དཔོན་བློ་གྲོས་ནམ་མཁའ་ལ་གདམས་པ།
ཨོཾ་སྭཱ་སྟི། ན་མོ་གུ་རུ། སྐྱབས་གསུམ་ཀུན་འདུས་ཀྱི་བླ་མ་ལ། །ཐུགས་ཡིད་དབྱེར་མེད་ཀྱི་མཆོད་པ་འབུལ། །མཉམ་ཉིད་ཀྱི་ངང་དུ་གསོལ་བ་འདེབས། །མོས་པའི་བུ་ལ་བྱིན་གྱིས་རློབས། །རང་སེམས་ལ་ཤར་བའི་ཚིག་བཅད་འགའ། །གོ་རིམ་དང་མཛེས་ཁྲིགས་མ་མཆིས་ཀྱང༌། །དད་ལྡན་གྱི་སློབ་མས་བསྐུལ་བའི་ངོར། །ཐོལ་བྱུང་དུ་ཤར་བ་འདི་ལྟར་ལགས། །ཆོས་མདོ་རྒྱུད་ཐང་མར་བརྡལ་བ་ནས། །ཚོགས་བསགས་ཐབས་ཇི་སྙེད་ཅིག་གསུང་ལགས་ཀྱང༌། །ཕ་བླ་མ་བསྟེན་ཚུལ་དུ་ཀུན་ཀྱང་འདུས། །ཐབས་མཁས་ཀྱི་རྒྱལ་པོ་མོས་གུས་ཡིན། །ལྟེམ་འགྱང་མེད་པ་ཞིག་གལ་རེ་ཆེ། །གཞན་ཟེར་གྱི་བསྟོད་སྨད་ཕྲ་མ་མཁན། །མཛད་སྤྱོད་འདི་བཟང་ངན་ཅི་ཡིན་སྙམ། །སེམས་འཁུ་འཁྲིགས་ཟ་ན་ལྟེམ་འགྱང་ཡིན། །གདུང་ཤུགས་དང་ཐག་ཆོད་གལ་རེ་ཆེ། །བློ་རྩེ་གཉིས་མེད་ན་ཐག་ཆོད་ཡིན། །སྐྱི་སྡུག་དང་མཐོ་དམན་ལ་མ་རག་ཅིང༌། །རེ་དོགས་བྲལ་བའི་མོས་གུས་འཚལ། །དུས་རྒྱུན་
དུ་གསོལ་བ་འདེབས་པ་གཅེས། །སྒོམ་བྱེད་དམ་འགྲོ་འཆག་ཉལ་འདུག་བྱེད། །དུས་རྟག་ཏུ་བླ་མ་བརྗེད་པ་མེད། །གདུང་ཤུགས་ཀྱི་ཚད་ནི་དེ་ལ་མཛོད། །གནས་ལུགས་ཀྱི་ཉམས་མྱོང་བཟང་མི་བཟང༌། །མོས་གུས་བཟང་ངན་གྱི་རྗེས་སུ་འགྲོ། །མོས་གུས་མཐའ་མེད་དུ་འཕེལ་འདུག་ན། །ཉམས་རྟོགས་མི་སྐྱེ་བའི་རང་དབང་མེད། །ཆོས་བརྒྱད་ཁྲི་བཞི་སྟོང་གསུངས་གྱུར་ཀྱང༌། །དོན་སེམས་ཉིད་གཏན་ལ་འབེབས་པ་ཡིན། །སེམས་གསལ་རིག་མ་འགགས་ངོས་གཟུང་བྲལ། །དེ་སོ་མར་བསྐྱངས་ན་རང་སོ་ཟིན། །དུས་རྟག་ཏུ་དྲན་པའི་ཐག་པས་བཟུང༌། །རང་རང་ཉིད་ཀྱིས་རིག་ན་རང་གྲོལ་ཡིན། །སེམས་བཟུང་བས་མི་ཕན་ལྷུག་པར་ཐོང༌། །འགྲོ་འོང་གི་རྣམ་དབྱེ་དབྱིངས་སུ་སྟོར། །དུས་རེ་འགའ་བསྒྲིམ་ཀྱིན་གཅུན་ལ་ཞོག །སྤྲོས་བྲལ་ཀྱི་དབྱིངས་སུ་ཕྱིན་པ་ཡིན། །ཡང་རེ་འགའ་ཀློད་ལ་བསྐྱུར་ཀྱིན་ཞོག །གཉུག་མའི་རང་སོ་ཟིན་པ་ཡིན། །ལར་གནས་ལུགས་བྱར་མེད་ཀྱི་རྣལ་འབྱོར་ལ། །བསྒྲིམ་དགོས་དང་ཀློད་དགོས་མི་འདུག་མོད། །བསྒྲིམ་ཀློད་ཀྱི་སྣང་བ་ཅི་ཤར་ཡང༌། །གནས་ལུགས་ཀྱི་དབྱིངས་སུ་ཁྱེར་ན་བདེ། །མཐོང་ཐོས་ཀྱི་ཡུལ་ལ་དགག་རྒྱུ་མེད། །སྣང་ཚད་ཀུན་གསལ་སྟོང་ཟུང་འཇུག་ཡིན། །འགྱུ་བྱེད་རྣམ་རྟོག་གི་རི་མོ་འདི། །རང་ངོ་ཤེས་ན་རིག་སྟོང་དུ་གདའ། །མེ་ལོང་ལ་སྣོད་བཅུད་ཀྱི་གཟུགས་བརྙན་
ཤར། །ཤར་ཙམ་ཉིད་ནས་ངོས་གཟུང་དང་བྲལ། །དཔེ་དེ་བཞིན་རིག་པའི་འཆད་སྒོ་ཀུན། །སེམས་སྤྲོས་བྲལ་ཁོ་རའི་རང་གཟུགས་ཡིན། །ཆོས་སྐུ་ཉག་གཅིག་གི་ཀློང་ཡངས་ལ། །བླང་དོར་གྱི་སྤྲོས་པ་དགོས་རེ་ཀན། །སྤང་བླང་གི་སྣང་ཆ་ཅི་ཤར་ཡང༌། །རང་གྲོལ་དུ་འདུག་ན་སྤང་བླང་བྲལ། །ང་འགྲོ་འམ་འདུག་གམ་གང་བྱེད་ཀྱང༌། །གཉིད་ལོག་གམ་སད་སྐབས་ཡིན་ཡང་རུང༌། །སེམས་གནས་སམ་འགྱུ་བ་ཅི་ཤར་ཡང༌། །རང་དུས་ནས་རང་ཚོ་ཐུབ་པ་ཞིག་འཚལ། །སེམས་རང་ཚོ་ཐུབ་ན་ངོས་གཟུང་བྲལ། །གཉིས་མེད་ཀྱི་རིག་པ་འདི་རྩལ་མ་འགགས། །འཁོར་འདས་ཀྱི་སྣང་བ་ལ་མི་འཆར་མེད། །ཤར་གྲོལ་གྱི་རྣལ་འབྱོར་བློ་རེ་བདེ། །ཡེངས་མེད་རྣལ་འབྱོར་བརྗིད་རེ་ཆགས། །ལས་མེད་ཀྱི་རྣལ་འབྱོར་ཞེ་རེ་གཙང༌། །རྒྱུ་ཡན་གྱི་རྣལ་འབྱོར་གུ་རེ་ཡངས། །གང་ཤར་ལ་ལམ་ཁྱེར་རྩལ་རེ་ཆེ། ཁྱེད་ཉམས་ལེན་གྱི་སྙིང་པོ་དེ་ལ་མཛོད། །གནས་ལུགས་ནམ་མཁའ་ལྟར་སྤྲོས་བྲལ་མོད། །སྤྱོད་པ་ལས་འབྲས་ཀྱི་བླང་དོར་ཟབ། །སྟོང་ཉིད་ཀྱི་རང་མདངས་སྙིང་རྗེར་ཤར། །ཆོས་ལྟ་སྤྱོད་འཛོམ་པ་སངས་རྒྱས་ཀྱི་ལམ། །སྤྱོད་པ་ལ་མཚན་མར་མ་ཞེན་ཞིང༌། །སྟོང་རྐྱང་ལ་ཁ་ལྟ་མི་འཐག་པར། །རང་རྒྱུད་ལ་གནད་དུ་འགྲོ་བ་གཅེས། །སྤྱི་འཁོར་བ་སྡུག་བསྔལ་གྱི་
རང་བཞིན་དང༌། །འདུས་བྱས་ལ་རྟག་པའི་གོ་སྐབས་མེད། །སྒོས་འཆི་བ་ནམ་ཡོང་ཆ་མེད་པས། །གཞན་ཅིས་ཀྱང་མི་ཕན་ཆོས་ལ་འབུངས། །ངན་སོང་གི་སྡུག་བསྔལ་མྱོང་དུས་ན། །ཕ་མ་དང་ཉེ་དུས་འཁྱོབས་པ་མེད། །སྔར་བྱས་ཀྱི་སྡིག་པ་བཤགས་པ་དང༌། །ཕྱིན་ཆད་མི་བྱེད་པ་གལ་རེ་ཆེ། །ཟས་ནོར་དང་ལོངས་སྤྱོད་ཁ་དྲག་ཀུན། །ཚེ་བརྗེས་པ་ཕན་ཆད་གར་སོང་མེད། །ལས་དཀར་པོ་དག་ལ་འབད་གྱུར་ན། །ཕྱོགས་གང་དུ་སྐྱེས་ཀྱང་བདེ་བ་ཡིན། །ད་མོས་གུས་ལ་ཐབས་ཀྱི་གཙོ་བོར་མཛོད། །སེམས་ཉིད་ལ་ལྟ་བ་ཉམས་ལེན་མཐིལ། །མི་རྟག་སྐྱོ་ཤས་དྲན་བསྐུལ་གྱི་ལྕག །ལས་འབྲས་ཀྱི་ཞིབ་ཏིག་སྤྱོད་པའི་ཕུལ། །དོན་འདི་བཞི་ཆོས་ཀྱི་སྙིང་པོ་ལགས། །མི་ཁྱེད་ཀྱི་ཐུགས་ལ་འཕྲོད་པར་སྨོན། །དགུང་མཁའ་ལ་ཉི་མ་ཤར་བ་བཞིན། །དོན་གནས་ལུགས་ཀྱི་རྟོགས་པ་འཆར་བར་ཤོག། །།ཅེས་པའང་ཏཱ་ར་ནཱ་ཐས་དཔོན་བློ་གྲོས་ནམ་མཁའ་ལ་གདམས་པའོ། །