འདིར་གནོན།]

པའི། །བསམ་པའི་ཁྱད་པར་གསུམ་སྟེ་སྦྱིན་པ་བརྒྱ། །མི་དགེའི་ལས་ལམ་བཅུ་པོ་ཕྱོགས་གཅིག་སྤོང་དང་གསལ་བར་གཞན་ཡང་འགོག་པ་དེ་བཞིན་ཐམས་ཅད་སྤོང༌། །དུས་ཀྱང་ཐུང་དང་རིང་བ་གཞན་ཡང་ཇི་སྲིད་འཚོ་བའི་བར་དང་བདག་ཉིད་སྤོང་དང་སྤོང་འཇུག་དང༌། །ཡི་རང་བསྔགས་པ་བརྗོད་པས་རྣམ་པར་ཕྱེ་ན་ཉེས་སྤྱོད་སྡོམ་པའི་རང་བཞིན་ཕྱོགས་ཀྱིས་བསྒྱུར་བས་བཅུ། །དེ་བཞིན་ལེགས་བྱས་རྣམ་བཅུ་མངོན་པར་བསྒྲུབ་ལ་ལེགས་པར་ཕྱེ་བས་དགེ་བ་ཡང་ནི་བཅུ་ཕྲག་བཅུ། །ཕ་རོལ་ཕྱིན་པ་རྣམ་བཅུ་པོ། །རེ་རེའང་ཕྱིན་དྲུག་བདག་ཉིད་ཅན། །རང་གི་མི་མཐུན་ཕྱོགས་ཉམས་ཤིང༌། །འཁོར་གསུམ་མི་དམིགས་ཡེ་ཤེས་ལྡན། །ཕར་ཕྱིན་དེ་དག་གིས་ཀྱང་སེམས་ཅན་ཀུན། །སྨིན་དང་བསམ་པ་རྫོགས་པ་བྱེད་པས་ན། །བྱང་ཆུབ་སེམས་དཔས་རྣམ་པར་སྤྱད་བྱ་བ། །སྟོང་པ་ནམ་མཁའ་ཟླ་བའི་གྲངས་སུ་འགྱུར། །དམྱལ་གནས་འབྱུང་པོ་བྱོལ་སོང་མི་དང་སྦྱིན་སྐྱེས་ཡིད་བཟང་དེ་བཞིན་གཟུགས་ཀྱི་ཁམས་ཏེ་འདི་རྣམས་ལ། །ནོར་ལྷ་ཡོན་ཏན་མིག་དང་རིག་བྱེད་རྒྱ་མཚོ་འགྲོ་བ་རི་ཟླ་ཞེས་བྱ་རིམ་བཞིན་གྲགས་སུ་བརྗོད། །དེ་དག་གནས་དང་འགྲོ་བས་རྣམ་ཕྱེ་གཞན་ནི་གཟུགས་མེད་འགྲོ་བ་རྣམ་བཞི་དེ་ལྟར་སྲིད་པ་གསུམ། །བརྒྱ་ཕྲག་འཇིག་རྟེན་དེ་དག་སེམས་ཀྱི་སྣང་བ་ཙམ་ཏེ་མེ་ལོང་དྭངས་པའི་གཟུགས་


TNT01_Page_0775
[མ་དཔེ་གཟིགས་ན་འདིར་གནོན།]

བརྙན་གསལ་བར་མཚུངས། །འདི་ན་སེམས་ཀྱི་གསལ་བ་ཙམ། །སངས་རྒྱས་རྣམས་ཀྱི་སྙིང་པོ་ཉིད། །བག་ཆགས་ཀྱིས་ནི་རྣམ་བརྟགས་པས། །གནས་དོན་ལུས་སུ་སྣང་བ་བྱུང༌། །སེམས་ཉིད་གཅིག་པུ་འཁོར་བ་དག་དང་ལམ། །བདེ་གཤེགས་ཡོན་ཏན་རྣམས་ཀྱི་ས་བོན་ཏེ། །རང་བཞིན་འགྱུར་བ་མེད་ལས་ཐམས་ཅད་སྐྱེས། །གནས་སྐབས་རྣམ་གསུམ་མངོན་པར་གསལ་བར་སྣང༌། །སེམས་ཀྱི་རང་བཞིན་སྟོང་ཉིད་དེ་ཡང་ཕྱི་ནང་སྟོང་སོགས་ཉི་ཤུས་རབ་ཕྱེ་བ། །རེ་རེའང་གང་ཟག་མེད་དང་རང་བཞིན་མེད་ཅིང་ཕྱོགས་རེའི་སྤྲོས་པས་མ་སྤྲོས་དང༌། །སྤྲོས་ཀུན་བྲལ་དང་རང་བཞིན་མི་འགྱུར་རྣམ་ལྔས་ཕྱེ་བས་དོན་དམ་མིང་ནི་བརྒྱ་ཕྲག་གཅིག །བརྗོད་དང་རྟོགས་པའི་ཚུལ་གྱིས་རྣམ་པར་དབྱེ་མོད་དོན་དམ་དབྱིངས་ལ་དབྱེ་བ་མེད། །སེམས་ཀྱི་རང་བཞིན་དུག་གསུམ་དང༌། །ཀུན་ལྡང་བག་ཆགས་མཐོང་སྤངས་དང༌། །སྒོམ་སྤངས་མ་དག་དག་པ་ཡི། །དྲི་མ་རྣམ་པ་དགུ་ལས་གྲོལ། །རིགས་དང་དེ་བཞིན་ཉིད་དང་འབྲས་དབྱེ་བས། །སྙིང་པོ་རྣམ་གསུམ་གློ་བུར་དྲི་མ་དགུས། །ནམ་ཡང་མ་གོས་འདི་ཉིད་སེམས་ཅན་དང༌། །བྱང་སེམས་རྒྱལ་བའི་གནས་སྐབས་གསུམ་དབྱེ་བས། །རྣམ་པར་ཕྱེ་དང་བསམ་མི་ཁྱབ་གནས་བཞི་ཡང་གནས་སྐབས་གསུམ་གྱིས་ཕྱེ། །རང་བཞིན་དང་ནི་


TNT01_Page_0776
[མ་དཔེ་གཟིགས་ན་འདིར་གནོན།]

རྒྱས་པའི་རིགས་དབྱེ་སྙིང་པོ་བསྟན་པའི་དགོས་པ་ལྔ། །དེ་ལྟ་ན་ནི་སྙིང་པོའི་མདོ་ཡང་དོན་གྱི་རབ་དབྱེ་བརྒྱ་ཕྲག་གཅིག །རང་བཞིན་མྱ་ངན་འདས་ཕྱིར་ནན་ཏན་སྒྲུབས་པས་འབྲས་བུ་སྨིན་འགྱུར་ཉིད། །རང་དོན་དོན་དམ་ཆོས་ཀྱི་སྐུ། །གཟུགས་སྐུ་གཞན་དོན་བརྡའ་ཞེས་བྱ། །བྲལ་དང་རྣམ་པར་སྨིན་པ་ཡིན། །ཡོན་ཏན་མི་ཟད་རྒྱ་མཚོ་བཞིན། །རྒྱུ་སྐར་བདག་པོ་འོད་ཀྱི་དྲ་བ་ཅན། །སྔོ་སངས་འདོད་མའི་དཔལ་ལ་མངོན་རོལ་བ། །རབ་དྭངས་པདྨའི་མཚོ་ལ་གཟུགས་བརྙན་གྱི། །རྣམ་བཀྲ་བརྒྱ་ཕྲག་རི་མོ་འགོད་པར་བརྩོན། །ཡེ་ཤེས་ཟླ་བརྙན་འགྲོ་སེམས་གཙང་མའི་མེ་ལོང་དག་པའི་གཞི་ལ་རང་ཤར་གཟུགས་ཀྱི་ཟློས་གར་མཁན། །རྩོལ་བའི་བྱེད་པོ་དྲུངས་ནས་ཕྱུང་ཡང་སྒྱུ་མ་ལྟ་བུའི་སྒྱུ་མའི་སྐྱེས་བུ་འདྲེན་པ་འདི་ཀོ་མཚར། །མཚན་དང་དཔེ་བྱད་རྣམས་ཀྱི་མཛེས་པར་སྤྲས་ཤིང་བྱང་ཆུབ་ཕྱོགས་ཆོས་དེ་བཞིན་མ་འདྲེས་ཆོས། །ཆོ་འཕྲུལ་གསུམ་ལྡན་དབང་དང་སྟོབས་དང་ཤེས་པ་རྣམ་བཅུ་ཞེས་པ་རྒྱལ་བའི་ཡོན་ཏན་བརྒྱ་ཕྲག་གཉིས། །ལམ་དང་འབྲས་བུ་རྩིབས་སྟོང་གིས་ཉེ་བར་མཚན་པ་ལྟ་བུའི་གཏམ་མོ། །གང་ཞིག་ཉིན་རེར་རྒྱལ་བ་རྣམས་ལ་རྡུལ་སྙེད་ཀྱི། །ཞིང་རྣམས་རིན་ཆེན་བདུན་གྱི་བཀང་ནས་ཕུལ་བ་དང༌། །འབུམ་ཕྲག་བསྐལ་པར་ཚུལ་ཁྲིམས་བརྟུལ་ཞུགས་མཆོག་གནས་དང༌། །


TNT01_Page_0777
[མ་དཔེ་གཟིགས་ན་འདིར་གནོན།]

གཞན་ནི་ཏིང་འཛིན་སྟོབས་ཀྱིས་བདེ་བ་མངོན་སྒྲུབ་པ། །དེ་ཡང་མོས་པའི་དགེ་བས་ཟིལ་གྱིས་གནོན་ཞེས་གསུངས། །གང་ཕྱིར་སྦྱིན་པས་ལོངས་སྤྱོད་ཁྲིམས་ཀྱིས་མངོན་མཐོ་དང༌། །ཏིང་འཛིན་ཉོན་མོངས་ཞི་བར་བྱེད་པ་ཙམ་ཡིན་གྱི། །ཤེས་རབ་ཀྱིས་ནི་ཉོན་མོངས་ཤེས་བྱའི་སྒྲིབ་ཀུན་སྤོང༌། །ཀུན་མཁྱེན་འགྲོ་བ་འདྲེན་པར་བྱེད་པའང་ཤེས་རབ་འབྲས། །ཤེས་རབ་ཐོས་བསམ་སྒོམ་པ་ལས་བྱུང་དེ་རྣམས་ཀྱང༌། །མོས་ལས་བྱུང་ཕྱིར་དེ་ཕྱིར་མོས་པ་མཆོག་ཡིན་པས། །ཟབ་མོ་མོས་པའི་དགེ་བ་ཅན་གྱི་སྤྱོད་ཡུལ་ལོ། །ཕན་ཡོན་མུ་ཁྱུད་བཟང་པོ་ལྟ་བུའི་གཏམ་མོ། །དྲན་པ་རིན་ཆེན་གསེར་ལས་གྲུབ། །ལྷག་བསམ་ཕུན་ཚོགས་ལྟེ་བ་བརྟན། །ལམ་དང་འབྲས་བུ་རྩིབས་སྟོང་ཅན། །ཕན་ཡོན་མུ་ཁྱུད་རབ་མཉམ་པ། །སྔོན་མེད་འཁོར་ལོ་རིན་ཆེན་འདི། །ས་སྐྱོང་མཆོག་ལ་སྐྱེས་སུ་འབུལ། །བདུད་བཞིའི་གཡུལ་ལས་རྣམ་རྒྱལ་ནས། །ཕྱོགས་ཀུན་དགེ་ལེགས་སྤེལ་བར་ཤོག །དེ་སྐད་ཏཱ་ར་ནཱ་ཐར་མངོན་བརྗོད་པ། །རིག་དང་གྲོལ་བར་སྨྲ་ལ་མཐུ་ཐོབ་པས། །ཉེ་བར་སྦྱར་བ་འདིས་ཀྱང་དམ་པའི་ཆོས། །ཡུན་རིང་གནས་ཤིང་ཕྱོགས་བཅུར་དར་བར་ཤོག། །།ལོ་གསར་དུ་ཚེས་པ་ལ། མངྒལཾ། །

ས་སྐྱོང་ལ་ཕུལ་བ།


TNT01_Page_0778
[མ་དཔེ་གཟིགས་ན་འདིར་གནོན།]

ཨོཾ་སྭ་སྟི། རྒྱལ་བ་སྤྱན་ལྡན་ལ་ཕྱག་འཚལ། །ཡང་དག་ལམ་ལ་འབད་བྱས་ན། །མྱང་འདས་ཐར་པ་ག་ལ་དཀའ། །རྣམ་དག་ལྟ་བ་འབྲས་བཅས་ལྡན། །རིམ་བཞིན་ཇི་བཞིན་འདི་ཉིད་ནི། །ལྷུན་གྲུབ་ཕུལ་བྱུང་རྫུ་འཕྲུལ་འབྱུང༌། །ཡེ་ཤེས་གཏེར་ཆེན་ཆེས་མཆེད་དེ། །མཆོག་ཁྱོད་འགྲོ་དོན་གཙོ་བོའི་གཙོ། །དེ་ལྟར་རྒྱལ་བ་ཆོས་བཅས་ལ། །ཡང་དག་བཏུད་ནས་ཡང་དག་ལམ། །ལེགས་པར་བཤད་ཀྱི་ལེགས་པར་ཉོན། །དམ་པའི་གཏམ་ནི་རྙེད་པར་དཀའ། །བློ་ལྡན་རྣམས་ལ་བདོག་པ་ནོར་མིན་ཏེ། །གང་ཞིག་ལེགས་པར་སྤྱོད་པ་དེ་ནོར་མཆོག །འབྱོར་བཅས་རྒྱལ་སྲིད་ཡང་ཡང་ཐོབ་འགྱུར་གྱི། །ལུགས་བཟང་རིགས་པར་འདོམས་པ་རྒྱ་ལམ་ན། །འདི་ན་དད་པ་ཐོག་མར་ནོར་གྱི་མཆོག །རྗེས་སུ་དྲན་པ་རྣམ་དྲུག་ཕུན་ཚོགས་ལྡན། །སངས་རྒྱས་བཅོམ་ལྡན་དེ་བཞིན་ཉིད་གཟིགས་པ། །བདུད་བཞི་བཅོམ་ནས་ཆོས་ཀུན་མངོན་པར་བརྙེས། །མངོན་ཤེས་རྫུ་འཕྲུལ་ཞབས་ལྡན་སྡུག་བསྔལ་སྤང༌། །འཁོར་བ་རྒྱུ་བཅས་ཐུགས་སུ་ཆུད་གྱུར་པ། །གང་གང་ཉོན་མོངས་སྤྱོད་པ་དེ་དེ་འདུལ། ལེ་ལོ་ཅན་བསྐུལ་ལོག་ཞུགས་རྣལ་མར་འགོད། །གདུལ་དཀའ་ཚར་གཅོད་མི་སྲུན་བཏང་སྙོམས་མཛད། །ཉན་ཐོས་རང་རྒྱལ་རྣམས་ཀྱི་བླ་མ་སྟེ། །ལྷ་དང་བཅས་པའི་འཇིག་རྟེན་ཀུན་གྱི་མགོན། །ཐུགས་རྗེ་ཆེན་པོའི་


TNT01_Page_0779
[མ་དཔེ་གཟིགས་ན་འདིར་གནོན།]

ཡོན་ཏན་དྲན་པར་འཚལ། །ཉིན་གསུམ་དེ་བཞིན་མཚན་མོ་ལན་གསུམ་དུ། །སངས་རྒྱས་རྗེས་སུ་དྲན་དེ་གོ་ཏམ་སྲས། །ལེགས་པར་རྣལ་ལ་ལེགས་པར་སད་འགྱུར་ཞེས། །འདྲེན་པ་ཟས་གཙང་སྲས་ཀྱིས་བཀའ་སྩལ་ཏོ། །ཆགས་སྡང་ལ་སོགས་དྲི་མ་ཐག་སྲིངས་པས། །ཐོས་ལ་སོགས་པ་ཐོག་མཐའ་བར་དུ་དགེ །འཕགས་ལམ་ཡན་ལག་རྣམ་པ་བརྒྱད་གང་དག །བྱང་ཆུབ་གསུམ་ལ་ཡང་དག་བསྟོད་པར་བྱེད། །འགོག་པ་སོ་སོར་རང་རིག་སྤྱོད་ཡུལ་ཅན། །ལུང་རྣམས་མ་ནོར་གོ་སླ་གང་ཟག་གི །སྐྱོན་དང་མ་འདྲེས་ལམ་སྟོན་དོན་དང་ཚིག །བསྔགས་པར་འོས་པ་འདི་ནི་དམ་པའི་ཆོས། །དེ་ཕྱིར་གུས་བཅས་ཆོས་ལ་སླབ་འཚལ་གྱི། །གཞན་གྱི་ཚིག་སྣ་གཅོད་དང་གྲགས་པ་ལ། །གཙོར་འཛིན་ལེགས་བཤད་སྨྲ་ཡང་དེ་དག་ནི། །འཇིག་རྟེན་རྒྱང་ཕན་བཞིན་དུ་རྣམ་པར་འཁྱམས། །དགེ་འདུན་བསླབ་གསུམ་དག་ལ་མཐུན་པར་ཞུགས། །བསླབ་གསུམ་ལྡན་ཕྱིར་ཕྱག་མཆོད་སྦྱིན་པའི་འོས། །འཕགས་མིན་ཉུང་ངུར་ཐོས་ཀྱང་ཚུལ་ལྡན་ལ། །སྲིད་གསུམ་ཀུན་གྱིས་ཕྱག་དང་མཆོད་པར་འོས། །སེར་སྣ་མེད་དང་རྒྱུན་མི་ཆད་དང་གཞན། །ཡོན་གནས་གདམ་པ་མེད་པའི་སྦྱིན་པ་ལས། །ལོངས་སྤྱོད་ཕུན་ཚོགས་གང་ཡང་ཐོབ་འགྱུར་བས། །གཏོང་


TNT01_Page_0780
[མ་དཔེ་གཟིགས་ན་འདིར་གནོན།]

བའི་ཡོན་ཏན་དྲན་པས་ལྷག་པར་སྤྱོད། །ཚུལ་ཁྲིམས་འཆལ་བའི་དྲི་སྤངས་ཚུལ་འཆལ་གྱི། །རྒྱུ་བཞི་ལས་ནི་ཤིན་ཏུ་ཐག་སྲིངས་དང༌། །མི་སྡུག་ལ་སོགས་གཉེན་པོ་ལ་བརྟེན་དང༌། །མྱང་འདས་བསམ་པ་ལ་བརྟེན་ཁྲིམས་ཀྱི་མཆོག །རང་གི་རིགས་ཀྱི་འགྲོ་བ་ལས་ལྷག་པ། །འདོད་པའི་ཁམས་དང་གཟུགས་ན་སྤྱོད་རྣམས་ཀྱི། །ལྷ་རྣམས་དག་གི་ལུས་དང་ལོངས་སྤྱོད་དང༌། །བསམ་གཏན་ལ་སོགས་བདེ་བའི་ཡོན་ཏན་བསམ། །དེ་ཡི་རྒྱུ་ནི་དགེ་བ་ཁོ་ན་སྟེ། །དགེ་བའི་འབྲས་བུ་ཡང་དག་བསམ་པར་འཚལ། །ཐོག་མར་དང་བ་སྐྱེད་དེ་འདུན་པ་དང༌། །དེ་ནས་ཡིད་ཆེས་དད་པ་སྐྱེ་བར་འགྱུར། །དད་པ་ཡོན་ཏན་ཀུན་གྱི་ས་གཞི་སྟེ། །འཕགས་པའི་ཆོས་ཀུན་སྐྱེད་བྱེད་མ་ཡི་མཆོག །འབྲས་བུ་ལོ་ཏོག་འབྱིན་བྱེད་བདུད་རྩིའི་ཆར། །ཉེས་པའི་ལས་ལ་ཆུ་ལོན་དམ་པ་ཡིན། །ཚུལ་ཁྲིམས་རྣམ་པ་གསུམ་ལ་བསླབ་པར་བྱ། །མི་དགེའི་ལམ་བཅུ་མི་བགྱིད་བགྱིད་མི་རྩལ། །ཡི་རང་སྤོང་དང་མི་བསྔགས་མི་སྨོན་ཞིང༌། །དེ་བཞིན་དགེ་བ་བགྱིད་པ་ལ་ཡང་སྦྱར། །ཐམས་ཅད་འགྲོ་ལ་ཕན་པའི་དོན་དུ་སྤྱོད། །མཆོད་འོས་བསླུ་དང་གནས་མིན་འགྱོད་སྐྱེད་དང༌། །རྒྱལ་སྲས་ལ་སྐུར་སེམས་ཅན་བསླུ་བ་སྤངས། །སྲུང་དང་ནོངས་པ་འཆགས་ལ་འབད་པར་འཚལ། །མཐོ་རིས་


TNT01_Page_0781
[མ་དཔེ་གཟིགས་ན་འདིར་གནོན།]

བདུད་རྩིའི་འབྱུང་གནས་ཚུལ་ཁྲིམས་ཏེ། །ཐར་པའི་གྲོང་དུ་འཇུག་ལ་ཐེམ་སྐས་མཆོག །ངན་འགྲོའི་སྡུག་བསྔལ་རྒྱུན་གཅོད་འཁོར་ལོ་སྟེ། །རློམ་སེམས་མེད་པའི་ཚུལ་ཁྲིམས་བདེ་བའི་ལམ། །ཐར་འདོད་རྣམས་ཀྱི་རྣ་བར་མི་རྩུབ་ཅིང༌། །ལེ་ལོ་ཅན་ལ་སྒྱིད་ལུག་མི་སྐྱེད་པ། །འཕགས་པས་རབ་བསྔགས་བསྟན་བཅོས་ལས་བྱུང་གཏམ། །རྒྱལ་བའི་གསུང་བཞིན་མཉན་པར་འོས་པ་ཉིད། །ཐོས་པ་གཏི་མུག་རབ་རིབ་སེལ་བའི་སྨན། །དམ་ཆོས་ཆུ་རྒྱུན་ཆད་པ་མེད་པར་འབབ། །འགྲོ་ལ་སྙིང་བརྩེ་ལྡན་པའི་ལྕགས་ཀྱུ་སྟེ། །ཐོས་ནས་སྒྲུབ་པར་བྱེད་པའི་དོན་ཆེན་འགྱུར། །ཚུལ་ཁྲིམས་ལྡན་དང་འཕགས་དང་དྲིན་ཆེ་བ། །སྡུག་བསྔལ་ཅན་དང་བཀུར་འོས་མཆོད་པར་མཛོད། །བཟང་དང་གྱ་ནོམ་མཁོ་དགུ་རན་པ་དང༌། དུས་ལས་མ་ཡོལ་སྡིག་དང་མ་འདྲེས་སྦྱིན། །མཆོད་འོས་མཆོད་ཕྱིར་སྲོག་དང་ནོར་འཕྲོག་པ། །ད་ལྟའི་རྒྱལ་སྲིད་ངན་པའི་རིང་ལུགས་སྤང༌། །སྦྱིན་ལ་དགའ་བ་དང་ཚུལ་རབ་རྩུབ་ཀྱང༌། །འཕགས་དང་མྱུར་དུ་ཕྲད་ནས་ཐར་པར་འཇུག །བཟོད་པ་ཐོབ་པས་ལུས་ཀྱང་གཏོང་བར་བྱེད། སྦྱིན་པས་རང་གི་བསོད་ནམས་འཕེལ་བ་དང༌། འགྲོ་བའི་རེ་སྐོང་ཡིད་བཞིན་ནོར་བུ་ཡིན། །འདི་དང་གཞན་དུ་


TNT01_Page_0782
[མ་དཔེ་གཟིགས་ན་འདིར་གནོན།]

ལོངས་སྤྱོད་མཆོག་གི་རྒྱུ། །ངོ་ཚ་ཤེས་པའི་རྒྱན་ནི་མཆོག་ཏུ་མཛེས། །ལྷ་དང་ཕ་མ་རྒན་རབས་འཕགས་རྣམས་ཀྱིས། །བདག་ལ་ཁྲེལ་བར་འགྱུར་ཞེས་མི་དགེ་ལས། །ཤིན་ཏུ་འཛེམ་པའི་མཁྱེན་པ་སྐྱེད་པར་འཚལ། ཁྲེལ་ཡོད་གོས་ནི་ལྷ་རྫས་ཀུན་པས་མཆོག །གཞན་དག་ཁྱད་དུ་མི་གསད་བག་ལྡན་པས། །འོས་པ་མ་ཡིན་བྱ་བ་ངན་བཏང་ནས། །དམ་པས་བསྔགས་པའི་སྤྱོད་ལ་དགེས་པར་མཛོད། །ཐོས་པས་ཚིག་བཟུང་བསམ་པའི་དོན་ངེས་ནས། །སྒོམ་པས་དངོས་སུ་ཤེས་རབ་བསྐྱེད་པར་བྱ། །ཏིང་འཛིན་གོམས་ན་ཤེས་རབ་འཕེལ་འགྱུར་རོ། །ཇི་ལྟར་རླུང་ནང་མར་མེ་གསལ་མི་འགྱུར། །ཏིང་འཛིན་མེད་ན་ཤེས་རབ་རྣམ་པར་གཡོ། །ཤེས་རབ་མཆོག་གིས་རྣམ་པར་དཔྱོད་པ་ན། །ཏིང་འཛིན་གྱིས་གཡོགས་ཡུལ་ནི་གསལ་བར་སྣང༌། །ཇི་ལྟ་ཇི་སྙེད་གནས་ལ་རིགས་པར་དཔྱོད། །ཆོས་རྣམས་ངོ་བོས་ཅུང་ཟད་མ་གྲུབ་ཀྱང༌། །འཁོར་འདས་རྒྱུ་འབྲས་འབྲེལ་བ་མི་བསླུ་བ། །ཟུང་འཇུག་འདི་ལ་མཉམ་པར་གཞག་གྱུར་ན། །སྲིད་པའི་འཆིང་ལས་ཡོངས་སུ་གྲོལ་བར་འགྱུར། །རྗེས་དྲན་མཆེ་བ་དྲུག་ལྡན་ཞིང༌། །འཕགས་ནོར་ཡན་ལག་བདུན་གནས་པ། །ཆོས་ཀུན་ཐེག་པ་ཆེར་འཇུག་སྟེ། །གཏམ་འདི་གླང་པོ་རིན་པོ་ཆེ། །རིག་པ་ས་སྐྱོང་ཁྱོད་ལ་འབུལ། །བླ་མེད་རྒྱལ་


TNT01_Page_0783
[མ་དཔེ་གཟིགས་ན་འདིར་གནོན།]

སྲིད་མཆོག་སྤྱོད་པའི། །འཁོར་ལོ་སྒྱུར་བའི་གཙོ་བོ་རུ། །རྒྱ་ཁྱོད་དགེ་ལེགས་བརྟན་གྱུར་ཅིག །དེ་སྐད་སྨྲ་བ་དགེ་སློང་ཚུལ། །ཏཱ་ར་ནཱ་ཐ་ཞེས་བྱ་བས། །མཆོག་ཏུ་གཤིན་པའི་སེམས་ཀྱིས་ཏེ། །སླར་ཡང་ཡང་ཡང་གསོལ་བར་བགྱི།། །།དགེའོ། །

རང་ལ་བསྐུལ་པ།


TNT01_Page_0784
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། སྐྱབས་གནས་རིན་ཆེན་གསུམ་ལ་གུས་བཏུད་ནས། །རང་གི་སེམས་ལ་ཤར་བའི་ཚིག་འདི་སྨྲ། །དབེན་པའི་རི་བོར་མཉམ་བཞག་བྱེད་དོ་སྐད། །གཞན་གྱི་མིག་ངོར་ཕོ་ཚུགས་བཟང་ན་ཡང༌། །བརྟགས་ན་སེམས་དང་ཆོས་སུ་མ་འདྲེས་པ། །འདི་འདྲ་དམ་ཆོས་གཤའ་མ་ག་ལ་ཡིན། །ད་ནི་སྙིང་ནས་སྒྲུབ་པ་བྱེད་རེ་རན། །ཚེ་འདིའི་མདུན་མ་སྐྱུངས་དང་སྙིང་མེད་པོ། །ཐོས་བསམ་ལྟ་རྟོག་ཆོས་བཤད་རེམ་ན་ཡང༌། །རྐྱེན་ངན་བག་རེའི་སྟེང་དུ་དམ་ཆོས་འདོར། །མཁས་པར་གྲགས་ཀྱང་མི་ཚེ་སྟོང་ཟད་མཁན། །འདི་འདྲ་བཤེས་གཉེན་དམ་པ་ག་ལ་ཡིན། །ད་ནི་རང་གི་སེམས་རྒྱུད་འདུལ་རེ་རན། །མཛུབ་མོ་ནང་དུ་ཁུག་དང་སྙིང་མེད་པོ། །འཁོར་བའི་གནས་ཚུལ་འཕྲལ་འཕྲལ་མཐོང་ན་ཡང༌། ཡིད་ཆེས་ཅུང་ཟད་མེད་པའི་ཚོད་མེད་པོ། །ཕ་རོལ་འགྲོ་ཚེ་གདེང་དྲོད་མི་གདའ་ནའང༌། །བསམ་མནོ་མི་གཏོང་སྨྱོན་པ་རྒྱ་ཡན་མཁན། །ད་ནི་ཕྱི་མའི་གྲབས་ཤོམས་བྱེད་རེ་རན། །


TNT01_Page_0784
[མ་དཔེ་གཟིགས་ན་འདིར་གནོན།]

བློ་ཁ་ཆོས་ལ་བསྒྱུར་དང་སྙིང་མེད་པོ། །མཁོས་ཀ་འདི་ལས་མེད་ཀྱང་ཆགས་སྡང་ཅན། །ཡོན་ཏན་འདི་ལ་ང་རྒྱལ་རི་རབ་ཙམ། །མགུ་མཁན་སུ་ཡང་མེད་ཀྱང་མཐུན་འཇུག་མཁན། །བྱས་པ་ཆུང་ལ་རེ་བ་ཆེ་བ་ཁྱོད། །ད་ནི་འཇིག་རྟེན་ཆོས་བརྒྱད་སྤོང་རེ་རན། །གང་ཤར་རོ་སྙོམས་ཀྱིས་དང་སྙིང་མེད་པོ། །ཆོས་ཕྱིར་གཉིད་ཐུན་རེ་ཡང་གཅོག་མི་ནུས། །ད་ལོ་ད་བཟོད་བྱེད་སྙམ་དང་རིང་པོ། །མྱོང་རྟགས་འཕྲལ་ལ་དགོས་པའི་སྟོང་ཡུལ་ཅན། །ཟས་ནོར་སྙན་གྲགས་འདོད་པའི་བློ་མ་ཁུགས། །ད་ནི་མདུན་མ་ཆིག་འགྲིལ་བྱེད་རེ་རན། །གཏིང་ནས་རེ་དོགས་སྐྱུང་དང་སྙིང་མེད་པོ། །གཞོན་ནུའི་དུས་ནས་ལང་ཚོ་ཡོལ་ཞིང་ཉམས། །འཁོར་འདབས་ཀུན་གྱིས་ཕན་ལན་གནོད་པས་འཇལ། །ད་དུང་སུན་པ་མེད་པའི་བློ་རྒྱ་ཅན། །མི་ཤེས་བཞིན་དུ་ཚེ་འདིའི་མདུན་གྲབས་བྱེད། །ད་ནི་སྙིང་ནས་བྱ་བཏང་བྱེད་རེ་རན། །ཕྱོགས་མེད་རང་བློ་སྦྱོངས་དང་སྙིང་མེད་པོ། །བླ་མའི་མིང་ཅན་རྣམས་ཀྱང་ཆོས་མི་བྱེད། །སློབ་མ་རྣམས་ཀྱང་དམ་ཚིག་སྲུང་མཁན་མེད། །སྐྱེ་བོ་ཀུན་ཀྱང་ངོ་ཚ་ཁྲེལ་གཞུང་མེད། །སངས་རྒྱས་བསྟན་པ་ཉམས་པའི་དུས་ངན་འདིར། །གཞན་ལ་ཕན་ཐབས་ཇི་ཙམ་བྱས་ན་ཡང༌། །ཕལ་ཆེར་མི་ཕན་རང་ལ་གནོད་པར་འདུག །རང་ཉིད་ཆོས་ལ་བརྟན་པ་ཐོབ་ཕན་ཆད། །གཞན་དོན་རྒྱུན་མི་ཆད་པ་འབྱུང་བས་ན། །


TNT01_Page_0785
[མ་དཔེ་གཟིགས་ན་འདིར་གནོན།]

རེ་ཞིག་ཚེ་འདི་ཁོང་ལ་གཅགས་པ་ཡི། །གཞན་དོན་ལྟར་སྣང་བོར་ལ་རང་དོན་མཆོག །དམ་པའི་ཆོས་ལ་སྒྲིལ་བའི་དུས་སུ་གདའ། །དེ་ལྟར་ལགས་པས་ད་དུང་བསམ་མནོ་ཐོང༌། །ཞེས་རང་ལ་བསྐུལ་པ་འདི་ཡང་ཏཱ་ར་ནཱ་ཐས་བསམ་སྡིངས་སུ་རང་ལོ་ཉེར་གསུམ་པ་ལའོ།། །།མངྒལཾ།། །།

རང་གི་རྟོགས་པའི་གླུ་དབྱངས།


TNT01_Page_0786
[མ་དཔེ་གཟིགས་ན་འདིར་གནོན།]

རང་གི་རྟོགས་པའི་གླུ་དབྱངས་སོ། །ཨོཾ་སྭཱ་སྟི། བླ་མ་རྣམས་ལ་ཕྱག་འཚལ་ལོ། །སྐྱབས་འགྲན་ཟླ་མེད་པའི་བླ་མ་རྗེ། །མཚན་ཐོས་པ་ཙམ་གྱིས་དོན་མཆོག་ལྡན། །ཡིད་གུས་པས་སྙིང་ནས་གསོལ་བ་འདེབས། །བདག་མོས་པའི་བུ་ལ་བྱིན་གྱིས་རློབས། །ཆོས་ཀྱི་རྩ་བ་རྣམ་པ་གསུམ། །མཚན་ལྡན་བླ་མར་མོས་གུས་དང༌། །སྙིང་རྗེ་བྱང་ཆུབ་སེམས་སྒོམ་དང༌། །དམིགས་མེད་རང་བཞིན་སྒོམ་པའོ། །དལ་འབྱོར་རྙེད་དཀའ་བསམ་པ་དང༌། །མི་རྟག་འཆི་བར་བསམ་པར་བྱ། །ཚེ་འདི་དོན་གཉེར་ཟློག་པར་འགྱུར། །སྐྱེས་བུ་ཆུང་ངུའི་ཉམས་ལེན་ཡིན། །ལས་འབྲས་སླུ་མེད་ངེས་བྱས་ནས། །འཁོར་བའི་སྡུག་བསྔལ་བསམ་པར་བྱ། །ཐར་པ་དོན་གཉེར་སྐྱེ་བར་འགྱུར། །སྐྱེས་བུ་འབྲིང་གི་ཉམས་ལེན་ཡིན། །བྱང་ཆུབ་སེམས་གཉིས་བསྒོམ་པར་བྱ། །ཐེག་པ་དམན་དང་མཚན་འཛིན་བཟློག །སྐྱེས་བུ་ཆེན་པོའི་ཉམས་ལེན་ཡིན། །སྣང་བ་སྣང་སྟོང་ལྷ་སྐུ་དང༌། །སེམས་ཉིད་བདེ་ཆེན་འོད་གསལ་སྒོམ། འདི་ནི་སྔགས་ཀྱི་ཉམས་ལེན་ཡིན། །སྙིགས་དུས་


TNT01_Page_0786
[མ་དཔེ་གཟིགས་ན་འདིར་གནོན།]

ངན་པ་འདི་ལྟ་བུར། །བཤེས་གཉེན་དམ་པ་ཤིན་ཏུ་དཀོན། །ཆོས་པར་རྫུས་ནས་འཁོར་གཡོག་དང༌། །ནོར་དང་ལོངས་སྤྱོད་བསྡུད་པ་མཐོང༌། །བསྡུས་ནས་རང་ཕྱོགས་འཛིན་པ་དང༌། །གཞན་ཕྱོགས་སྨོད་པའི་རྒྱུད་ངན་པོ། །གྲགས་འདོད་བྱ་བཏང་བྱེད་པ་དང༌། །སྤྱོད་པ་གང་བདེའི་གསང་སྔགས་པ། །བཟང་འཛིན་སྨྲ་བ་གཙོར་བྱེད་དང༌། །ལོ་འདོད་ལྷ་ཁང་བཞེང་པ་དང༌། །མཁས་འདོད་འཆད་ཉན་བྱེད་པ་དང༌། །མཛེས་ཆོས་ཙམ་གྱི་བཙུན་ཚུགས་སོགས། །ཆོས་བྱེད་རྣམ་དག་ཡིན་རེ་ཀན། །རང་བདེའི་དབང་ཐང་སྒྲུབ་པའི་ཕྱིར། །དུས་འཁྲུག་གཏུམ་པའི་བཟང་རྫུས་མཁན། །ཆོས་ནི་ཁ་སྐད་ཙམ་ཡང་མེད། །ཚེ་འདིའི་མདུན་གྲོས་འབའ་ཞིག་སྐྱོང༌། །རང་ལ་བརྟེན་པའི་འཁོར་ཀུན་ཡང༌། །ཚེ་འདིའི་མངའ་ཐང་ཙམ་ལ་སྦྱོར། །ས་གོས་བཟང་པོའི་དབུས་ཤིག་ན། །དཔུང་དགུང་དང་བུ་རྟའི་ལང་ལོང་ཅན། །འཆི་དུས་རང་སེམས་འགྱོད་ན་ཡང༌། །ད་དུང་གཞན་གྱི་མགོ་སྐོར་ལ། །རྫུན་གྱི་རྦད་ཁམ་ཆེན་པོ་གཏོང༌། །དེ་འདྲའི་བླ་མ་སྤང་བར་འཚལ། །དང་པོར་བླ་མ་བསྟེན་པའི་དུས། །ཅི་བྱུང་གིས་ཆོག་ཤེས་མི་བྱེད་པར། །ཆོས་བཞིན་སྟོན་པ་བླ་མར་བསྟེན། །དུས་ལན་གཅིག་བླ་མར་བསྟེན་གྲུབ་ནས། །མཛད་སྤྱོད་སྟོན་ལུགས་ཅི་འདྲ་ཡང༌། །སངས་རྒྱས་དངོས་སུ་


TNT01_Page_0787
[མ་དཔེ་གཟིགས་ན་འདིར་གནོན།]

ཐག་གཅོད་འཚལ། །རང་དབང་བསྐུར་ཐོབ་གདམས་ངག་ཞུས། །རྒྱུད་སྡེ་ཟབ་མོ་ཞུས་པ་ཡི། །བླ་མ་ལ་མོས་གུས་གསོལ་བ་ཐོབ། །མཆོག་གི་དངོས་གྲུབ་དེ་ལ་འབྱུང༌། ཁོང་བླ་མ་མང་ཡང་གཅིག་ཏུ་སྒོམས། །དེ་སངས་རྒྱས་སེམས་ཅན་གང་ལྟར་རུང༌། །མཛད་སྤྱོད་དང་མཁྱེན་པ་ཅི་འདྲ་ཡང༌། །ཡིད་སྙེམས་འཁྲིག་མེད་པས་གསོལ་བ་ཐོབ། །ཡང་རྡོ་རྗེ་འཆང་ལ་ཡིད་སྨོན་དང༌། །བརྒྱུད་པའི་ཆེ་བ་བརྗོད་བརྗོད་ནས། ཁོང་རྩ་བའི་བླ་མ་རྡོ་རྗེ་འཆང༌། །མི་རུ་བཟུང་ན་གནད་ནས་འཆུག །མཐོ་གཏོང་དམའ་གཏོང་ཁྱེད་རང་ཤེས། །ཡིད་ཐེ་ཚོམ་འཁུ་འཁྲིག་མིང་ཡང་མེད། །སེམས་གཏད་མེད་མོས་གུས་ཝལ་ལེ་བས། །རང་ཤར་རང་དེར་ཆམ་མེ་ཞོག །འགྲོ་དྲུག་སེམས་ཅན་ཐམས་ཅད་ཀུན། །དྲིན་ཅན་གྱིས་ཕ་མར་མ་གྱུར་མེད། །རང་ཉིད་བདེ་སྐྱིད་འདོད་འདོད་ནས། །ཕ་མ་སྐྱུར་བའི་མི་ངན་པོ། །སྤྱོད་པ་དུལ་ཞིང་སེམས་ཞི་ཡང༌། །མི་ཕལ་པ་བས་ཀྱང་ཁྲེལ་བོར་བས། །སེམས་ཅན་བདེ་འདོད་ཀྱི་བྱམས་པ་དང༌། །སྡུག་བསྔལ་བྲལ་འདོད་ཀྱི་སྙིང་རྗེ་སྒོམས། །དེ་སེམས་པ་ཙམ་ལ་མ་བཞག་པར། །ལག་ཏུ་ལོངས་པ་གལ་རེ་ཆེ། །བྱང་ཆུབ་མཆོག་ལ་འགོད་འདོད་པས། །དོན་སངས་རྒྱས་ཟེར་བའི་སྒྲ་བཽ་ཆེ། །རང་བཞིན་མེད་པའི་གནས་ལུགས་ལ། །ཅི་ཡང་འཆར་བ་


TNT01_Page_0788
[མ་དཔེ་གཟིགས་ན་འདིར་གནོན།]

སྙིང་རྗེའི་ངང༌། །དེ་སྒྲུབ་རྒྱུ་མེད་ཀྱང་སྒྲུབ་པར་འཚལ། །ཡོངས་གང་སྣང་དམིགས་པ་མེད་པའི་ངང༌། །དག་སྣང་ཕྱོགས་མེད་རང་ཤར་གཅིག །མི་བདག་ལ་དཔལ་ལྡན་བླ་མས་བསྟན། །དེ་ཉམས་སུ་མྱོང་བས་སྐྱིད་གཅིག་ཤར། །བུ་ཁྱོད་ཀྱང་འདི་ལ་བསླབ་པར་མཛོད། །དྲན་པ་ཉག་གཅིག་གི་རྣལ་འབྱོར་ལ། །སྐྱེས་གྲོལ་གྱི་འཆར་སྒོ་མ་གཏོགས་པ། །ཡུལ་དང་ཡུལ་ཅན་གྱི་རྗེས་ཀྱང་ཞིག །རྣམ་རྟོག་བཅོས་མའི་གྲོང་ཁྱེར་སྟོངས། །རྟོག་དཔྱོད་ཀུན་ས་མཚམས་དེ་རུ་ཟད། །གང་ཤར་མ་བཅོས་སྒོམ་དུ་ཐལ། །ཇི་ལྟར་བཅོས་ཀྱང་ལྷན་ནེར་གདའ། །འགྱུ་བ་འགྱུ་སྟོང་ངང་དུ་ཐིམ། །མཉམ་བཞག་དང་རྗེས་ཐོབ་ཀྱི་འདུན་པ་ཡལ། །གནས་རྒྱུ་མེད་པའི་རང་གནས་གཅིག །ཐ་མལ་གྱི་རྣམ་རྟོག་སྐྱེ་ཐག་ཆད། །འཆར་སྒོ་ལ་མི་འཆར་བྱ་བ་མེད། །གུ་ཡངས་དང་རྒྱ་འབྱམས་ཀྱི་རྣལ་འབྱོར་ཟེར། །རྩ་བྲལ་ཐག་ཆོད་ཀྱི་སྒོམ་འདི་ལ། །སྤྲོས་བཅས་ཐམས་ཅད་སྤྲོས་མེད་ཀྱི་ངང༌། །མཐུན་རྐྱེན་དང་འགལ་རྐྱེན་དབྱེར་མེད་དུ་སོང༌། །ཉོན་མོངས་དང་ཡེ་ཤེས་སྤང་བླང་བྲལ། །དོན་འདི་ལ་གཏད་སོ་ཐུབ་པར་འཚལ། །རེས་འགའ་རིག་པ་རྟེན་མེད་དུ་ཞོག །རེས་འགའ་གང་སྣང་ལ་ཆེར་རེ་ལྟོས། །སྐབས་རེ་ལྟ་སྟངས་ནམ་མཁར་གཅུན། །རེས་འགའ་སྒྲིམས་ལ་རེས་འགའ་གློད། །རེས་འགའ་


TNT01_Page_0789
[མ་དཔེ་གཟིགས་ན་འདིར་གནོན།]

དམིགས་པ་རྟེན་བཅས་སྒོམ། །རེས་འགའ་མ་བཅོས་སོ་མར་བཞག །རེས་འགའ་རང་སེམས་ཡང་ཡང་ཚོལ། །ནམ་ཞིག་རྩ་བྲལ་མངོན་དུ་འགྱུར། །རྐྱེན་མོས་གུས་ཁོ་ན་གལ་རེ་ཆེ། །ཉམས་ཉི་མ་བཞིན་དུ་འཆར་ནུབ་བྱེད། །དོན་འགྱུར་མེད་རྟོགས་པ་ནམ་མཁའ་འདྲ། །གོ་བ་ན་བུན་བཞིན་དུ་དེངས། །དེ་ཡན་ཆད་ཕྱག་རྒྱ་ཆེན་པོའི་གླུ། །དེ་ཡི་བོགས་འདོན་གལ་རེ་ཆེ། །གཏུམ་མོའི་རྣལ་འབྱོར་བདེ་བའི་ལམ། །བདེན་མེད་སྒྱུ་ལུས་ལམ་གྱི་མཆོག །ཉིན་མོའི་རྣལ་འབྱོར་ངོ་མཚར་ཆེ། །སྣང་གྲགས་ལྷ་སྐུའི་དག་སྣང་ལ། །ཞུ་བདེ་གཏུམ་མོའི་འབར་འཛག་གིས། །དབུ་མར་ཐིམ་པའི་བདེ་སྟོང་ལམ། །ལྷ་སྐུ་གཉིས་སྣང་སྤྲོས་དང་བྲལ། །བདེན་མེད་སྒྱུ་མའི་འདུན་པ་སྒོམ། །སྒྱུ་མར་འཛིན་པ་དབྱིངས་སུ་ཆད། །ལམ་འདི་སྒོམས་དང་རྣལ་འབྱོར་པ། །བུ་འདི་ལ་འབད་དང་སྙིང་གཏམ་ཡིན། །མཚན་མོ་གཉིད་ལོག་ཆོས་ཀྱི་སྐུ། །རླུང་སེམས་དྷཱུ་ཏིར་བཅིངས་པ་ན། །གཉིད་ཀྱི་ཐིམ་རིམ་འོད་གསལ་གྱི་ངང༌། །བདེ་གསལ་སྟོང་པ་འགྱུར་མེད་སྒོམ། །རྨི་ལམ་འཁྲུལ་པའི་བག་ཆགས་འདི། །འདུན་པས་སྦྱངས་ནས་ལྷ་སྐུར་བསྒྱུར། །ཕྱོགས་མེད་ཉམས་ཀྱི་རྩ་སྦྱངས་པས། །བར་དོ་ཟིན་པ་ངོ་མཚར་ཆེ། ཁམས་གསུམ་སྐད་ཅིག་ཙམ་ལ་བསྡུ། །སྟོང་པའི་


TNT01_Page_0790
[མ་དཔེ་གཟིགས་ན་འདིར་གནོན།]

ངང་ལས་ལྷ་སྐུར་ལྡང༌། །རླུང་སེམས་སྙིང་གར་ལྡང་འཇུག་བྱེད། །འདི་སྐུ་གསུམ་སྒྲུབ་ན་གནད་དུ་ཆེ། །ཉིན་པར་ཆོས་སྤྱོད་འཕེལ་བར་བྱ། །མཚན་མོ་ཟབ་མོའི་ཏིང་འཛིན་སྒོམ། །ཉིན་མཚན་གཉིས་ཀྱི་བྱ་བ་ཡིན། །ཐོ་རངས་སྔ་དྲོ་གཏུམ་མོ་སྒོམ། །ཉིན་པར་སྒྱུ་ལུས་སྒོམ་པར་བྱ། །ཕྱི་འཕྲེད་རྨི་ལམ་སྲོད་ཀྱི་དུས། །གཉིད་ཀྱི་འོད་གསལ་བསྒོམ་པར་བྱ། །ནམ་གུང་འོད་གསལ་རྨི་ལམ་སྒོམ། །གལ་ཏེ་མཉམ་བཞག་མི་བརྟན་ན། །སྤྲཽས་བཅས་ཆོས་སྤྱོད་འབད་ནས་སྒྲུབས། །ལྷ་སྒོམ་སྔགས་བཟླས་མཆོད་པ་བྱ། །སཱ་ཚ་གདབ་ཅིང་བསྐོར་བ་དང༌། །ཕྱག་དང་གསུང་རབ་ཀློག་པ་སྟེ། །བདུན་པོ་དེ་དག་འབད་ནས་སྒྲུབ། །སད་མ་ཐག་ཏུ་དད་པ་སྒོམ། །དེ་བཞིན་སྙིང་རྗེ་དྲག་ཏུ་སྒོམ། །བསྟོད་པ་གསོལ་འདེབས་ཕྱག་མཆོད་བྱ། །ལྟུང་བ་བཤགས་ཤིང་སླར་ཡང་བསྡམ། །གཏོར་མ་བཏང་བ་ལ་སོགས་བྱ། །བཟླས་པ་ལ་སོགས་ཐུན་ལ་འབད། །ཡན་ལག་བདུན་པ་ཅི་ནུས་བྱ། ཁྱད་པར་སྨོན་ལམ་མང་དུ་གདབ། །ཐུན་མཚམས་གསུང་རབ་ལྟ་བར་བྱ། །བྱ་བ་ཀུན་ལ་དྲན་ཤེས་བསྟེན། །རང་གི་རྒྱུད་ཀྱི་ཉེས་པ་བརྟག །དེ་ལྟར་ཐུན་མཚམས་ཀུན་ལ་སྦྱར། །ཟས་ཀྱང་ཆོས་དང་མཐུན་པར་སྤྱད། །རྟོགས་པ་མངོན་དུ་གྱུར་པ་དང༌། །གཞན་སྣང་ཟིལ་གྱིས་གནོན་ནུས་ཤིང༌། །དགོས་


TNT01_Page_0791
[མ་དཔེ་གཟིགས་ན་འདིར་གནོན།]

པ་དུ་མ་མཐོང་གྱུར་ན། །བརྟུལ་ཞུགས་སྤྱོད་པ་ངོ་མཚར་ཡང༌། །བུ་ཁྱོད་དེ་ལྟར་མ་གྱུར་པར། །སྤྱོད་པ་གཟབ་པ་གནད་དུ་ཆེ། །ཡི་དམ་ལྷ་དང་བླ་མ་ལ། །གསོལ་བ་བཏབ་ཅིང་གདམ་ངག་ཞུ། །དངོས་སུ་མཐོང་བའི་སྐལ་མེད་ན། །རྨི་ལམ་ཡུལ་སྣང་གཏན་ལ་ཕབ། །དགའ་ལྡན་མངོན་དགའ་བདེ་བ་ཅན། །གྲུ་འཛིན་རི་དང་ཨོ་རྒྱན་དང༌། །རི་བོ་རྩེ་ལྔ་ལ་སོགས་སུ། །རིགས་གསུམ་མགོན་པོའི་ལྷ་ཚོགས་ལ། །ཞལ་ལྟ་གདམས་ངག་ཞུ་བར་བྱ། །ཀླད་མེད་གཅམ་བུ་ཡལ་ཡུལ་དང༌། །དམ་ཚིག་སྐད་ཅིག་མི་བསྲུང་པའི། །གསར་འགྲོགས་ངོ་དགའི་བླ་མ་དང༌། །ཆོས་སྣ་མང་ཡང་གཏད་ས་མེད། །ཀུན་ལ་ཡིད་བརྟན་ཐུབ་པ་གཅེས། །འོན་ཀྱང་དག་སྣང་ཆེ་བར་བྱ། །ཞེས་པའང་ཏཱ་ར་ནཱ་ཐས་རང་གི་སློབ་མ་སྟན་ཅིག་པ་བྱམས་པ་འགྲོ་ཕན་བཟང་པོ་ལ་གདམས་པ་འདི་ཡང་ངམ་རིངས་སུ་སྟེ་རང་གི་རྟོགས་པའི་གླུ་དབྱངས་སོ།། །།མངྒལཾ། །

ཉམས་ལེན་གྱི་གནད་སྙན་བསྐུལ་གཏན་གྱི་མདུན་གྲོལ།


TNT01_Page_0792
[མ་དཔེ་གཟིགས་ན་འདིར་གནོན།]

ཨོཾ་སྭ་སྟི་པྲ་ཛཱ་བྷྱཿ རྒྱལ་བ་རྡོ་རྗེ་འཆང་དངོས་བླ་མ་ལ། །ནམ་ཡང་འབྲལ་བ་མེད་པའི་གདུང་ཤུགས་ཀྱི། །གུས་པས་གསོལ་བ་འདེབས་སོ་བྱིན་གྱིས་རློབས། །བུ་སློབ་བློ་སྣ་ཆོས་ལ་སྒྱུར་དུ་གསོལ། །ངེས་མེད་སྤྱོད་པའི་རྣལ་འབྱོར་རྒྱལ་ཁམས་པས། །སྙན་བསྐུལ་གཏན་གྱི་


TNT01_Page_0792
[མ་དཔེ་གཟིགས་ན་འདིར་གནོན།]

མདུན་གྲོལ་འབུལ་བ་ནི། །དམ་ཆོས་ལས་གཞན་མདུན་མའི་རྒྱལ་པོ་ནི། །གཞན་ཞིག་ཡོད་མེད་དཔྱོད་ལྡན་རྣམས་ཀྱིས་དཔྱོད། །ཚེ་འདིའི་བདེ་སྐྱིད་ཐམས་ཅད་བསླུ་བའི་ཆོས། །ད་ལྟ་འདི་ཉིད་དགའ་སྙམ་སེམས་འབྲིད་ཀྱང༌། །རིང་པོར་མི་ཐོགས་རང་གི་གནས་ཚུལ་སྟོན། །འདོད་ཡོན་ལོངས་སྤྱོད་དག་ལ་ཆགས་པ་འདི། །ཐོག་མེད་དུས་ནས་ངན་གོམས་ལ་སོང་ཞིང༌། །ད་རེས་རྒྱུན་དུ་འདྲིས་པས་དབྲལ་བར་དཀའ། །རིག་པ་སྤྲེའུ་ལྟར་བཅོལ་ཆུང་རྣམ་གཡེང་ཆེ། །ལས་ངན་ཐག་པས་བཏགས་པ་མ་ཚོར་རམ། །ད་རེས་ཐར་པའི་གདོག་སྣ་མ་ཚུགས་ན། །ངེས་པར་ངན་འགྲོའི་གཡང་དུ་འདྲེད་ཉེན་གདའ། །རྐྱེན་ངན་བདོའ་དུས་ཉམས་ལེན་མེད་པའི་ཆོས། །བཤད་མཁས་ལག་རྡུམ་གཡུལ་དུ་ཞུགས་པ་འདྲ། །ཚིག་ལ་མི་དགྱེས་དོན་ལ་ཉམས་ལེན་འཚལ། །སྦྲང་མ་སྦྲང་རྩི་སོགས་དང་བྱི་བའི་དཔེ། །རང་གིས་བསགས་པའི་ལོངས་སྤྱོད་གཞན་གྱིས་ཟ། །སྙིང་པོ་མེད་ལ་ཤིན་ཏུ་ཐུགས་འབྱུང་བས། །གསག་ལ་མ་དགྱེས་དགེ་བའི་ཕྱོགས་སུ་ཐོང༌། །ཟླ་དྲུག་དཀའ་ལས་ཁུར་བའི་ཞིང་པ་ཡང༌། །སྟོན་ཐོག་མ་ཟོས་ཤི་བ་མཐོང་བའི་ཚེ། །ལས་ཀུན་དཀའ་ལ་དོན་རེ་ཆུང་བར་ཤེས། །ལས་ལ་མ་དགྱེས་ཅི་མཛད་ཆོས་ལ་བསྒྱུར། །ཕ་མ་སྤུན་ཟླ་འཁོར་གཡོག་ལ་ལྟས་ན། །འགའ་ཞིག་སྔར་འདས་ལ་ལ་ད་བཟོད་


TNT01_Page_0793
[མ་དཔེ་གཟིགས་ན་འདིར་གནོན།]

འགྲོ། །མི་སྡོད་འབྲལ་བ་མཐོང་ཚེ་ཡིད་རེ་སྐྱོ། །རང་ཡང་དེ་ལྟར་ཡིན་མིན་བསམ་པ་ཞུ། །མཛའ་བའི་གྲོགས་ཀྱང་རྨི་ལམ་མགྲོན་པོ་འདྲ། །ཡོད་པའི་འཕྲོ་ལ་གར་སོང་ཆ་མེད་འགྲོ། །དཔལ་འབྱོར་འདི་ཡང་སྟོན་ཀའི་ན་བུན་འདྲ། །ཡུན་རིང་སྡོད་སྡོད་འདྲ་ཡང་འཕྲལ་དུ་འཇིག །དབང་ཐང་ལོངས་སྤྱོད་སོས་ཀའི་འཇའ་ཚོན་འདྲ། །མིག་སྔར་མཛེས་ཀྱང་ཡིད་བརྟན་རྟག་མི་ཐུབ། །དེ་ལ་གཡོ་རྒྱུ་བརྫུན་ཟོབ་ལྷུར་བླངས་པའི། ཁེ་བོགས་ཉེས་པ་ཆེ་བས་རིགས་མ་ཡིན། །ད་ལྟ་བློ་གཏད་འཆའ་བའི་གྲོགས་པོ་ཡང༌། །འཕྲལ་དུ་དགྲ་ཡི་དང་མར་འགྱུར་གྱིན་སྣང༌། དགྲ་གཉེན་མི་རྟག་ཕྱོགས་ཞེན་མི་འཚལ་བས། །གཏན་གྱི་དགྲ་བོ་ཡིན་ངེས་ཉོན་མོངས་ཐུལ། །བསྐྱངས་པའི་བུ་ཚ་རང་སྟོབས་རྒྱས་པའི་ཚེ། །དྲིན་དང་ལྡན་པའི་ཕ་མར་མ་གུས་ཤིང༌། །ཅིར་ཡང་མི་སེམས་མང་དུ་མཐོང་བས་ན། །དགོས་དུས་ཕན་ངེས་རིག་པའི་ཁྱེའུ་སྐྱོངས། །མིར་སྐྱེས་རྩ་ན་སྡིག་པ་ལ་དགའ་བ། །ཤི་ནས་གཤིན་རྗེའི་སྐྱེས་བུས་ཁྲིད་གྱུར་ཏེ། །བཟོད་ཐབས་མེད་པའི་སྡུག་བསྔལ་བསྐལ་པར་མྱོང༌། །དམྱལ་བར་སྐྱེས་ཚེ་འགྱོད་ཀྱང་ཅི་ལ་ཕན། །ནམ་ཞིག་ཤ་རུས་ཕུང་པོ་འཇིག་པ་དང༌། །འགྱུ་བའི་དབུགས་འཆད་གཉེན་གྱི་གདུང་སེམས་འཇིག །འཁོར་གཡོག་རྗེས་སུ་མི་འབྲང་


TNT01_Page_0794
[མ་དཔེ་གཟིགས་ན་འདིར་གནོན།]

ཡུལ་དང་འབྲལ། །ཟས་ནོར་ཀུན་བོར་རོགས་མེད་གཅིག་པུར་འགྲོ། །ལང་ཚོའི་མེ་ཏོག་རྒས་པའི་བ་མོས་གདུངས། །མདངས་ཉམས་སྟོབས་ཤོར་ཡི་མུག་སེམས་མི་བདེ། །འདོད་ལ་དགའ་ཡང་སྤྱོད་པའི་ནུས་པ་མེད། །ཕ་རོལ་འགྲོ་བ་མཐོང་ཚེ་ཡིད་རབ་འབྱུང༌། །ཕྱི་ནས་དམ་པའི་ཆོས་དང་མཇལ་བའང་དཀོན། །མི་ལུས་རིན་ཆེན་ཐོབ་པ་དཀའ་བས་ན། །ད་ལྟ་དམ་པའི་ཆོས་ལ་མ་འབད་ན། །གཏན་གྱི་མདུན་མ་ཤིན་ཏུ་ཉམས་པར་འགྱུར། །བསགས་པའི་ལོངས་སྤྱོད་གཞན་གྱིས་བགོ་བཤར་བྱེད། །གཅེས་པའི་ལུས་སྲོག་བཞག་ནས་འགྲོ་བའི་ཚེ། །གཡོག་དང་བུ་རྟ་རྗེས་སུ་མི་འབྲང་ཞིང༌། །ཆེ་གེ་ཤི་ཞེས་མིང་རྐྱང་ཙམ་གཅིག་ལུས། །སླན་ཆད་གཉེན་དང་མཁར་གཞིས་མངའ་ཞབས་ནོར། །ནམ་ཡང་གཟིགས་པའི་སྐབས་ཀྱང་མེད་པ་དང༌། །ངན་སོང་གསུམ་གྱི་བརྩོན་རར་འཁྱམས་པའི་ཚེ། །དཀོན་མཆོག་གསུམ་ལས་སྐྱབས་གཞན་མ་མཆིས་ལ། །སྤུ་གྲི་གཏམས་པའི་ཐང་ནི་རྒྱ་རེ་ཆེ། །རལ་གྲིའི་ནགས་ཚལ་ཐིབས་པོ་ཕ་མཐའ་མེད། །རི་ཀླུང་ཐམས་ཅད་མེ་ལྕེར་འབར་བའམ། །གྲང་བས་ཉེན་ནས་བརྒྱ་ཚལ་སྟོང་ཚལ་དུ། །རང་ལུས་གས་ཚེ་འཇིགས་པ་ཅིས་མི་སྐྱེ། །ཐོས་ཀྱང་འཇིགས་ལ་བསམས་ན་ཚུགས་ཐབས་མེད། །ལོ་བརྒྱའི་བར་དུ་ཟས་སྐོམ་མིང་ཡང་མེད། །ཟོས་ན་མེ་རུ་འབར་


TNT01_Page_0795
[མ་དཔེ་གཟིགས་ན་འདིར་གནོན།]

བས་ཁོར་ལུས་སྲེག །གནས་ཚུལ་བསམས་ན་སྐྲག་པས་ཤ་རུས་འགྱེས། །གཅིག་ལ་གཅིག་ཟ་གསོད་དང་འཆིང་དང་བརྡེག །བཀོལ་ཞིང་དབང་མེད་དུད་འགྲོའི་སྡུག་བསྔལ་ཡང༌། །ཐོག་ཏུ་བབས་ན་བཟོད་པའི་ཐབས་མཆིས་སམ། །ད་ལྟ་བཅོས་ཐབས་ཡོད་དུས་འབད་འབུངས་འཚལ། །ནམ་ཞིག་ཐོག་ཏུ་བབས་ན་གཞན་དག་ལ། །གྱོད་ཁ་རྡལ་བའི་ཁག་ངན་སུ་ལ་བགོ །རང་ཉེས་རང་གིས་འཁྱེར་ལས་འོས་ཅི་ཡོད། །སྡིག་པའི་གྲོགས་པོ་ངན་འགྲོའི་བསུ་མ་རུ། །མ་ཤེས་བདེ་སྐྱིད་དགའ་བའི་གྲོགས་སུ་འཁྲུལ། །དགེ་ལ་སྦྱོར་ན་དགྲ་ཡང་བླ་མ་ཡིན། །སྡིག་ལ་སྦྱོར་ན་བདུད་ཀྱི་ཕོ་ཉར་དགོངས། །ཆོས་མ་སྒོམས་ན་མི་རྟག་སྡུག་བསྔལ་གྱི། །ཡི་མུག་སྒོམས་ཀྱང་ཕན་པ་མི་གདའ་བས། །ཆོས་ལ་འཇུག་པའི་གེགས་ཀྱང་འདི་ལྟར་གདའ། །མི་ནུས་སྙམ་དང་ད་རེས་མི་ཁོམ་སྙམ། །གཞན་དབང་སོང་དང་ཕྱི་ཤོལ་ངང་ལ་ལུས། །རང་མཐོང་ཆེ་བའམ་ཐང་ཆད་བགྱིད་ལུག་དང༌། །མི་བདེན་སྙམ་དང་ལོང་ཡོད་བྱེད་པ་སྟེ། །དེ་དག་སྤངས་ནས་འཕྲལ་དུ་ཉམས་ལེན་འཚལ། །དཀར་ནག་ལས་ལ་བསླུ་བ་མ་མཆིས་པས། །འདི་ལ་སྤང་བླང་ནན་ཏན་སྐྱེད་ནས་འཚལ། །གཡོག་དང་ཁྱིམ་ཐབ་གཉེན་དང་སྲིད་ཀྱི་ཕྱིར། །སྡིག་ལས་མཛད་ཀྱང་རྣམ་སྨིན་རང་ཉིད་ལས། །


TNT01_Page_0796
[མ་དཔེ་གཟིགས་ན་འདིར་གནོན།]

གཞན་གྱིས་ཆ་ཤས་ཙམ་ཡང་ནོད་པ་མེད། །དེ་བས་གཞན་ཕྱིར་སྡིག་ལ་དགེས་མི་འཚལ། །རང་ལ་གནོད་པ་ཆུང་ཡང་མི་བཟོད་པར། །གཞན་ལུས་དུམ་བུར་གཏུམ་པའི་ཕོད་ཁམས་ཅན། །བཟའ་བཏུང་ཙམ་གྱི་ཕྱིར་དུ་སྲོག་ཀྱང་གཅོད། །རང་འདོད་ཅན་གྱི་སྤྱོད་ངན་རྣམ་སྤངས་ཏེ། །མཛད་པ་བཟང་པོས་རང་གཞན་ཕྱོགས་ཀུན་གྱི། །ཡུལ་ཁམས་ཐམས་ཅད་བདེ་བའི་ཐབས་སྒྲུབ་འཚལ། །འགྲོ་དྲུག་དྲིན་ཅན་ཕ་མ་ལགས་པས་ན། །ཀུན་ལ་འབད་ནས་ཕན་སེམས་བསྐྱེད་པར་འཚལ། །འགྲོ་ལ་བྱམས་དང་སྙིང་རྗེ་བསྐྱེད་པ་ནི། །ཆོས་རྣམས་ཀུན་གྱི་རྩ་བ་ལགས་པས་ན། །གལ་པོ་ཆེ་འདི་ནན་ཏན་ལྡན་པས་སྒོམ། །གནོད་སེམས་འཁོན་འཛིན་མི་བྱ་འཕྲལ་འཕྲལ་ཡང༌། །ཕན་པ་ཅི་ཐོགས་དོན་མེད་གནོད་མི་བགྱིད། །སྨོན་པ་ལྟ་བུར་སེམས་ལ་རང་དབང་མེད། །བདག་གི་ལས་ཀྱིས་བསྐུལ་ནས་དགྲ་ཟླར་སོང༌། །རང་ལ་བརྟེན་ནས་དགྲ་ལ་སྡིག་པས་གོས། །ཕ་མ་དམྱལ་བར་འགྲོ་བ་སྙིང་རེ་རྗེ། །དེ་ལྟར་བསམ་པས་གདུག་སེམས་ཞི་བར་འགྱུར། །ལམ་གྱི་རྩ་བ་བླ་མའི་རྣལ་འབྱོར་ཏེ། །མོས་གུས་གདུང་ཤུགས་དྲག་པོས་གསོལ་བ་གདབ། །བར་ཆད་ཐམས་ཅད་འདི་ཉིད་ཁོ་ནས་སེལ། །དངོས་གྲུབ་ཐམས་ཅད་འདི་ཉིད་ཁོ་ནས་ཐོབ། །མཚན་ལྡན་བླ་མའི་དགོངས་པ་ཀུན་


TNT01_Page_0797
[མ་དཔེ་གཟིགས་ན་འདིར་གནོན།]

བསྒྲུབ་ཅིང༌། །ཡིད་ཀྱི་མོས་གུས་ངག་གི་སྙན་པར་བརྗོད། །ཡོན་དབུལ་ལུས་ཀྱི་བྱ་བ་ཐམས་ཅད་ཀྱིས། །སློབ་དཔོན་གང་དགེས་དེ་ལ་འབད་པར་བྱ། །འཇིག་རྟེན་རྗེ་བོ་ཇི་ལྟར་བཟང་ཡང་འབྲལ། །བླ་མ་དམ་པའི་ཐུགས་རྗེས་འདོར་མི་སྲིད། །བླ་མའི་བྱིན་རླབས་ཤུགས་ལས་རྟོགས་པ་སྐྱེ། །ཕྱག་རྒྱ་ཆེན་པོ་བྱིན་རླབས་ལམ་བྱེད་ཡིན། །གསལ་ལ་འཛིན་མེད་ལྷོད་དེ་ཤིགས་སེ་བ། །གང་སྣང་སྟེང་དུ་སྐྱོང་བའི་ཞི་གནས་དང༌། །རང་ངོ་རྗེན་པར་མཐོང་བ་ལྷག་མཐོང་གཉིས། །སྒོམ་གྱི་འཇུག་སྒོ་ལགས་པས་ནན་ཏན་འཚལ། །གང་ཤར་དེ་ལ་བཅས་བཅོས་མེད་པར་ཞོག །འགྱུར་བ་གང་བྱུང་སོ་མ་དེ་ལ་བསྐྱང༌། །གནས་སམ་འགྱུ་ཡང་བཟོ་བཅོས་མི་འཚལ་བས། །ཡེངས་མེད་ཁ་གང་རིག་པའི་སྐྱོང་དར་ཞུ། །ཟབ་དོན་ཉམས་ལེན་ཀུན་གྱི་སྙིང་པོ་ནི། །རང་གི་སེམས་ལ་ལྟ་ཞིང་ཚོལ་བ་ཡིན། །སྐྱེས་ཙམ་ཉིད་ནས་གདོད་ནས་གྲོལ་གྲོལ་བ། །ངོ་མ་ཤེས་པའི་བརྫུན་ཕུགས་བཏིབ་པར་འཚལ། །རླུང་སེམས་རྩ་ཐིག་བཙུན་པ་ཐབས་ཀྱི་ལམ། །ལྷ་སྐུ་སྣང་སྟོང་ཞེན་མེད་སྒྱུ་མའི་སྐུ། །ཉིན་མཚན་གཅིག་གིས་གཅིག་ལ་བོགས་འདོན་ཞིང༌། །གཉིད་ཀྱི་གཏི་མུག་གསལ་སྟོང་བདེ་བར་གྱུར། །གང་སྣང་བླ་མ་ཡི་དམ་དབྱེར་མེད་ལ། །མ་ཞེན་དག་སྣང་འཁོར་ལོ་


TNT01_Page_0798
[མ་དཔེ་གཟིགས་ན་འདིར་གནོན།]

ཕྱོགས་མེད་བསྒྱུར། །ཇི་ཙམ་དམིགས་པ་སྒོམ་པ་ཐམས་ཅད་ཀྱང༌། །རང་ངོ་ཤེས་པའི་དྲན་པས་ཟིན་པ་གནད། །སྡིག་པ་བཤགས་དང་དགེ་བ་གསོག་པ་དང༌། །རྗེས་སུ་ཡི་རང་བསྔོ་བས་རྒྱས་ཐེབས་པ། །འདི་བཞི་མཐོ་རིས་ཐར་པའི་རྩ་བ་ཡིན། །སྔར་བྱས་སྡིག་ལ་ཤིན་ཏུ་འགྱོད་པ་དང༌། །ཕྱིན་ཆད་སྲོག་ལ་བབ་ཀྱང་སྡོམ་སེམས་དང༌། །སྐྱབས་འགྲོ་བྱང་ཆུབ་མཆོག་ཏུ་སེམས་བསྐྱེད་དང༌། །དེ་ལྟར་བཤགས་ན་སྡིག་པ་བྱང་བར་འགྱུར། །གླེགས་བམ་སྐུ་གཟུགས་བྱེད་ཅིང་གཟུངས་སྔགས་བཟླས། །སྟོང་པ་ཉིད་བསྒོམ་སྡིག་པ་ཐམས་ཅད་འདག །ཕ་མ་ནད་པ་མང་ཐོས་ཏིང་འཛིན་ཅན། །ཆོས་སྨྲ་ཡེ་ཤེས་ལྡན་དང་དབུལ་པོ་དང༌། །ཚུལ་ཁྲིམས་ལྡན་དང་བླ་མ་དམ་པ་སྟེ། །འདི་དགུ་ཞིང་གི་དམ་པར་གསུངས་པ་ཡིན། །ཆོས་བཤད་པ་དང་བསམ་གཏན་སྒོམ་པའི་གྲྭ། །གཟུགས་དང་ལྷ་ཁང་བྱས་ན་གཞི་དེ་ལས། །བསོད་ནམས་མང་དུ་འཕེལ་བར་འགྱུར་ཞེས་གསུངས། །རྒྱལ་བའི་བསྟན་ལ་མཆོད་པ་རྒྱ་ཆེར་མཛོད། །ལྷ་སྒོམ་སྔགས་བཟླས་དག་ལའང་བརྩོན་པ་དང༌། །དགེ་འདུན་ལ་ཡང་གུས་པ་རྒྱ་ཆེར་མཛོད། །བསྟན་པ་རིན་ཆེན་འགྲོ་བའི་གཉེན་གཅིག་པུ། །དགེ་སློང་དགེ་འདུན་ཡོད་དེར་ཡུན་རིང་གནས། །འཕགས་པའི་གང་ཟག་གར་ཡོད་མི་འཚལ་བས། །གང་ལའང་བརྙས་སེམས་


TNT01_Page_0799
[མ་དཔེ་གཟིགས་ན་འདིར་གནོན།]

སྐུར་བ་གདབ་མི་འཚལ། །དོན་མེད་ཚེ་འདིའི་བྱ་བ་ལ་འདས་ནས། །དོན་ཆེན་ཤུལ་དུ་ལུས་པ་མང་བར་གདའ། །དམ་ཆོས་བྱ་སྙམ་ཡོད་པ་མང་ན་ཡང༌། །ལག་ཏུ་ལོངས་པའི་མི་ནི་རྒྱ་ལམ་ན། །དེ་སྐད་ཀུན་དགའ་སྙིང་པོ་ཞེས་བྱ་བས། །ནོར་འཛིན་བདག་མོ་ངག་དབང་དོན་ཡོད་མཚན། །དགེ་ལེགས་དཔྱིད་ཀྱི་དཔལ་མོར་གདམས་པ་འདི། །གོང་དཀར་ཞེས་བྱ་རྒྱལ་པོའི་ཁབ་ཏུའོ། །རིན་ཆེན་གསུམ་གྱི་བདེན་པའི་བྱིན་རླབས་ཀྱིས། །སྲིད་འདིར་ཕུན་སུམ་ཚོགས་པ་ཉིད་གྱུར་ནས། །བླ་མེད་བྱང་ཆུབ་རྒྱལ་བའི་རྒྱལ་སྲིད་ལ། །རྟག་པར་བཞུགས་པའི་དགེ་མཚན་རྒྱས་པར་ཤོག །རང་ལོ་ཉེར་ལྔ་པ་ལ་དགེ། །།མངྒ་ལཾ་བིསྟཱ་ར་ཀུ་རུ། །

ཀུན་འཛོམ་ལ།


TNT01_Page_0800
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། ཆེད་དུ་ཕུལ་བ། ཉམས་སྣང་རྨི་ལྟས་བཟང་ངན་སོགས་གང་ལ་ཡང་འཛིན་ཞེན་མི་འཚལ་ཞིང༌། སེམས་ཀྱི་འཁྲུལ་སྣང་ཡིན་པས་སྤྱིར་གཏད་པ་མི་གདོགཁ་སིང་ཏེ་དངོས་གྲུབ་ཀྱིས་ལྟས་ཡིན། ཀྭ་ཡེ་ནམ་མཁའ་འདི་ལ་རྒྱུ་རྐྱེན་མེད། །འོན་ཀྱང་ཡོད་དང་མེད་པར་འཛིན་ན་འཁྲུལ། །འཛིན་མེད་ངང་དུ་ཞོག་ཅིག་སྐལ་ལྡན་མ། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །མཁའ་ལ་འཇའ་ཚོན་མཛེས་པར་ཤར་བ་ན། །ཡོད་ཡོད་འདྲ་ཞིང་ལེགས་ཀྱང་ཡོད་རྒྱུ་མེད། །ཡེ་ནས་ཡོད་མ་མྱོང་ཡང་


TNT01_Page_0800
[མ་དཔེ་གཟིགས་ན་འདིར་གནོན།]

འཇའ་རུ་སྣང༌། །འདི་ལྟར་མ་རྟོགས་གོལ་ས་ཤིན་ཏུ་མང༌། །འཇའ་ཚོན་མཁའ་ལས་བྱུང་ཀྱང་མཁའ་ལ་ཡལ། །གསལ་བར་མཐོང་ཀྱང་ནམ་མཁའི་རང་བཞིན་ཡིན། །རྒྱུ་རྐྱེན་ཕྲད་པ་ཙམ་ལས་རྣམ་པར་སྣང༌། །འཁྲུལ་པའི་རང་བཞིན་ཆོས་ཀུན་དེ་འདྲར་གདའ། །ལེགས་པར་བརྟགས་ན་འཇའ་ཚོན་ནམ་མཁའ་གཉིས། །ཐ་དད་དབྱེ་བ་འདུག་གམ་མིག་ཡངས་མ། །རང་སེམས་སྟོང་གསལ་འགག་པ་མེད་པའི་རྩལ། །སྙིང་རྗེ་བཟོད་གླགས་མེད་པར་ཤར་བ་ན། །སྙིང་རྗེའི་རང་ངོས་མ་བཅོས་སོ་མར་ཞོག །སྙིང་རྗེ་ཆེ་ལ་ཞེན་ཆགས་ཆུང་བ་ཡིན། །གཏིང་མཐའ་མེད་ཅིང་ཟབ་པའི་རྒྱ་མཚོ་ལས། །རྦ་རླབས་གཡོ་བ་ཇི་སྙེད་བྱུང་གྱུར་ཀྱང༌། །རྦ་རླབས་རྒྱ་མཚོ་ཉིད་ལས་བྱུང་གྱུར་ཞིང༌། །རྒྱ་མཚོའི་ཆུ་དེ་ཐིམ་ཡང་རྒྱ་མཚོར་ཐིམ། །རླབས་དང་རྒྱ་མཚོ་རང་བཞིན༌།་དད་མེད། །སེམས་ཀྱི་རང་བཞིན་འདི་ཡང་རྒྱ་མཚོ་འདྲ། །རྣམ་རྟོག་གཡོ་བ་ཇི་སྙེད་འཁྲུགས་གྱུར་ཀྱང༌། །རྣམ་རྟོག་སེམས་ཀྱི་ཆོ་འཕྲུལ་སེམས་ལ་ཐིམ། །སེམས་དང་རྣམ་རྟོག་ཐ་དད་མ་ལྟ་ཞིག །སེམས་ནི་གསལ་སྟོང་སྐྱེ་བ་མེད་པའི་ཕྱིར། །འགྱུ་བའི་རྟོག་པའང་གསལ་སྟོང་སྐྱེ་བ་མེད། །སེམས་ཀྱི་རང་བཞིན་ངོ་ཤེས་ཙམ་གྱིས་གྲོལ། །རྣམ་རྟོག་འདི་ཡང་ངོ་ཤེས་ཙམ་གྱིས་གྲོལ། །ངོ་མ་ཤེས་ན་གཉིས་ཀའང་འཁྲུལ་པ་


TNT01_Page_0801
[མ་དཔེ་གཟིགས་ན་འདིར་གནོན།]

ཡིན། གནས་དང་འགྱུར་ལ་སྤང་བླང་མི་འཚལ་ལོ། །མེ་ལོང་ཤིན་ཏུ་དྭངས་པའི་དཀྱིལ་འཁོར་ལ། །པྲ་སྔགས་བཏབ་པའི་ཁྱེའུས་པྲ་གཟུགས་མཐོང༌། །མེད་ཀྱང་རྒྱུ་རྐྱེན་ཙམ་ལ་གཟུགས་བརྙན་སྣང། །གཟུགས་བརྙན་བྱུང་ཡང་མེ་ལོང་ཞིག་པ་མེད། །ཐོག་མེད་དུས་ནས་རང་ངོ་མ་ཤེས་པས། །འཁྲུལ་པའི་སྣང་བ་ཇི་སྙེད་ཤར་གྱུར་ཀྱང། །སེམས་ཀྱི་རང་བཞིན་ཆོས་སྐུ་ཞིག་པ་མེད། །འོན་ཀྱང་ངོ་ཤེས་མེད་པས་ཕན་མ་ཐོགས། །རང་ངོ་ཤེས་ན་ཉོན་མོངས་ཡེ་ཤེས་ཡིན། །ངོ་མ་ཤེས་ན་ལམ་ཡང་འཁོར་བའི་རྒྱུ། །དགག་སྒྲུབ་སྤང་བླང་མེད་པའི་ཉམས་ལེན་འཚལ། །ཇི་ལྟར་བྲག་རི་མཐོན་པོའི་རྩ་བ་ནས། །ལྷང་ལྷང་སྙན་པའི་བྲག་ཆ་བྱུང་ན་ཡང༌། །སྒྲ་དེ་གྲགས་ཙམ་ཉིད་ནས་སྟོང་པ་ཡིན། །རྣམ་རྟོག་ཤར་ཙམ་ཉིད་ནས་སྐྱེ་མེད་ཡིན། །ཆོས་སྐུ་རང་ལ་ཡོད་པ་ངོ་ཤེས་འཚལ། །ཕུ་ཆུ་དྲག་པོ་ཅི་ཡང་གཡོ་བ་དེ། །གསལ་དྭངས་མཚོ་ལ་བབས་ན་ལྷན་ནེར་གདའ། །ཆུ་ཀླུང་དྲག་ཏུ་འབབ་པའམ་འཁྱིལ་ཀྱང་རུང༌། །བསིལ་དང་རླན་གཤེར་ངོ་བོར་ཁྱད་པར་མེད། །ཆུ་ལྟར་འཁྲུགས་པའི་འདོད་ཆགས་གཡོ་བ་ཡང༌། །རང་ངོ་ཤེས་ན་མཚོ་བཞིན་ལྷན་ནེར་གདའ། །འདོད་ཆགས་ཤར་ཙམ་ཉིད་ནས་རང་གྲོལ་བ། །སོ་སོར་རྟོག་པའི་ཡེ་ཤེས་འདི་ལ་ཟེར། །


TNT01_Page_0802
[མ་དཔེ་གཟིགས་ན་འདིར་གནོན།]

འོད་དཔག་མེད་མགོན་གཞན་དུ་མ་འཚོལ་ཞིག །ཇི་ལྟར་ནགས་ལ་མེ་ཕུང་འབར་བ་ན། །མེ་ལྕེ་མཁའ་ལས་བྱུང་ཞིང་མཁའ་ལ་ཐིམ། །མེ་ལྟར་འབར་བའི་ཞེ་སྡང་དྲག་པོ་ཡང༌། །སེམས་ལས་ལོགས་སུ་ཅུང་ཟད་གྲུབ་པ་མེད། །ཞེ་སྡང་རང་བཞིན་གསལ་སྟོང་ངང་ལ་ཞོག །མེ་ལོང་ལྟ་བུའི་ཡེ་ཤེས་མི་ཟེར་རམ། །མི་བསྐྱོད་རྒྱལ་པོ་གཞན་དུ་མ་འཚོལ་ཞིག །སྦྲུལ་ལ་མདུད་པ་རྒྱབ་པའི་དུས་ཙམ་ན། །མདུད་པར་སྣང་ཡང་རང་གྲོལ་ཉིད་དུ་འདུག །ཆར་སྤྲིན་འཐུག་པོ་ཇི་ལྟར་མཐོ་ན་ཡང༌། །ནམ་མཁའ་ལས་གཞན་གྲུབ་པ་ཅུང་ཟད་མེད། །ངོ་ཤེས་ཙམ་ན་ང་རྒྱལ་སེར་སྣ་ཡང༌། །རང་གྲོལ་དབྱིངས་ལས་ལོགས་སུ་མེད་པར་མཐོང༌། །ང་རྒྱལ་སེར་སྣ་མཉམ་ཉིད་ཡེ་ཤེས་ཡིན། །རྒྱལ་བ་རིན་འབྱུང་གཞན་ནས་མ་འཚོལ་ཞིག །མཁའ་ལ་རླུང་དམར་ཇི་ལྟར་འཚུབས་གྱུར་ཀྱང༌། །འཚུབ་མའི་ཐད་ཀྱི་མཁའ་ལ་འགྱུར་ཟློག་མེད། །ཕྲག་དོག་རླུང་དམར་འཚུབས་ཀྱང་སེམས་ཀྱི་ངང༌། །རང་གྲོལ་འདི་ནི་བྱ་གྲུབ་ཡེ་ཤེས་ཡིན། །དོན་ཡོད་གྲུབ་པ་གཞན་ནས་མ་འཚོལ་ཞིག །མཚན་མོ་ནམ་མཁའ་མུན་པས་ཁྱབ་གྱུར་ཞིང༌། །ནམ་ལངས་པ་ན་སངས་ཤིང་གསལ་བར་མཐོང༌། །མུན་པ་གཞན་ནས་མ་བྱུངགར་མ་སོང༌། །ནམ་མཁའི་ངོ་བོ་མུན་པས་ཁྱབ་པའི་ཚེ། །གཞན་དུ་མ་


TNT01_Page_0803
[མ་དཔེ་གཟིགས་ན་འདིར་གནོན།]

སོང་མུན་པ་སངས་པ་ན། །ངོ་བོ་འགྱུར་ནས་བཟང་དུ་སོང་བ་མེད། །སེམས་ཀྱི་རང་བཞིན་སྒྲིབ་བཅས་སྒྲིབ་མེད་ལ། །རང་བཞིན་ངོ་བོ་བཟང་ངན་འགྱུར་ཟློག་མེད། །མི་ཤེས་གཏི་མུག་རང་ངོ་ཤེས་པ་ན། །མི་བཅོས་སོ་མར་ཞོག་ཅིག་ཡེ་ཤེས་ཡིན། །ཆོས་དབྱིངས་ཡེ་ཤེས་དེ་ལ་བཅོས་མ་གཏོང༌། །རྣམ་པར་སྣང་མཛད་གཞན་ནས་མ་འཚོལ་ཞིག །འཁོར་བ་ལས་གཞན་མྱང་འདས་ཡོད་མ་ཡིན། །ཉོན་མོངས་ལས་གཞན་ཡེ་ཤེས་ཡོད་མ་ཡིན། །རང་སེམས་ལས་གཞན་སངས་རྒྱས་ཡོད་མ་ཡིན། །རྣམ་རྟོག་ལས་གཞན་སྟོང་ཉིད་ཡོད་མ་ཡིན། །རང་ངོ་མ་ཤེས་ཐམས་ཅད་འཆིང་བའི་རྒྱུ། །རང་ངོ་ཤེས་ན་ཐམས་ཅད་རང་གྲོལ་ཡིན། །ཞེན་ཞིང་བཟུང་ན་ཐམས་ཅད་གོལ་ས་ཡིན། །ཞེན་མེད་སྐྱངས་ན་ཐམས་ཅད་བོགས་འདོན་ཡིན། །བཅས་བཅོས་བྱས་ན་ཐམས་ཅད་ཕྱིན་ཅི་ལོག །མ་བཅོས་བཞག་ན་ཐམས་ཅད་རང་བཞིན་ཡིན། །དགག་སྒྲུབ་སྤང་བླང་མེད་པའི་ཉམས་ལེན་འཚལ། །ཨེ་མ་འདི་འདྲའི་ཉམས་ལེན་ཤེས་གྱུར་ན། །ད་ནི་སྡོད་དམ་ལངས་སམ་འགྲོ་ཡང་རུང༌། །ཟ་འཆག་ཉལ་སོགས་སྤྱོད་ལམ་ཅི་བྱེད་ཀྱང༌། །ཐམས་ཅད་དགེ་སྦྱོར་རྒྱལ་པོའི་ངང་ཉིད་ཡིན། །དམིགས་པའི་ལྟ་བ་ཙམ་གྱི་དགེ་སྦྱོར་སྟེ། །སེམས་ཀྱི་གཞི་རྩ་ཆོད་པར་མི་གདའ་བས། །


TNT01_Page_0804
[མ་དཔེ་གཟིགས་ན་འདིར་གནོན།]

བྱམས་པ་སྒོམས་ན་འདོད་ཆགས་སྲེད་པར་ལྷུང༌། །ཞེན་མེད་སྒོམས་ན་རང་དོན་ཡིད་བྱེད་སྐྱེ། །མི་རྟག་སྡུག་བསྔལ་སྒོམས་ན་ཡི་ཆད་ལྡང༌། །རིག་པས་བརྟགས་ཤིང་བཅད་ཀྱང་རྣམ་རྟོག་ཡིན། །བསམ་མནོ་ཙམ་གྱིས་མགོ་བོ་འཁོར་ཉེན་གདོག །བྱང་ཆུབ་ཐོབ་འདོད་སྐྱེས་ཀྱང་རེ་བ་ཡིན། །སྡུག་བསྔལ་བྲལ་འདོད་སྐྱེས་ཀྱང་དོགས་པར་སོང༌། །མི་སྡུག་ཏིང་འཛིན་སྒོམས་པས་ཞེ་སྡང་ལྡང༌། །རྟེན་འབྲེལ་གནས་ལུགས་བསམ་པས་རྣམ་རྟོག་འཁྲུག །དམིགས་པ་རྩེ་གཅིག་གཏད་ན་གཏི་མུག་སྐྱེ། །ལམ་སོགས་ཡོན་ཏན་བསམ་ན་ང་རྒྱལ་ལྡང༌། །བདག་གི་ཉེས་པ་བསམ་ན་ཤིན་ཏུ་ཞུམ། །ལྷ་སྒོམ་བཟླས་པས་བདག་འཛིན་དམ་དུ་སོང༌། །གཡས་པ་བཅོས་ཚེ་གཡོན་པ་ཞིག་པ་དང༌། །གཡོན་པ་བཅོས་ཚེ་གཡས་ནས་ཞིག་པའི་དཔེས། །རང་གྲོལ་གནས་ལུགས་ཕྱག་ཆེན་མ་ཤེས་པར། །ཉམས་ལེན་བྱེད་པ་འདི་དག་ཤིན་ཏུ་བྲེལ། །བྱ་བརྒྱ་འུར་རྡོ་གཅིག་གིས་དེད་པ་ལྟར། །སྡིག་སྒྲིབ་སྦྱོང་བའི་མཐར་ཐུག་ཕྱག་རྒྱ་ཆེ། །བླ་མའི་བྱིན་རླབས་མིན་པས་མི་རྟོགས་པས། །རྟག་ཏུ་གསོལ་བ་འདེབས་ལ་བརྩོན་པ་ཞུ། །ཉམས་ལེན་གནད་ནི་དེ་བཞིན་ཁོ་ན་ལགས།། །།

རང་གི་རང་ལ་འཛུར་བརྡར།


TNT01_Page_0805
[མ་དཔེ་གཟིགས་ན་འདིར་གནོན།]

རྗེ་མཚན་ལྡན་གྱི་བླ་མ་སྐུ་དྲིན་ཅན། །ཕ་ལྷ་དབང་གྲགས་པའི་ཞབས་ལ་འདུད། ཁོང་རྟོགས་ལྡན་མ་ཡིན་གྲུབ་ཐོབ་ཡིན། །གྲུབ་ཐོབ་མ་ཟེར་སངས་རྒྱས་གྱིས། །ལས་ངན་མ་དག་པས་མི་ངས་ཀྱང༌། །སྔོན་བླ་མ་སངས་རྒྱས་སེམས་ཅན་དུ་མཐོང༌། །དུས་དེ་ཙམ་ལྟས་ན་ཆོས་སྐུར་གདའ། །སྐུ་གསུམ་རིན་པོ་ཆེ་ལ་གསོལ་བ་འདེབས། ཁྱེད་སྒྲུབ་པ་ལྷུར་ལེན་གྱི་ཚོགས་པ་ལ། །ངེད་གྲོང་ཁྲོད་འགྲིམས་པས་སྨྲ་ཅི་ཡོད། །འོན་ཀྱང་བླ་མ་དེའི་སྐུ་དྲིན་གྱི། །གདེང་གཅིག་ཡོད་པས་འདི་སྐད་ཞུ། །སྣང་བ་ཀུན་ངོ་སྤྲོད་དུ་ཤར་ཙ་ན། །ཡིག་ནག་གི་དགོས་པ་མི་གདའ་འོ། །དམིགས་མེད་ཀྱི་སྙིང་རྗེ་ཤར་ཙ་ན། །ཕྱོགས་རིས་ཀྱི་དགོས་པ་མི་གདའ་འོ། །ཞེན་པ་གཏིང་ནས་ལོག་ཙ་ན། །སྙན་གྲགས་ཀྱི་དགོས་པ་མི་གདའ་འོ། །རི་ཁྲོད་དབེན་པ་བསྟེན་ཙ་ན། །འགྲོགས་བཤེས་ཀྱི་དགོས་པ་མི་གདའོ། །གདམས་ངག་དང་བླ་མ་འཛོམ་དུས་སུ། །བློ་མང་གིས་ཁྱེར་བ་དེ་སྤོང་བ་ཞུ། །དམ་ཚིག་དང་སྡོམ་པ་བསྲུང་དུས་སུ། །དད་ལོག་དང་འཁྲུག་པ་སྤོང་བ་ཞུ། །དམ་ཆོས་ཀྱི་དོགས་པ་གཅོད་དུས་སུ། །ལོང་གཏམ་གྱི་ཆལ་ཆོལ་དེ་སྤོང་བ་ཞུ། །སྒྲུབ་པའི་རང་ཚུགས་འཛིན་དུས་སུ། །ངོ་དགའི་མཐུན་འཇུག་དེ་སྤོང་བ་ཞུ། །འོད་གསལ་གྱི་ཉམས་ལེན་བྲལ་གྱུར་ན། །སྣང་བ་


TNT01_Page_0806
[མ་དཔེ་གཟིགས་ན་འདིར་གནོན།]

ཀུན་བར་དོའི་འཁྲུལ་བར་གདའ། །གདམས་པ་ཟབ་མོ་མང་ཡོད་ཀྱང༌། །བརྩོན་འགྲུས་ཀྱི་ལག་དང་བྲལ་གྱུར་ན། །རྒྱ་མཚོའི་གཏིང་གི་ནོར་བུ་འདྲ། །བཟང་ཡང་ཕན་པར་མི་གདའོ། །བློ་དྲང་པོས་ཐམས་ཅད་ཤེས་ན་ཡང༌། །བདེན་བརྫུན་གྱི་ཁ་རྒྱག་བྱས་གྱུར་ན། །སྙིགས་དུས་ཀྱི་སྐྱེ་བོས་སྡིག་པ་གསོག །ངག་སྨྲ་བ་བསྐྱུངས་ལ་རང་སོ་བཟུང༌། །ཟ་རྒྱུ་དང་གོན་རྒྱུ་སྐྱིད་སྡུག་ཀུན། །རེ་ས་བླ་མ་ལས་མེད་པ་ལ། །དབུ་སྐོར་དང་ཁ་གཡོགས་གཏོང་བ་དེ་འཁྲུལ། །གེགས་སེལ་དང་བོགས་འདོན་དངོས་གཞིའི་སྐབས། །གདམས་ངག་གི་རྒྱལ་པོ་མོས་གུས་ཡིན། །ཟབ་དོན་གཞན་དུ་འཚོལ་ན་འཁྲུལ། །ལར་སྙིགས་དུས་ཀྱི་སློབ་མ་བླ་མ་ལ་འཁང༌། །གྲོས་ངན་གྱི་འགོ་དཔོན་ལ་ལྷ་རུ་འཛིན། །འཕྲལ་འཕྲལ་དུ་འདི་ཕྱི་གཉིས་མེད་ཡོང༌། །དེ་ལྷ་དང་ཕུང་འགོང་གཉིས་ནོར་བ་ཡིན། །སེམས་རང་བཞིན་མེད་པའི་གཏད་མེད་ལས། །ཉམས་དང་རྟོགས་པ་ཀུན་འཆར་ལགས་ཀྱང༌། །སྙིགས་དུས་ཀྱི་སྒོམ་ཆེན་ཀུན་ཡིད་མི་ཆེས། །བློ་རྩེ་ཚེ་འདིའི་མདུན་མ་ལ་གཏོད། །སྒོམ་ཆེན་གྲོང་དུ་འཁྱམས་ཀྱིན་གདའ། །དེ་དུག་དང་བདུད་རྩི་ནོར་བ་ཡིན། །ཉེ་བ་ནི་རྡོ་རྗེ་སྤུན་རང་ཉེ། །མི་ཀུན་ནི་སྡིག་པ་དེ་ལ་གསོག །དམྱལ་བའི་ས་བོན་ཁོ་ན་འདེབས། །མཆེད་གྲོགས་ལ་དག་སྣང་སྦྱོང་


TNT01_Page_0807
[མ་དཔེ་གཟིགས་ན་འདིར་གནོན།]

བ་ཞུ། །དབང་ཆོས་ཞུ་བ་སྐད་བྱེད་ན་ཡང༌། །བླ་མ་ལ་ཕྱི་མི་འཚོལ་བ་དང༌། །མི་གཞན་ལ་ནང་མི་བྱེད་པ་འདི། །དམ་ཁ་ལ་མ་ཉམས་དོན་ལ་ཉམས། །དམྱལ་བའི་གཏིང་རྡོ་ཞིག་ལགས་པས་སྤོང་བར་ཞུ། །ཇ་ཆང་དང་མར་སྐྲོག་གི་ལག་འཁྱོངས་ཀྱིས། །ཉེ་གནས་ཀྱི་ངོས་འཛིན་བྱེད་བྱེད་ནས། །སྒྲུབ་པ་པའི་རང་ཚུགས་བསྐྱལ་ཉེན་གདོག །རྒྱུ་སོང་ལ་ཕན་ཡོན་ཆུང་བ་ཞིག་གདའ། ཁ་བླ་མའི་ཞབས་ཏོག་སྒྲུབ་སྐད་པ། །ཕུགས་ཟ་རྒྱུས་མི་ཆོག་འཁྱེར་རྒྱུ་དགོས། །ལར་བྱས་པ་ལ་དྲིན་གཟོ་ཅུང་ཟད་མེད། །མོས་གུས་སྟོར་བ་དང་ཨ་ཅང་ཆེ། །ངན་སྨྲས་ཀྱི་བརྗོད་པ་ཆར་ལྟར་འབབ། །ཚིག་བརྗོད་པ་མཁས་ལ་རྟོག་དང་ཆེ། །དེ་འདྲ་ཡི་བླ་མའི་ཉེ་གནས་དེ། །དམྱལ་བ་རིན་གྱིས་ཉོ་བ་ཡིན། །དྲུང་ན་གནས་པ་རྣམས་གཟབ་པར་ཞུ། །ཚེ་མི་རྟག་མྱུར་དུ་འཇིག་པས་ན། །ཞག་གསུམ་ཙམ་ཁ་ནི་གསོ་བ་ལ། །གཏན་གྱི་མདུན་མ་མ་རླག་ཅིག །བློས་བྱས་ཀྱི་སྟོང་པ་དང་དམིགས་བཅས་ཀྱི་ལམ། །རང་གིས་རང་ཉིད་འཆིང་བ་ཡིན། །བྱར་མེད་ངང་དུ་ཞོག་དང་སྒོམ་ཆེན་ཀུན། །བྱར་མེད་ཀྱི་བསྒོམ་འདི་མ་བྱུང་ན། །དགེ་སྦྱོར་གྱིས་རྐྱེན་ཐུབ་མི་ཡོང་མཆིས། །འདོད་ཆགས་དང་ཞེ་སྡང་གཏི་མུག་གསུམ། །ལམ་དུ་ཁྱེར་ལུགས་ཤིག་མ་ཤེས་ན། །དཔའ་བོ་ལག་ཆ་མེད་པ་དང་འདྲ། །བློ་བདེ་བའི་


TNT01_Page_0808
[མ་དཔེ་གཟིགས་ན་འདིར་གནོན།]

དུས་ཅིག་མེད་མེད་འདྲ། །རླུང་སེམས་ཚགས་སུ་མ་ཚུད་ན། །བློ་ཆོས་སུ་སོང་བ་སྐད་བྱས་ན་ཡང༌། །ངེས་འབྱུང་ནི་ན་བུན་བཞིན་དུ་ཡལ། །ཉམས་ཀྲ་ཀྲི་ཅུང་ཟད་ཤར་བ་ཡང༌། །སོས་ཀའི་ལྡེང་ཀ་བཞིན་དུ་བསྐམས། །མཐར་ཐ་མལ་དུ་འགྲོ་བའི་དུས་ཤིག་འདུག །རླུང་སེམས་ལ་འཇུར་བརྡར་མཛད་པ་ཞུ། །གཞན་ཡང་གྲྭ་རིགས་ཀུན་གྱིས་དགོངས་འཚལ་བ་ལ། །རང་གི་ཆོས་ཉམས་སུ་མི་ལེན་པར་གཞན་ཉམས་ལེན་བྱེད་པ་ལ་སྐུར་བ་མ་འདེབས། །ཆོས་ཀྱི་བར་ཆད་མ་བྱེད། ཁེ་འདོད་ནོར་གསོག་མ་བྱེད། །སྡེབས་དང་དཀྲུག་ལ་མ་དགའ། །རང་གིས་རང་མཚང་མ་སྟོན། །གྲོགས་ཀྱི་སྐྱོན་འཚང་མ་འདྲུ། །ཁ་མང་དགྲ་ཡངས་མ་འགྱེད། །ཀླད་མེད་ངོ་འཛིན་མ་བྱེད། །དཀོན་མཆོག་གི་རྫས་ལ་མ་རྔམ། །བླ་མའི་ནོར་ལ་མ་ཟ། །གཞན་ནོར་ལ་ལྟོག་པ་མ་བྱེད། །ཅི་བྱེད་ཆོས་དང་མཐུན་པར་གྱིས། །རང་གི་རང་ལ་འཛུར་བརྡར་འཚལ། །

སྒོམ་ཆེན་རྣམས་ལ་གདམས་པ།


TNT01_Page_0809
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། ལོངས་སྤྱོད་ཀྱི་ཁེ་སྤོགས་བྱེད་པ་སྟེ། །ངེད་རང་ཆོས་པ་ལ་རུང་མ་ཡིན། །དུས་ནམ་ཞིག་བླ་མ་སངས་རྒྱས་དུས། །མ་དག་པའི་འཁོར་དུ་འོང་ཞེས་གསུངས། །ད་དགེ་སྦྱོར་གང་ཡོང་མ་གཏོགས་པ། །འབྲུ་ཚོང་གི་འཕེལ་འགྱེད་མི་མཛད་པ་ཞུ། །འཕྲལ་འདོད་པ་ཆུང་ཞིང་ཆོག་ཤེས་པ། །ནམ་ཞིག་དག་པའི་འཁོར་དུ་འོང༌། །དེ་ལྟ་འདམ་ཁ་ཡོད་ཕྱིར་ལ། །དག་པའི་


TNT01_Page_0809
[མ་དཔེ་གཟིགས་ན་འདིར་གནོན།]

འཁོར་དང་མཛད་པ་ཞུ། །དམ་པའི་ཆོས་ལ་གེགས་བྱེད་ན། །ཕ་མ་དང་མཆེད་གྲོགས་ཡོན་མཆོད་སོགས། །སུ་ཡིན་ཀྱང་བདུད་དུ་འབབ་པར་གདའ། །མི་ཆོས་ཀྱི་འབྲེལ་འདི་སྤོང་བར་ཞུ། །སྙིང་རྗེ་དང་ཞེན་ཆགས་ངོ་བོ་གཅིག །འཁོར་འདས་ཀྱི་ལམ་ལ་ནོར་སོ་ཡོད། །ཆོས་དང་ཅི་མཐུན་མ་གཏོགས་པ། །མི་ཡི་ངོ་བསྲུང་ལ་མ་དགའ་མཛོད། །རང་ཆོས་ལྡན་དུ་སྡད་ནས་འདུག་ཙ་ན། །མི་ཀུན་གྱིས་གུས་པ་བྱེད་པར་འདུག །ཆོས་འགལ་གྱི་སྤྱོད་པ་སྤོང་བར་ཞུ། །ཡང་ཡང་སྐྱེ་བ་འདི་སྡུག་རེ་བསྔལ། །སྐྱེ་མེད་མངོན་སུམ་དུ་མ་གྱུར་པར། །རྩེ་གཅིག་ཏུ་སྒོམ་པ་འདི་གལ་རེ་ཆེ། །སེམས་ཀྱི་གཞི་རྩ་ཆོད་པ་ཞིག་འཚལ། །དགེ་སྦྱོར་གྱི་སྒང་ལ་འབུང་དུས་སུ། ཁ་ཧེ་ཧེ་ཟེར་བའི་ལོང་གཏམ་མཁན། །དགེ་སྦྱོར་གཅོག་པའི་ཕུང་འདྲེ་ཡིན། །གྲོགས་དང་འབྲེལ་བ་མི་མཛད་ཞུ། །རང་སྒྲུབ་པ་ཉམས་སུ་ལེན་ཙ་ན། །ཇ་ཆང་གི་ཟས་བསྐོར་བྱེད་པ་སྟེ། །གཡན་པ་ཕྲུག་པའི་བདེ་བ་འདྲ། །བདུད་ཀྱི་མགོ་བསྐོར་ཞིག་མ་ལགས་སམ། །ཡོང་ངེས་ཤེས་པའི་འཆི་བ་ལ། །མེད་ཐབས་མེད་པ་དམ་ཆོས་ཡིན། །ཚེ་འདིའི་བྱ་བ་དོན་མེད་དུ་འདུག །ཕྱི་མའི་བསོད་ནམས་གལ་རེ་ཆེ། །རང་སེམས་ཆོས་སྐུར་མ་རྟོགས་ན། །དངོས་གྲུབ་ཆེན་པོ་བརྒྱད་པོ་ཡང༌། །


TNT01_Page_0810
[མ་དཔེ་གཟིགས་ན་འདིར་གནོན།]

སྤྲོས་བཅས་ཀྱི་མགོ་བསྐོར་ཙམ་དུ་གདའ། །དབང་སྡུད་དང་དྲག་པོའི་འཕྲིན་ལས་དང༌། །མིག་མཐོང་དང་རྣ་སྙན་ཁྲུས་ཆོག་སོགས། །ཉམས་ལེན་པ་ལ་བདུད་དུ་འབབ། །འགྲོ་བ་ལ་ཕན་ངེས་མ་གཏོགས་པ། །གྲོང་ཆོག་ལ་དགའ་བ་མི་མཛད་ཞུ། །བདེ་སྡུག་དང་སེམས་སྣང་གང་བྱུང་ཡང༌། །ཉམས་ལ་མ་ཞེན་སྒོམ་པར་ཞུ། །མཛའ་མཛའ་འདུས་པའི་ཕོ་ཁྲོམ་ལ། །ཆགས་སྡང་གི་ལོང་གཏམ་འཐག་པ་སྟེ། །དྲིན་ཅན་གྱི་བླ་མའི་ཐུགས་དཀྲུགས་ཤིང༌། །རང་གཞན་གྱི་དགེ་སྦྱོར་གཅོག་པས་ན། །མཆུ་བསྡུར་ལ་དགའ་བ་མི་མཛད་ཞུ། །ཉམས་ལེན་བྱེད་པའི་ཆོས་པ་ལ། །དགྲ་གཉེན་ཉེ་རིང་མི་ཡོང་བས། །མཐུན་མཐུན་གྲ་སྡེབས་ཀྱི་དཔུང་གཞིབས་ཏེ། །བསྟན་པ་བཤིག་པའི་དད་མ་ཡིན། །དབེན་དང་སྡེབས་དཀྲུགས་མི་འཚལ་ལོ། །བླ་མ་དང་དགེ་འདུན་གྱི་སྐྱོན་གླེང་སྟེ། །རང་ཟོང་རང་གིས་འཚོང་བ་ཞིག་ལགས། །ཡོན་བདག་གཤེ་སྐུར་བྱེད་པ་སྟེ། །རྒྱལ་ཁམས་ཀུན་དད་པ་ཟློག་པ་ཞིག་འོང༌། །མི་ནག་ལ་ཁ་སྤྱད་ཐལ་བ་སྟེ། །རང་ཚུགས་མི་ཟིན་གཞན་དབང་དུ་ཐལ། །ཆོས་ཚུགས་དང་ལྟག་ཚུགས་མ་ཤོར་བར། །འཛིན་ཚུགས་འཚམ་པོ་མཛད་པ་ཞུ། །དངོས་གྲུབ་ཀྱི་རྩ་བ་ཡིན་པས་ན། །བླ་མ་ལ་མོས་གུས་འབྲལ་མེད་འཚལ། །བྱིན་རླབས་ཀྱི་སྣ་ཁ་རྣོ་བའི་ཕྱིར། །ཡི་དམ་བསྒོམ་


TNT01_Page_0811
[མ་དཔེ་གཟིགས་ན་འདིར་གནོན།]

བཟླས་ལ་རེམ་པར་འཚལ། །བསྟན་པ་བསྲུང་དུས་དགོས་པས་ན། །ཆོས་སྐྱོང་གི་བཟླས་བརྗོད་བརྩོན་པར་ཞུ། །འཕྲལ་དུ་སྤྱོད་པ་གཙང་བ་དང༌། །ཕུགས་སུ་དག་སྣང་ཆེ་བ་དང༌། །མཆེད་གྲོགས་ནང་ཁ་གཤིན་པ་དང༌། །མགོ་ཡང་བློ་མངས་མི་བྱེད་པ། །སྒོམ་ཆེན་ཀུན་ལ་གནད་དུ་ཆེ།། །།མངྒལཾ། །

མཻ་ཏྲི་དྷརྨ་བྷུ་ཏི་ལ་གདམས་པ།


TNT01_Page_0812
[མ་དཔེ་གཟིགས་ན་འདིར་གནོན།]

ལར་སྙིང་ནས་བློ་སྣ་མ་འགྱུར་ཞིང༌། །སེམས་དང་དམ་ཆོས་མ་འདྲེས་པས། །རློམ་སེམས་དང་བཟང་འཛིན་ཅི་བྱས་ཀྱང༌། །ཤུལ་རྗེས་ལེགས་པར་མི་གདའ་འོ། །མི་གཞན་ལ་ཁྱད་གསོད་དང་རང་མཐོང་སྐྱེ། །ཕྲག་དོག་དང་ངག་འཁྱལ་ཆགས་སྡང་འཕེལ། །བླ་མ་དང་མཆེད་གྲོགས་ལ་འཁང་ཞིང་འཁུ། །ནོར་འདོད་དང་ཁེངས་དྲེགས་སྐྱེས་པ་ཞིག །དེ་ཡིན་པ་བར་ཆད་ཀྱིས་ཁྱེར་རྟགས་ཡིན། །རློམ་ནི་སྤྱང་གྲུང་རྒོད་པོར་རློམ། །རྒྱུད་སེ་རེངས་ཡེ་རེངས་ལ་སོང་བ་དེས། །འབྲངས་མ་གཙང་རྫར་མ་ནར་མར་འོང༌། །སྔོན་གྲལ་འགོ་འཛིན་པའི་གནས་བརྟན་ཡང༌། །མཐའ་སྐྱ་སེར་ཀུན་གྱིས་འོག་ཏུ་སྡོད། །གནད་ཆེ་དུས་རིག་པ་མ་སྒྲིམས་ན། །ལས་ལན་གཅིག་ཉེས་པའང་འཆོས་པ་དཀའ། །ལར་ཆོས་དང་འགལ་བའི་ངན་སྤྱོད་འདི། །ཤི་ཕན་ཆད་དམྱལ་བའི་གཏིང་རྡོ་ཡིན། །ཚེ་འདིར་ཡང་མི་འཆའ་ཁྱི་རྒོད་པ། །བླ་མ་དང་བསྟན་པའི་ཞབས་


TNT01_Page_0812
[མ་དཔེ་གཟིགས་ན་འདིར་གནོན།]

འདྲེན་པོ། །ད་རྗེས་ངན་ཡང་ཡང་མ་འཇོག་པར། །སྙིང་ལ་རུས་པ་འཇུག་པར་མཛོད། །རུས་པ་ཆོས་སུ་སྒྱུར་བ་འཚལ། །བན་བཙུན་ཕྱུག་པོ་གཅིག་ཡོང་སྲིད་ཀྱང༌། །མཐོང་བ་ཙམ་གྱིས་སྐྱུག་རེ་ལོག །ཐོས་པ་ཙམ་གྱིས་ཡི་རེ་མུག །ད་བྱུང་ན་ལྟ་སྤྱོད་འཛོམ་པ་ཞིག་གྱིས། །མིན་ནའང་དཀའ་སྤྱད་སྡུག་རུས་ཀྱིས། །ཉམས་ལེན་ལ་འབད་འབུང་འདོན་པ་དང༌། །བློ་ཆོས་སོང་ཆོས་བརྒྱད་འགོ་སྙོམས་པའི། །ལྟ་བ་དང་སྒོམ་པ་བཟང་བ་ཞིག་དགོས། །ཡང་ན་སྤྱོད་པ་ཞིབ་ཏིག་གིས། །རང་སྤྱོད་ལ་སྐྱོན་འདོགས་མེད་པ་ཞིག་འཚལ། །གཉིས་མེད་སེང་གེ་ལ་མི་ཚེ་འདི། །སྔར་བསྐྱལ་ལ་ད་དུང་སྐྱེལ་སྐྱེལ་འདྲ། །སྤྱིར་སེམས་ཅན་ལས་ངན་སྤྱོད་པ་ལ། །ང་མི་གཅིག་གིས་བྱ་ཐབས་ག་ལ་ཡོད། །དད་པ་དང་དག་སྣང་སྙིང་རྗེ་དང༌། །ངེས་འབྱུང་དང་སྡོམ་སེམས་ལ་སོགས་པ། །གཅིག་ལས་གཅིག་ཆུང་གི་ཆོས་མེད་པོ། །ང་རྒྱལ་དང་འདོད་ཆགས་ཞེ་སྡང་དང༌། །ཕྲག་དོག་དང་ནོར་བརྣག་ལ་སོགས་པ། །ཆེ་མཉམ་དུ་འབར་བའི་རྒྱུད་ངན་པོ། །ངག་རྫུན་དང་ཕྲ་མའི་གཏེར་མོ་ཆེ། །འཕྲལ་བྱེད་དགུ་སྤྱོད་པ་གཙོག་པོ་སྟེ། །གང་ལ་བལྟས་ཀྱང་ལྟ་ཉན་མེད། །རློམ་སེམས་སུ་ཆེ་སྟེ་ཟེ་ལ་ལེ། །ལར་རང་མགོ་རང་གིས་མ་ཐོན་ན། །སྙིང་ལོགས་ནས་འཇུག་


TNT01_Page_0813
[མ་དཔེ་གཟིགས་ན་འདིར་གནོན།]

པ་ག་ལ་སྲིད། །ཕྱིན་ཆད་བླ་མའི་ཐུགས་རྗེ་ཡིས། །དམ་པའི་ཆོས་བཞིན་སྤྱོད་པར་ཤོག། །།ཏཱ་ར་ནཱ་ཐས་མཻ་ཏྲི་དྷརྨ་བྷུ་ཏི་ལ་གདམས་པའོ། །མངྒལཾ། །

སཱུཪྱ་བི་ཛ་ཡ་ལ་གདམས་པ།


TNT01_Page_0814
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། རྗེ་རྡོ་རྗེ་འཆང་ཆེན་གྲུབ་ཐོབ་ཚུལ། །མཚན་ཐོས་པ་ཙམ་གྱིས་དོན་ཆེན་ལྡན། །བདག་བུ་སློབ་ཀྱི་བློ་སྣ་ཆོས་ལ་སྒྱུར། ཁྱེད་ཐུགས་རྗེའི་གཏེར་ལ་གསོལ་བ་འདེབས། །དུས་ད་རེས་མི་ལུས་ཐོབ་པ་དང༌། །མཚན་ལྡན་གྱི་རྗེ་དང་མཇལ་སྐབས་འདིར། །ཉམས་ལེན་ལ་འབད་འབུང་མ་བཏོན་ན། །མི་ཚེ་དོན་མེད་དུ་འགྲོ་ཉེན་གདའ། །ཉམས་ལེན་གྱི་རྒྱལ་པོ་མོས་གུས་ཡིན། །མཐུན་རྐྱེན་གྱི་རྒྱལ་པོ་ངེས་འབྱུང་ཡིན། །བྱ་བྱེད་ཀྱི་རྒྱལ་པོ་བྱར་མེད་ཡིན། །མཉམ་བཞག་གི་རྒྱལ་པོ་རང་ཤར་ཡིན། །རྒྱལ་པོ་བཞི་ལྡན་གྱི་གདམས་ངག་འདི། །མཚན་ལྡན་བླ་མའི་གསུང་ངག་ཡིན། །གྲུབ་ཐོབ་ཡོངས་ཀྱི་ཐུགས་བཅུད་ཡིན། །ང་ཏཱ་ར་ནཱ་ཐའི་ཉམས་མྱོང་ཡིན། །མཚན་བཅས་ཀྱི་ཉམས་ལེན་ཕྱོགས་རེ་བ། །སྡུག་དུས་མི་ཕན་པའི་སྐྱིད་ཆོས་དེ། །ཐབས་མཁས་ཀྱི་བཀྲི་ཚུལ་ཡིན་མོད་ཀྱང༌། །སངས་རྒྱས་ལག་བཅངས་སུ་གཏོད་མི་ཐུབ། །རང་ཞལ་རྗེན་པར་ལྟ་བ་ལ། །མཚན་ལྡན་རྗེ་ལ་མོས་གུས་དགོས། །བླ་མ་སངས་རྒྱས་སྐད་པའི་ཁ་སྙན་དང༌། །ཅི་མཛད་ལེགས་པར་ལྟ་


TNT01_Page_0814
[མ་དཔེ་གཟིགས་ན་འདིར་གནོན།]

དགོས་ཀྱི་སྡུག་ཞེན་ཅན། །མ་བྱས་པས་མ་བྱུང་ཙམ་གྱི་མོས་གུས་དེ། ཁོ་གཞི་ནས་ལྟེམ་འགྱང་ལོག་གེ་བ། །ཆོས་རང་གིས་བྱེད་པ་སྙམ་ཚུགས་བཟང་ཡང༌། །དེ་སྒྲ་སྐད་ཙམ་ལས་དོན་མི་མཐོང༌། །སངས་རྒྱས་དང་སེམས་ཅན་གྱི་འཐེན་ཕྱོགས་མེད། །ཐུགས་ཆོས་སྐུ་སྐྱེ་མེད་ཉག་གཅིག་ལ། །མཛད་སྤྱོད་ཉེས་ནའང་ཉེས་གོ་ཆོད། །ཕྱོགས་མེད་ཀྱི་འགྲོ་དོན་རྒྱ་རེ་ཆེ། །བྱིན་རླབས་ཞུགས་རུང་མ་ཞུགས་རུང༌། །དངོས་གྲུབ་ཐོབ་རུང་མ་ཐོབ་རུང༌། སྐྱབས་གནས་གཞན་ན་མེད་དོ་ཞེས། །བློ་ཐག་ཆོད་ལ་གསོལ་བ་ཐོབ། །ཐུགས་ཡིད་དབྱེར་མེད་དུ་མཉམ་པར་ཞོག །སྒོམ་མི་སྐྱེ་བའི་རང་དབང་ག་ལ་ཡོད། །ཟས་གོས་འཛོམ་པའི་སྐྱིད་འདོད་དེ། །དགེ་སྦྱོར་འཆག་ལ་གཡེང་བ་ཆེ། །མཐུན་རྐྱེན་དུ་མིང་བཏགས་རྣམ་གཡེང་དེ། །རྣལ་འབྱོར་པ་ལ་དགོས་པ་མེད། །ཡིད་ངེས་འབྱུང་སྐྱོ་ཤས་དྲག་པོ་དེ། །རང་གཅིག་པུར་སྡོད་ན་སྐྱོ་རོགས་ཡིན། །ལུས་ན་ཚ་བྱུང་ན་ནད་གཡོག་ཡིན། །ཟས་གོས་དྲན་པའི་རྣམ་གཡེང་ལ། །གདོང་ཟློག་བྱེད་པའི་མཐུན་རྐྱེན་ཡིན། །སྔར་མ་བྱས་པ་ཅིག་མེད་པ་ལ། །བྱས་ཚད་འཁོར་བའི་གཡོས་སུ་སོང༌། །ད་བྱར་མེད་ཀྱི་ངང་དུ་ལྷོད་དེ་ཞོག །གཏན་གྱི་བཙན་ས་ཟིན་ཏེ་མཆིས། །བློས་བྱས་ཀྱི་དགེ་སྦྱོར་བརྩོན་ན་ཡང༌། །འགྱུར་མེད་ཀྱི་གཏན་ས་ཟིན་པ་མེད། །དབྱིངས་འཕོ་འགྱུར་


TNT01_Page_0815
[མ་དཔེ་གཟིགས་ན་འདིར་གནོན།]

མེད་པའི་གནད་ཀ་དེས། །རང་བབས་སུ་བཞག་ན་འགྱུར་མེད་ཐོབ། །རང་ཤར་ལ་བཟོ་བཅོས་མི་འཚལ་ཏེ། །བཅོས་མིན་ལ་ངོ་ཤེས་གལ་རེ་ཆེ། །སེམས་རྣམ་རྟོག་མེད་པར་རང་གསལ་ན། །གསལ་བ་གསལ་ཞིང་སྟོང་པ་དེ། །རང་ངོ་ཤེས་ན་ཆོས་སྐུར་འདུག །རང་གིས་རང་ངོ་ཤེས་དུས་ན། །རྟོག་པའི་ཆོ་འཕྲུལ་ཅི་ཆེ་ཡང༌། །བདེ་སྡུག་གི་འཆར་སྒོ་གང་མང་ཀྱང༌། །ཐམས་ཅད་ཆོས་སྐུའི་ཡོ་ལངས་ཡིན། །རྟོག་པ་དང་མི་རྟོག་ཁྱད་པར་མེད། །གནས་པ་དང་འགྱ྄ུ་བའི་རང་འཚང་ཞིག །ཆབ་རོམ་ཆུ་རུ་ཞུ་བ་ལྟར། །གང་སྣང་རང་སེམས་སུ་ལྷང་ངེ་བ། །སྣང་དུས་ནས་རྗེས་མེད་ཡུལ་ཡུལ་པོ། །སྟོང་ཙམ་གྱི་འཆར་སྒོ་མ་འགགས་པ། །ཡ་གི་སངས་རྒྱས་ཀྱི་སྐུ་གསུམ་ནས། །མ་གི་དམྱལ་ཁམས་ཡན་ཆད་ཀུན། །ཐམས་ཅད་མི་འཆར་བྱ་བ་མེད། །ཇི་ལྟར་ཤར་ཡང་སྤྲོས་དང་བྲལ། །ངག་བརྗོད་པ་ཀུན་གྱི་ཡུལ་ལས་འདས། །སེམས་རང་རིག་བདེ་བ་ཆེན་པོར་མྱོང༌། །སླར་སྤྲོས་བཅས་ཀྱི་དགེ་བ་གོང་འཕེལ་བྱ། །ཐམས་ཅད་ཕྱག་ཆེན་གྱི་ཡོ་ལངས་ཡིན། །ཐབས་ཤེས་རབ་ཚོགས་གཉིས་རྫོགས་པ་ལས། །སངས་རྒྱས་ཀྱི་དགོངས་པ་རྟོགས་པ་ཡིན། །དེ་ཉམས་སུ་བླངས་ན་བདུད་རྩི་འདྲ། ཁ་ལྟར་ཤོར་ན་སྟོང་ཤོབ་ཡིན། །རྒྱུད་ཐོག་ཏུ་ཉམས་སུ་ཡོངས་བ་


TNT01_Page_0816
[མ་དཔེ་གཟིགས་ན་འདིར་གནོན།]

ཞིག་འཚལ། །ཉམས་ལེན་ལ་རང་བྱན་ཆུད་པ་ཞིག་ཞུ།། །།ཞེས་པའང་ཏཱ་ར་ནཱ་ཐས་སཱུཪྱ་བི་ཛ་ཡ་ལ་གདམས་པའོ། །མངྒལཾ། །

ཟླ་རི་བ་གྲགས་བཟང་ལ་གདམས་པ།


TNT01_Page_0817
[མ་དཔེ་གཟིགས་ན་འདིར་གནོན།]

ན་མོ་གུ་རུ་ཝེ། བླ་མ་རིན་ཆེན་ཞབས་ལ་འདུད། །བུ་ཁྱོད་མངའ་རིས་སྟོད་ཕྱོགས་སུ། །འགྲོ་བར་བཞེད་ན་དམ་ཆོས་ཀྱི། །རིན་ཆེན་ཕྲེང་འདི་རྫོངས་སུ་འབུལ། །རྙེད་དཀའ་དལ་འབྱོར་མི་ལུས་འདི། །རང་ཡང་ལོ་བརྒྱ་མི་འདའ་ཞིང༌། །དོ་ནུབ་རང་ཡང་གདེངས་མེད་པས། །ཚེ་འདིའི་ལས་ཐབས་མ་ཚར་བར། །འཆིའོ་སྙམ་དུ་སྐྱོ་ཤས་བསྐྱེད། །ངན་སོང་གསུམ་ན་སྐྱིད་མེད་ཅིང༌། །ལྷ་མིར་སྐྱེས་ཀྱང་སྡུག་བསྔལ་དང༌། །གང་དུ་བསྡད་ཀྱང་བཙོན་ར་འདྲ། །སུ་དང་འགྲོགས་ཀྱང་བཙོན་རྫི་འདྲ། །ལོངས་སྤྱོད་ཐམས་ཅད་བཙོན་ཆོས་འདྲ། །འདི་ལས་ནམ་ཞིག་ཐར་ཞེས་སོམས། །མར་གྱུར་འགྲོ་བ་འདི་ཐམས་ཅད། །འཁོར་བར་འཁྱམས་པ་སྙིང་རེ་རྗེ། །རང་ཉིད་ཞུ་བདེས་མི་ཆོག་པས། །ད་ལྟ་སངས་རྒྱས་ཐོབ་བྱ་ཞེས། །སེམས་བསྐྱེད་དྲག་པོ་བསྒྲུབ་པར་བྱ། །དམྱལ་བར་བདག་ཉིད་འགྲོ་དགོས་ཀྱང༌། །གཞན་ལ་གནོད་པ་མི་བྱའོ། །རྒྱལ་སྲིད་རྔན་པར་སྟེར་ན་ཡང༌། །བྱང་ཆུབ་སེམས་མཆོག་མི་འདོར་ཞིང༌། །དོ་གལ་ཆེ་བ་ཅི་བྱུང་ཡང༌། །གཞན་ཕན་སེམས་མཆོག་རྗེད་མི་བྱ། །འཕེན་པ་མདའ་འཕངས་ལྟ་བུ་དང༌། །


TNT01_Page_0817
[མ་དཔེ་གཟིགས་ན་འདིར་གནོན།]

དམ་བཅའ་བྲག་རི་ལྟ་བུ་དང༌། །སེང་གེ་ལྟ་བུར་སྙིང་སྟོབས་དགོས། །གདུང་སེམས་ཆེན་པོས་བླ་མ་དང༌། །ཡི་དམ་ཐུགས་རྗེ་བྱིན་རླབས་ཅན། །ཀུན་ལ་གུས་པས་གསོལ་བ་གདབ། །ནད་པ་རྣམས་ལ་སྨན་པ་དང༌། །ལམ་སྟོར་ལོང་བའི་དམིགས་བུ་དང༌། །མཉམ་པ་ལྟ་བུའི་བློ་བཞག་གོ །སྐྱོ་ཤས་སྙིང་རྗེ་མོས་གུས་གསུམ། །སྔོན་འགྲོའི་མན་ངག་མཐར་ཐུག་ལགས། །གནས་ལུགས་ཉམས་སུ་ལེན་པ་ལ། །ལུང་རིག་གི་མཐའ་རྒྱ་ཆོད་ན་ཡང༌། །མན་ངག་མེད་ན་ཐོག་མི་ཁེལ། །ལུས་ནི་བསམ་གཏན་ཕྱག་རྒྱ་བཅའ། །ངག་ཀྱང་མི་སྨྲ་རང་སོར་བཞག །སེམས་ནི་མ་བཅོས་རང་ཐད་ལ། །མ་ཡེངས་གྲིམ་ལྷོད་རན་པར་བྱ། །གང་ཤར་དྲན་པའི་སོ་པས་བཟུང༌། །རྣམ་པ་མ་འགགས་གང་དུའང་འཆར། །རང་བཞིན་མ་གྲུབ་ཅི་ཡང་མིན། །སངས་རྒྱས་ཀུན་གྱི་དགོངས་པ་ཡང༌། །འདི་ཉིད་ཁོ་ན་ལགས་པར་ངེས། །རང་སེམས་ཆོས་སྐུ་ལམ་ཁྱེར་ཡིན། །སྟོང་པའི་སྣང་བ་མ་འགགས་པ། །ཕྱི་རུ་སྣོད་བཅུད་ལྷ་རུ་བསྒྱུར། །གྲགས་ཚད་སྔགས་སུ་ཤེས་པར་བྱ། །ནང་དུ་རང་ལུས་ཡི་དམ་ལྷ། །སྨྲས་ཚད་སྔགས་སུ་ཤེས་པ་དང༌། །དྲན་ཚད་སྒྱུ་མ་ལྟ་བུར་བསྒོམ། །བཟའ་བཏུང་བདུད་རྩི་གོས་ལྷ་རྫས། །ཅི་བྱེད་ཆོས་སུ་བསྒྱུར་བར་བྱ། །སྣང་བ་


TNT01_Page_0818
[མ་དཔེ་གཟིགས་ན་འདིར་གནོན།]

ལོངས་སྐུའི་ལམ་ཁྱེར་ཡིན། །སྐྱིད་ན་སེམས་ཅན་སྐྱིད་པར་སྨོན། །སྡུག་ན་ཀུན་གྱི་སྡུག་བསྔལ་བླང༌། །དགེ་བ་བྱས་ཚད་གཞན་དོན་བསྔོ། །བྱེད་སྤྱོད་སྤྲུལ་སྐུ་ལམ་ཁྱེར་ཡིན། །དངོས་གཞི་སྐུ་གསུམ་ལམ་ཁྱེར་རོ། །དེ་ནས་སངས་རྒྱས་མ་ཐོབ་བར། །དགོས་སུ་ཚེ་འདི་ཡང་དགོས་སུ། །གནས་སྐབས་ཀུན་ཏུ་དམ་ཆོས་དང༌། །མི་འབྲལ་འདུན་པ་དྲག་ཏུ་སྦྱང༌། །སྤྱོད་ལམ་ཀུན་དུ་དྲན་པ་ཡི། །ལྕགས་ཀྱུས་བཟུང་ལ་ཉམས་ལེན་དང༌། །རྟག་ཏུ་འབྲལ་མེད་བསྒྲུབ་པར་བྱ། །དགེ་རྩ་ཆོས་སྤྱོད་ཉམས་ལེན་ནི། །ཅི་བྱས་སངས་རྒྱས་རྒྱུར་བསྔོ་ཞིང༌། །སངས་རྒྱས་ནས་ཀྱང་སེམས་ཅན་རྣམས། །བླ་མེད་མཆོག་ལ་འགོད་པ་ཡི། །སྨོན་ལམ་ནན་ཏན་ཆེན་པོས་འདེབས། །འཕེན་པ་དྲན་པ་བསྔོ་བ་གསུམ། །རྗེས་ཀྱི་ཉམས་ལེན་མཐར་ཐུག་ཡིན། །སྤྲོས་བྲལ་ངང་ནས་སྤྲོས་བཅས་ཀུན། །རྩེ་གཅིག་ཉམས་སུ་ལེན་པར་ཞུ། །གང་ལའང་འཛིན་པ་མི་བྱེད་པར། །སོ་མའི་ཚུལ་གྱིས་ཉམས་ལེན་མཛོད། །སྔོན་ཆད་མང་དུ་བཤད་པ་ཡི། །སྙིང་པོ་འདིས་ཀྱང་དགའ་བ་སྐྱེ།། །།ཞེས་པ་ཏཱ་ར་ནཱ་ཐས་སྨྲས་པའོ། །མངྒལཾ། ཟླ་རི་བ་གྲགས་བཟང་ལ་གདམས་པའོ། །

ཟླ་བ་རི་པ་གྲགས་པ་བཟང་པོ་ལ་ཉེ་བར་གདམས་པ།


TNT01_Page_0819
[མ་དཔེ་གཟིགས་ན་འདིར་གནོན།]

ན་མོ་གུ་ར་ཝེ། བདག་འཆོལ་བའི་རྣལ་འབྱོར་རྒྱལ་ཁམས་པས། །ཉམས་མྱོང་ཀུན་སྨྲ་རུ་ཅུང་མ་བཏུབ། །ཚིག་ཅུང་ཟད་བརྗོད་ན་ཇི་ཙུག་འོང༌། །ཐུགས་ལ་མི་འཕྲོད་ན་ཞོག་ལ་ཐོང༌། །བླ་མཆོད་དུ་མིང་བཏགས་ཀྱི་ལྟོ་ཟན་འདི། །རང་ཚུགས་འཇིག་པའི་རྒྱུ་གཅིག་གདའ། །དབེན་པར་བསྡད་ན་མི་ལེགས་སམ། །མཐའ་རྒྱ་མ་ཆོད་པའི་དགེ་སྦྱོར་འདི། །ཟོམ་ཟོམ་གྱི་བཟང་རྫུ་ལས་མ་འདས་པས། །བརྡར་ཤ་བཅད་ན་མི་ལེགས་སམ། །བརྒྱུད་པ་ཁུངས་མེད་ཀྱི་ཆོས་ཐོབ་ཀྱང༌། །བྱིན་རླབས་དང་དངོས་གྲུབ་མི་འབྱུང་བས། །ཐུག་སར་ཐུག་ན་མི་ལེགས་སམ། །ཤེས་རབ་ཆུང་ལ་དོགས་པར་ཆེ། །འདི་མོས་གུས་མི་སྐྱེ་བའི་སྔ་ལྟས་ལགས། །ཐེ་ཚོམ་སྤངས་ན་མི་ལེགས་སམ། །གཞོག་ཐབས་མེད་པའི་བྱ་གཞག་འདི། །ཚེ་སྟོང་ཟད་རུ་གཏོང་བའི་བདུད་ཅིག་ལགས། །ལིངས་ཀྱིས་སྐྱུར་ན་མི་ལེགས་སམ། །གྲོང་ཆོག་རྒྱུག་པའི་དགོན་པ་དེ། །མིང་ཆོས་པར་བཏགས་པའི་ཁྱིམ་པ་ཡིན། །ལུང་སྟོང་འགྲིམས་ན་མི་ལེགས་སམ། །རི་ཁྲོད་དུ་ཟང་ཟིང་གི་འབྱོར་པ་དེ། །དགོན་པར་བསྡད་པ་དོན་མེད་དུ་གཏོང༌། །རྩེ་གཅིག་ཏུ་སྒྲུབ་ན་མི་ལེགས་སམ། །ལར་དྲན་ཚད་ལག་ཏུ་བླངས་པ་ལ། །ལྷ་འདྲེ་མི་གསུམ་ཞེ་ཁྲེལ་འདོད། །མདུན་མ་རྩེ་གཅིག་དྲིལ་ན་མི་ལེགས་སམ། །ཚིག་བརྗོད་པ་ཙམ་ལ་ཞེན་པ་དེ། །དོན་སྤྱིར་ལས་པའི་བཟང་འཛིན་ཡིན། །ཚིག་བརྗོད་པ་སྤངས་ན་མི་ལེགས་སམ། །སྤྲོས་བྲལ་དང་སྨྲ་བསམ་བརྗོད་མེད་སོགས། །ལེགས་ལེགས་དང་ཟབ་ཟབ་ཅི་སྨྲས་ཀྱང༌། །དོན་གྱིས་ཐོག་ཏུ་ཕེབས་དུས་མེད། །བརྟགས་པའི་


TNT01_Page_0820
[མ་དཔེ་གཟིགས་ན་འདིར་གནོན།]

མཐའ་ལ་ཐུག་དུས་མེད། །སེམས་ལས་ཆེ་བ་ཁོ་ནར་ཟད། །མ་བརྟགས་བར་ཀློད་ན་མི་ལེགས་སམ། །བསྐྱེད་རིམ་མི་གསལ་བའི་མོག་མོག་འདི། །བོགས་སུ་མི་ཐོན་ཞེ་རེ་སུན། །ཅི་གསལ་བྱས་ན་མི་ལེགས་སམ། །ཉལ་བར་འདོད་དང་འཕྲེད་སྙེས་འདོད། །ཉི་མ་ལ་སྡོད་འདོད་ཀྱི་ངན་ལང་འདི། །ཉམས་ལེན་བྱེད་སྐད་བྱས་ཀྱང་བྱེད་དུས་མེད། །སྡུག་སྲན་སྐྱེད་ན་མི་ལེགས་སམ། །བསམ་མནོ་གཏོང་དགོས་ཀྱི་གལ་པོ་ཆེ། །དགོས་ངེས་ཀྱི་ཉམས་ལེན་རླུང་ལ་བསྐུར། །རྟོག་མེད་ལ་ཞེ་བཅད་མི་ལེགས་སམ། །མ་ནུས་པ་སངས་ནས་བྱེད་སྙམ་སྟེ། །སྙོམ་ལས་ཀྱི་བདུད་ལ་འབྱམས་ཀྱིན་གདའ། །འཕྲལ་དེ་འགྲོག་འབུངས་ན་མི་ལེགས་སམ། །རྒྱུ་མེད་ལ་འབྲས་བུ་ཡོང་ལ་རེ། །འཕྲལ་འཕྲལ་དུ་རྟགས་གཅིག་ཡོང་ལ་རེ། །མཁས་བཙུན་དང་གྲུབ་ཐོབ་ཀྱི་སྙན་གྲགས་འདོད། །ལྐོག་མི་ཐུབ་པའི་ཚུལ་ཆོས་ལ་བསྙེན་པ་སྐྱེལ། །བརྫུན་པོ་ཆེ་སྤངས་ན་མི་ལེགས་སམ། །བླ་མའི་བཀའ་ལ་ངེས་ཤེས་ཤིག་བསྐྱེད། །གྲུབ་ཐོབ་གོང་མའི་རྣམ་ཐར་ཞིག་སོམས། །རང་མཐོང་གང་སྐྱེས་དེ་སུབས་ལ་ཞོག །ལར་ལ་ཚད་མེད་པས་ཙོག་གེ་སྡོད། །དེ་བདེན་སྙམ་འདུག་ན་ཐུགས་ལ་ཞོག །མ་འཐད་ན་རྣ་བའི་གོང་ག་ལ་ཐོང༌། །ཉན་ཀྱང་ང་ལ་དགའ་ཞེན་


TNT01_Page_0821
[མ་དཔེ་གཟིགས་ན་འདིར་གནོན།]

མེད། །མ་ཉན་ཀྱང་ང་ལ་ཞེ་སྡང་མེད།། །།ཅེས་པའང་ཟླ་བ་རི་པ་གྲགས་པ་བཟང་པོ་ལ་ཉེ་བར་གདམས་པ་ཏཱ་ར་ནཱ་ཐས་སོ། །དགེའོ། མངྒལཾ། །

དད་ལྡན་རྣམ་རྒྱལ་ལའོ། །


TNT01_Page_0822
[མ་དཔེ་གཟིགས་ན་འདིར་གནོན།]

ན་མོ་གུ་ར་ཝེ། །བུ་དད་ལྡན་ཉི་མ་རྣམ་རྒྱལ་བ། ཁྱེད་ན་ཚོད་བག་གཅིག་སྨིན་པ་ལ། །ཟབ་དོན་དང་མཇལ་བ་ཉམས་རེ་དགའ། ཁོང་མཁྱེན་རྒྱ་ཅན་དགེ་བཤེས་སུ་མིང་བཏགས་པའང༌། །རྒ་ཤི་སོ་ཐུག་ཐུག་སྤྲོས་པ་ལ་འདས། །འཆི་ཁར་མཚམས་སྦྱོར་འདྲ་བཟང་ཙམ་དང༌། །འཕྲལ་ལམ་ཁྱེར་བཟང་ཙམ་ཞིག་ལ་རེ། །རང་གྲོལ་གཅིག་ཉམས་སུ་མ་ལོངས་ན། །རང་དབང་འདུས་པ་ཞིག་མི་འོང་སྟེ་མཆི། །སེམས་འཕྲོ་འདུ་མ་མང་རང་དགའ་ཞོག །འབད་རྩོལ་མ་བྱེད་ལྷོད་ཀྱི་བཤིག །འཕྲོས་སོང་ན་དེ་ལ་སྒོམ་མེད་དུ་ལྟོས། །འབད་མེད་ཀྱི་དྲན་པ་འདི་ཆུ་བོ་ལྟར། །མ་ཡེངས་པ་རྒྱུན་མི་འཆད་ཅིག་མཛོད། །ཐུན་དང་ཐུན་མཚམས་ལ་ཁྱད་མེད་འཚལ། དུས་ནམ་ཞིག་འཆི་བ་དང་བར་དོའི་ཚེ། །སྤྲོས་བཅས་ཀྱི་དགེ་སྦྱོར་རྒྱང་དུ་ལུས། །སྤྲོས་མེད་ཉམས་ལེན་གལ་རེ་ཆེ། །སླར་མྱུར་དུ་ཕྲད་ནས་ཉམས་རྟོགས་ལ། །བོགས་འདོན་གང་དགོས་དེ་བྱེད་པ་ལགས། །ཞེས་པའང་ཏཱ་ར་ནཱ་ཐས་སོ།། །།མངྒལཾ།། །།

ཆ་བཀའ་བཅུ་པ་ལའོ། །


TNT01_Page_0822
[མ་དཔེ་གཟིགས་ན་འདིར་གནོན།]

༈ རབ་དཀར་སྟོན་ཀའི་སྤྲིན་བཞིན་དུ། །རབ་གཡོ་ལྷག་བསམ་དག་པ་ལས། །སྙན་ཚིག་སྦྲང་ཆར་འབབ་པ་ནི། །རིང་དུ་ཡིད་བདེའི་གསོས་སུ་གྱུར། །རྣམ་དཀར་བསིལ་ཟེར་ཅན་མཚོན་པའི། །གོས་བཟང་གྲུ་བཞི་ལྷམ་པ་ནི། །ཕྱོགས་ཀུན་དཀར་པོར་བྱེད་པ་འདི། །འགྲོ་དོན་རྒྱས་པར་འགྱུར་བའི་རྟགས། །ཉིད་བློ་ཆེན་སྡེ་སྣོད་ཤེས་པ་ལ། །བདག་ལྟ་བུས་ཇི་ལྟར་སྨྲ་བར་བྱེད། །གཞུང་ཟབ་ཅིང་རྒྱ་ཆེ་དཔག་དཀའ་བ། །ཐོས་བསམ་གྱིས་གཏན་ལ་ཕབ་པ་ཀུན། །སེམས་ལྷག་བསམ་དག་པས་ཀུན་བླངས་ཏེ། །བློ་གསལ་རྣམས་ལ་རྒྱ་ཆེར་ཤོད། །ཆོས་སྨྲ་བའི་གོ་སར་འདུག་ནས་ཀྱང༌། །ལོངས་སྤྱོད་འབའ་ཞིག་དོན་གཉེར་གྱིས། །ཆོས་ཀྱི་བྱ་བ་བཤོལ་བ་དེ། །ལུང་གི་བསྟན་པའི་ཆོམ་རྐུན་ཡིན། །འཕྲལ་འཆད་ཉན་སྨྲ་བར་སྣང་ན་ཡང༌། །བྱང་ཆུབ་སེམས་ཀྱིས་མ་ཟིན་ན། །ཆགས་སྡང་གི་རྒྱུ་ལ་མི་ཚེ་སྐྱེལ། །རང་གཞན་འཁོར་བ་ལས་མི་གྲོལ་བས། །གཞན་དོན་འཇོམས་པའི་ཆོམ་རྐུན་ལགས། །མདོ་སྡེ་དང་རྒྱུད་སྡེ་མཁས་གྲུབ་ཀྱི་གསུང༌། །སྔོན་བྱོན་བྱིན་རླབས་ཀྱི་གཟི་བརྗིད་ཅན། །གཞུང་འགྲེལ་བཟང་པོ་ལ་ནན་ཏན་འཚལ། །ཕྱི་རབས་ཀྱི་གཏམ་ལ་མ་དགོས་ཤིག །སྔོན་བྱོན་གྱི་མཁས་པ་གྲུབ་ཐོབ་ཡིན། །


TNT01_Page_0823
[མ་དཔེ་གཟིགས་ན་འདིར་གནོན།]

ཕྱི་རབས་ཀྱི་མཁས་པ་མཁས་བརྫུ་རུ་འདུག །དུས་བསྐལ་པར་ནོར་རྫས་སྦྱིན་པ་ལས། །ཆོས་ཉིན་གཅིག་སྦྱིན་པ་ལྷག་ཅེས་གསུངས། །གྲགས་འདོད་དང་ཆེ་འདོད་ཀྱི་ཆོས་བཤད་ལ། །ཆོས་ཟོང་དུ་བཙོངས་པའི་ཉེས་པའང་ཡོད། །རང་སེམས་དུལ་བ་འདི་གལ་རེ་ཆེ། །བཤེས་གཉེན་པའི་ཐུགས་ལ་དེ་ལྟར་ཞོག །མངྒལཾ། །

ཐབས་ཤེས་ཟུང་འཇུག་གདམས་ངག


TNT01_Page_0824
[མ་དཔེ་གཟིགས་ན་འདིར་གནོན།]

བདག་པོ་སྔགས་འཆང་བཀྲས་སྟོབས་ལ། །འདིར་ངེས་པར་བརྗོད་པ། སྡེབ་སྦྱོར་ཐ་སྙད་གཙོར་མཛད་མཁས་པའི་ཚོགས། །ཀུན་བརྟགས་ཚིག་ལ་ངེས་པའི་དོན་དུ་འཁྲུལ། །བློ་ཆུང་འགའ་ཞིག་མཉམ་བཞག་བསམ་གཏན་ལ། །ཕྱིར་ཕྱོགས་སྒོམ་འགྲོ་བོར་ནས་ཐོས་བསམ་བྱེད། མི་ཤེས་མུན་སྒོམ་ཙམ་གྱིས་ང་རྒྱལ་དང༌། །ལག་ལེན་ནོར་པའི་ཆོ་གས་འདའ་བའང་ཡོད། །བཟླས་བརྗོད་བརྩོན་སྤངས་སྟོང་ཉིད་སྙིང་རྗེ་དང༌། །རབ་བྲལ་བྱང་ཆུབ་མཆོག་ལ་ཤིན་ཏུ་རིང༌། །མདོ་སྡེ་གཞུང་ལུགས་གསང་སྔགས་ཐམས་ཅད་དང༌། །མན་ངག་ཀུན་ཡང་གཞོལ་ཞིང་འབབ་པའི་གནས། །ཆོས་ཀུན་རྩ་བ་རང་སེམས་གཅིག་པུ་སྟེ། །སེམས་ཉིད་གདོད་ནས་མ་གྲུབ་སྣང་སྟོང་ཡིན། །བཟང་ངན་བདེ་སྡུག་སྣང་བ་སྣ་ཚོགས་འདི། །རང་སྣང་འགག་པ་མེད་པའི་རྩལ་ལགས་པས། །རེ་དོགས་བཅས་བཅོས་མི་


TNT01_Page_0824
[མ་དཔེ་གཟིགས་ན་འདིར་གནོན།]

འཚལ་ལྷུག་པར་བཞག །ངོ་ཤེས་ངང་ནས་དམིགས་པ་ཕྱོགས་མེད་གཏོང༌། །གེགས་སེལ་བོགས་འདོན་ཀུན་གྱི་མཐར་ཐུག་ལགས། །དངོས་གྲུབ་འཕྲིན་ལས་སྒྲུབ་ལ་བརྩོན་པ་ཡང༌། །རེ་དོགས་བྲལ་བའི་དབྱིངས་ནས་གཡོ་མེད་སྤྱད། །ཐབས་ཤེས་ཟུང་འཇུག་ཅེས་བྱའི་གདམས་ངག་ལགས།། །།མངྒལཾ། དགེའོ།། །།

ཀམ་བཀའ་བཅུ་ལ་གདམས་པའོ། །


TNT01_Page_0825
[མ་དཔེ་གཟིགས་ན་འདིར་གནོན།]

སེམས་ངེས་མེད་རིག་སྟོང་སྣ་ཚོགས་འདི། །ཉམས་འདི་འཆར་མེད་པའི་གནད་ཀ་དེས། །མི་གཞན་དང་བློ་སྣ་མཐུན་དཀའ་ཡང༌། །ཆོས་ཟབ་དོན་ཅི་རིགས་སྟོན་ཞིང་མཆིས། །དྲང་དོན་དང་ངེས་དོན་ཞེས་བྱ་བ། །གནས་ལུགས་ཀྱི་སྟེང་ན་ཐ་དད་མེད། །རྩལ་ངེས་མེད་འཆར་བའི་རང་སེམས་འདི། །མིང་ཀུན་རྫོབ་སྐད་དུ་བཏགས་པ་ཡིན། །འདི་བརྟགས་ན་བརྗོད་བྲལ་གང་དུའང་མེད། །དེ་ངེས་དོན་སྐད་དུ་མཁས་རྣམས་འདོགས། །ལར་གང་ཡང་མིན་པ་ཞིག་ཅིར་ཡང་སྣང༌། །ཟུང་འཇུག་སྒྱུ་མའི་རྣལ་འབྱོར་འདི་སྒོམ་པ་ཞུ། །སྙིགས་དུས་ཀྱི་སྐྱེ་བོའི་ངན་སྨྲས་འདི། །སྔར་བྱས་ཀྱི་སྡིག་སྒྲིབ་འདག་ལ་ཕན། །འོ་སྐོལ་ནི་སྡིག་སྒྲིབ་སྦྱོང་མཁན་ཞིག་ལགས། །ཕན་འདོགས་ལ་མི་དགེས་མི་འཚལ་ལོ། །ལས་འབྲས་དགེ་སྡིག་གི་སྣང་བ་ཡང༌། །རང་སེམས་འཁྲུལ་པའི་སྣང་


TNT01_Page_0825
[མ་དཔེ་གཟིགས་ན་འདིར་གནོན།]

ངོ་ཞིག་ལགས། །ལས་སེམས་ཀྱི་ནང་བཞིན་བྱར་མེད་དུ། །བརྩིས་གདབ་མེད་པར་སྒོམ་པར་ཞུ། །རྣམ་སྨིན་ཀུན་དབྱིངས་སུ་བདག་ཏེ་མཆིས། །རང་སེམས་ནི་ཆོས་སྐུ་སྐྱེ་མེད་ཀྱི་ངང༌། །བླ་མ་ནི་ཆོས་སྐུའི་ངོ་བོ་ལགས། །རང་སེམས་དང་དབྱེར་མེད་དུ་ཤེས་ཙ་ན། སྐྱབས་གནས་ལ་འབྲལ་བ་མི་གདའོ། ཁ་གང་རིག་པའི་སྐྱོང་ཚུལ་འདི། །ཤི་གསོན་ལ་ཁྱད་པར་མི་གདོག་པས། །སྒོམ་པ་ལྷོངས་སུ་འཁྱུར་ཙ་ན། །བར་དོ་ཟེར་ཡང་གྲགས་སྟོང་ཡིན། །ཡེངས་མེད་དཔེན་གནས་ཀྱི་རི་ཁྲོད་དུ། །རྩོལ་གྲུབ་མེད་པའི་དབྱིངས་དེ་ལ། །ལེ་ལོ་མེད་པར་སྒོམ་པ་ཞུ། །ད་རེས་ལམ་སྣ་ཞིག་མི་ཟིན། །སེམས་གང་ཤར་ལྷུག་པ་མ་ལགས་པའི། །གཉེན་པོ་མ་རྙེད་པ་ལགས་མོད་ཀྱང༌། །ཐེ་ཚོམ་དང་བཟང་འཛིན་མི་འཚལ་ལོ། །གོ་ཆོད་པོའི་ཉམས་ལེན་ཤར་བ་ལ། །ཡིད་མི་ཆེས་བྱེད་ན་རང་ལ་སྡིག །བཟང་འཛིན་བྱེད་ན་ནི་གཡང་སར་ལྷུང༌། །ལོ་ཟླར་དཀར་བས་བརྩིགས་པའི་ཁང་པ་དེ། །ཉིན་གཅིག་ལ་བཤིག་ན་ལས་རོ་ཡིན། །མི་ཚེ་ཧྲིལ་པོར་བསྐྱལ་བའི་སྒོམ་དེ་ཡང༌། །རློམ་སེམས་ཀྱིས་ཁྱེར་ན་བྱུར་དུ་ཆེ། །སྣང་བ་དང་རྣམ་རྟོག་ཅི་ཤར་ལ། །སེམས་ཡེངས་མེད་ལྷུག་པ་བསྟེན་དགོས་ན། །དེ་ཕྱོགས་རེ་ཡིན་གྱི་མཐར་ཐུག་མིན། །


TNT01_Page_0826
[མ་དཔེ་གཟིགས་ན་འདིར་གནོན།]

ད་དུང་ཡང་རང་ཤར་ལ་ལྟ་བ་ཞུ། །སེམས་ཁོ་རང་གཉེན་པོ་ཡིན་སྙམ་སྟེ། ཁོ་གཉེན་པོར་འདུག་ན་འཁྲུལ་པ་ཡིན། །རྣམ་རྟོག་དང་སྣང་བ་རྟོག་མེད་གསུམ། །མིང་ཐ་དད་དོན་ལ་ཁྱད་པར་མེད། །སྤང་གཉེན་དང་སྨྲ་བརྗོད་ཟད་འདུག་ན། །གདམས་ངག་གི་རྒྱལ་པོས་སླེབ་པ་ཡིན། །དཀའ་སྤྱད་དང་ཞེ་རུས་འཛོམ་པ་ཡིས། །ཡུན་རིང་འབད་རྩོལ་མ་བྱས་པས། །མི་ཁོ་བོས་ཁྱེད་ལ་ཇི་ལྟར་འདོམ། །དོན་ཉམས་ལེན་གྱིས་རང་རྒྱུད་མ་གྲོལ་བ། །གཞན་གྲོལ་བར་འདོད་པ་འདི་ཨ་རེ་རེ། །རང་འགྱུར་མེད་ཀྱི་བརྟན་ས་མ་ཟིན་པར། །གཞན་འདྲེན་པར་བྱེད་ཟེར་ཨ་ཙ་མ། །སྔོན་ཉམས་མྱོང་དང་ལས་རྒྱུས་མེད་པ་ཡིས། །སྐྱེས་གཞན་གྱི་ལམ་སྣ་ཇི་ཚུག་ཡོང༌། །འོན་ཀྱང་བླ་མ་རྗེ་བཙུན་གྱི། །ཐུགས་རྗེ་དང་རང་གི་མོས་མཐུ་ཡིས། །རང་སེམས་ཀྱི་འཚང་ཀུན་བཏིང་ཁ་དེས། །ཅུང་ཟད་སྨྲ་བར་སྤོབས་ནས་བྲིས།། །།མངྒལཾ། དགེའོ།

ཇོ་ནང་དབུ་མཛད་རབ་འབྱམས་པ་བྱམས་པ།


TNT01_Page_0827
[མ་དཔེ་གཟིགས་ན་འདིར་གནོན།]

གཏིང་སྐྱེས་སུ་ཆོས་མཆོག་ལ། གང་ལས་སེམས་ཉིད་རིན་ཆེན་འདི་ནི། །རྟོགས་ན་ངོ་མཚར་ཆེ་བ་གཅིག་གདའ་སྟེ། །རྟོགས་པའི་དོན་དུ་སྒོམ་མཁན་གཅིག་ཀྱང་ཉུང་ངོ༌། །མི་ལུས་རིན་ཆེན་རྙེད་དཀའ་འདི་ལ། །ཆོས་ལ་འབུངས་ན་གྲོགས་གཅིག་གདའ་སྟེ། །དེ་ལ་འཇུག་པའི་མི་གཅིག་ཉུང་ངོ༌། །བྱིན་


TNT01_Page_0827
[མ་དཔེ་གཟིགས་ན་འདིར་གནོན།]

རླབས་ཅན་གྱི་བླ་མ་མཆོག་ལ། །མོས་གུས་བྱས་ན་རྟོགས་པ་འཆར་ཏེ། །སྙེམ་འཁྲིགས་མེད་པ་ཤིན་ཏུ་ཉུང་ངོ༌། །འགྲོ་དྲུག་དྲིན་ཅན་ཕ་མ་འདི་ལ། །སྙིང་རྗེ་ཤར་ན་སྒྲིབ་པ་འབྱང་ཀྱང༌། །ཕྱོགས་མེད་ལྷུན་གྲུབ་ཏུ་འཆར་བ་ཉུང་ངོ༌། །དེ་བྱར་མེད་ཀྱི་ངང་དུ་ཡེངས་མེད་འཇོག་ཅིང༌། །འབད་མེད་ཀྱི་བརྩོན་འགྲུས་ཕྱོགས་མེད་དུ་རྩོམ་པ། །མཚན་ལྡན་བླ་མར་མོས་གུས་ཀྱི་རྒྱབ་སྐྱོར། །དག་སྣང་རིས་མེད་ཕྱོགས་མེད་སྦྱོངས་ཤིག །སླད་ནས་མྱུར་བར་མཇལ་མཆིས།། །།འདིར་སྨྲས་པ། རྙེད་པ་དཀའ་བའི་མི་ལུས་འདི། །ཉམས་ལེན་ཆོས་ལ་མ་བཀོལ་ན། །ད་རེས་སྟོང་ལོག་བྱེད་དེ་མཆིས། །སྒོམ་ལ་འབུངས་དང་དད་ལྡན་གྱི་བུ། །མཚན་ལྡན་བླ་མ་དང་མཇལ་བ་ལ། །ཞབས་ཏོག་དང་སྒྲུབ་པས་མ་མཆོད་ན། །ལག་ཡོད་ཀྱི་དངོས་གྲུབ་ཕྱི་ལ་གཏོང༌། །མོས་གུས་ལ་འབུངས་དང་སྐལ་ལྡན་བུ། །འཆར་སྒོ་མ་འགགས་པའི་རང་སེམས་འདི། །འཛིན་མེད་ཀྱི་དབྱིངས་སུ་མ་བཅུན་ན། །གཟུང་འཛིན་གྱི་ངང་ལ་ཡར་ཏེ་མཆི། །བྱར་མེད་ཀྱི་ངང་ལ་ལས་མེད་དུ་ཞོག །ནམ་འཆི་ཆ་མེད་ཀྱི་ཚེ་ཐུང་འདི། །གཞན་དོན་ལྷག་བསམ་གྱི་མ་བསྒྱུར་ན། །གཅེས་འཛིན་གྱི་ངང་ལ་དོན་མེད་དུ་ལུས། །ལྷོད་དེ་ཀློད་དང་རབ་འབྱམས་པ། །སླར་ཡང་མྱུར་དུ་མཇལ་


TNT01_Page_0828
[མ་དཔེ་གཟིགས་ན་འདིར་གནོན།]

ཏེ་འོང༌། །ངེད་ཀྱིས་སྔར་ཞལ་གདམས་བསྐུར་བ་ལ་ལེགས་སོ་དང་ཐུགས་ལ་འཕྲོད་ཚུལ་འདུག་པས་དེ་ཙམ་ཞིག་གདམས་པ་ལགས།། །།ཇོ་ནང་དབུ་མཛད་རབ་འབྱམས་པ་བྱམས་པ་བ་ལའོ།། །།མངྒལཾ།། །།

གོང་དཀར་རྡོ་རྗེ་གདན་གྱི་དགོན་གཉེར་དཔོན་ལའོ། །


TNT01_Page_0829
[མ་དཔེ་གཟིགས་ན་འདིར་གནོན།]

ཡུན་རིང་འཁོར་བར་འཁོར་གྱུར་ཀྱང༌། །ད་ཙམ་ངེས་དོན་དང་ཞལ་མཇལ་བའི། །དད་ལྡན་གྱི་ཐུགས་ལ་འདི་ཞོག་དང༌། །ཉམས་ལེན་ལ་བློ་ཁ་ཕྱོགས་གསུང་པ། །སྤྱིར་ནི་རང་དོན་རང་ཡིན་ལགས་པས། །གཞན་ལ་ཡུས་སུ་མི་གདོག་སྟེ། །སེམས་ཅན་ལ་ཡང་དེ་རང་ཕན། །ངེད་གདམས་ངག་འབོགས་པའི་བླ་མ་ཡང༌། །སྙིང་ནས་རྗེས་སུ་ཡི་རང་བྱེད། །སྒྲུབ་པའི་ཁ་བཀོད་བསྐུར་གསུང་པ། །ཚིག་མང་ཀྱང་སྙིང་པོ་མི་གདའ་བས། །ཉམས་ལེན་ཆིག་འདྲིལ་དུ་བྱེད་པ་དང༌། །ཆོས་མིན་ཐམས་ཅད་སྤོང་བ་དེ། །གྲགས་འདོད་དང་གཞན་ལ་བརྙས་བཅོས་དང༌། །ང་རྒྱལ་དང་ལེ་ལོར་མ་སོང་བར་འཚལ། །སང་ཕོད་དང་སང་སྒོམ་སྙམ་ལགས་ཀྱང། །མི་ཚེ་ཡང་ངེས་པ་མེད་པ་དང༌། །འཆི་བ་ལ་དུས་བཏབ་མི་གདོག་པས། །ཤོམ་ར་ཐམས་ཅད་ཅམས་ཀྱིས་ཞོག །འདུན་གྲོས་ཐམས་ཅད་རྦད་ཀྱིས་ཆོད། །ལྷབ་ལྷུབ་ཐམས་ཅད་ཧྲིལ་གྱིས་བརྫཻས། །སྙིང་གི་ལུང་ཐག་ཡར་ལ་བསྟུངས། །དམ་ཆོས་ཟེར་བའི་


TNT01_Page_0829
[མ་དཔེ་གཟིགས་ན་འདིར་གནོན།]

སྒྲ་བོ་ཆེ། །དེ་ལྟར་བྱས་ན་ལག་ཏུ་ལོངས། །གཞན་ཁྱེ་ཉེན་གྱི་འཁོར་འདས་བརྩི་བརྩི་ནས། །དགོས་ངེས་ཀྱི་དམ་ཆོས་ཤུལ་དུ་ཕུལ། །སྤྲོས་པ་ཀུན་བཅད་ནས་ཚིག་འདྲིལ་འཚལ།། །།མངྒལཾ། །

མདོ་ཁམས་པ་ནང་སོ་ཀུན་དགའ་རིན་ཆེན་ལ་གདམས་པ་ཕྱག་ཆེན་ངོ་སྤྲོད།


TNT01_Page_0830
[མ་དཔེ་གཟིགས་ན་འདིར་གནོན།]

ན་མོ་རཏྣ་གུ་རུ། འགྲན་ཟླ་དང་བྲལ་བའི་རིན་པོ་ཆེ། །དུས་གསུམ་གྱི་སངས་རྒྱས་ཀྱི་དགོངས་པ་ཅན། །ཕྱི་ནང་གི་འཁྲུལ་པ་རང་སར་ཞིག །སྙིང་རྗེ་ཆེན་པོས་ཁྱབ་པའི་ཐུགས། །གཅམ་བུའི་མཛེས་ཆོས་སྤངས་ནས་ནི། །མངོན་ཤེས་དང་རྫུ་འཕྲུལ་ལ་མངའ་བརྙེས་པས། །ལྷ་འདྲེ་མི་གསུམ་གྱི་འགྲོ་དོན་མཛད། །དྲིན་ཅན་གྱི་བླ་མ་བྱིན་རླབས་ཅན། །ལྷ་དབང་གྲགས་པའི་ཞབས་ལ་འདུད། །མགོན་དེས་ཅུང་ཟད་བྱིན་བརླབས་པ། །མི་ངས་ཀྱང་གནས་ལུགས་ཚིག་གསུམ་འདི། །བུ་ཁྱོད་ལ་འདི་ལྟར་སྙིང་གཏམ་དུ་གདམས། །ངེས་འབྱུང་གི་དད་པ་སོ་མ་སྟེ། །ཆོས་བརྒྱད་ཀྱི་རླུང་གིས་མ་ཁྱེར་བར་འཚལ། །བྱིན་རླབས་ཀྱི་རྩ་བ་མོས་གུས་ལ། །གོམ་འདྲིས་དང་ལོག་ལྟས་མ་ཁྱེར་བར་འཚལ། །འདུས་བྱས་སྐད་ཅིག་གི་རང་བཞིན་ལ། །རྟག་འཛིན་གྱི་ལེ་ལོ་མི་འཚལ་ལོ། །སྡུག་བསྔལ་ཅན་འཁོར་བའི་གནས་ལུགས་ལ། །སྐྱིད་འདོད་ཀྱི་ཞེན་པ་ལོག་པ་ཞིག་འཚལ། །འགྲོ་


TNT01_Page_0830
[མ་དཔེ་གཟིགས་ན་འདིར་གནོན།]

དྲུག་དྲིན་ཅན་གྱི་ཕ་མ་ལ། །བྱམས་པ་དང་སྙིང་རྗེ་སྦྱོངས་དུས་འདིར། །གནོད་སེམས་དང་འགྲན་འདོད་མི་འཚལ་ལོ། །རང་ལུས་རྒྱལ་བའི་དཀྱིལ་འཁོར་ལ། །སྣང་སྟོང་ལྷ་སྐུར་རང་ཤར་གྱི། །དག་སྣང་གི་འཁོར་ལོ་སྐོར་རྒྱུ་ལ། །བརྡོས་བཅས་ཀྱི་ཞེན་པ་མི་འཚལ་ལོ། །གྲགས་སྟོང་ངག་གི་རང་བཞིན་དེ། །བྲག་ཅ་ལྟ་བུར་སྒོམ་རྒྱུ་ལ། །ཐ་མལ་གྱི་ལོང་གཏམ་སྣ་ཚོགས་ཀྱིས། །ཆགས་སྡང་གི་བཀྱེད་བེད་མི་འཚལ་ལོ། །སེམས་གང་ཤར་ཆོས་སྐུའི་ཡོ་ལངས་ལ། །ངོ་ཤེས་བྱར་མེད་ཀྱིས་སྒོམ་རྒྱུ་ལ། །རྣམ་གཡེང་ཕྱི་ལྟའི་རྣམ་རྟོག་གིས། །འཁོར་བའི་འཁོར་ལོ་མ་སྐོར་ཞིག །ཐ་མལ་རླུང་སེམས་ཀྱི་འཇུག་པ་འདི། །འཁོར་འདས་འབྱེད་པའི་ས་མཚམས་ཞིག་ལགས། །ལེ་ལོ་དང་བྱ་བ་ལ་མ་ཡེངས་པར། །རླུང་སེམས་དྲག་ཏུ་བཅུན་པ་ཞུ། །སེམས་ཀྱི་རྩ་བ་མ་ཆོད་ན། །གཏིང་སྐྱོན་མཐོན་པའི་གནད་ཀ་དེས། །གཉེན་པོ་མང་ཡང་མི་ཕན་པས། །རྩ་བྲལ་ཐོབ་ཕྱིར་དུ་འབད་པ་འཚལ། །ཡེངས་མེད་དུ་བསམ་གཏན་སྒོམ་དུས་སུ། །ལོངས་སྤྱོད་དང་བསོད་ནམས་ཐན་ཐུན་དེ། །བདུད་ཀྱི་ཕོ་ཉར་ཡོང་ལགས་པས། །ཅི་དགར་བོར་ལ་སྦྱིན་པར་ཐོང༌། །བར་ཆད་དངོས་གྲུབ་ཏུ་འཁྱར་བ་ལགས། །ནམ་ཞིག་སྒོམ་ཉམས་བཟང་བདེ་ན། །ཟང་འཛིན་དང་དགའ་


TNT01_Page_0831
[མ་དཔེ་གཟིགས་ན་འདིར་གནོན།]

བྲོད་བདུད་དུ་འོང༌། །ཉམས་ལེན་གྱི་རྒྱལ་པོ་ཞེན་མེད་ཡིན། །བྱར་མེད་དུ་ཞོག་ཅིག་གེགས་ལས་གྲོལ། །སེམས་རིག་པའི་འཆར་སྒོ་མ་འགགས་པ། །ཐམས་ཅད་ཆོས་སྐུའི་རྩལ་ཡིན་ཡང༌། །གང་ཤར་རྩ་བ་མ་ཆད་པར། །འོག་འགྱུར་འགྲོ་བའི་ཉེན་གདོག་པས། །རྩེ་གཅིག་དམིགས་པ་ལ་སྒྲིམ་པར་འཚལ། །ཞི་གནས་ཙམ་བརྟན་བརྟན་འདྲ་ན་ཡང༌། །མ་རིག་གཏི་མུག་ཏུ་བྱིངས་དོགས་ཡོད། །གང་ཤར་ངོ་ལྟའི་འུད་བཤད་ཀྱིས། །འཁྲུལ་པ་རྒྱ་འབྱམས་སུ་ཤོར་གྱིས་དོགས། །སྟོང་ཉམས་ཙམ་ཤར་བའི་ལྟ་སྐད་ཀྱིས། །ལས་འབྲས་ལ་ཆུད་ཟོས་མི་འཚལ་ལོ། །ལར་ཀུན་ལ་མོས་གུས་གནད་དུ་ཆེ། །དེ་དངོས་གྲུབ་ཀྱི་རྩ་བར་ངེས་ལགས་ཀྱང༌། །ཐོབ་འདོད་ཀྱི་རེ་དོགས་མི་འཚལ་ལོ། །ཞེན་མེད་ཀྱི་སྒོ་ནས་དགེ་སྦྱོར་ཀུན། ཁ་སྔོ་བས་རྒྱས་ཐེབས་ཀྱང་གལ་རེ་ཆེ། །ཡང་བླ་མ་ལ་གསོལ་བ་འདེབས་ན། མདུན་དུ་རྩ་བའི་བླ་མ་བཀྲག་མདངས་གཟི་བརྗིད་ལྡན་པ་བརྒྱུད་པའི་བླ་མ་ཡི་དམ་ཆོས་སྐྱོངས་མཁའ་འགྲོ་ཐམས་ཅད་ཀྱི་བསྐོར་བ། སྤྲུལ་པའི་ཕོ་ཉ་མང་པོ་སྤྲོ་བ་རང་ལ་དགྱེས་བཞིན་པ་བྱིན་གྱིས་རློབ་རློབ་ལྟར་བཞུགས་པ་ལ་མོས་གུས་དུང་བ་བྱས་ཏེ། དྲིན་ཅན་བླ་མ་རིན་པོ་ཆེ། །ཆོས་སྐུའི་ཐུགས་ལ་ལོངས་སྐུའི་གསུང༌། །སྤྲུལ་སྐུའི་


TNT01_Page_0832
[མ་དཔེ་གཟིགས་ན་འདིར་གནོན།]

ཚུལ་གྱིས་འགྲོ་དོན་མཛད། །མཚན་དཔེའི་གཟི་བརྗིད་འབར་བ་ལ། །གསུང་དབྱངས་ཡན་ལག་རྒྱ་མཚོའི་བཀའ། །ཐུགས་ནི་བདེ་གསལ་རྒྱ་མཚོ་འདྲ། །བརྒྱུད་ལྡན་བླ་མའི་ཚོགས་ཀྱིས་བསྐོར། །ཡི་དམ་ལྷ་ཚོགས་སྤྲིན་ལྟར་འཐིབས། །མཁའ་འགྲོ་མང་པོའི་ཚོགས་དང་བཅས། །ཆོས་སྐྱོང་བསྲུང་མ་ཁྲོམ་ལྟར་ཚོགས། །སྤྲུལ་པ་བུ་ཡུག་བཞིན་དུ་འཚུབས། །ཕོ་ཉ་མང་པོ་གློག་ལྟར་འཁྱུག །རིག་འཛིན་གྲུབ་པའི་ཚོགས་ཀྱིས་བསྐོར། །མཆོད་སྤྲིན་རྒྱ་མཚོའི་ཚོགས་དང་བཅས། །ཐུགས་རྗེའི་དབང་གིས་འདིར་བྱོན་ལ། །ད་ལྟ་བདག་ལ་བྱིན་གྱིས་རློབས། །མྱུར་བ་ཉིད་དུ་བྱིན་གྱིས་རློབས། །གདན་ཐོག་འདི་རུ་བྱིན་གྱིས་རློབས། །ལུས་ལ་བདེ་ཆེན་བསྐྱེད་དུ་གསོལ། །ངག་ལ་ནུས་པ་བསྐྱེད་དུ་གསོལ། །སེམས་ལ་ཡེ་ཤེས་དབབ་དུ་གསོལ། །དབང་བཞི་ད་ལྟ་བསྐུར་དུ་གསོལ། ཉམས་དང་རྟོགས་པ་བསྐྱེད་དུ་གསོལ། །འར་མ་འུར་མར་བྱིན་གྱིས་རློབས། །བན་མ་བུན་མར་བྱིན་གྱིས་རློབས། །ཆལ་མ་ཆིལ་མར་བྱིན་གྱིས་རློབས། །རྩ་བ་བརྒྱུད་པའི་བླ་མས་བྱིན་གྱིས་རློབས། །ཡི་དམ་ལྷ་ཚོགས་ཀྱིས་བྱིན་གྱིས་རློབས། །དཔའ་བོ་མཁའ་འགྲོས་བྱིན་གྱིས་རློབས། །ཆོས་སྐྱོང་བསྲུངས་མས་བྱིན་གྱིས་རློབས། ཀུན་འདུས་བླ་མས་བྱིན་གྱིས་རློབས། །རྗེ་བཙུན་བླ་མས་བྱིན་གྱིས་རློབས། །དེ་ནས་བླ་མའི་སྐུ་ལས་དབང་བཞི་བླངས། བླ་


TNT01_Page_0833
[མ་དཔེ་གཟིགས་ན་འདིར་གནོན།]

མ་རང་ལ་ཐིམ། རང་ཤར་ངོས་བཟུང་ངོ༌། །ཞེས་པ་འདི་ཡང་མདོ་ཁམས་པ་ནང་སོ་ཀུན་དཀའ་རིན་ཆེན་ལ། ཏཱ་ར་ནཱ་ཐས་གདམས་པ་སྟེ། །རྗེ་བཙུན་ལྷ་དབང་གྲགས་པའི་ཞལ་གྱི་གདམས་པ་ལ་བརྟེན་ནས་ཕྱག་ཆེན་ངོ་སྤྲོད་བྱས་པའི་རྗེད་ཐོར་བྱས་པའོ།། །།མངྒལཾ། །

དཀོན་མཆོག་རིན་ཆེན་ལ་གདམས་པའོ། །


TNT01_Page_0834
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། ཕ་བླ་མའི་ཞབས་ལ་ཕྱག་འཚལ་ལོ། །བུ་དཀོན་མཆོག་རིན་ཆེན་སྙན་གསོན་དང༌། །མི་ང་ལ་སྙིང་གཏམ་ཚིག་གསུམ་ཡོད། །ཉམས་ལེན་གྱི་རྒྱལ་པོ་མོས་གུས་ཡིན། །ད་རེས་བླ་མ་དང་མཇལ་བ་ལ། །མོས་གུས་ཀྱིས་གསོལ་བ་འདེབས་པ་ཞུ། །འཆི་བ་འདི་ནམ་ཡོང་ཆ་མེད་པས། །ཆོས་དྲན་མ་ཐག་ཏུ་ལག་ཏུ་ལོང༌། །མི་རྟག་འཕྲལ་འཕྲལ་དུ་འགྱུར་ལུགས་ལ། །ཡིད་འབྱུང་སྐྱོ་ཤས་ཀྱིས་རྒྱུད་གཅིག་བསྐུལ། །འདིར་ལྟས་འདོད་ཡོན་གྱི་གདུང་སེམས་འདི། །ལས་སླ་མོར་ཆོད་པ་དཀའ་བས་ན། །སྙིང་རུས་དང་ཞེ་བཅད་དྲག་པོ་ཡིས། །ཚེ་འདིའི་ལེགས་ཉེས་ཅི་དགར་བསྒྱུར། །ཞེན་མེད་དུ་འཕང་པ་གདམས་ངག་ཡིན། །ཚེ་འདི་ལ་སྐྱབ་ཀྱི་མི་རྣམས་དང༌། །བློ་སྣ་མང་དུ་བསྟུན་དགོས་ན། །བྱ་བྱེད་མི་ཤེས་ཆོས་དང་འགལ། །མི་ངན་དང་བློ་སྣ་བསྟུན་པ་བས། །དམ་ཆོས་དང་བློ་སྣ་བསྟུན་


TNT01_Page_0834
[མ་དཔེ་གཟིགས་ན་འདིར་གནོན།]

ན་ལེགས། །ཡོངས་རང་ཤར་རང་གི་རང་ངོ་ལ། །བཟོ་བཅོས་མེད་པར་ལྷོད་ཀྱིས་ཀློད། །ཆེད་དུ་བཅོས་པའི་གྲིམ་ལྷོད་ཀུན། །བློས་བྱས་ཡིན་པས་སྙིང་པོ་མེད། །སོ་མའི་ངང་ནས་རྒྱ་ཡན་འདི། །ཅི་བྱས་སྒོམ་དུ་འགྲོ་བ་ལགས། །རྣམ་རྟོག་སྐྱེས་དང་མ་སྐྱེས་འདྲ། །དྲན་པ་ངོ་ཤེས་འདི་གལ་རེ་ཆེ། །ཡོ་བྱད་དགེ་བའི་ཕྱོགས་སུ་བསྒྱུར། །བྱ་བྱེད་ཆོས་ཀྱི་ཕྱོགས་སུ་བསྒྱུར། །རིག་པའི་མདའ་རྩེ་ནང་དུ་བསྒྱུར། །འཁྲུལ་སྣང་དག་པའི་སྣང་བར་བསྒྱུར། །བསྒྱུར་བ་རྣམ་བཞི་ཉམས་སུ་ལོང༌། །དེ་ཀུན་ཡང་གཞན་ཕན་དུ་བསྒྱུར་བར་བྱ། །ལག་ཏུ་ཐེབས་ན་གདམས་ངག་ཡིན། །ཡི་གེ་ཙམ་ལ་མ་ལུས་པ་འཚལ། །ཞེས་པའང་ཏཱ་ར་ནཱ་ཐས་སྨྲས་པ་སྟེ། སྟག་ལུང་ཐང་དུའོ།། །།དགེ་ལེགས་འཕེལ། །

རིམ་གཉིས་ལྟ་སྤྱོད་སྒོམ་པ་ཀུན་མ་ཚང་བ་མེད་པའི་གནད་བསྡུས་བཞུགས།


TNT01_Page_0835
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། གང་གི་ཡེ་ཤེས་འོད་བརྒྱའི་དོ་ཤལ་ནི། །སྨོན་ལམ་ཤར་རིའི་ཕྲག་པར་ལེགས་བཀོད་ནས། །འགྲོ་བའི་མུན་སེལ་རྗེ་བཙུན་འོད་སྟོང་ཅན། ཁྱབ་བདག་ཁྱོད་ཀྱིས་མ་ལུས་འགྲོ་འདི་སྐྱོངས། །དེ་ལ་དམ་པའི་ཆོས་རིན་པོ་ཆེ་རྟོག་གེའི་ལམ་ལས་འདས་པ། བླ་མ་དམ་པའི་མན་ངག་གིས་གསལ་བར་གྱུར་པའི་ཡེ་ཤེས། དད་པའི་རྩ་བ་ཉིད་


TNT01_Page_0835
[མ་དཔེ་གཟིགས་ན་འདིར་གནོན།]

ལས་མངོན་པར་གྲུབ་པ། གང་གི་ལམ། ཐ་སྙད་སྤྲོས་པའི་ཚིག་ལ་མ་ཡིན་པར་སྒྲུབ་པ་སྙིང་པོར་བྱེད་པ་ལ་གནད་རྣམས་ལེགས་པར་ཤེས་པ་གལ་ཆེ། ཐམས་ཅད་ཀྱི་ཐམས་ཅད་དུ། བླ་མ་དམ་པ་ལུས་ལོངས་སྤྱོད་སྒྲུབ་པ་སོགས་ཐམས་ཅད་ཀྱིས་མཉེས་པར་བྱས་ནས། མན་ངག་མ་ནོར་བ་དག་ཞལ་ལས་མནོས་ཏེ། མདོ་རྒྱུད་ཟབ་མོ་རྣམས་ལ་ཐོས་པ་དཔྱིས་ཕྱིན་པས་སྒྲུབ་པ་བྱས་ན་ནི་ཆེས་མཆོག་གོ །བླ་མ་སངས་རྒྱས་ཀུན་ལས་ལྷག་པའི་མོས་གུས་ཀྱིས་རྩེ་གཅིག་ཏུ་གསོལ་བ་འདེབས་པ་རང་གནད་དུ་ཆེ་བར་གདའ། ༡༽ མཐའ་བྲལ་དུ་མཉམ་པར་འཇོག་པ་ལ། གསལ་རིག་ཙམ་ལ་རང་སོ་འཇུག་པ་ཡང་ཐབས་ཙམ་ཡིན་མོད། ངོ་བོ་རིག་སྟོང་དུ་འཇོག་པ་གནད། ༢༽ མང་དུ་སྒོམས་ཀྱང་ཉོན་མོངས་ཐ་མལ་པར་འཆོར་ན། སྒོམ་གནད་དུ་མ་སོང་བ་ཡིན་དེ་ལ་ཡིད་ལ་བྱེད་པ་རྣམས་དང༌། བདེན་མེད་ཀྱི་འདུན་པ། བླ་མའི་མོས་གུས་ངོ་བོ་ལ་ཅེར་ཕོག་ཏུ་སྒོམ་པ་རྣམ་གཟེར་བུས་འདེབས་པ་གནད། ༣༽ སྤྱོད་ལམ་ཐམས་ཅད་དུ་སྒོ་གསུམ་སྐད་ཅིག་ཀྱང་ཆོས་ལས་མི་འདའ་ཞིང༌། ལས་འབྲས་ཀྱི་བླང་དོར་ལ་རྡུལ་ཙམ་ཡང་མི་བརྙས་ཤིང༌། བསླབ་པ་ལ་གུས་པས་ཚུལ་བཞིན་བསྲུང་བ་གནད། ༤༽ སྒྲུབ་པ་བྱེད་པ་ཀུན་ཐོག་མར་དལ་འབྱོར་རྙེད་དཀའ་འཆི་བ་མི་རྟག་པ། འཁོར་བའི་སྡུག་བསྔལ་ལས་འབྲས་མི་བསླུ་


TNT01_Page_0836
[མ་དཔེ་གཟིགས་ན་འདིར་གནོན།]

བ་བསམ་པ་སོགས་བློ་ཆོས་སུ་འགྲོ་བའི་ཐབས་འདི་དག་བཅོས་མིན་རང་རྒྱུད་ལ་སྐྱེས་སྐྱེས་འབད་རྩོལ་དུ་བྱེད་པ་གནད། ༥༽ གསང་སྔགས་སྒོམ་འདོད་ཀུན་ཡེ་སྟོང་དང་རང་ངོ་ཤེས་ན་སྣང་ཚད་བདེ་སྟོང་རང་ཡིན་པས། གཞན་གང་ཡང་མི་དགོས་ཟེར་བའི་འུད་བཤད་ལ་ཀློག་ཉན་པ་མི་བྱེད་པར། བླ་མ་མཚན་ལྡན་ལ་བསྟེན་ནས་ཕྱི་ནང་གི་དཀྱིལ་འཁོར་རྣམས་སུ་ཆོ་ག་མཚན་ཉིད་དང་ལྡན་པས་དབང་བསྐུར་ཐོབ་པར་བྱེད་པ་གནད། ༦༽ །བསྐྱེད་རིམ་གྱི་རྣལ་འབྱོར་སྦྱང་གཞི་སྦྱོང་བྱེད་ཁྱད་པར་ཅན་གྱི་ཉམས་ལེན་རང་གལ་ཆེ་བ། ལྷའི་རྣལ་འབྱོར་ལ་གསལ་ཆ་ཚོལ་བ་གནད། ༧༽ གསལ་སྣང་གི་ངོ་བོ་རྡུལ་ཆོས་ལས་འདས་པའི་འཇའ་ཚོན་ལྟ་བུ་གནད། ༨༽ བཟླས་པ་དམིགས་མེད་ངང་ནས་བྱེད་པ་ཤིན་ཏུ་ཟབ་ཅིང༌། དམིགས་བཅས་ལ་ཡང་དམིགས་པ་རྩེ་གཅིག་པ་གནད། ༩༽ བཟླས་པའི་གཙོ་བོ་རྡོ་རྗེའི་བཟླས་པ་ཡིན་པ་དོན་དམ་རྡོར་བཟླས་ངག་རླུང་གི་དྭངས་མ་མི་ཤིགས་པའི་ནཱ་དར་དངོས་སུ་ངོ་སྤྲོད་པའི་ཟབ་གནད་ཕུལ་ཕྱིན་དང༌། སྤྲོས་བཅས་དམིགས་པ་རྡོར་བཟླས་སོགས་ཀྱང་ཤིན་ཏུ་ཟབ་པའི་གནད་ཡོད་པས་ནན་ཏན་བྱེད་པ་བཟླས་པའི་གནད། ༡༠༽ སེམས་འཛིན་ཐམས་ཅད་ཀྱི་ནང་ནས་སྙིང་གི་ཐིག་ལེ་སོགས་ཨ་བ་དྷཱུ་ཏཱི་ལ་གནད་དུ་བསྣུན་པ་རང་གནད། མན་ངག་ལུགས་ཀྱི་སྦྱོར་བ་ཧ་ཅང་དྲག་པས་གེགས་བྱུང་ན། ཕྱིས་ཐབས་


TNT01_Page_0837
[མ་དཔེ་གཟིགས་ན་འདིར་གནོན།]

མཁས་ཀྱིས་སེལ་བ་ལས་ཀྱང༌། གེགས་ཆུང་ལ་གཏིང་ཆོད་ཆེ་བ། ཚད་ལྡན་གྱི་གསུང་བཞིན་སྟོན་ན་ལེགས། རླུང་སྦྱོར་གྱི་གཙོ་བོ་རླུང་འགོག་པ་སྟེ། དབུ་མར་ཐིམ་པ་ཡིན། དེ་ལ་བུམ་ཅན་གནད་དུ་ཆེ་བ་ལས་སྔོན་དུ་རྩ་ལམ་སྦྱོང་བ་གནད། ༡༡༽ རླུང་དབུ་མར་ཐིམ་པས་སྟོང་ཉིད་ཙམ་རྟོགས་ལ་ཐིམ་པ་དེས་གཏུམ་མོ་འབར་བས་བདེ་བ་དྲངས་ཏེ། བདེ་སྟོང་ཟུང་དུ་སྦྱོར་བ་ཡིན་ཏེ། རླུང་དང་གཏུམ་མོའི་འབྲས་བུ་དྲོད་སོགས་ཙམ་ལ་དམིགས་ན་མི་རུང་པས། འདི་གནད་དུ་སོང་མ་སོང་ལྟ་བ་རང་གི་ཉམས་མྱོང་དང༌། བླ་མའི་མན་ངག་གི་དངོས་སྦྱོར་བ་གནད། ༡༢༽ ཡེ་ཤེས་ལྷན་ཅིག་སྐྱེས་པ་ངོ་སྤྲོད་པ་ཡེ་རྒྱ་སོགས་གསུངས་པའི་ནང་ནས། སྟོང་ཉིད་ལ་སྦྱོང་བ་ཁོ་ན་གནད་དོ། ༡༣༽ བསྟན་པ་རྫོགས་ལྡན་དུས་ལྟ་བུར་གང་ཟག་མཆོག་ལ་དོན་དུ་འགྱུར་ངེས་ན། ལས་རྒྱ་གནང་བ་སོགས་ཤིན་ཏུ་གསང་བའི་ཟབ་མོ་ཡིན་མོད། དེང་སང་དེ་ལ་སྙད་ནས་སྤྱོད་པ་འཆོལ་བར་སྤྱོད་པ་དག་དམྱལ་བའི་རྒྱུ་ཡིན་པས། རབ་བྱུང་སྔགས་སྤྱོད་པ་ཕལ་ཆེར་དམ་ཆོས་འདུལ་བ་རང་དབང་བཞག་ལ་བརྟེན་དགོས་པ་གནད། ༡༤༽ ས་རྡུལ་ཆུས་སྦྱངས་ནས་གསེར་ལེན་པ་ལྟར། དགའ་བཞི་སྐད་ཅིག་སོ་སོར་ཤར་པ་ངོས་ཟིན་པའི་སྒོ་ནས། ངོ་བོ་རང་བཞིན་སྟོང་པ་ལ་མཉམ་


TNT01_Page_0838
[མ་དཔེ་གཟིགས་ན་འདིར་གནོན།]

པར་འཇོག་པ་གནད། ༡༥༽ འདིས་རྣམ་ཤེས་གསུམ་དང་རང་བཞིན་བརྒྱད་ཅུའི་རྣམ་རྟོག་ཐམས་ཅད་སྦྱོང༌། མ་དག་ཐ་མལ་པའི་སྣང་བ་སྟོང་པར་སྦྱངས་པ་ལས། བག་ཆགས་ཀྱི་རང་གདངས་ལྷ་སྐུ་འཆར་བ་བདག་མེད་དུ་སྦྱོང་བ་ཆགས་གྲོལ་གང་ལ་བརྟེན་ཀྱང་བདེ་སྟོང་སྦྱོར་བ་གནད། ༡༦༽ དེས་ཕྱག་རྒྱ་ཆེན་པོ་ལྷ་སྐུ་མངོན་དུ་འགྱུར། འཁྲུལ་སྣང་ཐམས་ཅད་སྡུད་རིམ་ཁྱད་པར་ཅན་གྱི་སྟོང་པར་འདུས་པས་བདེ་སྟོང་ཡེ་ཤེས་མངོན་དུ་གྱུར་པའི་རང་བཞིན་འོད་གསལ་མངོན་གྱུར་གྱི་ཡེ་ཤེས་ཏེ། ཕྱག་ཆེན་དང་ཟུང་འཇུག་ཡིན་ལ་རང་བཞིན་རྣམ་དག་གི་རང་ངོའི་འཆར་སྒོ་རྐྱང་འདོད་ཙམ་ནི་ལྟ་བའི་ཉམས་ལེན་ཡིན་པས་ལྟ་སྒོམ་ཤན་ཕྱེད་པར་བྱ་བ་གནད་དེ་བཅུ་བདུན་ནོ། །སྤྱིར་བཏང་དུ་ཉམས་ཐམས་ཅད་ལ་བྱུང་རྒྱལ་གནད། སྤྲོས་བཅས་ཐམས་ཅད་མི་རྟོག་པས་ཟིན་པ་གནད། སྤྲོས་མེད་ཇི་ལྟ་བ་མངོན་དུ་གྱུར་ན། ཏིང་ངེ་འཛིན་གྱི་སྒོ་མཐའ་ཡས་ལ་འཇུག་པ་གནད། ལས་དང་པོ་བས་ཐུན་འཇུག་ཏུ་བསྔོ་བ་རྣམ་དག་གིས་རྒྱས་ཐེབས་པ་གནད་དེ་བཞིའོ། །བཅུ་བདུན་དང་བཞི་སྟེ། ཉེར་གཅིག་པོ་འདི་རྣལ་འབྱོར་བླ་མེད་ཀྱི་རིམ་གཉིས་ལྟ་སྤྱོད་སྒོམ་པ་ཀུན་མ་ཚང་བ་མེད་པའི་གནད་བསྡུས་ལགས་པས། ཐུགས་ལ་ངེས་པས་ཉམས་ལེན་དུ་མཛོད། །འདི་རུ་བདག་གིས་གང་སྨྲས་པ། །ལེགས་པ་


TNT01_Page_0839
[མ་དཔེ་གཟིགས་ན་འདིར་གནོན།]

གང་དག་བླ་མ་དང༌། །ཉེས་པ་གང་ཡིན་བདག་གིས་བཟུང༌། །ལོག་སྨྲས་དུས་གསུམ་མགོན་ལ་བཤགས། །འདིའི་དགེ་བས་བདག་གཞན་ཐམས་ཅད་རྟག་བརྟན་ཞི་བ་གཡུང་དྲུང་གི་དཔལ་ལ་འབྱོར་བར་གྱུར་ཅིག །ཅེས་པ་འདི་སྟག་ལུང་ལོ་ཙཱ་བ་ཤཱཀྱ་བཟང་པོའི་སྐུའི་རིགས་དང་གདན་སར་གྱུར་པ་གང་གི་ངོར། །ཕྱོགས་བྲལ་གྱི་རྣལ་འབྱོར་པ་ཏཱ་ར་ནཱ་ཐས་སྟག་ལུང་གི་ཆོས་གྲྭར་རོ། རང་ལོ་ཉི་ཤུ་པ་ལའོ།། །།

རིན་པོ་ཆེ་བཀྲ་ཤིས་རིན་ཆེན་ལ་གསུངས་པ།


TNT01_Page_0840
[མ་དཔེ་གཟིགས་ན་འདིར་གནོན།]

ན་མོ་གུ་རུ་བྷྱཿ སློབ་དཔོན་རྡོ་རྗེ་འཛིན་པ་ནི། །རིན་ཆེན་གསུམ་བཅས་ལ་ཕྱག་འཚལ། །ཕན་བདེ་མ་ལུས་ཀུན་གྱི་གཏེར། །ཆོས་ཀྱི་སྙིང་པོ་ཡང་འདི་རྙེད། །རྙེད་དཀའི་དལ་འབྱོར་དོན་མཆོག་ལ། སྦྱོར་ཞིང་ནམ་འཆི་ཆ་མེད་བསམ། །འཁོར་བའི་སྡུག་བསྔལ་ངེས་ཤེས་ནས། །བསམ་པ་དག་པས་སྐྱབས་འགྲོ་བྱ། །ལས་འབྲས་ཡིད་ཆེས་བླང་དོར་བྱ། །མཉམ་དང་བརྗེ་བའི་བྱང་སེམས་བསྒོམ། །ཕ་རོལ་ཕྱིན་པ་དྲུག་ལ་བསླབ། །ཆོས་སྤྱོད་བཅུ་པོ་ཉམས་སུ་བླང༌། །བརྒྱད་པོ་དེ་དང་ལྡན་གྱུར་ན། །དམ་ཆོས་མ་ལུས་བསྒྲུབ་པ་ཡི། །རྣལ་འབྱོར་ཅན་ཞེས་བྱ་བ་སྟེ། །གཞན་དུ་བསྒྲུབ་པའི་གཟུགས་བརྙན་ཙམ། ཁྱད་པར་ཉེས་པ་ལྔ་སྤངས་པའི། །ཞི་གནས་སྒོམ་གྱི་རྨང་གཞི་ཡིན། །


TNT01_Page_0840
[མ་དཔེ་གཟིགས་ན་འདིར་གནོན།]

ཇི་ལྟའི་གནས་ལ་མཐའ་བྲལ་ཚུལ། །རྗེས་སུ་དཔག་པས་ངེས་རྙེད་པའི། །ཤེས་རབ་གནས་ཆ་དང་བསྲེས་པ། །ལྷག་མཐོང་ལམ་གྱི་གཙོ་བོར་སྣང༌། །གསལ་ཞིང་ངར་བའི་མདངས་ལྡན་པ། །གཡོ་མེད་ལྷན་ནེར་གནས་པ་ན། །བྱིང་རྒོད་ཕྲ་ཞིང་ཕྲ་བ་ཡང༌། །བྲལ་ཕྱིར་སྐྱོན་རྣམས་སྤངས་ཞེས་བྱ། །རྡོ་ལ་བརྡར་བའི་གསེར་རིས་བཞིན། །ཞི་ལྷག་ཟུང་དུ་འཇུག་པར་མཛོད། །ད་ལྟར་སྣང་བ་འདི་དག་ཀུན། །སྣང་དུས་ཉིད་ནས་རང་བཞིན་མེད། །སྟོང་བཞིན་དུ་ཡང་བྱ་བ་དང༌། །རྟེན་འབྲེལ་འགག་པ་མེད་པ་ཡི། །སྟོང་པ་ཉིད་ལ་ཀུན་རུང་བ། །ཉིད་ཀྱི་ཐུགས་ལ་སྔར་ཆུད་ཀྱང༌། །ད་དུང་གཡོ་བར་མ་མཛད་ཅེས། །བདག་ནི་རིང་དུ་སྒྲོག་པར་བྱེད། །ད་ནི་ཤིན་ཏུ་གསང་བ་ཡི། །ཐེག་པ་མཆོག་གི་མན་ངག་ནི། །རྒྱུད་བཞི་བླ་མའི་མན་ངག་བཞིན། །ཅུང་ཟད་ཙམ་ཞིག་ཞུ་བགྱིད་ན། །དབང་བསྐུར་དམ་ཚིག་མ་ཉམས་པས། །བསྐྱེད་རིམ་ཡན་ལག་ཚང་བར་བསྒོམ། །འདི་ལ་ཞུ་བདེར་གྱུར་པའི་སེམས། །ཟབ་གསལ་གཉིས་མེད་བསྒོམ་པ་བསྔགས། །དེ་ནས་རྫོགས་པའི་རིམ་པ་ནི། །ཀུན་ཀྱང་ཀུན་འདར་ནང་དུ་བསྒོམ། །ལུས་གནད་བུམ་ཅན་རླུང་སྦྱོར་བཅས། །སོར་གཅིག་ཡང་ན་སོར་བཞི་པ། །མར་མེ་ཁོ་ན་རྟག་ཏུ་བསྒོམ། །ནོར་བུ་


TNT01_Page_0841
[མ་དཔེ་གཟིགས་ན་འདིར་གནོན།]

སྙིང་གར་འོད་གསལ་དང༌། །གསང་བ་མགྲིན་པར་རྨི་ལམ་བཟུང༌། །སྤྱི་བོ་ལྟེ་འོག་སྒྱུ་མའི་ལུས། །ལྟེ་བར་གཏུམ་མོ་སྦར་བར་བྱ། །དེ་དག་རྟག་ཏུ་བསྒོམ་པ་ལས། །སེམས་དམིགས་བདེན་གཉིས་ཟུང་འཇུག་སོགས། །བསྐྱེད་ཚུལ་སྤྱི་དང་མཐུན་པ་ཡིན། །སྐབས་འགར་ཤིན་ཏུ་དཔྱད་ཅིང་བསྒོམ། གཞན་དུ་རྩེ་གཅིག་སྒྲིམས་ལ་བཟུང༌། །ལ་ལར་ཀློད་ལ་ངལ་ཡང་གསོ། །རྟག་ཏུ་བླ་མར་གསོལ་བ་འདེབས། །གེགས་དང་བར་ཆད་མི་འབྱུང་ཞིང༌། །ཡོན་ཏན་གོང་དུ་འཕེལ་ཞེས་གསུངས། །རླུང་སྦྱོར་བཅུ་ལེན་ལ་སོགས་པ། །ལག་ལེན་འགའ་ཞིག་འདིར་མ་བཀོད། །དེ་དག་རྣམས་ཀྱི་རྒྱུ་མཚན་སོགས། །རླུང་རྣམས་བསྡུད་དང་གནས་དང་ཐིམ། །ཐིམ་པའི་ཞུ་བདེ་འདྲེན་ཚུལ་སོགས། །སྡེ་སྣོད་འཛིན་པ་ཁྱེད་ཀྱི་ནི། །ཐུགས་ལ་སྔོན་ནས་གསལ་བ་ལགས། །འོན་ཀྱང་ཐུན་མོང་མ་ཡིན་པའི། །ཞིབ་ཆའི་ཁྱད་པར་འགའ་ཞིག་ནི། །མཇལ་དུས་གླེང་བའི་ལེགས་སྨོན་ཞུ། །དགེ་བས་སངས་རྒྱས་ཐོབ་པར་ཤོག །བརྒྱུད་པ་མི་ལྡན་དག་མི་འགྱུར། །དེ་ལ་བརྒྱུད་པ་འདི་དག་ཡིན། །དྲིལ་བུ་པ་དང་ལྭ་བ་པ། །ཞིང་པ་རྡོ་རྗེ་ཆོས་མྱུག་དང༌། །ར་ཧུ་ལ་དང་ཨ་ཏི་ཤ །ཌེཾ་གི་བྷི་ཀྵའི་ཞལ་སྔ་ནས། །


TNT01_Page_0842
[མ་དཔེ་གཟིགས་ན་འདིར་གནོན།]

བྱ་རྔོན་པ་དང་དཀར་མིན་སྤྲིན། །ཡེ་ཤེས་བཤེས་གཉེན་དེ་བཞིན་དུ། །གྲུབ་ཐོབ་ཤཱནྟི་གུཔྟ་ལས། །སངས་རྒྱས་སྦས་པའི་མགོན་པོ་ཡིས། །ལེགས་གསན་དེ་ལ་བདག་གིས་ཐོབ། །ཅེས་པ་ཀུན་དགའ་སྙིང་པོས་སྨྲས། །བཤེས་གཉེན་ཆེན་པོ་རྒྱང་རོ་གསེར་སྡིངས་ཀྱི་གདན་ས་ཡུན་རིང་དུ་མཛད་པ་རིན་པོ་ཆེ་བཀྲ་ཤིས་རིན་ཆེན་པས། མདོ་རྒྱུད་ཀུན་གྱི་ཡང་སྙིང་ཡིན་པ། ཚིག་ཉུང་བའི་ཆོས་འབྲེལ་ཞིག་བསྐུར་གསུང་པའི་དོན་ལ་ཏཱ་ར་ནཱ་ཐས་རང་ལོ་ཉེར་གསུམ་པ་ལའོ།། །།

དད་ལྡན་གྱི་སློབ་མ་ཉི་མ་རྣམ་རྒྱལ་ལ་གདམས་པ།


TNT01_Page_0843
[མ་དཔེ་གཟིགས་ན་འདིར་གནོན།]

ན་མོ་གུ་རུ་བྷྱཿ ཕ་རྡོ་རྗེ་འཆང་ལ་ཕྱག་འཚལ་ནས། །འདིར་སྙིང་གཏམ་ཚིག་གསུམ་སྨྲ་བ་ནི། །ཚེ་འདིའི་སྣང་བ་ནི་འཇའ་ཚོན་དང་འདྲ། །འདི་ཡི་རྗེས་འདེད་མི་འཚལ་ལོ། །སྣང་བ་འདི་རང་སེམས་ཀྱི་བྱེད་པ་གཅིག་ལགས། །ཐ་དད་དུ་འཛིན་ཞེན་མི་འཚལ་ལོ། །རིག་པ་ཞེན་མེད་དུ་མ་ཤར་ན། །སྒོམ་བྱས་ཚད་བཟང་རྫུར་འགྲོ་ཉེར་གདའ། །རང་སེམས་ཚིར་གྱིས་མ་བཟུང་ན། །དོན་མེད་ཀྱི་ལས་ལ་ཟད་ཉེན་གདའ། །རང་དོན་ལ་ཧྲིལ་གྱིས་མ་སྒྲིལ་ན། །གཞན་དོན་ལྟར་སྣང་གི་མགོ་སྐོར་ཡོང༌། །ད་རེས་ཙམ་མ་གཏོགས་མི་ལུས་ནི། །ཡང་ཡང་དུ་ཐོབ་པ་ཤིན་ཏུ་དཀའ། །ངན་སོང་གསུམ་དུ་སྐྱེས་ཙ་ན། །དམ་ཆོས་ཀྱི་སྐལ་པ་ནི་གཅིག་ཀྱང་མེད། །ད་རེས་རྡོག་སྣ་གཅིག་འདྲེན་ན་ནི། །དམྱལ་


TNT01_Page_0843
[མ་དཔེ་གཟིགས་ན་འདིར་གནོན།]

བའི་གཏིང་རྡོ་གཅིག་བྱེད་བྱེད་འདྲ། །ཕྱི་མ་ལ་ཕན་པའི་དགེ་བ་དང༌། །ཉམས་ལེན་བྱས་རྗེས་ནི་འདི་ཀར་གདའ། །སྡིག་པ་དང་ཉེས་ལྟུང་ནི་ཆར་ལྟར་འབབ། །དོན་འདི་ལྟར་བསམ་ན་ཆོས་ལ་འབུངས། །རྒས་པའི་སྡུག་བསྔལ་ཡང་མྱུར་དུ་འོང༌། ན་ཚ་དང་མི་འདོད་པ་བྱུང་ཙ་ན། །སྡུག་བསྔལ་གྱི་གཟིར་བའི་ཤེས་པ་དེ། །ཆོས་ཀྱི་ལམ་དུ་ལོངས་དཀའ་བས། །སྐྱིད་དུས་ནས་ཆོས་ལ་འབུངས་པ་ཞུ། །རེ་ཞིག་རང་ཅག་ཚོའི་མི་ཚེ་ལ། །རྒྱལ་ཁམས་ཡུལ་ཕྱོགས་ཀྱི་དར་རྒྱུད་དང༌། །ཡར་བླ་མ་སློབ་དཔོན་གྱི་གནས་ལུགས་དང༌། །གྲྭ་རོགས་དང་གྲོགས་མཆེད་ཀྱི་འགྱུར་ལུགས་དང༌། །ཕ་མ་དང་དགྲ་གཉེན་གྱི་གནས་ལུགས་སོགས། །ཐམས་ཅད་མི་རྟག་པའི་རང་འཚང་སྟོན། །འཕྲལ་ལོ་དང་ཟླ་བ་ཞག་རེ་ལ། །མི་རྟག་པ་སྟོན་པའི་སློབ་དཔོན་ཀུན། །སྐྱོ་བ་སྐྱེད་བྱེད་ཀུན་གམ་ན་འདུག །ནམ་ཡང་ཚེ་འདིའི་བྱ་བ་ཀུན། །ཇི་ལྟར་བྱས་ཀྱང་འདོར་བ་ལ། །བུ་བྱ་བ་བཏང་ན་སྒྲུབ་པ་འཚལ། །ལུས་མི་རྟག་ཤ་རུས་འགྱེལ་འགྱེལ་འདྲ། །གཅེས་གཅེས་མོར་བྱས་པའི་ལུས་འདི་ཡང༌། །ཐ་མ་རུས་པའི་ཕུང་པོར་གདའ་འོ། །རང་སེར་སྣས་འབད་འབུངས་བསགས་པ་ཡི། །ནོར་ཀུན་ཡང་སུས་ཐོབ་དང་བགོ་བཤར་བྱེད། །ད་ལྟ་ཟས་གོས་ཀྱི་འབྱོར་པ་ཡང༌། །རོ་ཤུན་དང་རོ་ཟས་ཁམ་གཅིག་ཡིན། ཁོང་ཁ་


TNT01_Page_0844
[མ་དཔེ་གཟིགས་ན་འདིར་གནོན།]

དྲག་དཔུང་པ་འཛོམ་པ་ཡང༌། །དུས་ངེས་མེད་འཆི་བ་བྱུང་བའི་ཚེ། །ནོར་མངའ་ཐང་ལོངས་སྤྱོད་ཀུན་བོར་ནས། །སླར་ངན་སོང་གསུམ་དུ་འགྲིམ་པ་མཐོང༌། ལར་མི་རྟག་འདུས་བྱས་སྤྱི་ལུགས་ཡིན། །དོན་འདི་ལ་བསམས་ནས་ཆོས་ལ་འབུངས། །བྱམས་སྙིང་རྗེ་ཕྱོགས་མེད་དུ་སྐྱོང་བ་དང༌། །འཕྲལ་གང་ཤར་ལ་ཞེན་མེད་དུ་སྐྱོང་བ་དང༌། །ཚེ་འདི་དང་ཕྱི་མ་བར་དོ་གསུམ། །དུས་གནས་སྐབས་ཀུན་ཏུ་རིན་པོ་ཆེ། །ཕ་བླ་མར་ཡིད་ཆེས་བློས་ཁེལ་གྱི། །སྙིང་ཐག་པས་གསོལ་བ་འདེབས་པར་འཚལ། །ལར་ནམ་ཡང་བསླུ་པ་མེད་པར་ངེས། །ངེས་འབྱུང་དང་སྙིང་རྗེ་མོས་གུས་དང༌། །ཞེན་མེད་ཡེངས་མེད་དུ་སྐྱོང་བ་སྟེ། །དོན་བཞི་པོ་འདི་ལ་འབད་གྱུར་ན། །འདུན་མ་རྩེ་ལ་ཕྱིན་པ་ཡིན། །ཞེས་པ་ཡང་རྒྱལ་ཁམས་པ་ཏཱ་ར་ནཱ་ཐས། དད་ལྡན་གྱི་སློབ་མ་ཉི་མ་རྣམ་རྒྱལ་ལ་གདམས་པ་སྟེ། གོང་དཀར་དུའོ།། །།

རབ་འབྱམས་སྨྲ་བ་སྦྱིན་པ་རིན་ཆེན་དང༌དཔལ་འབྱོར་རྣམ་རྒྱལ་གཉིས་གདམས་པ།


TNT01_Page_0845
[མ་དཔེ་གཟིགས་ན་འདིར་གནོན།]

ཡང་ཞལ་གདམས་གཅིག་ལ། བླ་མ་རྣམས་ལ་ཕྱག་འཚལ་ལོ། །ཉམས་ལེན་སྙིང་པོར་དྲིལ་བ་ནི། །ཀུན་རྫོབ་སྙིང་རྗེ་ཆེན་པོ་དང༌། །དོན་དམ་སྤྲོས་དང་བྲལ་བ་ཡིན། །དག་སྣང་ལྷ་སྐུའི་ལམ་ཁྱེར་ནི། །སྔགས་ཀྱི་སྙིང་པོའི་ཉམས་ལེན་ཡིན། །བདེ་སྡུག་འཕྲལ་རྐྱེན་ཞིག་བྱུང་ཡང༌། །གང་བྱུང་ལམ་དུ་འཁྱེར་བ་ལས། །ཟབ་པའི་ཉམས་


TNT01_Page_0845
[མ་དཔེ་གཟིགས་ན་འདིར་གནོན།]

ལེན་ཅི་ཞིག་ཡོད། །རབ་གསལ་རྒྱལ་པོའི་རྣམ་འཕྲུལ་གྱིས། །གནད་འདི་གཟིགས་ནས་ཐུགས་ཀྱི་སྲས། །བྱམས་པའི་དཔལ་ལ་གདམས་པ་ཡིན། །བདག་ཉིད་བདེ་ཞིང་སྐྱིད་པ་ན། །མར་གྱུར་འགྲོ་བ་ཐམས་ཅད་ཀྱང༌། །སྐྱིད་པར་འདོད་པ་ཁོ་ན་ཡིན། །བདག་བདེ་གཅིག་པུས་མི་ཕན་གྱི། །འདི་ཀུན་བདེ་བ་ཐོབ་ན་སྙམ། །ཡང་ཡང་ཡིད་ལ་བསམ་པར་ཞུ། །སྐྱིད་ན་བདེ་བ་ཚོགས་སུ་བསྔོ། །ཕན་བདེས་ནམ་མཁའ་གང་བར་ཤོག །ཅེས་པ་ངག་ཏུ་ཡང་ཡང་བརྗོད། །གལ་ཏེ་བདེ་བ་འདོད་ན་ནི། །དགེ་བའི་ལས་ལ་བརྩོན་དགོས་པས། །དགེ་ལ་འབད་པར་བྱ་སྙམ་དང༌། ཁམས་གསུམ་འགྲོ་བ་འདི་ཀུན་ཡང༌། །དགེ་ལ་འཁོད་པར་གྱུར་ཅིག་ཅེས། །སྨོན་སེམས་ཡང་ཡང་གཏོང་བར་ཞུ། །རང་གཞན་དགེ་ལ་འཇུག་པའི་ཐབས། །ནན་ཏན་སྒྲུབ་པ་གལ་རེ་ཆེ། །སྐྱིད་པ་ཀུན་རྫོབ་ལམ་ཁྱེར་ཡིན། །མི་འདོད་སྡུག་བསྔལ་བྱུང་བའི་ཚེ། །སྡུག་བསྔལ་ཅན་ལ་སྙིང་རྗེ་སྒོམ། །སྡིག་པའི་ལས་ལམ་ཟློག་པར་བྱ། །སྐྱིད་ན་བྱམས་པའི་ལམ་འཁྱེར་དང༌། །སྡུག་ན་སྙིང་རྗེ་ལམ་དུ་འཁྱེར། །སྐྱིད་དང་སྡུག་པར་སྣང་བ་ཡང༌། །འཁྲུལ་ངོ་ཙམ་ཞིག་མ་གཏོགས་པ། ཡང་དག་དོན་ལ་གྲུབ་པ་མེད། །ལུས་ནི་བེམ་པོ་རོ་དང་འདྲ། །འདོད་ཡོན་ཇི་སྙེད་སྟབས་གྱུར་ཀྱང༌། །སྐྱིད་པའི་ཚོར་བ་མི་འབྱུང་ཞིང༌། །


TNT01_Page_0846
[མ་དཔེ་གཟིགས་ན་འདིར་གནོན།]

དུམ་བུར་གཏུབས་སམ་མེས་བསྲེགས་ཀྱང༌། །དེ་ལ་སྡུག་བསྔལ་ཅི་ཡང་མེད། །ལུས་མེད་ན་ནི་སེམས་དེ་ཡང༌། །བསྟན་དུ་མེད་ཅིང་ཐོགས་མེད་ཕྱིར། །ཡུལ་དང་འབྲེལ་བའི་བདེ་སྡུག་མེད། །ལུས་དང་སེམས་ལས་གཞན་པ་ཞིག །སྡུག་བསྔལ་མྱོང་བ་མེད་པས་ན། །སྐྱིད་བྱ་སྐྱིད་བྱེད་འཁྲུལ་པ་སྟེ། །སྡུག་བྱ་སྡུག་བྱེད་ཡོད་མ་ཡིན། །མེད་པའི་ངང་ལ་མཉམ་པར་ཞོག །སྣང་ངོར་བདེ་སྡུག་མ་འགགས་ཀྱང༌། །དེ་ལ་འཛིན་ཞེན་ཟློག་པ་ཡིན། །འཛིན་ཞེན་མེད་ན་འཕྲལ་རྐྱེན་ནི། །ཇི་ཙམ་མང་ཞིང་བོགས་ཀྱང་ཆེ། །ནགས་ཀྱི་མེ་ལ་རླུང་བྱུང་ན། །མེ་ཡི་གྲོགས་སུ་འགྱུར་བ་ཡིན། །འཛིན་ཞེན་ཅན་གྱི་གང་ཟག་དེ། །སྐྱིད་ན་ཆགས་ཞེན་དབང་སོང་ནས། ཆོས་མིན་སྤྱོད་པ་སྣ་ཚོགས་འོང། །སྡུག་ན་ཉམས་ཐག་སེམས་འཕྱོ་ཞིང༌། །ཉམས་ལེན་ཆོས་ལ་ཡི་ཆད་བྱེད། །ཉིན་གཅིག་ན་བ་ཙམ་ལ་ཡང༌། །ཐེ་ཚོམ་རྣམ་རྟོག་བརྒྱ་ཕྲག་ལྡང༌། །ནས་བྲེ་གང་གི་ཕྱོགས་སུ་ཡང༌། གཡོ་སྒྱུ་མགོ་སྐོར་སྣ་ཚོགས་བྱེད། །ཉིན་གཅིག་སྐྱིད་པ་བྱུང་བ་ལའང༌། །ཆོས་མིན་སྣ་དགུ་སེམས་ལ་འགྱུ། །བདེ་སྡུག་ཕྲ་མོ་ཙམ་ལ་ཡང༌། །ཉམས་ལེན་དཔྱད་ཐག་ཡན་ནས་མཆི། །ཞེན་མེད་ལམ་འཁྱེར་ཤེས་ཙ་ན། །རྐྱེན་ངན་མེ་ལྟར་འབར་ན་ཡང༌། །ཉམས་རྟོགས་དབྱར་གྱི་མཚོ་ལྟར་འཕེལ། །བདེ་སྡུག་སྣང་བའི་སེམས་འདི་ཡང༌། །སྣང་བ་


TNT01_Page_0847
[མ་དཔེ་གཟིགས་ན་འདིར་གནོན།]

ཙམ་ཞིག་མ་གཏོགས་པ། །སྐྱེ་འགག་གནས་གསུམ་བྲལ་བ་ཡིན། །འདས་པ་དང་ནི་མ་འོངས་པ། །རི་བོང་རྭ་ལྟར་ཅང་མེད་ཡིན། །ད་ལྟར་ན་ཡང་མ་དམིགས་པས། །འཁྲུལ་ངོ་མ་གཏོགས་དོན་ལ་མེད། །དེ་ལྟར་རིག་པས་དཔྱོད་པ་འཚལ། །དཔྱད་པ་ཙམ་ལ་མ་བཞག་པར། །རང་བཞིན་ངང་དེར་མཉམ་པར་ཞོག །རང་ངོ་ཤེས་པས་ཚིར་གྱི་ཟུང༌། །བདེ་སྡུག་སྣང་བའི་སེམས་དེ་ཡང༌། །ལྷ་སྐུར་ལམ་གྱིས་གསལ་བཏབ་ནས། །འགྲོ་བ་ཀུན་ལ་སྙིང་རྗེ་དང༌། །གང་སྣང་སྤྱན་རས་གཟིགས་སུ་སྒོམ། །ཡི་གེ་དྲུག་པའི་གསང་སྔགས་བཟླ། །སྟོང་པ་ལྷ་སྐུ་སྙིང་རྗེ་གསུམ། །སྐུ་གསུམ་ལམ་འཁྱེར་ངོ་སྤྲོད་ཡིན། །བབ་ལ་འདུས་པའི་གདམས་ངག་འདི། །ཉམས་ལེན་མཛོད་ཅིག་སྟན་གཅིག་པ། །ཞེས་པའང་སྟན་གཅིག་པ་རབ་འབྱམས་སྨྲ་བ་སྦྱིན་པ་རིན་ཆེན་དང༌། །དཔལ་འབྱོར་རྣམ་རྒྱལ་ཞེས་པ་གཉིས་ཀྱི་བསྐུལ་ནས་ཏཱ་ར་ནཱ་ཐས་གོང་དཀར་དུ་སྨྲས་པའོ།། །།དགེ་ལེགས་འཕེལ། །

བསོད་ནམས་བུ་ཁྲིད་ལ་གདམས་པའོ། །


TNT01_Page_0848
[མ་དཔེ་གཟིགས་ན་འདིར་གནོན།]

འགྲོ་ཀུན་དགའ་བའི་འཕྲིན་ལས་ཀྱིས། །སྙིང་པོའི་བསྟན་པ་རྒྱས་བྱེད་ཅིང༌། །ཐར་པའི་ལམ་སྟོན་མཇལ་གྱུར་ནས། ཁྱོད་ལ་ཕན་བདེ་རབ་རྒྱས་ཤོག །དད་ལྡན་མས་ངེས་འཚལ་བ། ཆོས་ཐམས་ཅད་ཀྱི་རྩ་བ་བཞི་པོ་འདིར་འདུས། དད་པ་བརྟན་པ།


TNT01_Page_0848
[མ་དཔེ་གཟིགས་ན་འདིར་གནོན།]

བསམ་པ་བཟང་བ། ལས་འབྲས་ལ་རྩི་བ། ང་རྒྱལ་སྤངས་པ་སྟེ་བཞི་ཡི། དང་པོ་དད་པ་ནི། བླ་མ་སངས་རྒྱས་དངོས་སུ་མཐོང་བ། མཛད་སྤྱོད་ཐམས་ཅད་འགྲོ་དོན་དུ་ལེན་པ། གདུང་ཤུགས་དྲག་པོ་འབྲལ་བ་མེད་པ་རྣམས་དགོས། སངས་རྒྱས་ཀྱི་སྐུ་གཟུགས་དང༌། གསུང་རབ་ཀྱི་པོ་ཏི་དང༌། །ཆོས་པ་བཞིར་ལོངས་པ་ལྟ་ཅི་སྨོས། ཆོས་པའི་གཟུགས་ཙམ་ཡོད་པ་ལ་ཡང༌། སྐུར་བ་མི་འདེབས། སྡིག་མི་གསོག་པ་གཅིག་འཚལ། གཉིས་པ་བསམ་པ་བཟང་བ་ནི། གལ་ཆེ་གཞན་ལ་བྱེད་པ། གཞན་ལ་ཕན་ཐོགས་ན་རང་ལ་གནོད་ཀྱང་བཟོད་པ། ཞོར་ཐབས་སུ་ཡང་གཞན་ལ་གནོད་པ་གཏན་མི་བྱེད། ཕན་ཅི་ཐོགས་ཐོགས་སུ་སྒྲུབ། དགྲ་ལ་ཞེ་སྡང་དྲག་པོ་དང་འཁོན་འཛིན་མི་བྱ། གསུམ་པ་ལས་འབྲས་ལ་རྩི་བ་ནི། སྡིག་པ་ཆེ་ཆུང་ཐམས་ཅད་ལ་འཛེམ། དགེ་བ་ཆུང་བ་ལ་བརྙས་བཅོས་མི་བྱེད། ཆེན་པོ་ལ་བློར་མི་ཤོང་བ་མེད་པ། འཕྲལ་ཉིན་རེ་བཞིན་ཕྱག་འབུལ། མཆོད་པ། བསྐོར་བ་བྱེད། སྨོན་ལམ་འདེབས། ཟླ་རེ་བཞིན་བསྙེན་གནས་ལེན། ལོ་དུས་སུ་ཚ་ཚ་འདེབས་པ་དང༌། དགེ་འདུན་དང༌། གཙུག་ལག་ཁང་ལ་མཆོད་པ་བྱེད། བཞི་པ་ང་རྒྱལ་སྤངས་པ་ནི། འདི་ཚོ་འགངས་ཆུང༌། ང་རང་འདི་ཙམ་ཡིན། ཕོ་གྲུང་མོ་གྲུང་བྱ་བ་ང་


TNT01_Page_0849
[མ་དཔེ་གཟིགས་ན་འདིར་གནོན།]

ཡིན་སྙམ་ནས་གཞན་ལ་བརྙས་བཅོས་བྱས་ན། སྐྱེས་བུ་དམ་པ་གང་ན་ཡོད་མི་ཤེས་པས། དེ་འདྲ་ལ་ང་རྒྱལ་གྱིས་བརྙས་ན་ཚེ་འདིའི་བསོད་ནམས་ཉམས། སྐྱེ་བ་ཕྱི་མ་ཡི་དྭགས་ལྦ་བ་ཅན་དུ་སྐྱེ། དེས་ན་བརྙས་པ་མི་བྱེད་གུས་པ་བྱ། ང་རྒྱལ་རང་མཐོང་ཆེ་འདོད་སྤངས་ན་རིགས་མཐོ་བར་སྐྱེ་བ་ལགས།། །།ཞེས་པའང་རྒྱལ་ཁམས་པ་ཏཱ་ར་ནཱ་ཐས་གདམས་པའོ། །མངྒལཾ། །དགེའོ། །

ཉམས་ལེན་གནད་བསྐུལ་གྱི་རིམ་པ།


TNT01_Page_0850
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། རྒྱལ་བ་ཀུན་འདུས་ཀྱི་ངོ་བོ་མཚན་ལྡན་བླ་མ་ལ་ཕྱག་འཚལ་ལོ། །འདིར་བུའི་དོན་པོ་དགེ་བའི་བཤེས་གཉེན་བློ་གྲོས་དཔལ་བཟང་བ་ལ། ཉམས་ལེན་གནད་བསྐུལ་གྱི་རིམ་པ་ཅུང་ཟད་བྲི་བར་བྱ་སྟེ། སྤྱིར་ཆོས་ཐམས་ཅད་ཀྱི་འཇུག་སྒོ་ངེས་འབྱུང་དང་སེམས་བསྐྱེད་གཉིས་ཡིན། དངོས་གཞི་ཏིང་ངེ་འཛིན་དང་ཤེས་རབ་གཉིས་ཡིན། མཐར་ཕྱིན་བྱེད་རང་དོན་དང་གཞན་དོན་གྱི་སྤྱོད་པ་ཕུན་སུམ་ཚོགས་པ་ཡིན། འབྲས་བུ་ཆོས་སྐུ་དང་གཟུགས་སྐུ་གཉིས་ཡིན། དེ་ལྟར་དོན་བརྒྱད་ཀྱི་ཆོས་སྤྱིའི་ཉམས་ལེན་འབྲས་བུ་དང་བཅས་པ་བསྡུས་པ་ལགས་སོ། །དེ་ཡང་འཁོར་བ་མཐའ་དག་དོན་དམ་པར་མེད་བཞིན་དུ་སྣང་བ་ཡིན་པས་ཞེན་པའི་ཡུལ་སྟོངས། གནས་སྐབས་ཀུན་རྫོབ་ཏུ་ཡང་མི་རྟག་པའི་རང་བཞིན་ཡིན་པས་ཞེན་རིན་ཡང་མི་ཆོག ཅི་བྱས་སྡུག་བསྔལ་གྱི་གཡོས་ལས་མ་འདས་པས་ཞེན་པའི་རྒྱུ་མེད། གལ་ཏེ་ཞེན་ན་སྡུག་བསྔལ་ལས་ཐར་དུས་མེད་པ་ཞིག་ཡོང་བས་ནམ་ཡང་ཞེན་དུ་མི་རུང༌། རྒྱུ་མཚན་བཞི་པོ་འདི་ཤེས་ན་ངེས་འབྱུང་སྙིང་ཐག་པ་ནས་སྐྱེ་བ་ཡིན།


TNT01_Page_0850
[མ་དཔེ་གཟིགས་ན་འདིར་གནོན།]

ཀུན་རྫོབ་རང་བཞིན་མེད་པར་ཤེས་པས། །དེ་ལྟར་མ་རྟོགས་པའི་སེམས་ཅན་ལ་སྙིང་རྗེ་བསྐྱེད། དོན་དམ་དེ་བཞིན་གཤེགས་པའི་ཁམས་འགྲོ་བ་ཐམས་ཅད་ལ་ཁྱབ་པར་མཐོང་བས། སངས་རྒྱས་ཀྱི་གོ་འཕང་ལ་སྐྱེ་འགྲོ་ཀུན་འགོད་པའི་སྙིང་སྟོབས་རྒྱས་པ། འཁྲུལ་སྣང་གི་སྡུག་བསྔལ་སྣ་ཚོགས་པས་གཅེས་པའི་སེམས་ཅན་རྣམས་སྒྲོལ་བའི་དོ་གལ་རང་ལ་བབ་བར་ཤེས་པའི་ལྷག་བསམ་དང༌། ཕྱོགས་ཆ་ཉེ་རིང་སྤངས་བའི་བཏང་སྙོམས་ཆེན་པོ་སྟེ། བཞི་པོ་དེ་འཛོམ་ན་སེམས་བསྐྱེད་རྣམ་དག་མི་ཡོང་བའི་ཐབས་མེད་དོ། །བྱིང་རྒོད་དང་བྲལ་བའི་སེམས་དང་བ་དང༌། དམིགས་མེད་དུ་ཅི་འདོད་བཞག་ཆོག་པའི་དབང་སྒྱུར་པ་དང༌། གྲིམ་ལྷོད་རན་པས་ལུས་སེམས་མི་བདེ་བ་མེད་པ་དང༌། དམིགས་མེད་དུ་ཤེས་པས་ཏིང་འཛིན་ཉིད་ལ་ཡང་མ་ཆགས་པ་སྟེ། ཏིང་ངེ་འཛིན་རྣམ་དག་ཏུ་འགྲོ་བ་ལ་བཞི་པོ་དེ་ཚང་དགོས། རྒྱུ་འབྲས་རྟེན་འབྲེལ་མི་བསླུ་བར་ཤེས་པ་དང༌། འཁོར་འདས་ཀྱི་གཉིས་སྣང་ཐམས་ཅད་གདོད་མ་ནས་སྟོང་པར་ཤེས་པ་དང༌། ཆོས་ཀྱི་དབྱིངས་གང་དུ་ཡང་དམིགས་སུ་མེད་པ་ལ་སེམས་རོ་གཅིག་ཏུ་ཐིམ་པའི་ཉམས་མྱོང་དང༌། ཉམས་མྱོང་དེའི་རྩལ་ཅིར་ཡང་འཆར་ཐུབ་པའི་གསལ་སྟོང་ཟུང་འཇུག་སྟེ། བཞི་པོ་འདི་དང་ལྡན་ན། ཐེག་ཆེན་གྱི་ལྟ་བ་རྣམ་པར་དག་པའི་ལྷག་མཐོང་དེ་ཡོད་པ་ལགས། སྤྱིར་བྱང་ཆུབ་སེམས་


TNT01_Page_0851
[མ་དཔེ་གཟིགས་ན་འདིར་གནོན།]

དཔའི་སྤྱོད་པ་ཐམས་ཅད་གཞན་དོན་ཡིན་ཀྱང༌། ཞོར་ལ་རང་དོན་རྒྱ་ཆེན་པོ་གཙོ་བོར་འགྲུབ་པའི་སྤྱོད་པ་རྣམས་ལ་རང་དོན་གྱི་སྤྱོད་པ་ཞེས་བྱ་སྟེ། དེ་ཡང་བདག་གཞན་མཉམ་པ་ཉིད་དུ་ཤེས་པ་དང༌། མཐར་ཐུག་སེམས་ཅན་སྒྲོལ་བར་འདོད་པས། གནས་སྐབས་བདག་ཉིད་བྱང་ཆུབ་ལ་འདུན་པ་དྲག་པོ་དང༌། མངོན་ཤེས་རྫུ་འཕྲུལ་སོགས་ཡོན་ཏན་གྱི་ཁྱད་པར་མང་པོ་སྒྲུབ་པ་ལ་བརྩོན་པ་དང༌། རྟག་ཏུ་མཉམ་པར་བཞག་པ་དང་འབྲེལ་བ་སྟེ། བཞི་པོ་དེས་ཕྱིན་དྲུག་སོགས་བྱང་ཆུབ་སེམས་དཔའི་སྤྱོད་པ་ཅི་སྤྱད་ཀྱང། རང་དོན་རླབས་པོ་ཆེ་ཡིན་ལ། བདག་པས་གཞན་གཅེས་ཀྱི་བསམ་པ་དང༌། ཡི་རང་དང་བསྔོ་བའི་སྦྱོར་བ་དང༌། ཆོས་དང་ཟང་ཟིང་དང༌། ལུས་དང༌། བྱ་རྩོལ་གྱི་སྒོ་ནས་དངོས་སུ་སེམས་ཅན་ལ་ཕན་འདོགས་པ་དང༌། ཇི་ལྟར་སྒོམ་པ་ཐམས་ཅད་གཞན་དོན་དུ་དམིགས་ཤིང༌། ཏིང་ངེ་འཛིན་གྱིས་ཞིང་སྦྱོང་བ་དང༌། སེམས་ཅན་སྨིན་པར་བྱེད་པ་དང༌། བརྒྱུད་ནས་སེམས་ཅན་ལ་ཕན་འདོགས་པ་སྟེ། བཞི་པོ་འདི་དང་འབྲེལ་བའི་སྤྱོད་པ་ཐམས་ཅད་གཞན་དོན་ལགས། རང་དོན་གཞན་དོན་ལ་ལྡོག་ཆས་ཕྱེ་བ་མང་ངོ༌། །ངེས་འབྱུང་དང༌། ཤེས་རབ་དང༌། རང་དོན་གྱི་སྤྱོད་པ་རྣམས་ཀྱི་རང་འབྲས་ཆོས་སྐུ་སྟེ། དེ་ཡང་སྤྲོས་བྲལ་མཁྱེན་པ་དང༌། རྟེན་འབྲེལ་མཁྱེན་པ་དང༌། རང་བཞིན་


TNT01_Page_0852
[མ་དཔེ་གཟིགས་ན་འདིར་གནོན།]

དབྱིངས་དང་ཡེ་ཤེས་ཟུང་འཇུག་དང༌། འཕྲིན་ལས་ལྷུན་གྲུབ་ཏུ་འབྱུང་བའི་ཐུགས་རྗེ་དམིགས་པ་མེད་པའི་ངོ་བོར་གནས་པ་སྟེ། མཚན་ཉིད་བཞི་ལྡན་ཡིན་ནོ། །སེམས་བསྐྱེད་དང་ཏིང་ངེ་འཛིན་དང་གཞན་དོན་གྱི་སྤྱོད་པའི་རང་འབྲས་ནི། གཟུགས་སྐུ་ཡིན་ཏེ། མཛད་པ་ལྷུན་གྱིས་གྲུབ་པ་དང༌། ཡེ་ཤེས་དང་སྨོན་ལམ་གྱི་སྟོབས་ལས་བྱུང་བ་དང༌། གང་ལ་གང་འདུལ་དུ་སྣང་བས་གར་ཡང་ཕྱིན་པ་དང༌། ཡུལ་དུས་ཐམས་ཅད་དུ་མཛད་པ་མ་འཁྲུགས་ཤིང་དོན་མེད་དུ་མི་འགྱུར་བ་སྟེ། མཚན་ཉིད་བཞི་ལྡན་ཡིན་ནོ། །ལམ་དེས་འབྲས་བུ་དེ་འགྲུབ་པའི་རྒྱུ་མཚན་ནི། སེམས་ཉིད་གདོད་མ་ནས་སྤྲོས་པ་ཐམས་ཅད་བྲལ་བ། ཀུན་རྫོབ་ཆོས་ཅན་འཁྲུལ་པའི་སྣང་བ་ཐམས་ཅད་དང༌། །དོན་དམ་ཆོས་ཉིད་མ་འཁྲུལ་པའི་ཡེ་ཤེས་ཐམས་ཅད་འཆར་བའི་ནུས་པ་ཅན་ཡིན་པའི་ཕྱིར། དེ་ལྟར་འགྲུབ་པ་ཡིན་ནོ། །དེ་རྣམས་བློ་ཡུལ་དུ་ངེས་ནས། སྐབས་ཀྱི་དོན་ཅུང་ཟད་བརྗོད་པ་ལ། བདག་ཉིད་ཀྱི་བསྟན་པའི་བྱ་བ་རང་གཞན་ཚུལ་ཁྲིམས་རྣམ་དག་ལ་འགོད་པ་དང༌། ཉན་བཤད་ལ་བརྟེན་ནས་གདུལ་བྱ་སྤྱོད་པ་ཕུན་སུམ་ཚོགས་པ་དང༌། བློ་གྲོས་ཀྱི་སྣང་བ་ཅི་རིགས་པ་བསྐྱེད་པ་རྣམས་ཀྱང། བསམ་པ་ཟང་ཟིང་མེད་ཅིང་བྱང་ཆུབ་སེམས་ཀྱིས་ཟིན་ན་གཞན་དོན་རླབས་པོ་ཆེ་ཡིན། གཞན་གཞི་ཚུལ་ཁྲིམས་ལ་གནས་པའི་སྒོ་ནས། ཏིང་ངེ་


TNT01_Page_0853
[མ་དཔེ་གཟིགས་ན་འདིར་གནོན།]

འཛིན་དང་ཤེས་རབ་དང་སྒོམ་བྱུང་རྣམ་པར་དག་པ་ལ་འགོད་ཐུབ་ན། གང་དག་གཅིག་ལ་སྟོང་ཉིད་ཀྱི་ལྟ་བ་རྣམ་པར་དག་པ་སྐྱེས་པས་ཀྱང་ཐོས་བསམ་ཁོ་ན་ཅན་གྱི་སྡེ་སྣོད་འཛིན་པར་གྲགས་པ་བརྒྱ་སྟོང་ཐོན་པ་ལས་གཞན་དོན་རླབས་ཆེ་བ་ཡིན། ཏིང་ངེ་འཛིན་ལྟར་སྣང་སྐྱེས་པ་ལས་ནི། རྒྱལ་བའི་གསུང་རབ་རྣམ་པར་དག་པ་ལ་ཐོས་བསམ་བྱུང་ན་བརྒྱ་སྟོང་འགྱུར་གྱི་དེ་རང་དགའ། ཕུགས་ཀྱི་གཞན་དོན་དེ་རང་ཆེ། བརྫུན་ཁོ་ནས་བཟང་པོར་འཆོས་པའི་སྒོམ་ཆེན་དང༌། ལས་འབྲས་ཁྱད་དུ་གསོད་པའི་སྟོང་ཉིད་དང༌། བླུན་སྒོམ་བྱིང་བ་བསགས་པའི་ཞི་གནས་ཏེ། འདི་གསུམ་དམ་ཆོས་འཇིག་པའི་རྒྱུ་ཆེན་ཡིན་ལགས་སོ། །ཡང་གནས་སྐབས་སུ་བདག་ཉིད་ལ་སྒོམ་བྱུང་གི་མངོན་པར་རྟོགས་པའི་ཡོན་ཏན་མེད་བཞིན་དུ་གཞན་གྱི་བླ་མ་ལྟར་བརྫུ་བ་ནི་ཤིན་ཏུ་ཉེས་པ་ཆེའམ་སྙམ་ན། འདི་ལ་གཉིས་ཡོད་དེ། རང་གི་རྙེད་བཀུར་གྲགས་པ་འདོད་པ་དང༌། རང་གཞན་ལ་ཆགས་སྡང་གི་དབང་དུ་སོང་བ་ཡིན་ན། ངན་འགྲོའི་གཏིང་རྡོ་ཡིན། གཅིག་ཏུ་བསྟན་པ་དང་དགེ་འདུན་ལ་ཕན་པའི་བསམ་པ་སྙིང་ཐག་པ་ནས་གཞན་དོན་སྐྱོང༌། དངོས་སུ་ཡང་ཕན་ཐོགས་ངེས་པ་རྣམས་བྱ། དད་རྫས་ལ་སོགས་པ་ལོངས་སྤྱོད་པར་མི་འོས་པ་རྣམས་ལ་ཅི་ནུས་ཀྱིས་འཛེམ་ཞིང༌། ཡོ་བྱད་ཐམས་


TNT01_Page_0854
[མ་དཔེ་གཟིགས་ན་འདིར་གནོན།]

ཅད་དགེ་བར་བསྒྱུར་བ་དང༌། འཕྲན་བུ་མི་སྤྱོད་ཀ་མེད་རྣམས་གཞན་ལ་ཕན་ན་བདག་ཉིད་ཉེས་པར་གྱུར་ཀྱང་སླ་སྙམ་པའི་བདག་གཞན་བརྗེ་བ་དང༌། འདི་ནི་མི་འོས་པའི་བྱ་བ་ཞིག་གོ་སྙམ་པས་བཤགས་པ་དང་སྒྲིབ་སྦྱོང་ལ་འབད་པར་བྱས་ན། བྱང་ཆུབ་སེམས་དཔའི་སྤྱོད་པ་ཁྱད་པར་ཅན་དུ་འགྲོ་བ་ཡིན། སོ་སོ་སྐྱེ་བོའི་གཞན་དོན་ཕལ་ཆེར་དོན་མེད་དུ་འགྲོ་བ་མ་ཡིན་ནམ་སྙམ་ན། དངོས་སུ་ཐར་པ་དང་ཐམས་ཅད་མཁྱེན་པའི་ལམ་ལ་འགོད་ཐུབ་པ་ཉུང་བ་ལ་དགོངས་པ་ཡིན་གྱི། དེ་མིན་ཆོས་ཀྱི་འབྲེལ་བ་ཐོགས་ཕྱིན། ཕུགས་དོན་མེད་དུ་འགྲོ་བ་མི་སྲིད། ཡང་གཞན་དོན་གྱི་གནས་སྐབས་སུ་རང་ལ་བཟང་འཛིན་གྱུར་ན། ཏིང་ངེ་འཛིན་མཐོ་རབ་ཡོད་ཀྱང་ཕུང་འགྲོ་ན། གཞན་ལྟ་ཅི་སྨོས། དེ་འཇོམས་པ་ལ་འདི་ལྟར་བསམ་དགོས། ཀུན་རྫོབ་ཀྱི་དངོས་པོ་ཐམས་ཅད་མེད་བཞིན་དུ་སྣང་བ་ལ། ང་རྒྱལ་དང་བཟང་འཛིན་སྐྱེ་བ་ལས་གཡས་ཆུང་བ་ཅི་ཡོད། རྨི་ལམ་དུ་རྒྱལ་སྲིད་ཐོབ་པ་ལ་རྒྱལ་པོར་རློམ་པ་དང་འདྲ། གལ་ཏེ་བདེན་པར་ཡོད་དུ་ཆུག་ཀྱང༌། སངས་རྒྱས་བྱང་ཆུབ་སེམས་དཔའི་མཛད་པ་སོགས་ལ་བརྟགས་ན། ཁྱོད་ཀྱི་འདི་ཙམ་གྱི་ཅིར་ཡང་མི་ཕྱིན། གཞན་དོན་ཡིན་པའི་རྒྱུ་མཚན་ཡང་མི་གདའ། འཕྲལ་གྱི་ཕུན་ཚོགས་དང་ལང་ལོང་ནི། མི་སྡིག་ཅན་དམྱལ་བར་འགྲོ་ཁ་མ་འདྲ་ལའང་གདའ་འོ། །


TNT01_Page_0855
[མ་དཔེ་གཟིགས་ན་འདིར་གནོན།]

ཞེས་རང་གི་རང་ལ་བརྡ་སྦྱོར་དགོས། ཡང་ཉམས་ལེན་དང་གཞན་དོན་སྤྱོད་པས་ངལ་བ་དང༌། སྒྱིད་ལུག་པར་གྱུར་ན་འདི་ལྟར་བསམ་སྟེ། རྒྱལ་བ་སྲས་བཅས་རྣམས་ཀྱི། གཞན་དོན་དུ་སྐུ་དང༌། རྒྱལ་སྲིད་སྦྱིན་པར་བཏང་བ་ལ་ཡང་གྲངས་མེད། ཏིང་ངེ་འཛིན་གྱི་དོན་དུ་ཞབས་ཡ་གཅིག་བཙུགས་ཏེ། ལོ་བརྒྱད་ཁྲིར་བཞུགས་པ་སོགས་མཛད་སྣང༌། ཁྱོད་ཀྱིས་འཁོས་འདིས་བྱང་ཆུབ་ཏ་ག་ལ་ཐོབ། ལྟོ་གོས་དང་ནོར་དང་གཏམ་གྱི་ཕྱིར་དུ་ཅི་ཡང་ཞིག་བྱེད་ནུས་པ་ལ། ཆོས་ཕྱིར་དཀའ་བ་ཅུང་ཟད་ཞིག་ཀྱང་སྤྱོད་མི་ནུས་པ་འཁོས་འདི་འདྲའམ། ཞེས་དྲན་པར་བྱའོ། །འདིར་སྨྲས་པ། ཧ་ཅང་སྐྱོ་ཤས་ཆེ་ན་ཡི་མུག་ཡིན། །དེས་ཀྱང་མི་ཕན་སྤྲོ་བ་སྐྱེད་པ་གཅེས། །མི་ལུས་ཐོབ་ཅིང་དམ་པའི་ཆོས་དང་མཇལ། །བླ་མས་རྗེས་བཟུང་འདི་ལས་སྐྱིད་པ་ཅི། །ཧ་ཅང་སྤྲོ་ན་རྣམ་གཡེང་རྒོད་བག་ཡིན། །ངེས་འབྱུང་སྒོམ་པས་དེ་ལ་གཉའ་གནོན་མཛོད། །ཞུམ་པར་གྱུར་ན་གཟེངས་བསྟོད་འདི་ལྟར་བསམ། །ཚུལ་བཞིན་བསྒྲུབས་ན་དུད་འགྲོའི་ལུས་ཀྱིས་ཀྱང༌། །བྱང་ཆུབ་མཆོག་གི་ལམ་དུ་ངེས་འཇུག་ན། །བདག་གིས་ཅི་ཕྱིར་མི་ནུས་ཞེས་སུ་བསམ། དྲེགས་པ་སྐྱེས་ན་རང་གི་གནས་ཚུལ་ལ། །དྲང་པོར་བསམས་པ་ཉིད་ཀྱིས་ཞི་བར་འགྱུར། །ཀུན་ཀྱང་ཐམས་ཅད་སྟོང་


TNT01_Page_0856
[མ་དཔེ་གཟིགས་ན་འདིར་གནོན།]

པའི་རང་བཞིན་ལ། །བཟང་ངན་མཐོ་དམན་བདེ་སྡུག་ཡོད་མེད་པས། །སྤྲོས་བྲལ་དབྱིངས་ལ་མཉམ་པར་བཞག་གྱུར་ན། །གེགས་དང་གོལ་ས་ཐམས་ཅད་རང་གྲོལ་ཡིན། །ཞེས་པ་འདི་ནི་རྒྱལ་ཁམས་པ་ཏཱ་ར་ནཱ་ཐས་ཉེ་བར་གདམས་ཏེ། ངོ་མཚར་ཅན་གྱི་དམ་ཆོས་འདི། ཁྱོད་ཀྱི་ཐུགས་སུ་སོན་པ་དང༌། །ཤཱཀྱའི་མཚན་འཆང་རྒྱལ་དཻས་ཀྱང༌། །ངེས་པར་བྱིན་གྱི་རློབས་པར་འགྱུར། །ཤར་ཕྱོགས་ཡངས་པའི་རྒྱལ་ཁམས་སུ། །དོན་གཉིས་རླབས་ཆེན་འགྲུབ་པ་དང༌། །མྱུར་དུ་བླ་མའི་ཞབས་བསྟེན་ནས། །བསྟན་ལ་བྱ་བ་བྱེད་པར་ཤོག །མངྒ་ལཾ།། །།

ཉམས་ལེན་སྒྲུབ་པའི་མན་ངག་མདོ་ཙམ་བཀོད་པ།


TNT01_Page_0857
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། དགོས་འདོད་ཀུན་འབྱུང་བླ་མ་ལ། །ལུས་ངག་ཡིད་གསུམ་ཕྱག་འཚལ་ནས། །ཉམས་ལེན་སྒྲུབ་པའི་མན་ངག་ཅིག །མདོ་ཙམ་བདག་གིས་གསོལ་བར་བགྱིད། །དེ་ལ་འཁོར་བ་ཐམས་ཅད་སྡུག་བསྔལ་ཡིན་པས། སེམས་རྒྱུད་ཆོས་སུ་སོང་བ་ཞིག་མ་བྱུང་ན། གཞན་འཁོར་བའི་ཕུན་ཚོགས་གང་གིས་ཀྱང་ཕན་མེད། ནམ་འཆི་ཆ་མེད་མི་ལུས་རྙེད་དཀའ་བས་ཆོས་ཉམས་ལེན་ལ་ཕྱི་ཤོལ་བྱེད་མི་ཉན། རྒྱལ་སྲིད་ཀྱི་འབྱོར་པ་ཕུན་ཚོགས་ཅི་དགར་བོར་བ་ནི་སྙིང་སྟོབས་མཆོག་ཏུ་གྱུར་པ་ལགས་མོད། དེ་ཉིད་ལ་དགོས་པ་བླ་ན་མེད་པའི་བྱང་ཆུབ་རང་དོན། ཆོས་ཀྱི་སྐུ་སྤྲོས་བྲལ་གྱི་དབྱིངས་རྟོགས་པ་དང༌། གཞན་དོན་འཁོར་བ་མ་སྟོངས་ཀྱི་


TNT01_Page_0857
[མ་དཔེ་གཟིགས་ན་འདིར་གནོན།]

བར་དུ་ནམ་མཁའི་མཐས་གཏུགས་ཀྱི་འགྲོ་བ་ཐར་པར་འདྲེན་པ་ཡིན་པས། དེ་གཉིས་ལ་ཐུགས་གཅིག་ཏུ་བརྣགས་པར་འཚལ། སྲིད་པ་སྙིང་པོ་མེད་པ་ལ་སྙིང་པོའི་དོན་བླང་པའི་ཕྱིར། རྩེ་གཅིག་ཏུ་སྒྲུབ་ཏུ་ཡོང་ཞེས་སྐལ་པ་བཟང༌། དེ་ཡང་ཚེ་འདི་ཕྱིའི་འཁོར་བ་ལ་ཞེན་པ་ཡོད་ན་ཆོས་རྣམ་དག་ཏུ་མི་འགྱུར། བྱམས་སྙིང་རྗེ་བྱང་ཆུབ་ཀྱི་སེམས་མ་འབྱོངས་ན་ཐེག་དམན་དུ་གོལ། ཕྱོགས་འཛིན་དང་ཆགས་སྡང་གི་དབང་ལས། རང་རྒྱུད་མ་དུལ་ན་ཆོས་ཀྱི་དགོས་པ་སྟོར། སྣང་གྲགས་ལ་བདེན་པར་འཛིན་ན་གནས་ལུགས་ཀྱི་དོན་མི་རྟོགས། དེས་ན་ཅིས་ཀྱང་དགོས་མེད་ཀྱི་ངེས་འབྱུང་དང་གཅིག བཟོད་མེད་ཀྱི་སྙིང་རྗེ་ཤུགས་དྲག་དང་གཉིས། དག་སྣང་གི་འཁོར་ལོ་བསྐོར་བ་དང་གསུམ། ཨ་འཐས་ཀྱི་འཁྲུལ་པ་བཤིག་པ་དང་བཞི། ཆོས་བཟང་པོ་འོང་མི་འོང་བཞི་པོ་འདི་ཡོད་མེད་ལ་རག་ལས། ཁྱད་པར་དངོས་གྲུབ་ཀྱི་རྩ་བ་བླ་མ་དམ་པ་ཡིན། བློ་རྩེ་གཉིས་ལ་བྱིན་རླབས་མི་འབྱུང་བས། རྩ་བའི་བླ་མ་གཅིག་ཁོ་ན་ལ་གསོལ་བ་བཏབ་པས། རྩ་བརྒྱུད་ཀྱི་བླ་མ་ཡིན་ཚད་ཀྱི་བྱིན་རླབས་འཇུག མོས་གུས་དེ་ཡང་སངས་རྒྱས་ཀུན་འདུས་ཀྱི་ངོ་བོར་ཤེས་པའི་ལྟག་ཚན་ཆེ་བ། གདུང་ཤུགས་དྲག་པོས་ངར་རྣོ་བ། ཅི་མཛད་གཞན་དོན་དུ་མཐོང་བའི་ངོས་རྒྱས་པ། གང་ལ་ཡང་དཔྱད་པ་མི་བྱེད་པའི་


TNT01_Page_0858
[མ་དཔེ་གཟིགས་ན་འདིར་གནོན།]

ཐག་ཆོད་པ་སྟེ། བཞི་པོ་དེ་ཚང་ན། རྟོགས་པ་མི་སྐྱེ་བའི་ཐབས་མེད། རྩ་བ་མོས་གུས་རང་ལ་འདུས། གཞན་ཡང་དེང་སང་གི་སྒོམ་ཆེན་པ་ཕལ་ཆེར། བསྐྱེད་རིམ་བཟླས་སྒོམ་ལ་གཡས་ཆུང་ངུ་བྱེད། ཡང་སྟོང་ཉིད་ཁོ་ན་ལ་གདེང་ཡོད་དམ་སྙམ་ན། བསྲུང་པ་དང་འདྲེ་འདུལ་སོགས་སྔགས་ཐུ་ཐུ་དང༌། གདམས་ངག་སད་སུད་ཅིག་ལ་ཀ་རེ་སྟེ། དེ་གཉིས་འགལ་བ་ཡིན། རྡོ་རྗེ་འཆང་གིས་རྒྱུད་ཐམས་ཅད་དུ་བསྐྱེད་རིམ་གལ་པོ་ཆེར་གསུངས། དག་སྣང་གི་འཁོར་ལོ་བསྐོར་བ་ལ་ཤིན་ཏུ་ཟབ། དེས་ན་ལུས་ལ་བྱིན་རླབས་འཇུག་པའི་དོན་དུ་བསྐྱེད་རིམ། ངག་ལ་ནུས་པ་རྙེད་པའི་དོན་དུ་བཟླས་བརྗོད་ལ་ནན་ཏན་དུ་ཞུ། བསྐྱེད་རིམ་རྒྱས་འབྲིང་བསྡུས་གསུམ་རང་གི་བློ་དང་འཚམ་པར་སྒོམ་པ་ལས། ཁབ་མིག་ཏུ་མཛུག་གུ་འཇུག་པ་བཞིན་མི་དགོས། རླུང་སེམས་ཀྱི་འཇུག་པ་མ་དག་ན་སེམས་ཀྱི་འཁྲུལ་པ་མི་ཞིག དེས་ན་རྫོགས་པའི་རིམ་པ་རྩ་རླུང་ཐིག་ལེའི་རྣལ་འབྱོར་མན་ངག་ཞལ་ཤེས་དང་བྱིན་རླབས་ཀྱི་བཀའ་བབས་སུ་ལྡན་པ་ལ་ནན་ཏན་དུ་སྒྲུབས་པས། རླུང་སེམས་ལ་འཇུར་བ་ཞིག་དགོས། རི་ཁྲོད་དུ་རྫོགས་རིམ་སྒོམ་པ་ལ། ལུས་སྦྱོང་ཀྱང་གེགས་སེལ་དང་བོགས་འདོན་དུ་གལ་ཆེ་བ་ཞིག་འདུག དེ་ཐམས་ཅད་ཀྱི་སྙིང་པོ་ཕྱག་རྒྱ་ཆེན་པོ་གནས་ལུགས་ཀྱི་དོན་རྟོགས་པ་ལ་འགྲིལ་བ་


TNT01_Page_0859
[མ་དཔེ་གཟིགས་ན་འདིར་གནོན།]

ཡིན། འདིའི་མན་ངག་ནི་སེམས་མ་བཅོས་སོ་མར་འཇོག་པ་ཁོ་ནར་འདུག རང་རིག་རང་གསལ་རྗེན་ནེ་བ་ལ་གནས་པ་འདི་ཞི་གནས་སྐྱོན་མེད་པ་ཡིན། དེ་ལ་བརྟེན་ཏེ་རང་སེམས་ཀྱི་གནས་ལུགས་རྟོགས་པའི་ཐབས་ལ་འབད་དགོས་པ་ཡིན་ལ། སེམས་ཀྱི་གནས་ལུགས་དེ་ནི་གཞི་གདོད་མ་ནས་ཅིར་ཡང་མ་གྲུབ་ཀྱང་འདུག་པ་དེའི་རང་ཞལ་ལྟ་ཤེས་ན་སྒོམ་ཆེན་དུ་སླེབ་པ་ཡིན། དེ་ཉིད་རྟག་ཏུ་འཁྱོངས་ན་སྒོམ་ལམ་དུ་ལོངས་པ་ཡིན། སྒོམ་ཡང་མ་དགོས་ན་གནས་ལུགས་ལྷོད་དུ་གྱུར་པ་ཡིན་པས། དེ་སྲིད་དུ་ནན་ཏན་འཚལ། དེས་ན་ད་ལྟར་ཐུན་གྱི་གནས་སྐབས་སུ་བླ་མའི་མོས་གུས་ལ་གཞི་བྱས། ཕྱག་རྒྱ་ཆེན་པོ་ལ་མཐིལ་དུ་བྱས། བསྐྱེད་རྫོགས་གཞན་རྣམས་ལ་བོགས་འབྱིན་དུ་བྱས་ཉམས་སུ་བཞེས་པ་དང༌། ཐུན་མཚམས་སུ་ཕྱག་དང་མཆོད་པ་སྨོན་ལམ་ཀློག་པ་སོགས་ཆོས་སྤྱོད་ཀྱི་རིམ་པ་ལ་ཡང་གང་འགྲུས་སུ་འཚལ་ཞིང༌། དགེ་སྦྱོར་ཐམས་ཅད་བཟང་འཛིན་དང་ཞེན་པས་མ་བཅིངས་པའི་ངང་ནས་སྤྱོད་པ་ཞུ། དམ་པ་རྣམས་ཀྱིས་གཅིག་ནས་གཅིག །འབད་པས་གདམས་པའི་སྙིང་གཏམ་ཡང༌། །འདི་ལས་གཞན་ན་ཡོད་མིན་པས། །ཐུགས་ལ་ཆོངས་ཤིག་སྐལ་ལྡན་མཆོག། །།ཅེས་པའང་རྒྱལ་ཁམས་པ་ཏཱ་ར་ནཱ་ཐས་གདམས་པའོ། །མངྒལཾ། །

སློབ་བུ་དགེ་འདུན་དཔལ་འཕེལ་ལ་གདམས་པ།


TNT01_Page_0860
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། བླ་མ་རྣམས་ལ་གུས་བཏུད་ནས། །ཉམས་ལེན་གདམས་པ་མདོ་ཙམ་ཞིག །བུ་ཡི་དོན་པོ་ཁྱོད་ལ་གདམས། ཁྱོད་ཀྱི་ཐུགས་དང་འཕྲོད་པར་སྨོན། །ད་རེས་རྟེན་མི་ལུས་ཁྱད་པར་ཅན་ཐོབ་པ་ལ་ཉམས་ལེན་སྒྲུབ་པ་སྙིང་པོར་བྱེད་པ་གལ་ཆེ་ཞིང༌། དེ་ཡང་གང་སྣེ་ཟིན་ཟིན་ནས་སྒོམ་པས་ཀྱང༌། དོན་ཆེན་པོ་འགྲུབ་པ་སྲིན་མོད་ཀྱི། འོན་ཀྱང་ཉམས་ལེན་ལ་རྐང་སྒྲིལ་རྒྱུ་ཡོད་པ་གལ་ཆེ། དེས་ན་རེ་ཞིག་རྒྱུད་སྡེ་ནས་བཤད་པའི་དྲོད་མ་ཐོབ་ཀྱི་བར་དུ་ཉམས་ལེན་ཁྲིགས་ཆགས་ལམ་གྱི་ལུས་ཚང་བ་ཞིག་ངེས་པར་དགོས། དྲོད་ཐོབ་པ་ཡན་ཆད་ཉམས་ལེན་ལ་རྐང་གྲངས་མེད། ཁྲིགས་ཆགས་ཐམས་ཅད་ཞིག་པ་ཡིན་མོད་ཀྱི། གྲུབ་པའི་སྤྱོད་པ་ཡིན་པས། རང་ཅག་ལས་དང་པོ་པས་དེ་མི་འཆུན། འདིར་ལམ་ཆ་ཚང་བའི་ཚད་ཀྱང་གང་ཡིན་སྙམ་ན། ཚེ་འདི་ལྟ་ཅི་སྨོས། འཁོར་བ་མཐའ་དག་ལ་བློ་གཏིང་ནས་ལོག་པའི་ངེས་འབྱུང༌། ཅི་བྱེད་གཞན་དོན་དུ་འགྱུར་བའི་བྱང་སེམས་དང༌། བླང་དོར་འགལ་འཁྲུལ་མེད་པའི་སྤྱོད་པ་རྣམས་ལམ་གྱི་གཞི་རྟེན་ཤིན་ཏུ་གལ་ཆེ། ལམ་གྱི་དངོས་གཞི་དབང་གིས་རྒྱུད་སྨིན་པ་དང༌། བསྐྱེད་རིམ་ལྷ་སྒོམ་སྔགས་བཟླས་ཀྱི་བྱིན་རླབས་ཞུགས་པ་དང༌། རྫོགས་རིམ་རྡོ་རྗེའི་ལུས་ལ་གནད་དུ་བསྣུན་པའི་བདེ་གསལ་གྱི་ཉམས་ཤར་བ་དང༌། དེ་ཐམས་ཅད་འཛིན་ཞེན་དང་བྲལ་


TNT01_Page_0861
[མ་དཔེ་གཟིགས་ན་འདིར་གནོན།]

བའི་ལྟ་བས་རྒྱས་ཐེབས་པ་སྟེ་བཞི་པོ་དེ་རྣམས་ཚང་དགོས། དེ་ཀུན་ཡང་ཆོས་རྒྱུད་ཐ་དད་པ་སྣ་ཚོགས་ཀྱི་འཁོ་འཁོ་བསྡུས་པ་ཙམ་མ་ཡིན་པ། བཀའ་བབས་ཀྱི་ཆུ་བོ་གཅིག་ལས་བྱུང་བ་གལ་ཆེ། སྙིང་པོ་ལག་ལེན་དུ་དྲིལ་བ་ལ་ཐུན་བཞིར་དགེ་སྦྱོར་གང་བྱེད་ཀྱང་ཐོག་མར་ངེས་འབྱུང་དང༌། བྱང་ཆུབ་ཀྱི་སེམས་ཡིད་འགྱུར་བ་ཐོན་ངེས་པ་དང༌། བར་བར་ཐམས་ཅད་དུ་ངེས་འབྱུང་དང་སྙིང་རྗེས་བསྐུལ་མ་འདེབས་པ་གལ་ཆེ། ཐུན་བཞིར་བསྐྱེད་རྫོགས་ཀྱི་ཉམས་ལེན་ཆ་ཚང་བར་སྒོམ་ཞིང༌། གཏུམ་མོ་སོགས་རྫོགས་རིམ་ལ་གནད་དུ་བསྣུན་པ་སྟེ། ལམ་མྱུར་ཁྱད་ཟབ་ཅིང་གལ་ཆེ་བ་ཞིག་ལགས་ནའང༌། རང་རེ་ན་ཚོད་བག་ཙམ་ཀྱང་སོང༌། ཉམས་མྱོང་ཅན་གྱི་བླ་མ་དང་ཡང་ཐག་རིང་པས། གེགས་སེལ་བོགས་འདོན་སོགས་ཇི་བཞིན་ཡོང་བ་དཀའ་བའི་ཕྱིར། རྫོགས་རིམ་ཐུན་མ་ཆག་ཙམ་ལ་ཆོག་ཤེས་བྱ་ཞིང༌། བཅུར་བཅུར་མ་ཡིན་པའི་ངོས་ནས། ལྷ་སྒོམ་སྔགས་བཟླས་གང་འགྲུབ་དང༌། ཐུན་མཚམས་སུ་ཆོས་སྤྱོད་དགེ་སྦྱོར་ཡང་མ་སུན་པའི་ངོས་ནས་ཅི་འགྲུབ་བྱ། ཐུན་ཐུན་མཚམས་དགེ་སྦྱོར་སྤྱོད་ལམ་ཐམས་ཅད་དུ་གང་ཤར་ངོས་གཟུང་ཐམས་ཅད་བྲལ་བ་ལ་མ་བཅོས་སོ་མ་ཀློང་ཡངས་སུ་སྐྱོང་བ་གལ་ཆེ། རྣམ་པར་མི་རྟོག་པའི་མཉམ་བཞག་སྐྱོང་ཐུབ་ན་རྟག་འགྲུས་སུ་འཚལ་ཞིང༌། ཁྱད་པར་བླ་མའི་


TNT01_Page_0862
[མ་དཔེ་གཟིགས་ན་འདིར་གནོན།]

མོས་གུས་དྲག་པོ་རྩེ་གཅིག་ཏུ་གསོལ་བ་འདེབས་པ་རྣམ་པ་ཀུན་གལ་ཆེ། མདོ་འདོན་པ་དང༌། གཏོར་མ་གཏོང་བ་དང༌། ཕྱག་མཆོད་སཱཙྪ་གདབ་པ་སོགས་ཀྱང་ནུས་ན་གང་འགྲུབ་བྱ་ཞིང༌། དགེ་བ་ཐམས་ཅད་སངས་རྒྱས་ཀྱི་རྒྱུར་བསྔོ་བས་རྒྱས་ཐེབས་པ་ལ་གཅིག་ཏུ་ནན་ཏན་འཚལ། ཚེ་སྤེལ་བ་སོགས་འདོད་ལྷ་འཕྲན་བུའི་བསྙེན་བསྒྲུབ། བསྐྱེད་རྫོགས་དངོས་གཞི་ཚར་རེ་སོང་བའི་གཞུག་ཏུ། སྔར་གྱི་དེ་ཁའི་རྩིས་ཟིན་པའི་ཁོག་ནས་བྱེད་པ་གལ་ཆེ། རང་གི་དགེ་སྦྱོར་མ་ཆགས་པའི་ངོས་ནས་གཞན་ཕན་ཅུང་ཟད་འགྲུབ་ནའང་འགལ་བ་མེད་པས་འཚམས་པར་རེ་མཛད་པར་ཞུ། སྙིང་པོ་རང་རེའི་མི་ཚེ་འཕྲོ་ཅི་ཡོད་དམ་པའི་ཆོས་ལ་ཆིག་འགྲིལ་དུ་འཁྱོལ་པ་ཞིག་མ་བྱུང་ན། ཅིས་ཀྱང་མི་ཕན་པ་ལ་བློ་ཆེ་གཏོད་དགོས་པ་ལགས་སོ། ཁྱེད་ལ་གདམས་པ་ཇི་བཞིན་དུ། ཁོ་བོའང་དེ་ལྟར་སྨོན་པ་ལགས། །འོ་སྐོལ་སྤྱོད་ཚུལ་གཅིག་གྱུར་པས། །སངས་རྒྱས་གོ་འཕང་ཐོབ་པར་ཤོག །ཅེས་པའང་རྒྱལ་ཁམས་པ་ཏཱ་ར་ནཱ་ཐས་དོན་ལྡན་གྱི་སློབ་བུ་དགེ་འདུན་དཔལ་འཕེལ་ལ་གདམས་པའོ།། །།བཀྲ་ཤིས། །

མདོ་ཁམས་པ་ཤེས་རབ་དཔལ་ལ་གདམས་པ།


TNT01_Page_0863
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། མཐའ་བཞིའི་སྤྲོས་པ་ལས་གྲོལ་བ། །གཉིས་མེད་ཡེ་ཤེས་བདེ་ཆེན་དངོས། །བླ་མ་རྡོ་རྗེ་ཅན་ཞབས་འདུད། །གདམས་ངག་


TNT01_Page_0863
[མ་དཔེ་གཟིགས་ན་འདིར་གནོན།]

མདོ་ཙམ་བཤད་པར་བྱ། །རྙེད་དཀའི་མི་ལུས་ཐོབ་དུས་སུ། །དོན་ཡོད་ཀྱི་ཐབས་ལ་འབད་པར་འཚལ། །མཚན་ལྡན་རྗེ་དང་མཇལ་དུས་འདིར། །མོས་གུས་རྒྱུན་ཆད་མེད་པར་འཚལ། །གདམས་ངག་ཟབ་མོ་ཐོབ་དུས་འདིར། །རྩེ་གཅིག་ཏུ་འབད་པས་ཉམས་ལེན་འཚལ། །ངེས་དོན་སྙིང་པོ་དང་མཇལ་དུས་འདིར། །དྲང་དོན་གྱི་མགོ་བསྐོར་ལ་མ་ཞེན་ཞིག །མཐུན་རྐྱེན་འབད་མེད་དུ་འཛོམ་དུས་འདིར། །འདོད་ཡོན་གྱི་གཡེང་བས་མ་འཁྱེར་ཞིག །ནམ་འཆི་ཆ་མེད་ཀྱི་དོན་བསམ་ནས། །ངེས་འབྱུང་གི་སྐྱོ་ཤས་བསྐྱེད་མོད་ཀྱི། །ཆུ་བུར་ཆུ་ལ་ཐིམ་པ་བཞིན། །སྣང་སྟོང་སྒྱུ་མའི་བློ་བྲིད་ཙམ། །ཡི་མུག་གི་སྡུག་བསྔལ་མི་དགོས་ཀྱི། །ཆོས་ཉིད་དུ་ཤེས་པས་སྐྱོ་སེ་ཞོག །རིགས་དྲུག་འཁོར་བའི་སྡུག་བསྔལ་འདི། །རྨི་ལམ་དུ་ན་བར་སྣང་བ་དང་འདྲ། །ཐར་འདོད་ཀྱི་བསམ་པ་བསྐྱེད་དགོས་ཀྱང༌། །བདེན་ཞེན་གྱི་འཇིགས་སྐྲག་མི་འཚལ་ལོ། །དགེ་སྡིག་གི་འབྲས་བུ་སྨིན་པ་འདི། །སྒྱུ་མས་སྒྱུ་མ་བསྐྱེད་པ་དང་འདྲ། །བདེན་མེད་ཀྱི་ཆོ་འཕྲུལ་ཙམ་ལགས་མོད། །ཀུན་རྫོབ་ཀྱི་འཁྲུལ་སྣང་མ་འགགས་པར། །རྒྱུ་འབྲས་ཀྱི་རྟེན་འབྲེལ་མི་བསླུ་པས། །སྤང་བླང་ལ་ཕྲ་ཞིབ་མཛད་པ་ཞུ། །འགྲོ་དྲུག་དྲིན་ཅན་གྱི་ཕ་མ་རྣམས། །རང་ངོ་མ་ཤེས་པས་


TNT01_Page_0864
[མ་དཔེ་གཟིགས་ན་འདིར་གནོན།]

འཁོར་བར་འཁྱམས། །རང་སེམས་ཀྱིས་རང་ཉིད་བཅིངས་ཚུལ་ལ། །བསམ་བཞིན་དུ་སྙིང་རྗེ་འབད་མེད་དུ་འཆར། །བྱམས་སྙིང་རྗེའི་རང་ངོ་བལྟས་པའི་ཚེ། །སྙིང་རྗེ་བྱ་རྗེ་བྱེད་དབྱིངས་སུ་ཡལ། །དབྱིངས་དེ་ལས་སྙིང་རྗེར་ལམ་ལམ་པ། །དམིགས་མེད་ཀྱི་སྙིང་རྗེ་ཆོས་ཀྱི་མཆོག །གཞི་ལམ་འབྲས་བུའི་ཆོས་ཐམས་ཅད། །གདོད་ནས་སྐྱེ་བ་མེད་པ་ལ། །བློས་བྱས་ཀྱི་བཅས་བཅོས་མི་དགོས་པས། །ཅི་ཡང་མ་ཡིན་ལྟ་བའི་མཆོག །ཤུགས་འབྱུང་གི་སྤྱོད་པ་འགག་མེད་ལ། ཀུན་བརྟགས་ཀྱིས་སྤང་བླང་མི་དགོས་པས། །རང་གྲོལ་རྒྱ་འབྱམ་གྱི་རྣལ་འབྱོར་ལ། །ཐོ་ཅོར་མ་སོང་བ་སྤྱོད་པའི་གནད། །གནས་ལུགས་ཅིར་ཡང་མེད་པ་ལ། །སྒོམ་མེད་ཡེངས་མེད་དུ་མཉམ་པར་ཞོག །སྣང་བ་ཅི་ཤར་འགག་པ་མེད། །དུ་མ་རོ་གཅིག་བསྒོམ་པའི་གནད། །རེ་དོགས་ཀྱི་ཞགས་པས་མ་བཅིངས་བར། །སྐུ་གསུམ་ལྷུན་གྲུབ་རང་རྫོགས་འདི། །རང་སེམས་ལས་གཞན་དུ་མེད་ལགས་པས། །རྩོལ་བྲལ་བྱར་མེད་འབྲས་བུའི་གནད། །རྩ་བའི་བླ་མ་ལ་མོས་གུས་དང༌། །དག་སྣང་ཕྱོགས་མེད་ཀྱི་བསྐྱེད་རིམ་དང༌། །རླུང་སེམས་ལ་གཞུར་བའི་རྫོགས་རིམ་གསུམ། །སྒོམ་ཉམས་ལེན་པ་ལ་གནད་དུ་ཆེ། །ཞེས་པ་ངེས་མེད་ཀྱི་རྒྱལ་ཁམས་པ། །ཏཱ་ར་ནཱ་ཐ་


TNT01_Page_0865
[མ་དཔེ་གཟིགས་ན་འདིར་གནོན།]

ཞེས་བྱ་བས། །རྩེ་གཅིག་ཏུ་སྒྲུབ་པ་ལ་གཞོལ་བ་ཡི། །མདོ་ཁམས་པ་ཤེས་རབ་དཔལ་ལ་གདམས་པའོ།། །།དགེའོ། །

རྒྱལ་བཟང་རྟོགས་ལྡན་རིན་བཀྲས་ལ་གདམས་པ།


TNT01_Page_0866
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། བླ་མ་རྣམས་ལ་ཕྱག་འཚལ་ལོ། །བུ་སྣང་བ་སེམས་ལ་ཁྱད་པར་མེད། །གང་ཤར་བཟོ་བཅོས་མེད་པར་ཞོག །སྙིང་རྗེ་དང་སྟོང་ཉིད་འགྲོ་ལྡོག་གཅིག །སྙིང་རྗེ་འཛིན་པར་མ་ཤོར་ཞིང༌། །སྟོང་ཉིད་ཆད་སྟོང་དུ་མ་ལུས་པའི། །ཟུང་འཇུག་ཉམས་ལེན་གལ་རེ་ཆེ། །ལས་འབྲས་ཀྱི་བླང་དོར་ཕྱིན་ཅི་ལོག །ཅིས་ཀྱང་དགོས་མེད་ཀྱི་ངེས་འབྱུང་སྟོར། །གཞན་ཕན་མཁའ་ཁྱབ་ཀྱི་སེམས་བྲལ་པའི། །སྟོང་སྐད་སྦད་ཁམ་གྱི་ཕྱག་ཆེན་དང༌། །མུ་སྟེགས་པའི་ལུགས་ཀྱི་རྩ་རླུང་ལ། །བློ་རྩེ་གཏོད་པའི་སྒོམ་ཆེན་ཏེ། །བློ་ཆུང་གི་མགོ་བསྐོར་མཁས་སྲིད་ཀྱང༌། །སངས་རྒྱས་དགྱེས་པའི་ལམ་ལས་གོལ། །བུ་སངས་རྒྱས་གསུང་བཞིན་སྒྲུབས་གྱུར་ན། །སངས་རྒྱས་ཐོབ་པའི་རྒྱུ་ཡིན་པས། །བཟང་འདོད་ཀྱི་ཙབ་ཙོབ་མ་མང་བར། །ལུས་ངག་ཡིད་གསུམ་ཆོས་དང་བསྟུན། །ལྟ་བ་མཐོ་ལ་ཡངས་པ་དང༌། །སྤྱོད་པ་ཞིབ་ཏིག་སྐབས་སུ་བབས། །སྒོམ་པ་ཡེངས་མེད་རྒྱུན་ཆད་མེད། །དེ་གསུམ་འཛོམ་ན་འབྲས་བུ་སྨིན། །བཟའ་བཏུང་དོན་གཉེར་གྱི་ཁ་སྤྱང་ཅན། །རྒྱལ་ཁམས་བསྐོར་


TNT01_Page_0866
[མ་དཔེ་གཟིགས་ན་འདིར་གནོན།]

བའི་ཟོག་པོ་ལ། །སྒོམ་ཆེན་གྱི་དྲི་ཡང་མི་ཡོང་བས། །དབེན་པའི་རི་ལ་ཚུགས་པར་འཚལ། །ལོང་གཏམ་ལ་ཆགས་ཤིང་ཞེན་པ་དེས། །ངག་གི་བདེན་ཚིག་ག་ལ་འགྲུབ། །ནུས་ན་གསང་སྔགས་ཀྱི་བཟླས་བརྗོད་གྱིས། །མིན་ནའང་སྨྲ་བ་བཅད་ན་ལེགས། །མཐུན་འཇུག་དང་མི་དགའི་ངོས་བསྲུངས་ཀྱིས། །སེམས་བཞག་ཀྱང་ཆགས་སྡང་འཕེལ་བའི་ངང༌། །འདི་སྤངས་ཀྱང་འཕོངས་པ་དཀའ་བའི་ཕྱིར། །པད་ཀྱིས་ཆོད་ལ་རྒྱངས་ཀྱི་བསྐྱུར། །ཉམས་མྱོང་ཅུང་ཟད་སྐྱེས་སྐབས་སུ། །བཟང་འཛིན་སྐྱེས་ན་བདུད་ཀྱིས་ཁྱེར། །དཔེ་རི་ལ་འཛེམས་པས་གཡང་ལ་ལྷུང༌། །མཐོ་རུ་སོང་གིན་སྒྲིམ་པ་གཅེས། །བླ་མའི་ཞལ་ལུང་གི་གདམས་ངག་རྣམས། །ཆུད་ཟོས་མེད་པར་ཉམས་སུ་ལོང༌། །ཧམ་པ་དང་འུད་གོག་མ་ཆེ་བར། །རྩེ་གཅིག་ཏུ་སྒོམས་ན་འཚེད་པ་ཡིན།། །།ཞེས་པའང་རྒྱལ་ཁམས་པ་ཏཱ་ར་ནཱ་ཐས། རྒྱལ་བཟང་རྟོགས་ལྡན་རིན་བཀྲས་ལ་གདམས་པ་སྟེ། དར་ཡུལ་བྲག་ནག་དུའོ། །མངྒལཾ། །

ལས་སྟོད་སྤ་ལུང་གི་རྣལ་འབྱོར་པ་འགའ་ལ་གདམས་པ།


TNT01_Page_0867
[མ་དཔེ་གཟིགས་ན་འདིར་གནོན།]

ན་མོ་གུ་རུ། ཕ་གཅིག་ཆོག་རྒྱལ་པོ་བླ་མ་ལ། །དུས་རྒྱུན་ཆད་མེད་པར་གསོལ་བ་འདེབས། །བདག་བུ་སློབ་ཀྱི་བློ་སྣ་ཆོས་ལ་བསྒྱུར། །སེམས་མཁའ་ཁྱབ་རྟོགས་པར་བྱིན་གྱིས་རློབས། །དུས་ད་རེས་མཐུན་


TNT01_Page_0867
[མ་དཔེ་གཟིགས་ན་འདིར་གནོན།]

རྐྱེན་ཀུན་འཛོམ་ཞིང༌། །མཚན་ལྡན་རྗེ་དང་མཇལ་བ་དང༌། གདམས་ངག་ཟབ་དགུ་ཐོབ་དུས་འདིར། །དོན་མེད་དུ་མ་ལུས་པ་ཅིས་ཀྱང་འཚལ། །ལུས་ཤ་ཁྲག་འདུས་པའི་ཕུང་པོ་ལ། །རྟག་འཛིན་གྱི་ཡིད་བརྟན་མི་རུང་བས། །དགེ་སྦྱོར་ཕྱི་ཤོལ་མ་བྱེད་པར། །འཕྲལ་འཕྲལ་དུ་ལག་ལེན་ལ་ཐེབས་པར་མཛོད། །ཉམས་སུ་མ་མྱོང་བའི་སྟོང་ཤོབ་ཅན། །སྟོང་ཉིད་ཀྱི་རྦད་གོག་ཁར་ཁྱེར་ནས། །ནག་པོ་ཁ་འབྱམས་སུ་སོང་ཉེན་གདོག །ལས་འབྲས་ལ་ཞིབ་ཏིག་གལ་རེ་ཆེ། །མོས་གུས་གདུང་བ་རྒྱུན་ཆད་མེད། །བླ་མའི་གསོལ་འདེབས་ལ་ནན་ཏན་མཛོད། །དེ་ལའང་བདེན་ཞེན་མི་འཚལ་ཏེ། །བླ་མའང་རང་སེམས་ལས་ལོགས་ན་མེད། །རང་ངོ་མ་ཤེས་པས་འཁོར་བར་འཁྱམས། །ཚུགས་མེད་ཀྱི་སྙིང་རྗེ་གལ་རེ་ཆེ། །བདེན་མེད་ཀྱི་འཁྲུལ་པས་བསླུས་པ་ཡི། །བདེ་སྡུག་ཀུན་རྨི་ལམ་ལྟ་བུར་ལྟོས། །རང་སེམས་ཐ་མལ་གྱི་ཤེས་པ་འདི། །བཅས་བཅོས་མི་དགོས་ཆོས་སྐུ་ཡིན། །རྣམ་རྟོག་གི་འཆར་སྒོ་ཅི་ཤར་ཡང༌། ཆུ་དང་རླབས་བཞིན་གོ་བར་གྱིས། །སྤྱོད་པ་ཞིབ་རྩིང་ཇི་ལྟར་ཡང༌། །ངོ་ལྐོག་གི་རྫུན་རིབ་མི་འཚལ་ཏེ། །དེ་ཡང་ཆོས་དང་མཐུན་པ་གཅེས། །ཆོས་འགལ་གྱི་སྒོམ་ཆེན་ཕཊ་ཚར་རེ། །སྒོམ་པ་འཁོར་


TNT01_Page_0868
[མ་དཔེ་གཟིགས་ན་འདིར་གནོན།]

ཡུག་རྒྱུན་ཆགས་ཏེ། །བྱར་མེད་ལས་མེད་གལ་རེ་ཆེ། །དེ་ཡང་རྩོལ་མེད་ཀྱི་དྲན་པས་བཟུང༌། །མུན་ཐོམ་དུ་ལུས་ན་ཐེ་ལེ་ལེ། །འབྲས་བུ་རང་སེམས་སངས་རྒྱས་འདི། །གཞི་ཐོག་ཏུ་ཟོབ་སྟོང་ལམ་ལས་ཤིང༌། །རེ་དོགས་ཀྱི་གཡང་སར་མ་ལྷུང་པ། །ཐག་ཆོད་ཀྱི་ཤེས་པའི་ངེས་ཤེས་དགོས། །གང་སྣང་ཐམས་ཅད་ཆོས་སྐུ་ལ། །ཕྱོགས་འཛིན་གྱི་དབྱེ་བ་མེད་ལགས་མོད། །གཅམ་བུའི་དག་སྣང་འདིས་རང་ཚུགས་སྐྱེལ། །བླ་མའི་བརྒྱུད་པ་ཟིན་པར་མཛོད།། །།ཅེས་པ་འདི་ནི་རྒྱལ་ཁམས་པ་ཏཱ་ར་ནཱ་ཐས་སྨྲས་པ་སྟེ། ལས་སྟོད་སྤ་ལུང་གི་རྣལ་འབྱོར་པ་འགའ་ལ་གདམས་པའོ།། །།

ཞལ་གདམས།


TNT01_Page_0869
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། འདུ་བྱེད་སྟོན་ཀའི་སྤྲིན་བཞིན་གཡོ་བ་དང༌། །ཚེ་སྲོག་ནམ་མཁའི་གློག་ལྟར་མི་བརྟན་ཞིང༌། །ལས་ནི་གྲིབ་མ་བཞིན་དུ་རྗེས་སུ་འགྲོ། །ལང་ཚོ་ལྡན་པའི་ལུས་ཀྱང་འཇིག་འགྱུར་བས། །འཇིག་རྟེན་འདི་དང་གཞན་དུ་ཕན་ངེས་པའི། །དགེ་བའི་ལས་ལ་རྩེ་གཅིག་འགྲུས་པར་འཚལ། །ལས་ནི་ཆུང་ཡང་འབྲས་བུ་རྒྱ་ཆེ་ན། །དགེ་སྡིག་ཆེན་པོ་བསགས་ལ་སྨོས་ཅི་དགོས། །ནམ་ཞིག་ཤ་ཁྲག་ཕུང་པོ་འགྱེས་པ་དང༌། །སེམས་ཉིད་སྐྱེ་བ་གཞན་དུ་འཕོ་བའི་ཚེ། །


TNT01_Page_0869
[མ་དཔེ་གཟིགས་ན་འདིར་གནོན།]

དམ་པའི་ཆོས་ལས་སྐྱབས་གཞན་མ་མཆིས་ཤིང༌། །སྡིག་ལས་གཞན་དུ་དགྲ་ཡང་མ་མཆིས་སོ། །འདུས་པའི་ཐ་མ་འབྲལ་པ་ཆོས་ཉིད་ལགས། །བསླང་བའི་མཐའ་ནི་འགྱེལ་བར་འགྱུར་བ་དང༌། །བསགས་པའི་ཐ་མ་རིང་པོར་མི་ཐོགས་འཛད། །གསོན་མཐའ་འཆི་བ་ཡིན་ཞེས་རྒྱལ་བས་གསུངས། །འདྲེན་པ་རྡོ་རྗེའི་སྐུ་ཡང་མི་བརྟན་ན། །སོ་སོའི་སྐྱེ་བོ་རྣམས་ནི་སྨོས་ཅི་འཚལ། །རི་རབ་གླིང་བཞིར་བཅས་པའི་འཇིག་རྟེན་འདིའང༌། །ཐལ་བ་ཙམ་ཡང་མི་ལུས་འཇིག་པར་གསུངས། །དེ་བས་རང་ཉིད་སྐྱེ་བ་དཔག་མེད་དུ། །རབ་དྲག་དམྱལ་བའི་སྡུག་བསྔལ་མྱོང་བ་དང༌། །ལྷ་མིའི་དཔལ་གྱི་བདེ་སྐྱིད་ཉམས་པ་སོགས། །སྡུག་བསྔལ་མྱ་ངན་འཁྲུག་དང་ཡིད་མི་བདེ། །གྲངས་མེད་ཚད་མེད་མྱོང་ཞིང་དུས་འདས་ཀྱང༌། །ད་དུང་སྡུག་བསྔལ་འཁོར་ལོ་བསྐོར་བ་འདི། །ཆུ་གཉེར་གྲངས་བཞིན་ཟིན་པ་མི་གདའ་བས། །ཚུལ་འདི་དགོངས་ལ་མྱ་ངན་མི་འཚལ་ཏེ། །སངས་རྒྱས་ཐོབ་པར་འདོད་པའི་སེམས་བསྐྱེད་དང༌། །གཞན་ལ་ཕན་པར་བསམ་པའི་སྙིང་རྗེ་ཡིས། །དགེ་བའི་ལས་ལ་རྒྱ་ཆེར་འབད་པར་འཚལ། །འབྲས་བུའི་དོན་ཆེན་མཆོག་ལ་སོམ་ཉི་མེད། །ལོ་ཟླ་མང་པོར་སྡུག་བསྔལ་རྒྱུར་འགྱུར་ན། །ཉིན་གཅིག་སྐྱིད་པས་སྐྱིད་གོ་མི་ཆོད་ལྟར། །


TNT01_Page_0870
[མ་དཔེ་གཟིགས་ན་འདིར་གནོན།]

ཚེ་རབས་ཀུན་ཏུ་སྡུག་བསྔལ་རྒྱུར་འགྱུར་བའི། །སྡིག་པས་ཚེ་འདིར་བདེ་ནའང་དེ་དང་འདྲ། །ཚེ་འདི་ཡུན་ཐུང་ལོ་ཟླ་འགའ་ཞིག་ཡིན། །འཇིག་རྟེན་ཕ་རོལ་ཚད་བཟུང་མེད་པའི་ཕྱིར། །སྐྱེ་བ་གཞན་དུ་སྡུག་བསྔལ་མི་འབྱུང་ཞིང༌། །དགེ་བའི་ཐབས་སུ་དགེ་སྡིག་བླང་དོར་བྱ། །ཚེ་འདིའི་གྲོགས་པོ་ཇི་ལྟར་བཟང་ཡང་འབྲལ། །དམ་ཆོས་སྒོམས་ན་ནམ་ཡང་འབྲལ་མི་སྲིད། །འཁོར་བའི་དཔོན་འདི་ཇི་ལྟར་བཟང་ཡང་བསླུ། །སྐྱབས་གནས་དཀོན་མཆོག་གསུམ་ལ་བསླུ་བ་མེད། །ཟས་ནོར་ལོངས་སྤྱོད་འཛོམ་ཡང་ཤུལ་དུ་ལུས། །བསགས་པའི་ལས་ནི་ནམ་ཡང་འབོར་མི་སྲིད། །ལང་ཚོ་ཕུན་སུམ་ཚོགས་པའང་རྒས་པས་འཇོམས། །དམ་པའི་ཆོས་ལ་ནམ་ཡང་རྒས་པ་མེད། །འཇིག་རྟེན་བྱ་བ་འགྲུབ་ཀྱང་ཟིན་པ་དཀོན། །ཆོས་ལ་འབད་ན་ལས་སྟབས་མྱུར་དུ་ཟིན། །འཁོར་བའི་བྱ་བ་ལེགས་པའང་ཐ་མར་བརླག །དམ་པའི་ཆོས་ཀྱི་འབྲས་བུ་ཉམས་མི་སྲིད། །དེ་ལྟར་ལགས་པས་ཚུལ་འདིས་ཀྱང༌། །ངེས་པར་ཐུགས་ནི་རབ་བསྐུལ་ཏེ། །བདག་ཉིད་དགེ་ལ་གནས་པ་དང༌། །སེམས་ཅན་བདེ་བའི་ཐབས་ཀྱང་འཚལ།། །།

དད་ལྡན་བདེ་སྐྱིད་དཔལ་འཛོམ་ལ་གདམས་པ།


TNT01_Page_0871
[མ་དཔེ་གཟིགས་ན་འདིར་གནོན།]

ན་མོ་གུ་ར་ཝེ། མཚན་ལྡན་བླ་མ་རྗེ་ལ་འདུད། །དད་ལྡན་མོས་པའི་སློབ་མ་ལ། །དོན་ལྡན་གདམས་པ་ཅུང་ཟད་


TNT01_Page_0871
[མ་དཔེ་གཟིགས་ན་འདིར་གནོན།]

ཙམ། །ཆོས་ལྡན་བྱ་བའི་ངང་ནས་བསྲིངས། །ངེས་མེད་འཇིག་རྟེན་གྱི་བྱ་བཞག་འདི། །རྨི་ལམ་དུས་ཀྱི་ལོངས་སྤྱོད་བཞིན། །བདེན་བདེན་འདྲ་ཡང་སྙིང་པོ་མེད། །བདེན་འཛིན་གྱི་ཞེན་པ་མི་འཚལ་ལོ། །རྙེད་དཀའ་མི་ལུས་ཀྱི་རིན་ཆེན་ལ། །དགེ་ལེགས་ཀྱི་ཁྱེ་ཕོགས་མ་ཐོན་ན། །དུད་འགྲོའི་འགྲོ་བ་དང་ཁྱད་མ་མཆིས། །སྒོ་གསུམ་དགེ་ཕྱོགས་ལ་འབུང་བ་ཞུ། །མངའ་ཐང་དང་ལོངས་སྤྱོད་ཆེར་མཆིས་ཀྱང༌། །ཚེ་ཕྱི་མར་ཕན་པ་མི་གདོག་ཅིང༌། །འཆི་བ་ཡང་ནམ་ཡོང་ཆ་མེད་པས། །འཕྲལ་འཕྲལ་དུ་དཀར་ཕྱོགས་ལ་འབད་པ་ཞུ། །རང་གཞན་གྱིས་གཅེས་པར་བཟུང་པ་ཡི། །ལུས་འདི་ཡང་ནམ་ཞིག་ངེས་པར་འཇིག །གཉེན་བུ་རྟ་སོགས་ལྟ་སྨོས་ཅི་དགོས། །ཚེ་འདི་ལ་མ་ཆགས་ཟབ་དོན་བསྒོམས། །འཁོར་བའི་སྡུག་བསྔལ་ནི་ཕ་མཐའ་མེད། །གར་སྐྱེལ་རང་དབང་མ་མཆིས་ཤིང༌། །ཕྱི་མའི་བདེ་སྡུག་ནི་ལས་ལ་རག །སྡིག་ལས་ལ་ཅིས་ཀྱང་འཇོམ་པར་ཞུ། །གཞན་གང་གི་ཕྱིར་དུ་སྡིག་བསགས་ཀྱང༌། །ངན་སོང་ལ་བགོ་བཤའ་བྱེད་ཐབས་མེད། །རྣམ་སྨིན་རང་ཉིད་ཀྱིས་འཁུར་དགོས་པས། །གཞན་ཕྱིར་དུ་སྡིག་གསོག་མི་འཚལ་ལོ། །སྣང་ཚད་རང་སེམས་ཀྱི་སྣང་བ་ཡིན། །


TNT01_Page_0872
[མ་དཔེ་གཟིགས་ན་འདིར་གནོན།]

གང་ཤར་ལ་དྲན་པའི་སོ་བས་ཟུང༌། །བྱར་མེད་ཀྱི་ངང་དུ་ལྷོད་ཀྱི་ཀློང༌། །རང་གྲོལ་གྱི་རྟོགས་པ་ནང་ནས་འཆར། །འགྲོ་དྲུག་དྲིན་ཅན་གྱི་ཕ་མ་ལ། །བྱམས་སྙིང་རྗེ་ཕྱོགས་དུས་མེད་པར་བསྒོམ། །རང་འདོད་ཀྱི་ངན་སེམས་ཤིག་གིས་བཤིག །ཕན་སེམས་བདེ་འབྱམ་གྱི་ངང་ལ་བཞག །མཛའ་བཤེས་ཀྱི་ཕྱི་རྗེས་མཐར་ཐུག་ཀྱང༌། །ཕྱི་ནས་དགེ་བ་ལ་འབད་པ་དཀོན། །གཞན་བྱས་ཀྱི་དགེ་བས་ཀྱང་མི་ཕན་པས། །དགེ་བ་བདག་ཉིད་ཀྱིས་སྒྲུབ་པར་ཞུ། །འཕྲལ་དཀོན་མཆོག་གསུམ་ལ་མཆོད་པ་དང༌། །ལུས་ཡི་དམ་ལྷ་སྐུར་བསྒོམ་པ་དང༌། །ངག་འཁྱལ་པས་མི་འདའ་གཟུངས་སྔགས་བགྲང༌། །ཡིད་ཕྱག་ཆེན་དང་སྙིང་རྗེ་ཟུང་འཇུག་སྒོམ། །འཕྲལ་ལོ་དུས་སུ་སྦྱིན་པ་རྒྱ་ཆེན་གཏོང༌། །དུས་ཟླ་རེར་བསྙེན་གནས་ཡང་ཡང་ལེན། །གཞན་ཉིན་ཞག་སོ་སོར་ཕྱག་མཆོད་བརྩོན། །ཚེ་འདི་ཕྱི་གཉིས་ཀར་བདེ་བ་ལགས། །དེ་ཀུན་གྱི་རྩ་བ་མོས་གུས་ཡིན། །མཚན་ལྡན་བླ་མ་རིན་ཆེན་ལ། །བློ་ལིངས་ཀྱི་བཀལ་ལ་གསོལ་བ་ཐོབ། །ཐེ་ཚོམ་གྱི་རྟོག་དཔྱོད་མི་འཚལ་ལོ། །ཆོས་ཐམས་ཅད་རང་གི་བློས་བྱས་ཡིན། །མོས་གུས་ཀྱི་སྣང་བ་དང་མ་བྲལ་ན། །རྟག་ཏུ་བླ་མ་དང་འགྲོགས་པ་ལགས། །ཉེ་རིང་གི་དཔྱད་པ་མི་འཚལ་ལོ། །ཐུགས་ཡིད་


TNT01_Page_0873
[མ་དཔེ་གཟིགས་ན་འདིར་གནོན།]

དབྱེར་མེད་དུ་གསོལ་བ་བཏབ། །རང་སེམས་དང་བླ་མ་དབྱེར་མེད་པ། །འདུ་འབྲལ་མེད་པར་རྟོགས་ཙ་ན། །མཐར་ཐུག་གི་རྟོགས་པ་ངང་གིས་འཆར།། །།ཞེས་པ་རྒྱལ་ཁམས་པ་ཏཱ་ར་ནཱ་ཐས། །དད་ལྡན་བདེ་སྐྱིད་དཔལ་འཛོམ་ལ་གདམས་པའོ། །དགེའོ། །

དྲུང་པ་འོ་པ་ལ་གདམས་པའོ། །


TNT01_Page_0874
[མ་དཔེ་གཟིགས་ན་འདིར་གནོན།]

ཁོ་བོ་རྗེ་བཙུན་བླ་མ་ཡིས། །རྗེས་སུ་བཟུང་ལ་ཉེར་བརྟེན་ནས། །སྙན་པའི་ཚིག་ལ་མ་ལྟོས་པར། །མ་སྒྲིབས་གཉུག་མ་ཁོང་ནས་གསལ། ཁྱེད་ཀྱང་བླ་མ་རིན་ཆེན་ལ། །གུས་པས་གསོལ་བ་འདེབས་པར་ཞུ། །འདོད་དགུ་ཐམས་ཅད་ཆར་ལྟར་འབབ། །གེགས་དང་གོལ་ས་བར་ཆད་གསུམ། །ནམ་གཞུག་ཆད་ཁའི་སྤྲིན་ལྟར་དེངས། །ཡོན་ཏན་ཐམས་ཅད་རང་ཤར་འབྱུང༌། །ཐ་སྙད་ཚིག་གི་བརྗོད་པ་ལ། །ཞེན་མེད་ངོས་ནས་བསླབ་པར་ཞུ། །ཚོགས་ཀྱི་གཙོ་བོ་བྱེད་པ་ལ། །ཚོགས་ལ་དག་དང་མ་དག་གཉིས། །རང་སེམས་རྟོགས་པའི་ཁྱད་པར་གཉིས། །སོ་སོའི་སྤང་བླང་མ་འདྲེས་འཚལ། །དག་པའི་འཁོར་ཀྱང་འདུས་པ་དང༌། །རང་ཉིད་རྟོགས་པ་འགྱུར་མེད་ན། །གནས་ལུགས་རྗེན་པར་སྟོན་པ་ལས། །ལུས་ངག་སྤྱོད་ལ་ཁྱད་པར་མེད། །མ་དག་འཁོར་ཚོགས་འདུས་པའམ། །རང་ཉིད་རྟོགས་པ་མི་


TNT01_Page_0874
[མ་དཔེ་གཟིགས་ན་འདིར་གནོན།]

བརྟན་ན། །ཚོགས་ཀྱི་གཙོ་བོ་བྱེད་པ་ལ། །གཙོ་བོའི་ཆོས་བཞི་དགོས་པ་ལགས། །འཁྲུལ་འཁོར་སྔགས་དང་ཏིང་འཛིན་དང༌། །ཆོ་ག་རྣམ་པར་དག་པ་འཚལ། །འཁྲུལ་འཁོར་སྤྱོད་པ་བཙུན་པ་ཡིན། །སྔགས་ནི་སྨྲ་ཚོད་ཟིན་པ་ཡིན། །ཏིང་འཛིན་གྲིམ་ལ་བསམ་པ་བཟང༌། །ཆོ་ག་འཁོར་ཚོགས་སྐྱོང་བ་ལ། །སྙོམས་ཤིང་འཇམ་པོས་སྐྱོང་བ་ཡིན། །འགྲོ་དོན་གཙོ་བོར་བྱེད་པའི་ཚེ། །ཤཱཀྱ་ཐུབ་པའི་འཁྲུལ་འཁོར་དགོས། །ཉམས་ལེན་གཙོ་བོར་བྱེད་པའི་ཚེ། །དྲང་སྲོང་ཆེན་པོའི་འཁྲུལ་འཁོར་འཚལ། །ཉམས་རྟོགས་ཕྱོགས་བཅུར་སྐྱོང་བའི་ཚེ། །མཁའ་ལྡིང་ཆེན་པོའི་འཁྲུལ་འཁོར་གཅེས། །ངེས་མེད་སྤྱོད་ལ་གནས་པའི་ཚེ། །ཧེ་རུ་ཀའི་འཁྲུལ་འཁོར་མཛོད། །དང་པོ་ཤཱཀ་ཐུབ་འཁྲུལ་འཁོར་ནི། །བཙུན་ཚུགས་ཟིན་ལ་ལྟག་ཚུགས་བཟང༌། ཁ་ངན་འཁྲུག་ལོང་མི་བྱེད་ཅིང༌། །སྤྱོད་པ་བདེ་ལ་ཁོག་ཡངས་པ། ཁ་ལག་བྱེད་པ་བཟང་པོ་ཡིས། །སྤྱི་སྙོམས་བྱེད་པ་གལ་རེ་ཆེ། །རྩ་བའི་བློ་གཏད་མ་འགྱུར་བར། །ཕྱི་ནང་སྤང་བླང་མ་འདྲེས་འཚལ། །དྲག་སྲོང་ཆེན་པོའི་འཁྲུལ་འཁོར་ནི། །འཆི་བ་སྙིང་ལ་ཟུག་པ་ཡིན། །བདེ་སྐྱིད་གཏམ་ལ་མ་ཆགས་པར། །དཀའ་སྤྱད་ཞེ་རུས་བྱེད་པ་ཡིན། །མཁའ་ལྡིང་


TNT01_Page_0875
[མ་དཔེ་གཟིགས་ན་འདིར་གནོན།]

ཆེན་པོའི་འཁྲུལ་འཁོར་ནི། །འདབ་ཆགས་མཁའ་ལྡིང་རྒྱལ་པོ་དེ། །མཁའ་ལ་འགྲོ་སྡོད་ཅི་བྱེད་ཀྱང༌། །ས་ལ་མི་བོག་རང་དབང་ཡོད། །སྤྱོད་ལམ་བྱ་བ་ཅི་བྱེད་ཀྱང༌། །འགྱུར་མེད་ཀློངས་སུ་གྱུར་པ་ན། །ཅི་བྱས་རང་ཤར་རང་གྲོལ་ཡིན། །ཉམས་རྟོགས་ལོངས་སྤྱོད་རྒྱ་ཆེར་སྤེལ། །ཧེ་རུ་ཀའི་འཁྲུལ་འཁོར་ནི། །ངེས་མེད་སྤྱོད་པ་སྐྱོང་བ་ཡང༌། །ཆལ་ཆོལ་ཙམ་ལ་མ་སོང་བར། །ཉམས་ལེན་གནས་ལ་འཆུག་མེད་དགོས། །འཁྲུལ་འཁོར་ཀུན་གྱི་སྤང་བྱ་ནི། །གྲགས་འདོད་གཡོ་སྒྱུ་ཡིན་པས་སྤང༌། །འཁྲུལ་འཁོར་སྤྱིའི་ཆོས་གཅིག་ནི། །དྲང་པོ་ལགས་པས་བསྐྱང་བར་ཞུ།། །།ངམ་རིང་སུའོ། །

དཔོན་མོ་ནམ་མཁའ་རྒྱལ་མོ་ལ་ཆོས་ཀྱི་འཕྲིན་དུ་བསྐུར་བ།


TNT01_Page_0876
[མ་དཔེ་གཟིགས་ན་འདིར་གནོན།]

༈ བླ་མ་རྣམས་ལ་གུས་པས་ཕྱག་འཚལ་ལོ། །གང་ལ་བདུད་བཞི་བཅོམ་པའི་དཔལ། །ཟས་གཙང་སྲས་ཀྱིས་འདི་སྐད་ཅེས། །བག་ཡོད་བདུད་རྩིའི་གནས་ཡིན་ཏེ། །བག་མེད་པ་ནི་འཆི་བའི་གནས། །དྲེགས་ལྡན་དབང་གིས་ཕྱུག་པ་ཡང༌། །མི་རྟག་གདོན་གྱིས་ཟིན་པ་ན། །མགོན་མེད་གྱུར་པའི་གནས་སྐབས་ལ། །ཆོས་ལས་གཞན་པའི་སྐྱབས་མ་མཆིས། །གང་ཞིག་འབྱོར་པར་ལྡན་པ་ལ། །ནོར་དང་དབྱིག་གིས་ཅི་ཞིག་འཚལ། །ལེགས་པར་བཤད་པའི་ཚིག་གཅིག་ལའང༌། ཁམས་གསུམ་ནོར་གྱིས་


TNT01_Page_0876
[མ་དཔེ་གཟིགས་ན་འདིར་གནོན།]

ཆར་མི་ཕོད། །ཆོས་མེད་དབང་ཕྱུག་ཕུན་ཚོགས་ཀྱང༌། །དུག་ཅན་ཁ་ཟས་བཟང་པོ་བཞིན། །འབྱོར་པ་ཉམས་པ་ཆོས་ལྡན་ཡང༌། །ཤུན་པར་བཅས་པའི་ནོར་བུ་བཞིན། །གང་ལ་གཉིས་ཀ་ལྡན་གྱུར་པ། །དེས་ནི་དོན་ཀུན་འགྲུབ་པར་མཐོང༌། །ཀུན་སྤངས་ཀྱིས་ནི་འབྱོར་ལྡན་ཀུན། །ཟིལ་གྱིས་གནོན་པ་རབ་བྱུང་ཡིན། །མི་ཡི་མཆོག་གྱུར་འབྲས་ཡོད་དང༌། །དཔལ་དང་ལྡན་པ་དོན་ཡོད་ཕྱིར། །སྐུ་ཚེ་འདི་དང་ཕ་རོལ་ཀུན། །བདེ་འགྱུར་ཆོས་ལ་འབད་པར་འཚལ། །ཉི་ཟླ་ལྷུན་པོ་རྒྱ་མཚོ་སོགས། །ནམ་ཞིག་གཞན་དུ་འགྱུར་བ་ན། །འཚེ་བ་རླུང་ལྟར་གཡོ་བ་ཡི། །མིར་གྱུར་པ་ལྟ་སྨོས་ཅི་དགོས། །ངན་སོང་གསུམ་གྱི་སྡུག་བསྔལ་འདིའི། །ཆ་ལའང་བཟོད་པར་དཀའ་བ་དང༌། །མཐོ་རིས་གནས་ཀྱི་འབྱོར་པ་ཡང༌། །ཆུ་བུར་བཞིན་དུ་གཡོ་བར་འགྱུར། །སྐྱེ་རྒ་ན་འཆི་འཇིགས་དང་དབུལ། །སྡུག་བསྔལ་མང་པོས་ཉེ་བར་གཅེས། །སྲིད་གསུམ་འགྲོ་བ་འདི་ཀུན་ནི། །འདུ་བྱེད་ཀྱིས་ནི་རྣམ་པར་འཁྱམས། །ཉོན་མོངས་ལྡན་པའི་དགེ་བ་ཡང༌། །འཁོར་བར་མཐོ་རིས་འགྲུབ་འགྱུར་བས། །ཉོན་མོངས་ལས་དང་སྡུག་བསྔལ་གྱི། །འཁོར་ལོ་འདི་ནི་ཟློག་པར་འཚལ། །ཕན་བདེ་འདི་ནི་དཀོན་མཆོག་མཐུ། །གནས་སྐབས་ཡབ་ཡུམ་སོགས་ཀྱི་དྲིན། །ཡབ་


TNT01_Page_0877
[མ་དཔེ་གཟིགས་ན་འདིར་གནོན།]

མེས་སོགས་ཀྱི་དྲིན་བསབ་ལའང༌། །དགེ་བ་རྒྱ་ཆེན་སྒྲུབ་པར་འཚལ། །བཀུར་འོས་བཀུར་བས་བདག་ཉིད་ལ། །བཀུར་བསྟི་རྒྱ་ཆེན་ཐོབ་པར་འགྱུར། །མཆོད་འོས་མཆོད་ཅིང་བསྟོད་འོས་བསྟོད། །གུས་དང་དྲིན་དུ་བཟོ་བའང་མཚུངས། །ཀུན་ལའང་བརྩེ་བར་རིགས་ལགས་ན། །རང་ལ་བརྟེན་པ་ལྟ་ཅི་སྨོས། །བདེ་འདོད་སྡུག་བསྔལ་སྤོང་འདོད་པར། །རང་གཞན་ཐམས་ཅད་མཚུངས་པར་གཟིགས། །གཞན་གྱི་སྲོག་དང་ནོར་ཕྲོགས་ནས། །གཞན་དག་ཚིམ་བྱེད་ལུགས་བཟང་མིན། །ལྷ་ཁང་གི་ནི་རྫས་ལ་སོགས། །གཞན་ལ་སྩལ་བ་ལྟ་ཅི་སྨོས། །ལྷ་ཁང་མཆོད་པ་དགེ་འདུན་དང༌། །དགེ་འདུན་མཆོད་པ་ལྷ་ཁང་ལ། །སྒྱུར་བའང་ཉེས་པ་ཆེར་གསུངས་ལ། །དཀོན་མཆོག་གསུམ་ལ་ཡོངས་དམིགས་པའི། །མར་མེའི་འོད་ལ་འདུག་པ་ཡང༌། །སྲོག་ཆགས་ཕལ་པ་བཀུམ་པ་བས། །ལས་དེ་སྦྱང་དཀའ་ཡིན་ཞེས་གསུངས། །རང་གི་ནོངས་ལ་གཞན་དག་གིས། །སྨད་ཀྱང་ཁྲོ་བར་མི་འཚལ་ཏེ། །དེ་ཡང་རང་གི་སྐྱོན་ལགས་པས། །སྐྱོན་ནི་འབད་པས་སྤང་བར་འཚལ། །ང་རྒྱལ་མི་བྱ་རང་མི་བསྟོད། །ཚེ་དང་དཔལ་དང་ཆོས་འཕེལ་ན། །དཀའ་བའང་དང་དུ་ལེན་པར་མཛོད། །ལན་འགའ་གྲུབ་པར་མ་གྱུར་ཀྱང༌། །དོན་


TNT01_Page_0878
[མ་དཔེ་གཟིགས་ན་འདིར་གནོན།]

ཆེན་སྒྲུབ་ལ་ཐུགས་མི་ཟློག །ཞིང་པ་ཚོང་པ་ལ་སོགས་བཞིན། །དུས་གཞན་ཞིག་ན་ལན་མང་དང༌། །འགྲུབ་པར་འགྱུར་བ་མ་ཡིན་ནམ། །འགལ་བགྱིད་གཅིག་ཀྱང་མངས་བའི་སྐྱོན། །ཕན་བགྱིད་བྱེད་པའང་མི་སྤང་ངོ༌། །བྲམ་པའི་རྡོ་བཞིན་འབད་པ་ཡིས། །བསལ་ཡང་གནོད་བྱེད་འཕེལ་བར་འགྱུར། །རིགས་དང་མི་རིགས་ཚར་བཅད་དང༌། །རྗེས་བཟུང་ནད་དང་ཟུངས་བཞིན་འཚལ། །གཟི་ལུམ་སྤྱད་པར་མི་བགྱིད་ཅིང༌། །གཞན་གྱི་སྲོག་ལའང་འཚེ་མི་བགྱིད། །དྲི་མ་བཀྲུས་པ་རབ་མཛེས་ཀྱི། །གོས་དག་སྲེག་པ་ག་ལ་འཛངས། །ཆོས་དོན་ཕྱིན་ཅི་ལོག་བཟུང་ན། །སྨན་མ་ཞུ་བའི་ནད་དང་མཚུངས། །ལོངས་སྤྱོད་འགའ་ཞིག་དགྲ་དང་གཉེན། །དོན་མེད་དོན་ལྡན་རྣམས་སུ་དགོངས། །གལ་ཏེ་གཏམ་དེ་དག་ལ་ནི། །དགྱེས་ན་སླར་ཡང་གསོལ་བར་བགྱིད། །འོན་ཏེ་ཐུགས་ཀྱིས་བས་གྱུར་ན། །མཆིད་འདི་བཏང་པས་བདེ་བར་འགྱུར།། །།དགེའོ། །དཔོན་མོ་ནམ་མཁའ་རྒྱལ་མོ་ལ་ཆོས་ཀྱི་འཕྲིན་དུ་བསྐུར་བའོ། །

ཚིགས་བཅད་བཅུ་གཉིས།


TNT01_Page_0879
[མ་དཔེ་གཟིགས་ན་འདིར་གནོན།]

༈ ཨོཾ་སྭཱ་སྟི། ཤིན་ཏུ་རྙེད་པར་དཀའ་བ་ནི། །མི་ལུས་ཤིང་རྟ་ལ་ཞོན་ནས། །ཐར་པའི་གྲོང་ཁྱེར་འཇུག་འདོད་པས། །ཤིན་ཏུ་འབད་པས་བརྩོན་པར་རིགས། །བརྩོན་འགྲུས་དཔུང་དང་བྲལ་བ་རྣམས། །


TNT01_Page_0879
[མ་དཔེ་གཟིགས་ན་འདིར་གནོན།]

བར་ཆད་ཆོམ་པོས་བཅོམ་ཞིང་བརླག །འཁོར་བའི་ཟམ་སྟེགས་དལ་འབྱོར་འདི། །འཆི་བདག་ཆུ་བོས་མ་ཁྱེར་བ། །དེ་སྲིད་འབད་པ་ཅིས་མི་རྩོམ། །འབུམ་ཕྲག་དཔུང་གི་རྡུལ་ཚུབ་ཅན། །བང་མཛོད་སྟོང་ཕྲག་མང་འབྱོར་ཞིང༌། །ནད་མེད་དྲེགས་ལྡན་རྒྱལ་པོ་ཡང༌། །མི་བཟད་གཤིན་རྗེའི་ཁར་ཆུད་ན། །དཔའ་བོའི་དམག་གིས་མི་ཕན་ཞིང༌། །གཡོག་དང་ནོར་གྱིས་མི་བཟློག་ལ། །གཟུགས་དང་ལང་ཚོས་བསླུ་བར་འགྱུར། །ཤིན་ཏུ་གཅེས་ཤིང་ཕངས་པ་དག །ཅིས་ཀྱང་མ་ཕན་འདས་གྱུར་ན། །སེམས་ནི་ཟུག་རྔུས་འཇོམས་འགྱུར་གྱི། །བདག་ལ་ཕན་པ་གང་ཡང་མེད། །འགྲོ་བ་དྲུག་པོ་འདི་དག་ཏུ། །བྱིས་པ་སོ་སོའི་སྐྱེ་བོ་འཁུམས། །བུམ་པར་སྦྲང་བུ་འཁོར་བ་དང༌། །མཚུངས་ཞེས་ཉི་མའི་གཉེན་གྱི་གསུངས། །ནམ་ཡང་འཁོར་བ་བདེ་མེད་པས། །དེ་ལས་ངེས་པར་ཐར་འདོད་ན། །དངོས་པོར་འཛིན་པ་བཟློག་པའི་ཕྱིར། །ཡང་དག་དོན་ལ་གནས་པར་འཚལ། །སྡིག་པ་ཐམས་ཅད་བཤགས་པར་བགྱི། །འཁོར་བ་ཐོག་མ་མེད་པ་ནས། །ད་ལྟའི་བར་གྱི་མི་དགེ་བ། །སྟོབས་བཞིའི་སྒོ་ནས་བཤགས་སྡམས་འཚལ། །གཞན་གྱི་ཆོས་ལྡན་བྱ་བ་གང༌། །མཐོང་ཐོས་ཀུན་ལ་ཡི་རང་ན། །དེ་ལས་རང་ལ་དགེ་བ་ནི། །ཤིན་ཏུ་རྒྱ་ཆེན་ཐོབ་པར་འགྱུར། །བདག་ཉིད་ང་


TNT01_Page_0880
[མ་དཔེ་གཟིགས་ན་འདིར་གནོན།]

རྒྱལ་མི་འཚལ་ཞིང༌། །གཞན་གྱི་ཕུན་ཚོགས་ལ་མི་སྡང༌། །ངན་པ་རྣམས་ལ་བརྙས་མི་བགྱིད། །མཆོད་དང་སྦྱིན་པ་རྒྱ་ཆེར་བཏང༌། །སློབ་དཔོན་གང་ལ་མཉེས་འགྱུར་བ། །དེ་ཡིས་བཀུར་བསྟི་མཆོད་པ་བྱ། །དགེ་བ་གང་བྱས་སེམས་ཅན་དང༌། །ལྷན་ཅིག་སངས་རྒྱས་རྒྱུ་རུ་བསྔོ། །ཆོས་ཚུལ་མུ་མཐའ་མ་མཆིས་པས། །མཐའ་དག་སུ་ཞིག་བརྗོད་པར་བྱེད། །གང་ལས་ཐབས་མཁས་ཐོབ་འགྱུར་བ། །དེ་འདྲ་བདག་གིས་བརྗོད་པ་ལགས། །ཞེས་པ་ཚིག་བཅད་བཅུ་གཉིས་པ་སྟེ། །ཏཱ་ར་ནཱ་ཐས་གཏམ་དུ་བརྗོད་པའོ། །མངྒ་ལཾ། །

བློ་ལྡན་ཀརྨ་ཆོས་བཟང་ལ་གདམས་པ།


TNT01_Page_0881
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། གང་ཞིག་སྲིད་ཞིའི་ཕུན་ཚོགས་བདུད་རྩིའི་འབྲས། །དལ་འབྱོར་དཔག་བསམ་ལྗོན་པའི་རྩེར་ཆགས་པ། །འདི་ལས་འདོད་དགུ་ཅི་ཡང་བླང་བར་རིགས། །གཞན་དུ་འདི་འདྲ་རྙེད་པ་བརྒྱ་ལ་ཞིག །ཧ་རི་ཙནྡན་དྲིས་རྒྱས་སུམ་རྩེན་ནགས། །ཅི་འདོད་དགའ་བས་རོལ་པའི་རྩེ་ས་ཡང༌། །དབང་མེད་བོར་ཏེ་ལོ་མ་རལ་གྲིའི་ཚལ། །བསྐལ་པར་བསྟེན་པ་འདི་ནི་ལས་ཀྱི་མཐུ། །རབ་འབར་གསེར་གྱི་སྤོ་ལ་གནས་བཅས་པའི། །རྣམ་ཐོས་བུ་དང་དབང་པོའི་འབྱོར་པ་ཡང༌། །དུས་ཀྱི་དབང་གིས་སྟོན་ཀའི་ཆུ་འཛིན་བཞིན། །དེངས་པར་འགྱུར་བ་འདི་ལ་སུ་ཡིས་བཟློག །རིག་འཛིན་དགའ་མའི་ལག་པད་ཀྱིས་བཏུད་པའི། །འཆི་མེད་སྦྲང་རྩིའི་


TNT01_Page_0881
[མ་དཔེ་གཟིགས་ན་འདིར་གནོན།]

དོག་པས་མི་སྤོགས་པ། །བསམ་བཏན་བདུད་རྩིའི་དགའ་སྟོན་ལོངས་སྤྱོད་ཅན། །དེ་དག་གཡུང་དྲུང་དཔལ་ལ་བདེ་བར་རོལ། །འཇིག་རྟེན་ཆོས་བརྒྱད་སྒྱུ་མའི་སྐྱེད་ཚལ་ན། །ངུར་སྨྲིག་སྤུ་སྡུག་རྒྱས་པའི་ཀོ་ཀི་ལ། །དམ་ཆོས་སྙན་སྒྲོགས་སྲིད་པའི་སྙེ་མ་ལ། །ཅི་དགར་ཆགས་མོད་དུས་གཞན་བསམ་པར་རིགས། །ཚིག་འཕྲེང་འདབ་ཤོག་རྒྱས་པའི་རྐང་དྲུག་པ། །རང་བཟོ་དཔལ་འབྲས་སྨིན་པའི་ཚོགས་ལ་འཁྲུལ། །འདབ་བརྒྱའི་ཚལ་ཞེས་རིངས་པར་རྒྱུག་བྱེད་ཀྱི། །ཟབ་དོན་རོ་མཆོག་ནམ་ཡང་ཐོབ་པ་མེད། །རྒྱུ་འབྲས་རྟེན་འབྲེལ་རི་མོ་བཀྲ་བ་འདི། །རང་བཞིན་གདོད་ནས་རྣམ་པར་དག་པའི་རྩལ། །ས་གཞི་རི་བཅས་ནགས་ཚལ་ཇི་སྙེད་གཟུགས། །ཅི་ཡང་འཆར་མོད་རབ་དྭངས་མཚོ་ཡི་ངང༌། །མཚན་ལྡན་བླ་མར་མོས་གུས་ཡིད་བཞིན་གྱི། །ནོར་བུ་འདི་ལས་ལེགས་བྱས་ཅི་ཡང་འབྱུང༌། །ཤིན་ཏུ་སྟོབས་ལྡན་བྱ་བའི་མཐུ་ལས་ནི། །མཐའ་དག་ཕྲ་མོ་འགྲུབ་པ་དངོས་པོའི་གཤིས། །རང་བཞིན་གདོད་མའི་སེམས་འདི་སངས་རྒྱས་ཏེ། །དབུལ་པོའི་ཁྱིམ་འོག་རིན་ཆེན་འབྱུང་ཁུངས་ལྟར། །ཐབས་གཞན་ཅིས་ཀྱང་མཚོན་པར་མི་ནུས་པ། །མཚོན་འདི་བྱིན་རླབས་སྟོབས་ཀྱི་མཐུ་དཔལ་ཡིན། །དེ་སྐད་སྨྲ་པ་ཏཱ་ར་ནཱ་ཐ་ཡིས། །བློ་ལྡན་


TNT01_Page_0882
[མ་དཔེ་གཟིགས་ན་འདིར་གནོན།]

ཀརྨ་ཆོས་བཟང་ཞེས་བྱ་བ། །དེ་ལ་དམ་པའི་ཆོས་ལས་བརྩམས་པ་ཡི། །བཀའ་མཆིད་ཉུང་ངུ་ཙམ་ཞིག་སྨྲས་པ་ལགས།། །། མངྒལཾ་བིསྟཱ་ར་ཀུ་རུ། དགེའོ། །

གྲགས་པ་བཟང་པོ་ལའོ། །


TNT01_Page_0883
[མ་དཔེ་གཟིགས་ན་འདིར་གནོན།]

༈ ཨོཾ་སཱ་སྟི། བླ་མ་ལ་ཕྱག་འཚལ་ལོ། །བདེ་སྡུག་ཆགས་སྡང་གི་རྣམ་རྟོག་དེ། །རང་སེམས་གསལ་སྟོང་ལས་གཞན་དུ་མེད། བློ་བདེ་དང་མི་བདེ་འཆར་སྒོ་ཀུན། །གང་ཤར་ལ་བཟོ་བཅོས་མི་འཚལ་ཞིང༌། །རང་ངོ་ཤེས་ཀྱིས་ལ་མཉམ་པར་བཞག །དབྱིངས་རིག་དབྱེར་མེད་སྤྲུལ་པའི་སྐུ། །དུས་ད་ལྟ་ཆོས་སྐུའི་ཡོ་ལངས་ཡིན། །འཕོ་ན་ཆོས་སྐུའི་དབྱིངས་སུ་འཕོ། །བླ་མ་སངས་རྒྱས་རིན་ཆེན་གྱི། །ཐུགས་ཡིད་དང་རང་སེམས་བསྲེས་ལ་ཞོག །བླ་མ་དང་རང་སེམས་དབྱེར་མེད་ལ། །བཟོ་བཅོས་མེད་པས་ངོ་ཤེས་འཚལ། །ངེད་བླ་མ་སྐྱེ་མེད་དུ་ངོ་ཤེས་འཚལ། ཁྱེད་རང་སེམས་ཆོས་སྐུར་རྟོགས་ནས་འོང༌། །མོས་གུས་འདུན་པའི་རྒྱབ་རྟེན་གཅེས། །ཡར་བླ་མའི་ཐུགས་སུ་འཕོ་འདུན་མཛོད། །ཟན་ལྷག་གི་ལུགས་ཀྱི་མི་ཆེ་ཞིང༌། །གདམས་ངག་གི་ལུགས་ཀྱི་མི་མང་བས། །ཚིག་འདི་བཞིན་ཐུགས་ལ་ནན་ཏན་མཛོད། །བུ་གྲགས་བཟང་གི་བློ་ལ་དེ་ལྟར་ཞོག། །།མངྒལཾ། །

ཆོས་རྗེ་ཀརྨ་བསྟན་འཛིན་ལ།


TNT01_Page_0883
[མ་དཔེ་གཟིགས་ན་འདིར་གནོན།]

ན་མོ་གུ་རུ། བླ་མ་མཆོག་གི་ཞབས་པད་ལ་བཏུད་ནས། །མདོར་བསྡུས་སྙན་བསྐུལ་བགྱིད་པར་འཚལ་བ་ལ། །ཤིན་ཏུ་རྙེད་དཀའ་བསྙེན་པར་དཀའ་བ་ཡི། །བཤེས་གཉེན་དམ་པ་འབད་པས་བསྟེན་པར་ཞུ། །འཇིག་རྟེན་འཇིག་རྟེན་འདས་པའི་ཕུན་ཚོགས་ཀུན། །བླ་མ་དམ་པ་བསྟེན་ལས་འབྱུང་ཞེས་གསུངས། །འཁོར་བའི་རྒྱ་མཚོའི་འཇིགས་པ་ལས་སྒྲོལ་བའི། །གྲུ་ཆེན་འདི་ནི་ཕྱི་ནས་ཐོབ་དཀའ་བས། །ད་ལྟ་རྩེ་གཅིག་འབད་པར་མ་བྱས་ན། །འབད་པར་བྱ་བའི་དུས་ནི་ནམ་ཞིག་ཡིན། །སྡུག་བསྔལ་འཁོར་བའི་རྒྱ་མཚོ་ཆེན་པོ་ལས། །དམ་ཆོས་མ་གཏོགས་གཞན་གྱིས་མི་གྲོལ་བས། །ཉིན་མཚན་ཚད་མེད་དམ་པའི་ཆོས་ལ་འབད། །འདུན་མ་ཐམས་ཅད་རྩེ་ལ་ཕྱིན་པར་གདའ། །སྔོན་འགྲོ་སྐྱབས་འགྲོ་སེམས་བསྐྱེད་མཎྜལ་འབུལ། །དངོས་གཞི་ཉམས་ལེན་གནད་ཀྱི་སྙིང་པོར་བསྒྲིལ། །ཐུན་འཇུག་བསྔོ་བས་རྒྱས་འདེབས་རྒྱ་ཆེར་སྤེལ། །ཐུན་མཚམས་ཀུན་ཏུ་སྙིང་རྗེའི་འཁོར་ལོ་བསྐོར། །ལམ་གྱི་ངོ་བོ་གནད་གསུམ་རིག་པར་བྱ། །གང་སྣང་དག་པའི་འཁོར་ལོར་སྤྱོད་པ་དང༌། རང་བཞིན་རྩ་བྲལ་ལྷུན་གྲུབ་མཉམ་བཞག་དང༌། །རྫོགས་རིམ་ཟབ་མོའི་གནད་དང་ལྡན་པའོ། །དགེ་སྦྱོར་ཀུན་ལ་གཅིག་ཏུ་གལ་ཆེ་བ། །བླ་མའི་མོས་གུས་ལགས་པས་


TNT01_Page_0884
[མ་དཔེ་གཟིགས་ན་འདིར་གནོན།]

འབད་དེ་སྒོམས། །མཁའ་ལྡིང་རྒྱལ་པོའི་འདབ་གཤོག་ཇི་བཞིན་དུ། །གང་ལའང་ཞེན་པ་མེད་དང་སྙིང་རྗེ་གཉིས། །བརྩོན་འགྲུས་དག་སྣང་སྙིང་སྟོབས་བརྟན་པ་གསུམ། །འཇིག་རྟེན་གསུམ་ན་རིན་ཆེན་གསུམ་དང་མཚུངས། །དད་པ་ངོ་ཚ་ཤེས་དང་ཁྲེལ་ཡོད་དང༌། དགེ་སྡིག་བླང་དོར་གནས་ལ་གཟབ་པ་ནི། །ཉམས་ལེན་རྒྱལ་པོའི་དཔུང་ཚོགས་ཡན་ལག་བཞི། །མི་མཐུན་དགྲ་འཇོམས་དཔའ་བོ་མཚུངས་པ་མེད། །དྲང་པོའི་ཡིད་དད་བདེན་པར་སྨྲ་བའི་ངག །ཆོག་ཤེས་དང་ནི་ཆགས་མེད་དམ་ཆོས་མཉན། །ལྔ་པོ་འདི་དག་ཡོན་ཏན་ས་གཞི་ལགས། །མཐའ་བཞི་ལས་རྒྱལ་དབུས་སུ་བརྟན་པར་བྱེད། །ཕྱོགས་ཀུན་བདེ་བར་སྐྱོང་བའི་དཔལ་ལྡན་པ། །རྒྱལ་པོའི་བུ་འཛོམ་ཕ་རོལ་ཕྱིན་པ་དྲུག །རིན་ཆེན་བདུན་མཚུངས་འཕགས་པའི་ནོར་བདུན་ཏེ། །ཡན་ལག་བརྒྱད་ལྡན་འཕགས་པའི་ལམ་ཀུན་ལས། །གསུང་རབ་དགུ་ཡི་འཁོར་ཚོགས་བདེ་བར་རྒྱུ། །དགེ་བཅུའི་ཁྲིམས་ཀྱི་བདེ་བར་འཚོ་བ་ནི། །དམ་ཆོས་འཁོར་ལོས་བསྒྱུར་བའི་དཔལ་འབྱོར་ལགས། །དེ་སྐད་སྨྲ་བའང་ཏཱ་ར་ནཱ་ཐ་ཡིན། །མི་མཆོག་ཐུགས་མཚོ་རྣམ་པར་གང་ཏེ་འོང༌། །ཐུབ་གསུང་སྤྲིན་ལས་དམ་ཆོས་ཆུ་ཆར་འདི། །སྐལ་ལྡན་རེ་བའི་ཞིང་སར་འབབ་མིན་ནམ།


TNT01_Page_0885
[མ་དཔེ་གཟིགས་ན་འདིར་གནོན།]

ཞེས་པའང་ཆོས་རྗེ་ཀརྨ་བསྟན་འཛིན་ལ་དགེ་བར་གདམས་པ། དགེ་ལེགས་འཕེལ། །ཤུ་བྷམ་སྟུ་སརྦ་ཛཱ་ག་ཏཾ།། །།

ཀུན་དགའ་གྲགས་པ་ལ་ཏཱ་ར་ནཱ་ཐས་གདམས་པ།


TNT01_Page_0886
[མ་དཔེ་གཟིགས་ན་འདིར་གནོན།]

ན་མོ་གུ་རུ། མཛུ་གུ་གཏད་ས་མེད་པའི་ཆོས་དབྱིངས་ལ། །ཅི་ཡིན་མེད་པའི་བླ་མ་བཞུགས། །ཏི་གཏད་མེད་པའི་མོས་གུས་སྒོམས། །ངོས་གཟུང་མེད་པའི་བྱིན་རླབས་ཞུ། །ནམ་ཞིག་རྒྱུན་དུ་མོས་གུས་སྒོམས། །ཐུན་འགོར་སྐྱབས་འགྲོ་སེམས་བསྐྱེད་དང༌། །ཐུན་གཞུག་ཏུ་བསྔོ་བས་རྒྱས་འདེབས་སྒོམས། །རྟག་ཏུ་བསམ་པ་བཟང་པོ་བྱ། །སྡིག་པ་ལ་ཤི་འཛེམ་རོ་འཛེམ་གྱིས། །ཡོང་ན་དགེ་བ་ཅི་འགྲུབ་གྱིས། །ལྷ་ཁང་དང་དགེ་འདུན་བླ་མའི་རྫས། །དུག་ནག་པོ་ཧ་ལ་ཧ་ལ་ཡིན། །འབྲུ་གཅིག་ཀྱང་ཁ་ལ་མ་འཁྱེར་ཞིག །སྐུད་གཅིག་ཀྱང་ཨཾ་ཕྲག་ཏུ་མ་འཇུག་ཅིག །འཇིག་རྟེན་གྱི་ཁ་དྲག་དཔུང་འཛོམ་ལ། །ཡིད་སྨོན་གྱི་རེ་བ་མ་གཏོད་ཅིག །དགོན་པ་སྡེ་གོག་གི་འགོ་མི་དང༌། །སྡིག་ཅན་གྱི་དཔོན་པོའི་ཐུགས་ཟིན་དང༌། །ཆོས་ལ་སྡིག་གསོག་གི་བཙུན་པ་གསུམ། །དམྱལ་བའི་གཏིང་རྡོ་ཞིག་ལགས་པས་སྤོང་བ་ཞུ། །རང་རྒྱུད་སེ་རེངས་ཡེ་རེངས་འདི་དང་གཅིག །ཆོས་ལ་ཉ་དྲེད་ཆུ་དྲེད་འདི་དང་གཉིས། །ཉོན་མོངས་མེ་དར་ཆུ་དར་འདི་དང་གསུམ། །བསླབ་སྡོམ་ཁ་རལ་སྣ་རལ་འདི་དང་བཞི། །འཕྲལ་


TNT01_Page_0886
[མ་དཔེ་གཟིགས་ན་འདིར་གནོན།]

སྤྱོད་མི་རྩིང་དགུ་རྩིང་འདི་དང་ལྔ། །དམ་ཚིག་གར་ཉམས་འདིར་ཉམས་མེད་དང་དྲུག །དགེ་སྦྱོར་རྒྱ་ཡེངས་དགུ་ཡེངས་འདི་དང་བདུན། །འདི་བདུན་རང་སྐྱོན་ལགས་པས་མཚང་ནས་བྲུས། །ལར་ལ་ཐང་མེད་པས་ཅ་རེ་སྡོད། །ཧམ་པ་མ་ཆེ་ཅུམ་མེ་གྱིས། །འགྲོ་ལུགས་ཝ་ལྟར་འཛེམ་པ་ཅིག །སྡོད་ལུགས་རི་བོང་ལྟར་བཟོ་བ་ཅིག །ལབ་ལུགས་ཞུམ་བུ་ལྟར་སྙམ་པ་ཅིག །རང་སེམས་བུ་ཆུང་ལྟར་བཟོ་མོད་ཅིག །ལག་ལེན་རྩི་ལྟར་ཞིབ་པ་ཅིག །འདི་ལྔ་ལག་ཐོག་ལ་ལོངས་པ་ཅིག་གྱིས། །ལུས་ངག་གི་སྤྱོད་པ་རྩིང་པ་འདི། །དམ་ཆོས་འདུལ་བ་དང་རྒྱབ་འགལ་ཡིན། །བསམ་ངན་སྦྱོར་རྩུབ་ཀྱི་གདུག་སེམས་འདིས། །ཐེག་ཆེན་གྱི་ཁྱུ་ནས་འབུད་པ་ལགས། །ཉམས་ལེན་མེད་པའི་ཐ་མལ་པ། །དག་སྣང་ཆུང་ལ་རང་འདོད་ཆེ། །རྡོ་རྗེ་ཐེག་པའི་བསྟན་བཤིག་ཡིན། །འོ་སྐོལ་ཆོས་གཟུགས་སུ་སྒྱུར་ཕྱིན་ཆད། །ཆོས་ཀུན་དང་མཐུན་པ་ཞིག་མ་བྱུང་ཀྱང༌། །སྣ་གཅིག་དང་མ་མཐུན་ན་ཅི་རང་བཏུབ། །འདི་སྙིང་གཏམ་གྱི་ནང་ནས་ཉིང་ཁུ་ཡིན། །སྙིང་དམར་པོར་བཏོན་ཀྱང་འདི་ལས་མེད། །ཆོས་གཟུགས་ཀྱི་དཀོར་ཟན་བསྟན་པའི་དགྲ། །ཚིག་འདི་ལ་མ་མགུ་ཡང་བྱ་ཐབས་མེད། །ཨ་ལ་ལ་མདོ་རྒྱུད་ཐང་མར་བརྡལ་ན་ཡང༌། །འགག་དྲིལ་རྒྱུ་འདི་ལས་འདུག་རི་ཤི །


TNT01_Page_0887
[མ་དཔེ་གཟིགས་ན་འདིར་གནོན།]

ངེད་རྟོགས་ལྡན་གྱི་ཁ་ནས་དེ་ལྟར་ཐལ། །བུ་སེམས་ལ་ཕན་ན་སེམས་ལ་ཞོག །སེམས་ཚིག་པ་ཟ་ན་ཆུ་ལ་སྐྱུར། །བསྟོད་ར་ལ་དགའ་ན་བསྟོད་པས་ཆོག །ཅེས་ཀུན་དགའ་གྲགས་པ་ལ་ཏཱ་ར་ནཱ་ཐས་གདམས་པའོ།། །།

ཀུན་དགའ་བདེ་ལེགས་འཛོམ་ལ་གདམས་པ།


TNT01_Page_0888
[མ་དཔེ་གཟིགས་ན་འདིར་གནོན།]

ན་མོ་གུ་ར་ཝེ། ཕ་བླ་མ་མཆོག་ལ་གསོལ་བ་འདེབས། ཁྱེད་མོས་ལྡན་གྱི་བློ་སྣ་ཆོས་ལ་བསྒྱུར། །དུས་ད་རེས་དལ་འབྱོར་ཐོབ་དུས་འདིར། །ཆོས་ཉམས་ལེན་བྱེད་པའི་དུས་ལ་བབ། །ལས་བྱས་ཀྱིན་སླར་ཡང་བྱེད་དགོས་མང༌། །དོན་ཆུང་གི་བྱ་བ་ཕྱི་ལ་སྐྱུར། །དགྲ་བཏུལ་ཀྱིན་རྟིང་ལ་འདུལ་དགོས་མང༌། །སླར་ཡང་སེམས་འདུལ་བའི་དུས་ལ་བབ། །གཉེན་མགུ་པ་ལས་ཀྱང་འཁང་བ་མང༌། །འཇིག་རྟེན་གྱི་གཉེན་ཀུན་སྡུག་བསྔལ་གྱི་རྒྱུ། །ནོར་གསོགས་པ་ལས་ཀྱང་བསག་དགོས་མང༌། །ཞེན་པ་གཏིང་ནས་ལོག་པའི་དུས་ལ་བབ། །སེམས་ཟིན་པ་ལས་ཀྱང་བཟུང་དགོས་མང༌། །ངོ་སྲུངས་བཤོལ་བ་ཀུན་བློ་རེ་བདེ། །ཆོས་བསླབས་པ་ལས་ཀྱང་སློབ་དགོས་མང༌། །དོན་ཉམས་ལེན་བྱེད་པ་ཁྱེ་རེ་ཆེ། །དོན་སྤྱད་པ་ལས་ཀྱང་སྤྱོད་དགོས་མང༌། །དལ་འབྱོར་དོན་མེད་དུ་འཆོར་ཉེན་གདའ། །འཇིག་རྟེན་གྱི་བློ་གཏད་མཐོང་ཙ་ན། །ལྷ་ཆོས་ཀྱི་སྐྱབས་གནས་བཀའ་དྲིན་རེ་ཆེ། །མཁར་


TNT01_Page_0888
[མ་དཔེ་གཟིགས་ན་འདིར་གནོན།]

ཀུན་ཞིག་པ་མཐོང་ཙ་ན། །ལུས་གནད་ཀྱི་མཁར་འདི་དོན་རེ་ཆེ། །གང་སྨྲས་མདོ་མེད་འདི་མཐོང་ཙ་ན། །ངག་བཟླས་བརྗོད་བྱེད་པ་དོན་རེ་ཆེ། །ཅི་བསམ་སེམས་ཀྱི་ཚེར་མ་ལ། །འཛིན་མེད་དུ་འཇོག་པ་གནད་རེ་ཟབ། །ཚེ་འདིའི་གཏན་གྲོགས་འབོར་ཙ་ན། །ཉམས་རྟོགས་ཀྱི་གྲོགས་འདི་བརྟན་རེ་ཐུབ། །ནམ་ཡང་རྒས་པ་འདིས་མི་བསླུ་བས། །དེ་ཚུན་ཆད་ཆོས་ལ་བསྒྱུར་ན་བཟང༌། །ནམ་ཡང་སྡུག་བསྔལ་འདིས་མི་སླུ་བས། །ཆོས་ཕྱིར་དཀའ་བ་སྤྱད་ན་བཟང༌། །ནམ་ཡང་ན་བ་འདིས་མི་སླུ་བས། །ན་ཚ་ལམ་དུ་ཁྱེར་ན་བཟང༌། །ནམ་ཡང་འཆི་བ་འདིས་མི་སླུ་བས། །ཆོས་ཕྱིར་དུ་ནོངས་ན་གོ་ཡང་ཆོད། །ནམ་ཡང་དམ་ཆོས་འདིས་མི་སླུ་བས། །བློ་གཏད་བཅས་ན་དོན་རེ་ཆེ། །ཚེ་འདི་ལས་ཕྱི་མ་དོན་ཆེ་བས། །ཕྱི་མའི་གྲབས་ཤོམ་སེམས་ལ་དྲིས། །ཚིག་སློབ་པ་ལས་ཀྱང་སྒོམས་ན་ལེགས། །སྒོམ་ཚུལ་བླ་མའི་ཞལ་ནས་དྲིས། །དོན་མང་བ་ལས་ཀྱང་འདྲིལ་བ་བཟང༌། །དོན་སྙིང་པོར་འདྲིལ་བ་ཞིག་ཅིས་ཀྱང་འཚལ།། །།ཞེས་པའང་ཀུན་དགའ་བདེ་ལེགས་འཛོམ་ལ་གདམས་པ་ཏཱ་ར་ནཱ་ཐས་སོ། །དགེའོ། །

ཀུན་དགའ་རྒྱལ་མཚན་ལ་གདམས་པ།


TNT01_Page_0889
[མ་དཔེ་གཟིགས་ན་འདིར་གནོན།]

ན་མོ་གུ་རུ། རྒྱལ་བ་སངས་རྒྱས་ཀུན་གྱི་དངོས། །མཚན་ལྡན་རྗེ་ལ་གུས་པས་འདུད། །བདག་ཅག་སློབ་མར་བཅས་པ་ལ། །ད་ལྟ་བྱིན་གྱིས་


TNT01_Page_0889
[མ་དཔེ་གཟིགས་ན་འདིར་གནོན།]

བརླབ་ཏུ་གསོལ། །ཕྱོགས་བཅུ་ནམ་མཁའི་མཐའ་གཏུགས་པའི། །འགྲོ་དྲུག་དྲིན་ཅན་ཕ་མ་ལ། །བྱས་པ་ཤེས་བཞིན་དྲིན་བཟོ་བའི། །བྱམས་དང་སྙིང་རྗེ་འབད་དེ་སྒོམས། །དམ་ཆོས་སྤྱོད་པའི་མཐུ་ལྡན་པ། །རྙེད་དཀའ་མི་ལུས་རིན་ཆེན་འདི། །སྟོན་ཀའི་སྤྲིན་བཞིན་ཡིད་བརྟན་མེད། །ནམ་འཆི་ཆ་མེད་བསམ་པར་འཚལ། །ཤིན་ཏུ་འབད་པའི་ལོངས་སྤྱོད་དང༌། །འབྲལ་ཐབས་མེད་པའི་བདོག་པ་ཀུན། །དབང་མེད་དུ་འཇོག་པ་མཐོང་ཙ་ན། །རྟག་འཛིན་ཅན་རྣམས་ཡི་རེ་མུག །དམ་ཆོས་ཉམས་ལེན་མ་གཏོགས་པ། །ལས་ཐབས་ཐམས་ཅད་མདོ་མེད་ཡིན། །མཚན་ལྡན་བླ་མ་ལས་གཞན་པའི། །བློ་གཏད་ཐམས་ཅད་སླུ་རྡོ་ཡིན། །ད་རེས་ཚེ་ཐུང་འདི་འདྲ་ལ། །ཚེ་འདིའི་ཆེད་ཀར་གཏོང་གཏོང་ནས། །ངན་སོང་གི་སྡུག་བསྔལ་མི་ཟད་རྒྱུ། །ཆོས་མིན་གྱི་བྱ་བ་བྱེད་ཁོམ་མམ། །དམ་ཆོས་སུ་མིང་བཏགས་མི་ཆོས་དང༌། །གཞན་དོན་དུ་མིང་བཏགས་ཀྱི་རང་འདོད་དང༌། །ཆོས་གཟུགས་སུ་བྱས་པའི་ཆོས་མེད་གསུམ། །སེམས་ཅན་སླུ་བའི་བརྫུན་ཁྲིགས་ཡིན། །བློ་སྙིང་ནས་ཆོས་སུ་སོང་བ་འཚལ། །བྱམས་སྙིང་རྗེ་གཏིང་ནས་འབྱོངས་པ་འཚལ། །དབྱིངས་སྤྲོས་མེད་ལ་མཉམ་


TNT01_Page_0890
[མ་དཔེ་གཟིགས་ན་འདིར་གནོན།]

པར་འཇོག་པ་འཚལ། །དོན་དེ་ཙམ་ཐུགས་ལ་འཇོག་པ་ཞུ།། །།ཞེས་པའང་རྒྱལ་ཁམས་པ་ཏཱ་ར་ནཱ་ཐས་ཚོགས་བྱེ་རྫིངས་ཀྱི་གཏན་གཅིག་པ་ཀུན་དགའ་རྒྱལ་མཚན་ལ་གདམས་པའོ། །མངྒལཾ། །

ཆོས་རྗེ་རིན་པོ་ཆེ་སྤ་ལུང་པ་ལའོ། །


TNT01_Page_0891
[མ་དཔེ་གཟིགས་ན་འདིར་གནོན།]

༈ གང་སྣང་མཉམ་ཉིད་ངོ་བོའི་རྩལ། །ནམ་མཁའ་བཞིན་དུ་ཕྱོགས་ལྷུང་མེད། །གང་བྱུང་དེ་ལ་བཅོས་མི་འཚལ། །ལྷུན་གྲུབ་དེ་ལ་ཆམ་གྱི་བཞག །བཙིར་ཐག་མེད་པའི་རང་གི་སེམས། །གུ་ཡངས་པོ་འདི་རྒྱ་རེ་ཆེ། །བཙོན་དུ་བཅུག་པའི་མི་འགའ་ཞིག །འབད་རྩོལ་དཀའ་སྤྱད་ཆེན་པོ་ཡི། །བཙོན་ལས་ཐར་པར་གྱུར་པ་ན། །རྩོལ་བ་མེད་པར་ངང་གི་བདེ། །དང་པོ་འབད་རྩོལ་དགོས་དུས་སུ། །ཇི་ལྟར་འབད་ཀྱང་སྐྱོན་དང་འདྲེ། །འབད་རྩོལ་མེད་པར་ཤེས་ཙ་ན། །སྐྱོན་རྣམས་ཐམས་ཅད་ཡོན་ཏན་ཡིན། །ཞེས་པའང་སྔར་གོམས་ཉམས་ལེན་ལ། །གསལ་འདེབས་ཙམ་དུ་སྨྲས་པ་ཡིན།། །།མངྒ་ལཾ། །དགེའོ། །

ལས་སྟོད་ཀྱི་གནས་སྐོར་བ་འདྲ་ལ་གདམས་པའོ། །


TNT01_Page_0891
[མ་དཔེ་གཟིགས་ན་འདིར་གནོན།]

༈ ཨོཾ་སྭཱ་སྟི། ངོ་མཚར་ཅན་གྱི་བླ་མ་ལ། །གདུང་བ་དྲག་པོས་གསོལ་བ་འདེབས། ཁྱེད་རྒྱལ་ཁམས་བསྐོར་བའི་རྣལ་འབྱོར་ཀུན། །དོན་འདི་བཞིན་ཐུགས་ལ་བཞག་པ་ཞུ། །ད་རེས་ཆོས་དང་མཇལ་བ་དང༌། །


TNT01_Page_0891
[མ་དཔེ་གཟིགས་ན་འདིར་གནོན།]

དགོས་སུ་བླ་མ་མཆོག་ལ་བསྟེན། །ལར་སྐལ་པ་བཟང་སྟེ་ཨ་ལ་ལ། །དུས་ཡུན་རིང་དགེ་བ་བསགས་གྱུར་ན། །གནད་མཆོག་གྱུར་བླ་མའི་བྱིན་རླབས་རྙེད། །བསྐྱེད་རྫོགས་དང་བཟླས་བརྗོད་ལ་སོགས་པ། །རླབས་ཆེན་གྱི་དགེ་བ་ཕྱོགས་བཅུར་སྤེལ། །དགེ་བ་ལ་འཛིན་ཞེན་མི་འཚལ་བར། །ལྷུག་པའི་ངང་ནས་དགེ་རྩ་བསོགས། །དམིགས་མེད་ཀྱི་ཚུལ་དུ་སྨོན་ལམ་ཐོབ། །ཞིང་གནས་ཆེན་རྣམས་སུ་འགྲོ་བ་ན། །ཐོ་ཅོ་དང་འཁྲུག་ལོང་མི་འཚལ་ཞིང༌། །ཉམས་ལེན་གྱི་རྟེན་འབྲེལ་སྒྲིག་པ་ཞུ། །གང་སྣང་ལྷ་སྐུའི་ཉམས་ལེན་མཛོད། །དག་སྣང་ཕྱོགས་མེད་དུ་འཆར་བའི་རྟེན་འབྲེལ་ཡོད། །སྔགས་ཀྱི་བཟླས་བརྗོད་ཀྱང་ཅི་ནུས་འཚལ། །ངག་བདེན་ཚིག་འགྲུབ་པའི་རྟེན་འབྲེལ་ཡོད། །གང་དགོས་ཀྱི་འདུན་པ་དུང་ངེ་བ། །ཕཊ་ཅེས་རང་སར་བཤིག་ལས་ཞོག །སྣང་བ་དབང་དུ་འདུ་བའི་རྟེན་འབྲེལ་ཡོད། །རང་འདོད་མེད་པའི་སྨོན་ལམ་ཐོབ། །འགྲོ་དོན་ཕྱོགས་མེད་དུ་འཆར་བའི་རྟེན་འབྲེལ་ཡོད། །གང་སྣང་རང་སེམས་ཀྱི་ངོ་བོ་ལ་དྲན་པ་སྐྱོངས། །རྟོགས་པ་མངོན་འགྱུར་གྱི་རྟེན་འབྲེལ་ཡོད། །ཉོན་མོངས་གང་སྐྱེས་ལ་ངོ་ཤེས་འཚལ། །ཉོན་མོངས་ཅན་ཆོས་ལ་འཛུད་པའི་རྟེན་འབྲེལ་ཡོད། །རྩ་རླུང་ཐིག་ལེའི་རྣལ་འབྱོར་སྒོམ། །


TNT01_Page_0892
[མ་དཔེ་གཟིགས་ན་འདིར་གནོན།]

མ་མཁའ་འགྲོས་བྱིན་རློབ་ཀྱི་རྟེན་འབྲེལ་ཡོད། །གང་སྡོད་དུ་མཆོད་གཏོར་ལ་བརྩོན་པ་ཞུ། །བར་ཆད་བཟློག་པའི་རྟེན་འབྲེལ་ཡོད། །མོས་གུས་ཀྱི་གསོལ་འདེབས་ཡང་ཡང་བྱ། །ཆོས་བརྒྱུད་འཕེལ་བའི་རྟེན་འབྲེལ་ཡོད། །དོན་དེ་དག་མཚོན་བྱེད་ཙམ་ཡིན་པས། །རྟེན་འབྲེལ་སྒྲིག་ལུགས་ཤེས་ཏེ་འཚལ། །ཕྱི་ནང་གི་རྟེན་འབྲེལ་སྒྲིག་ཤེས་ན། །དགོས་འདོད་དངོས་གྲུབ་ཆར་ལྟར་འབབ།། །།ཅེས་པའང་ཏཱ་ར་ནཱ་ཐས་ཉེ་བར་གདམས་པའོ། །དགེ་ལེགས་འཕེལ། །

ཞལ་གདམས་དཔེ་རྒྱན་གསལ་བ་བཞུགས།


TNT01_Page_0893
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། བདག་ལྟ་སོ་ལྡན་དྲེགས་པའི་དགྲ། །རྒྱལ་བ་རི་དྭགས་དབང་པོ་གང༌། །དཔག་ཡས་ཡོན་ཏན་འབྱོར་པ་ཡིས། ཁེངས་པས་སེངྒེའི་སྒྲ་བསྒྲགས་བཞིན། །གཉིས་མེད་གསུང་བའི་བསྟན་པ་ལ། །གུས་པས་བློ་ལྡན་ཕྱག་འཚལ་ཏེ། །གདམས་པའི་སྒྲོན་མེ་རབ་སྦར་བས། །སྙན་ཚིག་རི་མོའང་གསལ་བར་བྱ། །འབྱོར་པ་བཅུ་དང་ལྡན་པའི་ལུས། །ཡིད་བཞིན་ནོར་བུ་ལྟ་བུར་དཀོན། །མི་ཟད་གཏེར་ཆེན་དམ་པ་ལྟར། །ཕུན་ཚོགས་ཐམས་ཅད་འདི་ལས་ཐོབ། །ཅེས་པ་འདི་ནི་ཆོས་ཀྱི་དཔེ། །ལུས་འདི་ཆུ་ཡི་སྦུ་བ་འདྲ། །དབུགས་ཀྱང་སྟོན་ཀའི་ན་བུན་བཞིན། །མཐོ་རིས་འབྱོར་པའི་དཔལ་འདི་ཡང༌། །རྨི་ལམ་ལྟད་མོ་ཇི་བཞིན་ནོ། །ཞེས་པ་འདི་


TNT01_Page_0893
[མ་དཔེ་གཟིགས་ན་འདིར་གནོན།]

ནི་དངོས་པོའི་དཔེ། །ཞུན་མར་ཟད་པའི་སྒྲོན་མེ་འདི། །འཆི་བདག་གནས་སུ་ཆས་པ་ཡི། །སྐྱེས་བུའི་སྲོག་ལྟར་རྐྱེན་གཞན་ལ། །ལྟོས་པ་མེད་པར་འཇིག་པ་ཉིད། །ཅེས་པ་འདི་ནི་བཟློག་པའི་དཔེ། །ལང་ཚོ་དར་བའི་ལུས་འདི་ནི། །མཛེས་ཀྱང་མི་བརྟན་འཇའ་ཚོན་བཞིན། །འཇའ་ཚོན་འདི་ཡང་ལུས་བཞིན་དུ། །འདུས་བྱས་རྣམས་ཀྱི་ངང་ཚུལ་སྟོན། །ཞེས་པ་འདི་ནི་ཕན་ཚུན་དཔེ། །འདོད་ཡོན་རི་མོ་རབ་བཀྲ་བར། །སེམས་འདི་རྣམ་པར་གཡོ་བ་ནི། །བུང་བ་དུག་གི་མེ་ཏོག་ལ། །རྒྱུག་པར་མཚུངས་ཀྱི་གཞན་དང་མིན། །ཞེས་པ་འདི་ནི་ངེས་པའི་དཔེ། །རྩྭ་ལྟར་གཡོ་བའི་སེམས་པ་གང༌། །གློག་ལྟར་བཟུང་དུ་མེད་པ་སྟེ། འབབ་ཆུ་ལ་སོགས་རབ་གཡོ་བ། །གཞན་ཡང་ཡོད་ན་འདི་དང་མཚུངས། །ཞེས་པ་འདི་ནི་ངེས་མེད་དཔེ། །ངན་འགྲོའི་ཚོར་བ་མི་བཟད་པ། །རྣོ་བ་ཁོ་ནས་སྤུ་གྲི་དང༌། །མཚུངས་པ་མ་ཡིན་འགྲོ་སེམས་ལ། །འཇིགས་པ་སྐྱེད་བྱེད་ཀྱིས་ཀྱང་ངོ༌། །ཞེས་པ་འདི་ནི་བསྡུས་པའི་དཔེ། །དམྱལ་བའི་སྡུག་བསྔལ་མྱོང་བ་པོ། །ཀུན་གྱིས་སྡུག་བསྔལ་དྲག་པོར་ཤེས། །མཐོ་རིས་འབྱོར་པ་སྡུག་བསྔལ་དུ། །འཕགས་པས་མཁྱེན་པ་འདི་གཉིས་ཁྱད། །ཅེས་པ་འདི་ནི་ཁྱད་པར་དཔེ། །མཐོ་རིས་སྒེག་མོའི་


TNT01_Page_0894
[མ་དཔེ་གཟིགས་ན་འདིར་གནོན།]

བཞིན་གྱི་དཔལ། །ཡོད་ཅེས་པད་དཀར་སྙེམས་མི་འཚལ། །རབ་འབར་ཤལྨ་ལི་ནགས་ཀྱི། །སྲིང་མོ་ལ་ཡང་དེ་ཡོད་ཕྱིར། །ཞེས་པ་འདི་ནི་རབ་བཏགས་དཔེ། །ཚངས་གནས་བསམ་གཏན་བདེ་བ་འདི། །རྟག་བརྟན་གཡུང་དྲུང་དཔལ་འཛིན་ན། །ཟག་མེད་བདེ་བས་མངོན་མཐོ་བའི། །ཐར་པའི་གནས་དང་མཚུངས་པ་ཉིད། །ཅེས་པ་འདི་ནི་རྨད་བྱུང་དཔེ། །ཡིད་ནི་རབ་ཏུ་ཆགས་བྲལ་བས། །ལང་ཚོ་རྒྱས་པའི་གཟུགས་སྡུག་དང༌། །དུར་ཁྲོད་བོར་བའི་རུས་གོང་ནི། ཁྱད་པར་འབྱེད་ལ་རྨོངས་པར་གྱུར། །ཞེས་པ་འདི་ནི་རྨོངས་པའི་དཔེ། །ཅི་འདི་ཤིང་ལོའི་རྩེར་ཆགས་པའི། །ཆུ་ཐིགས་རབ་ཏུ་གཡོ་བའམ། །རབ་ཏུ་སྲེད་པའི་དབང་གྱུར་པའི། །མི་ལུས་ཡིན་ཞེས་ཐེ་ཚོམ་སྐྱེད། །ཅེས་པ་འདི་ནི་ཐེ་ཚོམ་དཔེ། །འཇོ་སྒེག་ཚུལ་གྱིས་འགྲོ་བ་དང༌། །སྲེད་ལྡན་མགུ་བ་བསྐྱེད་པའི་ཕྱིར། །ངན་སྐྱུགས་ཕུང་བོ་མ་ཡིན་གྱི། །རི་དྭགས་མིག་ཅན་ཡིན་པར་ཤེས། །ཞེས་པ་འདི་ནི་རྟོགས་པའི་དཔེ། །རྟག་ཏུ་རབ་འབར་སེམས་གདུངས་ཤིང༌། །འཁོར་བར་སྤྱོད་པ་རྣམས་ཀྱི་གནས། །ཉོན་མོངས་འཕེལ་བའི་ཁྱིམ་འདི་ནི། །ལོ་མ་རལ་གྲིའི་ཚལ་དང་མཚུངས། །ཞེས་པ་འདི་ནི་སྦྱར་བའི་དཔེ། །ང་རྒྱལ་སྤངས་པའི་དགེ་སྒྲུབ་དང༌། །སྦྱིན་ལ་དགའ་བའི་མཁས་རྣམས་ནི། །


TNT01_Page_0895
[མ་དཔེ་གཟིགས་ན་འདིར་གནོན།]

གཏེར་གྱི་བདག་པོ་ཇི་བཞིན་དུ། །སུ་ཝརྞ་ཡི་དཔལ་གྱིས་ཕྱུག །ཅེས་པ་འདི་ནི་མཉམ་ཉིད་དཔེ། །རབ་ཏུ་དབེན་པའི་བསམ་གཏན་འདི། །འཁོར་ལོས་སྒྱུར་བའི་བཀའ་ཁྲིམས་དང༌། །དགེ་ཆོས་སྤེལ་བར་མཚུངས་མོད་ཀྱི། །རྣམ་གཡེང་ཡིད་དང་བྲལ་བས་འཕགས། །ཞེས་པ་འདི་ནི་སྨད་པའི་དཔེ། །མ་ལཱ་ཡ་ཡི་ནགས་ཀླུང་གི །སེར་བུ་འདི་ཡིས་བདེ་བསྐྱེད་པ། །བསོད་ནམས་ཡོངས་སུ་སྨིན་གྱུར་པས། །ཆོས་ཐོས་པ་ཡང་དེ་དང་མཚུངས། །ཞེས་པ་འདི་ནི་བསྟོད་པའི་དཔེ། །བདེ་བའམ་སྡུག་བསྔལ་འདི་བསྐྱེད་ཅེས། །སོ་སོར་ངེས་པར་བརྗོད་མི་བྱེད། །འདོད་པ་ལྔ་ཡི་ལོངས་སྤྱོད་འདི། །སྤུ་གྲིའི་སོ་འདྲ་ཞེས་རྟོག་གོ །ཞེས་པ་འདི་ནི་རྟོག་པའི་དཔེ། །དྲི་མེད་ལྷག་བསམ་དག་པ་དང༌། །ཚུལ་ཁྲིམས་ཡོན་ཏན་བཞི་ལྡན་འདི། །དམ་པའི་ལམ་དུ་མཚུངས་མོད་ཀྱི། །ཕན་ཚུན་འགྲན་པའི་འགལ་ཟླ་ཉིད། །ཅེས་པ་འདི་ནི་འགལ་བའི་དཔེ། །རང་བཞིན་སྤྲོས་བྲལ་ཡེ་ཤེས་གང༌། །ཡོན་ཏན་ལྡན་ཡང་འབད་རྩོལ་ཅན། །འཁྲུལ་པས་བསླད་པའི་བསོད་ནམས་ཚོགས། །ཚེ་གང་འབད་པས་ག་ལ་འགྲན། །ཞེས་པ་འདི་ནི་དགག་པའི་དཔེ། །ལྷུན་པོ་ནོར་བུའི་འོད་ཀྱིས་མཛེས། །ཚངས་སྤྱོད་དུལ་བའི་དཔལ་གྱིས་ཕྱུག །གཟི་བརྗིད་ལྡན་པར་མཚུངས་


TNT01_Page_0896
[མ་དཔེ་གཟིགས་ན་འདིར་གནོན།]

མོད་ཀྱང༌། །རི་བོ་དེ་ལྟར་ལྷག་པ་མིན། །ཞེས་འདི་མཛེས་པའམ་ངོ་བསྟོད་དཔེ། །བློ་གྲོས་རྣམ་པར་འཕེལ་བྱེད་འདི། །དབྱངས་ཅན་མ་ཡིན་ཐོས་པ་ཉིད། །ལུས་ལ་སིམ་པ་བསྐྱེད་འདི་ཡང༌། །རེག་མིན་ཤིན་ཏུ་སྦྱངས་པ་ཉིད། །ཅེས་འདི་དེ་ཉིད་བརྗོད་པའི་དཔེ། །གཟུགས་མཛེས་སོགས་དང་བསམ་གཏན་ལས། །སྐྱེས་པའི་བདེ་བ་དེ་ཀུན་གྱིས། །ཞི་བའི་བདེ་ལ་སྐྲུན་ཏུ་མེད། །དེ་ཕྱིར་མྱ་ངན་འདས་ཉིད་དཔེ། །ཞེས་འདི་ཐུན་མོང་མིན་པའི་དཔེ། །སྲིད་ཞིའི་ལེགས་ལམ་མ་ལུས་པ། །བྱེད་པོས་གཅིག་ཏུ་བསྡུས་འདྲ་བའི། །དགེ་བའི་བཤེས་གཉེན་མཆོག་དེ་དག །བློ་ལྡན་ཀུན་གྱིས་བརྟེན་པར་བྱེད། །ཅེས་པ་འདི་ནི་འབྱུང་མིན་དཔེ། །རྩོད་པའི་དུས་འདིར་མང་ཐོས་འགའ། །ངུར་སྨྲིག་འཛིན་ཡང་གཡོ་སྒྱུ་དང༌། །གདུག་སེམས་རྟག་ཏུ་འཆང་བ་འདི། །བདུད་རྩིའི་འོད་ལས་ཚ་གདུང་བཞིན། །ཞེས་པ་འདི་ནི་སྲིད་མིན་དཔེ། །བདུད་རྩིའི་བུམ་པ་དེ་བཞིན་དུ། །གྲུབ་པའི་བཅུད་ལེན་ནོར་བུ་དང༌། །དཔག་བསམ་ཤིང་ལྟར་དགེ་བ་ནི། །བསྟེན་པ་ཙམ་གྱིས་འབྲས་རབ་སྟེར། །ཞེས་པ་འདི་ནི་མང་པོའི་དཔེ། །དགེ་བས་འཚོ་བའི་ལོངས་སྤྱོད་འདི། །ཡོངས་འདུའི་ཚལ་ཏུ་རྣམ་རོལ་པའི། །མཐོ་རིས་དབང་པོའི་འབྱོར་པ་ལ། །ཡང་ཡང་ལོངས་སྤྱོད་བྱེད་པ་བཞིན། །ཞེས་པ་


TNT01_Page_0897
[མ་དཔེ་གཟིགས་ན་འདིར་གནོན།]

འདི་ནི་རྣམ་འགྱུར་དཔེ། །ཉིན་བྱེད་འོད་ཀྱིས་མཚན་མོ་དང༌། །སྨན་གྱི་དབང་པོས་ཚ་གདུང་དང༌། །དབང་པོས་ད་ནུའི་བུ་བཞིན་དུ། །ཆོས་ཀྱིས་སྡིག་པ་འཇོམས་པར་བྱེད། །ཅེས་པ་འདི་ནི་ཕྲེང་བའི་དཔེ། །ཆོས་དང་འཁོར་བ་དེ་ནས་གཞན། །སྐྱེ་བོ་སྡིག་པ་མྱང་འདས་རྣམས། །བདུད་རྩིའི་འཁོར་ལོ་སྤྲེའུ་དང༌། །དུག་དང་དགའ་ཚལ་དག་ཏུ་མཚུངས། །ཞེས་འདི་དག་དོན་གསལ་བྱེད་ཀྱི། །དཔེ་རྒྱན་གསལ་བྱེད་སྒྲ་གཅིག་པའོ། །རྒྱ་མཚོ་བཞིན་དུ་སྲིད་པ་དང༌། །འཛིན་ཁྲི་བཞིན་དུ་ཉོན་མོངས་ཏེ། །གྲུ་བོ་ཆེ་བཞིན་ཆོས་ཀྱི་ལམ། །དེད་དཔོན་མཁས་ལྟར་སྟོན་པའོ། །ཞེས་འདི་གསལ་བྱེད་དུ་མ་ཅན། །ཆུ་ཀླུང་བྱེ་བ་ཕྲག་བརྒྱ་ཡང༌། །ཆུ་ཡི་གཏེར་དུ་གཞོལ་ཞིང་འབབ། །ཐེག་པ་སྣ་ཚོགས་ཐ་དད་དོན། །ཀུན་ཀྱང་ཆོས་ཀྱི་དབྱིངས་སུ་གཞོལ། །ཞེས་འདི་ཟླ་བོའི་དངོས་པོའི་དཔེ། །བྱང་ཆུབ་སེམས་ལས་སངས་རྒྱས་དང༌། །སྒོ་ངའི་སྦུབས་ལས་བྱེད་པོ་སྐྲུན། །རྒྱལ་བ་ཡང་དག་ལམ་སྟོན་ཞིང༌། །གཞན་གྱིས་ལྟ་བའི་ཐིབས་པོར་ཁྲིད། །ཅེས་པ་འདི་ནི་མཚུངས་སྦྱོར་དཔེ། །འདྲེན་པ་བཅོམ་ལྡན་དེ་བཞིན་གཤེགས། །རྣམ་མི་རྟོག་ལ་སེམས་ཅན་དོན། །ལྷུན་གྲུབ་སྤྱོད་ཕྱིར་ཡིད་བཞིན་གྱི། །ནོར་བུ་རིན་ཆེན་མཆོག་དང་མཚུངས། །


TNT01_Page_0898
[མ་དཔེ་གཟིགས་ན་འདིར་གནོན།]

ཞེས་པ་འདི་ནི་རྒྱུ་ཡི་དཔེ། །དེ་ལྟར་དཔེ་རྒྱན་སོ་གཉིས་སོ། །དཔེ་རྒྱན་གྱི་ནི་སྐྱོན་རྣམ་གསུམ། །ཕོ་མོ་མ་ནིང་རྟགས་འདྲེས་དང༌། །དཔེ་དོན་མཆོག་དམན་ཆེས་པ་དང༌། །མང་ཉུང་ཚིག་ཚོགས་འཁྲུགས་པའོ། །དེ་དག་རྣམས་ལ་རིམ་པ་བཞིན། །མེས་པོ་དྲན་པ་དྲང་སྲོང་གཙོ། །བུད་མེད་གཡོ་སྒྱུ་འཛིན་མ་བཞིན། །གཅམ་བུའི་ཚིག་གི་རྗེས་འཇུག་སྟེ། །ལྕགས་ཕྱེ་གསེར་ལྡན་མ་བཞིན་ནོ། །བདེ་སོགས་བདག་པོའི་ཁང་བཟང་ཡང༌། །མེ་ཏོག་བཀྲམ་པའི་ཕྱུགས་ལྷས་བཞིན། །མགོ་བྲེགས་དལ་བུས་གོམ་པ་འགོད། །འདི་དག་བདེ་གཤེགས་ཇི་བཞིན་ནོ། །གྲོགས་མེད་རྒྱུ་བའི་རྣམ་ཤེས་འདི། །ཚོང་པ་རྣམས་ཀྱི་དེད་དཔོན་མཚུངས། །འདུ་བྱེད་རྣམས་ནི་བསེ་རུ་ལྟར། །གཅིག་ཏུ་སྡུག་བསྔལ་གཅིག་པུ་བསྐྱེད། །དེ་དག་སྐྱོན་མེད་དམིགས་གསལ་དཔེ། །ཆོས་བཞིན་སྤྱོད་ན་བུད་མེད་ཀྱང༌། །སྐྱེས་བུ་སྙིང་སྟོབས་མཆོག་ལྡན་ལྟར། །ངེས་པར་བྱང་ཆུབ་བགྲོད་པ་ཉིད། །འདི་ལ་དཔྱད་པ་ཡོངས་མེད་དོ། །གཡུལ་ལས་རྒྱལ་བའི་དཔའ་བོ་ལྟར། །མཁས་པ་དགེ་སྦྱོང་མཆོག་ཏུ་བདེ། །རིམས་ནད་ཤིན་ཏུ་བྱང་བ་ལྟར། །སྤངས་པ་སླར་ཡང་བཟློག་པ་མེད། །ཇི་ཙམ་སྲིད་པར་གྱུར་པའི་ཚོགས། །མེ་ཡི་རང་བཞིན་ཚ་བ་ལྟར། །སྡུག་བསྔལ་ཁོ་ནར་ཟད་པ་སྟེ། །


TNT01_Page_0899
[མ་དཔེ་གཟིགས་ན་འདིར་གནོན།]

བློ་ལྡན་ཐར་ཕྱིར་འབད་པར་བྱོས། །དེ་ལྟར་རྗེས་གདམས་ཅུང་ཟད་ཙམ། །དཔེ་རྒྱན་ཚུལ་གྱིས་བརྗོད་པ་སྟེ། །ངོ་མཚར་བསྐྱེད་པའི་ཚིག་དང་དོན། །འགའ་ཡང་བདག་གིས་བརྗོད་མ་ནུས། །འོན་ཀྱང་ཆོས་ཀྱི་ཚུལ་བཞིན་ཏེ། །མི་བདག་ཁྱོད་ཀྱིས་བརྟག་པའི་འོས། །ཞེས་པ་ཏཱ་ར་ནཱ་ཐས་སྨྲས་པ་སྟེ། ནོར་གྱི་སྡེ་དང་འདོད་པའི་སྡེ་སྙིང་པོས་དབེན་པར་ཤེས་ནས། ཆོས་ཀྱི་སྡེ་དང་ཐར་པའི་སྡེ་ཁོ་ནའི་དབང་དུ་བྱས་ཏེ་སྙན་ཚིག་ཅུང་ཟད་སྤེལ་བ་ངམ་རིངས་སུའོ།། །། བཀྲ་ཤིས།

ལྕམ་ཀུན་དགའ་འཕྲིན་ལས་དབང་མོ་ལ་གདམས་པའོ། །


TNT01_Page_0900
[མ་དཔེ་གཟིགས་ན་འདིར་གནོན།]

ངེད་བླ་མ་དམ་པའི་ཐུགས་རྗེ་ཡིས། །ཕྱི་བདེ་སྡུག་ཆགས་སྡང་མཐོ་དམན་ཀུན། ནང་ཆོས་ཀྱི་དབྱིངས་སུ་རོ་མཉམ་ཙམ། །ཡིད་ངལ་གསོའི་བློ་གཏད་འཆའ་བ་ལས། །ལར་གཡའ་གོང་གངས་ཁྲོད་ཀྱི་དབེན་གནས་སུ། །ལུས་སེམས་གཉིས་རྡུལ་དུ་བརླགས་བརླགས་པར། །སེམས་ཉམས་ལེན་གྱི་འདུན་པ་ཡོད་མོད་ཀྱི། །སྔར་ཕན་ཆད་གཡེང་བའི་བདུད་ཀྱིས་ཁྱེར། །སྔོན་བསགས་པའི་ལས་ཀྱི་རང་གཟུགས་ལས། །ཚེ་ཕྱི་མ་བློས་བཏང་གི་འགོ་དཔོན་བབ། །འཕྲལ་ཆགས་སྡང་ཟུར་མགོ་སུ་བས་རགས། །ལས་སྡིག་དང་འདྲེས་པའི་འཆོལ་བར་ཤོར། །ད་སྔར་བྱས་ཀྱི་ལས་ལ་ཁག་མི་གཏོང༌། །མི་


TNT01_Page_0900
[མ་དཔེ་གཟིགས་ན་འདིར་གནོན།]

དད་ལྡན་ཀུན་གཡང་ལ་མི་འབོར་བ། །ཚེ་སྒྲུབ་པ་སྙོམས་པའི་ཉམས་ལེན་ཞིག །དུས་མྱུར་དུ་འགྲུབ་པར་སྨོན་པ་ལགས། །རང་ཁ་བཤད་ལག་ལེན་འཛོལ་པ་ཡི། །མི་གཞན་ལ་ཞལ་ཏ་ཇི་ལྟར་འཇུག །ཁྱེད་ལྷག་བསམ་ཤིན་ཏུ་དག་པས་ན། །གཏམ་ནང་མའི་ཚུལ་དུ་གླེང་བ་ནི། །གནས་ཕ་ཡུལ་སྤངས་པའི་རི་ཁྲོད་དང༌། །ཟས་དཀོར་དང་མ་འདྲེས་ལོངས་སྤྱོད་དང༌། །ཆོས་སྡིག་དང་མ་འདྲེས་པའི་ཉམས་ལེན་གསུམ། །ལར་ཤིན་ཏུ་དཀོན་ཏེ་ད་རེས་འཛོམ། །སྤང་དཀའ་བའི་འཇིག་རྟེན་ཁྱིམ་སོ་དང༌། །བརྒལ་དཀའ་བའི་ནོར་རྫས་ཡུལ་ཕྱོགས་དང༌། །བཅད་དཀའ་བའི་དགྲ་གཉེན་འབྲེལ་བ་གསུམ། །དབྱིངས་ཐར་པའི་ལམ་འགེགས་ཀྱི་ཆུ་བོ་ལགས། །དེ་རང་སར་གྲོལ་པ་དཀོན་མཆོག་དང༌། །ཕ་བླ་མའི་ཐུགས་རྗེ་མ་ལགས་སམ། །ད་བསམས་ན་གཏན་གྱི་བདེ་བའི་ཕུལ། །འགོ་ཚུགས་པ་འདུན་མའི་ཡང་རྩེ་ཡིན། །སྔོན་འཁོར་བ་ཐོག་མ་མེད་པ་ནས། །ཉིན་དེ་རིང་ཡན་ཆད་ནོར་བསགས་སམ། །དགྲ་བཏུལ་ཞིང་གཉེན་སྐྱོང་ལ་འབད་ཀྱང༌། །རང་ངལ་བ་ཙམ་ཞིག་མ་གཏོགས་པ། །ལས་བྱས་པ་ཐམས་ཅད་མདོ་དོན་སྟོར། །མི་དགྲ་གཉེན་མི་རྟག་ཚོང་འདུས་མགྲོན། །དོན་གནས་སྐབས་ཀྱི་འབྲེལ་བ་ཡད་ཡུད་ལ། །ལས་ཆགས་སྡང་གི་འཁོར་ལོ་སྐོར་བས་ཅི། །


TNT01_Page_0901
[མ་དཔེ་གཟིགས་ན་འདིར་གནོན།]

གནས་ཡིད་འོང་བསམ་གཏན་ཁང་བུ་རུ། །ལུས་གཡོ་མེད་དལ་བའི་བདེ་སྐྱིད་དང༌། །ཡིད་སེམས་ཁྲལ་མེད་པའི་ངལ་གསོ་འདི། ཁོང་བརྒྱ་བྱིན་ལ་ཡང་ཡོད་རེ་ཀན། །ཡོངས་འཇིག་རྟེན་འགྲོ་བའི་སྣང་ཚུལ་འདི། །མར་ངན་སོང་གསུམ་གྱི་སྡུག་བསྔལ་དང༌། །གནས་མཐོ་རིས་འབྱོར་རྒུད་འགྱུར་ལུགས་ལ། །དུས་ཅུང་ཟད་བདེ་བའི་གོ་སྐབས་མེད། ཁོང་དབང་ཆེན་དུ་བཏགས་པའི་ང་རྒྱལ་ཅན། །ཉིན་མཚན་མེད་ལས་ཀྱིས་བྲེལ་བ་ལ། །སེམས་བདེ་སྐབས་མེད་ཅིང་གཞན་གྱིས་འཕྱ། །དེ་འདུན་མ་ལེགས་སྙམ་འཁྲུལ་ཚབས་ལ། །སེམས་སྟོང་ཉིད་སྙིང་རྗེའི་གནད་སྦྱོར་དང༌། །རྐྱེན་མོས་གུས་གསོལ་འདེབས་ཀྱི་ནན་ཏན་དང༌། །འཕྲལ་དགེ་སྦྱོར་འཕེལ་བའི་དོན་ཅན་འདི། །ཐུགས་ཡེངས་མེད་ལམ་དུ་སྒྲུབ་པ་ཞུ།། །།བཀྲ་ཤིས། །

བླ་མ་ཀ་བཞི་པ་ཀུན་དགའ་ལྷུན་གྲུབ་ལ།


TNT01_Page_0902
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། བླ་མ་མཆོག་དང་དུས་གསུམ་རྒྱལ་བ་ཡི། །ཞབས་པད་དམ་པ་སྤྱི་བོས་བཏུད་བྱས་ཏེ། །དམ་ཆོས་བདུད་རྩིའི་རྒྱ་མཚོ་ལས་བརྩམས་ནས། །ཟབ་མོའི་བཀའ་མཆིད་ཅུང་ཟད་བགྱིད་ལ་སྤྲོ། །དེ་ལ་སྟོན་པ་དེ་བཞིན་གཤེགས་པས། །དམ་པའི་ཆོས་ཀྱི་སྒོ་མཐའ་ཡས་པ་ཞིག་བཀའ་སྩལ་པ་ནི། གཞན་གྱི་ཚིག་སྣ་བསྟུང་བ་དང༌། །ཕ་རོལ་ཟིལ་གྱིས་གནོན་པ་དང༌།


TNT01_Page_0902
[མ་དཔེ་གཟིགས་ན་འདིར་གནོན།]

བདག་ཉིད་སྒྲོག་པ་དང༌། རང་གི་ཕྱོགས་ཡོངས་སུ་སྤེལ་བའི་ཕྱིར་གསུངས་པ་མ་ཡིན་ཏེ། །དམིགས་པ་མེད་པའི་ཐུགས་རྗེ་ཆེན་པོའི་རང་བཞིན་ལས། འགྲོ་བ་ཐམས་ཅད་ལ་མཉམ་པར་བརྩེ་བས། དེ་རྣམས་རང་གིས་བརྙེས་པའི་བྱང་ཆུབ་དམ་པ་དེ་ལ་དགོད་པའི་ཕྱིར་གསུངས་པ་ཡིན་ནོ། །དེའི་ཕྱིར་ཆོས་བྱེད་པར་འདོད་པ་རྣམས་ཀྱང་རང་དང་གཞན་བླ་ན་མེད་པའི་བྱང་ཆུབ་སངས་རྒྱས་ཀྱི་གོ་འཕང་ཐོབ་པར་འགྱུར་བའི་ཐབས་ཁོ་ན་ལ་གཙོ་བོར་དམིགས་པ་ཞིག་ངེས་པར་དགོས་པ་ཡིན་ནོ། དེ་ཡང་དང་པོར་ཆོས་སྒྲུབ་ཅིང་ཉམས་སུ་བླང་བའི་གཞི་གང་ལ་དམིགས་ཏེ་བསྒོམ་པར་བྱ་བ་ནི། གནས་ལུགས་ཀྱི་དེ་ཁོ་ན་ཉིད་ཡིན་ལ། དེ་ཡང་འདི་ལྟར་ངེས་དགོས་ཏེ། སེམས་མ་རིག་པའི་འཁྲུལ་པས་ཡོངས་སུ་བསྐྱེད་དེ། རྨི་ལམ་བཞིན་དུ་སྣང་བའི་ཀུན་རྫོབ་ཁམས་གསུམ་གྱིས་བསྡུས་པའི་ཆོས་འདི་དག་ཐམས་ཅད། དངོས་པོའི་གནས་ཚུལ་ལ་གདོད་ནས་ཡོད་མ་མྱོང་ཞིང༌། འཁྲུལ་པའི་སེམས་ཀྱི་སྣང་བ་ལ་ནི། རང་རང་གི་རྒྱུ་རྐྱེན་ཚོགས་པ་ལས་འབྲས་བུ་བསླུ་བ་མེད་པར་འབྱུང་སྟེ། ཀུན་རྫོབ་གཟུང་འཛིན་གྱིས་བསྡུས་པའི་ཆོས་རྣམས་འཁྲུལ་སྣང་ཙམ་མ་གཏོགས། གདོད་མ་ནས་ཡོད་མ་མྱོང་བ་ཡིན་ལ། དེ་ལྟར་མེད་ཀྱང༌། ཇི་སྲིད་འཁྲུལ་པའི་སྣང་བ་མ་དག་གི་བར་དུ། འཁྲུལ་ངོ་ཉིད་དུ་རྒྱུ་འབྲས་ཕྲ་


TNT01_Page_0903
[མ་དཔེ་གཟིགས་ན་འདིར་གནོན།]

ཞིང་ཕྲ་བ་རྣམས་ཀྱང་མ་འཁྲུགས་པར་འབྱུང་བ་འདི་ནི། དང་པོ་ཉིད་དུ་ཡང་དག་པའི་ལྟ་བ་བསྐྱེད་པའི་དམིགས་པ་ཡིན་ཏེ། རྒྱུ་འབྲས་བསླུ་བ་མེད་པ་ལ་ངེས་ཤེས་སྐྱེས་ནས། སྤངས་བླང་ཇི་ལྟ་བ་བཞིན་དུ་སྤྱད་པས། འཇིག་རྟེན་པའི་ཡང་དག་པའི་ལྟ་བ་ལ་གནས། ངན་སོང་གི་སྒོ་ཁེགས། མཐོ་རིས་ཀྱི་སྒོ་ཕྱེད་པར་འགྱུར་ཞིང༌། སྣང་བ་འདི་དག་འཁྲུལ་པ་ཙམ་མ་གཏོགས། གདོད་མ་ནས་ཡོད་མ་མྱོང་པར་རྟོགས་པས། དངོས་པོར་འཛིན་པ་དང༌། མཚན་མར་འཛིན་པའི་རྟོག་པ་དབྱིངས་སུ་དག་སྟེ། འཇིག་རྟེན་ལས་འདས་པའི་ཡེ་ཤེས་ཡང་དག་པར་སྐྱེ་བར་འགྱུར་ཞིང༌། ཉོན་མོངས་པའི་ས་བོན་རྣམས་ཀྱང་སྤོང་བར་བྱེད་དོ། །དེ་ལྟར་ན། ཀུན་རྫོབ་གཟུང་འཛིན་གྱི་ཆོས་ཐམས་ཅད་གདོད་མ་ནས་མ་གྲུབ་ཀྱང༌། དོན་དམ་ཡང་དག་པའི་དབྱིངས་ཆོས་ཉིད་རང་རིག་རང་གསལ་སྤྲོས་པ་དང་བྲལ་བའི་ཡེ་ཤེས་འདི་ནི། ཡང་དག་པའི་སྟོང་པ་ཉིད་དང༌། ཤེས་བྱ་ཐམས་ཅད་ཀྱི་གནས་ལུགས་དང༌། རང་བཞིན་གྱིས་འོད་གསལ་བ་དང༌། བདེ་གཤེགས་སྙིང་པོ་ཞེས་བྱ་བ་ཡིན་ཏེ། འདི་ནི་ཆོས་ཐམས་ཅད་ཀྱི་ཆོས་ཉིད་དུ་གདོད་མ་ནས་གྲུབ་ཅིང༌། འཕགས་པ་རྣམས་ཀྱི་ཡེ་ཤེས་ཀྱི་ཉམས་སུ་མྱོང་བྱ་ཡིན་པའི་ཕྱིར། བདེན་པ་ཡིན་ལ། འགྱུར་བ་མེད་པའི་


TNT01_Page_0904
[མ་དཔེ་གཟིགས་ན་འདིར་གནོན།]

ཕྱིར་རྟག་ཅིང་བརྟན་པ་དང༌། གནས་ལུགས་ཕྱིན་ཅི་མ་ལོག་པ་ཡིན་པའི་ཕྱིར། དེ་བཞིན་ཉིད་དང༌། མ་ནོར་བ་དེ་བཞིན་ཉིད་དོ། །དེ་ལྟར་གནས་ལུགས་ད་ནི། བདེན་གྲུབ་དང༌། རྟག་བརྟན་གཡུང་དྲུང་ཡིན་ཀྱང། སྤྲོས་པ་ཐམས་ཅད་དང་བྲལ་བ་ཡིན་ཞིང༌། ཚིག་གིས་བརྗོད་དུ་མེད། བློས་བཟུང་དུ་མེད་པ་ཡིན་པས། མཉམ་བཞག་གི་ཚེ། འདི་བདེན་པ་ཡིན་ནོ་རྟག་པ་ཡིན་ནོ་ཞེས་བློས་བརྟགས་ནས་ནི་མི་སྒོམ་སྟེ། མཉམ་བཞག་རྣམ་པར་མི་རྟོག་པ་གང་དུ་ཡང་འཛིན་པ་མེད་པ། བཟོ་བཅོས་མེད་པའི་ཚུལ་གྱིས་འཇོག་དགོས་པས་སོ། །གཞི་ཤེས་བྱའི་གནས་ལུགས་དེ་ལྟར་ཆོས་ཉིད་ཡོངས་གྲུབ་དེ་བཞིན་གཤེགས་པའི་སྙིང་པོ་སེམས་ཅན་ཐམས་ཅད་ལ་གནས་ཤིང༌། དེ་ཉིད་སེམས་ཀྱིས་རང་བཞིན་ཡིན་ལ། དེ་ཁོ་ན་དངོས་པོའི་གནས་ཚུལ་ལ་ཞུགས་ཤིང་ཡོད་པ་ཡིན། དེ་ལས་གཞན་འཁོར་བ་པ་ལ་ཇི་ལྟར་སྣང་ཞིང༌། གྲགས་པ་འདི་དག་ཐམས་ཅད་དང༌། ལམ་གྱི་ཆོས་ཐམས་ཅད་དངོས་པོའི་གནས་ཚུལ་ལ་མ་གྲུབ་པ་གློ་བུར་བ་ཡིན་ནོ། །གཞི་དེ་ལྟར་ཡིན་པའི་གནད་ཀྱིས། ལམ་ཉམས་སུ་ལེན་པའི་ཚེ། རེ་ཞིག་འཁྲུལ་ངོ་དང་བསྟུན་ཏེ། ཁམས་གསུམ་འཁོར་བ་ཐམས་ཅད་སྡུག་བསྔལ་གྱི་རང་བཞིན་ཅན་མི་རྟག་ཅིང་མི་བརྟན་ལ་འཇིག་པ།


TNT01_Page_0905
[མ་དཔེ་གཟིགས་ན་འདིར་གནོན།]

ང་དང་ང་ཡིར་འཛིན་པའི་ཡུལ་བདག་ཅེས་བྱ་བ་གྲུབ་པ་མེད་པ། ཆོས་འདི་རྣམས་ལ་བྱེད་པོས་སྟོང་པ། རྒྱུ་རྐྱེན་སྣ་ཚོགས་པ་འཕྲད་པ་ལས་འབྱུང་བར་ཤེས་ནས། དེ་ཉིད་ཀྱི་དོན་ཡང་ཡང་བསྒོམས་པས། འཁོར་བའི་བདེ་བ་ཐམས་ཅད་སྙིང་པོ་མེད་པས། འཁོར་བ་ལས་ངེས་པར་འབྱུང་འདོད་ཀྱི་བསམ་པ་ཕུན་སུམ་ཚོགས་པ་སྐྱེ་བར་འགྱུར་ཞིང༌། དེའི་རྗེས་སུ་དེ་ལྟར་མི་རྟག་ཅིང་སྡུག་བསྔལ་ལ་སྙིང་པོ་མེད་པའི་འཁོར་བ་ལས་བདག་ཉིད་གཅིག་པུར་མ་ཟད་སེམས་ཅན་ཐམས་ཅད་ཀྱང་འདོན་དགོས་པའི་བསམ་པ་ཁྱད་པར་ཅན་བསྐྱེད་ནས། བྱམས་སྙིང་རྗེ་དང་འབྲེལ་བར་དེ་ཉིད་ཡང་ཡང་བསྒོམས་པས། བསམ་པ་བྱང་ཆུབ་ཀྱི་སེམས་བཅོས་མ་མ་ཡིན་པ་རྒྱུད་ལ་སྐྱེ་བར་འགྱུར་རོ། །དེ་ལྟར་སེམས་ཅན་སྡུག་བསྔལ་མྱོང་བ་ལ་སྙིང་རྗེ་དང༌། བདེ་བ་ལ་འགོད་འདོད་ཀྱི་བྱམས་པ་དང༌། །དེ་ལྟ་བུའི་སེམས་ཅན་གྱི་དོན་དེ་ཡང་བདག་ཉིད་གཅིག་པུས་ཁུར་དུ་བླངས་ནས་སྒྲུབ་འདོད་ཀྱི་སྙིང་སྟོབས་དང༌། གཞན་དོན་འབའ་ཞིག་གི་སྙིང་ཁོངས་སུ་བཅུག་ནས། སངས་རྒྱས་སྒྲུབ་འདོད་ཀྱི་བྱང་ཆུབ་ཀྱི་སེམས་ཏེ། དེ་དག་སྟོབས་དང་ལྡན་པར་གྱུར་པ་ན། ཐེག་ཆེན་གྱི་ཐུན་མོང་མ་ཡིན་པའི་ཆོས་རྒྱུད་ལ་སྐྱེས་པའི། ལམ་འགོ་ཟིན་པ་ཡིན་ནོ། །དེ་ནས་དེ་ལྟ་བུའི་


TNT01_Page_0906
[མ་དཔེ་གཟིགས་ན་འདིར་གནོན།]

གང་དུ་སྡུག་བསྔལ་མྱོང་བའི་ས་ཕྱོགས་འཇིག་རྟེན་གྱི་ཁམས་དང༌། སུ་ཞིག་སྡུག་བསྔལ་མྱོང་བའི་སེམས་ཅན་རྣམས་དང༌། རྒྱུ་གང་གིས་སྡུག་བསྔལ་མྱོང་བར་འགྱུར་བའི་ལས་དང་ཉོན་མོངས་རྣམས་དང༌། ཇི་ལྟར་སྡུག་བསྔལ་མྱོང་བའི་ཚུལ་སྐྱེ་རྒ་ན་འཆི་དང༌། འགྲོ་དྲུག་སོ་སོའི་སྡུག་བསྔལ་གྱི་རང་བཞིན་དེ་ཐམས་ཅད། སོ་སོའི་སེམས་རྒྱུད་ལ་མ་རིག་པའི་བག་ཆགས་ཡོད་པས། འཁྲུལ་བའི་སྣང་བར་ཤར་བ་མ་གཏོགས། དངོས་པོའི་གནས་ཚུལ་ལ་གྲུབ་པ་མེད་པས། རྨི་ལམ་གྱི་སྣང་བ་བཞིན་དུ་ཤེས་པ་ན། འཁོར་བའི་སྡུག་བསྔལ་དེ་ཡང་བདེན་མེད་སྒྱུ་མ་ལྟ་བུ་ཡིན་པའི་ཕྱིར། རང་ཉིད་དེ་ལ་མི་སྐྲག་ཅིང༌། གནས་ལུགས་ལ་སྡུག་བསྔལ་མེད་ཀྱང༌། ཡོད་པར་འཁྲུལ་ནས་སྡུག་བསྔལ་མྱོང་བའི་སེམས་ཅན་རྣམས་ལ་ལྷག་པར་ཡང་སྙིང་རྗེ་སྐྱེ་བར་འགྱུར་ཞིང༌། སེམས་ཅན་དང་སྡུག་བསྔལ་རང་བཞིན་མེད་པར་མཐོང་བས་དེ་དག་དངོས་པོར་འཛིན་པ་དང་ཡང་བྲལ་བ། སྟོང་ཉིད་སྙིང་རྗེའི་སྙིང་པོ་ཅན་ཞེས་བྱ་བ་རིམ་གྱིས་རྒྱུད་ལ་སྐྱེས་པར་གྱུར་ན། མདོ་སྔགས་གང་གིས་ལམ་ལ་ཞུགས་ཀྱང་རུང༌། ཐེག་པ་ཆེན་པོའི་ལམ་གྱི་སྙིང་པོ་རྒྱུད་ལ་སྐྱེས་པ་ཡིན་ནོ། ཁྱད་པར་དུ། སྤྲོས་པ་དང་བྲལ་བའི་དབྱིངས་ལ་རྣམ་པར་མི་རྟོག་པ་ཉིད་དུ་བཞག་པ་དང༌། རྣམ་པར་


TNT01_Page_0907
[མ་དཔེ་གཟིགས་ན་འདིར་གནོན།]

རྟོག་པའི་ཚོགས་མཐའ་དག་རང་བཞིན་གྱིས་སྟོང་པར་མཐོང་ཞིང༌། སེམས་ཀྱི་རང་བཞིན་འོད་གསལ་བ་ནི་ནམ་དུ་ཡང་འགྱུར་བ་མེད་པར་མཐོང་བ་དེའི་ཚེ། དེ་བཞིན་གཤེགས་པའི་སྙིང་པོ་ལ་ཡིད་ཆེས་དམ་པ་རྙེད་པར་འགྱུར་ཏེ། དེ་ལས་སེམས་ཅན་ཐམས་ཅད་ཀྱང་དེ་བཞིན་གཤེགས་པའི་སྙིང་པོ་ཅན་དུ་ཤེས་ཤིང༌། དེ་ཕྱིར་སེམས་ཅན་ལ་མི་བརྙས་པ་དང༌། སེམས་ཅན་བདག་དང་མཚུངས་པའི་བྱམས་པ་དང༌། སེམས་ཅན་གྱི་རང་བཞིན་དང༌། སངས་རྒྱས་ཀྱི་རང་བཞིན་གཅིག་པར་ཤེས་པས་གུས་པ་ཁྱད་པར་ཅན་དང༌། འགྲོ་ཀུན་བླ་ན་མེད་པའི་བྱང་ཆུབ་ལ་འགོད་ཐུབ་པ་ཤེས་པའི་སྙིང་སྟོབས་དང༌། སེམས་ཅན་རྣམས་ཉིད་སངས་རྒྱས་རང་ལ་ཡོད་ཀྱང་དེ་ལྟར་མ་ཤེས་པ་ལ་སྙིང་རྗེ་ཆེན་པོ་ཡང་ལྷག་པར་འཇུག་ཅིང༌། བདག་གཞན་འཁོར་འདས་བདེ་སྡུག་སོགས་ཆོས་ཐམས་ཅད་ཀྱི་སྣང་ཚུལ་རྣམས་ལ་མངོན་པར་ཞེན་པ་བཟློག རང་བཞིན་མཉམ་པ་ཉིད་ལ་རྩེ་གཅིག་ཏུ་མཉམ་པར་འཇོག་ནུས་པ་ན། མདོ་དང་སྔགས་ཀྱི་ལམ་གང་ལ་ཞུགས་པ་ཡིན་ཀྱང་རུང་སྟེ། ཐེག་པ་ཆེན་པོའི་ལམ་ཁྱད་པར་ཅན་ཟབ་མོ་ཆེས་ཕུལ་དུ་ཕྱིན་པ་ལ་རེག་པ་ཡིན་ནོ། །ཕྱི་མ་འདི་ནི། མདོ་རྣམས་ལས། ཕྱིར་མི་ལྡོག་པའི་འཁོར་ལོའི་གཏམ་ལ་དགའ་བ། ཞེས་གསུངས་


TNT01_Page_0908
[མ་དཔེ་གཟིགས་ན་འདིར་གནོན།]

པ་དང༌། དོན་དམ་རྣམ་པར་ངེས་པའི་ལམ་ལ་ཞུགས་པ་དང༌། ཐེག་པ་ཐམས་ཅད་ལ་ཡང་དག་པར་ཞུགས་པ་དང༌། འཁོར་ལོ་ཐ་མའི་ཆེད་དུ་བྱ་བའི་གདུལ་བྱར་གྱུར་པ་དང༌། བྱང་ཆུབ་སེམས་དཔའ་དབང་པོ་རྣོན་པོ་ཞེས་བྱ་བའི་གནས་ཐོབ་པ་ཡིན་ནོ། །དེ་དག་ནི་ལམ་གྱི་གཞི་ཡིན་པས་མདོ་སྔགས་གཉིས་ཆར་ལ་དགོས་ཤིང༌། སྔགས་ཀྱི་ཐེག་པ་ལ་བརྟེན་ནས། ཆོས་ཉིད་ཀྱི་གནས་ལུགས་མྱུར་དུ་རྟོགས་པར་འདོད་ན་ནི། ཡང་དག་པའི་དབང་གིས་རྒྱུ་སྨིན་པར་བྱས་ཤིང༌། དབང་པོ་རྟུལ་པོ་དང༌། རྒྱུད་སྦྱང་དགོས་པ་ཡིན་ན། བསྐྱེད་པའི་རིམ་པ་ཡན་ལག་བཅས་པ་ལ་ཡང་ལེགས་པར་སློབ་དགོས་ཤིང༌། དབང་པོ་རྣོན་པོ་ལ་ནི། རྫོགས་པའི་རིམ་པ་ཁོ་ནས་ཀྱང་དོན་འགྲུབ་པ་ཡོད་ལ། གཉིས་ཀས་ཀྱང་ཤིན་ཏུ་རྣལ་འབྱོར་ཕྱག་རྒྱ་ཆེན་པོ་ཉིད་དོན་གྱི་གཙོ་བོའི་ཚུལ་དུ་འབད་པས་སྒྲུབ་དགོས་སོ། །དེ་ནི་རྣལ་འབྱོར་ཡན་ལག་དྲུག་པ་སོགས་ཏེ། བླ་མ་དམ་པའི་མན་ངག་དང༌། ས་བཅུའི་བྱང་ཆུབ་སེམས་དཔའ་རྣམས་ཀྱི་གསུང་ལས་རྟོགས་དགོས་མོད། དོན་གྱི་སྙིང་པོ་ནི། རྣམ་པར་རྟོག་པ་ཐམས་ཅད་ཡོངས་སུ་སྤངས་ཏེ། གཡོ་བ་མེད་པའི་རྣལ་འབྱོར་གྱིས་ལུས་ལ་གནད་དུ་བསྣུན་པ་ན། སེམས་ཀྱི་རང་བཞིན་འོད་གསལ་ཏེ་རྣམ་པ་ཀུན་གྱི་མཆོག་དང་ལྡན་པའི་སྟོང་གཟུགས་


TNT01_Page_0909
[མ་དཔེ་གཟིགས་ན་འདིར་གནོན།]

ཕྱག་རྒྱ་ཆེན་པོའི་ཚུལ་དུ་མཐོང་བ་ན། ལས་རླུང་ཉིས་ཁྲི་ཆིག་སྟོང་དྲུག་བརྒྱ་དབྱིངས་སུ་ཐིམ་པའི་ཐབས་ལ་འབད་པས། མི་འགྱུར་བའི་བདེ་བ་ཆེན་པོ་མངོན་དུ་འགྱུར་ཏེ། དེ་ལྟར་རྣམ་ཀུན་མཆོག་ལྡན་གྱི་སྟོང་པ་ཉིད་དང༌། མི་འགྱུར་བའི་བདེ་བ་ཆེན་པོ་ཟུང་དུ་འཇུག་པ་དེ་ནི། དེ་བཞིན་གཤེགས་པའི་སྙིང་པོ་དངོས་ཡིན་ཞིང༌། དེ་ཡང་རང་བཞིན་གདོད་མ་ནས་སེམས་ཅན་གྱི་སེམས་རྒྱུད་ལ་གནས་པ་ཡིན་ཀྱང་མངོན་དུ་ནི་མ་གྱུར་པ་ཡིན་ལ། ཐབས་རྣམ་པར་མི་རྟོག་པའི་སྒོ་ནས་ལུས་ལ་གནད་དུ་བསྣུན་པ་དང༌། ལས་རླུང་དགག་པའི་སྦྱོར་བས། དེ་དག་ས་འོག་གི་གཏེར་བཏོན་པ་བཞིན་དུ་མངོན་དུ་འགྱུར་བ་ཡིན་ནོ། །ད་ལྟར་ལས་དང་པོ་པ་ལ་ཡང༌། སེམས་ཀྱི་གསལ་ཆ་མ་འགགས་པ་སྟོང་གཟུགས་ཀྱི་སྣང་བ་རབ་འབྱམས་སུ་འཆར་བ་ནི། སེམས་ཉིད་རྣམ་ཀུན་མཆོག་ལྡན་གྱི་སྟོང་ཉིད་འཁོར་འདས་ཀྱི་ཁམས་གསུམ་གྱི་གཟུགས་བརྙན་ཅན་དུ་གནས་པའི་རྟགས་ཡང་དག་པ་ཡིན་པས། དེ་ལྟར་ངེས་ཤེས་བསྐྱེད་པ་དང༌། གང་གཟུགས་བརྙན་སྣང་བའི་སེམས་དེ་ནི་སྤྲོས་པ་དང་བྲལ་ཞིང་ངོས་བཟུང་དུ་མེད་པ་དང༌། སྡུག་བསྔལ་གྱི་སྣང་བ་ནུབ་ཅིང་ཉམས་བདེ་བར་གནས་པ་དེ་ནི་སེམས་ཀྱི་རང་བཞིན་མི་འགྱུར་བའི་བདེ་བ་ཆེན་པོར་


TNT01_Page_0910
[མ་དཔེ་གཟིགས་ན་འདིར་གནོན།]

གནས་པའི་རྟགས་ཡང་དག་པ་ཡིན་པས། དེ་ལྟར་ངེས་ཤེས་བསྐྱེད་དགོས་པ་ཡིན་ནོ། །དོན་དམ་པར་སངས་རྒྱས་ཀྱི་ཡེ་ཤེས་རང་སེམས་ཁོ་ན་ལ་ལྷུན་རྫོགས་སུ་གནས་པ་ཡིན་ཞིང༌། དེ་ལ་སྒྲིབ་གཡོགས་སུ་ཡོད་པའི་གློ་བུར་གྱི་དྲི་མ་སྦྱང་བའི་ཐབས་ལ་ནན་ཏན་དུ་འབད་པས། མྱུར་དུ་རྫོགས་པའི་སངས་རྒྱས་ཀྱི་གོ་འཕང་ལ་རང་གིས་དབང་བསྒྱུར་བར་ནུས་པ་དེ་འབྱུང་བ་ཡིན་ནོ། །འདིར་སྨྲས་པ། ཤིན་ཏུ་རྙེད་དཀའི་མི་ལུས་རིན་ཆེན་རྙེད། །བླང་དོར་གནས་ཀུན་གསལ་བར་སྟོན་པ་ཡི། །དམ་ཆོས་བདུད་རྩིའི་རྒྱ་མཚོ་དང་འཕྲད་ནས། །དོན་མེད་སྟོང་ལོག་བྱེད་པར་ཅང་བཟོད་དམ། ལོ་ཟླའི་གྲངས་ཀྱིས་རིམ་པས་ཕྲི་བ་ན། །ཡུན་རིང་བསྐལ་པའི་དུས་ཀྱང་མྱུར་དུ་འཛད། །རྩོད་དུས་མི་ཡི་ཚེ་ལ་སྨོས་ཅི་དགོས། །ཕྱི་ཤོལ་ལེ་ལོའི་དབང་དུ་མ་གཏོང་ཞིག །ཤིན་ཏུ་གཅེས་པའི་ལུས་ཀྱང་མྱུར་དུ་འབོར། །ཡུལ་འཁོར་ལོངས་སྤྱོད་ལ་སོགས་སྨོས་ཅི་དགོས། །བསྟོད་དབྱངས་གཏམ་སྙན་བྲག་ཆའི་དབྱངས་དང་མཚུངས། །སྙིང་པོ་མེད་པ་དེ་ལ་སུ་ཞིག་ཆགས། །དགེ་སྡིག་ལས་ནི་སེམས་ཀྱི་རྗེས་སུ་འབྲང༌། འཇིག་རྟེན་ཕ་རོལ་གར་སྐྱེ་རང་དབང་མེད། །འགྲོ་དྲུག་གཡང་སར་ལས་ཀྱིས་འཁྲིད་པའི་ཚེ། །ཆོས་ལས་གཞན་པའི་བྱ་བྱེད་ཀུན་གྱིས་བསླུ། །འཁོར་བའི་སྡུག་བསྔལ་རྒྱ་མཚོ་ཆེན་བོ་བཞིན། །


TNT01_Page_0911
[མ་དཔེ་གཟིགས་ན་འདིར་གནོན།]

གཏིང་མཐའ་མི་མངོན་རྒལ་བར་ཤིན་ཏུ་དཀའ། །གཅིག་རྗེས་གཅིག་ཟིན་ཆུ་ཡི་རྦ་རླབས་བཞིན། །སྡུག་བསྔལ་འཁྲུལ་འཁོར་འདི་ལ་ཟད་པ་མེད། །འཁོར་བའི་སྡུག་བསྔལ་ཞེས་བྱའི་དངོས་གཞན་ཞིག །བདེན་གྲུབ་རང་དབང་ཅན་དུ་མེད་ལགས་ཏེ། །སེམས་ཉིད་འཁྲུལ་པའི་གསལ་སྣང་ཤར་བ་ན། །དངོས་སུ་ཡོད་པ་བཞིན་དུ་སྡུག་བསྔལ་མྱོང༌། །དཔེར་ན་མི་ཞིག་གཉིད་ལོག་རྨི་ལམ་ན། །གཡང་སར་ལྷུངས་ཤིང་ལུས་ལ་བསྣད་པ་རྨི། །གཡང་ས་མེད་ཅིང་ལྷུངས་པའི་ལུས་མེད་ཀྱང༌། །དངོས་སུ་ལྷུངས་པ་བཞིན་དུ་སྡུག་བསྔལ་མྱོང༌། བདག་གཞན་ཕྱི་ནང་སྣོད་བཅུད་ཐམས་ཅད་དུ། །ང་བདག་ཅེས་བྱ་ནམ་ཡང་གྲུབ་པ་མེད། དེ་ཕྱིར་རང་དོན་སེམས་པ་འཁྲུལ་པ་ཡིན། །མཁའ་མཉམ་སེམས་ཅན་ཐམས་ཅད་རང་སེམས་འཁྲུལ། །འཁྲུལ་པའི་རྒྱ་མཚོ་སྐེམས་པར་བྱ་བའི་ཕྱིར། །རང་སེམས་བརྩོན་འགྲུས་ཆེན་པོ་བརྩམས་གྱུར་ན། །འཁྲུལ་པ་སངས་ནས་གདོད་མའི་གནས་ལུགས་ལ། །རྟག་ཏུ་བཞུགས་པའི་སངས་རྒྱས་ཐོབ་པར་འགྱུར། །མ་དག་སྣང་བ་གཟུང་འཛིན་འཁོར་བའི་ཆོས། །ཡོད་པར་འཛིན་རྣམས་རྟག་པར་ལྟ་བ་ཡིན། །དོན་དམ་དབྱིངས་ཀྱི་ཡེ་ཤེས་སྙིང་པོ་སྟེ། །མེད་པར་འདོད་ན་ཆད་ལྟའི་ཐ་ཤལ་ཡིན། །གང་ཟག་ལ་སོགས་འདུས་བྱས་


TNT01_Page_0912
[མ་དཔེ་གཟིགས་ན་འདིར་གནོན།]

དངོས་པོ་རྣམས། །མི་འཇིག་རྟག་གོ་སྙམ་ན་རྟག་ལྟ་ཡིན། །རྒྱུ་འབྲས་རྟེན་འབྲེལ་འགག་མེད་ནམ་ཡང་འཆར། །དགེ་སྡིག་ལས་ལ་སྐུར་འདེབས་ཆད་ལྟ་ཡིན། །ཀུན་རྫོབ་བདེན་པའང་རྟག་ཆད་མཐའ་བྲལ་ཞིང༌། །དོན་དམ་རྟགས་ཚུལ་ལ་ཡང་མཐའ་གཉིས་སྤངས། །དེ་ལྟར་ཤེས་ན་ལྟ་བ་རྣམ་དག་ཡིན། །གཞན་དུ་རྦད་ཁམ་ཆེ་ཡང་དགོས་དོན་སྟོར། །དོན་དམ་རང་རིག་བདེ་གཤེགས་སྙིང་པོ་ནི། །རྣམ་པ་ཀུན་ལྡན་རང་བཞིན་འགྱུར་བ་མེད། །ཀུན་རྫོབ་འཁོར་འདས་ཆོས་ཀུན་ཡོད་མ་མྱོང༌། །རྣམ་དག་ལྟ་བའི་སྙིང་པོ་དེ་ཙམ་ལགས། །རྟག་ཏུ་ལུས་ངག་ཡིད་ཀྱིས་སྡིག་པ་སྤངས། །དགེ་བའི་སེམས་དང་དགེ་བའི་བྱ་བ་དང༌། །དགེ་བའི་ཚིག་དང་གཞན་ལ་ཕན་སེམས་བསྐྱེད། །ཐེག་པ་སྤྱི་ལ་དགོས་པའི་སྤྱོད་པ་ཡིན། །རིག་གནས་ཀུན་དང་དམ་ཆོས་ཀུན་ལ་མཁས། །ཡོན་ཏན་ཀུན་ཐོབ་ཏིང་འཛིན་ཐམས་ཅད་སྒྲུབ། །ཉེས་སྐྱོན་ཀུན་སྤོང་ཐེག་པ་ཀུན་ལ་འཇུག །ཐབས་ཀུན་ལ་བརྟེན་སེམས་ཅན་ཀུན་དོན་བྱེད། །དགེ་བའི་ཆོས་ལ་མི་སྒྲུབ་གང་ཡང་མེད། །བྱ་བ་ཐམས་ཅད་སེམས་ཅན་དོན་དུ་བསྔོ། །གཞན་གྱི་དགེ་བ་ཀུན་ལ་དགའ་བ་བསྒོམ། །འདི་ནི་ཐེག་ཆེན་ཀུན་གྱི་སྤྱོད་པ་ཡིན། །སྤྱོད་པ་བཟང་ཡང་བཟང་འཛིན་མེད་པ་དང༌། །བླང་དོར་གནས་ལ་ཞིབ་


TNT01_Page_0913
[མ་དཔེ་གཟིགས་ན་འདིར་གནོན།]

ཏིག་ཆེ་བཞིན་དུ། །སྤྱོད་པ་ཐམས་ཅད་སྒྱུ་མ་ལྟ་བུར་ཤེས། །རྒྱལ་བའི་སྲས་ཀྱི་ཚུལ་ཁྲིམས་རྣམ་དག་ཡིན། །སྣང་བ་ཐམས་ཅད་དཀྱིལ་འཁོར་འཁོར་ལོ་དང༌། །གྲགས་ཚད་གསུང་དང་སེམས་ཉིད་ཐུགས་རྡོ་རྗེ། །ལྷག་པར་མོས་ཤིང་མཚན་འཛིན་དང་བྲལ་བ། །བླ་མ་སངས་རྒྱས་ཀུན་འདུས་ངོ་བོར་བསྒོམ། །གསང་སྔགས་ལྷ་ལ་མི་ཕྱེད་དད་པ་ཡིས། །དམ་ཚིག་སྲོག་ལས་གཅེར་པར་འཛིན་པ་དང༌། །སྔགས་ཀྱི་སྤྱོད་པ་མཆོག་ལ་ཡིད་གུས་པ། །འདི་ནི་རྡོ་རྗེ་ཐེག་པའི་སྤྱོད་པ་ཡིན། །རང་སྤྱོད་ཕྲ་མོ་ནས་བརྩམས་སྤང་བླང་དང༌། །ཆེན་པོ་རྣམས་ཀྱི་ཐབས་ལ་མཁས་པ་ཡི། །རྨད་བྱུང་སྤྱོད་ལའང་དད་ཅིང་བློར་ཤོང་ལ། །གང་ཤར་དེ་ལ་རོ་སྙོམས་ཞེན་མེད་མཁན། །དེ་ལྟར་བྱས་ན་ལོག་པའི་ལམ་མི་འགྲོ། །རང་འདོད་འཁྲི་བ་གཏན་ནས་མ་ཞུགས་པར། །སྙིང་རྗེའི་སེམས་ཀྱིས་གཞན་ཕན་ཁོ་ན་སྒྲུབ། །འགྲོ་བ་རང་བཞིན་མེད་ཀྱང་སྙིང་རྗེའི་ངང༌། །ཡང་དག་སྤྱོད་པ་ཐམས་ཅད་འདི་ལ་འདུས། །རྩེ་གཅིག་སྒྲུབ་པ་ཉམས་སུ་ལེན་པ་ལ། །ཚེ་འདི་དོན་ཆུང་མི་རྟག་ཡད་ཡུད་ཙམ། ཁམས་གསུམ་སྡུག་བསྔལ་མེའི་འོབས་དང་འདྲ། །འདི་ལ་ངེས་འབྱུང་ཤུགས་དྲག་སྙིང་ནས་བསྐྱེད། །སྡུག་བསྔལ་ཅན་གྱི་འགྲོ་ལ་སྙིང་རྗེ་དང༌། །བྱང་ཆུབ་སྒྲུབ་པའི་ལྷག་བསམ་ཁུར་ཆེན་


TNT01_Page_0914
[མ་དཔེ་གཟིགས་ན་འདིར་གནོན།]

བསྐྱེད། །གནས་ལུགས་སྤྲོས་བྲལ་དོན་དམ་སྟོང་པ་ཉིད། །ལེགས་པར་གོ་ནས་མོས་པ་མཆོག་བསྐྱེད་དེ། །ཞི་གནས་ལྷག་མཐོང་རིམ་པས་རྩེ་གཅིག་སྒོམས། །རྣམ་རྟོག་རླུང་གིས་མ་གཡོས་ཞི་གནས་དང༌། །སེམས་ཉིད་གསལ་སྟོང་རིག་པའི་ལྷག་མཐོང་སྟེ། །ཞི་ལྷག་ཟུང་འཇུག་རྣལ་འབྱོར་བསྒོམས་གྱུར་ན། །ཉོན་མོངས་གཡུལ་ལས་མྱུར་དུ་རྒྱལ་བར་འགྱུར། །སྔགས་བཟླས་དཀྱིལ་འཁོར་འཁོར་ལོ་བསྒོམ་པ་སོགས། །སྣ་ཚོགས་ཐབས་ཀྱང་གཞན་གྱི་དོན་དུ་སྒྲུབ། །ཟབ་མོའི་གནད་ལ་བླ་མའི་ལུང་བཞིན་དུ། །ཡེ་ཤེས་ཆེན་པོའི་རྣལ་འབྱོར་འབད་པས་བསྒོམ། །རྣམ་རྟོག་ཐམས་ཅད་སྤྲིན་བཞིན་གློ་བུར་བ། །སེམས་ཉིད་སྤྲོས་བྲལ་མཁའ་བཞིན་འགྱུར་བ་མེད། །དབྱིངས་རིག་ཙམ་ལ་གཡོ་བ་མེད་པར་བསྒོམ། །ཉམས་ལེན་སྒོམ་པའི་སྙིང་པོ་དེར་འདུས་སོ། །ལྟ་སྒོམ་སྤྱོད་པ་མ་ནོར་ཉམས་བླངས་ན། །འབྲས་བུ་མཆོག་ལ་སོམ་ཉི་ག་ལ་ཡོད། །རྒྱུ་ཚོགས་མ་ལུས་ཚང་ཞིང་འཛོམ་པ་ལ། །འབྲས་བུ་འབྱུང་བ་སུས་ཀྱང་བཟློག་ཏུ་མེད། །རྒྱལ་བས་ས་ལམ་རིམ་པ་མང་གསུངས་ན། །ས་ལམ་རིམ་པ་འགོག་པ་གད་མོའི་གནས། །དེ་ཕྱིར་རིམ་པས་ལམ་རྣམས་བགྲོད་བྱས་ནས། །མཐར་ཐུག་བྱང་ཆུབ་གནས་སུ་ཕྱིན་པར་འགྱུར། །ཆོས་སྐུ་སྤྲོས་དང་བྲལ་བའི་ཡེ་ཤེས་ཀྱང༌། །


TNT01_Page_0915
[མ་དཔེ་གཟིགས་ན་འདིར་གནོན།]

སྣང་མེད་མུན་ནག་ལྟ་བུ་མ་ཡིན་ཏེ། །དུས་གསུམ་ཤེས་བྱའི་དཀྱིལ་འཁོར་མ་ལུས་པའི། །ཇི་ལྟ་ཇི་སྙེད་གནས་ཚུལ་གསལ་བར་མཁྱེན། །ཡེ་ཤེས་ཆེན་པོའི་རང་སྣང་འགག་མེད་ལས། །གཞན་སེམས་དག་པའི་བློའི་མེ་ལོང་དུ། །གཟུགས་སྐུའི་སྣང་བརྙན་དཔག་མེད་འཆར་བ་ཡིན། །དེ་ལས་ལྷུན་གྲུབ་འབད་རྩོལ་མེད་པ་རུ། །དུས་གསུམ་གདུལ་བྱ་འགྲོ་བ་མཐའ་དག་ལ། །གང་ལ་གང་འདུལ་འཕྲིན་ལས་འཇུག་པར་འགྱུར། །དེ་ལྟར་མཆོག་ཏུ་གདམས་པ་ཟབ་མོ་འདི། །དམ་པ་ཁྱེད་ཀྱི་ཐུགས་སུ་བྱོན་གྱུར་ནས། །དཔག་ཡས་སྐལ་ལྡན་གདུལ་བྱའི་ཚོགས་རྣམས་ལ། །དམ་ཆོས་བདུད་རྩིའི་དགའ་སྟོན་འགྱེད་པར་ཤོག། །།ཅེས་པ་འདི་ཡང་མདོ་ཁམས་སྨད་ཀྱི་རྒྱལ་ཁམས་ནས་དཔལ་ཇོ་ནང་པའི་བསྟན་འཛིན་ཆེན་པོ། །རྒྱལ་བའི་བསྟན་པ་རིན་པོ་ཆེའི་རིང་ལུགས་པ། བླ་མ་ཀ་བཞི་པ་ཀུན་དགའ་ལྷུན་གྲུབ་ཞེས་བྱ་བའི་གསུང་གིས་བསྐུལ་ནས། རྒྱལ་ཁམས་པ་ཏཱ་ར་ནཱ་ཐས་སྨྲས་པའོ།། །།

རི་ཁྲོད་པ་ནམ་མཁའི་སེང་གེ་ལ་འཕྲིན་དུ་བསྐུར་བ།


TNT01_Page_0916
[མ་དཔེ་གཟིགས་ན་འདིར་གནོན།]

རྒྱལ་ཁམས་པ་ཏཱ་ར་ནཱ་ཐའི་གཏམ། རི་ཁྲོད་པ་ནམ་མཁའི་སེང་གེ་ལ་འཕྲིན་དུ་བསྐུར་བ། སྒྲུབ་པ་འཕེལ་བར་ཡོད་འདུག་པ་ཡིད་སྤྲོ། ངེད་ཀྱང་ཆོས་འཕེལ་བར་ཡོད། སྐབས་ཀྱི་དོན། གནས་ལུགས་དང་རྗེས་སུ་འབྲེལ་བའི་གཏམ་ཅུང་ཟད་བཤད་ན། གནས་ལུགས་


TNT01_Page_0916
[མ་དཔེ་གཟིགས་ན་འདིར་གནོན།]

དོན་གྱི་སངས་རྒྱས་ཕྱི་རོལ་ནས་བཙལ་མ་དགོས་པར། རང་ལ་གདོད་མ་ནས་ཡོད་པ་དེར་གདའ། རང་དུ་མ་ཟད་སེམས་ཅན་ཐམས་ཅད་ལ་ཡོད། སེམས་ཅན་དུ་མ་ཟད་སྣང་སྲིད་འཁོར་འདས་ཐམས་ཅད་འདིའི་རང་བཞིན་དུ་འདུག །བླ་མའི་བྱིན་རླབས་དང༌། གདམས་ངག་གི་གནད་ལ་བརྟེན་ནས་རང་ཞལ་ལྟ་ཤེས་ན། ཡེ་ནས་ཆོས་སྐུ་ཡོད་པ་དེས་ཡོད་གོ་བཅད་པར་གདའ། དེ་བཞིན་མ་ཡིན་པ་ལ་ཡོད་ཀྱང་མ་ཕན། དེ་རྟོགས་པའི་ཐབས་ནི། དང་པོར་ནང་འཛིན་པའི་སེམས་རང་དག་ཏུ་བྱས་པས། འཛིན་བྱེད་ཁོ་རང་རང་གྲོལ་དུ་ཐོངས་པ་ཞིག་དགོས། དེ་བྱུང་ན་ཕྱིས་གཟུང་བ་རང་སར་དག་པ་ཡིན། དེ་ཡང་རང་ངོ་ཤེས་ཙམ་ལ་དྲན་འཛིན་གྱི་བཅོས་བསླད་ཀྱང་མེད་ན། །གཞན་གྱི་ལྟ་སྨོས་ཀྱང་ཅི་དགོས་ཏེ། །རིག་ཙམ་ཝལ་ལེ་ཁྱུག་གེ་བ་ནི་ནམ་དུ་ཡང་འགག་རྒྱུ་མི་འདུག །ཚིག་གིས་འདི་ལྟ་བུའོ་ཞེས་རང་མྱོང་དང་མཐུན་པ་ནི་ཇི་ལྟར་བྱས་ཀྱང་བརྗོད་མི་ཤེས། འགྱུ་བྱེད་རྣམ་རྟོག་གི་བློས་འདི་འདྲ་ཞིག་གོ་ཞེས་ཇི་ལྟར་བྱས་ཀྱང་དེས་ཐུབ་རྒྱུ་མེད། འདི་ཡིན་འདི་མིན། ཡུལ་ཕྱོགས་དང་ཕྱོགས་ཀྱི་ཆ་གང་གིས་ཀྱང་མ་བསྡུས། རིག་པ་དང་ཤེས་པའི་ངོ་བོར་ཡོད་སྙམ་ནའང༌། རང་རིག་སྐད་ཅིག་མའི་ངོ་བོ་ནི། ཤེས་པ་འདི་ལྟ་བུ་མྱོང༌། རིག་པ་འདི་ལྟ་བུར་འདུག་ཅེས་བྱ་བའི་མྱོང་བྱ་མྱོང་བྱེད་དང༌། རིག་བྱ་རིག་བྱེད་གང་ཡང་


TNT01_Page_0917
[མ་དཔེ་གཟིགས་ན་འདིར་གནོན།]

ཡོད་མ་མྱོང་བ་འདི་ཀ་ཐ་མལ་ཤེས་པའི་རང་བཞིན་དང༌། ཆོས་ཐམས་ཅད་ཀྱི་གནས་ལུགས་སུ་གདའ་འོ། །གསུང་རབ་ཀྱི་ཆོས་སྐད་ན་མར། སྒྲ་དང་རྟོག་པའི་ཡུལ་ལས་འདས་པ་ཞེས་བྱ་བ་དང༌། བརྗོད་བྲལ་དང༌། སྤྲོས་བྲལ་དང༌། སོ་སོར་རང་གིས་རིག་པའི་ཡེ་ཤེས་དང༌། སྟོང་པ་ཉིད་དང༌། དོན་དམ་པ་སོགས་ཆོས་སྐད་བཟང་བཟང་མོ་དང༌། མིང་སྙན་སྙན་མོ་དཔག་ཏུ་མེད་པ་ཞིག་བྱུང་བ་ཡིན། རང་བཞིན་ངོས་བཟུང་མེད་པ་དེའི་འཆར་སྒོ་ལ། དད་པ་དང་སྙིང་རྗེ་སོགས་དགེ་བའི་རྣམ་རྟོག་སྐྱེས་སམ་འདོད་ཆགས་ཞེ་སྡང་སོགས་ཉོན་མོངས་དུག་ལྔ་ཤར་རམ། ས་རྡོ་རི་བྲག་གི་རྣམ་རྟོག་སོགས་ལུང་མ་བསྟན་གྱི་འཆར་སྒོ་ཡིན་ཡང་རུང་སྟེ། གང་སྐྱེས་དེ་ཀ་སྐྱེས་ཙམ་ནས་ངོས་ཟིན་དགོས། ངོས་ཟིན་པ་ཟེར་བ་དེ་ཡང་སྐད་ཅིག་དང་པོར་རྣམ་རྟོག་སྐྱེས་པ་ལ། སྐད་ཅིག་གཉིས་པར་རྣམ་རྟོག་སྐྱེས་སོང་སྙམ་པའི་རྗེས་བསྙེགས་ཏེ་མིན། དུས་མཉམ་ཡང་རུང༌། རྣམ་རྟོག་ཡིན་པར་འདུག་སྙམ་པའི་བློས་བྱས་ཀྱིས་ཀྱང་མི་ཆོག །རྗེས་བསྙེགས་དང༌། བློས་བྱས་ཀྱི་བློ་ཁོ་རས་ཁོ་རང་ཡང་རང་ངོ་མ་ཤེས་ན། གཞན་ལ་ཁ་རོག་འདུག་ཟེར་ནས། རང་སྐད་ཆེན་པོ་འདོན་པ་དང་འདྲ་བ་ཞིག་ཡོང༌། ངོ་ཤེས་བྱེད་མཁན་ཁོ་རང་གིས་རང་ངོ་མ་ཤེས་པ་ལ། ཤེས་པ་གཞན་


TNT01_Page_0918
[མ་དཔེ་གཟིགས་ན་འདིར་གནོན།]

ཞིག་གིས་ངོ་ཤེས་བྱེད་པར་རློམ་པ་བློས་བྱས་འཁྲུལ་བའི་མགོ་སྐོར་དུ་གདའ་འོ། །འོ་ན་རང་ངོ་ངོས་ཟིན་པ་རང་ཅི་ལ་ཟེར་ན། འཆར་སྒོས་རང་ཤར་ཙམ་དུས་ན། སྐད་ཅིག་མ་གཅིག་པོ་དེ་ཉིད་ལ། ཁོ་རས་ཁོ་རང་ལ་བཟོ་བཅོས་མེད་པར་རང་སོ་ཟིན་པའི་མིང་ཡིན་ཏེ། འགྱུ་བ་ཁོ་རས་འགྱུ་བ་ཁོ་རང་ཤེས་ཙ་ན་བྱ་ལམ་རྗེས་མེད། འགྱུ་བ་རང་སངས། ཉོན་མོངས་རང་གྲོལ་ཡིན། འདི་ལ་ཡང༌། ཉོན་མོངས་པ་དང༌། རྣམ་རྟོག་དང༌། ཡུལ་རྐྱེན་སོགས་ཤུགས་དྲག་མི་དྲག་གི་ཁྱད་པར་གྱིས། རྟོག་པའི་འཆར་སྒོ་གསལ་གསལ་འདྲ་ལ་ངོས་གཟུང་མེད་པའི་ཡུལ་ཡུལ་པོ་ཆུ་ལ་གཟུགས་བརྙན་ཤར་བ་འདྲ་བ་ཞིག་དང༌། དབྱིངས་དེ་ལ་མདངས་གཅིག་གིས་ཁྱབ་པ་ཙམ་འདྲ་བ་མ་གཏོགས། འཆར་སྒོ་རང་ཡང་འདི་ཡིན་ངོས་གཟུང་དུ་མེད་པ་ཞིག་སྟེ། འཆར་ཚུལ་མི་འདྲ་བ་དེ་ལྟར་ཡོད་ཡང་ངོ་བོ་ལ་ཁྱད་མེད། བློ་དང་བསྟུན་པའི་འཆར་ཚུལ་མི་འདྲ་བ་ལ་གྲངས་མེད་ཅིང་ཟད་པའང་མེད་ལ། བརྗོད་ཀྱིས་མི་ལང༌། དེ་ཙམ་ན་འཆར་སྒོ་ཐམས་ཅད་ཀྱང་གདོད་མའི་རྩལ་བ་འགགས་པར་ཤར་བ་ཙམ་ལས་གཞན་མེད་པས། རྣམ་རྟོག་རང་མཚན་པ་བཙལ་བས་མ་རྙེད་པ་ལགས། འདི་བྱུང་ཙ་ན་དོན་ཚན་རིམ་པ་གཉིས་པ་ཕྱི་གཟུང་བའི་ཡུལ་དག་པས། སྣང་བ་རང་སར་གྲོལ་བ་ཞེས་བྱ་བ་དེ་ཞོར་ལ་འོང་བ་ཡིན་ཏེ། །ས་རྡོ་


TNT01_Page_0919
[མ་དཔེ་གཟིགས་ན་འདིར་གནོན།]

རི་བྲག་སྐྱེ་ཤིང་ནགས་ཚལ། དགྲ་གཉེན། འཁོར་ལོངས་སྤྱོད། འགྲོགས་ཤེས་ལ་སོགས་པ། ཕྱི་ནང་ཇི་ལྟར་སྣང་བ་ཐམས་ཅད་སྣང་ཙམ་དེ་ལ་ཡུལ་གྱི་འཛིན་པས་མ་བསླད་པར་སྣང་ཙམ་ཤར་ཙམ་དེ་ཀ་རང་རིག་རང་གསལ། ཤར་བའི་དུས། གསལ་བའི་དུས། སྣང་བའི་དུས་ཉིད་ན་ཀ་འདི་ཡིན་འདི་མིན་ངོས་གཟུང་བྲལ་བ། དེ་ཁོ་ན་སྣང་བ་རང་སར་གྲོལ་བ་ཞེས་བྱ་སྟེ། རྨི་ལམ་གྱི་ཡུལ་སྣང་ངམ་མེ་ལོང་གི་གཟུགས་བརྙན་ལྟ་བུར་ཤེས་པས་དངོས་པོར་འཛིན་པ་རང་སངས་པ་ཡིན་ནོ། །དེ་ལྟར་ཕྱི་ནང་གཉིས་རང་སར་དག་པ་དེ་ཀ་གཟུང་འཛིན་གཉིས་མེད་ཀྱི་དོན་ཡིན། མ་འགགས་པའི་ཤེས་པ་དང་སང་ངེ་བ། གསལ་ལེ་ཧྲིག་གེ་བ། འབོལ་ལེ་ཤིག་གེ་བ། རྩོལ་མེད་ཀྱི་རང་རིག་པ་ཡིད་ཆེས་ལ་སྨྲ་རུ་མི་བཏུབ་པ་ཞིག་འདུག་པ་འདི་ཀ གདོད་མའི་ཆོས་ཉིད་ཟེར་བའི་སྒྲ་བོ་ཆེ་དེ་ཡིན་མོད། སྒོམ་ཆེན་པ་ཐམས་ཅད་ཆོས་ཉིད་མ་བུ་འཕྲོད་སྐད། མ་འཕྲོད་སྐད། ཁ་བསྔགས་མང་པོ་ཟེར་ཏེ། དངོས་གནས་ལ་གཟུང་འཛིན་དབྱིངས་སུ་གྲོལ་བའི་རང་ཞལ་ལྟ་བ་གལ་ཆེའོ། །ཡང་ད་ལྟའི་སྣང་བ་ཟང་ཐལ་ལེ་བ་འདི་ཀ་ཆོས་སྐུ་ཡིན། སོ་སོའི་རྒྱུད་ལ་རྗེན་ཆེ་རེ་བ་མ་འགགས་པའི་རིག་པ་འདི་ཀ་ཡེ་ཤེས་ཡིན་ཟེར་ཏེ། ཚོམ་འཇོག་ལ་གཏམ་འང་འུད་རེ་བཤད། ཐམ་ཐོམ་ལ་བཟང་


TNT01_Page_0920
[མ་དཔེ་གཟིགས་ན་འདིར་གནོན།]

བརྫུའི་རྒྱབ་སྐྱོར་མཁན་དེ་ཀུན་ལ་སྙིང་པོ་མེད། ཆོས་སྐད་བཟང་ལ་མདོར་ཏེ་མེད་པ་ཞིག་ཡོང་ཉེན་ཡོད། དངོས་གནས་ལ་དེ་ལྟར་ཡིན་ཀྱང༌། ཡིན་པས་མི་ཕན་པ་ཞིག་ཀྱང་ཡོང༌། འཇིག་རྟེན་གྱི་ཁམས་འདིའི་འོག་གཞི་ཆུ་འབའ་ཞིག་ལ་བརྟེན་པ་ཡིན་ཀྱང༌། མྱ་ངམ་གྱི་ཐང་ལ་སྐོམས་ཏེ་ཤི་བའི་མི་མང་པོ་དང་འདྲ། གོང་དུ་བཤད་པ་ལྟར་གནས་ལུགས་ལ་རྡོ་རུས་ཐུག་པ་ཞིག་བྱུང་ན། འཁོར་འདས་རང་བཞིན་མཉམ་པ་ཉིད་ཡིན་པས། སྣང་བཟང་ཐལ་ལེ་བ་འདི་ལས་ལོགས་སུ་མྱ་ངན་ལས་འདས་པ་བཙལ་དུ་མེད་པ་ཅིས་ཀྱང་ཡིན་མོད། འཆར་སྒོ་ཇི་ཙམ་འཆར་བ་འདི། སྐྱེ་ནའང་རང་བཞིན་དབྱིངས་དེ་ལས་སྐྱེ། འགག་ནའང་དེའི་ངང་དེ་ཀར་འགག །མ་འགག་པར་གནས་ནའང་དེ་ཀའི་རང་བཞིན་ལས་མ་འདས་པར་གདའ་ནའང༌། དེ་འདྲ་ཞིག་ཡིན་པར་འདུག་སྙམ་པའི་གོ་བས་ཉམས་མྱོང་མ་བསླད་རིག་ཐོག་ཏུ་རིག་པས་གནད་ལ་འབྱོར་པ་གལ་ཆེ། གནས་ལུགས་ལྟ་བའི་ཕྱོགས་ལ་འདི་ཀས་ཐག་ཆོད་པར་འོང༌། ཐབས་སྤྱོད་པའི་ཕྱོགས་ལ། སྤྱིར་ཚོགས་བསོག་གི་རིམ་པ་རྣམས་རྣམ་གཡེང་གི་རྒྱུ་མི་འགྱུར་བའི་ངོས་ནས། རང་གི་མོས་པ་དང་བསྟུན་པས་ཁྱབ། བླ་མ་ལ་མོས་གུས་དང༌། སེམས་ཅན་ལ་སྙིང་རྗེ་རྒྱུན་མི་འཆད་པ་ཞིག་མེད་ཐབས་མེད། དེ་ཡང་གནས་ལུགས་ཀྱི་ལྟ་བ་དང༌། ཐབས་དེ་ཉིད་རེས་འཇོག་ཏུ་མ་སོང་


TNT01_Page_0921
[མ་དཔེ་གཟིགས་ན་འདིར་གནོན།]

བར། རང་བཞིན་ངོས་གཟུང་མེད་པའི་རྩལ་མོས་གུས་དང་སྙིང་རྗེ་འཆར་ཞིང༌། མོས་གུས་དང་སྙིང་རྗེའི་མདངས་དྲག་པོ་དེ་ཡང་རང་དུས་ནས་སྤྲོས་བྲལ་དུ་རང་ངོ་ཤེས་པ་ཞིག་དགོས་ཤིང༌། དགེ་སྦྱོར་ཅི་བྱེད་སེམས་ཅན་གྱི་དོན་དུ་བསྔོ་བས་རྒྱས་ཐེབས་པའང་གལ་ཆེ། རྟེན་བདུད་རྩི་རིལ་བུ་དང༌། བྱིན་རླབས་རིལ་བུ་ཐུམ་ལ་རྒྱ་ལྡན། སྟག་ལོ་ཟླ་བ་བཞི་པའི་ཚེས་བཟང་པོ་ལ་དགེ། །།བཀྲ་ཤིས། །

མཁན་ཆེན་ཤཱཀྱ་རི་དབང་གི་ཐུགས་དམ་གསལ་འདེབས་སུ།


TNT01_Page_0922
[མ་དཔེ་གཟིགས་ན་འདིར་གནོན།]

ན་མོ་གུ་རུ། ལག་ལེན་གནད་ལ་འབྱོར་པ་ཡི། །ཞལ་གདམས་གནད་ཀྱི་ཚིག་གསུམ་ལ། །དགོས་དུས་ཕན་པར་ངེས་པ་ཡི། །ཆོས་ཀྱི་གནད་ཀུན་འདུས་སམ་སྙམ། །འཕྲལ་གང་ཤར་སྒྱུ་མ་ལྟ་བུ་ལ། །གདངས་སྣང་ཆ་མོས་གུས་སུ་ཤར་བ་དང་གཅིག །མ་འགྲོ་དྲུག་ལ་སྙིང་རྗེའི་གདུང་ཤུགས་ཏེ། །དོན་ཞེན་ཆགས་ཕྱོགས་འཛིན་སྤངས་པ་དང་གཉིས། །སེམས་རིག་པའི་རྒྱལ་པོ་མཐའ་བྲལ་འདི། །ལར་བཟོ་མེད་ཡེངས་མེད་དུ་སྐྱོང་བ་དང་གསུམ། །གནད་གསུམ་པོ་གཅིག་ཏུ་བསྡུས་པ་འདི། །དུས་ནམ་དགོས་སུ་ཕན་པའི་ཆོས་ཞིག་ལགས། །དེ་ཡང་བདེ་བ་དང་སྡུག་བསྔལ། དགའ་བ་དང་མི་དགའ་བ། ཆགས་པ་དང་སྡང་བའི་རྣམ་པ་སོགས། མཐོ་དམན་རེ་དོགས་གང་བྱུང་ཡང༌། མེད་བཞིན་སྣང་བ་སྒྱུ་མ་ལྟ་བུར་ཨ་འཐས་བཤིག་པའི། དགག་སྒྲུབ་བླང་དོར་བྲལ་བའི་ངང་དེ་ལས།


TNT01_Page_0922
[མ་དཔེ་གཟིགས་ན་འདིར་གནོན།]

རིག་པ་གསལ་སྟོང་འཛིན་མེད་ཀྱི་གདངས། བླ་མ་ལ་མོས་གུས་དུང་རེ་བ་ཤར་བ་འདི་ཁོ་ནས་ཀྱང༌། བར་དོ་ལ་སོགས་པའི་འཁྲུལ་པ་ཆིག་ཆོད་དུ་འགྲོ་བ་ལགས། ཡང་གནས་ལུགས་ནམ་མཁའ་ལྟ་བུ་དང༌། སྣང་ཆ་སྒྱུ་མ་ལྟ་བུར་མ་རྟོགས་པའི་སེམས་ཅན་རྣམས་སྙིང་རེ་རྗེ། ཞེས་ཉེ་རིང་ཕྱོགས་ཆ་དང་བྲལ་བའི་སྙིང་རྗེ་ལྷང་ངེ་བ་ཏེ། ཁོ་རང་གི་རང་ཞལ་ལ་བལྟས་པས། འཛིན་མེད་ཞེན་མེད་ཀྱི་ངང་དེར་ཆམ་མེར་འདུག་པ། འདི་ཁོ་ན་སྒོམས་པས་ཀྱང༌། སྡུག་བསྔལ་ཡུལ་འབུད་པ་ཞིག་ལགས། སེམས་གནས་སམ་འགྱུ་ཡང༌། ཁོ་རང་གི་རང་དུས་དེ་ན་གང་ཤར་དེ་ལ་བཟོ་བཅོས་མེད་པར་ཤིག་གེ དེ་ཁའི་ངང་ངམ་རང་ཤར་དེ་ལ་ཡེངས་མེད་དུ་བཞག་པས། གང་ཤར་ཐམས་ཅད་དབྱིངས་དེ་ཁར་འདུག་པ་འདི་སྒོམས་ན་ཉོན་མོངས་ཐམས་ཅད་ཀྱི་རང་མཚང་རྡིབ་པ་ལགས། གནད་གསུམ་པོ་དེ་རེ་རེས་ཀྱང་ཆོག་ན། གསུམ་ཀ་གཅིག་ཏུ་དྲིལ་བས་ལྟ་མོས་ཀྱང་ཅི་དགོས། བཟོ་མེད་ཀྱི་ཤེས་པ་བསྐྱངས་པས། དེ་ལྟར་མ་རྟོགས་པ་ལ་སྙིང་རྗེ་ལྷང་ངེ། སྙིང་རྗེ་དེ་སྒྱུ་མ་ལྟ་བུར་ཤར་པས། དེ་ལྟར་སྟོན་པའི་བླ་མ་ལ་མོས་གུས་དུང་ངཻ་བ་དེའོ། །གནད་གསུམ་བྱས་ཀྱང་གནད་གཅིག་ཡིན། །འཆི་བར་སྣང་བ་འཁྲུལ་སྣང་ཡིན། །ཚེ་འདིའི་སྣང་བ་རྨི་ལམ་ཡིན། །བར་དོ་བྱས་


TNT01_Page_0923
[མ་དཔེ་གཟིགས་ན་འདིར་གནོན།]

ཀྱང་རྣམ་རྟོག་ཡིན། སྐྱེ་བ་བླངས་ཀྱང་སྒྱུ་མ་ཡིན། རེ་དོགས་བྱུང་ན་ཕཊ་ཀྱི་ཐོབ། །ལེགས་ལེགས་མཛེས་ཁྲིགས་ཤིག་ལས་ཐོང༌། །རང་ཤར་དེ་ལ་ཆམ་གྱིས་སྐྱུར། །མ་བཅོས་ངང་ལ་འཇོག་དགོས་ཏེ། །ཇི་ལྟར་བྱས་ཀྱང་བཅོས་མར་སོང༌། །མ་བཅོས་པ་གཅིག་ངས་མ་རྙེད། །བཅོས་མ་ཁོ་རའི་རང་བཞིན་ནི། །མ་བཅོས་པ་དེར་མི་འདུག་གམ། །ཤེས་ན་དེ་ཁས་ཆོག་པ་ལ། །ཐག་ཆོད་ཡོད་དུས་མི་འདུག་གོ །དེ་བས་བྱར་མེད་ངང་ལ་ཞོག །སེམས་ལ་འཕྲོད་ན་གདམས་ངག་ཡིན། ཁ་ཆོལ་ཙམ་ལ་ཅི་བྱ་ཡོད། །གང་ཤར་དེ་ཁས་གོ་ཆོད་ན། །མན་ངག་གི་རྒྱལ་པོ་དེ་ན་འདུག །། །།ཅེས་པ་ཚོགས་པའི་མཁན་ཆེན་ཤཱཀྱ་རི་དབང་གི་ཐུགས་དམ་གསལ་འདེབས་སུ། ཏཱ་ར་ནཱ་ཐས་སྨྲས་པའོ། །བཀྲ་ཤིས།

བྱ་བཏང་ཀུན་དགའ་དཔལ་ལྡན་ལ་ཏཱ་ར་ནཱ་ཐས་གདམས་པ།


TNT01_Page_0924
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། སྐུ་བཞིའི་བདག་ཉིད་ཀྱི་བླ་མ་ལ། །མི་ཕྱེད་དད་པས་གསོལ་བ་འདེབས། །གནད་སྐུལ་གྱི་གདམས་པ་ཚིག་གསུམ་འདི། །སློབ་མའི་སེམས་ལ་འཕྲོད་པར་ཤོག །མི་ལུས་ལན་གཅིག་ཐོབ་པ་འདི། །སོས་དལ་དུ་སྡོད་པ་ཅང་ཁོམ་མམ། རྣམ་གཡེང་ལ་མི་ཚེ་མ་སྐྱེལ་བར། །རང་གིས་རང་སེམས་འཆུན་པ་ཞིག་འཚལ། །བརྩོན་འགྲུས་ཀྱི་ལྕག་གིས་མ་འཁུལ་ན། །མི་གཞན་གྱི་བསྐུལ་འདེབས་རེ་ཐག་ཆད། །ཡུལ་


TNT01_Page_0924
[མ་དཔེ་གཟིགས་ན་འདིར་གནོན།]

མི་དང་དགྲ་གཉེན་ཀུན་ལ་ལྟོས། །དགེ་སྦྱོར་གྱི་བསྐུལ་འདེབས་གཞན་མི་འཚལ། །ཆོས་གདམས་པ་ཟབ་མོ་མཇལ་དུས་སུ། །ཉམས་ལེན་གྱི་ཁྱེ་སྤོགས་ལ་འབད་འབུངས་མཛོད། །ཟོང་ཕན་ཚུན་དུ་སྒྱུར་བའི་ཁྱེ་ཕོགས་ཏེ། །སྒོམ་ཆེན་པའི་རྐང་ཆུང་གཏིང་ནས་འདྲེན། །འདོད་ཡོན་གྱི་འཁྲི་བ་མ་ཆོད་ན། །བརྒྱ་བརྒྱ་བཏང་ནས་སྟོང་སྟོང་འགུགས། །གཡོ་ཟོལ་གྱི་རྣམ་རྟོག་ལ་མི་ཚེ་སྐྱེལ། །བྱ་བཏང་གི་མིང་བཏགས་ངོ་རེ་ཚ། །ཚེ་ངཻས་མེད་ནམ་འཆི་ཆ་མེད་ཡིན། །སྒོམ་སྒྲུབ་ལ་ཧམ་རྒྱུགས་མི་བྱེད་པར། །གྲགས་འདོད་དང་ལོ་འདོད་ཀྱི་ཁ་ལ་རྒྱུག །ཆོས་བརྒྱད་ཀྱི་རླུང་པོས་འཁྱེར་ཉེན་གདའ། །རང་རྒྱུད་ལ་ཕན་པའི་དགེ་སྦྱོར་ཏེ། །མི་གཞན་གྱིས་མ་གོ་ཡང་ཨའུ་རྩི། །འཁོར་ཆེ་དང་ངོ་སོ་མ་འདོད་ཨང༌། །ཉམས་ཕྲན་ཚེགས་སྐྱེས་པ་རྣམས་ཡལ་ཉེན་གདོག །ཉམས་རྟོགས་ཀྱི་ཉི་མ་ཤར་ན་ཡང༌། །ཉེ་རིང་དང་བར་མའི་མི་ཀུན་གྱིས། །མ་གོ་ན་གཏིང་ནས་འཚེངས་པ་ཡིན། །སྒོམ་ཉམས་ལེན་གནད་དུ་མི་འགྲོ་རི། །དགྲ་གཉེན་སོགས་སུ་ལ་ཕན་བཏགས་ཀྱང༌། རྒྱུད་སྙིང་རྗེས་བརླན་པ་མ་གཏོགས་པ། །ངོ་སོ་སྐད་ཅིག་ཀྱང་མི་འཕྱར་ན། །བྱང་ཆུབ་ཀྱི་ས་བོན་མ་ཐེབས་རི། །ལར་བར་ཆད་ཀུན་མངོན་ཚན་ཅན་ལ་འཇུག །གསངས་ཏེ་སྤྱོད་པ་འདི་གལ་རེ་ཆེ། །རྒྱལ་ཁམས་ཀྱི་


TNT01_Page_0925
[མ་དཔེ་གཟིགས་ན་འདིར་གནོན།]

མི་ལ་ཕན་བཏགས་ཀྱང༌། ཁོང་ཡུས་ཀྱིས་ཁྱེར་ན་གཞན་ཕན་མིན། །མི་ཚེ་སྒྲུབ་པ་ལ་བསྐྱལ་སྲིད་ཀྱང༌། །རློམ་སེམས་ཀྱིས་ཁྱེར་ན་གཡང་ལ་ལྷུང༌། །ཉམས་མྱོང་དང་ཡོན་ཏན་ཤར་སྐབས་སུ། །མི་གཞན་ལ་ངོམས་ན་འཕྲལ་དུ་འགྲིབ། །འགྲོ་དོན་དང་གྲགས་པ་བྱུང་དུས་སུ། །བདུད་ཀྱིས་བར་ཆད་ཀུན་འཇུག་ཉེན་ཆེ། །བདུད་གཞན་ན་ཡོད་པ་མ་ཡིན་ནོ། །ཆོས་སྤྱོད་ལ་གཡེལ་བ་དེ་རང་བདུད། །འགྲོགས་བཤེས་སོགས་གལ་ཆེ་སུ་ཡིན་ཀྱང༌། །འཇིག་རྟེན་གྱི་བྱ་བ་ཁོ་རང་ཚོས་ཤེས། །རང་ཚེ་འདི་བློས་བཏང་དུ་ཁས་བླངས་ནས། །འབྲེལ་ཅན་གྱི་འདུན་བྱུས་མི་འཚལ་ལོ། །ལོངས་སྤྱོད་དང་འཁོར་ཚོགས་རྣམ་གཡེང་གི་རྒྱུ། །དེ་ཚེ་འགུགས་གཡང་འགུགས་མི་དགོས་སོ། །རང་དབང་བའི་ཡོ་བྱད་འཆིང་བའི་གཞི། །དེ་སེར་སྣས་ཤི་སྦར་མ་འཐམ་ཞིག །འཕྲལ་ཟད་མེད་ཀྱི་ལོང་གཏམ་དགེ་སྦྱོར་གྱི་དགྲ། །ཚིག་མི་སྨྲ་ངག་བཅད་གནད་དུ་ཆེ། །ལྗོངས་གྲོང་ཁ་ཉུལ་བ་ལང་ཤོར་གྱི་རྒྱུ། །གནས་ལུང་སྟོང་དུ་ཚུགས་ན་དཔའ་བ་ཡིན། །ད་ཉམས་ལེན་གྱི་སྙིང་པོ་གཅིག་ཡིན་ཏེ། །ལྟེམ་འགྱང་མེད་པའི་མོས་གུས་བསྒོམ། །ཉམས་ལེན་གྱི་རྣམ་གྲངས་གསུམ་ཡིན་ཏེ། །མི་རྟག་སྡུག་བསྔལ་ལས་འབྲས་སོམས། །ཉམས་ལེན་གྱི་རྐང་རྩ་གཉིས་ཡིན་ཏེ། །མ་བཅོས་སོ་མ་དང་སྙིང་རྗེ་ཆེ། །འཆི་བ་མི་


TNT01_Page_0926
[མ་དཔེ་གཟིགས་ན་འདིར་གནོན།]

རྟག་པས་བསྐུལ་མ་བཏབ། །སྡུག་བསྔལ་དུ་བསམས་ན་ཞེན་ཆགས་སྤོང༌། །ལས་འབྲས་ལ་བསམས་ན་སྤྱོད་པ་གཙང༌། །སྙིང་རྗེ་དང་སྤྲོས་བྲལ་སྒོམ་གྱི་མཐིལ། །དེ་ཀུན་གྱི་རྩ་བ་མོས་གུས་ཡིན། །རུ་ང་དང་འགྲན་སེམས་དབྱིངས་སུ་དག །དྲན་འཁྲུལ་གྱི་གྱབ་སྐོར་མི་འདུག་ན། །དགེ་སྦྱོར་ཚོ་གནད་དུ་སོང་བ་ཡིན། །ལར་ཆོས་ཞིག་བྱེད་ན་ཆོས་བཞིན་གྱིས། །མི་ཚེ་འབྱིད་ཐབས་ཀྱི་ཆོས་སྤྱོད་དེ། །ཐོས་བསམ་དང་སྒོམ་སྒྲུབ་ཅི་ཡིན་རུང༌། །གཞན་མགོ་སྐོར་ལས་ལྷག་པ་ཡོད་རེ་ཀན། །ཆོས་ཤེས་རྒྱ་ཙམ་གྱིས་མི་ཕན་ཏེ། །རང་རྒྱུད་ཐ་མལ་པར་ཀྲོངས་སེ་ལུས། །ཉམས་ལེན་གྱི་གནད་དང་མི་ལྡན་པ། །བླུན་སྒོམ་ཙམ་གྱིས་ཀྱང་མདོ་དོན་སྟོར། །ཡིད་ངེས་འབྱུང་སྙིང་ནས་མ་སྐྱེས་པའི། །སྒོམ་ཆེན་དེ་རི་ལ་ལུད་བསོག་ཡིན། །ལས་འབྲས་ལ་མི་རྩི་བའི་བག་མེད་ལ། །གྲུབ་ཐོབ་ཏུ་རེ་བ་དམྱལ་བའི་རྒྱུ། །བྱམས་སྙིང་རྗེ་བྱང་ཆུབ་ཀྱི་སེམས་མེད་པའི། །སྟོང་སྐད་ཀྱི་རྦད་ཁམ་ཆད་ལྟ་རང༌། །ནང་རླུང་སེམས་ཡེ་ཤེས་སུ་མ་ཐིམ་པའི། །རྩ་རླུང་གི་རྣོ་ཁྱད་མུ་སྟེགས་པའི་ཆོས། །གསང་སྔགས་ཀྱི་དམ་ཚིག་ཁྲོམ་ལ་འཁྱམས། །ཀུན་སྤང་གྱི་རྣལ་འབྱོར་གདོལ་བར་སོང༌། །ཡང་ལྟ་སྤྱོད་བཟང་པོའི་འཛིན་སྟངས་ཅན། །གཞན་ཁྱད་གསོད་ཀྱི་སྡིག་པ་བསོག་ཉེན་གདོག །ཉིན་མཚན་སྒྲུབ་པ་ལ་རྩོལ་ན་ཡང༌། །གོལ་ས་འདི་


TNT01_Page_0927
[མ་དཔེ་གཟིགས་ན་འདིར་གནོན།]

རྣམས་ལ་བཟབ་པར་ཞུ། །ཆོས་ཁོ་ན་ལ་བློ་སྣ་འཇུར་ཏེ་བསྒྲིམ། །རྒྱུད་འཇམ་ལ་ལྟག་ཚུགས་བཟང་བ་དང༌། །ཐ་མལ་དུ་མ་ལུས་ཡེངས་མེད་དུ་འཚལ། །དགོས་འདོད་ཀྱི་འབྲས་བུ་མངོན་དུ་འགྱུར།། །།ཞེས་པའང་བྱ་བཏང་ཀུན་དགའ་དཔལ་ལྡན་ལ་ཏཱ་ར་ནཱ་ཐས་གདམས་པའོ། །བཀྲ་ཤིས། །

དཔོན་བློ་གྲོས་ནམ་མཁའ་ལ་གདམས་པ།


TNT01_Page_0928
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། ན་མོ་གུ་རུ། སྐྱབས་གསུམ་ཀུན་འདུས་ཀྱི་བླ་མ་ལ། །ཐུགས་ཡིད་དབྱེར་མེད་ཀྱི་མཆོད་པ་འབུལ། །མཉམ་ཉིད་ཀྱི་ངང་དུ་གསོལ་བ་འདེབས། །མོས་པའི་བུ་ལ་བྱིན་གྱིས་རློབས། །རང་སེམས་ལ་ཤར་བའི་ཚིག་བཅད་འགའ། །གོ་རིམ་དང་མཛེས་ཁྲིགས་མ་མཆིས་ཀྱང༌། །དད་ལྡན་གྱི་སློབ་མས་བསྐུལ་བའི་ངོར། །ཐོལ་བྱུང་དུ་ཤར་བ་འདི་ལྟར་ལགས། །ཆོས་མདོ་རྒྱུད་ཐང་མར་བརྡལ་བ་ནས། །ཚོགས་བསགས་ཐབས་ཇི་སྙེད་ཅིག་གསུང་ལགས་ཀྱང༌། །ཕ་བླ་མ་བསྟེན་ཚུལ་དུ་ཀུན་ཀྱང་འདུས། །ཐབས་མཁས་ཀྱི་རྒྱལ་པོ་མོས་གུས་ཡིན། །ལྟེམ་འགྱང་མེད་པ་ཞིག་གལ་རེ་ཆེ། །གཞན་ཟེར་གྱི་བསྟོད་སྨད་ཕྲ་མ་མཁན། །མཛད་སྤྱོད་འདི་བཟང་ངན་ཅི་ཡིན་སྙམ། །སེམས་འཁུ་འཁྲིགས་ཟ་ན་ལྟེམ་འགྱང་ཡིན། །གདུང་ཤུགས་དང་ཐག་ཆོད་གལ་རེ་ཆེ། །བློ་རྩེ་གཉིས་མེད་ན་ཐག་ཆོད་ཡིན། །སྐྱི་སྡུག་དང་མཐོ་དམན་ལ་མ་རག་ཅིང༌། །རེ་དོགས་བྲལ་བའི་མོས་གུས་འཚལ། །དུས་རྒྱུན་


TNT01_Page_0928
[མ་དཔེ་གཟིགས་ན་འདིར་གནོན།]

དུ་གསོལ་བ་འདེབས་པ་གཅེས། །སྒོམ་བྱེད་དམ་འགྲོ་འཆག་ཉལ་འདུག་བྱེད། །དུས་རྟག་ཏུ་བླ་མ་བརྗེད་པ་མེད། །གདུང་ཤུགས་ཀྱི་ཚད་ནི་དེ་ལ་མཛོད། །གནས་ལུགས་ཀྱི་ཉམས་མྱོང་བཟང་མི་བཟང༌། །མོས་གུས་བཟང་ངན་གྱི་རྗེས་སུ་འགྲོ། །མོས་གུས་མཐའ་མེད་དུ་འཕེལ་འདུག་ན། །ཉམས་རྟོགས་མི་སྐྱེ་བའི་རང་དབང་མེད། །ཆོས་བརྒྱད་ཁྲི་བཞི་སྟོང་གསུངས་གྱུར་ཀྱང༌། །དོན་སེམས་ཉིད་གཏན་ལ་འབེབས་པ་ཡིན། །སེམས་གསལ་རིག་མ་འགགས་ངོས་གཟུང་བྲལ། །དེ་སོ་མར་བསྐྱངས་ན་རང་སོ་ཟིན། །དུས་རྟག་ཏུ་དྲན་པའི་ཐག་པས་བཟུང༌། །རང་རང་ཉིད་ཀྱིས་རིག་ན་རང་གྲོལ་ཡིན། །སེམས་བཟུང་བས་མི་ཕན་ལྷུག་པར་ཐོང༌། །འགྲོ་འོང་གི་རྣམ་དབྱེ་དབྱིངས་སུ་སྟོར། །དུས་རེ་འགའ་བསྒྲིམ་ཀྱིན་གཅུན་ལ་ཞོག །སྤྲོས་བྲལ་ཀྱི་དབྱིངས་སུ་ཕྱིན་པ་ཡིན། །ཡང་རེ་འགའ་ཀློད་ལ་བསྐྱུར་ཀྱིན་ཞོག །གཉུག་མའི་རང་སོ་ཟིན་པ་ཡིན། །ལར་གནས་ལུགས་བྱར་མེད་ཀྱི་རྣལ་འབྱོར་ལ། །བསྒྲིམ་དགོས་དང་ཀློད་དགོས་མི་འདུག་མོད། །བསྒྲིམ་ཀློད་ཀྱི་སྣང་བ་ཅི་ཤར་ཡང༌། །གནས་ལུགས་ཀྱི་དབྱིངས་སུ་ཁྱེར་ན་བདེ། །མཐོང་ཐོས་ཀྱི་ཡུལ་ལ་དགག་རྒྱུ་མེད། །སྣང་ཚད་ཀུན་གསལ་སྟོང་ཟུང་འཇུག་ཡིན། །འགྱུ་བྱེད་རྣམ་རྟོག་གི་རི་མོ་འདི། །རང་ངོ་ཤེས་ན་རིག་སྟོང་དུ་གདའ། །མེ་ལོང་ལ་སྣོད་བཅུད་ཀྱི་གཟུགས་བརྙན་


TNT01_Page_0929
[མ་དཔེ་གཟིགས་ན་འདིར་གནོན།]

ཤར། །ཤར་ཙམ་ཉིད་ནས་ངོས་གཟུང་དང་བྲལ། །དཔེ་དེ་བཞིན་རིག་པའི་འཆད་སྒོ་ཀུན། །སེམས་སྤྲོས་བྲལ་ཁོ་རའི་རང་གཟུགས་ཡིན། །ཆོས་སྐུ་ཉག་གཅིག་གི་ཀློང་ཡངས་ལ། །བླང་དོར་གྱི་སྤྲོས་པ་དགོས་རེ་ཀན། །སྤང་བླང་གི་སྣང་ཆ་ཅི་ཤར་ཡང༌། །རང་གྲོལ་དུ་འདུག་ན་སྤང་བླང་བྲལ། །ང་འགྲོ་འམ་འདུག་གམ་གང་བྱེད་ཀྱང༌། །གཉིད་ལོག་གམ་སད་སྐབས་ཡིན་ཡང་རུང༌། །སེམས་གནས་སམ་འགྱུ་བ་ཅི་ཤར་ཡང༌། །རང་དུས་ནས་རང་ཚོ་ཐུབ་པ་ཞིག་འཚལ། །སེམས་རང་ཚོ་ཐུབ་ན་ངོས་གཟུང་བྲལ། །གཉིས་མེད་ཀྱི་རིག་པ་འདི་རྩལ་མ་འགགས། །འཁོར་འདས་ཀྱི་སྣང་བ་ལ་མི་འཆར་མེད། །ཤར་གྲོལ་གྱི་རྣལ་འབྱོར་བློ་རེ་བདེ། །ཡེངས་མེད་རྣལ་འབྱོར་བརྗིད་རེ་ཆགས། །ལས་མེད་ཀྱི་རྣལ་འབྱོར་ཞེ་རེ་གཙང༌། །རྒྱུ་ཡན་གྱི་རྣལ་འབྱོར་གུ་རེ་ཡངས། །གང་ཤར་ལ་ལམ་ཁྱེར་རྩལ་རེ་ཆེ། ཁྱེད་ཉམས་ལེན་གྱི་སྙིང་པོ་དེ་ལ་མཛོད། །གནས་ལུགས་ནམ་མཁའ་ལྟར་སྤྲོས་བྲལ་མོད། །སྤྱོད་པ་ལས་འབྲས་ཀྱི་བླང་དོར་ཟབ། །སྟོང་ཉིད་ཀྱི་རང་མདངས་སྙིང་རྗེར་ཤར། །ཆོས་ལྟ་སྤྱོད་འཛོམ་པ་སངས་རྒྱས་ཀྱི་ལམ། །སྤྱོད་པ་ལ་མཚན་མར་མ་ཞེན་ཞིང༌། །སྟོང་རྐྱང་ལ་ཁ་ལྟ་མི་འཐག་པར། །རང་རྒྱུད་ལ་གནད་དུ་འགྲོ་བ་གཅེས། །སྤྱི་འཁོར་བ་སྡུག་བསྔལ་གྱི་


TNT01_Page_0930
[མ་དཔེ་གཟིགས་ན་འདིར་གནོན།]

རང་བཞིན་དང༌། །འདུས་བྱས་ལ་རྟག་པའི་གོ་སྐབས་མེད། །སྒོས་འཆི་བ་ནམ་ཡོང་ཆ་མེད་པས། །གཞན་ཅིས་ཀྱང་མི་ཕན་ཆོས་ལ་འབུངས། །ངན་སོང་གི་སྡུག་བསྔལ་མྱོང་དུས་ན། །ཕ་མ་དང་ཉེ་དུས་འཁྱོབས་པ་མེད། །སྔར་བྱས་ཀྱི་སྡིག་པ་བཤགས་པ་དང༌། །ཕྱིན་ཆད་མི་བྱེད་པ་གལ་རེ་ཆེ། །ཟས་ནོར་དང་ལོངས་སྤྱོད་ཁ་དྲག་ཀུན། །ཚེ་བརྗེས་པ་ཕན་ཆད་གར་སོང་མེད། །ལས་དཀར་པོ་དག་ལ་འབད་གྱུར་ན། །ཕྱོགས་གང་དུ་སྐྱེས་ཀྱང་བདེ་བ་ཡིན། །ད་མོས་གུས་ལ་ཐབས་ཀྱི་གཙོ་བོར་མཛོད། །སེམས་ཉིད་ལ་ལྟ་བ་ཉམས་ལེན་མཐིལ། །མི་རྟག་སྐྱོ་ཤས་དྲན་བསྐུལ་གྱི་ལྕག །ལས་འབྲས་ཀྱི་ཞིབ་ཏིག་སྤྱོད་པའི་ཕུལ། །དོན་འདི་བཞི་ཆོས་ཀྱི་སྙིང་པོ་ལགས། །མི་ཁྱེད་ཀྱི་ཐུགས་ལ་འཕྲོད་པར་སྨོན། །དགུང་མཁའ་ལ་ཉི་མ་ཤར་བ་བཞིན། །དོན་གནས་ལུགས་ཀྱི་རྟོགས་པ་འཆར་བར་ཤོག། །།ཅེས་པའང་ཏཱ་ར་ནཱ་ཐས་དཔོན་བློ་གྲོས་ནམ་མཁའ་ལ་གདམས་པའོ། །

བླ་མ་སྐྱབས་གནས་ཀུན་འདུས་སུ་ཤེས་པ་གལ་ཆེ་བར་གདམས་པ།


TNT01_Page_0931
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། བླ་མ་དམ་པ་རྟོགས་པ་དང་ཐུགས་རྗེ་ཅན་རྣམས་ལ་ཕྱག་འཚལ་ལོ། །དངོས་གྲུབ་ཐམས་ཅད་ཀྱི་རྩ་བ་བླ་མའི་མོས་གུས་ཡིན་ཏེ། དངོས་གྲུབ་ཡོང་དུ་རེ་ནས་མོས་གུས་བྱས་ན་རང་འདོད་ཕུགས་སུ་བཅུག་པ་ཡིན། བླ་མ་སྐྱབས་གནས་ཀུན་འདུས་སུ་ཤེས་པ་གལ་ཆེ་སྟེ། བླ་མ་རང་


TNT01_Page_0931
[མ་དཔེ་གཟིགས་ན་འདིར་གནོན།]

གིས་མ་ཆོག་པར་ཡར་ལ་བཏེག་ནས་སངས་རྒྱས་སུ་སྐྱེལ་ན་མོས་གུས་ཀྱི་གནད་འཆུག་མཛད་པ་གང་ཤར་དེ་ཀ་ཆོས་སྐུའི་རྣམ་རོལ་སེམས་ཅན་གང་ལ་གང་འདུལ་དུ་ཤེས་དགོས་ཏེ། མཛད་པ་ཉེས་པ་ཞིག་ཡོད་པ་ལ་རང་རེས་བཟང་པོར་བསྒྱུར་ནས་ལྟ་དགོས་ན་སྣང་བ་མ་དག་པ་ཡིན། མོས་གུས་ཀྱི་གདུང་ཤུགས་ཚུགས་པ་མེད་པ་འདྲ་བ་ཞིག་མེད་ཁ་མེད་ཡིན་ནའང༌། ཞེན་མེད་ཀྱི་མོས་གུས་རང་ཤར་རང་གྲོལ་དུ་མ་སོང་ན་བཟང་རྟོག་ཕལ་པ་ཡིན། དེས་ན་རེ་དོགས་དང་བྲལ་བའི་མོས་གུས་དང་གསོལ་འདེབས་དགོས་པ་ལགས་སོ། །བླ་མ་དམ་པ་གཅིག་ལ་གསོལ་བ་བཏབ་པས་ཐམས་ཅད་ཀྱི་བྱིན་རླབས་འཇུག་པ་གཅིག་དགོས། དེ་ཡང་གཅིག་ལ་ཐམས་ཅད་སྟིམ་པ་ལ་སོགས་པའི་དམིགས་པ་བྱེད་པའི་སྲོལ་ལྟར་བྱས་ཀྱང་ཆོག་མ་བྱས་ཀྱངརུང་སྟེ། ངོ་བོ་བླ་མ་ཐམས་ཅད་ཀྱང་ཐུགས་ནམ་མཁའ་ལྟར་ངོས་གཟུང་མེད་པའི་གསལ་སྟོང་དུ་རོ་གཅིག །དེའི་མདངས་སྙིང་རྗེར་ཤར་བར་ཡང་གཅིག །དེའི་མཐུ་ལས་འཕྲིན་ལས་སེམས་ཅན་གྱི་དོན་མཛད་པར་ཡང་གཅིག །རང་གི་ངོས་ནས་ཀྱང༌། དང་པོ་ཀློག་སློབ་པའི་སློབ་དཔོན་ནས་གཟུང་བའི་བླ་མ་ཀུན་གྱིས་དགེ་བ་ལ་བསྐུལ་བར་ཡང་གཅིག །ཐབས་མི་འདྲ་བ་སྣ་ཚོགས་དང༌། སྟོན་ལུགས་དང་འཁྲིད་ལུགས་མི་འདྲ་བ་བྱུང་ཡང༌། དུས་ཚོད་


TNT01_Page_0932
[མ་དཔེ་གཟིགས་ན་འདིར་གནོན།]

གནས་སྐབས་དང༌། གང་ལ་གང་འདུལ་ཙམ་ཡིན། ངོ་བོ་སྒྲིབ་གཉིས་སྤྱོད་དུ་བཅུག །ཚོགས་གཉིས་རྫོགས་སུ་བཅུག་ནས། མཐར་ཐུག་སངས་རྒྱས་སུ་འཁྲིད་པར་ཡང་གཅིག །རང་གསོལ་བ་འདེབས། མོས་གུས་སྒོམ་པའི་སྐབས་ཡིན་ལ་ཝལ་ཝལ་འཆར་བའི་བླ་མ་དེ་རྣམས་རང་སེམས་ཀྱི་འཆར་སྒོ་ཡིན་པས་སེམས་གཅིག་གི་རང་ངོར་ཡང་རོ་གཅིག་པ་ལགས་སོ། །དེ་ལྟར་ཤེས་ནས་གསོལ་བ་འདི་ལྟར་འདེབས་སོ། །ཨོཾ་སྣང་སྟོང་དབྱེར་མེད་སྐུ་ཡི་རྡོ་རྗེ་ནི། །སྲིད་ཞིའི་སྣང་བ་ཀུན་ལ་ཁྱབ་པར་བཞུགས། །ཨཱཿགྲགས་སྟོང་དབྱེར་མེད་གསུང་གི་རྡོ་རྗེ་ནི། །བརྗོད་རྩོལ་བྲལ་ཡང་མིང་ཚིག་ཀུན་ཏུ་འཆར། །ཧཱུཾ་བདེ་སྟོང་དབྱེར་མེད་ཐུགས་ཀྱི་རྡོ་རྗེ་ནི། །འབད་རྩོལ་མེད་ཀྱང་ཤེས་བྱ་ཐམས་ཅད་མཁྱེན། །ཧོཿརྣམ་པ་ཀུན་ལྡན་ཡེ་ཤེས་རྡོ་རྗེ་ནི། །འགྱུར་བ་མེད་ཀྱང་འཁོར་འདས་ཀུན་ཏུ་སྣང༌། །སངས་རྒྱས་ཀུན་གྱི་ཁྱབ་བདག་རྡོ་རྗེ་བཞི། །ཀུན་འདུས་བླ་མ་ཁྱེད་ལ་སྐྱབས་སུ་མཆི། །དམ་ཆོས་ཀུན་འདུས་ཁྱོད་ལ་གསོལ་བ་འདེབས། །དགེ་འདུན་ཀུན་འདུས་ཁྱོད་ཀྱིས་བྱིན་གྱིས་རློབས། །ཡི་དམ་ཀུན་འདུས་ཁྱོད་ལ་ཕྱག་འཚལ་ལོ། །བསྟན་བསྲུང་ཀུན་འདུས་ཁྱོད་ཀྱི་མགོན་སྐྱབས་མཛོད། །མགོན་པོ་ཁྱོད་དང་ནམ་ཡང་མི་འབྲལ་ཞིང༌། ཁྱོད་ཉིད་དགེས་པའི་འཕྲིན་ལས་སྒྲུབ་པར་ཤོག །མཚན་ལྡན་བླ་མ་རིན་པོ་ཆེ། །གདུང་བ་དྲག་པོས་


TNT01_Page_0933
[མ་དཔེ་གཟིགས་ན་འདིར་གནོན།]

གསོལ་འདེབས་ན། །བདག་སོགས་སེམས་ཅན་ཐམས་ཅད་ལ། །བྱིན་གྱིས་བརློབ་ཕྱིར་འདིར་བྱོན་བཞུགས། །སྐུ་ལ་མཚན་དཔེ་འོད་དུ་འབར། །སྤྲུལ་པ་ཡང་སྤྲུལ་གྲངས་ལས་འདས། །མཁའ་དབྱིངས་གང་བའི་སངས་རྒྱས་དང༌། །དཔའ་བོ་མཁའ་འགྲོ་སྤྲིན་ལྟར་གཏིབས། །འོད་དང་འོད་ཟེར་འཇའ་འོད་འཁྲུག །ཉི་མ་འབུམ་གྱི་གཟི་བརྗིད་ཅན། །ཆོས་ཀྱི་སྒྲ་དབྱངས་འབྲུག་ལྟར་སྒྲོག །བདེ་ཆེན་ཉམས་མྱོང་འར་མ་འུར། །ད་ལྟ་བྱིན་གྱིས་བརླབ་ཏུ་གསོལ། །གཏན་ཐོག་འདི་རུ་བྱིན་གྱི་རློབས། །ཐུགས་ཡིད་དབྱེར་མེད་རྟོགས་ནས་ཀྱང༌། །རྗེ་བཙུན་ཁྱེད་དང་མཉམ་པར་ཤོག །བདག་ལུས་ནམ་མཁའ་མཉམ་གྱུར་ནས། །སྐུ་ཡི་འཕྲིན་ལས་སྒྲུབ་པར་ཤོག །ངག་ཀྱང་ཤེས་བྱ་ཀུན་ཁྱབ་ནས། ཁྱོད་གསུང་མ་ལུས་སྒྲུབ་པར་ཤོག །སེམས་ཅན་ཀུན་ཡིད་རོ་གཅིག་པས། །ཐུགས་ཀྱི་འཕྲིན་ལས་ཀུན་འགྲུབ་ཤོག །དུས་དང་གནས་སྐབས་ཐམས་ཅད་དུ། ཁྱོད་ཀྱི་ཞབས་པད་བསྟེན་པ་དང༌། ཁྱོད་གསུང་ཇི་བཞིན་འཛིན་པར་ཤོག །ཇི་སྲིད་གནས་ལུགས་མ་རྟོགས་ཤིང༌། །བརྟན་པ་མ་ཐོབ་བར་དུ་ཡང༌། །ཅི་གསུང་གུས་པས་སྒྲུབ་པ་དང༌། །མོས་གུས་ལྟེམ་འགྱང་མེད་པ་དང༌། བརྡེག་བརྡུང་བཀའ་བཀྱོན་ཅི་མཛད་ཀྱང༌། །ཡིད་ཆད་དད་ལོག་མི་སྐྱེ་བར། །


TNT01_Page_0934
[མ་དཔེ་གཟིགས་ན་འདིར་གནོན།]

མོས་གུས་ཆེས་ཆེར་འཕེལ་བར་ཤོག །ཁྱིམ་གྱི་ལས་དང་སྡིག་སྤྱོད་སོགས། །མཛད་སྤྱོད་ཅི་འདྲ་མཐོང་གྱུར་ཀྱང༌། །གང་འདུལ་ཐབས་མཁས་འཕྲིན་ལས་སུ། །རྟོགས་པར་བྱིན་གྱིས་བརླབ་ཏུ་གསོལ། ཕ་བླ་མ། ཕ་བླ་མ། ཕ་བླ་མ། ཕ་བླ་མ་རང་མཁྱེན། རྗེ་བཙུན་བླ་མ་མཁྱེན། །ཐབས་མཁས་འགྲོ་དོན་མཛད་ལ་གསོལ་བ་འདེབས། །བརྗོད་བྲལ་ཆོས་སྐུ་ཁྱོད་ལ་གསོལ་བ་འདེབས། །དུས་གསུམ་སངས་རྒྱས་ཁྱོད་ལ་གསོལ་བ་འདེབས། །མཐུ་སྟོབས་ནུས་ལྡན་ཁྱོད་ལ་གསོལ་བ་འདེབས། །ཡེ་ཤེས་མཁའ་ཁྱབ་ཁྱོད་ཀྱི་ཐུགས་རྗེས་གཟིགས། །བརྩེ་བའི་རང་བཞིན་ཁྱོད་ཀྱི་ཐུགས་རྗེས་གཟིགས། །འཕྲིན་ལས་ལྷུན་གྲུབ་ཁྱོད་ཀྱི་ཐུགས་རྗེས་གཟིགས། །སྒྱུ་མའི་གར་མཁན་ཁྱོད་ཀྱི་ཐུགས་རྗེས་གཟིགས། །འཁོར་བར་འཁྱམས་པ་བདག་ལ་ཐུགས་རྗེས་གཟིགས། །ཉོན་མོངས་མེ་ལྟར་འབར་ལ་ཐུགས་རྗེས་གཟིགས། །ལས་ངན་ཆུ་བོས་ཁྱེར་ལ་ཐུགས་རྗེས་གཟིགས། །སྡུག་བསྔལ་འདམ་དུ་བྱིང་ལ་ཐུགས་རྗེས་གཟིགས། ཆོས་བརྒྱད་རླུང་གིས་ཁྱེར་ལ་ཐུགས་རྗེས་གཟིགས། །ཚེ་འདི་བློས་མ་ཐོངས་ལ་ཐུགས་རྗེས་གཟིགས། །རང་རྒྱུད་ཤིང་ལྟར་རེངས་ལ་ཐུགས་རྗེས་གཟིགས། །གདེངས་མེད་ཆོད་ཡོད་མཁན་ལ་ཐུགས་རྗེས་གཟིགས། །ཟོག་པོ་མགོ་སྐོར་མཁན་ལ་ཐུགས་རྗེས་གཟིགས། །སྒྱིད་སྙོམས་རྣམ་གཡེངས་ཅན་ལ་ཐུགས་རྗེས་གཟིགས། །ངོ་དགའ་མཐུན་འཇུག་མཁན་ལ་ཐུགས་རྗེས་གཟིགས། །སྙིང་ནས་ཆོས་མ་ནུས་ལ་ཐུགས་རྗེས་གཟིགས། །རེ་ས་གཞན་ན་མེད་དོ་ཐུགས་རྗེས་གཟིགས། །སྐྱབས་གནས་གཞན་ན་མེད་དོ་ཐུགས་རྗེས་གཟིགས། །བློ་གཏད་


TNT01_Page_0935
[མ་དཔེ་གཟིགས་ན་འདིར་གནོན།]

གཞན་ན་མེད་དོ་ཐུགས་རྗེས་གཟིགས། ཁ་ཙམ་ཚིག་ཙམ་མིན་ནོ་ཐུགས་རྗེས་གཟིགས། །སྒྲུབ་ལ་བར་ཆད་མེད་པ་དང༌། །ཆོས་ཀུན་ཉམས་སུ་ལོངས་པ་དང༌། ཞེ་བཅང་སྙིང་རུས་རྒྱུན་མི་འཆད། །ཉམས་རྟོག་རྩོལ་མེད་འཆར་བར་ཤོག །བླ་མ་ཀུན་གྱི་ཐུགས་རྗེས་འཛིན་པ་དང༌། །སངས་རྒྱས་ཀུན་གྱི་གསུང་བཞིན་འགྲུབ་པ་དང༌། །དམ་ཆོས་ཀུན་གྱི་དགོངས་པ་ལོངས་པ་དང༌། འཕགས་ཚོགས་ཀུན་གྱི་ཞབས་རྗེས་ཟིན་པར་ཤོག །སེམས་ཅན་ཐམས་ཅད་འཁོར་བ་ལས་སྒྲོལ་ཞིང༌། ཉོན་མོངས་ཐམས་ཅད་དབྱིངས་སུ་དག་པ་དང༌། །ལས་རྣམས་ཐམས་ཅད་སྤྲིན་བཞིན་དེངས་པ་དང༌། །སྡུག་བསྔལ་ཐམས་ཅད་བདེ་བར་ཐིམ་པར་ཤོག །དྲིན་ཅན་ཕ་མ་འགྲོ་དྲུག་སེམས་ཅན་རྣམས། །རྗེ་བཙུན་ཁྱེད་ཀྱི་གོ་འཕང་ཐོབ་པར་ཤོག །དེ་སྲིད་རྒྱལ་ཁྱོད་ཐུགས་རྗེས་གཟིགས་པ་ཡིས། །ནམ་ཡང་འབྲལ་བ་མེད་པར་སྐྱོང་གྱུར་ཅིག །ཅེས་གསོལ་བ་དྲག་ཏུ་བཏབ་ནས། མོས་གུས་གང་སྐྱེས་དེ་ལ་བཟོ་བཅོས་མེད་པའི་ཚུལ་དུ་ཧྲིག་གེ་བཞག །གཞན་ཡང་ཕྱག་འབུལ། བསྐོར་བ་མཆོད་པ་སོགས་དགེ་བ་ཅི་བྱས་ཐམས་ཅད་བསྔོ་བའི་སྐབས་དང༌། བྱང་ཆུབ་སེམས་དཔར་གྲགས་པའི་བླ་མ་རྣམས་སམ། དེ་བཞིན་གཤེགས་པའི་སྐུ་གཟུགས་དང༌། གསུང་གི་གླེགས་བམ་སོགས་ཀྱི་དྲུང་དུ་ཡང༌། སེམས་ཅན་ཐམས་ཅད་འཁོར་བ་ལས་ཐར་པ་དང༌། གནས་


TNT01_Page_0936
[མ་དཔེ་གཟིགས་ན་འདིར་གནོན།]

ལུགས་རྟོགས་པ་དང༌། མོས་གུས་ཚད་དུ་ཕྱིན་པ་སྐྱེ་བར་སྨོན་ལམ་འདེབས། མཁའ་འགྲོ་ཆོས་སྐྱོང་ལ་ཡང་དེ་ལྟར་གསོལ་བ་ཐོབ། བླ་མའི་མོས་གུས་ཚད་དུ་ཕྱིན་ན་མོས་གུས་གཅིག་ཆོག་རྒྱལ་པོ་བྱ་བ་ལགས་སོ། །ད་ནི་གདམས་པ་གཞན་ཡང་བཤད་པར་བྱ་སྟེ། ལས་འབྲས་ལ་ཡིད་ཆེས་པའི་དད་པའི་གཏམ་སྟེ་དང་པོ་ནི། སངས་རྒྱས་ཆོས་དང་དགེ་འདུན་དང༌། །ཡི་དམ་མཁའ་འགྲོ་ཀུན་འདུས་པའི། །རྩ་བའི་བླ་མ་ཐུགས་རྗེ་ཅན། །རྒྱུད་པ་ཀུན་དངོས་དེ་ལ་འདུད། །མཆོག་ཏུ་གུས་པའི་སློབ་མ་ལ། །སེམས་ཡིད་ཆོས་སུ་སྒྱུར་བའི་ཕྱིར། ཉམས་ལེན་གནད་བསྐུལ་གདམས་ངག་ནི། །བློ་དང་འཚམ་པ་འདི་ལྟར་ལགས། །ཆོས་ཀུན་སྙིང་པོ་ལག་ལེན་ཀུན་བསྡུས་ན། །དཀར་ནག་ལས་འབྲས་བསླུ་བ་མེད་པ་ལ། །ཡིད་ཆེས་དད་པས་སྤང་བླང་འཛོལ་མེད་དང༌། །ཅིས་ཀྱང་དགོས་མེད་དྲན་པའི་ངེས་འབྱུང་དང༌། །ཕྱོགས་རིས་ཞེན་ཆགས་མེད་པའི་སྙིང་རྗེ་དང༌། །གང་ཤར་རང་སར་གྲོལ་བའི་ལྟ་སྒོམ་སྟེ། །བཞི་པོ་འདི་ལ་མ་འདུས་གང་ཡང་མེད། །གལ་པོ་ཆེ་འདི་བློ་ལ་ངེས་པར་མཛོད། །རང་ཉིད་ཉམས་རྟོགས་མཐོ་དམན་ཅི་འདྲ་ཡང༌། །དགེ་བའི་བྱ་བ་ལྕོགས་ཚད་བྱེད་པ་གཅེས། །དགེ་སྦྱོར་བཟང་པོར་ཡོད་ན་བོགས་འདོན་ཡིན། །དགེ་སྦྱོར་ངན་ན་བསགས་སྦྱང་གལ་རེ་ཆེ། །རྟོགས་པ་མཐོན་པོ་ཉམས་མྱོང་


TNT01_Page_0937
[མ་དཔེ་གཟིགས་ན་འདིར་གནོན།]

བརྟན་པོ་དང༌། །ཕྱོགས་རཻའི་བསྟན་པའི་ཁ་སོ་འཛིན་པའི་ཕྱིར། །སྡིག་པ་བསོག་ཅིང་ཁྱིམ་པའི་མཐུན་འཇུག་ནི། །བྱས་ཀྱང་ཉེས་པ་མེད་པར་འདོད་པ་མང༌། །དེ་དག་བདུད་ཀྱིས་བྱིན་གྱིས་བརླབས་པ་ཡིན། །རྟོགས་པ་མཐོང་ན་སྡིག་པ་བྱེད་དོན་མེད། །འཁྲུལ་པ་ཞིག་ན་མི་ངོ་འཛིན་དོན་མེད། །བསྟན་པ་ཕྱོགས་རེའི་ཞེན་གྱིས་བསྟན་པ་དཀྲུག །ཆོས་ཀྱི་ཕྱིར་དུའང་ཆོས་འགལ་བྱེད་མི་རུང༌། །རང་དང་དགྲ་གཉེན་ནོར་ཕྱི་ལྟ་ཅི་སྨོས། །དགེ་སྡིག་བྱ་བ་ཆེ་ཆུང་ཅི་བྱས་ཀྱང༌། །དེ་ཡི་འབྲས་བུ་བདེ་སྡུག་བསླུ་བ་མེད། །སེམས་ཅན་གཞན་ལ་ཕན་ཚད་དགེ་བ་ཡིན། །འགྲོ་ལ་གནོད་ཚད་སྡིག་པ་ཁོ་ན་ཡིན། །ཚེ་འདིའི་ཕན་པ་ཙམ་ལ་སྙིང་པོ་མེད། །ཕྱི་མར་ཕན་ན་ཕན་ཚབས་ཆེ་བ་ཡིན། །ཚེ་འདིར་ཕན་མེད་གནོད་མེད་ཡིན་སྙམ་ལ། །ཕྱི་མར་གནོད་པ་སྤོངས་ལ་ཕན་པ་སྒྲུབས། །འདི་ཕྱི་ཀུན་ཏུ་ཕན་ན་ཐམས་ཅད་བྱ། །འདི་ཕྱི་ཀུན་ཏུ་གནོད་ན་ནམ་ཡང་སྤང༌། །ཚེ་འདིར་གནོད་ཀྱང་ཕྱི་མར་ཕན་ན་ནི། །སྐབས་སུ་གང་བབ་བརྟགས་ལ་ངེས་པར་སྒྲུབས། །རྒྱལ་སྲིད་སྤངས་ནས་དཀའ་སྤྱད་ཆོས་སྒྲུབས་ན། །འཕྲལ་དུ་སྡུག་ཀྱང་ཕུགས་སུ་འཚེང་བ་བཞིན། །ཚེ་འདིར་སྐྱིད་ཀྱང་ཕྱི་མར་གནོད་པ་ནི། །ཟས་མཆོག་དུག་གིས་སྦགས་པ་བཞིན་དུ་སྤང༌། །


TNT01_Page_0938
[མ་དཔེ་གཟིགས་ན་འདིར་གནོན།]

དཀོན་མཆོག་མཆོད་པའི་རྫས་ལ་ལོངས་སྤྱོད་ན། །ལྟོ་བ་འགྲངས་ཀྱང་དམྱལ་བར་འགྲོ་བ་བཞིན། །རིག་པ་རྐྱང་འདེད་བྱས་པ་ཁོ་ནས་ཆོག །ལས་འབྲས་ཆ་མེད་ཟེར་པ་ལོག་ལྟ་ཡིན། ཁ་སྐད་ཙམ་གྱིས་ལྟ་བ་མཐོ་མཐོ་མོས། །གཡང་སར་ལྷུང་བ་མང་གི་ཞེ་ཟོན་འཚལ། །ཞེས་པ་ནི་ལས་འབྲས་ལ་ཡིད་ཆེས་པའི་དད་པའི་གཏམ་སྟེ་དང་པོའོ།། །།ད་ལྟའི་སྣང་བ་ཆགས་སྡང་སྐྱེ་བའི་ཡུལ། །འདི་དག་ཡད་ཡུད་ཙམ་ཡིན་རྟག་མི་ཐུབ། །འབྲལ་བར་ཕངས་པའི་གྲོགས་ནི་རྨི་ལམ་འདྲ། །གཅེས་པའི་ཁང་ཞིང་ནོར་ཡང་ཝུ་བ་བཞིན། །མཛའ་བ་ཀུན་ཡང་གཏན་གྱི་མཛའ་བ་མིན། །དགྲ་བོ་ཀུན་ཡང་གཏན་གྱི་དགྲ་བོ་མིན། །ཤི་ནས་འཁོར་བའི་གནས་སུ་འཁྱམས་པའི་ཚེ། །ཕ་བོས་མ་བོས་བྱས་ཀྱང་ཁུ་སྟོང་ཙམ། །ངན་སོང་འགྲིམ་དུས་ཅི་ཡང་མི་ཕན་ཞིང༌། །དགེ་སྦྱོར་གཅོག་པའི་གཉེན་གྱིས་ཅི་ཞིག་བྱ། །ནམ་ཞིག་ངེས་པར་འབྲེལ་བ་མཉམ་པོ་ལ། །ད་ལྟ་ཉིད་ནས་ཞེན་པ་མེད་ན་ལེགས། །ཞེན་པ་མེད་ན་བྲལ་ཀྱང་སྡུག་བསྔལ་མེད། །ཤི་སྦར་འཐམས་ན་མྱ་ངན་དྲག་པོས་འཇོམས། །གར་སྐྱེས་ངེས་མེད་སྐྱིད་སྡུག་རང་དབང་མེད། །གང་དུ་སྐྱེས་ཀྱང་སྡུག་བསྔལ་ཁོ་ནའི་དང༌། །དཔལ་འབྱོར་ཅན་གྱི་སྐྱེ་བོ་འདི་རྣམས་བླུན། །འདས་པའི་སྡུག་བསྔལ་མང་པོས་སྐྱེལ་མ་དང༌། །


TNT01_Page_0939
[མ་དཔེ་གཟིགས་ན་འདིར་གནོན།]

མ་འོངས་སྡུག་བསྔལ་མང་པོས་བསུ་མ་དང༌། ད་ལྟའི་སྡུག་བསྔལ་དབུས་ན་འདྲེ་ཞིང་ལྡོག །སྡིག་པའི་དབང་གིས་སྡུག་བསྔལ་རྒྱུན་མི་འཆད། །སྡུག་བསྔལ་མ་བཟོད་ད་དུང་སྡིག་ལ་འཇུག །སྡུག་ལ་སྐྱིད་པོར་འཁྲུལ་ནས་ང་རྒྱལ་བྱེད། །མི་ཆེན་བློ་ལྡན་རྣམས་ཀྱི་འདུན་གྲོས་ཡིན། །ད་ལྟའི་སྐྱེ་བོ་ཀུན་གྱི་སྤྱོད་ཚུལ་ཡིན། །དབང་ཐང་ཆེ་ཡིན་དམྱལ་བར་སྡོད་ཡུན་རིང༌། །འབྱོར་བ་ཆེ་ཡིན་ཡི་དྭགས་འཕོངས་པའི་རྒྱུ། །བློ་གྲོས་ཆེ་བར་རློམ་ཡང་ཕྱུགས་ཉིད་དེ། །བུ་ཁྱོད་དེ་འདྲའི་ཕྱོགས་ལ་རེ་སྨོན་སྤོངས། །ས་ཆེན་དབང་བའི་སྡེ་དཔོན་སྟོབས་ལྡན་དང༌། །སྲོག་ཆགས་ཕྲ་མོ་གྲོག་སྦུར་ཉམས་ཆུང་གཉིས། །སྐྱེ་བ་ཕྱི་མའི་གདེངས་ལ་ཁྱད་པར་མེད། །གང་ལའང་ཡིད་བརྟན་ཐུབ་པ་ཅི་ཡང་མེད། །བདེ་བའི་གོ་སྐབས་ཅི་ཡང་མ་མཐོང་བས། །འཁོར་བ་སྙིང་པོ་མེད་པར་ཤེས་ནས་ནི། །དམ་པའི་ཆོས་ལ་ནན་ཏན་སྙིང་པོར་མཛོད། །ཅེས་པ་ནི། མི་རྟག་པ་དང་སྡུག་བསྔལ་ལས་བརྩམས་པའི་ངེས་འབྱུང་གི་གཏམ་སྟེ་གཉིས་པའོ།། །།ཉམས་རྟོགས་མཐོན་པོར་གྲགས་པ་མང་པོ་ཡང༌། །སྙིང་རྗེ་མེད་པས་ངན་པའི་ལམ་དུ་གོལ། །ཐེག་ཆེན་ཟེར་ཡང་ཐེག་པ་དམན་པར་ལྷུང༌། །རང་དོན་གཞན་ཕན་གཉིས་ཀ་ཤོར་བ་མང༌། །བདག་པས་གཞན་གཅེས་སྙིང་རྗེའི་བསམ་པ་ཅན། །


TNT01_Page_0940
[མ་དཔེ་གཟིགས་ན་འདིར་གནོན།]

ཐབས་ལ་མཁས་པ་ཐེག་པ་ཆེན་པོའི་ཆོས། །ཐེག་པ་ཆེ་ཆུང་ལྟ་བས་ཁྱད་མི་འབྱེད། །བྱང་ཆུབ་སེམས་དང་སྙིང་རྗེ་སྤྱོད་པའི་ཁྱད། །ཕྲག་དོག་ཆེ་ཞིང་ཁ་རྒོད་བསམ་པ་ངན། །ཆོས་རྒྱུད་བུ་རྒྱུད་བཟང་ཡང་ག་ལ་ཕན། །དཀའ་སྤྱད་འདུག་ཚུལ་བཟང་ཡང་བསླུ་རྡོ་ཡིན། །བྱ་བཏང་དམ་བཅའ་ཆེ་ཡང་ཚིག་སྐམ་ཡིན། ཁྱོད་ནི་གནས་ལུགས་རྟོགས་པ་ཡིན་ནོ་ཞེས། །ཁ་འཇམ་ཞེ་གདུག་བླ་མ་གཡོ་ཅན་གྱིས། །བསྟོད་ར་བཏང་བས་རང་རྒྱུད་མ་ཐུལ་པའི། །བླུན་པོ་ཕལ་ཆེར་བླུན་དད་སྐྱེད་དུ་འཇུག །རྨོངས་པ་ཕལ་ཆེར་རང་ལ་བསྟོད་ན་དགའ། །དམ་པ་རྣམས་ནི་དྲང་པོར་སྨྲས་ན་མགུ། །ཕྱཽགས་ཞེན་ཀོ་ལོང་དམ་ལ་བཟང་འདོད་ཅན། །རང་རྒྱུད་མ་ཐུལ་སྒྲུབ་པའི་དགོས་པ་སྟོར། །རང་ཉིད་བཟང་འདོད་གཞན་ལས་ངན་མི་འདོད། །ལྐོག་ཏུ་ཆོས་མིན་སྤྱོད་པ་སྣ་ཚོགས་བྱེད། །རི་ཁྲོད་འགྲིམས་ན་གྲགས་པ་ཆེ་རུ་རེ། །འདུ་འཛི་སྦངས་ཀྱིན་དད་ཅན་འདུ་ལ་རེ། །བྱ་བཏང་བྱས་ཀྱིན་ཟས་ནོར་ཡོང་དུ་རེ། །ཕམ་ཁ་བླང་གིན་ཕུགས་སུ་རྒྱལ་འདོད་ཅིག །གཞན་ལ་བསྟོད་ན་རང་ལ་བྱམས་སུ་རེ། །དག་སྣང་བྱས་ནས་དབང་དུ་བསྡུ་འདོད་དང༌། །གཞན་ཕྱོགས་ནུབ་ཅིང་རང་ཕྱོགས་དར་ཕྱིར་རམ། །གྲགས་པ་སྒྲོག་ཕྱིར་ཆོས་རྫུ་བྱེད་པ་ནི། །སེམས་ཅན་ཐམས་ཅད་བསླུ་བའི་


TNT01_Page_0941
[མ་དཔེ་གཟིགས་ན་འདིར་གནོན།]

སྡིག་པོ་ཆེ། །དེ་ཕྱིར་རྫུན་མེད་ཕྱི་ནང་མེད་པར་གཅེས། །སྙན་གྲགས་འདོད་པས་སློབ་མ་བསླུ་བ་དང༌། །རྙེད་བཀུར་འདོད་པས་དད་ཅན་བསླུ་བ་དང༌། །མ་རྟོགས་བཞིན་དུ་གནས་ལུགས་རྟོགས་སོ་ཞེས། །ང་རྒྱལ་བྱེད་པ་སྙིང་རྗེའི་འགལ་ཟླ་ཡིན། །བདེན་པའི་ངག་དང་དྲང་པོའི་བསམ་པ་དང༌། །ང་རྒྱལ་སྤངས་ནས་འགྲོ་ཀུན་གོང་དུ་འཁུར། །གཞན་སྐྱོན་མི་བསམ་རང་གི་སྐྱོན་ལ་རྟོག །བྱང་ཆུབ་སེམས་དང་སྙིང་རྗེ་རྒྱས་པར་འགྱུར། །དགྲ་གཉེན་ཚེ་འདིར་བློ་ཡིས་བཏགས་པ་ཡིན། །ཉེ་རིང་མེད་པར་ཕན་སེམས་སྙིང་རྗེ་སྒོམས། །ཐམས་ཅད་འཁོར་བར་འཁྱམས་པ་སྙིང་རྗེ་བས། །དེ་རྣམས་ཐར་ཐབས་རང་རེས་འཚོལ་བར་བྱ། །ད་ལྟའང་དངོས་སུ་ཕན་ན་གང་ཕན་དང༌། །ཕན་སེམས་བསམ་པ་བཟང་པོ་འབྲལ་མེད་དང༌། །གཙོ་བོར་རང་ཉིད་ཆོས་ལ་གང་འབད་པ། །དེ་དག་གཞན་ལ་ཕན་པའི་རྒྱུ་རུ་བསྔོ། །ཞེས་པ་ཕྱོགས་ཞེན་མེད་པའི་སྙིང་རྗེ་ལས་བརྩམས་པའི་གཏམ་སྟེ་གསུམ་པའོ།། །།ཟབ་མོ་གནས་ལུགས་མྱུར་དུ་རྟོགས་འདོད་ན། །སྐྱོ་ཤས་སྙིང་རུས་འཛོམ་པའི་ངེས་འབྱུང་གིས། །དབེན་པའི་གནས་སུ་སྡོད་ཚུགས་ཐུབ་པ་གཅེས། །ལྐོག་ཉལ་ལེ་ལོའི་དབང་དུ་མི་གཏོང་ཞིང༌། །དྲན་པས་ནམ་སླེབ་ཉམས་སུ་ལེན་པ་ལ། །


TNT01_Page_0942
[མ་དཔེ་གཟིགས་ན་འདིར་གནོན།]

ཕྱི་བཤོལ་མེད་པར་འཕྲལ་དུ་སྦྱོར་བ་དགོས། །ཉམས་ལེན་ཐུན་སྒོམ་སྐབས་སུ་ཡིད་སུན་ནས། །ཉལ་ལམ་འཆག་འདོད་སྐྱོ་སངས་བྱེད་འདོད་དམ། །བྱ་བ་གཞན་ཞིག་བྱེད་འདོད་སྐྱེས་པའི་ཚེ། །དགེ་སྦྱོར་ཡོང་དང་མི་ཡོང་ས་མཚམས་ནི། །འདི་སྐབས་ཡིན་སྙམ་བྱ་བྱེད་གཞན་བོར་ནས། །སྒོམ་འཇུག་འཐུད་ནས་རྣམ་གཡེངས་སྤོང་བར་བྱོས། །སྐྱོ་སངས་ཡིན་ཀྱང་རྣམ་གཡེངས་དབང་སོང་ན། །དེ་ལ་ཡེངས་ནས་དོན་མེད་ཡུན་རིང་འདའ། །ནད་མང་ལས་ཉམས་ཆུང་ཞིང་ཁམས་དུབ་ན། །ངལ་བསོ་དགོས་མོད་དེ་སྐབས་སེམས་ཀློང་ནས། །བཟོ་བཅོས་མི་བྱ་དྲན་པས་ཟིན་ཙམ་དགོས། །རྣམ་རྟོག་གྱ་གྱུའི་དབང་དུ་མ་ཤོར་བར། །ན་ཚ་ལ་སོགས་གང་ཤར་དེ་ལ་ལྟོས། །ཐུན་དང་ཐུན་མཚམས་དབྱེར་མེད་མཚུངས་པར་འགྱུར། །མི་རྟག་སྡུག་བསྔལ་དྲན་པའི་སྐྱོ་ཤས་དང༌། སྙིང་རྗེ་མཁའ་ཁྱབ་བཅོས་མ་མིན་པ་དང༌། ནམ་ཡང་བརྗེད་མེད་བླ་མའི་མོས་གུས་ཏེ། །འདི་གསུམ་མེད་མི་རུང་བའི་ཡན་ལག་ཡིན། །སྔོན་འགྲོ་སྐྱབས་འགྲོ་སེམས་བསྐྱེད་ཚད་མེད་བཞི། །དངོས་གཞི་ལྟ་བ་དང་ནི་བསྐྱེད་རྫོགས་སྒོམ། །ཡི་རང་བསྔོ་དང་དམ་བཅའ་རྗེས་ཀྱི་གནད། །འདི་རྣམས་མདོ་རྒྱུད་ཀུན་གྱི་སྙིང་པོ་ཡིན། །འགྱུ་བྱེད་ཕྱི་མ་མ་སྐྱེས་སྔ་མ་འགགས། །དེ་


TNT01_Page_0943
[མ་དཔེ་གཟིགས་ན་འདིར་གནོན།]

གཉིས་བར་ན་གང་ཡང་མི་མནོ་ཡང༌། །གསལ་རིག་འགག་པ་མེད་པ་དེ་ཀ་སྐྱོང༌། །དེ་ལ་ངོས་གཟུང་གང་ཡང་ཡོད་པ་མིན། །དགའ་དང་མི་དགའ་བདེ་སྡུག་ཆགས་སྡང་དང༌། །སྙིང་ལ་འབབ་དང་ཞེ་ལ་འཕོག་པའི་གཏམ། །ཐོས་སོགས་སེམས་ཀྱི་འགྱུ་བ་གང་བྱུང་ཡང༌། །རང་ཞལ་བལྟས་ནས་བཟོ་བཅོས་མེད་པར་ཞོག །རང་ངོ་མ་ཤེས་སེམས་རྩ་སྤུན་པོ་ཏེ། །དེ་ལྟར་བརྟགས་ན་ཝལ་པོ་རྗེས་མེད་ཅིག །རང་རིག་དམིགས་གཏད་བྲལ་བ་ཁོ་ན་ཡིན། །རྣམ་རྟོག་མ་སྤངས་རང་སར་དག་ཅེས་གགས། །འདོད་ཆགས་ཞེ་སྡང་ལ་སོགས་རྣམ་རྟོག་གང༌། །ཉོན་མོངས་སྐྱེས་ན་གང་ཤར་ངོས་གཟུང་ལ། །སྒོ་གསུམ་དེ་ཡི་དབང་དུ་མི་གཏོང་བར། །སྐྱོན་དུ་བལྟ་བའང་མི་བྱ་ཐད་སོར་བཞག །ཐོག་མ་ཉོན་མོངས་ལྷང་ངེར་སྣང་ཙམ་ནའང༌། །རིག་ཙམ་བརྗོད་བྲལ་རྗེན་ནེ་གསལ་ལེར་འཆར། །དེ་ནས་ཉོན་མོངས་ཙམ་གྱི་སྣང་བ་དེ། །རང་སར་ལོག་སྟེ་ཡེ་ཤེས་ཆེན་པོ་ལགས། །དེ་རྗེས་སྙིང་རྗེས་ཟིན་པ་གལ་རེ་ཆེ། །དེ་བཞིན་དགེ་བའི་རྣམ་རྟོག་སོགས་ལའང་སྦྱར། །སེམས་ཉིད་གནས་སམ་ཡང་ན་འགྱུ་ཡང་རུང༌། །སྤྲོས་བྲལ་གཤིས་ཀྱི་རྒྱ་ལས་མི་འདའ་འོ། །ཞེས་པ་གང་ཤར་རང་གྲོལ་གྱི་ལྟ་སྒོམ་ལས་བརྩམས་པའི་གཏམ་སྟེ་བཞི་པའོ།། །།འདུ་འཛི་


TNT01_Page_0944
[མ་དཔེ་གཟིགས་ན་འདིར་གནོན།]

མང་སར་དགེ་སྦྱོར་སྐྱེ་བ་དཀོན། །རང་དང་འཚམ་པའི་དབེན་པ་བསྟེན་པ་ལེགས། །བརྟན་པ་མ་ཐོབ་བར་དུ་རྒྱལ་ཁམས་ཀུན། །ཡང་ཡང་འགྲིམས་ན་ལང་ཤོར་དགེ་སྦྱོར་འཆག །རི་ལ་མ་ཚུགས་ཡང་ཡང་ཀླུང་ལ་འབབ། །བཟང་རྫུ་དགོས་པས་ཡང་ཡང་རི་ལ་འགྲོ། །བློ་སྣ་མང་ཞིང་ཆོས་ཁྱད་རླུང་གིས་འཁྱེར། །དེ་ལྟར་མི་བྱ་བློ་རྩེ་འགྱུར་མེད་གཅེས། །སྨོན་ལམ་བཟང་པོའི་མཐུ་ཅན་མ་གཏོགས་པ། །སྡེ་དཔོན་བསྟེན་པ་ཆོས་པའི་བདུད་དུ་ཆེ། ཁྱད་པར་བྱ་བཏང་སྤྲོས་པ་སྤོང་བ་དང༌། །ཕོ་བྲང་འགྲིམ་པ་འགལ་བ་ལྟག་སྤྲོད་ཡིན། །ཧ་ཅང་དག་སྣང་ཆེས་ན་བཅོལ་ཆུང་ཡིན། །ཚོད་རྒྱག་སྐུར་འདེབས་ལོག་ལྟའང་མི་བྱ་སྟེ། །རང་ལ་ང་རྒྱལ་གཞན་ལ་ཁྱད་གསོད་སྤང༌། ཁ་སྤྱད་ངོས་འཛིན་ཐལ་བའང་མི་འཚལ་ལོ། །སད་སེར་བསྲུང་དང་གྲོང་འདྲེ་འདུལ་བ་དང༌། །མོ་རྩིས་སྔགས་དང་སྨན་དཔྱད་གླུད་གཏོར་དང༌། །མངོན་ཤེས་བརྫུས་མས་གཞན་མགོ་མ་སྐོར་ཞིག །སྒོམ་ཆེན་རྣམས་ལ་འདི་རྣམས་བར་ཆད་མང༌། །དོན་མེད་གཤགས་འབྱེད་མང་ན་མི་རྣམས་སྡང༌། །ལྐོག་ལབ་མང་ན་ངན་པའི་གྲལ་དུ་འགྲོ། །ཕྲ་མ་མུ་སྐྱོ་མང་ན་གཞན་སེམས་དཀྲུག །དེ་བས་སྨྲ་བ་སྤངས་ན་ལེགས་པ་ཡིན། །མི་སེམས་ཁྲིད་ཕྱིར་རྫུན་ནི་དམྱལ་བའི་རྒྱུ། །བདེན་པར་


TNT01_Page_0945
[མ་དཔེ་གཟིགས་ན་འདིར་གནོན།]

སྨྲས་ན་མི་རྣམས་སེམས་ཁོང་འཁྲུག །ལོང་གཏམ་དགེ་སྦྱོར་གཅོག་པའི་ཕུང་འདྲེ་ཡིན། །ཆགས་སྡང་སྨྲས་ན་ངག་གི་སྡིག་པར་འགྲོ། །ཉིན་མཚན་དགེ་སྦྱོར་ཁོ་ནར་བརྩོན་དགོས་ཀྱང༌། །མི་མང་འདུས་སར་གསོལ་འདེབས་སྐད་རྒྱང་དང༌། །སྐྱེ་བོའི་མདུན་དུ་ལྟ་སྟངས་འདུག་ཚུལ་སོགས། །ཆོས་བརྒྱད་དབང་གིས་གསང་སྒྲོགས་བྱར་མི་རུང༌། །མངོན་ཚན་ཆུང་ལ་ས་ཆོད་ཆེ་བ་དགོས། །མི་ནག་གྲོང་པའི་སྐྱེ་བོ་ཕོ་མོ་རྣམས། །དད་པ་སྐྱེ་ཕྱིར་རང་རྒྱུད་གྲོལ་མདོག་དང༌། །བྱ་བ་བཏང་ཚུལ་སྙིང་རྗེ་ཆེ་མདོག་དང༌། །ཉམས་རྟོགས་སྐྱེས་པའི་ཆོས་སྐད་རྦད་ཁམ་དང༌། །རྩ་རླུང་ངོམ་ངོམ་བྱེད་པ་དེ་མི་རུང༌། །སྐྱེ་བོ་བསླུས་པས་ཆོས་པའི་ཁྱུ་ནས་བུད། །གསང་སྒྲོགས་རྩ་ལྟུང་འབྱུང་བས་དམ་ཚིག་ཉམས། །རང་རེ་སྤྱོད་པ་ངོ་ལྐོག་མི་བྱ་སྟེ། །གསུས་པ་འགེངས་ཕྱིར་དམྱལ་བར་འགྲོ་ནུས་སམ། །ཚུལ་འཆོས་གཡོ་སྒྱུ་སྤོང་བ་ཤིན་ཏུ་གཅེས། །འོན་ཀྱང་ངོ་ལྐོག་མེད་པ་ཡིན་ཟེར་ནས། །རྩིང་ཆོས་ཕཊ་རལ་དྲན་ཚད་བྱེད་པ་ནི། །བསྟན་པའི་ཞབས་འདྲེན་ཆེ་ཞིག་རང་ཡང་ལྷུང༌། །སྒོ་གསུམ་བྱ་བ་རྣམ་དག་ཁོ་ན་བྱེད། །ངན་པས་གོས་ན་འཕྲལ་དུ་བཤགས་པ་འབུལ། །ཡོ་བྱད་ཀུན་སྤངས་རི་ལ་སྡོང་ཚུགས་ཤིང༌། །རི་པ་བྱ་བཏང་ཞེས་བྱའི་མིང་མེད་པར། །


TNT01_Page_0946
[མ་དཔེ་གཟིགས་ན་འདིར་གནོན།]

གནོད་པ་བྱེད་ལ་ལན་དུ་ཕན་འདོགས་ཀྱང༌། །ང་ནི་བསམ་སྦྱོར་བཟང་ཞེས་མི་ངོམ་ལ། །དམ་ཆོས་མིན་པ་བྱེད་རྒྱུ་མེད་པ་ལ། །ཆོས་པ་བཟང་སྙམ་རློམ་སེམས་མི་བྱེད་ན། །སྒོམ་ཆེན་བཟང་བའི་ཚད་དུ་ཕྱིན་པ་ཡིན། །ཡུལ་དང་བཟང་འཛིན་ཆེ་ཞིང་ཡོན་ཏན་ངོམ། །ཡོན་ཏན་གཞན་ཀུན་འཛོམ་ཡང་ཁོང་རུལ་ལགས། །བྱ་བྱེད་ཐམས་ཅད་ཕན་སེམས་ཁོ་ནས་བྱ། །གཉིད་དང་ཟས་དང་སྤྱོད་ལམ་གཏོར་མ་སོགས། །སོ་སོའི་རྣལ་འབྱོར་རྣམས་ཀྱང་རེལ་མེད་དང༌། གང་ཤར་དྲན་འཛིན་བླ་མའི་མོས་གུས་དང༌། །ངེས་འབྱུང་དད་པ་རྣམས་དང་འབྲལ་མེད་གཅེས། །ལྟ་སྒོམ་སྤྱོད་པ་ཆ་ལུགས་ལ་སོགས་པ། །གཞན་རྣམས་ཀུན་དང་ཧ་ཅང་འགལ་བ་སྤང༌། །ཀུན་དང་མཐུན་ཡང་རང་ལུགས་ཚུགས་པར་འཚལ། །ཕན་སེམས་ཆེ་ཡང་གྲོང་ཁ་མི་འགྲིམ་ཞིང༌། །ལྟག་ཚུགས་བཟང་ཡང་ཀོ་ལོང་མི་དམ་པ། །འདི་དག་ཅིས་ཀྱང་ལག་ཏུ་ལོངས་པར་མཛོད། །ཅེས་པ་ནི་ཆོས་ཉམས་ལེན་གནད་དུ་འགྲོ་བའི་སྤྱོད་པ་ལས་བརྩམས་པའི་གཏམ་སྟེ་ལྔ་པའོ།། །།གཞན་ཡང་རང་གི་དགེ་བ་རྣམས་བྱང་ཆུབ་ཏུ་བསྔོ་བ་ནི། བསྔོ་བྱ་དགེ་རྩ་ཡང་སྒྱུ་མ་ལྟ་བུ། བསྔོ་བྱེད་རང་ཉིད་ཀྱང་སྒྱུ་མ་ལྟ་བུ། བསྔོ་བའི་ངོ་བོ་འབྲས་བུ་ལ་འདུན་ཞིང་སེམས་པ་བསྔོ་བའི་ཚིག་དང་བཅས་པ་ཡང་སྒྱུ་མ་ལྟ་བུ། བསྔོ་བའི་


TNT01_Page_0947
[མ་དཔེ་གཟིགས་ན་འདིར་གནོན།]

འབྲས་བུ་སངས་རྒྱས་ཀྱི་གོ་འཕང་ཀྱང་སྒྱུ་མ་ལྟ་བུ། ཐམས་ཅད་སྣང་སྟོང་གཉྀས་སུ་མེད་པར་ཤེས་པ་དང༌། ཀུན་རྫོབ་རྒྱུ་འབྲས་བསླུ་བ་མེད་པའི་ཡིད་ཆེས་ཀྱི་སྨོན་ལམ་འདེབས་པ་སྟེ། དང་པོར་བཟང་སྤྱོད་སོགས་རྒྱལ་བའི་བཀའ་རྣམས་ཀྱི་ཐོག་དྲངས་ནས། རྗེས་སུ་འདི་སྐད་ཅེས་བྱའོ། །བདག་གིས་དད་པ་ངེས་འབྱུང་སྙིང་རྗེ་དང༌། །བྱང་ཆུབ་སེམས་དང་གནས་ལུགས་སྒོམ་པ་དང༌། །ཕྱག་འཚལ་མཆོད་དང་བསགས་པ་ཡི་རང་དང༌། །ལྷ་སྒོམས་སྔགས་བཟླས་དགེ་རྩ་གང་བགྱིས་དང༌། ཁྱད་པར་སངས་རྒྱས་བྱང་ཆུབ་སེམས་དཔའ་དང༌། ཁྲོ་བོའི་དབང་པོ་རྡོ་རྗེ་ལྷ་མོ་དང༌། །སྐྱེས་མཆོག་བླ་མ་དམ་པའི་སྐུ་གཟུགས་རྣམས། །ཞིག་པ་གསོས་ཤིང་གསར་དུ་བཞེངས་པ་དང༌། །གཙུག་ལག་ཁང་གི་བྱ་བ་བྱས་པ་སོགས། །དུས་གསུམ་བསགས་པའི་དགེ་བ་གང་ཡོད་རྣམས། །འགྲོ་ཀུན་དགེ་དང་སྲས་བཅས་རྒྱལ་བ་ཡི། །རྣམ་དཀར་འཕྲིན་ལས་རྒྱ་མཚོར་ཞུགས་པའི་མཐུས། །བདག་སོགས་མཁའ་མཉམ་སེམས་ཅན་མ་ལུས་པ། །སྒྲིབ་གཉིས་བག་ཆགས་བཅས་པ་གཏན་སྤངས་ནས། །བླ་མེད་བྱང་ཆུབ་མྱུར་དུ་ཐོབ་པ་དང༌། །དེ་སྲིད་གེགས་མེད་བདེ་བའི་རྒྱུར་གྱུར་ཅིག །དུས་གསུམ་སངས་རྒྱས་ཀུན་


TNT01_Page_0948
[མ་དཔེ་གཟིགས་ན་འདིར་གནོན།]

གྱི་བགྲོད་གཅིག་ལམ། །སྟོང་ཉིད་སྙིང་རྗེ་གཉིས་སུ་མེད་པ་ཡི། །ཡེ་ཤེས་དམ་པ་མངོན་དུ་གྱུར་ནས་ཀྱང༌། །ལྷུན་གྱི་གྲུབ་པའི་གཞན་དོན་འབྱུང་གྱུར་ཅིག །ནད་གདོན་བར་ཆད་ཐམས་ཅད་རབ་ཞི་ཞིང༌། །གེགས་དང་གོལ་ས་ཀུན་ལས་རང་གྲོལ་ནས། །ཆོས་དབྱིངས་སེམས་ཉིད་རང་ངོ་རྟོགས་ནས་ཀྱང༌། །དག་པའི་སྣང་བ་རབ་འབྱམས་མཆིད་གྱུར་ཅིག །བདག་ཉིད་མཐོང་ཐོས་རེག་དང་དྲན་པ་རྣམས། །སྔོན་དུ་འགྲོ་བའི་སེམས་ཅན་བགྲང་ལས་ཀུན། །ལས་ཉོན་སྡུག་བསྔལ་མ་ལུས་མྱུར་ཞི་ནས། །བདེ་དགེ་ཕུན་ཚོགས་ཐམས་ཅད་རྒྱས་གྱུར་ཅིག །བླ་མ་ཆོས་སྐུར་མཐོང་བའི་མོས་གུས་དང༌། །གང་ཤར་མ་བཅོས་རང་སར་གྲོལ་པ་དང༌། སྒྲུབ་ལ་བར་ཆད་རྣམ་གཡེང་མེད་པ་དང༌། །ལྷག་བསམ་དག་པས་གཞན་རྒྱུད་གྲོལ་གྱུར་ཅིག །བླ་མ་མཆོག་དང་ནམ་ཡང་མི་འབྲལ་ཞིང༌། །ཡི་དམ་ཀུན་གྱི་བྱིན་གྱིས་བརློབས་པ་དང༌། །བསྟན་བསྲུང་ཐམས་ཅད་བྲན་དུ་ཁོལ་བ་དང༌། །འབྲེལ་ཅན་ཐམས་ཅད་དོན་ཆེན་འགྲུབ་གྱུར་ཅིག །ཅེས་པ་འདི་ནི་བཟོ་གནས་ལེགས་ཤེས་ཤིང༌། །སྒྲུབ་ལ་མོས་པ་དེ་དང་གྲོགས་དག་གིས། །ཡང་ཡང་བསྐུལ་ནས་ཇོ་ནང་དཔལ་གྱི་རིར། །ཏཱ་ར་ནཱ་ཐ་ཞེས་བྱས་སྦྱར་བ་ཡིན།། །།ཞེས་པ་འདི་ནི་ལྷ་བཟོ་བ་བོད་མཁས་པ་དོན་


TNT01_Page_0949
[མ་དཔེ་གཟིགས་ན་འདིར་གནོན།]

གྲུབ་རྒྱལ་མཚན་དང༌། རང་གི་ལྷན་ཅིག་སྤྱོད་པ་གཙང་བ་ཀུན་དགའ་དཔལ་བཟང་གིས་བསྐུལ་ནས་སྨྲས་པའོ། །བཀྲ་ཤིས། །

ས་སྐྱོང་མི་དབང་ཆེན་པོའི་བཀས་བསྐུལ་ནས་ཏཱ་ར་ནཱ་ཐས་སྨྲས་པ།


TNT01_Page_0950
[མ་དཔེ་གཟིགས་ན་འདིར་གནོན།]

ན་མོ་གུ་ར་ཝེ། དྲི་བྲལ་མཁའ་ལ་ཉིན་བྱེད་ཤར་བ་ལྟར། །སྒྲིབ་བྲལ་ཡེ་ཤེས་ཤེས་བྱ་ཀུན་ཁྱབ་དེ། །སྤྲོས་བྲལ་ཐུགས་རྗེའི་རོལ་པར་རྟག་ཤར་བ། །མཚུངས་བྲལ་རྗེ་བཙུན་བླ་མས་བྱིན་གྱིས་རློབས། །ཤེས་བྱའི་མཚན་ཉིད་བསམ་གྱིས་མི་ཁྱབ་ཅིང༌། །ཐ་སྙད་བརྗོད་པ་ཟད་མེད་དཔག་ཏུ་མེད། །ལམ་གྱི་སྟོན་ཚུལ་རྣམ་པ་མང་ན་ཡང༌། །སྙིང་པོ་གནད་ནས་བཟུང་ན་འདི་ལྟར་ལགས། །དད་པ་ཅན་ལ་སྡིག་པའི་གོ་སྐབས་མེད། །ངེས་འབྱུང་ཅན་ལ་ཞེན་ཆགས་ལེ་ལོ་མེད། །མོས་གུས་ཅན་ལ་དཀོན་མཆོག་འདུ་འབྲལ་མེད། །སྙིང་རྗེ་ཅན་ལ་རང་འདོད་ཁོང་སྲན་མེད། །དཀར་ནག་ལས་འབྲས་མི་སླུ་ངེས་ཤེས་བསྐྱེད། །ཚིག་བཤད་མཁས་ཤིང་ཁ་ལྟ་མཐོ་བ་དང༌། །འདུག་ཚུགས་བཟང་ཡང་སྡིག་ལ་མ་འཛེམས་ན། །ངན་སོང་གསུམ་གྱི་གཏིང་རྡོ་ཐང་མ་ཡིན། ཁ་དྲག་དཔུང་འཛོམ་ལོངས་སྤྱོད་ལྡན་པ་ཡང༌། །ལོ་ཟླ་ཞག་འགའ་ཙམ་གྱི་ཕོ་སོ་ཡིན། །ཕ་རོལ་འགྲོ་ཚེ་དབང་མེད་ལས་ཀྱིས་འཁྲིད། །རློམ་སེམས་ཅན་ལ་ཁ་ཉེན་སྐབས་དེར་འབབ། །དགྲ་གཉེན་ནོར་ཁང་གཡོག་


TNT01_Page_0950
[མ་དཔེ་གཟིགས་ན་འདིར་གནོན།]

འཁོར་ལ་སོགས་པ། །རང་དབང་འབྱོར་སྐབས་དག་ལ་སྦྱར་ན་ལེགས། །ངཻས་པར་འབྲལ་ལ་མྱུར་དུ་འོང་ངེས་པས། །དབང་མེད་ཇེ་བྲལ་དེ་ལ་ཕན་ཡོན་ཅི། །ལྷ་མིའི་དཔལ་འབྱོར་ཐོབ་ཀྱང་ཚིམ་པ་མེད། །ཉོན་མོངས་དུག་གསུམ་རྒྱས་པས་ལས་ངན་བསོག །མཐོ་རིས་ཐོབ་དུས་དམྱལ་བའི་བྲེ་ཁ་འགེངས། །བདེ་བ་ཆུང་ངུས་སྡུག་བསྔལ་ཆེན་པོ་བསྒྲུབ། །ཨེ་མ་འཁོར་བའི་རང་བཞིན་དེ་འདྲ་ལ། །ལེགས་པར་བསམས་ན་སུ་ཞིག་ཆགས་པར་འགྱུར། །གྲོགས་དང་ཉེ་དུས་ཕན་པའི་རེ་མེད་ཀྱིས། །སྐྱབས་སུ་བཟང་བ་བླ་མ་དཀོན་མཆོག་ཡིན། །མོས་གུས་ཞན་རྣམས་རང་བློའི་མུན་པས་བསྒྲིབས། །ཡིད་ཆེས་མོས་གུས་སྙེམས་འཁྲིགས་བྲལ་བ་བསྒོམ། །དེ་ལས་ཕུན་ཚོགས་འབྲས་བུ་ཀུན་འབྱུང་སྟེ། །ཆོས་ཀུན་རང་གི་བསམ་པའི་རང་གཟུགས་ཡིན། །ཆོས་ཀྱི་རྩ་བ་བསམ་པའི་འགྲོ་ལྡོག་ལགས། །སྒོ་གསུམ་ཆོས་ལ་འབད་པར་རློམ་ན་ཡང༌། །འཇིག་རྟེན་འཕྲལ་བདེའི་རང་འདོད་མུན་ནག་ན། །ཕྱོགས་ཞེན་ཆོས་ཀྱི་ཆགས་སྡང་འབྱུང་པོ་རོལ། །རང་སེམས་གནས་ལུགས་མ་རྟོགས་ཉོན་མོངས་འཁྲུགས། །ལས་ངན་དབང་གིས་འགྲོ་དྲུག་སྲིད་པར་འཁྱམས། །སྒྱུ་མའི་འཁྲུལ་བས་སེམས་ཅན་འདི་རྣམས་བསླུས། །ང་རྒྱལ་ཁེངས་པ་མི་བྱ་སྙིང་རྗེ་སྒོམས། །


TNT01_Page_0951
[མ་དཔེ་གཟིགས་ན་འདིར་གནོན།]

ད་ནི་སྙིང་པོའི་གནད་ལ་གདམས་པར་བྱ། །རང་སེམས་སྤྲོས་བྲལ་བྱ་བ་ལོགས་ན་མེད། །ཐ་མལ་ཤེས་པ་བཟོ་བཅོས་མེད་པར་སྐྱོངས། །གང་ཤར་རྗེན་པ་དེ་ལ་རང་སོ་ཚུགས། །ཆེད་དུ་བཅོས་པའི་ལྟ་སྒོམ་བཟང་བཟང་པོ། །བློ་ཡིས་བྲིས་པའི་རི་མོ་ཟར་ཟིར་ཡིན། །རང་གི་སྡོད་ལུགས་སྒོམ་དུ་མ་ཤར་ན། །ལོགས་ནས་ཉམས་ལེན་ཚོལ་བ་དབུལ་ཤིང་འཕོངས། །རང་དུས་ཉིད་དུ་རང་གྲོལ་མ་ཤེས་ན། །རྗེས་འདེད་སྐྱེལ་མ་ཙམ་ཏེ་བྱེད་སྐད་ཡིན། །འཆར་སྒོ་སྟོང་པའི་རྩལ་དུ་མ་རིག་ན། །རྒྱས་འདེབས་ཙམ་གྱི་ཐལ་གཡོགས་དེ་ཡིས་ཅི། །མ་རྟོགས་ཁ་ཡན་སྨྱོན་པའི་རྣམ་ཐར་ལ། །མ་བཅོས་སོ་མར་འཁྲུལ་ན་རྩ་བ་འཆུག །ངོས་གཟུང་མེད་པའི་རང་ངོ་མ་མཐོང་ན། །གནས་པ་བཟང་ཡང་གཏི་མུག་མུན་འཐོམས་ཡིན། །བརྗོད་བྲལ་སེམས་ཀྱི་རང་རྩལ་འགག་མེད་དེ། །ཕྱིར་ལྟས་མ་ཤོར་རང་གསལ་ངང་ལ་ཞོག །གང་ཤར་དེ་ཀས་ཆོག་ན་སྒོམ་གྱི་མཆོག །འོན་ཀྱང་དོན་མེད་ལུས་ན་ལུང་མ་བསྟན། །རང་རིག་ནམ་ཡང་འཁྲུལ་ཏུ་མ་འཇུག་ཅིག །འཁྲུལ་ཀྱང་ཆོག་ན་བདེ་བའི་ཡང་རྩེ་ཡིན། །རྟག་ཏུ་བྱ་བྱེད་བདག་པོ་མེད་པར་ཞོག །བྱས་ཀྱང་བྱ་རྒྱུ་ཟད་ན་སྤྲོས་བྲལ་ཡིན། །སྒྲ་ཕྱིར་འབྲངས་པའི་རྟོག་དཔྱོད་


TNT01_Page_0952
[མ་དཔེ་གཟིགས་ན་འདིར་གནོན།]

མི་འཚལ་ཏེ། །བྱེད་བློ་རང་སར་གྲོལ་ན་མཚན་མེད་ཡིན། །གཞག་ཐབས་རྒྱལ་པོ་ལྷུག་པ་རང་དགའ་ལགས། །དབྱིངས་ཉིད་རྩོལ་པར་རག་ན་བཟོ་མེད་མཆོག །གནས་སམ་འགྱུ་ཡང་ཡེངས་མེད་ཐབས་ཀྱི་མཆོག །ཡེངས་པའི་རང་མཚང་རིག་ན་གནས་པའི་མཆོག །དབྱིངས་ལས་རང་ཤར་ཙམ་གྱི་རྣམ་རྟོག་དང༌། །བྱ་བྱེད་རྩོལ་པར་ཤར་ནས་རང་སར་ཐིམ། །དེ་ལྟར་རྟོགས་ན་མ་བཅོས་སོ་མ་ཡང༌། །རང་སར་སངས་ཏེ་བཅོས་དང་མ་བཅོས་མེད། །བསྒོམ་བྱ་སྒོམ་བྱེད་རང་སར་སྟོང་པ་ན། །སྣང་བ་ཐམས་ཅད་སྒོམ་དུ་ཤར་ཞེས་གྲགས། །ད་ནི་དེ་དག་གནང་དུ་འགྲོ་བ་ལའང༌། །ཉམས་ལེན་ཆོས་ཀྱི་བཟོ་ཐབས་ལེགས་པར་འཚལ། །ཨུ་ཚུགས་འཚོང་བའི་ཐག་ཆོད་ཡུས་ཡུས་པོ། །མདོ་མེད་པོ་གཅིག་གོལ་སའི་གཡང་ལ་ལྷུང༌། །ཐ་མལ་ལུས་ལ་གཅེས་འཛིན་སྤོང་བ་དང༌། །སྣང་བ་ཀུན་ལ་བདེན་འཛིན་བཤིག་པ་གཅེས། །བདེན་ཞེན་ཨ་མཐས་ཇེ་དམ་གོང་འཕེལ་ཞིག །གནས་ལུགས་རྟོགས་པར་འདོད་པ་ཤིན་ཏུ་འཁྲུལ། །ཕྱོགས་ཆ་ཟད་པའི་བྱམས་དང་སྙིང་རྗེ་ཡིས། །ཅི་བྱེད་གཞན་གྱི་དོན་དུ་སྦྱར་བར་བྱ། །འགལ་ཕྱོགས་དགྲ་ལ་ཉེས་འདོད་ངན་སེམས་ཅན། །ཞེ་སྡང་ལམ་འཁྱེར་ཟེར་ཡང་འུད་གོག་ཡིན། །


TNT01_Page_0953
[མ་དཔེ་གཟིགས་ན་འདིར་གནོན།]

འདོད་ཞེན་ཉེ་བའི་སྲེད་པས་མི་འཆིང་བར། །ཡིད་འོང་སེམས་ཀྱང་རྨི་ལམ་ལྟ་བུར་ལྟོས། །འདི་ནི་ལྷ་སྟེ་བདག་ལ་ཕན་འདོགས་པས། ཁྱེད་ཀྱིས་སྐྱོབས་ཞེས་རེ་བ་དུང་དུང་དང༌། །འདྲེ་འདིས་བདག་ལ་ངེས་པར་གནོད་དོ་སྙམ། །གནོད་སེམས་འཇིགས་སྐྲག་དོགས་པའི་འདམ་དུ་བྱིང༌། །དེ་དག་སེམས་ཀྱི་སྣང་ཆ་མཉམ་པོ་ལ། །བླང་དོར་དགའ་སྡུག་རང་གིས་རང་ཉིད་བསླུས། །ནད་དང་ཉམས་ང་ཆགས་ཆེ་བྱུང་གིན་དོགས། །མི་འདོད་སྡུག་བསྔལ་སངས་ཏེ་འགྲོ་ལ་རེ། །ཆོས་ཀྱི་འབྲས་བུ་ཚེ་འདིའི་བདེ་སྐྱིད་འདོད། །འདོད་པ་མ་གྲུབ་དཀོན་མཆོག་གསུམ་ལ་འཁང༌། །ཚེ་འདིའི་སྐྱིད་སྡུག་སྔོན་གྱི་ལས་ལས་བྱུང༌། །གང་བྱུང་ཆོག་ཤེས་བྱས་ན་ཞེ་བློ་བདེ། །ཕྱྀན་ཆད་ཆོས་ཀྱི་ཕན་ཡོན་བསླུ་བ་མེད། །བློ་སྣ་གཅིག་ཏུ་དྲིལ་ལ་ཡིད་ཆེས་སྐྱེད། །རང་ལ་ཉམས་མྱོང་ཡོན་ཏན་ཅུང་ཟད་ཙམ། །སྐྱེས་ན་ང་རྒྱལ་འགོང་པོ་རྗེས་སུ་འབྲང༌། །དེ་ལ་རང་ངོ་ཤེས་པའི་ཐོག་རྫིས་དང༌། །ང་རྒྱལ་ཡོད་དོན་མེད་པའི་རྒྱུ་མཚན་བསམ། །སྔོན་གྱི་སྡིག་ལས་ཟད་པར་འགྱུར་བའི་ཕྱིར། །སྡུག་བསྔལ་བྱུང་ན་འདོད་ཐོག་གོ་བཅད་སྙམ། །བློས་འདིས་བཅོས་པ་མ་གཏོགས་སྡུག་བསྔལ་ནི། །དངོས་པོར་


TNT01_Page_0954
[མ་དཔེ་གཟིགས་ན་འདིར་གནོན།]

མ་གྲུབ་རང་ལ་ཆེར་ཏེ་ལྟོས། །དོན་ལ་སྡུག་བསྔལ་གཞི་མེད་རྩ་བྲལ་ཡིན། །ཀུན་རྫོབ་ཏུ་ནི་ལས་སྣང་གང་ཤར་འདི། །བཅས་བཅོས་མི་བྱ་རེ་དོགས་མེད་ན་བདེ། །འོན་ཀྱང་དྲིན་ཅན་བླ་མར་གསོལ་བ་ཐོབ། །མདོར་ན་ལས་འབྲས་ཆོས་ལ་ཡིད་ཆེས་ཤིང༌། །དཀོན་མཆོག་གསུམ་ལ་དད་པ་རྒྱུན་མི་འཆད། །གང་ལའང་མ་ཆགས་རང་ངོ་རང་ཤེས་རྩལ། །སྒོ་གསུམ་ལོངས་སྤྱོད་དགེ་བ་བསོག་རྩི་ཞིང༌། །རྟག་ཏུ་གཞན་ཕན་བསམ་པ་བཟང་པོ་འཆང། །ལྔ་པོ་དེ་ལ་ཆོས་ཀྱི་མདོ་ཀུན་འདུས། །སྨོན་ལམ་དག་པས་རྟག་ཏུ་མཚམས་སྦྱོར་ཞིང༌། །རེ་དོགས་སྤོང་དང་སྐྱབས་གནས་དམ་པ་མཆོད། །ཆོས་འདི་གསུམ་ཡང་གནད་ཀྱི་དོན་ཆེན་ཡིན། །དེ་ལྟར་ཆ་ཙམ་གདམས་པ་འདི་དག་ཀྱང༌། །ཐུགས་སུ་བྱོན་ན་གཏན་གྱི་འདུན་གྲོས་ཡིན། །བས་ན་བླུན་པོའི་རང་མཚང་ལགས་པར་དགོངས། །འདི་ལས་ཅི་སྟེ་དགེ་བར་གྱུར་སྲིད་ན། །སྐྱེ་བོ་ཀུན་ལ་ཐར་པའི་རྒྱུ་རུ་བསྔོ། །བློ་ལྡན་དམ་པ་ཁྱེད་ཀྱི་ཐུགས་མཚོ་ཡང༌། །དམ་ཆོས་བདུད་རྩིའི་ཆུ་བརྒྱས་གང་བར་ཤཽག། །།ཅེས་པའང་རིག་སྔགས་ཀྱི་འཁོར་ལོས་བསྒྱུར་བ། ས་སྐྱོང་མི་དབང་ཆེན་པོའི་བཀས་བསྐུལ་ནས། ཏཱ་ར་ནཱ་ཐས་སྨྲས་པའོ། །དགེ་ལེགས་འཕེལ།། །།

ཟབ་དོན་སྔགས་ཀྱི་ལམ་དང་འབྲེལ་བ་གཙོ་ཆེ་བའི་མགུར་མའི་སྐོར་བཞུགས། །


TNT01_Page_0955
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། ན་མོ་གུ་ར་བེ། རྗེ་མཚན་ལྡན་གྱི་བླ་མ་རིན་པོ་ཆཻ། །རིགས་ཀུན་གྱི་བདག་པོ་རྡོ་རྗེ་འཆང༌། །ཐུགས་ཡེ་ཤེས་ངང་དུ་རྣམ་རོལ་ཡང༌། །འཕྲལ་ཅིར་ཡང་སྟོན་པ་དེ་ལ་འདུད། །རྗེ་རིན་ཆེན་སྐུ་ལ་ཕྱག་འཚལ་ལོ། །རྗེ་རིན་ཆེན་སྐུ་ཡིས་བྱིན་གྱིས་རློབས། །རྗེ་རིན་ཆེན་སྐུ་ལ་སྐྱབས་སུ་མཆི། །ལུས་རྡོ་རྗེའི་སྐུ་རུ་བྱིན་གྱིས་རློབས། །རྗེ་རིན་ཆེན་གསུང་ལ་ཕྱག་འཚལ་ལོ། །རྗེ་རིན་ཆེན་གསུང་གིས་བྱིན་གྱིས་རློབས། །རྗེ་རིན་ཆེན་གསུང་ལ་སྐྱབས་སུ་མཆི། །ངག་གྲག་སྟོང་རྡོ་རྗེའི་གསུང་དུ་མཛོད། །རྗེ་རིན་ཆེན་ཐུགས་ལ་ཕྱག་འཚལ་ལོ། །རྗེ་རིན་ཆེན་ཐུགས་ཀྱིས་བྱིན་གྱིས་རློབས། །རྗེ་རིན་ཆེན་ཐུགས་ལ་སྐྱབས་སུ་མཆི། །ཐུགས་ཡིད་དབྱེར་མེད་འདྲེ་བར་བྱིན་གྱིས་རློབས། །གནས་ཡང་དགོན་དཔལ་གྱི་དགོན་པ་རུ། །དུས་དེ་རིང་བཀྲ་ཤིས་ཡ་མཚན་ཚེས། །མ་མཁའ་འགྲོ་འདུས་པའི་ཚོགས་མཆོག་འདིར། །སྤྲང་བདག་གིས་ཉམས་དབྱངས་གླུ་རུ་ལེན། །མི་བདག་ལ་ཡོན་ཏན་མ་མཆིས་ཀྱང༌། ཁོང་རྩ་བརྒྱུད་བླ་མ་ཐུགས་རྗེ་ཅན། །བྱིན་རླབས་ནུས་མཐུ་དཔག་མེད་ཚོས། །བྱིན་གྱིས་རླབས་པས་སྐྱིད་གཅིག་ཤར། །གང་


TNT01_Page_0956
[མ་དཔེ་གཟིགས་ན་འདིར་གནོན།]

སྣང་བདེ་བའི་རྣལ་འབྱོར་པ། །དེ་རིང་དགའ་བའི་གླུ་གཅིག་ལེན། །རྗེ་བླ་མ་བྱིན་རླབས་མི་ཆེ་རུ། །རང་སེམས་ཆོས་ཀྱི་སྐུ་དང་མཇལ། །ངེད་སློབ་བུ་མོས་གུས་མི་ཆེ་རུ། །སེམས་ཅན་སངས་རྒྱས་དངོས་སུ་བཏང༌། །སྤྲང་ཐ་ཅུང་བདག་སྡུག་ཞེན་མི་ཆེ་རུ། །རྗེ་ཁྱོད་ཀྱི་བཀའ་དྲིན་ལ་འཁོར་ཐབས་མེད། །ཆོས་གདམས་ངག་ལ་ཡིད་ཆེས་མི་སྐྱེ་རུ། །ཉམས་དང་མྱོང་བ་འཕྲལ་དུ་ཐོན། །དོན་གནས་ལུགས་ལ་ངེས་ཤེས་མི་སྐྱེ་རུ། །རང་བཞིན་གཤིས་ལ་འགྱུར་བ་མེད། །བདག་རྒྱུད་པ་མི་ངན་རྒྱུད་པ་བཟང༌། །བརྒྱུད་པ་རྡོ་རྗེ་འཆང་ལ་ཐུག །ལྗོངས་འཕགས་པའི་ཡུལ་ན་སྒྲ་ཆེ་བ། ཁོང་གྲུབ་པའི་དབང་ཕྱུག་ཉི་ཤུ་གསུམ། །ཡོངས་ཤིང་རྟ་ཆེན་པོ་བཅུ་དྲུག་སོགས། །བྱིན་རླབས་ཀྱི་བཀའ་བབས་ཆུ་བོའི་རྒྱུན། །གཅིག་ཏུ་འདུས་པའི་རྒྱ་མཚོ་སྟེ། །དུས་དེང་སང་ས་གཞིའི་སྟེང་འདི་ན། །མཚན་སྙན་གྲགས་སྲིད་པ་གསུམ་དུ་ཁྱབ། ཁོང་མཁས་གྲུབ་ཀུན་གྱི་གཙུག་རྒྱན་ཏེ། །ལྷ་འབྱུང་པོ་ཀུན་གྱིས་ཞབས་ལ་བཏུད། །རྗེ་ཞི་བ་སྦས་པ་མ་ལགས་སམ། །མགོན་དེ་ཡི་ཐུགས་ཀྱི་སྲས་གཅིག་པུ། །ཆོས་མན་ངག་མ་ལུས་ཐུགས་སུ་ཆུད། །སྔོན་ལས་འཕྲོ་སད་པས་གྲུབ་ཆེན་མཇལ། །དོན་ཉམས་སུ་བཞེས་པས་ཡེ་ཤེས་བརྙེས། །


TNT01_Page_0957
[མ་དཔེ་གཟིགས་ན་འདིར་གནོན།]

སྤྲོས་མེད་སྤྲཽད་པས་འགྲོ་དོན་མཛད། །རང་རྡོ་རྗེ་འཆང་གི་གོ་འཕང་བརྙེས། །ཕྱོགས་རིས་མེད་པའི་འགྲོ་བ་ལ། །ཐུགས་སྙིང་རྗེས་འགྲོ་དོན་རྒྱུན་ཆད་མེད། །ཡོངས་སངས་རྒྱས་ཟེར་ན་ཁྱོད་ལ་ཟེར། །མཚན་བུདྡྷ་ནཱ་ཐ་མ་ལགས་སམ། །ངེད་གདམས་ངག་མི་ངན་གདམས་ངག་ཟབ། །གདམས་ངག་རྒྱལ་བའི་དགོངས་དོན་ཡིན། །ལར་རྒྱུད་སྡེ་བཞི་ཡི་ཁོང་སྙིང་ཏེ། །སྐལ་ལྡན་ལ་ལའི་བསོད་ནམས་ལས། །གཞན་ང་རྒྱལ་ཅན་གྱི་སྤྱོད་ཡུལ་མིན། །ཕྱོགས་འཛིན་ཅན་ལ་ག་ལ་ཡོད། །མི་ཁོ་བོའི་བསོད་ནམས་ལས་འཕྲོ་ལ། །སངས་རྒྱས་ཤོང་བའི་བསོད་ནམས་བྱུང༌། །བླ་མ་སངས་རྒྱས་དང་མཇལ་བའི་བསོད་ནམས་བྱུང༌། །ད་ལྟ་སྣང་བ་སྣང་སྟོང་ལ། །རང་བཞིན་མེད་པའི་གུ་ཡངས་པོ། །ལྷ་སྐུ་རང་སྣང་འགག་པ་མེད། །གང་ཤར་དག་པའི་སྣང་བ་ཞིག །འདི་ཉིན་མཚན་ཀུན་ཏུ་གནད་དུ་ཆེ། །སྐྱེད་རིམ་ཐམས་ཅད་སྤྲོས་མེད་ཀྱི་ངང༌། །མིང་ལ་སྤྲོས་བཅས་བྱ་བ་མེད། །གྲགས་སྟོང་སྔགས་ཀྱི་བཟླས་པ་སྟེ། །འཆར་སྒོ་དམིགས་པའི་འཕྲུལ་གྱི་གནད། །འཕྲིན་ལས་ལྷུན་གྲུབ་ངོ་མཚར་ཆེ། །གཞན་མཚན་བཅས་ཀྱི་བཟླས་པ་ཡ་རེ་ཆ། །རྗེ་སངས་རྒྱས་དངོས་ཀྱི་གདམས་ངག་ལས། །མི་བདག་


TNT01_Page_0958
[མ་དཔེ་གཟིགས་ན་འདིར་གནོན།]

གིས་རླུང་སེམས་དབང་དུ་འདུས། །འཕྲལ་ལས་རླུང་འཁོར་བའི་རྒྱུ་འདི་ཉིད། །དབྱིངས་མཁའ་དང་མཉམ་པའི་ངང་དུ་ཐིམ། །རླུང་དབུ་མར་ཐིམ་པ་འདི་ལ་ཟེར། །རགས་པ་མ་དག་འཁྲུལ་སྣང་འདི། །ཕྲ་མོ་རང་བྱུང་དབྱིངས་སུ་ཐིམ། ཁོང་སྐྱེ་བོ་གཞན་ལ་འཁྲུལ་སྣང་འདི། །གཟུང་འཛིན་གཉིས་ཀྱི་སྣང་བ་འདི། །སྔར་ཡང་འཁྲུལ་ལ་ད་ཡང་འཁྲུལ། །དེ་ང་ལ་དག་པའི་སྣང་བར་གདའ། །གཉིས་མེད་ཟུང་འཇུག་སྣང་བར་གདའ། །སྔོན་ནས་གྲོལ་ལ་ད་ཡང་གྲོལ། །གཞི་འགྱུར་མེད་དག་སྣང་ལམ་མེ་བ། །གང་ཤར་རྗེན་ནེ་ཆེ་རེ་བ། །ང་རྒྱ་འབྱམས་ཀྱི་རྣལ་འབྱོར་ཉམས་རེ་དགའ། གུ་ཡངས་རྣལ་འབྱོར་བློ་རེ་བདེ། ཁོང་སྡུག་རྩིར་མཁན་ཀུན་ཡི་རེ་མུག །སེམས་གནས་ཀྱང་སྟོང་པར་ལྷན་ནེ་གདའ། །ཡིད་འགྱུ་ཡང་སྟོང་པར་ཤར་རེ་གདའ། །ཕྱོགས་སུ་མ་ལྷུང་རྒྱར་མ་ཆད། །རྨི༵་ལ༵མ་འཁྲུལ་པའི་ཟར་ཟིར་འདི། །མི་ཕལ་པ་རྣམས་ལ་ཉིད་འཁྲུལ་ཏེ། །ངེད་གདམས་ངག་ཅན་ལ་དངོས་གྲུབ་གདའ། །སྔགས་བྱེ་བ་དུང་འགྱུར་བཟླས་བརྗོད་ཀྱི། །ཧཱུཾ་ཧཱུཾ་ཕཊ་ཕཊ་འདྲེ་གདོན་འདུལ། །འདྲེ་རང་ལ་ཡོད་པ་རྩད་མ་ཆོད། །རྨི་ལམ་འཁྲུལ་པ་ལ་བདེན་པར་འཛིན། །རང་སེམས་རྨི་ལམ་ཡུལ་ཡུལ་ཡོང༌། །གནས་སྐབས་བར་ཆད་ཐམས་ཅད་སེལ། །རྒྱལ་བའི་ལྷ་སྐུར་རང་ཤར་འདི། །


TNT01_Page_0959
[མ་དཔེ་གཟིགས་ན་འདིར་གནོན།]

རྨི་ལམ་ལ་འདུན་པ་གནད་དུ་ཆེ། །གཉིད་འཐུག་པོ་གཏི་མུག་མུན་པ་དེ། ཁོང་ཕལ་པ་ལ་སྒྲིབ་པ་རུ་ཆེ་བ་དེ། །ངེད་གདམས་ངག་ཅན་ལ་འོད་གསལ་དུ་གདའ། །འོད་གསལ་ཆོས་སྐུའི་ངོ་བོར་གདའ། །ཆོས་སྐུ་དངོས་པོའི་གཤིས་སུ་གདའ། །གཤིས་ལུགས་བདེ་བ་ཆེན་པོར་གདའ། །རླུང་སེམས་དབྱེར་མེད་ནམ་མཁའི་ངང༌། །ལྟེ་བའི་དམར་ཆ་དབུ་མར་འབར། །ཧཾ་ཡིག་བྱང་སེམས་ཆད་མེད་འབབ། །རྩོལ་མེད་དགའ་བཞིའི་ཉམས་མྱོང་འདི། །རང་བྱུང་ཐིག་ལེ་རང་འགགས་གཅིག །འདི་གསང་སྔགས་སྒོམ་ན་གནད་དུ་ཆེ། །ཚེ་གཅིག་གི་སངས་རྒྱས་ལ་མེད་ཐབས་མེད། །སྤྱི་ཕྱག་རྒྱའི་རྣལ་འབྱོར་ལ་གནད་དུ་ཆེ། །དགོས་ལས་རྒྱ་བསྟེན་ན་གནད་དུ་ཆེ། ཁོང་གདམས་ངག་མེད་པ་རྫས་ལ་རེ། །ང་ཕྱི་ལ་སངས་རྒྱས་ག་ལ་རེ། །གདམས་ངག་མེད་པ་ཚོ་སྙིང་རེ་རྗེ། །རང་ཆེ་འདོད་ཅན་ལ་སྙིང་ཡང་ཚིམ། །ལམ་སྒོམ་པས་ཉོན་མོངས་ཕལ་པར་སོང༌། །ངན་སོང་དུ་འཁྱམ་དགོས་ཚེ་སྙིང་རེ་རྗེ། །མི་བདག་ལ་ཐམས་ཅད་བདེ་བའི་ངང༌། །ཞུ་བདེ་དང་རང་བཞིན་དབྱེར་མེད་དུ་འདྲེས། །ད་གང་ལྟར་བྱས་ཀྱང་ལམ་དུ་གདའ། །སེམས་གནས་ལུགས་འགྱུར་བ་མེད་པ་དང༌། །ཡིད་བླ་མའི་མོས་གུས་འགྱུར་མེད་དང༌། རྟེན་རང་ལུས་ཐིག་ལེ་འགྱུར་མེད་དེ། །འགྱུར་མེད་


TNT01_Page_0960
[མ་དཔེ་གཟིགས་ན་འདིར་གནོན།]

རྣམ་གསུམ་གྱི་རྣལ་འབྱོར་བློ་རེ་བདེ།། །།ཞེས་པའང་བསམ་གཏན་སྡིངས་སུ་ཚོགས་ཀྱི་འཁོར་ལོའི་སྐབས་སུ་རྡོ་རྗེའི་གླུར་བླངས་པ་སྟེ། རང་ལོ་ཉེར་ལྔར་ཉེ་བ་ཚེས་བཅུ་བདུན་གྱི་མཚན་མོའི་ཐུན་དང་པོ་ལ་སྟེ། མངྒལཾ། །

བཀའ་མདོ་རྒྱུད་ཀྱི་གནད་དོན་མ་ལུས་པའི་དོན་སྙིང་པོར་དྲིལ་བ།


TNT01_Page_0961
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། རང་བཞིན་གདོད་ནས་འགྱུར་མེད་ལ། །མཁྱེན་རྟོགས་ཀྱི་ཡོན་ཏན་ཕྱོགས་བཅུར་རྒྱས། །དུས་གསུམ་སངས་རྒྱས་ཀྱི་ངོ་བོ་ཉིད། །ཕ་རྩ་བའི་བླ་མའི་ཞབས་ལ་འདུད། །ཕྱོས་བཅུ་དུས་གསུམ་གྱི་སངས་རྒྱས་ཀུན། །དབྱིངས་ཡེ་ཤེས་ཆེན་པོར་གཅིག་བསྡུས་པ། །དཔལ་དྲུག་པ་རྡོ་རྗེ་འཆང་ཆེན་གྱིས། །ཆོས་ཕུང་པོ་བརྒྱད་ཁྲི་བཞི་སྟོང་དང༌། །བཀའ་གསུང་རབ་ཡན་ལག་བཅུ་གཉིས་ཀྱི། །དོན་ངེས་གསང་སྙིང་པོར་དྲིལ་བ་ནི། །སྔགས་རྒྱུ་སྡེ་བཞི་པོ་གསུངས་སོ་སྐད། །མཐར་ཐུག་གི་འབྲས་བུ་མངོན་བྱེད་པ། །བླ་མེད་ཀྱི་ཐཻག་པ་ཁོ་ན་ལགས། །སྤྱིར་རྣལ་འབྱོར་ཆེན་པོ་རྒྱ་ཆེ་ཞིང༌། །དགོས་རྣལ་འབྱོར་མ་རྒྱུད་ཟབ་པའི་ཕུལ། །ཡོངས་རྒྱལ་བས་གསུངས་པའི་རྒྱུད་ཀུན་གྱི། །ཟབ་དོན་གྱི་ངེས་གསང་མཐར་ཐུག་ཀུན། །གང་སྦས་གསང་མེད་པར་གསལ་བར་བསྟན། །དོན་ཁྱད་པར་བཞི་པའི་ཡེ་ཤེས་དེ། །དུས་གསུམ་སངས་རྒྱས་ཀྱི་བགྲོད་གཅིག་ལམ། །དེ་ཇི་བཞིན་མ་འདྲེས་གསལ་བར་གསུངས། །མཚན་རྣལ་འབྱོར་མའི་རྒྱུད་རྒྱལ་པོ། །


TNT01_Page_0961
[མ་དཔེ་གཟིགས་ན་འདིར་གནོན།]

འདུས་པ་དོན་དམ་ཞེས་ཡོངས་སུ་གྲགས། །སྔོན་བསྐལ་པ་དཔག་མེད་སྔོན་རོལ་དུ། །དབུགས་དབྱུང་རྣམ་གཉིས་ཀྱི་དཀྱིལ་འཁོར་བསྟན། །སྒྲོལ་མའི་རྒྱུད་རྒྱལ་གསུངས་ཞེས་བཤད། ཁྱད་པར་མི་མཇེད་ཀྱི་འདྲེན་པ་མཆོག །མཚན་ཤཱཀྱ་སེང་གེས་ཟབ་པའི་དོན། །ཆོས་རྡོ་རྗེ་ཐེག་པ་འདི་གསུངས་ནས། །སླར་ལྷ་ཀླུ་རིག་འཛིན་ཀུན་ལ་གཏད། །དུས་ཕྱི་མར་སྔགས་ཀྱི་གདུལ་བྱ་རྣམས། །ལྷོ་འཛམ་བུ་གླིང་དུ་དར་བའི་ཚེ། །རྒྱུ་ཀུན་གྱི་རྒྱལ་པོ་འདི་ཡང་ཕེབས། ཁྱད་པར་འདི་ཉིད་ཀྱི་དབང་དུ་ན། །སྔོན་གྲུབ་ཐོབ་ཏི་ལི་ཆེན་པོ་ནས། །མི་ཁོའི་བླ་མ་ཡན་ཆད་དུ། །གྲུབ་ཐོབ་འབའ་ཞིག་མ་གཏོགས་པ། །སོ་སོ་སྐྱེ་བོས་བར་མ་ཆོད། ཁྱད་པར་རྩོད་ལྡན་ཕྱི་མའི་དུས། །མཐའ་དག་འགྲོ་བའི་འདྲེན་པ་ནི། །མཚན་བརྗོད་པར་དཀའ་བ་ཞི་བའི་ཞབས། ཁོང་ཧེ་རུ་ཀ་དཔལ་དངོས་སུ་བཞུགས། །རྗེ་དེ་ཉིད་ཀྱི་ཐུགས་ཀྱི་གསང་མཛོད་ཅན། །སངས་རྒྱས་ཀུན་འདུས་ཀྱི་རྡོ་རྗེ་འཆང༌། །མཚན་སྙན་པོ་སངས་རྒྱས་སྦས་པ་སྟེ། །མི་ཁོ་བོའི་བསོད་ནམས་དཔལ་དུ་བྱོན། །རྒྱུད་ཀུན་གྱི་ཉམས་ལེན་མདོར་བསྡུ་ན། །སྨིན་བྱེད་ཀྱི་དབང་དང་གྲོལ་བྱེད་ཀྱི་ལམ། །སེམས་རང་བཞིན་གདོད་མའི་སྐུ་བཞི་པོ། །ཐབས་ཆོ་གའི་འཕྲུལ་གྱིས་སྒྲིབ་སྦྱངས་ཏེ། །མཐར་སྐུ་


TNT01_Page_0962
[མ་དཔེ་གཟིགས་ན་འདིར་གནོན།]

བཞིའི་ས་བོན་འདེབས་པ་ལ། །མཚན་སྨིན་བྱེད་དབང་བསྐུར་ཞེས་པ་ཡིན། །བརྡའ་རྡུལ་ཚོན་ལ་སོགས་དཀྱིལ་འཁོར་དང༌། །དོན་རང་ལུས་རྒྱལ་བའི་དཀྱིལ་འཁོར་དུ། །གང་ཤར་རྒྱལ་བ་རིགས་ལྔ་ངོ་སྤྲོད་པ། །འདི་བུམ་དབང་གི་གནད་དུ་ཁོ་བོས་འཁུམས། །ངག་ཚིག་གི་བརྗོད་པ་སྣ་ཚོགས་འདི། །དོན་བརྗོད་བྲལ་དབྱིངས་སུ་ངོ་སྤྲད་ནས། །གསུང་རྡོ་རྗེའི་ས་བོན་འདེབས་པ་ལ། །མིང་གསང་བའི་དབང་དུ་བཏགས་པ་ལགས། །སེམས་རང་བཞིན་བརྗོད་བྲལ་མི་འགྱུར་པ། །གཞི་གདོད་མའི་བདེ་ཆེན་ལྷན་ཅིག་སྐྱེས། །དེ་ཇི་བཞིན་གསལ་བར་ངོ་སྤྲོད་པ། །དབང་གསུམ་པ་ཤེས་རབ་ཡེ་ཤེས་ལགས། །སེམས་བརྗོད་བྲལ་སྤྲོས་པ་ཀུན་སྤངས་པ། །ཡོད་མེད་དང་བླང་དོར་ཀུན་ལས་གྲོལ། །གསལ་སྟོང་དང་བདེ་བས་མ་བཅིངས་པ། །རང་གྲོལ་འདི་བཞི་པའི་ཡེ་ཤེས་ལགས། །གྲོལ་བྱེད་ཀྱི་ཉམས་ལེན་རིམ་པ་གཉིས། །མིང་གཞན་དུ་རྣལ་འབྱོར་བཞི་ཞེས་གྲགས། །དེ་སྔགས་ཀྱི་སྤྱོད་པས་མཚམས་སྦྱར་ནས། །མཐར་སྐུ་གསུམ་ཡེ་ཤེས་ལྔ་ལ་སྦྱོར། །འཁྲུལ་སྣང་ཕུང་ཁམས་སྐྱེ་མཆེད་འདི། །སྣང་སྟོང་དབྱེར་མེད་ལྷ་ཡི་སྐུ། །དག་སྣང་གི་འཁོར་ལོ་བསྒྱུར་པ་ལ། །རྣལ་འབྱོར་དང་པོ་ཞེས་སུ་བཏགས་པ་ཡིན། །རང་བཞིན་བརྗོད་བྲལ་ལྷུན་གྲུབ་ལ། །རྐྱེན་


TNT01_Page_0963
[མ་དཔེ་གཟིགས་ན་འདིར་གནོན།]

བླ་མའི་མན་ངག་ཐབས་མཆོག་གིས། །དོན་རྩ་བྲལ་ཉིད་དུ་སྟོན་པ་ལ། །ལམ་རྗེས་སུ་རྣལ་འབྱོར་ཞེས་སུ་བཏགས། །རྩ་གཡས་གཡོན་རོ་རྐྱང་གི་རྒྱུ་བ་ཀུན། །ནང་ཨ་བ་དྷཱུ་ཏཱིར་ལེགས་བཅིངས་ནས། །རྐྱེན་ལས་ཀྱི་ཕྱག་རྒྱས་བདེ་སྒྲུབ་པ། །མིང་ཤིན་ཏུ་རྣལ་འབྱོར་བྱའོ་སྐད། །དབྱིངས་མཁའ་ལ་འཇའ་ཚོན་ཤར་བ་ལྟར། །འཕྲལ་སྣང་བ་མ་འགགས་ཡེ་ཤེས་སྐུ། །དོན་ཐམས་ཅད་སྟོང་པ་འོད་གསལ་དང༌། །མཐར་ཟུང་འཇུག་གི་རྣལ་འབྱོར་ལ་སྦྱར་བ་ནི། །ཡོངས་མཐར་ཐུག་རྣལ་འབྱོར་ཆེན་པོ་སྟེ། །རྐྱེན་རྩ་རླུང་ཐིག་ལེའི་རྟེན་འབྲེལ་ལས། །གཞི་ལུས་ངག་ཡིད་གསུམ་དག་བྱེད་པ། །འདི་གནས་སྐབས་རྣལ་འབྱོར་ཆེན་པོ་ཡིན། །སྤྱིར་གསང་སྔགས་འདོད་ཡོན་ལམ་བྱེད་དང༌། །དགོས་འཕྲལ་སྤྱོད་ཆོས་བརྒྱད་རོ་སྙོམས་པ། །རྐྱེན་སྤྱོད་པ་གསུམ་གྱི་རྟེན་འབྲེལ་ལས། །མཐར་དངོས་གྲུབ་མཆོག་ལ་བར་མེད་སྦྱར། །ལུས་གནས་གྱུར་གྱི་སྤྲུལ་སྐུ་དང༌། །ངག་གནས་གྱུར་གྱི་ལོངས་སྐུ་དང༌། །རང་སེམས་གནས་གྱུར་ཆོས་ཀྱི་སྐུ། །དབྱེར་མེད་བདེ་བ་ཆེན་པོའོ། །བཀའ་མདོ་རྒྱུད་ཀྱི་གནད་དོན་མ་ལུས་པ། །དོན་སྙིང་པོར་དྲིལ་བ་རྒྱུད་འདི་ཡིན། །རྒྱུད་ཀུན་གྱི་དོན་ཡང་དེ་ཙམ་སྟེ། །དེ་ལྟར་ཐུགས་ལ་གཞོག་པར་ཞུ།། །།བཀྲ་ཤིས།། །།དགེའོ།། །།

བདག་འཛིན་དགྲ་བགེགས་བཏུལ་བའི་མགུར།


TNT01_Page_0964
[མ་དཔེ་གཟིགས་ན་འདིར་གནོན།]

ཨོཾ་ཡ་མཱ་རི་དེ་བ་མཎྜ་ལ་ན་མ་སྟུ་བྷྱཾ། བླ་མ་གཤིན་རྗེ་གཤེད་པོ་ལ། །གུས་པས་ཡིད་ཀྱིས་ཕྱག་འཚལ་ལོ། །ཐོག་མེད་དུས་ནས་བགེགས་བྱེད་པའི། །ང་བདག་འགོང་པོ་རླག་པར་མཛོད། །དུས་ལ་བབ་པོ་ཐུགས་བརྩེར་མཛོད། །གཏི་མུག་མུན་པས་སྒྲིབས་པས་ན། །སེམས་ནི་འདོད་ཆགས་རྒྱ་མཚོར་ལྷུང༌། །ང་རྒྱལ་རྦ་རླབས་ཤུགས་ཀྱིས་གཡེང༌། སེར་སྣའི་མདུད་པས་དམ་དུ་བཅིངས། །ཞེ་སྡང་དྲག་པོ་མེ་ལྟར་འབར། །ཕྲག་དོག་རླུང་གིས་ཕྱོགས་ཀུན་ཁྱེར། །དུས་དང་གནས་སྐབས་འདི་ལྟ་བུར། །གཞན་ནི་སུ་ལ་རམ་མདའ་སྦྲོན། །བདག་ཅག་རང་ཉིད་བརྩོན་འགྲུས་ཀྱིས། །རྫུ་འཕྲུལ་རྐང་པ་ཐོབ་དུས་ན། ཁྱེད་ཀྱི་ཐུགས་རྗེས་ཅི་ཞིག་འཚལ། །ལས་ཀྱི་ཤུགས་ནི་སྟོབས་ལྡན་པ། །རྒྱལ་བས་སྐྱོབ་པར་མི་འཚལ་ན། །ལས་ངན་མེད་པར་སྡུག་བསྔལ་ནི། །གང་ན་སུ་ལའང་ཡོད་མིན་པས། །སྐྱབས་གནས་ཀྱིས་ནི་ཅི་ཞིག་བྱ། །གཟིགས་ཤིག་གཟིགས་ཤིག་དུས་ལ་བབ། །ཡལ་ཡོལ་བཏང་སྙོམས་མ་མཛད་པར། །སྡུག་བསྔལ་སེམས་ཅན་རྣམས་ལ་གཟིགས། །མར་གྱུར་འགྲོ་ལ་གཟིགས་སུ་གསོལ། །བསྐལ་པའི་བར་དུ་དམྱལ་མེ་ཚ་བས་བསྲེགས། །ད་དུང་ལས་ངན་ཆ་ཙམ་མ་ཟད་པར། །སྡུག་བསྔལ་སྡུག་བསྔལ་རྒྱུད་མར་


TNT01_Page_0965
[མ་དཔེ་གཟིགས་ན་འདིར་གནོན།]

མྱོང་བ་ཡི། །ཕ་མ་རྣམས་ལ་ཐུགས་རྗེས་གཟིགས་སུ་གསོལ། ཁྱེད་ཀྱི་ཐུགས་རྗེའི་འོད་ཟེར་རེ་རེས་ཀྱང༌། །སེམས་ཅན་གྲངས་མེད་གྲོལ་བར་མཛད་ཅེས་ཐོས། །བདག་འཛིན་གདོན་གྱིས་རླམས་པའི་མ་རྒན་རྣམས། །ད་དུང་འཁོར་བར་འཇོག་གམ་གཟིགས་སུ་གསོལ། །ལྟོ་ཁམ་ཙམ་གྱི་ཕྱིར་དུ་ཕ་མའང་གསོད། །རང་ལ་ཁབ་ཙམ་ཟུག་ཀྱང་མི་བཟོད་ཅིང༌། །གཞན་ལུས་དུམ་བུར་གཏོང་བའི་ཕོད་ཁམ་ཅན། །གཅེས་འཛིན་གདོན་གྱིས་ཁྱེར་རྣམས་སྙིང་རེ་རྗེ། །རང་ནོར་ཏིལ་འབྲུ་ཙམ་ཡང་སྦྱིན་མི་ཕོད། །གཞན་ནོར་འཕྲོག་ལ་དགའ་བའི་བློ་ཉེས་པོ། །བཟོད་བསྲན་ཆུང་ལ་ཧམ་པ་ཆེ་བ་ཡི། །སྐྱེ་བོ་རྨོངས་པ་འདི་རྣམས་སྙིང་རེ་རྗེ། །དཀོན་མཆོག་གསུམ་གྱི་ནོར་རྫས་འཕྲོག་ལ་དགའ། །འདི་ཕྱི་ཀུན་ཏུ་སྡུག་བསྔལ་ཁོ་ནའི་གཡོས། །འདུན་མ་གཏིང་ནས་ཉེས་ཀྱང་སྐྱིད་པོར་འཁྲུལ། །སྙིངས་དུས་སྐྱེ་བོ་རྣམས་ཀྱི་འཁྲུལ་ཚབས་ལ། །སྐུ་གཟུགས་གླེགས་བམ་བཤིག་པའི་ལོངས་སྤྱོད་ཀྱིས། །རང་གཞན་བསྡེབས་ནས་དམྱལ་བར་འགྲོ་བ་ལ། །ཕོ་གྲུང་མོ་གྲུང་ཡིན་སྙམ་འཁྲུལ་ཚབས་ལ། །སྙིང་མེད་བདག་ཀྱང་སྙིང་རྗེ་གཏིང་ནས་སྐྱེས། ཁ་ཙམ་མཛེས་མཛེས་སྙན་སྙན་མིན་པར་སྐྱེས། །ལས་ངན་དབང་གིས་སྡུག་བསྔལ་ཡོད་ཚད་མྱོང༌། །


TNT01_Page_0966
[མ་དཔེ་གཟིགས་ན་འདིར་གནོན།]

སྡུག་བསྔལ་བྱུང་ཡང་ད་དུང་སྡིག་རང་བསོག །སྤྱང་པོར་རློམ་པའི་གླེན་པ་སྙིང་རེ་རྗེ། །དེ་ལྟར་ཉེས་པ་ཐམས་ཅད་ཀྱི། །རྩ་བ་བདག་འཛིན་དམ་པས་ལན། །གཞན་ལ་ཐེས་མེད་བསམ་པ་དང༌། །རང་ལ་གཅེས་འཛིན་འགོང་པོ་འདི། །ད་ལྟ་ཉིད་དུ་ཚར་ཆོད་ཅིག །མྱུར་བ་ཉིད་དུ་རླག་པར་མཛད། །དེ་རིང་གཏན་གྱི་དགྲ་འདི་ཐུལ། །དེ་རིང་གཏན་གྱི་གདོན་འདི་ཐུལ། །བརྩོན་འགྲུས་བསྐྱེད་ལ་ད་ལྟ་ཐུལ། །བཏང་སྙོམས་མ་མཛད་ད་ལྟ་ཆོམས།། །།ཞེས་པའང་ཏཱ་ར་ནཱ་ཐས་སྨྲས། །བདག་འཛིན་དགྲ་བགེགས་ཐུལ་བར་ཤོག །མངྒལཾ། །

འབྲེལ་མེད་ཀྱི་གླུ་བཞུགས་སོ། །


TNT01_Page_0967
[མ་དཔེ་གཟིགས་ན་འདིར་གནོན།]

༈ འབྲེལ་མེད་ཀྱི་གླུ་ཞེས་བྱ་བ་སངས་རྒྱས་ལ་ཕྱག་འཚལ་ལོ། །འཁོར་བ་ཐོག་མ་མེད་པ་ནས། ཆུ་བོ་རྒྱུན་མི་འཆད་འབབ་པ། །སེམས་ཀྱི་ཆུ་འདི་ངོ་མཚར་ཆེ། །བྱེ་མའི་ཕུང་པོ་ཆེན་པོ་ལྟར། །རེག་ལ་མ་འབྱར་པ་འདི་ངོ་མཚར་ཆེ། །སེམས་ལ་འབྲེལ་བ་མེད་པ་ངོ་མཚར་ཆེ། ཁ་སང་ང་ནི་ནའོ་ཞེས། །རྨོངས་པ་རྣམས་ནི་རྟག་པར་སྒོམ། །སྐད་ཅིག་རེ་རེས་འདས་པས་ན། །སེམས་ལ་འབྲེལ་བ་མ་མཐོང་ངོ༌། །རི་བོ་འདི་ཡི་བྱ་མ་རྣམས། །ཆུ་འགྲམ་འདི་རུ་སླེབ་པོ་ཞེས། །གཞན་ལ་གཞན་དུ་འཁྲུལ་པ་ཡིན། །ཡང་ན་ཐམས་ཅད་འབྲེལ་མེད་དེ། །ཡང་ན་ཐམས་ཅན་འབྲེལ་ལོ་ཞེས། །


TNT01_Page_0967
[མ་དཔེ་གཟིགས་ན་འདིར་གནོན།]

སྨྱོན་པ་ཏཱ་ར་ནཱ་ཐ་སྨྲ། །འདི་ནི་བདག་གི་བུ་དང་ཕ། །གཡོག་དང་འཁོར་ནི་ང་ལ་ཡོད། །ང་ཡི་ཡུལ་སར་མ་སྡོད་ཞེས། །གཞན་ལ་ང་བདག་བྱེད་པ་འཁྲུལ། །འཁོར་བ་ཐོག་མ་མེད་པ་ནས། །ད་ལྟའི་བར་དུ་འཁྱམ་པ་ལ། །ཐམས་ཅད་ཕ་ཡིན་ཐམས་ཅད་བུ། །ཐམས་ཅད་གཡོག་ཡིན་ཐམས་ཅད་དཔོན། །ཕ་མ་གསོད་ལ་དཔའ་བོར་རྩི། །ང་ལ་སེམས་ཅན་ཐམས་ཅད་ཕ། །དགྲ་ནི་ཅི་ཡང་ཡོད་མ་ཡིན། །བུ་རུ་མ་གྱུར་ཅུང་ཟད་མེད། །རང་གི་བུ་ནི་མང་པོ་འདི། །དགྲ་རུ་བཟུང་ནས་བུ་ངན་ཞིག །ང་ཡི་བུ་ཞེས་པང་དུ་ལེན་དེ་འཁྲུལ། །ད་ལྟ་རང་ལུས་བོར་ནས་འགྲོ་བ་ལ། །གཅིག་ལ་བདག་གི་བུ་ཞེས་བླུན་པོ་འཁྲུལ། །དེ་ལ་ཆགས་པས་འཁོར་བར་བསྐྱུར་བ་འདིས། །འདི་ནི་གཏན་གྱི་དགྲ་བོ་མ་ཡིན་ནམ། །མི་ཤེས་འཇིག་རྟེན་རྨོངས་ལ་ཀུན་ཀྱང་དགྲ། །རྣལ་འབྱོར་དེ་ལ་སྣང་བ་ཐམས་ཅད་གྲོགས། །འབྲཻལ་མེད་རྣལ་འབྱོར་ང་ལ་དགྲ་བོ་མེད། །སེམས་ནི་འབྲེལ་བ་མེད་པར་ཤཻས་ཙམ་ན། །སྣང་བ་འདི་ཡང་འབྲེལ་བ་མེད་པར་མཐོང༌། །རང་ལུས་ཐལ་བར་སོང་བ་ལ། །གཉེན་དང་འབྲེལ་བ་ག་ལ་ཡོད། །སེམས་འདི་སྐད་ཅིག་རེ་རེ་ལས། །གཞན་ནི་འབྲེལ་བ་མ་མཐོང་བས། །ལུས་སེམས་འབྲེལ་བ་ག་ལ་ཡོད། །ང་ལ་འདི་ཡིས་


TNT01_Page_0968
[མ་དཔེ་གཟིགས་ན་འདིར་གནོན།]

བསྣུན་ནོ་ཞེས། །དོན་མེད་ཞེ་སྡང་མ་བྱེད་ཅིག །སེམས་ཀྱི་མགྲོན་པོ་བྲེལ་བ་ཅན། །ལུས་ཀྱི་མགྲོན་ཁང་ཧྲུལ་པོ་ན། །ཡུད་ཙམ་ངལ་བསོ་བྱེད་པ་ལ། །མཁར་ལས་བྱེད་པ་ལས་རོ་ཡིན། །མགྲོན་ཁང་གི་ནི་ཕྱི་འཁྱམས་ལ། །ང་ཡི་སྐྱེད་མོས་ཚལ་ཡིན་ཞེས། །སྨྱོན་པ་རྣམས་ནི་འོ་དོད་འབོད། །དེ་རང་མགྲོན་པོ་སྨྱོ་བ་ཡིན། །གཞན་འགའ་བདག་ལ་ཁྲོ་ན་ཡང༌། །ང་ལ་ཅི་ཡང་གནོད་པ་མེད། །ང་ལ་འབྲེལ་བ་མེད་པས་ན། །བུ་ཡིས་རྒྱལ་སྲིད་ཐོབ་པ་ལའང༌། །དགའ་ཐག་ཆད་པ་ག་ལ་ཡོད། །བདག་ཉིད་དམྱལ་བར་སོང་ན་ཡང༌། །སྡུག་ཐག་ཆད་པ་ང་ལ་མེད། །སྡུག་དང་འབྲེལ་རྒྱུ་མི་འདུག་པས། །དམྱལ་བ་ན་ཡང་བདེ་བ་ཅན། །བདེ་དང་འབྲེལ་རྒྱུ་མི་འདུག་པས། །བརྒྱ་བྱིན་ལ་ཡང་སྨོན་རྒྱུ་མེད། །ཡུལ་འཁོར་མེ་ཡིས་ཚིག་ན་ཡང༌། །ང་ལ་ཅི་ཡང་འཚིག་རྒྱུ་མེད། །འདོད་ཆགས་ལ་སོགས་ཉོན་མོངས་བརྒྱ། །རང་གྲོལ་ཉིད་དུ་ཤེས་ཙ་ན། །དུག་རྣམས་ཁོ་ན་བདུད་རྩིར་སོང༌། །སྔོན་ནས་ཡེ་ཤེས་ཡིན་པ་ལ། །རང་གིས་ཉོན་མོངས་བཅོས་འདི་མཚར། །སེམས་ལས་འཁོར་བ་ཀུན་བྱུང་ཡང༌། །འཁོར་བ་སེམས་ལ་འབྲེལ་བ་མེད། །སངས་རྒྱས་སེམས་ཀྱི་ཆོ་འཕྲུལ་ཡིན། །སངས་རྒྱས་ལ་ཡང་འབྲེལ་བ་མེད། །འབྲེལ་མེད་མཉམ་པོ་ཡིན་པ་ལ། །ངས་ནི་སྤངས་བླང་མ་ཤེས་སོ། །བླ་མ་དམ་པའི་བཀའ་


TNT01_Page_0969
[མ་དཔེ་གཟིགས་ན་འདིར་གནོན།]

དྲིན་ལས། །འབྲེལ་མེད་སེམས་ཀྱི་ཚུལ་ལུགས་ཤེས། །ཨེ་མ་ཧོ་འདི་ནི་ངོ་མཚར་ཆེ། །ཉེས་ན་འདི་ལ་མཚར་ཀྱི་མེད། །ད་ནི་ཞེན་མེད་གླུ་གཅིག་བླང༌། །ཉེ་དུ་རྣམས་དང་ཕྲད་ན་ཡང༌། །འདོད་པའི་གདུང་བ་སྐྱེད་པར་ཟད། །མི་མཛའ་རྣམས་དང་ཕྲད་ན་ནི། །ཞེ་སྡང་མེ་ཡིས་རང་རྒྱུད་སྲེག །སྔོན་ནི་ཁྱིམ་ནི་འབྱོར་པ་ལས། །ད་ལྟ་ཤིན་ཏུ་རྒུད་དོ་ཞེས། །རང་གི་རང་སེམས་སྡུག་ལ་འདོགས། །ཡང་ན་འབྱོར་པར་གྱུར་པ་ན། །ས་སྟེང་ན་ནི་དཔའ་བོ་ང༌། །ང་མིན་གཞན་མེད་བདག་ལྷག་ཞེས། །ཡིད་ཀྱི་ང་རྒྱལ་བྱེད་པ་ནི། །ང་རྒྱལ་བྱེད་ཀྱིན་དམྱལ་བར་སོང༌། །རང་ཉིད་འབྱོར་པ་ཀུན་ལྡན་ཡང༌། །ད་དུང་ཚིམ་པ་མེད་པས་སྡུག །ནོར་གྱིས་དྲེགས་པའི་ང་རྒྱལ་ཅན། །གཅིག་ཀྱང་གཏོང་བ་མི་ཕོད་པར། །འཆི་ཚེ་མི་འདོད་བཞིན་དུ་འབུལ། །དབང་མེད་འཁྱམས་དགོས་བྱུང་གི་དོགས། །ནོར་རྣམས་གཞན་གྱིས་ཕྲོགས་ཀྱི་དོགས། །འགའ་ཞིག་རྔན་པར་སྦྱིན་སྙམ་དང༌། །འཁོར་གཡོག་སྐྱོང་ངམ་བུ་སྨད་གསོ། །དཔོན་གྱི་ངོ་འཛིན་བྱ་དགོས་སོགས། །ནོར་ལྡན་ཐམས་ཅད་སྡུག་བསྔལ་ཡིན། །སྲེད་དང་ལྡན་ན་བདེ་བ་མེད། །ཡིད་དུ་སྡུག་པའི་གཉེན་དང་གྲོགས། །ཅིས་ཀྱང་མ་ཕན་ཤི་བའི་ཚེ། །མྱ་ངན་སྐྱེད་པ་མ་གཏོགས་པ། །ཕན་པ་ཅུང་ཟད་མ་བྱུང་ངོ༌། །ད་ལྟ་


TNT01_Page_0970
[མ་དཔེ་གཟིགས་ན་འདིར་གནོན།]

དབང་ཕྱུག་ཕུན་ཚོགས་ཀྱང༌། །གཉེན་གྱིས་སླུས་ཀྱི་དོགས་པ་དང༌། །དགྲ་བོས་བཅོམ་གྱིས་དོགས་པ་དང༌། །གཞན་ལ་ངན་སྤྱོད་མ་སོང་དོགས། །སེམས་ཀྱི་སྡུག་བསྔལ་ཁོ་ན་ཡིན། །མཐོན་པོ་རྣམས་ལ་སེམས་སྐྱིད་མེད། །དམན་པའི་ལུས་ནི་ཤ་ཐང་བཅད། །རང་ལ་འབྱོར་པ་ཕུན་ཚོགས་ཀྱང༌། །གཞན་ལ་སྦྱིན་པའི་བློ་མེད་པར། །དབུལ་པོ་འགའ་ཡི་འབུལ་བ་ལ། །ཕུལ་གང་ཙམ་ཞིག་ཆུང་ན་ཡང༌། །རང་རྒྱུད་འཁྲུག་པའི་རྒྱུད་ངན་པོ། །སྐྱིད་སྙམ་མིག་དཔངས་མཐོ་ན་ཡང༌། །ཚེ་འདིར་སྐྱིད་པའི་སྐབས་མེད་པར། །སྡིག་པ་འབའ་ཞིག་བསྒྲུབས་ནས་ནི། །དམྱལ་བར་ཕ་ཡུལ་བྱེད་པ་འདི། །འདིར་སྡུག་ཕྱི་མར་སྡུག་པར་གདའ། །མཐུན་རྐྱེན་ཅུང་ཟད་མེད་ཀྱང་རུང༌། །ཞེན་མེད་སྐྱིད་པ་ནང་ནས་མཚར། །འབྱོར་པའི་དུས་ན་ཀུན་ཀྱང་གཉེན། །རྒུད་པའི་དུས་ན་ཀུན་ཀྱང་དགྲ། །དགྲ་གཉེན་ཕྱོགས་ཞེན་མ་ཆེ་བར། །ཟས་གོས་དམན་མས་ཆོག་ཤེས་བྱས། །གྲོང་དང་འདུ་འཛི་མི་བརྟེན་པར། །རང་གི་ཕ་ཡུལ་སྤངས་ནས་ཀྱང༌། །གཅིག་པུ་རིའམ་ནགས་འདབས་སུ། །མི་སྨྲ་གཡོ་མེད་གནས་པའམ། །ཡང་ན་ངེས་མེད་ཡུལ་རྒྱུས་ལ། །གྲོང་ཁྱེར་ཡུལ་འཁོར་སོ་མ་རུ། །ཡང་ཡང་སྤྲད་པ་བདེ་བ་ཡིན། །དམན་པའི་གོས་ཀྱིས་ཆོག་ཤེས་ན། །


TNT01_Page_0971
[མ་དཔེ་གཟིགས་ན་འདིར་གནོན།]

གོས་རུལ་ཀུན་ཡང་ལྷ་ཡི་གོས། །དམན་པའི་ཟས་ཀྱིས་ཆོག་ཤེས་ན། །ངན་ངན་འདྲ་ཡང་བདུད་རྩི་ཡིན། །ཕུལ་ཕྱེད་རི་བའི་ནོར་མེད་ཀྱང༌། །ནོར་ལྡན་ཀུན་པས་རང་སེམས་སྐྱིད། །སྐྱོ་ན་ཐང་འཁྱགས་རི་སུལ་སོགས། །ཞེན་མེད་དབེན་པའི་བདེ་བ་འདི། །རྣམ་པར་རྒྱལ་བའི་ཁང་བཟང་ལའང༌། །སྨོན་སེམས་སྐད་ཅིག་མི་སྐྱེའོ། །ནང་ནས་ཉམས་ལེན་ཤེས་ཙ་ན། །གང་སྣང་ཐམས་ཅད་སྒོམ་དུ་གདའ། །ཇི་ལྟར་སྒོམས་ཀྱང་སྤྲོས་བྲལ་ཡིན། །ཐམས་ཅད་ཆོས་ཉིད་ཀྱི་ཡོ་ལངས་ལ། མ་བཅོས་སོ་མའང་བཟང་འཛིན་དུ་གདའ། །ལམ་ལ་ཡང་ཞེན་པ་ད་མི་བྱེད། ཁྱད་གསོད་དུ་བྱེད་ན་ཀུན་ལ་སྡིག །གདོད་ནས་ཆོས་སྐུར་འདུག་པ་ལ། །སངས་རྒྱས་ལ་ཡང་ཞེན་རྒྱུ་མེད། །དེ་སྐད་སྨྲ་བ་རྣལ་འབྱོར་པ། །ཏཱ་ར་ནཱ་ཐ་ཞེས་བྱ་བས། །རང་གི་སེམས་ལ་ཤར་བའི་ཚུལ། །འགའ་ཞིག་ཁ་ནས་ཐལ་བ་ལགས། །འབྲལ་མེད་ཀྱི་གླུ་དགེ་ལེགས་འཕེལ།། །།

མཁའ་རོ་གངས་སྦུག་གི་རི་ཁྲོད་དུ་ཚོགས་འཁོར་གྱི་གྲལ་དུ་གླུར་བླངས་པ།


TNT01_Page_0972
[མ་དཔེ་གཟིགས་ན་འདིར་གནོན།]

༈ ན་མོ་གུ་ར་ཝེ། རྗེ་བཀའ་དྲིན་ཅན་གྱི་རིན་པོ་ཆེ། །མཚན་ཐོས་འཁོར་བའི་གནས་ལས་འདྲེན། ཁྱོད་རྡོ་རྗེ་འཆང་ཆེན་མི་གཟུགས་ཅན། །ཕ་བླ་མ་མཆོག་ལ་གསོལ་བ་འདེབས། །ཡུལ་ས་མཐོ་རིག་པ་དྭངས་པ་ཞིག །ལྗོངས་གངས་རིའི་ཁྲོད་ཀྱི་ལྟེ་བ་གཅིག །སྔོན་དམ་པ་མང་


TNT01_Page_0972
[མ་དཔེ་གཟིགས་ན་འདིར་གནོན།]

པོ་བྱོན་པ་གཅིག །གངས་དགུང་དུ་ནངས་ཀྱི་མཐོ་བ་གཅིག །དེ་ཧ་བོ་གངས་བཟང་མ་ལགས་སམ། །གནས་དེ་ན་རྒྱལ་ཁམས་ཀྱི་རྣལ་འབྱོར་པ། །ཕ་རྩ་བརྒྱུད་ཀྱི་བླ་མས་བྱིན་བརླབས་པ། །ནང་རིག་པ་མེ་ལྟར་འབར་བ་ལ། །ཕྱི་ཆོས་བརྒྱད་ཀྱི་དབུས་ན་ཉལ་བ་ཞིག །དུས་དོ་ནུབ་ཡར་གྱི་ཚེས་བཟང་པོ། །འཁོར་རྣལ་འབྱོར་ཕོ་མོའི་དཀྱིལ་འཁོར་ན། །ཡོངས་མཁའ་འགྲོ་འདུས་པའི་ཚོགས་ཀྱི་དབུས། །ཉམས་དགའ་བའི་རྒྱང་གླུ་ཚིག་གསུམ་ལེན། །དུས་ད་རེས་མི་ལུས་རིན་ཆེན་ཐོབ། །འདི་ཐོབ་པར་དཀའ་བ་ཞིག་ཡིན་པར་གདའ། །འདི་ཐོབ་པས་ཀྱང་ད་རེས་མདོ་དོན་བྱུང༌། །དོན་འདི་ལ་བསམས་ཀྱང་ཉམས་རེ་དགའ། །བུ་ཆུང་གི་དུས་ནས་ཆོས་དང་མཇལ། །ཉིན་མཚན་ཀུན་ཆོས་ལ་སྐྱེལ་བ་འདི་བྱས། །དེ་ཙམ་དུས་ན་མདོ་དོན་ཡང་བྱུང༌། །དོན་འདི་ལ་བསམས་ཀྱང་ཉམས་རེ་དགའ། །ང་ཆུང་ཆུང་མ་ཎི་མི་ཤེས་དུས་ཀྱང༌། །དཀོན་མཆོག་ལ་སྙིང་ནས་དད་པ་དང༌། །ཐར་འདོན་མཚན་ཉིད་དང་ལྡན་པ་ཡོད། །རྒྱུ་དེས་ཀྱང་འཇིག་རྟེན་ལ་བློ་མ་སོང༌། །དོན་འདི་ལ་བསམས་ཀྱང་ཉམས་རེ་དགའ། །བདག་སྤྱང་རིག་འཛོམ་པོ་གཅིག་མ་ལགས་ཏེ། །གསུང་རབ་ལ་གོ་བ་ལྷུག་པར་ཆགས། །བདག་ལས་བླ་བཟང་པོ་གཅིག་མ་ལགས་ཀྱང། །ཆོས་ཕྱོགས་སུ་སྡུག་


TNT01_Page_0973
[མ་དཔེ་གཟིགས་ན་འདིར་གནོན།]

ཀྱང་ཐེག་རབ་བྱུང༌། །བདག་རིག་པ་འཆར་པོ་གཅིག་མ་ལགས་ཀྱང༌། །གྲུབ་མཐའ་ལ་ཆེར་གྱི་གཏིང་གཅིག་ལོན། །བདག་བྱ་བྱེད་བརྩོན་པོ་གཅིག་མ་ལགས་ཀྱང༌། །སྒོམ་འཕྲལ་འཕྲལ་རྒྱུན་དུ་ཉམས་སུ་བླངས། །མི་ཆོས་ལ་དགོས་པ་ཀུན་མེད་ལགས་ཀྱང༌། །ལྷ་ཆོས་ལ་དགོས་པ་ཀུན་ཕལ་ཆེར་ཚང༌། །དོན་འདི་ལ་བསམས་ཀྱང་ཉམས་རེ་དགའ། །བདག་ལོངས་སྤྱོད་ལ་སྒྲུབ་འདོད་མེད་ལགས་ཏེ། །སྔོན་ལས་ཀྱིས་ཟང་ཟིང་རྗེས་ལ་བསྙེགས། །མི་གཞན་ལྟས་ཞིང་མ་དག་པར་རྩི། །གནད་འདིས་ཀྱང་རེ་ལྟོས་འཆའ་མཁན་ཉུང༌། །སྟོང་ཟོབ་ཀྱི་དད་ཅན་བསླུ་མ་དགོས། །དོན་འདི་ལ་བསམས་ཀྱང་ཉམས་རེ་དགའ། །ཆོས་སྡེ་སྣོད་མང་དུ་བསླབས་ལགས་ཀྱང༌། །སྐལ་ལྡན་ཚེ་གཅིག་ལ་སངས་རྒྱ་བ། །རྡོ་རྗེའི་ཐེག་པ་ལ་སྙིང་ཕུར་བཏབ། །དོན་འདི་ལ་བསམས་ཀྱང་ཉམས་རེ་དགའ། །ཐ་སྙད་ལ་མི་ཚེ་མ་སྐྱེལ་བར། །གཞོན་ནུ་ནས་སྙིང་པོའི་དོན་ལ་དྲིལ། །བླ་མའི་མན་ངག་ལ་ཆིག་འདྲིལ་དུ་བྱས། །དོན་འདི་ལ་བསམས་ཀྱང་ཉམས་རེ་དགའ། །སྔགས་ཞུས་ཀྱི་བླ་མ་མང་ཡོད་ཀྱང༌། ཁོང་དགོངས་པ་གཏད་པས་དོན་འགྲུབ་ཅིང༌། །ལྷུག་པ་རང་གྲོལ་གྱི་སངས་རྒྱས་ཏེ། །རྗེ་གྲུབ་ཆེན་རྣམ་གཉིས་ལ་གསོལ་བ་བཏབ། །དོན་འདི་ལ་བསམས་ཀྱང་ཉམས་རེ་དགའ། ཉམས་ཀྱི་རྩལ་ནི་ཕྱོགས་མེད་དུ་ཤར། །མྱོང་བ་ཡང་ཡང་


TNT01_Page_0974
[མ་དཔེ་གཟིགས་ན་འདིར་གནོན།]

ཐོན་ནས་བྱུང༌། །ད་ནི་རྟོགས་པ་འགྱུར་བ་མེད། །དོན་འདི་ཡང་རྗེ་བཙུན་བླ་མའི་དྲིན། །སྔར་ཡང་བླ་མ་ལ་གསོལ་བ་བཏབ། །ད་དུང་ཡང་ཕ་རྒོད་ཀྱིས་བྱིན་གྱིས་རློབས། །དུས་བཞེ་ནིང་མོས་གུས་ལ་འཕེལ་འགྲིབ་ཤོར། །དེར་ཡང་བླ་མ་ཉག་གཅིག་སྒོམས། །ཡི་མུག་བྱེད་ཀྱིན་ཡང་གསོལ་བ་བཏབ། །ཕུང་ངན་པའི་ལོ་དེ་འདས་ཕྱིན་ཆད། །མོས་གུས་སྒོམ་གྱི་རྩ་བ་ཚུགས། །དོན་འདི་ཡང་བླ་མའི་ཐུགས་རྗེ་ཡིན། །སྔར་ཡང་༴ ད་དུང་ཡང་༴ ཚེ་འདིའི་དཔལ་འབྱོར་ལ་ཡིད་དགའ་དང༌། །འཁོར་བའི་བདེ་སྐྱིད་ལ་ཡིད་སྨོན་དང༌། །སྙན་གྲགས་ཀྱི་ཕྱེ་མཐོར་ལེན་པ་གསུམ། །རྨི་ལམ་གྱི་དུས་ན་ཡང་ཡུལ་ནས་བུད། །དོན་འདི་ཡང་བླ་མའི༴ སྔར་ཡང་༴ ད་དུང་ཡང་༴ ད་འགྲོ་འདུག་སྤྱོད་ལམ་ཐམས་ཅད་དུ། །སྙིང་རྗེ་དང་བྱང་སེམས་མ་ཆད་ཙམ། །དོན་འདི་ཡང་༴ སྔར་ཡང་༴ ད་དུང་ཡང་༴ བྱ་བ་ཅི་བྱེད་ཐམས་ཅད་ཀྱང༌། །མ་བཅོས་ལྷུག་པའི་ངང་ནས་བྱེད། །གཉིས་མེད་ཀྱི་ངང་དུ་རིག་པ་འཕྱོ། །དོན་འདི་ཡང་༴ སྔར་ཡང་༴ ད་དུང་ཡང་༴ ཉོན་མོངས་ཀུན་ངོ་བོ་ཉིད་ཀྱིས་དག །ཉེས་ལྟུང་གི་ཚོགས་རྣམས་རག་སར་གྲོལ། །རྩ་བྲལ་ངང་ནས་ཕྱོགས་མེད་དུ་སྦྱངས། དོན་འདི་ཡང་༴ སྔར་ཡང་༴ ད་དུང་ཡང་༴ དུས་ད་ཙམ་རེ་དོགས་ཞིག་ནས་གདའ། །


TNT01_Page_0975
[མ་དཔེ་གཟིགས་ན་འདིར་གནོན།]

གཉེན་པོ་ཡང་རང་སར་ཞིག་ནས་གདའ། །དོན་འདི་ཡང་༴ སྔར་ཡང་༴ ད་དུང་ཡང་༴ རང་ལྟོགས་སམ་འཁྱགས་ཀྱི་དོགས་པའམ། །མིས་ཁ་ངན་འཆའ་སྨོད་བྱུང་དོགས་སམ། །དོན་མ་འགྲུབ་གནོད་པ་བྱུང་དོགས་སོགས། །རང་སྡུག་རང་གིས་འཆོས་པ་དེ་ཞིག་ནས་གདའ། །དོན་འདི་ཡང་༴ སྔར་ཡང་༴ ད་དུང་ཡང་༴ གཏམ་སྙན་ལ་རེ་དང་སྐྱིད་ལ་རེ། །མི་གཞན་ལས་ལྷག་པ་གཅིག་ཡོད་ལ་རེ། །རང་བཟང་འདོད་བཟང་འཛིན་གྱིས་ཁོག་ཕུག་པའི། །ཆོས་དང་འཇིག་རྟེན་གྱི་ལེགས་སྒྲིགས་སོགས། །རེ་བ་ཕུང་གི་དཀྱིལ་འཁོར་དེ་ཞིག་ནས་ཐལ། །དོན་འདི་ཡང་༴ སྔར་ཡང་༴ ད་དུང་ཡང་༴ ནང་རྩ་ཡི་མདུད་པ་ལྷོད་དེ་ཤིག །རྟེན་ཐིག་ལེ་བདེ་བ་རང་གཅིག་འབར། །ལས་རླུང་གི་འགྲོ་འོང་དབང་དུ་འདུས། །འཕྲལ་བོགས་འདོན་ཕྱོགས་མེད་ལྷུག་པར་བསྐྱངས། དོན་འདི་ཡང་༴ སྔར་ཡང་༴ ད་དུང་ཡང་༴ འབྲོག་བས་མཐའ་གངས་ཀྱི་མགུལ་པ་འདི། །གནས་སྨན་ལྗོངས་ཉམས་དགའ་འགོལ་བ་ལ། །འཕྲལ་འདུ་འཛི་ལང་ལོང་ཉུང་བ་གཅིག །བདག་རྒྱལ་ཁམས་ཀྱི་རྣལ་འབྱོར་ལྡོམ་བུ་པའང༌། །ནང་རང་རིག་བདེ་སྟོང་འགྱུར་མེད་ལ། །འཕྲལ་མཚམས་ཚིག་མི་ཤེས་གཡས་མེད་གཅིག །མི་བདག་དང་དབེན་པའི་གངས་ཁྲོད་འདི། །


TNT01_Page_0976
[མ་དཔེ་གཟིགས་ན་འདིར་གནོན།]

ཆོས་དེ་གཉིས་དཔེ་དོན་འཛོམ་པ་གཅིག་གདའ། །སྤྲང་ཁོ་བོ་ལ་བྱིན་རླབས་མེད་ལགས་ཀྱང༌། །རྗེ་བླ་མ་ཐུགས་རྗེ་དང་བྱིན་རླབས་སུ་ཆེ། །ཚིག་འདི་ལ་ལེགས་ཆ་མེད་འདུག་ཀྱང༌། །དོན་འདི་ལ་ངེས་པའི་གཏད་སོ་ཡོད། །དབྱངས་འདི་ལ་གླུ་རྟ་མ་མཆིས་ཀྱང༌། །ངག་འདི་ལ་ཤུགས་འབྱུང་གི་ཞང་གཅིག་གདའ། །གླུ་འདི་ལ་གོ་རིམ་མ་མཆིས་ཀྱང༌། །སྒྲ་འདི་ལ་བྱིན་བརླབས་བརྗིད་གཅིག་ཆགས། །ཞེས་པའང་ཧ་བོ་གངས་བཟང་གི་མགུལ། གུ་རུ་པདྨས་བྱིན་གྱིས་བརླབས་པའི་གནས། མཁའ་རོ་གངས་སྦུག་གི་རི་ཁྲོད་དུ་ཚོགས་འཁོར་གྱི་གྲལ་དུ་གླུར་བླངས་པའོ།། །།དགེའོ། །

སེམས་ལ་ངོ་སྤྲོད་པ་ལྟར་གྱུར་པའི་སྐབས་ཤིག་ཏུ་གླུར་བླངས་པའོ། །


TNT01_Page_0977
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། བདག་ཕྱོགས་རིས་བྲལ་བའི་རྣལ་འབྱོར་པ། །དུས་མེ་ཏོག་ལྡན་པ་ཁྱུ་མཆོག་ལོ། །ཡུལ་བཀྲ་ཤིས་འཕེལ་པའི་གཡོ་རུ་ན། །རྗེ་བླ་མའི་བཀའ་དྲིན་སྙིང་ལ་དྲན། །སྔོན་འཁོར་བ་ཐོག་མ་མེད་པ་ནས། །མཐར་ད་ལྟའི་བར་དུ་འཁྱམས་པ་ལགས། །ལར་འཁོར་བ་གཏིང་མཐའ་མེད་པ་འདིར། །སེམས་སངས་རྒྱས་སུ་གཏོང་བའི་རིན་པོ་ཆེ། །འགྲོ་དྲུག་ཕ་མ་དྲིན་ཅན་ཡང༌། །འཁོར་བར་བསྐྱུར་རོགས་གཅིག་མ་ལགས་པ། །གཏན་གྱི་འདུན་གྲོས་ལ་སྦྱོར་མཁན་མེད། །སྙིང་གི་འདུན་གྲོས་དེ་རྗེས་ལ་ཞུས། །ལུས་ཤ་ཁྲག་འདུས་པའི་ཕུང་པོ་འདི། །ནམ་འཇིག་ལ་ངེས་པ་ཅུང་ཟད་མེད། །


TNT01_Page_0977
[མ་དཔེ་གཟིགས་ན་འདིར་གནོན།]

ཤི་རྗེས་སུ་དྲོད་པའི་གདེངས་མེད་ཀུན། །རིག་པ་འདི་ནང་དུ་འགུགས་པར་ཞུ། །ང་འཆི་བས་འཇིགས་ནས་བླ་མ་བཙལ། །ཉམས་ལེན་ཀུན་རྡོ་རུས་ཐུག་པར་འབད། །ད་ཙམ་ནས་ཤི་ཡང་བློ་རེ་བདེ། །བློ་བདེ་ཚགས་སུ་ཆུག་པ་གཅིག་མི་དགོས་སམ། །ནམ་ཟླ་དུས་བཞིའི་འགྱུར་བ་འདི་དང་གཅིག །མཐོ་དམན་འབྱོར་རྒུད་ཀྱི་རི་མོ་འདི་དང་གཉིས། །རྒྱལ་ཁམས་ཡུལ་ཕྱོགས་ཀྱི་འགྱུར་ཚབས་འདི་དང་གསུམ། འདུས་བྱས་མི་རྟག་པ་སྟོན་པའི་སློབ་དཔོན་གཅིག་གདའ། །བྱས་ཀྱང་ཟིན་མེད་ཀྱི་ཞིང་ལས་འདི་དང་གཅིག །བསྐྱངས་ཀྱང་དྲིན་མེད་ལོག་སྒྲུབ་ཀྱི་སྤྱོད་པ་དང་གཉིས། །འཐུངས་ཀྱང་ངོམས་མེད་ཀྱི་ལན་ཚྭའི་ཆུ་དང་གསུམ། །ལས་དོན་མེད་དུ་སྟོན་པའི་སློབ་དཔོན་གཅིག་མི་གདའ། །གྲོང་ཁྱེར་འདུ་འཛིའི་ལང་ལོག་འདི་དང་གཅིག །བྲེལ་ལ་དོན་ཆུང་སྦྲང་བུའི་སྤྱོད་པ་འདི་དང་གཉིས། །སྤྲིན་དཀར་བན་བུན་གྱི་འགྱེད་འཁོར་འདི་དང་གསུམ། །འཁོར་བ་གཏད་མེད་དུ་སྟོན་པའི་ངོ་སྤྲོད་གཅིག་གདའ། །སྣང་ལ་གཟུགས་མེད་ཀྱི་འཇའ་ཚོན་འདི་དང་གཅིག །ལྷང་ལྷང་དམིགས་མེད་ཀྱི་བྲག་ཆ་འདི་དང་གཉིས། །མེད་ཀྱང་དགའ་སྡུག་འཆར་བའི་རྨི་ལམ་དང་གསུམ། །སྣང་བ་རང་སེམས་སུ་སྟོན་པའི་སློབ་དཔོན་གཅིག་གདའ། །ཕྱི་སྣང་བ་སྒྱུ་མའི་འཁྲུལ་འཁོར་


TNT01_Page_0978
[མ་དཔེ་གཟིགས་ན་འདིར་གནོན།]

དང་གཅིག །ནང་རིག་པ་སེམས་ཀྱི་འཆར་སྒོ་དང་གཉིས། །དབྱིངས་ངོས་གཟུང་བྲལ་བའི་སྟོང་ཉིད་དང་གསུམ། །ཆུ་ལ་ཆུ་བཞག་བཞིན་དུ་དབྱེར་མེད་གཅིག་གདའ། །ལར་ཉམས་མྱོང་ཅུང་ཟད་གཅིག་སྐྱེས་ཙ་ན། །སྣང་བ་གང་ཤར་ཅི་ཤར་ངོ་སྤྲོད་དུ་འདུག །སྒོ་གསུམ་བྱ་བ་ཅི་བྱས་བོགས་འདོན་དུ་གདའ། །དོན་འདི་ལ་བསམས་ན་ཨ་ལ་ལ། །ང་ཡང་མི་ཚེའི་ལྷག་མ་ཅུང་ཟད་འདི། །ཉམས་ལེན་སྒྲུབ་པ་ལ་སྐྱེལ་བ་དང༌། །དབེན་པའི་རི་ཁྲོད་ཟིན་པ་དང༌། །གང་ཤར་ལམ་དུ་ལོངས་པ་རུ། །དྲིན་ཅན་བླ་མ་རིན་ཆེན་གྱིས། །སྔར་ཚད་གཟུང་མེད་པར་བྱིན་བརླབས་མོད། །ད་ཡང་བྱིན་གྱིས་བརླབ་ཏུ་གསོལ། །སྐྱབས་གཞན་མེད་དོ་ཆོས་ཀྱི་རྗེ། །ཏཱ་ར་ནཱ་ཐས་རྒྱལ་ཁམས་ཀྱི་འགྱུར་ལུགས་འདྲ་མཐོང་བས། སེམས་ལ་ངོ་སྤྲོད་པ་ལྟར་གྱུར་པའི་སྐབས་ཤིན་ཏུ་གླུར་བླངས་པའོ།། །།བཀྲ་ཤིས་འཕེལ། །

ཡར་འབྲོག་སྟག་ལུང་དུ་ཚོགས་ཀྱི་འཁོར་ལོར་ངེས་པར་བརྗོད་པའི་གླུ།


TNT01_Page_0979
[མ་དཔེ་གཟིགས་ན་འདིར་གནོན།]

ན་མོ་མཧཱ་མུ་དྲཱ་ཡ། དབྱིངས་བདེ་བ་ཆེན་པོའི་ནམ་མཁའ་ལ། །རིག་པ་ཡེ་ཤེས་ཕྱོགས་མེད་ཀྱི་རྩལ། །མཁྱེན་བརྩེ་ནུས་པའི་གཟའ་སྐར་བཀྲ། །རྗེ་དཔལ་ལྡན་བླ་མ་རྡོ་རྗེ་འཆང༌། །སྤྲང་གུས་པས་ཁྱེད་ལ་གསོལ་བ་འདེབས། །ལར་བྱིན་གྱི་རློབས་ཤིག་ཐུགས་རྗེ་ཅན། །ཡ་གི་ཤེད་དག་པའི་ཞིང་ཁམས་ན། །སྐུ་མི་འགྱུར་བདེ་བ་ཆེན་པོའི་ཐུགས། ཁོང་


TNT01_Page_0979
[མ་དཔེ་གཟིགས་ན་འདིར་གནོན།]

རྡོ་རྗེ་འཆང་ཞེས་གྲགས་པ་སྟེ། །ཡོངས་དཀྱིལ་འཁོར་གྱི་གཙོ་བོ་ཡིན་ནོ་སྐད། །དེ་གཞན་ན་ཡོད་པ་མ་ཡིན་ཏེ། །ཕ་རྩ་བའི་བླ་མ་གཅིག་པུ་ལགས། །རྗེ་ཁྱེད་ཀྱི་ཐུགས་རྗེའི་བཀའ་དྲིན་གྱིས། །མི་ང་ཡང་བརྟན་པ་ཅུང་ཟད་ཟིན། །གཞི་མ་བཅོས་གཉུག་མའི་གནས་ལུགས་ལ། །ཐག་ཆོད་ཀྱི་གདེང་འདི་ཉམས་སུ་དགའ། །སེམས་གསལ་ལ་དྭངས་པའི་རང་སྣང་ལ། །མི་འཆར་བྱ་བ་ནི་གཅིག་ཀྱང་མེད། །དེ་ཤར་ཙམ་ཉིད་ནས་གྲོལ་བ་འདི། །རང་གྲོལ་གྱི་རྣལ་འབྱོར་མ་ལགས་སམ། །ཡོངས་རང་ངོ་ཤེས་པའི་གཡེངས་མེད་འདི། །ཞི་གནས་ཀྱི་སྒོམ་ཞེས་བྱ་བ་ལགས། །རང་བཞིན་མ་རྙེད་པའི་རྩ་བྲལ་འདི། །ལྷག་མཐོང་ཤེས་རབ་མ་ལགས་སམ། །རྗེ་རང་སེམས་དང་དབྱེར་མེད་དུ་ཤེས་ཙ་ན། །ཆོས་སྐུ་ཞལ་མཇལ་ལ་དཀའ་རྒྱུ་མེད། །རང་ཞལ་མཐོང་བའི་རྣལ་འབྱོར་ལ། །འདུ་འབྲལ་མེད་པའི་མོས་གུས་བསྐྱེད། །བདག་དལ་འབྱོར་མི་ལུས་ཐོབ་པ་དང༌། །སྤྱིར་དུ་ཆཽས་དང་མཇལ་བ་དང༌། །སྒོས་སུ་གསང་སྔགས་ཐོབ་པ་དང༌། །ཡང་སྒོས་ཟབ་དོན་རིག་པ་འདི། །སྔོན་ཅུང་ཟད་བསོད་ནམས་བསགས་པའི་རྟགས། །བློ་ཅུང་ཟད་ཆོས་ལ་སོང་བ་དང༌། །རྗེ་མཚན་ལྡན་བླ་མས་བསྐྱངས་པ་དང༌། །ཆོས་མདོ་རྒྱུད་ལ་ངེས་པ་རྙེད་པ་དང༌། །འཕྲལ་ཆགས་སྡང་ཕྱོགས་རིས་མེད་པ་འདི། །ཡུལ་


TNT01_Page_0980
[མ་དཔེ་གཟིགས་ན་འདིར་གནོན།]

གང་དུ་བསྡད་ཀྱང་སྐྱིད་པར་གདའ། །ཚེ་འདིར་ལྟས་ཀྱི་བདེ་བའི་མགོ་བསྐོར་དག །གཏམ་སྙན་གྱི་ཕྱེ་མཐོར་མ་བླངས་ཤིང༌། །དབང་ཐང་ལ་སྨོན་སེམས་མ་བྱས་པས། །དུས་ནམ་ཡང་བློ་སེམས་བདེ་མོར་བྱུང༌། །ཕྱི་ཆོས་སུ་བརྫུས་པའི་འཇིག་རྟེན་དང༌། །ནང་ཁོང་དུ་བཟུང་བའི་ངག་སྙན་དང༌། །ཕུགས་རང་འདོད་ཁ་རྒྱལ་གྱི་གཞན་དོན་བྱེད། །དོན་འདི་གསུམ་སྤངས་པས་ཆོས་སུ་སོང༌། །ཚུལ་འདི་ཡང་དཔལ་ལྡན་བླ་མའི་དྲིན། །ད་དུང་ཡང་གསོལ་བ་འདེབས་ལགས་པས། །བྱིན་གྱིས་རློབས་ཤིག་ཐུགས་རྗེ་ཅན། །རྗེ་ཁྱེད་ཀྱི་ཐུགས་རྗེའི་བྱིན་བརླབས་ཀྱིས། །དེང་ཕྱོགས་དུས་གནས་སྐབས་ཐམས་ཅད་དུ། །བཀྲ་ཤིས་ཕུན་སུམ་ཚོགས་པར་ཤོག །ཅེས་པའང་ཏཱ་ར་ནཱ་ཐས་ཡར་འབྲོག་སྟག་ལུང་དུ་ཚོགས་ཀྱི་འཁོར་ལོར་ངེས་པར་བརྗོད་པའི་གླུ་དབྱངས་སོ།། །།མངྒལཾ་བིསྟཱར་ཀུ་རུ། །

ཏཱ་ར་ནཱ་ཐས་ཚོགས་ཀྱི་འཁོར་ལོར་གླུར་བླངས་པ།


TNT01_Page_0981
[མ་དཔེ་གཟིགས་ན་འདིར་གནོན།]

ན་མོ་གུ་ར་ཝེ། སེམས་ཅན་གྱི་བསམ་པ་ཇི་བཞིན་དུ། །འཕྲིན་ལས་འགྲོ་བའི་དོན་མཛད་ཅིང༌། །ཐུགས་རྣམ་པར་མི་རྟོག་ཐུགས་རྗེ་ཅན། །བླ་མ་སྤྲུལ་པའི་སྐུ་ལ་གསོལ་བ་འདེབས། །ཐུགས་བདེ་ཆེན་ངག་ལས་མ་གཡོས་ཀྱང༌། །སྐུ་རླུང་སེམས་ཙམ་ལ་མཚན་དཔེས་སྤྲས། ཁོང་གདུལ་བྱ་དག་པའི་འགྲོ་དོན་མཛད། །རྗེ་ལོངས་སྤྱོད་རྫོགས་སྐུར་གསོལ་བ་འདེབས། །དབྱིངས་རང་བཞིན་སྟོང་པ་ཉིད་


TNT01_Page_0981
[མ་དཔེ་གཟིགས་ན་འདིར་གནོན།]

ཀྱི་ངང༌། །ཇི་ལྟ་ཇི་སྙེད་མཁྱེན་པའི་རྩལ། །གདོད་ནས་སྤྲོས་པ་ཀུན་བྲལ་བ། །བླ་མ་ཆོས་ཀྱི་སྐུ་ལ་གསོལ་བ་འདེབས། །མི་བདག་གི་ལུས་དང་ལོངས་སྤྱོད་དང༌། །སྔོན་འཁོར་བ་ཐོག་མ་མེད་པ་ནས། །ཕྱི་མའི་མུ་མཐར་ཐུག་པའི་བར། །དུས་གསུམ་དགེ་བ་ཅི་ཡོད་པ། །རྗེ་བླ་མ་ཁྱེད་ལ་མཆོད་པར་འབུལ། །དེང་དངོས་སུ་འབྱོར་དང་ཡིད་ཀྱིས་སྤྲུལ། །ཕྱི་འདོད་ཡོན་མཆོད་པ་སྣ་ཚོགས་དང༌། །ནང་ཞི་གནས་ལྷག་མཐོང་ཟུང་དུ་སྦྲཻལ། །མཆོག་བདེ་སྟོང་དབྱེར་མེད་གསང་པའི་འཕྲུལ། །དེ་ཐམས་ཅད་མ་བཅོས་མ་འགགས་རྩལ། །དེ་ཉིད་ཀྱི་མཆོད་པ་རྒྱ་ཆེར་འབུལ། །དུས་ད་ལྟ་བྱིན་གྱིས་བརླབ་ཏུ་གསོལ། །ཡེ་ཤེས་ཀྱི་དཀྱིལ་འཁོར་རྒྱལ་པ་ལ། །མཁྱེན་པའི་འོད་སྟོང་ཕྱོགས་བཅུར་འཕྲོ། །གདུལ་བྱའི་མ་རིག་མུན་པ་སེལ། །ཕ་བླ་མ་ཉི་མའི་དཀྱིལ་འཁོར་འདྲ། །མི་ཁོ་བོའི་སེམས་ཀྱང་ཉི་མ་དང་མཚུངས། །ངོ་བོ་འཕེལ་འགྲིབ་མེད་པ་དང༌། །སྣང་བ་མ་འགགས་ཕྱོགས་བཅུར་འཆར། །རང་བཞིན་སྒྲིབ་མེད་འོད་དུ་གསལ། །ལྷག་བསམ་གྱི་དཀྱིལ་འཁོར་གསལ་བ་དང༌། །བྱམས་བརྩེའི་འོད་དཀར་འཕྲོ་བ་དང༌། །ཉོན་མོངས་ཀྱི་ཚ་གདུང་སེལ་བས་ན། །ཕ་བླ་མ་ཟླ་བའི་དཀྱིལ་འཁོར་འདྲ། །མི་ཁོ་བོའི་སེམས་ཀྱང་ཟླ་བ་དང་མཚུངས། །རང་བཞིན་གྱི་རྣམ་


TNT01_Page_0982
[མ་དཔེ་གཟིགས་ན་འདིར་གནོན།]

པར་དག་པ་དང༌། །བྱང་ཆུབ་སེམས་ཀྱི་འོད་ཟེར་གྱིས། །ཞེ་སྡང་གི་མུན་པ་འཇོམས་པར་མཐོང༌། །འཁོར་འདས་ལ་ཡངས་དོག་མེད་པ་དང༌། །ཆོས་ཀུན་ལ་ཉེ་རིང་མེད་པར་ཁྱབ། །སྤྲུལ་པ་ཀུན་གྱི་གཞིར་གྱུར་པ། །ཕ་བླ་མ་ནམ་མཁའི་དབྱིངས་དང་འདྲ། །མི་བདག་གི་སེམས་ཀྱང་མཁའ་དང་མཚུངས། །རང་བཞིན་ཐོགས་རྡུགས་མེད་པ་དང༌། །སྤྱིར་ཡང་འཆར་བ་ཀུན་གྱི་རྩལ། །སྣང་བ་ཐམས་ཅད་འགག་མེད་དུ་སྣང༌། འཕྲིན་ལས་རྒྱུན་མི་འཆད་པ་དང༌། །བྱམས་དང་སྙིང་རྗེས་བརླན་པ་དང༌། །གདུལ་བྱའི་དྲི་མ་འཁྲུད་པ་སྟེ། །ཕ་བླ་མ་ཆུ་བོའི་རྒྱུན་དང་འདྲ། །མི་བདག་གི་སེམས་ཀྱང་ཆུ་རྒྱུན་དང་མཚུངས། །སྔོན་ཐོག་མ་མེད་ནས་ཐ་མའི་བར། །རང་བཞིན་མི་འགྱུར་རྒྱུན་ཆད་མེད། །རང་གི་དྲི་མ་རང་གིས་སྦྱོང༌། །གཏིང་ཡེ་ཤེས་གཡོ་བ་མེད་པ་ལ། །འཕྲལ་འགྲོ་དོན་རྦ་རླབས་ཕྱོགས་བཅུར་གཡོ། །གཞན་ཕན་རིན་ཆེན་ཀུན་གྱི་གནས། །ཕ་བླ་མ་རྒྱ་མཚོ་ཆེན་པོར་མཚུངས། །མི་བདག་གི་སེམས་ཀྱང་རྒྱ་མཚོ་དང་འདྲ། །རང་བཞིན་རྣམ་རྟོག་གི་མི་གཡོ་ཞིང༌། །ནམ་ཡང་རིག་པའི་རྩལ་མ་འགགས། །ཡོན་ཏན་ཀུན་གྱི་འབྱུང་གནས་ཡིན། །ཚོགས་གཉིས་ཀྱི་གཞི་ལ་བརྟེན་པ་དང༌། །རིམ་གཉིས་ཀྱི་བང་རིམ་མཛེས་པ་དང༌། །ཐར་འདོད་ཀྱི་རྟེན་ས་ཡིན་པའི་ཕྱིར། །ཕ་བླ་མ་དང་རི་རྒྱལ་ལྷུན་པོ་མཚུངས། །མི་


TNT01_Page_0983
[མ་དཔེ་གཟིགས་ན་འདིར་གནོན།]

བདག་གི་སེམས་ཀྱང་རི་རབ་དང་འདྲ། །རང་བཞིན་གྱི་དག་པར་ཞབས་བརྟན་ཞིང༌། །ཉམས་མྱོང་གི་བང་རིམ་མཛེས་པ་དང༌། །དངོས་གྲུབ་གཉིས་ཀྱི་རྟེན་སར་སྣང༌། །མི་ཁོ་བོའི་བླ་མ་ཅི་འདྲ་བར། །འགྲོ་དྲུག་གི་སེམས་ཀྱང་དེ་ལྟར་ལགས། །དོན་དེ་ལྟར་ལགས་པས་དགོངས་པར་མཛོད། །མཉམ་ཉིད་ལ་ཞོག་ཅིག་དམ་ཚིག་ཅན། །དབྱངས་འདི་ཡང་བླ་མ་ལ་མཆོད་པ་འབུལ། །གནས་འདིར་ཡང་བཀྲ་ཤིས་དགེ་ལེགས་སྩོལ།། །།ཞེས་པའང་ཏཱ་ར་ནཱ་ཐས་ཚོགས་ཀྱི་འཁོར་ལོར་གླུར་བླངས་པའོ། །བཀྲ་ཤིས། ཤུ་བྷཾ། །

ཆོས་འཁོར་སྡིངས་ཀྱི་གནས་སུ་ཚེས་བཅུའི་མཚན་མོའི་ཐུན་དང་པོ་ལ་བྱིན་པའི་དགའ་སྟོན་གྱི་ཚེ་གླུར་བླངས་པ།


TNT01_Page_0984
[མ་དཔེ་གཟིགས་ན་འདིར་གནོན།]

༈ ན་མོ་གུ་ར་བེ། རྗེ་མི་གཟུགས་ལ་རྡོ་རྗེ་འཆང་ཆེན་ཏེ། །ཕ་རྩ་བའི་བླ་མ་མ་ལགས་སམ། །གདུལ་བྱ་གང་མོས་འགྲོ་དོན་མཛད། །དེ་བརྒྱུད་པའི་བླ་མ་མ་ལགས་སམ། །དབྱིངས་མཁའ་ཁྱབ་ཀྱི་སྒོ་ནས་འགྲོ་བ་འདུལ། །དེ་རྡོ་རྗེ་འཆང་ཆེན་མ་ལགས་སམ། །སྤྲུལ་པ་སྣ་ཚོགས་ཀྱིས་དོན་མཛད་པ། །ཡི་དམ་གྱི་ལྷ་ཚོགས་མ་ལགས་སམ། །ནུས་མཐུ་ལ་ཐོགས་པ་མེད་པ་སྟེ། །ཆོས་སྐྱོང་བསྲུང་མ་མ་ལགས་སམ། ཁྱེད་ཡེ་ཤེས་གཅིག་གི་ཆོ་འཕྲུལ་ལས། །ཚུལ་ཅིར་ཡང་སྟོན་པ་ངོ་མཚར་ཆེ། །བདག་སྙིང་གི་ཁོང་ནས་གསོལ་བ་འདེབས། །དུས་ད་ལྟ་བྱིན་གྱིས་བརླབ་ཏུ་གསོལ། །དེང་འདིར་དུས་ཀྱི་སྐལ་ལྡན་ཕོ་མོ་ཀུན། །མི་བདག་གི་ཚིག་ལ་སྙན་གསོན་ཞིག །རྙེད་དཀའ་འཇིག་


TNT01_Page_0984
[མ་དཔེ་གཟིགས་ན་འདིར་གནོན།]

སླའི་མི་ལུས་ལ། །མདོ་དོན་འབྱུང་བའི་ཐབས་ཤིག་འཚལ། །སྡུག་བསྔལ་འཁོར་བའི་རྒྱ་མཚོ་ལས། །ཅིས་ཀྱང་ཐར་པའི་ཐབས་ཤིག་འཚལ། །ཆོས་ཀུན་གྱི་འཇུག་སྒོ་ལགས་པས་ན། །ཚེ་འདི་བློ་ཡི་བཏང་ཡང་འཚལ། །དམ་ཆོས་ཀྱི་རྩ་བ་ལགས་པས་ན། །འཁོར་བ་ལས་ངེས་འབྱུང་སེམས་བསྐྱེད་དེ། །ཉམས་ལེན་གྱི་སྙིང་པོ་ཡིན་པས་ན། །བྱམས་དང་སྙིང་རྗེ་བྱང་སེམས་སྒོམས། །ཆོས་ཀུན་གྱི་ཡང་རྩེ་ཡིན་པས་ན། །མཐའ་བྲལ་སྟོང་ཉིད་ཀྱི་ངང་ལ་ཞོག །རང་བཞིན་མ་བཅོས་གསལ་བས་ན། །མ་བཅོས་སོ་མའི་ངང་དུ་ཞོག །འཛིན་པ་རང་སར་བཤིག་ནས་ཀྱང༌། །ཆེད་འཛིན་མེད་པའི་དོན་དེ་སྒོམས། །རྣམ་རྟོག་བརྫུན་གྱི་མགོ་བསྐོར་ཡིན། །ལྷུག་པ་བཟོ་མེད་ངང་དུ་སྐྱོངས། །ཕྱི་སྣང་བ་གང་ཤར་གྱི་ངོ་བོ་ལ། །གསལ་ལ་ཞེན་པ་མེད་པར་ཞོག །ནང་རིག་པ་སེམས་ཀྱི་ངོ་བོ་ལ། །རིག་སྟོང་དབྱེར་མེད་ཁྲིམ་མེར་སྒྲིམས། །སེམས་མཉམ་བཞག་ངང་དུ་གནས་པའི་ཚེ། །ལྷུན་གྲུབ་བཟོ་བཅོས་མེད་པར་ཞོག །རྗེས་སྣང་བ་འགགས་མེད་ཤར་བའི་ཚེ། །གང་ཤར་རང་ཞལ་ལྟ་བར་འཚལ། །སྣང་བ་རང་བཞིན་དག་པ་ལ། །དག་པའི་སྣང་བ་རྒྱ་ཆེར་སྤེལ། །རང་ལུས་ཡི་དམ་ལྷ་སྐུ་ལ། །སྣང་སྟོང་སྒྱུ་མའི་རྩིས་སུ་ཟིན། །སེམས་རང་བཞིན་བདེ་བའི་རང་སྣང་ལ། །བོགས་འདོན་


TNT01_Page_0985
[མ་དཔེ་གཟིགས་ན་འདིར་གནོན།]

རྩས་ནི་ཕྱོགས་བཅུར་སྤེལ། །ལུས་རྩ་རླུང་ཐིག་ལེའི་རང་བཞིན་ལ། །བླ་མའི་གསུང་བཞིན་གནད་དུ་བསྣུན། །ཉམས་སྣ་ཚོགས་འཆར་སྒོ་ཇི་སྙེད་ལ། །ཞེན་ཆགས་མེད་པའི་སྐྱོང་ལུགས་འཚལ། །དོན་དེ་ལྟར་ཐུགས་ལ་ཞོག་མཛོད་ལ། །ཅིས་ཀྱང་གནད་དུ་བསྣུན་པར་མཛོད། །བདག་ངེས་མེད་ཀྱི་རྣལ་འབྱོར་རྒྱལ་ཁམས་པ། །དབྱངས་འདི་ཉིད་བླ་མ་ལ་མཆོད་པར་འབུལ། །ཚིག་འདི་ལ་ལེགས་ཆ་མི་འདུག་ཀྱང༌། །དོན་འདི་ལ་ངེས་པའི་གཏད་སོ་གདོག། །།ཅེས་པའང་རྒྱལ་ཁམས་པ་ཏཱ་ར་ནཱ་ཐས་ཆོས་འཁོར་སྡིངས་ཀྱི་གནས་སུ་ཚེས་བཅུའི་མཚན་མོའི་ཐུན་དང་པོ་ལ་བྱིན་པའི་དགའ་སྟོན་གྱི་ཚེ་གླུར་བླངས་པའོ། །བཀྲ་ཤིས། །

རང་བྱུང་མགོན་པོའི་དྲུང་དུ་ཚོགས་ཀྱིས་འཁོར་ལོའི་ཚེ་གླུར་བླངས་པ།


TNT01_Page_0986
[མ་དཔེ་གཟིགས་ན་འདིར་གནོན།]

ན་མོ་གུ་ར་བེ། དབྱིངས་སྐྱེ་བ་མེད་པའི་ནམ་མཁའ་ལ། །མདངས་འགག་པ་མེད་པའི་དཀྱིལ་འཁོར་རྒྱས། །ཐུགས་རྗེའི་འོད་བརྒྱ་འགྱེད་པ་ཡི། །ཕ་བླ་མ་རྡོ་རྗེ་འཆང་ལ་འདུད། །རྗེ་དེ་ཉིད་ཀྱི་ཐུགས་རྗེའི་ཆར་སྤྲིན་ལས། །ཆོས་གདམས་ངག་གི་ཆར་རྒྱུན་ཕབ་པ་དེ། །མི་ཁོ་བོའི་སེམས་ཀྱི་ཞིང་སར་བབས། །འབྲས་བུ་ཉམས་རྟོགས་ཀྱི་ལོ་ཏོག་རྒྱས། ཁྱེད་སྐལ་ལྡན་ཡོད་ན་འདི་ལས་ལོང༌། །དཔལ་རྡོ་རྗེ་འཆང་ཆེན་སྐད་པ་དེས། །རྒྱུད་མཐའ་ཡས་གསུངས་པའི་སྙིང་པོ་ལྔ། །ཟབ་དགུ་བསྡུས་པའི་ཉེ་ལམ་ཞིག །མིང་ནེ་གུ་ཆོས་དྲུག་ཞེས་བྱ་བ། །མ་


TNT01_Page_0986
[མ་དཔེ་གཟིགས་ན་འདིར་གནོན།]

མཁའ་འགྲོ་ཀུན་གྱི་གསང་ཚིག་དེ། །ངེས་གསང་བདུད་རྩིའི་སྙིང་པོ་དེ། །ཕ་བླ་མའི་ཞལ་གྱི་བདུད་རྩི་སྟེ། །དུས་དེ་རིང་རྒྱལ་ཁམས་ཀྱི་རྣལ་འབྱོར་པ། །ཕྱོགས་མེད་ཀྱི་ལྡུམ་བུར་སྤྱོད་པ་ཞིག །ངེས་མེད་ཀྱི་ཚུལ་ལ་སྤྱོད་བཞིན་དུ། །གནས་རི་གོང་དཔལ་གྱི་གཞལ་ཡས་འདིར། །དོན་སྙིང་པོ་རྡོ་རྗེའི་གླུ་རུ་ལེན། །གནས་སྤྱི་བོ་བདེ་ཆེན་གྱི་འཁོར་ལོ་ལས། །བརྡ་སྐྱེ་མེད་མཚོན་པ་ཨ་ཡི་གདའ། །འཕྲུལ་བདུད་རྩི་འབབ་པ་དམིགས་པའི་གནད། །ཉམས་སྡིག་སྒྲིབ་དག་པའི་ངེས་ཤེས་ཅན། །མིང་ཡང་དག་བྱེད་སྟོད་ར་ཟེར། །འདི་སྔོན་འགྲོ་ལ་གནད་དུ་ཆེ་བ་ཞིག་གདའ། །རྟེན་རྡོ་རྗེའི་ལུས་ལ་རྩ་ཐིག་གི་འགྲོས། །གཞི་གནད་དུ་ཆེ་བ་འཁོར་ལོ་བཞི། །འཕྲལ་འབར་འཛག་རང་ལུས་དགའ་བཞིའི་འགྲོས། །འདི་རྒྱུད་སྡེའི་ངེས་གསང་གནད་དུ་ཆེ། །རྐྱེན་ཐབས་དང་ཤེས་རབ་འཛོམ་པ་ལས། །གཞི་རང་སེམས་གཉུག་མ་ངོ་སྤྲོད་པ། །རྟེན་ཐིག་ལེ་དབབ་ལྡོག་དགའ་བཞིའི་འགྲོས། །དེ་ཡིན་ནི་ལས་ཀྱི་གཏུམ་མོ་ཡིན། །ཟེར་ནི་གཞན་ལུས་ཀྱི་གདམས་པ་ཟེར། །འདོད་ཡོན་ལམ་འཁྱེར་ལ་གནད་དུ་ཆེ། །མི་ཁོ་བོས་བདེ་སྟོང་དབྱེར་མེད་དུ་བསྒོམས། ཁྱེད་འདིར་འདུས་ཀྱང་བདེ་སྟོང་དབྱེར་མེད་བསྒྲུབས། །ཚེ་གཅིག་གི་སངས་རྒྱས་སྒྲུབ་འདོད་ན། །ལམ་གཞན་ལ་མེད་དོ་སྐལ་ལྡན་


TNT01_Page_0987
[མ་དཔེ་གཟིགས་ན་འདིར་གནོན།]

ཀུན། །བདེ་དྲོད་རང་འབར་ཞིག་མཛད་དེ་འཚལ། །ཕྱི་སྣང་བ་སྒྱུ་མའི་ལམ་འཁྱེར་ཏེ། །ལུས་རྒྱས་ཀྱང་སེམས་ཀྱི་རང་སྣང་ཙམ། །རང་སྣང་ལྷ་སྐུ་རང་ཤར་ལ། །སྒྱུ་མ་ལྟར་རང་བཞིན་མེད་པ་ཞིག །སྒྱུ་ལུས་ཀྱི་གདམས་པའི་སྙིང་པོའི་དོན། མི་ངན་ཀྱང་འདི་ལ་ཉམས་ལེན་བྱས། །ཆགས་སྡང་གི་སྣང་བ་རང་སར་དག །ཨ་མཐས་སྦྲུལ་གྱི་མདུད་པ་ཞིག ཁྱེད་འདིར་འདུས་ཀྱང་ཨ་མཐས་བཤིག་པ་ཞིག་འཚལ། །འཕྲལ་འདུན་པ་སྒྱུར་པའི་གནད་ཀ་ལས། །རིག་པའི་རང་རྩལ་ཕྱོགས་མེད་ཀྱི་གདངས། །དངོས་འཛིན་གྱི་འཆིང་བ་འགྲོལ་བ་ལ། །ངེས་མེད་དུ་སྦྱོང་པ་གནད་དུ་ཆེ། །མིང་ཡང་རྨི་ལམ་གྱི་གདམས་ངག་ཟེར། །སྒྱུ་ལུས་པ་རྣམས་ལ་མཁོ་བ་ལགས། །གཞི་གདོད་མའི་རང་ཞལ་ལྟ་བ་དང༌། །རྐྱེན་མོས་གུས་གདུང་བའི་ཤུགས་དྲག་དང༌། །གནད་རླུང་སེམས་འདུས་པའི་རྟེན་འབྲེལ་ལས། །སེམས་རྡོ་རྗེའི་རང་བཞིན་འོད་གསལ་ཆེ། །དུས་ཉིན་པར་རྩོལ་བ་བསྐྱེད་བསྐྱེད་ནས། །མཚན་མོ་རང་ཤར་གྱི་གསལ་སྣང་ཅན། །གསལ་ཙམ་ཉིད་ནས་སྟོང་པར་ཤར། །གསལ་སྟོང་དབྱེར་མེད་ཀྱི་འོད་གསལ་ཟེར། །ཞུ་བདེ་དང་གཉུག་མ་འདྲེས་པ་ལས། །ཉམས་བདེ་ཙམ་ཉིད་ནས་རང་དག་གཅིག །བདེ་སྟོང་དབྱེར་མེད་ཀྱི་འོད་གསལ་ཡིན། །སེམས་རང་བཞིན་གདོད་


TNT01_Page_0988
[མ་དཔེ་གཟིགས་ན་འདིར་གནོན།]

ནས་དག་པ་ལ། །སྒྲིབ་གཉིས་བརྫུན་གྱི་སྟོང་ཟོབ་ཡལ། །དག་པ་གཉིས་ལྡན་གྱི་འོད་གསལ་ཡིན། །འོད་གསལ་ལམ་གྱི་འབྲས་བུ་སྟཻ། །རྗེ་རྡོ་རྗེ་འཆང་ཆེན་གྱི་སྤྱན་སྔ་རུ། །གདམས་ངག་རྣམས་ཕུ་ཐག་ཆོད་པར་ཞུས། །ཞུས་པ་ཙམ་ལ་ཡང་མ་བཞག་པར། །རང་སེམས་དང་འདྲེས་པའི་ཉམས་ལེན་བྱས། །བན་བུན་ཉམས་ཀྱི་འཆར་སྒོ་དག །འགྱུར་མེད་རྟོགས་པའི་གཏན་ཡུལ་ཟིན། ཁྱེད་འདིར་འདུས་ཀྱང་འོད་གསལ་རྩེ་གཅིག་ཏུ་བསྒོམས། །ངོ་མཚར་རླུང་སེམས་འཕྲུལ་གྱི་གནད། །སེམས་རྩེ་གཅིག་གྱེན་དུ་འཕང་བ་དང༌། །ཅིར་སྣང་ལ་བར་དོའི་འདུན་པ་སྦྱོངས། །གང་ཤར་ལ་དག་སྣང་ལམ་འཁྱེར་བྱ། །འཕོ་བ་དང་བར་དོའི་གདམས་ངག་ཟེར། །ལས་དང་པོ་པ་ལ་གནད་དུ་ཆེ། །སེམས་མ་བཅོས་གཉུག་མའི་རང་ངོ་ལ། །གང་ཤར་རྗེན་ཆེར་གྱི་ངང་ལ་ཞོག །སྒོ་གསུམ་མ་བཅོས་སོ་མའི་ངང༌། །རང་བབས་ལྷུག་པའི་གདམས་པ་ཟེར། །སལ་ལེ་དང་སིང་ངེའི་ངང་དུ་སྒོམས། །ལྷོད་དེ་དང་ཤིགས་སེའི་རྒྱ་ཡན་གྱི་ངང༌། །སེམས་གང་ཤར་ངོ་ཤེས་ཀྱི་རྣལ་འབྱོར་བ། །ཤར་ཙམ་ཉིད་ནས་རང་སར་གྲོལ། །མིང་ཡང་རང་གྲོལ་གྱི་གདམས་ངག་ཟེར། །གསལ་བ་དང་སྟོང་པ་ཟུང་འཇུག་གསུམ། །སེམས་གནས་སམ་འགྱུའམ་ཇི་ལྟར་རུང༌། །གདོད་ནས་རང་གནས་ཀྱི་ངོ་ཤེས་ལ། །སྐུ་


TNT01_Page_0989
[མ་དཔེ་གཟིགས་ན་འདིར་གནོན།]

གསུམ་རང་ཤར་གྱི་གདམས་ངག་ཟེར། །འགྱུ་བ་འགྱུ་སྟོང་གི་ངང་དུ་ཐིམ། །མཉམ་རྗེས་ཀྱི་ས་མཚམས་ཞིག་ནས་ཐལ། །མདོ་རྒྱུད་ཀྱི་མཁྱེན་རྒྱ་ཅན་མང་ལགས་ཤིང༌། །གདམས་ངག་གི་བདག་པོ་མང་མོད་ཀྱང༌། །དོན་འདི་ལས་མེད་ཅེས་བྱ་བ་ཉུང༌། །རང་གྲོལ་ཕྱག་ཆེན་གྱི་རྣལ་འབྱོར་འདི། །མདོ་རྒྱུད་ཀྱི་སྙིང་པོར་ལགས་པར་འཁུམས། །མི་ཁོ་བོས་དེ་ལྟར་ཉམས་སུ་བླངས། ཁྱེད་འདིར་འདུས་ཀྱང་དེ་ལྟར་ཉམས་ལེན་མཛོད། །རང་ཤར་ཕྱོགས་མེད་ཀྱི་དག་སྣང་གཅིག །གང་སྣང་མོས་གུས་ཀྱི་ལམ་འཁྱེར་ལ། །མོས་གུས་ཀྱི་རྩ་བ་བླ་མར་ཤར། །ཟླ་མ་ཡི་དམ་དབྱེར་མེད་ཀྱི་ངང༌། །ཡི་དམ་དེ་སྒྱུ་མར་རང་ཤར་ཞིག །རང་ཤར་མ་བཅོས་ལྷུག་པའི་གདངས། །ཡིན་ནི་དག་སྣང་ཕྱོགས་མེད་འཁྲིད། །ཟེར་ནི་ལམ་འཁྱེར་རྣམ་གསུམ་ཟེར། །མི་ཁོ་བོས་ཀྱང་དག་སྣང་ཕྱོགས་མེད་དུ་སྦྱངས། ཁྱེད་འདིར་འདུས་ཀྱང་དག་སྣང་ཕྱོགས་མེད་དུ་སྦྱོངས། །ཐབས་འགག་མེད་ཀྱི་གནད་དེ་དག་སྣང་ལ་གདའ། །སེམས་གསལ་སྟོང་ལྷ་སྐུའི་སྣང་ཆ་དང༌། །རང་རིག་པ་འགྱུར་མེད་བདེ་བའི་ངང༌། །དེ་དང་པོ་ཉིད་ནས་སྐྱེ་བ་མེད། །གང་ལ་མ་སྐྱེས་པ་ལ་འགག་པ་མེད། །སེམས་སྐྱེ་འཆི་མེད་པའི་རང་བཞིན་ཏེ། །འཕྲལ་དྲིན་ཅན་གྱི་བླ་མས་ངོ་སྤྲོད་པ། །མིང་ཡང་རང་སེམས་འཆི་མེད་ཟེར། །


TNT01_Page_0990
[མ་དཔེ་གཟིགས་ན་འདིར་གནོན།]

བསྐྱེད་རྫོགས་སྙིང་པོར་དྲིལ་བ་གཅིག་ན་གདའ། །རླུང་དང་རྣམ་རྟོག་སེམས་གསུམ་པོ། །དབྱིངས་སུ་བསྡོམས་པ་ཉམས་ལེན་གྱི་གནད། །འཁྲུལ་འཁོར་གྱི་ཁ་བསྒྱུར་ཉམས་ལེན་གྱི་རྩལ། །གཞན་ལུས་ལ་ཐོགས་པ་མེད་པ་ཡི། །ཐིག་ལེ་འཛག་མེད་ཀྱི་རང་གྲོལ་ལས། །དགའ་བཞི་དབྱིངས་སུ་ངོ་སྤྲོད་པ། །མིང་ནི་རང་ལུས་འཆི་མེད་ཟེར། །རླུང་སེམས་རང་དབང་དུ་ཆུག་གཅིག་རྣལ་འབྱོར་པ། །འཕྲལ་འཕྲྀན་ལས་རྣམ་བཞིའི་བསྒྲུབ་པའི་གནད། །ཕ་དྲིན་ཅན་རྩ་བའི་བླ་མ་དང༌། །མྱུར་མཛད་ཡེ་ཤེས་མགོན་པོ་གཉིས། །མཚན་ཐ་དད་དོན་ལ་ཁྱད་པར་མེད། །མོས་གུས་ཉག་གཅིག་གི་རྣལ་འབྱོར་ལས། །དངོས་གྲུབ་རྣམ་གཉིས་ཀྱི་ཀློང་བརྡོལ་ནས། །འགྲོ་དོན་ལྷུན་གྲུབ་ཏུ་འཆར་བ་ལགས། །དབྱངས་མཆོད་པར་འབུལ་ལོ་མཚན་ལྡན་རྗེ། །དཔལ་རྡོ་རྗེ་འཆང་ཆེན་ནས་བརྩམས་ཏེ། །ཕ་རྩ་བའི་བླ་མ་ཐམས་ཅད་ལ། །ཉམས་དབྱངས་ཀྱི་གླུ་འདི་མཆོད་པར་འབུལ། ཁྱེད་འདིར་འདུས་ཀྱི་སྐལ་ལྡན་ཕོ་མོ་ལ། །ངེས་གསང་གི་བདུད་རྩི་རོ་མཆོག་འདི། །དགའ་དོན་གྱི་ཚུལ་དུ་བྱིན་པ་ལགས། །བདག་ཕྱོགས་རིས་མེད་པའི་རྒྱལ་ཁམས་པ། །རོ་སྙོམས་ཀྱི་རྣལ་འབྱོར་གུ་ཡངས་པོ། །ཆོས་བརྒྱད་ཀྱི་དགྲ་མཁར་ཞིག་པ་ཞིག །གཉུག་མའི་གཏན་ས་ཟིན་པ་ཞིག །དངོས་


TNT01_Page_0991
[མ་དཔེ་གཟིགས་ན་འདིར་གནོན།]

ཀུན་གྱི་རང་ཞལ་ལྟ་བ་པོ། །ཆོས་ཐ་སྙད་ཚིག་ལ་མ་རྨོངས་ཀྱང༌། །མཁས་འདོད་ཀྱི་བཟང་འཛིན་དབྱིངས་སུ་གྲོལ། །འཕྲལ་ལུས་སེམས་ཐ་མལ་དུ་སྣང་བ་ཙམ། །དྲིན་ཅན་གྱི་མཁན་པོས་གནང་པའི་མིང༌། །ཀུན་དགའ་སྙིང་པོ་ཞེས་བྱ་བ་ཡིན། །རང་སེམས་ཀྱི་རང་བཞིན་ངོ་སྤྲོད་པ། །མི་སངས་རྒྱས་སུ་གཏོང་བའི་བཀའ་དྲིན་ཅན། །ཕ་བླ་མས་བཀའ་དྲིན་རྩལ་བ་ནི། །མིང་ཏཱ་ར་ནཱ་ཐ་ཞེས་བྱ་བ་ཡིན། །དེང་སྙིང་གཏམ་གྱི་ཚུལ་དུ་སྨྲས་པ་ཡིན།། །།ཞེས་པའང་རང་ལོ་ཉེར་ལྔ་པ་ལ་རི་གོང་དཔལ་གྱི་མགོན་པོའི་གནས། རང་བྱུང་མགོན་པོའི་དྲུང་དུ་ཚོགས་ཀྱིས་འཁོར་ལོའི་ཚེ་གླུར་བླངས་པ་ཨྠིྀ། །དགེའོ། །

གདམས་པའི་ཚུལ་དུ་བླངས་པའི་གླུ།


TNT01_Page_0992
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། ན་མོ་གུ་ར་ཝེ། དབྱིངས་སྤྲོས་དང་བྲལ་བའི་ངང་ཞིག་ནས། །འཕྲལ་གང་ལ་གང་འདུལ་འགྲོ་དོན་མཛད། །ཆོས་ཚིག་སྤྱི་དང་དོན་སྤྱིར་མ་ལས་པར། །དོན་སྙིང་པོར་སྟོན་པའི་བླ་མ་རྗེ། །ས་འདི་ནས་རྒྱལ་ཁམས་ཀྱི་རྣལ་འབྱོར་པ། །ཡིད་མོས་གུས་དྲག་པོས་གསོལ་བ་འདེབས། །བུ་སློབ་མའི་སེམས་ལ་བྱིན་གྱིས་རློབས། །ལར་རྩ་བྲལ་རྟོགས་པར་ཐུགས་རྗེས་གཟུང༌། །ཕ་བྱིན་རླབས་ཅན་དེའི་བཀའ་དྲིན་ལ། །མི་ངས་ཀྱང་སེམས་ཀྱི་གནས་ལུགས་མཐོང༌། །རྗེ་མཁྱེན་པ་ཅན་དེའི་བཀའ་དྲིན་ལས། །དོན་ངེས་པའི་གནས་ལ་ཐག་


TNT01_Page_0992
[མ་དཔེ་གཟིགས་ན་འདིར་གནོན།]

ཆོད་བྱུང༌། །ཡོངས་ཐུགས་རྗེ་ཅན་དེའི་བཀའ་དྲིན་ལ། །ཕྱི་དགྲ་གཉེན་གྱི་རྣམ་རྟོག་ཞི་བ་ཙམ། མགོན་འཁྲུལ་ཞིག་ཅན་དེའི་བཀའ་དྲིན་ལ། །ནང་འཛིན་པ་ཡལ་ཡུལ་ངང་དུ་བུད། །ང་རྗེ་ལ་མོས་གུས་མི་ཆེ་རུ། །བཀའ་དྲིན་ལ་ཚད་གཟུང་མི་གདའ་འོ། ཁྱེད་འདིར་འདུས་ཀྱི་ཐུགས་ལ་འདི་ལྟར་ཞོག །ལར་ད་རེས་མི་ལུས་ཐོབ་པ་ལ། །མདོ་དོན་ཡོད་པ་ཞིག་གལ་རེ་ཆེ། །དམ་ཆོས་མི་བྱེད་པའི་མི་ལུས་འདི། །དུད་འགྲོ་ལས་ཟང་མ་ཞིག་མ་ལགས་སམ། །མི་རྟག་འཁོར་བའི་གནས་ཚུལ་ལ། །ཐུགས་ངེས་པར་འབྱུང་བ་ཞིག་ཅིས་ཀྱང་འཚལ། །ཐར་པའི་ལམ་སྣ་ཟིན་པ་ཞིག་གལ་རེ་ཆེ། །སྔོན་འཁོར་བ་ཐོག་མ་མེད་པ་ནས། །དུས་ཉི་མ་དེ་རིང་ལ་ཐུག་གི་བར། །ལུས་བྱ་བྱེད་འགྲོ་འདུག་ཉལ་དང་ལངས། །ངག་སྨྲ་བརྗོད་ངལ་དུབ་རྩོལ་བའི་ལམ། །ཡིད་མནོ་བསམ་འགྱུ་བའི་འཕྲང་ལ་བརྡར། །ཆོས་བྱེད་ཚུག་བྱས་ཀྱང་ལས་སུ་སོང༌། །ལར་སྡིག་པ་སྡུག་བསྔལ་གྱི་རྒྱུ་ལགས་ཤིང༌། །ལས་ལུང་མ་བསྟན་མི་ཚེ་སྟོང་ཟད་ཡིན། །ཐར་ལམ་དུ་མ་སོང་བའི་དགེ་བ་དེ། །འཁོར་བ་བསྐྱེད་པའི་ཐབས་སུ་གདའ། །ཕྱག་ཆེན་གྱིས་མ་ཟིན་པའི་སྤྲོས་བཅས་དེ། །ཡིད་རྣམ་རྟོག་འཁྲུག་པའི་རྒྱུ་ཞིག་གདའ། །སྒོམས་སེམས་དང་མ་འདྲེས་པའི་གོ་ཡུལ་དེ། །དོན་མདོ་དོན་ཐུག་དུས་བསླུ་བ་ཞིག་གདའ། །སྙིང་རྗེས་མ་ཟིན་པའི་སྟོང་རྐྱང་དེ། །ལེགས་ཀྱང་ཐེག་དམན་གྱི་རྒྱུ་ཞིག་ལགས། །ལས་འབྲས་ཁྱད་གསོད་ཀྱི་འུག་གོག་དེ། །དམྱལ་བར་འགྲོ་བའི་རྒྱུ་ཞིག་གདའ། །རང་ངོ་


TNT01_Page_0993
[མ་དཔེ་གཟིགས་ན་འདིར་གནོན།]

མ་ཤེས་པའི་ལྟ་བ་དེ། །བློས་བྱས་སྤྲོས་པའི་རི་མོར་གདའ། །རང་སོ་ཚུགས་པའི་ཉོན་མོངས་དེ། །རྩུབ་རྩུབ་འདྲ་ཡང་འཇམ་པོར་གདའ། །རྩ་བྲལ་ལ་སོང་བའི་འཆར་སྒོ་དེ། །སྣང་སྣང་འདྲ་ཡང་ཡལ་ཡུལ་དུ་གདའ། །རྩོལ་མེད་ངོ་ཤེས་ཀྱི་རྣམ་རྟོག་དེ། །འགྱུ་འགྱུ་འདྲ་ཡང་རང་ཞིག་ཏུ་གདའ། །ལྷག་བསམ་གྱིས་མ་ཟིན་པའི་དགེ་རྩ་དེ། །བྲེལ་བ་ཆེ་ལ་འབྲས་བུ་ཆུང༌། །སློང་ཡངས་སུ་མ་ཐེངས་པའི་ཁ་ཏོན་དེ། །སེམས་ཚབ་ཆེ་ལ་གྲུབ་དོན་ཆུང༌། །བྱང་སེམས་ཀྱིས་མ་ཟིན་པའི་སྒོམ་བཟླས་དེ། །བོན་ཆོག་དང་ཁྱད་པར་མི་གདའ་འོ། །ད་ལུས་གནད་སྲང་དུ་གཞུག་ཏུ་འཚལ། །ངག་སྨྲ་བརྗོད་སྤངས་ལ་ལྷུག་པར་ཞོག །སེམས་བཟོ་མེད་ཧྲིག་གེ་སྐྱོང་བར་ཞུ། །ཕ་བླ་མ་ཆོས་སྐུར་མཁྱེན་པ་ཞིག་འཚལ། །དམ་ཚིག་ལ་ཟོལ་ཟོག་མེད་པ་ཞིག་འཚལ། །དད་གུས་ལ་ཁ་ཞེ་མེད་པ་ཞིག་འཚལ། །ཉོན་མོངས་གང་སྐྱེས་ཀྱི་ངོ་བོ་ལ། །མ་བཅོས་སོ་མར་འཇོག་པ་ཞིག་ཞུ། །སེམས་རང་བཞིན་སོ་མ་བསྐྱངས་ཙ་ན། །གང་ཤར་བརྗོད་བྲལ་དུ་ལམ་མེར་གདའ། །དེ་གདོད་མ་ནས་ཡོད་ཡོད་པོ་ཞིག་ལགས། །ཡོད་པར་མ་ཤེས་པ་ཡ་རེ་ཆ། །འདི་མ་བཅོས་ལྷུག་པའི་གདམས་ངག་ཟེར། །འཕྲལ་ལུས་ངག་སྤྱོད་པ་ཅི་བྱེད་ཀྱང༌། །རང་སོ་ཚུགས་པའི་ངོ་བོ་ལ། །དམིགས་


TNT01_Page_0994
[མ་དཔེ་གཟིགས་ན་འདིར་གནོན།]

གཏད་ཀུན་ཞིག་པའི་ངང་ཞིག་ནས། །བླང་དོར་ལ་མཚན་མར་མ་འཛིན་པར། །ཐོ་ཆོ་ལ་བཟང་པོར་མ་ངོམ་ཞིག །ཚུལ་འཆོས་ཀྱི་མཛེས་ཁྲིགས་ཀྱང་མི་འཚལ་ལོ། །གང་ཤར་གྱི་སྤྱོད་པ་ལྷུག་པ་ལ། །བཅོས་མ་རུ་མ་སོང་པ་གནད་དུ་ཆེ། །འདི་བླང་དོར་མཉམ་ཉིད་ཀྱི་གདམས་ངག་ལགས། །སྒོམ་ཉམས་ཀྱི་རྩི་ལ་ཞེན་པ་ཏེ། དཔེ་དར་གྱི་སྲིན་བུ་ཇི་བཞིན་དུ། །རང་རང་གིས་འཆིང་བའི་མགོ་བསྐོར་ལགས། །དུས་དོ་ནུབ་ཚོགས་ཀྱི་འཁོར་ལོའི་དུས། །གནས་རྒྱལ་པོའི་ཕོ་བྲང་ཆེན་པོ་ན། །མིང་ཏཱ་ར་ནཱ་ཐ་སྐད་པ་ཡིས། །གླུ་འདི་ནི་གདམས་པའི་ཚུལ་དུ་བླངས། །དེ་མཆོད་པར་འབུལ་ལོ་བླ་མ་རྗེ།། །།ཞེས་སློབ་བུ་འགའ་ཞིག་ལ་ངོ་སྤྲོད་ཀྱི་ཚུལ་དུ་གླུར་བླངས་པ། ཉིན་ཞག་འགའ་རེ་འབྲི་བ་མ་བྱུང་བས། མ་བརྗེད་པར་དྲན་ཚོད་ཅིག་དེང་འདུས་རྣམས་ཀྱིས་འབྲི་བར་བསྐུལ་ནས་བྲིས་པ་སྟེ། གོང་དཀར་དུའོ། །དགེའོ། །

ངེས་འབྱུང་གི་མགུར།


TNT01_Page_0995
[མ་དཔེ་གཟིགས་ན་འདིར་གནོན།]

༈ བླ་མ་ལ་ཕྱག་འཚལ་ལོ། །འཁོར་བ་སྡུག་བསྔལ་གྱི་རང་བཞིན་ལས། །མ་གྱུར་འགྲོ་བ་ཀུན་སྒྲོལ་བའི་བློ། །སྐད་ཅིག་ཙམ་དུ་མ་རེ་སྐྱེས་ཙ་ན། །ལེ་ལོའི་འཁྲི་བ་ཚོ་རྩད་ནས་ཆོད། །ལར་བྱང་ཆུབ་སེམས་འདི་མ་འབྱོངས་ན། །དེ་མཁས་པར་རློམས་ཡང་མདོ་མེད་པོ། །བཟང་པོར་རྫུ་ཡང་གཞན་མགོ་བསྐོར། །བཙུན་


TNT01_Page_0995
[མ་དཔེ་གཟིགས་ན་འདིར་གནོན།]

བཙུན་འདྲ་ཡང་མཛེས་ཆོས་སུ་གདའ། །ཆོས་པ་རྣམ་དག་ཡིན་ཐག་ཆད། ཁོང་སྡེ་བྱུས་ཀྱི་ཁ་ལོ་སྒྱུར་པ་ཡི། །བཤེས་གཉེན་ཀུན་ལ་ཞེ་ནས་ཁྲེལ། །ཆོས་དང་རྒྱབ་འགལ་གྱི་མཛད་སྤྱོད་ལ། །དགེ་བཤེས་སུ་རེ་བ་ཧ་ཅང་འཁྲུལ། །དཔུང་བུ་རྟའི་རལ་རོལ་མང་པོ་དང༌། །ནོར་ལོངས་སྤྱོད་ཟང་ཟིང་ལྷུར་ལེན་པ། །ཆོས་ཀ་རི་ཀ་ཙམ་ཡང་མི་ཤེས་པར། །འཁོར་མང་པོ་འདྲེན་པ་ཡ་རེ་ཆ། །འཇིག་རྟེན་པའི་དཔོན་གཡོག་གྱུ་རུ་སྟེ། །ལས་མཐུན་ཙམ་འདུས་པ་མ་གཏོགས་པ། །དམ་ཆོས་ཀྱི་དྲི་ཙམ་མི་གདའ་ན། །སྨིན་གྲོལ་གྱི་གཞན་དོན་རེ་ཐག་སངས། །མ་བྱུང་དུས་འཁོར་ཚོགས་གཡང་ལྟར་འགུགས། །བྱུང་དུས་གྲགས་འདོད་ཀྱིས་ཕྱོགས་བཅུར་འགྱེད། །བྱ་བ་ཐོངས་ཐོངས་འདྲ་ཡང་མི་ཐོངས་པའི། ཁ་ཞུ་ག ཏིང་འཁྱགས་ཀྱི་རྣལ་འབྱོར་པ། །སྟོང་ཉིད་སྒོམ་པས་ཆོག་དུས་སུ། །སྤྲོས་བཅས་ཀྱི་སྐྱབས་ཤིག་ཚོལ་ལ་རེམ། །སྤྲོས་བཅས་མ་དག་ཅིང་མ་ཚང་པའི། །སྐྱོན་སུབས་ལ་སྟོང་སྐད་གྱི་འུད་གོག་འཐག །གཉིས་མེད་སེང་གེ་ཁྱོད་འཛིན་སྟངས་རེ་བཟང༌། །འཆར་ཀ་དང་གཏམ་ངན་བྱུང་གི་དོགས། །རང་གནོད་རི་ཙམ་ཁོང་དུ་ཆུག །རོ་སྙོམས་ཀྱི་རྣལ་འབྱོར་གནམ་མཐའ་ཡར། །སྐབས་འགར་རང་


TNT01_Page_0996
[མ་དཔེ་གཟིགས་ན་འདིར་གནོན།]

སྐྱོན་ཡང་གཤོང་བ་སྐད། །རང་མ་མགུ་བ་ཀུན་ལ་ཐབས་ཀྱིས་སྨོད། །རང་བཟང་པོར་ངོམ་པའི་རྣལ་འབྱོར་པ། ཁྱོད་སྨྲ་བ་མང་ཡང་གཏིང་ནས་ཁྲེལ། །ཡེངས་ཚེ་འདིའི་སྐྱིད་སྡུག་དང་གཏམ། །རླུང་ལ་བསྐུར་ནས་མ་གྱུར་ཚོ། །སྒྲོལ་འདོད་ཀྱི་སྙིང་རྗེ་ཟོལ་མེད་ཅིག །བྱུང་ན་ཆོས་སུ་འགྲོ་ལགས་པས། །ཅིས་ཀྱང་འབད་པའི་དུས་ལ་བབ།། །།ཅེས་པའང་རང་གཞན་ད་ལྟའི་ཆོས་པར་རྫུ་བ་མང་པོའི་གནས་ཚུལ་ལ་ཡིད་ངེས་པར་འབྱུང་ནས། ཏཱ་ར་ནཱ་ཐས་རང་ལོ་ཉེར་གསུམ་པ་ལའོ། །དགེའོ། །

རྟགས་འདི་བདུན་ཚང་བའི་རྣལ་འབྱོར་པ་ཞེས་པའི་མགུར།


TNT01_Page_0997
[མ་དཔེ་གཟིགས་ན་འདིར་གནོན།]

ན་མོ་གུ་རུ། བདེ་ཆེན་ཆོས་སྐུའི་རང་ཉམས་ལས། །ཕྱོགས་མེད་ཀྱི་ཐུགས་རྗེའི་འགྲོ་དོན་ཤར། །ཕ་རྡོ་རྗེ་འཆང་གི་ཞབས་ལ་འདུད། །བདག་འདིར་ཚོགས་ལ་བྱིན་གྱིས་བརླབ་ཏུ་གསོལ། །གཞན་དོན་ཕྱོགས་མེད་དུ་འཕེལ་བ་འདི། །སེམས་སྟོང་ཉིད་སྙིང་རྗེ་ཤར་བའི་རྟགས། །གནས་ལུགས་ཀྱི་རང་ངོ་འཕྲོད་པ་འདི། །མོས་གུས་ཚད་དུ་ཕྱིན་པའི་རྟགས། །ནམ་ཡང་ཡེངས་པ་མེད་པ་འདི། །རྩ་བྲལ་གྱི་གནས་ལུགས་རྟོགས་པའི་རྟགས། །རྣམ་རྟོག་གི་སྐྱེ་ཐག་ཆོད་པ་འདི། །རྟོག་མེད་ཀྱི་གནས་ལུགས་རྟོགས་པའི་རྟགས། །བདེ་སྟོང་གི་ཉམས་མྱོང་རྒྱུན་ཆད་མེད། །རྩ་ཐིག་རླུང་གསུམ་དུལ་


TNT01_Page_0997
[མ་དཔེ་གཟིགས་ན་འདིར་གནོན།]

བའི་རྟགས། སྤྱོད་པ་བཟའ་གཏད་དང་བྲལ་བ་འདི། །ཆོས་བརྒྱད་ཀྱི་རླུང་དམར་ཞི་བའི་རྟགས། །ཐོབ་འདོད་ཀྱི་རེ་དོགས་ཞིག་པ་འདི། །རང་སེམས་སངས་རྒྱས་སུ་ངེས་པའི་རྟགས། །རྟགས་འདི་བདུན་ཚང་བའི་རྣལ་འབྱོར་པ། །སེམས་བདེ་ཞིང་སྐྱིད་པའི་རང་སོ་ཟིན། །བློ་མི་བདེ་མི་གདའ་བདེ་མོར་གདའ། །སླར་བདེ་ཞིང་སྐྱིད་པའི་བཀྲ་ཤིས་ཤོག། །།ཅེས་པའང་ཏཱ་ར་ནཱ་ཐས་སྨྲས་པའོ། །རྗེ་བཙུན་པད་དཀར་འཆང་བའི་རྣམ་འཕྲུལ་མགོན། །སྨྲ་བའི་དབང་ཕྱུག་ཡོན་ཏན་བཟང་པོ་ཡིས། །སྤྱི་ལོ་༡༩༩༧ལོར། །བསྟན་པ་སྤྱི་དང་ཁྱད་པར་ཇོ་ནང་པའི། །བཤད་སྒྲུབ་སླར་གསོ་བྱ་བ་སྤེལ་བའི་ཆེད། །འཇམ་མགོན་ཏཱ་ར་ནཱ་ཐའི་གསུང་འབུམ་གྱི། །མི་ཟད་ཆོས་སྦྱིན་དཔལ་ལྡན་འཛམ་ཐང་གི །གཙང་བའི་ཆོས་གྲྭར་བསྐྲུན་པའི་དགེ་བ་ཡིས། །མ་གྱུར་འགྲོ་ལ་གནས་སྐབས་བདེ་བ་དང་། །མཐའ་ཐུག་གཏན་བདེ་བླ་མེད་བྱང་ཆུབ་མཆོག །མྱུར་དུ་ཐོབ་པའི་དཔུང་གཉེན་དམ་པ་རུ། །གཞི་དབྱིངས་མཆོག་གསུམ་དམ་པས་ཤིས་པ་སྩོལ། །དགེའོ། །མངྒ་ལཾ།། །།