ལྟ་སྒོམ་སྤྱོད་གསུམ་གྱི་གདམས་པ་མདོ་སྔགས་ལམ་གྱི་སྙིང་པོ།
ལྟ་སྒོམ་སྤྱོད་གསུམ་གྱི་གདམས་པ་མདོ་སྔགས་ལམ་གྱི་སྙིང་པོ་བཞུགས། །ན་མོ་གུ་རུ། བདེ་ཆེན་ཆོས་སྐུ་ནམ་མཁའ་དག་པ་ལ། །མཐའ་དག་སྲིད་གསུམ་སྣང་བ་ཅི་ཡང་ཤར། །ཟུང་འཇུག་གདོད་མའི་ཡེ་ཤེས་མངོན་དུ་གྱུར། །བླ་མ་མཆོག་ལ་དངོས་པོ་ཀུན་གྱིས་འདུད། །བརྗོད་མེད་རང་རིག་དོན་དམ་རྟོགས་པའི་ཐབས། །དད་ལྡན་སློབ་མས་བསྐུལ་ཕྱིར་འདིར་བརྗོད་བྱ། །ངེས་པའི་དོན་ནི་ཚིག་གི་ཡུལ་མིན་ཡང༌། །བརྡ་ལ་བརྟེན་ནས་དོན་དམ་རྟོགས་པར་འགྱུར། །དངོས་པོའི་གནས་ལུགས་གཏན་ལ་དབབ་པའི་ཕྱིར། །འཁྲུལ་མེད་ལྟ་བའི་ངེས་གསང་རྟོགས་པར་བྱ། །གནས་ལུགས་བཞིན་དུ་ཉམས་སུ་མྱོང་བའི་ཕྱིར། །ཉམས་ལེན་སྒོམ་པའི་གནད་ལ་འཁྲུལ་མེད་དགོས། །རྒྱུ་འབྲས་རྟེན་འབྲེལ་བསླུ་བ་མེད་པའི་ཕྱིར། །ལག་ལེན་སྤྱོད་པ་རྣམ་པར་དག་པ་གཅེས། །གཞིའི་གནས་ལུགས་ཇི་བཞིན་མངོན་གྱུར་པ། །རྒྱུ་འབྲས་དབྱེར་མེད་འབྲས་བུ་མངོན་གྱུར་གནད། །རང་བཞིན་འགྱུར་བ་མེད་དང་སྤྲོས་བྲལ་དང༌། །ལྷན་ཅིག་སྐྱཻས་དང་རང་རིག་རང་གསལ་དང༌། །ཀུན་ཁྱབ་མཐའ་བྲལ་བརྗོད་མེད་ཅེས་པ་སྟེ། །གནས་ལུགས་ལྟ་བའི་གནད་བདུན་རིག་པར་བྱ། །འཇིག་རྟེན་སྲིད་པ་ཆགས་འཇིག་ཅི་
བྱུང་ཡང༌། །མཁའ་ལ་ཡངས་དོག་མེད་ཅིང་འགྱུར་བ་མེད། འཁོར་འདས་བདེ་སྡུག་མཐོ་དམན་ཐམས་ཅད་ལ། །སེམས་ཀྱི་རང་བཞིན་བཟང་ངན་འཕོ་འགྱུར་མེད། །སྣང་བ་ཅི་ཡང་འཆར་བས་མེད་པ་མིན། །རང་བཞིན་ངོས་གཟུང་བྲལ་ཕྱིར་ཡོད་པ་མིན། །གདོད་ནས་ཅི་ཡང་མིན་པའི་རང་བཞིན་ལ། །བློ་ཡིས་བཞག་པའི་སྤྲོས་པ་ཀུན་དང་བྲལ། །དངོས་པོའི་གནས་ལུགས་སེམས་ཀྱི་རང་བཞིན་འདི། །གསར་བྱུང་མ་ཡིན་གདོད་ནས་ལྷན་ཅིག་སྐྱེས། །འདས་དང་མ་འོངས་ད་ལྟ་དུས་གསུམ་ཡང༌། །ཐ་སྙད་ཙམ་ལས་རང་བཞིན་ཐ་དད་མེད། །ཅང་མེད་མ་ཡིན་རིག་སྟོང་མ་འགགས་པས། །གསལ་ལ་ངོས་བཟུང་མེད་ཅིང་གཏད་སོ་བྲལ། འཁོར་དང་མྱ་ངན་འདས་པའི་སྣང་བ་ཀུན། །རྟག་ཏུ་འཆར་ཞིང་ཤར་དུས་ཉིད་ནས་སྟོང༌། །ནམ་མཁའ་རང་བཞིན་སྟོང་པ་ཙམ་འདི་ལ། །ཤར་ནུབ་ལ་སོགས་ཕྱོགས་ཆ་ཉེ་རིང་མེད། །ཀ་བའི་ནམ་མཁའ་བུམ་པའི་ནམ་མཁའ་ཞེས། །ཚིག་ཙམ་ཡིན་གྱི་སུས་ཀྱང་འབྱེད་མི་ནུས། །དེ་ཕྱིར་སེམས་ཀྱང་མཁའ་ལྟར་ཀུན་ཏུ་ཁྱབ། །ཉམས་ལེན་མ་བྱས་འཁྲུལ་པའི་སེམས་ཉིད་དང༌། །ལམ་གྱི་གནས་སྐབས་རྣལ་འབྱོར་པ་ཡི་སེམས། །འཁྲུལ་སྣང་དག་པ་རྫོགས་སངས་རྒྱས་ཀྱི་སེམས། །མིང་འདོགས་ཐ་དད་དོན་ལ་ཁྱད་པར་མེད། །ཅིར་
ཡང་འཆར་ལ་ཅི་ཡང་མ་ཡིན་པ། །སྟོང་གསལ་ངོས་བཟུང་བྲལ་བ་གཅིག་པུ་ལ། །འཁྲུལ་པས་སོ་སོར་བཏགས་པ་ཁོ་ན་ལགས། །གང་དུའང་གཟུང་རྒྱུ་མེད་པས་མཐའ་དང་བྲལ། །དངོས་པོར་འཛིན་ན་རྟག་པའི་མཐའ་ཡིན་ལ། །སྟོང་པར་འཛིན་ན་ཆད་པའི་མཐའ་ཞེས་གསུངས། །གང་དུའང་མ་གྲུབ་ཕྱིར་ན་བློ་ལས་འདས། །བཟང་ངན་དངོས་པོ་དངོས་མེད་འདུས་བྱས་དང༌། །འདུས་མ་བྱས་སོགས་སྣང་ཞིང་གྲགས་པ་ཡི། །མིང་དང་ཐ་སྙད་ཇི་ཙམ་བརྗོད་ཀྱང་རུང༌། །དངོས་པོའི་གནས་ལུགས་རྟོགས་པར་མི་འགྱུར་ཞིང༌། །སྡོད་ལུགས་ཇི་བཞིན་བརྗོད་པར་མི་ནུས་པས། །ཚིག་གི་ལམ་ལས་འདས་ཤིང་བརྗོད་བྲལ་ཡིན། །དཔལ་ལྡན་བླ་མ་མཆོག་གི་བྱིན་རླབས་ཀྱིས། །རང་རིག་ཙམ་གྱིས་ཉམས་སུ་མྱོང་བྱ་ལགས། །གྲུབ་མཐའ་ཐ་དད་སྣ་ཚོགས་ལྟ་བའི་དོན། །ཀུན་དང་འདི་ཉིད་མཐུན་ཞིང་ཀུན་ལས་ལྷག །གཞན་རྣམས་གནས་ལུགས་ཕྱོགས་རེ་ཙམ་ལ་སྤྱོད། །གདོད་མའི་གནས་ཚུལ་འཁྲུལ་མེད་འདི་ཁོ་ན། །ཉན་ཐོས་པ་རྣམས་གང་ཟག་བདག་མེད་སྒོམ། །རང་རྒྱལ་གཟུང་བའི་ཡུལ་རྣམས་བདེན་མེད་དང༌། །རྣལ་འབྱོར་སྤྱོད་པ་གཉིས་སྟོང་ཡེ་ཤེས་དང༌། །དབུ་མ་པ་རྣམས་ཆོས་ཀུན་བདེན་མེད་ཟེར། །གསང་སྔགས་ཕྱི་བ་སྣང་སྟོང་ལྷ་ཡི་སྐུ། །བླ་མེད་པ་རྣམས་བདེ་སྟོང་དབྱེར་མེད་དེ། །ཐམས་ཅད་རང་སེམས་གཅིག་པུའི་མིང་འདོགས་ཡིན། །
རང་སེམས་གཅིག་པུ་གཏན་ལ་འབེབས་པ་ཡིན། །བྱ་བྱེད་བྱེད་པོ་ཀུན་དང་བྲལ་བའི་ཕྱིར། །གང་ཟག་བདག་མེད་ཅེས་པ་སེམས་འདི་ཉིད། །ཡུལ་སྣང་ཐམས་ཅད་སེམས་ཉིད་གཅིག་པུའི་རྩལ། །དེ་ཕྱིར་གཟུང་བ་ཆོས་ཀྱི་བདག་མེད་ཡིན། །ཆུ་རླབས་ཆུ་དང་དབྱེ་བ་མེད་པ་བཞིན། །སྣང་བ་ཐམས་ཅད་རང་སེམས་གཅིག་པུའི་རྩལ། །དེ་ཕྱིར་གཟུང་དང་འཛིན་པའི་དབྱེ་བ་མེད། །རང་བཞིན་གསལ་སྟོང་རྒྱུན་ཆད་མེད་པ་འདི། །གཉིས་མེད་ཡེ་ཤེས་དོན་དམ་གནས་ལུགས་ཡིན། །གཏད་སོ་མེད་ཅིང་དམིགས་སུ་མེད་པ་དང༌། །གཟུང་མེད་བརྗོད་པའི་ཡུལ་ལས་འདས་པའི་ཕྱིར། ནམ་ཡང་ཡོད་མ་མྱོང་བའི་ཆོས་ཉིད་ཡིན། །འཁོར་འདས་ཀུན་གྱི་རྣམ་པར་འཆར་བ་དང༌། །ཤར་ཙམ་ཉིད་ནས་སྟོང་པས་གསལ་སྟོང་ཡིན། མི་རྟག་སྡུག་བསྔལ་ལ་སོགས་ཐ་སྙད་ཙམ། །དོན་ལ་ངོ་བོ་མ་གྲུབ་བྲག་ཆ་བཞིན། །རང་བཞིན་མི་འགྱུར་བདེ་བ་ཆེན་པོ་ལ། །གང་ཡང་འཛིན་དུ་མེད་པས་བདེ་སྟོང་ཡིན། །ལྟ་བའི་རྒྱལ་པོ་མཐའ་བྲལ་ནམ་མཁའི་དཔེ། །གནས་ལུགས་ཟབ་མོ་ཐུགས་ལ་ངེས་པར་འཚམ། དེ་དག་ལྟ་བའི་གནས་ཚུལ་མདོ་ཙམ་མོ། །ལྟ་བ་མཁའ་ལྟར་ཡངས་པ་སྟེ། །སྒོམ་པར་ཉམས་སུ་མྱོང་བ་གཅེས། །ཉམས་མྱོང་མེད་པའི་ལྟ་བ་ནི། །ཡིད་དཔྱོད་གོ་བ་ཙམ་ལ་ལུས། །ལས་དང་པོ་ཡི་རྣལ་འབྱོར་
པས། །རྗེས་ཐོབ་གཉུག་མའི་ཡེ་ཤེས་ལ། །རང་ངོ་འཕྲོད་པ་དཀའ་བའི་ཕྱིར། །ཞི་ལྷག་གཉིས་ལ་འབད་པ་གཅེས། །སེམས་ཀྱི་གནས་ཐབས་དགུ་ལ་སོགས། །ཞི་གནས་སྒོམ་པའི་རིམ་པ་དང༌། །འཇིག་རྟེན་འཇིག་རྟེན་འདས་པ་ཡི། །ལྷག་མཐོང་ལ་སོགས་རྣམ་གཞག་མང༌། ཁོ་བོ་སྙིང་པོ་ལ་དགའ་བས། །སྤྲོས་པ་དུ་མ་འདིར་མི་འཆད། །ཟབ་མོའི་དེ་ཉིད་ཉམས་མྱོང་དང༌། །རྗེས་སུ་འབྲེལ་བ་མདོ་ཙམ་ནི། །དཔྱད་འཇོག་སྤེལ་མར་སྒོམ་པ་སོགས། །གཞུང་ལུགས་རྣམས་ལས་མང་བཤད་པ། །དེ་ཡང་ལམ་དུ་འགྱུར་མོད་ཀྱི། །མན་ངག་ཅན་ལ་འདི་མི་དགོས། །རང་བཞིན་གདོད་ནས་སྤྲོས་བྲལ་ལ། །དེ་ལྟར་ཡིན་པར་ངོ་ཤེས་པའི། །ཐབས་ཀྱི་རྒྱལ་པོ་ཟླ་མེད་པ། །མཚན་ལྡན་བླ་མའི་མོས་གུས་ཡིན། །རང་གི་སེམས་ཀྱིས་རང་སེམས་ལ། །རང་དབང་འབྱོར་ཕྱིར་ཞི་གནས་སྒོམ། །རང་བཞིན་གདོད་ནས་སྤྲོས་བྲལ་ལ། །ཐག་ཆོད་སྐྱེ་ཕྱིར་སེམས་འཚོལ་བྱ། །གཏན་ལ་ཕེབས་པའི་རང་སེམས་དེ། །ངོ་ཤེས་གཅིག་པུས་ཆོག་པའི་ཕྱིར། །དྲན་པ་འབྲལ་མེད་རྒྱུན་དུ་བསྟེན། །དྲན་པ་མེད་ལ་ངོ་ཤེས་དཀའ། །གནས་ལུགས་གདོད་མ་ཡིན་པའི་ཕྱིར། །མ་བཅོས་སོ་མ་གནད་དུ་ཆེ། །གང་ཤར་གཉུག་མ་ཡིན་པའི་ཕྱིར། །ལྷུག་པར་འཇོག་པ་སྒོམ་གྱི་གནད། །བྱ་བྱེད་ཉམས་ལེན་ཐམས་ཅད་ཀྱི། །མཐར་ཕྱིན་བྱེད་པ་བོགས་འདོན་གནད། །བླ་མ་ཆོས་སྐུར་མཐོང་བ་ཡི། །མོས་གུས་
བྱིན་རླབས་ལམ་བྱེད་དེ། །སྒོམ་པ་ཉམས་སུ་ལེན་པ་ཡིན། །གནད་མཆོག་བདུན་པོ་བླ་མའི་གསུང༌། །ཉམས་ལེན་མཐའ་རུ་སྐྱོང་བ་ལ། མེད་ཐབས་མེད་པའི་གལ་པོ་ཆེ། །བྱིང་རྒོད་གཉིས་ཀྱིས་མ་སླད་པའི། །རང་སེམས་གསལ་སྟོང་འཛིན་མེད་ནི། །བཏང་འགྲོ་བཞག་སྡོད་རང་དབང་འབྱོར། །ཞི་གནས་སྒོམ་གྱི་རྩ་བ་ཡིན། །བྱིང་ན་སྒྲིམ་ཞིང་ངར་ཆ་འདོན། །རྒོད་ན་སློད་ལ་ལྟ་སྟངས་ཕབ། །ཐུན་མཚམས་སྤྱོད་ལམ་ཅི་བྱེད་ཀྱང༌། །གནས་པའི་རང་སོ་འཛིན་པ་གཅེས། །ལྷ་སྐུ་ཐིག་ལེ་ལ་སོགས་པ། །དམིགས་པའི་རྣམ་གཞག་གང་གསུངས་ཀྱང༌། །རྟེན་མེད་རིག་པ་སྒོམ་མེད་དུ། །འཇོག་པ་ཁོ་ན་ཟབ་པར་འཁུམས། །རང་སེམས་ལ་རང་སེམས་ཀྱིས་བལྟས་པས། །གསལ་ལ་བརྗོད་བྲལ་ངོས་གཟུང་མེད་པར་འཁུམས། །ཀུན་རྫོབ་གཟུགས་དང་ཁ་དོག་གནས་དང་དུས། །བཙལ་བས་མ་རྙེད་གདོད་མའི་གནས་ལུགས་མཐོང༌། །དེ་ཚེ་རང་སེམས་སྟོང་གསལ་ཆོས་ཀྱི་སྐུ། །རྒྱུན་དུ་ཡོད་ཀྱང་སྔོན་ཆད་མ་ཤེས་པ། །ངོ་ཤེས་རྒྱུན་ཆད་མེད་པ་དགོས་པས་ན། །རྟག་ཏུ་དྲན་པས་སྐྱོང་བ་གནད་དུ་ཆེ། །དྲན་བྱ་དྲན་བྱེད་དབྱིངས་སུ་མ་དག་པར། །དྲན་པ་སྐྱེས་དུས་རང་ཞལ་ལྟ་ཤེས་ཀྱིས། །དྲན་པ་ཉམས་ཚེ་ཐ་མལ་པ་དང་འདྲ། །ངོ་ཤེས་དྲན་པའི་རྩ་བར་ཐུག་པ་ཡིན། །ངོ་ཤེས་མེད་པའི་གནས་པ་གཏི་མུག་
ཡིན། །རང་ངོ་ཤེས་ནས་རྣམ་རྟོག་ཆོས་ཀྱི་སྐུ། །ཤེས་ན་ཐམས་ཅད་ཆོས་སྐུའི་ཡོ་ལངས་ཏེ། །མིན་ན་ཐམས་ཅད་སྤྲོས་པའི་མགོ་སྐོར་ཡིན། །ཆུ་དང་མར་མེ་རང་གསལ་གཅིག་ཏུ་ཞོག །བྲམ་ཟེ་ཆེན་པོས་དེ་སྐད་གསུངས་པ་བཞིན། །མ་བཅོས་སོ་མ་ཉམས་ལེན་སྒོམ་གྱི་མཐིལ། །བཅོས་མའི་ཉམས་མྱོང་བཟང་ཡང་ན་བུན་འདྲ། །རིག་པས་དཔྱད་པའི་སྟོང་ཉིད་སྒོམ་པ་དང༌། རིལ་འཛིན་རྗེས་གཞིག་སྤྲོ་བསྡུའི་སྟོང་ཉིད་དང༌། །ལྷ་སྒོམ་སྔགས་བཟླས་སོགས་ཀྱི་བྱིན་རླབས་དང༌། །རྩ་ཡི་རྣལ་འབྱོར་སྒོམས་པའི་སྟོང་ཉམས་དང༌། །རླུང་གི་གདམ་ངག་བསྒོམས་པའི་གསལ་བ་དང༌། །ཐིག་ལེ་བསྒོམས་པའི་བདེ་བའི་ཡེ་ཤེས་དང༌། །རྟག་སྣང་འཆར་སྒོ་སྣ་ཚོགས་འབྱུང་བ་རྣམས། །ཐམས་ཅད་རྐྱེན་ལ་ལྟོས་ཤིང་གློ་བུར་བ། །རྫས་སྔགས་འཛོམ་པས་མིག་འཕྲུལ་མཐོང་བ་བཞིན། །རྒྱུ་རྐྱེན་འཛོམ་ཚེ་འབྱུང་ལ་གཞན་མི་འབྱུང༌། །མི་བརྟན་མི་རྟག་འཕེལ་འགྲིབ་ཡལ་ཡོལ་བྱེད། །གདོད་མ་མ་ཡིན་འཕྲལ་དུ་སྐྱེ་ཞིང་འཇིག །མ་བཅོས་གཉུག་མའི་ཉམས་ལེན་གྱིས་ཟིན་ན། །དེ་དག་ཀུན་ཡང་འགྱུར་མེད་ཆོས་ཀྱི་སྐུ། །བློས་བྱས་བསྒོམ་དེ་ཇི་ལྟར་བཟང་ན་ཡང༌། །གསོག་གསོབ་སྙིང་པོ་མེད་པ་ཡ་མ་རླ། །བཟང་པོར་མིང་བཏགས་གཉེན་པོར་བཅོས་པ་དང༌། །རྣམ་རྟོག་འཁྲུལ་པས་སྣ་ཚོགས་བཅོས་པ་འདི། །
མཁའ་ལ་ན་བུན་སྤྲིན་གྱིས་སྒྲིབ་པ་བཞིན། །གནས་ལུགས་རང་ཞལ་བལྟ་བའི་བར་ཆད་ཡིན། །གསེར་གྱི་ཐིག་པོ་གསེར་དུ་བསྒྱུར་མི་དགོས། །སྣང་གྲགས་ཐམས་ཅད་རང་བཞིན་སྤྲོས་བྲལ་ལ། །ཐབས་ཀྱིས་གསར་དུ་སྤྲོས་པ་བཅོས་མི་དགོས། །རང་བཞིན་དེ་ལ་བཟོ་བཅོས་མེད་པར་བཞག །རྟོག་མེད་རང་ངོ་ཤེས་ཤིང་སེམས་གནས་ན། །མཁའ་དབྱིངས་ལྟ་བུའི་ངང་དེར་ལྷན་ནེ་སྒཽམ། །བཟང་ངན་རྣམ་རྟོག་ཇི་ལྟར་ཤར་ན་ཡང༌། །དེ་ལ་བཟོ་བཅོས་མེད་པར་ལྷུག་པར་བཞག །ཉོན་མོངས་སྐྱེས་ཀྱང་གང་སྐྱེས་གསལ་སྟོང་ཡིན། །ངེས་འབྱུང་སྙིང་རྗེ་སྐྱེས་ཀྱང་གསལ་སྟོང་ཡིན། །གང་སྐྱེས་གང་ཤར་ཐམས་ཅད་རོ་གཅིག་ལ། །སྤང་བླང་དགག་སྒྲུབ་བྱེད་ན་རང་ལ་སྡིག །ཉོན་མོངས་རྣམ་རྟོག་ཆེད་དུ་མི་དགག་ཅིང༌། །ཡེ་ཤེས་བཟང་རྫུ་ལོགས་ནས་མི་འཚོལ་བར། །སྤང་གཉེན་རོ་མཉམ་ངོ་བོ་ཐ་དད་མེད། །གདོད་མའི་དབྱིངས་ལས་ལོགས་སུ་མ་གྲུབ་པས། །མཉམ་ཉིད་ངང་དེར་མཉམ་པར་བཞག་པར་བྱ། །རྩོལ་མེད་བྱར་མེད་ཀློང་དུ་གྱུར་པ་ན། །སྤྲོས་པའི་སྣང་བ་ཇི་ལྟར་བསྟན་ན་ཡང༌། །ཆུ་ཟླ་བཞིན་དུ་ལས་མེད་བདག་པོ་མེད། །གཟུགས་སོགས་ཡུལ་སྣང་ཇི་ལྟར་ཤར་ན་ཡང༌། །རང་བཞིན་གཉུག་མའི་དོན་ལས་མ་འདས་པས། །དེ་ལ་བཟོ་བཅོས་མི་དགོས་ལྷུག་པར་ཞོག །ནམ་
མཁའ་ལྟ་བུར་འགྱུར་བ་མེད་པ་ཡིན། །ལུས་ངག་ཡིད་ཀྱི་སྤྱོད་པ་ཅི་བྱེད་དང༌། །སྤྲོས་བཅས་ཉམས་ལེན་ཇི་ལྟར་བྱེད་ན་ཡང༌། །ཐམས་ཅད་གཉུག་མ་ལྷན་ཅིག་སྐྱེས་པ་ཡི། །རང་འོད་ཙམ་དུ་ཤེས་པའི་ངང་དུ་སྤྱོད། །མཚན་ལྡན་བླ་མ་རང་སེམས་སྣང་བ་ཙམ། །བླ་མ་རང་བཞིན་གསལ་སྟོང་སྐྱེ་འགག་མེད། །རང་གི་སེམས་ཀྱང་དེ་དང་གཅིག་པར་ཤེས། །སྣང་བ་ཐམས་ཅད་སེམས་ཀྱི་གཟུགས་བརྙན་ཙམ། །རང་སེམས་བླ་མ་སྣང་བ་རྣམ་གསུམ་པོ། །མིང་འདོགས་ཐ་དད་དོན་ལ་ཁྱད་པར་མེད། །ཐམས་ཅད་རོ་མཉམ་ནམ་མཁའ་ལྟ་བུར་རྟོགས། །ཆོས་སྐུར་རྟོགས་ན་མོས་གུས་ཚུད་པ་ལགས། །ཀུན་རྫོབ་སྣང་བར་མཛད་སྤྱོད་ཅི་མཛད་ཀྱང༌། །རང་སྣང་ཙམ་དུ་ཆོས་སྐུའི་རྣམ་རོལ་དང༌། །གཞན་སྣང་སེམས་ཅན་འཁོར་བར་འདྲེན་པའི་ཐབས། ཁོ་ནར་མཐོང་ཚེ་མོས་གུས་ཚད་དུ་ཕྱིན། །ཅི་མཛད་ཡེ་ཤེས་རོལ་པར་མཐོང་བ་ལ། །བླ་མ་ལོངས་སྐུར་མཐོང་བའི་མོས་གུས་ཟེར། །ལེགས་ཉེས་གང་མཛད་གཞན་དོན་ཁོ་ནར་ཤེས། །མཚན་ལྡན་བླ་མ་སྤྲུལ་སྐུར་མཐོང་བ་ཡིན། །བླ་མ་རང་སེམས་དབྱེར་མེད་ཆོས་སྐུར་མཐོང༌། །གནས་ལུགས་དོན་གྱི་རྟོགས་པ་འགྱུར་བ་མེད། །ལོངས་སྤྱོད་རྫོགས་དང་སྤྲུལ་སྐུའི་མོས་གུས་སྐྱེ། །འབད་མེད་གཞན་དོན་ཕྲིན་ལས་འབྱུང་ཞེས་གསུངས། །སྒོམ་པས་ཉམས་སུ་
བླང་ཚུལ་མདོ་ཙམ་མོ། །ལྟ་སྒོམ་མཐའ་རུ་ཕྱིན་བྱེད་སྤྱོད་པ་སྟེ། །ལག་ལེན་བླང་དོར་འཁྲུལ་པ་མེད་པ་གཅེས། །དཀར་ནག་ལས་འབྲས་བསླུ་བ་མེད་མོད་ཀྱི། །སྒྱུ་མ་ལྟ་བུར་སྣང་བ་རང་བཞིན་མེད། །སྡིག་སྤོང་དགེ་བ་སྒྲུབ་དང་དབུ་མའི་ལམ། །ཅི་བྱེད་གཞན་དོན་སྒྱུར་དང་དུས་ཀུན་ཏུ། །དག་སྣང་ལྷ་སྐུ་སྟོང་ཉིད་དང་འབྲེལ་བ། །གདོད་མའི་དབྱིངས་ལས་གཡེལ་བ་མེད་པར་སྤྱོད། །དེ་ལྟར་གནས་བདུན་རྣམ་དག་སྤྱོད་པ་ལགས། །མི་དགེ་རྒྱུ་འབྲས་གདོད་ནས་སྟོང་ཉིད་དུ། །ལེགས་པར་རྟོགས་པའི་སྒོ་ནས་སྤང་པ་དང༌། །ཉིན་མཚན་ཕྱེད་པར་དགེ་ལ་འབད་བྱེད་ཀྱང༌། །ཆུ་ཟླ་བཞིན་དུ་ང་རྒྱལ་རློམ་སེམས་མེད། །འདོད་ཡོན་གང་ལའང་ཞེན་པ་སྤངས་བྱས་ནས། །ཚོགས་ཀྱིས་མི་སྒྲུབ་ཀུན་སྤངས་སྤྱོད་པ་ཅན། །ཆོས་བཞིན་འབད་པ་མེད་པར་རྙེད་གྱུར་ན། །རང་སེམས་སྙིང་པོར་འཇོག་བཞིན་ལོངས་སྤྱོད་པ། །འདོད་པའི་མཐའ་དང་ངལ་ཞིང་དུབ་པ་སྟེ། །མཐའ་གཉིས་སྤངས་པ་དབུ་མའི་ལམ་ཞེས་གསུངས། །འདོད་ཆུང་ཆོག་ཤེས་ལྡན་པའི་སྒོ་ནས་ཀྱང༌། །འདི་ལྟར་བསྒྲུབས་ན་སྤྱོད་པ་རྣམ་པར་དག །བྱ་བ་ཅི་བྱེད་ལེགས་ཉེས་ཅི་བྱུང་ཡང༌། །བྱང་ཆུབ་སེམས་ཀྱིས་ཟིན་ན་གཞན་དོན་ཡིན། །ཐུན་དང་ཐུན་མཚམས་སྤྱོད་ལམ་ཐམས་ཅད་དུ། །སྣང་སྲིད་དག་སྣང་
ལྷ་སྐུའི་ལམ་ཁྱེར་བྱ། །ཇི་ལྟར་སྤྱོད་པ་ཐམས་ཅད་རང་གི་སེམས། །སེམས་ཉིད་ངོས་བཟུང་བྲལ་བ་དགག་སྒྲུབ་མེད། །བྱ་བ་ཐམས་ཅད་བྱས་སྟོང་ངང་དུ་ཐིམ། །སྟོང་པའི་ངང་ལས་སྤྱོད་པའི་རྩ་མ་འགགས། །རང་ངོ་ཤེས་ཚེ་སྤྱོད་པ་ཅི་སྤྱད་ཀྱང༌། །བྱ་བྱེད་རོ་མཉམ་དབྱེར་མེད་གདོད་མའི་གཤིས། །དབྱིངས་ལས་གཞན་དུ་འཕོ་འགྱུར་མེད་པ་ལ། །རྩོལ་མེད་ལྷུན་གྲུབ་ཐོབ་པར་བྱ་ཕྱིར་འབད། །ལྟ་སྒོམ་སྤྱོད་གསུམ་རྣམ་དག་ལ་འབད་ན། །འབྲས་བུ་མཆོག་ལ་སོམ་ཉི་ག་ལ་ཡོད། །ལམ་ལྔ་ས་བཅུའི་རིམ་པ་མངོན་གྱུར་ནས། །བརྩོན་འགྲུས་ལྡན་པས་ཚེ་འདིར་བྱང་ཆུབ་འགྲུབ། །རང་བཞིན་འགྱུར་མེད་སྐུ་གསུམ་དང༌། །གློ་བུར་མ་ཡིན་རྒྱུན་ཆད་མེད། །བསམ་གྱིས་མི་ཁྱབ་པ་ཡི་གནས། །འབྲས་བུ་འགྲུབ་པའི་གནད་བདུན་ཡིན། །ཐོག་མ་མེད་པའི་དུས་ཀྱི་དབྱིངས། །ཤེས་བྱ་གཤིས་ཀྱི་གནས་ལུགས་ཏེ། །རྟོགས་ཤིང་གཏན་ལ་ཕེབས་པ་ལ། །འབྲས་བུ་ཐོབ་པར་མིང་དུ་བཏགས། །སངས་རྒྱས་ཞེས་བྱ་བཟང་བཟང་པོ། །ལེགས་ནས་བྱུང་བ་མ་ཡིན་ཏེ། །གཞི་ཡི་གནས་ལུགས་འགྱུར་མེད་དེ། །རང་གིས་རང་ས་ཟིན་པ་ལགས། །སྟོང་པའི་རང་བཞིན་ཆོས་ཀྱི་སྐུ། །གསལ་བའི་རང་བཞིན་ལོངས་སྤྱོད་རྫོགས། །བྱ་བྱེད་སྣང་བ་སྤྲུལ་པའི་སྐུ། །སེམས་ཉིད་གཅིག་པུ་སྐུ་གསུམ་དངོས། །འབྲས་བུ་སངས་
རྒྱས་ཡོན་ཏན་ཀུན། །སེམས་ཀྱི་རང་སྣང་མ་འགགས་པའི། །རྩལ་ཡིན་རྐྱེན་ལས་བྱུང་བ་མིན། །དུས་གསུམ་སྣང་བ་འཁྲུལ་པའི་ཆོས། །དོན་ལ་འདས་དང་མ་འོངས་མེད། །རང་བཞིན་ངོས་གཟུང་མེད་པ་ལ། །སྐྱེ་འགག་རྒྱུན་ཆད་ག་ལ་ཡོད། །འབྲས་བུའི་ཡེ་ཤེས་བསམ་ཡས་ཕྱིར། །ཚིག་དང་བརྗོད་པའི་ཡུལ་ལས་འདས། །རྣམ་རྟོག་བློ་ཡིས་གཞལ་དུ་མེད། །བཟང་ངན་འཛིན་པའི་ཡུལ་ལས་འདས། །གདོད་ནས་དམིགས་གཏད་མེད་པ་ལ། །རེ་དོགས་བྱ་ས་མ་རྙེད་པས། །ཞེན་མེད་འབད་མེད་བརྩོན་འགྲུས་ཀྱིས། །འབྲས་བུ་ཀློངས་སུ་འགྱུར་བར་འཚལ། །གདོད་མའི་རང་བཞིན་ཉམས་མྱོང་གིས། །གཏན་ལ་འབེབས་ཚེ་ཚོགས་ཀྱི་ལམ། །ཆོད་ནས་སྦྱོར་ལམ་སྐྱེས་པར་ཤེས། །རྩ་བྲལ་མངོན་གྱུར་མཐོང་བའི་ལམ། །དེ་ནས་རྟོགས་པའི་རང་ངོ་ལ། །གསར་དུ་སྐྱེད་བོགས་དབྱུང་རྒྱུ་མེད། །མེ་ལོང་ཡེ་ཤེས་སྣང་བའི་རྩལ། །འགག་མེད་ཕྱོགས་བཅུར་རྒྱས་པའི་ཕྱིར། །ཕྱི་ནང་སྤྱོད་པ་ལེགས་སྤྱད་པས། །སྒྲིབ་གཉིས་རྩད་ནས་དག་པའི་ཚེ། །འབྲས་བུ་རྫོགས་པའི་སངས་རྒྱས་ཟེར། །དེ་འདྲའི་ཉམས་ལེན་རིམ་པ་ནི། །འདུ་འཛི་སྤངས་ཏེ་དབེན་པའི་གནས། །བསྟེན་ཞིང་བསམ་གཏན་དང་མཐུན་པའི། །ཡོ་བྱད་ཅུང་ཟད་ལ་བརྟེན་ཏེ། །བླ་མ་དམ་པའི་ཞལ་
ལུང་བཞིན། །མན་ངག་རྩེ་གཅིག་ཉམས་སུ་བླང༌། །ལུས་ངག་འདུ་འཛིས་དབེན་པ་དང༌། །སེམས་ནི་ཐ་མལ་རྟོག་པས་དབེན། །རྙེད་དཀའ་འཇིག་སླའི་མི་ལུས་ཐོབ་དུས་འདིར། །སྡུག་བསྔལ་འཁོར་བ་འཁྲུལ་པའི་འཁོར་ལོ་ལ། །ངེས་པར་འབྱུང་ཞིང་མཐའ་ཡས་སེམས་ཅན་རྣམས། །རང་གི་སེམས་ལ་རང་ཉིད་འཁྲུལ་མཐོང་ནས། །འགྲོ་ཀུན་འཁྲུལ་པའི་རང་འཚང་བཤིག་པའི་ཕྱིར། །བླ་མེད་བྱང་ཆུབ་མཆོག་ལ་འདུན་པ་བསྐྱེད། །ཐུན་མགོར་ངེས་འབྱུང་སྐྱབས་འགྲོ་སེམས་བསྐྱེད་བསྒོམ། །འཇུག་ཏུ་ཡང་ཡང་བསྔོ་བས་རྒྱས་འདེབས་གཅེས། །དངོས་གཞིའི་ཉམས་ལེན་ཞི་གནས་ལྷག་མཐོང་གཉིས། །སྤྱོད་པ་ཕར་ཕྱིན་དྲུག་དང་བསྡུ་དངོས་བཞི། །ཐུན་མཚམས་ཕྱག་མཆོད་ལ་སོགས་ཡན་ལག་བདུན། ཁྱད་པར་བདག་གཞན་བརྗེ་བའི་ཉམས་ལེན་གཅེས། །འདི་དག་ཕ་རོལ་ཕྱིན་པའི་ཉམས་ལེན་ཡིན། །བརྒྱད་ཁྲི་བཞི་སྟོང་ཆོས་ཀྱི་ཕུང་པོའི་བཅུད། །གཞན་ཡང་གསང་སྔགས་ཐུན་མོང་མིན་པའི་ལམ། །འབྲས་བུ་ལམ་དུ་བྱེད་པའི་གནད་མཆོག་ནི། །སེམས་ཀྱི་རང་རྩལ་འགགས་པ་མེད་པ་ལ། །གཟུགས་སྐུའི་སྣང་བ་འཆར་བའི་ནུས་པ་ཡོད། །གཞི་འབྲས་གཉིས་དང་མཐུན་པར་བསྐྱེད་རིམ་བསྒོམ། །བསྒོམས་པས་མ་དག་སྣང་བ་དབྱིངས་སུ་
འདག རང་བཞིན་བདེ་སྟོང་ཀུན་གཞིའི་ངོ་བོ་ལས། །ཆོས་སྐུའི་གནས་ལུགས་ལོགས་སུ་མེད་པའི་ཕྱིར། །གཞི་འབྲས་གཉིས་དང་མཐུན་པར་རྫོགས་རིམ་ལམ། །བདེ་སྟོང་དབྱེར་མེད་བསྒོམས་པས་ཆོས་སྐུ་འགྲུབ། །སེམས་ལ་འཁྲུལ་པའི་བག་ཆགས་བཞི་ཡོད་པས། །ལུས་ལ་འཁོར་ལོ་བཞི་ཡི་རྩ་ཁམས་ཆགས། །དེ་ལས་གནས་སྐབས་བཞི་ཡི་འཁྲུལ་སྣང་འབྱུང༌། །དེ་རྣམས་གནད་ཀྱིས་ཟིན་ན་སྐུ་བཞིའི་རྒྱུ། །སྙིང་གར་གཉིད་འཐུག་རྨོངས་པའི་འཁྲུལ་པ་འཆར། །གནས་དེར་འོད་གསལ་ཕྱག་རྒྱ་ཆེ་བསྒོམས་པས། །སྤྲོས་ཀུན་ཉེ་བར་ཞི་བའི་ཆོས་སྐུ་འགྲུབ། །གཞི་ལམ་འབྲས་གསུམ་རྟོག་མེད་དབྱིངས་སུ་མཐུན། །མགྲིན་པས་རྨི་ལམ་བར་དོའི་གསལ་སྣང་འཆར། །རྨི་ལམ་ལྷ་སྐུའི་ལམ་ཁྱེར་མགྲིན་པའི་གནད། །འབྲས་བུ་ལོངས་སྐུའི་དག་སྣང་རབ་འབྱམས་འབྱུང༌། །འདི་གསུམ་གསལ་སྣང་ཕྲ་མོ་རང་བཞིན་གཅིག །སད་དུས་འཁྲུལ་སྣང་རགས་པ་ལྟེ་བའི་མཐུ། །སྒྱུ་ལུས་ལྷ་སྐུ་བདེན་མེད་གནད་ཀྱང་དེ། །སྣ་ཚོགས་སྤྲུལ་པས་དོན་བྱེད་སྤྲུལ་སྐུ་འབྲས། །གཞི་ལམ་འབྲས་གསུམ་རགས་པའི་སྣང་བར་མཐུན། །འགྱུར་བའི་བདེ་བ་སྤྱི་བོའི་གནད་ལས་འབྱུང༌། །གཏུམ་མོའམ་ལས་རྒྱ་གནད་དུ་བསྣུན་པའང་ཏེ། །འབྲས་བུ་འགྱུར་མེད་བདེ་བ་ཆེན་པོའི་
སྐུ། །གཞི་ལམ་འབྲས་གསུམ་བདེ་བའི་ངོ་བོར་མཐུན། །སེམས་ནི་རང་བཞིན་སྟོང་དང་གསལ་བ་དང༌། །གསལ་བའི་རང་གདངས་སྣ་ཚོགས་འཆར་བ་དང༌། །རང་བཞིན་བདེ་བ་ཆེན་པོར་གནས་པ་ལགས། །རང་ངོ་མ་ཤེས་འཁྲུལ་པའི་གནས་སྐབས་བཞི། །རང་བཞིན་གནས་ལུགས་མངོན་གྱུར་སྐུ་བཞི་ཡིན། །བླ་མེད་རྡོ་རྗེ་ཐེག་པའི་ཉེ་ལམ་གྱི། །གནད་ཀྱི་སྙིང་པོ་བསྡུས་པའང་དེ་ཙམ་སྟེ། །ཟབ་དོན་བདུད་རྩིས་རང་སེམས་ཚིམ་པར་མཛོད། །དེ་ལྟར་མདོ་སྔགས་ལམ་གྱི་གདམས་པ་འདི། །སྐལ་ལྡན་ཁྱེད་ཀྱི་ཐུགས་ལ་རབ་འཕྲོད་ནས། །དཔག་ཡས་འགྲོ་རྣམས་བྱང་ཆུབ་ལ་འགོད་པའི། །ཐབས་བཟང་མཆོག་གིས་སྨིན་ཞིང་གྲོལ་བྱེད་ཤོག །འདི་དག་ཉམས་མྱོང་དུ་མ་དང་འབྲེལ་མོད་ཀྱི། །རང་བཟོས་སྦྱར་བ་མ་ཡིན་ཏེ། །སྙིང་པོ་ལོགས་ནས་མི་བཙལ་བའི། །ལྟ་བ་མ་བཅོས་ལྷུག་པ་ནི། །རྒྱལ་བ་ཏིང་འཛིན་རྒྱལ་པོའི་མདོར། །གཟུགས་ཀྱི་རང་བཞིན་གཞན་ཡིན་ལ། །སྟོང་ཉིད་གཞན་དུ་མ་གསུངས་སོ། །གང་གིས་གཟུགས་རྣམས་རབ་ཤེས་པ། །དེས་ན་སྟོང་པ་རབ་ཏུ་ཤེས། །གང་གིས་སྟོང་ཉིད་རབ་ཤེས་པས། །དེས་ནི་མྱ་ངན་འདས་པ་ཤེས། །རྣམ་པ་འདིས་ནི་མི་ཤེས་པའི། །དམིགས་པ་ཅན་རྣམས་རབ་ཏུ་རླག །ཅེས་གསུངས་ལང་གར་གཤེགས་མདོ་ལས། །འཇིག་རྟེན་སྐྱེ་འཇིག་མ་མཆིས་ཏེ། །ནམ་མཁའི་མེ་ཏོག་རབ་ཏུ་འདྲ། །
ཁྱོད་ཀྱིས་ཡོད་དང་མེད་མ་དམིགས། །ཞེས་གསུངས་སོ། །གཟུང་འཛིན་མེད་ཅིང་གཉིས་མེད་ཀྱི། །ཡེ་ཤེས་ཡོད་དང་རྣམ་ཤེས་མེད། །རྣམ་པར་མི་རྟོག་ཡེ་ཤེས་ནི། །ལས་དང་སྤྱོད་པ་ཀུན་འདྲ་བར། །རྣམ་པར་རྟོག་མེད་ལྷུན་གྱིས་གྲུབ། །དུས་གསུམ་སངས་རྒྱས་ལས་བྱེད་པ། །སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རྒྱུ་མེད་པ། །ཞེས་གསུངས་བྲམ་ཟེ་ཆེན་པོས་ཀྱང༌། །ཇི་སྲིད་སེམས་ལས་རྣམ་འཕྲོས་པ། །དེ་སྲིད་མགོན་པོའི་རང་བཞིན་ཏེ། །ཆུ་དང་རླབས་དག་གཞན་ཡིན་ནམ། །ཉམས་ལེན་སྒོམ་ནི་སམྦུ་ཊིར། །སྟོང་པ་བསྒོམ་པར་མི་བྱ་སྟེ། །སྟོང་མིན་བསྒོམ་པར་མི་བྱའོ། །སྟོང་པ་མི་སྤང་རྣལ་འབྱོར་པས། །སྟོང་མིན་ཡོངས་སུ་མི་སྤང་ངོ༌། །སེམས་ལ་སྐུ་གཉིས་ཚང་ཚུལ་ནི། །དགྱེས་པ་རྡོ་རྗེའི་རྩ་རྒྱུད་ལས། །ཞལ་ཕྱག་རྣམ་པའི་གཟུགས་ཅན་ཏེ། །མཆོག་ཏུ་བདེ་བ་གཟུགས་མེད་པ། །དེ་ཕྱིར་འགྲོ་ཀུན་ལྷན་ཅིག་སྐྱེས། །རང་བཞིན་ལྷན་ཅིག་སྐྱེས་ཞེས་བརྗོད། །ཅེས་གསུངས་སྐུ་བཞིའི་འབྲེལ་རྩི་བ། །སྐྱེ་གནས་སྙིང་མགྲིན་མགོ་བོར་ཡང༌། །སྐུ་གསུམ་པོ་ནི་རྣམ་པར་གནས། །ཞེས་སོགས་རྒྱུད་དུ་གསལ་བར་གསུངས། །ཞེས་པ་ནི་སྒྲུབ་པ་མཆོག་ལ་ཉེ་བར་གཞོལ་པ། སློབ་མའི་དོན་པོ་བྱམས་པ་རིན་ཆེན་གྱིས་ཉེ་བར་བསྐུལ་ནས། རྒྱལ་ཁམས་པ་ཏཱ་ར་ནཱ་ཐས་ཕོ་བྲང་ཆེན་པོ་སྣེའུ་གདོང་རྩེར་སྦྱར་བའོ།། །།དགེ་ལེགས་འཕེལ། །