མཻ་ཏྲི་དྷརྨ་བྷུ་ཏི་ལ་གདམས་པ།
ལར་སྙིང་ནས་བློ་སྣ་མ་འགྱུར་ཞིང༌། །སེམས་དང་དམ་ཆོས་མ་འདྲེས་པས། །རློམ་སེམས་དང་བཟང་འཛིན་ཅི་བྱས་ཀྱང༌། །ཤུལ་རྗེས་ལེགས་པར་མི་གདའ་འོ། །མི་གཞན་ལ་ཁྱད་གསོད་དང་རང་མཐོང་སྐྱེ། །ཕྲག་དོག་དང་ངག་འཁྱལ་ཆགས་སྡང་འཕེལ། །བླ་མ་དང་མཆེད་གྲོགས་ལ་འཁང་ཞིང་འཁུ། །ནོར་འདོད་དང་ཁེངས་དྲེགས་སྐྱེས་པ་ཞིག །དེ་ཡིན་པ་བར་ཆད་ཀྱིས་ཁྱེར་རྟགས་ཡིན། །རློམ་ནི་སྤྱང་གྲུང་རྒོད་པོར་རློམ། །རྒྱུད་སེ་རེངས་ཡེ་རེངས་ལ་སོང་བ་དེས། །འབྲངས་མ་གཙང་རྫར་མ་ནར་མར་འོང༌། །སྔོན་གྲལ་འགོ་འཛིན་པའི་གནས་བརྟན་ཡང༌། །མཐའ་སྐྱ་སེར་ཀུན་གྱིས་འོག་ཏུ་སྡོད། །གནད་ཆེ་དུས་རིག་པ་མ་སྒྲིམས་ན། །ལས་ལན་གཅིག་ཉེས་པའང་འཆོས་པ་དཀའ། །ལར་ཆོས་དང་འགལ་བའི་ངན་སྤྱོད་འདི། །ཤི་ཕན་ཆད་དམྱལ་བའི་གཏིང་རྡོ་ཡིན། །ཚེ་འདིར་ཡང་མི་འཆའ་ཁྱི་རྒོད་པ། །བླ་མ་དང་བསྟན་པའི་ཞབས་
འདྲེན་པོ། །ད་རྗེས་ངན་ཡང་ཡང་མ་འཇོག་པར། །སྙིང་ལ་རུས་པ་འཇུག་པར་མཛོད། །རུས་པ་ཆོས་སུ་སྒྱུར་བ་འཚལ། །བན་བཙུན་ཕྱུག་པོ་གཅིག་ཡོང་སྲིད་ཀྱང༌། །མཐོང་བ་ཙམ་གྱིས་སྐྱུག་རེ་ལོག །ཐོས་པ་ཙམ་གྱིས་ཡི་རེ་མུག །ད་བྱུང་ན་ལྟ་སྤྱོད་འཛོམ་པ་ཞིག་གྱིས། །མིན་ནའང་དཀའ་སྤྱད་སྡུག་རུས་ཀྱིས། །ཉམས་ལེན་ལ་འབད་འབུང་འདོན་པ་དང༌། །བློ་ཆོས་སོང་ཆོས་བརྒྱད་འགོ་སྙོམས་པའི། །ལྟ་བ་དང་སྒོམ་པ་བཟང་བ་ཞིག་དགོས། །ཡང་ན་སྤྱོད་པ་ཞིབ་ཏིག་གིས། །རང་སྤྱོད་ལ་སྐྱོན་འདོགས་མེད་པ་ཞིག་འཚལ། །གཉིས་མེད་སེང་གེ་ལ་མི་ཚེ་འདི། །སྔར་བསྐྱལ་ལ་ད་དུང་སྐྱེལ་སྐྱེལ་འདྲ། །སྤྱིར་སེམས་ཅན་ལས་ངན་སྤྱོད་པ་ལ། །ང་མི་གཅིག་གིས་བྱ་ཐབས་ག་ལ་ཡོད། །དད་པ་དང་དག་སྣང་སྙིང་རྗེ་དང༌། །ངེས་འབྱུང་དང་སྡོམ་སེམས་ལ་སོགས་པ། །གཅིག་ལས་གཅིག་ཆུང་གི་ཆོས་མེད་པོ། །ང་རྒྱལ་དང་འདོད་ཆགས་ཞེ་སྡང་དང༌། །ཕྲག་དོག་དང་ནོར་བརྣག་ལ་སོགས་པ། །ཆེ་མཉམ་དུ་འབར་བའི་རྒྱུད་ངན་པོ། །ངག་རྫུན་དང་ཕྲ་མའི་གཏེར་མོ་ཆེ། །འཕྲལ་བྱེད་དགུ་སྤྱོད་པ་གཙོག་པོ་སྟེ། །གང་ལ་བལྟས་ཀྱང་ལྟ་ཉན་མེད། །རློམ་སེམས་སུ་ཆེ་སྟེ་ཟེ་ལ་ལེ། །ལར་རང་མགོ་རང་གིས་མ་ཐོན་ན། །སྙིང་ལོགས་ནས་འཇུག་
པ་ག་ལ་སྲིད། །ཕྱིན་ཆད་བླ་མའི་ཐུགས་རྗེ་ཡིས། །དམ་པའི་ཆོས་བཞིན་སྤྱོད་པར་ཤོག། །།ཏཱ་ར་ནཱ་ཐས་མཻ་ཏྲི་དྷརྨ་བྷུ་ཏི་ལ་གདམས་པའོ། །མངྒལཾ། །