མདོ་ཁམས་པ་ནང་སོ་ཀུན་དགའ་རིན་ཆེན་ལ་གདམས་པ་ཕྱག་ཆེན་ངོ་སྤྲོད།
ན་མོ་རཏྣ་གུ་རུ། འགྲན་ཟླ་དང་བྲལ་བའི་རིན་པོ་ཆེ། །དུས་གསུམ་གྱི་སངས་རྒྱས་ཀྱི་དགོངས་པ་ཅན། །ཕྱི་ནང་གི་འཁྲུལ་པ་རང་སར་ཞིག །སྙིང་རྗེ་ཆེན་པོས་ཁྱབ་པའི་ཐུགས། །གཅམ་བུའི་མཛེས་ཆོས་སྤངས་ནས་ནི། །མངོན་ཤེས་དང་རྫུ་འཕྲུལ་ལ་མངའ་བརྙེས་པས། །ལྷ་འདྲེ་མི་གསུམ་གྱི་འགྲོ་དོན་མཛད། །དྲིན་ཅན་གྱི་བླ་མ་བྱིན་རླབས་ཅན། །ལྷ་དབང་གྲགས་པའི་ཞབས་ལ་འདུད། །མགོན་དེས་ཅུང་ཟད་བྱིན་བརླབས་པ། །མི་ངས་ཀྱང་གནས་ལུགས་ཚིག་གསུམ་འདི། །བུ་ཁྱོད་ལ་འདི་ལྟར་སྙིང་གཏམ་དུ་གདམས། །ངེས་འབྱུང་གི་དད་པ་སོ་མ་སྟེ། །ཆོས་བརྒྱད་ཀྱི་རླུང་གིས་མ་ཁྱེར་བར་འཚལ། །བྱིན་རླབས་ཀྱི་རྩ་བ་མོས་གུས་ལ། །གོམ་འདྲིས་དང་ལོག་ལྟས་མ་ཁྱེར་བར་འཚལ། །འདུས་བྱས་སྐད་ཅིག་གི་རང་བཞིན་ལ། །རྟག་འཛིན་གྱི་ལེ་ལོ་མི་འཚལ་ལོ། །སྡུག་བསྔལ་ཅན་འཁོར་བའི་གནས་ལུགས་ལ། །སྐྱིད་འདོད་ཀྱི་ཞེན་པ་ལོག་པ་ཞིག་འཚལ། །འགྲོ་
དྲུག་དྲིན་ཅན་གྱི་ཕ་མ་ལ། །བྱམས་པ་དང་སྙིང་རྗེ་སྦྱོངས་དུས་འདིར། །གནོད་སེམས་དང་འགྲན་འདོད་མི་འཚལ་ལོ། །རང་ལུས་རྒྱལ་བའི་དཀྱིལ་འཁོར་ལ། །སྣང་སྟོང་ལྷ་སྐུར་རང་ཤར་གྱི། །དག་སྣང་གི་འཁོར་ལོ་སྐོར་རྒྱུ་ལ། །བརྡོས་བཅས་ཀྱི་ཞེན་པ་མི་འཚལ་ལོ། །གྲགས་སྟོང་ངག་གི་རང་བཞིན་དེ། །བྲག་ཅ་ལྟ་བུར་སྒོམ་རྒྱུ་ལ། །ཐ་མལ་གྱི་ལོང་གཏམ་སྣ་ཚོགས་ཀྱིས། །ཆགས་སྡང་གི་བཀྱེད་བེད་མི་འཚལ་ལོ། །སེམས་གང་ཤར་ཆོས་སྐུའི་ཡོ་ལངས་ལ། །ངོ་ཤེས་བྱར་མེད་ཀྱིས་སྒོམ་རྒྱུ་ལ། །རྣམ་གཡེང་ཕྱི་ལྟའི་རྣམ་རྟོག་གིས། །འཁོར་བའི་འཁོར་ལོ་མ་སྐོར་ཞིག །ཐ་མལ་རླུང་སེམས་ཀྱི་འཇུག་པ་འདི། །འཁོར་འདས་འབྱེད་པའི་ས་མཚམས་ཞིག་ལགས། །ལེ་ལོ་དང་བྱ་བ་ལ་མ་ཡེངས་པར། །རླུང་སེམས་དྲག་ཏུ་བཅུན་པ་ཞུ། །སེམས་ཀྱི་རྩ་བ་མ་ཆོད་ན། །གཏིང་སྐྱོན་མཐོན་པའི་གནད་ཀ་དེས། །གཉེན་པོ་མང་ཡང་མི་ཕན་པས། །རྩ་བྲལ་ཐོབ་ཕྱིར་དུ་འབད་པ་འཚལ། །ཡེངས་མེད་དུ་བསམ་གཏན་སྒོམ་དུས་སུ། །ལོངས་སྤྱོད་དང་བསོད་ནམས་ཐན་ཐུན་དེ། །བདུད་ཀྱི་ཕོ་ཉར་ཡོང་ལགས་པས། །ཅི་དགར་བོར་ལ་སྦྱིན་པར་ཐོང༌། །བར་ཆད་དངོས་གྲུབ་ཏུ་འཁྱར་བ་ལགས། །ནམ་ཞིག་སྒོམ་ཉམས་བཟང་བདེ་ན། །ཟང་འཛིན་དང་དགའ་
བྲོད་བདུད་དུ་འོང༌། །ཉམས་ལེན་གྱི་རྒྱལ་པོ་ཞེན་མེད་ཡིན། །བྱར་མེད་དུ་ཞོག་ཅིག་གེགས་ལས་གྲོལ། །སེམས་རིག་པའི་འཆར་སྒོ་མ་འགགས་པ། །ཐམས་ཅད་ཆོས་སྐུའི་རྩལ་ཡིན་ཡང༌། །གང་ཤར་རྩ་བ་མ་ཆད་པར། །འོག་འགྱུར་འགྲོ་བའི་ཉེན་གདོག་པས། །རྩེ་གཅིག་དམིགས་པ་ལ་སྒྲིམ་པར་འཚལ། །ཞི་གནས་ཙམ་བརྟན་བརྟན་འདྲ་ན་ཡང༌། །མ་རིག་གཏི་མུག་ཏུ་བྱིངས་དོགས་ཡོད། །གང་ཤར་ངོ་ལྟའི་འུད་བཤད་ཀྱིས། །འཁྲུལ་པ་རྒྱ་འབྱམས་སུ་ཤོར་གྱིས་དོགས། །སྟོང་ཉམས་ཙམ་ཤར་བའི་ལྟ་སྐད་ཀྱིས། །ལས་འབྲས་ལ་ཆུད་ཟོས་མི་འཚལ་ལོ། །ལར་ཀུན་ལ་མོས་གུས་གནད་དུ་ཆེ། །དེ་དངོས་གྲུབ་ཀྱི་རྩ་བར་ངེས་ལགས་ཀྱང༌། །ཐོབ་འདོད་ཀྱི་རེ་དོགས་མི་འཚལ་ལོ། །ཞེན་མེད་ཀྱི་སྒོ་ནས་དགེ་སྦྱོར་ཀུན། ཁ་སྔོ་བས་རྒྱས་ཐེབས་ཀྱང་གལ་རེ་ཆེ། །ཡང་བླ་མ་ལ་གསོལ་བ་འདེབས་ན། མདུན་དུ་རྩ་བའི་བླ་མ་བཀྲག་མདངས་གཟི་བརྗིད་ལྡན་པ་བརྒྱུད་པའི་བླ་མ་ཡི་དམ་ཆོས་སྐྱོངས་མཁའ་འགྲོ་ཐམས་ཅད་ཀྱི་བསྐོར་བ། སྤྲུལ་པའི་ཕོ་ཉ་མང་པོ་སྤྲོ་བ་རང་ལ་དགྱེས་བཞིན་པ་བྱིན་གྱིས་རློབ་རློབ་ལྟར་བཞུགས་པ་ལ་མོས་གུས་དུང་བ་བྱས་ཏེ། དྲིན་ཅན་བླ་མ་རིན་པོ་ཆེ། །ཆོས་སྐུའི་ཐུགས་ལ་ལོངས་སྐུའི་གསུང༌། །སྤྲུལ་སྐུའི་
ཚུལ་གྱིས་འགྲོ་དོན་མཛད། །མཚན་དཔེའི་གཟི་བརྗིད་འབར་བ་ལ། །གསུང་དབྱངས་ཡན་ལག་རྒྱ་མཚོའི་བཀའ། །ཐུགས་ནི་བདེ་གསལ་རྒྱ་མཚོ་འདྲ། །བརྒྱུད་ལྡན་བླ་མའི་ཚོགས་ཀྱིས་བསྐོར། །ཡི་དམ་ལྷ་ཚོགས་སྤྲིན་ལྟར་འཐིབས། །མཁའ་འགྲོ་མང་པོའི་ཚོགས་དང་བཅས། །ཆོས་སྐྱོང་བསྲུང་མ་ཁྲོམ་ལྟར་ཚོགས། །སྤྲུལ་པ་བུ་ཡུག་བཞིན་དུ་འཚུབས། །ཕོ་ཉ་མང་པོ་གློག་ལྟར་འཁྱུག །རིག་འཛིན་གྲུབ་པའི་ཚོགས་ཀྱིས་བསྐོར། །མཆོད་སྤྲིན་རྒྱ་མཚོའི་ཚོགས་དང་བཅས། །ཐུགས་རྗེའི་དབང་གིས་འདིར་བྱོན་ལ། །ད་ལྟ་བདག་ལ་བྱིན་གྱིས་རློབས། །མྱུར་བ་ཉིད་དུ་བྱིན་གྱིས་རློབས། །གདན་ཐོག་འདི་རུ་བྱིན་གྱིས་རློབས། །ལུས་ལ་བདེ་ཆེན་བསྐྱེད་དུ་གསོལ། །ངག་ལ་ནུས་པ་བསྐྱེད་དུ་གསོལ། །སེམས་ལ་ཡེ་ཤེས་དབབ་དུ་གསོལ། །དབང་བཞི་ད་ལྟ་བསྐུར་དུ་གསོལ། ཉམས་དང་རྟོགས་པ་བསྐྱེད་དུ་གསོལ། །འར་མ་འུར་མར་བྱིན་གྱིས་རློབས། །བན་མ་བུན་མར་བྱིན་གྱིས་རློབས། །ཆལ་མ་ཆིལ་མར་བྱིན་གྱིས་རློབས། །རྩ་བ་བརྒྱུད་པའི་བླ་མས་བྱིན་གྱིས་རློབས། །ཡི་དམ་ལྷ་ཚོགས་ཀྱིས་བྱིན་གྱིས་རློབས། །དཔའ་བོ་མཁའ་འགྲོས་བྱིན་གྱིས་རློབས། །ཆོས་སྐྱོང་བསྲུངས་མས་བྱིན་གྱིས་རློབས། ཀུན་འདུས་བླ་མས་བྱིན་གྱིས་རློབས། །རྗེ་བཙུན་བླ་མས་བྱིན་གྱིས་རློབས། །དེ་ནས་བླ་མའི་སྐུ་ལས་དབང་བཞི་བླངས། བླ་
མ་རང་ལ་ཐིམ། རང་ཤར་ངོས་བཟུང་ངོ༌། །ཞེས་པ་འདི་ཡང་མདོ་ཁམས་པ་ནང་སོ་ཀུན་དཀའ་རིན་ཆེན་ལ། ཏཱ་ར་ནཱ་ཐས་གདམས་པ་སྟེ། །རྗེ་བཙུན་ལྷ་དབང་གྲགས་པའི་ཞལ་གྱི་གདམས་པ་ལ་བརྟེན་ནས་ཕྱག་ཆེན་ངོ་སྤྲོད་བྱས་པའི་རྗེད་ཐོར་བྱས་པའོ།། །།མངྒལཾ། །