དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ཆོ་གའི་རྣམ་པར་བཤད་པ་བདུད་རྩིའི་རྒྱ་མཚོ།
དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ཆོ་གའི་རྣམ་པར་བཤད་པ་བདུད་རྩིའི་རྒྱ་མཚོ་ཞེས་བྱ་བ་བཞུགས།
ཨོཾ་སྭཱ་སྟི། དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ཆོ་ག་རྣམ་པར་བཤད་པ་བདུད་རྩིའི་རྒྱ་མཚོ་ཞེས་བྱ་བ། བླ་མ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གང་ཞིག་དབང་བཞི་གང་གཱའི་ཆུ་རྒྱུན་གྱིས། །འགྲོ་འདིའི་མ་དག་འཁྲུལ་པ་ཀུན་བཀྲུས་ནས། །བླ་མེད་བྱང་ཆུབ་ལྷ་ཡི་གནས་འགོད་པ། །བླ་མ་དུས་ཀྱི་འཁོར་ལོ་སྤྱི་བོས་མཆོད། །སྟོན་པ་ཉིད་དང་གཉིས་མེད་ཇོ་ནང་པ། །ཀུན་མཁྱེན་ཆེན་པོའི་ཞབས་ལ་ཕྱག་འཚལ་ཏེ། །དཀྱིལ་འཁོར་ཆོ་གའི་མན་ངག་མདོ་ཙམ་ཞིག །བློ་གསལ་དོན་གཉེར་འགའ་ལ་ཕན་ཕྱིར་བཤད། །དེ་ཡང་དུས་གསུམ་གྱི་རྒྱལ་བ་མཐའ་དག་གི་བསྟན་པའི་སྙིང་པོ་ནི་སྔགས་ཀྱི་ཐེག་པ་ཡིན་ལ། དེ་ལ་དང་པོར་འཇུག་པའི་སྒོ་དང༌། བར་དུ་ཉམས་སུ་བླང་བ་དང༌། མཐར་འབྲས་བུ་ལ་
མཚམས་སྦྱོར་བ་སྟེ། ཐོག་མཐའ་བར་གསུམ་དུ་མེད་དུ་མི་རུང་བའི་གལ་པོ་ཆེ་ནི་དབང་བསྐུར་བའོ། །དེའི་དབང་དུ་བྱས་ནས་འདིར་གང་གིས་དབང་བསྐུར་བའི་སློབ་དཔོན། གང་ལ་དབང་བསྐུར་བའི་སློབ་མ། གང་དུ་དབང་བསྐུར་བའི་དཀྱིལ་འཁོར། གང་ཞིག་དབང་བསྐུར་བའི་གོ་རིམ། ཇི་ལྟར་དབང་བསྐུར་བའི་རང་བཞིན་རྣམ་པར་ངེས་པ། དེ་ལྟར་དབང་བསྐུར་བའི་ཆོ་ག་སྤྱིར་བསྟན་པ། རྡོ་རྗེ་སློབ་དཔོན་གྱི་དབང་བྱེ་བྲག་གཏན་ལ་དབབ་པའོ། །དང་པོ་ནི། བསྡུས་པའི་རྒྱུད་ཀྱི་རྒྱལ་པོ་ལས། དང་པོར་ཡང་དག་བསྟེན་བྱ་བླ་མ་དག་ཀྱང་དམ་ཚིག་ལྡན་ཞིང་རྡོ་རྗེའི་ཐེག་ལ་ལྷག་པར་
གནས། །དེ་ཉིད་བསྒོམས་ཤིང་མ་ཆགས་དྲི་མ་དག་དང་རྣམ་པར་བྲལ་ཞིང་བཟོད་པའི་ངང་ཚུལ་ལམ་ལ་ཞུགས། །སློབ་མ་རྣམས་ལ་ལམ་ནི་སྦྱིན་བྱེད་དམྱལ་བའི་འཇིགས་པ་འཕྲོག་བྱེད་དེ་ཉིད་ལས་ནི་ཚངས་སྤྱོད་ལྡན། བདུད་རྣམས་ལ་ནི་རྡོ་རྗེའི་དབྱུག་པ་དེ་ཡང་འཛིན་མའི་གཞི་ལ་རྡོ་རྗེ་སེམས་དཔར་རབ་གྲགས་པའོ། །ཞེས་གསུངས་པའི་ཡོན་ཏན་རྣམས་དང་ལྡན་ཞིང༌། ཇི་སྐད་དུ། ང་རྒྱལ་དང་ལྡན་ཁྲོ་བས་ཟིལ་མནན་དམ་ཚིག་རྣམ་བྲལ་རྫས་ལ་བསྐམ་ཞིང་ཐོས་པ་དག་ཀྱང་མེད། སློབ་མ་རྣམས་ནི་བསླུ་བ་དོན་དུ་གཉེར་ཞིང་མཆོག་གི་བདེ་བའི་གནས་ལ་སེམས་ཉམས་དབང་མ་བསྐུར། །ལོངས་སྤྱོད་དག་ལ་ཀུན་ཆགས་བག་མེད་རྩུབ་མོའི་ཚིག་དང་བཅས་ཤིང་དབང་པོའི་དོན་དུ་འདོད་ལྡན་པ། །དེ་ཉིད་དམྱལ་བ་བཞིན་དུ་སློབ་མ་མཁས་པ་རྣམས་ཀྱིས་རྫོགས་པའི་བྱང་ཆུབ་རྒྱུར་ནི་སྤང་བར་བྱ། ཞེས་གསུངས་པ་དང༌། ཡང་ཇི་སྐད་དུ། གང་ཞིག་ཁྱིམ་པ་བསྟི་གནས་སྤྱོད། །གཡོག་པོ་ཞིང་པ་ཚོང་པ་དང༌། །དམ་ཆོས་འཚོང་བའི་རྨོངས་པ་དེ། །ས་ལ་རྡོ་རྗེ་འཛིན་པ་མིན། །ཞེས་གསུངས་པའི་སྐྱོན་རྣམས་སྤངས་པ་ཡིན་ལ། གཞན་ཡང་སློབ་དཔོན་གྱི་མཚན་ཉིད་རྒྱུད་གཞན་ལས་གསུངས་པ་རྣམས་ཀྱང་ངེས་པར་བྱས་ནས། སྐྱོན་ཀུན་སྤངས་ཡོན་ཏན་ཀུན་རྫོགས་བསྟེན་དགོས་པ་ཡིན་མོད་ཀྱང༌། དུས་ཀྱི་སྐྱོན་གྱིས་དེ་ལྟ་བུ་རྙེད་དཀའ་ན། དཔལ་དོན་དམ་བསྙེན་པ་ལས། རྩོད་ལྡན་དབང་གིས་བླ་མ་སྐྱོན་དང་ཡོན་ཏན་འདྲེས། །སྐྱོན་མེད་སྡིག་པ་མེད་པ་རྣམ་པ་ཀུན་ཏུ་ཡོད་མ་ཡིན། །གང་ཞིག་ཡོན་ཏན་ལྷག་པ་ཡང་ནི་ཉེར་སྤྱད་ནས། །བུ་རྣམས་ཀྱིས་ནི་དེ་ལ་བསྟེན་པར་འགྱུར་པའོ། །ཞེས་གསུངས་པ་ལྟར། སྐྱོན་ཡོན་གཉིས་ལས་ཡོན་
ཏན་སྟོབས་ཆེ་བ་དེ་བསྟེན་ཏུ་རུང་ལ། དེ་ལས་ཀྱང་དངོས་གྲུབ་སྩོལ་པ་པོའི་སློབ་དཔོན་དུ་འགྱུར་བའི་མཚན་ཉིད་ནི། སངས་རྒྱས་ཞལ་འདི་གང་གི་ཐུགས་དང་ཞལ་ལ་གནས་པར་གྱུར་པ་དེ་ནི་དཔལ་ལྡན་བླ་མའོ། །ཞེས་རྣམ་པ་ཀུན་ལྡན་གྱི་སྟོང་པ་ཉིད་དང་མི་འགྱུར་བའི་བདེ་བ་ཟུང་དུ་སྦྱོར་བའི་ལམ་མཆོག་འདི་རང་གི་ཐུགས་ལ་འཁྲུངས་ཤིང་ཞལ་གྱི་སྒོ་ནས་སློབ་མ་ལ་བསྟན་པས་བྱིན་རླབས་འཕོ་བར་མཛད་ནུས་པའོ། །དེ་ལྟ་བུའི་སློབ་དཔོན་དེ་དག་ཀྱང་གཞན་དོན་སྤྱོད་པའི་རྟེན་གྱི་སྒོ་ནས་རྣམ་པ་གསུམ་དུ་འགྱུར་ཏེ། རྩ་བའི་རྒྱུད་ལས། དེ་ཉིད་བཅུ་ནི་ཡོངས་ཤེས་པ། །གསུམ་ལས་དགེ་སློང་མཆོག་ཡིན་ཏེ། །འབྲིང་ནི་དགེ་ཚུལ་ཉིད་དུ་བརྗོད། །ཁྱིམ་གནས་དེ་ལས་ཐ་མ་ཡིན། །ས་ཐོབ་མ་གཏོགས་ཁྱིམ་པ་ ནི། །རྒྱལ་པོས་བླ་མར་མི་བྱ་སྟེ། །དེ་ལ་ཐོས་པ་ཡོངས་ཤེས་པས། །གང་ཞིག་རྟགས་ཅན་བྱ་བ་ཉིད། །ས་ཐོབ་མ་གཏོགས་སློབ་དཔོན་ནི། །ཁྱིམ་གནས་གང་ཚེ་མཆོད་བྱེད་པ། །དེ་ཚེ་སངས་རྒྱས་ཆོས་དང་ནི། །དགེ་འདུན་རྣམས་ལ་གུས་མེད་འགྱུར། །ལྷ་ཁང་ལ་སོགས་རབ་གནས་སོགས། །རྟགས་ཅན་གྱིས་ནི་རྟག་ཏུ་ བྱ། །གནས་གཅིག་དག་ན་གསུམ་ཡོད་ན། ཁྱིམ་པ་གོས་དཀར་ཅན་གྱིས་ མིན། །ཞེས་གསུངས་ཏེ། དགེ་སློང་རྡོ་རྗེ་འཛིན་པ་ནི་མཆོག དགེ་ཚུལ་རྡོ་རྗེ་འཛིན་པ་ནི་འབྲིང༌། ཁྱིམ་པ་རྡོ་རྗེ་འཛིན་པ་ནི་ཐ་མའོ། །འདིར་དེ་ཉིད་བཅུ་ལ་བགྲོང་ཚུལ་མི་འདྲ་བ་ཅི་རིགས་པ་ཡོད་ཀྱང༌། འཇམ་དཔལ་གྱི་ལྟ་འདོད་མདོར་བསྟན་ལས། དཀྱིལ་འཁོར་དང་ནི་ཏིང་འཛིན་དང༌། །ཕྱག་རྒྱ་བྱ་བ་འདུག་སྟངས་དང༌། །གཏོར་མ་སྦྱིན་སྲེག་རབ་གནས་དང༌། །སྤྱན་
དྲངས་གཤེགས་སུ་གསོལ་བའོ། །ཞེས་གསུངས་པ་འདི་དུས་འཁོར་གྱི་རང་ལུགས་སུ་བྱེད་དགོས་ལ། གཞན་ཡང་རྡོ་རྗེ་སྙིང་རྒྱན་དང༌། སྒྱུ་འཕྲུལ་དྲྭ་བ་སོགས་རྒྱུད་ལས་བཤད་པ་རྣམས་ནི་འདིར་ཡང་ཁས་ལེན་མོད། རྒྱ་གར་པཎྜི་ཏ་སློབ་དཔོན་དག་གི་བཤད་ཚུལ་མི་འདྲ་བ་དག་ནི་བཏང་སྙོམས་སུ་བཞག་པར་བྱའོ། །གཉིས་པ་ནི། ཇི་སྐད་དུ། ཟབ་ཅིང་རྒྱ་ཆེ་ལ་སེམས་བླ་མས་ངེས་པ་ལ་དགའ་གཏོང་བའི་ངང་ཚུལ་དང་ལྡན་ཡོན་ཏན་ཤེས། །ཐར་པ་དོན་གཉེར་རྒྱུད་ལ་གུས་ཤིང་གཡོ་བ་མིན་པའི་སེམས་ལྡན་དེ་ཉིད་ཐོབ་པ་ཤིན་ཏུ་སྦེད། །གདུག་པ་རྣམས་ཀྱི་གྲོགས་ཉམ་སློབ་མ་དེ་ཉིད་བླ་མ་ཤིན་ཏུ་མཁས་པ་དག་གིས་བསྡུ་བྱ་ བ། །ཤེས་རབ་དབང་ལ་སོགས་པའི་རྒྱུར་ཏེ་གཞན་ཞེས་བྱ་བ་སླར་ཡང་འབྲིང་པོ་བསོད་ནམས་དག་གི་རྒྱུར། ཞེས་གསུངས་ཏེ། དེ་ལྟར་ན་སློབ་མའི་ཡོན་ཏན་གྱི་རྣམ་གྲངས་དགུ་གསུངས་ལ། དེ་ལ་དམ་པ་འགའ་ཞིག་འདི་སྐད་ཅེས། འདུ་འཛི་དང་རྫས་ལ་སྲེད་པ་དང་བྲལ་བས་གཏོང་བའི་ངང་ཚུལ་དང་ལྡན་པ། དཀོན་མཆོག་གསུམ་གྱི་ཡོན་ཏན་ཤེས་པའི་དད་པ་དང་ལྡན་པ། གདུག་པའི་གྲོགས་སྤངས་ཤིང་དེའི་རྒྱུ་ལས་མི་དགེ་བ་བཅུ་བསྡམས་པ་སྟེ། ཡོན་ཏན་གསུམ་པོ་དེ་རྣམས་ཁོ་ན་ལྡན་པ་ནི་སློབ་མར་འོས་པ་ཐ་མའི་མཚན་ཉིད་དེ། རེ་ཞིག་རྒྱུད་སྦྱང་བའི་ཆེད་དུ་དགེ་བསྙེན་གྱི་སྡོམ་པ་སོགས་སྦྱིན་པས་རྗེས་སུ་བཟུང་བར་བྱའོ།། དེའི་སྟེང་དུ་རྩ་ལྟུང་སོགས་བསྲུང་ནུས་པས་བླ་མའི་ངེས་པ་ལ་དགའ་བ། རྒྱུད་ལ་གུས་པས་ཡིད་ཆེས་རྙེད་ནས་ཉམས་སུ་བླང་བའི་རྣལ་འབྱོར་དང༌། སྤང་བླང་ལ་བརྩོན་པ། གཞན་ངོར་འཕྱར་བག་སོགས་ལ་དགའ་བ་མེད་པས་སྔགས་ཀྱི་གསང་བ་དེ་ཁོ་ན་ཉིད་ཐོབ་པ་རྣམས་ཤིན་ཏུ་སྦེད་ཅིང༌།
གསང་ཐུབ་པའི་ཡོན་ཏན་གསུམ་སྟེ་ཡོན་ཏན་དྲུག་ལྡན་ཙམ་ནི་སློབ་མར་འོས་པ་འབྲིང་གི་མཚན་ཉིད་དེ། དེ་ནི་དབང་བདུན་གྱིས་བསྡུ་བར་བྱ་བ་ཡིན་ནོ། །དེ་ལྟར་དྲུག་གི་སྟེང་དུ་ངེས་དོན་མཐར་ཐུག་ཟབ་ཅིང་རྒྱ་ཆེ་བ་ཟུང་འཇུག་གི་ལམ་ལ་ཤིན་ཏུ་འདུན་པས་སེམས་པ་དང༌། ཚེ་འདིའི་རྙེད་བཀུར་གྲགས་པ་ནས་འཇིག་རྟེན་པའི་དངོས་གྲུབ་ཀྱི་བར་གང་ལའང་མ་ཞེན་པར་ཐར་པ་ཁོ་ན་དོན་དུ་གཉེར་བ་དང༌། ལས་ཕྲན་ཚེགས་ཀྱིས་སེམས་མི་འཕྲོག་པས་གཡོ་བ་མིན་པའི་སེམས་དང་ལྡན་པ་སྟེ། ཡོན་ཏན་དགུ་རྫོགས་པ་ནི། མཆོག་གི་དངོས་གྲུབ་ཀྱི་རྒྱུར་དབང་གོང་མས་རྗེས་སུ་བཟུང་བར་བྱའོ། །ཞེས་འཆད་པ་ནི་ཕལ་ཆེར་རྒྱུད་འགྲེལ་གྱི་དགོངས་པ་དང་མཐུན་པའི་ལེགས་བཤད་དུ་སྣང་ལ། འོན་ཀྱང་གཡོ་བ་མིན་པའི་སེམས་ནི། འཇིག་རྟེན་པའི་ལམ་རྣམས་ཀྱིས་སེམས་མི་གཡོ་བ་ཞེས་བཤད་པས། རྡོ་རྗེའི་རྣལ་འབྱོར་ལྟ་བུ་ལས་གཞན་དུ་གྱུར་པའི་མན་ངག་ཟབ་ཟབ་ལྟར་བཅོས་པ་ལ་བློ་མི་འགྲོ་བར་བློ་རྩེ་གཉིས་སྤངས་པའི་དོན་ཡིན་ལ། ཐ་མ་དགེ་བསྙེན་ཙམ་འབོགས་པ་ལ་ཡོན་ཏན་གསུམ་ཀ་མ་ཚང་རུང༌། སློབ་དཔོན་མི་སྨོད་ཅིང་བསྟེན་པར་མོས་ལ། དགེ་བསྙེན་ཐུབ་ན་དེས་ཀྱང་རུང་ཙམ་མོ། །དེ་ལས་ཕྱི་མ་གཉིས་ནི་རྒྱུད་འདིའི་དངོས་ཀྱི་གདུལ་བྱར་འོས་པ་ཡིན་ལ། དེ་གཉིས་ཀྱིའང་ཕྱི་མ་མཆོག་ལ་དབྱེ་ན་སློབ་མར་འོས་པ་དང༌། སློབ་དཔོན་དུ་འོས་པའོ། །དེ་ལ་ཡང་ཚེ་འདིར་རྡོ་རྗེ་སློབ་དཔོན་གྱི་གོ་འཕང་བསྒྲུབས་ནས་སློབ་མ་བསྡུ་བ་མངོན་པར་འདོད་པ་ནི་དབང་པོ་དམན་པ་དང༌། ཚེ་འདི་ལ་དངོས་གྲུབ་མཆོག་སྒྲུབ་པ་སྙིང་པོར་བྱེད་པ་ནི་དབང་པོ་རྣོན་པོའོ། །དེ་ལྟ་བུའི་སློབ་མ་མཆོག་དམན་འབྲིང་གསུམ་མམ་བཞིའམ་ལྔ་པོ་རྣམས་
ཀྱིས་དང་པོར་དཔོན་སློབ་ཀྱི་འབྲེལ་བ་བརྟགས་ནས། གོང་དུ་བཤད་པ་ལྟར་གྱི་མཚན་ཉིད་དང་ལྡན་པའི་སློབ་དཔོན་དེ་བླ་མར་བྱས་ཕྱིན་ཆད་རྣམ་པ་ཀུན་ཏུ་མཉེས་པར་བྱེད་པའི་བསྟེན་ཚུལ་ཡང་དག་པས་བསྟེན་པར་བྱེད་དགོས་ཀྱི། བླ་མ་མཉེས་པར་བྱེད་དགོས་པའི་གོ་བ་མ་རྙེད་ན། སློབ་དཔོན་དང་སློབ་མའི་མཚན་ཉིད་ཙམ་གྱི་བཤད་པ་ཁ་ཁྱེར་གྱིས་ནི་ཅིར་ཡང་མི་རུང་ངོ༌། །སློབ་དཔོན་དང་སློབ་མའི་ཆོས་སྐོར་གྱི་རྣམ་གཞག་འདི་རྣམས་རྒྱས་པར་དཀྱིལ་ཆོག་ཡེ་ཤེས་རྒྱ་མཚོ་ལས་ཤེས་པར་བྱ་ཞིང༌། དོན་དམ་བསྙེན་པ་ལས་ཀྱང་ནན་ཏན་ཏུ་རྟོགས་པར་བྱ་སྟེ། ལག་ལེན་དུ་ཐེབས་དཀའ་བ་མ་གཏོགས་གོ་བ་ཡང་སླ་བས་ན་འདིར་ཧ་ཅང་མང་བར་འགྱུར་བས་དེ་ཙམ་མོ། །གསུམ་པ་ནི། རྩ་རྒྱུད་ལས། ལུས་ཀྱི་དབང་པོ་བྷ་ག་སེམས། །སྐུ་གསུང་ཐུགས་ནི་རྡོ་རྗེ་ཡི། །དཀྱིལ་འཁོར་རྣམ་པ་གསུམ་དུ་འགྱུར། །གཞན་དུ་ཚོན་ལྔ་ལྡན་པས་མིན། །ཞེས་གསུངས་པ་ལྟར། བྱིས་པ་འཇུག་པ་ལ་རྡུལ་ཚོན་གྱི་དཀྱིལ་འཁོར་དང༌། བུམ་དབང་ལ་ཕྱག་རྒྱའི་ལུས་ཀྱི་དཀྱིལ་འཁོར་དང༌། གསང་དབང་ལ་བྷ་གའི་དཀྱིལ་འཁོར་དང༌། ཤེས་རབ་ཡེ་ཤེས་གཉིས་ལ་བྱང་ཆུབ་སེམས་ཀྱི་དཀྱིལ་འཁོར་གསུངས་ཏེ། དེ་ལ་དབྱེ་ན་ཀུན་རྫོབ་བྱང་ཆུབ་ཀྱི་སེམས་དང༌། དོན་དམ་བྱང་ཆུབ་ཀྱི་སེམས་སོ། །དེ་ལྟར་ན་དཀྱིལ་འཁོར་ལྔ་པོ་དེ་དག་གསལ་བར་གསུངས་ལ། རིགས་ལྡན་འཇམ་དཔལ་གྲགས་པས་དྲང་སྲོང་བྱེ་བ་ཕྲག་ཕྱེད་དང་བཞི་ལ་དབང་བསྐུར་བའི་དམིགས་པའི་རྟེན་གྱི་དཀྱིལ་འཁོར་ནི། དེང་སང་བློས་བསླངས་ཀྱི་ཐ་སྙད་བྱེད་པ་འབུར་མའི་དཀྱིལ་འཁོར་གྱི་བཀོད་པ་ཡིན་པར་
གསུངས་པས་ན། སྔོན་འབྱུང་སྟོན་པའི་རྣམ་འཕྲུལ་བཞིན་རྗེས་འཇུག་རྣམས་ཀྱིས་ཀྱང་སྒྲུབ་པར་བྱེད་པ་ཡིན་པས། འབུར་གྱི་བཀོད་པར་ཡང་དབང་བསྐུར་དུ་རུང་ལ། སློབ་དཔོན་དང་སློབ་མ་གཉིས་ཀར་ཀུན་སྤངས་ཡིན་ན། ཏིང་ངེ་འཛིན་གྱི་དཀྱིལ་འཁོར་དུ་ཚིག་གིས་དབང་བསྐུར་བ་ཡང་རུང་སྟེ། དེའི་ཕྱིར་རྫས་ཀྱི་དཀྱིལ་འཁོར་གཏན་ནས་མེད་པ་བསམ་གཏན་འབའ་ཞིག་གི་དཀྱིལ་འཁོར་དུ་དབང་བསྐུར་དུ་རུང་བ་དང༌། ཏིང་ངེ་འཛིན་ཁོ་ནའི་དཀྱིལ་འཁོར་ལ་ཡང་རུང་ན། དེའི་སྟེང་དུ་རས་བྲིས་ཀྱང་ལྷག་པོར་ཡོད་ན་ཅིའི་ཕྱིར་མི་རུང་སྟེ། སློབ་དཔོན་དང་སློབ་མ་ཆུང་ངུའི་ཡོ་བྱད་ཅན་ལ་རས་བྲིས་ཀྱང་ལྷག་པར་བསྔགས་སོ། །ཏིང་ངེ་འཛིན་གྱི་དཀྱིལ་འཁོར་གྱི་གནས་སྐབས་སུ་ཀ་བ་རྣམས་དང་རྡོ་རྗེའི་འཕྲེང་བ་སའི་དཀྱིལ་འཁོར་རྩིག་པ་དག་ནི་རུས་པ་རྣམས་ཀྱིས་མཛོད། །ཅེས་སོགས་ལུས་ལ་གཞལ་ཡས་ཁང་གི་དག་པ་དང༌། བུམ་པ་བརྒྱད་རྣམས་བདུད་རྩིའི་ཡན་ལག་གིས་ཏེ། ཞེས་སོགས་ལུས་ལ་ལྷའི་དག་པ་གསུངས་པ་རྣམས་མ་དག་པ་སྦྱངས་ཤིང་དག་པའི་དཀྱིལ་འཁོར་དུ་བསྐྱེད་ན། བསྐྱེད་གཞི་དམིགས་རྟེན་གྱི་སྒོ་ནས་སློབ་དཔོན་གྱི་ལུས་དཀྱིལ་དུ་དབང་བསྐུར་རོ་ཞེས་ཐ་སྙད་བཞག་ཀྱང་ཆ་གཅིག་ནས་མི་འགལ་བ་ཡང་ཡིན་མོད། འཁོར་ལོ་སྡོམ་པ་སོགས་ནས་བཤད་པའི་ལུས་དཀྱིལ་དང་ནི་ཅུང་མི་འདྲའོ། །དེ་ལ་ནི་ཕྱི་དབྱིབས་གཙོ་བོའི་རྣམ་པ་མ་ཞིག་པ་ཉིད་ལ་སྐུའི་ཆ་སོ་སོར་ལྷ་རྣམས་འགོད་དགོས་པ་ཡིན་ལ། འདི་ནི་ལུས་ཡོངས་སུ་གྱུར་པ་ལས་ཕྱི་དཀྱིལ་གཞལ་ཡས་ཁང་གྲུ་བཞི་སྒོ་བཞིའི་རྣམ་པར་གྱུར་པ་ལ་ལྷ་འགོད་ཚུལ་ཡང་ཕྱི་དཀྱིལ་
གྱི་ལུགས་ཉིད་ཡིན་པའི་ཕྱིར་རོ། །དེ་ལྟར་ན་བྱིས་པ་འཇུག་པའི་དབང་བདུན་ལ་ནི། རྡུལ་ཚོན་དང་བློས་བསླངས་དང་རས་བྲིས་ཏེ་གསུམ་དང༌། བསམ་གཏན་གྱི་དཀྱིལ་འཁོར་ལ་ལུས་རྒྱུར་དམིགས་པ་དང་མ་དམིགས་པའི་དབྱེ་བ་ལྔ་པོ་དེ་དག་འབྱུང་ལ། དེའི་སྟེང་དུ་གོང་མའི་བཞི་སྟེ། དཀྱིལ་འཁོར་གྱི་ངོ་བོ་དགུ་གསུངས་སོ། །གང་དག་འགྲེལ་པ་དོན་དམ་བསྡུས་པའི་ཚིག་དྲངས་ཏེ། དབང་བདུན་ལ་རྡུལ་ཚོན་ཁོ་ན་ལས་གཞན་པ་མི་རུང་ངོ་ཞེས་པ་ནི། འགྲེལ་ཚིག་དེ་ཚད་མའི་ལུང་དུ་མི་རུང་བའི་ཕྱིར་དང༌། ཁ་ཅིག་རྣམ་རྒྱལ་དཔལ་བཟང་དང་ལེགས་པའི་བུའི་འགྲེལ་པ་ལས་ཀྱང་བཤད་ཅེས་རྒྱབ་དཔུང་སྒྲོན་ཀྱང་མི་ཕན་ཏེ། དོན་དམ་བསྡུས་པ་རྩོམ་པ་པོ་དང་འགངས་ཆེ་ཆུང་འདྲ་བ་གཞན་ཞིག་གམ། དེ་བས་ལྷག་པ་སྔོན་བྱུང་བ་ཞིག་ཡིན་ན་ནི། རྒྱབ་དཔུང་དུ་འགྲོ་སྲིད་ཀྱང་དེ་གཉིས་ནི་དེའི་རྗེས་འབྲང་ཡིན་པའི་ཕྱིར་དེ་ཡང་ཚད་མར་མི་རུང་ན། དེ་གཉིས་ལྟ་ག་ལ་ཞིག ཡང་ཁ་ཅིག་འདི་སྐད་ཅེས་ལུགས་འདིའི་བྱིས་འཇུག་ལ་རྡུལ་ཚོན་གྱི་དཀྱིལ་འཁོར་ཁོ་ན་དགོས་ཏེ། ལུགས་འདི་ལ་རྫས་ལྔ། ལྷག་གནས་སོགས་ཀྱི་ཆོ་གའི་དཀྱུས་ཅིག་ལ་དཀྱིལ་འཁོར་བྱས་པ་དགོས་ལ། རས་བྲིས་ལ་དེ་ལྟར་མི་རུང་བའི་ཕྱིར་རོ་ཞེས་ཟེར་རོ། །དེའི་དངོས་ལན་ནི་བྱས་པ་དགོས་ཞེས་པ་ལ་མ་གྲུབ་པའི་ལན་འདེབས་རྒྱུ་ཡིན་ཡང༌། རེ་ཞིག་འདི་སྐད་ཅེས་བྱ་སྟེ། འོ་ན་རྒྱ་གར་པཎྜི་ཏའི་ལུགས་ཀྱི་བདེ་དགྱེས་གསང་གསུམ་སོགས་ཀྱི་བུམ་དབང་ལ་ཡང་རྡུལ་ཚོན་གྱི་དཀྱིལ་འཁོར་ཁོ་ན་དགོས་པ་ཐལ་ཏེ། ས་ཆོག་ས་ལྷ་ལྷ་དང་བུམ་པ་སྟ་གོན། ཐིག་ཚོན་བྱིན་རླབས་སོགས་ཀྱི་ཆོ་ག་
དཀྱུས་གཅིག་ལ་བྱས་པའི་དཀྱིལ་འཁོར་དགོས་པ་གང་ཞིག །རས་བྲིས་སོགས་ལ་དེ་ལྟར་མི་རུང་པའི་ཕྱིར་རོ། །དེ་ན་རེ་སྤྱིར་བཏང་ལ་དེ་ལྟར་ཡིན་ཡང༌། དམིགས་གསལ་ཡིན་པའི་ཕྱིར། བདེ་དགྱེས་སོགས་ལ་རས་བྲིས་འགལ་བ་མེད་སྙམ་ན། འདིར་ཡང་དམིགས་གསལ་ཡིན་ནོ། །དེ་རྣམས་ལ་དེ་འདྲ་དེ་དཀྱུས་གཅིག་པ་མི་དགོས་སྙམ་ན། འདིར་ཡང་དགོས་པའི་རྒྱུ་མཚན་ཅི། དེས་ན་ལུང་རིགས་གཉིས་ཀར་མེད་པའི་རང་གི་འདོད་པ་ཞིག་རྒྱུ་མཚན་དུ་བཀོད་པ་ཁོ་ནས་དཔྱོད་ལྡན་སུ་ཞིག་ཡིད་ཆེས་སྐྱེ་བར་འགྱུར། གཞན་ཡང་རས་བྲིས་ཀྱི་དཀྱིལ་འཁོར་དུ་བདག་འཇུག་རུང་ངམ་མི་རུང༌། རུང་ན་གཞན་ལ་དབང་བསྐུར་ཡང་རུང་བར་འགྱུར་ཏེ། དགོས་དོན་མཚུངས་པའི་ཕྱིར། མི་རུང་ན་རང་གཞན་གཉིས་ཀའི་དོན་དུ་མི་རུང་བའི་བཀོད་པ་དེ་རྣམ་པ་དུ་མར་སྐྱེས་བུ་དམ་པ་རྣམས་ཀྱིས་འབད་པའི་ཆེ་ཐང་དུ་བཞེད་པ་མི་འཐད་པར་འགྱུར་རོ། །ཡང་སྡོམ་པ་སོགས་ལས་འབྱུང་བའི་ལུས་ཀྱི་དཀྱིལ་འཁོར་དེ་དང་འདྲ་བའི་ལུས་དཀྱིལ་རྒྱུད་འདིར་མི་གསུང་བ་ཅི་སྙམ་ན། འདི་འདྲའི་རིགས་ལ་རྒྱུ་མཚན་གཞན་མི་དགོས་ཏེ། གདུལ་བྱའི་བསམ་པའི་དབང་གིས་སོ། །འོན་ཀྱང་བསྐྱེད་རིམ་ལ་གཙོ་བོར་བྱེད་པ་ཡིན་ན། དེ་ཟབ་མོའི་མཐར་ཐུག་ཏུ་མོས་པའི་དབང་གིས་བཞག་པ་ཡིན་པས། འགྲོ་བ་འདི་དག་རང་བཞིན་གྱིས། གྲུབ་པའི་དཀྱིལ་འཁོར་གཉིས་མེད་པའོ། །ཞེས་ཟབ་ཁྱད་ཆེ་ཆེ་ལྟར་བསྔགས་ཀྱང༌། རྒྱུད་འདིར་ལས་དང་པོ་པ་ཉིད་ནས་རྫོགས་རིམ་གྱི་དཀྱིལ་འཁོར་འགྲུབ་པའི་ཐབས་གསུངས་ན། རྣམ་པར་རྟོག་པས་བརྟགས་པའི་ལུས་དཀྱིལ་སྒོམ་པ་དེ། འདི་ལ་
བལྟོས་ན་ཆེས་རྨད་དུ་བྱུང་བའི་ཡ་མཚན་གང་ཡང་མེད་པས་འདིར་རྩལ་དུ་མ་བཏོན་ཏེ། ཕྱག་རྒྱའི་ལུས་ལས་གཞན་པའི་ལུས་དཀྱིལ་མི་གསལ་ལོ། །འོན་ཀྱང་ཕྱག་རྡོར་སྟོད་འགྲེལ་གྱི་མན་ངག་སྒྲུབ་ཐབས་ལས་འབྱུང་སྟེ། རྒྱུད་དེ་ཉིད་ལས་བཤད་པའི་བབས་ཀྱིས་ཡིན་ལ། དེ་ལས་བརྩམས་ན་འདིར་བཤད་པའི་སྡོམ་པ་ཆེ་ཆུང་ལ་ཡང་འབྱུང་དུ་རུང་སྟེ། དུས་འཁོར་རང་ལུགས་ཀྱི་མ་ཡིན། རྒྱུད་སྡེ་གཞན་གྱི་ཆོ་གའི་རིམ་པས་སོ། །བཞི་པ་ནི་སྤྱིར་བཏང་ལ་བྱིས་པ་འཇུག་པའི་དབང་བདུན་སྔོན་དུ་སོང་ནས། སློབ་མའི་དབང་གོང་མ་བཞི་བསྐུར་བ་དང༌། དེའི་སྟེང་དུ་སློབ་དཔོན་དུ་འོས་པའི་བྱ་བ་གྲུབ་པ་ན། རྡོ་རྗེ་སློབ་དཔོན་གྱི་དབང་བསྐུར་བ་ལ་རང་གཞན་དུས་འཁོར་བ་སུ་ཡང་མི་མཐུན་པ་མེད་དོ། །འོན་ཀྱང་སྒྲུབ་པ་ལྷུར་ལེན་པའི་དུས་འཁོར་བ་རྙིང་པ་མང་རབ་དང༌། ཨོ་རྒྱན་པ་དང་བུ་སྟོན་ཆེན་པོའང་བཞེད་ལ། རང་ལུགས་ལ་ཡང་དམིགས་གསལ་ལ་བྱིས་འཇུག་གི་དབང་མ་ཐོབ་རུང༌། བདེ་དགྱེས་སོགས་རྣལ་འབྱོར་བླ་མེད་གཞན་གྱི་བུམ་དབང་དུ་གྲགས་པ་དེ་ཐོབ་ན། དུས་འཁོར་རང་ལུགས་ཀྱི་མཆོག་དབང་གིས་སྒོ་ཕྱེ་ནས་རྡོ་རྗེའི་རྣལ་འབྱོར་སྟོན་པར་ཡང་མཛད་དེ། འདི་ནི་ཉེས་མེད་ཕུན་ཚོགས་ཀྱི་སྔགས་སྡོམ་སྦྱིན་ཚུལ་ཁོ་ན་ཡིན་ནོ། །སྦྱོར་དྲུག་གི་གྲུབ་ཐོབ་ལ་རྒྱ་བོད་བལ་གསུམ་དུ་རྟགས་མངོན་གྱུར་དུ་ཐོབ་པ་ནི། དཔལ་ཆེན་རྒ་ལོ་ཡིན་ཡང་དེས་སྐུ་གསུང་ཐུགས་ཡོངས་རྫོགས་ཀྱི་དཀྱིལ་འཁོར་དུ་དབང་བསྐུར་ནི་མི་མཛད་པར་གྲགས་ལ། ཐུགས་དཀྱིལ་གྱི་དབང་བསྐུར་ཅི་རིགས་པ་མཛད་མོད། ཤིན་ཏུ་གུས་པས་བསྟེན་པའི་སློབ་མ་ཕལ་ཆེར་ལ་ཡང༌། བདེ་མཆོག་ལཱུ་ཡི་པའི་
དབང་གིས་སྒོ་ཕྱེ་ནས། ཏིང་ངེ་འཛིན་སྐྱེད་བྱེད་ཀྱི་དབང་ལ་དུས་ཀྱི་འཁོར་ལོའི་མཆོག་དབང་བསྐུར་ཏེ། རྫོགས་རིམ་སྟོན་པར་མཛད་པ་ཤ་སྟག་ཡིན་ནོ། །ཤིན་ཏུ་དམིགས་གསལ་ལ་ནི། གཞན་ལུགས་ཀྱི་བུམ་དབང་ངམ་ལུགས་འདིའི་བྱིས་དབང་ཡེ་མ་ཐོབ་པ་ལ་ཡང་སྐབས་སུ་བབ་པའི་མོས་པ་དང་ལྡན་ན། མཆོག་དབང་འབའ་ཞིག་གིས་སྒོ་ཕྱེ་སྟེ། རྫོགས་རིམ་སྟོན་ཏུ་རུང་བ་ཡིན་ལ། དེ་ཡང་དེ་ལས་ལྷག་པོ་མི་དགོས་པའི་སྐལ་ལྡན་གྱི་གང་ཟག་ལ་ནི། ཉེས་མེད་ཕུན་ཚོགས་ཡོན་ཏན་དཔག་ཏུ་མེད་པ་དང་ལྡན་པའི་ཕྱིར། གསང་བ་གྲུབ་པ་དང་ཐབས་དང་ཤེས་རབ་གཏན་ལ་དབབ་པ་གྲུབ་པ་སོགས་ལས་བུམ་དབང་སྔོན་འགྲོའི་ཚིག་ཟུར་ཙམ་ཡང་མེད་པར་དབང་གོང་མ་བསྐུར་བར་གསུངས་སོ། །གཞན་དུ་ན། སློབ་དཔོན་ཡེ་ཤེས་ཅན་གྱི་བཀས་གནང་བ་དང༌། དགག་དགོས་འཛོམ་པའི་དུས་སུ་ཉེས་མེད་ཡིན་ལ། བླ་ཆོས་སུ་བྱས་ན་ཡང་ཆོ་གའི་རིམ་པ་བརྒལ་བའི་ཉེས་པ་ཡིན་གྱི། གསང་སྒྲོགས་ནི་མ་ཡིན་ནོ། །དེ་ལ་ཕྱིས་དཀྱིལ་ཆོག་དགོངས་པ་རབ་གསལ་མཁན་པོ་རྗེས་འབྲང་དང་བཅས་པ་རྣམས་དང༌། ཤེས་རིན་པ་སོགས་མང་པོ་ཞིག་མགྲིན་གཅིག་ཏུ་རྩོད་པ་བྱེད་དེ། རྒྱུད་སྡེ་གཞན་གྱི་བུམ་དབང་ཙམ་ཐོབ་པ་ལ་འདིའི་དབང་གོང་མ་བསྐུར་བའི་སྐབས་དེ་ལ་སྨྲ་བརྗོད་སྤངས་ཏེ། སྔར་དབང་གཞན་ཡེ་མ་ཐོབ་པའི་ཤིན་ཏུ་དམིགས་གསལ་དེ་ཉིད་ངེས་དོན་ལ་གཞོལ་བའི་དུས་འཁོར་པ་རྣམས་ཀྱིས་སྤྱིར་བཏང་གི་ལུགས་ལ་ཁས་བླངས་པ་ལྟར་བྱས་ནས། འདི་སྐད་ཅེས་སྨྲ་སྟེ། བོད་སྔ་ཕྱི་མང་པོ་ཞིག་དབང་བདུན་མ་བསྐུར་བར་མཆོག་དབང་གོང་མ་སྟེར་བ་མི་འཐད་དེ།
དེ་ལྟར་བྱས་ན་སློབ་དཔོན་ལ་གསང་སྒྲོགས་ཀྱི་རྩ་ལྟུང་འབྱུང་ཞིང༌། སློབ་མས་ཀྱང་དབང་མི་ཐོབ་པའི་ཕྱིར་རོ། །ཇི་སྐད་དུ། སྔགས་པ་དཀྱིལ་འཁོར་མ་མཐོང་བར། །གང་ཞིག་རྣལ་འབྱོར་པ་ཉིད་འདོད། ཅེས་སོགས་ལུང་འདྲེན་ནོ། །དེ་ལ་འདི་སྐད་ཅེས་བྱ་སྟེ། ཅི་ཁྱེད་རྣམས་དེ་སྐད་སྨྲ་བ་འདི། དཔལ་ཇོ་ནང་པ་གོང་མ་དག་གི་གསུང་རབ་ཏུ་ཡི་གེར་འཁོད་ཅིང་གྲུབ་མཐར་ཡོད་པ་ཞིག་འགོག་པ་ཡིན་ནམ། དེ་ལྟར་མིན་ཡང་ལག་ལེན་བྱེད་པ་མཐོང་སྟེ་ལག་ལེན་ནོར་བར་བསམས་ནས་འགོག་པ་ཡིན་ཞེས་ཐོག་མར་འདྲིའོ། །དང་པོའོ་ཟེར་ན་ཁྱེད་ཅག་རྫུན་ལ་གོམས་པ་ཉིད་ཀྱི་ཕྱིར་འདིར་ཡང་རྫུན་དུ་སྨྲ་བ་སྟེ། ཁོ་བོ་ཅག་གི་བླ་མ་གོང་མས་ནི། དགྱེས་རྡོར་སོགས་ཀྱི་བུམ་དབང་ཐོབ་པ་ལ་འདི་བསྐུར་དུ་རུང་ཞེས་པ་ནི་ལན་རེ་ཙམ་གསུངས་པ་ཡོད་ཀྱི། བྱིས་དབང་གཏན་ནས་མི་དགོས་པར་བཤད་པ་ཇོ་ནང་པའི་བསྟན་བཅོས་ག་ན་ཡོད་སྨྲོས་ཤིག གཉིས་པ་ལྟར་རོ་ཟེར་ན། སྤྱིར་ཡི་གེར་མ་འཁོད་པ་གྲུབ་མཐར་མི་བྱེད་ན་ལག་ལེན་དུ་ནོར་བ་ཙམ་ལ། རྩོད་པའི་དགག་པ་གཏོང་གིན་མི་ལང་སྟེ། རྒྱལ་བ་མྱ་ངན་ལས་འདས་ནས་ལོ་སུམ་བརྒྱ་ལོན་མན་ཆད་ཀྱི་རབ་བྱུང་ཕལ་ཆེར་ལག་ལེན་ནོར་བ་ཅན་ཁོ་ན་ཡིན་ན་དེ་ལ་ཅི་ཞིག་བྱ། ཉིད་རང་དང་ཉིད་ཀྱི་སློབ་དཔོན་དང་གྲོགས་དང་སློབ་མ་རྣམས་ལའང་ལག་ལེན་འཁྲུལ་པ་མང་དུ་ཡོད་སྲིད་དོ། །འོན་ཀྱང་སྐབས་འདིར་ཁོ་བོ་ཅག་ལག་ལེན་ནོར་བ་མིན་ལ། ཁས་ལེན་ནོར་བ་ཡང་མིན་ནོ། །དེ་ཅིས་མངོན་ཞེ་ན། ཁོ་བོ་ཅག་ནི་དུས་འཁོར་སྟོན་རྒྱུའི་སློབ་མ་ཕལ་ཆེར་ལ་བྱིས་འཇུག་ཐོག་མར་རང་གིས་བསྐུར་བར་བྱེད་པས་ལག་ལེན་མ་འཕྱུགས་ལ། དེ་བས་ཁྱེད་
དག་ལ་རང་ཉིད་རྒྱུད་བཤད་བྱེད་པར་འདོད། དབང་བྱང་དུ་མ་རུང་ནས་གཞན་ལ་ཞུ་བར་གཏོང་བ་དག་ཡོད་དེ། བྱིས་འཇུག་གི་དབང་དེ་ཙམ་དུ་ཕན་ཡོན་དང༌། གལ་ཆེ་ན་ཕན་ཡོན་ཆེ་བའི་བྱིས་འཇུག་དེ་ཅི་ཡི་ཕྱིར་རང་གིས་མི་བྱེད། དབང་བསྐུར་བ་པོ་མི་རུང་ན་རྒྱུད་འཆད་པ་པོར་ཡང་རུང་བ་དཀའ་བས། གཞན་སྐྱོན་ཚོལ་བ་བས་རང་ཉིད་བག་ཡོད་པ་གལ་ཆེའོ། །ཡང་ཁོ་བོ་ཅག་ནི་སྤྱིར་བཏང་ལ་གོང་མའི་སྔོན་དུ་བྱིས་འཇུག་དགོས་པར་འདོད་པས་བྱིས་འཇུག་གཏན་ནས་མི་འདོད་དོ་ཞེས་དབང་ཆེའི་རྫུན་སྨྲས་པས་ཅིར་རུང༌། སྤྱིར་བཏང་ལ་དགོས་པར་འདོད་པ་དེ་མི་དགོས་པར་འདོད་པ་རང་མིན་ལས་ཆེ། དམིགས་གསལ་ལ་མི་དགོས་པའི་སྐབས་ཡོད་པར་འདོད་པས་ནོར་ན་ནི། ཁྱེད་རང་རྣམས་ཀྱང་ཆེས་ནོར་ཏེ། འདུས་པའི་ཤེར་དབང་བསྐུར་བ་ལ་དེའི་བུམ་དབང་མི་དགོས་པ་དམིགས་གསལ་ལ་ཁས་ལེན་གྱི་འདུག་པའི་ཕྱིར་རོ། །མེད་ན་མི་འབྱུང་གི་རྒྱུ་ལ་དམིགས་གསལ་མི་འཐད་པས་དམིགས་གསལ་ཡོད་པ་ཉིད་ཀྱིས་དེ་མིན་ཏེ། དབང་གོང་མ་ཐོབ་པ་ལ་མེད་ན་མི་འབྱུང་བའི་རྒྱུར་བྱིས་དབང་མི་དགོས་པ་གྲུབ། དེ་གྲུབ་ཕྱིན་དགོས་པ་ཁྱད་པར་ཅན་ལ་དམིགས་གསལ་དུ་གོང་མ་བཙན་ཐབས་སུ་སྦྱིན་པ་ལ་གནོད་བྱེད་ཅི་ཡང་ཡོད་པ་མ་ཡིན་པས་ངེད་ཀྱི་འདོད་པ་ལ་ནོར་བ་ནམ་ཡང་མེད་དོ། །དངོས་ཀྱི་ལན་ནི་སྤྱིར་དཀྱིལ་འཁོར་དུ་མ་ཞུགས་པས་ཀྱང་གྲོལ་བའི་དངོས་གྲུབ་ཐོབ་པར་འགྱུར་བའི་ལུང་ཡོད་དེ། སངས་རྒྱས་མཉམ་སྦྱོར་ལས། དཀྱིལ་འཁོར་དག་ཏུ་མ་ཞུགས་པའམ། །སྒྲིབ་པ་ཀུན་དང་ལྡན་ཡང་རུང༌། །རང་གི་ལྷར་ནི་བདག་སྦྱོར་ན། །བསོད་ནམས་ཆུང་ཡང་
འགྲུབ་པར་འགྱུར། ཞེས་དང༌། འདི་དང་སངས་རྒྱས་ཐམས་ཅད་ལ། །མཐོང་བ་དང་ནི་རེག་པ་ཡིས། །དཀྱིལ་འཁོར་དག་ཏུ་མ་ཞུགས་པའང༌། །བདེན་པ་དག་ཀྱང་མཐོང་བར་འགྱུར། །ཞེས་གསུངས་ཏེ། ལུང་སྔ་ཕྱི་གང་ཞིག་དབང་བཙན་པར་བྱེད། རང་ལུགས་ལུང་དེ་དག་མི་འགལ་བའི་དོན་གཞན་དུ་རྒྱས་པར་འཆད་དོ། །འོན་ཀྱང་མཆོག་དབང་གོང་མ་བསྐུར་བས་ལུས་ཀྱི་དབང་པོ་བྷ་ག་སེམས། ཞེས་པའི་དཀྱིལ་འཁོར་དུ་ཞུགས་ཤིང་མཐོང་བ་ཡིན་པས་དཀྱིལ་འཁོར་དེ་དག་དང་བསྐྲུན་ན། བརྡ་ཐབས་ཙམ་གྱིས་འཇུག་པ་དང༌། རང་གི་རྣམ་རྟོག་གིས་བཀོད་པའི་ལྷ་ངོ་དང༌། རི་མོའི་དཀྱིལ་འཁོར་ཙམ་ལ་འགངས་ཆེ་རྒྱུ་ཅི་ཡོད། དཀྱིལ་འཁོར་དུ་མ་ཞུགས་པ་དང་མ་མཐོང་པ་ནི་རྟགས་མ་གྲུབ་བོ། །དབང་བདུན་མ་བསྐུར་བར་མཆོག་དབང་བསྐུར་བ་རུང་བ་ཡིན་ཏེ། སློབ་དཔོན་ལ་གསང་སྒྲོགས་ཀྱི་རྩ་ལྟུང་མི་འབྱུང་བ་གང་ཞིག །སློབ་མས་དབང་བསྐུར་བ་ཐོབ་པའི་ཕྱིར་རོ་ཞེས་ཟློག་སྟེ་བརྗོད་ན་ཅི་སྨྲ། རྩ་ལྟུང་འབྱུང་སྟེ་སྔར་དབང་བསྐུར་མ་ཐོབ་པ་ལ་གསང་བ་བསྟན་པའི་ཕྱིར་སྙམ་ན། འོ་ན་སྔར་དབང་བསྐུར་གཞན་མ་ཐོབ་པ་ལ་དཀྱིལ་འཁོར་དུ་འཇུག་པ་དང་བྱིས་འཇུག་བསྐུར་ཡང་སློབ་དཔོན་ལ་རྩ་ལྟུང་འབྱུང་བར་འགྱུར་ཏེ། ཡུལ་དེ་སྔར་དབང་བསྐུར་མ་ཐོབ་པ་ལ་སློབ་དཔོན་གྱིས་གསང་བ་བསྟན་པའི་ཕྱིར་རོ། །ཡང་དེ་ལ་གསང་སྒྲོགས་མི་འབྱུང་སྟེ་ཡུལ་དེ་ཡང་སྐབས་འདིར་མོས་པ་དང་ལྡན་ཞིང༌། གང་ཟག་དེ་ཉིད་ལ་དབང་བདུན་གྱི་ཆོ་ག་འདི་བྱེད་པའི་ཕྱིར་རོ་སྙམ་ན། དབང་གོང་མ་བཙན་ཐབས་སུ་བསྐུར་བ་འདི་ལ་ཡང་གསང་སྒྲོགས་མི་འབྱུང་སྟེ། དེ་ཡང་དད་
པ་དང་ལྡན་ཞིང་ཆོ་ག་ཡང་དེ་ཁོ་ན་ལ་བྱེད་པའི་ཕྱིར་རོ། །ཡང་དེ་ལྟ་བུའི་ཚེ་སློབ་མ་དེས་ཀྱང་དབང་གོང་མ་རྣམས་ཐོབ་པ་ཡིན་ཏེ། དབང་གོང་མ་རྣམས་ཀྱི་སྡོམ་པ་སྐྱེ་བའི་ཕྱིར་རོ། །དེ་ཡང་གྲུབ་སྟེ་དབང་གོང་མ་བཞི་པོ་རྫོགས་རིམ་གྱི་སྡོམ་པ་སྐྱེད་བྱེད་ཀྱི་དབང་ཡིན། དབང་གོང་མ་བཞི་ལས་གཞན་པའི་རྫོགས་རིམ་གྱི་སྡོམ་པ་སྐྱེད་བྱེད་ཀྱི་དབང་མེད་པའི་ཕྱིར། ཁྱབ་སྟེ། གོང་མའི་སྡོམ་པ་སྐྱེད་བྱེད་ཡོངས་རྫོགས་བསྐུར་བའི་ཕྱིར་གལ་ཏེ་གཞན་ཡོད་ཅེ་ན་གང་ཡིན་སྨྲོས་ཤིག །བྱིས་འཇུག་རྣམས་ཀྱང་ངོ་ཞེ་ན། འོ་ན་བྱིས་འཇུག་ཐོབ་ན་རྫོགས་རིམ་གྱི་སྡོམ་པ་སྐྱེས་པས་ཁྱབ་པར་ཐལ། བྱིས་འཇུག་རྫོགས་རིམ་གྱི་སྡོམ་པ་སྐྱེད་བྱེད་ཀྱི་དབང་ཡིན་པའི་ཕྱིར། དེར་དེ་སྐྱེས་པ་ནི་ཁྱེད་རང་ཡང་མི་འདོད་དོ། །ཡང་དེ་དག་འདི་སྐད་ཅེས། དབང་བདུན་གྱིས་ས་བདུན་གྱི་ལག་རྗེས་འཇོག་ཅིང༌། གོང་མ་བཞིས་ས་ཕྱི་མ་བཞིའི་ལག་རྗེས་འཇོག་པར་འོ་སྐོལ་འདོད་པ་མཚུངས་ན། ས་བདུན་མ་ཐོབ་པར་བརྒྱད་པ་སོགས་ཐོབ་པ་ཡོད་པར་འགྱུར་ཏེ། དབང་བདུན་མ་ཐོབ་པར་གོང་མ་བཞི་ཐོབ་པ་ཡོད་པའི་ཕྱིར། ཞེས་ཟེར་ཏེ། ཁོ་བོ་ཅག་དབང་བདུན་པོས་ས་བདུན་ཐོབ་པར་འགྱུར་བའི་ནུས་པ་ཁྱད་པར་ཅན་འཇོག་པར་འགྱུར་བ་ཙམ་དུ་འདོད་མོད། སྐབས་འདིར་ལག་རྗེས་ཀྱི་ཐ་སྙད་ནི། ཐ་སྙད་མི་མཛེས་ཤིང་དོན་དང་འགལ་བས་ཁོ་ཅག་ཐ་སྙད་དེ་མི་བྱེད་ལ། དོན་ལ་དཔྱད་ནའང་དབང་བདུན་གྱིས་ས་བདུན་གྱི་རྟེན་འབྲེལ་འཇོག་ཀྱང༌། ས་བདུན་ཐོབ་པའི་རྟེན་འབྲེལ་འཇོག་བྱེད་ཡིན་ན། དབང་བདུན་ཡིན་པས་ལྟ་ག་ལ་
ཡང་ཁྱབ། དེ་དང་ལྡན་དགོས་པས་ཀྱང་མ་ཁྱབ་པས། ཐལ་འགྱུར་དེ་ནི་ཁྱབ་པ་ཤིན་ཏུ་མ་ངེས་ལ། ཁྱེད་ཉིད་ལ་འདི་སྐད་ཅེས་བྱ་སྟེ། ཁམས་དྲུག་ལྡན་པའི་མི་ལུས་ཐོབ་པའི་ལག་རྗེས་འཇོག་པའི་དབང་དང༌། ལམ་ཐུན་མོང་བའི་རྒྱུད་སྦྱང་བའི་དབང་དང༌། ཚོགས་སྦྱོར་གྱི་སའི་ལག་རྗེས་འཇོག་པའི་དབང་མ་བསྐུར་བར་བྱིས་འཇུག་གི་དབང་བསྐུར་བ་མི་འཐད་པར་འགྱུར་ཏེ། མདོར་ན་ཁམས་དྲུག་ལྡན་པ་རྡོ་རྗེའི་ལུས་དང༌། རྒྱུད་སྦྱོང་བ་དང༌། ཚོགས་སྦྱོར་གྱི་ས་མ་ཐོབ་པར་ས་བདུན་པོ་ཐོབ་པ་མི་སྲིད་པའི་ཕྱིར་རོ། །ཞེས་མཚུངས་ཁྱབ་མགོ་འགྲེའོ། །འདོད་པར་ནི་མི་ནུས་ཏེ་དབང་དེ་འདྲ་མི་སྲིད་པའི་ཕྱིར་རོ། །དེ་དག་དབང་མ་ཡིན་པའི་ཐབས་གཞན་གྱིས་འགྲུབ་སྙམ་ན། འདིར་ཡང་དེ་ཁོ་ནའོ། །དེས་ན་རང་ལུགས་ནི། དབང་བདུན་གྱི་སྡོམ་པ་དགེ་བསྙེན་དང༌། བུམ་དབང་གི་དགེ་ཚུལ། གསང་དབང་གི་དགེ་སློང༌། འཇིག་རྟེན་པའི་ཤེར་དབང་འཇིག་རྟེན་པའི་བཞི་པར་བཅས་པས་གནས་བརྟན་དང༌། འཇིག་རྟེན་འདས་པའི་བཞི་པ་སྐྱེ་དགུའི་བདག་པོ་སྟེ་དགྲ་བཅོམ་པའི་རྒྱུད་ཀྱི་ཟག་མེད་ཀྱི་སྡོམ་པ་དང་སྦྱོར་བར་མཛད་ལ། དེས་ན་དགེ་བསྙེན་གྱི་སྡོམ་པ་མ་བླངས་པར་དགེ་ཚུལ་དགེ་སློང་སྒྲུབ་ཏུ་ཡོད་པ་བཞིན་དུ། དབང་བདུན་མ་བླངས་པར་ཡང་གོང་མའི་སྡོམ་པ་སྐྱེ་རུ་རུང་ལ། དབང་བཞི་སོ་སོ་རེ་རེས་ཀྱང་རང་རང་གི་སྡོམ་པ་སྐྱེ་རུ་རུང་བ་ཙམ་ཡིན་མོད་ཀྱི། ཆ་མ་ཚང་ན་རྡོ་རྗེ་བཞིའི་དག་པ་ཕྲུགས་གཅིག་མི་རྫོགས་པས་རྫོགས་རིམ་གྱི་སྒྲུབ་པ་ཆ་ཚང་སྒོམ་པ་ལ་བཞི་ཀར་ཡང་སྤྱིར་ནི་ཐོབ་དགོས་ལ། བཞི་
ཀ་བསྐུར་ཕྱིན་ཆད་སྔ་ཕྱིའི་གོ་རིམ་ཡང་ཚུལ་དང་མཐུན་པར་བྱའོ། །དམིགས་གསལ་གྱི་སྐབས་དབང་བདུན་མེད་ཀྱང་རུང་བ་ནི། དབང་བདུན་ལ་རྡོ་རྗེ་བཞིའི་དག་པ་ཕྲུགས་གཅིག་ཚང་ཞིང༌། གོང་མ་རྣམས་ལ་ཡང་དག་པ་ཕྲུགས་གཅིག་ཚང་བའི་ཕྲུགས་ཐ་དད་པས་ཡིན་ནོ། །དབང་གོང་མ་རེ་རེས་ཀྱང་རེ་རེའི་སྡོམ་པ་བསྐྱེད་ཐུབ་པའི་རྒྱུ་མཚན་ནི། ཡེ་ཤེས་གྲུབ་པ་ལས། དབང་བཞི་པ་ཁོ་ན་བཤད་པ་ལྟ་བུ་སྟེ། དེ་ཡང་ཉེས་མེད་ཡིན་དགོས་ན། དབང་པོ་རྣོན་པོ་ཁོ་ནས་དབང་དུ་བྱས་པ་ནི་ཡིན་པར་གསལ་མོད། དེ་ཁོ་ན་རུང་བའི་སྐབས་ཤིག་ཡོད་དགོས་སོ། །དེ་ལས་ཁ་ཅིག་ཆོས་རྒྱལ་ཕྱོགས་ལས་རྣམ་རྒྱལ་གྱི་བཞེད་པ་ཡིན་ནོ་ཞེས་དཀྱིལ་འཁོར་དུ་འཇུག་པའི་ཆོ་ག་བྱིས་དབང་བདུན་མ་བསྐུར་བར་མཆོག་དབང་བསྐུར་ན་རྫོགས་རིམ་སྟོན་པར་རུང་སྟེ། རྫོགས་རིམ་སྐྱེ་བ་བསྐྱེད་རིམ་ལ་མ་བལྟོས་པའི་ཕྱིར། ཞེས་གསུང་ངོ་ཟེར་ནས་དགག་པ་སྔར་བཞིན་གཏོང་སྟེ། རྗེ་ཕྱོགས་པའི་གསུང་གི་ཡི་གེ་འཁོད་པ་ཆེ་ཕྲ་གང་ནའང་དེ་སྐད་གསུང་པ་ནི་མེད་ན། རྗེ་ཕྱོགས་པས་སློབ་མ་རྣམས་ལ་མ་གནང་བར། ཁྱེད་རྣམས་ལ་གནང་བའི་སྙན་བརྒྱུད་དུ་སྩལ་བ་ཞིག་ཡོད་དམ་ཅི། འདི་ནི་ངེས་པར་གསུང་རབ་མ་མཐོང་བ་ལ་སློབ་དཔོན་ངན་པའི་ངག་སྒྲོས་ནོར་བས་བསླུས་པར་གོར་མ་ཆག་གོ །དེས་ན་དབང་དང༌། བྱིན་རླབས་དང༌། རྗེས་གནང་ཀུན་ལ་སྔོན་འགྲོའི་ཆོས་ཞེས་བྱ་བ་ཞིག་ཡོད་ཀྱི། དེ་དཀྱིལ་འཁོར་དུ་འཇུག་པའི་ཆོ་ག་ཡིན་པར་ནི་མ་ངེས་སོ། །དབང་གོང་མ་ལུས་ཀྱི་དཀྱིལ་འཁོར་སོགས་སུ་འཇུག་པ་ལ། ཕྱིའི་དཀྱིལ་འཁོར་གྱི་འཇུག་
ཆོག་གིས་ཁོ་བོ་ཅག་ལ་ནི་ཅི་ཞིག་བྱ། ཁྱེད་ལ་དེ་འདྲ་དགོས་པ་ལགས་སམ་ཅི། འཇུག་པ་དང་སྔོན་འགྲོའི་ཆོ་གའི་ཁྱད་པར་ཙམ་ཡང་མ་ཤེས་པ་འདི་ནི། རྟོག་གེ་སྐམ་པོའི་ས་ནས་བཙན་ཐབས་སུ་སྔགས་ལ་རང་གར་ཞུགས་པའི་རང་མདོག་བསྟན་པ་དེར་སྣང་ངོ༌། །ཡང་བྱིས་འཇུག་གི་དབང་ལ་ཁོ་བོ་ཅག་ནི་ཁྱེད་བཞིན་དུ་སྔགས་བརྗོད་ཀྱི་འུར་དིང་མི་ཆེ་ཡང་རང་དང་གཞན་ལ་ཡང་ཡང་ལེན་པ་དང་སྦྱིན་པའི་ལག་ལེན་རྒྱུན་མི་ཆད་པར་བྱེད་ལ། ཁྱེད་ཅག་ནི་བསྔགས་བརྗོད་འདི་ཙམ་དུ་ཆེ་ཞིང་ཞེན་ཆེན་པོ་འཐེན་པ་ལ། རང་ཡང་དཀྱིལ་འཁོར་དུ་མི་འཇུག་ཅིང༌། གཞན་དག་ལ་ཡང་རྒྱ་ལམ་ཞིག་ན་མ་གཏོགས་མི་སྟེར་བ་འདི་ཡང་ངོ་མཚར་རྨད་དུ་བྱུང་བ་ཞིག་གོ ། བྱིས་པ་འཇུག་པའི་དབང་བདུན་རྣམས་ཀྱང་སྤྱིར་རྫོགས་པར་ཐོབ་དགོས་ཀྱི། ནང་ཚན་གོ་རིམ་ལ་མཐའ་གཅིག་ཏུ་མ་ངེས་པ་ཡང་ཡིན་ཏེ། རྒྱུད་སྡེ་རྣམས་ལས་དབང་འདི་དག་གི་གོ་རིམ་ངེས་མེད་དུ་གསུངས་པའི་ཕྱིར་རོ། །ལྔ་པ་ནི། སྤྱིར་དཀྱིལ་འཁོར་གྱི་ཆོ་ག་ལ་གཙོ་བོ་དང་ཕལ་པ་གཉིས་ལས། དང་པོ་ནི། དབང་གི་ཆོ་ག་དང་དངོས་གྲུབ་སྒྲུབ་པའི་ཆོ་ག་གཉིས་ཡིན་ལ། ཕྱི་མ་ནི་རབ་གནས་དང༌། སྦྱིན་སྲེག་དང༌། ལས་ཚོགས་ཕྲ་མོ་རྣམས་སྒྲུབ་པ་དང༌། ལས་སྦྱོར་གྱི་ཆོ་ག་རྣམས་སོ། །དེ་ལས་འདིར་དབང་བསྐུར་བ་དང༌། དབང་གི་ཆོ་གའི་དབང་དུ་བྱས་ནས། ངོ་བོ་མཚན་ཉིད་དབྱེ་བ་ངེས་ཚིག་དགོས་པ་སྟེ་ལྔའོ། །དང་པོ་ནི། རྒྱལ་བས་གསུངས་པའི་སྔགས་རྒྱུད་ཀྱི་ཆོ་ག་ཡུལ་གང་ལ་སློབ་མར་བྱ་བའི་ཆེད་དུ་བསྒྲུབ་རྒྱུ་དེ་དབང་གི་ཆོ་གའི་ངོ་བོ་ཡིན་ལ། རིགས་སྔགས་ཀྱི་ཆོ་གའི་མཐུ་ལས་སློབ་མའི་རྒྱུད་སྨིན་པས་གོང་དུ་འགྱུར་བའི་
ཁྱད་པར་བསྟེན་པ་དེ་དབང་བསྐུར་བའི་ངོ་བོ་ཡིན་པས་ཁྱད་པར་དེ་སློབ་མས་ཐོབ་པ་ནི་དབང་ཐོབ་པའོ། །གཉིས་པ་ནི་སྔགས་ཀྱི་ཆོ་ག་གང་གིས་གཞན་ལ་སྔགས་སྡོམ་སྐྱེད་པའི་ནུས་པ་ཅན་དེ་དབང་བསྐུར་བའི་ཆོ་གའི་མཚན་ཉིད་ཡིན་ལ། ཡང་ན་ཡུལ་གྱི་ཁྱད་པར་སློབ་མ་བྱེད་པ་པོའི་ཁྱད་པར་རྡོ་རྗེ་སློབ་དཔོན་གྱི་རིགས་སུ་གནས་པ། ངོ་བོའི་ཁྱད་པར་སངས་རྒྱས་ཀྱིས་གསུངས་པའི་སྔགས་རྒྱུད་ཀྱི་ཆོ་ག་བྱེད་ལས་ཀྱི་ཁྱད་པར་གང་ལ་བྱ་བའི་ཡུལ་དེ་ལ་སྔགས་ཀྱི་སྡོམ་པ་སྐྱེད་ནུས་པའི་རིགས་ཅན་ཏེ། ཁྱད་པར་བཞི་ལྡན་གྱི་ཆོ་ག་དེ་ནི་དབང་བསྐུར་བའི་ཆོ་གའི་མཚན་ཉིད་དུ་འགྱུར་ལ། རྒྱུའི་ཁྱད་པར་སངས་རྒྱས་ཀྱིས་གསུངས་པའི་སྔགས་ཀྱི་ཁྱད་པར། ངོ་བོའི་ཁྱད་པར་དམ་ཚིག་གིས་བསྡུས་པའི་སྡོམ་པ། དག་པའི་ཁྱད་པར་སྒྲིབ་པ་སྤོང་བྱེད་ཀྱི་ལམ་ཐམས་ཅད་ཀྱི་གཞིར་གྱུར་པ། བྱེད་ལས་ཀྱི་ཁྱད་པར་ཐུན་མོང་མ་ཡིན་པའི་གསང་བ་ལ་འཇུག་ཏུ་རུང་བར་བྱེད་པ་སྟེ། ཁྱད་པར་བཞི་ལྡན་དུ་གྱུར་པའི་རྒྱུད་གོང་དུ་འཕགས་པའི་གནས་ཐོབ་པའི་དངོས་པོ་དེ་ནི་དབང་དངོས་ཀྱི་མཚན་ཉིད་དོ། །གསུམ་པ་ནི་ཐུན་མོང་དུ་རྒྱུད་དང་པོར་སྨིན་པར་བྱེད་པ་བྱིས་པ་འཇུག་པའི་དབང་བདུན་དང༌། ཁྱད་པར་ཅན་སྨིན་པར་བྱེད་པ་དབང་གོང་མ་བཞི་དང༌། རྡོ་རྗེ་སློབ་དཔོན་དུ་སྒྲུབ་པ་རྡོ་རྗེ་སློབ་དཔོན་གྱི་དབང་སྟེ་གསུམ་དུ་དབྱེ་ལ། དེ་དག་རེ་རེ་ལ་ཡང་སྐུ་དང་གསུང་དང་ཐུགས་དང་ཡེ་ཤེས་ཀྱི་དབང་བཞི་བཞིར་དབྱེའོ། །ཆུ་ཅོད་ནི་སྐུ། དར་དཔྱངས་དང་དྲིལ་བུ་ནི་གསུང༌། བརྟུལ་ཞུགས་དང་མིང་ནི་ཐུགས། རྗེས་གནང་ཡེ་ཤེས་
རྡོ་རྗེའི་དབང་ཡིན་ལ། བུམ་དབང་སྐུ། གསང་དབང་གསུང༌། ཤེས་རབ་ཐུགས། བཞི་པ་ཡེ་ཤེས་སོ། །ཡང་སློབ་མའི་དབང་དང༌། སློབ་དཔོན་གྱི་དབང་གཉིས་ཏེ། སློབ་མའི་དབང་ལ་དབང་བདུན་དང་གོང་མ་བཞི་སྟེ་བཅུ་གཅིག་ཡོད་ལ། སློབ་དཔོན་གྱི་དབང་ལ་བདག་པོ་དང༌། བདག་པོ་ཆེན་པོ་གཉིས་སོ། །ཡང་ན་འཇིག་རྟེན་པ་དང་འཇིག་རྟེན་ལས་འདས་པ་གཉིས་སུའང་བསྡུ་སྟེ། དབང་གཞན་རྣམས་འཇིག་རྟེན་པ་དང༌། བཞི་པ་དངོས་ནི་འཇིག་རྟེན་ལས་འདས་པའོ། །ཡང་ན་སློབ་མའི་དབང་ནི་རང་དོན་དང༌། བདག་པོའི་དབང་ནི་གཞན་དོན་དང༌། བདག་པོ་ཆེན་པོའི་དབང་ནི་གཉིས་དོན་གྱི་དབང་སྟེ་གསུམ་དུ་དབྱེའོ། །ཡང་རྒྱུ་ལམ་འབྲས་གསུམ་ལས། རྒྱུའི་དུས་ཀྱི་དབང་ནི། དང་པོར་མ་སྨིན་པ་སྨིན་པར་བྱེད་པ་དང༌། སྒྲིབ་པ་སྦྱང་བ་ཙམ་དང༌། བསོད་ནམས་ལ་སོགས་པ་ཚོགས་གསུམ་གྱི་ཡོན་ཏན་འཕེལ་བའི་ཕྱིར། བདག་ཉིད་འཇུག་པའམ་སློབ་དཔོན་གྱིས་དབང་བསྐུར་བ་ལས་དངོས་སུ་ལམ་གོང་མར་འཕོ་བའི་ནུས་པ་མེད་པའོ། །ལམ་གྱི་དབང་ནི་དབང་བསྐུར་བ་དེ་ཉིད་ཀྱི་དངོས་འབྲས་ལ་ས་ལམ་གྱིས་བསྡུས་པའི་རིམ་པ་གོང་མར་འཕོ་ནུས་པ་སྟེ། གང་དབང་བསྐུར་བླངས་པས་བསྐྱེད་རིམ་བརྟན་པ་མ་ཐོབ་པ་ཐོབ་པར་འགྱུར་བ་དང༌། རིག་པ་འཛིན་པ་མ་ཐོབ་པ་ཐོབ་པར་བྱེད་པ་དང༌། ལས་མ་འགྲུབ་པ་འགྲུབ་པར་བྱེད་པ་དང༌། ཡན་ལག་དྲུག་ལའང་དེ་བཞིན་དུ་སྦྱར་བ་དང༌། ཉེ་རྒྱུ་འོག་མ་དང་འཕགས་པའི་ས་ལ་དབང་བསྐུར་བ་རྣམས་ཡིན་ཞིང༌། འབྲས་བུའི་དབང་ནི་སངས་
རྒྱས་ཀྱི་གོ་འཕང་ཐོབ་ཁར་ལོངས་སྤྱོད་རྫོགས་པའི་སྐུའི་སྐུར་འགྱུར་བའི་དབང་དེའོ། །གཞན་ཡང་དབང་དོན་སྒོམ་པ་ཡང་དབང་ཞེས་བྱ་བའི་སྐབས་ཡོད་དེ། དབང་ནི་དྲི་མེད་རི་བོང་ཅན་མཚུངས་གསུངས་པ་ལྟར་ཡིན་པས་བསྐྱེད་རིམ་བརྟན་པའི་ཡེ་ཤེས་ལ་བྱིས་འཇུག་དང་རྫོགས་རིམ་གྱི་ཡེ་ཤེས་ལ་དབང་གོང་མའི་ཐ་སྙད་མཛད་པའང་ཡོད་མོད་ཀྱི། ཆོ་ག་དང་འབྲེལ་བའི་དབང་ནི་གོང་དུ་བཤད་པ་དེ་རྣམས་སོ། །འོད་ཟེར་འཕྲེང་བ་ལས་ནི་དབང་གི་དབྱེ་བསྡུ་འདི་ལྟར་ཡང་མཛད་དེ། དབང་བདུན་དཀྱིལ་འཁོར་རྡུལ་ཚོན་དང་ལམ་བསྐྱེད་རིམ་སྟོན་པས་གཅིག་ཏུ་བསྡུ། བུམ་དབང་ལུས་དཀྱིལ་ལ་བརྟེན། གསང་དབང་བྷ་ག་ལ་བརྟེན། ཤེར་དབང་ཀུན་རྫོབ་བྱང་སེམས་ལ་བརྟེན་པས་མན་ངག་ཕྲ་ཐིག་ཏུ་གཅིག་ཀྱང་དཀྱིལ་འཁོར་སོ་སོའི་དབང་གིས་གསུམ་དུ་བྱས་ལ། བཞི་པའི་དཀྱིལ་འཁོར་ཕྱག་རྒྱ་ཆེན་པོ་དང་མན་ངག་སྦྱོར་དྲུག་ཡིན། རྡོ་རྗེ་སློབ་དཔོན་གྱི་དབང་ནི་རྒྱུད་ཀྱི་དཀྱིལ་འཁོར་ལ་བརྟེན། མན་ངག་རྡོ་རྗེའི་ཚིག་འབྱེད་པ་དང༌། ལས་ཚོགས་ཡིན་ཏེ། དབང་བཅུ་གཉིས་དཀྱིལ་འཁོར་དྲུག་ལ་བརྟེན་ནས་དྲུག་ཏུ་བསྡུ། ཡང་ན་དབང་བདུན་གོང་བཞིན་གཅིག་ཏུ་བསྡུ། གོང་མ་འཇིག་རྟེན་པ་གསུམ། ཡུལ་རིག་མ་དང་མན་ངག་བདེ་བར་མཐུན་པའི་བདེ་བའི་དབང་དང༌། བཞི་པ་ཕྱག་རྒྱ་ཆེན་པོའི་དངོས་གྲུབ་སྟོན་པས་ཕྱག་ཆེན་གྱི་དབང་དང༌། སློབ་དཔོན་གྱི་དབང་སྔར་བཞིན་ལོགས་པ་སྟེ། དབང་བཅུ་གཉིས་བཞི་རུ་བསྡུ། ཡང་ན་དེ་བཞིན་དུ་དབང་གཞན་རྣམས་སྨིན་བྱེད་ཀྱི་དབང་དང༌།
འཇིག་རྟེན་ལས་འདས་པའི་བཞི་པ་ནི་གྲོལ་བྱེད་ཀྱི་དབང་ངོ༌། །ཞེས་གཉིས་སུ་བསྡུ་བར་བཤད་དེ། གནད་དང་ལྡན་པའི་ལེགས་པར་བཤད་པའོ། །བཞི་པ་ནི། གཅིག་ཏུ་ན་དབང་གི་སྐད་དོད་སེ་ཀ་ལ་ཡི་གེ་ཕྱིས་བསྣན་བསྒྱུར་བ་སྣ་པི་ཞེས་འབྱུང་བ་ནི་འཁྲུད་པ་སྟེ་དྲི་མའི་རྙོག་པ་ཐམས་ཅད་འཁྲུད་ཅིང་ཡེ་ཤེས་སྐྱེད་པར་བྱེད་པའི་དོན་ནོ། །ཡང་ན་དག་པར་བྱེད་པས་དབང་སྟེ། རྡོ་རྗེ་འཕྲེང་བ་ལས། དུག་ནི་སྔགས་ཀྱིས་བཅོམ་པ་བཞིན། །སྔགས་ཀྱིས་དག་བྱས་བཅུད་ལེན་བྱེད། །དེ་བཞིན་སློབ་མ་དབང་སོགས་ཀྱིས། །མ་དག་པར་ནི་དག་པར་བྱེད། །ཅེས་གསུངས། ཡེ་ཤེས་ཐིག་ལེ་ལས། དབང་གིས་དྲི་མ་མེད་པར་བྱེད། །ཆུ་ལ་སོགས་པས་རབ་བཀྲུས་བཞིན། །ཞེས་གསུངས་ཏེ། དཔེར་ན་རྒྱལ་རིགས་དབང་བསྐུར་པ་ལ་བཀྲ་མི་ཤིས་པ་འཁྲུད་པའི་དོན་དུ་ཁྲུས་བྱེད་པ་བཞིན་ནོ། །དེ་ལྟར་འཁྲུད་པ་དང་དག་བྱེད་དོན་གཅིག་གོ །ཡང་གཉིས་སུ་ན་ཡི་གེ་ཕྱིས་བསྣན་གྱི་དབང་གིས་ཨ་དྷི་ཀ་ར་ཞེས་པ་དབང་བར་བྱེད་པས་ན་དབང་སྟེ། རྒྱུད་ཉན་པ་དང་ལམ་སྒོམ་པ་དང་དངོས་གྲུབ་སྒྲུབ་པ་དང་རྒྱུད་སྟོན་པ་ལ་དབང་བར་བྱེད་པའོ། །ཡང་གསུམ་དུ་ན་བཤད་ཀ་རོ་ཏི་རང་དབང་དུ་གྱུར་པས་དབང་སྟེ། དངོས་གྲུབ་དང་འཕྲིན་ལས་ཇི་ལྟར་འདོད་པས་དབང་དུ་གྱུར་པའོ། །ཡང་བཞི་རུ་ན། ཨཱི་ཤྭ་ར་དབང་ཕྱུག་གི་དོན་གྱིས་དབང་སྟེ། རྒྱལ་པོར་དབང་བསྐུར་བས་རྒྱལ་སྲིད་ཀྱི་བདག་པོར་མངའ་བརྙེས་པ་བཞིན། ཐམས་ཅད་ལ་མངའ་བསྒྱུར་བའི་ཕྱིར་ཡོན་ཏན་གྱི་དབང་ཕྱུག་དམ་པ་ཐོབ་པར་བྱེད་པ་སྟེ། ཡེ་ཤེས་ཐིག་ལེར། དབང་བསྐུར་སྦྱིན་
དང་འཁོར་ལོས་བསྒྱུར། །ཐེ་ཚོམ་མེད་པ་ཡིན་པར་འགྱུར། །ཞེས་གསུངས། ཡང་ལྔ་པར་ན་ཨ་བྷི་ཥིཀྟ་ལ་དབྱངས་བསྒྱུར་བས། ཤཀྟི་ཨ་ཝ་ཀྵེ་པ་ནཾ་ཞེས་པ་ནུས་པ་འཇོག་པ་སྟེ། ས་ལམ་དང་འབྲས་བུ་ཐོབ་པའི་ནུས་པ་གསལ་བར་བྱེད་པའོ། ཡང་དྲུག་པར་ན་ཨ་བྷི་ཥིཉྩ་ལ་ཤིཉྩ་ཆུ་གཏོར་ནས་འཁྲུད་པ་ལྟ་བུ་གཏོར་བའི་དོན་དང༌། ནི་ཥིཀྟ་ཞེས་པ་ལུགས་སུ་བླུགས་པ་སྟེ། དྲི་མ་བཀྲུས་ཤིང་ཡེ་ཤེས་ཞུ་ལུགས་སུ་བླུགས་པ་ལྟ་བུའོ། །དགྱེས་རྡོར་ལས། གཏོར་དང་བླུགས་པ་ཞེས་བྱ་འདིས། །དེས་ན་དབང་ཞེས་བརྗོད་པར་བྱ། །ཞེས་སོ། །ཁ་ཅིག་སྣོད་གཙང་མར་ཆུ་བླུགས་པ་ཞེས་ཀྱང་འཆད་དོ་དྲི་མ་བཀྲུས་ནས་བྱིན་གྱིས་བརླབས་ཞེས་པའི་དོན་ཙམ་ཡིན་ལ། ལུགས་སུ་བླུགས་ཞེས་པ་ལྟར་ན། སྔར་ལུས་ངག་ཡིད་གསུམ་རང་བཞིན་རྣམ་དག་ཙམ་དེ། ཕྱིས་དཀྱིལ་འཁོར་གྱི་གཟུགས་སུ་དོད་པའི་མིང་ཡིན་ནོ། །ཡང་བདུན་པར་ན། ཥིཉྩ་ལ་ཡི་གེ་ཕྱིས་བསྣན་གྱི་དབང་གིས་ཙརྻ་སྤྱོད་པ་དང༌། ཤེཀྟ་ལ་ཡི་གེ་ཕྱིས་བསྣན་གྱིས་མུཀྟི་གྲོལ་བ་སྟེ། སྤྱོད་པ་དང་གྲོལ་བའི་འབྲས་བུ་སྟེར་བའི་ཕྱིར་དབང་སྟེ། ཀྱཻ་རྡོར་གྱི་འགྲེལ་པ་ཁ་ཆེ་ཆེན་པོས་བྱས་པ་ལས། སྔགས་ཀྱི་ཚུལ་ལ་སྤྱོད་པ་དང་གྲོལ་བ་གཉིས་སྟེར་བའི་ཕྱིར་དབང་ཞེས་བྱའོ། །ཞེས་སོ། །ཡང་བརྒྱད་པར་ན་སུ་ཁ་ཡུཀྟ་བདེ་བ་དང་ལྡན་པར་བྱེད་པའི་ཕྱིར་དབང་སྟེ། ཕྱག་རྡོར་སྟོད་འགྲེལ་ལས། འདིར་དབང་བསྐུར་བར་བྱེད་པ་ནི་དབང་སྟེ། བདེ་བའི་སེམས་དང་ལྡན་པར་བྱེད་པའི་ཕྱིར་རོ། །ཞེས་
གསུངས་པས་སོ། །ཡང་དགུ་པར་ན་རྣམ་གྲངས་གཞན་ནི། ཡེ་ཤེས་ཐིག་ལེ་ལས། ཨ་ཡི་ཡིག་འབྲུ་དགའ་བ་ཡིན། །བྷི་ཡི་ཡིག་འབྲུ་མཆོག་ཏུ་དགའ། །ཤེ་ཡི་ཡིག་འབྲུ་དགའ་བྲལ་དགའ། །ཀ་ཡི་ཡིག་འབྲུ་ལྷན་སྐྱེས་སོ། །ཞེས་གསུངས་ཏེ། དགའ་བཞིའི་ཡེ་ཤེས་གསལ་བར་བྱེད་པ་དང༌། གཞན་ཡང་ཡི་གེ་བཞིའི་དོན་གྱི་རྣམ་གྲངས་མི་འདྲ་བ་མང་དུ་གསུངས་སོ། །དེ་ལྟར་དབང་བསྐུར་བའི་སྒྲ་དོན་མང་ན་ཡང༌། གཏོར་ཞིང་བཀྲུས་པ་དང༌། བླུགས་པ་དང༌། དབང་བར་བྱེད་པ་རྣམས་སྒྲ་དོན་གྱི་གཙོ་བོ་ཡིན་ནོ། །ལྔ་པ་ནི། གོང་དུ་བཤད་པ་རྣམས་ཀྱི་ཞོར་ལའང་རྟོགས་པར་འགྱུར་མོད་ཀྱི། བྱིས་པ་འཇུག་པའི་དབང་བདུན་བསྐུར་བས་བསྐྱེད་རིམ་གྱི་སྡོམ་པ་ཐོབ་ཅིང༌། བསྐྱེད་རིམ་དང་བཟླས་པ་བྱེད་དུ་རུང་བའི་དགོས་པ་དང༌། ལས་ཚོགས་དང་དངོས་གྲུབ་སོགས་ལ་ཞུགས་ན། ཇི་ལྟར་འདོད་པའི་འབྲས་བུ་འབྱུང་བའི་དགོས་པ་ཡོད་དོ། །དེ་བཞིན་དུ་བུམ་དབང་དང༌། གསང་དབང་དང༌། འཇིག་རྟེན་པའི་ཤེས་རབ་ཡེ་ཤེས་རྣམས་ལ་ཀུན་རྫོབ་ཀྱི་སྡོམ་པ་རེ་རེ་དངོས་སུ་སྐྱེ་རྒྱུ་ཡོད་ཅིང༌། འཇིག་རྟེན་ལས་འདས་པའི་དབང་བཞི་པ་ནི་ལས་དང་པོ་པ་ལ་ཚིག་དབང་གི་ཚུལ་དུ་བསྐུར་ན། ད་ལྟ་དོན་དམ་གྱི་སྡོམ་པ་དངོས་སུ་མི་སྐྱེ་ཡང་དོན་དམ་པའི་ལམ་དེ་ཉན་པ་དང་སྒོམ་དུ་རུང་བའི་སྡོམ་པ་ཀུན་རྫོབ་པས་བསྡུས་པ་ཞིག་སྐྱེའོ། །དེ་སྐྱེས་པས་རྫོགས་རིམ་གྱི་གསང་བ་ཟབ་མོ་རྣམས་ཉན་སྒོམ་ཐམས་ཅད་ལ་དབང་བའི་དགོས་པ་ཡོད་དོ། །གཞན་ལ་སྟོན་པར་མི་དབང་ངམ་ཞེ་ན། སློབ་མའི་དབང་ཙམ་ཐོབ་པས་རྡོ་རྗེ་སློབ་དཔོན་གྱི་ཚུལ་
གྱིས་རྒྱུད་སྟོན་པ་དང༌། དབང་བསྐུར་བ་སོགས་ལ་ནི་མི་དབང་ལ། བླ་མའི་ཚུལ་དུ་མ་ཡིན་པར་གསང་སྒྲོགས་མི་འབྱུང་བའི་ཡུལ་ལ་དོགས་དཔྱོད་ལ་སོགས་པའི་ཚུལ་གྱིས་སྨྲ་མི་རུང་བ་ནི་མ་ཡིན་པས་གཞན་ལ་ཅུང་ཟད་སྟོན་དུ་རུང་བར་འགྲོའོ། །རྡོ་རྗེ་སློབ་དཔོན་གྱི་དབང་ནི་ཡུལ་གང་ཟག་གང་གིས་ཐོབ་ན། འགྲོ་བའི་དོན་སྤྱོད་པ་ལ་མཐུ་དང་ལྡན་པ་སྟེ། རང་དོན་དུ་ཡང་དངོས་གྲུབ་ཀྱི་འབྲས་བུ་ལ་མྱུར་དུ་འཇུག་པའི་དགོས་པ་ཡོད་དོ། །འདིར་རྡོ་རྗེ་སློབ་མའི་དབང་གོང་མ་བཞི་ལས། བུམ་དབང་ཐོག་མར་དགེ་བའི་སྨིན་བྱེད་དང༌། གསང་དབང་བར་དུ་དགེ་བའི་སྨིན་བྱེད་སོགས་དང་སྦྱོར་ན། བུམ་དབང་ཙམ་ཐོབ་པས་སོར་བསམ་དང༌། དེ་དང་གསང་དབང་ཙམ་ཐོབ་པས་སྲོག་འཛིན་ཙམ་སྒོམ་དུ་རུང་ངམ་ཞེ་ན། དེ་དག་བརྒྱུད་མ་ནས་སྨིན་པར་བྱེད་པ་ཡིན་གྱི། དངོས་ཀྱི་སྨིན་བྱེད་མ་ཡིན་པས་མི་རུང་ངོ༌། །འོ་ན་འཇིག་རྟེན་པའི་དབང་གསུམ་ལ་ལམ་ལྷག་པོ་བསྒོམ་རྒྱུ་མེད་པར་འགྱུར་རོ་སྙམ་ན། མདོ་གཞུང་ཅི་རིགས་པ་དང༌། སྔགས་རྒྱུད་གཞན་ཐན་ཐུན་རྣ་བར་ཐོས་པའི་ལྟག་ཤེད་ཀྱིས། དཔལ་དུས་ཀྱི་འཁོར་ལོ་ལ་རང་སྟོབས་ཀྱིས་འཇུག་པ་དག་ལ་འདི་ལྟ་བུའི་དོགས་པ་སྐྱེ་བ་བདེན་ནོ། །འོན་ཀྱང་དེར་མི་འགྲོ་སྟེ་བུམ་དབང་ཐོབ་པས་རྩ་གསུམ་མམ་འཁོར་ལོ་བཞི་ལ་སོགས་པའི་དམིགས་པ་དང༌། ཡིག་འབྲུ་ཐིག་ལེའི་གཟུགས་ལ་སོགས་པའི་རྣལ་འབྱོར་སྒོམ་པ་དང༌། གསང་དབང་ཐོབ་པས་བུམ་པ་ཅན་སོགས་རླུང་གི་རྣལ་འབྱོར་རྣམས་དང༌། འཁོར་ལོ་དྲུག་གི་གཏུམ་མོ་འབར་འཛག་སོགས་སྒོམ་པ་དང༌། འཇིག་རྟེན་
པའི་ཤེས་རབ་ཡེ་ཤེས་གསུམ་པ་བཞི་པ་གཉིས་ཀྱིས་ལས་དང་ཡེ་ཤེས་ཀྱི་ཕྱག་རྒྱའི་རྣལ་འབྱོར་ལ་བརྟེན་པའི་བདེ་བ་སྒོམ་ཚུལ་བཙན་ཐབས་ན་དེའི་སྦྱོར་བ་དུ་མ་དང་བཅས་པ་རྣམས་སྒོམ་པ་ལ་དབང་བ་ཡིན་ནོ། །དེ་རྣམས་ནི་དཔལ་དུས་ཀྱི་འཁོར་ལོའི་ལུགས་ལ་བསྐྱེད་རིམ་ཕྲ་ཐིག་ཏུ་གཏོགས་པའི་རྣལ་འབྱོར་ཡིན་གྱི། རྫོགས་རིམ་གྱི་རྟོགས་རིགས་མ་ཡིན་ནོ། །དེ་དག་ལ་ཟབ་མོ་བསྐྱེད་རིམ་ཞེས་པ་དང༌། མི་ཟབ་པའི་རྫོགས་རིམ་ཞེས་ཟེར་ཡང་བསྐྱེད་རིམ་མཚན་ཉིད་པ་དང་རྫོགས་རིམ་བཏགས་པ་ པའོ། །གང་གི་ཚེ་འཇིག་རྟེན་ལས་འདས་པའི་དབང་བཞི་པ་ཚིག་དབང་དུ་ཐོབ་པས་ནི་རྫོགས་རིམ་དངོས་རྣམས་སྒོམ་པ་ལ་དབང་བ་ཡིན་ཏེ། དེ་ལ་སོར་བསམ་དུ་ཡང་རྣམ་ཀུན་མཆོག་ལྡན་གྱི་སྟོང་གཟུགས་སྒོམ་པ་ཉིད་དང༌། སྲོག་རྩོལ་དུ་རླུང་གི་དྭངས་མ་སྟོང་གཟུགས་སུ་སྒྲུབ་པ་ཉིད་དང༌། འཛིན་པར་ཐིག་ལེའི་དྭངས་མ་ཡང་དེ་དང་གཅིག་ཏུ་བྱེད་པ་དང༌། རྗེས་དྲན་དུ་རྣམ་ཀུན་མཆོག་ལྡན་དངོས་དང་ཏིང་ངེ་འཛིན་དུ་གཟུགས་དང་བདེ་བར་དབྱེར་མེད་པ་མི་འགྱུར་བའི་བདེ་བ་འགྲུབ་ཅིང༌། ཡན་ལག་དྲུག་ཀར་དུ་ཡེ་ཤེས་ཀྱི་རྩ་དབུ་མ་ཞེས་བྱ་བ་སྒྲུབ་པ་པོ་རང་གི་ལུས་སེམས་གཉིས་དང་དབྱེར་མི་ཕྱེད་པའི་ཚུལ་གྱིས་གནས་པ་སྟོང་གཟུགས་ལས་གྲུབ་པའི་རྩ་ཞིག་གདོད་ནས་གནས་པ་དེ་ལ་རྣམ་པར་མི་རྟོག་པའི་ཚུལ་གྱིས་གནད་དུ་བསྣུན་པ་དགོས་ཏེ། རྫོགས་རིམ་མཚན་ཉིད་པ་ནི་དེ་དག་ཡིན་ལ། རགས་པའི་རྩ་རླུང་ཐིག་ལེ་རྩ་བ་ནས་འཆིང་བ་ལ་ནི་དྭངས་མ་ཆོས་ཉིད་ལ་བསྲེ་ཚུལ་མེད་ན་མི་འབྱུང་བས་རྫོགས་རིམ་དངོས་དགོས་ཀྱང༌། ཅུང་
ཟད་འཆིང་བ་ལ་ནི་དེར་མ་ངེས་ཏེ། དེས་ན་བསྐྱེད་རིམ་པ་ལ་ཡང་རགས་པའི་དབུ་མར་རགས་པའི་རླུང་ཐིམ་པ་དང༌། དེར་རགས་པའི་ཐིག་ལེ་འཆིང་བ་ཡོད་ དོ། །འཕགས་ཡུལ་གྱི་སློབ་དཔོན་མང་པོ་ཞིག་རྫོགས་རིམ་དུ་འདོད་པ་རྣམས་ལུགས་འདིར་བསྐྱེད་རིམ་དུ་འཆད་པ་འདི་ཡང་མཁས་པར་གྲགས་པ་མང་པོས་མ་གོ་འདུག་ལ། ཡན་ལག་དྲུག་པའི་ཁྲིད་ཚུལ་ལ། ལས་དང་པོ་པས་ཡན་ལག་དྲུག་རྗེས་མཐུན་པ་བསྒོམ་དགོས་པའི་ཕྱིར། བསྐྱེད་རིམ་ནས་བླངས་ཏེ་བསྐྱེད་རྫོགས་འདྲེས་མའི་ཚུལ་དུ་བསྒོམ་དགོས་པའི་གནད་ཀྱང་ཤེས་པར་བྱའོ། །དེས་ན་དབང་བདུན་གྱི་ལམ་ནི། གཙོ་བོར་མི་ཟབ་པའི་བསྐྱེད་རིམ་ཡིན་ཞིང༌། དེ་ཉིད་ཀུན་ལ་གྲགས་པའི་བསྐྱེད་རིམ་ཡིན་པས་རགས་བཤད་ཀྱི་སྐབས་སུ་དེ་ཁོ་ན་ལ་བསྐྱེད་རིམ་ཟེར་བ་དང༌། འཇིག་རྟེན་པའི་དབང་གོང་མ་གསུམ་གྱི་ལམ་ནི་ངེས་པར་ན། ཟབ་མོ་བསྐྱེད་རིམ་ཡིན་ཡང༌། དེ་ཉིད་རྫོགས་རིམ་ཡིན་པར་ཕལ་ལ་གྲགས་པ་དང༌། དབང་དེ་ཡང་རྫོགས་རིམ་ཡན་ལག་དྲུག་དངོས་ཀྱི་དབང་མིན་ཡང་དེ་ལ་ཤིན་ཏུ་ཉེ་བའི་དབང་ཡིན་པའི་ཕྱིར། རྫོགས་རིམ་གྱི་དབང་གི་ཐ་སྙད་འཇོག་གོ །དེས་ན་ཞིམ་མོར་དཔྱད་ན་དབང་འདི་རྣམས་ནི་འདོད་གཟུགས་ཀྱི་རིག་འཛིན་སྒྲུབ་པ་ལ་ཡང་ངེས་པར་དགོས་ལ། འཇིག་རྟེན་འདས་པའི་བཞི་པ་ཚིག་དབང་མ་བསྐུར་ན། འདི་རྣམས་ཐོབ་ཀྱང་ཡན་ལག་དྲུག་པའི་རྣལ་འབྱོར་དངོས་ཀྱི་མན་ངག་ཉན་པ་དང་སྒོམ་དུ་མི་རུང་ཞིང༌། རྒྱུད་ཀྱི་ནང་ནས་ཡན་ལག་དྲུག་པོ་ཤིན་ཏུ་གསལ་པར་སྟོན་པའི་ངོ་སྤྲོད་རྣམས་
ཀྱང་ཉན་པ་ལ་མི་དབང་མོད། བསྐྱེད་རིམ་སོགས་དང་རྫོགས་རིམ་སྤྱོད་པའི་གནས་སྐབས་དང༌། རྫོགས་རིམ་ལ་དད་པ་བསྐྱེད་པའི་ཕྱིར་ཆེ་བ་དབྱུང་དགོས་པས། ངོ་བོ་བྱེད་ལས་ཕན་ཡོན་རགས་པ་རྣམས་ཉན་དུ་ནི་རུང་ཡང༌། དུས་ཀྱི་འཁོར་ལོའི་རྒྱུད་རྫོགས་པར་ཉན་པ་ལ་དབང་བ་ནི་མིན་མོད། བདེ་གསང་སོགས་ལ་ནི་ཚོགས་བཤད་ཀྱི་སྒོ་ནས་རྒྱུད་འགོ་གཞུག་ཚང་བར་ཉན་དུ་རུང་བ་ནི་ཡོད་དེ། དེ་ལ་ནི་བྱིས་པ་འཇུག་པའི་དབང་བདུན་གྱིས་ཀྱང་ཆོག་པར་མངོན་ཞིང༌། གསང་འདུས་སོགས་ཀྱི་སློབ་བཤད་རགས་པ་ལ་ཡང་འདིའི་དབང་གོང་མ་འཇིག་རྟེན་པ་རྣམས་ཐོབ་ན་ཉན་པ་ལ་དབང་བར་སེམས་ཏེ། དེའི་རྫོགས་རིམ་གྱི་མན་ངག་ཕལ་ཆེར་ཟབ་མོ་བསྐྱེད་རིམ་ཡིན་པས་སོ། །དེའི་ཕྱིར་མང་པོ་ཞིག་དུས་ཀྱི་འཁོར་ལོའི་སློབ་མའི་དབང་ལ་འཇིག་རྟེན་ལས་འདས་པའི་བཞི་པ་མི་བསྐུར་ཞིང༌། དེའི་རྒྱུད་རྫོགས་པར་ཉན་པ་ལ་དབང༌། སྦྱོར་དྲུག་སྒོམ་པ་ལ་དབང་ཞེས་སོགས་ནི། གཞན་ལག་ལེན་མ་ནོར་བར་སྤྱོད་པའི་སྐྱེས་བུ་དམ་པས་འགྲོ་བ་མང་པོ་སྨིན་གྲོལ་མཛད་པ་ལ་གསང་སྒྲོགས་ཀྱི་སྐྱོན་འཚོལ་འཚོལ་ནས། རང་ལ་གསང་སྒྲོགས་ཆེས་ཆེ་བའི་སྐྱོན་ཆགས་པ་མ་གོ་བར་ཟད་དོ། །འཇིག་རྟེན་འདས་པའི་དབང་མ་ཐོབ་པ་ལ་སྟོང་གཟུགས་ཕྱག་རྒྱ་ཆེན་པོ་འཇིག་རྟེན་ལས་འདས་པའི་ལམ་སྟོན་དུ་རུང་ན། བསྐྱེད་རིམ་གྱི་དབང་མ་ཐོབ་པ་ལ་བསྐྱེད་རིམ་སྟོན་དུ་ཅིའི་ཕྱིར་མི་རུང་སྟེ། དེ་ལ་སོགས་པ་ཧ་ཅང་ཐལ་བར་འགྱུར་རོ། །དེ་ལྟར་ན་རྒྱུའི་དབང་བསྐུར་བའི་དགོས་པ་ལམ་ཐམས་ཅད་ཀྱི་རྟེན་དང་གཞིའི་དོན་དུ་འགྱུར་བ་ཡིན་ལ། ལམ་དང་འབྲས་བུའི་དབང་རྣམས་ལ་དེ་དང་དེའི་དངོས་གྲུབ་
དང་ས་ལམ་རྣམས་ཐོབ་པར་འགྱུར་བ་དགོས་པ་ཡིན་ནོ། །རྩ་བའི་དྲུག་པ་ཇི་ལྟར་དབང་བསྐུར་བའི་ཆོ་གའི་རིམ་པ་ལ། གང་དུ་དབང་བསྐུར་བའི་གནས། གང་གི་ཚེ་དབང་བསྐུར་བའི་དུས། གང་གིས་དབང་བསྐུར་བའི་ཆོ་ག་དངོས་བཤད་པའོ། །དང་པོ་ནི། གྲོང་ཁྱེར་དང་འབྲེལ་པ་དང༌། མ་འབྲེལ་པ་གཉིས་སོ། །ཇི་སྐད་དུ། རྒྱུད་ལས། དབང་ལྡན་དང་ནི་བྱང་གི་ས་གཞི་དག་ལ་ཞི་བ་དང་ནི་རྒྱས་པ་དག་ཏུ་འགྱུར་བ་སྟེ། མེ་ཡི་མཚམས་དང་ཤར་གྱི་ཆར་ནི་རབ་ཏུ་གསལ་ཞིང་ངེས་པར་བསད་པ་དག་དང་བསྐྲད་པའོ། །བདེན་བྲལ་དང་ནི་ལྷོ་ཕྱོགས་སུ་ཡང་གསལ་བར་རྟག་ཏུ་དབང་དུ་བྱ་དང་དགུག་པ་དག་ཀྱང་ངོ༌། །མཆོག་གི་མི་བདག་རླུང་གི་མཚམས་དང་ནུབ་ཕྱོགས་སུ་ཡང་ངེས་པར་རེངས་པ་དང་ནི་རྨོངས་པའོ། །ཞེས་གསུངས་ཏེ། གྲོང་ཁྱེར་གྱི་དབུས་སུ་ལས་ཐམས་ཅད་པ་གཉིས་ཀྱི་དོན་དང༌། གྲོང་གི་ཕྱི་རོལ་བྱང་དུ་རྒྱས་པ། བྱང་ཤར་དུ་ཞི་བ། ཤར་དུ་དབྱེ་བ། མེར་བསད་པ། ལྷོར་དགུག་པ། བདེན་བྲལ་དུ་དབང༌། ནུབ་ཏུ་རེངས་པ། རླུང་དུ་རྨོངས་པ་རྣམས་ཀྱི་དོན་དུ་དཀྱིལ་འཁོར་བཞེངས་པ་དང༌། ཡང་གྲོང་ཁྱེར་གྱི་ཕྱི་རོལ་ཕྱོགས་མཚམས་བརྒྱད་ཀར་དུ་དུར་ཁྲོད་ཡོད་ན། ཕྱི་རོལ་གྱི་བྱང་དང་བྱང་ཤར་དུ་ཞི་རྒྱས་མི་འགྲུབ་པས་གྲོང་ཁྱེར་གྱི་ནང་ཕོ་བྲང་གི་ཕྱི་རོལ་བྱང་དང་བྱང་ཤར་དུ་ཞི་རྒྱས་སྒྲུབ་པར་གསུངས་སོ། །དེ་དག་ནི་གྲོང་ཁྱེར་དང་འབྲེལ་བའི་དབང་དུ་བྱས་ལ། ཡང་སྒྲུབ་ལེ་ལས། སྐྱེད་མོས་ཚལ་ལམ་རི་བོ་དང་ནི་རྒྱལ་བ་མཆོག་གི་གནས་དང་ལྷ་ཡི་གནས་ནི་སྟོང་པ་དང༌། །གྲུབ་པའི་གནས་དང་དུར་ཁྲོད་དང་ནི་མཚོ་དང་བཟང་པོའི་གནས་དང་དེ་བཞིན་ཉིད་དུ་སྦས་པའི་ས། །ཞེས་
གསུངས་ཏེ། སྐྱེད་མོས་ཚལ་དུ་དབང་དགུག་དང༌། རི་བོར་རྨོངས་རེངས་གདབ་གསུམ་དང༌། རྒྱལ་བ་མཆོག་གི་གནས་ཏེ་མཆོད་རྟེན་ཆེན་པོར་དངོས་གྲུབ་བརྒྱད་དང༌། རྒྱ་མཚོའི་འགྲམ་དང༌། ལྷ་ཁང་སྟོང་པར་བསྐྲད་དབྱེ་དང༌། གྲུབ་པའི་གནས་སུ་ལས་ཀྱི་ཕྱག་རྒྱའི་དངོས་གྲུབ་དང༌། དུར་ཁྲོད་དུ་བསད་པ་དང༌། མཚོ་ཕྲན་གྱི་འགྲམ་དང༌། ཚོང་ཁང་སོགས་བཟང་པོའི་གནས་སུ་ཞི་རྒྱས་དང༌། སྦས་པའི་ས་སྟེ་ཕུག་པར་འཇིག་རྟེན་གསུམ་གྱི་རྒྱལ་སྲིད་སྒྲུབ་བོ། །ཞེས་གསུངས་པ། གྲོང་ཁྱེར་ལ་མ་བལྟོས་པའི་གནས་ཀྱི་དབང་དུ་མཛད་པ་སྟེ། འདི་སྒྲུབ་པའི་སྐབས་སུ་གསུངས་པ་ཡིན་ཡང༌། དེ་ལ་ཡང་དཀྱིལ་འཁོར་བཞེང་དགོས་པའི་གནས་སྐབས་མང་བའི་ཕྱིར་དང༌། དགོས་དོན་མཚུངས་པའི་ཕྱིར་དཀྱིལ་འཁོར་འབྲི་བའི་གནས་ཡིན་ནོ། །དེ་ལ་ལས་སོ་སོའི་དོན་དུ་དཀྱིལ་འཁོར་འབྲི་བ་ནི། སྒྲུབ་པ་པོའི་ལས་སྦྱོར་སོ་སོ་སྒྲུབ་པའི་དོན་དུ་བྱེད་པ་ཉིད་གཙོ་ཆེ་བ་ཡིན་མོད། སློབ་མ་ལ་དབང་བསྐུར་བ་ན་ཡང་སློབ་མ་དེས་ཐོག་མར་ལས་དེ་དང་དེ་ཁོ་ན་ཐོག་མར་འགྲུབ་དགོས་པ་ཞིག་ཡོད་ན། དེ་དང་མཐུན་པར་དཀྱིལ་འཁོར་འབྲི་བ་ཡིན་པས་བསད་བསྐྲད་ལ་སོགས་པའི་གནས་ཀྱང་དབང་བསྐུར་དང་མ་འབྲེལ་བ་མ་ཡིན་ལ། དེ་འདྲའི་དམིགས་གསལ་མེད་པ་ལ་ནི། སློབ་མ་དབང་བསྐུར་གྱི་དཀྱིལ་འཁོར་དེ་ལས་ཐམས་ཅད་པའམ། ཞི་རྐྱང་རྒྱས་རྐྱང་གང་རུང་རེ་དང་མཐུན་པར་བྱེད་དགོས་པ་ཡིན་ཞིང༌། དེ་དག་ལས་ཀྱང་ཞི་རྐྱང་དང་མཐུན་པར་སྒྲུབ་པ་ཉིད་གཙོ་ཆེ་སྟེ། འདི་ཞི་སྐྱང་གི་ལས་མིན་ཡང་ཆོ་གའི་སྤྱོད་ཚུལ་ཕལ་ཆེར་དེ་དང་མཐུན་པ་
ནི། སློབ་མའི་རྒྱུད་ཀྱི་དྲི་མ་སྦྱང་བའི་ཕྱིར་ཡིན་ལ། དེ་བཞིན་དུ་བསོད་ནམས་སོགས་རྒྱས་པ་དང༌། ལས་དང་དངོས་གྲུབ་ཐམས་ཅད་ཀྱི་སྤྱི་ལ་གནས་པའི་ཕྱིར། རྒྱས་པའམ་ལས་ཐམས་ཅད་པ་དང་མཚུངས་པར་ཡང་བྱེད་དེ། གཞན་དབང་སོགས་གསུམ་དང་བསྐྲད་པ་ལ་སོགས་པ་དྲུག་དང་མཐུན་པ་ནི། ལས་དེ་དང་དེ་ཐོག་མར་སྒྲུབ་འདོད་པ་མ་ཡིན་པ་ལ་མི་བྱའོ། །གཉིས་པ་གང་གི་ཚེ་འབྲི་བའི་དུས་ནི། རྒྱུད་ལས། ནག་པའི་མཐར་ནི་དཀར་པོའི་ཚིགས་ལ་གཞན་ལ་ཕན་པའི་བླ་མའི་དཀྱིལ་འཁོར་དག་ནི་བཞེངས་བྱས་ནས། །སྡིག་པའི་དྲི་མ་འཕྲོག་པའི་དབང་བདུན་རྣམས་ནི་བསོད་ནམས་དོན་དུ་བུ་རྣམས་དག་ལ་སྦྱིན་པར་བྱ། །ཡང་ན་མཐའ་དག་ཡོན་ཏན་གཏེར་ནི་བསྟན་པའི་སླད་དུ་རྣལ་འབྱོར་མ་རྣམས་དག་ལ་མཆོད་པར་བྱ། །མཆོད་པ་མེད་ན་ལོ་གཅིག་ཏུ་ནི་རྒྱུད་ཀྱི་རྒྱལ་པོ་དག་ནི་བླ་མས་བསྟན་པར་མི་བྱའོ། །ཞེས་དང༌། རྫོགས་པ་དག་ལས་ནི་སྦྱང་དང་བཟུང་བ་དག་ཀྱང་དེ་བཞིན་བུ་རྣམས་དག་ནི་ཡང་དག་བསྡུ། །བཅུ་གཉིས་པ་ལ་ཐིག་གདབ་འདོད་པ་མ་ནུས་ཉིན་ཞག་དག་ལ་དཔལ་ལྡན་རྡུལ་ཚོན་དབྱེ་བ་ཉིད། །དབང་ལ་སོགས་པ་ཉ་ལ་མཆོག་གི་བླ་མས་སྦྱིན་ཏེ་བདུད་ནི་བཅོམ་པའི་ཉིན་ཞག་དག་ལ་ཡང༌། །དེ་ཡི་མཚན་མོ་རྒྱལ་བའི་རིགས་ལ་རབ་ཏུ་གནས་པར་འགྱུར་ཏེ་མཚན་མོ་གཞན་ལ་རབ་གནས་མིན། །དག་པའི་དུས་སྦྱོར་གཟའ་ལ་སོགས་པས་མི་ཡི་བདག་པོ་མཚན་མོ་གཞན་ལ་རབ་ཏུ་གནས་པར་འགྱུར། །སྲོག་དང་པ་སངས་ནུབ་པར་གྱུར་ན་དེ་ནི་ངེས་པར་བག་མའམ་རབ་ཏུ་གནས་པར་མི་འགྱུར་རོ། །
ཞེས་གསུངས་ཏེ། དེ་ཡང་སྤྱིར་དཀྱིལ་འཁོར་བཞེངས་པ་དང་དབང་བསྐུར་བའི་དུས་ནི་དེ་བཞིན་གཤེགས་པ་ས་ཀའི་ཟླ་བའི་ཉ་ལ་མངོན་པར་རྫོགས་པར་སངས་རྒྱས་ནས། དེ་ནས་བརྩམས་པའི་ཟླ་བ་བཅུ་གཉིས་པ་ནག་པའི་ཉ་ལ། དཔལ་ལྡན་འབྲས་སྤུངས་སུ་ཆོས་དབྱིངས་གསུང་གི་དབང་ཕྱུག་ཆ་བཅུ་དྲུག་པའི་དཀྱིལ་འཁོར་དང༌། སྟེང་དུ་རྒྱུ་སྐར་གྱི་དཀྱིལ་འཁོར་ཆ་བཅུ་དྲུག་པ་སྤྲུལ་ཏེ། དུས་ཀྱི་འཁོར་ལོའི་རྒྱུད་བསྟན་པའི་དུས་སྐབས་ཡིན་པའི་ཕྱིར། ནག་པའི་ཟླ་བའི་དཀར་ཕྱོགས་ཡར་ངོའི་ཐ་མར་རྡུལ་ཚོན་གྱི་དཀྱིལ་འཁོར་དུ་བྱིས་པ་འཇུག་པའི་དབང་བདུན་བསྐུར་བར་བྱ་ལ། དུས་དེ་ཉིད་དམ་ལོ་གཞན་ལ་ཡང་རུང་སྟེ། དབང་གོང་མ་རྣམས་ཀྱང་ནག་པའི་ཉ་ལ་བསྐུར་བ་བསྔགས་ཤིང་སྐབས་འདིར་ཡེ་ཤེས་ཀྱི་ཚོགས་ཀྱི་དོན་དུ་དབང་གོང་མ་གསུམ་སྦྱིན་པ་ནི། རང་གི་ཤ་ལ་སོགས་པ་དང༌། ཤིན་ཏུ་འདོད་པ་སྦྱིན་པ་ལ་སོགས་པའི་དོན་དང་ཞེས་སོགས་གསུངས་ནས། དེ་དག་ཀྱང་བཞི་པ་དང་བཅས་པ་སྟེ། བཞི་པ་ནི་མན་ངག་གིས་བརྗོད་པར་བྱའོ། །ཞེས་གསུངས་པས། འཇིག་རྟེན་པའི་བཞི་པ་ནི་རིག་མ་ལ་བརྟེན་ནས་དབང་བསྐུར་བའི་ཕྱིར་བཞི་པ་ཡང་དག་པ་མ་ཡིན་པ་དང༌། གསོལ་བཏབ་དང་ང་རྒྱལ་བཟུང་བའི་སྔགས་སོགས་མ་བཤད་པས་ན། དབང་རྐང་ཐུབ་མ་ཡིན་པའི་ཕྱིར་དབང་བཞིའི་ཡ་གྱལ་གྱི་བཞི་པར་བགྲོད་དུ་མི་རུང་ལ། འདིར་ནི་བླ་མའི་མན་ངག་ཅེས་ཚིག་དབང་ཡིན་པའི་ཕྱིར་དང༌། གསོལ་བཏབ་དང་ང་རྒྱལ་བཟུང་བ་སོགས་ཆོ་ག་རྐང་ཐུབ་འདས་པའི་བཞི་པ་འདི་ལ་ཡོད་པའི་
ཕྱིར། འདིའི་བཞི་པ་ནི་འཇིག་རྟེན་ལས་འདས་པའི་བཞི་པ་ཁོ་ན་ཡིན་ལ། དེ་ཡང་དངོས་བསྟན་ཉིད་ཞག་དེ་ཉིད་ལ་བྱེད་པར་གསུངས་པས། སློབ་མའི་དབང་ལ་འཇིག་རྟེན་ལས་འདས་པའི་བཞི་པ་དགོས་པ་ནི་འདིས་ཀྱང་ཤིན་ཏུ་གསལ་བར་བསྟན་ཞིང༌། ཉ་དེ་ཉིད་ལ་འདས་པའི་བཞི་པ་བསྐུར་པར་གྲུབ་ལ། གལ་ཏེ་འཇིག་རྟེན་ལས་འདས་པའི་བཞི་པ་སློབ་དཔོན་ཁོ་ནའི་ཡིན་ན། ནག་པའི་ཉ་དེ་ཉིད་ལ་བྱིས་འཇུག་གི་དབང་བསྐུར་དེ་ཉིད་དུ་སློབ་མ་དེས་བསྙེན་པ་ཡང་སོང་བ་དང༌། དཔོན་སློབ་གཉིས་ཀྱིས་རྒྱུད་ཡོངས་སུ་རྫོགས་པར་ཉན་བཤད་ཟིན་པ་དང༌། དེ་ནས་རྡོ་རྗེ་སློབ་དཔོན་གྱི་དབང་བསྐུར་བ་རྣམས་ཉིན་ཞག་གཅིག་གི་ནང་དུ་གྲུབ་པ་ཞིག་དགོས་པར་འགྱུར་ལ། དཔོན་སློབ་ཐམས་ཅད་ཆེས་རྫུ་འཕྲུལ་དང་ལྡན་པ་ཡིན་ན་མ་གཏོགས། དེ་འདྲ་གྲུབ་པ་མི་སྲིད་པའི་ཕྱིར་དེ་ནི་གཞིའི་རྒྱུ་ཁོ་ནའོ། །དེ་ལྟ་བུའི་དཀྱིལ་འཁོར་བཞེངས་ཟིན་པའམ། ཡང་ན་སྔོན་རོལ་དུ་ཚེས་བརྒྱད་སོགས་ལ་རྣལ་འབྱོར་མ་སུམ་ཅུ་རྩ་བདུན་ནམ། རིགས་བརྒྱའི་མཆོད་པ། ཚོགས་ཀྱི་འཁོར་ལོ་ཡོན་འབུལ་བ་དང་བཅས་པ་སློབ་མས་བསྒྲུབ་པར་བྱ་སྟེ། གལ་ཏེ་སློབ་མ་ཡོ་བྱད་དང་ལྡན་ཡང་དེ་མ་གྲུབ་ན། ལོ་གཅིག་ཏུ་དབང་མི་བསྐུར་ཞིང་རྒྱུད་བསྟན་པར་མི་བྱ་ལ། ཕྱི་ནས་མཆོད་པ་དེ་ཡང་གྲུབ་པར་བྱས་ནས་དབང་བསྐུར་རོ། །ཡོ་བྱད་མེད་ཅིང་ཡོན་ཏན་དང་ལྡན་པའི་སློབ་མ་ལ་ནི་དེ་ལྟ་བུ་མི་དགོས་ཏེ། ཇི་ལྟར་སྐབས་སུ་བབ་པ་དེར་སྦྱིན་ནོ། །ནག་པའི་ཉ་ལ་ཇི་ལྟར་བྱ་བ་ཡང་སྤྱིར་བཏང་དུ་ནག་པའི་དཀར་ཕྱོགས་
ཀྱི་རྫོགས་པ་གཉིས་པ་སྟེ། ཡར་ངོའི་ཚེས་བཅུ་ལ་ས་སྦྱངས་བཟུང་དང༌། སློབ་མ་ཡང་དག་པར་བསྡུ་བ་སྟེ། སློབ་མ་རྗེས་བཟུང་བྱ་ལ། བཅུ་གཅིག་གི་ཉིན་པར་རྫས་ལྔ་དང་སློབ་མ་ལྷག་གནས་རྣམས་བྱེད་ཅིང༌། གསོལ་བ་གདབ་པ་ཡང་ལྷག་གནས་ཀྱི་དབང་དུ་བྱས་ན་དེའི་ཉིན་པར་བྱ་ལ། བཅུ་གཉིས་པ་ལ་ཐིག་གདབ་པ་དང༌། འདོད་པ་སྟེ་བཅུ་གསུམ་དང་མ་ནུ་སྟེ་བཅུ་བཞིའི་ཚེས་ལ་རྡུལ་ཚོན་འགྱེད་ཅིང༌། ཉའི་ནུབ་མོ་དབང་བསྐུར་བར་བྱ་སྟེ། མཆོག་གི་དོན་དུ་དེ་ལྟར་ཡིན་ལ། ལས་སོ་སོ་དང་རྗེས་སུ་འབྲེལ་པ་ལ་ནི། དཀར་པོའི་རྫོགས་པ་གསུམ་ལ་དགེ་བའི་ལས་དང༌། ནག་པོའི་རྫོགས་པ་གསུམ་ལ་དྲག་པོའི་ལས་ཀྱི་དབང་དུ་བྱས་པའི་དཀྱིལ་འཁོར་གྱི་ས་ལྷག་པར་གནས་པ་བྱ་སྟེ། གཞན་རྣམས་སྔ་མས་རིགས་འགྲེའོ། །ཁ་ཅིག་དཀྱིལ་འཁོར་ཁང་པ་བྱེད་ན་དེ་ལ་མི་གྲུབ་པས་རྫོགས་པ་དང་པོ་ཚེས་ལྔ་ཡིན་ནོ་ཟེར་ཡང༌། དེ་འདྲ་ལ་ནི་བར་དུ་ཟླ་བ་ཙམ་གྱིས་ཆོད་པ་སོགས་ཡོང་བས་མ་ངེས་སོ། །ཡང་ན་བདུད་བཅོམ་པའི་ཉིན་ཞག་སྟེ་ས་གའི་ཉ་ལ་དབང་བསྐུར་བ་སོགས་བྱེད་དགོས་པས། དེའི་དཀར་ཕྱོགས་ཀྱི་བཅུ་པ་ལ་ས་ལྷག་གནས་དང་སློབ་མ་རྗེས་སུ་བཟུང་བར་བྱའོ། །གལ་ཏེ་དེ་དག་ལ་མ་གྲུབ་ན། ཉ་བཅུ་གཉིས་དང༌། གཞན་ཡང་གཟའ་སྐར་དུས་སྦྱོར་བཟང་པོ་རྣམས་ལ་བྱར་རུང་ངོ༌། །ཕུར་བུ་དང་པ་སངས་ཉི་མའི་དཀྱིལ་འཁོར་ལ་ཞུགས་པ་ན་དབང་དང་རབ་གནས་མི་བྱ་ལ། རྒྱལ་དང་ནག་པའི་ཉ་ལ་ཕུར་བུའི་ཞིང༌། གཞུ་དང་ཉའི་ཁྱིམ་དུ་ཉི་མ་ཞུགས་པ་ལ་
དབང་བསྐུར་བ་དང༌། རབ་ཏུ་གནས་པ་བཟང་བ་ཡིན་པར་གསུངས་སོ། །དེ་ལ་མཆོག་སྒྲུབ་པའམ་མཆོག་གི་དོན་ཞེས་བྱ་བ་ནི། མཆོག་དང་ཐུན་མོང་གི་ཟླས་ཕྱེ་བའི་མཆོག །ཕྱག་རྒྱ་ཆེན་པོའི་དངོས་གྲུབ་ཁོ་ན་ལ་བཟུང་ན་འཁྲུལ་གཞི་འགའ་རེ་ལྡང་བས་གནས་སྐབས་འདི་འདྲའི་རིགས་ཀྱི་མཆོག་ནི་མཆོག་དང་ཕྲ་མོ་གཉིས་ཀྱིས་ཟླས་ཕྱེ་བའི་མཆོག་སྟེ། དེ་ནི་གྲུབ་པ་བརྒྱད་ཡན་ཆད་ཀྱི་དངོས་གྲུབ་ཐམས་ཅད་ཀྱི་མིང་ཡིན་ལ། ཞི་སོགས་ཀྱི་ལས་རྣམས་ནི་ཕྲ་མོའོ། །གསུམ་པ་གང་གིས་དབང་བསྐུར་བའི་ཆོ་ག་དངོས་བཤད་པ་ལ། སློབ་མས་གསོལ་པ་བཏབ་ཅིང་སྲུང་བ། ས་བཟུང་ཞིང་ལྷག་པར་གནས་པ། སྟ་གོན་ལྷག་གནས་ཀྱི་རིམ་པ། ཐིག་ཚོན་གྱི་བྱ་བས་དཀྱིལ་འཁོར་བཞེང་བ། དངོས་གཞི་དང་པོ་དཀྱིལ་འཁོར་སྒྲུབ་པ། མཆོད་གཏོར་གྱི་རིམ་པས་མཉེས་པར་བྱེད་པ། རང་གཞན་དབང་བསྐུར་བའི་རིམ་པ། ཆོ་གའི་དག་དབྱེ་ཞིབ་མོ། རྗེས་ཀྱི་བྱ་བའི་རིམ་པ་འཕྲོས་དོན་དང་བཅས་པ་རྣམས་ཏེ་དོན་ཚན་དགུའོ། །དང་པོ་བཞི་པོ་སྔོན་འགྲོ་ཡིན་པས་སྔོན་འགྲོ་དངོས་གཞི་རྗེས་གསུམ་དུ་བྱས་ཀྱང་ཆོག་གོ ། དེའི་དང་པོ་ལ་གསོལ་གདབ་ཀྱི་ཡུལ་དུ་བསྙེན་པའི་དོན་ལ་དཔྱད་པ་དང༌། གསོལ་གདབ་རྗེས་བཟུང་དངོས་བཤད་པའོ། །དང་པོ་ནི། དཀྱིལ་ཆོག་མང་པོ་ལས་འབྱུང་བ་ལྟར། སྐབས་འདིར་བསྙེན་པའི་ཆོ་ག་ཞེས་པའི་དོན་ཚན་དགོས་སམ་མི་དགོས་སྙམ་ན། ད་ལྟ་ཕལ་ཆེ་བའི་སློབ་དཔོན་གྱི་མཚན་ཉིད་ལ་བསྙེན་པ་སྔོན་དུ་སོང་བ་ནི་དགོས་མོད་ཀྱང༌། དབང་བསྐུར་བའི་ཆོ་གའི་ཡན་ལག་ཏུ་བསྙེན་
པ་མཐའ་གཅིག་ཏུ་དགོས་པ་ཡང་མིན་ནོ། །དེ་ལ་རྡོ་རྗེ་སློབ་དཔོན་རྫོགས་རིམ་ཁོ་ན་བསྒོམས་པའི་སྟོབས་ལས་སྲོག་གཟུགས་གྲུབ་ཅིང་གཞོམ་མེད་ཀྱི་ན་དཱའི་སྒྲ་དབྱངས་སྟོབས་སུ་གྱུར་པ་ཡིན་ན། བསྐྱེད་རིམ་སྒོམ་པ་དང༌། ཐ་མལ་བཟླས་བརྗོད་ཀྱི་བསྙེན་པ་ལ་རག་མ་ལུས་ལ། དེ་འདྲ་དེས་གལ་ཏེ་བཟླ་བར་སྤྲོ་ན་ནི། སྙིང་པོའམ་འཕྲེང་སྔགས་བྱ་བ་སོགས་ཉིན་ཞག་ཉུང་ངུ་ཙམ་གྱིས་བཟླ་བར་ནུས་སོ། །འོན་ཀྱང་གླང་པོ་རྙེད་ནས་གླང་པོའི་རྗེས་འཚོལ་བ་དོན་མེད་པ་ལྟར་དམིགས་གསལ་གྱི་དགོས་དོན་ཁྱད་པར་ཅན་ཡོད་ན་མ་གཏོགས་གཙོ་བོར་མི་བྱེད་པས། སྤྱི་ལྡོག་ནས་དབང་བསྐུར་བའི་རྡོ་རྗེ་སློབ་དཔོན་ཡིན་ན། ཐ་མལ་ངག་བཟླས་ཀྱི་བསྙེན་པ་བྱེད་དགོས་པས་ནི་མ་ཁྱབ་སྟེ། རྫོགས་རིམ་གཅིག་གི་སྟོབས་ཀྱིས་སྤྲོས་པའི་དཔུང་ཚོགས་ཐམས་ཅད་ཟིལ་གྱིས་གནོན་པའི་ཕྱིར་རོ། །འོན་ཀྱང་དེང་སང་དེ་ལྟ་བུ་གྲུབ་པ་དཀོན་པའི་ཕྱིར། སྐབས་འདིར་རྡོ་རྗེ་སློབ་དཔོན་གྱི་མིང་ཅན་ཐ་མལ་པ་རྣམས་ལས་བརྩམས་ཏེ་བཤད་ན། སྔོན་དུ་བསྙེན་པ་བཟླས་པའི་གྲངས་ཚད་དང་བཅས་པ་འགྲོ་དགོས་ལ། དེ་ཡང་ཐུགས་ཀྱི་ལས་དྲུག་ལ་དྲུག་འབུམ། གསུང་ལ་འབུམ་ཕྲག་བཅུ། སྐུ་ལ་བྱེ་བ་རྣམས་སོང་ན་རབ་ཡིན། དེ་མིན་ཡང་སྙིང་པོའམ་རྣམ་བཅུ་དབང་ལྡན་བྱེ་བ་བཟླས་པ་དང༌། དེ་ཀུན་གྱི་བཅུ་ཆའི་སྦྱིན་སྲེག་དང་བཅས་པ་ནི་ངེས་པར་གལ་ཆེ་ལ། ཁ་ཅིག་གཞན་གྱི་རིགས་འགྲོས་སྦྱོར་ཏེ་གཙོ་བོ་ལ་སྙིང་པོ་བཞི་འབུམ། ཐུགས་དཀྱིལ་ནང་གི་འཁོར་ལ་མཚན་སྔགས་ཁྲིའམ་བཞི་ཁྲི་རེ་བཟླ་ཟེར་ཡང་
གཙོ་བོ་ལ་ཉུང་བས་བྱིན་རླབས་ཆུང་ཞིང་ཆད་པའི་སྐྱོན་དང༌། འཁོར་གྱི་རྣམས་རྒྱུད་འགྲེལ་ལས་མ་གསུངས་པ་ལ་རྩལ་འདོན་བྱས་པས་ལྷག་པོའི་སྐྱོན་ཡོད་དོ། །དེས་ན་དབང་བསྐུར་བ་ལ་རྩ་བའི་བསྙེན་པ་སྔར་བཤད་ལྟར་སོང་བ་དགོས་པ། དེ་ནི་སྔ་རོལ་ནས་གྲུབ་པས་སློབ་མ་བྱིན་གྱིས་རློབས་ནུས་པ་ཞིག་དགོས་ལ། རྒྱུད་སྡེ་གཞན་དང་བསྟུན་ནས་ཡེ་ཤེས་འབབས་པའི་སྔགས་ལ་བསྙེན་པ་བྱས་ཀྱང་ལེགས་པ་ཙམ་ཡིན་མོད་ཀྱི །འདིར་བསྐྱེད་རྫོགས་གང་རུང་གི་རང་བྱིན་གྱིས་རླབས་པའི་སྟོབས་ལས་ཡེ་ཤེས་འབེབས་པར་གསུངས་པས་དེའི་སྒོས་བསྙེན་ནི་གལ་ཡང་ཆུང་མོད། འགྲེལ་ཆེན་དུ་འདི་ལ་བཟླས་པ་བྱེ་བ་དང་སོགས་ནི། ཡེ་ཤེས་འབེབས་པ་འདི་ལ་སྔོན་བཟླས་པ་སྙིང་པོ་སོགས་བྱེ་བ་སྦྱིན་སྲེག་དང་བཅས་ཏེ་སོང་པ་དགོས་པའི་དོན་ཡིན་གྱི། ཨ་ར་ལའི་སྔགས་བྱེ་བའི་དོན་མིན་ཏེ། ཡིན་ན་སུ་ལ་སྦྱིན་སྲེག་འབུལ་བསམ་པར་བྱའོ། །ཁ་ཅིག་སློབ་མ་གསོལ་བཏབ་ཀྱི་རྗེས་སུ་སློབ་དཔོན་གྱིས་གཞིའི་བསྙེན་པ་གདོང་སྐྱེལ་བར་འདོད་པ་ནི། བསྙེན་པ་མ་སོང་ཞིང་སློབ་དཔོན་གྱི་གནས་མ་ཐོབ་པ་ལ་གསོལ་བ་འདེབས་པ་ཡང་མི་འོས་ན། དེས་སློབ་མ་ལ་སྲུང་བ་བྱེད་པ་སོགས་ཅིར་འགྱུར་ཡང་བསམ་དགོས་ཤིང༌། དེས་ན་ད་ལྟར་བརྒྱུད་པ་འདེད་པའི་ཁྱད་ཡོད་ཟེར་བ་དང༌། ཐོབ་རྒྱ་ཙམ་སོགས་གསོག་མཁན་རྣམས་ཀྱི་ལག་ལེན་ལོག་པ་དེ་གྲུབ་མཐར་འཁྱེར་དུ་མི་རུང་ངོ༌། །འོ་ན་དཀྱིལ་ཆོག་གཞན་མང་པོར་རྗེས་བཟུང་གི་རྗེས་ལ་བསྙེན་པ་ཡོད་པ་དེ་ཅི་སྙམ་ན་འདི་ནི་སློབ་མ་དེ་རྣམས་ཉིད་ལ་དབང་བསྐུར་དགོས་པའི་གནང་བ་ཞུ་བའི་དོན་དུ་ལྷ་ལ་གསོལ་བ་
གདབ་པའི་ཕྱིར་མཆོད་པ་དང་བཟླས་པའི་བསྙེན་པ་ཅུང་ཟད་བྱེད་པ་དེ་ཡིན་ལ། དེ་ནི་སྐབས་འདིར་ཡང་སྦྱར་ན་ཤིན་ཏུ་རུང་མོད། གསལ་བར་མ་གསུངས་པས་མ་བྱས་ཀྱང་འགལ་བ་མེད་དོ། །འདི་ལ་བོད་རྣམས་བརྙེན་པ་ཁ་གསོའི་ཐ་སྙད་འཇོག་སྟེ། ཐ་སྙད་དེ་ཡང་ལེགས་པར་ནི་མི་སྣང་ངོ༌། །དེ་ལྟ་ན་ཡང་དེ་ཆོ་གའི་ཡན་ལག་མ་ཡིན་པས་དབང་ཆོག་གི་དཀྱུས་སུ་མ་བགྲངས་སོ། །གཉིས་པ་གསོལ་གདབ་རྗེས་བཟུང་དངོས་ནི། སློབ་མར་འགྱུར་བ་ངེས་ཞེས་སོགས་ཏེ་འདི་ལ་མཎྜལ་འབུལ་བ། གསོལ་བ་གདབ་པ། བླ་མས་ཁས་བླང་བ། སོ་ཤིང་སྦྱིན་པས་ལྟས་བརྟག་པ། སྲུང་བ་དགོད་པ་སྤྲོ་བ་བསྐྱེད་པ་རྣམས་བྱ་ལ། དེ་རྗེས་ཚོགས་མཆོད་དང་གཏོར་མ་ཕུལ་ནས་སློབ་མ་ལ་བར་ཆད་ཞི་བའི་ཕྱིར་གསོལ་བ་གདབ་བོ། །རྭ་འབྲོ་སོགས་བོད་གོང་མ་རྣམས་ནི། ཡོ་བྱད་འབྲི་བ་སོགས་རྡོ་རྗེ་མཁའ་འགྲོ་ནས་བཤད་པ་ལྟར་མཐུན་པར་མཛད་དེ་འདིར་མ་བཤད་མོད་འགལ་བ་མེད་པར་སེམས་མོ། །རྩིས་འགོ་གཉིས་པས་བཟུང་ཞིང་ལྷག་པར་གནས་པ་ནི། བྲིས་སྐུ་ལ་སོགས་པ་བཀྲམ་ཞེས་པ་ནས་ཉི་མ་དང་པོའི་བྱ་ བའོ། །ཞེས་པའི་བར་ཡིན་ལ། འདི་ལ་གཉིས། གོ་རིམ་ངེས་པ་དང༌། ཆོ་ག་དངོས་བཤད་པའོ། །དང་པོ་ནི། འདི་ལ་གཞན་རྣམས་ཕལ་ཆེར་ས་བརྟག་སླང་སྦྱང་བཟུང༌། འཕྲེང་བ་ལ་སོགས་པ་དཀྱིལ་ཆོག་སྤྱི་དང་མཐུན་པར་འདོད་ཅིང༌། གོ་རིམ་ཡང་དེ་དག་མཐུན་པ་ཁོ་ནར་སྒྲིག་དགོས་པར་མཐའ་གཅིག་ཏུ་སྨྲའོ། །ལག་ལེན་གྱི་རྣམ་གྲངས་འགའ་ཞིག་ཏུ་ཕྱོགས་བཞིར་གསོལ་བཏབ། བགེགས་ལ་བཀའ་བསྒོ། མ་ལུས་ཕྱོགས་ན་བཞུགས་པ་ཡི། ཞེས་སོགས་རྡོ་རྗེ་རྩེ་མོ་ལས་
འབྱུང་བ་ལྟར་སྙན་མནན་པ་སོགས་སྤྱི་འགྲོ་དང་གོ་རིམ་ཅི་རིགས་པ་བསྟུན་ཀྱང་སྤྲོས་པ་ལྷུར་ལེན་པ་རྣམས་ཀྱི་ངོར་འགལ་བ་མེད་དེ། རང་ལུགས་ལ་ཡང་རྗེ་ཕྱོགས་པ་སོགས་ཐུགས་སྲས་འགས་ཀྱང་མཛད་ལ། དཀྱིལ་ཆོག་ཡེ་ཤེས་རྒྱ་མཚོ་ལས་ཀྱང་བཀས་གནང་སྩལ་ཞིང༌། དཀྱིལ་ཆོག་ཆུང་བར་ཡང་དེ་དང་མཐུན་པར་དགོངས་སོ། །འོན་ཀྱང་ཡེ་ཤེས་རྒྱ་མཚོའི་དཀྱུས་ཀྱི་རིམ་པ་ནི། རྒྱུད་འགྲེལ་གྱི་དགོངས་པ་སྒྲ་ཇི་བཞིན་ཡིན་ལ། རྒྱུད་འགྲེལ་ཉིད་ཀྱི་དགོངས་པ་ནི། ས་བརྟག་པ་ཙམ་མ་གཏོགས་ས་གཞི་ལ་བརྟེན་པའི་ཆོ་ག་ཀུན་ལས་བཟུང་བ་ཞེས་སྤྱི་མིང་དུ་གསུངས་ཤིང༌། ལས་དང་བྱ་བས་སྦྱང་བ་གཏེར་གཞུགས་པ་དང་བཅས་པ་ཁོ་ན་ལ་ས་སྦྱང་བར་གསུངས་ཏེ། དེ་ཡང་བཟུང་བའི་ནང་ཚན་དུ་བྱེད་པའམ། ཡང་ན་དེ་ནི་ལས་དང་བྱ་བ་ཙམ་ཡིན་གྱི། སྔགས་དང་ཏིང་ངེ་འཛིན་སྦྱར་བའི་ཆོ་ག་མ་ཡིན་པས་ཆོ་ག་རྣམས་ནི་ས་བཟུང་བ་ཡིན་ལ། བརྐཽ་སྦྱངས་ཀྱི་ལས་ནི་སྦྱང་བའོ། །ཞེས་བརྗོད་ཀྱང་རྒྱུད་འགྲེལ་གྱི་དོན་ལ་འབྱོར་རོ། །དེ་ཡང་དབང་ལེའི་མདོར་བསྡུས་གཉིས་པའི་ཐོག་མ་ཉིད་དུ་རྡོ་རྗེ་སློབ་དཔོན་གྱི་རང་གི་ལུས་དང་གནས་སྲུང་བ་བསམ་པར་བྱ་སྟེ། ཞེས་སོགས་ཀྱིས་སྲུང་འཁོར་སྒོམ་པ་གསལ་བར་བསྟན་ལ། སྲུང་འཁོར་གྱི་སྔོན་དུ་བདུད་སྲེག་པ་དགོས་ཏེ། བདུད་ཀྱི་ཚོགས་བསྲེག་པ་དེའི་འོག་ཏུ་ཕྱི་ནས་འཁོར་ལོའི་རྩིབས་བཅུ་ཞེས་སོགས་གསུངས། ཕུར་བཏབ་ཀྱི་དོན་དུ་སྲུང་འཁོར་བསྒོམ་ཞེས་གསུངས་པས། སྲུང་འཁོར་གྱི་རྗེས་སུ་ཕུར་གདབ་བྱེད་པར་ཤིན་ཏུ་གསལ་ལ། དང་པོར་ཡུལ་དང་གྲོང་གི་བདག་པོའི་གཏོར་མ་སྔགས་ཀྱི་ཚིག་འདི་དག་གིས་སྦྱངས་ཏེ་སྦྱིན་པར་བྱ། ཞེས་ཐོག་མར་ཡུལ་བདག་གི་གཏོར་མ་དང༌།
དེའི་གོ་རིམ་དང་འགྲེལ་པར་སའི་ལྷ་མོ་སྤྱན་དྲངས་མཆོད་ཅིང་གཤེགས་གསོལ་རྣམས་གསུངས་པས། དེ་གཉིས་པོ་སྲུང་འཁོར་གྱི་སྔོན་དུ་བྱེད་པར་གསལ་ལ། སྟང་སྟབས་ཀྱིས་འཆག་པ་དང༌། རྡོ་རྗེའི་ས་སྤྱན་འདྲེན་པ་གཉིས་ཕུར་གདབ་ཀྱི་རྗེས་སུ་གསལ་བར་འབྱུང་སྟེ། འགྲེལ་ཆེན་ཉིད་དུ་ཕུར་བུས་གདབ་པའི་ཆོ་གའོ། །དེ་ནས་ཕུར་བུ་རྣམས་བསྲུང་པའི་དོན་དུ་ཁྲོ་བོའི་རྒྱལ་པོ་བཅུ་རྣམས་སྔར་གསུངས་པའི་ཆོ་གས་དགོད་པར་བྱའོ། །དེ་ནས་གཡོན་དང་གཡས་པའི་རྐང་བའི་མཐིལ་ལ་ཞེས་སོགས་ཤིན་ཏུ་གསལ་བ་བསྙོན་དུ་མེད་ལ། དེ་ལྟར་ན་ཡུལ་བདག་གི་གཏོར་མ། ས་ལྷ་མཆོད་པ། སྲུང་འཁོར། ཕུར་གདབ། སྟང་སྟབས། རྡོ་རྗེའི་ས་སྤྱན་དྲངས་པ་རྣམས་སྔ་ཕྱིའི་རིམ་པ་ཤིན་ཏུ་གསལ་བ་དེ་ཡིན་ཞིང༌། ས་བརྐཽ་སྦྱངས་ཀྱི་ལས་ནི་སའི་ལྷ་མོ་མཆོད་པའི་རྗེས་དང༌། སྲུང་འཁོར་གྱི་སྔོན་དུ་དགོས་པར་རིག་པས་གྲུབ་ལ། བདུད་གཞོམ་པ་ནི། བརྐཽ་སྦྱངས་ཀྱི་རྗེས་སྲུང་འཁོར་གྱི་སྔོན་དུ་བྱས་ཀྱང་རུང་མོད་ཀྱི། སའི་ལྷ་མོ་ལ་མཆོད་པའི་སྔོན་དུ་བྱས་ན་ལེགས་ཏེ། སྔོན་སྟོན་པས་བདུད་ཀྱི་མཚོན་ཆ་རྣམས་མེ་ཏོག་ཏུ་བསྒྱུར་བ་སོགས་བྱམས་པའི་ཏིང་ངེ་འཛིན་གྱིས་བདུད་ཕམ་པ་སྔོན་ལ་མཛད་ནས། རྗེས་སུ་སའི་ལྷ་མོ་དཔང་པོར་བཞག་པ་ཡིན་པས་ སོ། །ཞེས་སྔོན་བྱུང་སྟོན་པའི་རྣམ་འཕྲུལ་དང་མཐུན་པར་བྱེད་པ་བླ་མའི་མན་ངག་གི་རིམ་པ་ཡིན་ལ། འབྲོ་ཤོང་གཉིས་ཀྱང་བཞེད་དོ། །འོ་ན་དབང་བསྐུར་སླད་དུ་བདུད་རྣམས་ཉམ་པ་དག་ཏུ་བྱ། ཞེས་སླར་བདུད་འཇོམས་པར་དམ་བཅས་པ་མ་ཡིན་ནམ། སྙམ་ན། འདི་ནི་དག་ཏུ་བྱས་ཞེས་འདས་པའི་དོན་ལ། བྱ་ཞེས་མ་འོངས་པའི་ཚིག་བཅུག་པ་དྲང་སྲོང་རྣམས་ཚིག་
ལ་ཞེན་པ་དགག་པའི་དོན་དུ་སྒྲ་ཉམ་དུ་མཛད་པ་ཡིན་ཏེ། དེ་བཞིན་བདག་གིས་བདུད་སྡེ་ལས། རྒྱལ་བར་བྱས་ནས་དཀྱིལ་འཁོར་འབྲི། །ཞེས་གསུངས་པ་དང་དོན་གཅིག་པ་ཡིན་ན། ཚིག་དེའི་དོན་བདུད་སྡེ་ལས་རྒྱལ་བར་བྱས་ཟིན་ཏེ། དེ་ལ་ཁྱོད་དཔང་པོ་ཡིན་ན། སླད་ནས་དཀྱིལ་འཁོར་འབྲི་བའི་གནང་བ་ཞུ། ཞེས་པ་ལྟར་འདིར་ཡང་བདུད་ཉམ་པར་བྱས་པའི་དབང་པོ་ཁྱོད་ཡིན་གྱི། དེ་ཡང་དབང་བསྐུར་བའི་སླད་དུ་བདུད་བཅོམ་པ་ཡིན་ན། དབང་གི་དོན་དུ་དཀྱིལ་འཁོར་འབྲི་བའི་གནང་བ་ཞུ་ཞེས་པའོ། དེ་ལྟར་ན་འདི་རྣམས་ལ་ཡང་དཀྱིལ་ཆོག་སྤྱི་འགྲོའི་ལུགས་ཀྱི་བརྟག་སླང་སྦྱང་བཟུང་གི་དོན་ནི་ཚང་བ་ཡིན་ཏེ། ཡུལ་བདག་དང་ས་ལྷ་ནི་ས་སླང་བ་དང༌། བརྐཽ་སྦྱངས་ནི་སྦྱང་བ་དང༌། སྲུང་འཁོར་ཕུར་གདབ་སྟང་སྟབས་གསུམ་ནི་བཟུང་བའི་དོན་ཡིན་པས་སོ། །འོན་ཀྱང་རྒྱུད་འགྲེལ་འདིར་དེ་ལྟ་བུའི་ཐ་སྙད་མ་མཛད་དོ། །དེ་ཐམས་ཅད་ཀྱི་སྔོན་དུ་བདག་བསྐྱེད་རྒྱས་པ་འགྲོ་བ་ནི། ལྷའི་ཏིང་ངེ་འཛིན་གྱིས་བདུད་ཚར་གཅོད་པའི་སྔགས་དང༌། ཞེས་པ་ནས། ལྷའི་ང་རྒྱལ་གྱི་ངེས་པའོ། །དེ་ལྟར་ང་རྒྱལ་བསྐྱེད་དེ། དེ་ནས་ས་ཡོངས་སུ་བཟུང་བ་དང༌། སློབ་མ་བསྡུ་བ་བྱའོ། །ཞེས་གསུངས་པ་དང༌། ང་རྒྱལ་བཟུང་བའི་གོང་དུ་སྟོང་པ་ཉིད་ལ་དམིགས་པ་དང༌། དཀྱིལ་འཁོར་རྒྱལ་མཆོག་དང༌། ལས་རྒྱལ་མཆོག་དང༌། ཐིག་ལེའི་རྣལ་འབྱོར་དང༌། ཕྲ་མོའི་རྣལ་འབྱོར་རྣམས་སྔགས་པས་བྱའོ་ཞེས་གསུངས་ཏེ། སའི་ཆོ་གའི་སྔོན་དུ་བདག་བསྐྱེད་རྒྱས་པ་སྒོམ་པར་གསུངས་ཀྱི། ས་ལྷ་སོགས་སྔོན་དུ་བཏང་བའི་རྗེས་ལ་དཀྱིལ་འཁོར་གྱི་ས་གཞིར་བདག་བསྐྱེད་བསྒོམས་
ནས། དཀྱིལ་འཁོར་འདེགས་པ་སོགས་མ་གསུངས་སོ། །དེས་ན་སྤྱིར་དབང་ཆོག་ལ་རང་གི་ཆོ་གས་སྒྲུབ་པ་དང༌། གཞན་གྱི་ཆོ་གའི་སྒྲུབ་པ་དང༌། འདྲེས་མའི་ཚུལ་དུ་སྒྲུབ་པ་སྟེ་གསུམ་འབྱུང་བ་ལས། གཞན་གྱི་ཆོ་གའི་སྒྲུབ་པ་ནི་དེ་ཉིད་བསྡུས་པའི་དཀྱིལ་འཁོར་ལ་བླ་མེད་ཀྱི་ཆོ་ག་སྦྱར་བ་བྱ་བ་བསྡུས་པ་ལྟ་བུ་ཡིན་ལ། འདྲེས་པར་སྦྱར་བ་ནི། སཱ་དྷུ་པུ་ཏྲའི་དུས་འཁོར་གྱི་དཀྱིལ་ཆོག་ལྟ་བུ་ཡིན་ཞིང༌། དཀྱིལ་འཁོར་གྱི་ཆོ་ག་ཡེ་ཤེས་རྒྱ་མཚོ་ནི་དུས་འཁོར་གྱི་རྒྱུད་རང་ཉིད་ཁོ་ནས་ལུགས་སུ་སྦྱར་བའོ། །སྤྱིར་ཁ་སྐོང་ཐན་ཐུན་གཞན་ནས་བསྐང་བ་ཡོད་པ་ཙམ་གྱིས་རང་ལུགས་མ་ཡིན་པར་མི་འགྱུར་ཡང་ཐུན་མོང་མ་ཡིན་པའི་ཐད་དུ་ཕན་ཚུན་དོད་བསྒྲིགས་ནས་ལུགས་གཞན་དབང་བཙན་དུ་བཅུག་སྟེ། གོ་རིམ་བསྒྱུར་བ་སོགས་ཆིངས་མི་འདྲ་བ་བྱས་ན། གཞན་ལུགས་སུ་སྒྲུབ་པའམ་འདྲེས་མའི་རིགས་སུ་འགྱུར་རོ། །དེ་དག་ཀྱང་ལྷས་ལུང་བསྟན་པའམ། བླ་མའི་མན་ངག་དང་ལྡན་ན་མི་འགལ་ཏེ་འཕྲེང་བ་སྐོར་གསུམ་གྱིས་མཚོན་ནོ། །དེས་ན་ཕྱིས་ཀྱི་མཁས་འདོད་ཅན་ཁ་ཅིག་བཞིན་དུ། རང་གི་འདོད་པ་དང་མི་མཐུན་པ་ཕྲ་མོ་ཞིག་བྱུང་ནའང༌། ཆོས་ཙམ་རང་མ་ཡིན་པ་སྐད་དུ་འབར་ཤ་བྱེད་པ་དེ་ལྟ་བུ་ནི། ཁོ་བོ་ཅག་ནམ་ཡང་མི་བྱེད་དེ་གང་དེ་དང་དེའི་ལུགས་ཡིན་པ་དང་མ་ཡིན་པ་ནི་རྣམ་པར་འབྱེད་དོ། །གལ་ཏེ་གྲུབ་པ་ཐོབ་པས་མ་བྱས་ལ། ལྷས་ཀྱང་མ་གནང་ཞིང༌། མན་ངག་ཀྱང་མེད་པར་ཐོས་པ་ཅུང་ཟད་བྱས་པའི་ང་རྒྱལ་གྱིས་གཞན་ལུགས་སུ་སྒྲུབ་པ་དང་འདྲེས་པ་སོགས་གསར་དུ་སྦྱོར་ཞིང་སྟོབས་ཀྱིས་སྤྱད་པས་ནི་ཅིར་ཡང་མི་རུང་སྟེ། སློབ་མ་རྣམས་ངལ་བ་དོན་མེད་དུ་བྱེད་པ་འབའ་ཞིག་གོ །དེ་ལྟར་སྤྱིའི་
གོ་བ་ཆགས་པ་དང༌། གལ་ཆེ་བ་ཆོ་གའི་གོ་རིམ་ལ་ངེས་པ་རྙེད་པར་བྱས་ནས། ད་ནི་གཉིས་པ་ཆོ་ག་དངོས་ལ། དང་པོ་ས་བརྟགས་པ། གཉིས་པ་བདག་གི་རྣལ་འབྱོར། གསུམ་པ་ས་གཞི་ལྷག་པར་གནས་པ། བཞི་པ་རྗེས་ཀྱི་ཆོ་གའོ། །དང་པོ་ནི། རྒྱུད་ལས། ས་ཡི་རིགས་ནི་ཡོན་ཏན་དབང་གིས་རྣམས་བཞིར་འགྱུར་བ་དམངས་རིགས་རྗེ་རིགས་རྒྱལ་པོ་བྲམ་ཟེ་སྟེ། །ཞེས་སོགས་རྒྱས་པར་གསུངས་པའི་དོན། ས་གཞི་ཁ་དོག་ནག་པོ་ནི་དམངས་རིགས་ཏེ། བསད་བསྐྲད་དབྱེ་གསུམ་དང༌། སེར་པོ་ནི་རྗེ་རིགས་ཏེ་རྨོངས་རེངས་གདབ་གསུམ་དང༌། དམར་པོ་ནི་རྒྱལ་རིགས་ཏེ་དབང་དགུག་གི་ལས་དང༌། དཀར་པོ་ནི་བྲམ་ཟེའི་རིགས་ཏེ་ཞི་རྒྱས་ལ་བསྔགས་སོ། །ལྗང་ཁུ་ནི་མཐར་སྐྱེས་ཀྱི་རིགས་ཏེ་ལས་ཐམས་ཅད་པའོ། །}ོན་པོ་ཁ་དོག་གསལ་བ་ཡང་དེ་དང་འདྲ་ལ། མི་གསལ་བ་ནི་ནག་པོ་དང་མཚུངས་པར་མངོན་ནོ། །སའི་དྲི་ལ་བརྟགས་ན། རྣག་གི་དྲི་དམངས་རིགས། ལན་ཚྭའི་དྲི་རྗེ་རིགས། མེ་ཏོག་པདྨའི་དྲི་རྒྱལ་རིགས། ཙན་དན་ལ་སོགས་པ་མཆོག་གི་དྲི་ནི་བྲམ་ཟེའི་རིགས་སོ། །རོ་ལའང་བརྟགས་སྟེ། སྐྱུར་བ་དང་ལན་ཚྭ་དམངས་རིགས། མངར་བ་རྗེ་རིགས། ཚ་བ་རྒྱལ་རིགས། ཁ་བ་དང་སྐ་བ་བྲམ་རིགས། དྲི་དང་རོ་ཀུན་ཚང་ན་མཐར་སྐྱེས་མཁའ་ཁམས་ལས་ཐམས་ཅད་པ་སྟེ། ལས་ཀྱི་དབྱེ་བ་གཞན་རྣམས་སྔ་མས་རིགས་འགྲེའོ། །དེ་དག་དང་པོ་ཉིད་དུ་ཚང་ན་ལེགས། མ་ཚང་ན་བསྐོ་སྦྱངས་ཀྱི་སྐབས་སུ་གསར་དུ་བསྒྲུབས་པས་རུང་ངོ༌། །གཞན་ཡང་དབུས་མཐོ་ཞིང་མཐའ་དམའ་བའམ། ཤར་དང་བྱང་དུ་གཞོལ་བ་དང༌། ཆུ་བོ་
གཡས་བསྐོར་དུ་འབབ་པ་སོགས་དང༌། དཀྱིལ་འཁོར་ཁང་པའི་གཞིར་ཆུས་བརྟག་པ་དང༌། སས་བརྟག་པ་སོགས་སྤྱི་དང་མཐུན་པར་ཁ་བསྐང་ཡང་རུང་ལ། འདི་ཉིད་ལས་མ་གསུངས་པས་ངེས་པར་དགོས་པའང་མིན་ཞིང་གཙུག་ལག་ཁང་བཞེང་པའི་སྐབས་མ་གཏོགས། དཀྱིལ་འཁོར་ཁང་པ་བཞེང་པའི་སྲོལ་བོད་ན་མེད་པས་གོ་ཡུལ་ཙམ་དུ་བཞག་གོ །གཉིས་པ་ནི། ད་ལྟ་ལག་ལེན་ལ་སྔོན་འགྲོ་གཏོར་མ་དང༌། གནས་དང་ཡོ་བྱད་བྱིན་གྱི་རློབས་པ་སྔོན་དུ་བཏང་ནས་བདག་བསྐྱེད་སྒོམ་པ་སྟེ། ཐོག་མར་ནང་མཆོད་ལ་དམིགས་ཏེ་ཞེས་པ་ནས། ཞེས་ང་རྒྱལ་བཟུང་ཞེས་པའི་བར་རོ། །གསུམ་པ་ལ་དབྱེ་ན། དང་པོར་མངོན་པ་ལས་ས་གཞི་སླང་བ་ནི། རྒྱལ་པོ་སོགས་སའི་བདག་པོ་ལས་སློང་བ་ཡིན་ཡང༌། དེང་སང་ལག་ལེན་མི་དགོས་པས། འདིར་དོན་ཚན་དགུ་སྟེ། ཡུལ་བདག་གྲོང་བདག་ལས་སླང་བ། བདུད་ཚོགས་སྲེག་པ། སའི་ལྷ་མོ་ལ་གནང་བ་ཞུ་བ། ས་སྦྱང་བ། གཏེར་གཞུག་པ། སྲུང་འཁོར་གྱིས་གནས་བཟུང་བ། ཕུར་གདབ་ཀྱིས་མཚམས་བཅད་པ། སྟང་སྟབས་ཀྱིས་ས་འཆག་པ། རྡོ་རྗེའི་ས་གཞི་སྤྱན་དྲང་པ་རྣམས་སོ། །དང་པོ་ནི། དབང་ལེར་ས་ཆོག་གི་སྐབས་འདིར། གྲོང་གི་བདག་པོ་ཁོ་ནའི་གཏོར་སྔགས་གསུངས་ལ། སྒྲུབ་ཐབས་ཀྱི་སྐབས་སུ་ཡུལ་བདག་གི་གཏོར་སྔགས་རིང་བ་དེ་ཁོ་ན་གསུངས་པ། ལེགས་པའི་བུས་དེ་གཉིས་གོ་ཟློག་སྟེ་བཤད། དེའི་ཕྱིར་གཞན་དག་གདམ་ཁ་ཡིན་ཞེས་གསུང་བ་འགལ་བ་ཆེན་པོའང་མེད་མོད་ཀྱི། འོན་ཀྱང་ཡུལ་བདག་དང་གྲོང་བདག་ལ་རྒྱ་ཆེ་ཆུང་ཡོད་ཅིང་རུ་ང་ཕྲག་དོག་གི་ཁྱད་
ཀྱང་ཡོད་པས། གཉིས་ཀ་མཛད་པ་ཉིད་རང་ལུགས་ཀྱི་བླ་མའི་ཕྱག་ལེན་ཡང་ཡིན་ཞིང༌། རྒྱུ་མཚན་ཡང་སྤྱི་ལྡོག་ནས་སྒྲུབ་པ་པོ་རང་ཉིད་དང༌། སྡེ་དེའི་བྱ་བ་སྤྱིའི་རླབས་ཀྱི་བར་ཆད་ཞི་བ་དང༌། མཐུན་རྐྱེན་སྒྲུབ་པ་ལ་ཡུལ་བདག་བསྔགས་ལ། ས་ཕྱོགས་དེ་ཉིད་དུ་སྐབས་སུ་བབ་པའི་ལས་ལ་འཇུག་པ་ན། རང་དང་སློབ་མ་ལ་བཀྲ་མི་ཤིས་པ་མེད་ཅིང་མཐུན་རྐྱེན་འབྱོར་བར་བྱེད་པ་ལ་གྲོང་བདག་མགུ་བ་གལ་ཆེའོ། །དེའི་ཕྱིར་གཉིས་ཀ་བྱེད་པ་ལག་ལེན་བཟང་ངོ༌། །དེ་ནས་གཉིས་པ་བདུད་སྲེག་པ་ནི། རང་ཉིད་དུས་ཀྱི་འཁོར་ལོའི་སྐུར་གསལ་བའི་དཔྲལ་བར་ཟླ་བའི་དཀྱིལ་འཁོར་སོགས་ཏེ་སྒྲུབ་ཐབས་བཞིན་ཡིན་ལ། སྤྱིར་བདུད་སྲེག་པའི་དེ་མ་ཐག་པར་སྲུང་འཁོར་སྒོམ་པ་སོགས་འབྲེལ་ཡང༌། འདིར་ནི་སའི་ལྷ་མོ་མཆོད་པ་དང༌། ས་སྦྱང་ཞིང་གཏེར་གཞུག་པ་ལ་བར་ཆད་མི་འཇུག་པའི་ཕྱིར་དེ་དག་གི་སྔོན་དུ་བདུད་སྲེག་གོ །དེ་ཡང་གཞི་བདག་དང་འབྱུང་པོ་སོགས་ཀྱི་གཏོར་མ་ལ་བདུད་བགེགས་འཇུག་པ་ཉུང་ལ། འཇིག་རྟེན་འཇིག་རྟེན་འདས་པའི་ལྷ་ལ་སྒོས་སུ་མཆོད་པ་ལ་བར་ཆད་འཇུག་པ་མང་ཞིང༌། འཇིག་རྟེན་པའི་ལྷ་ལ་ནི་མཆོད་པ་ལ་བགེགས་ཞུགས་ན། མཆོད་པ་དེ་ཉིད་ལྷ་ལ་མ་ཐེངས་པར་མ་ཟད། ལྷ་དེ་ཡང་སྒྲུབ་པོ་ལ་རྒྱབ་ཀྱིས་ཕྱོགས་པར་དཔུང་བཟང་སོགས་ལས་བཤད་པ་ལྟར་ཡིན་པས། ས་ལྷ་མཆོད་པའི་སྔོན་དུ་བདུད་བགེགས་སྲེག་པ་འདི་ཡང་ཤིན་ཏུ་གནད་ཆེ་བ་ཡིན་ནོ། །གསུམ་པ་སའི་ལྷ་མོ་ལ་གནང་བ་ཞུ་བ་ནི། མདུན་དུ་དྲི་བཟང་པོའི་མཎྜལ་ཞེས་པ་ནས། དམ་ཚིག་པ་རང་གི་སྙིང་གར་བསྡུ་ཞེས་པའི་བར་ཏེ། ས་བོན་
ལམ་ལས་བསྐྱེད་པ་ས་ལྷ་རང་ཉིད་ཀྱི་ས་བོན་ཡིན་ཞིང་བྷྲ྄ུྃ་ལས་བསྐྱེད་པ་རྒྱུད་འགྲེལ་གྱི་དངོས་བསྟན་ལས་འབྱུང་བ་བཞིན་བརྟན་པར་བྱེད་པའི་དོན་ཡིན་པས་གདམ་ཁ་ཡིན་ལ། རང་གི་སྙིང་གར་དམ་ཚིག་པ་བསྐྱེད་པ་ལ་ཡེ་ཤེས་པ་བཅུག་ནས་དེའི་རྗེས་སུ་ཨོཾ་ལཾ་ཨཱཿཧཱུྃ་སོགས་ཀྱིས་སྤྱན་འདྲེན་དང་མཆོད་པ་ལྷན་ཅིག་པའི་སྔགས་ཀྱིས་ས་འོག་ནས་སའི་ལྷ་མོ་འཁོར་བཅས་སྤྱན་དྲངས་ཏེ། ཚོམ་བུའི་སྟེང་དུ་འཁོད་པ་ལ། སྙིང་ག་ནས་དམ་ཡི་དབྱེར་མེད་སྤྲོས་ཏེ་བསྟིམ། བར་འདིར་ལག་ལེན་ཅུང་ཟད་སྤྲོས་པའི་དབང་དུ་བྱས་ནས། མཆོད་ཡོན་དྲི་དང་མེ་ཏོག་སྤོས་མར་མེ་ཞལ་ཟས་འབྲས་བུ་རྣམ་ཕུལ་ཞིང༌། དེ་འཕྲལ་གཏོར་མ་བྱིན་གྱིས་བརླབས་ཏེ་འབུལ་བ་ཡིན། བསྡུ་ན་གོང་གི་སྔགས་ཉིད་སྙིང་ག་དང་མདུན་གྱི་ལྷ་ལ་དུས་གཅིག་ཏུ་མཆོད་པའི་སྔགས་ཡིན་པས་མཆོད་པ་དེ་ལ་འདུས་ཤིང༌། གཏོར་མ་དམིགས་གསལ་མ་གསུངས་པས། བསྡུས་པའི་སྐབས་སུ་དེ་རྣམས་མེད་ཀྱང་ཆོ་ག་ཆད་པར་མི་འགྱུར་མོད། དེ་ཙམ་བྱས་ན་སྤྲོས་པ་ལ་དགའ་བའི་བློ་ངོ་དང་མཐུན་ཞིང༌། ཧ་ཅང་སྤྲོས་པ་ཐལ་ཆེས་པའང་མིན་པས་ལེགས་སོ། །དེ་མ་ཐག་ཏུ་གསོལ་པ་འདེབས་ཏེ། དེ་ལ་རྒྱལ་བས་ལྷའི་བདག་པོ་དང་བཅས་ཞེས་པ་ནི་ལྷ་དང་བཅས་པའི་བདུད་བཏུལ་ཞེས་པའམ། སྟོན་པ་ལྷའི་དཔུང་དང་བཅས་པས་བདུད་བཏུལ་ཞེས་པ་མིན་གྱི། སྟོན་པས་བདུད་བཏུལ་བའི་ཚེ། གནས་གཙང་མ་ནས་རྒྱལ་ཆེན་རིགས་བཞིའི་བར་གྱི་ལྷ་རྣམས་སྟོན་པའི་ཉེ་སྐོར་ན་དབང་པོ་དང་ལྟད་མོ་ལ་ཡོད་པའི་དོན་ནོ། །འཇུག་ཏུ་སརྦ་སཏྭཱ་ནཱཾ་སོགས་གཤེགས་སུ་
གསོལ་བའི་སྔགས་སོ། །དེ་ལ་ས་ལྷ་ཡེ་ཤེས་པ་ནམ་མཁའ་འམ་དབྱིངས་སུ་གཤེགས། ས་ལྷ་དངོས་ས་འོག་ཏུ་བཞུད། དམ་ཚིག་པ་རང་གི་སྙིང་གར་བསྡུ། །བཞི་པ་ས་སྦྱང་བ་ནི། ས་ལྷ་མཆོད་པའི་རྗེས་སུ་བྱེད་དགོས་ཏེ། སྒྲུབ་པ་པོ་ལ་སའི་ལྷ་མོས་ས་མ་གནང་ན། བརྐཽ་བ་སོགས་མི་རུང་བའི་ཕྱིར་རོ། །དེ་ཡང་སློབ་དཔོན་ཉིད་དམ་ལས་བྱེད་པ་པོ་ལྷའི་ང་རྒྱལ་དང་ལྡན་པས་སྔགས་ཀྱིས་བྱིན་གྱིས་བརླབས་པའི་འཇོར་གྱིས་ས་བརྐོ་བར་བྱ་སྟེ། དཀྱིལ་འཁོར་ཁང་པའི་དོན་དུ་ཡིན་ན་རྒྱ་ཆེན་པོར་བརྐོ་ཞིང༌། ཁྱིམ་གྱི་ནང་དུ་ས་སྟེགས་ཀྱི་དོན་དུ་བརྐཽ་བ་ཡིན་ན། ཇི་ཙམ་ས་སྟེགས་ཀྱི་རྒྱ་ལ་དགོས་པ་དེ་ཙམ་སྟེ། འདི་ལ་སྤྱི་ཁྱབ་ཏུ་ཡོངས་སུ་གྲགས་པ་ལྟར་ས་བདག་ལྟོས་འཕྱེ་བརྟགས་ནས་ལྟོ་བ་ལས་ཅུང་ཟད་མདུན་གྱི་ཆ་ནས་དང་པོར་བརྐོའོ། །ས་གཞི་བསྟར་པའི་སྟེང་དུ་ས་སྟེགས་བྱེད་པ་ཙམ་ལ་བརྐཽ་བ་མི་དགོས་ཏེ། གཞན་ཡང་ཇི་སྐད་དུ། ཁང་བཟངས་བྲག་སྟེང་བ་ལང་ལྷས། །གཙུག་ལག་ཁང་སོགས་ཆུ་འགྲམ་དང༌། །སྔོན་འདུས་བྱས་པའི་གནས་དག་ཏུ། །མ་བརྐོས་ན་ཡང་དག་པ་ཡིན། །ཞེས་གསུངས་ཏེ། མི་བརྐཽ་ན་ལྟོས་འཕྱེ་བརྟག་པ་དང༌། ས་སེལ་དབྱུང་པ་ཡང་མི་དགོས་སོ། །ས་གཞི་བལྟར་པ་དང༌། སྲ་ཞིང་མཁྲེགས་པ་ལ་གཏེར་གཞུགས་པ་མི་དགོས་མོད། ཕྱུགས་ལྷས་དང༌། ཆུ་འགྲམ་དང༌། སྟེགས་བུ་སོགས་ལ་གཏེར་གཞུག་པ་དགོས་སོ། །གང་ལྟར་ཡང་ས་བརྐཽ་བའི་ཕྱོགས་ལ་རྭ་དང་རུས་པ་དང༌། སོལ་པ་ལ་སོགས་པ་སའི་སེལ་ལམ་རོ་རྣམས་ནི་ནད་
ལ་སོགས་པ་སྡུག་བསྔལ་སྐྱེད་པའི་ཕྱིར་དབྱུང་དགོས་ལ། འདིར་དེ་ལ་ཟུག་རྔུ་སེལ་བའི་ཐ་སྙད་མཛད་དོ། །ཡང་སའི་ནང་ནས་རིན་པོ་ཆེ་དང༌། འཆིང་བུ་དང༌། དུང་ལ་སོགས་པ་ཐོན་ན་ནི། མཆོག་ཏུ་དགེ་བའི་ལྟས་ཏེ་སླར་ཡང་དེར་གཞུག་གོ །གོང་དུ་སྨོས་པ་ལྟར་སའི་ཁ་དོག་དྲི་རོ་འདོད་པ་ཞིག་མེད་ན། ཕྱོགས་གཞན་ནས་ས་ནག་དམར་དཀར་སེར་ལྗང་ཁུ་དག་བླངས་ཏེ་དེས་དགང་བར་བཤད་ཅིང༌། དེ་ཡང་དཀྱིལ་འཁོར་ཁང་པའི་དོན་དུ་བརྐཽ་བ་ཡིན་ན། ཆུའམ་རྡོ་ལ་ཐུག་གི་བར་དུ་བརྐཽའོ། །ཁང་པ་གདན་བཞུགས་ཀྱི་སྟེང་དུ་སྟེགས་བུའི་དོན་དུ་བརྐཽ་བ་ཡིན་ན། སའི་གཞི་ནས་ཁྲུ་གང་སོགས་ཇི་ལྟར་འོས་པ་བརྐཽ་བ་ཡིན་ནོ། །སའི་དྲི་རོ་ཡང་རང་བཞིན་གྱིས་གྲུབ་པ་མེད་ན། དཀར་པོ་ལ་ཙན་དན་དཀར་པོའི་ཆུས་བྲན་པ་དང༌། དམར་པོ་ལ་པདྨའི་གེ་སར་གྱི་ཆུ་འམ་ཙནྡན་དམར་པོས་བྲན་པ་དང༌། སེར་པོ་ལ་བོང་བུ་དང༌། རྟ་དང༌། མིའི་དྲི་ཆུས་བྲན་པ་དང༌། ནག་པོ་ལ་ཤ་རུལ་པའི་ཆུས་བྲན་པས་དྲི་སོ་སོ་དང་ལྡན་པར་བྱེད་པ་དང༌། རོའི་ཁྱད་པར་ཡང་ནག་པོ་ལ་ལན་ཚྭ་དང་སྐྱུར་པ་བསྲེ་བ་དང༌། སེར་པོ་ལ་བུ་རམ་དང༌། དམར་པོ་ལ་ཚ་བ་གསུམ་དང༌། དཀར་པོ་ལ་ཁ་བ་དང་སྐ་བ་བསྲེ་ལ། ལྗང་ཁུ་ལ་ནི་ཅི་ཡང་མི་བསྲེའོ་ཞེས་གསུངས་སོ། །ལྔ་པ་གཏེར་གཞུག་པ་ནི། ནག་པོ་ལ་བསད་པའི་ལས་ཀྱི་དོན་ཡིན་ན་མི་རུས་དང༌། བསྐྲད་པ་ལ་བྱ་རོག་གི་འཇུག་སྒྲོ་དང༌། དབྱེ་བ་ལ་བོང་བུའི་རུས་པའོ། །སེར་པོ་ལ་ནི་རྨོངས་པ་ལ་སྦྲུལ་གྱི་རུས་པ་དང༌། རེངས་པ་ལ་བ་བླ་དང༌། ཕུར་བུས་གདབ་པ་ལུག་གི་རྭའོ། །དམར་
པོ་ལ་ནི་དབང་ལ་གི་ཧང་དང༌། དགུག་པ་ལ་མཚལ་དང༌། བསྐྱོད་པ་ལ་ལྡོང་རོས་སོ། །དཀར་པོ་ལ་ནི་ཞི་བ་ལ་ཤེལ་དང༌། རྒྱས་པ་ལ་དུང་དང༌། རིམས་འཕྲོག་པ་དང་སྲེག་པ་ལ་ནི་མུ་ཏིག་གོ །ལྗང་གུ་ལ་ནི་ཡང་ན་ཅི་ཡང་མི་གཞུག་ཅིང༌། ཅི་སྟེ་འཇུག་ན་རིན་པོ་ཆེ་སྣ་ལྔ་གཞུག་ལ། གཞན་ཡང་དགེ་བའི་ལས་དྲུག་དང་འབྲེལ་པ་རྣམས་ལ་དེ་འཇུག་ཏུ་རུང་མོད། དགེ་བ་མ་ཡིན་པའི་ལས་དྲུག་རྣམས་ལ་གཞུག་ཏུ་མི་རུང་ལ། དྲག་པོའི་རྫས་ཀྱང་དྲག་པོ་རྣམས་ཉིད་མ་གཏོགས་པ་ལ་མི་འཇུག་སྟེ་ལས་ཐམས་ཅད་པ་ཞེས་པ་ཡང་འཇམ་པོ་ཐམས་ཅད་པའོ། །གཏེར་རྣམས་ས་སྟེགས་ལ་འཇུག་པ་ཡིན་ན། སྟེང་འོག་ཕྱོགས་མཚམས་ཀྱི་དབུས་དྲང་ཐད་དུ་གཞུག་ཅིང༌། དཀྱིལ་འཁོར་ཁང་པ་སོགས་ཀྱི་ས་གཞི་ལ་ཕྱོགས་མཚམས་ཀྱི་དབུས་དང༌། མཐོ་དམའི་དབང་དུ་ན་འོག་གི་ཆ་ལ་གཞུག་པ་ཡིན་ལ། དེ་དག་ཀྱང་ཡི་གེ་བྷྲཱུྃ་ལས་བསྐྱེད་ཅིང༌། སྙིང་པོའམ་ཡན་ལག་དྲུག་གིས་སྔགས་ཀྱིས་བྱིན་གྱིས་བརླབས་ཏེ་འཇུག་གོ །བརྐཽ་སྦྱངས་དང་གཏེར་གཞུག་པ་འདི་དག་མ་གྲུབ་པའམ། མི་དགོས་པའི་སར་ཡུངས་ཀར་དང་དྲི་བཟང་གི་ཆུ་དང༌། ཤིང་ཐལ་རྣམས་བསྲེས་པ་ཞེས་སོགས་ཏེ་འདི་ལ་སྔགས་ཀྱི་ས་སྦྱང་བ་ཞེས་ཟེར་རོ། །འདི་ཡང་གསང་བ་སྤྱིའི་ཆོ་ག་ཡིན་གྱི། དུས་འཁོར་རང་ལུགས་མིན་པས་མ་བྱས་ཀྱང་འགལ་བ་མེད་དོ། །དྲུག་པ་སྲུང་འཁོར་ནི། སློབ་དཔོན་དཀྱིལ་འཁོར་གྱི་ས་གཞིར་འདུག་སྟེ། ཧཾ་ལས་བྱུང་བའི་ནམ་མཁའི་རང་བཞིན་ཞེས་པ་ནས། སྲུང་འཁོར་གྱི་ང་རྒྱལ་བཟུང་བའི་བར་སྒྲུབ་ཐབས་བཞིན་
ནོ། །བདུན་པ་ཕུར་གདབ་ནི། ཕུར་བུ་བཅུ་མཆོད་པ་དང་བཅས་པ་ནས་དེ་བཞིན་ཉིད་རྣམ་པར་དག་པར་གྱུར་ཞེས་པའི་བར་ཕུར་གདབ་དངོས་ཡིན་ལ། དེ་རྗེས་མཆོད་གཏོར་འབུལ་བ་ཡང་ཕུར་གདབ་དང་སྲུང་འཁོར་གཉིས་ཀྱི་རྗེས་ཐུན་མོང་གི་ཆོ་གའོ། །རྒྱུད་ལས། ནྱ་གྲོ་དྷཱ་དང་ཨ་ཤྭ་ད་ཐ་ཀ་རུས་ལྕགས་སེང་ལྡེང་ལས་སྐྱེས་ཙཱུ་ཏ་བིལ་པ་ཨརྐ་སྐྱེས། ཞེས་གསུངས་ཏེ། ཕུར་བུའི་རྒྱུ་ནི་ཞི་བ་ལ་ནྱ་ཀྲོ་དྷཱ། རྒྱས་པ་ལ་ཨ་ཤྭ་ད་ཐ། བསད་པ་ལ་རུས་པ། བསྐྲད་པ་ལ་ལྕགས། དབང་ལ་སེང་ལྡེང༌། དགུག་པ་ལ་ཙཱུ་ཏ། རྨོངས་པ་ལ་ཨརྐ། རེངས་པ་ལ་བིལ་བ། ལས་ཐམས་ཅད་པ་ལ་ཨུ་དུམ་བ་ར་ལས་གྲུབ་པའོ། །སྤྱིར་མཆོག་སྒྲུབ་ལ་ཞི་སོགས་དང་མཐུན་པ་ཤས་ཆེ་ཡང་འདིར་བགེགས་དབང་དུ་བྱ་བའི་ཕྱིར། དབང་གི་ལས་དང་མཐུན་པར་སེང་ལྡེང་གི་ཕུར་བུས་འདེབས་པ་ཡིན་ལ། ཕུར་བུའི་ཚད་ནི། ཐིག་སྐུད་ཁྲུ་བརྒྱད་པ་ལ་དཀྱུས་སུ་སོར་བཅུ་གཉིས་སྤོམས་སུ་མཐེ་བོའི་ཚད་ཙམ་བྱ་ལ། དཀྱིལ་འཁོར་གྱི་ཚད་ཆེ་ཆུང་ལས་བརྩམས་ནས་ཕུར་བུའི་ཚད་བྱ་སྟེ་གཞན་རྣམས་ལ་ཡང་དེས་རིགས་འགྲེའོ། །སྐབས་འདིར་ཕུར་བུའི་ཁྲོ་བོ་ཇི་ལྟར་ཡིན་པ་ནི་སྒྲུབ་ཐབས་ཀྱི་རྣམ་བཤད་དུ་བརྗོད་ཟིན་ལ། ས་བོན་ནི། ཧ་ཡ་ར་ཝ་ལ་རིང་ཐུང་ལས་བསྐྱེད་པར་འདོད་པའང་ཡོད་མོད། རིགས་ཀུན་གྱི་ཁྱབ་བདག་རྡོ་རྗེ་སེམས་དཔའི་ཁྲོ་བོ་ཡིན་པའི་ཕྱིར། ཧཱུཾ་འབའ་ཞིག་ལས་བསྐྱེད་པས་ཀྱང་རུང་ངོ༌། །ཡི་གེ་ལྔ་ནི་ཧཱུཾ་ཉིད་ལ་ཚང་སྟེ། ཧ་ཨུ་རྣམ་བཅད་ཐིག་ལེ་ན་དཱའོ། །ས་ཆོག་གི་སྐབས་འདིར་ཕུར་བུས་འདེབས་པ་
པོ་ནི་ཁྲོ་བོ་བཅུས་འདེབས་པ་ཡིན་ཏེ། དེ་ཡང་སྲུང་འཁོར་གྱི་ཁྲོ་བོ་བཅུ་ལས། དེ་འདྲ་བ་རེ་རེ་ཆད་ནས་ཕུར་བུ་བླངས་ནས་ཕྱོགས་བཅུའི་བགེགས་ལ་འདེབས་ཤིང༌། ཕུར་བུ་བརྡུང་པ་ཡང་ཁྲོ་བོ་བཅུ་པོ་རྣམས་ཉིད་ཀྱིས་ཐོ་བ་བླངས་ཏེ་བརྡུང་པ་ཡིན་ནོ། །ཡང་ཁ་ཅིག་ཕུར་བུ་ཁྲོ་བོ་ནག་པོ་གཉིས་དམར་པོ་གཉིས་སོགས་བྱས་ནས་ཞལ་མདོག་ལ་རིགས་དྲུག་ཀར་ཚང་བར་བྱེད་པའང་ཡོད་མོད་ཀྱི། དེ་དག་བགེགས་མཐར་བྱེད་སོགས་ཡིན་པའང་མི་འཐད་ལ། མཚན་གྱི་ངེས་པ་གང་ཡང་མེད་པའི་ཁྲོ་བོ་ཆེན་པོ་ཁྲོ་བོ་ཆེན་པོ་ཞེས་ཟོལ་འཇོག་སྨྲ་བ་ཡང་མུན་སྤྲུལ་ཁོ་ནར་འགྱུར་བས། ཕུར་བུའི་ཁྲོ་བོའི་མཚན་རྡོ་རྗེ་ཕུར་བུ་ཞེས་བྱ་བ་ཉིད་དེ། སྐུའི་རྣམ་པ་འདྲ་བ་ཉིད་གྲངས་བཅུ་སྒོམ་མོ། །ཨོཾ་ཧཾ་བཛྲ་ཀྲོ་དྷ་རཱ་ཛ་མ་ཧཱ་ཨུཥྞི་ཥ་ཞེས་སོགས་ཁྲོ་བོ་བཅུ་ལ་བཀའ་བསྒོ་བའི་སྔགས་བརྗོད་པའི་སྐབས་སུ་ཕུར་བུ་འདེབས་བྱེད་ཀྱི་ཁྲོ་བོ་དེ་ཉིད་ཕུར་བུའི་རྒྱབ་ཏུ་པད་ཉི་ལ་ཞུགས། ཕུར་བུ་བསྲུང་བར་བསམ་སྟེ། ཕུར་བུར་མ་ཟད་ཕྱོགས་སྲུང་པའོ། །བརྒྱད་པ་སྟང་སྟབས་ཀྱིས་ས་འཆག་པ་ནི། ཨོཾ་ཧཱུཾ་ཀྲོ་དྷ་ཨིནྜོ་སོགས་ཀྱིས་ང་རྒྱལ་བཟུང་ལ། ཞེས་པ་ནས་རྒྱུད་འགྲེལ་ནས་འབྱུང་ངོ་ཞེས་པའི་བར་ཏེ། དེ་ཡང་དབུས་སུ་གཡས་བརྐྱང་གཡོན་བརྐྱང་མཉམ་པའི་སྟབས་གསུམ་བྱེད་པ་ནི། རྡོ་རྗེ་གསུམ་དང་རྩ་གསུམ་དག་པར་བྱེད་པ་དང༌། བཤང་གཅི་ཁུ་བའི་ལམ་དགག་པའི་དོན་ཡིན་ལ། གཞན་རྣམས་ཕྱོགས་མཚམས་ཀྱི་རྩ་དང་རླུང་དང་ཐིག་ལེ་དག་པར་བྱེད་པའི་དོན་ཡིན་ཞིང༌། འདི་དག་ལ་གར་གྱི་རྣམ་པ་རྒྱས་པ་མ་ཡིན་པར་དངོས་བསྟན་
དང་འབྲེལ་པ་འདི་ཁོ་ན་ལ་ཅུང་ཟད་སྤྲོས་པ་བྱེད་ན། གཞི་བཅའ་དང་པད་སྐོར་སྔོན་དུ་འགྲོ་བའི་རྡོ་རྗེ་རྩེ་ལྔ་པའི་ཕྱག་རྒྱ་སྙིང་གར་རེག་ཅིང༌། གཡས་བརྐྱང་དང་ལྷན་ཅིག་ཏུ། ཨོཾ་ཨ་ལི་ཊ་བཛྲ་མ་ཧཱ་ཀྲོ་དྷ་བི་གྷུར་ཎ་བི་གྷུར་ཎ་ཡ། སརྦ་དུཥྟ་ན་སྭརྒ་དེ་བ། ཨཱ་དཱི་མ་རཱ་ན་ཧཱུཾ་ཕཊ་ཞེས་བརྗོད་པ་དང༌། དེ་བཞིན་དུ་ཨ་ལི་ཊའི་གནས་སུ་པྲ་ཏྱ་ལི་ཊ་དང་ས་མཱ་དང་བར་ཏུ་ལ་དང༌། ལ་ལི་ཏ་དང༌། ཏནྜ་བ་དང་བི་ཤཱ་ཥ་ཞེས་པ་རྣམས་བཅུག་པ་དང༌། སྭརྒ་དེ་བའི་གནས་སུ་བྷུ་མི་གྲ་ཧཱ་དང༌། ཏྲཻ་དྷཱ་ཏུ་ཀ་བསྠི་ཏ་དང༌། གནྡྷརྦྷ། ཡ་མ། ཡཀྵ། ནཱ་ག་ཞེས་པ་རྣམས་འཇུག་སྟེ། ཞིབ་ཏུ་ལག་ལེན་མཐོང་བ་ལས་ཤེས་པར་བྱའོ། ཁ་ཅིག་རྐང་པ་བདུན་ཅུ་རྩ་གཉིས་པའི་ལྕགས་ཀྱུ་ཕུར་བུ་ཐོ་བ་རྣམས་ཀྱི་སྔགས་ལ་བརྟེན་ནས་སྤྲོས་པ་བྱེད་པའང་ཡོད་དེ། རང་བཟོ་འབའ་ཞིག་གོ །ཡང་འཕྲེང་བ་སོགས་དང་བསྲེས་ཏེ། འཕྲེང་གར་ལ་སོགས་པའི་སྤྲོས་པ་བྱེད་ན། གཞུང་དེ་དང་དེ་ལས་ཇི་སྐད་འབྱུང་བ་ལྟར་བྱ་ཡི། ཕྱོགས་བཞི་གསོལ་གདབ་ལ་རིགས་ལྔ་སོ་སོར་ཡན་ལག་བཞི་རྫོགས་ཀྱིས་བསྐྱེད་པ་དང༌། མཆོད་བསྟོད་ལ་སོགས་པའི་སྤྲོས་པ་ཧ་ཅང་ཆེ་བ་ནི་མི་ལེགས་ཏེ། ལར་ནས་དུས་ཀྱི་འཁོར་ལོའི་ཁོར་ཡུག་གི་ལྷའི་སྤྲོས་པ་དང༌། འདོད་ཕྱིར་འདོད་ཀྱི་ས་བོན་གྱི་བཤད་པ་དང༌། ས་ཆོག་དང་བུམ་བསྐྱེད་སྤྲོས་པ་འདི་རྣམས་ཀྱིས་བོད་ཀྱི་དུས་འཁོར་བར་ཁས་འཆེ་བ་ཕྱིས་བྱུང་མང་པོའི་ལས་ཐེབས་ཆེ་ཚད་ཞིག་བཅག་འདུག་གོ །དགུ་པ་རྡོ་རྗེའི་ས་སྤྱན་འདྲེན་པ་ནི། སླར་ཡང་དཀྱིལ་འཁོར་གྱི་ས་གཞི་ལ་ཞེས་པ་ནས། ས་ལྷག་པར་གནས་པའོའི་བར་ཏེ།
སྔར་གཤེགས་སུ་གསོལ་བའི་སའི་ལྷ་མོ་སྤྱན་དྲངས་ཏེ་ས་ལ་སྟིམ་པ་ནི། འགྲེལ་ཆེན་ལས། སྔར་བཞིན་ཞེས་པའི་ཚིག་ཟུར་དང༌། བསྟན་བཅོས་ལས་འབྱུང་ཞིང་བླ་མའི་མན་ངག་ཀྱང་སྟེ། ཕྱོགས་དེར་བཀྲ་ཤིས་པའི་དགོས་པ་ཁྱད་པར་ཅན་ཡོད་ཅིང༌། དོན་གྱི་གཙོ་བོ་དོན་དམ་རྡོ་རྗེའི་སས་བྱིན་གྱིས་རློབས་པ་ཡིན་ལ། འདི་ཉིད་ཆོ་ག་གཞན་གྱི་སའི་ལྷ་མོ་སྟ་གོན་གྱི་དོད་བྱིན་རླབས་ཀྱི་སྒོ་ནས་ལྷག་ཆོས་དང་བཅས་པ་ཡིན་པས། གཞན་དག་ནང་བར་སྤྱི་འགྲོ་ས་ལྷ་སྟ་གོན་ལོགས་སུ་བྱེད་པ་ནི་ལྷག་པ་ཡིན་ཞིང༌། སྐབས་འདིར་ཡང་ས་སློང་བའི་ཆོ་ག་བསྐྱར་ནས་མི་དགོས་ཏེ། ཐུན་གཅིག་ལ་ས་སླང་བ་ལན་གཉིས་བྱས་ན་ཧ་ཅང་ཐལ་བར་འགྱུར་རོ། །སླར་ཡང་ས་ལ་མཆོད་པ་འབུལ་བ་ནི། ས་གཞི་དམ་ཡེ་དབྱེར་མེད་ལ་དགའ་སྟོན་བྱེད་པ་སྟེ། རྒྱུད་འགྲེལ་ལས་གསལ་བར་གསུངས་པའོ། །བཞི་པ་རྗེས་ཀྱི་ཆོ་ག་ནི། དེའི་འོག་ཏུ་སླར་ཡང་སྲུང་མ་དྲུག་ཅུའི་གཏོར་མ་འབུལ་བ་དང༌། གཤེགས་གསོལ་དང༌། སྨོན་ལམ་སོགས་ཞོར་ལ་འོངས་པའི་ཆོ་གའོ། །གལ་ཏེ་འཕྲེང་བ་སོགས་ཀྱི་སྤྱི་འགྲོས་དང་བསྲེས་ཏེ་སྤྲོས་པ་བྱེད་འདོད་ན། དེའི་ལུགས་བཞིན་དུ་གོ་རིམ་ཡང་ཅུང་ཟད་བསྒྱུར་ཏེ། ཉི་མ་དེ་ལ་ཐོག་མར་བདག་བསྐྱེད་མི་བྱེད་པར། དང་པོར་ཡུལ་བདག་གྲོང་བདག་ལས་ས་བསླངས། དེ་ནས་སའི་ལྷ་མོ་མཆོད་ཅིང་གཤེགས་སུ་གསོལ། དེ་ནས་སྔགས་ཀྱིས་ས་སྦྱངས། དེ་རྗེས་དཀྱིལ་འཁོར་གྱི་ས་གཞིར་འདུག་ནས། སྲུང་འཁོར་དང་བཅས་པའི་བདག་བསྐྱེད་རྒྱས་པར་བསྒོམ། མ་
ལུས་ཕྱོགས་ན་བཞུགས་པ་ཡི་སོགས་ཀྱིས་སྙན་མནན། རྡོ་རྗེ་ཆེ་དང་དྲིལ་བུ་ཆེ་སོགས་ཀྱིས་ཕྱོགས་བཞིའི་གཙོ་བོ་བསྐོས། དེ་ནས་ཕྱོགས་བཞིའི་གསོལ་བཏབ་བྱས་ནས་དཀྱིལ་འཁོར་ནམ་མཁའ་ལ་བཏེགཕྱག་དང་སེམས་བསྐྱེད་དང་ཁྲོ་བོའི་ང་རྒྱལ་དང་རྡོ་རྗེའི་ལྟ་བས་ཕྱོགས་ཐམས་ཅད་དུ་ལྟ་ཞིང་འགྲོ་བས་ང་རྒྱལ་བསྐྱེད་པ་དང༌། རྐང་སྟབས་རྣམས་ཀྱིས་ཕྱོགས་རྣམས་སུ་བསྐོར་བ་དང༌། བགེགས་ལ་བཀའ་བསྒོ་བ་དང༌། དཀྱིལ་འཁོར་གྱི་ས་གཞི་བྱིན་གྱིས་བརླབས་པ་དང༌། ཐབས་ཤེས་ཁ་སྦྱོར་གྱི་གར་དང༌། གཡས་བརྐྱང་ལ་སོགས་པ་གནས་ངེས་ཅན་ལྔ་དང༌། སྐྱེས་པའི་རྐང་སྟབས་སོགས་ངེས་མེད་བརྒྱད་དང༌། རྒྱ་མཚོའི་རླབས་སོགས་གོམ་པས་བགྲོད་ཚུལ་བཞི་དང༌། བསྣུན་པ་ལ་སོགས་པ་ཀུན་བསྐྱོད་དགུ་དང༌། རྡོ་རྗེ་བསྒྲེང་བ་སོགས་ཚུལ་དྲུགརལ་གྲི་སོགས་ཚུལ་བཅུ་གསུམ། གདན་གྱི་ཚུལ་བཅུ་སྟེ་ཚུལ་ཉེར་དགུ་དང༌། རྡོ་རྗེའི་ལྟ་བ་གཉིས་དང༌། གར་གྱི་ཉམས་དགུ་སོགས་ཕྱོགས་འདིར་འཕྲེང་གར་དུ་གྲགས་པ་རྣམས་ཀྱང་ཇི་ལྟར་འོས་པ་བྱ་སྟེ། མཐར་བགེགས་ལ་ཕུར་བུས་བཏབ། ས་གཞི་སྤྱན་འདྲེན་བྱེད་པའི་སྲོལ་ཡོད་པ་ལྟར་བྱའོ། །འོན་ཀྱང་རྒྱུད་འགྲེལ་ལས་གསུངས་པའི་ཆོ་གའི་གོ་རིམ་བསྒྱུར་བ་ནི་ཅུང་མི་ལེགས་པར་མངོན་ལ། ལྷག་མ་གར་གྱི་བྱ་བ་སྣོན་པ་ནི་འགལ་བ་མེད་དེ། རྒྱུད་འགྲེལ་ཉིད་ལས་ཀྱང་བྷ་ར་ཏ་ལ་ཁ་འཕངས་མཛད་པས་སོ། །གོང་དུ་བཤད་པའི་རྐང་སྟབས་ཀྱི་སྔགས་དང༌། འཕྲེང་གར་སོགས་ཀྱི་ཚུལ་ཐ་དད་པའི་སྔགས་མང་པོ་འདི་
རྣམས་རྡོ་རྗེ་གུར་དང་སྒྱུ་དྲ་དང༌། ཕྱག་རྡོར་དབང་བསྐུར་སོགས་གར་གྱི་ཚུལ་སྟོན་པའི་རྒྱུད་ནས་གསུངས་པ་མ་ཡིན་ལ། དེའི་ཕྱིར་འཕྲེང་པའི་དངོས་བསྟན་ལ་ཡང་མེད་དོ། །འོན་ཀྱང་རིགས་ཀྱི་བྱིན་པ་དང༌། དར་པན་ཨ་ཙརྱ་སོགས་ཀྱིས་ནི་བཤད་དེ། བྷ་ར་ཏ་ལས་གར་གྱི་སྐབས་སུ་ལྷ་མིན་དང་བགེགས་ཞི་བྱེད་ཀྱི་ཚིག་མང་པོ་ཡོད་པ་རྣམས་དང་ཕྱོགས་མཚུངས་པར་སྔོན་གྱི་གསང་སྔགས་པ་ཆེན་པོ་རྣམས་ཀྱིས་སྦྱར་པའི་ལག་ལེན་བྱིན་རླབས་ཀྱི་རྒྱུན་དང་ལྡན་པ་ཡིན་ནོ་ཞེས་གྲགས་སོ། །འོན་ཀྱང་དཔལ་གྱི་མགུར་ནས་བྱུང་བ་མ་ཡིན་པས་ཅི་བདེར་སྤྱོད་དོ། །ཡང་དུས་ཀྱི་འཁོར་ལོའི་སྲུང་འཁོར་ཡོངས་རྫོགས་ནི། དཀྱིལ་འཁོར་རྒྱས་པ་ཞིག་དང་ཁྱད་མེད་ལ། ས་བཟུང་བ་ལ་སྲུང་འཁོར་ཁོ་ན་ལ་བརྟེན་པས་ཀྱང་རུང་པ་ལྟ་བུར་རྒྱུད་འགྲེལ་ལས་གསུངས་པས། མངོན་རྟོགས་རྒྱས་པ་ཐོག་མར་མི་སྒོམ་ཕྱིན། ས་གཞིའི་དབུས་སུ་འདུག་ནས་སྒྲུབ་ཐབས་རྒྱས་པ་སྒོམ་པའི་དོད་དུ། བདུད་སྲེག་པ་སྔོན་དུ་འགྲོ་བའི་སྲུང་འཁོར་རྒྱས་པ་ཙམ་བསྒོམས་ནས། སྙན་མནན་པ་མན་ཆད་བྱས་ཀྱང་ཆོག་པར་མངོན་མོད། དེ་དག་ན་འཕྲོས་དོན་ཙམ་ཡིན་གྱི། དཀྱུས་སུ་བཤད་པའི་རང་ལུགས་སྤངས་ནས་གཡར་པོའི་སྤྲོས་པས་ཅི་ཞིག་བྱ། གཉིས་པ་སྟ་གོན་གྱི་བྱ་བ་ལ། གསོལ་པ་བཏབ་པ་དང༌། རྫས་ལྔ་ལྷག་གནས་དང༌། སློབ་མ་ལྷག་གནས་དང༌། མལ་སྟན་ལྷག་གནས་ཏེ་བཞི་ལས། དང་པོ་ནི་དཀྱིལ་འཁོར་གྱི་ས་གཞིར་དྲི་བཟང་གིས་བྱུགས། ཞེས་པ་ནས། ལས་ཀྱི་རྗེས་མི་མངོན་པར་བསྡུའོ། །ཞེས་པའི་བར་རོ། །དེ་ལ་གསོལ་བ་གདབ་པ་ཞེས་
བྱ་བ་འདི་ནི། ལུགས་འདིའི་ལྷ་སྟ་གོན་གྱི་དོན་ཡིན་པར་གྲུབ་ཅིང༌། དེ་ཡང་སྟ་གོན་དངོས་ཀྱི་ཚུལ་དུ་བྱེད་ན། ཉི་མ་གཉིས་པའི་སྐབས་འདིར་བྱ་བ་ཡིན་ཞིང༌། སྟ་གོན་ལྷག་གནས་ཀྱི་ཚུལ་དུ་མི་བྱེད་ན། ཉི་མ་དང་པོའི་སྐབས་ཇི་ལྟར་འོས་པར་བྱས་ཀྱང་འགལ་བ་མེད་དེ། རྒྱུད་སྡེ་གཞན་ལུགས་ཀྱི་ལྷ་སྟ་གོན་གྱི་དོད་ཡིན་ཡང་དོད་ཙམ་ཡིན་གྱིས་དངོས་མ་ཡིན་པའི་ཕྱིར། རང་རང་གི་ལུགས་ལ་གང་འབྲེལ་ཆགས་པ་དེའི་སྐབས་སུ་བྱེད་པ་ཡིན་གྱི། དོད་པོ་དེའི་ཤུལ་གྱི་དུས་སྐབས་སུ་དགོས་པར་མ་ངེས་སོ། །འོན་ཀྱང་རྒྱུད་ལས། གང་དག་ཕྱོགས་རྣམས་ཀུན་ན་སོགས་གསོལ་གདབ་ཀྱི་ཚིག་གི་རྗེས་སུ། །དེ་དག་ཀུན་ལ་གསོལ་བ་བཏབ་ནས་སེང་ལྡེང་རང་བཞིན་སྲ་བའི་ཕུར་བུ་རྣམས་ཀྱིས་ས་ལ་གདབ། །ཅེས་འབྱུང་ན། གསོལ་གདབ་ཀྱི་རྗེས་དེ་མ་ཐག་པར་ཕུར་གདབ་བྱེད་པ་ལྟར་བྱུང་ཡང༌། བཏབ་ནས་ཞེས་པའི་ནས་ཞེས་པ་ནི་དེ་མ་ཐག་པ་ཡང་མིན་ལ། སྔ་ཕྱིའི་གོ་རིམ་སྟོན་པའང་མིན་ཏེ། ཚིག་གི་ཕྲད་མཚམས་སྦྱོར་བ་ཙམ་ཡིན་པས་ན། བཏབ་སྟེ་ཞེས་པའི་དོན་ཡིན་ཏེ། རྭ་འགྱུར་ལས། དེ་རྣམས་ཀུན་ལ་གསོལ་བ་བཏབ་སྟེ་སེང་ལྡེང་ལས་བྱུང་མཁྲང་པའི་ཕུར་བུ་རྣམས་ནི་ས་ལ་གདབ། །ཅེས་འབྱུང་ཞིང༌། འ་ཞ་འགྱུར་ལས་ནི། ཚིག་གི་ཕྲད་ཙམ་མ་གཏོགས། དོན་གཞན་སྟོན་རྒྱུ་མེད་པས་མི་མངོན་བར་བསྡུས་ཏེ། དེ་རྣམས་ཉིད་ལ་གསོལ་བཏབ་ཐམས་ཅད་ལ་ནི་སྲ་བའི་སེང་ལྡེང་ལས་བྱུང་ཕུར་བུས་ས་ལ་གདབ། ཅེས་འབྱུང་བ་བཞིན་ཡིན་ཏེ། འདིའི་རྒྱ་སྐད་དུ། ཏཱ་ནེ་བཱ་དྷྱེ་ཥྱ་
སརྦཱན་དྲྀ་ཌྷ་ཁ་དིར་མ་ཡཻཿ ཀཱི་ལ་ཀཻཿཀཱི་ལ་ཡེ་ཏ་ཀྵྨཱཾ། ཞེས་པ་བསྒྱུར་ན། ཏཱ་ནེ་བ་དེ་དག ཨ་དྷྱཻ་ཥྱ་གསོལ་བ་བཏབ་ཅིང༌། སརྦཱན་ཀུན་ལ། དྲྀ་ཌྷ་སྲ་བ། ཁ་དིར། སེང་ལྡེང༌། མ་ཡཻཿ ལས་བྱུང་པ། ཀཱི་ལ་ཀཻཿ ཕུར་བུ་རྣམས་ཀྱིས། ཀཱི་ལ་ཡེ་ཏ་ཕུར་བུས་གདབ། ཀྵྨཱཾ་ས་ལ་ཞེས་པའོ། །དེས་ན་འདིའི་རིགས་ཀྱི་མཚམས་སྦྱོར་བའི་ཚིག་ཕྲད་ནི། རྒྱ་སྐད་དུ་ཥྱ་ཞེས་པའི་ཡ་བཏགས་དེ་ཁོ་ན་ཡིན་པ། ནས་ཏེ་ཅིང་ཞེས་སོགས་གང་དུ་བསྒྱུར་ཡང་འདྲ་སྟེ། གསོལ་བ་ཡང་བཏབ། ཕུར་བུ་ཡང་འདེབས་ཞེས་པར་འགྱུར་གྱི། སྔ་ཕྱིའི་གོ་རིམ་དུ་ནམ་ཡང་མི་འགྱུར་རོ། །ཁྱད་པར་དུ་ཡང་ས་ལྷའི་ཆོ་ག་དང༌། ཕུར་གདབ་ཀྱི་བར་དུ་དེ་གསུངས་པ་ནི། གསོལ་གདབ་ཀྱི་ཚིག་གཉིས་རིགས་འདྲ་སྡེ་ཚན་གཅིག་ཏུ་མཛད་པ་དང༌། སློབ་དཔོན་མེད་པར་རང་ཀར་འཇུག་པ་དགག་པའི་དོན་ཡིན་ལ། དེ་ཉིད་གང་དུ་བྱེད་པའི་ས་མཚམས་ནི། འོག་ཏུ། སེམས་ཅན་རྣམས་ནི་ཐར་པའི་སླད་དུ་ཆེ་གེ་བདག་ཀྱང་གཙོ་བོའི་དཀྱིལ་འཁོར་དག་ནི་བཞེང་བར་བགྱིད། ཅེས་པ་འདི་ཡིན་ཏེ། དེའི་དེ་མ་ཐག་ཏུ། དག་པའི་གནས་ནི་ལེགས་པར་གང་ཞིང་ཤིན་ཏུ་མཉམ་པར་བཀོད་པ་རུས་སྦལ་རྒྱབ་བཞིན་མཐོ་བ་དག །ཅེས་སོགས་རྫས་ལྔ་སྟ་གོན་བྱེད་པར་གསུངས་ཤིང་བཞེང་བར་བགྱིད་ཅེས་པའི་རྗེས་སུ། གང་དག་ཕྱོགས་རྣམས་ཀུན་ནས་སོགས་སྤྲེལ་རྒྱུ་ཡིན་པ་ཤིན་ཏུ་གསལ་བའི་ཕྱིར་དང༌། རྒྱུད་དོན་ཕྱིན་ཅི་མ་ལོག་པར་དགོངས་པ་རྣམས་ཀྱི་མན་ངག་ལས་ཀྱང་འབྱུང་ངོ༌། །མཁས་
མཆོག་བུ་སྟོན་གྱིས་ཀྱང་སེམས་ཅན་རྣམས་ནི་ཐར་པའི་སླད་དུ། ཞེས་སོགས་ཀྱིས་ལྷ་སྟ་གོན་བསྟན་པར་བཞེད་ན། དེ་ལས་བརྒྱུད་པར་འདོད་པ་ཁ་ཅིག་ནི་རང་ཉིད་ལྷ་སྟ་གོན་འོག་ཏུ་བྱེད་པ་དེ་ཁོ་ན་སྙིང་ལ་བཞག་ནས་འདི་སྐད་དུ། དེ་མི་འཐད་དེ་འདི་ནི་སློབ་མ་སྲུང་བ་བྱས་པའི་རྗེས་སུ་སློབ་མ་ལ་བར་ཆད་མི་འཇུག་པའི་ཕྱིར། སངས་རྒྱས་ལ་གསོལ་བ་འདེབས་པ་ཙམ་ཡིན་ཟེར་བ་ནི། དཀྱིལ་འཁོར་དག་ནི་བཞེང་བར་བགྱི། ཞེས་པའི་ཚིག་དོན་མེད་དུ་བཏང་བ་དང༌། གང་དག་ཕྱོགས་རྣམས་ཀུན་ན་ཞེས་སོགས་ཁོ་ན་ཙམ་ཞིག་གཞན་དུ་སྐྱོགས་པ་ཙམ་ལ་སེམས་ཚིམ་པར་ཟད་དོ། །འདི་ནི་སྤྱི་རྒྱུད་ལས་འབྱུང་བའི་སྙན་གསན་དབབ་པ་དང་དོན་གཅིག་སྟེ། འདིར་སེམས་ཅན་རྣམས་ནི་ཐར་པའི་སླད་དུ་ཞེས་པ་དང༌། སློབ་མ་རྣམས་ལ་བརྩེ་ཕྱིར་དང༌། ཞེས་སོགས་དོན་གཅིག་ལ། ཆེ་གེ་བདག་ཀྱང་སོགས་དང༌། མགོན་པོ་ཐུགས་རྗེའི་བདག་ཉིད་སོགས་དོན་གཅིག །གང་དག་ཕྱོགས་རྣམས་ཀུན་ན་སོགས་དང༌། སངས་རྒྱས་འགྲོ་འཁོར་སོགས་དོན་གཅིག །མཆོག་གིས་ཐུགས་རྗེས་སོགས་དང༌། བདག་ནི་རྡོ་རྗེ་ཆེ་གེ་ཅན། སོགས་དོན་གཅིག་པས། སེམས་ཅན་རྣམས་ནི་སོགས་དང༌། གང་དག་ཕྱོགས་རྣམས་ཀུན་ན་སོགས་སྦྲེལ་དགོས་པར་ངེས་ཤིང༌། དེ་ཡང་ཚིག་རྐང་གསུམ་པོ་དེ་སྙན་གསན་དབབ་པར་གོ་དགོས་པ་དང༌། རྒྱུད་གཞན་གྱི་ལུགས་ཀྱི་སྙན་གསན་དབབ་པ། བཅོམ་ལྡན་ཆེ་གེ་མོ་ཞེས་མཆོག་ཅེས་སོགས་མེད་ཀྱང༌། གོང་མས་རང་ལུགས་ལ་ཆོག་པ་དང༌། སྤྲོས་པ་ལ་མོས་ན་
དོན་གཅིག་པའི་ཕྱིར་གཉིས་ཀ་བྱས་ཀྱང་མི་འགལ་བར་གོ་བར་བྱ་ཡི། ཁ་ཅིག་ལྟར་འབྲེལ་མེད་ཀྱི་ཅལ་ཅོལ་ལ་ལེགས་བཤད་དུ་བརྫུ་བར་མི་བྱའོ། །ཡང་དེ་དག་འདི་སྐད་ཅེས་རྒྱུད་གཞན་ལ་བུམ་པ་སྟ་གོན་གྱི་སྔོན་དུ་ལྷ་སྟ་གོན་བྱེད་ཀྱང༌། དུས་འཁོར་ལ་ནི་མི་རུང་སྟེ་མལ་སྟན་ལྷག་གནས་ཀྱི་སྔོན་དུ་རྫས་ལྔ་སྟ་གོན་འགྲོ་དགོས་པར་བཤད་ལ། མལ་སྟན་ལྷག་གནས་ཀྱིས་རྨི་ལམ་བརྟགས་ནས། ངན་ན་རེ་ཞིག་ཐིག་མི་འདེབས་པར་བགེགས་གཞོམ་པ་བྱེད་ལ། བཟང་ན་གདོང་ཐིག་འདེབས་དགོས་པ་ཡིན་པར་དུས་འཁོར་བ་ཐམས་ཅད་འདོད་དགོས་ལ། ཐིག་མ་བཏབ་པར་ལྷ་སྟ་གོན་མི་རུང་སྟེ་ལས་ཐིག་མ་བཏབ་པ་ལ་ལྷག་གནས་ཀྱི་ལྷའི་གནས་ངེས་ཐུབ་པ་མི་སྲིད། ལྷག་གནས་ཀྱི་ལྷ་སོ་སོའི་གདན་གྱི་སར་རྡུལ་ཚོན་གྱི་ལྷ་མཚན་རྣམས་མ་འཆོལ་བར་དགོས་པའི་ཕྱིར། རྫས་ལྔ་ལྷག་གནས་དེ་རིང་བྱས་པའི་ནང་བར་ལས་ཐིག་བཏབ་ནས་ལྷ་ལྷག་གནས་བྱེད་པ་ཡིན་ནོ་ཞེས་སྨྲ་ཞིང༌། འདི་བའི་དུས་འཁོར་དུ་མ་ཟད་རྒྱུད་སྡེ་བཞིའི་དཀྱིལ་འཁོར་ཆེ་ཆུང་གང་ལ་ཡང༌། ལས་ཐིག་སྔོན་དུ་མ་སོང་བར་ལྷ་སྟ་གོན་མི་རུང་སྟེ། ལྷག་གནས་ཀྱི་ས་གཞི་ངེས་མི་ཐུབ་པའི་ཕྱིར། ཞེས་པ་འདི་ཁོ་ན་ཡང་སྐྱོར་ཞེ་སྐྱོར་རྒྱུ་མཚན་དུ་འགོད་ཅིང༌། ཡེ་ཐིག་རྗེས་སུ་ལས་ཐིག་བྱེད་པ་ནམ་ཡང་མི་རུང་བར་སྨྲའོ། །འདི་ནི་སྨྲ་བ་པོ་དེ་རྣམས་ཉིད་བློ་གྲོས་ཤིན་ཏུ་ཆེ་བའི་རློམ་པ་ཡོད་ཀྱང༌། འཕྲལ་གྱི་བྱ་བ་ལ་བྱེ་བྲག་ཕྱེད་པའི་སྤྱང་གྲུང་གི་རིག་པ་མེད་པ་ཞིག་སྟེ། ལྷ་ལྔ་ནས་སུམ་ཅུ་ཙམ་གྱི་བར་ལ་ཐིག་ལ་མ་བལྟོས་པར་མིག་ཚོད་ཤིན་ཏུ་འགྲིག་
པོར་ཡོད་པ་ད་ལྟ་ཡང་ཤིན་ཏུ་མང་ལ། བློས་ཁྱད་པར་ལས་དུས་འཁོར་ཡོངས་རྫོགས་ལྟ་བུ་ལྷ་ཤིན་ཏུ་མང་བ་ལ་ཡང་མིག་ཚོད་མི་འཆུག་པའི་བློ་རྣོན་པོ་ད་ལྟར་ཡང་ཡོད་སྲིད་ན། སྔོན་གྱི་མི་བློ་གྲིམ་པོ་དག་ལ་ལྟ་ཅི་སྨོས། དེ་ལ་ཁྱེད་འདི་ལྟར་སེམས་ཏེ། བློ་གྲོས་ཡངས་པོ་དེ་ལྟ་བུ་ལ་ཡང་མིག་ཚོད་དེ་འདྲ་བ་མེད་ན། གཞན་དག་ལ་ལྟ་ཅི་སྨོས་སྙམ་འདུག་སྟེ། ང་རྒྱལ་གྱི་རྩ་བ་ཅན་གྱི་གཏི་མུག་གླེན་རྟགས་སོ། །ཡང་དེའི་རྗེས་འབྲང་ཁ་ཅིག་དུས་འཁོར་ལ་ཐིག་བཏབ་པའི་རྗེས་སུ་ལྷ་སྟ་གོན་བྱེད་དགོས་ཏེ། འགྲེལ་ཆེན་ལས། འདིར་ཐིག་བཏབ་ཅིང་ལྷའི་གནས་ཐམས་ཅད་སྦྱངས་པར་གྱུར་པ་ན། དེ་ནས་དྲི་དང་མེ་ཏོག་ལ་སོགས་པ་དང༌། གཏོར་མ་བྱིན་ཏེ་ཕྱི་ནས་རྡུལ་ཚོན་དགྱེ་བ་བརྩམ་པར་བྱའོ། །ཞེས་གསུངས་ཟེར་བ་ནི། ལུང་གི་རྒྱབ་རྟེན་མ་རྙེད་པའི་ཅི་ཟེར་ཟད་པ་སྟེ། འདིའི་དོན་ནི་ཐིག་ལེགས་པར་བཏབ་པས། ལྷ་སོ་སོའི་བཞུགས་གནས་ཐམས་ཅད་ཀྱང་སྦྱངས་པ་སྟེ་དག་ཅིང་མ་ནོར་བར་གྱུར་ཟིན་པ་ན། དེ་རྗེས་སྲུང་མ་དྲུག་ཅུ་དང༌། རྣལ་འབྱོར་མའམ་མཁའ་འགྲོ་མ་ལ་གཏོར་མ་སྦྱིན། དེ་ནས་རྡུལ་ཚོན་འགྱེད་ཅེས་པའི་དོན་ཁོ་ན་ཡིན་པས་སོ། །དེས་ན་སྐབས་འདིའི་ལྷ་ལྷག་གནས་ནི་སངས་རྒྱས་རྣམས་ལ་གསོལ་བ་གདབ་པ་དེ་ཡིན་ལ། དེ་ནི་རྫས་ལྔ་སྟ་གོན་གྱི་སྔོན་དུ་གསལ་བར་གསུངས་པ་ལས་འགོད་པར་མི་བྱའོ། །ཡང་འདི་སྙམ་དུ་དེ་ལྟར་ཡིན་དུ་ཆུག་ཀྱང་མིག་ཚོད་འགྲིག་པོ་དཀོན་པའི་ཕྱིར། ལྷ་ལྷག་གནས་ཀྱི་སྔོན་དུ་ཐིག་མི་འདེབས་པའི་ཐབས་མེད་སྙམ་ན། ལྷག་གནས་མ་འཆོལ་བར་བྱེད་པའི་ཐ་སྙད་འདི་ནི། རྒྱ་བོད་ཀྱི་སློབ་དཔོན་ཕྱི་མ་རྣམས་ཁོ་ན་
ལ་གྲགས་པ་ཡིན་པའི་ཕྱིར་ཁུངས་ཤིན་ཏུ་ཆུང་ལ། སྒོས་སུ་དུས་ཀྱི་འཁོར་ལོའི་ལུགས་ལ་དེ་ལྟ་བུ་རྩི་དགོས་པ་ཡིན་པ་ཁོ་ནའོ། །རང་ལུགས་ལ་གཅིག་ཏུ་དགོས་པ་མ་ཡིན་ཡང་གཞན་དོར་བྱེད་པ་དང་བླ་ཆོས་ལ་ནི་ཚད་མི་བཞག་གོ །དེས་ན་རྒྱ་བོད་ཀྱི་སྔགས་པ་འགའ་ཞིག་གིས་ཐིག་ཚོན་གྱི་ལས་བྱེད་པ་གླེན་བླུན་མང་པོ་དག་འཇུག་པ་བདེ་བའི་ཕྱིར། ལྷ་སྟ་གོན་གྱི་སྔོན་དུ་ཐིག་འདེབས་པར་བྱེད་ཅིང་ཡི་གེར་ཡང་འགོད་པ་ནི། ལྷག་གནས་མི་འཆོལ་བའི་ཕྱིར་སྐམ་ཐིག་ཙམ་འདེབས་པ་ལས་ཐིག་ཆོག་མི་བྱེད་ཅིང༌། ལས་ཐིག་ཕྱིས་འདེབས་པ་ཡིན་པ་ལ། བོད་པ་རྗེས་མ་རྣམས་ཀྱིས་ལས་ཐིག་འདེབས་ཐེངས་གཅིག་པོ་དེས་གོ་ཉིས་ཆོད་བྱེད་པའི་བླ་ཆོས་ཀྱི་ལག་ལེན་ནོར་བ་བྱས་པ་དེ། ལག་ལེན་ཡང་དག་ཏུ་སྒྲུབ་པའི་ངོ་བོའི་ཅི་ཞིག་བྱ། འདིས་ནི་ནོར་བ་དེ་ཡང་དག་ཏུ་འབད་པས་སྒྲུབ་པ་དང༌། མ་ནོར་པ་ལ་ནོར་རོ་ཞེས་གྱ་གྱུ་ཅན་དུ་གསལ་བར་བྱེད་པའོ། །རྒྱ་གཞུང་དཀྱིལ་ཆོག་ཁུང་མ་ཐམས་ཅད་ལས་ལྷག་གནས་ཀྱི་རྗེས་སུ་ཐིག་འདེབས་པ་ཁོ་ན་ཡོད་ཅིང། དེ་ཡང་ཡེ་ཐིག་འབའ་ཞིག་མ་ཡིན་ཏེ། དཀར་ཐིག་ངེས་པར་གདབ་དགོས་པའི་ཕྱིར་ན། དཀྱིལ་ཆོག་ཤིན་ཏུ་བསྡུས་པ་རེ་རེ་ཙམ་མ་གཏོགས། ལས་ཐིག་འཕྲོས་གླེང་མེད་པར་འཇོག་པའི་རྒྱུ་མཚན་ཡང་མེད་པའི་ཕྱིར། གསལ་ཁ་མ་གསུངས་པ་རྣམས་ནི་ལས་ཡེ་ལྷན་ཅིག་ཏུ་སྟོན་པ་ཡིན་ནོ། །དེས་ན་དཀྱིལ་ཆོག་གཞན་རྣམས་ཀྱི་ལུགས་ལ་སྔོན་ལ་ལས་ཐིག་བཏབ་ནས་ཡེ་ཐིག་གིས་བྱིན་གྱིས་རློབས་པའི་ལུགས་གཅིག་དང༌། སྔོན་ལ་ཡེ་ཐིག་ཡིད་ཀྱིས་ཕབ་ནས་དེའི་ཚེ་དབྱེ་བའི་ཕྱིར་ལས་ཐིག་འདེབས་པ་གཉིས་ཡོད་ལ། འདིར་
ནི་ལས་ཡེའི་དབྱེ་བ་མེད་དེ། རྡོ་རྗེའི་ཐིག་ཅེས་པ་ཁོ་ནར་ཟད་དོ། །དེས་ན་ལྷ་སྟ་གོན་གྱི་གོང་དུ་ཐིག་ཆོག་དགོས་པ་ལ་རྒྱུ་མཚན་མེད་ཅིང་གནོད་བྱེད་ཡོད་པས་ལོག་རྟོག་ལ་ཞེན་པར་མི་བྱའོ། །ད་ནི་འདིར་མེད་དུ་མི་རུང་བའི་གསོལ་བ་གདབ་པའི་ཆོ་ག་ནི་འདི་ཙམ་ཞིག་སྟེ། ནམ་མཁའི་དབྱིངས་སུ་གསོལ་བ་གདབ་པའི་ཡུལ་ངེས་ཅན་གདོད་ནས་གྲུབ་པའི་དུས་ཀྱི་འཁོར་ལོ་དཀྱིལ་འཁོར་ཡོངས་རྫོགས་བཞུགས་པ་གསལ་བཏབ་ཅིང༌། ཡུལ་ངེས་མེད་ཕྱི་ནང་ཕྱོགས་མཚམས་ཐམས་ཅད་ཁྱབ་པའི་སངས་རྒྱས་བྱང་སེམས་དཔག་ཏུ་མེད་པ་གསལ་བཏབ་ནས་མཆོད་པ་རྒྱ་ཆེར་བཤམས་བྱིན་གྱིས་བརླབས་ཏེ། མཆོད་བསྟོད་ཕུལ་ཞིང༌། སེམས་ཅན་རྣམས་ནི་སོགས་ཚིག་རྐང་གསུམ་གྱི་དཀྱིལ་འཁོར་བྲི་བའི་སླད་དུ་གསོལ་བ་འདེབས་པ་དང༌། གནང་བ་སྩལ་བར་བསམ་པ་ཙམ་ཞིག་ཡིན་ལ་མཆོད་པ་ནི་རྒྱས་པ་ཉིད་བཟང་ ངོ༌། །འདི་ནི་རྒྱུད་འགྲེལ་གྱི་དངོས་བསྟན་ཉིད་ཡིན་པས་དངོས་གནས་ལ་སྐྱོན་མེད་ཡོན་ཏན་ཀུན་ལྡན་ལྷག་ཆད་བྲལ་བ་ཉིད་ཡིན་ལ། དཀྱིལ་ཆོག་འཇུག་པའི་དངོས་བསྟན་དཀྱུས་ནི། དུས་ཕྱིས་བོད་དུ་ཆོག་གྲྭ་བྱེད་པ་ལ་བཀོད་པ་མཛེས་ཤིང་ཚིག་འདོད་གྱི་སྤྲོས་པ་ཧ་ཅང་ཆེས་པ་མིན་ཙམ་ཞིག་དགོས་པ་བྱུང་བས་དོན་དང་མི་འགལ་པ་ལ། ལག་ལེན་ལྷག་པོ་ཅུང་ཟད་ཀྱིས་བརྒྱན་པར་བྱས་པ་འདི་ཡང་བླ་མ་བརྒྱུད་པའི་མན་ངག་ཡིན་ཞིང༌། ལྷ་སྟ་གོན་གྱི་ཐ་སྙད་སྦྱོར་པའི་ཕྱིར་ལེགས་པའང་ཡིན་ནོ། །འདི་ལ་ལྷག་གནས་ཀྱི་སྔོན་འགྲོ་ནི་བདག་བསྐྱེད་བཟླས་པ་དང་བཅས་པ་དང༌། དཀྱིལ་འཁོར་གྱི་གཞི་ལ་རྐྱང་ནུལ་བྱེད་པ་དང༌། སྐམ་ཐིག་ཅི་རིགས་པ་འདེབས་པ་དང༌། ལྷའི་གདན་དུ་དྲི་བཟང་གི་ཐིག་ལེའམ་ཚོམ་བུ་དགོད་
པ་དང༌། མཆོད་གཏོར་ཤོམ་པ་རྣམས་ཡིན་ལ། དངོས་གཞི་ནི་བསངས་སྦྱངས། དཀྱིལ་འཁོར་སྐད་ཅིག་གིས་བསྐྱེད་མགྲོན་རྣམས་སྤྱན་དྲངས། ཕྱི་མཆོད་ནང་མཆོད་སོགས་མཆོད་བསྟོད་ཇི་ལྟར་འོས་པ་བྱ། གསོལ་བ་བཏབ་པའི་རྗེས་སུ་སྙན་གསན་ཕབ་ཅིང་གཏོར་མ་འབུལ། རྗེས་ནི་མཆོད་པ་བྱིན་གྱིས་རླབས། མཆོད་བསྟོད་གསོལ་འདེབས་ཁ་སྐོང་བཟོད་གསོལ་གཤེགས་གསོལ་སྨོན་ལམ་བཀྲ་ཤིས་རྣམས་སོ། །དེ་དག་ལས་སྔོན་འགྲོའི་སྐབས་སུ་དྲིས་བྱུག་ཐིག་གདབ་ཚོམ་བུ་གསུམ། དངོས་གཞིའི་སྐབས་སུ་བསངས་སྦྱངས་མགྲོན་སྤྱན་འདྲེན་སྙན་གསན་དབབ་པ་གསུམ། རྗེས་ཆོག་རིལ་པོ་རྣམས་རྒྱུད་འགྲེལ་ལས་དངོས་སུ་མི་གསལ་བའི་ཁ་སྐོངས་ལྷག་པོ་ཡིན་ནོ། །གཏོར་མ་འབུལ་བ་ནི་གསོལ་བཏབ་ཀྱི་ཡན་ལག་རང་མིན་ཡང་ལྷག་གནས་ཀྱི་ཉིན་མོ་ངེས་པར་བྱེད་དགོས་པས་རྒྱུད་འགྲེལ་ལས་མ་བཤད་པའི་ལྷག་པོ་ཁ་སྐོངས་ཀྱི་རིགས་མ་ཡིན་ནོ། །གཉིས་པ་རྫས་ལྔ་ལྷག་གནས་ལས། དང་པོ་བུམ་པ་ལྷག་གནས་ལ་བུམ་པའི་རྒྱུ། བུམ་པའི་ཚད། བུམ་པའི་གྲངས། ནང་རྫས་ཀྱི་ངེས་པ། བསྐྱེད་ཆོག་གི་ཚུལ་ལ་དཔྱད་པ་སྟེ་ལྔ་ལས། དང་པོ་ནི། རྒྱུད་ལས། དེ་བཞིན་ཤེལ་གྱི་བུམ་པ་དང་ནི་དངུལ་མཆོག་རང་བཞིན་དཔལ་ལྡན་ཐོད་པ་དག་དང་ལྕགས་ཀྱི་དང༌། །ཟངས་ཞེས་བྱ་དང་གསེར་གྱི་བུམ་པ་རབ་གསལ་ངེས་པར་ཤིང་ལས་སྐྱེས་དང་ས་ཡི་རང་བཞིན་ནོ། །ཞེས་གསུངས་ཏེ། ཞི་བ་ལ་ཤེལ་གྱི་བུམ་པ། རྒྱས་པ་ལ་དངུལ། བསད་པ་ལ་མིའི་ཐོད་པ། བསྐྲད་པ་དང་དབྱེ་བ་ལ་ལྕགས། དབང་ལ་གསེར། དགུག་པ་ལ་ཟངས།
རེངས་པ་ལ་ས། རྨོངས་པ་ལ་ཤིང་གི་བུམ་པ། ཞེས་གསུངས་ལ། དབང་བསྐུར་དང་རབ་གནས་སོགས་ལ་ལས་ཐམས་ཅད་པ་དང་མཚུངས་ཏེ། དེ་ཡང་ཚད་ཞི་རྒྱས་དབང་གསུམ་གང་རུང་དང་མཚུངས་པ་ལས། རྒྱུ་ནི་གསེར་དངུལ་ཤེལ་གསུམ་གང་རུང་བྱེད་པ་མཆོག་གམ་སྤྱི་འགྲོས་དབང་དུ་བྱས་པ་ཡིན་ལ། མ་སྙེད་ན་སའི་ཁམས་ལས་བྱས་པ་རྫ་བུམ་གྱིས་ཀྱང་རུང་ངོ༌། །ཤེལ་དང་དངུལ་རང་མདོག་དཀར་པོ་ཉིད་ཀྱིས་ཆོག་ཅིང་གསེར་ཡང་རང་མདོག་ཉིད་ཀྱིས་ཆོག་པས་དཀར་པོར་བསྒྱུར་མི་དགོས་ལ། ས་ལས་བྱས་པ་ཡིན་ན་ཁ་དོག་དཀར་པོར་བསྒྱུར་བར་བཤད་དོ། །ལས་སོ་སོ་ལ་ནི། གསེར་དངུལ་ཟངས་ལྕགས་ཤེལ་རྣམས་རང་མདོག་དང༌། ཐོད་པ་དུར་ཁྲོད་ཀྱི་སོལ་པ་དང་མིའི་ཞག་གིས་བྱུགས་པས་ནག་པོ་དང༌། ས་དང་ཤིང་གི་བུམ་པ་སེར་པོར་བྱའོ། །གཉིས་པ་བུམ་པའི་ཚད་ནི། ཞི་རྒྱས་ལ་ལྟོ་བ་ཟླུམ་པོའི་སྦོམ་སའི་རྒྱར་སོར་བཅུ་དྲུག་པ། ལྟོ་བ་རང་གི་དཔངས་ལ་སོར་བཅུ་བཞི། བུམ་པ་ཡོངས་རྫོགས་ཀྱི་དཔངས་སུ་སོར་ཉི་ཤུ། མཆུ་འཕྱང་སོར་གཉིས། མགྲིན་པའི་དཔངས་ལ་སྤྱིར་སོར་དྲུག་ཡོད་ཀྱང་གཉིས་མཆུ་འཕྱང་གི་འོག་ཏུ་སོང་བས་སོར་བཞི། ཁའི་རྒྱར་ནི་སོར་བརྒྱད། དེ་ལ་ཆ་གསུམ་དུ་བགོས་པའི་དབུས་མ་ཆ་གཉིས་ནི། ཁའི་བུ་ག་མགུལ་བའི་སྦུབས་ཡིན་ལ། གཡས་གཡོན་གྱི་ཆ་ཕྱེད་པ་རེ་རེ་ནི་ཁ་གཡེལ་བ་ཡིན་ཞེས་ཏེ་དོན་ལ་ཆ་དྲུག་ཏུ་བཏང་བའི་དབུས་ཀྱི་ཆ་བཞི་བུ་ག་སྟེ། རགས་རྩིས་སུ་སོར་ལྔ་ཁའི་བུ་ག་དང༌། ཁའི་འདབ་མའི་ཞེང་སོར་ཕྱེད་གཉིས་རེའོ། །འདིའི་སོར་ཡང་མཐེ་བོའི་སོར་ལ་ཚད་བཞག་གོ །རེངས་པའི་ལས་ལ་ལྟོ་བ་སྒོས་ཀྱི་དཔངས་ལ་སོར་བཅུ་
གཉིས། སྤྱིར་སྦོམ་ཐུང་རྒྱ་དཔངས་མཉམ་པ་སོར་བཅུ་དྲུག །མགྲིན་པའི་དཔངས་སུ་སོར་བཞི། མཆུ་འཕྱང་འཐུག་པོ་སོར་གཉིས། ཁའི་རྒྱར་སོར་དྲུག །བསྐྲད་པ་དང་དབྱེ་བ་ལ་ལྟོ་བ་ཆུང་བ་སྟེ་ཟླུམ་སྐོར་རྒྱར་སོར་བཅུ་གཉིས། མགྲིན་པ་སོར་བརྒྱད་སུམ་འཁྱོག་ཅན། མཆུ་སོར་གཅིགདཔངས་སུ་སོར་ཉེར་བཞི། ཁའི་རྒྱ་སོར་དྲུག་སུམ་ཆ་བུ་གའོ། །བསད་པ་ལ་ནི་ཐོད་པ་བྱ་རིལ་ཏེ་ལག་ཁུང་བུམ་པའི་ཁ་ཡིན་པར་བྱའོ། །ཡང་ཁ་ཅིག་ཐོད་པ་བསྒྲིགས་པའི་བུམ་པར་ཡང་འདོད་མོད་མི་ལེགས་ལ། གཞན་དག་ཐོད་ཕོར་ལ་འདོད་ཀྱང་ཐོད་ཕོར་ནི། བསད་པའི་ལས་ལ་རྣམ་རྒྱལ་ཆེན་པོ་ཡིན་པའི་ཕྱིར། བུམ་པ་དང་རྣམ་རྒྱལ་ཆེན་པོ་འདི་གཉིས་ལ་དབྱེ་བ་ཕྱེད་པ་ཞིག་དགོས་པར་སྣང་བས་སྔ་མ་ཁོ་ན་འཐད་དོ། །དབང་དགུག་ལ་བཟོ་བོས་ཇི་ལྟར་བྱས་པ་ལས་དབྱིབས་དང་ཚད་ཀྱི་ངེས་པ་མེད་དོ། །རྨོངས་པ་ལ་གསལ་ཁ་མེད་ཀྱང་རེངས་པ་དང་འདྲ་ལ། ལས་ཐམས་ཅད་པ་ལ་ནི། ཞི་རྒྱས་དབང་གསུམ་གང་རུང་དང་མཚུངས་པར་སྦྱར་རོ། །དེ་ལ་བུམ་པ་རྣམས་རྩ་བ་དང་ནག་པོ་མེད་པ་ཞེས་པ་ནི། རྫ་བུམ་ཡིན་ན་སོ་བཏང་བའི་དུས་སུ་ནག་ཐིག་མེད་པ་དང་དབང་དགུག་མ་གཏོགས་པ་ལ་རྩ་བ་སྟེ་ཞབས་སྟེགས་མེད་པའོ། ཁ་དོག་དཀར་པོར་བསྒྱུར་པ་ ནི། །ཙནྡན་དཀར་པོའི་ལྡེ་གུའམ། འབྲས་བཏགས་པའི་ཁུ་བས་བྱུག་ཅིང༌། ཐ་ན་ས་དཀར་གྱིས་ཀྱང་རུང་ངོ༌། །གསུམ་པ་བུམ་པའི་གྲངས་ནི། རྒྱུད་འདིའི་ལུགས་ལ་དཀྱིལ་འཁོར་ཆེན་པོ་བཞེངས་ཕྱིན་ཆད་ལེགས་པར་འབྱོར་ན་ལྔ་བས་ཉུང་བ་མ་གསུངས་ཤིང༌། མང་ན་ལྷའི་གྲངས་སམ། དེ་བས་ཀྱང་མང་བ་མཐའ་མེད་
པའི་བར་དུ་རུང་ངོ༌། །འོན་ཀྱང་ལྔའམ་བཅུའི་གྲངས་གཙོ་ཆེ་ལ། དེ་ལ་སྤྱིར་རྒྱུད་འདིར་གཟུགས་མིང་མཚུངས་པའི་བུམ་པ་ནི་ལྔའམ་བཅུ་ཡིན་ལ། གཟུགས་མིང་མི་མཚུངས་པ་ནི། ལྔའི་ཕྱོགས་ལ་རྣམ་རྒྱལ་བུམ་པ་སྟེ་དྲུག་པ་དང༌། བཅུའི་ཕྱོགས་ལ་རྣམ་རྒྱལ་ཆེན་པོ་སྟེ་བཅུ་གཅིག་པའོ། །དེ་གཉིས་ནི་བུམ་པའི་མིང་ཡོད་ཀྱང་གཟུགས་ནི་དུང་ཆོས་སམ་ཐོད་པའམ་མཆོད་ཡོན་གྱི་སྣོད་དོ། །དེས་ན་རྣམ་རྒྱལ་ཆེན་པོ་ལ་ནི་བུམ་གཟུགས་མ་ཡིན་པས་ཁྱབ་ལ། ཕྱོགས་མཚམས་བརྒྱད་ཀྱི་བུམ་པ་བརྒྱད་དང༌། རྒྱལ་བའི་བུམ་པ་ནི་བུམ་གཟུགས་ཅན་ཡིན་པས་ཁྱབ་ཅིང༌། རྣམ་རྒྱལ་གཉིས་ཀ་ཡོད་དེ། བུམ་གཟུགས་ལྔའི་ཕྱོགས་ལ་རྣམ་རྒྱལ་དུང་ཆོས་ཡིན་ཞིང༌། བཅུའི་ཕྱོགས་ལ་བུམ་པའི་གཟུགས་ཉིད་ཡིན་པས་སོ། །བཅུ་ལས་མང་བར་གྱུར་ན། གཅིག་ལྷག་ན་གཙོ་བོ་ཡབ་ཡུམ། གཉིས་ལྷག་ན་ཡབ་ཡུམ་སོ་སོ་དང༌། གསུམ་ལྷག་ན་གཙོ་བོ་ཡབ་ཡུམ་དང་འཁོར་ཚོགས་སྤྱི། བཞི་ལྷག་ན་འཁོར་ལ་ཐུགས་དཀྱིལ་དང༌། གསུང་དཀྱིལ་ཕན་ཆད་གཉིས། ལྔ་དང་དྲུག་ལ་གསུང་དཀྱིལ། སྐུ་དཀྱིལ་ལ་རེ་རེ་དང༌། བདེ་ཆེན་འཁོར་ལོ་ལ་ཡང་ལོགས་སུ་བྱ། ཡང་ན་ལྔ་གཙོ་བོ་དང་རིགས་བཞི། དྲུག་རིགས་དྲུག་སོགས་མཐར་དྲུག་བརྒྱ་སུམ་ཅུ་སོ་དྲུག་གི་བར་དུ་ལྷ་གྲངས་དང་མཉམ་པར་རུང་ལ། དེ་བས་ལྷག་ན་གཙོ་བོ་ལ་བུམ་པ་བཅུ་བྱེད་པ་སོགས་ཚུལ་དེས་རིགས་བསྒྲེ་བ་ཡིན་ཡང༌། ད་ལྟ་ཉེ་བར་མཁོ་བ་ནི་ལྔའམ་བཅུ་གང་རུང་ངོ༌། །དེར་མ་ཟད་བུམ་པ་དུ་མ་ཞིག་བྱེད་པ་ནི། རབ་གནས་དང་མཆོག་སྒྲུབ་ཀྱི་དབང་བསྐུར་དང༌།
ལས་ཐམས་ཅད་པ་དང་ཞི་རྒྱས་རྣམས་ལ་ཡིན་གྱི། ལས་ལྷག་མ་རྣམས་ལ་བུམ་པ་བཅུ་ལས་མང་བ་མི་རུང་ངོ༌། །བཅུ་ལ་རྣམ་རྒྱལ་ཆེན་པོ་དང་ལྔ་ལ་རྣམ་རྒྱལ་ཡང་རབ་གནས་སོགས་ཞི་རྒྱས་ཀྱི་བར་ལ་དུང་ཆོས་དང༌། བསད་བསྐྲད་དབྱེ་གསུམ་ལ་ཐོད་པ་དང༌། དབང་དགུག་ལ་ཟངས་དང་གསེར། རྨོངས་རེངས་ལ་ཁམ་ཕོར་ཞེས་གསུངས་ཏེ་སོ་བཏང་པ་ནི་ཡིན་ནོ། །དེ་དག་ལ་ཡང་ཁྱབ་བྱ་ཁྱབ་བྱེད་ཀྱི་དབྱེ་བ་ཡོད་དེ། རྒྱུད་ལས། ཀླུ་དང་བཞི་ཡི་ནོར་བུ་གསེར་གྱི་བུམ་པ་དག་སྟེ་རྒྱལ་པོ་ས་ཡི་རང་བཞིན་རིན་ཆེན་བཅས། ཞེས་གསུངས་ཏེ། བུམ་པ་བཅུའི་ཕྱོགས་ལ་ཁྱབ་བྱ་ཕྱོགས་མཚམས་ཀྱི་བུམ་པ་བརྒྱད། ལྔའི་ཕྱོགས་ལ་ཁྱབ་བྱ་ཕྱོགས་ཀྱི་བུམ་པ་བཞི། ཞེས་བྱ་སྟེ། དེ་ཡང་བཅུ་ལ་ཕྱོགས་བཞི་དང༌། སྟེང་རྒྱལ་བ་ནི། རྒྱལ་པའི་བུམ་པ་ཉིད་དུ་གཏོགས་ཤིང༌། འོག་རྣམ་རྒྱལ་དང་མཚམས་བཞི་ནི་རྣམ་རྒྱལ་ཉིད་དུ་གཏོགས་ལ། རྣམ་རྒྱལ་ཆེན་པོ་ནི་བཅུ་པོ་ཀུན་ལ་ཁྱབ་པའོ། ལྔ་ལྟར་ན་ཤར་བྱང་སྟེང་གསུམ་རྒྱལ་བའི་ཕྱོགས། ལྷོ་ནུབ་དུང་ཆོས་གསུམ་རྣམ་རྒྱལ་གྱི་ཕྱོགས་སོ། །དེ་ཐམས་ཅད་ལ་རྒྱལ་བའི་ཕྱོགས་རྣམས་ཐབས་དང༌། རྣམ་རྒྱལ་གྱི་ཕྱོགས་རྣམས་ཤེས་རབ་ཏུ་བྱའོ། །འདིར་ལས་བུམ་ནི། སྔ་རབས་པ་རྣམས་ཕལ་ཆེ་བ་མཛད་པ་ཡིན་པར་འདུག་པས། རྟགས་མངོན་གྱུར་གྱི་ཕྱག་ལེན་དགག་པར་མི་བྱ་མོད། འོན་ཀྱང་རྒྱུད་འགྲེལ་གྱི་དགོངས་པ་ནི་རྣམ་རྒྱལ་ཆེན་པོའམ་རྣམ་རྒྱལ་དུང་ཆོས་ཀྱིས་བསངས་པས་ཀྱང་ཆོག །སྦྱིན་སྲེག་གི་སྐབས་སུ་གསུངས་པ་ལྟར་ཡི་གེ་དྲུག་པས་བསངས་ཆུ་ལོགས་སུ་
བསྒྲུབས་ཀྱང་རུང་སྟེ། ལས་བུམ་གྱི་བྱ་བ་དེས་བྱེད་དོ། །དེ་དག་གིས་བུམ་པ་རང་གི་མཚན་ཉིད་བཤད་ཟིན་ནས། ད་ནི་ཡོ་བྱད་རྣམས་བཤད་ན། བུམ་པ་རྣམས་ཀྱི་གདན་ནི་རྐོས་མའམ། ཚེམ་བུས་བཙེམས་པའམ། ས་ལས་བྱས་པའམ། རས་བྲིས་སམ་རྡུལ་ཚོན་གང་ཡིན་ཡང་རུང་སྟེ། པདྨ་དཀར་པོ་འདབ་མ་བརྒྱད་པའི་རྣམ་པ་བྱ་ལ། ཁ་རྒྱན་ཡང་དངུལ་ལམ་ཤིང་སོགས་ལས་པདྨ་དཀར་པོའི་རྣམ་པའམ། པདྨ་དངོས་བོད་དུ་མི་རྙེད་ཀྱང་མེ་ཏོག་དཀར་པོ་ཕལ་པས་ཀྱང་རུང་བར་མངོན། ལྕུག་མའི་ཡལ་ག་ནི་ངེས་པར་དགོས་ལ། མགུལ་བཅིངས་ནི། ལས་སོ་སོ་ལ་ལས་མཐུན་དང༌། སྤྱི་འགྲོ་ལ་གོས་གཙང་མ་ཐམས་ཅད་དཀར་རྐྱང་ངམ་སཻར་རྐྱང་ངམ་དཀར་སེར་ཕྱེད་པས་ཀྱང་རུང་ཞིང༌། ཁ་ཅིག་ཕྱོགས་མདོག་ཏུ་བྱེད་པའང་འགལ་བ་མེད་དེ། གང་ལྟར་ཡང་སྟོད་གཡོགས་དང་སྨད་གཡོགས་མཚོན་བྱེད་གོས་ཟུང་དང༌། རིགས་སྔགས་ཀྱི་ནུས་པ་བརྟན་བྱེད་དང་ཚངས་སྐུད་མཚོན་བྱེད་དང་བཀྲ་ཤིས་པའི་དོན་དུ་བུམ་པའི་མགུལ་པར་སྲད་བུ་དཀར་པོས་ལན་བདུན་དཀྲི། བུམ་པའི་མཚན་མ་ནི། རྣམ་རྒྱལ་ལ་སྣ་ཚོགས་པདྨ་ཉི་ཟླ་སྒྲ་གཅན་གྱི་སྟེང་དུ་རྡོ་རྗེ་སྔོན་པོ་རྭ་གསུམ་པ་དང༌། རྒྱལ་བ་ལ་ལྗང་ཁུ་རྩེ་ལྔའོ། །ཡང་ན་རྒྱལ་བ་ལ་རྡོ་རྗེ་དང༌། རྣམ་རྒྱལ་ལ་གྲི་གུག་གོ །ཤར་དང་ཤར་ལྷོ་ལ་རལ་གྲི། ལྷོ་དང་ལྷོ་ནུབ་ལ་རིན་པོ་ཆེ། ནུབ་དང་ནུབ་བྱང་ལ་འཁོར་ལོ། བྱང་དང་བྱང་ཤར་ལ་པདྨ་རྣམས་ཕྱོགས་མདོག་དང༌། དེ་དག་ཀྱང་པདྨ་ཉི་ཟླའི་གདན་ལ་འགོད་པར་བྱེད་དོ། །བསྡུ་ན་བུམ་མཚན་ཀུན་ལ་གདན་མེད་ཀྱང་ཆོག །སཱ་དྷུ་པུ་ཏྲས་ལྷོ་ནུབ་ལ་པད་དམར་དང༌། བྱང་ཤར་དུ་ཨུཏྤལ་བྱེད་པ་ནི་ཡུམ་བཞིའི་བུམ་པ་ཡིན་པའི་
དབང་དུ་བྱས་པར་སྣང་སྟེ། རང་ལུགས་ལ་བུམ་པ་རྣམས་རིགས་ལྔ་ཡུམ་ལྔའི་བུམ་པ་མ་ཡིན་པའི་ཕྱིར་དེ་འདྲ་མི་དགོས་ཏེ། ཁམས་དྲུག་མཚོན་བྱེད་ཀྱི་མཚན་མ་ཙམ་ཡིན་ནོ། །བཞི་པ་ནང་རྫས་ནི། རྒྱུད་འགྲེལ་ལས་འབྱུང་བ་རྣམས་སྡོམས་སུ་བྱ་ན། རྡོ་རྗེ་ཕ་ལམ་ཁ་དོག་དབྱེ་བས་ལྔ། །དབང་སྔོན་པད་དམར་ཆུ་ཤེལ་ཀརྐེ་ཏ། །མརྒད་རྣམས་ནི་རིན་ཆེན་མཆོག་ལྔ་ཡིན། །མུ་ཏིག་བྱུ་རུ་མུ་མེན་ཤཱུ་ལ་དང༌། །ཐིག་ལེ་དྲུག་པ་རིན་ཆེན་འབྲིང་པོ་ཡིན། །ཤེལ་དང་ཛཱི་བ་ཛཱ་ཏི་ཌཽ་ཧ་རི། །འཆིང་བུ་ཤེལ་ལྗང་རིན་ཆེན་ཐ་མ་ལྔ། །གསེར་དངུལ་ཟངས་ལྕགས་ཁབ་ལེན་བཞུ་བའི་ལྕགས། །ལྕགས་ལྔ་ཞེས་གྲགས་དེ་ལྟར་ཉེར་ལྔ་ལས། །རིན་ཆེན་གང་རུང་ལྔ་དང་ལྕགས་ལྔ་བཟུང༌། །ག་པུར་སུག་སྨེལ་པྲི་ཀ་སི་ཧྱ་དང༌། །བླ་སྒང་རྣམས་ནི་ལྔ་ཚན་དང་པོ་ཡིན། །སིང་ཧ་མུ་དྲ་ཀ་ཀོལ་པྲི་ཡང་ཀུ །ཨ་ཀར་ནག་དང་ཤཻ་ལེན་གཉིས་པ་ཡིན། །གླ་རྩི་ཛཱ་ཏི་གུར་གུམ་མུ་ར་དང༌། །རུ་རྟ་རྣམས་ནི་ལྔ་ཚན་གསུམ་པའོ། །པུ་ཏྲ་ཀེ་ཤ་ཏ་མ་ལ་འདབ་དང༌། །ནཱ་ག་ཀེ་སར་ཙནྡན་ཨུ་ཤཱི་ར། །དེ་རྣམས་དྲི་བཟང་ལྔ་ཚན་བཞི་པའོ། །བྷེ་རུཎྜ་བྲུན་རྒྱ་སྤོས་མེ་ཏོག་དང༌། །སྔོ་སྨན་འཁྲི་ཤིང་གླ་རྩིར་གྲགས་པ་དང༌། །སྤང་སྤོས་བཱ་ལ་ཀ་རྣམས་ལྔ་པ་སྟེ། །དེ་རྣམས་དྲི་བཟང་སྡེ་ཚན་ཉེར་ལྔའོ། །ཁྱབ་འཇུག་གནོན་དང་ཚངས་པའི་དབྱུག་པ་དང༌། །དྲག་པོའི་རལ་པ་དེ་བཞིན་པྲ་སི་བྷ། །དེ་བ་དཱ་ལི་སྡེ་ཚན་རི་བོང་ཅན། །ཨ་དྷོ་པུཥྤ་ཀརྞི་ཀ་དང་ནི། །ཨིནྡྲ་བ་རུ་ཎཱི་དང་ལ་ཀྵ་ཎ། །ཕག་གི་རྣ་བ་ཞེས་བྱའི་སྔོ་སྨན་ ནི། །སྨན་གྱི་སྡེ་ཚན་མིག་གི་གྲངས་སུ་བརྗོད། །
ཛྱོ་ཏི་སྱ་ཏི་དུ་བྱེད་ལཛྫ་ལུ་ཨཱ། །ཨརྐ་མུ་ཥ་ལི་རྣམས་འཇིག་རྟེན་ནོ། །ལྔ་ཚན་བཞི་པ་པུ་ཏྲཾ་ཛཱ་རི་དང༌། །མོ་ཧ་ནེ་དང་ཧ་ས་དེ་བ་དང༌། །ཀྲི་ཏ་ཉྫ་ལི་ཨ་ཛ་ཀར་ཎའོ། །ཀཎྜ་ཀ་རི་ཤིང་མངར་རྨ་བྱའི་གཙུག །བྲི་ཧ་ཏི་དང་བྷཾ་ག་རཱ་ཛ་རི། །ལྔ་ཚན་དབང་པོ་ཡིན་ཏེ་ཉི་ཤུ་ལྔ། །སོ་བ་ཆེན་པོ་སོ་བ་མོན་སྲན་དང༌། །ཙ་ན་དཀར་པོ་ཏིལ་ནག་ལྔ་ཚན་གཟུགས། །གྲོ་དང་ཏིལ་དཀར་དང་ནི་ཀོ་ཏྲ་པ། །མུད་ག་སྲན་མ་ལྔ་ཚན་བགྲོད་པར་བརྗོད། །ཡུ་ནག་ཏྲི་པུ་ཊཱ་དང་ནས་འབྲུ་དང༌། །མོན་སྲན་ཨཽཥྛ་ཞེས་པ་ལྔ་ཚན་མེ། །སྲན་ཆུང་པརྦ་ཊི་ཀཱ་ཡུངས་ཀར་དང༌། །ཁྲ་རྒོད་ཏུ་བ་རི་ནི་ཆུ་གཏེར་ཡིན། །ཀུ་ལན་ཐ་དང་བརྞྞ་ཙ་ན་ནག །ཨ་ཏ་ཤི་དང་ཁ་ར་ཌི་རྣམས་ནི། །འབྲུ་ཡི་སྡེ་ལས་ལྔ་ཚན་མདའ་ཡིན་ནོ། །རིན་ཆེན་ལྔ་པོ་རྙེད་པར་མ་གྱུར་ན། །མེ་ཏོག་ཁ་དོག་ལྔས་ཀྱང་དོད་ཐུབ་ཡིན། །ལྔ་ཚན་རེ་རེ་བཞིན་དུ་ཆ་གཅིག་ནས། །ཆ་ལྔའི་བར་དུ་བློ་ཡིས་སྦྱར་བར་བྱ། ཆ་གཅིག་མཁའ་ཡེའི་ཁམས་ཡིན་སྟེང་འོག་དང༌། །ཆ་གཉིས་རླུང་ཤར་ཆ་གསུམ་མེ་སྟེ་ལྷོ། །ཆ་བཞི་བྱང་ཆུབ་ཆ་ལྔ་ནུབ་སྟེ་ས། །ཞེས་སོ། །དེ་ཡང་བུམ་པ་རྣམས་སུ་ཐུར་བུར་མི་བྱེད་པ་གཙོ་ཆེ་ལ། རྣམ་རྒྱལ་དུང་ཆོས་སམ་རྣམ་རྒྱལ་ཆེན་པོར་ལྔ་ཚན་ལྔ་པོ་ཐམས་ཅད་བསྡོམས་པའི་ཐུམ་བུ་ངེས་པར་འཇུག་པར་བཤད། དེ་ལ་ལྔ་ཚན་ལྔ་ནི་རིན་པོ་ཆེ་ལྔ། ལྕགས་ལྔ། དྲི་ལྔ། སྨན་ལྔ། འབྲུ་ལྔ་རྣམས་ཡིན་ལ། དེ་དག་ལས་ཁམས་ལྔའི་རིམ་པ་གང་རྙེད་པ་རེས་ཆོག་པ་ཡིན་པས། བོད་དུ་རྙེད་བླ་བ་རྣམས་ནི་དཀྱིལ་ཆོག་འཇུག་པར་བྲིས་པ་
བཞིན་ཡིན། ཞིབ་པར་དཀྱིལ་ཆོག་ཡེ་ཤེས་རྒྱ་མཚོའི་ཉིད་དང༌། རྒྱུད་འགྲེལ་གྱི་ཆུ་དབང་གི་སྐབས་དང༌། ནང་ལེའི་དྲི་བཟང་གི་ལེ་ཚེའི་སྐབས་སུ་བལྟ་བར་བྱ་ལ། སྨན་གྱི་ངོས་འཛིན་ལོ་པཎ་གྱི་ངག་སྒྲོས་ཡིན་གྱུ་བ་དང༌། ཨུ་རྒྱན་པ་རིན་ཆེན་དཔལ་གྱིས་རྩད་བཅད་པ་ཡིན་ཟེར་བ་སོགས་སྔར་མང་པོ་བྲིས་འདུག་པ་དེ་རྣམས་ལ་ཡིད་བརྟན་ཐུབ་པ་རང་ཡང་དཀའ་བར་སྣང་བས་བཏང་སྙོམས་སུ་བཞག་གོ །དེ་ལ་བྷཻ་རུ་ནྚའི་བྲུན་དང༌། རྨ་བྱའི་གཙུག་ཕུད་ཅེས་པ་ལྟ་བུ་སྔོ་སྨན་གྱི་རིགས་ལ་མིང་དེ་སྐད་ཐོག་པ་དག་ཡིན་གྱི། བྲུན་དང་སྒྲོ་མིན་ནོ། །སྨན་གཞན་རྣམས་ཆ་ཆེ་ཆུང་གི་ཚད་ཞོ་ཆར་གཞལ་ཏེ་ཡང་ལྗིའིསྒོ་ནས་ཆ་མང་ཉུང་གི་ཚད་བྱེད་ལ། འབྲུ་རྣམས་འབྲུའི་གྲངས་ལ་རྩི་བ་ཡིན། ཞེས་གསུངས། དེ་ཡང་བུམ་པ་རྣམས་གུ་གུལ་གྱིས་བདུགས། ཡིག་དྲུག་བཟླས་པའི་ཡུངས་དཀར་གྱིས་གྲབས་ལེགས་པར་བཀྲུས་ཏེ། གོས་ཟུང་དང་སྲད་བུས་དཀྲི། གདན་ལ་བཞག་ནས་ཆུ་གཙང་རྙོག་པ་མེད་པས་བཀང༌། རིགས་དྲུག་བཟླ་བཞིན་དུ་སྙིང་པོ་རྣམས་གཞུག་པར་བྱའོ། །བཛྲ་ཤི་ཥ་རེའི་སྔགས་དང༌། ཨོཾ་ཏ་བྟཻ་སོགས། ཁྲོ་བོ་དགུག་པའི་སྔགས་རྣམས་འདིར་མི་དགོས་ཏེ། དེ་དག་ནི་གཞན་གྱིས་ཁ་འགེངས་ཡིན་པ་ཙམ་དུ་མ་ཟད། ལུགས་གཞན་ལའང་གལ་ཆེ་བ་མ་ཡིན་པས་སོ། །ལྔ་པ་བུམ་བསྐྱེད་ཀྱི་ཚུལ་ལ། གཞན་ལུགས་རང་ལུགས་གཉིས་ལས། དང་པོ་ནི། དུས་ཞབས་པའི་དཀྱིལ་ཆོག་ན། ཧཾ་ལས་བུམ་པ་གཞལ་ཡས་ཁང༌། པཾ་ལས་ཆུ་འོ་མའི་རྒྱ་མཚོ་ཞེས་འདོད། སཱ་དྷུ་པུ་ཏྲས་པཾ་ལས་བུམ་པར་བསྐྱེད། བོད་སྔ་རབས་
འགའ་ཞིག་བྷྲུཾ་ལས་བསྐྱེད་ཀྱང༌། རྒྱུད་འགྲེལ་གྱི་དངོས་བསྟན་དུ་གསུངས་པའི་བུམ་པའི་ས་བོན་དང་འགལ་བའི་ཕྱིར། མན་ངག་ལྟར་སྣང་ཡིན་པས་སྙིང་པོ་མེད་ལ། མཁས་པ་ཁ་ཅིག་ཀྱང་དུང་ཆོས་སུ་དཀྱིལ་འཁོར་རྫོགས་པར་སྒོམ་པའི་རྒྱབ་རྟེན་དུ། ཀྱཻ་རྡོར་གྱི་འགྲེལ་པ་པདྨ་ཅན་ལས། ཐམས་ཅད་ཆུ་ལས་ཁམས་ཕོར་དུ། །ཉུང་ཚད་བླུགས་ཏེ་རྣམ་རྒྱལ་གྱི། །བུམ་པ་པཾ་ལས་བསྐྱེད་པ་ཡི། །རིན་ཆེན་བུམ་པ་སྟེང་བཞག་བྱ། །དེར་ནི་དཀྱིལ་འཁོར་བསྐྱེད་བྱ་ སྟེ། །ཞེས་པ་འདྲེན་ཏེ། དེ་ནི་བུམ་པར་དཀྱིལ་འཁོར་བསྐྱེད་པའི་གོ་བ་ཡིན་གྱི། དེར་ནི་ཞེས་པ་དུང་ཆོས་ལ་འཆད་པ་གོ་ལུགས་ཉེས་པའོ། །གཞན་ཡང་བོད་ཀྱི་དུས་འཁོར་བར་འདོད་པ་ཕྱིས་བྱུང་ཕལ་ཆེར་བུམ་མཚན་རྣམས་ལྷར་བསྐྱེད་པ་དང༌། བུམ་པ་སོ་སོའི་ནང་དུ་རིགས་ལྔ་ཡུམ་བཅས་ཙམ་མམ། རིགས་ལྔ་ཡབ་ཡུམ་བཅུ་ཙམ་བསྐྱེད་པ་དང༌། ཕྱོགས་ཕྱོགས་ཀྱི་ལྷ་རྣམས་ཕྱོགས་ཕྱོགས་ཀྱི་བུམ་པ་སོ་སོར་བསྐྱེད་པ་སོགས་ལྷ་བསྐྱེད་ཆོག་རྒྱས་བསྡུས་སྣ་ཚོགས་དང༌། རྣམ་རྒྱལ་ཆེན་པོར་ཇི་ཙམ་དབང་བསྐུར་བའི་དཀྱིལ་འཁོར་གྱི་ལྷ་དེ་ཙམ་བསྐྱེད་ཟེར་བ་དང༌། ལྷ་ཐམས་ཅད་ཀྱང་རིགས་དྲུག་བྱིན་རླབས། ཡེ་ཤེས་དགུག་གཞུག་རྒྱས་བཏབ་སོགས་རྒྱས་བསྡུས་སྣ་ཚོགས་དང༌། ཨོཾ་བཛྲ་སཏྭ་ཡ་སྭཱཧཱ། ཞེས་སོགས་ཀྱི་བློ་བཟོའི་སྔགས་མང་པོ་དང༌། བུམ་པ་ལ་འདུད་ཉི་ཤུའི་བསྟོད་པ་བྱེད་པ་སོགས། མདོར་ན་མཚན་པའི་རྣམ་གཡེང་དུ་མས་རྒྱུད་དཀྲུགས་ཤིང༌། རྒྱུད་གཞན་ལ་རྒྱ་བོད་ཀྱི་སློབ་དཔོན་གཞན་གྱིས་སྦྱར་བའི་དཀྱིལ་ཆོག་རྣམས་ན། བུམ་བསྐྱེད་ལ་ལྷ་ཚོགས་བསྐྱེད་པ། དེའི་རྒྱས་མ་ཁེབས་ཀྱིས་དོགས་ནས་དྲན་རྐྱེན་མང་པོ་བྱས་པ་དེར་འདུག །དེས་ན་རྒྱུད་འདིར་ཐིག་ཚོན་
བུམ་པ་རྡོར་དྲིལ་ཞེས། གཙོ་ཆེ་ཆུང་འདྲ་རུང་ཁྱད་མེད་ཀྱི་སྒོ་ནས་ལྷག་གནས་སྔར་བཤད་པས། དེ་དག་ཆོ་ག་རྒྱས་བསྡུས་ཀྱང་འདྲ་རུང་བར་འཐད་ལ། རྒྱུད་གཞན་དང་ལུགས་གཞན་ལ་སྒྲིག་མི་དགོས་ཏེ། དེ་དག་ལ་རྡོར་དྲིལ་ལྷག་གནས་མེད་ཅིང༌། ཐིག་ཚོན་བྱིན་རླབས་ཀྱང་ལྷག་གནས་སུ་མི་བྱེད་པས། རྫས་ཀྱི་ལྷ་གནས་འདྲ་མཚུངས་བརྩི་རྒྱུ་མེད་པའི་ཕྱིར་རོ། །འདི་ནི་རང་ལུགས་ཀྱི་བུམ་བསྐྱེད་འདི་ཙམ་གྱིས་ཆོག་གི ལུགས་གཞན་སྤྲོས་པ་ལྷུར་ལེན་པ་རྣམས་ལ་ལྷག་པའི་སྐྱོན་ཡོད་པའི་རྒྱུ་མཚན་དང་པོ་ཡིན་ནོ། །རྒྱུད་འགྲེལ་གྱི་གནས་སྐབས་གང་ན་ཡང་བུམ་བསྐྱེད་ལ་ལྷ་ཞལ་ཕྱག་ཅན་དགོས་པའི་དངོས་བསྟན་ཤུགས་བསྟན་གང་ཡང་མ་བྱུང་བ་འདི་ནི་རྒྱུ་མཚན་གཉིས་པ་ཡིན་ནོ། །རྒྱུད་འགྲེལ་ལས། ཐིག་ཚོན་གྱི་ཡེ་ཤེས་པ་རིགས་ལྔ་ཡུམ་ལྔ་རྣམས་ཐིག་ཚོན་ཉིད་ཀྱི་རྣམ་པར་སྤྱན་འདྲེན་པར་གསུངས་པས། ཡར་ལ་བུམ་པ་དང་འོག་ཏུ་བྱིས་འཇུག་གི་དབང་རྫས་ཐམས་ཅད་ཀྱི་བར་དུ་དེ་ལྟར་གོ་དགོས་ལ། ཡེ་ཤེས་པ་ཐིག་ཚོན་གྱི་རྣམ་པར་སྤྱན་དྲངས་ཕྱིན། དམ་ཚིག་པ་ཡང་ཐིག་ཚོན་གྱི་རྣམ་པ་ལས་འོས་མེད་དེ། དམ་ཡེ་མཚུངས་པ་སྤྱིར་ཡང་སྔགས་པ་ཀུན་གྱི་ལུགས་དང༌། སྒོས་སུ་རྒྱུད་འདི་ལས་ཀྱང་ཆེ་ཐང་དུ་མཛད་པ་རོ་མཉམ་གྱི་སྐབས་སོགས་ལས་ཤེས་སོ། །དེའི་ཕྱིར་འདི་ནི་རྒྱུ་མཚན་གསུམ་པའོ། །གཞན་ཡང་རྒྱུད་རྒྱལ་འདི་ལས། སྐུ་གཟུགས་དང་གླེགས་བམ་སོགས་གཙོ་ཆེ་ཤོས་འགའ་ཞིག་མ་གཏོགས། བརྟན་པའི་དངོས་པོ་ལ་བྱིན་རླབས་ཀྱི་སྐབས་ཞལ་ཕྱག་གི་རྣམ་པ་ཅན་བསྐྱེད་པ་རྩལ་འདོན་མ་མཛད་པས། སྤྱིའི་རིག་པ་དེ་འདི་ལའང་སྦྱོར་དགོས་པ་ནི་བཞི་པའོ། །ཡང་འདིའི་བུམ་པ་བརྒྱད་
ནི། བདེ་ཆེན་འཁོར་ལོའི་བུམ་པ་བརྒྱད་དང་དོན་གཅིག་པས། དེ་དག་ནུས་མ་རྣམས་ཀྱི་ཐབས་གསང་ཞིང་སྦས་པའི་སྐུ་ཡིན་པའི་ཕྱིར། ལྷ་གཞན་ཐམས་ཅད་ཞལ་ཕྱག་ཏུ་བཞེངས་པའི་བསྐྱེད་རིམ་སྒོམ་པའི་སྡེ་ཚན་ལ་ཡོད་སྐབས་ཀྱང༌། དེ་དག་རྣམ་པ་བུམ་པ་ལས་གཞན་དུ་མི་བཞེངས་ན། འདིར་ཞལ་ཕྱག་གི་རྣམ་པའི་ལྷ་མི་དགོས་པའི་སྡེ་ཚན་ལ་ཡོད་པའི་སྐབས་ལྟ་སྨོས་ཀྱང་ཅི་དགོས་ཏེ་རྒྱུ་མཚན་ལྔ་པའོ། །ཡང་ཁྱེད་མང་པོ་དག་ཐིག་ཚོན་རྣམས་རང་རང་གི་ས་བོན་ལས་ངོ་བོ་ལྷ་ཡིན་ཡང་རྣམ་པ་ཐིག་ཚོན་ཉིད་ལས་གཞན་དུ་མི་བསྒྱུར་བའི་དམ་ཡེ་བསྲེ་བ་བྱེད་ཀྱིན་འདུག་ན། དེ་དག་དང་འདི་ལ་རྒྱུ་མཚན་ཁྱད་པར་མེད་པའི་ཕྱིར། ཞེས་པ་ནི། ལུགས་འདི་ལ་སྒྲུབ་བྱེད་དང༌། བུམ་པ་ཞལ་ཕྱག་ཅན་ལ་གནོད་པ་ཅན་གྱི་ཚད་མ་སྟེ། རྒྱུ་མཚན་དྲུག་པའོ། །ཡང་དེ་དག་མི་མཚུངས་ཏེ་དབང་བསྐུར་བའི་དུས་སུ་བུམ་པ་གཙོ་ཆེ་བས་ཞལ་ཕྱག་ཏུ་བསྐྱེད་དགོས་སོ་སྙམ་ན་མ་ཡིན་ཏེ། བུམ་པ་བས་ཐིག་ཚོན་གལ་ཆེ་སྟེ། ཐིག་ཚོན་གྱི་སྒྲུབ་པའི་དཀྱིལ་འཁོར་མེད་ན་བུམ་པའི་བྱ་བ་སྟོང་པའི་ཕྱིར། དཀྱིལ་འཁོར་དང་བུམ་པ་གང་གཙོ་ཆེ་རྣག་རྗི་མོས་ཀྱང་གོ་བ་མ་ཡིན་ནམ། ཁྱཻད་དག་རང་ལུགས་ལ་ནོར་བ་ཞིག་སྔོན་དུ་ཁས་བླངས་ན། དེའི་ལྟག་མི་འཆོར་བའི་ཕྱིར། ནོར་པ་ལ་ནོར་པར་ཤེས་བཞིན་དུ་ཡང་ཡེ་ནས་ཁས་མི་ལེན་པར་ལུང་རིག་ལྟར་སྣང་སད་སུད་འདྲ་ཉག་ཉུག་ཁོ་ན་བྱེད་ཅིང༌། ཡང་དག་པའི་ལུགས་ལ་སྡང་སྨྲས་འབའ་ཞིག་ལྷུར་ལེན་པ་ནི། ཕྱོགས་འཛིན་གྱི་གདོན་གྱིས་བསླད་པས་སྤྱང་ཐལ་ཆེས་ཏེ་རྨོངས་པ་རང་མགོ་རང་གིས་བསྐོར་བ་སྟེ། འོན་ཀྱང་བདེན་ཏེ་གང་ལ་སྐྱོན་ཆགས་པ་ནི་དུས་ངན་པ་
འདིའོ། །ཡང་འགའ་ཞིག་སྐབས་འདིར་བུམ་པར་ལྷ་མ་བསྐྱེད་ན། ཕྱིས་ཆུ་དབང་བསྐུར་བ་དོན་མེད་དེ་ལྷ་ཞུ་བའི་ཆུ་མ་ཡིན་པའི་ཕྱིར་རོ་ཟེར་བ་ནི་མུ་ཅོར་ཏེ། སྐབས་འདིར་ལྷར་མ་བསྐྱེད་ཀྱང་ཕྱིས་དབང་བསྐུར་གྱི་ཚེ་ལྷར་བསྐྱེད་པ་ནི་ཤིན་ཏུ་མང་སྟེ། དཀྱིལ་ཆོག་གཞན་གྱི་ལུགས་ལ་དབུ་རྒྱན་དང་རྡོར་དྲིལ་བཞིན་ནོ། །དེས་ན་དེར་མ་བསྐྱེད་པས་འདིར་བསྐྱེད་དུ་མི་རུང་བ་མ་ཡིན་ལ། འདིར་མ་བསྐྱེད་པས་དེར་བསྐྱེད་དུ་མི་རུང་པའང་མ་ཡིན་ནོ། །དངོས་གནས་ནི། ཁོ་བོ་ཅག་སྐབས་འདི་དང༌། དབང་གི་དངོས་གཞི་སོགས་ཐམས་ཅད་དུ་བུམ་པ་དང་བུམ་ཆུ་གཉིས་ཀར་ལྷར་བསྐྱེད་མཉམ་ལ་ཞལ་ཕྱག་གི་རྣམ་པ་ཅན་དུ་ནི་མ་ཡིན་པར་མཉམ་པས་ཀྱང་གནས་སྐབས་གཉིས་ལ་མི་མཚུངས་པའི་སྐྱོན་ནི་མེད་ལ་ལར་མཚུངས་པ་དགོས་པ་ཡང་མ་ཡིན་ནོ། །གལ་ཏེ་མཚུངས་པར་དགོས་ན་ནི་ཁྱེད་རྣམས་ཉིད་ལ་སྐྱོན་ཏེ། བུམ་པ་སྟ་གོན་གྱི་སྐབས་ཀྱི་ལྷ་དང༌། ཆུ་དབང་བསྐུར་བའི་སྐབས་ཀྱི་ལྷ་གཉིས་གཅིག་གམ་མི་གཅིག་ཅེས་བརྟགས་ན་དུས་འཁོར་གྱི་དཀྱིལ་ཆོག་གམ་གཞན་གྱི་དཀྱིལ་ཆོག་གང་ཡིན་ཡང་འདྲ་སྟེ། གཟོད་གོ་བ་རྙེད་པར་འགྱུར་གྱི། ཆགས་སྡང་ཕྲག་དོག་དྲག་པོས་སེམས་ཧད་ཧད་པོར་གྱུར་པའི་སྐབས་སུ་ཐབས་ཅི་བྱས་ཀྱང་ངེས་པ་སྟེར་བར་མི་ནུས་སོ། །ངེད་ཀྱི་ལུགས་ལའང་ཆུ་དབང་གི་ཆུ་ནི་ལྷའི་ངོ་བོ་ཡིན་ཏེ། སྔགས་ཀྱི་ཡིག་འབྲུ་ལས་ཡང་དག་པར་སྤྲུལ་པའི་ཕྱིར་དང༌། ལྷའི་ངོ་བོར་ལྷག་པར་མོས་པའི་ཕྱིར་རོ། །ལར་ཁྱེད་འདྲ་བ་མཚན་ཉིད་པ་སྐམ་པོས་སྔགས་པ་བྱས་པ་ན། ལྷའི་གལ་ཆེ་ཤོས་ཡིག་འབྲུའི་ལྷ་ནམ་
ཡང་རྩད་མ་ཆོད་པར་འདུག་ལ། ལྷའི་མོས་པ་བརྟན་པོས་ཀྱང་ལྷར་མི་འགྱུར་ན། སྔོན་དུ་ལྷ་བསྐྱེད་ཆོག་བྱས་ནས་ཞུ་བའི་བུམ་ཆུ་ཡང་ཁྱེད་ལྟར་ན་ལྷའི་རང་བཞིན་མ་ཡིན་པར་འགྱུར་ཏེ། ལྷ་དེ་ཡིན་སྙམ་པའི་མོས་པས་ནི་ལྷར་མི་འགྱུར། དངོས་དང་དམིགས་པ་གང་གི་སྒོ་ནས་ཀྱང་ཞལ་ཕྱག་གི་རྣམ་པར་མི་འདུག་པའི་ཕྱིར་རོ། །དེ་ལྟར་མེད་ཀྱང་ལྷ་བསྐྱེད་པ་སྔོན་འགྲོ་ཅན་ཡིན་པའི་ཕྱིར་རོ་སྙམ་ན། བདག་བསྐྱེད་ས་ཆོག་གསོལ་གདབ་སོགས་འདིར་ཡང་ལྷ་བསྐྱེད་པ་དུ་མ་སྔོན་དུ་སོང་ངོ༌། །མ་ཡིན་ཏེ་གཞི་དེ་ལ་དགོས་སོ་སྙམ་ན། བུམ་པ་འཇོག་པའི་སྔོན་དུ་ལྷ་ལྷག་གནས་བྱས་པ་མ་ཤེས་སམ། མ་ཡིན་ཏེ་དབང་རྫས་ཉིད་ལྷར་བསྐྱེད་པ་དགོས་སོ་སྙམ་ན། འོ་ན་དབང་རྫས་ནི་བུམ་ཆུ་ཡིན་ལ། ཁྱེད་རྣམས་བུམ་ཆུའི་སྟེང་གི་ནམ་མཁའ་ལ་ལྷ་བསྐྱེད་པས་ཅིར་འགྱུར། ལྷ་སྐུ་ལས་བུམ་ཆུ་བྱུང་ཞིང༌། ལྷ་བུམ་ཆུའི་རྒྱུ་ཡིན་པས་ཆུ་དེ་ལྷའི་རང་བཞིན་ནོ་སྙམ་ན། དེ་ནི་མི་འཐད་དེ། ཡུལ་དངོས་པོ་ལྟར་ན་ཆུ་ནི་ཆུ་ཉིད་ཀྱི་རིགས་འདྲ་སྔ་མའི་རྒྱུན་ལས་བྱུང་བ་ཡིན་གྱི། རྣལ་འབྱོར་པའི་ཡིད་ངོར་བསྒོམས་པའི་ལྷ་སྐུ་ལས་བྱུང་བ་ག་ལ་ཡིན། མོས་པའི་དབང་དུ་བྱས་པའོ་སྙམ་ན། ལྷ་ལས་བྱུང་བའི་བུམ་ཆུའོ་སྙམ་པས་ལྷའི་རང་བཞིན་དུ་འགྲོ་ན། ངེད་ཀྱང་བུམ་པ་དང་བུམ་ཆུ་འདི་ནི་ལྷ་ཡིན་ནོ་སྙམ་མོས་པ་ནན་ཏན་དུ་བྱེད་པས་ཅིའི་ཕྱིར་བུམ་ཆུ་ལྷའི་ངོ་བོ་མ་ཡིན། དེས་ན་སྔར་གཏན་ལ་མ་ཕབ་པ་ཐམས་ཅད་ལ་ཆོ་ག་གཞན་ཕྱོགས་རེ་ཙམ་མཐོང་བའི་མིག་གིས་ཚོད་དཔོགས་མི་བྱའོ། ཁྱད་པར་དུས་ཀྱི་འཁོར་ལོའི་རང་ལུགས་སུན་ཕྱུང་ནས། དུས་འཁོར་གྱི་བསྟན་བཅོས་རྩོམ་པ་ནི་བུ་རུ་བརྫུས་ནས་རབས་གཅོད་
པའི་དཔེའོ། །དེ་ལྟར་ན་དཔལ་ཇོ་ནང་པའི་རང་ལུགས་ལ་ངེས་པ་རྙེད་ནས་བུམ་སྒྲུབ་ཀྱི་ཆོ་ག་དངོས་གཞི་ནི་དཀྱིལ་ཆོག་ཡེ་ཤེས་རྒྱ་མཚོ་དངོས་དང༌། ངག་འདོན་ལ་གཉིས་ཀྱི་དཀྱུས་ལྟར་ཡིན་པས་གཞན་རྣམས་གོ་སླ་ལ། རྒྱུད་ལས། ཨ་སོགས་ཀ་སོགས་རྡོ་རྗེ་ལྡན་པ་དག་གིས་རང་གི་སྙིང་གར་པདྨ་ཟླ་ཉི་མེ་སྟེང་དུ། །ཞེས་གསུངས་པ་ལ་དམིགས་པ་རྒྱས་པ་བྱེད་ན་མངོན་བྱང་ལྔ་ལས་དུས་འཁོར་བསྐྱེད་པ་ཡིན་ཡང༌། མདོར་བསྡུས་པའི་ཚེ་སྐད་ཅིག་གམ་ས་བོན་ལས་བསྐྱེད་པས་ཆོག་གོ །དེ་ཡང་བུམ་པ་རྣམས་ལྷ་ཡབ་ཡུམ་གཉིས་འདུས་ཀྱི་ངོ་བོ་ཡིན་པས། ཡབ་ཡུམ་ཀྱི་ཐུགས་ཀའི་ཉི་ཟླ་ཁ་སྦྱོར་ལས་ལྕགས་ཀྱུ་སྤྲོ་བ་ཡིན་ལ། ཐིག་སྐུད་དང་དྲིལ་བུ་ལྷ་མོའི་ངོ་བོ་ཡིན་པས། ཡུམ་གྱི་ཐུགས་ཀའི་ཉི་མ་ལས་ལྕགས་ཀྱུ་ སྤྲོའོ། །རྡུལ་ཚོན་རྡོ་རྗེ་ལྷ་ཡབ་ཀྱི་ངོ་བོ་ཡིན་པས་ཡབ་ཀྱི་ཐུགས་ཀའི་ཟླ་བ་ལས་ལྕགས་ཀྱུ་སྤྲོ་བ་ཡིན་ཞིང༌། བུམ་པ་རྣམས་ལྷ་ཇི་ལྟ་བུའི་ངོ་བོ་ཞེ་ན། དཀྱིལ་འཁོར་གྱི་སྐབས་ནུས་མ་བཅུ་ལོགས་སུ་ཡོད་པས་ཡབ་རྐྱང་དུ་བྱེད་པ་དང༌། འདིར་ནག་པོ་འབར་བ་ལ་སོགས་པའི་ཡབ་བཅུ་ལ་རང་མཚུངས་ཀྱི་ཡུམ་བྱེད་ཀྱང་རུང་སྟེ་རིགས་ཀུན་ཁྱབ་ཡིན་པའི་ཕྱིར་རོ། །ཅི་སྟེ་ན་ནག་པོ་འབར་བ་ལ་སེར་མོ་འབར་མས་འཁྱུད་པ་སོགས་གཞན་རིགས་ཀྱི་ཚུལ་དུ་བྱས་ཀྱང་རུང་མོད། དེ་ཡང་ནག་པོ་འབར་བའི་སྟོང་གཟུགས་དེ་རྗེས་དྲན་གྱི་དུས་ན་ལྷ་སྐུ་ཡབ་ཡུམ་དུ་འགྱུར་ལ། སྐྱེས་བུ་གང་རྫོགས་པའི་སངས་རྒྱས་ཐོབ་པ་ན། དེ་ཡང་ཡེ་ཤེས་ཀྱི་ལྷ་ནག་པོ་འབར་བ་དང་ནག་མོ་འབར་མར་འགྱུར་རོ། །དེའི་གཞན་རྣམས་ལ་ཡང་རིགས་འགྲེ་སྟེ། སེམས་འགྲེལ་གྱི་དགོངས་པ་བུམ་པ་ལྷག་གནས་ཀྱི་དོན་འདི་ཁོ་ནའོ། །གཟུངས་ཐག་རྡོ་རྗེ་སོགས་སྤྱི་འགྲོས་ཀྱི་ལག་
ལེན་བཞིན་དུའང་མཛད་ལ། རྒྱུད་འགྲེལ་ལས་མ་གསུངས་པས་མ་བྱས་ཀྱང་ཆོག་མོད། བྱེད་ན་རྡོ་རྗེའི་གཟུགས་བརྙན་ཆུ་ལ་ཤར་བ་དང་བཅས་པ་ནི་ལྷ་རྣམས་ཀྱི་ཐུགས་རྡོ་རྗེ་མཚོན་ལ་གཟུངས་ཐག་གམ་མེ་ཏོག་གི་འཕྲེང་པ་ནི། སྔགས་ཀྱི་འོད་ཟེར་འགྲོ་བའི་ལམ་ཡིན་པར་གྲགས་པ་བཞིན། རྒྱ་གར་ན་དངོས་པོ་གང་དང་གང་ལ་སྔགས་བཟླ་བ་ལ། བོད་གཙང་སྨེ་མེད་པ་རྣམས་ཀྱི་སྤྱོད་པ་ལྟར་ཐུ་ཐུ་མི་ཟེར་བར་ལམ་གཏོང་པའི་སྲོལ་ཡོད་པ་ལྟར་ཡིན་པས་འགལ་བ་མེད་ལ། འོན་ཀྱང་གཟུངས་ཐག་རྡོ་རྗེ་བཏགས་པ་ན་གཞན་གྱི་མིག་རྒྱུགས་ཐེབས་ཏེ། རྣམ་རྒྱལ་ཆེན་པོ་མཆོད་ཡོན་གྱི་སྣོད་ཡིན་པར་བཟུང་ན་ནི་ནོར་ཚབ་ཆེན་པོ་འོང་ངོ༌། །གཉིས་པ་ཐིག་སྐུད་ནི། སྤྱིར་རྒྱུད་འདི་ལས་ཁྲུ་ཉི་ཤུ་པ་དང༌། བཅུ་དྲུག་པ་དང༌། བཅུ་གཉིས་པའི་དཀྱིལ་འཁོར་གསུངས་པ་རྣམས་ལ་རང་རང་གི་ཉིས་འགྱུར་ཐིག་སྐུད་བྱས་ཀྱང་འོང༌། ཁྲུ་བརྒྱད་པའི་ཐིག་སྐུད་ཉིད་བསྲིངས་ཏེ་བཏབ་ཀྱང་རུང་ལ། ཁྲུ་བཞི་པ་ལས་ཆུང་བའི་དཀྱིལ་འཁོར་ལ་ནི་རང་རང་གི་ཉིས་འགྱུར་དང༌། སྦོམས་སུ་སྒོའི་ཉི་ཤུ་ཆ་ཡིན་ཞེས་གསུངས་པ་ལྟར་ཡིན་པས། ཁྲུ་བརྒྱད་པའི་ཐིག་སྐུད་མི་དགོས་མོད། སྤྱིར་དེ་དག་གི་ནང་ནས་སྐུའི་རྩ་ཐིག་ཁྲུ་བཞི་པ་གྲུ་བཞི་ནི་དཀྱིལ་འཁོར་ཡིན་ལ། ཆང་ཟུང་མི་ཐེ་བར་བྱས་ནས་དེ་ཉིས་འགྱུར་གྱི་ཁྲུ་བརྒྱད་པ་ཉིད་གཙོ་བོར་བསྔགས་ཤིང༌། བཞི་འགྱུར་ཁྲུ་བཅུ་དྲུག་པ་
ཡང་གསུངས་ནས། ལྷག་མ་ཁྲུ་ཉི་ཤུ་ལས་ལྷག་སྟེ་ཁྲུ་སྟོང་གི་བར་དུ་ཡང་ཐིག་སྐུད་དེ་ཁོ་ནས་བྱེད་དེ། ཁྲུ་བརྒྱད་པར་ལོངས་པ་ཡན་ཆད་ཀུན་ལ་སྦོམ་ཕྲ་ཡང་སློབ་དཔོན་གྱི་ནས་གཅིག་སྟེ། མཐེབ་སོར་གྱི་བརྒྱད་ཆ་ཡིན་ལ། དཀྱིལ་འཁོར་ཤིན་ཏུ་ཆེ་ན་དེ་ཉིད་རིམ་པས་བསྲེངས་ཏེ་གདབ་པ་ཡིན་ནོ། །གང་ལྟར་ཡང་ཐིག་སྐུད་དེ་ནི་རྩ་གསུམ་རྣམ་པར་དག་པས་གསུམ་སྒྲིལ་དང༌། མི་ལུས་ཁྲུ་བཞིའི་ཚད་ཅན་ལ་ཐབས་ཤེས་ཀྱི་དབྱེ་བ་རྣམ་པར་དག་པས་ཁྲུ་བརྒྱད་དང༌། ཐིག་ལེ་བཞི་དག་པའི་སྒོ་ནས་ཁྲུ་བཅུ་དྲུག་པར་ཡང་འགྱུར་ཏེ། རྩ་གསུམ་གཅིག་ཏུ་འདྲེས་པའི་བདེ་སྟོང་ཟུང་འཇུག་གམ། རྡོ་རྗེ་བཞི་མཚོན་ནོ། །གསུམ་སྒྲིལ་ནི། ལས་ཐམས་ཅད་ལ་སྤྱི་ཁྱབ་ཏུ་ནག་དམར་དཀར་བ་གསུམ་སྒྲིལ་དུ་བྱས་ན་ལེགས་ཏེ། རྩའི་དག་པ་དང་ཡང་མཐུན་མོད། ལས་སོ་སོ་དང་མཐུན་པའི་ཁ་དོག་ཏུ་བྱས་ནས། དཀར་པོ་གསུམ་སྒྲིལ་སོགས་བྱས་ནའང་ལེགས་པར་འགྱུར་རོ། །དཀྱིལ་ཆོག་གཞན་གྱི་ཡེ་ཐིག་ལ་ཁ་དོག་ལྔའི་ཐིག་སྐུད་རྣམས་ལྷ་སོ་སོ་དང་སྦྱོར་བ་འགྲིག་པར་ཡོད་ཀྱང༌། འདིར་གསུམ་སྒྲིལ་ལ་ཡུམ་ལྔ་ཇི་ལྟར་སྦྱོར་སྙམ་ན། འདིར་ཞལ་ཕྱག་གི་རྣམ་པར་མི་བསྐྱེད་པས་དོགས་པ་དེ་མི་འཇུག་སྟེ། ས་བོན་ལྔ་པོ་ཡུམ་ལྔ་དངོས་ཡིན་ལ། དེ་རྣམས་གཅིག་ཏུ་འདྲེས་པ་ལས་ཐིག་སྐུད་དུ་གྱུར་པའི་ཕྱིར། ཐིག་སྐུད་རིལ་པོ་རྡོར་དབྱིངས་དབང་ཕྱུག་མ་ཡིན་པ་ནས། རིལ་པོ་སྤྱན་མའི་བར་དུའང་ཡིན་པའི་ཡུམ་ལྔ་ཆར་གྱི་གཞི་མཐུན་པར་མོས་པ་ཡིན་པས་དོགས་པ་དེ་རྩ་བ་ནས་མེད་ལ། ཅི་སྟེ་ཞལ་ཕྱག་གི་རྣམ་པ་ཅན་དུ་སྒོམ་ན་
ནི། སྲད་བུ་དེ་ཆ་ལྔར་བགོས་པའི་ཆ་རེ་རེ་ཡུམ་རེ་རེར་བསྒོམས་པས་ཆོག་སྟེ་གསུམ་སྒྲིལ་དང་ལྷ་ལྔ་མི་འགལ་ལོ། །རྒྱུད་འགྲེལ་འདིར་ནི་ཡེ་ཐིག་དང་ལས་ཐིག་གི་དབྱེ་བ་ཡེ་མ་གསུངས་ཤིང༌། དཀྱིལ་འཁོར་ཀྱི་ཐིག་སྐུད་ནི་གཅིག་པུ་ཡིན་པར་གསུངས་པས་རྡོ་རྗེའི་ཐིག་གདབ་པ་ཞེས་བརྗོད་ཀྱི་ལས་དང་ཡེ་ཤེས་ཀྱི་དབྱེ་བ་མི་བྱའོ། །གསུམ་པ་རྡུལ་ཚོན་ནི་རྒྱུད་ལས། རྡོ་རྗེ་སོགས་དང་རིན་ཆེན་ལྔ་དང་གསེར་དང་མ་ར་ཀ་ཏ་བྱུ་རུ་མུ་ཏིག་ལ་སོགས་དང༌། དབྱེ་བ་ལྔ་ཡི་འབྲུའམ་རྣམ་མང་ནོར་བུ་དང་ནི་དེ་བཞིན་ཉིད་དུ་བཏགས་པའི་ཚོན་རྣམས་ཀྱི། ཞེས་གསུངས་པ་ལྟར། སློབ་མ་འཁོར་ལོས་བསྒྱུར་བ་དངོས་ཡིན་ན་མ་བཏགས་པ་རང་བྱུང་གི་རྡུལ་ཚོན་རྡོ་རྗེ་ཕ་ལམ་ཀྱི་བྱེ་གསེག་ཁ་དོག་ལྔ་པོ་སོ་སོ་དང༌། ཡང་མརྒད། ཨིནྡྲ་ནཱི་ལ། པདྨ་རཱ་གཟླ་བ་ཆུ་ཤེལ། ཀརྐེ་ཏ་ན། མཐོན་ཀ་ཆེན་པོ་སྟེ་ཁ་དོག་དྲུག་གི་རིན་པོ་ཆེའི་དངོས་ཕྱེ་མར་བཏགས་པའི་རྡུལ་ཚོན་ནོ། །འཁོར་ལོས་བསྒྱུར་བ་ཕལ་པས་ནི། གསེར་དང༌། མུ་ཏིག་དང༌། བྱུ་རུ་དང༌། མུ་མེན་དང༌། ཚོན་བཞི་བསྲེས་པའི་ལྗང་གུའམ། }ོ་ལྗང་ཚོན་ཐོབ་ཉུང་བས་མར་གད་དང༌། མཐོན་ཀ་ཆེན་པོའི་རིགས་གྱི་རྡོས་ཕྱེ་མའོ། །སྐྱེ་བོ་ཕལ་པས་ནི། རྡོ་རྗེའི་ཕྱེ་མ་རང་བྱུང་གི་ཚབ་ཏུ་མ་ཉམ་པའི་འབྲས་བུའི་ཚོན་ཏེ། དཔེར་ན་དཀར་པོ་དང༌། ནག་པོ་ལ་ཏི་ལ་དཀར་ནག་ལྟ་བུ་དང༌། འབྲས་ཀྱི་རིགས་ཤིན་ཏུ་ཕྲ་བ་ཡང་མང་པོ་ཡོད་པས། དེ་དག་ཁ་བསྒྱུར་བས་ཀྱང་རུང་བ་དང༌། དཀྱིལ་འཁོར་ཤིན་ཏུ་ཆེ་ན་ནི་འབྲུ་ཆེན་པོས་ཀྱང་རུང་ངོ༌། །ཡང་ནོར་བུ་བཏགས་པའི་
དོད་དུ་འབྲུའམ་རྡོ་ལ་སོགས་པ་བཏགས་པ་སྟེ། ཁ་དོག་ཀྱང་རང་བྱུང་དང་བཅོས་མ་གཉིས་ཀ་འབྱུང་ངོ༌། །དེ་དག་ལ་ཤ་ཁྲག་དྲི་ཆུ་བཤང་བ་ཁུ་རྡུལ་སོགས་ཀྱི་ཆ་ཤས་ཀྱང་སོ་སོར་བསྲེ་དགོས་པར་གསུངས་པས་ཐ་ན་མོས་པ་ཙམ་ཡང་བྱ་དགོས་སོ། །འདིར་འཁོར་ལོས་བསྒྱུར་བ་ཞེས་གསུངས་པ། འདུལ་མངོན་ལས་བཤད་པ་ལྟ་བུའི་གསེར་དངུལ་ཟངས་ལྕགས་ཀྱི་ངེས་བཟུང་ཅན་མིན་ཏེ། སྟོབས་ཀྱི་འཁོར་ལོས་བསྒྱུར་བ་མཚན་ཉིད་དང་ལྡན་པ་ཡང་འདིའི་འཁོར་ལོས་བསྒྱུར་བ་ཡིན་ལ། འཁོར་ལོས་བསྒྱུར་བ་ཕལ་པ་ནི། བྲམ་ཟེ་རྣམས་ཀྱི་འདོད་པ་ལྟར་ཁམས་ཀྱི་རྒྱལ་པོ་མཐའ་བཞི་ལས་རྣམ་པར་རྒྱལ་བའི་དོན་ནོ། །འདིར་རྡུལ་ཚོན་ནི་ཁ་དོག་དྲུག་དཀར་ཡོད་ན། དབུས་སུ་སྔོན་པོའི་སྟེང་དུ་ལྗང་གུ་བཞག ཤར་དུ་ནག་པོ་སོགས་ཕྱོགས་ཀྱི་རིམ་པས་བཀོད། བསྐྱེད་ཆོག་གི་སྐབས་སུ་ཡང་དབུས་ཀྱི་རྡུལ་ཚོན་ལྗང་སྔོ་གཉིས་ཀར་ཨཾ་ལས་བྱུང་བའི་རྣམ་པ་རྡུལ་ཚོན་ལྗང་སྔོ་ངོ་བོ་མེ་བསྐྱོད་པར་བསྐྱེད་པ་སོགས་ཏེ་གཅིག་ཏུ་བསྲེས་མ་བསྲེས་ཀྱི་ཁྱད་པར་གྱིས་ཐིག་སྐུད་དང་འདི་མི་འདྲ་སྟེ། འདིར་སོ་སོར་བསྐྱེད་པ་ངེས་པར་དགོས་སོ།། །།བཞི་པ་རྡོ་རྗེ་ལྷ་གནས་ཀྱི་སྐབས་སུ། ཡེ་ཤེས་ལེའུ་ལས། ནོར་བུ་གཙུག་ཏོར་དཔྲལ་བ་མགྲིན་པ་སྙིང་གའི་གནས་དང་ལྟེ་བ་གསང་བ་ལ་ཡང་རྡོ་རྗེ་ནི། །གཅིག་གཉིས་ཆུ་གཏེར་མདའ་དང་ཀླུ་ཡི་དབང་པོ་དགུ་བཅས་ཉིན་བྱེད་སོར་རྣམས་དག་གི་རིམ་པས་སོ། །དབུས་དང་སྟེང་འོག་གསུམ་གྱི་ཆ་སྟེ་ཟུམ་པ་དང་ནི་རྣམ་པར་གྱཻས་པ་ཞི་དང་དྲག་པོ་ལའོ། །ཞེས་དང༌། ཁྱོན་ནི་དེ་ཡི་སུམ་ཆ་ཞལ་དང་བཅས་པའི་ལྟེ་བ་འདབ་མ་དག་ཀྱང་དེ་ཡི་སུམ་ཆ་
ལས། །རྭ་ནི་ཁྱོན་དང་མཚུངས་པ་ཕྱོགས་སམ་ཕྱོགས་བྲལ་དུ་སྟེ་རྭ་ཡི་ཟླུམ་པོ་དག་ནི་བཞི་ཆའོ། །ཕྱི་རོལ་རྭ་ཡི་སུམ་ཆ་འོག་སྟེ་སྟེང་དུ་རྒྱ་ཤུག་ཚེར་མ་ཡི་ནི་རྣམ་པ་སྦྱོར་བའོ། །ཞེས་གསུངས་པ་ལྟར། རྣ་རྒྱན་གྱི་རྡོ་རྗེ་ནི་རྡོ་རྗེ་ནོར་བུ་རྣམ་པར་དག་པ་སོར་གཅིག་པ་དང༌། མཐེ་བོའི་རྡོ་རྗེ་ནི་གཙུག་ཏོར་གྱི་འཁོར་ལོ་དག་པས་སོར་གཉིས་པ་དང༌། སྐྲ་མཚམས་ཀྱི་རྡོ་རྗེ་འཕྲེང་བ་ནི། དཔྲལ་པའི་འཁོར་ལོ་དག་པ་སོར་བཞི་པ་དང༌། མགུལ་རྒྱན་གྱི་རྡོ་རྗེ་ནི། མགྲིན་པའི་འཁོར་ལོ་དག་པ་སོར་ལྔ་པ་དང༌། དོ་ཤལ་གྱི་རྡོ་རྗེ་ནི་སྙིང་གའི་འཁོར་ལོ་དག་པ་སོར་བརྒྱད་པ་དང༌། སྙིང་གར་འདོགས་པའི་རྡོ་རྗེ་ཞེས་བྱ་བ་སྲུང་བ་དང་བསྙེན་པའི་དོན་དུ་དགོས་ཏེ། དེ་ནི་ལྟེ་བའི་འཁོར་ལོ་དག་པས་སོར་དགུ་པའོ། །གསོར་པའི་རྡོ་རྗེ་ནི་གསང་པའི་འཁོར་ལོ་དག་པ་སྟེ་སོར་བཅུ་གཉིས་པའོ། །ཞེས་གསུངས་པ་ལས། འདིར་གསོར་པའི་རྡོ་རྗེ་སྟེ། དེ་ཡང་དཀྱུས་སུ་སོར་བཅུ་གཉིས། དེ་ལ་ཆ་གསུམ་དུ་བྱས་པའི་ཆ་ཐ་མ་གཉིས་ནི་སྟེང་འོག་གི་དབུས་རྭའི་དཀྱུས་ཡིན་ལ། ཆ་དབུས་མ་ལ་ཡང་ཆ་གསུམ་དུ་བྱས་ཏེ་སྟེང་འོག་གཉིས་ནི་པདྨ་འདབ་བརྒྱད་ཀྱི་ས་དང༌། དབུས་མ་ལྟེ་བའི་ས་སྟེ་འདི་ལ་ཐིག་ལེ་བཞི་ཐབས་ཀྱི་ཆ་རྣམ་པར་དག་པ་དང༌། ཚངས་པའི་གནས་པ་བཞི་རྣམ་པར་དག་པའི་དབང་དུ་བྱས་ནས། ཕྱོགས་བཞིར་གཟུགས་པའི་ཞལ་བཞི་བྱ་ཞིང༌། ཡང་ན་རྡོ་རྗེ་ནི་གསལ་བྱེད་སུམ་ཅུ་དག་པའི་དབང་དུ་བྱས་ན། དབྱངས་མེད་པས་བརྗོད་མི་ཤེས་པའི་ཕྱིར་ཞལ་མེད་པའི་ཟླུམ་པོའོ། །རྡོ་རྗེ་དབུས་ཀྱི་རྭའི་དཀྱུས་ནི་སོར་བཞི་ཡིན་ལ། དེ་ལ་ཆ་གསུམ་དུ་བཏང་པའི་འོག་ཏུ་སུམ་ཆ་གཅིག་དང༌། སྟེང་དུ་སུམ་ཆ་གཉིས་
ཡོད་པའི་མཚམས་དེ་ནི་རྭའི་སྦོམ་ས་སྟེ། དེའི་ཞིང་ལ་སོར་གཅིག་གི་རྒྱའོ། །དེ་ལས་འོག་ཏུ་ཞུ་འདྲོངས་ཀྱི་འཕྲར་སོང་ཞིང༌། སྟེང་དུ་ཞུ་འདྲོངས་ཀྱི་ལྷག་པར་ཕྲ་ཞིང་རྩེ་མོ་རྣོ་བ་ཡིན་ལ། དབུས་ཀྱི་རྭ་གྲུ་བཞི་དང་ཕྱོགས་ཀྱི་རྭ་རྣམས་ཅུང་ཟད་ཟླུམ་པ་དབུས་རྭ་ལས་ཅུང་ཟད་ཕྲ་བའོ། །རྭ་ལྔ་པའམ་དགུ་པ་གང་ཡིན་ཡང་རུང་སྟེ། གཡས་གཡོན་གྱི་རྭ་རྣམས་ཀྱང་བརྐྱང་ན་དབུས་རྭ་དང་རིང་ཐུང་མཉམ་པ་ཡིན་ཡང་རྐེད་མཚམས་ནས་གཞུ་ལྟར་གུག་པའི་ཕྱིར། རྩེ་མོ་དབུས་རྭ་ལས་དཀྱུས་ལས་ཐུང་བ་སྟེ། ཞི་བ་ལ་ནི། ཕྱོགས་ཀྱི་རྭའི་རྩེ་རྣམས་དབུས་ཀྱི་རྭ་ལ་རེག་པས་སོར་ཕྱེད་ཙམ་དབུས་ཀྱི་རྭ་ཕྱིར་འཕགས་པ་ཡིན་ལ། དྲག་པོ་ལ་ནི་ཁ་གྱེས་པ་ཡིན་ཡང༌། བར་གྱི་ཆ་སོར་ཕྱེད་བཞི་ཙམ་ཞི་བ་ལས་ཚབས་ཆེ་ཙམ་གུག་ཅིང༌། སོར་ཕྱེད་ཙམ་སྟེང་དུ་རྩེ་མོ་རྣོན་པོའི་རྣམ་པ་སྟེ། ཕྱོགས་རྣམས་གུག་པའི་ཁྱད་ཀྱིས་མཐའ་རྣམས་ལས་དབུས་རྭ་སོར་བྱེད་ཙམ་འཕགས་པ་ཡིན། དེ་ཡང་པདྨའི་ཁ་མཚམས་ལས་འཕྲེད་དུ་ནས་གང་ཙམ་རེ་ནང་དུ་གཞལ་བའི་མཚམས་ནས་ཕྱོགས་ཀྱི་རྭ་རྣམས་སྐྱེས་ཏེ། སོར་ཕྱེད་ཙམ་དྲང་པོར་འཕགས་ནས་སོར་གང་ཙམ་ཕྱིར་སོགས་འགྲོས་དང༌། དེ་མཚམས་ནས་གཞུ་ལྟར་གུག་པའི་སྒུར་ཕྱི་ལ་བསྟན་པ་ཡིན་པ། རྭ་དེ་རྣམས་ཀྱི་ཕྱེད་དམ་སུམ་གཉིས་མཚམས་ཙམ་གང་རུང་ལ་སྦོམ་ས་འོང་བ་བྱེད་དེ་བཟོའི་ཁྱད་པར་ལས་སོ། །སྦོམ་སའི་ཐད་ལ་བརྩིས་ན་ཤར་གྱི་རྭ་མཐའ་ནས་ནུབ་ཀྱི་རྭ་མཐའི་བར་ལའང་སོར་བཞི་ཡོད་ལ། དེ་ཁོར་ཡུག་ཏུ་ཟླུམ་པོར་བཅལ་ན་སོར་བཅུ་གཉིས་ཏེ་རྡོ་རྗེ་དཀྱུས་དང་མཉམ་པའོ། །ཟླ་བའི་སྟེང་དུ་མུ་ཏིག་གི་འཕྲེང་བ་སོགས་དང༌། ཆུ་སྲིན་གྱི་གདོང་སོགས་རྒྱུད་
འདིར་མ་གསུངས་པའི་ཕྱིར་ངེས་པར་དགོས་པ་མ་ཡིན་ལ། སྤྱི་འགྲོས་སུ་སྣང་བས་བྱས་ཀྱང་འགལ་བ་མེད་པར་མངོན་ནོ། །དེ་ལྟར་ཚད་དང་ལྡན་པ་རྒྱུ་ནི་གསེར་དངུལ་ཟངས་སོགས་དང༌། ཕུར་བུའི་རྒྱུར་བཤད་པ་རྣམས་ཀྱང་རུང་བས་ཇི་ལྟར་འོས་པའོ། །འདིར་ཡང་ངོ་བོ་ཧཱུྃ་ལས་བྱུང་བ་གཙོ་བོ་དུས་ཀྱི་འཁོར་ལོ་ཉིད་རྣམ་པ་རྡོ་རྗེ་ཉིད་དུ་ཤར་བའོ། །ལྔ་པ་དྲིལ་བུ་ལྷག་གནས་ཀྱི་སྐབས་སུ། རྒྱུད་ལས། དྲིལ་བུ་དག་ཀྱང་ དེ་བཞིན་ཆ་གསུམ་སྟེང་ནི་རྡོ་རྗེ་དང་མཚུངས་བ་ལང་གདོང་དང་པདྨའི་ གཟུགས། །ཞེས་དང༌། དྲིལ་བུའི་ཞལ་རྣམས་དེ་བཞིན་འདབ་མ་རྡོ་རྗེ་ཡང་ངོ་བ་ལང་གདོང་ལ་སོགས་པ་དེ་བཞིན་ཉིད། །ཅེས་ཀྱང་གསུངས་ཏེ། འདིར་རྡོ་རྗེ་དྲིལ་བུ་ཞེས་པ་རྡོ་རྗེས་མཚན་པའི་དྲིལ་བུའོ། །དྲིལ་བུ་དེ་དཔངས་སུ་སོར་བཅུ་གཉིས་པ་སྟེ། དེ་ཡང་སྟེང་འོག་ཏུ་ཆ་གསུམ་དུ་བྱས་པའི་ཆ་གཅིག་སྟེང་མ་ནི་རྡོ་རྗེ་ཕྱེད་པ། ཆ་བར་པ་ནི་ཞལ་གྱི་གནས་ཆ་འོག་མ་ནི་ལྟོ་བ་སྟེ་དེ་ལ་རྡོ་རྗེ་ཕྱེད་པའི་ཐ་སྙད་ནི་རྭ་རྣམས་ལ་འཇུག་སྟེ་གོང་དང་འདྲའོ། །དབུས་ཀྱི་ཆ་ལ་ཆ་གསུམ་དུ་བྱས་པའི་སྟེང་འོག་གཉིས་པདྨ་དང་དབུས་མ་ལ་གཞལ་ཏེ་དེ་ཡང་ཐིག་ལེ་བཞིའི་ནང་ནས་ཤེས་རབ་ཀྱི་ཕྱོགས་དང༌། རྣམ་ཐར་སྒོ་བཞི་དག་པས་ཞལ་བཞི་དང༌། ཡང་ན་དྲིལ་བུ་ཨཱ་ལི་རྣམ་པར་དག་པ་ཆོས་ཀྱི་སྒྲ་སྒྲོགས་པའི་ཕྱིར་ཞལ་གཅིག་པ་སྟེ། དེ་ཡང་རྡོ་རྗེ་ཞལ་བཞི་དང་ལྡན་པ་ལ་དྲིལ་བུ་ཡང་ཞལ་བཞི་པ་དང༌། རྡོ་རྗེ་ལ་ཞལ་མེད་ན་ནི། དྲིལ་བུ་ཞལ་གཅིག་པའོ། །རྡོ་རྗེ་དང་དྲིལ་བུ་རིགས་གཉིས་ཀ་ལའང་ཞི་དྲག་གཉིས་ཀ་འབྱུང་བས། རྡོ་རྗེ་རིགས་བཞི་དང་དྲིལ་བུ་རིགས་
བཞི་དང༌། དེ་ལའང་རྩེ་དགུ་རྩེ་ལྔའི་དབྱེ་བས་བརྒྱད་དམ་རྭའི་དབྱེ་བས་སྣ་ཚོགས་པའོ། །དྲིལ་བུའི་ཁོག་པའི་སྐྲ་མཚམས་ཀྱི་རྒྱ་དང༌། རྡོ་རྗེ་བྱེད་པའི་རྭའི་སྦོམས་གཉིས་རྒྱ་མཉམ་པ་དང༌། དེ་ནས་སོར་གསུམ་དུ་ཅུང་ཟད་ཞུ་འདྲོངས་དང་བཅས་པས་ཁ་ཇེ་རྒྱས་ལས། ཞི་བ་ལ་ནི་བ་ལང་ཁ་སྟེ་མཚམས་དེ་ནས་དཔངས་སུ་སོར་ཕྱེད་ཙམ་གྱི་ཚད་ཕྱི་ལ་ནས་གཉིས་ཙམ་འཕགས་ནས། དེ་ནས་ཁའི་མཐའ་སོར་ཕྱེད་ནང་དུ་ནས་གང་ཙམ་རུབ་པ་ཡིན་ལ། དེ་ལྟར་བ་ལང་ཁ་ལ་རྩེ་མོར་ཞི་པའི་རྡོ་རྗེས་མཚན་པ་ཡིན། ཡང་ན་པདྨ་རྒྱས་པའི་ཁ་སྟེ། ཁོག་པ་སོར་གསུམ་གྱི་བར་གོང་བཞིན་ལ། དེ་ནས་དཔངས་སུ་སོར་གཅིག་པོ་རྒྱར་སོར་ཕྱེད་ཀྱི་བར་དུ་སྔར་བས་ཀྱང་ཇེ་རྒྱས་སུ་སོང་ཞིང༌། ཁ་རྒྱུན་ཅུང་ཟད་འཐུག་པར་བྱ་སྟེ། ནང་དུ་ཞུམ་པ་ནི་མེད་དོ། །འདི་ལ་རྡོ་རྗེ་རཱ་གྱེས་པས་མཚན་པའོ། །རྡོ་རྗེ་དང་དྲིལ་བུ་གཉིས་ཀར་ལ་རྭ་ལ་ཞི་དྲག་གི་དབྱེ་བ་ཡོད་པས་ཞལ་རས་ལའང་ཞི་དྲག་དགོས་པར་སེམས། དྲིལ་བུ་ལ་བཟོ་ཐིག་ཅུང་ཟད་ཀྱང་རུང་པ་སྟེང་གི་རྭ་ལ་རྩེ་སོར་བཞི་ཙམ་བྱས་ནས། བར་གྱི་ཆ་སྟེང་མ་པདྨ་བར་པ་ཞལ་རས། འོག་མ་ལ་པདྨའི་འོག་ཏུ་དབྱུག་པ་རྩེ་སོར་ཕྱེད་ཙམ་བླ་ཐབས་སུ་བསྣན། ལྷག་པོ་རྩེ་སོར་གང་ཙམ་པ་དེ་ནི་འོག་གི་ཁོག་པའི་དཔངས་ལ་བསྣན་ནས་ཁོག་པ་དངོས་ལ་སོར་བཞི་དང་ཐོད་དཔངས་རྩེ་སོར་གཅིག་བྱ། དེའི་ཚེ་ཁོག་པའི་སྐྲ་མཚམས་ལ་མུ་ཁྱུད་ཡོད་པའི་ནང་མཐའ་དང༌། རྡོ་རྗེའི་རྭའི་སྦོམས་ཀྱི་ཕྱི་མཐའ་མཉམ་པ་ཙམ་བྱས་ན་གཞུང་དང་ཡང་མི་འགལ་ལ་མཛེས་པའི་ཕྱིར་འདི་ལ་མི་ལེགས་པ་མེད་དོ། །འདིར་དཀྱིལ་ཆོག་ཡེ་ཤེས་རྒྱ་མཚོ་
ལས། ཞི་བ་ལ་བ་ལང་གི་གདོང་ལྟ་བུ་རྡོ་རྗེའི་ཁ་ཟུམ་པས་མཚན་པ་དང༌། དྲག་པོ་ལ་པདྨ་རྒྱས་པ་ལྟ་བུ་རྡོ་རྗེ། ཁ་གྱེས་པས་མཚན་པའོ། །ཞེས་གསུངས་པའི་དོན་ཁོག་པ་བ་ལང་ཁ་དང་པདྨ་ཁ་ཡིན་པ་ལ། སྟེང་དུ་ཁ་གྱེས་པ་དང་ཟུམ་པས་མཚན་པ་ཞེས་པའི་དོན་དུ་ཐམས་ཅད་ཀྱིས་གོ་ནུས་པར་འདུག་ཀྱང༌། སྤྱན་སྔ་ཆོས་གྲགས་པ་ནི་གོ་བ་ལོག་སྟེ་བ་ལང་གདོང་གི་དོན་རྡོ་རྗེ་ཁ་ཟུམ་པ་དང༌། པདྨ་རྒྱས་པའི་དོན་ཁ་གྱེས་པ་ལ་ཀུན་མཁྱེན་ཆེན་པོ་བཞེད་དོ་ཞེས་ཡི་གེར་འདྲི་བ་ནི། གཞན་ལ་སྐྱོན་རྟོག་གྱུའི་ཁུངས་ལ་ཧལ་ཧོལ་དུ་སྨྲས་པས་རང་ཉིད་ལ་གཞན་དག་བཞད་གད་ཀྱི་རྒྱུ་ཆེན་པོ་བྱུང་བའོ། །འགྲེལ་པ་ལས། བ་ལང་གི་གདོང་ནི་ཞི་བ་ལའོ། །ཞེས་པའི་དོལ་མཆན་དུ། དྲིལ་བུའི་ཁ་རྒྱུན་ནང་དུ་རུབ་པ་ཞེས་དང༌། པདྨ་རྒྱས་པའི་ཁ་ཞེས་པའི་དོལ་མཆན་དུ་དྲིལ་བུའི་ཁ་རྒྱུན་ཕྱིར་གྱེད་པ་ཞེས་འབྱུང་བའང་མཐོང་བར་གྱུར་ཅིག དྲིལ་བུ་ཡང་གོང་བཞིན་རྣམ་པ་དྲིལ་བུ་ཉིད་ལ་སྣ་ཚོགས་ཡུམ་གྱི་ངོ་བོ་ཉིད་དུ་བསམ་དགོས་པ་ཡིན་ནོ། །གཞན་རྫས་ལྔ་སྟ་གོན་གྱི་སྐབས་རྣམས། དཀྱིལ་ཆོག་ཉིད་ཀྱིས་གོ་བླའོ། །གསུམ་པ་སློབ་མ་ལྷག་གནས་ནི། རྫས་ལྔ་ལྷག་གནས་ཀྱི་གནས་དེ་ཉིད་དུ་བྱེད་པ་ཡིན་ན། རྫས་རྣམས་གཞན་དུ་བསྡུས་ཏེ། སླར་མལ་སྟན་ལྷག་གནས་ཀྱི་ཚེ་དཀྱིལ་འཁོར་གྱི་ས་གཞི་ལ་སྔར་བཞིན་འཇོག་པར་བཤད་པ་ལྟར་ཡིན་ཡང་ཡོལ་བས་བཅད་པའམ། ཁེབས་ཀྱིས་བཀབ་ཀྱང་རུང་སྟེ་དགོས་དོན་མཚུངས་པའི་ཕྱིར་རོ། །དཀྱིལ་འཁོར་ཁང་པ་ལས་གཞན་དུ་ཡིན་ན་དགག་བྱ་མེད་པས། རྫས་རྣམས་བསྡུ་མི་དགོས་
ཏེ་ཇི་ལྟར་རིགས་པར་སྤྱད་དོ། །རྒྱུད་འགྲེལ་ཉིད་ལས་གསུངས་པའི་སློབ་མ་ལྷག་གནས་དངོས་ནི། སོ་ཤིང་དོར་བ་དང༌། ཡི་གེ་དྲུག་པས་སྲུང་བ་དང༌། རྡོ་རྗེ་སེམས་དཔའ་བསྐུལ་བ་སྟེ་ཆོས་གསུམ་པོ་དེ་ཙམ་ཡིན་ལ། སྔོན་དུ་གསོལ་བཏབ་དང༌། སྣོད་དུ་རུང་བའི་ཕྱིར་ཆོས་བཤད་པ་རྒྱུད་འདི་ཉིད་ལས་འབྱུང་བ་ཅི་རིགས་སྦྱར་ནའང་ལེགས་པས་དུས་འཁོར་རང་ལུགས་ཁོ་ན་བྱེད་འདོད་པ་དང༌། སློབ་མའང་དེ་ཙམ་ལ་ཡིད་ཆེས་ན། དེ་ཙམ་གྱིས་སྐྱོན་ཀུན་སྤངས་ཡོན་ཏན་ཀུན་རྫོགས་ཀྱི་སྟ་གོན་ཡིན་མོད། སྤྲོས་པ་ལ་དགའ་བ་རྣམས་ཀྱི་ངོར་གསང་བ་སྤྱིའི་ཆོ་གས་ཁ་བསྐང་པ་ནི་དཀྱིལ་ཆོག་ཏུ་བཤད་ཟིན་པ་ལྟར་ཡིན་པ། འདིའི་ལུགས་ལ་དཔྱད་ན། རྒྱ་གར་བ་བློས་བཏགས་མཁན་པོ་དང༌། བོད་མང་པོ་ཞིག་གསང་བ་ནོར་ཐིག་ལས་འབྱུང་བའི་སྡོམ་བཟུང་གི་གུང་ལ་ཡོད་པའི་རིགས་ལྔའི་སྐོར་རྣམས་ཕུད་ནས། དུས་འཁོར་གྱི་རིགས་དྲུག་སྡོམ་བཟུང་འཇུག་པ་དག་མཐོང་སྟེ། ཇི་ལྟར་དུས་གསུམ་མགོན་པོ་རྣམས། ཞེས་སོགས་དང་མ་བསྒྲལ་བ་རྣམས་བདག་གིས་བསྒྲལ། །ཞེས་སོགས་རྒྱུད་འདིར་བྱང་ཆུབ་བདག་གིས་བསྐྱེད་ཅེས་པའི་ནང་དུ་འདུས་པ་མ་གོ་བས་དེ་དག་བྱེད་མོད། ཕན་ཚུན་བསྲེས་པས་གཉིས་ཡིན་དུ་མ་སོང་གཉིས་མིན་དུ་སོང་བའི་དོན་གྱི་སྒོ་ནས་འཁྲུལ་བར་མ་ཟད། ཁ་སྐོང་བྱེད་པའི་སྐབས་སུ། སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །ཞེས་པའི་ཚིག་དོན་གཉིད་ཀར་སྒྲིག་མཚམས་མ་ཤེས་ནས་འཇོག་པ་སོགས་རྐང་དུམ་རེ་འདྲེན་པར་བྱེད་དོ། ཁ་ཅིག་རིགས་ལྔའམ་དྲུག་གི་སྡོམ་བཟུང་
ལན་གསུམ་བྱས་པས་སྔགས་སྡོམ་རྫོགས་པར་ཐོབ་པར་འདོད་པ་ལ་ནི། སྟ་གོན་གྱི་སྐབས་ཁོ་ནར་སྔགས་སྡོམ་རྫོགས་པར་ཐོབ་ཟིན་པའི་སྐྱོན་འཇུག་གོ །གཞན་རྣམས་གོ་བླ་ཞིང༌། དཀྱིལ་ཆོག་སྤྱིའི་གོ་དོན་ཞིག་འབྲི་བར་འདོད་པས་འདིར་མ་བཤད་དོ། །རང་རེའི་བླ་མ་གོང་མ་རྣམས་ཀྱི་ཕྱག་ལེན་ལ་གོང་དུ་བཤད་པའི་དུས་འཁོར་རང་ལུགས་ཀྱི་སྟ་གོན་དེ་ཙམ་རེ། བདག་འཇུག་ལ་ཡང་མཛད་པར་སྣང་བ། སྒྲུབ་མཆོད་ལ་ཡང་ལྷག་གནས་བརྒྱད་ཀ་ཚང་བར་དགོས་པར་བཞེད་དེ་འགྲུབ་ན་དེ་བཞིན་དུ་བྱའོ། །བཞི་པ་མལ་ལྷག་གནས་ནི། རྫས་ལྔ་ཕྱོགས་མ་འཆོལ་བར་ཡོད་པའི་ངང་དེར། དཀྱིལ་འཁོར་གྱི་ས་ཆའི་ལྷོ་ཕྱོགས་སུ་མལ་སྟན་བཅས་ཤིང༌། ཨོཾ་ཧོཿསོགས་ཀྱི་སྔགས་མང་དུ་བཟླས་ནས། མགོ་ནུབ་དང་རྐང་པ་ཤར་དུ་བསྟན་ཏེ། སློབ་དཔོན་རང་ཉིད་སེང་གེའི་ཉལ་སྟབས་ཀྱིས་ཉལ་བ་ན། དགེ་བ་དང་མི་དགེ་བའི་ལྟས་རྨི་ལམ་དུ་མཐོང་བར་འགྱུར་རོ། །སངས་རྒྱས་བྱང་སེམས་ལྷ་ལྷ་མོ་དགྱེས་ཤིང་རྩེ་བ་དང༌། རྡོ་རྗེ་ཁྲོ་བོ་དང་རྡོ་རྗེ་མཁའ་འགྲོ་མ་རྣམས་ཀྱིས་བདུད་བགེགས་འཇོམས་པའི་མཚན་མ་སོགས་མཐོང་ན་ཤིན་ཏུ་ལེགས་ཤིང་ཅི་ཡང་མ་མཐོང་ན་འབྲིང་ཡིན་པས། དེ་གཉིས་ལ་ནི་དེའི་ནངས་པར་ཉིད་ནས་ཐིག་གདབ་ཅིང་དཀྱིལ་འཁོར་འབྲིའོ། །ཅི་སྟེ་བདུད་བགེགས་ཀྱི་རིགས་མངོན་གསལ་ཅན་རྣམས། ཆོ་འཕྲུལ་གྱི་རིགས་མཐོང་ཞིང༌། ལོགས་པའི་སྐྱེ་བོ་ལ་གནོད་པའི་རྣམ་འགྱུར་བྱེད་པ་དང༌། གཞན་ཡང་ངན་པར་མངོན་ན། སློབ་དཔོན་གྱི་མལ་སྟན་སྤངས་ཏེ། དཀྱིལ་འཁོར་གྱི་ས་
གཞིའི་ཤར་དུ་འདུག་ནས་རྡོ་རྗེ་མཁའ་འགྲོ་མ་རྣམས་ལ་གཏོར་མ་སྦྱིན་ཞིང༌། དུར་ཁྲོད་ཀྱི་ས་གཞི་ལ་འདུག་ནས་གཏོར་མ་གསོལ་བར་བསམ་ལ། བགེགས་ཞི་བར་གསོལ་པ་བཏབ་བོ། འདི་ནི་མཚོན་བྱེད་དེ། སྲུང་མ་དྲུག་ཅུ་དང༌། རིགས་བརྒྱ་རྣལ་འབྱོར་མའི་ཚོགས་ལ་ཡང་འགྲུབ་ན་གཏོར་མ་འབུལ་ལོ། །དེའི་རྗེས་སུ་རྡོ་རྗེའི་ཞལ་དག་པ་ནས་བརྩམས་ཏེ། སྲུང་འཁོར་ཡང་རྫོགས་པར་བསྒོམས་ལ། ཚོགས་བསགས་གཉིས་སྔོན་དུ་འགྲོ་བས་མངོན་བྱང་ལྔ་བསྐྱེད་དམ་ས་བོན་ཕྱག་མཚན་ཙམ་ལས། རང་ཉིད་རྡོ་རྗེ་འཇིགས་བྱེད་སྡོམ་པ་ཆེན་པོར་བསྒོམ། དེ་མ་ཐག་རྒྱན་དང་ཕྱག་མཚན་བཀོད་ཀྱང་རུང་ལ། ཡང་ན་ཡེ་ཤེས་པ་སྤྱན་དྲངས། ཡི་གེ་བཀོད། རྡོ་རྗེ་གསུམ་བྱིན་གྱིས་བརླབས། སྔགས་དབང་རྫོགས་པར་བླངས། རྒྱས་བཏབ་བཞིའི་མཐར་ཕྱག་མཚན་རྒྱན་བཀོད་བྱས་ཀྱང་རུང་ངོ༌། །དེའི་ཚེ་རྐང་པ་བཅུ་དྲུག་པ་དང༌། བདུན་ཅུ་རྩ་གཉིས་པ་དྲག་ཏུ་བཟླ་ཞིང༌། སྔགས་དོན་དང་མཐུན་པར་བགེགས་གཞོམ་པའི་དམིགས་པ་ཡང་བྱ། མཁའ་འགྲོ་མ་རྣམས་ཀྱི་སྔགས་ཀྱང་ངེས་པར་བཟླ་བར་བྱ་སྟེ། སྙིང་པོའི་མཐར། ཨ་ཨཱ་ཨཾ་ཨཿ ཧ་ཧཱ་ཧཾ་ཧཿ ཕྲེཾ་ཧོཿ ཧ་ཧཱ་ཧི་ཧཱི་ ཧུ་ཧཱུ་ཧླྀ་ཧླཱྀ། སླྀ་སླཱྀ་ ཤི་ཤཱི་ཧཾ་ཧཿཧུཾ་ཧཱུཾ་ཕཊ་ཕཊ། ཨཱཿ ཐུ་ཐཱུའུ་ དྷི་དྷཱི་ལ་ལཱ་ཧུཾ་ཧཱུཾ་ཕཊ་ཕཊ། པླི་པླཱི་ཕུ་ཕཱུ་ བྷི་བྷཱི་ཝ་ཝཱ་ཧུཾ་ཧཱུཾ་ཕཊ་ཕཊ། ཋུ་ཋཱུ་ ཌྷི་ཌྷཱི་ར་རཱ་ཧུཾ་ཧཱུཾ་ཕཊ་ཕཊ། ཚུ་ཚཱུ་ ཛྷི་ཛྷཱི་ཡ་ཡཱ་ཧུཾ་ཧཱུཾ་ཕཊ་ཕཊ། ཀླྀ་ཀླཱྀ་ཁུ་ཁཱུ་ གྷི་གྷཱི་ཧ་ཧཱ་ཧུཾ་ཧཱུཾ་ཕཊ་ཕཊ། ཧ་ཧཱ་ཀྵ་ཀྵཱ་ང་ངཱ་༵༵༵ྈྐ་ ན་ནཱ་མ་མཱ་ཎ་ཎཱ་ཉ་ཉཱ་ཧུཾ་ཧཱུཾ་ཕྲེཾ་ཕྲཻཾ་ཕཊ་ཕཊ། ཅེས་པའོ། །
སྔགས་འདི་ནི་དྲག་པོའི་ལས་དང་བགེགས་ཚར་གཅོད་པ་ལ་བསྔགས་པའོ། །དེའི་ནུབ་མོ་ཡང་སྔར་བཞིན་མལ་སྟན་ལྷག་གནས་ཀྱིས་བརྟག་བགེགས་བཟློག་པའི་མཚན་མ་བྱུང་ན་ལེགས། མ་བྱུང་ན་སྔར་བཞིན་ཡང་ཡང་གཏོར་མ་དང་བཟླས་བསྒོམ་བྱ། ནམ་བགེགས་བཟློག་པའི་མཚན་མ་བྱུང་བ་ན། ནང་བར་གཏོར་མ་རྒྱ་ཆེར་བཏང་སྟེ། སྔར་གྱི་ལ་དགའ་སྟོན་དང་ཕྱིན་ཆད་མི་འཇུག་པའི་དོན་དུ་གསོལ་བ་གདབ་པ་དང༌། དེ་ནས་དེ་མ་ཐག་ཏུ་ཐིག་གདབ་པར་བྱ་བ་ཡིན་ནོ། །བཞི་པ་ཐིག་ཚོན་གྱི་ལས་ཀྱིས་དཀྱིལ་འཁོར་བཞེང་པ་ནི། སློབ་དཔོན་དཀྱིལ་འཁོར་གྱི་ནུབ་ཏུ་གནས་ནས་ཁ་ཤར་དུ་ཕྱོགས་ཤིང༌། ཞེས་པ་ནས་ཉི་མ་གསུམ་པའི་བྱ་བའོ། །ཞེས་པའི་བར་གྱིས་ཐིག་འདེབས་ཚུལ་བསྟན་ལ། སླར་ཡང་དཀྱིལ་འཁོར་གྱི་ས་གཞི་ལ་ཞེས་པ་ནས། ཉི་མ་བཞི་པ་དང་ལྔ་པའི་བྱ་ བའོ། །ཞེས་པའི་བར་གྱིས་ཚོན་གྱིས་འབྲི་བའི་རིམ་པ་བཤད་དེ། འདི་དག་རྒྱས་པར་རྒྱུད་འགྲེལ་ཉིད་ལས་འབྱུང་ཞིང༌། ཕལ་ཆེར་གོ་བདེ་བར་ཡང་ཡོད་ལ། རྒྱུད་དང་འགྲེལ་པ་གཉིས་སུ་གསུངས་པའི་དོན་ཕྱིན་ཅི་མ་ལོག་པ་ཤིན་ཏུ་གསལ་བར་དཀྱིལ་འཁོར་གྱི་ཆོ་ག་ཡེ་ཤེས་རྒྱ་མཚོ་དང༌། བདེན་པ་གཉིས་ཀྱི་ཚོན་ས་གཏན་ལ་དབབ་པ་ཞེས་བྱ་བར། དུས་གསུམ་སངས་རྒྱས་ཀུན་མཁྱེན་ཆེན་པོ་ཉིད་ཀྱིས་ཞིབ་མོར་གསུངས་པ་ལས་རྟོགས་པར་བྱའོ། །དེ་ལ་དབྱེ་ན། ཐིག་གདབ་པ་དང༌། རྡུལ་ཚོན་དབྱཻ་བའོ། །དང་པོ་ལ་ཐིག་ཆོག་དངོས་ལ་དཔྱད་པ། ཐིག་ཆ་ལ་བཤད་པ། ཡོངས་འཇོམས་བཤད་པ། དག་པ་བཤད་པ། རྒྱས་བསྡུས་ཀྱི་དབྱེ་བ། རྗེས་ཀྱི་བྱ་བ་བཤད་པ་སྟེ་དྲུག་གོ །དང་པོ་ནི། རྫས་ལྔ་པོ་རྣམས་དབེན་པའི་གནས་སུ་སྟན་
དྲི་མ་མེད་པ་ལ་བཞག རས་གཙང་མས་བཀབ་ཅིང་སྔགས་ཀྱིས་སྲུང་ངོ༌། །སཱ་དྷུ་པུ་ཏྲས་ནི། སྤྱིའི་རིགས་འགྲོས་སྦྱར་ནས་ཡེ་ཐིག་གི་རྗེས་སུ་ལས་ཐིག་འདེབས། འབྲོ་བ་ཁ་ཅིག་དང་རྭ་པ་ཡང་དེ་དང་འདྲ། གཞན་དག་ནི་དེ་གཉིས་སྔ་ཕྱི་བསྒྱུར་བ་ཙམ་བྱེད་ཅིང༌། གཞན་ཡང་སོ་སོ་ལ་ནང་སེལ་འདོད་ཚུལ་མི་འདྲ་བ་ཇི་སྙེད་ཞིག་ཡོད་ཀྱང༌། དཀྱིལ་ཆོག་གཞན་གྱི་ལུགས་ཀྱི་ཐིག་ཆོག་དེ་འདིར་སྦྱོར་བ་སྙིང་པོ་མེད་དེ། འདི་ཉིད་དུ་ཐིག་སྐུད་བྱིན་རླབས་ཀྱི་སྔགས་དང་ཐིག་གདབ་པའི་སྔགས་ཐུན་མོང་མ་ཡོན་པའི་རྒྱས་པ་འདི་འདྲ་ཡོད་བཞིན་དུ། ཨོཾ་ཨཱཿཨ་མྲྀ་ཏ་བྷཱ་བཛྲ་སཱུ་ཏྲ་ཞེས་སོགས་བཅོས་མའི་སྔགས་ཀྱི་སྣོན་ཀ་ལ་དགའ་བ་ནི། ཉི་མའི་འོད་ཀྱིས་སྣང་བར་བྱེད་བཞིན་པ་ལ། མེ་ཁྱེར་ཚོལ་བ་རྒྱུག་པ་བཞིན་ནོ། །ཁ་ཅིག་ཐིག་སྐུད་སུམ་སྒྲིལ་དངོས་སུ་གསུངས་ལ། བྱིན་རླབས་ཀྱི་སྔགས་ལ་ཡུམ་ལྔའི་ས་བོན་ཡོད་པས་ལྔ་སྒྲིལ་གཅིག་ཀྱང་བསྟན་པར་འགྱུར་བས། ལས་ཡི་གཉིས་ཀར་དགོས་ཏེ། སུམ་སྒྲིལ་ཡེ་ཐིག་དང་ལྔ་སྒྲིལ་ལས་ཐིག་གོ་ཟེར་བ་དང༌། ལྷག་གནས་ཀྱི་ཐིག་སྐུད་ལ་ཁ་ཅིག་ལས་ཐིག་ཡིན། གཞན་དག་ཡེ་ཐིག་ཡིན་ཟེར་བ་དང༌། བྱམས་གླིང་པ་ནི་ཐིག་འདེབས་པའི་སྔགས་ལ་ཨོཾ་ཨཱཿཧཱུྃ་ཞེས་རྡོ་རྗེ་གསུམ་གྱི་ས་བོན་ཡོད་པས་ཐིག་འདེབས་པའི་ཚེ་རྡོ་རྗེ་གསུམ་དུ་བསྐྱེད་དགོས་ཟེར་ཏེ། དེ་ཐམས་ཅད་འགྲེལ་ཆེན་དུ་ཐིག་སྐུད་གཉིས་པ་མེད་པར་བཤད་པ་དང་འགལ། རྡོ་རྗེ་གསུམ་དུ་སྐྱེད་ཟེར་བ་ནི་ཡུམ་ལྔའི་ངོ་བོར་གསུངས་པ་དང་འགལ། རྡོ་རྗེ་
གསུམ་གྱི་ས་བོན་ཡོད་པས་དེ་བསྐྱེད་དགོས་ན། ཐིག་སྐུད་བརྐྱང་པའི་སྔགས་ཀྱི་གཞུགས་ན། ཡུམ་གྱི་སྐུ་གསུང་ཐུགས་ཀྱི་ས་བོན་ཡོད་ཅིང༌། ཐིག་སྐུད་གདབ་པའི་སྔགས་ལ་རིགས་དྲུག་གི་ས་བོན་ཡང་ཡོད་པས། དེ་དག་ཀྱང་སྒོམ་དགོས་པར་ཐལ་བར་འགྱུར་ལ། འདོད་ཚུལ་སྣ་ཚོགས་པ་དེ་དག་ལ་འགོག་བྱེད་མང་མོད་ཀྱི། ལོག་པའི་ལན་ལ་མཐའ་མེད་པའི་དཔེར་ཤེས་ནས་འདིར་མ་བྲིས་སོ། །གཉིས་པ་ནི། སྐབས་འདིར་ཐིག་ཆ་ལ་ནི་ཞི་རྒྱས་ལ་ཙནྡན་དཀར་པོའི་ལྡེ་གུའམ། འབྲས་བཏགས་པ་སོགས་དཀར་པོས་བྱ་ལ། བསད་བསྐྲད་ལ་དུག་ཁྲག་དང་རོ་སོལ་བསྲེས་པ་དང༌། དབང་དགུག་ལ་གུར་གུམ་དང་ཙནྡན་དམར་པོ་བསྲེས་པ་དང༌། རྨོངས་རེངས་ལ་ཡུང་བ་དང་ཙནྡན་དམར་པོ་དང་བབ་ལའི་ཁུ་བས་སོ། །གསུམ་པ་ནི་ཡོངས་འཇོམས་སྤོང་པ་ཞེས་བྱ་བ་ནི། ཤར་ལྷོ་ནས་ནུབ་བྱང་དུ་བཏབ་པའི་ཟུར་ཐིག་ལ་ཚད་བཞག ལྷོ་ལྷོ་ནུབ། ནུབ་ནུབ་བྱང་ཐིག་སྐུད་དེའི་ལྷོའི་དུམ་བུ་ཤེས་རབ་ཀྱི་ས་ཕྱོགས་སུ་སློབ་དཔོན་ཐབས་བགྲོད་ཅིང༌། ཐིག་སྐུད་དེའི་བྱང་གི་སའི་དུམ་བུ། བྱང་བྱང་ཤར་ཤར་ཤར་ལྷོ། ཐབས་ཀྱི་ས་གཞི་ལ་སློབ་མ་ཤེས་རབ་བགྲོད་པར་བྱེད་དོ། །དེ་ལས་ཟློག་ན་མི་ཤེས་ཏེ། ཕྱི་རོལ་ཏུ་མེ་རླུང་གི་མཚམས་གང་རུང་དུ་སྒྲ་གཅན་གྱི་གདོང་མཇུག་གནས་པས་གཡུལ་དུ་འཇུག་པ་རྣམས་དེ་ལ་འགོངས་ན། གཞན་གྱིས་འཇོམས་པ་ལྟར་འདིར་ཡང་དེ་ལས་འགོངས་ན། སློབ་དཔོན་ནམ་སློབ་མ་ལ་གནོད་པ་ཆེན་པོ་འབྱུང་བས་ཡོངས་འཇོམས་ཞེས་བཏགས་སོ། །འདིར་རྒྱུད་ལས། ཤེས་
རབ་ཐབས་ཀྱི་ཡན་ལག་དབུས་སུ་ཡོངས་འཇོམས་སུ་འགྱུར་དེ་ནི་དཀྱིལ་འཁོར་དག་ལ་སྤང་བར་བྱ། །ཞེས་གསུངས་ཤིང༌། གཞན་ཡང་ཐིག་སྐུད་ཆད་པར་གྱུར་ན་བླ་མ་ཉམ་ཞིང་ཡོངས་འཇོམས་འགོངས་པར་གྱུར་ན་བུ་རྣམས་དག་ཀྱང་ངོ་ཞེས་གསུངས་སོ། །བཞི་པ་ནི་སྐབས་འདིར་དག་པའི་རྣམ་གྲངས་ཅིག་ལ་སྒྲུབ་ཐབས་ཀྱི་སྐབས་སུ་བཤད་པ་འདི་ཡང་གོ་བར་བྱ་སྟེ། ཁྲུ་གཅིག་འཇིག་རྟེན་ཁམས་ཀྱི་དཔག་ཚད་འབུམ་ཕྲག་རེ་དང་སྦྱོར། ཁྲུ་གཅིག་ནི་སྒོ་ཚད་གཅིག་ཡིན་ནོ། །དེ་ལ་སའི་དཀྱིལ་འཁོར་སྒོ་ཚད་ཕྱེད། ཕྱི་རོལ་དུ་ས་དཀྱིལ་གྱི་ཞིང་ལ་དཔག་ཚད་སྟོང་ཕྲག་ཉེར་ལྔ་དང་སྦྱོར། ཆུ་མེ་རླུང་གསུམ་ལ་སྒོ་ཚད་རེ་རེ་ཡོད་པ། ཕྱི་རོལ་ཏུ་ཡང་འབུམ་ཕྲག་ཕྱེད་ཕྱེད་ཀྱི་ཞིང་ཡོད་པ་དང་སྦྱོར། ཕྱི་རོལ་ཀྱི་ནམ་མཁའི་བརྒྱ་སྟོང་ཕྲག་ཉེར་ལྔ་ལ་རྫོགས་པ་མིན་ཡང་ནམ་མཁའི་ཁམས་ཕྲ་བ་མཚོན་བྱེད་དུ་དཀྱིལ་འཁོར་ལ་སྒོ་ཚད་ཕྱེད་མར་བྱས་པས་ཁོར་ཡུག་ལྔའི་ཞིང་དུ་ཁྲུ་གཉིས་ཡོད་ལ། སའི་ཁོར་ཡུག་གི་ནང་ནས་སྐུའི་རྩ་ཐིག་གི་བར་ལའང་ཁྲུ་གཉིས། དེ་ནས་གཙོ་བོའི་གནས་ཀྱི་ཚངས་ཐིག་ལའང་ཁྲུ་གཉིས་ཏེ། ཕྱོགས་གཅིག་ལ་ཁྲུ་དྲུག་དང་ཅིག་ཤོས་ལའང་དེ་དང་མཉམ་པའི་དཀྱིལ་འཁོར་ཁྲུ་བཅུ་གཉིས་ནི་བདེན་དོན་བཅུ་གཉིས་རྣམ་པར་དག་པ་དང༌། ཡང་ཐིག་སྐུད་ཁྲུ་བཅུ་དྲུག་པའམ། སྒོ་ཚད་ཁྲུ་ཕྱེད་དང་སྦྱར་ན་ཁྲུ་ཕྱེད་བཅུ་དྲུག་སྒོ་ཚད་བཅུ་དྲུག་པ་ནི་དེ་ཉིད་རྣམ་པ་བཅུ་དྲུག་གི་དག་པར་ཡང་བྱ་ལ། ཡང་གཅིག་ཏུ་ན། ཐིག་སྐུད་ཀྱི་ཚད་དེ་དེང་སང་གི་མཐོང་ཆ་ལྟར་ན།
མྱོས་སྲུང་གོང་མའི་ཐད་ཡིན་ཡང་སྒོམ་དོན་ལ་མཆོད་པའི་ས་གཞི་དང་སའི་ཁོར་ཡུག་གི་མཚམས་ཡིན་ཞིང༌། དེ་ལ་ཁྲུ་བརྒྱད་ཡོད་པ་ཡིན་ལ། དེའི་ཕྱི་རོལ་ཏུ་ས་དང་ནམ་མཁའི་ཁོར་ཡུག་སྒོ་ཚད་རེ་རེ། ཆུ་མེ་རླུང་གསུམ་སྒོ་ཚད་གཉིས་གཉིས་ཏེ། དཀྱུས་ལས་ལྔ་པ་འགྱུར་དུ་སྤར་བས་ཕྱོགས་རེའི་ཁོར་ཡུག་ལྔ་ལ་ཁྲུ་བཞི་བཞི་སྟེ། ཕྱོགས་གཉིས་བསྡོམས་པས་བརྒྱད་འབྱུང་ལ། དེ་དང་ཐིག་སྐུད་ཀྱི་དཀྱུས་བསྡོམས་པས་ཁྲུ་བཅུ་དྲུག་ནི། དེ་ཉིད་བཅུ་དྲུག་གི་དག་པའོ་ཞེས་གསུངས་སོ། །ལྔ་པ་ནི། ཡང་རྒྱུད་འགྲེལ་ལས། སྤྲོས་བཅས་སྤྲོས་མེད་ཀྱི་ཐིག་གཉིས་གསུངས་ཏེ། དང་པོ་ནི། སོར་དང་སོར་ཕྱེད་ཀྱི་གྲངས་ལས་གཞལ་ཏེ་ཞིབ་རྩིས་ཕྲ་མོ་མཛད་པ་ཡིན་པས་ཅུང་ཟད་གོ་དཀའ་ལ། ཕྱི་མ་ནི་ཆ་ཆེ་ཆུང་གཞལ་ནས་རགས་རྩིས་སུ་མཛད་པས་གོ་བདེ་སྟེ། ཆེ་ཆུང་ཕྲ་སྦོམ་གྱི་ཚད་ལ་མི་འདྲ་བ་ནི་མེད་མོད། ད་ལྟའི་ཐིག་རྩ་ཡང་སྤྲོས་མེད་ཉིད་ལ་གཞི་བླངས་པའོ། །དེ་ལྟར་ཡང་བསྡུས་པའི་རྒྱུད་ཀྱི་རྒྱལ་པོ་ལས་དབང་གི་ལེའུར། ཐིག་ནི་རོ་དང་དགུ་བཅུ་འདི་རྣམས་ཚངས་པའི་ཐིག་ལས་ཕྱོགས་ཀྱི་ཆ་རྣམས་དག་ཏུ་རབ་སྦྱིན་བྱ། ཞེས་པ་ནས། ཉི་མ་དག་གི་སྒོ་ཡི་དབུས་དང་མཁའ་དང་ས་གཞི་དག་ལ་ཤར་གྱི་ཆ་དང་ནུབ་ལ་ཡང༌། །ཞེས་པའི་བར་དུ་ཤོ་ལོ་ཀ་དྲུག་སྟེ། དབང་ལེའི་ཚིགས་བཅད་སོ་ལྔ་པ་ལ་སོགས་པ་ཡིན་ན། དེའི་སྐབས་ཀྱི་འགྲེལ་ཆེན་ཡང༌། དབང་ལེའི་མདོར་བསྡུས་གསུམ་པའི་ཐོག་མ། གནས་སྐབས་འདིར་སྔར་གྱི་དཀྱིལ་འཁོར་གྱི་ས་ལ་ནུབ་ཏུ་ཞེས་པ་ནས། དཀྱིལ་འཁོར་གྱི་ཐིག་གདབ་པའོ་ཞེས་པའི་བར་དུ། བསྡུས་རྒྱུད་
ཀྱི་འབྲུ་མནན་པས་སྤྲོས་བཅས་ཀྱི་ཐིག་གཙོ་བོར་བཤད་ཅིང༌། རྩ་རྒྱུད་ལས། གྲུ་བཞི་མཉམ་པའི་ས་དག་ལ། །བཅུ་དྲུག་ཆ་རུ་བྱས་ནས་ནི། །སྐུ་ཡི་དཀྱིལ་འཁོར་དོར་བྱ་སྟེ། །སླར་ཡང་ཆ་ནི་བཅུ་དྲུག་པ། །གསུང་ལ་སོགས་པའི་དཀྱིལ་འཁོར་བྱ། །དེ་ནས་གསུང་གི་དཀྱིལ་འཁོར་དག །དོར་ནས་ཆ་ནི་བཅུ་དྲུག་ པ། །སླར་ཡང་ཐུགས་ཀྱི་དཀྱིལ་འཁོར་བྱ། །དེ་ལྟར་ཕྱོགས་གསུམ་ཡང་དག་ དག །དཀྱིལ་འཁོར་གསུམ་གྱི་བདག་ཉིད་དོ། །དེ་ནས་གཉིས་དང་ཆུ་སོགས་ཆས། །དཀྱིལ་འཁོར་གསུམ་དེ་ཐིག་གདབ་པོ། །ཞེས་གསུངས་པ་དང༌། བསྡུས་རྒྱུད་ལས་ཀྱང༌། གཉིས་དང་ཆུ་གཏེར་གཅིག་དང་ཆུ་གཏེར་གཅིག་ཉི་དུས་རོ་རྩེ་མོ་ཅན་མེ་དུས་ཕྱེད་དུས་ཕྱེད་དང༌། དུས་དང་དུས་ནི་རབ་ཕྱེ་དག་དང་དུས་དང་རོ་དག་ཀྱང་སྟེ་སྐྱོན་གྱི་ཆ་རྣམས་རིམ་པ་ཡིས། །སྙིང་པོར་ལྟེ་བའི་ཕྱེད་དང་ཆུ་སྐྱེས་འདབ་མ་ཡང་སྟེ་དེ་ནས་ཀ་བ་རྡོ་རྗེའི་འཕྲེང་བ་དང༌། །པདྨ་རྡོ་རྗེའི་འཕྲེང་བར་འགྱུར་ཏེ་ས་དག་དང་ནི་དེ་ནས་སྒོ་དང་སྒོ་མཁྱུད་ལ་སོགས་དང༌། །ཀ་བ་རྭ་བ་སྟེགས་བུ་དག་དང་སླར་ཡང་དེ་ནས་སྣམ་བུ་དང་ནི་དོ་ཤལ་ས་དག་དང། །མེ་ལོང་ས་ཡི་རྣམ་བུ་རྟ་བབས་དག་ཏུ་མི་ཡི་བདག་པོ་རབ་ཏུ་བརྗོད་པའི་ཆ་ཡིས་འགྱུར། །ཕྱི་རོལ་དུ་ནི་སྒོ་སོགས་ཐམས་ཅད་ཉིས་འགྱུར་ཏུ་འགྱུར་ཕྱི་རོལ་ཏུ་ཡང་དེ་ཡི་ཉིས་འགྱུར་རོ། །ཕྱི་རོལ་ཏུ་ནི་པདྨ་འཁོར་ལོ་ཤིང་རྟ་རྣམས་དང་དཀྱིལ་འཁོར་རྣམས་ནི་ཉིན་བྱེད་དག་གིས་སོ། །ཞེས་པས་སྤྲོས་མེད་ཀྱི་ཐིག་བསྟན་ཏེ། འདི་གཉིས་ལ་ཐིག་འདེབས་ཚུལ་སོ་སོ་བ་བྱས་ཀྱང་རུང་མོད། འོན་ཀྱང་སྤྲོས་བཅས་གོ་ཡུལ་དུ་ངེས་
པར་བྱས་ནས་ལག་ལེན་དུ་སྤྲོས་མེད་ལྟར་འདེབས་པ་ཉིད་དགོངས་པ་ཡང་ཡིན་ཏེ། འགྲེལ་ཆེན་ལས་ཐིག་གང་ཞིག་དབྱེ་བར་བྱ་བ་དེ་དག་ནི་གདབ་པར་བྱ་བ་མ་ཡིན་ནོ། །ཞེས་གསུངས་པ། སྤྱི་བབས་སྤྲོས་མེད་ཀྱི་སྐབས་སུ་དགོངས་པ་ཡིན་ཡང༌། ཤུགས་ལ་དབྱེ་དགོས་པ་བས་དབྱེ་མི་དགོས་པའི་ཕྱོགས་ལེགས་པར་བསྟན་པའང་ཡིན་ནོ། །ཐིག་གི་སྐབས་འདིར་འགྲེལ་ཆེན་ལས། སངས་རྒྱས་དང་ལྷ་མོ་རྣམས་ཀྱི་བར་གྱི་ལེ་ཚེ་རྣམས་ལ་བུམ་པའམ་ཐོད་པ་རྣམས་གྱི་གདན་བརྒྱད་དུ་འགྱུར་ཏེ། ཞེས་གསུངས་པས། ཁ་ཅིག་འདོད་པ་ལྟར་གྱི་རྒྱལ་བ་རིགས་བཞིའི་རེ་མིག་ལ་བུམ་ཐོད་འགོད་པ་ཤིན་ཏུ་བཀག་གོ །དྲུག་པ་ནི་འགྲེལ་ཆེན་ལས། དེ་ནས་དྲི་དང་སྤོས་ལ་སོགས་པ་ཕུལ་ནས། དཀྱིལ་འཁོར་ལ་དགོས་པའི་ཐིག་རྣམས་ཡང་དག་པར་བསྲུངས་ཏེ། ལྷག་མ་ཐམས་ཅད་དབྱེ་བར་བྱའོ། །སྒོ་ཐམས་ཅད་ཡང་དག་པར་སྦྱངས་ཏེ། སླར་ཡང་དྲི་དང་མེ་ཏོག་ལ་སོགས་པ་དང༌། གཏོར་མ་བྱིན་ནས་སྔར་བརྗོད་པའི་ཆོ་གས་སྔགས་བཟླས་པར་བྱའོ་ཞེས། དབང་ལེའི་མདོར་བསྡུས་གཉིས་པའི་འཇུག་ཏུ་གསུངས་སོ། །འདི་ནི་ཁ་ཅིག་ས་ལ་བཏབ་པའི་ཐིག་ལ་མཆོད་ནས། དེ་རྗེས་ཐིག་རོ་རྣམས་ཕྱིས། སྒོའི་ཐད་ཀྱི་རྩ་ཐིག་ཀྱང་སྦྱངས་ཏེ། སླར་ཡང་ས་མཐིལ་ལ་གནས་པའི་ཐིག་ལ་མཆོད་གཏོར་འབུལ་ཞེས་པའི་དོན་དུ་འདོད་པ་དང༌། ཕྱི་མ་འདི་ཐིག་སྐུད་ལ་མཆོད་གཏོར་འབུལ་བར་འདོད་པ་སོགས་ཡོད་ཀྱང༌། དོན་ལ་གནས་པའི་ཕྱོགས་ནི། ཐིག་གདབ་ཟིན་པའི་རྗེས་སུ་ཐིག་སྐུད་ལ་མཆོད་པ་ཕུལ། སྒོའི་རྩ་ཐིག་སྦྱངས་ནས་བར་ཆད་མི་འཇུག་པའི་ཕྱིར། མཁའ་འགྲོ་མ་དང་སྲུང་མ་དྲུག་ཅུ་ལ་མཆོད་གཏོར་ཕུལ་ནས་
རྡོ་རྗེ་འཇིགས་བྱེད་བསྒོམས་པའི་ཆོ་གས་སྔགས་བཟླ་བའོ། །གཉིས་པ་ནི། རྡུལ་ཚོན་བྲི་པའི་སྐབས་སུ་ཉེ་བར་མཁོ་བ་ཅུང་ཟད་བརྗོད་དེ། རྡུལ་ཚོན་གྱི་ཆོ་ག་ལ་དཔྱད་པ། ཚོན་ཐོབ་དང་ལྷ་མཚན་བཤད་པ། འཕྲོས་དོན་དོགས་སྤོང་ཐོར་བུ་བཤད་པའོ། །དང་པོ་ནི། དཀྱིལ་འཁོར་གྱི་ས་གཞི་དང་རྡུལ་ཚོན་ལ་མཆོད་པ་བཅུ་གཉིས་ཀྱིས་མཆོད། སའི་ལྷ་མོ་ལ་གཏོར་མའང་ཕུལ། ལྷག་གནས་བྱས་པའི་རྡུལ་ཚོན་རྣམས་བླངས་ཏེ། ཐོག་མར་སློབ་དཔོན་གྱི་ཁུ་ཚུར་གཡོན་པས། དབང་ལྡན་ནས་བརྩམས་ཏེ་གཡས་བསྐོར་དུ་འགྱེད་ལ། དེ་མ་ཐག་ནས་ལས་ཀྱི་སློབ་མ་རྣམས་ཀྱིས་ཇི་ལྟར་འོས་པར་དགྱེའོ། །དེ་ལ་འདི་ནི་ཆོས་ཉིད་དག་པ་སྟེ་སོགས་ཀྱང་བརྗོད་པ་ཕྱག་ལེན་ལ་མཛད་དེ། གཞན་གྱིས་ཁ་སྐོངས་ཡིན་ཡང་འགལ་བ་མེད་དོ། །སྔ་རབས་པ་རྣམས་ཚོན་བཀྲ་བརྟགས་པ་ལ་ཕྱིས་ཀྱི་མཁས་པ་རྣམས་ཁུངས་མེད་ཅེས་འགོག་ཀྱང༌། ཚད་དང་ལྡན་པའི་གཞུང་ལས་བཀག་པ་མེད་ཅིང༌། འགལ་བར་མ་གྱུར་ཕྱིན་ཆད་མན་ངག་གི་ལག་ལེན་ཐོར་བུར་བྱུང་བ་རྣམས་ལ་རེ་རེ་ནས་ཁུངས་གསལ་མེད་ཀྱང་དགག་ཏུ་མི་བཏུབ་སྟེ། བུ་སྟོན་དང་རྡོ་རྗེ་དཔལ་བའི་དཔེ་བཞིན་ནོ། །སློབ་དཔོན་སྨན་པ་ཞབས་དང་དམ་ཚིག་རྡོ་རྗེས་དབང་ལྡན་གྱི་རྩིག་པ་སྣོད་ཀྱིས་འགེབས་པར་བཤད་པས། ཚོན་བཀྲ་བརྟགས་པའང་དེའི་ལག་ལེན་དུ་གསལ་ཏེ། དེས་ན་ཁུངས་མེད་པའང་མིན་ལ། འོན་ཀྱང་ཚོན་བཀྲ་བརྟགས་པ་འདིར་མི་འཆད་དོ། །རྩིག་པ་རྣམས་ལ་རྭ་བའི་བར་སྟོངས་ཞེས་བྱ་བ། རྡུལ་ཚོན་གྱི་རྩེ་མོའི་བར་སྟོངས་ཡིན་ཏེ། རྩ་བ་ནི་རེག་ལ་མ་འདྲེས་པ་དགོས་ཀྱི་ས་སྟོངས་
ཡོད་པར་འདོད་པ་མི་ལེགས་སོ། །དེ་ཡང་ཐུགས་དཀྱིལ་ལ་རྩིག་པའི་ས་གཞི་ཆ་དགུར་བཏང་བའི་ཆ་གཉིས་གཉིས་རྭ་བའི་ས་ཞེས་གྲགས་ལ་ཞིབ་མོར་ན་རྭ་བ་གསུམ་ལ་བར་སྟོངས་གཉིས་ལས་མེད་པས། བར་སྟོངས་གཉིས་ལ་ཆ་རེ་རེ་དང༌། རྭ་བ་རེ་རེ་ལ་ཆ་གཉིས་སུམ་ཆ་རེའོ། །དེ་བཞིན་དུ་གསུང་དང་སྐུ་ལའང་རྩིག་པའི་ཞིང་ཆ་བཅོ་ལྔ་རེར་བཏང་བའི་ར་བ་རེ་ལ་གཉིས་རེ་དང༌། བར་སྟོངས་རེ་ལ་ཆ་རེའོ་ཞེས་རགས་རྩིས་ལ་འཇོག་ཀྱང༌། བར་སྟོངས་བཞི་ལས་མེད་པའི་ཆ་གཅིག་པོ་དེ་རྭ་བ་ལ་བསྣན་ནོ། །འོན་ཀྱང་འདི་འདྲའི་རིགས་རྣམས་ཕྲ་མོ་ཙམ་ཡིན་པས་གནད་ཆུང་ངོ༌། །ཐིག་སྐུད་ཡུམ་ལྔའི་ངོ་བོ་ཡིན་པས། ཐིག་རྗེས་ཀྱང་ཡུམ་ལྔའི་རང་བཞིན་ཡིན་ལ། དེའི་སྟེང་དུ་རྡུལ་ཚོན་ཡབ་ལྔའི་རང་བཞིན་བཀྲམས་པས། ཐབས་ཤེས་ཟུང་འཇུག་གི་དག་པར་འགྱུར་བ་ཡིན་ནོ། །ཕྱིས་ཀྱི་ཕལ་ཆེར་ཞིག་རྫས་ལྔའི་སྐབས་ཀྱི་དེ་ལྷག་གནས་ཞེས་པས་སྟ་གོན་ཙམ་ཡིན་གྱི། ཐིག་ཚོན་བྱིན་རླབས་དངོས་ཕྱིས་བྱེད་དགོས་སྙམ་པ་སྣང་སྟེ། ལྷག་གནས་ཀྱི་དོན་བྱིན་རླབས་སམ་རབ་གནས་ཡིན་པ་མ་གོ་ཞིང་དཀྱིལ་ཆོག་ཚད་ལྡན་ཐམས་ཅད་ལ་བུམ་པ་ལྷག་གནས་ལས་གཞན་པའི་བུམ་སྒྲུབ་དངོས་གཞི་བྱེད་རྒྱུ་མེད་པ་དེ་ཕལ་ཆེར་ནེ་ཙོའི་འདོན་པ་ལྟར་སོང་ནས། དོན་ལ་གཞུག་པ་མ་ཆུག་པར་ལྷག་གནས་ཡིན་པའི་ཕྱིར་སྟ་གོན་ཡིན་ལ། དེའི་ཕྱིར་སྔོན་འགྲོ་ཡིན་པས་ཐིག་ཚོན་བྱིན་རླབས་དངོས་དེ་གཟོད་བྱ་དགོས་སྙམ་ནས། བྱིན་རླབས་དངོས་གཞི་དུས་འཁོར་གྱི་རང་ལུགས་རྣམ་དག་དེ་སྔོན་འགྲོར་བཟུང་ནས་འགངས་ཆུང་བར་བྱས། གཞན་ལ་གཡར་བའི་འདྲེས་མ་ཆོ་ག་མ་དག་པ་དེ་དངོས་གཞི་གལ་པོ་ཆེར་བཟུང་ནས། བྱིན་རླབས་ལན་གཉིས་བྱེད་པ་ནི་བླུན་རྟགས་ཆེན་
པོར་སྣང་ལ། དེས་ན་ཐིག་ཚོན་སྟ་གོན་ནི། ཐིག་ཚོན་བྱིན་རླབས་སླར་བྱེད་རྒྱུའི་སྟ་གོན་མ་ཡིན། བྱིན་རླབས་དངོས་གཞི་ཡིན། ཐིག་འདེབས་པ་དང་ཚོན་འགྱེད་པའི་སྟ་གོན་ཡིན་པས་སྟ་གོན་ཞེས་བྱས་པ་མ་གོ་བའོ། །དཔེར་ན། བུམ་པ་སྟ་གོན་དེ་བུམ་སྒྲུབ་དངོས་གཞི་ཡིན་ཡང༌། སློབ་མ་ལ་ཆུ་དབང་བསྐུར་བའི་སྟ་གོན་ཡིན་པས་སྟ་གོན་དུ་བཞག་པ་བཞིན་ནོ། །སྟ་གོན་གྱི་དོན་ནི་གྲབས་ཡུལ་བྱེད་པ་ཡིན་ཏེ། དཔེར་ན། རལ་གྲི་ལེགས་པར་འདུས་བྱས་པ་དང༌། དེའི་འཁྲུལ་འཁོར་བྱང་བར་སློབ་པ་ནི། གལ་ཆེ་ཤོས་བྱིན་རླབས་ཀྱི་དཔེ་ཡིན་ལ། གྲི་སྐོར་གྱིས་ཤིང་སྡོང་གཅོད་པ་ནི། རྒྱ་ལམ་ཞིག་ན་ལས་ལ་སྦྱོར་བའི་དཔེ་ཡིན་ཏེ། གཞན་རྣམས་དག་གི་ལུགས་ལྟར་ན། འཁྲུལ་འཁོར་བྱང་བ་གལ་ཆུང་ལ། སྡོང་པོ་གཅོད་ཁར་མཚོན་ཆ་སྐོར་པ་དངོས་གཞི་གལ་པོ་ཆེའོ་ཟེར་བ་དང་འདྲ་ལ། དེ་འདྲ་བྱིན་རླབས་ལན་གཉིས་བྱས་པའི་ཕྱིར། སྟ་གོན་ལན་གཉིས་སུ་འགྱུར་གྱི། བྱིན་རླབས་ཕྱི་མ་དངོས་གཞི་མ་ཡིན་ཏེ། འདི་སྐབས་རང་གི་དངོས་གཞི་ཐིག་གདབ་པ་དང་ཚོན་འགྱེད་པ་ཡིན་པའི་ཕྱིར་རོ། །འོན་ཀྱང་བྱིན་རླབས་བརྩེགས་པ་བཟང་སྙམ་ན། གཅིག་ཏུ་ན་དེ་ལྟར་གྱུར་པས་ལེགས་པར་རེ་ཡང༌། གཉིས་སུ་ན་སྔ་མ་ཐོབ་ཐང་ཅན་དང་ཕྱི་མ་རྟོག་པས་སྦྱར་བ་ཉིད་ཀྱི་ཕྱིར། ཆོ་ག་ཕྱི་མས་སྔ་མ་ཉམ་པར་བྱེད་པའང་སྲིད་པས། དོན་མེད་ཆེན་པོ་བསྐྱེད་ཉེན་ཡོད་དོ།། །།གཉིས་པ་ནི། དཀྱིལ་འཁོར་གྱི་ས་གཞིའི་ཚོན་རྣམས་སྒྲུབ་ཐབས་སུ་བསྟན་པ་ཉིད་ཀྱིས་གོ་བླ་མོད་ཀྱང༌། བློ་དམན་རྣམས་གང་ལའང་བརྡུགས་པར་འགྱུར་བ་མཐོང་བས། སྡོམ་དུ་
བརྗོད་ན། དབུས་ཀྱི་གཙོ་བོའི་གཞི་ཚོན་སྔོན་པོ་ལ། །གདན་གྱི་པདྨ་ལྗང་གུ་འདབ་བརྒྱད་པའི། །ལྟེ་བར་ཉི་ཟླ་སྒྲ་གཅན་བརྩེགས་པ་ནི། །ཟླུམ་པོ་ནག་པོ་མུ་ཁྱུད་དམར་དང་དཀར། །རྡོ་རྗེའི་འཕྲེང་བ་ཞེས་གྲགས་གདུང་ཡིན་ཏེ། །གཙོ་བོའི་གནས་ཀྱི་ཕྱི་མཐར་ནག་པོ་དང༌། །བདེ་གཤེགས་འཕར་མའི་ཕྱི་མཐར་ལྗང་གུ་ཡིན། །གདུང་གཉིས་བར་གྱི་ཀ་བ་བཅུ་དྲུག་ ནག །ཀ་བར་རེ་མིག་བཅུ་དྲུག་སྔོའམ་ལྗང༌། །ཡང་ན་ཕྱོགས་ཀྱི་མདོག་ཅན་ཉིད་དུ་བྱ། །དེང་སང་ལག་ལེན་ཕྱི་མ་གཙོ་བོར་མཛད། །དེ་ཡི་ཕྱི་རོལ་ཐུགས་གསུང་སྐུ་གསུམ་ལ། །རེ་རེ་བཞིན་ཡང་རིམ་པ་དགུ་དགུ་སྟེ། །རྩིག་པ་མ་གཏོགས་གཞན་རྣམས་ཕྱི་ནང་འདྲ། །ཚོན་ས་ཕྱོགས་མདོག་ལྷ་རྣམས་ཀུ་མུད་མཚུངས། །སྤངས་ཆུང་ཕྱོགས་མདོག་རྩིག་པ་སོ་སོར་ཡོད། །སྟེགས་བུ་དཀར་ཞིང་ཕ་གུ་གཞི་དམར་བ། །ཕྲ་རྒྱན་ཇི་ལྟར་མཛེས་པས་བརྒྱན་པ་དང༌། །དྲ་ཕྱེད་ཤར་བུ་མདའ་ཡབ་དཀར་པོ་སྟེ། །འོག་གི་གཞི་ཚོན་སྔོན་པོའམ་ཡང་ན་ནག །རྒྱན་གྱི་རྣམ་འགྱུར་ཕྲ་མོ་ངེས་པ་མེད། །ལྷ་སྣམ་གསུམ་ལ་གཞི་ཚོན་ཕྱོགས་མདོག་གི །སྟེང་དུ་དཀར་པོ་ཤིན་ཏུ་འཐུག་པར་དགྲམ། །ཐོག་མར་བཅད་བཏང་དེ་རྗེས་བཀྲམ་ན་བཟང༌། །རྟ་བབས་ཀ་གདུང་གསེར་གྱི་མདོག་ཅན་ཏེ། །རེ་མིག་རྣམས་དང་ཧར་མི་མཛེས་ཚོན་ཡིན། །དབུས་མ་ལྗང་ན་གཡས་གཡོན་དམར་བ་ཡིན། །དབུས་མ་དམར་ན་གཡས་གཡོན་སྔོ་བ་དང༌། །དབུས་མ་དམར་སེར་གཡས་གཡོན་ལྗང་བ་སོགས། །ཧར་མི་སེར་པོའི་ཡང་ན་ལྗང་དང་སྔོ། །ཕྱོགས་བཞི་རྣམས་ནི་ཕན་ཚུན་མཚུངས་པ་ལེགས། །བུམ་ཏོག་གསེར་གྱི་མདོག་ཅན་ཉིད་
དུ་ངེས། །ཐུགས་དཀྱིལ་རྩིག་པ་ནང་ནས་ནག་དམར་དཀར། །གསུང་དང་སྐུའི་རྩིག་པ་རིམ་པ་ལྔ། །ནང་ནས་ལྗང་ནག་དམར་དཀར་སེར་པོ་འགྱེད། །མཆོད་པའི་ས་གཞི་ཕྱོགས་ཀྱི་མདོག་ཅན་ཏེ། །ཕྱོགས་མདོག་ཅེས་པ་ཟུར་ཐིག་བཞི་པོ་ལ། །ས་མཚམས་བཅོལ་ནས་ཤར་ནག་ལྷོ་དམར་དང༌། །ནུབ་སེར་བྱང་ཕྱོགས་དཀར་པོ་གོ་བར་བྱ། །ཁོར་ཡུག་དང་པོ་སེར་ལ་གཉིས་པ་དཀར། །གསུམ་པ་དམར་ཞིང་བཞི་པ་བུང་བའི་མདོག །ལྔ་པའི་ཞིང་དུ་ཆ་གསུམ་བགོས་པ་ཡི། །ཕྱི་ནང་ལྗང་གུ་བར་མ་སྔོན་པོ་ལ། །རྡོ་རྗེ་འཕྲེང་རྒྱུགས་སྦོམ་པོར་བྲི་བར་བྱ། །ཕྱི་རོལ་འོད་ཟེར་འཕྲེང་བ་ཁྲ་བོ་སྤེལ། །ལྗང་ནག་དམར་དཀར་སེར་དང་སྔོན་པོ་ཡིན། །ལྷ་ཡི་གདན་དང་མཚན་མ་བཤད་བྱ་སྟེ། །དབུས་ཀྱི་གཙོ་བོའི་གདན་ལ་རྡོ་རྗེ་སྔོ། །ཡུམ་གྱི་ཕྱག་མཚན་ལོགས་སུ་འབྲི་བ་མེད། །འདབ་བརྒྱད་ཕྱོགས་བཞིར་ཕྱོགས་མདོར་སྤོས་ཕོར་དང༌། །མར་མེ་དུང་ཆོས་ཞལ་ཟས་གཡས་སྐོར་ཡིན། །མཚམས་ལ་ཤར་ལྷོར་རྔ་ཡབ་ནག་པོ་སོགས། །དམར་སེར་དཀར་པོ་རྣམས་ཀྱང་གཡས་སྐོར་བྱ། །གྲུ་ཆད་བཞི་ལ་དུང་དཀར་གཎྜི་དམར། །ནོར་བུ་མཐིང་ཁ་ལྗོན་ཤིང་སེར་པོ་རྣམས། །བྱང་ཤར་མཚམས་ནས་གཡས་སྐོར་ཉིད་དུ་བྲི། །བུམ་པ་བརྒྱད་ནི་དཀར་པོ་པད་གདན་དཀར། །བདེ་གཤེགས་འཕར་མའི་རེ་མིག་བརྒྱད་པོ་ལ། །ཕྱོགས་བཞིར་པདྨ་དཀར་དང་ཉི་མའི་གདན། །མཚམས་བཞིར་པདྨ་དམར་དང་ཟླ་བའི་གདན། །ཤར་དང་མེ་རུ་རལ་གྲི་ནག་པོ་དང༌། །ལྷོ་དང་བདེན་བྲལ་རིན་ཆེན་དམར་པོ་དང༌། །ནུབ་དང་རླུང་དུ་འཁོར་ལོ་སེར་པོ་དང༌། །བྱང་དང་བྱང་ཤར་ཆུ་སྐྱེས་དཀར་པོ་སྟེ། །ཡང་ན་མཚམས་བཞིར་མེ་ནས་གཡས་སྐོར་གྱི། །
ཨུཏྤལ་སྔོ་དང་པདྨ་དམར་པོ་དང༌། །འཁོར་ལོ་སེར་དང་ཨུཏྤལ་དཀར་པོ་འབྲི། །ལྷ་སྣམ་ཤར་དང་ལྷོ་ཡི་གཡས་གཡོན་དང༌། །བྱང་གི་ཤར་དང་ནུབ་ཀྱི་བྱང་ངོས་དང༌། །དབང་པོ་ནོར་སྦྱིན་ཕྱོགས་ཀྱི་སྒོ་རྣམས་སུ། །པད་དཀར་ཟླ་བའི་གདན་ཏེ་མཚམས་བཞི་དང༌། །བྱང་གི་ནུབ་དང་ནུབ་ཀྱི་ལྷོ་ཕྱོགས་དང༌། །ལྷོ་དང་ནུབ་སྒོར་པད་དམར་ཟླ་བའི་གདན། །ཕྱོགས་བཞིའི་གཡས་སུ་རལ་གྲི་ལ་སོགས་བཞི། །མཚམས་བཞི་མེ་སོགས་དེ་དང་འདྲ་བའམ། །ཡང་ན་ན་བཟའ་རོ་མཆོག་སྣོད་དམར་དང༌། །དྲི་ཡི་དུང་དང་མེ་ལོང་དཀར་པོའོ། །ལྷོ་ཡི་གཡོན་དང་ནུབ་ཀྱིའང་གཡོན་དག་ཏུ། །རྡོ་རྗེ་ལྗང་གུ་རེ་རེ་དགོད་པར་བྱ། །ཤར་དང་བྱང་གི་གཡོན་དུ་རྡོ་རྗེ་སྔོ། །ཡང་ན་ནུབ་ཀྱི་གཡོན་དུ་ཆོས་འབྱུང་ལྗང༌། །བྱང་གི་གཡོན་དུ་པི་ཝཾ་སྔོན་པོ་བྱ། །ཤར་སྒོར་རལ་གྲི་ནག་དང་ལྷོ་ཡི་སྒོར། །དབྱུག་པ་དམར་དང་ནུབ་སྒོར་ཐོ་བ་སེར། །བྱང་སྒོར་པདྨ་དཀར་པོ་དགོད་པ་ཉིད། །སྟེང་འོག་བུམ་པ་འགོད་ནའང་ཤར་ནུབ་ཀྱི། །ཁྲོ་བོའི་མཚན་མོའི་ཕྱི་རོལ་འགོད་པ་ཡིན། །ཐུགས་ཀྱི་རྟ་བབས་ཀ་བའི་གཡས་གཡོན་ནང༌། །སྟེགས་བུའི་སྟེང་དུ་གཟུངས་མའི་མཚན་མ་དགོད། །ཤར་དུ་དུང་ཆོས་མེ་ཏོག་འཕྲེང་བ་དང༌། །ལྷོ་རུ་སྤོས་ཕོར་མར་མེའི་ཀོང་བུ་དང༌། །ནུབ་ཏུ་དབུ་རྒྱན་རིན་ཆེན་དོ་ཤལ་དང༌། །བྱང་དུ་ཞལ་ཟས་སྣོད་དང་ཤིང་འབྲས་སོ། །རྟ་བབས་བརྩེགས་མ་གསུམ་པའི་དབུས་གནས་ ལ། །ཤར་དུ་ན་བཟའ་ནུབ་ཏུ་རྫ་རྔ་དང༌། །བྱང་དུ་རྡོ་རྗེ་ལྷོ་རུ་པདྨའོ། །གསུང་འཁོར་པདྨ་རྣམས་ལ་གཡས་སྐོར་གྱི། །གྲི་གུག་ནག་དང་འཁོར་ལོ་ནག་པོ་དང༌། །དབྱུག་པ་དང་ནི་ཤལ་ཏི་དམར་པོ་དང༌། །གསེར་གྱི་མདོག་ཅན་རྡོ་རྗེ་
པར་བུ་དང༌། །ཟླ་འོད་དང་མཚུངས་རྩེ་གསུམ་པད་སྡོང་དཀར། །རེ་རེ་བཞིན་ཡང་མཚན་མ་དགུ་དགུ་སྟེ། །སོ་སོའི་ལྟེ་བ་དང་ནི་འདབ་བརྒྱད་ལའོ། །ཞོར་བྱུང་ཡིན་ཕྱིར་ཡབ་གྱི་མཚན་མ་ནི། །ངེས་པར་དགོས་པ་མ་ཡིན་འོན་ཀྱང་ནི། །བྱེད་པར་འདོད་ན་ཤར་དུ་རྡོ་རྗེ་སེར། །དེ་སོགས་གཡས་སྐོར་བྱ་སྟེ་སེར་པོའི་ཁབ། །ཏྲི་ཤུ་ལ་དང་དགྲ་སྟ་དཀར་པོ་དང༌། །རལ་གྲི་འབར་དང་འཁོར་ལོ་ནག་པོ་དང༌། །ཁ་དོག་དམར་བའི་དབྱུག་པ་ཤཀྟིའོ། །གཙོ་མོའི་མཚན་མ་དབུས་སུ་བཀོད་ནས་ ནི། །དེ་དེའི་གཡས་སུ་ཡབ་ཀྱི་མཚན་མ་བྱ། །སྐུ་དཀྱིལ་ཚེས་ཀྱི་ལྷ་ཡི་པདྨ་ ལ། །ལྟེ་བར་གཉིས་དང་འདབ་མར་རེ་རེ་སྟེ། །མཚན་མ་སུམ་ཅུ་འགོད་པར་བྱ་བ་ལས། །ཐམས་ཅད་ཕྱག་མཚན་ངོ་བོའི་དབྱིབས་གཅིག་ཀྱང༌། །གཙོ་མོའི་ཕྱག་མཚན་རྣམས་ནི་ཁ་དོག་གཞན། །ཤར་གྱི་གཡོན་ནས་བརྩམས་ཏེ་གཡས་སྐོར་ དུ། །འཁོར་ལོ་ལྗང་གུ་རལ་གྲི་མུན་པའི་མདོག །དཔག་བསམ་ཤིང་ནག་དབྱུག་པ་ལྗང་གུ་དང༌། །མདུང་དང་ཤཀྟི་བྱུ་རུའི་མདོག་ཅན་དང༌། །ནོར་བུས་མཚན་པའི་བེ་ཅོན་དབང་སྔོན་མཚུངས། །ཀརྐེ་ཏ་འོད་རྡོ་རྗེ་འབར་དང་ཁབ། །ཨུཏྤལ་སྔོ་མཚུངས་མདུང་རྩེ་གསུམ་པ་དང༌། །ཀུནྡའི་མདོག་ཅན་སྦྲུལ་ཞགས་དགྲ་ སྟའོ། །ལྟེ་བའི་དབུས་སུ་ཡབ་ཀྱི་མཚན་མ་སྟེ། །གཡོན་དུ་ཡུམ་མཚན་ཁ་དོག་ཐབས་ཤེས་བསྒྱུར། །རིམ་བཞིན་སྔོན་པོ་སེར་གཉིས་སྔོན་པོ་དང༌། །དཀར་གཉིས་ལྗང་གུ་དཀར་མིན་ཟུང་དང་ནི། །མརྒད་མདོག་དང་མེའི་མདོག་ཅན་ ཟུང༌། །སྒོ་ཡི་ནང་གི་ཤིང་རྟ་སོ་སོ་ལ། །ཤར་དུ་དབྱུག་པ་ནག་དང་བེ་ཅོན་སེར། །ལྷོ་རུ་མདའ་དམར་གཏུན་ཤིང་དཀར་པོ་དང༌། །བྱང་དུའང་དེ་དང་མཚུངས་པར་གཏུན་ཤིང་མདའ། །ནུབ་ཏུའང་བེ་ཅོན་དབྱུག་པ་བྲི་བར་བྱ། །ཤིང་རྟ་
རྣམས་ཀྱང་ཕྱོགས་ཀྱི་མདོག་ཅན་ཡིན། །སྟེང་དུ་དགྲ་སྟ་ལྗང་དང་རྡོ་རྗེ་སྔོ། །འོག་ཏུ་རྡོ་རྗེ་སྔོ་དང་རྩེ་གསུམ་ལྗང༌། །རྟ་བབས་འོག་མའི་དབུས་སུ་འཁོར་ལོ་ནག །གཡས་གཡོན་རི་དྭགས་ཕོ་མོ་གསེར་མདོག་སོགས། །སྒྲུབ་པའི་ཐབས་ལས་འབྱུང་བ་ཇི་བཞིན་དུ། །ཕྱི་རོལ་རྡོ་རྗེ་བཞི་པོའང་དགོད་པར་བྱ། །མི་ཅི་ཕོ་མོ་ལྷ་ཡི་གཟུགས་ཡིན་ཏེ། །གླང་སེང་བརྩེགས་དང་ཤ་ལ་བྷཉྫི་ཀ །གདུང་སྣང་རྒྱལ་མཚན་བ་དན་ལ་སོགས་བྲི། །ཀླུ་རྣམས་མཚན་མ་བུམ་པ་ཉིད་ཡིན་ཏེ། །སྐུ་དཀྱིལ་རྟ་བབས་ཀ་བའི་རྩ་བ་དང༌། །ཉེ་བར་སྟེགས་བུའི་སྟེང་དུ་འབྱུང་བ་བཞིའི། །དཀྱིལ་འཁོར་རྣམས་ལ་ཚུལ་དང་མཐུན་པར་དགོད། །མེ་དང་རླུང་གི་འཁོར་ཡུག་མཚམས་སུ་ནི། །ཕྱོགས་བཞིར་འཁོར་ལོ་དམར་དང་མཚམས་བཞིར་དཀར། །རྩིབས་བརྒྱད་ལྟེ་བར་ཕྱོགས་མདོག་གྲི་གུག་རེའོ། །ཀླུ་དང་རབ་གཏུམ་མ་ཡི་གདན་རྣམས་ལ། །གཙོ་བོ་གཙོ་མོ་གང་ཡིན་ཕྱག་མཚན་ཏེ། །འཁྱུད་པའི་ཡབ་ཡུམ་རྣམས་ཀྱི་མཚན་མ་མིན། །གསུང་དང་སྐུ་ཡི་པདྨའི་ལྟེ་བ་དང༌། །དུར་ཁྲོད་འཁོར་ལོའི་འོག་ཏུ་སྲོག་གཟུགས་རྣམས། །འབྲི་བར་བྱེད་མོད་ཤིན་ཏུ་འབྲི་དཀའ་ན། །ཐུར་མ་སོགས་ཀྱིས་རི་མོ་བཏོད་ཀྱང་རུང༌། །ཡི་དྭགས་དམར་དང་མཁའ་ལྡིང་ནག་པོ་དང༌། །མ་ཧེ་ཉི་འོད་རྨ་བྱ་རང་མདོག་དང༌། །གླང་ཆེན་ངང་པ་ཁ་བ་ཀུ་མུད་ འདྲ། ཁྱུ་མཆོག་དཀར་དང་སེང་གེ་དེ་དང་མཚུངས། །འདི་དག་གསུང་གི་རྣལ་འབྱོར་མ་ཡི་གདན། །བྱ་ཁྱུང་སྣ་ལྔ་རོ་ལངས་དམར་པོ་དང༌། །ཁྲི་སྙན་རང་མདོག་མ་ཧེ་སྔོ་སྐྱ་དང༌། །ལུག་དཀར་གཙུག་ཕུད་ཅན་ནི་རང་མདོག་སྟེ། །ནོར་སྦྱིན་གདན་ལ་གླང་ཆེན་སྨུག་ནག་གམ། །
ཁོལ་པོ་མི་ཤ་ཁ་ལས་སེར་མདངས་ཅན། །གླང་ཆེན་ངང་པ་ཁྱུ་མཆོག་སྔར་བཞིན་ཏེ། །ཆུ་སྲིན་དམར་དང་བྱི་བ་སྔོན་པོའོ། །དེ་རྣམས་ཚེས་ལྷའི་པདྨའི་ལྟེ་བར་སྟེ། །སྒོ་སྐྱོང་རྣམས་ཀྱི་ཤིང་རྟ་འདྲེན་བྱེད་ལ། །ཕག་བདུན་ནག་དང་རྟ་བདུན་དམར་བ་དང༌། །གླང་ཆེན་བདུན་སེར་སེང་གེ་དཀར་པོ་བདུན། །མཁའ་ལྡིང་སྣ་ལྔ་བདུན་དང་ཤ་ར་བྷ། །ནག་པོ་བདུན་ཏེ་མཚོན་བྱེད་སྤུངས་པས་རུང༌། །དུར་ཁྲོད་འཁོར་ལོའི་འོག་ཏུ་སྲོག་ཆགས་ནི། །ཤར་ནས་གཡས་སྐོར་བསེ་རུ་བྱ་སེར་པོ། །དོམ་དང་ཁྲུང་ཁྲུང་སེང་གེ་བྱ་སྔོན་པོ། །གཡག་དང་ཕ་ཝཾ་བྲི་བར་བྱ་བ་སྟེ། །གསུང་སྐུའི་སྟེགས་བུར་འདོད་དང་ཕྱིར་འདོད་མའི། །ཨུཏྤལ་ན་བཟའ་འཁོར་ལོ་རལ་གྲི་དང༌། །གྲི་གུག་ཤར་སྒོའི་གཡས་ནས་མེ་ཟུར་བར། །ལྷོ་གཡོན་གྲི་གུག་མདའ་དབྱུག་དགྲ་སྟའོ། །པདྨ་རོ་སྣོད་ཤཀྟི་ལྕགས་ཀྱུ་དང༌། །གྲི་གུག་ནག་རྣམས་ལྷོ་གཡས་བདེན་བྲལ་ཟུར། །ནུབ་གཡོན་གྲི་གུག་རྡོ་རྗེ་འཁོར་ལོ་དང༌། །ཆོས་འབྱུང་ལྗང་ཁུ་རིམ་བཞིན་བྲི་བར་བྱ། །འཁོར་ལོ་དུང་ཆོས་པར་པུ་ཁབ་སེར་དང༌། །གྲི་གུག་སེར་རྣམས་ནུབ་གཡས་རླུང་ཟུར་བར། །བྱང་གཡོན་ཟངས་གྲི་དཀར་པོ་ཏྲི་ཤུ་ལ། །ཐོ་བ་པི་ཝཾ་རིམ་བཞིན་དགོད་པར་བྱ། །ཨུཏྤལ་དཀར་དང་མེ་ལོང་པད་དཀར་དང༌། །ཐོ་བ་གྲི་གུག་བྱང་གཡས་དབང་ལྡན་ཟུར། །ཤར་གཡོན་གྲི་གུག་རྩེ་གསུམ་རལ་གྲི་དང༌། །རྡོ་རྗེ་རྭ་གསུམ་གདེངས་པ་སྔོན་པོ་བྲི། །དེ་དག་ཐམས་ཅད་གཡས་སྐོར་རིམ་པ་ཡིན། །གལ་རེ་ལྷ་མཚན་སྲོག་གཟུགས་འབྲི་དཀའ་ན། །ཁོལ་མར་བཏབ་ཀྱང་རུང་ཞིང་མཛེས་པ་ཡིན། །བུམ་པ་པདྨ་མཆོད་པ་སྣ་ཚོགས་ཏེ། །མཚོན་པའི་ས་གཞིའི་
གདན་ལ་མཛེས་ཚོན་རུང༌། །སྐུ་ཡི་རྩིག་པའི་ནང་རོལ་ཐམས་ཅད་ དུ། །མཛེས་བྱེད་བློ་བཟོའི་རི་མོ་འབྲི་བར་བཀབ། །རླུང་གི་དཀྱིལ་འཁོར་ཕྱེད་ཀྱི་ཕྱི་མ་ལ། །མཚན་མ་ངེས་མེད་འབྲི་བར་གསུངས་པས་ན། །ཚོན་སྤུངས་ཁ་དོག་སྣ་ཚོགས་བྱས་ཀྱང་རུང༌། །སྒོ་མཁྱུད་མཚམས་ཀྱི་ཟླ་ཕྱེད་རིན་ཆེན་དང༌། །རྩི་གཟུར་ཕྱི་ལ་སྣ་ཚོགས་རྡོ་རྗེ་འབྲི། །མེ་ཡི་ཁོར་ཡུག་ཕྱེད་ཀྱི་ཕྱི་མ་དང༌། །རླུང་གི་ཕྱེད་ཀྱི་ནང་མའི་གནས་སུ་ནི། །དུར་ཁྲོད་མཚན་མ་སྤྱི་དང་མཚུངས་པའང་བྱ། །ཡང་ན་ལྷ་མཚན་སྤངས་ཏེ་ས་བོན་འབྲི། །སྐལ་མེད་མདུན་སེར་སྐུ་བརྙན་མི་འགོད་ཅིང༌། །དུར་ཁྲོད་མཚན་མའང་མིན་ཞེས་གཞན་ལས་བཤད། །འོན་ཀྱང་ཁ་བ་ཅན་གྱི་ཕྱོགས་འདི་ན། །དགག་བྱ་དེ་ནི་ཡོད་མིན་བྲིས་ན་ལེགས། །ཞེས་བྱའོ། །གསུམ་པ་ལ་དོན་ཚན་ལྔ་ལས། དང་པོ་རྡུལ་ཚོན་གྱི་དཔངས་ལ་དཔྱད་པ་ནི། རྒྱུད་འགྲེལ་ལས། ཚོན་གྱི་དཔངས་ལ་རེག་བྱ་ལ་སོགས་པའི་ཡོན་ཏན་གྱི་གྲངས་ཀྱི་དག་པས། ནག་པོ་ལ་ནས་ཀྱི་རྐང་པ་གཅིག །དམར་པོ་ལ་གཉིས། དཀར་པོ་ལ་གསུམ། སེར་པོ་ལ་བཞི་ཞེས་གསུངས་ཤིང༌། དོན་གྱིས་ན་ལྗང་སྔོ་གཉིས་ལ་ནས་ཀྱི་བརྒྱད་ཆ་ཡིན་པར་གསལ་ལོ། །ཡང་ན་ཕྱོགས་ཀྱི་རིམ་པས་ཁ་དོག་གི་དབྱེ་བ་མེད་པར་ཐུགས་ཀྱི་ཉིས་འགྱུར་གསུང་དང༌། དེའི་ཉིས་འགྱུར་སྐུ་ལའང་གསུངས་པ། ཕྱི་མ་འདི་ས་སྟེགས་དབུས་མཐོ་བའི་དབང་དུ་བྱས་པ་སྟེ། དེ་བཞིན་དུ་རྭ་བ་རྣམས་རྡུལ་ཚོན་སེར་པོའི་དཔངས་ལས་སུམ་འགྱུར་དང༌། རེ་ཁ་གཞན་རྣམས་ཉིས་འགྱུར་དུ་གསུངས་པ་འདི་རྣམས་དེང་སང་ལག་ལེན་དུ་འདེབས་དཀའ་བས་ཡིད་ཀྱིས་མོས་པ་བྱ་ཞིང༌། གོ་རིམ་དང་མཐུན་པའི་སྲབ་འཐུག་གི་ཁྱད་པར་ཅུང་
ཟད་བྱས་ན་ལེགས་མོད། རྭ་བ་རྣམས་སེར་པོའི་སུམ་འགྱུར་དུ་བྱེད་པ་སོགས་ལ་ཁ་ཅིག་ནུས་པའོ་སྙམ་པ་འདུག་ཀྱང༌། འཕྲུལ་གྱི་ཡན་ལག་ཏུ་དགོངས་པ་མ་ཡིན་གྱི། ཐང་ཆུའི་ཁྱད་པར་སོགས་བསྲེས་པས་དཀའ་བ་མེད་ཅེས་བླ་མ་པཎྜི་ཏ་གསུང་ངོ༌། །གཞན་ཡང་ཕྱོགས་མདོག་གི་གཞི་ལ་པདྨ་དང༌། པདྨའི་སྟེང་དུ་ཉི་ཟླ་སོགས་ཀྱང་བརྩེགས་པ་ཡིན་པས་རྡུལ་ཚོན་རིམ་གྱིས་མཐོ་བ་ཡིན་ལ། འཁོར་ཡུག་གི་ས་ལའང་རྡུལ་ཚོན་ནས་གང་ཙམ་འགྲེམ་པར་གསུངས་སོ། །ནས་ཞེས་བྱ་བ་དཀྱིལ་འཁོར་རང་རང་གི་ཆ་ཆུང་ཕྱེད་ལ་བརྒྱད་དུ་བགོས་པའི་ཆ་སྟེ། དཀྱིལ་འཁོར་རང་རང་གི་རྩ་ཐིག་གི་བདུན་བརྒྱ་དྲུག་ཅུ་རེ་བརྒྱད་ཀྱི་ཆ་ཤས་ཡིན་མོད། འོན་ཀྱང་ཐུགས་དང་གསུང་གི་དཀྱིལ་འཁོར་ལ། ནས་ཀྱི་བྱེད་དང་བཞི་ཆ་ལ་ནས་སུ་མིང་བཏགས་པའང་ཡོད་གསུང་ངོ༌།། དོན་ཚན་གཉིས་པ་མཚན་མ་ངན་པ་བཟློག་པ་ནི། དེ་ལྟར་རྡུལ་ཚོན་གྱི་དཀྱིལ་འཁོར་ལ། རྒྱུད་ལས། གལ་ཏེ་རྡུལ་ཚོན་རླུང་གིས་ཁྱེར་ན་འཇིགས་པ་གསལ་བྱེད་ཡུལ་འཁོར་དག་ཏུ་རྒྱལ་པོས་འཇིགས་པ་ཡང༌། །ཞེས་པ་ལྟ་བུའི་གནོད་པ་ལས་བསྲུང་ཞིང༌། ཡང་ཇི་སྐད་དུ། སྦོམས་པས་ནད་དག་བྱེད་ཅིང་ཕྲ་དང་རེ་ཁ་ངན་པས་རྫས་ནི་ཉམ་པ་རབ་ཏུ་གསལ་བར་བྱེད། །ཆད་པས་འཆི་བ་དང་ནི་འཁྱོག་པོས་མི་ཡི་བདག་པོ་དང་བཅས་གྲོང་བརྡལ་དེ་བཞིན་ཉིད་དུ་བསྐྱོད། །མཚན་མ་ཉི་མ་ཟླ་བ་ཆད་ན་སྔགས་པ་རྣམས་ལ་སྲིད་པའི་འཇིགས་པ་འཇོམས་པའི་དངོས་གྲུབ་མེད། །རྣམ་པར་འདྲེས་པས་རིགས་བརྒྱད་འཆད་དེ་རྒྱལ་བའི་རིགས་ཀྱིས་དཀྱིལ་འཁོར་རྡུལ་ཚོན་དག་ལ་རིག་པར་བྱ། །
ཞེས་གསུངས་པ་ལྟར། ཉེས་དམིགས་ཤེས་ནས་གཟབ་པར་བྱ་ལ། ཡང༌། མཚན་མ་ངན་པ་དེ་དག་མཐོང་ནས་སླར་ཡང་གཙོ་བོ་དག་གི་སྔགས་ཀྱི་བཟླས་པ་རབ་ཏུ་བྱ། །ཞེས་གསུངས་པ་ལྟར། ཐིག་དང་ཚོན་གྱི་སྐབས་སུ་མཚན་མ་ངན་པ་དག་བྱུང་ན་གོང་བདུད་བགེགས་ཚར་གཅོད་པའི་སྐབས་སུ་འབྱུང་བ་ལྟར་གཏོར་མ་དང༌། བཟླས་པ་ལ་བརྩོན་པ་དང༌། སྦྱིན་སྲེག་དང༌། ཕུར་བུས་གདབ་པ་སོགས་ལ་འབད་དེ། བཟློག་པའི་རྟགས་བྱུང་གི་བར་དུ་རྩོམ་པ་མི་འདོར་བར་བྱའོ།། དོན་ཚན་གསུམ་པ་ཕྱོགས་མདོག་ལ་དཔྱད་པ་ནི། སྐབས་འདིར་ཡེ་ལེའི་ཞེ་གསུམ་པའི་འགྲེལ་བར་དེས་ན་ཐུགས་རྣམ་པར་དག་པས་ཤར་དུ་དཔལ་ལྡན་ནག་པོའི་སར་འགྱུར་རོ། །གསུང་རྣམ་པར་དག་པས་ལྷོར་ཉི་མ་དང་མཚུངས་པའོ། །ཡེ་ཤེས་ཀྱི་ཞལ་རྣམ་པར་དག་པས་ནུབ་ཏུ་གསེར་མདོག་སྟེ་སེར་ པོའོ། །སྐུའི་ཞལ་རྣམ་པར་དག་པས་བྱང་དུ་ཡང་གཞན་ཏེ་དཀར་པོའོ། །དེ་ལྟར་རྡོ་རྗེ་ཅན་གྱི་ཞལ་གྱི་དབྱེ་བས་ཕྱོགས་རྣམས་སུ་རྡུལ་ཚོན་དགྱེ་བར་བྱའོ། །ཞེས་ཕྱོགས་བཞིའི་དབྱེ་བ་གསུངས་ཀྱི། ཕྱོགས་བརྒྱད་ཀྱི་དབྱེ་བ་ཡེ་མ་གསུངས་པ་དང༌། གཞན་ཡང་འདི་སྐད་ཅེས། ཤར་དུ་རླུང་རྣམ་པར་དག་པས་ཐུགས་རྡོ་རྗེ་ཁ་དོག་ནག་པོ་སའི་ཆ་ལ་ཁྱབ་པར་བྱེད་པའོ། །ཞེས་སོགས་གསུངས་པས། ཞལ་གྱི་དབྱེ་བའི་དོན་ཕྱོགས་བཞི་ལ་ཞལ་རེ་རེ་སྟེ་ཞལ་བཞི་ཡིན་ལ། མཚམས་རྣམས་ལ་ཞལ་གཉིས་ཀྱི་བར་མཚམས་མ་གཏོགས། དྲང་ཐད་ཀྱི་ཞལ་མ་བྱུང་བས་མདུན་ཞལ་དང་གཡས་ཞལ་གྱི་ས་གཞིའི་མཚམས་ཤར་ལྷོའི་ཟུར་ཐིག་ལ་འོང་གི ཕྱོགས་ཕྱོགས་
མཚམས་མཉམ་པར་བཅད་པའི་ཤར་ལྷོའི་དུམ་བུ་རྩ་ཞལ་གྱི་སའི་ཕྱིར་ཡིན་ན། ཤར་དྲང་ཐད་ལ་རྩ་ཞལ་གྱི་འཁུར་ཚོས་གཡོན་པའི་ཟུར་སྟོན་པར་འགྱུར་བས། ལྟག་པ་དང་མགུལ་ཕྱིར་གཅུས་པའམ། མ་གཅུས་ན་བཞུགས་ཚུལ་འཁྱོགས་པར་འགྱུར་ཏེ་སྐུ་གཟུགས་ཀྱི་དབྱིབས་སྔོན་མེད་བློ་བཟོ་མ་ཡོང་བས་རང་བཟོ་འདི་ལྟ་བུ་མི་བྱའོ། །ཞལ་གྱི་དབྱེ་བས་གསུངས་པ་ཉིད་ཀྱི་ཕྱིར། ཞལ་བཞི་ལ་ཕྱོགས་བཞིའི་དབྱེ་བ་བྱ་ཡི། ཞལ་བརྒྱད་མེད་བཞིན་དུ་ཕྱོགས་བརྒྱད་ཀྱི་དབྱེ་བ་མི་བྱའོ། །ཕྱོགས་བརྒྱད་བྱེད་ན་ཞལ་བརྒྱད་དང་ཡང་སྦྱོར་དགོས་ཀྱང༌། ཞལ་བརྒྱད་པའི་སྐབས་སུ་ནི་ངེས་པར་ཡང་ཟུར་ཐིག་ལ་མཚམས་བྱེད་པ་འགྲུབ་ཀྱི། ཤར་ཤར་ལྷོ་ནག་པོ་སོགས་མི་འགྲུབ་བོ། །དེ་བཞིན་དུ་རྒྱུད་ལས། ཕྱོགས་ཀྱི་ཆ་ལ་ཚོན་གྱི་སར་ནི་མི་ཡི་བདག་པོ་སངས་རྒྱས་དབྱེ་བས་རྡུལ་ཚོན་གདབ་པར་འགྱུར། །ཞེས་ཚོན་སའི་ཕྱོགས་ཀྱི་ཁ་དོག་རྒྱལ་བ་རིགས་བཞིའི་དབྱེ་བས་བྱེད་ཅེས་གསུངས་པ། སངས་རྒྱས་བཞི་ཕྱོགས་བཞི་ན་ཡོད་ཀྱི་མཚམས་ན་མེད་པས། མཚམས་རྣམས་ཞར་བྱུང་དུ་བཏང་སྟེ། མེ་མཚམས་ཀྱི་དུམ་བུ་ལས། ཤར་དང་ཉེ་བ་རྣམས་ཤར་གྱི་ཁ་དོག་དང༌། ལྷོ་དང་ཉེ་བ་རྣམས་ལྷོའི་ཁ་དོག་ཏུ་བྱེད་པ་སོགས་ཀྱི་དོན་ཡིན་གྱི། ཤར་དང་ཤར་ལྷོ་ནག་པོ་དང༌། ལྷོ་དང་ལྷོ་ནུབ་དམར་པོ་སོགས་བྱེད་ན། ཕྱོགས་དང་མཚམས་ཀྱི་ཆ་ལ་སངས་རྒྱས་བཞི་དང་ཡུམ་བཞི་སྟེ་བརྒྱད་ཀྱི་དབྱེ་བས་རྡུལ་ཚོན་གདབ་ཅེས་གསུང་དགོས་པར་འགྱུར་རོ། །གཞན་ཡང་ཡོངས་འཇོམས་ཀྱི་སྐབས་སུ་ཐབས་ལ་ཤེས་རབ་དང༌། ཤེས་རབ་ལ་ཐབས་རྒྱུ་བ་ལེགས་པར་འགྱུར་ཞིང༌། ཐབས་དང་ཐབས་ནང་འཁྲུག །ཤེས་རབ་དང་ཤེས་
རབ་ནང་འཁྲུགས་པས་ཡོངས་འཇོམས་ཡིན་ལ། དེ་ཡང་མེ་རླུང་གི་ཟུར་ཐིག་ཉིད་ལ་མཚམས་འཆོལ་བར་མཛད་ན། ཁྱེད་ཀྱི་ལུགས་ལ་ཤར་ལྷོ་ནག་པོ་རླུང་དང༌། ནུབ་བྱང་སེར་པོ་ས་ཁམས་ཡིན་ཞིང༌། དེ་ཡང་ཤར་ལྷོའི་ཟུར་ཐིག་ནས་ལྷོའི་ཚངས་ཐིག་གི་བར་ལ་ཕྱེད་མར་བཏང་བའི་ཕྱེད་ཤར་མ། ཟུར་ཐིག་ལས་ལྷོ་ཕྱོགས་སུ་འཕགས་པའི་ས་དེར་སློབ་དཔོན་ཕྱིན་ན་ཡོངས་འཇོམས་སུ་འགྱུར་ཏེ། རླུང་ཁམས་ཐབས་ཀྱི་ས་ལ་སློབ་དཔོན་ཐབས་འོངས་པས་སོ། །དེ་བཞིན་དུ། ནུབ་བྱང་གི་ཕྱེད་ཤར་མ་ལ་སློབ་མའང་དེ་དང་འདྲ་བས། ཡོངས་འཇོམས་ཀྱི་ས་མཚམས་ཟུར་ཐིག་ལ་གསུངས་པའི་རིགས་པས་ཀྱང་ཕྱོགས་མདོག་འཁྱོག་པོ་འདི་ཤིན་ཏུ་གསལ་བར་བཀག་གོ །ཡང་འདི་སྐད་དུ། ལྷའི་མཚན་མ་འགོད་པའི་སྐབས་སུ་ཤར་དང་མེར་ནག་པོ་ཞེས་སོགས་གསུངས་ཤིང༌། དེ་ཉིད་ཞལ་གྱི་དབྱེ་བ་ཡང་ཡིན་པར་བཤད་དོ། །ཞེས་ཟེར་རོ། །འདི་ཡང་སློབ་དཔོན་གྱི་ཞལ་གྱིས་དམན་པའི་སྦོམ་ཡོར་བ་རྣམས་ཀྱི་བློ་ངོར་འདྲ་རུང་བྱུང་ཡང་དོན་མ་ཡིན་ཏེ། ཕྱོགས་མཚམས་བརྒྱད་དུ་བཅད་པའི་ཤར་ལྷོ་ན་ཡོད་པའི་ལྷ་ཐམས་ཅད་ནག་པོ་མ་ཡིན་ཏེ། ཡིན་ན་གཤིན་རྗེའི་འཁོར་ཚོགས་ཕྱེད་ནག་པོར་ཐལ་ལོ། །དེས་ན་འདིར་རང་ལུགས་ནི་དཔེར་ན་མེ་མཚམས་ཀྱི་ལྷར་གསུངས་ཚད་ཟུར་ཐིག་གི་ས་ཁུལ་གྱི་སྟེང་ན་གནས་པ་ཡིན་ལ། དེ་ལས་གཞི་དམར་ནག་གཉིས་ཀའི་ཆ་ཡོད་ཀྱང་ནག་པོ་གཙོ་ཆེ་བ་ཡིན་པས། དེར་གནས་པའི་ལྷ་དང་མཚན་མ་ནག་པོར་འགྱུར་རོ། །དེས་ན་ཤར་དྲང་ཐད་ནི་རླུང་ཁམས་ཁོ་ན་ཡིན་ལ། ཤར་ལྷོའི་མཚམས་དྲང་ཐད་ནི། གཙོ་བོ་རླུང་ལ་འཁོར་མེ་ཡོད་པ་ཡིན་པས། གནས་སྐབས་གཞན་དུ་ཤར་ལྷོ་རླུང་དུ་བཤད་པའང་ཡོད་མོད་གཙོ་ཆེ་བར་
དགོངས་སོ། །གཡས་སྐོར་གྱི་རིམ་པས་བགྲོད་པའི་དབང་དུ་བྱེད་ན། ཤར་ནས་བརྩམས་ཏེ་ཤར་ལྷོའི་མཚམས་སུ་ཕྱིན་པ་ན། མཚམས་དེར་འབྱུང་བ་གཉིས་ཀར་འཛོམ་ཡང༌། རླུང་ནི་སྔ་རོལ་ནས་འགྲོགས་ཏེ་ཡུན་རིང་ལོན་པའི་གདོད་མ་ཡིན་ལ། མེ་ནི་ཕྲད་མ་ཐག་པ་ཡིན་པས་མེ་བས་རླུང་སྟོབས་ཆེ་བ་ཡིན་ནོ། །དེས་ཐམས་ཅད་ལ་འགྲེ་སྟེ། དེ་ཡང་དགེ་བའི་ལས་དང་མཆོག་སྒྲུབ་ལ་གཡས་སྐོར་དུ་བརྩི་ཞིང༌། དགེ་མིན་གྱི་ལས་ལ་གཡོན་སྐོར་དུ་བརྩི་བའང་ཡོད་ན། འདིར་ནི་གཡས་སྐོར་རོ། །གཞན་ཡང་རྣམ་པ་གཅིག་ཏུ་ན་ལྷའི་མཚན་མའི་སྐབས་སུ། ཤར་ཤར་ལྷོ་ནག་པོ་སོགས་ཀུན་ཏུ་གྲགས་ཤིང་གསུངས་ལ། ས་གཞིའི་ཕྱོགས་མདོག་ལ་དེ་འདྲ་མ་གསུངས་པ་ཉིད་ཀྱིས་གཞིའི་ཕྱོགས་མདོག་གི་མཚམས་ཟུར་ཐིག་ལ་བྱེད་པར་གྲུབ་བོ། །འོ་ན་ཡེ་ལེའི་ཉེར་བདུན་པའི་འགྲེལ་པར་ཤར་དང་མེར་ནག་པོ་དང༌། ལྷོ་དང་བདེན་བྲལ་དུ་དམར་པོ་དང༌། ནུབ་དང་རླུང་དུ་སེར་པོ་དང༌། བྱང་དང་དབང་ལྡན་དུ་དཀར་པོའོ། །ཞེས་གསུངས་པས། ལུང་གསལ་ཁ་དང་བཅས་པའི་ཕྱིར། གཞིའི་ཕྱོགས་མདོག་ཤར་ཤར་ལྷོ་ནག་པོ་སོགས་འདི་ཁོ་ནའོ་སྙམ་ན། དེ་ནི་སྡོམ་ཆེན་གྱི་སྒོས་ཆོས་ཡིན་པས་དུས་ཀྱི་འཁོར་ལོ་ནས་བཤད་པའི་དཀྱིལ་འཁོར་གཞན་ལ་མི་རུང་ངོ༌། །དེའི་རྒྱུ་མཚན་ཡང་དཀྱིལ་འཁོར་དེ་ལ་སྒོ་བརྒྱད་ཡོད་ཅིང༌། དེའི་ཟུར་ཐིག་ཀྱང་དོན་གྱི་ཚངས་ཐིག་ཡིན་པས། ཚངས་ཐིག་ལ་མཚམས་འཆོལ་བ་དང༌། སྒོ་ལ་ཁ་དོག་ཕྱེད་ཚལ་དུ་གཏོང་བ་དཀྱིལ་འཁོར་གང་གི་ལུགས་ལ་ཡང་མི་རུང་བས་རྒྱུ་མཚན་དེའི་ཕྱིར་དེ་ལ་དེ་ཡིན་ནོ། །དེ་ལྟ་བས་ན་དུས་འཁོར་ཡོངས་རྫོགས་ཀྱི་དཀྱིལ་འཁོར་ལ་ནི། ཕྱོགས་བཞི་མཚམས་
བཞི་ཡིན་ལ། སྡོམ་ཆེན་ལ་ནི་ཕྱོགས་བརྒྱད་མཚམས་བརྒྱད་ཡིན་ཏེ། སྒོ་བརྒྱད་དང་དུར་ཁྲོད་བཅུ་དྲུག་གི་རིག་པས་སོ། །འདི་ཡང་བླ་མའི་ཞལ་ལུང་མེད་པར་ཤེས་རབ་ཆེ་རུ་རེ་བས་དཔེ་སྒྲོགས་བྱེད་པ་རྣམས་ལ་འཁྲུལ་གཞི་སྐྱེ་བ་ནི་བདེན་པར་སྣང་ངོ༌། །དོན་ཚན་བཞི་པ་དག་པ་བཤད་པ་ནི། དེ་ལྟར་བྲིས་པའི་དཀྱིལ་འཁོར་བཞེངས་པ་དེ་ལ་དག་སྦྱོར་གྱི་རིམ་པ་མང་དུ་གསུངས་པ་ལས། ཕྱི་འཇིག་རྟེན་ཁམས་ལ་སྦྱོར་ཚུལ་གཅིག་ནི། འཇིག་རྟེན་ཁམས་མཉམ་གྱི་དག་པར་གྲགས་པ་དེ་ཡིན་ཏེ། གཞན་དུ་བརྗོད་ཟིན་ཏོ། །ཡང་རྣམ་གྲངས་གཅིག་ལ། ལུས་ཀྱི་དཔྱི་མན་ཆད་དུ་སོར་དྲུག་པ་བརྒྱད་ཡོད་པ་ནི། དམྱལ་བ་བདུན་དང་ཀླུའི་གནས་ཏེ་བརྒྱད་དག་པ་སྐུའི་དཀྱིལ་འཁོར་རོ། །གསུང་གི་དཀྱིལ་འཁོར་ནི་ཕྱི་རོལ་ཏུ་ལྷུན་པོ་དང༌། ནང་དུ་སྒལ་ཚིགས་ཏེ་དཔྱི་ནས་མགྲིན་པའི་འོག་མཚམས་ཀྱི་བར་ རོ། །རི་རབ་ཀྱི་མགྲིན་པ་དང་ལུས་ཀྱི་མགྲིན་པ་དང༌། གདོང་གི་ཕྱེད་འོག་མ་ནི་ཚོན་ས་ཕན་ཆད་ཐུགས་དཀྱིལ་དངོས་དང་སྦྱོར་ཞིང༌། རི་རབ་ཀྱི་གདོང་དང་ལུས་ཀྱི་གདོང་གི་ཕྱེད་གོང་མ་ནི། བདེ་གཤེགས་འཕར་མ་དང༌། གཙོ་བོའི་གནས་ནི་རི་རབ་ཀྱི་གཙུག་ཏོར་དང༌། ལུས་ཀྱི་གཙུག་ཏོར་དག་པའོ། །འདི་ནི་དཔངས་ཚད་ལ་སྦྱར་བ་ཡིན་ལ། ལུས་ཀྱི་རྒྱ་ཚད་དང་སྦྱར་བ་ནི། རྟེན་སྙིང་གའི་ཐིག་ལེ་བརྟེན་པ་རང་བྱུང་གི་ཡེ་ཤེས་མ་རིག་པ་དང་བཅས་པ་ནི་བདེ་བ་ཆེན་པོའི་འཁོར་ལོས་དག་པའོ། །སྙིང་གའི་འཁོར་ལོ་ནི་ཐུགས་དཀྱིལ་ལོ། །དེའི་སྒོ་བཞི་ནི་གནས་སྐབས་བཞི། མགྲིན་པ་ནས་ལྟེ་བའི་མཐར་ཐུག་པ་ནི་གསུང་དཀྱིལ་དང༌། དེའི་སྒོ་བཞི་ནི་རྩ་བཞི། མཛོད་སྤུ་ནས་ཆུ་སོའི་བར་ནི་སྐུ་དཀྱིལ་དང༌། བཤང་གཅི་ཁུ་བའི་བུ་ག་གཙུག་ཏོར་གྱི་
འཁོར་ལོར་བཅས་པ་ནི་སྒོ་བཞིའོ། །ཕྱི་མ་འདི་རྩ་རྒྱུད་ཀྱི་དགོངས་པ་ཡིན་ཞེས་གསུངས་སོ། །དེ་ཡང་སེམས་ལ་གནས་སྐབས་བཞི་དང༌། རླུང་ལ་རྩ་བཞི་དང༌། ལུས་ལ་འཛག་པའི་སྒོ་བཞི་སྟེ་སྒོ་རྣམས་ཀྱང་ལུས་ངག་ཡིད་ཀྱི་ཆོས་སུ་སྦྱར་བའོ།། དོན་ཚན་ལྔ་པ་འདོད་ཕྱིར་འདོད་ལ་དཔྱད་པ་ནི། འདོད་ཕྱིར་འདོད་རྣམས་ལ་འགྲེལ་ཆེན་ལས་ཤར་སྒོའི་བྱང་དུ་ས་སྡེ་ལྷོ་སྒོའི་ཤར་དུ་ཀ་སྡེ། བྱང་སྒོའི་ནུབ་ཏུ་ལ་སྡེ་སྟེ་ས་བོན་ལྔ་ཚན་རེ་གསུངས་ནས། ནུབ་སྒོའི་ལྷོ་རུ་ཀྵཿགཅིག་པུ་ལས་མ་གསུངས་ཏེ། དེ་ཡང་ཤར་ནུབ་ཀྱི་ཡི་གེ་རྣམས་ཡེ་ཤེས་དང༌། ལྷོ་བྱང་གཉིས་ནམ་མཁའི་ཁམས་སུ་དགོངས་པ་སྟེ། ནུབ་ཀྱི་གཡོན་དུ་ཀྵཿགཅིག་པུ་ལས་མི་འབྱུང་བ་ནི་དོན་ལ། ལ་ཝ་ར་ཡ་ཀྵཿསྟེ་ཡི་གེ་ལྔ་ཡིན་ཡང་མཐར་གནས་བཞི་པོ་རིམ་པ་གཅིག་ལ་ལན་གཉིས་ཟློས་པ་མི་ལེགས་པ་དང༌། ལྷ་ཡང་ཁྱབ་བྱའི་འདོད་མ་སོ་དྲུག་ལས་མེད་པས། ཡི་གེ་ལྔ་འདུས་ཀྱི་ངོ་བོ་ཀྵཿཡིག་ཏུ་བསྡུས་པའོ། །དེས་ན་གསལ་པར་གསུངས་པ་འདི་ཡང་རགས་བཤད་དམ། དགོངས་པ་གཞན་དུ་དྲངས་དགོས་པ་མ་ཡིན་ཏེ། ཕྱོགས་ཀྱི་རིམ་པ་དང་ཡི་གེའི་ཁམས་བསྟུན་ནས་གསུངས་པའི་ཕྱིར་དང༌། སྐབས་འདི་ལ་སོ་སོར་ཕྲལ་ནས་བཤད་པ་དང༌། སྡེ་ཚན་བསྡོམས་པ་ལ་ཡིག་ཚོགས་ཆེ་ཆུང་དང༌། གོ་དཀའ་སླའི་ཁྱད་པར་མེད་པའི་ཕྱིར་རོ། །གཡས་གཡོན་གྲངས་མ་མཚུངས་པས་མི་མཛེས་སོ་སྙམ་དུ་ཡང་བསམ་པར་མི་བྱ་སྟེ། །མཛེས་མི་མཛེས་བློས་བཏགས་ཚུལ་གྱི་ཁྱད་ཡིན་པས་ངེས་བཟུང་མེད་ལ། གྲངས་སྙོམས་པ་ནི་མཐའ་གཅིག་ཏུ་མི་དགོས་ཏེ། གཟའ་ཡུམ་གྱི་དཀྱིལ་འཁོར་དང༌། མངོན་བརྗོད་བླ་མའི་ཞབས་གཅིག་
པའི་དཀྱིལ་འཁོར་སོགས་མཐོང་བས་ཤེས་སོ། །དེས་ན་སྔགས་རྒྱུད་གསུང་བ་པོས་གང་བཤད་པ་དེ་ཉིད་ལ་ཡིད་ཆེས་བྱ་དགོས་ཀྱི། ཕལ་པའི་བློས་དགག་སྒྲུབ་མི་ཐུབ་པས། དབང་ལེའི་འགྲེལ་བའི་དངོས་བསྟན་འདི་ཡང་བཅོས་མ་བཏབ་པར་གདམ་ཁའི་རྣམ་གྲངས་གཅིག་ཏུ་ཁས་ལེན་ནོ། །འོ་ན་ཕྱོགས་ཕྱོགས་སུ་བརྒྱད་བརྒྱད་ཟུར་བཞིར་རེ་རེ་དང་བཅས་པའི་འགོད་ཚུལ་འདི་ཇི་ལྟ་བུ་ཞེ་ན། འདི་ཡང་མཛེས་བྱེད་ཙམ་དུ་བློས་བཅོས་པ་མ་ཡིན་ཏེ། སྒྲུབ་ལེའི་འགྲེལ་པར། རང་རང་གི་སྤྲུལ་གཞི་དང་སྦྱར་ནས་གསུངས་པའི་རྗེས་སུ་ཐམས་ཅད་རང་རིག་དང་ཁམས་ཀྱི་ཕྱོགས་སུ་འགོད་པར་གསུངས་པས་བསྟན་པ་ཡིན་ལ། དེ་ལ་ཡང་རྒྱ་བོད་ན་འགོད་ཚུལ་མི་འདྲ་བ་ཅི་རིགས་པ་ཡོད་མོད། ལྷའི་འགོད་ཚུལ་དང་ས་བོན་སྦྱོར་ཚུལ་སྒྲུབ་ཐབས་སུ་བཤད་པ་དང༌། ཕྱག་མཚན་འགོད་ཚུལ་གོང་དུ་བཤད་པ་ནི། བླ་མ་དམ་པའི་མན་ངག་མ་ནོར་བ་ཡིན་ལ། ཡང་འཕྲེང་བ་ལས་འབྱུང་བ་ནི་འདི་ལྟར་བཀོད་དེ། ཨུཏྤལ་གོས་དང་གྲི་གུག་འཁོར་ལོ་ཁ་ཊྭཱཾ་ག །ཤར་གྱི་གཡས་ཏེ་གྲི་གུག་རལ་གྲི་གྲི་གུག་ཟུང༌། །པདྨ་རོ་སྣོད་དབྱུག་པ་ཤཀྟི་པདྨ་རྣམས། །ལྷོ་ཡི་གཡས་ཏེ་དགྲ་སྟ་མདའ་དང་གྲི་གུག་གཉིས། །འཁོར་ལོ་དུང་ཆོས་རྡོ་རྗེ་ཁབ་དང་འཁོར་ལོ་རྣམས། །ནུབ་ཀྱི་གཡས་ཏེ་ཆོས་འབྱུང་འཁོར་ལོ་གྲི་གུག་གཉིས། །ཨུཏྤལ་མེ་ལོང་རྩེ་གསུམ་པདྨ་ཨུཏྤལ་རྣམས། །བྱང་གི་གཡས་ཏེ་པི་ཝཾ་ཐོ་བ་གྲི་གུག་གཉིས། །ཞེས་སྡོམ་ལ། ཀྲི་ཡ་ས་མུད་ཙ་ནི་དེའི་རྗེས་འབྲང་ཁོ་ན་ཡིན་ཞིང༌། སཱ་དྷུ་པུ་ཏྲ་ཡང་ཕལ་ཆེར་དེའི་རྗེས་སུ་འབྲང་བས་འགྱུར་ནོར་རམ་ཡིག་ནོར་ཞིག་ལ་ཆོས་འབྱུང་གི་
ཚབ་ཏུ་ཕུབ་ཅེས་པ་བྱུང་མོད་གཞན་འདྲའོ། །ཕྱོགས་རྣམས་ཀྱི་གཡོན་གྱི་སྟེགས་བུ་ལ་བཞི་བཞི་འགོད་ཚུལ་འདི་རྣམས་ལ། ཕྱིས་བོད་པས་མི་འདྲ་བ་སྣ་ཚོགས་བྱས་འདུག་པ་ནི། ཕལ་ཆེར་བློ་བཟོ་ཁོ་ན་ཡིན་པར་སྣང་བས་རྗེས་སུ་འབྲངས་ཀྱང་དགོས་པ་ཆུང་ལ། སྤྱིར་ཡང་ལུང་གསལ་མེད་པའི་རིགས་རྣམས་དམ་པའི་མན་ངག་ལ་བརྟེན་པ་གནད་དུ་ཆེའོ།། ལྔ་པ་དངོས་གཞིའི་དང་པོ་དཀྱིལ་འཁོར་སྒྲུབ་པ་ལ། དཀྱིལ་འཁོར་སྒྲུབ་པའི་སྦྱོར་བ་དང༌། དཀྱིལ་འཁོར་སྒྲུབ་པ་དངོས་སོ། །དང་པོ་ལ་རྒྱན་དགྲམ་པ། ལས་བྱེད་བརྐོ་བ། སྦྱིན་སྲེག་འབུལ་བ། བུམ་པ་སོགས་ངེས་པའི་ཡོ་བྱད་བཤམ་པའོ། །དང་པོ་རྒྱན་དགྲམ་པ་ནི་སྤྱི་དང་འདྲ་སྟེ་གོ་སླའོ། །གཉིས་པ་ནི། དེ་ནས་སློབ་དཔོན་དུ་འོས་པ་བཞི་ལ། རྡོ་རྗེ་དྲིལ་བུ་གཏད་དེ་སློབ་དཔོན་གྱི་བཀའི་གནང་བ་སྦྱིན། སྒོ་བཞིའི་སློབ་དཔོན་དུ་བསྐོ་ཞིང༌། བུམ་སྐྱོང་རྣམས་དང་སྦྱིན་སྲེག་གི་སློབ་དཔོན་ཡང་སྐོས་པའོ། །གསུམ་པ་ནི། དེ་ཉིད་བཅུ་ཤེས་པའི་སློབ་མ་བཟང་པོ་ཞིག་སྦྱིན་སྲེག་གི་དོན་དུ་ལས་ཀྱི་རྡོ་རྗེར་བསྐོ། སློབ་དཔོན་རང་ཉིད་བདག་བསྐྱེད་བྱེད་པ་ཡན་ཆད་དུ་དེས་སྦྱིན་སྲེག་བྱའོ། །གལ་ཏེ་མེད་ན་སློབ་དཔོན་རང་ཉིད་ཀྱིས་སྦྱིན་སྲེག་བྱ་སྟེ། རྒྱུད་འགྲེལ་དངོས་བསྟན་གྱི་གོ་རིམ་ཇི་ལྟ་བ་བཞིན་དུ་སྒྲུབ་ཅིང་མཆོད་པའི་སྔོན་དུ་བྱུར་བསལ་ཞིང་དགེ་ལེགས་སུ་བསྒྲུབ་པའི་ཕྱིར། དཀྱིལ་འཁོར་ཁང་པ་དེ་ཉིད་དུ་ཞི་རྒྱས་བརྐྱང་པ་གང་རུང་གི་སྦྱིན་སྲེག་ངེས་པར་བྱ་ཞིང༌། སྟེང་ཁང་གི་ནང་དཀྱིལ་འཁོར་གྱི་སྟེང་ཐད་ཉིད་དམ། དཀྱིལ་འཁོར་ཁང་པ་གཞན་དུ་ལས་ཐམས་ཅད་པའི་སྦྱིན་སྲེག་ཀྱང་རུང་ལ། ཡང་ལས་སོ་སོ་
སྒྲུབ་པའི་དབང་བསྐུར་ཡིན་ན། དེ་དང་དེའི་སྦྱིན་སྲེག་སྒྲུབ་པ་ཡིན་ཏེ། འདི་དག་རྒྱས་པར་ཀུན་མཁྱེན་ཆེན་པོས་མཛད་པའི་སྦྱིན་སྲེག་གི་ཡི་གེ་རྣམས་སུ་ཤེས་པར་བྱ་ལ། ཐབ་བཅུ་པོའི་ཚད་ནི། ཆོས་རྒྱལ་ཕྱོགས་ལས་རྣམ་རྒྱལ་གྱི་ཐིག་རྩར་ཡང་ཤེས་པར་བྱའོ། །དེས་ནི་སྐབས་འདིའི་རྒྱུད་འགྲེལ་གྱི་དོན་ཕྱིན་ཅི་མ་ལོག་པ་རྟོགས་པར་འགྱུར་རོ། །གལ་ཏེ་སྐབས་འདིར་སྦྱིན་སྲེག་མ་གྲུབ་ན། དཀྱིལ་འཁོར་མཆོད་པའི་སྐབས་སུ་བྱས་པས་ཀྱང་དོན་འགྲུབ་སྟེ་བླ་མ་རྣམས་ཀྱི་མན་ངག་གོ། བཞི་པ་ནི། དེ་ནས་བུམ་པ་རྣམས་སྤྱན་འདྲེན་ཏེ། དེ་ཡང་བུམ་པ་བཅུ་ཡོད་ན། ཕྱོགས་མཚམས་བརྒྱད་དུ་བུམ་པ་བརྒྱད་དང༌། རྒྱལ་བ་ནི་ཤར་གྱི་བུམ་པའི་ཤར་དང༌། རྣམ་པར་རྒྱལ་བ་ནི་ནུབ་ཀྱི་བུམ་པའི་ནུབ་ཏུ་ཕན་ཚུན་ལྟེ་བའི་བར་དུ་སོར་གཉིས་ཙམ་གྱི་བར་སྟོངས་ཡོད་པར་བྱས་ཏེ་འགོད། རྒྱལ་བའི་བུམ་པའི་སྟེང་དུ་རྣམ་རྒྱལ་ཆེན་པོ་དུང་ཆོས་བཞག་ཅིང༌། རྣམ་རྒྱལ་བུམ་པའི་སྟེང་དུ་ཉ་ཕྱིས་སམ། ཐོད་པའམ། དུང་གི་སྣོད་དུ་བདུད་རྩི་ལྔ་དང༌། སྒྲོན་མ་ལྔའི་རིལ་བུ་རིགས་དྲུག་གི་ས་བོན་ལན་བདུན་བཟླས་ཏེ་བཞག བུམ་པ་ལྔའི་ཕྱོགས་ལ་ཕྱོགས་བཞི་དང༌། རྒྱལ་བའི་བུམ་པ་སྔར་བཞིན། རྒྱལ་བའི་སྟེང་དུ་རྣམ་རྒྱལ་བུམ་པ་ནི་དུང་ཆོས་ཉིད་ཡིན་ལ། དམ་རྫས་ཀྱིས་བཀང་བའི་ཐོད་པ་ནི་ནུབ་ཀྱི་བུམ་པར་བཞག་གོ །གཞན་ཡང་མཆོད་པ་དང་གཏོར་མ་དང་དབང་རྫས་རྣམས་ཀྱང་ཉེ་བར་བཤམ་མོ། །རྒྱན་དང་མཆོད་གཏོར་འགྲེམ་པ་ཐམས་ཅད་ལ་གཙོ་བོའི་སྔགས་དང༌། ཨོཾ་སྥ་ར་ཎ་ཁཾ་ཞེས་བརྗོད་ནས་འགོད་པར་འདོད་དོ། །མཆོད་པའི་རྟ་བབས་རྩིག་པ་
སོགས་ངེས་པ་ཅན་དུ་མི་དགོས་ཀྱང༌། མཆོད་པ་ནི་ཇི་ཙམ་རྒྱས་པ་དེ་ཙམ་བཟང་བས་གང་ཡང་བཀག་པ་མེད་ཅིང་འགལ་བ་མེད་དོ།། གཉིས་པ་དཀྱིལ་འཁོར་སྒྲུབ་པ་དངོས་ལ། གཞན་གྱི་འདོད་པ་བརྗོད་པ་དང༌། རང་ལུགས་གཉིས་སོ། །དང་པོ་ནི། དུས་ཞབས་པས་མཛད་ཟེར་བའི་དཀྱིལ་ཆོག་ཏུ་རང་གི་དཀྱིལ་འཁོར་སྤྲུལ་དང་བསྲེ། ཞེས་རྒྱུད་སྡེ་གཞན་གྱིས་རྒྱས་འགེབས་དང༌། རྗེ་ཤེས་རབ་སེངྒེ་བ། དམིགས་པ་བརྟན་པའི་རྣལ་འབྱོར་པས་བདག་མདུན་དབྱེར་མེད་དུ་བསྒོམ། མི་བརྟན་ན་བདག་མདུན་ཐ་དད་དུ་བྱེད་གསུངས་ལ། གྲུབ་ཆེན་ཡུ་མོ་བདག་བསྐྱེད་ཚར་ནས་མདུན་བསྐྱེད་གཞལ་ཡས་ཁང་བསྒོམ། སྙིང་གར་མངོན་བྱང་ལྔ་ལས་གཙོ་བོ་ཡབ་ཡུམ་བསྐྱེད། དེའི་མཁའ་ནང་ནས་གཙོ་བོ་སྤྲོས་ཏེ། དབུས་ཀྱི་གདན་ལ་འཁོད་པ་སོགས་ལྷ་རྣམས་བཀོད་ནས་ཡབ་ཡུམ་སྙོམས་འཇུག་གི་སྦྱོར་བས་ཡེ་ཤེས་པ་སྤྱན་འདྲེན་མཛད་ དོ། །དེ་ལ་མཁས་པ་ཁ་ཅིག་ནི། དེ་རྡུལ་ཚོན་གྱི་རིགས་འགྲེ་ཡིན་ཡང་དམ་ཚིག་པ་བསྐྱེད་པ་ཆད་དོ་ཞེས་སྐྱོན་འདོགས་མོད། སྐྱོན་དེ་ནི་མི་འཇུག་པར་སྣང་ལ། དེ་རྣམས་ཀྱང་སོ་སོའི་བླ་མའི་མན་ངག་ཡིན་ཏེ་མཆི་ཞིང༌། སྤྱིར་རྒྱུད་གཞན་གྱི་ཆོ་གས་ཀྱང་སྒྲུབ་ཏུ་རུང་བས་སྐུར་པ་ནི་མི་འདེབས་ལ། འོན་ཀྱང་དངོས་བསྟན་རྒྱུད་འགྲེལ་དང་མི་མཐུན་ནོ།། །།གཉིས་པ་རང་ལུགས་ནི་རྒྱུད་འགྲེལ་དངོས་བསྟན་ལྟར་དང་པོར་བདག་བསྐྱེད་རྫོགས་པར་བསྒོམས། བཟླས་པ་ཡང་བྱས་ནས་བདག་བསྐྱེད་ཀྱི་དཀྱིལ་འཁོར་རང་ལ་ཉེ་བར་བསྡུས། གཙོ་བོའི་ང་རྒྱལ་ལ་གནས་པའི་སྒོ་ནས་མདུན་བསྐྱེད་ཀྱི་དཀྱིལ་འཁོར་བསངས་སྦྱངས་ཏེ་གཞལ་ཡས་ཁང་གདན་དང་བཅས་པ་བསྐྱེད་
པ་ཡིན་ལ། གདན་དེ་ཡང་བསྡུས་པ་ཨོཾ་ཡིག་དང་པཾ་ཡིག་ལས་བསྐྱེད་པས་ཀྱང་གོ་ནི་ཆོད་མོད། སྐབས་འདིར་ཐུགས་དཀྱིལ་གྱི་པད་གདན་རྣམས་ལ་ས་བོན་རྒྱས་པ་མཛད་པ་ཉིད་བསྔགས་ཏེ། དེ་ཡང་ཐམས་ཅད་ལ་ཡི་གེ་ལྔ་ལྔ་ཡོད་པ་ནི། པདྨ་རྣམས་ཀྱི་རྩ་བ་སྟེ་བ་ཐག་དང༌། སྡོང་བུ་སྟེ་རྐང་ལོ་མར་བཅས་པ་དང༌། མེ་ཏོག་གི་འདབ་མ་དང་གེ་སར་དང་ལྟེ་བ་སྟེ་ལྔ་པོའི་ས་བོན་ཡིན་ཏེ། དཔེར་ན། སཱཾ་ནི་ལྟེ་བ། གེ་སར། ཥཱཾ་ནི་འདབ་མ། ཤཱཾ་ནི་རྐང་བུ་ལོ་མར་བཅས་པ། ནི་རྩ་བའི་ས་བོན། དེའི་ཐམས་ཅད་ལ་རིགས་འགྲེའོ། །ཡི་གེ་སྡེ་པ་སོ་སོ་ནི་རང་རང་གི་འབྱུང་བའི་ཁམས་དང་བསྟུན་པ་ཡིན་ཞིང༌། ཐུང་རིང་གི་དབྱེ་བ་དང༌། རྗེས་སུ་ང་རོ་དང༌། ཚེག་དྲག་ནི་ཐབས་ཤེས་ཀྱི་ཁྱད་པར་རོ། །དེ་ཡང་གཙོ་བོའི་གདན་ཐབས་ཤེས་ཆ་མཉམ་པས་ཀླད་སྐོར་ཐབས་དང༌། རིང་པོ་ཤེས་རབ་འཛོམ་པ་ཡིན། གཞན་ཡབ་གཙོ་བོ་ལ་ཀླད་སྐོར་ཅན་ནམ་ཐུང་ངུའི་སྡེ་ཚན་དང༌། ཡུམ་གཙོ་བོ་ལ་ཚེག་དྲག་ཅན་ནམ་རིང་པོའོ། །གཙོ་བོའི་གདན་ལ་ས་སྡེ་སྦྱོར་བ་ཀུན་ཁྱབ་ཡེ་ཤེས་ཀྱི་ཁམས་མཚོན་པའོ། །གཙོ་བོའི་གདན་ཉི་ཟླ་སྒྲ་གཅན་ནི། ཨཾ་ཨཱཿཨ་ལས་བསྐྱེད་པ་དང༌། འཁོར་རྣམས་ལ་ར་ལས་ཉི་མ་དང༌། མ་དང་ཨ་ལས་ཟླ་བ་སོགས་སོ། །དེ་རྗེས་ལྷ་རྣམས་ཀྱི་བསྐྱེད་ཆོག་རྒྱས་འབྲིང་བསྡུས་པའི་དབྱེ་བ་ཅི་རིགས་པ་ཡོད་ཀྱང༌། གཙོ་བོར་རྡོ་རྗེ་བཞི་དང་བུམ་པ་དང་གཟུངས་མའི་རིགས་སུ་གཏོགས་པ་རྣམས་ས་བོན་ཙམ་དང༌། སྟེང་འོག་གི་ཀླུ་རབ་གཏུམ་མ་སོགས་སྐད་ཅིག་གིས་བསྐྱེད། གཙོ་འཁོར་གཞན་རྣམས་ས་བོན་ཕྱག་མཚན་ཙམ་ལས་བསྐྱེད་པའོ། །
ཡེ་ཤེས་པ་སྤྱན་འདྲེན་གྱི་སྐབས། རྒྱུད་ལས། རྡོ་རྗེ་པདྨ་ལས་སྐྱེས་ཞེས་པའི་ལྔ་འགྲེལ་དུ་ཤེས་རབ་དང་ཐབས་ལས་འབྱུང་བ་ཞེས་བྱུང་བ་ནི། སྒྲུབ་ཐབས་ཀྱི་སྐབས་སུ་བཤད་པ་ལྟར་ཕོ་ཉ་རྡོ་རྗེ་ཤུགས་རྣམ་པ་ཡབ་རྐྱང་ཡིན་ཡང་ཐབས་དང་ཤེས་རབ་ཟུང་འཇུག་གི་བདག་ཉིད་ཡིན་ཞེས་སྟོན་པ་ཡིན་གྱི། ཕོ་ཉ་མཁའ་སྤྲོ་བྱེད་པ་དང༌། ཡེ་ཤེས་པ་ཞལ་དུ་བཅུག་ནས་སླར་ཡང་མཁའ་ནང་ནས་སྤྲོས་ཏེ་བསྲེ་བའི་དོན་མ་ཡིན་ནོ། །དེ་ཉིད་ལུང་གིས་སྒྲུབ་པ་ནི། ཇི་སྐད་དུ་འགྲེལ་ཆེན་ལས། དེ་ནས་སློབ་དཔོན་ཤར་གྱི་ཞལ་དུ་འདུག་སྟེ་འཆད་པར་འགྱུར་བའི་སྒྲུབ་ཐབས་ཀྱི་ཆོ་གས་སྡིག་པ་བཤགས་པ་ལ་སོགས་པ་བྱས་ནས་དཀྱིལ་འཁོར་རྒྱལ་མཆོག་དང༌། ལས་རྒྱལ་མཆོག་དང༌། ཐིག་ལེའི་རྣལ་འབྱོར་དང༌། ཕྲ་མོའི་རྣལ་འབྱོར་བྱའོ། །དེ་ནས་ཤེས་རབ་དང་ཐབས་ལས་བྱུང་བ་རྡོ་རྗེ་པདྨ་ལས་སྐྱེས་རབ་བགྲོད་ཁྲོ་བོའི་རྒྱལ་པོ་རྣམ་དག་གིས། ཞེས་པ་སྒྲུབ་ཐབས་ཀྱི་ཐབས་དང་ལྡན་པའི་ཆོ་གས་ཛཿཧཱུཾ་བཾ་ཧོ༔ སྔགས་ཀྱི་ཚིག་འདི་རྣམས་ཀྱིས་ཏེ། ཛཿཡིག་གིས་དགུགས་པ་དང༌། ཧཱུཾ་ཡིག་གིས་གཞུག་པ་དང༌། བཾ་ཡིག་གིས་བཅིང་བ་དང༌། ཧོཿཡིག་གིས་མཉེས་པར་བྱས་ནས། ཡེ་ཤེས་ཀྱི་འཁོར་ལོ་ནི་རྡུལ་ཚོན་གྱི་དཀྱིལ་འཁོར་ལ་དམ་ཚིག་གི་དཀྱིལ་འཁོར་དུ་བསྒོམས་ཤིང་དེ་ལ་རོ་མཉམ་དུ་བྱ་སྟེ་དབང་གི་དོན་དུའོ། །ཞེས་གསུངས་ཏེ། འཆད་པར་འགྱུར་བའི་ཞེས་པ་ནས། ཕྲ་མོའི་རྣལ་འབྱོར་བྱའོའི་བར་གྱི་བདག་བསྐྱེད་དང༌། རྡུལ་ཚོན་གྱི་དཀྱིལ་འཁོར་ལ་དམ་ཚིག་གི་དཀྱིལ་འཁོར་དུ་བསྒོམས་ཤིང་ཞེས་
པས། མདུན་བསྐྱེད་ཀྱི་དམ་ཚིག་པ་བསྟན། དེ་ནས་ཤེས་རབ་དང་ཞེས་པ་ནས། ཡེ་ཤེས་ཀྱི་འཁོར་ལོ་ནི་ཞེས་པའི་བར་དང༌། དེ་ལ་རོ་མཉམ་དུ་བྱ་སྟེ། ཞེས་པའི་བར་གྱིས་ཡེ་ཤེས་པ་སྤྱན་འདྲེན་རོ་མཉམ་གྱི་བར་བསྟན་ནོ། །དེ་དག་ནི་དངོས་བསྟན་ཚིག་གིས་གསལ་བ་དེ་ཡིན་ཞིང༌། སྐུ་གསུང་ཐུགས་ཀྱི་བྱིན་རླབས་དང༌། རིགས་བདག་གི་རྒྱས་འདེབས་ནི་ལྷ་དབང་བསྐུར་བ་ཡིན་པ་དང༌། རྡོ་རྗེ་བཞིའི་རྒྱས་བཏབ་ཀྱང་དེའི་རྗེས་འབྲང་ཡིན་པས་བྱ་དགོས་ལ། ཡི་གེ་འགོད་པའང་སྐྱེ་མཆེད་བྱིན་རླབས་ཀྱི་དོད་ཡིན་པས་བྱའོ།། སྔ་མའི་འཕྲོས་ལས། དེ་ལྟར་རབ་ཏུ་གནས་པ་བྱས་ཏེ་ཞེས་འབྱུང་བ་ལྟར། འདི་རྡུལ་མཚོན་གྱི་དཀྱིལ་འཁོར་རང་ལ་བལྟོས་པའི་རབ་གནས་དངོས་ཡིན་པས། དམ་ཚིག་པ་བསྐྱེད་པ། ཡེ་ཤེས་པ་དང་བསྲེ་བ། དབང་བསྐུར་རྒྱས་བཏབ་རྣམས་མེད་མི་རུང་ཡིན་ཏེ། རབ་གནས་དངོས་རང་དེ་ཆོ་ག་གསུམ་པོ་དེ་དག་ཡིན་པས་སོ། །གཙོ་བོ་ཡབ་ཡུམ་ནི་མདུན་བསྐྱེད་སྐབས་འདིར་ཡང་ཀུན་ཁྱབ་ཀྱི་རིགས་སུ་གྱུར་པ་ཡིན་མོད། མདུན་བསྐྱེད་ཀྱི་གཙོ་བོས་འཁོར་གྱི་དཀྱིལ་འཁོར་སྤྲོ་བ་སོགས་འཁོར་གྱི་ཚོགས་ལ་སྐྱེ་དགུའི་བདག་པོའི་མཛད་པ་མཛད་མི་དགོས་པ་དང༌། རྡུལ་ཚོན་གྱི་ལྷ་ལ་རབ་གནས་ཡིན་པའི་ཕྱིར། གཙོ་བོ་ཡབ་ཡུམ་ལ་ཡང་རྒྱས་བཏབ་བྱེད་དེ། མདུན་བསྐྱེད་ཀྱི་གཙོ་བོ་དེ་འཁོར་ཚོགས་ལ་ཀུན་ཁྱབ་དབང་སྒྱུར་བ་པོ་ཡིན་དུ་ཆུག་ཀྱང་མདུན་བསྐྱེད་བཟང་པོར་གཏོང་པ་བདག་བསྐྱེད་ཀྱིས་བྱིན་གྱིས་རློབས་པ་ལ་རག་ལུས་པས་རབ་ཏུ་གནས་པ་བྱ་ལ། རབ་གནས་བྱེད་པ་པོས་དབང་བསྒྱུར་བའི་ཕྱིར་བདག་བསྐྱེད་ཀྱིས་སྤྲུལ་པའི་རྒྱས་འདེབས་བྱེད་དོ། །དེ་ཡང་གཙོ་བོ་མི་བསྐྱོད་པའི་རིགས་ལ་
རྡོ་རྗེ་སེམས་དཔའ་དང༌། ཡུམ་རྡོར་སེམས་ཀྱི་རིགས་ལ་མི་བསྐྱོད་པའོ། །ཡང་སྐབས་འདི་དག་ཏུ་བུ་སྟོན་ཆེན་པོ་ནི་དཀྱིལ་འཁོར་གཞན་ལ་བོད་རྣམས་བསྲེ་བའི་ཐ་སྙད་བྱེད་པ་ལྟར། ས་ཆོག་གི་དུས་ཀྱི་དམ་ཡེ་གཉིས། སྟ་གོན་གྱི་དམ་ཚིག་པ་ལ་བཅུག་པས་གསུམ་བསྲེས། དེ་ནམ་མཁར་བཏེགས་པ་རྡུལ་ཚོན་གྱི་དམ་ཚིག་པ་ལ་བསྟིམས་པས་བཞི་བསྲེས། དེ་ལ་ཡེ་ཤེས་པ་བསྟིམས་པས་ལྔ་བསྲེས་སོ་གསུང་ཡང༌། དུས་འཁོར་གྱི་རྒྱུད་འགྲེལ་ལྟ་ཞོག ཆོ་ག་གཞན་དང་གོ་བསྟུན་ཤིན་ཏུ་མང་བའི་སཱ་དྷུ་པུ་ཏྲས་ཀྱང་དེ་ལྟར་བཤད་པ་མེད་པ་ལ་ཁོང་པ་རང་གི་ཕྱག་ལེན་ལྟར་ན་སྔར་གཞན་གྱིས་ཐ་སྙད་སྦྱར་བ་མེད་ཀྱང་དོན་ཚང་འདུག་པས་ཐ་སྙད་དེ་བཞིན་གསར་དུ་མཛད་ཀྱང་ཆོག་མོད། རང་ལུགས་རྒྱུད་འགྲེལ་དངོས་བསྟན་གྱི་ལུགས་ཡིན་པས་དེ་དག་མི་དགོས་ཏེ། ས་ཆོག་ལ་དཀྱིལ་འཁོར་ནམ་མཁར་འདེགས་པ་མེད་པའི་ཕྱིར་དང༌། ལྷ་ལྷག་གནས་གསོལ་བཏབ་ཀྱང་རང་བཞིན་གྱི་གནས་སུ་གཤེགས་པའི་ཕྱིར།སྐབས་འདིར་སྟ་གོན་གྱི་ལྷ་བསྲེ་མི་དགོས་ཤིང༌། དེའི་བྱ་བ་ཐམས་ཅད་ཡེ་ཤེས་པ་བསྲེས་པ་ཁོ་ནས་འགྲུབ་པའི་ཕྱིར་རོ། །དེས་ན་བསྲེ་བའི་ཐ་སྙད་གཞུང་ཁུངས་མ་ནས་མ་བཤད་པས་རང་ལུགས་ལ་བསྲེ་བའི་གྲངས་ཀ་མི་བགྲོང་པ་ཉིད་མཆོག་ཡིན་ནོ།། །།དྲུག་པ་མཆོད་གཏོར་གྱི་རིམ་པས་མཉེས་པར་བྱེད་པ་ལ་སྐབས་འདིར་ཉེར་མཁོ་མཆོད་པ་མདོར་བསྡུས་དཀྱུས་སུ་བསྒྲིགས་པའི་རིམ་པ་ལ། མཆོད་པ་བྱིན་རླབས་མགྲོན༡། སྤྱན་འདྲེན༢། ཆུ་བཞི༣། མཆོད་པ་བཅུ་གཉིས་པ་༤རིགས་གཉིས༥། ན་བཟའ༦། མཆོད་པ་བཅུ་གསུམ་པ༧། མཆོད་པ་བཅུ་པ༨། བཀྲ་ཤིས་རྟགས་བརྒྱད༩། རྒྱལ་སྲིད་སྣ་བདུན༡༠། འདོད་ཡོན་ལྔ༡༡། བཀྲ་ཤིས་
དགེ་བའི་རྫས་བརྒྱད༡༢། མཆོད་བུམ༡༣། དམ་རྫས་བཅུ༡༤། དམ་རྫས་སོ་བདུན༡༥། ན་མཿའི་མཆོད་པ༡༦། གསང་བ་རྗེས་ཆགས་ཀྱི་མཆོད་པ༡༧། སྣ་ཚོགས་ཐོར་བུའི་མཆོད་པ༡༨། དེ་ཁོ་ན་ཉིད་ཀྱི་མཆོད་པ༡༩། བསྟོད་པའི་མཆོད་པ༢༠། གཏོར་མའི་མཆོད་པ་༢༡རྣམས་སོ། །དེ་ལྟར་དོན་ཚན་ཉེར་གཅིག་ལས་གཞན་རྣམས་གོ་སླ་ལ། མཆོད་པ་བཅུ་གཉིས་ལ། དང་པོ་ཁམས་གསུམ་དབང་ཕྱུག་བཅོམ་ལྡན་འདས། །སོགས་ནི་དྲི་ཆབ་ལ་སོགས་པའི་མཆོད་པའི་ཡོ་བྱད་ཉིད་གཙོ་བོར་འབུལ་བ་ཡིན། གར་སྒེག་བཞད་འདོད་བཞི་ནི། སྐབས་འདིར་ཡང་ལྷ་མོ་ཡིན་མོད། ཕྱག་མཚན་རྒྱན་གོས་མལ་སྟན་སོགས་ཡོ་བྱད་ཀྱི་ཞོར་ལ་བྱུང་བའོ། །ཕྱི་མ་ཙ་སྡེ་ཐུང་རིང་ལས་སྐྱེས་པའི། །སོགས་ནི་གཟུངས་མ་ཉེར་སྤྱོད་མོ་བཅུ་གཉིས་ཡིན་པ། མེ་ཏོག་ལ་སོགས་པ་ཡོ་བྱད་རྣམས་ཞོར་ཐབས་སོ། །མཆོད་པ་བཅུ་གཉིས་ལ་ཕྱི་ནང་གསང་བ་གསུམ་ཚང་བར་བཞེད། མཆོད་པ་བཅུ་གསུམ་པ་དང༌། བཅུ་པ་ཕྱི་མཆོད་ཉིད་དང༌། དམ་རྫས་བཅུ་དང་སོ་བདུན་ནང་མཆོད་ཀྱི་ཁོངས་སུ་འདུ་བ་དང༌། ན་མཿའི་མཆོད་སྔགས་ནི། སྤྱིར་མཆོད་པ་སྤྱི་འགྲོ་ཡིན་ཡང་ལག་ལེན་ནང་མཆོད་ལ་གཙོ་བོར་སྦྱོར་བ་དང༌། གསང་བ་རྗེས་ཆགས་ནི་མདུན་བསྐྱེད་ལྷ་ཚོགས་རྣམས་ཀྱི་སྐུ་ལ་སོགས་ཏེ་སྤྱི་དང་འདྲའོ། །སྣ་ཚོགས་ཐོར་བུའི་སྐབས་སུ། ཉོན་མོངས་མ་ལུས་སོགས་ཕྱི་དང་འགྲེལ་པ་དང༌། དབང་བསྐུར་དངོས་གྲུབ་དོན་དུ་ནི། །སོགས་གསང་མཆོད་དང་འབྲེལ་བའོ། །དེ་ཁོ་ན་ཉིད་ཀྱི་མཆོད་པ་ནི། །ཀུནྡ་རབ་ཏུ་ཁྱབ་བྱེད་སོགས་ཏེ། །མཆོད་པ་རྣམས་ཀྱི་མཚོན་དོན་དག་པ་ངེས་དོན་སྒོམ་པ་སྟེ། འདིར་མཆོད་པའི་གཙོ་བོ་ཡིན་པའི་ཕྱིར། མཆོད་པ་བཅུ་
གཉིས་ཀྱི་ངེས་དོན་བསམ་ཞིང་མོས་པའོ། །དེ་ཡང་ཞུ་བདེ་འགྱུར་མེད་ཀྱི་མཐར་བྱང་སེམས་ཀུནྡས་ལུས་ལ་ཁྱབ་པ་ནི་དྲིའི་བྱུག་པ་དང༌། དམར་ཆས་ཀྱང་དེ་ལྟར་ཁྱབ་པ་ནི་མེ་ཏོག་དང༌། རྣམ་དག་ཉི་ཟླ་ནི། དེ་གཉིས་བསྡོམས་པ་སྟེ། དཀར་དམར་བཅིངས་པས་ཉི་ཟླའི་རྩ་རླུང་ཐིག་ལེ་དག་པའོ། །གཏུམ་མོ་འབར་བས་སེམས་སྤྲོས་བྲལ་དུ་ཤར་བ་ནི། རྣམ་རྟོག་བསྲེགས་པས་སྤོས་དང༌། གཞོམ་མེད་མི་ཤིགས་པ་ལ་རླུང་ཐིམ་པའི་གསལ་སྣང་ནི་སྒྲོན་མེ་དང༌། སྤྲོས་བྲལ་ཡེ་ཤེས་ཀྱི་སྣང་བ་ནི། དེ་གཉིས་བསྡོམས་པའི་དོན་དང༌། སྟོང་གཟུགས་ཀྱི་འདོད་ཡོན་ལྔ་ནི་ཟས་མཆོག་དང༌། ཞུ་བདེ་འགྱུར་མེད་དངོས་ནི་འབྲས་བུ་དང༌། དེ་གཉིས་བསྡོམས་པས་རྗེས་དྲན་དུ་སྟོང་གཟུགས་ཀྱིས་ཐིག་ལེ་འཆིང་བ་དང་མ་དག་པའི་ལུས་དབྱིངས་སུ་ཐིམ་པ་སྒེག་མོ་དང༌། ལས་རླུང་རྩ་བ་ནས་ཐིམ་པ་བཞད་མ་དང༌། དེ་གཉིས་བསྡོམས་པ་ཏིང་ངེ་འཛིན་གྱི་ཡན་ལག་ཏུ་ལས་རླུང་འགག་པའི་ས་བཅུ་གཉིས་པའི་མཐར་རྡོ་རྗེའི་སྐུ་འགྲུབ་པ་དང༌། གཞོམ་མེད་སྔགས་ཀྱི་སྒྲ་རོལ་མོ་དང༌། ལས་དང་ཡེ་ཤེས་ཀྱི་ཕྱག་ཆེན་གསུམ་གར་ཏེ། དེ་གཉིས་བསྡོམས་པས་བརྟུལ་ཞུགས་སྤྱོད་པའི་རོལ་རྩེད་དང་སྔགས་མཐུས་འགྲོ་དོན་བྱེད་པའོ། །གསུངས་སྒྲ་སྐད་རྣམ་པ་ཐམས་ཅད་པ་གླུ་དང༌། ཐུགས་དང་ཡེ་ཤེས་མི་འགྱུར་བའི་བདེ་བ་འདོད་པ་མོ་སྟེ། དེ་གཉིས་དང་གོང་གི་གར་མའི་ངེས་དོན་སྐུ་རྡོ་རྗེ་བསྡོམས་པས་འབྲས་བུ་རྡོ་རྗེ་བཞིའོ། །ད་ནི་རྒྱུད་འདི་ཉིད་ལས་འབྱུང་བའི་མཆོད་པ་ཐུན་མོང་མ་ཡིན་པའི་དབང་དུ་བྱས་ན། མཆོད་པ་དངོས་དང༌། བསྟོད་པ་དང༌། གཏོར་མ་འབུལ་བ་སྟེ་གསུམ་མོ།། །།དང་པོ་ནི། དེ་ནས་མཆོད་པ་
རྒྱ་ཆེར་བཤམ་ཞེས་པ་ལ་སོགས་པ་སྟེ། སླར་ཡང་མཆོད་པའི་ཡུལ་རྣམས་སྤྱན་དྲངས་ཏེ་མཆོད་པ་ཡིན་ལ། དེ་ཡང་དཀྱིལ་འཁོར་ཆེན་པོའི་ཕྱོགས་མཚམས་བརྒྱད་དུ་མཎྜལ་འདུས་བྱས་པ་རྣམས་དང༌། ཁྱད་པར་དུ་ཡང་ཤར་དུ་མཆོད་ཡོན་ཀྱི་སྣོད་བཟེད་ཞལ་དང༌། རྒྱལ་བའི་བུམ་པའི་མདུན་དུ་སྒྲུབ་ཐབས་ཀྱི་མཆོད་ཆོག་ཏུ་བཤད་པ་ལྟར་གྱི་མཎྜལ་འདུས་བྱས། ཆུ་བཞི་འབུལ་བའི་སྐབས་སུ་མཆོད་པའི་དུང་ཆོས་དྲི་བཟང་གི་ཆུས་གང་བས་བཟེད་ཞལ་དུ་འབུལ་བར་བྱེད་ལ། མེ་ཏོག་སོགས་རེ་རེ་བཞིན་ཡང་འགྲུབ་ན་ལྷ་སོ་སོའི་མཚན་དང་སྤེལ་ནས་འབུལ་བ་ཡིན་མོད་ཀྱང༌། ད་ལྟ་དེ་འགྲུབ་དཀའ་བའི་དབང་དུ་བྱས་ནས་རིན་པོ་ཆེའི་མཎྜལ་གཅིག་ལ་ནང་མཆོད་དྲི་བཟང་གིས་བྱུགས། ཚོམ་བུ་མཚོན་ཙམ་བཀོད་ནས་ཟངས་གཞོང་ལ་སོགས་པའི་ནང་དུ་བཅུག་ལ། རྒྱལ་བའི་བུམ་པ་དང་ཉེ་བར་བཞག དེའི་གཡས་གཡོན་མདུན་གསུམ་དུ་ཁྲུས་དང་གཙང་སྦྲ་བྱས་པའི་མི་གསུམ་བསྡད་དེ། མདུན་མས་ནང་མཆོད། གཡས་པས་དྲི་བཟང་གི་ཆུ་དང༌། མེ་ཏོག གཡོན་པས་མཐེབ་ཀྱུ་ལྟ་བུའི་བཤོས་གཙང་དང༌། མེ་ཏོག་བཏབ་པའི་འོ་ཆབ་སྟེ་མཆོད་པ་དེ་རྣམས་སྔགས་རེ་རེ་དང་བསྟུན་རེ་རེ་འབུལ། དེའི་དྲུང་དུ་མར་མེ་ཆེ་བ་ཞིག་སྤར། སྤོས་ཕོར་དུ་སྤོས་དུད་བཏུལ། ནང་མཆོད་འབུལ་མཁན་གྱི་རྒྱབ་ཏུ་གཅིག་གིས་འགྲེངས་ཏེ་ཌཱ་མ་རུ་དཀྲོལ། ན་མཿའི་མཆོད་སྔགས་ཆེན་མོས་དེ་རྣམས་དུས་གཅིག་ཏུ་འབུལ་བ་ཡིན། ཨརྒྷཾ་ཆེན་མོའི་སྔགས་བོད་སྐད་དུ་བསྒྱུར་ཏེ་ཕུལ་ཀྱང་ལེགས་སོ། །མཆོད་པའི་སྐབས་འདིར་རྒྱུད་འགྲེལ་ལས་རྫས་ཀྱི་དབྱེ་བ་དུ་མ་གསུངས་པའི་སྙིང་པོ་ནི། ཞི་བ་ལ་མཆོད་ཡོན་གྱི་སྣོད། ཤེལ་དཀར་པོ་ལས་གྲུབ་པ་
པདྨ་འདབ་བརྒྱད་ཀྱི་དབྱིབས་ཅན། རྒྱར་མཐོ་གང་ལྟེ་བ་སོར་བཞི་པའོ། །འདི་ནི་ལས་ཐམས་ཅད་པ་དང༌། མཆོག་སྒྲུབ་ཀྱི་དོན་དུའང་ཡིན་ནོ། །དེ་བཞིན་དུ་རྒྱས་པ་ལ་དངུལ། བསད་པ་ལ་ཐོད་པ། དབྱེ་བསྐྲད་ལ་ལྕགས། དབང་དགུག་ལ་གསེར་དང་ཟངས། རྨོངས་རེངས་ལ་ཤིང་དང་སའོ། །ཞི་རྒྱས་དྲི་ཞིམ་མེ་ཏོག་དཀར། །ཨ་ཀ་ར་སིཧླ་ག་བུར་སྦྲང༌། །ཀ་ར་སྦྱར་བ་བསིལ་བའི་སྤོས། །ཞི་རྒྱས་འོ་མ་ཞོ་སྦྱར་ཟན། །ཙནྡན་ལྡེ་གུའི་བྱུག་པ་དང༌། །རྩི་མར་མར་མེ་ནམ་བཟའ་དཀར། །མ་ཉམས་འབྲས་ནི་ས་ལིའོ། །བསད་བསྐྲད་དབྱེ་བའི་ལས་རྣམས་ལ། །མེ་ཏོག་རོ་ཚ་ཚེར་ཅན་ནག ཁྲག་བཅས་བཤང་བ་ཤ་ཡི་སྤོས། །བསད་ལ་མཆིན་པ་བསྐྲད་ལ་ ཤ་ཁྲག་དང་སོལ་བའི་བྱུག་པ་སྟེ། །ཞག་གི་མར་མེ་ནམ་བཟའ་ནག །ཀེ་ཙེ་སོགས་ཀྱི་མ་ཉམས་འབྲས། །དབང་དགུག་མེ་ཏོག་དམར་པོ་སྟེ། །གུ་གུལ་རྒྱ་སྐྱེགས་སྤོས་དཀར་དང༌། །ཀུན་དུར་ཐང་ཆུ་བུ་རམ་སྤོས། །དབང་མར་དགུག་ལ་འབྲུ་མར་ཟན། །གུར་གུམ་གི་ཧཾ་ཙན་དམར་དྲི། །ཏིལ་མར་སྣང་གསལ་ནམ་བཟའ་དམར། །མ་ཉམས་འབྲས་བུ་ཡུངས་ཀར་རོ། །རྨོངས་རེངས་མེ་ཏོག་སེར་པོ་སྟེ། །བུ་རམ་ཨ་རུ་ར་སྦྱར་བའི། །སྤོས་ནི་སྐ་བའི་སྤོས་ཞེས་བྱ། །རྨོངས་ལ་སྲན་ཆུང་མུད་ག་དང༌། །རེངས་ལ་ཙ་ན་ཀ་ཉ་ཤ །ཡུང་པ་བབ་བླའི་དྲི་ཆབ་དང༌། །ཟར་མ་བསེ་ཤིང་འབྲུ་མར་མེ། །སྲན་ཆུང་དང་ནི་ངན་འབྲུ་ཡི། །མ་ཉམས་འབྲས་ཏེ་ནམ་བཟའ་སེར། །ལས་ཐམས་ཅད་ལ་ནམ་བཟའ་ལྗང༌། །ཞི་རྒྱས་དབང་དགུག་ཐམས་ཅད་འབུལ། །ཞེས་སོ། །མཆོག་གི་དོན་དུ་ནི། ཞི་བ་དང་དྲག་པོའི་མཆོད་པ་ཀུན་ཡང་འབུལ་བ་ཡིན་
མོད་ཀྱི། སྤྱིར་བཏང་དབང་བསྐུར་རབ་གནས་ལ་མེ་ཏོག་ཚེར་མ་ཅན་དང༌། དྲི་མི་ཞིམ་པའི་སྤོས་དང་བྱུག་པ་ནི་མི་བྱ་སྟེ། འོན་ཀྱང་དམིགས་གསལ་ལས་དེ་དང་དེ་སྒོས་སུ་སྒྲུབ་པའི་ཕྱིར་དུ་ཡིན་ན་ནི་ངེས་པར་དགོས་སོ། །གཞན་ཡང་མཆོད་པའི་ཁྱད་པར་དབང་ལེ་གྱ་བཞི་པར། རིན་ཆེན་ཨིཎྜ་གསེར་གྱི་མེ་ཏོག་དང་ནི་རྣམ་མང་གོས་དང་དྲི་དང་སྤོས་དང་མར་མེ་དང༌། །དྲིལ་བུ་མེ་ལོང་བླ་བྲེ་དང་ནི་རྣམ་མང་འབྲས་བུ་བ་དན་སོགས་དང་གར་དང་རོལ་མོ་ཡིས། ཞེས་མཆོད་པ་བཅུ་གསུམ་དང༌། ཡང་བརྒྱ་ང་ལྔ་པར། ཆུ་དང་མཆོད་ཡོན་དྲི་དང་མེ་ཏོག་དང་ནི་འབྲས་བུ་མ་ཉམས་པ་དང་མར་མེ་དང༌། །ལྷ་བཤོས་དང་ནི་འདིར་ནི་ནམ་བཟར་འགྱུར་ཏེ་བཅུ་པོ་རྣམས་ནི་འཁོར་ལོ་འདུས་པ་དག་ལ་ ཡང༌། །ཞེས་ཕྱིའི་མཆོད་པ་བཅུ་དང༌། ཁུ་བ་གཅི་བ་རྐང་དང་བཤང་བ་དག་དང་ཤ་དང་མཆིན་པ་དག་དང་མཁྲིས་པ་ཁྲག་དང་ནི། །རྒྱུ་མ་ལྤགས་པ་རྣམས་ནི་རྣམ་པ་བཅུ་རུ་འགྱུར་ཏེ་རྒྱལ་པོ་འཁོར་ལོ་འདུས་པ་དག་ལ་ཡང༌། །ཞེས་ནང་གི་མཆོད་པ་བཅུ་གསུངས། ད་གསུམ་པ་སོགས་སུ། སོ་དང་སྐྲ་དང་ལྤགས་པ་ལ་སོགས་ཆུ་རྒྱུས་དང་བཅས་རུས་པ་སྙིང་དང་པདྨ་དང༌། །ཤིག་དང་བ་སྤུ་སྲིན་བུ་དང་ནི་རབ་མཆོག་མི་བདག་གློ་བ་རྒྱུ་མ་ཆུ་སོ་བད་ཀན་དང༌། །མཁྲིས་པ་ཆུ་དང་རྣག་དང་ཁྲག་དང་རྡུལ་དང་ཚིལ་བུ་མཆི་མ་མཆིལ་མ་རྣབས་དང་དྲི་ཆུ་དང༌། །ཆུ་སེར་ཞག་དང་བཤང་བ་རྣམས་ཏེ་སྣ་ཚོགས་ལུས་ལ་གནས་པ་ཁ་དོག་དང་ནི་དྲི་རྣམས་དང༌། །ལྕེ་དང་མིག་དང་རྣ་བ་སྣ་དང་རི་བོང་ཅན་བཅས་ཉིན་བྱེད་རྣམས་ཀྱིས་ལྷ་ལ་མཆོད་པ་བྱ། །ཞེས་ནང་གི་ཁམས་སུམ་ཅུ་སོ་དྲུག་དམ་རྫས་ནང་གི་མཆོད་པའི་དོན་དུ་གསུངས་སོ། །མཆོད་
པ་བཅུ་གཉིས་ནི་དཀྱུས་ཀྱི་མཆོད་པ་ཡིན་པས་ཡང་དང་ཡང་དུ་དགོས་ཤིང་གཞན་འདི་རྣམས་ཀྱང་དཀྱིལ་འཁོར་མཆོད་པའི་སྐབས་སུ་ངེས་པར་གལ་ཆེའོ།། །།གཉིས་པ་ནི་བསྟོད་པའི་སྐབས་འདིར་དང་པོ་མཚན་བརྗོད་ལས་འབྱུང་བ་འདུད་ཉི་ཤུས་བསྟོད་པ་ནི་མཆོག་སྦྱིན་རྡོ་རྗེ་མཆོག་ཁྱོད་འདུད། །སོགས་མེ་ལོང་ལྟ་བུའི་ཡེ་ཤེས་དང༌། སངས་རྒྱས་ཆགས་པ་སོགས་མཉམ་ཉིད་ཡེ་ཤེས་དང༌། སངས་རྒྱས་འཛུམ་པ་སོགས་སོར་རྟོག་ཡེ་ཤེས་དང༌། དངོས་མེད་ལས་བྱུང་སོགས་བྱ་སྒྲུབ་ཡེ་ཤེས་དང༌། སྒྱུ་འཕྲུལ་དྲ་བ་སོགས་ཆོས་དབྱིངས་ཡེ་ཤེས་ སོ། །དེ་ཡང་གང་ལ་དམིགས་ན། མཆོག་སྟེ་ཕུན་སུམ་ཚོགས་པ་ཐམས་ཅད་ཐོབ་པར་འགྱུར་བ་ནི། མཆོག་སྦྱིན་པ་སྟེ་རྣམ་པར་རྟོག་པ་དང་བྲལ་བའི་ཕྱིར། དེའི་ནང་ནས་ཀྱང་མཆོག་ཡིན་ལ། རང་བཞིན་འོད་གསལ་ཆོས་ཀྱི་དབྱིངས་ཀྱི་ངོ་བོ་ནམ་དུ་ཡང་གཞིག་ཏུ་མེད་པའི་ཕྱིར་རྡོ་རྗེའོ། །ཕྱིན་ཅི་མ་ལོག་པའི་ཡེ་ཤེས་ཡིན་པའི་ཕྱིར་ཡང་དག་པའི་མཐའོ། །སྟོང་ཉིད་སྙིང་པོ་ནི་རྣམ་པ་ཀུན་ལྡན་གྱི་སྟོང་ཉིད་རང་གིས་རིག་པའི་དོན་ནོ། །སྟོང་ཉིད་ལས་བྱུང་ཞེས་འབྱུང་བ་ལ་ཡང་དོན་དེ་ཉིད་དོ། །སངས་རྒྱས་བྱང་ཆུབ་ནི་མི་འགྱུར་བའི་བདེ་བ་ཡང་དག་པར་རྟོགས་པའོ།། །།གཉིས་པའི་དབང་དུ་བྱས་ནས་དོན་དམ་འདོད་ཆགས་ཆེན་པོའི་ངོ་བོ་ཉིད་ཀྱི་ཕྱིར་སངས་རྒྱས་ཆགས་པའོ། །སངས་རྒྱས་ཉིད་ཀྱང་ཡིན་ལ་འདོད་པར་བྱ་བའི་གནས་ལེགས་པ་ཐམས་ཅད་ཀྱི་མཐར་ཐུག་ཡིན་པའི་ཕྱིར་སངས་རྒྱས་འདོད་པའོ། །རྟག་ཏུ་དོན་དམ་པའི་བདེ་བ་ཆེན་པོས་དགྱེས་པའི་ཕྱིར་སངས་རྒྱས་དགྱེས་པའོ། །རྣམ་འཕྲུལ་སྣ་ཚོགས་པའི་རོལ་པ་དང་བཅས་
ཀྱང་བདེ་ཆེན་གཅིག་གི་ངོ་བོར་རོ་མཉམ་པའི་ཕྱིར་སངས་རྒྱས་རོལ་པའོ།། །།གསུམ་པའི་དབང་དུ་བྱས་ནས་བདེ་བ་ཆེན་པོའི་འོད་ཟེར་ཤིན་ཏུ་གསལ་པས་སངས་རྒྱས་འཛུམ་པའོ། །དོན་དམ་ལྷན་ཅིག་སྐྱེས་པའི་གཏུམ་མོའི་སྣང་བས་རྣམ་པར་མི་རྟོག་བཞིན་དུ་སྒྲ་སྐད་ཐམས་ཅད་པའི་ཆོས་ཀྱི་སྒྲ་འབྱུང་བའི་ཕྱིར་སངས་རྒྱས་བཞད་པའོ། །སྲོག་ལ་སོགས་པའི་རླུང་བཅུ་རྣམ་པར་དག་པའི་ཕྱིར་དང༌། རྡུལ་འགགས་པའི་གཞོམ་མེད་ཀྱི་སྒྲ་ནི་སངས་རྒྱས་གསུང་པའོ། །རང་བཞིན་སྤྲོས་བྲལ་གྱི་ཡེ་ཤེས་གཅིག་པུ་ཉིད་དུ་གྱུར་པའི་ཕྱིར་སངས་རྒྱས་ཐུགས་སོ།། །།བཞི་པའི་དབང་དུ་བྱས་ནས་དངོས་པོ་ཐམས་ཅད་ལས་ཡོངས་སུ་འདས་པའི་རྣམ་པ་ཀུན་ལྡན་ལས་རྟག་ཏུ་བྱུང་བའི་ཕྱིར་རྡོ་རྗེ་སེམས་དཔའ་ནི་དངོས་པོ་མེད་པ་ལས་བྱུང་བའོ། །རྟག་ཏུ་ཡེ་ཤེས་རྒྱུན་ཆད་པ་མེད་པའི་ཕྱིར་སངས་རྒྱས་འབྱུང་བའོ། །གདོད་མ་ནས་བྱུང་བའི་ཕྱིར་ནམ་མཁའ་ལས་བྱུང་བའོ། །རྡུལ་ཕྲ་རབ་ལས་འདས་པ་ཟུང་འཇུག་གི་ཡེ་ཤེས་རྒྱུ་རྐྱེན་སྤངས་པའི་ཡེ་ཤེས་ཉིད་གནས་པ་ཁོ་ནའི་ཕྱིར་ཡེ་ཤེས་ལས་བྱུང་བའོ།། །།ལྔ་པའི་དབང་དུ་བྱས་ནས་ངོ་བོ་རྣམ་པ་ཀུན་ལྡན་འཕྲིན་ལས་དུས་གསུམ་ཤེས་བྱ་ཀུན་ལ་ཁྱབ་པས་སྒྱུ་འཕྲུལ་དྲ་ བའོ། །འཁོར་འདས་ཀུན་གྱི་གཞི་ཡིན་པའི་ཕྱིར་ཐམས་ཅད་སྟོན་པས་སངས་རྒྱས་རོལ་སྟོན་ནོ། །ཤེས་བྱ་ཐམས་ཅད་ཀྱི་རང་བཞིན་ཡིན་པའི་ཕྱིར། ཐམས་ཅད་ཐམས་ཅད་དོ། །དེ་ཉིད་ཀུན་རྫོབ་རྣམ་ཤེས་ཀྱི་ཆོས་ལས་གདོད་ནས་གྲོལ་བའི་ཆོས་སྐུ་ཡིན་པའི་ཕྱིར་ཡེ་ཤེས་སྐུ་ཉིད་དོ། །དེ་དག་ཐམས་ཅད་དུ་ཕྱག་འཚལ་བ་དང་འདུད་པ་ནི། ཀུན་རྫོབ་ཏུ་དད་པས་ཕྱག་འཚལ་བ་དང་དོན་དམ་པར་ཕྱག་
འཚལ་བ་པོའི་སེམས་ཉིད་དང༌། ཕྱག་འཚལ་བའི་ཡུལ་གྱི་རང་བཞིན་དབྱེར་མེད་དུ་གདོད་ནས་གྲུབ་པ་ཡེ་ཤེས་ཀྱིས་མངོན་སུམ་དུ་རྟོགས་པ་སྟེ། ལས་དང་པོ་པས་མོས་པའི་སྒོ་ནས་སོ། །དེ་ནས་བར་འདིར་འདོན་པར་བྱ་རྒྱུ་དུས་ཀྱི་འཁོར་ལོ་བདེ་བ་ཆེ། །ཞེས་སོགས་བསྟོད་པ་ཐོར་བུ་རྣམས་ཀྱི་དོན་ནི་གོ་སླ་བས་རེ་ཞིག་ཞག་གོ། །།གཉིས་པ་བསྡུས་རྒྱུད་ལས་འབྱུང་བ། ཡེ་ཤེས་ལྔའི་བསྟོད་པར་གྲགས་པ། གང་ལ་ཐོག་མཐའ་དབུས་མེད་སོགས་ཏེ། འདི་ལ་གཉིས་སྟོང་ཆེན་ཡི་གེ་ལྔ་ལ་བསྟོད་པ་དང༌། འགྱུར་མེད་དྲུག་ལ་བསྟོད་པའོ། །དེ་ཡང་སྟོང་ཆེན་དང་པོར་ནམ་མཁའི་ཁམས་ཀྱི་དྭངས་མ་ནི། ཆོས་ཀྱི་དབྱིངས་ཉིད་ཀྱི་ཕྱིར། བདག་མེད་གཉིས་ཀྱི་སྒོ་ནས་བསྟོད་དེ། སྟོང་གཞི་ཆོས་ཀྱི་དབྱིངས་ཀྱི་ཡེ་ཤེས་གང་ལ་ཐོག་མ་དང་ཐ་མ་དང་དབུས་ཀྱི་དུས་མེད་ཏེ་ཡེ་ཤེས་དེ་ནི་དུས་ལས་གྲོལ་བ་དང༌། དུས་མེད་པའི་ཕྱིར་ཕྱོགས་ཆ་ལས་ཀྱང་གྲོལ་ལ། རྣམ་འགྱུར་གྱི་སྒོ་ནས་གནས་པ་དང༌། འཆི་བ་སྟེ་འཇིག་པ་དང༌། སྲིད་པ་སྟེ་སྐྱེ་བ་མེད་ལ། རྣམ་པའི་སྒོ་ནས་སྒྲ་དང་དྲི་དང་རོ་དང་རེག་བྱ་དང་གཟུགས་ཏེ་གཟུང་པ་མེད་ཅིང༌། དེ་མེད་པས་འཛིན་པ་སེམས་ཀྱང་མེད་དོ། །དེ་ལྟར་ན་དུས་དང་ཕྱོགས་དང་རྣམ་འགྱུར་དང་གཟུང་འཛིན་བྲལ་བ་དེ་ནི་ཆོས་ཀྱི་བདག་མེད་གྱི་དབང་དུ་མཛད་པའོ། །གང་ཟག་གི་ལོངས་སྤྱད་པར་བྱ་རྒྱུ་རང་བཞིན་ཉི་ཤུ་རྩ་བཞི་ཡང་མེད་ལ། ཉེར་ལྔ་པ་ཚོར་བ་པོ་དང༌། མྱོང་བ་པོ་དང་ཤེས་པ་པོར་གྱུར་པའི་སྐྱེས་བུ་བདག་ཀྱང་མེད་ཅིང༌། འཆིང་བས་བཅིངས་པ་དང༌། ལམ་གྱི་གྲོལ་རྒྱུའི་བདག་ཀྱང་མ་གྲུབ་ལ། བདེ་
སྡུག་དང་བཅིངས་གྲོལ་དང༌། སྲིད་པ་སྐྱེ་འཇིག་བྱེད་པའི་བྱེད་པ་པོའི་སྐྱེས་བུ་ཡང་མེད་ལ། ས་བོན་བག་ཆགས་རང་བཞིན་གྱིས་མ་གྲུབ་པས་རྒྱུ་ས་བོན་གྱི་ཚུལ་དུ་གནས་པའི་བདག་ཀྱང་མེད་དེ། ཀུན་གཞི་རྣམ་ཤེས་གདོད་ནས་མ་གྲུབ་པའི་ཕྱིར་ རོ། །འདིར་ནི་ཀུན་གཞི་རྣམ་ཤེས་བདག་ཏུ་འདོགས་པའི་གཞི་ཡིན་ཡང་དེ་ལ་བདག་མེད་པའོ། །སྐྱེས་བུ་འདི་ལྟ་བུ་ཞིག་བྱུང་ངོ༌། །ཡོད་དོ་འབྱུང་བར་འགྱུར་ རོ། །བདག་སྔོན་ནི་ལྷར་གྱུར་ལ་སྔོན་ལྷར་གྱུར་པ་དེ་ནི་ད་ལྟའི་མི་ཡིན་ཞིང༌། མི་བདག་ནི་མ་འོངས་པ་ན་དམྱལ་བའོ་ཞེས་པ་ལྟ་བུ་དུས་གསུམ་དུ་གསལ་ཞིང་ངེས་པར་འགྲོ་བ་མེད་དེ། ཡང་ན་རྒྱུའི་དུས་ན་ས་བོན་ངོ་བོས་སྟོངས་པ་དང༌། འབྲས་བུའི་དུས་ན་གསལ་བ་མངོན་གྱུར་ངོ་བོས་མ་གྲུབ་པའོ། །མཐའ་དག་སྲིད་པའི་གནས་འདིར་ཕུང་པོའི་རྒྱུན་ཙམ་ལས་གཞན་པའི་སྡུག་བསྔལ་དང་བདེ་བ་མྱོང་བ་པོ་ཉིད་ཀྱི་རང་བཞིན་ཡང་གྲུབ་པ་མེད་དོ། །སྟོང་གཞི་དོན་དམ་པའི་མྱ་ངན་ལས་འདས་པ་ཆེན་པོ་དེ་ནི་ཡོད་མེད་ཡིན་མིན་ཆེ་ཆུང་མཐའ་དབུས་སོགས་སྤྲོས་པའི་མཚན་མ་མེད་ཅིང༌། ཡུལ་དུས་རྒྱུ་རྐྱེན་བྲལ་ཕྲད་ཀྱི་སྒོ་ནས་རྣམ་པར་འགྱུར་བ་བསྐྱེད་པའི་བྱེད་པ་དང་རྣམ་པར་བྲལ་ལ། ཁམས་ལྔའི་ཡོན་ཏན་དང་སྒྲ་གཅན་ཉི་ཟླ་སྟེ་མུན་རྡུལ་སྙིང་སྟོབས་གསུམ་གྱི་ཡོན་ཏན་མེད་པ་སྟེ། སྤྲོས་མེད་འགྱུར་མེད་སྒྲིབ་པ་མེད་པའི་ཡེ་ཤེས་སོ། །འདིར་ཁ་ཅིག་ཚིགས་བཅད་འདི་གྲངས་ཅན་འགོག་པ་ཡིན་ཟེར་ཏེ། བདག་བཀག་པས་ཤུགས་ལ་ཁེགས་པ་ཙམ་ནི་ཡིན་དུ་རུང་ལ། གཞན་དུ་ན་ཆོས་དབྱིངས་ཡེ་ཤེས་མཚོན་པ་ལ་གྲངས་ཅན་ཙམ་བཀག་པས་དགག་བྱ་ཤིན་ཏུ་རྒྱ་ཆུངས་ནས་མི་
ཕན་པའི་ཕྱིར་དང༌། སྔགས་ཀྱི་དམ་ཚིག་གི་སྤྱོད་པ་ཅན་དག་འདོད་པའི་ལྷ་ལ་བསྟོད་པའི་སྐབས་སུ་ཡང་གྲངས་ཅན་ལ་སྙིང་ན་སྐེ་རེ་བ་ཡོད་པ་ལྟར་འཆད་པ་སྐབས་སུ་མ་བབ་ཅིང༌། འོས་མ་ཡིན་པའི་ཕྱིར་མི་འཐད་དོ། །ཡེ་ཤེས་གཉིས་པ་ནི། རླུང་ཁམས་ཀྱི་དྭངས་མ་སྟོང་པ་ཆེན་པོ་སྟེ། བྱ་བ་སྒྲུབ་པའི་ཡེ་ཤེས་དེ་ནི་དུས་ཀྱི་འཁོར་ལོ་དང་སྣ་ཚོགས་ཡུམ་ལ་སོགས་པ་རྡོ་རྗེ་དཀྱིལ་འཁོར་གྱི་ལྷ་ཚོགས་རྣམས་དང༌། མཆོག་གི་དང་པོའི་སྐྱེས་བུ་ཡིན་ལ། སྤྲོས་པ་མེད་པའི་ཡེ་ཤེས་དཔེ་དང་རྟགས་ཀྱིས་མཚོན་དུ་མེད་དེ། ངོ་བོ་བརྗོད་བྲལ་བློས་ཡུལ་ལས་འདས་པ་དེ་ནི་ནམ་མཁའ་གཟུགས་ཅན་ཀུན་ལ་ཁྱབ་པ་ལྟར་ཤེས་བྱ་ཀུན་ཏུ་འགྲོ་ཡང་གཞན་ལ་མ་བལྟོས་པ་རྟག་པར་ཐེར་ཟུག་ཏུ་གནས་ཤིང༌། སྤྲོས་མེད་ཀྱི་ཡེ་ཤེས་ཁོ་ནས་ཀུན་རྫོབ་དང་དོན་དམ་པའི་སྒྲ་སྐད་ཐམས་ཅད་མཁྱེན་པའི་ཕྱིར། སྙན་རྣམ་པ་ཐམས་ཅད་པའམ་ཀུན་ནས་སྙན་དང༌། དེ་བཞིན་དུ་ཤངས་དང་ཞལ་དང་སྤྱན་དང་དབུ་དང་ཕྱག་དང་ཞབས་རྣམ་པ་ཐམས་ཅད་པའོ། །འབྱུང་པོ་སྣོད་བཅུད་ཐམས་ཅད་ཀྱི་གནས་ལུགས་མཐར་ཐུག་པ་སྟེ། འབྱུང་པོ་ཆོས་ཐམས་ཅད་ཀྱི་མགོན་ཏེ་ཆོས་ཉིད་ཀྱང་ཡིན་ལ། མཆོག་དོན་དམ་གྱི་ཕུང་ཁམས་དབང་ཡུལ་སྣོད་བཅུད་སྲིད་པ་གསུམ་གྱི་ངོ་བོ་མཚན་ཉིད་འཛིན་ཞིང༌། འཁོར་འདས་ཀྱི་རྒྱུ་ཀུན་གཞི་རྣམ་ཤེས་ཀྱིས་བསྡུས་པའི་ཆོས་རྣམས་དག་གི་ཡང་རྒྱུ་སྟེ། གཞི་རྟེན་དུ་གྱུར་པ་ནང་གི་རིག་པ་སྟེ་མི་འགྱུར་བའི་བདེ་བ་ཆེན་པོ་སོགས་པའི་སྒྲས་རླུང་འགགས་པ་དང་རྣམ་པ་ཀུན་ལྡན་ཡང་སྟེ། ལམ་གྱི་རྣལ་འབྱོར་དེ་དག་གིས་རྟོགས་པར་བྱ་བའི་ཡུལ་གནས་ལུགས་མཆོག་གི་བདེ་བའི་གོ་འཕང་དུས་ཀྱི་
འཁོར་ལོ་ལ་ཕྱག་འཚལ་ལོ། །ཁ་ཅིག་དུས་དང་སྣ་ཚོགས་ཞེས་པ་འདི་ལ་མི་འགྱུར་བའི་དུས་དང༌། འབྱུང་བཞི་དག་པའི་སྣ་ཚོགས་རྡོ་རྗེ་ཞེས་འཆད་ཀྱང་ནུས་པ་ཆུང་ལ། ལམ་གྱི་སྐབས་སུ་དཔེ་མེད་རྩ་དབུ་མ་དང༌། རྡོ་རྗེ་རླུང་འཛིན་པ་དང། སྙན་སོགས་ཡན་ལག་གི་རླུང་གི་རྡོར་བཟླས་སོ། །ཞེས་ཟེར་བ་ཡང་སྐབས་དང་མ་འབྱོར་བས་དགོས་མེད་ཀྱི་སྤྲོས་པ་ཙམ་མོ།། །།སྟོང་པ་གསུམ་པ་མེ་ཁམས་ཀྱི་དྭངས་མ་ནི། དོན་དམ་མཉམ་ཉིད་ཀྱི་ཡེ་ཤེས་གང་དེ་ཇི་ལྟ་ཇི་སྙེད་རྟོགས་པའི་ཐུགས་མཁྱེན་པ་དང༌། སྣང་སྟོང་གཉིས་སུ་མེད་པའི་སྐུ་སྣ་ཚོགས་པ་སྤྲོ་པར་བྱེད་ཅིང༌། ཁྱད་གཞི་ནུས་མ་སྟེ་ཕྱག་རྒྱ་ཆེན་མོ་ལྷ་མོའི་གཟུགས་ལ་ཁྱད་ཆོས་ཁམས་གསུམ་གྱི་གཟུགས་ཅན་གློག་གི་མེ་དང་མཚུངས་པ་སྟེ། གཏུམ་མོའི་འབར་སྣང་འཕོ་བ་བཅུ་གཉིས་དང་རྟེན་འབྲེལ་བཅུ་གཉིས་སྒྲིབ་བྲལ་དུ་གྱུར་པས། ཤེས་རབ་བདེན་དོན་གྱི་ཡེ་ཤེས་བཅུ་གཉིས་ཉི་མ་བཅུ་གཉིས་ལྟ་བུ་དག་གི་གཟི་བརྗིད་ཅན་ཡེ་ཤེས་རྡོ་རྗེ་བདེ་བ་ཆེན་པོ་ལ་ཀུན་རྫོབ་ལམ་གྱི་དུས་སུ་བསྐྱེད་འཕེལ་བརྟན་གསུམ་གྱི་བྱ་བ་བྱེད་ནུས་པའི་སྣང་ བ་སྟེ་འོད་ཟེར་དང་ལྡན་པ་ཅན་མཆོག་གི་གོ་འཕང་མི་འགྱུར་བའི་གནས་ལུགས་སུ་བགྲོད་པར་བྱེད་པ་སྟེ། དབྱེར་མེད་དུ་འདྲེས་ནས་གནས་པ་རྣམ་པར་བཅད་པའི་བརྡས་བསྟན་པ་དེ་ལ་ཕྱག་འཚལ་ལོ། །འདིར་ཁ་ཅིག་སྲོག་ཐུར་འགགས་པས་གློག་དང༌། ཉི་མ་ཚིགས་ཆེན་བཅུ་གཉིས་ཞེས་འཆད་པ་ཡོད་དེ། ལམ་ལ་སྦྱར་བར་སོང་བས་འབྲས་བུའི་སྐབས་འདིར་སྟོང་ཚུལ་འགངས་ཆུང་ངོ༌།། །།ཡེ་ཤེས་བཞི་པ་ཆུ་ཁམས་ཀྱི་དྭངས་མ་ནི། སོ་སོར་ཀུན་ཏུ་རྟོག་པའི་ཡེ་ཤེས་གང་ཞིག་དཀར་
པོ་འབར་བ་དེ་ནི་ཁམས་གསུམ་ཐམས་ཅད་ཀྱི་ཆོས་ཉིད་བདེ་བ་ཆེན་པོ་ཡིན་པས་འཇིག་རྟེན་གསུམ་གྱི་མགོན་པོ་སྟེ། འཁོར་འདས་ཀྱི་བདེ་བ་ཐམས་ཅད་དེས་སྩོལ་བའི་ཕྱིར་རོ། །དེའི་མཐུ་ལས་དེའི་གཟུགས་བརྙན་ལྟ་བུ་ཐིག་ལེ་གང་ཞིག་འཁོར་བ་དང་ལམ་གྱི་གནས་སྐབས་སུ་འཇིག་རྟེན་ཀུན་གྱི་སྤྱི་བོར་ཡང་དག་པར་གནས་ནས་དྲན་པ་དང་བློ་གྲོས་དང་རྟོག་དཔྱོད་མཐའ་དག་བསྐྱེད་ལ། རི་བོང་འཛིན་པ་སྟེ་ཐིག་ལེ་ལས་རྩ་ནང་ཕན་ཚུན་ཏུ་གཡོ་ཞིང་འཛག་པས་སྲིད་པའི་བདེ་བ་བསྐྱེད་པ་དང༌། ལམ་དུས་སུ་ཧཾ་ཡིག་ཞུ་བའི་བདུད་རྩི་འཆི་བའི་འཇིགས་པ་སེལ་ཞིང་སྲིད་པའི་འཇིགས་པ་འཇོམས་པར་བྱེད་པའི་ལྷན་སྐྱེས་བསྐྱེད་པ་སྟེ། འཁོར་འདས་ཀྱི་དེ་དག་འབྱུང་བའི་གཞི་ཐིག་ལེའི་གཟུགས་ཀྱིས་མཚོན་པ་དེ་ལ་ཕྱག་འཚལ་ལོ།། སྟོང་ཆེན་ལྔ་པ་ས་ཁམས་ཀྱི་དྭངས་མའི་ཡེ་ཤེས་ནི། མེ་ལོང་ལྟ་བུའི་ཡེ་ཤེས་ཏེ། དོན་དམ་སེམས་ཉིད་ཀྱི་སྣང་བ་ཙམ་ཡིན་ལ། ཡིད་སྐྱོབ་ཀྱི་དོན་ནམ་གང་ཅི་ཡང་རུང་བ་ཕྱོགས་བཅུ་དུས་གསུམ་ན་སྤྱོད་པའི་འཇིག་རྟེན་འཇིག་རྟེན་འདས་པའི་སྔགས་ཐམས་ཅད་ཀྱི་ངོ་བོ་དང༌། དོན་དམ་གྱི་ལྷ་སྐུ་མཐའ་ཡས་པས་ཡོངས་སུ་བསྐོར་བ་སྟེ། ལྷ་སྣང་དུ་གདོད་ནས་ཤར་བ་དང༌། སྡུག་བསྔལ་དང་བདེ་བའི་རང་བཞིན་ནི་རྣམ་པ་སྣ་ཚོགས་པར་སྣང་བ་སྟོན་པ་སྟེ། དེ་ནི་རང་བཞིན་རྟག་ཏུ་བཟང་བ་ཁོ་ན་དང་བདེ་བ་ཁོ་ན་ཡིན་ཡང༌། སེམས་ཅན་རྣམས་ཉིད་ལ་ཇི་ལྟར་སྣང་ཞིང་མྱོང་བ་ནི། རང་གིས་བྱས་པའི་ལས་དང་མཐུན་པར་ཉམས་སུ་མྱོང་བ་སྟེ། དམ་པ་རྣམས་ལ་ཞི་བ་སྟེ་བདེ་བའི་གཟུགས་དང༌། མི་བཟད་པ་སྟེ་ངན་པ་མ་རུངས་པ་རྣམས་ལ་མི་བཟད་
པའི་སྡུག་བསྔལ་དུ་སྣང་བའོ། །དེས་ན་འདིས་ནི་སེམས་ཅན་རྣམས་ཀྱི་ལས་དང་བདེ་སྡུག་མྱོང་བ་ཐམས་ཅད་ཀྱི་གཞི་དང་གནས་ཚུལ་དུ་བསྟན་པ་སྟེ། གང་ཟག་གང་གིས་ལས་གང་དང་གང་རབ་ཏུ་བྱས་པ་དེ་དང་འཚམ་པར་རང་གི་སེམས་ལ་ཆོ་ག་སྟེ་དུས་དང་རྒྱུ་རྐྱེན་ཚོགས་པ་ལས་ཇི་ལྟར་བྱས་པ་དེ་བཞིན་དུ་ལས་དེ་ཡི་འབྲས་བུ་དེ་བསྐྱེད་པའི་གཞིར་གྱུར་པ་དེ་ཉིད་ཀྱི་ཕྱིར་གཙོ་བོར་གྱུར་པས་འཇིག་རྟེན་གྱི་དབང་པོ་དང༌། སྣ་ཚོགས་པའི་འཇིག་རྟེན་ལ་འཁོར་བ་སྲིད་གསུམ་གྱི་བསྐྱེད་གཞི་དང༌། གཞན་མཆོག་གི་སྲིད་པ་གསུམ་སྐྱེད་པར་མཛད་པ་པོ་རྡོ་རྗེ་སེམས་དཔའ་ལ་ཡང་ཕྱག་འཚལ་ ལོ། །དེ་ལྟར་ལྔ་ལས་དང་པོ་ནི་སྤྲོས་པ་བྲལ་ཞིང་དྲི་མ་དག་པའི་ཆ་ནས་དང༌། གཉིས་པ་ནི་སྟོང་པའི་ཆ་ནས་བྱ་བ་མི་བྱེད་པའི་ཕྱིར་ཡེ་ཤེས་ཀྱི་སྣང་བ་ཐམས་ཅད་ཡོད་པའི་སྒོ་ནས་དང༌། གསུམ་པ་གསལ་བའི་སྒོ་ནས་དང༌། བཞི་པ་བདེ་བའི་སྒོ་ནས་དང༌། ལྔ་པ་དག་པ་ལྷ་སྔགས་ཀྱི་འཕྲིན་ལས་དང་མ་དག་པ་བདེ་སྡུག་གི་རྣམ་པ་ཀུན་ལ་འཇུག་པའི་སྒོ་ནས་བསྟོད་པའོ།། གཉིས་པ་འགྱུར་མེད་དྲུག་ལ་བསྟོད་པ་ནི། ཡེ་ཤེས་ལྔ་པོ་དེ་དང་ངོ་བོ་གཅིག་ཀྱང་རྟེན་གྱི་ལྡོག་ཆ་འཛིན་པའི་སྒོ་ནས་དྲུག་སྟེ། དེ་ཡང་ཀུན་རྫོབ་ཀྱི་གཅིག་དང་དུ་མ་ལས་འདས་ཤིང༌། རང་སྣང་ལ་ཆོས་ཉིད་དུ་རོ་གཅིག་པ་དང༌། མཉམ་པ་ཤེས་རབ་དང་མི་མཉམ་པ་ཐབས་གཉིས་ཟུང་འཇུག་ཏུ་མཉམ་པ་ཉིད་དེ། སྤྱིར་གཡས་གཡོན་མདུན་རྒྱབ་སྟེང་འོག་སོགས་རྣམ་པ་ཀུན་ལྡན་དང་ཁ་དོག་ཀུན་ལྡན་ཡིན་ལ། བརྡ་ཐབས་ཀྱི་དབང་དུ་བྱས་ན། གཡས་དམར་པོ་འབར་བ། གཡོན་དཀར་པོ་འབར་བ། མདུན་ནག་པོ་འབར་བ། རྒྱབ་སེར་པོ་འབར་བ། སྟེང་ལྗང་ཁུ་འབར་བ། འོག་སྔོན་
པོ་འབར་བའོ། །གཞན་ཟུངས་བདུན་སོགས་མཐའ་ཡས་པ་དེ་དག་ཀྱང་མི་འགྱུར་བའི་ཐིག་ལེ་ཁ་དོག་ཆེན་པོ་གཅིག་གི་གཟུགས་སུ་གནས་ལ། ཐུང་ངུ་ལུས་སྙིང་སྟོབས་དང༌། རིང་པོ་ངག་རྡུལ་དང༌། ཤིན་ཏུ་རིང་པོ་ཡིད་མུན་པ་སྟེ་སྒྲིབ་པའི་ཡོན་ཏན་རྣམས་མེད་ཅིང༌། ཡང་དག་པའི་ཡོན་ཏན་སྟོབས་བཅུ་སོགས་དང་གདོད་ནས་མི་འབྲལ་པའི་ཚུལ་དུ་བཅས་པ། བུད་མེད་དང་སྐྱེས་པ་ལ་སོགས་པ་དོན་དམ་སྲིད་གསུམ་སྣ་ཚོགས་སུ་སྣང་ཡང་སྐྱེས་པ་དང་བུད་མེད་ལ་སོགས་པའི་དངོས་པོ་མ་ཡིན་པ། གང་ཞིག་མི་འགྱུར་བའི་བདེ་བའི་རྟེན་ནམ། རྣམ་པ་མཐའ་ཡས་ཀུན་གྱི་རྟེན་གཅིག་པུ་པ། བྷ་ག་སྟེང་ཨེ་ཡིག་ཆོས་འབྱུང་བཟང་མོ་གཞན་དོན་དམ་རྣམ་པ་ཀུན་ལྡན་མཆོག་གི་བྷ་ག་ཁྱོད་ལ་འདུད་དེ། སླར་ཡང་ཁྱོད་ལ་འདུད་ཅེས་ཡང་ཡང་དུ་འདུད་པའི་སྒྲ་སྦྱར་བའོ། །འདི་དག་གི་དོན་སྐབས་འདིར་འབྲུ་གནོན་ཙམ་སྨོས་ཀྱི་རྒྱས་པར་གཞན་དུ་ཤེས་དགོས་སོ།། གཏོར་མའི་ཆོ་ག་ནི། སྤྱིར་རྒྱུད་འགྲེལ་ཉིད་ལས། ཡུལ་བདག་གྲོང་བདག་སྲུང་མ་དྲུག་ཅུ་མཁའ་འགྲོ་མ་དང༌། རྣལ་འབྱོར་མ་རྣམས་ཀྱི་གཏོར་མ་གསུངས་པ། དེ་དག་སོ་སོ་གནས་སྐབས་ཐ་དད་དུ་གསལ་བར་བྱུང་ལ། དཀྱིལ་འཁོར་སྒྲུབ་མཆོད་ཀྱི་སྐབས་ཇི་ལྟར་འབུལ་བའི་ཚུལ་ནི། འགྲེལ་ཆེན་ལས། རྡུལ་ཚོན་གྱི་དཀྱིལ་འཁོར་ལ་སྔར་གསུངས་པའི་ཆོ་གའི་མཚན་མ་རྣམས་བཀོད་ཅིང༌། དུར་ཁྲོད་ཀྱི་སར་དཀྱིལ་འཁོར་ལ་བུམ་པ་ལ་སོགས་པ་ཡང་དག་པར་བཞག་སྟེ་རབ་ཏུ་གནས་པ་བྱས་ལ། དྲི་ལ་སོགས་པ་རྣམས་ཀྱིས་འདོད་པའི་ལྷ་རྣམས་ལ་མཆོད་པ་བྱས་ནས་ཞིང་སྐྱོང་ལ་སོགས་པ་རྣམས་ལ་གཏོར་མ་སྦྱིན་ཏེ། ཞེས་
གསུངས་ཏེ། འདིར་ཞིང་སྐྱོང་ནི་ཡུལ་བདག་གྲོང་བདག་གོ །དེ་ཐོག་མར་སྨོས་པ་ཉིད་ཀྱིས་སོགས་ཁོངས་ནས་དེ་བས་ཆུང་བ་རྣམས་འདོན་ཡང་ཆེ་བའི་གསལ་ཁ་མི་འབྱུང་མོད། རྡོ་རྗེ་སྙིང་འགྲེལ་ལས། ཨིན་ད་ཛ་མ་སོགས་ཕྱོགས་སྐྱོང་ལའང་སྦྱིན་པར་གསུངས། རྒྱུད་དང་འགྲེལ་བ་འདིར་ཁྲོ་བོ་བཅུ་ལས་གཞན་པའི་འདས་གཏོར་མ་གསུངས་ཀྱང༌། ཕྱག་རྡོར་སྟོད་འགྲེལ་ལས་གསུངས་པས། སེམས་འགྲེལ་རྣམས་ཕན་ཚུན་གཅིག་གིས་གཅིག་ཁ་འགེངས་འོས་ཤིང་དགོངས་པ་གཅིག་པའི་ཕྱིར། སྤྱིར་དུས་འཁོར་ལ་ཡང་འདས་གཏོར་ཕུལ་ན་ལེགས་ སོ། །འོན་ཀྱང་སྐབས་འདིར་ཕྱོགས་སྐྱོང་གིས་མཚོན་པའི་སྲུང་མ་དྲུག་ཅུ་དང༌། མཁའ་འགྲོ་མ་རྣམས་དང༌། ཡུལ་གྲོང་གི་བདག་པོ་རྣམས་ལ་འབུལ་ཏེ་ཞོར་བྱུང་དུ་བགེགས་དང་འབྱུང་པོ་སྤྱི་ལའང་སྦྱིན་ནོ། །དེས་ན་དེང་སང་ཕྱི་རོལ་གཏོར་མར་གྲགས་པ་དེ་ཡིན་ཏེ། སྐབས་འདིར་བོད་ཀྱི་རྭ་བ་དང་ཤོང་པ་རྣམས་ནང་དང་ཕྱི་རོལ་གཉིས་ཀར་དུ་གཏོར་མ་མཛད། ནང་དུ་མཁའ་འགྲོ་མ་དང༌། ཁྲོ་བོ་ཙམ་མམ། སྲུང་མ་དྲུག་ཅུའི་གཏོར་མ་འབུལ། ཕྱི་རུ་ཞིང་སྐྱོང་སོགས་ཀྱི་གཏོར་མ་འབུལ་བ་དང༌། གཞན་ཡང་ལུགས་སོ་སོ་པ་རྣམས་ལ་ཕྱི་ནང་གི་དབྱེ་བའི་ལག་ལེན་མི་འདྲ་ཙམ་སྣ་ཚོགས་ཡོད་ཀྱང༌། འདིར་ཀུན་མཁྱེན་ཆོས་ཀྱི་རྒྱལ་པོའི་ཞལ་སྔ་ནས་འདི་སྐད་ཅེས་བཀའ་སྩལ་ཏེ། །འདིར་དཀྱིལ་འཁོར་ལྟ་བར་མི་དབང་བ་ལ། ཕྱི་རོལ་པའི་གཏོར་མ་ཞེས་པ་ནི། བོད་འགའ་ཞིག་གི་འཁྲུལ་པ་སྟེ། འཕགས་པ་རྣམས་ཀྱིས་གསུངས་པ་མེད་དོ། །འོན་ཀྱང་དཀྱིལ་འཁོར་གྱི་ཆོ་ག་ཐམས་ཅད་ལ་ཐུན་མཚམས་བཞིར་སློབ་དཔོན་གྱིས་
གཏོར་མ་བྱིན་ཏེ། དེ་ནས་གཤེགས་སུ་གསོལ་བར་བྱ་སྟེ། ཞེས་གསུངས་ཏེ། དེའི་ཆོ་ག་ནི་བཤད་ཟིན་པ་ཉིད་དོ།། །།གཞུང་གཞན་ལས་ཀྱང༌། ཡོད་ན་སྒྲུབ་པའི་གྲོགས་པོ་དཀྱིལ་འཁོར་དུ་བཞག་ནས་རང་ཉིད་ཕྱིར་བྱུང་སྟེ། འདོད་པའི་ལྷ་དང་དབང་པོ་ལ་སོགས་པ་རྣམས་ལ་གཏོར་མ་འབུལ་བར་གསུངས་པ་ནི། དཀྱིལ་འཁོར་ལྟ་བར་མི་དབང་བའི་རྒྱུ་མཚན་གྱིས་མ་ཡིན་ཏེ། གཏོར་མ་རྣམས་ཕྱོགས་སོ་སོར་གཤེགས་སུ་གསོལ་བ་ལ་སོགས་པའི་རྒྱུ་མཚན་གཞན་གྱིས་ཡིན་ལ། དེ་ནི་འདིར་ཡང་འདོད་པ་ཉིད་དོ། །ཞེས་གསུངས་ཏེ། དེ་སྐད་གསུངས་པའི་དོན་ནི། རྒྱུད་སྡེ་གཞན་གྱི་ལུགས་ཀྱི་དཀྱིལ་ཆོག་ལ་ཕྱི་རོལ་པ་ཡོད། དུས་འཁོར་ལུགས་ལ་མེད་ཅེས་པ་མ་ཡིན་པར། སྐབས་འདིར་དུས་འཁོར་དང་གཞན་ལ་ཁྱད་མེད་དེ། གཏོར་མ་རྣམས་ཕྱོགས་ཕྱོགས་སུ་གཤེགས་དགོས་ཤིང༌། དེའི་ལག་ལེན་བདེ་བའི་ཕྱིར། དཀྱིལ་འཁོར་ཁང་པའི་ཕྱི་རོལ་ཏུ་མཆོད་གཏོར་བཤམས་ཏེ། འབུལ་བ་ལ་གཏོར་ཆོག་གཏོང་སའི་དབང་གིས་ཕྱི་རོལ་པའི་གཏོར་མ་ཞེས་ཟེར་གྱི། དམ་ཚིག་ཅན་རྣམས་ལ་ནང་དུ་གཏོར་མ་སྟེར་ལ། དམ་ཚིག་མེད་པས་དཀྱིལ་འཁོར་ལྟ་བར་མི་དབང་བ་རྣམས་ལ་དཀྱིལ་འཁོར་ཁང་པའི་ཕྱི་རོལ་ཏུ་གཏོར་མ་སྟེར་དགོས་པའི་ཕྱིར། ཕྱི་རོལ་གཏོར་མ་ཞེས་འཆད་པ་ནི་འཁྲུལ་པའོ་ཞེས་པའི་དོན་ཡིན་ལ། ཡང་དཀྱིལ་འཁོར་གྱི་ཕྱི་བཞིན་འབྲངས་པས་ཕྱོགས་སྐྱོང་སོགས་ཕྱི་རོལ་ན་འཁོད་པ་ལ་འབུལ་ཞེས་ཡོ་ག་པ་ཀུན་སྙིང་གིས་བཤད་པ་དང༌། ཛ་ཡ་སེ་ནས་ཀྱང༌། གང་དུ་བཅོམ་ལྡན་འདས་ལྷན་ཅིག་
འོངས་པའི་ཕྱོགས་ཀྱི་བདག་པོ་རྣམས། ཞེས་སོགས་བཤད་དོ་སྙམ་ན། སྤྱིར་པཎྜི་ཏ་དེ་གཉིས་ཀྱི་ལུང་ཚད་མར་མི་འགྱུར་ཞིང༌། གལ་ཏེ་འགྱུར་ནའང་ཡེ་ཤེས་སེམས་དཔའི་ཕྱི་བཞིན་དུ་འོངས་པའི་ཕྱོགས་སྐྱོང་སོགས་དཀྱིལ་འཁོར་གྱི་ཕྱི་རོལ་ན་གནས་པ་རྣམས་ལ་འབུལ། ཞེས་པ་ཙམ་ཡིན་ལ། སྤྱིར་ཡང་མི་མ་ཡིན་རྣམས་ལ་དཀྱིལ་འཁོར་གྱི་སྲུང་འཁོར་ཐོགས་པའི་གནས་ཡིན་གྱི། དཀྱིལ་འཁོར་བཞེངས་ས་སའི་ཁང་པ་ལ་དེ་ཙམ་དུ་ཐོགས་རྒྱུ་མེད་པའི་ཕྱིར། ཕྱི་རོལ་ཏུ་གནས་པ་ཡང་དཀྱིལ་འཁོར་གྱི་ཕྱི་རོལ་ཡིན་གྱི། མི་འཁྱམས་པོ་བཞིན་སའི་ཁང་པའི་སྒོ་ནང་དུ་ཡོང་རྒྱུ་མ་བྱུང་བ་ཅི་ལ་ཡིན། ཡེ་ཤེས་སེམས་དཔའི་འཁོར་གྱི་ཕྱོགས་སྐྱོང་རྣམས་དཀྱིལ་འཁོར་ལྟ་བར་མི་དབང་བའི་རྒྱུ་མཚན་ཡེ་མེད་དེ། འདི་ན་གང་དག་འགོང་པོ་དག་དམ་ཅན་ཡིན་ཞེས་ནང་དུ་གཏོར་མ་སྟེར་ལ། ཚངས་པ་དབང་པོ་སོགས་དཀྱིལ་འཁོར་ལྟ་བར་མི་དབང་ཞེས་ཟེར་བ་ནི། བླུན་པོ་རྫུན་ཅན་རྣམས་མཁས་ཁྱད་ཀྱི་དཔའ་རྟགས་སུ་བྱེད་ཀྱང༌། ཡུལ་གང་དུ་ཡིན་ཡང་རུང༌། ཆོས་ལུགས་སུའི་སར་ཡིན་ཡང་འདྲ་སྟེ། མཁས་པ་དྲང་པོའི་རང་བཞིན་ཅན་རྣམས་ཁྲེལ་བའི་རྒྱུ་ཁོ་ནའོ། །གཞན་ཡང་དཀྱིལ་འཁོར་ལྟ་བར་མི་དབང་བའི་འདྲེ་གདོན་ཡིན་ན། དེ་ལ་བདག་རྗེས་སུ་བཟུང༌། སློབ་མ་ལ་བགེགས་མེད་པར་མཛོད་ཟེར་བ་ཡང་མི་འཐད་པའི་ཕྱིར་རོ། །དེས་ན་དཀྱིལ་འཁོར་གྱི་ཆོ་ག་མང་པོར་སྐབས་འདིར་འཇིག་རྟེན་པ་ཁོ་ནའི་གཏོར་མ་སྦྱིན་པ་དག་ཡོད་ན། དེ་ནི་ཡེ་ཤེས་སེམས་དཔའ་དང་ལྷན་ཅིག་འོངས་པའི་ཕྱོགས་
སྐྱོང་སོགས་དང་པོ་བསྐྱེད་ཆོག་གིས་བསྐྱེད་པའང་མིན། སྒྲུབ་པ་པོའི་ཆེད་གཏད་སྤྱན་དྲངས་པའང་མིན། དཀྱིལ་འཁོར་ནང་དུ་བཀོད་ནས་བཞུགས་སུ་གསོལ་བའང་མིན་པས། དེ་དག་དཀྱིལ་འཁོར་གྱི་ཕྱི་རོལ་ན་འདུག་ཅིང༌། སྔར་གྱི་མཆོད་པ་རྣམས་ལ་ཇི་བཞིན་དུ་མི་དབང་པས་ཡེ་ཤེས་ཀྱི་ལྷ་དཀྱིལ་འཁོར་ནང་དུ་མཆོད་ཟིན་པའི་རྗེས་ལ། རྗེས་འབྲང་རྣམས་ལའང་སྐལ་བ་ཙམ་དུ་གཏོར་མ་སྦྱིན་པ་ཡིན་ལ་དེར་མ་ཟད་འབྱུང་པོ་སྤྱི་ལའང་སྐལ་བ་སྦྱིན་པ་ཡིན་ནོ། །འདིར་ནི་སྲུང་མ་དྲུག་ཅུ་དང༌། མཁའ་འགྲོ་མ་རྣམས་དང༌། ཡུལ་བདག་གཞི་བདག་འབྱུང་པོ་སྤྱི་རྣམས་ལ་གཏོར་མ་སྦྱིན་པ་ནི་ཡིན་ན། ཕྱོགས་དྲུག་ཏུ་སོང་ནས་གཏོར་མ་སྟེར་བ་དང༌། དེ་ཙམ་མ་གྲུབ་ན་ཤར་ཕྱོགས་ལྟ་བུ་གཅིག་ཏུ་སོང་ནས། དེར་གཏོར་མ་ཐམས་ཅད་ལྷན་ཅིག་ཏུ་བསྔོས་ཏེ། མཐར་ཕྱོགས་ཕྱོགས་སུ་བསྐྱལ་ཡང་རུང་ལ། ཐ་ན་ཕྱོགས་སུ་གཏོར་བས་ཀྱང་རུང་ངོ༌། །སྲུང་མ་དྲུག་ཅུ་ལ་གྲངས་མཉམ་ཡོད་ན། རང་རང་གང་དུ་བཞུགས་པའི་ཕྱོགས་ཀྱི་དབྱེ་བ་བྱས་ཀྱང་ཆོག་ལ། ཡང་ཁམས་ཀྱི་དབྱེ་བས་ཕྱོགས་སྐྱོང་ཤར། གཟའ་ལྷོ། ཀླུ་བྱང༌། འབྱུང་པོ་ནུབ། ཟད་པར་སྟེང༌། ཁྲོ་བོ་འོག་ཅེས་པ་ལྟར་འབུལ་བ། སྟེང་འོག་ནི་ཁང་སྟེང་ངམ་འོག་ཁང་སོགས་སམ། རིའི་ངོས་ཀྱི་དཀྱིལ་འཁོར་ཁང་པ་ཡིན་ན་དངོས་སུའང་ཡོད་ཅིང༌། གཞན་དུ་ན་ཤར་གྱི་ཤར་དང༌། ནུབ་ཀྱི་ནུབ་ཏུ་བཏང་ངོ༌། །དེ་ལྟར་ན་ནང་དུ་དཀྱིལ་འཁོར་གྱི་ལྷ་ལ་འཇིག་རྟེན་འདས་པ་ཀུན་འདུས་པ་མཆོད་པ་དང༌། ཕྱི་རུ་ནི་འཁོར་འདས་ཀྱི་མགྲོན་ཐམས་ཅད་གཏོར་མས་
ཚིམ་པར་བྱེད་པ་ཡིན་ཡང༌། གཙོ་ཆེར་འཇིག་རྟེན་པ་རྣམས་སོ། །འདི་ཇི་ལྟར་བྱེད་པའི་ཚུལ་ནི་དཀྱིལ་ཆོག་ཉིད་དུ་གསལ་ལ། འདིའི་རྗེས་ཀྱི་ཡན་ལག་གི་དབང་དུ་བྱས་ནས་སྐོར་བ། སྒོ་དབྱེ། ཕྱག་འཚལ། མེ་ཏོག་འབུལ་བ་ལ་སོགས་པ་རྣམས་གསང་བ་སྤྱིའི་ཆོ་ག་རྡོ་རྗེ་འཕྲེང་བ་དང་མཐུན་པར་བྱེད་པའང་མང་མོད་ཀྱི། དེ་ལྟར་ཡང་སྤྱིར་མི་འགལ་མོད། དུས་འཁོར་རང་ལུགས་ལ་དངོས་དང༌། ཞལ་འཕངས་དང༌། ཤུགས་བསྟན་གང་ལའང་མེད་པའི་ཕྱིར། ཁ་སྐོངས་ཧ་ཅང་མང་ན་བསྲེ་སླད་དུ་འགྲོ་ཉེན་ཆེ་བས། རང་ལུགས་ཀྱི་བླ་མ་གོང་མ་རྣམས་ཕྱག་ལེན་མི་མཛད་དོ།། བདུན་པ་རང་གཞན་དབང་བསྐུར་བའི་རིམ་པ་ལ། བདག་ཉིད་འཇུག་ཅིང་དབང་བླང་པ་དང༌། སློབ་མ་གཞུག་ཅིང་དབང་བསྐུར་བའོ། །དང་པོ་ནི། ཕལ་ཆེར་འདི་སྐད་ཅེས། རྩོད་ལྡན་གྱི་སློབ་དཔོན་རྣམས་དམ་ཚིག་གི་ཉེས་ལྟུང་མེད་པ་དཀོན་ལ། ཉེས་ལྟུང་ཡོད་ན་སློབ་མ་ལ་དབང་སྦྱིན་དུ་མི་རུང་བས་སྡོམ་པ་གསོ་བའི་ཕྱིར་བདག་འཇུག་ལེན་ཞེས་ཟེར་རོ། །དེ་ལ་དཔྱད་ན། སྤྱིར་སྔགས་ཀྱི་དམ་ཚིག་ཉམ་པ་ཞིགསྡོམ་པ་གསོ་བ་ལ་སྤྱིར་བཏང་དུ་སློབ་དཔོན་ཁོ་ན་ལས་དབང་བསྐུར་ཞུ་དགོས་ཤིང༌། དམིགས་གསལ་ལ་སློབ་དཔོན་དུ་འོས་པ་ཡེ་མ་རྙེད་ན། སྐྱབས་འགྲོ་སེམས་བསྐྱེད་སྔོན་དུ་འགྲོ་བའི་བཤགས་བསྡམ་མང་དུ་བྱས་ནས། གྲོགས་དང་བཅས་དཀྱིལ་འཁོར་བཞེང་པ་སྔོན་དུ་འགྲོ་བའི་བདག་འཇུག་བྱས་ན། དམ་ཚིག་སོར་ཆུད་ཚུལ་ཞིག་ཀྱང་བཤད་མོད། བདག་འཇུག་བྱེད་པ་ཕལ་ཆེ་བ་སྡོམ་པ་གསོ་བའི་ཆེད་ཁོ་ན་མིན་པར་ཤེས་ཏེ། རྩ་ལྟུང་མ་བྱུང་ན་ཡན་ལག་ཕྲ་མོ་
ཙམ་ལ་སྡོམ་པ་གསོ་མི་དགོས་ཤིང༌། རྩ་ལྟུང་བྱུང་ན་ནི་ཡུལ་ཉེ་བ་ན་རྡོ་རྗེ་སློབ་དཔོན་ཡོད་པ་ཤས་ཆེ་བས། དེའི་ཚེ་བདག་འཇུག་ཙམ་གྱིས་སྡོམ་པ་གསོ་ཡང་མི་ཐུབ་ལ། ཐུབ་ཀྱང་དེ་མ་ཐག་ཏུ་གཞན་ལ་དབང་བསྐུར་དུ་མི་རུང་སྟེ། སྡོམ་པ་གསོས་ཀྱང་རྩ་ལྟུང་གི་སྡིག་པ་མ་བྱང་བའི་ཕྱིར་དང༌། དམ་ཚིག་ཉམ་པས་གཞན་དོན་དུ་ས་ཆོག་ནས་གཟུང༌། སྒྲུབ་མཆོད་ཀྱི་བར་བྱེད་དུ་མི་རུང་བའི་ཕྱིར་རོ། །རྒྱུད་འགྲེལ་འདི་དག་ཏུ་ཡང་བདག་འཇུག་བྱེད་པའི་གསལ་ཁ་མ་གསུངས་ཏེ། དེས་ན་དཀྱིལ་འཁོར་བཞེངས་ནས་སྒྲུབ་མཆོད་བྱེད་པའི་ཆ་ལག་དང༌། སློབ་མ་ལ་སྔགས་སྡོམ་བསྐྱེད་པའི་རྒྱུ་ཚོགས་སུ་བདག་འཇུག་ངེས་པར་དགོས་པ་མ་ཡིན་ཡང༌། སྤྱིར་བདག་འཇུག་བླངས་པ་ལ་ཕན་ཡོན་ཁྱད་པར་ཅན་ཡོད་ཅིང༌། ལམ་དང་འབྲས་བུའི་དབང་བསྐུར་བ་རྣམས་ཐོབ་པར་འགྱུར་བའི་རྟེན་འབྲེལ་ཁྱད་པར་ཅན་སྒྲིག་པ་ཡང་ཡིན་པ་དང༌། རང་རྒྱུད་ཀྱི་སྔགས་སྡོམ་ཇེ་དག་དང་ཇེ་བཟང་དུ་འགྱུར་བ་ཡིན་པ་དང༌། བསོད་ནམས་ཀྱི་ཚོགས་འཕེལ་པའི་སླད་དུ་བདག་འཇུག་བླངས་ན་ཆེས་བཟང་བ་ནི་ཡིན་ནོ། །དེས་ན་དབང་བསྐུར་བའི་སློབ་དཔོན་གྱི་མཚན་ཉིད་དུ་བདག་འཇུག་བླངས་པ་དགོས་པར་མ་གསུངས་པ་དང༌། དགོས་ངེས་ཤེས་པའི་བདག་པོ་དང་བདག་པོ་ཆེན་པོའི་དབང་ནི་སྔར་ནས་ཐོབ་ཟིན་པ་དགོས་ལ། དམ་ཚིག་གི་ཡན་ལག་ཕྲ་མོ་གསོ་བ་ལ་བདག་འཇུག་ལེན་པ་ཡང་མི་དགོས་ཤིང༌། ཡན་ལག་ཕྲ་མོས་གོས་ཀྱང་རྩ་བའི་དམ་ཚིག་དག་ན་སློབ་མའི་རྒྱུད་ཀྱི་སྔགས་སྡོམ་སྐྱེད་པ་ལ་མི་སྒྲིབ་པས། སློབ་དཔོན་གྱི་མཚན་ཉིད་སྤྱི་དང་ལྡན་པ་གལ་ཆེ་ཡི། རང་ཉིད་ལག་ལེན་ཆེན་པོ་ཙམ་མི་བྱེད་བཞིན་དུ་བྱིས་དབང་གི་བདག་འཇུག་ལ་ཁ་ཙམ་
ཚིག་ཙམ་གྱིས་བསྔགས་པ་བརྗོད་པ་ཙམ་ལ་སྙིང་པོ་མེད་དེ་གཡོ་སྒྱུ་འབའ་ཞིག་གོ །ཡང་རྒྱུད་འདིར་རྡོ་རྗེ་འཇིགས་བྱེད་ཀྱི་རྣལ་འབྱོར་སྐབས། དབང་གི་དངོས་གཞི་ཐམས་ཅད་སྔགས་དབང་གི་སྒོ་ནས་རང་ཉིད་ཀྱིས་ལེན་པར་གསུངས་པས། བདག་འཇུག་ཀྱང་དོན་གྱིས་འཕངས་པ་ཡིན་ན། ཁ་ཅིག་བདག་འཇུག་ལ་ནི། དབང་བདུན་ཁོ་ནའོ་ཞེས་ཟེར་བ་འབྲེལ་མེད་བྱུང་རྒྱལ་གྱི་གཏམ་དུ་གསལ་བར་བྱས་ཤིང༌། ཡང་བདག་འཇུག་ལ་འཇུག་པ་རྒྱས་པ་མ་གྲུབ་ན། སྒོ་ཕྱེ་ཞིང་མེ་ཏོག་དོར་ནས་དངོས་གཞི་ལ་ཞུགས་པས་ཆོག་པ་དེ་གསང་སྔགས་སྤྱི་ལུགས་ཡིན་ཡང༌། དེ་ལ་དགག་པ་བྱེད་དུས་བདག་འཇུག་གི་དོན་སྡོམ་པ་གསོ་བ་ཡིན། སྡོམ་བཟུང་མ་བྱས་ན་གསོ་མི་ཐུབ་ཟེར་བ་སོགས་ཀྱང་མ་གོ་མ་རིག་པའི་གཉིད་འཐུག་པོས་ནོན་པས་བར་བར་དུ་བླ་རྡོལ་སྨྲ་བར་ཟད་དོ། །དབང་སོ་སོའི་དམིགས་པ་རྣམས་གསལ་ཐེབས་ན། ངག་ཏུ་བརྗོད་རྒྱུ་སྔགས་དབང་ཁོ་ནས་ཀྱང་དབང་གི་དངོས་གཞིའི་ཆོ་ག་མ་ཚང་བ་མེད་པ་ཡིན་ཏེ། དབང་ཆོག་རྒྱས་པ་ལ་ཡང་འགའ་ཞིག་ཆ་ལག་འཕྲོས་དོན་ཙམ་དང་ཕལ་ཆེར་དམིགས་པ་ཉིད་དག་ཏུ་བརྗོད་པ་ཡིན་པས་སོ། །འདི་དག་ལ་བརྗོད་པར་བྱ་རྒྱུ་མང་ཡང་རེ་ཞིག་བཞག་གོ །དམ་ཚིག་གསུམ་གླུ་བླང་བ་ཡང་རྒྱུད་གཞན་གྱི་ཁ་འགེངས་ཙམ་ཡིན་ལ། འཇིག་རྟེན་འདས་གཏོར་སྐབས་འདིར་བྱེད་པ་ཡང་མན་ངག་ཁོ་ནའོ།། གཉིས་པ་སློབ་མ་གཞུག་ཅིང་དབང་བསྐུར་བ་ལ། སྔོན་འགྲོ་དཀྱིལ་འཁོར་དུ་འཇུག་པའི་ཆོ་ག་བཤད། དངོས་གཞིའི་ཐོག་མ་བྱིས་པ་འཇུག་པའི་དབང་བདུན་བཤད། ཕྱི་མ་མཆོག་དབང་གོང་མའི་དབང་བཞི་བཤད། རྗེས་སློབ་མ་དང་སློབ་དཔོན་གྱི་བྱ་བ་ཅུང་ཟད་བཤད་པའོ། །དང་
པོ་ལ། ཁ་མི་སྐོང་བའི་ཆོ་ག་ངོས་བཟུང༌། ཁ་སྐོང་ཅན་གྱི་རིམ་པ་རྒྱས་པར་བཤད་པའོ། །དང་པོ་ནི་རྒྱུད་འགྲེལ་ཆེན་པོ་ཉིད་ཀྱི་དགོངས་པ་ཇི་ལྟ་བ་ནི། སློབ་མས་བླ་མ་དམ་པའི་ཞབས་དྲུང་དུ་གསེར་གྱི་མེ་ཏོག་དང་བཅས་པའི་མཎྜལ་བྱས་ནས། ཁྱིམ་པ་ཡིན་ན་རྫས་དང་བདག་ཉིད་བུ་དང་བུ་མོ་སོགས་ཉེ་བར་སྤྱོད་པའི་གཡོག་སྟེ་དག་པ་གསུམ་གྱི་དངོས་པོ་འབུལ་དགོས་ལ། རབ་ཏུ་བྱུང་བ་ཡོ་བྱད་དང་ལྡན་ན་དང་པོ་གཉིས་དང༌། མི་ལྡན་ན་བདག་ཉིད་ཁོ་ན་འབུལ་ལོ། །ཡིད་ཀྱི་སྒོ་ནས་ནི་ཐམས་ཅད་ཀྱིས་ཀྱང་ཐམས་ཅད་ཕུལ་ནས། གསོལ་བ་གདབ་པ་དང་སྡོམ་པ་བཟུང་ནས་སོ་ཤིང་དོར། ཁྱོར་ཆུས་ཁ་དག་པར་བྱས། ལྕེ་ལ་དམ་རྫས་བདུད་རྩི་ལྔ་བཞགཡེ་ཤེས་ཕབ། རིགས་དྲུག་གི་ས་བོན་ལུས་ལ་བཀོད། འདིར་གོས་སེར་པོ་སྦྱིན་པའམ། ཡང་ན་བརྟུལ་ཞུགས་ཉེར་ལྔ་སྦྱིན་པའི་རྗེས་སུ། གོས་དང་མིག་དར་སྔགས་གཅིག་གིས་བྱིན། དཀྱིལ་འཁོར་ལ་སྐོར་བ་བྱས་ནས་མགོ་བོར་བསངས་གཏོར་བྱས། མེ་ཏོག་ཕུལ། རིགས་བརྟགས་ནས་མིག་དར་ཕྱེ། རིགས་ཀྱི་ལྷ་དང་དཀྱིལ་འཁོར་གྱི་གཙོ་བོ་དང་པོར་བྱས་ནས་དཀྱིལ་འཁོར་མཐའ་དག་གི་ལྷ་ངོ་བསྟན་པ་ཙམ་བྱ་སྟེ། འདི་ཙམ་གྱི་ལུགས་ལ་ཡེ་ཤེས་དབབ་པ་ཡན་ཆད་དཀྱིལ་འཁོར་ཁང་པའི་ཕྱི་རོལ་དུ་བྱས་ནས། དེ་མན་ཆད་ཁང་པའི་ནང་དུ་བྱས་ཀྱང་རུང༌། དང་པོ་ཉིད་ནས་དཀྱིལ་འཁོར་ཁང་པའི་ནང་དུ་བྱས་ཀྱང་མི་རུང་བ་ནི་མེད་དེ། འཇུག་པ་ཞེས་པ་ནི་དཀྱིལ་འཁོར་གྱི་གཞལ་མེད་ཁང་གི་ནང་དུ་འཇུག་པ་ཡིན་པས་ཕྱི་འཇུག་ནང་འཇུག་ཅེས་པའང་དེ་ལ་བལྟོས་པའི་ཕྱི་ནང་ཡིན་པས་དམིགས་པའི་ས་མཚམས་ལ་རག་ལས་ཀྱི། དཀྱིལ་འཁོར་
བཞེངས་སའི་ས་ཁང་གི་ནང་དུ་འཇུག་པའི་དོན་ཙམ་ཁོ་ན་མ་ཡིན་པའི་ཕྱིར་རོ། །སློབ་དཔོན་སློབ་མ་སྤྲོས་པ་ལ་མི་དགའ་ཞིང༌། རང་གཞུང་ཁོ་ནས་ཆོ་ག་ཤེས་པའི་ངོར་འདི་ཙམ་ཁོ་ན་བྱས་ན་བསྲེ་བསླད་མེད་ཅིང༌། དགོས་དོན་ཐམས་ཅད་འགྲུབ་པ་ཡིན་པས། བསྡུས་པ་འདི་ཡང་རུང་ཙམ་ཡིན་ཞེས་པ་དེ་འདྲའི་རིགས་མ་ཡིན། ཆེས་མཆོག་ཏུ་གྱུར་པ་སྟེ། དཀྱིལ་ཆོག་ཆེན་མོ་ཡེ་ཤེས་རྒྱ་མཚོ་ལས་ཀྱང༌། དཀྱུས་སུ་དེ་ཙམ་ཁོ་ན་བཀའ་སྩལ་ཏོ། །འོན་ཀྱང་བསྡུས་པ་ལ་མི་དད་ཅིང་ཡིད་མི་ཆེས་ལ། སྤྲོས་པ་ལ་དགའ་བ་ཁོ་ན་མང་བར་སྣང་བས། ལར་ནས་ཆོ་གའི་ངོ་བོ་བཟང་ཡང་སློབ་མ་ཡིད་ཆེས་མ་སྐྱེས་པའམ་མ་དད་ན་དོན་དུ་མི་འགྱུར་བས་དེང་སང་ལག་ལེན་ལ་ཕལ་ཆེར་ཁ་སྐོང་ཅན་དེ་མཛད་དོ།། གཉིས་པ་ནི་ཁ་སྐོང་ཅན་གྱི་དབང་དུ་བྱས་ན། འཇུག་པ་ཉིད་ལ་བལྟོས་པ་སྔོན་འགྲོ་ཡོལ་བའི་ཕྱི་འཇུག་དང༌། འཇུག་པ་ཉིད་ཀྱི་དངོས་གཞི་ཡོལ་བའི་ནང་འཇུག་གོ །དང་པོ་ལ་དྲུག་སྟེ། མཎྜལ་འབུལ་ཞིང་གསོལ་བ་གདབ་པ། རིགས་དྲུག་གི་སྡོམ་པ་བཟུང་བ། སོ་ཤིང་དོར་ཞིང་རིགས་དྲུག་གིས་བསྲུང་བ། ཁྱོར་ཆུ་དང་བདུད་རྩིས་ཁ་དག་པར་བྱེད་པ། དྲི་བ་དྲི་ལན་སེམས་བསྐྱེད་དང་བཅས་པ། གསང་བར་གདམས་ཤིང་ནང་དུ་འཇུག་པའོ། །དང་པོ་ནི། སློབ་མ་རྣམས་ཁྲུས་བྱས་ཤིང་བསམ་པ་དགེ་བར་བསྒྱུར་ཏེ་མཎྜལ་ཕུལ་ནས། མི་ཟད་འཁོར་བས་འཇིགས་པ་ཞེས་སོགས་ལན་གསུམ་གསོལ་བ་འདེབས་པའོ། །གཉིས་པ་ནི་སློབ་མས་སློབ་དཔོན་གྱི་དྲུང་དུ་ཐལ་མོ་སྦྱར་ཞིང་ལུས་བཏུད་ནས་སྡོམ་བཟུང་བྱེད་དོ། །འདི་ལ་སྨོན་ལམ་གདབ་པ་ཞེས་གསུངས་ཏེ། དམ་ཚིག་འདི་རྣམས་ལ་སྤྱོད་པར་
སྨོན་ཞིང་དམ་འཆའ་བ་ཡིན་ནོ། །དེ་ཡང་སློབ་དཔོན་གྱིས་སློབ་མ་ལ་དམ་ཚིག་དེ་རྣམས་བཤད་ནས། ཁྱོད་ལ་དབང་བསྐུར་བས་སྔགས་ཀྱི་སྡོམ་པ་ཐོབ་པར་བྱེད་དེ། དེ་ལྟར་བྱས་པའི་རྗེས་སུ་དམ་ཚིག་འདི་དག་བསྒྲུབ་དགོས་སོ། །འདི་རྣམས་ལ་བླང་དོར་མི་བྱེད་ན། ཁྱེད་ལ་དབང་བསྐུར་ཡང་བདག་དབང་བསྐུར་བ་པོ་དང༌། །དབང་ཞུ་བ་པོ་ཁྱོད་གཉིས་ཀ་ལ་དོན་མེད་ཆེན་པོ་བསྐྱེད་པ་ལས་གཞན་མེད་དོ། །ཞེས་བརྗོད་པ་ན། སློབ་མས་ཀྱང་བླང་དོར་དེ་དག་ཉམས་འོག་ཏུ་བཅུག་ནས། རང་གིས་སྒྲུབ་ནུས་པར་འདུག་ན་ཞེས་ཀྱང་སྒྲུབ་པར་སྨོན་པའི་ཚུལ་གྱིས་དམ་འཆའ་བྱེད་ན། སྡོམ་པ་བློས་མི་སྤོང་བར་འཛིན་པ་ཡིན་པའི་ཕྱིར། སྡོམ་བཟུང་ཞེས་བྱ་སྟེ་དོན་ལ་དབང་བསྐུར་མི་བསྐུར། སྡོམ་པ་འཛིན་པར་དམ་འཆའ་མི་འཆའ་ལ་རག་ལས་པས། སོ་ཐར་གྱི་བར་ཆད་དྲི་བ་དང་དོན་གཅིག་གོ །འདི་ན་ཤིང་རྟ་ཆེན་པོ་དག་ཀྱང་སྡོམ་བཟུང་ལན་གསུམ་གྱིས་སྔགས་སྡོམ་ཐོབ་པར་འགྱུར་ཞེས་དང༌། གཞན་དག་གིས་དེ་ལ་དེར་སྡོམ་པ་ཐོབ་ཟིན་ན། དབང་དངོས་གཞིའི་ཆོ་ག་མི་དགོས་པར་འགྱུར་ཞེས་དགག་པ་བྱས་པ་ན། དེར་དེ་ཐོབ་ཟིན་ཡང་ཆོ་ག་ལྷག་མ་བྱེད་མི་དགོས་པའི་སྐྱོན་མེད་དེ། གསོལ་གཞིའི་ཆོ་གས་དགེ་སློང་གི་སྡོམ་པ་ཐོབ་ཀྱང༌། དུས་གོ་དང་གདམས་ངག་བརྗོད་པ་སོགས་ངེས་པར་བྱེད་དགོས་པ་བཞིན་ནོ་ཞེས་ལན་འདེབས་ཏེ། གསོལ་གཞི་དང་སྡོམ་བཟུང་དོད་ཐུབ། ཆུ་དབང་སོགས་དང་དུས་གོ་སོགས་དོད་ཐུབ་ཏུ་ཤུགས་ལ་ཁས་བླངས་སོ། །དེ་ནི་མི་མཚུངས་ཤིང་མི་རིགས་ཏེ། སོ་ཐར་གྱི་དགེ་སློང་ལ་གསོལ་གཞིའི་ཆོ་གའི་སྡོམ་པ་སྐྱེས་ཟིན་པ་དེ། རྗེས་ཆོག་གཉིས་མ་
བྱས་ཀྱང་ལས་བརྒྱ་རྩ་གཅིག་ཉམས་སུ་མྱོང་བ་དང༌། འདུལ་བའི་དོན་ཉམས་སུ་ལེན་པ་ལ་རྗེས་ཆོག་གཉིས་ཉན་ཟིན་པའི་དགེ་སློང་དང་ཁྱད་མེད་ལ། གཞན་དུ་ན་ལས་བྱེད་པའི་སློབ་དཔོན་སོགས་ལ་ཆོ་གའི་ཡན་ལག་མ་ཚང་བའི་ཉེས་བྱས་འབྱུང་བར་ཟད་དེ། རྗེས་ཆོག་གཉིས་པོས་བསྒྲུབ་བྱ་དེ་འདུལ་བ་ལ་སྤྱོད་པར་དབང་བའི་བྱ་བ་གང་ཡང་མི་བྱེད་དེ། དེའི་བྱ་བ་དངོས་གཞིས་བྱེད་ལ། རྗེས་ཆོག་གཉིས་ནི་བསྒྲུབ་བྱ་དེས་སྡོམ་པ་བསྲུང་ལུགས་རགས་པ་ཙམ་གོ་བྱེད་ཁོ་ན་ཡིན་པས་སོ། །ཁྱེད་ལྟར་ན་རིགས་ལྔའི་སྡོམ་བཟུང་བྱས་པའི་རྗེས་སུ་དབང་གང་ཡང་མ་བསྐུར་ཡང་སློབ་མ་དེས་སྔགས་ཀྱི་ཉམས་ལེན་རང་གཞན་གྱི་དོན་ཐམས་ཅད་སྤྱོད་དུ་རུང་བར་འགྱུར། སློབ་དཔོན་ལ་ནི་ཆོ་ག་མ་ཚང་བར་བྱས་པའི་ཉེས་པ་ཙམ་ཞིག་འབྱུང་ངོ༌། །ཞེས་འདོད་དགོས་ཏེ་ཐལ་བ་འདི་བཟློག་ཏུ་མེད་དོ། །དེས་ན་ཐེག་པ་གསུམ་གྱི་སྡོམ་པ་གང་ལེན་ཡང་ཆོ་ག་དངོས་གཞིས་སྡོམ་པ་ཐོབ་པར་འགྱུར་གྱི། སྔོན་འགྲོ་དང་རྗེས་ཀྱིས་ཐོབ་པ་ནམ་ཡང་མེད་དེ། དངོས་གཞི་ཞེས་པའི་མིང་ཁོ་ནས་ཀྱང་དོན་དེ་ལྟར་གོ་དགོས་སོ། །སྡོམ་པ་འབོགས་པའི་ཆོ་གའི་སྡེ་ཚན་ཆ་ཤས་ཡིན་མཉམ་ལ། ཆོ་ག་གང་གིས་སྡོམ་པ་མི་ཐོབ་པ་དེ་སྡོམ་ཆོག་གི་དངོས་གཞི་ཡིན་པ་ཡང་ག་ལ་སྲིད་དེ། དེ་མི་ཐོབ་ན་དངོས་གཞི་ཡིན་པའི་རྒྱུ་མཚན་གཅིག་ཀྱང་མ་བྱུང་བས་སོ། །སྡོམ་བཟུང་བྱས་པ་ཁོ་ནས་སྡོམ་པ་ཐོབ་པར་འགྱུར་ན། དེ་ཉིད་དབང་གི་དངོས་གཞིར་ཐལ་བ་དང༌། ཆུ་དབང་སོགས་དངོས་གཞི་རྣམ་དངོས་གཞི་མ་ཡིན་པར་འགྱུར་ཏེ། སྔགས་སྡོམ་ཐོབ་ཟིན་གྱི་ཕྱིས་བྱེད་རྒྱུ་ཙམ་དུ་ཟད་པས་རྗེས་ཀྱི་ཆོ་གར་འགྱུར་བས་སོ། །ཡང་འདི་སྙམ་
དུ་སྡོམ་པ་ལེན་པའི་ཆོ་ག་དངོས་གཞི་དེ་སྡོམ་བཟུང་ཡིན་ཡང༌། སྤྱིར་དབང་གི་དངོས་གཞི་སྨིན་བྱེད་རང་མིན་ནོ་སྙམ་ན། དབང་བསྐུར་བས་རྒྱུད་སྨིན་པར་བྱེད་པ་དེ་སྔགས་སྡོམ་ཐོབ་ཚུལ་གྱི་སྒོ་ནས་རྒྱུད་སྨིན་པར་བྱེད་པ་མིན་ན། གཞན་ཚུལ་ཇི་ལྟ་བུས་རྒྱུད་སྨིན་པར་བྱེད་པ་ཡིན་སྨྲ་དགོས་སོ། །གལ་ཏེ་སྨིན་བྱེད་ཀྱིས་རྒྱུད་སྨིན་པར་བྱེད་པའི་གཙོ་བོ་སྔགས་སྡོམ་ཐོབ་པའི་སྒོ་ནས་མི་འཇོག་ཅིང༌། སྡོམ་པ་མི་ཐོབ་ན་དབང་བསྐུར་དངོས་ལ་དགོས་པ་མེད་པར་ཐལ་བ་དང༌། ལམ་གྱི་རྩ་བ་དབང་དང་དམ་ཚིག་ཟེར་བ་ཡང་ཚིག་ཙམ་དུ་འགྲོ་བ་དང༌། རྒྱུད་སྨིན་པར་མི་བྱེད་པའི་སྔགས་སྡོམ་དེ་ཐོབ་ཀྱང་དགོས་པ་མེད་པར་ཐལ་བས་སོ། །ཡང་དབང་དངོས་གཞིའི་དུས་སུ་སྔགས་དང་ཕྱག་རྒྱ་དང༌། ཏིང་ངེ་འཛིན་གྱི་ཆོ་གའི་བྱིན་གྱིས་རློབས་པ་དང༌། གསལ་བར་གསུངས་པའི་ངག་སྦྱོར་ཤིན་ཏུ་རྒྱས་པར་ཡོད་པ་དེས་སྔགས་སྡོམ་ཐོབ་པར་མི་འགྱུར་ན། དེ་དག་གང་ཡང་མེད་པའི་ཁས་ལེན་ཙམ་གྱིས་སྡོམ་པ་ཐོབ་པ་མི་རིགས་པ་ནི་བླུན་པོས་ཀྱང་ཤེས་སུ་རུང་ན། མཁས་པ་ཤེས་རབ་འཆལ་བའི་ངང་ཚུལ་འདི་འདྲ་ནི་བསམ་གྱིས་མི་ཁྱབ་བོ། །ཡང་ཆུ་དབང་སོགས་དངོས་གཞིའི་ཆོ་ག་རྣམས་སྡོམ་བཟུང་དང་འབྲེལ་བའི་ཆོ་ག་ཡིན་ན་ནི། སྡོམ་པ་སྡོམ་བཟུང་གིས་ཐོབ་ཟིན་པའི་རྗེས་ཀྱི་ཆོ་ག་ཡིན་པར་འགྱུར་ལ། དེ་དང་མ་འབྲེལ་ན་ནི་དབང་བསྐུར་བ་དངོས་དེ་སྔགས་སྡོམ་གྱི་ཆོ་ག་ཡེ་མ་ཡིན་པར་ཐལ་བར་འགྱུར་རོ། །ཐ་ན་བསྙེན་གནས་ནས་བརྩམས་ཏེ་རྣམ་པ་ཀུན་ཏུ་སྡོམ་པ་སྲུང་བའི་ཁས་ལེན་ཙམ་ནི། སྡོམ་པ་ཐོབ་བྱེད་ཀྱི་ཆོ་ག་དངོས་མ་ཡིན་
གྱི། ཆོ་གའི་ཡན་ལག་འབའ་ཞིག་ཡིན་པ་ཐུགས་སུ་གཞོག་འཚལ་ཏེ། ཆོས་སྐད་གསར་བྱུང་ཡིན་པ་ཙམ་ལ་ལེགས་བཤད་དུ་ཁྱབ་པ་འཆའ་བར་མི་བྱའོ། །དེས་ན་སྔགས་སྡོམ་ནི་དངོས་གཞིའི་ཆོ་གས་ཐོབ་པར་འགྱུར་ལ། སྡོམ་བཟུང་ནི་སློབ་དཔོན་གྱིས་སློབ་མ་ལ་དབང་སྩོལ་བའི་ཕྱིར་དུ་སློབ་མས་སྡོམ་པ་སྲུང་བར་ཁས་ལེན་པ་ཡིན་ཞིང༌། རྒྱུན་བཤགས་དང་འབྲེལ་ན་ལམ་བརྟེན་པར་ཡང་འགྱུར་བ་དང༌། གཞན་དུ་ན་སེམས་བསྐྱེད་ཀྱི་ཁོངས་སུའང་འདུས་སོ། །དེ་ལ་འདིར་རིགས་དྲུག་གི་སྡོམ་པ་བཟུང་བ་ནི། གཞན་དུ་རིགས་ལྔའི་སྡོམ་བཟུང་འབྱུང་བའི་དོད་ཡིན་ཞིང༌། འཁོར་ལོ་པདྨ་གཉིས་མ་གཏོགས་ཕལ་ཆེར་མཚུངས་པའང་ཡིན་མོད་ཀྱི། རྣམ་གཞག་ཅུང་ཟད་མི་འདྲ་བར་བྱུང་ཡང་རིགས་ལྔ་ལས་འདི་དོན་རྒྱ་ཆེའོ། །དེ་ལ་རྡོ་རྗེའི་རིགས་ཞེས་བྱ་བ། སྤྱིར་མི་བསྐྱོད་པ་དང་རྡོ་རྗེ་སེམས་དཔའ་གཉིས་ཀར་ལ་འཇུག་པའང་ཡོད་ལ། ཡང་རྡོ་རྗེ་དང་གྲི་གུག་གི་ཟླས་ཕྱེ་བའི་རྡོ་རྗེའི་རིགས་ནི་མི་བསྐྱོད་པ་དང༌། གྲི་གུག་གི་རིགས་ནི་རྡོར་སེམས་ལ་འཇོག་པའང་ཡོད། ཡང་རྡོ་རྗེ་རྩེ་ལྔ་པའི་རིགས་ནི་མི་བསྐྱོད་པ་དང༌། རྩེ་གསུམ་པ་དང་རྩེ་གཅིག་པའི་རིགས་ནི་རྡོར་སེམས་སུ་འཇོག་པ་ལས། འདིར་འདོད་པ་ནི་ལྔ་སྟེ། རྩེ་ལྔ་པའི་རྡོ་རྗེ་མི་བསྐྱོད་པའི་རིགས་ཀྱི་དམ་ཚིག་ལ་རྡོ་རྗེ་ཐུགས་ཀྱི་དམ་ཚིག་སྟེ་སྙིང་རྗེ་ཆེན་པོ་བྱང་ཆུབ་ཀྱི་སེམས་དང་བཅས་པ་སྒོམ་པ་དང༌། དྲིལ་བུ་གསུང་གི་དམ་ཚིག་སྤྲོས་བྲལ་གྱི་རྣམ་པ་ཅན་གྱི་ཤེས་རབ་སྟོང་ཉིད་སྒོམ་པ་དང༌། ཕྱག་རྒྱ་སྐུའི་དམ་ཚིག་རང་གི་ལུས་ངག་ཡིད་གསུམ་སྣོད་བཅུད་དང་བཅས་པ་ལྷའི་རྣལ་འབྱོར་གྱིས་རྒྱས་ཐེབས་པར་བྱེད་པ་རྣམས་
བསྐྱེད་རྫོགས་ཐུན་མོང་ངམ། བསྐྱེད་རིམ་ཕྱོགས་ཀྱི་དམ་ཚིག་ཡིན་ལ། རྫོགས་རིམ་ངེས་དོན་གྱི་ཕྱོགས་ལ་ནི་ཐུགས་གསུང་གཉིས་པོ་ལ་སྔར་གྱི་དེ་ཁའི་སྟེང་དུ། ཐུགས་མི་འགྱུར་བའི་བདེ་བའི་རྒྱུར་བྱང་ཆུབ་ཀྱི་སེམས་འཆིང་བའི་སྤྱོད་པ་ལ་བསླབ་པ་དང༌། གསུང་གཞོམ་མེད་ཀྱི་སྒྲའི་རྒྱུར་སྲོག་དབུ་མར་གཞུག་ཅིང་འཆིང་བའི་ཐབས་ལ་རྩོལ་བ་དང༌། སྐུ་ལ་བསྐྱེད་རིམ་གྱི་དེ་གཞི་རྟེན་དུ་ནི་མི་དགོས་ཀྱང་ལེགས་པའི་ཆ་ཤས་ནི་ཡིན་ནོ། །ངོ་བོ་ནི་སྟོང་གཟུགས་ཕྱག་རྒྱ་ཆེན་པོ་བསྒྲུབས་ཏེ་ཡང་ཡང་སྐྱོང་དགོས་པའོ། །གཉིས་ཀར་གྱི་ཐུན་མོང་དུ་སློབ་དཔོན་གྱི་དམ་ཚིག་སྟེ། རང་ཉིད་དཀྱིལ་འཁོར་མཆོག་ཏུ་དབང་བསྐུར་ཞིང་རྡོ་རྗེའི་རྣལ་འབྱོར་གྱི་བཀའ་དྲིན་སྩོལ་བའི་བླ་མ་དེ་ནི་སངས་རྒྱས་ཀུན་འདུས་དཀྱིལ་འཁོར་གྱི་བདག་པོ་ཉིད་དུ་ཤེས་པས་དངོས་པོ་ཐམས་ཅད་ཀྱིས་བསྟེན་པའོ། །དེ་ལྟར་ན་འདི་གཙོ་བོར་རྗེས་སྤྱོད་ཀྱི་དམ་ཚིག་དང་སྔ་མ་གསུམ་ལས་ཕྱེ་བའི་དྲུག་ནི་མཉམ་གཞག་གི་དམ་ཚིག་གཙོ་ཆེའོ། །དེ་ལྟར་ན་མི་བསྐྱོད་པའི་རིགས་ཀྱི་དམ་ཚིག་འདི་ནི་རིགས་གཞན་རྣམས་ཀྱི་དམ་ཚིག་གི་རྩ་བའོ། །རིན་ཆེན་འབྱུང་ལྡན་གྱི་རིགས་ཀྱི་དམ་ཚིག་ལ་སྦྱིན་པ་རྣམ་པ་བཅུ་སྦྱིན་ཏེ། དེ་ལ་བཅུ་ནི། རིན་ཆེན་ལྕགས་ཟངས་བ་ལང་རྟ། །གླང་པོ་བུ་མོ་ཡུལ་འཁོར་ དང༌། །འདོད་པའི་ཆུང་མ་རང་གི་ཤ །སྦྱིན་པ་རྣམ་པ་བཅུ་རུ་འདོད། །ཅེས་གསུངས་པ་སྟེ། སྦྱིན་རྒྱུ་དངོས་སུ་ཡོད་ཅིང་སྐབས་སུ་བབ་ན་དངོས་སུ་སྦྱིན་པ་ཡིན་ཏེ། ཐ་ན་སློང་བ་པོའམ་དུད་འགྲོའི་རིགས་ལ་ཟས་ཁམ་རེ་ཙམ་ཡང་སྦྱིན་པའམ་ཡི་དྭགས་སོགས་ལ་ཉིན་རེར་གཏོར་མ་ཕྲ་མོ་རེ་ཙམ་བཏང༌།
དངོས་སུ་སྦྱིན་རྒྱུ་མེད་ཀྱང་གཏོང་སེམས་དང་མ་བྲལ་པ་སྟེ། དམ་ཚིག་གི་ས་མཚམས་ནི་སྦྱིན་པ་བཅུས་མཚོན་པའི་ཟང་ཟིང་གི་སྦྱིན་པ་གཏོང་སེམས་དྲན་པ་དང༌། སྦྱིན་པས་སེམས་ཅན་གྱི་བསམ་པ་རྫོགས་པར་སྨོན་པ་ཐུན་གསུམ་དུ་དྲན་པའོ། །འཁོར་ལོ་སྟེ་རྣམ་པར་སྣང་མཛད་ཀྱི་རིགས་ཀྱི་དམ་ཚིག་ལ་རྒྱལ་བ་མཆོག་སངས་རྒྱས་རིགས་ལྔའི་དམ་ཚིག་བདུད་རྩི་ལྔ་དང༌། ཡུམ་ལྔའི་དམ་ཚིག་ལྕགས་ཀྱུ་ལྔ་བསྟེན་པ་སྟེ། ལས་དང་པོ་པས་དམ་རྫས་རིལ་བུ་ཡུངས་ཀར་གྱི་ཚད་ཙམ་བཟའ་བ་དང༌། བཟའ་བཏུང་ཐམས་ཅད་དམ་རྫས་སུ་བྱིན་གྱིས་བརླབས་ནས་བསྟེན་པ་ཡིན་ནོ། །རྣལ་འབྱོར་བའི་ས་ཐོབ་པས་ནི། དངོས་སུ་སྦྱངས་རྟོགས་སྦར་གསུམ་བྱས་ནས་སྐྱེ་བོའི་མངོན་དུ་ཇི་ལྟར་འདོད་པར་ཡང་བསྟེན་ནོ། །དེ་བཞིན་དུ་རལ་གྲི་སྟེ། དོན་ཡོད་གྲུབ་པ་ལས་ཀྱི་རིགས་ཀྱི་དམ་ཚིག་ལ་འདོད་པའི་ལྷ་དང་སངས་རྒྱས་དང་བྱང་ཆུབ་སེམས་དཔའ་རྣམས་དང༌། རྡོ་རྗེ་སློབ་དཔོན་ལ་མཆོད་པ་ཐམས་ཅད་ཀྱིས་མཆོད་པ་སྟེ། འདིར་མཆོད་པ་ནི། བྱ་བ་དང་ཡོ་བྱད་ཀྱིས་མཆོད་པ་ཡིན་པས་རྙེད་པ་དང་བཀུར་སྟི་དང༌། རིམ་གྲོ་དང༌། བསྔགས་པ་བརྗོད་པ་ལ་སོགས་པའོ། །སྒྲུབ་པའི་མཆོད་པར་ནི་གོང་འོག་ཐམས་ཅད་འདུས་པའི་ཕྱིར་དེ་ནི་ལས་རིགས་ཁོ་ནར་མི་བགྲོད་དོ། །ཆུ་སྐྱེས་ཏེ་པདྨའི་རིགས་ལ་རླུང་ལས་རྣམ་པར་རྒྱལ་བ་སོགས་བསྒྲུབས་ཏེ། ཐོབ་ན་རིགས་དང་རིགས་མ་ཡིན་པའི་ལས་ཀྱི་ཕྱག་རྒྱ་མངོན་པར་བགྲོད་དེ། ཐིག་ལེ་འཕོ་མེད་དུ་འཆིང་བ་འཛག་མེད་ཀྱི་སྡོམ་པའི་ཚུལ་ཁྲིམས་བརྟན་པར་བྱེད་པའི་ཐབས་ལ་བརྟེན་པའོ། །རྒྱལ་བ་བསྐྱེད་མཛད་དེ་རྡོ་
རྗེ་སེམས་དཔའི་རིགས་ལ་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་འགོད་པའི་ཕྱིར་དུ་སྟོང་ཉིད་སྙིང་རྗེ་དབྱེར་མེད་པའི་བྱང་ཆུབ་ཆེན་པོར་སྨོན་ལམ་གདབ་པ་སྟེ། སྨོན་འཇུག་གི་སེམས་བསྐྱེད་བླངས་ནས་བྱང་ཆུབ་སེམས་དཔའི་ཐུན་མོང་གི་ཚུལ་ཁྲིམས་རྣམ་པ་གསུམ་ལ་སློབ་པར་བྱེད་པའོ། །དེ་ལྟར་ན་རྡོ་རྗེའི་རིགས་རྩ་བའི་དམ་ཚིག་ཏུ་བཞག་ནས། ལྷག་མ་རྣམས་ཚོགས་གསུམ་གྱིས་བསྡུས་ན། བསོད་ནམས་ཀྱི་ཚོགས་ལ་གཉིས་ཀྱི་ཡུལ་དམན་པ་ལ་བརྟེན་པ་ནི། རིན་ཆེན་རིགས་ཀྱི་སྦྱིན་པ་དང༌། ཡུལ་མཆོག་ལ་བརྟེན་པ་ནི་ལས་ཀྱི་རིགས་ཀྱི་མཆོད་པའོ། །ཚུལ་ཁྲིམས་ཀྱི་ཚོགས་དངོས་ནི། པདྨའི་རིགས་ལ་འཛག་མེད་ཀྱི་ཚུལ་ཁྲིམས་དངོས་དང༌། ཚུལ་ཁྲིམས་ཚོགས་ཀྱི་རྒྱུར་རྣམ་སྣང་གི་རིགས་ལ་བཟའ་བའི་དམ་ཚིག་སྟེ། ཀྱཻ་རྡོར་ལས། དེ་ལ་ག་བུར་རྒྱུ་ཡི་ཕྱིར། །ཤ་ནི་བཟའ་བ་ཉིད་དུ་བྱ། །ཞེས་པ་ལྟ་བུའོ། །ཡེ་ཤེས་ཀྱི་ཚོགས་ནི་རྡོ་རྗེ་སེམས་དཔའི་རིགས་ཀྱི་སྟོང་ཉིད་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་བསྐྱེད་པའོ། །རྡོ་རྗེའི་རིགས་ཀྱི་ཡང་བསྐྱེད་རིམ་གྱི་ལྷ་སྐུ་ཕྱག་རྒྱ་ཆེན་པོ་བསོད་ནམས་དང༌། སློབ་དཔོན་གྱི་དམ་ཚིག་ནི་ཚོགས་གསུམ་ཀ་དང༌། གཞན་རྣམས་ཡེ་ཤེས་ཀྱི་ཚོགས་ སོ། །ཡང་སྐབས་འདིར་འཁོར་ལོའི་སྐབས་སུ། ཕུང་པོ་དང་དབང་པོའི་ཚོགས་པ་བསྲུང་ཞེས་གསུངས་པ་དང༌། རྡོར་སེམས་སྐབས་སུ། རྩེ་གཅིག་པའི་རིགས་ལ་གནས་པར་གྱུར་པས་ཞེས་དང༌། ཕྱག་རྒྱ་ཆེན་པོའི་དངོས་གྲུབ་བྱང་ཆུབ་བདག་གིས་བསྐྱེད་ཅེས་གསུངས་པས། དེ་གཉིས་ལ་དངོས་སུ་ཐུན་མོང་མ་ཡིན་པའི་ངེས་དོན་བསྟན་པ་ཉིད་ཀྱིས་གཞན་
རྣམས་ལ་ཡང་གོ་དགོས་ཏེ། སྦྱིན་པ་བཅུ་ནི་རླུང་བཅུ་བཅིངས་པ་དང༌། བདུད་རྩི་ལྔ་ནི་ཕུང་པོ་ལྔའི་དྭངས་མ་བཅིངས་པ་དང༌། ཤ་ལྔ་ནི་དབང་པོ་ལྔའི་ཐིག་ལེ་བཅིངས་པ་དང༌། མཆོད་པ་ནི་གཏུམ་མོ་སྦར་བས་བྱང་ཆུབ་ཀྱི་སེམས་ཞུ་སྟེ། ཕུང་ཁམས་བདེ་བས་ཁྱབ་པར་བྱེད་པ་དང༌། འཛག་མེད་ཀྱི་ཚུལ་ཁྲིམས་ཀྱང་ལས་རྒྱ་ལ་མ་བལྟོས་པར་ཕྱག་ཆེན་གྱིས་སྒྲུབ་པ་དང༌། སྟོང་ཉིད་སྙིང་རྗེ་དབྱེར་མེད་ཀྱང་ཐུན་མོང་གི་སྟེང་དུ་སྙིང་རྗེ་མི་འགྱུར་བའི་བདེ་བ་དང༌། སྟོང་ཉིད་རྣམ་ཀུན་མཆོག་ལྡན་ཟུང་འཇུག་རོ་གཅིག་ཏུ་གྱུར་པ་ནི་རྡོ་རྗེ་རྩེ་གཅིག་པའི་ངེས་དོན་དུ་བཤད་པ་ཡིན་ནོ། །འོ་ན་ཕྱག་ཆེན་གྱི་ཚུལ་ཁྲིམས་དེ་ཡེ་ཤེས་མ་ཡིན་ནམ་སྙམ་ན། ཡིན་མོད་ངེས་དོན་གྱི་དམ་ཚིག་ལྔ་ལ་ཚོགས་གསུམ་གྱི་དབྱེ་བ་གོང་བཞིན་མི་སྦྱོར་བས་དཔྱད་པ་དེ་མི་འཇུག་ལ། སྤྱིར་ནས་རྗེས་དྲན་གྱི་སྐབས་ཕྱག་ཆེན་གྱིས་ཞུ་བདེ་འགྱུར་མེད་བསྐྱེད་པའང་ཡོད་པས། ཚོགས་གསུམ་ངོ་བོ་མ་འདྲེས་པའི་དབྱེ་བ་བྱེད་སྐབས་ཞུ་བདེ་འགྱུར་མེད་ཀྱི་ཕྱིར་དེ་འདྲ་དེ་ཚུལ་ཁྲིམས་ཀྱི་ཚོགས་ཉིད་དོ། །འོན་ཀྱང་འདི་རྣམས་ད་ལྟ་ལས་དང་པོ་པས་སྒྲུབ་ཅིང་ཉམས་སུ་ལེན་པའི་དབང་དུ་བྱས་ན། རྡོར་དྲིལ་ཕྱག་རྒྱ་གསུམ་གྱི་དམ་ཚིག་ཏུ་འདུས་པས་རིགས་ཕྱི་མ་ལྔ་པོའི་དེས་དོན་ཐུན་མོང་མ་ཡིན་པ་རྣམས་སྤྱིར་ཟབ་ཀྱང་ལས་དང་པོ་པའི་དམ་ཚིག་གི་སྐབས་སུ་འཕྲོས་དོན་ཙམ་མོ། །དེ་ལས་བྱིས་འཇུག་ཙམ་ལ་ནི་བསྐྱེད་རིམ་གྱི་དམ་ཚིག་དང༌། དངོས་བསྟན་རྣམས་ཀྱིས་ཆོ་ག་ལ། རྡོར་དྲིལ་ཕྱག་རྒྱ་གསུམ་གྱི་རྫོགས་རིམ་གྱི་དམ་ཚིག་རྣམས་དབང་གོང་མ་རྫོགས་པར་ཐོབ་པ་ལ་གལ་ཆེའོ། །རྒྱུད་གཞན་ལས་གསུངས་པའི་རིགས་ལྔའི་
དམ་ཚིག་རྣམས་འདིར་འདུས་ཏེ། རྡོ་རྗེའི་རིགས་ནི་ཕལ་ཆེར་འདྲ་བ་ལས་རྫོགས་རིམ་གྱི་དམ་ཚིག་གསུམ་ལྷག་པོ་ཡིན་ལ། རིན་ཆེན་རིགས་ལ་གཞན་ལས་སྦྱིན་པ་བཞི་གསུངས་ཤིང༌། འདིའི་བཅུ་པོ་དེའི་ཟང་ཟིང་དུ་འདུས་ཀྱང༌། སྤྱིར་སྦྱིན་པའི་ངོས་ནས་གཙོ་བོར་གྱུར་པ་སྦྱིན་པ་རྐྱང་པའམ། དག་པ་བ་ནི་ཟང་ཟིང་གི་སྦྱིན་པ་ཡིན་པས་དེ་གཙོ་བོར་སྨོས་པ་ཡིན། གཞན་གསུམ་ཤུགས་ལ་བསྟན་པར་བྱས་ན་ལེགས་ལ། འོག་རྡོ་རྗེ་རྩེ་གཅིག་པའི་དམ་ཚིག་ཏུ་བསྡུས་ཀྱང་ཆོག་ གོ །སྤྱིར་ཡང་མི་འཇིགས་པའི་སྦྱིན་པ་ནི་ཚུལ་ཁྲིམས་དང༌། ཆོས་ཀྱི་སྦྱིན་པ་ནི་ཤེས་རབ་དང༌། བྱམས་པའི་སྦྱིན་པ་ནི་བསམ་གཏན་ཡིན་པས་རྣམ་གྲངས་ཀྱི་སྦྱིན་པར་འགྱུར་གྱི་སྦྱིན་པ་དག་པ་བ་མ་ཡིན་ནོ། །དེའི་ཕྱིར་རིན་ཆེན་རིགས་ཀྱི་དམ་ཚིག་ལ་སྦྱིན་པ་སྦྱིན་པ་ནི། རྒྱུད་གཞན་གྱི་ལུགས་ལ་ཡང་གཙོ་བོར་ཟང་ཟིང་ཉིད་ཡིན་པའི་ཕྱིར་དགོངས་པ་གཅིག་གོ །རྣམ་སྣང་གི་རིགས་ལ་བཤད་ཚུལ་མི་འདྲ་སྟེ། གཞན་ལས་སྐྱབས་འགྲོ་བཤད་ཀྱང་འདིར་བཟའ་བའི་དམ་ཚིག་ཏུ་མཛད་པ་གཞན་ལ་མེད་པའི་ལྷག་པོ་ཡིན་ལ། གཞན་ལས་སྐབས་འདིར་གསུངས་པའི་སྐྱབས་འགྲོ་ནི་ཀུན་རྫོབ་སེམས་བསྐྱེད་ཀྱི་ནང་དུ་འདུས་པའོ། །ལས་ཀྱི་རིགས་ཀྱི་དམ་ཚིག་འདི་དང་དེ་དག་འདྲ་ལ། པདྨའི་རིགས་ཀྱི་དམ་ཚིག་ལ་གཞན་དུ་ཆོས་འཛིན་པ་ལ་བཤད་པ་ཚིག་འཛིན་པ་ཕལ་བ་དང༌། དོན་འཛིན་པ་གཙོ་བོར་འཆད་ལ། དོན་འཛིན་པ་ཆོས་སྒྲུབ་པ་ལ་བྱེད་ན་ནི་དམ་ཚིག་མཐའ་དག་དེར་འདུས་པར་འགྱུར་བས་སོ་སོའི་དབྱེ་བ་ཉམས་པར་འགྱུར། དོན་བློ་ལ་གོ་བར་བྱེད་པ་དང་ཆོས་དར་ཞིང་མི་ནུབ་པར་བྱེད་པ་ལྟ་བུ་ལ་ངོས་འཛིན་དགོས་ན། དེ་ཡང་འོག་རྡོར་སེམས་སུ་
འདུས་པས་འདིར་འཕོ་མེད་ཀྱི་ཚུལ་ཁྲིམས་བཤད་པ་ཡར་ལྷག་པོ་སྟེ། དབང་བདུན་དང་བསྐྱེད་རིམ་ཙམ་ལ་བརྟེན་པ་ཡང་ལུས་ཀྱི་དངོས་གྲུབ་སྒྲུབ་པ་ལ་དམ་ཚིག་འདི་མེད་ཀ་མེད་ཡིན་པས་སོ། །ཀུན་རྫོབ་དང་དོན་དམ་དབྱེར་མེད་པར་སེམས་བསྐྱེད་པ་ནི། གཞན་གྱི་ལུགས་ཀྱི་རིགས་ལྔ་སྤྱིའི་དམ་ཚིག་ཞེས་བྱ་བ་དེ་ཡིན་ལ། སྦྱིན་པ་ལྷག་མ་གསུམ་དང་སྐྱབས་འགྲོ་དང༌། ཐོས་བསམ་གྱི་སྒོ་ནས་ཆོས་བཟུང་བ་དང༌། ཆོས་མི་ནུབ་པར་བཟུང་བ་ཐམས་ཅད་ཀྱང་འདིའི་ནང་དུ་འདུས་པ་ཡིན་པས། གཞན་ལས་འབྱུང་བའི་རིགས་ལྔ་སྤྱི་དང་སོ་སོའི་དམ་ཚིག་རྣམས་འདིར་འདུས་ཤིང༌། འདིར་བཤད་པའི་ལྷག་པོ་རྣམས་དེར་མ་འདུས་པའི་དབྱེ་བ་ཤེས་པར་བྱ་ཞིང༌། དམ་ཚིག་གི་ཡན་ལག་ཕྲ་མོ་རྣམས་ནི་འདིར་ཡང་རིགས་དྲུག་ཀའི་ཐུན་མོང་དུ་བྱའོ།། །། གསུམ་པ་སོ་ཤིང་དོར་ཞིང་རིགས་དྲུག་གིས་བསྲུང་བ་ནི། དང་པོར་ལས་དང་དངོས་གྲུབ་གང་འགྲུབ་བརྟག་པའི་དོན་དུ་སོ་ཤིང་འདོར་བ་ཡིན་པ། ཕྱོགས་ཀྱི་དབྱེ་བས་ལྷ་གང་གི་དངོས་གྲུབ་འགྲུབ་པ་ཡང་རྟོགས་ནུས། དེ་རྗེས་རིགས་དྲུག་གི་ཡི་གེ་འགོད་པ་ནི། སློབ་མའི་ཁམས་དྲུག་བྱིན་གྱིས་མ་བརླབས་ན་དཀྱིལ་འཁོར་དུ་འཇུག་ཏུ་མི་རུང་བས་དེའི་ཕྱིར་བྱིན་གྱིས་རློབས་པའོ།། །།བཞི་པ་ཁྱོར་ཆུ་དང་བདུད་རྩིས་ཁ་དག་པར་བྱེད་པ་ནི། ཨོཾ་ཧྲཱིཿསོགས་ཏེ་ཁྱོར་ཆུས་དག་གི་དྲི་མ་སྦྱངས། བདུད་རྩིས་དག་ལའང་རྡོ་རྗེ་གསུམ་དང་ཡེ་ཤེས་ལྔའི་ངོ་བོར་བྱེད་པའོ།། །།ལྔ་པ་དྲི་བ་དྲི་ལན་སེམས་བསྐྱེད་དང་བཅས་པ་ནི། ཀྱེ་དགའ་བ་སོགས་ཏེ། དེ་རྗེས་སེམས་བསྐྱེད་པ་ནི། སྙིང་གར་ཟླ་བའི་སྟེང་དུ་རྡོ་རྗེ་རྩེ་ལྔ་པ་བསྒོམས་ནས། ཨོཾ་སརྦ་སོགས་བརྗོད། གཞན་དཀྱུས་བཞིན།། །།དྲུག་པ་གསང་བར་གདམས་ཏེ་ནང་དུ་གཞུག་པ་ནི།
རྡོ་རྗེ་སྤྱི་བོར་སོགས་ཏེ་གཞན་ལའང་མ་སྨྲ། ཁྱོད་ཉིད་ཀྱང་མ་དད་པར་མ་བྱེད་ཅེས་པའོ། །འདིར་ཡ་མཱནྟ་ཀྲྀཏ་ཀྱི་སྔགས་ཀྱིས་འཇུག་པ་ནི། བར་གྱི་འདི་རྣམས་གཞན་གྱི་ཁ་སྐོང་ཡིན་ལ། རང་ལུགས་ཀྱི་བླ་མ་རྣམས་འཕྲེང་བ་ནས་ལེན་གྱི། སཱ་དྷུ་པུ་ཏྲའི་དཀྱིལ་ཆོག་ནས་མ་ཡིན་ཏེ། རྒྱུ་མཚན་འཕྲེང་བ་མཁན་པོ་སྔ་རོལ་དུ་བྱུང་ཞིང་ཤིང་རྟ་ཆེན་པོ་ཡིན་པ་དང༌། ལྷག་པའི་ལྷས་བྱིན་གྱིས་བརླབས་པ་རྩོད་པ་དང་བྲལ་བ་དང༌། ཐོག་མའི་ལུགས་སྲོལ་ཆེ་བ་གདོད་མ་ཡིན་པའི་ཕྱིར་དེ་ལས་ཁ་སྐོང་བ་བཟང་གི སཱ་དྷུ་པུ་ཏྲ་དུས་འཁོར་བ་ཙམ་ཞིག་ཏ་ཡིན་པར་འདུག་སྟེ། ཕྱིས་བྱུང་བ་དང་པཎྜི་ཏ་ཕལ་པ་ཡིན་པ་དང་དེའི་ངང་ཚུལ་རང་གཞན་ཐམས་ཅད་ལ་བཤད་རྒྱུ་མེད་པ་དང༌། དེས་དུས་འཁོར་ལ་ཁ་སྐོང་བྱས་པ་རྣམས་ཀྱང་འཕྲེང་བ་ལས་དྲངས་པར་སྣང་བའི་ཕྱིར། དེའི་རྗེས་འཇུག་ཡིན་པས། ཁ་སྐོང་གི་གཞུང་དངོས་ལས་བླངས་ཆོག་པ་ལ། འཕར་ཞིང་བརྒྱུད་པ་ལས་ལེན་དགོས་པའི་རྒྱུ་མཚན་མེད་པའི་ཕྱིར་རོ། །ཅི་སྟེ་དེ་ལ་ལྷག་པར་ཞེན་པར་བྱེད་པ་རྣམས་ནི། དེའི་ལུགས་གཙང་མ་འཛིན་པར་རིགས་ཀྱི། རང་བློ་དང་སྦྱར་ནས་འདྲ་མིན་བྱེད་པ་མི་རིགས་ཏེ་ཁུངས་སུ་འདྲེན་ཡང་ཡིད་མི་ཆེས་པ་དང༌། དེའི་རྗེས་སུ་འཇུག་བཞིན་དུ་གྲས་བྱེད་པ་འགལ་བའི་སྤྱོད་པ་མ་རུངས་པ་ཡིན་པའི་ཕྱིར་རོ། །དེས་ན་ཨོཾ་ཨཱཿབིགྷྣཱན་ཏ་ཀྲྀཏ་ཧཱུཾ། ཞེས་པར་བསྒྱུར་ནས་འཁྲིད་པར་བྱེད་པ་ནི་མི་ལེགས་ཏེ། སྔགས་དེ་གསང་འདུས་ཀྱི་སྔགས་ཡིན་ལ། འདུས་པའི་ལུགས་ལ་ཁྲོ་བོ་བགེགས་མཐར་བྱེད་བྱང་ཕྱོགས་སྲུང་བ་ཡིན་གྱི། ཤར་ཕྱོགས་སྲུང་བ་མ་ཡིན་ནོ། །ཡང་དུས་འཁོར་གྱི་
ཤར་སྒོ་ན་བགེགས་མཐར་བྱེད་འདུག་ཅིང༌། སློབ་མ་ཤར་སྒོ་ནས་འཇུག་པས་སོ་སྙམ་ན། དུས་འཁོར་གྱི་བགེགས་མཐར་བྱེད་ལ་སྔགས་དེ་འདྲ་གསུངས་པ་མེད་ དོ། །དེས་ན་ཡ་མནྟ་ཀྲྀཏ་ཀྱིས་བྱེད་པ་འདི་གཞན་གྱི་ཆོ་གས་སྒྲུབ་པའི་ལུགས་ཡིན། འདི་ལ་བིགྷྣཱན་ཏ་ཀྲྀཏ་བྱས་ན། རང་ལུགས་གཞན་ལུགས་གཉིས་མིན་གྱི་འདྲ་མིན་དུ་འགྱུར་རོ། །དུས་འཁོར་རང་ལུགས་ཁོ་ན་བྱེད་ན་དེ་འདྲ་གང་ཡང་མི་དགོས་སོ། །དེས་ན་རང་ལུགས་ནི་དཀྱིལ་འཁོར་དུ་འཇུག་པར་བྱེད་མཁན་གྱི་ལྷ་ནི་མདུན་བསྐྱེད་དཀྱིལ་འཁོར་ལ་བཀོད་ཅིང་བརྟན་པར་བཞུགས་མཁན་དེས་མིན་གྱི། སློབ་དཔོན་གྱི་ཐུགས་ཀ་ནས་སྤྲུལ་པའི་ལས་ཀྱི་རྡོ་རྗེའི་ཚུལ་འཛིན་པས་བྱེད་ན། མདུན་བསྐྱེད་དཀྱིལ་འཁོར་གྱི་ཤར་སྒོ་ན་བགེགས་མཐར་བྱེད་བཞུགས་ཀྱང༌། སློབ་དཔོན་གྱི་ཐུགས་ཀ་ནས་གཤིན་རྗེ་མཐར་བྱེད་སྤྲུལ་ཏེ། ཤར་སྒོ་ཕྱེ་ནས་སྒོ་ནང་དུ་སློབ་མ་ཁྲིད་པ་ལ་འགལ་བ་ཅུང་ཟད་ཀྱང་མེད་དོ། །གལ་ཏེ་སཱ་དྷུ་པུ་ཏྲའི་ལུགས་ལ་བགེགས་མཐར་བྱེད་ཡིན་དུ་ཆུག་ཀྱང༌། ཐུགས་ཀ་ནས་སྤྲུལ་པ་ཡིན་གྱི། ཤར་སྒོའི་སྒོ་སྲུང་དེ་སྒོ་གཡབས་སུ་འོངས་ནས་སློབ་མ་འཁྲིད་ཅིང༌། ཁྲོ་བོ་རང་གི་གནས་སྟོང་པར་འཇོག་པ་གཏན་ནས་མིན་པ་གོ་དགོས་སོ། །དེས་ན་ཁྲོ་བོ་དེས་སྒོ་གཡབས་སུ་སློབ་མའི་བྱུར་དང་སྐལ་ངན་བགེགས་བསྐྲད་ཅིང༌། རང་སྔགས་ཀྱིས་ཁྲིད་ནས་ཨཱ་ཁཾ་ཝཱི་ར་ཧཱུཾ་གིས་སྒོ་ནང་དུ་བཅུག་པ་ཙམ་ཞིག་བསམ་མོ།། །།གཉིས་པ་འཇུག་པ་ཉིད་ཀྱི་དངོས་གཞི་ཡོལ་བའི་ནང་དུ་འཇུག་ལ།སྐོར་བ་དང༌། ཕྱག་འཚལ་བ་དང༌། དམ་བཞག་དང༌། ཡེ་ཤེས་དབབ་ཅིང་བརྟན་པ་དང༌། བརྟུལ་ཞུགས་ཉེར་ལྔ་བཟུང་བ་དང༌། མིག་དར་མེ་ཏོག་གི་བྱ་བ་དང༌། ལྷ་ངོ་བསྟན་པ་སྟེ་བདུན་
ལས། དང་པོ་ནི། ཨོཾ་མ་ཧཱ་ར་ཏ་སོགས་ཏེ། འདི་ལ་གཞན་དག་སྐུ་དཀྱིལ་ལམ་ཐུགས་དཀྱིལ་གྱི་དཔངས་ཆུང་གི་སྟེང་ནས་སྐོར་བ་བྱེད་ཅེས་འདོད་ཀྱང་འདི་ཉིད་རང་ཁ་སྐོང་གི་ཆོ་ག་ཡིན་ཞིང༌། དཀྱིལ་འཁོར་གཞན་ལ་དཔངས་ཆུང་མ་བཤད་པས་ཅུང་ཟད་མི་འཐད་ལ། དེ་ལྟར་ན་གཞལ་ཡས་ཁང་གི་ཕྱི་རོལ་ཉིད་ནས་སྐོར་བ་བྱེད་པ་ཡིན་ནོ།། །།གཉིས་པ་ཕྱག་འཚལ་ལ་ཕྱག་ཚན་བདུན་ཡོད་ཅིང༌། བླ་མེད་ལུགས་སུ་སྦྱར་བ་ཡིན་པས་ཡོ་གའི་ཕྱོགས་བཞི་ཕྱག་འཚལ་གྱི་དམིགས་པ་ནི་སྦྱོར་མི་དགོས་ལ། མཁས་པ་ཁ་ཅིག་རྣམ་སྣང་གི་སྔགས་དེ་པཎྜི་ཏའི་བློས་སྦྱར་བའི་ཁ་སྐོང་ཡིན་ནམ་ཞེས་གསུངས་ཡང༌། གདན་བཞི་དང་རྡོ་རྗེ་མཁའ་འགྲོ་ལས་ཨོཾ་པཉྩ་ཊཱ་ཀི་ནི་པུ་ཛ་སོགས་གསུངས་པས་ཟིན་ཏེ་བློ་བཟོ་མིན་ནོ། །སྔགས་ཐ་མ་ནི་སེམས་ཅན་ཐམས་ཅད་བདག་ཉིད་སྒྲོལ་བའི་ཕྱིར་ཡོངས་སུ་འབུལ་ཞེས་པའོ། །གསུམ་པ་ནི། དེ་ནས་སྤྱི་བོར་རྡོ་རྗེ་བཞག་ཅེས་སོགས་ཏེ། དམ་བཞག་དང་པོ་གསུམ་སྣོད་མིན་ལ་གསང་བས་སྒོ་ནས་དམ་ལ་བཞག །བཞི་པ་དམ་ཚིག་མཐའ་དག་གིས་དམ་ལ་བཞག་པ་སྟེ་དམ་བཞག་གི་གཙོ་བོ་ཡིན། ལྔ་པ་ནི་དམ་ཚིག་གི་རྩ་བ་ཡིན་པས་བླ་མའི་དམ་ཚིག་གི་སྒོ་ནས་དམ་ལ་བཞག་པའོ།། །།བཞི་པ་ནི་དེ་ནས་ཡེ་ཤེས་དབབ་པ་སོགས་ཏེ་འདི་ལ་རྒྱུད་འགྲེལ་གྱི་དངོས་བསྟན་དང༌། དཀྱིལ་འཁོར་གྱི་ཆོ་ག་ཡེ་ཤེས་རྒྱལ་མཚོའི་དངོས་བསྟན་ལ། སློབ་མ་ལྷ་གང་དུ་བསྐྱེད་ཀྱི་གསལ་ཁ་མ་བྱུང་ཡང༌། དཀྱིལ་ཆོག་ལས་ཁྲོ་བོ་ཕེབས་པར་འགྱུར་གྱི་གསུངས་པ་དང༌། རྒྱུད་འགྲེལ་ལས་ཀྱང་ཁྲོ་བོ་འབེབས་པར་གསུངས་པ་ལྟར་ལོ་ཙྪ་བ་བློ་གྲོས་རྣམ་གཉིས་ཀྱིས་ཀྱང་ཁྲོ་བོའི་གཙོ་བོ་ཉིད་ཡིན་པའི་ཕྱིར་
རྡོ་རྗེ་ཤུགས་སུ་བསྐྱེད་པར་མཛད་ལ། གཞན་ཡང་དུས་འཁོར་བ་ཕལ་ཆེར་དེ་ལྟར་བཞེད་དོ། །ཆོས་རྒྱལ་ཕྱོགས་ལས་རྣམ་རྒྱལ་གྱིས་འོད་དཔག་མེད་དུ་བསྐྱེད་པར་མཛད་པ་ནི། སྔགས་འདི་ནི་དུས་འཁོར་རང་ལུགས་ཡིན་པས་བྱེད་དགོས་ལ། གཞན་འབྱུང་བཞིའི་དཀྱིལ་འཁོར་སོགས་འཕྲེང་བའི་ལུགས་ལྟར་བྱེད་ཕྱིན། ཁ་སྐོང་གྲབས་གཅིག་པར་བྱུང་ན་ལེགས་པར་དགོངས་པ་སྟེ། ཀུན་མཁྱེན་ཆེན་པོའི་དཀྱིལ་ཆོག་ཆུང་བ་ལས། རྡོར་ཤུགས་དང་འོད་དཔག་མེད་གདམ་ཁར་ཡང་གསུངས་པས་བཞེད་པ་མི་མཐུན་པ་ཡང་མ་ཡིན་ནོ། །དེ་ལ་འདིར་འོད་དཔག་མེད་དུ་བསྐྱེད་ཅིང་ཧཱུཾ་ཨཱཿཧ་ཛྷཻཿཡིག་གེ་རྣམས་འགོད་པ་འདི་གསང་འདུས་དང་གཤིན་རྗེ་གཤེད་ནག་པོ་སོགས་སུ་གསལ་བར་གསུངས། རྒྱུད་འདིར་ཡང་དོན་གྱི་འབྱོར་ཏེ། དབབ་བྱའི་ལྷ་རྡོ་རྗེ་བཞི་དང་ཡུམ་ལྔ་ཁྲོ་བོའི་དབང་པོ་དང་བཅས་པ་ཡིན་ལ། གཞན་སའི་སྙིང་པོ་སོགས་དེ་དག་ནི་ཞོར་བྱུང་ཡིན་པས་གཞི་རྟེན་མེད་ཀྱང་མི་འགལ་བས། རྡོ་རྗེ་བཞི་མཚོན་པའི་ཡི་གེ་བཞི་དང༌། ཡུམ་རྣམས་མཚོན་པའི་འབྱུང་བའི་དཀྱིལ་འཁོར་ལྔ་པོ་དག་སྟེ། རླུང་ལན་གཉིས་ཡོད་པས་གཅིག་ནམ་མཁའི་དོན་ནོ། །གང་ལ་བཀོད་པའི་གཞི་ནི་ཁྲོ་བོ་ཉིད་ཡིན་པས། དེ་དག་གང་རུང་ཞིང་འབེབས་པའི་གཞི་ཚང་བར་སྒོམ་པ་ཡིན་ཞིང༌། ལྷ་བཅུ་པོ་དེ་རྣམས་ཀྱི་ནུས་པ་ལས་སྐལ་བ་དང་འཚམ་པ་ཡིན་ན། ལྷ་གཞན་རྣམས་ཀྱང་དེ་དག་གིས་བསྐུལ་ནས་ཕེབས་པར་འགྱུར་ལ། བསྡུ་ན་ཁྲོ་བོའི་དབང་པོས་བསྐུལ་བས་ཁྲོ་བོ་ཉིད་འབེབས་སམ་གཞན་ཡང་འབེབས་པར་འགྱུར་བས། ལྷ་གཞན་རྣམས་ཀྱི་རྟེན་གཞི་མེད་ཀྱང་ཆོག་སྟེ། དེས་ན་གོང་མ་འགའ་ཞིག་
གིས་དམིགས་པའི་ཁྱད་པར་སྣ་ཚོགས་མཛད་པ་ལ། ཕྱིས་ཀྱི་འགའ་ཞིག་དགག་པ་བྱེད་དེ། མན་ངག་མ་ནོར་བ་ཡིན་ན་དགག་པར་མི་ནུས་སོ། །ཁྲོ་བོ་ཡང་ལས་འབྲེལ་སོ་སོའི་དབང་གི་ཁྲོ་བོ་བཅུ་གཅིག་པོ་གང་ལ་བརྟེན་ཀྱང་སྒྲུབ་ཏུ་རུང་མོད་ཀྱི། ལས་འབྲེལ་མངོན་ཤེས་ཀྱིས་མ་རྟོགས་ན་རྡོ་རྗེ་ཤུགས་ཉིད་བྱ་སྟེ་སྤྱི་ཁྱབ་ཡིན་པས་སོ། །དེ་ཡང་སློབ་མའི་ལྕེ་ལ་དམ་རྫས་བདུད་རྩི་ལྔ་བཞག །བདུད་རྩི་ལྔ་དང་སྒྲོན་མ་ལྔ་བསྒྲུབས་པའི་སྤོས་བདུག་ཅིང༌། སློབ་མ་དམིགས་པ་སྒོམ་དུ་བཅུག །སློབ་དཔོན་གྱིས་ཏིང་ངེ་འཛིན་གྱིས་གཟིར་བས་སློབ་དཔོན་རང་བྱིན་གྱིས་རླབས་པ་དང་ལྡན་ན་འབབ་པར་འགྱུར་རོ། །དེ་ཡང་སྔགས་ལ་སོགས་པའི་གྲངས་བཤད་ཚོད་དང་མཐུན་པ་དང༌། དཔོན་སློབ་གཉིས་གར་དམིགས་པ་ལས་མ་ཡེངས་པར་བྱའོ། །ཡེ་ཤེས་ཕེབས་པའི་རྟགས་ནི། དབང་ལེའི་གྱ་དགུ་པ་སོགས་ལས། ཁྲོ་བོའི་རྒྱལ་པོ་ཕེབས་ན་མཚོན་ཆས་མཛེས་པའི་ལག་པ་དག་གིས་བདུད་ཀྱི་ཚོགས་ལ་སྡིགས་བྱེད་ཅིང༌། གཡོན་བརྐྱང་ལ་སོགས་སྟབས་རྣམས་དང་ནི་རྣམ་མང་བྱེད་པ་རྣམས་ཀྱིས་རྡོ་རྗེའི་གར་གྱིས་གར་བྱེད་དེ། བཞད་དང་ཧཱུཾ་གི་ཡི་གེ་འདྲེས་པས་དགྲ་ལ་འཇིགས་པ་སྟེར་བ་དང་ནི་རྡོ་རྗེའི་གླུ་ཡང་བྱེད། ངོ་ཚ་མེད་ཅིང་དོགས་པ་མེད་པར་འགྱུར་ཏེ་ཡོན་ཏན་དབང་གིས་ལྷ་གཞན་རྣམས་ཀྱང་ཞི་བའོ། །སྐུ་ཕེབས་པས་ནི་རྣལ་འབྱོར་ལྡན་པ་རང་བཞིན་ཡོན་ཏན་དབང་གིས་སྐུ་ཡི་བྱ་བ་བྱེད་པ་སྟེ། གསུང་ཕེབས་པས་ནི་ལྷ་དང་འབྱུང་པོ་ལྷ་མིན་རྣམས་ལས་རྣམ་པར་རྒྱལ་བའི་སྨྲ་བ་པོ་རུ་འགྱུར། ཐུགས་ཕེབས་པས་ནི་གཞན་གྱི་སྙིང་ལ་གནས་པ་
དག་དང་བྱུང་དང་འབྱུང་པ་ཐམས་ཅད་ཤེས་པར་འགྱུར། ཡེ་ཤེས་ཕེབས་པས་སངས་རྒྱས་བླ་མ་ཡི་ཡང་བླ་མ་རྫུ་འཕྲུལ་ལྡན་པའི་སྟོན་པ་གཅིག་པུར་འགྱུར། ས་ཕེབས་པས་ནི་རྣལ་འབྱོར་པ་དག་རི་དང་མཚུངས་པར་འགྱུར་ཏེ་ཆུས་ཀྱང་བསིལ་བར་རབ་ཏུ་འགྱུར། མེ་ཕེབས་པས་ནི་སྲེག་པར་འགྱུར་ཏེ་རླུང་གིས་ཀྱང་ནི་དེ་བཞིན་སྐམ་པ་དག་ཏུ་རབ་ཏུ་འགྱུར། སྟོང་པ་ཕེབས་པས་མི་སྣང་བར་འགྱུར། ས་སྟེང་དུ་ནི་མཁའ་ལ་སྤྱོད་པ་ཉིད་དུ་རབ་ཏུ་འགྱུར། དེ་བཞིན་གཟུགས་ལ་སོགས་པ་ཐམས་ཅད་རང་བཞིན་ཡོན་ཏན་དབང་གི་རིམ་པ་ཡིས་ནི་རིག་པར་བྱ། ཞེས་གསུངས་ཏེ། སྐུ་རྡོ་རྗེ་ཕེབས་པས་སྐུའི་བྱ་བ་བྱེད་པ་ནི་ལྷའི་སྐུ་མཐོང་བ་དང༌། གསུང་ཕེབས་པས་མ་བསླབས་པའི་སྐད་སྨྲ་བ་དང༌། ཐུགས་ཕེབས་པས་མངོན་ཤེས་ཅུང་ཟད་འཆར་བ་དང༌། ཡེ་ཤེས་ཕེབས་པས་རྫུ་འཕྲུལ་ཅི་རིགས་པ་སྟོན་པ་སོགས་སྐབས་དེར་འབྱུང་བ་ཡིན་ལ། དེ་ལྟར་ཡེ་ཤེས་ཕེབས་པ་དེ་ཕྱིས་བསྒྲུབས་ན་ཚེ་དེ་ཉིད་ལ་སྐུ་ཕེབས་ན་ནམ་མཁའ་ལ་འགྲོ་ཞིང༌། ས་འོག་ཏུ་འཇུག་པ་དང༌། གསུང་ཕེབས་ན་འཇམ་དཔལ་ལྟར་སྨྲ་བའི་དབང་ཕྱུག་ཏུ་འགྱུར་བ་དང༌། ཐུགས་ཕེབས་པ་ལ་དུས་གསུམ་ཤེས་པ་དང༌། དེ་བཞིན་དུ་ཡེ་ཤེས་ཕེབས་ན་རབ་ཀྱིས་ཚེ་དེ་ལ་ས་བཅུའི་དབང་ཕྱུག་ཏུ་འགྱུར་ལ། ཐ་མ་དབང་པོ་ཇི་ལྟར་བརྟུལ་ཡང་རྫུ་འཕྲུལ་ལ་སོགས་པ་མངོན་ཤེས་ལྔ་དང་ལྡན་པ་རིག་པ་འཛིན་པར་ནི་ངེས་པར་འགྱུར་རོ། །དེ་ལྟར་ཡེ་ཤེས་འབེབས་པ་ཡང་སློབ་དཔོན་དེ་ལྷའི་རྣལ་འབྱོར་བརྟན་པ་དང༌། སྔགས་ཀྱི་བཟླས་པ་མཐར་ཕྱིན་
པས་ཀྱང་ཡིན་ལ། ངེས་པར་ན་ཐིག་ལེ་བརྟན་པའི་དམ་ཚིག་ལ་གནས་པ་དང༌། སྟོང་གཟུགས་ཀྱི་རྣལ་འབྱོར་ལ་བརྟན་པ་ཐོབ་པ་དགོས་པ་དང༌། སློབ་མའི་རྒྱུད་དག་པ་རྣམས་འཛོམ་ན། འདི་ལྟ་བུའི་ཡེ་ཤེས་པ་མཆོག་རྣམས་ཕེབས་པར་འགྱུར་གྱི་གཞན་དུ་ན་མ་ཡིན་ལ། གཞན་འཇིག་རྟེན་པའི་མཁའ་འགྲོ་མ་དང་སྲིན་པོ་སོགས་འབེབས་པ་ནི། བྱིས་པ་རྣམས་ཡིད་ཆེས་བསྐྱེད་པ་ཙམ་དུ་ཟད་ཀྱི་འབྲས་བུ་མཆོག་ཏུ་མི་ཐོབ་སྟེ། དེ་ཙམ་དུ་དཀོན་པ་དང་དཀའ་བ་ཡང་མ་ཡིན་ནོ། །འདིར་མཁས་པ་འགས་ཀྱང་སློབ་མ་རྡོ་རྗེ་ཤུགས་སུ་བསྐྱེད་ནས་ཕྱིས་རྡོ་རྗེ་ཆོས་ཆེན་པོ་ཞེས་དྲི་བ་བྱེད་པར་འཆད་པ་ནི། ཐུགས་མཉམ་པར་མ་བཞག་པ་སྟེ། རྡོ་རྗེ་ཆོས་ཏེ་འོད་དཔག་མེད་དུ་མ་བསྐྱེད་པའི་ཕྱིར་རོ། །གལ་ཏེ་ཡེ་ཤེས་དངོས་ཕེབས་ན་གཤེགས་གསོལ་བྱེད་པ་མི་འཐད། དེ་ལ་ངང་གིས་ཕེབས་པ་བཏང་སྟེ་ཉམས་སད་པར་འགྱུར་རོ། །འཕར་གཡོ་ལ་སོགས་པའི་ཉམས་ཡུན་རིང་དུ་མ་བཏང་ན། ཐབས་ཤེས་རིགས་དྲུག་གི་ས་བོན་བཀོད་ཅིང༌། སྤྱི་དང་མཐུན་པར་སྤྱི་བོར་རྡོ་རྗེ་རྒྱ་གྲམ་དུ་བཞག་པས་བརྟན་པར་བྱེད་དོ།། །།བཞི་པ་བརྟུལ་ཞུགས་ཉེར་ལྔ་སྦྱིན་པ་ནི། འཚེ་དང་སོགས་ཏེ་དེ་ཡང་རྡོ་རྗེ་སེམས་དཔའི་བརྟུལ་ཞུགས་ཉི་ཤུ་རྩ་ལྔ་ཞེས་བྱ་བ། ཡོད་པའི་སྡིག་པ་ལྔ། ཉེ་བའི་སྡིག་པ་ལྔ། གསོད་པ་ལྔ། འཁུ་བ་ལྔ། ཆགས་པ་ལྔ་སྟེ་ཉི་ཤུ་རྩ་ལྔ་པོ་འདི་རྣམས་ལས་ཟློག་པ་དཔལ་རྡོ་རྗེ་སེམས་དཔའི་དམ་ཚིག་གི་ཡན་ལག་ཡིན་པའི་ཕྱིར་བརྟུལ་ཞུགས་སུ་བསྲུང་དགོས་ལ། ཡེ་ཤེས་ཕེབས་པ་ཡང་ཡེ་ཤེས་ཀྱི་ཁྱད་པར་ཇི་སྙེད་པ་ཐམས་ཅད་རྡོ་རྗེ་སེམས་དཔའ་ཉིད་
ཀྱི་འཕྲིན་ལས་དང་ཡེ་ཤེས་ཡིན་པའི་ཕྱིར། རྡོ་རྗེ་སེམས་དཔའ་ཕབ་པར་འགྱུར་བས། དེའི་རྗེས་སུ་འདི་སྒྲག་སྟེ། དབང་དངོས་གཞི་མ་ཐོབ་ཀྱང་ཡེ་ཤེས་འབེབས་པའི་རིམ་པ་དངོས་དང་མོས་སྒོམ་གང་ཐོབ་ཀྱང་འདི་དག་བསྲུང་དགོས་སོ། །དེ་ཡང་ཡོད་པ་སྟེ་དངོས་པོའི་སྡིག་པ་ཞེས་བྱ་བ། ལས་དེ་ཉིད་ཀྱི་རང་ངོས་ནས་མི་དགེ་བ་ཡིན་པ་ནི། སྲོག་གཅོད་པ་འཚེ་བ་དང༌། མི་བདེན་པ་རྫུན་ཚིག་དང༌། གཞན་གྱི་བུད་མེད་བསྟེན་པ་སོགས་འདོད་པས་ལོག་པར་གཡེམས་པ་དང༌། གཞན་གྱི་ནོར་མ་བྱིན་པར་ལེན་པ་དང༌། ཆང་གི་བཏུང་བས་མྱོས་པར་བྱེད་པ་སྟེ། དེ་རྣམས་ཕྱོགས་མཐུན་ཆ་ལག་དང་བཅས་པ་སྤོང་དགོས་འདི་རྣམས་འཁོར་བའི་གནས་སུ་འཆིང་བྱེད་དམ་པོ་རྡོ་རྗེའི་ཞགས་པ་དང་མཚུངས་ཤིང༌། རང་གཞན་གྱི་བདེ་དགེ་ཕུན་སུམ་ཚོགས་པ་འཇོམས་པ་ཡིན་ལ། རྫོགས་ལྡན་ལ་སོགས་པ་གང་གི་དུས་སུ་བྱུང་བའི་ལྷ་དང་མི་ཡི་བླ་མ་སངས་རྒྱས་གང་ཞིག་རྣམ་གཟིགས་ལ་སོགས་པ་གང་ཡིན་པ་དེའི་མཚན་གྱིས་སྦྱིན་དགོས་པ་ལས། དེང་རྩོད་དུས་ཚེ་ལོ་བརྒྱ་པའི་གནས་སྐབས་སུ་བྱོན་པའི་སངས་རྒྱས་མཚན་ཤཱཀྱ་ཐུབ་པ་ཞེས་བྱ་བའི་བཀས་སྦྱིན་ལ། སྣ་ཚོགས་གཙོ་བོ་དུས་ཀྱི་འཁོར་ལོའི་བཀའ་འདི་སློབ་མ་ཁྱོད་ཀྱིས་སྐྱོང་བར་བྱེད་དགོས་ཏེ། དེའི་ཕན་ཡོན་ནི་སྲིད་པའི་འཇིག་པ་འཇོམས་པའི་དངོས་གྲུབ་ཐོབ་པ་དག་གོ །ཚིག་ཏུ་བརྗོད་པ་མདོར་བསྡུ་ན་ལྔ་པོ་དེ་ཙམ་བརྗོད་པས་གཞན་རྣམས་ཞོར་ལ་ཐོབ་པར་ཡང་འགྱུར་ན། རྒྱས་པར་སྤྲོ་བས་ཐམས་ཅད་བརྗོད་པར་བྱ་སྟེ། ཤོ་དང་མིག་མང་དང་དེ་དག་དང་འདྲ་བ་རྣམས་ནི་ཆོ་ལོ་རྩེ་བ་ཞེས་བྱ་ལ། ཁ་ན་མ་ཐོ་བ་དང་བཅས་པའི་ཟས་ནི། བཟའ་བ་དང་རིན་གྱི་དོན་དུ་བསད་པ་དང༌།
མཆོད་སྦྱིན་གྱི་ལྷག་མ་སོགས་མཚན་མ་དང་བཅས་པའི་ཤ་ནི་མཚོན་པར་བྱེད་པ་སྟེ། གཞན་ཡང་སྡིག་པ་དང་བཅས་པའི་ཟས་རྣམས་སོ། །མཚན་མའི་དོན་ཕྱུགས་ལ་རྟགས་བཏབ་པ་ལ་འཆད་པ་དོན་མིན་གྱི། ཆོས་མ་ཡིན་པ་ལ་ཆོས་སུ་ལོག་པར་རློམ་པ་ནི་མཚན་མ་སྟེ་མཚན་མའི་རྣམ་གཡེང་ཞེས་པ་བཞིན་ནོ། །ཚིག་ངན་ཀློག་པ་ནི་ཉོན་མོངས་པ་ཅན་གྱི་ཀུན་ནས་བླངས་པའི་ངག་འཁྱལ་སྣ་ཚོགས་དང༌། བྷཱ་ར་ཏ་སོགས་ཉོན་མོངས་པ་འཕེལ་པའི་བསྟན་བཅོས་ངན་པ་ཀློག་པ་ཡིན་ལ། འབྱུང་པོའི་ཆོས་ནི་མཚུན་འཐོར་བ་དང༌། མཆོད་སྦྱིན་དང༌། རིག་བྱེད་ལ་སོགས་པ་ཡིན་པར་བཤད་པ་དངོས་སུ་མཚུན་གསོལ་བ་ཉིད་དོ། །ལྷ་མིན་དབང་པོ་ནི་ཀླ་ཀློའི་ཆོས་ཏེ་བྱ་བ་ངན་པ་དེ་རྣམས་ཀྱིས་དུས་འདས་ན། དགེ་བའི་བར་གཅོད་ཆེན་པོ་ཡིན་པའི་ཕྱིར། ཉེ་བའི་སྡིག་པ་ལྔ་ཞེས་བྱའོ། །དེ་དག་གི་ནང་ན་ངག་འཁྱལ་དང༌། གནོད་སེམས་དང༌། འཚེ་བའི་ཆ་ཤས་སོགས་སྡིག་ལས་དངོས་ཀྱང་མང་ལ། ལུས་ངག་གི་བྱ་བ་འགའ་ཞིག་ལུང་མ་བསྟན་ཡང་ཡོད་མོད་ཀྱི། དགེ་བའི་བར་ཆད་ཉིད་ཀྱི་ཕྱིར་སྡིག་པ་ཞེས་བརྗོད་དོ།། །།གསོད་པ་ལྔ་ནི། བ་ལང་གསོད་པ། བྱིས་པ་གསོད་པ། བུད་མེད་གསོད་པ། སྐྱེས་པ་གསོད་པ་སྟེ་བཞི་ནི་སྔར་གྱི་འཚེ་བའི་ནང་ཚན་དངོས་ཡིན་ཡང༌། འདིར་ལོགས་སུ་སྨོས་པ་ནི་མུ་སྟེགས་བྱེད་མང་པོ་ཞིག་ཕྱིར་འཚེ་བ་སྡིག་པ་ཡིན་ཡང་མཆོད་སྦྱིན་གྱི་དོན་དུ་བ་ལང་གསོད་པ་དང༌། མ་མོ་མཆོད་པ་ལ་བྱིས་པ་གསོད་པ་དང༌། མི་གསང་མཆོད་སྦྱིན་གྱི་དོན་དུ་སྐྱེས་པའི་དོན་དུ་སྐྱེས་པ་དང༌། བུད་མེད་ཀྱི་དོན་དུ་བུད་མེད་གསོད་པ་ལ་སོགས་པ་སྡིག་པ་མེད་ཀྱི་སྟེང་དུ་དགེ་བར་འདོད་པ་རྣམས་དགག་པའི་དོན་དུ་དམིགས་གསལ་
མཛད་པ་ཡིན་ནོ།། །།ལྔ་པ་ལྷ་མིའི་བླ་མ་གསོད་པ་ནི། རྒྱལ་བ་སྲས་བཅས་ཀྱི་སྐུ་གཟུགས་དང་མཆོད་རྟེན་དང༌། བཀའི་གླེགས་བམ་འཇིག་པར་བྱེད་པ་སྟེ། དེ་ནི་སྤྱིར་སྡིག་པ་ཆེ་བས་སྤོང་དགོས་པར་མ་ཟད། ཀླ་ཀློ་རྣམས་ཆོས་སུ་འདོད་པ་དགག་པའི་དོན་དུ་གསུངས་སོ།། །།འཁུ་པ་སྟེ་ཁྲོ་བ་ལྔ་ནི། སྔར་འབྲེལ་ཅན་ལ་ཕྱིས་དྲི་ལོག་སྟེ་ཁྲོ་བ་ནི་འཁུ་བའི་དོན་ནོ། །དེ་ཡང་འཇིག་རྟེན་དང་སྦྲེལ་བའམ། ཆོས་ཀྱིས་སྦྲེལ་ཡང་རུང་སྟེ་མཉམ་པར་འགྲོགས་པའི་གྲོགས་པོ་དང༌། བཀུར་བར་འོས་པའི་རྗེ་བོ་དང༌། ལྷ་དང་མིའི་བླ་མ་སངས་རྒྱས་དང༌། དགེ་སློང་གི་དགེ་འདུན་དང༌། ཡིད་བརྟན་པར་འོས་པའི་ཡུལ་མཁན་སློབ་དང༌། བླ་མ་ཕལ་པ་རྣམས་ལ་ཁྲོ་ཞིང་འཁང་བའོ། །དེ་ལྟར་ཉི་ཤུ་ནི་འཕྲལ་སྤྱོད་ཀྱི་སྒོ་ནས་སྤངས་ཤིང་ཟློག་པ་ཞིག་དགོས་ལ། ཆགས་པ་ལྔ་ནི་མིག་གི་དབང་པོ་ཡུལ་གཟུགས་ལ་ཆགས་པ་སོགས། དབང་པོ་ལྔ་ཡུལ་ལྔ་པ་ཆགས་པ་ཞེས་བྱ་ན། དབང་ཤེས་ཀྱི་རྗེས་སུ་འབྲང་བའི་རྣམ་རྟོག་ཡུལ་ལ་ཆགས་པའོ། །དེ་ནི་སོ་སོ་སྐྱེ་བོ་འདོད་ཁམས་པ་རྣམས་ཀྱིས་རྩ་བ་ནས་ཟློག་པར་མི་ནུས་ཀྱང༌། དེའི་གཉེན་པོ་ཉིན་རེ་བཞིན་དུ་ཐུན་གསུམ་སོགས་སྒོམ་ པའོ། །གཉེན་པོ་ཡང་ཁྱད་པར་ཅན་དགོས་ཏེ་བསྐྱེད་རྫོགས་གཉིས་དང་འབྲེལ་པ་ལས། བསྐྱེད་རིམ་ལ་ཡུལ་དབང་ལྷ་སྐུར་ང་རྒྱལ་བྱེད་པ་དང༌། རྫོགས་རིམ་ལ་སོ་སོར་སྡུད་པའི་རྣལ་འབྱོར་གྱིས་སོ། །དེ་ལྟར་ན་ཁ་ཅིག་འདི་གང་ཟག་གི་ཁྱད་པར་རྫོགས་རིམ་གྱི་རྣལ་འབྱོར་པ་ལ་སོ་སོར་སྡུད་པའི་དམ་ཚིག་དུ་ཡང་འགྱུར་ཏེ། བརྟུལ་ཞུགས་ཀྱི་གཙོ་བོ་ཆགས་པ་ལྔ་སྤོང་ཐབས་སོར་སྡུད་ཡིན་ལ། སོར་སྡུད་རྡོ་རྗེ་སེམས་དཔའི་ལམ་དུ་བཤད་ཅིང༌། འདིར་ཡང་རྡོར་
སེམས་ཀྱི་བརྟུལ་ཞུགས་སུ་གསུངས་པའི་ཕྱིར་རོ། །ཞེས་འཆད་དེ་ལེགས་པར་ཡང་སེམས་སོ།། །།དྲུག་པ་མིག་དར་མེ་ཏོག་དང་འབྲེལ་བའི་བྱ་བ་རྣམས་ནི། ཨོཾ་དྭ་ད་ཤ་ནས་མིག་དར་དཀྲོལ། ཞེས་པའི་བར་ཏེ། དེ་ལ་གདོང་བཅིང་པའི་སྔགས་དེ་ཉིད་ཀྱིས་ཆས་སུ་འཇུག་པའི་གོས་ཀྱང་བགོ་བ་ཡིན་ན། རྒྱུད་ལས། ལུས་ལ་སེར་པོའི་གོས་དག་བྱིན་ཏེ་མིག་ནི་བསྒྲིབ་པར་གྱུར་པའི་སློབ་མ་འདིར་ནི་གཞུག་པར་བྱ། །ཞེས་འབྱུང་བ་ལས་ཚིག་དེའི་དངོས་བསྟན་ལྟར་སྔོན་དུ་གོས་སྐོན་པའི་རྗེས་ལ་མིག་དར་བཅིངས་ཀྱང་ཆོག་མོད། སྤྱིར་ནི་དེ་ཚིག་གི་བརྗོད་ཚུལ་ཙམ་ཡིན་གྱི། མཐའ་གཅིག་ཏུ་སྔ་ཕྱིའི་རིམ་པ་སྟོན་པའང་མིན་པས། མིག་དར་གྱི་རྗེས་སུ་གོས་གཡོགས་ཀྱང་རུང་ལ་དུས་མཉམ་དུ་བྱས་ཀྱང་ཆོག་གོ །གཞན་དག་གིས་སྦྱིན་པའི་སྐབས་འདིར་འཕྲེང་བ་ལྟར་ཆས་འཇུག་གསུམ་བོ་དྷི་ཨ་ལཾ་ཀ་ར་སོགས་ཀྱི་སྔགས་དང་སྦྱར་ནས་བྱེད་པ་ཡོད་ཀྱང༌། རང་ལུགས་ཀྱི་སྔགས་བོར་ནས་ལུགས་གཞན་བླངས་པར་སོང་བས་ཅུང་ཟད་མི་ལེགས་སོ། །འདིར་མིག་དར་དང་ལུས་ལ་བགོ་བའི་གོས་ནི། མཆོག་སྒྲུབ་ལ་དམར་པོ་དང་སེར་པོ་གང་རུང་ཡིན་ཞིང༌། ལས་སོ་སོ་གཙོ་བོར་སྒྲུབ་པ་ལ་ནི་ལས་མཐུན་གྱི་ཁ་དོག་སྟེ་ཞི་རྒྱས་ལ་དཀར་པོ་ལ་སོགས་པའོ། །དེ་ཡང་དྭ་ད་ཤ་སོགས་ཀྱི་སྔགས་དོན་ཡན་ལག་བཅུ་གཉིས་འགོག་པར་བྱེད་པ་ཞེས་པ་ཡིན་པས། མིག་དར་དང་གོས་ཀྱིས་གཡོགས་པ་ནི། འཁོར་བའི་རང་བཞིན་རྟེན་འབྲེལ་ཡན་ལག་བཅུ་གཉིས་ཀྱི་རྩ་བ་ལས་རླུང་འཕོ་ཆེན་བཅུ་གཉིས་པོ་ཕྱིར་རྒྱུ་བ་མེད་པར་ནང་ཨ་ཝ་དྷཱུ་ཏཱིར་དགག་པ་མཚོན་པས་དོན་མ་རིག་པའི་སྣང་བ་ཐམས་ཅད་འགག་པའི་རྟེན་འབྲེལ་བསྒྲིགས་པའོ། །
འདིར་ལུས་ལ་གོས་སྦྱིན་པ་ནི། སྟོད་གཡོགས་སྨད་གཡོགས་གཉིས་ཡིན་པར་གསལ་ལ། ཐོར་ཚུགས་བཅིང་བ་ནི་མ་གསུངས་པས་མི་དགོས་མོད། གལ་ཏེ་བྱེད་ན་སྔོན་པོ་མི་བྱ་སྟེ་དམར་སེར་གང་རུང་གིས་བྱ་ལ། ཐམས་ཅད་ལ་སྔགས་ནི་མིག་དར་གྱི་སྔགས་ཁོ་ནའོ། །དེ་མ་ཐག་དཀྱིལ་འཁོར་ལ་བསྐོར་བ་བྱས་པར་མོས་པའམ་དངོས་སུ་བྱ་སྟེ། འགྲེལ་ཆེན་ལས། དེ་ནས་དང་པོར་མིག་བཀབ་ནས་དགེ་བའི་གྲོགས་ལ་སོགས་པས་དཀྱིལ་འཁོར་ལ་ལན་གསུམ་བསྐོར་ཏེ་ཞེས་གསུངས་སོ། །ཡང་འདི་སྐད་གསུངས་ཏེ། དུང་གི་ཆུས་སློབ་མའི་མགོ་ལ་བསངས་གཏོར་བྱས་ཏེ། །ཨོཾ་ཨཱཿཧཱུྃ། ཞེས་པ་ཡི་གེ་གསུམ་གྱིས་ལན་བདུན་མངོན་པར་བསྔགས་པའི་མེ་ཏོག་ཞིག་དེའི་ལག་པའི་པདྨ་སྦྱར་བར་ཀུན་ཏུ་སྦྱིན་པར་བྱ་ སྟེ། །ཞེས་སློབ་མ་བསང་བ་དང་མེ་ཏོག་གཏད་པ་བཤད་དོ། །དེ་རྗེས་སྤྱི་རྒྱུད་ལས་འབྱུང་བའི་བདེན་སྟོབས་བརྗོད་པ་ཡིན་ཏེ། སྤྱི་འགྲོས་ཀྱི་ཁ་སྐོང་ཡིན། དེ་ནས་མེ་ཏོག་དོར་བ་དང་མིག་དར་དབྱེ་བ་དུས་མཉམ་དུ་བྱེད་པའམ། སྤྱི་དང་མཐུན་པར་ཐོག་མར་མེ་ཏོག་དོར། ཕྱིས་མིག་དར་དཀྲོལ་ཡང་རུང་བ་ཡིན་ལ། གང་དག་མིག་དར་ཐོག་མར་ཕྱེ་ནས་མེ་ཏོག་ཕྱིས་འདོར་བ་ནི། སྐབས་འདིར་མ་ཡིན་ཏེ། སྦྱངས་བྱའི་རིམ་པ་དང་ཡང་མི་འགྲིག་ཅིང༌། དགོས་པ་གཞན་ཡང་མེད་ལ། མིག་གིས་མཐོང་ན་ལྷ་མཚན་གདམ་དུ་རུང་བ་སོགས་དགག་བྱ་ཅུང་ཟད་འབྱུང་སྲིད་པས་སོ། །སྐབས་འདི་དག་གི་སྟོད་སྨད་དུ་ནམ་མཁའི་ཁ་དོག་དྲི་བ་ནི། འགའ་ཞིག་དག་བྱེད་མོད་ཀྱང་དེ་ནི་མི་དགོས་ཏེ། དེའི་དོད་གོང་དུ་སོ་ཤིང་དོར་བ་ཉིད་འདི་བའི་རང་ལུགས་ཡིན་པའི་ཕྱིར་དང༌། དེང་སང་གི་དཔོན་སློབ་ལ་དེ་བས་སོ་ཤིང་འདོར་བ་འདི་
མཆོག་ཡིན་ཏེ། དེ་ལ་ནི་མོས་པ་ཙམ་ལས་མེད་ལ། འདི་ལ་ནི་དངོས་སུ་བརྟག་རྒྱུ་ཡོད་པའི་ཕྱིར་རོ། །གང་ཡེ་ཤེས་པ་དངོས་ཕེབས་པ་དེ་ལ་ནམ་མཁའི་ཁ་དོག་བརྟག་པ་དངོས་སུ་ཡོད་ཀྱི། གཞན་དུ་མ་ཡིན་ཏེ་འདི་ནི་སྤྱིའི་ལུགས་ཡིན་ལ། དེང་སང་གི་སྔགས་པ་ལ་དེ་ཡང་རྒྱ་ལམ་ཙམ་ནའོ། །དེ་ལ་འདིར་མེ་ཏོག་གང་ལ་འབུལ་བ་ནི། མོས་པས་དཀྱིལ་འཁོར་དངོས་ལ་འབུལ་བ་ཡིན་ཡང་གལ་ཏེ་མེ་ཏོག་དོར་བས་རྡུལ་ཚོན་གྱི་རི་མོ་ཉམ་པར་གྱུར་ན། མཆོད་རྟེན་བཤིག་པའི་རིགས་སུ་གཏོགས་པའི་ཉེས་པ་ཡོད་པའི་ཕྱིར། ཆོས་འདིའི་ལུགས་ལ་རྡུལ་ཚོན་གྱི་དཀྱིལ་འཁོར་དུ་མེ་ཏོག་མི་འདོར་ལ། རིས་བྲིས་ལ་ནི་དགག་བྱ་དེ་མེད་པས་འདོར་དུ་ནི་རུང་ཙམ་དུ་མངོན་ཞིང༌། བློས་སློངས་ཆུང་ངུ་ལ་ནི་དགག་བྱ་དེ་མེད་ཀྱང༌། ལྷའི་མཚན་མའི་གནས་སུ་མི་ཕྱིན་པས་རྡུལ་ཚོན་བཞིན་དུ་བྱ་བར་རིགས་སོ། །འོན་ཀྱང་འདིའི་ལུགས་ལ་བྲིས་པའི་དཀྱིལ་འཁོར་ཁོ་ན་ལ་འདོར་དགོས་པའང་མིན་ཏེ། ཁྲུ་སྟོང་དང་ལྡན་པའི་དཀྱིལ་འཁོར་ལ་མེ་ཏོག་འཕངས་ཀྱང་གཞལ་ཡས་ཁང་གི་ནང་དུ་སླེབ་པ་མི་འབྱུང་སྟེ། རྡོ་རྗེའི་རྭ་བ་བརྒལ་ཙམ་འབྱུང་ལ་རག དེའི་ཕྱིར་ཕྱི་རོལ་ཏུ་རིགས་བརྟགས་པས་ཆོག་ཅིང་དེ་ཡང་ཙར་ཙི་ཀཱ་སོགས་རེ་རེ་ནས་བརྟག་མི་དགོས་ཀྱི། རིགས་ཐམས་ཅད་རྒྱལ་བ་རིགས་ལྔར་འདུས་པ་རིགས་དང་རིགས་ཅན་གྱི་དབྱེ་བ་གཞན་དུ་བཤད་ཟིན་པ་ལྟར་ཤེས་པར་བྱས་ནས། དཔེར་ན་རྣམ་སྣང་གི་མཚན་མ་ལ་མེ་ཏོག་ཕོག་ན། སྤྱན་མ་ས་སྙིང་རེངས་བྱེད་དབང་པོ་སོགས་ལས་གང་མོས་པ་དེ་འགྲུབ་པར་འགྱུར་ཏེ། དེས་གཞན་རྣམས་ལའང་རིགས་འགྲེའོ། །དེ་ལ་རྣམ་རྒྱལ་ཆེན་པོའི་སྟེང་དུ་རིགས་ལྔའི་མཚན་མ་འགོད་
ཅེས་པའི་དོན། མཉྫི་ལྟ་བུ་སྟེགས་བུ་མཐོ་བ་ཞིག་རྒྱལ་བའི་བུམ་པ་རྣམ་རྒྱལ་ཆེན་པོ་དང་བཅས་པའི་མདུན་དུ་བཞག་ནས། དུང་ཆོས་ལས་སྟེགས་བུ་དེ་མཐོ་བ་བྱེད་པ་ནི་སྟེང་དུ་ཞེས་པའི་དོན་ཡིན། སྟེགས་བུ་དེའི་སྟེང་དུ་རིགས་ལྔའི་ཕྱག་མཚན་བྲིས་འབུར་གང་རུང་ཞིག་འགོད། དེ་ཡང་རྡུལ་ཚོན་གྱི་པདྨ་འདབ་བརྒྱད་ལ་དབུས་སུ་རྡོ་རྗེ་ཤར་དུ་རལ་གྲི །ལྷོར་ནོར་བུ། ནུབ་ཏུ་འཁོར་ལོ། བྱང་དུ་པདྨ་རྣམས་ཕྱོགས་མདོག་ཅན་དུ་འབྲི་བའི་ལག་ལེན་འདུག་ཀྱང༌། སོ་སོར་པདྨ་ཉི་ཟླའི་གདན་རེ་བྱས་ན་ལེགས་པར་མངོན་ཏེ། ཤར་བྱང་གཉིས་སུ་ཟླ་བ་དང༌། ལྷོ་དབུས་ནུབ་གསུམ་དུ་ཉི་གདན་བྱས་ན་ལེགས་ སོ། །རྣམ་རྒྱལ་བུམ་པའི་སྟེང་དུ་མེ་ཏོག་འབུལ་ཞེས་པ་ལྟར་ན། བུམ་པ་ལྔའི་ཕྱོགས་ལ་དུང་ཆོས་རྣམ་རྒྱལ་ཡིན་པས་དེ་ལྟར་གསུངས་པ་སྟེ། གང་ལྟར་ཡང་དབང་བསྐུར་བའི་དུང་ཆོས་ཉིད་ཡིན་ནོ། །དེ་ཡང་ཤར་ཕྱོགས་ཅུང་ཟད་མཐོ་བ་ལ་མཎྜལ་བཞག་ན་སྟེང་གི་དོན་དུ་འགྱུར་ཞིང༌། ཡང་ན་སྟེགས་བུ་མཐོ་བ་བུམ་པའི་སྟེང་དུ་ཡོད་པ་བྱས་ཀྱང་ལེགས་མོད། འགའ་ཞིག་ལྟར་བུམ་མཚན་ནམ་དུང་ཆོས་ཀྱི་མཚན་མ་ལ་མེ་ཏོག་འདོར་བ་ནི་ལག་ལེན་ནོར་བའོ། །འཕྲེང་བ་ལ་སོགས་པ་ཆོ་ག་གཞན་ལས་དང་པོར་སློབ་མའི་ལག་ཏུ་མེ་ཏོག་ཆུན་པོའམ་འཕྲེང་བ་གཏད། ཕྱིས་མེ་ཏོག་འབུལ་བ་ན། དེའི་ནང་ནས་ཡང་ཞིང་མ་རྙིང་པའི་མེ་ཏོག་ཕྲ་མོ་ཞིག་འཐོར་བར་བཤད་པ་དེ་ཁ་ཅིག་དུས་འཁོར་ལ་ཡང་སྦྱོར་བ་ནི། ཡང་བ་དང་ཕྲ་མོ་འཐོར་དགོས་པའི་རྒྱུ་མཚན་རྡུལ་ཚོན་གྱི་རི་མོ་ཟུབས་ཀྱི་དོགས་པ་སྟེ། རྡུལ་ཚོན་ལ་དངོས་སུ་འཐོར་བའི་དབང་དུ་བྱས་པ་ཡིན་ལ། འདིར་དཀྱིལ་འཁོར་ལ་དངོས་སུ་མི་འབུལ་བས་དེ་ལྟ་བུ་མི་དགོས་པའི་གནད་མ་གོ་བའོ། །མེ་ཏོག་སྤྱི་བོར་
འཆིང་བའི་སྔགས་དང༌། མིག་དར་འབྱེད་པའི་ཚིགས་བཅད་ནི་གཞན་གྱི་ཁ་སྐོང་ཡིན་ལ། མེ་ཏོག་དོར་བའི་སྔགས་དང་གདོང་རས་འབྱེད་པའི་སྔགས་ནི་ཐུན་མོང་མ་ཡིན་པའོ།། །།བདུན་པ་ལྷ་ངོ་བསྟན་པ་ནི། སྤྱི་རྒྱུད་ལས་འབྱུང་བའི་ད་ནི་དད་པའི་ཤུགས་ཀྱིས་སོགས་ཏེ། ལྟ་བར་བསྐུལ་བ་དང་སྤྲོ་བ་བསྐྱེད་ནས། བདག་འཇུག་གི་སྐབས་སུ་ལྷ་ཚོགས་ཐམས་ཅད་མཐོང་བར་མོས་པ་ཙམ་གྱིས་ཆོག་ལ། སློབ་མ་དབང་བསྐུར་གྱི་དུས། གཞལ་མེད་ཁང་ཐོག་མར་བཤད། དེ་ནས་ལྷ་ཚོགས་ཐམས་ཅད་རྒྱས་པར་སྟོན་དགོས་པ་ཡིན་ཞིང༌། མདོར་བསྡུས་པ་ལ་ཡང༌། ཐུགས་དཀྱིལ་གྱི་ལྷ་ཚོགས་རྣམས་རྒྱས་པར་སྟོན་དགོས་ལ། གཞན་རྣམས་མཚན་ཙམ་བརྗོད་པས་ཀྱང་རུང་ངོ༌། དེ་ནས་ཨོཾ་རྡོ་རྗེའི་དཀྱིལ་འཁོར་དཀྱིལ་འཁོར་ཆེན་པོ་སོགས་རྡོ་རྗེ་སྙིང་རྒྱན་ལས་འབྱུང་བ་ལྟར་བརྗོད་པ་ནི། དཀྱིལ་འཁོར་དེ་ལྟ་བུ་མཐོང་བས་སློབ་མ་རང་ཉིད་རབ་ཏུ་དགའ་མགུ་རངས་པའི་ཆེད་དུ་བརྗོད་པ་སྟེ། ཚིགས་བཅད་གོང་འོག་དེ་གཉིས་ཀྱང་གསང་བ་སྤྱིའི་ཆོ་ག་ལས་བྱུང་བའོ།། །།གཉིས་པ་དངོས་གཞི་ཐོགས་མ་བྱིས་པ་འཇུག་པའི་དབང་བདུན་བཤད་པ་ནི། དཀྱིལ་ཆོག་ལས་བདག་འཇུག་གི་སྐབས་སུ། དངོས་གཞི་ལ་བྱིས་པ་འཇུག་པའི་དབང་བདུན་ཞེས་པ་ནས། དེ་དག་ནི་བྱིས་པ་འཇུག་པའི་དབང་གི་ཆོ་གའོ་ཞེས་པའི་བར་དང༌། སློབ་མ་དབང་བསྐུར་བའི་ཆོ་གའི་སྐབས་སུ། དབང་རྫས་ལྷའི་ངོ་བོར་བསྒོམ་ཞིང་ཞེས་པ་ནས། ཁ་སྐོང་དང་བཅས་པ་རྒྱས་པར་འགྱུར་རོ་ཞེས་པའི་བར་ལེགས་པར་སྦྱར་ནས་བློ་ཡུལ་དུ་ངེས་པར་བྱའོ། །འདི་ལ་དབང་བདུན་གྱི་ཆོ་ག་སྤྱིའི་དོན་དང༌། བྱ་བའི་རིམ་པ་སོ་སོའི་དོན་གཉིས་སོ། །དང་པོ་ལ་ལྔ་སྟེ་ཐུན་མོང་མ་ཡིན་པའི་ཆོ་ག་ངོས་བཟུང༌།
དབང་བསྐུར་བྱའི་རྟེན་གྱི་ལྷ་ལ་དཔྱད། ཆོ་ག་གཞན་གྱིས་རིགས་བསྒྲེ་བར་འདོད་པ་ལ་བརྟག །དབང་བདུན་གྱི་ལྷའི་བཞུགས་གནས་ལ་དཔྱད། རང་ལུགས་ཀྱི་བཞེད་པ་འགའ་ཞིག་བརྗོད་པའོ།། །།དང་པོ་ནི། དེ་ལ་རྒྱུད་ཀྱི་རྒྱལ་པོ་འདི་ཉིད་ཀྱི་ཐུན་མོང་མ་ཡིན་པའི་ལུགས། གཞན་གྱི་ཁ་སྐོང་ལ་མ་བལྟོས་པར་བྱེད་ན། དབང་གི་དོན་དུ་མཎྜལ་དང་ཡོན་ཕུལ། བྱང་སྒོའི་ཐད་དུ་བཞག་ནས་ཆུ་དབང་གི་སྒོས་ཀྱི་གསོལ་བཏབ་བྱས། ཡུམ་ལྔའི་སྔགས་ཀྱིས་བུམ་ཆུ་དུང་ཆོས་སུ་བསྡུས། ས་བོན་ལྔ་ལས་ལྷ་མོ་ལྔའི་ངོ་བོར་མོས། དུང་གི་ཆུ་ཁོ་ནས་དབང་བསྐུར་བས་སློབ་མའི་ཁམས་ལྔ་པོ་ཡུམ་ལྔར་སོང་བར་བསམས་ཏེ་སྐུའི་རྣམ་པ་བསྐྱེད། རིམ་པ་དེ་ཀའི་ཅོད་པན་སོགས་རིགས་བསྒྲེས་ཏེ། རྗེས་གནང་འཁོར་ལོའི་དབང་བསྐུར་བའི་བར་དུ་གཞན་ཐམས་ཅད་འདྲ་བ་ལས། དཀྱིལ་འཁོར་གྱི་བྱང་དུ་ཆུ་ཅོད། ལྷོར་དར་དྲིལ། ཤར་དུ་བརྟུལ་ཞུགས་དང་མིང༌། ནུབ་ཏུ་རྗེས་གནང་སྦྱིན། འདོགས་ལ་ངོས་བཟུང་གི་གནས་མེད་དོ། །དབང་གཞན་རྣམས་ལ་ཆུ་དབང་དེ་སྔོན་དུ་འགྲོ་བ་དང༌། རྡོར་དྲིལ་ལ་སྔ་ཕྱི་གཉིས་ཀར་ལ་ཆུ་དབང་བསྐུར། མིང་དབང་གི་མཐར་གསང་མིང་འདོགས། རྗེས་གནང་གི་ཡན་ལག་ཏུ་སྔགས་ཀྱི་རྗེས་གནང་དང་བཀའི་གནང་བ་ཙམ་སྦྱིན། ང་རྒྱལ་བཟུང་ནས་སློབ་མའི་ལག་ཏུ་རྡོར་དྲིལ་གཏད། དག་པའི་ཆོས་བཤད། ལྟུང་བ་བསྒྲགས་ཏེ་དུས་གོ་བར་བྱེད་པ་ཙམ་ཞིག་གསུངས་སོ། །དེ་ལ་གཞན་གྱི་ཁ་སྐོང་མ་ཡིན་ཡང་ཤུགས་ལ་ཐོབ་པ་ནི། དབང་ལྷ་སྤྱན་འདྲེན་ཅིང་མཆོད་པ་དང༌། དབང་རེ་རེ་བཞིན་ནམ་ངེས་པར་ཆུ་དབང་ཉིད་ལ་ཤིས་བརྗོད་སྔོན་དུ་འགྲོ་བ་དང༌། དབང་རྫས་དང་སློབ་
མའི་ལྷ་ལ་ཡེ་ཤེས་པ་བསྟིམ་པ་དང༌། སློབ་མ་ལ་མཆོད་པ་འབུལ་བ་རྣམས་ངེས་པར་ཐོབ་བོ། །རྗེས་གནང་གི་འདོགས་ཀྱི་དངོས་གཞི་ནི། དུས་འཁོར་རང་ལུགས་ལ་དག་པའི་ཆོས་བཤད་པ་ཁོ་ན་ཡིན་ཏེ། དཀྱིལ་ཆོག་གཞན་གྱི་ལུགས་ཀྱི་སྤྱོད་པའི་བརྟུལ་ཞུགས་ཀྱི་དོད་དོ། །གལ་ཏེ་སློབ་མ་དག་ཡིད་ཆེས་ཤིང་མོས་ན་འདི་ཙམ་གྱིས་གོ་ཆོད་པར་མ་ཟད། གཅིག་ཏུ་ན་ཁ་སྐོང་ཅན་ལས་འདི་མཆོག་ཡིན་ཏེ། རང་ལུགས་ཡོངས་སུ་རྫོགས་ཤིང་གཞན་གྱིས་བསྲེ་བསླད་མེད་པའི་ཕྱིར་རོ།། །།གཉིས་པ་ནི། བྱིས་འཇུག་གི་སྐབས་འདི་ལ་རྡོ་རྗེ་བཞིར་བསྐྱེད་པ་དགོས་སམ་མི་དགོས་སྙམ་ན། འདི་ཡང་རྒྱ་གར་བ་འགའ་ཞིག་དང་བོད་སྔ་ཕྱི་ཕལ་ཆེར་གྱིས་མཛད་པ་ནི་ཡིན་ཏེ། དག་སྦྱོར་ལ་བལྟོས་ནས། ཚུལ་དང་མཐུན་པ་ཙམ་ཡིན་གྱིས་ངེས་པར་དགོས་པ་ནི་མ་ཡིན་ནོ། །དེས་ན་མདོར་བསྡུས་པའི་ཚེ། སློབ་མ་དཔལ་དུས་ཀྱི་འཁོར་ལོ་ཡབ་རྐྱང་ཕྱག་གཉིས་པ་ལྟ་བུར་བསྒོམས་ཀྱང་ཤིན་ཏུ་བཟང་བ་ཡིན་ནོ།། །།གསུམ་པ་ནི། དེང་སང་ཕལ་ཆེར་སྤྲོས་པ་ཅན་ལ་དགའ་བའི་དབང་དུ་བྱས་ན། ཁ་སྐོང་ཅུང་ཟད་བྱས་ཀྱང་མི་འགལ་བ་ལྟར་འདིར་ཡང་བྱ་ལ། གཞན་གྱིས་རྒྱས་འགེབས་དང་ཁ་སྐོང་ཧ་ཅང་ཐལ་བ་ནི་མི་ལེགས་པས་མི་བྱེད་དོ། །དེ་ཡང་གང་སྙམ་ན་སློབ་མའི་ཕུང་ཁམས་དང་དབང་རྫས་ཀྱི་ཆ་ཤས་རེ་རེ་བཞིན་ཉིས་སྡེབས་ཉིས་སྡེབས་ཀྱི་ལྷར་བསྐྱེད་པ་དང༌། ཡུམ་ལྔ་ལ་བརྟེན་ནས་ཆུ་དབང་བསྐུར་བའི་སྔགས་དེ་ཁོ་ན་ཐམས་ཅད་ལ་བརྟན་བྱེད་དུ་བཟླ་བ་སོགས་སྤྲོས་པ་མང་པོ་དེ་དག་ཡིན་ལ། གཞན་སློབ་མ་
ལ་དབང་སོ་སོ་བསྐུར་བའི་རྗེས་སུ་མདུན་བསྐྱེད་ཐུགས་དཀྱིལ་གྱི་ལྷ་ཚོགས་ནས་རིགས་མཐུན་པའི་ལྷ་སྤྱན་དྲངས་ཏེ། སློབ་མའི་ལྷ་ལ་བསྟིམ་པ་ནི། ཆོ་ག་གཞན་གྱི་ཁ་སྐོང་མིན་ཡང་བོད་རྙིང་པ་འགའ་ཞིག་གིས་ཟབ་ཟབ་ལྟར་བྱས་པ་ལ། ཕྱི་མ་ཐམས་ཅད་ཀྱིས་ཁྱད་ཆོས་ཡིན་པར་འཁྲུལ་ཏེ་ཁུངས་མེད་ངོ་སོར་འཁྱེར་བར་བྱེད་ལ། ཡང་སོ་སོའི་དབང་བསྐུར་བའི་རྗེས་སུ་དེའི་དག་འབྲས་ལ་སློབ་མའི་ཕུང་ཁམས་སོགས་ལྷར་བསྐྱེད་པ་ཆོས་འདི་ཉིད་ཀྱི་རང་ལུགས་ཡིན་ཞིང༌། རྭ་འབྲོ་སོགས་གོང་མ་རྣམས་བཞེད་པ་ལ། དེ་བཀག་ནས་སྤྱི་ལུགས་དང་མཐུན་པའི་བསྐྱེད་ཆོག་བྱེད་པ་ཡང༌། རང་ལུགས་བོར་ནས་གཞན་ལུགས་ལ་ཞུགས་པ་ཡིན་པས་ཆེས་མི་འཐད་ལ། གཞན་གྱི་རྒྱས་འགེབས་རྒྱ་གར་པ་འགའ་ཞིག་གིས་ཀྱང་མཛད་དོ་སྙམ་ན། བླུན་པོ་རྒྱ་གར་ན་ཡང་ཡོད་ཅེས་པའི་དཔེ་དང༌། རིག་པའི་གནས་ལྔ་ལ་བྱང་བ་ཡིན་དུ་ཆུག་ཀྱང། མཁས་པའི་མངོན་པའི་ང་རྒྱལ་གྱིས། རྒྱུད་ཀྱི་དོན་འཆད་ཅེས་པའི་མཚན་གཞི་ངོས་ཟིན་དགོས་སོ།། །།བཞི་པ་ནི། ཡང་ཁ་ཅིག་སྤྱི་དང་ཁྱད་པར་གྱི་ལྷ་གཉིས་ཀར་བསྐྱེད་པའི་ལུགས་ལ། ཁྱད་པར་གྱི་ལྷའི་གནས་ངེས་མེད་དུ་བྱེད་དེ། དཔེར་ན་ཆུ་ཅོད་གཉིས་ལ་སྤྱིའི་ལྷ་ནི་སྐུ་རྡོ་རྗེར་བསྐྱེད་པ་ཡིན། ཆུ་དབང་གི་སྐབས་སུ་སློབ་མའི་ཁམས་ལྔ་ཡུམ་ལྔར་བསྒོམས་པ་ན་ལྷ་ཞལ་ཕྱག་གི་རྣམ་པ་ཅན་དུ་བྱེད་པ་དེ། ཁམས་ལྔ་ཉིད་ལྷར་སྒོམ་པ་ཡིན་གྱི། གནས་གང་དུ་སྒོམ་པའི་ངེས་པ་མི་དགོས་ཟེར་བ་ནི་ཤིན་ཏུ་འགལ་ཏེ། དེའི་ཚེ་ནམ་ཡུམ་ལྔར་བསྐྱེད་པ་ན། ཡུམ་ལྔ་ལ་ང་རྒྱལ་ཞུགས་ཏེ། སྐུ་རྡོ་རྗེ་མི་དམིགས་པར་བྱེད་ཀྱང་མི་
འཐད་དེ། དབང་གི་དོན་དུ་བསྐྱེད་པའི་ལྷ་དེ་བྱ་བ་གང་ཡང་མ་བྱས་པའི་ཕྱིར་རོ། །སྐུ་རྡོ་རྗེ་ཉིད་ཞུ་ནས་ཡུམ་ལྔར་སོང་བར་བྱེད་ཀྱང་མི་འཐད་དེ། ཁུངས་དང་རྒྱུ་མཚན་གང་ཡང་མེད་པའི་ཕྱིར་རོ། །སྐུ་རྡོ་རྗེ་ནི་རང་ཉིད་ཡིན་ལ། ཡུམ་ལྔ་མདུན་བསྐྱེད་ལྟར་བྱས་ཀྱང་མི་རུང་སྟེ། མདུན་བསྐྱེད་དབང་བསྐུར་བའི་སློབ་མ་ལ་དབང་བསྐུར་བར་མི་འགྲོ་བ་གྲགས་ཤིང་གྲུབ་པའི་ཕྱིར་རོ། །ཐོག་མ་སྐུ་རྡོ་རྗེ་རང་ཡིན་ཡང་ཕྱིས་ཡུམ་ལྔ་ལ་ང་རྒྱལ་ཞུགས་པ་ན། སྐུ་རྡོ་རྗེ་ཕྱི་ལོགས་སུ་བཞག་པས་ཀྱང་མི་ཡོང་ལ། ལྷ་མོ་ལྔ་ལ་དུས་མཉམ་དུ་ང་རྒྱལ་བྱེད་པ་ཡང་མོས་སྒོམ་ཙམ་མ་གཏོགས། ལས་དང་པོ་པ་ལ་བློ་ཡུལ་དུ་འཆར་བར་དཀའ་བས། ཡུམ་ལྔ་ཞལ་ཕྱག་ཅན་བསྐྱེད་ཕྱིན་གནས་ངེས་མེད་མི་འཐད་དོ། །དེས་ན་རང་སྐུ་རྡོ་རྗེའི་རྣམ་པ་དང་ང་རྒྱལ་ལ་གནས་བཞིན་པ་ཡིན་ན། ལྷ་མོ་ལྔ་པོ་རང་ལུས་ལ་གནས་སམ། ཕྱི་རོལ་ན་གནས་ཀྱང་གནས་ངེས་ཅན་དགོས་ཏེ། ཕྱི་ནང་གཉིས་ཀར་མ་ཡིན་པའི་གནས་མེད་པའི་ཕྱིར་རོ། །ཡང་གལ་ཏེ་འགོད་པའི་གནས་ངེས་ཅན་མི་བྱེད་ན་ནི། ཞལ་ཕྱག་གི་རྣམ་པ་ཅན་མི་བསྐྱེད་པར་མོས་སྒོམ་ཉིད་བཟང་སྟེ། དཔེར་ན་རང་གི་ལུས་ཀྱི་ཁོག་པ་ལ་དམིགས་ནས། འདི་ལ་ཁྱབ་པའི་སྲ་བ་ཐམས་ཅད་ནི་སངས་རྒྱས་སྤྱན་མ་ཡིན། གཤེར་པ་ཐམས་ཅད་ནི་མཱ་མ་ཀཱི་ཡིན་སྙམ་དུ་སྒོམ་པ་སོགས་སོ། །དེ་ལ་ཁོ་བོ་ཅག་ནི་རྒྱས་པ་ཞལ་ཕྱག་ཅན་སྒོམ་པའི་ཚེ་གནས་ངེས་ཅན་བྱེད་ལ། ཞལ་ཕྱག་གི་རྣམ་པ་ཅན་མེད་པར་མོས་སྒོམ་ཙམ་གྱིས་ཀྱང་དབང་བདུན་གྱི་ལྷའི་བསྐྱེད་ཆོག་གོ་ཆོད་པའི་སྐབས་ཤིག་འདོད་ཅིང༌། དེའི་ཚེ་གནས་ངེས་པ་མེད་མོད་ཀྱི། ཁྱེད་དག་ཞལ་ཕྱག་ཅན་མེད་མི་རུང་དུ་
འདོད་པས་ན་ངེད་དང་མི་མཚུངས་ཏེ། གནས་ངེས་མེད་ལ་སྦྱངས་བྱ་དང་མཐུན་པའི་བསྐྱེད་ཚུལ་བྱེད་ན། སྤྱི་བོ་ནས་རྐང་མཐིལ་གྱི་བར་དུ་ལུས་ཐམས་ཅད་སྤྱན་མ་སེར་མོ་ཞལ་གསུམ་ཕྱག་དྲུག་པས་ཀྱང་ཁྱབ་ལ། གོས་དེ་ཀར་གོས་དཀར་མོ་དམར་མོ་ཞལ་གསུམ་ཕྱག་དྲུག་པ་སོགས་ཀྱང་ཡོད་པ་ཞིག་བསྒོམ་དགོས་ན། དམིགས་པ་ལ་དབང་མ་འབྱོར་བས་དེ་ལྟ་བུ་སྒོམ་མི་ནུས་པའི་ཕྱིར་རོ། །འོན་ཏེ་སྦྱང་བྱའི་འདུག་ཚུལ་དང་མ་མཐུན་ཡང་སྐྱོན་མེད་སྙམ་ན། དེ་ནི་ཅིས་ཀྱང་མེད་པས་ཁོ་བོ་ཅག་འདོད་པ་ཉིད་དེ། ཁྱེད་དག་ལ་དེ་ལྟ་ན་ཁྱད་པར་གྱི་ལྷ་འདི་རྣམས་མན་ངག་ལྟར་གནས་ངེས་ཅན་དུ་སྒོམ་པ་ལ་ཅིའི་ཕྱིར་སྐྱོན་དུ་ལྟ། དེས་ན་རང་ཉིད་ཡོངས་རྫོགས་མི་དམིགས་པར་སྦྱངས་ནས། དེའི་ཤུལ་དུ་ལར་ནས་ལྷ་མོ་ལྔ་བསྐྱེད་པ་ཙམ་ཡིན་ན། མི་བདེ་བ་མེད་ཀྱང་སྐབས་འདིར་རང་གི་ཁམས་ལྔ་པོ་ཉིད་ཡུམ་ལྔ་ཞལ་ཕྱག་གི་རྣམ་པ་ཅན་དུ་བསྐྱེད་པ་ལ། རང་གི་གཞི་ལུས་ལྷར་བསྐྱེད་རུང་མི་བསྐྱེད་རུང་ལྷ་མོ་ལྔ་ལ་གནས་ངེས་ཅན་དགོས་ལ། དེ་ཡང་རང་ལུས་ཀྱི་ཕྱི་རོལ་ཏུ་སྒོམ་པ་མི་རུང་སྟེ། དེ་ལྟར་བསྒོམ་ན། དུང་གི་ཆུས་ཀྱང་སློབ་མའི་ལུས་ལ་དབང་མི་བསྐུར་བར་ལུས་ཀྱི་ཕྱི་རོལ་ལྷ་མོ་བསྒོམ་སའི་ནམ་མཁའ་སྟོང་པ་ལ་དབང་བསྐུར་དགོས་པར་ཐལ་བར་འགྱུར་ཏེ། སློབ་མའི་ཕུང་ཁམས་ལྷར་བསྐྱེད་ཟིན་པ་ལ་དབང་བསྐུར་དགོས་པ་ཁྱེད་ཀུན་གྱི་འདོད་པ་ཐུན་མོང་པ་ཡིན་ཞིང༌། ལྷ་དེ་རྣམས་རང་ལུས་ཕྱི་རོལ་ན་ཡོད་པའི་ཕྱིར་རོ། །ངེད་ཀྱི་ལུགས་ལྟར་ན་དེ་ལྟར་མི་འདོད་མོད། འདོད་པར་བྱས་ཀྱང་ཁྱེད་རྣམས་ལ་སྐྱོན་འཇུག་ཚུལ་ལས་སྐྱོན་ཆུང་མོད་ཀྱང༌། སྤྱིར་དབང་བསྐུར་བས་དག་བྱའི་ལྷ་རང་ལས་གཞན་དུ་སྣང་བའི་ཚུལ་ནི་མི་བདེའོ། །ཡང་ལུས་ནང་ངམ་ཕྱིའམ་བདག་བསྐྱེད་ལྟར་སྒོམ་པ་གང་ཡིན་ཡང་རུང༌། ཡུམ་ལྔ་ལྟ་བུ་གྲལ་སྒྲིགས་
སམ་ལྔ་ཚོམས་སོགས་གང་བསྒོམས་ཀྱང་གནས་ངེས་ཅན་དུ་བསྒོམས་པར་འགྲོ་བས་དེ་ལྟར་འདོད་ན་ངེས་མེད་ཉམ་ལ། ཉིན་ཞག་སོ་སོར་ངེས་མེད་ཅི་དྲན་དྲན་ནས་སྒོམ་ན་ནི། གྱ་ཚོམ་གྱི་འདོད་པ་དེ་ལ་སུ་ཞིག་དཔྱད་པའི་ཡུལ་དུ་བྱེད། དེའི་ཕྱིར་ན་ལུས་ལ་དགོད་པ་ལས་འོས་མེད་ཅིང༌། དེ་ལ་ནི་བླ་མ་གོང་མ་འགའ་ཞིག་བཞེད་པ་ལྟར་དབང་བདུན་ཀར་གྱི་ལྷ་སྙིང་གའམ་ལྟེ་བར་བཀོད་ཀྱང་འགལ་བ་མེད་དེ། ལུས་ཀྱི་གནས་རྣམས་ཀྱི་གཙོ་བོ་དེ་ཉིད་ཡིན་པ་དང༌། སྙིང་ག་ནི་ཐུགས་དཀྱིལ་གྱི་གནས་ཡིན་པའི་ཕྱིར་རོ། །འོན་ཀྱང་དཀྱུས་ལས་འབྱུང་བ་གྲུབ་ཆེན་ཡུ་མོ་སོགས་ཀྱི་བཞེད་པ་ལྟར་སོ་སོའི་གནས་སུ་བཀོད་ན། དག་བྱ་དག་བྱེད་ཀྱི་རིམ་པ་དང༌། མཐུན་ཚབས་སྔ་མ་ལས་ཆེ་བས། གཉིས་པོ་ལ་བལྟོས་པའི་ཡང་འདི་ལེགས་སོ།། །།ལྔ་པ་ནི། དེ་ཡང་ཆུ་ཅོད་ཀྱི་དབང་ལུས་ཀྱི་དྲི་མ་སྦྱོང་བྱེད་ཡིན་པས། ཐུན་མོང་གི་ལྷ་གཞི་ལུས་སྐུ་རྡོ་རྗེ་དང༌། དར་དཔྱངས་རྡོར་དྲིལ་ངག་གི་དྲི་མ་སྦྱོང་བྱེད་ཡིན་པས་གསུང་རྡོ་རྗེ་དང༌། བརྟུལ་ཞུགས་དང་མིང་ཡིད་ཀྱི་དྲི་མ་སྦྱོང་བྱེད་ཡིན་པས་ཐུགས་རྡོ་རྗེ་དང༌། རྗེས་གནང་ཡེ་ཤེས་ཀྱི་དྲི་མ་སྦྱོང་བྱེད་ཡིན་པས་ཡེ་ཤེས་རྡོ་རྗེར་བསྐྱེད་ཅིང་རྡོ་རྗེ་བཞི་པོའི་ངོས་འཛིན་ཡང་སྐུ་གསུང་ཐུགས་བྱིན་རླབས་སུ་བཤད་པ་ལྟར་གྱི་རྡོ་རྗེ་གསུམ་དང༌། དེའི་ཚེ་ཡེ་ཤེས་རྡོ་རྗེ་རྡོར་སེམས་སུ་བསྐྱེད་ཀྱང་མི་རུང་བ་མེད་དེ། བསྐྱེད་རིམ་གྱི་ཡན་ལག་རྒྱུད་སྡེ་གཞན་གྱི་ཆོ་གས་རུང་བར་གསུངས་ན། དེ་ལ་རུང་ཕྱིན་མན་ངག་གི་རྒྱུད་ཡོད་ན། དབང་བདུན་ལ་མི་རུང་བའི་རྒྱུ་མཚན་མེད་ཅིང་དབང་ལམ་འབྲེལ་པ་ཅན་དུ་ཡོད་པའི་ཕྱིར་རོ། །ཡང་དུས་འཁོར་རང་ལུགས་ལ་གྲགས་ཆེ་བའི་དབང་དུ་བྱས་ནས་སྐུ་འོད་དཔག་མེད། གསུང་རིན་འབྱུང་ཐུགས་དོན་
ཡོད་གྲུབ་པ། ཡེ་ཤེས་རྣམ་སྣང་དུ་བྱེད་པའང་ལག་ལེན་གྱི་རྒྱུན་དང་ལྡན་པའི་ཕྱིར་ཡིན་ནོ། །ཡང་ཆུ་རླུང་ནམ་མཁའ་དང༌། ས་མེ་ཡེ་ཤེས་ཀྱི་རིམ་པའང་འཇུག་མོད། མདོར་བསྡུ་ན་གོང་དུ་སྨོས་པ་ལྟར་དུས་ཀྱི་འཁོར་ལོ་ཉིད་དུ་བསྐྱེད་པས་ཀྱང་ཆོག་སྟེ། རིགས་ཀུན་གྱི་བདག་པོ་ཡིན་པའི་ཕྱིར་རོ། །འདི་དག་ཀྱང་ཡབ་ཡུམ་ཁ་སྦྱོར་གྱི་སྐུ་ཅན་གཙོ་མི་ཆེ་སྟེ། ཡབ་རྐྱང་གིས་ཆོག་པ་དེ་ཡང་སྤྱིར་འདི་ལྟར་ཤེས་དགོས་ཏེ། འདུས་པ་ལ་སོགས་པ་རྒྱུད་གཞན་ལས་གཉིས་སྦྱོར་གྱི་བདེ་བ་ལ་བསྔགས་པ་ཆེ་ཞིང༌། དུས་འཁོར་ནས་ལས་རྒྱའི་ཡེ་ཤེས་དེ་སྨད་ཅིང་དགག་པ་ལྟར་མཛད་པ་མང་ངོ༌། །གཞན་ལས་བསྔགས་པ་ནི། མཚོན་བྱེད་དཔེ་དང་ཐབས་ཆེ་བ་ལ་དགོངས་པ་ཡིན་ཞིང་དེ་ནི་འདིར་ཡང་བཞེད་དོ། །འདིར་སྨད་པ་ནི་དོན་དམ་གནས་ལུགས་རྟོགས་བྱེད་རྗེན་པ་མ་ཡིན་པར་དགོངས་ལ། དེ་ནི་རྒྱུད་གཞན་གྱི་ཡང་དགོངས་པ་ལ་གནས་པས་འདི་དག་དགོངས་པ་འགལ་བ་མ་ཡིན་མོད། ཚིག་གི་སྒོ་ནས་བསྟོད་སྨད་ཁྱད་ཆེ་བ་ལྟར་ཆོ་ག་ལག་ལེན་མང་པོ་ལ་དེའི་ཤུགས་བརྡེག་པས། དབང་གོང་མ་གསུམ་གྱི་སྐབས་དང་ཞོར་བྱུང་ཅི་རིགས་ལ་མ་གཏོགས། དབང་པོ་གཉིས་སྦྱོར་གྱི་ཆོ་གས་དབང་བསྐུར་བ་ལ་རྩལ་འདོན་མི་མཛད་པ་གོ་དགོས་ཤིང༌། ཁྱད་པར་དུ་འདི་ལ་ཡབ་ཡུམ་མཉམ་སྦྱོར་བསྒོམས་ཕྱིན། དེ་ལ་ཡང་དབང་བསྐུར་དགོས་ན། དེའི་ཚུལ་མི་གསལ་བའི་ཕྱིར་རོ། །རྒྱུ་མཚན་དེས་ན་རྗེ་རོང་པ་ཤེར་སེང་པ་སོགས་འགའ་ཞིག་དབང་རྫས་ལ་ཡང་ནང་ཆོག་གིས་བསྐྱེད་པར་མཛད་པ་སོགས་ལྟ་ཅི་སྨོས། རང་ལུགས་པ་མ་གཏོགས་གཞན་ཐམས་ཅད་སློབ་མ་ལ་ནང་དབང་བསྐུར་བར་མཛད་པའང་ལྷག་ཆོས་ཡིན་པས་མི་དགོས་ཏེ། ཆོ་ག་གཞན་གྱི་ལུགས་
ལ་དེ་འདྲའི་རིགས་ཟབ་ཅིང་བྱིན་རླབས་ཆེ་བར་འདོད་ཀྱང༌། དུས་འཁོར་ལུགས་ལ་དབང་གོང་མ་ལྟ་བུའི་ཡེ་ཤེས་ངོ་སྤྲོད་རྒྱུ་ཡོད་ན་མ་གཏོགས་དེ་འདྲའི་རིགས་ལ་ཟབ་རྒྱས་ལྷག་པོ་རྩིས་པོ་ཆེར་མི་བཞེད་པའི་ཕྱིར་རོ།། །།གཉིས་པ་བྱ་བའི་རིམ་པ་སོ་སོའི་དོན་ནི། ཁ་ཅིག་བྱིས་འཇུག་གི་སྔོན་དུ་དྲུག་བཞི་ལྡན་གྱི་སྦྱང་བ་བྱེད་པ་ནི། བྱུར་བསལ་པ་ཉིད་ཡིན་པའི་ཕྱིར་འགལ་བ་མེད་མོད་ཀྱང༌། དེ་ནི་དཀྱིལ་ཆོག་རྡོ་རྗེ་འཕྲེང་བ་ལས་འབྱུང་བ་སཱ་དྷུ་པུ་ཏྲས་བླངས་ཤིང༌། དེ་ལས་སྤྲོས་པ་ལ་དགའ་བའི་དུས་འཁོར་བ་གཞན་རྣམས་ཀྱིས་བླངས་པ་ཡིན་མོད། རྒྱུད་འདིར་ནི་རབ་ཏུ་གནས་བྱའི་རྟེན་གསུམ་ལ་བྱུར་བསལ་བྱེད་པར་ནི་གསུངས་མོད། སྐབས་འདིར་བྱུར་བསལ་བ་གསལ་པོར་མ་བཤད་པས་གལ་ཆུང་ལ། ཡང་དབང་བདུན་སྤྱིའི་དོན་དུ་བྱང་ཆུབ་རྡོ་རྗེས་སངས་རྒྱས་ལ་སོགས་ཀྱིས་གསོལ་བ་འདེབས་པ་ནི། གཞན་གྱི་ཁ་སྐོང་ཡིན་ཡང་མི་འགྲེལ་པ་མེད་དོ། །གཞན་ཆོ་གའི་རིམ་པ་རྣམས་ནི་དཀྱུས་སུ་གསལ་བ་ཉིད་ཡིན་པས་འདིར་ལྡབས་ཏེ་བཤད་མི་དགོས་ལ། དེར་མི་གསལ་བ་རྣམས་བརྗོད་ན། ཆུ་དབང་གི་གསོལ་བཏབ་སྐབས། ཨོཾ་ཧཾ་ཧཱཾ་སོགས་བུམ་པ་རྣམས་བསྐུལ་བའི་ས་བོན་དང༌། ཨཱ་ཨཱི་སོགས་ནི་ཡུམ་ལྔའི་ཐུགས་རྒྱུད་བསྐུལ་བའི་ས་བོན་ནོ། །དབང་གི་གསོལ་བཏབ་འདི་རྣམས་ཁ་ཅིག་དཀྱིལ་འཁོར་གྱི་ལྷ་ལ་གསོལ་བཏབ་ཡིན་ཏེ། ནམ་མཁའི་དབང་ལྷ་སྤྱན་མ་དྲངས་པའི་གོང་དུ་བྱེད་པའི་ཕྱིར་རོ་ཞེས་ཟེར་ཡང༌། ཞོར་ཐབས་སུ་ཕྱིའི་དཀྱིལ་འཁོར་གྱི་ལྷ་ལའང་གསོལ་བ་འདེབས་མོད་ཀྱི། གཙོ་བོར་སྤྱིའི་གསོལ་བཏབ་དང་འདྲ་བར་རྡོ་རྗེ་སློབ་དཔོན་དང་དཀྱིལ་འཁོར་གྱི་གཙོ་བོ་དབྱེར་མེད་པའི་སྐུ་གསུང་ཐུགས་ལ་དཀྱིལ་
འཁོར་གྱི་ལྷ་ཚོགས་ཡོངས་སུ་རྫོགས་པར་ཞུགས་པས་དེ་རྣམས་ལ་གསོལ་བ་འདེབས་པ་ཡིན་ནོ། །ཡང་དབང་བསྐུར་བ་པོའི་ལྷ་གང་ཡིན་བརྟགས་ན། ཁ་ཅིག་དབང་ལྷ་སྤྱན་འདྲེན་པ་མི་འདོད་པ་ནི་ཕྱི་དང་འབྲེལ་བའི་དབང་གི་གཙོ་བོ་གང་བསྐུར་ཡང་སངས་རྒྱས་ཐམས་ཅད་ཞལ་འཛོམ་པའི་དམིགས་པ་དགོས་པ་སྤྱིའི་ལུགས་ཡིན་པ་དེ་དང་འགལ་ཞིང༌། སྤྱན་འདྲེན་ཡང་དེས་དབང་མི་བསྐུར་བ་ནི། དེ་རྣམས་སྤྱན་དྲངས་པ་དགོས་མེད་རྐང་སྟོང་གི་རྣམ་པར་སོང་བས། དེས་ན་སྤྱི་དང་མཐུན་པར་སློབ་དཔོན་དང་དཀྱིལ་འཁོར་གྱི་ལྷ་ཚོགས་རྣམས་ཀྱིས་དབང་བསྐུར་ཅིག་པར་བཀའ་སྩལ་ནས། ལས་བྱེད་པ་པོ་དབང་གི་ལྷ་རྣམས་ཀྱིས་མཛད་པ་ཡིན་ལ། འོན་ཀྱང་ལས་བྱེད་པ་པོ་གང་ཡིན་པ་དེ་ལ་རྡོ་རྗེ་སློབ་དཔོན་དང་དཀྱིལ་འཁོར་གྱི་གཙོ་བོ་དབྱེར་མེད་ཀྱི་སྤྲུལ་པར་མོས་པ་བརྟན་པོ་དགོས་སོ། །ཡང་མང་པོ་ཞིག་དབང་ལྷའམ་དཀྱིལ་འཁོར་ལ་བཀོད་པ་གང་ཡིན་ཡང་རུང་སྟེ། ཆུ་དབང་ཡུམ་ལྔ་དང༌། ཅོད་པན་སངས་རྒྱས་ལྔས་བསྐུར་བ་སོགས་འདོད་པ་ནི་རྣམ་པ་གཅིག་ཏུ་འགལ་བའང་མེད་མོད་ཀྱི། འོན་ཀྱང་འགངས་མི་ཆེ་སྟེ། འདིར་ནི་དབང་ལྷའི་གཙོ་བོ་དུས་འཁོར་ཉིད་རྩ་བའི་བླ་མ་དང་དབྱེར་མེད་པ་དེས་དབང་བསྐུར་བ་ཉིད་གཙོ་ཆེ་ལ། དབང་བསྐུར་གསོལ་གདབ་ཀྱི་སྔགས་དོན་ལ་ལྷ་སོ་སོའི་མཚན་ཡོད་པ་དེ་ནི་དབང་རྫས་རྣམས་ལྷ་སོ་སོའི་ངོ་བོ་ཡིན་པར་སྟོན་ཅིང་ཐུགས་བསྐུལ་བ་ཡིན་གྱི། དབང་ལྷའི་ནང་ཚན་ནམ་དཀྱིལ་འཁོར་ལྷའི་ནང་ཚན་ལྷ་སོ་སོ་ལ་གསོལ་བ་འདེབས་པ་མ་ཡིན་ནོ། །དེས་ན་རྒྱུ་མཚན་དེས་ནི་སོ་སོས་དབང་བསྐུར་བར་མི་འགྲུབ་ལ། རྒྱུ་མཚན་གཞན་ནི་མེད་དོ། །བུམ་ཆུ་བསྡུ་བའི་སྔགས་ལ་ཡུམ་བཞིའི་སྔགས་ནི། རྒྱུད་འགྲེལ་ཉིད་ལས་གསལ་བར་
གསུངས་པ་ཡིན་ལ། རྡོར་དབྱིངས་དབང་ཕྱུག་མའི་སྔགས་ནི་འཁོར་སྤྱི་འགྲོས་ཀྱི་མཚན་སྔགས་སྦྱར་བ་ཡིན་ནོ། །འདིར་དབང་བསྐུར་བའི་དུང་ཆོས་ནི། བུམ་པ་ལྔའི་ཕྱོགས་ལ་རྣམ་རྒྱལ་དང༌། བཅུའི་ཕྱོགས་ལ་རྣམ་རྒྱལ་ཆེན་པོའོ། །ལུགས་འདི་ལ་བུམ་པ་དཀྱིལ་འཁོར་དུ་བཀོད་ནས་དཀྱིལ་འཁོར་གྱི་བྱ་བ་ཚར་གཅིག་མ་སོང་གི་བར་དུ་བུམ་གཟུགས་དང་ལྡན་པའི་དབང་བུམ་རྣམས་བསྐྱོད་མི་དགོས་པའི་དབང་དུ་བྱས་ནས། བུམ་པའི་དོན་ཚང་ཡང་གཟུགས་དང་མི་ལྡན་པ་རྣམ་རྒྱལ་ལམ་རྣམ་རྒྱལ་ཆེན་པོའི་བུམ་པ་ནི་ཀུན་ཏུ་རྒྱུག་པ་ཡིན་ནོ། །དེས་ན་ཞི་རྒྱས་དང་ལས་ཐམས་ཅད་པ་ལ་དུང་ཆོས་སུ་བསྡུས་ནས་དབང་བསྐུར་དགོས་པའི་རྒྱུ་མཚན་གཟུགས་ཀྱི་བུམ་པ་མི་བསྐུལ་བའི་རྒྱུ་མཚན་ལས་ཡིན་གྱི། བུམ་པ་གཞན་དུ་བསྡུས་ནས་ཀྱང་དབང་བསྐུར་དུ་གཏན་ནམ་མི་རུང་བའང་མིན་ཏེ། དེས་ན་གང་དག་ལུགས་འདི་ལ་དབང་བདུན་ལ་ཆུ་དབང་བདུན་ཞེས་གྲགས་ཀྱི། བུམ་དབང་ཞེས་མི་གསུང་པས་གཟུགས་ཀྱི་བུམ་པས་དབང་བསྐུར་དུ་མི་རུང་སྟེ། རུང་ན་བུམ་དབང་བདུན་དུ་ཐལ་པར་འགྱུར་ཟེར་པ་ནི་ཤིན་ཏུ་མ་གོ་བ་སྟེ། བུམ་པས་དབང་བསྐུར་ན་བུམ་དབང་བདུན་དུ་ཐལ་བར་འདོད་པ་དེ་ལྟ་ན་དུང་ཆོས་ཀྱི་དབང་བདུན་དང༌། ལས་གཞན་ལ་ཟངས་ཆོས་ དང༌། ཤིང་སྣོད་དང༌། རྫ་ཕོར་གྱི་དབང་བདུན་ལ་སོགས་པར་ཡང་ཐལ་བར་འགྱུར་བའི་ཕྱིར་རོ། །དེས་ན་ཡིན་ལུགས་ནི་བུམ་པའི་བརྡས་བསྟན་པའི་ཤེས་རབ་མའི་ནུ་མ་ལ་བརྟེན་ནས་དབང་བསྐུར་བ་ནི། བུམ་དབང་ཡིན་གྱི་ཆུ་དབང་གི་སྣོད་དུང་གིས་བྱས་པ། དུས་འཁོར་རང་ལུགས་ཀྱི་བུམ་དབང་དངོས་སུ་མི་འགྱུར་པ་བཞིན་དུ་བུམ་པས་བྱས་ཀྱང་དུས་
འཁོར་རང་ལུགས་ཀྱི་བུམ་དབང་དངོས་སུ་ནམ་ཡང་མི་འགྱུར་ལ། གཞན་དང་གོ་བསྟུན་པའི་རྣམ་གྲངས་ཀྱི་སྒོ་ནས་ནི། དུང་ཆོས་ཀྱིས་བསྐུར་བའི་ཆུ་དབང་ལ་ཡང་བུམ་དབང་སྒྲ་ཙམ་འཇུག་ཏུ་རུང་པའི་སྐབས་ཡོད་པས་ཅལ་ཅོལ་འབྲེལ་མེད་ཀྱི་སྨྲ་བ་མ་མང་ཞིག ཡང་གང་དག་གསར་དུ་སྤྱན་དྲངས་པའི་དབང་ལྷ་རྣམས་ཀྱིས་དཀྱིལ་འཁོར་གྱི་ལྷ་ལ་བཀའ་བསྒོ་བ་པོར་བྱེད་པ་ནི། དཀྱིལ་ཆོག་སུ་དང་ཡང་མི་མཐུན་ཞིང༌། བསྐྱེད་ཆོག་གིས་བསྐྱེད་བསྒྲུབས་མཆོད་པའི་ལྷའི་གཙོ་བོ་དཀྱིལ་འཁོར་གྱི་ལྷ་ལ་གློ་བུར་དུ་སྤྱན་དྲངས་པའི་ལྷས་ཕར་བཀའ་བསྒོ་བ་འདི་ནི་ཤིན་ཏུ་བཀྲ་མི་ཤིས་པའི་ཆོ་ག་འབྱུང་པོའི་གདོན་གྱིས་རྒྱུད་སྐུལ་བ་ཡིན་ཏེ་སྤྲོས་པས་ཆོག་གོ །དེ་ནས་དབང་རྫས་བསྐྱེད་པ་ལ་དུང་ཆོས་ཀྱི་ནང་དུ་ཡུམ་ལྔའི་ས་བོན་དབུས་དང་ཕྱོགས་བཞིར་ལྔ་ཚོམས་སུ་བསྒོམ། དེ་རེ་རེ་ཞུ་བ་ལས་བྱུང་བའི་བུམ་ཆུར་མོས། དེ་ཡང་ཡུམ་ལྔ་སོ་སོར་མོས་པའོ། །འདིར་བུམ་ཆུ་ལ་སོགས་པ་དབང་བདུན་གྱི་དབང་རྫས་རྣམས་ལྷ་སོ་སོའི་ངོ་བོ་ཡིན་པ་ལ། རྣམ་པ་དབང་རྫས་སོ་སོའི་དམ་ཚིག་པར་བསྐྱེད། ཡེ་ཤེས་པ་ཡང་ངོ་བོ་ལྷ་སོ་སོ་ཡིན་པ་ལ། རྣམ་པ་དབང་རྫས་དེ་དང་དེའི་རྣམ་པ་ཅན་གྱི་ཡེ་ཤེས་པ་སྤྱན་འདྲེན་པ་འདི་ནི། རང་ལུགས་ལ་རྫས་ལྔ་ལྷག་གནས་ཡོངས་རྫོགས་ཀྱིས་རིགས་འགྲེ་བ་ཡིན་ཞིང༌། ཕལ་ཆེར་གྱི་འདོད་པ་ལྟར་ན་ཡང་ཐིག་སྐུད་དང་རྡུལ་ཚོན་གྱི་རིག་པས་འགྲུབ་ལ། རྒྱུད་འདི་བརྟན་པའི་དངོས་པོ་ལ་བསྐྱེད་ཆོག་དེ་རིགས་གཙོ་ཆེ་བས་དེ་ལྟར་གྲུབ་པོ་སྐྱེ་བའི་གནས་ལྔ་ནི། སྤྱི་བོ་དང་དཔུང་པ་གཡས་གཡོན་དང༌། དབྱི་གཡས་གཡོན་ཏེ་ལྔའོ། །དེ་ལྟར་དུང་གི་ཆུས་དབང་བསྐུར་པའི་འབྲས་བུ་ལ་སློབ་མའི་ཁམས་ལྔ་རྣམ་པར་དག་ནས། ཡུམ་ལྔ་ཞལ་ཕྱག་གི་རྣམ་
པ་ཅན་དུ་བསྐྱེད་དེ། །དེ་ཡང་རྒྱུད་འདིའི་ཕྱོགས་སུ་གཡོ་བའི་དངོས་པོ་ལྷར་བསྐྱེད་པ་ནི། ཞལ་ཕྱག་གི་རྣམ་པ་ཅན་གཙོ་ཆེ་བའི་རིགས་པས་སོ། །དེ་ལ་ཡེ་ཤེས་པ་བསྟིམ་པ་ནི་འགྲེལ་ཆེན་ལས། དཀྱིལ་འཁོར་ལ་དབང་བདུན་གྱི་ཆོ་ག་བྱས་ཏེ། དེ་ནས་སློབ་མ་ལ་སངས་རྒྱས་ཀྱིས་བྱིན་གྱིས་བརླབས་པ་བསམ་པར་བྱའོ། །ཞེས་གསུངས་པས་བསྟན་པའོ། །ཅོད་པན་གྱི་དབང་ལ་རྒྱུ་ནི་འགྲེལ་ཆེན་ལས། རིན་པོ་ཆེ་དང༌། གསེར་གྱི་ཅོད་པན་ནམ། གོས་ཀྱི་ཅོད་པན་ཞེས་གསུངས་པས། རིན་ཆེན་ནི་ཨིནྜ་ནཱི་ལ་སོགས་ཀྱིས་བརྒྱན་པའོ། །རྒྱུད་གཞན་ལས། རིན་ཆེན་འབྱུང་ལྡན་ཅོད་པན་གྱི་དབང་དུ་གསུངས་པ་ནི། དྲང་དོན་ཏེ་གཞན་དུ་མེ་ཏོག་གང་ལ་ཕོག་པ་རིགས་ཀྱི་ལྷ་ཡིན་པ་དང་ནང་འགལ་བར་འགྱུར་ཏེ། གང་ཅོད་པན་དུ་བྱེད་པ་དེ་ནི་ཀུན་གྱི་ནང་ནས་མཆོག་ཏུ་བཀུར་བ་ཡིན་ན། དཔེར་ན་རིན་ཆེན་འབྱུང་ལྡན་ཅོད་པན་དུ་བྱས་པས་གུས་པར་བཀུར་དགོས་ཤིང༌། མེ་ཏོག་སྤྱན་རས་གཟིགས་ལ་ཕོག་པས་དེ་བསྒྲུབས་ན། གཅིག་ལ་མཆོད་ཅིང་གཅིག་ཤོས་ལ་དངོས་གྲུབ་ལེན་པར་སོང་བས་འགལ་བ་ཡིན་ན། འདིར་ནི། སངས་རྒྱས་ལྔ་བདག་ཅོད་པན་འཆང༌། །ཞེས་པ་ལྟར། རིགས་ལྔ་ཅར་ཅོད་པན་དུ་དབང་བསྐུར་ཞིང༌། མཉམ་པར་གུས་པས་བརྟེན་ན་མེ་ཏོག་གང་ཕོག་པའི་ལྷ་དེ་ཡང་རིགས་ལྔ་གང་རུང་དུ་མ་འདུས་པ་མེད་པའི་ཕྱིར་མཆོད་པ་དང་སྒྲུབ་པ་འགལ་བའི་སྐྱོན་མི་འབྱུང་ངོ༌། །དེ་བཞིན་དུ་ཆུས་འཁྲུད་པའང་རྡོ་རྗེའི་རིགས་ཁོ་ནས་བྱེད་ན། རིག་པའི་དབང་གཞན་བཞི་པོ་ལ་འཇུག་པར་མི་འོས་ཏེ། རིན་ཆེན་འབྱུང་ལྡན་དང་འོད་དཔག་མེད་སོགས་ཀྱི་དབང་ལ་མི་བསྐྱོད་པས་འཁྲུ་བ་འབྲེལ་ཆུང་བའི་ཕྱིར་རོ། །འདིར་ཡུམ་
ལྔས་བྱེད་པ་ནི་ཀུན་ཏུ་འཇུག་སྟེ། ཡུམ་ལྔ་རྒྱལ་བ་རིགས་ལྔའི་ནི་བཙུན་མོ་ཡིན་ལ། ལྷ་གཞན་རྣམས་ཀྱི་ཡང་མ་དང་ཕྱི་མོ་སོགས་ཀྱིས་ཚུལ་ཡིན་པས་སྒྲུབ་ཅིང་བསྟེན་པའི་ལྷ་ཐམས་ཅད་དྲི་བྲལ་དུ་སྒྲུབ་པ་ལ་ཆེས་ཤིན་ཏུ་འབྲེལ་བ་ཡིན་ནོ། །དེ་ལྟར་ན་དབང་ལེ་གོ་བདུན་པའི་འགྲེལ་པར། འདི་དང་ལུགས་གཞན་གྱི་ཆུ་ཅོད་ཀྱི་དབང་ལ་མཆོག་དམན་གྱི་དབྱེ་བ་གསུངས་པའི་དོན་གྱི་སྙིང་པོ་འཛུག་ཚུགས་དེ་ལྟར་ཡིན་ཡང་འགྲེལ་བཤད་བྱེད་པ་རྣམས་ནི་གསལ་པོར་སྨྲ་བ་མེད་དོ། །དེས་ན་འགྲེལ་ཆེན་དུ། ཆུ་ལ་སོགས་པའི་དག་པ་མེད་དེ། ཆོ་ག་གཞན་སྟོབས་དང་ལྡན་པའི་ཕྱིར་རོ། །ཞེས་པ་ནི། དཀྱིལ་ཆོག་གཞན་གྱི་ལུགས་ལ་ཆུ་ཅོད་པན་སོགས་ཀྱི་དག་པ་རྫོགས་པར་མ་ཚང་བས། སློབ་མའི་རྒྱུད་སྨིན་ཚུལ་སྟོབས་ཆུང་ལ། ཆོ་ག་གཞན་ཞེས་པ་འདུས་པ་སོགས་དག་ལས། གཞན་དུས་འཁོར་གྱི་རྒྱུད་འདི་ནས་གསུངས་པ་ནི། སློབ་མའི་རྒྱུད་སྨིན་ཚུལ་སྟོབས་དང་ལྡན་པའི་ཕྱིར་ཏེ། ལྷ་མང་པོའི་དག་པ་མཛད་པས་སོ། །ཞེས་པ་སྟེ། དེ་ལྟར་ན་ཡང་རྒྱུད་རྡོ་རྗེ་འཕྲེང་བ་དང༌། རྡོ་རྗེ་གུར་ལ་སོགས་པ་རྒྱུད་སྡེ་གཞན་རྣམས་དྲང་དོན་རྫུན་པ་ཁོ་ནར་འབེབས་པ་མ་ཡིན་ཏེ། དགོངས་པའི་གནད་གཅིག་པ་ཞིག་ནི་ཡོད་དོ། །དེ་ཡང་ཅི་སྙམ་ན། དུས་འཁོར་ལུགས་བཞིན་ཁམས་ལྔའི་དག་པ་རྒྱས་ལ་ཞིབ་པ་ནི་རེ་ཞིག་རྒྱུད་གཞན་ལ་མེད་དེ། དེ་ཡང་བླ་མེད་ཀྱི་རྒྱུད་གཞན་རྣམས་དུས་འཁོར་ལ་བལྟོས་ན་བབས་ནས་འབྱུང་བའི་ཁམས་ཀྱི་དག་པ་གཙོ་ཆུང་བའི་དབང་ལས་ཡིན་ལ། དེ་ལ་དབང་རྫས་ཆུ་ནི་དངོས་པོའི་དབང་ལས་མཱ་མ་ཀཱིའི་དག་པ་དང༌། ལྷ་མོ་མཱ་མ་ཀཱི་རྒྱུད་གཞན་གྱི་ལུགས་ཀྱི་རྡོ་རྗེ་དང་རིན་ཆེན་གྱི་རིགས་གཉིས་རྟེན་ཡང་གཙོ་བོར་རྡོ་རྗེའི་རིགས་མི་བསྐྱོད་པ་ཡིན་
ལ། ཡུམ་ལ་བརྟེན་ནས་ཡབ་མཚོན་པས། ཆུ་མི་བསྐྱོད་པར་བསྐྱེད་པའི་རྒྱུ་མཚན་དེ་ཡིན་ཞིང༌། དེ་དག་གི་སྐབས་ཀྱི་མི་བསྐྱོད་པ་ཡང་དངོས་སུ་ན་ཉེ་ཚེ་བ་ཡིན་དུ་ཆུག་ཀྱང༌། ཐུགས་རྡོ་རྗེ་ཉིད་ཡིན་པའི་ཕྱིར་ཐུགས་ཀུན་ཏུ་འགྲོ་བ་ཡིན་པས། དོན་གྱིས་ན་ཀུན་ཁྱབ་སྟེ། དེའི་ཕྱིར་ཅོད་པན་སོགས་དབང་གཞན་ལའང་དེའི་བྱ་བ་འཇུག་ཏུ་རུང་ཞིང༌། ཡང་ཆོ་ག་གཞན་འགའ་ཞིག་ཏུ་ཆུ་དབང་གི་སྐབས་ལྷ་གསར་དུ་མི་བསྐྱེད་པའང་ཡོད་པ། སྔོན་བུམ་སྒྲུབ་ཀྱི་དུས་སུ་དཀྱིལ་འཁོར་ཡོངས་རྫོགས་བསྐྱེད་པས་ཕྱིས་རིགས་ཐམས་ཅད་ལ་འཇུག་པར་དགོངས་པས། དུས་འཁོར་དང་དེ་དག་དགོངས་པའི་གནད་གཅིག་གོ །འོན་ཀྱང་དངོས་སུ་ན་གཞན་དུ་མི་བསྐྱོད་པ་ཡབ་ཡུམ་མམ། མི་བསྐྱོད་པ་ཙམ་བསྐྱེད་པས་རིགས་ཕྱོགས་གཅིག་པ་དང༌། འདིར་ཡུམ་ལྔ་བསྐྱེད་པས་རིགས་ཐམས་ཅད་པ་ཡིན་ཞིང༌། ཆུ་ཙམ་སྤྱིར་ནས་མཱ་མ་ཀཱིའི་དག་པ་ཡིན་པར་འདིར་ཡང་བཞེད་མོད། བུམ་ཆུ་ནི་ས་བོན་དང་སྔགས་སོགས་བསྐྱེད་ཆོག་གི་སྒོ་ནས་ཁམས་ལྔ་ལྡན་ཡིན་པས་འདིར་ཡུམ་ལྔར་བྱེད་པས་ཁྱད་པར་དུ་འཕགས་ཤིང༌། ཐུན་མོང་མ་ཡིན་པའི་བྱིན་རླབས་འཇུག་ཚུལ་ཁྱད་པར་ཅན་ཡོད་མེད་ཀྱི་སྒོ་ནས་ཀྱང་ལུགས་འདི་ཉིད་མཆོག་གོ །སྤྱིར་དབང་རྫས་དང་སློབ་མའི་ཁམས་ཀྱི་མཚོན་དོན་གལ་ཆེ་ཡི། དབང་རྫས་ཀྱི་རྒྱུ་ཆའི་མཚོན་དོན་གལ་མི་ཆེ་སྟེ། དེ་ཆེ་ན་རྡོར་དྲིལ་སོགས་ལའང་སའི་དག་པ་དགོས་པར་ཐལ་བར་འགྱུར་རོ། །དེ་བཞིན་དུ་དབུ་རྒྱན་ལ་ཡང་རྒྱུད་སྡེ་གཞན་གྱི་ལུགས་ཀྱིས་ཀྱང་རིགས་ལྷག་མ་བཞི་འདུས་པའི་ཆ་འཇོག་རྒྱུ་ཡོད་དེ། རིན་ཆེན་དངོས་ནི་ཡོན་ཏན་གྱི་རིགས་ཡིན་ལ། ཡོན་ཏན་དེ་
ཡང་སྐུ་གསུང་ཐུགས་ཀྱི་ཡོན་ཏན་ཡིན་པའི་ཕྱིར་སྐུ་རྣམ་སྣང༌། གསུང་སྣང་མཐའ། ཐུགས་མི་བསྐྱོད་གསུམ་ཚང་ལ། བྱ་སྒྲུབ་ཡེ་ཤེས་མཉམ་ཉིད་ལས་བྱུང་བ་དང༌། ང་རྒྱལ་ནི་བྱེད་པོ་དང༌། ཕྲག་དོག་བྱེད་པ་ཡིན་པའི་རྒྱུ་མཚན་གྱིས་ལས་དང༌། རིན་ཆེན་གཅིག་ཏུ་ཞུགས་པའི་ཕྱིར་རོ། །འོན་ཀྱང་དབུ་རྒྱན་རིན་ཆེན་དང་སྦྱོར་བའི་རྒྱུ་མཚན་ནི། དབུ་རྒྱན་ནི་གཙུག་གི་ནོར་བུ་སོགས་རིན་པོ་ཆེའི་རྣམ་པར་ཡོད་ལ། དེ་ཡང་སྤྱི་ཁྱབ་ཏུ་རིན་ཆེན་འབྱུང་ལྡན་གྱི་ཕྱག་ན་གནས་པའི་ཕྱིར། དབུ་རྒྱན་རིན་ཆེན་འབྱུང་ལྡན་དུ་དགོངས་པའོ། །རྣལ་འབྱོར་རྒྱུད་དུ་ཡང་དབང་བསྐུར་བ་པོ་རྡོ་རྗེ་རིན་ཆེན་གྱི་འཕྲིན་ལས་སུ་འཆད་པ་ཡང་གནད་དེ་དང་ འདྲའོ། །དེའི་ཕྱིར་འདི་དང་དེ་དག་ཐུགས་དགོངས་པ་གཅིག་ཀྱང་དངོས་སུ་ན་ལྷ་ལྔ་ཅར་ཚང་པ་དང༌། ལྷ་གཅིག་གི་ཁྱད་པར་ཡིན་པས། གཞན་རྣམས་ལས་ལུགས་འདི་ཉིད་སློབ་མའི་རྒྱུད་སྨིན་ཚབས་ཆེ་བའི་ཁྱད་པར་ཡོད་དོ། །དེས་ན་རྒྱུད་འདི་ལས་གཞལ་ན། རྒྱུད་གཞན་ལས་གསུངས་པའི་དབང་དེ་དག་ཆུ་ཅོད་པན་སོགས་ཀྱི་གོ་མི་ཆོད་ཅེས་པ་ཏ་མ་ཡིན་ཏེ། དགོངས་པ་གཅིག་པའི་ཕྱིར་རོ། །འོན་ཀྱང་ཟབ་མི་ཟབ་ཀྱི་ཁྱད་པར་མེད་པའང་མ་ཡིན་ཏེ། དངོས་ཀྱི་སྤྱད་བྱ་སྤྱོད་བྱེད་སྦྱངས་འབྲས་ལ་རྒྱ་ཆེ་ཆུང་ཁྱད་པར་ཤིན་ཏུ་ཆེ་བའི་ཕྱིར་རོ། །གནད་འདི་གོ་བ་ཤིན་ཏུ་གལ་ཆེ་སྟེ། གཞན་དུ་ན་བསྡུས་རྒྱུད་གཞན་གཙོ་བོར་བྱེད་པ་རྣམས་ལུགས་འདི་མི་ཟབ་པར་བྱེད་པ་ནི། བདུད་རྩི་བས་ཟས་ཕལ་པ་བཟང་བར་རྩི་བ་དང་འདྲ་ལ། ཡང་འདི་ལ་བརྟེན་ནས་དེ་དག་དབང་གི་གོ་མི་ཆོད་པར་བྱས་ན་ནི་
དཀྱིལ་ཆོག་ཉི་ཤུ་པ་དང༌། བཞི་བརྒྱ་ལྔ་བཅུ་པ་ལ་སོགས་པ་དེ་རྣམས་སྨད་ཀྱང་བླའི་རྡོ་རྗེ་འཕྲེང་བ་སོགས་རྒྱུད་ལས་གསུངས་པ་རྣམས་སྨད་ན། མི་བཟད་པའི་ལས་ཆེན་པོར་འགྱུར་རོ། །ཁ་ཅིག་ལུགས་སྲོལ་སོ་སོའོ་ཟེར་ནས་འཇོག་པ་ནི། རྩ་བ་མ་ངེས་པའི་རྒྱུ་མཚན་གྱིས་ཟོལ་འཇོག་ཙམ་མོ། །དེར་རྗེས་དར་དཔྱངས་ཀྱི་དབང་ནི། ནུས་མ་བཅུ་ལ་བརྟེན་ནས་རྐང་ཚུགས་པར་བསྐུར་བ་ཡིན་པས་རྒྱུད་འདིའི་ཁྱད་ཆོས་ལྷག་པོ་སྟེ་ལུགས་གཞན་ལ་དར་དཔྱངས་ཀྱི་དབང་མེད་པའམ། ཡོད་ཀྱང་དབུ་རྒྱན་གྱི་རྗེ་འབྲང་མ་གཏོགས་རྐང་ཚུགས་པའི་དབང་མེད་པས་ སོ། །འདིར་རླུང་བཅུ་སྙིང་གར་འགོད་ཚུལ་ལ་སྔ་མ་རྣམས་ཀྱི་བཞེད་པ་མི་འདྲ་ཙམ་གཉིས་ཡོད་ཀྱང༌། རང་ལུགས་དཀྱུས་སུ་བཤད་པ་ཉིད་འབྱུང་བའི་གོ་རིམ་དང་མཐུན་ནོ། །ནུས་མ་བཅུའི་ནང་གི་བརྒྱད་ལ་མི་མཐུན་པ་མེད་ཅིང༌། ཁ་ཅིག་ལྷག་མ་གཉིས་སྣ་ཚོགས་ཡུམ་དང་རྡོར་དབྱིངས་དབང་ཕྱུག་མར་འདོད་པ་ནི། དོན་ལ་གནད་འཆུག་པའི་འགལ་བ་རང་ཏ་ཆེར་མེད་ཀྱང༌། གནས་སྐབས་སུ་ཤིན་ཏུ་མི་འཐད་དེ། ནུས་མ་ལ་རྡོར་དབྱིངས་དབང་ཕྱུག་མ་བགྲོང་པ་ལྟར་ན། སྒྲོལ་མ་ལ་སོགས་པ་ཡང་བགྲོད་དགོས་པར་འགྱུར་ལ། སྣ་ཚོགས་ཡུམ་ནི་དུས་ཀྱི་འཁོར་ལོའི་བཙུན་མོ་འཁོར་ལོས་བསྒྱུར་མ་ཉིད་ཀྱི་ཕྱིར་གྲགས་པའི་སྒོ་ནས་ཀྱང་ནུས་མའི་ཐ་སྙད་མི་ལེགས་ཏེ། བཙུན་མོ་དང་ནུས་མ་འཇིག་རྟེན་ཐ་སྙད་འཇུག་ཚུལ་སོ་སོ་ཡིན་པའི་ཕྱིར་རོ། །མཚན་གྱི་སྒོ་ནས་ཀྱང་དེ་ལྟར་བགྲོང་པ་མི་འཐད་དེ། ནུས་མ་བཅུ་རྟགས་བཅུའི་ངོ་བོ་ཉིད་ཀྱི་ཕྱིར། བརྒྱད་ལ་རྟགས་སོ་སོའི་མཚན་གྱིས་འཁྱུད་ཅིང༌། གཉིས་ལ་
མཚན་གྱིས་མི་འཁྱུད་པའི་རྒྱུ་མཚན་མེད་པའི་ཕྱིར་རོ། །དེས་ན་རང་ལུགས་ནི་སྟེང་གི་ནུས་མ་མཆོག་གི་ཆ་མ་དང༌། འོག་གི་ནུས་མ་ཐིག་ལེ་མ་སྟེ། དེ་གཉིས་རྡོར་དབྱིངས་ཤེར་ཕྱིན་གཉིས་དང་ངོ་བོས་གཅིག་པ་ཙམ་ཡིན་དུ་ཆུག་ཀྱང༌། ལྷའི་རྣམ་གྲངས་ནི་ཡེ་མི་གཅིག་ལ། མཐའ་གཅིག་ཏུ་ངོ་བོ་ཡང་གཅིག་པར་མ་ངེས་ཏེ། དག་བྱ་དག་བྱེད་ཤིན་ཏུ་ཐ་དད་པའི་ཕྱིར་ རོ། །དེས་ན་དབུས་ཀྱི་གཙོ་མོ་བཅོམ་ལྡན་འདས་མ་ལ་སྟེང་འོག་གི་ནུས་མ་གཉིས་ཀར་འདུས་སོ་ཞེས་པ་ཙམ་ཡིན་གྱི། སྣ་ཚོགས་ཡུམ་སྟེང་འོག་གང་རུང་གཅིག་གི་ཡ་གྱལ་དུ་བགྲོང་བ་མི་རིགས་སོ། །ཡང་འདིར་ས་བོན་ཕྲཻཾ་བྱུང་བའི་ཕྱིར་སྣ་ཚོགས་ཡུམ་ཡིན་ནོ་སྙམ་ན། འོ་ན་འདིར་ས་བོན་ཧོཿབྱུང་བའི་ཕྱིར་གཅིག་ཤོས་དེ་དབྱིངས་ཕྱུག་མ་མ་ཡིན་པར་འགྱུར་ཏེ། ས་བོན་ཙམ་ལས་ལྷ་གང་ཡིན་དཔག་དགོས་ན། དབྱིངས་ཕྱུག་མའི་ས་བོན་ཧོཿཡིག་ཏུ་བཤད་པ་གཞན་གང་དུའང་མ་བྱུང་བའི་ཕྱིར་རོ། །ཡང་འདི་སྐད་ཅེས་བྱ་སྟེ། ཧོཿཡིག་དབྱིངས་ཕྱུག་མའི་ས་བོན་ཡིན་ན། འོག་ཏུ་དྲིལ་བུའི་ས་བོན་ཧོཿབྱུང་བའི་ཕྱིར། དྲིལ་བུ་སྣ་ཚོགས་ཡུམ་མ་ཡིན་པར་དབྱིངས་ཕྱུག་མར་ཐལ་བར་འགྱུར་རོ། །དེས་ན་རང་ལུགས་ས་བོན་ལ་གཅིག་ཁོ་ན་ཐེར་ཟུག་ཏུ་མི་རུང་བས། སྐབས་སོ་སོའི་བཤད་ལུགས་མ་བསྒྱུར་བར་ཇི་ལྟར་འོས་འོས་སུ་སྦྱོར་བ་ཡིན་ནོ། །ནུས་མ་དེ་གཉིས་ཀྱི་ཕྱག་མཚན་ནི་སྣ་ཚོགས་ཡུམ་དང་མཚུངས་ལ། སྐུ་མདོག་ནི་ཆ་མ་ལྗང་ཁུ་དང༌། ཐིག་ལེ་མ་སྔོན་མོ་ཡིན་ནོ། །དེའི་ཕྱིར་རྩ་ཞལ་སྐུ་ལུས་དང་མཚུངས། གཡས་གཡོན་རྒྱབ་རྣམས་དཔལ་དུས་ཀྱི་འཁོར་ལོ་ལྟ་བུའོ། །རྡོར་དྲིལ་གྱི་དབང་ལ་གཙོ་བོ་ཡབ་ཡུམ་ལུས་ལ་འགོད་པའི་
སྐབས། རྩ་གཡོན་དག་པ་དུས་འཁོར་གཡོན་གྱི་ཆ་ནས་གཡས་སུ་ཞལ་གཟིགས་པ་དང༌། རྩ་གཡས་དག་པ་སྣ་ཚོགས་ཡུམ་གཡས་ནས་གཡོན་དུ་ཞལ་བསྟན་པ། ལྟེ་བའི་དབུས་སུ་མཉམ་པར་སྦྱོར་བ་བསྒོམ་སྟེ། རྡོར་དྲིལ་འདི་གཙོ་བོ་ཡབ་ཡུམ་ལ་བརྟེན་ནས་བསྐུར་བའི་ཕྱིར། དབང་བདུན་གྱི་ནང་ནས་གཙོ་ཆེ་ཤོས་ཡིན་ཏེ། དེའི་ཕྱིར་འདི་ལ་ཡབ་ཡུམ་ཁ་སྦྱོར་དང༌། དབང་གི་རྗེས་སུ་ཆུ་དབང་བསྐུར་བར་གསུངས་སོ། །གཞན་ལས་རྡོ་རྗེ་དང་དྲིལ་བུ་དབང་སོ་སོར་གསུངས་པ་འདིར་གཅིག་ཏུ་བསྡོམས་པས། གཞན་གྱི་དབང་གཉིས་ཀྱིས་འདིའི་གཅིག་གི་དོད་ལས་མ་ཐུབ་པ་དང༌། གཙོ་བོ་ཞལ་ཕྱག་གི་དག་པ་མང་པོས་ལྷ་གྲངས་མང་པོ་དང་ཨཱ་ལི་ཀཱ་ལི་རྩ་རླུང་ཐིག་ལེ་རྣམ་གྲངས་མང་པོའི་དག་པ་ཡོད་པས་གཞན་ལས་ལྷག་ཅིང༌། རྡོར་དྲིལ་གཙོ་བོ་ཡབ་ཡུམ་དང་སྦྱོར་བ་རྒྱུད་གཞན་གྱི་དབང་ཆོག་ལ་ཡང་སྲིད་པ་དང་འདོད་ཆགས་ཀྱི་རྒྱུ་ཁུ་བ་རྐྱང་མ་སྣང་མཐའ་དང༌། རོ་མ་དག་རླུང་ཁམས་དོན་གྲུབ་དང་ཡང་འབྱོར་བས་འདི་དང་དེ་དག་གནད་ནི་གཅིག་པའོ། །དབང་བདུན་གྱིས་ལྷ་བསྐྱེད་པ་འདི་རྣམས་ལ་སྔ་ཕྱི་མ་ཟློས་པ་ཞིག་དགོས་པ་ལས། གང་དག་དར་དཔྱངས་ལྗང་གུ་དང་སྔོན་པོ་སྣ་ཚོགས་ཡུམ་དང་རྡོར་དབྱིངས་དབང་ཕྱུག་མར་བསྒོམས་པས་ནི། དབྱིངས་ཕྱུག་མ་ཆུ་དབང་དང་ཟློས། སྣ་ཚོགས་ཡུམ་འདི་དང་ཟློས་པར་འགྱུར་རོ། །བརྟུལ་ཞུགས་ཀྱི་དབང་གི་སྐབས་སུ་དཀྱིལ་ཆོག་གཞན་ལ་རིགས་ལྔ་ཀུན་འདུས་རྡོར་སེམས་ཀྱི་དག་པ་སྦྱོར་ལ། འགའ་ཞིག་ཏུ་ཐུགས་རྡོ་རྗེར་བྱེད་པའང་དེ་དང་གནད་གཅིག་ཏུ་ཡོད་ཅིང༌། རྡོར་སེམས་དེ་རིགས་ཀུན་
གྱི་བདག་པོ་རྡོ་རྗེ་འཆང་དང་ནི་ཅུང་ཟད་མི་འདྲ་སྟེ། དོན་ལ་རྣལ་འབྱོར་རྒྱུད་དུ་རྡོ་རྗེའི་རིགས་ཀྱི་འཁོར་ལོས་བསྒྱུར་བའི་རྡོར་སེམས་གསུངས་པ་དང་འདྲ་རུང་བ་ལས། བླ་མེད་དུ་རིགས་ཐམས་ཅད་པ་རྒྱལ་བ་རིགས་ལྔ་ཅར་ལས་བྱུང་བའི་རྡོ་རྗེ་སེམས་དཔའི་ངོ་བོ་ནི་ཡོ་ག་ལས་བྱང་ཆུབ་སེམས་དཔར་བཤད་པ་ལྟར་ནི་མ་ཡིན་ཏེ་སངས་རྒྱས་ཙམ་ཡིན་ནོ། །རྣལ་འབྱོར་རྒྱུད་ལ་སེམས་དཔའ་འཁོར་ལོས་བསྒྱུར་བར་བྱེད། བླ་མེད་ལ་དཀྱིལ་འཁོར་གྱི་གཙོ་བོའམ་འཁོར་ལོས་བསྒྱུར་བ་ཡིན་པ་རིགས་ལྔ་ལས། འདིའི་རྡོར་སེམས་འདི་ནི་སངས་རྒྱས་ཡིན་ཡང་འཁོར་ལོས་བསྒྱུར་བ་མ་ཡིན་ཏེ་ལས་མཛད་པའི་ལྷ་ཡིན་ནོ། །དེས་ན་རྒྱུད་སྡེ་གཞན་ལས་འབྱུང་བའི་བརྟུལ་ཞུགས་ཀྱི་སྐབས་ཀྱི་རྡོ་རྗེ་སེམས་དཔའི་ཐུགས་རྡོ་རྗེ་དེ་རྡོ་རྗེ་སེམས་དཔའ་ཡིན་ཡང་ཡོངས་སུ་མ་རྫོགས་པས་ད་དུང་འབྲས་བུའི་གནས་སུ་ན་འཕར་རྒྱུ་ཡོད་པས་རྒྱུའི་རྡོར་སེམས་ཟེར་ཞིང༌། ཁྱབ་བདག་རྡོ་རྗེ་སེམས་དཔའ་ལས་རིགས་ལྔ་སྤྲུལ། རིགས་ལྔ་ལས་དེ་སྤྲུལ་པ་ཡིན་པས་ཀུན་ཁྱབ་ཡིན་ཡང་བདག་པོ་མ་ཡིན་པས་ཁྱབ་བདག་ཅེས་མི་བྱ་ལ། དུས་འཁོར་ནས་སེམས་དཔའ་ཡབ་ཡུམ་བཅུ་གཉིས་སུ་བྱས་པ། བཅུ་གཉིས་རིགས་ལྔའམ་དྲུག་གིས་སྤྲུལ་པ་ཡིན་ཞིང༌། སངས་རྒྱས་རིགས་ལྔའི་འཕྲིན་ལས་མཛད་པ་པོ་ཉིད་ཀྱི་ཕྱིར། དེ་དང་འདི་ཡང་གནད་གཅིག་གོ །གཞན་དག་ལས་ཐ་མལ་གྱི་སྤྱོད་པ་བརྟུལ། རྡོ་རྗེ་འཆང་ཆེན་པོའི་ཚུལ་ལ་ཞུགས་ཞེས་པ་ཡང་དབང་ཡུལ་གྱི་སྣང་བ་སྣ་ཚོགས་པ་འདི་ལ་མ་དག་པའི་སྣང་ཞེན་གཉིས་ཀ་སྤངས་ཏེ། བདེ་སྟོང་གིས་རྒྱས་བཏབ་པས་
བདེ་སྟོང་གི་ངོ་བོར་ཤར་བའི་རྡོ་རྗེ་འཆང་ཆེན་པོའི་ཚུལ་ལ་ཞུགས་པར་གྱིས་ཤིག་ཅེས་པ་ཡིན་ལ། འདིར་ཡང་དབང་ཡུལ་རྣམས་དག་པར་བྱེད་པའི་ཕྱིར། འདི་དང་དེ་གཉིས་དགོངས་པའི་གནད་གཅིག་ཅིང༌། འདིར་བརྟུལ་ཞུགས་ཡིད་དག་བྱེད་ཡིན་པས། ཐུགས་རྡོ་རྗེར་བསྐྱེད་པ་དང་ཡང་འགྲིག་གོ །འོན་ཀྱང་དེར་དབང་ཡུལ་སོ་སོའི་ཁྱད་པར་གྱི་དག་བྱེད་སྦྱོར་ཚུལ་མེད་ལ། འདིར་སེམས་དཔའ་སེམས་མ་བཅུ་གཉིས་ཀྱི་སྒོ་ནས་ཞིབ་རྒྱས་ཡོད་པའི་ཕྱིར་འདི་ཁྱད་པར་དུ་འཕགས་པའོ། །འདི་ལ་དབང་རྫས་རྡོ་རྗེ་སོར་གདུབ་དང༌། མེ་ཏོག་སིལ་མ་གང་རུང་རེ་བྱེད་པའང་ཡོད་མོད་ཀྱི། འགྲུབ་ན་གཉིས་ཀར་བྱ་སྟེ། དེ་ཡང་མཐེ་བོའི་སོར་གདུབ་སྔགས་ཀྱིས་བྱིན་གྱིས་བརླབས་པ་སློབ་མ་ལ་སྦྱིན་ཏེ་བྱིས་འཇུག་གི་སྐབས་འདིར་སོར་གདུབ་ལྷ་སོ་སོར་བསྐྱེད་མི་དགོས། སྔགས་ཀྱི་རང་བཞིན་ཙམ་དུ་བྱེད་པ་ཡིན། སྔགས་ཀྱང་སེམས་དཔའ་ཡབ་ཡུམ་བཅུ་གཉིས་ཀྱི་ས་བོན་ཉིད་དོ། །ལྷར་བསྐྱེད་རྒྱུའི་དབང་རྫས་མེ་ཏོག་སིལ་མ་ཉིད་ཡིན་པ། དབང་བསྐུར་བའི་ཚེ་འགྲུབ་ན་རྣ་ལྟག་ཏུ་ལྗང་ཁུ། སྣ་ལ་ནག་པོ་མིག་ལ་དམར་པོ། ལྕེའི་གནས་སུ་དཀར་པོ། གསང་བར་སེར་པོ། སྙིང་གར་སྔོན་པོ་རྣམས་འགོད་དེ། ཡབ་གཙོ་ཆེ་ལ། ཡང་ན་ཡབ་ཡུམ་གྱི་དབྱེ་བས་གཉིས་གཉིས་འགོད་དེ། གནས་གཞན་རྣམས་གོ་བླ་སྒྲིབ་སེལ་གྱི་གནས་གསང་གནས་ནི་ནོར་བུའོ། །རྡོ་རྗེ་ཕག་མོའི་དབང་ཆོག་རྒྱལ་སྲས་འཇིགས་མེད་ལྷས་མཛད་པ་ན་སིལ་མ་མི་མཛད་པར་སྤྱི་བོ་མགྲིན་པ་ཚངས་སྐུད་སྐེ་རགས་ཏེ་བཞི་དང༌། རྣ་བ་དཔུང་པ་ལག་པ་རྐང་པ་རྣམས་ལ་གཉིས་གཉིས་ཏེ་མེ་ཏོག་གི་འཕྲེང་བ་བཅུ་གཉིས་འཆིང་བར་
བཤད་དེ། སློབ་དཔོན་གྱི་དབང་གི་སྐབས་ཕྱག་རྒྱ་དྲུག་གི་བརྟུལ་ཞུགས་བཤད་པ་དང་གནད་གཅིག་གོ །མཐེ་བོའི་སོར་གདུབ་ཅེས་པ་ཡང་མཚོན་བྱེད་དེ། སོར་མོ་གཞན་རྣམས་ལ་རེ་རེ། མཐེ་ཆུང་གཉིས་ལ་གཉིས་ཏེ། སོར་གདུབ་བཅུ་གཉིས་འགྲུབ་ན་བཟང་ལ། བསྡུ་ན་ས་ཁམས་བཅིངས་པས་ཐམས་ཅད་བཅིང་བར་འགྱུར་བའི་ཕྱིར། མཐེ་བོང་གཉིས་ཁོ་ན་ལའོ། །མིང་གི་དབང་ནི་སྤྱི་དང་མཐུན་པར་དབང་རྫས་ཀྱི་དངོས་གཞི་སྒྲའི་རྫས་མིང་འདོགས་པའི་ངག་ཚིག་ཉིད་ཡིན་པར་གསལ་ཏེ། འགྲེལ་ཆེན་ལས། དེ་ནས་ལག་པ་དང་རྐང་པ་དག་ལ་གདུབ་བུ་དང༌། རྐང་གདུབ་ལ་སོགས་པའམ། དེ་དག་མེད་ན་མེ་ཏོག་གི་འཕྲེང་བ་བཅིངས་ལ། དེ་ནས་དབང་བསྐུར་བར་བྱ་སྟེ། ཁྱོད་ནི་རྡོ་རྗེ་ཆེ་གེ་མོ་ཞེས་བྱས་ནས་ལུང་བསྟན་པར་བྱའོ་ཞེས་གསུངས་པས། གདུ་བུའམ་འཕྲེང་བ་སྦྱིན་པ་སྔོན་འགྲོའི་ཚུལ་དང༌། མིང་འདོགས་པ་རང་ཉིད་དབང་དངོས་གཞིར་གསུངས་སོ། །འོན་ཀྱང་དེ་གྲུབ་དོན་འཇུག་བསྡོམས་ཡིན་གྱི་དག་བྱ་དག་བྱེད་ལ། སྔོན་མ་རྣམས་གལ་ཆེའོ། །དེ་ཡང་རྒྱུད་གཞན་ལས། རྣམ་སྣང་དུ་གསུངས་པ་ཡང་གཙོ་བོར་རྣམ་སྣང་སྐུ་ཡིན་པས། གཟུགས་ཅན་དང་འབྲེལ་བའི་བྱ་བ་སྤྱོད་པ་ཡིན་ལ། འདིར་ཡང་དག་གི་སྒྲ་དང་རྐང་ལག་འོག་སྒོ་གཉིས་སོགས་གཟུགས་དངོས་དང༌། འགྲོ་བ་དང་ལེན་པ་དང་སྨྲ་བ་དང༌། བཤང་གཅིའི་བྱ་བ་སོགས་གཟུགས་ཅན་དང་རྗེས་སུ་འབྲེལ་བའི་བྱ་བ་ཡིན་པས་གནད་ནི་གཅིག་ལ། ལས་དང་བྱ་བ་སོ་སོ་ལ་ཐུན་མོང་མ་ཡིན་པའི་དག་བྱ་དག་བྱེད་ཀྱིས་ཁྱད་ཆེ་བས་འདི་ཉིད་ཆེས་ཟབ་པ་ནི་ཡིན་ནོ། །དོན་གྱི་སྡེ་ཚན་ནི་ཕལ་དུ་མི་འདྲ་
སྟེ། འདིར་ནི་ལུས་དག་བྱེད་ཀྱི་སྡེ་ཚན་མ་ཡིན་པར་ལུས་ངག་ཡིད་གསུམ་གྱི་ནང་ནས་ཡིད་དག་བྱེད་དུ་བྱེད་པའི་ཕྱིར་རོ། །འོན་ཀྱང་ཆོས་དབྱིངས་ཡེ་ཤེས་ཐུགས་སུ་འཇོག་པའི་ཕྱིར་རྒྱུད་སྡེ་གཞན་གྱི་ལུགས་ལའང་ཡིད་མིང་དབང་གི་དག་བྱར་སྦྱར་ན་ཕྱོགས་ཙམ་འགྲིག་ཏུ་རུང་ངོ༌། །དེ་ལ་འདིར་མེ་ཏོག་འཕྲེང་བ་ལྗང་ཁུ་གཙུག་ཏོར་འཁོར་ལོས་བསྒྱུར་བ་དང༌། སྔོན་མོ་དྲག་སྤྱན་མར་བྱེད་པ་ནི། སྐབས་འདིར་ཧ་ཧཱ་ཞེས་ཁྲོ་བོ་གཅིག་དང་ཁྲོ་མོར་གཅིག་གི་ས་བོན་ལས་མེད་ཅིང༌། ཁྲོ་བོ་གཅིག་གིས་ལས་དབང་གཉིས་དང༌། ཁྲོ་མོ་གཅིག་གིས་བྱ་བ་གཉིས་བསྡུ་དགོས་པའི་ཕྱིར། དབང་རྫས་ཀྱི་སྐབས་སུ་མེ་ཏོག་ལྗང་ཁུ་གཙུག་ཏོར་འཁོར་ལོའི་བསྒྱུར་བའི་ངོ་བོ་དང༌། སྔོན་མོ་དྲག་མིག་མའམ་གནོད་མཛེས་རྒྱལ་པོའི་ངོ་བོར་སྒོམ་པ་ཡིན་པས། སྤྱིར་དྲག་མིག་མ་གཙུག་ཏོར་དང་འདྲ་བར་ལྗང་ཁུ་ཡིན་ཡང༌། སྐབས་འདིར་ཁམས་དྲུག་ཀར་ཚང་དགོས་པའི་ཕྱིར། ཁྲོ་མོ་དེའི་ཡབ་ཡེ་ཤེས་ཁམས་པ་ཡིན་པས་ན། དེའི་འབྲེལ་པས་སྔོན་མོའོ། །དེས་ན་སློབ་མའི་ལུས་ལ་ལྷ་བསྐྱེད་པའི་སྐབས་སུ་མགོ་བོ་དང་གཙུག་ཏོར་སྦྲགས་པར་མཆོག་གི་དབང་པོ་ཡེ་ཤེས་ཀྱི་ཁམས་དེ་གསང་བའི་དབང་པོ་ནམ་མཁའི་ཁམས་སུ་བསྡུས་ནས་ཁྲོ་བོ་གཙུག་ཏོར་དང༌། གསང་གནས་ཀྱི་དྲི་ཆུའི་རྩ་ནམ་མཁའི་ཁམས་དེ་ཁུ་བའི་རྩ་ཡེ་ཤེས་ཀྱི་ཁམས་ཀྱི་ཁོངས་སུ་བསྡུས་ནས་ཁྲོ་མོ་དྲག་སྤྱན་མའམ་ཤིན་ཏུ་སྔོན་མོ་གནོད་མཛེས་རྒྱལ་པོ་དང་འདྲ་བ་སྒོམ་པའོ། །འདིར་ལྷ་ཁ་སྦྱོར་ནི་མ་ཡིན་པས་ཡང་ན་ཤིན་ཏུ་སྔོན་མོ་གཙུག་ཏོར་ལྟ་བུ་ལྗང་ཁུར་བསྒོམས་
ཀྱང་མི་འགལ་ཏེ། མཁའ་ཡེ་གཉིས་གཅིག་ཏུ་བསྡུས་ནས་ཁམས་ལྔར་བྱེད་པའི་ཕྱིར་ཇི་ལྟར་འོས་པའོ། །དབང་རྫས་གདུ་བུ་ལ་འགའ་ཞིག་དཔུང་གདུབ་སྣོན་པ་སོགས་ཡོད་པ་ལྟར་བྱས་ཀྱང་རུང༌། འདིར་འཕྲེང་བའམ་གདུ་བུ་བཞི་བྱེད་ན། ལག་པ་གཡས་གཡོན་རྐང་པ་གཡས་གཡོན་རྣམས་ལ་རྩ་བཞིའི་དག་པས། དམར་དཀར་ནག་སེར་གྱི་རིམ་པ་སྦྱོར། གཙུག་ཏོར་སྤྱི་ལ་བསྒོམ། དཔུང་གདུབ་བྱེད་ན་དེ་གཙུག་ཏོར་ཡབ་ཡུམ་དང་སྦྱོར་རོ། །མེ་ཏོག་འཕྲེང་བ་ལྔར་བྱས་ན་གཅིག་ལྗང་ཁུ་སྟེ་མགོ་ལ་འདོག་པ། དྲུག་བྱེད་ན་སྔོན་པོ་སྐེད་པར་གདགས་སོ། །ཁ་ཅིག་ནང་ལེར་ལག་པ་དང་རྐང་པའི་ཚིགས་ལ་འབྱུང་བའི་དག་སྦྱོར་གསུངས་པ་དང་སྦྱོར་བར་ཡང་འདོད་དེ་འགལ་བ་ཆེར་མི་སྣང་ཡང་མན་ངག་དང་ཁུངས་གང་རུང་ཞིག་མེད་ན་རྣམ་རྟོག་ཙམ་མོ། །རྗེས་གནང་གི་སྐབས་སུ་འདི་དང་དཀྱིལ་ཆོག་གཞན་ལ་རྗེས་གནང་ནི་བཀའ་གནད་ཙམ་དུ་མཐུན་པས་གནད་གཅིག་ཀྱང༌། གཞན་དག་ཕལ་ཆེར་དུ་དབང་དངོས་སུ་མི་བྱེད་པར་མཐའ་བརྟེན་དུ་བྱེད་ལ། འདིར་སྤྱིར་ཡང་དབང་དངོས་སུ་བྱེད་པ་དང༌། སྒོས་སུ་ཁྱབ་བདག་རྡོར་སེམས་དང་འགྲེལ་བས་ཆེས་ཁྱད་པར་དུ་འཕགས་པའོ། །འདི་ལ་གསོལ་བཏབ་ཀྱི་ཐོག་མའི་ཨེ་ཝཾ་ནི་རྡོར་སེམས་ཡབ་ཡུམ་གྱི་ས་བོན་ཡང་ཡིན་ལ་འགྱུར་མེད་ལྔ་དང་འགྱུར་མེད་ཀུན་འདུས་པ་མཚོན་པའོ། །ས་བོན་ཧཾ་ཀྵཿནི་ལུས་མེད་རྡོ་རྗེའི་ས་བོན་ཡིན་ལ། དེ་ཡང་ལུས་མེད་ཀྱི་དོན་ཡུལ་བདེ་བ་ཆེན་པོ་དང་ཡུལ་ཅན་འདོད་ཆགས་རྡོ་རྗེ་སྦྱོར་བ་ཡིན་པས། རྡོ་རྗེ་སེམས་དཔའ་ཡེ་ཤེས་རྡོ་རྗེ་ཡབ་ཡུམ་མོ། །འདིའི་དབང་རྫས་རྒྱུད་འགྲེལ་
ལས་དངོས་སུ་གསལ་བར་མ་གསུངས་ཀྱང༌། སྔགས་ཀྱི་དོན་ལྟར་ཆོས་ཀྱི་འཁོར་ལོ་ཉིད་དོ། །རྡོ་རྗེ་ལ་སོགས་པ་གཞན་རྣམས་ནི་སྤྲོས་པ་ལ་དགའ་བ་རྣམས་དེའི་ཞོར་བྱུང་གི་ཚུལ་དུ་འདོགས་པ་ཙམ་ཡིན་གྱི། རྐང་ཚུགས་མ་ཡིན་པས་སྤྲོས་པ་ལ་མི་དགའ་ན་མི་བྱེད་པ་ཉིད་མཆོག་གོ །འདིར་ཡེ་ཤེས་ཀྱི་ཕུང་པོ་ནི། འགྱུར་བ་དེས་ཕུང་པོ་གཞན་ལ་བྱིན་གྱིས་བརླབས་པའི་འགྱུར་བའི་ཁྱད་པར་ཁམས་གསུམ་ན་རང་རང་གི་ཁམས་ཀྱིས་བསྡུས་པའི་མངོན་འགྱུར་བའི་ཆ་དེ་ཡིན་ལ། ཡེ་ཤེས་ཀྱི་ཁམས་ནི་དེ་དང་ངོ་བོ་དབྱེ་བ་མེད་ཀྱང༌། ངོ་བོ་བག་ཆགས་ཀྱི་ཆ་ལ་བརྟེན་ནས་མངོན་འགྱུར་བ་སྐད་ཅིག་ཕྱི་མ་བསྐྱེད་པའི་ནུས་པ་ཅན་ དེའོ། །སློབ་མའི་ལུས་ལ་རྡོ་རྗེ་སེམས་དཔའ་ཡབ་ཡུམ་གང་དུ་བསྐྱེད་པའི་གནས་ནི་གསང་གནས་བདེ་སྐྱོང་གི་འཁོར་ལོ་ཡིན་ལ། ཡུམ་ཡང་ཡེ་ཤེས་ཀྱི་ཁམས་ཡིན་པའི་ཕྱིར། ཤེར་ཕྱིན་ཡིན་གྱི་དབྱིངས་ཕྱུག་མ་མ་ཡིན་ཏེ། འདིར་ཡང་དབྱིངས་ཕྱུག་མ་སྒོམ་པ་རྣམས་ནི། བྱིས་དབང་ཚར་གཅིག་ལ་དབྱིངས་ཕྱུག་མ་ཆུ་དར་དཔྱངས་རྗེས་གནང་སྟེ་སྐབས་གསུམ་ཀར་དུ་བྱུང་བས་ལན་གསུམ་ཟློས་ཤིང༌། ཡང་ཁ་ཅིག་རྡོ་རྗེ་སེམས་དཔའ་དང་ཤེར་ཕྱིན་མ་གཉིས་ཀར་བསྐྱེད་དགོས་བྱུང་ཞིང༌། དེ་གཉིས་ཁ་སྦྱོར་དུ་བྱས་ན་ཡེ་ཤེས་ཕན་ཚུན་འཁྱུད་པས་མི་རུང་བར་གྱུར་ཏོ་སྙམ་ནས། མི་བསྐྱོད་པ་དང་རྡོར་དབྱིངས་དབང་ཕྱུག་མ་ཡང་བསྣན་ཏེ། རྡོར་སེམས་ལ་དབྱིངས་ཕྱུག་མས་དང༌། ཤེར་ཕྱིན་མ་ལ་མི་བསྐྱོད་པས་འཁྱུད་དེ། སྐབས་འདིར་ལྷ་བཞི་བསྐྱེད་པ་ནི། སྦྱང་བྱ་གཉིས་ལ་སྦྱོང་བྱེད་བཞི་སྦྱོར་བ་སོགས་བྱ་ཐབས་ཟད་
པའི་བསྐྱེད་ཆོག་སྟེ། མཁས་ཁྱད་ཁ་ཐལ་བ་བླུན་རྟགས་སུ་སོང་ལ་ལར་དུས་འཁོར་གྱི་གཞན་རིགས་ལ་འཁྱུད་པའི་ཆོས་སྐད་འདིས། ཁྱབ་བྱ་ཁྱབ་བྱེད་ཀྱི་དབྱེ་བ་མ་ཤེས་པའི་དུས་འཁོར་བ་ཐམས་ཅད་སྡུག་ལ་བསྟད་ དོ། །དེས་ན་འདི་ལུས་མེད་རྡོ་རྗེ་ཡིན་པའི་ཕྱིར་ཁྱབ་བྱེད་ཀྱི་རྡོ་རྗེ་སེམས་དཔའ་ཡིན་པས་རང་རིགས་ཀྱིས་འཁྱུད་པ་ཡང་རུང་ལ། འདོད་ཆགས་ཆེན་པོའི་ངོ་བོ་ཉིད་ཀྱི་ཕྱིར་རྡོར་སེམས་ཤེར་ཕྱིན་མཉམ་སྦྱོར་དུ་བྱས་ནའང་ལེགས་མོད། སྤྱིར་དབང་བདུན་གྱི་སྐབས་ཀྱི་གཤེགས་མ་གཤེགས་པ་སེམས་མ་སེམས་དཔའ་ཁྲོ་བོ་ཁྲོ་མོ་རྣམས་མཉམ་སྦྱོར་གྱི་སྐུ་མ་ཡིན་ཏེ། ནུས་མ་རྣམས་ཀྱིས་མཚོན་པས་འདིར་ཡང་མཉམ་སྦྱོར་ངེས་པར་དགོས་པ་མིན་ནོ། །དེ་ལྟར་ན་དབང་བདུན་པོ་རྣམས་ལ་ཆུ་དབང་ལ་རྩོད་པ་མེད་ལ། ཅོད་པན་ནས་བརྩམས་ཏེ། རང་རང་གི་སྔགས་ཀྱིས་དུང་ཆོས་ཀྱི་ཆུ་བླངས་ཏེ། ཆུ་དབང་བསྐུར་བ་སྔོན་དུ་འགྲོ། དེ་ཡང་ཅོད་པན་གྱི་དབང་གི་སྐབས་སུ་འགྲེལ་ཆེན་ལས་འདི་སྐད་ཅེས་གསུངས་ཏེ། དེ་ནས་ཅོད་པན་གྱི་དབང་ལ་སྐྱེ་བའི་གནས་ལྔར་སྔགས་འདིས་དབང་བསྐུར་བར་བྱས་ཏེ། ཨོཾ་ཨ་ཨི་རྀ་ཨུ་ལྀ་པཉྩ་ཏ་ཐཱ་ག་ཏ་པ་རི་ཤུདྡྷ་སྭཱཧཱ། ཞེས་པས་སོ། །ཞེས་གསུངས་ཏེ། དབང་རྫས་དུང་གི་ཆུ་དང་སྔགས་ཅོད་པན་རང་ཉིད་ཀྱི་སྔགས་ཀྱིས་དབང་བསྐུར་བ་ཡིན་ནོ། །འགྲེལ་ཆེན་ལས། དེ་རྗེས་དེ་མ་ཐག་ཏུ་དེ་ནས་རིན་པོ་ཆེ་དང༌། གསེར་གྱི་ཅོད་པན་ནམ་གོས་ཀྱི་ཅོད་པན་བཅིང་པར་བྱའོ། །ཞེས་སྔ་མའི་རྗེས་སུ་དབུ་རྒྱན་བཅིང་པར་གསུངས། རྗེས་གནང་གི་བར་དུ་ཡང་དེ་དང་འདྲ་བར་ཡང་བཤད་དོ། །
དེས་ན་སླར་ཡང་དབང་རྫས་སོ་སོ་ལ་རང་རང་གི་སྔགས་དགོས་པ་ནི་སྨོས་ཅི་དགོས། ཡང་འདི་ལྟར་དང་པོར་ཆུ་དག་ལ་ནི་དགེ་བསྙེན་ཉིད་དུ་ འགྱུར། །ཞེས་པའི་འགྲེལ་པར། དབང་བདུན་པོ་ཆུའི་མིང་ཅན་དག་ལ་ཞེས་གསུངས་པས། ཐམས་ཅད་ལ་ཆུ་དབང་བསྐུར་དགོས་པར་གྲུབ་ཀྱང༌། ཆུ་དབང་བསྐུར་བའི་དུས་གསལ་ཁ་ཅན་འདི་རྣམས་མ་གཏོགས་གཞན་མེད་ཅིང༌། འདི་རྣམས་ཐམས་ཅད་ལ་དབང་རྫས་སོ་སོའི་སྔོན་དུ་ཆུ་དབང་དེ། དབང་སོ་སོ་རང་རང་གི་སྔགས་ཀྱིས་བསྐུར་བ་ཤ་སྟག་གསུངས་སོ། །རྡོར་དྲིལ་གྱི་སྐབས་སུ་རྡོར་དྲིལ་སྤྱི་བོར་འཇོག་པ་དང༌། བརྟུལ་ཞུགས་ཀྱི་སྐབས་རྣ་བ་སོགས་དང་མིང་དབང་གི་སྐབས་རྐང་ལག་ལ་དབང་རྫས་ཀྱིས་དབང་བསྐུར་བར་བཤད་པས། དུང་ཆོས་མ་གཏོགས་དབང་རྫས་གཞན་རྣམས་སྐྱེ་བའི་གནས་ལྔར་དབང་བསྐུར་བར་མ་ངེས་མོད། ལག་ལེན་གྱི་རྒྱུན་ལ་ནི་དེ་ལྟར་བྱེད་པར་སྣང་ངོ༌། །རྗེས་གནང་གི་འདོགས་རྒྱུད་དང་འགྲེལ་ཆེན་ལས་གསུངས་པའི་ཐུན་མོང་མ་ཡིན་པ་ནི། དག་པའི་ཆོས་བསྟན་པ་ཡིན་ལ། དངོས་སུ་མ་གསུངས་ཀྱང་འདོགས་དང་བཅས་པ་ཞེས་གསུངས་པས་ཤུགས་ལ་འཕངས་པས་ན་སྔགས་ཀྱི་རྗེས་གནང་ནི་ངེས་པར་དགོས་ཏེ། སྔགས་ཀྱི་བྱིན་རླབས་སློབ་དཔོན་ལས་བླངས་པ་ནི། དབང་གི་དངོས་གཞིའི་ནང་ཚན་རེ་རེ་དང་གལ་ཆེ་ཆུང་ལ་ཁྱད་མེད་ཅིང༌། རྗེས་གནང་གི་ཆ་ལག་ཡིན་ཡང་དབང་བདུན་ཀ་ལ་རྗེས་སུ་འཇུག་པ་ཉིད་དོ། །གཞན་མིག་ཐུར་དང༌། མེ་ལོང་དང༌། མདའ་གཞུ་དང༌། ཆོས་བཤད་ལ་སོགས་པ་དག་རྒྱུད་ནི་རྒྱུད་གཞན་གྱིས་ཤེས་པར་གསུངས་པ་ལྟར་མི་འབྲེལ་པ་མེད་ཅིང༌། སྤྲོས་པ་ལ་མོས་པ་རྣམས་ལ་ལེགས་པའི་
ཡན་ལག་ཏུ་ཡང་འགྱུར་མོད། ངེས་པའི་ཡན་ལག་ནི་མ་ཡིན་པས་མོས་པ་དང་བསྟུན་པར་བྱ་ལ། དབང་བདུན་གྱི་ང་རྒྱལ་བཟུང་བ་ནི་སྐབས་འདིར་བྱས་ནས། དེ་རྗེས་རྒྱུད་ལས། རྡོ་རྗེ་དྲིལ་བུ་རབ་ཏུ་བཟུང་ནས་རབ་མཆོག་སྙིང་རྗེ་དག་གིས་དག་པའི་ཆོས་ནི་བསྟན་པར་བྱ། །ཞེས་གསུངས་ཏེ། འདིའི་རྡོ་རྗེའི་དྲིལ་བུ་སྦྱིན་པ་ནི། རྒྱུད་འདི་དཔལ་རྡོ་རྗེ་སེམས་དཔའ་དང་མི་བསྐྱོད་པ་གཅིག་ཏུ་འདྲེས་པ་ཉིད་གཙོ་ཆེ་བས། འདིའི་ཕྱག་མཚན་སྦྱིན་ཞིང་ཆས་སུ་འཇུག་པའི་དབང་དུ་བྱས་པ་སྟེ། ཕྱག་མཚན་གཏད་ནས་བཀའ་གང་ཞིག་བསྒོ་བ་ནི། ངེས་པར་རྡོ་རྗེ་རིགས་དག་ཅེས་སོགས་ཏེ། དཔེར་ན། ཧེ་རུ་ཀའི་རིགས་ལ་ཕྱག་མཚན་ཅང་ཏེའུ་ཁ་ཊྭཱཾ་སོགས་གཏད་ནས། ཧེ་རུ་ཀ་དཔལ་ཕྱག་རྒྱ་འདི། ཞེས་སོགས་ཀྱིས་གནད་པ་སྦྱིན་པ་དང་འདྲ་སྟེ། དག་པའི་ཆོས་ཞེས་པའང༌། རིག་པའི་བརྟུལ་ཞུགས་ཉིད་ཡིན་པས། འདི་ལ་གཞན་ནས་སྤྱོད་པའི་བརྟུལ་ཞུགས་སུ་བཤད་པའོ། །ལག་ལེན་སྤྲོས་པའི་དབང་དུ་མཛད་ནས། རྡོར་དྲིལ་གཏོད་པ་ལ་ཐོག་མཐའ་མེད་པའི་སེམས་དཔའ་ནི་སོགས་བརྗོད་པའི་སྲོལ་ཙམ་ཡོད་མོད། གཞན་ལས་འབྱུང་བ་ལྟར་དམ་ཚིག་གསུམ་སྦྱིན་པའི་དོན་དུ་མ་ཡིན་པས་དང༌། སྤྱིར་དམ་ཚིག་གསུམ་སྦྱིན་པའང་རྒྱུད་སྡེ་གཞན་ལུགས་ལ་ཡང་སློབ་དཔོན་དུ་ཡེ་མ་ངེས་ལ། ད་རེས་འདི་ནི་རྒྱུད་འདིའམ་རྒྱུད་གང་གི་ལུགས་ཀྱིས་ཀྱང་རྡོ་རྗེ་སློབ་དཔོན་གྱི་དབང་གི་རིགས་སུ་བྱེད་པ་མ་ཡིན་པའི་ཕྱིར། རྣལ་འབྱོར་རྒྱུད་མན་གྱི་རྡོ་རྗེ་སློབ་དཔོན་ཡིན་ཞེས་དང༌། བླ་མེད་གཞན་གྱི་རྡོ་རྗེ་སློབ་དཔོན་གྱི་དབང་ཡིན། ཕྱག་རྒྱ་སྐུའི་དམ་ཚིག་ཡབ་རྐྱང་ཡིན། ཞལ་སྦྱོར་ཡིན། བུམ་དབང་དང་ཟློས་སོ་མ་ཟློས་སོ་
ཞེས་སོགས་སྨྱོན་པ་ཚོགས་པའི་གླེང་བརྗོད་ལྟར་མི་བྱ་སྟེ། རེ་ཞིག་དེ་ལྟ་བུའི་སྐོར་གྱི་དོགས་པ་འཇུག་པ་ཡང་བླུན་ན། ཁྱད་ཆོས་མང་པོ་ཡོད་སྐད་ཀྱི་ལན་འདེབས་པ་ལྟ་ཅི་སྨོས། དཔེར་ན། སྐྱེས་བུ་ཞིག་གིས་བ་མེན་མཐོང་བ་ན། ཏོ་མ་ཆོལ་དུ་འདི་ནི་གླང་པོ་ཆེའོ་ཞེས་བརྗོད་ན། གཞན་དག་རྣམས་འདི་ནི་ནགས་ཀྱི་གླང་པོ་ཆེ་ཡིན་པས་འདུལ་སྦྱོངས་དགོས་སོ། །གཞན་དག་ན་རེ། འདི་ནི་གངས་ཀྱི་གླང་པོ་ཡིན་པས་འདུལ་སྦྱོངས་མི་དགོས་སོ་ཟེར་བ་དང་འདྲ་སྟེ། འདི་སྤྱོད་པའི་བརྟུལ་ཞུགས་ཡིན་པ་ལ། དེ་དག་འདི་སྐད་ཅེས་དམ་ཚིག་གསུམ་སྦྱྀན་པ་རྡོ་རྗེ་སློབ་དཔོན་གྱི་དབང་ཡིན་ཏེ། འཁྱུད་པའི་བདེ་བ་ལམ་བྱེད་དགོས་ཟེར་བ་དང༌། གཞན་དག་མི་དགོས་ཏེ། དེ་ལྟར་བྱས་ན་བུམ་དབང་དང་ཟློས་ཟེར་ཏེ། འདི་ནི་རྡོ་རྗེ་སློབ་དཔོན་གྱི་དབང་གི་རིགས་ཀྱང་ཡེ་མིན་ལ། དམ་ཚིག་གསུམ་སྦྱིན་པའང་ཡེ་མེད་པའི་ཕྱིར། རྩོད་གཞི་མེད་པའི་རྩོད་པར་ཟད་ལ། རྡོར་དྲིལ་སྦྱིན་པ་དང༌། དག་ཆོས་འཆད་པ་ཡང་ཆོ་ག་སོ་སོ་མ་ཡིན་ཏེ། སློབ་དཔོན་གྱིས་སློབ་མ་ལ་ལུས་ཀྱི་ལས་སུ་རྡོར་དྲིལ་སྦྱིན་ནས། ངག་གི་ལས་སུ་དག་ཆོས་འཆད་པ་ཉིད་ཡིན་ནོ། །དེ་ཡང་ཀྱེ་ཞེས་བོས་ནས་གསང་མིང་བརྗོད་དེ། རྡོ་རྗེ་འདི་ཞེས་བྱ་བ་ཉོན་ཅིག་ཅེས་བྱས་ནས། དག་ཆོས་ཚིགས་བཅད་ཀྱིས་སྟོན་པ་ཡིན་ལ། རྡོ་རྗེ་དྲིལ་བུ་ལག་ཏུ་གཏོད་པ་ལ་ཚིག་དམིགས་གསལ་བ་གཞན་མེད་པས། རྒྱ་བོད་ཀྱི་དཀྱིལ་ཆོག་བྱེད་པོ་རྣམས་ཀྱིས་རྣམ་པ་བདེ་བའི་ཕྱིར། ཚིགས་བཅད་དེ་དག་སྦྱར་བ་ལ་བརྟེན་ནས་འཁྲུལ་གཞི་བྱུང་སྟེ། ཐམས་ཅད་ལ་ཟ་ཟི་ལངས་པ་ཙམ་མོ། །འདིར་དག་པའི་ཆོས་ཞེས་བྱ་བ་ནི་དག་གཞི་བདེ་བར་གཤེགས་པའི་སྙིང་པོའི་
སྟེང་དུ། དག་བྱ་སྒྲིབ་པ་རྣམ་པ་གསུམ་པོ་དེ། དག་བྱེད་ཚོགས་གསུམ་གྱིས་སྦྱངས་པས། དག་འབྲས་སྐུ་གསུམ་མངོན་དུ་འགྱུར་པའི་ཚུལ་ལམ་རིམ་པ་སྤྱི་ལ་འཇུག་ཀྱང༌། སྐབས་འདིར་སྤྱི་མིང་བྱེ་བྲག་ལ་བཏགས་ཏེ། དག་ཚུལ་ཁྱད་པར་ཅན་ཞིག་ཡིན་པ་ནི། རིགས་པའི་བརྟུལ་ཞུགས་ལ་དག་པའི་ཆོས་སུ་འཆད་དོ། །དེ་ཡང་འདིར། ཉོན་མོངས་པའི་སྒྲིབ་པའི་གཉེན་པོ་ནི་བསོད་ནམས་ཀྱི་ཚོགས་ཏེ། ཞེ་སྡང་གི་གཉེན་པོ་བྱམས་པ་དང༌། འདོད་ཆགས་ཀྱི་གཉེན་པོ་ངེས་འབྱུང་དང༌། སེར་སྣའི་གཉེན་པོ་སྦྱིན་པ་དང༌། བདག་ལ་སྲེད་པའི་གཉེན་པོ་རང་གི་ལུས་ངག་ཡིད་གསུམ་སེམས་ཅན་ལ་གཏོང་བ་ལ་སོགས་པ་ཉོན་མོངས་སོ་སོའི་གཉེན་པོ་སྣ་ཚོགས་པ་འདུས་པའི་བདག་ཉིད་ཅན་ནོ། །ཚུལ་ཁྲིམས་ཀྱི་ཚོགས་ཞུ་བདེ་འགྱུར་མེད་དུ་འཆིང་བ་ནི། སྙོམས་འཇུག་གི་སྒྲིབ་པའི་གཉེན་པོ་སྟེ། བསམ་གཏན་བཞི་པའི་རྩེ་མོ་འཆང༌། ཞེས་པ་ལྟར། ཞུ་བདེ་འགྱུར་མེད་དང་མི་འགྱུར་བའི་དགའ་བཞི་ལས་ཐེག་པ་འདིའི་ཐུན་མོང་མ་ཡིན་པའི་བསམ་གཏན་གཟུགས་མེད་སོགས་ཏིང་ངེ་འཛིན་མཐའ་དག་འབྱུང་བའི་ཕྱིར་རོ། །ཤེས་བྱའི་སྒྲིབ་པའི་གཉེན་པོ་ནི། ཡེ་ཤེས་ཀྱི་ཚོགས་ཡིན་པ་སྤྱི་ཁྱབ་ཏུ་གྲགས་པ་ལྟར་ལས་འདིར་ཡེ་ཤེས་ཀྱི་ཚོགས་ཀྱི་ངོ་བོ་ནི་མི་འགྱུར་བའི་བདེ་སྟོང་ཟུང་འཇུག་ལ་ངོས་འཛིན་ནོ། །བསོད་ནམས་ཀྱི་ཚོགས་ཀྱི་འབྲས་བུ་གསལ་བ་སྐུའི་དཀྱིལ་འཁོར་སྤྲུལ་སྐུ་དང༌། ཚུལ་ཁྲིམས་ཀྱི་ཚོགས་ཀྱི་འབྲས་བུ་བདེ་བ་འགྱུར་མེད་ལོངས་སྐུ་དང༌། ཡེ་ཤེས་ཀྱི་ཚོགས་ཀྱི་འབྲས་བུ་སྟོང་པ་རྣམ་པ་ཀུན་ལྡན་ཆོས་ཀྱི་སྐུའོ། །སྤྱིར་དེ་ལྟར་ཡིན་པ་ལས་སྒོས་སུ་རིག་པའི་
བརྟུལ་ཞུགས་ནི། ཚོགས་གསུམ་གསོག་ཚུལ་ཁྱད་པར་ཅན་ཡིན་ཞིང༌། འདིའི་ནང་ཚན་དྲང་དོན་བསྐྱེད་རིམ་གྱི་སྤྱོད་པ་ལ་ནི། ཚོགས་གཞན་གཉིས་ཀྱི་ཆ་ཤས་ཡོད་མོད་ཀྱང༌། གཙོ་བོར་བསོད་ནམས་ཀྱི་ཚོགས་གསོགས་ཚུལ་ཡིན་ལ། རྫོགས་རིམ་གྱི་སྤྱོད་པ་ནི། གསུམ་ཀ་ཆ་མཉམ་པར་སྤྱོད་པའོ། །འདིར་ངེས་པར་རྡོ་རྗེའི་རིགས་དག་ལ་ནི་ཞེས་སོགས་ཀྱི་རྒྱུད་ཚིག་རྐང་དྲུག་ལས། དང་པོ་གསུམ་གྱི་དོན་ལ་བསྐྱེད་རྫོགས་སོ་སོར་སྦྱོར་ཚུལ་གཉིས་ལས་ཕྱི་དྲང་དོན་བསྐྱེད་རིམ་དང་སྦྱར་བ་ནི། ཁྲོ་བོའམ་མི་བསྐྱོད་པའི་རྣལ་འབྱོར་ལ་བརྟན་པ་ཐོབ་ཅིང་ནུས་པ་རྙེད་པས། ཕ་རོལ་པོ་འཚམས་མེད་བྱེད་པ་དང༌། སངས་རྒྱས་ཀྱི་བསྟན་པ་ལ་གནོད་པ་བྱེད་པ་དང༌། རྡོ་རྗེ་སློབ་དཔོན་དམོད་པ་སོགས་དམ་ཚིག་དྲལ་བར་བྱེད་པ་ནི། མངོན་སྤྱོད་ཀྱི་ལས་ཀྱིས་བསད་པར་བྱ་བ་ཡིན་ལ། འདི་ལ་མངོན་ཤེས་དང་ལྡན་པས་ཡུལ་དེ་ཕྱིས་དགེ་བ་རླབས་ཆེན་སྤྱོད་པར་མི་འགྱུར་བ་སྡིག་པའི་ལས་དང་བཅས་ཏེ་ངན་སོང་དུ་འགྲོ་བར་ཤེས་ནས་ལས་ངན་པ་དེ་རྒྱུན་བཅད་པའི་ཕྱིར་མངོན་སྤྱོད་ཀྱི་ལས་ལ་སྦྱོར་བ་ཡིན་གྱི། མངོན་ཤེས་མེད་པས་མི་བྱ་ཞེས་འཕྲོས་དོན་དུ་གསུངས་སོ། །རལ་གྲི་སྟེ་དོན་ཡོད་གྲུབ་པའི་རིགས་ལ་ཏིང་ངེ་འཛིན་བརྟན་ཞིང་ནུས་པ་མེད་པས་སེམས་ཅན་གང་ཞིག་ལམ་ལོག་པ་ལ་ཞུགས་པ་དག་ཡང་དག་པའི་ལམ་ལ་འཛུད་པའི་དགོས་པ་ཡོད་ན་རྫུན་དུ་སྨྲ་བས་རྣམ་དག་ལེགས་པའི་ལམ་ལ་གཞུགས་པར་བྱའོ། །དེ་བཞིན་དུ་རིན་ཆེན་རིགས་ཀྱི་བརྟན་རྙེད་ཐོབ་པས་སེམས་ཅན་གང་ཞིག་ནོར་ལ་ཆགས་པས་ངན་འགྲོ་ཡི་དྭགས་སུ་འགྲོ་བ་ཟློག་པའི་དོན་དུ་སྔགས་ཀྱི་མཐུས་དྲངས་པ་སོགས་གཞན་ནོར་འཕྲོག་པར་གསུངས་ལ། དེ་བཞིན་དུ་པདྨའི་རིགས་
ཀྱི་བརྟན་རྙེད་ཐོབ་པས་གང་དག་བུད་མེད་སོགས་ལ་ཆགས་པས་དུད་འགྲོའི་སྐྱེ་གནས་སུ་འགྲོ་བ་ཟློག་པའི་དོན་དུ་གོང་བུ་དང་རྐང་པ་དགུག་པ་ལྟ་བུ་དབང་དགུག་ལ་སོགས་པའི་ཐབས་ཀྱིས་གཞན་གྱི་བུད་མེད་དབྲོག་པར་བྱ་བ་དང༌། འཁོར་ལོའི་རིགས་ཀྱི་བརྟན་རྙེད་ཐོབ་པས་རིགས་ཀྱི་རྣམ་རྟོག་དང༌། གཙང་སྨྲེའི་རྣམ་རྟོག་གཞིག་པའི་ཕྱིར་དང༌། རྫས་སོ་སོ་སྦྱངས་པ་ལས་བྱུང་བའི་དངོས་གྲུབ་ཐོབ་པའི་ཕྱིར་དུ་མྱོས་བྱེད་དང༌། ཤ་རྣམས་དང༌། བདུད་རྩི་རྣམས་དང༌། གཟུགས་སོགས། ཡུལ་རྣམས་ལ་ཅི་དགར་སྤྱོད་པའི་བདེ་བ་རྗེས་སུ་གནང་སྟེ། དེ་ལྟར་ན་བསད་པ་ལ་སོགས་པའི་ལས་འདི་རྣམས་བསྐྱེད་རིམ་ལ་བརྟན་ནས་རིག་པའི་བརྟུལ་ཞུགས་སྤྱོད་པ་ལ་བརྟེན་རྙེད་ཀྱི་ཚད་སྤྱི་དང་མཐུན་མོད། འོན་ཀྱང་རྒྱུད་འདིར་བསམ་གཏན་གྱི་ལས་ཚོགས་ཕལ་ཅིག་སྲོག་གཟུགས་གྲུབ་པས་སྒྲུབ་པར་གསུངས་ན། དེ་ནི་རྫོགས་རིམ་ལ་སྲོག་རྩོལ་མ་གྲུབ་པར་མི་འབྱུང་ངོ་སྙམ་ན། སྟོང་གཟུགས་ཀྱི་ངོ་བོར་གྱུར་པའི་སྲོག་གཟུགས་གྲུབ་པ་ལ་དེ་བཞིན་དགོས་ཀྱང་སྲོག་གཟུགས་ཙམ་ལ་མི་དགོས་ཏེ། བསྐྱེད་རིམ་བརྟན་པས་བུམ་པ་ཅན་གོམས་པར་བྱས་ན་རྟགས་པའི་ལྷ་དང༌། རགས་པའི་རླུང་འདྲེས་པའི་སྲོག་གཟུགས་གྲུབ་པ་ནི་འབྱུང་ངོ༌། །དེ་གྲུབ་ན་བརྟན་རྙེད་ཁྱད་པར་ཅན་ཡིན་པས་དངོས་གྲུབ་རྣམས་ཀྱང་སྒྲུབ་ནུས་ན། ཕྲ་མོ་རྣམས་ཐོགས་པ་མེད་པར་འགྲུབ་པ་སྨོས་མ་དགོས་ཀྱང༌། སྤྱིར་བསྐྱེད་རིམ་ལ་གསལ་སྣང་ཐོབ་ཅིང་བརྟན་ལ་ནུས་པ་རྙེད་པ་ཙམ་ལ་སྲོག་གཟུགས་གྲུབ་པར་ནི་མ་ངེས་སོ། །འདིར་འགྲེལ་པ་ལས། ནུས་པ་རྙེད་པ་ཞེས་གསུངས་པས་བརྟུལ་ཞུགས་ཀྱི་དྲོད་ཚད་བསྟན་པ་དང༌། བཟང་པོའི་ཡུལ་རྣམས་ཞེས་སོགས་ཀྱིས་སྤྱོད་
པའི་ངོ་བོ་དང༌། མྱོས་བྱེད་ཆང་དང་སོགས་ཡོ་བྱད་དང་བསད་སོགས་ལས་བཞི་པོ་ཁྱད་པར་ཅན་གྱིས་འགྲོ་བའི་དོན་སྤྱོད་པའི་འཕྲིན་ལས་དང་སྤྱོད་པ་ཉིད་ཀྱི་ལོངས་སྤྱོད་དང་དམ་ཚིག་རྣམས་ཀྱང་བསྟན་པ་ཡིན་ནོ།། །།གཉིས་པ་ནང་ངེས་དོན་རྫོགས་རིམ་ལ་སྦྱར་བ་ནི། འདིར་རྡོ་རྗེའི་རིགས་ལ་སོགས་པ་རིགས་དྲུག་གི་བརྡས་གཙུག་ཏོར་ལ་སོགས་པ་འཁོར་ལོ་དྲུག་གི་རྩ་དང་ཐིག་ལེ་དང་རླུང་གི་ཚོགས་རྣམས་བསྟན་པ་ཡིན་ཏེ། འཁོར་ལོ་དྲུག་རིགས་དྲུག་གི་དག་པ་དང་འབྲེལ་བའི་དབང་དུ་མཛད་པའོ། །དེ་ལྟར་ན་ངེས་པར་རྡོ་རྗེའི་རིགས་གཙུག་ཏོར་གྱི་འཁོར་ལོའི་གནས་སུ་མས་བརྟན་གྱི་དགའ་བཞིའི་མཐར་ཐིག་ལེའི་གཞོན་པར་གྱུར་པའི་སྲོག་སྟེ་རླུང་གཅོད་ཅིང་ཐིམ་པར་བྱས་པ་ལས་གནས་དེར་ཐིག་ལེ་མི་འགྱུར་བའི་ནུས་པ་ཐོབ་པར་བྱ་སྟེ། འདིའི་མཐར་ཐུག་པ་ནི་ཏིང་ངེ་འཛིན་གྱིས་ས་བཅུ་གཉིས་པའོ། །རལ་གྲིའི་རིགས་ཏེ་སྙིང་གའི་འཁོར་ལོ་ལ་རླུང་རྣམས་ཐིམ་པར་བྱས་པས། ངེས་དོན་རྣལ་འབྱོར་པ་རང་ཉིད་ཀྱི་ཉམས་མྱོང་ལ་གཞོམ་མེད་ཀྱི་སྒྲ་རྣམ་པ་ཐམས་ཅད་པར་ཤར་བ་དང༌། དྲང་དོན་གཞན་སྣང་དུ་སེམས་ཅན་སོ་སོའི་བསམ་པ་དང་མཚུངས་པར་ཆོས་སྒོ་སྣ་ཚོགས་ཅིག་ཅར་སྟོན་པ་སྟེ། བདེན་པ་མ་ཡིན་པ་རྫུན་གྱི་ཚིག་ནི་ཚིག་གང་ཡིན་ཡང་རུང་ཚིག་རང་ཉིད་ཀྱི་དོན་ལ་རབ་ཏུ་མི་གནས་པ་ཡིན་པས། རྣམ་པ་ཐམས་ཅད་པའི་སྒྲ་དང་ཆོས་སྟོན་པ་ཡང་དོན་གཅིག་ཁོ་ན་ལ་རབ་ཏུ་མི་གནས་པར་དོན་དུ་མ་ཅིག་ཅར་བྱུང་བའི་ཕྱིར། འཇིག་རྟེན་དུ་གྲགས་པ་ལ་ཡང་བདེན་པ་མ་ཡིན་པའི་དོན་གཅིག་ཏུ་ངེས་པ་མ་ཡིན་པར་འདོད་པ་དང་མཚུངས་པའི་ཕྱིར། གཞོམ་མེད་ཀྱི་སྒྲ་ལ་རྫུན་གྱི་
བརྡས་བསྟན་ནོ། །འདིར་གཞོམ་མེད་ཀྱི་སྒྲ་ངེས་དོན་དང༌། གདུལ་བྱ་གཞན་ལ་ཆོས་བསྟན་པ་དྲང་དོན་དུ་བཤད་པས་དྲང་ངེས་ཀྱི་འཇོག་ཚུལ་གཞན་སྐབས་འདིར་འགྲིག་ས་མེད་པས་དྲང་དོན་ཀུན་རྫོབ་དང༌། ངེས་དོན་དོན་དམ་ལ་འཇོག་པ་ཉིད་ཡིན་པའི་ཕྱིར། གཞོམ་མེད་ཀྱི་སྒྲ་དབྱངས་དེ་དོན་དམ་བདེན་པ་ཉིད་དུ་ངེས་སོ། །སྐབས་འདིར་འགྲེལ་ཆེན་ལས། དྲང་པའི་དོན་དང་ངེས་པའི་དོན་གྱི་ཞེས་སོགས་གསུངས་པའི་ཚིག་འདིས་དོན་དམ་གནས་ལུགས་སྣང་མེད་ཁོ་ནར་འདོད་བཞིན་དུ། དུས་འཁོར་བར་ཁས་འཆེ་བ་རྣམས་ཀྱི་མཆུ་བཅད་པ་ཡིན་ནོ། །དེས་ན་འབྲས་དུས་ཀྱི་གསུང་གཞོམ་དུ་མེད་པའི་སྒྲ་ནི། དོན་དམ་སྟོང་པ་ཉིད་ཀྱི་ཡེ་ཤེས་ཁོ་ན་ཡིན་ལ། ལམ་གྱི་དུས་ན་དོན་དམ་ཀུན་རྫོབ་འདྲེས་པའི་ཚུལ་དུ་ཡོད་ཀྱང༌། དོན་གྱི་གཙོ་བོ་ཡིན་པའི་ཕྱིར། དོན་དམ་གྱི་ཕྱོགས་ནས་སྨོས་སོ། །དེས་ན་སྐབས་འདིར་ཏིང་ངེ་འཛིན་གྱི་ས་དྲུག་པ་ལ་གཞོམ་མེད་ཀྱི་སྒྲ་དབྱངས་རྣམ་པ་ཐམས་ཅད་པ་དངོས་ཐོབ་པར་འགྱུར་ལ། སྲོག་གཅོད་པའི་ངེས་དོན་དང་འདི་གཉིས་ཀར་རླུང་ཐིམ་པ་ལ་སྦྱོར་བར་འདྲ་ཡང༌། སྔ་མ་ནི་ཐིག་ལེའི་བགྲོད་པ་འགོག་པའི་རྒྱུར་རླུང་ཐིམ་པ་སྟེ། གནས་ཀྱང་གཙུག་ཏོར་གཙོ་བོ་ཡིན་ལ། འདི་ནི་རྣམ་རྟོག་གི་ཚོགས་འགག་ཅིང༌། གཞོམ་མེད་ཀྱི་སྒྲ་བསྐྱེད་པའི་དོན་དུ་རླུང་དགག་པ་ཡིན་པས་གནས་ཀྱང་སྙིང་ག་གཙོ་ཆེའོ། །རིན་ཆེན་རིགས་མགྲིན་པ་ལ་ནི་གཞན་རྡོ་རྗེ་སེམས་དཔའི་ནོར་མི་འགྱུར་བའི་ཐིག་ལེ་ཡོན་ཏན་མཐའ་ཡས་པ་བསྐྱེད་པའི་གཞི་ཡིད་བཞིན་གྱི་ནོར་བུ་ལྟ་བུ་འཕྲོག་པ་སྟེ་ཐོབ་པར་བྱའོ། །དེ་ཡང་ཏིང་ངེ་འཛིན་གྱི་ས་བརྒྱད་པ་ལ། ལྟེ་བའི་གཏུམ་མོ་འབར་བའི་སྟེང་དུ།
མགྲིན་པའི་ཡེ་ཤེས་ཀྱི་གཏུམ་མོ་ལྷག་པར་རྒྱས་པ་འདྲེས་པས་འགྱུར་མེད་ཀྱི་ཐིག་ལེའི་སྟོབས་ས་དང་པོ་ནས་བདུན་པའི་བར་གྱི་འཕེལ་བསྐྱེད་ལས་བརྒྱ་སྟོང་མང་པོའི་འགྱུར་བསྐྱེད་ལྷག་པ་ཞིག་འབྱུང་བ་དེའོ། །དེ་བཞིན་དུ་མཆོག་གི་པདྨའི་རིགས་སྤྱི་བོའི་འཁོར་ལོ་ལ་ནི། གཞན་དོན་དམ་སྟོང་པ་ཉིད་ཀྱི་བུད་མེད་རྣམ་ཀུན་མཆོག་ལྡན་གྱི་སྟོང་ཉིད་ཤིན་ཏུ་རྣམ་པ་ཐམས་ཅད་པ་འཕྲོག་པ་སྟེ་གསར་དུ་ཐོབ་པར་བྱེད་པའོ། །དེ་ཡང་ཏིང་ངེ་འཛིན་གྱི་ས་བཅུ་པ་ལ་སྤྱི་བོ་སད་པའི་གནས་སྐབས་དག་ཚུལ་ལས་བརྩམས་པའི་གཟུགས་བརྙན་འཆར་ཚུལ་ཤིན་ཏུ་རྒྱས་པས་ས་དགུ་པ་མན་ཆད་ཀྱི་དཔེར་མི་མཚོན་པའི་རྣམ་པ་ཐམས་ཅད་པའི་ཡེ་ཤེས་དང་རྣམ་འཕྲུལ་ཐོབ་པ་སྟེ། མགྲིན་པ་དང་སྤྱི་བོའི་འདི་གཉིས་རླུང་ཐིམ་པ་ལྟ་བུ་ཞིག་ཁོ་ན་གཙོ་བོར་མི་བཟུང་གི་དཀར་དམར་རླུང་གསུམ་ཆ་མཉམ་པར་འགགས་པ་ལ་བཤད་དོ། །འཁོར་ལོའི་རིགས་ཏེ་ལྟེ་བའི་འཁོར་ལོ་ལ་ནི། ཆང་གི་བརྡས་ཡས་བབས་ཀྱི་ལྷན་སྐྱེས་ཞུ་བདེ་འགྱུར་མེད་དུ་འཆིང་བ་དང༌། སྒྲོན་མ་ཤ་ལྔའི་བརྡས་དབང་པོ་ལྔའི་དྭངས་མ་དང༌། སངས་རྒྱས་བདུད་རྩི་ལྔའི་བརྡས་འབྱུང་བ་ལྔའི་དྭངས་མ་རྣམས་བཅིངས་པ་ལས། ཞུ་བའི་ཐིག་ལེ་རྡུལ་ཕྲ་རབ་ཀྱི་ཚོགས་པ་ཤིན་ཏུ་རྣམ་པར་དག་པར་བྱེད་པ་སྟེ། ཏིང་ངེ་འཛིན་གྱི་ས་བཞི་པ་ཡན་ཆད་ལ་ལྷག་པར་བསྐྱང་བར་བྱ་བ་ཉིད་དོ། །བཟང་པོའི་ཡུལ་རྣམས་ཞེས་པ་ནི། རེས་འགའ་ལྟེ་བ་སད་པའི་གནས་སྐབས་སྐུ་རྡོ་རྗེ་དང་སྦྱོར་བའི་ངེས་པས་སྟོང་པ་ཉིད་ཀྱི་གཟུགས་སྒྲ་དྲི་རོ་རེག་བྱ་ལ་བརྟེན་པའི་ཞུ་བདེ་ལྷག་པར་སྤྱོད་པའོ། །སྤྱིར་ལྟེ་བར་ལྷན་སྐྱེས་ཀྱི་ཐིག་ལེ་ཤིན་ཏུ་བཅིངས་པའི་སྟོབས་ལས་ཁམས་ལྔ་
དང་བདུད་རྩི་ལྔ་ཐིམ་དེའི་མཐུ་ལས་འོག་ཏུ་བཤད་པའི་རྩ་དག་པ་དང༌། དེར་དབང་ལྔ་བཅིངས་པས་འོག་ཏུ་དྲི་ཆུ་དག་པ་དང༌། གནས་དེར་ཀུནྡ་བཅིངས་པའི་འོག་ཏུ་ཁུ་བའི་རྩ་འགག་པར་འགྱུར་རོ། །འདི་ཙམ་ཞིག་ནི་འཛིན་པའི་སྐབས་ནས་གྲུབ་པ་ཡིན་ཡང༌། ཁྱད་པར་ཅན་འགྲུབ་པའི་དབང་དུ་བྱས་ནས་ཏིང་ངེ་འཛིན་གྱི་ས་བཞི་པ་ཡན་ཆད་སྨོས་སོ། །སྐབས་འདིར་ཡེ་ཤེས་ཀྱི་སྣང་བ་ལྷག་པར་རྒྱས་པའི་ཕྱིར། ས་བཞི་པ་འོད་འཕྲོ་བ་ཞེས་པའང་འདི་ལ་དགོངས་པར་སེམས་ཏེ། གོང་མའི་ས་བཅུ་གཉིས་ཀྱང་ཏིང་ངེ་འཛིན་གྱི་ས་དང་རྣམ་པ་མཚུངས་པའི་ཕྱིར་རོ། །དེ་ལྟར་ན་དེ་རྣམས་ནི་ཡེ་ཤེས་ཀྱི་ཚོགས་ཀྱི་དོན་ཏེ། རྣམ་ཀུན་མཆོག་ལྡན་གྱི་སྟོང་གཟུགས་དང་མི་འགྱུར་བའི་བདེ་བ་ཟུང་དུ་འཇུག་པ་ནི། ཡེ་ཤེས་ཀྱི་ཚོགས་དངོས་ཡིན་པས་སོ། །གྲི་གུག་གི་རིགས་ཀྱི་དག་པའི་ཆོས་ནི་ཚུལ་ཁྲིམས་ཀྱི་ཚོགས་ཡིན་ལ། རིགས་དྲུག་ཀར་གྱི་ཐུན་མོང་དུ་བསོད་ནམས་ཀྱི་ཚོགས་ཏེ། འདི་གཉིས་ནི་རྫོགས་རིམ་གྱི་ཕྱོགས་ལ་བཤད་མ་ཐག་པའི་མཐར་སྦྱར་བས་ཚོགས་གསུམ་ཅར་གྱི་རྐང་གྲངས་ཚང་བར་འགྱུར་ལ། འབྲས་བུ་རིག་འཛིན་འགྲུབ་པའི་ཕྱིར། བསྐྱེད་རིམ་གྱི་དག་པའི་ཆོས་ལའང་འདི་གཉིས་སྣོན་ནི་དགོས་མོད་ཀྱང༌། བསྐྱེད་རིམ་འཁོར་བཅས་ཙམ་གྱིས་སངས་རྒྱས་སྒྲུབ་པའི་ལམ་གྱི་ལུས་ཚང་བར་མི་འགྱུར་བའི་ཕྱིར། ཚོགས་གསུམ་གྱི་རྐང་སྒྲིག་དགོས་པ་མ་ཡིན་ནོ། །དེ་ཡང་ནང་དུ་གྲི་གུག་གི་རིགས་གསང་བའི་འཁོར་ལོ་ལ་ཡང་གཡུང་མོའི་བརྡས་བསྟན་པ། ཨ་ཝ་དྷཱུ་ཏཱི་ལ་སོགས་པའི་རྩ་དང་རླུང་དང༌། ཐིག་ལེ་རྣམས་མཁའ་སྟེ་སྟོང་པ་ཉིད་ཀྱི་ངང་དུ་འཆིང་ཞིང་མི་སྨད་པ་
དང༌། ཕྱི་རུ་ཡང་དེ་ལྟ་བུའི་རྒྱུར་གཡུང་མོ་ལ་སོགས་པའི་རིགས་ཐ་དད་པའི་བུད་མེད་རྣམས་མཁའ་ཡི་པདྨར་མི་སྨད་པ་སྟེ་མཉམ་པར་སྦྱར་བ་ལས་གསང་བ་ནས་ནོར་བུའི་བར་དུ་ཞུ་བདེ་བྱང་ཆུབ་ཀྱི་སེམས་བཅིངས་པས་འཕོ་མེད་ཀྱི་ཚངས་སྤྱོད་སྒྲུབ་པ་ཡིན་ལ། བསྐྱེད་རིམ་གྱི་སྲོག་གཟུགས་གྲུབ་པས་ཀྱང་རིག་བརྟུལ་གྱི་སྐབས་སུ་འདི་དང་རྗེས་མཐུན་གྱི་ཚངས་པར་སྤྱོད་པ་ལ་གནས་པ་དགོས་པས། བསྐྱེད་རྫོགས་གཉིས་པོ་ལ་སྦྱོར་ཚུལ་དེ་ལྟར་ཡིན་ལ། འདིར་ཚུལ་ཁྲིམས་ཀྱི་ཚོགས་ནི་ཞུ་བདེ་འགྱུར་མེད་ཡིན་ཞིང༌། དེ་ཡང་དངོས་ནི་འཛིན་པ་གྲུབ་པ་ནས་འབྱུང་ལ། རྗེས་མཐུན་པ་བསྐྱེད་རིམ་གྱི་སྐབས་སུ་བྱུང་བ་དེས་ནི་ཡེ་ཤེས་ཀྱི་རྩ་རླུང་ཐིག་ལེ་མངོན་དུ་མི་བྱེད་ཀྱང༌། འབྱུང་ལུས་ཕྲ་མོས་བསྡུས་པའི་དྭངས་མ་ཙམ་འགྲུབ་པར་འགྱུར་རོ། །བསོད་ནམས་ཀྱི་ཚོགས་ནི་གཞན་དོན་ཏེ་ནོར་དང་བུ་དང་ཆུང་མ་སོགས་དང་བཅས་པའི་རང་གི་ལུས་ཀྱང་སེམས་ཅན་ཐམས་ཅད་ཀྱི་དོན་གྱི་སླད་དུ་སྦྱིན་ཞིང་བློས་བཏང་ནས། བདག་གིར་འཛིན་པས་ཀུན་ནས་བསླངས་པའི་ལྟ་ཉུལ་གྱི་སྲུང་བ་མི་བྱེད་པ་སྟེ། རྫོགས་རིམ་གྱི་ཕྱོགས་ལ་ལས་དང་པོ་པ་ཉིད་ནས་བལྟོས་མེད་བཞི་ལྡན་གྱི་ཚུལ་གྱིས་སྒྲུབ་དགོས་པ་ཡིན་ཡང༌། གཙོ་བོར་ལུས་སྟོང་གཟུགས་སུ་ཤར་བ་ཐོག་མར་དགེ་བའི་རྟོགས་པ་རྫོགས་པ་ནས་འཇོག་པ་དང༌། ཁྱད་པར་ཅན་ནི་དེ་འདྲ་དེ་སླར་ཡང་རྗེས་སུ་དྲན་པ་རྗེས་དྲན་གྱི་ཡན་ལག་ནས་འབྱུང་བས། སྐབས་འདིར་ཕྱི་མའི་དབང་དུ་བྱས་པ་ཡིན་ལ། བསྐྱེད་རིམ་གྱི་རིག་བརྟུལ་ལ་ཡང་ལུས་དང་ལོངས་སྤྱོད་ལ་མངོན་ཞེན་སྤངས་པ་འདི་དགོས་པས། འདི་ཡང་རིམ་པ་གཉིས་ཀར་
ལ་འཇུག་གོ །སྐབས་འདིར་རྫོགས་རིམ་ཁོ་ན་ཉིད་ལ་འཇུག་པའི་བསོད་ནམས་ཀྱི་ཚོགས་ནི་དེ་ཡིན་ལ། ལུས་ནི་མཚོན་པར་བྱེད་པ་སྟེ་ངག་དང་ཡིད་ཀྱང་ངོ༌། །སྤྱིར་ལུས་ངག་གི་ལས་དགེ་བ་དང༌། ཡིད་ཀྱི་ལས་རྣམ་པར་རྟོག་པའི་རྒྱུ་དང་བཅས་པའི་དགེ་བ་རྣམས་ནི་བསོད་ནམས་ཀྱི་ཚོགས་ཏེ། དེའི་གཙོ་བོ་ནི་སྙིང་རྗེ་ཆེན་པོ་དང༌། བླ་མ་མཆོད་པ་དང༌། སེམས་ཅན་གྱི་དོན་རྣམས་ཡིན་ལ། གང་ཟག་གི་ཁྱད་པར་འགའ་ཞིག་ལ་ནི་བསྐྱེད་རིམ་ཡང་ངོ༌། །བསྐྱེད་རིམ་རྐྱང་པའི་རྣལ་འབྱོར་ལ་གནས་པ་ལ་ནི། ཡེ་ཤེས་ཚོགས་ཀྱི་རྣམ་པ་ལམ་བྱེད་ཙམ་ཡོད་ཀྱང༌། ཡེ་ཤེས་ཀྱི་ཚོགས་དངོས་མེད་པས། བསོད་ནམས་གཙོ་བོ་དང་ཚུལ་ཁྲིམས་ཆུང་ངུ་འཁོར་གྱི་ཚུལ་ལོ། །རྫོགས་རིམ་གྱི་གནས་སྐབས་ཀུན་ཏུ་ཚོགས་གསུམ་ལྡན་དུ་དགོས་ཀྱང༌། འཛིན་པ་རྗེས་དྲན་ཚུལ་ཁྲིམས་གཙོ་བོ་དང༌། ཏིང་ངེ་འཛིན་ཡེ་ཤེས་ལ་གཙོ་བོར་སྤྱོད་པའོ། །དེ་ལྟར་རྟོགས་ན་བསོད་ནམས་དང་ཚུལ་ཁྲིམས་གཉིས་ལས་ཡེ་ཤེས་འབྱུང་བར་གསུངས་པའི་དོན་ལ་ངེས་པ་རྙེད་པར་འགྱུར་རོ། །དེ་ལྟར་དག་པའི་ཆོས་བཤད་ནས། དེའི་རྗེས་སུ་དམ་ཚིག་བརྗོད་པར་བྱའོ། །དེ་ཡང་ནུབ་གཅིག་ལ་དབང་བཅུ་གཅིག་རྫོགས་པར་བསྐུར་བ་ཡིན་ན། དམ་ཚིག་བརྗོད་པ་ནི་འདིར་བྱེད་པའམ་དབང་གསུམ་པའི་ཐུན་མོང་མ་ཡིན་པའི་དམ་ཚིག་བརྗོད་པའི་རྗེས་སུ་བསྒྲག་ཀྱང་རུང་སྟེ་གདམ་ང་ཡིན་ལ། འོན་ཀྱང་སྤྱི་ལྡོག་ནས་སྐབས་སུ་བབ་པ་ནི། གནས་སྐབས་འདི་ཁོ་ནར་སྣང་ཞིང༌། ཉིན་ཞག་གཅིག་པོ་དེ་ལ་བྱིས་འཇུག་ཁོ་ན་བྱེད་ན། སྐབས་འདིར་ངེས་པར་བརྗོད་དགོས་ཏེ། བྱིས་འཇུག་ཁོ་ན་ཐོབ་པས་ཀྱང་འདི་དག་ངེས་པས་
བསྲུང་དགོས་པའི་ཕྱིར། རྒྱུད་འགྲེལ་གྱི་དགོངས་པ་ཡང་དེ་ཁོ་ནའོ། །དེ་ལ་དམ་ཚིག་བརྗོད་པ་ནི། གལ་ཏེ་གཡོ་སྒྱུའི་དབང་གིས་ཞེས་སོགས་ཏེ། འདི་དག་གི་དོན་རྒྱས་པར་གཞན་དུ་ཤེས་པར་བྱ་ལ། སྙིང་པོ་མདོ་ཙམ་བརྗོད་ན་འདི་ཡིན་ཏེ། གཡོ་སྒྱུའི་དབང་གིས་ཞེས་པ་འདི། དོན་གྱི་མདོ་ཆེན་པོ་འཛིན་པའི་ནུས་པ་ཅན་གྱི་ཚིག་སྟེ། དེའི་འགྲེལ་པར་མི་དགེ་བ་བཅུ་ལ་ཞུགས་པའི་དབང་གིས་ཞེས་འབྱུང་ངོ༌། །དེ་ཡང་དཀར་ནག་གི་ལས་འབྲས་དང་ལམ་དང་འབྲས་བུའི་ཆོས་ལ་ཡིད་ཆེས་མེད་པ་དག་ནི། སྔགས་ལ་ཞུགས་པར་རློམ་ཡང་གཡོ་སྒྱུའི་དབང་གིས་མི་སྔུན་དུ་དམ་ཚིག་སྲུང་བ་ལྟར་བྱེད་པའང་སྲིད་མོད། གཡོ་སྒྱུའི་རང་བཞིན་ཉིད་ཀྱི་ཕྱིར་ལྐོག་ཏུ་མི་དགེ་བ་བཅུ་བྱེད་པ་སོགས་བག་མེད་དུ་སྤྱོད་པར་འགྱུར་བས། གང་གཡོ་སྒྱུ་དང་ལྡན་པ་དེ་ལ་མ་གུས་པ་དང༌། བག་མེད་པ་གཉིས་ཀར་འབྱུང་ཞིང༌། དེ་ལས་ཀྱང་གཙོ་བོ་མ་གུས་པ་ཡིན་པས་ཆོས་ནས་ལྟུང་བ་ཡིན་པར་བཤད་པ་ཐོས་ཀྱང་སྐྱོན་དུ་མི་སེམས་པ་ནི་མ་གུས་པ་སྟེ་དེས་ཀུན་ནས་བླངས་པའི་རྩ་ལྟུང་ཡིན་ན་བྱས་སྟོབས་ཆེ་ཆུང་ཇི་ལྟར་ཡིན་ཡང༌། ཤིན་ཏུ་ལྕི་བའི་ཕྱིར་དམྱལ་བ་བརྒྱད་པོ་གང་རུང་དུ་འགྲོ་བར་ཐེ་ཚོམ་མེད་དོ། །དེ་དག་ཏུ་ཡང་ཚེ་ཚད་ལས་ཐུང་བར་ནམ་ཡང་མི་འགྱུར་ཞིང༌། དམྱལ་བ་པ་གཞན་ལས་སྔགས་ཀྱི་དམ་ཚིག་ཉམས་པའི་དམྱལ་བ་པ་རྣམས་ལྷག་པར་སྡུག་བསྔལ་དོས་གྲགས་པའང་ཡིན་ནོ། །སློབ་མ་གང་དག་རྡོ་རྗེ་སློབ་དཔོན་ལ་རིག་མའི་དབང་གིས་ཕྲག་དོག་གི་རྣམ་རྟོག་སྐད་ཅིག་ཙམ་སྐྱེས་པས་ཀྱང་ཡུལ་ཕྱོགས་ཉེ་བ་ན་ཡོད་ན་ཐུན་མཚམས་སམ་ཉིན་ཞག་གཅིག་གི་ཁོངས་སུ་བཤགས་ཤིང་ཕྱིར་བཅོས་མ་བྱས་ན། དམྱལ་བ་བརྒྱད་པ་རྡོ་རྗེའི་
དམྱལ་བར་འཇུག་པར་བཤད་པས། དེ་ལས་དཔགས་ཏེ་རྩ་ལྟུང་དང་པོ་དང་གཉིས་པ་ཡན་ལག་ཚང་པར་སྤྱད་ན། དམྱལ་བ་བརྒྱད་ཀྱི་ནང་ན་རྡོ་རྗེའི་དམྱལ་བར་འཇུག་གོ །བླ་མ་ལ་བརྟེན་པའི་རྩ་ལྟུང་འདི་ནི། ཡུལ་ཁོ་ནས་སྟོབས་ཀྱིས་ཉེས་པ་ཤིན་ཏུ་ལྕི་བ་ཉིད་ཡིན་པའི་ཕྱིར། དམ་ཚིག་ལ་མ་གུས་པའི་བསམ་པ་ལྟུང་བའི་ཡན་ལག་ཏུ་ངེས་པར་སྦྱོར་དགོས་པ་མ་ཡིན་ལ། ཕལ་ཆེར་ལ་རང་ཤུགས་ཀྱིས་ནི་འབྱུང་ངོ༌། །རྩ་ལྟུང་གསུམ་པ་ཡང་སློབ་མར་གྱུར་པས་རང་གི་རྡོ་རྗེ་སློབ་དཔོན་གྱི་སློབ་མ་ལ་ཁྲོས་པ་ཡིན་པའི་ཕྱིར། ཡུལ་སློབ་དཔོན་ལ་བརྒྱུད་ནས་བརྟེན་པར་འགྲོ་ཞིང༌། ནང་སྨེ་བྱེད་པ་ཡིན་པའི་ཕྱིར། རྩ་ལྟུང་ཕྱི་མ་རྣམས་ལས་ཆེས་ལྕི་བ་ཡིན་མོད། ཡུལ་སློབ་དཔོན་ལ་དངོས་སུ་སྡིག་གསོག་པའི་སྔ་མ་གཉིས་ལས་ཅུང་ཟད་ཡང་བས། དམྱལ་བ་བརྒྱད་པའི་ངེས་བཟུང་གསལ་བར་མ་གསུངས་སོ། །དེས་ན་གསུམ་པ་ཕན་ཆད་རྩ་ལྟུང་རྣམས་ལ་ལྟུང་བ་ལན་མང་དུ་བྱས་ཤིང༌། སྡིག་པ་རླབས་ཆེན་དུ་སོང་ན། ལས་དེ་དག་གིས་རྡོ་རྗེའི་དམྱལ་བར་འཇུག་པའང་ཡོད་མོད་ཀྱི། མ་གུས་པའི་དབང་གིས་བྱུང་བའི་རྩ་ལྟུང་ལན་གཅིག་བྱས་པ་ཡིན་པ་ཙམ་གྱིས་རྡོ་རྗེའི་དམྱལ་བར་མ་ངེས་ཀྱང་ཕྱིར་བཅོས་མ་བྱས་ན་དམྱལ་བ་བརྒྱད་པོ་གང་རུང་དུ་ནི་ངེས་སོ། །མདོ་ལུགས་ལ་སེམས་བསྐྱེད་ཀྱི་སྡོམ་པའི་སྐབས་སུ་རྩ་ལྟུང་གི་རིགས་སུ་འགྱུར་བའི་ལས་བདག་བསྟོད་གཞན་སྨོད་ལ་སོགས་པ་དེ་རྣམས་ཉོན་མོངས་དྲག་པོས་བྱས་ན་སྡོམ་པ་འཇིག་པ་དང༌། ཉོན་མོངས་འབྲིང་པོ་དང་ཆུང་ངུས་བྱས་པ་ལ་སྡོམ་པ་རྩ་བ་ནས་འཇིགས་པ་རང་མིན་པས་བྱང་ཆུབ་སེམས་དཔའ་གསུམ་མམ་གཅིག་གི་དྲུང་དུ་བཤགས་ཀྱང་ཆོག་པར་བཤད་པ་དང༌།
འདིར་གཡོ་སྒྱུའི་དབང་གིས་ཞེས་གསུངས་པ་ཚིག་གི་ནུས་པ་གཅིག་སྟེ། འདིར་བསླབ་པ་དམ་ཚིག་ལ་མ་གུས་པའི་གཡོ་སྒྱུའི་སེམས་ནི་ལོག་ལྟའི་ཞད་དང་བཅས་པ་ཉིད་ཀྱི་ཕྱིར། ཉོན་མོངས་དྲག་པོ་སྟེ་ཤིན་ཏུ་མ་རུངས་པ་ཡིན། དེས་ཀུན་ནས་བླངས་པའི་རྩ་ལྟུང་གིས་ནི་སྔགས་སྡོམ་སྟེ་དམ་ཚིག་རྩ་བ་ནས་འཇིག་ཅིང་ཉམ་པར་བྱེད་ལ། དེས་མཚོན་ནས་ཉོན་མོངས་དྲག་པོ་གཞན་ཡང་ཁོངས་སུ་བསྡུ་ཞིང༌། ཉོན་མོངས་འབྲིང་ངམ་ཆུང་ངུས་བྱས་པ་རྣམས་ཀྱིས་དམ་ཚིག་རྩ་བ་ནས་འཇིག་པ་རང་མིན་ཡང་ཤིན་ཏུ་ཉམས་སྨད་དེ་ཉམ་པར་བྱས་པའི་ཕྱིར་སྤྱིར་རྩ་ལྟུང་ནི་ཡིན་ནོ། །གལ་ཏེ་དམ་ཚིག་ཉམས་ན་སླར་གསོ་བར་བྱེད་པའི་ཚུལ་ནི། རྒྱུད་ལས། རྩ་བའི་ལྟུང་བ་རྣམ་པར་དག་པར་འགྱུར་ཏེ་ཡོན་ཏན་ལྡན་པ་དབང་བདུན་ལ་གནས་དག་གིས་སོ། །བུམ་པ་གསང་བ་ལ་གནས་གལ་ཏེ་བརྟུལ་ཞུགས་ངེས་པའི་དབང་གིས་གོང་མ་ལ་ནི་དག་པ་མེད། རྩ་བའི་ལྟུང་བ་བྱུང་བ་གང་ཞིག་དག་པའི་སླད་དུ་སླར་ཡང་དཀྱིལ་འཁོར་འདིར་ནི་འཇུག་བྱ་སྟེ། རྗེས་སུ་གནང་བ་ཐོབ་ནས་སླར་ཡང་ཚོགས་ཀྱི་འདུས་པར་ཐུ་བོའི་མིང་ནི་ཆུང་བ་ཉིད་དུ་འགྱུར། དེ་ལ་ཡོན་ཏན་ལྡན་པ་ཞེས་པ་ནི་ཕྱིས་མི་བྱེད་པའི་སྡོམ་པ་ལ་གནས་པ་ཡིན་ཏེ། འདི་ནི་སྐབས་འདིའི་དོན་ཚན་རྣམ་གྲངས་གལ་ཆེ་ཤོས་གཅིག་ཏུ་སྦྱོར་རྒྱུ་ཡིན་ནོ། །དེ་ཡང་དབང་བདུན་ཐོབ་ལ་གོང་མ་མ་ཐོབ་པ་ནི། རྩ་ལྟུང་བྱུང་ན་སྡིག་པ་སྦྱང་བའི་ཐབས་རང་གི་འདོད་པའི་ལྷའི་སྙིང་པོའམ། རྡོ་རྗེ་སེམས་དཔའི་ཡི་གེ་བརྒྱ་པ་སྟོང་ཕྲག་སུམ་ཅུ་རྩ་དྲུག་གི་བཟླས་པས་དག་པར་ནུས་པ་དང༌། བུམ་དབང་དང་གསང་བའི་དབང་བསྐུར་ཙམ་ཐོབ་པ་ལ་ནི། སློབ་དཔོན་གྱིས་ཇི་སྐད་
བཀའ་སྩལ་པའི་བརྟུལ་ཞུགས་ངེས་པའི་ཆད་པ་དང་དུ་བླངས་པས་སྡིག་པ་དག་པར་འགྱུར་ཏེ། དེ་ཡང་བུམ་དབང་ཙམ་ཐོབ་པ་ལ་ཡོན་དབུལ་བ་དང་ཕྱག་མཆོད་སོགས་བསོད་ནམས་ཚོགས་ཆད་པ་ཙམ་དང༌། དེ་སྟེང་གསང་དབང་ཡང་ཐོབ་པ་ལ་ནི། བསོད་ནམས་ཀྱི་ཚོགས་ཀྱི་ཆད་པ་སྔོན་དུ་འགྲོ་བའི་དཀའ་ཐུབ་དཀའ་སྤྱད་ཚུལ་ཁྲིམས་ཀྱི་ཚོགས་ཀྱི་ཆད་པ་ཉམས་སུ་བླང་དགོས་པ་ཡིན་ ནོ། །གལ་ཏེ་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ་ན། དེ་ལ་བྱུང་བའི་རྩ་ལྟུང་ནི། ཆད་པའི་ལས་ཙམ་གྱིས་དག་པར་མི་འགྱུར་བས་བསོད་ནམས་དང་ཚུལ་ཁྲིམས་ཀྱི་སྟོབས་ཅི་ནུས་ཅི་ལྕོགས་སུ་བྱས་ནས་མཐོལ་བཤགས་རྒྱ་ཆེར་ཕུལ་ཏེ། བསྐྱེད་པའི་རིམ་པའམ་རྫོགས་པའི་རིམ་པའི་རྣལ་འབྱོར་ལ་ནན་ཏན་དུ་འབད་པས་རིམ་གྱིས་ལྟུང་བ་བྱང་བར་འགྱུར་རོ། །འདིའི་འགྲེལ་པར། སློབ་དཔོན་གྱིས་འདིའི་ཆད་པ་སྦྱིན་པར་མི་འགྱུར་རོ་ཞེས་པ་ནི། བསོད་ནམས་དང་ཚུལ་ཁྲིམས་ཀྱི་ཆད་ལས་བྱིན་པ་ཙམ་ལས་ལྟུང་བ་དག་པར་སློབ་དཔོན་གྱིས་གནང་བ་མི་སྦྱིན་པ་ཁོ་ན་ཏེ། སྦྱིན་པར་མི་འགྱུར་རོའི་དོན་སྦྱིན་པ་ཙམ་གྱིས་དག་པར་མི་འགྱུར་ཞེས་པའོ། །སྤྱིར་སློབ་དཔོན་གྱིས་དགེ་བའི་ཆད་ལས་སྟེར་བ་བཀག་པའོ་སྙམ་དུ་སེམས་ཤིང་སྨྲ་བ་ལྟར་མ་ཡིན་གྱི། སྐབས་དེར་དགེ་བ་གང་བསྒྲུབས་ཀྱང་དེའི་ལྟུང་བའི་གཉེན་པོར་འགྱུར་བ་ཁོ་ན་ཡིན་པའི་ཕྱིར་རོ། །དེས་ན་འགའ་ཞིག་བུམ་གསང་ཡན་ཆད་ལུས་ངག་གི་སྡོམ་པ་ཤས་ཆེ་བས་ཕྱིར་རོལ་གྱི་ཆད་ལས་དང༌། ཤེར་དབང་སེམས་ཀྱི་དམ་ཚིག་ཉམས་ན་རང་སེམས་དཔང་པོར་བཞག་ནས་རང་གིས་བསྒྲུབ་དགོས་ཚུལ་སོགས་འཆད་པ་ནི། བློས་བཏགས་ཀྱི་རང་བཟོ་འབའ་ཞིག་སྟེ། རང་སེམས་དཔང་པོར་འཇོག་པ་ཐམས་
ཅད་ལའང་དགོས་པ་དང༌། དེ་དང་བླ་མའི་བཀའ་སྦྱིན་པ་ནམ་ཡང་མི་འགལ་བའི་ཕྱིར་དང༌། གོང་མའི་རྩ་ལྟུང་ཅན་ལ་ཆད་ལས་ཀྱིས་གནོད་པར་འགྱུར་བ་ནམ་ཡང་མི་རིགས་པའི་ཕྱིར་རོ། །རྩ་བའི་ལྟུང་བ་བྱུང་བ་ཀུན་ལ་སྡོམ་པ་ཞིག་པའམ་རྩ་བ་ནས་མ་ཞིག་ཀྱང་ཉམས་སྨད་པའི་ཕྱིར་རོ། །སླར་བླང་བའམ་གསོ་བའི་དོན་དུ་དཀྱིལ་འཁོར་ཆེན་པོ་འདིར་ཡོངས་སུ་ཞུགས་ཏེ་དབང་བླང་བར་བྱའོ། །དེའི་ཚེ་སྡོམ་པ་སོར་ཆུད་པས་སློབ་དཔོན་གྱི་བཀའི་གནང་བ་ཐོབ་པར་བྱས་ནས་ཚོགས་ཀྱི་འདུས་པར་འཇུག་ཏུ་རུང་ལ། སྔོན་ལྟུང་བ་མ་བྱུང་བའི་དུས་ན་གཞན་གྱི་གྲལ་འགོ་སོགས་བཀུར་སྟི་དབང་བ་ཡིན་ཡང༌། སྐབས་དེར་དམ་ཚིག་གི་བསླབ་པ་གཞོན་པ་རྣམས་ཀྱང་གྲལ་གོང་དུ་བཏང་སྟེ། དམ་ཚིག་བསྐྱར་བ་དེ་ནི་གྲལ་གྱི་ཐ་མར་བཞག་པར་བྱའོ། །སྔར་ཐུ་བོ་ཡིན་ཡང་སྐབས་དེར་ཆུང་བར་འགྱུར་ཞེས་པའི་དོན་ནི་དེ་ཡིན་པས། ཐུ་བོའི་མིང་ནི་ཆུང་བ་ཉིད་དུ་འགྱུར་ཞེས་པ། ཐུ་བོ་ཞེས་བྱའང་ཆུང་བ་ཉིད་དུ་འགྱུར། ཞེས་འགྱུར་བཅོས་ན་བདེའོ། །དེ་ལྟར་དམ་ཚིག་གསོའི་ཟིན་ནས། གཟོད་བཟླས་བརྗོད་དང་ཆད་ལས་སོགས་བླང་བར་བྱ་བ་ཡིན་གྱི། དམ་ཚིག་མ་བསྐྱར་བ་ལ་བཟླས་བརྗོད་བྱ་བར་མི་རིགས་སོ། །འདིར་དག་བྱེད་བཤད་པ་ནི། སྔ་མ་སྔ་མའི་སྟེང་དུ་ཕྱི་མ་ཕྱི་མ་སྣོན་པ་ཡིན་ཏེ། བུམ་གསང་གི་སྐབས་སུ་བསོད་ནམས་དང་ཚུལ་ཁྲིམས་ཀྱི་དག་བྱེད་གསུངས་ཤིང༌། ཤེར་དབང་གི་སྐབས་སུ་བསོད་ནམས་དང་ཚུལ་ཁྲིམས་སྔོན་དུ་སོང་ནས་སྒོམ་དགོས་པ་ཤེས་པར་བྱ་ལ། དབང་བདུན་གྱི་སྐབས་སུ་བཤད་པའི་བཟླས་བརྗོད་ཀྱང་གཞན་ཐམས་ཅད་ཀྱི་སྔོན་དུ་འགྲོ་བར་ཤེས་པར་བྱའོ། །
འགྲེལ་པར། བྱིས་འཇུག་དང་བུམ་གསང་གི་ཕྱིར་བཅོས་ལ་དབང་བསྐུར་བར་གསལ་བར་གསུངས་ནས་ཤེར་དབང་གི་སྐབས་སུ་ཚིག་གསལ་མ་བྱུང་བ་ནི། ཤེར་དབང་ཐོབ་པ་ལ་རྩ་ལྟུང་གི་ཕྱིར་བཅོས་སྐབས་སུ་དབང་བསྐུར་མི་ལེན་པའི་དོན་མ་ཡིན་གྱི། བསོད་ནམས་དང་ཚུལ་ཁྲིམས་ཀྱི་སྡིག་བཤགས་སྔོན་དུ་འགྲོ་བས། ཕྱིས་དཀྱིལ་འཁོར་དུ་འཇུག་པ་ལ་དགོངས་ནས། ལྟུང་བ་བྱུང་མ་ཐག་དཀྱིལ་འཁོར་དུ་འཇུག་པའི་རྣམ་གཞག་མ་མཛད་པ་དང༌། གཞན་གཉིས་ལ་ཕྱིར་བཅོས་ཀྱི་ཐོག་མ་དབང་བསྐུར་ཡིན་པ་ལ་དགོངས་སོ། །འདི་སྐབས་ཀྱི་འགྲེལ་བ་ཤིན་ཏུ་ཞལ་གསལ་ཡང་བྱིན་རླབས་ཀྱི་སྟོབས་ལས་ཐོབ་པའི་བློ་གྲོས་མེད་ཅིང༌། བླ་མའི་ཞལ་གྱིས་དམན་པའི་མཁས་པ་དག་ལ་འཁྲུལ་པ་མང་དུ་སྐྱེས་སྣང་ངོ༌། །དཔལ་ལྡན་བླ་མའི་ཐུགས་དཀྲུགས་པ་སོགས་ནི་རྩ་ལྟུང་རྣམས་ཀྱི་མཚན་ཉིད་སྟོན་པར་བྱེད་པ་སྟེ། དེ་ཡང་བུ་སྟེ་སློབ་མ་གང་གིས་སློབ་དཔོན་དེ་སེམས་ཅན་ལ་ཕན་པར་མཛད་པའི་དོན་ཉམ་པར་བྱས་པའམ། བྱ་བ་མ་ཡིན་པ་བྱས་པ་གང་གིས་ཀྱང་རུང་སྟེ། བླ་མའི་ཐུགས་དཀྲུགས་པ་སྟེ་མི་མཉེས་པར་བྱས་པ་དེ་ནི་རྩ་བའི་ལྟུང་བ་རི་བོང་འཛིན་པ་སྟེ་དང་པོར་འགྱུར་རོ། །སློབ་དཔོན་དེའི་བཀའ་ཆོས་དང་ལྡན་པ་བཅག་སྟེ་གསུངས་ལས་འགོངས་པ་ནི། གཞན་རྩ་ལྟུང་གཉིས་པར་འགྱུར་རོ། །འདི་ནི་རྒྱུད་གཞན་ལས་གསུངས་པའི་བདེ་གཤེགས་བཀའ་འདས་དང་དོན་གཅིག་སྟེ། བླ་མས་ཀྱང་སངས་རྒྱས་ཀྱི་གསུང་བཞིན་དུ་སྟོན་པའི་དོན་ནོ། །དེ་ཡང་བླ་མའི་ལྐོག་ཏུ་བཀའ་ལས་འདས་ཏེ་མི་དགེ་བ་བཅུ་བྱེད་པར་གསུངས་ཤིང༌། དེ་བཞིན་དུ་བླ་མ་གཅིག་པའི་རྡོ་རྗེའི་སྤུན་ལ་ཁྲོས་པའི་
སེམས་བསྐྱེད་ན། ཡིད་ཀྱིས་ཁྲོས་པ་ཁོ་ན་ལ་ཉིན་ཞག་གཅིག་གི་བཞི་ཆ་དང༌། ལུས་ངག་གི་རྣམ་འགྱུར་དུ་ཐོན་པ་ལ་ནི། དེ་དང་དེའི་བྱ་བ་བྱས་ཟིན་པ་ན་ངེས་པར་རྩ་ལྟུང་དུ་འགྱུར་ཏེ་ལྟུང་བ་གསུམ་པའོ། །སེམས་ཅན་རྣམས་ལ་བྱམས་པ་སྟེ། དེའི་ཁོངས་སུ་སྙིང་རྗེ་དང༌། ཀུན་རྫོབ་ཀྱི་བྱང་ཆུབ་ཀྱི་སེམས་ཀྱང་འདུས་པར་འགྱུར་ཏེ། བྱམས་པ་ཡོད་པ་ལ་དེ་དག་ཡོད་ཀྱི། དེ་མེད་ན་དེ་དག་ཀྱང་མེད་པས་སྙིང་རྗེ་དང་བྱང་ཆུབ་སེམས་ཀྱི་རྩ་བ་ནི་བྱམས་པ་ཡིན་པའི་ཕྱིར་རྩ་བ་ཡིན་པའི་ཆ་ནས་བྱམས་པ་སྨོས་པའོ། །དེ་བཏང་བའི་ཚུལ་ཡང་བཞི་སྟེ། བཏང་བ་ཆུང་ངུ་ཆུ་ལ་རི་མོ་བྲིས་པ་ལྟ་བུ་དང༌། འབྲིང་པོ་བྱེ་མ་ལ་རི་མོ་བྲིས་པ་ལྟ་བུ་དང༌། ཆེན་པོ་ས་བརྣག་ལ་རི་མོ་བྲིས་པ་ལྟ་བུ་སྟེ། གསུམ་པོ་དེ་ཉེས་པ་དང་བཅས་པ་ཡིན་ཡང་རྩ་ལྟུང་དུ་མི་འགྱུར་ལ། ཤིན་ཏུ་ཆེན་པོ་རྡོ་ལ་བརྐོས་པའི་རི་མོ་ལྟ་བུ་སེམས་ཅན་རྩ་བ་ནས་བློས་བཏང་བ་ནི། རྩ་བའི་ལྟུང་བ་བཞི་པར་འགྱུར་ཏེ། དེ་ལས་གཞན་ཡང་མི་འགྱུར་བདེ་བའི་རྒྱུད་ཀུནྡ་བྱང་ཆུབ་ཀྱི་སེམས་རགས་པའི་ཐིག་ལེ་རྟག་ཏུ་བསྲུང་དགོས་ཤིང༌། ཞུ་བདེ་འགྱུར་མེད་དེ་ལ་བརྟེན་ནས་མི་འགྱུར་བའི་བདེ་བ་རིམ་གྱིས་འགྲུབ་པར་འགྱུར་བ་ཡིན་པ་ལས་མི་འགྱུར་བའི་བདེ་བའི་རྒྱུ་ཐིག་ལེ་སྲུང་བ་ལ་མ་དད་པའམ་བརྙས་པའམ་རྩིས་སུ་བྱེད་པའི་གུས་པ་མེད་པས་ཀུནྡ་བྱང་ཆུབ་ཀྱི་སེམས་ཆེད་གཏད་ཀྱིས་རྩོལ་པས་རབ་ཏུ་ཉམ་པར་བྱེད་ན། ཉམ་པ་དེ་ལས་ཀྱང་རྩ་བའི་ལྟུང་བ་མངའ་སྟེ་ལྔ་པར་འགྱུར་རོ། །རྩ་ལྟུང་དངོས་ནི་དེ་ལྟར་ཡིན་ལ། སྤྱིར་གསང་དབང་ལ་སོགས་པ་དམིགས་གསལ་གསུངས་པའི་སྐབས་མ་གཏོགས། མ་དད་མ་
གུས་བརྙས་པ་སོགས་མེད་ཀྱང་ཀུནྡ་ཆེད་ཀྱིས་ཉམ་པར་བྱས་པ་ཐམས་ཅད་འདིའི་ཕྱོགས་མཐུན་གྱི་ཉེས་བྱས་ཡིན་ནོ། །འདིའི་འགྲེལ་པར་དེ་ཁོ་ན་ཉིད་མེད་པ་དབང་པོ་གཉིས་ཀྱི་བདེ་བས་སངས་རྒྱས་ཉིད་འདོད་པ་རྣམས་ལ་རྩ་བའི་ལྟུང་བ་ལྔ་པར་འགྱུར་རོ་ཞེས་འབྱུང་བས། འདི་རྩ་ལྟུང་དུ་འགྱུར་བའི་ཀུན་སློང་མི་འགྱུར་བའི་བདེ་བའི་ལམ་ལ་མ་གུས་པ་ཡིན་པ་གསལ་བར་བསྟན་ཏེ། ཕལ་ཆེར་ཞུ་བདེ་འགྱུར་མེད་ནི་གཉིས་སྦྱོར་གྱི་བདེ་བ་ཡིན་ཡང་དེ་ཁོ་ན་ཉིད་ཅེས་བྱ་བ་ཡང་དག་པའི་གནས་ལུགས་ལ་འཇུག་པའི་ཐབས་ཡིན་ན། དེ་མེད་པར་གཉིས་སྦྱོར་གྱི་ཐིག་ལེ་འཕོ་བའི་གནས་སྐབས་ཉིད་ཡེ་ཤེས་སུ་ངོ་སྤྲོད་པ་རྣམས་བྱང་ཆུབ་ཀྱི་སེམས་འཕོ་མེད་དུ་འཆིང་བར་བྱེད་པའི་ཐབས་ལ་བརྙས་པར་བྱེད་པའི་ཕྱིར། བརྙས་སེམས་དེ་རྩ་ལྟུང་གི་ཡན་ལག་ཏུ་སྦྱོར་དགོས་ཀྱི། གཉིས་སྦྱོར་ཆོས་སུ་འདུ་ཤེས་པ་ཙམ་ཡན་ལག་ཏུ་སྦྱོར་བ་ནི་མི་རིགས་ཏེ། ལམ་ཡང་དག་པ་ལ་མ་གུས་པ་མེད་ན་ཆོས་མ་ཡིན་པ་ལ་ཆོས་སུ་འདུ་ཤེས་པ་ཙམ་ནི་ཉེས་པ་ཡང་བའི་ཡན་ལག་ཏུ་འགྱུར་གྱི། ལྕི་བའི་བྱེད་ཆོས་སུ་མི་འགྱུར་བ་སྤྱི་ཁྱབ་ཀྱི་ལུགས་ཡིན་པའི་ཕྱིར་རོ། །རྩ་ལྟུང་དྲུག་པ་ནི། མདོ་སྔགས་ཀྱིས་བསྡུས་པའི་སངས་རྒྱས་པའི་གྲུབ་མཐའ་ལ་ཕྲག་དོག་གི་སེམས་ཀྱིས་སྨོད་པར་བྱེད་པ་ཞེས་སྤྱིར་བཤད་པ་ལྟར་རམ། དེ་རྣམས་ཀྱི་ངེས་པའི་དོན་ལ་སྨོད་པ་སྟེ། གྲུབ་མཐའ་ནོར་པའི་ཆ་རྣམས་འགོག་པ་ནི་འདི་ལ་མི་གཏོགས་སོ། །རི་བོ་ཞེས་པ་བདུན་པ་ནི། ཉན་ཐོས་ལ་སོགས་པ་གསང་སྔགས་ཀྱི་ཆོས་ལ་མ་དད་པ་སྣོད་དུ་མ་གྱུར་པ་ལ་རྫོགས་རིམ་བདེ་བ་ཆེན་པོའི་ལམ་མམ་དབང་དང་བསྐྱེད་རིམ་ཡང་རུང་སྟེ།
བདེ་བ་ཆེན་པོའི་ཡེ་ཤེས་ཀྱི་ཐབས་སམ་ལམ་དང་འབྲས་བུ་དག་བསྟན་ཅིང་ངེས་ཀྱང་གོ་བའོ། །སྤྱི་ལ་གྲགས་པ་ལྟར་ན་དབང་བསྐུར་མ་ཐོབ་པ་ལ་སྔགས་ཀྱི་ཐུན་མོངས་མ་ཡིན་པའི་གསང་བ་གང་བསྟན་ཀྱང་འདིར་འགྱུར་ཞེས་བྱ་ལ། བོད་ཡུལ་འདིར་དུས་ད་ལྟའི་ཆོ་ག་ཙམ་གྱིས་དབང་བསྐུར་བའི་མིང་ཅན་གྱི་གོ་རིམ་ཙམ་ཞིག་མིང་དུ་ཐོབ་ཀྱང་མི་ཕན་པ་དག་ཡོད་དེ། དུས་ཕྱིས་བོད་ཀྱི་གསུམ་ལྡན་དགེ་སློང་རྡོ་རྗེ་འཛིན་པར་རློམ་པ་མང་པོ་ཞིག་ཀྱང་སློབ་དཔོན་དུ་འོས་པ་སྨོས་ཅི་འཚལ། དེ་ཁོ་ན་ཉིད་ཀྱི་སྣོད་ཙམ་ཡང་མིན་པར་སྣང་བའི་ཕྱིར་རོ། །ཕུང་པོ་ལུས་ལ་ཉོན་མོངས་པ་སྟེ་སྨད་པའི་སེམས་ཀྱིས་གདུང་བ་རྩོམ་པར་བྱེད་ན། ཀླུ་སྟེ་རྩ་ལྟུང་བརྒྱད་པར་འགྱུར་ཞིང༌། སླར་ཡང་རྩ་ལྟུང་དགུ་པ་ནི། གདོད་ནས་རྣམ་པར་དག་པའི་ཆོས་དོན་དམ་སྟོང་ཉིད་ཡོངས་གྲུབ་བདེ་བར་གཤེགས་པའི་སྙིང་པོ་ལ་དྲང་དོན་ཡིན་ནོ་ཞེས་མ་དད་པར་བྱེད་པ་གང་དག་སྟེ། རེད་མདའ་བ་གཞོན་བློ་ལྟ་བུའོ། །གཡོ་སྒྱུའི་སྒོ་ནས་བྱམས་པ་ལྟར་སྟོན་པ་ཁ་འཇམ་ཞེ་གདུག་བྱེད་པ་ནི། རྩ་ལྟུང་ཕྱོགས་ཏེ་བཅུ་པ་དང༌། མིང་སོགས་མཚན་མ་ཐམས་ཅད་དང་བྲལ་བའི་དོན་དམ་བདེ་བ་ཆེན་པོ་སྟེར་བའི་ཐབས་སྟོང་གཟུགས་ཕྱག་རྒྱ་ཆེན་པོའི་ལམ་ལ་ཡང་དག་པའི་ལམ་ཡིན་མིན་ཐེ་ཚོམ་ཟ་ཞིང་རྟོག་པ་ནི། རྩ་ལྟུང་དྲག་པོ་བཅུ་གཅིག་པ་སྟེ། སྟོང་གཟུགས་བདེ་གཤེགས་སྙིང་པོའི་རང་མདངས་ཡིན་པ་ལ་འཁྲུལ་སྣང་ངོ་ཞེས་སྐུར་པ་འདེབས་པ་ནི་རྩ་ལྟུང་འདིར་འགྱུར་རོ། །དག་པའི་སེམས་ཅན་ཞེས་པ་ནང་དུ་ཡང་དག་པའི་ཡེ་ཤེས་སྐྱེས་པའི་རྣལ་འབྱོར་པ་ལ་དེ་ལྟར་ཡིན་
པ་ཤེས་བཞིན་དུའམ། ཡིན་མིན་ཐེ་ཚོམ་དང་བཅས་བཞིན་དུ་དེ་ལ་སྐྱོན་བརྗོད་ཅིང་སྨོད་པ་ནི། ཉི་མ་སྟེ་རྩ་ལྟུང་བཅུ་གཉིས་པར་འགྱུར་རོ། །ཚོགས་ཀྱི་འཁོར་ལོ་ལ་སོགས་པ་སྔགས་ཀྱི་སྤྱོད་པའི་དགའ་སྟོན་ལ་ཞུགས་པ་ན་གོ་ཀུ་ལ་སོགས་པ་དང༌། བི་མུ་ལ་སོགས་པ་རྣམས་ལ་མི་གཙང་བ་དང་སྨད་པའི་སེམས་ཀྱིས་བཟའ་བའི་དམ་ཚིག་དེ་དག་རང་གི་ལག་ཏུ་ཐོབ་པ་སྤངས་ཤིང་གཏོང་བར་བྱེད་ན། རྩ་ལྟུང་བཅུ་གཉིས་པ་ལས་གཞན་བཅུ་གསུམ་པར་འགྱུར་རོ། །ཡུལ་བུད་མེད་ཀྱི་འགྲོ་བ་མིར་གྱུར་པའམ། ལྷར་གྱུར་པ་གཅིག་གམ་མང་པོའམ་ཀུན་ལ་ལྐོག་གམ་དངོས་སུ་སྨོད་པ་ཡིན་ཡང་རུང་སྟེ། ཇི་ལྟར་སྨོད་ལུགས་ནི། ཐམས་ཅད་ལ་སྨོད་པར་འགྱུར་བ་དེ་ལྟ་བུས་སྨད་ན། རྩ་ལྟུང་མ་ནུ་སྟེ་བཅུ་བཞི་པར་ངེས་པར་འགྱུར་རོ། །དེ་ལ་ཐམས་ཅད་ལ་སྨོད་པར་འགྱུར་ཚུལ་ནི། གཙོ་བོར་ཐར་ལམ་གྱི་སྣོད་དུ་མི་རུང་ཞེས་སྨྲ་བ་ཡིན་ལ། གཞན་ཡང་དེ་དང་ཕྱོགས་མཚུངས་པར་འགྲོ་བ་མང་པོ་ལ་ཕན་འདོགས་པ་པོ་དང༌། མགོན་སྐྱབས་སུ་གྱུར་པ་མེད་ཅེས་དང༌། ཉོན་མོངས་མང་བ་དང༌། བློ་མི་བརྟན་པ་དང༌། གཡོ་སྒྱུ་ཆེ་བ་དང༌། འདོད་པ་ལ་བསྐམ་པ་དང༌། ཤེས་རབ་འཆལ་བ་དང༌། ཡིད་རྟོན་མེད་པ་དང༌། དབང་པོ་བརྟུལ་བ་དང༌། ཉམས་ཆུང་བ་ཡིན་ནོ་ཞེས་སོགས་བུད་མེད་ཀྱི་རིགས་ནི་སྐྱོན་དེ་དང་དེ་དག་དང་བཅས་ པའོ། །ཞེས་རིགས་དེད་པས་དངོས་སུ་གཅིག་ལ་སྨད་ཀྱང༌། དོན་གྱིས་ཐམས་ཅད་ལ་སྨད་པར་འགྱུར་བ་དེ་ལྟ་བུའོ། །དེ་ལྟར་ན་རྩ་བའི་ལྟུང་བ་བཅུ་བཞི་པོ་འདི་དག་ནི། རྡོ་རྗེ་ཐེག་པའི་དམ་ཚིག་ཐོབ་པ་རྣམས་ལ་བྱུང་ན། དམ་ཚིག་ཉམས་པར་འགྱུར་བས་
རྡོ་རྗེ་ཐེག་པར་གནས་པ་རྣམས་ཀྱིས་འབད་པས་བསྲུང་བར་བྱའོ། །རྩ་ལྟུང་དྲུག་པ་དང་བདུན་པ་བཅུ་གཉིས་པ་དང༌། བཅུ་བཞི་པ་ལ་ངེས་པར་ངག་གི་ལུས་སུ་ཐོན་པ་དགོས་ཤིང༌། བརྒྱད་པ་དང་ལྔ་པ་ལ་ལུས་ཀྱི་ལས་སུ་གྲུབ་པ་དགོས། གཞན་རྣམས་ལ་ཡིད་ཁོ་ནས་ཀྱང་རྩ་ལྟུང་དུ་འགྱུར་བ་ཡོད་དེ། ཡིད་ཀྱི་རྣམས་ཐུན་ཐུན་མཚམས་གཅིག་གི་ནང་དུ་གཉེན་པོས་མ་སླེབ་ན་རྩ་ལྟུང་དུ་འགྱུར་ལ། ངག་དང་འགྲེལ་པ་རྣམས་ཕ་རོལ་པོ་གང་རུང་གཅིག་གིས་གོ་བ་དང༌། ལུས་དང་འབྲེལ་བ་རྣམས་བྱ་བ་དེ་བྱས་ཟིན་པ་ན་རྩ་ལྟུང་དུ་འགྱུར་ལ། ལུས་ངག་ཡིད་གསུམ་གང་རུང་གཅིག་ལ་བལྟོས་པའི་གཅིག་བྱུང་ཟིན་པ་ན། ཕྱིས་གཅིག་ཤོས་དེ་བྱས་ཀྱང་རྩ་ལྟུང་གཉིས་སུ་མི་འགྱུར་མོད། ཉེས་པ་ལྕི་བའི་ཡན་ལག་ཏུ་ནི་འགྱུར་རོ། །དཔེར་ན། རྡོ་རྗེའི་སྤུན་ལ་ཁྲོས་པ་དེ་ཐུན་ཐུན་མཚམས་གཅིག་གི་ཁོངས་སུ་གཉེན་པོས་མ་སླེབས་པས་ཐུན་མཚམས་དེའི་མཐར་ཡིད་ཀྱི་ཉེས་བྱས་སུ་གྱུར་པའི་རྩ་ལྟུང་དུ་གྱུར་ཟིན་པ་ལ། ནང་བར་ལྟ་བུ་སྐྱེ་བོ་གཞན་གྱིས་གོ་བར་སྨོད་ཚིག་བརྗོད་ན། དེའི་ཡིད་ཉེས་ཀྱི་རྩ་ལྟུང་སྔ་མ་དེ་འཕེལ་བར་བྱེད་པ་ཡིན་གྱི། བརྗོད་པ་དེ་ལས་རྩ་ལྟུང་གཉིས་པ་གསར་དུ་མི་འབྱུང་ངོ༌། །སྤྱིར་ཡུལ་དང༌། ལས་ཀྱི་རྣམ་པ་དང༌། འཕེན་སྟོབས་འདྲེན། ཡིད་རྐྱང་པ་སྟོབས་ཆུང༌། དེ་ལུས་ངག་གང་རུང་གཅིག་ཁོ་ན་དང་འབྲེལ་ན་འབྲིང་དང་གསུམ་ཀར་འཛོམ་ན་ཆེ་བ་ཡིན་ནོ། །ཡང་རྡོ་རྗེ་སྤུན་ལ་ཁྲོས་མ་ཐག་ཏུ་ངག་གི་ཉེས་པར་བརྗོད་ཟིན་ན། ལྟ་དཀའ་བ་དག་དང་འབྲེལ་བ་དེས་རྩ་ལྟུང་གྲུབ་ཟིན་པས། དེ་རྗེས་གཉེན་པོས་མ་སླེབ་ཀྱང་དུས་མཚམས་ཐལ་པ་ལ་ཡིད་ཉེས་ཀྱི་རྩ་ལྟུང་གསར་དུ་མི་འབྱུང་ཞིང༌། ཡིད་ཉེས་ཀྱི་རྒྱུན་
མ་ལོག་པས་ལྟུང་བ་སྔ་མའི་རྒྱུན་ཅུང་ཟད་འཕེལ་བར་འགྱུར་མོད་ཀྱང་ཡིད་ཀྱི་ལྟུང་བའི་རྒྱུན་ལུས་ངག་གིས་འཕེལ་ཐུབ་པ་ཙམ་འདི་ལ་མི་འབྱུང་ངོ༌། །དེ་ལྟར་ན་རྩ་ལྟུང་གི་རྣམ་གཞག་ལེགས་པར་ཤེས་ནས་སྦོམ་པོ་ལ་སོགས་པ་རྣམས་རྒྱུད་གཞན་ལས་འབྱུང་བ་དང༌། རྩ་ལྟུང་རྣམས་དངོས་སུ་གསུངས་པ་འདི་ལས་དཔགས་ཏེ་ཤེས་དགོས་སོ། །འདིར་ནི་འབྲུ་གནོན་ཙམ་སྟེ་རྒྱས་པར་གཞན་ལས་བཙལ་བར་བྱའོ། །དེ་ལྟར་དམ་ཚིག་བསྒྲགས་ཟིན་ནས། དེའི་རྗེས་སུ་དུས་གོ་བ་དང༌། འོག་མིན་གྱི་དངོས་གྲུབ་ཀྱི་བར་གྱི་བཀའི་གནང་བ་སྦྱིན་ཏེ། དེ་དག་ནི་ངེས་པར་དགོས་པའི་ཆོ་གའི་བྱ་བའོ། །ཆོ་ག་སྤྱི་འགྲོས་ཀྱི་ལུང་བསྟན་དང༌། དབུགས་དབྱུང་དང་གཟེངས་བསྟོད་དང༌། འདི་ཉིད་རང་གི་རྟེན་བརྟེན་པའི་དག་པ་བརྗོད་པ་ལ་སོགས་པ་དེ་དག་ནི་སྤྲོས་པ་ལ་དགའ་བའི་ལག་ལེན་གྱི་ངོར་མི་འགལ་ཞིང་ལེགས་པའང་ཡིན་མོད། ངེས་པར་དགོས་པ་ནི་མ་ཡིན་ནོ། །གཞན་དག་འདི་སྐད་དུ་འོ་ན་དབུགས་དབྱུང་གི་སྐབས་སུ་སློབ་དཔོན་དུ་བཀའ་གནང་སྟེར་དགོས་ན། དུས་འཁོར་རང་ལུགས་ཀྱི་རྡོ་རྗེ་སློབ་དཔོན་མ་ཡིན་པར་མ་ཟད། ཁྱོད་ལྟར་ན་གོང་རྡོ་རྗེ་དྲིལ་བུ་སྦྱིན་པའི་སྐབས་དམ་ཚིག་གསུམ་སྦྱིན་པ་མི་འདོད་པས། རྒྱུད་སྡེ་གཞན་ལུགས་ཀྱི་སློབ་དཔོན་གྱི་དབང་ཡང་མ་ཡིན་ན། འདི་ཇི་ལྟར་འོས་ཞེ་ན། ལྷག་པར་མོས་པའི་དབང་ལས་སློབ་དཔོན་དུ་འོས་པ་མ་ཡིན་ཡང་ཕྱི་མའི་དུས་ལ་བསམས་ཏེ་སློབ་དཔོན་དུ་བསྔགས་པ་ཡང་སྲིད་ལ། དག་པའི་ཆོས་བརྗོད་པའི་རྡོར་དྲིལ་སྦྱིན་པ་དེ་དམ་ཚིག་གསུམ་སྦྱིན་པ་དང་མི་གཅིག་ཀྱང༌། རྡོར་དྲིལ་གྱི་དབང་དང་རྗེས་གནང་གི་སྐབས་སུ། དམ་ཚིག་གསུམ་གྱི་དོན་ནི་མཐའ་དག་
ལྷག་བཅས་སུ་ཚང་བ་ཡིན་པར་མ་ཟད་རྗེས་གནང་གི་དབང་ལས་བཀའ་གནང་ཐོབ་པས། སྤྱིར་བྱིས་པ་འཇུག་པའི་དབང་བདུན་ཐོབ་ན། དཀྱིལ་ཆོག་གཞན་ལུགས་ཀྱི་སློབ་དཔོན་གྱི་དབང་ནི་ངེས་པར་ཐོབ་པ་ཡིན་ནོ། །དེའི་ཕྱིར་སྤྱི་འགྲོའི་ཆུ་སོགས་ཀྱི་དབང་དང༌། རབ་གནས་དང་བསྐྱེད་རིམ་འབའ་ཞིག་སྟོན་པའི་རྒྱུད་ཐོར་བུ་རྣམས་འཆད་པའི་སློབ་དཔོན་དུ་ཡང་འགྱུར་བ་ཙམ་ཡིན་ནོ། །དེ་དག་ལས་དམ་ཚིག་བརྗོད་པ་མན་ཆད་ནི་དབང་བདུན་པོ་ཐམས་ཅད་ཀྱི་སྤྱི་འགྲོའི་རྗེས་ཀྱི་བྱ་བ་ཡིན་པར་རྩོད་པ་མེད་ལ། སྤྱོད་པའི་བརྟུལ་ཞུགས་རྗེས་གནང་གི་འདོགས་ཡིན་ཡང་རྗེས་གནང་ཁོ་ནར་མ་ཟད། བདུན་ཀའི་འཇུག་བསྡོམས་ཡིན་པས་ཀུན་དང་འབྲེལ་པའི་རྗེས་ཀྱི་བྱ་བའོ།། གང་ལྟར་ནའང་ལུས་ངག་ཡིད་གསུམ་དང་དཀྱིལ་འཁོར་གྱི་ཕྱོགས་གཞན་གསུམ་དུ་དབང་གཉིས་གཉིས་ཡོད་པ་ལྟར་ནུབ་ཏུ་དབང་དངོས་རྗེས་གནང་ལས་མེད་ཀྱང༌། འདོགས་ཀྱིས་དབང་གཅིག་གི་དོད་ཐུབ་པར་བྱས་པ་སྟེ། རྗེས་གནང་འདོགས་བཅས་ཞེས་སྨོས་པའི་རྒྱུ་མཚན་ནི་དེ་ཡིན་ནོ། །བཤད་རྒྱུད་རྡོ་རྗེ་འཕྲེང་བ་ལས། སངས་རྒྱས་ལྔ་ནི་དག་པ་ནི། །དབང་བསྐུར་ལྔ་ནི་ཐོབ་པའི་རྒྱུ། །ཞེས་རིག་པའི་དབང་ལྔ་ལ་རྒྱལ་བ་རིགས་ལྔ་ཐོབ་པའི་རྒྱུར་གསུངས་པ་ལྟར་འདིར་ཡང་རིགས་འགྲེ་ལ། ཛ་ཡ་སེ་ནས། གང་གི་ལྷ་ཡི་དབང་བསྐུར་བས། །གང་དེའི་དངོས་གྲུབ་ཐེ་ཚོམ་མེད། །གང་རྣམས་ལྷ་ནི་མངོན་བྱས་པའི། །ལས་རྣམས་འབྲས་བུ་སྒྲུབ་པར་བྱེད། །ཅེས་བཤད་པ་ལྟར་ལྷ་གང་དང་གང་གི་དབང་བསྐུར་བ་དེས་ལྷ་དེ་དང་དེ་འགྲུབ་པར་འགྱུར་ལ། ལྷ་མངོན་དུ་བྱས་པ་ཞེས་བྱ་བ།
ལྷ་གང་དང་གང་གི་རྣམ་པར་བསྒོམས་པ་དེས་ཀྱང་ལྷ་དེ་དང་དེ་འགྲུབ་པར་འགྱུར་བ་ཡིན་ནོ། །འདིར་དབང་བདུན་གྱིས་དགེ་བསྙེན་དུ་འགྱུར་བ་ནི། སྔགས་སྡོམ་ཉིད་ཀྱི་ནང་ཚན་སྔགས་ཀྱི་དགེ་བསྙེན་དུ་ཞེས་ཀྱང་འགྲོ་བ་ཡིན་མོད། དེར་མ་ཟད་འགྲེལ་ཆེན་དུ་ས་བདུན་པར་ལུང་བསྟན་པའི་ཕྱིར་དགེ་བསྙེན་ཉིད་དོ། །ཞེས་གསུངས་པས། སྔགས་ཀྱི་ལུགས་ལ་ས་བདུན་པ་དོན་དམ་པའི་དགེ་བསྙེན་ཡིན་ལ། དེ་ཐོབ་པར་འགྱུར་བའི་རྟེན་འབྲེལ་ཐུན་མོང་མ་ཡིན་པ་འགྲིག་པའི་ཕྱིར་འབྱུང་བར་ངེས་པའི་འབྲས་བུ་ལས་བསམ་ནས། དོན་དམ་པའི་དགེ་བསྙེན་གྱི་མིང་གིས་བཏགས་ཤིང༌། ཀུན་རྫོབ་པའི་སྔགས་ཀྱི་སྡོམ་པའི་དགེ་བསྙེན་དངོས་ཡིན་པའོ། །ས་བདུན་ཐོབ་པ་ནི་དབང་བསྐུར་བ་ཉིད་ཀྱི་དུས་ཏིང་ངེ་འཛིན་ནམ་སྤྲུལ་པའི་དཀྱིལ་འཁོར་མངོན་སུམ་དུ་ལྟ་བར་ནུས་ན། ཕྱིས་ལམ་བསྒོམས་པའི་ཚེ་འདི་ལ་ས་བདུན་ཐོབ་ངེས་པར་དབང་འདིས་འཕངས་པ་ཡིན་ལ། དེ་མ་ནུས་ན་ཡང་དམ་ཚིག་དག་ན། སྐྱེ་བ་གཞན་དུ་ས་བདུན་འཕེན་པ་ཡིན་ནོ། །ས་བདུན་ཐོབ་ཕྱིན་དེ་ཐོབ་པའི་སྐྱེ་བའམ་ཚེ་དེ་ལ་ས་ལྷག་མ་མི་ཐོབ་པ་མི་སྲིད་མོད། དབང་འདིས་འཕངས་པ་མ་ཡིན་པས་འདིར་བདུན་གྱི་དག་པ་ཁོ་ན་མཛད་དོ།། །།གསུམ་པ་མཆོག་དབང་གོང་མ་བཞི་བཤད་པ་ལ། བདག་འཇུག་ལ་དཔྱད་པ། དཀྱིལ་འཁོར་གྱི་དབྱེ་བ། འཇིག་རྟེན་པའི་དབང་གི་དོན་བཤད། འཇིག་རྟེན་འདས་པའི་དབང་གི་རིམ་པ་ལ་དཔྱད། དབང་བཞིའི་ཡན་ལག་འགའ་ཞིག་ལ་དོགས་པ་སྤོང་པའོ།། དང་པོ་ནི། དབང་གོང་མ་འདི་རྣམས་ནི། བྱིས་འཇུག་དང་དཀྱུས་གཅིག་པར་སྒྲེལ་ཏེ་བསྐུར་བའི་སྐབས་ཡོད་ཀྱང༌། རྡུལ་ཚོན་གྱི་དཀྱིལ་འཁོར་ལ་ནི་བརྟེན་པ་
མ་ཡིན་པས་སྐབས་འདི་ནས་དཀྱིལ་འཁོར་གཞན་དུ་འཇུག་རྒྱུ་ཡིན་པ་གོ་དགོས་ཏེ་བདག་འཇུག་ལ་ཡང་ངོ༌། །ཁ་ཅིག་དབང་གོང་མ་རྣམས་བདག་འཇུག་ཏུ་མི་ལེན་ཏེ། བདག་འཇུག་བྱས་པའི་དགོས་པ་སྡོམ་པ་གསོ་བ་ཡིན་ལ། དབང་གོང་མ་ལ་དེའི་བྱ་བྱེད་མེད་པའི་ཕྱིར་རོ། །ཞེས་སྨྲ་བ་ནི་མི་འཐད་དེ། བདག་འཇུག་གི་དགོས་པ་དམ་ཚིག་གསོ་བ་ཙམ་མ་ཡིན་པར་གོང་དུ་བཤད་ཟིན་པའི་ཕྱིར་དང༌། དབང་གོང་མ་བསྐུར་བ་ལ་དགེ་ཚུལ་དགེ་སློང་སོགས་དང་དོད་མཚུངས་སུ་གསུངས་པའི་ཕྱིར། སྡོམ་པ་ལོག་པ་རེ་ཡོད་པར་གྲུབ་པས། གལ་ཏེ་བདག་འཇུག་དམ་སྡོམ་གསོ་བ་ཡིན་སྲིད་ན་འདི་ལའང་བདག་འཇུག་ངེས་པར་དགོས་པར་ཁྱེད་ལ་ཐལ་བ་དང༌། ཁྱེད་ཀྱི་ལུགས་ལ་རིགས་དྲུག་གི་སྡོམ་བཟུང་ཁོ་ནས་སྡོམ་པ་ཐོབ་པར་འགྱུར་བའི་ཕྱིར། བྱིས་པ་འཇུག་པའི་དབང་བདུན་ཡང་བདག་འཇུག་ཏུ་ལེན་མི་དགོས་པར་འགྱུར་ཏེ། བདག་འཇུག་གི་དགོས་པ་དམ་སྡོམ་གསོ་བ་ཁོ་ན་ཡིན་པའི་ཕྱིར་རོ། །དེས་ན་སྤྱིར་སྒྲུབ་མཆོད་ཀྱི་ཡན་ལག་དང༌། སློབ་མ་དབང་བསྐུར་གྱི་ཡན་ལག་ཏུ་བདག་འཇུག་མེད་མི་རུང་མ་ཡིན་པ་གོང་དུ་བཤད་ཟིན་པ་ལྟར་ཡིན་པས། དབང་བདུན་ཙམ་ཁོ་ན་ལ་བདག་འཇུག་བྱེད་པའང་བློ་མོས་དང་བསྟུན་ནས་དགག་རྒྱུ་མེད་མོད། དབང་གོང་མ་རྣམས་ལ་བདག་འཇུག་བྱར་མི་རུང་བའི་རྒྱུ་མཚན་ཅུང་ཟད་ཀྱང་མེད་ཅིང༌། འདི་ལ་དེ་མི་རུང་ན་རྒྱུད་སྡེ་གཞན་ལའང་དེ་མི་རུང་བར་འགྱུར་བས། ཁྱེད་རྣམས་རང་ཉིད་ཀྱི་ལག་ལེན་དང་ཤིན་ཏུ་འགལ་བར་འགྱུར་རོ། །གཞུང་ཚད་ལྡན་གཞན་མང་པོ་ལས་ཀྱང༌། བདག་བསྐྱེད་ཀྱི་སྐབས་དབང་གཞན་བཞི་ཀར་ལེན་པར་བཤད་པ་དང༌།
འདིའི་རྡོ་རྗེ་འཇིགས་བྱེད་ཀྱི་སྐབས་ལས་ཀྱང༌། དབང་ལེན་པའི་སྐབས་དབང་གོང་མ་རྣམས་བཤད་པས། དེ་དག་ཀྱང་སྤྱིར་བདག་འཇུག་གི་རིགས་དོན་གྱིས་ཡིན་ཞིང༌། ཡང་སྒོས་སུ་དབང་གོང་མ་རྣམས་ལ་གང་དུ་འཇུག་པའི་དཀྱིལ་འཁོར་སོགས་ཚིག་འདོན་རྒྱས་བསྡུས་མ་གཏོགས་དོན་ལ་ཁྱད་པར་མེད་པའི་བདག་འཇུག་ལེན་ཕྱིན་དབང་གི་མཆོག་འདི་རྣམས་ཅིའི་ཕྱིར་འདོར་བར་བྱེད།། །།གཉིས་པ་ནི། དེ་ལ་དབང་གོང་མ་འདི་རྣམས་གང་དུ་དབང་བསྐུར་བའི་དཀྱིལ་འཁོར་ནི། རྩ་རྒྱུད་ལས། ལུས་ཀྱི་དབང་པོ་བྷ་ག་སེམས། །སྐུ་གསུང་ཐུགས་ནི་རྡོ་རྗེ་ཡི། །དཀྱིལ་འཁོར་རྣམ་པ་གསུམ་དུ་འགྱུར། །གཞན་དུ་ཚོན་ལྔ་ལྡན་པས་མིན། །ཞེས་གསུངས་ཏེ། ཕྱག་རྒྱའི་ལས་ཀྱི་དབང་པོའི་དཀྱིལ་འཁོར་དུ་བུམ་དབང༌། བྷ་གའི་དཀྱིལ་འཁོར་དུ་གསང་དབང༌། སེམས་ཞེས་བྱ་བ་བྱང་ཆུབ་སེམས་ཀྱི་དཀྱིལ་འཁོར་དུ་ཤེས་རབ་ཡེ་ཤེས་དང་བཞི་པ་བསྐུར་ཏེ། དེ་ཡང་བྱང་ཆུབ་སེམས་ཞེས་བྱ་བ་མིང་མཚུངས་པ་དང༌། དོན་ཡང་དེ་གཉིས་པོ་དཔེ་དང་དཔེ་ཅན་ཉིད་ཀྱི་ཕྱིར་འབྲེལ་པ་ཅན་ནི་ཡིན་ནོ། །དེའི་ཕྱིར་གསུམ་པ་ཀུན་རྫོབ་བྱང་ཆུབ་ཀྱི་སེམས་དང༌། བཞི་པ་དོན་དམ་བྱང་སེམས་གཉིས་དོན་གྱི་སྒོ་ནས་ཐ་དད་ཀྱང་བྱང་ཆུབ་སེམས་ཀྱི་དཀྱིལ་འཁོར་ཞེས་མིང་གི་སྒོ་ནས་གཅིག་ཏུ་བསྡོམས་ཀྱང་རུང་བས་ན་དཀྱིལ་འཁོར་བཞི་དང་གསུམ་གང་གི་ཐ་སྙད་བརྗོད་ཀྱང་མི་འགལ་ལོ།། །།བཞི་པ་ནི་དེ་ལ་ཐོག་མར། སྒྲིབ་པ་ཐམས་ཅད་བཅོམ་པ་ཡི། །ཞེས་སོགས་གསོལ་གདབ་ནི། སློབ་དཔོན་གྱི་དབང་གི་སྐབས་སུ་བཤད་མོད། ཆོ་གའི་བྱ་བ་གཅིག་པའི་ཕྱིར་འདིར་ཡང་སྦྱར་རོ། །དབང་གི་ཆོ་གའི་རིམ་པ་
དཀྱིལ་ཆོག་ཏུ་བྲིས་ཟིན་པས། འདིར་ཟློས་ཏེ་མི་འབྲི་ལ། དོན་གྱི་སྙིང་པོ་ནི་རིག་མ་ལོ་བཅུ་གཉིས་ནས་ཉི་ཤུའི་བར་གྱི་ན་ཚོད་ཅན་མཚན་ཉིད་དང་ལྡན་པ་དང་གཞན་ཡང་མཎྜལ་ཡོན་དུ་བཅས་པ་སློབ་དཔོན་ལ་ཕུལ་ཏེ། དང་པོར་སྤྱིའི་གསོལ་བ་བཏབ། དེ་ནས་སྔགས་ཀྱི་གསོལ་བ་བཏབ་ནས། སློབ་དཔོན་གྱིས་ཀྱང་སློབ་མས་ཕུལ་བའི་རིག་མ་དེའམ་གཞན་གང་ཡང་རུང་བ་སྣ་ཚོགས་ཡུམ་གྱི་རྣམ་པ་དང་ངོ་བོར་བྱིན་གྱིས་བརླབས་ནས། སློབ་མ་དུས་ཀྱི་འཁོར་ལོའི་ང་རྒྱལ་ཅན་ལ་གཏད་ དོ། །རྒྱུ་འགྲེལ་འདིར་གསལ་བར་གསུངས་པ་མེད་པས་ངག་འདོན་ལ་མེད་ཀྱང་རྡོ་རྗེ་སྙིང་འགྲེལ་ལས། རྒོད་པས་དགའ་བ་ཐོབ་པས་ནི། །རྒོད་པ་དག་པ་སློབ་དཔོན་ཉིད། །ཅེས་གསུངས་པས། རྒོད་པའི་བདེ་བ་ལམ་བྱེད་ཀྱང་ཞོར་བྱུང་དུ་དགོས་ལ། གཙོ་བོར་བུམ་པའི་སྒྲས་བསྟན་པ་ཤེས་རབ་མའི་ནུ་མ་འཛིན་པ་ལས་བྱུང་བའི་བདེ་བ་ནི་དགའ་བ་བཞི་ལས་དགའ་བའི་ཡེ་ཤེས་ཏེ་དེ་ངོས་ཟིན་པར་བྱས་ཤིང༌། དེ་ཉིད་སྟོང་པས་རྒྱས་བཏབ་སྟེ་དེའི་རང་ཞལ་བལྟས་ལ། མོས་པའི་སྒོ་ནས་མི་འགྱུར་བའི་བདེ་བའི་ནང་ཚན་དགའ་བའི་ཡེ་ཤེས་སུ་མོས་པ་བྱའོ། །དེ་ཡང་ཇི་སྐད་དུ། དཔལ་ལྡན་ཤེས་རབ་ནུ་མ་ལ་ཡང་དང་པོར་རེག་པ་གང་ཡིན་བུམ་པའི་དབང་ནི་དེ་ཉིད་དོ། །ཞེས་གསུངས། དེའི་མཐར་ས་བརྒྱད་པའི་ང་རྒྱལ་བཟུང་བ་བྱ། འདིར་རྗེས་ཆགས་ཀྱི་དགའ་བ་དང་པོ་སྐྱེས་པ་དེ་ནི་དབང་གི་ཡེ་ཤེས་ཡིན་ལ། དེ་ཉིད་གང་ལ་བརྟེན་ནས་བྱུང་བ་ནི་ཕྱག་རྒྱའི་ལུས་ཏེ། དེ་ཡང་བུམ་པ་དང་དབྱིབས་མཚུངས་པའི་དཀར་འཛིན་ནམ། ལུས་སྤྱི་རང་ཡང་བུམ་པ་དང་མཚུངས་པའི་ཕྱིར། ལུས་སྤྱི་དང་ཁྱད་པར་དཀར་འཛིན་ནི་
དཀྱིལ་འཁོར་ཡིན་ལ། དེ་ལས་ཐོབ་པའི་ཡེ་ཤེས་ནི་ནང་ཤེས་རབ་མའི་ལུས་ཀྱི་བུམ་པ་ལས་ཐོབ་པའི་ཕྱིར་བུམ་དབང་ཞེས་བྱའོ།། །།གཉིས་པ་གསང་དབང་ནི། དང་པོར་གསོལ་གདབ་དང༌། མཐར་ང་རྒྱལ་འཛིན་པ་སོགས་ཆོ་ག་སྔ་ཕྱིའི་རིམ་པ་བུམ་དབང་དང་འདྲ་བ་ལས། དངོས་གཞིའི་སྐབས་སུ། སྔར་སློབ་མས་ཕུལ་བའི་རིག་མ་དེ་ཁོ་ན་དང༌། སློབ་དཔོན་སྙོམས་པར་ཞུགས་པའི་བྱང་ཆུབ་ཀྱི་སེམས་སློབ་མའི་ཁར་དབབ་པས། བྱང་ཆུབ་ཀྱི་སེམས་དེ་མྱངས་པ་ལས་བྱུང་བའི་བདེ་བ་གཞོན་ནུའི་བདེ་བ་ལྟ་བུ་སྐྱེའོ། །ཞེས་དཀྱིལ་ཆོག་གཞན་ནས་བཤད་པ་ལྟར་ཡང་རུང་ལ། འདི་སྐབས་ཀྱི་ཐུགས་ཀའི་འོད་ཟེར་གྱིས་སངས་རྒྱས་སྲས་བཅས་སྤྱན་དྲངས་ཏེ། སློབ་དཔོན་གྱི་སྐུ་ལ་ཞུགས་ནས་བྱང་ཆུབ་ཀྱི་སེམས་སུ་སྒྲུབ་པ་ནི། རྒྱུད་འགྲེལ་འདི་ན་གསལ་ཁ་མེད་ཀྱང༌། གསང་འདུས་རྒྱུད་ཕྱི་མར། རྡོ་རྗེ་པདྨ་སྦྱོར་བ་ཡིས། དེ་བཞིན་གཤེགས་ཀུན་ཡང་དག་བསྡུ། །སྐུ་གསུང་ཐུགས་ཀྱི་སྦྱོར་བ་ཡིས། །དེ་དག་ཐམས་ཅད་སྙིང་གར་བསྡུས། །རྡོ་རྗེའི་ལམ་ནས་ཕྱུང་ནས་ནི། །སློབ་མའི་ཁར་ནི་དབབ་པར་ བྱ། །ཞེས་གསུངས་པའི་དོན་ཏེ། དེ་ཡང་བླ་མེད་སྤྱི་ལ་འཇུག་པ་ཡིན་པས་འདིར་ཡང་སྦྱོར་དགོས་སོ། །དེ་ལ་བྱང་ཆུབ་ཀྱི་སེམས་འཁོར་ལོ་བཞིར་བརྟན་པར་བྱས་པས་དགའ་བཞིའི་ཡེ་ཤེས་ཡུན་རིང་དུ་ཉམས་སུ་མྱོང་བའི་རྟེན་ཀུནྡ་ལྟ་བུ་དེ་མྱངས་པས་ཉམ་མྱོང་ཁྱད་པར་ཅན་སྐྱེའོ་ཞེས་གཞན་ནས་འབྱུང་བ་དང་མཐུན། ཡབ་ཡུམ་གཉིས་ཀར་གྱི་བྱང་ཆུབ་ཀྱི་སེམས་སློབ་མས་མྱང་བ་འདིར་ཡང་མཛད་དེ། འདི་ཉིད་ལས་གསལ་བར་མ་གསུངས་
ཀྱང་སྤྱི་འགྲོས་ཡིན་ནོ། །མིག་དར་བཅིངས་གྲོལ་སློབ་དཔོན་གྱི་དབང་གི་སྐབས་ཀྱི་གསང་དབང་ལ་གསུངས་པ་ལྟར་འདིར་ཡང་སྦྱོར་ལ། གང་ལས་གསང་དབང་ཐོབ་པའི་རིག་མའི་བྷ་གའི་དཀྱིལ་འཁོར་ལ་བལྟས་པའི་རྗེས་ཆགས་ལ་བརྟེན་ནས། བུམ་དབང་གི་དུས་ལས་ལྷག་པའི་དགའ་བ་གཉིས་པ་མཆོག་དགའི་ཉམས་མྱོང་ཙམ་དངོས་སུ་སྐྱེ་བ་ངོས་ཟིན་པ་དང༌། དེ་ལ་མི་འགྱུར་བའི་མཆོག་དགར་མོས་པ་བྱེད་དོ། །དེ་ཡང་རྒྱུད་ལས། གསང་བ་དག་ལས་རི་བོང་འཛིན་པ་མྱང་བ་དང་ནི་ལྟ་བ་དག་གི་གསང་བའི་དབང་དུ་འགྱུར། །ཞེས་པ་དང༌། བལྟས་པས་དགའ་བ་ཐོབ་པ་ནི། ལྟ་བ་གསང་བ་དེ་བཞིན་ནོ། །ཞེས་སོ། །དཀྱིལ་ཆོག་གཞན་དང་ཐུན་མོང་མ་ཡིན་པ་ནི། གསང་བའི་དཀྱིལ་འཁོར་ལྟ་བའི་བདེ་བ་འདི་ཡིན་ལ། སྐབས་འདིའི་མཆོག་དགའ་ནི། པདྨའི་དཀྱིལ་འཁོར་བལྟས་པའི་རྒྱུ་ལས་བྱུང་བའི་ཕྱིར། བྷ་གའི་དཀྱིལ་འཁོར་དུ་ཞུགས་ཞེས་བྱའོ། །ཤེས་རབ་ཡེ་ཤེས་ཀྱི་དབང་ཡང་གསོལ་བཏབ་སྔོན་དུ་འགྲོ་བས་དངོས་གཞིའི་སྐབས་སུ་རྒྱུད་ལས། ཤེས་རབ་ཡེ་ཤེས་དབང་ལ་མཐའ་དག་རྒྱལ་བའི་རིགས་ཀྱི་ཡན་ལག་ཞལ་གྱིས་སྦྱང་བ་བྱས་ནས་ནི། །རྒྱལ་བ་དག་ཀྱང་འདིར་ནི་བླ་མས་དཔང་པོར་བྱས་ནས་སློབ་མ་ལ་ནི་ཕྱག་རྒྱ་སྦྱིན་པར་བྱ། །ཞེས་གསུངས་ཏེ། དེའི་དོན་ལ་རྒྱལ་བའི་རིགས་ཀྱི་སོགས་རིག་མའི་གནས་ལྔར་ཨོཾ་ཡིག་ལ་སོགས་པ་ས་བོན་ལྔ་འགོད་པར་གསུངས་པ། འདུས་པ་ལ་སོགས་པ་རྒྱུད་གཞན་ལས་འབྱུང་བ་ལྟར་ཡང་རུང་བའི་དོན་དང༌། ཡང་དེའི་དོན་འདུས་ཤིང་ལྷག་དང་བཅས་པ་ཡིན་
པས་ཡན་ལག་དྲུག་དགོད་པའམ། རིགས་དྲུག་གི་ས་བོན་དགོད་པའམ། ཐིག་ལེའི་རྣལ་འབྱོར་གྱི་སྐབས་སུ་བཤད་པ་ལྟར་ཡང་རུང་བ་ལས་ཕྱི་མ་འདི་ཕྱག་ལེན་ལ་མཛད་དོ། །རྒྱལ་བ་རྣམས་དཔང་པོར་བྱས་ཞེས་པ་ནི། འདིར་ནི་ཁྱེད་རྣམས་དཔང་པོ་ལགས། ཞེས་སོགས་ཇི་ལྟར་འོས་པའི་ཚིག་སྟེ་ཕྱག་རྒྱ་གཏད་པའོ། །གཞན་མཁའ་གསང་བྱིན་རླབས་སོགས་ཐིག་ལེའི་རྣལ་འབྱོར་གྱིས་རིགས་འགྲེ། འདིར་འགྲེལ་ཆེན་ལས། རྡོ་རྗེ་སེམས་དཔའ་དཔང་པོར་བྱས་ནས་ལག་བཅངས་དང་གཉིས་གཉིས་བྱེད་པའི་ཆེད་དུ་ཕྱག་རྒྱ་དེ་སློབ་མ་ལ་སྦྱིན་པར་བྱའོ། །ཇི་ལྟར་སྐལ་བ་ངན་པའི་སེམས་ཅན་འདི་ནི་སྒོམ་པ་ལ་སོགས་པ་ལ་དབང་བ་དང༌། རྒྱུད་ཉན་པའི་ཆེད་དུ་སྟེ་ཞེས་ལག་བཅངས་དང༌། གཉིས་སྤྲོད་གཉིས་རིམ་པས་དངོས་སུ་བྱ་བར་གསུངས། ལག་བཅངས་དགའ་བ་ཐོབ་པ་ནི། ལག་བཅངས་དག་ལ་ཤེས་རབ་ཉིད་ཅེས་པ་ལྟར་ལག་བཅངས་ནི་མཚོན་བྱེད་དེ། ལུས་ཀྱི་ཕྱི་རོལ་སྦྱོར་བ་ལས་བྱུང་བ་སྐད་ཅིག་མའི་ཁྱད་པར་གྱི་དགའ་བ་ཐོབ་པ་ནི། འཇིག་རྟེན་པའི་ཤེས་རབ་ཡེ་ཤེས་ཉིད་ཀྱི་ནང་ཚན་དབང་གསུམ་པ་དང༌། གཉིས་གཉིས་སྤྲད་ལས་བདེ་ཐོབ་པ། །གཉིས་གཉིས་འཁྱུད་ལ་དེ་བཞིན་ཉིད། །ཅེས་པ་ལྟར་རྡོ་རྗེ་པདྨ་མཉམ་པར་སྦྱར་བ་ལས་བྱང་ཆུབ་ཀྱི་སེམས་གསང་བ་ནས་ནོར་བུར་འོངས་པ་ཡུན་རིང་ཐུང་ཇི་ལྟར་འོས་པ་བཅིངས་པ་ལས་བྱུང་བའི་སྐད་ཅིག་པའི་བདེ་བ་ལྷན་ཅིག་སྐྱེས་པའི་རང་བཞིན་ཤེས་པར་བྱེད་པ་ནི། འཇིག་རྟེན་པའི་ཤེས་རབ་ཡེ་ཤེས་ཉིད་ལ་བལྟོས་པའི་བཞི་པ་སྟེ། གཉིས་པོ་དེ་ཡང་སློབ་མའི་
བྱང་ཆུབ་ཀྱི་སེམས་ཀྱི་བགྲོད་པ་མངོན་གྱུར་པ་བཀག་པ་ལས་བྱུང་བའི་བདེ་བ་ཉིད་ཀྱི་ཕྱིར། ཀུན་རྫོབ་ཀུནྡ་ལྟ་བུའི་བྱང་ཆུབ་སེམས་ཀྱི་དཀྱིལ་འཁོར་དུ་ཞུགས་ཞེས་ཐ་སྙད་འཇོག་ལ། འདིར་སྐད་ཅིག་མའི་ཁྱད་དགའ་དང་ལྷན་སྐྱེས་ཙམ་དངོས་སུ་སྐྱེ་བ་དེ་ལ་མོས་པའི་སྒོ་ནས་མི་འགྱུར་བའི་ཁྱད་དགའ་དང༌། ལྷན་སྐྱེས་སུ་མོས་པ་བྱའོ། །དེ་ལྟར་ན་བུམ་དབང་གི་སྐབས་སུ་ནམ་མཁའ་དང་རླུང་གི་ཁམས་གཙོ་བོར་གྱུར་པ་རྒོད་པ་སྒྲ་དང༌། ནུ་མ་ལ་རེག་པ་རེག་བྱའི་ཡོན་ཏན་གྱི་ཐིག་ལེ་བཅིངས་པ་དང༌། གསང་དབང་གི་སྐབས་མེ་ཁམས་གཙོ་བོར་གྱུར་པ་རོའི་ཡོན་ཏན་ཏེ་བྱང་ཆུབ་ཀྱི་སེམས་མྱངས་ཤིང༌། རོ་དེ་གང་ནས་བྱུང་བ་པདྨ་ལ་བལྟས་པ་ལས་བྱུང་བའི་ཕྱིར། སྔར་གཉིས་ཀྱི་སྟེང་དུ་རོའི་ཡོན་ཏན་དང༌། འཇིག་རྟེན་པའི་ཤེར་དབང་གི་སྐབས་འདིར་ལག་བཅངས་སོགས་རགས་པའི་ལུས་སྤྲད་པ་ནི་གཟུགས་ཀྱི་ཡོན་ཏན་ཆུའི་ཁམས་དང༌། གཉིས་གཉིས་སྦྱོར་བ་གསང་བར་ནང་གི་རྩ་ཁམས་ཀྱི་དྲི་ངད་ཕྲད་པའི་ཕྱིར། དྲིའི་ཡོན་ཏན་སའི་ཁམས་ཀྱི་བདེ་བ་ཞེས་བྱ་སྟེ། སྔ་མ་སྔ་མ་རྣམས་ཡར་ལྡན་དུ་ཡོད་པས་ཡོན་ཏན་བཞི་ལྡན་དང་ལྔ་ལྡན་ཡིན་ནོ། །སྤྱིར་བཏང་སྐབས་འདིར་ཡང་མས་བརྟན་པ་དགོས་ལ། འོན་ཀྱང་ལས་དང་པོ་པ་ལ་མས་བརྟན་མ་ནུས་ཀྱང་ཉེས་པ་ཆུང་ངོ༌། །དེ་རྗེས་ས་བཅུ་པའི་ང་རྒྱལ་བཟུང་ནས། སློབ་མ་དེ་དབང་བཞི་པའི་སྣོད་དུ་མ་གྱུར་པ་ཡིན་ན། རེ་ཞིག་མཆོག་དབང་རྣམ་པ་གསུམ་པོ་དེ་ཉིད་སྦྱིན་ཏེ། དབང་བཞིའི་གྲངས་ཀྱི་སྒོ་ནས་དབུགས་ཕྱུང་སྟེ་ལག་བཅངས་ཀྱི་བདེ་བ་ནི། དབང་གསུམ་པ་དང༌། གཉིས་
སྤྲོད་ནི་བཞི་པའོ་ཞེས་སོ། །དེའི་རྗེས་སུ་ལས་ཀྱི་ཕྱག་རྒྱའི་རབ་སྦྱོར་དང༌། ཞེས་སོགས་ཀྱིས་ཐུན་མོང་མ་ཡིན་པའི་དམ་ཚིག་ཐིག་ལེ་འཕོ་མེད་དུ་འཆིང་བ་ལ་བསླབ་དགོས་པ་དང༌། སྔར་བྱིས་འཇུག་གི་སྐབས་སུ་བསྒྲགས་པ་དང་ཉིན་ཞག་སོ་སོ་ཡིན་ན། རྩ་ལྟུང་སོགས་ཀྱང་སྒྲག་གོ །དེ་ལ་ཚིགས་བཅད་ཀྱི་དོན་ནི། ལས་ནི་ཕྱག་རྒྱ་དང་རབ་ཏུ་སྦྱོར་བའི་སྐབས་དང༌། ཡེ་ཤེས་ཀྱི་ཕྱག་རྒྱའི་རྗེས་ཆགས་ཀྱི་བདེ་བ་སྒོམ་པ་ལ་ཡང་བདེ་བ་ཆེན་པོའི་རྟེན་བྱང་ཆུབ་ཀྱི་སེམས་ཀུནྡ་ལྟ་བུ། བརྟུལ་ཞུགས་ཚུལ་ཁྲིམས་བརྟན་པོས་མ་ཉམ་པར་བསྲུང་བར་བྱའོ། རྗེས་ཆགས་ལའང་ཞེས་འང་སྒྲ་སྨོས་པ་ནི། སྟོང་གཟུགས་ཀྱིས་བདེ་བ་བསྐྱེད་པ་ན། བྱང་ཆུབ་ཀྱི་སེམས་མི་འཕོ་བར་བྱེད་དགོས་པར་མ་ཟད། ལས་ཡེ་གཉིས་ལས་ཀྱང་འཕོ་མེད་དུ་བྱེད་དགོས་ཞེས་ པའོ། །འདི་ནི་སྤྱི་ཁྱབ་ཏུ་བསྟན་པ་སྟེ། དང་པོར་སྨིན་བྱེད་ཀྱི་དབང་ནས་བརྩམས་ཏེ་རྗེས་དྲན་གྱི་བར་དང༌། ཏིང་ངེ་འཛིན་ཡན་ཆད་ཀྱི་རྗེས་ཐོབ་ཏུའང་འཇུག་ གོ །སྲུང་ཚུལ་ཇི་ལྟ་བུ་སྙམ་ན། བྷ་གར་ལིངྒ་རབ་ཏུ་བཞག་ནས་བྱང་ཆུབ་ཀྱི་སེམས་ཕྱི་རོལ་ཏུ་སྤྲོ་བར་མི་བྱ་སྟེ། ཁམས་གསུམ་པོ་མ་ལུས་པའི་རྣམ་པ་ཅན་གྱི་སངས་རྒྱས་ཀྱི་གཟུགས་ཏེ་སྟོང་གཟུགས་རྟག་ཏུ་བསྒོམས་པས་ཐིག་ལེ་འཛག་མེད་དུ་འཆིང་བར་བྱའོ། །འདི་ནི་རྗེས་དྲན་གྱི་སྐབས་ཐམས་ཅད་དང་ཏིང་ངེ་འཛིན་གྱི་རྗེས་ཐོབ་ཏུ་སྟེ། དངོས་ནི་དེ་ལྟར་ཡིན་ཡང་རྗེས་མཐུན་པའི་དབང་དུ་བྱས་ན། འཛིན་པའི་སྐབས་དང་སྲོག་རྩོལ་མན་ཆད་ཀྱི་ཡང་བོགས་འདོན་བཙན་ཐབས་ཀྱི་སྦྱོར་བ་ལ་ལས་ཡེ་གཉིས་ཀྱི་རྗེས་ཆག་སྒྲུབ་པའི་སྐབས་སུ་ཡང༌། སྤྱིར་སྟོང་གཟུགས་ལ་དམིགས་པ་ཙམ་དང༌། རླུང་སྟོབས་ཀྱིས་ཐིག་ལེ་བཅིངས་པ་ན། སྟོང་གཟུགས་
ཀྱིས་བཅིངས་པའི་ཆ་ཡང་ཅུང་ཟད་ཡོད་པ་དག་ཡིན་ནོ། །སྟོང་གཟུགས་ལ་སངས་རྒྱས་ཀྱི་གཟུགས་ཞེས་གསུང་པའི་རྒྱུ་མཚན་ནི་སངས་རྒྱས་དངོས་དོན་དམ་པའི་སངས་རྒྱས་བདེ་གཤེགས་སྙིང་པོ་ཡིན་ལ། འདི་དེའི་རང་གཟུགས་ཡིན་པར་དགོངས་པའོ། །དེ་ཡང་ཐ་མལ་གྱི་རླུང་ཅུང་ཟད་ཐིམ་ཞིང་ཡེ་ཤེས་ཀྱི་རླུང་རྒྱས་པ་ན། སྟོང་གཟུགས་གསལ་བར་སྣང་ལ། ཡང་སྟོང་གཟུགས་ལ་སེམས་གཏད་པ་ན། འབྲས་བུས་རྒྱུའི་རིགས་རྒྱུན་ལ་ཕན་བཏགས་པའི་ཚུལ་གྱིས་ཡེ་ཤེས་ཀྱི་རླུང་རྒྱས་པར་འགྱུར། དེ་རྒྱས་པས་ཐ་མལ་གྱི་རླུང་བཀག་སྟེ་འཆིང༌། རླུང་འཆིངས་པས་ཐིག་ལེ་འགག་སྟེ། རྒྱུ་མཚན་དེའི་ཕྱིར་སྟོང་གཟུགས་ཀྱིས་ཐིག་ལེ་འཆིང་པ་ཡིན་ནོ། །ཐིག་ལེ་སྲུང་བའི་ཚུལ་འདི་ཉིད་ཁོ་ན་ཡིས་སྐྱེ་བ་གཞན་མ་བརྒྱུད་པར་ཚེ་འདི་ལ་སངས་རྒྱས་ཉིད་ཀྱི་གོ་འཕང་ཐོབ་པར་འགྱུར་ཏེ་དང་པོར་འཛག་མེད་ཀྱི་བདེ་བ་ཚུལ་ཁྲིམས་ཀྱི་ཚོགས་ནི་ཡང་དག་པར་རྫོགས་ཤིང༌། སྦྱིན་སོགས་བསོད་ནམས་ཀྱི་ཚོགས་དང༌། འགྱུར་མེད་བདེ་བའི་ཡེ་ཤེས་ཀྱི་ཚོགས་ཡང་དག་པར་ལྡན་པ་ལས་འབྲས་བུས་རྟགས་བཅུའི་རང་བཞིན་ཕ་རོལ་ཏུ་ཕྱིན་པ་བཅུ་ཐོབ་པ་ཡི་རྫོགས་པའི་སངས་རྒྱས་དྲི་བྲལ་དེ་བཞིན་ཉིད་ཀྱི་ངོ་བོ་དུས་གསུམ་ཤེས་བྱ་ཀུན་ལ་ཆོས་ཉིད་ཀྱི་ཚུལ་དུ་ཁྱབ་པར་འཇུག་པ་དེའི་གོ་འཕང་མངོན་སུམ་དུ་ཐོབ་པར་འགྱུར་ལ། འགྱུར་མེད་བདེ་བ་འདི་ཡི་ངང་དུ་གོམས་པར་བྱས་པས། བདེ་བའི་རང་མདངས་གཞོམ་མེད་ཀྱི་སྒྲ་ཆོས་སྒྲ་ཐམས་ཅད་དུ་འཆར་བས། རྫོགས་པའི་སངས་རྒྱས་ཀུན་གྱི་ཆོས་ཀྱི་འཁོར་ལོ་རབ་ཏུ་བསྐོར་བ་ཡང་བདེ་ཆེན་གྱི་མཐུའོ། །དེས་ན་རང་དོན་སྒྲུབ་པའི་སླད་དུ་འགྱུར་མེད་ཀྱི་སྙིང་རྗེ་དང༌། གཞན་དོན་སྒྲུབ་པའི་སླད་དུ་རྣམ་ཀུན་གྱི་སྟོང་ཉིད་རྟོགས་
པར་བྱས་ནས་དེ་གཉིས་དབྱེར་མེད་དུ་སྒོམ་དགོས་སོ། །ཆོས་ཅན་ཁམས་གསུམ་མཐའ་དག་ལ་དབང་བསྒྱུར་བའི་ཆོས་ཉིད་དབང་ཕྱུག་དམ་པ་དོན་དམ་ཁམས་གསུམ་གྱི་ཡེ་ཤེས་ནི་སྟོང་ཉིད་སྙིང་རྗེ་དབྱེར་མེད་དེ་ཡིན་ལ། འདི་ལས་གཞན་པའི་ཆོས་རྣམས་ཀྱི་གནས་ལུགས་ཡོད་པ་མ་ཡིན་པས། བདེ་བ་དང་རྣམ་པ་ཐམས་ཅད་པ་གནས་ཚུལ་ཡིན་པའི་ཕྱིར། ལམ་ཡང་དེ་དང་མཐུན་པར་སྒོམ་དགོས་སོ། །ཐིག་ལེ་སྟོང་གཟུགས་ཀྱི་ངོ་བོར་གྱུར་པའི་འཛག་མེད་ཀྱི་ཚུལ་ཁྲིམས་སྐྱོབ་པ་སངས་རྒྱས་ཐམས་ཅད་ཀྱི་སྡོམ་པའི་མཆོག དེའི་རྒྱུར་ཐིག་ལེ་སྲུང་བའི་ཚུལ་ཁྲིམས་འདི་ནི་གལ་ཏེ་ཁྱོད་ཀྱིས་སྲུང་བར་བྱེད་ན། བདག་རྡོ་རྗེ་སེམས་དཔའི་བུ་སྟེ་རིགས་ཡིན་ལ། དེའི་ཚེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་ནས་རྫོགས་པའི་བྱང་ཆུབ་མྱུར་དུ་ཐོབ་པར་འགྱུར་རོ། །བདེ་བ་རྣམ་པ་ཐམས་ཅད་པའི་གནས་ལུགས་རྟོགས་པ་ལ་བདེ་སྟོང་དེ་རྟོགས་པའི་ལམ་གྱི་ཡེ་ཤེས་མི་འགྱུར་བའི་བདེ་བ་དགོས། དེ་ཐོབ་པ་ལ་ཞུ་བདེ་འགྱུར་མེད་དགོས། དེ་ལ་བྱེད་བཅིངས་རླུང་སྟོབས་སོགས་ཐབས་དུ་མའི་སྒོ་ནས་ནམ་དུ་ཡང་བྱང་ཆུབ་ཀྱི་སེམས་མ་འཕོས་ཤིང་བརྟན་པ་དགོས་པ་ལས། ཅི་སྟེ་ཆགས་པའི་རྣམ་རྟོག་གིས་ཟིལ་གྱིས་མནན་པའི་བདག་ཉིད་ཅན་དག་དཀྱིལ་འཁོར་གྱི་གཙོ་བོ་བླ་མའི་མདུན་དུ་འཛག་མེད་ཀྱི་སྡོམ་པ་བླངས་ནས། ཡང་དེ་ནི་བྱང་ཆུབ་ཀྱི་སེམས་ལྟུང་བར་ཆེད་དུ་རྩོལ་བས་སྡོམ་པ་སྐྱོང་བར་མི་བྱེད་ན། དེའི་ཚེ་དེ་ནི་དམྱལ་བ་ངུ་འབོད་དུ་འགྲོ་བར་འགྱུར་རོ། །གལ་ཏེ་འཆིང་བར་འདོད་པའི་བསམ་པ་ཡོད་ཀྱང༌། སྒོམ་པའི་སྟོབས་དམན་ཞིང་ཞེན་པའི་སེམས་ལས་རླུང་སྟོབས་ཀྱིས་འཆིང་མ་ནུས་པར་གང་གི་ཚེ་ཕྱག་རྒྱའི་སྐྱེ་གནས་
སུ་བྱང་ཆུབ་ཀྱི་སེམས་ལྟུང་བར་གྱུར་ན། དེའི་ཚེ་ཕྱག་རྒྱའི་སེམས་ཤིན་ཏུ་རྣམ་པར་དག་པར་ཤེས་ནས་ནི་པདྨའི་ཕྱི་རོལ་ནས་རང་གི་ལྕེས་བླང་བར་བྱ་སྟེ། རྟེན་བྱང་ཆུབ་ཀྱི་སེམས་ལ་གཅེས་སྤྲས་དང་གུས་པའི་སེམས་ཀྱིས་སོ། །གལ་ཏེ་དེའི་སེམས་མ་དག་ན་མ་ཚོར་བར་བླང་ཞེས་དོན་དམ་བསྙེན་པར་བཤད་དོ། །དེ་ན་ཡོན་འབུལ་བ་སོགས་བྱ་སྟེ། རེ་ཞིག་དེ་ཙམ་གྱིས་ཆོག་ཤེས་པར་བྱ་ལ། དེ་ཁོ་ནས་སོ་སོར་སྡུད་པ་ལ་སོགས་པ་ལུགས་འདིའི་ཐུན་མོང་མ་ཡིན་པའི་རྫོགས་རིམ་རྣམས་སྒོམ་པ་ལ་མི་དབང་ཡང་རྩ་རླུང་ཐིག་ལེ་ལས་རྒྱ་སོགས་ལ་བརྟེན་པའི་གསལ་སྟོང་དང་བདེ་སྟོང་སྒོམ་པ་སོགས་འཕགས་ཡུལ་གྱི་པཎ་གྲུབ་ཕལ་ལ་གྲགས་པའི་རྫོགས་རིམ་གྱི་མིང་ཅན་རྣམས་སྒོམ་པ་ལ་དབང་ངོ༌། །འོ་ན་བུམ་དབང་ཐོག་མར་དགེ་བའི་སྨིན་བྱེད་དུ་སྦྱོར་བ་སོགས་མི་འཐད་པར་འགྱུར་རོ་སྙམ་ན། སྔར་བུམ་དབང་ཐོབ་པའི་རྒྱུན་དེ་ཕྱིས་འཇིག་རྟེན་ལས་འདས་པའི་བཞི་པས་བྱིན་གྱིས་བརླབས་པ་ན། དེ་འདྲ་བའི་བུམ་དབང་གི་སྡོམ་པ་དེ་སོར་བསམ་གྱིས་ཡེ་ཤེས་དང་ཡོན་ཏན་འཕྲལ་དུ་བསྐྱེད་པའི་མཐུ་ཅན་དུ་འགྱུར་གྱི། བཞི་པས་བྱིན་གྱིས་མ་བརླབས་ན། དེ་ལྟར་མི་འགྱུར་ཏེ་བརྒྱུད་རྒྱུ་ཙམ་མོ། །དཔེར་ན་ཆུ་ཅོད་གཉིས་སྐུ་རྡོ་རྗེ་སྨིན་བྱེད་ཙམ་ཡིན་ཡང༌། དབང་གོང་མ་མ་བསྐུར་ན་རྫོགས་རིམ་སྐུ་རྡོ་རྗེའི་རྣལ་འབྱོར་ཐོས་སུ་ཡང་མི་རུང་ན་སྒོམ་པ་ལྟ་ཅི་སྨོས་པ་བཞིན་ནོ། །དེའི་རྗེས་སུ་འཆད་རྒྱུ་དབང་གི་རབ་བྱེད་ནི། དབང་གསུམ་པའི་རྗེས་འབྲང་ཡིན་ཡང་མི་རིང་བར་བཞི་པ་སྦྱིན་རྒྱུའི་ཤེར་དབང་གི་མཐར་བྱ་དགོས་ཀྱི། དམིགས་གསལ་མ་གཏོགས་སྤྱིར་བཏང་ལ་འཇིག་རྟེན་ལས་འདས་པའི་དབང་བཞི་པ་རེ་ཞིག་མི་བསྐུར་ན་སྐབས་འདིར་མི་བྱ་
སྟེ། འདི་ནི་གསུམ་པའི་དབང་དེ་འཇིག་རྟེན་པ་དཔེ་ཙམ་ཡིན་ནོ་ཞེས་སྨད་ནས་དོན་གྱི་བཞི་པ་ལ་བསྔགས་པ་བརྗོད་པ་ཡིན་པའི་ཕྱིར། བཞི་པ་མི་བསྐུར་བ་ལ་འདི་བྱས་ན་སློབ་མ་ལ་དགའ་བ་མ་ཡིན་པ་བསྐྱེད་པའི་ཕྱིར་དང༌། འཕྲལ་དུ་བཞི་པ་བསྐུར་པར་འགྱུར་བ་ལ་ནི། འདི་བྱེད་དགོས་ཏེ་དད་པ་དང་སྤྲོ་བ་བསྐྱེད་པའི་ཕྱིར་ཡིན་པས་སོ། །སྐབས་ འདིར་རྒྱུད་ཚིག་འདོད་པ་བསྐྱོད་པ་ཞེས་སོགས་ཚིགས་བཅད་ཀྱི་དོན་ནི། འགྲོ་བ་རྣམས་ཀྱི་ཡིད་ལ་སྐྱེས་པའམ་བུད་མེད་ཀྱི་ཡིད་ལ་འདོད་པའི་སེམས་བསྐྱོད་ཅིང་འགྲོ་བར་བྱེད་པའི་སྐད་ཅིག་མ་གསལ་བར་སྣང་བ་ལས་སྐྱེས་པ་དེ་ནི་དང་པོ་དགའ་བ་ཡིན་ལ། ཤེས་རབ་ཀྱི་ལུས་ལ་འཁྱུད་ཅིང་རེག་པ་ལས་བྱང་ཆུབ་ཀྱི་སེམས་དཔྲལ་བའི་འཁོར་ལོ་ལས་འབབ་ཅིང་རྫོགས་པ་གང་བའི་གནས་སྐབས་ནི་མཆོག་དགའ་ཡིན་ཞིང༌། དབང་པོ་གཉིས་མཉམ་པར་ཞུགས་པའི་རྐྱེན་གྱིས་གང་བ་དེའི་མཐར་ཡན་ལག་མཆོག་མགོ་བོའི་གནས་ལས་རི་བོང་འཛིན་པ་ཁུ་བ་ཞུ་སྟེ། མགྲིན་སྙིང་ལྟེ་གསང་སོགས་རྩ་འཁོར་སོ་སོར་བདེ་བ་འབར་བའི་རྟེན་ཐིག་ལེའི་རྒྱུན་རྩ་འཁོར་གཅིག་ཏུ་ལྟུང་ཞིང་འཛག་པ་ནི་ཁྱད་པར་གྱི་དགའ་བ་དང༌། དེ་ནས་ཨོཊྚ་ཞེས་པ་ཟླ་བའམ་མྱོས་པའི་དོན་ཏེ་ཐིག་ལེ་འཕོ་བཞིན་པའི་དུས་ན། སྐུ་གསུང་ཐུགས་ཀྱི་ཐིག་ལེ་གསུམ་བྱུང་བའི་མཐར་ལྷན་ཅིག་སྐྱེས་པའི་དགའ་བ་འབྱུང་ངོ༌། །དེ་ཡང་མགྲིན་པ་ནས་སྐུ་དང༌། སྙིང་ག་ནས་གསུང་དང༌། ལྟེ་བ་ནས་ཐུགས་ཀྱི་ཐིག་ལེ་རྣམས་འཐུར་དུ་སྤགས་པ་ན། བཞི་པའི་ཐིག་ལེ་ནོར་བུ་ནས་ཕྱིར་འཕོ་བ་རྩོམ་པ་དུས་མཉམ་པའོ། །སྤྱིར་དགའ་བ་བཅུ་དྲུག་ལ་བཞི་བཞི་བཅུ་དྲུག་ཏུ་བཤད་པ་མང་ཡང་འདིར་དགའ་བ་དང་པོ་
ལ་ནམ་མཁའ་རླུང་མེ་ཆུ་སའི་རིམ་པས། དགའ་བཟང་རྒྱལ་སྟོང་རྫོགས་པར་སྦྱར་ཏེ། ཨ་ཨི་རྀ་ཨུ་ལྀ་ཀ་འཆར་བ་དང༌། མཆོག་དགའ་བ་ཡང་དེ་བཞིན་དུ་སྦྱར་ཏེ། ཨ་ཨེ་ཨར་ཨོ་ཨ་ལ་ཙ་འཆར་བ་དང༌། ཁྱད་དགའ་ལ་ཡང་དེ་བཞིན་དུ་སྦྱར་ཏེ། ཧ་ཡ་ར་ཝ་ལ་ཊ་འཆར་བ་སྟེ། དེ་ལྟར་ན་དགའ་བ་གསུམ་ལ་ནང་ཚན་གྱི་དབྱེ་བ་ལྔ་ལྔ་སྟེ་བཅོ་ལྔ་དང༌། ལྷན་སྐྱེས་ནི་གཅིག་ཁོ་ན་སྟེ། ཆ་བཅུ་དྲུག་པ་ཁམས་ཐམས་ཅད་འདུས་པ་དགའ་བ་བཟང་པོ་སོགས་ན་ཚོད་འགྱུར་བའི་རིམ་པ་ཐམས་ཅད་སྤངས་པ་ཡིན་ནོ། །ཤེས་རབ་མ་ལ་ལྟ་བ་དང༌། རེག་པ་དང༌། རྡོ་རྗེ་པདྨར་འགྲོགས་པ་ལས་བྱང་ཆུབ་ཀྱི་སེམས་གཡོ་ཞིང་འཛག་པའི་བདེ་བ་འདི་དག་གིས་ནི་རིམ་པ་བཞིན་དུ་དགའ་བ་དང་པོ་དང༌། ལ་སོགས་ཀྱི་ཁོངས་ནས་མཆོག་དགའ་དང༌། ཁྱད་དགའ་དང༌། ལྷན་སྐྱེས་ཀྱི་དབྱེ་བ་སྟེ། དགའ་བ་དང་པོ་དག་ཀྱང་མི་རྣམས་ཀྱིས་ནི་ཆགས་ཡུལ་ལ་མིག་གིས་ལྟ་བ་དང༌། རྒོད་པ་དང༌། དཀར་འཛིན་སོགས་ཆ་ཤས་ལ་རེག་པ་རྣམས་ཀྱིས་འདོད་པའི་སེམས་བསྐྱོད་ཅིང་དགའ་བར་བྱེད་པ་ཡིན་ལ། དེའི་ཕྱི་རྗེས་ནས་བྱང་ཆུབ་ཀྱི་སེམས་མགོ་བོའི་འཁོར་ལོ་ནས་ཞུ་ཞིང་གང་བ་དང༌། འཁྱུད་པ་སོགས་ནས་རྡོ་རྗེ་པདྨར་རབ་ཏུ་སྦྱར་བའི་བར་གྱིས་ནི། སླར་ཡང་གཉིས་པ་མཆོག་གི་དགའ་བ་ཉིད་དོ། །ཡང་འདོད་པའི་མིའི་དྲོད་དང་བདེ་བ་འབར་བ་ཉིད་ལས་བྱང་ཆུབ་ཀྱི་སེམས་ཐིག་ལེ་ཉིད་དང་ལུས་ཉིད་ཀྱི་ནང་ཚན་རྩ་འཁོར་སོ་སོ་ལ་འཛག་པའི་དགའ་བ་ཡིས་ཀྱང་ཁྱད་པར་གྱི་དགའ་བ་ཉིད་དོ། །རྡོ་རྗེ་དང་པདྨ་ཕན་ཚུན་དུ་བྱ་བ་བྱས་པ་ལས་ཐིག་ལེ་གསུམ་གྱི་མཐར་འགྱུར་བ་ལ་གནས་པའི་ཨོཊྚ་ཏེ་རྣམ་རྟོག་དང་བྲལ་ཞིང་
མྱོས་པའི་སྐད་ཅིག་མ་ནི་ལྷ་ཅིག་སྐྱེས་པའི་དགའ་བའོ། །དེ་ཡང་ཐིག་ལེ་གྲོལ་པ་སྟེ་ཕྱི་རོལ་ཏུ་ལྟུང་པ་ནི། ཆགས་བྲལ་ཉམས་པའི་ཕྱོགས་ཡིན་ལ། རྡོ་རྗེ་སྟེ་མི་འཕོ་བར་བྱས་ན། ཨོཊྚས་བཀུག་པ་སྟེ་དེ་ཡིས་རྒྱུ་བྱས་ནས་བཀུག་སྟེ་འོངས་པ་དང་འདྲ་བ་སྟེ། ཨོཊྚའི་གནས་སྐབས་སུ་འཕོ་བ་མེད་པར་བཅིངས་པས། ཨོཊྚ་ཉིད་ལ་རང་བཞིན་གྱིས་གནས་པའི་མཆོག་གི་བདེ་བ་དམ་པ་ཞུ་བདེ་འགྱུར་མེད་ཀྱི་ལྷན་ཅིག་སྐྱེས་དགའ་སྟེར་ཞིང་ཐོབ་པར་བྱེད་དོ། །དེ་དག་ནི་འཇིག་རྟེན་ཀུན་རྫོབ་མཚོན་བྱེད་དཔེའི་དགའ་བཞི་ཡིན་ལ། མཚོན་བྱ་དོན་གྱི་དགའ་བཞི་ནི། མཚན་བརྗོད་ཀྱི་ལུང་ཤོ་ལོ་ཀ་གཉིས་ཀྱིས་སྟོན་ཏེ། དོན་གྱི་ཡེ་ཤེས་མི་འགྱུར་བའི་བདེ་བ་ནི་ཆགས་པ་སྟེ་བདེ་བ་ཆེན་པོ་ཡིན་ལ། གཞན་ཕལ་པ་ལ་ཀུན་རྫོབ་ཀྱི་བདེ་བ་ཤིན་ཏུ་རྒྱས་པའི་མཐར་དེའི་རྗེས་སུ་ཉམ་པའི་ཆགས་བྲལ་འཇུག་ཀྱང༌། འདི་ལ་ཉམ་པ་མི་སྲིད་པས་ཆག་བྲལ་གྱི་དང་པོ་ལ་རྟག་ཏུ་གནས་པ་ཡིན་ལ། ཡེ་ཤེས་ཀྱི་རང་བཞིན་ཁ་དོག་སྣ་ཚོགས་འབར་བའི་འོད་རྡུལ་དང་བྲལ་པ་དང༌། རྡོ་རྗེ་རྫོགས་པར་སངས་རྒྱས་པ་སྟེ། སྟོང་གཟུགས་ཀྱི་རྡོ་རྗེ་རྟག་ཏུ་ལངས་པ་གཞིག་ཏུ་མེད་པའི་དོན་ཡིན་ལ། དེ་ཡང་སྟོང་གཟུགས་དང་ཐིག་ལེ་རོ་གཅིག་ཏུ་འདྲེས་པ་ལས་མི་འགྱུར་བའི་བདེ་བ་དེའི་གནས་ནི་ཤེས་རབ་སྟོང་གཟུགས་ཉིད་དོ། །སངས་རྒྱས་ཀྱི་བརྗོད་པ་གཞོམ་མེད་ཀྱི་སྒྲ་དང༌། དེ་རྣམས་ཀྱི་ཆོས་ཐིག་ལེ་བཞི་པོ་མི་འགྱུར་བར་འཛིན་པ་སྟེ། ཁ་དོག་སོགས་ཀྱི་སྐུ་དང༌། སངས་རྒྱས་བརྗོད་པ་ཞེས་པ་གསུངས་དང༌། རྡོ་རྗེ་སོགས་ཀྱིས་ཐུགས་དང༌། ཆགས་བྲལ་སོགས་ཀྱིས་ཡེ་ཤེས་ཏེ།
ཆོས་ཞེས་པས་དེ་རྣམས་ཀྱི་རྟེན་ཐིག་ལེ་བཞིའོ། །དོན་དམ་ཁམས་གསུམ་བརྟན་གཡོའི་དངོས་པོ་རྣམ་པ་ཀུན་དང་ལྡན་ཞིང༌། རྡུལ་དང་སྐད་ཅིག་ལས་འདས་པས་ཀུན་རྫོབ་ཀྱི་རྣམ་པ་ཅི་ཡང་མེད་པ། དེ་ལྟ་བུའི་སྟོང་ཉིད་དང༌། བཅུ་དྲུག་གི་ཕྱེད་ཀྱི་ཕྱེད་དེ་སྐུ་གསུང་ཐུགས་ཡེ་ཤེས་ཀྱི་ཐིག་ལེ་བཞི་འཕོ་མེད་སྒྲིབ་བྲལ་དུ་འཆང་ཞིང༌། དཔེར་ན་དཀར་ཕྱོགས་ནག་ཕྱོགས་ཀྱི་ཆ་བཅོ་ལྔ་ལས་འདས་ཤིང༌། ཆ་དེ་རྣམས་མེད་པའི་ཆ་བཅུ་དྲུག་པ་དང་མཚུངས་པར་འཕེལ་འགྲིབ་ཐམས་ཅད་ལས་འདས་ཀྱང་འཕེལ་འགྲིབ་ཀུན་ལ་ཆོས་ཉིད་དུ་ཁྱབ་པའི་འགྱུར་མེད་བདེ་བ་དེ་ནི་བསམ་གཏན་དགའ་བ་བཞིའི་རྩེ་མོ་ལྷན་ཅིག་སྐྱེས་དགའ་རྟག་ཏུ་འཛིན་ཞིང་འཆང་ པའོ། །ཞེས་དོན་དམ་པའི་ཡེ་ཤེས་ལ་ངོ་བོའི་སྒོ་ནས་དབྱེ་བ་མེད་ཀྱང་ལྡོག་ཆས་ཕྱེ་ན་དགའ་བ་བཞི་པོ་རེ་རེ་རྡོ་རྗེ་བཞི་བཞིའི་ཕྱེ་བས་བཅུ་དྲུག་སྟེ། ཆ་མེད་ཆ་ལས་འདས་ཞེས་པས་དེ་ཁོ་ན་ཉིད་བཅུ་དྲུག་བསྟན་ཞིང༌། བསམ་གཏན་བཞི་ཞེས་པའི་དགའ་བཞི་དང༌། ཆགས་བྲལ་སོགས་ཀྱིས་དེ་བཞི་པོ་རེ་རེ་ལ་ཡང་རྡོ་རྗེ་བཞིས་འབྱེད་པར་བསྟན་ནོ། །དཔེའི་ཡེ་ཤེས་ཀྱི་སྐབས་སུ་དགའ་བ་བཞི་ནི་གོང་དུ་བཤད་པ་བཞིན་ཡིན་ཞིང༌། སྐབས་འདིར་འདོད་པ་གང་བ་འབར་བ་ཨོཊྚ་རྣམས་དགའ་བ་བཞི་དང་དོན་གཅིག་མིང་གི་རྣམ་གྲངས་སུ་མཛད་ལ། སྐད་ཅིག་མའི་དགའ་བ་བཅུ་དྲུག་ནི་འོག་ཏུ་འཆད་པ་ལྟར་ཏེ། དེའི་སྐབས་སུ་འདོད་པ་ལ་སོགས་པ་བཞི་པོ་དེ་རྣམས་དགའ་བཞིའི་ནང་ཚན་རེ་རེ་ལ་སྦྱོར་གྱི། དགའ་བཞིའི་མིང་གི་རྣམ་གྲངས་སུ་མི་བྱེད་དོ། །ཞེས་དམིགས་ཕྱེད་པར་བྱའོ། །དེ་དག་གིས་འཇིག་རྟེན་པའི་དབང་གི་ཆོ་
གའི་རིམ་པ་རྣམས་མདོ་ཙམ་བསྟན་ཟིན་ཏོ།། །།བཞི་པ་འཇིག་རྟེན་འདས་པའི་དབང་གི་རིམ་པ་ལ་དཔྱད་པ་ལ་གསུམ་སྟེ། སློབ་མའི་དབང་ལ་བཞི་པ་འཇུག་ཚུལ། བཞི་པའི་ཆོ་ག་ལ་དཔྱད་པ། བཞི་པའི་ཡེ་ཤེས་ངོས་བཟུང་བའོ། །དང་པོ་ནི། སློབ་མའི་དབང་གི་སྐབས་འདིར་འཇིག་རྟེན་ལས་འདས་པའི་བཞི་པ་ངེས་པར་བསྐུར་དགོས་ཏེ། རྒྱུད་ལས། ཤེས་རབ་ཡེ་ཤེས་དག་གིས་མངོན་པར་དབང་བསྐུར་སྲིད་པའི་འཇིགས་པ་འཇོམས་པའི་འཇམ་དབྱངས་ཉིད་དུ་འགྱུར། །ཞེས་གསུངས་པའི་དངོས་བསྟན་གསུམ་པའི་དག་པ་བརྗོད་ནས། འགྲེལ་པར། དེ་ལྟར་བསོད་ནམས་དང་ཚུལ་ཁྲིམས་ཀྱི་ཚོགས་སྔོན་དུ་འགྲོ་བ་ནི་ཡེ་ཤེས་ཀྱི་ཚོགས་སོ། །དེ་ལ་ས་བཅུ་གཉིས་པ་ལ་རྣལ་འབྱོར་པ་རྣམས་སངས་རྒྱས་ཉིད་དོ། །ཞེས་གསུངས་ཏེ། བསོད་ནམས་ཀྱི་ཚོགས་དབང་བདུན་དང༌། ཚུལ་ཁྲིམས་ཀྱི་ཚོགས་བུམ་གསང་ཤེར་དབང་གསུམ་དང༌། ཡེ་ཤེས་ཀྱི་ཚོགས་ཀྱི་ལམ་ས་བཅུ་གཅིག་པ་ལས་འབྲས་བུ་ས་བཅུ་གཉིས་པ་ཐོབ་པ་དང་དག་པ་སྦྱར་ཏེ་གསལ་བར་གསུངས་པའི་འཇིག་རྟེན་ལས་འདས་པའི་དབང་བཞི་པ་ངེས་པར་དགོས་ལ། སྐབས་འདིར་དབང་གོང་མ་རྣམས་སའི་དག་སྦྱོར་དང་བཅས་ཏེ་གསལ་བར་གསུངས་པ་འདི་ནི། རྒྱུད་ལས། སྡིག་པའི་དྲི་མ་འཕྲོག་པའི་དབང་བསྐུར་བདུན་པོ་འདི་རྣམས་དཀྱིལ་འཁོར་དུ་ནི་ཡང་དག་རབ་སྦྱིན་བྱ། །ཞེས་པའི་འཇུག་ཐོག་ཁོ་ནར་གསུངས་ཤིང༌། འདིའི་དེ་མ་ཐག་གི་རྗེས་སུ་ཡང་རྩ་ལྟུང་བསྒྲགས་པ་སོགས་ཆོ་གའི་ལྷག་མ་བཤད་པ་དང༌། སློབ་དཔོན་གྱི་དབང་དང༌། འདི་དག་སྟོན་བྱེད་རྣམས་མདོར་བསྡུས་སོ་སོའི་མཚམས་བཅད་པའི་སློབ་མའི་
དབང་ཁོ་ནས་སྐབས་ཡིན་ནོ། །དེར་མ་ཟད་དབང་བཅུ་གཅིག་སའི་དག་པ་དང་སྦྱོར་བ་འདི་གཙོ་བོར་སློབ་མའི་དབང་ལ་འཇུག་དགོས་ཏེ། རྡོ་རྗེ་སློབ་དཔོན་གྱི་དབང་ཉིད་ལ་དབང་བཅུ་གཅིག་བྲེངས་ཆགས་སུ་བསྐུར་རྒྱུ་མེད་པའི་ཕྱིར་ རོ། །སློབ་མ་དང་སློབ་དཔོན་གཉིས་ཀར་སྡོམ་པའི་ཕྱིར་རོ་སྙམ་ན། མི་རུང་སྟེ་བརྒྱད་དགུ་བཅུ་པ་གསུམ་པ་དག་པ་ལན་གཉིས་ཡོད་པར་འགྱུར་བ་དང༌། གཞན་རྣམས་ལ་རེ་རེ་ལས་མེད་པར་ཐལ་བས་ཤིན་ཏུ་མི་འགྲིག་པའི་སྐྱོན་དུ་འགྱུར་བའི་ཕྱིར། སློབ་མའི་དབང་ཁོ་ནར་ཡང་ས་བཅུ་གཉིས་ཀྱི་དག་པ་རྫོགས་པ་ཚང་དགོས་སོ།། །།གཉིས་པ་ནི། ཁ་ཅིག་དབང་བཞི་པ་བསྐུར་བའི་དོན་བཞི་པའི་ལམ་དང་འབྲས་བུའི་མཚན་ཉིད་སློབ་དཔོན་གྱིས་བཤད་དེ། སློབ་མས་གོ་བ་ཞིག་ཡིན་གྱི། དམིགས་པ་ཕོག་སྟེ་སྒོམ་དུ་བཅུག་པས་བཞི་པར་མི་འགྱུར་ཏེ། བཞི་པ་ཚིག་དབང་ཞེས་གསུངས་པའི་ཕྱིར་རོ། །ཞེས་ཟེར་རོ། །དེ་ནི་མི་འཐད་དེ་ཚིག་གིས་དབང་བསྐུར་བར་བཤད་པ་ཉིད་ཀྱིས་ཁྱེད་འདི་འགལ་ཁྱབ་ཡིན་ལ། རྒྱུ་མཚན་ཅིའི་ཕྱིར་ཞེ་ན། ཚིག་གི་དབང་ཞེས་པའི་དབང་རྫས་དང་སྔགས་ཚིག་གིས་བསྐུར་བ་གཅོད་པ་ཡིན་མོད་སྒོམ་པ་མ་བཀག་སྟེ། ཚིག་གིས་གདམས་ངག་ཇི་ལྟར་བརྗོད་པ་ལྟར་སློབ་མས་སྒོམ་དུ་གཞུག་པའི་དོན་ཡིན་པས་སོ། །ཚིག་གི་དབང་ཞེས་པས་རྫས་སྔགས་སུ་མ་ཟད་དམིགས་པ་སྒོམ་པ་ཡང་འགོག་སྟེ། ཚིག་བརྗོད་ཁོ་ན་ལས་གཞན་གང་ཡང་མི་རུང་ན། སློབ་མས་དོན་གོ་བ་ཡང་འགོག་དགོས་ཏེ། དོན་གོ་བ་དང་སྒོམ་པ་གཉིས་ཀར་ཚིག་གི་བརྗོད་པ་མ་ཡིན་པར་
མཚུངས་པ་དང་ཚིག་དབང་ཞེས་པ་ལ་དོན་དེ་གཉིས་ཉེ་རིང་དང་ཤས་ཆེ་ཆུང་གི་ཁྱད་པར་ཡང་མི་སྣང་བའི་ཕྱིར་རོ། །དེས་ན་རང་བྱུང་ཉིད་དུ་མངོན་པར་རྟོགས་པ་ཡིན་ན་མ་གཏོགས་དམིགས་པ་སྒོམ་པ་ཀུན་ལ་གདམས་ངག་གི་ཚིག་སྔོན་དུ་འགྲོ་དགོས་པས། ཚིག་གིས་སྦྱིན་པ་དང་དམིགས་པ་བྱེད་པ་ག་ལ་འགལ་ཏེ། ཚིག་གིས་སྦྱིན་རྒྱུ་དེ་ཀ་དམིགས་པ་ཡིན་པས་སོ། །དེས་ན་དབང་བཞི་པ་སློབ་དཔོན་ལ་ཞུ་བའི་སྐབས། དམིགས་པ་ལ་མཉམ་པར་འཇོག་པ་དང་མོས་སྒོམ་བྱེད་པ་གཙོ་ཆེ་སྟེ། བཞི་པ་སློབ་དཔོན་ལ་ཞུ་བ་དེ་ཡང་ཆོ་གས་སྟེར་བ་ཡིན་དགོས་ཤིང༌། སྔོན་འགྲོ་གསོལ་བཏབ་དང༌། རྗེས་ང་རྒྱལ་བཟུང་བ་མ་གཏོགས། འདིར་དངོས་གཞི་ལ་རྫས་སྔགས་ཀྱི་ཆོ་ག་ནི་བཀག་སྟེ། ཏིང་ངེ་འཛིན་འབའ་ཞིག་གི་ཆོ་ག་ཡིན་པས་དེར་ཡང་དམིགས་པ་སྒོམ་པ་ལས་གཞན་དུ་མེད་པའི་ཕྱིར་རོ།། །།བཞི་པའི་ལམ་དང་འབྲས་བུའི་དོན་འཆད་པ་ནི་དམིགས་པ་སྒོམ་པ་དེ་ཉིད་ལ་ངེས་ཤེས་བསྐྱེད་པའི་ཕྱིར་བརྡ་སྤྲོད་ཙམ་དུ་འགྱུར་སྲིད་པའི་སྤྱིར་འགོག་པ་མ་ཡིན་མོད། དོན་གྱི་གཙོ་བོ་ཡང་མིན་ལ། བཤད་པ་ཙམ་གྱིས་ཆོ་གར་ཡང་མ་སོང་ཞིང༌། གལ་ཏེ་བཤད་པ་བྱེད་པ་དེ་བཞི་པའི་ཆོ་ག་ཡིན་ན་ནི། རྒྱལ་བའི་གསུངས་པའི་སྔགས་ཚིག་ངེས་ཅན་སྟོན་དགོས་ལ། མ་ཡིན་ན་ནི་ངེས་པར་དགོས་པ་ཡང་མ་ཡིན་ནོ། །ཡང་འདི་སྐད་ཅེས་བྱ་སྟེ། ལས་དང་པོ་པ་ལ་བསྐུར་བའི་ཚེ་དབང་གཞན་རྣམས་ལས་བཞི་པ་བཟང་བ་དང་མཐོ་བ་དང་མཆོག་མ་ཡིན་པར་ཐལ་བར་འགྱུར་ཏེ། གཞན་རྣམས་ལ་རྫས་དང་དམིགས་པའི་སྒོ་ནས་ཉམས་མྱོང་ཅུང་ཟད་རེ་དངོས་སུ་སྐྱེ་རྒྱུ་ཡོད། བཞི་པ་ལ་ཚིག་ཕྱིར་འབྲངས་པའི་གོ་བ་ཙམ་མ་གཏོགས་མྱོང་བ་སྐྱེ་རྒྱུ་ཅུང་ཟད་ཀྱང་མི་
འདུག་པའི་ཕྱིར། འདོད་པར་ནི་རང་གཞན་ཐམས་ཅད་ཀྱིས་མི་ནུས་མོད་ཅི་སྟེ་འདོད་དོ་ཞེ་ན། དབང་བཞིའི་ལམ་གྱི་ནང་ནས་བཞི་པའི་ལམ་མཆོག་མ་ཡིན་པར་ཐལ་ཏེ། སྨིན་བྱེད་དབང་གི་སྐབས་སུ་བཞི་པ་མཆོག་མ་ཡིན་པའི་ཕྱིར། སྨིན་བྱེད་དབང་གི་སྐབས་སུ་བཞི་པ་ལ་སའི་དག་པ་མཐོ་ཤོས་སྦྱོར་བ་མི་འཐད་པར་ཐལ་ཏེ། དབང་གཞན་རྣམས་ལས་དེ་མཆོག་མ་ཡིན་པའི་ཕྱིར། གཞན་ཡང་ཀུན་ཏུ་གྲགས་པ་དང་འགལ་ལོ། །ཡང་མ་ཁྱབ་སྟེ། དབང་དུས་སུ་ཡང་དབང་གཞན་གྱི་ཉམས་མྱོང་ལས། བཞི་པ་ཐོས་པའི་གོ་བ་ཙམ་ཡང་བཟང་ངོ་སྙམ་ན་མི་འཐད་དེ། འོ་ན་ལམ་དུས་སུ་ཡང་དབང་གཞན་གྱི་ལམ་གྱི་ཉམས་མྱོང་རྒྱུད་ལ་སྐྱེས་པ་ལས་དབང་བཞི་པའི་ལམ་ཐོས་བསམ་གྱིས་གཏན་ལ་ཕེབས་པའི་ཤེས་རབ་དེ་བཟང་བར་ཐལ་ཏེ་རྒྱུ་མཚན་དེའི་ཕྱིར་རོ། །དེ་ཡང་འདོད་ན་ཁྱེད་ཀྱི་ལུགས་ལ་རྣལ་འབྱོར་ཡན་ལག་དང་པོ་ལྔའི་རྟོགས་པ་སྐྱེས་པའི་སྦྱོར་ལམ་པ་ལས། དབང་བཞི་པའི་དོན་འཆད་ཤེས་པ་ཚོགས་ལམ་དང་པོ་ལ་ཡང་མ་ཞུགས་པའི་སྐྱེས་བུ་དེ་བཟང་བར་འགྱུར་ཏེ་རྒྱུ་མཚན་དེའི་ཕྱིར་རོ། །ཡང་དབང་བསྐུར་གཞན་རྣམས་ཆོ་ག་ཡིན་ཡང་བཞི་པ་མིན་སྙམ་ན། དབྱེ་བ་དེ་ལྟར་འབྱེད་པ་ལ་རྒྱུ་མཚན་ལུང་རིགས་གཉིས་ཀ་མེད་ཅིང༌། དག་བྱ་དག་བྱེད་སོགས་མཚུངས་པར་སྦྱར་བའི་རྒྱུ་མཚན་གྱིས་ཆོ་ག་ཡིན་མཉམ་ལ་རྒྱུ་མཚན་ཡོད་པའི་ཕྱིར་དེ་མི་འཐད་ལ། གཞན་ཡང་ཆོ་ག་མ་ཡིན་ན སྔགས་ཀྱི་གསོལ་བཏབ་ཀྱང་མི་འོས་ཤིང༌། ང་རྒྱལ་བཟུང་བ་ཡང་མི་འོས་སོ། །དབང་གཞན་རྣམས་རེ་རེ་ལ་རྒྱུད་ཁྱད་པར་ཅན་གོང་ནས་གོང་དུ་འགྱུར་བའི་སྐབས་རེ་ཡོད་པས་རྒྱུ་མཚན་དེས་ས་སོ་སོའི་ང་རྒྱལ་འཛིན་པ་ཡིན་ན། འདི་ལ་ཆོ་ག་མེད་ན་ཅིའི་ཕྱིར་རྒྱུད་གོང་དུ་འགྱུར། ས་གོང་མའི་ང་
རྒྱལ་ཅིའི་ཕྱིར་བྱེད། ཐོས་པའི་ཤེས་རབ་འཕེལ་བས་སོ་སྙམ་ན། དེ་ལྟར་ན་རྒྱུད་ཉན་པའི་ཚེ་ཚིག་རེ་རེ་ལས་ཀྱང་ཐོས་པའི་ཤེས་རབ་འཕེལ་བའི་ཕྱིར་རྒྱུད་བཤད་ལ་ས་ལ་སོགས་པའི་དག་སྦྱོར་སྟོང་ཕྲག་མང་པོ་དགོས་པར་འགྱུར་རོ། །དེས་ན་སེམས་རྒྱུད་ཀྱི་རྟེན་གོང་ནས་གོང་དུ་ཁྱད་པར་དུ་འགྱུར་བ་ནི། རེ་ཤིག་རིགས་གཉིས་སུ་ངེས་ཏེ་གཅིག་ནི་བསྒོམས་པའི་སྟོབས་ཀྱིས་སེམས་ཀྱི་རྟེན་གོང་ནས་གོང་དུ་འཕོ་བ་ཡིན་ལ། གཉིས་པ་ནི། ཆོ་གའི་སྒོ་ནས་བྱིན་གྱིས་བརླབས་པས་སྡོམ་པའམ་བརྟུལ་ཞུགས་སམ་བྱིན་རླབས་ཀྱི་སྟོབས་ཀྱིས་ཁྱད་པར་འཕགས་པའི་གནས་སུ་རྒྱུད་འགྱུར་བ་བསྟེན་པ་ཡིན་པས། རེ་ཤིག་འདི་གཉིས་ལས་གཞན་ཡོད་པ་མ་ཡིན་ཏེ། འདི་གཉིས་གང་ཡང་མེད་ན། ཐོས་པ་ཙམ་གྱི་སྐབས་དེ་ཉིད་ཁོ་ནར་རྒྱུད་ཁྱད་འཕགས་སུ་འགྱུར་བ་མ་ཡིན་ཏེ། ཆོ་གས་སྡོམ་པ་ཡང་མ་བླངས་མཉམ་བཞག་གི་སེམས་ཀྱང་མ་སྐྱེས་ན། གསུང་རབ་ཡན་ལག་བཅུ་གཉིས་རྫོགས་པར་ཐོས་ཀྱང་རྒྱུད་གོང་དུ་མི་འགྱུར་ཏེ་སྡོམ་པས་རྒྱུད་ཁྱད་པར་དུ་ཡང་མ་གྱུར་ལ། མིའི་ཆོས་ལས་གོང་དུ་སོང་བ་ཡང་མ་ཡིན་ནོ། །དེས་ན་དབང་བཞི་པ་ནི་ཆོ་གས་བསྐུར་དགོས་པ་ཡིན་ན་བཞི་པའི་བཤད་པ་བྱས་པ་ཙམ་གྱིས་ཆོ་གར་ག་ལ་འགྱུར། ལར་ཁྱེད་རྣམས་ཀྱིས་གསང་བ་བསྐུར་བ་དང༌། གསང་བ་བཤད་པའི་དབྱེ་བ་མ་ཕྱེད་པས་ཁྱེད་རང་དག་གསང་བ་འཆད་པ་ལྟར་བྱེད་པ་དེ་བཞི་པ་གསང་བ་བསྐུར་བ་ཡིན་པར་རློམ་ཞིང༌། དུས་འཁོར་བ་རྙིང་པ་རྗེས་འབྲང་དང་བཅས་པ་དག་དང་དཔལ་ཇོ་ནང་པ་དག་དབང་གོང་མ་གསང་བ་བསྐུར་བ་ལ་གསང་བ་བཤད་པ་ཡིན་སྙམ་ནས་གསང་སྒྲོགས་ཀྱི་སྐུར་བ་འདེབས་པར་བྱེད་དེ། རང་གཞན་གཉིས་ཀའི་ངང་ཚུལ་མ་རིག་པ་མི་མཁས་པའི་རང་བཞིན་ཁོ་ནའོ། །
དེས་ན་རང་ལུགས་ལ་དབང་བཞི་པའི་སྐབས་སུ་ཡན་ལག་དྲུག་པའི་དམིགས་པ་སྒོམ་དགོས་པས་ཤིན་ཏུ་ལས་དང་པོ་པ་ལ་ཡང་སོར་སྡུད་ཀྱི་དམིགས་པ་དང་པོ་ཙམ་ངེས་པར་ཕོག་ནས། ཡན་ལག་དྲུག་ཀར་གྱི་ཡེ་ཤེས་སུ་མོས་པ་བསྐྱེད་དགོས་ལ། རྗེས་སུ་དབང་དོན་ངོ་སྤྲོད་ཀྱི་ཚིག་བཤད་མཐའ་གཅིག་ཏུ་དགོས་པའི་ངེས་པ་མེད་ཀྱང༌། མཛད་པའི་སྲོལ་ཡོད་པ་དེ་ཡང་སློབ་མས་གོ་བར་རུང་བ་མང་ཉུང་འཚམ་པར་བརྗོད་ཀྱི། འདི་ཆོ་ག་བྱེད་པའི་སྐབས་ཡིན། གཞུང་བཤད་བྱེད་པའི་སྐབས་མ་ཡིན་པས་ཧ་ཅང་ལབ༌། ག་རིང་བ་དང་བཤད་པ་དཀའ་བ་དག་གཏོང་བ་ནི་མི་ལེགས་སོ། །ཡང་དབང་བཞི་པ་ལ་ཐོས་བསམ་གྱི་གོ་བ་མ་གཏོགས། དམིགས་པ་ལ་མཉམ་པར་འཇོག་ཏུ་མི་རུང་བར་སྨྲ་བ་འདི་ནི། ལས་འཕྲོ་ཅན་དང་དབང་པོ་རྣོན་པོ་ལ་དབང་བསྐུར་དུ་མི་རུང་བར་འདོད་དགོས་པར་འགྱུར་ཏེ། དབང་སྔ་མ་སྔ་མ་རྣམས་ཀྱི་ཉམས་མྱོང་སྔོན་དུ་སོང་ནས། བཞི་པའི་སྐབས་བླ་མས་བཤད་པ་མ་གཏོགས་དམིགས་པ་མ་ཕོག་ཀྱང༌། དབང་པོ་རྣོན་པོ་ལ་ཉམས་མྱོང་སྔ་མ་རྣམས་ཀྱིས་སྣ་དྲངས་ཏེ། བཞི་པའི་བཤད་པ་ཐོས་པས་རྐྱེན་བྱས་ནས། སློབ་མའི་སེམས་རྒྱུད་སོར་སྡུད་སོགས་ཀྱི་དམིགས་པ་ལ་གནས་པར་གྱུར་ན། ཁྱེད་ཀྱི་ལུགས་ལ་བཞི་པ་བསྐུར་བའི་དགག་བྱ་ཆེ་ཤོས་སུ་འདོད་པ་དམིགས་པ་སྒོམ་པ་དེ་རང་ཤུགས་སུ་བྱུང་བས་གོད་ཆེན་པོ་སྦྱོར་བར་ཐལ་བའི་ཕྱིར་རོ། །ཡང་རྒྱ་གར་གྱི་སློབ་དཔོན་མང་པོའི་དཀྱིལ་ཆོག་དང་བཤད་པས་དབང་བཞི་པའི་དོན་འཆད་པ་ཉིད་བཞི་པ་བསྐུར་བར་བཞེད་དོ་ཞེ་ན། འདི་ལ་ཁ་ཅིག་ནི་དེ་ལྟར་འདོད་དུ་ཆུག་ཀྱང༌། བྲམ་ཟེ་ཆེན་པོ་ས་ར་ཧས་ཕྱོགས་སྔར་མཛད་དེ་བཀག་པ་དེར་སྣང་བས་ཁུངས་སུ་མི་
རུང་ངོ༌། །དེ་ཡང་དོ་ཧ་མཛོད་ལས། ཁ་ཅིག་བཞི་པའི་དོན་འཆད་པ་ལ་ཞུགས། ཞེས་ཕྱོགས་སྔར་བཀོད་ནས། ལྷན་ཅིག་སྐྱེས་པ་ཚིག་གིས་མི་མཚོན་ཏེ། །ཞེས་སོགས་རྣམ་གྲངས་དུ་མས་དགག་པར་མཛད་དོ། །ཡང་བཞི་པའི་དོན་གྱི་བཤད་པ་མཛད་པ་གཞན་མང་པོ་ཞིག་ནི། དོན་དེ་དང་མཚུངས་པར་དམིགས་པས་སྒོམ་དགོས་རྒྱུ་མན་ངག་གབ་པའི་ཚུལ་ཡིན་པ་ལ། ཁྱེད་མཁས་པར་མངོན་པའི་ང་རྒྱལ་ཅན་དག་གིས་རྒྱུད་འགྲེལ་དག་ལ་ལྟ་རྟོག་མཛད་པ་ན། མན་ངག་ནི་ཞལ་མ་མཇལ། གལ་ཏེ་མཇལ་ཡང་རང་གི་ང་རྒྱལ་དེའི་དབང་ལས་ཡིད་མ་ཆེས། བླ་མ་གདམས་ངག་ཅན་ལས་ནི་རིང་དུ་བྱོལ། དཔེ་རིས་ཀྱི་ཚིག་དོན་ཙམ་ལ་ནི་དམིགས་པ་གསལ་བར་མ་ཐོན་པའམ། རེས་འགའ་ཐོན་པ་ཡོད་སྲིད་ཀྱང༌། ཚིག་དོན་ལ་གོ་བ་ལོག་པ་ཤར་ཏེ། ཟབ་དོན་བྱིན་རླབས་ཀྱི་བཅུད་ལེན་ཕོ་ནས། ཚིག་ཙམ་གྱི་རྫ་བུམ་སྟོང་པ་འཆང་བར་ཟད་དོ།། །།གསུམ་པ་ནི་དེ་ལ་དབང་བཞི་པའི་དབང་དོན་གྱི་ཡེ་ཤེས་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་ལ་མི་འགྱུར་བའི་བདེ་བ་རོ་གཅིག་ཏུ་འདྲེས་པ་དེ་ཡིན་མོད། དེའི་ཡན་ལག་ཆ་ཚང་བ་སྒྲུབ་པ་པོས་མངོན་དུ་གྱུར་པའི་ཐོག་མ་ནི། ཏིང་ངེ་འཛིན་གྱི་རིམ་པའི་སྐབས་ཡན་ཆད་ཡིན་ཡང་འདི་ན་ཁ་ཅིག་བཞི་པའི་དབང་དོན་ཡིན་ན། ཏིང་ངེ་འཛིན་གྱི་རིམ་པ་ཁོ་ནར་ཁྱད་མཐའ་འཆའ་བ་ནི་ཤིན་ཏུ་མི་རིགས་སོ། །དེའི་རྒྱུ་མཚན་ཡང་རྫོགས་རིམ་ཡན་ལག་དྲུག་པ་ནི་ཕྱག་ཆེན་ཁོ་ན་གཙོ་བོར་བྱེད་པ་དང༌། ལས་དང་པོ་པའི་སོར་སྡུད་ནས་བརྩམས་ཏེ། མི་འགྱུར་བའི་རྒྱུ་ཚོགས་ཁོ་ན་ཡིན་པའི་ཕྱིར་དང༌། འཇིག་རྟེན་པའི་དབང་གོང་མ་གསུམ་ལས་སམ་ཡེ་ཤེས་ཀྱི་ཕྱག་རྒྱ་ལ་བརྟེན་པ་ཁོ་ན་དང༌། ཞུ་བདེ་
ཁོ་ནའི་ཉམས་མྱོང་ལ་ངོ་སྤྲོད་དགོས་པའི་ཕྱིར། ཕྱག་ཆེན་གཙོ་བོར་བྱེད་པའི་སྨིན་བྱེད་དངོས་སུ་མི་རུང་ངོ༌། །དེའི་ཕྱིར་སོར་སྡུད་ཀྱི་རིམ་པ་ཡང་བུམ་པའི་དབང་དོན་དང་འདྲེས་པ་ནི་ཡིན་གྱི། ལམ་གྱི་གཞུང་ཤིང་ནི་བཞི་པའི་དབང་དོན་ཉིད་ དོ། །དེས་ཡན་ལག་གཞན་བཞི་པོ་ལ་རིགས་འགྲེའོ། །ཁ་ཅིག་འདི་སྐད་ཅེས་དབང་བཞི་པའི་མཐར་ཐུག་མི་འགྱུར་བའི་བདེ་བ་ལ་ངོས་འཛིན་པ་ནི། བཞི་པའི་ཕྱེད་མ་ཙམ་ཡིན་པས་མི་འཐད་ལ། སྟོང་གཟུགས་ཕྱག་རྒྱ་ཆེན་པོ་དང་གཉིས་ཚོགས་སུ་བྱེད་དགོས་སོ་ཟེར་རོ། །དེ་ནི་མི་འགྱུར་བའི་བདེ་བ་ངོས་མ་ཟིན་བཞིན་དུ་གཞན་སྐྱོན་རྟོག་པ་ལ་ཞུགས་པ་སྟེ། གང་མི་འགྱུར་པའི་བདེ་བ་ཡིན་པ་དེ་ནི། རྣམ་ཀུན་མཆོག་ལྡན་གྱི་སྟོང་གཟུགས་ཀྱང་ཡིན་པས་ཁྱབ་པས་མི་འགྱུར་བའི་བདེ་བ་ཡིན་ལ། སྟོང་གཟུགས་མ་ཡིན་པ་མི་སྲིད་པའི་ཕྱིར་རོ། །དཔེར་ན་རྒྱལ་བུ་དོན་གྲུབ་ཀྱི་སྟེང་ན། ལྷ་མོ་སྒྱུ་འཕྲུལ་གྱི་སྲས་པོའི་རྫས་ཐ་དད་དུ་མེད་ཀྱི། ཁོང་ཉིད་དེ་གཉིས་ཀ་ཡིན་ནོ། ཁྱེད་ཀྱི་རྩོད་པ་འདི་ནི། དཔེར་ན། རྒྱལ་བུ་དོན་གྲུབ་ནི་ངེས་པར་སངས་རྒྱས་སུ་འགྱུར་རོ་ཞེས་སྨྲས་པ་ན། དེ་ལ་ཁ་ཅིག་འདི་སྐད་ཅེས། རྒྱལ་བུ་དོན་གྲུབ་དུ་གྱུར་པ་ཙམ་གྱིས་སངས་རྒྱས་ཐོབ་པར་མི་འགྱུར་གྱི། ལྷ་མོ་སྒྱུ་འཕྲུལ་གྱི་སྲས་དང་དོན་གྲུབ་ཉིས་ཚོགས་ཡིན་ན་དེར་འགྱུར་ཟེར་བ་དང་འདྲ་སྟེ། ལར་འགྱུར་མེད་བདེ་བའི་མཚན་ཉིད་ཙམ་ཡང་ངོས་མ་ཟིན་པར་དུས་ཀྱི་འཁོར་ལོ་འཆད་པའི་ཁུར་འཁྱེར་བ་ནི། སུ་ཞིག་གིས་དབང་མེད་བཏང་བ་ལགས་སམ། ཡང་དེ་དག་གསང་སྔགས་པ་སྔ་མ་རྣམས་ཕལ་ཆེར་ལ་ཟུར་ཟ་བའི་ཁུངས་ཀྱིས་འདི་སྐད་ཅེས་དབང་བཞི་པ་བྱེད་ཟེར་ནས་
ཧྭ་ཤང་གི་སྒོམ་འབོགས་ཞེས་དང༌། དཔལ་ཇོ་ནང་པ་ལ་སྨོད་པར་བསམས་ཏེ། འདི་སྐད་དུ་སྟོང་གཟུགས་དང་བདེ་བ་རྟག་པར་འདོད་པ་མུ་སྟེགས་པའི་གྲུབ་མཐའ་ཡིན་ཟེར་བ་སོགས་ནི། ཁྱེད་རྣམས་རང་ཉིད་གོ་ཡུལ་གྱི་ལྟ་བ་དང༌། རྣལ་འབྱོར་སྒོམ་པའི་ཚུལ་ལ་གཟབ་དགོས་ཤིང༌། འཇིག་རྟེན་ཐམས་ཅད་ཀྱིས་སྨད་པའི་གནས་སུ་མ་ལྟུང་བར་བག་ཡོད་འཚལ་གྱི། དེ་འདྲ་མེད་པར་རང་ཉིད་དམན་པའི་གནས་སུ་ལྟུང་བཞིན་དུ་གཞན་གྱི་ཡོན་ཏན་ལ་སྐྱོན་དུ་བཏགས་པས་ཅི་ཞིག་བྱ། ཚུལ་འདི་རྣམས་ལ་དགག་སྒྲུབ་ཀྱི་དཔྱད་པ་མང་དུ་བྱར་ཡོད་མོད་ཀྱི། གཞན་དུ་འབྲི་བར་འགྱུར་བས་འདིར་རྒྱས་པར་མི་འཆད་དོ། །འོན་ཀྱང་འདི་སྐད་ཅེས་བྱ་སྟེ། ཁྱེད་རྣམས་ཀྱང་འདོད་ཅིང་རྒྱ་བོད་ཀྱི་དབུ་མའི་མིང་ཅན་རྩོད་ཆོས་པ་ཀུན་ལ་གྲགས་པའི་འཇིག་རྟེན་གྲགས་སྡེ་པ་དང༌། མདོ་སྡེ་སྤྱོད་པ་བ་དང༌། སློབ་དཔོན་སེང་བཟང་དང༌། ཀ་ཤཱི་སོགས་ཀྱི་འདོད་ཚུལ་ལས་ནི། རྒྱ་ནག་ཧྭ་ཤང་མཧཱ་ཡ་ནའི་འདོད་པ་མཆོག་ཏུ་གྱུར་པ་ཡིན་ལ། སྲིད་ཞི་ཐམས་ཅད་ཀྱི་དཔྱིད་ཀྱི་ཐིག་ལེ་ལེགས་པ་ཐམས་ཅད་ཀྱི་འབྱུང་གནས་དེ་བཞིན་གཤེགས་པའི་སྙིང་པོ་ལ་སྐུར་བ་འདེབས་པའི་སངས་རྒྱས་པའི་མིང་ཅན་སྐྱབས་གནས་དང་ལྟ་སྒོམ་སྤྱོད་པ་ཐམས་ཅད་ཁ་ཙམ་ཚིག་ཙམ་འབའ་ཞིག་ཏུ་ཟད་པ་རྣམས་ལས་ནི། རིག་བྱེད་ཀྱི་རྗེས་སུ་འབྲང་པ་མུ་སྟེགས་བྱེད་རྣམས་ཀྱང་མཆོག་ཡིན་པས། ཁྱེད་རྣམས་ཏ་ནང་པ་སངས་རྒྱས་པ་ཧྭ་ཤང་མ་ཧཱ་ཡ་ནའི་ལུགས་ལ་ཞུགས་ན་ལྟ་ཅི་སྨོས། མུ་སྟེགས་ཀྱི་ལམ་དུ་དོང་པར་གྱུར་ནའང་བསོད་ནམས་ཆེས་བསགས་པའོ། །འདིར་སྨྲས་པ་དབང་
བཞི་པའི་ལམ་ནི། ཅི་ཡང་ཡིད་ལ་མི་བྱེད་པ་ཡིན་ཏེ། འགྲེལ་ཆེན་ལས། དང་པོར་སྟོང་ཉིད་བྱང་ཆུབ་ནི་མུན་པ་ལ་ཅུང་ཟད་ཀྱང་བསམ་པར་མི་བྱའོ། །ཞེས་གསུངས་པའི་ཕྱིར་རོ། །སྟོང་གཟུགས་རྟག་པ་ཡིན་ཏེ། སྟོང་ཉིད་གོ་ཆོད་པོ་ཡིན་པའི་ཕྱིར་རོ། །ལུགས་འདིའི་བདེ་ཆེན་རྟག་པ་ཡིན་ཏེ། འཕོ་འགྱུར་མེད་པའི་ཕྱིར་རོ། །ཡང་ཇི་སྐད་དུ། བདེ་ཆེན་མི་རྟག་མ་ཡིན་ཏེ། །བདེ་བ་ཆེན་པོའི་རྟག་ཏུ་བརྟག །ཅེས་གསུངས་པས། ཨིནྡྲ་བོ་དྷི་ཡང་མུ་སྟེགས་ཡིན་ནམ་ཅི། དེ་མུ་སྟེགས་དང་མཚུངས་ན་འགྱུར་མེད་ཀྱི་ཐིག་ལེ་རྟག་པ་ཡིན་པར་འདོད་པ་དང༌། རྣམ་ཀུན་མཆོག་ལྡན་གྱི་སྟོང་གཟུགས་རྟག་པར་འདོད་པའི་མུ་སྟེགས་དེ་སུ་ཡིན། མུ་སྟེགས་ཀྱི་གཞུང་ལུགས་གང་ན་ཡོད་གསལ་པོར་སྨྲོས་ཤིག རང་གི་འཁོར་ནང་དུ་རྫུན་གྱི་གང་རྒྱངས་སྒྲོགས་པར་བྱེད་པ་ལ་སྙིང་པོ་ཅི་ཡོད། ལྔ་པ་དབང་བཞིའི་ཡན་ལག་འགའ་ཞིག་ལ་དོགས་པ་སྤོང་བ་ནི། དབང་གོང་མ་རྣམས་ཀྱི་ཆོ་གའི་དོན་གོང་དུ་བཤད་པ་དེ་རྣམས་ཚང་ན། ལྷག་མ་ཆོ་གའི་ཁ་འགེངས་ལ། བླ་མ་གོང་མ་རྣམས་ཀྱི་ཕྱག་ལེན་མི་འདྲ་བ་དུ་མ་ཡོད་པ་རྣམས་མན་ངག་ཡིན་པའི་ཕྱིར་གཅིག་གིས་གཅིག་ཤོས་དགག་ཏུ་མི་རུང་ལ། རྒྱུད་འགྲེལ་གྱི་དངོས་བསྟན་ལ་མེད་པ་རྣམས་མ་བྱས་ཀྱང་སྐྱོན་ཆུང་མོད་ཀྱང་རང་ལུགས་ཀྱི་བླ་མ་གོང་མ་རྣམས་རྡོ་རྗེ་བཞིའི་ཡེ་ཤེས་འབེབས་པ་འདི་དབང་རེ་རེའི་སྔོན་འགྲོར་ཡང་མཛད་དེ། བདག་འཇུག་སོགས་དཀྱུས་ཀྱི་ཆོ་ག་ལ་ནི་སྔོན་གྱི་རྣམས་མི་མཛད་པ་ཤས་ཆེ། ཕྱིས་ཀྱི་རྣམས་མཛད་པ་ཤས་ཆེ་བར་འདུག་ཀྱང༌། ཡན་ལག་དྲུག་གི་ཁྲིད་ཀྱི་དབང་ལ་ནི་
ངེས་པར་མཛད་དོ། །དབང་གོང་མ་ཀུན་ལ་ལྷའི་རྣལ་འབྱོར་གྱི་རིམ་པ་ནི་རིགས་ཁྱབ་བདག་ཉིད་ཀྱི་ཕྱིར་དང༌། བྱིས་དབང་ལ་ཡོད་པ་ལྟར་གྱི་ལྷ་སོ་སོའི་དག་པ་འདི་ལ་མེད་པའི་ཕྱིར། སློབ་དཔོན་དང་སློབ་མ་དཔལ་དུས་ཀྱི་འཁོར་ལོ་ཁོ་ནར་བསྐྱེད་པ་རང་ལུགས་ཡིན་ཞིང་རྒྱུད་དོན་ལ་ཡང་ཞུགས་སོ། །གཞན་དག་རྡོ་རྗེ་བཞིར་བསྐྱེད་པར་འདོད་མོད། སྦྱང་བྱ་སྦྱོང་བ་ལ་དུས་འཁོར་ཡབ་ཡུམ་ཉིད་དུ་བསྐྱེད་པ་སྟོབས་ཆེའོ། །དེ་ལ་ཁ་ཅིག་བུམ་དབང་ལ་འོད་དཔག་མེད་གསང་དབང་ལ་རིན་འབྱུང༌། ཤེར་དབང་ལ་དོན་གྲུབ། འཇིག་རྟེན་པའི་བཞི་པ་ལ་རྣམ་སྣང་དུ་བསྐྱེད་དེ་སྐུ་མདོག་ཕྱག་མཚན་དུས་འཁོར་རང་ལུགས་བཞིན་བྱེད་དེ། ཆེས་ཆེར་འགལ་བ་རང་ཡང་མེད་མོད་ལེགས་པ་ཡང་མ་ཡིན་ལ། ཁ་ཅིག་སྐུ་གསུང་ཐུགས་བྱིན་རླབས་ཀྱི་སྐབས་ཀྱི་རྡོ་རྗེ་གསུམ་ལ་ཡུམ་གོས་དཀར་མོ་སོགས་གཏོད་པར་བྱེད་དེ། དེ་ནི་ཤིན་ཏུ་འཁྲུལ། དེ་སྐབས་ཀྱི་སྐུ་གསུང་ཐུགས་གསུམ་ནི་རིམ་བཞིན་རྣམ་སྣང༌། སྣང་མཐའ་མི་བསྐྱོད་པ་གསུམ་ཡིན་པས། རྣམ་སྣང་གོས་དཀར་མོ་སྦྱོར་བ་དང༌། མི་བསྐྱོད་པ་ལ་སྤྱན་མས་འཁྱུད་པ་ནི་རྒྱུད་འདི་དང་ཡང་མི་མཐུན། གཞན་དང་ཡང་མི་མཐུན་པས་རང་བཟོ་མཁན་པོའི་ཕྱག་རྗེས་གསལ་པོར་བཞག་པ་དེ་ཡིན་ལ། སྤྱིར་ཀྱི་ལུགས་དེ་གཉིས་ཀས། འགྲེལ་ཆེན་ཉིད་ལས། ལག་བཅངས་ཞེས་པ་ནི་ཡོན་ཏན་བཞིའི་བདག་ཉིད་རྣམ་པར་ཐར་པས་སོ། །ཞེས་འཇིག་རྟེན་པའི་དབང་གསུམ་པའམ། ཤེས་རབ་ཡེ་ཤེས་ཆུང་བ་ལག་བཅངས་ཀྱི་བདེ་བ་ལ་ངོ་སྤྲོད་པ་ཁུངས་མེད་དུ་བཏང་བས་ཤིན་ཏུ་འཁྲུལ་ཞིང༌། གཉིས་སྤྲོད་ཀྱི་བདེ་བ་ཉིད་ལན་གཉིས་ལྡབས་ཏེ། གཅིག་གསུམ་པ་དང་གཅིག་ཤོས་བཞི་པར་བྱེད་པ་
བླུན་པོས་བལྟས་ཀྱང་མི་རིགས་པར་གོ་བ་དང༌། གཞན་རྣམས་ལ་གསོལ་བཏབ་དང༌། ང་རྒྱལ་འཛིན་པ་གཉིས་ཀ་ཡོད་པས། འཇིག་རྟེན་པའི་བཞི་པ་ལོགས་སུ་བྱས་ཕྱིན། འདི་ལ་དེ་གཉིས་མ་བྱས་ན་ནི་ཤིན་ཏུ་ཆ་མི་འགྲིག་ཅིང༌། བྱེད་ན་རང་བཟོ་ལས་མ་འདས་ཏེ། གསུམ་པའི་དེ་ཉིད་བསྐྱར་ནས་བྱེད་ན། དབང་གཉིས་བསྐུར་བ་ལ་དག་པ་འཕར་རྒྱུ་མ་བྱུང་བ་དང༌། འཇིག་རྟེན་འདས་པའི་བཞི་པའི་སྐབས་ཀྱི་དེ་བླངས་ན་ནི། དེ་བས་ཀྱང་ཆེས་མི་འགྲིག་སྟེ། འཇིག་རྟེན་པའི་དབང་ས་བཅུ་པ་མན་ཆད་དང་སྦྱོར་རྒྱུ་དེ་ས་བཅུ་གཉིས་པ་དང་སྦྱོར་རྒྱུའི་མཐར་ཐུག་གི་དབང་དུ་ཐལ་བར་འགྱུར་ལ། སྔགས་ལ་འདོན་པ་སྤོས་ཏེ་མི་འདྲ་བ་བྱས་ན་ནི། ལྷག་པར་ཡང་རང་བཟོ་སྟེ་གར་ཡང་མི་རུང་ངོ༌། །དེས་ན་འཇིག་རྟེན་པའི་ཤེས་རབ་ཡེ་ཤེས་རྐང་ཚུགས་གཅིག་ཁོ་ན་བསྐུར་བའི་དུས་ན། རིག་མ་དང་མཉམ་པར་སྦྱར་བའི་དགའ་བ་བཞི་ཅར་ཡོད་མོད་ཀྱང་དགའ་བ་དང་པོ་གཉིས་པོ་བུམ་གསང་གཉིས་དང་ཐུན་མོང་དུ་གྱུར་པའི་ཕྱིར། དབང་ལོགས་པའི་མིང་གིས་མ་བཏགས་ལ། ཕྱི་མ་གཉིས་པོ་ལ་དབང་རེ་རེའི་མིང་གིས་བཏགས་པ་སྟེ། སྤྱི་ལྡོག་ནས་དབང་བཞིར་ཕྱེ་བའི་དུས་ཀྱི་དབང་གཅིག་ཁོ་ན་ཡིན་ཡང༌། སྔར་བུམ་གསང་གཉིས་དང་བསྟུན་ན་ལག་བཅངས་ལ་བརྟེན་པའི་ཁྱད་དགའ་ཁོ་ནས་ཀྱང་དབང་གཅིག་གི་དོད་ཐུབ་ངེས་བྱུང་བས་དབང་བཞིའི་སྐབས་ཀྱི་དབང་ཚོ་ཐུབ་མ་ཡིན་ཡང་འོག་མའི་དོད་མཚུངས་ཀྱི་སྒོ་ནས་དབང་ཚོ་ཐུབ་ཡིན་པ་ལྟར་བྱས་ནས། འཇིག་རྟེན་པའི་ཤེས་རབ་ཡེ་ཤེས་ཆུང་བའམ། འཇིག་རྟེན་པའི་གསུམ་པར་བཞག་མོད། སྤྱི་ལྡོག་ནས་དབང་གསུམ་པ་དངོས་མ་ཡིན། སྔོན་འགྲོ་ཡིན་ལ། དེའི་དཀྱུས་ཐོག་
དེ་ཉིད་ལ་ཆོ་ག་གཞན་གྱིས་བར་མ་ཆོད་པར་གཉིས་སྤྲོད་ལས་ཐོབ་པའི་ལྷན་སྐྱེས་ནི། སྤྱི་ལྡོག་ནས་དབང་གསུམ་པའི་དངོས་གཞི་ཡིན་ཡང་འཇིག་རྟེན་པ་ཉིད་ལ་བལྟོས་པའི་བཞི་པར་བཞག དེ་ནི་བདེ་སྟོང་གི་སྐྱེ་ཚུལ་དབང་སྔ་མ་གསུམ་ཀའི་དོད་ཐུབ་པར་མ་ཟད་ལྷག་པའོ། །ཡང་དེ་དག་འདི་སྙམ་དུ་ལག་བཅངས་ཤེས་རབ་ཡེ་ཤེས་ཀྱི་དབང་གི་སྦྱངས་གཞི་ཡིན་གྱི། དེ་ལས་ཐོབ་པའི་ཁྱད་དགའ་དབང་དུ་འཇོག་པ་མིན་ཟེར་བ་ནི། སྨྲ་རྒྱུས་འཕོངས་པས་ཚིག་ཙམ་ལ་འཆོལ་པ་ཡིན་ཏེ། ཁྱེད་ཀྱིས་དབང་གི་རྗེས་ཆགས་བཞི་པོ་དེས་འདོད་ཆགས་བཞི་པོ་དེ་སྦྱོང་ཟེར་ན་ནུ་མ་ལ་རེག་པས་རྒོད་པ་སྦྱོང༌། གསང་བ་ལ་བལྟས་པས་གདོང་ལ་ལྟ་བ་སྦྱོང༌། ཆོ་ག་ཡོད་པའི་གཉིས་སྤྲོད་ཀྱིས་ལག་བཅངས་སྦྱོང༌། ཡང་ཆོ་ག་གང་ཡང་མེད་པར་གཉིས་སྤྲོད་སྟོང་ཉིད་ཀྱིས་གཏན་ལ་ཕབ་པས་གཉིས་སྤྲོད་སྦྱོང་ཞེས་པར་སོང་བས་སྨྱོན་པའི་ཚིག་ལྟར་འབྲེལ་མེད་འབའ་ཞིག་དང༌། རིག་མཐུན་པ་དང་མི་མཐུན་པའི་སྦྱོང་ཚུལ་གང་ཡང་མ་ཡིན་པ། བླུན་པོའི་ཚོགས་རྣམས་ཁོ་ན་མགོ་སྐོར་བའི་གཏམ་ མོ། །སྦྱང་བྱ་འདོད་ཆགས་བཞི་པོ་དེ་ཡང་ཅི། སྒྲུབ་པ་པོ་རང་ཉིད་ཀྱི་འདོད་པའི་འདོད་ཆགས་མངོན་གསལ་ཅན་ཁྲུགས་གཅིག་གིས་བསྡུས་པའི་ཆགས་པ་ཡིན་ནམ། འགྲོ་བ་གཞན་དུ་སྐྱེས་པའི་བག་ཆགས་ཡིན། དང་པོ་ལྟར་ན་སྐབས་དེའི་གཉིས་སྤྲོད་ཀྱི་དུས་ན་ལག་བཅངས་ཀྱི་ཆགས་པ་མེད་པས་ཇི་ལྟར་སྦྱོང༌། གཉིས་པ་ལྟར་ནའང་ལག་བཅངས་ཀྱི་བདེ་བ་སྟོང་ཉིད་དུ་གཏན་ལ་ཕབ་པའི་ཡེ་ཤེས་བསྐྱངས་པས། ལག་བཅངས་ཀྱི་བག་ཆགས་སྦྱོང་ཞིང༌། གཉིས་སྤྲོད་ལ་དེ་ལྟར་བསྐྱངས་པས་དེ་ཉིད་སྦྱོང་རིགས་པ་ལག་བཅངས་རང་ལ་གང་
ཡང་སྒོམ་མི་དགོས་ཤིང༌། གཉིས་སྤྲོད་ཀྱི་དེ་གཉིས་སྤྲོད་རང་ཉིད་ཀྱི་བག་ཆགས་མི་སྦྱོང་བར་ལག་བཅངས་ཀྱི་བག་ཆགས་སྦྱོང་བ་ལ་རྒྱུ་མཚན་ཅུང་ཟད་ཀྱང་མེད་པ་ཀུན་གྱིས་ཤེས་སོ། །སྤྱིར་བུམ་དབང་ལ་སོགས་པ་ཀུན་ལ་ཡང་སྟོང་ཉིད་ཀྱི་ལྟ་བས་ཟིན་པ་ཐམས་ཅད་དུ་དགོས་པ་ཙམ་ནི་ཡིན་ལ། དེ་ཁོ་ན་གནད་དུ་ཆེ་བ་ཡང་མ་ཡིན་མོད། ཡིན་དུ་ཆུག་ཀྱང་རང་དུས་ན་སྟོང་ཉིད་ཀྱིས་རྒྱས་ཐེབས་པ་གནད་ཆེ་བ་དེ་འཇིག་རྟེན་པའི་གསུམ་པར་བཞག་ནས། སྔར་འདས་ཟིན་སྟོང་ཉིད་དུ་སྒོམ་པ་ཤིན་ཏུ་གནད་ཆུང་བ་དེ་བཞི་པར་འདོད་པའང་ལྷག་པར་འཁྱམས་སོ། །དེ་བཞིན་དུ་དེ་དག་གཞན་ཕལ་ཆེར་སཱ་དྷུ་པུ་ཏྲའི་རྗེས་སུ་འབྲངས་ནས། སཱ་དྷུ་པུ་ཏྲའི་ལུགས་སློབ་མའི་དབང་ལ་འཇིག་རྟེན་འདས་པའི་བཞི་པ་བསྐུར་བ་ཡིན་ཡང༌། དེའི་རྗེས་སུ་མི་འབྲང་བ་ནི། གོས་ཧྲུལ་དྲུད་པའི་དཔེ་ལྟར་སྐྱོན་འགོ་ལ་ཡོན་ཏན་མི་འགོ་པའོ། །དེས་ན་དབང་གོང་མའི་སྐབས་འདི་དག་ཏུ་ལོག་པར་སྨྲ་བ་སྤངས་ཏེ་ཡང་དག་པའི་ཚུལ་ལ་འཇུག་པར་བྱའོ།། །།གཉིས་པ་དབང་གི་དག་སྦྱོར་བཤད་པ་ལ་སྤྱི་དང་ཁྱད་པར་གཉིས་ལས། དང་པོ་ནི། སྙིང་འགྲེལ་དུ་འབུམ་ལྔའི་ལུང་དྲངས་པ་དང་འགྲེལ་ཆེན་ཉིད་དུ། མེ་ཏོག་འཐོར་པ་བྱིས་པ་བཙས་མ་ཐག་པའི་རླུང་རྒྱུ་བ་དང་སྦྱར་བ་མཚོན་བྱེད་དུ་མཛད་དེ། བླ་མའི་མན་ངག་ལས། སྔོན་འགྲོ་རྣམས་ལའང་སྦྱང་བྱའི་དག་སྦྱོར་ཅི་རིགས་མཛད་པ་ནི་འདི་ཡིན་ཏེ། དེ་ལས་ས་ཆོག་གི་སྐབས་ས་གཞི་སྤྱི་ནི་ཀུན་གཞི་རྣམ་ཤེས། རིམ་པ་བདུན་ནི་རྣམ་ཤེས་ཚོགས་བདུན། སའི་ལྷ་མོ་ནི་གདོད་ནས་གྲུབ་པའི་ཟག་མེད་ཀྱི་ས་བོན། དེ་ཡང་རང་དུས་ཀྱི་འཁོར་ལོའི་ཐུགས་ཀ་ནས་སྤྲོ་བ་ནི། རྣལ་
འབྱོར་ཅན་གྱི་སྣང་ཚུལ་མན་ཆད་ལ་སོ་སོའི་ཟག་མེད་ཀྱི་ས་བོན་དང་ཆོས་དབྱིངས་ཀུན་ཁྱབ་དེ་ཉིད་ཐ་དད་པར་སྣང་ཡང་གནས་ཚུལ་ལ་ངོ་བོ་གཅིག་ཡིན་པ་མཚོན། ས་ལྷ་མཆོད་ཅིང་མཉེས་པར་བྱེད་པ་ནི་ཟག་མེད་ཀྱི་ས་བོན་སོས་ཐེབས་ནས་དགེ་ཆོས་གོང་ནས་གོང་དུ་འཕེལ་བའོ། །ས་བཟུང་བ་ནི་ཕ་རོལ་ཏུ་ཕྱིན་པ་བཅུའི་སྒྲུབ་པས་ཉོན་མོངས་པ་མངོན་གྱུར་པ་རྣམས་བཅོམ་པ་དང༌། གསོལ་བ་བཏབ་པས་ནི། བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་ དང༌། རྫས་ལྔས་ནི་སྟོང་ཉིད་སྙིང་རྗེ་སྒོམ་པ་སོགས། ཡེ་ཤེས་ལྔ་འགྲུབ་བྱེད་ཀྱི་རྒྱུ་ལ་ཞུགས་པ་མཚོན་ཏེ། དེ་ཡང་སློབ་མའི་རྒྱུད་ལ་དེ་ལྟ་བུའི་རྟེན་འབྲེལ་ཁྱད་པར་ཅན་སྒྲིག་པའི་ཕྱིར་རོ། །དེ་ཡན་ཆད་ལ་སྦྱང་བྱ་དང་སྦྱོར་བའི་རྣམ་གཞག་ལོགས་སུ་མི་མཛད་དོ། །སློབ་མ་སྟ་གོན་ནི་བར་དོ་དང་སྦྱོར་ཏེ། རིགས་དྲུག་གིས་བྱིན་གྱིས་བརླབས་པ་ནི། ཕྲ་མོ་རླུང་སེམས་ཀྱི་བདག་ཉིད་ཁམས་དྲུག་གི་རང་བཞིན་སྒོ་གསུམ་རྫོགས་པ། སོ་ཤིང་འདོར་བ་ནི་གང་དུ་སྐྱེ་བར་འགྱུར་བའི་རྣམ་པ་ངེས་པར་དམིགས་པ། རྡོ་རྗེ་སེམས་དཔའ་བསྐུལ་བ་ནི། བར་དོ་ལས་ཀྱི་རྫུ་འཕྲུལ་དང་མངོན་ཤེས་ཅན་ཡང་སྲིད་ལེན་བྱེད་སྲེད་པ་དང་ལེན་པས་བྱིན་གྱིས་བརླབས་པའོ། །དཀྱིལ་འཁོར་འབྲི་ཞིང་སྒྲུབ་པ་ནི་མའི་ལུས་ངག་ཡིད་གསུམ་རྣམ་པར་དག་པ་སྟེ། དེ་ཡང་ཐིག་ནི་འབྱུང་བ་ལྔ་དང༌། རྡུལ་ཚོན་ནི་ཕུང་པོ་ལྔ་སྟེ། ལུས་ཀྱི་རྒྱུ་ཚོགས་དང་རང་བཞིན་མཚོན་ལ། མའི་ལུགས་ནི་དཀྱིལ་འཁོར་ཏེ། ཨ་ཝ་དྷཱུ་ཏཱི་ཚངས་ཐིག་དང༌། སྙིང་གའི་རྩ་བརྒྱད་སོགས་འདབ་མའི་རྩ་རྣམས་ཐིག་གཞན་རྣམས་སོ་སོ་དང༌། ཁྲུ་བཞི་མཉམ་པ་ནི་གྲུ་བཞི་དང༌། ཤ་ཁྲག་ཆུ་དང་བཤང་བ་ཁུ་རྡུལ་སོགས་རྡུལ་
ཚོན་ཁ་དོག་དྲུག་མཚོན་པ་སོགས་རང་ལུས་དང་མའི་ལུས་ཀྱི་ཁྱད་པར་མ་གཏོགས། གཞལ་ཡས་ཁང་གི་དག་པའི་སྐབས་བཞིན་ཐམས་ཅད་སྦྱོར་དུ་རུང་ལ། སྙིང་གའི་རྣམ་ཤེས་ཀྱི་རྟེན་ན་ད་ནི་གཙོ་བོའི་མཚན་མ་དང༌། རླུང་བཅུ། ལུས་ཟུངས་བཅུ། ཐིག་ལེ་བཞི་ཕུང་ཁམས་སྐྱེ་མཆེད་ལས་དབང་བྱ་བ་དང་བཅས་པ་རྣམས་ཐུགས་དཀྱིལ་གྱི་ལྷའི་མཚན་མ་དང༌། སྟོང་པའི་ཆུ་ཚོད་བཞི་དང་བཅས་པའི་ཆུ་ཚོད་དྲུག་ཅུ་རྩ་བཞི་དང༌། ཐུན་ཚོད་བརྒྱད་ཀྱི་རླུང༌། རང་རང་གི་རྟེན་རྩ་དང་གྲོགས་ཐིག་ལེར་བཅས་པ་ནི་གསུང་དཀྱིལ་གྱི་མཚན་མ་དང༌། ཆུ་ཚོད་རེ་རེ་བཞིན་དབུགས་སུམ་བརྒྱ་དྲུག་བཅུ་འབྱུང་བ་གྲོགས་རྟེན་དང་བཅས་པ་ནི་ཚེས་ལྷ་རྣམས་དང༌། མིག་རྣ་སྣ་ལྕེ་ཐུར་སེལ་གྱི་སྒོ་གཉིས་དང་བཅས་པའི་རྩ་ཐིག་རླུང་རྣམས་སྐུའི་སྒོ་སྐྱོང་དང༌། རྐང་ལག་གི་སོར་མོ་རྣམས་ཀླུ་དང་རབ་གཏུམ་མས་རྣམ་པར་དག་པའོ། །མཆོད་པ་ནི་འདོད་ཡོན་ལ་ལོངས་སྤྱོད་པ་དང༌། ལས་དང་བྱ་བ་སྣ་ཚོགས་ལ་སྤྱོད་པའོ། །ཕ་ནི་རྡོ་རྗེ་སློབ་དཔོན་གྱི་དག་པ་དང༌། སྡོམ་པ་བཟུང་བ་ནི་སྟ་གོན་གྱིས་སྦྱངས་པའི་བར་སྲིད་དང་མཚུངས་པ་དེ་ཕའི་ལུས་ལ་ཡོངས་སུ་ཞུགས་ཤིང་ཀུནྡ་དང་འགྲོགས་པ་བར་སྲིད་མངལ་དུ་ཞུགས་པ་དེ་དཀྱིལ་འཁོར་དུ་འཇུག་པ། དཀར་དམར་སེམས་གསུམ་འདྲེས་པ་བདེ་བས་བྱིན་གྱིས་བརླབས་པ་ནི། ཡེ་ཤེས་དབབ་པ། མངལ་སྦུབས་ཀྱི་མུན་པ་ནི་མིག་དར་བཅིངས་པ། བཙས་པ་ནི་མིག་དར་དཀྲོལ་བ། དེ་དུས་གཡས་གཡོན་གྱི་དཀྱིལ་འཁོར་བཅུ་འབབ་པ་ནི་མེ་ཏོག་དོར་བ། དབུ་མའི་དབུགས་འབབ་པ་ནི་རིག་ངེས་པར་གྱུར་པས་སྦྱོང་བའོ།། །།
དེའི་རྗེས་སུ་དབང་བདུན་ལ། ཇི་སྐད་དུ། དགྱེས་རྡོར་རྩ་རྒྱུད་ཀྱི་ལུང་སྙིང་འགྲེལ་དུ་དྲངས་པ་ལས། བྱིས་པ་བཙས་ལ་མ་རྣམས་ཀྱིས། །ཆུ་ཡིས་འཁྲུ་བའི་དབང་བསྐུར་བྱེད། །དེ་ཡི་གཙུག་ཕུད་རབ་འཇོག་པ། །ཅོད་པན་དུ་ནི་ཡོངས་སུ་བཏགས། །དེ་ཡི་རྣ་བ་འབིགས་པ་སོགས། །དར་དཔྱངས་དབང་བསྐུར་ཞེས་བྱར་བཤད། །བྱིས་པ་སྨྲ་དང་རྒོད་པ་ནི། །རྡོ་རྗེ་དྲིལ་བུའི་དབང་བསྐུར་རོ། །ལྔ་པ་ལོངས་སྤྱོད་བརྟུལ་ཞུགས་ཡིན། །མིང་ནི་མིང་གིས་དབང་བསྐུར་བའོ། །ཀློག་པ་ལ་སོགས་རྗེས་གནང་བ། །ཕ་དག་གིས་ནི་རྟག་ཏུ་སྟེར། །དེ་ལྟར་རྣམ་པ་བདུན་གྱིས་ནི། །དབང་བསྐུར་བདུན་དུ་རབ་ཏུ་གྲགས། །ཞེས་གསུངས་པ། གཞན་རྣམས་གོ་སླ་ལ། ལྔ་པ་ལོངས་སྤྱོད་ཅེས་པ་དབང་པོ་ལྔ་ཡུལ་ལྔ་ལ་ལོངས་སྤྱོད་པའོ། །དེ་ལྟར་ན་བཙས་པ་ནས་བརྩམས་ཏེ། ལོ་བཅོ་ལྔའི་མཐར་ཐུག་པ་གཞོན་ནུའི་གནས་སྐབས་ནི་བྱིས་པ་འཇུག་པའི་དབང་བདུན་གྱིས་དག་པར་བྱེད་ལ། དེ་རྗེས་ལང་ཚོའི་གནས་སྐབས་སུ་གྱུར་ཏེ། གཉིས་སྦྱོར་གྱི་ཆགས་པ་མངོན་གྱུར་པ་དྲག་པོ་ནི་ཡོད་ལ། དངོས་སུ་གཉིས་སྦྱོར་གྱི་བྱ་བ་ལ་མ་ཞུགས་ཤིང༌། བག་མ་བླང་པ་སོགས་ཀྱི་བྱ་བ་ལ་གནས་པ་ནི་བུམ་དབང་གིས་སྦྱོང༌། གཉིས་སྦྱོར་ཀྱི་སྔོན་འགྲོའི་གནས་སྐབས་ནི་གསང་དབང་གིས་སྦྱོང༌། འཁྲིག་པའི་སྦྱོར་བ་དངོས་གཞི་དང་པོ་ཐོབ་པ་ནི་ཤེར་དབང་གིས་སྦྱོང༌། ཕྱིས་བུ་དང་བུ་མོ་སྤྲོ་བ་སོགས་དང་བྱ་བ་སྣ་ཚོགས་པ་དེ་དག་ནི་དབང་བཞི་པས་སྦྱོང་བ་ཡིན་ནོ། །མཐར་འཆི་བའི་སྲིད་པ་ལ་ཉེ་བར་འཇུག་པ་ནི། རྣམ་པར་མི་རྟོག་པའི་དེ་ཁོ་ཉིད་ཐོབ་པས་སྦྱོང་བར་བྱེད་དོ། །གཞན་ཡང་ཡོན་དབུལ་བ་དང༌། དཀྱིལ་
འཁོར་ཉེར་བསྡུ་ལ་སོགས་པའི་མཐར་ཐུག་པ་ནི་སླར་ཡང་འགྲོ་བ་དྲུག་ཏུ་ལས་དང་བྱ་བ་མཐའ་ཡས་པ་ལ་འཇུག་པ་དག་ཆོ་གའི་རིམ་པས་སྦྱོང་བར་བྱེད་པའོ།། །།གཉིས་པ་ཁྱད་པར་གྱི་དག་པ་ནི་སོ་སོའི་དག་པ་བཤད་པ་ཡིན་ཏེ། འདི་ལ་དབང་བདུན་གྱི་དག་པ་དང་གོང་མ་བཞིའི་དག་པའོ། །དང་པོ་ལ་གཞི་འབྲས་སྦྱར་བའི་དག་པ་དང༌། རྣལ་འབྱོར་བཞིའི་དག་པ་དང༌། དག་པའི་སྒོ་ནས་གོ་རིམ་བཤད་པའོ། །དང་པོ་ལ་སྤྱི་རགས་པ་བཤད་པ་ནི་ཆུ་དང་ཅོད་པན་གྱིས་ཆོས་ཉིད་ལུས་ཀྱི་ཐིག་ལེའི་སྟེང་དུ་མ་དག་གཟུགས་སྣང་གི་དྲི་མ་སྦྱངས་ནས་དག་པ་ཡེ་ཤེས་ཀྱི་སྐུ་མངོན་དུ་བྱེད། དར་དཔྱངས་དང་དྲིལ་བུའི་དབང་གི་ཆོས་ཉིད་གསུང་གི་ཐིག་ལེ་ལ་ཐ་མལ་ངག་གི་དྲི་མ་སྦྱངས་དག་པ་ཡེ་ཤེས་ཀྱི་གསུང་རྡོ་རྗེ་མངོན་དུ་བྱེད་པ་དང༌། བརྟུལ་ཞུགས་དང་མིང་གི་དབང་བསྐུར་བས་ཆོས་ཉིད་སེམས་ཀྱི་ཐིག་ལེ་ལ་ཡིད་ཀུན་རྟོག་འཁྲུལ་པའི་དྲི་མ་སྦྱངས་ནས། དག་པ་ཡེ་ཤེས་ཀྱི་ཐུགས་རྡོ་རྗེ་མངོན་དུ་བྱེད་པ་དང༌། རྗེས་གནང་འདོགས་བཅས་ཀྱི་དབང་བསྐུར་བས་ཆོས་ཉིད་ཡེ་ཤེས་ཀྱི་ཐིག་ལེ་ལ་འགྱུར་བདེའི་བག་ཆགས་ཀྱི་དྲི་མ་བཀྲུས་ནས་རྣམ་དག་ཡེ་ཤེས་རྡོ་རྗེའི་གོ་འཕང་མངོན་དུ་འགྱུར་བའི་རྟེན་འབྲེལ་སྒྲིག་པ་ཡིན་ནོ། །བྱེ་བྲག་ཞིབ་མོར་བཤད་པ་ནི། དབང་མདོར་བསྟན་ལས་གཞན་པ་ཁམས་སོགས་དག་པ་སྟེ་སོགས་དང་སྦྱར་ན། དེ་ཡང་བྱེད་པ་པོ་རྡོ་རྗེ་སློབ་དཔོན་གྱིས་ལས་སུ་བྱ་བ་སློབ་མའི་རྒྱུད་ལ། བྱེད་པ་རྫས་སྔགས་ཏིང་ངེ་འཛིན་གསུམ་གྱིས་བྱིན་གྱིས་བརླབས་པས། བྱ་བ་ཕུང་ཁམས་སྐྱེ་མཆེད་གནས་ཚུལ་གདོད་ནས་ལྷར་གྲུབ་པ་དེ། གནས་སྐབས་སུ་སློབ་མའི་བློ་དོར་ལྷར་སྣང་དུ་རྫོགས་པ་དང༌། མཐར་ཐུག་ཏུ་
རྫོགས་པའི་བྱང་ཆུབ་ལ་ཤིན་ཏུ་ཉེ་བར་རྒྱུད་སྨིན་པར་བྱས་པ་ནི་དབང་བདུན་གྱི་ངོ་བོ་ཡིན་པ། དཔེར་མཚོན་ཆུ་དབང་ལ་སྦྱར་ན། བྱེད་པ་པོ་དང་ལས་གོང་བཞིན་ལས། བྱེད་པ་དཀྱིལ་འཁོར་གྱི་བྱང་སྒོའི་ས་ལ་རྫས་དུང་གི་ཆུ་ཡུམ་ལྔའི་རང་བཞིན་དུ་བྱིན་གྱིས་བརླབས་པ། སྔགས་ཨོཾ་ཨཱ་ཨཱི་རཱྀ་ཨཱུ་ལཱྀ་སོགས། ཏིང་ངེ་འཛིན་གཙོ་བོའི་ཡུམ་ལྔའི་ངོ་བོར་གྱུར་པའི་བུམ་ཆུ་བསྣམས་ཏེ། དབང་བསྐུར་བས་སློབ་མའི་ཁམས་ལྔ་རྒྱལ་བ་ཡུམ་ལྔར་གྱུར་པར་མོས་པ། རྫས་སྔགས་ཏིང་ངེ་འཛིན་གསུམ་པོ་དེ་འཛོམ་པར་དབང་བསྐུར་བ་ལས། བྱ་བ་ནི་གནས་སྐབས་སུ་སློབ་མའི་རྒྱུད་ལ་ཁམས་ལྔའི་རང་བཞིན་ཡུམ་ལྔར་རྟོགས་པའི་ཤེས་པ་བརྟན་པོ་དང༌། མཐར་ཐུག་དོན་དམ་དབྱིངས་ཀྱི་ཡུམ་ལྔ་པོ་མྱུར་དུ་ཐོབ་པའི་རྟེན་འབྲེལ་འགྲིག་པས་སྨིན་ཚུལ་ཁྱད་པར་ཅན་དུ་གྱུར་པའི་སེམས་རྒྱུད་ནི་ཆུ་དབང་ཐོབ་པའི་ངོ་བོ་ཡིན་ནོ། །རིམ་པ་འདི་བཞིན་དུ་འོག་མ་རྣམས་ལའང་རིགས་འགྲེ་བ་ཤེས་པར་བྱ་སྟེ། ཅོད་པན་གྱི་དབང་གིས་ཐ་མལ་གྱི་ཕུང་པོ་ལྔ་སྦྱོང་ཞིང༌། རྒྱལ་བ་རིགས་ལྔའི་གོ་འཕང་མངོན་དུ་འགྱུར་བ་དང༌། དར་དཔྱངས་ཀྱི་དབང་བསྐུར་བས་ཐ་མལ་གྱི་རླུང་བཅུ་སྦྱོང་ཞིང༌། ནུས་མ་བཅུའི་གོ་འཕང་མངོན་དུ་བྱེད་པ་དང༌། རྡོ་རྗེ་དང་རྡོ་རྗེ་དྲིལ་བུའི་དབང་བསྐུར་བས་ནི། ཉི་ཟླའི་རྩ་རོ་རྐྱང་དག་པར་བྱེད་ཅིང་འབྲས་བུ་གཙོ་བོ་ཡབ་ཡུམ་ཀྱི་གོ་འཕང་མངོན་དུ་བྱེད་པ་དང༌། བརྟུལ་ཞུགས་ཀྱི་དབང་བསྐུར་བས་བློ་ཡི་དབང་པོ་དྲུག་ཡུལ་དྲུག་དང་བཅས་པ་མ་དག་པའི་ཆོས་སྦྱངས་ཏེ། དོན་དམ་དབྱིངས་ཀྱི་སེམས་དཔའ་ཡབ་ཡུམ་བཅུ་གཉིས་ཐོབ་པར་འགྱུར་བ་དང༌། མིང་གི་དབང་བསྐུར་བའི་
ལས་དབང་ལྔ་བྱ་བ་དང་བཅས་པ་རྣམ་པར་དག་པ་སྟེ། དོན་དམ་དབྱིངས་ཀྱི་ཁྲཽ་བོ་ཡབ་ཡུམ་བཅུའི་གོ་འཕང་མངོན་དུ་འགྱུར་བར་བྱེད། དེ་བཞིན་དུ་བྱེད་པོ་རྡོ་རྗེ་སློབ་དཔོན་གྱིས་ལས་སུ་བྱ་བ་སློབ་མ་ལ་བྱེད་པ་གནས་ནུབ་ཀྱི་སྒོའི་ས་ལ་རྫས་འཁོར་ལོ་རྡོར་སེམས་ཡབ་ཡུམ་དུ་བྱིན་གྱིས་བརླབས་པ། སྔགས་ཨོཾ་ཧཾ་ཀྵ་སོགས། ཏིང་ངེ་འཛིན་གཙོ་བོ་དུས་འཁོར་གྱིས་རྡོར་སེམས་ཀྱི་རང་བཞིན་ཕྱག་མཚན་འཁོར་ལོའི་དབང་བསྐུར་བས་བྱ་བ་གནས་སྐབས་སུ་སློབ་མའི་ཡེ་ཤེས་ཀྱི་ཕུང་ཁམས་བློ་ངོར་རྡོར་སེམས་ཡབ་ཡུམ་གྱི་སྐུར་རྫོགས་པས་མ་དག་པའི་ཡེ་ཤེས་ཀྱི་ཕུང་ཁམས་སྦྱོང་བ་དང༌། མཐར་ཐུག་རྡོར་སེམས་ཡབ་ཡུམ་གྱི་གོ་འཕང་མྱུར་དུ་ཐོབ་པའི་རྟེན་འབྲེལ་འགྲིག་པས་སྨིན་ཚུལ་ཁྱད་པར་ཅན་དུ་བྱས་པའི་སློབ་མའི་རྒྱུད་ནི་རྗེས་གནང་གི་དབང་ངོ༌། །སྤྱིར་ལས་དང་པོ་པའི་དབང་གི་སྐབས། དྲི་མ་སྦྱངས་ཞེས་པ་རྣམས་ཕྱིས་ལམ་བསྒོམས་ན་དྲི་མ་སྦྱོང་བའི་སྟོབས་ཆེན་པོ་ཁྱད་པར་ཅན་འབྱུང་བའི་ནུས་པ་སྐབས་འདིར་ཐོབ་པའི་དོན་དང༌། འབྲས་བུ་མངོན་དུ་འགྱུར་བའི་རྟེན་འབྲེལ་འགྲིག་ཅེས་པའང༌། ཕྱིས་ལམ་བསྒོམས་ན་ལམ་སྟོབས་དང་ལྡན་པས་འབྲས་བུ་མྱུར་དུ་ཐོབ་པར་འགྱུར་བའི་ནུས་པ་སྐབས་འདིར་ཐོབ་པའི་དོན་ཡིན་པ་ཐམས་ཅད་ལ་སྦྱོར་ཤེས་པར་བྱའོ།། གཉིས་པ་རྣལ་འབྱོར་བཞི་དག་པ་ལ། དབྱིབས་ཀྱི་རྣལ་འབྱོར་དང་སྦྱར་བ་ནི། རྒྱུད་ལས། ཆུ་ནི་སྒྲོལ་མ་ལ་སོགས་ལྷ་མོ་ཅོད་པན་ཞེས་པ་རྒྱལ་བ་དཔའ་བོའི་དར་དཔྱངས་ནུས་མ་རྣམས། །ཞེས་གསུངས་པས་བསྟན་ཏེ། འདིར་བསྐྱེད་རིམ་གྱི་ལྷ་སྐུ་དང༌། འབྲས་བུ་རྫོགས་པའི་
སངས་རྒྱས་ཀྱི་སྐུ་རྡོ་རྗེ་མཚན་དཔེའི་རྣམ་པ་ཅན་གཉིས་ཀ་སྟོན་ཏེ། བསྐྱེད་རིམ་སྒོམ་པ་ལ་དབང་བ་དང༌། སྐུ་རྡོ་རྗེ་སྤྲུལ་སྐུ་སོགས་ལམ་དུ་བྱེད་ནུས་པའོ། །དེ་ཡང་ཆུ་དབང་གི་ཡུམ་ལྔ་ནས་རྗེས་གནང་གི་རྡོ་རྗེ་སེམས་དཔའི་བར་དུ་སྦྱར་རོ། །བསྐྱེད་རིམ་དང་འབྲས་བུའི་དབྱིབས་ཀྱི་རྣལ་འབྱོར་ལ་སྦྱར་བས་རྫོགས་རིམ་གྱི་དབྱིབས་ཀྱི་རྣལ་འབྱོར་ལ་རྒྱུད་པའི་སྒོ་ནས་ཕན་འདོགས་པའང་ཤེས་པར་བྱའོ། །དེ་ཡང་འདི་ལྟ་སྟེ། ཆུ་ཅོད་ཀྱི་གཤེགས་པ་ཡབ་ཡུམ་བཅུ་ནི། ཐོག་མར་དགེ་བའི་རྟགས་བཅུ་དང༌། ནུས་མ་བཅུ་ནི་སྲོག་གཟུགས་གྲུབ་པའི་རྟགས་བཅུ་དང༌། གཙོ་བོ་ཡབ་ཡུམ་ནི་སྟོང་གཟུགས་ཀྱི་ལྷ་སྐུ་ཡབ་ཡུམ་འབར་སྣང་དང༌། སེམས་དཔའ་སེམས་མ་ཁྲོ་བོ་ཡབ་ཡུམ་ནི་ཁམས་གསུམ་གྱི་གཟུགས་བརྙན་དང༌། རྡོར་སེམས་ཡབ་ཡུམ་ནི་གཟུགས་དང་བདེ་བ་འདྲེས་པ་སྟེ། ཡན་ལག་དྲུག་གི་དབྱེ་བས་དབྱིབས་ཀྱི་རྣལ་འབྱོར་དྲུག་དང་སྦྱར་ཏེ། དེ་ལྟར་དབྱིབས་ཀྱི་འབྲས་བུ་ནི། སྐུ་རྡོ་རྗེ་ཡེ་ཤེས་ཀྱི་དཀྱིལ་འཁོར་རབ་འབྱམས་གཙོ་བོར་གྱུར་པའི་སྲིད་ཞིའི་སྣང་བརྙན་ཐམས་ཅད་པ་སྤྲུལ་པའི་སྐུ་མངོན་དུ་འགྱུར་བའི་རྟེན་འབྲེལ་སྒྲིག་པའོ། །སྔགས་ཀྱི་རྣལ་འབྱོར་གྱི་དག་པ་ནི། རླུང་རྣམས་བསྡུ་ན་རང་བཞིན་དང་ལས་དང་རྣམ་འགྱུར་གྱི་རླུང་གསུམ་དུ་འདུ་ལ། དང་པོ་རང་བཞིན་ནི་ཕུང་པོ་ལྔ་དང་འབྱུང་བ་ལྔའི་རླུང་ཡིན་ལ། དེ་མཚོན་བྱེད་རྩ་བའི་དབྱངས་ལྔ་རིང་ཐུང་གཉིས་སོ།། །།གཉིས་པ་ལས་བྱེད་པ་ནི། ཡུལ་དྲུག་འཛིན་པ་དབང་པོ་དྲུག་གི་རླུང་དང༌། ལུས་ངག་གི་ལས་ཀྱི་རྣམ་རྟོག་བསྐྱེད་པ་བྱ་བ་དྲུག་བྱེད་པ་པོ་ལས་དབང་དྲུག་དང་ལྷན་ཅིག་སྤྱོད་པའི་རླུང་རྣམས་ཏེ། དེ་མཚོན་བྱེད་ཡོན་ཏན་དང༌། འཕེལ་བ་
དང༌། ཡ་ཎར་གྱུར་པའི་ཡི་གེ་རྣམས་ཀྱིས་མཚོན་ནོ།། །།གསུམ་པ་རྣམ་འགྱུར་གྱི་རླུང་ནི། སྲོག་ལ་སོགས་པའི་རླུང་བཅུ་ཡུལ་དང་ཡུལ་ཅན་གྱི་སྣང་བ་བསྐྱེད་པ་རོ་རྐྱང་གི་རླུང་དང༌། ཐིག་ལེའི་འགྲོ་འོང་བྱེད་པ་བདེ་བའི་རླུང་སྟེ། དེ་རྣམས་ནི་ནུས་མ་བཅུ་དང༌། གཙོ་བོ་ཡབ་ཡུམ་དང་ལུས་མེད་རྡོ་རྗེའི་ས་བོན་རྣམས་དབྱངས་གསལ་འདྲེས་མ་ཡིན་པས་མཚོན་ཏེ། དེ་ལྟར་ན་འདིར་དངོས་སུ་དབྱངས་དང་གསལ་བྱེད་ཀྱི་རྒྱུ་ལས་བྱུང་བའི་སྔགས་ཀྱི་ཡིག་འབྲུ་སྒོམ་པ་དང༌། སྒྲ་དང་འོད་ཟེར་དང་བཟླས་པའི་རྣལ་འབྱོར་རྣམས་ལ་དབང་ཞིང་བརྒྱུད་ནས་སྨིན་པར་བྱེད་ཚུལ་ལ་སྐུ་ལ་ཐུགས་ཀྱི་བྱེད་པ་འཇུག་སྟེ། ཐུགས་ཀྱིས་དབང་བསྐུར་བས་སྐུ་རྡོ་རྗེའི་ལམ་སྨིན་ནུས། བརྟུལ་ཞུགས་ཀྱི་དབང་གིས་སོར་སྡུད་དབང་ཡུལ་གྱི་འབྲེལ་པ་བཅད་པས། དབང་ཡུལ་གྱི་རླུང་རགས་པ་ནང་དུ་ཟློག་པ་དང༌། མིང་དབང་བསྐུར་བས་བསམ་གཏན་ལུས་ངག་ཡིད་ཀྱི་རྣམ་རྟོག་གི་རླུང་འགག་པ་དང༌། གསུང་ལ་སྐུའི་བྱེད་པ་འཇུག་པས་སྐུའི་དབང་གིས་གསུང་རྡོ་རྗེའི་ལམ་སྨིན་པ་ནི། ཆུ་དང་ཅོད་པན་བསྐུར་བས་སྲོག་རྩོལ་གྱི་དཀྱིལ་འཁོར་བཅུ་དབུ་མར་འགག་ཅིང༌། ཐུགས་ལ་ཡེ་ཤེས་ཀྱི་བྱེད་པ་འཇུག་པས་ཡེ་ཤེས་ཀྱི་དབང་གིས་ཐུགས་རྡོ་རྗེའི་ལམ་སྨིན་པ་ནི། རྗེས་གནང་བསྐུར་བས་རྗེས་དྲན་བདེ་བའི་རླུང་དབུ་མར་དག་ཅིང༌། འདོད་ཆགས་ཆེན་པོའི་རང་བཞིན་ཐོབ་པར་ནུས་པ་དང༌། ཡེ་ཤེས་ལ་གསུང་གི་བྱེད་པ་འཇུག་པས། གསུང་གི་དབང་གིས་ཡེ་ཤེས་རྡོ་རྗེའི་ལམ་སྨིན་པ་ནི། དར་དཔྱངས་བསྐུར་བར་ཏིང་ངེ་འཛིན་དུ་རླུང་བཅུ་གཏན་ནས་འགག་ཅིང༌། རྡོར་དྲིལ་གྱི་དབང་བསྐུར་བས་ཐབས་ཤེས་རོ་གཅིག་ཏུ་འདྲེ་བར་འགྱུར་བའི་རྒྱུད་སྨིན་པར་བྱེད་ལ།
དེ་ལྟར་སྔགས་ཀྱི་སྨིན་ཚུལ་དེ་ཐམས་ཅད་ཀྱི་འབྲས་བུ་ལོངས་སྤྱོད་རྫོགས་སྐུ་གཞོམ་མེད་ཀྱི་ན་དའི་རང་བཞིན་གྱི་གསུང་རྣམ་པ་ཐམས་ཅད་པ་ཆོས་ཀྱི་ཕུང་པོའི་རང་བཞིན་མངོན་དུ་གྱུར་པའི་རྟེན་འབྲེལ་སྒྲིག་གོ །ཆོས་ཀྱི་དག་པ་ནི། ཆུ་དབང་ཡུམ་ལྔ་དང་འབྱུང་བ་ལྔའི་དག་པ་ཡིན་པས། ཤེས་རབ་ཇི་སྙེད་མཁྱེན་པ་རྣམ་པ་ཀུན་ལྡན་གྱི་ཕྱོགས་འཛིན་པའི་ཡེ་ཤེས་ལྔ་དང༌། ཅོད་པན་རིགས་ལྔ་དང༌། ཕུང་ལྔའི་དག་པས་ཐབས་ཇི་ལྟ་བ་མཁྱེན་པའི་མི་འགྱུར་བདེ་ཆེན་གྱི་ཕྱོགས་བཟུང་བའི་ཡེ་ཤེས་ལྔ་དང༌། དར་དཔྱངས་ནུས་མ་བཅུའི་དག་པའི་ཕ་རོལ་ཏུ་ཕྱིན་པ་བཅུའི་ཡེ་ཤེས་དང༌། རྡོ་རྗེ་གཙོ་བོའི་དག་པས་མི་འགྱུར་བའི་བདེ་བ་དང༌། དྲིལ་བུ་ཡུམ་གྱི་དག་པས་གཞོམ་མེད་ཀྱི་ན་དའི་སྒྲ་དབྱངས་གཅིག་ཏུ་འདུས་པ་དང༌། བརྟུལ་ཞུགས་སེམས་དཔའ་ཡབ་ཡུམ་གྱི་དག་པ་ནི། ཡེ་ཤེས་དབང་ཡུལ་བཅུ་གཉིས་ཀྱི་སྟོབས་ལས་ཀུན་རྫོབ་དབང་ཡུལ་གྱི་ཆོས་ཐམས་ཅད་ཡང་དག་པར་རིག་པའི་མངོན་ཤེས་དྲུག་དང༌། མིང་དབང་ཁྲོ་བོ་ཡབ་ཡུམ་གྱི་དག་པས་བྱམས་སོགས་ཚད་མེད་ལྔའི་སྒོ་ནས། གང་ལ་གང་འདུལ་གྱི་འཕྲིན་ལས་ལ་འཇུག་པ་དང༌། རྗེས་གནང་རྡོར་སེམས་ཀྱི་དག་པས་སངས་རྒྱས་ཀྱི་གོ་འཕང་སྟེ། ཐུགས་རྡོ་རྗེ་ཆོས་ཀྱི་སྐུ་ཇི་ལྟ་བ་དང༌། ཇི་སྙེད་པའི་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པར་བྱེད་པའི་རྟེན་འབྲེལ་སྒྲིག་པ་ཡིན་ནོ། །དེ་ལས་བརྟུལ་ཞུགས་ཀྱི་སྒྲ་དོན་ནི། དབང་ཡུལ་གྱི་སྣང་བ་ཐམས་ཅད་འཕོ་མེད་བདེ་བའི་ངོར་རོ་མཉམ་པར་བྱེད་པ་ལས་མི་འདའ་བ་དང་སྦྱང་བྱའི་སྒོ་ནས་ཀྱང་དབང་པོ་རྣམས་རང་རང་གི་ཡུལ་ལས་མི་འདའ་བ་བརྟུལ་ཞུགས་ངེས་པར་བླངས་པ་ལྟ་བུར་ཡོད་པས། དབང་ཡུལ་དག་བྱེད་ཀྱི་དབང་བསྐུར་ལ་
བརྟུལ་ཞུགས་ཀྱི་དབང་གི་མིང་བཏགས་པ་ཡིན་ཞེས་འོད་ཟེར་འཕྲེང་བ་ལས་གྲུབ་ཆེན་ཡུ་མོ་ཡབ་སྲས་ཀྱིས་བཤད་དེ་ལེགས་པར་དགོངས་པའོ། །ཆོས་ཀྱི་དག་པ་འདི་ནི་གཙོ་བོར་འབྲས་དུས་ཀྱི་དབང་དུ་བྱས་ལ། དེས་མཚོན་ཏེ་རྫོགས་རིམ་ཡན་ལག་དྲུག་ཀར་ལ་ཡང་ཆོས་ཀྱི་རྣལ་འབྱོར་གྱི་ཆ་ཤས་ཡོད་པ་དང༌། བསྐྱེད་རིམ་གྱི་ལྷ་སྐུ་སྟོང་པར་ཤར་པ་ལ་ཡང་ཆོས་ཀྱི་རྣལ་འབྱོར་གྱི་ཆ་ཤས་ཡོད་པའི་ཕྱིར། དེ་ཐམས་ཅད་ལ་སྦྱོར་ཚུལ་ཤེས་དགོས་ཏེ། ཡི་གེ་མངས་བར་འགྱུར་བས་འདིར་མ་སྨོས་སོ། །དག་པའི་རྣལ་འབྱོར་དང་སྦྱར་བ་ནི། དོན་དམ་ཆོས་ཉིད་ཀྱི་འབྱུང་བ་ལྔ་མི་འགྱུར་བ་དང༌། རྣམ་ཀུན་ཟུང་འཇུག་ཏུ་གདོད་མ་ནས་གནས་པ་དེ། ཀུན་རྫོབ་བརྡར་བཏགས་པ་རྣམ་པ་ལམ་བྱེད་མོས་པ་རིགས་མཐུན་པས་དྲི་མ་སྦྱངས་ནས་དག་པ་མངོན་གྱུར་དུ་རུང་བར་བྱེད་པ་སྟེ། དེས་གཞན་རྣམས་ལའང་རིགས་བསྒྲེ་བས་ཡེ་ཤེས་ཀྱི་ཕུང་ཁམས་ཀྱི་རང་བཞིན་རྡོར་སེམས་ཡབ་ཡུམ་གྱི་ངོ་བོ་བདེ་བ་དང་རྣམ་ཀུན་ཟུང་འཇུག་གི་རང་བཞིན་དུ་གདོད་ནས་གནས་པ་དེ་རྗེས་གནང་གི་དབང་གིས་གློ་བུར་གྱི་དྲི་མ་བཀྲུས་ནས། དོན་དམ་ཡེ་ཤེས་ཀྱི་ཕུང་ཁམས་མངོན་དུ་འགྱུར་རུང་དུ་བྱེད་ཅིང༌། ཡེ་ཤེས་རྡོ་རྗེ་ངོ་བོ་ཉིད་སྐུ་དོན་དམ་པ་བདེ་བ་རྣམ་པ་ཐམས་ཅད་པ་ཐོབ་པར་འགྱུར་བའི་རྟེན་འགྲེལ་སྒྲིག་པའོ། །སྐབས་འདིར་དབྱིབས་ནི་སློབ་མ་ལྷར་བསྐྱེད་ཀྱི་དག་པ་གཙོ་ཆེ། སྔགས་ནི་དབང་རྫས་དང་སྔགས་ཉིད་ཀྱི་དག་པ་གཙོ་ཆེ། ཆོས་ནི་གཉིས་ཀ་ལ་མཉམ་པར་འཇུག དག་པའི་རྣལ་འབྱོར་གྱི་རྣམ་དག་ཀྱང་དེ་དང་འདྲ་བ་ལས་དབང་བསྐུར་ཟིན་གྱི་འབྲས་བུ་གཙོ་ཆེ་བར་བཞག་པའང་ཡིན་ནོ།། །།གསུམ་པ་དག་པའི་སྒོ་ནས་གོ་རིམ་བཤད་པ་ནི། དང་པོར་
མངལ་དུ་ལུས་ཆགས་པ་ན། ཁམས་ལྔ་རྒྱུའི་ཚུལ་དུ་ཡོད་པས་ཆུ་དབང་དང་པོར་བསྐུར་ལ། ཕུང་པོ་ལྔ་འབྲས་བུའི་ཚུལ་དུ་རྗེས་ལ་རིམ་གྱིས་ཆགས་པས། དེ་རྗེས་ཅོད་པན་གྱིས་དབང་བསྐུར། དེ་ནས་ཕྱིར་བཙས་པ་ན། ང་དྲུག་རྐང་བཅས་སྔོན་དུ་འགྲོ་བའི་གཡས་གཡོན་གྱི་རླུང་རྒྱུ་བས་དེ་དང་འདྲ་བའི་དར་དཔྱངས་དང་རྡོར་དྲིལ་གྱི་དབང་དེ་རྗེས་བསྐུར། རླུང་རྒྱུས་པས་ཡུལ་ལ་མཚན་མར་འཛིན་པ་འབྱུང་སྟེ། དེ་དང་མཚུངས་པར་རྗེས་སུ་བརྟུལ་ཞུགས་ཀྱི་དབང་བསྐུར། དེ་ནས་ངུ་བ་དང༌། སྨྲ་བ་དང༌། ཡན་ལག་བསྐྱོད་པ་དང༌། བཤང་གཅི་འདོར་བ་འབྱུང་སྟེ། དེ་དང་མཚུངས་པར་ལས་དབང་དག་བྱེད་མིང་དབང་དེའི་རྗེས་ལ་བསྐུར། དེ་ནས་རིམ་པས་ཕ་དང་མས་བསླབས་པའི་བྱ་བ་རྣམས་ཤེས་པ་འབྱུང་སྟེ། དེ་དང་མཚུངས་པར་རྗེས་གནང་ཐ་མར་བསྐུར་བའོ། །ཞེས་གྲུབ་ཆེན་ཡུ་མོ་ཡབ་སྲས་གསུངས་སོ།། །།གཉིས་པ་མཆོག་དབང་གོང་མའི་དག་པ་བཤད་པ་ལ། བཞི་གསུམ་དབྱེ་བའི་དོན་ངོས་བཟུང༌། དྲི་མ་སྦྱོང་ཚུལ་སྤྱི་ལྡོག་ནས་བཤད། དག་པའི་གཙོ་བོ་བྱང་ཆུབ་བཞི་དང་སྦྱར། འཕྲོས་དོན་ཐོར་བུ་སྣ་ཚོགས་པའི་དོགས་པ་དཔྱད་པའོ། །དང་པོ་ནི། ཐམས་ཅད་སྤྱི་ལྡོག་ནས་བདེ་སྟོང་གི་ཡེ་ཤེས་གཅིག་པུའི་དག་པ་ཡིན་ལ། དེ་ལ་དཔེའི་ཡེ་ཤེས་དང་དོན་གྱི་ཡེ་ཤེས་སྨིན་པར་བྱེད་ཚུལ་གཉིས་ཀྱིས་དབྱེ་ན། དང་པོ་གསུམ་དཔེ་དང༌། བཞི་པ་དོན་ནོ། །སྐབས་འདིར་འདི་ལྟར་གོ་དགོས་ཏེ། དེ་ཡང་བུམ་གསང་གཉིས་ལ་འཁྲུལ་གཞི་མེད། ཕྱི་མ་གཉིས་ལ་འདྲ་མིན་གྱི་མིང་འདོགས་ཚུལ་གསུངས་ཏེ། དེ་ལ་འཇིག་རྟེན་འཇིག་རྟེན་འདས་པའི་དབྱེ་བས་མ་ཕྱེ། དབང་བཞིས་
ཕྱེ་བའི་ཟླས་དྲངས་པ་མ་ཡིན་ན། སྤྱི་ལྡོག་ནས་ཤེས་རབ་ཡེ་ཤེས་ཀྱི་དབང་གི་གཙོ་བོ་དབང་བཞི་པ་དངོས་དང༌། ཤེས་རབ་ཡེ་ཤེས་ཕལ་པ་དབང་གསུམ་པ་ལ་ངོས་འཛིན་པ་ཡིན། དབང་བཞིས་ཟླས་ཕྱེ་བའི་སྐབས། ཤེས་རབ་ཡེ་ཤེས་གསུམ་པ་དང༌། དབང་བཞི་པ་ནི། དོན་དམ་པས་དབང་ཁོ་ན་ལ་ངོས་འཛིན། དབང་བཞིའི་ནང་གི་གསུམ་པ་ལ་དབྱེ་ན། འཇིག་རྟེན་པའི་ཤེས་རབ་ཡེ་ཤེས་གཞིར་བཞག་པའི་གསུམ་པ་ཤེས་རབ་ཡེ་ཤེས་ལག་བཅངས་ལས་ཐོབ་པ་དང༌། བཞི་པ་ཤེས་རབ་ཡེ་ཤེས་གཉིས་སྤྲོད་ལས་ཐོབ་པ་གཉིས་ཡོད་ནའང༌། ནང་ཚན་བྱེ་བྲག་པའི། གསུམ་པ་ཤེས་རབ་ཡེ་ཤེས་དེ་ནི་འཇིག་རྟེན་པའི་ཤེས་རབ་ཡེ་ཤེས་ཀྱང་དངོས་མ་ཡིན་ཏེ། སྔོན་འགྲོ་ཙམ་བཏགས་པ་བ་ཡིན་ནོ། །འཇིག་རྟེན་པའི་དབང་བཞི་པ་དེ་ནི་བཞི་པ་བཏགས་པ་བ་ཙམ་ལས་དངོས་མ་ཡིན་ཡང༌། འཇིག་རྟེན་པའི་ཤེས་རབ་ཡེ་ཤེས་ནི་དངོས་དང་གསུམ་པ་ཡང་དངོས་ཡིན་ནོ། །འཇིག་རྟེན་པ་ཉིད་ལས་ཕྱེ་བའི་དབང་བཞི་ཞེས་བྱ་བ་ནི། དབང་བཞིའི་མིང་ཅན་ཙམ་སྟེ་དབང་བཞི་མ་ཡིན་པས་དབང་གསུམ་ཉིད་ལ་བཞིར་བཏགས་པའོ། །འདས་པའི་དབང་བཞི་པ་ནི། བཞི་པའི་ཟླས་དྲངས་པའི་ཤེས་དབང་ནམ་ཡང་མ་ཡིན་མོད། སྤྱིར་བཞི་པ་མཚན་ཉིད་པ་དང་ཤེས་རབ་ཡེ་ཤེས་ཀྱང་མཚན་ཉིད་པའོ། །སྤྱི་ལྡོག་ནས་ཤེས་རབ་ཡེ་ཤེས་ཆུང་བ་འཇིག་རྟེན་པ་དང་གསུམ་པ་ཡིན་ལ། ཆེན་པོ་འཇིག་རྟེན་ལས་འདས་པ་དང་བཞི་པ་ཡིན་ཡང༌། འཇིག་རྟེན་པ་ཉིད་ལ་བལྟོས་ན་ལག་བཅངས་གསུམ་པ་ཤེས་རབ་ཡེ་ཤེས་ཆུང་ངུ་དང༌། གཉིས་སྤྲོད་བཞི་པ་དེ་ལ་བལྟོས་པའི་ཆེན་པོའོ། །དེས་ན་འཇིག་
རྟེན་པའི་བཞི་པ་ཞེས་བཞི་པའི་མིང་གིས་བཏགས་ཀྱང༌། དངོས་སུ་ནི་བཞི་པའི་དཔེ་ཙམ་ཡིན་གྱི་བཞི་པ་དངོས་ཉིད་ནམ་ཡང་མ་ཡིན་ནོ། །དེ་ལྟར་ན་བུམ་གསང་ཤེར་དབང་གསུམ་ནི་འཇིག་རྟེན་པའི་དབང་སྟེ། དེའི་རྒྱུ་མཚན་ལས་རྒྱའི་འབྲས་བུ་འདོད་ཁམས། ཡེ་རྒྱའི་འབྲས་བུ་གཟུགས་ཁམས། དེ་གཉིས་ཀྱང་འདོད་ཆགས་ཕལ་པ་ནི་མ་ཡིན་པས་འཇིག་རྟེན་པའི་ཆགས་ཆེན་ཞེས་བྱ་ལ། འཇིག་རྟེན་པའི་ཆགས་བྲལ་ལམ་གྱི་འབྲས་བུ་གཟུགས་མེད། འཇིག་རྟེན་འདས་པའི་ཆགས་ཆེན་གྱི་འབྲས་བུ་མཆོག་གི་དངོས་གྲུབ་ཏུ་བཤད་ལ། དབང་གསུམ་པོ་དེ་རྣམས་ལས་ཡེ་གང་རུང་ལ་རྟེན་དགོས་པ་ཡིན་པའི་འབྲས་བུ་སྲིད་པ་ལས་མི་འདའ་བས་སོ། །དབང་བཞི་པ་དངོས་ནི། འཇིག་རྟེན་འདས་པ་སྟེ་ཕྱག་ཆེན་ལ་བརྟེན་ནས་བསྐུར་བས། དེའི་ལམ་ཐམས་ཅད་ཀྱང་ཟག་མེད་ཁོ་ན་ཡིན་ཏེ། རང་འབྲས་ཀྱི་མཆོག་གི་དངོས་གྲུབ་ཉིད་ཡིན་པའི་ཕྱིར་རོ།། །།གཉིས་པ་ནི་དྲི་མ་སྦྱོང་ཚུལ་ལ། ལམ་བསྒོམས་པས་དྲི་མ་དངོས་སུ་སྦྱོང་ཚུལ་དང༌། དབང་བསྐུར་བས་ནུས་མཐུ་བཞག་པའི་ཚུལ་གྱིས་དྲི་མ་སྦྱོང་ཚུལ་ལོ། །འདིར་ཕྱི་མའི་དབང་དུ་བྱས་ན་བྱིས་འཇུག་གི་སྐབས་སུ་རྡོ་རྗེ་བཞིའི་དྲི་མ་རགས་པ་དང༌། སློབ་མའི་དབང་གོང་མ་བཞིའི་སྐབས་སུ་འབྲིང་པོ་དང༌། རྡོ་རྗེ་སློབ་དཔོན་བདག་པོའི་སྐབས་སུ་ཕྲ་མོ་དང༌། བདག་པོ་ཆེན་པོའི་སྐབས་སུ་ཤིན་ཏུ་ཕྲ་མོ་སྦྱོང་ངོ་ཞེས་ཐ་སྙད་སྦྱོར་ལ། དེ་ལས་སྐབས་འདིར་སློབ་མའི་དབང་བཞི་པོ་ལ་བུམ་དབང་གིས་ལུས་ཀྱི་ཐིག་ལེ་དང་སད་པའི་གནས་སྐབས་སྦྱོང༌། གསང་དབང་གིས་ངག་གི་ཐིག་ལེ་དང༌། རྨི་ལམ་གྱི་གནས་སྐབས་སྦྱོང༌། །གསུམ་
པ། འཇིག་རྟེན་པའི་ཤེས་རབ་ཡེ་ཤེས་ཀྱི་ཡིད་ཀྱི་ཐིག་ལེ་དང་གཉིད་འཐུག་པོའི་གནས་སྐབས་སྦྱོང༌། འཇིག་རྟེན་ལས་འདས་པའི་བཞི་པས་ཐམས་ཅད་ཀྱང་སྦྱོང་མོད་ཀྱི། གཙོ་བོར་ཡེ་ཤེས་ཀྱི་ཐིག་ལེ་དག་པར་བྱེད་ཅིང་བཞི་པའི་གནས་སྐབས་སྦྱོང་ངོ༌། །དེ་ཡང་ལུས་ངག་ཡིད་དང་ཡེ་ཤེས་ཀྱི་དྲི་མ་སྦྱོང་བ་ཉིད་ཡིན་པས། བུམ་དབང་གཉེན་པོ་བདེ་བ་ཆུང་ངུས་སྤང་བྱ་རགས་པ་ལུས་ཀྱི་དྲི་མ་སྦྱོང༌། གསང་དབང་བདེ་བ་འབྲིང་པོས་སྤང་བྱ་རྣམ་རྟོག་འབྲིང་པོ་ངག་གི་དྲི་མ་སྦྱོང༌། ཤེར་དབང་བདེ་བ་ཆེན་པོས་སྤང་བྱ་རྣམ་རྟོག་ཆུང་ངུ་ཡིད་ཀྱི་དྲི་མ་སྦྱོང༌། དབང་བཞི་པ་བདེ་བ་བླ་ན་མེད་པས་སྤང་བྱ་རྣམ་རྟོག་ཕྲ་ཞིང་ཕྲ་བ་ཡེ་ཤེས་ཀྱི་དྲི་མའམ་ཆགས་རྟོག་གི་བག་ཆགས་སྦྱོང་ལ། དབང་དང་པོ་གསུམ་པོ་ནི། འབྱུང་བའི་ཁམས་ཀྱི་དག་པ་ཅན་ཉིད་ཀྱི་ཕྱིར། བརྟགས་གཉིས་ལས། གང་ཕྱིར་འབྱུང་བ་ཆེ་བདེ་བ། །དེ་ཕྱིར་བདེ་བ་དེ་ཉིད་མིན། །ཞེས་པ་ལྟར། ཡང་དག་པའི་ཡེ་ཤེས་སུ་མི་འགྱུར་ཞིང༌། དེའི་ཕྱིར་སྦྱངས་བྱ་ཕྱོགས་རེ་སྦྱོང་བ་དང༌། དབང་བཞི་པ་ནི་ཆོས་ཉིད་རྣམ་པ་ཐམས་ཅད་པ་ཁོ་ན་ལས་རྡུལ་ཕྲ་རབ་ཀྱི་ཆོས་ལས་འདས་པའི་ཕྱིར། འབྱུང་བའི་རང་བཞིན་མ་ཡིན་ལ། སྒྲ་རེག་སོགས་ཡོན་ཏན་ཐམས་ཅད་དང་བྲལ་བ་སེམས་ཀྱི་རང་བཞིན་བདེ་ཆེན་ཡིན་པའི་ཕྱིར་དོན་དམ་པའི་ཡེ་ཤེས་ཏེ་སྦྱང་བྱ་མཐའ་དག་སྦྱོང་བའོ།། །།གསུམ་པ་ལ་བུམ་དབང་གི་དག་པ། གསང་དབང་གི་དག་པ། ཤེར་དབང་གི་དག་པ། བླ་ན་མེད་པའི་དབང་གི་དག་པའོ། །དང་པོ་ནི། ཡང་བྱང་ཆུབ་རྣམ་པ་བཞི་ལས། བུམ་དབང་སྒྱུ་འཕྲུལ་དྲྭ་བས་མངོན་པར་བྱང་ཆུབ་པ་དང༌། གསང་དབང་
རྣམ་པ་ཉི་ཤུས་མངོན་པར་རྫོགས་པར་བྱང་ཆུབ་པ་དང༌། ཤེར་དབང་རྣམ་པ་ལྔས་མངོན་པར་རྫོགས་པར་བྱང་ཆུབ་པ་དང༌། བཞི་པ་སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པའོ། །དེ་ཡང་བུམ་དབང་གི་དུས་ན་བདེ་བ་ཤེས་ཆུང་བས་རྣམ་རྟོག་འདུས་ཚབ་ཆུང་སྟེ། ཕྱི་རོལ་ཀྱི་ཡུལ་ལ་དམིགས་པའི་ཆགས་རྟོག་ཕྲ་མོ་མི་འདྲ་བ་དུ་མ་དང་རྒོད་པ་དང་ནུ་མར་རེག་པ་སོགས་བྱ་བ་དུ་མ་དང་བཅས་པའི་ཕྱིར། སྦྱང་བྱ་སད་དུས་ཀྱི་གནས་སྐབས་རྟོག་པ་ཤིན་ཏུ་བཀྲ་བ་དང༌། སྦྱངས་འབྲས་སྤྲུལ་པ་སྒྱུ་འཕྲུལ་དྲྭ་བ་མཐའ་ཡས་པ་སྟོན་པའི་སྐུ་གཉིས་ཀ་དང༌། རྣམ་པ་མཚུངས་ཤིང༌། བདེ་བ་དེ་ཉིད་སྟོང་པར་རིག་པས་མར་ལ་སད་པའི་གནས་སྐབས་སྦྱོང༌། ཡར་ལ་སྒྱུ་འཕྲུལ་དྲྭ་བའི་བྱང་ཆུབ་པ་ལམ་དུ་བྱེད་ནུས་པ་ཡིན་ནོ།། །།གཉིས་པ་གསང་དབང་ནི། གསང་རྫས་བྱང་ཆུབ་ཀྱི་སེམས་ཕུང་ཁམས་དབང་ཡུལ་ཉི་ཤུའི་བདག་ཉིད་ཀྱི་ཕྱིར་རམ། བྷ་གའི་དཀྱིལ་འཁོར་བལྟས་པའི་བདེ་བ་ཡང་གསང་བའི་དཀྱིལ་འཁོར་ལ་ཁམས་དྲུག་འབབ་པའི་རྩ་དྲུག་དང༌། ཕྱི་སྐོར་བཅུ་དྲུག་ལ་བཞི་བཞི་བསྡོམས་པས་ཉི་ཟླ་མུན་པ་མེ་བཞི་འབབ་པ་སྟེ་བཅུ་དང༌། བར་སྐོར་གྱི་རྩ་བཅུ་ཡང་དེ་དག་དང་མཚུངས་པ་ལས་ཐབས་རླུང་གཙོ་བོར་འབབ་པ་སྟེ། དེ་ལྟར་ཉི་ཤུའི་བདག་ཉིད་ཀྱི་ཕྱིར། ཡུལ་གྱི་དབྱེ་བས་ཡུལ་ཅན་མཆོག་དགའ་ཡང་ཁམས་དྲུག་དང་རྡོ་རྗེ་བཞི་ལ་རླུང་དང་ཐིག་ལེའི་དབྱེ་བ་ཉི་ཤུའི་ཆ་ཤས་ཡོད་པས། གསུང་རྡོ་རྗེ་རྣམ་པ་ཉི་ཤུས་མངོན་པར་བྱང་ཆུབ་པ་དང་མཚུངས་ཤིང༌། གསང་རྫས་སྦྱིན་པས་ངག་རླུང་བྱིན་གྱིས་བརླབས་པ་དང༌། དཀྱིལ་འཁོར་བལྟས་པས་ངག་རླུང་གི་ཐིག་ལེ་གཡོ་
བ་ཡིན་པས། རྨི་ལམ་གྱི་སྣང་བ་ཡང་རླུང་གི་ཐིག་ལེ་བསྐྱོད་པའི་བྱེད་པ་ཅན་ཉིད་ཀྱི་ཕྱིར། འབྲེལ་བའི་སྒོ་ནས་རྨི་ལམ་གྱི་གནས་སྐབས་དང་རྒྱུ་གཅིག་ལ་མཆོག་དགའ་དེའི་རང་བཞིན་སྟོང་པར་རྟོགས་པས་གནས་སྐབས་དེ་སྦྱོང་ཞིང་བྱང་ཆུབ་དེ་མངོན་དུ་བྱེད་དོ། །མཁའ་གསང་རེག་པ་ཙམ་གྱི་མཆོག་དགའ་ལ་གསང་དབང་དུ་ངོ་སྤྲོད་ནའང་དག་པ་དེ་དང་མཚུངས་ལ། གསང་རྫས་སྒྲུབ་པ་དང༌། དཀྱིལ་འཁོར་ལ་ལྟ་བ་དང། རེག་སྦྱོར་གང་ཡིན་ཡང་རུང་སྟེ། རྨི་ལམ་གྱྀ་ཤེས་པ་རང་ཐད་ཀྱི་སྣང་བ་དང་རྣམ་རྟོག་གསལ་ཞིང༌། རྣམ་རྟོག་གཞན་གྱི་འཕྲོ་འདུ་ཉུང་བ་ལྟར་འདིར་ཡང་དེ་དང་མཚུངས་ཞེས་དམ་པ་འགའ་ཞིག་གསུང་ངོ༌།། །།གསུམ་པ་ཤེར་དབང་གི་དག་པ་ལ་རྣམ་པ་ལྔའི་བྱང་ཆུབ་པ་དང༌། དགའ་བ་བཞི་དང་བཅུ་དྲུག་གི་རབ་དབྱེའོ། །དང་པོ་ནི། སྐབས་འདིར་འཇིག་རྟེན་པའི་གསུམ་པ་ཞོར་བྱུང་སྟེ། འོན་ཀྱང་དངོས་གཞི་དང་དག་པ་ནི་མཚུངས། དངོས་གཞི་འཇིག་རྟེན་པའི་བཞི་པའི་མིང་ཅན་གཉིས་སྤྲོད་དེ། དེ་གཉིས་དབང་འདི་ཉིད་ཀྱི་རང་ཐད་ན། ཐུགས་དང་ཡེ་ཤེས་ཀྱི་དག་པ་སོ་སོ་ལ་སྦྱོར་དགོས་ཀྱང༌། སྤྱི་ལྡོག་ནས་ཐུགས་རྡོ་རྗེའི་སྨིན་ལམ་གྱི་མཚན་ཉིད་ཙམ་ཚང་ཡང་ཡེ་ཤེས་རྡོ་རྗེའི་སྨིན་ལམ་གྱི་མཚན་ཉིད་མ་ཚང་པས། སྐབས་འདིར་ཡེ་ཤེས་རྡོ་རྗེ་དང་མི་སྦྱོར་ཐུགས་ཁོ་ན་དང་སྦྱོར་ལ། དེ་ཡང་གཉིད་འཐུག་པོའི་གནས་སྐབས་སུ་རྣམ་རྟོག་འགགས་པ་བཞིན་དུ་འདིར་གསུམ་པ་ཁྱད་དགའི་དུས་ན་རྣམ་རྟོག་ཕྲ་བ་དང༌། བཞི་པ་ལྷན་སྐྱེས་ཀྱི་མཐར་ཡུད་ཅིག་རྣམ་རྟོག་ཤིན་ཏུ་འགགས་པའི་ཕྱིར། འདི་དང་གཉིད་འཐུག་
པོའི་གནས་སྐབས་རྣམ་པ་མཐུན་ལ། ཐུགས་ཡེ་ཤེས་ལྔ་ལྡན་རྣམ་པ་ལྔས་མངོན་པར་བྱང་ཆུབ་པ་དང་ཡང་རྣམ་པ་མཐུན་ཏེ། འཇིག་རྟེན་པའི་ཤེས་རབ་ཡེ་ཤེས་འདི་ཉིད་བདེ་བའི་ཡེ་ཤེས་ལྔ་དང་ལྡན་པའི་ཕྱིར་རོ། །དེ་ཡང་རྒྱུད་ལས། སེམས་ཀྱི་བསམ་པ་ཡིས་ནི་མ་རུ་འགྱུར་ཏེ་རེག་པ་དང་ནི་ལྟ་བ་དག་གིས་སྲིང་མོའོ། །རྡོ་རྗེ་ཞུགས་པས་བུ་མོ་བྱེད་པ་དང་བཅས་ཤིན་ཏུ་དགའ་བས་སྲིང་མོའི་བུ་མོ་དེ་བཞིན་ཉིད། །ཐིག་ལེ་ལྟུང་ན་ཆུང་མ་གཞན་གྱི་རིགས་ལ་གནས་པའི་རྣལ་འབྱོར་མ་ནི་འདོད་ཆགས་ཉམས་ལས་སོ། །འདི་རྣམས་རྣལ་འབྱོར་ཕྱག་རྒྱ་དྲུག་སྟེ་ས་ཆུ་སྲེག་ཟ་རླུང་དང་མཁའ་དང་ཆེད་པའི་དངོས་རྣམས་སོ། །ཞེས་གསུངས་ཏེ། རིག་མའི་ཡུལ་ལ་ཆགས་པའི་སེམས་ཀྱིས་བསམ་པའི་བདེ་བ་ནི། ས་ཁམས་ཀྱི་དྭངས་མ་ཞུ་བའི་བདེ་བ་ཡིན་པ་དང༌། དེས་ས་ཁམས་ཀྱི་ཐིག་ལེའི་དྭངས་མ་འཁྲུགས་པ་སྟེ་གཡོ་བ་ཡིན་ལ། དེ་བཞིན་དུ་ལྟ་བ་དང་རེག་པ་ལས་ཆུ་ཁམས་ཀྱི་དྭངས་མ་ཞུ་ཞིང་གཡོ་བ་དང༌། རྡོ་རྗེ་པདྨར་ཞུགས་པ་ལས་མེ་ཁམས་ཀྱི་དྭངས་མ་ཞུ་ཞིང་གཡོ་བ་དང༌། ཐིག་ལེའི་བགྲོད་པ་ནོར་བུའི་ལམ་དུ་ཕྱིན་པ་ཚུན་ཆོད་ནི། རླུང་ཁམས་ཀྱི་དྭངས་མ་ཞུ་ཞིང་གཡོ་བ་སྟེ། གནས་དེར་རྣལ་འབྱོར་གྱི་སྟོབས་དང་ལྡན་ན་གཡོ་མེད་དུ་བཅིངས་པས་མཁའ་ཁམས་ཞུ་བ་བརྟན་པར་འགྱུར་བ་དང༌། མི་ལྡན་ན་ཕྱིར་འཕོ་ཞིང་མཁའ་ཁམས་ཀྱི་ཐིག་ལེ་འཁྲུགས་པ་སྟེ། འཕོ་བཞིན་པ་ཞུ་ཞིང་གཡོ་ལ་འཛག་པའི་ངང་ཚུལ་ལོ། །དེ་ལྟར་ལྔ་པོ་ནི་ཡེ་ཤེས་ལྔའི་དག་པ་ཅན་ཡིན་ལ། ཆེད་པའི་དངོས་པོ་ཞེས་པ་གནས་སྐབས་དྲུག་པ་ནི། ཐ་མལ་པ་ལ་འཕོས་ཟིན་པའི་
ཆགས་བྲལ་ཏེ། ཡེ་ཤེས་ཀྱི་དག་པ་དང་མི་སྦྱོར་མོད། རྣལ་འབྱོར་ཅན་ལ་དེའི་དོད་སྟེང་དུ་གཤེགས་པ་ཡིན་པས་ལྔ་པོ་ཀུན་ལ་ཁྱབ་པའི་ཡེ་ཤེས་ཀྱི་ཁམས་སོ། །གཡས་གཡོན་ཀྱི་དཀྱིལ་འཁོར་ལྔ་ཟད་པའི་མཐའ་ཡེ་ཤེས་ཀྱི་ཁམས་སུ་འགྱུར་བ་དང༌། རིགས་དྲུག་དང་སྤྱི་བོའི་འཁོར་ལོ་སོགས་ཕྱག་རྒྱ་དྲུག་དང༌། ཕར་ཕྱིན་དྲུག་རྣམ་པར་དག་པ་སྟེ། དེའི་ཚེ་ཡེ་ཤེས་ཀྱང་དྲུག་གི་དག་པར་འགྱུར་མོད་ཀྱི། དྲུག་པ་ནི། ཀུན་ཏུ་ཁྱབ་པ་ཉིད་ཀྱི་ཕྱིར་ལོགས་སུ་མ་བགྲངས་པའོ།། །།གཉིས་པ་དགའ་བ་བཞི་དང་བཅུ་དྲུག་གི་རབ་དབྱེ་ལ། ཁ་ཅིག་བུམ་གསང་གཉིས་ལ་བདེ་བ་ཙམ་མ་གཏོགས་དགའ་བཞིའི་བྱེ་བྲག་མི་འབྱེད། ཅེས་དང༌། དགའ་བཞིའི་བྱེ་བྲག་ནི་ཤེར་དབང་ཁོ་ན་ལ་བྱེད་ཀྱང༌། ལ་ལ་འཁོར་ལོ་དྲུག་གི་གནས་བདུན་ཁོ་ན་ལ་དགའ་བཞི་སྦྱོར། ལ་ལ་འཁོར་ལོ་བཞི་ཁོ་ན་ལ་དགའ་བཞི་སྦྱོར་ཏེ། གཉིས་པོ་ལའང་འགལ་བར་སེམས་སཽ་ཞེས་སྨྲའོ། །དེ་ནི་མི་འཐད་དེ་བདག་པོ་ཆེན་པོའི་སྐབས་སུ་བུམ་དབང་དགའ་བ་དང༌། གསང་དབང་མཆོག་དགར་བཤད་པས། དེ་དང་རྒྱུ་མཚན་མཚུངས་པའི་ཕྱིར། བུམ་དབང་ཐམས་ཅད་དང་གསང་དབང་ཐམས་ཅད་ལ་གོ་བར་བྱ་ལ། གཞན་ཡང་རྗེས་ཆགས་ཀྱི་དགའ་བ་ཐམས་ཅད་དགའ་བཞིར་འདུས་པ་ཡིན་པས། བུམ་གསང་གཉིས་པོ་དེ་ལ་དགའ་བཞིའི་བྱེ་བྲག་མེད་ན། དེ་གཉིས་ཀྱི་དགའ་བ་དེ་རྗེས་ཆགས་ཀྱི་དགའ་བ་མ་ཡིན་པར་འགྱུར་རོ། །གནས་བདུན་དང་འཁོར་ལོ་བཞི་ཡང་གནད་གཅིག་པ་ཡིན་ཡང་ཁྱེད་ཀྱིས་མ་གོ་བར་སྣང་མོད། དེ་གཉིས་འགལ་བར་མི་བསམ་ཏེ། གཙུག་ཏོར་དུ་ཞུ་ནས་སྨིན་
མཚམས་རངས་པོ་དང༌། མགྲིན་པའི་སྟེང་གི་ནང་ཡན་ཆད་དགའ་བ་དང་པོའི་ས་ཡུལ་ཡིན། དེ་ནས་ལྟེ་བའི་སྟེང་ཡན་ཆད་མཆོག་དགའ་སྐྱེ་བའི་ས་ཡུལ་ཡིན། དེ་ནས་གསང་བའི་འཁོར་ལོའི་ཕྱེད་གོང་མ་ཡན་ཆད་ཁྱད་དགའ་སྐྱེ་བའི་ས་ཡུལ་ཡིན། གསང་འཁོར་གྱི་ཕྱེད་འོག་མ་ཁ་མར་ལྟ་ནས་ནོར་བུའི་རྩེ་མོའི་ནང་གི་བར་དུ་ལྷན་སྐྱེས་འཆར་བའི་གནས་ཡིན་པས། འཁོར་ལོ་དྲུག་གི་གནས་བདུན་ལ་དགའ་བཞི་སྦྱོར་བ་ཡིན་ལ། གཙུག་ཏོར་དང་སྤྱི་བོ་ཞུ་བ་མགྲིན་པའི་སྟེང་དུ་འཆིང་དགོས་ན། མགྲིན་པར་དགའ་བ་ཞེས་བྱ། རྒྱུ་མཚན་དགའ་བ་དང་པོ་བདེ་བའི་སྟོབས་ཆུང་བས་རྫོགས་མཚམས་སུ་བཅིངས་པས་ཆོག དེས་མཚོན་ཏེ་མཆོག་དགའ་ཤུགས་འབྲིང་བ་ཡིན་པས། ས་ཡུལ་གྱི་ཕྱེད་སྙིང་གར་འཆིང་བས་སྙིང་གར་མཆོག་དགའ་ཡིན། ཁྱད་དགའ་དང་ལྷན་སྐྱེས་གཉིས་ཤུགས་ཆེ་བས་གཉིས་པོ་རང་རང་སོ་སོ་འགོ་རྩོམ་པའི་གནས་ལྟེ་བ་དང་གསང་བར་འཆིང་མཉམ་ལ་ལྷན་སྐྱེས་ནི་ལྷག་པར་ཤུགས་ཆེ་བས་མཐར་ནོར་བུར་ཡང་འཆིང་དགོས་ལ། སྤྱིར་གསང་བའི་མས་མཐར་བཅིངས་པས་ནོར་བུ་ཡང་འགག་དགོས་པ་ཡིན་ཏེ། དེས་ན་དགའ་བ་བཞི་གང་དུ་བཅིངས་ནས་ཡུན་རིང་དུ་བསྒོམ་པའི་ས་གནས་བཞི་ལ་དགའ་བ་བཞི་འཆར་ཚུལ་ནི། དེ་ལྟར་ཡིན་པས་སྤྱིར་དགའ་བཞི་སྤྱི་ལྡོག་ནས་འཆར་བའི་ས་ཡུལ་དང༌། དགའ་བཞི་འཆིང་སའི་གནད་ཀྱིས་ཕྱོགས་ཀྱི་ཁྱད་པར་ལས་འཆད་ཚུལ་མི་འདྲ་བ་གཉིས་བྱུང་ཡང་དོན་རྣམ་གྲངས་ཐ་དད་མ་ཡིན་པ་གོ་བར་གྱིས་ཤིག གཞན་ཡང་འདི་ལྟར་གོ་དགོས་ཏེ། བུམ་དབང་གི་དགའ་བ་དང༌། གསང་དབང་གི་མཆོག་དགའ་དང༌། ཤེར་དབང་གི་དགའ་བ་བཞི་རྣམས་ཐུན་གཅིག་གམ་སྦྱོར་བ་གཅིག་ལས་བྱུང་བ་
མ་ཡིན་ཏེ། དེ་དག་རྗེས་སྤྱོད་ལམ་གྱིས་བར་མཚམས་ཆོད་ཅིང༌། སྦྱོར་བའང་སྡོད་སོ་སོར་བརྩམ་པ་ཡིན་ནོ། །བུམ་དབང་གི་དུས་སུ་རྗེས་ཆགས་ཀྱི་སྦྱོར་བ་བརྩམས་ནས། དགའ་བའི་སྐད་ཅིག་མ་བསྐྱེད་ཐུབ་པ་ན། དེའི་འཕྲོས་ལས་མཆོག་དགའ་མན་ཆད་མི་བསྐྱེད་པར་ཕྲུགས་གཅིག་པོ་དེ་རྫོགས་པར་བྱས་པ་དང༌། གསང་དབང་གི་སྐབས་མྱང་བ་དང་ལྟ་བ་ལས་རྗེས་ཆགས་ཀྱི་སྦྱོར་བ་བརྩམས་པས། ཡང་དགའ་བ་དང་པོ་གསར་དུ་སྐྱེས་པ་སྔོན་དུ་འགྲོ་བའི་དངོས་གཞི་མཆོག་དགའ་སྐྱེད་བྱེད་ཕྲུགས་གཅིག་པོ་དེ་རྫོགས་པ་ཡིན་ལ། བུམ་དབང་གི་དགའ་བས་འདིའི་སྦྱོར་བ་དགའ་བ་དང་པོའི་གོ་གཅོད་པའང་མིན་ཞིང༌། ཕྲུགས་དེ་ལ་ཁྱད་དགའ་མན་ཆད་པ་སྐྱེད་པའང་མི་དགོས་སོ། །ཡང་དེའི་འཕྲོ་བཅད་དེ་ཤེས་རབ་ཡེ་ཤེས་རྩོམ་པ་ན། སླར་ཡང་རྗེས་ཆགས་ཀྱི་སྤྱོད་པ་བརྩམས་པའི་བུམ་གསང་གི་དུས་ཀྱི་དེ་མ་ཡིན་པའི་དགའ་བ་མཆོག་དགའ་གསར་དུ་བསྒྲུབས་པ་སྔོན་དུ་འགྲོ་བའི་ཁྱད་དགའ་དང་ལྷན་སྐྱེས་དངོས་གཞིའི་ཚུལ་དུ་བསྐྱེད་པ་ཡིན་པས། སྤྱིར་ལེགས་པར་ངོ་འཕྲོད་པའི་དགའ་བཞི་དབང་བཞིའི་དབང་དོན་དུ་སྦྱོར་ཡང་དབང་བསྐུར་བའི་ཆོ་གའི་སྐབས་སུ། དགའ་བཞི་ཕྲུགས་གཅིག་ལ་འཇིག་རྟེན་པའི་དབང་བཞི་ཚང་བ་མི་འབྱུང་སྟེ། ཤེར་དབང་ཉིད་ལ་ཡང་དགའ་བཞི་ཕྲུགས་གཅིག་ཏུ་དབྱེའོ། །གསང་དབང་གི་སྐབས་སུ་དགའ་བ་དང་པོ་ཡོད་ཀྱང་རིགས་འདྲ་བུམ་དབང་གི་སྐབས་སུ་ངོ་སྤྲད་ཟིན་པས། མཆོག་དགས་ཁྱད་པར་དུ་བྱས་པ་དང༌། ཤེར་དབང་ལ་དེ་གཉིས་ཀར་ཡོད་ཀྱང་རིགས་འདྲ། བུམ་གསང་དུ་ངོ་སྤྲད་ཟིན་པས་ཁྱད་དགའ་དང་ལྷན་སྐྱེས་ཁྱད་པར་དུ་བྱས་པའོ། །སྐབས་འདིར་དགའ་བ་བཞི་པོ་ཡང་སྐུ་གསུང་ཐུགས་ཡེ་ཤེས་ཀྱི་དབྱེ་བས་ཕྱེ་བ་
དགའ་བ་བཅུ་དྲུག་སྟེ། རྒྱུད་ལས། འདོད་པ་དགའ་བ་དང་ནི་འདར་དང་འགྱུར་མེད་དག་དང་བཞི་པོ་ཡིས་ནི་སྦྱོར་བ་དེ་གཅིག་སྟེ། །གང་བ་དང་ནི་ནུས་དང་སྐྱེ་བ་དག་དང་མཆོག་གི་དགའ་བ་ཉིད་ནི་གཉིས་པར་ངེས་པར་ འགྱུར། །འབར་བ་དང་ནི་ཐིག་ལེ་གཉིད་ཡུར་དག་ཀྱང་སླར་ཡང་ཁྱད་པར་དགའ་བ་ཉིད་ནི་གསུམ་པའོ། །ཨོཊྚ་དང་ནི་ན་དཱ་དག་དང་གཉིད་དང་ལྷན་ཅིག་སྐྱེས་པའི་དགའ་བ་ཉིད་ནི་བཞི་པར་འགྱུར། །ཞེས་གསུངས་ཏེ། འདོད་པ་སྐུའི་དགའ་བ། དགའ་བ་གསུམ་གི་དགའ་བ། འདར་བ་ཐུགས་ཀྱི་དགའ་བ། འགྱུར་མེད་ཡེ་ཤེས་ཀྱི་དགའ་བ། དེ་བཞིན་དུ་སྦྱར་ཏེ། གང་བ་མཆོག་དགའ་སྐྱེ་བ་ནུས་པ་རྣམས་སྐུའི་མཆོག་དགའ་སོགས་བཞིའོ། །འབར་བ་ཁྱད་དགའ་གཉིད་ཡུར་ཐིག་ལེ་རྣམས་སྐུའི་ཁྱད་དགའ་སོགས་བཞིའོ། །ཨོཊྚ་ལྷན་སྐྱེས་གཉིད་དང་ན་དཱ་རྣམས་སྐུའི་ལྷན་སྐྱེས་སོགས་བཞིའོ། །འདི་དག་ལ་བརྗོད་པར་བྱ་རྒྱུ་མང་མོད་ཀྱི། ཧ་ཅང་རྒྱས་པར་འགྱུར་བས་མ་སྨོས་སོ།། །།བཞི་པ་བླ་ན་མེད་པའི་དབང་གི་དག་པ་ལ། དོན་དང་པོ་མཚོན་བྱེད་ཀྱི་དབང་ནི། འཇིག་རྟེན་ལས་འདས་པའི་དབང་བཞི་པ་ལས་དང་པོ་པ་ལ་སྨིན་བྱེད་དུ་བསྐུར་བའི་སྐབས། དབང་པོ་རྣོན་པོ་ཡིན་ན་མ་གཏོགས་བཞི་པའི་ཡེ་ཤེས་དངོས་སུ་བསྐྱེད་མི་ཐུབ་མོད། མོས་པའི་སྒོ་ནས་ཅུང་ཟད་ཉམས་སུ་མྱོང་བར་ནི་བྱའོ།། །།དོན་གཉིས་པ་བཞི་པའི་ཡེ་ཤེས་དངོས་ལ་དཔྱད་པ་ནི། རྣལ་འབྱོར་ཡན་ལག་དྲུག་གི་དངོས་གཞི་རྣམས་དབང་བཞི་པའི་ཡེ་ཤེས་ཡིན་ཏེ། དེ་ཡང་སྟོང་གཟུགས་སྐུ། གཞོམ་མེད་ཀྱི་སྒྲ་གསུང༌། སྤྲོས་བྲལ་རྣམ་པར་མི་རྟོག་པ་ཐུགས། འགྱུར་མེད་བདེ་བ་ཡེ་ཤེས་ཏེ། རྡོ་རྗེ་བཞི་མཉམ་པ་
ཉིད་ཀྱིས་ཡེ་ཤེས་སོ། །ཡན་ལག་དྲུག་ལ་རྡོ་རྗེ་བཞིས་བགོས་པ་ན། ཏིང་ངེ་འཛིན་ཡེ་ཤེས་རྡོ་རྗེ་ཡིན་ཞིང༌། དེ་ཉིད་དབང་བཞི་དང་སྦྱར་བས་བཞི་པའི་ཐོབ་སྐལ་དུ་ཏིང་ངེ་འཛིན་བྱུང་ཡང་ཏིང་ངེ་འཛིན་གྱི་རིམ་པའི་སྐབས་ནི། ཞི་བདེ་དང་འདྲེས་པའི་ཕྱིར་བཞི་པ་ཉག་གཅིག་མ་ཡིན་ལ། ཆ་ཤས་ཙམ་ནི་སོར་སྡུད་ཀྱི་རྣམ་པར་མི་རྟོག་པའི་སྟོང་གཟུགས་མཐོང་བ་དེ་ཡང་ཡིན་ཞིང༌། དེའི་དུས་ན་མི་འགྱུར་བའི་བདེ་བ་ཆ་ཕྲ་བའང་ཡོད་པ་དེ་བཞི་པའི་ལམ་དངོས་ཡིན་ནོ། །དེས་ན་ཁ་ཅིག་ཏིང་ངེ་འཛིན་གྱི་རིམ་པ་ཙམ་ཞིག་བཞི་པའི་ཡེ་ཤེས་ཀྱི་མཚན་གཞི་དངོས་མ་ཡིན་ཁྱབ་མཉམ་དུ་འདོད་པ་ཡང་ཆ་ཤས་སུ་འདོད་ན་རྒྱ་ཆུངས། གཙང་མར་འདོད་ན་ཁྱབ་ཆེས་པས་མི་རིགས་ སོ། །དེས་ན་ཏིང་ངེ་འཛིན་རྫོགས་པ་ཡན་ཆད་སྔགས་ཀྱི་འཕགས་ལམ་མཉམ་གཞག་རྣམས་བཞི་པའི་ཡེ་ཤེས་གཙང་མ་ཡིན་ལ། ཆ་ཤས་ཀྱིས་ན་གོང་དུ་སྨོས་པའི་རྡོ་རྗེ་བཞི་འདུས་ཀྱི་ཡེ་ཤེས་དེ་གནས་སྐབས་གང་ན་འདུས་ཀྱང་བཞི་པའི་ཡེ་ཤེས་ཡིན་ནོ། །འོ་ན་མི་འགྱུར་བའི་བདེ་བ་ཉིད་ཀྱི་ཕྱིར། ཏིང་ངེ་འཛིན་ཡན་ཆད་ཁོ་ནའོ་སྙམ་ན། དེ་སྐད་ཅེས་སྨྲ་པ་དེ་ནི་མི་འགྱུར་བའི་བདེ་བའི་སྐད་ཅིག་གྲུབ་པ་དང༌། མི་འགྱུར་པའི་བདེ་བའི་ཆ་ཤས་ཀྱི་དབྱེ་བ་མ་ཕྱེད་པ་ཡིན་ཏེ། སོར་སྡུད་དང་པོའི་གནས་སྐབས་ཉིད་ནས་ལམ་གྱིས་བསྡུས་པའི་མི་འགྱུར་བའི་བདེ་བས་ཆ་ཤས་ཕྲ་མོ་ཡོད་དོ། །འོ་ན་ཏིང་ངེ་འཛིན་བཞི་པའི་ཡེ་ཤེས་སུ་གྲགས་པ་ཅི་ཞེ་ན། རྒྱུ་ཚོགས་སྦྱོར་གྱི་རྫོགས་རིམ་ཁོ་ན་གཏན་ལ་འབེབས་པའི་སྐབས་སུ། ཏིང་ངེ་འཛིན་གྱི་རིམ་པ་དེ་བཞི་པའི་ལམ་ཁོ་ན་གཙོ་ཆེ་བས་བཞི་པའི་ལམ་གྱི་གཙོ་བོར་འཇོག་པ་དང༌། སྤྱིར་རིམ་པ་ཙམ་མ་ཡིན་པར་ཏིང་ངེ་འཛིན་གྱི་ཡན་ལག་ནི་མི་འགྱུར་
བའི་བདེ་བ་ལ་ཟེར་ན་འཕགས་ས་ཀུན་ཡང་དེ་ཡིན་ཞིང༌། ཡན་ལག་དེ་ལ་ཕྲ་མོའང་ཡོད་པས་དེ་ནི་དེ། ངེས་པར་ཡིན་ནོ།། །།དོན་གསུམ་པ་སྐད་ཅིག་གཅིག་རྫོགས་སུ་འཇོག་པ་ནི། བཞི་པའི་ཡེ་ཤེས་ཀྱི་ཆ་ཤས་དང༌། ཐ་ན་མོས་སྒོམ་གྱི་རྣམ་པ་ལམ་དུ་བྱེད་པ་ཚུན་ཆོད་ཀྱང་རང་གི་སྤང་བྱ་བཞི་པའི་གནས་སྐབས་ཞེས་བྱ་བ། འཛག་བདེ་བག་ཆགས་དང་བཅས་པ་སྟེ་གནས་སྐབས་ཀྱི་མི་རྟོག་པ་བདེ་བ་འགྱུར་བཅས་སུ་ཤར་བའི་ཆ་དེ་དང༌། བདེ་ལ་མི་རྟོག་པའི་རྣམ་པར་མཐུན་ཞིང་རང་བཞིན་སྟོང་ཉིད་དུ་ཤེས་པས་བཞི་པའི་གནས་སྐབས་དེ་སྤོང་བར་བྱེད་པ་ལ་ཞུགས་ཤིང༌། སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པ་ཞེས་བྱ་བ། སངས་རྒྱས་རྣམས་ཀྱི་ཡེ་ཤེས་བདེ་བ་ཆེན་པོ་དེ་དོན་དམ་ཆོས་ཉིད་ཀྱི་ངོ་བོ་ཡིན་པས་ནམ་དུ་ཡང་འཕོ་འགྱུར་དང་འཇུག་པ་མེད་པ་ནི་སྐད་ཅིག་གཅིག་པ་ཞེས་བྱ་སྟེ། །དཔེར་ན། སྣང་གྲགས་ཀྱི་ཆོས་ལའང་ཤིན་ཏུ་ཕྲ་བའི་སྐད་ཅིག་གཅིག་ཁོ་ན་ལ་གནས་ནས། སྐད་ཅིག་གཉིས་པར་ནམ་ཡང་མི་འཕོ་བ་ཞིག་སྲིད་ན། དེ་རྟག་པར་འཇོག་དགོས་པ་བཞིན་ནོ། །དེས་ན་སེམས་སྤྲོས་བྲལ་གྱི་རང་བཞིན་མི་རྟོག་པ་སྟོང་གཟུགས་སུ་ཤར་བ་དེ་ནི་སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པ་དང་བློ་ངོར་རྣམ་པ་མཐུན་ཞིང༌། དོན་ངོ་བོའི་སྟེང་ནས་ཀྱང་ཐ་དད་མ་ཡིན་ལ། དེ་དབང་དུས་སུ་ཡུད་ཙམ་བསྒོམས་པས་འབྲས་བུ་དེ་མངོན་དུ་འགྱུར་བའི་རྟེན་འབྲེལ་ཁྱད་པར་ཅན་བསྒྲིགས་པ་ཡིན་ནོ།། །།དོན་བཞི་པ་ཡུལ་ཡུལ་ཅན་རྒྱུ་གསུམ་གྱི་དབྱེ་བ་ནི། དབང་བཞི་པའི་ངོ་བོ་གསལ་བར། རྒྱུད་ལས། ཤེས་རབ་ཡེ་ཤེས་དག་ནི་སེམས་དང་དེ་ཡི་སྣང་བ་དག་ཀྱང་རྣམ་པ་བཅུ་པོ་ཉིད་དུ་འགྱུར། །དབང་ནི་དྲི་མེད་རི་བོང་ཅན་མཚུངས་མེ་ལོང་
གཟུགས་བརྙན་ལྟ་བུ་འདི་ལ་ཞུགས་པ་གང་ཡིན་པ། །དེ་ལས་མྱ་ངན་འདས་པའི་བདེ་བ་འཕོ་མེད་ལྷན་ཅིག་སྐྱེས་པ་འགྱུར་མེད་ཉིད་ནི་བཞི་པ་སྟེ། །སངས་རྒྱས་ཞལ་འདི་གང་གི་ཐུགས་དང་ཞལ་ལ་གནས་པར་གྱུར་པ་དེ་ནི་དཔལ་ལྡན་བླ་ མའོ། །ཞེས་གསུངས་པ་འདི་ཉིད་དབང་བཞི་པ་ཞེས་པའི་ངོས་འཛིན་མིང་ཞལ་གསལ་དང་བཅས་པ་ཡིན་ལ། དོན་འདི་ནི་མཆོག་མི་འགྱུར་གྱི་མདོར་བསྡུས་དང༌། དོན་དམ་བསྙེན་པ་དང༌། གཞུང་གཞན་བྲམ་ཟེ་ཆེན་པོའི་དོ་ཧ་དང༌། ཨིནྡྲ་བྷུ་ཏིའི་ཡེ་ཤེས་གྲུབ་པ་དང༌། དཔལ་མོའི་ལྷན་ཅིག་སྐྱེས་གྲུབ་སོགས་ལས་རྟོགས་པར་བྱ་ཞིང༌། འདིའི་དོན་འཆད་པ་ནི་གཞན་ཡང་ཤིན་ཏུ་མང་མོད། སྦྱོར་བ་ཡན་ལག་དྲུག་པའི་སྤྱི་དོན་དང༌། དབང་མདོར་བསྟན་གྱི་རྣམ་བཤད་དུ་བདག་གིས་ཀྱང་བཤད་ཟིན་པས་འདིར་ཧ་ཅང་མི་སྤྲོའོ། །འོན་ཀྱང་སྙིང་པོ་ནི་རྣམ་ཀུན་མཆོག་ལྡན་དང་བདེ་བ་ཟུང་དུ་འཇུག་པ་ནི་བཞི་པའི་ཡེ་ཤེས་ཀྱི་ངོ་བོ་ཡིན་ལ། དེ་ལ་ཆོས་ཉིད་དོན་གྱི་ཟུང་འཇུག་ནི། དབང་བཞི་པའི་དབང་དོན་གྱི་ཡེ་ཤེས་དངོས་ཡིན་ཡང་ལམ་གྱི་ཟུང་འཇུག་མ་ཡིན་ནོ། །ལམ་གྱིས་བསྡུས་པ་ནི། ཆོས་དབྱིངས་དེ་མངོན་སུམ་དུ་རྟོགས་པའི་ཡེ་ཤེས་གང་ཞིག་བདེ་བ་དང་རྣམ་པ་ཐམས་ཅད་པའི་སྒོ་ནས་ཆོས་ཉིད་དང༌། ཤིན་ཏུ་རྣམ་པ་མཐུན་པ་དེ་ནི་དབང་བཞི་པའི་ལམ་གྱི་ཡེ་ཤེས་ཡིན་ལ། ཡེ་ཤེས་དེ་ལྟ་བུ་མཚན་ཉིད་ཀྱི་ལུས་ཡོངས་སུ་རྫོགས་པ་ནི། རྒྱུའི་དབང་དུས་སུ་ཕལ་ཆེར་ལ་སྐྱེ་བ་མ་ཡིན་ཡང་རྗེས་མཐུན་མོས་པ་ལམ་བྱེད་དུ་བྱས་པས་བཞི་པའི་ལམ་དེ་རྒྱུད་ལ་སྐྱེ་བའི་ཐུན་མོང་མ་ཡིན་པ་དང་མེད་ན་མི་འབྱུང་གི་རྒྱུར་གྱུར་
པའི་ནུས་པ་ནི་དབང་བཞི་པ་ཡིན་པས། ནུས་པ་དེ་རྒྱུད་ལ་སྐྱེས་བ་ན་བཞི་པ་ཐོབ་པ་ཞེས་བྱའོ།། །།དོན་ལྔ་པ་སྡོམ་པ་ཐོབ་མཚམས་རྒྱུ་དང་བཅས་པ་ལ་དབང་བཞི་པའི་སྡོམ་པ་དངོས་ནི། ཏིང་ངེ་འཛིན་གྱི་སྐད་ཅིག་དང་པོ་ནས་ཅུང་ཟད་སྐྱེས་ཤིང་མཚན་ཉིད་རྫོགས་པར་ཐོབ་པ་ནི། ཏིང་ངེ་འཛིན་གྱི་འབྲས་བུ་ནས་ཐོབ་པ་དེ་ཡིན་ལ། དེ་སྒོམ་སྟོབས་གཙོ་ཆེ་མོད་ཀྱང་ཆོ་ག་ལས་ཀྱང་སྐྱེ་བ་ཡོད་དེ། དོན་དམ་སྡོམ་པ་ཡང་ཆོ་ག་ལས་འབྱུང་བ་སྔགས་ལུགས་ཀྱི་ཁྱད་ཆོས་ཡིན་པའི་ཕྱིར་རོ། །དེ་ལྟ་བུའི་དབང་བཞི་པའི་སྡོམ་པ་དངོས་དོན་དམ་པ་ནི། རྒྱུའི་དབང་གི་སྐབས་འདིར་མི་ཐོབ་ཀྱང་དབང་གི་མཚན་ཉིད་དེ་ལྟ་བུ་དང་ཕྱོགས་འདྲ་བའི་ཀུན་རྫོབ་ཀྱི་སྡོམ་པ་བཞི་པས་བསྡུས་པ་ཞིག་ཐོབ་པ་ནི་ཡིན་ནོ། །གཞན་དག་རྒྱུད་སྡེ་གཞན་གྱི་དབང་བཞི་པ་དང༌། འདིའི་དབང་བཞི་པ་གཅིག་གོ་མི་གཅིག་གོ་དོད་ཐུབ་པོ་མི་ཐོབ་པོ། རྒྱུད་སྡེ་གཞན་ལ་དབང་བཞི་པ་མཚན་ཉིད་པ་མེད་དོ་ཡོད་དོ་སོགས་འབྲེལ་མེད་ཀྱི་འདོད་ཚུལ་དང་རྩོད་པ་མང་ཞིང༌། དེ་དག་ལ་རྒལ་བརྟགས་ཅུང་ཟད་དགོས་པའི་སྐབས་ཀྱང་འདུག་མོད་ཀྱི། ཡི་གེ་མངས་པར་འགྱུར་བའི་ཕྱིར་འདིར་མི་འབྲིའོ།། །།བཞི་པ་འཕྲོས་དོན་ཐོར་བུ་སྣ་ཚོགས་པའི་དོགས་པ་དཔྱད་པ་ལ། སྡོམ་ནི། འཇིག་རྟེན་བཞི་དང་སྐུ་བཞི་དང༌། །ན་ཚོད་རིམ་དང་ཕྱག་རྒྱ་བཞི། །འཇིག་འདས་ཆེ་ཆུང་དབྱེ་བ་དང༌། དྲང་ངེས་ས་ཡི་རིམ་པ་གཉིས། །སློབ་དཔོན་སློབ་མའི་དོན་ལ་དཔྱད། །བཞི་པ་སྦེད་པའི་ཚུལ་གཉིས་སོ། །གཞན་ཡང་བུམ་དབང་གིས་གཟུགས་མེད་ཁམས་ཀྱི་འདོད་ཆགས་སྦྱོང༌། གསང་དབང་གིས་གཟུགས་ཁམས་ལྷའི་འདོད་ཆགས་སྦྱོང༌། འཇིག་རྟེན་པའི་གསུམ་པས་འདོད་ཁམས་ལྷའི་འདོད་ཆགས་སྦྱོང༌། འཇིག་རྟེན་
པའི་བཞི་པས་མིའི་འགྲོ་བ་མན་ཆད་ཀྱི་འདོད་ཆགས་སྦྱོང་བ་དང༌། དབང་བཞི་པས་ཐམས་ཅད་ཀྱི་དངོས་ཀྱི་གཉེན་པོ་བྱེད་ དོ། །དེ་བཞིན་དུ་བྱང་ཆུབ་བཞི་ཉིད་ཀྱི་ཕྱིར། སྤྲུལ་ལོངས་ཆོས་སྐུ་ལྷན་ཅིག་སྐྱེས་པ་སྟེ་སྐུ་བཞི་ལ་སྦྱར་བ་དང༌། བདེ་བ་མཆོག་དམན་གྱི་དབྱེ་བས་བྱིས་པ། དར་མ་རྒན་པོ་སྐྱེ་དགུའི་བདག་པོ་བཞི་དང་སྦྱོར་བ་དང༌། གཞན་ཡང་དག་སྦྱོར་ཕྲ་མོ་བཤད་པ་རྣམས་ནི་གོ་སླའོ། །ཡང་རྒྱུད་ལས། ཆུ་སྐྱེས་ལ་ནི་རྡོ་རྗེ་རབ་ཞུགས་རྩེ་མོ་ཅན་ལ་རླུང་དང་ཐིག་ལེ་མི་ལྟུང་གསུམ་པའོ། །ཞེས་རྫོགས་རིམ་གྱི་ཕྱག་རྒྱ་གསུམ་པོ་སྨིན་བྱེད་བུམ་གསང་ཤེར་དབང་གསུམ་དང༌། ཡང་རྒྱུད་ལས། ཆགས་དང་ཆགས་བྲལ་མཐར་གྱུར་དང་པོ་མཆོག་བདེའི་གཏེར་ནི་རྣལ་འབྱོར་རྣམས་ཀྱིས་རྟོགས་བྱ་བཞི་པའོ། །ཞེས་ཕྱག་རྒྱ་བཞི་པ་སྨིན་བྱེད་དབང་བཞི་པར་གསུངས་ཏེ། དེ་ཡང་འཇིག་རྟེན་ལས་འདས་པའི་བཞི་པ་མ་བསྐུར་ན་ནི། བྱིས་འཇུག་རྣམས་བསྐྱེད་རིམ་ཁོ་ནའི་སྨིན་བྱེད་དང༌། གོང་མ་གཞན་གསུམ་པོ་ཡང་རྫོགས་རིམ་གྱི་མིང་ཅན་ཟབ་མོ་བསྐྱེད་རིམ་ཙམ་དང༌། དེའི་འབྲས་བུ་ཚོགས་སྦྱོར་ཙམ་གྱི་སྨིན་བྱེད་ཡིན་གྱི། བསྒོམ་བྱ་རྫོགས་རིམ་དང༌། ཐོབ་བྱ་འཕགས་སའི་སྨིན་བྱེད་དུ་མི་འགྱུར་ལ། ནམ་བཞི་པ་ཐོབ་པ་ན་དབང་བདུན་དང་དབང་གསུམ་ཐོབ་པའི་རྒྱུན་དེ་ཡང་འདིའི་བྱིན་གྱིས་བརླབས་པས་དེ་དག་ཏུ་འགྱུར་བ་ཡིན་ནོ། །ཡང་སློབ་མ་དང་སློབ་དཔོན་གྱི་དབང་གོང་མ་རྣམས་ལ་འཇིག་རྟེན་དང་འཇིག་རྟེན་ལས་འདས་པ་གཉིས་ཡོད་པ་ནི། རྒྱུ་ལས། འདིར་ནི་དབང་བསྐུར་རྣམ་པ་གཉིས་ཀྱང་བུ་ཡི་ཡོན་ཏན་དབང་གིས་འཇིག་རྟེན་འཇིག་རྟེན་འདས་པའོ། །གང་ཞིག་ཤེས་རབ་ཀྱི་ནི་ནུ་མ་ལ་རེག་གཞན་པ་བདུད་རྩི་མྱང་དང་འཁྱུད་པ་གང་ཡིན་པ། །ཤེས་རབ་དང་འགྲོགས་བྱང་
ཆུབ་སེམས་ནི་ཞུ་བ་དག་ལ་བཞི་པའི་སྐད་ཅིག་བདུད་རྩི་རྟགས་པ་གང༌། །འདི་དག་ཐམས་ཅད་ངེས་པར་འཇིག་རྟེན་པ་སྟེ་མཆོག་གི་སྙིང་རྗེ་ཡིས་ནི་ལམ་གྱི་རྒྱུ་རུ་བསྟན། །འཇིག་རྟེན་འདས་པའི་དབང་གང་མཆོག་གི་རྒྱལ་བའི་བདག་པོའི་ཕྱག་རྒྱ་མཆོག་ལ་རྗེས་སུ་སྦྱོར་ བའོ། །ཞེས་གསུངས་པས། མདོར་ན་འཇིག་རྟེན་ལས་འདས་པའི་དབང་བཞི་པ་ཁོ་ན་འཇིག་རྟེན་ལས་འདས་པ་ཡིན་གྱི། གཞན་ཐམས་ཅད་འཇིག་རྟེན་པའོ། །འཇིག་རྟེན་ལས་འདས་པ་ཉིད་ཀྱི་ཕྱིར་གོང་མ་ཆེན་པོ་ཞེས་པ་ཡང་བཞི་པ་འདི་ཁོ་ནའོ། །ཡང་ངེས་དོན་གྱི་དབང་ཞེས་བྱ་བ་ནི། ངེས་དོན་དོན་དམ་ལ་འཇོག་པ་ལྟར་ན་འཇིག་རྟེན་ལས་འདས་པའི་དབང་བཞི་པ་ལ་སྤྱི་ལྡོག་ནས་སྦྱར་ན་རུང་བ་ཙམ་ཡིན་མོད་ཀྱི། དབང་ལེའི་འགྲེལ་ཆེན་ལས། དེ་ལ་རེ་ཞིག་ངེས་པའི་དོན་བརྗོད་པར་བྱ་སྟེ་ཞེས་སོགས་ཀྱི་དོན་ནི། འབྲས་བུའི་དབང་ལ་ངེས་དོན་གྱི་དབང་དུ་བཤད་པ་ཡིན་པས། གང་དག་རིག་མ་གཅིག་དང་བཅས་པའི་དབང་གོང་མ་ནི་དྲང་དོན་གྱི་དབང་དང༌། རིག་མ་བཅུ་དང་བཅས་པ་ལ་ངེས་དོན་ཟེར་བ་ནི། དྲང་དོན་ངེས་དོན་གྱི་གོ་བ་ཙམ་ཡང་མ་ཆགས་ཤིང༌། དྲང་དོན་གྱི་སྒྲ་བཤད་བྱེད་པའི་ཚེ། དབང་གོང་མ་གཞན་ཡོད་པས། གཞན་དུ་དྲངས་པ་ཞེས་འཆད་པ་ནི་སློབ་མའི་གོང་མ་གསུམ་གོང་མ་མ་ཡིན་པར་སོང་བས་ཤིན་ཏུ་ཐ་ཆད་དེ། རྒྱས་འགེབས་མི་འོས་པ་ལ་གཞན་གྱིས་རྒྱས་འགེབས་བྱས་པའི་རང་རྟགས་བསྟན་པའོ། །འཕྲོས་དོན་དུ་སའི་དག་པ་ཡང་གོ་སླ་ལ། དབང་བདུན་གྱི་སྐབས་སུ། དུས་སྦྱོར་གྱི་རླུང་བདུན་འགགས་པའི་སར་གསུངས་པས། གོང་མ་བཞི་ལའང་ཏིང་ངེ་འཛིན་གྱི་ས་ཕྱི་མ་ལྔའི་དག་པ་སྦྱོར་དགོས་ཤིང༌། ང་རྒྱལ་བཟུང་བའི་སྔགས་དོན་གྱི་སྐབས་གོང་མ་བཞི་ལ།
མི་གཡོ་བ་ལ་སོགས་པ་འཕགས་ས་ལྔའི་དག་པ་དངོས་སུ་མཛད་པས། དབང་བདུན་ལ་ཡང་འཕགས་ས་བདུན་གྱི་དག་པ་སྦྱོར་དགོས་ཏེ། ས་བཅུ་གཉིས་པོ་གོང་འོག་གཉིས་ཀ་མཚན་ཉིད་མཚུངས་ཤིང་རྒྱུ་འབྲས་ཀྱི་འབྲེལ་པ་ཅན་ཡིན་པའི་ཕྱིར་གཅིག་ལ་སྦྱར་བས་གཅིག་ཤོས་ལ་འབྱོར་བར་ཡང་འགྱུར་རོ། །དབང་བཅུ་གཅིག་ས་བཅུ་གཉིས་དང་སྦྱར་བ་འདིས་སློབ་མའི་དབང་ལ་འདས་པའི་བཞི་པ་མི་བྱེད་པ་བཀག་སྟེ། ས་བཅུ་པ་དང་བཅུ་གཉིས་པའི་བར་དུ་ཕྲུགས་གཅིག་པོ་དེ་ལ་མི་ཐེ་བ་ཁྱེད་དག་གོང་ཆེན་གྱི་མིང་འདོགས་པའི་དབང་གསུམ་གྱིས་བར་ཆོད་པས་ཤིན་ཏུ་མི་རིགས་པའི་ཕྱིར་དང༌། དེ་དག་རེ་རེ་བཞིན་གྱི་དག་པའང་ཕྲུགས་གཅིག་ལ་ཁས་ལེན་ན། ས་བཅུ་པའམ་བཅུ་གཅིག་པའི་རྗེས་སུ་སླར་བརྒྱད་དགུ་སོགས་བགྲོད་དགོས་པར་འགྱུར་བ་དང༌། དེ་དག་ཕྲུགས་གཞན་ཡིན་པས་སྐྱོན་དེ་མེད་སྙམ་ན། ཕྲུགས་གཅིག་ལས་བཅུ་གཉིས་གྱི་དག་པ་ཚང་པའི་དབང་མི་སྲིད་པར་འགྱུར་རོ། །དེ་ཡང་འདོད་ན་དབང་བཅུ་གཅིག་ས་བཅུ་གཅིག་གམ་བཅུ་གཉིས་ཀྱི་དག་སྦྱོར་ཞེས་པའི་ཐ་སྙད་ཙམ་དང་ཡང་འགལ་བར་འགྱུར་ཏེ། དབང་བཅུ་བཞི་ས་བཅུ་གཅིག་གམ་བཅུ་གཉིས་དང་སྦྱོར་བ་ཁོ་ནར་སོང་བས་སོ། །གཞན་ཡང་རྫོགས་རིམ་གྱི་ཕྱག་རྒྱ་བཞིའི་ལུང་གོང་དུ་དྲངས་པ་དང༌། འཇིག་རྟེན་འཇིག་རྟེན་འདས་པའི་དབྱེ་བའི་ལུང་འདི་རྣམས་ཀྱིས་མོས་ཤིང་སྐལ་པ་དང་ལྡན་ན་སློབ་དཔོན་དང་སློབ་མར་འོས་པ་ཇི་ལྟར་ཡིན་ཡང་རུང༌། འཇིག་རྟེན་ལས་འདས་པ་བསྐུར་དགོས་པ་ཁོ་ནར་གསུངས་སོ། །སྐལ་བ་དང་མི་ལྡན་པ་དང་མི་མོས་པ་ལ་བསྐུར་པར་བྱ་བ་མ་ཡིན་མོད། དེ་ནི་འཇིག་རྟེན་ལས་འདས་པའི་བཞི་པར་མ་ཟད། དབང་བདུན་གྱི་བར་
དུ་ཡང་འདྲ་བས། སློབ་དཔོན་དང་སློབ་མའི་དབང་གི་དབྱེ་བར་མི་འགྱུར་རོ། །འོ་ན་དྲི་མེད་འོད་ལས། དབང་གོང་མ་ནི་རྣམ་པ་གཉིས་ཏེ་གཅིག་ནི་སེམས་ཅན་གཞུག་པའི་དོན་དང༌། ལམ་ཡོངས་སུ་ཤེས་པའི་དོན་དང༌། རྒྱུད་ཉན་པ་ལ་དབང་བའི་དོན་དུའོ། །གཞན་ནི་སློབ་དཔོན་ཆེན་པོའི་གནས་སྦྱིན་པ་དང༌། སྟོན་པ་པོ་བྱེད་པའི་སླད་དུའོ། །ཞེས་གསུངས་པས། དབང་གོང་མ་ལ་སློབ་མ་དང་སློབ་དཔོན་གྱི་དབང་གཉིས་སུ་གྲངས་ངེས་ཤིང༌། སློབ་མ་ནི་དཔལ་ལྡན་ཤེས་རབ་ནུ་མ་ལ་ཡང་ཞེས་སོགས་ཀྱིས་བསྟན། རྒྱུད་དང་འགྲེལ་པ་གཉིས་ཀ་ལས། སྐབས་དེར་འདས་པའི་བཞི་པ་མ་གསུངས་སོ་སྙམ་ན། འདིའི་དོན་གྱི་ངེས་པ་མྱུར་དུ་འཆད་པར་འགྱུར་མོད། ཅུང་ཟད་བཤད་ན་འདིར་དབང་གོང་མ་གཉིས་ཏེ་ཞེས་པ་ནི། སྡེ་ཚན་གཉིས་སུ་གྲངས་ངེས་མཛད་པ་ཡིན་གྱི། དངོས་པོ་གཉིས་སུ་གྲངས་ངེས་པ་ག་ལ་ཡིན། དཔེར་ན་ཆོས་ཐམས་ཅད་ནི་གཉིས་ཏེ་ཟག་བཅས་དང་ཟག་མེད་དོ་ཞེས་བརྗོད་ན། ཆོས་གང་ཅི་ཡང་རུང་བ་ཐམས་ཅད་ཡང་ན་ཟག་བཅས་ཡིན་ཏེ། མིན་ན་ཟག་མེད་ཡིན་ཞེས་པའི་དོན་ཡིན་གྱི། ཟག་བཅས་ཟག་མེད་ཀྱི་མཚན་གཞི་རེ་རེ་བ་གཅིག་ཏུ་གྲངས་ངེས་པ་ག་ལ་ཡིན། ཟག་མེད་ལ་ཡང་འདུས་བྱས་འདུས་མ་བྱས་སོགས་ནང་སེལ་མཚན་ཉིད་མི་འདྲ་བ་དུ་མ་ཡོད་ཅིང༌། ཟག་བཅས་ལ་ཡང་སྣོད་བཅུད་ཡུལ་ཡུལ་ཅན་སོགས་མཚན་ཉིད་མི་འདྲ་བ་མཐའ་ཡས་པ་ཡོད་པའི་ཕྱིར་རོ། །དེ་བཞིན་དུ་འདིར་ཡང་དབང་གོང་མ་ལ་སློབ་མའི་དབང་གི་སྡེར་གཏོགས་པ་དང༌། སློབ་དཔོན་གྱི་དབང་གི་སྡེར་གཏོགས་པ་གཉིས་སུ་གྲངས་ངེས་ཞེས་པ་ཡིན་གྱི། དེ་གཉིས་
ལ་དབང་ཆོག་མི་འདྲ་བ་རེ་རེར་ངེས་པ་ག་ལ་ཡིན། དེས་ན་འགྲེལ་པའི་ཚིག་ཉིད་ཀྱིས་གསལ་ཏེ། སློབ་མའི་དབང་འཇིག་རྟེན་པ་རྣམས་གསུངས་པའི་རྗེས་སུ་བསྐྱེད་རིམ་ཁོ་ན་སྒོམ་པ་དང༌། བསྡུས་རྒྱུད་གཞན་གྱི་ཚོགས་བཤད་དང༌། རྒྱུད་འདི་ཉིད་ཀྱི་ཡང་དུམ་བུ་ཅི་རིགས་པ་ཉན་པ་ལ་དེ་ཙམ་བསྐུར་བ་ཡིན་ཏེ། ཇི་སྐད་དུ། སེམས་ཅན་གཞུགས་པའི་སླད་དུ་འཇིག་རྟེན་ཀུན་རྫོབ་ཀྱི་དབང་རྣམ་པ་བཞིའི་ངེས་པའོ། །ཞེས་གསུངས་པས། འདི་ནི་ད་ལྟ་དངོས་སུ་དབང་བཞི་པའི་སྐལ་བ་མེད་པའི་སེམས་ཅན་རྣམས་རིམ་གྱིས་འཇིག་རྟེན་ལས་འདས་པའི་བཞི་པ་ལ་འཇུག་པའི་སླད་དུ། ད་ལྟ་དངོས་སུ་འཇིག་རྟེན་པའི་ནང་ཚན་གཅིག་ལ་བཞི་པར་མིང་བཏགས་ཏེ། དབང་བཞི་ཆ་ཚང་ཡིན་པ་ལྟར་བཅོས་ནས་སྦྱིན་པའོ། །འདིའི་ཤུགས་ལ་ལམ་ཡོངས་སུ་ཤེས་པའི་དོན་ཞེས་པ་ནི། དེ་འཕྲལ་ཉིད་དུ་བཞི་པ་མི་བསྐུར་ཡང་རབ་དབྱེ་འཆད་དགོས་པའི་དམིགས་གསལ་ནི། འཇིག་རྟེན་པའི་ལམ་ནི་དངོས་སུ་གསལ་བར་གོ་བ་དང༌། འཇིག་རྟེན་ལས་འདས་པའི་ལམ་སྒོམ་པའི་ལག་ལེན་དང་མཚན་ཉིད་གསལ་བར་མ་རྟོགས་ཀྱང༌། འདི་ལས་གཞན་དུ་འཇིག་རྟེན་ལས་འདས་པའི་ལམ་ཆེས་མཆོག་ཏུ་གྱུར་པ་ཕན་ཡོན་འདི་ལྟ་བུ་དང་ལྡན་པ་ཡོད་ དོ། །ཞེས་དད་པ་བསྐྱེད་ཅིང་རགས་པའི་ཚུལ་དུ་གོ་བ་ཤར་བ་ནི། ལམ་གཉིས་པོའི་ཁྱད་པར་གྱི་དམིགས་ཅུང་ཟད་ཕྱེ་བ་ཡིན་པས། དེའི་དོན་དུ་དབང་གི་རབ་བྱེད་མན་ཆད་མཐའ་དག་སྦྱིན་པ་ཡིན་ནོ། །སྔ་མ་ནི་རེ་ཞིག་བཞི་པའི་ལམ་ལ་དད་པ་མེད་པ་ཡིན་ལ། འདི་ནི་ད་ལྟ་
དངོས་སུ་བཞི་པ་སྟོན་དུ་མི་རུང་ཡང་དད་པ་ཡོད་པ་དག་ཡིན་ན། དེའི་མཚན་ཉིད་བསྟན་པས་ཀྱང་རུང་མོད་ད་ལྟ་ཉམས་མྱོང་འཕྲལ་དུ་སྐྱེ་མི་ཐུབ་པའོ། །ཉམས་མྱོང་འཕྲལ་དུ་སྐྱེར་རུང་གི་སློབ་མ་དང༌། སྒོམ་པ་ལ་གཙོ་བོར་མི་བྱེད་ཀྱང༌། དད་ཅིང་རྒྱུད་མཐའ་དག་གོར་རུང་བས་བློ་སྟོབས་ཅན་ཉན་པར་འདོད་པ་ཡིན་ན། འཇིག་རྟེན་ལས་འདས་པའི་དབང་བཞི་པ་ཡང་བསྐུར་དགོས་ཏེ། དེ་ལྟར་གདུལ་བྱ་མི་འདྲ་བ་གསུམ་གྱི་སྒོ་ནས་དབང་བསྐུར་ཚུལ་གསུམ་བྱུང་ཡང་ཐམས་ཅད་སློབ་མའི་དབང་དུ་རིག་གཅིག་གོ །ཞེས་གོ་བར་བྱའོ།། །།བཞི་པ་རྗེས་སློབ་མ་དང་སློབ་དཔོན་གྱི་བྱ་བ་ཅུང་ཟད་བཤད་པ་ལ། དང་པོ་ཡོན་དབུལ་བ་ནི། རྒྱུད་ལས། དྲུག་ཆ་ལུས་ཀྱི་ནང་ནས་ལག་པ་རྐང་པ་ལུས་དག་ལས་ནི་ཡན་ལག་མཆོག་ཀྱང་སྦྱིན་པ་སྟེ། །ལས་ཀྱི་དབང་པོ་རྣམས་ལས་ངག་དང་དབང་པོ་རྣམས་ཀྱི་ནང་ནས་ཡོན་ཏན་དང་བཅས་ཡིད་དག་ཀྱང༌།། ཁམས་ཀྱི་ཆ་ཤས་རྣམས་ཀྱི་ནང་ནས་རྐང་གཉིས་པ་དང་ཕྱུགས་ཀྱི་ཚོགས་ལས་དེ་ཉིད་ཆ་ཡི་གཞན། །མཆོག་གི་ཕྱག་རྒྱ་རྗེས་སུ་རིག་པ་སློབ་དཔོན་ལ་ནི་རབ་ཏུ་ཕུལ་ན་བདེ་བའི་གནས་སུ་འགྲོ། །ཞེས་གསུངས་ཏེ། སྤྱིར་དངོས་པོ་ཐམས་ཅད་ཀྱིས་བླ་མ་མཉེས་པར་བྱེད་པ་ཡིན་ཡང་ཆུང་མཐའ་བཟུང་ན། དབང་བསྐུར་བའི་སློབ་དཔོན་ལ་ལུས་ལ་སོགས་པ་དངོས་པོ་ཐམས་ཅད་ཀྱི་དྲུག་ཆ་འབུལ་ལོ། །ལུས་ཀྱི་དྲུག་ཆ་ཡན་ལག་མཆོག་ནི། ཕྱག་འཚལ་བའི་དོན་དང༌། ལས་དབང་གི་དྲུག་ཆ་དག་ནི། བདེན་པར་སྨྲ་ཞིང་བསྔགས་པ་བརྗོད་པའི་དོན་དང༌། དབང་པོའི་དྲུག་ཆ་ཡིད་ནི་གུས་པ་དང་བཅས་ཤིང༌། གཡོ་
སྒྱུ་བྲལ་བའི་དོན་དང༌། ཁམས་ཞེས་བྱ་བ་ནོར་དང་འབྲུ་སོགས་སེམས་མེད་པའི་རྫས་སྔར་ཡོད་གསར་བྱུང་ཐམས་ཅད་ཀྱི་དྲུག་ཆ་ནི། རྣལ་འབྱོར་མ་སོགས་མཆོད་པའི་དོན་དང༌། སེམས་དང་བཅས་པ་མི་དང་དུད་འགྲོ་རྐང་གཉིས་རྐང་བཞི་རྣམས་ཀྱི་དྲུག་ཆ་ལས་བྱེད་པའི་དོན་དང༌། རྗེས་སུ་ཆགས་པའི་དོན་དུ་ཐབས་ཟླའམ་རིགས་ཀྱི་བཟང་མོ་ཟླ་བ་རེ་རེའི་ནང་དུ་ལན་ལྔ་སྟེ་དྲུག་ཆ་ནི། གསང་བའི་སྦྱིན་པ་རྫོགས་པར་བྱ་བའི་དོན་དུ་འབུལ་བར་གསུངས་སོ། །དེ་དག་ཀྱང་རིགས་དྲུག་གི་ཡེ་ཤེས་ཐོབ་པར་འགྱུར་བའི་རྒྱུར་རིགས་དྲུག་གི་དག་པ་ཅན་ཡིན་ཏེ། སྤྱི་སྐད་དང་མཚུངས་པར་སྦྱར་ནས་དང་པོ་གསུམ་པོ་ལུས་ངག་ཡིད་གསུམ་ཡིན་པའི་ཕྱིར། རྣམ་སྣང་སྣང་མཐའ་མི་བསྐྱོད་གསུམ། ནོར་དང་འབྲུ་རིན་འབྱུང༌། རྐང་འགྲོ་དོན་གྲུབ་རྗེས་ཆགས་རྡོ་རྗེ་སེམས་དཔའ་མཆོད་པའོ། །གཞན་ཡང་བུམ་པའི་གོས་ཟུང་དང་སྟོད་སྐོར་ནི། བུམ་སྐྱོང་གི་རྣལ་འབྱོར་མ་རྣམས་ལ་སྦྱིན་ནོ། །སྟོད་སྐོར་གཞན་དང༌། གོས་ཟུང་དང༌། ཅོད་པན་ཏེ་ཐོད་བཅིང་པ་ལ་སོགས་པ་ནི་སྒོའི་སློབ་དཔོན་རྣམས་ལའོ། །ལྷག་མ་དཀྱིལ་འཁོར་གྱི་ཡོ་བྱད་ཐམས་ཅད་ནི་རྡོ་རྗེ་སློབ་དཔོན་ཉིད་ཀྱིས་དབང་སྟེ། དེ་བཞིན་དུ་སློབ་དཔོན་འཁོར་བཅས་ཚོགས་ཀྱི་འཁོར་ལོས་མཉེས་པར་བྱེད་ཅིང༌། དཀྱིལ་འཁོར་གྱི་ལྷ་ཚོགས་རྣམས་སྦྱིན་སྲེག་རྒྱ་ཆེན་པོས་ཀྱང་ཚིམ་པར་བྱའོ།། །།གཉིས་པ་འགྲོ་བ་སྦྱང་པ་ནི། བདག་འཇུག་གམ་སློབ་མ་དབང་བསྐུར་གྱི་ཐ་མར་སེམས་ཅན་ཐམས་ཅད་ལ་སྙིང་རྗེས་དབང་བསྐུར་བར་བྱའོ། །རྒྱུད་ལས། སེམས་ཅན་གང་དག་
རྣམ་གསུམ་སྲིད་པར་གནས་རྣམས་འཇིག་རྟེན་ཁམས་ལས་ཡེ་ཤེས་རྡོ་རྗེའི་ལྕགས་ཀྱུ་ཡིས། །བཀུག་སྟེ་དེ་རྣམས་མཐའ་དག་མཆོག་གི་སྙིང་རྗེས་དཀྱིལ་འཁོར་དུ་ནི་སངས་རྒྱས་རྣམས་དང་རྡོ་རྗེ་ཡི། །བདུད་རྩིས་མངོན་པར་དབང་བསྐུར་ནས་ནི་དྲི་མེད་རི་བོང་ཅན་ལུས་རྡོ་རྗེ་ཅན་གྱི་ལམ་ཐོབ་པ། །དྲི་མ་རྣམ་པར་བྲལ་ཞིང་བྱང་ཆུབ་སྤྱོད་ལ་རྗེས་སུ་གནས་རྣམས་རང་གི་གནས་སུ་བཏང་བར་བྱ། །ཞེས་གསུངས་ཏེ་ལག་ལེན་དཀྱིལ་འཁོར་རྒྱལ་མཆོག་གི་སྐབས་ཀྱི་སྙིང་རྗེའི་དབང་བསྐུར་བཞིན་དུ་མཛད་ལ། འདིའི་འགྲེལ་བར། སེམས་ཅན་རྣམས་ལ་བུམ་པ་བཅུས་དབང་བསྐུར་བར་བཤད་པས་དེ་བཞིན་དུ་སྒོམ་མོ། །འདི་ནི་དཀྱིལ་འཁོར་གཤེགས་གསོལ་གྱི་རྗེས་སོགས་གང་དུ་སྒོམ་ཀྱང་རུང་མོད་ཀྱི། མདུན་བསྐྱེད་དཀྱིལ་འཁོར་གཤེགས་སུ་མ་གསོལ་བ་ཉིད་ལ་འབྲེལ་ཆགས་ཤིང༌། ཆོ་གའི་ཡན་ལག་ཆད་མི་འགྲོ་བའི་དགོས་པ་ཡོད་པས། གནས་སྐབས་གཉིས་པོ་གང་རུང་གཅིག་ཏུ་ངེས་པར་བྱའོ།། །།བརྒྱད་པ་དཀྱིལ་འཁོར་གྱི་རྗེས་ཀྱི་བྱ་བའི་རིམ་པ་འཕྲོས་དོན་དང་བཅས་པ་ནི། དེ་ནས་རྗེས་ཆོག་ཅེས་སོགས་ཏེ། རྡུལ་ཚོན་གྱི་དཀྱིལ་འཁོར་ལ་མཆོད་ཅིང་བསྟོད་པ་དང་དངོས་གྲུབ་བླངས་ནས་གཤེགས་སུ་གསོལ་བ་དང༌། དཀྱིལ་འཁོར་བསྡུ་ཞིང་རྡུལ་ཚོན་ཆུ་བོར་སྤྱན་འདྲེན་པ་རྣམས་གསུངས་ཏེ། ཡིག་བརྒྱ། བཟོད་གསོལ་སོགས་ཅི་རིགས་པ་གཞན་ནས་ཁ་བསྐང་བའི་ལག་ལེན་ཆོ་གར་གསལ་ལ། རྡུལ་ཚོན་གྱི་ལྷ་བསྡུ་ཚུལ་གཉིས་ལས་རྒྱུད་ཀྱི་དངོས་བསྟན་ཡིན་པས་སྙིང་གར་བསྡུ་བ་གཙོ་བོར་བྱ་ལ། འཇིག་རྟེན་པའི་ལྷ་རྣམས་གཤེགས་སུ་གསོལ་པ་ནི། མཆོད་པ་དང་
གཏོར་མའི་མགྲོན་དུ་བྱོན་པའི་ཕྱོགས་སྐྱོང་ལ་སོགས་པ་རྣམས་ཡིན་གྱི། ཁ་ཅིག་ཁོར་ཡུག་གི་ལྷ་ཡིན་པར་འདོད་པ་ནི་བཞད་གད་ཀྱི་གནས་ཏེ། དེ་སྐད་ཅེས་སྨྲ་བ་དེ་དག་ཁོར་ཡུག་གི་ལྷ་དམ་ཚིག་པ་འབད་པས་བསྐྱེད་པར་འདོད་པས། ས་བོན་ཕྱག་མཚན་སོགས་ལས་འབད་པས་བསྐྱེད་པའི་དམ་ཡེ་དབྱེར་མེད་དེ་དག་ཨུ་ཤི་ར་འདོན་པ་བཞིན་དུ་རྩ་བཏོན་བྱས་ནས་རྒྱང་རིང་དུ་འཕེན་པའི་ལག་སྟོབས་ཅན་དམ་ཡེ་དབྱེར་མེད་དཀྱིལ་འཁོར་གཅིག་གི་ལྷ་ཚོགས་ལ་ནང་དུ་བསྡུད་རྒྱུ་དང་ཕྱིར་འབུད་རྒྱུའི་དབྱེ་བ་ཤེས་པའི་སྤྱང་གྲུང་འཛོམ་པོ་ཡ་མཚན་ལས་ཀྱང་ཡ་མཚན་ཆེ་བའི་ལག་ལེན་མཁན་པོ་ནང་འགལ་གྱི་ཁུར་ཆེན་པོ་འཛིན་པའོ། །ཨ་ཤྭ་ཐའི་འདབ་མ་ནི་བྱང་ཆུབ་ཤིང་གི་ལོ་མ་ཡིན། སྐམ་པའི་ཕྱག་རྒྱ་ནི་རྡོ་རྗེ་རྩེ་ལྔ་པའི་ཕྱག་རྒྱ་དང་འདྲ་བར། དཔལ་མཆོག་འགྲེལ་ཆེན་ལས་འབྱུང་བ་ལྟར་རམ། སྒྱུ་དྲའི་འགྲེལ་པ་དང་ཀླུ་བྱང་གིས་བཤད་པ་ལྟར། ཧཱུྃ་མཛད་ཀྱི་ཕྱག་རྒྱ་འདྲ་རུང་ལས་འཛུབ་མོ་གཉིས་གདུ་བུ་ལྟ་བུར་བྱས་པས་ཕུར་བུ་འདོན་ནོ། །ཕུར་བུའི་ཁྲོ་བོ་ཉིད་དང་སྲུང་བའི་ཁྲོ་བོ་ལ་སྔར་ཆོ་གའི་སྐབས་ཐམས་ཅད་དུ་མཆོད་གཏོར་དཀྱུས་ཀྱི་སྐབས་སུ་ཡང་ཡང་ཕུལ་བ་དེས་ཆོག་གི དེ་མི་བྱེད་པར་ཕུར་བུ་སྲུང་བའི་ཁྲོ་བོ་ལ་སྒོས་སུ་གཏོར་འབུལ་སྐབས་འདིར་བྱེད་པ་ནི་གནད་འགག་ཆེ་ཤོས་བརྗོད། གནད་མེད་པ་ལ་གལ་པོ་ཆེ་ཡིན་པ་ལྟར་བྱེད་པ་བྱི་བ་ཤོར་ནས་སྐར་ཁུང་འགགས་པའི་དཔེ་དང་ལྟད་མོ་བ་བླུན་པོ་རྣམས་བསླུ་བར་བྱེད་པའོ། །དེ་ནས་དཀྱིལ་འཁོར་ཁང་པའི་ས་གཞིར་བ་བྱུང་གིས་ཉེ་བར་བྱུགས་ཤིང༌། ལོ་ལྔ་ནས་བཅུའི་བར་གྱི་གཞོན་ནུ་མ་དག་འོ་མ་མར་དང་འོ་ཐུག་ཀ་ར་ལ་དུ་ལ་སོགས་པས་ཚིམ་
པར་བྱ་སྟེ། གཞོན་ནུ་མ་མཆོད་པའི་ཆོ་གས་སོ། །གཞན་ཡང་གཞོན་ནུ་མ་དེ་དག་ལ་ཏམ་བུ་ལ་དང་དྲི་དང་སྤོས་དང་མེ་ཏོག་དང༌། འབྲས་བུ་དང་བུམ་པའི་མགྲིན་པ་བཅིངས་པའི་རས་ཡུག་སོགས་སྦྱིན་ནོ། །དེ་ནི་སྔ་དྲོའི་དང་པོར་ཡིན་ལ། དེ་ནས་སྔ་དྲོ་ཆུ་ཚོད་བདུན་པ་ལ། དགེ་སློང་དང་དགེ་སློང་མའི་དགེ་འདུན་ཤ་སྤངས་པའི་ཁ་ཟས་གཙང་མས་ཚིམ་པར་བྱ་ཞིང༌། དེའི་རྗེས་སུ་སློབ་དཔོན་སློབ་མར་བཅས་པ་དཔའ་བོ་དཔའ་མོའི་སྟོན་མོ་དང་ཚོགས་ཀྱི་འཁོར་ལོས་དགྱེས་ཤིང་ཚིམ་པར་བྱས་ནས། འཁོར་ལོ་མཆོད་པའི་ཡོན་ཡང་དབུལ་བར་བྱའོ། །དེ་དག་ཀྱང་རྒྱུད་ལས། མཐར་ནི་སྦྱིན་སྲེག་བྱས་ནས་རང་གི་སྙིང་གའི་པདྨར་ཡེ་ཤེས་སེམས་དཔའ་རབ་ཏུ་གཞུག་བྱ་སྟེ། །འཇིག་རྟེན་པ་རྣམས་རང་གི་གནས་སུ་མཐའ་དག་རྡུལ་ཚོན་རྣམས་ཀྱང་དག་པའི་ཀླུང་ལ་སྤྱན་དྲངས་བྱ། །ཏམ་བུ་ལ་དང་དྲི་སྤོས་མེ་ཏོག་འབྲས་བུར་བཅས་དང་རས་ཡུག་དག་ནི་གཞོན་ནུ་མ་རྣམས་ལ། །བྱིན་ནས་སློབ་དཔོན་སློབ་མར་བཅས་པ་མཐའ་དག་ཚོགས་ཀྱི་རིགས་ནི་ཇི་ལྟར་འདོད་པར་མཆོད་བྱས་ཏེ། །སློབ་མ་ལ་ནི་སྣང་བ་རབ་སྦྱིན་རབ་མཆོག་ཚོགས་ཀྱི་རིགས་ནི་རང་རང་གནས་སུ་གཤེགས་སུ་གསོལ། །ཞེས་གསུངས་པ་རྣམས་ཀྱིས་ལེགས་པར་བསྟན་ནོ།། །།ད་ནི་འཕྲོས་དོན་བརྗོད་ན། རྒྱུད་འདིར་ཞལ་གསལ་དུ་ཀུན་སྤངས་ཀྱི་དབང་བསྐུར་ཡང་བཤད་དེ། རྒྱུད་ལས། རྫས་རྣམས་མེད་པའི་མངོན་པར་དབང་བསྐུར་རྒྱལ་བའི་བདག་པོའི་བཀའ་ཡིས་ཀུན་སྤངས་ལ་ནི་སྦྱིན་པར་བྱ། །དེ་བཞིན་དུ་བ་ལ་སོགས་ལམ་དང་མཐའ་དག་ཡོན་ཏན་གཏེར་ནི་རྩ་ཡི་རྣལ་འབྱོར་ལྡན་པ་སྟེ། །བསྟེན་པའི་དོན་དུ་
ལག་པའི་ཕྱག་རྒྱ་རང་གི་སྙིང་གི་དབང་སོན་སྐྱོན་རྣམས་ཀུན་ལས་རྣམ་པར་གྲོལ། །གཞན་རྣམས་ལ་ནི་རྒྱལ་བ་མཆོག་གི་སྙིང་པོ་ཡུམ་གྱི་མཆོད་པ་རྣམ་དམན་སྦྱིན་པ་ཉིད་མི་བྱ། །ཞེས་གསུངས་ཏེ། སྐབས་དེར་ཡུལ་དང་དུས་དང་བྱ་བའི་སྒོ་ནས་རྩོལ་བ་ཆུང་ངུས་འགྲུབ་ན་ལྟ་ཅི་སྨོས། མཐའ་ན་ལོ་གཅིག་ཚུན་ལའང་རྩོལ་བ་ཆེ་རབ་ཀྱིས་འགྲུབ་རུང་དུ་ཡོད་པའི་འབྱོར་ལྡན་ཡིན་ན། དང་པོ་གསོལ་གདབ་ཀྱི་ཡོན་ནས་བརྩམས། ཐ་མ་ཚོགས་ཀྱི་འཁོར་ལོའི་བར་གྱི་ཡོ་བྱད་མ་ལུས་པ་ཐམས་ཅད་སློབ་མས་འབུལ་དགོས་ཏེ། ཐ་ན་དེའི་རིན་འབུལ་བ་ཚུན་ཆོད་ཀྱིས་ཀྱང་སྒྲུབ་དགོས་སོ། །གལ་ཏེ་སློབ་མ་འབྱོར་བ་མེད་ཅིང་སྐལ་བ་དང་ལྡན་པ་ཡིན་ལ། སློབ་དཔོན་འབྱོར་པ་དང་ལྡན་པ་ཡིན་ན། སློབ་མ་རང་ཉིད་ཀྱིས་གུས་པ་དང་ལུས་ངག་གི་བྱ་བ་དང༌། གསུང་བཞིན་སྒྲུབ་པའི་དཀའ་སྤྱད་ཀྱིས་ཆོག དབང་གི་ཡོ་བྱད་མེད་མི་རུང་ཆ་ཚང་བ་ཙམ་སློབ་དཔོན་གྱིས་བཏོན་ཏེ། རྫས་ཅི་རིགས་དང་བཅས་པའི་དབང་བསྐུར་སྦྱིན་ནོ། །དེས་མཚོན་པའི་ཕན་ཚུན་འབྱོར་བ་ཆེ་ཆུང་དང་བསྟུན་ནས་ཡོ་བྱད་ཀྱི་ཁྱད་པར་འབྲི་བསྐྱེད་རྣམས་རིག་པས་བརྟགས་ཏེ་སྦྱོར་ལ། སློབ་དཔོན་དང་སློབ་མ་གཉིས་ཀར་ཀུན་སྤངས་ཉག་གཅིག་ཡིན་ཞིང༌། ཡོ་བྱད་རྒྱས་པ་སྒྲུབ་པའི་ཐབས་མེད་ན། རྡུལ་ཚོན་ནམ་རས་བྲིས་ཀྱི་དཀྱིལ་འཁོར་ཙམ་བཞེངས་ནས། མཆོད་པ་དང་དབང་རྫས་ཅུང་ཟད་ཙམ་དང་བཅས་ནས་དབང་བསྐུར་བར་བྱའོ། །གལ་ཏེ་དེ་ཙམ་ཡང་མེད་ཅིང་ཐབས་ཀྱིས་འཚོལ་དུ་རུང་བའང་མ་ཡིན་ལ། སློབ་མ་སྐལ་བ་དང་ལྡན་པའི་དུས་ཀྱི་དབང་གིས་སྐབས་དེར་ངེས་པར་སྦྱིན་
དགོས་ན། རྫས་ཐམས་ཅད་དང་བྲལ་བ་ཏིང་ངེ་འཛིན་དང་ཚིག་གི་བརྗོད་པ་འབའ་ཞིག་གིས་དབང་བསྐུར་བས་ཀྱང་རུང་བ་ཉིད་དེ། དོན་དམ་བསྙེན་པ་ལས། རྣམ་པར་དག་པའི་སློབ་མ་ནོར་ནི་མེད་པ་ལ། །རྫོགས་པའི་བྱང་ཆུབ་རྒྱུ་རུ་དབང་བསྐུར་རིན་པོ་ཆེ། །རང་གི་ངག་གིས་ཀུན་ནས་རྣམ་པར་དག་པ་འདི། །མཆོད་པ་མེད་ནའང་བླ་མ་ཡིས་ནི་སྦྱིན་པར་བྱ། །ཞེས་སོ། །རང་གི་ངག་གིས་ཞེས་པས་དུང་ཆོས་དང་ཅོད་པན་སོགས་དབང་རྫས་མེད་ཀྱང་ཆུ་དབང་སོགས་ཚིག་གིས་སྟེར་བའོ། །སློབ་དཔོན་དང་སློབ་མའི་དབང་གོང་མ་རྣམས་ལ་ལས་ཀྱི་ཕྱག་རྒྱ་མ་རྙེད་ན། རང་ལུས་ལག་པའི་ཕྱག་རྒྱའམ་ཡིད་ཀྱི་ཕྱག་རྒྱ་ཁོ་ནས་སྒྲུབ་ལ། གཞན་དུ་ན་རྙེད་དུ་རུང་བས་ཤེས་རབ་ཡུམ་གྱིས་དམན་པ་ལ་དབང་གོང་མ་བསྐུར་བར་མི་རུང་བར་གསུངས་པ་མཚོན་བྱེད་དེ། སློབ་མ་འབྱོར་པ་དང་ལྡན་ཡང༌། སློབ་དཔོན་ལ་ཇི་སྐད་བཤད་པའི་རྫས་མ་ཕུལ་བར་སྟོབས་ཀྱིས་དབང་བསྐུར་ཞུ་བ་ནི། འཇིག་རྟེན་འདི་ཉིད་དུ་ཡང་མི་འདོད་པ་སྣ་ཚོགས་པ་དང༌། ཕྱི་མར་ཡང་སྡུག་བསྔལ་གྱི་རྒྱུའོ། །དེ་ལྟར་ན་ཀུན་སྤངས་ཀྱི་དབང་ཁོ་ན་ལ་ཡང་ཏིང་ངེ་འཛིན་གྱི་སྒོ་ནས་དཀྱིལ་འཁོར་དང་མཆོད་པ་སོགས་ཐམས་ཅད་སྒྲུབ་དགོས་ན། དམིགས་པ་ལ་གསལ་སྣང་ཐོབ་པས་སོ་སོའི་ཐད་ཀ་དེར་ལན་རེ་རེས་ཀྱང་འགྲུབ་པ་ཡིན་མོད། མ་ཐོབ་ན་སྒྲིམ་ཞིང་རིག་པའི་ཤུགས་ཕྱུང་ནས་ལན་མང་པོར་བསྐྱར་གྱིན་གསལ་བཏབ་སྟེ། ཡིད་ཆེས་པར་བྱེད་པ་དཔོན་སློབ་གཉིས་ཀས་བྱེད་དགོས་སོ། །ཀུན་སྤངས་ལ་ནི་སྦྱིན་པར་བྱ། །ཞེས་པ་ཡན་ཆད་དབང་བདུན་དང་བུམ་པ་སོགས་གསུམ་
ཡིན་ལ། བཞི་པ་ལ་ནི་ཀུན་སྤངས་དང་འབྱོར་ལྡན་ལ་ཁྱད་མེད་པས། འགྲེལ་བར་དེ་བཞིན་དུ་བཞི་པ་དུ་བ་ལ་སོགས་པའི་ལམ་སྦྱིན་པར་བྱ་སྟེ། ཞེས་པ་སྟེ་ཚིག་གིས་བརྗོད་པར་བྱའོ། །ཞེས་གསུངས་པ་འདིས་ཀྱང༌། སློབ་མའི་དབང་ལ་འཇིག་རྟེན་འདས་པའི་བཞི་པ་དགོས་པར་གསལ་ལ། བཞི་པའི་མན་ངག་ཚིག་གིས་བརྗོད་དགོས་མོད་ཀྱང༌། འདིར་ཚིག་གིས་བརྗོད་པར་བྱའོ་ཞེས་པ་ནི། སྔོན་མ་ཞེས་པ་སྟེ། ཞེས་པ་ཡན་ཆད་ཀྱི་ཚིག་གིས་མཚམས་བཅད་ཟིན་པས། བཞི་པ་ཁོ་ནའི་ཁྱད་ཆོས་སུ་མི་སྦྱོར་ཏེ། དང་པོར་གོས་དང་མིག་དར་ནས་བརྩམས་ཏེ། བར་དུ་ཅོད་པན་དར་དཔྱངས་ལ་སོགས་པ་དང༌། མཐར་ཤེས་རབ་ཡེ་ཤེས་ཀྱི་རིག་མའི་བར་དུ་རྫས་ཀྱི་དངོས་པོ་མེད་པའི་ཕྱིར་ཚིག་གིས་བརྗོད་ཅེས་པའོ། །ཡང་དེའི་འཕྲོས་ལས་འགྲེལ་ཆེན་དུ་འདི་སྐད་ཅེས། དེ་བཞིན་དུ། མཐའ་དག་ཡོན་ཏན་གཏེར་ནི་རྩ་བའི་རྣལ་འབྱོར་དང་ལྡན་པ་སྟེ། མི་འགྱུར་བའི་བདེ་བ་ཆེན་པོའི་སྐད་ཅིག་ཚིག་གིས་བརྗོད་པར་བྱའོ། །ཞེས་པ་ནི། དབང་བཞི་པའི་དུས་སུ་དུ་བ་ལ་སོགས་པ་རྟགས་བཅུ་ཐོག་མར་དགེ་བའི་ལམ་ངེས་པར་སྟོན་དགོས་པར་མ་ཟད། ལམ་གྱི་དུས་སུའང་དགོས་པ་ཤུགས་ལ་གོ་ནུས་ཤིང༌། དེ་བཞིན་དུ་རྩ་བའི་ཀུན་སྤྱོད་སྲོག་འཛིན་དང༌། མི་འགྱུར་བདེ་བའི་ལམ་དྲན་ཏིང་གི་མན་ངག་ཀྱང་སྟོན་དགོས་པས། ལམ་དངོས་དང་སྤོགས་ཆོག་ཏུ་ལས་རྒྱའི་ལག་ཁྲིད་དགོས་པ་དེ་ཡང་ཀུན་སྤངས་ཀྱི་རྣལ་འབྱོར་པས་མ་འགྲུབ་ན། དེའི་མན་ངག་རྣམས་སློབ་དཔོན་གྱིས་ཚིག་གི་སྒོ་ནས་བསླབ་
དགོས། ཞེས་པ་ཡིན་པས། དུ་བ་ལ་སོགས་ལམ་ཞེས་པ་དབང་དུས་དང༌། མཐའ་དག་ཡོན་ཏན་གཏེར་སོགས་སྦྱོར་དྲུག་གི་མན་ངག་སྟོན་པ་ལ་སྦྱོར་དགོས་སོ། །གཞན་དུ་ན། དབང་བཞི་པའི་དུས་སུ་སྦྱོར་དྲུག་དང་འབྲས་བུའི་ཚིག་བཤད་བྱེད་པ་ཙམ་ལ་གཉིས་ཀ་སྦྱོར་ན། དུ་བ་ལ་སོགས་ཀྱི་སོགས་ཁོངས་ནས། རྩ་བའི་ཀུན་སྤྱོད་སོགས་ཀྱང་འདུས་པས། སོགས་སྒྲ་དོན་མེད་དང༌། ཚིག་གིས་བརྗོད་པར་བྱའོ་ཞེས་ལན་གཉིས་ལྷག་པའི་སྐྱོན་དུ་ཐལ་བར་འགྱུར་རོ། །འདི་ནི་ཁྱོད་ཀྱིས་ནན་གྱིས་སྐྱོགས་པའོ་སྙམ་ན་མ་ཡིན་ཏེ། དེ་ཙམ་ལ་སྐྱོགས་མི་དགོས་པའི་ཕྱིར་ཏེ། ཚིགས་དབང་གི་དོན་གོང་དུ་བཤད་པ་ལྟར་བླ་མས་མན་ངག་ཚིག་གིས་བཅོད་པ་བཞིན་སློབ་མས་སྒོམ་པའི་དོན་དུ་འཆད་དགོས་པས། བཞི་པ་ཚིག་དབང་དུ་ཁོ་བོ་ཅག་ཀྱང་ཤིན་ཏུ་འདོད་པའི་ཕྱིར། འདིར་ཚིག་གིས་བརྗོད་པར་བྱའོ་ཞེས་པ་གཉིས་པོ་འདི། ཚིག་དབང་སྟོན་བྱེད་མ་ཡིན་ནོ་ཞེས་ཁོ་བོ་ཅག་སྨྲ་བ་ནི་ཁོ་བོ་ཅག་གི་འདོད་པ་བསྒྲུབ་པའི་ཕྱིར་སྐྱོགས་ཏེ་སྨྲས་པ་མ་ཡིན་གྱི། གཞུང་འགྲེལ་གྱི་དོན་ཇི་བཞིན་དུ་སྨྲས་པ་ཡིན་ནོ། །ཚིག་གིས་བརྗོད་པར་བྱའོ་ཞེས་པས་དམིགས་པ་བསྒོམ་རྒྱུ་མེད་པའི་ཚིག་བཤད་ཙམ་བྱའོ་ཞེས་པར་མི་འགྱུར་བས། དེ་ལྟར་འདོད་པའི་རྒྱབ་རྟེན་དུ་ཡང་མི་འགྲོ་ལ། དམིགས་པ་སྒོམ་པ་ལ་གནོད་བྱེད་དུ་ཡང་མི་འགྱུར་བས། འདི་ལ་ཁོ་བོ་ཅག་སྐྱོགས་བཤད་བྱེད་དགོས་པ་མེད་དོ། །འཕྲོས་པས་ཆོག་གོ། །།བདུན་པ་མཆོག་དབང་རྡོ་རྗེ་སློབ་དཔོན་གྱི་དབང་བྱེ་བྲག་ཏུ་གཏན་ལ་དབབ་པ་ལ་བདུན་ཏེ། དབང་གི་གྲངས་སྤྱིར་བཤད་པ། སློབ་དཔོན་གྱི་དབང་གི་ངོ་བོ།
དེའི་དབྱེ་བ་ལ་དོགས་པ་སྤོང་བ། གང་ལ་དབང་བསྐུར་བའི་ཡུལ་སློབ་མའི་ཁྱད་པར། ཆོ་ག་དངོས་ཀྱི་རིམ་པ་བཤད་པ། དེ་ལས་འཕྲོས་པའི་དོན་བཤད་པ། ངེས་པའི་དོན་གྱི་འཇུག་སྒོ་བསྟན་པའོ།། །།དང་པོ་ནི་དེ་ལ་རྒྱུད་འདིར་བུམ་དབང་ལ་ཡང་སློབ་དཔོན་གྱི་དབང་གི་ཐ་སྙད་ཙམ་རྒྱུད་སྡེ་གཞན་དང་གོ་བསྟུན་ནས་མཛད་པ་ནི་ཡོད་དེ། འགྲེལ་ཆེན་ལས། དེ་བཞིན་དུ་སློབ་དཔོན་ནི། རྒོད་པ་ཡོན་ཏན་གཉིས་ཀྱི་བདག་ཉིད་ཁུ་བའི་བདེ་བ་རྣམ་པར་དག་པས་སོ། །ཞེས་གསུངས། འོན་ཀྱང་རྒྱུད་འདི་དང་རྩ་བའི་རྒྱུད་ཀྱི་དགོངས་པས། རྡོ་རྗེ་སློབ་དཔོན་གྱི་དབང་ནི་ལོགས་པ་ཡིན་ཞིང༌། དེ་ཉིད་བསྡུས་རྒྱུད་གཞན་འགའ་ལས་ཀྱང་འབྱུང་སྟེ། །རེ་ཞིག་མཁའ་འགྲོ་མ་རྡོ་རྗེ་གུར་ལས། ཆུ་ཡི་དབང་ནི་དང་པོ་སྟེ། །ཅོད་པན་དབང་བསྐུར་གཉིས་པའོ། །གསུམ་པ་དར་དཔྱངས་དབང་བསྐུར་ཏེ། །རྡོ་རྗེ་དྲིལ་བུ་བཞི་པའོ། །ལྔ་པ་རང་གི་བདག་པོ་ཉིད། །མིང་གི་དབང་ནི་དྲུག་པ་སྟེ། །སངས་རྒྱས་རྗེས་གནང་བདུན་པར་འདོད། །བརྒྱད་པ་བུམ་པའི་དབང་ཡིན་ཏེ། །གསང་བའི་དབང་ནི་དགུ་པ་ཡིན། །ཤེས་རབ་དབང་བསྐུར་བཅུ་པའོ། །དེ་ཉིད་རྡོ་རྗེའི་རབ་སྦྱོར་གྱིས། །རྡོ་རྗེའི་བརྟུལ་ཞུགས་ཀུན་སྦྱིན་ཞིང༌། །རང་ཉིད་སྟོན་པར་ལུང་སྟོན་པ། །འདི་ཉིད་དབང་བསྐུར་ཆོ་ག་ཡིན། །ཞེས་གསུངས་ཏེ། འདི་ནི་ཕྱག་རྡོར་སྟོད་འགྲེལ་ལས་ལུང་དྲངས་པ་ལྟར་ཡིན་ལ། ད་ལྟ་བོད་དུ་འགྱུར་བའི་འགོས་འབྲོག་སོགས་ཀྱི་འགྱུར་ལ། གསུམ་པ་དར་དཔྱངས་ཞེས་པའི་ཚིག་མེད་ལ། དེའི་ཤུགས་རྒྱབ་པས་དབང་གཞན་རྣམས་ཀྱི་གྲངས་ཀྱང་རིམ་པས་འཕོས་ཏེ། ཤེས་རབ་དབང་བསྐུར་དགུ་པར་བྱུང་ལ།
གཞན་རྣམས་འགྱུར་ཁྱད་ཙམ་མ་གཏོགས་ཁྱད་མེད་དེ། དེས་ན་བྱང་ཆུབ་སེམས་དཔའི་འགྲེལ་པར་དྲངས་པ་ནི་ཤིན་ཏུ་རྣམ་པར་དག་པ་ཐེ་ཚོམ་མེད་པ་ཡིན་ལ། དཔེ་གཞན་ལས་བྱུང་བ་ཡང་སེམས་ཅན་བསམ་པའི་དབང་གིས་དེ་བཞིན་གཤེགས་པའི་སྨོན་ལམ་གྱི་སྟོབས་ལས་བྱུང་བ་ནི་ཡིན་ཏེ་འོང༌། ཡང་འཕགས་ཡུལ་དུ་ཕྱིས་བྱུང་བའི་པཎྜི་ཏ་འགའ་ཞིག་ལ་ཡིད་བརྟན་མེད་པའང་སྣང་བས། སངས་རྒྱས་ཀྱི་གསུང་དྲི་མ་མེད་པ་རང་རྟོག་ངན་པས་རྙོག་པར་མ་གྱུར་ཅིག དེ་ཉིད་རྡོ་རྗེའི་རབ་སྦྱོར་གྱིས། །ཞེས་པ་འདི་ནི། འཇིག་རྟེན་ལས་འདས་པའི་དབང་བཞི་པ་ཡིན་ལ། རང་ཉིད་སྟོན་པར་ལུང་སྟོན་པ་ཞེས་པ་རྡོ་རྗེ་སློབ་དཔོན་གྱི་དབང་ངོ༌། །འདིར་འཇིག་རྟེན་འདས་པའི་བཞི་པ་གསུངས་པའི་རྗེས་སུ། རྡོ་རྗེ་སློབ་དཔོན་གྱི་དབང་གསུངས་པ་ཉིད་ཀྱིས་ཀྱང་སློབ་མའི་དབང་ལ་བཞི་པ་ངེས་པར་དགོས་སོ།། །།གཉིས་པ་སློབ་དཔོན་གྱི་དབང་གི་ངོ་བོ་ནི། དཔལ་དུས་ཀྱི་འཁོར་ལོ་ལས་གསུངས་པའི་རྡོ་རྗེ་སློབ་དཔོན་གྱི་དབང་ནི་ངེས་པའི་དོན་གྱི་རྒྱུད་མ་ལུས་པ་འཆད་པ་དང༌། རྡོ་རྗེའི་རྣལ་འབྱོར་བསྒོམ་པས་སོ་སོའི་ཉམས་མྱོང་འཕྲལ་དུ་སྐྱེ་ཞིང༌། དེ་ཡང་བརྟན་པ་ཐོབ་པར་གྱུར་ནས་སློབ་མ་ལ་སྟོན་པ་དང༌། ཆོས་བསྟན་པ་དེ་ཡང་དོན་མེད་དང་ཚིག་ཙམ་དུ་མི་འགྱུར་བར་བྱིན་རླབས་རིམ་པས་འཕོ་བར་འགྱུར་བ་སོགས་ལ་མཐུ་དང་ལྡན་པ་ཡིན་པའི་ཕྱིར། དབང་བསྐུར་རབ་གནས་ཕལ་པ་ཙམ་བྱེད་པ་དང༌། སྦས་རྒྱུད་རྣམས་ཀྱི་ཚོགས་བཤད་ཙམ་སྟོན་པའི་སློབ་དཔོན་དང་གོ་འཕང་མི་འདྲ་སྟེ། དེའི་ཕྱིར་བུམ་དབང་ཙམ་ལ་སློབ་དཔོན་དུ་བྱེད་པ་དང༌། ཆུ་ཅོད་སོགས་ལ་སློབ་དཔོན་དུ་བྱེད་པ་དང༌། རྒྱུད་འདིའི་ལུགས་ཀྱི་ཐུན་མོང་མ་ཡིན་པའི་སློབ་དཔོན་
གྱི་དབང་ནི་བཟང་ངན་མི་འདྲའོ། །དེའི་ཕྱིར་དཀྱིལ་ཆོག་གཞན་གྱི་ལུགས་ཀྱི་སློབ་དཔོན་གྱི་དབང་ནི། གསང་དབང་སོགས་གོང་མ་ཡིན་ཚད་ལས་ས་མཚམས་དམན་ཞིང་འདི་ནི་སློབ་མའི་དབང་གི་བཞི་པ་ལས་ཀྱང་ཆེས་མཐོ་བ་དབང་གོང་མ་ཁྱད་པར་ཅན་ཡིན་ཏེ། སྔགས་རིགས་ཐམས་ཅད་ཀྱི་གཙོ་བོར་མངའ་གསོལ་པའི་དོན་དུ་བསྐུར་རྒྱུའི་མཆོག་དབང་མངའ་དབུལ་གྱི་ཡན་ལག་དུ་མ་དང་བཅས་པ་ནི་རྡོ་རྗེ་སློབ་དཔོན་གྱི་དབང་གི་ངོ་བོའོ།། །།གསུམ་པ་དབྱེ་བ་ལ་དོགས་པ་དཔྱད་པ་ནི་སྔར་ཡང་ཅུང་ཟད་བཤད་མོད་ཀྱི། ད་དུང་གསལ་བར་བརྗོད་དོ། །རྡོ་རྗེ་སློབ་དཔོན་གྱི་དབང་ལ་དབྱེ་ན། རྡོ་རྗེ་སློབ་དཔོན་བདག་པོ་དང༌། བདག་པོ་ཆེན་པོའི་དབང་གཉིས་སོ། ཁ་ཅིག་འདི་སྐད་ཅེས། རྡོ་རྗེ་སློབ་དཔོན་གྱི་དབང་ལ་གཉིས་ཡོད་ན། དབང་གོང་མ་ནི་རྣམ་པ་གཉིས་ཏེ་ཞེས་པའི་གྲངས་ངེས་དང་འགལ་ཏེ། དབང་གོང་མ་ལ་སློབ་མ་དང༌། བདག་པོ་དང༌། བདག་པོ་ཆེན་པོ་དང་གསུམ་བྱུང་བའི་ཕྱིར་རོ། །ཞེས་ཟེར་རོ། །འདི་ནི་ཤིན་ཏུ་བླུན་ཏེ། དཔེར་ན། མངོན་སུམ་ལ་བཞི་ཡོད་ན། ཚད་མ་ལ་མངོན་རྗེས་གཉིས་སུ་གྲངས་ངེས་པ་དང་འགལ་ཏེ། ཚད་མ་ལ་དབང་མངོན་ཡིད་མངོན་རང་རིག་རྣལ་འབྱོར་མངོན་སུམ་སྟེ་བཞི་དང༌། རྗེས་དཔག་སྟེ་ལྔ་ཡོད་པའི་ཕྱིར་རོ་ཞེས་ཟེར་བ་དང་མཚུངས་ཏེ། འདི་ལ་ཁོ་བོ་ཅག་བརྗོད་པ་འཚང་བར་མི་བྱེད་ཀྱི། དེ་སྐད་དང་འདི་མཚུངས་མི་མཚུངས་ཁྱེད་རྣམས་ཉིད་ཀྱིས་བསམ་པར་བྱའོ། །དེས་ན་སློབ་མའི་དབང་དང་སློབ་དཔོན་གྱི་དབང་གཉིས་ཀ་མ་ཡིན་པའི་དབང་གོང་མ་ཞིག་ཁས་བླངས་ན་ནི། དབང་གོང་མ་
ལ་སློབ་དཔོན་སློབ་མའི་དབང་གཉིས་སུ་གྲངས་ངེས་མཛད་པ་དང་འགལ་ཟེར་བ་བདེན་མོད་ཀྱི། སློབ་དཔོན་གྱི་དབང་གི་ནང་ཚན་ལས་ཕྱེ་བས་ཀྱང་དེ་ལྟར་འགྱུར་ན་ནི། ཁྱེད་རང་གི་ལུགས་ལ་ཡང་སློབ་དཔོན་དང་སློབ་མའི་དབང་གཉིས་ཀ་ལ་དབང་བཞི་རེ་སྟེ་བརྒྱད་ཡོད་པས། དེ་ཡང་གཉིས་ཀྱི་གྲངས་ངེས་དང་ཅིའི་ཕྱིར་མི་འགལ། དེ་དག་ནི་གཉིས་ཀྱི་ནང་ཚན་ཁོ་ན་ལས་ཕྱེ་བས་མི་འགལ་སྙམ་ན། ཁོ་བོ་ཅག་གི་འདོད་པ་འདིར་ཡང་དེ་བཞིན་ནོ། །དེས་ན་སྐབས་འདི་ཉིད་རང་དུ་ཡང་སློབ་དཔོན་གྱི་དབང་གཉིས་པོའི་དབྱེ་བ་གསལ་བར་མཛད་དེ། སློབ་དཔོན་ཆེན་པོའི་གནས་སྦྱིན་པ་ཞེས་པས་བདག་པོ་ཆེན་པོའི་དབང་དང༌། སྟོན་པ་པོ་ཞེས་པ་བདག་པོའི་དབང་ངོ༌། །དེ་ལ་ཡང་ཁ་ཅིག་འདི་སྐད་དུ། རྡོ་རྗེ་སློབ་དཔོན་གྱི་དབང་སྟོན་བྱེད་ཀྱི་རྒྱུད་དང་འགྲེལ་པ་གཉིས་ཀར་གྱི་ཚིག་སྔ་ཕྱི་སྡེ་ཚན་གཉིས་བྱུང་བ་འདི། བདག་པོ་དང་བདག་པོ་ཆེན་པོ་ཞེས་སོ་སོར་སྦྱོར་རྒྱུ་མ་ཡིན་གྱི། ཕན་ཚུན་བསྲེས་ཤིང་ཁ་བསྐང་ནས་གཅིག་སྟོན་པ་ཡིན་ནོ་ཟེར་རོ། །དེའི་སྒྲུབ་བྱེད་འཆད་པ་ལ་འགལ་བ་འདི་ལྟར་སྨྲ་སྟེ། འགྲེལ་ཚིག་གོང་མའི་སྐབས་སུ་ད་ནི་བདག་གིས་བདེ་བར་གཤེགས་པས་ལམ་ཐམས་ཅད་ཤེས་སོ་ཞེས་དང༌། ཡོན་ཏན་ཐམས་ཅད་དང་ལྡན་པའི་སློབ་མ་དམ་བཅའ་བ་ལ་གནས་པ་ཞེས་གསུངས་ཤིང༌། འགྲེལ་པ་འོག་མར་རྒྱས་འགྲེལ་དང་བཅས་པའི་རྒྱུད་ཐམས་ཅད་ཤེས་ཤིང་ཞེས་པ་དང༌། ཕ་རོལ་ཕྱིན་པ་ཐོབ་པ་བདག་གིས་ཞེས་བཤད་པས། དབང་བསྐུར་བའི་ཡུལ་ལ་ཁྱད་མ་བྱུང་ཟེར་རོ། །འདི་ནི་དོན་གཏན་ནས་མ་གོ་བའི་གཏམ་འཆལ་ལམ། ཡང་ན་རྫུན་གྱིས་སློབ་མ་བསླུ་བ་
ཞིག་གོ་ཅིའི་ཕྱིར་ཞེ་ན། དེ་ལྟར་གསུངས་པ་ཉིད་ཀྱིས་ཤིན་ཏུ་ཁྱད་ཆེ་སྟེ། ལམ་ཐམས་ཅད་ཤེས་ཞེས་པའང༌། རྒྱུད་བཤད་རགས་པ་བསླབས་པས་སྔགས་ཀྱི་ལམ་གྱི་བཞུགས་ཚུལ་ཐོས་བསམ་གྱིས་ཤེས་ཞེས་པ་ཙམ་ཡིན་ལ། ཡོན་ཏན་ཐམས་ཅད་དང་ལྡན་པ་ཞེས་པ་ཡང་སློབ་མར་འོས་པའི་ཡོན་ཏན་ཏེ། དེའི་གོང་དུ་གསུངས་པའི་རྒྱུད་ཐམས་ཅད་ཤེས་ཤིང༌། ཞེས་པ་དེ་ལ་བསྙེག་སྟེ། དོན་ལ་དད་པ་དང་དམ་ཚིག་དང་ལྡན་ཞིང་བསྙེན་པ་སོགས་བྱས་པའི་སྟེང་དུ་དུས་འཁོར་གྱི་རྒྱུད་འདི་ཉིད་ཀྱི་དབུ་ཞབས་ཀྱི་དོན་ཆ་ཚང་བར་ཤེས་པ་ཁོ་ནའི་དོན་ཡིན་གྱི། དེ་ལས་ལྷག་པའི་དོན་མིན་ཏེ། གཞན་དུ་ན་ལམ་ཐམས་ཅད་ཤེས་པ་དང༌། ཡོན་ཏན་ཐམས་ཅད་དང་ལྡན་པ་སྤྱི་ལྡོག་ལ་ངོས་འཛིན་ན་ནི། སློབ་མ་དེ་རྫོགས་པའི་སངས་རྒྱས་ཡིན་པ་དགོས་པར་ཐལ་བར་འགྱུར་རོ། །དེས་ན་འདིའི་སྐབས་ཀྱི་ལམ་ཤེས་པ་དང༌། ཡོན་ཏན་ཐམས་ཅད་དང་ལྡན་པ་བས་འོག་གི་ཕ་རོལ་ཏུ་ཕྱིན་པ་ཐམས་ཅད་ཐོབ་པ་ཞེས་པ་ཁོ་ནས་ཀྱང་ཆེས་ལྷག་ གོ །འདིར་རྒྱུད་ཐམས་ཅད་ཅེས་པའི་དོན་ལེའུར་ཙམ་མམ་དུམ་བུ་ཙམ་མ་ཡིན་པའི་རྒྱུད་ཆེན་གཅིག་དབུ་ཞབས་ཐམས་ཅད་ཚང་བ་ཡོངས་རྫོགས་ཀྱི་དོད་ཡིན་ལ། དེ་ཡང་སྐབས་ཐོབ་ཀྱིས་དུས་འཁོར་ཉིད་དོ། །དེས་ན་བདག་པོའི་དབང་བསྐུར་བའི་ཡུལ་ནི་དེ་འདྲ་ཡིན་ན། ཕྱི་མ་བདག་པོ་ཆེན་པོའི་དབང་ལ་ནི། རྒྱུད་ཐོས་ལུགས་ལ་ཡང་རྒྱས་འགྲེལ་དང་བཅས་པའི་ཞེས་ཁྱད་ཆོས་ལྷག་པོ་སྦྱར་ཞིང༌། དེའི་དོན་ལ་ཁྱེད་ཅག་གི་འདོད་པ་ནི། དེང་སང་རྒྱུད་ཀྱི་འཆད་ཉན་པར་གྲགས་པ་རྣམས་ཀྱི་རྒྱས་བཀབ་བྱེད་པར་གདའ་བས།
དྲི་མེད་འོད་ཀྱི་འཛུག་ཁྲིད་ཅིག་བཏང་ཞེས་པ་ཙམ་ལས་གོ་བ་ལྷག་པོ་མི་འཆར་བ་ཁྱེད་རྣམས་བདེན་ཡང་དོན་ལ་དེ་ལྟར་མ་ཡིན་ཏེ། འདི་ནི་རྒྱུད་དང་བྱང་ཆུབ་སེམས་དཔའི་རྒྱས་འགྲེལ་གྱི་དགོངས་དོན་ཐམས་ཅད་ཚིག་དོན་དང༌། ཁོག་བསྒྲིགས་དང་ཞལ་གདམས་ཀྱི་རིག་པས་ཐོས་བསམ་གྱིས་གཏན་ལ་ཕབ་པ་ལྟ་ཅི་སྨོས། སློབ་མའི་དབང་པོ་མཐོ་དམན་དང་འཚམས་པར་སྦྱར་ནས། བསྐྱེད་རིམ་རྫོགས་རིམ་ལས་ཚོགས་དངོས་གྲུབ་རྣམས་ལ་རྒྱས་འགྲེལ་དང་མཚུངས་པར་ཉམས་མྱོང་གིས་གཏན་ལ་ཕེབས་པའི་དོན་ཡིན་པས་སྔ་མ་དང་ཤིན་ཏུ་ཁྱད་ཆེ་ལ། ཕ་རོལ་ཏུ་ཕྱིན་པ་ཐམས་ཅད་ཐོབ་པ་ཞེས་པས་ནི་ཤིན་ཏུ་ཡང་ཁྱད་ཆེ་སྟེ། འདི་ལ་དངོས་བསྟན་ལྟར་ན་ནོར་རྣམས་སྤངས་པས་སྦྱིན་པ་ཞེས་སོགས་ཀྱི་ཕར་ཕྱིན་བཅུ་ཐོབ་པ་ཡིན་པས། ཏིང་ངེ་འཛིན་གྱི་ཡན་ལག་རྒྱུད་ལ་སྐྱེས་པ་དགོས་ལ། བཅུ་པོ་ཅི་རིགས་པ་རྗེས་མཐུན་གྱི་དབང་དུ་བྱས་ན་ཡང་བསྐྱེད་རིམ་ལ་ནི་དྲོད་ཐོབ་པ་མ་མཐའ་ལ་ཡང་དགོས་པ་དང༌། ཕལ་ཆེར་དུ་རྫོགས་རིམ་ལ་ནི། རྗེས་དྲན་དང་འཛིན་པ་ཐོབ་པ་ལ་ཡང་བསྐུར་ཏེ། འདི་གཙོ་བོར་རིག་པ་བརྟུལ་ཞུགས་ཀྱི་དབང་བསྐུར་ཡིན་པས་ སོ། །རྫོགས་རིམ་སྐབས་ཆེས་ཤིན་ཏུ་མ་མཐའ་ཡང་ཕར་ཕྱིན་བཅུ་དག་པའི་རིག་མ་བཅུ་དང་བཅས་ཏེ་དབང་བསྐུར་ཞུ་བ་ལ། སྒྲུབ་པ་པོ་རང་ཉིད་ཕར་ཕྱིན་བཅུའི་རང་བཞིན་རྟགས་བཅུ་མཐོང་བ་ངེས་པར་དགོས་པས་གོ་བར་གྱིས་ཤིག ཡང་དེ་དག་འདི་སྐད་ཅེས་འགྲེལ་པ་གོང་འོག་གཉིས་ཀྱི་དབང་བསྐུར་བའི་དགོས་པ་ལ་ཡང་ཁྱད་མེད་དེ། གོང་མར་དབང་བསྐུར་བ་དང་རྒྱུད་བསྟན་པའི་དོན་དུ་གསུང་ངམ་རྗེས་སུ་གནང་བ་
སྦྱིན་ཞེས་དང༌། སྟོན་པ་པོ་དབང་ལ་མངོན་པར་དབང་བསྐུར་ཞེས་གསུངས། འོག་མར་ཡང་བདག་པོ་ཉིད་བྱེད་པའི་སླད་དུ་དཀྱིལ་འཁོར་ཆེན་པོའི་སློབ་དཔོན་གྱི་གོ་འཕང་མངོན་པར་འདོད་ཅེས་གསུངས་ཏེ། གཉིས་ཀར་དཀྱིལ་འཁོར་ཆེན་པོའི་སློབ་དཔོན་དང༌། དབང་བསྐུར་པ་པོ་དང་རྒྱུད་སྟོན་པ་པོར་མཚུངས་པས་སོ་ཟེར་རོ། །འདི་ཡང་ཤིན་ཏུ་འཁྲུལ་ཏེ། སྔོན་མ་བདག་པོའི་དབང་གི་སྐབས་རྩ་འགྲེལ་ཐམས་ཅད་དུ་དཀྱིལ་འཁོར་ཆེན་པོའི་སློབ་དཔོན་དུ་གསུངས་པ་ནམ་ཡང་མེད་ཅིང༌། ཕྱི་མ་ལ་གསལ་པར་གསུངས་པས་ཤིན་ཏུ་ཁྱད་ཆེ་ལ། སྔ་མའི་དབང་བསྐུར་པ་པོ་དང་རྒྱུད་སྟོན་པ་པོ་ཙམ་དཀྱིལ་འཁོར་ཆེན་པོའི་སློབ་དཔོན་གྱི་དོན་མ་ཡིན་ནོ། །དཀྱིལ་འཁོར་ཆེན་པོའི་སློབ་དཔོན་ནི། རང་ཉིད་ཡེ་ཤེས་བརྟན་ཞིང་དངོས་གྲུབ་ཆེན་པོ་ཐོབ་ནས། གཞན་ལ་དངོས་གྲུབ་སྩོལ་ནུས་པའམ། དེ་ཙམ་མེད་ཀྱང་སྒྲུབ་པ་པོ་ཆེན་པོར་གྱུར་ནས་དངོས་གྲུབ་ལ་ཉེ་བར་སླེབ། ཕྲ་མོ་ཐོགས་པ་མེད་པར་གྲུབ་ནས་སྔགས་ཀྱི་ཆོ་གས་སེམས་ཅན་གྱི་དོན་དངོས་སུ་སྤྱོད་ནུས་པ་ཞིག་ལ་ཟེར་བ་ཡིན་ལགས་ སོ། །ཁྱེད་ཅག་གི་འདི་ནི་སྒྲུབ་དཀྱིལ་ཚིག་འདོན་ཐུབ་ཙམ་དང༌། རྒྱུད་ཀྱི་ཚིག་བཤད་ཅི་རིགས་ཐོངས་ཙམ་དང༌། གྲངས་བསྙེན་མིང་བཏགས་རེ་སོང་བ་ཙམ་སློབ་དཔོན་ཆེན་པོ་ཡིན་དུ་རེ་བ་དང་རློམ་པ་བྱེད་པའི་དབང་ལས་རང་གི་ཉམས་ཐོག་ཏུ་གང་འབྱོར་དང་སྦྱར་ནས་མཛད་འདུག་པས་དུས་དེང་སང་གི་གནས་གཞི་སྐྱོང་མཁན་གསང་སྔགས་པའི་མིང་ཅན་རྣམས་ཀྱི་དབང་དུ་བྱས་ན། རབ་ཏུ་ཚིག་གཤོར་གྱི་དབང་བསྐུར་རྒྱུད་བཤད་ཐུབ་ཙམ་དང༌།
དེ་མིན་སྒྲུབ་མཆོད་ཀྱི་མགོ་དཔོན་ཕེར་ཙམ་དེ་དཀྱིལ་འཁོར་ཆེན་པོའི་སློབ་དཔོན་དུ་མི་འཇོག་ཀ་མེད་ཡིན་པ་ལ་ཁྱེད་ཀྱི་དགོངས་པ་བསྟད་པ་འདྲའོ། །ཞེས་བཞད་གད་ཀྱང་བྱའོ། །ཡང་འདི་སྐད་ཅེས། འགྲེལ་པ་འོག་མར་བདག་པོ་ཉིད་བྱེད་པའི་སླད་དུ་ཞེས་འབྱུང་བས། འགྲེལ་པ་འོག་མའི་བསྟན་དོན་ཡང་བདག་པོའི་དབང་ལས་གཞན་པའི་བདག་པོ་ཆེན་པོའི་དབང་མིན་ཟེར་རོ། །འདི་ནི་ཚིག་དུམ་བུར་བཅད་པ་ལ་གོ་བ་ལོག་པ་སྟེ། འགྲེལ་ཚིག་འདི་ནི་བདག་པོ་ཆེན་པོ་ཞེས་པའི་འབྲུ་གནོན་སྒྲ་བཤད་པ་སྟེ། བདག་པོ་ཉིད་བྱེད་པའི་སླད་དུ་དཀྱིལ་འཁོར་ཆེན་པོའི་སློབ་དཔོན་ཞེས་གསུངས་པས། དཀྱུས་ཀྱི་འགྱུར་ལྟར་ན། རིགས་སྔགས་མཁན་མང་པོའི་གཙོ་བོ་བདག་པོ་ཉིད་བྱེད་པའི་སླད་ཏེ་རྒྱུ་མཚན་དུ་དཀྱིལ་འཁོར་ཆེན་པོའི་སློབ་དཔོན་ཏེ་བསྐྱེད་རྫོགས་གང་ཡིན་ཡང་རུང་རང་རང་གི་ཏིང་ངེ་འཛིན་ལ་དཀྱིལ་འཁོར་གྱི་འཁོར་ལོ་རྒྱུན་མི་འཆད་པར་རྟག་པར་མངོན་དུ་གྱུར་པ་དེ་ནི་དཀྱིལ་འཁོར་ཆེན་པོའི་སློབ་དཔོན་ཞེས་བྱ་ལ། གོ་འཕང་དེ་ཐོབ་ཟིན་པ་བརྟན་པའམ་འཕེལ་བའི་དོན་དང༌། མ་ཐོབ་པ་ཐོབ་ཏུ་ཉེ་བ་ལ་དུས་དེ་ཉིད་དུ་ཐོབ་པའི་ཕྱིར་བསྐུར་དགོས་པས་ན། བདག་པོ་དང་དཀྱིལ་འཁོར་ཆེན་པོའི་སློབ་དཔོན་གཞི་མཐུན་པའི་དབང་ཡིན་པས་བདག་པོ་ཆེན་པོའི་དབང་ཞེས་བྱའོ། །ཡང་གཅིག་ཏུ་ན་དཀྱིལ་འཁོར་གྱི་བདག་པོ་ཆེན་པོ་ཉིད་བྱེད་པའི་སླད་དུ་སློབ་དཔོན་གྱི་གནས་མངོན་པར་འདོད་པས་ཞེས། ཀུན་མཁྱེན་ཆེན་པོ་ནས་འགྱུར་བཅོས་མཛད་པ་ལྟར་ཡིན་ཏེ། བདག་པོ་ཆེན་པོའི་དོན་དཀྱིལ་འཁོར་གྱི་བདག་པོ་ཆེན་
པོ་ཞེས་མཚན་དོན་དུ་སྦྱར་བས་ཆོག་ལ། སྤྱིར་ནི་བདག་པོ་ཡིན་ན། བདག་པོ་ཆེན་པོ་ཡིན་པས་མ་ཁྱབ་ཀྱང༌། བདག་པོ་ཆེན་པོ་ལ་བདག་པོས་ཁྱབ་པས་དཀྱིལ་འཁོར་ཆེན་པོ་སོགས་ཀྱི་ཚིག་དང་མ་སྦྱར་ཡང་བདག་པོ་ཉིད་ཀྱི་སླད་དུ་ཞེས་པས་བདག་པོ་ཆེན་པོ་དང་མི་འགལ་ཞིང༌། བདག་པོ་ཉིད་ཅེས་པ་ཙམ་གྱིས་བདག་པོ་ཆུང་ངུ་ཡིན་པར་མི་འགྲོའོ། །གལ་ཏེ་ཁྱེད་ཀྱི་ལུགས་ལ་དེར་འགྲོ་བར་འདོད་ན། ཁྱེད་རང་འདོད་པའི་རྡོ་རྗེ་སློབ་དཔོན་དེ་བདག་པོ་ཆུང་ངུའི་དབང་ཡིན་པར་ཐལ་བ་དང༌། ཆུང་ངུའི་དོན་དང་ཐ་སྙད་འཐད་ན་ཆེན་པོ་གཞན་ཞིག་ཡོད་དགོས་པས། བདག་པོ་དང་བདག་པོ་ཆེན་པོའི་དབང་གྲུབ་པར་ཐལ་ལ། བདག་པོ་ཉིད་ཅེས་པས་བདག་པོ་ཆུང་ངུ་ཡིན་པར་མི་འགྲོ་ན། བདག་པོ་ཆེན་པོ་ཡིན་པར་འདོད་པ་ལ་ཚིག་དེ་གནོད་བྱེད་དུ་འདྲེན་པ་ནི་རིག་པ་རྣལ་དུ་མ་ཕེབས་པའོ། །དེས་ན་སྐབས་འདིའི་རྒྱུད་དོན་ཕྱིན་ཅི་མ་ལོག་པ་རྡོ་རྗེ་སློབ་དཔོན་གྱི་དབང་རྣམ་པ་གཉིས་ཀྱི་དབྱེ་བ་འདི། དུས་གསུམ་སངས་རྒྱས་ཀུན་མཁྱེན་ཆེན་པོ་དོལ་པོ་པ་ཁོ་ནས་ཐུན་མོང་མ་ཡིན་པའི་ལེགས་བཤད་དུ་སྩལ་བ་སྟེ། འདི་མ་ཤེས་པས་ཐམས་ཅད་མཁྱེན་པར་གྲགས་པ་ཐམས་ཅད་ཀྱང་སྐབས་འདིའི་རྒྱུད་འགྲེལ་གྱི་དོན་ལ་ཕྱོགས་བསླད་པར་མཐོང་ངོ༌།། །།བཞི་པ་གང་ལ་དབང་བསྐུར་བའི་ཡུལ་སློབ་མའི་ཁྱད་པར་ནི། སྤྱིར་སློབ་མའི་ཡོན་ཏན་སྤྱི་ཁྱབ་དང་ལྡན། སྒོས་སུ་བླ་མ་དམ་པ་དགེས་པས་མཆོག་དབང་བརྡལ་པོའི་ཚུལ་དུ་གནང་བར་བཞེད་པའི་ཡུལ་སེམས་མཆོག་ཏུ་དག་པ་སྟེ། འདིར་དཔལ་དོན་དམ་བསྙེན་པ་ལས། ཇི་ལྟར་བུ་བཟང་དག་གིས་བག་མ་བླང་བའི་རྒྱུར། རང་གི་ཕ་ལ་ནམ་ཡང་
གསོལ་བ་འདེབས་མིན་ཏེ། ཡོན་ཏན་དང་བཅས་དུས་ལ་བབ་པའི་བུ་ལ་ནི། ཕ་ཉིད་ཀྱིས་ནི་བག་མའི་བྱ་བ་ཤེས་པར་བྱེད། དེ་བཞིན་སློབ་མ་རྣམས་ཀྱིས་བླ་མེད་དབང་གི་ཕྱིར། བླ་མ་ལ་ནི་ནན་གྱིས་གསོལ་བ་མི་འདེབས་སོ། །བདག་གིས་སློབ་མ་སྐལ་བར་ལྡན་ནམ་མི་ལྡན་པ། །རྣམ་པར་དག་པའི་དེ་ཉིད་ལ་ནི་དེ་ཡིས་ཤེས། །ཞེས་སློབ་མ་ཡོན་ཏན་དང་ལྡན་པ་ལ་བླ་མས་འོས་པར་མཁྱེན་ནས་དབང་གོང་མ་རྣམས་བསྐུར་དགོས་ཀྱི། ཡོན་ཏན་མ་རྫོགས་པའི་སློབ་མས་ནན་ཏན་གྱིས་འཆུ་བ་མི་རུང་བ་དང༌། གོང་མའི་སྣོད་དུ་གྱུར་པའི་ཡོན་ཏན་ཡོད་ན་ནན་གྱིས་གསོལ་བ་འདེབས་པའང་ཉེས་པ་ཆུང་མོད། སྤྱིར་ཡོན་ཏན་མ་ཚང་བ་དང༌། ཁྱད་པར་རིག་མ་ལ་བརྟེན་ནས། སློབ་དཔོན་ལ་ཕྲག་དོག་མིག་སེར་གྱི་རྣམ་རྟོག་དྲི་ཙམ་ཡང་མེད་པ་དགོས་ཀྱི། གཞན་དུ་ན་དེ་འདྲའི་རྣམ་རྟོག་སྐད་ཅིག་ཙམ་གྱིས་ཀྱང་དམྱལ་བར་འགྲོ་བས་རྣམ་རྟོག་དེ་ཡོད་དུ་རུང་ན། བླ་མས་དབང་གོང་མ་མི་སྟེར་ཞིང་སློབ་མས་མི་ཞུའོ། །རྒྱུད་ལས། འདི་སྐད་ཅེས། གང་ཞིག་རྒྱུད་ཀྱི་རྒྱལ་པོ་ལས་ནི་རྒྱལ་བ་མཆོག་གི་སྤྱོད་པ་ཐོས་ཤིང་དབང་ནི་བླངས་ནས་ཀྱང༌། །སླར་ཡང་ཕྲག་དོག་བྱེད་ན་འདི་ནི་དམྱལ་བ་བརྒྱད་པ་ཇི་སྲིད་ཉིད་དུ་རབ་ཏུ་འཇུག་འགྱུར་ཏེ། །གང་ན་ཁབ་རྩེའི་ས་ལ་མི་དགེའི་འབྲས་བུ་དབང་གིས་དམྱལ་བ་རྣམས་ནི་ཀུན་ཏུ་རྒྱུ་བར་བྱེད། །དེ་ཕྱིར་མི་རྣམས་སེམས་ལ་ཕྲག་དོག་ཡོད་ཀྱི་བར་དུ་དབང་ནི་བླང་བ་བྱ་བར་མི་འགྱུར་རོ། །ཞེས་གསུངས། དངོས་བསྟན་ལྟར་ནན་གྱིས་གསོལ་བ་མི་འདེབས་པ་དང༌། ཕྲག་དོག་སྤངས་པ་དགོས་པ་འདི་སྤྱིར་དབང་གོང་མ་ཐམས་ཅད་ལ་ཡིན་ལ། གཙོ་བོར་སློབ་དཔོན་གྱི་དབང་ལ་ཡིན་ཞེས་བླ་མ་དག་གི་
གསུང་བགྲོས་ལས་འབྱུང་བ་ལས། འདི་ནི་སློབ་དཔོན་དང་སློབ་མའི་དབང་ལ་དགག་བྱ་དང་དགོས་པའི་ཁྱད་པར་གྱི་དབྱེ་བ་ཆེར་མི་ཕྱེད་པར་སྣང་ཡང༌། རེ་ཤིག་གསུང་བགྲོས་དབང་བཙན་པར་བྱ་བ་ལ། མཚན་ཉིད་དེ་དག་ཐམས་ཅད་ཚང་པའི་སྟེང་དུ་སློབ་དཔོན་རྣམ་པ་གཉིས་པོར་རུང་བ་མཚན་ཉིད་གོང་དུ་བཤད་པ་ཚང་བ་ནི། སློབ་དཔོན་གྱི་དབང་བསྐུར་བའི་ཡུལ་གྱི་ངེས་པའོ།། །།ལྔ་པ་ཆོ་ག་དངོས་ཀྱི་དོན་བཤད་པ་ལ། བདག་པོའི་དབང་བཤད་པ་དང༌། བདག་པོ་ཆེན་པོའི་དབང་བཤད་པའོ། །དང་པོ་ལ་རྩ་བའི་གཞུང་དགོངས་འགྲེལ་པའི་དོན་གྱིས་གོ་རིམ་བསྟན། ཆོ་གའི་ངོ་བོ་ལ་ལོག་རྟོག་བསལ། བྱ་བའི་རིམ་པ་གསལ་བར་བསྟན་པའོ། །དང་པོ་ནི། དབང་ལེའི་ཚིགས་བཅད་བརྒྱ་བཞི་པ་དང་ལྔ་པར། ཀླུ་དང་བཞི་ཡི་ནོར་བུ་གསེར་གྱི་བུམ་པ་རྣམས་དང་རྒྱལ་པོ་ས་ཡི་རང་བཞིན་རིན་ཆེན་བཅས། །སྨན་དང་དྲི་དང་ལྡན་པའི་རྒྱལ་དང་རྣམ་རྒྱལ་བུམ་པ་དག་གིས་གདན་གྱི་དབུས་སུ་ཁྲུས་བྱ་སྟེ། །ཀླུ་རྣམས་ཀྱིས་ནི་དཔལ་ལྡན་ཅོད་པན་བཅིངས་ཏེ་ནོར་འདབ་པདྨར་བཞི་ཡིས་དར་དཔྱངས་བཅིང་བར་བྱ། །ཕྱག་རྒྱ་ལ་ནི་དཔལ་ལྡན་བུམ་པ་ཡིས་ཏེ་འདིར་ནི་པདྨ་དང་བྲལ་རེ་ཁ་ལྔ་པོ་སྤངས། །དང་པོར་ཆུ་དག་ལ་ནི་དགེ་བསྙེན་ཉིད་དུ་འགྱུར་ཏེ་བུམ་པ་ལ་ཡང་དགེ་ཚུལ་དག་ཏུ་འགྱུར། །གསང་བའི་དབང་ལ་དགེ་སློང་དང་ནི་གོང་མའི་བྱེད་པ་ལ་ཡང་གནས་བརྟན་ཞེས་པར་འགྱུར་བ་སྟེ། །ཕྱག་རྒྱ་དར་དཔྱངས་ཅོད་པན་དག་དང་རྡོ་རྗེ་མཆོད་ཕྱིར་ཐོགས་ནི་བླ་མ་མཆོག་གིས་སྦྱིན་པར་བྱ། །དེ་རྣམས་སློབ་དཔོན་སླད་དུ་རང་གི་རྒྱལ་བའི་རིགས་ཀྱི་དབང་གིས་ཕྱག་རྒྱ་རྣམ་པར་དག་པ་ཉིད། །ཅེས་གསུངས་སོ།། །། གཉིས་པ་ནི་འདིའི་
འགྲེལ་ཆེན་ལས་ཀྱང་ཐོག་མར་འདི་སྐད་ཅེས། ཀླུ་དང་ཞེས་པ་ལ་སོགས་པ་ནི་འདི་དང་པོར་འཆད་པར་འགྱུར་བའི་བུམ་པ་ལ་སོགས་པའི་དབང་བསྐུར་བ་རྣམས་ཀྱིས་མངོན་པར་དབང་བསྐུར་ཏེ། དེ་ལས་རྒྱུད་ཐམས་ཅད་ཤེས་ཤིང་དམ་བཅའ་བ་ལ་གནས་པའི་སློབ་མ་ནི། རྡོ་རྗེ་སློབ་དཔོན་བདག་པོའི་སླད་དུ་བླ་མས་དབང་བསྐུར་བར་བྱའོ། །ཞེས་གསུངས་ཏེ། རྒྱུད་གཞན་དང་བསྟུན་ནས་ཆུ་དབང་ལ་ཡང་རྣམ་གྲངས་ཙམ་གྱི་སྒོ་ནས་བུམ་པའི་དབང་གི་ཐ་སྙད་འཇོག་པའི་སྐབས་ཡོད་ཅེས་གྲགས་ལ། གཞུང་འདིའི་བཤད་པ་རྫོགས་པའི་འཇུག་ཏུ་རྡོ་རྗེ་སློབ་དཔོན་བདག་པོའི་དབང་གི་ཆོ་གའི་རབ་ཏུ་གནས་པའི་ངེས་པའོ། །ཞེས་ཐོག་མཐའ་གཉིས་ཀར་དུ་བདག་པོའི་དབང་ཁོ་ནའི་མིང་ནས་སྨོས་ཀྱི། ཆེན་པོའི་ཐ་སྙད་ཟུར་ཙམ་ཡང་མ་གསུངས་པས། རྒྱན་རྣམས་ཐམས་ཅད་ཅེས་སོགས་འོག་ཏུ་འཆད་འགྱུར་དང་མི་གཅིག་པར་དངོས་སུ་གྲུབ་ལ། རེ་ཁ་སྤངས་ཞེས་པའི་འགྲེལ་པར་རྗེས་གནང་སྦྱིན་པ་ཡན་ཆད་གསུངས་ནས། དེ་ནས་དང་པོར་ཞེས་པ་ལ་སོགས་པས་དབང་གི་དག་པ་གསུངས་པ་ཞེས་མཚམས་སྦྱར་ནས་གནས་བརྟན་ཞེས་པར་འགྱུར་བ་སྟེ་ཞེས་པའི་འགྲེལ་པར། ཤེས་རབ་ཡེ་ཤེས་ཀྱི་དབང་ཡན་ཆད་བསྟན་ནས། གནས་བརྟན་ཞེས་པ་ལས་འཕྲོས་པ་འཇིག་རྟེན་གསུམ་གཅིག་གཞོན་ནུའི་སྐུ་སོགས་མཚན་བརྗོད་ཀྱི་ལུང་དྲངས་ཏེ། འདི་བཞི་པའི་ཆེད་བརྗོད་ཡིན་པ། བཞི་པ་མ་བསྐུར་བ་ལ་དེ་མི་རུང་བའི་དེའི་སྔོན་དུ་བཞི་པ་བསྐུར་བར་བསྟན་ལ། དེ་ཉིད་ཀྱི་མཐར། རྣམ་གྲོལ་ཞི་བ་ཞི་བ་ཉིད། །ཅེས་པ་སྟེ་སློབ་དཔོན་གྱི་དབང་ངོ༌། །ཞེས་གསུངས་པས། བུམ་དབང་སོགས་བཞི་པོ་དེ་སྐབས་འདིར་
འཕྲོས་དོན་དུ་གསུངས་པ་མ་ཡིན་པར། སློབ་དཔོན་གྱི་དབང་ཉིད་ལ་དགོས་པར་གསལ་ཞིང༌། དེ་མ་ཐག་ཏུ་དེ་ནས་སྐུ་དང༌། གསུང་དང༌། ཐུགས་རྡོ་རྗེ་བྱེད་པའི་སླད་དུ་ཞེས་སོགས་གསུངས་པས། རྗེས་གནང་གི་རྗེས་དང་རྡོ་རྗེ་གསུམ་གྱི་ཕྱག་རྒྱའི་སྔོན་དུ་དབང་བཞི་སྦྱིན་པར་ཤིན་ཏུ་གསལ་ལོ།། །།གསུམ་པ་ནི། དེས་ན་བདག་པོའི་དབང་ལ་དབང་བཞི་མི་བསྐུར་བ་ཤིན་ཏུ་འཁྲུལ་ཞིང༌། ཆུ་ནས་ཕྱག་རྒྱ་གསུམ་གྱི་བར་གྱི་གོ་རིམ་འདི་ལས་གཞན་དུ་བྱེད་པ་ཡང་ལེགས་པ་མ་ཡིན་ནོ། །འོ་ན་དབང་བཞི་པོ་བསྐུར་ཚུལ་ཇི་ལྟར་ཡིན་སྙམ་ན། སྐབས་དེའི་ཆོ་གའི་བྱེད་ཚུལ་ནི། སློམ་མའི་དབང་གི་སྐབས་དང་འདྲ་སྟེ། དབང་གི་ལེའུར་བྱིས་འཇུག་བསྐུར་བའི་དཀྱུས་ཉིད་ལ་འདི་སྐད་ཅེས། དབང་བདུན་རྣམས་ཀྱིས་མངོན་པར་དབང་བསྐུར་དགེ་བའི་དབང་གི་ས་བདུན་གྱི་ནི་དབང་ཕྱུག་ཉིད་དུ་འགྱུར། །བུམ་པ་གསང་བས་མངོན་པར་དབང་བསྐུར་སླར་ཡང་ཕྱིར་མི་ལྡོག་པ་སོགས་སུ་ངེས་པར་རབ་ཏུ་འཇུག །ཤེས་རབ་ཡེ་ཤེས་དག་གིས་མངོན་པར་དབང་བསྐུར་སྲིད་པའི་འཇིག་པ་འཇོམས་པའི་འཇམ་དབྱངས་ཉིད་དུ་འགྱུར། །ཞེས་སློབ་མའི་དབང་ཁོ་ནའི་རྣམ་གཞག་ལ་ཤེས་རབ་ཡེ་ཤེས་དག་ཅེས་པའི་ཚིག་ཟུར་ལས་བཞི་པའང་ཞོར་ལ་འཕངས་ཏེ། དབང་བསྐུར་བའི་ཆོ་ག་ཇི་ལྟར་ཡིན་གསལ་པོར་མ་གསུངས་ལ། དེ་བཞིན་དུ་བདག་པོའི་དབང་གི་སྐབས་ཀྱང་བུམ་པའི་དབང་ལ་དགེ་ཚུལ་ཞེས་སོགས་དབང་བཞི་གསུངས་ཤིང་ཆོ་ག་མི་གསལ་བ་ལས། དེའི་འོག་ཏུ་སློབ་དཔོན་དང་སློབ་མའི་
ཆོ་ག་སོ་སོར་ཕྱེ་བའི་སྐབས། དཔལ་ལྡན་ཤེས་རབ་སོགས་ཆོ་གའི་ཚུལ་གཅིག་དང༌། རྒྱན་རྣམས་ཐབས་ཅད་དང་ལྡན་སོགས་ཚུལ་གཞན་གཅིག་སྟེ་གཉིས་གསུངས་ན། ཕྱི་མ་ནི་ངེས་པར་སྤྱོད་པའི་བརྟུལ་ཞུགས་ཀྱི་དབང་བདག་པོ་ཆེན་པོ་ཁོ་ནར་བཤད་པས། དང་པོ་དེ་སྔ་མ་གཉིས་ཀྱི་ཐུན་མོང་དུ་ཤིན་ཏུ་གསལ་བའི་ཕྱིར། བདག་པོའི་སྐབས་ཀྱི་དབང་བཞི་ནི། སློབ་མའི་སྐབས་དང་ཆོ་ག་འདྲ་བར་གྲུབ་ལ། དེ་ལྟར་སྟོན་པར་བཞེད་ནས་མཐའི་གསལ་བྱེད་ཀྱི་ཚུལ་དུ། སློབ་དཔོན་གྱི་དབང་སྔ་མའི་གོ་རིམ་བཤད་པ་སོང་བའི་རྗེས་སུ་དབང་གི་ཆོ་ག་གསུངས་པས། སྔར་བཤད་ཟིན་པ་གཉིས་གར་ལ་གོ་བར་དགོངས་སོ། །འོ་ན་བདག་པོའི་དབང་གི་སྐབས་སུ་ཅིའི་ཕྱིར་མི་གསུང་སྙམ་ན། སྤྱིར་རྒྱུད་རྣམས་ཐམས་ཅད་འཁྲུགས་ཅན་དུ་འབྱུང་བས་དཔྱད་པ་དེ་ནི་མི་འཇུག་ལ། གལ་ཏེ་འཇུག་ནའང་སྐབས་དེར་གསུངས་ན་བདག་པོ་ཁོ་ན་ལ་གོ་སྟེ། སློབ་མ་ལ་མི་འཇུག་པར་འགྱུར་པས་སྐབས་དེ་གཉིས་ཀར་དང༌། བརྟན་པའི་དངོས་པོ་ལ་རབ་ཏུ་གནས་པ་ལ་ཡང་དབང་བསྐུར་བའི་ཚེ། ཏིང་ངེ་འཛིན་ཙམ་གྱི་སྒོ་ནས་འདི་དག་ཐམས་ཅད་བྱེད་དགོས་པའི་ཕྱིར། ཐམས་ཅད་ལ་ཐུན་མོང་དུ་འཇུག་དགོས་པས་ན། སོ་སོའི་སྐབས་གཅིག་ཁོ་ནར་མ་བསྟན་པར་དབང་བཞིའི་ཆོ་ག་དངོས་ཕན་ཆད་ལོགས་སུ་བཤད་པའོ། །དེ་ལ་སྐབས་འདིར་རབ་ཏུ་གནས་པ་གཉིས་ཏེ། སྐུ་གསུང་ཐུགས་ཀྱི་རྟེན་སོགས་བརྟན་པའི་དངོས་པོ་ལ་རབ་ཏུ་གནས་པ་དང༌། སློབ་མ་རྡོ་རྗེ་སློབ་དཔོན་དུ་རབ་ཏུ་གནས་པར་བྱེད་པ་གཉིས་སོ། །སྤྱིར་དབང་བསྐུར་བ་ཐམས་ཅད་སློབ་མ་རབ་ཏུ་
གནས་པར་བྱེད་པ་ཡིན་ཡང་མངའ་གསོལ་ཁྱད་པར་ཅན་གྱི་སྒོ་ནས་རབ་ཏུ་གནས་པ་ཡིན་པས། བདག་པོའི་དབང་འདི་ལ་སྤྱི་མིང་བྱེ་བྲག་ཏུ་བཏགས་ནས་རབ་ཏུ་གནས་པའི་ཐ་སྙད་ནན་ཏན་དུ་མཛད་དོ།། །།བཞི་པ་ནི་འདིའི་བྱ་བའི་རིམ་པ་རྣམས་དབང་ཆོག་ཏུ་གསལ་བར་བཤད་ཟིན་མོད། མདོར་ན་དགེ་སློང་རྡོ་རྗེ་འཛིན་པ་ལ་གཞོན་ནུ་མ་སྐྱེ་གནས་མ་ཉམས་པ་གཉིས་ཀྱིས་རྒྱལ་རྣམ་རྒྱལ་དང༌། བུ་མ་སྐྱེས་པའི་བུ་མོ་བརྒྱད་ཀྱིས་བུམ་པ་བརྒྱད་བཟུང༌། རེ་ཁ་ལྔའི་དབུས་སུ་ཤིང་སྟན་ཁྲུ་བཞི་པ་སྣ་ཚོགས་པདྨ་ཁྲུ་གཉིས་དང་བཅས་པའི་སྟེང་དུ་བཞག་ལ་ཆུ་དབང་བསྐུར་ཏེ། ཅོད་པན། དར་དཔྱངས། ཕྱག་རྒྱ་དྲུག་གི་སྒོ་ནས་བརྟུལ་ཞུགས་ཀྱི་དབང་དང་བཅས་པ་རྣམས་སྦྱིན་ ནོ། །དགེ་ཚུལ་ལ་ནི་པདྨའི་གདན་སྤངས་ཏེ། གཞོན་ནུ་མ་གཉིས་དང་བུ་མོ་བཞི་སྟེ་དྲུག་གིས་ཁྲུས་གསོལ་ཞིང༌། དར་དཔྱངས་དང༌། ཕྱག་རྒྱ་དྲུག་གིས་དབང་བསྐུར་རོ། །དགེ་བསྙེན་རྡོ་རྗེ་འཛིན་པ་ལ་ནི། ཤིང་སྟན་སྤངས་ཤིང་ཐུན་མོང་གི་གདན་དང༌། རེ་ཁ་གསུམ་པ་བྱས་ནས་གཞོན་ནུ་མ་གཅིག་དང་བུ་མོ་གཅིག་གིས་ཁྲུས་གསོལ་ཞིང༌། མཐེ་བོང་རྡོ་རྗེའི་བརྟུལ་ཞུགས་ཀྱི་དབང་སྦྱིན་ནོ། །གསུམ་ཀར་ཡང་རྡོ་རྗེ་དྲིལ་བུ་ལག་ཏུ་གཏད་ནས། སྟོང་ཉིད་སྙིང་རྗེར་ཁྱོད་བྱིན་རླབས་ཞེས་སོགས་བཀའི་གནང་བའི་རྗེས་གནང་སྦྱིན་ནས། དེའི་འོག་ཏུ་སློབ་དཔོན་དངོས་སུ་བྱེད་པའི་དོན་དུ་དབང་བཞི་བསྐུར་ཞིང༌། མཐར་སྐུ་གསུང་ཐུགས་རྡོ་རྗེའི་ཕྱག་རྒྱ་གསུམ་སྦྱིན་ནས། དམ་ཚིག་དང་རྡོ་རྗེ་སློབ་དཔོན་དུ་བཀའི་གནང་བ་སྦྱིན་པར་བྱའོ། །འདི་ལ་ཁ་ཅིག་བྱིས་འཇུག་ཇི་ལྟ་བ་བཞིན་
གྱི་དབང་བདུན་ཀར་བསྐུར་ཟེར་ཏེ། དགེ་སློང་དགེ་ཚུལ་དགེ་བསྙེན་གསུམ་གྱི་དབྱེ་བ་སོ་སོར་མཛད་པས་དེ་ནི་མི་འཐད་མོད། འོན་ཀྱང་དགེ་སློང་རྡོ་རྗེ་འཛིན་པ་ལ་དབང་བསྐུར་བ་ལ་ནི་དབང་བདུན་གྱི་དོད་ཚང་སྟེ། མེ་ཏོག་གང་ལ་ཕོག་པའི་རིགས་ཀྱི་ཕྱག་མཚན་སྦྱིན་པ་ནི་རྡོ་རྗེ་དྲིལ་བུའི་དོད་དང༌། རྡོ་རྗེ་སློབ་དཔོན་ཁྱོད་ཉིད་དོ་ཞེས་སོགས་སྔགས་པས་མིང་གི་དབང་བསྐུར་གྱི་དོད་དང༌། གཞན་རྣམས་དངོས་སུའང་ཡོད་པའི་ཕྱིར་རོ། །ཡང་འགྲེལ་པར་ཆུ་དག་ཅེས་པའི་དོན་ལ་དབང་བདུན་སྐུར་བར་གསུངས་ལས། འདིར་དབང་བདུན་ཀ་བསྐུར་དགོས་སྙམ་ན། མ་ངེས་ཏེ་དག་པ་འདི་ནི་སློབ་མའི་དབང་དང་ཆབས་ཅིག་ཏུ་སྟོན་པའི་ཕྱིར་དང༌། ཆུ་དག་ཅེས་པ་གཙོ་བོར་སློབ་མའི་དབང་བྱིས་འཇུག་གི་དག་པ་ཡིན་པས་སོ། །འདིར་ཡང་ཆུ་ལ་སོགས་པ་དེའི་ནང་ཚན་འགའ་ཞིག་ཡོད་པས་ཚིག་གི་འགྲེལ་པ་བཙལ་བ་ཙམ་ཡིན་པའི་ཕྱིར། འདིར་ཆུ་དབང་སོགས་བསྐུར་བ་ལ་ཆུ་དབང་ཞེས་སོགས་དངོས་ཀྱི་མིང་དེ་ལས་གཞན་བྱིས་འཇུག་གི་ཐ་སྙད་ནམ་དུ་ཡང་མི་བྱའོ།། །།གཉིས་པ་བདག་པོ་ཆེན་པོའི་དབང་ནི། རྐྱེན་ཕྱག་རྒྱའི་དབྱེ་བ་དང༌། དབང་དངོས་གཉིས་ལས། དང་པོ་ནི། རྒྱུད་ལས། ཇི་སྲིད་ཕྱོགས་ཀྱི་ལོ་ནི་གཅིག་པུ་རྣམ་པ་བཅུ་རུ་འགྱུར་ཏེ་ལྟ་བ་དང་ནི་རེག་པ་བྱ། །དེ་ནས་འཁྱུད་པར་བྱ་སྟེ་རོ་དང་བཅས་པའི་ཆུ་གཏེར་གཡོ་བ་ལ་སོགས་རྣམས་ནི་བསྟེན་པར་བྱ། །ལོ་ནི་ཉི་ཤུ་ཡན་ཆད་ཕྱག་རྒྱ་མཆོག་ཏུ་འཇིགས་བྱེད་མ་སྟེ་ཁྲོ་བོ་འབྱུང་པོ་ལྟ་མིན་ཆ། །དབང་གི་དོན་དུ་དྲུག་དང་གསུམ་སྟེ་བདེ་མཉམ་འབྲས་བུ་སྟེར་བ་གཞན་ནི་སྒོམ་པའི་དོན་དུའོ། །ཞེས་གསུངས་
ཏེ། དེ་ལ་གཞོན་ནུ་མ་ལོ་གཅིག་ནས་བཅུའི་བར་ནི་ཕར་ཕྱིན་བཅུ་དང་ནུས་མ་བཅུའི་དག་པ་ཅན་བཅོམ་ལྡན་འདས་མ་ཤེར་ཕྱིན་མས་དག་པ་ཡེ་ཤེས་ཀྱི་ཁམས་དང་ནམ་མཁའི་ཁམས་སོ། །དེ་ཡང་སོ་མ་ལྷུང་བ་ན་ཡེ་ཤེས་དང༌། ལྷུངས་པ་ན་ནམ་མཁའོ། །རེ་ཞིག་གཞོན་ནུ་མ་དེ་དག་རྗེས་ཆགས་དངོས་ཀྱི་བརྟེན་བྱ་མ་ཡིན་ལ་ལྟ་བ་དང་རེག་པ་དང་མཆོད་པར་བྱ་བ་ནི་ཡིན་ ནོ། །བཅུ་གཅིག་མ་རླུང་ཁམས་སྒྲོལ་མ་དང༌། བཅུ་གཉིས་མ་མེ་གོས་དཀར་མོ་དང༌། བཅུ་གསུམ་མ་ཆུ་མཱ་མ་ཀཱི་དང༌། བཅུ་བཞི་མས་སངས་རྒྱས་སྤྱན་མ་དང༌། བཅོ་ལྔ་མ་སྒྲ་རྡོ་རྗེ་མ་དང༌། བཅུ་དྲུག་མ་རེག་བྱ་རྡོ་རྗེ་མ་དང༌། བཅུ་བདུན་མ་རོ་རྡོ་རྗེ་མ་དང༌། བཅོ་བརྒྱད་མ་གཟུགས་རྡོ་རྗེ་མ་དང༌། བཅུ་དགུ་མ་དྲི་རྡོ་རྗེ་མ་དང༌། ཉི་ཤུ་མ་ཆོས་ཁམས་རྡོ་རྗེ་མའི་རྣམ་པར་དག་པའོ། །སྐབས་འདིར་སྒྲོལ་མ་ལ་སོགས་ཆོས་ཁམས་མཐར་ཞེས་པ་བཅུ་གཅིག་ནས་ཉི་ཤུའི་བར་རིག་མ་བཅུ་པོ་དབང་གི་རིག་མར་གསུངས་ཀྱང༌། སྒྲོལ་མའི་དག་པ་བཅུ་གཅིག་མ་ཡང་གཉིས་སྤྲོད་ཀྱི་བསྟེན་བྱ་མ་ཡིན་ནོ། །འགྲེལ་པར། དྲུག་དང་གསུམ་ཞེས་པས་ལྷག་མ་དགུ་པོ་རྣམས་ཀྱི་ཡིན་ནོ། །ཞེས་སོ། །ཡང་གལ་ཏེ་ཕྱག་རྒྱ་བཅུ་ཡོད་ན། དེའི་ཚེ་གང་དང་གང་ལ་སྤྱོད་པར་ནུས་པའི་སློབ་མ་ལ་དེ་དང་དེ་གཏད་ཅེས་གསུངས་པས་ཤེར་དབང་གི་སྐབས་བཅུ་ཀར་གཉིས་སྤྲོད་ཀྱི་ཡུལ་དུ་གཏོད་པ་མ་ཡིན་ནམ་སྙམ་ན། གཏད་པ་ཙམ་ནི་ཡིན་ཡང་ཇི་ལྟར་ནུས་པ་ཞེས་གསུངས་པ་ནི། བཅུའི་ནང་ནས་དགུ་པོ་རྣམས་དངོས་སུ་བསྟེན་པར་བྱ་ལ།
དེ་ནི་ལྟ་བ་དང་རེག་པས་བསྟེན་པ་ཙམ་ལ་དགོངས་ཏེ། འགྲེལ་ཆེན་ལས། མེའི་ཁམས་ནས་བརྩམས་ཏེ་ཇི་སྲིད་ཆོས་ཁམས་ཀྱི་བར་དུའོ། །རླུང་གི་ཁམས་ནི་རྡུལ་མེད་པ་ཉིད་ཀྱི་ཕྱིར་བཟུང་བར་མི་བྱའོ། །ཞེས་པ་ངེས་པའོ། །ཞེས་ངེས་བཟུང་དུ་གསུངས་པའི་ཕྱིར་ རོ། །སློབ་མ་དང་བདག་པོའི་དབང་གི་སྐབས། དབང་གོང་མ་གསུམ་ལ་རིག་མ་རེ་རེས་ཆོག་ཀྱང༌། ན་ཚོད་བཅུ་གཉིས་ནས་ཉི་ཤུའི་བར་གང་རུང་ཞིག་བཟུང་དགོས་པར་འདྲ་བས་སློབ་མའི་ཆོ་གའི་གོང་དུ་འདི་བཤད་པ་ཡིན་ནོ། །ལྷག་མ་གཞན་ཉེར་གཅིག་ནས་བརྩམ་ཞེ་དྲུག་གི་བར་དུ་ཁྲོ་མོ་བཅུ་དང་རྣལ་འབྱོར་མ་བརྒྱད་དང༌། རབ་གཏུམ་མ་བརྒྱད་དག་པའི་རིག་མ་རྣམས་ནི། སྒོམ་པའི་དོན་ཙམ་ཡིན་གྱི། དབང་གི་དོན་དུ་ནི་མ་ཡིན་ནོ། །དེ་ལ་འདིར་ཁྱིམ་པས་ཚ་མོ་ལ་སོགས་པ་རང་རིགས་ཏེ་ཉེ་དུ་དང་འབྲེལ་བའི་རིག་མ་བཅུ་རང་གི་བཙལ་ནས་སློབ་དཔོན་ལ་འབུལ་ཏེ། ཁྱིམ་པས་རང་རིག་རྣམས་སྤྱིར་གྱི་འབྱོར་པར་སླ་ཡང༌། རང་རིག་དངོས་གོང་དུ་བཤད་པའི་ལང་ཚོ་ཅན་བཅུ་ཀ་དུས་གཅིག་ཏུ་རྙེད་དཀའ་བས་གང་མ་རྙེད་པ་རྣམས་དེ་དང་དེའི་དོད་ཀྱིས་ཆོག་ལ། རབ་ཏུ་བྱུང་བ་ནི་ཉེ་དུ་སྤངས་པའི་ཕྱིར་རང་རིགས་མེད་པས། གཞན་རིགས་ཁོ་ན་ཡིན་པས་ན་རིགས་ཐ་དད་པའི་རིག་མ་བཅུ་སློབ་དཔོན་གྱི་བཙལ་ཏེ་སྦྱིན་པར་བྱའོ། །དམངས་རིགས་ལ་སོགས་པའི་རིགས་བཅུ་ཀར་དངོས་སུ་མ་འཛོམ་ཡང༌། གང་མ་རྙེད་པ་དེ་ཚབ་མས་རུང་ཞིང༌། འདི་གཉིས་ཀ་ལ་ན་ཚོད་བཅུ་གཅིག་ནས་ཉི་ཤུའི་བར་གྱི་ལོ་གྲངས་བཅུ་པོ་དེ་འཛོམ་ན་དེ་གལ་ཆེ་སྟེ། རང་རིགས་བཅུ་དང་གཞན་རིགས་
བཅུར་མོས་པའི་སྒོ་ནས་དོད་དུ་བཟུང་པས་ཆོག་ལ། ཅི་སྟེ་ལོ་གྲངས་བཅུ་པོ་ཐ་དད་པ་ཚང་བར་མ་རྙེད་ན། བཅུ་གཅིག་ནས་ཉི་ཤུའི་བར་ག ང་ཡིན་ཡང་རུང་སྟེ། ལང་ཚོ་ཅན་གང་རྙེད་པ་བཅུ་ལ་ལོ་གྲངས་དེ་དང་དེར་མིང་བཏགས་ཤིང་མོས་པས་ཀྱང་འགྲུབ་བོ།། །།གཉིས་པ་དབང་དངོས་ནི། རྒྱུད་ལས། རྒྱན་རྣམས་ཐམས་ཅད་དང་ལྡན་ཞུན་མའི་གསེར་དང་མཚུངས་ཤིང་བཅུ་གཉིས་ལོ་ལོན་མཛེས་པའི་བུ་མོ་ ནི། །ཁྲག་དང་ལྡན་ལ་ཤེས་རབ་ཐབས་ཀྱི་བདག་ཉིད་དག་གིས་རང་གི་རྡོ་རྗེ་ནོར་བུས་འདོད་སྤྱད་ནས། །ས་བོན་དང་བཅས་རྡོ་རྗེ་དག་ཀྱང་སློབ་མ་དག་པར་ཤེས་ནས་ཁ་རུ་འཕང་པར་བྱས་ནས་ནི། ཕྱི་ནས་རང་གི་ཕྱག་རྒྱ་སྦྱིན་བྱ་དེ་ནས་སླར་ཡང་གཞན་ནི་དུ་བའི་ལམ་སོགས་ལྡན་པའོ། །ཞེས་རྒྱུད་ལས་དེ་ཙམ་ཞིག་གསུངས་ཤིང༌། འགྲེལ་པས་ཁ་སྐོང་རྒྱས་བཤད་ཅན་དུ་མཛད་པ་ལས་ཐོག་མར་འདི་སྐད་ཅེས། དེ་ནས་རྒྱས་འགྲེལ་དང་བཅས་པའི་རྒྱུད་ཐམས་ཅད་ཐོས་ཤིང་ཤེས་པར་གྱུར་པ་ན་བདག་པོ་ཆེན་པོ་ཉིད་ཀྱི་ཆེད་དུ་གོ་རིམ་ཇི་ལྟ་བ་བཞིན་གསུངས་པའི་རིག་མ་བཅུ་པོ་རྣམས་ཁྱིམ་ན་གནས་པའི་སློབ་མས་བླ་མ་ལ་དབུལ་བར་བྱའོ་ཞེས་གསུངས་ཤིང༌། ཤེར་དབང་རྫོགས་མཚམས་སུ་ཡང་ཐམས་ཅད་དུ་བདག་པོ་ཆེན་པོའི་དབང་གི་ཆོ་གའོ། །ཞེས་སྔ་མ་བདག་པོ་དབང་དང་ནོར་གྱི་དོགས་ཏེ། སྔ་ཕྱི་གཉིས་ཀར་དུ་བདག་པོ་ཆེན་པོའི་མིང་གིས་གཟེར་བཏབ་ པའོ། །དེའི་རྗེས་སུ་དམ་ཚིག་དང་སྡོམ་པ་སྦྱིན་པ་དང༌། དབང་གི་རབ་བྱེད་གསུངས་ཏེ། རྒྱུད་དང་འགྲེལ་བའི་གསུངས་ཚུལ་འདིས་ཀྱང་སློབ་མའི་དབང་དང་བདག་པོའི་དབང་ལ་དབང་གི་རབ་བྱེད་སོགས་བྱེད་པར་གྲུབ་
སྟེ། ཤེར་དབང་རྫོགས་མཚམས་སུ་བདག་པོ་ཆེན་པོའི་དབང་གི་ཆོ་གའོ་ཞེས་སློབ་མ་དང་བདག་པོའི་དབང་གཉིས་དང༌། འདི་མི་འདྲ་བའི་ཁྱད་པར་ཕལ་ཆེ་བ་དེ་ཡན་ཆད་ཀྱིས་བཤད་ཟིན་པར་བསྟན། དེ་མན་ཆད་ཐུན་མོང་དུ་ཆོ་གའི་ཚིག་འདྲ་བ་ལ་དགོངས་ནས་མཐའི་གསལ་བྱེད་ཀྱི་ཚུལ་དུ་མཛད་པའི་ཕྱིར་རོ། །རྒྱུད་ལས། སླར་ཡང་གཞན་ནི་དུ་བའི་ལམ་སོགས་ལྡན་པའོ། །ཞེས་ཤེར་དབང་གི་མཚམས་དེ་ཉིད་དུ་འཇིག་རྟེན་ལས་འདས་པའི་དབང་བཞི་པ་གསུངས་པ་ལ། འགྲེལ་པར་འབྲུ་གནོན་མ་བྱུང་བ་ནི་དེའི་བར་དུ་དབང་གི་རབ་བྱེད་སོགས་དགོས་པ་ལ་དགོངས་ཤིང༌། རབ་བྱེད་ཀྱི་འཕྲོས་དོན་ཕྱག་རྒྱ་བཞིའི་སྐབས་སུ། རྒྱུད་ལས། ཆགས་དང་ཆགས་བྲལ་མཐར་གྱུར་དང་པོ་མཆོག་བདེའི་གཏེར་ནི་རྣལ་འབྱོར་རྣམས་ཀྱིས་རྟོགས་བྱ་བཞི་པའོ། །ཕྱག་རྒྱ་རྣམས་ལས་དེ་ནི་ལེགས་པའི་མ་རུ་འགྱུར་ཏེ་རྣམ་བཅུ་དཔལ་ལྡན་བླ་མའི་ཞལ་འདིའོ། །ཞེས་གསུངས་པས་བཞི་པ་གསལ་བར་བཤད་ཅིང་དེ་ལ་འགྲེལ་པ་མཛད་པས། དབང་གི་གོ་རིམ་མ་འཁྲུགས་པར་འབྱུང་བས་དེས་ཆོག་པ་ལ་དགོངས་སོ། །སྐབས་འདིར་འགྲེལ་པར་འདི་སྐད་ཅེས། རྣམ་བཅུ་ནི་དེ་ངུ་བ་ལ་སོགས་པའི་དབྱེ་བས་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་སྟེ། དཔལ་ལྡན་བླ་མ་རྡོ་རྗེ་སེམས་དཔའི་ཞལ་འདིའོ། །ཞེས་པ་ནི་ཡེ་ཤེས་ཀྱི་ཞལ་བཞི་པའོ། །ཞེས་པའི་དོན་ཏོ་དེ་ནི་ངོ་བོ་ཉིད་ཀྱི་སྐུའི་ཆོས་ཅན་ནོ་ཞེས་པ་ངེས་པའོ། །ཞེས་གསུངས་ཏེ། ངུ་སོགས་རྟགས་བཅུ་ངོ་བོ་ཉིད་སྐུ་ཡིན་ཞེས་གསལ་པོར་གསུངས་པ་འདིས་ནི། ངུ་སོགས་འཁྲུལ་སྣང་ངོ་ཞེས་ལྟ་བ་ལོག་པ་དག་ལོག་པར་སྨྲ་
བ་དེ་རྣམས་ཀྱི་མགོ་བོར་གནམ་ལྕགས་འབར་བ་ལྷུང་བ་ཡིན་ནོ། །ལྟ་ལོག་ཅན་དེ་དག་ངེས་དོན་གྱི་ཚིག་གསལ་པོར་སྟོན་པ་འདི་དང་འདི་འདྲ་བ་རྣམས་རྫུན་རིབ་སབ་སུབ་བྱེད་ཅིང་ཀློག་ལུང་ཙམ་གྱིས་སྤོས་ནས། ད་དུང་དུས་འཁོར་འཆད་པ་ལྟར་བརྫུ་ཞིང༌། བླུན་པོ་ཕྱོགས་འཛིན་ཅན་རྣམས་ལྷན་ཅིག་ཏུ་གཞན་ལ་སྨོད་ཅིང་བདག་ཉིད་སྒྲོག་པར་བྱེད་དོ། །ལུང་དེའི་དོན་ནི་མ་སོགས་ལས་རྒྱ་དྲུག་དང༌། སྐུ་གསུང་ཐུགས་ཀྱི་ཕྱག་རྒྱ་གསུམ་སྟེ་དགུ་ལ། ཀུན་ཏུ་ཁྱབ་པའི་ཕྱག་རྒྱ་བཅུ་པ་ནི། ཡེ་ཤེས་རྡོ་རྗེའི་ཞལ་ལམ་སྒོ་དུ་བ་ལ་སོགས་པའི་ལམ་སྟེ་དབང་བཞི་པའོ། །ཞེས་པའི་དོན་ཡིན་ནོ། །འདིའི་ཆོ་ག་རྣམས་ནི་དབང་ཆོག་ཏུ་གསལ་བར་བཤད་ཟིན་པས་གོ་སླ་ལ། གོ་རིམ་འདི་ལྟར་ཡིན་ཏེ། རིག་མ་བཅུ་བསྟར་ཏེ་དབུལ་བ་དང༌། བཀའ་གནང་ཞུ་སྦྱིན་དང༌། བསྟོད་ཅིང་གསོལ་བ་འདེབས་པ་དང༌། བཅུ་དྲུག་མ་སྒྲ་རྡོ་རྗེ་མ་ནས་བརྩམས་ཉི་ཤུ་མ་མ་གཏོགས་གཞན་དགུས་སློབ་མ་ལ་འཁྱུད་དུ་གཞུག་པ་དང༌། བདག་པོའི་དབང་གི་སྐབས་སུ་བསྟན་པ་ལྟར། ཆུ་དབང་དང་རྗེས་གནང་སྦྱིན་པ་དང༌། དེ་ནས་དངོས་གཞི་ལ་བུམ་དབང་གི་སྐབས། བཅུ་གཅིག་མ་མ་གཏོགས་རིག་མ་དགུ་ལ་སློབ་དཔོན་གྱིས་འཁྱུད་པར་བྱས། ཉི་ཤུ་མ་མ་གཏོགས་རིག་མ་དགུ་པོ་སློབ་མ་ལ་གཏད་ནས། ནུ་མ་ལ་སློབ་མས་རེག་པ་དང༌། སློབ་དཔོན་གྱིས་ཉི་ཤུ་མའི་ནུ་མ་འཛིན་པ་སློབ་མས་བལྟ་བར་བྱ་བ་ཡིན་ལ། གསང་དབང་གི་སྐབས་དང་པོར་སྒྲ་རྡོ་རྗེ་མ་བཅོ་ལྔ་མ་དང༌། སློབ་དཔོན་སྙོམས་པར་ཞུགས་པའི་བྱང་ཆུབ་ཀྱི་སེམས་སློབ་མ་དང༌། ཉི་ཤུ་མ་ཆོས་ཁམས་རྡོ་རྗེ་མའི་ཁར་དབབ་ཅིང༌། དེ་རྗེས་
སྒྲ་རྡོ་རྗེ་མ་མི་ཐེ་ཞིང༌། སྒྲོལ་མ་དག་པ་དམིགས་ཡུལ་ཙམ་དུ་བྱས་པ་ཐེ་བའི་རིག་མ་དགུ་པོ་རྣམས་ཀྱི་རྡུལ་གྱི་དྭངས་མ། སློབ་དཔོན་གྱི་རྡོ་རྗེ་ནོར་བུར་དྲངས་པ་སླར་ཡང་སློབ་མའི་ཁ་རུ་འཕང་བར་བྱ་ལ། ཡང་ན་སྒྲོལ་མའི་དག་པ་མི་བགྲོང་བར་རིག་མ་བརྒྱད་དེ། ཤེར་དབང་གི་སྐབས་ཉི་ཤུ་མ་ཆོས་ཁམས་རྡོ་རྗེ་དེ་ལ་སློབ་དཔོན་གྱི་རྗེས་སུ་ཆགས་པས་སྙོམས་པར་ཞུགས་པས་འཛག་མེད་ཀྱི་ལྷན་སྐྱེས་མངོན་དུ་བྱས་ཤིང༌། དེ་མ་ཐག་སློབ་མ་ལ་གཏད་ནས། ཤེར་དབང་གི་ཆོ་ག་རྫོགས་པར་བྱ་སྟེ། དེའི་རྗེས་སུ་རིག་མ་གཞན་རྣམས་ཀྱང་ཇི་ལྟར་འོས་པར་བསྟེན་པ་སྟེ། མཚན་ཕྱེད་ནས་ཆུ་ཚོད་བཅུའི་བར་རམ་བཅུ་གསུམ་མམ་བཅུ་དྲུག་གི་བར་དུ་ཇི་ལྟར་དགའ་བར་བསྟེན་ནས། དེའི་མཐར་ཚོགས་ཀྱི་འཁོར་ལོའི་རྗེས་ཀྱི་བྱ་བ་རྣམས་བྱས་ཏེ། འཁོར་ལོའི་དཔའ་བོ་དང་རྣལ་འབྱོར་མ་རྣམས་ཕྱིར་བཏང་ངོ༌། །དེ་རྗེས་སྐྱ་རེངས་ཤར་ནས་ཉི་མ་མ་ཤར་བའི་བར་དེར། སྡོམ་པ་སྦྱིན་པ་དང༌། དབང་གི་རབ་བྱེད་དང༌། དབང་བཞི་པ་དང༌། དེའི་ཆེད་དུ་བརྗོད་པ་རྣམས་བྱ་ལ། འདིའི་དབང་དང་པོ་གསུམ་པོ་ཉིད་ཚོགས་འཁོར་ཡིན་ཏེ། དབང་གི་སྔོན་དུ་ལྷའི་རྣལ་འབྱོར་དང་རྫས་བྱིན་རླབས་སོགས་བཏང་ནས། འདོད་པའི་ཡོན་ཏན་སྣ་ཚོགས་ལ་རོལ་བཞིན་པས་དབང་བསྐུར་པ་སྟེ། ཤེར་དབང་དངོས་གཞི་གྲོལ་པ་ན་ཚོགས་ཀྱི་འཁོར་ལོ་གཤེགས་སུ་གསོལ་ཞེས་རྗེས་ཆོག་ཙམ་བྱེད་པ་ཡིན་ནོ།། །།དྲུག་པ་དེ་ལས་འཕྲོས་པའི་དོན་བཤད་པ་ལ། ལུགས་གཞན་གྱི་སྐྱོན་མདོ་ཙམ་ངོས་བཟུང་བ་ནི། ཁ་ཅིག་དབང་གི་དངོས་གཞི་གྲོལ་བའི་རྗེས་སུ་སླར་ཚོགས་འཁོར་བྱེད་དོ་
ཞེས་བཟའ་བའི་སྟོན་མོ་ཙམ་ལ་གོ་བ་ནི། བཞད་གད་ཀྱི་གནས་ཡིན་ལ། ལུགས་གཞན་པ་རྣམས་འདི་ལ་དབང་གོང་ཆེན་ཟེར་ཞིང་དེའི་ནང་ཚན་ལ་ལ་དག་འཁྲིད་ཀྱི་སྔོན་འགྲོའི་དབང་ལ་སྦྱོར་བ་དང༌། ཁ་ཅིག་སློབ་མའི་དབང་གི་ཁོངས་སུ་བསྡུ་བ་དང༌། བདག་པོའམ་བདག་པོ་ཆེན་པོའི་དབང་དུ་མི་འདོད་པ་དང༌། སྔོན་འགྲོའི་སྐབས་རིགས་མ་ཡོངས་སུ་བཟུང་བའི་སློབ་མ་ཆད་པ་དང༌། བུམ་དབང་གི་སྐབས་སློབ་དཔོན་གྱིས་འཁྱུད་པ་དང༌། སློབ་མས་ལྟ་བའི་ཡུལ་དུ་བྱེད་པ་གཉིས་ཆད་པ་དང༌། གསང་དབང་གི་སྐབས་ཆོས་ཁམས་རྡོ་རྗེ་མ་ལ་གསང་རྫས་སྦྱིན་པ་མ་བྱུང་བ་སོགས་དགོས་ངེས་མང་པོ་ཆད་ཅིང༌། མི་དགོས་པའི་སྤྲོས་པ་མང་པོ་ལྷག་པ་དང༌། རིག་མ་བཅུ་ལ་རྗེས་ཆགས་བྱེད་པ་ཀུན་ལ་ཡབ་རྒྱལ་བ་རིགས་བཞི་དང་སེམས་དཔའ་དྲུག་གི་ང་རྒྱལ་རིམ་གྱིས་འཕོ་བར་འདོད་པས་དཀའ་ཚེགས་ཆེ་ལ་དགོས་པ་ཆུང་ཞིང༌། ཐོག་མ་སྐུ་རྡོ་རྗེ་སོགས་སུ་བསྐྱེད་མ་ཐག་ཏུ་བྱ་བ་གང་ཡང་མ་བྱས་པར་དོན་གྲུབ་ཏུ་བསྐྱེད་པ་སོགས་རང་བཟོའི་རྣམ་འགྱུར་ཆེས་གསལ་བ་དང༌། ཐོག་མར་སངས་རྒྱས་སུ་བསྐྱེད་ནས་ཕྱིས་བྱང་ཆུབ་སེམས་དཔར་འབབ་པ་སོགས་དང༌། བྱིས་དབང་སྐབས་སྔོན་འགྲོ་ལ་ཁྱབ་བྱེད་རྡོ་རྗེ་བཞིར་བསྐྱེད་ནས་དངོས་གཞི་ཡུམ་ལྔ་དང༌། སེམས་དཔའ་ཁྲོ་བོ་སོགས་ཁྱབ་བྱའི་ལྷར་འབབ་པ་དག་མཚུངས་ཏེ་ཤིན་ཏུ་མི་ཤེས་པའི་ཆོ་གར་འགྱུར་པ་དང༌། གཞན་ཡང་གསང་དབང་ལ་སློབ་དཔོན་ཡང་ཀུན་བཟང་དུ་བསྐྱེད་ཟེར་པ་སོགས་མདོར་ན་དབང་གོང་མ་རྣམས་ལ་ཆོ་གའི་ལག་ལེན་ནོར་བ་
དང་གོ་བ་ནོར་བ་ཤིན་ཏུ་མང་པ་འདུག་སྟེ། འདིར་ཡི་གེ་མངས་པར་འགྱུར་བས་རྒལ་བརྟག་མ་བྱས་མོད། ནོར་བ་ཡིན་པར་ཡང་རྟོགས་སླའོ། །དེ་ལྟར་བཤད་པ་རྣམས་དངོས་དབང་བསྐུར་བའི་དབང་དུ་བྱས་ལ། ཡང་འདིར་གོང་མ་རྣམས་ཚིག་གིས་སྟེར་དགོས་པའི་དམིགས་གསལ་གྱི་དབང་དུ་བྱས་ན། སློབ་མ་དང་བདག་པོའི་དབང་ལ་རྒན་པོ་དང༌། ས་བོན་གྱི་མཐུ་ཉམས་པ་དང༌། རབ་བྱུང་ཆགས་བྲལ་གྱི་བསླབ་པས་བཅིངས་ཤིང་ནུས་པ་མ་ཐོབ་པ་དང༌། འཇིག་རྟེན་སྨོད་པར་འགྱུར་པའི་དགག་བྱ་ཡོད་པའི་སྐབས་སུ། ཡིད་ཀྱིས་བསྒོམས་པའི་སྒོ་ནས་དབང་བསྐུར་བ་ཡིན་ནོ། །དབང་རྒྱུན་མི་འཆད་པའི་ཕྱིར་དེང་སང་གི་གང་ཟག་ཕལ་ལ་བདག་པོ་ཆེན་པོ་རྗེས་མཐུན་པ་བསྐུར་ན་ཡང་དེ་དང་འདྲ་ལ། དངོས་ཀྱི་སྐབས་སུ་ནི། དགོས་པས་དགག་བྱ་ཟིལ་གྱིས་གནོན་ཞིང་མ་དད་པ་བཟློག་ནུས་པའི་ཕྱིར་དངོས་དབང་ཉིད་བཟང་ལ། ཏིང་ངེ་འཛིན་ལ་དབང་ཐོབ་པའི་ཕྱིར་ཡིད་ཀྱིས་བསྒོམས་པས་ཀྱང་དངོས་དང་འདྲ་བའི་བྱ་བ་བྱེད་ནུས་པ་ནི་ཡིན་ནོ།། །།བདུན་པ་ངེས་པའི་དོན་གྱི་འཇུག་སྒོ་བསྟན་པ་ནི། གང་ཕྱིར་གཅིག་ཉིད་ཨ་སོགས་ཀ་སོགས་རི་བོང་ཅན་དང་ཉིན་བྱེད་རྡོ་རྗེ་ཅན་གྱི་གདན་མིན་ཞིང༌། །ཧཱུྃ་ཡིག་ཉིད་ཀྱི་མཚན་མ་དང་ནི་ཡོངས་སུ་གྱུར་པའི་གཞན་པ་ཁ་དོག་གཟུགས་དག་མི་འདོད་དེ། །འགྱུར་མེད་དག་གིས་བསྐྱེད་ཅིང་འགྱུར་བ་ཉམ་པར་གྱུར་པ་མཆོག་གི་དབང་བོ་དག་དང་ལྡན་པ་ནི། རྣམ་པ་ཀུན་ལྡན་ཐིག་ལེ་མཐའ་དག་རྒྱལ་པའི་བདག་པོ་སྣ་ཚོགས་རྒྱུ་མ་འཛིན་པ་འདི་ལའོ། །ཞེས་པ་འདིས་དབང་བཞི་པའི་ཡེ་
ཤེས་དོན་དམ་པ་མཐར་ཐུག་ལམ་དང་བཅས་པ་བསྟན་ཏེ། འགྱུར་མེད་ལས་བྱུང་བ་ལྷན་ཅིག་སྐྱེས་པའི་སྐུ་ཞེས་བྱའོ། །སྐུ་དེ་རྒྱུ་ཨཱ་ལི་ཀཱ་ལི་ཉི་ཟླ་ནི་རྡོ་རྗེ་ཅན་ཏེ་ཧཱུྃ་ཡིག་གི་གདན་དང་གཅིག་ཉིད་དུ་འདྲེས་པ་ཕྱག་མཚན་དང༌། དེ་གྱུར་པ་ལས་བྱུང་བའི་འབྲས་བུ་ཁ་དོག་གཟུགས་ཞལ་ཕྱག་སོགས་རྣམ་པར་བརྟགས་པའི་ལྷ་སྐུ་རྣམས་མ་ཡིན་ཏེ། རྒྱུ་ཕུང་ལྔ་འབྱུང་ལྔའི་འགྱུར་མེད་ཆོས་དབྱིངས་སྟོང་ཆེན་ཡེ་ཤེས་ལྔ་དང༌། དབང་དྲུག་ཡུལ་དྲུག་གི་ཆོས་ཉིད་འགྱུར་མེད་ཡེ་ཤེས་དྲུག་དང༌། འགྱུར་མེད་ཨ་ཡིག་སྤྲོས་བྲལ་གྱི་ཡེ་ཤེས་རོ་མཉམ་ལས་བྱུང་བའི་འབྲས་བུ་འགྱུར་བ་ཉམས་པ་སྟེ། འགྱུར་མེད་བདེ་བ་ཐིག་ལེ་མཐའ་དག་རོ་མཉམ་པའི་ངོ་བོ་ཐུགས་ཡེ་ཤེས་དང༌། དབང་པོ་ཐམས་ཅད་པ་རྣམ་པ་ཀུན་ལྡན་སྟོང་ཉིད། སྐུ་ཤེས་བྱ་རོ་མཉམ་གཅིག་པུ་ཉིད་དོན་དམ་སྲིད་གསུམ་སྣ་ཚོགས་པའི་རྣམ་པ་སྒྱུ་མ་ལྟ་བུ་ཡང་བདེ་བ་གཅིག་གིས་འཛིན་པ་ནི་རྒྱལ་བ་སངས་རྒྱས་ཐམས་ཅད་ཀྱི་བདག་པོ་དོན་དམ་པའི་ཡེ་ཤེས་རྡོ་རྗེ་འཆང་གི་བརྡས་བསྟན་པ། སངས་རྒྱས་ཀུན་འདུས་གདོད་མའི་ཡེ་ཤེས་སོ། །དེའི་ཤུགས་ལས་འགྱུར་མེད་མངོན་གྱུར་སྐྱེད་བྱེད་དང༌། འགྱུར་བ་ཉམ་བྱེད་ལམ་གྱི་ཟུང་འཇུག་ཀྱང་བསྟན་ནོ། །འདིར་དོན་ནི་འགྱུར་མེད་ལ་རྒྱུ་འབྲས་དང་ཤེས་པ་ཤེས་བྱ་དངོས་སུ་མེད་ཀྱང་འདྲ་བ་དཔེ་ལ་བལྟོས་ཏེ། མཐུན་པའི་རྒྱུ་འབྲས་སོགས་རྣམ་པར་བཞག་སྟེ་གསེར་གྱི་རྣ་རྒྱན་གྱི་རྒྱུ་གསེར་ཡིན་ཞེས་པ་ལྟར་རང་བཞིན་ལ་རྒྱུར་བཏགས་པའོ། །དེས་ན་རྒྱུ་འགྱུར་མེད་ལྔ་ཚན་གཉིས་དང༌། དྲུག་ཚན་གཉིས་ལས་འབྲས་བུ་མཚན་ཉིད་རྣམ་པ་ཀུན་ལྡན་གྱི་ངོ་བོ་ཐིག་ལེ་
འགྱུར་མེད་རྣམ་བཞི་ནི། རྟོགས་བྱ་གནས་ལུགས་ཡིན་པས། སློབ་དཔོན་གྱི་དབང་འདི་དག་ཀྱང་དེ་ལྟ་བུའི་དག་པ་དང་སྦྱོར་རོ། །དེ་ལ་བདག་པོའི་དབང་གི་ཆུ་ཅོད་གཉིས་འགྱུར་མེད་ལྔ་ཚན་ཟུང་ལམ་བྱེད་དང༌། དར་དཔྱངས་ནི་དེ་རྣམས་དག་སྦྱོར་རྒྱུའི་སྟོང་པའི་ཡེ་ཤེས་ལྔ་གཉིས་བཅུ་དང༌། ཕྱག་རྒྱ་དྲུག་གམ་སོར་གདུབ་ཀྱི་བརྟུལ་ཞུགས་ནི། སེམས་དཔའ་ཡབ་ཡུམ་དབང་ཡུལ་གྱི་དག་པ་ཅན་གྱི་ཕྱིར་འགྱུར་མེད་དྲུག་ཚན་ཟུང་ངོ༌། །དགེ་བསྙེན་ལ་ཡང་ཆུ་དབང་འགྱུར་མེད་ལྔ་དང༌། སོར་གདུབ་འགྱུར་མེད་དྲུག་གོ །ཕྱག་རྒྱ་དྲུག་རིགས་དྲུག་ཏུ་བྱུང་བ་སེམས་དཔའ་སེམས་མ་དྲུག་དང་གནད་གཅིག་གོ །འབྲས་བུ་ཐིག་ལེ་འགྱུར་མེད་བཞི་ནི་དབང་བཞི་པོ་ཉིད་ཀྱིས་མངོན་དུ་བྱེད་པ་དང༌། དེའི་མཚན་ཉིད་རྣམ་པ་ཀུན་ལྡན་ནི་སྐུ་གསུང་ཐུགས་རྡོ་རྗེའི་བརྟུལ་ཞུགས་སྦྱིན་པས་མངོན་དུ་བྱེད་དོ། །བདག་པོ་ཆེན་པོའི་དབང་གི་སྐབས་སུ་སྔོན་འགྲོའི་རིག་མ་བཤམས་ཏེ་ཞུ་གསོལ་དང༌། ཆོས་ཁམས་རྡོ་རྗེ་དང་ལྷན་ཅིག་གསོལ་བ་འདེབས་པ་དང༌། སྒྲ་རྡོ་རྗེ་སློབ་མར་གཏད་ཅིང་དེས་སློབ་དཔོན་ལ་འཁྱུད་པ་དང༌། སློབ་མ་རིག་མ་དགུས་འཁྱུད་པ་རེ་རེ་ནས་བགྲངས་པ་སྟེ། བཅུ་གཉིས་པོ་དེ་ནི་འགྱུར་མེད་དྲུག་ཚན་གཉིས་མཚོན་པ་དང༌། ཆུ་དབང་བསྐུར་བའི་སྐབས་འདིར་བུམ་པ་བཅུ་འགྱུར་མེད་ལྔ་ཚན་གཉིས་ཀྱི་བདེ་བ་དང༌། བུམ་འཛིན་བཅུ་དེ་རྣམས་ཀྱི་སྟོང་ཉིད་མཚོན། མཆོག་དབང་བཞི་ཐིག་ལེ་འགྱུར་མེད་བཞི་དག་པ་སྟེ། དབང་གི་ཡེ་ཤེས་དངོས་མི་འགྱུར་བདེ་བའི་ལྡོག་ཆ་འཛིན་པ་དང༌། འཇིག་རྟེན་པའི་དབང་ལ་རེ་རེ་བཞིན་རིག་མ་དགུའམ་བཅུའི་བྱ་
བ་འཇུག་པ། སྤྱིར་རིག་མ་མང་པོ་ཙམ་རྣམ་པ་ཀུན་ལྡན་གྱི་ལྡོག་ཆ་འཛིན་པ་དང༌། ཁྱད་པར་དུ་བཅུ་ནི་རྟགས་བཅུ་མཚོན་པ་དང༌། དགུ་བྱེད་པ་ནི་ཐིག་ལེའི་རྟགས་སྤྱྀ་ཁྱབ་ཏུ་འཇུག་པ་སྟེ་རྟགས་གཞན་རྣམས་ཀྱི་གཞི་དང་འབྲས་བུ་གཉིས་ཀའི་ཚུལ་འཇུག་པས་སོ།། །།བཞི་པ་ལ་ནི། བདེ་བ་དང་རྣམ་ཀུན་རང་བཅས་སུ་བཞུགས་པར་སྦྱོར་ཏེ་སྤྱི་དང་འདྲའོ། །བུམ་དབང་སློབ་དཔོན་གྱིས་དང་པོར་ཕྱག་རྒྱ་བཅུ་ལ་འཁྱུད་པ། དེ་རྗེས་དགུའི་དཀར་འཛིན་སློབ་མས་རེག་ཅིང༌། ཆོས་ཁམས་རྡོ་རྗེའི་དཀར་འཛིན་སློབ་དཔོན་གྱིས་རེག་པ་སྟེ། རྗེས་ཆགས་ཉི་ཤུ་ནི་སྐུ་ལས་གསུང་འབྱུང་བའི་ཕྱི་རྣམ་པ་ཉི་ཤུས་བྱང་ཆུབ་དང་སྦྱོར། གསང་དབང་སྐབས་སྒྲ་རྡོ་རྗེ་ལས་བསྒྲུབས་པ་གསང་རྫས་ཀྱིས་སློབ་མ་དང་ཆོས་ཁམས་རྡོ་རྗེ་ལ་དང་པོར་དབང་བསྐུར། དེ་རྗེས་རླུང་སྒྲོལ་མ་མ་གཏོགས་ཕྱག་རྒྱ་དགུས་དངོས་སུ་བསྒྲུབས་པའི་རྡུལ་གྱིས་དབང་བསྐུར་ཏེ། དེ་ལྟར་བཅུ་ནི་ཐབས་ཤེས་ཉིས་སྡེབས་བྱས་པས་སྔར་འགྱུར་གསུངས་ལ་སྒྲོལ་མ་ཡང་མེད་པར་ཕྱག་རྒྱ་བརྒྱད་དུ་བྱེད་ན་སློབ་མ་དང་ཆོས་ཁམས་མ་སོ་སོར་བྱའོ། །གསུང་ལ་ཐུགས་རྗེས་སུ་ཞུགས་པ་རྣམ་པ་ལྔས་བྱང་ཆུབ་པའོ། །ཤེར་དབང་ཆོས་ཁམས་རྡོ་རྗེ་དང་སློབ་དཔོན་རྗེས་སུ་ཆགས་པ་དང༌། དེ་དང་སློབ་མ་ལག་བཅངས་ཉམས་སུ་མྱོང་བ་དང༌། དེ་རྗེས་གཉིས་སྤྲོད་ལ་སྒྲོལ་མ་མི་ཐེ་བའི་ཕྱག་རྒྱ་དགུ་སྟེ། བཅུ་གཅིག་ནི་ཐུགས་ལ་སྐུ་རྡོ་རྗེ་རྗེས་སུ་ཞུགས་པ་སྒྱུ་འཕྲུལ་དྲ་བ་སྟེ། རྟགས་བཅུ་དང་སྣ་ཚོགས་གཟུགས་བརྙན་ནོ།། །།བཞི་པ་ནི་རང་བཞིན་ཁོ་ན་ལས་རྒྱས་གདབ་དང་བྲལ་བ་མཚོན་པའི་ཕྱིར་ཡེ་ཤེས་རྡོ་རྗེ་ཁོ་ནས་དག་པའོ། །གཞན་ཡང་བདག་པོ་དང་བདག་པོ་ཆེན་པོའི་སྔོན་འགྲོ་རྣམས་ཀྱིས་སྔར་གྱི་བྱིས་འཇུག་གི་སྡོམ་པའི་རྒྱུན་དང༌། གོང་མ་རྣམས་ཀྱིས་སྔར་གྱི་གོང་མ་
ལས་བྱུང་བ་སློབ་མའི་སྡོམ་པའི་རྒྱུན་རྣམས་ཡོད་ཀྱི་སྟེང་དུ་རྡོ་རྗེ་སློབ་དཔོན་གྱི་སྡོམ་པའི་ཡོན་ཏན་གསར་དུ་ཐོབ་པ་དང༌། སྔོན་འགྲོ་རྣམས་ལ་རྒྱུའི་རྫོགས་རིམ་སྐབས་ཡན་ལག་དང་པོ་ལྔ་དང༌། ཏིང་ངེ་འཛིན་གྱི་ས་དང་འཕགས་སའི་སྐབས་ས་བདུན་བདུན་དང༌། དངོས་གཞི་མཆོག་དབང་བཞི་ལ་རྫོགས་རིམ་སྐབས་ཏིང་ངེ་འཛིན་གྱི་ཡན་ལག་དང་ཏིང་ངེ་འཛིན་གྱི་ས་དང་འཕགས་སའི་སྐབས་ས་ཕྱི་མ་ལྔ་དང་སྦྱོར་ཏེ། སློབ་མའི་དབང་གིས་དེ་དག་གི་ལམ་སྒོམ་པ་ལ་དབང༌། བདག་པོའི་དབང་གིས་ས་ལམ་གྱི་ཡོན་ཏན་བསྐྱེད་པ་ལ་དབང༌། བདག་པོ་ཆེན་པོའི་དབང་གིས་གཙོ་བོར་འབྲས་བུ་སྐུ་བཞི་འགྲུབ་པ་དང༌། སའི་ཡོན་ཏན་མཐར་ཐུག་པ་ལ་དབང་འབྱོར་བར་བྱེད་པའོ། །དེ་ལྟར་ན་དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ཆོ་ག་ལས། དབང་བསྐུར་དང་འབྲེལ་བའི་དོན་རྣམས་ལ་ཉེར་མཁོ་རགས་པ་ཙམ་བསྟན་པའོ། །འདིའི་ཆ་ལག་ཏུ་དམ་ཚིག་དག་སྡོམ་པའི་རྣམ་གཞག་ཞིབ་མོ་ལོགས་སུ་ཡང་གཏན་ལ་འབེབས་དགོས་ཤིང༌། དེ་བཞིན་དུ་ཚོགས་ཀྱི་འཁོར་ལོ་དང༌། སྦྱིན་སྲེག་དང་རབ་ཏུ་གནས་པ་རྣམས་ལའང་ལག་ལེན་ཆོ་གའི་རིམ་པ་བྱང་ཞིང༌། གོ་དོན་བློ་ལ་ངེས་པ་ཞིག་གལ་ཆེ་མོད་ཀྱི། དེ་དག་གི་རྣམ་པར་གཞག་པ་རྣམས་བླ་མ་གོང་མ་རྣམས་ཀྱིས་མཛད་པ་ལས་རྟོགས་པར་བྱ་སྟེ། འདི་དག་ལེགས་པར་སྦྱར་བ་བླ་མ་ལས་ཡང་དག་པར་ཞུས་ན་ཡང་དག་པའི་བློ་གྲོས་དང་ཤེས་རབ་དང་ལེགས་པའི་ཆོས་ཐམས་ཅད་གོང་ནས་གོང་དུ་འཕེལ་ཞིང་རྒྱས་པའོ།། །།རྡོ་རྗེའི་ཐེག་འདིར་མཐའ་ཡས་ཕུན་ཚོགས་ཀྱི། །རྩ་བ་དེ་ནི་སྨིན་པར་བྱེད་པའི་དབང༌། །ཁོ་ན་ཉིད་ཅེས་རྒྱས་བ་སྲས་བཅས་དང༌། །གྲུབ་པའི་ཚོགས་དང་མཁས་པ་ཀུན་གྱི་བཤད། །དེ་ལྟ་བས་ན་འདིར་འབད་སྐལ་བཟང་སྟེ། །དཔག་ཡས་རྒྱུད་སྡེའི་དབང་ཆུ་བྱེ་བ་བརྒྱ། །ངེས་གསང་རྒྱ་མཚོར་རོ་གཅིག་གྱུར་པ་ནི། །དུས་ཀྱི་འཁོར་ལོའི་དབང་བསྐུར་ཡེ་ཤེས་མཚོ། །
འདི་དོན་རྣམས་པར་ཕྱེ་བའི་བསོད་ནམས་གང༌། །མཐའ་ཡས་སེམས་ཅན་ཀུན་གྱི་ཉེར་འཚོར་གྱུར། །དེ་ལས་འགྲོ་བ་མཐའ་དག་མི་རིང་པར། །བླ་མེད་བདེ་བ་ཆེན་པོའི་སྐུ་ཐོབ་ཤོག །དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ཆོ་གའི་རྣམ་པར་བཤད་པ་བདུད་རྩིའི་རྒྱ་མཚོ་ཞེས་བྱ་བ་འདི་ནི། ཆོས་ཀྱི་རྒྱལ་པོ་ཇོ་ནང་པ་ཡབ་སྲས་ཀྱི་དགོངས་པ་བསྐང་བའི་ཕྱིར་དུ་རྒྱལ་ཁམས་པ་ཏཱ་ར་ནཱ་ཐས་ངེས་པར་བརྗོད་པའོ། །གཅིག་ཞུས་དག མངྒལཾ།། །།སྨྲས་པ་རྒྱལ་ཀུན་མཁྱེན་བརྩེའི་དྲི་མེད་ནོར་བུའི་ཅོ་དཔོན་གང་གི་དབུ་ལ་བཞག །མཁས་པ་ཀུན་གྱི་མགོ་བོར་ཞབས་ཀྱིས་པདྨོའི་གེ་སར་གསལ་བར་བཀོད། །ལྷ་མི་ཀུན་དགའ་ངེས་དོན་སྙིང་པོའི་བསྟན་པ་ཟླ་བའི་མ་མ་ལྟར། །རྒྱལ་བསྟན་མདོ་སྔགས་ནོར་འཛིན་ཀུན་ཏུ་བཀའ་ཡིས་དབང་བསྒྱུར་བའི་ལ་འདུད། ༡མི་འགྱུར་བདེ་ཆེན་ཡེ་ཤེས་འོད་ཟེར་རྣམ་བས་སྟོང་ཉིད་མཁའི་མཛེས་མ་དག་ལ་རབ་ཏུ་འགྲོགས་པ་ལྷུར་ལེན་པ། ཕྱི་ཡི་དུས་བྲལ་ནང་གི་དུས་བཅོམ་དུས་གཞན་དུས་ཀྱི་གཟུང་ལྡན་མཁའ་ལ་དེ་བང་གཞུའི་གར་གྱི་རི་མོ་བཞིན། རྣམ་པ་ཀུན་ལྡན་སྣ་ཚོགས་ཡུམ་གྱི་རྣམ་རྒྱས་པདྨའི་རེག་ལ་སྲེག་ཕྱག་གཉིས་ཞགས་པས་དགའ་མའི་མགྲིམ་པར་འགྱུར། རབ་དམར་གཡས་དང་གཡས་མིན་དཀར་པོའི་ཞབས་གཉིས་རོལ་བས་བདུད་དང་འབྱུང་པོའི་མགོན་པོ་དག་གི་མགོ་པོར་གར་མཛད་གུས། ༢རྣམ་དག་ཆོས་དབྱིངས་མཁའ་ལ་འབསམ་གཏན་བདེབས་གཟིམ་ཀྱང་མཁའ་མཉམ་འགྲོ་ལ་རིངས་ནས་བརྩེ་བར་གཟིགས། རྣམ་པར་རྟོག་པའི་བརྗོད་པ་དང་བྲལ་ཁྱོད་གསུང་གཅིག་གིས་སྐད་རིགས་མ་ལུས་ཅིག་ཆར་སྟོན་པར་མཛོད། ཚོགས་གཉིས་ལས་བསྐྲུན་
མཚན་དཔེའི་སྐུ་ཡིས་བྱེ་བ་ཕྲག་བརྒྱའི་ཞིང་རྣམས་ཀུན་ཏུ་གཟུགས་སྐུ་ཅིག་ཆར་སྟོན། མ་ལུས་རྒྱལ་བའི་མཛད་པས་རྣམ་རོལ་ཤཱཀྱ་སེང་གེའི་ཞབས་རྡུལ་ལྷ་དབང་གཙུག་གི་ནོར་བུས་གཏུག ༣དཔལ་ལྡན་འབྲས་སྤུངས་མཆོད་རྟེན་ཆེན་མོ་རུ། སྟོབས་བཅུ་ཡིས་སྔགས་རྒྱུད་མ་ལུས་བསྟན། ལྷ་ཀླུ་མི་དང་མི་མིན་མ་ལུས་པས། བདུད་རྩིའི་བཅུད་དུ་མྱུར་བས་ཉམས་སུ་བླང་། ༤ཁྱད་པར་རྒྱུད་དོན་གསལ་མཛད་ཟླ་ཟད་ཞབས། རྒྱུད་འདི་བསྡུ་མཛོད་འཇམ་དཔལ་གྲགས་པ་རྗེ། རྒྱས་འགྲེལ་བྱེད་པོ་རིགས་ལྡན་པད་དཀར་འཛིན། རྣམ་གསུམ་ཞབས་རྡུལ་ལྷ་མིས་སྤྱི་བོར་བླངས། ༥དུས་ཀྱི་རིམ་པས་འཕགས་ཡུལ་གངས་ལྗོངས་ཀྱིས། མཁས་རྨོངས་དུ་མའི་མིག་གི་བཅུད་དུ་ལེན། ཁྱད་འཕགས་ཇོ་ནང་ཆེན་མོའི་གསུང་རྒྱུན་འདིའི། དགོངས་དོན་ལེགས་བཀྲལ་ཏུ་རིན་ཐར་གུས། ༦དུས་ཀྱི་འཁོར་ལོའི་དཀྱིལ་ཆོག་ཆོག་འདིའི། རྣམ་བཤད་བདུད་རྩིའི་རྒྱ་མཚོའི་གཞུང་འདི་ཡང་། སྤྱི་ལོ་ཅིག་སྟོང་དགུ་བརྒྱ་གོ་བརྒྱད་ལོར། གཅིག་ལས་དུ་མ་འབྱུང་བའི་འཁྲུལ་གྱི་གཞི། ༧ཕ་མའི་ཐོག་དྲངས་ཡེ་ཤེས་བཟང་པོའི་མཚོན། མཁའ་ཁྱབ་འགྲོ་ཀུན་དོན་དུ་སྤར་བསྐྲུན་མཛད། སྦྱིན་བདག་ཕྱི་ནང་གསང་བའི་བར་ཆད་བྲལ། ༨བསྟན་འཛིན་ཡོངས་རྒྱས་སྐུ་ཚེ་འདུ་བྱེད་བརྟན། ཆོས་སྤྱོད་བཅུ་ཡི་བྱ་བ་རྟག་འཕེལ་དང་། ཆབ་སྲིད་བརྟན་ཞིང་དུས་འཁྲུག་ཞི་བ་དང་། བསམ་དོན་མ་ལུས་ཆོས་བཞིན་འགྲུབ་པར་ཤོག ༩དུས་བཞི་སྙོམས་ཤིང་ཆར་རྒྱུ་དུས་སུ་བབ། ལོ་ཕྱུགས་ལེགས་ཤིང་ནད་རིགས་མ་ལུས་ཞི། ཚེ་རིང་ནད་མེད་ལོངས་སྤྱོད་གྲོགས་
བཟང་ལྡན། མི་དགེ་བཅུ་པོ་མ་ལུས་སྤངས་བར་ཤོག ༡༠བདག་གི་དུས་གསུམ་བསགས་པའ་དགེ་བ་དང་། ཕྱོགས་བཅུའི་རྒྱལ་བ་སྲས་བཅས་དགེ་ཚོགས་རྣམས། གཅིག་ཏུ་བསྡོམས་པའི་ཀུན་བཟང་མཛད་སྤྱོད་ལྟར། རྣམ་ཀུན་གཟིགས་པའི་ཡེ་ཤེས་མཆོག་ཐོབ་ཤོག ༡༡སྐྱེ་ཞིང་སྐྱེ་བདག་ནི་ཐམས་ཅད་དུ། རིགས་བཟང་བློ་གསལ་རྒྱལ་མེད་པ་དང་། སྙིང་རྗེ་ཆེ་ཞིང་བླ་མ་ལ་གུས་ཤིང་། དཔལ་ལྡན་བླ་མའི་དམ་ཚིག་ལ་གནས་ཤོག ༡༢དཔལ་ལྡན་བླ་མའི་རྣམ་པར་ཐར་པ་ལ། སྐད་ཅིག་ཙམ་ཡང་འོག་ལྟ་མི་སྐྱེ་ཞིང་། ཅི་མཛད་ལེགས་པར་མཐོང་འབི་མོས་གུས་ཀྱིས། བླ་མའི་བྱིན་རླབས་སེམས་ལ་འཇུག་པར་ཤོག ༡༣སྐྱེ་བ་ཀུན་ཏུ་ཡང་དག་བླ་མ་དང་། འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། ས་དང་ལམ་གྱི་ཡོན་ཏན་རབ་རྫོགས་ནས། རྡོ་རྗེ་འཆང་གི་གོ་འཕང་མྱུར་ཐོབ་ཤོག ༡༤ཅེས་རྣམ་བཤད་བདུད་རྩིའི་རྒྱ་མཚོའི་སྤར་བྱང་བདེ་ཆེན་མར་རྩོལ་ཞེས་བྱ་བ་འདི་འཛམ་ཐང་གཙང་ཆེན་དགོན་གྱི་མཁན་ངག་དབང་ཡོན་ཏན་བཟང་པོའམ་ཤཱཀྱའི་དགེ་སློང་བློ་བཟང་ཆོས་འཕེལ་གྱིས་རྗེ་ཏཱ་ར་ནཱ་ཐའི་གསུང་འབུམ་གྱི་སྤར་བསྐོ་སྐབས་སྤང་བྱང་སྨོན་ཚིག་འདི། ༡༩༩༨རབ་བྱུང་བཅུ་བདུན་པ་ས་ཕོ་སྟག་འབྲུ་མང་པོའི་ཟླ་བའི་ཚེས་བཅུ་གཉིས་བཟའ་ལྷག་པར་སྐོར་སྐག་ཆུ་གཉིས་འཕྲད་པས་བདུད་རྩི་སྦྱོར་གྱི་ཉིན་དགེ་ཚོགས་གང་བསགས་འབུམ་འགྱུར་དུ་འགྲོ་བའི་དུས་ཆེན་དཔྱིད་ཐ་ཆུང་གི་དུས་ཁ་བ་ཐམས་ཅད་ཆར་ཏུ་འགྱུར། དྲོད་རྒྱུས་པས་སྲིད་བུའི་རིགས་རྣམས་འགུལ། བྱ་ལམ་གྱི་མདངས་གསལ། ས་བོན་ཐམས་ཅད་སྨིན་ལ་ཉེ་བ། སྟེང་འཐུང་རྣམས་བཞད་པའི་དབུ་བ་རྩམ། རྐང་འཐུང་ཐམས་ཅད་མདོག་འགྱུར། གཉིས་སྐྱེས་ཀྱི་རིགས་ཐམས་ཅད་ཀྱིས་སྐད་
སྙན་སྣ་ཚོགས་སྒྲོག་པའི་མགོ་འཛིན། ཉལ་འགྲོའི་མདོག་དཀར་བསྒྱུར་ནས་སྔོ་སང་དུ་འགྲོ། ནོར་འཛིན་གྱི་ཁ་དོག་གཡུ་མདོག་ཏུ་འགྱུར་བའི་མགོ་བརྩམ། འགྲོ་ཀུན་དགའ་བའི་རྣམ་འགྱུར་ངོམས་པ་སོགས། མདོར་ན་ཕྱི་ནང་སྣོད་བཅུད་ཐམས་ཅད་ཀྱིས་མཆོག་གསུམ་ལ་མཆོད་པའི་རྣམ་འགྱུར་ངོམས་པའི་དབུ་བརྩམས་པའི་དུས་སུ་འཛམ་ཐང་གཙང་ཆེན་དགོན་གྱི་མཁན་རང་ཉིད་གྱིས་སྦྱར་བའོ། སྤར་འདི་འཛམ་ཐང་བསམ་འགྲུབ་ནོར་བུའི་གླིང་དུ་བཞུགས། བཀྲ་ཤིས། སརྦ་མངྒམཾ། །
ཤོག་སྟོང་
ཤོག་སྟོང་།