ངེས་འབྱུང་གི་མགུར།
༈ བླ་མ་ལ་ཕྱག་འཚལ་ལོ། །འཁོར་བ་སྡུག་བསྔལ་གྱི་རང་བཞིན་ལས། །མ་གྱུར་འགྲོ་བ་ཀུན་སྒྲོལ་བའི་བློ། །སྐད་ཅིག་ཙམ་དུ་མ་རེ་སྐྱེས་ཙ་ན། །ལེ་ལོའི་འཁྲི་བ་ཚོ་རྩད་ནས་ཆོད། །ལར་བྱང་ཆུབ་སེམས་འདི་མ་འབྱོངས་ན། །དེ་མཁས་པར་རློམས་ཡང་མདོ་མེད་པོ། །བཟང་པོར་རྫུ་ཡང་གཞན་མགོ་བསྐོར། །བཙུན་
བཙུན་འདྲ་ཡང་མཛེས་ཆོས་སུ་གདའ། །ཆོས་པ་རྣམ་དག་ཡིན་ཐག་ཆད། ཁོང་སྡེ་བྱུས་ཀྱི་ཁ་ལོ་སྒྱུར་པ་ཡི། །བཤེས་གཉེན་ཀུན་ལ་ཞེ་ནས་ཁྲེལ། །ཆོས་དང་རྒྱབ་འགལ་གྱི་མཛད་སྤྱོད་ལ། །དགེ་བཤེས་སུ་རེ་བ་ཧ་ཅང་འཁྲུལ། །དཔུང་བུ་རྟའི་རལ་རོལ་མང་པོ་དང༌། །ནོར་ལོངས་སྤྱོད་ཟང་ཟིང་ལྷུར་ལེན་པ། །ཆོས་ཀ་རི་ཀ་ཙམ་ཡང་མི་ཤེས་པར། །འཁོར་མང་པོ་འདྲེན་པ་ཡ་རེ་ཆ། །འཇིག་རྟེན་པའི་དཔོན་གཡོག་གྱུ་རུ་སྟེ། །ལས་མཐུན་ཙམ་འདུས་པ་མ་གཏོགས་པ། །དམ་ཆོས་ཀྱི་དྲི་ཙམ་མི་གདའ་ན། །སྨིན་གྲོལ་གྱི་གཞན་དོན་རེ་ཐག་སངས། །མ་བྱུང་དུས་འཁོར་ཚོགས་གཡང་ལྟར་འགུགས། །བྱུང་དུས་གྲགས་འདོད་ཀྱིས་ཕྱོགས་བཅུར་འགྱེད། །བྱ་བ་ཐོངས་ཐོངས་འདྲ་ཡང་མི་ཐོངས་པའི། ཁ་ཞུ་ག ཏིང་འཁྱགས་ཀྱི་རྣལ་འབྱོར་པ། །སྟོང་ཉིད་སྒོམ་པས་ཆོག་དུས་སུ། །སྤྲོས་བཅས་ཀྱི་སྐྱབས་ཤིག་ཚོལ་ལ་རེམ། །སྤྲོས་བཅས་མ་དག་ཅིང་མ་ཚང་པའི། །སྐྱོན་སུབས་ལ་སྟོང་སྐད་གྱི་འུད་གོག་འཐག །གཉིས་མེད་སེང་གེ་ཁྱོད་འཛིན་སྟངས་རེ་བཟང༌། །འཆར་ཀ་དང་གཏམ་ངན་བྱུང་གི་དོགས། །རང་གནོད་རི་ཙམ་ཁོང་དུ་ཆུག །རོ་སྙོམས་ཀྱི་རྣལ་འབྱོར་གནམ་མཐའ་ཡར། །སྐབས་འགར་རང་
སྐྱོན་ཡང་གཤོང་བ་སྐད། །རང་མ་མགུ་བ་ཀུན་ལ་ཐབས་ཀྱིས་སྨོད། །རང་བཟང་པོར་ངོམ་པའི་རྣལ་འབྱོར་པ། ཁྱོད་སྨྲ་བ་མང་ཡང་གཏིང་ནས་ཁྲེལ། །ཡེངས་ཚེ་འདིའི་སྐྱིད་སྡུག་དང་གཏམ། །རླུང་ལ་བསྐུར་ནས་མ་གྱུར་ཚོ། །སྒྲོལ་འདོད་ཀྱི་སྙིང་རྗེ་ཟོལ་མེད་ཅིག །བྱུང་ན་ཆོས་སུ་འགྲོ་ལགས་པས། །ཅིས་ཀྱང་འབད་པའི་དུས་ལ་བབ།། །།ཅེས་པའང་རང་གཞན་ད་ལྟའི་ཆོས་པར་རྫུ་བ་མང་པོའི་གནས་ཚུལ་ལ་ཡིད་ངེས་པར་འབྱུང་ནས། ཏཱ་ར་ནཱ་ཐས་རང་ལོ་ཉེར་གསུམ་པ་ལའོ། །དགེའོ། །