ཉམས་ལེན་གྱི་གནད་སྙན་བསྐུལ་གཏན་གྱི་མདུན་གྲོལ།
ཨོཾ་སྭ་སྟི་པྲ་ཛཱ་བྷྱཿ རྒྱལ་བ་རྡོ་རྗེ་འཆང་དངོས་བླ་མ་ལ། །ནམ་ཡང་འབྲལ་བ་མེད་པའི་གདུང་ཤུགས་ཀྱི། །གུས་པས་གསོལ་བ་འདེབས་སོ་བྱིན་གྱིས་རློབས། །བུ་སློབ་བློ་སྣ་ཆོས་ལ་སྒྱུར་དུ་གསོལ། །ངེས་མེད་སྤྱོད་པའི་རྣལ་འབྱོར་རྒྱལ་ཁམས་པས། །སྙན་བསྐུལ་གཏན་གྱི་
མདུན་གྲོལ་འབུལ་བ་ནི། །དམ་ཆོས་ལས་གཞན་མདུན་མའི་རྒྱལ་པོ་ནི། །གཞན་ཞིག་ཡོད་མེད་དཔྱོད་ལྡན་རྣམས་ཀྱིས་དཔྱོད། །ཚེ་འདིའི་བདེ་སྐྱིད་ཐམས་ཅད་བསླུ་བའི་ཆོས། །ད་ལྟ་འདི་ཉིད་དགའ་སྙམ་སེམས་འབྲིད་ཀྱང༌། །རིང་པོར་མི་ཐོགས་རང་གི་གནས་ཚུལ་སྟོན། །འདོད་ཡོན་ལོངས་སྤྱོད་དག་ལ་ཆགས་པ་འདི། །ཐོག་མེད་དུས་ནས་ངན་གོམས་ལ་སོང་ཞིང༌། །ད་རེས་རྒྱུན་དུ་འདྲིས་པས་དབྲལ་བར་དཀའ། །རིག་པ་སྤྲེའུ་ལྟར་བཅོལ་ཆུང་རྣམ་གཡེང་ཆེ། །ལས་ངན་ཐག་པས་བཏགས་པ་མ་ཚོར་རམ། །ད་རེས་ཐར་པའི་གདོག་སྣ་མ་ཚུགས་ན། །ངེས་པར་ངན་འགྲོའི་གཡང་དུ་འདྲེད་ཉེན་གདའ། །རྐྱེན་ངན་བདོའ་དུས་ཉམས་ལེན་མེད་པའི་ཆོས། །བཤད་མཁས་ལག་རྡུམ་གཡུལ་དུ་ཞུགས་པ་འདྲ། །ཚིག་ལ་མི་དགྱེས་དོན་ལ་ཉམས་ལེན་འཚལ། །སྦྲང་མ་སྦྲང་རྩི་སོགས་དང་བྱི་བའི་དཔེ། །རང་གིས་བསགས་པའི་ལོངས་སྤྱོད་གཞན་གྱིས་ཟ། །སྙིང་པོ་མེད་ལ་ཤིན་ཏུ་ཐུགས་འབྱུང་བས། །གསག་ལ་མ་དགྱེས་དགེ་བའི་ཕྱོགས་སུ་ཐོང༌། །ཟླ་དྲུག་དཀའ་ལས་ཁུར་བའི་ཞིང་པ་ཡང༌། །སྟོན་ཐོག་མ་ཟོས་ཤི་བ་མཐོང་བའི་ཚེ། །ལས་ཀུན་དཀའ་ལ་དོན་རེ་ཆུང་བར་ཤེས། །ལས་ལ་མ་དགྱེས་ཅི་མཛད་ཆོས་ལ་བསྒྱུར། །ཕ་མ་སྤུན་ཟླ་འཁོར་གཡོག་ལ་ལྟས་ན། །འགའ་ཞིག་སྔར་འདས་ལ་ལ་ད་བཟོད་
འགྲོ། །མི་སྡོད་འབྲལ་བ་མཐོང་ཚེ་ཡིད་རེ་སྐྱོ། །རང་ཡང་དེ་ལྟར་ཡིན་མིན་བསམ་པ་ཞུ། །མཛའ་བའི་གྲོགས་ཀྱང་རྨི་ལམ་མགྲོན་པོ་འདྲ། །ཡོད་པའི་འཕྲོ་ལ་གར་སོང་ཆ་མེད་འགྲོ། །དཔལ་འབྱོར་འདི་ཡང་སྟོན་ཀའི་ན་བུན་འདྲ། །ཡུན་རིང་སྡོད་སྡོད་འདྲ་ཡང་འཕྲལ་དུ་འཇིག །དབང་ཐང་ལོངས་སྤྱོད་སོས་ཀའི་འཇའ་ཚོན་འདྲ། །མིག་སྔར་མཛེས་ཀྱང་ཡིད་བརྟན་རྟག་མི་ཐུབ། །དེ་ལ་གཡོ་རྒྱུ་བརྫུན་ཟོབ་ལྷུར་བླངས་པའི། ཁེ་བོགས་ཉེས་པ་ཆེ་བས་རིགས་མ་ཡིན། །ད་ལྟ་བློ་གཏད་འཆའ་བའི་གྲོགས་པོ་ཡང༌། །འཕྲལ་དུ་དགྲ་ཡི་དང་མར་འགྱུར་གྱིན་སྣང༌། དགྲ་གཉེན་མི་རྟག་ཕྱོགས་ཞེན་མི་འཚལ་བས། །གཏན་གྱི་དགྲ་བོ་ཡིན་ངེས་ཉོན་མོངས་ཐུལ། །བསྐྱངས་པའི་བུ་ཚ་རང་སྟོབས་རྒྱས་པའི་ཚེ། །དྲིན་དང་ལྡན་པའི་ཕ་མར་མ་གུས་ཤིང༌། །ཅིར་ཡང་མི་སེམས་མང་དུ་མཐོང་བས་ན། །དགོས་དུས་ཕན་ངེས་རིག་པའི་ཁྱེའུ་སྐྱོངས། །མིར་སྐྱེས་རྩ་ན་སྡིག་པ་ལ་དགའ་བ། །ཤི་ནས་གཤིན་རྗེའི་སྐྱེས་བུས་ཁྲིད་གྱུར་ཏེ། །བཟོད་ཐབས་མེད་པའི་སྡུག་བསྔལ་བསྐལ་པར་མྱོང༌། །དམྱལ་བར་སྐྱེས་ཚེ་འགྱོད་ཀྱང་ཅི་ལ་ཕན། །ནམ་ཞིག་ཤ་རུས་ཕུང་པོ་འཇིག་པ་དང༌། །འགྱུ་བའི་དབུགས་འཆད་གཉེན་གྱི་གདུང་སེམས་འཇིག །འཁོར་གཡོག་རྗེས་སུ་མི་འབྲང་
ཡུལ་དང་འབྲལ། །ཟས་ནོར་ཀུན་བོར་རོགས་མེད་གཅིག་པུར་འགྲོ། །ལང་ཚོའི་མེ་ཏོག་རྒས་པའི་བ་མོས་གདུངས། །མདངས་ཉམས་སྟོབས་ཤོར་ཡི་མུག་སེམས་མི་བདེ། །འདོད་ལ་དགའ་ཡང་སྤྱོད་པའི་ནུས་པ་མེད། །ཕ་རོལ་འགྲོ་བ་མཐོང་ཚེ་ཡིད་རབ་འབྱུང༌། །ཕྱི་ནས་དམ་པའི་ཆོས་དང་མཇལ་བའང་དཀོན། །མི་ལུས་རིན་ཆེན་ཐོབ་པ་དཀའ་བས་ན། །ད་ལྟ་དམ་པའི་ཆོས་ལ་མ་འབད་ན། །གཏན་གྱི་མདུན་མ་ཤིན་ཏུ་ཉམས་པར་འགྱུར། །བསགས་པའི་ལོངས་སྤྱོད་གཞན་གྱིས་བགོ་བཤར་བྱེད། །གཅེས་པའི་ལུས་སྲོག་བཞག་ནས་འགྲོ་བའི་ཚེ། །གཡོག་དང་བུ་རྟ་རྗེས་སུ་མི་འབྲང་ཞིང༌། །ཆེ་གེ་ཤི་ཞེས་མིང་རྐྱང་ཙམ་གཅིག་ལུས། །སླན་ཆད་གཉེན་དང་མཁར་གཞིས་མངའ་ཞབས་ནོར། །ནམ་ཡང་གཟིགས་པའི་སྐབས་ཀྱང་མེད་པ་དང༌། །ངན་སོང་གསུམ་གྱི་བརྩོན་རར་འཁྱམས་པའི་ཚེ། །དཀོན་མཆོག་གསུམ་ལས་སྐྱབས་གཞན་མ་མཆིས་ལ། །སྤུ་གྲི་གཏམས་པའི་ཐང་ནི་རྒྱ་རེ་ཆེ། །རལ་གྲིའི་ནགས་ཚལ་ཐིབས་པོ་ཕ་མཐའ་མེད། །རི་ཀླུང་ཐམས་ཅད་མེ་ལྕེར་འབར་བའམ། །གྲང་བས་ཉེན་ནས་བརྒྱ་ཚལ་སྟོང་ཚལ་དུ། །རང་ལུས་གས་ཚེ་འཇིགས་པ་ཅིས་མི་སྐྱེ། །ཐོས་ཀྱང་འཇིགས་ལ་བསམས་ན་ཚུགས་ཐབས་མེད། །ལོ་བརྒྱའི་བར་དུ་ཟས་སྐོམ་མིང་ཡང་མེད། །ཟོས་ན་མེ་རུ་འབར་
བས་ཁོར་ལུས་སྲེག །གནས་ཚུལ་བསམས་ན་སྐྲག་པས་ཤ་རུས་འགྱེས། །གཅིག་ལ་གཅིག་ཟ་གསོད་དང་འཆིང་དང་བརྡེག །བཀོལ་ཞིང་དབང་མེད་དུད་འགྲོའི་སྡུག་བསྔལ་ཡང༌། །ཐོག་ཏུ་བབས་ན་བཟོད་པའི་ཐབས་མཆིས་སམ། །ད་ལྟ་བཅོས་ཐབས་ཡོད་དུས་འབད་འབུངས་འཚལ། །ནམ་ཞིག་ཐོག་ཏུ་བབས་ན་གཞན་དག་ལ། །གྱོད་ཁ་རྡལ་བའི་ཁག་ངན་སུ་ལ་བགོ །རང་ཉེས་རང་གིས་འཁྱེར་ལས་འོས་ཅི་ཡོད། །སྡིག་པའི་གྲོགས་པོ་ངན་འགྲོའི་བསུ་མ་རུ། །མ་ཤེས་བདེ་སྐྱིད་དགའ་བའི་གྲོགས་སུ་འཁྲུལ། །དགེ་ལ་སྦྱོར་ན་དགྲ་ཡང་བླ་མ་ཡིན། །སྡིག་ལ་སྦྱོར་ན་བདུད་ཀྱི་ཕོ་ཉར་དགོངས། །ཆོས་མ་སྒོམས་ན་མི་རྟག་སྡུག་བསྔལ་གྱི། །ཡི་མུག་སྒོམས་ཀྱང་ཕན་པ་མི་གདའ་བས། །ཆོས་ལ་འཇུག་པའི་གེགས་ཀྱང་འདི་ལྟར་གདའ། །མི་ནུས་སྙམ་དང་ད་རེས་མི་ཁོམ་སྙམ། །གཞན་དབང་སོང་དང་ཕྱི་ཤོལ་ངང་ལ་ལུས། །རང་མཐོང་ཆེ་བའམ་ཐང་ཆད་བགྱིད་ལུག་དང༌། །མི་བདེན་སྙམ་དང་ལོང་ཡོད་བྱེད་པ་སྟེ། །དེ་དག་སྤངས་ནས་འཕྲལ་དུ་ཉམས་ལེན་འཚལ། །དཀར་ནག་ལས་ལ་བསླུ་བ་མ་མཆིས་པས། །འདི་ལ་སྤང་བླང་ནན་ཏན་སྐྱེད་ནས་འཚལ། །གཡོག་དང་ཁྱིམ་ཐབ་གཉེན་དང་སྲིད་ཀྱི་ཕྱིར། །སྡིག་ལས་མཛད་ཀྱང་རྣམ་སྨིན་རང་ཉིད་ལས། །
གཞན་གྱིས་ཆ་ཤས་ཙམ་ཡང་ནོད་པ་མེད། །དེ་བས་གཞན་ཕྱིར་སྡིག་ལ་དགེས་མི་འཚལ། །རང་ལ་གནོད་པ་ཆུང་ཡང་མི་བཟོད་པར། །གཞན་ལུས་དུམ་བུར་གཏུམ་པའི་ཕོད་ཁམས་ཅན། །བཟའ་བཏུང་ཙམ་གྱི་ཕྱིར་དུ་སྲོག་ཀྱང་གཅོད། །རང་འདོད་ཅན་གྱི་སྤྱོད་ངན་རྣམ་སྤངས་ཏེ། །མཛད་པ་བཟང་པོས་རང་གཞན་ཕྱོགས་ཀུན་གྱི། །ཡུལ་ཁམས་ཐམས་ཅད་བདེ་བའི་ཐབས་སྒྲུབ་འཚལ། །འགྲོ་དྲུག་དྲིན་ཅན་ཕ་མ་ལགས་པས་ན། །ཀུན་ལ་འབད་ནས་ཕན་སེམས་བསྐྱེད་པར་འཚལ། །འགྲོ་ལ་བྱམས་དང་སྙིང་རྗེ་བསྐྱེད་པ་ནི། །ཆོས་རྣམས་ཀུན་གྱི་རྩ་བ་ལགས་པས་ན། །གལ་པོ་ཆེ་འདི་ནན་ཏན་ལྡན་པས་སྒོམ། །གནོད་སེམས་འཁོན་འཛིན་མི་བྱ་འཕྲལ་འཕྲལ་ཡང༌། །ཕན་པ་ཅི་ཐོགས་དོན་མེད་གནོད་མི་བགྱིད། །སྨོན་པ་ལྟ་བུར་སེམས་ལ་རང་དབང་མེད། །བདག་གི་ལས་ཀྱིས་བསྐུལ་ནས་དགྲ་ཟླར་སོང༌། །རང་ལ་བརྟེན་ནས་དགྲ་ལ་སྡིག་པས་གོས། །ཕ་མ་དམྱལ་བར་འགྲོ་བ་སྙིང་རེ་རྗེ། །དེ་ལྟར་བསམ་པས་གདུག་སེམས་ཞི་བར་འགྱུར། །ལམ་གྱི་རྩ་བ་བླ་མའི་རྣལ་འབྱོར་ཏེ། །མོས་གུས་གདུང་ཤུགས་དྲག་པོས་གསོལ་བ་གདབ། །བར་ཆད་ཐམས་ཅད་འདི་ཉིད་ཁོ་ནས་སེལ། །དངོས་གྲུབ་ཐམས་ཅད་འདི་ཉིད་ཁོ་ནས་ཐོབ། །མཚན་ལྡན་བླ་མའི་དགོངས་པ་ཀུན་
བསྒྲུབ་ཅིང༌། །ཡིད་ཀྱི་མོས་གུས་ངག་གི་སྙན་པར་བརྗོད། །ཡོན་དབུལ་ལུས་ཀྱི་བྱ་བ་ཐམས་ཅད་ཀྱིས། །སློབ་དཔོན་གང་དགེས་དེ་ལ་འབད་པར་བྱ། །འཇིག་རྟེན་རྗེ་བོ་ཇི་ལྟར་བཟང་ཡང་འབྲལ། །བླ་མ་དམ་པའི་ཐུགས་རྗེས་འདོར་མི་སྲིད། །བླ་མའི་བྱིན་རླབས་ཤུགས་ལས་རྟོགས་པ་སྐྱེ། །ཕྱག་རྒྱ་ཆེན་པོ་བྱིན་རླབས་ལམ་བྱེད་ཡིན། །གསལ་ལ་འཛིན་མེད་ལྷོད་དེ་ཤིགས་སེ་བ། །གང་སྣང་སྟེང་དུ་སྐྱོང་བའི་ཞི་གནས་དང༌། །རང་ངོ་རྗེན་པར་མཐོང་བ་ལྷག་མཐོང་གཉིས། །སྒོམ་གྱི་འཇུག་སྒོ་ལགས་པས་ནན་ཏན་འཚལ། །གང་ཤར་དེ་ལ་བཅས་བཅོས་མེད་པར་ཞོག །འགྱུར་བ་གང་བྱུང་སོ་མ་དེ་ལ་བསྐྱང༌། །གནས་སམ་འགྱུ་ཡང་བཟོ་བཅོས་མི་འཚལ་བས། །ཡེངས་མེད་ཁ་གང་རིག་པའི་སྐྱོང་དར་ཞུ། །ཟབ་དོན་ཉམས་ལེན་ཀུན་གྱི་སྙིང་པོ་ནི། །རང་གི་སེམས་ལ་ལྟ་ཞིང་ཚོལ་བ་ཡིན། །སྐྱེས་ཙམ་ཉིད་ནས་གདོད་ནས་གྲོལ་གྲོལ་བ། །ངོ་མ་ཤེས་པའི་བརྫུན་ཕུགས་བཏིབ་པར་འཚལ། །རླུང་སེམས་རྩ་ཐིག་བཙུན་པ་ཐབས་ཀྱི་ལམ། །ལྷ་སྐུ་སྣང་སྟོང་ཞེན་མེད་སྒྱུ་མའི་སྐུ། །ཉིན་མཚན་གཅིག་གིས་གཅིག་ལ་བོགས་འདོན་ཞིང༌། །གཉིད་ཀྱི་གཏི་མུག་གསལ་སྟོང་བདེ་བར་གྱུར། །གང་སྣང་བླ་མ་ཡི་དམ་དབྱེར་མེད་ལ། །མ་ཞེན་དག་སྣང་འཁོར་ལོ་
ཕྱོགས་མེད་བསྒྱུར། །ཇི་ཙམ་དམིགས་པ་སྒོམ་པ་ཐམས་ཅད་ཀྱང༌། །རང་ངོ་ཤེས་པའི་དྲན་པས་ཟིན་པ་གནད། །སྡིག་པ་བཤགས་དང་དགེ་བ་གསོག་པ་དང༌། །རྗེས་སུ་ཡི་རང་བསྔོ་བས་རྒྱས་ཐེབས་པ། །འདི་བཞི་མཐོ་རིས་ཐར་པའི་རྩ་བ་ཡིན། །སྔར་བྱས་སྡིག་ལ་ཤིན་ཏུ་འགྱོད་པ་དང༌། །ཕྱིན་ཆད་སྲོག་ལ་བབ་ཀྱང་སྡོམ་སེམས་དང༌། །སྐྱབས་འགྲོ་བྱང་ཆུབ་མཆོག་ཏུ་སེམས་བསྐྱེད་དང༌། །དེ་ལྟར་བཤགས་ན་སྡིག་པ་བྱང་བར་འགྱུར། །གླེགས་བམ་སྐུ་གཟུགས་བྱེད་ཅིང་གཟུངས་སྔགས་བཟླས། །སྟོང་པ་ཉིད་བསྒོམ་སྡིག་པ་ཐམས་ཅད་འདག །ཕ་མ་ནད་པ་མང་ཐོས་ཏིང་འཛིན་ཅན། །ཆོས་སྨྲ་ཡེ་ཤེས་ལྡན་དང་དབུལ་པོ་དང༌། །ཚུལ་ཁྲིམས་ལྡན་དང་བླ་མ་དམ་པ་སྟེ། །འདི་དགུ་ཞིང་གི་དམ་པར་གསུངས་པ་ཡིན། །ཆོས་བཤད་པ་དང་བསམ་གཏན་སྒོམ་པའི་གྲྭ། །གཟུགས་དང་ལྷ་ཁང་བྱས་ན་གཞི་དེ་ལས། །བསོད་ནམས་མང་དུ་འཕེལ་བར་འགྱུར་ཞེས་གསུངས། །རྒྱལ་བའི་བསྟན་ལ་མཆོད་པ་རྒྱ་ཆེར་མཛོད། །ལྷ་སྒོམ་སྔགས་བཟླས་དག་ལའང་བརྩོན་པ་དང༌། །དགེ་འདུན་ལ་ཡང་གུས་པ་རྒྱ་ཆེར་མཛོད། །བསྟན་པ་རིན་ཆེན་འགྲོ་བའི་གཉེན་གཅིག་པུ། །དགེ་སློང་དགེ་འདུན་ཡོད་དེར་ཡུན་རིང་གནས། །འཕགས་པའི་གང་ཟག་གར་ཡོད་མི་འཚལ་བས། །གང་ལའང་བརྙས་སེམས་
སྐུར་བ་གདབ་མི་འཚལ། །དོན་མེད་ཚེ་འདིའི་བྱ་བ་ལ་འདས་ནས། །དོན་ཆེན་ཤུལ་དུ་ལུས་པ་མང་བར་གདའ། །དམ་ཆོས་བྱ་སྙམ་ཡོད་པ་མང་ན་ཡང༌། །ལག་ཏུ་ལོངས་པའི་མི་ནི་རྒྱ་ལམ་ན། །དེ་སྐད་ཀུན་དགའ་སྙིང་པོ་ཞེས་བྱ་བས། །ནོར་འཛིན་བདག་མོ་ངག་དབང་དོན་ཡོད་མཚན། །དགེ་ལེགས་དཔྱིད་ཀྱི་དཔལ་མོར་གདམས་པ་འདི། །གོང་དཀར་ཞེས་བྱ་རྒྱལ་པོའི་ཁབ་ཏུའོ། །རིན་ཆེན་གསུམ་གྱི་བདེན་པའི་བྱིན་རླབས་ཀྱིས། །སྲིད་འདིར་ཕུན་སུམ་ཚོགས་པ་ཉིད་གྱུར་ནས། །བླ་མེད་བྱང་ཆུབ་རྒྱལ་བའི་རྒྱལ་སྲིད་ལ། །རྟག་པར་བཞུགས་པའི་དགེ་མཚན་རྒྱས་པར་ཤོག །རང་ལོ་ཉེར་ལྔ་པ་ལ་དགེ། །།མངྒ་ལཾ་བིསྟཱ་ར་ཀུ་རུ། །