ཀུན་དགའ་གྲགས་པ་ལ་ཏཱ་ར་ནཱ་ཐས་གདམས་པ།
ན་མོ་གུ་རུ། མཛུ་གུ་གཏད་ས་མེད་པའི་ཆོས་དབྱིངས་ལ། །ཅི་ཡིན་མེད་པའི་བླ་མ་བཞུགས། །ཏི་གཏད་མེད་པའི་མོས་གུས་སྒོམས། །ངོས་གཟུང་མེད་པའི་བྱིན་རླབས་ཞུ། །ནམ་ཞིག་རྒྱུན་དུ་མོས་གུས་སྒོམས། །ཐུན་འགོར་སྐྱབས་འགྲོ་སེམས་བསྐྱེད་དང༌། །ཐུན་གཞུག་ཏུ་བསྔོ་བས་རྒྱས་འདེབས་སྒོམས། །རྟག་ཏུ་བསམ་པ་བཟང་པོ་བྱ། །སྡིག་པ་ལ་ཤི་འཛེམ་རོ་འཛེམ་གྱིས། །ཡོང་ན་དགེ་བ་ཅི་འགྲུབ་གྱིས། །ལྷ་ཁང་དང་དགེ་འདུན་བླ་མའི་རྫས། །དུག་ནག་པོ་ཧ་ལ་ཧ་ལ་ཡིན། །འབྲུ་གཅིག་ཀྱང་ཁ་ལ་མ་འཁྱེར་ཞིག །སྐུད་གཅིག་ཀྱང་ཨཾ་ཕྲག་ཏུ་མ་འཇུག་ཅིག །འཇིག་རྟེན་གྱི་ཁ་དྲག་དཔུང་འཛོམ་ལ། །ཡིད་སྨོན་གྱི་རེ་བ་མ་གཏོད་ཅིག །དགོན་པ་སྡེ་གོག་གི་འགོ་མི་དང༌། །སྡིག་ཅན་གྱི་དཔོན་པོའི་ཐུགས་ཟིན་དང༌། །ཆོས་ལ་སྡིག་གསོག་གི་བཙུན་པ་གསུམ། །དམྱལ་བའི་གཏིང་རྡོ་ཞིག་ལགས་པས་སྤོང་བ་ཞུ། །རང་རྒྱུད་སེ་རེངས་ཡེ་རེངས་འདི་དང་གཅིག །ཆོས་ལ་ཉ་དྲེད་ཆུ་དྲེད་འདི་དང་གཉིས། །ཉོན་མོངས་མེ་དར་ཆུ་དར་འདི་དང་གསུམ། །བསླབ་སྡོམ་ཁ་རལ་སྣ་རལ་འདི་དང་བཞི། །འཕྲལ་
སྤྱོད་མི་རྩིང་དགུ་རྩིང་འདི་དང་ལྔ། །དམ་ཚིག་གར་ཉམས་འདིར་ཉམས་མེད་དང་དྲུག །དགེ་སྦྱོར་རྒྱ་ཡེངས་དགུ་ཡེངས་འདི་དང་བདུན། །འདི་བདུན་རང་སྐྱོན་ལགས་པས་མཚང་ནས་བྲུས། །ལར་ལ་ཐང་མེད་པས་ཅ་རེ་སྡོད། །ཧམ་པ་མ་ཆེ་ཅུམ་མེ་གྱིས། །འགྲོ་ལུགས་ཝ་ལྟར་འཛེམ་པ་ཅིག །སྡོད་ལུགས་རི་བོང་ལྟར་བཟོ་བ་ཅིག །ལབ་ལུགས་ཞུམ་བུ་ལྟར་སྙམ་པ་ཅིག །རང་སེམས་བུ་ཆུང་ལྟར་བཟོ་མོད་ཅིག །ལག་ལེན་རྩི་ལྟར་ཞིབ་པ་ཅིག །འདི་ལྔ་ལག་ཐོག་ལ་ལོངས་པ་ཅིག་གྱིས། །ལུས་ངག་གི་སྤྱོད་པ་རྩིང་པ་འདི། །དམ་ཆོས་འདུལ་བ་དང་རྒྱབ་འགལ་ཡིན། །བསམ་ངན་སྦྱོར་རྩུབ་ཀྱི་གདུག་སེམས་འདིས། །ཐེག་ཆེན་གྱི་ཁྱུ་ནས་འབུད་པ་ལགས། །ཉམས་ལེན་མེད་པའི་ཐ་མལ་པ། །དག་སྣང་ཆུང་ལ་རང་འདོད་ཆེ། །རྡོ་རྗེ་ཐེག་པའི་བསྟན་བཤིག་ཡིན། །འོ་སྐོལ་ཆོས་གཟུགས་སུ་སྒྱུར་ཕྱིན་ཆད། །ཆོས་ཀུན་དང་མཐུན་པ་ཞིག་མ་བྱུང་ཀྱང༌། །སྣ་གཅིག་དང་མ་མཐུན་ན་ཅི་རང་བཏུབ། །འདི་སྙིང་གཏམ་གྱི་ནང་ནས་ཉིང་ཁུ་ཡིན། །སྙིང་དམར་པོར་བཏོན་ཀྱང་འདི་ལས་མེད། །ཆོས་གཟུགས་ཀྱི་དཀོར་ཟན་བསྟན་པའི་དགྲ། །ཚིག་འདི་ལ་མ་མགུ་ཡང་བྱ་ཐབས་མེད། །ཨ་ལ་ལ་མདོ་རྒྱུད་ཐང་མར་བརྡལ་ན་ཡང༌། །འགག་དྲིལ་རྒྱུ་འདི་ལས་འདུག་རི་ཤི །
ངེད་རྟོགས་ལྡན་གྱི་ཁ་ནས་དེ་ལྟར་ཐལ། །བུ་སེམས་ལ་ཕན་ན་སེམས་ལ་ཞོག །སེམས་ཚིག་པ་ཟ་ན་ཆུ་ལ་སྐྱུར། །བསྟོད་ར་ལ་དགའ་ན་བསྟོད་པས་ཆོག །ཅེས་ཀུན་དགའ་གྲགས་པ་ལ་ཏཱ་ར་ནཱ་ཐས་གདམས་པའོ།། །།