དཔལ་དུས་ཀྱི་འཁོར་ལོའི་མཆོད་ཆོག་ཉེར་མཁོ།
དཔལ་དུས་ཀྱི་འཁོར་ལོའི་མཆོད་ཆོག་ཉེར་མཁོ་བཞུགས།
ཨོཾ་སྭཱ་སྟི་པྲ་ཛཱ་བྷྱཿ དཔལ་དུས་ཀྱི་འཁོར་ལོ་ལ་ཕྱག་འཚལ་ལོ། །སྐབས་འདིར་ལས་དང་པོ་པ་ལ་ཉེ་བར་མཁོ་བའི་ལག་ལེན་འདི་ལྟ་བུ་དག་ཡོད་དེ། དེ་ལ་གསུམ་མཎྜལ་བསྒྲུབ་མཆོད་དམ་ཏིང་ངེ་འཛིན་གྱི་བདག་འཇུག་དང༌། རྣལ་འབྱོར་མ་རིགས་བརྒྱ་མཆོད་པའི་ཆོ་གའོ། །དང་པོ་ནི་བྲིས་སྐུ་ལ་སོགས་པ་རྟེན་བཀྲམ། མཎྜལ་འཆའ་བ་བདག་བསྐྱེད་ཀྱི་རྗེས་སུ་བྱེད་པ་ཐོབ་ཐང་ཡིན་ཡང་ལག་ལེན་སྟབས་བདེ་བའི་ཕྱིར་སྐབས་འདིར་འཆའ་ན།
ཆོ་གའི་རྡོ་རྗེ་སློབ་དཔོན་ནམ་ལས་ཀྱི་རྡོ་རྗེ་སློབ་དཔོན་དེ་རང་སྐད་ཅིག་གིས་དུས་ཀྱི་འཁོར་ལོའི་སྐུར་གྱུར། འོག་ནས་འབྱུང་བ་ལྟར་ནང་མཆོད་འདུས་བྱས་བྱིན་གྱིས་བརླབས་ནས། མཎྜལ་བསངས་སྦྱངས། ཨོཾ་ཨཱཿཧཱུཾ་ཧོཿཧཾཾ་ཀྵཿ ཞེས་བརྗོད་བཞིན་དུ་མཎྜལ་ལ་ནང་མཆོད་ཀྱིས་བྱུགས། སླར་ཡང་མཐེབ་སྲིན་གཡོན་པས་ནང་མཆོད་ནས་བླངས་ཏེ་མཎྜལ་ལ་ཆོས་འབྱུང་གྲུ་གསུམ་འབྲི། དབུས་སུ་བདུད་རྩིའི་ཐིག་ལེ་ཟླུམ་པོ་ཞིག་བྱ། དེའི་སྟེང་དུ་སྤྲོས་པ་ལ་དགའ་ན་རྡུལ་ཚོན་བཀྲམ་སྟེ། ཆོས་འབྱུང་དམར་པོ་གོང་རས་ལྗང་ཁུ་ཐིག་ལེ་དཀར་པོ་བྱ། མདོར་བསྡུས་སུ་བྱེད་ན་བདུད་རྩིའི་ཐིག་ལེའི་
སྟེང་དུ་འབྲུའི་ཚོམ་བུ་ཙམ་འགོད། དེ་དག་གི་མདུན་དུ་མཆོད་པ་རྒྱ་ཆེར་བཤམས། གཙོ་བོའི་ཟླུམ་གཏོར་གཅིག་སྡེ་དྲུག་ལ་ཟུར་གསུམ་རེ་རེ་གཞན་ཡང་ཆོས་སྐྱོང་དང་གཞི་བདག་གི་གཏོར་མ་སོགས་ཇི་ལྟར་འོས་པ་བཤམས། རྣལ་འབྱོར་མ་རིགས་བརྒྱའི་མཆོད་པ་དང་སྦྲེལ་ནས་བྱེད་ན། དེ་དང་ཉེ་བའི་ཕྱོགས་གང་ཡང་རུང་བར་འཆད་པར་འགྱུར་བའི་མཎྜལ་དང་མཆོད་གཏོར་རྣམས་ཀྱང་འདུས་བྱས་ལ་སྐབས་འདིར་བཤམས་པའམ་འོག་ཏུ་དུས་ལ་བབ་པའི་ཚེ་བཤམས་པ་གང་བདེར་བྱའོ། །སློབ་དཔོན་གྱི་དྲུང་དུ་ནང་མཆོད་རྡོར་དྲིལ་ཅང་ཏེའུ་སོགས་ཚོགས་པར་བྱས་ནས། གཞན་ཡང་རོལ་མོ་ལ་སོགས་པ་ལེགས་པར་བསྟར་ཏེ། སྔོན་འགྲོ་གཏོར་མ་ལ་ཆབ་བཏང༌། ཐོག་མར་ནང་མཆོད་ལ་དམིགས་ཏེ། ཨོཾ་ཨཱཿཧཱུཾ་ཧྲཿཕཊ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཨོཾ་ཨཱཿཧཱུཾ་ཧོཿ ཞེས་བྱིན་གྱིས་བརླབས། ཨོཾ་ཨཱཿཧཱུཾ་ཧྲཿཕཊ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཨོཾ་ཨོཾ་བཛྲ་ཙནྡྲ་སོགས། ཨོཾ་ཨཱཿབཛྲ་སཱུརྱ་སོགས། ཨོཾ་ཧཱུཾ་བཛྲ་ཨ་ན་ལ་སོགས་དང༌། ཨོཾ་ཧོཿསརྦ་དྷརྨ་སོགས་སྔགས་ཚན་
བཞིས་བྱིན་གྱིས་བརླབས། ཨོཾ་ཕཻཾ་བཛྲ་ཨ་རལླི་ཧོ། ཛཿཧཱུཾ་བཾ་ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ། དྲྀ་ཤྱ་ཧོ། ཨོཾ་ཁ་ཁ། ཁཱ་ཧི་ཁཱ་ཧི། སརྦ་ཡཀྵ་རཀྵ་ས། བྷཱུ་ཏ་པྲེ་ཏ་པི་ཤཱ་ཙ་ཨུན་མན་དཱ། ཨ་པ་སྨཱ་ར། ཌཱ་ཀ་ཌཱ་ཀི་ཎྱ་དཱ་ཡ། ཨི་དཾ་བ་ལིཾ། གྲྀཧྞན་ཏུ། ས་མ་ཡ་རཀྵཱན་ཏུ་མ་མ་སརྦ་སིདྡྷི་མྨེ་པྲ་ཡཙྪཱནྟུ་ཡ་ཐེ་བཾ། ཡ་ཐེཥྟཾ། བྷུ་ཛ་ཐཱ། ཛི་གྷྲ་ཐ། པི་པཱ་ཐ། མ་ཏི་ཀྲ་མ་ཐ། མ་མ་སརྦ་ཀརྟཱ་ཡ་སད་སུ་ཁ་བི་ཤུདྡྷ། ས་ཧཱ་ཡི་ཀ་བྷཱ་ཝནྟུ་ཧཱུཾ་ཧཱུཾ་ཕཊ་སྭཱཧཱ། ཨོཾ་བཛྲ་གནྡྷཾ་པྲ་ཏཱིཙྪ་ན་མཿ བཛྲ་པུཥྤཾ། བཛྲ་དྷཱུ་པཾ། བཛྲ་དཱི་པཾ། བཛྲ་ནཻ་ཝེ་དྱཾཾ། བཛྲ་ཨཀྵ་ཏཾ། བཛྲ་ལཱ་སྱཾ། བཛྲ་ཧཱ་སྱཾ། བཛྲ་བ་དྱཾ། བཛྲ་ནྲྀ་ཏྱཾ། བཛྲ་གཱི་ཏཾ། ཨོཾ་བཛྲ་ཀཱ་མཾ་པྲ་ཏཱིཙྪ་ན་མཿ མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོ་ཕྱག་འཚལ་བསྟོད། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་གྱི་ནི་འོད་གསལ་མཆོག །སངས་རྒྱས་
མཁའ་འགྲོ་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །རང་བཞིན་དག་པས་གོས་པ་མེད། །རིན་ཆེན་མཁའ་འགྲོ་ཕྱག་འཚལ་བསྟོད། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་རྡོ་རྗེ་ནམ་མཁའི་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོ་ཕྱག་འཚལ་བསྟོད། །དོན་ཡོད་རྒྱལ་པོ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དངོས་ཉིད་དག་པ་ཉིད་ལས་བྱུང༌། །སྣ་ཚོགས་མཁའ་འགྲོ་ཕྱག་འཚལ་བསྟོད། །ལྷ་ཆེན་བརྒྱད་པོ་འཁོར་དང་བཅས། །ཀླུ་ཆེན་བརྒྱད་པོ་འཁོར་དང་བཅས། །འཇིག་རྟེན་སྐྱོང་བ་བརྒྱད་པོ་དང༌། །གནོད་སྦྱིན་ཚོགས་རྣམས་མ་ལུས་དང༌། །སྲིན་པོའི་ཚོགས་རྣམས་མ་ལུས་དང༌། །འབྱུང་པོའི་ཚོགས་རྣམས་མ་ལུས་དང༌། །ཡི་དྭགས༴ ཤ་ཟའི༴ སྨྱོ་བྱེད༴། བརྗེད་བྱེད༴ མཁའ་འགྲོ༴ མ་མོའི་ཚོགས་རྣམས་མ་ལུས་དང༌། །དེ་ལ་སོགས་ཏེ་འབྱུང་པོའི་ཚོགས། །མ་ལུས་ཇི་སྙེད་མཆིས་པ་
རྣམས། །འདིར་གཤེགས་བདག་ལ་དགོངས་སུ་གསོལ། །མཆོད་སྦྱིན་གཏོར་མ་འདི་བསྣོམས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང༌། །དཔལ་དང་གྲགས་དང་སྐལ་བ་བཟང༌། །ལོངས་སྤྱོད་རྒྱ་ཆེན་ཀུན་ཐོབ་ཅིང༌། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྟོངས་གྲོགས་མཛོད། །དུས་མིན་འཆི་དང་ནད་རྣམས་དང༌། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང༌། །འབྲུ་རྣམས་འཕེལ་ཞིང་ཆོས་འཕེལ་དང༌། །དགེ་ལེགས་ཐམས་ཅད་འབྱུང་བ་དང༌། །ཡིད་ལ་འདོད་པ་ཀུན་འགྲུབ་ཤོག །ཅེས་པའི་མཐར་ཨོཾ་ཨཱཿཧཱུཾ་ཧོཿཧཾ་ཀྵཿཧྲཱཿཧྲཱཿ སོགས་སྒྲུབ་ཐབས་འབྱུང་བ་ལྟར་བདུད་སྲེག་པའི་སྔགས་ཀྱིས་བགེགས་བསྐྲད། ཚམ་རྔམ་དང་རོམ་མོའི་སྒྲ་བྱ། དེ་ནས་གནས་དང་ཡོ་བྱད་བྱིན་གྱིས་བརླབ་པ་
ནི། ཨོཾ་ཨཱཿཧཱུཾ་ཧྲཿཕཊ་ཀྱིས་བསངས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པར་གྱུར་སྟོང་པའི་ངང་ལས་གནས་ཁང་བྷྲུཾ་ལས་རིན་པོ་ཆེ་སྣ་ཚོགས་ལས་གྲུབ་པའི་ཐར་པ་ཆེན་པོའི་གཞལ་ཡས་ཁང་པ་གྲུ་བཞི་པ་སྒོ་བཞི་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་ཤེལ་གྱི་སྣོད་སོར་བཅུ་གཉིས་པ་རྣམས་ཀྱི་ནང་དུ་ཨོཾ་ཨཱཿཧཱུཾ་ཧོཿརྣམས་ལས་བྱུང་བའི་ཆུ་དང་མཆོད་ཡོན་དང་དྲི་དང་མེ་ཏོག་དང་བདུག་པ་དང་སྣང་གསལ་དང་ཞལ་ཟས་དམ་པ་དག་དང༌། རྣམ་པ་མང་པོའི་འབྲས་བུ་མ་ཉམས་པ་དང༌། གོས་དང་རྒྱན་དང་བ་དན་དང་བླ་བྲེ་ལ་སོགས་པ་དང༌། ཀླུ་དང་གར་དང་མེ་ལོང་དང་དྲིལ་བུ་ལ་སོགས་པ་སིལ་སྙན་གྱི་ཚོགས་དུ་མ་དང༌། ཨིནྡྲ་ནཱི་ལ་ལ་སོགས་པ་རྣམ་པ་མང་པོའི་རིན་པོ་ཆེ་དང༌། ནང་གི་དམ་ཚིག་རྣམས་དང༌། དམ་ཚིག་རྣམ་པ་བཞིའི་རྫས་ལ་སོགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་ཕུང་ལྟ་བུ་དཔག་ཏུ་མེད་ཅིང་དྲི་མ་དང་བྲལ་བར་གྱུར། ཨོཾ་བཛྲ་
གནྡྷཾ་སྭཱཧཱ། ཨོཾ་བཛྲ་པུཥྤཾ་སྭཱཧཱ། དེ་བཞིན་དུ་སྦྱར་ཏེ། བཛྲ་དྷཱུ་པཾ། བཛྲ་དཱི་པཾ། བཛྲ་ནཻ་ཝེ་ཏྱཾ། བཛྲ་ཨཀྵ་ཏཾ། བཛྲ་ལཱ་སྱཾ། བཛྲ་ཧཱ་སྱཾ། བཛྲ་ཝཱ་དྱཾ། བཛྲ་ནྲཱྀ་ཏྱཾ། བཛྲ་གཱི་ཏཾ། ཨོཾ་བཛྲ་ཀཱ་མཾ་སྭཱཧཱ། རོལ་ཆེན་དང་བཅས་ཏེ། ཨོཾ་ཧོཿབཛྲ་གཎྜེ་སརྦ་དྷརྨ་ཨེ་ཀ་པྲཛྙཱ་དྷཱ་ནི། སྭ་བྷཱ་ཝེ། སརྦ་ཨཱ་ཀཱ་རེ། སརྦ་དྷརྨ་པྲ་བོ་དྷ་ནི། སརྦ་དྷརྨ་ཎི་སྭ་བྷཱ་ཝན་པྲ་བོ་དྷ་ཡ་པྲ་བོ་དྷ་ཡ་སྭཱཧཱ། ཞེས་ལན་གསུམ་བརྗོད། དེ་དག་ནི་སྔོན་འགྲོའི་རིམ་པའོ། །དངོས་གཞི་ལ་དང་པོར་བདག་བསྐྱེད་ནི། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། ཞེས་པ་ནས་དཀྱིལ་འཁོར་གྱི་འཁོར་ལོ་རང་གི་ཐུགས་ཀར་ཐིམ། ཞེས་པའི་བར་ལྷ་དགུའི་སྒྲུབ་ཐབས་སུ་ཇི་སྐད་བཤད་པ་བཞིན་བསྒོམ་པར་བྱའོ། །དེ་ནས་མདུན་བསྐྱེད་མཆོད་པ་དང་བཅས་པ་ནི་མཎྜལ་བསྒྲུབ་མཆོད་དངོས་ཡིན་པས་དེ་བྱ་སྟེ། དེ་ཡང་བདག་བསྐྱེད་དཀྱིལ་འཁོར་གྱི་འཁོར་ལོ་རྒྱས་བསྡུས་གང་སྒོམ་ཀྱང་རུང༌། མདུན་བསྐྱེད་དཀྱིལ་འཁོར་གྱི་འཁོར་ལོ་རྒྱས་པ་སྒོམ་ཚུལ་དཀྱིལ་འཁོར་གྱི་ཆོ་ག་རྒྱས་པར་བཤད་པའི་མདུན་བསྐྱེད་བསྒྲུབ་ཚུལ་མཆོད་བསྟོད་གཏོར་མ་དང་
བཅས་པ་རྣམས་མཐའ་རྒྱས་སུ་བྱེད་པ་ནི་ཤིན་ཏུ་རྒྱས་པ་ཡིན་ལ། ཡང་ཆོ་ག་དེ་ཉིད་ཐུགས་དཀྱིལ་ཙམ་ལ་སྦྱར་ནའང་ཅུང་ཟད་རྒྱས་པར་འགྱུར་ཞིང༌། དཀྱིལ་འཁོར་ཡོངས་རྫོགས་སམ་ཐུགས་དཀྱིལ་ས་བོན་ཙམ་ལས་བསྐྱེད་ནའང་ཆོ་ག་འབྲིང་པོར་འགྱུར་རོ། །འཆད་པར་འགྱུར་བ་འདི་ནི་བསྡུས་པ་ཡིན་ལ། བདག་བསྐྱེད་ཀྱི་དཀྱིལ་འཁོར་རྒྱས་བསྡུས་གང་ཡིན་ཡང་དེ་མ་བསྡུས་པར་དེའི་གཟུགས་བརྙན་མཎྜལ་ལ་ཤར་བའི་ཚུལ་གྱིས་སྐད་ཅིག་གིས་བསྐྱེད་ནས་མཆོད་པ་བྱེད་པ་ནི་ཤིན་ཏུ་བསྡུས་པ་ཡིན་ནོ། །འོན་ཀྱང་འདི་ལྟར་ལག་ལེན་དུ་བྱ་སྟེ། ནང་མཆོད་ཁ་གསོ་བ་ཙམ་འགྲུབ་ན་ལེགས། ཨོཾ་ཨཱཿཧཱུཾ་ཧྲཿཕཊ་ནས། ཨ་མྲྀ་ཏཾ་ཀུ་རུ་ཀུ་རུ་སྭཱཧཱའི་བར་ནང་མཆོད་བྱིན་རླབས་རྒྱས་པ་གཏོར་མ་བྱིན་རླབས་ལྟར་བྱ། ཨོཾ་ཨཱཿཧཱུཾ་ཧོཿཧཾ་ཀྵཿ ཞེས་ལན་གསུམ་ལ་སོགས་པ་ཇི་ལྟར་འོས་པ་བརྗོད་མཎྜལ་ཆོས་འབྱུང་ཐིག་ལེ་དང་བཅས་པ་གྲུབ་པར་མོས་པ་ཙམ་བྱས། ཨོཾ་ཨཱཿཧཱུཾ་ཧྲཱཿཕཊ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་ཆོས་འབྱུང་ནམ་མཁའི་ཁམས་ལ་གནས་པའི་བརྩེགས་པའི་ཡི་གེ་ཡོངས་སུ་གྱུར་པ་ལས་འབྱུང་བ་རིམ་བརྩེགས་ལྷུན་པོ་དང་བཅས་
པའི་སྟེང་དུ་ཐུགས་གསུང་སྐུའི་དཀྱིལ་འཁོར་རྣམས་མཚན་ཉིད་ཐམས་ཅད་ཡོངས་སུ་རྫོགས་པ་ཕྱོགས་ཀུན་ཏུ་ཡེ་ཤེས་ཀྱི་འོད་ཟེར་མཐའ་ཡས་པ་ཀུན་ཏུ་འཕྲོ་བ་དབང་པོའི་གཞུ་དང་མེ་ལོང་གི་གཟུགས་བརྙན་དང་པྲ་ཕབ་བརྒྱད་དང་མཚུངས་པ་སྣང་ལ་རང་བཞིན་མེད་པ། རང་གི་སེམས་ཉིད་ཀྱི་སོ་སོར་སྣང་བ་གཞོམ་དུ་མེད་ཅིང་རྡུལ་ཕྲ་རབ་ཀྱི་ཆོས་ལས་འདས་པ་དྭངས་ཤིང་སྒྲིབ་པ་མེད་ལ་ཕྱི་ནང་ཀུན་ཏུ་འོད་གསལ་བ་མཚན་ཉིད་ཐམས་ཅད་ཡོངས་སུ་རྫོགས་ཤིང་རྒྱན་གྱིས་རྣམ་པ་མཆོག་ཏུ་བཀྲ་བ་དུ་མས་མཛེས་པ་དབུས་སུ་སྣ་ཚོགས་པདྨའི་ལྟེ་བ་ལ་ཟླ་བ་ཉི་མ་སྒྲ་གཅན་གྱི་དཀྱིལ་འཁོར་ལ་སོགས་པ་གནས་ཐམས་ཅད་དུ་ལྷའི་གདན་ཐམས་ཅད་ཀྱིས་མཛེས་པའོ། །གདན་རྣམས་ཀྱི་སྟེང་དུ་བཅོམ་ལྡན་འདས་དཔལ་དུས་ཀྱི་འཁོར་ལོ་ཡབ་ཡུམ་ནུས་མ་བཅུ་དེ་བཞིན་གཤེགས་པ་ཡབ་ཡུམ་བཅུ། སེམས་དཔའ་ཡབ་ཡུམ་བཅུ་གཉིས། ཁྲོ་བོ་ཁྲོ་མོ་བརྒྱད། གཟུངས་མ་བཅུ་གཉིས་ཏེ་ཐུགས་ཀྱི་དཀྱིལ་འཁོར་གྱི་
ལྷ་ཚོགས་རྣམས་དང༌། རྣལ་འབྱོར་མ་བརྒྱད་ཐབས་དང་བཅས་པ་རྣལ་འབྱོར་མ་དྲུག་ཅུ་རྩ་བཞིས་བསྐོར་བ་དང༌། འདོད་མ་སུམ་ཅུ་རྩ་དྲུག་སྟེ་གསུང་གི་ལྷ་ཚོགས་རྣམས་དང༌། ལྷ་ཆེན་པོ་བཅུ་གཉིས་སོ་སོར་ཤེས་རབ་མ་དང་བཅས་ཤིང༌། པད་འདབ་ལ་གནས་པའི་ལྷ་མོ་ཉེར་བརྒྱད་ཉེར་བརྒྱད་ཀྱིས་བསྐོར་བ། ཆོས་ཀྱི་ལྷ་སུམ་བརྒྱ་དྲུག་ཅུའི་ཚོགས་རྣམས་དང༌། སྒོ་སྐྱོང་གི་ཁྲོ་བོའི་རྒྱལ་པོ་དྲུག་པོ་སོ་སོར་ཡུམ་དང་བཅས་པ་དང༌། ཕྱིར་འདོད་མ་སུམ་ཅུ་རྩ་དྲུག་དང༌། ཀླུ་རྒྱལ་ཆེན་པོ་བཅུ་ཤེས་རབ་མ་དང་བཅས་པ་སྟེ། སྐུའི་དཀྱིལ་འཁོར་གྱི་གཞལ་མེད་ཁང་ལ་གནས་པ་རྣམས་དང༌། དུར་ཁྲོད་འཁོར་ལོར་བཞུག་པའི་རབ་གཏུམ་མ་བཅུ་ཐབས་དང་བཅས་པ་དང༌། རླུང་གི་དཀྱིལ་འཁོར་ལ་གནས་པའི་འབྱུང་པོ་བྱེ་བ་ཕྲག་ཕྱེད་དང་བཞི་ལ་སོགས་པ་དང་བཅས་པ་རྣམས་སྐད་ཅིག་གིས་གྲུབ་པར་གྱུར་པ་ནི། སྟོང་པ་ཉིད་དང་སྙིང་རྗེའི་བདག །སྲིད་གསུམ་སྐྱེ་འཇིགས་མེད་པའི་དངོས། །ཞེས་པ་ནས། སྲིད་གསུམ་དང་བ་མངོན་དུ་བྱེད་གྱུར་ཅིག །
ཅེས་པའི་བར་བསྟོད་ཆེན་འདོན་བཞིན་དུ་ལྷ་རྣམས་གསལ་གདབ་བོ། །དེ་ནས་མཆོད་པ་བྱིན་གྱིས་བརླབ་པར་བྱ་སྟེ། གོང་གི་གནས་དང་ཡོ་བྱད་བྱིན་གྱིས་བརླབ་པ་དང་འདྲ་བ་ལས། གནས་ཁང་བསྐྱེད་ཆོག་གི་ཚིག་དོར་བ་སྟེ། སྟོང་པའི་ངང་ལས་ཤེལ་གྱི་སྣོད་སོར་བཅུ་གཉིས་པ་ཞེས་སོགས་བརྗོད་པའི་ཁྱད་པར་ཙམ་མོ། །དེ་ནས་མཆོད་པའི་མགྲོན་སྤྱན་དྲངས་ནས་མཆོད་པ་ནི། རང་གི་སྙིང་ག་ནས་འོད་ཟེར་འཕྲོས། རང་བཞིན་གྱི་གནས་ནས་བླ་མ་ཡི་དམ་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་མཆོད་པའི་ཡུལ་དུ་བཛྲ་ས་མཱ་ཛཿ ཛཿཧཱུཾ་བཾ་ཧོཿ སངས་རྒྱས་སྲས་དང་བཙུན་མོར་བཅས་པ་ནམ་མཁའ་གང་བར་བཞུགས། ཨོཾ་ཨཱཿཧཱུཾ་ཧོཿཏྲཻ་དྷཱ་ཏུ་ཀེ་ཤྭ་ར་ཀཱ་ལ་ཙཀྲ་ཨརྒྷཾ་པྲ་ཏཱིཙྪ་ས་པ་རི་ཝཱ་རཿཏྭཾ་བྷ་ག་ཝཱན་མེ་ཝ་ར་དོ་བྷ་ཝ་ཤི་ཥྱ་ནཾ་ཙ། ཞེས་པ་ལན་གསུམ། རྣམ་དག་ཡེ་ཤེས་བདུད་རྩིའི་ཆུ་གཏེར་ནི། །རབ་དྭངས་ཁ་དོག་དྲི་རོ་ཕུན་སུམ་ཚོགས། །ཞལ་གྱི་རྙོག་པའི་དྲི་སེལ་ཡོན་ཆབ་འདི། །དུས་ཀྱི་འཁོར་ལོའི་
ལྷ་ཚོགས་མཉེས་ཕྱིར་འབུལ། །ཨོཾ་ཨཱཿཧྲི་པྲ་ཝ་ར་སད་ཀཱ་རཾ་ཨརྠ་ཨཉྩ་མ་ནཾ་པྲ་ཏཱིཙྪ་ན་མཿ ཚིག་རྐང་དང་པོ་གཉིས་འདྲ་བ་ལ། ཞབས་ཀྱི་པདྨའི་དྲི་སེར་སྤོས་ཀྱི་ཆུ། །ཞེས་དང༌། པཱདྱཾ། དེ་བཞིན་དུ། ཀུན་ཏུ་འཕོ་བའི་གདུང་སེལ་འཐོར་འཐུང་འདི། །པྲོཀྵཱ་ནཾ། ཡན་ལག་བརྒྱད་ལྡན་རྡོ་རྗེ་ཨརྒྷའི་རྒྱུན། །ཨརྒྷཾ།ཞེས་པས་ཆུ་བཞི་ཕུལ། ཁམས་གསུམ་དབང་ཕྱུག་བཅོམ་ལྡན་འདས། །དུས་ཀྱི་འཁོར་ལོ་འཁོར་བཅས་རྣམས། །རྣམ་དག་རྡོ་རྗེའི་དྲི་མཆོག་འདི། །བཞེས་ནས་བདག་ལ་མཆོག་སྩོལ་མཛོད། །ཨོཾ་ཤྲཱི་ཀཱ་ལ་ཙཀྲ་ས་པ་རི་ཝཱ་རེ་བྷྱཿ ཞེས་ཀུན་ལ་སྦྱར་ཏེ། བཛྲ་གནྡྷཾ་པྲ་ཏཱིཙྪ་ན་མཿ རྐང་པ་གསུམ་ཡང་སྔ་མ་བཞིན་ཀུན་ལ་སྦྱར་ཏེ། རྡོ་རྗེ་མེ་ཏོག་རྣམ་བཀྲའི་ཚོགས། །བཛྲ་པུཥྤཾ་པྲ་ཏཱིཙྪ་ན་མཿ རྡོ་རྗེ་བདུག་སྤོས་བླ་ན་མེད། །བཛྲ་དྷཱུ་པཾ་པྲ་ཏཱིཙྪ་ན་མཿ རྡོ་རྗེ་སྒྲོན་མེ་འོད་རབ་འབར། །བཛྲ་དཱི་པཾ་པྲ་ཏཱིཙྪ་ན་མཿ རྡོ་རྗེ་ཞལ་ཟས་རོལ་མཆོག་ལྡན། །བཛྲ་ནཻ་ཝི་ཏྱཾ་པྲ་ཏཱིཙྪ་ན་མཿ རྡོ་རྗེ་མ་ཉམས་འབྲས་བུའི་མཆོག །བཛྲ་ཨཀྵ་
ཏཾ་པྲ་ཏཱིཙྪ་ན་མཿ རྡོ་རྗེ་སྒེག་མོའི་མཆོད་པ་ནི། །བཛྲ་ལཱ་སྱཾ་པྲ་ཏཱིཙྪ་ན་མཿ རྡོ་རྗེ་བཞད་མའི་མཆོད་པ་འདི། །བཛྲ་ཧཱ་སྱཾ་པྲ་ཏཱིཙྪ་ན་མཿ རྡོ་རྗེ་སིལ་སྙན་རྣམ་མང་པོ། །བཛྲ་བཱ་ཏྱཾ་པྲ་ཏཱིཙྪ་ན་མཿ རྡོ་རྗེ་གར་གྱི་མཆོད་སྤྲིན་འདི། །བཛྲ་ནྲྀ་ཏྱཾ་པྲ་ཏཱིཙྪ་ན་མཿ རྡོ་རྗེ་གླུ་དབྱངས་ཡིད་འཕྲོག་ལྡན། །བཛྲ་གཱི་ཏཾ་པྲ་ཏཱིཙྪ་ན་མཿ རྡོ་རྗེ་འདོད་པའི་མཆོད་པ་མཆོག །བཛྲ་ཀཱ་མཾ་པྲ་ཏཱིཙྪ་ན་མཿ ཙ་སྡེ་ཐུང་རིང་ལས་སྐྱེས་པའི། །དྲི་ཆབ་མ་དང་ཕྲེང་བ་མ། །ནམ་མཁའ་ཁྱབ་པའི་ཚོགས་སྤྲུལ་ནས། །དཀྱིལ་འཁོར་ལྷ་ལ་མཆོད་པ་འབུལ། །ཨོཾ་བཛྲ་གནྡྷེ་གནྡྷ་ཨརྩ་ནཾ་ཀུ་རུ་ཀུ་རུ་སྭཱཧཱ། ཨོཾ་བཛྲ་མཱ་ལེ་མཱ་ལ༴ ཊ་སྡེ་ཐུང་རིང་ལས་སྐྱེས་པའི། །བདུག་སྤོས་མ་དང་སྣང་གསལ་མ། །ནམ་མཁའ༴ དཀྱིལ་འཁོར་ལྷ༴ ཨོཾ་བཛྲ་དྷཱུ་པེ་དྷཱུ་པ༴ ཨོཾ་བཛྲ་པྲ་དཱི་པེ༴ པ་སྡེ་ཐུང་རིང་ལས་སྐྱེས་པའི། །ཞལ་ཟས་མ་དང་འབྲས་བུ་མ། །ནམ་མཁའ༴ དཀྱིལ་འཁོར་ལྷ༴ ཨོཾ་བཛྲ་
ཨ་མྲྀ་ཏེ༴ ཨོཾ་བཛྲ་ཨཀྵ་ཏེ༴ ཏ་སྡེ་ཐུང་རིང་ལས་སྐྱེས་པའི། །སྒེག་མོ་དང་ནི་བཞད་པ་མོ། །ནམ་མཁའ༴ དཀྱིལ་འཁོར་ལྷ༴ ཨོཾ་བཛྲ་ལཱ་སྱེ༴ ཨོཾ་བཛྲ་ཧཱ་སྱ༴ ཀ་སྡེ་ཐུང་རིང་ལས་སྐྱེས་པའི། །སིལ་སྙན་མ་དང་གར་མཁན་མ། །ནམ་མཁའ༴ དཀྱིལ་འཁོར་ལྷ༴ ཨོཾ་བཛྲ་བཱ་དྱེ༴ ཨོཾ་བཛྲ་ནྲྀ་ཏྱེ༴ ས་སྡེ་ཐུང་རིང་ལས་སྐྱེས་པའི། །གླུ་དབྱངས་མ་དང་འདོད་པ་མ། །ནམ་མཁའ༴ དཀྱིལ་འཁོར་ལྷ༴ ཨོཾ་བཛྲ་གཱི་ཏེ༴ ཨོཾ་ཀཱ་མེ་སརྦ་བུདྡྷ་བོ་དྷི་སཏྭ་ནཱཾ་ཀྲོ་དྷ་ཨཱ་དཱི་ནཱཾ་བཛྲ་སུ་ར་ཏ་པཱུ་ཛཾ་ཀུ་རུ་ཀུ་རུ་སྭཱཧཱ། ཞེས་རིག་མ་བཅུ་གཉིས་ཀྱིས་མཆོད། སྲབ་འཇམ་ཡང་པ་ལྷ་ཡི་གོས། །མི་ཕྱེད་རྡོ་རྗེའི་སྐུ་བརྙེས་ལ། །མི་ཕྱེད་དད་པས་བདག་འབུལ་ན། །བདག་ཀྱང་རྡོ་རྗེའི་སྐུ་ཐོབ་ཤོག རབ་འབར་ནོར་བུ་རིན་ཆེན་ཨིནྡ་སྙིལ། །གསེར་དངུལ་ལ་སོགས་རིན་ཆེན་མེ་ཏོག་དང༌། །རེག་ན་བདེ་བ་རྣམ་མང་གོས་ཀྱི་ཚོགས། །ཙནྡན་ལ་སོགས་དྲི་བཟང་སྦྱར་
བའི་ཆབ། །དྲི་ཞིམ་བདུག་སྤོས་བསྲེགས་པའི་སྤྲིན་ཚོགས་དང༌། །རྩི་བཅུད་འབྲུ་མར་དང་བཅས་སྒྲོན་མེའི་ཚོགས། །གྲགས་སྟོང་གཉིས་སུ་མེད་པ་དྲིལ་བུའི་སྒྲ། །གསལ་སྣང་གཟུགས་བརྙན་འཆར་བའི་མེ་ལོང་དང༌། །ལྷ་རྫས་བླ་བྲེ་ནམ་མཁའི་ཚད་འཇལ་བྱེད། །རྣམ་མང་འབྲས་བུ་སྣ་ཚོགས་བཅུད་སྟེར་ཞིང༌། །ལྷབ་ལྷུབ་གཡོ་བ་བ་དན་རྣམ་ལྔའི་ཚོགས། །འཇོ་སྒེག་རྣམ་འགྱུར་སྤྲོ་བའི་གར་མཁན་དང༌། །སྒྲ་སྙན་སྣ་ཚོགས་རོལ་མོའི་མཆོད་པ་སྟེ། །བཅུ་གསུམ་དཀྱིལ་འཁོར་ལྷ་ཚོགས་རྣམས་ལ་འབུལ། །ཡན་ལག་བཅུ་གཉིས་འཕོ་བ་རབ་འགགས་ནས། །བཅུ་གསུམ་རྡོ་རྗེ་འཛིན་པའི་ས་ཐོབ་ཤོག །རབ་དྭངས་ཡན་ལག་བརྒྱད་ལྡན་ཆུ་གཙང་དང༌། །འོ་ཆབ་མེ་ཏོག་བཅས་པའི་མཆོད་ཡོན་བཟང༌། །རླུང་གིས་བསྐྱོད་པའི་དྲི་བཟང་མཁའ་ཁྱབ་དང༌། །ལྷན་ཅིག་སྐྱེས་དང་སྦྱར་བའི་བདུག་སྤོས་དང༌། །ཨུཏྤལ་པདྨ་ལ་སོགས་མེ་ཏོག་བཀྲ། །མ་ཉམས་ས་ཧ་ཀ་རའི་འབྲས་བུ་སྨིན། །སྨན་མཆོག་དབང་པོ་ལ་
སོགས་འབྲུ་སྣ་ཚོགས། །ཉི་ཟླ་ནོར་བུ་ལ་སོགས་སྣང་གསལ་ཚོགས། །བདུད་རྩི་རོ་བརྒྱ་ལྡན་པའི་ལྷ་བཤོས་དང༌། །ཀཉྩ་ལི་ཀ་ལྷ་ཡི་གོས་ཀྱི་མཆོག །མཆོད་པ་རྣམ་བཅུ་ཕུལ་བས་ས་བཅུ་ཐོབ། །དཀྱིལ་འཁོར་རྣམ་བཅུ་སྒྲིབ་བྲལ་ཐོབ་པར་ཤོག །ཇི་ལྟར་སྔོན་གྱི་སངས་རྒྱས་ལ། །བཀྲ་ཤིས་དཔལ་བེའུ་གཡུང་དྲུང་འཁྱིལ། །དགེ་བའི་དོན་དུ་མངའ་བ་ལྟར། །དེ་བཞིན་བདག་ཀྱང་དབུལ་བར་བགྱི། །ཇི་ལྟར་སྔོན་གྱི༴ གསེར་གྱི་འཁོར་ལོ་མུ་ཁྱུད་ཅན། །ཚངས་པ་ཆེན་པོས་ཕུལ་བ་ལྟར། །དེ་བཞིན༴ ཇི་ལྟར་སྔོན༴ འདབ་གྱི་སྐྱོན་གྱིས་མ་གོས་པའི། །པདྨ་དཀར་པོ་ཕུལ་བ་ལྟར། དེ་བཞིན༴ ཇི་ལྟར་སྔོན༴ ཉོན་མོངས་བདུད་ལས་རྒྱལ་བ་ཡི། །ཆོས་ཀྱི་རྒྱལ་མཚན་ཕུལ་བ་ལྟར། །དེ་བཞིན༴ ཇི་ལྟར༴ གདུགས་དཀར་གསེར་གྱི་ཡུ་བ་ཅན། །ཕུལ་བ་དེ་བཞིན་བདག་འབུལ་ན། །ཅི་བདེ་བར་ནི་བཞེས་སུ་གསོལ། །ཇི་ལྟར༴ རེ་བ་ཐམས་ཅད་རྫོགས་མཛད་པའི། །བུམ་པ་བཟང་པོ་ཕུལ་བ་ལྟར། །དེ་བཞིན༴ ཇི་
ལྟར༴ སྙན་པ་ཕྱོགས་བཅུར་སྒྲོག་པ་ཡི། །འབུད་དུང་གཡས་འཁྱིལ་ཕུལ་བ་ལྟར། །དེ་བཞིན༴ ཇི་ལྟར༴ ན་བཟའ་གསེར་གྱི་ཉ་རིས་ཅན། །ཕུལ་བ་དེ་བཞིན་བདག་འབུལ་ན། །ཅི་བདེ་བར་ནི་བཞེས་སུ་གསོལ། །ཕྱོགས་ལས་རྣམ་རྒྱལ་གསེར་གྱི་འཁོར་ལོ་དང༌། །དགོས་འདོད་མ་ལུས་སྩོལ་བ་ཡིད་བཞིན་ནོར། །གཟུགས་མཛེས་སྐྱོན་ཀུན་བྲལ་བ་བཙུན་མོའི་མཆོག །བང་མཛོད་མ་ལུས་འགེངས་བྱེད་བློན་པོའི་ཕུལ། །ཡིད་འོང་སྟོབས་ལྡན་གླང་པོའི་བདག་པོ་དང༌། །ཅང་ཤེས་སྤྲིན་གྱི་ཤུགས་ཅན་རྨད་བྱུང་རྟ། །རྒོལ་བ་ཀུན་འཇོམས་ཁྱིམ་བདག་དཔའ་བོ་ཆེ། །དེ་ལྟར་རིན་ཆེན་བདུན་གྱིས་དཀྱིལ་འཁོར་མཆོད། །དྲི་མེད་ཆོས་ཀུན་གསལ་བའི་མེ་ལོང་དང༌། །གཡས་འཁྱིལ་ཆོས་སྒྲ་མི་ཟད་སྒྲོག་པའི་དུང༌། །དུག་གསུམ་ཉོན་མོངས་འཇོམས་པའི་གི་ཧཾ་དང༌། །རྩི་བཅུད་སྙིང་པོ་བདུད་རྩིའི་རང་བཞིན་ཞོ། ཁམས་གསུམ་དབང་དུ་སྡུད་པ་ལི་ཁྲིའི་རྫས། །རྡོ་རྗེ་སེམས་དཔའི་ཚེ་སྒྲུབ་དུར་པའི་རྩྭ། །
དོན་མཆོག་བླ་མེད་སྒྲུབ་པ་བིལ་བའི་འབྲས། བགེགས་དང་བར་ཆད་ཀུན་འཇོམས་ཡུངས་ཀར་ཏེ། །རྒྱལ་བས་བྱིན་རླབས་བཀྲ་ཤིས་རྫས་བརྒྱད་པོ། །ཕུལ་བས་འགྲོ་ལ་དགེ་ལེགས་འཕེལ་བར་ཤོག །ཉོན་མོངས་མ་ལུས་བཅོམ་པའི་སྟག་ལྤགས་དང༌། །སྒྲིབ་པ་ཀུན་བྲལ་གླང་ཆེན་པགས་པའི་གོས། །འཇིགས་བྱེད་ཧེ་རུ་ཀ་དཔལ་མཉེས་བྱེད་པ། །སྣ་ཚོགས་ན་བཟའི་མཆོད་པ་དབུལ་བར་བགྱི། །དབང་སྔོན་ཀརྐེ་ཏ་ན་ཆུ་ཤེལ་དང༌། །པད་དམར་མ་ར་ཏ་ཀ་མུ་ཏིག་དང༌། །འཛམ་བུ་ཆུ་བོའི་གསེར་དང་དངུལ་ལ་སོགས། །བཟའ་དང་བཅའ་བ་རྣམ་པ་དུ་མ་དང༌། །རྩ་བ་སྡོང་བུ་འདབ་མ་མེ་ཏོག་དང༌། །ལྗོན་ཤིང་ལ་སོགས་རྣམ་པ་སྣ་ཚོགས་པ། །བསོད་ནམས་སྤེལ་ཕྱིར་དཀྱིལ་འཁོར་ལྷ་ལ་འབུལ། །རལ་གྲི་ཁང་པ་པགས་པ་སྐྱེད་མོས་ཚལ། །མལ་ཆ་གོས་དང་མཆིལ་ལྷམ་རིན་པོ་ཆེ། །པདྨ་ཅན་སོགས་བཀྲ་ཤིས་ལྷ་མོ་བརྒྱད། །སྣ་ཚོགས་རིན་ཆེན་ལས་གྲུབ་ཁང་བཟང་དང༌། །དཔག་བསམ་ཤིང་དང་བུམ་པ་བཟང་པོ་དང༌། །འདོད་འཇོའི་བ་དང་
རིན་ཆེན་རི་བོ་སོགས། །མཆོད་སྤྲིན་རྒྱ་མཚོས་དཀྱིལ་འཁོར་ལྷ་ཚོགས་མཆོད། །ཀུནྡ་རབ་ཏུ་ཁྱབ་བྱེད་དྲི་བཟང་དང༌། །རྣམ་དག་ཉི་མས་དག་བྱེད་མེ་ཏོག་ཕྲེང༌། །དོན་དམ་དབྱིངས་ཀྱི་དཀྱིལ་འཁོར་ལྷ་ལ་འབུལ། །འགྲོ་བས་རྣམ་དག་ཟླ་ཉི་ཐོབ་པར་ཤོག །གཏུམ་མོ་འབར་བས་ཀུན་རྟོག་བསྲེགས་པའི་སྤོས། །སྙིང་ནང་གཞོལ་མེད་འབར་བའི་སྣང་གསལ་ཚོགས། །དོན་དམ་དབྱིངས་ཀྱི་དཀྱིལ་འཁོར་ལྷ་ལ་འབུལ། །སྤྲོས་བྲལ་ཡེ་ཤེས་སྣང་བ་ཐོབ་པར་ཤོག །འདོད་ཡོན་གཞན་མཆོག་བདུད་རྩི་ཞལ་ཟས་ལྔ། །ཐིག་ལེ་ནོར་བུར་བཅིངས་པའི་མ་ཉམས་འབྲུ། །དོམ་དམ་དབྱིངས༴ སྟོང་པའི་གཟུགས་ཀྱི་བྱང་སེམས་འཆིང་བར་ཤོག །མ་དག་གནས་གྱུར་ཡེ་ཤེས་སྒེག་མོའི་ལུས། །ལས་རླུང་དྷཱུ་ཏཱིར་ཐིམ་པ་བཞད་སྒྲའི་དབྱངས། །དོམ་དམ་དབྱིངས༴ རྡོ་རྗེའི་སྐུ་དང་བཅུ་གཉིས་ས་ཐོབ་ཤོག །གཞོམ་མེད་ནཱ་དའི་རོལ་མོ་སིལ་སྙན་མཆོག །རྣམ་གསུམ་ཕྱག་རྒྱའི་རོལ་པ་བདེ་བའི་གར། །དོམ་དམ་དབྱིངས༴། གྲག་སྟོང་སྒྲ་དང་སྒྱུ་རྩལ་མཆོག་ཐོབ་ཤོག །
སྒྲ་དབྱངས་རྒྱ་མཚོ་ཆོས་ཉིད་རྡོ་རྗེའི་གླུ། །མི་འགྱུར་བདེ་སྒྲུབ་ཕྱག་ཆེན་འདོད་པ་མོ། །དོམ་དམ་དབྱིངས༴ རྡོ་རྗེའི་གསུང་དང་མི་འགྱུར་བདེ་ཐོབ་ཤོག །ན་མཿསརྦ་ཏ་ཐཱ་ག་ཏ་བྷྱོཿབི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུད་ག་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ། ལན་གསུམ་ལ་སོགས་པ་ཅི་རིགས་པར་བརྗོད། ནང་མཆོད་གཏོར་མ་ལྟར་བྱིན་གྱིས་རླབས། ན་མོ་སངས་རྒྱས་ཆོས་དང་དགེ་འདུན་ཐམས་ཅད་ཀྱི་ངོ་བོ་དཀྱིལ་འཁོར་ཐམས་ཅད་ཀྱི་བདག་པོ་ལྷ་དང་བཅས་པའི་འགྲོ་བ་ཐམས་ཅད་ཀྱི་སྐྱོབ་པ་དྲིན་ཅན་རྩ་བའི་བླ་མ་རྡོ་རྗེ་འཆང་འདི་ཞེས་བྱ་བའི་ཞལ་དུ་མཆོད་པ་དམ་པ་འབུལ་ལོ། །ཨོཾ་ཨཱཿཧཱུཾ། དངོས་གྲུབ་རྒྱ་མཚོ་ཡོན་ཏན་རིན་ཆེན་གཏེར། །སྲིད་དང་ཞི་བའི་གདུང་བ་སེལ་བའི་སྨན། །ལྷ་དང་བཅས་པའི་འགྲོ་བ་ཀུན་གྱི་སྐྱབས། །དཔལ་ལྡན་རྡོ་རྗེ་འཆང་ལ་མཆོད་པ་འབུལ། །ཨོཾ་ཨཱཿཧཱུཾ། ཉི་མའི་འོད་དང་ཟླ་བཟང་ལྷ་དབང་དང༌། །གཟི་བརྗིད་ཟླས་བྱིན་ལྷ་ཡི་དབང་ཕྱུག་དང༌། །སྣ་ཚོགས་གཟུགས་དང་ལྷ་ཡི་དབང་ལྡན་ཏེ། །ཆོས་རྒྱལ་ཆེན་པོ་བརྒྱད་ལ་མཆོད་པ་འབུལ། །འཇམ་དབྱངས་གྲགས་པ་
པདྨ་དཀར་པོ་དང༌། བཟང་པོ་རྣམ་རྒྱལ་བཤེས་གཉེན་བཟང་པོ་དང༌། །ཕྱག་ན་རིན་ཆེན་ཁྱབ་འཇུག་སྦས་པ་དང༌། །ཉི་མ་གྲགས་དང་ཤིན་ཏུ་བཟང་པོའི་མཆོད། །རྒྱལ་མཚོ་རྣམ་རྒྱལ་རྒྱལ་དཀའ་ཉི་མ་དང༌། །སྣ་ཚོགས་གཟུགས་དང་ཟླ་འོད་མཐའ་ཡས་དང༌། །ས་སྐྱོང་དཔལ་སྐྱོང་སེང་གེ་རྣམ་གནོན་དང༌། །སྟོབས་ཆེན་མ་འགགས་མི་ཡི་སེང་གེ་མཆོད། །དབང་ཕྱུག་ཆེན་པོ་མཐའ་ཡས་རྣམ་རྒྱལ་དང༌། །དྲག་པོ་ཞེས་བྱ་ཉི་ཤུ་རྩ་ལྔ་པོ། །ས་ཡི་འཁོར་ལོ་རྫོགས་པར་སྐྱོང་བ་སྟེ། །ཚངས་པ་ལྷ་དབང་ཕྱེད་ཕྱེད་སྐྱོང་རྣམས་མཆོད། །འོད་སྲུང་ལ་སོགས་དུམ་བུར་སྐྱོང་བ་བརྒྱད། །དེ་ལྟར་ས་སྐྱོང་སུམ་ཅུ་རྩ་ལྔ་ནི། །རིགས་ཀུན་གཅིག་ཏུ་མཛད་པ་གསང་སྔགས་ཀྱི། །རིགས་ལྡན་བརྒྱུད་པ་རྣམས་ལ་མཆོད་པ་འབུལ། །དུས་ཞབས་གཉིས་དང་ནཱ་ལེནྡྲ་པ་དང༌། །ཟླ་བ་མགོན་པོ་འབྲོ་སྟོན་ལོ་ཙཱ་དང༌། །ལྷ་རྗེ་སྒོམ་པ་སྒྲོ་སྟོན་གནམ་བརྩེགས་དང༌། །གྲུབ་ཆེན་ཡུ་མོ་རྣམས་ལ་མཆོད་པ་འབུལ། །ཆོས་ཀྱི་དབང་ཕྱུག་ནམ་མཁའ་འོད་ཟེར་དང༌། །སྤྲུལ་སྐུ་ཇོ་འབུམ་གྲུབ་ཐོབ་
སེ་ཆེན་དང༌། །ཆོས་རྗེ་འཇམ་གསར་ཆོས་སྐུ་འོད་ཟེར་དང༌། །ཀུན་སྤངས་ཆོས་རྗེ་རྣམས་ལ་མཆོད་པ་འབུལ། །བྱང་སེམས་ཆེན་པོ་ཡོན་ཏན་རྒྱ་མཚོ་དང༌། །ཀུན་མཁྱེན་ཆོས་རྗེ་སྒྲ་བསྒྱུར་སྐུ་མཆེད་དང༌། །ཕྱོགས་ལས་རྣམ་རྒྱལ་ཉ་དབོན་ཆོས་རྗེ་དང༌། །གྲུབ་ཆེན་ཀུན་བློ་རྣམས་ལ་མཆོད་པ་འབུལ། །འཇམ་དབྱངས་དཀོན་བཟང་ནམ་མཁའ་ཆོས་སྐྱོང་དང༌། །ནམ་མཁའ་དཔལ་བཟང་རཏྣ་བྷ་དྲ་དང༌། །གྲོལ་མཆོག་ཞབས་དང་ལུང་རིགས་རྒྱ་མཚོ་དང༌། །རྩ་བའི་བླ་མ་རྡོ་རྗེ་འཆང་ཆེན་ཏེ། །རྡོ་རྗེའི་རྣལ་འབྱོར་མངོན་སུམ་སྟོན་མཛད་པའི། །རྩ་བརྒྱུད་བླ་མ་རྣམས་ལ་མཆོད་པ་འབུལ། །ཨོཾ་ཀཱ་ལ་ཙཀྲ་ཡ་ཧཱུཾ་སྭཱཧཱ། ཨོཾ་ཨཱཿཧཱུཾ། ཨོཾ་བི་ཤྭ་མཱ་ཏ་ཧོཿཕྲཻཾ་སྭཱཧཱ། ཨོཾ་ཨ་ཨཱཿཨཾ་ཨཿཧ་ཧཱ་ཧཾ་ཧཿསྭཱཧཱ། ཨོཾ་ཨཱཿཧཱུཾ་ཧོཿ ཨ་ཨཱ་ཨི་ཨཱི་རྀ་རཱྀ་ཨུ་ཨཱུ་ལྀ་ལཱྀ་ཧ་ཧཱ་ཧི་ཧཱི་ཧུ་ཧཱུ་ཧླྀ་ཧླཱྀ་ཧཾ་ཧཿ ཨ་ཨཱ་ཨེ་ཨཻ་ཨར་ཨཱར་ཨོ་ཨཽ་ཨལ་ཨཱལ་ཧ་ཧཱ་ཡ་ཡཱ་ར་རཱ་ཝ་ཝཱ་ལ་ལཱ། ཨོཾ་ཨཱཿཧཱུཾ། ཨོཾ་སྐུ་བཞི་རྡོ་རྗེ་བཞི་ཡི་བདག་ཉིད་དང༌། །ཚད་མེད་རྣམ་ཐར་ཆོས་ཀྱི་ཕུང་པོ་དང༌། །དམ་ཆོས་སྟོན་པ་
འཕགས་པའི་ཚོགས་རྣམས་ཏེ། །སྐྱབས་གནས་དཀོན་མཆོག་གསུམ་ལ་མཆོད་པ་འབུལ། །དུས་འཁོར་རྡོར་སེམས་ཤཱཀྱ་ཐུབ་པ་དང༌། །ནུས་མ་བུམ་པ་བཅུ་དང་རྡོ་རྗེ་བཞི། །སངས་རྒྱས་བྱང་ཆུབ་སེམས་དང་ཁྲོ་བོའི་རྒྱལ། །རང་རང་ལྷ་མོར་བཅས་པ་རྣམས་ལ་མཆོད། །གཟུངས་མ་རྣལ་འབྱོར་མ་དང་འདོད་མ་དང༌། །ཚེས་ཀྱི་ལྷ་དང་གདེངས་ཅན་ཕྱིར་འདོད་མ། །རབ་གཏུམ་གཟའ་སྐར་ཕྱོགས་སྐྱོང་ཞིང་སྐྱོང་སོགས། །ཕྱེད་བཅས་བྱེ་བ་གསུམ་གྱི་འབྱུང་པོ་མཆོད། བླ་མ་ཡི་དམ་མཁའ་འགྲོའི་ཚོགས་བཅས་དང༌། །མཆོད་ཡུལ་རྒྱ་མཚོ་ཚོགས་ལ་མཆོད་པ་འབུལ། །འགྲོ་ཀུན་ཡེ་ཤེས་བདུད་རྩིའི་རྒྱ་མཚོ་ལ། །མཆོག་ཏུ་རོལ་པས་བདེ་ཆེན་ཐོབ་པར་ཤོག །ཨོཾ་ཨཱཿཧཱུཾ། ཨོཾ་གུ་རུ་བུདྡྷ་བོ་དྷི་སཏྭེ་བྷྱོཿན་མོ་ན་མཿ གཞན་ཡང་རྒྱུད་སྡེ་ཆེན་པོ་བཞི་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས་ཐམས་ཅད་ལ་མཆོད་པ་དམ་པ་འབུལ་ལོ། །ཨོཾ་ཨཱཿཧཱུཾ། བཀའ་སྡོད་ཆོས་སྐྱོང་བསྲུང་མ་ཐམས་ཅད་ལ༴ ཡུལ་བདག་གྲོང་བདག་གཉུག་མར་
གནས་པ་ཐམས་ཅད་ལ༴ ཟག་པ་མེད་པའི་བདེ་བས་རྒྱུད་ཚིམ་ནས་མྱུར་དུ་མངོན་པ་རྫོགས་པར་སངས་རྒྱ་བར་གྱུར་ཅིག །བསྟོད་པ་ནི། རོལ་ཆེན་དང་བཅས་ཏེ། མཆོག་སྦྱིན་རྡོ་རྗེ་མཆོག་ཁྱོད་འདུད། །ཅེས་པ་ནས། ཡེ་ཤེས་སྐུ་ཉིད་ཁྱོད་ལ་འདུད། །ཀྱི་བར་མཚན་བརྗོད་ཀྱི་འདུད་ཉི་ཤུས་བསྟོད། དེ་ནས་དྲིལ་བསིལ་དང་བཅས་ཏེ། སྟོང་ཉིད་སྙིང་རྗེའི་བདག་ཉིད་ཅན་སོགས། ཕྲ་རབ་རྡུལ་གྱི་ཆོས་ཉིད་འདས་སོགས། དུས་ཀྱི་འཁོར་ལོ་བདེ་ཆེན་པོ། །སྐུ་གསུམ་མཆོག་དང་དཀྱིལ་འཁོར་གསུམ། །རྡོ་རྗེ་གསུམ་མཆོག་རྡོ་རྗེ་དབྱིངས། །འགྱུར་བ་མེད་ལ་ཕྱག་འཚལ་ལོ། །རྣམ་རྟོག་སྒོམ་པ་ལས་འདས་པ། །ཕྱག་རྒྱ་ཆེན་པོ་མི་འགྱུར་བདེ། །གཟུང་བ་འཛིན་པ་དབྱིབས་དག་དང༌། །རྟོག་དག་དཔྱོད་པ་རྣམ་པར་སྤངས། །དྲི་ཟའི་གྲོང་ཁྱེར་རྣམ་པ་དང༌། །པྲ་ཕབ་པ་ཡི་རང་བཞིན་ཅན། །ཤེས་རབ་ཐབས་ཀྱི་བདག་ཉིད་སྦྱོར། །ཨེ་ཝཾ་ཡི་གེ་དེ་ལ་འདུད། །སངས་རྒྱས་ཀུན་གྱི་བསྐྱེད་མཛད་མ། །སྐྱེ་བ་དང་ནི་འཇིགས་པ་སྤངས། །ཀུན་ཏུ་བཟང་པོའི་སྤྱོད་པ་ཅན། །སྣ་ཚོགས་ཡུམ་དེ་ལ་ཕྱག་འཚལ། །ཨཱ་ལི་ཀཱ་ལི་སྙོམས་
འཇུག་དང༌། །ཧཱུཾ་ཕཊ་ཡི་གེ་སོགས་སྤངས་ཀྱང༌། །འགྱུར་བ་མེད་ལས་འཁྲུངས་པའི་སྐུ། །དུས་ཀྱི་འཁོར་ལོ་དེ་ལ་འདུད། །ཀུན་མཁྱེན་ཡེ་ཤེས་སྐུ་ཞེས་པ། ཁྱབ་བདག་ཉི་མ་ལྟ་བུའི་སྐུ། །པདྨའི་འདབ་མ་རྒྱས་པའི་སྤྱན། །དེ་ཉིད་བཅུ་དྲུག་དབྱེ་བ་ལས། །སྐུ་བཞིའི་བདག་ཉིད་སངས་རྒྱས་ནི། །རྡོ་རྗེ་སེང་གེའི་གདན་བཞུགས་པ། །ལྷ་དང་ལྷ་མིན་གྱིས་བསྟོད་སྔོན། །ཟླ་བཟང་གིས་གསོལ་དེ་ལ་འདུད། །རྣམ་པར་བཅས་ཀྱང་རྣམ་མེད་བཅོམ་ལྡན་འདས་མ་ཤེས་རབ་མ་སྟེ་དེ་ཡིས་འཁྱུད། །སྐྱེ་འཇིགས་སྤངས་པའི་འགྱུར་མེད་བདེ་བ་དང་ལྡན་རྒོད་པ་ལ་སོགས་བདེ་བ་སྤངས། །སངས་རྒྱས་རྣམས་ཀྱི་བསྐྱེད་མཛད་སྐུ་གསུམ་རྣམས་དང་ལྡན་ཞིང་དུས་གསུམ་ཡང་དག་རིག །ཀུན་མཁྱེན་མཆོག་གི་དང་པོའི་སངས་རྒྱས་བཅོམ་ལྡན་གཉིས་མེད་དེ་ཉིད་ལ་ཕྱག་འཚལ། །གང་ལ་ཐོག་མཐའ་དབུས་མེད་གནས་དང་འཆི་དང་སྲིད་པ་དང་ནི་སྒྲ་དང་དྲི་དང་རོ་དག་དང༌། །རེག་བྱ་གཟུགས་དང་སེམས་མེད་རང་བཞིན་དང་ནི་སྐྱེས་བུ་མེད་ཅིང་འཆིང་དང་གྲོལ་དང་བྱེད་པོ་མེད། །ས་བོན་དང་ནི་གསལ་བར་
དུས་མེད་མཐའ་དག་སྲིད་པའི་སྡུག་བསྔལ་བདེ་བ་ཉིད་ཀྱི་རང་བཞིན་མེད། །མྱ་ངན་འདས་པ་མཚན་མ་མེད་ཅིང་བྱེད་པ་རྣམས་བྲལ་ཡོན་ཏན་མེད་པ་དེ་ལ་ཕྱག་འཚལ་ལོ། །དུས་དང་སྣ་ཚོགས་ལ་སོགས་རྡོ་རྗེ་དང་ནི་སྐྱེས་བུ་དཔེ་མེད་ཀུན་འགྲོ་སྤྲོས་པ་མེད་པ་སྟེ། །ཐེར་ཟུག་ཏུ་གནས་སྙན་དང་ཤངས་དང་ཞལ་དང་སྤྱན་དང་དབུ་དང་ཕྱག་དང་ཞབས་ནི་ཐམས་ཅད་པ། །འབྱུང་པོའི་མཐའ་སྟེ་འབྱུང་པོའི་མགོན་པོ་མཆོག་གི་སྲིད་པ་གསུམ་འཛིན་རྒྱུ་རྣམས་དག་གི་རྒྱུར་གྱུར་པ། །རིག་པ་ལ་སོགས་རྣལ་འབྱོར་དག་གིས་རྟོག་བྱ་མཆོག་བདེའི་གོ་འཕང་དུས་ཀྱི་འཁོར་ལོ་ལ་ཕྱག་འཚལ། །སྤྲོ་བྱེད་ནུས་མའི་གཟུགས་གཞན་གློག་གི་མེ་དང་མཚུངས་ཤིང་ཉི་མ་བཅུ་གཉིས་དག་གི་གཟི་བརྗིད་ཅན། །ཡེ་ཤེས་རྡོ་རྗེའི་སྣང་བ་མཆོག་གི་གོ་འཕང་བགྲོད་བྱེད་རྣམ་པར་བཅད་པ་དེ་ལ་ཕྱག་འཚལ་ལོ། །དཀར་པོ་འཇིག་རྟེན་གསུམ་གྱི་མགོན་པོ་རི་བོང་འཛིན་པ་ལས་འཛག་འཇིག་རྟེན་སྤྱི་བོར་ཡང་དག་གནས། །བདུད་རྩི་འཆི་བ་སེལ་ཞིང་སྲིད་པའི་འཇིགས་པ་འཇོམས་པར་བྱེད་པ་ཐིག་ལེའི་གཟུགས་ལ་ཕྱག་འཚལ་ལོ། །སེམས་
ཙམ་སྔགས་ཀྱི་ངོ་བོ་ལྷ་ཡིས་ཡོངས་སུ་བསྐོར་བ་སྡུག་བསྔལ་དང་ནི་བདེ་བའི་རང་བཞིན་ཏེ། །དམ་པ་རྣམས་ལ་ཞི་བའི་གཟུགས་ནི་རང་གིས་བྱས་པའི་ཉམས་མྱོང་མི་ཟད་རྣམས་ལ་མི་ཟད་པ། །གང་གིས་ལས་གང་རབ་བྱས་རང་གི་སེམས་ལ་ཆོ་ག་བཞིན་དུ་དེ་ཡི་འབྲས་བུ་དེ་བསྐྱེད་པ། །འཇིག་རྟེན་དབང་པོ་སྣ་ཚོགས་གཟུགས་ཅན་སྲིད་གསུམ་བསྐྱེད་མཛད་རྡོ་རྗེ་སེམས་དཔའ་ལ་ཡང་ཕྱག་འཚལ་ལོ། །གཅིག་དང་དུ་མ་དག་ཀྱང་གཅིག་ཅིང་མཉམ་དང་མི་མཉམ་པ་དང་མཉམ་པ་གཡས་གཡོན་མདུན་རྒྱབ་དང༌། །སྟེང་འོག་ཀུན་ནས་དཀར་ལྗང་སྣ་ཚོགས་ཁ་དོག་ཆེན་པོ་གཅིག་གི་གཟུགས་ཏེ་ཐུང་ངུ་རིང་པོ་དང༌། །ཤིན་ཏུ་རིང་པོ་ཡོན་ཏན་མེད་ཅེས་ཡོན་ཏན་དང་བཅས་བུད་མེད་སྐྱེས་པའམ་སྐྱེས་པ་བུད་མེད་མིན། །གང་ཞིག་ཀུན་གྱི་རྟེན་གཅིག་བྷ་ག་བཟང་མོ་མཆོག་གི་བྷ་ག་ཁྱོད་ལ་འདུད་དེ་ཁྱོད་ལ་འདུད། །ཅེས་པ་ལ་སོགས་པ་ཇི་ལྟར་འོས་པས་བསྟོད། དེ་ནས་ཏིང་ངེ་འཛིན་གྱི་བདག་འཇུག་མི་བྱེད་ན། སྐབས་འདིར་སྒྲུབ་ཐབས་ནས་འབྱུང་བ་ལྟར་གཏོར་མ་ཕུལ་ལ་རྗེས་ཀྱིས་ཆོ་ག་རྣམས་བྱའོ། །
བདག་འཇུག་བྱེད་པར་འདོད་ན། ཐོག་མར་བུམ་པ་སྒྲུབ་དགོས་པས་བུམ་པ་སྒྲུབ་ཚུལ་ནི། བུམ་པ་བཅུའམ་ལྔ་ལ་སོགས་པ་ཡོད་ནའང་ལེགས་ལ། བསྡུ་ན་བུམ་པ་གཅིག་ཉིདལ་བུམ་པ་བཅུར་མོས་པས་ཆོག་སྟེ། བུམ་པའི་སྟེང་དུ་རྣམ་རྒྱལ་ཆེན་པོ་ཞེས་བྱ་བ་དུང་ཆོས་བཀོད། གཟུངས་ཐག་སོགས་ཀྱང་སྤྱི་དང་མཐུན་པར་ལག་ལེན་ལ་མཛད་དོ། །ཨོཾ་ཨཱཿཧཱུཾ་ཧྲཿཕཊ་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཧཾ་ཧཱཾ་ཧིཾ་ཧཱིཾ་ཧཱཾ་ཧཱུཾ་ཧླྀཾ་ཧླཱྀཾ་རྣམས་ཡོངས་སུ་གྱུར་པ་ལས། དབུས་སུ་ཁུ་བ་དང་རྡུལ་འགགས་པའི་བུམ་པ་གཉིས་དང༌། ཤར་དང་མེར་རྐང་འགགས་པའི་བུམ་པ་གཉིས་དང༌། ལྷོ་དང་བདེན་བྲལ་དུ་ཁྲག་འགགས་པའི་བུམ་པ་གཉིས་དང༌། བྱང་དང་དབང་ལྡན་དུ་གཅི་བ་འགགས་པའི་བུམ་པ་གཉིས་དང༌། །ནུབ་དང་རླུང་དུ་བཤང་བ་འགགས་པའི་བུམ་པ་གཉིས་ཏེ་བདུད་རྩིའི་བུམ་པ་དཀར་པོ་པདྨ་ལ་གནས་ཤིང་པདྨས་ཁ་བརྒྱན་པ་རྣམས་སུ་གྱུར། རང་གི་སྙིང་གར་ཟླ་བ་ཉི་མ་སྒྲ་གཅན་གྱི་སྟེང་དུ། ཧཱུཾ་ལས་བྱུང་བའི་རྡོ་རྗེ་ཡོངས་སུ་གྱུར་པ་ལས་དུས་ཀྱི་འཁོར་ལོ་སྣ་ཚོགས་ཡུམ་དང་བཅས་པར་གསལ་བའི་ཡབ་ཀྱི་ཐུགས་ཀར་ཟླ་བ་དང༌།
ཡུམ་གྱི་ཐུགས་ཀར་ཉི་མའི་དཀྱིལ་འཁོར་ཏེ། དེ་དག་ཁ་སྦྱར་བ་ལས་རྡོ་རྗེ་ལྕགས་ཀྱུ་དྲི་མ་མེད་པའི་འོད་ཟེར་འཕྲོ་བ་སྤྲོས་ནས་ཕྱོགས་བཅུའི་སངས་རྒྱས་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་སྤྱན་དྲངས། ཛཿཧཱུཾ་བཾ་ཧོཿ རྡོ་རྗེ་བདུད་རྩིའི་བུམ་པ་རྣམས་དང་རོ་གཅིག་ཏུ་གྱུར། ཨོཾ་ཧཾ་ཧཱཾ་ཧིཾ་ཧཱིཾ་ཧུཾ་ཧཱུཾ་ཧླྀཾ་ཧླཱྀཾ་བཛྲ་པདྨ་ཨ་མྲྀ་ཏ་གྷ་ཊ་སུ་བི་ཤུདྡྷ་དྷརྨ་དྷཱ་ཏུ་སྭ་བྷཱ་ཝ་སརྦ་དྷརྨཱན། སུ་བི་ཤུདྡྷ་དྷརྨ་དྷཱ་ཏུ་སྭ་བྷཱ་ཝཱན་ཀུ་རུ་ཀུ་རུ་སྭཱཧཱ། ཞེས་པ་མང་དུ་བཟླས། ཨོཾ་བཛྲ་གནྡྷཾཾ་པྲ་ཏཱིཙྪ་ན་མཿ ནས། ཀཱ་མཾ་པྲ་ཏཱིཙྪ་ན་མཿ ཞེས་པའི་བར་མཆོད་པ་བཅུ་གཉིས་འབུལ། དེ་དག་ནི་བུམ་པ་སྒྲུབ་པའི་ཆོ་གའོ། །དེ་ནས་ལྷག་གནས་ཀྱི་དོན་དུ་མཎྜལ་ཕུལ། སྐྱེ་རྒ་འཆི་བ་ན་ཀྲ་ཡི། །ཆུ་སྲིན་ལ་སོགས་འཇིགས་རུང་བ། །འཁོར་བའི་མཚོ་ལས་བདག་སྒྲོལ་མཛོད། །དགའ་ཆེན་སྟོན་པ་ཁྱོད་གཅིག་པུ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། སྐྱབས་གསུམ་དག་
ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཅེས་ལན་གསུམ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །ཞེས་པ་ལན་གསུམ་གྱིས་སྐྱབས་འགྲོ་སེམས་བསྐྱེད་བཟུང༌། སྲས་བཅས་སངས་རྒྱས་ཐམས་ཅད་དང༌། །དཔའ་བོ་རྣལ་འབྱོར་མ་རྣམས་ཀུན། །ཐམས་ཅད་བདག་ལ་དགོངས་སུ་གསོལ། །རིག་པ་འཛིན་པ་བདག་གིས་ནི། །དུས་འདི་ནས་ནི་གཟུང་ནས་སུ། །ཇི་སྲིད་བྱང་ཆུབ་སྙིང་པོའི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་
རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་བཟུང༌། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང༌། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ཡང་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་བཟུང༌། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང༌། །མ་བསྒྲལ་པ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་
འགོད། །ཅེས་ལན་གསུམ་གྱིས་རིགས་ལྔའི་སྡོམ་པ་བཟུང༌། ཨོཾ་ཨཱཿཧཱུཾ་ཧོཿཧཾ་ཀྵཿབཛྲ་དན་ཏཱ་ཀཱཥྛ་ཙ་ཏུར་བི་མོཀྵ་མུ་ཁ་བི་ཤུདྡྷེཿསྭ་བྷཱ་ཝཾ་ཀཱ་ཡ་ཝཱཀ་ཙིཏྟ་ཛྙཱ་ན་མུ་ཁ་དན་ཏ་ཨཱ་དྷི་མ་ལཾ་བི་ཤོ་དྷ་ཡ་བི་ཤོ་དྷ་ཡ་སྭཱཧཱ། རང་གི་དཔྲལ་པར་ཟླ་བའི་དཀྱིལ་འཁོར་ལ་ཨོཾ། མགྲིན་པར་ཉི་མའི་དཀྱིལ་འཁོར་ལ་ཨཱཿ སྙིང་གར་སྒྲ་གཅན་གྱི་དཀྱིལ་འཁོར་ལ་ཧཱུཾ། ལྟེ་བར་དུས་མའི་དཀྱིལ་འཁོར་ལ་ཧོཿ གཙུག་ཏོར་དུ་ནམ་མཁའི་དཀྱིལ་འཁོར་ལ་ཧཾ། གསང་བར་ཡེ་ཤེས་ཀྱི་དཀྱིལ་འཁོར་ལ་ཀྵཿརྣམས་སུ་གྱུར། ཨོཾ་ཨ་ཨཱ་ཨཾ་ཨཿབཛྲ་སཏྭ་མཧཱ་སུ་ཁ་ཀཱ་ལ་ཙཀྲ་བཛྲ་ཤི་ཥྱ་སྱ་ཨ་བྷི་མུ་ཁོ་ཏ་བྷ་ཝ་སནྟུ་ཥྟོ་བྷ་ཝ་ཝ་ར་དོ་བྷ་ཝ་ཀཱ་ཡ་ཝཱཀ་ཙིཏྟ་ཨདྷིཥྛ་ནཾ་ཀུ་རུ་ཀུ་རུ་སྭཱཧཱ། ཞེས་ལན་གསུམ་ལ་སོགས་པ་བརྗོད་ཅིང་རོལ་མོའི་སྒྲ་བྱ་སྟེ་རྡོ་རྗེ་སེམས་དཔའ་བསྐུལ་བའོ། །དངོས་གཞི་དཀྱིལ་འཁོར་དུ་འཇུག་པའི་དོན་དུ་མཎྜལ་ཕུལ། མི་ཟད་འཁོར་བས་འཇིགས་པས་བདག་ནི་དེ་རིང་ཉིད་ནས་རྒྱལ་བ་རྣམས་ལ་སྐྱབས་སུ་ལྷག་པར་མཆི། ཁྱོད་ཀྱི་ཞབས་ཀྱི་ཆུ་སྐྱེས་ངེས་པར་སྲིད་པར་འཇིགས་འཕྲོག་དག་ལ་ལུས་ངག་སེམས་ནི་དག་
པས་སོ། །ལན་གསུམ། འདོད་པའི་རྡོ་རྗེ་ལ་ནི་རྡོ་རྗེ་དྲིལ་བུ་ཕྱག་རྒྱ་བླ་མ་དག་ཀྱང་སྤྱི་བོས་བཟུང་བར་བགྱི། །རིན་ཆེན་ལ་ནི་སྦྱིན་པ་སྦྱིན་བགྱི་འཁོར་ལོ་འདི་ལ་རྒྱལ་བ་མཆོག་གི་དམ་ཚིག་བསྐྱང་བར་བགྱི། །རལ་གྲི་ལ་ནི་མཆོད་པ་བགྱི་སྟེ་གསལ་བར་ཆུ་སྐྱེས་རིགས་ལ་སྡོམ་པ་དག་ཀྱང་བསྐྱང་བར་བགྱི། །སེམས་ཅན་རྣམས་ནི་ཐར་པའི་སླད་དུ་རྒྱལ་བ་བསྐྱེད་མཛད་རིགས་ལ་བྱང་ཆུབ་བདག་གིས་བསྐྱེད་པར་བགྱི། །དཔྲལ་པར་ཟླ་བའི་དཀྱིལ་འཁོར་ལ་ཨོཾ། སོགས་གོང་བཞིན་བཀོད། ཨོཾ་ཨཱཿཧཱུཾ་བདུད་རྩི་མྱང༌། སངས་རྒྱས་བྱང་ཆུབ་སེམས་དཔའ་ཁྲོ་བོའི་དབང་པོ་བཙུན་མོར་བཅས་པ་ཐམས་ཅད་སྤྱན་དྲངས་ཏེ་རང་གི་སྙིང་གར་ཐིམ། ཨོཾ་ཨཿར་ར་ར་ར་ལ་ལ་ལ་ལ་བཛྲ་ཨཱ་བེ་ཤ་ཡ་ཧཱུཾ། ཞེས་རོལ་མོའི་སྒྲ་དང་བཅས་ཏེ་ཡེ་ཤེས་དབབ། ཨོཾ་ཨཱཿཧཱུཾ་ཧོཿཧཾ་ཀྵཿ འཚེ་དང་མི་བདེན་གཞན་གྱི་བུད་མེད་སྤང་བྱ་གཞན་གྱི་ནོར་དང་ཆང་གི་བཏུང་བ་དེ་བཞིན་ཉིད། །འཁོར་བར་རྡོ་རྗེའི་ཞགས་པ་དག་སྟེ་རང་གི་དགེ་བ་འཇོམས་བྱེད་སྡིག་པ་ལྔ་པོ་འདི་རྣམས་སོ། །གང་ཞིག་གང་གི་དུས་སུ་
བྱུང་བའི་ལྷ་དང་མི་ཡི་བླ་མ་དེ་ཡི་མཚན་གྱིས་རབ་སྦྱིན་བྱ། །སྣ་ཚོགས་གཙོ་བོའི་བཀའ་འདིས་སྲིད་པའི་འཇིགས་པ་འཇོམས་པ་དག་སྟེ་ཁྱོད་ཀྱིས་ཀྱང་ནི་བསྐྱང་བར་བྱ། །ཆོ་ལོ་ཁ་ན་མ་ཐོ་བཅས་པའི་ཟས་དང་ཚིག་ངན་ཀློག་དང་འབྱུང་པོ་ལྷ་མིན་དབང་པོའི་ཆོས། །བ་ལང་བྱིས་པ་བུད་མེད་སྐྱེས་པ་རྣམས་དང་ལྷ་མིའི་བླ་མ་གསོད་པ་ལྔ་ནི་མི་བྱའོ། །གྲོགས་པོ་རྗེ་བོ་རྣམས་དང་ལྷ་དང་མི་ཡི་བླ་མ་དགེ་འདུན་ཡིད་བརྟན་རྣམས་ལ་འཁུ་བ་ཡང༌། །དབང་པོ་རྣམས་ནི་ཀུན་ནས་ཆགས་པ་དག་སྟེ་དེ་ལྟར་སྲིད་པའི་བདག་པོའི་བརྟུལ་ཞུགས་ཉི་ཤུ་ལྔ། །ཞེས་ཚར་གཅིག་བརྗོད། སྲིད་པའི་འཇིགས་པ་འཇོམས་མཛད་པའི། །བརྟུལ་ཞུགས་ཉི་ཤུ་རྩ་ལྔ་པོ། །སྣ་ཚོགས་གཙོ་བོའི་གསུང་ཇི་བཞིན། །བདག་གིས་བརྟན་པོར་བཟུང་བར་བགྱི། །ལན་གསུམ། ཨོཾ་དྭཱ་ད་ཤ་ཨཾ་ག་ནི་རོ་དྷ་ཀཱ་རི་ཎེ་ཧཱུཾ་ཕཊ། མིག་དར་བཅིངས་ཤིང་གོས་སེར་པོ་བགོས་པར་མོས། ཨོཾ་ཨཱཿཧཱུཾ་ཧོཿཧཾ་ཀྵཿ ལན་གཅིག ཨོཾ་ཨཱཿཧཱུཾ་ལན་བདུན། ཨོཾ་སརྦ་ཏ་ཐཱ་ག་ཏཱ་ཀུ་ལ་བི་ཤྭ་དྷ་ནི་སྭཱཧཱ། ཞེས་མེ་ཏོག་ཕུལ་བར་མོས།
ཨོཾ་དི་བྱཻནྣ་ཡཱ་ཎྱཱུཊ་གྷ་ཊ་སྭཱཧཱ། ཨོཾ་དི་བྱཡ་ན་མུད་གྷཱ་ཊ་ཡཱ་མི་སྭཱཧཱ། ཞེས་མིག་དར་ཕྱེ་བས་དཀྱིལ་འཁོར་མཐོང་བར་མོས། དེ་ནས་མཎྜལ་ཚོམ་བུ་དགུ་མ་ཕུལ། བདག་གཞན་ལུས་ངག་ཡིད་གསུམ་དུས་གསུམ་དགེ་ཚོགས་བཅས། །རིན་ཆེན་མཎྜལ་ཀུན་བཟང་མཆོད་པའི་ཚོགས་བཅས་པ། །བློ་ཡིས་བླངས་ནས་བླ་མ་དཀྱིལ་འཁོར་ལྷ་ལ་འབུལ། །ཐུགས་རྗེའི་དབང་གིས་བཞེས་ནས་བྱིན་གྱིས་བརླབ་ཏུ་གསོལ། །ཅེས་བརྗོད། རང་གི་སྙིང་ག་ནས་འོད་ཟེར་འཕྲོས། དབང་གི་ལྷ་འཁོར་དང་བཅས་པ་བཛྲ་ས་མཱ་ཛཿ ཨོཾ་བཛྲ་གནྡྷཾ་ནས། ཀཱ་མཾ་པྲ་ཏཱིཙྪ་ན་མཿ ཨོཾ་བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་ལུས་སྐྱེད་བྱེད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །ཨོཾ་ཕུན་སུམ་ཚོགས་པ་མངའ་བ་སོགས་ཀྱང་བརྗོད། སྒྲིབ་པ་ཀུན་སྤངས་དུས་ཀྱི་འཁོར་ལོ་དང༌། །བླ་མ་དབྱེར་མེད་ཡེ་ཤེས་སྐུ་ཁྱོད་ལ། །ཕྱི་ནང་མཆོད་རྫས་བཟང་དགུ་
འབུལ་བར་བགྱི། །འཇིག་རྟེན་འཇིག་རྟེན་འདས་པའི་དབང་རབ་སྩོལ། །ཅེས་ལན་གསུམ་གསོལ་བ་བཏབ། དུང་ཆོས་ཀྱི་ཆུ་གནས་ལྔར་གཏོར། ཨོཾ་ཨཱཿཨཱི་རཱྀ་ཨཱུ་ལཱྀ་པཉྩ་དྷཱ་ཏུ་བི་ཤོ་དྷ་ནི་སྭཱཧཱ། ཁམས་ལྔ་སྦྱོང་བྱེད་ཡེ་ཤེས་བདུད་རྩི་འདིས། །གནས་ལྔར་དབང་སྐུར་རང་བཞིན་གཉུག་མ་ཡི། །གཤེགས་མ་ཡུལ་ལྔའི་དངོས་གྲུབ་མྱུར་རྟོགས་ནས། །འབྲས་བུ་ས་ནི་དང་པོ་ཐོབ་གྱུར་ཅིག །ཨོཾ་ཨ་ཨི་རྀ་ཨུ་ལྀ་པཉྪ་ཏ་ཐཱ་ག་ཏ་པ་རི་ཤུདྡྷ་སྭཱཧཱ། ཕུང་པོ་ལྔ་རྣམས་སྦྱོང་བྱེད་ཅོད་པན་འདིས། །གནས་ལྔར་དབང་བསྐུར་རང་བཞིན་གཉུག་མ་ཡི། །རྒྱལ་བ་རིགས་ལྔའི་དངོས་གྲུབ་མྱུར་རྟོགས་ནས། །འབྲས་བུ་ས་ནི་གཉིས་པ་ཐོབ་གྱུར་ཅིག །ཨོཾ་ཨ་ཨཱ་ཨཾ་ཨཱཿཧ་ཧཱ་ཧཾ་ཧཱ་ཕྲཻཾ་ཧོཿད་ཤ་པ་ར་མི་ཏཱ་པ་རི་པུ་ར་ཎི་སྭཱཧཱ། རླུང་བཅུ་སྦྱོང་བྱེད་དར་དཔྱངས་ཕྲེང་བ་འདིས། །གནས་ལྔར༴ ནུས་མ་བཅུ་ཡི་དངོས་གྲུབ་མྱུར་རྟོགས་ནས། །འབྲས་བུ་ས་ནི་གསུམ་པ༴ ཨོཾ་ཧཱུཾ་ཧོཿསཱུརྱ་ཙནྡྲ་བི་ཤྭ་དྷ་ཀ་སྭཱཧཱ། རོ་རྐྱང་སྦྱོང་བྱེད་རྡོ་རྗེ་དྲིལ་བུ་འདིས། །གནས་ལྔར༴ གཙོ་བོ་ཡབ་ཡུམ་
དངོས་གྲུབ༴ འབྲས་བུ་ས་ནི་བཞི་པ༴ ཨོཾ་ཨ་ཨཱ་ཨེ་ཨཻ་ཨར་ཨཱར་ཨོ་ཨཽ་ཨལ་ཨཱལ། བི་ཥ་ཡ་ཨིནྡྲཱ་ཡ་བི་ཤོ་དྷ་ནི་སྭཱཧཱ། དབང་ཡུལ་སྦྱོང་བྱེད་མེ་ཏོག་སིལ་མ་འདིས། །གནས་ལྔར༴ སེམས་དཔའ་ཡབ་ཡུམ་དངོས་གྲུབ༴ འབྲས་བུ་ས་ནི་ལྔ་པ༴ ཨོཾ་ཧ་ཧཱ་ཡ་ཡཱ་ར་རཱ་ཝ་ཝཱ་ལ་ལཱ་ཙ་ཏུརྦྲ་ཧྨ་བི་ཧཱ་ར་བི་ཤུདྡྷེ་སྭཱཧཱ། ཀྱེ་དཔལ་བརྗོད་ཅིང་གསང་བའི་མིང་དྲན་པར་བྱ། ལས་དབང་བྱ་བ་སྦྱོང་བྱེད་གདུ་བུ་འདིས། །གནས་ལྔར༴ ཁྲོ་བོ་ཡབ་ཡུམ་དངོས་གྲུབ༴ འབྲས་བུ་ས་ནི་དྲུག་པ༴ ཨོཾ་ཧཾ་ཀྵཿདྷརྨཱ་ཙཀྲ་པྲ་བརྡྷ་ཀ་སྭཱཧཱ། འགྱུར་བདེ་སྦྱོང་བྱེད་ཆོས་ཀྱི་འཁོར་ལོ་འདིས། །གནས་ལྔར༴ རྡོར་སེམས་ཡབ་ཡུམ་དངོས་གྲུབ༴ འབྲས་བུ་ས་ནི་བདུན་པ༴ སླར་ཡང་རང་གི་ལག་ཏུ་རྡོ་རྗེ་དང་དྲིལ་བུ་སྦྱིན་པར་གྱུར། ངེས་པར་རྡོ་རྗེའི་རིགས་དག་ལ་ནི་སྲོག་གཅོད་བྱ་སྟེ་རལ་གྲི་ལ་ཡང་བདེན་པ་མིན་པའི་ཚིག །རིན་ཆེན་ལ་ནི་གཞན་ནོར་དབྲོག་བྱ་མཆོག་གི་པདྨའི་རིགས་ཉིད་ལ་ཡང་གཞན་གྱི་བུད་མེད་དབྲོག །ཆང་དང་སྒྲོན་མ་
སངས་རྒྱས་རྣམས་དང་བཟང་པོའི་ཡུལ་རྣམས་མཐའ་དག་འཁོར་ལོ་ལ་ནི་བསྐྱང་བར་བྱ། །གཡུང་མོ་ལ་སོགས་མཐའ་དག་བུད་མེད་རྣམས་ནི་གྲི་གུག་ལ་ཡང་མཁའ་ཡི་པདྨར་སྨད་མི་བྱ། །སེམས་ཅན་དོན་གྱི་སླད་དུ་ནོར་དང་བཅས་པའི་ལུས་འདི་སྦྱིན་པར་བྱ་སྟེ་ཁྱོད་ཀྱིས་བསྲུང་མི་བྱ། །རིགས་ཀྱི་བུ་ཀྱེ་སངས་རྒྱས་ཉིད་དུ་འགྱུར་བ་བཞན་དུ་མཐའ་ཡས་བསྐལ་པས་མིན་པར་རྒྱལ་བས་གསུངས། །ཞེས་བརྗོད་དེ་ནས་དམ་ཚིག་རྣམས་དྲན་པར་བྱ་སྟེ། གལ་ཏེ་གཡོ་སྒྱུའི་དབང་གིས་རྩ་བའི་ལྟུང་བ་བྱུང་ན་དམྱལ་བར་འགྲོ་སྟེ་འདི་དག་སྡུག་བསྔལ་ལོ། །དཔལ་ལྡན་བླ་མའི་ཐུགས་དཀྲུགས་པ་ལས་བུ་རྣམས་ཀྱི་ནི་རྩ་བའི་ལྟུང་བ་རི་བོང་འཛིན་པར་གྱུར། །དེ་ཡི་བཀའ་ལས་འགོངས་པས་གཞན་དུ་འགྱུར་ཏེ་ངེས་པར་དེ་བཞིན་སྤྱན་ལ་ཁྲོས་པས་གསུམ་པའོ། །བྱམས་པ་བཏང་བས་བཞི་པར་འགྱུར་ཏེབྱང་ཆུབ་སེམས་ནི་རབ་ཏུ་ཉམས་པ་ལས་ཀྱང་མདའ་རུ་འགྱུར། །དྲུག་པ་གྲུབ་པའི་མཐའ་ལ་སྨོད་པ་རི་བོ་དག་ཀྱང་མ་སྨིན་མི་
ལ་གསང་བ་སྦྱིན་ལས་སོ། །ཕུང་པོ་ཉོན་མོངས་པ་ལས་ཀླུ་རུ་འགྱུར་ཏེ་སླར་ཡང་དགུ་པ་དག་པའི་ཆོས་ལ་མ་དག་གང༌། །རྒྱུ་ཡི་བྱམས་པ་དང་ནི་མིང་སོགས་བྲལ་བ་བདེ་བ་སྟེར་ལ་རྟོག་པ་ཕྱོགས་དང་དྲག་པོའོ། །དག་པའི་སེམས་ཅན་དག་ལ་སྐྱོན་བརྗོད་པ་ལས་ཉི་མ་དམ་ཚིག་ཐོབ་པ་གཏོང་བ་ལས་ཀྱང་གཞན། །བུད་མེད་ཐམས་ཅད་ལ་སྨོད་ངེས་པར་མ་ནུར་འགྱུར་ཏེ་རྡོ་རྗེའི་ཐེག་པར་གནས་པ་རྣམས་པའོ། །ཞེས་བརྗོད། དབང་གོང་མའི་དོན་དུ་གསོལ་བ་འདེབས་པ་ནི། སྒྲིབ་པ་ཐམས་ཅད་བཅོམ་པ་ཡི། །དུས་ཀྱི་འཁོར་ལོ་ཁྱོད་ལ་འདུད། །མཆོག་ཏུ་མི་འགྱུར་བདེས་གང་བ། །ཡེ་ཤེས་སྐུ་ཁྱོད་ལ་ཕྱག་འཚལ། །སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་ནི་འགྱུར་མེད་གང༌། །དབང་བསྐུར་དེ་ཡིས་བདག་ལ་ནི། །མགོན་པོ་ད་ནི་བཀའ་དྲིན་མཛོད། །བུ་དང་ཆུང་མ་སོགས་བཅས་པ། །བདག་ནི་དུས་ཀུན་ཁྱོད་ཀྱི་འབངས། །ཇི་སྲིད་བྱང་ཆུབ་སྙིང་པོའི་བར། །བདག་ལ་སྐྱབས་གཞན་ཡོད་མ་ཡིན། །ཅེས་
དབང་གོང་མ་སྤྱིར་གསོལ་བ་བཏབ། ཨོཾ་ཨོཾ་པྲཛྙཱ་ཨུ་པཱ་ཡཽ་ཀ་ལ་ཤ་ཨ་བྷི་ཥེ་ཀཾ་མེ་ད་དཱ་ཏཾ་ཧུཾ་ཧཱུཾ་ཕཊ། སད་པའི་གནས་སྐབས་སྦྱོང་བྱེད་བུམ་དབང་གིས། །དགེ་ཚུལ་རྡོ་རྗེ་འཛིན་པར་དབང་བསྐུར་བས། །སྒྱུ་འཕྲུལ་དྲྭ་བས་མངོན་པར་བྱང་ཆུབ་སྟེ། །འབྲས་བུ་ས་ནི་བརྒྱད་པ་ཐོབ་གྱུར་ཅིག །ཨོཾ་ཨཱཿཔྲཛྙཱ་ཨུ་པཱ་ཡོ་གུ་ཧྱ་ཨ་བྷི་ཥེ་ཀཾ་མེ་ད་དཱ་ཏཾ་ཧུཾ་ཧཱུཾ་ཕཊ། བདུད་རྩི་བྱང་ཆུབ་ཀྱི་སེམས་མྱངས་ཤིང་གསང་བའི་དཀྱིལ་འཁོར་མཐོང་བར་གྱུར། རྨི་ལམ་གནས་སྐབས་སྦྱོང་བྱེད་གསང་དབང་གིས། །དགེ་སློང་རྡོ་རྗེ་འཛིན་པར་དབང་བསྐུར་བས། །རྣམ་པ་ཉི་ཤུས་མངོན་པར་བྱང་ཆུབ་སྟེ། །འབྲས་བུ་ས་ནི་དགུ་པ་ཐོབ་པར་ཤོག །ཨོཾ་ཧཱུཾ་པྲཛྙཱ་ཨུ་པཱ་ཡོ་བཛྲ་སཏྭ་བི་ཤྭཱ་མཱ་ཏ་རཽ་པྲཛྙཱ་ཛྙཱ་ན་ཨ་བྷི་ཥེ་ཀཾ་མེ་ད་དཱ་ཏཾ་ཧུཾ་ཧཱུཾ་ཕཊ། ལག་བཅངས་དང་གཉིས་སྤྱོད་ཀྱི་བདེ་བ་འཕོ་མེད་དུ་མྱོང་བར་གྱུར། ཨོཾ་ཛྙཱ་ན་པཱུ་ཛ་ཨ་ནུ་རཀྟོ་སྭ་བྷཱ་ཝ་ཨཱཏྨ་ཀོ྅ཧཾ། གཉིད་འཐུག་གནས་སྐབས་སྦྱོང་བྱེད་གསུམ་པ་འདིས། །གནས་བརྟན་རྡོ་རྗེ་འཛིན་པར་དབང་བསྐུར་བས། །
རྣམ་པ་ལྔ་ཡིས་མངོན་པར་བྱང་ཆུབ་སྟེ། །འབྲས་བུ་ཕྱོགས་དང་དྲག་པོའི་ས་ཐོབ་ཤོག །བཅོམ་ལྡན་འདས་བདག་ལ་དབང་བསྐུར་བའི་རབ་ཏུ་བྱེད་པའི་བཀའ་དྲིན་གནང་བར་མཛད་དུ་གསོལ། ལན་གསུམ། ཆགས་བྲལ་དང་པོ་ཆགས་པ་ཆེ། ཁ་དོག་སྣ་ཚོགས་འབར་བའི་འོད། །རྡོ་རྗེ་རྫོགས་སངས་རྒྱས་པའི་གནས། །སངས་རྒྱས་བརྗོད་པའི་ཆོས་འཛིན་པ། །རྣམ་པ་ཀུན་ལྡན་རྣམ་པ་མེད། །བཅུ་དྲུག་ཕྱེད་ཕྱེད་ཐིག་ལེ་འཆང༌། །ཆ་མེད་ཆ་ལས་འདས་པ་པོ། །བསམ་གཏན་བཞི་པའི་རྩེ་མོ་འཆང༌། །ཨོཾ་ཧོཿཔྲཛྙཱ་ཨུ་པ་ཡ་ཨཱཏྨ་ཀཾ་བཛྲ་སཏྭ་མཧཱ་མུ་དྲ་ཛྙཱ་ན་ཨཱ་བྷི་ཥེ་ཀཾ་མེ་པྲ་ཡཙྪ་ཨོཾ་ཨཱཿཧཱུཾ་ཧོཿཕཊ། དངོས་པོ་མེད་ལ་སྒོམ་པ་མེད། །སྒོམ་པ་སྒོམ་པ་ཉིད་མ་ཡིན། །དེ་ལྟར་དངོས་པོ་དངོས་མེད་པས། །སྒོམ་པ་དམིགས་སུ་མེད་པའོ། །ཆགས་རྟོག་གནས་སྐབས་སྦྱོང་བྱེད་བཞི་པ་འདིས། །སྐྱེ་རྒུའི་བདག་པོ་ཆེན་པོར་དབང་བསྐུར་བས། །སྐད་ཅིག་གཅིག་གིས་མངོན་པར་བྱང་ཆུབ་སྟེ། །འབྲས་བུ་ས་ནི་བཅུ་
གཉིས་ཐོབ་པར་ཤོག །དེ་ནས་དམ་ཚིག་ཁས་བླང་པ་ནི། དུས་འདི་ནས་ནི་གཟུང་ནས་སུ། །ཇི་སྲིད་བྱང་ཆུབ་སྙིང་པོའི་བར། །སངས་རྒྱས་དང་ནི་བྱང་ཆུབ་སེམས། །དཔལ་ལྡན་བླ་མ་ཁྱོད་སྤངས་ནས། །བླ་མ་གཞན་དག་རྨི་ལམ་དུའང༌། །སྲོག་དོར་ནས་ནི་བསྟེན་མི་བྱ། །གཞན་ཡང་དེ་བཞིན་དུས་གསུམ་དུ། །གཡོ་སྒྱུ་མེད་པར་ནུས་ཚད་ཀྱིས། །ལུས་ངག་སེམས་དང་གསུམ་པོ་འདི། །གཙོ་བོའི་སྤྱན་སྔར་དབུལ་བར་བགྱི། །དེ་ནས་རྗེས་ནི། གཙོ་བོས་ཇི་ལྟར་བཀའ་སྩལ་བ་སོགས། བཀའ་དྲིན་གཏང་རག་གི་ཡོན་དུ་མཎྜལ་དང༌། དེང་ནས་བརྩམས་ཏེ་སོགས་བརྗོད་དེ་དབང་བཅུ་གཅིག་གི་བདག་འཇུག་ཏིང་ངེ་འཛིན་ཙམ་གྱི་སྒོ་ནས་བླང་བའོ། །དེ་ནས་རྣལ་འབྱོར་མ་རིགས་བརྒྱའི་མཆོད་པ་མི་བྱེད་ན། ཨོཾ་ཨཱཿཧཱུཾ་ཧྲཿཕཊ་ཀྱིས་གཏོར་མ་བསངས་པ་ནས། འབྱུང་པོའི་འཁོར་ལོ་རྣམས་གཤེགས་སུ་གསོལ་གྱི་བར་སྒྲུབ་ཐབས་ནས་འབྱུང་བ་ལྟར་གཏོར་ཆོག་བྱས་ལ། འཁོར་ལོའི་མཆོད་པ་སོགས་བྱེད་ནའང་སྐབས་འདིར་བྱེད་པ་ཡིན་ཏེ། དེ་དག་གི་མཐར་རྗེས་ཆོག་བྱའོ། །གལ་ཏེ་རྣལ་འབྱོར་མ་རིགས་བརྒྱའི་མཆོད་པ་བྱེད་ན།
སྡེ་དྲུག་གི་གཏོར་ཆོག་ཀྱང་དེའི་ཞོར་ལ་སྦྱར་ཏེ་ཆབས་ཅིག་ཏུ་གྲུབ་པར་བྱས་ན་ལེགས་སོ། །རྣལ་འབྱོར་མ་སུམ་ཅུ་རྩ་བདུན་མཆོད་པ་དང༌། རྣལ་འབྱོར་མ་དྲུག་ཅུ་རྩ་བཞི་མཆོད་པ་ཡང་མཆོད་ཆོག་མི་འདྲ་བ་རེ་རེ་ཡིན་པའི་ཕྱིར། སྡེ་དྲུག་དང་སོ་བདུན་དང་དྲུག་ཅུ་རྩ་བཞི་རྣམས་གཅིག་གི་ཡན་ལག་ཏུ་ཅིག་ཤོས་ངེས་པར་སྦྱོར་དགོས་པ་ནི་མ་ཡིན་ནོ། །འོན་ཀྱང་རྣལ་འབྱོར་མ་སོ་བདུན་དང་དྲུག་ཅུ་རྩ་བཞི་གཉིས་ཀ་དུས་མཉམ་དུ་མཆོད་པ་ལ་རྣལ་འབྱོར་མ་རིགས་བརྒྱ་མཆོད་པ་ཞེས་གྲགས་ཤིང༌། མཆོད་ཆོག་ལོགས་པ་གཅིག་ཏུ་འགྱུར་ལ། སྡེ་དྲུག་གི་གཏོར་ཆོག་ནི། རྣལ་འབྱོར་མ་མཆོད་པའི་ཡན་ལག་མིན་ཀྱང་མཎྜལ་སྒྲུབ་མཆོད་ཀྱི་ཆ་ལག་ཏུ་ངེས་པར་དགོས་པའི་ཕྱིར་དང༌། རིགས་བརྒྱ་དང་ལྷན་ཅིག་ཏུ་མཆོད་ན་ཐབས་ཤེས་ཀྱི་ལྷ་ཆ་ཚང་ཞིང་འཕྲིན་ལས་མཐའ་དག་སྒྲུབ་པ་ལ་སྟོབས་ཆེ་བར་འགྱུར་བས་ཀྱང་ཤིན་ཏུ་ལེགས་པ་ཁོ་ནའོ། །དེ་ལ་རྣལ་འབྱོར་མ་སུམ་ཅུ་རྩ་བདུན་ནམ་རིགས་བརྒྱའི་དཀྱིལ་འཁོར་རས་བྲིས་ལ་སོགས་པ་ཡོད་ན་བཀྲམ། གལ་དེ་མེད་ན་མཎྜལ་ཟླུམ་སྐོར་ལྔ་པ་འདྲི་བའམ། མཎྜལ་གཅིག་ལ་ལྷ་སུམ་ཅུ་རྩ་བདུན་ཐོད་པ་བཞི་དང་བཅས་པའི་ཚོམ་བུ་བཀོད། དེའི་ཕྱི་རོལ་ཕྱོགས་མཚམས་བརྒྱད་དུ་ཚོམ་བུ་དགུ་པ་རེ་རེ་འགོད་པའམ། འབྲུ་བརྡལ་བའི་མཎྜལ་ཟླུམ་པོ་རེ་ལ་ཚོམ་བུ་རེ་རེ་འགོད།
རིགས་སུམ་ཅུ་རྩ་བདུན་ནམ་རིགས་བརྒྱའི་ཙ་ཀ་ལི་ཡོད་ན་ལེགས་པར་བཀྲམ། ཡང་ཕྱི་མ་འདི་མཎྜལ་ལོགས་པ་ལ་བཀོད་དེ་མཎྜལ་གཉིས་བྱས་ཀྱང་རུང༌། དེའི་ཚེ་དེ་ལ་དབུས་སུ་ཆོས་འབྱུང་འབྲི་བའམ། ཚོམ་བུ་ཆེ་བ་རེ་འགོད་དོ། །སྤྱིར་རིགས་བརྒྱའི་འགོད་ཚུལ་ལ་དཀྱིལ་འཁོར་གཉིས་སུ་བྱས་ནས་གཅིག་ལ་སོ་བདུན་དང་ཅིག་ཤོས་ལ་དབུས་སུ་དུས་ཀྱི་འཁོར་ལོའམ་རྡོ་རྗེ་སེམས་དཔའ། ཕྱོགས་མཚམས་བརྒྱད་དུ་གསུང་དཀྱིལ་བཞིན་མ་མོ་བརྒྱད་ཡབ་དང་བཅས་པ་དང༌། རྣམ་འབྱོར་མ་དྲུག་ཅུ་རྩ་བཞི་འགོད་པའི་ལུགས་ཀྱང་ཡོད་ལ། ཡང་ལུགས་གཅིག་ལ་གཞལ་ཡས་ཁང་སྒོ་རྐྱང་གཅིག་གི་སྒོའི་ནང་ཚུན་ཆད་དུ་རྣལ་འབྱོར་མ་སོ་བདུན་དང༌། ཁོར་ཡུག་ལ་རྣལ་འབྱོར་མ་དྲུག་ཅུ་རྩ་བཞི་འགོད་པའི་ལུགས་ཀྱང་སྣང་བ་དང༌། ཡང་སོ་བདུན་གྱི་དཀྱིལ་འཁོར་ཉིད་ལ་གསུང་འཁོར་གྱི་མ་མོ་བརྒྱད་ཀྱི་མཐའ་སྐོར་དུ་བརྒྱད་པ་བརྒྱད་ཀྱིས་བསྐོར་བ་བྱེད་པའི་ལུགས་ཀྱང་ཡོད་པ་དེ་རྣམས་ཀྱང་མི་རུང་བ་ནི་མ་ཡིན་ལ། འོན་ཀྱང་འདིར་འོག་ནས་འཆད་པ་ལྟར་གཞལ་ཡས་ཁང་ཕྱི་ནང་རིམ་པ་གཉིས་བྱེད་པ་སྒོམ་པ་དང་ལག་ལེན་ལ་འཁྱེར་བདེ་བས་བྱ་ལ། འདི་ལྟར་གྱི་ཚེ་རྣལ་འབྱོར་མ་བརྒྱད་ཚར་གཉིས་སྒོམ་དགོས་ཀྱང་ངོ་བོ་གཅིག་པས་རིགས་བརྒྱའི་གྲངས་དང་མི་འགལ་ལ། ཐབས་ལྷ་ཆེན་བརྒྱད་ཞོར་བྱུང་ཡིན་ཏེ། དུར་ཁྲོད་གནས་པའི་ལྷ་དང་འདྲའོ། །
དེས་ན་གསུང་འཁོར་གྱི་རྩིབས་རེ་རེ་ལ་ལྷ་དགུ་དགུ་འགོད་པ་དེ་རས་བྲིས་སམ་ཚོམ་བུ་འགོད་པ་ལ་ལག་ལེན་ཅུང་མི་བདེ་བར་འོང་ཡང་མི་རུང་བ་ནི་མ་ཡིན་ནོ། །དེས་ན་ལུགས་དེ་དག་གང་མོས་པ་ཞིག་བྱ་བ་ཡིན་པས་མཎྜལ་གྱི་ཚོམ་བུ་འགོད་ཚུལ་ཡང་དེ་དང་དེ་ལས་དཔགས་ཏེ་ཤེས་པར་བྱའོ། །གཏོར་མ་བསྡུ་ན་སྤུངས་གཏོར་གཅིག་གིས་ཆོག་པ་སོགས་ཡོད་ཀྱང་རིགས་སུམ་ཅུ་རྩ་བདུན་ལ་ཕྱོགས་ཀྱི་དབྱེ་བས་བཅུ་གཅིག་ཟླུམ་གཏོར་མཐེབ་ཀྱུ་ཅན་དུ་བྱེད་ཅིང༌། རྣལ་འབྱོར་མ་དྲུག་ཅུ་རྩ་བཞི་ལ་སྣོད་བརྒྱད་དུ་ཟན་རིལ་སྤུངས་པ་རྣམས་བཤམས་དམ་རྫས་རྣམས་དངོས་སུ་བསྲེ་རྒྱུ་ཡོད་ན་རབ། མེད་ན་གཟུགས་བརྙན་དང་མིང་ཡིག་ཙམ་གྱིས་ཀྱང་བརྒྱན་པར་བྱ་བ་ཡིན་མོད་ཀྱི། དེ་ཡང་མ་གྲུབ་ན་ཡིད་ཀྱི་མོས་པ་ཙམ་གྱིས་ཀྱང་མི་རུང་བ་མ་ཡིན་ནོ། །དེ་དག་གི་མཐའ་སྐོར་རམ་མདུན་དུ་མཆོད་པ་རྒྱ་ཆེར་བཤམས་ཤིང༌། དབུས་སུ་ཤིང་ཕོར་ཤར་སོགས་ཕྱོགས་བཞིར་ཉ་ཕྱིས་བེ་ཏ་ཐོད་པ་རྫ་ཕོར་རྣམས་མཆོད་ཡོན་གྱི་སྣོད་དང༌། དེའི་རིམ་པས་མི་ལྤགས། ཁྱི་ལྤགས། རྟ་ལྤགས་བ་ལང་གི་པགས་པ་གླང་ཆེན་གྱི་པགས་པ་རྣམས་ཀྱི་སྡེར་བཟའ་བཅའི་སྣོད་དུ་བྱ་བར་གསུངས་པ་ལྟར་དངོས་སམ་གཟུགས་བརྙན་ཇི་ལྟར་འབྱོར་བ་བཤམས། སླར་ཡང་གོང་དུ་བཤད་པ་ལྟར་མཆོད་པ་བྱིན་གྱིས་བརླབས། གཏོར་མ་ལ་ཨོཾ་ཨཱཿ
ཧཱུཾ་ཧྲཿཕཊ་ཀྱིས་བསངས་བ་ནས། ཨ་མྲྀ་ཏ་ཀུ་རུ་ཀུ་རུ་སྭཱཧཱའི་བར་བྱིན་རླབས་ཐམས་ཅད་ཐུན་མོང་དུ་བྱ། སངས་རྒྱས་ཡབ་ཡུམ་ཞེས་པ་ནས། རྡོ་རྗེ་འཛིན་པའི་བཀའ་བཞིན་མཛད་དུ་གསོལ། ཞེས་པ་ཡན་ཆད་ཀྱིས་གཙོ་བོ་དུས་ཀྱི་འཁོར་ལོ་སྡེ་དྲུག་དང་བཅས་པ་ལ་གཏོར་མ་ཕུལ། དེ་ནས་མཎྜལ་བསངས་སྦྱངས། སྟོང་པའི་ངང་ལས་གི་ཡི་གེ་ཡོངས་སུ་གྱུར་པ་ལས་འབྱུང་བཞི་རི་རབ་བརྩེགས་པའི་སྟེང་དུ་རྡོ་རྗེའི་ས་གཞིའི་སྟེང་རྡོ་རྗེའི་གུར་གྱི་ནང་དུ། གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པ། ཕྱི་ནང་རིམ་པ་གཉིས་ལྷ་སྣམ་ཕྱོགས་ཀྱི་མདོག་ཅན་དུ་གནས་པ། ནང་གི་ལྷ་སྣམ་གྱི་དབུས་སུ་སྐུའི་འཁོར་ལོ་དཀར་པོ་རྩིབས་བརྒྱད་པ། དེའི་ནང་དུ་གསུང་གི་འཁོར་ལོ་དམར་པོ་རྩིབས་བརྒྱད་པ། དེའི་ནང་དུ་ཐུགས་ཀྱི་འཁོར་ལོ་ནག་པོ་རྩིབས་བརྒྱད་པ། དེའི་ལྟེ་བར་བདེ་བ་ཆེན་པོའི་འཁོར་ལོ་པདྨ་ལྗང་ཁུ་འདབ་མ་བརྒྱད་པ་སྟེ། དེ་ལྟར་འཁོར་ལོ་ལྔ་ནི་སྣ་ཚོགས་རྡོ་རྗེ་དང་པདྨ་དང་རལ་གྲི་དང་གྲི་གུག་གི་འཕྲེང་བས་རིམ་པ་
བཞིན་དུ་བསྐོར་བའོ། །བདེ་ཆེན་འཁོར་ལོའི་པདྨར་བཞུགས་པ་ནི། །ལྟེ་བར་མི་ལྤགས་གདན་ལ་གཡུང་མོ་སྟེ། །ཤར་དུ་ཁྱི་ཡི་པགས་པར་དམངས་རིགས་མོ། །ལྷོ་ཕྱོགས་རྟ་ཡི་པགས་པར་རྒྱལ་རིགས་མ། །བྱང་དུ་བ་ལང་པགས་པར་བྲམ་ཟེ་མོ། །ནུབ་ཏུ་གླང་ཆེན་པགས་པར་རྗེ་རིགས་མ། །མཚམས་ཀྱི་འདབ་མ་བཞི་ལ་སྣོད་བཞི་སྟེ། །མེ་རུ་རྐང་དང་བདེན་བྲལ་ཁྲག་གི་སྣོད། །དབང་ལྡན་དྲི་ཆུ་རླུང་དུ་བཤང་བ་སྟེ། །ཟླ་བ་ལྟར་དཀར་ཐོད་པ་བདུད་རྩིས་གང༌། །ཐུགས་འཁོར་ཤར་དུ་ལུག་ལྤགས་མཁར་བ་མཁན། །ལྷོ་རུ་སྤྱང་ལྤགས་འོད་མའི་གར་མཁན་མ། །བྱང་དུ་རྔ་མོའི་པགས་པར་ནོར་བུ་མཁན། །ནུབ་ཕྱོགས་འདམ་སེང་པགས་པར་འཕྲེང་མཁན་མོ། །ཤར་ལྷོ་ར་ལྤགས་གདན་ལ་ཐགས་མཁན་མ། །ལྷོ་ནུབ་རི་དྭགས་པགས་པར་ཆང་འཚོང་མ། །བྱང་ཤར་བོང་བུའི་པགས་པར་གསེར་མཁན་མོ། །ནུབ་བྱང་ཕག་གི་པགས་པར་འཕྲེང་རྒྱུད་མཁན། །དེ་ཡི་ཕྱི་རོལ་
གསུང་འཁོར་ཤར་ཕྱོགས་སུ། །ཆུ་སྲིན་པིར་གྱི་པགས་པར་ཤ་འཚོང་མ། །ལྷོ་ཡི་རྩིབས་ལ་སྦལ་པ་ཀརྐ་ཊའི། །རུས་པའི་གདན་ལ་མཁུར་བ་མཁན་མོ་དང༌། །བྱང་རྩིབས་རུས་སྦལ་ཁོག་པར་གར་མགར་མ། །ནུབ་རྩིབས་མ་ཀ་ར་ལ་ཚེམ་བུ་མ། །བསྲེག་བཟང་མགྲོན་བུའི་ཕུང་པོར་རྫ་མཁན་མ། །སྲིན་པོར་ཉ་སྐམ་ཕུང་པོར་སྨད་འཚོང་མ། །དབང་ལྡན་དུང་དཀར་སྟེང་དུ་ཚོས་མཁན་མ། །རླུང་ཕྱོགས་སྦལ་བའི་པགས་པར་ཉ་བ་མོ། །ཕྱི་རོལ་སྐུ་འཁོར་དབང་པོའི་ཕྱོགས་རྩིབས་སུ། །བསེ་ཡི་པགས་པའི་གདན་ལ་ལྕགས་མགར་མོ། །ལྷོ་རུ་རྒྱ་སྐྱེགས་མཁན་མོ་སྟག་ལྤགས་ལ། །སྲེ་མོང་པགས་པར་ཏིལ་བརྡུང་བྱང་དུའོ། །སྲིན་བལ་མཁན་མོ་ནུབ་ཏུ་དོམ་ལྤགས་ལ། །ཤར་ལྷོར་འབྲི་ཡི་པགས་པར་སྨིན་མ་མཁན། །ལྷོ་ནུབ་ཅེ་སྤྱང་པགས་པར་ཤིང་བཟོ་མ། །འབྱུང་པོར་བྱི་ལའི་པགས་པར་འདྲེག་མཁན་མོ། །རླུང་མཚམས་སྲམ་གྱི་པགས་པར་ཀོ་ལྤགས་མཁན། །ཕྱི་རོལ་ནམ་མཁའི་འཁོར་
ལོའི་ཤར་སྒོ་རུ། །གོ་དའི་པགས་པར་ཀླ་ཀློ་ཨོ་ཌི་མ། །ལྷོ་སྒོ་བྱི་བའི་པགས་པར་ཕྱག་དར་མཁན། །བྱང་སྒོ་སྤྲེའུའི་པགས་པར་སྟག་གཟིག་མོ། །ནུབ་སྒོ་ས་ལི་ཛ་ཏ་ཀ་ཞེས་བྱའི། །པགས་པའི་གདན་ལ་གཏུམ་མོ་གདོལ་པ་མོ། །མེ་མཚམས་རི་བོང་པགས་པར་སྨྱོན་ཐབས་མོ། །སྲིན་མཚམས་བྱི་ངུར་པགས་པར་རོ་སྲེག་མ། །དབང་ལྡན་རྩངས་པའི་པགས་པར་རི་ཁྲོད་མ། །ནུབ་བྱང་ཕྱོགས་སུ་ཨི་ཤུ་ཀ་པ་ཤུའི། །པགས་པར་བྷིལ་ལི་མོ་རྣམས་འཁོད་པར་གྱུར། །ཐམས་ཅད་ལང་ཚོ་ལྡན་པའི་བུད་མེད་ཚུལ། །རང་རང་ལས་ཀྱི་མཐའ་ལ་གནས་པར་སྟོན། །སླར་ཡང་བསང་སྦྱངས། རིགས་སུམ་ཅུ་རྩ་དྲུག་གི་ཕོ་ཉ་མོ་དེ་རྣམས་སྟོང་པ་ཉིད་དུ་གྱུར། །སྟོང་པའི་ངང་ལས་དབུས་སུ་ཨ་དང་རྡོ་རྗེ་ལས་རྡོ་རྗེ་དབྱིངས་ཀྱི་དབང་ཕྱུག་མ། རྩ་བའི་ཞལ་དང་སྐུ་མདོག་ལྗང་ཁུ། གཡས་ཞལ་དམར་ཞིང་གཡོན་ཞལ་དཀར་བ། ཕྱག་གཡས་པ་གསུམ་གྱིས་རྡོ་རྗེ་གྲི་གུག་དགྲ་སྟ། གཡོན་པ་གསུམ་གྱིས་རྡོ་རྗེ་དྲིལ་བུ་
ཐོད་པ་ཚངས་པའི་མགོ་བོ་གདོང་བཞི་པ་འཛིན་པ། ཐབས་བཅོམ་ལྡན་འདས་དཔལ་དུས་ཀྱི་འཁོར་ལོའི་རང་བཞིན་མི་བསྐྱོད་པ་སྔོན་པོས་འཁྱུད་པའོ། །བདེ་ཆེན་འཁོར་ལོའི་འདབ་མ་བརྒྱད་པོ་རྣམས་ལ་ནི། །ཨི་དང་རལ་གྲི་ལས་བྱུང་སྒྲོལ་མ་ནག་མོ་ཤར། །རྀ་དང་རིན་ཆེན་ལས་བྱུང་གོས་དཀར་དམར་མོ་ལྷོ། །ཨུ་དང་པདྨ་ལས་སྐྱེས་བདག་མ་དཀར་མོ་བྱང༌། །ལྀ་དང་འཁོར་ལོ་ལས་སྐྱེས་སྤྱན་མ་སེར་མོ་ནུབ། །གོས་དཀར་མོ་མེའི་མདའ་ལས་བསྐྱེད་པར་ཡང་བཤད་པས་ཅི་བདེ་བར་བྱའོ། །མཚམས་བཞིར་ཧཱི་ཧཱུཾ་ཧླཱྀ་རྣམས་ལས་བྱུང་བའི་ཐོད་པ་བཞིའོ། །ཐུགས་ཀྱི་འཁོར་ལོའི་རྩིབས་ལ་གནས་པའི་ལྷ་མོ་ནི། །ཨཱ་ཡིག་རྒྱུད་མང་ཤར་ཕྱོགས་སྒྲ་ཡི་རྡོ་རྗེ་སྔོ། །ཧཱཿཡིག་རྡོ་རྗེ་[འོད་མའི་དབྱུག་]ལས་བྱུང་གཤིན་སྔོན་མཐོན་མཐིང་ལྷོ། །ཨཾ་ཡིག་ཆོས་འབྱུང་ལས་བྱུང་ཆོས་ཁམས་ལྗང་ཁུ་བྱང༌། །ཧཾ་ཡིག་ཏོག་རྩེ་ལས་སྐྱེས་དྲག་སྤྱན་ལྗང་ཁུ་ནུབ། །ཨཾ་ཡིག་དར་གོས་ལས་སྐྱེས་རེག་མ་ནག་མོ་མེ། །ཨཱར་ཡིག་ཆང་སྣོད་ལས་སྐྱེས་རོ་མ་དམར་མོ་སྲིན། །
ཨཽ་ཡིག་མེ་ལོང་ལས་སྐྱེས་གཟུགས་མ་དཀར་མོ་དབང༌། །ཨལ་ཡིག་འཁོར་[མེ་ཏོག་འཕྲེང་]ལོ་ལས་སྐྱེས་དྲི་མ་སེར་མོ་རླུང༌། །དེ་ལྟར་གཙོ་འཁོར་བཅུ་གསུམ་ནི་པདྨའི་སྐྱིལ་ཀྲུང་གིས་བཞུགས་པའོ། །གསུང་འཁོར་རྩིབས་ལ་གནས་པའི་རྣལ་འབྱོར་མ་རྣམས་ནི། །ཤར་དུ་ཧ་དང་གྲི་གུག་ཙར་ཙི་ཀཱ་ནག་མོ། །ལྷོ་ཕྱོགས་ཧཿདང་བཅུ་གཟར་ཕག་མོ་དམར་མོ་སྟེ། །བྱང་ཕྱོགས་ཧཾ་དང་རྩེ་གསུམ་དྲག་མོ་དཀར་མོའོ། །ནུབ་ཕྱོགས་ཧཱ་དང་ཁབ་ལས་དབང་མོ་སེར་བའི་མདངས། །ཤར་ལྷོར་ཀྵ་དང་བུམ་པ་ཁྱབ་འཇུག་མོ་ནི་གནག །བདེན་བྲལ་ཀྵཿདང་གོས་སེར་དམར་མོ་གཞོན་ནུ་མ། །དབང་ལྡན་ཀྵཾ་དང་རྡོ་ལེབ་དཔལ་མོ་ཟླ་བའི་མདངས། །རླུང་མཚམས་ཀྵ་དང་ཉ་[དོལ་]ལས་ཚངས་མ་གསེར་གྱི་འོད། །མ་མོ་བརྒྱད་པོ་འདི་རྣམས་ནི་ས་གའི་སྟབས་ཀྱིས་བཞུགས་པའོ། །སྐུ་འཁོར་རྩིབས་ལ་བཞུགས་པའི་ཁྲོ་མོ་བརྒྱད་པོ་ནི། །དཀར་མིན་ཡཿལས་ཆུ་གྲི་བརྩོན་འགྲུས་མ་ནི་ཤར། །རབ་དམར་རཿལས་ཚོས་སྣོད་རྨུགས་བྱེད་དམར་མོ་ལྷོ། །
རབ་དཀར་ཝཿལས་ཀུ་ཤ་ཁེངས་བྱེད་མ་ནི་བྱང༌། །སེར་འོད་ལཿལས་དར་སྲིན་རེངས་བྱེད་མ་ནི་ནུབ། །ཡཱ་དང་སྨུག་གདུགས་ལས་སྐྱེས་ལྕགས་སྒྲོག་མ་ནི་ནག །རཱ་དང་ཤིང་ལྷམ་ལས་སྐྱེས་ཁྲོ་གཉེར་ཅན་མ་དམར། །ཝཱ་དང་སྤུ་གྲི་ལས་སྐྱེས་སྐུལ་བྱེད་མ་ནི་དཀར། །ལཱ་དང་མཐིལ་ལྷམ་ལས་སྐྱེས་འོད་ཟེར་ཅན་མ་སེར། །དེ་རྣམས་མེ་སྲིན་འབྱུང་པོ་གཡོ་བའི་ཕྱོགས་ལ་གནས། །ཐམས་ཅད་ཀྱང་གཡོན་བརྐྱང་གི་སྟབས་ཀྱིས་བཞུགས་པའོ། །སྒོ་མཚམས་རྣམས་སུ་རྣམས་ཡོངས་སུ་གྱུར་པ་ལས། བ་ལང་ར་ལས་ཤར་སྒོར་ཁྱི་གདོང་མ་ནི་གནག །རྫ་ཕོར་ལས་སྐྱེས་ལྷོ་སྒོར་ཕག་གདོང་མ་ནི་དམར། འཕང་ལས་སྐྱེས་པ་བྱང་སྒོར་སྟག་གདོང་མ་ནི་དཀར། །ནུབ་སྒོར་པི་ཝང་ལས་སྐྱེས་ཅེ་སྤྱང་གདོང་མ་སེར། །གསལ་ཤིང་ལས་སྐྱེས་ཤར་ལྷོར་ཁྭ་གདོང་མིག་སྨན་མདོག །ཀིན་ན་རི་ལས་ལྷོ་ནུབ་བྱ་རྒོད་གདོང་མ་དམར། །རྨ་བྱའི་སྒྲོ་ལས་བྱང་ཤར་
འུག་གདོང་ཆུ་ཤེལ་མཚུངས། །ཤིང་མདའ་ལས་འཁྲུངས་ནུབ་བྱང་མཁའ་ལྡིང་གདོང་མ་སེར། །དེ་རྣམས་ནྀ་ཟླུམ་པོའི་སྟབས་ཀྱིས་བཞུགས་པའོ། །འཁོར་འདི་རྣམས་ཀྱི་ཕྱག་མཚན་སྐུ་གསུང་ཐུགས་ཡོངས་རྫོགས་ཀྱི་དཀྱིལ་འཁོར་ལས་བཤད་པ་ལྟར་སྒོམ་པའམ། བསྡུ་ན་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པ་ཁོ་ནར་བྱས་ཀྱང་ཆོག་གོ །གཞལ་ཡས་ཁང་ཕྱི་མའི་ནང་གི་ལྷ་སྣམ་ལ་སླར་ཡང་མ་མོ་བརྒྱད་ཐབས་དང་བཅས་པ་རྣལ་འབྱོར་མ་དྲུག་ཅུ་རྩ་བཞིས་བསྐོར་བ་སྐད་ཅིག་གིས་གྲུབ་པར་གྱུར་པ་ནི། ཕྱོགས་དང་མཚམས་སུ་ཆུ་སྐྱེས་དམར་དང་དཀར་པོ་ལ་གནས་རྣལ་འབྱོར་མ། །ཞེས་པ་ནས། བར་བུས་མཚན་ལ་ཕྱག་འཚལ་ལོ། །ཞེས་པའི་བར་བསྟོད་ཆེན་ལས་འབྱུང་བ་ལྟར་ངག་ཏུ་བརྗོད་ཅིང་ཡིད་ལ་ཡང་བསམ་མོ། །སྤྲོས་པ་ལ་དགའ་ན་འདི་རྣམས་ཀྱང་ས་བོན་ཕྱག་མཚན་ལས་བསྐྱེད་ཅིང༌། རིགས་བརྒྱའི་རྣལ་འབྱོར་མ་ཐམས་ཅད་ལ་ཡེ་ཤེས་སྤྱན་འདྲེན་གནས་གསུམ་བྱིན་རླབས་དབང་བསྐུར་རྒྱས་གདབ་རིགས་བདག་སོ་སོའི་བར་དུ་མཐའ་རྒྱས་སུ་བྱ་ལ། མདོར་བསྡུ་ན། རང་གི་སྙིང་ག་ནས་འོད་ཟེར་འཕྲོས། རང་
བཞིན་གྱི་གནས་ནས་སངས་རྒྱས་བྱང་ཆུབ་སེམས་དཔའ་ཐམས་ཅད་རྣལ་འབྱོར་མ་རིགས་བརྒྱའི་རྣམ་པར་ཨོཾ་བཛྲ་ས་མཱ་ཛཿ ཨོཾ་བཛྲ་གནྡྷཾ་སོགས་མཆོད་པ་བཅུ་གཉིས་ཀྱིས་མཆོད། ཧཱུཾ་བཾ་ཧོཿཧི་གཉིས་སུ་མེད་པར་ཐིམ། ཁམས་གསུམ་དབང་ཕྱུག་བཅོམ་ལྡན་འདས། །རིགས་བརྒྱ་རྣལ་འབྱོར་མ་ཚོགས་བཅས། །རྣམ་དག་རྡོ་རྗེ་དྲི་མཆོག་འདི། །ཞེས་སོགས་འདོན་པ་སྤོས་ལ་མཆོད་པ་བཅུ་གཉིས་ཀྱིས་མཆོད། ཨོཾ་ཨ་ཨཱ་ཨི་ཨཱི་རྀ་རཱྀ་ཨུ་ཨཱུ་ལྀ་ལཱྀ་སྭཱཧཱ། ཨོཾ་ཨཱཿཧཱུཾ། ཨོཾ་ཨཱཿཧ་ཨཿཧཾ་ཨཻ་ཨར་ཨཽ་ཨལ་སྭཱཧཱ། ཨོཾ་ཧ་ཧཿཧཾ་ཧཱ་ཀྵ་ཀྵཿཀྵཾ་ཀྵཱ་སྭཱཧཱ། ཨོཾ་སྭཱཧཱ། ཨོཾ་ཡཿརཿཝཿལཿཡ་ར་ཝ་ལ་སྭཱཧཱ། ཨོཾ་ཨཱཿཧཱུཾ། ཨོཾ་ཧི་ཧཱི་ཡ་ཡི་ཡུ་ཡཾ་སྭཱཧཱ། ཨོཾ་ཀྵཱི་ཀྵཱི་ཡཱ་ཡཱི་ཡཱུ་ཡྀལཱ་ཡཿསྭཱཧཱ། ཨོཾ་ར་རིརུ་རླྀ་རཾ་སྭཱཧཱ། ཨོཾ་རཱ་རཱི་རཱུ་རླཱྀ་རཿསྭཱཧཱ། ཨོཾ་ཧུ་ཧཱུ་ཝ་ཝི་ཝུ་ཝཾ་སྭཱཧཱ། ཨོཾ་ཀྵུ་ཀྵཱུ་ཝཱ་ཝཱི་ཝཱུ་
ཝཿསྭཱཧཱ། ཨོཾ་ཧླྀ་ཧླཱྀ་ལ་ལི་ལུ་ལླྀ་ལཾ་སྭཱཧཱ། ཨོཾ་ཀྵླྀ་ཀྵླཱྀ་ལཱ་ལཱི་ལཱུ་ལླཱྀ་ལཿསྭཱཧཱ། ཨོཾ་ཨཱཿཧཱུཾ། དེ་ལྟར་སྔགས་ཚན་བཅུ་གསུམ་པོ་རེ་རེའི་མཐར་འབྲུ་གསུམ་སྦྱར་བ་ལན་གསུམ་གྱིས་ནང་མཆོད་ཕུལ། དེ་ནས། སྟོང་ཉིད་སྙིང་རྗེའི་སོགས་དང༌། ཕྲ་རབ་རྡུལ་གྱི་སོགས་སྔོན་དུ་འགྲོ་བས། གང་གི་ཞབས་ནི་དྲན་པས་ཀྱང༌། །འཇིགས་པ་བཅུ་དྲུག་ལས་ཐར་མཛད། །རྫུ་འཕྲུལ་དངོས་གྲུབ་སྩོལ་མཛད་པ། །རྣལ་འབྱོར་མ་ཚོགས་རྣམས་ལ་འདུད། །དེ་བཞིན་གཤེགས་ཡུམ་རྣམ་པ་ལྔ། །བདུད་རྩིའི་སྣོད་དང་བཅས་རྣམས་དང༌། །རྡོ་རྗེ་མ་དྲུག་ཁྲོ་མོ་གཉིས། །ཐུགས་ཀྱི་འཁོར་ལོ་ལ་གནས་དང༌། །འཆི་མེད་ན་ཆུང་མ་མོ་བརྒྱད། །གསུང་གི་འཁོར་ལོ་མཆོག་ལ་གནས། །སྐུ་ཡི་འཁོར་ལོ་བདེ་བ་ཆེ། ཁྲོ་མོ་བརྒྱད་པོ་ཡང་དག་རོལ། །རབ་གཏུམ་ཆེན་མོ་འཇིགས་རུང་རྣམས། །སྒོ་མཚམས་དུར་ཁྲོད་འཁོར་ལོར་གནས། །བརྒྱད་པ་བརྒྱད་ཀྱི་རིགས་བྱུང་རྣམས། །འཇིག་རྟེན་འཕེལ་ཟད་ལས་ལ་བརྩོན། །དངོས་གྲུབ་སྩོལ་བའི་གདོང་
གྲོགས་མཛད། །རིགས་བརྒྱ་རྣལ་འབྱོར་གཙོ་མོ་རྣམས། །བྱེ་བ་བགྲང་ཡས་ཚད་མེད་པའི། །རྣལ་འབྱོར་མ་ཚོགས་རྣམས་ལ་བསྟོད། །གང་ལ་ཐོག་མཐའ་དབུས་མེད་སོགས་ཡེ་ཤེས་ལྔའི་བསྟོད་པ་གོང་བཞིན་གྱི་མཐར་རོལ་མོའི་སྒྲ་བྱའོ། །དེ་ནས་གཏོར་མ་འབུལ་བ་ནི། ཨོཾ་ཨཱཿཧཱུཾ་ཧོཿཞེས་ལན་མང་དུ་བརྗོད་པས་བྱིན་རླབས་ཁ་གསོས་ནས། ཨོཾ་ཨ་ཨཱ་ཨི་ཨཱི་རྀ་རཱྀ་ཨུ་ཨཱུ་ལྀ་ལཱྀ་སྭཱཧཱ། ཞེས་པའི་མཐར། ཨོཾ་ཨཱཿཧཱུཾ་ཧོཿ ཞེས་སོགས་སྡེ་དྲུག་གི་གཏོར་སྔགས་བཏགས་ཏེ་ཕུལ་ཀྱང་རུང་མོད། འོན་ཀྱང་མཁའ་འགྲོ་མ་སྤྱིའི་གཏོར་སྔགས་ཉིད་སྦྱོར་བ་ལེགས་པས། དེ་ཉིད་བོད་སྐད་དུ་སྦྱར་ན་ནོར་སོ་ཆུང་བས་འདི་སྐད་ཅེས་བྱ་སྟེ། ཨོཾ་ཨཱཿཧཱུཾ། རྡོ་རྗེ་མཁའ་འགྲོ་མ་རྣམས་འཁོར་བཅས་རྣམས། །འདི་སྟེ་གཏོར་མ་དྲི་དང་མེ་ཏོག་དང༌། །བདུག་སྤོས་སྒྲོན་མེ་མ་ཉམས་བདག་འབུལ་གྱི། །འཁོར་དང་བཅས་པ་མྱུར་དུ་ཚུར་བྱོན་ལ། །ཛཿཧཱུཾ་བཾ་ཧོཿའདིར་ནི་གཏོར་མ་ཟུང༌། །བཟའ་བར་མཛོད་ལ་བཏུང་བར་མཛད་དུ་གསོལ། །འཁོར་དང་བཅས་པས་སེམས་ཅན་རྣམས་ལ་ནི། །ཞི་རྒྱས་བསྲུང་སྐྱོབ་
སྦ་བར་མཛད་དུ་གསོལ། །རང་གནས་བཞུགས་ལ་ཕྱི་རོལ་དཀྱིལ་འཁོར་གྱི། །ས་ལ་གནས་པར་མཛོད་ཅིག་ཧཱུཾ་ཧཱུཾ་ཕཊ། །རྡོ་རྗེ་འཛིན་པའི་བཀའ་བཞིན་མཛོད་སྭཱཧཱ། །ཞེས་བཏགས་པས་གཏོར་མ་འབུལ། དེ་བཞིན་དུ་སྔགས་ཚན་གཞན་རྣམས་རེ་རེའི་མཐར་ཡང་གཏོར་སྔགས་དེ་ཉིད་སྦྱར་བས་འབུལ་ཏེ། ཨོཾ་ཀྵླྀ་ཀྵླཱྀ་ལཱ་ལཱི་ལཱུ་ལླཱྀ་ལཱཿསྭཱཧཱ། ཨོཾ་ཨཿཧཱུཾ། རྡོ་རྗེ་མཁའ་འགྲོ་མ་རྣམས་ཞེས་པ་ནས། བཀའ་བཞིན་མཛོད་སྭཱཧཱའི་བར་སྦྱར་བའོ། །དེ་ནས་སྡེ་དྲུག་ནང་ཚན་ཆོས་སྐྱོང་གི་གཏོར་མ་དང་རྣལ་འབྱོར་མའི་གཏོར་མ་རྣམས་སྔར་ཕྱོགས་ཕྱོགས་སུ་བཤམས་ཡོད་ན་ཕྱོགས་ཀྱི་རིམ་པ་དང་མཐུན་པར་བྱེད་དགོས་པས། ཤར་གྱི་གཏོར་མ་གཉིས་པོ་དེ་གཏོང་དགོས་པ་ཡིན་ལ། གཏོར་མ་གྲལ་སྒྲིགས་སུ་བཤམས་ཡོད་ན་ཟླུམ་གཏོར་བཅུ་གཅིག་གི་གྲལ་འགོ་མ་དེ་བཞག་པའི་དེའི་འོག་ནས་གྲལ་རིམ་དུ་བྱེད་དགོས་པས་གྲལ་འགོ་མའི་འཁྲིས་ཀྱི་ཟླུམ་གཏོར་དེ་དང་སྤུངས་གཏོར་བརྒྱད་ཀྱི་ཐོག་མ་གཅིག་སྟེ། དེ་རྣམས་གཏོར་གྲལ་ནས་བླངས་ཤར་ཕྱོགས་ཀྱི་སྟེགས་བུའི་སྟེང་དུ་བཞག་ལ། སླར་ཡང་ཆབ་ཀྱིས་བྲན་ནས་འདི་སྐད་ཅེས་གྱེར་རོ། །ཤར་ཕྱོགས་ལྷ་མོ་སྒྲོལ་མ་འཁོར་བཅས་ལ། ཁྱི་
ཤ་ཁུག་རྟའི་ཤ་དང་ཤ་ཁམས་ཀྱི། །གཏོར་མ་འདི་འབུལ་རླུང་གི་བར་ཆད་སོལ། །བསད་བསྐྲད་དབྱེ་བའི་ལས་ཀུན་གྲུབ་པར་མཛོད། །ཙ་མུནྚ་ལ་ཀུམྦྷིར་ཁྲུང་ཁྲུང་ཤ །རྣག་དང་བཅས་པའི་གཏོར་མ་འདི་འབུལ་གྱི། །མ་མོའི་གདོན་འཇོམས་རིམས་ནད་ཞི་བར་མཛོད། །ཤར་ཕྱོགས་འགྲོ་རྣམས་ནད་མེད་དགེ་བར་སྩོལ། །ཤིན་ཏུ་སྟོབས་མར་བསེ་དང་ཧོར་པའི་ཤ །རྐང་དང་བཅས་པའི་གཏོར་མ་འདི་འབུལ་གྱི། །ཤར་གྱི་ཕྱོགས་ཀྱི་བགེགས་ཀུན་ཞི་བར་མཛོད། །སྡང་དང་གདུག་ཅན་ཐམས་ཅད་ཚར་ཆོད་ཅིག ཁྱི་གདོང་མ་ལ་གོ་དྷ་མིག་སྔོན་ཤ །སྣ་ཡི་དྲི་མ་བཅས་པའི་གཏོར་མ་འབུལ། །ཤར་གྱི་ཕྱོགས་ནས་འཕྲིན་ལས་ཀུན་སྒྲུབས་ཤིག །ལོངས་སྤྱོད་སྩོལ་ཞིང་དབང་བསྒྱུར་དངོས་གྲུབ་སྩོལ། །ཤར་ཕྱོགས་རྒྱུ་བའི་རྣལ་འབྱོར་མ་བརྒྱད་ལ། །སོ་བཞི་སེན་མོ་གསུམ་དང་ཐོད་དུམ་གཅིག །དམ་རྫས་བཅས་པའི་གཏོར་མ་འདི་འབུལ་བས། །བགེགས་རྣམས་ཉམས་ཤིང་འདོད་དོན་གྲུབ་པར་མཛོད། །ཕྱོགས་སྐྱོང་བཅུ་
པོ་འཁོར་དང་བཅས་རྣམས་ལ། །མཆོད་གཏོར་འདི་དང་དྲི་དང་མེ་ཏོག་དང༌། །ཞེས་པ་ནས། རྡོ་རྗེ་འཛིན་པའི་བཀའ་བཞིན་མཛད་དུ་གསོལ། །རོལ་མོའི་སྒྲ་དང་བཅས་ཏེ་གཏོར་མ་དེ་རྣམས་ཕྱི་རོལ་ཏུ་བཏང་ངོ༌། །ཡང་དེའི་རྗེས་ཀྱི་འཕྲོ་ལས་རྣལ་འབྱོར་མའི་ཟླུམ་གཏོར་གཅིག་དང་སྤུངས་གཏོར་གཅིག་ཤར་ལྷོར་སྟེགས་བུའི་སྟེང་དུ་བཤམས་འདི་སྐད་ཅེས་གྱེར་རོ། །ཤར་ལྷོ་རེག་བྱ་རྡོ་རྗེ་འཁོར་བཅས་ལ། །ར་ཤ་ངུར་པའི་ཤ་དང་བཤང་ལམ་བཅས། །གཏོར་མ་འདི་འབུལ་རེག་བྱའི་བར་ཆད་སོལ། །འགྲོ་ལ་རེག་མཆོག་སྟེར་བའི་འཕྲིན་ལས་མཛོད། ཁྱབ་འཇུག་མ་ལ་མགྲོན་བུ་ཁུ་བྱུག་བཅས། །བད་ཀན་བཅས་པའི་གཏོར་མ་འདི་འབུལ་གྱི། །མ་མོའི་གདོན་དང་རིམས་ནད་ཞི་བར་མཛད། །ཤར་ལྷོའི་འགྲོ་རྣམས་ནད་མེད་དགེ་བར་སྩོལ། །ལྕགས་སྒྲོག་མ་ལ་འབྲི་དང་འོལ་བའི་ཤ །མཆིན་པར་བཅས་པ་གཏོར་མ་འདི་འབུལ་གྱི། །ཤར་ལྷོ་ཕྱོགས་ཀྱི་བགེགས་ཀུན་ཞི་བར་མཛོད། །སྡང་དང་གདུག་ཅན་ཐམས་ཅད་ཚར་ཆོད་ཅིག ཁྭ་གདོང་མ་ལ་རི་བོང་ནེ་ཙོའི་
ཤ ། བཤང་སྒོའི་དྲི་མར་བཅས་པའི་གཏོར་མ་འབུལ། །ཤར་ལྷོའི་ཕྱོགས་ནས་འཕྲིན་ལས་ཀུན་སྒྲུབས་ཤིག །ལོངས་སྤྱོད་འཕེལ་དང་དབང་བསྒྱུར་དངོས་གྲུབ་སྩོལ། །མེ་མཚམས་རྒྱུ་བའི་རྣལ་འབྱོར་མ་བརྒྱད་ལ། །སེན་མོ་གཉིས་དང་སོ་བཞི་ཐོད་དུམ་གཉིས། །དམ་རྫས་བཅས་པའི་གཏོར་མ་འདི་འབུལ་བས། །བགེགས་རྣམས་ཉམས་ཤིང་འདོད་དོན་གྲུབ་པར་མཛོད། །མཚམས་རྣམས་སུ་སྲུང་མ་དྲུག་ཅུའི་གཏོར་མ་གཏོང་བ་མེད་པས་སྐབས་འདིར་རོལ་མོའི་སྒྲ་དང་བཅས་ཏེ་གཏོར་མ་ཕྱི་རོལ་ཏུ་དོར། ཕྱོགས་གཞན་གསུམ་དང་ཕྱོགས་མཚམས་གསུམ་ལའང་རིགས་འགྲེ་སྟེ། རྣལ་འབྱོར་མའི་གཏོར་མ་གཉིས་དང་གཟའི་གཏོར་མ་ལྷོ་ཕྱོགས་སུ་བཏེག ལྷོ་ཕྱོགས་ལྷ་མོ་གོས་དཀར་འཁོར་བཅས་ལ། །རྟ་ཤ་སྔགས་ཅན་ཤ་དང་ཁྲག་ཁམས་ཀྱི། །གཏོར་མ་འདི་འབུལ་མེ་ཡི་བར་ཆད༴ དབང་དགུག་བསྐྱོད་པའི་ལས༴ ཕག་མོར་ཀརྐ་ཊ་དང་སྲིན་བྱའི་ཤ །ལུས་སྐྱེས་ཕྲར་བཅས་གཏོར་མ༴ མ་མོའི༴ ལྷོ་ཕྱོགས་འགྲོ་རྣམས༴ རྨུགས་བྱེད་མ་ལ་སྟག་དང་བྱ་རོག་ཤ །རྒྱུ་མར་བཅས་
པའི་གཏོར་མ༴ ལྷོ་ཡི་ཕྱོགས་ཀྱི༴ སྡང་དང་༴ ཕག་གདོང་མ་ལ་བྱི་བ་ཙ་ཀོར་ཤ །རྣ་བའི་དྲི་མར་བཅས་པའི༴ ལྷོ་ཡི་ཕྱོགས་ནས༴ ལོངས་སྤྱོད༴ ལྷོ་ཕྱོགས་རྒྱུ་བའི་རྣལ་འབྱོར་མ༴ སོ་བཞི༴ དམ་རྫས༴ བགེགས་རྣམས༴ གཟའ་མཆོག་བཅུ་པོ་འཁོར་དང་བཅས་རྣམས་ལ། །མཆོད་གཏོར་འདི་དང་༴ བཀའ་བཞིན་མཛད་དུ་གསོལ། །གཏོར་མ་གསུམ་པོ་ལྷོ་ཕྱོགས་སུ་དོར། ཡང་རྣལ་འབྱོར་མའི་གཏོར་མ་གཉིས་ལྷོ་ནུབ་ཏུ་བཏེག་ལ། ལྷོ་ནུབ་རོ་ཡི་རྡོ་རྗེ་འཁོར་བཅས་ལ། །རི་དྭགས་ཕུག་རོན་ཤ་དང་ཤ་ཁམས་ཀྱི། །གཏོར་མ་འདི་འབུལ་རོ་ཡི༴ འགྲོ་ལ་རོ་མཆོག༴ གཞོན་ནུ་མ་ལ་ཉ་དང་ཀྱུང་ཀའི་ཤ །སྲིན་བུར་བཅས་པའི༴ མ་མོའི༴ ལྷོ་ནུབ་འགྲོ་རྣམས༴ ཁྲོ་གཉེར་ཅན་ལ་ཅེ་སྤྱང་ཁྱིམ་བྱའི་ཤ །གློ་བར༴ ལྷོ་ནུབ་ཕྱོགས་ཀྱི༴ སྡང་དང་གདུག་ཅན༴ བྱ་རྒོད་གདོང་ལ་གཟུག་མོ་ཅོ་གའི་ཤ །བྷ་གའི་དྲི་མར༴ ལྷོ་ནུབ་ཕྱོགས་ནས༴ ལོངས་སྤྱོད༴ ལྷོ་ནུབ་རྒྱུ་བའི༴ སེན་མོ་གཉིས་དང་༴
དམ་རྫས༴ བགེགས་རྣམས༴ གཏོར་མ་གཉིས་པོ་ལྷོ་ནུབ་ཏུ་དོར་རོ། །རྣལ་འབྱོར་མའི་གཏོར་མ་གཉིས་དང་ཀླུའི་གཏོར་མ་བྱང་ཕྱོགས་སུ་བཏེག་ལ། བྱང་ཕྱོགས་ལྷ་མོ་བདག་མ་འཁོར་བཅས་ལ། །བ་ལང་ཁུ་བྱུག་ཤ་དང་དྲི་ཆུ་ཡི། །གཏོར་མ་འདི་འབུལ་ཆུ་ཡི༴ ཞི་རྒྱས་གཞིལ་བའི༴ དྲག་མོ་ལ་ནི་རུས་སྦལ་སོ་བྱའི་ཤ །བ་སྤུར་བཅས་པའི༴ མ་མོ༴ བྱང་ཕྱོགས་འགྲོ་རྣམས༴ ཁེངས་བྱེད་མ་ལ་ནེའུ་ལེ་འུག་པའི་ཤ །རུས་པར༴ བྱང་གི་ཕྱོགས་ཀྱི༴ སྡང་དང་༴ སྟག་གདོང་མ་ལ་སྤྲེའུ་ཕ་ཝང་ཤ །ལྕེའི་དྲི་མར༴ བྱང་གི་ཕྱོགས་ནས༴ ལོངས་སྤྱོད༴ བྱང་ཕྱོགས་རྒྱུ་བའི་སོ་བཞི༴ དམ་རྫས༴ བགེགས་རྣམས༴ ཀླུ་རྒྱལ་བཅུ་པོ་འཁོར་དང་བཅས་རྣམས་ལ། །མཆོད་གཏོར༴ མཛད་དུ་གསོལ། །གཏོར་མ་གསུམ་བྱང་དུ་དོར། རྣལ་འབྱོར་མའི་གཏོར་མ་གཉིས་བྱང་ཤར་དུ་བཏེག བྱང་ཤར་གཟུགས་ཀྱི་རྡོ་རྗེ་འཁོར་བཅས་ལ། །བོང་བུ་བྱ་གར་ཤ་རྣམས་མིག་ཁམས་ཀྱི། །གཏོར་མ་འདི་འབུལ་གཟུགས་ཀྱི༴ འགྲོ་
ལ་གཟུགས་མཆོག༴ དཔལ་མོ་ལ་ནི་དུང་དང་ཆུ་སྐྱར་ཤ །སྐྲ་དང་བཅས་པའི༴ མ་མོའི༴ བྱང་ཤར་འགྲོ་རྣམས༴ སྐུལ་བྱེད་མ་ལ་བྱི་ལ་ཁྱིམ་བྱའི་ཤ །རྩ་རྒྱས་བཅས་པའི༴ བྱང་ཤར་ཕྱོགས་ཀྱི༴ སྡང་དང་༴ འུག་གདོང་མ་ལ་རྩངས་པ་ཨམྦྷ་རི། །མཆན་ཁུང་དྲི་མར༴ བྱང་ཤར་ཕྱོགས་ནས༴ ལོངས་སྤྱོད༴ བྱང་ཤར་རྒྱུ་བའི༴ སེན་མོ་གཉིས༴ དམ་རྫས༴ བགེགས༴ གཏོར་མ་གཉིས་བྱང་ཤར་དུ་དོར་རོ། །ཡང་རྣལ་འབྱོར་མའི་གཏོར་མ་གཉིས་དང་འབྱུང་པོའི་གཏོར་མ་ནུབ་ཏུ་བཏེག་ལ། ནུབ་ཕྱོགས་ལྷ་མོ་སྤྱན་མ་འཁོར་བཅས་ལ། །གླང་ཆེན་རི་སྐེག་ཤ་དང་བཤང་ཁམས་ཀྱི། །གཏོར་མ་འདི་འབུལ་ས་ཡི༴ རྨོངས་རེངས་གདབ་པའི༴ དབང་མོ་ལ་ནི་མ་གར་སྲེག་པའི་ཤ །ཆུ་སེར་བཅས་པའི༴ མ་མོའི༴ ནུབ་ཕྱོགས་འགྲོ་རྣམས༴ རེངས་བྱེད་མ་ལ་དོམ་དང་བྱ་རྒོད་ཤ། འཁྲིས་པར་བཅས་པའི༴ ནུབ་ཀྱི་ཕྱོགས་ཀྱི༴ སྡང་དང་༴ ཅེ་སྤྱང་གདོང་ལ་ཤ་ལི་ཛ་ཏ་དང༌། །ཨ་ནཱི་ལ་དང་མིག་དྲིའི་གཏོར་མ་འབུལ། །ནུབ་ཀྱི་ཕྱོགས་ནས༴
ལོངས་སྤྱོད༴ ནུབ་ཕྱོགས་རྒྱུ་བའི༴ སོ་བཞི༴ དམ་རྫས༴ བགེགས་རྣམས༴ འབྱུང་པོ་བཅུ་པོ་འཁོར་དང་བཅས་རྣམས་ལ། །མཆོད་གཏོར༴ མཛད་དུ་གསོལ། །གཏོར་མ་གསུམ་པོ་ནུབ་ཕྱོགས་སུ་དོར་རོ། །རྣལ་འབྱོར་མའི་གཏོར་མ་གཉིས་ནུབ་བྱང་དུ་བཏེག་ལ། ནུབ་བྱང་དྲི་ཡི་རྡོ་རྗེ་འཁོར་བཅས་ལ། །ཕག་ཤ་མཆིལ་པའི་ཤ་དང་སྣ་ཁམས་ཀྱི། །གཏོར་མ་འདི་འབུལ་དྲི་ཡི༴ འགྲོ་ལ་དྲི་མཆོག༴ ཚངས་མ་ལ་ནི་སྦལ་པ་བཞད་དཀར་ཤ །ཞག་དང་བཅས༴ མ་མོའི༴ ནུབ་བྱང་འགྲོ་རྣམས༴ འོད་ཟེར་ཅན་ལ་སྲམ་དང་རྨ་བྱའི་ཤ །པགས་པར་བཅས་པའི༴ ནུབ་བྱང་ཕྱོགས་ཀྱི༴ སྡང་དང་༴ མཁའ་ལྡིང་གདོང་ལ་ཨི་ཤུ་བྷེ་རུཎྜ། །རྟགས་ཀྱི་དྲི་མར༴ ནུབ་བྱང་ཕྱོགས་ནས༴ ལོངས་སྤྱོད༴ ནུབ་བྱང་རྒྱུ་བའི༴ སེར་མོ་གཉིས༴ དམ་རྫས༴ བགེགས་རྣམས༴ གཏོར་མ་གཉིས་ནུབ་བྱང་དུ་དོར། སྟེང་དུ་རྣལ་འབྱོར་མའི་ཟླུམ་གཏོར་གཅིག་དང་ཟད་པར་གྱི་གཏོར་མ་གཏོང་དགོས་པས་ཁང་སྟེང་ངམ། ཤར་གྱི་ཤར་དུ་གཏོར་མ་གཉིས་པོ་བཏེག་ལ། སྟེང་ཕྱོགས་ཆོས་ཁམས་རྡོ་རྗེ་འཁོར་བཅས་
ལ། །རྔ་མོང་ངང་པའི་ཤ་དང་བྷ་གར་བཅས། །གཏོར་མ་འདི་འབུལ་ཆོས་ཁམས༴ འགྲོ་ལ་ཆོས་མཆོག༴ དྲག་ཆེན་མ་ལ་སེང་གེ་བྱ་ཁྲའི་ཤ །སྙིང་དང་བཅས་པའི༴ སྟེང་གི་ཕྱོགས་ཀྱི༴ སྡང་དང་༴ ཟད་པར་བཅུ་པོ་འཁོར་དང་བཅས་རྣམས་ལ། །མཆོད་གཏོར༴ མཛད་དུ་གསོལ། །གཏོར་མ་གཉིས་པོ་སྟེང་དུ་དོར། རྣལ་འབྱོར་མའི་ཟླུམ་གཏོར་གཅིག་དང༌། ཁྲོ་བཅུའི་གཏོར་མ་ནུབ་ཀྱི་ནུབ་ཏུ་བཏེག་ལ། འོག་ཕྱོགས་སྒྲ་ཡི་རྡོ་རྗེ་འཁོར་བཅས་ལ། །ལུག་དང་བ་ལང་ཤ་དང་རྣ་བ་ཡི། །གཏོར་མ་འདི་འབུལ་སྒྲ་ཡི་བར་ཆད་སོལ། །འགྲོ་ལ་སྒྲ་མཆོག་སྟེར་བའི་འཕྲིན་ལས་མཛད། །སྔོན་མོར་འབྲོག་དགོན་ཁྱི་དང་ལྗོན་ཤིང་སྒྲ། །ཚིལ་བུར་བཅས་པའི་གཏོར་མ་འདི་འབུལ་གྱི། །འོག་གི་ཕྱོགས་ཀྱི་བགེགས་ཀུན་ཞི་བར་མཛོད། །སྡང་དང་གདུག་ཅན་ཐམས་ཅད་ཚར་ཆོད་ཅིག ཁྲོ་རྒྱལ་བཅུ་པོ་འཁོར་དང་བཅས་རྣམས་ལ། །མཆོད་གཏོར་འདི་དང་༴ བཀའ་བཞིན་མཛད་དུ་གསོལ། །གཏོར་མ་གཉིས་པོ་ནུབ་ཕྱོགས་ཐག་རིང་སའམ་དོར་
ས་ཡོད་ན་འོག་ཕྱོགས་སུ་དོར། རྣམ་འབྱོར་མའི་གཏོར་མ་ཟླུམ་གཏོར་གྲལ་འགོ་མ་ཁ་གསོས་ཆབ་ཀྱིས་བྲན། དཔལ་ལྡན་རྡོར་དབྱིངས་དབང་ཕྱུག་འཁོར་བཅས་ལ། །ཤུ་ཀྲ་མེ་ཏོག་དམ་རྫས་ཐམས་ཅད་ཀྱི། །གཏོར་མ་འདི་འབུལ་བར་ཆད་ཐམས་ཅད་སོལ། །ལས་དང་དངོས་གྲུབ་ཐམས་ཅད་སྩལ་དུ་གསོལ། །རིགས་བརྒྱ་རྣལ་འབྱོར་མ་རྣམས་ཀུན། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །གི་བར་སྤྱི་དང་མཐུན་པར་བརྗོད་ཅིང་རོལ་མོའི་སྒྲ་བྱ། གཏོར་མ་དེ་ཡང་ཁང་སྟེང་དུ་འབུལ་ལོ། །ཡང་ཚོགས་མཆོད་བྱེད་ནའང་སྐབས་འདིར་བྱ་སྟེ། ཚོགས་རྫས་འདུས་བྱས་ལ། ཨོཾ་ཕྲཻཾ་བཛྲ་ཌཱ་ཀི་ནཱི་ཞེས་པ་ནས། ད་ལྟ་ཉིད་དུ་གནས་པར་ཤོག །གི་བར་ཚོགས་མཆོད་ཀྱི་ཆོ་ག་བདུད་རྩི་འཁྱིལ་བར་བཤད་པ་བཞིན་བྱའོ། །དེ་ནས་རྗེས་ཆོག་ནི་མཆོད་པ་རྣམས་ཁ་གསོས། གོང་བཞིན་བྱིན་གྱིས་བརླབས། ཨོཾ་བཛྲ་གནྡྷེ་གནྡྷ་ཨརྩ་ནཱཾ་ཀུ་རུ་ཀུ་རུ་སྭཱཧཱ། ཞེས་པ་ནས། སུ་ར་ཏ་པཱུ་ཛཾ་ཀུ་རུ་ཀུ་རུ་སྭཱཧཱའི་བར་གྱིས་མཆོད་རོལ་མོའི་སྒྲ་དང་བཅས། མཆོག་སྦྱིན་རྡོ་རྗེ་སོགས་ཀྱིས་གོང་བཞིན་
བསྟོད། སྤྲོ་ན་རྒྱུད་གཞན་ལས་འབྱུང་བའི་རྡོ་རྗེའི་གླུ་ཡང་བླང༌། མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་བདག་ཅག་ལ་དགོངས་སུ་གསོལ། ཁྱེད་རྣམས་ལ་མཁྱེན་པའི་ཡེ་ཤེས་བརྩེ་བའི་ཐུགས་རྗེ། ནུས་མཐུའི་འཕྲིན་ལས་བསམ་གྱིས་མི་ཁྱབ་པ་མངའ་བ་ལགས་པས། སྤྱིར་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་དར་བ་དང༌། སེམས་ཅན་ལ་བདེ་སྐྱིད་འབྱུང་བ་དང༌། བླ་མ་གོང་མ་རྣམས་ཀྱི་ཐུགས་དགོངས་རྫོགས་ཤིང༌། ཞལ་བཞུགས་པ་རྣམས་སྐུ་ཁམས་བཟང་བ་དང༌། ཁྱད་པར་དུ་ཡང་བདག་ཅག་དཔོན་སློབ་རྒྱུ་སྦྱོར་བ་དང་བཅས་པས་ཐོག་དྲངས་སེམས་ཅན་ཐམས་ཅད་ཀྱི་རྒྱུད་ལ་ཚོགས་རྫོགས་སྒྲིབ་པ་དག་ནས་མྱུར་དུ་མངོན་པར་རྫོགས་པར་སངས་རྒྱ་བར་བྱིན་གྱིས་བརླབ་ཏུ་གསོལ། གནས་སྐབས་སུ་ཡང་སྔོན་གྱི་ལས་ལས་གྱུར་པ་དང༌། འཕྲལ་གྱི་རྐྱེན་ལས་གྱུར་པའི་བར་ཆད་མི་མཐུན་པའི་ཕྱོགས་ཐམས་ཅད་ཞི་ཞིང༌། ཚེ་དང་བསོད་ནམས་དང་དབང་ཕྱུག་ཕུན་
སུམ་ཚོགས་པ་ཐོབ་པར་མཛད་དུ་གསོལ། ཇི་ལྟར་ཡིད་ལ་བསམ་པའི་དོན་ཐམས་ཅད་འབད་པ་མེད་པར་འགྲུབ་པར་མཛད་དུ་གསོལ། ཞེས་བྱ་བ་ལ་སོགས་པ་གསོལ་བ་དྲག་ཏུ་བཏབ། སྟེང་ན་བྱང་ཆུབ་སེམས་དཔའ་གང་དག་བདུད་ཀྱི་ཕྱོགས་གནས་ལྷ་མ་ཡིན་རྣམས་མཆོག་ཏུ་འཇིགས་བྱེད་དང༌། །མི་ཡི་འཇིག་རྟེན་དག་ན་ཕྱོགས་དང་ཕྱོགས་བྲལ་དུ་གནས་ཁྲོ་བོའི་རྒྱལ་པོ་བཙུན་མོར་བཅས་རྣམས་དང༌། །ས་འོག་དག་ན་གདེངས་ཅན་དབང་པོ་གང་དག་གདོན་ཚོགས་མི་དགེ་དུས་ཀུན་ཏུ་ནི་འཆིང་བྱེད་པ། །དེ་རྣམས་ཐམས་ཅད་ཉིན་ཞག་སོ་སོའི་དུས་སུ་མི་ཤེས་འཇིག་རྟེན་ཀུན་ནས་སྐྱོང་པར་བྱེད་གྱུར་ཅིག །ཨོཾ་ཕུན་སུམ་ཚོགས་པ་མངའ་བ་སོགས་ཀྱིས་ཤིས་པ་བརྗོད། ཡིག་བརྒྱ་མང་དུ་བཟླས། མ་འབྱོར་པ་དང་སོགས། གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར། །མགོན་ཁྱོད་དེ་ཀུན་བཟོད་པར་མཛོད། །གཙོ་བོ་ནུས་པ་མ་མཆིས་པས། །མ་རྙེད་ཡོངས་
སུ་མ་ཤེས་དང༌། །འདིར་ནི་བྱ་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། །ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །སོགས། ཨོཾ་ཨཱཿཧཱུཾ་བཛྲ་མུཿ ཞེས་མགྲོན་རྣམས་གཤེགས་སུ་གསོལ། གསང་བར་ཧཾ་ཡིག་ལ་སོགས་ཀྱིས་སྲུང་མ་དྲུག་ཅུ་ཡང་རང་གི་ལུས་ལ་བསྟིམས། བྲིས་སྐུ་དང་ཙ་ཀ་ལི་སོགས་རྟེན་རྣམས་ལ་བརྟན་བཞུགས་སྤྱི་དང་མཐུན་པར་བྱ། ཡེ་ཤེས་ཀྱི་དཀྱིལ་འཁོར་རང་ཉིད་ལ་ཐིམ། བསོད་ནམས་འདི་ཡིས་འགྲོ་རྣམས་དུ་བ་ལ་སོགས་ལམ་གྱིས་ལྷན་སྐྱེས་བདེ་བ་མཆོག་བསྒོམས་ཏེ། །འགྲོ་བའི་བླ་མ་སུམ་ཅུ་རྩ་གཉིས་མཚན་ལྡན་སྐུ་ནི་ཆོས་ཀྱི་འཁོར་ལོར་ཡང་དག་གནས། །ལྷ་རྣམས་མགོ་ཡི་གཙུག་གི་ནོར་བུའི་འོད་ཟེར་ཚོགས་ཀྱིས་ཞབས་ཀྱི་པདྨ་ལ་གཏུགས་ཤིང༌། །དམ་པའི་ལམ་སྟོན་ཉིན་བྱེད་བཞིན་དུ་མུན་པ་ཀུན་འཇོམས་དུས་ཀྱི་འཁོར་ལོ་ཉིད་གྱུར་ཅིག །ཉི་མ་དང་བཅས་ཐུབ་པའི་རིགས་རྣམས་ཀྱིས་ནི་ཤེས་རབ་ཡེ་ཤེས་ཐོབ་པར་གྱུར་འདི་ཇི་ལྟ་བར། །རྣམ་གསུམ་སྲིད་པར་གནས་པའི་སེམས་ཅན་
རྣམས་ནི་དུས་ཀྱི་འཁོར་ལོའི་དྲིན་ལས་ཨེ་ཝཾ་ཉིད་གྱུར་ཅིག །སྐྱེས་བུ་གང་དག་བདུད་ཀྱི་གྲོགས་ཀྱིས་རྟག་ཏུ་མི་བདེན་མུན་པར་སོང་ཞིང་ལམ་ཉམས་པ། དེ་རྣམས་ལམ་འདི་ཐོབ་ནས་རྡོ་རྗེ་ནོར་བུའི་ཁྱིམ་དང་རིང་མ་མིན་པར་འོང་གྱུར་ཅིག །རྣལ་འབྱོར་བདག་ཅག་རྣལ་འབྱོར་མ་ཐོབ་རབ་ཏུ་གཡོ་བའི་ཡིད་ཀྱིས་གལ་ཏེ་ཤི་བར་གྱུར་ན་ཡང༌། །དཔལ་ལྡན་མི་ཡི་འཇིག་རྟེན་དུ་ནི་རབ་མཆོག་ཐུབ་པའི་རིགས་སུ་རྣལ་འབྱོར་ལྡན་པར་སྐྱེ་བ་དང༌། །སྔོན་གྱི་གོམས་པ་དེ་ཡིས་སླར་ཡང་ཡེ་ཤེས་རྣལ་འབྱོར་ཡངས་པ་དག་ནི་ཀུན་ཏུ་འཛིན་པ་དང༌། །ཡེ་ཤེས་ཐོབ་ནས་མི་ཟད་མཆོག་གི་གནས་སུ་རབ་བགྲོད་སླར་ཡང་གང་དུའང་སྐྱེ་ལྡན་མིན་གྱུར་ཅིག །དགྲ་དང་སེང་གེ་གླང་ཆེན་དབང་པོ་མེ་དང་ལྟོས་འགྲོའི་བདག་དང་ཆོམ་རྐུན་ཞགས་པས་འཆིང༌། །ཆུ་གཏེར་འཁྲུགས་དང་ཤ་ཟ་འཆི་བའི་འཇིགས་བྱེད་ནད་དང་དབང་པོའི་ཉེ་བར་འཚེ་བ་དང༌། །དབུལ་དང་བུད་མེད་དང་བྲལ་མི་བདག་འཁྲུགས་པའི་འཇིགས་དང་རྡོ་རྗེ་ལྟུང་དང་དོན་ཉམས་རྣམས། །
བདག་གིས་རྣལ་འབྱོར་མ་རྣམས་ཞབས་ནི་གསལ་བར་དྲན་པའི་མཐུ་ལས་རབ་ཏུ་ཉམས་གྱུར་ཅིག །དགེ་བ་འདི་ཡིས་མྱུར་དུ་བདག །དུས་ཀྱི་འཁོར་ལོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །རིགས་སུ་སྐྱེ་དང་དམ་ཚིག་ཅན། །བསྙོམ་མེད་དུས་ཀྱི་འཁོར་ལོ་སྟོན། །བླ་མ་ལ་གུས་སྙིང་བརྩེ་ལྡན། །སྐྱེ་ཞིང་སྐྱེ་བར་འགྱུར་བར་ཤོག །ལག་པས་རྡོ་རྗེ་དྲིལ་བུ་འཛིན། །ཟབ་མོའི་ཆོས་ནི་ཀློག་པ་དང༌། །བཙུན་མོའི་ཁུ་བ་མཉམ་ཟས་ཅན། །སྐྱེ་ཞིང་སྐྱེ་བར་འགྱུར་བར་ཤོག །ལྷ་མོ་ཚད་མ་དམ་ཚིག་ཚད་མ་དང༌། །དེས་གསུངས་ཚིག་ཀྱང་ཚད་མའི་མཆོག་ཡིན་ཏེ། །བདེན་པ་དེ་ཡིས་ལྷ་མོ་དེ་དག་གིས། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །ཅེས་སོགས་སྨོན་ལམ་ཇི་ལྟར་འོས་པ་བཏབ། དེ་ནས་དྲིལ་སིལ་མེ་ཏོག་རོལ་མོ་སོགས་དང་བཅས་པས་འདི་སྐད་ཅེས་བརྗོད་དེ། བཀྲ་ཤིས་འབྱུང་གནས་དཔལ་ལྡན་བླ་མ་དང༌། །བཀྲ་ཤིས་རང་བཞིན་དུས་ཀྱི་འཁོར་ལོ་ལ། །བཀྲ་ཤིས་འགྲོ་
ལ་སྤེལ་ཕྱིར་ཕྱག་འཚལ་ནས། །བཀྲ་ཤིས་རྒྱ་མཚོའི་སྒྲ་དབྱངས་བརྗོད་པར་བྱ། །པདྨའི་ལྟེ་བར་བདུད་དང་དྲག་པོའི་སྟེང༌། །རོལ་པའི་གདན་བཞུགས་བདེ་བ་ཆེན་པོའི་སྐུ། །སྟོང་ཆེན་འོད་གསལ་སྣ་ཚོགས་ཡུམ་དང་སྦྱོར། །བདེ་སྟོང་དུས་ཀྱི་འཁོར་ལོའི་བཀྲ་ཤིས་ཤོག །རྣམ་བཅུ་དབང་ལྡན་འོད་གསལ་འདུས་མ་བྱས། །ཕ་རོལ་ཕྱིན་བཅུ་རྣམ་དག་ལྷ་མོ་བཅུ། །རྡོ་རྗེ་བཞི་ཡི་གྲྭ་ནས་རབ་མཛེས་པ། །བདེ་ཆེན་འཁོར་ལོས་དེང་འདིར་བཀྲ་ཤིས་ཤོག །ཕུང་པོ་རྣམ་དག་དེ་བཞིན་གཤེགས་པའི་ཚོགས། ཁམས་དྲུག་དག་པའི་ཡུམ་དང་མཉམ་པར་སྦྱོར། །འཆི་མེད་གྲུབ་པའི་བུམ་པས་རབ་བརྒྱན་པ། །རྒྱལ་བའི་འཁོར་ལོས་དེང་འདིར་བཀྲ་ཤིས་ཤོག །དབང་པོ་རྣམ་དག་བྱང་ཆུབ་སེམས་དཔའི་ཚོགས། །ཡུལ་དྲུག་དག་པའི་ལྷ་མོས་རབ་ཏུ་འཁྱུད། །གདོད་ནས་ཟག་མེད་བདེ་བའི་དཔལ་འབྱོར་ཅན། །སེམས་དཔའི་འཁོར་ལོས་དེང་འདིར་བཀྲ་ཤིས་ཤོག །ལས་དབང་རྣམ་དག་ཁྲོ་ཆེན་འབར་བའི་ཚོགས། །བྱ་བ་
རྣམ་དག་ཁྲོ་མོར་མཉམ་པར་སྦྱོར། །མཐུ་སྟོབས་ཡོན་ཏན་ཕུན་སུམ་ཚོགས་པའི་དཔལ། ཁྲོ་རྒྱལ་འཁོར་ལོས་དེང་འདིར་བཀྲ་ཤིས་ཤོག །ལྟེ་བའི་རྩ་རྣམས་དག་པ་ལྷ་མོའི་ཚོགས། །ཙརྩི་ཀཱ་སོགས་གཞན་མཆོག་ཆོས་ཀྱི་དབྱིངས། །ཟུང་འཇུག་རོལ་པའི་ལྷ་མོ་འཁོར་དང་བཅས། །གསུང་གི་འཁོར་ལོས་དེང་འདིར་བཀྲ་ཤིས་ཤོག །ལས་དང་བྱ་བའི་འཁོར་ལོ་རྣམ་དག་པ། །དོན་དམ་ལྷ་ཆེན་བཅུ་གཉིས་འཁོར་དང་བཅས། །མཐིལ་བཞི་གསང་གཙུག་རྣམ་དག་ཤིང་རྟ་དཔུང༌། །སྐུ་ཡི་འཁོར་ལོས་དེང་འདིར་བཀྲ་ཤིས་ཤོག །སོར་མོ་རྣམ་དག་ཀླུ་དང་གཏུམ་མོའི་ཚོགས། །འདོད་ཡོན་དགའ་བདེའི་རང་བཞིན་གཟུགས་ཀྱི་ལྷ། །སྐྲ་དང་བ་སྤུ་རྣམ་དག་གྲུབ་པ་དང༌། །འབྱུང་པོའི་འཁོར་ལོས་དེང་འདིར་བཀྲ་ཤིས་ཤོག །གཟའ་དང་དྲང་སྲོང་རྒྱུ་སྐར་ཁྱིམ་དང་ཆ། །ཕྱོགས་སྐྱོང་ཞིང་སྐྱོང་ཕོ་ཉ་འཕྲོག་མ་དང༌། །གྷཎྜ་ཀརྞ་དགའ་བྱེད་ནག་པོ་ཆེ། །བྷྲྀཾ་གི་ནི་སོགས་འཁོར་གྱིའང་བཀྲ་ཤིས་
ཤོག །དོན་དམ་སྐྱབས་གསུམ་ཐུགས་གསུང་སྐུ་ཡི་བདག །ལྷུན་གྲུབ་ཡེ་ཤེས་འོད་གསལ་གཞལ་ཡས་ཁང༌། །ཆོས་སྐུའི་ཡོན་ཏན་འོད་ཀྱི་དྲ་བ་ཅན། །དཀྱིལ་འཁོར་ཆོས་དབྱིངས་ཆེན་པོའི་བཀྲ་ཤིས་ཤོག །དཀྱིལ་འཁོར་བཀྲ་ཤིས་དགེ་ལེགས་རྒྱ་མཚོའི་དབྱངས། །རྡོ་རྗེ་འཛིན་པ་བློ་གྲོས་རྒྱ་མཚོའི་སྒྲས། །རྣམ་པར་བསྒྲགས་ཏེ་སྐྱེ་རྒུ་རྒྱ་མཚོའི་ཚོགས། །རྒྱལ་བ་རྒྱ་མཚོའི་གོ་འཕང་མྱུར་ཐོབ་ཤོག །ཅེས་པ་ལ་སོགས་པ་བཀྲ་ཤིས་ཀྱི་ཚིགས་བཅད་ཇི་ལྟར་འོས་པ་བརྗོད་དོ། །དེ་ལྟར་ན་དཔལ་དུས་ཀྱི་འཁོར་ལོ་ལྷ་དགུའི་སྒྲུབ་ཐབས་ཉམས་སུ་ལེན་པ་རྣམས་ལ་ཉེ་བར་མཁོ་བ་མཆོད་པའི་ཆོ་ག་ཆ་ཚང་མདོ་ཙམ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་དཔལ་གྱི་ཇོ་ནང་དུ་སྨྲས་པའོ། །མངྒལཾ། ཨོ་སྭ་སྟི། མི་འགྱུར་བདེ་བ་ཆེན་པོའི་ཡེ་ཤེས་དང་། །རྣམ་ཀུན་མཆོག་ལྡན་སྟོང་བ་ཉིད་ཀྱི་དབྱིངས། །དབྱེ་མེད་ཟུང་ཕྱག་རྒྱས་དངོས་ཀུན་སྡོམས། །དཔལ་མཆོག་དུས་ཀྱི་འཁོར་ལོས་དགེ་ལེགས་སྩོལ། །རྣམ་ངག་ལུང་རིགས་སྨྲ་བའི་སེང་གེའི་སྒྲས། །ལྟ་ངན་མུ་སྟེགས་ཝ་སྐྱེའི་སྙིང་བཅིལ་ཞིང་། །ཐེག་མཆོག་གངས་རིའི་སྤོར་དགྱིངས་སྒྲོལ། །
མགོན་གྱིས། །ལེགས་བཤད་བསྒྲུབ་ཐབས་ནོར་བུའི་འཕྲེང་བ་འདི། །ལུང་རྟོགས་མཛོད་འཛིན་ཆོས་ཀྱི་འཕགས་པ་ཡི། །ཐུགས་བསྐྱེད་དཔྱིད་རྐྱི་བལ་མོའི་བུ་བྱེད་ཡས། །རྐོས་མཁན་རབ་ཏུ་འཕེལ་བའི་སོར་འཕྲུལ་ཀྱིས། །མི་ཟད་ཆོས་སྦྱིན་སྤེལ་ཕྱིར་བར་དུ་བསྐྲུན། །འདིར་བྱུང་རྣམ་དཀར་དགེ་བའི་ཟླ་ཟེར་གྱིས། །མ་ལུས་འགྲོ་བའི་སྒྲིབ་པའི་མུན་བསལ་ཅིང་། །ས་དང་ལམ་གྱི་བགྲོད་པ་མཐར་ཕྱིར་ཏེ། །སྐུ་གསུམ་རྒྱལ་བའི་གོ་འཕང་མྱུར་ཐོབ་ཤོག །ཅེས་པ་འདི་ཡང་ངེས་དོན་བསྟན་པའི་གསལ་བྱེད་དམ་པར་གྱུར་པ་བླ་མ་ངག་དབང་ཆོས་ཀྱི་འཕགས་པས་ཐུགས་བསྐྱེད་རྨད་དུ་བྱུང་བའི་སྒོ་ནས་དཔལ་དུས་ཀྱི་འཁོར་ལོའི་དཀྱིལ་འཁོར་བསྒྲུབ་ཅིང་མཆོད་པའི་ཆོ་ག་འདི་ཉིད། པར་དུ་བསྒྲུན་པའི་སྤར་བྱང་དུ་དགེ་ལེགས་རྒྱ་མཚོས་སྨྲས་པའོ། །དགེའོ།
ཤོག་སྟོང་། དཔལ་དུས་ཀྱི་འཁོར་ལོའི་བསྟོད་པའམ་མངོན་རྟོགས་ཉེ་བར་བསྡུས་པ།
དཔལ་དུས་ཀྱི་འཁོར་ལོའི་བསྟོད་པའམ་མངོན་རྟོགས་ཉེ་བར་བསྡུས་པ་བཞུགས།
ན་མ་ཤྲཱི་ཀཱ་ལ་ཙཀྲཱ་ཡ། སྟོང་པ་ཉིད་དང་སྙིང་རྗེའི་བདག །སྲིད་གསུམ་སྐྱེ་འཇིག་མེད་པའི་དངོས། །ཤེས་དང་ཤེས་བྱ་གཅིག་པའི་སྐུ། །དཔལ་ལྡན་དུས་འཁོར་ལ་ཕྱག་འཚལ། །རླུང་མེ་ཆུ་དང་ས་ཡི་དཀྱིལ་འཁོར་ལྷུན་པོ་པདྨ་དང༌། །ཟླ་ཉི་དུས་མེའི་སྟེང་དུ་དབང་ཕྱུག་དང་ནི་བདུད་ཀྱི་མགོར། །ཞབས་ནི་སྲིད་པའི་ཡུམ་གྱི་ཞབས་དང་ལྷན་ཅིག་བཀོད་གྱུར་པ། །ལྷ་ཡི་དབང་པོས་བཏུད་པའི་གཙོ་ལ་སྤྱི་བོས་ཕྱག་འཚལ་ལོ། །ཟླ་བའི་སྐུ་དང་ཟུང་གི་ཞབས་ཏེ་མེ་ཡི་མགྲིན་པ་ཆུ་གཏེར་དཔལ་ལྡན་ཞལ་ནི་སྣ་ཚོགས་མདོག །
ཕྲག་པ་དྲུག་དང་ཉི་མའི་དཔུང་པ་རྒྱལ་བའི་ཕྱག་གི་པདྨ་སྟོང་པ་དྲུག་དང་མེ་ཡི་ཚིགས། །ཞབས་དག་གིས་ནི་ཟླ་བ་ཉི་མ་བསྲེག་ཟའི་དཀྱིལ་འཁོར་དག་ལ་བདུད་དང་དྲག་པོ་སྐྲག་བཞིན་པ། །རོལ་པས་མནན་པའི་སྲིད་མེད་སྲིད་པ་མཉམ་པ་དུས་ཀྱི་འཁོར་ལོ་གཅིག་པུ་དེ་ལ་ཕྱག་འཚལ་ལོ། །རྡོ་རྗེ་རལ་གྲི་རྩེ་གསུམ་གྲི་གུག་མདའ་དང་ལྕགས་ཀྱུ་ཌཱ་མ་རུ། །ཐོ་བ་འཁོར་ལོ་མདུང་དབྱུག་དགྲ་སྟས་གཡས་ཀྱི་ཕྱག་བརྒྱན་གཡོན་པ་ཡང༌། །དྲིལ་བུ་ཕུབ་དང་ཁ་ཊྭཱཾ་ཐོད་པ་གཞུ་དང་ཞགས་པ་རིན་པོ་ཆེ། །པད་དཀར་དུང་དང་མེ་ལོང་ལྕགས་སྒྲོག་ཚངས་མགོས་བརྒྱན་ལ་ཕྱག་འཚལ་ལོ། །སྟག་ལྤགས་དང་ནི་རྡོ་རྗེའི་རྒྱན་ལྡན་རྡོ་རྗེ་སྐུ་ཅན་བདེ་བ་ཆེ། །འོད་གསལ་སྟོང་ཉིད་སྣ་ཚོགས་ཡུམ་གྱིས་ཀུན་ནས་རབ་འཁྱུད་གསེར་མདོག་མ། །ཞལ་བཞི་ཕྱག་བརྒྱད་གྲི་གུག་ལྕགས་ཀྱུ་ཌཱ་མ་རུ་དང་བགྲང་འཕྲེང་དང༌། །ཐོད་པ་ཞགས་པ་པདྨ་དཀར་དང་རིན་ཆེན་འཛིན་མར་བཅས་ལ་འདུད། །ནག་མོ་འབར་མ་བདུག་སྤོས་ཙན་དན་གུར་གུམ་དང་ནི་ག་པུར་སྣོད། །དྲིལ་བུ་པདྨ་ཡོངས་འདུའི་མེ་ཏོག་སྣ་ཚོགས་མེ་ཏོག་འཕྲེང་ལྡན་མ། །དམར་མོའི་གཡས་ན་མར་མེ་དོ་
ཤལ་ཅོད་པན་དང་ནི་གདུབ་བུ་སྟེ། །གཡོན་ན་གོས་དང་སྐ་རགས་དང་ནི་རིན་ཆེན་སྣ་རྒྱན་རྐང་གདུབ་འཛིན། །དཀར་མོའི་གཡས་ན་འོ་མ་ཆུ་དང་སྨན་མཆོག་ཆང་གི་སྣོད་རྣམས་ཏེ། །གཡོན་ན་བདུད་རྩི་གྲུབ་པའི་བཅུད་དང་བདུད་རྩིའི་འབྲས་བུ་འབྲས་ཆན་སྣོད། །སེར་མོ་འབར་མ་དུང་དང་གླིང་བུ་ནོར་བུ་དང་ནི་ཌཱ་མ་རུ། །པི་ཝང་རྔ་དང་འཁར་རྔ་ཟངས་དུང་རང་ཕྱོགས་གཙོ་བོའི་ཞལ་ལྡན་མ། །དེ་དག་དང་མཚུངས་དུ་བ་སྨིག་རྒྱུ་མེ་ཁྱེར་དང་ནི་མར་མེ་མ། །རང་མདོག་དང་མཚུངས་རྔ་ཡབ་བརྒྱད་ལྡན་ཕྱག་རྒྱ་ལྔ་ཡིས་རྣམ་བརྒྱན་མ། །རྡོ་རྗེ་སེམས་དཔའི་ཅོད་པན་དང་ལྡན་རྡོ་རྗེ་སེམས་དཔའ་རབ་མཆོད་མ། །མཉམ་པའི་སྟབས་ཅན་ཕ་རོལ་ཕྱིན་རྫོགས་སྲོག་གི་དཀྱིལ་འཁོར་འགགས་ལ་འདུད། །ཚད་མེད་རྣམ་ཐར་རྡོ་རྗེའི་རྣལ་འབྱོར་དབང་དང་བསྙེན་སྒྲུབ་དགའ་བ་བཞིས། །ལུས་ངག་སེམས་དང་ཆགས་པའི་ཐིག་ལེ་གནས་སྐབས་རྣམ་བཞི་རྣམ་དག་པ། །སྐད་ཅིག་མཁྱེན་པ་སྐུ་དང་རྡོ་རྗེ་བྱང་ཆུབ་རྣམ་བཞི་སེམས་དཔའ་བཞི། །ཆོས་ཀྱི་དུང་དང་གཎྜི་ནོར་བུ་དཔག་བསམ་ཤིང་ལ་ཕྱག་འཚལ་ལོ། །ཁུ་ཁྲག་རྐང་དང་ཁྲག་གི་ཚོགས་ཆེན་
དྲི་ཆུ་དྲི་ཆེན་རབ་འགགས་པས། །འཆི་མེད་རབ་སྟེར་འཆི་མེད་རྒྱུན་གྱིས་མངོན་པར་གང་བའི་ཐོད་པའམ། །ཟླ་བའི་རང་བཞིན་ཟླ་བའི་འོད་ལྟར་རབ་ཏུ་དཀར་བའི་བུམ་པ་ནི། །བདུད་ཀྱི་ཚོགས་འཇོམས་བདུད་རྩིའི་ཚོགས་ཀྱིས་ཤིན་ཏུ་གང་བ་རྣམས་ལ་འདུད། །འདུ་བྱེད་རླུང་དང་ངག་གི་དབང་པོ་སྣ་དང་རེག་གཞན་འདུས་མ་བྱས། །དོན་ཡོད་སྒྲོལ་མ་བགེགས་ཀྱི་སྒྲ་དང་ནམ་མཁའི་སྙིང་པོ་རེག་བྱ་མ། །རལ་གྲི་གྲི་གུག་རྩེ་གསུམ་ཕུབ་དང་དཔལ་ལྡན་ཐོད་པ་ཁ་ཊྭཱཾ་ག །ཉི་ཟླའི་གདོང་ལྡན་སྤྲིན་ནག་དང་མཚུངས་ས་ཡི་རིགས་ཀྱིས་འཁྱུད་ལ་འདུད། །ཚོར་བ་མེ་དང་ལག་པའི་དབང་པོ་མིག་དང་རོ་གཞན་བདེ་བ་ཆེ། །རིན་ཆེན་དབང་པོ་གོས་དཀར་མོ་དང་རྨུགས་བྱེད་ས་ཡི་སྙིང་པོ་རོ། །མདའ་དང་ལྕགས་ཀྱུ་ཌཱ་མ་རུ་དང་གཞུ་དང་ཞགས་པ་ནོར་བུའི་ཕྱག །དཀར་ནག་གདོང་ལྡན་ཉིན་མོར་བྱེད་འདྲ་ཆུ་ཡི་རིགས་ཀྱིས་འཁྱུད་ལ་འདུད། །འདུ་ཤེས་ཆུ་དང་རྐང་པའི་དབང་པོ་ལྕེ་དང་གཟུགས་གཞན་ཡེ་ཤེས་སྐུ། །སྣང་བ་མཐའ་
ཡས་མཱ་མ་ཀཱི་དང་ཁེངས་བྱེད་འཇིག་རྟེན་དབང་པོའི་གཟུགས། །ཐོ་བ་མདུང་དང་རྩེ་གསུམ་པད་དཀར་མེ་ལོང་དང་ནི་བགྲང་འཕྲེང་དང༌། །ནག་དང་དམར་བའི་གདོང་ལྡན་དཀར་པོ་མེ་ཡི་རིགས་ཀྱིས་འཁྱུད་ལ་འདུད། །གཟུགས་ཀྱི་ཕུང་པོ་ས་དང་བཤང་ལམ་ལུས་དང་དྲི་གཞན་འོད་གསལ་གཟུགས། །རྟག་པ་སྤྱན་མ་རེངས་བྱེད་དང་ནི་རྣམ་སེལ་དྲི་ཡི་རྡོ་རྗེ་མ། །འཁོར་ལོ་དབྱུག་པ་ཁྲོ་བོའི་རྡོ་རྗེ་དུང་དང་ལྕགས་སྒྲོག་དྲིལ་བུའི་ཕྱག །དཀར་ནག་གདོང་ལྡན་གསེར་གྱི་རི་འདྲ་རླུང་གི་རིགས་ཀྱིས་འཁྱུད་ལ་འདུད། །རྣ་བ་ཆོས་ཁམས་ཡིད་དང་སྒྲ་གཞན་ཕྱག་ན་རྡོ་རྗེ་ཆོས་ཁམས་མ། །ཀུན་བཟང་སྒྲ་ཡི་རྡོ་རྗེ་མ་སྟེ་ལྗང་སྔོན་ཕན་ཚུན་ཡང་དག་སྦྱོར། །གཡས་གཡོན་ཉི་ཟླའི་ཞལ་གྱིས་རབ་བརྒྱན་རྡོ་རྗེ་གྲི་གུག་དགྲ་སྟ་དང༌། །དྲིལ་བུ་ཐོད་པ་ཚངས་པའི་གདོང་ལྡན་སྟོང་པའི་རིགས་ལ་ཕྱག་འཚལ་ལོ། །རབ་དཀར་ཆུ་སྐྱེས་མདངས་བཀྲའི་ཟེ་འབྲུར་འོད་སྟོང་བདག་པོའི་དཀྱིལ་འཁོར་ལ། །རྡོ་རྗེའི་གདན་དང་གཡས་བརྐྱང་སྟབས་བཞུགས་རྒྱལ་དང་
རྒྱས་སྲས་ཁྲོ་རྒྱལ་དང༌། །འདམ་སྐྱེས་དམར་པོའི་གེ་སར་སྙིང་པོར་རི་བོང་འཛིན་པའི་དཀྱིལ་འཁོར་ལ། །པདྨའི་གདན་བཞུགས་རིག་མ་རྣམས་དང་རྡོ་རྗེ་མ་རྣམས་ལ་ཕྱག་འཚལ། །དེ་ལྟར་ལྷ་ཡི་འཁོར་ལོ་ལེགས་མཆོད་དྲི་དང་འཕྲེང་བ་བདུག་སྤོས་མ། །སྣང་གསལ་བདུད་རྩི་འབྲས་བུ་མ་དང་སྒེག་མོ་བཞད་མ་སིལ་སྙན་མ། །གར་དང་གླུ་ཡི་སྦྱོར་བ་ལ་བརྩོན་འདོད་མ་འདོད་ལ་རབ་དགའ་མ། །རྒྱན་དང་ཆ་བྱད་རྣམ་འགྱུར་དུ་མས་ཡིད་རབ་འཛིན་མ་རྣམས་བསྟོད་དོ། །ཕྱོགས་དང་མཚམས་སུ་ཆུ་སྐྱེས་དམར་དང་དཀར་པོ་ལ་གནས་རྣལ་འབྱོར་མ། །ལྟེ་བའི་རྩ་བརྒྱད་དྲུག་ཅུ་རྩ་བཞི་རྣམ་པར་དག་པའི་ཆོས་ཅན་མ། །ཐུན་ཚོད་དང་ནི་དབྱུག་གུ་རྣམ་དག་ཀུན་ནས་བདེ་ལ་སྙོམས་འཇུག་མ། །སྤྱན་གསུམ་ཕྱག་བཞི་རོལ་པས་ཡོངས་བསྐོར་ས་གའི་སྟབས་ཀྱིས་ལེགས་གནས་མ། །ཡི་དྭགས་ལ་གནས་ཙརྩི་ཀ་ནི་དབང་པོས་འཁྱུད་ཅིང་འཇིགས་མ་དང༌། །རླུང་ཤུགས་མ་དང་དྲག་མོ་དུས་ཀྱི་མཆེ་བ་མ་དང་མེ་འབར་གདོང༌། །རབ་གཏུམ་དྲག་མིག་སྣ་ཆེན་མས་
བསྐོར་དུས་མཐའི་སྤྲིན་མཚུངས་ཟླ་ཞལ་མ། །ཐམས་ཅད་གྲི་གུག་རྩེ་གསུམ་ཐོད་པ་ཁ་ཊྭཱཾ་ག་ཡིས་བརྒྱན་ལ་འདུད། །མཁའ་ལྡིང་ལ་གནས་ཁྱབ་འཇུག་མ་ནི་ཚངས་པས་འཁྱུད་ཅིང་དཔལ་མོ་དང༌། །རྣམ་པར་རྒྱལ་མ་སྒྱུ་མ་གྲགས་མ་བཀྲ་ཤིས་མ་དང་དཔལ་རྒྱལ་མ། །དཔལ་རྒྱལ་བྱེད་མ་འཁོར་ལོ་མས་བསྐོར་འཁོར་ལོ་དབྱུག་ཐོ་པདྨ་དང༌། །དུང་གི་ཕྱག་ལྡན་སྤྲིན་ནག་དང་མཚུངས་ཟླ་བའི་ཞལ་ལ་ཕྱག་འཚལ་ལོ། །མ་ཧེར་གནས་པའི་ཕག་མོ་ལ་ནི་དྲག་པོས་འཁྱུད་ཅིང་ཀེང་རུས་མ།། རྩིགས་མ་དུས་མཚན་རབ་ཁྲོས་གདོང་མ་དུས་ཀྱི་ལྕེ་མ་ནག་མོ་དང༌། །དྲག་མོ་དང་ནི་གཟུགས་ངན་མས་བསྐོར་མེ་ཡི་མདོག་ཅན་ཟླ་ཞལ་མ། །དབྱུག་པ་རལ་གྲི་ལྕགས་སྒྲོག་ཕུབ་ཀྱིས་རྣམ་བརྒྱན་རྣམས་ལ་ཕྱག་འཚལ་ལོ། །རྨ་བྱར་གནས་པའི་གཞོན་ནུ་མ་ནི་ཚོགས་བདག་གིས་འཁྱུད་པདྨ་མ། །རིན་ཆེན་ཕྲེང་མ་ལུས་མེད་གཞོན་ནུ་རི་དྭགས་བདག་པོའི་འགྲོས་མ་དང༌། །མིག་མཛེས་རུལ་མ་བཟང་མོས་ཡོངས་བསྐོར་བྱི་རུའི་འོད་འཕྲོ་གདོང་དྲུག་མ། །ཤཀ་ཏི་ལྕགས་ཀྱུ་རིན་ཆེན་ཞགས་པས་ཉེ་བར་མཛེས་ལ་ཕྱག་འཚལ་ལོ། །
ཁྱུ་མཆོག་ལ་གནས་དྲག་མོ་ལ་ནི་གཤིན་རྗེས་འཁྱུད་ཅིང་ཕྱོགས་ཀུན་ནས། །གཽ་རི་འདེགས་མ་གཾ་ག་མ་དང་རྟག་མ་མྱུར་མ་མཚོན་བྱེད་མ། །དམར་སེར་མ་དང་ནག་མོས་ཡོངས་བསྐོར་ཟླ་བའི་མདོག་ཅན་ཟླ་བའི་ཞལ། །རྩེ་གསུམ་ཅང་ཏེའུ་ཁ་ཊྭཱཾ་ག་དང་ལྟོས་འགྲོས་མཚན་ལ་ཕྱག་འཚལ་ལོ། །སེང་གེར་གནས་པའི་དཔལ་མོ་ལ་ནི་གཞོན་ནུས་འཁྱུད་ཅིང་དཔལ་དཀར་མོ། །འཛིན་མ་ཟླ་བའི་རི་མོ་ཅན་དང་རི་བོང་འཛིན་ཞལ་ངང་པའི་མདོག །པདྨའི་དབང་མོ་སྐར་མིག་མ་དང་དྲི་མེད་རི་བོང་འཛིན་མས་བསྐོར། །ཟླ་འོད་ཟླ་ཞལ་པདྨ་བགྲང་འཕྲེང་ཆུ་སྐྱེས་རིན་ཆེན་འཛིན་ལ་འདུད། །གླང་པོར་གནས་པའི་དབང་མོ་ལ་ནི་སྲིན་པོས་འཁྱུད་ཅིང་རྡོ་རྗེའི་འོད། །བཀྲ་བའི་རི་མོ་རྡོ་རྗེའི་ལུས་མ་གསེར་ལྡན་མ་དང་ཨུར་བ་སི། །རཾ་བྷ་ཟུག་རྔུ་མེད་མ་དང་ནི་ཤིན་ཏུ་སྒྲོལ་མས་ཡོངས་བསྐོར་མ། །གསེར་མདོག་ཟླ་ཞལ་རྡོ་རྗེ་མདའ་དང་དྲིལ་བུ་གཞུ་ཡིས་མཚན་ལ་འདུད། །ངང་པར་གནས་པའི་ཚངས་མ་ལ་ནི་ནོར་ལྷས་འཁྱུད་ཅིང་མཆོད་སྦྱིན་འདོད། །ངག་གི་དབང་ཕྱུག་པདྨའི་སྤྱན་མ་ཆུ་སྐྱེས་ལྡན་
མ་བློ་གྲོས་མ། །གླུ་མ་གློག་མ་དྲན་མས་ཡོངས་བསྐོར་རིག་བྱེད་གདོང་མ་གསེར་མདོག་མ། །ཕྱག་གི་པདྨས་པདྨ་ཚངས་དབྱུག་སྤྱི་བླུགས་བར་བུས་མཚན་ལ་འདུད། །ཟླ་བ་ཚིགས་ཆེན་ཉི་མའི་ཚེས་དང་རྩ། །རྣམ་དག་ལྷ་ཆེན་བཅུ་གཉིས་འཁོར་དང་བཅས། །སྤྱན་གསུམ་ཉི་ཟླའི་མདོག་ཅན་པདྨའི་སྟེང༌། །རོལ་པས་ཡོངས་བསྐོར་རྡོ་རྗེའི་གདན་བཞུགས་པ། །སྲིན་མོས་འཁྱུད་ཅིང་ཡི་དྭགས་ལ་གནས་པའི། །བདེན་བྲལ་ལ་སོགས་ནག་པའི་ཚེས་རྣམས་གཞན། །རལ་གྲི་གྲི་གུག་ཕུབ་དང་ཐོད་པ་ཅན། །དུས་མཐའི་སྤྲིན་མཚུངས་ཟླ་བའི་ཞལ་ལ་འདུད། །གཏུམ་མོས་འཁྱུད་ཅིང་རི་དྭགས་ལ་གནས་པའི། །རླུང་སོགས་ས་གའི་ཚེས་གཞན་དཔག་བསམ་ཤིང༌། །ཡོངས་འདུས་མེ་ཏོག་ནོར་བུ་ཨུཏྤལ་འཛིན། །ཟླ་ཞལ་མིག་སྨན་མདོག་ལ་ཕྱག་འཚལ་ལོ། །ལུག་ལ་གནས་ཤིང་ཆུ་བདག་མོས་འཁྱུད་པའི། །མེ་ལྷ་ལ་སོགས་སྣྲོན་གྱི་ཚེས་རྣམས་གཞན། །མདུང་ཐུང་དབྱུག་པ་ཆུ་སྐྱེས་སྤྱི་བླུགས་འཛིན། །ཞལ་གཅིག་པདྨ་རཱ་གའི་མདོག་ལ་འདུད། །དཔལ་མོས་འཁྱུད་ཅིང་རྨ་བྱ་ལ་གནས་པའི། །གདོང་
དྲུག་ལ་སོགས་ཆུ་སྟོད་ཚེས་རྣམས་གཞན། །ཤཀ་ཏི་མདུང་དང་ནོར་བུ་མེ་ལོང་ཅན། །བྱི་རུའི་འོད་འཕྲོ་གདོང་དྲུག་ལྡན་པས་སྐྱོང༌། །ཕག་མོས་འཁྱུད་ཅིང་ཆུ་སྲིན་ལ་གནས་པའི། །རྒྱ་མཚོ་ལ་སོགས་གྲོ་བཞིན་ཚེས་རྣམས་གཞན། །ཞགས་པ་རིན་ཆེན་སྦྲུལ་ཞགས་ཆུ་ཤེལ་འཛིན། །ཟླ་བའི་འོད་ཅན་ཟླ་བའི་ཞལ་མཆོད་དོ། །བྱི་བར་གནས་ཤིང་གཞོན་ནུ་མས་འཁྱུད་པའི། །ཚོགས་བདག་ལ་སོགས་ཁྲུམས་སྟོད་ཆོས་རྣམས་གཞན། །དགྲ་སྟྭ་རྡོ་རྗེ་ཞགས་པ་ནོར་བུའི་ཕྱག །ཟླ་ཞལ་ཟླ་འོད་ལྟ་བུར་དཀར་ལ་འདུད། །གླང་པོར་གནས་ཤིང་རླུང་ལྷ་མོས་འཁྱུད་པའི། །བརྒྱ་བྱིན་ལ་སོགས་ཐ་སྐར་ཚེས་རྣམས་གཞན། །རྡོ་རྗེ་མདའ་དང་དྲིལ་བུ་གཞུ་ཡིས་མཚན། །གསེར་མདོག་ཟླ་བའི་ཞལ་ལ་ཕྱག་འཚལ་ལོ། །གློག་མས་འཁྱུད་ཅིང་ངང་པ་ལས་གནས་པའི། །ཚངས་པ་ལ་སོགས་སྨིན་དྲུག་ཚེས་རྣམས་གཞན། །ཁབ་དང་བགྲང་འཕྲེང་ཆུ་སྐྱེས་སྤྱི་བླུགས་འཛིན། །ཆུ་ཡི་གསེར་མཚུངས་ཆུ་ཡི་ཞལ་གྱིས་སྐྱོང༌། །ཨུ་མས་འཁྱུད་ཅིང་ཁྱུ་མཆོག་ལ་གནས་པའི། །དྲག་པོ་ལ་
སོགས་མགོ་ཡི་ཚེས་རྣམས་གཞན། །རྩེ་གསུམ་མདའ་དང་སྦྲུལ་ལྡན་ཁ་ཊཱཾ་གཞུ། །རི་བོང་འཛིན་ཞལ་མཁའ་ལྟར་སྔོ་ལ་འདུད། །གླང་པོར་གནས་ཤིང་ནོར་སྦྱིན་མས་འཁྱུད་པའི། །ནོར་བདག་ལ་སོགས་རྒྱལ་གྱི་ཚེས་རྣམས་གཞན། །ནོར་བུ་བེ་ཅོན་ནེའུ་ལེ་པདྨའི་ཕྱག །སྔོན་པོ་རི་དྭགས་མཚན་པའི་ཞལ་མཆོད་བགྱི། །དཔལ་མོས་འཁྱུད་ཅིང་མཁའ་ལྡིང་ལ་གནས་པའི། །ཁྱབ་འཇུག་ལ་སོགས་མཆུ་ཡི་ཚེས་རྣམས་གཞན། །འཁོར་ལོ་དབྱུག་ཐོ་པདྨ་དུང་གིས་མཚན། །ཞལ་གཅིག་མར་གད་མདོག་ལ་ཕྱག་འཚལ་ལོ། །གཤིན་རྗེ་མས་འཁྱུད་མ་ཧེ་ལ་གནས་པའི། །གཤིན་རྗེ་ལ་སོགས་དབོ་ཡི་ཚེས་རྣམས་གཞན། །དབྱུག་པ་རལ་གྲི་ལྕགས་སྒྲོག་ཞགས་པས་བརྒྱན། །ལྗང་ཁུ་རི་དྭགས་ཅན་ཞལ་ལ་ཕྱག་འཚལ། །འོད་ཟེར་ཅན་འཁྱུད་དབྱུག་སྔོན་ནག་པོ་རལ་གྲི་དང་ནི་རྡོ་རྗེ་ཕུབ་དང་ལྟོས་འགྲོ་འཛིན། །ཙིན་དས་ལེགས་འཁྱུད་ཌཱ་ཀི་དམར་པོ་མེ་མདའ་དང་ནི་ལྕགས་ཀྱུ་གཞུ་དང་ཞགས་པས་མཚན། །ཁྲོ་གཉེར་མས་འཁྱུད་མི་གཡོ་དཀར་པོ་ཐོ་བ་དང་ནི་མདུང་དང་པདྨ་མེ་ལོང་འཛིན། །ལྕགས་སྒྲོག་མས་འཁྱུད་སྟོབས་
ཆེན་སེར་པོ་འཁོར་ལོ་དང་ནི་དབྱུག་པ་དུང་དང་ནོར་བུའི་ཕྱག །སྔོན་མོས་འཁྱུད་པའི་གཙུག་ཏོར་ལྗང་ཁུ་དགྲ་སྟྭ་དང་ནི་རྩེ་གསུམ་སྦྲུལ་ཞགས་ཁ་ཊྭཱཾ་ག །དྲག་སྤྱན་མས་འཁྱུད་གནོད་མཛེས་སྔོན་པོ་གྲི་གུག་དང་ནི་རྡོ་རྗེ་ཐོད་པ་དྲིལ་བུ་འཛིན། །ཕག་རྟ་སེང་གེ་གླང་པོ་མཁའ་ལྡིང་རྐང་བརྒྱད་ཀྱི་ནི་ཤིང་རྟ་ལ་གནས་གཡས་བརྐྱང་སྟབས། །མཐིལ་བཞི་བཤང་ལམ་གཙུག་གི་རྩ་དག་ཁྲོ་བོའི་ཚོགས་ནི་ཞལ་གཅིག་ཕྱག་བཞིས་བརྗིད་ལ་འདུད། །སྟོབས་ཀྱི་རྒྱུ་དང་པདྨ་ཆར་སྤྲིན་མདོག །ནོར་རྒྱས་དུང་སྐྱོང་བྱི་རུའི་ཕུང་པོ་འདྲ། །མཐའ་ཡས་རིགས་ལྡན་ཀུན་དའི་མདོག་ལྟར་གསལ། །འཇོག་པོ་པདྨ་ཆེན་པོ་རབ་ཏུ་སེར། །རྒྱལ་དང་རྣམ་རྒྱལ་ལྗང་སྔོན་འབྱུང་བ་ལ། །རྡོ་རྗེ་གདན་བཞུགས་རིན་ཆེན་རྒྱལ་གྱིས་བརྒྱན། །བུམ་པ་རྡོ་རྗེ་པདྨ་ནོར་བུའི་ཕྱག །རྐང་སོར་ཀླུ་ཆེན་གཏུམ་མོས་འཁྱུད་ལ་འདུད། །མདུང་གིས་འབིགས་དང་ལྷག་མ་བརྩེགས་པའི་རོ། །དྲག་པོའི་གཡུལ་དང་རུལ་པ་བྱིས་པ་གསོད། །རྣག་གི་དྲི་དང་སྦྲུལ་གྱིས་ཟོས་པ་ཡིས། །
དུར་ཁྲོད་ཆེན་པོར་བསེ་དང་བྷེ་རུན་ཊ། །དོམ་དང་ཁྲུང་ཁྲུང་འབྲི་དང་བྱ་མ་བྱི། །སེང་གེ་མིག་སྔོན་ལ་གནས་འཁོར་ལོའི་སྟེང༌། །ཟླུམ་པོའི་སྟབས་ཅན་མི་མགོའི་འཕྲེང་ལྡན་མ། །གཅེར་བུ་སྤྱན་གསུམ་གྲི་གུག་ཐོད་པ་མ། །ཕྱག་རྒྱ་ལྔ་ལྡན་ཀླུ་ཡིས་རབ་འཁྱུད་མ། །ལུས་ལ་ལག་པའི་སེར་མོ་རྣམ་དག་མ། །ཁྱི་གདོང་མ་དང་ཁྭ་གདོང་ཕག་གདོང་མ། །བྱ་རྒོད་གདོང་མ་སྟག་གདོང་འུག་གདོང་མ། །ལྕེ་སྤྱང་གདོང་མ་ནམ་མཁའ་ལྡིང་གདོང་མ། །སྟེང་འོག་ཤིང་རྟར་སྔོན་མོ་རྡོ་རྗེའི་མིག །སྐྲ་དང་བ་སྤུ་རྣམ་དག་གྲུབ་པ་དང༌། །འབྱུང་པོའི་ཚོགས་ཀྱིས་བསྐོར་ལ་ཕྱག་འཚལ་ལོ། །ཤིན་ཏུ་སྟོབས་མ་རྨུགས་བྱེད་མ་དང་ང་རྒྱལ་ཅན་མ་རེངས་བྱེད་མ། །ལྕགས་སྒྲོག་མ་དང་ཁྲོ་གཉེར་ཅན་མ་ཙུན་ད་དང་ནི་འོད་ཟེར་ཅན། །དྲག་སྤྱན་མ་དང་ཤིན་ཏུ་སྔོན་མོ་རང་རང་རིགས་ཀྱི་ཁྲོ་བོ་ཡི། །ཞལ་ཕྱག་མཚོན་ཆ་ཁ་དོག་རྒྱན་ལྡན་ཁྲོ་མོ་རྣམས་ལའང་ཕྱག་འཚལ་ལོ། །དེ་བཞིན་སྒྲོལ་མ་རེག་བྱ་མ་དང་ཁྱབ་འཇུག་ལྕགས་སྒྲོག་ཁ་གདོང་མ། །རབ་སྔོན་རབ་བརྩོན་ཙརྩི་ཀ་དང་ཁྱི་གདོང་མས་བསྐྱེད་བརྒྱ་བྱིན་དུ།། དབྱེ་བ་གོས་དང་
མཆིལ་འདོར་རེག་བྱ་ལྷག་མ་ཟ་བ་ཀུན་དུ་གདུང༌། །སྐྲོད་དང་ལུས་འཕྲུག་ཡན་ལག་བསྐྱོད་པར་འདོད་དང་ཕྱིར་འདོད་མ་ལ་འདུད། །གོས་དཀར་རོ་མ་གཞོན་ནུ་མ་དང་ཁྲོ་གཉེར་ཅན་མ་བྱ་རྒོད་མ། །དྲག་སྤྱན་རྨུག་མ་ཕག་མོ་དང་ནི་ཕག་གདོང་མས་བསྐྱེད་ལྷོ་ཕྱོགས་སུ། །བསྐྱོད་པ་ཟས་དང་གར་འགུགས་གཡུལ་དང་རྒྱུག་པ་དང་ནི་སྐེམས་པ་དང༌། །ལུས་ཀྱི་དྲི་མ་བཤང་གཅི་ཟག་པར་འདོད་དང་ཕྱིར་འདོད་མ་རྣམས་མཆོད། །མཱ་མཱ་ཀཱི་དང་གཟུགས་མ་དཔལ་མོ་ཙུན་ད་དང་ནི་འུག་གདོང་མ། །སྒྲ་མ་ཁེངས་མ་དྲག་མོ་དང་ནི་སྟག་གདོང་མས་བསྐྱེད་ནོར་སྦྱིན་དུ། །རྒྱས་པ་རྒྱན་དང་རྒྱལ་སྲིད་འཆིང་བ་བྱིས་པ་སྡིག་དང་རོལ་མོའི་སྒྲ། །འཇམ་པར་སྨྲ་དང་མལ་སྟན་རྩོད་མང་འདོད་དང་ཕྱིར་འདོད་མ་རྣམས་རྒྱལ། །སྤྱན་མ་དྲི་མ་ཚངས་མ་དང་ནི་འོད་ཟེར་ཅན་མ་མཁའ་ལྡིང་མ། །ཆོས་ཀྱི་ཁམས་མ་རེངས་མ་དབང་མོ་ལྕེ་སྤྱང་མས་བསྐྱེད་ཆུ་བདག་ཏུ། །རེངས་པ་དྲི་དང་ཆུ་ལ་རྐྱལ་བ་ཕུར་བུས་འདེབས་དང་སྦྲུལ་འཆིང་འཁྲིག །གཉེན་འདུན་མལ་བརྙེས་སེམས་ཅན་བསླུ་འདོད་ཕྱིར་འདོད་མ་རྣམས་གཞན་ལ་འདུད། །ཁྱོད་
ནི་སྲིད་པ་གསུམ་ལས་འདས་ཀྱང་སྲིད་པ་གསུམ་གྱི་རྣམ་པ་ཅན། །ཕྲ་རབ་རྡུལ་གྱི་ཆོས་དང་བྲལ་ཡང་བརྟན་དང་གཡོ་བ་ཀུན་གྱི་གཟུགས། །ལུས་དང་དབང་པོའི་སྦྱོར་བ་སྤངས་ཀྱང་རྟག་ཏུ་འདོད་ཆགས་ཆེ་ལ་རོལ། །བསམ་གྱིས་མི་ཁྱབ་བརྟག་པར་དཀའ་བ་དུས་ཀྱི་འཁོར་ལོས་བདག་སྐྱོངས་ཤིག །གཟའ་དང་དྲང་སྲོང་རྒྱུ་སྐར་ཁྱིམ་དང་ཆ། །ཕྱོགས་སྐྱོང་ཞིང་སྐྱོང་ཕོ་ཉ་འཕྲོག་མ་དང༌། །གྷཎ་ཊ་ཀརྞ་དགའ་བྱེད་ནག་པོ་ཆེ། །བྷྲྀཾ་གི་ནི་སོགས་འཁོར་མང་རྒྱལ་གྱུར་ཅིག །དེ་ལྟར་བསྟོད་པས་ཕུང་པོ་ཁམས་སོགས་གཞན། །བདེ་གཤེགས་སྙིང་པོ་དེ་བཞིན་ཉིད་ཀྱི་དབྱིངས། །གློ་བུར་དྲི་མའི་སྦུགས་ལས་ངེས་གྲོལ་ཏེ། །སྲིད་གསུམ་དང་བ་མངོན་དུ་བྱཻད་གྱུར་ཅིག །དཔལ་དུས་ཀྱི་འཁོར་ལོའི་བསྟོད་པའམ་མངོན་རྟོགས་ཉེ་བར་བསྡུས་པ་རྫོགས་སོ། །སེམས་ཅན་ཐམས་ཅད་ཀྱིས་རང་རང་ལ་བཞུགས་པའི་སངས་རྒྱས་མྱུར་དུ་ཐོབ་པར་གྱུར་ཅིག །ཅེས་པ་འདི་ཡང་རྒྱལ་ཁམས་ཕྱོགས་མེད་རིས་མེད་པ་རྟོན་པ་བཞི་ལྡན་གྱིས་བཀོད་པའོ།། །།ཨོཾ་ཨཱཿཧཱུཾ་ཧོཿཧཾ་ཀྵཿསྭཱཧཱ། མངྒ་ལཾ། དགེའོ།། །།
དུས་འཁོར་སྨན་མཆོད་ཀྱི་བླ་བརྒྱུད་ཀྱི་ཁ་བསྐང་ནི། ལུང་རིག་རྒྱ་མཚོ་དང་། འཇམ་མགོན་བླ་མ་ཀུན་དགའ་སྙིང་པོ་མཆོད། རིན་ཆེན་རྒྱ་མཚོ་བློ་གྲོས་རྒྱལ་དང་། །ངག་དབང་འཕྲིན་ལས་ངག་དབང་རྒྱམ་པར་རྒྱལ། ཀུད་དགའ་དར་རྒྱས་འཕྲིན་ལས་རྣམ་རྒྱལ་ཞབས། །ལྷུང་གྲུབ་རྒྱ་མཚོ་རྣམས་ལ་མཆོད་པ་འབུལ། །དཀོན་མཆོག་འཇིགས་མེད་ཕྱོགས་ལས་རྣམ་རྒྱལ་དང་། །རྡོ་རྗེ་འཆང་ཆེན་ངག་དབང་ཆོས་འཕེལ་ཏེ། །རྡོ་རྗེ་རྣལ་འབྱོར་སོགས། ༈ དང་པོ་མི་སྐྱོད་པའི་ངོ་བོ་ཆོས་དབྱངས་ཡེ་ཤེས་ལ་བསྟོད་པ་ནི། །མཆོག་སྦྱིན་རྡོ་རྗེ་མཆོག་ཁྱོད་འདུད། །ཡང་དག་མཐའ་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། སངས་རྒྱས་བྱང་ཆུབ་ཁྱོད་ལ་འདུད། །གཉིས་པ་རྣམ་པར་སྣང་མཛད། །ཀྱི་ངོ་བོ་མེ་ལོང་ཡེ་ཤེས་ལ་བསྟོད་པ་ནི། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་འཚལ་འདུད། །སངས་
རྒྱས་དགེས་པ་ཁྱོད་ལ་འདུད། །སངས་རྒྱས་རོལ་ལ་ཕྱག་འཚལ་འདུད། །གསུམ་པ་སྣང་བ་མཐའ་ཡས་ཀྱི་ངོ་བོ་སོར་རྟོག་ཡེ་ཤེས་ལ་བསྟོད་པ་ནི། །སངས་རྒྱས་འཛུམ་པ་ཁྱོད་ལ་འདུད། །སངས་རྒྱས་བཞད་ལ་ཕྱག་འཚལ་འདུད། །སངས་རྒྱས་གསུང་ཉིད་ཁྱོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། །བཞི་པ་རིན་ཆེན་འབྱུང་ལྡན་གྱི་ངོ་བོ་མཉམ་ཉིད་ཡེ་ཤེས་ལ་བསྟོད་པ་ནི། །མེད་པ་ལས་བྱུང་ཁྱོད་ལ་འདུད། །སངས་རྒྱས་འབྱུང་བ་ཁྱོད་ལ་འདུད། ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལད་བྱུང་ཁྱོད་ལ་འདུད། །ལྔ་པ་དོན་ཡོད་གྲུབ་པའི་ངོ་བོ་བྱ་གྲུབ་ཡེ་ཤེས་ལ་བསྟོད་པ་ནི། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་སེཧས་སྐུ་ཉིད་ཁྱོད་ལ་འདུད། །ཅེས་པའོ།
འཇིགས་མེད་རྣམ་རྒྱལ་ཆོས་འཕེལ་རྒྱ་མཚོ་དང་། །ཆོས་ཀྱི་འཕགས་པ་ཀུན་དགའ་དཔལ་ལྡན་རྗེ། །ངག་དབང་ཆོས་འབྱོར་ཀུན་དགའ་མཁས་གྲུབ་དབང་། །བསྟན་པ་གསལ་བྱེད་རྣམས་ལ་མཆོད་པ་འབུལ། །ཨོཾ་ཨཱ༔ཧཱུཾ། རྡོ་རྗེ་བཟང་པོ་དཀོན་མཆོག་དར་རྒྱས་དང་། །བློ་གྲོས་གྲགས་པས་རྒྱལ་བསྟན་རབ་སྤེལ་བ། །རྡོ་རྗེ་རྣལ་འབྱོར་མངོན་སུན་སྟོན་མཛད་པའི། །རྩ་བརྒྱུད་བླ་མ་རྣམས་ལ་མཆོད་པ་འབུལ། །ཨོཾ་ཨཱ༔ཧཱུཾ། འཛམ་ཐང་གཙང་ཆེན་གཟིམ་ཁང་བདེ་ཆེན་བཤད་སྒྲུབ་དཔལ་གྱི་ཕོ་བྲང་གི་གདན་རབས་རིམ་བྱོན་ལྟར་བློ་བཟང་ཆོས་འཕེལ་བས་བྲིས་པའོ། །
ཤོག་སྟོང་། དཔལ་དུས་ཀྱི་འཁོར་ལོ་ལ་བརྟེན་པའི་ལྷོ་སྒོའི་ཆོ་ག
དཔལ་དུས་ཀྱི་འཁོར་ལོ་ལ་བརྟེན་པའི་ལྷོ་སྒོའི་ཆོ་ག་ཞེས་བྱ་བ་བཞུགས།
ན་མོ་མཧཱ་སརྦ་ཛྙཱ་དརྴ་དྷརྨཱ་ཀ་ར་ཡ། འདིར་དུས་ཀྱི་འཁོར་ལོ་ལ་བརྟེན་པའི་ལྷོ་སྒོའི་ཆོ་ག་ནི། འདུས་པ་དང་གཤེད་སྐོར་སོགས་ཀྱི་དུས་ཐ་མའི་ཆོ་ག་རྣམས་ནི་ངན་སོང་སྦྱོང་རྒྱུད་ཀྱི་ལུགས་ཟངས་མར་སྦྱར་བར་མཛད་འདུག་པ་རྒྱུད་ནི་རྒྱུད་གཞན་གྱིས་རྟོགས་པར་བྱ་བ་ཡིན་པས། ཤི་ནས་ངན་སོང་སྦྱོང་བའི་ལས་ནི་སྦྱོང་རྒྱུད་ཁོ་ན་བཞིན་བྱ་དགོས་པས་དོན་ནོ། །དེའི་ཕྱིར་ལེགས་པའི་བུས། དུས་འཁོར་གྱི་ལྷོ་སྒོའི་སྔགས་རྣམས་ཀྱང་ངན་སོང་སྦྱོང་རྒྱུད་དུ་བཀོད་པས་འདིར་ཡང་དེ་བཞིན་བྱའོ། །ལྷོ་སྒོའི་ཆོ་ག་ཞེས་པའང་འཕགས་ཡུལ་དུ་གྲོང་ཁྱེར་གྱི་ལྷོ་སྒོ་ནི་གཤིན་རྗེ་གནས་པའི་ཕྱོགས་ཡིན་པས་རོ་
བསྐྱལ་བའི་སྐབས་མ་གཏོགས་མི་ཕྱེ་ཞིང་དེར་དགོས་པའི་ཆོ་ག་ཡིན་པས་དཀྱིལ་འཁོར་ལྷོ་སྒོར་བྱེད་པ་སོགས་ནི་རྫུན་བཤད་དོ། །དེ་ནས་རྟེན་གང་ཡིན་པ་ལ་བགེགས་སྦྱངས་པ་ནི། རང་ཉིད་སྐད་ཅིག་གིས་དུས་ཀྱི་འཁོར་ལོར་གསལ་བར་གྱུར། བགེགས་གཏོར་ནི། ཨོཾ་ཨཱཿཧཱུཾ་ཧྲཿཕཊ། ཨོཾ་ཨོཾ་བཛྲ་ཙནྡྲ༴ ཨོཾ་ཨཱཿབཛྲ་སུརྻ༴ ཨོཾ་ཧཱུཾ་བཛྲ་ཨཱ༴ ཨོཾ་ཧོཿསརྦ༴ འཇིག་རྟེན་གསུམ་རྒྱལ་གྱི་ཕྱག་རྒྱ་བཅས་ཏེ། ཨོཾ་ཨཱཿཧཱུཾ། ཚེ་ལས་འདས་པ་ཨ་མུ་ཀ་ཞེས་བྱ་བ་ལ་ལས་ཀྱི་དབང་གིས་འཆི་ཁ་དང་བར་དོ་དང་ཚེ་རབས་གཞན་ཐམས་ཅད་དུ་གནོད་ཅིང་འཚེ་བར་བྱེད་པ་དང༌། སྡིག་པ་སྦྱོང་ཞིང་དགེ་བའི་ཆོས་བསྐྱེད་པ་ལ་བར་དུ་
གཅོད་པ་དང༌། འབྲེལ་བ་ཅན་ཤུལ་ན་གནས་པ་རྣམས་ལ་གནོད་ཅིང་འཚེ་བར་བྱེད་པའི་གནོད་བྱེད་བགེགས་ཀྱི་ཚོགས་གང་ཡིན་པ་ཐམས་ཅད་ཨཱ་གཙྪ་ཨཱ་གཙྪ། ཤཱི་གྷྲཾ། ཨེ་དཾ་བ་ལིང༌། གྲྀཧྞ། གྲྀཧྞ། བྷུག་ཏྭ། བི་ཏྭ། ཀྲིབ་ཏིཾ། ཀྲི་ཏྭ། སརྦ་སཏྭ་ནཱཾ། ཤཱིནྟཾ། ཙིཏྟིཾ། ཀྲི་ཏྭ། སྭ་ཨ་བ་ར་སྭ་སྠ་ནཾ་གཙྪ་གཙྪ་སྭཱཧཱའི་བར་ལན་གསུམ་བརྗོད། སྤྲོ་ན་ཁྲོ་བོ་སྤྱན་འདྲེན་དང་མཆོད་བསྟོད་བྱ། ཧཱུཾ། དཀྱིལ་འཁོར་ཆེན་པོ་སོགས་བྱ། ན་མོ་སངས་རྒྱས་ཀྱི་བཀའ་བདེན་པ་དང༌། ཆོས་ཀྱི་བཀའ༴ དགེ་འདུན་གྱི༴ གསང་སྔགས་དང་རིགས་སྔགས་ཀྱི་རྒྱལ་པོ་ཁྲོ་བོ་དང་ཁྲོ་མོ་རྣམས་ཀྱི༴ བཅོམ་ལྡན་འདས་དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ལྷ་ཚོགས་རྣམས་ཀྱི༴ ཁྲོ་བོའི་དབང་པོ་རྡོ་རྗེ་ཤུགས་འཁོར་བསྲུང་མ་དྲུག་ཅུའི་ལྷ་ཚོགས་རྣམས་ཀྱི༴ དཔལ་མགོན་དམ་པ་ཆོས་སྐྱོང་བའི་བསྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱི༴ བདེན་པ་དང་བདེན་པ་ཆེན་པོའི་བྱིན་གྱིས་རླབས་ཀྱིས་ཆྒཻ་མོ་ཞེས་བྱ་བ། སོགས་ནས།
གདོན་བགེགས་ཀྱི་ཚོགས་གང་ཡིན་པ་ཐམས་ཅད་གཏོར་མ་འདིས་ཚིམ་པར་གྱིས་ལ་གནོད་སེམས་ཞི་ཞིང་དགེ་བའི་སེམས་དང་ལྡན་པས་དམིགས་ཡུལ་བསྒྲུབ་བྱ་འདིའི་ཐན་འཁོར་དུ་མ་གནས་པར་གཞན་དུ་སོངས་ཤིག གལ་ཏེ་མི་འགྲོ་ན་ཡེ་ཤེས་ཀྱི་རྡོ་རྗེ་འབར་བས་མགོ་བོ་ཚལ་པ་བརྒྱར་དགས་པར་བྱའོ། །གཏོར་མ་ཕྱི་རོལ་ཏུ་དོར་རོལ་མོའི་སྒྲ་བསྒྲགས་གུ་གུལ་གྱིས་བདུག་ཡུངས་ཀར་གྱིས་བྲབས། དེ་ཉིད་ལས་འཕྲོས་པའི་རྡོ་རྗེའི་མེ་དཔུང་སྟེང་དུ་འོག་ཏུ་ལྗང་ཁུ་དང་སྔོན་པོ། ཤར་དང་མེར་ནག་པོ། ལྷོ་དང་བདེན་བྲལ་དུ་དམར་པོ། བྱང་དང་དབང་ལྡན་དུ་དཀར་པོ། ནུབ་དང་རླུང་དུ་སེར་པོ་འབར་ཞིང་རབ་ཏུ་འབར་བའི་རྡོ་རྗེ་རྣམས་ཀྱིས་སེམས་ཅན་རྣམས་ལ་རྣམ་པར་འཚེ་བར་བྱེད་པའི་བདུད་ཀྱི་ཚོགས་ཕྱོགས་བཅུ་ན་གནས་པ་མཐའ་དག་ངེས་པར་བསྲེགས་ནས་བདེ་བ་ཆེན་པོ་ལ་འགོད་པར་བྱའོ། །ཨོཾ་ཨཱཿཧཱུཾ་ཧོཿཧཾ་ཀྵཿཧྲཱཿཧྲཱཿཧྲཱཿཧྲཱཿ སོགས་ནས། ཧཱུཾ་ཧཱུཾ་ཕཊ་ཕཊ། དེ་ནས་རྟེན་བསྐྱེད་
པ་ནི། ཨོཾ་ཨཱཿཧཱུཾ་ཧྲཿཕཊ། སྭ་བྷ་ཝས་སྦྱངས། སྟོང་པའི་ངང་ལས་དམིགས་རྟེན་ཚེ་འདས་༵ཆྒཻ་མོ་ཞེས་བྱ་གསོན་པོའི་རྣམ་པ་ཇི་ལྟ་བ་བཞིན་དུ་གྱུར། འདོད་རྒྱལ་གྱི་ཕྱག་རྒྱ་བཅས་གོང་བཞིན་ལས། ན་མོ་སངས་རྒྱས་ཀྱི་བཀའ་བདེན་པ་དང༌། སོགས་ནས། བདེན་པ་ཆེན་པོའི་བྱིན་གྱིས་བརླབས་ཀྱིས་ཚེ་འདས་ཆྒཻ་མོ་ཞེས་བྱ་བ་ཁམས་གསུམ་གང་ན་གནས་ཤིང་རིགས་དྲུག་གང་དུ་སྐྱེས་སམ་སྐྱེ་གནས་བཞི་གང་དུ་འདུག་ཀྱང་སྐད་ཅིག་ཐང་ཅིག་ཡིད་ཙམ་འདི་ཉིད་ལ་འདིར་མཆིས་པར་གྱུར་ཅིགལན་གསུམ་ལྟུང་བ་སློང་བའི་རྒྱས། ཨོཾ་ཤོ་དྷ་ནི་ཤོ་དྷ་ནི་སརྦ་པཱ་པཾ་ཨ་པ་ན་ཡེ་ཧཱུཾ། ཞེས་པས་སྡིག་པ་བཀུག་པ་དང་དྲལ་བའི་ཕྱག་རྒྱས། ཨོཾ་བཛྲ་པཱ་ཎི་བཱི་སྥོ་ཊ་ཡ། སརྦ་ཨཱ་པ་ཡ་བྷནྡྷ་ནི་པྲ་མོ་ཀྵ་ཡ། སརྦ་ཨ་པ་ཡ་ག་ཏི་བྷྱཿ སརྦ་སཏྭ་ནཾ་སརྦ་ཏཱ་ཐཱ་ག་ཏ་བཛྲ་ས་མ་ཡ་ཏྲཊ། གསུམ། ཨོཾ་སརྦ་བིད་སརྦ་པཱ་པཾ་བི་ཤོ་དྷ་ནི་ཧཱུཾ་ཕཊ། ཅེས་པས་སྡིག་པ་སྦྱངས། ཨོཾ་སརྦ་བིད་དྲད། ཨོཾ་བཛྲ་བནྡྷ་དྲ་ཐ། ཨོཾ་སརྦ་བིད་བཛྲ་ཨདྷི་ཏིཥྛ་ཛྙཱ་ན་ས་མ་ཡ་ཧཱུཾ།
ངན་སོང་སྦྱོངས། དཔྲལ་པར་ཨོཾ། སྙིང་ཁར་ཧཱུཾ། གཙུག་ཏོར་དུ་ཧཾ། ལྟེ་བར་ཧོཿ མགྲིན་པར་ཨཱཿ གསང་བར་ཀྵཿཡིག་གིས་མཚན་པ་གྱུར། སྙིང་པོ་དང་ཐམས་ཅད་རིགས་པའི་རྩ་སྔགས་དང༌། ཨོཾ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ། ཨོཾ་སརྦ་ཨཱ་པ་ཡ་བི་ཤྭ་དྷ་ནེ་བཛྲ་ཧཱུཾ་ཕཊ། ཨོཾ་སརྦ་ཀརྨ་ཨཱ་བ་ར་ཎ་ནི་བྷསྨི་ཀུ་རུ་ཧཱུཾ་ཕཊ། ཨོཾ་བྷྲཱུཾ་བི་ཤྭ་དྷཱ་ཡ་ཨཱ་བ་ར་ཎ་ནི་བཛྲ་ཧཱུཾ་ཕཊ། ཨོཾ་དྲུཾ་བི་ཤྭ་དྷ་ཡ་ཨཱ་བ་ར་ཎ་ནི་ཧཱུཾ་ཕཊ། ཨོཾ་ཛྭ་ལ་ཛྭ་ལ་དྷ་ཀ་དྷ་ཀ་ཧ་ན་ཧ་ན་སརྦ་ཨཱ་བ་ར་ཎ་ནི་བཛྲ་ཧཱུཾ་ཕཊ། ཨོཾ་སྲུཾ་ས་ར་ས་ར་པྲ་ས་ར་པྲ་ས་ར་སརྦ་ཨཱ་བ་ར་ཎ་ནི་ཧཱུཾ་ཕཊ། ཨོཾ་ཧཱུཾ་ཧ་ར་ཧ་ར་སརྦ་ཨཱ་བ་ར་ཎ་ནི་ཧཱུཾ་ཕཊ། ཨོཾ་ཧཱུཾ་ཕཊ་སརྦ་ཨཱ་བ་ར་ཎ་ནི་བི་སྥོ་ཊ་ཡ་ཧཱུཾ་ཕཊ། ཨོཾ་བི་ཏྲ་བ་བི་ཏྲ་བ་སརྦ་ཨ་པ་ཡ་ཏད་ཏོ་ཎ་ནི་ཧཱུཾ་ཕཊ། ཨོཾ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུཾ་ཧཱུཾ་ཕཊ། ཨོཾ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུཾ་ཧཱུཾ་ཕཊ། ཨོཾ་མ་ཐ་མ་ཐ་སརྦ་ཏིརྻ་ཀ་ག་ཏེ་ཧེ་ཏུཾ་ཧཱུཾ་ཕཊ། ཅེས་པ་རྣམས་དང་གཞན་ཡང་བཟླ་ཞིང་རྫས་ཀྱིས་བྲབས། དེ་ནས་ལག་ལེན་སྤྲོས་པ་ལ་དགའ་ན་དཀྱིལ་འཁོར་ལ་
ཁྲུས་གསོལ་བྱ་སྟེ། ཇི་ལྟར་བལྟམས་པ༴ འདི་ནི་ཁྲུས༴ དེ་བཞིན་གཤེགས་པ༴ དེ་དག་སྐུ་ལ༴ ཨོཾ་ཧཱུཾ་ཏྲཾ་ཧྲཱིཿཨཱཿ སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནི་སྭཱཧཱ། དེ་ནས་དེ་ལ་སོགས་ཀྱིས་གོས་ཟུང་ཕུལ། དེ་ལྟ་བུས་ཁྲུས་ཆུ་དེ་ལ་བུམ་ནང་དུ་བླུག་ནས་རྟེན་ལ་ཁྲུས་བྱ། དེ་ཡང༌། འདི་ནི་སྦྱིན་པའི་རང་བཞིན་ཆུ། །སོགས་དང༌། ཆུ་བོ་དྲུག་གིས་སོགས་དང༌། སངས་རྒྱས་ཀུན་གྱི་གཟི་བརྗིད་དང༌། །རང་རྒྱལ་དག་གིས་གཟི་བརྗིད་དང༌། །དགྲ་བཅོམ་རྣམས་ཀྱི་མཐུ་དག་དང༌། གསང་སྔགས་འཛིན་པ་ཐམས་ཅད་དང༌། །ཤཱ་རིའི་བུའི་ཤེས་རབ་དང༌། །མོའུ་འགལ་བུ་ཡི་རྫུ་འཕྲུལ་དང༌། །མ་འགགས་པ་ཡི་མིག་དང་ནི། །འོད་སྲུང་སྦྱངས་པའི་ཡོན་ཏན་དང༌། །ཀཽ་དི་ནྱའི་སྔར་ཐོབ་དང༌། །ཀུན་དགའ་བོའི་ཐོས་པ་དང༌། །ཚངས་པ་ཡི་ནི་བྱམས་པ་དང༌། །བརྒྱ་བྱིན་གྱི་ནི་དབང་རྣམས་དང༌། །འཇིག་རྟེན་སྐྱོང་བའི་ཡུལ་རྣམས་དང༌། །དབང་ཕྱུག་ཆེན་པོའི་སྟོབས་དག་དང༌། །སྡེ་དཔོན་རྣམས་ཀྱི་མཐུ་དག་དང༌། །འཕྲོག་མའི་གཟི་བརྗིད་རྫུ་འཕྲུལ་དང༌། །དེ་དག་རྣམས་ཀྱི་མཐུ་དང་
གཟིས། །ཆྒཻའི་དུག་ནི་དུག་མེད་ཤོག །འདོད་ཆགས་ཞེ་སྡང་གཏི་མུག་གསུམ། །སོགས་དང༌། ས་ནི་དུག་གི་ཕ་ཡིན་ཏེ། །ས་ནི་དུག་གི་སོགས་བརྗོད། ཚིགས་བཅད་དེ་དག་གི་བར་བར་དུ་སྙིང་པོ་དང་རྩ་རིག་བརྗོད་ཅིང་བུམ་ཆུས་བཀྲུའོ། །མི་འཁྲུགས་རྒྱལ་པོ་སྲིད་དང་གཏི་མུག་རྣམ་སྦྱོངས་པ། །མགོན་པོ་ཡོན་ཏན་ཐམས་ཅད་རྫོགས་པའི་བཀྲ་ཤིས་པ། །དགེ་མཉམ་བསམ་མེད་ལྡན་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །ཨོཾ་ཀཾ་ཀཱ་ནི་སོགས་ནས། སརྦ་ཀརྨ་པ་རཾ་པ་ར་ཎི་མེ་སརྦ་སཏྭ་ནཾ་ཙ་སྭཱཧཱ། སངས་རྒྱས་ཡོན་ཏན་ཀུན་གྱི་རྒྱན་གྱིས་བརྒྱན་མཛད་ཅིང༌། །ཡང་དག་སྦྱིན་མཛད་འགྲོ་བའི་དོན་ལ་མི་བསླུ་བའི། །རིན་ཆེན་འབྱུང་ལྡན་ཞེས་བྱའི་བཀྲ་ཤིས་གང་ཡིན་པ། །བཀྲ་ཤིས་དེས་ན་སྐྱེ་རྒུ་རྣམས་ལ་ཞི་བྱེད་ཤོག །ཨོཾ་རཏྣེ་རཏྣེ་མཧཱ་རཏྣེ། རཏྣ་སཱམྦྷ་བེ། རཏྣེ་ཀི་རཏྣེ། རཏྣ་མ་ལ་བི་ཤུདྡྷེ་ཤྭ་དྷ་ཡ་སརྦ་པ་པཾ་ཧཱུཾ་ཕཊ། སེམས་ཅན་ཀུན་གྱི་དོན་ལ་ཐུགས་ནི་རབ་ཏུ་དགོད་མཛད་ཅིང༌།
འགྲོ་བ་མཐའ་དག་འཆིང་བའི་བཅིངས་ལས་གྲོལ་མཛད་པ། །ཐུབ་མཆོག་དོན་ཡོད་གྲུབ་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །ཨོཾ་ཨཱ་མོ་གྷ་ཨ་པྲ་ཏི་ཧ་ཏ། སརྦ་ཨ་པ་ར་ཎ་བི་ཤྭ་དྷ་ནི་ཧ་ར་ཧ་ར་ཧཱུཾ་ཕཊ། བསམ་གཏན་ཏིང་འཛིན་དམ་པ་རིན་ཆེན་འབྱུང་བའི་གནས། །ཡེ་ཤེས་པདྨའི་སྟེང་བཞུགས་དཔག་མེད་ཚེ་ལྡན་པ། །ཚེ་གྲངས་མེད་པར་བྱིན་གྱིས་བརླབས་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །ཨོཾ་ཨ་མི་ཏེ་ཨ་མི་ཏོད་བྷ་ཝེ་ཨ་མི་ཏ་སཾ་བྷ་ཝེ། ཨ་མི་ཏ་བི་ཀྲཱན་ཏེ། ཨ་མི་ཏ་ག་མི་ནི་ག་ག་ན་ཀཱིརྟི་ཀ་རེ་སརྦ་ཀརྨ་ཀླེ་ཤཀྵ་ཡཾ་ཀ་རི་སྭཱཧཱ། རྣམ་པར་སྣང་མཛད་ཡེ་ཤེས་དམ་པ་མཚོ་ཆེན་ལྡན། །ཟླ་བ་ཉ་འདྲའི་སྐུ་མངའ་སྲིད་པ་མཐར་ཕྱིན་པ། །དགོངས་པ་མཐའ་དག་རྫོགས་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་རྒུ་རྣམས་ལ་ཞི་བྱེད་ཤོག །ཨོཾ་པུཎྱེ་པུཎྱེ་མཧཱ་པུཎྱེ་ཨ་པ་ར་མཱི་ཏ་པུཎྱེ་ཨ་ཡུར་པུཎྱེ་ཛྙཱ་ན་སཾ་བྷ་རོ་པ་ཙི་ཏི་ཨུ་པ་ཀ་རི་ཎི་
སྭཱཧཱ། སྤྲོ་ཞིང་ནུས་ན། གང་ལ་སེར་སྣ་རྣམ་ཆགས་སོགས་ཡང་པའི་གྲོང་ཁྱེར་དུ་འཇུག་པའི་མདོར་བྱུང་བ་དང༌། དཀྱིལ་འཁོར་གྱི་བཀྲ་ཤིས་བརྗོད། དེ་ནས་དཔལ་དུས་འཁོར་ཡབ་ཡུམ་ལ་ཕྱག་འཚལ་བའི་ཚིགས་བཅད་དང༌། གཙོ་བོའི་རྒྱལ་བ་སོགས་ནས། འཇིགས་ལས་མྱུར་དུ་བསྐྱབ་ཏུ་གསོལ། བར་སྤྱོད་འཇུག་ལས་བྱུང་བ་ལྟར་དང༌། དེ་ནས་དབང་བསྐུར་བའི་མཆོད་ཆོག་ཉེར་མཁོའི་མཎྜལ་ཕུལ། སྐྱེ་རྒ་འཆི་བ་ན་ཀྲ་ཡི། །ཞེས་སོགས་ནས། གཙོ་བོའི་སྤྱན་སྔར་འབུལ་བར་བགྱིའི་བར་དང༌། གཙོ་བོས་ཇི་ལྟར་བཀའ་སྩལ་པ། །སོགས་ནས། ཆ་ཤས་ཀྱིས་ཀྱང་སྤྱད་དུ་གསོལ། །བར་དང་དབང་བསྐུར་བའོ། །ལོང་སྐབས་མེད་ན། ཨོཾ་ཨཱ་ཨཱི་རཱྀ་ཨཱུ་ལཱྀ་པཉྩ་དྷཱ་ཏུ་བི་ཤུདྡྷ་ནི་སྭཱཧཱ། སོགས་ནས། འབྲས་བུ་ས་ནི་བདུན་པ་ཐོབ་གྱུར་ཅིག །ཞེས་པའི་བར་ཙམ་བསྐྱུར་ཀྱང་རུང་ངོ༌། །རྟེན་བསྒྲུབ་བྱར་གསལ་བ་ལ། དེ་ལྟར་དབང་བསྐུར་བས་དམིགས་ཡུལ་དུས་ཀྱི་འཁོར་ལོ་སྐུ་མདོག་སྔོན་པོ་ཞལ་གཅིག་ཕྱག་གཉིས་པའི་སྐུར་གྱུར། པ་ལ་མཆོད་པར་བསམ། ཟས་གོས་སོགས་བསངས་
སྦྱངས། ན་མཿསརྦ་ཏ་ཐཱ་ག་ཏ་བྷྱོཿ སོགས་ནམ་མཁའ་མཛོད་ཀྱི་སྔགས་རྒྱ་དང༌། གཟི་བརྗིད་ཚད་མེད་སྔགས་ལན་བདུན་གྱིས་བསྔོས། ཁ་དོག་དབྱིབས་ལེགས་སོགས་ཀྱི་ཚིགས་བཅད་ལ། དུས་ཀྱི་འཁོར་ལོའི་གནས་ཐོབ་ཁྱོད་ལ་འབུལ། །ཟག་མེད་དགའ་བདེས་རྟག་ཏུ་ཚིམ་པར་ཤོག །ཨོཾ་ཀཱ་ལ་ཙཀྲ་རཱུ་པ་ཀ་མ་གུ་ཎ་སོགས་སྔགས་བསྒྱུར། དཀྱིལ་འཁོར་གྱི་ལྷ་ཚོགས་རྣམས་ཀྱི་ཐུགས་ཀ་ནས་ཡེ་ཤེས་ཀྱི་འོད་ཟེར་བྱུང༌། ཚེ་འདས་ཀྱི་ཕུང་ཁམས་སྐྱེ་མཆེད་འཁོར་བའི་ཆོས་ཐམས་ཅད་ཡེ་ཤེས་ཆེན་པོའི་དབྱིངས་སུ་སྦྱངས་བར་གྱུར། དུས་འཁོར་སྙིང་པོ་དང༌། རྩ་རིག་ལན་གསུམ་གྱིས་མེ་སྦར་ཞིང༌། སྟོང་ཉིད་ཡེ་ཤེས་འབར་བའི་མེ། །ཚེ་འདས་སྒྲིབ་པའི་བུད་ཤིང་དང༌། །འཁོར་བའི་སྡུག་བསྔལ་མ་ལུས་པ། །ཡེ་ཤེས་སྣང་བར་འབར་གྱུར་ཅིག །ཕུང་པོ་དྲུག་གི་བུད་ཤིང་ལ། །རྒྱལ་བ་རིགས་དྲུག་མེ་སྦར་རོ། །ཁམས་རྣམས་ལྔ་ཡི་བུད་ཤིང་ལ། །རྡོ་རྗེ་མ་ལྔའི་མེ༴ ལས་རླུང་བཅུ་ཡི་བུད་ཤིང་ལ། །ནུས་མ་བཅུ་ཡི་མེ༴ དབང་ཡུལ་དྲུག་གི་བུད་ཤིང་ལ། །སེམས་དཔའ་
སེམས་མའི་མེ༴ ལས་དབང་ཡུལ་བཅས་བུད་ཤིང་ལ། ཁྲོ་བོ་ཁྲོ་མོའི་མེ༴ ལུས་ངག་ཡིད་གསུམ་བུད་ཤིང་ལ། །རྒྱལ་བ་སྐུ་གསུམ་མེ་སྦར་རོ། །སྐུ་གསུམ་ཡེ་ཤེས་ལྔ་ལྡན་དུ། །འགྲོ་བའི་དོན་དུ་སྤྱོད་པ་ཤོག །ལམ་སྦྱངས་པ་ནི། དཀོན་མཆོག་རིན་ཆེན་དཔལ་ཞིང་དུ། །དཀོན་མཆོག་རིན་ཆེན་སོགས་ནས། བགྲོད་པར་ཤོག །ཨོཾ་རཏྣེ་རཏྣེ་མཧཱ་རཏྣེ་རཏྣ་སམྦྷ་བེ་རཏྣེ་ཀི་རཏྣེ་རཏྣ་མཱ་ལ་བི་ཤུདྡྷེ་ཤྭདྷ་ཡ་སརྦ་པཱ་པཾ་ཧཱུཾ་ཕཊ། ལམ་བསྟན་པ་ནི། པདྨ་འདམ་ཀྱྀས་མ་གོས་སོགས་ནས། སྐྱེ་བར་ཤོག །ཨོཾ་པདྨེ་པདྨེ་པདྨ་སཾ་བྷ་བེ་མཧཱ་སུ་ཁ་བ་ཏི་གཙྪན་ཏུ་སྭཱཧཱ། དྲིན་ལན་མཆོད་སྟོད་བྱས་ལ་ཆེད་དུ་བརྗོད་པ་ནི། ཚེ་འདས་དེ་ཉིད་བདེ་བ་ཅན་དུ་སྐྱེས་དེའི་རྒྱུ་རྐྱེན་བརྟགས་པས་སློབ་དཔོན་གྱི་ཆོ་གའི་མཐུ་ཡིན་པར་ཤེས་ནས་འདི་ཉིད་དུ་ལྷག་སྟེ་སློབ་དཔོན་དང་དཀྱིལ་འཁོར་གྱི་ལྷ་ལ་མཆོད་པ། ཨོཾ་བཛྲ་གནྡྷཾ་སོགས་མཆོད་པ་བཅུ་གཉིས་ཀྱིས་མཆོད། སྟོང་ཉིད་སྙིང་རྗེ་སོགས་ཀྱིས་བསྟོད། ཆེད་དུ་བརྗོད་པ་ནི། ཨེ་མ་སངས་རྒྱས་
རྣམས་ཀྱི་ནི། །སྔགས་ཀྱི་བྱིན་བརླབས་ཡ་མཚན་ཆེ། །གང་ཕྱིར་མཚམས་མེད་ལྟུང་བ་ཡི། །སེམས་ཅན་ལྷ་གནས་མྱུར་དུ་སྐྱེས། །ཨེ་མ་ཤཱཀྱ་མགོན་པོ་ཡི། །སངས་རྒྱས་མཛད་པ་ངོ་མཚར་ཆེ། །གང་ཕྱིར་ངན་སོང་ལྟུང་བ་ཡི། །སེམས་ཅན་གློག་བཞིན་མྱུར་དུ་གྲོལ། །སླར་ཡང་བདེ་བ་ཅན་དུ་གཤེགས་པར་གྱུར། །དེ་ནས་རྒྱུད་ལས། སྦྱིན་བསྲེག་གིས་སྦྱངས་བར་གསུང་པ་རྟེན་གང་ཡིན་པ་རྫས་གཅིག་པའི་སྦྱིན་བསྲེག་བྱ་དགོས་པ་དེ་ལྟར་ན། མེ་བསངས་སྦྱངས། སྟོང་པའི་ངང་ལས་ཧཱུཾ་ལས་ཡེ་ཤེས་ཀྱི་མེ་ཁ་དོག་ལྔ་ལྡན་དུས་ཀྱི་འཁོར་ལོའི་དཀྱིལ་འཁོར་གྱི་ལྷ་ཚོགས་རྣམས་ཀྱི་ངོ་བོར་གྱུར། སྙིང་པོ་དང་རྩ་རིག་མཐར་ཆྒཻ་མོའི། སྡིག་པ་དང་སྒྲིབ་པ་ཐམས་ཅད་ད་ཧ་ན་བྷསྨིན་ཀུ་རུ་སྭཱཧཱ། ཞེས་པ་བདུན་སོགས་བཟླས་ནས་ཏིལ་དང་མིང་བྱང་བསྲེག་གོ །དེ་ནས་དཀྱིལ་འཁོར་གྱི་རྗེས་ཆོག་སོགས་བྱའོ། །དེ་ལྟར་ལྷོ་སྒོའི་ཆོ་ག་རྒྱུད་སྡེ་སྤྱི་ལ་སྦྱར་རུང་བའི་གསང་བ་སྤྱིའི་ཆོ་ག་འདི་ཡང་ཇོ་ནང་སྒྲོལ་མགོན་ཞབས་ཀྱི་གསུངས་རྒྱུན་རིམ་པར་བརྒྱུད་པའི་ངག་རྒྱུན་ལ་གནས་པ་ལྟར་ཀརྨ་ཚེ་དབང་ཀུན་ཁྱབ་ཀྱི་བཀོད་པ་སྟེ། སྙིང་པོ་མཐའ་ཡས་ཀྱིས་ཡི་གེར་ཕབ་པའོ།། །།
ཨོཾ་སྭཱ་སྟི། བདེ་ཆེན་ཡེ་ཤེས་གཞོན་ནུའི་དཔང་སྡོན་ལ། སྟོང་ཆེན་མཛེས་མའི་གསེར་གྱི་ཆུ་འཛིན་འཁྲིགས། ལྷུན་གྲུབ་བཟུང་འཇུག་ཆོས་སྐུ་ཕྱག་རྒྱ་ཆེར། མཆོག་གི་དང་པོའི་སངས་རྒྱས་དུས་ཀུན་སྐྱོང་། ཤེས་བྱའི་བློ་གྲོས་མཁའ་ལྟར་ཡངས་བ་ལས། །གཞན་ཕན་སྣང་བའི་རྟ་བདུན་འོད་སྟོང་བཞིན། །ཟུཨེ་བ་ན་ཚ་དབང་ཀུན་བྱ་བ་ཞིག་བྱའི། ཐུགས་སྐྱེད་ལས་འཁྲུངས་ལྷོ་སྒོའི་ཆོ་ག་འདི། །པུཥྱེ་ཤྲིས་མི་ཟད་བར་གྱི་གཏེར། བསྐུར་དགེས་མ་གྱུར་འགྲོ་བའི་དོན་བྱེད་ཤོག །འདི་ཡང་པུཎྱེ་ཤྲིས་སྦྱར་བའོ། དགེའོ། །
ཤོག་སྟོང་
སྟོང་ཆེན་ཡི་གེ་ལྔ་ལས་དང་པོ་བདག་མེད་གཉིས་ཀྱི་སྒོ་ནས་བསྟོད་པ་ནི། གང་ལ་ཐོག་མཐའ་ཞེས་པ་ཆོས་དབྱིངས་ཡེ་ཤེས་ལ་བསྟོད་པ་ནི་ནམ་མཁའི་ཁམས་ཀྱིས་དངས་མ་རྒྱལ་བ་མི་བསྐྱོད་པའི་རིགས་ལ་བསྟོད་པའོ། སྟོང་ཆེན་ཡི་གེ་གཉིས་སྣང་ཐམས་ཅད་ཡོད་པའི་སྒོ་ནས་བསྟོད་པ་ནི། དུས་དང་སྣ་ཚོགས་ལ་སོགས་པ་ཞེས་པ་བྱ་བ་སྒྲུབ་པའི་ཡེ་ཤེས་ལ་བསྟོད་པ་ནི་ཆུ་ལས་ཀྱི་དངས་མ་རྒྱལ་བ་དོན་ཡོད་གྲུབ་པའི་རིགས་ལ་བསྟོད་པའོ། སྟོང་ཆེན་ཡི་གེ་གསུམ་པ་གསལ་བའི་སྒོ་ནས་བསྟོད་པ་ནི། སྤྲོས་བྱེད་ནུ་མའི་གཟུགས་ཞེས་ཞེན་ཞེས་པ་མཉམ་ཉིད་ཡེ་ཤེས་ཀྱི་བསྟོད་པ་ནི་མེ་ཁམས་ཀྱི་དངས་མ་རྒྱལ་བ་རིན་ཆེན་འབྱུང་ལྡན་གྱི་རིགས་ལ་བསྟོད་པའོ། སྟོང་ཆེན་ཡི་གེ་བཞི་ག་བེད་པའི་སྒོ་ནས་བསྟོད་པ་ནི། དཀར་པོ་འཇིག་རྟེན་གསུམ་གྱི་མགོན་པོ་ཞེས་པ་སོ་སོར་རྟོག་པའི་ཡེ་ཤེས་ལ་བསྟོད་པ་ནི་ཆུ་ཁམས་ཀྱི་དངས་མ་རྒྱལ་བ་སྣང་བ་མཐའ་ཡས་ཀྱི་རིགས་ལ་བསྟོད་པའོ། སྟོང་ཆེན་ཡི་གེ་ལྔ་ལ་ལྷ་སྔགས་ཀྱི་འཕྲིན་ལས་དང་མ་དག་བདེ་སྡུག་གི་རྣམ་པ་ཀུན་ལ་འཇུག་པའི་སྒོ་ནས་བསྟོད་པ་འདི། སེམས་ཙམ་སྔགས་ཀྱི་ངོ་བོ་ཞེས་པ་མེ་ལོང་ལྟ་བུའི་ཡེ་ཤེས་
ཀྱི་བསྟོད་པ་ནི་ས་ཁམས་ཀྱི་དངས་མ་རྒྱལ་བ་རྣམ་པར་སྣང་མཛད་ཀྱི་རིགས་ལ་བསྟོད་པའོ། གཉིས་པ་འགྱུར་མེད་དྲུག་ལ་བསྟོད་པ་ནི། ལྔ་པོ་དེ་དང་ངོ་བོ་གཅིག་ཀྱང་རྟེན་གྱི་ལྡོག་ཆ་འཛིན་པའི་སྒོ་ནས་དྲུག་སྟེ། དེ་ཡང་གཅིག་དང་དུ་མ་དག་ཀྱང་ཞེས་པ་ཡེ་ཤེས་ཀྱི་ཁམས་ཏེ་རྒྱལ་བ་རྡོ་རྗེ་སེམས་དཔའི་རིགས་ལ་བསྟོད་པ་སྟེ་ངེས་པའོ།