ཟླ་རི་བ་གྲགས་བཟང་ལ་གདམས་པ།
ན་མོ་གུ་རུ་ཝེ། བླ་མ་རིན་ཆེན་ཞབས་ལ་འདུད། །བུ་ཁྱོད་མངའ་རིས་སྟོད་ཕྱོགས་སུ། །འགྲོ་བར་བཞེད་ན་དམ་ཆོས་ཀྱི། །རིན་ཆེན་ཕྲེང་འདི་རྫོངས་སུ་འབུལ། །རྙེད་དཀའ་དལ་འབྱོར་མི་ལུས་འདི། །རང་ཡང་ལོ་བརྒྱ་མི་འདའ་ཞིང༌། །དོ་ནུབ་རང་ཡང་གདེངས་མེད་པས། །ཚེ་འདིའི་ལས་ཐབས་མ་ཚར་བར། །འཆིའོ་སྙམ་དུ་སྐྱོ་ཤས་བསྐྱེད། །ངན་སོང་གསུམ་ན་སྐྱིད་མེད་ཅིང༌། །ལྷ་མིར་སྐྱེས་ཀྱང་སྡུག་བསྔལ་དང༌། །གང་དུ་བསྡད་ཀྱང་བཙོན་ར་འདྲ། །སུ་དང་འགྲོགས་ཀྱང་བཙོན་རྫི་འདྲ། །ལོངས་སྤྱོད་ཐམས་ཅད་བཙོན་ཆོས་འདྲ། །འདི་ལས་ནམ་ཞིག་ཐར་ཞེས་སོམས། །མར་གྱུར་འགྲོ་བ་འདི་ཐམས་ཅད། །འཁོར་བར་འཁྱམས་པ་སྙིང་རེ་རྗེ། །རང་ཉིད་ཞུ་བདེས་མི་ཆོག་པས། །ད་ལྟ་སངས་རྒྱས་ཐོབ་བྱ་ཞེས། །སེམས་བསྐྱེད་དྲག་པོ་བསྒྲུབ་པར་བྱ། །དམྱལ་བར་བདག་ཉིད་འགྲོ་དགོས་ཀྱང༌། །གཞན་ལ་གནོད་པ་མི་བྱའོ། །རྒྱལ་སྲིད་རྔན་པར་སྟེར་ན་ཡང༌། །བྱང་ཆུབ་སེམས་མཆོག་མི་འདོར་ཞིང༌། །དོ་གལ་ཆེ་བ་ཅི་བྱུང་ཡང༌། །གཞན་ཕན་སེམས་མཆོག་རྗེད་མི་བྱ། །འཕེན་པ་མདའ་འཕངས་ལྟ་བུ་དང༌། །
དམ་བཅའ་བྲག་རི་ལྟ་བུ་དང༌། །སེང་གེ་ལྟ་བུར་སྙིང་སྟོབས་དགོས། །གདུང་སེམས་ཆེན་པོས་བླ་མ་དང༌། །ཡི་དམ་ཐུགས་རྗེ་བྱིན་རླབས་ཅན། །ཀུན་ལ་གུས་པས་གསོལ་བ་གདབ། །ནད་པ་རྣམས་ལ་སྨན་པ་དང༌། །ལམ་སྟོར་ལོང་བའི་དམིགས་བུ་དང༌། །མཉམ་པ་ལྟ་བུའི་བློ་བཞག་གོ །སྐྱོ་ཤས་སྙིང་རྗེ་མོས་གུས་གསུམ། །སྔོན་འགྲོའི་མན་ངག་མཐར་ཐུག་ལགས། །གནས་ལུགས་ཉམས་སུ་ལེན་པ་ལ། །ལུང་རིག་གི་མཐའ་རྒྱ་ཆོད་ན་ཡང༌། །མན་ངག་མེད་ན་ཐོག་མི་ཁེལ། །ལུས་ནི་བསམ་གཏན་ཕྱག་རྒྱ་བཅའ། །ངག་ཀྱང་མི་སྨྲ་རང་སོར་བཞག །སེམས་ནི་མ་བཅོས་རང་ཐད་ལ། །མ་ཡེངས་གྲིམ་ལྷོད་རན་པར་བྱ། །གང་ཤར་དྲན་པའི་སོ་པས་བཟུང༌། །རྣམ་པ་མ་འགགས་གང་དུའང་འཆར། །རང་བཞིན་མ་གྲུབ་ཅི་ཡང་མིན། །སངས་རྒྱས་ཀུན་གྱི་དགོངས་པ་ཡང༌། །འདི་ཉིད་ཁོ་ན་ལགས་པར་ངེས། །རང་སེམས་ཆོས་སྐུ་ལམ་ཁྱེར་ཡིན། །སྟོང་པའི་སྣང་བ་མ་འགགས་པ། །ཕྱི་རུ་སྣོད་བཅུད་ལྷ་རུ་བསྒྱུར། །གྲགས་ཚད་སྔགས་སུ་ཤེས་པར་བྱ། །ནང་དུ་རང་ལུས་ཡི་དམ་ལྷ། །སྨྲས་ཚད་སྔགས་སུ་ཤེས་པ་དང༌། །དྲན་ཚད་སྒྱུ་མ་ལྟ་བུར་བསྒོམ། །བཟའ་བཏུང་བདུད་རྩི་གོས་ལྷ་རྫས། །ཅི་བྱེད་ཆོས་སུ་བསྒྱུར་བར་བྱ། །སྣང་བ་
ལོངས་སྐུའི་ལམ་ཁྱེར་ཡིན། །སྐྱིད་ན་སེམས་ཅན་སྐྱིད་པར་སྨོན། །སྡུག་ན་ཀུན་གྱི་སྡུག་བསྔལ་བླང༌། །དགེ་བ་བྱས་ཚད་གཞན་དོན་བསྔོ། །བྱེད་སྤྱོད་སྤྲུལ་སྐུ་ལམ་ཁྱེར་ཡིན། །དངོས་གཞི་སྐུ་གསུམ་ལམ་ཁྱེར་རོ། །དེ་ནས་སངས་རྒྱས་མ་ཐོབ་བར། །དགོས་སུ་ཚེ་འདི་ཡང་དགོས་སུ། །གནས་སྐབས་ཀུན་ཏུ་དམ་ཆོས་དང༌། །མི་འབྲལ་འདུན་པ་དྲག་ཏུ་སྦྱང༌། །སྤྱོད་ལམ་ཀུན་དུ་དྲན་པ་ཡི། །ལྕགས་ཀྱུས་བཟུང་ལ་ཉམས་ལེན་དང༌། །རྟག་ཏུ་འབྲལ་མེད་བསྒྲུབ་པར་བྱ། །དགེ་རྩ་ཆོས་སྤྱོད་ཉམས་ལེན་ནི། །ཅི་བྱས་སངས་རྒྱས་རྒྱུར་བསྔོ་ཞིང༌། །སངས་རྒྱས་ནས་ཀྱང་སེམས་ཅན་རྣམས། །བླ་མེད་མཆོག་ལ་འགོད་པ་ཡི། །སྨོན་ལམ་ནན་ཏན་ཆེན་པོས་འདེབས། །འཕེན་པ་དྲན་པ་བསྔོ་བ་གསུམ། །རྗེས་ཀྱི་ཉམས་ལེན་མཐར་ཐུག་ཡིན། །སྤྲོས་བྲལ་ངང་ནས་སྤྲོས་བཅས་ཀུན། །རྩེ་གཅིག་ཉམས་སུ་ལེན་པར་ཞུ། །གང་ལའང་འཛིན་པ་མི་བྱེད་པར། །སོ་མའི་ཚུལ་གྱིས་ཉམས་ལེན་མཛོད། །སྔོན་ཆད་མང་དུ་བཤད་པ་ཡི། །སྙིང་པོ་འདིས་ཀྱང་དགའ་བ་སྐྱེ།། །།ཞེས་པ་ཏཱ་ར་ནཱ་ཐས་སྨྲས་པའོ། །མངྒལཾ། ཟླ་རི་བ་གྲགས་བཟང་ལ་གདམས་པའོ། །