རབ་འབྱམས་སྨྲ་བ་སྦྱིན་པ་རིན་ཆེན་དང༌དཔལ་འབྱོར་རྣམ་རྒྱལ་གཉིས་གདམས་པ།
ཡང་ཞལ་གདམས་གཅིག་ལ། བླ་མ་རྣམས་ལ་ཕྱག་འཚལ་ལོ། །ཉམས་ལེན་སྙིང་པོར་དྲིལ་བ་ནི། །ཀུན་རྫོབ་སྙིང་རྗེ་ཆེན་པོ་དང༌། །དོན་དམ་སྤྲོས་དང་བྲལ་བ་ཡིན། །དག་སྣང་ལྷ་སྐུའི་ལམ་ཁྱེར་ནི། །སྔགས་ཀྱི་སྙིང་པོའི་ཉམས་ལེན་ཡིན། །བདེ་སྡུག་འཕྲལ་རྐྱེན་ཞིག་བྱུང་ཡང༌། །གང་བྱུང་ལམ་དུ་འཁྱེར་བ་ལས། །ཟབ་པའི་ཉམས་
ལེན་ཅི་ཞིག་ཡོད། །རབ་གསལ་རྒྱལ་པོའི་རྣམ་འཕྲུལ་གྱིས། །གནད་འདི་གཟིགས་ནས་ཐུགས་ཀྱི་སྲས། །བྱམས་པའི་དཔལ་ལ་གདམས་པ་ཡིན། །བདག་ཉིད་བདེ་ཞིང་སྐྱིད་པ་ན། །མར་གྱུར་འགྲོ་བ་ཐམས་ཅད་ཀྱང༌། །སྐྱིད་པར་འདོད་པ་ཁོ་ན་ཡིན། །བདག་བདེ་གཅིག་པུས་མི་ཕན་གྱི། །འདི་ཀུན་བདེ་བ་ཐོབ་ན་སྙམ། །ཡང་ཡང་ཡིད་ལ་བསམ་པར་ཞུ། །སྐྱིད་ན་བདེ་བ་ཚོགས་སུ་བསྔོ། །ཕན་བདེས་ནམ་མཁའ་གང་བར་ཤོག །ཅེས་པ་ངག་ཏུ་ཡང་ཡང་བརྗོད། །གལ་ཏེ་བདེ་བ་འདོད་ན་ནི། །དགེ་བའི་ལས་ལ་བརྩོན་དགོས་པས། །དགེ་ལ་འབད་པར་བྱ་སྙམ་དང༌། ཁམས་གསུམ་འགྲོ་བ་འདི་ཀུན་ཡང༌། །དགེ་ལ་འཁོད་པར་གྱུར་ཅིག་ཅེས། །སྨོན་སེམས་ཡང་ཡང་གཏོང་བར་ཞུ། །རང་གཞན་དགེ་ལ་འཇུག་པའི་ཐབས། །ནན་ཏན་སྒྲུབ་པ་གལ་རེ་ཆེ། །སྐྱིད་པ་ཀུན་རྫོབ་ལམ་ཁྱེར་ཡིན། །མི་འདོད་སྡུག་བསྔལ་བྱུང་བའི་ཚེ། །སྡུག་བསྔལ་ཅན་ལ་སྙིང་རྗེ་སྒོམ། །སྡིག་པའི་ལས་ལམ་ཟློག་པར་བྱ། །སྐྱིད་ན་བྱམས་པའི་ལམ་འཁྱེར་དང༌། །སྡུག་ན་སྙིང་རྗེ་ལམ་དུ་འཁྱེར། །སྐྱིད་དང་སྡུག་པར་སྣང་བ་ཡང༌། །འཁྲུལ་ངོ་ཙམ་ཞིག་མ་གཏོགས་པ། ཡང་དག་དོན་ལ་གྲུབ་པ་མེད། །ལུས་ནི་བེམ་པོ་རོ་དང་འདྲ། །འདོད་ཡོན་ཇི་སྙེད་སྟབས་གྱུར་ཀྱང༌། །སྐྱིད་པའི་ཚོར་བ་མི་འབྱུང་ཞིང༌། །
དུམ་བུར་གཏུབས་སམ་མེས་བསྲེགས་ཀྱང༌། །དེ་ལ་སྡུག་བསྔལ་ཅི་ཡང་མེད། །ལུས་མེད་ན་ནི་སེམས་དེ་ཡང༌། །བསྟན་དུ་མེད་ཅིང་ཐོགས་མེད་ཕྱིར། །ཡུལ་དང་འབྲེལ་བའི་བདེ་སྡུག་མེད། །ལུས་དང་སེམས་ལས་གཞན་པ་ཞིག །སྡུག་བསྔལ་མྱོང་བ་མེད་པས་ན། །སྐྱིད་བྱ་སྐྱིད་བྱེད་འཁྲུལ་པ་སྟེ། །སྡུག་བྱ་སྡུག་བྱེད་ཡོད་མ་ཡིན། །མེད་པའི་ངང་ལ་མཉམ་པར་ཞོག །སྣང་ངོར་བདེ་སྡུག་མ་འགགས་ཀྱང༌། །དེ་ལ་འཛིན་ཞེན་ཟློག་པ་ཡིན། །འཛིན་ཞེན་མེད་ན་འཕྲལ་རྐྱེན་ནི། །ཇི་ཙམ་མང་ཞིང་བོགས་ཀྱང་ཆེ། །ནགས་ཀྱི་མེ་ལ་རླུང་བྱུང་ན། །མེ་ཡི་གྲོགས་སུ་འགྱུར་བ་ཡིན། །འཛིན་ཞེན་ཅན་གྱི་གང་ཟག་དེ། །སྐྱིད་ན་ཆགས་ཞེན་དབང་སོང་ནས། ཆོས་མིན་སྤྱོད་པ་སྣ་ཚོགས་འོང། །སྡུག་ན་ཉམས་ཐག་སེམས་འཕྱོ་ཞིང༌། །ཉམས་ལེན་ཆོས་ལ་ཡི་ཆད་བྱེད། །ཉིན་གཅིག་ན་བ་ཙམ་ལ་ཡང༌། །ཐེ་ཚོམ་རྣམ་རྟོག་བརྒྱ་ཕྲག་ལྡང༌། །ནས་བྲེ་གང་གི་ཕྱོགས་སུ་ཡང༌། གཡོ་སྒྱུ་མགོ་སྐོར་སྣ་ཚོགས་བྱེད། །ཉིན་གཅིག་སྐྱིད་པ་བྱུང་བ་ལའང༌། །ཆོས་མིན་སྣ་དགུ་སེམས་ལ་འགྱུ། །བདེ་སྡུག་ཕྲ་མོ་ཙམ་ལ་ཡང༌། །ཉམས་ལེན་དཔྱད་ཐག་ཡན་ནས་མཆི། །ཞེན་མེད་ལམ་འཁྱེར་ཤེས་ཙ་ན། །རྐྱེན་ངན་མེ་ལྟར་འབར་ན་ཡང༌། །ཉམས་རྟོགས་དབྱར་གྱི་མཚོ་ལྟར་འཕེལ། །བདེ་སྡུག་སྣང་བའི་སེམས་འདི་ཡང༌། །སྣང་བ་
ཙམ་ཞིག་མ་གཏོགས་པ། །སྐྱེ་འགག་གནས་གསུམ་བྲལ་བ་ཡིན། །འདས་པ་དང་ནི་མ་འོངས་པ། །རི་བོང་རྭ་ལྟར་ཅང་མེད་ཡིན། །ད་ལྟར་ན་ཡང་མ་དམིགས་པས། །འཁྲུལ་ངོ་མ་གཏོགས་དོན་ལ་མེད། །དེ་ལྟར་རིག་པས་དཔྱོད་པ་འཚལ། །དཔྱད་པ་ཙམ་ལ་མ་བཞག་པར། །རང་བཞིན་ངང་དེར་མཉམ་པར་ཞོག །རང་ངོ་ཤེས་པས་ཚིར་གྱི་ཟུང༌། །བདེ་སྡུག་སྣང་བའི་སེམས་དེ་ཡང༌། །ལྷ་སྐུར་ལམ་གྱིས་གསལ་བཏབ་ནས། །འགྲོ་བ་ཀུན་ལ་སྙིང་རྗེ་དང༌། །གང་སྣང་སྤྱན་རས་གཟིགས་སུ་སྒོམ། །ཡི་གེ་དྲུག་པའི་གསང་སྔགས་བཟླ། །སྟོང་པ་ལྷ་སྐུ་སྙིང་རྗེ་གསུམ། །སྐུ་གསུམ་ལམ་འཁྱེར་ངོ་སྤྲོད་ཡིན། །བབ་ལ་འདུས་པའི་གདམས་ངག་འདི། །ཉམས་ལེན་མཛོད་ཅིག་སྟན་གཅིག་པ། །ཞེས་པའང་སྟན་གཅིག་པ་རབ་འབྱམས་སྨྲ་བ་སྦྱིན་པ་རིན་ཆེན་དང༌། །དཔལ་འབྱོར་རྣམ་རྒྱལ་ཞེས་པ་གཉིས་ཀྱི་བསྐུལ་ནས་ཏཱ་ར་ནཱ་ཐས་གོང་དཀར་དུ་སྨྲས་པའོ།། །།དགེ་ལེགས་འཕེལ། །