རྒྱལ་བཟང་རྟོགས་ལྡན་རིན་བཀྲས་ལ་གདམས་པ།
ཨོཾ་སྭཱ་སྟི། བླ་མ་རྣམས་ལ་ཕྱག་འཚལ་ལོ། །བུ་སྣང་བ་སེམས་ལ་ཁྱད་པར་མེད། །གང་ཤར་བཟོ་བཅོས་མེད་པར་ཞོག །སྙིང་རྗེ་དང་སྟོང་ཉིད་འགྲོ་ལྡོག་གཅིག །སྙིང་རྗེ་འཛིན་པར་མ་ཤོར་ཞིང༌། །སྟོང་ཉིད་ཆད་སྟོང་དུ་མ་ལུས་པའི། །ཟུང་འཇུག་ཉམས་ལེན་གལ་རེ་ཆེ། །ལས་འབྲས་ཀྱི་བླང་དོར་ཕྱིན་ཅི་ལོག །ཅིས་ཀྱང་དགོས་མེད་ཀྱི་ངེས་འབྱུང་སྟོར། །གཞན་ཕན་མཁའ་ཁྱབ་ཀྱི་སེམས་བྲལ་པའི། །སྟོང་སྐད་སྦད་ཁམ་གྱི་ཕྱག་ཆེན་དང༌། །མུ་སྟེགས་པའི་ལུགས་ཀྱི་རྩ་རླུང་ལ། །བློ་རྩེ་གཏོད་པའི་སྒོམ་ཆེན་ཏེ། །བློ་ཆུང་གི་མགོ་བསྐོར་མཁས་སྲིད་ཀྱང༌། །སངས་རྒྱས་དགྱེས་པའི་ལམ་ལས་གོལ། །བུ་སངས་རྒྱས་གསུང་བཞིན་སྒྲུབས་གྱུར་ན། །སངས་རྒྱས་ཐོབ་པའི་རྒྱུ་ཡིན་པས། །བཟང་འདོད་ཀྱི་ཙབ་ཙོབ་མ་མང་བར། །ལུས་ངག་ཡིད་གསུམ་ཆོས་དང་བསྟུན། །ལྟ་བ་མཐོ་ལ་ཡངས་པ་དང༌། །སྤྱོད་པ་ཞིབ་ཏིག་སྐབས་སུ་བབས། །སྒོམ་པ་ཡེངས་མེད་རྒྱུན་ཆད་མེད། །དེ་གསུམ་འཛོམ་ན་འབྲས་བུ་སྨིན། །བཟའ་བཏུང་དོན་གཉེར་གྱི་ཁ་སྤྱང་ཅན། །རྒྱལ་ཁམས་བསྐོར་
བའི་ཟོག་པོ་ལ། །སྒོམ་ཆེན་གྱི་དྲི་ཡང་མི་ཡོང་བས། །དབེན་པའི་རི་ལ་ཚུགས་པར་འཚལ། །ལོང་གཏམ་ལ་ཆགས་ཤིང་ཞེན་པ་དེས། །ངག་གི་བདེན་ཚིག་ག་ལ་འགྲུབ། །ནུས་ན་གསང་སྔགས་ཀྱི་བཟླས་བརྗོད་གྱིས། །མིན་ནའང་སྨྲ་བ་བཅད་ན་ལེགས། །མཐུན་འཇུག་དང་མི་དགའི་ངོས་བསྲུངས་ཀྱིས། །སེམས་བཞག་ཀྱང་ཆགས་སྡང་འཕེལ་བའི་ངང༌། །འདི་སྤངས་ཀྱང་འཕོངས་པ་དཀའ་བའི་ཕྱིར། །པད་ཀྱིས་ཆོད་ལ་རྒྱངས་ཀྱི་བསྐྱུར། །ཉམས་མྱོང་ཅུང་ཟད་སྐྱེས་སྐབས་སུ། །བཟང་འཛིན་སྐྱེས་ན་བདུད་ཀྱིས་ཁྱེར། །དཔེ་རི་ལ་འཛེམས་པས་གཡང་ལ་ལྷུང༌། །མཐོ་རུ་སོང་གིན་སྒྲིམ་པ་གཅེས། །བླ་མའི་ཞལ་ལུང་གི་གདམས་ངག་རྣམས། །ཆུད་ཟོས་མེད་པར་ཉམས་སུ་ལོང༌། །ཧམ་པ་དང་འུད་གོག་མ་ཆེ་བར། །རྩེ་གཅིག་ཏུ་སྒོམས་ན་འཚེད་པ་ཡིན།། །།ཞེས་པའང་རྒྱལ་ཁམས་པ་ཏཱ་ར་ནཱ་ཐས། རྒྱལ་བཟང་རྟོགས་ལྡན་རིན་བཀྲས་ལ་གདམས་པ་སྟེ། དར་ཡུལ་བྲག་ནག་དུའོ། །མངྒལཾ། །