ས་སྐྱོང་ལ་ཕུལ་བ།
ཨོཾ་སྭ་སྟི། རྒྱལ་བ་སྤྱན་ལྡན་ལ་ཕྱག་འཚལ། །ཡང་དག་ལམ་ལ་འབད་བྱས་ན། །མྱང་འདས་ཐར་པ་ག་ལ་དཀའ། །རྣམ་དག་ལྟ་བ་འབྲས་བཅས་ལྡན། །རིམ་བཞིན་ཇི་བཞིན་འདི་ཉིད་ནི། །ལྷུན་གྲུབ་ཕུལ་བྱུང་རྫུ་འཕྲུལ་འབྱུང༌། །ཡེ་ཤེས་གཏེར་ཆེན་ཆེས་མཆེད་དེ། །མཆོག་ཁྱོད་འགྲོ་དོན་གཙོ་བོའི་གཙོ། །དེ་ལྟར་རྒྱལ་བ་ཆོས་བཅས་ལ། །ཡང་དག་བཏུད་ནས་ཡང་དག་ལམ། །ལེགས་པར་བཤད་ཀྱི་ལེགས་པར་ཉོན། །དམ་པའི་གཏམ་ནི་རྙེད་པར་དཀའ། །བློ་ལྡན་རྣམས་ལ་བདོག་པ་ནོར་མིན་ཏེ། །གང་ཞིག་ལེགས་པར་སྤྱོད་པ་དེ་ནོར་མཆོག །འབྱོར་བཅས་རྒྱལ་སྲིད་ཡང་ཡང་ཐོབ་འགྱུར་གྱི། །ལུགས་བཟང་རིགས་པར་འདོམས་པ་རྒྱ་ལམ་ན། །འདི་ན་དད་པ་ཐོག་མར་ནོར་གྱི་མཆོག །རྗེས་སུ་དྲན་པ་རྣམ་དྲུག་ཕུན་ཚོགས་ལྡན། །སངས་རྒྱས་བཅོམ་ལྡན་དེ་བཞིན་ཉིད་གཟིགས་པ། །བདུད་བཞི་བཅོམ་ནས་ཆོས་ཀུན་མངོན་པར་བརྙེས། །མངོན་ཤེས་རྫུ་འཕྲུལ་ཞབས་ལྡན་སྡུག་བསྔལ་སྤང༌། །འཁོར་བ་རྒྱུ་བཅས་ཐུགས་སུ་ཆུད་གྱུར་པ། །གང་གང་ཉོན་མོངས་སྤྱོད་པ་དེ་དེ་འདུལ། ལེ་ལོ་ཅན་བསྐུལ་ལོག་ཞུགས་རྣལ་མར་འགོད། །གདུལ་དཀའ་ཚར་གཅོད་མི་སྲུན་བཏང་སྙོམས་མཛད། །ཉན་ཐོས་རང་རྒྱལ་རྣམས་ཀྱི་བླ་མ་སྟེ། །ལྷ་དང་བཅས་པའི་འཇིག་རྟེན་ཀུན་གྱི་མགོན། །ཐུགས་རྗེ་ཆེན་པོའི་
ཡོན་ཏན་དྲན་པར་འཚལ། །ཉིན་གསུམ་དེ་བཞིན་མཚན་མོ་ལན་གསུམ་དུ། །སངས་རྒྱས་རྗེས་སུ་དྲན་དེ་གོ་ཏམ་སྲས། །ལེགས་པར་རྣལ་ལ་ལེགས་པར་སད་འགྱུར་ཞེས། །འདྲེན་པ་ཟས་གཙང་སྲས་ཀྱིས་བཀའ་སྩལ་ཏོ། །ཆགས་སྡང་ལ་སོགས་དྲི་མ་ཐག་སྲིངས་པས། །ཐོས་ལ་སོགས་པ་ཐོག་མཐའ་བར་དུ་དགེ །འཕགས་ལམ་ཡན་ལག་རྣམ་པ་བརྒྱད་གང་དག །བྱང་ཆུབ་གསུམ་ལ་ཡང་དག་བསྟོད་པར་བྱེད། །འགོག་པ་སོ་སོར་རང་རིག་སྤྱོད་ཡུལ་ཅན། །ལུང་རྣམས་མ་ནོར་གོ་སླ་གང་ཟག་གི །སྐྱོན་དང་མ་འདྲེས་ལམ་སྟོན་དོན་དང་ཚིག །བསྔགས་པར་འོས་པ་འདི་ནི་དམ་པའི་ཆོས། །དེ་ཕྱིར་གུས་བཅས་ཆོས་ལ་སླབ་འཚལ་གྱི། །གཞན་གྱི་ཚིག་སྣ་གཅོད་དང་གྲགས་པ་ལ། །གཙོར་འཛིན་ལེགས་བཤད་སྨྲ་ཡང་དེ་དག་ནི། །འཇིག་རྟེན་རྒྱང་ཕན་བཞིན་དུ་རྣམ་པར་འཁྱམས། །དགེ་འདུན་བསླབ་གསུམ་དག་ལ་མཐུན་པར་ཞུགས། །བསླབ་གསུམ་ལྡན་ཕྱིར་ཕྱག་མཆོད་སྦྱིན་པའི་འོས། །འཕགས་མིན་ཉུང་ངུར་ཐོས་ཀྱང་ཚུལ་ལྡན་ལ། །སྲིད་གསུམ་ཀུན་གྱིས་ཕྱག་དང་མཆོད་པར་འོས། །སེར་སྣ་མེད་དང་རྒྱུན་མི་ཆད་དང་གཞན། །ཡོན་གནས་གདམ་པ་མེད་པའི་སྦྱིན་པ་ལས། །ལོངས་སྤྱོད་ཕུན་ཚོགས་གང་ཡང་ཐོབ་འགྱུར་བས། །གཏོང་
བའི་ཡོན་ཏན་དྲན་པས་ལྷག་པར་སྤྱོད། །ཚུལ་ཁྲིམས་འཆལ་བའི་དྲི་སྤངས་ཚུལ་འཆལ་གྱི། །རྒྱུ་བཞི་ལས་ནི་ཤིན་ཏུ་ཐག་སྲིངས་དང༌། །མི་སྡུག་ལ་སོགས་གཉེན་པོ་ལ་བརྟེན་དང༌། །མྱང་འདས་བསམ་པ་ལ་བརྟེན་ཁྲིམས་ཀྱི་མཆོག །རང་གི་རིགས་ཀྱི་འགྲོ་བ་ལས་ལྷག་པ། །འདོད་པའི་ཁམས་དང་གཟུགས་ན་སྤྱོད་རྣམས་ཀྱི། །ལྷ་རྣམས་དག་གི་ལུས་དང་ལོངས་སྤྱོད་དང༌། །བསམ་གཏན་ལ་སོགས་བདེ་བའི་ཡོན་ཏན་བསམ། །དེ་ཡི་རྒྱུ་ནི་དགེ་བ་ཁོ་ན་སྟེ། །དགེ་བའི་འབྲས་བུ་ཡང་དག་བསམ་པར་འཚལ། །ཐོག་མར་དང་བ་སྐྱེད་དེ་འདུན་པ་དང༌། །དེ་ནས་ཡིད་ཆེས་དད་པ་སྐྱེ་བར་འགྱུར། །དད་པ་ཡོན་ཏན་ཀུན་གྱི་ས་གཞི་སྟེ། །འཕགས་པའི་ཆོས་ཀུན་སྐྱེད་བྱེད་མ་ཡི་མཆོག །འབྲས་བུ་ལོ་ཏོག་འབྱིན་བྱེད་བདུད་རྩིའི་ཆར། །ཉེས་པའི་ལས་ལ་ཆུ་ལོན་དམ་པ་ཡིན། །ཚུལ་ཁྲིམས་རྣམ་པ་གསུམ་ལ་བསླབ་པར་བྱ། །མི་དགེའི་ལམ་བཅུ་མི་བགྱིད་བགྱིད་མི་རྩལ། །ཡི་རང་སྤོང་དང་མི་བསྔགས་མི་སྨོན་ཞིང༌། །དེ་བཞིན་དགེ་བ་བགྱིད་པ་ལ་ཡང་སྦྱར། །ཐམས་ཅད་འགྲོ་ལ་ཕན་པའི་དོན་དུ་སྤྱོད། །མཆོད་འོས་བསླུ་དང་གནས་མིན་འགྱོད་སྐྱེད་དང༌། །རྒྱལ་སྲས་ལ་སྐུར་སེམས་ཅན་བསླུ་བ་སྤངས། །སྲུང་དང་ནོངས་པ་འཆགས་ལ་འབད་པར་འཚལ། །མཐོ་རིས་
བདུད་རྩིའི་འབྱུང་གནས་ཚུལ་ཁྲིམས་ཏེ། །ཐར་པའི་གྲོང་དུ་འཇུག་ལ་ཐེམ་སྐས་མཆོག །ངན་འགྲོའི་སྡུག་བསྔལ་རྒྱུན་གཅོད་འཁོར་ལོ་སྟེ། །རློམ་སེམས་མེད་པའི་ཚུལ་ཁྲིམས་བདེ་བའི་ལམ། །ཐར་འདོད་རྣམས་ཀྱི་རྣ་བར་མི་རྩུབ་ཅིང༌། །ལེ་ལོ་ཅན་ལ་སྒྱིད་ལུག་མི་སྐྱེད་པ། །འཕགས་པས་རབ་བསྔགས་བསྟན་བཅོས་ལས་བྱུང་གཏམ། །རྒྱལ་བའི་གསུང་བཞིན་མཉན་པར་འོས་པ་ཉིད། །ཐོས་པ་གཏི་མུག་རབ་རིབ་སེལ་བའི་སྨན། །དམ་ཆོས་ཆུ་རྒྱུན་ཆད་པ་མེད་པར་འབབ། །འགྲོ་ལ་སྙིང་བརྩེ་ལྡན་པའི་ལྕགས་ཀྱུ་སྟེ། །ཐོས་ནས་སྒྲུབ་པར་བྱེད་པའི་དོན་ཆེན་འགྱུར། །ཚུལ་ཁྲིམས་ལྡན་དང་འཕགས་དང་དྲིན་ཆེ་བ། །སྡུག་བསྔལ་ཅན་དང་བཀུར་འོས་མཆོད་པར་མཛོད། །བཟང་དང་གྱ་ནོམ་མཁོ་དགུ་རན་པ་དང༌། དུས་ལས་མ་ཡོལ་སྡིག་དང་མ་འདྲེས་སྦྱིན། །མཆོད་འོས་མཆོད་ཕྱིར་སྲོག་དང་ནོར་འཕྲོག་པ། །ད་ལྟའི་རྒྱལ་སྲིད་ངན་པའི་རིང་ལུགས་སྤང༌། །སྦྱིན་ལ་དགའ་བ་དང་ཚུལ་རབ་རྩུབ་ཀྱང༌། །འཕགས་དང་མྱུར་དུ་ཕྲད་ནས་ཐར་པར་འཇུག །བཟོད་པ་ཐོབ་པས་ལུས་ཀྱང་གཏོང་བར་བྱེད། སྦྱིན་པས་རང་གི་བསོད་ནམས་འཕེལ་བ་དང༌། འགྲོ་བའི་རེ་སྐོང་ཡིད་བཞིན་ནོར་བུ་ཡིན། །འདི་དང་གཞན་དུ་
ལོངས་སྤྱོད་མཆོག་གི་རྒྱུ། །ངོ་ཚ་ཤེས་པའི་རྒྱན་ནི་མཆོག་ཏུ་མཛེས། །ལྷ་དང་ཕ་མ་རྒན་རབས་འཕགས་རྣམས་ཀྱིས། །བདག་ལ་ཁྲེལ་བར་འགྱུར་ཞེས་མི་དགེ་ལས། །ཤིན་ཏུ་འཛེམ་པའི་མཁྱེན་པ་སྐྱེད་པར་འཚལ། ཁྲེལ་ཡོད་གོས་ནི་ལྷ་རྫས་ཀུན་པས་མཆོག །གཞན་དག་ཁྱད་དུ་མི་གསད་བག་ལྡན་པས། །འོས་པ་མ་ཡིན་བྱ་བ་ངན་བཏང་ནས། །དམ་པས་བསྔགས་པའི་སྤྱོད་ལ་དགེས་པར་མཛོད། །ཐོས་པས་ཚིག་བཟུང་བསམ་པའི་དོན་ངེས་ནས། །སྒོམ་པས་དངོས་སུ་ཤེས་རབ་བསྐྱེད་པར་བྱ། །ཏིང་འཛིན་གོམས་ན་ཤེས་རབ་འཕེལ་འགྱུར་རོ། །ཇི་ལྟར་རླུང་ནང་མར་མེ་གསལ་མི་འགྱུར། །ཏིང་འཛིན་མེད་ན་ཤེས་རབ་རྣམ་པར་གཡོ། །ཤེས་རབ་མཆོག་གིས་རྣམ་པར་དཔྱོད་པ་ན། །ཏིང་འཛིན་གྱིས་གཡོགས་ཡུལ་ནི་གསལ་བར་སྣང༌། །ཇི་ལྟ་ཇི་སྙེད་གནས་ལ་རིགས་པར་དཔྱོད། །ཆོས་རྣམས་ངོ་བོས་ཅུང་ཟད་མ་གྲུབ་ཀྱང༌། །འཁོར་འདས་རྒྱུ་འབྲས་འབྲེལ་བ་མི་བསླུ་བ། །ཟུང་འཇུག་འདི་ལ་མཉམ་པར་གཞག་གྱུར་ན། །སྲིད་པའི་འཆིང་ལས་ཡོངས་སུ་གྲོལ་བར་འགྱུར། །རྗེས་དྲན་མཆེ་བ་དྲུག་ལྡན་ཞིང༌། །འཕགས་ནོར་ཡན་ལག་བདུན་གནས་པ། །ཆོས་ཀུན་ཐེག་པ་ཆེར་འཇུག་སྟེ། །གཏམ་འདི་གླང་པོ་རིན་པོ་ཆེ། །རིག་པ་ས་སྐྱོང་ཁྱོད་ལ་འབུལ། །བླ་མེད་རྒྱལ་
སྲིད་མཆོག་སྤྱོད་པའི། །འཁོར་ལོ་སྒྱུར་བའི་གཙོ་བོ་རུ། །རྒྱ་ཁྱོད་དགེ་ལེགས་བརྟན་གྱུར་ཅིག །དེ་སྐད་སྨྲ་བ་དགེ་སློང་ཚུལ། །ཏཱ་ར་ནཱ་ཐ་ཞེས་བྱ་བས། །མཆོག་ཏུ་གཤིན་པའི་སེམས་ཀྱིས་ཏེ། །སླར་ཡང་ཡང་ཡང་གསོལ་བར་བགྱི།། །།དགེའོ། །