ཆོས་རྗེ་རིན་པོ་ཆེ་སྤ་ལུང་པ་ལའོ། །

༈ གང་སྣང་མཉམ་ཉིད་ངོ་བོའི་རྩལ། །ནམ་མཁའ་བཞིན་དུ་ཕྱོགས་ལྷུང་མེད། །གང་བྱུང་དེ་ལ་བཅོས་མི་འཚལ། །ལྷུན་གྲུབ་དེ་ལ་ཆམ་གྱི་བཞག །བཙིར་ཐག་མེད་པའི་རང་གི་སེམས། །གུ་ཡངས་པོ་འདི་རྒྱ་རེ་ཆེ། །བཙོན་དུ་བཅུག་པའི་མི་འགའ་ཞིག །འབད་རྩོལ་དཀའ་སྤྱད་ཆེན་པོ་ཡི། །བཙོན་ལས་ཐར་པར་གྱུར་པ་ན། །རྩོལ་བ་མེད་པར་ངང་གི་བདེ། །དང་པོ་འབད་རྩོལ་དགོས་དུས་སུ། །ཇི་ལྟར་འབད་ཀྱང་སྐྱོན་དང་འདྲེ། །འབད་རྩོལ་མེད་པར་ཤེས་ཙ་ན། །སྐྱོན་རྣམས་ཐམས་ཅད་ཡོན་ཏན་ཡིན། །ཞེས་པའང་སྔར་གོམས་ཉམས་ལེན་ལ། །གསལ་འདེབས་ཙམ་དུ་སྨྲས་པ་ཡིན།། །།མངྒ་ལཾ། །དགེའོ། །