ཆོས་འཁོར་སྡིངས་ཀྱི་གནས་སུ་ཚེས་བཅུའི་མཚན་མོའི་ཐུན་དང་པོ་ལ་བྱིན་པའི་དགའ་སྟོན་གྱི་ཚེ་གླུར་བླངས་པ།
༈ ན་མོ་གུ་ར་བེ། རྗེ་མི་གཟུགས་ལ་རྡོ་རྗེ་འཆང་ཆེན་ཏེ། །ཕ་རྩ་བའི་བླ་མ་མ་ལགས་སམ། །གདུལ་བྱ་གང་མོས་འགྲོ་དོན་མཛད། །དེ་བརྒྱུད་པའི་བླ་མ་མ་ལགས་སམ། །དབྱིངས་མཁའ་ཁྱབ་ཀྱི་སྒོ་ནས་འགྲོ་བ་འདུལ། །དེ་རྡོ་རྗེ་འཆང་ཆེན་མ་ལགས་སམ། །སྤྲུལ་པ་སྣ་ཚོགས་ཀྱིས་དོན་མཛད་པ། །ཡི་དམ་གྱི་ལྷ་ཚོགས་མ་ལགས་སམ། །ནུས་མཐུ་ལ་ཐོགས་པ་མེད་པ་སྟེ། །ཆོས་སྐྱོང་བསྲུང་མ་མ་ལགས་སམ། ཁྱེད་ཡེ་ཤེས་གཅིག་གི་ཆོ་འཕྲུལ་ལས། །ཚུལ་ཅིར་ཡང་སྟོན་པ་ངོ་མཚར་ཆེ། །བདག་སྙིང་གི་ཁོང་ནས་གསོལ་བ་འདེབས། །དུས་ད་ལྟ་བྱིན་གྱིས་བརླབ་ཏུ་གསོལ། །དེང་འདིར་དུས་ཀྱི་སྐལ་ལྡན་ཕོ་མོ་ཀུན། །མི་བདག་གི་ཚིག་ལ་སྙན་གསོན་ཞིག །རྙེད་དཀའ་འཇིག་
སླའི་མི་ལུས་ལ། །མདོ་དོན་འབྱུང་བའི་ཐབས་ཤིག་འཚལ། །སྡུག་བསྔལ་འཁོར་བའི་རྒྱ་མཚོ་ལས། །ཅིས་ཀྱང་ཐར་པའི་ཐབས་ཤིག་འཚལ། །ཆོས་ཀུན་གྱི་འཇུག་སྒོ་ལགས་པས་ན། །ཚེ་འདི་བློ་ཡི་བཏང་ཡང་འཚལ། །དམ་ཆོས་ཀྱི་རྩ་བ་ལགས་པས་ན། །འཁོར་བ་ལས་ངེས་འབྱུང་སེམས་བསྐྱེད་དེ། །ཉམས་ལེན་གྱི་སྙིང་པོ་ཡིན་པས་ན། །བྱམས་དང་སྙིང་རྗེ་བྱང་སེམས་སྒོམས། །ཆོས་ཀུན་གྱི་ཡང་རྩེ་ཡིན་པས་ན། །མཐའ་བྲལ་སྟོང་ཉིད་ཀྱི་ངང་ལ་ཞོག །རང་བཞིན་མ་བཅོས་གསལ་བས་ན། །མ་བཅོས་སོ་མའི་ངང་དུ་ཞོག །འཛིན་པ་རང་སར་བཤིག་ནས་ཀྱང༌། །ཆེད་འཛིན་མེད་པའི་དོན་དེ་སྒོམས། །རྣམ་རྟོག་བརྫུན་གྱི་མགོ་བསྐོར་ཡིན། །ལྷུག་པ་བཟོ་མེད་ངང་དུ་སྐྱོངས། །ཕྱི་སྣང་བ་གང་ཤར་གྱི་ངོ་བོ་ལ། །གསལ་ལ་ཞེན་པ་མེད་པར་ཞོག །ནང་རིག་པ་སེམས་ཀྱི་ངོ་བོ་ལ། །རིག་སྟོང་དབྱེར་མེད་ཁྲིམ་མེར་སྒྲིམས། །སེམས་མཉམ་བཞག་ངང་དུ་གནས་པའི་ཚེ། །ལྷུན་གྲུབ་བཟོ་བཅོས་མེད་པར་ཞོག །རྗེས་སྣང་བ་འགགས་མེད་ཤར་བའི་ཚེ། །གང་ཤར་རང་ཞལ་ལྟ་བར་འཚལ། །སྣང་བ་རང་བཞིན་དག་པ་ལ། །དག་པའི་སྣང་བ་རྒྱ་ཆེར་སྤེལ། །རང་ལུས་ཡི་དམ་ལྷ་སྐུ་ལ། །སྣང་སྟོང་སྒྱུ་མའི་རྩིས་སུ་ཟིན། །སེམས་རང་བཞིན་བདེ་བའི་རང་སྣང་ལ། །བོགས་འདོན་
རྩས་ནི་ཕྱོགས་བཅུར་སྤེལ། །ལུས་རྩ་རླུང་ཐིག་ལེའི་རང་བཞིན་ལ། །བླ་མའི་གསུང་བཞིན་གནད་དུ་བསྣུན། །ཉམས་སྣ་ཚོགས་འཆར་སྒོ་ཇི་སྙེད་ལ། །ཞེན་ཆགས་མེད་པའི་སྐྱོང་ལུགས་འཚལ། །དོན་དེ་ལྟར་ཐུགས་ལ་ཞོག་མཛོད་ལ། །ཅིས་ཀྱང་གནད་དུ་བསྣུན་པར་མཛོད། །བདག་ངེས་མེད་ཀྱི་རྣལ་འབྱོར་རྒྱལ་ཁམས་པ། །དབྱངས་འདི་ཉིད་བླ་མ་ལ་མཆོད་པར་འབུལ། །ཚིག་འདི་ལ་ལེགས་ཆ་མི་འདུག་ཀྱང༌། །དོན་འདི་ལ་ངེས་པའི་གཏད་སོ་གདོག། །།ཅེས་པའང་རྒྱལ་ཁམས་པ་ཏཱ་ར་ནཱ་ཐས་ཆོས་འཁོར་སྡིངས་ཀྱི་གནས་སུ་ཚེས་བཅུའི་མཚན་མོའི་ཐུན་དང་པོ་ལ་བྱིན་པའི་དགའ་སྟོན་གྱི་ཚེ་གླུར་བླངས་པའོ། །བཀྲ་ཤིས། །