དཔལ་དུས་ཀྱི་འཁོར་ལོ་སྡོམ་པ་ཆེན་པོའི་དཀྱིལ་འཁོར་ལ་བསྟོད་པ།
དཔལ་དུས་ཀྱི་འཁོར་ལོ་སྡོམ་པ་ཆེན་པོའི་དཀྱིལ་འཁོར་ལ་བསྟོད་པ་བཞུགས།
ཨོཾ་ན་མཿཤྲཱི་ཀཱ་ལ་ཙཀྲཱ་ཡ། སྟོང་པ་ཉིད་དང་སྙིང་རྗེའི་བདག །སྲིད་གསུམ་སྐྱེ་འཇིགས་མེད་པའི་དངོས། །ཤེས་དང་ཤེས་བྱ་གཅིག་པའི་སྐུ། །དཔལ་ལྡན་དུས་འཁོར་ལ་ཕྱག་འཚལ། །ཕྲ་རབ་རྡུལ་གྱི་ཆོས་ཉིད་འདས། །པྲ་ཕབ་པ་ཡི་རང་བཞིན་ཅན། །རྣམ་པ་ཀུན་གྱི་མཆོག་ལྡན་མ། །ཕྱག་རྒྱ་ཆེན་མོ་དེ་ལ་འདུད། རླུང་མེ་ཆུ་དང་ས་ཡི་དཀྱིལ་འཁོར་ལྷུན་པོ་པདྨ་དང༌། །ཟླ་ཉི་དུས་མེའི་སྟེང་དུ་དབང་ཕྱུག་དང་ནི་བདུད་ཀྱི་མགོར། །ཞབས་ནི་སྲིད་པའི་ཡུམ་གྱི་ཞབས་དང་ལྷན་ཅིག་བཀོད་གྱུར་པ། །ལྷ་ཡི་དབང་པོས་བཏུད་པའི་གཙོ་ལ་སྤྱི་བོའི་ཕྱག་འཚལ་ལོ། །ཟླ་བའི་སྐུ་དང་ཟུང་གི་ཞབས་ཏེ་མེ་ཡི་མགྲིན་པ་ཆུ་གཏེར་དཔལ་ལྡན་ཞལ་ནི་སྣ་ཚོགས་མདོག །ཕྲག་པ་དྲུག་དང་ཉི་མའི་དཔུང་པ་གཉིས་ལྷག་རྒྱལ་བའི་ཕྱག་དང་སྟོང་པ་དགུ་དང་མེ་ཡི་ཚིགས། །ཞབས་དག་གིས་ནི་ཟླ་བ་ཉི་མ་སྲེག་ཟའི་དཀྱིལ་འཁོར་དག་ལ་བདུད་དང་དྲག་པོ་སྐྲག་བཞིན་པ། །རོལ་པའི་མནན་པའི་སྲིད་མེད་སྲིད་པ་མཉམ་པ་དུས་ཀྱི་འཁོར་ལོ་གཅིག་པུ་དེ་ལ་ཕྱག་འཚལ་ལོ། །སྐུ་མདོག་མཁའ་འདྲ་ཞབས་གཡས་དམར་པོས་འདོད་ལྷ་དམར་པོ་གདོང་
གཅིག་པ། །ལག་པ་བཞི་ཡིས་མདའ་ལྔ་གཞུ་དང་ལྕགས་ཀྱུ་ཞགས་པ་འཛིན་པ་མནན། །གཡོན་པ་དཀར་པོས་དྲག་པོ་དཀར་པོ་གདོང་གཅིག་མིག་གསུམ་རིག་བྱེད་ལག །རྩེ་གསུམ་ཐོད་པ་ཌ་མ་རུ་དང་ཁ་ཊྭཱཾ་འཛིན་པ་བརྫིས་ལ་འདུད། །གཡས་བརྐྱང་སྟབས་གཞུགས་བདུད་དང་ཉོན་མོངས་ཆུང་མ་གཉིས་ཀྱང་མ་བཟོད་པར། །དམན་པའི་གདོང་གིས་འཛིན་པར་བྱེད་ཀྱང་གཡོ་མེད་གནས་པ་རྡོ་རྗེའི་སྐུ། །གཙུག་གི་ནོར་བུ་སྣ་ཚོགས་རྡོ་རྗེ་ཟླ་བ་ཕྱེད་པས་དབུ་ལ་བརྒྱན། །ཐོད་སྐམ་འཕྲེང་དང་ཐལ་བ་ཕྱག་རྒྱ་ཀླུ་རྒྱལ་བཅུ་ཡིས་བརྒྱན་ལ་འདུད། །དབུས་དང་གཡས་གཡོན་མགྲིན་པའི་མདོག་ནི་མུ་མེན་བྱུ་རུ་ཀུནྡ་མཚུངས། །མདུན་ཞལ་དབང་སྔོན་འབར་བའི་འོད་དང་གཡས་ནི་ཉི་མ་འཆར་ཀ་མཚུངས། །གཡོན་ཞལ་ཟླ་འོད་རྒྱབ་ནི་གསེར་མཚུངས་སྤྱན་གསུམ་མཆེ་བ་གཙིགས་ལ་འདུད། །གཡས་གཡོན་ཕྲག་པ་དང་པོ་མཐོན་མཐིང་གཉིས་པ་གསུམ་པ་དམར་དང་དཀར། །ཕྲག་པ་རེ་ལ་དཔུང་པ་གཉིས་གཉིས་དེ་དག་སོ་སོར་ཕྱག་གཉིས་ལྡན། །དཔུང་པ་ཕྱག་དང་བཅས་པ་རྣམས་ཀྱང་གང་ལས་བྱུང་བ་ཕྲག་པའི་མདོག །ཕྱག་རྣམས་རེ་རེ་སོ་མོ་ལྔ་ལྔ་སོར་གདུབ་ལྡན་ལ་ཕྱག་འཚལ་ལོ། །མཐེ་བོའི་མདོག་ནི་མཆོག་གི་གསེར་མཚུངས་མཛུབ་མོ་དུང་དང་ཀུནྡའི་མདོག །གུང་མོ་པདྨ་རཱ་ག་ལྟར་དམར་མིང་མེད་གནག་ཅིང་མཐེ་ཆུང་ལྗང༌། །སོར་མོ་རེ་རེའང་ཚིགས་གསུམ་དང་ལྡན་རྩ་བའི་ཕྱོགས་ནས་གོ་རིམ་བཞིན། །དུས་མཐུའི་སྤྲིན་དང་ཉིན་མོར་བྱེད་འདྲ་ཟླ་བའི་མདོག་དང་ལྡན་ལ་འདུད། །རྡོ་རྗེ་རལ་གྲི་རྩེ་གསུམ་གྲི་གུག་མདའ་དང་ལྕགས་ཀྱུ་ཌ་མ་རུ། །ཐོ་བ་འཁོར་ལོ་མདུང་དབྱུག་དགྲ་སྟས་གཡས་ཀྱི་ཕྱག་བརྒྱན་གཡོན་
པ་ཡང༌། དྲིལ་བུ་ཕུབ་དང་ཁ་ཊྭཱཾཾ་ཐོད་པ་གཞུ་དང་ཞགས་པ་རིན་པོ་ཆེ། །པད་དཀར་དུང་དང་མེ་ལོང་ལྕགས་སྒྲོག་ཚངས་མགོས་བརྒྱན་ལ་ཕྱག་འཚལ་ལོ། །ལྷག་མའི་ཕྱག་གཉིས་སྡིགས་མཛུབ་ཚུལ་གྱིས་གཏི་མུག་གླང་ཆེན་པགས་རློན་བརྒྱངས། །གཡས་ནག་གཡོན་སེར་འཆི་བདག་མགོ་དང་ལྷ་མིན་ཁྲག་གང་ཐོད་པ་འཛིན། །སྟག་ལྤགས་དང་ནི་རྡོ་རྗེ་རྒྱན་ལྡན་བདུད་རིགས་བརྒྱ་ཡི་མགོ་འཕྲེང་འཆང༌། །སྨ་ར་སྨིན་མ་དབུ་སྐྲ་སེར་ཞིང་རལ་པའི་ཅོད་པན་ལྡན་ལ་འདུད། །འོད་གསལ་སྟོང་ཉིད་སྣ་ཚོགས་ཡུམ་ཉིད་རྡོ་རྗེ་མཁའ་འགྲོ་མ་དཔལ་སྐུ། །ཞལ་གཅིག་ཕྱག་གཉིས་གསེར་གྱི་རི་མཚུངས་བསྐལ་པའི་མེ་ལྟར་གཟི་བརྗིད་འབར། །གྲི་གུག་དང་བཅས་ཕྱག་གཡས་སྡིགས་མཛུབ་གཡོན་པ་ཐོད་ཁྲག་འཛིན་ཞིང་འཁྱུད། །སྐྲ་གྲོལ་སྐམ་རློན་མགོ་བོའི་འཕྲེང་ལྡན་ཕྱག་རྒྱ་ལྔ་ཡིས་བརྒྱན་ལ་འདུད། །སྐུ་མདོག་མཐིང་ག་མི་འགྱུར་བདེ་བ་ཆེ། །དུས་སྦྱོར་བཞི་ཚན་གསུམ་དང་གཉིས་ཚན་དྲུག །བཅུ་གཉིས་ཟླ་བ་དག་པའི་མགྲིན་པ་དཔུང༌། །ཞལ་བཞི་འགྱུར་མེད་ཐིག་ལེ་བཞི་ལ་འདུད། །ཉེར་དྲུག་ཕྱག་ནི་བཤོལ་བཅས་ཟླ་བའི་ཕྱོགས། །དེ་ཉིད་བྱེད་པོར་བཅས་པའི་ཕྱག་མཚན་ཏེ། །ཕ་རོལ་ཕྱིན་བཅུ་དག་པའི་ཕྱག་རྒྱ་བཅུ། །ཉོན་མོངས་བདུད་སྤངས་ཕྱོགས་གཉིས་ཞབས་ལ་འདུད། །ཉི་མའི་ཁྱིམ་གཅིག་སྐུ་དང་ཟླ་ཁྱིམ་གཅིག །ཞལ་རས་སྟོང་ཉིད་རྣམ་ཐར་སྤྱན་གསུམ་ལྡན། །མཚན་བྲལ་སྨོན་མེད་ཕྱག་དང་འདུ་མི་བྱེད། །རྣམ་པར་ཐར་པའི་ཕྱག་མཚན་འཛིན་ལ་འདུད། །བཅུ་དྲུག་དགའ་བ་སྒྲིབ་བྲལ་ཆུ་སྐྱེས་འདབ། །ཕྱོགས་མཚམས་བརྒྱད་ཀྱི་འདབ་མར་ནུས་མ་བརྒྱད། །ཐབས་དང་ཤེས་རབ་
ཅང་ཏེའུ་ཁ་ཊྭཱཾ་འཛིན། །བཅོམ་ལྡན་འདས་མ་དང་མཚུངས་གཡས་བརྐྱང་སྟབས། །ཕ་རོལ་ཕྱིན་བཅུའི་རང་བཞིན་རྣམས་ལ་འདུད། །བར་གྱི་འདབ་མ་བརྒྱད་ལ་ཐབས་ཀྱི་དངོས། །ཀུན་ད་ལྟར་དཀར་ཐོས་པ་བདུད་རྩིས་གང༌། །དངོས་གྲུབ་བཞིར་འགྱུར་ལྷ་ཚོགས་མཉེས་བྱེད་རྫས། །དགའ་ཆེན་མཆོད་པའི་གཙོ་ལ་ཕྱག་འཚལ་བསྟོད། །དེ་ལྟར་འཁོར་ལོའི་དབུས་ཀྱི་ཆུ་སྐྱེས་ལ། །བཅོམ་ལྡན་དཔའ་བོའི་དབང་ཕྱུག་ཡབ་ཡུམ་ནི། །ནུས་མའི་ཚོགས་དང་མཆོད་ཡོན་སྣོད་བཅས་པའི། །དཀྱིལ་འཁོར་བདེ་ཆེན་འཁོར་ལོ་ལ་ཕྱག་འཚལ། །ལྟེ་བར་གྲི་གུག་འཕྲེང་བས་མཛེས་པ་ཡི། །ནམ་མཁའི་གཞི་ལ་ཡེ་ཤེས་འཁོར་ལོ་སྔོ། །ཕྱོགས་རྣམས་དུས་སྦྱོར་གཞུ་དབང་རྒ་ཤི་དག །མཚམས་རྣམས་སྡིག་ཁྱིམ་སྐྱེ་བ་འགགས་ལ་འདུད། །ཡེ་ཤེས་ཁམས་ལ་དབང་བསྒྱུར་རྣལ་འབྱོར་མ། །དཔའ་བོར་བཅས་པས་སྡེའི་མཚན་གྱིས་བཏགས། །ཕྱོགས་བྲལ་འོག་རྣམས་ཉི་མའི་ཆོས་ཀྱིས་སྦྱངས། །སྟེང་དང་ཕྱོགས་རྣམས་ཟླ་བས་དག་ལ་འདུད། །ཤར་སོགས་ཕྱོགས་དང་རླུང་སོགས་ཕྱོགས་བྲལ་ལ། །ཡེ་ཤེས་ནང་ཚན་རླུང་མེ་ཆུ་ས་ཡི། །མཁའ་འགྲོ་མ་རྣམས་ས་ཆུ་མེ་རླུང་གི །རིགས་ཀྱི་ཡབ་གྱུར་མཁའ་འགྲོས་འཁྱུད་ལ་འདུད། །རླུང་གི་གཞི་ལ་ས་ཡི་འཁོར་ལོ་སེར། །ལྟེ་བར་འཁོར་ལོའི་འཕྲེང་བས་མཛེས་པ་ཡི། །ཕྱོགས་རྣམས་དུས་སྦྱོར་སྲང་དང་སྲིད་པ་འགགས། །མཚམས་རྣམས་ལེན་པ་བུ་མོ་དག་ལ་འདུད། །ས་ཡི་ཁམས་ལ་དབང་བསྒྱུར་རྣལ་འབྱོར་མ། །དཔའ་བོར་བཅས་པ་ཏ་སྡེའི་དག་པ་ཅན། །ཕྱོགས་བྲལ་འོག་རྣམས་ཉི་མའི་ཆོས་ཀྱིས་སྦྱངས། །སྟེང་དང་ཕྱོགས་རྣམས་ཟླ་བས་དག་ལ་འདུད། །ཤར་སོགས་ཕྱོགས་དང་རླུང་སོགས་ཕྱོགས་བྲལ་ལ། །དབང་ཆེན་ནང་ཚན་རླུང་མེ་ཆུ་ས་
ཡི། །མཁའ་འགྲོ་མ་རྣམས་ས་ཆུ་མེ་རླུང་གི །རིགས་ཀྱི་ཡབ་གྱུར་མཁའ་འགྲོའི་འཁྱུད་ལ་འདུད། །མེ་དཀྱིལ་གཞི་ལ་ཆུ་ཡི་འཁོར་ལོ་དཀར། །ལྟེ་བར་པདྨའི་འཕྲེང་བས་མཛེས་པ་ཡི། །ཕྱོགས་རྣམས་དུས་སྦྱོར་སེང་གེ་སྲེད་པ་དག །མཚམས་རྣམས་ཀརྐ་ཚོར་བ་འགགས་ལ་འདུད། །ཆུ་ཡི་ཁམས་ལ་དབང་བསྒྱུར་རྣལ་འབྱོར་མ། །དཔའ་བོར་བཅས་པ་པ་སྡེའི་ས་བོན་སྐྱེས། །ཕྱོགས་བྲལ་འོག་རྣམས་ཉི་མའི་ཆོས་ཀྱིས་སྦྱངས། །སྟེང་དང་ཕྱོགས་རྣམས་ཟླ་བའི་དག་ལ་འདུད། །ཤར་སོགས་ཕྱོགས་དང་རླུང་སོགས་ཕྱོགས་བྲལ་ལ། །གཤེར་བྱེད་ནང་ཚན་རླུང་མེ་ཆུ་ས་ཡི། །མཁའ་འགྲོ་མ་རྣམས་ས་ཆུ་མེ་རླུང་གི །རིགས་ཀྱི་ཡབ་གྱུར་མཁའ་འགྲོས་འཁྱུད་ལ་འདུད། །ཆུ་དཀྱིལ་གཞི་ལ་མེ་ཡི་འཁོར་ལོ་དམར། །ལྟེ་བར་ནོར་བུའི་འཕྲེང་པས་མཛེས་པ་ཡི། །ཕྱོགས་རྣམས་དུས་སྦྱོར་འཁྲིག་དང་རེག་པ་འགགས། །མཚམས་རྣམས་སྐྱེ་མཆེད་གླང་ཁྱིམ་དག་ལ་འདུད། །མེ་ཡི་ཁམས་ལ་དབང་བསྒྱུར་རྣལ་འབྱོར་མ། །དཔའ་བོར་བཅས་པ་ཊ་སྡེའི་རྡོ་རྗེས་མཚན། །ཕྱོགས་བྲལ་འོག་རྣམས་ཉི་མའི་ཆོས་ཀྱིས་སྦྱངས། །སྟེང་དང་ཕྱོགས་རྣམས་ཟླ་བས་དག་ལ་འདུད། །ཤར་སོགས་ཕྱོགས་དང་རླུང་སོགས་ཕྱོགས་བྲལ་ལ། །འབར་བྱེད་ནང་ཚན་རླུང་མེ་ཆུ་ས་ཡི། །མཁའ་འགྲོ་མ་རྣམས་ས་ཆུ་མེ་རླུང་གི །རིགས་ཀྱི་ཡབ་གྱུར་མཁའ་འགྲོས་འཁྱུད་ལ་འདུད། །ས་ཡི་གཞི་ལ་རླུང་གི་འཁོར་ལོ་ནག །ལྟེ་བར་རལ་གྲིའི་འཕྲེང་བས་མཚན་པ་ཡི། །ཕྱོགས་རྣམས་དུས་སྦྱོར་ལུག་དང་མིང་གཟུགས་དག །མཚམས་རྣམས་ཉ་ཁྱིམ་རྣམ་ཤེས་འགགས་ལ་འདུད། །རླུང་གི་ཁམས་ལ་དབང་བསྒྱུར་རྣལ་
འབྱོར་མ། །དཔའ་བོར་བཅས་པ་ཙ་སྡེའི་ཡི་གེ་གཞན། །ཕྱོགས་བྲལ་འོག་རྣམས་ཉི་མའི་ཆོས་ཀྱིས་སྦྱངས། །སྟེང་དང་ཕྱོགས་རྣམས་ཟླ་བས་དག་ལ་འདུད། །ཤར་སོགས་ཕྱོགས་དང་རླུང་སོགས་ཕྱོགས་བྲལ་ལ། །གཡོ་བའི་ནང་ཚན་རླུང་མེ་ཆུ་ས་ཡི། །མཁའ་འགྲོ་མ་རྣམས་ས་ཆུ་མེ་རླུང་གི །རིགས་ཀྱི་ཡབ་གྱུར་མཁའ་འགྲོས་འཁྱུད་ལ་འདུད། །ཡེ་ཤེས་གཞི་ལ་ནམ་མཁའི་འཁོར་ལོ་ལྗང༌། །ལྟེ་བར་རྡོ་རྗེའི་འཕྲེང་བའི་མཛེས་པ་ཡི། ཕྱོགས་རྣམས་དུས་སྦྱོར་བུམ་པ་འདུ་བྱེད་འགགས། །མཚམས་རྣམས་ཆུ་སྲིན་མ་རིག་དག་ལ་འདུད། །ནམ་མཁའི་ཁམས་ལ་དབང་བསྒྱུར་རྣལ་འབྱོར་མ། །དཔའ་བོར་བཅས་པ་ཀ་སྡེའི་ཡེ་ཤེས་སྐྱེས། །ཕྱོགས་བྲལ་འོག་རྣམས་ཉི་མའི་ཆོས་ཀྱིས་སྦྱངས། །སྟེང་དང་ཕྱོགས་རྣམས་ཟླ་བས་དག་ལ་འདུད། །ཤར་སོགས་ཕྱོགས་དང་རླུང་སོགས་ཕྱོགས་བྲལ་ལ། །སྟོང་པའི་ནང་ཚན་རླུང་མེ་ཆུ་ས་ཡི། །མཁའ་འགྲོ་མ་རྣམས་ས་ཆུ་མེ་རླུང་གི །རིགས་ཀྱི་ཡབ་གྱུར་མཁའ་འགྲོས་འཁྱུད་ལ་འདུད། །དུས་སྦྱོར་བཅུ་གཉིས་ཐུན་བཞི་རྣམ་དག་པ། །མི་བདག་དུར་ཁྲོད་རྣམས་ལ་དབང་བསྒྱུར་མཁན། །རང་མདོག་དང་མཚུངས་འཁོར་ལོའི་གདན་སྟེང་དུ། །རྣམ་པར་རོལ་མཛད་གཏུམ་མོའི་ཚོགས་ལ་འདུད། །རླུང་མེ་ཆུ་སའི་དཀྱིལ་འཁོར་མཁའ་ཡེ་བརྒྱད། །ཕྱོགས་དང་ཕྱོགས་བྲལ་སྒོ་བརྒྱད་རྣམས་སུ་བཞུགས། །འཁོར་ལོ་བཞི་ཡི་སྟེང་འོག་དང་འབྲེལ་བའི། །ཕྱོགས་མཚམས་དུར་ཁྲོད་བརྒྱད་པོར་སྤྱོད་ལ་འདུད། །སྤྱི་དང་ཁྱད་པར་གཉིས་ཀ་ནམ་མཁའ་དང༌། །ཡེ་ཤེས་ཁམས་ཀྱི་རང་བཞིན་ལྷ་མོ་རྣམས། །སྒོ་ཁྱུད་བར་གྱི་ཕྱི་རོལ་སྟེགས་བུར་བཞུགས། །བར་བར་
དུར་ཁྲོད་བརྒྱད་པོ་སྐྱོང་ལ་འདུད། །ཡེ་ཤེས་སྟོང་པའི་འཁོར་ལོའི་སྟེང་འོག་དང༌། །ཧ་ཀྵ་ཐུང་རིང་སྡེ་པ་རྣམས་དག་པ། ཁྱབ་བྱེད་ཁམས་གཉིས་དག་པ་བ་ཡི་དངོས། །དུས་སྦྱོར་བཞི་དང་ཐུན་བཞི་འགགས་ལ་འདུད། །འཁོར་ལོ་དྲུག་དང་སྒོ་མཚམས་གནས་པ་ཡི། །རྣལ་འབྱོར་མ་ཀུན་གཙོ་མོ་དང་མཚུངས་ཤིང༌། །མི་རོའི་གདན་ལ་གཡས་བརྐྱང་སྟབས་ཀྱིས་གནས། ཁྲོ་ཞིང་ཐུང་བའི་སྐུ་ཅན་རྣམས་ལ་འདུད། །འཁོར་ལོ་དྲུག་གི་དཔའ་བོ་བཞི་བཅུ་བརྒྱད། །ཞལ་གཉིས་ཕྱག་བཞི་རྡོ་རྗེ་དྲིལ་བུ་དང༌། ཁ་ཊྭཱཾ་ག་འཛིན་གཡོན་བརྐྱངས་སྟབས་ཀྱིས་སྦྱོར། །ཧེ་རུ་ཀ་དཔལ་རིགས་ལས་བྱུང་ལ་འདུད། །སྟོབས་ཀྱི་རྒྱུ་དང་པདྨ་ཆར་སྤྲིན་མདོག །ནོར་རྒྱས་དུང་སྐྱོང་བྱུ་རུའི་ཕུང་པོ་འདྲ། །མཐའ་ཡས་རིགས་ལྡན་ཀུན་དའི་མདོག་ལྟར་གསལ། །འཇོག་པོ་པད་ཆེན་རབ་ཏུ་སེར་ལ་འདུད། །ཕྱོགས་བཞི་སྒོ་ཡི་སྟེགས་བུར་འབྱུང་བ་ལ། །རྡོ་རྗེའི་གདན་བཞུགས་རིན་ཆེན་རྒྱན་གྱིས་སྤྲས། །བུམ་པ་རྡོ་རྗེ་པདྨ་ནོར་བུའི་ཕྱག །ཀླུ་ཆེན་བརྒྱད་ནི་གཏུམ་མོས་འཁྱུད་ལ་འདུད། །དེ་ལྟར་ལྷ་ཡི་འཁོར་ལོ་ལེགས་མཆོད་དྲི་དང་འཕྲེང་བ་བདུག་སྤོས་མ། །སྣང་གསལ་བདུད་རྩིའི་འབྲས་བུ་མ་དང་སྒེགས་མོ་བཞད་མོ་སིལ་སྙན་མ། །གར་དང་གླུ་ཡི་སྦྱོར་བ་ལ་བརྩོན་འདོད་མ་འདོད་ལ་རབ་དགའ་མ། །རྒྱན་དང་ཆ་བྱད་རྣམ་འགྱུར་དུས་མས་ཡིད་རབ་འཛིན་མ་རྣམས་བསྟོད་དོ། །མདུང་གི་འབིགས་དང་ལྷག་མ་བསྲེགས་པའི་རོ། །དྲག་པོའི་གཡུལ་དང་རུལ་བ་བྱིས་པ་གསོད། །རྣག་གི་དྲི་དང་སྦྲུལ་གྱིས་བཟུང་བ་དང༌། །ཀང་ཀེ་ལ་དང་ཀོ་ལ་ཧ་ལ་དང༌། །ཧ་ཧ་སྒྲོག་དང་དྲག་ཏུ་རྒོད་པ་དང༌། །དྲག་པོའི་སྒྲ་ཅན་དང་ནི་ཕེཊ་ཀ་ར། །འཇིགས་སུ་རུང་
དང་འཇིགས་པར་བྱེད་པ་སྟེ། །དུར་ཁྲོད་ཆེན་པོ་མཚན་མ་སྣ་ཚོགས་ཅན། །ཤིང་མེ་ཆུ་དང་སྤྲིན་དང་གྲུབ་པའི་རྫས། །རོ་དང་རོ་ལངས་བྱ་གཅན་སོགས་ཀྱིས་གང༌། །གྲུབ་པ་མཆོད་པའི་ཚོགས་ཀྱིས་རབ་ཏུ་ཁྱབ། །དཔའ་བོའི་གནས་སུ་གནས་པ་རྣམས་ལ་འདུད། ཁྱོད་ནི་སྲིད་པ་གསུམ་ལས་འདས་ཀྱང་སྲིད་པ་གསུམ་གྱི་རྣམ་པ་ཅན། །ཕྲ་རབ་རྡུལ་གྱི་ཆོས་ལས་འདས་ཀྱང་བརྟན་དང་གཡོ་བ་ཀུན་གྱི་གཟུགས། །ལུས་དང་དབང་པོའི་སྦྱོར་བ་སྤངས་ཀྱང་རྟག་ཏུ་འདོད་ཆགས་ཆེ་ལ་རོལ། །བསམ་གྱིས་མི་ཁྱབ་རྟག་པར་དཀའ་བ་དུས་ཀྱི་འཁོར་ལོས་བདག་སྐྱོངས་ཤིག །གཟའ་དང་དྲང་སྲོང་རྒྱུ་སྐར་ཁྱིམ་དང་ཆ། །ཕྱོགས་སྐྱོངས་ཞིང་སྐྱོང་ཕོ་ཉ་འཕྲོག་མ་དང༌། གྷནྚ་ཀརྞ་དགའ་བྱེད་ནག་པོ་ཆེ། །བྷྲྀང་གི་ཎི་སོགས་འཁོར་མང་རྒྱལ་གྱུར་ཅིག །དེ་ལྟར་བསྟོད་པས་ཕུང་པོ་ཁམས་སོགས་གཞན། །བདེ་གཤེགས་སྙིང་པོ་དེ་བཞིན་ཉིད་ཀྱི་དབྱིངས། །གློ་བུར་དྲི་མའི་སྦུབས་ལས་ངེས་གྲོལ་ཏེ། །སྲིད་གསུམ་དང་བ་མངོན་དུ་བྱེད་གྱུར་ཅིག །ཅེས་པ་དཔལ་དུས་ཀྱི་འཁོར་ལོ་སྡོམ་པ་ཆེན་པོའི་དཀྱིལ་འཁོར་ལ་བསྟོད་པ། འདོན་པ་བསྒྱུར་བའི་ཚུལ་འདི་ཡང་རྒྱལ་ཁམས་པ་ཏཱ་ར་ནཱ་ཐས་ཅུང་ཟད་བརྗོད་པའོ།། །།ཞུས་དག སརྦ་མངྒ་ལམ།
ཤོག་སྟོང་།