མདོ་ཁམས་པ་ཤེས་རབ་དཔལ་ལ་གདམས་པ།
ཨོཾ་སྭཱ་སྟི། མཐའ་བཞིའི་སྤྲོས་པ་ལས་གྲོལ་བ། །གཉིས་མེད་ཡེ་ཤེས་བདེ་ཆེན་དངོས། །བླ་མ་རྡོ་རྗེ་ཅན་ཞབས་འདུད། །གདམས་ངག་
མདོ་ཙམ་བཤད་པར་བྱ། །རྙེད་དཀའི་མི་ལུས་ཐོབ་དུས་སུ། །དོན་ཡོད་ཀྱི་ཐབས་ལ་འབད་པར་འཚལ། །མཚན་ལྡན་རྗེ་དང་མཇལ་དུས་འདིར། །མོས་གུས་རྒྱུན་ཆད་མེད་པར་འཚལ། །གདམས་ངག་ཟབ་མོ་ཐོབ་དུས་འདིར། །རྩེ་གཅིག་ཏུ་འབད་པས་ཉམས་ལེན་འཚལ། །ངེས་དོན་སྙིང་པོ་དང་མཇལ་དུས་འདིར། །དྲང་དོན་གྱི་མགོ་བསྐོར་ལ་མ་ཞེན་ཞིག །མཐུན་རྐྱེན་འབད་མེད་དུ་འཛོམ་དུས་འདིར། །འདོད་ཡོན་གྱི་གཡེང་བས་མ་འཁྱེར་ཞིག །ནམ་འཆི་ཆ་མེད་ཀྱི་དོན་བསམ་ནས། །ངེས་འབྱུང་གི་སྐྱོ་ཤས་བསྐྱེད་མོད་ཀྱི། །ཆུ་བུར་ཆུ་ལ་ཐིམ་པ་བཞིན། །སྣང་སྟོང་སྒྱུ་མའི་བློ་བྲིད་ཙམ། །ཡི་མུག་གི་སྡུག་བསྔལ་མི་དགོས་ཀྱི། །ཆོས་ཉིད་དུ་ཤེས་པས་སྐྱོ་སེ་ཞོག །རིགས་དྲུག་འཁོར་བའི་སྡུག་བསྔལ་འདི། །རྨི་ལམ་དུ་ན་བར་སྣང་བ་དང་འདྲ། །ཐར་འདོད་ཀྱི་བསམ་པ་བསྐྱེད་དགོས་ཀྱང༌། །བདེན་ཞེན་གྱི་འཇིགས་སྐྲག་མི་འཚལ་ལོ། །དགེ་སྡིག་གི་འབྲས་བུ་སྨིན་པ་འདི། །སྒྱུ་མས་སྒྱུ་མ་བསྐྱེད་པ་དང་འདྲ། །བདེན་མེད་ཀྱི་ཆོ་འཕྲུལ་ཙམ་ལགས་མོད། །ཀུན་རྫོབ་ཀྱི་འཁྲུལ་སྣང་མ་འགགས་པར། །རྒྱུ་འབྲས་ཀྱི་རྟེན་འབྲེལ་མི་བསླུ་པས། །སྤང་བླང་ལ་ཕྲ་ཞིབ་མཛད་པ་ཞུ། །འགྲོ་དྲུག་དྲིན་ཅན་གྱི་ཕ་མ་རྣམས། །རང་ངོ་མ་ཤེས་པས་
འཁོར་བར་འཁྱམས། །རང་སེམས་ཀྱིས་རང་ཉིད་བཅིངས་ཚུལ་ལ། །བསམ་བཞིན་དུ་སྙིང་རྗེ་འབད་མེད་དུ་འཆར། །བྱམས་སྙིང་རྗེའི་རང་ངོ་བལྟས་པའི་ཚེ། །སྙིང་རྗེ་བྱ་རྗེ་བྱེད་དབྱིངས་སུ་ཡལ། །དབྱིངས་དེ་ལས་སྙིང་རྗེར་ལམ་ལམ་པ། །དམིགས་མེད་ཀྱི་སྙིང་རྗེ་ཆོས་ཀྱི་མཆོག །གཞི་ལམ་འབྲས་བུའི་ཆོས་ཐམས་ཅད། །གདོད་ནས་སྐྱེ་བ་མེད་པ་ལ། །བློས་བྱས་ཀྱི་བཅས་བཅོས་མི་དགོས་པས། །ཅི་ཡང་མ་ཡིན་ལྟ་བའི་མཆོག །ཤུགས་འབྱུང་གི་སྤྱོད་པ་འགག་མེད་ལ། ཀུན་བརྟགས་ཀྱིས་སྤང་བླང་མི་དགོས་པས། །རང་གྲོལ་རྒྱ་འབྱམ་གྱི་རྣལ་འབྱོར་ལ། །ཐོ་ཅོར་མ་སོང་བ་སྤྱོད་པའི་གནད། །གནས་ལུགས་ཅིར་ཡང་མེད་པ་ལ། །སྒོམ་མེད་ཡེངས་མེད་དུ་མཉམ་པར་ཞོག །སྣང་བ་ཅི་ཤར་འགག་པ་མེད། །དུ་མ་རོ་གཅིག་བསྒོམ་པའི་གནད། །རེ་དོགས་ཀྱི་ཞགས་པས་མ་བཅིངས་བར། །སྐུ་གསུམ་ལྷུན་གྲུབ་རང་རྫོགས་འདི། །རང་སེམས་ལས་གཞན་དུ་མེད་ལགས་པས། །རྩོལ་བྲལ་བྱར་མེད་འབྲས་བུའི་གནད། །རྩ་བའི་བླ་མ་ལ་མོས་གུས་དང༌། །དག་སྣང་ཕྱོགས་མེད་ཀྱི་བསྐྱེད་རིམ་དང༌། །རླུང་སེམས་ལ་གཞུར་བའི་རྫོགས་རིམ་གསུམ། །སྒོམ་ཉམས་ལེན་པ་ལ་གནད་དུ་ཆེ། །ཞེས་པ་ངེས་མེད་ཀྱི་རྒྱལ་ཁམས་པ། །ཏཱ་ར་ནཱ་ཐ་
ཞེས་བྱ་བས། །རྩེ་གཅིག་ཏུ་སྒྲུབ་པ་ལ་གཞོལ་བ་ཡི། །མདོ་ཁམས་པ་ཤེས་རབ་དཔལ་ལ་གདམས་པའོ།། །།དགེའོ། །