གདམས་པའི་ཚུལ་དུ་བླངས་པའི་གླུ།
ཨོཾ་སྭཱ་སྟི། ན་མོ་གུ་ར་ཝེ། དབྱིངས་སྤྲོས་དང་བྲལ་བའི་ངང་ཞིག་ནས། །འཕྲལ་གང་ལ་གང་འདུལ་འགྲོ་དོན་མཛད། །ཆོས་ཚིག་སྤྱི་དང་དོན་སྤྱིར་མ་ལས་པར། །དོན་སྙིང་པོར་སྟོན་པའི་བླ་མ་རྗེ། །ས་འདི་ནས་རྒྱལ་ཁམས་ཀྱི་རྣལ་འབྱོར་པ། །ཡིད་མོས་གུས་དྲག་པོས་གསོལ་བ་འདེབས། །བུ་སློབ་མའི་སེམས་ལ་བྱིན་གྱིས་རློབས། །ལར་རྩ་བྲལ་རྟོགས་པར་ཐུགས་རྗེས་གཟུང༌། །ཕ་བྱིན་རླབས་ཅན་དེའི་བཀའ་དྲིན་ལ། །མི་ངས་ཀྱང་སེམས་ཀྱི་གནས་ལུགས་མཐོང༌། །རྗེ་མཁྱེན་པ་ཅན་དེའི་བཀའ་དྲིན་ལས། །དོན་ངེས་པའི་གནས་ལ་ཐག་
ཆོད་བྱུང༌། །ཡོངས་ཐུགས་རྗེ་ཅན་དེའི་བཀའ་དྲིན་ལ། །ཕྱི་དགྲ་གཉེན་གྱི་རྣམ་རྟོག་ཞི་བ་ཙམ། མགོན་འཁྲུལ་ཞིག་ཅན་དེའི་བཀའ་དྲིན་ལ། །ནང་འཛིན་པ་ཡལ་ཡུལ་ངང་དུ་བུད། །ང་རྗེ་ལ་མོས་གུས་མི་ཆེ་རུ། །བཀའ་དྲིན་ལ་ཚད་གཟུང་མི་གདའ་འོ། ཁྱེད་འདིར་འདུས་ཀྱི་ཐུགས་ལ་འདི་ལྟར་ཞོག །ལར་ད་རེས་མི་ལུས་ཐོབ་པ་ལ། །མདོ་དོན་ཡོད་པ་ཞིག་གལ་རེ་ཆེ། །དམ་ཆོས་མི་བྱེད་པའི་མི་ལུས་འདི། །དུད་འགྲོ་ལས་ཟང་མ་ཞིག་མ་ལགས་སམ། །མི་རྟག་འཁོར་བའི་གནས་ཚུལ་ལ། །ཐུགས་ངེས་པར་འབྱུང་བ་ཞིག་ཅིས་ཀྱང་འཚལ། །ཐར་པའི་ལམ་སྣ་ཟིན་པ་ཞིག་གལ་རེ་ཆེ། །སྔོན་འཁོར་བ་ཐོག་མ་མེད་པ་ནས། །དུས་ཉི་མ་དེ་རིང་ལ་ཐུག་གི་བར། །ལུས་བྱ་བྱེད་འགྲོ་འདུག་ཉལ་དང་ལངས། །ངག་སྨྲ་བརྗོད་ངལ་དུབ་རྩོལ་བའི་ལམ། །ཡིད་མནོ་བསམ་འགྱུ་བའི་འཕྲང་ལ་བརྡར། །ཆོས་བྱེད་ཚུག་བྱས་ཀྱང་ལས་སུ་སོང༌། །ལར་སྡིག་པ་སྡུག་བསྔལ་གྱི་རྒྱུ་ལགས་ཤིང༌། །ལས་ལུང་མ་བསྟན་མི་ཚེ་སྟོང་ཟད་ཡིན། །ཐར་ལམ་དུ་མ་སོང་བའི་དགེ་བ་དེ། །འཁོར་བ་བསྐྱེད་པའི་ཐབས་སུ་གདའ། །ཕྱག་ཆེན་གྱིས་མ་ཟིན་པའི་སྤྲོས་བཅས་དེ། །ཡིད་རྣམ་རྟོག་འཁྲུག་པའི་རྒྱུ་ཞིག་གདའ། །སྒོམས་སེམས་དང་མ་འདྲེས་པའི་གོ་ཡུལ་དེ། །དོན་མདོ་དོན་ཐུག་དུས་བསླུ་བ་ཞིག་གདའ། །སྙིང་རྗེས་མ་ཟིན་པའི་སྟོང་རྐྱང་དེ། །ལེགས་ཀྱང་ཐེག་དམན་གྱི་རྒྱུ་ཞིག་ལགས། །ལས་འབྲས་ཁྱད་གསོད་ཀྱི་འུག་གོག་དེ། །དམྱལ་བར་འགྲོ་བའི་རྒྱུ་ཞིག་གདའ། །རང་ངོ་
མ་ཤེས་པའི་ལྟ་བ་དེ། །བློས་བྱས་སྤྲོས་པའི་རི་མོར་གདའ། །རང་སོ་ཚུགས་པའི་ཉོན་མོངས་དེ། །རྩུབ་རྩུབ་འདྲ་ཡང་འཇམ་པོར་གདའ། །རྩ་བྲལ་ལ་སོང་བའི་འཆར་སྒོ་དེ། །སྣང་སྣང་འདྲ་ཡང་ཡལ་ཡུལ་དུ་གདའ། །རྩོལ་མེད་ངོ་ཤེས་ཀྱི་རྣམ་རྟོག་དེ། །འགྱུ་འགྱུ་འདྲ་ཡང་རང་ཞིག་ཏུ་གདའ། །ལྷག་བསམ་གྱིས་མ་ཟིན་པའི་དགེ་རྩ་དེ། །བྲེལ་བ་ཆེ་ལ་འབྲས་བུ་ཆུང༌། །སློང་ཡངས་སུ་མ་ཐེངས་པའི་ཁ་ཏོན་དེ། །སེམས་ཚབ་ཆེ་ལ་གྲུབ་དོན་ཆུང༌། །བྱང་སེམས་ཀྱིས་མ་ཟིན་པའི་སྒོམ་བཟླས་དེ། །བོན་ཆོག་དང་ཁྱད་པར་མི་གདའ་འོ། །ད་ལུས་གནད་སྲང་དུ་གཞུག་ཏུ་འཚལ། །ངག་སྨྲ་བརྗོད་སྤངས་ལ་ལྷུག་པར་ཞོག །སེམས་བཟོ་མེད་ཧྲིག་གེ་སྐྱོང་བར་ཞུ། །ཕ་བླ་མ་ཆོས་སྐུར་མཁྱེན་པ་ཞིག་འཚལ། །དམ་ཚིག་ལ་ཟོལ་ཟོག་མེད་པ་ཞིག་འཚལ། །དད་གུས་ལ་ཁ་ཞེ་མེད་པ་ཞིག་འཚལ། །ཉོན་མོངས་གང་སྐྱེས་ཀྱི་ངོ་བོ་ལ། །མ་བཅོས་སོ་མར་འཇོག་པ་ཞིག་ཞུ། །སེམས་རང་བཞིན་སོ་མ་བསྐྱངས་ཙ་ན། །གང་ཤར་བརྗོད་བྲལ་དུ་ལམ་མེར་གདའ། །དེ་གདོད་མ་ནས་ཡོད་ཡོད་པོ་ཞིག་ལགས། །ཡོད་པར་མ་ཤེས་པ་ཡ་རེ་ཆ། །འདི་མ་བཅོས་ལྷུག་པའི་གདམས་ངག་ཟེར། །འཕྲལ་ལུས་ངག་སྤྱོད་པ་ཅི་བྱེད་ཀྱང༌། །རང་སོ་ཚུགས་པའི་ངོ་བོ་ལ། །དམིགས་
གཏད་ཀུན་ཞིག་པའི་ངང་ཞིག་ནས། །བླང་དོར་ལ་མཚན་མར་མ་འཛིན་པར། །ཐོ་ཆོ་ལ་བཟང་པོར་མ་ངོམ་ཞིག །ཚུལ་འཆོས་ཀྱི་མཛེས་ཁྲིགས་ཀྱང་མི་འཚལ་ལོ། །གང་ཤར་གྱི་སྤྱོད་པ་ལྷུག་པ་ལ། །བཅོས་མ་རུ་མ་སོང་པ་གནད་དུ་ཆེ། །འདི་བླང་དོར་མཉམ་ཉིད་ཀྱི་གདམས་ངག་ལགས། །སྒོམ་ཉམས་ཀྱི་རྩི་ལ་ཞེན་པ་ཏེ། དཔེ་དར་གྱི་སྲིན་བུ་ཇི་བཞིན་དུ། །རང་རང་གིས་འཆིང་བའི་མགོ་བསྐོར་ལགས། །དུས་དོ་ནུབ་ཚོགས་ཀྱི་འཁོར་ལོའི་དུས། །གནས་རྒྱལ་པོའི་ཕོ་བྲང་ཆེན་པོ་ན། །མིང་ཏཱ་ར་ནཱ་ཐ་སྐད་པ་ཡིས། །གླུ་འདི་ནི་གདམས་པའི་ཚུལ་དུ་བླངས། །དེ་མཆོད་པར་འབུལ་ལོ་བླ་མ་རྗེ།། །།ཞེས་སློབ་བུ་འགའ་ཞིག་ལ་ངོ་སྤྲོད་ཀྱི་ཚུལ་དུ་གླུར་བླངས་པ། ཉིན་ཞག་འགའ་རེ་འབྲི་བ་མ་བྱུང་བས། མ་བརྗེད་པར་དྲན་ཚོད་ཅིག་དེང་འདུས་རྣམས་ཀྱིས་འབྲི་བར་བསྐུལ་ནས་བྲིས་པ་སྟེ། གོང་དཀར་དུའོ། །དགེའོ། །