དུས་ཀྱི་འཁོར་ལོའི་བརྒྱུད་འདེབས།
དུས་ཀྱི་འཁོར་ལོའི་བརྒྱུད་འདེབས་ཞེས་བྱ་བ་བཞུགས།
ཨོཾ་ཨཱཿཧཱུཾ་ཧོཿཧཾ་ཀྵཿ མཆོག་གི་དང་པོའི་མགོན་པོ་རྟག་པའི་དཔལ། །སེམས་ཉིད་རིན་ཆེན་རྡོ་རྗེ་རྣམ་བཞི་ཡི། །ལམ་གྱིས་རབ་སྦྱངས་སྐུ་བཞི་མངོན་གྱུར་པ། །ཆོས་ཀུན་མཉམ་ཉིད་ངོ་བོར་གསོལ་བ་འདེབས། །སྐུ་བཞི་དབྱེར་མེད་ཡན་ལག་བདུན་ལྡན་སྐུ། །ས་བཅུའི་དབང་ཕྱུག་མི་བདག་སྤྲུལ་པའི་སྐུ། །ཆོས་རྒྱལ་རིགས་ལྡན་འཁོར་དང་བཅས་རྣམས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འཇིག་རྟེན་མགོན་པོས་རྗེས་བཟུང་དུས་ཞབས་པ། །དེ་ཡི་ཞབས་བརྟེན་དུས་ཞབས་
གཉིས་པ་དང༌། །རྒྱལ་སྲས་ཆེན་པོ་ནཱ་ལེནྡྲ་པ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རིག་པའི་གནས་ལྔ་ཕུལ་བྱིན་ཟླ་མགོན་ཞབས། །འཇིག་རྟེན་མིག་འབྱེད་འབྲོ་སྟོན་ཤེས་རབ་གྲགས། །རྡོ་རྗེ་ཐེག་པའི་སྲོག་ཤིང་དཀོན་མཆོག་སྲུངས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །མཁས་གྲུབ་སྔགས་འཆང་སྒྲོ་སྟོན་གནམ་ལ་བརྩེགས། །གྲུབ་པའི་ཁྱུ་མཆོག་མི་བསྐྱོད་རྡོ་རྗེའི་ཞབས། །ཆོས་ཀྱི་དབང་ཕྱུག་མ་ལུས་ཆོས་ཀྱི་བདག །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ངོ་མཚར་བགྲངས་བཅས་མ་ཅིག་སྤྲུལ་སྐུ་དང༌། །ནམ་མཁའ་འོད་ཟེར་མཚན་འཆང་མཁས་པའི་ཕུལ། །སྔོན་གནས་རྗེས་དྲན་གྲུབ་ཐོབ་སེ་མོ་ཆེ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འཇམ་དབྱངས་སྤྲུལ་པའི་ཤེས་རབ་འོད་ཟེར་དང༌། །རབ་གསལ་རྒྱལ་པོའི་རྣམ་འཕྲུལ་དགེ་སྟེང་པ། །སྲོག་འཛིན་རྒྱ་མཚོའི་མཐར་སོན་ཀུན་སྤངས་རྗེ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སྔོན་མཁྱེན་ཐོགས་མེད་རྒྱལ་བ་ཡེ་ཤེས་དང༌། །མཁས་བཙུན་གྲུབ་བརྙེས་ཡོན་
ཏན་རྒྱ་མཚོ་དང༌། །རིགས་ལྡན་སྤྲུལ་སྐུ་ཀུན་མཁྱེན་ཇོ་ནང་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ལེགས་བཤད་རིན་ཆེན་འབྱུང་གནས་ཉ་དབོན་དང༌། །གྲུབ་ཆེན་འགྲན་ཟླ་མེད་པའི་ཀུན་བློ་བ། །ངེས་དོན་བསྟན་པའི་སྲོག་ཤིང་དཀོན་མཆོག་བཟང༌། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །མདོ་སྔགས་ཀུན་ཆུབ་ནམ་མཁའ་ཆོས་སྐྱོང་དང༌། །མཁས་དབང་པཎ་ཆེན་ནམ་མཁའ་དཔལ་བཟང་པོ། །ལོ་ཆེན་མཚན་འཆང་རཏྣ་བྷ་དྲ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཐོགས་མེད་བརྟུལ་ཞུགས་གྲུབ་པ་ཀུན་དགའི་མཚན། །གཉུག་མ་མངོན་གྱུར་ལུང་རིགས་རྒྱ་མཚོ་དང༌། །སྐྱབས་གནས་ཀུན་འདུས་ཀུན་དགའ་སྙིང་པོའི་ཞབས། །གསོལ་འདེབས་སོ་བདག་རྒྱུད་བྱིན་གྱིས་རློབས། །གསོལ་བ་འདེབས་སོ་ཀུན་མཁྱེན་ཇོ་ནང་བ། །གསོལ་བ་འདེབས་སོ་འགྲོ་དྲུག་བྱིན་གྱིས་རློབས། །སྔོན་འགྲོ་དབེན་པ་གསུམ་གྱིས་རྒྱུད་སྦྱངས་ཤིང༌། །དངོས་གཞི་ཡན་ལག་དྲུག་གི་སྦྱོར་བ་ཡིས། །མཐར་ཐུག་སྐུ་བཞི་རྡོ་རྗེ་རྣམ་པ་བཞི། །མྱུར་དུ་མངོན་དུ་འགྱུར་བར་བྱིན་གྱིས་རློབས། །ཞེས་སྦྱོར་དྲུག་
ཇོ་ནང་ལུགས་ཀྱི་བརྒྱུད་འདེབས་ཏཱ་ར་ནཱ་ཐས་སྨྲས་པའོ། །སྔོན་སྦྱངས་མཁྱེན་པའི་རིན་ཆེན་རྒྱ་མཚོ་དང༌། །ཐར་པའི་ལམ་སྟོན་བློ་གྲོས་རྣམ་པར་རྒྱལ། །གྲུབ་པའི་མཆོག་གྱུར་ངག་དབང་འཕྲིན་ལས་ཞབས། །གསོལ་བ་འདེབས་སོ་བདག་རྒྱུད་བྱིན་རློབས། །མཐའ་འཁོབ་མུན་སེལ་ངག་དབང་རྣམ་རྒྱལ་དང༌། །དམ་ཆོས་དགའ་སྟོན་སྤེལ་མཛད་དར་རྒྱས་མཚན། །རྒྱལ་བ་ཀུན་དངོས་འཕྲིན་ལས་རྣམ་རྒྱལ་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གདམས་པའི་མཛོད་འཛིན་རང་བཞིན་ལྷུན་གྱིས་གྲུབ།། ཟབ་ལམ་མཐར་ཕྱིན་འཇིགས་མེད་རྣམ་རྒྱལ་དང༌། །དུས་འཁོར་བརྒྱུད་འདེབས་ཀྱི་ཁ་སྐོང་འདིའང་སྤྲུལ་སྐུ་འཇིགས་མེད་རྣམ་རྒྱལ་གྱིས་རི་ཁྲོད་དུ་ཐུན་མཚམས་སུ་བྲིས་པའོ། །རིགས་ཀུན་ཁྱབ་བདག་ཆོས་འཕེལ་རྒྱ་མཚོའི་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རིམ་གཉིས་མཐར་
སོན་ཆོས་ཀྱི་འཕགས་པའི་ཞབས། །གཟུང་འཛིན་འཁྲུལ་ཟད་ཀུན་དགའ་དཔལ་ལྡན་རྗེ། །དབང་ལུང་གདམས་ངག་མཛོད་འཛིན་ཆོས་འབྱོར་ལ། །གསོལ་བ་འདེབས་སོ་བདག་བདག་རྒྱུད་བྱིན་གྱིས་རློབས། །གནས་ལུགས་གཤེགས་སྙིང་མངོན་གྱུར་མཁས་གྲུབ་དབང༌། །ཡི་དམ་ཞལ་གཟིགས་བསྟན་པ་གསལ་བྱེད་ཞབས། །རྒྱུད་སྡེ་རབ་འབྱམས་སྤྲོ་བསྡུ་རྡོ་རྗེ་བཟང༌། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སྤྱོད་འཆང་རྣམ་འཕྲུལ་དཀོན་མཆོག་དར་རྒྱས་རྗེ། །གཞན་སྟོང་འཛམ་གླིང་ཁྱབ་མཛད་བློ་གྲོས་གྲགས། །དྲིན་ཅན་མངོན་གྱུར་རྩ་བའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དུས་འཁོར་བརྒྱུད་འདེབས་ཁ་སྐོང་འཛམ་ཐང་གཙང་ཆེན་གཟིམ་ཁང་བདེ་ཆེན་བཤད་སྒྲུབ་དཔལ་གྱི་ཕོ་བྲང་གི་གདན་རབས་རིམ་བྱོན་ལྟར་བློ་བཟང་ཆོས་འཕེལ་བས་བྲིས་པའོ། །