བླ་མ་ཀ་བཞི་པ་ཀུན་དགའ་ལྷུན་གྲུབ་ལ།
ཨོཾ་སྭཱ་སྟི། བླ་མ་མཆོག་དང་དུས་གསུམ་རྒྱལ་བ་ཡི། །ཞབས་པད་དམ་པ་སྤྱི་བོས་བཏུད་བྱས་ཏེ། །དམ་ཆོས་བདུད་རྩིའི་རྒྱ་མཚོ་ལས་བརྩམས་ནས། །ཟབ་མོའི་བཀའ་མཆིད་ཅུང་ཟད་བགྱིད་ལ་སྤྲོ། །དེ་ལ་སྟོན་པ་དེ་བཞིན་གཤེགས་པས། །དམ་པའི་ཆོས་ཀྱི་སྒོ་མཐའ་ཡས་པ་ཞིག་བཀའ་སྩལ་པ་ནི། གཞན་གྱི་ཚིག་སྣ་བསྟུང་བ་དང༌། །ཕ་རོལ་ཟིལ་གྱིས་གནོན་པ་དང༌།
བདག་ཉིད་སྒྲོག་པ་དང༌། རང་གི་ཕྱོགས་ཡོངས་སུ་སྤེལ་བའི་ཕྱིར་གསུངས་པ་མ་ཡིན་ཏེ། །དམིགས་པ་མེད་པའི་ཐུགས་རྗེ་ཆེན་པོའི་རང་བཞིན་ལས། འགྲོ་བ་ཐམས་ཅད་ལ་མཉམ་པར་བརྩེ་བས། དེ་རྣམས་རང་གིས་བརྙེས་པའི་བྱང་ཆུབ་དམ་པ་དེ་ལ་དགོད་པའི་ཕྱིར་གསུངས་པ་ཡིན་ནོ། །དེའི་ཕྱིར་ཆོས་བྱེད་པར་འདོད་པ་རྣམས་ཀྱང་རང་དང་གཞན་བླ་ན་མེད་པའི་བྱང་ཆུབ་སངས་རྒྱས་ཀྱི་གོ་འཕང་ཐོབ་པར་འགྱུར་བའི་ཐབས་ཁོ་ན་ལ་གཙོ་བོར་དམིགས་པ་ཞིག་ངེས་པར་དགོས་པ་ཡིན་ནོ། དེ་ཡང་དང་པོར་ཆོས་སྒྲུབ་ཅིང་ཉམས་སུ་བླང་བའི་གཞི་གང་ལ་དམིགས་ཏེ་བསྒོམ་པར་བྱ་བ་ནི། གནས་ལུགས་ཀྱི་དེ་ཁོ་ན་ཉིད་ཡིན་ལ། དེ་ཡང་འདི་ལྟར་ངེས་དགོས་ཏེ། སེམས་མ་རིག་པའི་འཁྲུལ་པས་ཡོངས་སུ་བསྐྱེད་དེ། རྨི་ལམ་བཞིན་དུ་སྣང་བའི་ཀུན་རྫོབ་ཁམས་གསུམ་གྱིས་བསྡུས་པའི་ཆོས་འདི་དག་ཐམས་ཅད། དངོས་པོའི་གནས་ཚུལ་ལ་གདོད་ནས་ཡོད་མ་མྱོང་ཞིང༌། འཁྲུལ་པའི་སེམས་ཀྱི་སྣང་བ་ལ་ནི། རང་རང་གི་རྒྱུ་རྐྱེན་ཚོགས་པ་ལས་འབྲས་བུ་བསླུ་བ་མེད་པར་འབྱུང་སྟེ། ཀུན་རྫོབ་གཟུང་འཛིན་གྱིས་བསྡུས་པའི་ཆོས་རྣམས་འཁྲུལ་སྣང་ཙམ་མ་གཏོགས། གདོད་མ་ནས་ཡོད་མ་མྱོང་བ་ཡིན་ལ། དེ་ལྟར་མེད་ཀྱང༌། ཇི་སྲིད་འཁྲུལ་པའི་སྣང་བ་མ་དག་གི་བར་དུ། འཁྲུལ་ངོ་ཉིད་དུ་རྒྱུ་འབྲས་ཕྲ་
ཞིང་ཕྲ་བ་རྣམས་ཀྱང་མ་འཁྲུགས་པར་འབྱུང་བ་འདི་ནི། དང་པོ་ཉིད་དུ་ཡང་དག་པའི་ལྟ་བ་བསྐྱེད་པའི་དམིགས་པ་ཡིན་ཏེ། རྒྱུ་འབྲས་བསླུ་བ་མེད་པ་ལ་ངེས་ཤེས་སྐྱེས་ནས། སྤངས་བླང་ཇི་ལྟ་བ་བཞིན་དུ་སྤྱད་པས། འཇིག་རྟེན་པའི་ཡང་དག་པའི་ལྟ་བ་ལ་གནས། ངན་སོང་གི་སྒོ་ཁེགས། མཐོ་རིས་ཀྱི་སྒོ་ཕྱེད་པར་འགྱུར་ཞིང༌། སྣང་བ་འདི་དག་འཁྲུལ་པ་ཙམ་མ་གཏོགས། གདོད་མ་ནས་ཡོད་མ་མྱོང་པར་རྟོགས་པས། དངོས་པོར་འཛིན་པ་དང༌། མཚན་མར་འཛིན་པའི་རྟོག་པ་དབྱིངས་སུ་དག་སྟེ། འཇིག་རྟེན་ལས་འདས་པའི་ཡེ་ཤེས་ཡང་དག་པར་སྐྱེ་བར་འགྱུར་ཞིང༌། ཉོན་མོངས་པའི་ས་བོན་རྣམས་ཀྱང་སྤོང་བར་བྱེད་དོ། །དེ་ལྟར་ན། ཀུན་རྫོབ་གཟུང་འཛིན་གྱི་ཆོས་ཐམས་ཅད་གདོད་མ་ནས་མ་གྲུབ་ཀྱང༌། དོན་དམ་ཡང་དག་པའི་དབྱིངས་ཆོས་ཉིད་རང་རིག་རང་གསལ་སྤྲོས་པ་དང་བྲལ་བའི་ཡེ་ཤེས་འདི་ནི། ཡང་དག་པའི་སྟོང་པ་ཉིད་དང༌། ཤེས་བྱ་ཐམས་ཅད་ཀྱི་གནས་ལུགས་དང༌། རང་བཞིན་གྱིས་འོད་གསལ་བ་དང༌། བདེ་གཤེགས་སྙིང་པོ་ཞེས་བྱ་བ་ཡིན་ཏེ། འདི་ནི་ཆོས་ཐམས་ཅད་ཀྱི་ཆོས་ཉིད་དུ་གདོད་མ་ནས་གྲུབ་ཅིང༌། འཕགས་པ་རྣམས་ཀྱི་ཡེ་ཤེས་ཀྱི་ཉམས་སུ་མྱོང་བྱ་ཡིན་པའི་ཕྱིར། བདེན་པ་ཡིན་ལ། འགྱུར་བ་མེད་པའི་
ཕྱིར་རྟག་ཅིང་བརྟན་པ་དང༌། གནས་ལུགས་ཕྱིན་ཅི་མ་ལོག་པ་ཡིན་པའི་ཕྱིར། དེ་བཞིན་ཉིད་དང༌། མ་ནོར་བ་དེ་བཞིན་ཉིད་དོ། །དེ་ལྟར་གནས་ལུགས་ད་ནི། བདེན་གྲུབ་དང༌། རྟག་བརྟན་གཡུང་དྲུང་ཡིན་ཀྱང། སྤྲོས་པ་ཐམས་ཅད་དང་བྲལ་བ་ཡིན་ཞིང༌། ཚིག་གིས་བརྗོད་དུ་མེད། བློས་བཟུང་དུ་མེད་པ་ཡིན་པས། མཉམ་བཞག་གི་ཚེ། འདི་བདེན་པ་ཡིན་ནོ་རྟག་པ་ཡིན་ནོ་ཞེས་བློས་བརྟགས་ནས་ནི་མི་སྒོམ་སྟེ། མཉམ་བཞག་རྣམ་པར་མི་རྟོག་པ་གང་དུ་ཡང་འཛིན་པ་མེད་པ། བཟོ་བཅོས་མེད་པའི་ཚུལ་གྱིས་འཇོག་དགོས་པས་སོ། །གཞི་ཤེས་བྱའི་གནས་ལུགས་དེ་ལྟར་ཆོས་ཉིད་ཡོངས་གྲུབ་དེ་བཞིན་གཤེགས་པའི་སྙིང་པོ་སེམས་ཅན་ཐམས་ཅད་ལ་གནས་ཤིང༌། དེ་ཉིད་སེམས་ཀྱིས་རང་བཞིན་ཡིན་ལ། དེ་ཁོ་ན་དངོས་པོའི་གནས་ཚུལ་ལ་ཞུགས་ཤིང་ཡོད་པ་ཡིན། དེ་ལས་གཞན་འཁོར་བ་པ་ལ་ཇི་ལྟར་སྣང་ཞིང༌། གྲགས་པ་འདི་དག་ཐམས་ཅད་དང༌། ལམ་གྱི་ཆོས་ཐམས་ཅད་དངོས་པོའི་གནས་ཚུལ་ལ་མ་གྲུབ་པ་གློ་བུར་བ་ཡིན་ནོ། །གཞི་དེ་ལྟར་ཡིན་པའི་གནད་ཀྱིས། ལམ་ཉམས་སུ་ལེན་པའི་ཚེ། རེ་ཞིག་འཁྲུལ་ངོ་དང་བསྟུན་ཏེ། ཁམས་གསུམ་འཁོར་བ་ཐམས་ཅད་སྡུག་བསྔལ་གྱི་རང་བཞིན་ཅན་མི་རྟག་ཅིང་མི་བརྟན་ལ་འཇིག་པ།
ང་དང་ང་ཡིར་འཛིན་པའི་ཡུལ་བདག་ཅེས་བྱ་བ་གྲུབ་པ་མེད་པ། ཆོས་འདི་རྣམས་ལ་བྱེད་པོས་སྟོང་པ། རྒྱུ་རྐྱེན་སྣ་ཚོགས་པ་འཕྲད་པ་ལས་འབྱུང་བར་ཤེས་ནས། དེ་ཉིད་ཀྱི་དོན་ཡང་ཡང་བསྒོམས་པས། འཁོར་བའི་བདེ་བ་ཐམས་ཅད་སྙིང་པོ་མེད་པས། འཁོར་བ་ལས་ངེས་པར་འབྱུང་འདོད་ཀྱི་བསམ་པ་ཕུན་སུམ་ཚོགས་པ་སྐྱེ་བར་འགྱུར་ཞིང༌། དེའི་རྗེས་སུ་དེ་ལྟར་མི་རྟག་ཅིང་སྡུག་བསྔལ་ལ་སྙིང་པོ་མེད་པའི་འཁོར་བ་ལས་བདག་ཉིད་གཅིག་པུར་མ་ཟད་སེམས་ཅན་ཐམས་ཅད་ཀྱང་འདོན་དགོས་པའི་བསམ་པ་ཁྱད་པར་ཅན་བསྐྱེད་ནས། བྱམས་སྙིང་རྗེ་དང་འབྲེལ་བར་དེ་ཉིད་ཡང་ཡང་བསྒོམས་པས། བསམ་པ་བྱང་ཆུབ་ཀྱི་སེམས་བཅོས་མ་མ་ཡིན་པ་རྒྱུད་ལ་སྐྱེ་བར་འགྱུར་རོ། །དེ་ལྟར་སེམས་ཅན་སྡུག་བསྔལ་མྱོང་བ་ལ་སྙིང་རྗེ་དང༌། བདེ་བ་ལ་འགོད་འདོད་ཀྱི་བྱམས་པ་དང༌། །དེ་ལྟ་བུའི་སེམས་ཅན་གྱི་དོན་དེ་ཡང་བདག་ཉིད་གཅིག་པུས་ཁུར་དུ་བླངས་ནས་སྒྲུབ་འདོད་ཀྱི་སྙིང་སྟོབས་དང༌། གཞན་དོན་འབའ་ཞིག་གི་སྙིང་ཁོངས་སུ་བཅུག་ནས། སངས་རྒྱས་སྒྲུབ་འདོད་ཀྱི་བྱང་ཆུབ་ཀྱི་སེམས་ཏེ། དེ་དག་སྟོབས་དང་ལྡན་པར་གྱུར་པ་ན། ཐེག་ཆེན་གྱི་ཐུན་མོང་མ་ཡིན་པའི་ཆོས་རྒྱུད་ལ་སྐྱེས་པའི། ལམ་འགོ་ཟིན་པ་ཡིན་ནོ། །དེ་ནས་དེ་ལྟ་བུའི་
གང་དུ་སྡུག་བསྔལ་མྱོང་བའི་ས་ཕྱོགས་འཇིག་རྟེན་གྱི་ཁམས་དང༌། སུ་ཞིག་སྡུག་བསྔལ་མྱོང་བའི་སེམས་ཅན་རྣམས་དང༌། རྒྱུ་གང་གིས་སྡུག་བསྔལ་མྱོང་བར་འགྱུར་བའི་ལས་དང་ཉོན་མོངས་རྣམས་དང༌། ཇི་ལྟར་སྡུག་བསྔལ་མྱོང་བའི་ཚུལ་སྐྱེ་རྒ་ན་འཆི་དང༌། འགྲོ་དྲུག་སོ་སོའི་སྡུག་བསྔལ་གྱི་རང་བཞིན་དེ་ཐམས་ཅད། སོ་སོའི་སེམས་རྒྱུད་ལ་མ་རིག་པའི་བག་ཆགས་ཡོད་པས། འཁྲུལ་བའི་སྣང་བར་ཤར་བ་མ་གཏོགས། དངོས་པོའི་གནས་ཚུལ་ལ་གྲུབ་པ་མེད་པས། རྨི་ལམ་གྱི་སྣང་བ་བཞིན་དུ་ཤེས་པ་ན། འཁོར་བའི་སྡུག་བསྔལ་དེ་ཡང་བདེན་མེད་སྒྱུ་མ་ལྟ་བུ་ཡིན་པའི་ཕྱིར། རང་ཉིད་དེ་ལ་མི་སྐྲག་ཅིང༌། གནས་ལུགས་ལ་སྡུག་བསྔལ་མེད་ཀྱང༌། ཡོད་པར་འཁྲུལ་ནས་སྡུག་བསྔལ་མྱོང་བའི་སེམས་ཅན་རྣམས་ལ་ལྷག་པར་ཡང་སྙིང་རྗེ་སྐྱེ་བར་འགྱུར་ཞིང༌། སེམས་ཅན་དང་སྡུག་བསྔལ་རང་བཞིན་མེད་པར་མཐོང་བས་དེ་དག་དངོས་པོར་འཛིན་པ་དང་ཡང་བྲལ་བ། སྟོང་ཉིད་སྙིང་རྗེའི་སྙིང་པོ་ཅན་ཞེས་བྱ་བ་རིམ་གྱིས་རྒྱུད་ལ་སྐྱེས་པར་གྱུར་ན། མདོ་སྔགས་གང་གིས་ལམ་ལ་ཞུགས་ཀྱང་རུང༌། ཐེག་པ་ཆེན་པོའི་ལམ་གྱི་སྙིང་པོ་རྒྱུད་ལ་སྐྱེས་པ་ཡིན་ནོ། ཁྱད་པར་དུ། སྤྲོས་པ་དང་བྲལ་བའི་དབྱིངས་ལ་རྣམ་པར་མི་རྟོག་པ་ཉིད་དུ་བཞག་པ་དང༌། རྣམ་པར་
རྟོག་པའི་ཚོགས་མཐའ་དག་རང་བཞིན་གྱིས་སྟོང་པར་མཐོང་ཞིང༌། སེམས་ཀྱི་རང་བཞིན་འོད་གསལ་བ་ནི་ནམ་དུ་ཡང་འགྱུར་བ་མེད་པར་མཐོང་བ་དེའི་ཚེ། དེ་བཞིན་གཤེགས་པའི་སྙིང་པོ་ལ་ཡིད་ཆེས་དམ་པ་རྙེད་པར་འགྱུར་ཏེ། དེ་ལས་སེམས་ཅན་ཐམས་ཅད་ཀྱང་དེ་བཞིན་གཤེགས་པའི་སྙིང་པོ་ཅན་དུ་ཤེས་ཤིང༌། དེ་ཕྱིར་སེམས་ཅན་ལ་མི་བརྙས་པ་དང༌། སེམས་ཅན་བདག་དང་མཚུངས་པའི་བྱམས་པ་དང༌། སེམས་ཅན་གྱི་རང་བཞིན་དང༌། སངས་རྒྱས་ཀྱི་རང་བཞིན་གཅིག་པར་ཤེས་པས་གུས་པ་ཁྱད་པར་ཅན་དང༌། འགྲོ་ཀུན་བླ་ན་མེད་པའི་བྱང་ཆུབ་ལ་འགོད་ཐུབ་པ་ཤེས་པའི་སྙིང་སྟོབས་དང༌། སེམས་ཅན་རྣམས་ཉིད་སངས་རྒྱས་རང་ལ་ཡོད་ཀྱང་དེ་ལྟར་མ་ཤེས་པ་ལ་སྙིང་རྗེ་ཆེན་པོ་ཡང་ལྷག་པར་འཇུག་ཅིང༌། བདག་གཞན་འཁོར་འདས་བདེ་སྡུག་སོགས་ཆོས་ཐམས་ཅད་ཀྱི་སྣང་ཚུལ་རྣམས་ལ་མངོན་པར་ཞེན་པ་བཟློག རང་བཞིན་མཉམ་པ་ཉིད་ལ་རྩེ་གཅིག་ཏུ་མཉམ་པར་འཇོག་ནུས་པ་ན། མདོ་དང་སྔགས་ཀྱི་ལམ་གང་ལ་ཞུགས་པ་ཡིན་ཀྱང་རུང་སྟེ། ཐེག་པ་ཆེན་པོའི་ལམ་ཁྱད་པར་ཅན་ཟབ་མོ་ཆེས་ཕུལ་དུ་ཕྱིན་པ་ལ་རེག་པ་ཡིན་ནོ། །ཕྱི་མ་འདི་ནི། མདོ་རྣམས་ལས། ཕྱིར་མི་ལྡོག་པའི་འཁོར་ལོའི་གཏམ་ལ་དགའ་བ། ཞེས་གསུངས་
པ་དང༌། དོན་དམ་རྣམ་པར་ངེས་པའི་ལམ་ལ་ཞུགས་པ་དང༌། ཐེག་པ་ཐམས་ཅད་ལ་ཡང་དག་པར་ཞུགས་པ་དང༌། འཁོར་ལོ་ཐ་མའི་ཆེད་དུ་བྱ་བའི་གདུལ་བྱར་གྱུར་པ་དང༌། བྱང་ཆུབ་སེམས་དཔའ་དབང་པོ་རྣོན་པོ་ཞེས་བྱ་བའི་གནས་ཐོབ་པ་ཡིན་ནོ། །དེ་དག་ནི་ལམ་གྱི་གཞི་ཡིན་པས་མདོ་སྔགས་གཉིས་ཆར་ལ་དགོས་ཤིང༌། སྔགས་ཀྱི་ཐེག་པ་ལ་བརྟེན་ནས། ཆོས་ཉིད་ཀྱི་གནས་ལུགས་མྱུར་དུ་རྟོགས་པར་འདོད་ན་ནི། ཡང་དག་པའི་དབང་གིས་རྒྱུ་སྨིན་པར་བྱས་ཤིང༌། དབང་པོ་རྟུལ་པོ་དང༌། རྒྱུད་སྦྱང་དགོས་པ་ཡིན་ན། བསྐྱེད་པའི་རིམ་པ་ཡན་ལག་བཅས་པ་ལ་ཡང་ལེགས་པར་སློབ་དགོས་ཤིང༌། དབང་པོ་རྣོན་པོ་ལ་ནི། རྫོགས་པའི་རིམ་པ་ཁོ་ནས་ཀྱང་དོན་འགྲུབ་པ་ཡོད་ལ། གཉིས་ཀས་ཀྱང་ཤིན་ཏུ་རྣལ་འབྱོར་ཕྱག་རྒྱ་ཆེན་པོ་ཉིད་དོན་གྱི་གཙོ་བོའི་ཚུལ་དུ་འབད་པས་སྒྲུབ་དགོས་སོ། །དེ་ནི་རྣལ་འབྱོར་ཡན་ལག་དྲུག་པ་སོགས་ཏེ། བླ་མ་དམ་པའི་མན་ངག་དང༌། ས་བཅུའི་བྱང་ཆུབ་སེམས་དཔའ་རྣམས་ཀྱི་གསུང་ལས་རྟོགས་དགོས་མོད། དོན་གྱི་སྙིང་པོ་ནི། རྣམ་པར་རྟོག་པ་ཐམས་ཅད་ཡོངས་སུ་སྤངས་ཏེ། གཡོ་བ་མེད་པའི་རྣལ་འབྱོར་གྱིས་ལུས་ལ་གནད་དུ་བསྣུན་པ་ན། སེམས་ཀྱི་རང་བཞིན་འོད་གསལ་ཏེ་རྣམ་པ་ཀུན་གྱི་མཆོག་དང་ལྡན་པའི་སྟོང་གཟུགས་
ཕྱག་རྒྱ་ཆེན་པོའི་ཚུལ་དུ་མཐོང་བ་ན། ལས་རླུང་ཉིས་ཁྲི་ཆིག་སྟོང་དྲུག་བརྒྱ་དབྱིངས་སུ་ཐིམ་པའི་ཐབས་ལ་འབད་པས། མི་འགྱུར་བའི་བདེ་བ་ཆེན་པོ་མངོན་དུ་འགྱུར་ཏེ། དེ་ལྟར་རྣམ་ཀུན་མཆོག་ལྡན་གྱི་སྟོང་པ་ཉིད་དང༌། མི་འགྱུར་བའི་བདེ་བ་ཆེན་པོ་ཟུང་དུ་འཇུག་པ་དེ་ནི། དེ་བཞིན་གཤེགས་པའི་སྙིང་པོ་དངོས་ཡིན་ཞིང༌། དེ་ཡང་རང་བཞིན་གདོད་མ་ནས་སེམས་ཅན་གྱི་སེམས་རྒྱུད་ལ་གནས་པ་ཡིན་ཀྱང་མངོན་དུ་ནི་མ་གྱུར་པ་ཡིན་ལ། ཐབས་རྣམ་པར་མི་རྟོག་པའི་སྒོ་ནས་ལུས་ལ་གནད་དུ་བསྣུན་པ་དང༌། ལས་རླུང་དགག་པའི་སྦྱོར་བས། དེ་དག་ས་འོག་གི་གཏེར་བཏོན་པ་བཞིན་དུ་མངོན་དུ་འགྱུར་བ་ཡིན་ནོ། །ད་ལྟར་ལས་དང་པོ་པ་ལ་ཡང༌། སེམས་ཀྱི་གསལ་ཆ་མ་འགགས་པ་སྟོང་གཟུགས་ཀྱི་སྣང་བ་རབ་འབྱམས་སུ་འཆར་བ་ནི། སེམས་ཉིད་རྣམ་ཀུན་མཆོག་ལྡན་གྱི་སྟོང་ཉིད་འཁོར་འདས་ཀྱི་ཁམས་གསུམ་གྱི་གཟུགས་བརྙན་ཅན་དུ་གནས་པའི་རྟགས་ཡང་དག་པ་ཡིན་པས། དེ་ལྟར་ངེས་ཤེས་བསྐྱེད་པ་དང༌། གང་གཟུགས་བརྙན་སྣང་བའི་སེམས་དེ་ནི་སྤྲོས་པ་དང་བྲལ་ཞིང་ངོས་བཟུང་དུ་མེད་པ་དང༌། སྡུག་བསྔལ་གྱི་སྣང་བ་ནུབ་ཅིང་ཉམས་བདེ་བར་གནས་པ་དེ་ནི་སེམས་ཀྱི་རང་བཞིན་མི་འགྱུར་བའི་བདེ་བ་ཆེན་པོར་
གནས་པའི་རྟགས་ཡང་དག་པ་ཡིན་པས། དེ་ལྟར་ངེས་ཤེས་བསྐྱེད་དགོས་པ་ཡིན་ནོ། །དོན་དམ་པར་སངས་རྒྱས་ཀྱི་ཡེ་ཤེས་རང་སེམས་ཁོ་ན་ལ་ལྷུན་རྫོགས་སུ་གནས་པ་ཡིན་ཞིང༌། དེ་ལ་སྒྲིབ་གཡོགས་སུ་ཡོད་པའི་གློ་བུར་གྱི་དྲི་མ་སྦྱང་བའི་ཐབས་ལ་ནན་ཏན་དུ་འབད་པས། མྱུར་དུ་རྫོགས་པའི་སངས་རྒྱས་ཀྱི་གོ་འཕང་ལ་རང་གིས་དབང་བསྒྱུར་བར་ནུས་པ་དེ་འབྱུང་བ་ཡིན་ནོ། །འདིར་སྨྲས་པ། ཤིན་ཏུ་རྙེད་དཀའི་མི་ལུས་རིན་ཆེན་རྙེད། །བླང་དོར་གནས་ཀུན་གསལ་བར་སྟོན་པ་ཡི། །དམ་ཆོས་བདུད་རྩིའི་རྒྱ་མཚོ་དང་འཕྲད་ནས། །དོན་མེད་སྟོང་ལོག་བྱེད་པར་ཅང་བཟོད་དམ། ལོ་ཟླའི་གྲངས་ཀྱིས་རིམ་པས་ཕྲི་བ་ན། །ཡུན་རིང་བསྐལ་པའི་དུས་ཀྱང་མྱུར་དུ་འཛད། །རྩོད་དུས་མི་ཡི་ཚེ་ལ་སྨོས་ཅི་དགོས། །ཕྱི་ཤོལ་ལེ་ལོའི་དབང་དུ་མ་གཏོང་ཞིག །ཤིན་ཏུ་གཅེས་པའི་ལུས་ཀྱང་མྱུར་དུ་འབོར། །ཡུལ་འཁོར་ལོངས་སྤྱོད་ལ་སོགས་སྨོས་ཅི་དགོས། །བསྟོད་དབྱངས་གཏམ་སྙན་བྲག་ཆའི་དབྱངས་དང་མཚུངས། །སྙིང་པོ་མེད་པ་དེ་ལ་སུ་ཞིག་ཆགས། །དགེ་སྡིག་ལས་ནི་སེམས་ཀྱི་རྗེས་སུ་འབྲང༌། འཇིག་རྟེན་ཕ་རོལ་གར་སྐྱེ་རང་དབང་མེད། །འགྲོ་དྲུག་གཡང་སར་ལས་ཀྱིས་འཁྲིད་པའི་ཚེ། །ཆོས་ལས་གཞན་པའི་བྱ་བྱེད་ཀུན་གྱིས་བསླུ། །འཁོར་བའི་སྡུག་བསྔལ་རྒྱ་མཚོ་ཆེན་བོ་བཞིན། །
གཏིང་མཐའ་མི་མངོན་རྒལ་བར་ཤིན་ཏུ་དཀའ། །གཅིག་རྗེས་གཅིག་ཟིན་ཆུ་ཡི་རྦ་རླབས་བཞིན། །སྡུག་བསྔལ་འཁྲུལ་འཁོར་འདི་ལ་ཟད་པ་མེད། །འཁོར་བའི་སྡུག་བསྔལ་ཞེས་བྱའི་དངོས་གཞན་ཞིག །བདེན་གྲུབ་རང་དབང་ཅན་དུ་མེད་ལགས་ཏེ། །སེམས་ཉིད་འཁྲུལ་པའི་གསལ་སྣང་ཤར་བ་ན། །དངོས་སུ་ཡོད་པ་བཞིན་དུ་སྡུག་བསྔལ་མྱོང༌། །དཔེར་ན་མི་ཞིག་གཉིད་ལོག་རྨི་ལམ་ན། །གཡང་སར་ལྷུངས་ཤིང་ལུས་ལ་བསྣད་པ་རྨི། །གཡང་ས་མེད་ཅིང་ལྷུངས་པའི་ལུས་མེད་ཀྱང༌། །དངོས་སུ་ལྷུངས་པ་བཞིན་དུ་སྡུག་བསྔལ་མྱོང༌། བདག་གཞན་ཕྱི་ནང་སྣོད་བཅུད་ཐམས་ཅད་དུ། །ང་བདག་ཅེས་བྱ་ནམ་ཡང་གྲུབ་པ་མེད། དེ་ཕྱིར་རང་དོན་སེམས་པ་འཁྲུལ་པ་ཡིན། །མཁའ་མཉམ་སེམས་ཅན་ཐམས་ཅད་རང་སེམས་འཁྲུལ། །འཁྲུལ་པའི་རྒྱ་མཚོ་སྐེམས་པར་བྱ་བའི་ཕྱིར། །རང་སེམས་བརྩོན་འགྲུས་ཆེན་པོ་བརྩམས་གྱུར་ན། །འཁྲུལ་པ་སངས་ནས་གདོད་མའི་གནས་ལུགས་ལ། །རྟག་ཏུ་བཞུགས་པའི་སངས་རྒྱས་ཐོབ་པར་འགྱུར། །མ་དག་སྣང་བ་གཟུང་འཛིན་འཁོར་བའི་ཆོས། །ཡོད་པར་འཛིན་རྣམས་རྟག་པར་ལྟ་བ་ཡིན། །དོན་དམ་དབྱིངས་ཀྱི་ཡེ་ཤེས་སྙིང་པོ་སྟེ། །མེད་པར་འདོད་ན་ཆད་ལྟའི་ཐ་ཤལ་ཡིན། །གང་ཟག་ལ་སོགས་འདུས་བྱས་
དངོས་པོ་རྣམས། །མི་འཇིག་རྟག་གོ་སྙམ་ན་རྟག་ལྟ་ཡིན། །རྒྱུ་འབྲས་རྟེན་འབྲེལ་འགག་མེད་ནམ་ཡང་འཆར། །དགེ་སྡིག་ལས་ལ་སྐུར་འདེབས་ཆད་ལྟ་ཡིན། །ཀུན་རྫོབ་བདེན་པའང་རྟག་ཆད་མཐའ་བྲལ་ཞིང༌། །དོན་དམ་རྟགས་ཚུལ་ལ་ཡང་མཐའ་གཉིས་སྤངས། །དེ་ལྟར་ཤེས་ན་ལྟ་བ་རྣམ་དག་ཡིན། །གཞན་དུ་རྦད་ཁམ་ཆེ་ཡང་དགོས་དོན་སྟོར། །དོན་དམ་རང་རིག་བདེ་གཤེགས་སྙིང་པོ་ནི། །རྣམ་པ་ཀུན་ལྡན་རང་བཞིན་འགྱུར་བ་མེད། །ཀུན་རྫོབ་འཁོར་འདས་ཆོས་ཀུན་ཡོད་མ་མྱོང༌། །རྣམ་དག་ལྟ་བའི་སྙིང་པོ་དེ་ཙམ་ལགས། །རྟག་ཏུ་ལུས་ངག་ཡིད་ཀྱིས་སྡིག་པ་སྤངས། །དགེ་བའི་སེམས་དང་དགེ་བའི་བྱ་བ་དང༌། །དགེ་བའི་ཚིག་དང་གཞན་ལ་ཕན་སེམས་བསྐྱེད། །ཐེག་པ་སྤྱི་ལ་དགོས་པའི་སྤྱོད་པ་ཡིན། །རིག་གནས་ཀུན་དང་དམ་ཆོས་ཀུན་ལ་མཁས། །ཡོན་ཏན་ཀུན་ཐོབ་ཏིང་འཛིན་ཐམས་ཅད་སྒྲུབ། །ཉེས་སྐྱོན་ཀུན་སྤོང་ཐེག་པ་ཀུན་ལ་འཇུག །ཐབས་ཀུན་ལ་བརྟེན་སེམས་ཅན་ཀུན་དོན་བྱེད། །དགེ་བའི་ཆོས་ལ་མི་སྒྲུབ་གང་ཡང་མེད། །བྱ་བ་ཐམས་ཅད་སེམས་ཅན་དོན་དུ་བསྔོ། །གཞན་གྱི་དགེ་བ་ཀུན་ལ་དགའ་བ་བསྒོམ། །འདི་ནི་ཐེག་ཆེན་ཀུན་གྱི་སྤྱོད་པ་ཡིན། །སྤྱོད་པ་བཟང་ཡང་བཟང་འཛིན་མེད་པ་དང༌། །བླང་དོར་གནས་ལ་ཞིབ་
ཏིག་ཆེ་བཞིན་དུ། །སྤྱོད་པ་ཐམས་ཅད་སྒྱུ་མ་ལྟ་བུར་ཤེས། །རྒྱལ་བའི་སྲས་ཀྱི་ཚུལ་ཁྲིམས་རྣམ་དག་ཡིན། །སྣང་བ་ཐམས་ཅད་དཀྱིལ་འཁོར་འཁོར་ལོ་དང༌། །གྲགས་ཚད་གསུང་དང་སེམས་ཉིད་ཐུགས་རྡོ་རྗེ། །ལྷག་པར་མོས་ཤིང་མཚན་འཛིན་དང་བྲལ་བ། །བླ་མ་སངས་རྒྱས་ཀུན་འདུས་ངོ་བོར་བསྒོམ། །གསང་སྔགས་ལྷ་ལ་མི་ཕྱེད་དད་པ་ཡིས། །དམ་ཚིག་སྲོག་ལས་གཅེར་པར་འཛིན་པ་དང༌། །སྔགས་ཀྱི་སྤྱོད་པ་མཆོག་ལ་ཡིད་གུས་པ། །འདི་ནི་རྡོ་རྗེ་ཐེག་པའི་སྤྱོད་པ་ཡིན། །རང་སྤྱོད་ཕྲ་མོ་ནས་བརྩམས་སྤང་བླང་དང༌། །ཆེན་པོ་རྣམས་ཀྱི་ཐབས་ལ་མཁས་པ་ཡི། །རྨད་བྱུང་སྤྱོད་ལའང་དད་ཅིང་བློར་ཤོང་ལ། །གང་ཤར་དེ་ལ་རོ་སྙོམས་ཞེན་མེད་མཁན། །དེ་ལྟར་བྱས་ན་ལོག་པའི་ལམ་མི་འགྲོ། །རང་འདོད་འཁྲི་བ་གཏན་ནས་མ་ཞུགས་པར། །སྙིང་རྗེའི་སེམས་ཀྱིས་གཞན་ཕན་ཁོ་ན་སྒྲུབ། །འགྲོ་བ་རང་བཞིན་མེད་ཀྱང་སྙིང་རྗེའི་ངང༌། །ཡང་དག་སྤྱོད་པ་ཐམས་ཅད་འདི་ལ་འདུས། །རྩེ་གཅིག་སྒྲུབ་པ་ཉམས་སུ་ལེན་པ་ལ། །ཚེ་འདི་དོན་ཆུང་མི་རྟག་ཡད་ཡུད་ཙམ། ཁམས་གསུམ་སྡུག་བསྔལ་མེའི་འོབས་དང་འདྲ། །འདི་ལ་ངེས་འབྱུང་ཤུགས་དྲག་སྙིང་ནས་བསྐྱེད། །སྡུག་བསྔལ་ཅན་གྱི་འགྲོ་ལ་སྙིང་རྗེ་དང༌། །བྱང་ཆུབ་སྒྲུབ་པའི་ལྷག་བསམ་ཁུར་ཆེན་
བསྐྱེད། །གནས་ལུགས་སྤྲོས་བྲལ་དོན་དམ་སྟོང་པ་ཉིད། །ལེགས་པར་གོ་ནས་མོས་པ་མཆོག་བསྐྱེད་དེ། །ཞི་གནས་ལྷག་མཐོང་རིམ་པས་རྩེ་གཅིག་སྒོམས། །རྣམ་རྟོག་རླུང་གིས་མ་གཡོས་ཞི་གནས་དང༌། །སེམས་ཉིད་གསལ་སྟོང་རིག་པའི་ལྷག་མཐོང་སྟེ། །ཞི་ལྷག་ཟུང་འཇུག་རྣལ་འབྱོར་བསྒོམས་གྱུར་ན། །ཉོན་མོངས་གཡུལ་ལས་མྱུར་དུ་རྒྱལ་བར་འགྱུར། །སྔགས་བཟླས་དཀྱིལ་འཁོར་འཁོར་ལོ་བསྒོམ་པ་སོགས། །སྣ་ཚོགས་ཐབས་ཀྱང་གཞན་གྱི་དོན་དུ་སྒྲུབ། །ཟབ་མོའི་གནད་ལ་བླ་མའི་ལུང་བཞིན་དུ། །ཡེ་ཤེས་ཆེན་པོའི་རྣལ་འབྱོར་འབད་པས་བསྒོམ། །རྣམ་རྟོག་ཐམས་ཅད་སྤྲིན་བཞིན་གློ་བུར་བ། །སེམས་ཉིད་སྤྲོས་བྲལ་མཁའ་བཞིན་འགྱུར་བ་མེད། །དབྱིངས་རིག་ཙམ་ལ་གཡོ་བ་མེད་པར་བསྒོམ། །ཉམས་ལེན་སྒོམ་པའི་སྙིང་པོ་དེར་འདུས་སོ། །ལྟ་སྒོམ་སྤྱོད་པ་མ་ནོར་ཉམས་བླངས་ན། །འབྲས་བུ་མཆོག་ལ་སོམ་ཉི་ག་ལ་ཡོད། །རྒྱུ་ཚོགས་མ་ལུས་ཚང་ཞིང་འཛོམ་པ་ལ། །འབྲས་བུ་འབྱུང་བ་སུས་ཀྱང་བཟློག་ཏུ་མེད། །རྒྱལ་བས་ས་ལམ་རིམ་པ་མང་གསུངས་ན། །ས་ལམ་རིམ་པ་འགོག་པ་གད་མོའི་གནས། །དེ་ཕྱིར་རིམ་པས་ལམ་རྣམས་བགྲོད་བྱས་ནས། །མཐར་ཐུག་བྱང་ཆུབ་གནས་སུ་ཕྱིན་པར་འགྱུར། །ཆོས་སྐུ་སྤྲོས་དང་བྲལ་བའི་ཡེ་ཤེས་ཀྱང༌། །
སྣང་མེད་མུན་ནག་ལྟ་བུ་མ་ཡིན་ཏེ། །དུས་གསུམ་ཤེས་བྱའི་དཀྱིལ་འཁོར་མ་ལུས་པའི། །ཇི་ལྟ་ཇི་སྙེད་གནས་ཚུལ་གསལ་བར་མཁྱེན། །ཡེ་ཤེས་ཆེན་པོའི་རང་སྣང་འགག་མེད་ལས། །གཞན་སེམས་དག་པའི་བློའི་མེ་ལོང་དུ། །གཟུགས་སྐུའི་སྣང་བརྙན་དཔག་མེད་འཆར་བ་ཡིན། །དེ་ལས་ལྷུན་གྲུབ་འབད་རྩོལ་མེད་པ་རུ། །དུས་གསུམ་གདུལ་བྱ་འགྲོ་བ་མཐའ་དག་ལ། །གང་ལ་གང་འདུལ་འཕྲིན་ལས་འཇུག་པར་འགྱུར། །དེ་ལྟར་མཆོག་ཏུ་གདམས་པ་ཟབ་མོ་འདི། །དམ་པ་ཁྱེད་ཀྱི་ཐུགས་སུ་བྱོན་གྱུར་ནས། །དཔག་ཡས་སྐལ་ལྡན་གདུལ་བྱའི་ཚོགས་རྣམས་ལ། །དམ་ཆོས་བདུད་རྩིའི་དགའ་སྟོན་འགྱེད་པར་ཤོག། །།ཅེས་པ་འདི་ཡང་མདོ་ཁམས་སྨད་ཀྱི་རྒྱལ་ཁམས་ནས་དཔལ་ཇོ་ནང་པའི་བསྟན་འཛིན་ཆེན་པོ། །རྒྱལ་བའི་བསྟན་པ་རིན་པོ་ཆེའི་རིང་ལུགས་པ། བླ་མ་ཀ་བཞི་པ་ཀུན་དགའ་ལྷུན་གྲུབ་ཞེས་བྱ་བའི་གསུང་གིས་བསྐུལ་ནས། རྒྱལ་ཁམས་པ་ཏཱ་ར་ནཱ་ཐས་སྨྲས་པའོ།། །།